Psalms
1
Baleh Manu Manbolh Karrire?
1 Bininj nawu kabirridjalwarnyak kabirribekkabekkan kunwok bedberre birribuyika bininj nawu kunwarre kabirrikurduyime, wanjh nakka Yawey God kabenmarnekurduyime kunmak. Birrimekbe bininj minj kabindingunjdjikkan birribuyika bininj nawu kunwarre kabirridjalkurduyime, mak minj kabirriraworren bininj nawu kabirridjekmiwon Yawey bu kabirridjalkewkme.
2 Nawu birrimak bininj, wanjh kundjalbuyika kabirrikurduyime. Bedda kabirriwernborlhme Yawey nuye mankarre manbu kabirrinjilngmarnbun. Bedda kabirridjalburrbun mahni mankarre barnangarrakuyeng dja mak kukakkuyeng.
3 Birrimekbe bininj yiman kayime manbu kahdulkdi darnkih kore mankabo. Manmekbe kundulk kaluk kakarrme manwern manme, dja mak minj kamarlaworrdowen. Wanjh kore njalehnjale kabirrikurduyime, wanjh kunmak rowk kabenmarnebebme.
4 Dja nawu birriwarre bininj minj kunmekbe kabenmarnekurduyimerran bedberre. Bedda wanjh yiman kayime mandalkdarleh manbu kunmayorrk kabuhbuhme dja kadjalburriwe.
5 Yawey kabendjadme dja kabenwarrewe birrimekbe birriwarre bininj. Wanjh minj bedda kabirriraworren nawu Yawey nuye namud bu kabirridjarrkmarnedi yiwarrudj.
6 Kaluk nawu Yawey munguyh kabendjalnahnan nawu bedda kabirrikadjung nungka; dja mak nawu birriwarre bininj wanjh nakka kabenbawon kabirridjalyakmen.