10
Yesu ipwandrisa hu Songui pe Lumou
1 Pwen Yesu iyoh ndramiran hu songui pe lumou huya kili yiy pe iyki pwoke nopwaran iya kili hu para hu karasses hu payit, pe para hu kasopwoyani hu ndramat masih mepo humwa, pe hu neken handra-handra iro kili hu.
2 Pe iye, ara ngala hu aposel songui pe lumou: Imu, ara Simon, mepo ngalan handra yi ara Pita, pe nalin Antruw, Yamis noru Sepetiy pe nalin Yohanes,
3 Pilip pe Partolomeu, Tomas pe Mattiu mepo ndramat para poya takis, Yamis NdraAlpeyus pe Tatteyus,
4 Simon mepo ndramat hamou para kili hu Selot, pe Yutas Yiskariyot mepo iyamulan iratuni Yesu.
5 Yihu songui pe lumou aro, ara Yesu ipwandrisa hu para hu kaya, pe ipomwanye iya kili hu, ipa: <<Wawu mbuna kaya kili hu Ndramira Lah, pe mbuna akaya nondriya kol ngawan hakol para Samariya.
6 Hapeko wawu kaya kili hu ndraye Yisrayel, mepo hu kansongsin tehe hu sipsip.
7 Pe kiro mwonen wawu kaya, ara akoro pohowe nongan aro: <Kolo king mepo ngara kiro mu kiya aliy para kol paingan yang, ara kinsa pakeh.>
8 Pe akasopwoyani hu ndramat humwa, pe akahangini hu ndramat kanmat kasa tine, pe wawu kasopwoyani hu mepo mwamwa kawa ita kili hu, para hu karayah howen. Pe wawu karasses hu payit kaya mawen kili hu ndramat. Pwoke mepo wawu kanwiriy, ara kennen pwi; pwen pe apakasopwat hu ndramat, ara kennen pwi yi.
9 Pe wawu mbuna kapo sombule kolt, ndre sombule silwa, ndre sombule kopa kiro ndropwa sombule pat tawawu pe akaya.
10 Pe wawu mbuna akasap ndropwa kunkun, pe wawu mbuna kapo susura koiwe wawu, ndre susura hatna pweleka wawu, ndre kapo nes sih kiyapolo wawu. Paratesah, ndramat ngara kipo mbulen, ara andre kiwiri hiyan kiyau aliy.
11 Pwen sehe kol ngawan ndre sehe kol mendreheh wawu nakaya nondriyan, ara akaten ndramat hamou pahalan kiro ara, pe wawu koro suwen kipoo wawu katali kol ara.
12 Pe kiro mwonen wawu nakasong kaya nondriya seu, ara wawu karawulohani hu ndramira seu ara.
13 Pe kapa hu para seu ara, hu karawulohani wawu, akapwai para lomwes para ndriya wayis kiro sura hu. Pe kapa hu kantawulohani wawu pwi, pwen akawiri lomwes para ndriya wayis tawawu kimui.
14 Pe kapa hamou kintawulohani wawu pwi, ndre kinhilingi nongna wawu pwi, pwen akaratolohani kohu pweleka wawu kiro mwonen wawu nakatali seu ara ndre kol ngawan ara.
15 Yo upwai ndrokonan isa kili wawu, kora nopwaran para kol ara, ara andre kiramwaitini nopwaran para Sotom pe Komorrah, kiro mwonen lang para tamwanye.
16 Yo nakupwandrisa wawu tehe hu sipsip para akaya mwalinga hu mwiy puyap. Pwen tehen tora ko, lohonga wawu kipahas tehe hu mwat, pe wawu koro mwonen tehe hu pai.
17 Pe wawu koro hinehes kiyata hu ndramat, andre hu karatuni wawu pe kaiki wawu kaya nongan koro mbulmara hu pohon para kol, pe andre hu kamwiri wawu koro hu yumwa mbultere tahu Yutah.
18 Tunan yo kopu, andre hu kaluwi tarahani wawu kaya mbulmara hu yapane hu kol namandran iya, pe kaya mbulmara hu king. Pwen tehen tora ko, andre wawu katiyani tiyeyo kiya kili hu, pe kiya kili hu Ndramira Lah.
19 Hapeko kiro mwonen yihu kambultuwe tahatini wawu, para wawu koro tine nongan, ara lohonga wawu mbuna kimwa kiya sehe nongan para wawu nakapwai, ndre wawu nakawong tapeh. Kiro mwonen paramwandrai ara, Ngindrai andre kiyki nongan para wawu kapwai.
20 Paratesah, andre wawu kanwong pwi, hapeko Mwoiwa Tama wawu, ara andre kiwong kiyau poho wawu.
21 Pe hilu ndramat malmou hilu nali hilu, ara andre hamou kiratuni hamou para hu ndramat katingundrun kimat. Pe tama mbunah hamou, ara andre kimbusiy tehen aliy kiya kili norun i. Hu mbunah andre hu karasisingat ana tamahu pe tinahu, para hu ndramat katingundru hilu kamat.
22 Pe tunan yo kopu, pwen andre hu ndramat masih kahingasi wawu. Hapeko sehe ndramat kiro tine pwokeyan kipoo lang kiyahapwen, ara andre Ngindrai kisopwat yiy.
23 Pe kiro mwonen hu pakarandroyani wawu koro kol hakol, ara wawu kawop kaya hakol. Yo upwai ndrokonan isa kili wawu, tehe wawu andre kanlahiy para kasalti topwe hu kol masih kene para Yisrayel mapu, kipoo andre Noru Ndramat kisa.
24 Pe ndramat mepo ngara kiwiri hinonou, ara kinhohin kili ndramat mepo iro hinuwani yiy pwi. Pe ndramat para poya mbulen, ara kinhohin ta namandran tan pwi.
25 Hiyan para ndramat iro wiri hinonou, ara kirayah tehe ndramat iro hinuwani yiy. Pe hiyan para ndramat para poya mbulen kirayah tehe namandran tan. Pe kapa hu kapohowe tama seu ara, Peelsepul, pwen andre ngala yowen hu masih kene ara, ara andre kiya pwalngengei o mwaihei!
26 Pwen pe wawu, ara mbuna kanoh tahu ndramat ara. Paratesah, sehe melit mepo kantamburuhiy, ara andre karehei. Pe sehe melit mepo ita kohon, ara andre kisa yelan ngawan.
27 Pe tesah upwai isa kili wawu kiro lokuhan, ara a wawu kapohowei kiro ngana lang. Pe tesah mepo ndrainga wawu kihilingiy kiro mwalinga wawu ko, ara wawu kapwaharai kiho payandroha hu seu.
28 Pe wawu mbuna kanoh ta hu mepo hulahiy para katingundru nombuwe wawu, hapeko hu kanlahiy para katingundru mwoiwa wawu pwi. Hapeko akanoh ta Ngindrai opu, yiy mepo ilahiy para kipwalngani mwoiwa wawu pe nombuwe wawu kene, kiya nondriya ngat mepo mwan ita yat aliy.
29 Wawu pahasaniy tehe norupep malmou, ara andre hu ndramat kapo pehei kiyata hilu kiya sombule pat hambut, ndre? Hapeko kinlahi hamou ta hilu norupep ara, kimat pe Tama wawu kikowu, ara pwi.
30 Pe tehen aliy opu, hu kompai hutora paya wawu, ara Tama wawu kindromwahu topwei.
31 Pwen pe wawu mbuna kanoh, wawu ho hin iya, iyata hu norupep soyon.
32 Pe yihu mepo ngara kawong ngawan kiro mbulmara hu ndramat tehe yihu ndramiro, ara andre kuwong ngawan kiro mbulmara Tomo kiro kol paingan yang tehe yihu ndramiro yi.
33 Pe yihu mepo ngara kapwai tehe hu kowu to kiro mbulmara hu ndramat, ara andre kupwai tehe ukowu ta hu, kiro mbulmara Tomo kiro kol paingan yang i.
34 Wawu mbuna kapa ndre usa kol pwan, ara para kuiki ndriya wayis kiya mwalinga hu ndramat. Pwi yoh! Kunsa para kuiki ndriya wayis pwi, hapeko usa, ara para kusaiki tahatai.
35 Paratesah, usa, ara para kumbusiy, pe
<mbunah kamai andre kihingas ana taman,
pe andre mbunah pihin kihingas ana tinan,
pe andre mbuyunorun kihingas ana mbuyungundran.
36 Pe hu ndraisih mbukenan ta ndramat hamou, ara andre hu karayah hu ndramat para kamwisnani yiy.>
37 Pe yiy mepo ndriyan imbuluhi yo, hapeko ndriyan imbuluhi taman ndre tinan iya namandran iya isato, ara kinlahiy para kirayah ndramiro pwi. Pe hiyeh ndriyan imbuluhi yo, hapeko ndriyan imbuluhi norun kamai ndre norun pihin iya namandran iya isato, ara kinlahiy para kirayah ndramiro pwi.
38 Pe yiy mepo kinwiri kei tondrih tan pe kinho ndruwo pwi, ara kinlahiy para kirayah ndramiro pwi.
39 Pe yiy mepo neren kiya mwoiwan mbukenan, andre mwoiwan kitali yiy. Pe yiy mepo kilohongani yo, pe tunan yo kopu kitali mwoiwan, ara andre kisopwat mwoiwan mbukenan.
40 Pe yiy mepo irawulohani wawu, ara irawulohani yo. Pe yiy mepo irawulohani yo, ara irawulohani yiy mepo ipwandrisa yo.
41 Pe Ngindrai andre kiyki kenne yiy mepo ipwokere poropet hamou. Pe andre kiyki kenne ndramat ara, kihisoule ko tehe kenne poropet hamou. Pe Ngindrai andre kiyki kenne yiy mepo kipwokere ndramat hamou imwonen. Pe andre kiyki kenne ndramat ara, kihisoule ko tehe kenne ndramat hamou imwonen.
42 Pe kapa hamou kimbusi melit mendreheh, tehe kiyki ndran wawen hape kiya kili hamou tahu mbunah mendreheh aripo, paratesah, mbunah aro, ara ndramiro hamou, pwen upwai ndrokonan isa kili wawu, Ngindrai, ara andre kiyki kennen.>>