12
Bu Kunyid Kawernmerren Kadberre Wanjh Karridi Yiwarrudj.
1 Ngudda Yawey kanbidyikarrmen! Birriwern bininj nawu ngundiwoybukwong nakka wanjh birridarrkidyakminj rowk! Nawu birrimak bininj ngudda ke, wanjh bonj, minj kabirrihni kondah kurorre.
2 Bininj rowk kabirrikurrekurren bu kabirrikowerren, dja minj nangale mak nawoybuk dja kabirridjalkurren munguyh.
3 Wanjh birrimekbe nawu kabirrihburlumerren yiddok minj yibenwokngurdke?
4 Bedda wanjh kabirrihburluburlumerren dja kanjdji baybaywi kabirrimarneyimerren, “Ngad wanjh ngarriyolyolme kore ngad ngarridjare, dja minj nangale kanngurdke. Dja wanjh karriwokdangen ba bu karrimang rowk manbu karridjare!”
5 Wanjh Yawey kayime, “Mah. Ngaye ngarrolkkan dja ngabenbidyikarrme bininj nawu birringudjwarre dja mak nawu birrimarladj Ngabenbekkan bedda kabirrikayhme dja ngabenmarnedjurrudi ba nawu birriwarre bininj minj kabindimarneyime kunwarre.” Kuhni yimeng nawu Yawey.
6 Dja nawu Yawey wanjh nawoybuk kore kawokkurrmerren, wanjh manbu kunwok nuye makka yiman kayime silver nawu bininj kabirriwolngwon kunbidkudji dja bokenh kore kunak.
7 Mah ngudda Yawey, kankukbalhmen ngadberre kore nawu birriwarre bininj ngandiwirrihme. Ngudda kandjalnahna munguyh.
8 Nawu birriwarre bininj kabirrihdjalrengehre bu kabirriburlumerren, dja birridjalwern bininj kabirriburlumerren kore kundjalwarre duninjh kabirrikurduyime.