3
King David Dingihdi Yiwarrudj Bu Kangewarreni
1 Ngudda Yawey, ngaye wanjh ngabenkarrme birriwern bininj nawu ngarriyidko! Birridjalwern ngandiwirrihme!
2 Birriwern bininj ngandiyolyolme, dja kabirriyime, “Nawu God minj kabibidyikarrme.”
3 Ngaye wanjh ngaburrbun bu ngudda Yawey nawu yiwernhmakkaykenh, dja ngudda yikukdjurruddi yiman shield ngardduk dja kankangemarnbun.
4 Wanjh ngaye ngakayhme nuye nawu Yawey, dja nungka ngankayhmimang kore kaddum kuwarddekimuk kubolkdjamun nuye kahni.
5 Bu ngakekurrmerren wanjh ngadjalkodjkeyongen. Kaluk ngayawoyhdolkkan, dja nawu Yawey nganahnan ba ngadjaldarrkiddi.
6 Kunmekbekenh ngaye minj ngabenkengeme birridjalwern duninjh bininj bu kabirrimyorrme dja ngandidjokohme kuhri kuhri.
7 Yawey, yirrolka! Kanngehkemen, ngudda nawu God ngardduk! Yibendjalbun nawu ngandiwirrihme, yibenkerrkdo dja yibenyidmebakke bedberre bininj nawu kunwarre kabirriyime.
8 Yawey ngudda yidjalkudji kanngehke kore ngarribongdi. Yoh Yawey, ngarridjare ngudda kunmak kanmarnekurduyime ngad bininj ke.