12
Yesu ara Yapane lang Sapat
1 Pe iro mwonen lang Sapat, Yesu iyasura ndramiran hu huyayau hu ndraipinge wit. Pe ndramiran hu, ara humundrui pe huro rih hu mbuwa wit pe huro yan.
2 Pe iro mwonen hu Parisiy hunimei toro, pwen hupwai iya kili Yesu, hupa, <<Animei! Ndramiram hu, ara humbusi melit mepo nonombun para kambusiy kiho nondriya lang Sapat.>>
3 Pe Yesu isomwi hu, ipa, <<Wawu ngara kannime titiye ta Tepit iyapolo ndramiran hu mepo humundrui ara, ndre pwi?
4 Yiy ara isong iya nondriya yumwa Ngindrai, pe iwiri ndrinanohun mepo kanmbusiy kintayah haiyan; pwen yiy pe ndramiran hu, ara huiniy. Ndrinanohun ara, ara nonombun para hu kayan; hapeko hu pris opu andre hu kayan.
5 Ndre wawu kannime titiye ara pwi? Pe wawu kannimei pwi yi, ita nongan para pwahanou, ara ipa hu pris hu koropo mbulen kiro nondriya yumwa totohun namandran kiho nondriya lang Sapat, ndre pwi? Hapeko mbulen mepo hu ngara kambusiy, ara imwonen, pe nonombun pwi.
6 Hapeko upwai isa kili wawu, tehe yiy mepo ihohin iya, iya yumwa totohun namandran, ara iripo kol iye.
7 Pe kapa wawu kapahasani ndroiyi nongan iye, <Unamili koisirai, ara ihohin iya kultuw para yukyuk,> pwen wawu andre kanrasusut nongan kiya kili hu ndramat mepo hu kanmbusi hapesah mwomwan pwi.
8 Paratesah, Noru Ndramat, ara yiy Yapane lang Sapat.>>
9 Yesu itali kol ara, pe iyau iya nondriya yumwa mbultere tahu Yutah,
10 pe ndramat hamou iro aliy, ara niman imat. Hu ndramat hayah huro ten sai para hu kaiki Yesu kiya nongan, pwen pe husok yiy, hupa, <<Nonombun para kasopwoyani ndramat kiro nondriya lang Sapat, ndre pwi?>>
11 Yesu ipwai iya kili hu, ipa, <<Kapa hamou tawawu ma sipsip tan hamou, pe kiyos kiya ngat kiho nondriya lang Sapat, ara andre kiluwi yiy kisa ngawan, ndre pwi?
12 Pwen ndramat hamou, ara iho hin iya, iyata sipsip hamou, ndre pwi? Tehen tora ko, hiyan para kambusi kultuw hiyan kiho nondriya lang Sapat, pe nonombun pwi.>>
13 Pwen ipwai iya kili ndramat ara, ipa, <<Amwaniyani nimam.>> Pwen imwaniyani niman, pe niman irayah hiyan tehe niman hakai yi.
14 Hapeko hu Parisiy, ara huya ngawan pe humburi nongan para andre katingundru Yesu tapeh.
Ndramat para poya mbulen mepo Ngindrai kintakiniman pwen
15 Yesu isapahas iya tesah hu Parisiy hu pakambusiy kiya kili yiy, pwen itali kol ara, pe iyau. Pe hu ndramat soyon iya huho ndruwan, pe isopwoyani hu ndramat masih, mepo mwamwa iro kili hu pe hungoh.
16 Pe ipwandrandrahani hu pwokeyan para hu mbuna katiyani yiy kiya kili hu hayah.
17 Pe hu melit aro hurayah, ara para kimbusi nongna Poropet Yisayah kirayah mannan, ipa toro:
18 <<Iye ara ndramat para poya mbulyo mepo kuntakiniman.
Yiy mepo ndriyo imbuluhi yiy pe upwes iyatan;
pe andre kuiki Mwoiwo kiya ndritan,
pe andre kipohowe nongan para tamwanye kultuw imwonen kiya kili hu ndraye ndramat masih.
19 Pe andre kintakokowai pe kinpalngai pwi,
pe hamou andre kinhilingi mbulukoyun kiho hu payango sai, ara pwi.
20 Pe parah hakou mepo ipuyui, ara andre kintumbuwei pwi,
pe mwan mepo nakimonon, ara andre kinsumatei pwi,
kipoo kimbusi kultuw imwonen kiramwaitini kultuw masih kene.
21 Pe iya ngalan opu, hu ndraye ndramat masih, andre hu kapwotisingi lohongahu kaya kili yiy, pe koro longe sopwat tan itapo isa.>>
Yesu pe Peelsepul
22 Pwen huwiri ndramat hamou payit iro ndritan, mepo pohon imum pe maran iyoh. Pe Yesu isopwoyani ndramat ara iya hiyan, pe ilahiy para kiwong pe kinimnim.
23 Pe hu ndramat masih, ara lohongahu indrap, pe hupa, <<Ndramat aro, ara yiy noru Tepit, mepo andre kisopwat hu ndramat kamui ara, ndre?>>
24 Hapeko iro mwonen hu Parisiy huhilingi nongan aro, pwen hupa, <<Ndramat iye ita rasses hu payit, ara iyau pwoke ta Peelsepul opu, payit mepo yapane hu payit masih.>>
25 Yesu kinpahasani lohongahu, pwen ipwai iya kili hu, ipa, <<Kapa kolo king hakol mepo ngara kiro mu aliy ara kimasilpat kiya malpat, pe kihingasi yiy mbukena, ara andre kiya pwalngengei. Pe kapa hu ndramat para kol hakol, ndre hu ndraisih, hu kamasilpat kaya malpat, pe hu kahangas mwalinga hu mbukenahu, pwen hu ndramira kol ara, ndre hu ndraisih ara, ara andre hu kanlahiy para koro tine pwokeyan pwi.
26 Pwen kapa Sinai kirasses Sinai, ara yiy mbukenan kinmasilpat. Pe andre kolo king tan mepo ngara kiro mu kiya aliy ara andre kiro tine pwokeyan tapeh?
27 Pe kapa kurasses hu payit kiyau pwoke ta Peelsepul, pwen yowe wawu hu ngara karasses hu payit kiyau pwoke ta hiyeh? Pwen pe hu yowe wawu mbukena wawu, andre hu kapwainganiy tehe nongna wawu ara, ara kinmwonen pwi.
28 Hapeko kapa kurasses hu payit, kiyau pwoke ta Mwoiwa Ngindrai, pwen pwoke para kolo King Ngindrai mepo ngara kiro mu kiya aliy, ara kinsa kili wawu pwen.
29 Ndre hiyeh ilahiy para kisong kiya nondriya suwe ndramat hamou pwokeyan, pe kiya kuni hu menmenan? Hamou kinlahiy pwi! Hapeko kapa kiwasi tiriyi ndramat pwokeyan ara namu, pwen andre kilahiy para kiya pe kilokihi topwe menmena ndramat ara.
30 Pe yiy mepo kinto sura yo pwi, ara andre kirasisingat ano. Pe yiy mepo kinho mbultani hu ndramat pwi, ara ngara kirasumbuwani hu.
31 Pwen pe upwai isa kili wawu tehe hu pakut mwomwan masih, pe hu nongan masih para pwasisiman, ara Ngindrai ilahiy para kitali hu pakut mwomwan ara. Hapeko yiy mepo kipwasisiman ana Mwoiwan Haiyan, ara andre Ngindrai kintali pakut mwomwan tan pwi.
32 Pe yiy mepo kipa nongan sahin para kipwasisiman ana Noru Ndramat, ara Ngindrai ilahiy para kitali pakut mwomwan tan ara. Hapeko yiy mepo kipa nongan sahin kipwasisiman ana Mwoiwan Haiyan, andre Ngindrai kinlahiy para kitali pakut mwomwan tan ara, ara pwi, kiro nondriya lang mahapo, ndre kiho nondriya lang itapo isa.
33 Pe kapa kei hakou ara hiyan, pwen sangin ara andre kiya hiyan; pe kapa kei hakou ara mwomwan, pwen sangin ara andre kiya mwomwan. Paratesah, ngara kayirowe kei hakou hiyan ndre mwomwan, ara kiyau sangin.
34 Wawu noru mwat mapairan, wawu ndramat mwomwan, andre wawu kawong nongan hiyan tapeh? Paratesah, poho ndramat ngara kipohowei tesah ipep ita ndriya ndramat.
35 Pe ndramat hiyan, ara ngara kiyingani hu kultuw hiyan mepo kiyau mbulkura ndriya mepo hiyan. Pe ndramat mwomwan, ara ngara kiyingani hu kultuw pwassin mepo kiyau mbulkura ndriya mepo pwassin.
36 Hapeko upwai isa kili wawu, tehe hu ndramat masih andre koro tine nongan, kiho nondriya lang para tamwanye, kiya hu nongan masih mwaihei opu pe mwomwan mepo hu kanpwai.
37 Paratesah, kiyau hu nongnam opu, andre Ngindrai kipohowe wou ndramat imwonen, pe kiyau hu nongnam opu, andre Ngindrai kiyki konam kisa ndritam.>>
Kaipisa titiye ta poropet Yonah
38 Pwen hu Parisiy hayah pe hu ndramat para hinuwani nongan para pwahanou, ara hupwai iya kili yiy, hupa, <<Ndramat para Hinonou, yowu nakanime kaipisa ndraikiya pwoke handra kiyau kili wou.>>
39 Pe isomwi hu, ipa, <<Hu hasap mepo kultuwayihu pwassin pe hu kantali Ngindrai, ara yihu ngara kasok kaipisa ndraikiya pwoke. Hapeko yihu andre kannime kaipisa hapesah pwi; kaipisa poropet Yonah kopu andre hu kanimei.
40 Paratesah, Yonah ara iro nondriya ndriya ni hamou namandran lang maroyoh pe ping maroyoh. Pwen tehen tora ko, Noru Ndramat andre lang maroyoh pe ping maroyoh kiro mbulu pwan.
41 Pe kirahihini lang para tamwanye, yihu ndramira kol Ninipe andre hu kasa koro tine, pe kasopwat nongan para tamwanye, pe katiyani titiye mwomwan tahu hasap para mahapo, pe andre hu karasusut nongan kiya kili hu. Paratesah, yihu kanhilingi nongna Yonah pe hu kantapaiwani ndriyahu; hapeko hamou iripo mahapo, ara ihohin iya, iya kili Yonah.
42 Pe kiro lang para tamwanye, Kwin para Tolau andre kisa, pe andre kitiyani titiye mwomwan tahu hasap para mahapo, paratesah, yiy iyau ndrakolmu kol pwan isa para kisa hilong lohongai waison ta Solomon. Hapeko hamou iripo mahapo, ara ihohin iya, iya kili Solomon.
43 Pe kiro mwonen mwoiwa payit hamou kisa mawen kili ndramat hamou, ara andre kiya hu kol ndrohoyin para kiya ten noku ngohongoh. Hapeko andre kiten ndrit.
44 Pwen andre kipa, <Yo andre kumui kuya seu mepo kuntaliy mamu ara.> Pe kiro mwonen kiyarayah, ara andre kinimei tehe seu ara, ara iro ko mwaihei, pe yihu kanpwasiliy kinna hiyan pe iro mwoimwoi.
45 Pwen imui iya pe iya wiri hu payit manandrtimou i huya sura yiy; hu payit ara, ara kultuwayihu pwassin masih iramwaitini yiy. Pe husong huya nondriya seu ara, pe huyen aliy. Pe iyamulan para aliy, ara mipwan ata ndramat ara, ara kintewihiy pwi masih, pe iramwaitini mipwan tan para mamu. Yihu hasap pwassin para mahapo aro, ara andre kirayah tehen tora ko kiya kili hu yi.>>
Tina Yesu pe nalin hu
46 Pwen pe Yesu iro wong ndron iya kili hu ndramat soyon ara, pwen tinan pe nalin hu, ara husa pe huro tine ngawan para hu nakawong kiya kili yiy.
47 Pwen hamou inese ndrainga Yesu, ipa, <<Tinam pe nalim hu, ara hutora tine ngawan pe hu nakawong kisa kili wou.>>
48 Hapeko Yesu isomwi ndramat mepo inese ndraingan ara, ara ipa, <<Hiyeh ara tino, pe hiyeh hu ara nali hu?>>
49 Pwen isuwe ndramiran hu, pe ipa, <<Tino pe nali hu, ara yihu aripo.
50 Paratesah, ndramat mepo ngara kimbusi namiliwai pwokeyan ta Tomo ita kol paingan yang, ara yiy nali, pe yiy pisu, pe yiy tino.>>