7
Bu King David Dingihdi Yiwarrudj.
1 Ngudda Yawey, nawu God ngardduk, ngaye ngawarlkkarren kore ngudda ba bu kannahnan. Kanngehkemen kore birriwarre bininj rowk nawu ngandihkelekadjung.
2 Wardi bedda ngandibun ngandikukdjalkdjalkmang yiman nabang lions. Bedda kabirridjare ngandikan kore minj nangale nganbidyikarrme, dja wanjh ngandibun.
3 Ngudda Yawey, nawu God ngardduk! Ngaye ngaburrbun bu minj nangale ngawarrewoyi.
4 Yina, nawu nganedabbolk nakka minj njale ngamarnewarrewoyi nuye. Dja minj mak ngadjirdmayi bininj nuye yehyeng nawu nganeyidko djal burrkyak.
5 Bu kuhni ngaye ngakurduyimeninj wanjh ngudda yibenbawoyi bininj nawu ngarriyidko nganngudjkadjuyi, ngandarrkidmayi dja ngandibun, kaluk bu ngandikukbawon kore kurorre ngahkukyo.
6 Wanjh ngudda nawu Yawey, wardi yiyiddu! Yibenbu nawu ngaye ngandihnjirrmiwon. Dja yibenmarnekurduyimen mandjad kore yibendjadme.
7 Mak ngadjare yibenmirndemornamen bininj nawu kubolkbubuyikabeh kore ngudda yihyerrkan kore throne kaddum yihbarndi. Ngudda yibenmarnewohrnan rowk.
8 Ngudda nawu Yawey yibendjadme nawu kubolkbubuyikabeh bininj rowk! Mak ngaye warridj kandjadme. Dja kanrohrokmen bu kanna ngaye kunubeywu ngamak bininj.
9 Ngudda kanmayalinan dja mak kankangenan warridj, wanjh ngudda nawu kundjalmak yidjalkurduyime. Mak ngadjare bu ngudda yibenmarnbu nawu birribang bininj bu kabirringurdme kabirrihkurduyime kunwarre. Dja mak kannahnan ngad bininj nawu ngundiwoybukwon.
10 Ngudda God nawu Yiwernhwohrnan rowk, ngudda wanjh kahnmarnekukdjurruddi yiman shield ngardduk, mak yibennahnan munguyh bininj nawu mandjad kabirrikurduyime.
11 Ngudda yibenhnan dja mak yibendjadme bininj rowk bu djal mandjad. Wanjh kunbarnangarrabubuyika ngudda yiyiddung kore yibenhnan bininj nawu kunwarre kabirrikurduyime.
12 Bu baleh yarrkka nawu ngurriyidko minj kabirriborledme dja mak kabirribawon kore kunwarre kabirrikuruyime, wanjh ngudda yidjurrbun nawu mandjawak dja yimarnbun mankole dorrengh bu yibenbun.
13 Ngudda wanjh yiyingkihmarnbun bu yibenbunkenh. Manbu mankole yingkihmang dja mak yiwurlhke manbu manmirrhmak bu yibenyame nawu birriwarre bininj.
14 Ngudda nawu ngardduk bininj, ngabenyolyolme birriwarre bininj. Nawu bedda kabirrimayalimarnburren bu kunwarrekenh kabirrikarremarnbun bu kabirrikowe.
15 Wanjh birrimekbe bininj nawu kunmekbe kabirrihkurduyime nakka wanjh kabirribolkkarung kanjdji duninjh, wanjh kabindimang bininj yimankek kabindiburriwe dja bedmandeleng kabirrikukwarrhme.
16 Manbu kunyid kabirrimarnbun makka wanjh kamdurndeng bedberre bedda, wanjh kabirrikodjkuluwarremen kore bedmandeleng kunwarre kabirrikurduyime.
17 Ngudda Yawey nawu yidjalkurduyime kunmak kore djal mandjad munguyh munguyh, dja kunmekbekenh ngaye ngawayini ke bu burluburlume ngudda Yawey nawu Yiwernhwohrnan rowk.