8
Yawey Nawu Kanmarnewohrnan Kadberre Ngad Nawu Djal Bininj
1 Ngudda nawu Yawey, Yiwohrnan ngadberre! Manbu kunngey ke, wanjh yingeymakkaykenh duninjh kore kubolkbubuyika rowk kondah kurorre! Dja mak kore ngudda yihni kaddum heaven kore ngudda ke kunmakmak duninjh.
2 Ngudda yibenbukkang nawu wurdwurd dja mak birribarrken bu bedda warridj ngundiburluburlume. Wanjh bininj bedda ngurriyidko nawu kabirriyeme rowk, dja yibenngudke nawu yimankek kabirrimarnburren bu ngundinjirrke.
3 Bu ngaye ngabolknan kaddum kore heavens manbu yimarnbom kunbidwi ke, dja nganan manbu dird dja mankokkarrng manbu yikurrmeng kumekbe, wanjh ngaye ngadjawarren,
4 Adju! Njalekenh ngudda kanbengkan ngad nawu binihbininj? Kab njalekenh mak kannahnan ngadberre nawu ngad bininj?
5 Mak ngudda kankurrmeng ngad bininj darnkih kore ngudda nawu God duninjh ba bu ngad karridjarrkni kore ngudda. Mak ngudda kanmarnbom ba bu ngarringeykukkenmen.
6-8 Ngudda kankurrmeng ba bu ngarriwohrnan kore njalehnjale rowk nawu ngudda yimarnbom kunbid ke. Wanjh ngad kunu ngarriyurrhke kore yehyeng rowk yimarnbom, yiman nawu sheep, dja mak bulikki, dja nawu mayh kurralkwaken, mak nawu kungolwaken mayhmayh, dja djenj nawu kurrulawaken, mak njalehnjale nawu kayo kore kurrula kanjdji kukku.
9 Yoh, ngudda nawu Yawey, Yiwohrnan ngadberre! Manbu kunngey ke, wanjh yingeymakkaykenh duninjh kore kubolkbubuyika rowk kondah kurorre!