14
Bu Karrbennan Bininj Nawu Kabirrikewkme
1 Yikahwi bininj baybaywi kabirriyime, “God yak, God minj kahdi!” Kuhni kabirriyime bininj nawu birrimayaliwarre! Bedda wanjh kabirridjare kabirridjalkurduyime kunwarre. Minj kunmak kabirrikurduyime. Dja minj nangale bininj kakurduyime kunmak. Bonj, wanjh minj nangale bininj namak.
2 Nawu Yawey kahni kaddum wanjh kamhbolknan kanjdji bu kabennan bininj rowk. Yawey kadjare kabingalke bininj, nawu mayalimak dja mak nawu kabiyawan nungka.
3 Dja burrkyak. Minj nangale bininj namak duninjh. Bedda wanjh birridjalwarrewarreminj rowk, dja birridjalbawong God. Minj nangale kakurduyime kunmak. Bonj, minj nadjalkudji namak karri.
4 Mah, bedda nawu birriwarre bininj, baleh kabolkyime bu kabirriborlhme? Bedda minj kabirrikayhme kunngey nuye Yawey, dja kabindidjalbun nawu Yawey nuye bininj bu kabindikukyakwon.
5 Bedda kabirrihni nakka wanjh kabirrikele. Dja God nungka kabirrihdjarrkdi nawu birrimak bininj, bu kabenbidyikarrme.
6 Ngudda nawu ngurriwarre bininj, ngurrikarrewarrewon bedberre bininj nawu birrimarladj, dja bedda kabirrikelerlobme kore Yawey nawu kabennahnan.
7 Wanjh ngaye ngadjare nangale nawu kamdolkkan kore Zion ba kamre kabenbebke bininj nawu Israel benkebmawahmeng kore kabirribongdi! Bu Yawey, kabenmarnekurduyime kunmak bedberre nawu bininj nuye. Wanjh nawu Jacob nuye namud birridjalnjilngmakminj, dja nawu Israel benkebmawahmeng, nakka wanjh birriwernhnjilngmakminj rowk.