MAT 1:1 Leꞌa bexa ndee bexa ngok usan gox polta ten Jesucristo, dub xa ras David no xa ras Abraham.
MAT 1:2 Leꞌa Abraham ngop Isaac, Isaac ngop Jacob, Jacob ngop Judá no stapla be wit xa.
MAT 1:3 Judá cha ngop Fares no Zara, leꞌa xnaꞌa bexa usaleaꞌ Tamar. Fares ngop Esrom, Esrom ngop Aram,
MAT 1:4 Aram ngop Aminadab, Aminadab ngop Naasón, Naasón ngop Salmón.
MAT 1:5 Salmón ngop Booz, leꞌa xnaꞌa Booz usaleaꞌ Rahab. Booz ngop Obed, leꞌa xnaꞌa Obed usaleaꞌ Rut. Obed ngop Isaí,
MAT 1:6 Isaí ngop David xa nibeꞌe, David ngop Salomón, leꞌa xnaꞌa Salomón xa ngok xagots ten Urías.
MAT 1:7 Salomón ngop Roboam, Roboam ngop Abías, Abías ngop Asa,
MAT 1:8 Asa ngop Josafat, Josafat ngop Joram, Joram ngop Uzías.
MAT 1:9 Uzías ngop Jotam, Jotam ngop Acaz, Acaz ngop Ezequías.
MAT 1:10 Ezequías ngop Manasés, Manasés ngop Amón, Amón ngop Josías.
MAT 1:11 Josías ngop Jeconías no be wit xa, zha na lajuers mbiꞌi bexa Babilonia bexa Israel.
MAT 1:12 Tsoꞌo na li ngwaꞌa bexa Israel gast Babilonia wa, leꞌa Jeconías ngop Salatiel, Salatiel ngop Zorobabel.
MAT 1:13 Zorobabel ngop Abiud, Abiud ngop Eliaquim, Eliaquim ngop Azor.
MAT 1:14 Azor ngop Sadoc, Sadoc ngop Aquim, Aquim ngop Eliud.
MAT 1:15 Eliud ngop Eleazar, Eleazar ngop Matán, Matán ngop Jacob.
MAT 1:16 Jacob ngop Kosé. Leꞌa xagots ten Kosé usaleaꞌ Marí, xa ngop Jesús, xa nak Cristo, xa mtuꞌub Dios.
MAT 1:17 Li leꞌa Abraham no gast David leꞌa ta wa dub tidaꞌ bexa. Leꞌa David no gast zha na ngwaꞌyoꞌo bexa Israel gast Babilonia wa, leꞌa zha weꞌe uyoꞌo stub stidaꞌgal bexa. No zha na ngwaꞌa bexa Babilonia no gast zha na ngol Jesucristo wa uyoꞌo stub stidaꞌgal bexa.
MAT 1:18 Lndeꞌe ngol Jesús xa nak Cristo: Leꞌa dub xagots nsaleaꞌ Marí yá msaꞌala diꞌizh uchilyaꞌano xa dub xabgiꞌi nsaleaꞌ Kosé. Parea zha biseata ikaꞌa xa Kosé, leꞌa xa nsoꞌnola dub meꞌed, leꞌa meꞌed wa meꞌed msaꞌa Espíritu ten Dios.
MAT 1:19 Leꞌa Kosé wa mbinbeꞌe ulaꞌa xa Marí, ná leꞌa ta na wen nak xa ta weꞌe xagaꞌtsa ndiꞌizh ulaꞌa xa Marí, ndontsa naꞌanpa ido ladna Marí.
MAT 1:20 Leꞌa zha na mbinbeꞌela Kosé li gun, leꞌa dub angel ten Dios mlundoꞌla ndoꞌ xa cuent dub ta mcheꞌa ladna xa, ndab angel ndoꞌ xa: —Kosé xin David, lá yuꞌ ladna lu ikaꞌa lu Marí gak xagots ten lu, leꞌa meꞌed nsoꞌno Marí leꞌa meꞌed wa meꞌed msaꞌa Espíritu ten Dios.
MAT 1:21 Leꞌa Marí gap dub meꞌed bgiꞌi, cha usaleaꞌ lu meꞌed wa Jesús, geal leꞌa meꞌed wa koꞌo be xmen Dios ndoꞌ be ke ten bexa.
MAT 1:22 Leꞌa ta wa li ngok lak ndab dub xabgiꞌi mbidiꞌizh sakndoꞌ Dios tiemp polta, ndab xa:
MAT 1:23 Blaꞌach bego, leꞌa dub xagots ben gol ugal xabgiꞌi isoꞌno dub meꞌed. Cha gap xa dub meꞌed bgiꞌi, cha isaleaꞌ meꞌed Emanuel. (Leꞌa Emanuel dub diꞌizh hebreo gab: Dios nsoꞌ wats beuna.)
MAT 1:24 Leꞌa gor uban Kosé ndoꞌ ta mcheꞌa ladna xa wa, cha mbin xa lak unibeꞌe angel ten Dios, ukaꞌa xa Marí gak xagots ten xa.
MAT 1:25 Ná leꞌa xa naꞌanpa ugal Marí zha biseata gap Marí meꞌed ned ten xa wa. Cha msaleaꞌ Kosé meꞌed wa Jesús.
MAT 2:1 Leꞌa Jesús ngol gezh Belén ten distrit Judea, zha na nak Herodes xa nibeꞌe Judea. Weꞌe leꞌa lad nlen wizh utoꞌo pla bexa ndák, ulayaꞌ bexa gezh Jerusalén.
MAT 2:2 Cha unabdiꞌizh bexa ndoꞌ be men, ndab bexa: —¿Ma meꞌed ngol gak xa nibeꞌe ten bega xa judio zha? Leꞌa besa uniꞌí ulen mbeal ten xa lad nlen wizh. Ta weꞌe nseabe besa yankea besa xa.
MAT 2:3 Leꞌa Herodes nsea itea bexa ndencho Jerusalén wa ni ko lá iniꞌí xteꞌe gun gor na mbiꞌín bexa ta wa.
MAT 2:4 Cha mchealte Herodes itea be uleꞌay nibeꞌe no be mech ten ley ten bexa judio. Cha unabdiꞌizh Herodes ndoꞌ bexa ná pa nsabndoꞌ gal Cristo xa na ndiꞌizh ga utuꞌubka Dios.
MAT 2:5 Leꞌa bexa wa cha ukaꞌab ndab: —Leꞌa xa wa gal gezh Belén ten Judea, lak mkeꞌa dub xa mbidiꞌizh sakndoꞌ Dios tiemp polta, ndab Dios:
MAT 2:6 Lu Belén, gezh ten Judá, nsakka lu ndoꞌ itea be gezh ten Judá, geal leꞌa Belén itoꞌo dub xa nibeꞌe, xa ulaꞌach be xmen naꞌ bexa Israel.
MAT 2:7 Leꞌa Herodes cha xgaꞌach utezh bexa ndák wa, cha unabdiꞌizh Herodes ná xá wizh na ned uniꞌí bexa mbeal wa.
MAT 2:8 Cha mtuꞌub Herodes bexa wa gezh Belén, ndab xa: —Waꞌbe bego, cha bkwaꞌan bega pa ncho meꞌed wa. Leꞌa gor mzheal bega meꞌed, cha gidyab bega‑yá ndoꞌ naꞌ, ndontsa no naꞌ gaa sa wa, cha gankeꞌa naꞌ meꞌed.
MAT 2:9 Leꞌa gor na mbiꞌín bexa ta li ndab Herodes wa, leꞌa bexa cha utoꞌo nchaꞌbe. Leꞌa mbeal na li uniꞌí bexa lad nlen wizh wa cha nchaꞌa ned ndoꞌ bexa, cha ngwaꞌisaꞌab‑a sa ncho meꞌed wa.
MAT 2:10 Leꞌa gor na uniꞌí bexa wa mbeal nsob sa wa, leꞌa bexa uzhebpa mten ladna.
MAT 2:11 Cha uyote bexa len niꞌi wa, cha uniꞌí bexa meꞌed nsea Marí xnaꞌa meꞌed. Cha msaxib bexa ngwankea bexa meꞌed wa. Cha mxaꞌal bexa be caj noꞌo bexa, cha uloꞌo bexa pla be taꞌa uzhebpa uyap: be ta oro, no dub ta uxeꞌe ta nyolꞌ, no mirra. Cha msaꞌa bexa be ta wa ukaꞌa meꞌed‑a.
MAT 2:12 Tsoꞌo wa leꞌa Dios ndab ndoꞌ bexa wa gor ndeyats bexa lá yach bexa ndoꞌ Herodes. Ta weꞌe cha nseaꞌ bexa lazh bexa ndi stub nes xaꞌaga.
MAT 2:13 Leꞌa gor na nseaꞌla bexa ndák wa, leꞌa dub angel ten Dios mlundoꞌ ndoꞌ Kosé gor naxyats xa, ndab angel: —Goste, cha biꞌi meꞌed baꞌ no xnaꞌa meꞌed. Bxoꞌon waꞌ nacion Egipto. Cha weꞌetsa uyoꞌo bega gast zha na gáp naꞌ yach bega, leꞌa Herodes ukwaꞌan meꞌed baꞌ gut xa meꞌed.
MAT 2:14 Bi leꞌa teꞌal wa leꞌa Kosé cha utoꞌo no meꞌed no xnaꞌa meꞌed, nchaꞌbe bexa Egipto.
MAT 2:15 Cha kwen uyoꞌo bexa sa wa gast ngut Herodes. Leꞌa be ta wa li ngok lak nkeaniꞌi diꞌizh ten Dios ta ndab dub xa sakndoꞌ Dios: “Uteꞌezh naꞌ xiꞌín naꞌ itoꞌo xa Egipto.”
MAT 2:16 Leꞌa gor uniꞌí Herodes leꞌa bexa ndák wa yá lá yachtabe, cha uzhebpa ngokloo xa. Cha unibeꞌe xa ndoꞌ be soldad, ndab xa yaꞌyut bexa itea be meꞌed ncho top liꞌin, no gast be medoꞌo gezh Belén no be gezh nde gax sa wa. Li unibeꞌe xa geal leꞌa bexa ndák wa ndab mtopla liꞌin ulen mbeal wa.
MAT 2:17 Li ngok ta wa lak mbidiꞌizh Jeremías sakndoꞌ Dios, ndab xa:
MAT 2:18 Mgen dub ruid siꞌil gezh Ramá, Uzhebpa nbezhat bexa no ndoꞌon bexa. Leꞌa Raquel ndoꞌonno be xin na. Yá lá kaꞌabta xa itayoꞌon, geal leꞌa be xin xa ngutbe.
MAT 2:19 Ngol tsoꞌo wa leꞌa Herodes ngut. Weꞌe leꞌa dub angel ten Dios mlundoꞌ ndoꞌ Kosé nacion Egipto gor naxyats xa,
MAT 2:20 cha ndab angel: —Goste, cha byoꞌo meꞌed baꞌ no xnaꞌa meꞌed leꞌaka nacion Israel, leꞌa bexa na nlad gut meꞌed baꞌ wa ngutlabe.
MAT 2:21 Leꞌa Kosé cha ngwaste, cha myoꞌo xa meꞌed no xnaꞌa meꞌed leꞌaka Israel.
MAT 2:22 Ná leꞌa gor na mbiꞌín Kosé leꞌa Arquelao xin Herodes myatsoꞌgal nibeꞌe Judea, cha mzheb xa yaꞌ xa sa wa. Leꞌa Dios cha uníꞌigal gor naxyats Kosé, ndab Dios lá yaꞌ xa Judea. Ta weꞌe cha nchaꞌa xa ndi distrit Galilea.
MAT 2:23 Ngwaꞌ bexa yoo bexa gezh Nazaret, lak ndab bexa uyoꞌo polta sakndoꞌ Dios, ndab xa: “Leꞌa be men gab leꞌa xa dub xa Nazaret.”
MAT 3:1 Ngol tsoꞌo wa leꞌa Juan xa ulaleaꞌ be men ngwaꞌyoꞌo geꞌe sa bid sa uxee ncho men, dub sa ten Judea. Ndadiꞌizh xa ndoꞌ be men,
MAT 3:2 ndab xa: —Blaꞌa bego be ta ugap nak bega, leꞌa zha inibeꞌe Dios ladoꞌo be men yá gaxla nak.
MAT 3:3 Polta leꞌa Isaías mbidiꞌizh sakndoꞌ Dios cuent ten Juan, ndab Isaías: Leꞌa xa wa ikeseyadiꞌizh geꞌe sa bid, ugeꞌ gab xa: “Bin parej bega nes ilen Xa Nibeꞌe. Bkeasoꞌ bega nes ten xa.”
MAT 3:4 Leꞌa xab Juan nakchaꞌaw gich las came, no dub sinch gid nde len xa. Leꞌa xa ndaw mbit, nsea mzhin ser ndo xa.
MAT 3:5 Leꞌa kwaꞌad bexa Jerusalén no bexa idub distrit Judea no bexa ncho gax toꞌo yowbeꞌe Jordán utoꞌo, ndabeyoꞌón bexa xtaꞌan ndadiꞌizh Juan.
MAT 3:6 Mgondoꞌ bexa be ke ten bexa, cha ulaleaꞌ Juan bexa len nits yowbeꞌe Jordán.
MAT 3:7 Ná leꞌa gor na uniꞌí Juan leꞌa kwaꞌad bexa fariseo nsea bexa saduceo nseabe italeaꞌ, cha ndab Juan ndoꞌ bexa wa: —¡Bego bexa ugap cuent be mbeꞌal! ¿Ton ndab ndoꞌ bega italeaꞌtsa bega, cha naꞌanpa utsaksi Dios bega zha?
MAT 3:8 Bin bega ta wen, ta uluu leꞌa bega mlaꞌaka ta ugap nak bega.
MAT 3:9 No ni lá gunbeꞌe bega gab bega leꞌa bega xin Abraham, ta weꞌe leꞌa Dios naꞌanpa utsaksi bega. Leꞌa naꞌ gáp leꞌa Dios syoꞌo gan gunno be geꞌ ndee be xin Abraham.
MAT 3:10 Leꞌa Dios listla nsoꞌ utsaksi xa bexa ndun ta ugap, cuent dub xa nsoꞌnsén dub gibya, kabtoꞌog xa itea be ya lá nsaꞌa ngus wen, cha utsaꞌab xa ta wa ndoꞌ giꞌ yolꞌ‑a.
MAT 3:11 ’Leꞌa naꞌ ndee nits‑tsa ngoleaꞌ be men, ta nluu leꞌa bexa mlaꞌaka be ta ugap nak bexa. Parea tsoꞌo naꞌ ilen stub xa koleaꞌ be men no Espíritu ten Dios no giꞌ. Leꞌa xa wa mas nsak ndoꞌ naꞌ gast ni lá isaya naꞌ goo naꞌ ndab xa wa.
MAT 3:12 Leꞌa xa wa listla nsoꞌ uti be men wen lat bexa ugap, cuent dub men nti bid ten trig lat be gix xab‑a. Cha kochaꞌaw xa trig wa len niꞌi, nsea utsoꞌol xa xab‑a wa ndoꞌ giꞌ nunk lá yuꞌu.
MAT 3:13 Leꞌa Jesús cha utoꞌo Galilea, nchaꞌa xa yowbeꞌe Jordán sa nsoꞌ Juan, ndontsa koleaꞌ Juan xa.
MAT 3:14 Ná leꞌa Juan lá kaꞌab, ndab xa: —Nkiꞌin naꞌ leꞌa go koleaꞌ naꞌ, ná nat leꞌa go ndi nsea koleaꞌ naꞌ go.
MAT 3:15 Leꞌa Jesús cha ukaꞌab ndab: —Litsa gun una nat, leꞌa una nsabndoꞌ gun lak nlad Dios. Leꞌa Juan cha ulaleaꞌ xa.
MAT 3:16 Leꞌa tsoꞌo na utaleaꞌ Jesús leꞌa gor na utoꞌo Jesús len nits, leꞌa gibeꞌa baꞌ cha myaꞌal. No mnaꞌ Jesús Espíritu ten Dios cuent dub palom nchaꞌlaꞌ sa nsoꞌ Jesús.
MAT 3:17 Cha ulen ti Dios gibeꞌa ndab: —Ta ndee Xiꞌín naꞌ. Leꞌa naꞌ nkweaꞌ ladna xa, no ntenno lad naꞌ xa.
MAT 4:1 Leꞌa Espíritu ten Dios cha mbiꞌi Jesús geꞌe sa bid sa naꞌan men, sa gun maxuꞌu juers utsabgix Jesús.
MAT 4:2 Leꞌa dub top gaꞌal wizh leꞌa Jesús lá ngaw, cha ngol gor leꞌa xa uzhebpa ndanna.
MAT 4:3 Weꞌe leꞌa maxuꞌu cha ulen gun preb Jesús, ndab maxuꞌu ndoꞌ xa: —Tal leꞌa lu nak Xin Dios, nat gud ndoꞌ be geꞌ baꞌ yak‑a pan.
MAT 4:4 Leꞌa Jesús cha ukaꞌab ndab: —Leꞌa diꞌizh ten Dios nkeaniꞌi: “Naꞌanpa nabtsa ta ndaw men nban bexa. Mas nsak nxobgek men ndoꞌ diꞌizh ten Dios, leꞌa ta wa ndun nban xa.”
MAT 4:5 Leꞌa maxuꞌu cha mbiꞌigal Jesús gezh Jerusalén gek niꞌi ten Dios, sa ndon leꞌa gaꞌap.
MAT 4:6 Cha ndab maxuꞌu: —Tal leꞌa lu Xin Dios, nat btsaꞌab dub brink gast ndoꞌ yo baꞌ, leꞌa diꞌizh ten Dios nkeaniꞌi ndab‑a: Leꞌa Dios utuꞌub be angel ten na ulaꞌach lu. Leꞌa bexa wa goꞌo lu ndoꞌ yaꞌa na, ndontsa ni lá ikateꞌeb lu ndoꞌ ni dub geꞌ.
MAT 4:7 Leꞌa Jesús cha ukaꞌab ndab: —No ndab diꞌizh ten Dios: “Lá gun lu preb Dios Xa Nibeꞌe.”
MAT 4:8 Leꞌa maxuꞌu cha mbiꞌi Jesús gek dub geꞌe gaꞌappa, cha mluu maxuꞌu itea be gezh nde ndoꞌ gizhliyo no be ta nsak ncho be gezh wa.
MAT 4:9 Cha ndab maxuꞌu: —Itea be ta baꞌ usa naꞌ ikaꞌa lu tal leꞌa lu isaxib ndoꞌ naꞌ, yankea lu naꞌ.
MAT 4:10 Leꞌa Jesús cha ndab ndoꞌ maxuꞌu: —Bxoꞌon wats naꞌ, maxuꞌu. Leꞌa diꞌizh ten Dios nkeaniꞌi ndab‑a: “Wankea Dios Xa Nibeꞌe, no bin ta nladtsa xa.”
MAT 4:11 Leꞌa maxuꞌu cha mlaꞌa Jesús, cha ulen be angel ten Dios mlaꞌach bexa Jesús.
MAT 4:12 Ngol dub wizh leꞌa Jesús mbiꞌín leꞌa Juan nkea litgiꞌib, cha nseaꞌ Jesús leꞌaka Galilea.
MAT 4:13 Parea lá ngaꞌyoꞌo xa Nazaret, ndi ngwaꞌyoꞌo xa gezh Capernaum toꞌo lagun siꞌil, yo ten bexa ras ten Zabulón no ras ten Neftalí.
MAT 4:14 Li ngok‑a lak nkeaniꞌi diꞌizh ten Dios, ta mas polta mkeꞌa Isaías sakndoꞌ Dios, ndab xa:
MAT 4:15 Bego ncho ndoꞌ yo ten Zabulón no yo ten Neftalí, sa ntid nes toꞌo lagun, lad ndaꞌas wizh sa nax yowbeꞌe Jordán; Bego ncho Galilea, sa ncho no bexa naꞌanpa xa judio:
MAT 4:16 Leꞌa bego nde sa ukaw, parea leꞌa nat uniꞌí bega dub xeꞌa siꞌil. Leꞌa bega nde sa wa cuent dub xa ngut, parea nat mgondoꞌ bega xeꞌa ten Dios.
MAT 4:17 Leꞌa zha weꞌe cha usaxan Jesús ndadiꞌizh diꞌizh ten Dios ndoꞌ be men, ndab xa: —Blaꞌa bego be ta ugap nak bega, leꞌa zha na inibeꞌe Dios ladoꞌo be men yá gaxla nak.
MAT 4:18 Leꞌa dub gor nchasea Jesús toꞌo lagun siꞌil nsaleaꞌ Galilea, cha uniꞌí xa top xabgiꞌi ndeutsaꞌab red ten na len nits, leꞌa bexa wa xa nsen mbeal. Leꞌa dub xa wa Simón, xa no nsaleaꞌga Pedr. Leꞌa stub xa wa Ndres wit Simón Pedr wa.
MAT 4:19 Cha ndab Jesús ndoꞌ bexa: —Usankea bega tsoꞌo naꞌ, leꞌa naꞌ uluu xteꞌe yunjunt bega be men ndoꞌ Dios.
MAT 4:20 Leꞌa bexa wa cha uxax mlaꞌa be red ten na, cha usankea bexa tsoꞌo Jesús.
MAT 4:21 Leꞌa gor usea bexa stub tuzh sa, cha uniꞌí Jesús stop xabgiꞌi, dub xa nsaleaꞌ Jacob nsea stub xa nsaleaꞌ Juan. Leꞌa bexa wa ndeno Zebedeo xus bexa ndoꞌ dub barco, ndego bexa ramient be red ten bexa. Leꞌa Jesús cha utezh itop wit bexa.
MAT 4:22 Leꞌa itop bexa cha uxax mchansoꞌ xus na ndoꞌ barco wa, cha usankea bexa tsoꞌo Jesús.
MAT 4:23 Leꞌa Jesús cha nchasea idub distrit Galilea, nluu xa be men len be niꞌi sa nzhealbe bexa judio sa wa. Mbidiꞌizh xa diꞌizh wen ten Dios ná xteꞌe nibeꞌe Dios be men, no myunyakna xa be men nsén guniꞌi xá gealgizh ná, no bexa kweaꞌ nsak.
MAT 4:24 Leꞌa ta li ndun Jesús wa mgen idub distrit Siria. Ta weꞌe leꞌa kwaꞌad be men ulenno bexa nsén isandoꞌ be gealgizh, no bexa gizh ncho mbi bxin len ladoꞌo na, no bexa nsak gizhkaw, no bexa lá yoo gan isea. Cha myunyakna Jesús bexa wa.
MAT 4:25 Cha usankea kwaꞌad be men tsoꞌo Jesús: bexa distrit Galilea, no distrit Decápolis, no gezh Jerusalén, no idub distrit Judea, no bexa ncho stub toꞌo yowbeꞌe Jordán.
MAT 5:1 Leꞌa gor uniꞌí Jesús be men kwaꞌad wa, cha ukea xa dub bet, cha usob xa. Leꞌa be xmen xa cha ulayaꞌ wats xa.
MAT 5:2 Cha usaxan nluu xa bexa wa, ndab xa:
MAT 5:3 —Uzheꞌeb wen yoo ladna bexa ngondoꞌ leꞌa bexa nkiꞌin Dios, leꞌa Dios nibeꞌe ladoꞌo bexa.
MAT 5:4 ’No uzheꞌeb wen yoo ladna bexa ndoꞌon, leꞌa Dios gal gor gun iten ladna bexa wa.
MAT 5:5 ’No uzheꞌeb wen yoo ladna bexa bchaꞌan nak, leꞌa Dios usaꞌa gizhliyo ikaꞌa bexa wa.
MAT 5:6 ’No uzheꞌeb wen yoo ladna bexa nkwaꞌan gun lak nlad Dios, leꞌa Dios saꞌa ta nlad bexa wa.
MAT 5:7 ’No uzheꞌeb wen yoo ladna bexa nlats ladna be men, leꞌa Dios ilats ladna bexa wa.
MAT 5:8 ’No uzheꞌeb wen yoo ladna bexa umbiꞌi nak ladoꞌo na, leꞌa bexa wa igondoꞌ Dios.
MAT 5:9 ’No uzheꞌeb wen yoo ladna bexa nkwaꞌan xteꞌe lá kuyo be men, leꞌa bexa wa isaleaꞌ xin Dios.
MAT 5:10 ’No uzheꞌeb wen yoo ladna bexa ntid be gealkweaꞌ ta na ndun bexa ta nsak ladna Dios, leꞌa Dios nibeꞌe ladoꞌo bexa.
MAT 5:11 ’No uzheꞌeb wen yoo ladna bego gor na ugap ndanno be men bega, ta na ndangea ladna bega naꞌ. Leꞌa bexa wa xela iníꞌi ndoꞌ bega, no ukwiꞌin bexa gab bexa leꞌa bega sian ta ugap ndun.
MAT 5:12 Uzhebpa bten ladna bego be zha li wa, leꞌa Dios uzhebpa usaꞌa be ta wen ndoꞌ bega gibeꞌa. Leꞌa polta likaga ugap mbinno be men bexa mbidiꞌizh sakndoꞌ Dios.
MAT 5:13 ’Leꞌa bega nak cuentta sed lat be men ndoꞌ gizhliyo ndee. Parea tal leꞌa sed itoꞌo ta utix ten na, ¿xteꞌema yak utix‑a stub biaj zha? Leꞌa‑yá naꞌanta xtiꞌin, ta weꞌe yabitsa‑yá tsoꞌo juer sa ulako be men‑a.
MAT 5:14 ’Leꞌa bego nak cuent xeꞌa ndoꞌ be men gizhliyo ndee, cuent dub gezh nde gaꞌap gek dub geꞌe lá yoo gan xgaꞌach kwe.
MAT 5:15 Leꞌa naꞌan ton usobgiꞌ dub xeꞌa, cha usob xa‑yá len dub caj. Ndi usob xa xeꞌa dub sa gaꞌap, ndontsa usu‑yá xeꞌa ndoꞌ itea bexa ncho len niꞌi wa.
MAT 5:16 No liga usu bego xeꞌa ten bega ndoꞌ be men, ndontsa inaꞌ bexa be ta wen ndun bega, cha no gab bexa siꞌil nak Tad Dios nsob gibeꞌa.
MAT 5:17 ’Lá gunbeꞌe bega leꞌa naꞌ ndal unitndoꞌ ley mkeꞌa Moisés no be ta mkeꞌa bexa sakndoꞌ Dios tiemp polta. Leꞌa naꞌ ndi ndal gun cumplir be ta wa.
MAT 5:18 Leꞌa naꞌ gáp ndoꞌ bego leꞌa nat na bi nde gizhliyo no gibeꞌa leꞌa ni dub letr ten ley ten Dios naꞌanpa initndoꞌ, gast itea‑yá gak cumplir.
MAT 5:19 Ta weꞌe tal ton lá uxobgek ndoꞌ dub taꞌa ndon leꞌa tuzh ndoꞌ ley wa, no liga nluu xa stubga men li gun, leꞌa xa wa ndon leꞌa lá nsak lat bexa nibeꞌe Dios. Ná leꞌa xa na nxobgekka ndoꞌ ta ndab ley ten Dios, no liga nluu xa be men, leꞌa xa wa nsakka lat bexa nibeꞌe Dios.
MAT 5:20 Leꞌa naꞌ gáp ndoꞌ bega tal leꞌa bega naꞌanpa mas uxobgek ndoꞌ Dios ndoꞌ lak ndun bexa fariseo no be mech ten ley, leꞌa bega lá yoo gan gak bexa leꞌa Dios nibeꞌe.
MAT 5:21 ’Leꞌa bego mbiꞌínla ta ndab Dios ndoꞌ be men polta, ndab xa: “Lá gut bega men, leꞌa tal ton gut men leꞌa be men utsaksi xa wa.”
MAT 5:22 Parea leꞌa naꞌ ndi gáp leꞌa tal ton gakloo ndoꞌ stub men, leꞌa Dios utsaksi xa wa. No tal ton inisi stub men, leꞌa xa wa isoꞌ ndoꞌ bexa nibeꞌe. No tal ton gab “tont” ndoꞌ stub men, leꞌa xa wa yaꞌ ndoꞌ giꞌ infierno.
MAT 5:23 ’No tal leꞌa bega nchaꞌlo med sa nsaꞌa men taꞌa ndoꞌ Dios, ná sa weꞌe utseꞌa ladna bega leꞌa stub ltsaꞌa bega ndakloo ndoꞌ bega,
MAT 5:24 blaꞌa bega sa weꞌetsa ndiꞌib‑a. Cha waꞌ bega ndoꞌ ltsaꞌa bega wa, bin bega ta gun wen yaꞌan bega ndoꞌ xa. Cha weꞌe byach bega bsaꞌa bega ta wa ndoꞌ Dios.
MAT 5:25 ’No tal ton nlad usake bega, waꞌyadiꞌizhno bega xa gor biseata isoꞌ xa ndoꞌ juez. Leꞌa tal xa usake bega ndoꞌ juez, leꞌa juez cha yun cuent bega ndoꞌ bexa nlaꞌach litgiꞌib, cha ukeꞌa xa bega litgiꞌib.
MAT 5:26 Leꞌa naꞌ gáp leꞌa bego naꞌanpa itoꞌo sa wa gast kixka bega itea ta nsaꞌab bega wa.
MAT 5:27 ’Leꞌa bego mbiꞌínla ta ndab diꞌizh ten Dios: “Lá ugal bega dub xagots naꞌanpa xagots ten bega.”
MAT 5:28 Parea leꞌa naꞌ ndi gáp ndoꞌ bega leꞌa tal ton iwiꞌi ndoꞌ dub xagots ndanbeꞌe xa ugal xa xagots wa, leꞌa xa wa ndap ke ndoꞌ Dios cuent mgal‑la xa xagots wa.
MAT 5:29 ’Ta weꞌe tal leꞌa bega ndun dub ta ugap ta naꞌ dub ngusndoꞌ bega, mas wen itoꞌo‑yá. Ndi mas wen naꞌan dub ngusndoꞌ bega nat, ni ka idub bega yaꞌ infierno.
MAT 5:30 No liga tal leꞌa bega ndun dub ta ugap nsea yaꞌa bega, mas wen yabtoꞌog‑a. Ndi mas wen naꞌan dub yaꞌa bega nat, ni ka idub bega yaꞌ infierno.
MAT 5:31 ’No ndab diꞌizh ten Dios: “Leꞌa tal ton dub xabgiꞌi nlad ulaꞌa xagots ten na, leꞌa xa syoꞌo gan usaꞌatsa dub git ndoꞌ xagots wa, gab git leꞌa xa mlaꞌa xagots.”
MAT 5:32 Parea leꞌa naꞌ ndi gáp ndoꞌ bega leꞌa tal ton dub xabgiꞌi ulaꞌa xagots ten na, cha ikaꞌa xagots wa stubga xabgiꞌi, leꞌa xabgiꞌi ned wa ndun leꞌa xagots wa ndap ke ndoꞌ Dios. No liga leꞌa stub xabgiꞌi na ikaꞌaga xagots wa noga ndap ke ndoꞌ Dios. Ná tal ton dub xagots ugal stubga xabgiꞌi, leꞌa xabgiꞌi ten xa wa sak ulaꞌa xa.
MAT 5:33 ’No mbiꞌínla bega stub taꞌa ndab Dios ndoꞌ bexa polta, ndab xa: “Tal leꞌa bega ndab Dios nsobwiꞌi sunka bega dub taꞌa, weꞌe leꞌa bega juerska li gun. Naꞌanpa ulaꞌa bega lá gun bega ta wa.”
MAT 5:34 Parea leꞌa naꞌ ndi gáp ndoꞌ bega, leꞌa gor na ndab bega gun bega dub taꞌa, naꞌanpa useꞌat bega Dios, ndi gabtsa bega gun bega ta wa. No naꞌanpa useꞌat bega gibeꞌa, leꞌa gibeꞌa baꞌ sa nsob Dios.
MAT 5:35 No ni naꞌanpa useꞌat bega gizhliyo, leꞌa gizhliyo ndee sa nibeꞌe Dios. No ni lá useꞌat bega Jerusalén, leꞌa Jerusalén gezh ten Dios xa ndon leꞌa nibeꞌe.
MAT 5:36 No ni lá useꞌat bega gek bega, leꞌa bega lá yoo gan ucheꞌa ni dub gichgek bega xaꞌaga color.
MAT 5:37 Ndi gor na gun bega dub taꞌa, litsa gud bega. No tal naꞌanpa gun bega dub taꞌa, litsa gud bega. Leꞌa itea taꞌa na kota bega ndoꞌ ta ndee wa, leꞌa ta wa ta ten maxuꞌu.
MAT 5:38 ’No mbiꞌínla bega ta ndab diꞌizh ten Dios: “Tal ton guzhaꞌa ngusndoꞌ dub men, leꞌa men wa noga li gunno xa wa. No tal ton koꞌoga dub ndeay dub men, leꞌa men wa noga li gunno xa wa.”
MAT 5:39 Parea leꞌa naꞌ ndi gáp naꞌanpa ukixke bega ta ugap mbinno dub men bega. Tal ton kichyaꞌa ndoꞌ bega lad gaꞌal, blaꞌa bega kichyaꞌa xa no stubga lad.
MAT 5:40 No tal ton usake bega ulat xa dub xab bega, blaꞌa bega gast no stub‑a goꞌo xa.
MAT 5:41 No tal ton gab juerska goꞌo bega dub taꞌa noꞌo xa dub kilómetro nes nsea xa, ndi top li sa biꞌi bega‑yá.
MAT 5:42 No tal ton inab dub taꞌa ndoꞌ bega, usaꞌa bega‑yá. No tal ton inab dub ta ikiꞌin xa, lá gab bega leꞌa bega lá usaꞌa‑yá.
MAT 5:43 ’No mbiꞌínla bega stubga taꞌa ndab be men: “Bkweaꞌ ladna bega be ltsaꞌa bega, no bxee ladna bega ndoꞌ bexa ugap ndanno bega.”
MAT 5:44 Parea leꞌa naꞌ ndi gáp ndoꞌ bega bkweaꞌ ladna bega bexa ugap ndanno bega. No utsin bidiꞌizh bega ndoꞌ bexa xela níꞌi ndoꞌ bega. No utsin gok bega ndoꞌ bexa nxee ladna ndoꞌ bega. No unab bega ndoꞌ Dios gakno Dios bexa na kweaꞌ níꞌi ndoꞌ bega no bexa na ugap ndanno bega.
MAT 5:45 Li nsabndoꞌ gun bega ta na nak bega xinka Dios Xus beuna, xa nsob gibeꞌa. Leꞌa xa ndun leꞌa wizh nsu xeꞌa ndoꞌ itea be men, bexa wen no bexa ugap. No nlaꞌ xa gi ndantiꞌin itea be men, bexa wen no bexa ugap.
MAT 5:46 Tal leꞌa bega nkweaꞌ ladna sbeꞌen bexa nkweaꞌ ladna bego, ¿xteꞌe nsak bega leꞌa Dios usaꞌa ta wen ndoꞌ bega zha? ¿Lá iniꞌí bega zha leꞌa gast bexa nsen med ten gobier Roma liga nkweaꞌ ladna be ltsaꞌa na?
MAT 5:47 No tal leꞌa bega utsin nidiꞌizh ndoꞌ be ltsaꞌatsa bega, ¿xteꞌe nsak bega zha leꞌa bega wen ndun? ¿Lid no bexa lá nchandoꞌ Dios li ndun?
MAT 5:48 Ta weꞌe sbeꞌen ta wen bin bega, lak sbeꞌen ta wen ndun Tad Dios xa nsob gibeꞌa.
MAT 6:1 ’Blaꞌach bega leꞌaka bega leꞌa gor na ndun bega ta wen ndoꞌ stub men, naꞌanpa gun bega‑yá dub mod na iniꞌí be men ta ndun bega wa. Tal leꞌa bega li gun, leꞌa Tad Dios xa nsob gibeꞌa lá kix ta li mbin bega wa.
MAT 6:2 Leꞌa gor na nsaꞌa bega ta nkiꞌin dub men uban nak, naꞌanpa gudiꞌizh bega‑yá ndoꞌ be men, lak ndun bexa nluu cuentta xa wen ná xa xa ugap. Leꞌa bexa wa ndadiꞌizh‑a len be niꞌi sa nzhealbe beuna xa judio no ndadiꞌizh bexa‑yá be nes, ndontsa gab be men leꞌa bexa xa wenka. Leꞌa naꞌ gáp leꞌa ta wen iníꞌi be men ndoꞌ bexa wa, leꞌa ta weꞌetsa gun bexa gan.
MAT 6:3 Ná leꞌa gor nsaꞌa bega ta nkiꞌin dub men, naꞌanpa gab bega ta wa ndoꞌ ni dub men.
MAT 6:4 Tal leꞌa bega li xagaꞌtsa gakno stub men, weꞌe leꞌa Tad Dios iniꞌí ta wa, cha gaꞌalka usaꞌa xa ta ikaꞌa bega.
MAT 6:5 ’Leꞌa gor gudiꞌizhno bega Dios, lá gak bega lak nak bexa nluu cuentta xa wen ná xa xa ugap. Leꞌa bexa wa ndal ladna nsoꞌyadiꞌizh ndoꞌ Dios sbeꞌen len niꞌi sa nzhealbe beuna xa judio no be sa skin nes ndontsa iniꞌí be men‑a. Ná leꞌa naꞌ gáp ndoꞌ bego leꞌa ta wen níꞌi be men ndoꞌ bexa wa, leꞌa ta weꞌetsa gun bexa gan.
MAT 6:6 Ná leꞌa bego gor gudiꞌizhno bega Dios, uyoꞌo bega len lid bega, cha btsaw bega toꞌo puert, cha bidiꞌizhno bega Tad Dios dub mod na ni dub men lá iniꞌí‑yá. Leꞌa ta na li xagaꞌtsa ndun bega, leꞌa Dios iniꞌí ta wa cha gaꞌalka usaꞌa xa ta ikaꞌa bega.
MAT 6:7 ’Leꞌa gor na ndadiꞌizhno bega Dios, naꞌanpa gab bega dubtsa diꞌizh ngi sian biaj, lak ndun bexa lá nchandoꞌ Dios, ndanbeꞌe bexa leꞌa ta na uzhebpa ndadiꞌizh bexa, ta weꞌe mas goꞌón Dios ta ndab bexa.
MAT 6:8 Lá gak bega lak nak bexa wa, leꞌa Tad Dios xa nsob gibeꞌa yá uniꞌíla xtaꞌan nkiꞌin bega gor na biseata inab bega‑yá.
MAT 6:9 Ta weꞌe lndeꞌe bidiꞌizhno bega Dios: Go Dios Xus besa, go nsob gibeꞌa, yankea be men leaꞌ go.
MAT 6:10 No uxax ilen tiemp inibeꞌe go be men. Gak ta nlad go ndoꞌ gizhliyo, lak ndak‑a gibeꞌa.
MAT 6:11 Nab besa usaꞌa go ta gaw besa wizh nat, lak nkiꞌin besa‑yá itea wizh.
MAT 6:12 No bingeꞌ ladna go be ke ten besa, lak ndangeꞌ ladna besa ndoꞌ be men ugap ndanno besa.
MAT 6:13 Lá ulaꞌa go gailaꞌ besa ndoꞌ be ta ugap, ndi uloꞌo go besa ndoꞌ itea be ta ugap. Leꞌa idub tiemp leꞌa go xa ndon leꞌa nibeꞌe no xa ndon leꞌa juert no xa ndon leꞌa nsak. Lika nak‑a.
MAT 6:14 ’Leꞌa tal bega gungeꞌ ladna be ta ugap ndanno be men bega, weꞌe leꞌa Tad Dios xa nsob gibeꞌa noga sungeꞌ ladna be ke ten bega.
MAT 6:15 Parea tal leꞌa bega lá gungeꞌ ladna ndoꞌ be men ugap ndanno bega, weꞌe leꞌa Tad Dios noga lá gungeꞌ ladna ndoꞌ bego.
MAT 6:16 ’Leꞌa zha na lá ndaw bega dub tiemp, naꞌanpa gun bega uban inaꞌ ndoꞌ bega, lak ndun bexa ndab leꞌa xmen Dios parea naꞌanpa ta ugea‑yá. Leꞌa bexa li ndun ndontsa iniꞌí be men leꞌa bexa lá ndaw wizh wa. Ná leꞌa naꞌ gáp leꞌa ta wen níꞌi be men ndoꞌ bexa wa, leꞌa ta weꞌetsa gun bexa gan.
MAT 6:17 Naꞌ leꞌa bego zha na li lá gaw bega, ndi ulo bega ta uxeꞌe gek bega, no udaꞌab bega ndoꞌ bega,
MAT 6:18 ndontsa naꞌanpa inaꞌ be men ti lá ngaw bega wizh wa. Nabtsa Dios inaꞌ ta li xagaꞌtsa ndun bega, cha gaꞌalka usaꞌa Dios ta ikaꞌa bega.
MAT 6:19 ’Lá yunjunt bega be ta sian ndoꞌ gizhliyo ndee, leꞌa mbes sazhaꞌa‑yá, no slen yasoꞌo‑yá, no ncho waꞌan sgowaꞌan‑a.
MAT 6:20 Ndi bin bega be ta nsak ndoꞌ Dios, li kochaꞌaw bega sian taꞌa gibeꞌa, sa na ni mbes lá guzhaꞌa‑yá, no ni yasoꞌo lá gaw‑a, no ni waꞌan lá kowaꞌan‑a.
MAT 6:21 Leꞌa sa kochaꞌaw bega be ta mas nsak cuent ten bega, leꞌa sa wa mas ncho tseꞌe gek bega.
MAT 6:22 ’Leꞌa ngusndoꞌ dub men leꞌa nak xeꞌa ten xa. Tal leꞌa ngusndoꞌ bega ta wen, leꞌa bega nkesea ndoꞌ xeꞌa.
MAT 6:23 Ná tal ngusndoꞌ bega naꞌanpa ta wen, leꞌa bega nkesea ndi sa ukaw. No tal xeꞌa ncho len ladoꞌo bega ndi nyak sa ukaw, ¡uzhebpa dub sa ukaw nkesea bega!
MAT 6:24 ’Naꞌan ton yoo gan gun tiꞌin ten top xa nibeꞌe xa. Leꞌa gal gor leꞌa xa ixee ladna ndoꞌ dub xa nsea ikweaꞌ ladna xa stub xa, no uxobgek xa ndoꞌ dubtsa xa nsea lá uxobgek xa ndoꞌ stub xa wa. Liga tal leꞌa bega nkwaꞌan sian med, leꞌa bega lá yoo gan gun tiꞌin ndoꞌ Dios.
MAT 6:25 ’Ta weꞌe gáp naꞌ ndoꞌ bega, lá yuꞌ ladna bega xtaꞌan gaw bega no xtaꞌan goo bega ndontsa iban bega. No ni lad gak bega lá yuꞌ ladna bega. ¿Lá iniꞌí bega zha leꞌa gealnaban ten bega mas nsak ndoꞌ be ta gaw bega, no leꞌa bega mas nsak ndoꞌ xab bega?
MAT 6:26 Binbeꞌe bega lak nak be migin ni lá ndas ma bid, no ni lá nteleꞌe ma ta gaw ma, no ni lá ndap ma sa nyochaꞌaw ta gaw ma. Ná leꞌa Dios Xus beuna nsob gibeꞌa ngawka bema. ¿Lá iniꞌí bega zha leꞌa ndoꞌ Dios leꞌa bega uzhebpa mas nsak ndoꞌ be migin?
MAT 6:27 ’¿Ton bega gun gan tal uzhebpa yuꞌ ladna bega gaꞌal bega stol metr?
MAT 6:28 ¿No xtaꞌan nyuꞌ ladna bega lad gak bega zha? Bwiꞌi bega ndoꞌ be géꞌe, ná xteꞌe ndiꞌibyaꞌal‑a, ná ni lá ndun‑a tiꞌin, no ni lá ndandeꞌe‑yá lad.
MAT 6:29 Ná leꞌa naꞌ gáp ndoꞌ bego leꞌa lat itea be lad uzhebpa wen ngok Salomón naꞌan dub lad chul lakta dub géꞌe.
MAT 6:30 Leꞌa Dios lita chul ndanno be géꞌe ndiꞌib geꞌe, ná ta gal geꞌa yabtoꞌog‑a cha yolꞌ‑a. ¿Lid mas uzheꞌeb gakno Dios bega, maska ndidotsa ndangea ladna bega xa?
MAT 6:31 Lá yuꞌ ladna bega xtaꞌan gaw bega no xtaꞌan goo bega no lad gak bega.
MAT 6:32 Leꞌa be men lá nchandoꞌ Dios itea be ta ndee nkwaꞌan bexa, ná leꞌa Tad Dios xa ncho gibeꞌa uniꞌíla xtaꞌan nkiꞌin bega.
MAT 6:33 Ndi bkwaꞌan bega xteꞌe uxobgek bega ndoꞌ Dios, no xteꞌe gun bega ta nlad xa. Weꞌe leꞌa Dios saꞌaka itea ta nkiꞌin bega wa.
MAT 6:34 Ta weꞌe lá yuꞌ ladna bega xteꞌe itid bega wizh geꞌa, leꞌa itea be wizh ncho ta itid bega. Leꞌa kadga wizh binbeꞌetsa bega be ta nsatid bega wizh wa.
MAT 7:1 ’Lá gab bega leꞌa be men lid leꞌa ndun, ndontsa naꞌanpa no Dios gab leꞌa bega lid leꞌa ndun.
MAT 7:2 Leꞌa lak ndab bego ndoꞌ be men, no liga gab Dios ndoꞌ bego. No lak ndanno bega be men, no liga gunno Dios bega.
MAT 7:3 ¿Xtaꞌan nwiꞌi bega gix tuzh ncho ndoꞌ ltsaꞌa bega zha, ná ni lá naꞌ bega leꞌa ndoꞌ bega ntsaw dub bleꞌa ya siꞌil?
MAT 7:4 ¿Xteꞌema yoo gan gab bega ndoꞌ ltsaꞌa bega: “Bsaꞌa ndoꞌ lu ko naꞌ gix tuzh ncho ndoꞌ lu”, ná leꞌa ndoꞌ bega ntsaw dub bleꞌa ya siꞌil?
MAT 7:5 Ndab bega ugap nak stubga men, ná leꞌa bega ndi mas ugap nak. Ned udob bega ya siꞌil ntsaw ndoꞌ bega, weꞌeta sun bega gan koꞌo bega gix tuzh ncho ndoꞌ ltsaꞌa bega.
MAT 7:6 ’Lá uluu bega diꞌizh ten Dios ndoꞌ bexa lá nsakyoꞌón‑a. Leꞌa bexa ndun lak ndun dub kuch, tal leꞌa dub men nchaꞌano dub ngusnik uyap ndoꞌ ma, leꞌa ma slako tsoꞌo‑yá, ni lá iniꞌí ma xtaꞌan‑a. No ta ndun bexa wa cuent ta ndun dub mbek ndawkeꞌa yaꞌa men gor ngaw xa ma.
MAT 7:7 ’Unab bega ta nkiꞌin bega ndoꞌ Dios, leꞌa Dios saꞌaka ta wa. Bkwaꞌan bega Dios, leꞌa bega szhealka xa. Utezh bega Dios, leꞌa Dios saknoka bega.
MAT 7:8 Leꞌa itea bexa na nab ta nkiꞌin na, leꞌa xa nkaꞌaka‑yá; leꞌa itea bexa nkwaꞌan Dios, leꞌa bexa nzhealka xa; leꞌa itea bexa nbezh Dios, leꞌa Dios ndaknoka.
MAT 7:9 ’Leꞌa bego na ndap meꞌed, tal leꞌa dub xmeꞌed bega inab dub pan, ¿cha saꞌa bega ndi dub geꞌ ndoꞌ meꞌed zha?
MAT 7:10 No tal leꞌa xmeꞌed bega inab dub mbeal, ¿cha saꞌa bega ndi dub mbeꞌal ndoꞌ meꞌed zha?
MAT 7:11 Leꞌa bego bexa ugap, ná sbeꞌen be ta wen nsaꞌa bega ndoꞌ be xin bega. Mata Dios Xus beuna nsob gibeꞌa saꞌa sbeꞌen be ta wen ndoꞌ bexa inab‑a.
MAT 7:12 ’Ta weꞌe utsin bin bega ndoꞌ be men lak nlad bego utsin gun be men ndoꞌ bega. Leꞌa ta ndee nak xan itea be ta unibeꞌe Dios, no be ta mluu bexa mbidiꞌizh sakndoꞌ Dios tiemp polta.
MAT 7:13 ’Bin bega juers yate bega toꞌo puert uyaꞌa. Ncho dub nes uxen nchaꞌa sa nsob dub puert uxen. Kwaꞌadpa men yate puert wa, ná leꞌa bexa wa yaꞌ ndoꞌ giꞌ.
MAT 7:14 No ncho dub nes uyaꞌa nchaꞌa sa nsob dub puert uyaꞌa. Uxee men izheal yate puert wa, ná leꞌa bexa wa gap gealnaban ndoꞌ Dios.
MAT 7:15 ’Lá ulaꞌach bega be men nkwiꞌin ndab leꞌa ndadiꞌizh sakndoꞌ Dios. Bchaꞌan nluꞌu bexa cuent borreg, ná leꞌa len ladoꞌo bexa leꞌa bexa ugiꞌi cuent dub mbee.
MAT 7:16 Leꞌa be ta ndun bexa wa, ta weꞌe sgondoꞌ bega ná xteꞌe nak xa, lak dub yagich naꞌanpa usaꞌa uv no ni ngus laꞌaw lá usaꞌa‑yá.
MAT 7:17 Liga itea be ya wen sbeꞌen ngus wentsa nsaꞌa. Ná leꞌa itea be ya na nsaꞌa ngus lá isuꞌu gaw be men, leꞌa ta wa sbeꞌen ngus weꞌetsaga nsaꞌa.
MAT 7:18 Leꞌa dub ya wen naꞌanpa nsaꞌa ngus lá isuꞌu gaw be men. No liga dub ya nsaꞌa ngus lá ndaw men lá yoo gan usaꞌaga ngus wen.
MAT 7:19 Leꞌa itea ya na lá nsaꞌa ngus wen, gal gor yabtoꞌog‑a cha yolꞌ‑a.
MAT 7:20 Liga nak bexa ukwiꞌin wa, leꞌa ta nduntsa xa sgondoꞌ bega xteꞌe nak xa.
MAT 7:21 ’Leꞌa kwaꞌad be men ndab leꞌa xa nak xmen naꞌ, parea naꞌanpa itea bexa wa yate sa nibeꞌe Dios gibeꞌa. Leꞌa sa wa yate bexa nxobgektsa ndoꞌ Dios Xus naꞌ xa nsob gibeꞌa.
MAT 7:22 Gal wizh wa leꞌa kwaꞌad bexa gab ndoꞌ naꞌ: “Tad, ¿lá iniꞌí go zha leꞌa besa juers ten ga mbidiꞌizh sakndoꞌ Dios, no juers ten ga ulantuꞌub besa mbi bxin, nsea sian be uyon mbin besa?”
MAT 7:23 Cha ndi gáp naꞌ ndoꞌ bexa wa: “Leꞌa naꞌ lá nchandoꞌ bega. Nat bxoꞌon bega wats naꞌ, bego xa ndun ta ugap.”
MAT 7:24 ’Leꞌa tal ton goꞌón ta ndáp naꞌ ndee, cha liga gun xa, leꞌa naꞌ gáp leꞌa xa wa nak cuent dub xabgiꞌi list, dub xa mbindeꞌe lid na ndoꞌ geꞌdaꞌa.
MAT 7:25 Ngol gor ulen gi, ngopyoꞌo nits yoꞌow, no ulen mbi siꞌil sa nde niꞌi wa, no ukeꞌa nits niꞌi wa, ná niꞌi wa naꞌankapa ilate, leꞌa xan‑a nsob ndoꞌ geꞌdaꞌa.
MAT 7:26 Ná leꞌa tal ton goꞌón ta ndáp naꞌ ndee, ná lá uxobgek bexa ndoꞌ‑yá, leꞌa xa wa cuent dub xa lá ndanbeꞌe, dub xa mbindeꞌe lid na ndoꞌ yux.
MAT 7:27 Ngol gor ulen gi, no ngopyoꞌo nits yoꞌow, no ulen mbi siꞌil sa nde niꞌi wa, no ukeꞌa nits niꞌi wa, cha ulate idub niꞌi.
MAT 7:28 Leꞌa gor mtayadiꞌizh Jesús ta ndee, leꞌa be men ndanseana xteꞌe ndadiꞌizh xa,
MAT 7:29 geal leꞌa ta ndadiꞌizh xa wa nluu leꞌa xa uzheꞌeb ndap juers, naꞌanpa lak ndadiꞌizh be mech ten ley.
MAT 8:1 Leꞌa gor nchaꞌlaꞌ Jesús bet wa, leꞌa kwaꞌad be men usankea tsoꞌo xa.
MAT 8:2 Cha ulen dub xabgiꞌi nsaꞌgea las na, leꞌa ta wa dub gealgizh nsaleaꞌ lepra. Cha msaxib xa ndoꞌ Jesús gast ndoꞌ yo ngol xtuzh xa, ndab xa: —Señor, tal go nlad yunyakna go naꞌ, leꞌa naꞌ uní leꞌa ga sunka gan.
MAT 8:3 Leꞌa Jesús cha mxoꞌob yaꞌa na tsoꞌo xa wa, cha ndab Jesús: —Nladka naꞌ yakna lu. ¡Nat myakna lu! Cha bi leꞌa gor wa leꞌa gealgizh wa cha mnitndoꞌ.
MAT 8:4 Leꞌa Jesús cha ndab ndoꞌ xa: —Blaꞌach, naꞌan ton ndoꞌ ná gudiꞌizh lu xteꞌe myakna lu. Ndi waꞌ ndoꞌ uleꞌay iniꞌí xa leꞌa lu myaklana. No biꞌi be man xnab lak unibeꞌe ley mkeꞌa Moisés usaꞌa be men zha nyakna bexa, ndontsa iniꞌí be men leꞌa lu myaklana.
MAT 8:5 Leꞌa gor na ulayaꞌ Jesús gezh Capernaum, leꞌa wats Jesús ulen dub soldad, dub xa Roma nibeꞌe dub gayoꞌoga be soldad. Cha unab xa ndoꞌ Jesús,
MAT 8:6 ndab xa: —Señor, leꞌa dub xa ndun tiꞌin ndoꞌ naꞌ uzheꞌeb kweaꞌ nsak. Leꞌa xa lá yoota gan isea, uzhebpa gealkweaꞌ nax niꞌí xa ta lid naꞌ.
MAT 8:7 Leꞌa Jesús cha ndab: —Naꞌ gaa yunyakna xa.
MAT 8:8 Ná leꞌa soldad wa cha ndab: —Señor, leꞌa naꞌ naꞌanpa isayaꞌ yate go len lid naꞌ. Nat gudtsa go yakna xa, leꞌa xa syakkana.
MAT 8:9 Leꞌa naꞌ ndee nxobgek ndoꞌ xa mas nibeꞌe ndoꞌ naꞌ. No ncho be soldad nibeꞌe naꞌ ndoꞌ na. Leꞌa gor na ndáp naꞌ ndoꞌ dub xa yaꞌ xa, leꞌa xa cha ndaꞌkaga. No gor na ndáp naꞌ giꞌid stub xa, leꞌa xa cha ndiꞌidkaga. No gor na nibeꞌe naꞌ ndoꞌ xa ndun tiꞌin ndoꞌ naꞌ, leꞌa xa wa cha ndunkaga ta li ndáp naꞌ wa.
MAT 8:10 Leꞌa gor na mbiꞌín Jesús ta wa, cha ngwanseana xa, ndab xa ndoꞌ be men nchankea tsoꞌo xa: —Leꞌa naꞌ gáp ndoꞌ bego, naꞌanpa izheal naꞌ ni dub xa Israel lndeꞌeta ngeꞌ ladna naꞌ.
MAT 8:11 No gáp naꞌ ndoꞌ bega leꞌa gal dub wizh leꞌa kwaꞌad be men itoꞌo lad nlen wizh no lad ndaꞌas wizh, cha kwe bexa wats Abraham no Isaac no Jacob sa nibeꞌe Dios gibeꞌa.
MAT 8:12 Naꞌ leꞌa bexa Israel, bexa na ndiꞌizh nsabndoꞌ yaꞌbe sa nibeꞌe Dios, leꞌa bexa wa ndi itatebe tsoꞌo juer sa ukaw. Cha goꞌon bexa gast ndeay bexa gaw bexa tant dub gealkweaꞌ siꞌil iniꞌí bexa.
MAT 8:13 Cha ndab Jesús ndoꞌ soldad nibeꞌe wa: —Nat byaꞌ ga, leꞌa lak mgeꞌ ladna go naꞌ, li gak‑a. Cha bi leꞌa gor wa leꞌa xa ndun tiꞌin ndoꞌ soldad wa cha myakna.
MAT 8:14 Cha nchaꞌa Jesús ta lid Pedr, cha uniꞌí Jesús xnazhaꞌap Pedr nax ndoꞌ loꞌon uzhebpa ncho xlea.
MAT 8:15 Cha mgal Jesús yaꞌa xa, cha mtoꞌo xlea xa. Leꞌa xagots wa cha ngwaste msaꞌa ta gaw bexa.
MAT 8:16 Leꞌa gor uyoꞌo teꞌal, leꞌa be men ulenno kwaꞌadpa bexa ncho mbi bxin ladoꞌo na. Leꞌa Jesús cha ulantuꞌub be mbi bxin nsea sbeꞌen diꞌizhtsa, no myunyakna xa itea bexa gizh.
MAT 8:17 Li ngok‑a lak ta polta ndab Isaías, xa mbidiꞌizh sakndoꞌ Dios: “Leꞌa xa leꞌa uloꞌo beuna ndoꞌ be gealgizh nsén beuna no be gealkweaꞌ nchono beuna.”
MAT 8:18 Leꞌa gor uniꞌí Jesús idub gangeak wats xa nde be men kwaꞌad, cha ndab xa ndoꞌ be xmen xa itakea bexa stub toꞌo lagun Galilea.
MAT 8:19 Weꞌe leꞌa dub mech ten ley cha ulen wats Jesús, ndab xa: —Mech, leꞌa naꞌ no isankea tsoꞌo go guniꞌi pa yaꞌ ga.
MAT 8:20 Leꞌa Jesús cha ndab: —Leꞌa be mbeas ndap geꞌed nyoꞌo na, no leꞌa be migin ndap be xuꞌun ten na, parea leꞌa Xa Myak Men Ndoꞌ Gizhliyo lá ndap sa uneꞌe xa.
MAT 8:21 Leꞌa stub xa na no nkeseano Jesús cha ndab: —Señor, blaꞌa ga ned yaꞌukaꞌach naꞌ xus naꞌ. Cha weꞌeta isankea naꞌ tsoꞌo ga.
MAT 8:22 Leꞌa Jesús cha ndab ndoꞌ xa wa: —Usankea tsoꞌo naꞌ. Blaꞌa leꞌa bexa lá ndap gealnaban ndoꞌ Dios ukaꞌach ltsaꞌa ngut na.
MAT 8:23 Leꞌa Jesús cha ukea ndoꞌ barco no be xmen xa, cha nchaꞌbe bexa ndoꞌ nits.
MAT 8:24 Leꞌa sa wa cha ulen dub mbi siꞌil gast nyoꞌo nits wa len barco. Ná leꞌa Jesús ndi naxyats.
MAT 8:25 Leꞌa be xmen xa cha mkwaꞌan xa, ndab bexa: —¡Señor, lá ulaꞌa ga gat beuna, leꞌa beuna ngi slaꞌyoꞌo len nits!
MAT 8:26 Leꞌa Jesús cha ndab: —¿Xtaꞌan lbaꞌata nzheb bega zha? ¿Lid ndangea ladna bega naꞌ zha? Weꞌe cha ngwaste xa, uteyo xa mbi no nits, cha uleas mbi no ndon xe ute nits.
MAT 8:27 Leꞌa bexa wa cha ngwanseana, ndab bexa ndoꞌ be ltsaꞌa xa: —Wen, ¿tonxá xa ndee zhaga, gast mbi nsea nits nxobgek ndoꞌ diꞌizh ten xa?
MAT 8:28 Leꞌa gor ulayaꞌ bexa stub toꞌo lagun sa nibeꞌe gezh Gadara, weꞌe cha ulen top xabgiꞌi wats Jesús, utoꞌo bexa lat be geꞌloꞌo sa ngaꞌach be men ngut. Leꞌa bexa wa ncho mbi bxin len ladoꞌo bexa, no uzhebpa ugiꞌi bexa, gast ni dub men lá yoo gan itid nes nax sa wa.
MAT 8:29 Cha ugeꞌ ndab bexa ndoꞌ Jesús: —¿Xtaꞌan ngi besa nsea ugal lu zha, Jesús Xin Dios? ¿Nsea utsaksi lu besa, zha biseata gal wizh li gun lu?
MAT 8:30 Leꞌa gax sa wa ndeseayaw kwaꞌadpa kuch.
MAT 8:31 Cha ndab be mbi bxin wa ndoꞌ Jesús: —Tal leꞌa lu kontuꞌub besa, blaꞌa yate besa len be kuch baꞌ.
MAT 8:32 Leꞌa Jesús cha ndab: —Waꞌbe bega. Leꞌa be mbi bxin wa cha utoꞌo ladoꞌo be xabgiꞌi wa, cha uyoꞌo beya len be kuch wa. Leꞌa itea be kuch wa cha karrel nchaꞌa gek dub weꞌa toꞌo nits. Cha ubix bema gast len nits ulaꞌyoꞌo bema, cha ngut bema.
MAT 8:33 Leꞌa bexa nkeno kuch wa cha mxoꞌon. Ngol gezh wa cha mbidiꞌizh bexa itea be ta uyoꞌo wa, gast xteꞌe myakna bexa ncho mbi bxin len ladoꞌo na.
MAT 8:34 Leꞌa kwaꞌadpa bexa gezh wa cha utoꞌo nchaꞌbe sa nsoꞌ Jesús. Leꞌa gor uniꞌí bexa Jesús, cha unab bexa ikaꞌan xa sa wa.
MAT 9:1 Leꞌa Jesús cha ukeagal ndoꞌ barco wa, cha utakea xa stub toꞌo lagun, nseaꞌ xa gezh Capernaum sa ncho xa.
MAT 9:2 Leꞌa sa wa cha ulenno pla be men dub xabgiꞌi gizh lá yoo gan isea, nax ndoꞌ dub yaloꞌon. Leꞌa Jesús cha mnaꞌla leꞌa bexa ngeꞌ ladna leꞌa Jesús sun gan yunyakna xa gizh wa, cha ndab Jesús ndoꞌ xa gizh wa: —Amig, bten ladna lu, leꞌa ke ten lu myuꞌula.
MAT 9:3 Weꞌe leꞌa pla be mech ten ley nde sa wa cha mbinbeꞌebe: “Leꞌa ta ndab xa baꞌ uzheꞌeb dub taꞌa lá nsak ladna Dios.”
MAT 9:4 Ná leꞌa Jesús mgenna xteꞌe ndanbeꞌe bexa wa, cha ndab Jesús: —¿Xtaꞌan lbaꞌa ugap ndanbeꞌe bega len ladoꞌo bega zha?
MAT 9:5 ¿Xtaꞌan mas lid bid gáp naꞌ leꞌa ke ten xa ndee myuꞌula, nati gáp naꞌ gaste xa, cha isea xa?
MAT 9:6 Leꞌa nat iniꞌí bego leꞌa naꞌ, Xa Myak Men Ndoꞌ Gizhliyo, no syoꞌo gan utsuꞌu ke ten be men. Cha ndab Jesús ndoꞌ xa gizh wa: —Goste, cha udob yaloꞌon ten lu baꞌ, cha byaꞌ ta lid lu.
MAT 9:7 Leꞌa xa cha ngwaste, cha nseaꞌ xa ta lid xa.
MAT 9:8 Leꞌa gor uniꞌí be men ta wa, cha uzhebpa ngwanseana bexa, no ndab bexa leꞌa Dios uzheꞌeb dub Dios siꞌil ta na li msaꞌa xa juers ndoꞌ men.
MAT 9:9 Leꞌa gor nchaꞌa Jesús cha uniꞌí xa dub xa nsaleaꞌ Mateo nsobyun tiꞌin nsen xa med nkix be men ndoꞌ gobier Roma. Cha ndab Jesús ndoꞌ xa: —¡Utsea! ¡Usankea tsoꞌo naꞌ! Leꞌa Mateo cha ngwasoꞌ, cha usankea xa tsoꞌo Jesús.
MAT 9:10 Ngol tsoꞌo wa leꞌa Jesús nsea be xmen xa ngwaꞌdaw ta lid Mateo. Leꞌa sa wa no kwaꞌad bexa ndun ltsaꞌa tiꞌin ndun Mateo wa ngwaꞌbe, no kwaꞌadta bexa na ndab be men ugap nak bexa.
MAT 9:11 Leꞌa gor uniꞌí bexa fariseo ta wa, cha ndab bexa ndoꞌ be xmen Jesús: —¿Xtaꞌan lbaꞌa ndawno mech ten bega bexa nsen med no bexa ugap baꞌ zha?
MAT 9:12 Ná leꞌa Jesús mbiꞌín ta ndab bexa wa, cha ndab Jesús: —Leꞌa bexa naꞌanpa gizh lá nkiꞌin doctor, ndi leꞌa bexa gizh nkiꞌinka xa wa.
MAT 9:13 Waꞌutsid bega ná xteꞌe gab diꞌizh ten Dios, sa ndab Dios: “Leꞌa naꞌ mas nlad ikweaꞌ ladna bega men, ndoꞌ lak nlad naꞌ usaꞌa bega man xnab ndoꞌ naꞌ.” Leꞌa naꞌ naꞌanpa ndaltezh bexa ndanbeꞌe leꞌa lá ndap ke. Leꞌa naꞌ ndi ndaltezh bexa ngondoꞌ leꞌa ndapka ke, ndontsa yach bexa wats Dios.
MAT 9:14 Weꞌe leꞌa pla be xmen Juan xa ulaleaꞌ be men wa cha ulen ndabbe ndoꞌ Jesús: —Leꞌa besa ndee no bexa fariseo ncho sian be wizh lá ndaw besa. Ná leꞌa be xmen ga zha, ¿xtaꞌan lid no bexa li ndun ta wa?
MAT 9:15 Leꞌa Jesús cha ukaꞌab ndab: —¿Nsak bega zha leꞌa dub sa nchilyaꞌa men leꞌa bexa nde sa wa nsabndoꞌ uban yoo ladna, zha bi ncho xabgiꞌi nchilyaꞌa wa? Parea gal dub wizh leꞌa be men goꞌo xabgiꞌi mchilyaꞌa wa. Leꞌa zha weꞌe leꞌa be men nde sa wa lá gaw dub tiemp.
MAT 9:16 ’Naꞌan ton ngo ramient dub lad gox nsea dub bleꞌa lad kub, leꞌa lad kub wa syaꞌad, cha ndi mas stsaw‑a lad gox wa.
MAT 9:17 No naꞌan ton ngo vin kub len dub bols gid gox, leꞌa bich ten vin kub wa stsaw bols gid gox wa. Leꞌa vin wa cha ibid stsiꞌi no sazhaꞌa bols gox wa. Leꞌa vin kub wa nsabndoꞌ yoꞌo len bols gid kubga, ndontsa ni dub‑a lá gazhaꞌa.
MAT 9:18 Ndalen li nsoꞌyadiꞌizh Jesús, leꞌa dub xabgiꞌi nsak ten bexa judio ulen, cha usaxib xa ndoꞌ Jesús, ndab xa: —Leꞌa meꞌed gots ten naꞌ tiꞌi ngutma. Waꞌ una uxoꞌob ga yaꞌa ga tsoꞌo meꞌed, ndontsa iban meꞌed.
MAT 9:19 Weꞌe leꞌa Jesús no be xmen xa cha nchaꞌano xa wa.
MAT 9:20 Leꞌa toꞌo nes wa nsoꞌ dub xagots nsak gealgizh nleꞌa xa ten idub dub tibtopla liꞌin. Leꞌa xa ubii ndi tsoꞌo Jesús, cha mgal xa ndats xab Jesús,
MAT 9:21 leꞌa xa mbinbeꞌe tal leꞌa xa ugal masa xab Jesús, leꞌa xa syakkana.
MAT 9:22 Ná leꞌa Jesús cha mgeaksoꞌ mwiꞌi ndoꞌ xa, cha ndab Jesús: —Xagots, bten ladna lu, leꞌa ta na mgeꞌ ladna lu naꞌ, ta weꞌe mbin myakna lu. Cha bi leꞌa gor wa myakna xa.
MAT 9:23 Ngol gor ulayaꞌ Jesús ta lid xabgiꞌi nsak wa, leꞌa Jesús cha uniꞌí bexa ndoꞌol bzhee, no xteꞌeta ugeꞌ ndeyoꞌon be men.
MAT 9:24 Cha ndab Jesús ndoꞌ bexa wa: —Utate bega, leꞌa meꞌed baꞌ naꞌanpa ngut, leꞌa meꞌed ga naxyats. Leꞌa be men wa cha ndi mxiꞌidno Jesús.
MAT 9:25 Ná leꞌa gor utatela bexa, cha uyoꞌo Jesús len niꞌi, cha usen xa yaꞌa meꞌed, cha ngwaste meꞌed.
MAT 9:26 Leꞌa ta li mbin Jesús wa mgen itea be gezh nde gax sa wa.
MAT 9:27 Leꞌa gor utoꞌo Jesús sa wa leꞌa top xabgiꞌi lá naꞌ nseabenkea tsoꞌo Jesús, ugeꞌ ndab bexa: —¡Xin David! ¡Blats ladna go besa!
MAT 9:28 Leꞌa gor uyoꞌo Jesús len niꞌi, cha ulen bexa wa wats Jesús. Leꞌa Jesús cha ndab ndoꞌ bexa: —¿Ndangea ladna bega leꞌa naꞌ sun gan yakna bega zha? Leꞌa bexa cha ndab: —Señor, leꞌa besa ndangeaka ladna‑yá.
MAT 9:29 Leꞌa Jesús cha mgal ngusndoꞌ bexa, ndab Jesús: —Nat yakna bega lak ndangea ladna bega‑yá.
MAT 9:30 Cha mnaꞌla bexa. Leꞌa Jesús cha uzhebpa ndab lá gudiꞌizh bexa‑yá ndoꞌ ni dub men.
MAT 9:31 Ná leꞌa gor nseaꞌbe bexa, cha mbidiꞌizh bexa ta li mbin Jesús wa ndoꞌ itea be men ncho gax sa wa.
MAT 9:32 Leꞌa gor utoꞌo itop be xabgiꞌi sa wa, weꞌe leꞌa stapla be men ulenno dub xabgiꞌi mud, ncho mbi bxin len ladoꞌo na.
MAT 9:33 Leꞌa Jesús cha ulantuꞌub mbi bxin len ladoꞌo xa wa, cha usaxan ndadiꞌizh xabgiꞌi wa. Leꞌa be men uzhebpa ndanseana, ndab bexa: —¡Ta ndee dub ta nunk beuna gol niꞌí idub Israel ndee!
MAT 9:34 Ná leꞌa bexa fariseo ndabbe: —Leꞌa juers ten maxuꞌu na nibeꞌe be mbi bxin ngontuꞌub Jesús be mbi bxin len ladoꞌo be men.
MAT 9:35 Tsoꞌo wa leꞌa Jesús ukesea itea be gezh ubiꞌi no be gezh byux sa wa, mluu xa be men len be niꞌi sa nzhealbe bexa judio be gezh wa. Mbidiꞌizh xa diꞌizh wen ten Dios ná xteꞌe gak bexa dub xa leꞌa Dios nibeꞌe, no myunyakna xa be men nsén isandoꞌ gealgizh no be gealkweaꞌ.
MAT 9:36 Leꞌa gor uniꞌí Jesús be men kwaꞌad, cha mlats ladna Jesús bexa, leꞌa bexa nyuꞌ ladna no ni lá iniꞌí bexa xteꞌe gun bexa, cuent be borreg ni lá ndap ton ulaꞌach ma.
MAT 9:37 Cha ndab Jesús ndoꞌ be xmen na: —Ncho kwaꞌad be men gol goꞌón diꞌizh wen ten Dios, nak bexa cuent sianpa be taꞌa iganleꞌe, parea leꞌa bexa gun tiꞌin wa platsa.
MAT 9:38 Ta weꞌe unab bega ndoꞌ Dios Xwan tiꞌin utuꞌubta xa bexa gun tiꞌin ndee.
MAT 10:1 Weꞌe leꞌa Jesús cha utezh isatibtop be xmen xa, cha msaꞌa xa juers ndoꞌ bexa kontuꞌub bexa be mbi bxin, no yunyakna bexa be men nsén isandoꞌ gealgizh no be gealkweaꞌ.
MAT 10:2 Leꞌa bexa wa bexa mtuꞌub Jesús, gun bexa tiꞌin ten Dios. Leꞌa ta wa Simón Pedr, no Ndres wit xa; nsea Jacob no Juan wit Jacob be xin Zebedeo.
MAT 10:3 Nsea Julip no Bartol no Tomás no Mateo xa nsen med nkaꞌa gobier Roma, no Jacob xin Alfeo, no Lebeo xa no nsaleaꞌ Tadeo.
MAT 10:4 No Simón xa partid Caná, nsea Judas Iscariot, xa na leꞌa myun cuent Jesús tsoꞌo wa.
MAT 10:5 Leꞌa isatibtop bexa wa mtuꞌub Jesús, ndab Jesús xteꞌe gun bexa, ndab xa: —Lá yaꞌbe bega sa ndencho bexa naꞌanpa xa judio, ni lá yaꞌ bega be gezh ten bexa Samaria.
MAT 10:6 Ndi waꞌbe bega sa ndencho bexa Israel, bexa nak cuent be borreg ulaꞌ.
MAT 10:7 Cha bidiꞌizh bega ndoꞌ bexa wa leꞌa zha inibeꞌe Dios ladoꞌo be men yá gaxla nak.
MAT 10:8 No byunyakna bega bexa gizh, no bexa nsén gealgizh lepra. No uxiste bega bexa tiꞌi ngut. No ulantuꞌub bega be mbi bxin len ladoꞌo be men. Lak naꞌanpa ikix bega nsa naꞌ juers ndee ndoꞌ bega, no liga gaꞌbin bega be ta wa naꞌanpa kix bexa ndoꞌ bega.
MAT 10:9 ’Lá goꞌo bega ni med oro, ni plata, ni cobre,
MAT 10:10 no ni bols goꞌo bega nes. No ni lá goꞌo bega top nes xab bega, no ni stub nes ndab bega, ni bordón lá goꞌo bega. Leꞌa dub xa ndun tiꞌin nsabndoꞌ yax ten na.
MAT 10:11 ’Leꞌa guniꞌi xá gezh ná ilayaꞌ bega, tal gezh siꞌil‑a natal gezh tuzh‑a, bkwaꞌan bega dub men utsin nak, cha uyoꞌo bega ta lid xa gast zha ikaꞌan bega gezh wa.
MAT 10:12 Leꞌa gor na yoo bega len dub niꞌi, cha utsin unidiꞌizh bega ndoꞌ xa ncho sa wa.
MAT 10:13 Leꞌa tal xa utsin ndanno bega, weꞌe leꞌa xa wen yoo ladna. Ná tal leꞌa xa naꞌanpa utsin ndun, leꞌa xa wa naꞌanpa wen yoo ladna.
MAT 10:14 ’Ná tal be men wa lá utsin ndanno bega no ni lá ulaꞌach xa ta gudiꞌizh bega, bkaꞌan bega sa wa guniꞌi tal ta lid dub men‑a no tal dub gezh‑a. Cha blate bega gast yakol ngwaꞌal xoꞌo bega, ta uluu leꞌa Dios lá nsak ladna lak nak bexa wa.
MAT 10:15 Leꞌa naꞌ gáp ndoꞌ bega leꞌa gal wizh gab Dios ná ton ndap ke, leꞌa bexa gezh wa mas gealkweaꞌ iniꞌí ndoꞌ bexa uyoꞌo gezh Sodoma nsea gezh Gomorra.
MAT 10:16 ’Blaꞌach bega leꞌa naꞌ ntuꞌub bega yaꞌbe bega cuentta be borreg nde lat be mbee. Ta weꞌe list gok bega cuentta list be uzhib. No bchaꞌan gok bega lakta bchaꞌan nak be palom.
MAT 10:17 No gop bega cuent ndoꞌ be men, bexa na yun cuent bega ndoꞌ bexa naktiꞌin, no kin bexa bega len be niꞌi sa nzhealbe bexa judio.
MAT 10:18 Leꞌa bexa gast ndoꞌ bexa naktiꞌin ubiꞌi no ndoꞌ bexa mas leꞌa nibeꞌe goꞌo bega ke na nak bega xmen naꞌ. Leꞌa gor weꞌe sak gudiꞌizh bega cuent ten naꞌ ndoꞌ bexa wa no ndoꞌ kwaꞌadta bexa naꞌanpa xa judio.
MAT 10:19 Parea leꞌa gor na yun bexa cuent bega, lá yuꞌ ladna bega xteꞌe ikaꞌab bega, leꞌa gal gor wa leꞌa Dios leꞌa usaꞌa diꞌizh ikaꞌab bega.
MAT 10:20 Leꞌa ta gudiꞌizh bega wa naꞌanpa ta ndanbeꞌetsa bega, leꞌa ta wa ndi ta usaꞌa Espíritu ten Dios Xus beuna gudiꞌizh bega.
MAT 10:21 ’Leꞌa ncho be men leꞌaka wit na yun cuent gat xa ke ndangea ladna xa naꞌ. No nchoga bexa liga yun cuent leꞌaka xin na. No ncho bexa leꞌakaga gaklono xus na gast gab bexa gat xus bexa.
MAT 10:22 No itea be men ixeeno ladna bega ke na ndangea ladna bega naꞌ. Ná leꞌa tal ton bega uxik ndoꞌ be gealkweaꞌ wa, leꞌa bega gap gealnaban ndoꞌ Dios.
MAT 10:23 Leꞌa zha na ugap gunno bexa bega dub gezh, bxoꞌon bega, waꞌ bega stubga gezh. Leꞌa naꞌ gáp ndoꞌ bega leꞌa zha biseata itid bega itea be gezh Israel, leꞌa naꞌ, Xa Myak Men Ndoꞌ Gizhliyo, ilengal.
MAT 10:24 ’Leꞌa dub xin utsid dub mech naꞌanpa mas nsak ndoꞌ mech ten na. No liga leꞌa dub mos naꞌanpa mas nsak ndoꞌ xa nibeꞌe ten xa.
MAT 10:25 Leꞌa xin utsid dub mech itid lak ntid mech wa. No liga dub mos itid lak ntid xa nibeꞌe ten xa. Tal leꞌa be men níꞌi ndoꞌ naꞌ ndee maxuꞌu Beelzebú, matagal ndoꞌ bega nak be xmen naꞌ, ¿xteꞌema ugap gab bexa wa?
MAT 10:26 ’Lá izheb bega ndoꞌ be men, leꞌa itea be ta ugaꞌach, leꞌa gal gor leꞌa be ta wa uluꞌukabe. No itea be taꞌa ngachyoꞌo, leꞌa gal gor leꞌa be men iniꞌíka ta wa.
MAT 10:27 Leꞌa be ta ndáp naꞌ ndoꞌ bega gor teꞌal, gud bega‑yá gor tezhea ndoꞌ be men. Leꞌa be ta xgaꞌach ndoꞌón bega, gast gek niꞌi usoꞌ bega ugeꞌ gudiꞌizh bega‑yá.
MAT 10:28 Lá izheb bega ndoꞌ be men. Leꞌa bexa sun gan gut bexa bega, ná leꞌa gealnaban ncho len ladoꞌo bega leꞌa bexa wa lá gun gan gut. Ndi mas bzheb bega ndoꞌ Dios xa na sun gan gut be men, cha utsaꞌab xa gealnaban ten bexa infierno.
MAT 10:29 ’Leꞌa top migin nzheꞌa dub med tuzh, parea ni dub bema lá gat tal Dios lá ulaꞌa gat ma.
MAT 10:30 Leꞌa Dios uzhebpa nlaꞌach bega gast uniꞌí xa plo gichgek bega ncho.
MAT 10:31 Ta weꞌe lá izheb bega, leꞌa bega mas nsak ndoꞌ be migin.
MAT 10:32 ’Leꞌa tal ton gab ndoꞌ gaꞌal be men leꞌa xa xmen naꞌ, leꞌa naꞌ noga gáp ndoꞌ Xus naꞌ xa nsob gibeꞌa leꞌa xa wa xmenka naꞌ.
MAT 10:33 Ná leꞌa tal ton gab ndoꞌ be men leꞌa xa naꞌanpa xmen naꞌ, leꞌa naꞌ noga gáp ndoꞌ Xus naꞌ xa nsob gibeꞌa leꞌa xa wa naꞌanpa xmen naꞌ.
MAT 10:34 ’Lá gunbeꞌe bega leꞌa naꞌ ndal por na uzheꞌeb wen kwe be men ndoꞌ gizhliyo. Leꞌa naꞌ ndi ndal leꞌa be men iteltsaꞌa.
MAT 10:35 Leꞌa naꞌ ndal leꞌa be xabgiꞌi kuyono leꞌaka xus na, leꞌa be xagots kuyono leꞌaka xnaꞌa na, leꞌa xinxix xa kuyono leꞌaka xnazhaꞌap xa.
MAT 10:36 Leꞌa bexa na mas gakloo ndoꞌ dub men, leꞌa ta wa leꞌaka bexa ta lid xa.
MAT 10:37 ’Leꞌa tal ton mas ndankea xus na no xnaꞌa na ndoꞌ lak ndankea xa naꞌ, leꞌa xa wa naꞌanpa isayaꞌ gak xmen naꞌ. Liga tal ton mas nkweaꞌ ladna be xmeꞌed na ndoꞌ naꞌ, leꞌa xa wa naꞌanpa isayaꞌ gak xmen naꞌ.
MAT 10:38 Tal leꞌa bego lá goꞌo cruz ten na, cha lá isankea bega tsoꞌo naꞌ, leꞌa bega lá isayaꞌ gak xmen naꞌ.
MAT 10:39 Leꞌa tal ton ukwaꞌan xteꞌe wen yoo xa, leꞌa xa wa ndi gun perdid gealnaban ten na ndoꞌ Dios. Ná tal ton gat geal ndangea ladna xa naꞌ, leꞌa xa wa gap gealnaban ndoꞌ Dios.
MAT 10:40 ’Leꞌa tal ton utsin gak ndoꞌ bega, leꞌa ta wa cuentkata ndoꞌ naꞌ utsin nak xa. No liga leꞌa tal ton utsin nak ndoꞌ naꞌ, leꞌa xa wa utsinga nak ndoꞌ Dios xa mtuꞌub naꞌ.
MAT 10:41 Leꞌa tal ton utsin gak ndoꞌ dub profet geal profet xa, leꞌa Dios no ndoꞌ xa wa usaꞌa ltsaꞌa ta usaꞌa Dios ndoꞌ be profet. No liga tal ton utsin gak ndoꞌ dub xa wen geal wen xa, leꞌa Dios no ndoꞌ xa wa usaꞌa ltsaꞌa ta usaꞌa Dios ndoꞌ bexa wen.
MAT 10:42 Leꞌa tal ton usaꞌa masa dub vas nits myalꞌ goo dub xmen naꞌ, geal leꞌa xa xmen naꞌ, leꞌa naꞌ gáp ndoꞌ bega leꞌa Dios usaꞌaka ta wen nsabndoꞌ ikaꞌa xa.
MAT 11:1 Leꞌa gor na mtayadiꞌizh Jesús ndoꞌ isatibtop be xmen xa ná xteꞌe nsabndoꞌ gun bexa, cha utoꞌo xa nchaꞌuluu xa be men be gezh nde gax wa.
MAT 11:2 Leꞌa zha wa leꞌa Juan xa na ulaleaꞌ be men wa nkea litgiꞌib. Leꞌa gor na mbiꞌín xa be taꞌa ndun Jesucristo, cha mtuꞌub xa top xmen xa,
MAT 11:3 ngwaꞌ inabdiꞌizh bexa ndoꞌ Jesús, ndab bexa: —¿Go nak xa na ndab Dios ilen wa zha? ¿Nati kweas besa ilen stubga xa?
MAT 11:4 Leꞌa Jesús cha ukaꞌab ndab: —Byaꞌbe bega, cha gud bega ndoꞌ Juan ta naꞌ bega no ta ndoꞌón bega.
MAT 11:5 Leꞌa bexa lá yoo gan iwiꞌibe, nat leꞌa bexa naꞌla. Leꞌa bexa lá yoo gan isea, nat leꞌa bexa nseala. Leꞌa bexa nsén gealgizh lepra, nat leꞌa bexa myaklana. Leꞌa bexa ngwaꞌad, nat leꞌa bexa ndoꞌónla. Leꞌa bexa ngut, nat leꞌa bexa nbanla. No bexa uban nak ndoꞌón diꞌizh wen ten Dios.
MAT 11:6 Uzhebpa wen yoo ladna tal ton igondoꞌ ton nak naꞌ.
MAT 11:7 Leꞌa gor nseaꞌbe itop be xmen Juan, leꞌa Jesús cha usaxan mbidiꞌizh ndoꞌ be men cuent ten Juan, ndab xa: —Leꞌa gor na ngwaꞌbe bega geꞌe sa uxee ncho men, ¿xtaꞌan ngwaꞌiwiꞌi bega zha? ¿Dub yalod nkwiꞌin mbi?
MAT 11:8 Nati, ¿xtaꞌan ngwaꞌiwiꞌi bega zha? ¿Dub xabgiꞌi nak dub lad uzhebpa uyap nsak? Leꞌa bega uniꞌíka leꞌa bexa ndak lad uyap wa, leꞌa bexa wa ncho ta lid bexa nibeꞌe.
MAT 11:9 ¿Xtaꞌan ngwaꞌiwiꞌi bega zha? ¿Ngwaꞌiwiꞌi bega dub xa ndadiꞌizh sakndoꞌ Dios zha? Leꞌa naꞌ gáp ndoꞌ bega leꞌa Juan ta ugeaka ndadiꞌizh sakndoꞌ Dios, parea leꞌa xa mas nsak ndoꞌ iteata bexa li ndun wa.
MAT 11:10 Leꞌa diꞌizh ten Dios nkeaniꞌi ndab Dios cuent ten Juan: Bwiꞌi, leꞌa naꞌ utuꞌub dub xa yaꞌ ned ndoꞌ lu, uxaꞌal xa nes isea lu.
MAT 11:11 No gáp naꞌ ndoꞌ bega leꞌa lat be men ngol ndoꞌ gizhliyo naꞌan ni stub xa mas nsak ndoꞌ Juan xa ulaleaꞌ be men. Ná leꞌa tal ton uxee nsak lat bexa nibeꞌe Dios, leꞌa cuent ten Dios leꞌa xa wa mas nsak ndoꞌ Juan.
MAT 11:12 ’Leꞌa zha ulen Juan xa ulaleaꞌ be men wa no gast nat, leꞌa ncho bexa ngiꞌi nka inibeꞌe Dios be men, nlad bexa initndoꞌ ta nibeꞌe Dios be men.
MAT 11:13 Leꞌa ta mkeꞌa itea bexa mbidiꞌizh sakndoꞌ Dios no ley mkeꞌa Moisés wa mbidiꞌizh xteꞌe nibeꞌe Dios be men gast zha ulen Juan.
MAT 11:14 Leꞌa tal bega nlad gungea ladna‑yá, leꞌa Juan leꞌa nak Elí, xa na ndab be profet giꞌidka.
MAT 11:15 Bego na ndap nchaꞌ na, blaꞌach bega ta ndáp naꞌ ndee.
MAT 11:16 ’¿Xtaꞌanma dub ta nak cuent ta ndun be men ncho nat? Leꞌa bexa wa nak cuent be meꞌed nde ndoꞌ xgeꞌe, ugeꞌ ndab be meꞌed ndoꞌ ltsaꞌa meꞌed:
MAT 11:17 “Mbiꞌil besa bzhee, ná leꞌa bega lá ngolndatsbe. No mbiltoꞌoga besa be cant uban nsea, ná leꞌa bega lá ngoꞌonga.”
MAT 11:18 Leꞌa zha ulen Juan ncho wizh lá ngaw xa, no ni lá ndo xa vin. Cha ndab bega leꞌa xa ncho mbi bxin len ladoꞌo na, ta weꞌe li ndun xa.
MAT 11:19 Ná leꞌa nat ndalga naꞌ, Xa Myak Men Ndoꞌ Gizhliyo. Leꞌa naꞌ ndaw, no ndoꞌo naꞌ, ná leꞌa bega ndab leꞌa naꞌ uzhebpa ndaw, no uzhebpa ndoꞌo naꞌ vin. Ndab bega leꞌa naꞌ nchealtsaꞌa bexa ugap nak, no bexa nsen med nkix be men ndoꞌ gobier Roma. Parea leꞌa bexa ndák lak nsaꞌa Dios, leꞌa be ta wen ndun bexa wa nluu leꞌa bexa ndákka.
MAT 11:20 Weꞌe cha usaxan uteyo Jesús bexa na ncho be gezh na mas sian be uyon mbin xa, geal leꞌa bexa wa ni lá ulaꞌa be ta ugap nak bexa. Ndab Jesús:
MAT 11:21 —¡Proꞌob bego xa gezh Corazín no gezh Betsaida! Tal be uyon mbin naꞌ lat bega wa ndi ngun naꞌ gezh Tiro no gezh Sidón, polta ngokla bexa lad nagats, no usobla bexa ndoꞌ diꞌ, ta uluu leꞌa bexa uban myoꞌo ladna no mlaꞌala bexa be ta ugap nak bexa.
MAT 11:22 Ta weꞌe gáp naꞌ leꞌa gal wizh gab Dios ná ton ndap ke, leꞌa bego xa gezh Corazín no gezh Betsaida mas uzheꞌeb iniꞌí gealkweaꞌ ndoꞌ bexa Tiro no Sidón wa.
MAT 11:23 No bego bexa gezh Capernaum, ¿ndanbeꞌe bega zha gibeꞌa yaꞌ bega? Leꞌa Dios ndi utsaꞌab bega infierno. Tal be uyon mbin naꞌ lat bega wa ndi ngak gezh Sodoma, nal gast gor nat bi nde gezh wa.
MAT 11:24 Leꞌa naꞌ gáp leꞌa gal wizh gab Dios ná ton ndap ke, leꞌa bega xa Capernaum wa mas uzheꞌeb iniꞌí gealkweaꞌ ndoꞌ bexa uyoꞌo gezh Sodoma.
MAT 11:25 Leꞌa zha wa cha ndab Jesús ndoꞌ Dios: —Nsa naꞌ xno ndoꞌ go, Xus naꞌ, go Xa Nibeꞌe gibeꞌa no gizhliyo, leꞌa go lá ulaꞌa leꞌa bexa ndák wa no bexa ntsid wa yakbeꞌena be ta ndee. Ndi mluu ga‑yá ndoꞌ bexa naꞌanpa ndák, bexa nak cuent be meꞌed.
MAT 11:26 Li ngok‑a, Xus naꞌ, geal leꞌa go li nlad gak‑a.
MAT 11:27 Cha ndab Jesús ndoꞌ be men nde sa wa: —Leꞌa Dios Xus naꞌ msaꞌa itea be taꞌa ndoꞌ naꞌ. No naꞌan ton nchandoꞌ naꞌ, nabtsa Dios nchandoꞌ naꞌ. No naꞌan ton nchandoꞌ Dios Xus naꞌ, nabtsa naꞌ xa nak Xin xa nchandoꞌ xa, no bexa na nlad naꞌ uluꞌu naꞌ ná ton nak Dios ndoꞌ bexa.
MAT 11:28 Utseabe itea bego na noꞌo be yoꞌo kweꞌa no mzhannabe, leꞌa naꞌ gakno bega uneꞌe ladoꞌo bega.
MAT 11:29 Bin bega lak nluu naꞌ bega, no btsid bega ndoꞌ naꞌ, leꞌa naꞌ bchaꞌan nak, no naꞌanpa zhin nak naꞌ. Li ndontsa uneꞌe ladoꞌo bega.
MAT 11:30 Leꞌa ta ndáp naꞌ ndoꞌ bego wa dub ta naꞌanpa bid gun bega, cuent dub yoꞌo ta uxaxtsa.
MAT 12:1 Leꞌa ngol dub wizh neꞌe be men, leꞌa Jesús nchaꞌtid sa nax dub bleꞌa yo ncho trig. Leꞌa be xmen Jesús ndannabe, ta weꞌe cha uxeꞌe bexa pla be bid ten trig, cha udaw bexa‑yá.
MAT 12:2 Leꞌa ncho bexa fariseo uniꞌí ta wa, cha ndab bexa ndoꞌ Jesús: —Bwiꞌi go ná xtaꞌan ndun be xmen go, ta lá nsabndoꞌ gun bexa wizh neꞌe beuna.
MAT 12:3 Ná leꞌa Jesús cha ukaꞌab ndab: —¿Ni lá ndoꞌol bega sa ndab diꞌizh ten Dios ta mbin David dub biaj zha na uzhebpa ndanna xa no bexa ndeseano xa zha?
MAT 12:4 Leꞌa David uyoꞌo len niꞌilad ten Dios, cha udaw xa be pan leꞌay, ta lá nsabndoꞌ gaw xa no bexa ndeno xa, nab be uleꞌay ndaw‑a.
MAT 12:5 ¿No ni lá ndoꞌol bega ndoꞌ ley ten Dios leꞌa be uleꞌay wa ndun tiꞌin len niꞌi ten Dios wizh neꞌe be men, ná leꞌa ta wa naꞌanpa dub ke?
MAT 12:6 Leꞌa naꞌ gáp ndoꞌ bega leꞌa sa ndee nat nchola dub xa mas nsak ndoꞌ niꞌi ten Dios wa.
MAT 12:7 Leꞌa diꞌizh ten Dios nkeaniꞌi ndab Dios: “Leꞌa naꞌ mas nlad ikweaꞌ ladna bega men, ndoꞌ lak nlad naꞌ usaꞌa bega xnab ndoꞌ naꞌ.” Tal leꞌa bega yakbeꞌena ta ndee wa, leꞌa bega lá gab ugap ndun bexa ndee, dub ta naꞌanpa dub ke.
MAT 12:8 Leꞌa naꞌ, Xa Myak Men Ndoꞌ Gizhliyo, noga nibeꞌe wizh neꞌe be men.
MAT 12:9 Cha nchaꞌa Jesús uyoꞌo xa len niꞌi sa nzhealbe bexa judio gezh wa.
MAT 12:10 Leꞌa sa wa nsob dub xabgiꞌi ubidya dub yaꞌa na. Leꞌa bexa fariseo nkwaꞌan ná xteꞌe usake bexa Jesús, cha unabdiꞌizh bexa ndoꞌ Jesús, ndab bexa: —¿Syoꞌo gan yunyakna men dub xa gizh wizh neꞌe beuna zha?
MAT 12:11 Leꞌa Jesús cha ukaꞌab ndab: —Tal leꞌa dub bega ndap dub borreg, cha ulaꞌyoꞌo ma len dub geꞌed wat wizh neꞌe beuna, ¿lid yaꞌloꞌo bega ma leꞌaka wizh wa zha?
MAT 12:12 ¿Lá iniꞌí bega zha leꞌa dub men uzhebpa mas nsak ndoꞌ dub borreg? Ta weꞌe leꞌa beuna syoꞌoka gan gakno stub xa be wizh neꞌe beuna.
MAT 12:13 Cha ndab Jesús ndoꞌ xa gizh dub yaꞌa na wa: —Bkea yaꞌa lu. Leꞌa xa wa cha mkea yaꞌa na, cha uxax myakna‑yá lak nak stub‑a.
MAT 12:14 Cha nseaꞌbe bexa fariseo, mzhealbe bexa mbidiꞌizh bexa xteꞌe gun bexa gan gat Jesús.
MAT 12:15 Leꞌa Jesús mgenna ta li nlad bexa gun bexa wa, ta weꞌe cha mkaꞌan xa sa wa. No kwaꞌad be men usankea tsoꞌo xa, cha myunyakna xa itea bexa gizh wa.
MAT 12:16 No uzhebpa ndab Jesús ndoꞌ bexa lá gudiꞌizh bexa ton myunyakna bexa.
MAT 12:17 Leꞌa ta wa ngok lak ndab profet Isaías polta, ndab Dios:
MAT 12:18 Bwiꞌi bego leꞌa xa ndee xa ndun tiꞌin ndoꞌ naꞌ, leꞌa naꞌ mti xa no nkweaꞌ lad naꞌ xa no ntenno lad naꞌ xa. Usa naꞌ Espíritu ten naꞌ yoo len ladoꞌo xa, leꞌa xa gudiꞌizh ndoꞌ be men, gab xa xteꞌe wen yaꞌan bexa ndoꞌ naꞌ.
MAT 12:19 Leꞌa xa ni lá kuyotoꞌo, no ni lá kwezhat xa; No ni naꞌanpa igen ti xa be nes.
MAT 12:20 Leꞌa xa wa bchaꞌan gak ndoꞌ bexa kweaꞌ ncho ladna, bexa nak cuent dub xos ya yamer gach, no cuent nak dub bealꞌ ndidotsa nsayolꞌ. Li utsin gak xa ndoꞌ bexa wa gast gal wizh gun xa gan leꞌa be men wa wen yaꞌan ndoꞌ Dios.
MAT 12:21 No idub ndoꞌ gizhliyo igeꞌ ladna be men xa.
MAT 12:22 Weꞌe leꞌa be men cha ulenno dub xabgiꞌi gizh wats Jesús. Leꞌa mbi bxin ncho len ladoꞌo xa wa mbin mud xa no lá naꞌ xa. Leꞌa Jesús cha myunyakna xa ndontsa naꞌ xa no níꞌi xa.
MAT 12:23 Leꞌa be men wa ngwatenaꞌbe, ndab bexa ndoꞌ be ltsaꞌa xa: —¿Syoꞌo gan gak xa ndee xin David xa ndiꞌizh utuꞌubka Dios zha?
MAT 12:24 Ná leꞌa gor na mbiꞌín bexa fariseo ta wa, cha ndab bexa ndoꞌ be ltsaꞌa xa: —Leꞌa Jesús ngontuꞌub be mbi bxin len ladoꞌo be men juers ten Beelzebú, maxuꞌu nibeꞌe be mbi bxin.
MAT 12:25 Leꞌa Jesús cha mgenna xteꞌe ndanbeꞌe bexa, cha ndab Jesús: —Tal leꞌa be xmen dub xa nibeꞌe iteltsaꞌabe, cha bi leꞌakaga bexa kuyo, weꞌe leꞌa bexa wa yá naꞌantapa gak juertbe. No tal leꞌa be men ncho dub gezh natal dubtsa niꞌi bi leꞌaka kuyobe, leꞌa juers ten bexa idub.
MAT 12:26 No liga tal leꞌa maxuꞌu kuyono leꞌaka be mbi bxin ten na, weꞌe leꞌa maxuꞌu wa no be mbi bxin wa iteltsaꞌabe, cha idub juers ten maxuꞌu.
MAT 12:27 Ndab bega leꞌa naꞌ ngontuꞌub be mbi bxin juers ten Beelzebú. ¿Ná ton nsaꞌa juers ngontuꞌub be xmen bega be mbi bxin wa zha? Ta weꞌe leꞌa ta na ndun be xmen bega wa leꞌa nluu leꞌa bega naꞌanpa utsin ndanbeꞌe.
MAT 12:28 Ná leꞌa naꞌ ngontuꞌub be mbi bxin juers ten Espíritu ten Dios, ta na nluu leꞌa Dios yá ngol tiemp inibeꞌe len ladoꞌo be men.
MAT 12:29 ’¿No xteꞌema yoo gan yate dub men len lid dub xabgiꞌi juert, kowaꞌan xa be ta ncho sa wa, tal men wa lid ned uxi xa juert wa zha? Lima syoꞌo gan kowaꞌan xa be taꞌa len lid xa juert wa.
MAT 12:30 ’Leꞌa tal ton lá nsak ladna be ta ndun naꞌ, leꞌa xa wa ndakloo ndoꞌ naꞌ. No liga leꞌa tal ton naꞌanpa ndakno naꞌ nyakjunt be men ndoꞌ Dios, leꞌa xa wa ndi ndun nsasit be men wats Dios.
MAT 12:31 ’Leꞌa naꞌ gáp ndoꞌ bego leꞌa itea be ta ugap ndun be men no itea be ta kweaꞌ níꞌi bexa, leꞌa ta wa dub ke syoꞌoka gan gungeꞌ ladna Dios. Ná leꞌa tal ton inisi Espíritu ten Dios, weꞌe leꞌa Dios lá gungeꞌ ladna ke wa.
MAT 12:32 Leꞌa tal ton inisi naꞌ ndee, Xa Myak Men Ndoꞌ Gizhliyo, leꞌa ke weꞌe syoꞌoka gan yuꞌu. Ná leꞌa tal ton inisi Espíritu ten Dios, leꞌa ke weꞌe yá lá yuꞌuta, ni tiemp ndee no ni tiemp ilen wa.
MAT 12:33 ’Leꞌa dub ya wen nsaꞌa sbeꞌen ngus wen. No dub ya naꞌanpa wen nsaꞌa sbeꞌen ngus lá yoo gan gaw men. Leꞌa be ngus ten dub ya nluu xá ya na‑yá.
MAT 12:34 ¡Leꞌa bego xa ugap cuent be uzhib! ¿Xteꞌema yoo gan gudiꞌizh bega be ta wen zha, ná bega bexa ugap? Leꞌa ta na ncho ladoꞌo dub men, ta weꞌetsa ndadiꞌizh xa.
MAT 12:35 Leꞌa be men wen wa ndadiꞌizh ta wen, lak ta wen ncho ladoꞌo xa. No liga leꞌa bexa ugap ndadiꞌizh be ta ugap, lak ta ugap ncho ladoꞌo xa.
MAT 12:36 Leꞌa naꞌ gáp leꞌa gal wizh gab Dios ná ton ndap ke, leꞌa itea be men isoꞌ ndoꞌ Dios gab bexa ná xtaꞌan mbidiꞌizh bexa itea be diꞌizh ugap.
MAT 12:37 Tal leꞌa bega ndadiꞌizh ta wen, weꞌe leꞌa Dios gab leꞌa bega naꞌanpa ndap ke. Ná tal leꞌa bega ndadiꞌizh ta ugap, weꞌe leꞌa Dios gab leꞌa bega ndapka ke.
MAT 12:38 Weꞌe ncho bexa fariseo no be mech ten ley ukaꞌab ndab ndoꞌ Jesús: —Mech, leꞌa besa nlad gun go dub ta uluu leꞌa go Dioska mtuꞌub.
MAT 12:39 Leꞌa Jesús cha ukaꞌab ndab: —Leꞌa be men ncho nat uzhebpa be men ugap no ndankea bexa be ta naꞌanpa ta ugeapa nak Dios. Unab bega gun naꞌ dub ta uluu na ton nak naꞌ, parea leꞌa naꞌ lá gun ta unab bega wa. Ndi iniꞌítsa bega leꞌa naꞌ itiꞌid ltsaꞌa ta utid Jonás, xa mbidiꞌizh sakndoꞌ Dios tiemp polta.
MAT 12:40 Lak uyoꞌo Jonás len dub mbeal siꞌil chon wizh no chon teꞌal, no liga leꞌa naꞌ, Xa Myak Men Ndoꞌ Gizhliyo, yoo len yo chon wizh no chon teꞌal.
MAT 12:41 ’Leꞌa gal wizh na gab Dios ná ton ndap ke, weꞌe leꞌa bexa uyoꞌo gezh Nínive wa gab leꞌa be men ncho nat ndee ugap nak. Leꞌa bexa Nínive mlaꞌa be ta ugap nak bexa, gor na mbiꞌín bexa diꞌizh ten Dios ta mbidiꞌizh Jonás. Ná leꞌa sa ndee nsoꞌ dub xa mas nsak ndoꞌ Jonás.
MAT 12:42 No gal wizh wa leꞌa xagots unibeꞌe be men lad sur isoꞌ, gab xa leꞌa bega ndee ndapka ke. Leꞌa xa wa uzhebpa sit utoꞌo ndontsa mbidyoꞌón xa ta mbidiꞌizh Salomón, be ta uzheꞌeb ngók xa. Leꞌa sa ndee nsoꞌ dub xa mas nsak ndoꞌ Salomón wa, ná leꞌa bega lá nsakyoꞌón ta ndab xa.
MAT 12:43 ’Leꞌa gor na ntoꞌo dub mbi bxin len ladoꞌo dub men, leꞌa ta wa cha nchaꞌa sa naꞌan men, nchaꞌkwaꞌan ná pa yoo na. Ná leꞌa gor na lá izheal pa yoo mbi bxin wa,
MAT 12:44 cha ndab mbi bxin wa: “Nsea naꞌ leꞌaka ta lid naꞌ sa utoꞌo naꞌ.” Leꞌa gor mtanseaꞌ mbi bxin wa, leꞌa ladoꞌo men wa cuent dub niꞌi tach, ndon umbiꞌi nak‑a no chul nsaxkwaꞌa‑yá.
MAT 12:45 Weꞌe leꞌa mbi bxin wa cha nchaꞌgiꞌi stub sgaꞌad be mbi bxin mas ugap nak, cha yoo be mbi bxin wa ladoꞌo men wa. Cha mas kweaꞌ yoo xa ndoꞌ lak zha ned wa. No liga yasea be men ugap ncho tiemp nat.
MAT 12:46 Bi li nsoꞌyadiꞌizh Jesús ndoꞌ be men, leꞌa xnaꞌa Jesús no be wit xa ulayaꞌ sa wa. Ndebe bexa tsoꞌo juer, nlad bexa gudiꞌizhno bexa Jesús.
MAT 12:47 Leꞌa dub men cha ndab ndoꞌ Jesús: —Unaꞌ go leꞌa xnaꞌa go no be wit ga ndebe tsoꞌo juer ndee nlad gudiꞌizhno ga.
MAT 12:48 Leꞌa Jesús cha ukaꞌab ndab ndoꞌ xa wa: —Leꞌa naꞌ gáp ndoꞌ go ná ton xa na ta ugeaka nak xnaꞌa naꞌ nsea be wit naꞌ.
MAT 12:49 Cha mluyaꞌa Jesús be xmen xa ndab xa: —Leꞌa bexa nde ndee nak xnaꞌa naꞌ no be wit naꞌ.
MAT 12:50 Leꞌa itea bexa ndun lak nlad Xus naꞌ xa nsob gibeꞌa, bexa weꞌe nak wit naꞌ no bsan naꞌ no xnaꞌa naꞌ.
MAT 13:1 Bi leꞌa wizh wa leꞌa Jesús utoꞌo len niꞌi wa, cha nchaꞌa xa toꞌo lagun Galilea, cha usob xa.
MAT 13:2 Weꞌe leꞌa kwaꞌad be men mzhealbe wats xa, cha ukea xa ndoꞌ dub barco, cha usob xa. Leꞌa itea be men wa utebe ndoꞌ yo bid toꞌotsa nits.
MAT 13:3 Leꞌa Jesús cha mluu sian taꞌa, msaktabeꞌe xa be taꞌa, ndab xa: —Blaꞌach bego leꞌa dub xa ndun tiꞌin geꞌe utoꞌo nchaꞌutob xa bid ten trig ndoꞌ yo.
MAT 13:4 Leꞌa gor na mteꞌach xa‑yá, ncho‑yá ulate toꞌo nes. Leꞌa be migin cha ulen cha udaw‑a.
MAT 13:5 No ncho‑yá ulate ndoꞌ yo geꞌ, sa uxee yo. Leꞌa ná wa uxax ulen,
MAT 13:6 parea ngol gor mnaꞌ bea leꞌa‑yá cha mgoꞌol cha ubid‑a, geal leꞌa‑yá naꞌanpa wat ndiꞌib loꞌ na.
MAT 13:7 No ncho‑yá ulate lat be gix nsoꞌ gich. Ngol gor leꞌa gix wa ngoꞌol, cha ulo xleaꞌ‑yá.
MAT 13:8 Parea leꞌa ncho‑yá ulate sa utaꞌa yo, cha msaꞌa‑yá sian bid. Ncho be trig wa msaꞌa dub gayoꞌoga bid. No ncho‑yá msaꞌa dub chon gaꞌal bid. No ncho‑yá msaꞌa dub galntiꞌi bid.
MAT 13:9 Bego na ndap nchaꞌ na, blaꞌach bego ta ndáp naꞌ ndee.
MAT 13:10 Leꞌa be xmen Jesús cha ulen wats xa, cha ndab bexa: —¿Xtaꞌan sbeꞌen nsaktabeꞌe ga be taꞌa no be ta nluu ga?
MAT 13:11 Leꞌa Jesús cha ukaꞌab ndab: —Leꞌa Dios nsaꞌa ta yakbeꞌena bega be ta ugaꞌach cuent ten xteꞌe nibeꞌe Dios. Ná leꞌa ndoꞌ bexa xaꞌaga naꞌanpa nsaꞌa Dios yakbeꞌena bexa‑yá.
MAT 13:12 Leꞌa tal ton isakyoꞌón ta ndáp naꞌ, leꞌa Dios usaꞌa mas yakbeꞌena xa. Ná leꞌa tal ton lá isakyoꞌón, leꞌa Dios slat gast ta tuzh nyakbeꞌena xa wa.
MAT 13:13 Ta weꞌe li sbeꞌen be taꞌa nsaktabeꞌe naꞌ be ta nluu naꞌ ndoꞌ be men. Leꞌa bexa nwiꞌi, ná lá nyakbeꞌena bexa ta naꞌ bexa. No ndoꞌón bexa ta ndáp naꞌ, ná ni lá isakyoꞌón bexa‑yá no ni lá yakbeꞌena bexa‑yá.
MAT 13:14 Leꞌa ta ndun bexa wa nak lak ta mkeꞌa Isaías sakndoꞌ Dios, ndab Dios: Ndoꞌón bega‑yá, parea lá nyakbeꞌena bega‑yá. No nwiꞌi bega‑yá, parea lá iniꞌí bega xtaꞌan‑a.
MAT 13:15 Leꞌa be men ndee uzhebpa myak ngud ladoꞌo na. No lá ndoꞌón bexa, no nsaꞌnyaw ndoꞌ bexa. Ta weꞌe lá inaꞌ bexa, no ni lá goꞌón bexa, no ni lá yakbeꞌena bexa. No ni naꞌanpa ilen bexa wats naꞌ utsuꞌu naꞌ be ke ten bexa.
MAT 13:16 Cha no ndab Jesús: —Ná leꞌa Dios ndun wen nyoꞌo ladna bego, geal leꞌa bega naꞌ be ta ndee no ndoꞌón bega‑yá.
MAT 13:17 Leꞌa naꞌ gáp leꞌa kwaꞌad bexa mbidiꞌizh sakndoꞌ Dios no bexa wen nak uyoꞌo polta, nlad bexa iniꞌí bexa ltsaꞌa ta naꞌ bega nat, ná leꞌa bexa lá iniꞌí ta wa. No nlad bexa goꞌón bexa ltsaꞌa ta ndoꞌón bega nat, ná leꞌa bexa lá ngoꞌón ta wa.
MAT 13:18 ’Blaꞌach bega nat ná xtaꞌan gab ta mbidiꞌizh naꞌ cuent ten xa na ngwaꞌyas trig.
MAT 13:19 Leꞌa toꞌo nes sa ulate bid ten trig wa nak cuent bexa na ndoꞌón diꞌizh ten Dios ná xteꞌe nibeꞌe Dios be men, parea lá nyakbeꞌena bexa‑yá. Cha nlen maxuꞌu, cha ngoꞌo maxuꞌu diꞌizh wa len ladoꞌo bexa.
MAT 13:20 Leꞌa yo geꞌ wa nak cuent bexa nten ladna ndoꞌón diꞌizh ten Dios.
MAT 13:21 Ná leꞌa bexa wa nak cuent dub ya trig lá ndap sian loꞌ na. Ndangea ladna bexa diꞌizh ten Dios dub ndeꞌep, ná leꞌa gor na juert ncho bexa geal ndangea ladna bexa diꞌizh wa, cha nlaꞌa xa‑yá.
MAT 13:22 Leꞌa yo ncho gix nsoꞌ gich wa nak cuent bexa na ndoꞌón diꞌizh ten Dios, ná leꞌa bexa nyuꞌ ladna be taꞌa ndoꞌ gizhliyo ndee, no ngeꞌ ladna bexa be ta siantsa ndap xa. Leꞌa bexa wa nak cuent dub trig naꞌan xtaꞌan usaꞌa.
MAT 13:23 Parea leꞌa sa utaꞌa yo wa nak cuent bexa na ndoꞌón diꞌizh ten Dios no nyakbeꞌena bexa‑yá. Leꞌa bexa wa wen nak cuentta be trig nsaꞌa dub gayoꞌo bid no dub chon gaꞌal bid no dub galntiꞌi bid.
MAT 13:24 Leꞌa Jesús cha msaktabeꞌe stub taꞌa, ndab xa ndoꞌ be men: —Leꞌa lak nibeꞌe Dios be men nak cuent ta ngwasea dub men ngos sbeꞌen bni wen ten trig ndoꞌ dub bleꞌa yo ten xa.
MAT 13:25 Parea ngol dub teꞌal gor ndeyats be men, cha ulen dub xa ndakloo ndoꞌ xa. Cha ngos xa be gix lá isuꞌu lat be bni ten trig wa, cha nseaꞌ xa.
MAT 13:26 Leꞌa zha ulen trig no ulenga be bid ndoꞌ‑yá, cha no gix wa ulen lat‑a.
MAT 13:27 Weꞌe leꞌa bexa ndun tiꞌin sa wa cha ngwaꞌyab‑a ndoꞌ xwan yo wa, ndab bexa: “Señor, ¿lid ngos ga sbeꞌen bni wen geꞌe ten ga baꞌ zha? ¿Ná nat pa utoꞌo be gix ncho lat‑a zha?”
MAT 13:28 Leꞌa xa cha ndab: “Dub xa ndakloo ndoꞌ naꞌ ngos‑a.” Leꞌa bexa wa cha unabdiꞌizh ndab: “¿Nlad go yaꞌbedib besa be gix baꞌ zha?”
MAT 13:29 Leꞌa xa cha ndab: “Lá yaꞌdib bega‑yá. Leꞌa tal bega kiꞌib be gix baꞌ, leꞌa be trig baꞌ no sgiꞌib.
MAT 13:30 Blaꞌa bego li junt gaꞌal‑a gast gal zha ibeleꞌe be bid ten trig. Zha weꞌe leꞌa naꞌ gáp ndoꞌ bexa gun tiꞌin wa uteleꞌe bexa ned lak be gix, cha uxi bexa gen‑a, cha utsoꞌol bexa‑yá. Weꞌe uteleꞌe bexa be bid ten trig wa, cha kochaꞌaw bexa‑yá ta lid naꞌ.”
MAT 13:31 Weꞌe msaktabeꞌe Jesús stub taꞌa, ndab xa: —Leꞌa lak nibeꞌe Dios be men nak lak ta ngwasea dub bid ten mostas, ta ngos dub xabgiꞌi ndoꞌ dub bleꞌa yo ten xa.
MAT 13:32 Leꞌa ta wa dub bid ndon leꞌa tuzh ndoꞌ itea be bid, parea ngoꞌol‑a cuent dub ya siꞌil, mas siꞌil ndoꞌ itea be ta xgeꞌa ndas be men, gast be migin ndandeꞌe xuꞌun ten na ndoꞌ be xos‑a.
MAT 13:33 Cha msaktabeꞌe xa stub taꞌa, ndab xa: —Leꞌa lak nibeꞌe Dios be men nak lak nyak levadur. Leꞌa dub xagots mgoch dub tuzh‑a top gaꞌal kil arin. Ngol tsoꞌo wa leꞌa idub koꞌob arin wa usabich.
MAT 13:34 Itea be ta ndee msaktabeꞌe Jesús be taꞌa ndoꞌ be men, leꞌa xa sbeꞌen li mbidiꞌizh ndoꞌ be men.
MAT 13:35 Li ngok‑a lak ndab dub xa uyoꞌo polta sakndoꞌ Dios, ndab xa: Sbeꞌen usaktabeꞌe naꞌ be taꞌa, gor na gudiꞌizh naꞌ ndoꞌ be men. Gáp naꞌ be ta ugaꞌach nak, be taꞌa ni dub men gol iniꞌí idub ncho gizhliyo.
MAT 13:36 Cha mlaꞌa Jesús be men wa, cha uyoꞌo xa len dub niꞌi. Leꞌa be xmen xa cha no ulen wats xa, ndab bexa: —Bidiꞌizh ga ná xteꞌe nak ta msaktabeꞌe ga wa cuent ten gix ncho geꞌe wa.
MAT 13:37 Leꞌa Jesús cha ndab: —Leꞌa xa ndas bni wen wa, leꞌa ta wa Xa Myak Men Ndoꞌ Gizhliyo.
MAT 13:38 Leꞌa geꞌe wa leꞌa ta wa ndoꞌ gizhliyo ndee. Leꞌa bni wen wa leꞌa ta wa bexa nibeꞌe Dios. Leꞌa be gix wa, leꞌa ta wa bexa nibeꞌe maxuꞌu.
MAT 13:39 Leꞌa xa ugap wa xa ngos gix wa, leꞌa ta wa maxuꞌu. Leꞌa gor uteleꞌe bexa trig wa, leꞌa ta wa zha idub tiemp ndee. Leꞌa bexa uteleꞌe be ta wa, leꞌa bexa wa be angel ten Dios.
MAT 13:40 Leꞌa lak igiꞌib be gix no yolꞌ‑a, liga gak‑a gal zha idub tiemp ndee.
MAT 13:41 Leꞌa gal zha wa leꞌa naꞌ, Xa Myak Men Ndoꞌ Gizhliyo, utuꞌub be angel ten naꞌ uteleꞌe itea bexa ugap nak no bexa nkiꞌil be men gun ta ugap.
MAT 13:42 Leꞌa be angel wa cha utsaꞌab bexa ndoꞌ giꞌ, sa goꞌon bexa no gast ndeay bexa gaw bexa tant dub gealkweaꞌ siꞌil iniꞌí bexa.
MAT 13:43 Weꞌe leꞌa bexa wen wa iluu cuent xeꞌa wizh sa nibeꞌe Dios Xus beuna. Bego na ndap nchaꞌ na, ¡blaꞌach bego ta ndáp naꞌ ndee!
MAT 13:44 ’No lak nibeꞌe Dios nak cuentta dub ta uzhebpa nsak ngachyoꞌo ndoꞌ dub yo. Leꞌa gor mzheꞌal dub men‑a, cha mkachko xa‑yá leꞌaka sa wa. Cha nten ladna xa nseaꞌ xa, ngwaꞌudoꞌo xa iteanak ta ndap xa, cha usiꞌi xa yo wa.
MAT 13:45 ’No leꞌa lak nibeꞌe Dios nak cuent ta ngwasea dub xa nsiꞌi utiꞌix be taꞌa, nkeseakwaꞌan xa be perla wen isiꞌi xa.
MAT 13:46 Leꞌa gor na mzheal xa dub ná ndon leꞌa nsak, cha ngwaꞌudoꞌo xa iteanak be ta ndap xa, cha usiꞌi xa perla wa.
MAT 13:47 ’No leꞌa lak nibeꞌe Dios nak lak ndanno be men dub red ntsaꞌab bexa ndoꞌ nits, nsen‑a isandoꞌ mbeal.
MAT 13:48 Leꞌa gor nzhea‑yá cha ngoꞌo bexa‑yá toꞌo nits. Cha nsob bexa sa wa nti xa be mbeal wen wa ngochaꞌaw xa len zhum. Leꞌa bema lá isuꞌu wa ngote bexa dub lad.
MAT 13:49 No liga gak‑a gal zha idub tiemp ndee. Leꞌa be angel ten Dios ilen koꞌo bexa ugap lat bexa wen.
MAT 13:50 Cha utsaꞌab be angel bexa ugap wa ndoꞌ giꞌ. Cha goꞌon bexa no gast ndeay bexa gaw bexa, tant dub gealkweaꞌ siꞌil iniꞌí bexa.
MAT 13:51 Leꞌa Jesús cha unabdiꞌizh ndoꞌ be xmen na ndab xa: —¿Nyakbeꞌena bega iteanak ta ndáp naꞌ ndee zha? Leꞌa bexa cha ukaꞌab ndab: —Besa nyakbeꞌekana‑yá, Señor.
MAT 13:52 Leꞌa Jesús cha ndab: —Leꞌa bexa ntsid ley ten Dios leꞌa gor na nyakbeꞌena bexa lak nibeꞌe Dios be men, leꞌa bexa wa nak cuent dub xwan niꞌi ngote be ta nsak ten xa sa nchochaꞌaw‑a, be ta kub no be ta gox.
MAT 13:53 Leꞌa gor na mtayadiꞌizh Jesús be ta na li msaktabeꞌe xa be taꞌa wa, cha nseaꞌ xa.
MAT 13:54 Leꞌa zha ulayaꞌ xa gezh Nazaret sa ngoꞌol xa, cha usaxan nluu xa be men len niꞌi sa nzhealbe bexa judio. Leꞌa be men cha ngwanseana xteꞌe ndadiꞌizh xa, ndab bexa ndoꞌ be ltsaꞌa xa: —¿Pa mtsid xa baꞌ be ta ndák xa zha? ¿No xteꞌema ndun xa be uyon wa?
MAT 13:55 ¿Naꞌanpa xa ndee xin carpinter wa zha? ¿Naꞌanpa Marí nak xnaꞌa xa zha? ¿No naꞌanpa wit xa Jacob no Kosé no Simón no Judas?
MAT 13:56 ¿Naꞌanpa be bsan xa ncho lat beuna gezh ndee zha? ¿Xteꞌema ndák xa ta wa zha?
MAT 13:57 Weꞌe naꞌanpa isakyoꞌón bexa ta ndab Jesús, ná leꞌa Jesús cha ndab ndoꞌ bexa: —Leꞌa be men ndap mod ndoꞌ dub xa ndadiꞌizh sakndoꞌ Dios. Parea leꞌa bexa lazh xa no bexa ncho ta lid xa naꞌanpa ndap mod ndoꞌ xa.
MAT 13:58 Ta weꞌe lá ngun Jesús sian uyon sa wa ke na lá ngungea ladna bexa ta ndadiꞌizh Jesús.
MAT 14:1 Leꞌa tiemp weꞌe leꞌa Herodes xa nibeꞌe sa wa mbiꞌín be ta ndun Jesús.
MAT 14:2 Cha ndab Herodes ndoꞌ bexa ndun tiꞌin ndoꞌ xa: —Leꞌa Jesús wa leꞌa nak Juan xa ulaleaꞌ be men wa mbangal ndoꞌ gealgut. Ta weꞌe ndap xa juers ndun xa be uyon wa.
MAT 14:3 Leꞌa mas polta leꞌa Herodes unibeꞌe ndoꞌ be xmen na isen bexa Juan, cha uxi bexa Juan caden, no ukeꞌa bexa Juan litgiꞌib. Li mbin xa ke ten Herodías xagots ten Julip wit Herodes,
MAT 14:4 geal leꞌa Juan ndabla ndoꞌ Herodes: —Naꞌanpa utsin nak‑a ukaꞌa lu Herodías.
MAT 14:5 Ta weꞌe leꞌa Herodes nlad gut Juan, parea leꞌa xa nzheb ndoꞌ be men leꞌa bexa itea ndab leꞌa Juan dub xa ndadiꞌizh sakndoꞌ Dios.
MAT 14:6 Leꞌa ngol dub wizh ngol leaꞌ Herodes, leꞌa xa ulo dub gast. Leꞌa sa wa utoꞌo xingots Herodías mbilndats xa ndoꞌ gaꞌal bexa nde ndoꞌ gast wa. Leꞌa Herodes cha uzhebpa ngol ladna xteꞌe mbilndats nagots wa,
MAT 14:7 cha ndab Herodes ndoꞌ xa: —Nsobwiꞌi Dios usa naꞌ guniꞌi xtaꞌan inab lu.
MAT 14:8 Leꞌa nagots wa cha ndab ndoꞌ Herodes lak ndabla xnaꞌa na wa: —Nat bsaꞌa ga gek Juan xa ulaleaꞌ be men, ixoꞌob‑a ndoꞌ dub plat.
MAT 14:9 Weꞌe leꞌa Herodes cha uban myoꞌo ladna. Parea ke na ndab xa leꞌa Dios nsobwiꞌi no ke na mbiꞌín be men nde ndoꞌ mes ta ndab xa wa, ta weꞌe unibeꞌe xa ndoꞌ be xmen xa usaꞌa bexa gek Juan,
MAT 14:10 ndab xa yaꞌlabtoꞌog bexa gen Juan len litgiꞌib.
MAT 14:11 Cha myoꞌo bexa gek Juan uxoꞌob‑a ndoꞌ dub plat, cha msaꞌa xa‑yá ndoꞌ nagots wa. Leꞌa xa wa cha ngwaꞌusaꞌa‑yá ndoꞌ xnaꞌa na.
MAT 14:12 Leꞌa be xmen Juan cha ulen, cha mbiꞌi bexa Juan mkaꞌach bexa xa. Cha ngwaꞌyab bexa‑yá ndoꞌ Jesús.
MAT 14:13 Leꞌa gor na mbiꞌín Jesús ta wa, cha ukea xa ndoꞌ dub barco nchaꞌa xa dub sa naꞌan men. Ná leꞌa gor na mbiꞌín be men pa nchaꞌa Jesús, cha utoꞌo bexa be gezh nchaꞌa ndats bexa sa nchaꞌa Jesús.
MAT 14:14 Leꞌa sa wa leꞌa gor ulaꞌ Jesús ndoꞌ barco wa cha uniꞌí xa kwaꞌad be men wa, cha mlats ladna xa bexa. Cha myunyakna xa be men gizh nde lat bexa wa.
MAT 14:15 Leꞌa ngol gor uzhelapa leꞌa be xmen Jesús cha ubii wats Jesús, cha ndab bexa: —Leꞌa sa ndee dub sa naꞌanpa ncho men, no nat yá uzhela. Gud go ndoꞌ bexa kwaꞌad baꞌ yaꞌisiꞌi bexa ta gaw bexa be gezh baꞌ.
MAT 14:16 Leꞌa Jesús cha ndab: —Naꞌanpa juerska yaꞌbe bexa. Ndi bsaꞌa bego ta gaw bexa.
MAT 14:17 Leꞌa be xmen Jesús cha ndab: —Leꞌa besa ndap sgaꞌaytsa pan no stoptsa mbeal.
MAT 14:18 Leꞌa Jesús cha ndab: —Utseano bega‑yá sa ndee.
MAT 14:19 Cha ndab xa ndoꞌ be men kwaꞌad wa kwe bexa ndoꞌ gixgi. Cha usen xa isagaꞌay pan wa no itop mbeal wa, cha mwiꞌi xa gibeꞌa msaꞌa xa xno ndoꞌ Dios. Cha uleꞌa xa be pan sian bleꞌa, cha msaꞌa xa‑yá ndoꞌ be xmen xa. Leꞌa bexa cha mtseꞌa‑yá ndoꞌ be men.
MAT 14:20 Leꞌa itea bexa wa udaw gast plo mzhea bexa. Leꞌa be xmen Jesús cha mteleꞌe stibtop zhum byux be ta myaꞌan sobr wa.
MAT 14:21 Leꞌa lat bexa li udaw wa pa dub gaꞌay mil xabgiꞌi, parea naꞌanpa igaꞌab be xagots no be meꞌed.
MAT 14:22 Cha ndab Jesús ndoꞌ be xmen na: —Bkea bega leꞌaka ndoꞌ barco baꞌ, cha waꞌned bega ndoꞌ naꞌ stub toꞌo nits baꞌ. Ndalen wa leꞌa Jesús ndab ndoꞌ be men kwaꞌad wa yaꞌbe bexa.
MAT 14:23 Leꞌa gor na yá nseaꞌbe be men wa, leꞌa Jesús nab ukea dub bet ngwaꞌyadiꞌizhno Dios. Leꞌa gor na nseala teꞌal leꞌa Jesús nab nsoꞌ sa wa.
MAT 14:24 Leꞌa gor weꞌe leꞌa barco sitla nchaꞌa tol‑la ndoꞌ nits. Leꞌa be golp ten nits uzhebpa nkeꞌa las barco, no leꞌa mbi uzhebpa nlen ndoꞌ nits lad ndoꞌ barco.
MAT 14:25 Ngol gor yamer gat xeꞌa, leꞌa Jesús nchasea ndats ndoꞌ nits, nchaꞌbii xa sa nchaꞌbe bexa wa.
MAT 14:26 Leꞌa be xmen Jesús cha uniꞌí xa nsea xa ndoꞌ nits, cha mzheb bexa no ugeꞌ ndab bexa: —¡Leꞌa ta baꞌ dub ta uxin!
MAT 14:27 Ná leꞌa Jesús cha ndab ndoꞌ bexa: —¡Gop bega valor! ¡No lá izheb bega! Leꞌa ta ndee naꞌka.
MAT 14:28 Leꞌa Pedr cha ukaꞌab ndab: —Señor, tal leꞌa go Jesús, unibeꞌe ga gal naꞌ wats ga ndoꞌ nits baꞌ.
MAT 14:29 Leꞌa Jesús cha ndab ndoꞌ xa: —¡Utsea! Leꞌa Pedr cha ulaꞌ ndoꞌ barco nchasea ndats ndoꞌ nits, nchaꞌa xa wats Jesús.
MAT 14:30 Parea ngol gor uniꞌí Pedr lita nsoꞌ mbi siꞌil wa, cha mzheb xa. Cha usaxan nchaꞌlayoꞌo xa len nits. Cha utezhat xa ndab xa ndoꞌ Jesús: —¡Señor, utsealoꞌo ga naꞌ!
MAT 14:31 Cha bi leꞌa gor wa leꞌa Jesús cha mkea yaꞌa na, cha usen xa yaꞌa Pedr. Cha ndab Jesús ndoꞌ xa: —¡Ndidotsa ngeꞌ ladna lu naꞌ! ¿Xtaꞌan lá ndangea ladna lu naꞌ zha?
MAT 14:32 Leꞌa gor na ukea Jesús no Pedr ndoꞌ barco wa, leꞌa mbi wa cha uleas.
MAT 14:33 Weꞌe leꞌa bexa nde ndoꞌ barco cha ngwankea Jesús, ndab bexa: —Ta ugeaka leꞌa go nak Xin Dios.
MAT 14:34 Leꞌa bexa cha utakea ndoꞌ nits wa, ulayaꞌ bexa sa nsaleaꞌ Genesaret.
MAT 14:35 Leꞌa gor uniꞌí be men leꞌa Jesús nkesea sa wa, cha mtuꞌub bexa men ngwaꞌyab‑a ndoꞌ bexa ncho idub gangeak sa wa. Weꞌe cha ulenno be men itea bexa gizh wats Jesús.
MAT 14:36 Cha unab bexa ulaꞌa xa masa ndats xab xa ugal bexa gizh wa. Leꞌa itea bexa na li ngal xab Jesús wa cha myaknabe.
MAT 15:1 Tsoꞌo wa leꞌa pla be mech ten ley nsea bexa fariseo utoꞌo gezh Jerusalén nchaꞌbe wats Jesús. Cha ndab bexa ndoꞌ Jesús:
MAT 15:2 —¿Xtaꞌan ni lá ndankea be xmen lu be costumbr mchaꞌan be usan gox polta? Lbaꞌatsa naꞌa bexa gor ndaw bexa parea naꞌanpa naꞌa bexa lak nibeꞌe costumbr wa.
MAT 15:3 Leꞌa Jesús cha ukaꞌab ndab: —¿Xtaꞌan lá ndun bega lak nibeꞌe ley ten Dios, ndi ndankeatsa bega be costumbr ten leꞌaka bega?
MAT 15:4 Leꞌa Dios unibeꞌe ndab: “Wankea bega xus bega nsea xnaꞌa bega.” No ndab xa: “Leꞌa tal ton kweaꞌ iníꞌi ndoꞌ xus na natal ndoꞌ xnaꞌa na, leꞌa xa wa nsabndoꞌ gat.”
MAT 15:5 Ná leꞌa bego ndi ndab leꞌa tal ton gab ndoꞌ xus na natal ndoꞌ xnaꞌa na “leꞌa itea ta ndiꞌizh gakno naꞌ bega wa, leꞌa ta wa ndi usa naꞌ ndoꞌ Dios”,
MAT 15:6 weꞌe leꞌa xa wa yá naꞌantapa juerska gakno xus na no xnaꞌa na. Li nlaꞌa bega ta unibeꞌe Dios, ndankea bega ndi sbeꞌen costumbr ten bega.
MAT 15:7 Leꞌa bega nluu cuentta xa wen, ná bega ugap nak. Ugeaka ndab Isaías sakndoꞌ Dios tiemp polta, ndab xa lak nak bego:
MAT 15:8 Leꞌa be men ndee diꞌizhtsa ndankea naꞌ, parea leꞌa ladoꞌo xa sit nak ndoꞌ naꞌ.
MAT 15:9 Naꞌan xtiꞌin ta ndankea bexa naꞌ, leꞌa cuent diꞌizh ten naꞌ nluu bexa, parea diꞌizh ten be mentsa‑yá.
MAT 15:10 Weꞌe leꞌa Jesús cha utezh be men kwaꞌad wa, ndab xa: —Blaꞌach bego ta gáp naꞌ ndee. No byakbeꞌena bega‑yá.
MAT 15:11 Leꞌa be ta ndaw be men naꞌanpa leꞌa ndun bzhiꞌik ladoꞌo be men. Ndi ta ugap ndadiꞌizh be men leꞌa ndun bzhiꞌik bexa.
MAT 15:12 Cha ulen be xmen Jesús wats xa, ndab bexa: —¿Uniꞌí go leꞌa bexa fariseo ngokloo gor na mbiꞌín bexa ta li ndab go wa?
MAT 15:13 Leꞌa Jesús cha ukaꞌab ndab: —Leꞌa bexa nak cuent dub ya naꞌanpa ngas Xus naꞌ xa nsob gibeꞌa, leꞌa gal dub wizh leꞌa xa kib‑a.
MAT 15:14 Blaꞌa bega bexa, leꞌa bexa cuent dub xa lá naꞌ nchaꞌano stub xa lá naꞌ. Leꞌa tal li goꞌo dub xa lá naꞌ stubga xa lá naꞌ, leꞌa bexa itop slaꞌyoꞌo len dub geꞌed.
MAT 15:15 Leꞌa Pedr cha ndab: —Bluu ga xteꞌe nak ta msaktabeꞌe ga wa ndoꞌ besa.
MAT 15:16 Leꞌa Jesús cha ndab: —¿Noga bego ni lá nyakbeꞌena ta ndáp naꞌ zha?
MAT 15:17 ¿Lá nyakbeꞌena bega zha leꞌa ta ndaw dub men nchaꞌa len xa, cha nchaꞌaga‑yá len letrina?
MAT 15:18 Ná leꞌa ta ugap ndadiꞌizh be men wa ladoꞌoka xa ntoꞌo. Cha ndun bzhiꞌik‑a xa ndoꞌ Dios.
MAT 15:19 Leꞌa len ladoꞌo be men ntoꞌo be ta ugap ndanbeꞌe bexa. Ta weꞌe ncho xa ndut men. No ngal xa xa ten stubga men. No ndun xa ta ugap ltsaꞌa ta li nak wa. No ndun xa gealwaꞌan no gealkwiꞌin. No nisi xa be ltsaꞌa xa.
MAT 15:20 Leꞌa itea be ta ugap ndee ndun bzhiꞌik bexa cuent ten Dios. Parea ta na lá unaꞌa dub xa lak nibeꞌe bexa wa cha gaw xa, leꞌa ta wa naꞌanpa gun bzhiꞌik xa cuent ten Dios.
MAT 15:21 Cha utoꞌo Jesús nchaꞌa xa dub sa gax gezh Tiro no gezh Sidón.
MAT 15:22 Weꞌe leꞌa dub xagots ncho sa wa dub xa Canaán ulen wats Jesús, ugeꞌ ndab xa: —¡Señor, xin David! ¡Blats ladna go naꞌ! Leꞌa xiꞌín gots naꞌ ncho mbi bxin len ladoꞌo na uzhebpa kweaꞌ nsak xa.
MAT 15:23 Ná leꞌa Jesús ni lá ikaꞌab ndoꞌ xa. Leꞌa be xmen Jesús cha ulen wats xa, cha ndab bexa: —Gud go ndoꞌ xa baꞌ yaꞌ xa, leꞌa xa uzhebpa ndun ruid nsenkea xa tsoꞌo beuna.
MAT 15:24 Leꞌa Jesús cha ndab: —Leꞌa Dios mtuꞌub naꞌ gakno naꞌ bexa Israeltsa, bexa nak cuent be borreg ulaꞌ.
MAT 15:25 Parea leꞌa xagots wa ubii, cha usaxib xa ndoꞌ Jesús, ndab xa: —¡Señor, gokno ga naꞌ!
MAT 15:26 Leꞌa Jesús cha ndab: —Naꞌanpa utsin nak ulat besa pan ndoꞌ be meꞌed, cha usaꞌab besa‑yá ndoꞌ be mbek.
MAT 15:27 Leꞌa xagots wa cha ndab: —Ta ugeaka ta wa, Señor, parea leꞌa be mbek ndaw be taꞌa nlate xan mes ten xwan ma.
MAT 15:28 Leꞌa Jesús cha ndab: —Xagots, uzheꞌeb ngeꞌ ladna lu naꞌ. Nat gak ta nlad lu. Bi leꞌa gor wa leꞌa xingots xa wa cha myakna.
MAT 15:29 Leꞌa Jesús cha utoꞌo sa wa nchaꞌagal xa toꞌo lagun Galilea. Cha ukea xa dub bet, cha usob xa.
MAT 15:30 Weꞌe leꞌa kwaꞌadpa men ulen wats xa, nseano bexa bexa lá yoo gan isea, no bexa lá naꞌ, no bexa lá yoo gan gudiꞌizh, no bexa moch, nsea kwaꞌadta bexa gizh. Cha mte bexa bexa gizh wa ndoꞌ Jesús, cha myunyakna Jesús bexa.
MAT 15:31 Leꞌa be men wa ngwanseanabe gor uniꞌí bexa leꞌa bexa lá yoo gan gudiꞌizh wa ndadiꞌizhla, no bexa moch wa myaklana, no bexa lá yoo gan isea wa utsinla nsea, no bexa lá naꞌ wa nwiꞌila. No ndab be men leꞌa Dios ten bexa Israel uzheꞌeb dub Dios juert.
MAT 15:32 Cha utezh Jesús be xmen na, cha ndab xa: —Leꞌa naꞌ nlats ladna be men kwaꞌad ndee, leꞌa bexa wizh nyonla nde wats naꞌ, parea lá ndapta bexa ta gaw na. Leꞌa naꞌ lá nlad utuꞌub naꞌ bexa lbaꞌatsa lá gaw bexa, nchaꞌa bexa lá uxik ilanseaꞌ ta lid na.
MAT 15:33 Leꞌa be xmen Jesús cha ndab ndoꞌ xa: —¿Pa izheal beuna pan gaw dub lbaꞌata men kwaꞌad baꞌ? Leꞌa sa ndee sit nde be gezh.
MAT 15:34 Leꞌa Jesús cha unabdiꞌizh ndab: —¿Plo pan ndap bega zha? Leꞌa bexa cha ndab: —Sgaꞌad pan nsea stapla mbeal byux.
MAT 15:35 Cha ndab Jesús ndoꞌ be men kwaꞌad wa kwe bexa ndoꞌ yo.
MAT 15:36 Cha usen xa isagaꞌad pan nsea be mbeal wa, cha msaꞌa xa xno ndoꞌ Dios, no uleꞌa xa be ta wa sian bleꞌa. Weꞌe msaꞌa xa‑yá ndoꞌ be xmen xa, utseꞌa bexa‑yá ndoꞌ be men wa.
MAT 15:37 Leꞌa be men wa itea udaw gast plo mzhea bexa. Cha mteleꞌe be xmen Jesús sgaꞌad zhum byux be ta myaꞌan sobr.
MAT 15:38 Leꞌa lat bexa udaw wa ncho pa dap mil xabgiꞌitsa, parea naꞌanpa igaꞌab be xagots no be meꞌed.
MAT 15:39 Cha ndab Jesús ndoꞌ be men yaꞌbe bexa. Cha ukea xa ndoꞌ barco wa nchaꞌa xa dub sa gax gezh nsaleaꞌ Magdala.
MAT 16:1 Leꞌa pla bexa fariseo no bexa saduceo ulen wats Jesús, nlad bexa gun bexa preb Jesús, ndab bexa ndoꞌ Jesús: —Leꞌa besa nlad gun ga dub ta uluu leꞌa ga Dioska mtuꞌub.
MAT 16:2 Leꞌa Jesús cha ukaꞌab ndab: —Leꞌa ncho uzhe leꞌa gibeꞌa baꞌ nane naꞌ, cha ndab bego leꞌa geꞌa naꞌanpa ilaꞌ gi.
MAT 16:3 No ncho tempran leꞌa gibeꞌa baꞌ nane naꞌ no nde xkaw, cha ndab bega nat ilaꞌ gi. ¡Bego nluu cuentta xa wen ná bega ugap nak! Nyakbeꞌena bega xteꞌe nak be ta naꞌ bega gibeꞌa baꞌ, ná ni lá nyakbeꞌena bega ta ndun Dios tiemp nat.
MAT 16:4 Leꞌa be men ncho nat uzhebpa be men ugap no nkwaꞌan bexa be ta naꞌanpa ta ugeapa nak Dios. Ndab bega gun naꞌ dub ta uluu na ton nak naꞌ, parea leꞌa naꞌ lá gun ta ndab bega. Ndi iniꞌítsa bega leꞌa naꞌ itiꞌid ltsaꞌa ta utid Jonás, xa mbidiꞌizh sakndoꞌ Dios tiemp polta. Cha mlaꞌa Jesús bexa, cha nchaꞌa xa.
MAT 16:5 Weꞌe leꞌa Jesús nsea be xmen xa utakea stub toꞌo nits, parea myalad bexa ngoꞌo bexa pan gaw bexa.
MAT 16:6 Leꞌa Jesús cha ndab ndoꞌ bexa: —Blaꞌach bego, uzhebpa gop bega cuent nsea levadur ten bexa fariseo no levadur ten bexa saduceo.
MAT 16:7 Leꞌa bexa cha ndabbe ndoꞌ ltsaꞌa na: —Li ndab xa baꞌ geal leꞌa beuna lá ngoꞌo pan.
MAT 16:8 Leꞌa Jesús cha mgenna ta li ndanbeꞌe bexa wa, cha ndab xa: —¿Xtaꞌan lbaꞌa nyuꞌ ladna bega leꞌa bega lá noꞌo pan zha? ¡Ndidotsa ngeꞌ ladna bega naꞌ!
MAT 16:9 ¿Bi lá nyakbeꞌena bega be ta uniꞌí bega uyoꞌo wa zha? ¿Ni lá ntseꞌa ladna bega xteꞌe msa naꞌ gaꞌay pan udaw gaꞌay mil xabgiꞌi wa, no plo zhum ta myaꞌan sobr mteleꞌe bega zha weꞌe zha?
MAT 16:10 ¿No ni lá ntseꞌa ladna bega xteꞌe msa naꞌ dub gaꞌad pan udaw dub dap mil xabgiꞌi zha, no plo zhum ta myaꞌan sobr mteleꞌe bega zha?
MAT 16:11 ¿Xtaꞌan lá nyakbeꞌena bega leꞌa naꞌ naꞌanpa ndadiꞌizh cuent ten pan gor ndáp naꞌ gop bega cuent nsea levadur ten bexa fariseo no levadur ten bexa saduceo zha?
MAT 16:12 Leꞌa bexa wa cha myakbeꞌena leꞌa Jesús naꞌanpa ngab gap bexa cuent nsea levadur ten pan. Leꞌa xa ndi ndab gap bexa cuent nsea ta nluu bexa fariseo nsea bexa saduceo.
MAT 16:13 Leꞌa gor na ulayaꞌ bexa gax dub gezh nsaleaꞌ Cesarea Filipo, leꞌa Jesús cha unabdiꞌizh ndoꞌ be xmen na, ndab xa: —¿Xteꞌe ndab be men ton nak Xa Myak Men Ndoꞌ Gizhliyo zha?
MAT 16:14 Leꞌa bexa cha ukaꞌab ndab: —Leꞌa ncho be men ndab leꞌa go nak Juan xa ulaleaꞌ be men. No ncho bexa ndab leꞌa go nak Elí. No nchoga bexa ndab leꞌa go Jeremías, natal stubga xa mbidiꞌizh sakndoꞌ Dios tiemp polta.
MAT 16:15 Leꞌa Jesús cha ndab: —¿Leꞌa bego zha xteꞌe gab ton nak naꞌ?
MAT 16:16 Leꞌa Simón Pedr cha ukaꞌab ndab: —Leꞌa go nak Cristo Xin Dios nban.
MAT 16:17 Weꞌe leꞌa Jesús cha ndab ndoꞌ xa wa: —Simón xin Jonás, uzhebpa wen yoo ladna lu, leꞌa ta ndab lu naꞌanpa men mluu ndoꞌ lu, ndi Xus naꞌ xa ncho gibeꞌa mluu‑yá ndoꞌ lu.
MAT 16:18 Leꞌa lu nsaleaꞌ Pedr. Leꞌa ndoꞌ geꞌdaꞌa ndee kwe dub xkwaꞌa men gungea ladna naꞌ. Leꞌa juers ten gealgut naꞌanpa gun gan ndoꞌ bexa wa.
MAT 16:19 Leꞌa naꞌ leꞌa usoꞌ lu gak lu xa yansu bexa leꞌa Dios nibeꞌe. Leꞌa itea be ta inibeꞌe lu ta lá gun bexa, leꞌa ta wa nokaga Dios lá ulaꞌa. No liga itea be ta inibeꞌe lu gun bexa, leꞌa ta wa ta na nokaga Dios inibeꞌe li gak.
MAT 16:20 Leꞌa Jesús cha unibeꞌe ndoꞌ be xmen na naꞌanpa gab bexa ndoꞌ ni dub men leꞌa Jesús nak Cristo xa mtuꞌub Dios.
MAT 16:21 Leꞌa zha weꞌe usaxan Jesús ndadiꞌizh ndoꞌ be xmen na leꞌa xa juerska yaꞌ Jerusalén, ndab xa: —Leꞌa Jerusalén wa leꞌa bexa gox nsak nsea be uleꞌay nibeꞌe nsea be mech ten ley ugap gunno naꞌ. No gut bexa naꞌ, parea leꞌa wizh yon leꞌa naꞌ iban ndoꞌ gealgut.
MAT 16:22 Weꞌe leꞌa Pedr cha mbiꞌi Jesús dub lad, cha uteyo Pedr xa, ndab Pedr: —¡Naꞌanpa li gak‑a, Señor! ¡Leꞌa Dios lá ulaꞌa li yasea ga!
MAT 16:23 Ná leꞌa Jesús cha myach mwiꞌi ndoꞌ Pedr, ndab xa: —Utatsoꞌ wats naꞌ, leꞌa lu ndadiꞌizh cuent maxuꞌu, lá nlad lu gun naꞌ ta nlad Dios. Leꞌa lu lá ndanbeꞌe lak ndanbeꞌe Dios, leꞌa lu ndi ndanbeꞌe lak ndanbeꞌe be mentsa.
MAT 16:24 Cha ndab Jesús ndoꞌ be xmen na: —Tal ton nlad isankea tsoꞌo naꞌ, nsabndoꞌ ulaꞌa xa iteanak ta nlad xa, cha goꞌo xa cruz ten xa, cha isankea xa tsoꞌo naꞌ.
MAT 16:25 Leꞌa tal ton ukwaꞌan xteꞌe wen yoo xa, leꞌa xa wa ndi gun perdid gealnaban ten na ndoꞌ Dios. Ná leꞌa tal ton gat geal ndangea ladna xa naꞌ, leꞌa xa wa gap gealnaban ndoꞌ Dios.
MAT 16:26 Tal leꞌa dub men ndap iteanak be ta ncho ndoꞌ gizhliyo ndee, cha gak perdid gealnaban ten xa ndoꞌ Dios, ¿xtiꞌin iteanak be ta ndap xa wa zha? Leꞌa be ta wa naꞌanpa ugal isiꞌi xa gealnaban ten xa.
MAT 16:27 Leꞌa naꞌ, Xa Myak Men Ndoꞌ Gizhliyo, ilenno xeꞌa siꞌil ten Dios Xus naꞌ no be angel. Cha kixga naꞌ ikaꞌa kad dub men be ta mbin xa.
MAT 16:28 Leꞌa naꞌ gáp ndoꞌ bego leꞌa ncho bega nde ndee naꞌanpa gat gast iniꞌí bega leꞌa naꞌ, Xa Myak Men Ndoꞌ Gizhliyo, ilen inibeꞌegal.
MAT 17:1 Ngol sxoꞌop wizh leꞌa Jesús mbiꞌi Pedr no Jacob no Juan wit Jacob, ukea bexa dub bet gaꞌap sa naꞌan men.
MAT 17:2 Leꞌa sa wa leꞌa Jesús mtixndoꞌ ndoꞌ gaꞌal bexa wa, leꞌa ndoꞌ Jesús myak cuent xeꞌa wizh no xab xa ndon mbe mnaꞌ cuent xeꞌa.
MAT 17:3 Zha leꞌa sa wa mlundoꞌ Moisés no Elí ndeyadiꞌizhno Jesús.
MAT 17:4 Weꞌe leꞌa Pedr cha ndab ndoꞌ Jesús: —Señor, uzhebpa wen nde beuna sa ndee. Tal go nlad gundeꞌe besa chon ramad: dub‑a ná ten go, leꞌa stub‑a ná ten Moisés, nsea stub‑a ná ten Elí.
MAT 17:5 Ndalen li nsoꞌyadiꞌizh Pedr, cha ulen dub xkaw msu xeꞌa idub sa ndebe bexa. Leꞌa lat xkaw wa mgen ti Dios ndab: —Leꞌa ta ndee Xiꞌín naꞌ. Leꞌa naꞌ nkweaꞌ ladna xa no ntenno lad naꞌ xa. Bsakyoꞌón bega ta ndab xa.
MAT 17:6 Leꞌa gor na mbiꞌín be xmen Jesús ta wa, cha msaxib bexa gast ndoꞌ yo ngol xtuzh bexa, no uzhebpa mzheb bexa.
MAT 17:7 Leꞌa Jesús cha ubii gax wats bexa, cha mgal Jesús gek bexa, cha ndab xa: —Gosoꞌ bega, lá izhebta bega.
MAT 17:8 Leꞌa gor na mwiꞌi bexa yá naꞌanla ton ndebe sa wa. Leꞌa Jesús nabla nsoꞌ.
MAT 17:9 Leꞌa gor na nchaꞌlayoꞌo bexa bet wa, leꞌa Jesús ndab ndoꞌ bexa: —Naꞌan ton ndoꞌ ná gudiꞌizh bega ta li uniꞌí bega wa, gast gor ibangal naꞌ, Xa Myak Men Ndoꞌ Gizhliyo.
MAT 17:10 Leꞌa bexa wa cha unabdiꞌizh ndoꞌ Jesús ndab: —¿Xtaꞌan ndab be mech ten ley leꞌa Elí ned ilen, weꞌeta ilen Cristo xa utuꞌub Dios zha?
MAT 17:11 Leꞌa Jesús cha ukaꞌab ndab: —Ta ugeaka leꞌa Elí nedka ilen ndontsa list kwe be men.
MAT 17:12 Leꞌa naꞌ gáp ndoꞌ bego, leꞌa Elí wa mbiꞌidla. Ná leꞌa be men lá igondoꞌ xa, ndi ugap mbinno bexa xa lakta nlad bexa. No liga gunno bexa naꞌ, Xa Myak Men Ndoꞌ Gizhliyo.
MAT 17:13 Weꞌe leꞌa be xmen Jesús myakbeꞌena leꞌa Jesús mbidiꞌizh cuent ten Juan xa ulaleaꞌ be men.
MAT 17:14 Leꞌa gor na mlaꞌnchaꞌ bexa sa nde be men kwaꞌad, leꞌa dub xabgiꞌi cha ulen wats Jesús, cha msaxib xa ndoꞌ Jesús ndab xa:
MAT 17:15 —Señor, blats ladna go xiꞌín naꞌ, leꞌa meꞌed uzhebpa kweaꞌ nsak gizhkaw. Sian biaj nlayat meꞌed ndoꞌ giꞌ no ndoꞌ nits.
MAT 17:16 Leꞌa naꞌ ngwaꞌnola meꞌed ndoꞌ be xmen ga, ná leꞌa bexa lá ngun gan yakna meꞌed.
MAT 17:17 Leꞌa Jesús cha ndab ndoꞌ be men: —Uzheꞌeb ngud nak bega no ndidotsa ngeꞌ ladna bega Dios. ¿Ploxá tiemp yoꞌo naꞌ lat bega zhaga? ¿Sta ploxá tiemp uxik naꞌ ndoꞌ bega zhaga? Utseano bega meꞌed baꞌ sa ndee.
MAT 17:18 Leꞌa Jesús cha uteyo mbi bxin ncho ladoꞌo meꞌed bgiꞌi wa. Leꞌa mbi bxin wa cha utoꞌo, cha bi leꞌa gor wa myakna meꞌed wa.
MAT 17:19 Tsoꞌo wa leꞌa be xmen Jesús ulen wats Jesús, unabdiꞌizh bexa ndoꞌ Jesús, ndab bexa: —¿Xtaꞌan lá ngun besa gan igontuꞌub besa mbi bxin wa zha?
MAT 17:20 Leꞌa Jesús cha ndab: —Leꞌa bega ndidotsa ngeꞌ ladna Dios. Leꞌa naꞌ gáp ndoꞌ bega tal leꞌa bega ngeꞌ ladna Dios lak tuzh dub bid ten ya mostas, leꞌa bega sunka gan gab ndoꞌ bet ndee: “Bxoꞌon sa ndee, waꞌ sa baꞌ”; leꞌa bet cha uxoꞌon. Tal leꞌa bega li igeꞌ ladna Dios, leꞌa bega itea taꞌa sunka gan.
MAT 17:21 Parea leꞌa be ltsaꞌa mbi bxin ndee lá yoo gan itoꞌo xagaꞌ. Nkiꞌin lá gaw bega dub tiemp no mas gudiꞌizhno bega Dios ndontsa slaꞌa be mbi bxin wa be men.
MAT 17:22 Leꞌa dub wizh zha ndencho bexa wa Galilea, leꞌa Jesús ndabgal ndoꞌ be xmen na: —Leꞌa naꞌ, Xa Myak Men Ndoꞌ Gizhliyo, yak cuent ndoꞌ yaꞌa be men.
MAT 17:23 Leꞌa bexa wa cha gut naꞌ, parea leꞌa wizh yon leꞌa naꞌ ibangal. Leꞌa bexa wa cha uzhebpa uban myoꞌo ladna.
MAT 17:24 Leꞌa bexa wa cha nchaꞌagal gezh Capernaum. Weꞌe leꞌa bexa na nkaꞌa med ten niꞌi ten Dios ulen ndoꞌ Pedr, ndab bexa: —¿Nkix mech ten bega med ndantiꞌin bexa niꞌi ten Dios zha?
MAT 17:25 Leꞌa Pedr cha ukaꞌab ndab: —Leꞌa xa nkixka‑yá. Ngol gor uyoꞌo Pedr len niꞌi, leꞌa Jesús ned uníꞌi ndoꞌ Pedr, ndab xa: —¿Xteꞌe nsak lu, Simón? Leꞌa bexa ndon leꞌa nibeꞌe ndoꞌ gizhliyo, ¿ton ndoꞌ ná ndun bexa cobr be med zha? ¿Ndoꞌ bexa lazh xa nate ndoꞌ bexa ntoꞌo sit?
MAT 17:26 Leꞌa Pedr cha ukaꞌab ndab: —Ndoꞌ bexa ntoꞌo sit ndun bexa cobr. Leꞌa Jesús cha ndab: —Ta ugeaka leꞌa bexa lazh xa nibeꞌe wa naꞌanpa juerska kix ta wa.
MAT 17:27 Parea ndontsa lá gakloo bexa, waꞌ toꞌo lagun, cha btsaꞌab gibganch ndoꞌ nits wa. Leꞌa mbeal ned isen‑a, leꞌa toꞌo ma wa izheal lu dub med. Cha biꞌi‑yá waꞌtix ta ten itop beuna.
MAT 18:1 Tsoꞌo wa leꞌa be xmen Jesús ulen ndoꞌ Jesús ndab bexa: —¿Ton mas nsak lat bexa nibeꞌe Dios?
MAT 18:2 Leꞌa Jesús cha utezh dub meꞌed, cha msoꞌ Jesús meꞌed tlaw bexa.
MAT 18:3 Cha ndab xa ndoꞌ bexa: —Leꞌa naꞌ gáp ndoꞌ bego leꞌa tal bega lá yak lak nak be meꞌed, leꞌa bega lá yoo gan yate lat bexa leꞌa Dios nibeꞌe.
MAT 18:4 Ta weꞌe leꞌa tal ton yak tuzh ndoꞌ Dios lak nak dub meꞌed ndee, leꞌa xa wa mas nsak lat bexa leꞌa Dios nibeꞌe.
MAT 18:5 Leꞌa tal ton dub xmen naꞌ utsin gak xa ndoꞌ dub meꞌed nak cuent meꞌed ndee, leꞌa xa wa cuentkata ndoꞌ naꞌ utsin nak.
MAT 18:6 ’Leꞌa tal ton utsabgix dub xa ndangea ladna naꞌ ndoꞌ ta ugap, leꞌa xa wa mas dub gealkweaꞌ siꞌil iniꞌí ndoꞌ dub xa nkea dub geꞌ siꞌil gen na, cha utsaꞌab be men xa sa mas wat len nitsdoꞌo.
MAT 18:7 Proꞌob be men nde ndoꞌ gizhliyo isabgix ndoꞌ ta ugap. Idub tiemp ncho ta ntsabgix be men ndoꞌ ta ugap, parea uzhebpa proꞌob bexa leꞌa utsabgix stubga men.
MAT 18:8 ’Ta weꞌe tal leꞌa dub yaꞌa bega natal dub xoꞌo bega utsabgix bega, ulobtoꞌog bega‑yá cha udabi bega‑yá. Mas wen yoo bega wats Dios moch bega, ndoꞌ ndap bega itop yaꞌa bega nsea itop xoꞌo bega yaꞌ bega ndoꞌ giꞌ nunk lá yuꞌu.
MAT 18:9 No tal leꞌa dub ngusndoꞌ bega utsabgix bega, uloꞌo bega‑yá cha udabi bega‑yá. Mas wen yoo bega wats Dios dubtsa ngusndoꞌ bega, ndoꞌ itop ngusndoꞌ bega yaꞌ bega ndoꞌ giꞌ infierno.
MAT 18:10 ’Blaꞌach bega lá uxelad bega ni dub men ndangea ladna naꞌ lak dub meꞌed. Leꞌa naꞌ gáp ndoꞌ bego leꞌa be angel ndesoꞌ ulaꞌach bexa wa idub tiemp nde wats Xus naꞌ, xa nsob gibeꞌa.
MAT 18:11 Leꞌa naꞌ, Xa Myak Men Ndoꞌ Gizhliyo, ndalteꞌezh naꞌ bexa ulaꞌ, bexa sit nak wats Dios, ndontsa gap bexa gealnaban ndoꞌ Dios.
MAT 18:12 ’¿Xá nsak bega zha? Tal leꞌa dub xabgiꞌi ndap dub gayoꞌo borreg, cha ilaꞌ dub ma, ¿lid ulaꞌa xa isadap gaꞌal ncho tiꞌin bdap ma, cha ndi yaꞌ xa be geꞌe yaꞌkwaꞌan xa ma li ulaꞌ wa?
MAT 18:13 Leꞌa naꞌ gáp ndoꞌ bega, leꞌa gor mzheal xa ma, leꞌa xa mas itenno ladna ma ulaꞌ wa ndoꞌ isadap gaꞌal ncho tiꞌin bdap bema naꞌanpa ilaꞌ.
MAT 18:14 No liga leꞌa Dios Xus beuna xa nsob gibeꞌa lá nlad isabgix ni dub bexa ndangea ladna naꞌ.
MAT 18:15 ’Tal dub ltsaꞌa ga ugap gunno ga, cha waꞌyadiꞌizhno ga nab xa. Tal xa nsakyoꞌón ta ndab ga wa, leꞌa ga mbinka gan mchealtsaꞌa xa wa.
MAT 18:16 Ná tal leꞌa xa lá isakyoꞌón ta ndab ga, biꞌi ga stub xa natal stop xa ndontsa no bexa gab ndoꞌ xa ná xtaꞌan ta ugap mbin xa.
MAT 18:17 Tal leꞌa xa wa lá isakyoꞌón ta ndab bexa wa, cha gab ga‑yá sa nzhealbe bexa nak xmen naꞌ. No binno bega xa cuent dub xa lá nchandoꞌ Dios natal cuent dub xa ugap nsen med nkix be men ndoꞌ Roma.
MAT 18:18 ’Leꞌa naꞌ gáp ndoꞌ bego leꞌa ta na lá nlaꞌa bega gun be men ndoꞌ gizhliyo ndee, leꞌa ta wa no Dios lá ulaꞌa gun bexa wa. No liga ta na nsaꞌa bega diꞌizh gun be men ndoꞌ gizhliyo, leꞌa ta wa no Dios usaꞌa diꞌizh gun bexa.
MAT 18:19 ’No gáp naꞌ stub biaj, tal leꞌa top bega dubtsa gudiꞌizh inab dub taꞌa ndoꞌ Xus naꞌ xa nsob gibeꞌa, leꞌa xa saꞌaka ta inab bega wa.
MAT 18:20 Leꞌa sa nde top xa natal chon xa nak xmen naꞌ, leꞌa naꞌ no nsoꞌ tlaw bexa sa wa.
MAT 18:21 Leꞌa Pedr cha ulen wats Jesús cha unabdiꞌizh Pedr, ndab xa: —Señor, ¿plo biaj nsabndoꞌ gungeꞌ lad naꞌ ndoꞌ dub ltsaꞌa naꞌ tal xa ugap gunno naꞌ zha? ¿Nati gaꞌad biaj?
MAT 18:22 Leꞌa Jesús cha ukaꞌab ndab: —Naꞌanpa gáp naꞌ gaꞌadtsa biaj gungeꞌ ladna lu ndoꞌ xa, leꞌa naꞌ ndi gáp gast chon gaꞌal ncho tiꞌi gaꞌad biaj gungeꞌ ladna lu ndoꞌ xa.
MAT 18:23 ’Leꞌa lak nibeꞌe Dios be men nak lak ndun dub rey nibeꞌe, gor na nlad xa iniꞌí xa ná plo med nsaꞌab be xmen xa ndoꞌ xa.
MAT 18:24 Leꞌa gor na tiꞌi usaxan rey ndun ta wa, cha nseano bexa dub xmen rey uzhebpa sian mil med nsaꞌab ndoꞌ rey.
MAT 18:25 Leꞌa xa wa naꞌanpa ndap xtaꞌan kix xa, ta weꞌe leꞌa rey wa unibeꞌe ndoꞌ be xmen na udoꞌo bexa xa nsaꞌab med wa no xagots ten xa no be xin xa no iteanak be ta ndap xa wa, ndontsa kix xa med wa.
MAT 18:26 Weꞌe leꞌa xa wa cha msaxib ndoꞌ rey, ndab xa: “Señor, kweas go dub ndeꞌep leꞌa naꞌ skixka itea med wa.”
MAT 18:27 Leꞌa rey cha mlats ladna xa wa, mbingeꞌ ladna rey ta li nsaꞌab xa wa, cha mxaꞌak rey xa.
MAT 18:28 Parea leꞌa gor utoꞌo xmen rey sa wa, mzheꞌal xa stubga xmen rey nsaꞌab dub tuzh med ndoꞌ xa. Cha usen xa gen xa wa nkeutsebe xa‑yá, cha ndab xa: “¡Utix ta nsaꞌab lu ndoꞌ naꞌ!”
MAT 18:29 Leꞌa xa nsaꞌabga wa cha usaxib, ndab xa: “Kweas ga dub ndeꞌep leꞌa naꞌ skixka itea‑yá.”
MAT 18:30 Ná leꞌa xa wa lá ngungeꞌ ladna, cha ndi ngwaꞌukeꞌa xa xa nsaꞌab med wa litgiꞌib gast kix xa ta nsaꞌab xa wa.
MAT 18:31 Leꞌa gor na uniꞌí stapla be xmen rey ta li mbin xa wa, cha uzheꞌeb uban myoꞌo ladna bexa. Cha nseaꞌbeyab bexa ndoꞌ rey ta li ngok wa.
MAT 18:32 Leꞌa rey cha utezh xa na li mbin wa, cha ndab xa ndoꞌ xa: “¡Uzhebpa ugap nak lu! Leꞌa naꞌ mbingeꞌ ladna iteanak be ta nsaꞌab lu ndoꞌ naꞌ naꞌanpa ikix lu‑yá, geal leꞌa lu li unab ndoꞌ naꞌ.
MAT 18:33 ¿Lid no lu nsabndoꞌ ilats ladna ltsaꞌa lu wa zha, lak mlats lad naꞌ lu?”
MAT 18:34 Leꞌa rey cha ngokloo cha unibeꞌe xa ndoꞌ be soldad ten xa utsaksi bexa xa wa gast kix xa itea be med nsaꞌab xa.
MAT 18:35 No ndab Jesús: —Leꞌa Xus naꞌ xa nsob gibeꞌa noga li gunno bego tal leꞌa bega lá gungeꞌ ladna ndoꞌ be ltsaꞌa bega idub ncho ladna bega be ta ugap ndanno bexa bega.
MAT 19:1 Leꞌa gor mtayadiꞌizh Jesús ta wa, cha mkaꞌan xa Galilea nchaꞌa xa Judea stub toꞌo yowbeꞌe Jordán.
MAT 19:2 Leꞌa sa wa leꞌa kwaꞌadpa men usankea tsoꞌo xa, cha myunyakna Jesús bexa gizh sa wa.
MAT 19:3 Weꞌe leꞌa pla bexa fariseo ulen wats Jesús, nlad bexa gab Jesús dub ta lid leꞌa nak, ndab bexa ndoꞌ Jesús: —¿Utsin nak ulaꞌa dub xabgiꞌi xagots ten na, tal xa lá nsak ladna xtaꞌanla dub ta ndun xa zha?
MAT 19:4 Leꞌa Jesús cha ukaꞌab ndab: —¿Lá ndoꞌol bega zha sa nkeaniꞌi diꞌizh ten Dios, leꞌa Dios leꞌa mbindeꞌe xabgiꞌi no xagots zha ned wa?
MAT 19:5 Cha ndab Dios: “Ta weꞌe ulaꞌa xabgiꞌi xus na no xnaꞌa na zha na ikaꞌa xa xagots ten xa. Leꞌa cuent ten Dios leꞌa itop xa wa yak dubtsa men.”
MAT 19:6 Leꞌa bexa wa dubtsa men myak, yá lid topta xa. Ta weꞌe gáp naꞌ leꞌa bexa mchealte Dios, lá nsabndoꞌ dub men uteltsaꞌa bexa.
MAT 19:7 Leꞌa bexa fariseo wa cha unabdiꞌizhgal ndab: —¿Xtaꞌan ndab ley mkeꞌa Moisés zha leꞌa dub xabgiꞌi syoꞌo gan ulaꞌa xagots ten na, tal ned usaꞌa xa dub git ndoꞌ xagots, gab‑a leꞌa xa ulaꞌa xa wa?
MAT 19:8 Leꞌa Jesús cha ndab: —Geal ngud nak ladoꞌo bega, ta weꞌe mkeꞌa Moisés syoꞌo gan li ulaꞌa bega xagots ten bega. Ná leꞌa zha ned naꞌanpa li ngak‑a.
MAT 19:9 Leꞌa naꞌ gáp ndoꞌ bego leꞌa tal ton dub xabgiꞌi ulaꞌa xagots ten na, cha ikaꞌa xa stubga xagots, leꞌa xabgiꞌi wa ndapka ke ndoꞌ Dios. No liga tal stub xabgiꞌi ikaꞌaga xagots wa, leꞌa xa wa no ndap ke ndoꞌ Dios. Ná leꞌa tal ton dub xagots ndap xabgiꞌi ugal stubga xabgiꞌi, leꞌa xabgiꞌi ten xa wa sak ulaꞌa xa.
MAT 19:10 Leꞌa be xmen Jesús cha ndab ndoꞌ Jesús: —Tal li nsabndoꞌ lá ulaꞌa xabgiꞌi xagots ten na, mas wen naꞌanpa ukwaꞌan xa xagots.
MAT 19:11 Leꞌa Jesús cha ndab: —Naꞌanpa itea xabgiꞌi uxik lá ukwaꞌan xagots, ndi ncho bexa li msaꞌa Dios nak bexa.
MAT 19:12 No ncho be xabgiꞌi lá ukwaꞌan xagots geal leꞌa zha ndalkata xa lá yoo gan gap xa xin xa leꞌa xa lá utsin nak. No ncho be xabgiꞌi leꞌaka be men li ndazhaꞌa xa. No ncho be xabgiꞌi lá ukwaꞌan xagots ndontsa mas gun xa tiꞌin ten Dios. Leꞌa tal ton bexa na syoꞌo gan li gun, leꞌa bexa nsabndoꞌka li gun ta wa.
MAT 19:13 Weꞌe leꞌa be men ulenno be meꞌed ten na wats Jesús, ndontsa uxoꞌob Jesús yaꞌa na gek be meꞌed, inab xa ulaꞌach Dios be meꞌed. Leꞌa be xmen Jesús cha uteyo bexa nseano be meꞌed wa.
MAT 19:14 Ná leꞌa Jesús cha ndab ndoꞌ be xmen na: —Blaꞌa bego giꞌid be meꞌed baꞌ wats naꞌ. Lá uka bega giꞌid be meꞌed, leꞌa sa nibeꞌe Dios wa yate bexa yak lak nak be meꞌed ndee.
MAT 19:15 Cha mxoꞌob xa yaꞌa xa gek be meꞌed wa, weꞌe cha nseaꞌ xa.
MAT 19:16 Leꞌa dub xabgiꞌi cha ulen wats Jesús unabdiꞌizh xa ndoꞌ xa ndab xa: —Mech wen, ¿xtaꞌan dub ta wen gun naꞌ ndontsa no naꞌ gap gealnaban ndoꞌ Dios, ta nunk lá idub zha?
MAT 19:17 Leꞌa Jesús cha ukaꞌab ndab: —¿Xtaꞌan ngi wen ndab lu ndoꞌ naꞌ zha? Naꞌan ton wen ndoꞌ gizhliyo, ndon nabtsa Dios wen nak. Parea tal leꞌa lu nlad gap gealnaban ta nunk lá idub, bxobgek ndoꞌ be ta nibeꞌe Dios.
MAT 19:18 Leꞌa xabgiꞌi wa cha ndab: —¿Xtaꞌanma be ta unibeꞌe Dios gun naꞌ zha? Leꞌa Jesús cha ndab: —Lá gut lu men. Lá ugal lu xa ten stubga men. Lá gun lu gealwaꞌan. Lá gun lu gealkwiꞌin.
MAT 19:19 Wankea xus lu nsea xnaꞌa lu. Bkweaꞌ ladna lu be ltsaꞌa lu lakkata lu.
MAT 19:20 Leꞌa xabgiꞌi wa cha ndab: —Iteanak ta ndab go wa ndunka naꞌ idub zha tuzhta naꞌ. ¿Xtaꞌan ndun jwalt gun naꞌ?
MAT 19:21 Leꞌa Jesús cha ndab: —Tal lu nlad gak lak nlad Dios, byaꞌ cha bdoꞌo itea be ta ndap lu, cha btseꞌa med wa ndoꞌ bexa uban nak. Weꞌe gap lu sian taꞌa ndoꞌ Dios. Cha utsea usankea tsoꞌo naꞌ.
MAT 19:22 Leꞌa gor na mbiꞌín xabgiꞌi wa ta wa, cha uban myoꞌo ladna xa, cha nseaꞌ xa, leꞌa xa uzhebpa sian taꞌa ndap.
MAT 19:23 Leꞌa Jesús cha ndab ndoꞌ be xmen na: —Leꞌa naꞌ gáp ndoꞌ bega uzheꞌeb ugan yate dub xa rik sa nibeꞌe Dios.
MAT 19:24 Stub biaj gáp naꞌ‑yá: ndi mas lid bid itid dub came geꞌed xan dub yagux, ndoꞌ yak dub xa rik dub xa nibeꞌe Dios.
MAT 19:25 Leꞌa gor na mbiꞌín be xmen Jesús ta wa, cha uzhebpa ngwanseana bexa, ndab bexa ndoꞌ be ltsaꞌa xa: —¿Tonxá syoꞌo gan yate sa nibeꞌe Dios zhaga?
MAT 19:26 Leꞌa Jesús cha mwiꞌi ndoꞌ bexa ndab xa: —Leꞌa cuent ten nabtsa be men leꞌa‑yá lá yoo gan. Ná leꞌa cuent ten Dios itea taꞌa syoꞌoka gan.
MAT 19:27 Leꞌa Pedr cha ndab ndoꞌ Jesús: —Unaꞌ go, leꞌa besa mlaꞌa itea be taꞌa ndap besa, cha ndi usankea besa tsoꞌo ga. ¿Ta weꞌe xtaꞌan ikaꞌa besa zha?
MAT 19:28 Leꞌa Jesús cha ndab ndoꞌ bexa wa: —Leꞌa naꞌ gáp ndoꞌ bego leꞌa gal dub wizh yunchaꞌaw Dios iteanak be taꞌa, zha na leꞌa naꞌ, Xa Myak Men Ndoꞌ Gizhliyo, isoꞌob wats Dios sa inibeꞌe naꞌ. Leꞌa gal zha wa leꞌa bego nsankea tsoꞌo naꞌ nat noga gap tibtop sa isob bega inibeꞌe bega ndoꞌ isatibtop xkwaꞌa bexa Israel.
MAT 19:29 Leꞌa tal ton ulaꞌa lid na no wit na no bsan na no xus na no xnaꞌa na no xagots ten na no xmeꞌed na no be yo ten na ndontsa gun xa tiꞌin ten naꞌ, leꞌa xa wa ikayaꞌa stub gayoꞌo biaj mas be ta mlaꞌa xa wa. No gap xa gealnaban ta nunk lá idub.
MAT 19:30 Ná kwaꞌad bexa nsak nat wa, yak bexa naꞌanpa nsak; no leꞌa bexa naꞌanpa nsak nat wa, yak bexa nsak.
MAT 20:1 ’Leꞌa lak nibeꞌe Dios nak lak mbin dub xabgiꞌi ndap dub bleꞌa yo ncho ya uv. Utoꞌo xa dub tempran gor nseayat xeꞌa nchaꞌkwaꞌan xa bexa gun tiꞌin ten uv.
MAT 20:2 Ndab xa ndoꞌ bexa gun tiꞌin wa leꞌa xa kix dub med denario dub wizh, cha unika bexa. Cha mtuꞌub xa bexa ndoꞌ tiꞌin wa.
MAT 20:3 Cha utoꞌogal xa gor nkea ugeꞌa gor tempran, nchaꞌa xa ndoꞌ xgeꞌe. Weꞌe uniꞌí xa pla xabgiꞌi naꞌan xtiꞌin ndap gun.
MAT 20:4 Cha ndab xa ndoꞌ bexa wa: “No bega waꞌyun tiꞌin ndoꞌ ya uv ten naꞌ. Leꞌa naꞌ kix dub lak taꞌa nsabndoꞌ ikaꞌa bega.” Leꞌa bexa wa cha nchaꞌaga.
MAT 20:5 Cha liga utoꞌogal xa gor gawizh no gor nkea yon uzhe, no ligal ndab xa ndoꞌ be men.
MAT 20:6 No utoꞌogal xa pa gor nkea ugaꞌay uzhe, cha mzheal xa stapla bexa lá ndap tiꞌin gun na. Cha unabdiꞌizh xa ndab xa: “¿Xtaꞌan lndeꞌe nde bega sa ndee idub wizh, ni lá ndun bega tiꞌin?”
MAT 20:7 Leꞌa bexa wa cha ndabbe: “Naꞌan ton nsaꞌa tiꞌin gun besa.” Leꞌa xwan geꞌe wa cha ndab: “Waꞌyun bega tiꞌin ndoꞌ ya uv ten naꞌ. Leꞌa naꞌ kix dub lak ta nsabndoꞌ ikaꞌa bega.”
MAT 20:8 ’Leꞌa gor na yá ngwaꞌas wizh, leꞌa xwan tiꞌin wa cha ndab ndoꞌ xa nchansu ndoꞌ tiꞌin wa: “Utezh bexa ndun tiꞌin baꞌ. Cha ndon ned bexa tsoꞌo uyote baꞌ utix ikaꞌa bexa, weꞌeta utix ikaꞌa bexa ned uyote baꞌ.”
MAT 20:9 Leꞌa gor nseabe bexa uyote gor nkea ugaꞌay gor uzhe, cha utix xa dub med denario ukaꞌa kadga dub bexa wa.
MAT 20:10 Leꞌa tsoꞌo wa gor nseabe bexa ned uyote gor tempran wa, mbinbeꞌe bexa mas sian med ikaꞌa bexa. Ná leꞌa bexa no ukaꞌa dubtsa denario kadga dub bexa.
MAT 20:11 Leꞌa gor usen bexa med wa, cha ngokloo bexa ndoꞌ xwan tiꞌin wa,
MAT 20:12 ndab bexa ndoꞌ xa: “Leꞌa bexa tsoꞌo uyote mbin tiꞌin baꞌ dub gortsa mbin tiꞌin. Ná go dubtsa utix ukaꞌa bexa baꞌ no besa na mxik uzheꞌeb utii mbin tiꞌin idub wizh.”
MAT 20:13 Leꞌa xwan tiꞌin wa cha ndab ndoꞌ dub bexa wa: “Amig, naꞌ naꞌanpa dub ta ugap ndanno lu. ¿Cha lid uni lu ikaꞌa lu dub denario dub wizh zha?
MAT 20:14 Nat byaꞌ, cha byoꞌo ta ukaꞌa lu baꞌ. Leꞌa naꞌ nlad usa dub lak ta ukaꞌa lu ndoꞌ bexa tsoꞌo uyote baꞌ.
MAT 20:15 ¿Lid syoꞌo gan gunno naꞌ med ten naꞌ guniꞌi xteꞌe nlad naꞌ zha? ¿Xtaꞌan ndaklono lu stub xa baꞌ geal leꞌa naꞌ utsin nak ndoꞌ xa?”
MAT 20:16 Cha no ndab Jesús: —Li leꞌa kwaꞌad bexa nsak nat wa, yak bexa naꞌanpa nsak; leꞌa bexa naꞌanpa nsak nat wa, yak bexa nsak. Leꞌa Dios nbezh kwaꞌad men, parea naꞌanpa nti Dios kwaꞌad xa.
MAT 20:17 Leꞌa gor na nsoꞌ bexa nes nchaꞌa bexa gezh Jerusalén, leꞌa Jesús mbiꞌi isatibtop be xmen na dub lad, cha ndab xa:
MAT 20:18 —Blaꞌach bego leꞌa beuna nchaꞌbe Jerusalén, leꞌa sa wa leꞌa naꞌ, Xa Myak Men Ndoꞌ Gizhliyo, yak cuent ndoꞌ yaꞌa be uleꞌay nibeꞌe no be mech ten ley. Leꞌa bexa wa gab nsabndoꞌ gat naꞌ,
MAT 20:19 cha yun bexa cuent naꞌ ndoꞌ bexa naꞌanpa xa judio. Leꞌa bexa wa inisi naꞌ no kin bexa naꞌ no gut bexa naꞌ ndoꞌ cruz. Parea leꞌa gal wizh yon leꞌa naꞌ ibangal ndoꞌ gealgut.
MAT 20:20 Weꞌe leꞌa Jacob nsea Juan be xin Zebedeo ulenno xnaꞌa na wats Jesús. Leꞌa xagots wa cha msaxib ndoꞌ Jesús, inab xa dub taꞌa ndoꞌ Jesús.
MAT 20:21 Leꞌa Jesús cha ndab ndoꞌ xa: —¿Xtaꞌan nlad lu gun naꞌ zha? Leꞌa xa wa cha ndab: —Nlad naꞌ gab go kwe itop xiꞌín naꞌ ndee sa inibeꞌe go, dub xa wats ga lad gaꞌal no stub xa wats ga lad raves.
MAT 20:22 Leꞌa Jesús cha ndab ndoꞌ itop bexa wa: —Leꞌa bego ni lá iniꞌí xtaꞌan unab bega. ¿Sxik bega itid bega gealkweaꞌ cuent gealkweaꞌ itiꞌid naꞌ zha? ¿No sni bega gat bega lak gat naꞌ zha? Leꞌa bexa cha ndab: —Snika besa.
MAT 20:23 Leꞌa Jesús cha ndab: —Leꞌa naꞌ gáp leꞌa bego stidka be gealkweaꞌ cuent gealkweaꞌ itiꞌid naꞌ, no sat bega lak gat naꞌ. Parea leꞌa sa kwe bega, dub bega wats naꞌ lad gaꞌal no stub bega lad raves wa, leꞌa sa wa naꞌanpa naꞌ inibeꞌe. Leꞌa Dios Xus naꞌ leꞌa gab ná ton kwe sa wa.
MAT 20:24 Leꞌa gor na mbiꞌín isatiꞌi xmen Jesús ta li unab Jacob nsea Juan wa, cha ngokloo bexa.
MAT 20:25 Leꞌa Jesús cha utezh bexa wa, cha ndab xa: —Leꞌa bego uniꞌíka leꞌa bexa nibeꞌe be nacion naꞌanpa ulaꞌa gun be men dub taꞌa naꞌanpa nibeꞌe bexa, no bexa mas nsak ten bexa uzhebpa nibeꞌe ndoꞌ be men.
MAT 20:26 Ná leꞌa bego ndee naꞌanpa li nsabndoꞌ gak. Ndi tal ton bega nlad gak dub xa nsak lat bega, leꞌa xa wa nsabndoꞌ gakno iteata bega.
MAT 20:27 No tal ton bega nlad yansu lat bega, leꞌa xa wa nsabndoꞌ gun tiꞌin ndoꞌ bega.
MAT 20:28 Leꞌa naꞌ, Xa Myak Men Ndoꞌ Gizhliyo, naꞌanpa ndal por na gun be men tiꞌin ndoꞌ naꞌ. Leꞌa naꞌ ndi ndalyun tiꞌin ndoꞌ be men, no usa naꞌ gealnaban ten naꞌ gat naꞌ kix naꞌ ke ten kwaꞌad men.
MAT 20:29 Leꞌa gor nseaꞌ Jesús nsea be xmen na utoꞌo bexa gezh Jericó wa, leꞌa kwaꞌadpa be men nchabenkea tsoꞌo xa.
MAT 20:30 Leꞌa toꞌo nes wa ndebe top xabgiꞌi lá naꞌ. Leꞌa gor na mbiꞌín bexa leꞌa Jesús nseatid sa wa, cha ugeꞌ ndab bexa: —¡Señor, xin David! ¡Blats ladna go besa!
MAT 20:31 Leꞌa be men cha uteyo bexa ndontsa naꞌan xteꞌe gab bexa. Ná leꞌa bexa ndi mas ugeꞌ ndab: —¡Señor, xin David! ¡Blats ladna go besa!
MAT 20:32 Leꞌa Jesús ngwaꞌisoꞌ utezh itop xa lá naꞌ wa. Cha unabdiꞌizh Jesús ndoꞌ bexa ndab xa: —¿Xtaꞌan nlad bega gunno naꞌ bega?
MAT 20:33 Leꞌa bexa wa cha ndab: —Señor, leꞌa besa nlad inaꞌ.
MAT 20:34 Weꞌe leꞌa Jesús cha mlats ladna bexa, cha mgal Jesús ngusndoꞌ bexa. Cha bi leꞌa gor wa leꞌa bexa wa mnaꞌlabe. Cha no bexa usankea tsoꞌo Jesús.
MAT 21:1 Leꞌa ngol gor na yá nchaꞌlayaꞌ gax Jesús no be xmen xa Jerusalén, ulayaꞌ bexa gezh Betfagé sa nsob Bet Olivo. Leꞌa Jesús cha mtuꞌub top xmen na,
MAT 21:2 ndab xa: —Waꞌ bega len gezh nde mas ndoꞌ ndee, cha izheal bega dub burr gots nsoꞌ nchii, no dub xin ma. Cha uxaꞌak bega bema, goꞌo bega ma sa ndee.
MAT 21:3 No tal ton uka ma ndoꞌ bega, gud bega leꞌa mech guntiꞌin ma. Cha ulaꞌa xa goꞌo bega ma.
MAT 21:4 Li ndab Jesús ndontsa gak‑a lak ndab dub profet sakndoꞌ Dios, ndab xa:
MAT 21:5 Gud bego ndoꞌ bexa gezh Sion: “Bwiꞌi bega, leꞌa xa nibeꞌe ten bega nsea sa ndee. Bchaꞌan nak xa nsob xa tsoꞌo dub burr, tsoꞌo dub burr tuzh, xin dub man yoꞌo.”
MAT 21:6 Leꞌa be xmen Jesús wa cha nchaꞌbe, cha mbin bexa lakka unibeꞌe Jesús ndoꞌ bexa.
MAT 21:7 Cha mbiꞌi bexa burr wa nsea burr tuzh wa, cha mtiꞌib bexa dubga xab bexa tsoꞌo ma. Cha usob Jesús tsoꞌo ma.
MAT 21:8 Leꞌa kwaꞌad be men cha mte be lad nbix bexa ndoꞌ nes sa itid Jesús, no ncho bexa ulobtoꞌog be xos ya gin, cha mte bexa‑yá nes wa.
MAT 21:9 Leꞌa be men nchaꞌbe ned ndoꞌ Jesús no be men nseabenkea tsoꞌo Jesús ugeꞌ ndab: —¡Siꞌil nak xin David! ¡Dios uzhebpa nlaꞌach xa baꞌ, xa na mtuꞌub Dios Xa Nibeꞌe! ¡Siꞌil nak Dios nsob gaꞌap!
MAT 21:10 Leꞌa gor na uyote Jesús len gezh Jerusalén, leꞌa iteanak be men usaxan ndeseyoch, unabdiꞌizh bexa ndab bexa: —¿Ton xa baꞌ zha?
MAT 21:11 Leꞌa be men ndeseano Jesús wa cha ndab: —Leꞌa xa ndee Jesús, xa ndadiꞌizh sakndoꞌ Dios, xa gezh Nazaret ten Galilea.
MAT 21:12 Leꞌa Jesús cha nchaꞌa len niꞌi ten Dios, cha ulantuꞌub xa bexa nadoꞌotiꞌix taꞌa sa wa. No mtixte xa be mes ten bexa ntil be med, no be yaxil ten bexa ndiꞌibudoꞌo be palom.
MAT 21:13 Cha ndab xa ndoꞌ bexa wa: —Leꞌa diꞌizh ten Dios nkeaniꞌi ndab Dios: “Leꞌa lid naꞌ isaleaꞌ dub sa ndadiꞌizhno be men naꞌ.” Ná leꞌa bego ndi ndanno‑yá cuent dub geꞌloꞌo ten be waꞌan.
MAT 21:14 Weꞌe leꞌa pla bexa lá naꞌ no bexa coj cha ulen wats Jesús tale ten niꞌi ten Dios wa, cha myunyakna Jesús bexa.
MAT 21:15 Parea leꞌa be uleꞌay nibeꞌe no be mech ten ley uzheꞌeb ngokloo gor uniꞌí bexa be uyon ndun Jesús wa, no mbiꞌín bexa ta ugeꞌ ndab be meꞌed tale ten niꞌi ten Dios, ndab meꞌed: “¡Siꞌil nak xin David!”
MAT 21:16 Cha ndab bexa ndoꞌ Jesús: —¿Lid ndoꞌón lu xtaꞌan ndab be meꞌed baꞌ zha? Leꞌa Jesús cha ukaꞌab ndab: —Naꞌ ndónka‑yá. ¿Parea lá ndoꞌol bega zha sa nkeaniꞌi diꞌizh ten Dios cuent ten ta ndee? Ndab‑a: Leꞌa go Dios gun leꞌa be meꞌed nsea be medoꞌo gab xteꞌe siꞌil nak go.
MAT 21:17 Leꞌa Jesús cha mlaꞌa bexa mkaꞌan xa gezh Jerusalén. Cha nchaꞌa xa gezh Betania, sa uyoꞌo xa teꞌal wa.
MAT 21:18 Leꞌa stub wizh gor tempran myach xa nchaꞌa xa Jerusalén. Leꞌa nes wa leꞌa Jesús ndanna.
MAT 21:19 Weꞌe uniꞌí xa dub ya higo gax toꞌo nes wa, cha nchaꞌkwaꞌan xa ngus gaw xa ndoꞌ ya wa. Parea naꞌanpa izheal xa ngus ndoꞌ‑yá, ndi latsa nsoꞌ ndoꞌ‑yá. Cha ndab Jesús ndoꞌ ya wa: —Idub isob lu naꞌantapa isoꞌ ngus ndoꞌ lu. Leꞌa ya higo wa cha ubid.
MAT 21:20 Leꞌa gor uniꞌí be xmen Jesús ta wa cha ngwanseana bexa, unabdiꞌizh bexa ndoꞌ Jesús, ndab bexa: —¿Xteꞌe uxax ubid ya higo baꞌ?
MAT 21:21 Leꞌa Jesús cha ukaꞌab ndab: —Leꞌa naꞌ gáp ndoꞌ bego leꞌa tal bega idub ncho ladna ngeꞌ ladna Dios, leꞌa bega sun gan gun lak mbinno naꞌ ya higo ndee, no sun bega gan gab bega ndoꞌ bet ndee: “Utatsob, waꞌ len nitsdoꞌo”, leꞌa‑yá cha lika gak.
MAT 21:22 Leꞌa itea be ta inab bega ndoꞌ Dios tal ngeꞌka ladna bega xa, leꞌa Dios saꞌaka‑yá.
MAT 21:23 Leꞌa gor na mlanseagal Jesús wats niꞌi ten Dios, cha usaxan xa nluu xa be men. Weꞌe leꞌa be uleꞌay nibeꞌe no bexa gox nsak ten bexa judio ulen wats Jesús, ndab bexa: —¿Ton ulaxoꞌob lu gun lu be ta wa zha? ¿Nati ton mtuꞌub lu gun lu ta wa?
MAT 21:24 Leꞌa Jesús cha ukaꞌab ndab: —Leꞌa naꞌ no inabdiꞌizh dub taꞌa ndoꞌ bego. Tal leꞌa bega ikaꞌab, weꞌe no naꞌ gáp ná ton ulaxoꞌob naꞌ li gun naꞌ ta wa.
MAT 21:25 ¿Ton mtuꞌub Juan ulaleaꞌ Juan be men zha? ¿Dios nati dub men? Leꞌa bexa wa cha ndabbe ndoꞌ ltsaꞌa na: —Tal leꞌa beuna gab leꞌa Dios leꞌaka mtuꞌub Juan, leꞌa Jesús inabdiꞌizh ná xtaꞌan lá ngungea ladna beuna xa.
MAT 21:26 Ná tal leꞌa beuna gab leꞌa Juan dub men mtuꞌub, leꞌa be men ndee sakloo ndoꞌ beuna, leꞌa bexa itea mbingea ladna leꞌa Juan dub xa mbidiꞌizh sakndoꞌ Dios.
MAT 21:27 Cha ndab bexa ndoꞌ Jesús: —Leꞌa besa lá iniꞌí ton mtuꞌub Juan. Leꞌa Jesús cha noga ndab: —Ni naꞌga lá gáp ton ulaxoꞌob naꞌ gun naꞌ be ta ndee.
MAT 21:28 Leꞌa Jesús cha unabdiꞌizh ndoꞌ bexa wa ndab xa: —¿Xteꞌe nyakbeꞌena bega ta gáp naꞌ ndee wa? Uyoꞌo dub xabgiꞌi ndap top xin na. Cha ngwaꞌ xa ndoꞌ xin ned xa, ndab xa: “Xiꞌín naꞌ, waꞌyun tiꞌin ndoꞌ yo ten naꞌ sa ncho ya uv.”
MAT 21:29 Leꞌa xin xa wa cha ukaꞌab ndab: “Naꞌ lá nlad gaa.” Parea tsoꞌo wa leꞌa xa mgondoꞌ leꞌa xa ugap ndab, cha nchaꞌaka xa ndoꞌ tiꞌin wa.
MAT 21:30 Leꞌa xabgiꞌi wa no ngwaꞌ ndoꞌ stubga xin na wa, cha leꞌakagal li ndab xa ndoꞌ xin xa. Leꞌa xin xa wa cha ukaꞌab ndab: “Leꞌa naꞌ saaka, tad.” Ná leꞌa xa ndi ni lá nga.
MAT 21:31 ¿Ton ndoꞌ itop xa wa mbin ta nlad xus na zha? Leꞌa bexa wa cha ndab: —Xin ned xa. Leꞌa Jesús cha ndab ndoꞌ bexa: —Leꞌa naꞌ gáp ndoꞌ bego leꞌa bexa nsen med nkaꞌa gobier Roma no be xagots ndun juis mgiꞌi nadoꞌo bexa las bexa, leꞌa ncho bexa wa syoteka sa nibeꞌe Dios. Ná leꞌa bego lá yate sa wa.
MAT 21:32 Leꞌa Juan xa ulaleaꞌ men mbidyadiꞌizh xteꞌe nsabndoꞌ wen gun bega, ná leꞌa bega ni lá ngungea ladna xa. Ná leꞌa bexa nsen med wa no be xagots ndun juis mgiꞌi wa mbingea ladna Juan. Leꞌa bego uniꞌí leꞌa bexa wa mbingea ladna Juan, ná leꞌa bega ni lá igondoꞌ ti no bega nsabndoꞌ gungea ladna xa.
MAT 21:33 ’Blaꞌach bega stub taꞌa usaktabeꞌe naꞌ: Uyoꞌo dub xabgiꞌi ndap dub bleꞌa siꞌil yo. Cha ngos xa ya uv ndoꞌ‑yá, cha ulo xa lo idub gangeak wats‑a. No mbindeꞌe xa dub sa kichkeꞌe xa uv wa, koꞌo xa nits ten uv. No mbindeꞌe xa dub sa gaꞌap isob xa ulaꞌach sa wa. Cha mkwaꞌan xa pla men gun tiꞌin sa wa. Cha nchaꞌa xa sit.
MAT 21:34 Leꞌa zha na yamer ngol tiemp ten uv wa, cha mtuꞌub xa pla xmos xa yaꞌ ndoꞌ be men wa, yaꞌyoꞌo bexa ta na ndal xwan yo wa.
MAT 21:35 Ná leꞌa be men wa ndi usen be mos wa, udin bexa dub xa, cha mbit bexa stub xa, cha mlaꞌgeꞌ bexa stub xa.
MAT 21:36 Leꞌa xwan yo wa cha mtuꞌubgal mas kwaꞌad mos ndoꞌ zha ned wa. Ná leꞌa be men wa ligal mbinno bexa wa.
MAT 21:37 Tsoꞌo wa leꞌa xwan yo wa mtuꞌub xin na, mbinbeꞌe xa leꞌa be men gap mod ndoꞌ xa.
MAT 21:38 Ná leꞌa gor uniꞌí be men wa xin xwan yo wa, cha ndi ndab bexa ndoꞌ ltsaꞌa na: “Leꞌa xa baꞌ leꞌa yaꞌanno yo ndee. Nchaꞌyut beuna xa, cha yaꞌanno beuna‑yá.”
MAT 21:39 Cha usen bexa xa, cha uloꞌo bexa xa dub lad toꞌo yo wa, cha mbit bexa xa.
MAT 21:40 Cha unabdiꞌizh Jesús ndoꞌ be men nde wats xa ndab xa: —¿Xteꞌe nsak bega zha? ¿Leꞌa gor giꞌid xwan yo wa xteꞌe gunno xa bexa mlaꞌach yo wa?
MAT 21:41 Leꞌa bexa cha ndab: —Leꞌa xa utsaksika bexa ugap wa gast gat bexa. Cha usaꞌa xa yo wa ndoꞌ be men xaꞌaga ulaꞌach‑a, bexa na usaꞌa be ta ndal xwan yo wa gal tiemp ten uv wa.
MAT 21:42 Weꞌe leꞌa Jesús cha ndab ndoꞌ bexa: —¿Ni lá ndoꞌol bega diꞌizh ten Dios zha? Ndab‑a: Leꞌa geꞌ na mxelad bexa ndandeꞌe niꞌi, leꞌa ta wa nat nak geꞌ ndon leꞌa nsak nbexan niꞌi. Leꞌa Dios leꞌa mbin ta ndee, dub ta ndanseana beuna.
MAT 21:43 Ta weꞌe leꞌa naꞌ gáp leꞌa Dios ulat ta na nak bega xmen xa, cha ndi usaꞌa Dios ta wa ndoꞌ bexa nxobgek ndoꞌ xa.
MAT 21:44 Leꞌa bexa na ilayat tsoꞌo geꞌ wa, leꞌa bexa wa syuꞌbe. Leꞌa bexa ilaꞌ geꞌ wa tsoꞌo na wa, leꞌa bexa wa sachkeꞌe.
MAT 21:45 Leꞌa gor na mbiꞌín be uleꞌay nibeꞌe nsea bexa fariseo wa be ta li msaktabeꞌe Jesús wa, cha myakbeꞌena bexa leꞌa Jesús li ndab cuent ten bexa.
MAT 21:46 Cha nlad bexa isen bexa Jesús, parea leꞌa bexa nzheb ndoꞌ be men kwaꞌad, leꞌa be men ndangea ladna leꞌa Jesús ndadiꞌizh sakndoꞌ Dios.
MAT 22:1 Cha msaktabeꞌe Jesús stub taꞌa, ndab xa ndoꞌ bexa wa:
MAT 22:2 —Leꞌa lak nibeꞌe Dios be men nak lak mbin dub rey ngo dub ujest nchilyaꞌa dub xin xa.
MAT 22:3 Cha mtuꞌub xa be mos ten xa nchaꞌyab ndoꞌ be men ulola rey kombid ndoꞌ bexa wa giꞌid bexa ujest wa. Ná leꞌa be men lá kaꞌab yaꞌ.
MAT 22:4 Weꞌe cha mtuꞌubgal xa stapla mos ten xa, ndab xa ndoꞌ bexa: “Waꞌyab bega ndoꞌ bexa wa, leꞌa be ta gaw beuna yá listla nak. Leꞌa be ngon nsea be bser ndaꞌal ten naꞌ yá ngutla. No iteata be taꞌa listla nak. Nat giꞌid bexa ujest nchilyaꞌa xiꞌín naꞌ.”
MAT 22:5 Ná leꞌa bexa wa ni lá isakyoꞌón be ta ndab be mos wa. Ncho bexa nchaꞌa geꞌe ten na, no ncho xa nchaꞌbe ndoꞌ tiꞌin ten na.
MAT 22:6 No ncho bexa usen be mos ten rey wa, mtsawiꞌi bexa be mos wa gast ngut bexa.
MAT 22:7 Leꞌa gor na mbiꞌín rey ta wa cha ngokloo xa, cha mtuꞌub xa be soldad ten xa yaꞌyut bexa be men na li mbit be mos wa no utsoꞌol be soldad gezh ten bexa.
MAT 22:8 Cha ndab rey ndoꞌ be mos ten na: “Leꞌa ujest uchilyaꞌa xiꞌín naꞌ yá listla nak. Parea leꞌa bexa uyoꞌo kombid ndoꞌ na wa lá nsabndoꞌ giꞌid.
MAT 22:9 Nat waꞌ bega be nes, cha gab bega ndoꞌ guniꞌi ton izheꞌal bega giꞌid xa ujest.”
MAT 22:10 Leꞌa be mos cha utoꞌo ngwaꞌkesea be nes, cha myunjunt bexa iteanak be men mzheꞌal bexa, bexa wen no bexa ugap. Weꞌe leꞌa sa ncho ujest wa mzhea nde be men wa.
MAT 22:11 ’Leꞌa rey cha nsea iwiꞌi ndoꞌ bexa nde sa wa. Cha uniꞌí xa dub xabgiꞌi naꞌanpa nak lad nsabndoꞌ gak bexa dub sa nchilyaꞌa men.
MAT 22:12 Leꞌa rey wa cha ndab ndoꞌ xa: “Amig, ¿xteꞌe uyoꞌo lu sa ndee, ná lu naꞌanpa nak lad ndak bexa nde sa ndee, sa nchilyaꞌa men zha?” Ná leꞌa xabgiꞌi wa ni lá ikaꞌab ndoꞌ rey.
MAT 22:13 Leꞌa rey cha ndab ndoꞌ be mos ten na: “Bxi bega xoꞌo xa ndee no yaꞌa xa, cha btsaꞌab bega xa tsoꞌo juer sa ukaw, sa goꞌon xa no gast ndeay xa gaw xa tant dub gealkweaꞌ siꞌil iniꞌí xa.”
MAT 22:14 Cha no ndab Jesús: —Liga leꞌa Dios nbezh kwaꞌad men, parea naꞌanpa uti Dios itea be men.
MAT 22:15 Leꞌa bexa fariseo cha nseaꞌbe, cha mbidiꞌizh bexa ná xteꞌe ukwiꞌinno bexa Jesús gab Jesús dub ta lid leꞌa nak.
MAT 22:16 Cha mtuꞌub bexa pla be xmen bexa no stapla be xmen Herodes wats Jesús. Leꞌa bexa cha unabdiꞌizh ndoꞌ Jesús, ndab bexa: —Mech, leꞌa besa uniꞌí leꞌa go ndadiꞌizh sbeꞌen gealngea no wen nluu ga lak nlad Dios gak be men, ni lá nlaꞌach ga ta ndab be men no ni tal xteꞌe nak bexa.
MAT 22:17 Nat gud ga ná xteꞌe nsak ga: ¿Nsabndoꞌ kix beuna med nab César xa nibeꞌe Roma nate naꞌanpa kix beuna‑yá?
MAT 22:18 Ná leꞌa Jesús mgenna ta ugap ndanbeꞌe bexa, cha ndab Jesús: —Leꞌa bega nluu cuentta xa wen, ná bega xa ugap nak. ¿Xtaꞌan li ndun bega preb naꞌ zha?
MAT 22:19 Bluu bega dub med nkix be men ndoꞌ xa nibeꞌe wa. Weꞌe cha msaꞌa bexa dub med denario.
MAT 22:20 Leꞌa Jesús cha unabdiꞌizh ndoꞌ bexa: —¿Ton gek ná no leaꞌ ná nkea las med ndee zha?
MAT 22:21 Leꞌa bexa cha ukaꞌab ndab: —Gek César no leaꞌ César. Leꞌa Jesús cha ndab: —Bsaꞌa bega be ta ten César ndoꞌ César. Leꞌa ndoꞌ Dios bsaꞌa bega be ta ten Dios.
MAT 22:22 Leꞌa gor na mbiꞌín bexa ta wa, cha ngwanseana bexa xteꞌe ukaꞌab Jesús, cha nchaꞌa bexa mlaꞌa bexa Jesús.
MAT 22:23 Bi leꞌa wizh wa leꞌa pla bexa saduceo ulen wats Jesús. Leꞌa bexa saduceo ndangea ladna leꞌa bexa ngut wa lá ibantabe. Cha unabdiꞌizh bexa ndoꞌ Jesús, ndab bexa:
MAT 22:24 —Mech, leꞌa ta mkeꞌa Moisés ndab leꞌa tal ton dub xabgiꞌi gat, ná lá ngap xa xin xa, leꞌa wit xa wa nsabndoꞌ uchilyaꞌano xagots ten xa ngut wa, ndontsa tal gap bexa dub meꞌed leꞌa meꞌed wa gak cuent xin xa ngut wa.
MAT 22:25 Leꞌa sa ndee uyoꞌo dub gaꞌad wit xa. Leꞌa xa ned wa mchilyaꞌano dub xagots, cha tsoꞌo wa ngut xa, ni lá ngap xagots wa xin xa. Weꞌe leꞌa stubga wit xa cha mchilyaꞌano xagots wa.
MAT 22:26 Cha li ngwasea wit itop xa no xa yon wa no gast isagaꞌad bexa.
MAT 22:27 Leꞌa tsoꞌo na ngut itea be xabgiꞌi wa leꞌa xagots wa noga ngut.
MAT 22:28 Leꞌa zha na iban bexa ngut wa, leꞌa lat isagaꞌad bexa wa ¿ton gak xabgiꞌi ten xagots wa, xa na li mchilyaꞌano itea be xabgiꞌi wa?
MAT 22:29 Leꞌa Jesús cha ukaꞌab ndab: —Uzhebpa lid leꞌa ndanbeꞌe bega, geal leꞌa bega lá nyakbeꞌena xteꞌe ndab diꞌizh ten Dios, no ni lá nchandoꞌ bega juers ten Dios.
MAT 22:30 Leꞌa gal zha na iban bexa ngut, leꞌa be men naꞌantapa uchilyaꞌano be ltsaꞌa na zha wa. Leꞌa bexa ndi yak cuent be angel ten Dios ncho gibeꞌa.
MAT 22:31 Parea leꞌa cuent ten ta iban bexa ngut wa, ¿lá ndoꞌol bega diꞌizh ten Dios ta ndab Dios zha? Ndab xa,
MAT 22:32 leꞌa xa nak Dios ndankea Abraham no Isaac no Jacob. Leꞌa Dios naꞌanpa Dios ten bexa ngut, leꞌa xa ndi Dios ten bexa nban, ta weꞌe uniꞌí beuna leꞌa bexa wa bi nbanka maska ngut bexa ndoꞌ gizhliyo.
MAT 22:33 Leꞌa gor na mbiꞌín be men ta wa, cha ngwanseana bexa xteꞌe ndadiꞌizh Jesús.
MAT 22:34 Leꞌa bexa fariseo, gor na mbiꞌín bexa leꞌa Jesús mbin gan yá lá utsakndoꞌta bexa saduceo wa, cha mzhealbe bexa wats Jesús.
MAT 22:35 Leꞌa dub bexa wa xa nak mech ten ley mbin preb Jesús, unabdiꞌizh xa ndab xa ndoꞌ Jesús:
MAT 22:36 —Mech, ¿ma ta na mas nsak lat be ta unibeꞌe Dios zha?
MAT 22:37 Leꞌa Jesús cha ukaꞌab ndab: —Wankea Dios Xa Nibeꞌe idub ncho ladna ladoꞌo lu no idub gealnaban ten lu no idub lak ndanbeꞌe lu.
MAT 22:38 Leꞌa ná ndee wa mas nsak ndoꞌ iteanak be taꞌa unibeꞌe Dios.
MAT 22:39 Leꞌa ná itop ndee lakkaga nak ná ned wa: Bkweaꞌ ladna lu be ltsaꞌa lu lakkata lu.
MAT 22:40 Leꞌa itop be ná ndee wa nak xan iteanak be ta unibeꞌe Dios, ley mkeꞌa Moisés nsea ta mkeꞌa be profet.
MAT 22:41 Ndalen li ndebe bexa fariseo sa wa, leꞌa Jesús unabdiꞌizh ndoꞌ bexa,
MAT 22:42 ndab xa: —¿Xteꞌe ndanbeꞌe bega zha ton nak Cristo xa utuꞌub Dios, xá ras ná xa? Leꞌa bexa wa cha ukaꞌab ndab: —Leꞌa xa wa gak dub xa ras ten David.
MAT 22:43 Weꞌe leꞌa Jesús cha ndab: —Ta ugeaka ta wa, ná leꞌa David leꞌaka ndab sakndoꞌ Espíritu ten Dios leꞌa Cristo nak xa nibeꞌe ten xa. Ndab David:
MAT 22:44 Leꞌa Dios Xa Nibeꞌe ndab ndoꞌ Xa Nibeꞌe ten naꞌ: “Usob wats naꞌ lad gaꞌal ndee, gast gal gor ute naꞌ bexa ndaklono lu xan ndats lu.”
MAT 22:45 Leꞌa David ndab leꞌa Cristo nak Xa Nibeꞌe ten xa. ¿Ná xteꞌe yoo gan gak Cristo wa xin David zha?
MAT 22:46 Leꞌa ni dub bexa wa lá ikaꞌab ni stub diꞌizh. No idub tsoꞌo wa ni lá ngun bexa rages inabdiꞌizhta bexa ndoꞌ Jesús.
MAT 23:1 Leꞌa Jesús cha mbidiꞌizh ndoꞌ be men no ndoꞌ be xmenka xa, ndab xa:
MAT 23:2 —Leꞌa be mech ten ley no bexa fariseo nak bexa nsabndoꞌ leꞌa uluu xteꞌe gab ley mkeꞌa Moisés.
MAT 23:3 Ta weꞌe blaꞌach bega xtaꞌan ndab bexa no bxobgek bega ndoꞌ be ta nluu bexa. Parea lá gun bega lak ndun bexa wa, leꞌa bexa naꞌanpa ndun ta ndab bexa gun bega.
MAT 23:4 Leꞌa be ta sian nluu bexa wa nak cuent dub yoꞌo uzheꞌeb kweꞌa nsaꞌa bexa goꞌo bega. Parea ni dub ngutsyaꞌa xa lá ndakno bexa bega goꞌo bega‑yá.
MAT 23:5 Leꞌa iteanak ta wen ndun bexa, li ndun bexa ndontsa iniꞌí be men‑a. Ndal ladna bexa nkeꞌa be caj byux xtuzh bexa no yaꞌa bexa, ta ncho git tuzh nkea diꞌizh ten Dios len‑a. No ndal ladna bexa ndak bexa be lad nsob be ta koꞌol toꞌo‑yá.
MAT 23:6 No nti bexa be sa mas nsak isob bexa sa ndaꞌdaw bexa ndoꞌ dub gast, no len be niꞌi nzhealbe beuna xa judio.
MAT 23:7 No nlad bexa utsin inidiꞌizh be men ndoꞌ bexa be ndoꞌ xgeꞌe, gab be men “mech” ndoꞌ xa.
MAT 23:8 ’Ná leꞌa bega naꞌanpa ukwaꞌan xteꞌe gab be men “mech” ndoꞌ bega, leꞌa bega dubkama mech ndap leꞌa ta wa xa nak Cristo. No leꞌa itea bega dubtsa nak.
MAT 23:9 No naꞌan ton ndoꞌ ná gab bega “tad” ndoꞌ gizhliyo ndee, leꞌa bega dubtsa tad ndap leꞌa ta wa Dios nsob gibeꞌa.
MAT 23:10 No lá ulaꞌa bega gab be men leꞌa bega xa nibeꞌe, leꞌa xa nibeꞌe dubtsa ncho, leꞌa ta wa xa nak Cristo.
MAT 23:11 Leꞌa tal ton mas nsak lat bega, leꞌa xa wa nsabndoꞌ gun tiꞌin ndoꞌ iteanak bega.
MAT 23:12 Leꞌa tal ton gunbeꞌe leꞌa mas nsak, leꞌa gal gor leꞌa xa ido ladna. No liga leꞌa tal ton yak tuzh ndoꞌ be men, leꞌa gal gor leꞌa be men iniꞌí leꞌa xa wa nsakka.
MAT 23:13 ’¡Proꞌob bego, mech ten ley no xa fariseo! Leꞌa bega nluu cuentta xa wen, ná bega xa ugap nak. Nka bega yak be men bexa leꞌa Dios nibeꞌe. Ni leꞌa bego nak bexa leꞌa Dios nibeꞌe, no ni lá nlaꞌa bega gak be men xa nibeꞌe Dios.
MAT 23:14 ’¡Proꞌob bego, mech ten ley no xa fariseo! Leꞌa bega nluu cuentta xa wen, ná bega xa ugap nak. Nlat bega itea be ta ndap be xagots ngut xabgiꞌi ten na. No kwenpa ndadiꞌizh bega ndoꞌ Dios ndontsa gab be men leꞌa bega ndankeaka Dios. Leꞌa bego na li ndun wa mas uzheꞌeb gealkweaꞌ iniꞌí.
MAT 23:15 ’¡Proꞌob bego, mech ten ley no xa fariseo! Leꞌa bega nluu cuentta xa wen, ná bega xa ugap nak. Leꞌa bega ndesea itea lad ndoꞌ gizhliyo no ndoꞌ nitsdoꞌo, ndeseakwaꞌan bega be men gungea ladna be ta nluu bega. Ná leꞌa gor mbin bega gan ndangea ladna dub xa ta wa, leꞌa ke ten ta mluu bega ndoꞌ xa wa leꞌa xa mas nsabndoꞌ yaꞌ infierno ndoꞌ lak nsabndoꞌ yaꞌ bego.
MAT 23:16 ’¡Proꞌob bego, leꞌa bego cuent dub xa lá naꞌ nlad goꞌo stubga men! Leꞌa bega ndab leꞌa tal ton gab lak ta ugeakapa ncho niꞌi ten Dios no liga ta ugeakapa gun xa dub taꞌa, leꞌa xa wa naꞌanpa juerska li gun. Parea no ndab bega tal xa gab lak ta ugeakapa ncho ta oro len niꞌi ten Dios, weꞌe leꞌa xa wa juerska li gun ta ndab xa wa.
MAT 23:17 ¡Ugap ndanbeꞌe bego, nak bego cuent dub xa lá naꞌ! ¿Xtaꞌan mas nsak zha? ¿Be ta oro wa nate niꞌi ten Dios, ta na ndun umbiꞌi nak oro wa ndoꞌ Dios?
MAT 23:18 No ndab bega leꞌa tal ton gab lak ta ugeakapa ncho altar wa, no liga ta ugeakapa gun xa dub taꞌa, leꞌa xa wa naꞌanpa juerska li gun. Parea no ndab bega tal xa gab lak ta ugeakapa ncho be xnab, weꞌe leꞌa xa wa juerska li gun ta ndab xa wa.
MAT 23:19 ¡Ugap ndanbeꞌe bega no nak bega cuent dub xa lá naꞌ! ¿Xtaꞌan mas nsak zha? ¿Xnab wa nate altar wa, ta na ndun umbiꞌi nak xnab wa ndoꞌ Dios?
MAT 23:20 Leꞌa tal ton nseꞌat altar wa gor na ndab xa gun xa dub taꞌa, leꞌa ta wa cuent no be xnab ndiꞌib ndoꞌ altar wa nseꞌat xa.
MAT 23:21 No tal ton nseꞌat niꞌi ten Dios gor na ndab xa gun xa dub taꞌa, leꞌa ta wa cuent no Dios xa ncho sa wa nseꞌat xa.
MAT 23:22 No tal ton nseꞌat gibeꞌa gor na ndab xa gun xa dub taꞌa, leꞌa ta wa cuent no sa nsob Dios nsea Dios nseꞌat xa wa.
MAT 23:23 ’¡Proꞌob bego, mech ten ley no xa fariseo! Leꞌa bega nluu cuentta xa wen, ná bega xa ugap nak. Leꞌaka nak nsaꞌa bega dub gen byonxtil lat dub tiꞌi gen‑a uxen bega, no liga ndanno bega eneldo no komin. Parea leꞌa bega lá ndun be ta mas nsak nibeꞌe ley ten Dios, ta na ndab utsin gunno bega be men lak nsabndoꞌ‑yá no ilats ladna bega be men, no igeꞌ ladna bega Dios. Be ta wen ndee nsabndoꞌ gun bega no usaꞌaka bega be ta wa lakka ndun bega nat.
MAT 23:24 Leꞌa bega cuent dub xa lá naꞌ nlad goꞌo stubga men. Nyuꞌ ladna bega be ta byuxtsa, ná leꞌa ta mas nsak nlaꞌa bega, cuent dub men ngoꞌo dub mlat ncho len tas, parea ndi ngab xa dub came.
MAT 23:25 ’¡Proꞌob bego, mech ten ley no xa fariseo! Leꞌa bega nluu cuentta xa wen, ná bega xa ugap nak. Leꞌa bega uzhebpa nyuꞌ ladna nyat tsoꞌo vas nsea plat, parea leꞌa len ladoꞌo bega uzhebpa ugap nak, no uzhebpa nsaꞌab ladna bega be taꞌa.
MAT 23:26 ¡Bego xa fariseo nak cuent dub xa lá naꞌ! Ndi ned isambiꞌi len ladoꞌo bega, weꞌeta umbiꞌi gak idub bega.
MAT 23:27 ’¡Proꞌob bego, mech ten ley no xa fariseo! Leꞌa bega nluu cuentta xa wen, ná bega xa ugap nak. Leꞌa bega nak cuent dub baꞌa nagud chulpa nluꞌu tsoꞌo‑yá. Ná leꞌa len‑a ndi ncho tit men ngut no uzhebpa ta bzhiꞌik.
MAT 23:28 Li nak bego, ndab be men leꞌa bega xa wen, parea leꞌa len ladoꞌo bega uzhebpa ncho gealkwiꞌin no sianta be ta ugap.
MAT 23:29 ’¡Proꞌob bego, mech ten ley no xa fariseo! Leꞌa bega nluu cuentta xa wen, ná bega xa ugap nak. Leꞌa bega ndanchaꞌaw ta chul nsob sa mgaꞌach bexa mbidiꞌizh sakndoꞌ Dios tiemp polta no nsaxkwaꞌa bega be baꞌa ten bexa mxobgek ndoꞌ Dios.
MAT 23:30 No ndab bega tal leꞌa bega yoꞌo zha uyoꞌo bexa polta wa, naꞌanpa no bega ngakno be men wa gor na mbit bexa be profet.
MAT 23:31 Parea leꞌa ta li ndab bega wa nluu leꞌa bega dubtsa nakka no bexa na li mbit bexa wa.
MAT 23:32 ¡Bego usandoꞌ be ta ugap mbin be usan gox ten bega polta!
MAT 23:33 ’¡Leꞌa bego xa ugap cuent be mbeꞌal! ¿Xteꞌe ni bega naꞌanpa utsaksi Dios bega, utsaꞌab xa bega ndoꞌ infierno sa nde giꞌ?
MAT 23:34 Leꞌa naꞌ utuꞌubkata bexa gudiꞌizh sakndoꞌ Dios, no bexa ndák, no be mech uluu bega. Ná leꞌa bega ndi gut ncho bexa ukeꞌa bega bexa wa ndoꞌ cruz. No kin bega ncho bexa len be niꞌi sa nzhealbe beuna xa judio. No isankea bega tsoꞌo bexa guniꞌi tal pa gezh na nchaꞌbe bexa.
MAT 23:35 Ta weꞌe leꞌa bega gap ke ten itea bexa ugap li ndut be men wen. Leꞌa ta wa gast zha ngut Abel no gast zha ngut Zacarías xin Berequías, gor na mbit usan gox polta ten bega xa wats altar dub lad wats niꞌi ten Dios.
MAT 23:36 Leꞌa naꞌ gáp ndoꞌ bega leꞌa Dios utsaksi bego ncho nat ke ten iteanak be ta wa.
MAT 23:37 ’Leꞌa bego ndencho Jerusalén, leꞌa bega ndut bexa ndadiꞌizh sakndoꞌ Dios no nlaꞌgeꞌ bega bexa na ntuꞌub Dios ndoꞌ bega. Sian biaj nlad naꞌ yunjunt naꞌ bega lak nyunjunt dub ngidtsan be ngid ben ten ma len xkwag ma, parea leꞌa bega nunk lá kaꞌab.
MAT 23:38 Blaꞌach bego, leꞌa nat leꞌa Dios ulaꞌalad bega.
MAT 23:39 No gáp naꞌ ndoꞌ bega leꞌa bega yá naꞌantapa iniꞌí naꞌ gast gal wizh gab bega: “Dios uzhebpa nlaꞌach xa baꞌ, xa na mtuꞌub Dios Xa Nibeꞌe.”
MAT 24:1 Leꞌa Jesús cha utoꞌo tale ten niꞌi ten Dios, cha nseaꞌ xa. Leꞌa be xmen xa cha ubii wats xa mluu bexa ndoꞌ xa xteꞌe ta chul nakchaꞌaw niꞌi ten Dios wa.
MAT 24:2 Leꞌa Jesús cha ukaꞌab ndab: —¿Naꞌ bego itea ta ndee zha? Leꞌa naꞌ gáp ndoꞌ bega leꞌa gal dub wizh ilate iteanak be ta baꞌ, gast ni stub geꞌ baꞌ lá kwiꞌibta tsoꞌo ltsaꞌa na.
MAT 24:3 Cha nchaꞌbe bexa Bet Olivo, cha usob Jesús sa wa. Leꞌa be xmen xa cha nabtsa ubii wats xa, cha unabdiꞌizh bexa ndab bexa: —Gud ga, ¿pol gak be ta ndab go wa zha? ¿No xteꞌe iniꞌí besa zha na yamer ilengal ga, no zha yamer idub tiemp ndee?
MAT 24:4 Leꞌa Jesús cha ukaꞌab ndab: —Blaꞌach bego naꞌan ton ukwiꞌinno bega.
MAT 24:5 Leꞌa kwaꞌad be men ilen gab leꞌa xa leꞌa nak naꞌ. Gab xa leꞌa xa leꞌa nak Cristo xa na mtuꞌub Dios; cha ukedino bexa kwaꞌad be men.
MAT 24:6 Leꞌa gor na goꞌón bega ncho guerr be sa sit no sa gax, lá yuꞌ ladna bega. Leꞌa ta wa nsabndoꞌka yoo, ná leꞌa zha wa biseata gal be wizh lult.
MAT 24:7 Leꞌa gal zha wa kuyo be nacion no stubga nacion. Leꞌa be xmen dub xa nibeꞌe kuyono be xmen stubga xa nibeꞌe. No yoo gealgizh ugiꞌi no win no be xoꞌo ubiꞌi.
MAT 24:8 Parea leꞌa itea be ta ndee wa pen isobxanma be gealkweaꞌ ilen wa.
MAT 24:9 ’Leꞌa be men yun cuent bega ndoꞌ bexa nibeꞌe. Leꞌa bexa wa kin bega no gast gut bexa ncho bega. No iteanak be men ixeeno ladna bega ke na nak bega xmen naꞌ.
MAT 24:10 Leꞌa kwaꞌad bexa ulaꞌa ta na ndangea ladna bexa naꞌ. No yun bexa cuent be ltsaꞌa xa ndoꞌ men utsaksi bexa. No ixeeno ladna bexa be ltsaꞌa xa.
MAT 24:11 No ilen kwaꞌad bexa ukwiꞌin gab leꞌa xa ndadiꞌizh sakndoꞌ Dios. Leꞌa bexa wa gun gan ukedino kwaꞌadpa be men.
MAT 24:12 No gun be men sianpa be ta ugap, gast kwaꞌadpa bexa yá lá ikweaꞌta ladna be ltsaꞌa na.
MAT 24:13 Ná leꞌa tal ton uxik ndoꞌ be gealkweaꞌ wa no bi ngeꞌ ladna xa naꞌ, leꞌa xa wa gap gealnaban ndoꞌ Dios.
MAT 24:14 Leꞌa diꞌizh wen ten Dios ná xteꞌe nibeꞌe Dios be men wa iteꞌachso idub nax ndoꞌ gizhliyo, ndontsa leꞌa iteanak be men goꞌón‑a. Weꞌeta ilen be wizh lult.
MAT 24:15 ’Leꞌa Daniel xa mbidiꞌizh sakndoꞌ Dios ndab leꞌa yoo dub ta uzhebpa ugap no bzhiꞌik len sa umbiꞌi ten niꞌi ten Dios (leꞌa xa ndoꞌol ta ndee nsabndoꞌ yakbeꞌena‑yá). Leꞌa gal zha iniꞌí bega ta wa,
MAT 24:16 weꞌe leꞌa bexa ndencho Judea ndee nsabndoꞌ uxoꞌonbe yaꞌbe bexa be geꞌe ubiꞌi.
MAT 24:17 Leꞌa be men ndiꞌib gek lid na wa no nsabndoꞌ uxoꞌonbe, ni lá koꞌo xa be taꞌa len lid xa.
MAT 24:18 Leꞌa bexa ndeyun tiꞌin geꞌe ni lá nsabndoꞌ yachta ilenyoꞌo be xab na.
MAT 24:19 Leꞌa gal be wizh wa uzhebpa kweaꞌ itid be xagots nsoꞌno meꞌed no be xagots ndap medoꞌo.
MAT 24:20 Unab bega ndoꞌ Dios natsa leꞌa tiemp uxoꞌon bega wa naꞌanpa gal tiemp kwal natal dub wizh neꞌe be men.
MAT 24:21 Leꞌa be wizh weꞌe yoo dub gealkweaꞌ siꞌil, dub ta nunk gol yoꞌo zha mbindeꞌeta Dios gizhliyo ndee, no ni lá yoota‑yá stub biaj.
MAT 24:22 Tal leꞌa Dios ulaꞌa sian wizh yoo ta uzheꞌeb wa, leꞌa be men stea gat. Parea lá ulaꞌa Dios yoo sian wizh wa, geal leꞌa xa nlats ladna bexa mti xa.
MAT 24:23 ’Weꞌe leꞌa tal ton gab ndoꞌ bega: “Bwiꞌi bego, leꞌa xa ndee Cristo”, natal gab xa: “Unaꞌ bego, leꞌa sa baꞌ nsoꞌ Cristo”, lá gungea ladna bega ta wa.
MAT 24:24 Yoo bexa ukwiꞌin gab leꞌa nak Cristo, no ncho bexa ukwiꞌin gab leꞌa ndadiꞌizh sakndoꞌ Dios. Leꞌa bexa wa no gun sian taꞌa yanseana be men ndontsa ukedino xa bexa. No gun xa juers ukedino bexa wa gast bexa mti Dios.
MAT 24:25 Blaꞌach bego leꞌa naꞌ yá ndáp nedla ta ndee ndoꞌ bega.
MAT 24:26 Ta weꞌe tal ton gab ndoꞌ bega: “Waꞌwiꞌi bega, leꞌa xa nak Cristo nkesea geꞌe”, naꞌanpa yaꞌ bega sa wa. No tal ton gab: “Utseawiꞌi bega, leꞌa Cristo ncho len niꞌi baꞌ”, lá gungea ladna bega ta wa.
MAT 24:27 Leꞌa lak nlaꞌ bealꞌ usiꞌi nsu‑yá xeꞌa lad nlen wizh no gast lad ndaꞌas wizh, no liga gak‑a zha ilengal naꞌ, Xa Myak Men Ndoꞌ Gizhliyo.
MAT 24:28 Leꞌa lak sa nyakjunt be bech nluu leꞌa sa wa nax dub man ngut, no liga leꞌa zha ilengal naꞌ leꞌa itea be men iniꞌí‑yá.
MAT 24:29 ’Leꞌa gor utidla tiemp ncho be gealkweaꞌ wa, leꞌa ndoꞌ wizh ikaw, leꞌa mbeꞌe yá lá usuta xeꞌa, leꞌa be mbeal ndiꞌib gaꞌap baꞌ ilate, no gast idub gibeꞌa iwiꞌin.
MAT 24:30 Leꞌa gor ulundoꞌ be ta gibeꞌa wa leꞌa naꞌ, Xa Myak Men Ndoꞌ Gizhliyo, yamer ilengal. Cha goꞌon be men itea be ras ncho ndoꞌ gizhliyo, no iniꞌí bexa leꞌa naꞌ, Xa Myak Men Ndoꞌ Gizhliyo, ilenno juers ten Dios lat xkaw no dub xeꞌa siꞌil.
MAT 24:31 Cha kwezh dub trompet, cha utuꞌub naꞌ be angel ten naꞌ, yunjunt bexa wa bexa mti Dios idub ndoꞌ gizhliyo.
MAT 24:32 ’Bwiꞌi bego lak nak be ya laꞌaw. Leꞌa zha na nsaxan‑a nxich‑a, leꞌa zha wa uniꞌíka bega leꞌa tiemp bigi yá gal.
MAT 24:33 No liga leꞌa zha na naꞌ bego ncho itea be ta mbidiꞌizh naꞌ ndee, weꞌe iniꞌí bega leꞌa be wizh lult wa yamer ilen.
MAT 24:34 Leꞌa naꞌ gáp ndoꞌ bega leꞌa itea be ta ndee itid zha biseata gat be men ncho gal zha wa.
MAT 24:35 Leꞌa gibeꞌa no gizhliyo initndoꞌ, parea leꞌa be ta ndáp naꞌ ndee yooka.
MAT 24:36 ’Parea naꞌan ton iniꞌí xá wizh ná no xá gor yoo be ta ndee. Ni be angel ncho gibeꞌa lá iniꞌí ta wa. Nabtsa Dios Xus naꞌ uniꞌí‑yá.
MAT 24:37 Leꞌa lak ngok‑a zha uyoꞌo Noé, no liga gak‑a zha ilengal naꞌ, Xa Myak Men Ndoꞌ Gizhliyo.
MAT 24:38 Leꞌa tiemp uyoꞌo Noé zha biseata ilen gilog wa leꞌa be men ndeyaw, no ndo bexa no ndeuchilyaꞌa bexa, no ngodiꞌin bexa xin xa, gast wizh uyoꞌo Noé len barco wa.
MAT 24:39 Leꞌa be men wa lá iniꞌí xtaꞌan yoo gast gor ulen gilog wa cha mbit‑a itea bexa. No liga gak‑a gor ilengal naꞌ, Xa Myak Men Ndoꞌ Gizhliyo.
MAT 24:40 Leꞌa zha wa leꞌa top xabgiꞌi junt ndeyun tiꞌin geꞌe, cha yoꞌo Dios dubtsa xa, leꞌa stub xa wa yaꞌan.
MAT 24:41 No liga leꞌa top xagots junt ndeyajw, cha yoꞌo Dios dubtsa xa, leꞌa stub xa wa yaꞌan.
MAT 24:42 ’Ta weꞌe list ute bega, leꞌa bega lá iniꞌí xá wizh na ilengal naꞌ.
MAT 24:43 Parea nsabndoꞌ yakbeꞌena bega ta ndee: tal leꞌa xwan dub niꞌi iniꞌí xá gor giꞌid waꞌan ta lid xa, leꞌa xa isob ulaꞌach ndontsa naꞌan ton yoo len lid xa kowaꞌan ta ncho sa wa.
MAT 24:44 Ta weꞌe no bega list ute, leꞌa naꞌ, Xa Myak Men Ndoꞌ Gizhliyo, ilengal dub gor ni lá ndanbeꞌe bega ti ilen naꞌ.
MAT 24:45 ’¿Ton bega nak cuent dub mos ndák ndun lak ndab dub xwan niꞌi? Leꞌa xwan niꞌi wa uchaꞌan mos wa inibeꞌe xa stapla bexa ndun tiꞌin ten xa, no usaꞌa mos ta gaw bexa wa.
MAT 24:46 Leꞌa gor ilaꞌnchaꞌ xwan niꞌi wa uzhebpa wen yoo ladna mos ndun lak ndab xa wa.
MAT 24:47 Leꞌa naꞌ gáp ndoꞌ bega leꞌa xwan niꞌi wa usoꞌ mos wen wa, yansu xa itea be ta ndap xa wa.
MAT 24:48 Ná tal leꞌa mos wa dub xa ugap, gunbeꞌe xa gab xa leꞌa xa nibeꞌe ten xa nleꞌata ilen.
MAT 24:49 Cha ndi isaxan xa kin xa iteata be mos wa. No nchealtsaꞌa xa bexa gu, gaw bexa no goo bexa.
MAT 24:50 Weꞌe leꞌa xwan niꞌi wa ilaꞌnchaꞌ dub wizh no dub gor ni lá ndanbeꞌe mos ti ilen xa.
MAT 24:51 Leꞌa xa wa cha uzheꞌeb utsaksi mos wa, cha utsaꞌab xa mos wa wats bexa nluu cuentta xa wen ná bexa xa ugap nak. Leꞌa sa wa goꞌon xa no gast ndeay xa gaw xa tant gealkweaꞌ siꞌil iniꞌí xa.
MAT 25:1 ’Leꞌa zha weꞌe leꞌa lak nibeꞌe Dios be men wa nak cuent ta ngwasea dub tiꞌi xagots ben usen be xeꞌa aceit ten na, cha nchaꞌikanes bexa dub xabgiꞌi uchilyaꞌa.
MAT 25:2 Leꞌa gaꞌay bexa wa xa list nak, parea leꞌa stub sgaꞌay bexa wa naꞌanpa xa list nak.
MAT 25:3 Leꞌa bexa naꞌanpa list nak wa mbiꞌi be xeꞌa ten na, parea naꞌanpa ngoꞌota xa aceit.
MAT 25:4 Ná leꞌa bexa list nak wa mbiꞌi be xeꞌa ten na no stubga bot aceit.
MAT 25:5 Leꞌa xabgiꞌi uchilyaꞌa wa naꞌanpa ilayaꞌ gor mbinbeꞌe bexa wa, weꞌe ulen xkaꞌal itea bexa, cha ngwadgats bexa.
MAT 25:6 Leꞌa utol teꞌal cha mgen dub ti men ugeꞌ ndab: “¡Yá nseala xabgiꞌi uchilyaꞌa wa! ¡Utoꞌo bega, waꞌikanes bega xa!”
MAT 25:7 Weꞌe cha itea be xagots wa ngwastebe, cha usaxan bexa ndeusaxkwaꞌa bexa xeꞌa ten bexa.
MAT 25:8 Leꞌa bexa naꞌanpa list nak wa ndab ndoꞌ bexa list nak wa: “Bsaꞌa bega dub tuzh aceit ten bega ikaꞌa besa, leꞌa xeꞌa ten besa yamer yuꞌu.”
MAT 25:9 Ná leꞌa bexa list nak wa cha ndab: “Tal leꞌa besa usaꞌa‑yá leꞌa‑yá lá ugal gun tiꞌin beuna. Mas wen waꞌ bega sa ndaꞌad‑a, cha usiꞌi bega ná gun tiꞌin bega.”
MAT 25:10 Parea ndalen nchaꞌisiꞌi sgaꞌay xagots wa aceit, leꞌa xabgiꞌi uchilyaꞌa wa ulansea. Leꞌa be xagots list nde wa uyoꞌo len niꞌi no xabgiꞌi wa sa uchilyaꞌa xa, cha myaw toꞌo niꞌi wa.
MAT 25:11 Tsoꞌo wa mlaꞌnchaꞌ be xagots naꞌanpa list nak wa, ndab bexa: “¡Señor, señor, bxaꞌal ga toꞌo niꞌi yoꞌo besa!”
MAT 25:12 Ná leꞌa xabgiꞌi wa cha ndi ukaꞌab ndab: “Leꞌa naꞌ gáp ndoꞌ bega leꞌa naꞌ lá nchandoꞌ bega.”
MAT 25:13 Cha no ndab Jesús: —No bega list ute, leꞌa bega lá iniꞌí xá wizh ná no xá gor ilengal naꞌ, Xa Myak Men Ndoꞌ Gizhliyo.
MAT 25:14 ’Leꞌa lak nibeꞌe Dios nak lak mbin dub xabgiꞌi ikaꞌan sit, utezh xa be mos ten xa. Cha msaꞌa xa be med ten xa gunno bexa‑yá tiꞌin.
MAT 25:15 ’Leꞌa ndoꞌ dub mos msaꞌa xa gaꞌay med uzhebpa nsak. Leꞌa ndoꞌ stub xa msaꞌa xa top‑a, no ndoꞌ stub xa msaꞌa xa dub‑a. Lak ndák bexa wa, liga sian‑a msaꞌa xabgiꞌi wa. Cha ukaꞌan xa nchaꞌa xa sit.
MAT 25:16 Weꞌe leꞌa xa usen dub gaꞌay med wa mbintiꞌin ta wa, cha mbin xa gan stub sgaꞌayga med ndoꞌ‑yá.
MAT 25:17 No liga mbin xa usen top‑a wa, cha mbin xa gan stopga‑yá.
MAT 25:18 Ná leꞌa xa usen dub‑a wa, cha ndi utoꞌo ngwaꞌdan xa dub geꞌed len yo, cha mkachko xa med ten xa nibeꞌe wa.
MAT 25:19 ’Tsoꞌo wa kwenla leꞌa xa nibeꞌe wa mtanseaꞌ, cha nlad xa iniꞌí xa ná xteꞌe mbinno bexa med wa.
MAT 25:20 Ned ulen xa li usen gaꞌay med wa, cha myun xa cuent ta wa no sgaꞌayga‑yá ndoꞌ xa nibeꞌe wa. Ndab xa: “Señor, leꞌa go msaꞌa gaꞌay med ndee. Leꞌa ná ndee sgaꞌay ná mbin naꞌ gan.”
MAT 25:21 Leꞌa xa nibeꞌe wa cha ndab: “Uzhebpa wen lu mos. Wen mbin lu tiꞌin nsea dub tuzh med ndee. Nat leꞌa naꞌ usa sian taꞌa inibeꞌe lu. Uyoꞌo, cha junt iten ladna beuna.”
MAT 25:22 Tsoꞌo wa ulen xa li usen top med wa, cha ndab xa: “Señor, leꞌa go msaꞌa top med ndee. Leꞌa ná ndee stop ná mbin naꞌ gan.”
MAT 25:23 Leꞌa xa nibeꞌe wa cha ndab: “Uzhebpa wen lu mos. Wen mbin lu tiꞌin nsea dub tuzh med ndee. Nat leꞌa naꞌ usa sian taꞌa inibeꞌe lu. Uyoꞌo, cha junt iten ladna beuna.”
MAT 25:24 ’Ná leꞌa gor ulen xa usen dubtsa med wa, cha ndab xa ndoꞌ xa nibeꞌe wa: “Señor, leꞌa naꞌ uní leꞌa go uzhebpa dub xa nibeꞌe. Nsen go be taꞌa ni lid ta ten ga, no nteleꞌe ga be taꞌa ni lid ta ngas ga.
MAT 25:25 Ta weꞌe mzheb naꞌ, cha ngwaꞌukachkoꞌo naꞌ med ten ga len yo. Bwiꞌi ga leꞌa med ten ga ndee.”
MAT 25:26 Leꞌa xa nibeꞌe wa cha ndab: “Leꞌa lu dub mos ugap no zhaꞌab. Tal leꞌa lu uniꞌí leꞌa naꞌ nsen be taꞌa ni lid ta ten naꞌ, no nteleꞌe naꞌ be taꞌa ni lid ta ngas naꞌ,
MAT 25:27 ¿xtaꞌan lid ngaꞌulaꞌa lu med ten naꞌ banco, ndontsa nat nseal naꞌ isen naꞌ be xin med wa?”
MAT 25:28 Cha ndab xa ndoꞌ bexa nde sa wa: “Blat bega med nsén xa baꞌ, cha bsaꞌa bega‑yá ndoꞌ xa nsén dub tiꞌi med baꞌ.
MAT 25:29 Leꞌa bexa utsin ndun wa, leꞌa bexa wa mas sian ta ikaꞌa. Ná leꞌa xa na naꞌanpa utsin ndun wa, leꞌa bexa slat be ta ndido ndap xa wa.
MAT 25:30 Leꞌa mos ugap ndee xa lá isuꞌu. Btsaꞌab bega xa tsoꞌo juer sa ukaw baꞌ, sa goꞌon xa no gast ndeay xa gaw xa, tant dub gealkweaꞌ siꞌil iniꞌí xa.”
MAT 25:31 ’Leꞌa zha leꞌa naꞌ, Xa Myak Men Ndoꞌ Gizhliyo, ilengal no xeꞌa siꞌil ten Dios no itea be angel ten naꞌ, cha isoꞌob naꞌ sa nibeꞌe naꞌ no juers siꞌil ten naꞌ,
MAT 25:32 weꞌe leꞌa itea be men nde ndoꞌ gizhliyo ndee yakjunt ndoꞌ naꞌ. Cha uteltsaꞌa naꞌ bexa lak nteltsaꞌa dub xa nlaꞌach man be borreg lat be chiv.
MAT 25:33 Leꞌa bexa cuent nak borreg kwe lad gaꞌal wats naꞌ, leꞌa bexa cuent nak chiv kwe lad raves.
MAT 25:34 Weꞌe leꞌa naꞌ nak xa nibeꞌe cha gáp ndoꞌ bexa nde lad gaꞌal wa: “Utsea bega leꞌa Dios Xus naꞌ gun wen yoo ladna bega. Uyote bega sa nibeꞌe naꞌ, sa na ngokndeꞌe yoo bega zha ngokndeꞌekata gizhliyo.
MAT 25:35 Li ndáp naꞌ geal leꞌa gor na ndanna naꞌ, leꞌa bega msaꞌa ta udaw naꞌ. Leꞌa gor ndak lad naꞌ, leꞌa bega msaꞌa nits nguꞌu naꞌ. Leꞌa gor ukesea naꞌ sit, leꞌa bega msaꞌa sa ngot naꞌ.
MAT 25:36 Leꞌa gor lá ndap naꞌ xab naꞌ, leꞌa bega msaꞌa lad ngok naꞌ. Leꞌa gor kweaꞌ usak naꞌ no zha ukea naꞌ litgiꞌib, leꞌa bega mbiꞌid inaꞌ naꞌ.”
MAT 25:37 Leꞌa bexa wen wa cha inabdiꞌizh gab: “Señor, ¿Pol uniꞌí besa ndanna ga, cha msaꞌa besa ta udaw ga? ¿No pol ndak ladna ga, cha msaꞌa besa nits ngu ga?
MAT 25:38 ¿No pol ukesea ga sit, cha msaꞌa besa sa ngot ga? ¿No pol lá ndap ga xab ga, cha msaꞌa besa lad ngok ga?
MAT 25:39 ¿No pol uniꞌí besa kweaꞌ usak ga no ukea ga litgiꞌib, cha ngwaꞌinaꞌ besa ga?”
MAT 25:40 Weꞌe leꞌa naꞌ cha gáp ndoꞌ bexa: “Leꞌa naꞌ gáp ndoꞌ bego leꞌa gor li utsin mbinno bega dub xa naꞌanpa nsak, dub xa cuentta nak wit naꞌ no bsan naꞌ, leꞌa bega no ndoꞌ naꞌ ndee li utsin mbin.”
MAT 25:41 ’Leꞌa naꞌ cha gáp ndoꞌ bexa nde lad wats raves naꞌ: “Utate bega wats naꞌ, bego na ndap ke ndoꞌ Dios. Waꞌbe bega ndoꞌ giꞌ nunk lá yuꞌu, sa msaxkwaꞌa Dios yaꞌbe maxuꞌu no be mbi bxin ten maxuꞌu.
MAT 25:42 Li ndáp naꞌ geal leꞌa gor na ndanna naꞌ, leꞌa bega ni lá usaꞌa ta ngaw naꞌ. No gor ndak lad naꞌ, leꞌa bega ni lá usaꞌa nits ngoꞌo naꞌ.
MAT 25:43 Leꞌa gor ukesea naꞌ sa sit, leꞌa bega ni lá usaꞌa sa ngat naꞌ. Leꞌa gor lá ndap naꞌ xab naꞌ, leꞌa bega ni lá usaꞌa lad ngak naꞌ. Leꞌa gor kweaꞌ usak naꞌ no gor ukea naꞌ litgiꞌib, leꞌa bega ni lá ngiꞌid inaꞌ naꞌ.”
MAT 25:44 Weꞌe leꞌa bexa wa cha inabdiꞌizh gab bexa: “Señor, ¿pol uniꞌí besa ndanna ga, no ndak ladna ga, no sa sit ukesea ga, no ni lá ndap ga xab ga, no kweaꞌ usak ga, no ukea ga litgiꞌib, ná leꞌa besa ni lá ngakno ga?”
MAT 25:45 Leꞌa naꞌ cha ikaꞌab ndáp: “Leꞌa naꞌ gáp ndoꞌ bego leꞌa gor na naꞌanpa li utsin ngun bega ndoꞌ dub xa naꞌanpa nsak, dub xa cuentta nak wit naꞌ no bsan naꞌ, leꞌa bega no ndoꞌ naꞌ li naꞌanpa utsin ngun.”
MAT 25:46 Leꞌa bexa ugap wa cha yaꞌbe sa iniꞌí bexa gealkweaꞌ nunk lá idub. Ná leꞌa bexa wen wa yaꞌbe sa gap bexa gealnaban nunk lá idub.
MAT 26:1 Leꞌa gor mtayadiꞌizh Jesús itea be ta wa, cha ndab xa ndoꞌ be xmen xa:
MAT 26:2 —Leꞌa bego uniꞌíka leꞌa stop wizh ndun jwalt yoo ujest Pascua, zha na leꞌa naꞌ, Xa Myak Men Ndoꞌ Gizhliyo, yak cuent ndoꞌ yaꞌa be men, cha ukeꞌa bexa naꞌ ndoꞌ cruz.
MAT 26:3 Weꞌe leꞌa be uleꞌay nibeꞌe no be mech ten ley no bexa gox nsak ten bexa judio mzhealbe tale ten niꞌi ten Caifás, xa nak uleꞌay ndon leꞌa nsak.
MAT 26:4 Cha dubtsa mbidiꞌizh bexa isen bexa Jesús dub mod na lá iniꞌí be men‑a, cha gut bexa Jesús.
MAT 26:5 Parea ndab bexa: —Naꞌanpa isen beuna xa len ujest, ndontsa lá ixaꞌach be men gakloo ndoꞌ beuna.
MAT 26:6 Leꞌa dub wizh nsob Jesús ta lid Simón xa Betania, xa na polta usak gealgizh lepra.
MAT 26:7 Weꞌe ulen dub xagots sa nsob Jesús ndoꞌ mes, nsea dub bot tuzh nakchaꞌaw geꞌ alabastro ncho ta uxeꞌe len‑a, dub ta uyappa nsak. Cha ulo xa ta uxeꞌe wa gek Jesús.
MAT 26:8 Leꞌa gor uniꞌí be xmen Jesús ta wa cha ngokloo bexa, ndab bexa ndoꞌ ltsaꞌa xa: —¿Xtaꞌan ngi mbizhaꞌa xagots ndee ta baꞌ zha?
MAT 26:9 Tal leꞌa xa ndi udoꞌo‑yá, leꞌa xa yoꞌo gan utseꞌa med wa ndoꞌ bexa uban nak, leꞌa‑yá uzhebpa dub ta nsak.
MAT 26:10 Leꞌa gor na mbiꞌín Jesús ta wa, cha ndab xa ndoꞌ bexa: —¿Xtaꞌan ngi li nisi bega xagots ndee zha? Leꞌa xa dub ta wen mbinno naꞌ.
MAT 26:11 Leꞌa bexa uban nak wa guniꞌi polga nchoka lat bega, parea leꞌa naꞌ ndee naꞌanpa kwenta nchoꞌono bega.
MAT 26:12 Leꞌa ta na li mbin xagots ndee ulo xa ta uxeꞌe gek naꞌ, leꞌa ta wa li mbin xa ndontsa listla nak naꞌ zha igaꞌach naꞌ.
MAT 26:13 Leꞌa naꞌ gáp ndoꞌ bega guniꞌi pa ndoꞌ gizhliyo gudiꞌizh be men diꞌizh wen ten Dios, no ta li mbin xagots ndee gudiꞌizh bexa, ndontsa iniꞌí be men ta wen mbin xa.
MAT 26:14 Leꞌa Judas Iscariot, dub xa nak isatibtop xmen Jesús, cha ngwaꞌ ndoꞌ be uleꞌay nibeꞌe,
MAT 26:15 cha unabdiꞌizh xa ndab xa: —¿Plo med usaꞌa bego ika naꞌ yun naꞌ cuent Jesús ndoꞌ bega? Cha msaꞌa bexa galntiꞌi med plata ndoꞌ xa.
MAT 26:16 Zha weꞌe leꞌa Judas cha usaxan nkwaꞌan ná xteꞌe yun xa cuent Jesús ndoꞌ yaꞌa bexa.
MAT 26:17 Leꞌa ngol wizh ned ten ujest zha ndaw bexa judio pan naꞌan levadur, leꞌa be xmen Jesús ulen wats Jesús, cha ndab bexa: —¿Pa nlad go yaꞌyundeꞌe besa ta gaw beuna ujest Pascua?
MAT 26:18 Leꞌa Jesús cha ndab: —Waꞌ bega gezh Jerusalén baꞌ ta lid xa na lika ndáp naꞌ ndoꞌ bega wa, cha gud bega ndoꞌ xa leꞌa Mech ten bega ndab: “Leꞌa tiemp wa yá ngol. Leꞌa ta lid ga gaw naꞌ ta ten ujest Pascua no be xmen naꞌ.”
MAT 26:19 Weꞌe leꞌa be xmen Jesús cha mbin lak ndab Jesús, cha mbinchaꞌaw bexa ta gaw xcheꞌe bexa ujest Pascua.
MAT 26:20 Leꞌa ngol gor uyoꞌo teꞌal leꞌa Jesús nsea isatibtop be xmen xa mzhealbe sa wa, cha usaxan bexa gaw bexa.
MAT 26:21 Ndalen li ndeyaw bexa wa, leꞌa Jesús cha ndab: —Leꞌa naꞌ gáp ndoꞌ bega leꞌa dub bega na no nsob sa ndee yun cuent naꞌ ndoꞌ be men.
MAT 26:22 Leꞌa bexa cha uzheꞌeb uban myoꞌo ladna, usaxan nabdiꞌizh dub gaꞌga bexa ndoꞌ Jesús: —¿Lid naꞌ ta wa zha, Señor?
MAT 26:23 Leꞌa Jesús cha ukaꞌab ndab: —Leꞌa dub bego na nsobyawno naꞌ plat ndee yun cuent naꞌ.
MAT 26:24 Ta ugeaka leꞌa naꞌ, Xa Myak Men Ndoꞌ Gizhliyo, itiꞌidka lak nkeaniꞌi diꞌizh ten Dios. Parea proꞌob xabgiꞌi na yun cuent naꞌ ndoꞌ bexa wa. Mas wen lá yoꞌo xabgiꞌi wa ndoꞌ gizhliyo.
MAT 26:25 Leꞌa Judas, xa na yun cuent Jesús, cha unabdiꞌizh ndab: —¿Lid naꞌ ta wa zha, Mech? Leꞌa Jesús cha ndab: —Luka ta wa lak ndab lu.
MAT 26:26 Leꞌa gor na li ndeyaw bexa, leꞌa Jesús cha usen dub pan, cha msaꞌa xa xno ndoꞌ Dios. Cha uleꞌa xa‑yá, no mtseꞌa xa‑yá ndoꞌ be xmen xa, ndab xa: —Usen bega pan ndee, cha udaw bega‑yá, leꞌa ta ndee beꞌal las naꞌ.
MAT 26:27 Cha liga usen Jesús dub vas ncho vin, cha msaꞌa xa xno ndoꞌ Dios. Cha msaꞌa xa‑yá ndoꞌ bexa, ndab xa: —Iteanak bega gu ta ncho len vas ndee,
MAT 26:28 leꞌa ta ndee ten ten naꞌ usa naꞌ ndontsa utsuꞌu Dios ke ten be men. Leꞌa ta ndee nluu leꞌa nat leꞌa Dios mbinno be men dub trat kub ná xteꞌe wen yaꞌan bexa ndoꞌ Dios.
MAT 26:29 No gáp naꞌ ndoꞌ bega leꞌa naꞌ yá naꞌantapa goꞌo vin ten uv, gast gal wizh goꞌono naꞌ bega‑yá stub biaj sa nibeꞌe Dios Xus naꞌ.
MAT 26:30 Cha mbiltoꞌo bexa dub cant ndoꞌ Dios. Cha utoꞌo bexa nchaꞌbe bexa Bet Olivo.
MAT 26:31 Weꞌe leꞌa Jesús cha ndab ndoꞌ bexa: —Leꞌa teꞌal ndee leꞌa iteanak bega ulaꞌa naꞌ, lak nkeaniꞌi diꞌizh ten Dios, ndab‑a: “Leꞌa naꞌ gut xa nlaꞌach be borreg, cha iteꞌachso bema.”
MAT 26:32 Ná leꞌa tsoꞌo na iban naꞌ leꞌa naꞌ ned ilayaa ndoꞌ bega Galilea.
MAT 26:33 Leꞌa Pedr cha ndab: —Maska itea be men ulaꞌa ga, ná leꞌa naꞌ nunk lá ula ga.
MAT 26:34 Leꞌa Jesús cha ndab ndoꞌ Pedr: —Leꞌa naꞌ gáp ndoꞌ lu leꞌa teꞌal ndee gor biseata kwezh boy, leꞌa lu ta ugeaka mkwiꞌinla chon biaj, ndab lu leꞌa lu lá nchandoꞌ naꞌ.
MAT 26:35 Ná leꞌa Pedr cha ndab: —Maska gat naꞌ gor na gat go, leꞌa naꞌ nunk lá gáp leꞌa naꞌ lá nchandoꞌ ga. Leꞌa iteata be xmen Jesús ndab lak ndab Pedr.
MAT 26:36 Weꞌe leꞌa Jesús cha ulayaꞌ sa nsaleaꞌ Getsemaní nsea be xmen xa. Cha ndab Jesús ndoꞌ bexa: —Ndeꞌetsa ute bega, ndalen ndaꞌyadiꞌizhno naꞌ Dios sa baꞌ.
MAT 26:37 Cha mbiꞌi Jesús chon bexa stub tuzh sa, leꞌa ta wa Pedr no itop xin Zebedeo. Leꞌa Jesús cha uzhebpa uban myoꞌo ladna no kweaꞌ myoꞌo ladna xa.
MAT 26:38 Cha ndab Jesús ndoꞌ yon bexa wa: —Uzhebpa uban ncho lad naꞌ gast ngi sat naꞌ. Ndeꞌetsa ute bega, cha utenaꞌno bega naꞌ.
MAT 26:39 Cha usea Jesús stub tuzh sa, cha usaxib xa gast ndoꞌ yo ngol xtuzh xa, cha uníꞌi xa ndoꞌ Dios, ndab xa: —Tad, tal syoꞌo gan, lá ulaꞌa ga itiꞌid naꞌ ndoꞌ be gealkweaꞌ uzheꞌeb ndee. Parea lá gak‑a lak nlad naꞌ, ndi gak‑a lak nlad go.
MAT 26:40 Weꞌe leꞌa gor na nseaꞌ Jesús sa na nde yon xmen xa, leꞌa bexa ndeyats. Cha ndab xa ndoꞌ Pedr: —¿Ni dub gor lá uxik bega kwenaꞌno bega naꞌ zha?
MAT 26:41 Utenaꞌ bega no bidiꞌizhno bega Dios, ndontsa naꞌanpa utsabgix maxuꞌu bega. Leꞌa ladoꞌo bega nlad gun ta wen, ná leꞌa idub bega lá uxik.
MAT 26:42 Cha nchaꞌagal Jesús nchaꞌyadiꞌizhno xa Dios, ndab xa: —Tad, tal naꞌ juerska itiꞌid ndoꞌ be gealkweaꞌ ndee, gak‑a lak nlad go.
MAT 26:43 Leꞌa gor nseaꞌgal Jesús sa nde bexa wa, leꞌa bexa ndeyatsgal, geal leꞌa bexa uzhebpa nyoꞌo xkaꞌalna.
MAT 26:44 Cha mlaꞌagal xa bexa, nchaꞌyadiꞌizhnogal xa Dios biaj yon, cha ndabgal xa lakka ndabla xa ndoꞌ Dios.
MAT 26:45 Cha nseaꞌgal xa sa nde bexa, cha ndab xa: —¿Galka bi ndeyats bega zha, no bi ndeuneꞌe bega zha? Nat bwiꞌi bega yá ngol gor leꞌa naꞌ, Xa Myak Men Ndoꞌ Gizhliyo, yak cuent ndoꞌ yaꞌa bexa ugap.
MAT 26:46 Goste bega, nchaꞌbe beuna. Bwiꞌi bega leꞌa xa yun cuent naꞌ yá nseala baꞌa.
MAT 26:47 Bi li nsoꞌyadiꞌizh Jesús leꞌa Judas, xa no nak dub tibtop xmen Jesús, ulennola be men kwaꞌad noꞌo be spad nsea garrot. Leꞌa ta wa bexa mtuꞌub uleꞌay nibeꞌe no bexa gox nsak isen bexa Jesús.
MAT 26:48 Leꞌa Judas, xa li yun cuent Jesús, nedla ndab ndoꞌ be men wa: “Leꞌa xa na gaw naꞌ chit beꞌal ndoꞌ na wa, xa weꞌe isen bega.”
MAT 26:49 Leꞌa gor ulayaꞌ Judas sa wa, cha uxax ubii xa wats Jesús, cha ndab xa: —Tiux ga, Mech. Cha mchealtoꞌo xa ndoꞌ Jesús.
MAT 26:50 Leꞌa Jesús cha ndab: —Amig, ¿xtiꞌin nsea lu? Weꞌe leꞌa bexa kwaꞌad wa cha ubii gax, cha usen bexa Jesús.
MAT 26:51 Ná leꞌa dub xa nsoꞌ wats Jesús uloꞌo spad tuzh ten na, cha ulobtoꞌog xa nchaꞌ dub xmen uleꞌay ndon leꞌa nsak.
MAT 26:52 Leꞌa Jesús cha ndab ndoꞌ xa ten spad wa: —Ulochaꞌaw spad ten lu len lid‑a. Leꞌa itea bexa ndantiꞌin spad, leꞌa xa wa ndoꞌ spadka gat.
MAT 26:53 ¿Lá iniꞌí lu leꞌa naꞌ syoꞌo gan inaꞌab ndoꞌ Xus naꞌ bi leꞌa nat, cha utuꞌub xa masla dub tibtop xkwaꞌa siꞌil be angel gakno naꞌ?
MAT 26:54 Parea tal naꞌ li gun, weꞌe naꞌanpa gak‑a lak nkeaniꞌi diꞌizh ten Dios be ta nsabndoꞌ itiꞌid naꞌ.
MAT 26:55 Cha ndab Jesús ndoꞌ be men wa: —¿Xtaꞌan nseano bega spad nsea garrot isen bega naꞌ cuent dub waꞌan? Itea wizh nluu naꞌ be men wats niꞌi ten Dios lat bega, ná lá isen bega naꞌ sa wa.
MAT 26:56 Parea leꞌa iteanak be ta ndee nsatid ndontsa gak‑a lak nkeaniꞌi diꞌizh ten Dios, ta ndab bexa mbidiꞌizh sakndoꞌ Dios. Weꞌe leꞌa itea be xmen Jesús cha mxoꞌon, mlaꞌa bexa Jesús.
MAT 26:57 Leꞌa bexa na li usen Jesús wa cha mbiꞌi xa ta lid Caifás uleꞌay ndon leꞌa nsak, sa mzhealbela be mech ten ley no bexa gox nsak.
MAT 26:58 Leꞌa Pedr sittsa nchankea tsoꞌo Jesús, gast uyoꞌo Pedr len tale ten niꞌi wa. Cha usob Pedr gax wats bexa nlaꞌach sa wa, natsa iniꞌí xa ná xtaꞌan yasea Jesús.
MAT 26:59 Leꞌa be uleꞌay nibeꞌe no bexa gox nsak no iteata bexa nsak wa nkwaꞌan be men ukwiꞌin gab leꞌa Jesús ndapka ke, ta nsabndoꞌ gat xa.
MAT 26:60 Leꞌa kwaꞌad be men mkwiꞌin nsake Jesús, ná lá izheal bexa nibeꞌe wa ni dub ke nsabndoꞌ gat Jesús. Weꞌe ulen stop bexa,
MAT 26:61 cha mkwiꞌin bexa ndab: —Leꞌa xa baꞌ ndab leꞌa xa sun gan ulate niꞌi ten Dios, cha gal wizh yon leꞌa xa gundeꞌegal‑a.
MAT 26:62 Weꞌe leꞌa uleꞌay ndon leꞌa nsak wa ngwasoꞌ, ndab ndoꞌ Jesús: —¿Ni lá utsakndoꞌ lu zha? ¿Ta ugeaka ta ndab bexa ndee leꞌa lu li ndab zha?
MAT 26:63 Ná leꞌa Jesús naꞌan xteꞌe ngab. Weꞌe leꞌa uleꞌay wa cha ndabgal ndoꞌ Jesús: —Leꞌa Dios nban nsobwiꞌi, leꞌa naꞌ nibeꞌe ndoꞌ lu gud ndoꞌ besa naga lu nak Cristo Xin Dios zha.
MAT 26:64 Leꞌa Jesús cha ndab: —Goka ndab‑a. No gáp naꞌ leꞌa nat idub nchaꞌa ndoꞌ ndee leꞌa bega iniꞌíka leꞌa naꞌ, Xa Myak Men Ndoꞌ Gizhliyo, isob wats Dios lad gaꞌal xa ndon leꞌa nibeꞌe, no ilengal naꞌ ndoꞌ xkaw.
MAT 26:65 Leꞌa uleꞌay ndon leꞌa nsak wa cha utsaw xab na tant ndakloo xa, cha ugeꞌ ndab xa ndoꞌ bexa nde sa wa: —¡Leꞌa xa ndee unisi Dios! ¿Xtaꞌanta nkiꞌin beuna kwaꞌadta xa usake xa? Leꞌa bega mbiꞌín xteꞌe ugap uníꞌi xa.
MAT 26:66 ¿Nat zha xteꞌe gab bega, xteꞌe gunno beuna xa? Leꞌa bexa wa cha ukaꞌab ndab: —¡Leꞌa xa ndapka ke nsabndoꞌ gat xa!
MAT 26:67 Cha mchukko bexa ndoꞌ Jesús, no udin bexa Jesús. No ncho bexa utichyaꞌa ndoꞌ Jesús,
MAT 26:68 ndab bexa ndoꞌ Jesús: —Tal lu ta ugeaka nak Cristo, ¡gud ná ton udin lu!
MAT 26:69 Ndalen wa leꞌa Pedr nsob tsoꞌo juer tale wa. Cha ubii dub xagots ndun tiꞌin sa wa wats Pedr, ndab xa: —Go no ukeseano Jesús xa Galilea, ¿la?
MAT 26:70 Ná leꞌa Pedr cha mkwiꞌin ndoꞌ gaꞌal itea bexa wa ndab: —Naꞌ lá iní xtaꞌan ndab go ndoꞌ naꞌ.
MAT 26:71 Cha nchaꞌa Pedr mas gax toꞌo puert. Weꞌe cha uniꞌí stubgal xagots Pedr, ndab xa ndoꞌ bexa nde sa wa: —Leꞌa xa ndee no ukeseano Jesús xa Nazaret.
MAT 26:72 Ná leꞌa Pedr cha mkwiꞌingal ndab xa: —Leꞌa Dios nsobwiꞌi leꞌa naꞌ lá nchandoꞌ xabgiꞌi baꞌ.
MAT 26:73 Tsoꞌoma wa leꞌa bexa nde sa wa ubii wats Pedr ndab bexa: —Ta ugeaka leꞌa go no nak dub xmen xa baꞌ, leꞌa go ndadiꞌizh lak ndadiꞌizh bexa Galilea.
MAT 26:74 Leꞌa Pedr cha ngokloo ndab ndoꞌ bexa: —¡Nsobwiꞌi Dios leꞌa naꞌ lá nchandoꞌ xa baꞌ! Zha leꞌa dub boy utezh.
MAT 26:75 Weꞌe leꞌa Pedr cha mtseꞌa ladna ta ndab Jesús: “Leꞌa teꞌal ndee gor biseata kwezh boy, leꞌa lu mkwiꞌinla chon biaj ndab lu leꞌa lu lá nchandoꞌ naꞌ.” Cha utoꞌo Pedr tsoꞌo juer, cha uzhebpa mbiꞌin xa.
MAT 27:1 Leꞌa ngol gor ngot xeꞌa, leꞌa itea be uleꞌay nibeꞌe no bexa gox nsak ten bexa judio dubtsa mbidiꞌizh xteꞌe gun bexa gan gat Jesús.
MAT 27:2 Cha mxi bexa Jesús cha mbiꞌi bexa xa ndoꞌ Poncio Pilat, xa nibeꞌe idub región wa.
MAT 27:3 Leꞌa Judas xa na li myun cuent Jesús wa, gor uniꞌí xa leꞌa bexa wa dubtsa mbidiꞌizh gat Jesús, cha mgondoꞌ xa leꞌa xa ugap mbin. Cha mbiꞌi xa isagalntiꞌi med plata wa sa nde be uleꞌay nibeꞌe no bexa gox nsak wa.
MAT 27:4 Cha ndab Judas ndoꞌ bexa: —Leꞌa naꞌ mbin dub ta ugap, myun naꞌ cuent dub xa gat, mas ni lá ndap xa ke. Ná leꞌa bexa wa cha ndab: —Leꞌa besa naꞌan xá gealnyuꞌ ná ta li mbin lu wa. Leꞌa ta wa cuent ten lu nak.
MAT 27:5 Weꞌe leꞌa Judas cha udabi be med wa len niꞌi ten Dios. Cha utoꞌo xa sa wa, cha ulo xa doꞌo gen xa, mtsebe xa gen xa.
MAT 27:6 Leꞌa be uleꞌay nibeꞌe cha mkanleꞌe be med wa, cha ndab bexa: —Lá nsabndoꞌ guntiꞌin beuna med ndee cuent be med gon, leꞌa‑yá ngoktiꞌin ndontsa gat dub men.
MAT 27:7 Cha mbidiꞌizh bexa isiꞌi bexa dub bleꞌa yo ten dub xa ndandeꞌe be ta btsiꞌin, ndontsa sa weꞌe igaꞌach tal ton bexa sit gat gezh Jerusalén.
MAT 27:8 Ta weꞌe gast nat leꞌa yo wa nsaleaꞌ Yo Ten.
MAT 27:9 Li ngok‑a lak ndab Jeremías xa mbidiꞌizh sakndoꞌ Dios tiemp polta, ndab xa: “Usen bexa galntiꞌi med plata, lak mbidiꞌizh bexa Israel kix bexa.
MAT 27:10 Leꞌa med wa cha usiꞌi bexa yo ten xa ndandeꞌe be ta btsiꞌin. Leꞌa ta wa ta ndab Dios ndoꞌ naꞌ.”
MAT 27:11 Leꞌa gor nsoꞌ Jesús ndoꞌ Pilat xa nibeꞌe wa, leꞌa Pilat cha unabdiꞌizh ndab ndoꞌ Jesús: —¿Lu nak xa nibeꞌe ten bexa judio zha? Leꞌa Jesús cha ndab: —Goka ndab‑a.
MAT 27:12 Weꞌe leꞌa be uleꞌay nibeꞌe no bexa gox nsak wa sian taꞌa msake Jesús, ná leꞌa Jesús ni lá utsakndoꞌ.
MAT 27:13 Leꞌa Pilat cha ndabgal ndoꞌ Jesús: —¿Lá ndoꞌón lu be ta sian li nsake bexa baꞌ lu zha?
MAT 27:14 Parea leꞌa Jesús ni dub diꞌizh lá ikaꞌab, cha uzheꞌeb ngwanseana Pilat.
MAT 27:15 Leꞌa itea liꞌin zha ndal ujest Pascua wa, leꞌa Pilat ngoꞌo dub men nkea litgiꞌib, tal ton nlad be men itoꞌo.
MAT 27:16 Leꞌa zha wa uyoꞌo dub xabgiꞌi nsaleaꞌ Barrabás nkea litgiꞌib, dub xa uniꞌí itea be men xtaꞌan ta ugap mbin xa.
MAT 27:17 Leꞌa gor mzhealbe be men ta lid Pilat, leꞌa Pilat cha ndab ndoꞌ bexa: —¿Ton nlad bega ula naꞌ, Barrabás nate Jesús xa ndab be men nak Cristo?
MAT 27:18 Leꞌa Pilat uniꞌí leꞌa be uleꞌay nibeꞌe nxee ladna ndoꞌ Jesús ta na mas kwaꞌad men ndeseano Jesús, ta weꞌe myun bexa cuent Jesús.
MAT 27:19 Leꞌa gor na li nsob Pilat sa nibeꞌe Pilat wa, leꞌa xagots ten xa mtuꞌub dub xa gab ndoꞌ xa: “Naꞌan xteꞌe gunno lu xabgiꞌi wen wa, leꞌa naꞌ uzhebpa mzheb dub ta mcheꞌano lad naꞌ xa teꞌal.”
MAT 27:20 Parea leꞌa be uleꞌay nibeꞌe no bexa gox nsak mkiꞌil be men wa inab bexa igoꞌo Pilat Barrabás litgiꞌib, cha gat Jesús.
MAT 27:21 Ta weꞌe leꞌa gor na unabdiꞌizhgal Pilat ndoꞌ be men ná ton ndoꞌ itop bexa wa nlad bexa igoꞌo Pilat, leꞌa be men wa cha ndab: —¡Bgoꞌo ga Barrabás!
MAT 27:22 Leꞌa Pilat cha ndab: —¿Xteꞌe gunno naꞌ Jesús xa ndab be men nak Cristo zha? Leꞌa iteanak bexa wa cha ugeꞌ ndabbe: —¡Ikea xa ndoꞌ cruz!
MAT 27:23 Leꞌa Pilat cha ndab: —¿Xtaꞌan dub ta ugap mbin xa zhaga? Parea leꞌa be men wa ndi mas ugeꞌ ndab: —¡Ikea xa ndoꞌ cruz!
MAT 27:24 Leꞌa gor uniꞌí Pilat leꞌa Pilat lá gun gan ndoꞌ bexa leꞌa bexa ndi mas ndakloobe, cha usen Pilat dub ta ncho nits. Cha mnaꞌa Pilat ndoꞌ gaꞌal be men wa, ndab xa: —Leꞌa naꞌ naꞌanpa leꞌa ndap ke gat xa wen ndee. Leꞌa ta wa cuent ten bega nak.
MAT 27:25 Weꞌe leꞌa iteanak be men wa cha ndabbe: —Leꞌa besa ndee no be xin besa leꞌa ndap ke gat xa baꞌ.
MAT 27:26 Weꞌe leꞌa Pilat cha mgoꞌo Barrabás litgiꞌib. Cha ndab Pilat ndoꞌ be soldad kin bexa Jesús, cha ukeꞌa bexa Jesús ndoꞌ cruz.
MAT 27:27 Leꞌa be soldad ten Pilat cha mbiꞌi Jesús len lid Pilat sa nsaleaꞌ pretorio. Cha mzhealbe kwaꞌadta be soldad gangeak wats Jesús.
MAT 27:28 Cha ulate bexa xab Jesús, no mgak bexa Jesús dub lad koꞌol ta nane.
MAT 27:29 No msob bexa dub ta rued xos yagich gek Jesús cuent coron. Cha msob bexa dub bar yaꞌa Jesús lad gaꞌal. Cha msaxib bexa ndoꞌ Jesús mbin usaladno bexa Jesús, ndab bexa: —¡Siꞌil nak xa nibeꞌe ten bexa judio!
MAT 27:30 Cha mchukko bexa ndoꞌ Jesús, cha ute bexa bar nsén Jesús, cha leꞌaka bar wa nlaꞌ bexa gek Jesús.
MAT 27:31 Leꞌa gor na mtayun usaladno bexa Jesús, cha ulate bexa lad nane nak Jesús. Cha mgak bexa Jesús leꞌaka xab Jesús, cha nchaꞌano bexa Jesús sa ikea xa ndoꞌ cruz.
MAT 27:32 Leꞌa gor utoꞌo be soldad sa wa, cha mzheꞌal bexa dub xabgiꞌi nsaleaꞌ Simón xa gezh Cirene. Cha mbin bexa juers goꞌo xa cruz ten Jesús.
MAT 27:33 Cha ngol gor ulayaꞌ bexa sa nsaleaꞌ Gólgota, dub diꞌizh gab tit gek men.
MAT 27:34 Cha msaꞌa bexa vin kwi mbich ta ulaꞌpa goo Jesús. Ná leꞌa gor na mbin xa preb‑a, cha lá kaꞌabta xa goo xa‑yá.
MAT 27:35 Cha mkeꞌa be soldad Jesús ndoꞌ cruz, cha uloꞌo bexa dub suert ndontsa iniꞌí bexa ná ton ikaꞌa be xab Jesús. Li ngok‑a lak ndab dub xa mbidiꞌizh sakndoꞌ Dios tiemp polta, ndab xa: “Uloꞌo bexa dub suert ndontsa iniꞌí bexa ná ton ikaꞌa be xab naꞌ.”
MAT 27:36 Cha ndeulaꞌach be soldad xa sa wa.
MAT 27:37 Leꞌa gek cruz ten Jesús wa mkeꞌa bexa dub letr ndab ná xtaꞌan li nkea xa ndoꞌ cruz, ndab‑a: “TA NDEE JESÚS, XA NIBEꞌE TEN BEXA JUDIO.”
MAT 27:38 Nsea top waꞌan mkeꞌa bexa ndoꞌ cruz wats Jesús, dub xa wats lad gaꞌal Jesús, nsea stub xa wats lad raves.
MAT 27:39 Leꞌa be men nseabetid sa wa xela uníꞌi ndoꞌ Jesús, nkwiꞌin bexa gek bexa,
MAT 27:40 ndab bexa ndoꞌ Jesús: —Lu ndab leꞌa lu ulate niꞌi ten Dios, cha ixiste lu‑yá wizh yontsa. Nat byun libr leꞌaka lu. ¡Tal lu Xin Dios, ulaꞌ ndoꞌ cruz baꞌ!
MAT 27:41 No liga leꞌa be uleꞌay nibeꞌe no be mech ten ley no bexa fariseo no bexa gox nsak wa ndun usaladno Jesús, ndab bexa ndoꞌ ltsaꞌa bexa:
MAT 27:42 —Leꞌa xa baꞌ leꞌa ngokno be men, ná lá gun xa gan ulat xa leꞌaka xa ndoꞌ gealgut. Tal leꞌa xa baꞌ xa nibeꞌe ten beuna xa Israel, ilaꞌ xa ndoꞌ cruz, cha gungea ladna beuna xa.
MAT 27:43 Leꞌa xa baꞌ ndab leꞌa ngeꞌ ladna Dios. Nat gakno Dios xa tal leꞌa Dios nlad, leꞌa xa baꞌ ndab leꞌa xa Xin Dios.
MAT 27:44 No liga leꞌa itop waꞌan nkea ndoꞌ be cruz wats Jesús wa xela uníꞌi ndoꞌ Jesús.
MAT 27:45 Leꞌa ngol gor gawizh leꞌa idub ndoꞌ gizhliyo mkaw gast gor nkea uyon gor uzhe.
MAT 27:46 Leꞌa ngol gor nkea uyon wa leꞌa Jesús ugeꞌ ndab: —Elí, Elí, ¿lama sabactani? —leꞌa ta wa dub diꞌizh gab: Dios ten naꞌ, Dios ten naꞌ, ¿xtaꞌanxá mlalad go naꞌ zhaga?
MAT 27:47 Leꞌa ncho bexa nde sa wa gor na mbiꞌín bexa ta li ndab Jesús wa, cha ndab bexa: —Leꞌa xa baꞌ nbezh Elí.
MAT 27:48 Zha leꞌa dub bexa wa utoꞌo karrel, nchaꞌdob dub lad xiꞌil, cha ulo xa‑yá ndoꞌ vinagr. Cha msob xa‑yá gek dub yalod ndontsa goo Jesús ta wa.
MAT 27:49 Parea leꞌa iteata bexa wa ndab ndoꞌ xa wa: —Kweas go, leꞌa beuna iniꞌí naga siꞌid yakno Elí xa.
MAT 27:50 Weꞌe leꞌa Jesús cha ugeꞌgal utezhat, cha ngut xa.
MAT 27:51 Zha leꞌa lad utaꞌa ncho bseꞌa len niꞌi ten Dios cha usaw gast gaꞌap no gast ilaꞌ, ngok top bleꞌa‑yá. No ngok xoꞌo gast uleꞌa be geꞌ ubiꞌi,
MAT 27:52 no myaꞌal be geꞌloꞌo sa mgaꞌach be men ngut. Cha myaste kwaꞌad bexa ngut, bexa nak xmen Dios.
MAT 27:53 Cha utoꞌo bexa wa len baꞌa wa. Leꞌa tsoꞌo na mbangal Jesús, cha uyote bexa wa Jerusalén cha uniꞌí kwaꞌad be men bexa.
MAT 27:54 Leꞌa gor ngok xoꞌo nsea iteata be taꞌa wa, leꞌa xa nibeꞌe ten soldad no iteata be soldad ndeulaꞌach Jesús wa cha uzhebpa mzheb, ndab bexa: —Ta ugeaka leꞌa xabgiꞌi ndee Xinka Dios.
MAT 27:55 Leꞌa sa wa sittsa ndewiꞌi kwaꞌad be xagots, bexa na utoꞌo Galilea usankea bexa tsoꞌo Jesús, no ngokno bexa Jesús nes nchaꞌa xa Jerusalén.
MAT 27:56 Leꞌa lat bexa wa no Marí xa gezh Magdala nsoꞌ, no Marí xnaꞌa Jacob nsea Kosé, no xnaꞌa be xin Zebedeo.
MAT 27:57 Leꞌa ngol gor uzhe cha ulen dub xabgiꞌi rik nsaleaꞌ Kosé, xa gezh Arimatea, dub xa no ndangea ladna Jesús.
MAT 27:58 Leꞌa xa wa ngwaꞌ ndoꞌ Pilat, cha unab xa Jesús. Leꞌa Pilat cha unibeꞌe ulaꞌa be soldad goꞌo Kosé Jesús.
MAT 27:59 Cha uxeꞌe Kosé Jesús ndoꞌ cruz wa, cha mtixko xa Jesús dub lad koꞌol ta umbiꞌi.
MAT 27:60 Cha ulo xa Jesús len dub baꞌa cuent geꞌloꞌo, dub ta tlaw myan ndoꞌ geꞌdaꞌa. Cha mtixte xa dub geꞌ siꞌil toꞌo baꞌa wa, cha nseaꞌ xa.
MAT 27:61 Leꞌa sa wa nde Marí xa Magdala no stubga Marí lad toꞌo baꞌa wa.
MAT 27:62 Leꞌa ngot xeꞌa stubga wizh dub wizh neꞌe bexa judio, leꞌa be uleꞌay nibeꞌe no bexa fariseo ngwaꞌ ndoꞌ Pilat,
MAT 27:63 ndab bexa: —Señor, leꞌa besa ntseꞌa ladna leꞌa Jesús xa ukwiꞌin wa ndab gor na bi nban xa leꞌa xa wizh yontsa iban ndoꞌ gealgut.
MAT 27:64 Ta weꞌe nab besa ndoꞌ go inibeꞌe ga yaꞌulaꞌach be soldad toꞌo baꞌa gast wizh yon. Tal naꞌanpa li gun ga leꞌa be xmen xa giꞌid gor teꞌal, cha goꞌo bexa wa xa. Cha ukwiꞌin bexa gab bexa ndoꞌ be men leꞌa xa wa mbanla ndoꞌ gealgut. Tal leꞌa bexa li ukwiꞌin leꞌa ta wa mas ugap ndoꞌ lak mkwiꞌin Jesús wa.
MAT 27:65 Weꞌe leꞌa Pilat cha ndab ndoꞌ bexa: —Ulaꞌachka be soldad sa wa. Waꞌ bega cha btsaw chá bega toꞌo baꞌa wa lak ndák bega.
MAT 27:66 Weꞌe leꞌa bexa wa cha nchaꞌbe, cha ulo bexa dub taꞌa toꞌo baꞌa wa, natsa iniꞌí bexa tal ton uxaꞌal‑a. Cha myanbe be soldad sa wa ulaꞌach bexa‑yá.
MAT 28:1 Ngol utid wizh neꞌe bexa wa, gor ngot xeꞌa wizh ned ten sman, leꞌa Marí xa Magdala no stubga Marí nchaꞌwiꞌi baꞌa wa.
MAT 28:2 Weꞌe cha ngok dub xoꞌo siꞌil. Leꞌa dub angel ten Dios utoꞌo gibeꞌa ulaꞌ sa wa, cha udob xa geꞌ toꞌo baꞌa wa, cha usob xa tsoꞌo‑yá.
MAT 28:3 Leꞌa angel wa ndon nduꞌu naꞌ cuent bealꞌ usiꞌi. No xab xa ndon mbe xiꞌil naꞌ.
MAT 28:4 Leꞌa gor uniꞌí be soldad ta wa, uzheꞌeb nzheb bexa gast nxis bexa, cha ulayat bexa ndoꞌ yo cuent bexa ngut.
MAT 28:5 Leꞌa angel ndab ndoꞌ be xagots wa: —Lá izheb bego, leꞌa naꞌ uníka leꞌa bego nkwaꞌan Jesús, xa ngut ndoꞌ cruz.
MAT 28:6 Leꞌa xa naꞌan sa ndee, leꞌa xa ndi mbanla lakka ndab xa. Utseawiꞌi bega sa mkaꞌach bexa xa.
MAT 28:7 Cha uxax byaꞌ bega, cha gud bega ndoꞌ be xmen Jesús leꞌa xa mbanla ndoꞌ gealgut. No nchaꞌa nedla xa ndoꞌ bexa wa Galilea, leꞌa sa wa iniꞌígal bexa xa. Leꞌa naꞌ ta ndeekama nsabndoꞌ gáp ndoꞌ bego.
MAT 28:8 Weꞌe leꞌa be xagots wa nzheb, parea uzhebpa nten ladna bexa. Cha uxax mkaꞌan bexa wats baꞌa wa, karrel nseaꞌbeyab bexa‑yá ndoꞌ be xmen Jesús. Leꞌa nes nseaꞌbe be xagots wa,
MAT 28:9 ngi zha uniꞌí bexa leꞌa Jesús nseala nes, cha unidiꞌizh Jesús ndoꞌ bexa. Cha ubii bexa wats Jesús, msaxib bexa ndoꞌ xa. Cha udiꞌid bexa xoꞌo Jesús, ndankea bexa xa.
MAT 28:10 Weꞌe leꞌa Jesús cha ndab ndoꞌ bexa: —Lá izheb bega. Byaꞌyab bega ndoꞌ be xmen naꞌ, bexa cuent nak wit naꞌ, yaꞌbe bexa Galilea, leꞌa sa wa iniꞌígal bexa naꞌ.
MAT 28:11 Ndalen li nchaꞌbe be xagots nes wa, leꞌa pla be soldad nlaꞌach toꞌo baꞌa wa uyote gezh wa, cha mbidiꞌizh bexa ndoꞌ be uleꞌay nibeꞌe wa iteanak be ta li uyoꞌo wa.
MAT 28:12 Leꞌa bexa nibeꞌe ten uleꞌay wa cha ngwaꞌyadiꞌizhno bexa gox nsak ten bexa judio ná xteꞌe gun bexa. Weꞌe cha msaꞌa bexa sian med ndoꞌ be soldad wa,
MAT 28:13 ndab bexa: —Gud bega leꞌa be xmen Jesús mbiꞌid gor teꞌal cha mbiwaꞌan bexa Jesús gor ndeyats bega.
MAT 28:14 Tal leꞌa xa nibeꞌe wa goꞌón‑a, leꞌa besa leꞌa ikaꞌab sakndoꞌ bega, ndontsa naꞌan xtaꞌan gunno xa bega.
MAT 28:15 Weꞌe leꞌa be soldad wa cha usen be med wa, cha mbidiꞌizh bexa lak ndab be uleꞌay wa. Leꞌa ta wa gast wizh nat li ndadiꞌizh bexa judio lak mkwiꞌin be soldad wa.
MAT 28:16 Weꞌe leꞌa isatibdub be xmen Jesús nchaꞌbe Galilea, gast bet sa ndabka Jesús yaꞌbe bexa wa.
MAT 28:17 Leꞌa gor uniꞌí bexa Jesús, cha ngwankea bexa xa, parea ncho bexa bi lá ndangea ladna ti leꞌa Jesús xa wa.
MAT 28:18 Leꞌa Jesús cha ubii wats bexa, ndab xa: —Leꞌa Dios msaꞌa juers nibeꞌe naꞌ iteanak be ta ncho gibeꞌa no ndoꞌ gizhliyo.
MAT 28:19 Ta weꞌe waꞌ bega idub nax ndoꞌ gizhliyo ndoꞌ be men itea be nacion, bluu bega bexa xteꞌe gak bexa xmen naꞌ. Cha ulaleaꞌ bega bexa, guntiꞌin bega leaꞌ Dios Xus naꞌ, no lea naꞌ xa nak Xin Dios, no leaꞌ Espíritu ten Dios.
MAT 28:20 Bluu bega bexa uxobgek bexa iteanak ta unibeꞌe naꞌ ndoꞌ bega. Lá yalad bega leꞌa naꞌ nkeseano tseꞌe bega gast initndoꞌ gizhliyo ndee. Lika nak‑a.
MAR 1:1 Lndeꞌe usaxan diꞌizh wen ten Jesucristo, Xin Dios,
MAR 1:2 lak mkeꞌa profet Isaías sakndoꞌ Dios ndab xa: Unaꞌ, leꞌa naꞌ utuꞌub dub xa yaꞌ ned ndoꞌ lu gudiꞌizh diꞌizh ten naꞌ, ndontsa listla kwe be men gal zha ilen lu.
MAR 1:3 Leꞌa xa wa ikeseyadiꞌizh geꞌe sa bid, ugeꞌ gab xa: “Bin parej bega nes ilen Xa Nibeꞌe. Bkeasoꞌ bega nes ten xa.”
MAR 1:4 Leꞌa xa wa Juan, xa uyoꞌo geꞌe sa bid. Ulaleaꞌ xa be men len nits, no ndab xa ulaꞌa bexa be ta ugap nak bexa, no italeaꞌ bexa, ndontsa utsuꞌu Dios be ke ten bexa.
MAR 1:5 Leꞌa kwaꞌad bexa Jerusalén no bexa idub distrit Judea utoꞌo nchaꞌyoꞌón diꞌizh ten Juan. Leꞌa gor na mgondoꞌ bexa be ke ten bexa, leꞌa Juan cha ulaleaꞌ bexa len nits yowbeꞌe Jordán.
MAR 1:6 Leꞌa xab Juan nakndeꞌe gich las came, nsea dub sinch gid nde len xa. Leꞌa xa ndaw mbit, nsea mzhin ser ndo xa.
MAR 1:7 Ndadiꞌizh Juan, ndab xa ndoꞌ be men: —Leꞌa tsoꞌo naꞌ ndee ilen stub xa mas nsak ndoꞌ naꞌ. Leꞌa naꞌ ni lá isayaꞌ kote ndab xa wa.
MAR 1:8 Leꞌa naꞌ nits‑tsa ngoleaꞌ bega, ná leꞌa xa ilen tsoꞌo naꞌ ndee koleaꞌ be men no Espíritu ten Dios.
MAR 1:9 Ngol dub wizh leꞌa Jesús utoꞌo gezh Nazaret ten distrit Galilea. Nchaꞌa Jesús sa nsoꞌ Juan, cha ulaleaꞌ Juan Jesús len nits yowbeꞌe Jordán.
MAR 1:10 Leꞌa gor na utoꞌo Jesús len nits wa, leꞌa Jesús uniꞌí myaꞌal gibeꞌa. Leꞌa Espíritu ten Dios cuent dub palom nchaꞌlaꞌ sa nsoꞌ Jesús.
MAR 1:11 No ulen ti Dios gibeꞌa ndab ndoꞌ Jesús: —Lu nak Xiꞌín naꞌ. Leꞌa naꞌ nkweaꞌ ladna lu, no ntenno lad naꞌ lu.
MAR 1:12 Leꞌa Espíritu ten Dios cha mbiꞌi Jesús geꞌe bid sa naꞌan men.
MAR 1:13 Leꞌa sa wa uyoꞌo Jesús dub top gaꞌal wizh lat be man geꞌe wa. Weꞌe ulen maxuꞌu uzheꞌeb mbin preb Jesús nlad maxuꞌu utsabgix Jesús. Tsoꞌo wa cha ulen be angel ten Dios mlaꞌach bexa Jesús.
MAR 1:14 Tsoꞌo na mkeꞌa be men Juan litgiꞌib, leꞌa Jesús cha nseaꞌ leꞌaka Galilea, ukesea uluu xa be men diꞌizh wen ten Dios ná xteꞌe nibeꞌe Dios be men.
MAR 1:15 Ndab xa: —Leꞌa tiemp yá ngol. Leꞌa zha inibeꞌe Dios ladoꞌo be men yá gax nak. Blaꞌa bego be ta ugap nak bega, no bingea ladna bega diꞌizh wen ten Dios.
MAR 1:16 Leꞌa dub gor nchasea Jesús toꞌo lagun siꞌil nsaleaꞌ Galilea, cha uniꞌí xa Simón nsea Ndres wit Simón, ndeutsaꞌab red ten na len nits, leꞌa bexa wa xa nsen mbeal.
MAR 1:17 Cha ndab Jesús: —Usankea bega tsoꞌo naꞌ, leꞌa naꞌ uluu xteꞌe yunjunt bega be men ndoꞌ Dios.
MAR 1:18 Bi leꞌa gor wa cha mlaꞌa bexa be red ten bexa, cha nchaꞌano bexa Jesús.
MAR 1:19 Weꞌe cha usea bexa stub tuzh sa. Cha uniꞌí Jesús dub xa nsaleaꞌ Jacob nsea stub xa nsaleaꞌ Juan wit Jacob. Leꞌa bexa wa ndiꞌib ndoꞌ dub barco ndego ramient be red ten na.
MAR 1:20 Cha utezh Jesús itop wit bexa. Leꞌa bexa wa cha mchansoꞌ xus na Zebedeo ndoꞌ barco wa no be mos ten bexa. Leꞌa Jacob no Juan cha nchaꞌano Jesús.
MAR 1:21 Cha uyote bexa len gezh Capernaum. Leꞌa ngol wizh neꞌe be men, leꞌa Jesús cha nchaꞌuluu be men len niꞌi sa nzhealbe bexa judio gezh wa.
MAR 1:22 Leꞌa be men wa ndanseana xteꞌe ndadiꞌizh xa, leꞌa ta ndadiꞌizh xa wa nluu leꞌa xa uzheꞌeb ndap juers, naꞌanpa lak nluu be mech ten ley.
MAR 1:23 Leꞌa len niꞌi wa nsob dub xabgiꞌi nsak gizh tont ncho mbi bxin len ladoꞌo na. Leꞌa ta wa ugeꞌ ndab ndoꞌ Jesús:
MAR 1:24 —¿Xtaꞌan nsea ugal lu besa, Jesús xa Nazaret? ¿Nati nsea unitndoꞌ lu besa zha? Naꞌ uní ton nak lu, leꞌa lu xa umbiꞌi mtuꞌub Dios.
MAR 1:25 Leꞌa Jesús uteyo mbi bxin wa, ndab xa: —¡Kexga lu! ¡Utoꞌo len ladoꞌo xa baꞌ!
MAR 1:26 Weꞌe leꞌa mbi bxin wa udabi xabgiꞌi wa, cha utezhat xa, cha utoꞌo mbi bxin wa len ladoꞌo xa.
MAR 1:27 Weꞌe leꞌa itea be men wa ngwanseana, nabdiꞌizh bexa ndoꞌ be ltsaꞌa xa, ndab bexa: —¿Xteꞌe nak ta ndee zha? Leꞌa xa nluu dub taꞌa ni gol goꞌón beuna, no uzheꞌeb ndap xa juers, gast be mbi bxin nxobgek ndoꞌ ta ndab xa.
MAR 1:28 Leꞌa ta li mbin Jesús wa cha uxax mgen idub Galilea.
MAR 1:29 Leꞌa gor na utoꞌo bexa len niꞌi wa, leꞌa Jesús nchaꞌano Jacob nsea Juan ta lid Simón nsea Ndres.
MAR 1:30 Leꞌa xnazhaꞌap Simón nax ncho xlea. Leꞌa gor na ndab bexa‑yá ndoꞌ Jesús,
MAR 1:31 leꞌa Jesús cha ubii sa nax xa wa, usen xa yaꞌa xa, cha uxiste Jesús xa. Cha bi leꞌa gor wa mtoꞌo xlea xa, cha msaꞌa xa ta gaw bexa wa.
MAR 1:32 Leꞌa gor na ngwaꞌasla wizh cha nsea teꞌal, leꞌa be men ulenno kwaꞌadpa bexa gizh nsea bexa nsak gizh tont ncho mbi bxin len ladoꞌo na.
MAR 1:33 Leꞌa idub gezh men myakjunt toꞌo niꞌi wa.
MAR 1:34 Leꞌa Jesús myunyakna kwaꞌadpa be men nsén isandoꞌ gealgizh, nsea ulantuꞌub Jesús be mbi bxin ncho len ladoꞌo be men wa. Lá ulaꞌa xa ngudiꞌizh be mbi bxin, geal leꞌa be ta wa uniꞌí ton nak Jesús.
MAR 1:35 Ngol gor bi teꞌalta leꞌa Jesús ngwaste, cha nchaꞌa xa dub sa naꞌan men, sa na ngwaꞌyadiꞌizhno xa Dios.
MAR 1:36 Leꞌa Simón no stapla bexa utoꞌo nchaꞌkwaꞌan Jesús.
MAR 1:37 Ná gor na mzheal bexa Jesús, cha ndab bexa ndoꞌ xa: —Leꞌa be men weꞌe itea nkwaꞌan ga.
MAR 1:38 Leꞌa Jesús cha ndab: —Nchaꞌbe beuna be gezh gax ndee. Uluꞌu naꞌ be men, leꞌa naꞌ tiꞌin weꞌe ndal ndoꞌ gizhliyo.
MAR 1:39 Weꞌe leꞌa Jesús cha nchasea be gezh idub distrit Galilea, nluu xa be men len be niꞌi sa nzhealbe bexa judio, nsea ulantuꞌub Jesús be mbi bxin ncho len ladoꞌo be men.
MAR 1:40 Leꞌa dub wizh ulen dub xabgiꞌi wats Jesús, dub xa nsaꞌgea las na, leꞌa ta wa dub gealgizh nsaleaꞌ lepra. Cha msaxib xa ndoꞌ Jesús, ndab xa: —Tal go nlad yunyakna go naꞌ, leꞌa naꞌ uní leꞌa ga sunka gan.
MAR 1:41 Leꞌa Jesús cha mlats ladna xa wa, cha mxoꞌob Jesús yaꞌa na tsoꞌo xa wa. Cha ndab Jesús: —Nladka naꞌ yakna lu. Nat myakna lu.
MAR 1:42 Bi leꞌa gor wa leꞌa gealgizh wa cha unitndoꞌ, cha myakna las xa.
MAR 1:43 Weꞌe leꞌa Jesús cha unibeꞌe ndoꞌ xa, ndab Jesús: —Nat syoꞌo gan yaꞌ lu.
MAR 1:44 Naꞌan ton ndoꞌ ná gudiꞌizh lu xteꞌe myakna lu. Dubgaꞌal ndoꞌ uleꞌay waꞌ uluu las lu, leꞌa lu myaklana. Nsea biꞌi be man xnab lak nibeꞌe ley mkeꞌa Moisés usaꞌa be men zha nyakna bexa, ndontsa iniꞌí be men leꞌa lu myaklana.
MAR 1:45 Ná leꞌa nes nseaꞌ xabgiꞌi wa, usaxan ndadiꞌizh xa ndoꞌ be men xteꞌe myunyakna Jesús xa. Ta weꞌe leꞌa Jesús lá yoota gan gaꞌal yate ni dub len gezh wa. Sbeꞌen dub lad sa naꞌan men ukesea xa, ná leꞌa be men itea lad utoꞌo nchaꞌbeka wats Jesús.
MAR 2:1 Ngok stapla wizh mtanchaꞌgal Jesús gezh Capernaum. Weꞌe mbiꞌín be men pa niꞌi na ncho Jesús.
MAR 2:2 Cha uxax mzhealbe kwaꞌad men sa wa, gast ni toꞌo niꞌi wa lá ugalta kwe be men. Cha mluu Jesús bexa diꞌizh ten Dios.
MAR 2:3 Leꞌa gor wa ulayaꞌ dap men nchaꞌano dub xabgiꞌi gizh lá yoo gan isea.
MAR 2:4 Ná leꞌa tant kwaꞌad be men nde sa wa, leꞌa bexa lá yoꞌo gan ibii wats Jesús. Cha ndi ukea bexa gek niꞌi wa, mxaꞌal bexa‑yá gaꞌal‑la sa nsoꞌ Jesús. Cha mlaꞌko bexa yaloꞌon nax xa gizh wa ndoꞌ na.
MAR 2:5 Leꞌa Jesús mnaꞌla leꞌa bexa mgeꞌ ladna leꞌa Jesús sun gan yunyakna xa gizh wa. Cha ndab Jesús ndoꞌ xa: —Amig, leꞌa be ke ten lu myuꞌula.
MAR 2:6 Ná leꞌa be mech ten ley ndebe sa wa cha mbinbeꞌebe:
MAR 2:7 “¿Xtaꞌan ngi li ndab xa ndee zhaga? Leꞌa ta ndab xa uzheꞌeb dub ta lá nsak ladna Dios. ¿Ton isuꞌu utsuꞌu be ke ten be men zha? Nabtsa Dios suꞌu.”
MAR 2:8 Ná leꞌa Jesús cha mgenna xteꞌe ndanbeꞌe bexa wa. Cha ndab Jesús: —¿Xtaꞌan lbaꞌa ndanbeꞌe bega zha?
MAR 2:9 ¿Xtaꞌan mas lid bid gáp naꞌ ndoꞌ xa gizh ndee, leꞌa ke ten xa myuꞌula, nati gáp naꞌ gaste xa, cha kob xa yaloꞌon ten xa, cha isea xa?
MAR 2:10 Leꞌa nat iniꞌí bega leꞌa naꞌ, Xa Myak Men Ndoꞌ Gizhliyo, no syoꞌo gan utsuꞌu be ke ten be men. Cha ndab Jesús ndoꞌ xa gizh wa:
MAR 2:11 —Gáp naꞌ ndoꞌ lu goste, cha udob yaloꞌon ten lu baꞌ, cha byaꞌ ta lid lu.
MAR 2:12 Leꞌa xa wa uxax ngwaste, cha udob xa yaloꞌon ten xa. Cha utoꞌo xa sa wa ndoꞌ gaꞌal iteanak be men. Leꞌa itea bexa nde sa wa ngwanseana, ndab bexa leꞌa Dios uzheꞌeb dub Dios juert, no ndab bexa: —Ta ndee dub ta nunk beuna gol niꞌí.
MAR 2:13 Tsoꞌo wa nchaꞌagal Jesús toꞌo lagun wa. Leꞌa kwaꞌad men ulen wats Jesús, cha mluu Jesús bexa diꞌizh ten Dios.
MAR 2:14 Leꞌa sa nchaꞌtid Jesús wa uniꞌí Jesús dub xabgiꞌi nsaleaꞌ Leví xin Alfeo. Leꞌa Leví wa nsobyun tiꞌin nsen xa med nkix be men ndoꞌ gobier Roma. Cha ndab Jesús: —¡Utsea! ¡Usankea tsoꞌo naꞌ! Leꞌa Leví cha ngwasoꞌ, cha usankea xa tsoꞌo Jesús.
MAR 2:15 Ngol tsoꞌo wa leꞌa Jesús nsea be xmen xa ngwaꞌdaw ta lid Leví. No kwaꞌad be men nchaꞌano Jesús sa wa, bexa ndun ltsaꞌa tiꞌin mbin Leví, nsea kwaꞌadta bexa na ndab be men ugap nak bexa.
MAR 2:16 Leꞌa gor uniꞌí be mech ten ley no bexa fariseo leꞌa Jesús nsobyawno bexa ugap no bexa nsen med, cha weꞌe unabdiꞌizh bexa ndoꞌ be xmen Jesús, ndab bexa: —¿Xtaꞌan ndawno Jesús bexa nsen med baꞌ no iteata bexa ugap baꞌ zha?
MAR 2:17 Leꞌa gor na mbiꞌín Jesús ta wa, cha ndab Jesús ndoꞌ bexa wa: —Leꞌa be men naꞌanpa gizh lá nkiꞌin doctor, ndi leꞌa xa gizh nkiꞌinka xa wa. Leꞌa naꞌ naꞌanpa ndalteꞌezh bexa ndanbeꞌe leꞌa lá ndap ke; naꞌ ndi ndalteꞌezh bexa ngondoꞌ leꞌa ndap ke.
MAR 2:18 Leꞌa be xmen Juan nsea be xmen bexa fariseo ncho be wizh lá ndaw bexa ndontsa mas yankea bexa Dios. Weꞌe ngol dub wizh leꞌa pla be men ndab ndoꞌ Jesús: —Leꞌa be xmen Juan nsea be xmen bexa fariseo ncho wizh lá ndaw bexa. Ná leꞌa be xmen ga zha, ¿xtaꞌan lid no bexa li ndun ta wa?
MAR 2:19 Leꞌa Jesús cha ukaꞌab ndab: —¿Nsak bega zha leꞌa dub sa nchilyaꞌa men leꞌa bexa nde sa wa lá nsabndoꞌ gaw, zha bi ncho xabgiꞌi mchilyaꞌa wa?
MAR 2:20 Parea gal dub wizh leꞌa be men goꞌo xabgiꞌi mchilyaꞌa wa. Weꞌe leꞌa bexa nde sa wa lá gaw dub tiemp.
MAR 2:21 ’Naꞌan ton ngo ramient lad gox nsea dub bleꞌa lad kub. Tal leꞌa xa li gun, leꞌa lad kub wa syaꞌad, cha ndi mas stsaw‑a lad gox wa.
MAR 2:22 No naꞌan ton ngo vin kub len dub bols gid gox. Tal leꞌa xa li gun leꞌa bich ten vin kub stsaw bols gid gox wa. Leꞌa vin wa cha ibid stsiꞌi no sazhaꞌa bols gox wa. Leꞌa vin kub wa nsabndoꞌ yoo len bols gid kubga.
MAR 2:23 Leꞌa ngol dub wizh neꞌe be men leꞌa Jesús nchaꞌtid sa nax dub bleꞌa yo ncho trig. Leꞌa be xmen Jesús cha uxeꞌe pla be bid ten trig.
MAR 2:24 Leꞌa ncho bexa fariseo cha ndab ndoꞌ Jesús: —Unaꞌ go, ¿xtaꞌan lbaꞌa ndun bexa baꞌ, ta na lá nsabndoꞌ gun bexa wizh neꞌe beuna zha?
MAR 2:25 Ná leꞌa Jesús cha ndab: —¿Ni lá ndoꞌol bega sa ndab diꞌizh ten Dios ta na mbin David dub biaj, zha na uzhebpa ndanna xa no bexa ndeseano xa zha?
MAR 2:26 Leꞌa David uyoꞌo len niꞌilad ten Dios, zha na ngok Abiatar uleꞌay ndon leꞌa nsak, cha udaw xa be pan leꞌay, ta lá nsabndoꞌ gaw dub men naꞌanpa nak uleꞌay. No msaꞌa xa‑yá ndoꞌ bexa ndeno xa.
MAR 2:27 No ndab Jesús ndoꞌ bexa: —Leꞌa Dios msaꞌa wizh neꞌe be men ndontsa gakno‑yá be men. Naꞌanpa mbindeꞌe Dios be men yankea bexa wizh wa.
MAR 2:28 Ta weꞌe leꞌa naꞌ, Xa Myak Men Ndoꞌ Gizhliyo, noga nibeꞌe wizh neꞌe beuna.
MAR 3:1 Leꞌa stub wizh uyoꞌo Jesús len niꞌi sa nzhealbe bexa judio gezh wa. Leꞌa sa wa nsob dub xabgiꞌi ubidya dub yaꞌa na.
MAR 3:2 Weꞌe leꞌa ncho bexa ndeulaꞌach naga syunyakna Jesús xa gizh wa wizh neꞌe be men, ndontsa ta weꞌetsa usake bexa Jesús.
MAR 3:3 Leꞌa Jesús cha ndab ndoꞌ xa gizh yaꞌa na wa: —Gosoꞌ, cha usoꞌ tlaw ndee.
MAR 3:4 Leꞌa Jesús cha ndab ndoꞌ be men wa: —¿Leꞌa wizh neꞌe beuna nsabndoꞌ gun beuna ta wen nati gun beuna ta ugap? ¿Gakno beuna dub xa nati ulaꞌa beuna gat xa? Ná leꞌa be men wa ni lá ikaꞌabbe.
MAR 3:5 Weꞌe leꞌa Jesús ndakloo mwiꞌi ndoꞌ be men nde gangeak, cha uban myoꞌo ladna Jesús tant ngud nak ladoꞌo bexa. Cha ndab Jesús ndoꞌ xa na gizh yaꞌa na wa: —Bkea yaꞌa lu. Leꞌa xa wa cha mkea yaꞌa na, cha uxax myakna‑yá.
MAR 3:6 Leꞌa bexa fariseo cha nseaꞌbe, cha mzhealbe bexa nsea be xmen Herodes, mbidiꞌizh bexa ná xteꞌe gun bexa gan gat Jesús.
MAR 3:7 Leꞌa Jesús cha nchaꞌagal toꞌo lagun nsea be xmen xa. Weꞌe kwaꞌad bexa Galilea usankea tsoꞌo Jesús.
MAR 3:8 Leꞌa gor na mbiꞌín be men xteꞌe mbidiꞌizh Jesús nsea xteꞌe myunyakna Jesús be men, weꞌe kwaꞌadpa bexa ulayaꞌ wats Jesús, bexa utoꞌo Jerusalén nsea distrit Judea nsea distrit Idumea nsea stub toꞌo yowbeꞌe Jordán nsea gezh Tiro no gezh Sidón.
MAR 3:9 Cha ndab Jesús ndoꞌ be xmen na: —List uteno bega dub barco, ndontsa lá kidko be men naꞌ.
MAR 3:10 Leꞌa Jesús myunyaklana kwaꞌad be men, ta weꞌe itea bexa gizh nsiꞌi be ltsaꞌa na, ndontsa ugal bexa masa xab Jesús.
MAR 3:11 Leꞌa be men ncho mbi bxin len ladoꞌo na wa, gor uniꞌí bexa Jesús cha msaxib bexa ndoꞌ Jesús, ugeꞌ ndab be mbi bxin wa: —¡Go nak Xin Dios!
MAR 3:12 Ná leꞌa Jesús cha uzheꞌeb uteyo be mbi bxin, ndontsa lá gab be mbi bxin ton nak Jesús.
MAR 3:13 Tsoꞌo wa leꞌa Jesús ukea dub bet, cha utezh xa bexa mti xa. Leꞌa bexa wa cha ulayaꞌ wats Jesús.
MAR 3:14 Cha ndab Jesús ndoꞌ isatibtop bexa wa: —Leꞌa bega gak xa ikeseano naꞌ nsea bexa utuꞌub naꞌ yaꞌbe uluu be diꞌizh ten Dios ndoꞌ be men.
MAR 3:15 Nat leꞌa bega gap diꞌizh yunyakna men gizh no kontuꞌub bega be mbi bxin.
MAR 3:16 Leꞌa bexa wa lndeꞌe nsaleaꞌ: Simón xa msaleaꞌ Jesús Pedr,
MAR 3:17 nsea Jacob no Juan wit Jacob be xin Zebedeo (Jesús msaleaꞌ itop wit xa wa “Boanerges”, dub diꞌizh gab: cuent níꞌi usiꞌi).
MAR 3:18 Nsea Ndres, nsea Julip, nsea Bartol, nsea Mateo, nsea Tomás, nsea Jacob xin Alfeo, nsea Tadeo, nsea Simón xa partid Caná,
MAR 3:19 nsea Judas Iscariot, xa na leꞌa myun cuent Jesús tsoꞌo wa. Leꞌa bexa wa cha uyoꞌo len dub niꞌi.
MAR 3:20 Weꞌe leꞌa kwaꞌad be men ulen gast ni lá yoo gan gaw Jesús nsea be xmen xa.
MAR 3:21 Leꞌa gor na mbiꞌín xnaꞌa Jesús nsea be wit Jesús leꞌa be men ndadiꞌizh leꞌa Jesús myak tont, weꞌe cha utoꞌo bexa nchaꞌyoꞌo bexa Jesús.
MAR 3:22 Leꞌa sa wa ndebe pla mech ten ley utoꞌo Jerusalén. Leꞌa bexa wa ndab: —Leꞌa Jesús ndap Beelzebú maxuꞌu na nibeꞌe be mbi bxin. Juers weꞌe ngontuꞌub Jesús be mbi bxin wa.
MAR 3:23 Leꞌa Jesús cha utezh bexa wa, cha ndab xa: —¿Syoꞌo gan kontuꞌub dub maxuꞌu leꞌaka maxuꞌu zha?
MAR 3:24 Tal be xmen dub xa nibeꞌe yak top partid, cha bi leꞌakaga bexa kuyo, leꞌa bexa wa yá naꞌantapa gak juertbe.
MAR 3:25 No tal be men ncho dub niꞌi bi leꞌakaga kuyobe, leꞌa bexa wa iteltsaꞌabe.
MAR 3:26 No liga tal leꞌa maxuꞌu kuyono leꞌaka be mbi bxin ten na, leꞌa maxuꞌu wa lá yoota gan gak juert, no cha snitndoꞌ maxuꞌu.
MAR 3:27 ’No naꞌan ton gun gan yate len lid dub xabgiꞌi juert kowaꞌan be taꞌa len niꞌi, tal leꞌa xa lid ned uxi xabgiꞌi wa. Lima syoꞌo gan kowaꞌan xa be taꞌa len lid xa juert wa.
MAR 3:28 ’Leꞌa naꞌ gáp ndoꞌ bega leꞌa itea be ta kweaꞌ níꞌi be men no iteata be ta ugap ndun bexa, leꞌa Dios sungeꞌka ladna ta wa.
MAR 3:29 Ná leꞌa tal ton inisi Espíritu ten Dios, leꞌa Dios lá gungeꞌ ladna ke wa, leꞌa ta wa dub ke nunk lá yuꞌuta.
MAR 3:30 Leꞌa ta wa ndab Jesús geal leꞌa be mech ten ley ndab leꞌa Jesús ndap dub mbi bxin.
MAR 3:31 Weꞌe leꞌa xnaꞌa Jesús nsea be wit Jesús ulen, cha ute bexa tsoꞌo juertsa. Cha mtuꞌub bexa dub men nchaꞌtezh Jesús.
MAR 3:32 Leꞌa bexa nde wats Jesús cha ndab ndoꞌ xa: —Leꞌa xnaꞌa go nsea be wit go nde tsoꞌo juer ndee, nkwaꞌan bexa go.
MAR 3:33 Leꞌa Jesús cha ukaꞌab ndab: —Leꞌa naꞌ gáp ndoꞌ bego ná ton xa na ta ugeaka nak xnaꞌa naꞌ nsea be wit naꞌ.
MAR 3:34 Weꞌe cha mwiꞌi Jesús ndoꞌ bexa ndebe sa wa. Cha ndab xa: —Leꞌa bega nde ndee nak xnaꞌa naꞌ no wit naꞌ.
MAR 3:35 Leꞌa itea bexa ndun lak nlad Dios, leꞌa bexa wa nak cuent wit naꞌ no bsan naꞌ no xnaꞌa naꞌ.
MAR 4:1 Leꞌa stub biaj usaxan nluu Jesús be men toꞌo lagun Galilea. Weꞌe leꞌa kwaꞌadpa be men ulen wats xa, cha ukea xa ndoꞌ dub barco nde ndoꞌ nits, cha usob xa. Leꞌa itea be men wa utebe ndoꞌ yo bid toꞌotsa nits wa.
MAR 4:2 Cha sian taꞌa mluu xa msaktabeꞌe xa be taꞌa, ndab xa:
MAR 4:3 —Blaꞌach bego, leꞌa dub xabgiꞌi ndun tiꞌin geꞌe utoꞌo nchaꞌutob bid ten trig ndoꞌ yo.
MAR 4:4 Leꞌa gor na mteꞌach xa‑yá, ncho‑yá ulate toꞌo nes. Leꞌa be migin cha ulen cha udaw‑a.
MAR 4:5 No ncho‑yá ulate ndoꞌ yo geꞌ, sa uxee yo. Leꞌa ná wa uxax ulen,
MAR 4:6 parea ngol gor na mnaꞌ bea, leꞌa ná wa cha mgoꞌol, cha ubid‑a geal leꞌa‑yá naꞌanpa wat ndiꞌib loꞌ na.
MAR 4:7 No ncho‑yá ulate lat be gix nsoꞌ gich. Ngol gor leꞌa gix wa uzheꞌeb ngoꞌol, cha ulo xleaꞌ‑yá. Cha naꞌanpa usaꞌa‑yá bid.
MAR 4:8 Parea ncho‑yá ulate sa utaꞌa yo. Leꞌa be ná wa ulen cha ngoꞌol‑a, cha msaꞌa‑yá sian bid. Ncho be trig wa msaꞌa dub galntiꞌi bid. No ncho‑yá msaꞌa dub chon gaꞌal bid. No ncho‑yá msaꞌa dub gayoꞌoga bid.
MAR 4:9 Bego na ndap nchaꞌ na, blaꞌach bega ta ndáp naꞌ ndee.
MAR 4:10 Leꞌa gor na myanbe isatibtop xmen Jesús nsea stapla bexa, weꞌe unabdiꞌizh bexa ndoꞌ Jesús ndab bexa: —¿Xtaꞌan gab ta msaktabeꞌe go cuent ten xa ndas trig wa zha?
MAR 4:11 Leꞌa Jesús cha ndab: —Leꞌa Dios nsaꞌa ta yakbeꞌena bega be ta ugaꞌach cuent ten xteꞌe nibeꞌe Dios. Parea ndoꞌ bexa xaꞌaga, sbeꞌen nsaktabeꞌe naꞌ be taꞌa gor ndadiꞌizh naꞌ.
MAR 4:12 Leꞌa bexa nwiꞌi, ná leꞌa bexa lá iniꞌí xtaꞌan‑a. No ndoꞌón bexa ta ndáp naꞌ, ná leꞌa bexa ni lá yakbeꞌena‑yá. Weꞌe lá yach bexa wats Dios, no lá utsuꞌu Dios be ke ten bexa.
MAR 4:13 No ndab Jesús: —¿Lá nyakbeꞌena bega ta msaktabeꞌe naꞌ wa zha? ¿Xteꞌexá yakbeꞌena bega itea be ta uluu naꞌ zhaga?
MAR 4:14 Leꞌa xa nteꞌach trig wa nak cuent xa ndadiꞌizh diꞌizh ten Dios.
MAR 4:15 Leꞌa toꞌo nes sa ulate bid ten trig wa nak cuent be men ndoꞌón diꞌizh ten Dios, parea cha nlen maxuꞌu cha ngoꞌo maxuꞌu diꞌizh wa len ladoꞌo bexa.
MAR 4:16 Leꞌa yo geꞌ sa ulate bid wa nak cuent bexa nten ladna ndoꞌón diꞌizh ten Dios.
MAR 4:17 Ná leꞌa bexa wa nak cuent dub ya trig lá ndap sian loꞌ na. Ndangea ladna bexa diꞌizh ten Dios dub ndeꞌep, ná leꞌa gor na juert ncho bexa geal ndangea ladna bexa diꞌizh wa, cha nlaꞌa bexa‑yá.
MAR 4:18 Leꞌa yo ncho gix nsoꞌ gich wa nak cuent bexa na ndoꞌón diꞌizh ten Dios,
MAR 4:19 ná leꞌa bexa nyuꞌ ladna be taꞌa ndoꞌ gizhliyo ndee, no ngeꞌ ladna bexa be taꞌa siantsa ndap xa, no nsaꞌab ladna bexa sianta taꞌa gap bexa. Ta weꞌe leꞌa bexa wa cuent dub ya trig naꞌan xtaꞌan usaꞌa‑yá.
MAR 4:20 Ná leꞌa sa utaꞌa yo wa nak cuent bexa ndoꞌón diꞌizh ten Dios, cha ndangea ladna xa‑yá idub ncho ladna xa. Leꞌa bexa wa wen nak cuentla be ya trig nsaꞌa dub galntiꞌi bid no dub chon gaꞌal bid no dub gayoꞌoga bid.
MAR 4:21 No ndab Jesús: —¿Ncho ton nsob dub xeꞌa len dub caj zha? ¿Nati ncho xa nsob‑a xan dub loꞌon? ¿Lid nsob xa xeꞌa dub sa gaꞌap, ndontsa usu‑yá xeꞌa itea lad?
MAR 4:22 Leꞌa itea be ta ugaꞌach, leꞌa gal gor leꞌa be ta wa uluukabe. No iteanak be ta ngachyoꞌo, leꞌa gal gor itoꞌo‑yá ndoꞌ xeꞌa.
MAR 4:23 Bego na ndap nchaꞌ na, blaꞌach bega ta ndáp naꞌ ndee.
MAR 4:24 No ndab Jesús: —Blaꞌach bega ta ndáp naꞌ ndee. Bi lak ulaꞌach bega‑yá, bi liga mas yakbeꞌena bega‑yá.
MAR 4:25 Leꞌa bexa nyakbeꞌena, leꞌa Dios gun mas yakbeꞌena bexa. Ná leꞌa bexa na lá nyakbeꞌena, leꞌa Dios slat ta na nsak bexa nyakbeꞌena bexa wa.
MAR 4:26 Nsea ndab Jesús ndoꞌ be men: —Leꞌa lak nibeꞌe Dios be men nak cuent dub xabgiꞌi ndas trig ndoꞌ yo.
MAR 4:27 Guniꞌi tal naxyats xa natal nsobnaꞌ xa leꞌa trig wa teꞌal tezhea ndiꞌibyaꞌalka.
MAR 4:28 Leꞌa trig wa juers ten yotsa nsaꞌa bid. Ndon ned lak ya wa nlen, weꞌe cha ndach ta ben ndoꞌ ya wa, cha nyak‑a bid ten trig.
MAR 4:29 Leꞌa zha na ngugal trig wa, cha ixen xa trig no dub os, geal leꞌa zha ibeleꞌe trig wa yá ngol.
MAR 4:30 No ndab Jesús: —¿Xtaꞌan dub taꞌa nak lak nibeꞌe Dios be men? ¿Xtaꞌanma dub taꞌa usaktabeꞌe beuna‑yá?
MAR 4:31 Leꞌa ta wa nak cuent ta ndasea dub bid ten mostas. Leꞌa gor na ndas dub men‑a leꞌa‑yá dub bid ndon leꞌa tuzh ndoꞌ itea be bid ncho ndoꞌ gizhliyo.
MAR 4:32 Ná leꞌa tsoꞌo na ndas xa‑yá, leꞌa‑yá ndaꞌal cuent dub ya siꞌil, mas siꞌil ndoꞌ itea be ta xgeꞌa ndas be men, gast be migin syoꞌo gan ukal lat be xos‑a.
MAR 4:33 Leꞌa Jesús li msaktabeꞌe sian taꞌa gor nluu xa diꞌizh ten Dios, lak yakbeꞌena bexa‑yá.
MAR 4:34 Sbeꞌen msaktabeꞌe xa be taꞌa gor ndadiꞌizh xa ndoꞌ be men, parea ndal gor nyak nab Jesús no be xmen xa, weꞌe uyaꞌal ndadiꞌizh xa ndoꞌ bexa wa.
MAR 4:35 Leꞌa ngol gor na nsea teꞌal, leꞌa Jesús ndab ndoꞌ be xmen na: —Nchaꞌbe beuna stub toꞌo lagun ndee.
MAR 4:36 Cha mlaute bexa be men ndebe sa wa. Cha nchaꞌbe bexa bi laktsa ndiꞌib bexa ndoꞌ barco wa. Nsea stapla barco junt nchaꞌano bexa.
MAR 4:37 Ngol gor leꞌa ndoꞌ nits wa ulen dub mbi siꞌil. Leꞌa golp ten nits wa gast len barco nyoꞌola, ngi slaꞌko‑yá barco len nits.
MAR 4:38 Ná leꞌa Jesús ndi naxyats dub xan len barco wa, nsea dub lad ncho xan gen xa. Weꞌe leꞌa be xmen xa mkwaꞌan xa, ndab bexa: —¡Mech! ¿Lá nyuꞌ ladna go leꞌa beuna ngi sat?
MAR 4:39 Leꞌa Jesús cha ngwaste, cha uteyo xa mbi wa, ndab xa ndoꞌ nits wa: —¡Kexga lu! ¡No xe ute! Leꞌa mbi wa cha uleas, cha ndon xe ute nits wa.
MAR 4:40 Weꞌe leꞌa Jesús cha ndab ndoꞌ be xmen na: —¿Xtaꞌan lbaꞌa nzheb bega zha? ¿Xtaꞌan lá ndangea ladna bega naꞌ zha?
MAR 4:41 Leꞌa bexa wa mzhebbe, ndabbe ndoꞌ ltsaꞌa na: —¿Tonxá xa ndee zhaga, gast mbi nsea nits nxobgek ndoꞌ diꞌizh ten xa?
MAR 5:1 Cha ulayaꞌ bexa stub toꞌo lagun wa ndoꞌ yo sa nibeꞌe gezh Gadara.
MAR 5:2 Leꞌa gor ulaꞌ Jesús ndoꞌ barco wa, leꞌa dub xabgiꞌi ncho mbi bxin len ladoꞌo xa utoꞌo lat be geꞌloꞌo sa ngaꞌach be men ngut.
MAR 5:3 Leꞌa xabgiꞌi wa len geꞌloꞌo ten kampeon wa nak lid na. Ni caden lá ndun bexa gan uxi bexa xa wa.
MAR 5:4 Sianla biaj mxi bexa yaꞌa xa nsea caden, no giꞌib nkeꞌanchii bexa xoꞌo xa. Ná xa nkixka caden wa nsea nsuka xa giꞌib wa. Ta weꞌe naꞌan ton ndun gan uxi xa.
MAR 5:5 Teꞌal tezhea nkeseabezhat xa be geꞌe no sa ngaꞌach be men wa. No geꞌ nkeꞌa xa leꞌaka las xa.
MAR 5:6 Gor na bi sitta uniꞌí xa Jesús leꞌa xa wa utoꞌola karrel gast ndoꞌ Jesús msaxib xa.
MAR 5:7 Cha ugeꞌ ndab mbi bxin wa ndoꞌ Jesús: —¿Xtaꞌan ngi naꞌ nsea ugal lu zha Jesús, Xin Dios siꞌil? ¡Leꞌa Dios nsobwiꞌi leꞌa naꞌ naꞌab naꞌanpa utsaksi lu naꞌ!
MAR 5:8 Leꞌa mbi bxin wa leꞌa li ndab, geal leꞌa Jesús unibeꞌela ndoꞌ mbi bxin itoꞌo len ladoꞌo xa wa.
MAR 5:9 Leꞌa Jesús cha unabdiꞌizh ndab: —¿Xteꞌe nsaleaꞌ lu zha? Leꞌa mbi bxin wa cha ndab: —Naꞌ nsaleaꞌ Uzheꞌeb Kwaꞌad Xa, geal leꞌa besa kwaꞌadpa.
MAR 5:10 Weꞌe cha uzhebpa unab mbi bxin wa ndoꞌ Jesús ndab ta wa: —Lá kontuꞌub lu besa sa ndencho besa ndee.
MAR 5:11 Leꞌa gax geꞌe wa kwaꞌad kuch ndeseayawbe.
MAR 5:12 Leꞌa be mbi bxin wa cha ndab ndoꞌ Jesús: —Btuꞌub besa yate besa len be kuch baꞌ.
MAR 5:13 Weꞌe leꞌa Jesús cha msaꞌa diꞌizh li gun be mbi bxin. Leꞌa be ta wa cha utoꞌo len ladoꞌo xabgiꞌi wa, cha uyoꞌo be ta wa len be kuch wa. Cha ubix bema gek dub weꞌa gast len nits ulaꞌyoꞌo ma, cha ngut bema. Leꞌa ndoꞌ itea be kuch wa pa top mil ma.
MAR 5:14 Weꞌe leꞌa be men nkeno be kuch wa cha utoꞌo karrel nchaꞌyab‑a ndoꞌ be men ndesea geꞌe nsea be men gezh. Leꞌa kwaꞌad be men cha utoꞌo nchaꞌbewiꞌi ná xtaꞌan uyoꞌo.
MAR 5:15 Leꞌa gor ulayaꞌ bexa wats Jesús, leꞌa bexa cha uniꞌí xa na li utoꞌo mbi bxin len ladoꞌo na wa myaklana nsob wats Jesús, nakla xa xab xa. Cha mzheb bexa.
MAR 5:16 Leꞌa bexa na uniꞌí ta uyoꞌo wa cha mbidiꞌizh ndoꞌ be men wa xteꞌe myakna xa wa, nsea xteꞌe ngut be kuch wa.
MAR 5:17 Leꞌa bexa wa cha unab ndoꞌ Jesús ikaꞌan Jesús ndoꞌ yo ten bexa wa.
MAR 5:18 Leꞌa gor na ukeagal Jesús ndoꞌ barco, leꞌa xa li myakna wa cha unab ndoꞌ Jesús no yaꞌno Jesús.
MAR 5:19 Ná leꞌa Jesús lá kaꞌab goꞌo xa, ndi ndab Jesús ndoꞌ xa: —Byaꞌ ndoꞌ bexa ta lid lu. Cha bidiꞌizh ná xteꞌe myunyakna Dios lu, no xteꞌe mlats ladna Dios lu.
MAR 5:20 Leꞌa xa wa cha nseaꞌ, cha usaxan ndadiꞌizh xa ndoꞌ bexa idub distrit Decápolis xteꞌe myunyakna Jesús xa. Weꞌe leꞌa itea be men wa ngwanseanabe.
MAR 5:21 Leꞌa gor na myach Jesús len barco wa nseaꞌ xa stub toꞌo lagun wa, leꞌa uzhebpa kwaꞌad men ulen wats Jesús.
MAR 5:22 Cha no ulen dub xabgiꞌi nsaleaꞌ Jairo, xa nchansu niꞌi sa nzhealbe bexa judio gezh wa. Leꞌa gor na uniꞌí xa Jesús, cha msaxib xa ndoꞌ Jesús.
MAR 5:23 Cha unab xa ndoꞌ Jesús, ndab xa: —Leꞌa meꞌed gots ten naꞌ yamer gat. Waꞌ una uxoꞌob ga yaꞌa ga tsoꞌo meꞌed wa, ndontsa yakna meꞌed, lá gat meꞌed.
MAR 5:24 Leꞌa Jesús cha nchaꞌano xa, nsea kwaꞌad be men usankea tsoꞌo bexa gast ngidko bexa Jesús.
MAR 5:25 Leꞌa lat be men wa nchaꞌa dub xagots nsén gealgizh nleꞌa xa ten idub dub tibtopla liꞌin.
MAR 5:26 Leꞌa xa wa uzheꞌeb ukesea ndoꞌ kwaꞌad be doctor, gast mteꞌa xa iteanak med ndap xa. Ná leꞌa xa ni lá yakna, ndi mas kweaꞌ nsak xa.
MAR 5:27 Leꞌa gor na mbiꞌín xa ndadiꞌizh be men xteꞌe ndun Jesús, weꞌe cha ubii xa ndi tsoꞌo Jesús lat be men wa. Cha mgal xa xab Jesús,
MAR 5:28 geal leꞌa xa mbinbeꞌe tal xa ugal masa xab Jesús, leꞌa xa syakkana.
MAR 5:29 Cha bi leꞌa gor wa uleaslaꞌ ten wa, cha mgenna xa leꞌa xa myaklana ndoꞌ gealgizh wa.
MAR 5:30 Weꞌe leꞌa Jesús mgenna utoꞌo dub tuzh juers ten na, cha mgeak Jesús mwiꞌi ndoꞌ be men, ndab xa: —¿Ton xa mgal xab naꞌ?
MAR 5:31 Leꞌa be xmen Jesús ndab: —Unaꞌ go leꞌa be men kwaꞌad baꞌ leꞌa ngidko ga, ¿ná xtaꞌan ndab go ná ton mgal xab ga zha?
MAR 5:32 Ná leꞌa Jesús nwiꞌika gangeak ná ton mgal xab xa.
MAR 5:33 Leꞌa xagots wa nxis tant nzheb xa, geal leꞌa xa uniꞌí xtaꞌan mbin xa. Cha ubii xa msaxib xa ndoꞌ Jesús, cha ndab xa idub gealngea xtaꞌan mbin xa.
MAR 5:34 Leꞌa Jesús cha ndab ndoꞌ xa: —Xagots, leꞌa ta na mgeꞌ ladna lu naꞌ wa, ta weꞌe myakna lu. Nat byaꞌ cha bten ladna lu, leꞌa lu myaklana ndoꞌ gealgizh wa.
MAR 5:35 Ndalen li nsoꞌyadiꞌizh Jesús, ulen pla bexa utoꞌo ta lid Jairo, ndab dub xa wa ndoꞌ Jairo: —Leꞌa xingots ga ngutla. Yá naꞌantapa goꞌo ga mech baꞌ.
MAR 5:36 Ná leꞌa gor na mbiꞌín Jesús ta li ndab xa wa, cha ndab Jesús ndoꞌ Jairo: —Lá izheb lu. Bingeatsa ladna lu naꞌ.
MAR 5:37 Weꞌe leꞌa Jesús lá ngoꞌo itea be men wa. Nabtsa Pedr no Jacob no Juan wit Jacob mbiꞌi Jesús.
MAR 5:38 Gor na ulayaꞌ bexa ta lid Jairo, leꞌa Jesús uniꞌí xteꞌe nbezhat bexa no ndeyoꞌon bexa.
MAR 5:39 Cha uyoꞌo Jesús len niꞌi wa, cha ndab xa: —¿Xtaꞌan lbaꞌa ndun bega ruid nsea ndeyoꞌon bega zha? Leꞌa meꞌed baꞌ naꞌanpa ngut, leꞌa meꞌed baꞌ ga naxyats‑tsa.
MAR 5:40 Leꞌa be men wa ndi nxiꞌidno Jesús. Leꞌa Jesús cha ndab ndoꞌ bexa: —¡Utate itea bega sa ndee! Cha mbiꞌi Jesús xustsa meꞌed no xnaꞌatsa meꞌed nsea yontsa be xmen Jesús wa. Cha uyoꞌo bexa len sa nchoꞌob meꞌed wa.
MAR 5:41 Weꞌe leꞌa Jesús cha usen yaꞌa meꞌed, cha ndab xa: —Talita kumi —leꞌa ta wa dub diꞌizh gab: Meꞌed gots, naꞌ gáp ndoꞌ lu, goste.
MAR 5:42 Leꞌa meꞌed wa cha mban no usaxan nkesea meꞌed. Leꞌa be men ndebe sa wa ngwanseanabe. Leꞌa meꞌed wa ncho dub tibtop liꞌin.
MAR 5:43 Weꞌe leꞌa Jesús cha ndab ndoꞌ bexa: —Naꞌanpa gudiꞌizh bega ta ndee. Nat bsaꞌa bega ta gaw meꞌed gots baꞌ.
MAR 6:1 Leꞌa Jesús nsea be xmen xa cha utoꞌo sa wa, nseaꞌ xa Nazaret sa ngoꞌol xa.
MAR 6:2 Ngol dub wizh neꞌe be men leꞌa Jesús cha nluu bexa len niꞌi sa nzhealbe bexa wa. Weꞌe kwaꞌad be men ndanseana xteꞌe ndadiꞌizh Jesús, ndab bexa ndoꞌ be ltsaꞌa xa: —¿Pama ngwaꞌloꞌo xa ndee be diꞌizh lbaꞌata nluu xa baꞌ zha? ¿Pa mtsid xa be ta ndák xa baꞌ zha? ¿No xteꞌema ndun xa be uyon wa zha?
MAR 6:3 ¿Naꞌanpa xa ndee xa carpinter, xin Marí wa zha? ¿No naꞌanpa wit xa Jacob no Kosé no Judas no Simón zha? ¿No naꞌanpa be bsan xa ncho lat beuna gezh ndee zha? Ta weꞌe naꞌanpa isakyoꞌón bexa ta ndab Jesús.
MAR 6:4 Ná leꞌa Jesús cha ndab ndoꞌ bexa: —Leꞌa be men ndap mod ndoꞌ dub xa ndadiꞌizh sakndoꞌ Dios. Parea leꞌa bexa ncho lazh xa no be ltsaꞌa xa no bexa ncho ta lid xa naꞌanpa ndap bexa mod ndoꞌ xa.
MAR 6:5 Ta weꞌe lá ngun Jesús sian uyon sa wa. Platsa xa gizh mxoꞌob Jesús yaꞌa na gek xa, cha myakna bexa.
MAR 6:6 Leꞌa Jesús ngwanseana xteꞌe lá ndangea ladna bexa Jesús. Cha ndi ukesea uluu xa be men ndencho be gezh gax sa wa.
MAR 6:7 Tsoꞌo wa utezh Jesús isatibtop be xmen xa, cha msaꞌa xa juers kontuꞌub bexa be mbi bxin. Cha mtuꞌub xa top gaꞌga bexa,
MAR 6:8 ndab xa ndoꞌ bexa: —Ni dub taꞌa guntiꞌin bega nes lá goꞌo bega, ni bols, no ni pan, no ni med. Biꞌi bega dub bordóntsa.
MAR 6:9 Bkeꞌatsa bega ndab bega, parea ni stub nes xab bega lá goꞌo bega.
MAR 6:10 Leꞌa sa na ilayaꞌ bega len dub niꞌi usaꞌa bexa, weꞌetsa yoo bega gast gal wizh ikaꞌan bega gezh wa.
MAR 6:11 No tal ncho gezh lá ulaꞌa bexa yoo bega, ni lá nlad bexa goꞌón bexa ta gudiꞌizh bega, bkaꞌan bega gezh wa. Cha blate bega gast yakol ngwaꞌal xoꞌo bega, ta nluu leꞌa Dios lá nsak ladna lak nak bexa wa. Leꞌa naꞌ gáp ndoꞌ bega leꞌa gal wizh gab Dios ná ton ndap ke, leꞌa bexa gezh wa mas gealkweaꞌ iniꞌí ndoꞌ bexa uyoꞌo gezh Sodoma nsea gezh Gomorra.
MAR 6:12 Weꞌe cha utoꞌo be xmen Jesús nchaꞌbeyadiꞌizh ndoꞌ be men ulaꞌa bexa be ta ugap nak bexa, cha yach bexa wats Dios.
MAR 6:13 No ngontuꞌub bexa sian be mbi bxin ncho len ladoꞌo be men, nsea ngaꞌab bexa aceit gek kwaꞌad bexa gizh, cha nyakna bexa gizh wa.
MAR 6:14 Leꞌa be ta mbin Jesús wa uzheꞌeb mgen itea lad, gast no Herodes xa nibeꞌe idub región wa mbiꞌín be ta wa. Cha ndab Herodes: —Leꞌa Jesús leꞌa nak Juan xa ulaleaꞌ be men wa mbangal ndoꞌ gealgut. Ta weꞌe ndap xa juers ndun xa be uyon wa.
MAR 6:15 No ncho be men ndab: —Leꞌa Jesús nak Elí. No ncho bexa ndab: —Leꞌa Jesús leꞌa stub profet cuent bexa mbidiꞌizh sakndoꞌ Dios tiemp polta.
MAR 6:16 Ná leꞌa gor na mbiꞌín Herodes xteꞌe ndab be men wa, cha ndab Herodes: —Leꞌa xa wa leꞌa Juan xa unibeꞌe naꞌ ulobtoꞌog bexa gen na wa. Xa wa leꞌa xa mbangal.
MAR 6:17 Leꞌa mas polta leꞌa Herodes ukaꞌa Herodías, xagots ten Julip witka Herodes. Leꞌa Herodes mtuꞌub be xmen na isen bexa Juan, cha uxi bexa Juan caden, ukeꞌa bexa Juan litgiꞌib, lak nlad Herodías.
MAR 6:18 Li mbin Herodes geal leꞌa Juan ndab ndoꞌ xa: —Naꞌanpa utsin nak‑a ukaꞌa lu xagots ten wit lu.
MAR 6:19 Ta weꞌe leꞌa Herodías nxeeno ladna Juan, gast nlad xa gut xa Juan. Ná xa lá gunga gan,
MAR 6:20 geal leꞌa Herodes lá ulaꞌa gat Juan. Leꞌa Herodes ndap mod ndoꞌ Juan, geal leꞌa Juan dub xa wen ten Dios. No ndal ladna Herodes ndoꞌón xa ta ndadiꞌizh Juan, ná leꞌa xa gast ni lá iniꞌí xteꞌe gun gor ndoꞌón xa ta ndadiꞌizh Juan.
MAR 6:21 Leꞌa ngol dub wizh leꞌa Herodías mzhealka dub mod xteꞌe gat Juan. Leꞌa wizh ngol leaꞌ Herodes, leꞌa xa ulo dub gast siꞌil. Mgaw Herodes be men nsak ten xa, no bexa nibeꞌe ten soldad, no leꞌaka bexa nsak ncho distrit Galilea.
MAR 6:22 Cha utoꞌo xingots Herodías mbilndats xa ndoꞌ gaꞌal bexa nde ndoꞌ gast wa. Weꞌe leꞌa Herodes nsea bexa nde sa wa ngol ladna xteꞌe mbilndats nagots wa, cha ndab Herodes ndoꞌ xa: —Unab guniꞌi xtaꞌan nlad lu, leꞌa naꞌ usa‑yá.
MAR 6:23 Gast Dios nsobwiꞌi gáp naꞌ ndoꞌ lu: itea ta inab lu usa naꞌ, gast itol ta nibeꞌe naꞌ ndee.
MAR 6:24 Leꞌa nagots wa cha utoꞌo nseaꞌ ndoꞌ xnaꞌa na, cha ndab xa: —¿Xtaꞌan inaꞌab naꞌ ndoꞌ Herodes? Leꞌa xnaꞌa nagots wa cha ukaꞌab ndab: —Unab gek Juan xa ulaleaꞌ be men.
MAR 6:25 Leꞌa nagots wa cha uxax ubii sa nsob Herodes ndab: —Leꞌa naꞌ nlad usaꞌa go gek Juan xa ulaleaꞌ be men, ixoꞌob‑a ndoꞌ dub plat.
MAR 6:26 Leꞌa Herodes cha uban myoꞌo ladna. Parea ke na ndab xa Dios nsobwiꞌi no ke na mbiꞌín be men nde ndoꞌ mes ta ndab xa wa, ta weꞌe usaꞌaka Herodes ta unab nagots wa.
MAR 6:27 Weꞌe leꞌa xa cha mtuꞌub dub soldad yaꞌlabtoꞌog gen Juan len litgiꞌib wa, cha yoꞌo xa‑yá.
MAR 6:28 Leꞌa soldad wa cha ngwaꞌlabtoꞌog gen Juan len litgiꞌib, cha myoꞌo xa‑yá uxoꞌob‑a ndoꞌ dub plat. Cha msaꞌa xa‑yá ndoꞌ nagots wa. Leꞌa nagots wa cha ngwaꞌusaꞌa‑yá ndoꞌ xnaꞌa na.
MAR 6:29 Leꞌa gor na mbiꞌín be xmen Juan leꞌa Juan ngut, cha ngwaꞌdob bexa Juan. Cha mkaꞌach bexa Juan.
MAR 6:30 Weꞌe leꞌa be xmen Jesús cha mlaꞌnchaꞌ wats Jesús, cha mbidiꞌizh bexa itea be taꞌa mbin bexa nsea ta mluu bexa be men.
MAR 6:31 Ná leꞌa sa nsoꞌ Jesús wa tant nyoꞌo ntoꞌo be men, gast ni lá yoo gan gaw bexa. Ta weꞌe leꞌa Jesús cha ndab ndoꞌ be xmen na: —Nchaꞌbe beuna dub sa naꞌan men, ndontsa uneꞌe bega dub xlaꞌal.
MAR 6:32 Weꞌe cha nab Jesús nsea be xmentsa xa utoꞌo, ukea bexa ndoꞌ dub barco, nchaꞌbe bexa dub sa naꞌan men.
MAR 6:33 Ná leꞌa kwaꞌad be men uniꞌí nchaꞌbe bexa no mgondoꞌ bexa Jesús. Ta weꞌe cha utoꞌo bexa be gezh wa, uxax nchaꞌbe ndats bexa, cha nedla bexa ulayaꞌ sa ilayaꞌ Jesús.
MAR 6:34 Leꞌa gor na ulaꞌ Jesús ndoꞌ barco wa, cha mnaꞌla xa be men kwaꞌad nde toꞌo nits, cuent be borreg lá ndap ton ulaꞌach ma. Cha mlats ladna Jesús bexa, cha usaxan xa mbidiꞌizh xa sian taꞌa ndoꞌ bexa.
MAR 6:35 Ngol gor mas uzhela, leꞌa be xmen Jesús ubii wats Jesús, ndab bexa: —Leꞌa sa ndee dub sa sit naꞌanpa ncho be men, ná nat yá uzhelapa.
MAR 6:36 Gud go ndoꞌ be men baꞌ yaꞌisiꞌi bexa ta gaw bexa be ranch no be gezh nde gax ndee, leꞌa bexa lá noꞌo ta gaw na.
MAR 6:37 Leꞌa Jesús cha ukaꞌab ndab: —Bsaꞌa bego ta gaw bexa baꞌ. Leꞌa be xmen Jesús cha ndab: —¿Nlad ga yaꞌisiꞌi besa be ta gaw bexa baꞌ zha? Leꞌa ta wa itatsoꞌ ta ndun dub men gan dub xoꞌon mbeꞌe.
MAR 6:38 Leꞌa Jesús cha unabdiꞌizh ndab: —¿Plo pan ndap bega zha? Waꞌiwiꞌi bega‑yá. Weꞌe leꞌa gor mlen bexa, cha ndab bexa ndoꞌ Jesús: —Leꞌa besa ndap sgaꞌaytsa pan nsea stoptsa mbeal.
MAR 6:39 Weꞌe leꞌa Jesús cha ndab ndoꞌ be xmen na gab ndoꞌ be men wa kwe plagaga xa ndoꞌ gixgi ugeꞌa wa.
MAR 6:40 Weꞌe leꞌa kadga dub sa wa ute dub gayoꞌoga bexa no itol gayoꞌoga xa.
MAR 6:41 Leꞌa Jesús cha usen isagaꞌay pan nsea itop mbeal wa. Cha mwiꞌi xa gibeꞌa, msaꞌa xa xno ndoꞌ Dios. Cha uleꞌa Jesús be pan wa sian bleꞌa, weꞌe msaꞌa xa‑yá ndoꞌ be xmen xa. Leꞌa bexa wa mtseꞌa‑yá ndoꞌ be men wa. Cha liga mtseꞌa bexa be mbeal wa ndoꞌ iteanak be men.
MAR 6:42 Leꞌa itea be men wa udaw gast plo mzhea bexa.
MAR 6:43 Ná leꞌa gor mteleꞌe bexa be pan no be mbeal ta myaꞌan yaw be men wa, leꞌa ta wa stibtop zhum byux‑a.
MAR 6:44 Leꞌa lat bexa li udaw wa pa dub gaꞌay mil be xabgiꞌi.
MAR 6:45 Cha ndab Jesús ndoꞌ be xmen na: —Bkea bega leꞌaka ndoꞌ barco baꞌ. Cha waꞌ bega stub toꞌo lagun gast gezh Betsaida. Ndalen wa ndab Jesús ndoꞌ be men kwaꞌad wa yaꞌbe bexa.
MAR 6:46 Leꞌa gor na yá nseaꞌbe be men wa, leꞌa Jesús nab ukea dub bet ngwaꞌyadiꞌizhno xa Dios.
MAR 6:47 Ngol gor ulaꞌ teꞌal leꞌa barco ncho be xmen Jesús wa nchaseala itol nes ndoꞌ nits wa. Leꞌa Jesús nab myansoꞌ ndoꞌ yo.
MAR 6:48 Weꞌe leꞌa Jesús mnaꞌla leꞌa barco wa uzhebpa juers nseala, geal leꞌa mbi uzhebpa nlen ndoꞌ nits wa lad ndoꞌ barco. Ngol gor yamer nsayat xeꞌa, leꞌa Jesús nchasea ndats ndoꞌ nits gax wats barco wa.
MAR 6:49 Leꞌa gor uniꞌí bexa Jesús nseandats xa ndoꞌ nits wa, cha utezhat bexa leꞌa bexa mbinbeꞌe leꞌa‑yá dub ta uxin.
MAR 6:50 Leꞌa bexa iteanak naꞌ ta wa, no uzheꞌeb mzheb bexa. Ná leꞌa Jesús cha ndab ndoꞌ bexa: —¡Gop bega valor! ¡No lá izheb bega! Leꞌa ta ndee naꞌka.
MAR 6:51 Leꞌa gor ukea Jesús ndoꞌ barco wa, leꞌa mbi wa cha uleas. Leꞌa be xmen Jesús uzhebpa mzheb, no ngwanseana bexa,
MAR 6:52 geal leꞌa bexa lá yakbeꞌena ta na li mbinno Jesús be pan wa, leꞌa bexa bi lika ngud nak ladoꞌo na.
MAR 6:53 Leꞌa bexa wa utakea ndoꞌ nits wa, ulayaꞌ bexa sa nsaleaꞌ Genesaret, cha mxi bexa barco wa ndoꞌ yo.
MAR 6:54 Leꞌa gor ulaꞌ bexa ndoꞌ barco, leꞌa be men nde sa wa mgondoꞌla Jesús.
MAR 6:55 Weꞌe leꞌa be men ncho be gezh nde gax wa ulenno be men gizh ndoꞌ yaloꞌon gast sa mbiꞌín bexa nsoꞌ Jesús.
MAR 6:56 Leꞌa itea sa ndaꞌ Jesús len be gezh byux no be gezh ubiꞌi no be ranch, ngoteka be men bexa gizh wa toꞌo nes sa nsatid Jesús. Cha unab bexa ulaꞌa Jesús masa ndats xab Jesús ugal bexa gizh. Leꞌa itea bexa na li mgal xab Jesús wa cha myaknabe.
MAR 7:1 Tsoꞌo wa leꞌa pla bexa fariseo nsea be mech ten ley utoꞌo Jerusalén ulen wats Jesús.
MAR 7:2 Cha uniꞌí bexa leꞌa pla be xmen Jesús ndeyaw ni lá unaꞌa bexa lak nibeꞌe costumbr ten bexa. Ta weꞌe unisi bexa be xmen Jesús.
MAR 7:3 Leꞌa bexa fariseo nsea iteata be men judio uzhebpa ndankea be costumbr ten be usan gox polta ten bexa. Tal leꞌa bexa lid ned unaꞌa sian biaj lak nak costumbr wa, leꞌa bexa lá yoo gan gaw.
MAR 7:4 No tal bexa ngwaꞌ ndoꞌ xgeꞌe, leꞌa bexa wa lá yoo gan gaw tal leꞌa bexa lá unaꞌa. Nsea sianta be costumbr ndankea bexa, lak nsat bexa be vas no be kamplor no be ta giꞌib. Nsea iteata be taꞌa ndantiꞌin bexa sa ndaw bexa juerska yat‑a lak nibeꞌe costumbr ten bexa.
MAR 7:5 Ta weꞌe leꞌa bexa fariseo nsea be mech ten ley unabdiꞌizh ndoꞌ Jesús ndab bexa: —¿Xtaꞌan ni lá ndankea be xmen lu be costumbr mchaꞌan be usan gox polta ten beuna zha? Lbaꞌatsa naꞌa bexa gor ndaw bexa parea naꞌanpa naꞌa bexa lak nsabndoꞌ‑yá.
MAR 7:6 Leꞌa Jesús cha ukaꞌab ndab: —Leꞌa bega nluu cuentta xa wen ná bega xa ugap nak. Ugeaka mkeꞌa Isaías sakndoꞌ Dios tiemp polta, ndab xa lak nak bego: Leꞌa be men ndee diꞌizhtsa ndankea naꞌ, parea leꞌa ladoꞌo xa sit nak ndoꞌ naꞌ.
MAR 7:7 Naꞌan xtiꞌin ta ndankea bexa naꞌ, leꞌa cuent diꞌizh ten naꞌ nluu bexa, parea diꞌizh ten be mentsa‑yá.
MAR 7:8 Mlaꞌa bega ta unibeꞌe Dios gun bega, ndankea bega ndi sbeꞌen costumbr ten men, lak nsat bega kamplor no be vas, no sianta be taꞌa cuent ta ndee ndun bega.
MAR 7:9 No ndab Jesús ndoꞌ bexa: —Leꞌa bega nlaꞌa be ta unibeꞌe Dios, cha ndi ndankeatsa bega be costumbr ten leꞌaka bega.
MAR 7:10 Leꞌa ta na mkeꞌa Moisés ndab: “Wankea bega xus bega nsea xnaꞌa bega.” No ndab‑a: “Leꞌa tal ton kweaꞌ iníꞌi ndoꞌ xus na natal ndoꞌ xnaꞌa na, leꞌa xa wa nsabndoꞌ gat.”
MAR 7:11 Ná leꞌa bego ndi ndab leꞌa tal ton gab ndoꞌ xus na no ndoꞌ xnaꞌa na leꞌa iteanak be taꞌa ndiꞌizh gakno xa bexa wa, leꞌa ta wa ndi usaꞌa xa ndoꞌ Dios,
MAR 7:12 weꞌe leꞌa xa wa yá naꞌantapa juerska gakno xus na no xnaꞌa na.
MAR 7:13 Li nlaꞌa bega ta unibeꞌe Dios, ndankea bega ndi sbeꞌen costumbr ten bega. No sianta be taꞌa cuent nak ta ndee ndun bega.
MAR 7:14 Weꞌe leꞌa Jesús cha utezh itea be men kwaꞌad wa, cha ndab xa: —¡Blaꞌach bega ta gáp naꞌ ndee! ¡No byakbeꞌena bega‑yá!
MAR 7:15 Leꞌa ta ndaw be men naꞌanpa leꞌa ndun bzhiꞌik bexa ndoꞌ Dios. Ndi leꞌa ta ntoꞌo ladoꞌo be men ndun bzhiꞌik bexa cuent ten Dios.
MAR 7:16 Leꞌa bego na ndap nchaꞌ na, blaꞌach bega ta ndáp naꞌ ndee.
MAR 7:17 Leꞌa gor na mlaꞌa Jesús be men wa, cha nseaꞌ xa len niꞌi. Weꞌe leꞌa be xmen xa unabdiꞌizh ná xteꞌe nak ta msaktabeꞌe xa wa.
MAR 7:18 Leꞌa Jesús cha ndab: —¿Noga bego ni lá nyakbeꞌena ta ndáp naꞌ zha? ¿Lá nyakbeꞌena bega zha leꞌa ta ndaw dub men, leꞌa ta wa lá gun bzhiꞌik xa ndoꞌ Dios?
MAR 7:19 Leꞌa ta wa naꞌanpa nyoꞌo ladoꞌo xa, ndi len xa nchaꞌa‑yá, cha tsoꞌo wa nchaꞌa‑yá len letrina. Leꞌa ta li ndab Jesús wa gab leꞌa itea ta ndaw bexa umbiꞌika ndoꞌ Dios.
MAR 7:20 Weꞌe ndab Jesús: —Leꞌa ta ntoꞌo ladoꞌo dub men, leꞌa ta wa ndun bzhiꞌik xa ndoꞌ Dios.
MAR 7:21 Leꞌa len ladoꞌo xa ntoꞌo be ta ugap ndanbeꞌe xa. Ta weꞌe ncho bexa ngalga xa ten stubga men. No ncho xa ndun ta ugap ltsaꞌa ta li nak wa. No ncho xa ndut men.
MAR 7:22 No ncho xa ndun gealwaꞌan. No ncho xa sbeꞌen nlad mas sian taꞌa gap. No ncho xa ugap ndanno be men. No ncho xa ndun gealkwiꞌin. No ncho xa ndun itea ta nladtsa xa. No ncho xa ndaklono stub xa ndap taꞌa. No ncho xa nisi be ltsaꞌa na. No ncho xa nzhinna. No ncho xa ni lá nsakyoꞌón.
MAR 7:23 Leꞌa itea be ta ugap ndee ntoꞌo len ladoꞌo be men, cha ndun bzhiꞌik‑a gealnaban ten xa ndoꞌ Dios.
MAR 7:24 Cha utoꞌo Jesús distrit Galilea nchaꞌa xa dub sa gax gezh Tiro no gezh Sidón. Cha uyoꞌo xa len lid dub men sa wa. Leꞌa Jesús lá nlad igen pa ncho xa, ná leꞌa‑yá mgenka.
MAR 7:25 Weꞌe leꞌa dub xagots mbiꞌín pa ncho Jesús cha ulen xa wats Jesús, leꞌa xa ndap dub meꞌed gots gizh ncho mbi bxin len ladoꞌo na. Cha usaxib xagots wa ndoꞌ Jesús.
MAR 7:26 Leꞌa xa wa xa Sirofenicia, naꞌanpa xa judio. Leꞌa xa wa unab kontuꞌub Jesús mbi bxin ncho len ladoꞌo xin xa wa.
MAR 7:27 Ná leꞌa Jesús ndi ndab: —Blaꞌa ned be meꞌed itayaw. Naꞌanpa utsin nak ulat besa ta gaw be meꞌed, cha usaꞌab besa‑yá ndoꞌ be mbek.
MAR 7:28 Leꞌa xagots wa ukaꞌab ndab: —Ta ugeaka ta wa, Señor, parea leꞌa be mbek ndaw be taꞌa nlate toꞌo be meꞌed xan mes.
MAR 7:29 Leꞌa Jesús cha ndab: —Leꞌa lu utsin ukaꞌab. Nat byaꞌ ta lid lu, leꞌa mbi bxin wa utoꞌola len ladoꞌo xmeꞌed lu.
MAR 7:30 Leꞌa gor na mtanseaꞌ xagots wa ta lid xa, leꞌa mbi bxin wa utoꞌola len ladoꞌo meꞌed gots wa. Leꞌa meꞌed wa nax ndoꞌ loꞌon myaklana.
MAR 7:31 Leꞌa Jesús cha mkaꞌan sa nibeꞌe Tiro wa, nchaꞌtid xa Sidón nsea distrit nsaleaꞌ Decápolis, ulayaꞌ xa toꞌo lagun Galilea.
MAR 7:32 Leꞌa be men kwaꞌad cha ulayaꞌno dub xa mud no ngwaꞌad xa. Cha unab bexa uxoꞌob Jesús yaꞌa na gek xa mud wa, ndontsa yakna xa.
MAR 7:33 Leꞌa Jesús cha mbiꞌi nabtsa xa mud wa dub lad wats be men wa. Cha mkiko Jesús ngutsyaꞌa na be len nchaꞌ xa mud wa. Cha mchukko Jesús dub ngutsyaꞌa na, cha mgal Jesús luzh xa mud wa.
MAR 7:34 Weꞌe mwiꞌi Jesús gibeꞌa, cha mgaꞌa ladna xa, ndab xa: —¡Efata! —leꞌa ta wa gab: ¡Byaꞌal lu!
MAR 7:35 Bi leꞌa gor wa cha myaꞌal nchaꞌ xa, cha myakna luzh xa nsea usaxan utsin ndadiꞌizh xa.
MAR 7:36 Weꞌe cha ndab Jesús ndoꞌ bexa: —Naꞌan ton ndoꞌ ná gudiꞌizh bega ta ndee. Parea lakta pla biaj ndab Jesús lá gudiꞌizh bexa‑yá, ná leꞌa bexa ndi mas mbidiꞌizh‑a.
MAR 7:37 Leꞌa itea be men uzhebpa ngwanseana, ndab bexa: —Wenka ndun xa itea be taꞌa, gast nyunyakna xa bexa mud no ngwaꞌad.
MAR 8:1 Ngol dub wizh leꞌa be men kwaꞌadpa mzhealbe wats Jesús, ná leꞌa bexa lá ndap ta gaw na. Ngol gor leꞌa Jesús cha utezh be xmen na, cha ndab xa:
MAR 8:2 —Naꞌ nlats ladna be men ndee, leꞌa bexa wizh nyonla nde wats naꞌ, ná leꞌa bexa lá ndapta ta gaw na.
MAR 8:3 Tal naꞌ utuꞌub bexa lbaꞌatsa lá gaw bexa, nchaꞌa bexa lá uxik ilanseaꞌ ta lid na, leꞌa ncho xa baꞌ sit utoꞌo.
MAR 8:4 Leꞌa be xmen Jesús cha ndab: —¿Pa izheal beuna pan gaw dub lbaꞌata men baꞌ zha? Leꞌa sa ndee sit nde be gezh.
MAR 8:5 Leꞌa Jesús cha unabdiꞌizh ndab ndoꞌ bexa: —¿Plo pan noꞌo bega zha? Leꞌa bexa cha ndab: —Sgaꞌad pan.
MAR 8:6 Weꞌe leꞌa Jesús cha ndab ndoꞌ be men kwaꞌad wa kwe bexa ndoꞌ yo. Cha usen xa isagaꞌad pan wa, cha msaꞌa xa xno ndoꞌ Dios. Cha uleꞌa xa be pan wa sian bleꞌa, cha msaꞌa xa‑yá ndoꞌ be xmen xa, utseꞌa bexa‑yá ndoꞌ be men.
MAR 8:7 No stapla be mbeal byux ndap bexa usen Jesús, msaꞌa Jesús xno ndoꞌ Dios. Cha unibeꞌe xa ndoꞌ be xmen xa utseꞌa‑yá ndoꞌ be men wa.
MAR 8:8 Leꞌa be men wa udaw gast plo mzhea bexa. Cha mteleꞌe bexa sgaꞌad zhum byux be ta myaꞌan sobr.
MAR 8:9 Leꞌa bexa udaw wa pa dap mil. Leꞌa Jesús cha ndab ndoꞌ bexa wa yaꞌbe bexa.
MAR 8:10 Cha ukea xa ndoꞌ dub barco nsea be xmen xa nchaꞌa bexa distrit Dalmanuta.
MAR 8:11 Leꞌa sa wa ulen pla bexa fariseo wats Jesús. Cha usaxan bexa ndadiꞌizhno bexa Jesús, nlad bexa gun bexa preb Jesús, ndab bexa ndoꞌ Jesús: —Leꞌa besa nlad gun ga dub ta uluu leꞌa ga Dioska mtuꞌub.
MAR 8:12 Leꞌa Jesús cha mgaꞌa ladna, cha ndab xa: —¿Xtaꞌan nlad be men ncho nat dub ta uluu ton nak naꞌ? Leꞌa naꞌ gáp leꞌa bega naꞌanpa iniꞌí ta nab bega wa.
MAR 8:13 Weꞌe leꞌa Jesús cha mlaꞌa bexa. Cha ukea Jesús ndoꞌ barco wa nsea be xmen xa, nchaꞌbe bexa stub toꞌo nits.
MAR 8:14 Leꞌa be xmen Jesús myalad ngoꞌo pan gaw bexa. Dubtsa pan noꞌo bexa len barco wa.
MAR 8:15 Leꞌa Jesús ndab ndoꞌ bexa: —Blaꞌach bego, uzhebpa gop bega cuent nsea levadur ten bexa fariseo no levadur ten Herodes.
MAR 8:16 Leꞌa bexa wa cha ndabbe ndoꞌ be ltsaꞌa na: —Li ndab xa geal leꞌa beuna lá ngoꞌo pan.
MAR 8:17 Leꞌa Jesús cha mgenna ta li ndab bexa wa, cha ndab Jesús: —¿Xtaꞌan ndeyadiꞌizh bega leꞌa bega lá noꞌo pan zha? ¿Bi lá nyakbeꞌena bega ta nluu naꞌ zha? ¿No bi ngud nak ladoꞌo bega zha?
MAR 8:18 ¿Lá naꞌ ngusndoꞌ bega zha? ¿No ni lá ndoꞌón nchaꞌ bega zha? ¿No ni lá ntseꞌa ladna bega ta li mbin naꞌ wa zha?
MAR 8:19 Leꞌa zha na msa naꞌ gaꞌaytsa pan udaw dub gaꞌay mil xabgiꞌi wa, ¿plo zhum ta myaꞌan sobr mteleꞌe bega zha? Cha ndab bexa: —Stibtop zhum‑a.
MAR 8:20 Leꞌa Jesús cha ndab: —No gor na msa naꞌ dub gaꞌadtsa pan udaw dub dap mil men, ¿plo zhum ta myaꞌan sobr mteleꞌe bega zha weꞌe zha? Cha ndab bexa: —Sgaꞌad zhum‑a.
MAR 8:21 Cha ndab Jesús: —¿Ni bi lá nyakbeꞌena bega zha?
MAR 8:22 Leꞌa gor ulayaꞌ Jesús gezh Betsaida, weꞌe leꞌa pla be men ulenno dub xabgiꞌi lá naꞌ. Cha unab bexa ndoꞌ Jesús ugal Jesús ngusndoꞌ xa ndontsa yakna xa.
MAR 8:23 Leꞌa Jesús cha usen yaꞌa xa lá naꞌ wa, uloꞌo Jesús xa dub lad toꞌo gezh. Cha mchukko Jesús ngusndoꞌ xa no mxoꞌob Jesús yaꞌa na tsoꞌo ngusndoꞌ xa wa. Cha ndab Jesús: —¿Naꞌla lu nat zha?
MAR 8:24 Leꞌa xa wa cha mwiꞌi ndab: —Naꞌ naꞌla be men cuenttsa be ya ndesea.
MAR 8:25 Leꞌa Jesús cha mxoꞌob yaꞌa na tsoꞌo ngusndoꞌ xa stub biaj, cha myakna‑yá. No ndon wenla mnaꞌ xa itea be taꞌa.
MAR 8:26 Weꞌe leꞌa Jesús cha mtuꞌub xa yaꞌ xa ta lid xa, ndab Jesús: —Lá itid lu len gezh baꞌ, no ni naꞌan ton ndoꞌ ná gudiꞌizh lu‑yá toꞌo gezh baꞌ.
MAR 8:27 Tsoꞌo wa leꞌa Jesús utoꞌo sa wa nsea be xmen xa. Nchaꞌbe bexa be gezh nde gax Cesarea Filipo. Leꞌa nes nchaꞌbe bexa leꞌa Jesús unabdiꞌizh ndoꞌ be xmen xa, ndab xa: —¿Xteꞌe ndab be men ton nak naꞌ zha?
MAR 8:28 Leꞌa bexa cha ukaꞌab ndab bexa: —Leꞌa ncho be men ndab leꞌa go nak Juan xa ulaleaꞌ be men. No ncho bexa ndab leꞌa go nak profet Elí. No nchoga bexa ndab leꞌa ga nak stub profet xaꞌaga.
MAR 8:29 Weꞌe leꞌa Jesús cha ndab: —¿Bego zha xteꞌe gab ton nak naꞌ? Leꞌa Pedr cha ukaꞌab ndab: —Leꞌa go nak Cristo, xa mtuꞌub Dios.
MAR 8:30 Parea leꞌa Jesús cha ndab ndoꞌ bexa: —Lá gudiꞌizh bega ton nak naꞌ ndoꞌ be men.
MAR 8:31 Weꞌe leꞌa Jesús cha usaxan nluu bexa, ndab xa: —Leꞌa naꞌ, Xa Myak Men Ndoꞌ Gizhliyo, nsabndoꞌka iní naꞌ sian gealkweaꞌ. Leꞌa bexa gox nsak no be uleꞌay nibeꞌe no be mech ten ley uxelad naꞌ. No gut bexa naꞌ, ná leꞌa gal wizh yon leꞌa naꞌ iban ndoꞌ gealgut.
MAR 8:32 Li uyaꞌal mbidiꞌizh Jesús leꞌa xa gat. Weꞌe leꞌa Pedr cha mbiꞌi Jesús dub lad, cha uteyo Pedr xa, ndab Pedr: —¡Naꞌanpa li gak ta wa!
MAR 8:33 Leꞌa Jesús cha mgeaksoꞌ mwiꞌi ndoꞌ be xmen na, cha uteyo xa Pedr, ndab xa: —Utatsoꞌ wats naꞌ, leꞌa lu ndadiꞌizh cuent maxuꞌu. Leꞌa lu lá ndanbeꞌe lak ndanbeꞌe Dios, leꞌa lu ndi ndanbeꞌe lak ndanbeꞌe be mentsa.
MAR 8:34 Weꞌe leꞌa Jesús cha utezh be xmen na nsea kwaꞌad be men xaꞌaga. Cha ndab Jesús: —Tal ton nlad isankea tsoꞌo naꞌ, nsabndoꞌ ulaꞌa xa iteanak be ta nlad xa, cha goꞌo xa cruz ten xa, cha isankea xa tsoꞌo naꞌ, guniꞌi xtaꞌan gunno be men xa.
MAR 8:35 Leꞌa tal ton ukwaꞌan xteꞌe wen yoo xa, leꞌa xa wa ndi gun perdid gealnaban ten na ndoꞌ Dios. Ná leꞌa tal ton gat ta na nak xa xmen naꞌ no ta na ndangea ladna xa diꞌizh wen ten Dios, leꞌa xa wa gap gealnaban ndoꞌ Dios.
MAR 8:36 Leꞌa tal dub men ndap iteanak be ta ncho ndoꞌ gizhliyo ndee, cha gak perdid gealnaban ten xa ndoꞌ Dios, ¿xtiꞌin be ta sian ndap xa wa zha?
MAR 8:37 Leꞌa ta wa naꞌanpa ugal isiꞌi xa gealnaban ten xa.
MAR 8:38 Tal ton idono ladna naꞌ nsea diꞌizh ten naꞌ ndoꞌ be men ugap ncho tiemp nat, leꞌa naꞌ, Xa Myak Men Ndoꞌ Gizhliyo, noga idono ladna xa wa, gal wizh ilenno naꞌ xeꞌa siꞌil ten Dios Xus naꞌ no be angel ten Dios.
MAR 9:1 No ndab Jesús: —Leꞌa naꞌ gáp ndoꞌ bego leꞌa ncho bexa nde ndee naꞌanpa cha gat gast iniꞌí bexa gal tiemp inibeꞌe Dios ndoꞌ gizhliyo no juers siꞌil ten xa.
MAR 9:2 Ngol sxoꞌop wizh leꞌa Jesús mbiꞌi Pedr no Jacob no Juan, ukea bexa dub bet gaꞌap sa naꞌan men. Leꞌa sa wa leꞌa Jesús cha mtixndoꞌ ndoꞌ gaꞌal bexa wa.
MAR 9:3 Leꞌa xab Jesús ndon nlaꞌbealꞌ no ndon mbe xiꞌil mnaꞌ‑yá, ni dub bexa nsat lad lá ndun gan lita mbe inaꞌ‑yá.
MAR 9:4 Zha leꞌa sa wa mlundoꞌ Elí no Moisés ndeyadiꞌizhno Jesús.
MAR 9:5 Weꞌe leꞌa Pedr cha ndab ndoꞌ Jesús: —Mech, uzhebpa wen nde beuna sa ndee. Gundeꞌe besa chon ramad: dub‑a ná ten go, leꞌa stub‑a ná ten Moisés, nsea stub‑a ná ten Elí.
MAR 9:6 Leꞌa be xmen Jesús wa uzhebpa mzheb, ta weꞌe ngi li ndab Pedr.
MAR 9:7 Weꞌe leꞌa dub xkaw cha ulen sa nde bexa. Leꞌa lat xkaw wa ulen ti Dios ndab: —Leꞌa ta ndee Xiꞌín naꞌ. Naꞌ nkweaꞌ ladna xa. Bsakyoꞌón bega ta ndab xa.
MAR 9:8 Cha uxax mwiꞌi be xmen Jesús gangeak, parea leꞌa sa wa yá naꞌanla ton ndebe, nabtsa Jesús nsoꞌ sa wa.
MAR 9:9 Leꞌa ngol gor na nchaꞌlayoꞌo bexa bet wa, leꞌa Jesús ndab ndoꞌ bexa: —Naꞌan ton ndoꞌ ná gudiꞌizh bega ta na li uniꞌí bega wa, gast gal gor na leꞌa naꞌ, Xa Myak Men Ndoꞌ Gizhliyo, iban ndoꞌ gealgut.
MAR 9:10 Weꞌe leꞌa bexa wa lá ngudiꞌizh‑a, nabtsa yon bexa ndadiꞌizh, ndab bexa: —¿Xteꞌe nak ta ndab xa leꞌa xa iban ndoꞌ gealgut zha?
MAR 9:11 Leꞌa bexa wa cha unabdiꞌizh ndab bexa ndoꞌ Jesús: —¿Xtaꞌan ndab be mech ten ley leꞌa Elí ned ilen, weꞌeta ilen Cristo xa utuꞌub Dios zha?
MAR 9:12 Leꞌa Jesús cha ukaꞌab ndab: —Ta ugeaka leꞌa Elí nedka ilen ndontsa list kwe be men. Leꞌa lak nkeaniꞌi diꞌizh ten Dios, leꞌa naꞌ, Xa Myak Men Ndoꞌ Gizhliyo, sianpa gealkweaꞌ iní, no uxelad be men naꞌ.
MAR 9:13 Leꞌa naꞌ gáp ndoꞌ bega, leꞌa Elí wa mbiꞌidla. Ná leꞌa be men ugap mbinno xa lakta nlad bexa, lakka nkeaniꞌi diꞌizh ten Dios cuent ten xa wa.
MAR 9:14 Leꞌa gor na myach Jesús no schon xmen xa sa nde staplaga xmen xa wa, weꞌe leꞌa bexa uniꞌíla leꞌa be men kwaꞌad ndela wats bexa wa. Leꞌa be mech ten ley ndeyotoꞌono stapla be xmen Jesús.
MAR 9:15 Leꞌa gor uniꞌí be men wa Jesús cha ngwanseana bexa, cha uxax ngwaꞌinidiꞌizh bexa ndoꞌ Jesús.
MAR 9:16 Leꞌa Jesús cha unabdiꞌizh ndab: —¿Xtaꞌan ndeyotoꞌo bega zha?
MAR 9:17 Leꞌa dub xabgiꞌi ukaꞌab ndab: —Mech, leꞌa naꞌ ndee ndalno dub meꞌed bgiꞌi ten naꞌ ncho mbi bxin len ladoꞌo na. Leꞌa mbi bxin wa leꞌa mbin mud meꞌed.
MAR 9:18 Leꞌa gor na nsen mbi bxin meꞌed baꞌ, leꞌa meꞌed nlayat, nsea nlen bchiꞌin toꞌo meꞌed, no ndaw meꞌed ndeay meꞌed, cha lá nteꞌalta meꞌed. Leꞌa naꞌ unaꞌab ndoꞌ be xmen ga kontuꞌub mbi bxin wa, ná leꞌa bexa lá ngun gan.
MAR 9:19 Leꞌa Jesús cha ndab ndoꞌ be men wa: —¡Ndidotsa ngeꞌ ladna bega Dios! ¿Ploxá tiemp yoꞌo naꞌ lat bega zhaga? ¿Sta ploxá tiemp uxik naꞌ ndoꞌ bega zhaga? Utseano bega meꞌed bgiꞌi baꞌ sa ndee.
MAR 9:20 Weꞌe cha mbiꞌi bexa meꞌed wa wats Jesús. Leꞌa gor na uniꞌí mbi bxin wa Jesús, leꞌa ta wa cha udingeꞌ meꞌed wa ndoꞌ yo, naxbixte meꞌed, nsea toꞌo meꞌed cha ulen bchiꞌin.
MAR 9:21 Leꞌa Jesús cha unabdiꞌizh ndoꞌ xus meꞌed ndab xa: —¿Polta ulen‑a zha? Leꞌa xus meꞌed cha ndab: —Zha tuzhta meꞌed baꞌ.
MAR 9:22 Sian biaj leꞌa mbi bxin ntsaꞌab meꞌed baꞌ ndoꞌ giꞌ no len nits, ndontsa gat meꞌed. Ná tal leꞌa ga sun gan, blats ladna go besa gokno ga besa.
MAR 9:23 Leꞌa Jesús cha ndab: —¿Xteꞌe ndab lu “tal leꞌa ga sun gan”? Leꞌa xa na ndangea ladna Dios, itea taꞌa syoꞌo gan.
MAR 9:24 Weꞌe leꞌa xus meꞌed wa cha ugeꞌ ndab: —Naꞌ ndangeaka ladna Dios. Gokno ga naꞌ, ndontsa mas gungea lad naꞌ.
MAR 9:25 Leꞌa gor na uniꞌí Jesús kwaꞌadpa be men nseabewiꞌi, weꞌe cha uteyo Jesús mbi bxin wa ndab xa: —Lu nak mbi bxin ndun ngwaꞌad no mud meꞌed ndee, gáp naꞌ ndoꞌ lu utoꞌo. Ni lá yachta lu len ladoꞌo meꞌed ndee.
MAR 9:26 Leꞌa mbi bxin wa cha uzheꞌeb utezhat, no mas ngotbixte meꞌed. Cha utoꞌo mbi bxin len ladoꞌo meꞌed wa. Leꞌa meꞌed wa cuent meꞌed ngut nax, gast kwaꞌad be men ndab leꞌa meꞌed wa ngutka.
MAR 9:27 Ná leꞌa Jesús cha usen yaꞌa meꞌed, cha ngwaste meꞌed.
MAR 9:28 Tsoꞌo wa uyoꞌo Jesús len dub niꞌi sa wa, cha unabdiꞌizh be xmen Jesús, ndab bexa ndoꞌ Jesús: —¿Xtaꞌan lá ngun besa gan igontuꞌub besa mbi bxin baꞌ zha?
MAR 9:29 Leꞌa Jesús cha ndab: —Leꞌa be ltsaꞌa mbi bxin wa lá yoo gan itoꞌo xagaꞌ, nkiꞌin lá gaw bega dub tiemp no mas gudiꞌizhno bega Dios ndontsa sun bega gan kontuꞌub bega be mbi bxin wa.
MAR 9:30 Leꞌa gor na mkaꞌan bexa sa wa, cha nchaꞌtid bexa distrit Galilea. Ná leꞌa Jesús lá nlad iniꞌí be men leꞌa bexa ndesea sa wa,
MAR 9:31 geal leꞌa Jesús nluu be xmen na, ndab xa: —Leꞌa naꞌ, Xa Myak Men Ndoꞌ Gizhliyo, yak cuent ndoꞌ yaꞌa be men. Leꞌa bexa wa gut naꞌ, parea gal wizh yon leꞌa naꞌ iban ndoꞌ gealgut.
MAR 9:32 Leꞌa bexa wa ni lá yakbeꞌena ta ndab xa wa, ná leꞌa bexa nzheb inabdiꞌizhta xteꞌe gab ta wa.
MAR 9:33 Cha ulayaꞌ bexa Capernaum mlanseaꞌ bexa ta niꞌi. Cha unabdiꞌizh Jesús ndoꞌ be xmen xa, ndab xa: —¿Xtaꞌan nseabe yadiꞌizh bega nes wa zha?
MAR 9:34 Leꞌa bexa cha xetsa ute, geal leꞌa bexa nseaꞌbe yadiꞌizh ná ton mas nsak.
MAR 9:35 Leꞌa Jesús cha usob, cha utezh xa isatibtop bexa wa, cha ndab xa: —Tal leꞌa dub bega nlad gak xa mas nsak, leꞌa xa wa nsabndoꞌ yak xa lult, no gun xa tiꞌin lat bega.
MAR 9:36 Cha usen Jesús dub meꞌed, cha msoꞌ xa meꞌed tlaw bexa, cha udiꞌid xa meꞌed wa, ndab xa:
MAR 9:37 —Leꞌa tal ton dub xmen naꞌ utsin gak xa ndoꞌ dub meꞌed nak cuent meꞌed ndee, leꞌa xa wa cuentkata ndoꞌ naꞌ utsin nak. Leꞌa xa na utsin nak ndoꞌ naꞌ wa, leꞌa xa wa utsinga nak ndoꞌ xa mtuꞌub naꞌ.
MAR 9:38 Leꞌa Juan cha ndab ndoꞌ Jesús: —Mech, leꞌa besa uniꞌí dub men ndantiꞌin leaꞌ go gor na ngontuꞌub xa be mbi bxin. Ná leꞌa besa cha mka guntiꞌinta xa leaꞌ go, geal leꞌa xa naꞌanpa no nkeseano beuna.
MAR 9:39 Leꞌa Jesús cha ndab: —Lá uka bega gun xa ta wa. Leꞌa tal ton dub xa ndantiꞌin lea naꞌ gun dub uyon, leꞌa xa wa naꞌanpa cha inisi naꞌ.
MAR 9:40 Leꞌa tal ton naꞌanpa ndakloo ndoꞌ beuna, leꞌa xa wa dubtsa nak no beuna.
MAR 9:41 No tal ton guntiꞌin lea naꞌ usaꞌa xa masa dub vas nits goo bega ta na nak bega xmen naꞌ, leꞌa naꞌ gáp ndoꞌ bega leꞌa Dios usaꞌaka ta wen nsabndoꞌ ikaꞌa xa wa.
MAR 9:42 ’Leꞌa tal ton utsabgix dub xa ndangea ladna naꞌ ndoꞌ ta ugap, leꞌa xa wa mas dub gealkweaꞌ siꞌil iniꞌí ndoꞌ dub xa nkea dub geꞌ siꞌil gen na, cha utsaꞌab be men xa len nitsdoꞌo.
MAR 9:43 Tal leꞌa dub yaꞌa bega utsabgix bega, ndi ulobtoꞌog bega‑yá. Mas wen yoo bega wats Dios moch bega, ndoꞌ itop yaꞌa bega yaꞌ bega infierno ndoꞌ giꞌ lá nyuꞌu,
MAR 9:44 sa na nde mgeas lá ndat, nsea giꞌ nunk lá nyuꞌu.
MAR 9:45 Ná tal leꞌa dub xoꞌo bega utsabgix bega, ndi ulobtoꞌog bega‑yá. Mas wen yoo bega wats Dios nsea dubtsa xoꞌo bega, ndoꞌ itop xoꞌo bega yaꞌ bega infierno ndoꞌ giꞌ naꞌanpa nyuꞌu,
MAR 9:46 sa na nde mgeas lá ndat, nsea giꞌ nunk lá nyuꞌu.
MAR 9:47 No tal leꞌa dub ngusndoꞌ bega utsabgix bega, uloꞌo bega‑yá. Mas wen yoo bega wats Dios nsea dubtsa ngusndoꞌ bega, ndoꞌ itop ngusndoꞌ bega cha yaꞌ bega infierno,
MAR 9:48 sa na nde mgeas lá ndat nsea giꞌ nunk lá nyuꞌu.
MAR 9:49 ’Leꞌa Dios guntiꞌin giꞌ ndontsa umbiꞌi gak bega ndoꞌ Dios, lak ndantiꞌin men sed gor na nsaꞌa xa man xnab ndoꞌ Dios.
MAR 9:50 Leꞌa sed dub ta wen, parea tal leꞌa sed itoꞌo ta utix ten na, ¿xteꞌema yak utix‑a stub biaj zha? Gok bega cuent sed utix, nsea utsin gok bega ndoꞌ be men ltsaꞌa bega.
MAR 10:1 Leꞌa Jesús cha utoꞌo gezh wa nchaꞌa xa distrit Judea no stub toꞌo yowbeꞌe Jordán lad nlen wizh. Cha usaxangal mzhealbe kwaꞌad be men wats Jesús. Leꞌa Jesús cha mluugal bexa lakka ndun xa.
MAR 10:2 Weꞌe leꞌa pla bexa fariseo ulen wats Jesús, nlad bexa gab Jesús dub ta lid leꞌa nak. Ta weꞌe unabdiꞌizh bexa ndoꞌ Jesús ndab bexa: —¿Utsin nak ulaꞌa dub xabgiꞌi xagots ten na zha?
MAR 10:3 Leꞌa Jesús cha ukaꞌab ndab xa: —¿Xteꞌe ndab ley mkeꞌa Moisés, ta unibeꞌe Dios wa zha?
MAR 10:4 Leꞌa bexa cha ukaꞌab ndab: —Leꞌa ley mkeꞌa Moisés ndab syoꞌo gan ulaꞌa dub xa xagots ten xa, tal ned usaꞌa xa dub git ndoꞌ xagots wa, gab‑a leꞌa xa ulaꞌa xa wa.
MAR 10:5 Cha ukaꞌab Jesús ndab xa: —Geal ngud nak ladoꞌo bega, ta weꞌe mkeꞌa Moisés ta wa.
MAR 10:6 Ná leꞌa zha utexan gizhliyo leꞌa Dios mbindeꞌe xabgiꞌi nsea xagots.
MAR 10:7 Ta weꞌe ulaꞌa xabgiꞌi xus na nsea xnaꞌa na, zha na nkaꞌa xa xagots ten xa.
MAR 10:8 Leꞌa cuent ten Dios leꞌa itop xa wa yak dubtsa men, yá lid topta xa. Weꞌe leꞌa bexa wa dubtsa men myak.
MAR 10:9 Ta weꞌe gáp naꞌ leꞌa bexa na mchealte Dios, lá nsabndoꞌ dub men uteltsaꞌa bexa.
MAR 10:10 Leꞌa gor na mlanseaꞌ bexa ta lid bexa, leꞌa be xmen Jesús cha unabdiꞌizh stub biaj cuent ten ta mbidiꞌizh Jesús wa.
MAR 10:11 Leꞌa Jesús cha ndab: —Leꞌa tal ton dub xabgiꞌi ulaꞌa xagots ten na, cha ikaꞌa xa stubga xagots, leꞌa xabgiꞌi wa ugap ndanno xagots ned ten na wa, no ndap xa ke ndoꞌ Dios.
MAR 10:12 No liga tal leꞌa dub xagots ulaꞌa xabgiꞌi ten na, cha ikaꞌa xa stubga xabgiꞌi, leꞌa xagots wa ugap ndanno xabgiꞌi ned ten na wa, no ndap xa ke ndoꞌ Dios.
MAR 10:13 Weꞌe leꞌa be men ulanseano be meꞌed ten na wats Jesús, uxoꞌob Jesús yaꞌa na gek be meꞌed wa, inab xa ulaꞌach Dios be meꞌed. Ná leꞌa be xmen Jesús uteyo bexa na nseabeno be meꞌed wa.
MAR 10:14 Leꞌa Jesús cha uniꞌí ta wa, cha ngokloo xa ndoꞌ be xmen xa, cha ndab xa: —Blaꞌa bego giꞌid be meꞌed baꞌ wats naꞌ. Lá uka bega giꞌid be meꞌed, leꞌa Dios nibeꞌe len ladoꞌo be men nak lak be meꞌed ndee.
MAR 10:15 Leꞌa naꞌ gáp ndoꞌ bego, leꞌa tal ton lá ulaꞌa inibeꞌe Dios xa lak dub meꞌed, leꞌa xa wa nunk lá yate sa nibeꞌe Dios.
MAR 10:16 Cha udiꞌid Jesús be meꞌed wa, nsea mxoꞌob xa yaꞌa xa gek be meꞌed. Cha unab xa ndoꞌ Dios ulaꞌach Dios be meꞌed.
MAR 10:17 Leꞌa gor na yaꞌikanes Jesús, leꞌa dub xabgiꞌi karrel ulen cha usaxib ndoꞌ Jesús, unabdiꞌizh xa ndab xa: —Mech wen, ¿xtaꞌan nsabndoꞌ gun naꞌ ndontsa no naꞌ gap gealnaban ndoꞌ Dios, ta nunk lá idub zha?
MAR 10:18 Leꞌa Jesús cha ukaꞌab ndab: —¿Xtaꞌan ngi wen ndab lu ndoꞌ naꞌ zha? Naꞌan ton wen, ndon nab Dios nak wen.
MAR 10:19 Yá nchandoꞌ lu ley ten Dios ndab‑a: “Lá ugal lu xa ten stubga men. Lá gut lu men. Lá gun lu gealwaꞌan. Lá gun lu gealkwiꞌin. Lá ukedino lu men. Wankea xus lu nsea xnaꞌa lu.”
MAR 10:20 Leꞌa xabgiꞌi wa cha ukaꞌab ndab: —Mech, itea ta ndab go baꞌ ndunka naꞌ idub zha tuzhta naꞌ.
MAR 10:21 Weꞌe leꞌa Jesús mwiꞌi ndoꞌ xa, cha mkweaꞌ ladna Jesús xa, cha ndab Jesús ndoꞌ xa: —Stubtsa taꞌa ndun jwalt gun lu: nat byaꞌ, cha bdoꞌo iteanak ta ndap lu, cha btseꞌa med wa ndoꞌ bexa uban nak. Weꞌe gap lu sian taꞌa gibeꞌa. Cha utsea usankea tsoꞌo naꞌ, guniꞌi tal men xteꞌe gunno lu.
MAR 10:22 Leꞌa xabgiꞌi wa kweaꞌ myoꞌo ladna gor na mbiꞌín xa ta wa. Ndon uban myoꞌo ladna xa nseaꞌ xa, geal leꞌa xa uzhebpa sian taꞌa ndap.
MAR 10:23 Weꞌe leꞌa Jesús mwiꞌila gangeak, cha ndab xa ndoꞌ be xmen xa: —Uzheꞌeb ugan ulaꞌa dub men rik inibeꞌe Dios xa, bexa na li ndap sianpa be taꞌa.
MAR 10:24 Leꞌa be xmen Jesús ngwanseana be diꞌizh ndab Jesús wa, ná leꞌa Jesús cha ndabgal: —Bego bexa nak xiꞌín utsid naꞌ, uzhebpa ugan ulaꞌa dub xa rik inibeꞌe Dios xa, bexa na ngeꞌ ladna be ta sian ndap na.
MAR 10:25 Ndi mas lid bid itid dub came geꞌed xan dub yagux, ndoꞌ yate dub xa rik sa nibeꞌe Dios.
MAR 10:26 Cha mas ngwanseana bexa, ndab bexa ndoꞌ be ltsaꞌa xa: —¿Tonxá syoꞌo gan yate sa nibeꞌe Dios zhaga?
MAR 10:27 Leꞌa Jesús mwiꞌi ndoꞌ bexa, ndab xa: —Leꞌa cuent ten nabtsa be men leꞌa‑yá lá yoo gan, ná leꞌa cuent ten Dios itea taꞌa syoꞌoka gan.
MAR 10:28 Weꞌe leꞌa Pedr cha ndab: —Unaꞌ go, leꞌa besa mlaꞌa itea ta ndap besa, cha ndi usankea besa tsoꞌo ga.
MAR 10:29 Cha ukaꞌab Jesús ndab xa: —Leꞌa naꞌ gáp ndoꞌ bego, leꞌa tal ton ulaꞌa lid na no wit na no bsan na no xus na no xnaꞌa na no xagots ten na no xmeꞌed na no be yo ten na ta na ndangea ladna xa naꞌ no diꞌizh ten naꞌ,
MAR 10:30 leꞌa xa wa ikayaꞌa dub gayoꞌo biaj mas sian be ta wa tiemp ndee. Leꞌa bexa wa gap lid na, wit na, bsan na, xnaꞌa na, xmeꞌed na, nsea yo. No kweaꞌ itid bexa, parea gal tiemp tiꞌi ilen leꞌa bexa gap gealnaban nunk lá idub.
MAR 10:31 Ná kwaꞌad bexa nsak nat wa yak bexa naꞌanpa nsak; leꞌa bexa naꞌanpa nsak nat wa yak bexa nsak.
MAR 10:32 Leꞌa gor na nsoꞌ bexa nes ikea bexa Jerusalén, leꞌa Jesús nchaꞌa ned. Leꞌa be xmen Jesús nchankea tsoꞌo Jesús, leꞌa bexa ndanseana no nzheb bexa. Weꞌe leꞌa Jesús cha mbiꞌi bexa wa dub lad, cha mbidiꞌizhgal xa be gealkweaꞌ iniꞌí xa, ndab xa:
MAR 10:33 —Blaꞌach bego leꞌa beuna nchaꞌbe Jerusalén, sa leꞌa naꞌ, Xa Myak Men Ndoꞌ Gizhliyo, yak cuent ndoꞌ yaꞌa be uleꞌay nibeꞌe no ndoꞌ be mech ten ley. Leꞌa bexa wa gab nsabndoꞌ gat naꞌ, cha yun bexa cuent naꞌ ndoꞌ be men naꞌanpa xa judio.
MAR 10:34 Leꞌa bexa wa inisi naꞌ, nsea kin bexa naꞌ, nsea uchukko bexa ndoꞌ naꞌ, no gut bexa naꞌ. Parea gal wizh yon leꞌa naꞌ iban ndoꞌ gealgut.
MAR 10:35 Weꞌe leꞌa Jacob nsea Juan be xin Zebedeo ubii wats Jesús ndab bexa: —Mech, leꞌa besa nlad usaꞌa go dub ta inab besa.
MAR 10:36 Cha ndab Jesús: —¿Xtaꞌan nlad bega usa naꞌ zha?
MAR 10:37 Leꞌa bexa cha ndab: —Usaꞌa go wats go sa inibeꞌe go kwe besa, dub besa wats ga lad gaꞌal, leꞌa stub besa lad raves.
MAR 10:38 Leꞌa Jesús cha ndab ndoꞌ bexa: —Bego ni lá iniꞌí xtaꞌan unab bega. ¿Sxik bega itid bega gealkweaꞌ lakta gealkweaꞌ itiꞌid naꞌ zha? ¿No sni bega gat bega lak gat naꞌ zha?
MAR 10:39 Leꞌa bexa cha ndab: —Leꞌa besa sxikka. Leꞌa Jesús cha ndab: —Leꞌa naꞌ gáp leꞌa bega stidka be gealkweaꞌ lakta gealkweaꞌ itiꞌid naꞌ, no sat bega lak gat naꞌ.
MAR 10:40 Parea leꞌa sa kwe bega, dub bega wats naꞌ lad gaꞌal, no stub bega wats naꞌ lad raves, leꞌa sa wa naꞌanpa naꞌ inibeꞌe. Leꞌa Dios leꞌa gab ná ton kwe sa wa.
MAR 10:41 Leꞌa gor na mbiꞌín isatiꞌi be xmen Jesús ta unab Jacob no Juan wa, cha ngokloo bexa.
MAR 10:42 Ná leꞌa Jesús cha utezh itea be xmen xa, ndab xa: —Leꞌa bego uniꞌíka leꞌa bexa nibeꞌe be nacion naꞌanpa ulaꞌa gun be men dub taꞌa naꞌanpa nibeꞌe bexa, no bexa mas nsak ten bexa uzhebpa nibeꞌe ndoꞌ be men.
MAR 10:43 Ná leꞌa bego ndee naꞌanpa li nsabndoꞌ gak. Ndi tal ton bega nlad gak dub xa nsak lat bega, leꞌa xa wa nsabndoꞌ gakno itea bega.
MAR 10:44 No tal ton bega nlad yansu lat bega, leꞌa xa wa nsabndoꞌ gun tiꞌin ndoꞌ iteanak bega.
MAR 10:45 Leꞌa naꞌ, Xa Myak Men Ndoꞌ Gizhliyo, naꞌanpa ndal gun be men tiꞌin ndoꞌ naꞌ. Leꞌa naꞌ ndi ndalyun tiꞌin ndoꞌ be men, no usa naꞌ gealnaban ten naꞌ gat naꞌ, kix naꞌ ke ten kwaꞌad be men.
MAR 10:46 Leꞌa Jesús no be xmen xa cha nchaꞌtid gezh Jericó. Cha gor na nseatoꞌo bexa toꞌo gezh wa no kwaꞌad be men, leꞌa dub xabgiꞌi lá naꞌ nsobnab med toꞌo nes sa nchaꞌtid Jesús. Leꞌa xa wa nsaleaꞌ Bartimeo, xin Timeo.
MAR 10:47 Leꞌa gor na mbiꞌín Bartimeo leꞌa xa nchaꞌtid wa nsaleaꞌ Jesús xa Nazaret, cha usaxan xa ugeꞌ ndab xa: —¡Jesús, xin David, blats ladna go naꞌ!
MAR 10:48 Cha kwaꞌad bexa uteyo xa wa ndab bexa ndoꞌ xa yá naꞌanta xteꞌe gab xa. Ná leꞌa xa wa ndi mas ugeꞌ ndab: —¡Xin David, blats ladna go naꞌ!
MAR 10:49 Weꞌe leꞌa Jesús cha ngwaꞌisoꞌ ndab xa: —Utezh bega xa na li ugeꞌ níꞌi wa. Cha ngwaꞌtezh bexa Bartimeo, ndab bexa: —Bten ladna lu, gosoꞌ, leꞌa Jesús nbezh lu.
MAR 10:50 Leꞌa xa wa cha ngwasoꞌ, udabi xa lad nbix xa, cha ubii xa wats Jesús.
MAR 10:51 Leꞌa Jesús cha ndab ndoꞌ xa: —¿Xtaꞌan nlad lu gunno naꞌ lu zha? Leꞌa xa wa cha ndab: —Mech, leꞌa naꞌ nlad inaꞌ.
MAR 10:52 Leꞌa Jesús cha ndab: —Nat syoꞌo gan yaꞌ lu, leꞌa lu myaklana ta na mgeꞌ ladna lu naꞌ. Cha bi leꞌa gor wa leꞌa xa cha mnaꞌla. Weꞌe cha no xa usankea tsoꞌo Jesús nes wa.
MAR 11:1 Leꞌa ngol gor nsalayaꞌ gax bexa wa Jerusalén, gax sa nde gezh Betfagé nsea gezh Betania, sa nsob Bet Olivo, leꞌa Jesús cha mtuꞌub top be xmen na,
MAR 11:2 ndab xa: —Waꞌ bega len gezh nde ndoꞌ ndee. Leꞌa toꞌo gezh baꞌ iniꞌí bega nsoꞌ nchii dub burr tuzh naꞌan ton gol sob tsoꞌo na. Cha bxaꞌak bega ma, goꞌo bega ma sa ndee.
MAR 11:3 Leꞌa tal ton inabdiꞌizh ná xtaꞌan ngi nxaꞌak bega ma, cha gab bega: “Leꞌa Mech guntiꞌin ma dub xlaꞌal, cha yakka cuent ma.”
MAR 11:4 Weꞌe leꞌa be xmen Jesús wa cha nchaꞌbe. Cha mzheal bexa burr tuzh wa nsoꞌ nchii toꞌo nes sa wa, cha mxaꞌak bexa ma.
MAR 11:5 Leꞌa pla bexa nde sa wa unabdiꞌizh ndoꞌ bexa, ndab xa: —¿Xtaꞌan ngi nxaꞌak bega burr baꞌ zha?
MAR 11:6 Weꞌe leꞌa be xmen Jesús ukaꞌab ndab ndoꞌ bexa wa laktsa ndab Jesús gab bexa. Leꞌa bexa cha naꞌanta xteꞌe ngabbe.
MAR 11:7 Cha mbiꞌi bexa burr wa wats Jesús. Cha mxoꞌob bexa dubga xab bexa tsoꞌo ma, cha usob Jesús tsoꞌo ma.
MAR 11:8 No kwaꞌad be men mte be lad nbix bexa ndoꞌ nes sa isea ma. No ncho bexa ulobtoꞌog be xos ya gin, cha mte bexa‑yá nes wa.
MAR 11:9 Leꞌa be men nchaꞌbe ned ndoꞌ Jesús no be men nseabenkea tsoꞌo Jesús ugeꞌ ndab: —¡Siꞌil nak xa baꞌ! ¡Dios uzhebpa nlaꞌach xa baꞌ, xa na mtuꞌub Dios Xa Nibeꞌe!
MAR 11:10 ¡No nkeseano Dios xa baꞌ, leꞌa xa inibeꞌe lak unibeꞌe David xus beuna! ¡Siꞌil nak Dios nsob gaꞌap!
MAR 11:11 Leꞌa gor na uyote Jesús len gezh Jerusalén, cha nchaꞌa xa sa nde niꞌi ten Dios. Cha mwiꞌi Jesús gangeak ndoꞌ itea be ta ncho sa wa. Leꞌa gor wa yá uzhela, ta weꞌe nseaꞌ Jesús gezh Betania no isatibtop be xmen xa.
MAR 11:12 Ngol stubtsa wizh leꞌa bexa wa utoꞌo gezh Betania nchaꞌagal bexa Jerusalén. Leꞌa nes wa leꞌa Jesús ndanna.
MAR 11:13 Cha sitta naꞌ xa nsob dub ya higo nsoꞌ la. Cha utoꞌo Jesús nchaꞌwiꞌi naga lid no ngus nsoꞌ ndoꞌ ya wa. Parea naꞌanpa izheal xa ngus, ndi latsa nsoꞌ ndoꞌ‑yá, leꞌa ta wa naꞌanpa tiemp ten ngus higo wa.
MAR 11:14 Cha ndab Jesús ndoꞌ ya wa: —Idub isob lu naꞌantapa isoꞌ ngus gaw men ndoꞌ lu. Leꞌa be xmen Jesús mbiꞌín ta li ndab Jesús ndoꞌ ya wa.
MAR 11:15 Leꞌa gor na ulayaꞌ bexa Jerusalén, cha nchaꞌa Jesús sa nde niꞌi ten Dios. Cha usaxan ngontuꞌub xa bexa nadoꞌotiꞌix taꞌa sa wa. No mtixte xa be mes ten bexa ntil be med, no be yaxil ten bexa ndiꞌibudoꞌo be palom.
MAR 11:16 Cha lá ulaꞌata Jesús itidno be men be taꞌa tale ten niꞌi ten Dios.
MAR 11:17 Weꞌe usaxan xa nluu xa be men, ndab xa: —¿Lá iniꞌí bega zha xteꞌe nkeaniꞌi diꞌizh ten Dios? Ndab Dios: “Leꞌa lid naꞌ isaleaꞌ dub sa ndadiꞌizhno be men naꞌ, bexa ncho idub ndoꞌ gizhliyo.” Ná leꞌa bego ndi ndanno‑yá cuent dub geꞌloꞌo ten waꞌan.
MAR 11:18 Leꞌa gor na mbiꞌín be mech ten ley no be uleꞌay nibeꞌe ta li ndab Jesús, cha usaxan nkwaꞌan bexa ná xteꞌe gut bexa Jesús. Ná leꞌa iteata be men ndanseana be ta nluu Jesús, ta weꞌe mzheb bexa nsak wa.
MAR 11:19 Leꞌa ngol gor yá uzhe, leꞌa Jesús cha utoꞌo gezh wa.
MAR 11:20 Ngok stubtsa wizh tempran nsatidgal Jesús no be xmen xa gax sa nsob ya higo wa. Weꞌe uniꞌí bexa leꞌa ta wa ubidla gast itea loꞌ‑yá.
MAR 11:21 Weꞌe leꞌa Pedr mtseꞌa ladna ta ndab Jesús ndoꞌ ya wa. Cha ndab Pedr ndoꞌ Jesús: —Mech, bwiꞌi ga leꞌa ya higo na ndab go ndoꞌ na yá naꞌantapa usaꞌa ngus wa, yá ubidla.
MAR 11:22 Leꞌa Jesús cha ndab: —Bgeꞌ ladna bega Dios.
MAR 11:23 Leꞌa naꞌ gáp ndoꞌ bega leꞌa tal ton gab ndoꞌ bet ndee: “Utatsob, waꞌ len nitsdoꞌo”, cha naꞌanpa igan ladna xa ta wa, ndi gungea ladna xa ta li ndab xa wa, leꞌa ta wa sakka.
MAR 11:24 Ta weꞌe ndáp naꞌ ndoꞌ bego, leꞌa itea ta inab bega ndoꞌ Dios, bingeatsa ladna bega‑yá, leꞌa Dios saꞌaka ta wa.
MAR 11:25 Leꞌa gor na ndadiꞌizhno bega Dios, bingeꞌ ladna bega ndoꞌ tal ton xteꞌe mbinno bega, ndontsa no Dios Xus beuna nsob gibeꞌa sungeꞌ ladna ke ten bega.
MAR 11:26 Ná tal leꞌa bega lá gungeꞌ ladna ndoꞌ be men ugap ndanno bega wa, leꞌa Dios Xus beuna nsob gibeꞌa noga naꞌanpa gungeꞌ ladna be ke ten bega.
MAR 11:27 Leꞌa gor na mlanseagal bexa Jerusalén, cha nchaꞌa Jesús sa nde niꞌi ten Dios. Weꞌe leꞌa be mech ten ley no be uleꞌay nibeꞌe no bexa gox nsak ulen wats Jesús.
MAR 11:28 Leꞌa bexa wa cha unabdiꞌizh ndoꞌ Jesús ndab bexa: —¿Ton ulaxoꞌob lu gun lu be ta wa zha? ¿Nati ton mtuꞌub lu gun lu ta wa?
MAR 11:29 Leꞌa Jesús cha ukaꞌab ndab: —Leꞌa naꞌ no inabdiꞌizh dub taꞌa ndoꞌ bega. Tal leꞌa bega ikaꞌab, weꞌe no naꞌ gáp ná ton ulaxoꞌob naꞌ li gun naꞌ.
MAR 11:30 ¿Ton mtuꞌub Juan ulaleaꞌ Juan be men zha? ¿Dios nati dub men? ¡Gud bega‑yá!
MAR 11:31 Leꞌa bexa cha ndab ndoꞌ be ltsaꞌa na: —Tal leꞌa beuna gab leꞌa Dios leꞌaka mtuꞌub Juan, leꞌa Jesús inabdiꞌizh ná xtaꞌan lá ngungea ladna beuna xa.
MAR 11:32 Parea lá yoo gan gab beuna leꞌa Juan dub men mtuꞌub. Nzheb bexa gab bexa ta wa, geal leꞌa itea be men mbingea ladna leꞌa Juan dub profet mtuꞌub Dios.
MAR 11:33 Ta weꞌe ndab bexa ndoꞌ Jesús: —Leꞌa besa lá iniꞌí ton mtuꞌub Juan. Leꞌa Jesús cha noga ndab: —Naꞌ noga lá gáp ton ulaxoꞌob naꞌ gun naꞌ be ta ndee.
MAR 12:1 Weꞌe leꞌa Jesús usaxan mbidiꞌizh xa dub taꞌa msaktabeꞌe xa, ndab xa: —Uyoꞌo dub xabgiꞌi ngos ya uv ndoꞌ dub bleꞌa yo ten xa. Cha ulo xa lo idub gangeak wats‑a. No mbindeꞌe xa dub sa gachkeꞌe uv wa, koꞌo xa nits ten‑a. Cha mbindeꞌe xa dub sa gaꞌap isob xa ulaꞌach sa wa. Cha mkwaꞌan xa pla men gun tiꞌin. Cha nchaꞌa xa sit.
MAR 12:2 ’Leꞌa zha na ngol tiemp ten uv, cha mtuꞌub xa dub xmos xa yaꞌ ndoꞌ be men nlaꞌach uv, yaꞌyoꞌo xa ta na ndal xwan yo wa.
MAR 12:3 Ná leꞌa be men wa ndi usen mos wa, cha udin bexa xa. Cha naꞌan xtaꞌan usaꞌa bexa yoꞌo xa.
MAR 12:4 Leꞌa xwan yo wa cha mtuꞌubgal stub mos. Ná leꞌa be men wa ndi mlaꞌgeꞌ gek mos, no xela mbinno bexa xa.
MAR 12:5 Weꞌe leꞌa xwan yo wa mtuꞌubgal stub mos, ná leꞌa be men wa mbit xa wa. Cha mtuꞌub xa stapla be xmos xa, parea ncho xa wa udin bexa, no ncho xa wa mbit bexa.
MAR 12:6 ’Weꞌe cha mtea be xmos xwan yo wa. Lulttsa ndap xa dubtsa xin xa, xa nkweaꞌ ladna xa. Cha mtuꞌub xa xin xa wa, mbinbeꞌe xa leꞌa be men wa gap mod ndoꞌ xa.
MAR 12:7 Ná leꞌa be men wa ndi ndabbe ndoꞌ ltsaꞌa na: “Leꞌa xa baꞌ leꞌa yaꞌanno yo ndee. Nchaꞌyut beuna xa, cha yaꞌanno beuna‑yá.”
MAR 12:8 Cha usen bexa xa, cha mbit bexa xa, cha udabi bexa xa dub lad toꞌo yo wa.
MAR 12:9 Cha unabdiꞌizh Jesús ndab xa: —¿Xteꞌe nsak bega zha? ¿Xteꞌe gun xwan yo wa nat? Leꞌa xa wa ilen gut be men mlaꞌach yo wa. Cha usaꞌa xa yo wa ndoꞌ bexa xaꞌaga ulaꞌach‑a.
MAR 12:10 ¿Lá iniꞌí bega xteꞌe nkeaniꞌi diꞌizh ten Dios zha? Ndab‑a: Leꞌa geꞌ na mxelad bexa ndandeꞌe niꞌi, leꞌa ta wa nat nak geꞌ ndon leꞌa nsak nbexan niꞌi.
MAR 12:11 Leꞌa Dios leꞌa mbin ta ndee, dub ta ndanseana beuna.
MAR 12:12 Weꞌe leꞌa bexa nsak wa cha nlad isen Jesús, geal leꞌa bexa myakbeꞌenabe leꞌa Jesús li ndab cuent ten bexa. Parea leꞌa bexa nzheb ndoꞌ be men kwaꞌad wa, ta weꞌe mlaꞌa bexa Jesús, cha nseaꞌbe bexa.
MAR 12:13 Cha mtuꞌub bexa pla bexa fariseo no pla be xmen Herodes yaꞌbe yun preb Jesús, ndontsa gab Jesús dub taꞌa usake bexa Jesús.
MAR 12:14 Leꞌa bexa cha ulayaꞌ wats Jesús ndab bexa: —Mech, leꞌa besa uniꞌí leꞌa go ndadiꞌizh gealngea. No ni lá nlaꞌach ga ta ndab be men, no ni tal xteꞌe nak be men, leꞌa go ndi wen nluu lak nlad Dios gak be men. Ta weꞌe nabdiꞌizh besa ndoꞌ ga, ¿nsabndoꞌ kix beuna med nab César xa nibeꞌe Roma nate naꞌanpa kix beuna‑yá? ¿Saꞌa beuna‑yá nate naꞌan?
MAR 12:15 Ná leꞌa Jesús mgenna ta ugap ndanbeꞌe bexa, cha ndab Jesús: —¿Xtaꞌan ndun bega preb naꞌ zha? Bsaꞌa bega dub med iwiꞌi naꞌ‑yá.
MAR 12:16 Leꞌa bexa wa cha msaꞌa dub med ndoꞌ Jesús. Leꞌa Jesús cha ndab ndoꞌ bexa: —¿Ton gek na no leaꞌ na nkea las med ndee zha? Leꞌa bexa wa cha ndab: —Gek César no leaꞌ César.
MAR 12:17 Cha ndab Jesús: —Bsaꞌa bega ta ten César ndoꞌ César. Leꞌa ndoꞌ Dios bsaꞌa bega ta ten Dios. Cha ngwanseana bexa xteꞌe ukaꞌab Jesús.
MAR 12:18 Weꞌe ulen pla bexa saduceo wats Jesús. Leꞌa bexa saduceo ndangea ladna leꞌa bexa ngut wa lá ibantabe. Cha unabdiꞌizh bexa ndoꞌ Jesús, ndab bexa:
MAR 12:19 —Mech, leꞌa ley mkeꞌa Moisés ndab leꞌa tal ton dub xabgiꞌi gat, ná lá ngap xa xin xa, leꞌa wit xa wa nsabndoꞌ uchilyaꞌano xagots ten xa ngut wa, ndontsa tal gap bexa dub meꞌed leꞌa meꞌed wa gak cuent xin xa ngut wa.
MAR 12:20 Uyoꞌo dub gaꞌad wit xa. Leꞌa xa ned wa mchilyaꞌano dub xagots, cha tsoꞌo wa ngut xa ni lá ngap xagots wa xin xa.
MAR 12:21 Weꞌe cha mchilyaꞌano wit itop xa wa xagots wa. Leꞌa xabgiꞌi wa cha noga ngut, ni lá ngapgal xa xin xa. Leꞌa wit yon bexa wa litsagal ngwasea.
MAR 12:22 Cha li ngwasea isagaꞌad wit bexa, ná ni dub xa lá ngap xagots wa xin na. Tsoꞌo wa leꞌa xagots wa noga ngut.
MAR 12:23 Leꞌa gal zha iban bexa ngut wa, lat bexa wa ¿ton gak xabgiꞌi ten xagots wa, xa na li mchilyaꞌano isagaꞌad xabgiꞌi wa?
MAR 12:24 Leꞌa Jesús cha ukaꞌab ndab: —Uzhebpa lid leꞌa ndanbeꞌe bega, geal leꞌa bega lá nyakbeꞌena xteꞌe gab diꞌizh ten Dios, no ni lá nchandoꞌ bega juers ten Dios.
MAR 12:25 Leꞌa gal zha na iban bexa ngut, leꞌa be men yá naꞌantapa uchilyaꞌano be ltsaꞌa na zha wa. Leꞌa bexa ndi gak cuent be angel ten Dios ncho gibeꞌa.
MAR 12:26 Parea leꞌa cuent ten ta iban bexa ngut wa, ¿lá ndoꞌol bega libr mkeꞌa Moisés, xteꞌe uníꞌi Dios lat dub yagich zha? Ndab Dios leꞌa xa leꞌa nak Dios ndankea Abraham, no Isaac, no Jacob.
MAR 12:27 Leꞌa Dios naꞌanpa Dios ten bexa ngut, leꞌa xa ndi Dios ten bexa nban, ta nluu leꞌa bexa wa nbanka. Ta weꞌe ndáp naꞌ leꞌa bega uzhebpa lid leꞌa ndanbeꞌe.
MAR 12:28 Leꞌa gor na mbiꞌín dub mech ten ley ta nsoꞌyadiꞌizhno Jesús bexa saduceo wa, leꞌa xa wa uniꞌí leꞌa Jesús leꞌaka ukaꞌab ndoꞌ bexa. Weꞌe cha ubii xa wats Jesús, cha unabdiꞌizh xa ndab xa: —¿Ma ta na mas nsak lat be ta unibeꞌe Dios zha?
MAR 12:29 Leꞌa Jesús cha ukaꞌab ndab: —Leꞌa ná mas nsak wa nkeaniꞌi ndab‑a: “Blaꞌach bega xa Israel, leꞌa Dios Xa Nibeꞌe ten beuna dubkama nak Dios.
MAR 12:30 Wankea Dios Xa Nibeꞌe idub ncho ladna ladoꞌo lu no idub gealnaban ten lu no idub lak ndanbeꞌe lu no idub juers ten lu.” Leꞌa ná ndee wa mas nsak ndoꞌ iteanak be ta unibeꞌe Dios.
MAR 12:31 Leꞌa ná itop ndee lakkaga nak ná ned wa: “Bkweaꞌ ladna lu be ltsaꞌa lu lakkata lu.” Yá naꞌan stub taꞌa nibeꞌe Dios mas nsak ndoꞌ itop ta ndee.
MAR 12:32 Weꞌe leꞌa mech ten ley wa cha ndab: —Leꞌaka ndab go, mech. Ugeaka ta ndab go leꞌa Dios dubtsa, yá naꞌan stub dios xaꞌaga.
MAR 12:33 Leꞌa ta na yankea be men Dios idub ncho ladna ladoꞌo xa, no idub lak ndanbeꞌe xa, no idub juers ten xa, no ikweaꞌ ladna xa be ltsaꞌa xa lakkata leꞌa xa, leꞌa be ta wa mas nsak ndoꞌ xnab ten be man no ndoꞌ iteata be taꞌa nsaꞌa be men ndoꞌ Dios.
MAR 12:34 Leꞌa gor na mnaꞌla Jesús leꞌa mech wa leꞌaka ukaꞌab, cha ndab Jesús ndoꞌ xa: —Leꞌa lu gaxla nak ulaꞌa lu inibeꞌe Dios lu. Weꞌe ni stub xa wa ni lá ngun rages inabdiꞌizhta xa ndoꞌ Jesús.
MAR 12:35 Leꞌa Jesús ndadiꞌizh ndoꞌ be men nde gax wats niꞌi ten Dios, ndab xa: —¿Xtaꞌan ndab be mech ten ley leꞌa zha ilen Cristo leꞌa xa wa nak xin David zha?
MAR 12:36 Ná leꞌa David leꞌaka ndab sakndoꞌ Espíritu ten Dios, ndab xa: Leꞌa Dios Xa Nibeꞌe ndab ndoꞌ Xa Nibeꞌe ten naꞌ: “Usob wats naꞌ lad gaꞌal ndee, gast gal gor ute naꞌ bexa ndaklono lu xan ndats lu.”
MAR 12:37 Leꞌa David ndab leꞌa Cristo nak Xa Nibeꞌe ten xa. ¿Ná xteꞌe yoo gan gak Cristo wa xin David zha? Leꞌa bexa kwaꞌad wa cha mten ladna mbiꞌín ta ndab Jesús.
MAR 12:38 Leꞌa Jesús cha nluu bexa, ndab Jesús: —Blaꞌach bego lá gak bega lak nak be mech ten ley, leꞌa bexa ndal ladna ndesea nak lad koꞌol. No nlad bexa utsin inidiꞌizh be men ndoꞌ xa be ndoꞌ xgeꞌe.
MAR 12:39 No nti bexa be sa mas nsak isob bexa len be niꞌi sa nzhealbe beuna xa judio, no liga ndun bexa sa ndaꞌdaw bexa sa nyoꞌo dub gast.
MAR 12:40 Nsea nlat bexa be ta ndap be xagots ngut xabgiꞌi ten na. No kwenpa ndadiꞌizh bexa ndoꞌ Dios ndontsa gab be men leꞌa xa uzheꞌeb ndankea Dios. Leꞌa naꞌ gáp leꞌa bexa li ndun wa mas uzheꞌeb gealkweaꞌ iniꞌí.
MAR 12:41 Cha ngwatsob Jesús gax wats sa nsaꞌa be men med gon tale ten niꞌi ten Dios. Cha mwiꞌi xa xteꞌe nsaꞌa be men med wa. Leꞌa kwaꞌad men rik ulen, msaꞌa bexa sian med.
MAR 12:42 Leꞌa dub xagots prob ngut xabgiꞌi ten na no ulen, cha msaꞌa xa top med byux uxee nsak.
MAR 12:43 Weꞌe cha utezh Jesús be xmen na, cha ndab xa: —Leꞌa naꞌ gáp ndoꞌ bega leꞌa xagots prob ndee msaꞌa mas sian med ndoꞌ iteanak bexa baꞌ.
MAR 12:44 Leꞌa bexa msaꞌa sbeꞌen ta myaꞌan sobrtsa, ná leꞌa xagots ndee msaꞌa iteanak be med isiꞌi xa be taꞌa nkiꞌin xa.
MAR 13:1 Leꞌa gor utoꞌo Jesús tale ten niꞌi ten Dios, leꞌa dub xmen xa ndab: —Mech, bwiꞌi go be niꞌi chul ndee no be geꞌ ubiꞌi nakchaꞌaw niꞌi ten Dios ndee.
MAR 13:2 Leꞌa Jesús cha ndab: —Leꞌa gal dub wizh leꞌa be niꞌi lbaꞌa naꞌ lu baꞌ ilate, gast ni stub geꞌ baꞌ lá kwiꞌibta tsoꞌo ltsaꞌa na.
MAR 13:3 Cha nchaꞌa bexa Bet Olivo, sa nluxeꞌa niꞌi ten Dios, cha usob Jesús. Weꞌe leꞌa nabtsa Pedr no Jacob no Juan no Ndres unabdiꞌizh ndoꞌ Jesús, ndab bexa:
MAR 13:4 —Gud ga, ¿pol gak be ta li ndab go wa zha? ¿No xteꞌe iniꞌí besa zha na yamer gak‑a?
MAR 13:5 Leꞌa Jesús cha ukaꞌab ndab: —Gop bega cuent ndontsa naꞌan ton ukwiꞌinno bega.
MAR 13:6 Leꞌa kwaꞌad be men ilen gab leꞌa xa nak Cristo xa mtuꞌub Dios, ukwiꞌinno bexa kwaꞌad be men.
MAR 13:7 ’Leꞌa gor na goꞌón bega ncho guerr be sa sit no be sa gax, lá yuꞌ ladna bega. Leꞌa ta wa nsabndoꞌka yoo, ná leꞌa zha wa biseata gal be wizh lult.
MAR 13:8 Leꞌa gal zha wa kuyo nacion no stubga nacion. No leꞌa xmen dub xa nibeꞌe kuyono be xmen stubga xa nibeꞌe. No sian sa gak be xoꞌo ubiꞌi. No yoo win nsea uzheꞌeb kwesaxaꞌach be men. Leꞌa be ta ndee wa pen isobxanma be gealkweaꞌ ilen wa.
MAR 13:9 ’No blaꞌach bega leꞌaka bega, leꞌa be men yun cuent bega ndoꞌ bexa nibeꞌe ten bexa, no kin bexa bega len be niꞌi sa nzhealbe bexa judio. Leꞌa bexa yun cuent bega ndoꞌ bexa naktiꞌin ubiꞌi no ndoꞌ bexa nibeꞌe, cha usake xa bega ke na nak bega xmen naꞌ. Leꞌa gor weꞌe sak gudiꞌizh bega cuent ten naꞌ ndoꞌ bexa wa.
MAR 13:10 Parea leꞌa diꞌizh wen ten Dios nsabndoꞌ nedka iteꞌachso idub nax ndoꞌ gizhliyo.
MAR 13:11 Leꞌa zha na isen bexa bega no yun bexa cuent bega, lá yuꞌ ladna bega xteꞌe ikaꞌab bega, leꞌa gor wa leꞌa Dios saꞌaka diꞌizh iníꞌi bega. Leꞌa ta wa naꞌanpa bego iníꞌi, leꞌa ta wa Espíritu ten Dios iníꞌi.
MAR 13:12 Leꞌa zha wa ncho be men leꞌaka wit na yun cuent gat xa ke ndangea ladna xa naꞌ. No nchoga bexa liga yun cuent leꞌaka xin na. No ncho bexa gakloo ndoꞌ leꞌaka xus xa gast gut bexa xus xa.
MAR 13:13 No itea men ixeeno ladna bega ke na nak bega xmen naꞌ. Parea leꞌa tal ton bega uxik ndoꞌ be gealkweaꞌ wa no bi ngeꞌka ladna bega naꞌ, leꞌa bega wa gap gealnaban ndoꞌ Dios.
MAR 13:14 ’Leꞌa profet Daniel mkeꞌa leꞌa gal zha yoo dub ta uzhebpa ugap no bzhiꞌik len niꞌi ten Dios, sa lá nsabndoꞌ yoo‑yá (leꞌa xa ndoꞌol ta ndee nsabndoꞌ yakbeꞌena‑yá). Leꞌa gal zha iniꞌí bega ta wa, weꞌe leꞌa bexa ndencho Judea ndee nsabndoꞌ uxoꞌonbe yaꞌbe bexa be geꞌe ubiꞌi.
MAR 13:15 Leꞌa be men ndiꞌib gek lid na wa ni lá igen koꞌo be ta ten na len lid na.
MAR 13:16 Leꞌa bexa ndeyun tiꞌin geꞌe ni lá nsabndoꞌ yachta ilenyoꞌo be xab na.
MAR 13:17 Leꞌa gal zha wa uzhebpa kweaꞌ itid be xagots nsoꞌno meꞌed no be xagots ndap medoꞌo.
MAR 13:18 Unab bega ndoꞌ Dios, ndontsa leꞌa tiemp uxoꞌon bega wa naꞌanpa gal tiemp kwal.
MAR 13:19 Leꞌa be wizh weꞌe yoo dub gealkweaꞌ siꞌil, dub ta nunk gol yoꞌo zha mbindeꞌeta Dios gizhliyo, no ni lá yoota‑yá stub biaj.
MAR 13:20 Tal leꞌa Dios ulaꞌa sian wizh yoo ta uzheꞌeb wa, leꞌa be men stea gat. Parea lá ulaꞌa Dios yoo sian wizh wa, geal leꞌa xa nlats ladna bexa mti xa.
MAR 13:21 ’Weꞌe leꞌa tal ton gab ndoꞌ bega: “Bwiꞌi bego, leꞌa xa ndee Cristo”, no tal gab xa: “Unaꞌ bego, leꞌa xa baꞌ Cristo”, lá gungea ladna bega ta wa.
MAR 13:22 Leꞌa kwaꞌad bexa ukwiꞌin ilen gab leꞌa nak Cristo, no ilen bexa ukwiꞌin gab leꞌa ndadiꞌizh sakndoꞌ Dios. Leꞌa bexa wa no gun sian taꞌa yanseana be men, ndontsa ukwiꞌinno bexa be men. No ukwaꞌan bexa xteꞌe ukwiꞌinno bexa bexa mti Dios.
MAR 13:23 Blaꞌach bega, leꞌa naꞌ yá ndáp nedla ta ndee ndoꞌ bega.
MAR 13:24 ’Parea leꞌa be wizh wa, zha na yá mtea be gealkweaꞌ wa, leꞌa ndoꞌ wizh ikaw, leꞌa mbeꞌe yá lá usuta xeꞌa.
MAR 13:25 Leꞌa be mbeal ndiꞌib gaꞌap baꞌ ilate, no gast idub gibeꞌa iwiꞌin.
MAR 13:26 Leꞌa zha weꞌe iniꞌí be men leꞌa naꞌ, Xa Myak Men Ndoꞌ Gizhliyo, ilennogal juers ten Dios lat xkaw no dub xeꞌa siꞌil.
MAR 13:27 Cha utuꞌub naꞌ be angel ten naꞌ yunjunt bexa mti Dios itea lad ndoꞌ gizhliyo, gast sa mas sit ndoꞌ gizhliyo no sa mas sit gibeꞌa baꞌ.
MAR 13:28 ’Bwiꞌi bego lak nak be ya higo. Leꞌa zha na nxich be ya wa, leꞌa bego uniꞌíka leꞌa tiemp bigi yá gal.
MAR 13:29 No liga leꞌa zha na naꞌ bega ncho be ta mbidiꞌizh naꞌ ndee wa, weꞌe iniꞌí bega leꞌa naꞌ ndee yamer ilengal.
MAR 13:30 Leꞌa naꞌ gáp ndoꞌ bega leꞌa itea be ta ndee itid zha na biseata gat be men ncho gal zha wa.
MAR 13:31 Leꞌa gibeꞌa no gizhliyo initndoꞌ, parea leꞌa ta ndáp naꞌ ndee naꞌanpa initndoꞌ.
MAR 13:32 ’Parea naꞌan ton iniꞌí xá wizh na‑yá no xá gor yoo be ta ndee. Ni be angel ncho gibeꞌa ni naꞌ xa nak Xin Dios lá iní ta wa. Nabtsa Tad Dios uniꞌí ná pol yoo‑yá.
MAR 13:33 ’Ta weꞌe list ute bega no blaꞌach bega no bidiꞌizhno bega Dios, leꞌa bega lá iniꞌí pol yoo be ta ndee.
MAR 13:34 Leꞌa ta wa cuent dub xabgiꞌi ikaꞌan yaꞌ sit. Leꞌa gor na nlaꞌa xa lid xa, ndab xa ndoꞌ be xmos xa: “Kadga dub bega bin bega tiꞌin ndáp naꞌ.” No ndab xa ndoꞌ xa nlaꞌach toꞌo puert wa uzheꞌeb list isoꞌ xa wa.
MAR 13:35 Li list ute bega leꞌa bega lá iniꞌí xá gor ilen xwan niꞌi wa, ga ilen xa gor uzhe, nate utol teꞌal, nate gor nbezh boy, nate gor ngotla xeꞌa.
MAR 13:36 Li gak bega ndontsa guniꞌi xá gor itanchaꞌ xa, lá gaꞌigaꞌa bega ndeyats bega.
MAR 13:37 Leꞌa ta ndáp naꞌ ndoꞌ bego wa, leꞌa ta wa ndáp naꞌ ndoꞌ itea be men: list ute bega.
MAR 14:1 Leꞌa zha na nsob stop wizh gal ujest Pascua, zha ndaw bexa judio pan naꞌan levadur, leꞌa be uleꞌay nibeꞌe no be mech ten ley nkwaꞌan ná xteꞌe isen bexa Jesús dub mod na lá iniꞌí be men‑a, cha gut bexa Jesús.
MAR 14:2 Parea ndab bexa naꞌanpa isen bexa Jesús len ujest, ndontsa lá ixaꞌach be men gakloo ndoꞌ bexa.
MAR 14:3 Leꞌa dub wizh nsob Jesús ta lid Simón xa Betania, xa na mas polta usak gealgizh lepra. Weꞌe ulen dub xagots sa nsob Jesús ndoꞌ mes, nsea dub bot tuzh nakchaꞌaw geꞌ alabastro ncho sbeꞌen nardo ta uxeꞌe, dub ta uyappa nsak. Cha utiꞌich xa gen bot wa ndontsa myaꞌal‑a, cha ulo xa ta uxeꞌe wa gek Jesús.
MAR 14:4 Leꞌa ncho bexa nde sa wa ngokloo ndab bexa ndoꞌ be ltsaꞌa xa: —¿Xtaꞌan ngi mbizhaꞌa xagots ndee ta uxeꞌe baꞌ zha?
MAR 14:5 Tal leꞌa xa ndi udoꞌo‑yá, leꞌa xa yoꞌo gan utseꞌa med wa ndoꞌ bexa uban nak. Leꞌa ta baꞌ nsak masa chon gayoꞌo denario. Cha kweaꞌ uníꞌi bexa ndoꞌ xagots wa.
MAR 14:6 Naꞌ leꞌa Jesús ndab ndoꞌ bexa: —Blaꞌa bega xagots baꞌ. ¿Xtaꞌan ngi li nisi bega xa zha? Leꞌa xa dub ta wen mbin ndoꞌ naꞌ.
MAR 14:7 Leꞌa bexa uban nak guniꞌi polga nchoka lat bega. No guniꞌi pol nlad bega, sak usaꞌa bega ta nkiꞌin bexa. Parea leꞌa naꞌ ndee naꞌanpa kwenta nchoꞌono bega.
MAR 14:8 Leꞌa xagots ndee mbin laktsa msuꞌu xa. Leꞌa xa ulo ned ta uxeꞌe gek naꞌ, gor biseata gal zha igaꞌach naꞌ.
MAR 14:9 Leꞌa naꞌ gáp ndoꞌ bega guniꞌi pa ndoꞌ gizhliyo gudiꞌizh be men diꞌizh wen ten Dios, no ta mbin xagots ndee gudiꞌizh bexa, ndontsa iniꞌí be men ta wen mbin xa.
MAR 14:10 Weꞌe leꞌa Judas Iscariot, dub xa nak isatibtop xmen Jesús, ngwaꞌ ndoꞌ be uleꞌay nibeꞌe, ndab xa leꞌa xa syun cuent Jesús.
MAR 14:11 Leꞌa gor na mbiꞌín bexa ta wa, cha mten ladna bexa, ndab bexa ndoꞌ Judas leꞌa bexa usaꞌa med. Leꞌa Judas cha usaxan mkwaꞌan ná xteꞌe yun xa cuent Jesús ndoꞌ yaꞌa bexa.
MAR 14:12 Leꞌa ngol wizh ned ten ujest zha ndaw bexa pan naꞌan levadur, wizh ndut bexa dub borreg ndaw bexa cuent ten ujest Pascua, leꞌa be xmen Jesús ndab ndoꞌ Jesús: —¿Pa nlad go yaꞌyundeꞌe besa ta gaw beuna ujest Pascua?
MAR 14:13 Leꞌa Jesús cha mtuꞌub top xmen xa, ndab xa: —Waꞌ bega gezh Jerusalén baꞌ, leꞌa gal sa izheꞌal bega dub xabgiꞌi noꞌo dub te ncho nits, cha usankea bega tsoꞌo xa.
MAR 14:14 Leꞌa sa na ilanseaꞌ xa, cha gud bega ndoꞌ xwan niꞌi wa: “Leꞌa mech nabdiꞌizh ná xá cuart ná usaꞌa ga gawno mech be xmen xa ta ten ujest Pascua.”
MAR 14:15 Leꞌa xwan niꞌi wa cha uluu dub cuart siꞌil ndoꞌ bega, ta nde gek niꞌi wa. Leꞌa sa wa listla nde be taꞌa guntiꞌin bega. Cha binchaꞌaw bega be ta gaw beuna sa wa.
MAR 14:16 Leꞌa be xmen Jesús cha utoꞌo nchaꞌbe len gezh wa. Weꞌe cha mzheꞌalka bexa men wa no be ta ndab Jesús. Cha mbindeꞌe bexa be ta gaw bexa ujest Pascua.
MAR 14:17 Leꞌa ngol gor uyoꞌo teꞌal, leꞌa Jesús ulayaꞌno isatibtop be xmen na len niꞌi wa.
MAR 14:18 Leꞌa gor na ndeyaw bexa ndoꞌ mes, leꞌa Jesús cha ndab: —Leꞌa naꞌ gáp ndoꞌ bega leꞌa dub bega na ndeyaw beuna ndee leꞌa yun cuent naꞌ ndoꞌ bexa ndakloo ndoꞌ naꞌ.
MAR 14:19 Weꞌe leꞌa be xmen xa cha uban myoꞌo ladnabe, usaxan nabdiꞌizh dub gaꞌga bexa ndoꞌ Jesús, ndab bexa: —¿Lid naꞌ ta wa zha, Mech?
MAR 14:20 Leꞌa Jesús cha ndab: —Leꞌa ta wa leꞌaka dub isatibtop bega nsobyawno naꞌ ndee.
MAR 14:21 Leꞌa naꞌ, Xa Myak Men Ndoꞌ Gizhliyo, itiꞌidka lak nkeaniꞌi diꞌizh ten Dios. Parea proꞌob xabgiꞌi na yun cuent naꞌ ndoꞌ bexa wa. ¡Mas wen lá yoꞌo xabgiꞌi wa ndoꞌ gizhliyo!
MAR 14:22 Leꞌa gor na li ndeyaw bexa, leꞌa Jesús cha usen dub pan, cha msaꞌa xa xno ndoꞌ Dios. Cha uleꞌa xa‑yá, no mtseꞌa xa‑yá ndoꞌ be xmen xa, ndab xa: —Udaw bega pan ndee, leꞌa‑yá beꞌal las naꞌ.
MAR 14:23 Cha liga usen Jesús dub vas ncho vin, cha msaꞌa xa xno ndoꞌ Dios. Weꞌe cha msaꞌa xa‑yá ndoꞌ bexa, cha ngu itea bexa‑yá.
MAR 14:24 Cha ndab Jesús: —Leꞌa ta ndee ten ten naꞌ usa naꞌ por bego. Leꞌa ta ndee nluu leꞌa nat leꞌa Dios mbinno be men dub trat kub ná xteꞌe wen yaꞌan bexa ndoꞌ Dios.
MAR 14:25 Leꞌa naꞌ gáp ndoꞌ bego leꞌa naꞌ yá naꞌantapa goꞌo vin ten uv, gast gal wizh na goꞌo naꞌ vin kub sa nibeꞌe Dios.
MAR 14:26 Cha mbiltoꞌo bexa dub cant ndoꞌ Dios; cha utoꞌo bexa, nchaꞌbe bexa Bet Olivo.
MAR 14:27 Weꞌe leꞌa Jesús cha ndab ndoꞌ bexa: —Leꞌa iteanak bego ulaꞌa naꞌ teꞌal ndee, lak nkeaniꞌi diꞌizh ten Dios, ndab‑a: “Leꞌa naꞌ gut xa nlaꞌach be borreg, cha iteꞌachso bema.”
MAR 14:28 Ná leꞌa tsoꞌo na iban naꞌ leꞌa naꞌ ned ilaya ndoꞌ bega Galilea.
MAR 14:29 Leꞌa Pedr cha ndab ndoꞌ Jesús: —Maska itea bexa baꞌ ulaꞌa ga, ná leꞌa naꞌ naꞌanpa ula ga.
MAR 14:30 Leꞌa Jesús cha ndab ndoꞌ Pedr: —Leꞌa naꞌ gáp ndoꞌ lu, leꞌa teꞌal ndee gor biseata kwezh boy top biaj, leꞌa lu mkwiꞌinla chon biaj ndab lu leꞌa lu lá nchandoꞌ naꞌ.
MAR 14:31 Ná leꞌa Pedr bi ndabkata: —Maska gat naꞌ gor gat go, leꞌa naꞌ naꞌanpa gáp leꞌa naꞌ lá nchandoꞌ ga. Weꞌe leꞌa iteata be xmen Jesús ndab lak ndab Pedr.
MAR 14:32 Cha ulayaꞌ bexa sa nsaleaꞌ Getsemaní, cha ndab Jesús ndoꞌ be xmen na: —Ndeꞌetsa ute bega ndalen ndaꞌyadiꞌizhno naꞌ Dios.
MAR 14:33 Cha mbiꞌi Jesús Pedr no Jacob no Juan stub tuzh sa. Cha uzhebpa uban myoꞌo ladna Jesús no kweaꞌ myoꞌo ladna xa.
MAR 14:34 Cha ndab xa ndoꞌ yon bexa wa: —Uzhebpa uban ncho lad naꞌ gast ngi sat naꞌ. Ndeꞌetsa utenaꞌ bega.
MAR 14:35 Cha usea Jesús stub tuzh sa, cha usaxib xa gast ndoꞌ yo ngol xtuzh xa. Cha ndadiꞌizhno xa Dios, ndab xa tal syoꞌo gan lá itid xa be gealkweaꞌ wa.
MAR 14:36 Lndeꞌe ndab Jesús ndoꞌ Dios: —Tad Xus naꞌ, leꞌa go itea taꞌa sun gan. Lá nlad naꞌ itiꞌid naꞌ ndoꞌ be gealkweaꞌ uzheꞌeb ndee. Parea lá gak‑a lak nlad naꞌ, ndi gak‑a lak nlad go.
MAR 14:37 Leꞌa gor nseaꞌ Jesús sa nde yon be xmen xa, leꞌa bexa ndeyats. Cha ndab xa ndoꞌ Simón Pedr: —Simón, ¿naxyats lu zha? ¿Ni lá uxik lu isobnaꞌ lu ni stub gor zha?
MAR 14:38 Utenaꞌ bega no bidiꞌizhno bega Dios, ndontsa naꞌanpa utsabgix maxuꞌu bega. Leꞌa ladoꞌo bega nlad gun ta wen, ná leꞌa idub bega lá uxik.
MAR 14:39 Cha nchaꞌagal Jesús nchaꞌyadiꞌizhno xa Dios lakkagal gor ned wa.
MAR 14:40 Leꞌa gor na nseaꞌgal Jesús sa nde yon be xmen xa leꞌa bexa ndeyatsgal, geal leꞌa bexa uzhebpa nyoꞌo xkaꞌalna. No ni lá iniꞌí bexa xteꞌe ikaꞌab bexa ndoꞌ Jesús.
MAR 14:41 Ngol biaj yon ngwaꞌyadiꞌizhno Jesús Dios. Leꞌa gor nseaꞌgal xa sa nde bexa wa, cha ndab xa: —¿Bi ndeyats bega zha, no ndeuneꞌe bega zha? Yá unika‑yá, leꞌa nat yá ngol gor leꞌa naꞌ, Xa Myak Men Ndoꞌ Gizhliyo, yak cuent ndoꞌ yaꞌa bexa ugap.
MAR 14:42 Goste bega, nchaꞌbe beuna. Bwiꞌi bega leꞌa xa yun cuent naꞌ yá nseala baꞌ.
MAR 14:43 Bi li nsoꞌyadiꞌizh Jesús leꞌa Judas, xa no nak dub tibtop xmen Jesús, ulennola be men kwaꞌad noꞌo be spad nsea garrot. Leꞌa ta wa bexa mtuꞌub be uleꞌay nibeꞌe no be mech ten ley no bexa gox nsak isen bexa Jesús.
MAR 14:44 Leꞌa Judas, xa li yun cuent Jesús, ndabla ndoꞌ be men wa: —Leꞌa xa na gaw naꞌ chit beꞌal ndoꞌ na, xa weꞌe isen bega, no gun segur bega xa, goꞌo bega xa.
MAR 14:45 Leꞌa gor na ulenno Judas be men wa, cha ubii Judas wats Jesús ndab xa: —Mech, mech. Cha mchealtoꞌo Judas ndoꞌ Jesús.
MAR 14:46 Weꞌe leꞌa be men wa cha usen Jesús, cha yá lá ulaꞌata bexa xa.
MAR 14:47 Zha leꞌa dub xmen Jesús cha uloꞌo spad ten na, cha ulobtoꞌog xa nchaꞌ dub xa ndun tiꞌin ndoꞌ uleꞌay ndon leꞌa nsak.
MAR 14:48 Cha ndab Jesús ndoꞌ be men wa: —¿Xtaꞌan nseano bega spad nsea garrot isen bega naꞌ cuent dub waꞌan zha?
MAR 14:49 Itea wizh mluu naꞌ be men tale ten niꞌi ten Dios lat bega, ná lá isen bega naꞌ sa wa. Parea leꞌa ta ndee li ngok ndontsa gak‑a lak nkeaniꞌi diꞌizh ten Dios.
MAR 14:50 Weꞌe leꞌa itea be xmen Jesús cha mxoꞌon, mlaꞌa bexa Jesús.
MAR 14:51 Parea leꞌa dub xabgiꞌi ben nbix nabtsa dub bleꞌa lad siꞌil usankea tsoꞌo Jesús. Leꞌa gor na ndiꞌizh isen bexa no xabgiꞌi ben wa,
MAR 14:52 leꞌa xa wa cha mlaꞌa lad nbix na, mxoꞌon xa litsa naꞌanpa nak xa xab xa.
MAR 14:53 Leꞌa be men wa cha mbiꞌi Jesús ta lid uleꞌay ndon leꞌa nsak. Leꞌa sa wa leꞌa itea be uleꞌay nibeꞌe no bexa gox nsak no be mech ten ley cha mzhealbe.
MAR 14:54 Leꞌa Pedr sittsa nchankea tsoꞌo Jesús, cha no Pedr uyoꞌo len tale ten niꞌi wa. Weꞌe cha usob ubizhno Pedr bexa nlaꞌach sa wa sa nde giꞌ.
MAR 14:55 Leꞌa be uleꞌay nibeꞌe no iteata bexa nsak wa nkwaꞌanbe ná xteꞌe usake bexa Jesús, dub ta nsabndoꞌ gat Jesús. Parea leꞌa bexa ni lá izheal xteꞌe‑yá.
MAR 14:56 Leꞌa kwaꞌad be men mkwiꞌin nsake Jesús, ná leꞌa bexa wa naꞌanpa dubtsa ngudiꞌizhbe.
MAR 14:57 Weꞌe ngwasoꞌ pla bexa msake bexa Jesús, mkwiꞌin bexa ndab bexa:
MAR 14:58 —Leꞌa besa mbiꞌín leꞌa Jesús baꞌ ndab leꞌa xa ulate niꞌi ten Dios, ta mbindeꞌe men. Cha gal wizh yon leꞌa xa ixiste stub niꞌi ten Dios ta naꞌanpa men gundeꞌe.
MAR 14:59 Ni lika naꞌanpa dubtsa ngudiꞌizh bexa.
MAR 14:60 Weꞌe leꞌa uleꞌay ndon leꞌa nsak cha ngwasoꞌ ndoꞌ be men wa, unabdiꞌizh xa ndab xa ndoꞌ Jesús: —¿Ni lá utsakndoꞌ lu zha? ¿Ta ugeaka ta ndab bexa ndee leꞌa lu li ndab zha?
MAR 14:61 Ná leꞌa Jesús naꞌan xteꞌe ngab, ni lá ikaꞌab xa. Weꞌe leꞌa uleꞌay wa cha unabdiꞌizhgal ndoꞌ Jesús ndab: —¿Lu nak Cristo Xin Dios wen wa zha?
MAR 14:62 Leꞌa Jesús cha ukaꞌab ndab: —Leꞌa ta wa naꞌka. Leꞌa bego gal gor iniꞌí leꞌa naꞌ, Xa Myak Men Ndoꞌ Gizhliyo, isob wats Dios lad gaꞌal, xa ndon leꞌa nibeꞌe, no ilen naꞌ lat xkaw nde gibeꞌa.
MAR 14:63 Weꞌe leꞌa uleꞌay ndon leꞌa nsak wa cha utsaw xab na tant ndakloo xa, cha ugeꞌ ndab xa: —¿Xtaꞌanta nkiꞌin beuna kwaꞌadta xa usake xa ndee zha?
MAR 14:64 Leꞌa bega mbiꞌín xteꞌe unisi xa Dios. ¿Nat xteꞌe gab bega, xteꞌe gunno beuna xa? Leꞌa iteanak bexa wa ndab leꞌa Jesús ndapka ke nsabndoꞌ gat xa.
MAR 14:65 Ncho bexa usaxan mchukko ndoꞌ Jesús. No mtsaw bexa ndoꞌ Jesús, udin bexa Jesús. Cha ndab bexa ndoꞌ Jesús: —¡Gud ná ton udin lu! Leꞌa bexa nlaꞌach sa wa cha utichyaꞌa ndoꞌ Jesús.
MAR 14:66 Ndalen wa leꞌa Pedr nsob tale wa. Cha ulen dub xagots ndun tiꞌin ta lid uleꞌay wa.
MAR 14:67 Leꞌa gor na uniꞌí xagots wa nsob ubizh Pedr, cha mwiꞌi xa ndoꞌ Pedr, ndab xa: —Go no ukeseano Jesús xa Nazaret baꞌ, ¿la?
MAR 14:68 Leꞌa Pedr cha mkwiꞌin ndab: —Leꞌa naꞌ lá nchandoꞌ xa baꞌ, no ni lá iní naꞌ xtaꞌan ndab ga. Cha nchaꞌa Pedr mas gax toꞌo puert. Leꞌa gor wa cha utezh dub boy.
MAR 14:69 Parea leꞌa xagots wa uniꞌígal Pedr, cha usaxan xa ndab xa ndoꞌ bexa nde sa wa: —Leꞌa xa ndee no nak dub xmen Jesús.
MAR 14:70 Ná leꞌa Pedr cha mkwiꞌingal ndab leꞌa xa naꞌanpa xa wa. Tsoꞌoma wa leꞌa bexa nde sa wa stub biaj ndabgal ndoꞌ Pedr: —Ta ugeaka leꞌa go no nak dub xmen Jesús, leꞌa go xa Galilea no ndadiꞌizh ga lak ndadiꞌizh bexa Galilea.
MAR 14:71 Leꞌa Pedr cha kweaꞌ uníꞌi, ndab xa: —¡Nsobwiꞌi Dios leꞌa naꞌ lá nchandoꞌ xabgiꞌi nseꞌat bego baꞌ!
MAR 14:72 Bi leꞌa gor wa leꞌa boy cha utezh biaj itop. Weꞌe mtseꞌa ladna Pedr ta ndab Jesús ndoꞌ Pedr: “Leꞌa teꞌal ndee gor biseata kwezh boy top biaj, leꞌa lu mkwiꞌinla chon biaj ndab lu leꞌa lu lá nchandoꞌ naꞌ.” Cha usaxan Pedr ndoꞌon.
MAR 15:1 Leꞌa ngol gor ngot xeꞌa leꞌa be uleꞌay nibeꞌe no bexa gox nsak no be mech ten ley no iteata bexa nsak wa dubtsa mbidiꞌizh bexa xteꞌe gunno bexa Jesús. Cha mxi bexa Jesús, cha mbiꞌi bexa xa ndoꞌ Pilat.
MAR 15:2 Leꞌa Pilat cha unabdiꞌizh ndoꞌ Jesús, ndab xa: —¿Lu nak xa nibeꞌe ten bexa judio zha? Leꞌa Jesús cha ndab: —Goka ndab‑a.
MAR 15:3 Leꞌa be uleꞌay nibeꞌe wa cha sian taꞌa msake Jesús.
MAR 15:4 Leꞌa Pilat unabdiꞌizhgal ndab: —¿Ni lá utsakndoꞌ lu zha? Unaꞌ plota taꞌa nsake bexa baꞌ lu.
MAR 15:5 Parea leꞌa Jesús ni lika lá ikaꞌab. Cha ngwanseana Pilat.
MAR 15:6 Leꞌa itea liꞌin zha ndal ujest Pascua, leꞌa Pilat ngoꞌo dub men nkea litgiꞌib, tal ton gab be men itoꞌo.
MAR 15:7 Leꞌa zha wa uyoꞌo dub xa nsaleaꞌ Barrabás nkea litgiꞌib no be ltsaꞌa na, ke na ngokloo bexa ndoꞌ bexa nibeꞌe sa wa no mbit bexa dub men.
MAR 15:8 Leꞌa be men kwaꞌad wa ulayaꞌ ndoꞌ Pilat, cha unab bexa igoꞌo Pilat dub men litgiꞌib, lakka ndun Pilat itea liꞌin.
MAR 15:9 Leꞌa Pilat cha ndab: —¿Nlad bega ula naꞌ xa nibeꞌe ten bega xa judio zha?
MAR 15:10 Li ndab Pilat leꞌa Pilat uniꞌí leꞌa be uleꞌay nibeꞌe wa nxee ladna ndoꞌ Jesús ta na mas kwaꞌad men ndeseano Jesús, ta weꞌe myun bexa cuent Jesús.
MAR 15:11 Parea leꞌa be uleꞌay nibeꞌe wa mkiꞌil be men wa inab bexa ndi igoꞌo Pilat Barrabás litgiꞌib.
MAR 15:12 Leꞌa Pilat cha unabdiꞌizhgal ndoꞌ be men: —¿Xtaꞌan nlad bega gunno naꞌ xa ndab bega xa nibeꞌe ten bega xa judio?
MAR 15:13 Leꞌa be men wa ugeꞌ ukaꞌab, ndab bexa: —¡Ikea xa ndoꞌ cruz!
MAR 15:14 Weꞌe leꞌa Pilat ndab: —¿Xtaꞌan ta ugap mbin xa zhaga? Ná leꞌa be men wa ndi mas ugeꞌ ndab: —¡Ikea xa ndoꞌ cruz!
MAR 15:15 Leꞌa Pilat nlad wen yaꞌan ndoꞌ be men wa, ta weꞌe mgoꞌo Pilat xa nsaleaꞌ Barrabás. Cha ndab Pilat ndoꞌ be soldad kin bexa Jesús, cha ukeꞌa bexa xa ndoꞌ cruz.
MAR 15:16 Weꞌe leꞌa be soldad cha mbiꞌi Jesús tale ten niꞌilaw, sa nsaleaꞌ pretorio. Cha mzhealbe iteanak be soldad sa wa.
MAR 15:17 Cha mgak bexa Jesús dub lad koꞌol, ta konch ugats. No msob bexa dub ta rued cuent coron gek Jesús ta nakndeꞌe xos yagich.
MAR 15:18 Cha usaxan be soldad ndun usaladno Jesús, ugeꞌ ndab bexa: —¡Siꞌil nak xa nibeꞌe ten bexa judio!
MAR 15:19 Cha nlaꞌ bexa dub bar gek Jesús, no mchukko bexa ndoꞌ Jesús, no msaxib bexa ndoꞌ Jesús cuent ndankea bexa xa.
MAR 15:20 Leꞌa gor na mtayun usaladno bexa Jesús, cha ulate bexa lad konch ugats nak Jesús. Cha mgak bexa Jesús leꞌaka xab xa. Cha nchaꞌano bexa Jesús sa ikea xa ndoꞌ cruz.
MAR 15:21 Leꞌa gor weꞌe leꞌa dub xabgiꞌi nsaleaꞌ Simón nchaꞌlayaꞌ Jerusalén, dub xa gezh Cirene xus Alejandro no Rufo. Leꞌa gor na mzheꞌal be soldad xa wa, cha mbin bexa juers goꞌo Simón wa cruz ten Jesús.
MAR 15:22 Cha mbiꞌi bexa Jesús dub sa nsaleaꞌ Gólgota, dub diꞌizh gab tit gek men.
MAR 15:23 Weꞌe msaꞌa bexa vin ten uv noch xup ten ya mirra goo Jesús, parea leꞌa xa lá ngo‑yá.
MAR 15:24 Cha mkeꞌa be soldad Jesús ndoꞌ cruz, cha uloꞌo bexa dub suert, ndontsa iniꞌí bexa ná tonpa ikaꞌa be xab Jesús.
MAR 15:25 Leꞌa gor na mkeꞌa bexa Jesús ndoꞌ cruz, leꞌa ta wa gor nkea ugeꞌa tempran.
MAR 15:26 Leꞌa gek cruz ten Jesús mkeꞌa bexa dub letr, ndab‑a ná xtaꞌan li nkea xa ndoꞌ cruz, ndab‑a: “TA NDEE XA NIBEꞌE TEN BEXA JUDIO.”
MAR 15:27 No top waꞌan mkeꞌa bexa ndoꞌ stop cruz wats Jesús, dub xa wats Jesús lad gaꞌal, leꞌa stub xa wats lad raves.
MAR 15:28 Li ngok‑a lak nkeaniꞌi diꞌizh ten Dios, ndab‑a: “Mbinno bexa xa cuent dub xa ugap.”
MAR 15:29 Leꞌa be men nseabetid sa wa xela uníꞌi ndoꞌ Jesús, nkwiꞌin bexa gek bexa, ndab bexa ndoꞌ Jesús: —Lu ndab slate niꞌi ten Dios, cha ixiste lu‑yá wizh yontsa.
MAR 15:30 ¡Nat byun libr leꞌaka leꞌa lu, ulaꞌ ndoꞌ cruz baꞌ!
MAR 15:31 No liga leꞌa be uleꞌay nibeꞌe no be mech ten ley nisi Jesús, ndab bexa ndoꞌ be ltsaꞌa xa: —Leꞌa xa baꞌ leꞌa ngokno be men, ná lá gun xa gan ulat xa leꞌaka xa ndoꞌ gealgut.
MAR 15:32 Xa baꞌ ndab leꞌa nak Cristo xa nibeꞌe ten beuna xa Israel. ¡Nat ilaꞌ xa ndoꞌ cruz, ndontsa iniꞌí beuna‑yá, cha gungea ladna beuna xa! No liga leꞌa bexa nkea ndoꞌ cruz wats Jesús kweaꞌ uníꞌi ndoꞌ Jesús.
MAR 15:33 Leꞌa ngol gor gawizh leꞌa idub ndoꞌ gizhliyo mkaw gast gor nkea uyon uzhe.
MAR 15:34 Leꞌa ngol gor wa leꞌa Jesús uzheꞌeb ugeꞌ uníꞌi ndab: —Eloi, Eloi, ¿lama sabactani? —leꞌa ta wa dub diꞌizh gab: Dios ten naꞌ, Dios ten naꞌ, ¿xtaꞌanxá mlalad go naꞌ zhaga?
MAR 15:35 Leꞌa ncho bexa nde sa wa gor na mbiꞌín bexa ta li ndab Jesús wa, cha ndab bexa: —Blaꞌach bega, leꞌa xa baꞌ nbezh profet Elí.
MAR 15:36 Weꞌe leꞌa dub bexa wa cha utoꞌo karrel, cha mgazh xa dub bleꞌa lad xiꞌil ndoꞌ vinagr, cha msob xa‑yá gek dub yalod. Cha msaꞌa xa‑yá goo Jesús‑a, ndab xa: —Kweas beuna naga siꞌid Elí ixeꞌe xa ndee ndoꞌ cruz.
MAR 15:37 Ná leꞌa Jesús ugeꞌ utezhat, cha ngut xa.
MAR 15:38 Weꞌe leꞌa lad utaꞌa nak bseꞌa len niꞌi ten Dios cha usaw gast gaꞌap no gast ilaꞌ, ngok top bleꞌa‑yá.
MAR 15:39 Leꞌa dub xa nibeꞌe ten soldad nsoꞌ lad ndoꞌ Jesús uniꞌí xteꞌe utezhat Jesús no xteꞌe ngut xa. Cha ndab soldad wa: —Ta ugeaka leꞌa xabgiꞌi ndee Xinka Dios.
MAR 15:40 Leꞌa sa wa sittsa ndewiꞌi kwaꞌad be xagots. Leꞌa lat bexa wa nsoꞌ Marí xa gezh Magdala no Salomé no Marí xnaꞌa Kosé xa wit Jacob tuzh wa.
MAR 15:41 Leꞌa be xagots wa bexa na utoꞌo Galilea usankea tsoꞌo Jesús, no ngokno bexa Jesús nes nchaꞌa xa Jerusalén. No kwaꞌadta be xagots nchaꞌano Jesús Jerusalén nde sa wa.
MAR 15:42 Leꞌa ta wa dub gor uzhe wizh nsaxkwaꞌa bexa judio ta guntiꞌin bexa gat xeꞌa wizh neꞌe bexa.
MAR 15:43 Weꞌe leꞌa dub xa nsaleaꞌ Kosé xa gezh Arimatea ngop valor ulen ndoꞌ Pilat unab xa Jesús. Leꞌa Kosé wa dub xa nsak ten bexa judio, no nkenkeaꞌ xa tiemp inibeꞌe Dios ndoꞌ gizhliyo.
MAR 15:44 Leꞌa Pilat ngwanseana ná xteꞌe uxax ngut Jesús. Cha utezh Pilat dub soldad nibeꞌe, cha unabdiꞌizh Pilat naga ngutla Jesús.
MAR 15:45 Leꞌa gor na ndab soldad wa leꞌa Jesús ngutka, cha ndab Pilat goꞌo Kosé Jesús.
MAR 15:46 Weꞌe leꞌa Kosé ngwaꞌisiꞌi dub lad kub, cha uxeꞌe xa Jesús ndoꞌ cruz, cha mtixko xa Jesús lad wa. Cha ulo xa Jesús len dub baꞌa cuent geꞌloꞌo, dub geꞌed udan men ndoꞌ geꞌdaꞌa. Cha mtixte xa dub geꞌ siꞌil mtsaw toꞌo baꞌa wa.
MAR 15:47 Leꞌa Marí xa gezh Magdala no Marí xnaꞌa stubga Kosé ndewiꞌi pa ulo bexa Jesús.
MAR 16:1 Ngol utid wizh neꞌe bexa judio, leꞌa Marí xa Magdala no Marí xnaꞌa Jacob no Salomé usiꞌi bexa ta uxeꞌe koo bexa las Jesús.
MAR 16:2 Leꞌa ngol tempran wizh ned ten sman nsobla dub tuzh wizh, nchaꞌbe bexa sa nde baꞌa mgaꞌach Jesús wa.
MAR 16:3 Leꞌa gor nchaꞌa bexa nes wa ndab bexa ndoꞌ be ltsaꞌa xa: —¿Cha ton kob geꞌ siꞌil toꞌo baꞌa wa zha?
MAR 16:4 Ná leꞌa gor ulayaꞌ bexa sa wa, mnaꞌla bexa leꞌa geꞌ wa myoꞌobla toꞌo baꞌa wa.
MAR 16:5 Cha uyoꞌo be xagots wa len baꞌa wa, cha mnaꞌ bexa dub xabgiꞌi ben nsob lad gaꞌal len baꞌa nak dub lad nagud ta koꞌol, cha mzheb bexa.
MAR 16:6 Ná leꞌa xabgiꞌi wa cha ndab ndoꞌ bexa: —¡Lá izheb bego! Naꞌ uní leꞌa bego nkwaꞌan Jesús xa Nazaret, xa na ukea ndoꞌ cruz. Ná leꞌa Jesús ubanla, leꞌa xa wa naꞌanla sa ndee. Bwiꞌi bega sa mxoꞌob be men xa.
MAR 16:7 Nat waꞌ bega ndoꞌ be xmen Jesús no ndoꞌ Pedr, gud bega ndoꞌ bexa leꞌa Jesús nchaꞌa nedla ndoꞌ bexa Galilea, leꞌa sa wa izheꞌal bexa xa lakka ndab xa.
MAR 16:8 Weꞌe leꞌa be xagots wa nxis tant nzheb bexa, cha utoꞌo bexa len baꞌa wa mxoꞌon bexa. Ná ni naꞌan ton ndoꞌ ná ngab bexa ta wa nes nseaꞌ bexa, tant nzheb bexa.
MAR 16:9 Tsoꞌo na mban Jesús gor tempran wizh ned ten sman wa, ned mlundoꞌ xa ndoꞌ Marí xa Magdala, xa na uloꞌo Jesús dub gaꞌad mbi bxin len ladoꞌo na.
MAR 16:10 Leꞌa Marí wa cha ngwaꞌ ndoꞌ bexa uteseano Jesús. Leꞌa bexa wa uzhebpa uban ndencho ladna no ndeyoꞌon bexa. Cha ndab Marí leꞌa Jesús mbanla.
MAR 16:11 Parea leꞌa bexa wa lá ngungea ladna leꞌa Jesús nban, no ni lá ngungea ladna bexa leꞌa Marí wa uniꞌí Jesús.
MAR 16:12 Tsoꞌo wa leꞌa Jesús mlundoꞌ ndoꞌ top be xabgiꞌi nes nchaꞌbe bexa geꞌe, parea xaꞌaga nluu xa. Leꞌa bexa wa bexa no ukeseano Jesús.
MAR 16:13 Weꞌe cha ngwaꞌyab bexa‑yá ndoꞌ iteata be ltsaꞌa bexa. Parea leꞌa bexa ni weꞌeka lá ngungea ladna‑yá.
MAR 16:14 Tsoꞌo wa mlundoꞌ Jesús ndoꞌ isatibdub be xmen xa dub sa junt ndeyaw bexa. Leꞌa Jesús cha uteyo bexa ke na lá ngungea ladna bexa leꞌa Jesús nbanla, no ke ngud nak ladoꞌo bexa, geal leꞌa bexa wa lá ngungea ladna ta ndab bexa uniꞌíla leꞌa Jesús mbanla.
MAR 16:15 Cha ndab Jesús ndoꞌ bexa wa: —Waꞌ bego idub nax ndoꞌ gizhliyo. Bidiꞌizh bega diꞌizh wen ten Dios ndoꞌ iteanak be men.
MAR 16:16 Leꞌa tal ton gungea ladna naꞌ no italeaꞌ xa, leꞌa xa wa sap gealnaban ndoꞌ Dios. Leꞌa tal ton naꞌanpa gungea ladna naꞌ, leꞌa xa wa iniꞌí gealkweaꞌ.
MAR 16:17 Leꞌa bexa ndangea ladna naꞌ sun be ta nluu leꞌa bexa ndap juers ten Dios. Guntiꞌin bexa lea naꞌ kontuꞌub bexa be mbi bxin ncho len ladoꞌo be men, no gudiꞌizh bexa stubga diꞌizh.
MAR 16:18 No tal bexa lá iniꞌí isen bexa mbeꞌal no goo bexa venen, leꞌa ta wa naꞌan xtaꞌan gun. No uxoꞌob bexa yaꞌa bexa gek bexa gizh, leꞌa bexa wa cha syakna.
MAR 16:19 Tsoꞌo na li ndab Jesús, weꞌe cha mkea xa gibeꞌa, cha usob xa wats Dios lad gaꞌal.
MAR 16:20 Leꞌa be xmen Jesús cha utoꞌo nchaꞌbeyadiꞌizh diꞌizh ten Jesús ndoꞌ be men ncho itea lad. Leꞌa Jesús ndakno bexa, no nsaꞌa xa juers ndun bexa sian taꞌa, ta na nluu leꞌa ta ndadiꞌizh bexa wa diꞌizh tenka Dios.
LUK 1:1 Leꞌa kwaꞌad be men mbin juers ndon xkwaꞌa mkeꞌa bexa ta na ta ugeakapa mbin Jesús lat besa.
LUK 1:2 Leꞌa bexa na ukeseano Jesús ndon leꞌa ned uniꞌí be ta wa no mbidiꞌizh bexa‑yá ndoꞌ besa.
LUK 1:3 Ta weꞌe no naꞌ uzhebpa uloxnes gast xan itea be ta ndee. Cha mbinbe naꞌ leꞌa naꞌ nsabndoꞌ ndon xkwaꞌa ukeꞌa be ta ndee ndoꞌ go, Teófilo,
LUK 1:4 ndontsa wen igondoꞌ go gealngea, be ta na mbidiꞌizh bexa ndoꞌ ga.
LUK 1:5 Leꞌa zha na ngok Herodes xa nibeꞌe Judea, uyoꞌo dub uleꞌay judio nsaleaꞌ Zacarías, dub xa no nak partid Abías ten be uleꞌay. Leꞌa xagots ten Zacarías wa nsaleaꞌ Elisabet, dub xa ras ten Aarón.
LUK 1:6 Leꞌa Zacarías nsea Elisabet uzhebpa bexa wen ngok ndoꞌ Dios. No uzheꞌeb mxobgek bexa ndoꞌ itea be taꞌa unibeꞌe Dios.
LUK 1:7 Ná leꞌa bexa wa lá ndap xin na, geal leꞌa Elisabet wa dub xagots lá yoꞌo gan gap meꞌed. No goxlapa itop bexa wa.
LUK 1:8 Ngol zha na leꞌa partid ten uleꞌay Zacarías wa leꞌa ngol gun tiꞌin ndoꞌ Dios.
LUK 1:9 Lak nak costumbr ten be uleꞌay uloꞌo bexa suert, cha leꞌa Zacarías ngol leꞌa yaꞌlo zhen len niꞌi ten Dios.
LUK 1:10 Ngol gor na ngo xa zhen len wa, leꞌa itea be men ndebe tsoꞌo juer ndadiꞌizhno Dios.
LUK 1:11 Cha mlundoꞌ dub angel ten Dios ndoꞌ Zacarías, nsoꞌ angel lad gaꞌal wats mes, sa ngo uleꞌay zhen.
LUK 1:12 Leꞌa gor na uniꞌí Zacarías angel wa, leꞌa xa ni lá iniꞌí xteꞌe gun, no mzheb xa.
LUK 1:13 Leꞌa angel wa cha ndab: —Zacarías, lá izheb lu, leꞌa Dios ndoꞌón ta nab lu ndoꞌ xa. Leꞌa Elisabet xagots ten lu gap dub meꞌed bgiꞌi, cha usaleaꞌ lu meꞌed wa Juan.
LUK 1:14 Leꞌa zha na gal meꞌed, leꞌa lu uzhebpa iten ladna, no kwaꞌadpa be men iten ladnabe,
LUK 1:15 geal leꞌa xin lu wa gak dub xa uzhebpa nsak cuent ten Dios. Leꞌa xa ni lá goo vin no ni stub taꞌa nsudna be men. No uzhebpa gap xa juers ten Espíritu ten Dios, gor na bi leꞌa xnaꞌa xa nsoꞌno xa.
LUK 1:16 Leꞌa xa gun gan leꞌa kwaꞌadpa bexa Israel yach yankea bexa Dios Xa Nibeꞌe.
LUK 1:17 Leꞌa Juan leꞌa yaꞌ ned ndoꞌ Xa Nibeꞌe wa. Leꞌa xa wa juert gudiꞌizh sakndoꞌ Dios lak juert mbidiꞌizh Elí, ndontsa gun xa gan lá kuyota be men nsea leꞌaka be xin xa, no leꞌa bexa lá nxobgek wa uxobgek ndoꞌ Dios. Li gun xa ndontsa list kwe be men gungea ladna bexa xa nak Xa Nibeꞌe wa zha na ilen xa.
LUK 1:18 Leꞌa Zacarías cha unabdiꞌizh ndoꞌ angel, ndab xa: —¿Xteꞌexá iní naꞌ syoꞌo gan gak ta ndee zhaga? Leꞌa naꞌ no xagots ten naꞌ yá goxlapa besa.
LUK 1:19 Leꞌa angel cha ukaꞌab ndab: —Leꞌa naꞌ nsaleaꞌ Gabriel, naꞌ ndun tiꞌin ndoꞌ Dios. Leꞌa Dios mtuꞌub naꞌ ndalyáp naꞌ ndoꞌ lu be diꞌizh wen mbidiꞌizh naꞌ wa.
LUK 1:20 Leꞌa nat leꞌa lu yak mud, yá lá gudiꞌizhta lu gast gal wizh yoo be ta ndáp naꞌ ndee wa, ke na lá ngungea ladna lu ta ndee. Nat leꞌa ta wa gakka gal zha nsabndoꞌka li gak‑a.
LUK 1:21 Ndalen wa leꞌa be men ndenkeaꞌ ná xá gor itoꞌo Zacarías len niꞌi ten Dios. Ndanseana bexa xtaꞌan ngi lita kwen nchaꞌa xa len wa.
LUK 1:22 Ná leꞌa gor na utoꞌo xa leꞌa xa lá yoolata gan iníꞌi. Weꞌe uniꞌí be men leꞌa xa uniꞌí dub ta mluu Dios len wa. Leꞌa xa sbeꞌen seintsa ndun, leꞌa xa lá yoolata gan gudiꞌizh.
LUK 1:23 Leꞌa ngol zha ngwaꞌa be wizh mbin Zacarías tiꞌin wa, cha nseaꞌ xa ta lid xa.
LUK 1:24 Leꞌa tsoꞌo wa leꞌa Elisabet xagots ten xa cha nsoꞌnola dub meꞌed. Leꞌa xagots wa cha lá itoꞌota ta lid na dub gaꞌay mbeꞌe. Mbinbeꞌe xa, ndab xa:
LUK 1:25 “Lndeꞌe ngokno Dios naꞌ gap naꞌ meꞌed, ndontsa naꞌantapa ido lad naꞌ ndoꞌ be men.”
LUK 1:26 Leꞌa ngol sxoꞌop mbeꞌe tsoꞌo wa, leꞌa Dios mtuꞌubgal angel Gabriel gezh Nazaret ten distrit Galilea,
LUK 1:27 sa ncho dub xagots ben, dub xa ni gol ugal xabgiꞌi. Leꞌa xa wa nsaleaꞌ Marí, xa na ikaꞌaka dub xa na nsaleaꞌ Kosé, xa ras ten David.
LUK 1:28 Leꞌa angel wa uyoꞌo len lid xagots wa, cha ndab angel ndoꞌ xa: —Tiux ga Marí, leꞌa Dios nsak ladna lak nak lu, no nsoꞌ Dios wats lu. Leꞌa xa mas ndakno lu ndoꞌ itea be xagots.
LUK 1:29 Ná leꞌa Marí ni ko lá iniꞌí xteꞌe gun gor na mbiꞌín xa ta li ndab angel wa. Ni lá iniꞌí xa xtaꞌan ngi li ndab angel ndoꞌ xa.
LUK 1:30 Leꞌa angel cha ndab: —Marí, lá izheb lu leꞌa Dios nsak ladna lak nak lu.
LUK 1:31 Leꞌa nat leꞌa lu yoxinna dub meꞌed bgiꞌi, cha usaleaꞌ lu meꞌed wa Jesús.
LUK 1:32 Leꞌa meꞌed wa gak dub xa nsakpa, geal leꞌa xa Xin Dios siꞌil. Leꞌa Dios Xa Nibeꞌe leꞌa gun leꞌa Jesús inibeꞌe lak unibeꞌe David usan gox polta ten xa.
LUK 1:33 Leꞌa Jesús wa inibeꞌe bexa ras ten Jacob idub tiemp. Leꞌa tiemp inibeꞌe xa nunk lá idub.
LUK 1:34 Weꞌe leꞌa Marí cha unabdiꞌizh ndab ndoꞌ angel: —¿Xteꞌe yoo gan gak ta li ndab go wa zha? Leꞌa naꞌ ndee dub xagots nab, ni dub xabgiꞌi gol ugal naꞌ.
LUK 1:35 Leꞌa angel cha ukaꞌab ndab: —Leꞌa Espíritu ten Dios siꞌil ilen cuent dub xgal tsoꞌo lu. Leꞌa Espíritu wa leꞌa gun gap lu meꞌed wa. Ta weꞌe leꞌa meꞌed gap lu wa ni dub ke lá gap, no isaleaꞌ meꞌed Xin Dios.
LUK 1:36 Leꞌa Elisabet ltsaꞌa lu wa no gap dub meꞌed maska yá goxlapa xa. Leꞌa be men ndab leꞌa xa wa lá yoo gan gap meꞌed, parea leꞌa xa nsoꞌnola meꞌed dub xoꞌop mbeꞌe.
LUK 1:37 Leꞌa cuent ten Dios naꞌan xtaꞌan dub ta lá yoo gan.
LUK 1:38 Leꞌa Marí cha ndab: —Leꞌa naꞌ ndee dub xa ndun tiꞌin ndoꞌ Dios Xa Nibeꞌe. Gun Dios lak ndab go ndoꞌ naꞌ wa. Leꞌa angel wa cha mkaꞌan sa wa.
LUK 1:39 Ngol tsoꞌo wa leꞌa Marí cha uxax nchaꞌa dub gezh nde lat be bet distrit Judea.
LUK 1:40 Cha uyoꞌo xa len lid Zacarías, cha unidiꞌizh xa ndoꞌ Elisabet.
LUK 1:41 Leꞌa gor na mbiꞌín Elisabet unidiꞌizh Marí ndoꞌ xa, leꞌa meꞌed nsoꞌno Elisabet wa cha uteꞌal len xa. Leꞌa Espíritu ten Dios cha mas uyoꞌo len ladoꞌo Elisabet,
LUK 1:42 cha ugeꞌ ndab xa: —¡Leꞌa Dios uzhebpa ndakno lu ndoꞌ iteata be xagots! ¡No uzheꞌeb gakno Dios xin lu!
LUK 1:43 ¿Tonxá nak naꞌ nsea inaꞌ lu naꞌ zhaga, ná lu leꞌa nak xnaꞌa xa gak Xa Nibeꞌe naꞌ?
LUK 1:44 Leꞌa gor na mbín naꞌ unidiꞌizh lu, leꞌa meꞌed nsoꞌno naꞌ ndee uteꞌal‑la len naꞌ tant nten ladna meꞌed.
LUK 1:45 Uzhebpa wen ncho ladna lu ta na mbingea ladna lu ta ndab Dios ndoꞌ lu, leꞌa ta wa gakka lak ndab xa.
LUK 1:46 Leꞌa Marí cha ndab: Leꞌa naꞌ idub ncho ladna ndáp leꞌa Dios uzheꞌeb dub Dios wen.
LUK 1:47 Leꞌa ladoꞌo naꞌ nten ladna ndoꞌ Dios xa nsaꞌa gealnaban ndoꞌ naꞌ.
LUK 1:48 Leꞌa Dios nlaꞌach naꞌ, xa ndun tiꞌin ndoꞌ xa, maska naꞌanpa nak naꞌ dub xa nsak. Leꞌa idub ndoꞌ ndee gab be men leꞌa naꞌ uzhebpa wen ncho lad naꞌ.
LUK 1:49 Leꞌa Dios siꞌil uzhebpa ndakno naꞌ; leꞌa xa dubkama nak Dios.
LUK 1:50 Idub tiemp nkweaꞌ ladna xa be men, bexa nxobgek ndoꞌ xa.
LUK 1:51 Leꞌa juers ten Dios mbin xa be ta ndanseana beuna; Mteꞌachso xa bexa zhin nak.
LUK 1:52 No ulatsob xa bexa nsak sa nibeꞌe bexa, Cha myunno Dios bexa uban nak cuent bexa nsak.
LUK 1:53 Nsea bexa lá ndap ta gaw na, msaꞌa Dios sian taꞌa ndoꞌ bexa. No ulantuꞌub xa bexa rik ni naꞌanta xtaꞌan ndap bexa.
LUK 1:54 Ndakno Dios bexa Israel, bexa ndun tiꞌin ndoꞌ xa, leꞌa xa lá nyalad ta nkweaꞌ ladna xa bexa wa.
LUK 1:55 Leꞌa ta wa ta ndabka Dios ndoꞌ bexa gox polta ten beuna, ta gunno Dios Abraham no bexa ras ten xa idub tiemp.
LUK 1:56 Weꞌe leꞌa Marí cha uyoꞌo ta lid Elisabet pa chon mbeꞌe. Cha weꞌeta nseaꞌ xa ta lid xa.
LUK 1:57 Leꞌa ngol wizh na gap Elisabet meꞌed, leꞌa xa cha ngop dub meꞌed bgiꞌi.
LUK 1:58 Leꞌa bexa ncho gax wa no be ltsaꞌa xa cha mbiꞌín xteꞌe li utsin mbinno Dios Elisabet, cha no bexa mten ladna.
LUK 1:59 Leꞌa ngol zha na ngok xoꞌon wizh ngol meꞌed wa, cha ulo bexa beꞌe meꞌed lakka ndun bexa judio. No cha nlad bexa usaleaꞌ bexa meꞌed wa Zacarías lak nsaleaꞌ xus meꞌed.
LUK 1:60 Ná leꞌa xnaꞌa meꞌed lá kaꞌab li isaleaꞌ meꞌed. Ndab xa: —Leꞌa meꞌed isaleaꞌ Juan.
LUK 1:61 Leꞌa bexa wa cha ndab: —¿Xtaꞌan ngi li isaleaꞌ meꞌed baꞌ zha? Leꞌa ni dub ltsaꞌa lu naꞌanpa li nsaleaꞌ.
LUK 1:62 Weꞌe cha unabdiꞌizh bexa sbeꞌen sein ndoꞌ xus meꞌed xteꞌe nlad xa isaleaꞌ meꞌed.
LUK 1:63 Leꞌa xa cha unab dub bleꞌa tabl, cha mkeꞌa xa ndoꞌ tabl wa: “Leꞌa meꞌed isaleaꞌ Juan.” Leꞌa itea be men wa cha ngwanseanabe.
LUK 1:64 Cha bi leꞌa gor wa cha uyoꞌo gan uníꞌi Zacarías, cha usaxan xa nsaꞌa xa xno ndoꞌ Dios.
LUK 1:65 Leꞌa itea be men ncho gax ta lid Zacarías cha ngwanseana bexa no mzheb bexa. Leꞌa ta li ngok wa mgen itea be gezh ndebe lat be bet distrit Judea.
LUK 1:66 Leꞌa itea bexa na li mbiꞌín ta wa cha mbinbeꞌe bexa, ndab bexa: —¿Xteꞌema gak meꞌed wa zha? Leꞌa bexa wa uniꞌí leꞌa meꞌed wa ncho ndoꞌ yaꞌa Dios.
LUK 1:67 Leꞌa Zacarías xus meꞌed wa mas uyoꞌo juers ten Espíritu ten Dios len ladoꞌo na, cha mbidiꞌizh xa sakndoꞌ Dios, ndab xa:
LUK 1:68 Uzhebpa wen Dios Xa Nibeꞌe bexa Israel, geal leꞌa xa mbiꞌid yakno be xmen xa.
LUK 1:69 Leꞌa Dios mtuꞌub dub xa juertpa usaꞌa gealnaban, dub xa ras David, xa mbin tiꞌin ndoꞌ Dios.
LUK 1:70 Leꞌa ta wa ta ndab Dios ndoꞌ be profet ten na polta, cha mbidiꞌizh bexa‑yá ndoꞌ be men sakndoꞌ Dios.
LUK 1:71 Leꞌa Dios ndab leꞌa xa lá ulaꞌa beuna ndoꞌ be men ndakloo ndoꞌ beuna, no bexa nxee ladna ndoꞌ beuna.
LUK 1:72 Leꞌa Dios nkweaꞌ ladna be usan gox ten beuna, no ndunka xa lakka ndab trat mbinno xa bexa wa.
LUK 1:73 Leꞌa trat wa ta ndab Dios ndoꞌ Abraham usan gox ten beuna leꞌa Dios sunka ta wa:
LUK 1:74 leꞌa xa gakno beuna ndoꞌ be men ndakloo ndoꞌ beuna, ndontsa naꞌanpa izheb beuna gun beuna tiꞌin ndoꞌ Dios,
LUK 1:75 no umbiꞌi gak ladoꞌo beuna ndoꞌ Dios, no uzhebpa wen gak beuna ndoꞌ xa idub tiemp nban beuna.
LUK 1:76 Leꞌa lu, chuu, isaleaꞌ dub profet ten Dios Siꞌil, leꞌa lu yaꞌ ned ndoꞌ xa gak Xa Nibeꞌe, ndontsa list kwe be men Israel gal zha ilen xa wa.
LUK 1:77 Weꞌe iniꞌí bexa leꞌa Dios stsuꞌu be ke ten bexa, no usaꞌa xa gealnaban ndoꞌ bexa.
LUK 1:78 Leꞌa Dios ten beuna uzhebpa nkweaꞌ ladna be men, ta weꞌe utuꞌub xa xa nak cuent xeꞌa wizh gor tempran ndoꞌ beuna,
LUK 1:79 ndontsa usu xa xeꞌa ladoꞌo bexa ndencho sa ukaw, bexa nzheb gat. Li uluu Dios beuna nes ten xa, ná xteꞌe wen yoono beuna xa.
LUK 1:80 Leꞌa Juan ngoꞌol, no mas juert ngok ladoꞌo xa. Ngol zha goxla xa ngwaꞌ xa uyoꞌo xa geꞌe sa bid sa naꞌan men, gast ngol zha na usaxan mbidiꞌizh xa ndoꞌ bexa Israel.
LUK 2:1 Leꞌa tiemp weꞌe leꞌa xa nsaleaꞌ Augusto César xa nibeꞌe Roma unibeꞌe gats dub censo ten itea be men.
LUK 2:2 Leꞌa censo ned wa ngwats zha nak Cirenio xa nibeꞌe sa nsaleaꞌ Siria.
LUK 2:3 Leꞌa itea be men cha nseaꞌbe be sa nak lazh bexa, ndontsa sa weꞌe gak punt bexa ndoꞌ censo wa.
LUK 2:4 Ta weꞌe leꞌa Kosé utoꞌo gezh Nazaret ten distrit Galilea. Cha nseaꞌ xa gezh Belén ten distrit Judea, lazh David usan gox polta ten Kosé,
LUK 2:5 ndontsa sa weꞌe gak punt xa no Marí xagots ikaꞌa xa. Leꞌa zha wa leꞌa Marí yá nsoꞌnola meꞌed.
LUK 2:6 Ná leꞌa zha na ncho bexa Belén, leꞌa Marí ngol wizh gap meꞌed.
LUK 2:7 Cha ngop xa meꞌed ned ten xa. Cha mtixko xa meꞌed dub bleꞌa lad, nsea ulo xa meꞌed len dub caj, ta nyoꞌo gix ndaw man, geal leꞌa bexa yá lá ngalta cuart uteꞌe bexa yoo bexa.
LUK 2:8 Leꞌa gax Belén nde pla be xabgiꞌi nkeno be borreg ten na teꞌal wa.
LUK 2:9 Zha leꞌaka dub angel ten Dios mlundoꞌla sa wa. Leꞌa xeꞌa siꞌil ten Dios msula idub sa nde bexa. Cha uzhebpa mzheb bexa.
LUK 2:10 Ná leꞌa angel wa cha ndab: —Lá izheb bega, leꞌa naꞌ ndalyáp ndoꞌ bega dub ta uzhebpa iten ladna itea be men.
LUK 2:11 Leꞌa teꞌal ndee leꞌa gezh Belén lazh David ngol dub meꞌed mtuꞌub Dios usaꞌa gealnaban, leꞌa ta wa Cristo Xa Nibeꞌe.
LUK 2:12 Lndeꞌe igondoꞌ bega ná ta meꞌed na‑yá: leꞌa meꞌed wa izheal bega nbixyoꞌo dub bleꞌa lad, naxncho meꞌed len dub caj ta nyoꞌo gix ndaw be man.
LUK 2:13 Leꞌa gor wa leꞌa kwaꞌadta be angel ten Dios mlundoꞌ sa wa. Ndaltoꞌo bexa ndoꞌ Dios, ndab bexa:
LUK 2:14 ¡Siꞌil nak Dios ncho gaꞌap, no ndoꞌ gizhliyo wen kwe be men ndun ta nsak ladna Dios!
LUK 2:15 Weꞌe leꞌa be angel wa nseaꞌbe gibeꞌa, cha ndab bexa nkeno be man wa ndoꞌ be ltsaꞌa na: —Nchaꞌbe beuna Belén, iniꞌí beuna ta ncho sa wa, ta mbidiꞌizh angel ten Dios.
LUK 2:16 Cha uxax nchaꞌbe bexa Belén. Cha mzheal bexa Marí no Kosé, cha uniꞌí bexa meꞌed wa naxncho meꞌed len ta nyoꞌo gix ndaw be man.
LUK 2:17 Leꞌa gor na uniꞌí bexa meꞌed, cha mbidiꞌizh bexa ta ndab angel cuent ten meꞌed.
LUK 2:18 Leꞌa itea be men na mbiꞌín ta ndab bexa nlaꞌach borreg wa cha ngwanseanabe.
LUK 2:19 Ná leꞌa Marí cha lá yalad ta ndab bexa wa, cha uzhebpa nten ladna xa ndanbeꞌe xa ta wa.
LUK 2:20 Leꞌa bexa nkeno be borreg wa cha nseaꞌbe, ndab bexa leꞌa Dios uzheꞌeb dub Dios siꞌil. No nsaꞌa bexa xno ndoꞌ Dios por itea be taꞌa mbiꞌín bexa no ta uniꞌí bexa lak ndab angel.
LUK 2:21 Leꞌa ngol zha ncho meꞌed wa dub xoꞌon wizh, leꞌa bexa cha ulo beꞌe meꞌed wa. Cha msaleaꞌ bexa meꞌed Jesús, lakka ndab angel isaleaꞌ meꞌed, zha na biseata isoꞌno Marí meꞌed.
LUK 2:22 Leꞌa ngol zha na ngwaꞌa be wizh nsambiꞌi dub xagots ndap meꞌed, lak nibeꞌe ley ten Moisés, weꞌe leꞌa Kosé no Marí cha mbiꞌi Jesús gezh Jerusalén sa nde niꞌi ten Dios, yun bexa cuent Jesús ndoꞌ Dios.
LUK 2:23 Li mbin bexa lak nkeaniꞌi ley ten Dios, ndab‑a: “Leꞌa xinbgiꞌi ned dub xagots wa gak meꞌed ten Dios.”
LUK 2:24 No msaꞌa bexa man xnab lak nibeꞌe ley ten Dios, ndab‑a usaꞌa bexa top ngog natal top palom.
LUK 2:25 Leꞌa gezh Jerusalén uyoꞌo dub xa nsaleaꞌ Simeón, dub xa wen nak ndoꞌ Dios no ndankea xa Dios. No nkenkeaꞌ xa zha ilen xa na koꞌo bexa Israel ndoꞌ be gealkweaꞌ. Leꞌa Espíritu ten Dios uzhebpa ncho len ladoꞌo Simeón.
LUK 2:26 Leꞌa Espíritu wa ndabka ndoꞌ Simeón leꞌa Simeón naꞌanpa gat gast iniꞌíka xa Cristo xa na utuꞌub Dios.
LUK 2:27 Ta weꞌe ngol dub wizh leꞌa Espíritu ten Dios leꞌa ulogek Simeón yaꞌ xa sa nde niꞌi ten Dios. Leꞌa wizh wa leꞌa be usan ten Jesús no nchaꞌano Jesús sa wa, gunno bexa Jesús lak nibeꞌe ley ten Dios.
LUK 2:28 Weꞌe leꞌa Simeón cha udiꞌid Jesús, cha msaꞌa xa xno ndoꞌ Dios, ndab xa:
LUK 2:29 Dios Xa Nibeꞌe, nat leꞌa naꞌ yá syoꞌo gan gat, leꞌa go yá mbinka ta ndab ga gak wa.
LUK 2:30 Leꞌa naꞌ yá uní meꞌed gak xa usaꞌa gealnaban wa,
LUK 2:31 xa na mtuꞌub ga iniꞌí itea be men xa.
LUK 2:32 Leꞌa meꞌed ndee gak xa usu xeꞌa ndoꞌ be men naꞌanpa xa Israel; cha gab bexa leꞌa besa xa Israel xmenka go Dios.
LUK 2:33 Leꞌa Kosé nsea Marí xnaꞌa Jesús ndanseana ta ndadiꞌizh Simeón xteꞌe gak Jesús.
LUK 2:34 Leꞌa Simeón cha unab ndoꞌ Dios ulaꞌach Dios bexa wa, cha ndab xa ndoꞌ Marí xnaꞌa Jesús: —Leꞌa kwaꞌad bexa Israel lá gungea ladna Jesús ndee, weꞌe gak perdid bexa. No leꞌa kwaꞌad bexa Israel gungea ladna Jesús ndee, weꞌe gap bexa gealnaban ndoꞌ Dios. Leꞌa meꞌed ndee gak dub sein ten Dios, ná leꞌa kwaꞌad be men gakloo ndoꞌ xa.
LUK 2:35 Leꞌa ta wa uluu ta ndanbeꞌe bexa len ladoꞌo bexa. Parea leꞌa cuent ten lu leꞌa ta wa gak dub gealkweaꞌ siꞌil iniꞌí lu, cuent dub spad gaꞌas ladoꞌo lu.
LUK 2:36 Leꞌa sa wa no dub profet nsoꞌ, dub xagots nsaleaꞌ Ana xin Fanuel, xa ras ten Aser. Leꞌa Ana wa dub xa goxlapa. Leꞌa xa wa uyoꞌono xabgiꞌi ten na dub gaꞌadtsa liꞌin,
LUK 2:37 cha ngut xabgiꞌi wa. Leꞌa xa wa ncho dap gaꞌal ncho dap liꞌin. Idub tiemp ncho xa tale ten niꞌi ten Dios, teꞌal tezhea ndun xa tiꞌin ndoꞌ Dios, gast ncho wizh lá ndaw xa tant ndadiꞌizhno xa Dios.
LUK 2:38 Leꞌa gor na bi li nsoꞌyadiꞌizh Simeón ndoꞌ Marí, leꞌa Ana cha ulen wats bexa, cha msaꞌa xa xno ndoꞌ Dios. Cha mbidiꞌizh xa cuent ten meꞌed Jesús ndoꞌ itea be men nde sa wa, bexa na ndenkeaꞌ zha koꞌo Dios bexa Jerusalén ndoꞌ be gealkweaꞌ.
LUK 2:39 Leꞌa gor na yá mbin bexa lak nibeꞌe ley ten Dios gun bexa, cha myach bexa Galilea nseaꞌ bexa Nazaret lazh bexa.
LUK 2:40 Cha mas nsayaꞌal Jesús, no nsayoꞌo juers xa, no mas uzheꞌeb nsayák xa. No uzheꞌeb ndakno Dios xa.
LUK 2:41 Leꞌa be usan ten Jesús itea liꞌin ndaꞌbe gezh Jerusalén ujest Pascua ten bexa judio.
LUK 2:42 Leꞌa zha ncho Jesús tibtop liꞌin cha ngwaꞌbe bexa Jerusalén lakka ndun bexa.
LUK 2:43 Leꞌa ngol wizh myandoꞌ ujest wa, cha nseaꞌbe bexa ta lid bexa, parea lá iniꞌí bexa leꞌa Jesús myansoꞌ Jerusalén.
LUK 2:44 Cha usoꞌla bexa idub dub wizh nes, ni bexa gol noka Jesús nchaꞌ lat bexa kwaꞌad wa. Cha usaxan nkwaꞌan bexa Jesús lat be ltsaꞌa bexa no lat bexa nchandoꞌ bexa,
LUK 2:45 parea lá izheal bexa Jesús. Cha myach bexa leꞌaka Jerusalén myaꞌkwaꞌan bexa Jesús.
LUK 2:46 Leꞌa ngol wizh yon cha mzheal bexa Jesús tale ten niꞌi ten Dios. Leꞌa Jesús nsob lat be mech ten ley nsobyoꞌón Jesús ta ndadiꞌizh bexa, nsea nabdiꞌizh Jesús ndoꞌ bexa.
LUK 2:47 Leꞌa itea bexa na ndeyoꞌón ta li ndab Jesús wa ndanseana xteꞌe ndák Jesús no xteꞌe nkaꞌab Jesús.
LUK 2:48 Leꞌa gor na uniꞌí be usan ten Jesús ta wa, cha ngwanseana bexa. Cha ndab Marí ndoꞌ Jesús: —Chuu, ¿xtaꞌanxá lbaꞌa mbinno lu besa zhaga? Leꞌa naꞌ nsea xus lu baꞌ nyuꞌpa ladna besa, nseakwaꞌan besa lu.
LUK 2:49 Ná leꞌa Jesús cha ukaꞌab ndab: —¿Xtaꞌan nkwaꞌan bega naꞌ zha? ¿Ná lá iniꞌí bega zha leꞌa naꞌ nsabndoꞌka gun tiꞌin ten Dios Xus naꞌ?
LUK 2:50 Ná leꞌa be usan ten Jesús lá yakbeꞌena ta ndab Jesús.
LUK 2:51 Leꞌa Jesús cha nseaꞌno bexa gezh Nazaret, nxobgek meꞌed ndoꞌ bexa. Leꞌa xnaꞌa Jesús lá yalad be ta utid wa.
LUK 2:52 Leꞌa Jesús cha mas nsayaꞌal no mas nsayák meꞌed. No mas nsak ladna Dios no be men lak nak Jesús.
LUK 3:1 Leꞌa zha na nchasea dub tiꞌinla liꞌin nak Tiberio xa nibeꞌe Roma, leꞌa Poncio Pilat nak xa nibeꞌe idub distrit Judea. Leꞌa Herodes nibeꞌe Galilea. Leꞌa wit xa Julip nibeꞌe Iturea no Traconite. Leꞌa Lisanias nak xa nibeꞌe Abilinia.
LUK 3:2 Leꞌa Anás no Caifás nak be uleꞌay ndon leꞌa nsak lat bexa judio. Zha weꞌe leꞌa Dios uníꞌi ndoꞌ Juan xin Zacarías, zha ncho xa geꞌe sa bid sa uxee ncho men.
LUK 3:3 Leꞌa Juan cha nchasea idub gax toꞌo yowbeꞌe Jordán, mbidiꞌizh xa ndoꞌ be men, ndab xa ulaꞌa bexa be ta ugap nak bexa no italeaꞌ bexa, ndontsa utsuꞌu Dios be ke ten bexa.
LUK 3:4 Leꞌa ta wa ngok lak mkeꞌa profet Isaías polta cuent ten Juan, ndab‑a: Leꞌa xa wa ikeseyadiꞌizh geꞌe sa bid, ugeꞌ gab xa: “Bin parej bega nes ilen Xa Nibeꞌe, bkeasoꞌ bega nes ten xa.
LUK 3:5 Itea be sa wat nak izheayobe, itea be geꞌe ubiꞌi no be bet byux yak lat sa wa. Leꞌa be nes naꞌanpa bgea nak wa igeasoꞌbe; leꞌa be nes ngwap ulaꞌ nak wa yakchaꞌawbe.
LUK 3:6 Leꞌa itea be men iniꞌí xteꞌe koꞌo Dios bexa ndoꞌ be ke ten bexa.” Li mkeꞌa Isaías sakndoꞌ Dios.
LUK 3:7 Leꞌa zha wa leꞌa kwaꞌad be men ulen wats Juan koleaꞌ Juan bexa. Leꞌa Juan cha ndab ndoꞌ bexa: —¡Bego xa ugap cuent be mbeꞌal! ¿Ton ndab ndoꞌ bego italeaꞌtsa bega, cha naꞌanpa utsaksi Dios bega zha?
LUK 3:8 Bin bega ta wen, ta uluu leꞌa bega mlaꞌaka be ta ugap. No ni lá gunbeꞌe bega gab bega leꞌa bega ras ten Abraham, ta weꞌe leꞌa Dios naꞌanpa utsaksi bega. Leꞌa naꞌ gáp leꞌa Dios syoꞌo gan gunno be geꞌ ndee bexa ras Abraham.
LUK 3:9 Leꞌa Dios listla nsoꞌ utsaksi xa bexa ndun ta ugap, cuent dub xa nsoꞌnsén dub gibya kabtoꞌog xa itea be ya lá nsaꞌa ngus wen, cha utsaꞌab xa ta wa ndoꞌ giꞌ yolꞌ‑a.
LUK 3:10 Leꞌa be men wa cha unabdiꞌizh ndab bexa ndoꞌ Juan: —¿Xtaꞌan nsabndoꞌ gun besa zha?
LUK 3:11 Leꞌa Juan cha ndab: —Leꞌa bego na ndap top gamix, bsaꞌa bega dub‑a ndoꞌ xa lá ndap‑a. Liga bego na ndap sian ta ndaw na, bsaꞌa bego ta gaw bexa lá ndap‑a.
LUK 3:12 Leꞌa pla bexa nsen med nkix be men ndoꞌ xa nibeꞌe Roma cha ulayaꞌ wats Juan. Leꞌa bexa wa no nlad italeaꞌ, ndab bexa ndoꞌ Juan: —Mech, ¿xtaꞌan nsabndoꞌ gun besa zha?
LUK 3:13 Leꞌa Juan cha ndab: —Lá inab bega mas sian med ndoꞌ dub lak nsabndoꞌ‑yá.
LUK 3:14 Weꞌe no stapla soldad unabdiꞌizh ndab: —¿Besa zha xtaꞌan nsabndoꞌ gun? Leꞌa Juan cha ndab: —Naꞌanpa ucheb bega be men, no lá ulat bega med ten bexa. No lá usake bega dub men dub taꞌa naꞌanpa ngun xa. Bten ladna bego nsea tal plo ta nkix xa nkaꞌa bega.
LUK 3:15 Leꞌa be men wa ndenkeaꞌ zha ilen Cristo, no ndanbeꞌe bexa naga lid leꞌa Juan nak xa wa.
LUK 3:16 Ta weꞌe leꞌa Juan cha ndab ndoꞌ itea bexa: —Leꞌa naꞌ ndee nits‑tsa ngoleaꞌ bega, ná leꞌa tsoꞌo naꞌ ilen stub xa koleaꞌ be men no Espíritu ten Dios no giꞌ. Leꞌa xa wa mas nsak ndoꞌ naꞌ gast ni lá isaya naꞌ kote naꞌ ndab xa wa.
LUK 3:17 Leꞌa xa wa listla nsoꞌ uti be men wen lat bexa ugap, cuent dub men nti bid ten trig lat be gix xab‑a. Cha kochaꞌaw xa trig wa len niꞌi, nsea utsoꞌol xa xab‑a wa ndoꞌ giꞌ nunk lá yuꞌu.
LUK 3:18 Leꞌa be ta ndee no sianta be taꞌa mtenxeꞌa Juan be men, mbidiꞌizh xa diꞌizh wen ten Dios ndoꞌ bexa wa.
LUK 3:19 Leꞌa tsoꞌo wa leꞌa Juan ndab ndoꞌ Herodes xa nibeꞌe Galilea leꞌa ta mbin Herodes naꞌanpa leꞌa nak ndoꞌ Dios, geal leꞌa xa ukaꞌa Herodías xagots ten Julip wit xa no sianta be ta ugap mbin xa.
LUK 3:20 Weꞌe leꞌa Herodes mbin stub ta mas ugap, unibeꞌe xa ikea Juan litgiꞌib.
LUK 3:21 Leꞌa zha na bi li ngoleaꞌ Juan kwaꞌad be men, leꞌa xa no Jesús ulaleaꞌ zha wa. Leꞌa gor weꞌe uníꞌi Jesús ndoꞌ Dios, cha myaꞌal gibeꞌa.
LUK 3:22 Weꞌe leꞌa Espíritu ten Dios cha ulen gibeꞌa cuent dub palom nchaꞌlaꞌ sa nsoꞌ Jesús. No ulen ti Dios gibeꞌa ndab ndoꞌ Jesús: —Lu nak Xiꞌín naꞌ. Leꞌa naꞌ nkweaꞌ ladna lu, no ntenno lad naꞌ lu.
LUK 3:23 Leꞌa Jesús ncho pa dub galntiꞌila liꞌin zha na usaxan xa ndun xa tiꞌin mtuꞌub Dios xa gun xa. Leꞌa be men ndab leꞌa Jesús xin Kosé. Leꞌa Kosé xin Elí.
LUK 3:24 Elí xin Matat, Matat xin Leví, Leví xin Melqui, Melqui xin Jana, Jana xin Kosé,
LUK 3:25 Kosé xin Matatías, Matatías xin Amós, Amós xin Nahum, Nahum xin Esli, Esli xin Nagai,
LUK 3:26 Nagai xin Maat, Maat xin Matatías, Matatías xin Semei, Semei xin Kosé, Kosé xin Judá,
LUK 3:27 Judá xin Joana, Joana xin Resa, Resa xin Zorobabel, Zorobabel xin Salatiel, Salatiel xin Neri,
LUK 3:28 Neri xin Melqui, Melqui xin Adi, Adi xin Cosam, Cosam xin Elmodam, Elmodam xin Er,
LUK 3:29 Er xin Josué, Josué xin Eliezer, Eliezer xin Jorim, Jorim xin Matat,
LUK 3:30 Matat xin Leví, Leví xin Simeón, Simeón xin Judá, Judá xin Kosé, Kosé xin Jonán, Jonán xin Eliaquim,
LUK 3:31 Eliaquim xin Melea, Melea xin Mainán, Mainán xin Matata, Matata xin Natán,
LUK 3:32 Natán xin David, David xin Isaí, Isaí xin Obed, Obed xin Booz, Booz xin Salmón, Salmón xin Naasón,
LUK 3:33 Naasón xin Aminadab, Aminadab xin Aram, Aram xin Esrom, Esrom xin Fares, Fares xin Judá,
LUK 3:34 Judá xin Jacob, Jacob xin Isaac, Isaac xin Abraham, Abraham xin Taré, Taré xin Nacor,
LUK 3:35 Nacor xin Serug, Serug xin Ragau, Ragau xin Peleg, Peleg xin Heber, Heber xin Sala,
LUK 3:36 Sala xin Cainán, Cainán xin Arfaxad, Arfaxad xin Sem, Sem xin Noé, Noé xin Lamec,
LUK 3:37 Lamec xin Matusalén, Matusalén xin Enoc, Enoc xin Jared, Jared xin Mahalaleel, Mahalaleel xin Cainán,
LUK 3:38 Cainán xin Enós, Enós xin Set, Set xin Adán, Adán xin Dios.
LUK 4:1 Leꞌa Espíritu ten Dios cha msaꞌa juers ndoꞌ Jesús, cha utoꞌo Jesús toꞌo yowbeꞌe Jordán. Cha mbiꞌi Espíritu ten Dios xa geꞌe sa bid sa naꞌan men.
LUK 4:2 Leꞌa Jesús uyoꞌo dub top gaꞌal wizh sa wa. Leꞌa maxuꞌu mbin preb Jesús, nlad maxuꞌu utsabgix maxuꞌu Jesús. Leꞌa be wizh wa leꞌa Jesús lá ngaw, ta weꞌe zha utid be wizh wa leꞌa xa uzhebpa ndanna.
LUK 4:3 Weꞌe leꞌa maxuꞌu cha ndab ndoꞌ xa: —Tal leꞌa lu Xin Dios, nat gud ndoꞌ geꞌ baꞌ yak‑a pan.
LUK 4:4 Leꞌa Jesús cha ukaꞌab ndab: —Leꞌa diꞌizh ten Dios nkeaniꞌi: “Naꞌanpa nabtsa ta ndaw men nban bexa. Mas nsak nxobgek men ndoꞌ diꞌizh ten Dios, leꞌa ta wa ndun nban xa.”
LUK 4:5 Weꞌe leꞌa maxuꞌu cha mbiꞌi Jesús gek dub geꞌe gaꞌappa. Cha uxax mluu maxuꞌu itea be gezh nde ndoꞌ gizhliyo.
LUK 4:6 Cha ndab maxuꞌu ndoꞌ Jesús: —Leꞌa itea be gezh baꞌ no itea be ta nsak ncho ndoꞌ be gezh baꞌ, leꞌa ta wa usa naꞌ ndoꞌ lu inibeꞌe lu‑yá. Leꞌa ta baꞌ ta nibeꞌe naꞌ, no sak usa naꞌ‑yá ndoꞌ bexa nlad naꞌ.
LUK 4:7 Tal leꞌa lu isaxib ndoꞌ naꞌ yankea lu naꞌ, leꞌa naꞌ usa itea be ta baꞌ ikaꞌa lu.
LUK 4:8 Leꞌa Jesús cha ndab ndoꞌ maxuꞌu: —Bxoꞌon wats naꞌ, maxuꞌu. Leꞌa diꞌizh ten Dios nkeaniꞌi ndab‑a: “Wankea Dios Xa Nibeꞌe, no bin ta nladtsa xa.”
LUK 4:9 Weꞌe leꞌa maxuꞌu cha mbiꞌigal Jesús gezh Jerusalén gek niꞌi ten Dios sa ndon leꞌa gaꞌap. Cha ndab maxuꞌu: —Tal leꞌa lu Xin Dios, nat btsaꞌab brink gast ndoꞌ yo baꞌ,
LUK 4:10 geal leꞌa diꞌizh ten Dios nkeaniꞌi ndab‑a: Leꞌa Dios utuꞌub be angel ten na ulaꞌach lu.
LUK 4:11 Leꞌa bexa wa goꞌo lu ndoꞌ yaꞌa na, ndontsa ni lá ikateꞌeb lu ndoꞌ ni dub geꞌ.
LUK 4:12 Leꞌa Jesús cha ukaꞌab ndab: —No ndab diꞌizh ten Dios: “Lá gun lu preb Dios Xa Nibeꞌe.”
LUK 4:13 Cha li mteꞌa maxuꞌu be ta mbin maxuꞌu preb Jesús wa, cha mlaꞌa maxuꞌu xa dub ndeꞌep.
LUK 4:14 Leꞌa Jesús cha mlanseaꞌ distrit Galilea, cha mas uyoꞌo juers ten Espíritu ten Dios xa. Leꞌa be ta mbin Jesús cha mgen itea be sa gax sa wa.
LUK 4:15 No mluu Jesús be men len be niꞌi sa nzhealbe bexa judio. Cha ndab bexa leꞌa Jesús leꞌaka ndadiꞌizh.
LUK 4:16 Tsoꞌo wa leꞌa Jesús cha nseaꞌ Nazaret sa na ngoꞌol xa. Leꞌa ngol dub wizh neꞌe bexa judio, leꞌa xa cha no uyoꞌo len niꞌi sa nzhealbe bexa wa, lakka ndun xa. Cha ngwasoꞌ xa goꞌol xa diꞌizh ten Dios.
LUK 4:17 Cha msaꞌa bexa dub libr nyuꞌud ndoꞌ Jesús, ta nsoꞌ diꞌizh mkeꞌa Isaías, xa mbidiꞌizh sakndoꞌ Dios tiemp polta. Leꞌa gor na mxaꞌal xa git wa, cha mzheal xa sa ndab‑a:
LUK 4:18 Leꞌa Espíritu ten Dios Xa Nibeꞌe ncho ladoꞌo naꞌ, leꞌa Dios mti naꞌ gudiꞌizh naꞌ ndoꞌ be men uban nak leꞌa Dios gakno bexa. No gun naꞌ wen yoo ladna bexa kweaꞌ ncho ladna, no itoꞌo bexa nkea litgiꞌib, no inaꞌ bexa lá naꞌ. No ko naꞌ bexa kweaꞌ ndencho ndoꞌ yaꞌa be men,
LUK 4:19 no ndalyáp naꞌ leꞌa Dios Xa Nibeꞌe yá ngol tiemp gakno be xmen na.
LUK 4:20 Cha mtsaw Jesús git wa, cha msaꞌa xa‑yá ndoꞌ xa nchansu sa wa, cha usob xa. Leꞌa itea be men nde len niꞌi wa cha nwiꞌi ndoꞌ Jesús.
LUK 4:21 Leꞌa Jesús cha ndab ndoꞌ bexa: —Nat ngok cumplir be diꞌizh ndee ndoꞌ gaꞌal bega.
LUK 4:22 Leꞌa itea be men wa ndab leꞌa Jesús dub xa wenka. No ngwanseana bexa ndoꞌ be ta li mbidiꞌizh Jesús wa, ndab bexa: —¿Lid xin Kosé xa baꞌ zha?
LUK 4:23 Leꞌa Jesús cha ndab: —Ta ugeapa leꞌa bego gab dub diꞌizh ndee ndoꞌ naꞌ: “Doctor, byunyakna go leꞌaka go. Bin ga be uyon lazh ga ndee, lak ndoꞌón besa mbin go be uyon gezh Capernaum.”
LUK 4:24 Cha no ndab Jesús: —Leꞌa naꞌ gáp ndoꞌ bego leꞌa ni dub profet lá gungea ladna bexa lazh xa ti profet xa.
LUK 4:25 No gáp naꞌ leꞌa tiemp uyoꞌo profet Elí, lá ilaꞌ gi chon liꞌin ncho xoꞌop mbeꞌe, cha uzhebpa uyoꞌo win idub Israel. Leꞌa zha wa leꞌa kwaꞌad be xagots nab ngut xabgiꞌi ten na uyoꞌo Israel.
LUK 4:26 Parea leꞌa Dios ni dub ndoꞌ be xagots Israel wa lá utuꞌub Elí. Leꞌa xa wa ndi ngwaꞌyakno dub xagots ncho gezh Sarepta sa nibeꞌe Sidón.
LUK 4:27 No liga leꞌa tiemp uyoꞌo profet Eliseo, leꞌa kwaꞌad bexa Israel nsén gealgizh lepra, parea ni dub bexa wa lá yunyakna xa. Leꞌa xa ndi myunyakna dub xa nsaleaꞌ Naamán, xa nacion Siria.
LUK 4:28 Leꞌa gor na mbiꞌín bexa ta ndab Jesús, cha uzhebpa ngokloo itea bexa.
LUK 4:29 Cha ngwasoꞌ bexa, mbiꞌi juers bexa Jesús toꞌo gezh sa mas gaꞌap gek bet wa, ndiꞌizh utsuꞌub bexa Jesús.
LUK 4:30 Parea leꞌa Jesús cha myach, mtid xa tlaw bexa wa, cha nseaꞌ xa.
LUK 4:31 Leꞌa Jesús cha nchaꞌa Capernaum dub gezh ten distrit Galilea. Leꞌa ngol be wizh neꞌe bexa judio, leꞌa Jesús cha mluu be men len niꞌi sa nzhealbe bexa wa.
LUK 4:32 Leꞌa bexa wa ndanseana xteꞌe ndadiꞌizh xa, geal leꞌa ta ndadiꞌizh xa wa nluu leꞌa xa uzheꞌeb ndap juers.
LUK 4:33 Ngol dub wizh leꞌa dub xabgiꞌi nsak gizh tont ncho mbi bxin len ladoꞌo na no nsob sa wa. Leꞌa mbi bxin wa cha ugeꞌ ndab ndoꞌ Jesús:
LUK 4:34 —Blaꞌa besa. ¿Xtaꞌan nsea ugal lu besa, Jesús xa Nazaret? ¿Nsea unitndoꞌ lu besa zha? Leꞌa naꞌ nchandoꞌ lu, leꞌa lu xa umbiꞌi mtuꞌub Dios.
LUK 4:35 Leꞌa Jesús cha uteyo mbi bxin wa, ndab xa: —¡Kexga lu! ¡Utoꞌo ladoꞌo xa baꞌ! Weꞌe leꞌa mbi bxin wa cha udabi xabgiꞌi wa ndoꞌ yo lat be men, cha utoꞌo mbi bxin wa len ladoꞌo xa, naꞌanta xtaꞌan ngunno ta wa xa.
LUK 4:36 Weꞌe leꞌa itea be men wa ngwanseana, ndab bexa ndoꞌ ltsaꞌa bexa: —¿Xteꞌe nak diꞌizh ten xa ndee zha? Leꞌa xa ndee ndap juers nibeꞌe xa ndoꞌ be mbi bxin, cha ntoꞌo be mbi bxin wa len ladoꞌo be men.
LUK 4:37 Leꞌa ta li mbin Jesús wa cha mgen itea be gezh ndebe gax sa wa.
LUK 4:38 Weꞌe leꞌa Jesús cha utoꞌo len niꞌi wa, cha nchaꞌa xa ta lid Simón. Leꞌa xnazhaꞌap Simón uzhebpa kweaꞌ nsak, ncho xlea xa. Cha unab bexa ndoꞌ Jesús yunyakna Jesús xa wa.
LUK 4:39 Leꞌa Jesús cha ubii sa nax xa wa, cha uteyo Jesús xlea wa, cha mtoꞌo xlea wa xa. Cha bi leꞌa gor wa ngwaste xa, msaꞌa xa ta gaw bexa.
LUK 4:40 Leꞌa gor na yá ngwaꞌasla wizh leꞌa be men ulenno kwaꞌadpa bexa gizh ndoꞌ Jesús, bexa nsén isandoꞌ gealgizh. Leꞌa Jesús cha mxoꞌob yaꞌa na las kadga dub bexa gizh wa, cha myakna bexa.
LUK 4:41 No ulantuꞌub Jesús be mbi bxin ncho ladoꞌo kwaꞌad bexa. Leꞌa be mbi bxin wa ugeꞌ ndab ndoꞌ Jesús: —¡Lu nak Xin Dios! Leꞌa Jesús cha uteyo be mbi bxin wa, no lá ulaꞌata Jesús iníꞌi bena wa, geal leꞌa be mbi bxin wa uniꞌí leꞌa Jesús leꞌa nak Cristo xa mtuꞌub Dios.
LUK 4:42 Ngol stubtsa wizh leꞌa Jesús cha mkaꞌan sa wa, nchaꞌa xa dub sa naꞌan men. Ná leꞌa be men cha mkwaꞌan xa. Leꞌa ngol gor na mzheal bexa Jesús, ndab bexa ndoꞌ xa lá ikaꞌan xa gezh ten bexa.
LUK 4:43 Leꞌa Jesús cha ukaꞌab ndab: —Leꞌa naꞌ no be gezh xaꞌaga nsabndoꞌ gudiꞌizh diꞌizh wen, ná xteꞌe nibeꞌe Dios be men. Leꞌa Dios tiꞌin weꞌe mtuꞌub naꞌ.
LUK 4:44 Cha nchasea Jesús be gezh nibeꞌe Galilea, nluu xa be men len be niꞌi sa nzhealbe bexa judio.
LUK 5:1 Leꞌa dub wizh nsoꞌ Jesús toꞌo lagun nsaleaꞌ Genesaret. Leꞌa sa wa nde kwaꞌad be men nlad goꞌón diꞌizh wen ten Dios.
LUK 5:2 Leꞌa Jesús cha uniꞌí top barco nde toꞌo nits wa. Leꞌa bexa nsen mbeal ndeusat be red ten na.
LUK 5:3 Weꞌe leꞌa Jesús cha ukea ndoꞌ barco ten xa na nsaleaꞌ Simón, ndab xa ndoꞌ Simón: —Bsiꞌi barco ndee isasitxá‑yá toꞌo nits. Cha usob Jesús, cha usaxan xa nluugal xa be men kwaꞌad nde toꞌo nits wa.
LUK 5:4 Leꞌa gor na mtayadiꞌizh xa ndoꞌ be men wa, cha ndab xa ndoꞌ Simón: —Btseꞌa barco ndee sa mas wat, cha btsaꞌab bego be red ten bega ndontsa igaꞌa mbeal.
LUK 5:5 Leꞌa Simón ukaꞌab ndab: —Mech, leꞌa besa idub teꞌal mbin tiꞌin, ná ni dub man lá isen besa. Parea nat leꞌa naꞌ utsaꞌab red ndee leꞌa go leꞌa li ndab.
LUK 5:6 Leꞌa gor na li mbin bexa wa, leꞌa red wa cha mzhea uyoꞌo be mbeal gast usaxan nsasaw‑a.
LUK 5:7 Cha mbin bexa sein ndoꞌ be ltsaꞌa xa ndiꞌib ndoꞌ stub barco wa, ndontsa giꞌid yakno bexa. Leꞌa bexa wa cha ulenno stub barco, cha mchea bexa itop barco wa uyoꞌo be mbeal gast ngi slaꞌyoꞌo be barco len nits.
LUK 5:8 Leꞌa gor na uniꞌí Simón Pedr ta wa, cha msaxib xa ndoꞌ Jesús, ndab xa: —Bxoꞌon ga wats naꞌ, Señor. Leꞌa naꞌ lá nsabndoꞌ isoꞌ wats ga, leꞌa naꞌ dub xa ndap ke ndoꞌ Dios.
LUK 5:9 Li ndab Simón geal leꞌa xa nsea be ltsaꞌa xa ndanseana no nzheb bexa gor na uniꞌí bexa ta na li mgaꞌa sian mbeal wa.
LUK 5:10 No liga ngwanseana Jacob nsea Juan, be xin Zebedeo, bexa ltsaꞌa ndunno Simón tiꞌin. Leꞌa Jesús cha ndab ndoꞌ Simón: —Lá izheb lu, nat leꞌa lu gak xa yunjunt be men ndoꞌ Dios.
LUK 5:11 Leꞌa bexa wa cha myoꞌo be barco wa toꞌo nits ndoꞌ yo, cha mlaute bexa itea be taꞌa ten bexa, cha nchaꞌano bexa Jesús.
LUK 5:12 Leꞌa dub biaj zha uyoꞌo Jesús dub gezh, cha ulen dub xabgiꞌi wats Jesús, dub xa nsaꞌgea las na, nsén gealgizh lepra xa. Leꞌa gor uniꞌí xa Jesús, cha msaxib xa ndoꞌ Jesús gast ndoꞌ yo ngol xtuzh xa. Cha ndab xa ndoꞌ Jesús: —Señor, tal go nlad yunyakna go naꞌ, leꞌa naꞌ uní leꞌa go sunka gan.
LUK 5:13 Leꞌa Jesús cha mxoꞌob yaꞌa na tsoꞌo xa wa, cha ndab Jesús: —Nladka naꞌ yakna lu. Nat myakna lu. Cha bi leꞌa gor wa leꞌa gealgizh wa cha unitndoꞌ.
LUK 5:14 Weꞌe leꞌa Jesús cha unibeꞌe ndoꞌ xa, ndab Jesús: —Naꞌan ton ndoꞌ ná gudiꞌizh lu xteꞌe myakna lu. Ndi waꞌ ndoꞌ uleꞌay iniꞌí xa leꞌa lu myaklana. No biꞌi be man xnab lak unibeꞌe ley mkeꞌa Moisés usaꞌa be men zha na myakna bexa, ndontsa iniꞌí be men leꞌa lu myaklana.
LUK 5:15 Ná leꞌa be ta li mbin Jesús wa uzhebpa mgen. Weꞌe leꞌa kwaꞌad be men ulansea wats Jesús, goꞌón bexa diꞌizh ten Jesús nsea yunyakna Jesús bexa.
LUK 5:16 Ná leꞌa Jesús sian biaj ntoꞌo nab, ndaꞌyadiꞌizhno xa Dios sa naꞌan men.
LUK 5:17 Leꞌa ngol dub wizh leꞌa Jesús mluugal be men len dub niꞌi. Leꞌa sa wa no pla be mech ten ley ndebe no stapla bexa fariseo, bexa utoꞌo be gezh ten Galilea no be gezh ten Judea no Jerusalén. No uzheꞌeb msaꞌa Dios juers ndoꞌ Jesús yunyakna xa be men.
LUK 5:18 Cha ulayaꞌno pla bexa dub xabgiꞌi gizh lá yoo gan isea, nchoꞌob xa ndoꞌ dub yaloꞌon. Leꞌa bexa wa nlad goꞌo xa gizh wa gast len niꞌi sa nsoꞌ Jesús.
LUK 5:19 Ná leꞌa bexa wa lá yoꞌo gan yate len niꞌi wa tant kwaꞌad men nde sa wa. Cha ndi ukea bexa gek niꞌi, cha mxaꞌal bexa‑yá. Cha mlaꞌko bexa yaloꞌon nax xa gizh wa ndoꞌ na sa nsoꞌ Jesús lat be men wa.
LUK 5:20 Leꞌa Jesús cha mnaꞌla leꞌa bexa ngeꞌ ladna leꞌa Jesús sun gan yunyakna xa gizh wa, cha ndab xa ndoꞌ xa gizh wa: —Mgiꞌi, leꞌa ke ten lu myuꞌula.
LUK 5:21 Weꞌe leꞌa be mech ten ley no bexa fariseo mbinbeꞌe: “¿Tonxá xa ndee zhaga? Leꞌa ta ndab xa uzheꞌeb dub ta lá nsak ladna Dios. ¡Ndon Diostsa suꞌu utsuꞌu be ke ten be men!”
LUK 5:22 Ná leꞌa Jesús cha mgenna xteꞌe ndanbeꞌe bexa wa, cha ndab Jesús: —¿Xtaꞌan lbaꞌa ndanbeꞌe bega len ladoꞌo bega?
LUK 5:23 ¿Xtaꞌan mas lid bid gáp naꞌ, leꞌa ke ten xa ndee myuꞌula, nati gáp naꞌ gaste xa, cha isea xa?
LUK 5:24 Leꞌa nat iniꞌí bega leꞌa naꞌ, Xa Myak Men Ndoꞌ Gizhliyo, no syoꞌo gan utsuꞌu ke ten be men. Weꞌe cha ndab Jesús ndoꞌ xa gizh wa: —Gáp naꞌ ndoꞌ lu goste, cha udob yaloꞌon ten lu, cha byaꞌ ta lid lu.
LUK 5:25 Leꞌa xa wa cha uxax ngwaste ndoꞌ gaꞌal be men wa, cha udob xa yaloꞌon ngot xa ndoꞌ na wa. Leꞌa idub nes nseaꞌ xa nsaꞌa xa xno ndoꞌ Dios.
LUK 5:26 Leꞌa itea be men wa uzhebpa ngwanseana, no ndab bexa leꞌa Dios uzheꞌeb dub Dios siꞌil. No mzheb bexa, ndab bexa ndoꞌ be ltsaꞌa bexa: —¡Nat uniꞌí beuna dub taꞌa uzhebpa ndanseana beuna!
LUK 5:27 Tsoꞌo wa leꞌa Jesús utoꞌo sa wa. Leꞌa sa nchaꞌtid xa uniꞌí xa dub xabgiꞌi nsaleaꞌ Leví nsobyun tiꞌin, nsen xa med nkix be men ndoꞌ gobier Roma. Cha ndab Jesús ndoꞌ xa: —¡Utsea! ¡Usankea tsoꞌo naꞌ!
LUK 5:28 Leꞌa Leví cha ngwasoꞌ, cha mlaꞌa xa tiꞌin ndun xa wa, cha usankea xa tsoꞌo Jesús.
LUK 5:29 Cha ulo Leví dub gast siꞌil ten Jesús ta lid na. Leꞌa sa wa no kwaꞌad bexa ndun ltsaꞌa tiꞌin mbin Leví wa ngwaꞌbe, no kwaꞌad bexa xaꞌaga. Cha junt utebe bexa ndoꞌ mes.
LUK 5:30 Ná leꞌa be mech ten ley no bexa fariseo cha xela uníꞌi ndoꞌ be xmen Jesús, ndab bexa: —¿Xtaꞌan ndawno bega bexa nsen med baꞌ no iteata bexa ugap baꞌ zha?
LUK 5:31 Leꞌa Jesús cha ukaꞌab ndab: —Leꞌa bexa naꞌanpa gizh lá nkiꞌin doctor, ndi leꞌa bexa gizh nkiꞌinka xa wa.
LUK 5:32 Leꞌa naꞌ ndee naꞌanpa ndalteꞌezh bexa ndanbeꞌe leꞌa naꞌanpa ndap ke. Leꞌa naꞌ ndi ndalteꞌezh bexa ngondoꞌ leꞌa ndapka ke, ndontsa yach bexa wats Dios.
LUK 5:33 Weꞌe leꞌa ncho bexa ndab ndoꞌ Jesús: —Leꞌa be xmen Juan ncho sian wizh lá ndaw bexa ndontsa mas gudiꞌizhno bexa Dios. No liga ndun be xmen bexa fariseo. Ná leꞌa be xmen go zha, ¿xtaꞌan lid no bexa li ndun? Sbeꞌen ndeyaw bexa no ndo bexa itea wizh.
LUK 5:34 Leꞌa Jesús cha ukaꞌab ndab: —¿Nsak bega zha leꞌa dub sa nchilyaꞌa men leꞌa bexa nde sa wa lá nsabndoꞌ gaw zha bi ncho xabgiꞌi mchilyaꞌa wa?
LUK 5:35 Parea gal dub wizh leꞌa be men goꞌo xabgiꞌi mchilyaꞌa wa. Weꞌe leꞌa bexa nde sa wa lá gaw dub tiemp.
LUK 5:36 No cha msaktabeꞌe Jesús dub taꞌa mluu xa ndab xa: —Naꞌan ton nxen dub bleꞌa lad kub, cha ko xa ramient ta wa las dub lad gox. Tal leꞌa xa li gun leꞌa lad kub wa syaꞌad, cha mas stsaw‑a lad gox wa. No leꞌa lad kub wa naꞌanpa nsakna no lad gox wa.
LUK 5:37 No naꞌan ton ngo vin kub len dub bols gid gox. Tal leꞌa xa li gun, leꞌa vin kub stsaw bols gox wa. Leꞌa vin wa cha ibid stsiꞌi, no sazhaꞌa bols gox wa.
LUK 5:38 Leꞌa vin kub wa nsabndoꞌ yoo len dub bols gid kubga, ndontsa ni dub‑a lá gazhaꞌa.
LUK 5:39 No tal ton goo vin ncho polta, cha yá lá kaꞌabta xa goo xa vin kub. Leꞌa xa ndab leꞌa vin ncho polta wa mas wen.
LUK 6:1 Leꞌa dub wizh neꞌe be men, leꞌa Jesús nchaꞌtid sa nax dub bleꞌa yo ncho trig. Leꞌa be xmen Jesús cha uxeꞌe pla be bid ten trig, cha uloꞌo bexa xab‑a, cha udaw bexa‑yá.
LUK 6:2 Leꞌa ncho bexa fariseo cha ndab: —¿Xtaꞌan lbaꞌa ndun bega zha, ta lá nsabndoꞌ gun beuna wizh neꞌe beuna?
LUK 6:3 Leꞌa Jesús ukaꞌab ndab: —¿Ni lá ndoꞌol bega sa ndab diꞌizh ten Dios ta mbin David dub biaj, zha na uzhebpa ndanna xa no bexa ndeseano xa zha?
LUK 6:4 Leꞌa David uyoꞌo len niꞌilad ten Dios, cha usen xa be pan leꞌay, cha udaw xa‑yá. No msaꞌa xa‑yá ndoꞌ bexa ndeno xa. Ná leꞌa pan wa naꞌanpa nsabndoꞌ gaw dub men naꞌanpa nak uleꞌay.
LUK 6:5 No ndab Jesús: —Leꞌa naꞌ, Xa Myak Men Ndoꞌ Gizhliyo, noga nibeꞌe wizh neꞌe be men.
LUK 6:6 Ngol stub wizh neꞌe be men, leꞌa Jesús cha uyoꞌo len niꞌi sa nzhealbe bexa judio, cha mluu xa be men. Leꞌa sa wa nsob dub xabgiꞌi ubidya dub yaꞌa na, ná lad gaꞌal.
LUK 6:7 Leꞌa bexa fariseo no be mech ten ley cha ndeulaꞌach naga syunyakna Jesús xa gizh wa wizh neꞌe bexa, ndontsa litsa usake bexa Jesús.
LUK 6:8 Ná leꞌa Jesús mgenna ta ndanbeꞌe bexa, cha ndab xa ndoꞌ xa gizh yaꞌa na wa: —Gosoꞌ, cha usoꞌ tlaw ndee. Leꞌa xa wa cha usoꞌ sa wa.
LUK 6:9 Leꞌa Jesús cha ndab ndoꞌ be men wa: —Leꞌa naꞌ inabdiꞌizh dub taꞌa ndoꞌ bego. ¿Leꞌa wizh neꞌe beuna nsabndoꞌ gun beuna ta wen, nati gun beuna ta ugap? ¿Gakno beuna dub men, nati ulaꞌa beuna gat xa?
LUK 6:10 Cha mwiꞌi Jesús ndoꞌ itea be men ndebe idub gangeak, cha ndab xa ndoꞌ xa gizh yaꞌa na wa: —Bkea yaꞌa lu. Leꞌa xa wa cha mkea yaꞌa na, cha uxax myakna‑yá.
LUK 6:11 Weꞌe leꞌa bexa nde sa wa uzheꞌeb ngoklobe, ndab bexa ndoꞌ be ltsaꞌa bexa ná xteꞌe gunno bexa Jesús.
LUK 6:12 Ngol tsoꞌo wa leꞌa Jesús ukea dub bet sa nchaꞌyadiꞌizhno xa Dios idub teꞌal.
LUK 6:13 Ngol gor na ngot xeꞌa, cha utezh Jesús itea be men ndeseano xa. Cha mti xa dub tibtop bexa utuꞌub xa gun bexa tiꞌin ten Dios.
LUK 6:14 Leꞌa bexa wa lndeꞌe nsaleaꞌ: Simón xa msaleaꞌ Jesús Pedr, no Ndres wit Simón, no Jacob no Juan no Julip no Bartol
LUK 6:15 no Mateo no Tomás no Jacob xin Alfeo, no Simón xa partid Zelote,
LUK 6:16 no Judas wit Jacob no Judas Iscariot, xa na leꞌa myun cuent Jesús tsoꞌo wa.
LUK 6:17 Cha mlayoꞌo Jesús no be xmen xa bet wa ngol dub sa lat. Leꞌa sa wa ndebe kwaꞌad be men, bexa utoꞌo gezh Jerusalén no idub distrit Judea no toꞌo nitsdoꞌo sa nde gezh Tiro nsea gezh Sidón. Leꞌa bexa wa nseabeyoꞌón ná xtaꞌan gudiꞌizh Jesús, nsea yunyakna Jesús bexa nsén gealgizh.
LUK 6:18 No myunyakna xa be men kweaꞌ nsak, ncho mbi bxin len ladoꞌo na.
LUK 6:19 Leꞌa itea be men gizh wa nlad ugal las Jesús, geal leꞌa las Jesús ntoꞌo juers nyunyakna bexa.
LUK 6:20 Leꞌa Jesús cha mwiꞌi ndoꞌ be xmen na, ndab xa: —Uzheꞌeb wen yoo ladna bego na uban nak, leꞌa Dios nibeꞌe ladoꞌo bega.
LUK 6:21 ’No uzheꞌeb wen yoo ladna bego na nkwaꞌan gun lak nlad Dios, leꞌa Dios saꞌa ta nlad bega wa. ’No uzheꞌeb wen yoo ladna bego na ndoꞌon, leꞌa gal gor wen yoo bega uxiꞌid bega.
LUK 6:22 ’No uzheꞌeb wen yoo ladna bego na nxee ladna be men ndoꞌ na, no lá nlad bexa uchealtsaꞌa bexa bega, no xela níꞌi bexa ndoꞌ bega. Li ugap gunno bexa bega ta na nak bega xmen naꞌ, Xa Myak Men Ndoꞌ Gizhliyo.
LUK 6:23 Uzhebpa bten ladna bega be zha li wa, leꞌa Dios uzhebpa usaꞌa be ta wen ndoꞌ bega gibeꞌa. Leꞌa bexa na li ugap ndanno bega wa, leꞌa be usan gox polta ten bexa wa likaga ugap mbinno bexa mbidiꞌizh sakndoꞌ Dios.
LUK 6:24 ’Parea ¡proꞌob bego xa rik, leꞌa bega wen ndencho nattsa!
LUK 6:25 ’¡No proꞌob bego bexa ndap itea be taꞌa nlad na, leꞌa bega galka gor yá lá gapta be ta wa! ’¡No proꞌob bego na nxiꞌid, leꞌa gal gor leꞌa bega uban yoo ladna no goꞌon bega!
LUK 6:26 ’¡No proꞌob bego na utsin nak be men ndoꞌ na, leꞌa be usan gox polta ten be men wa lika utsin ngok ndoꞌ bexa na nkwiꞌin ndab leꞌa ndadiꞌizh sakndoꞌ Dios!
LUK 6:27 ’Parea leꞌa naꞌ gáp ndoꞌ bego na nlad goꞌón, bkweaꞌ ladna bega bexa na ndakloo ndoꞌ bega, no utsin gok bega ndoꞌ bexa nxee ladna ndoꞌ bega.
LUK 6:28 No utsin uníꞌi bega ndoꞌ bexa nisi bega. No unab bega ndoꞌ Dios gakno Dios bexa xela níꞌi ndoꞌ bega.
LUK 6:29 Leꞌa tal ton kichyaꞌa dub lad ndoꞌ bega, blaꞌa bega kichyaꞌa xa no stubga lad. No tal ton ulat dub xab bega, blaꞌa bega goꞌo xa gast no stub‑a.
LUK 6:30 No tal ton inab dub taꞌa ndoꞌ bega, bsaꞌa bega‑yá. No tal ton goꞌo dub taꞌa ten bega, lá inab bega‑yá ndoꞌ xa.
LUK 6:31 Utsin gunno bega be men lak nlad bega utsin gunno be men bega.
LUK 6:32 ’Tal leꞌa bega nkweaꞌ ladna beꞌen bexa nkweaꞌtsa ladna bega, ¿xteꞌe ni bega utsin ndun bega zha? Leꞌa be men ugap no lika ndun.
LUK 6:33 No tal leꞌa bega utsin nak ndoꞌ bexa na utsin nak ndoꞌ bega, ¿xteꞌe ni bega utsin nak bega zha? Leꞌa bexa ugap no likaga ndun.
LUK 6:34 No tal leꞌa bega ngodiꞌin dub taꞌa ndoꞌ bexa na uniꞌí bega skixka‑yá, ¿xteꞌe ni bega utsin ndun bega zha? Leꞌa bexa ugap no li ngodiꞌin be taꞌa ndoꞌ stub xa, cha nkenkeaꞌ bexa leꞌa xa wa skixka ta wa.
LUK 6:35 Bkweaꞌ ladna bega bexa ndakloo ndoꞌ bega, no utsin gok bega. No leꞌa gor na ngodiꞌin bega dub ta nkiꞌin stubga men, lá ikenkeaꞌ bega kix xa‑yá. Weꞌe leꞌa Dios uzheꞌeb usaꞌa ta wen ndoꞌ bega, no isaleaꞌ bega xin Dios siꞌil. Leꞌa Dios uzheꞌeb dub xa wen ndoꞌ itea be men, gast ndoꞌ bexa lá nsaꞌa xno ndoꞌ Dios no ndoꞌ bexa ugap nak.
LUK 6:36 Bkweaꞌ ladna bega be men, lakta nkweaꞌ ladna Dios Xus beuna be men.
LUK 6:37 ’Lá gab bega leꞌa be men lid leꞌa ndun, ndontsa naꞌanpa gab Dios leꞌa bega lid leꞌa ndun. No naꞌanpa gab bega leꞌa bexa ndap ke, ndontsa naꞌanpa gab Dios leꞌa bego ndap ke. Bingeꞌ ladna bega ndoꞌ be men, ndontsa no Dios sungeꞌ ladna ndoꞌ bego.
LUK 6:38 Bsaꞌa bega ta nkiꞌin be men, cha no Dios usaꞌa sian taꞌa ikaꞌa bega, lak ndun dub men nsaꞌa sian taꞌa. Ntiꞌix xa‑yá, cha nkadko xa‑yá, no nkwiꞌin xa‑yá ndontsa sian‑a yoo gast iteꞌach‑a. Leꞌa lak ndakno bega be men, no liga gakno Dios bega.
LUK 6:39 Weꞌe msaktabeꞌe Jesús dub taꞌa mluu xa, ndab xa: —¿Syoꞌo gan goꞌo dub xa lá naꞌ stubga xa lá naꞌ? ¿Lid itop bexa slaꞌyoꞌo len dub geꞌed zha?
LUK 6:40 Leꞌa xin utsid dub mech naꞌanpa ndi mas ndák ndoꞌ mech. Tal leꞌa xa wenka ntsid, leꞌa xa laktsa ndák mech wa ndák.
LUK 6:41 ’¿Xtaꞌan nwiꞌi bega gix tuzh ncho ndoꞌ ltsaꞌa bega zha, ná ni lá naꞌ bega leꞌa ndoꞌ bega ntsaw dub bleꞌa ya siꞌil?
LUK 6:42 ¿Xteꞌema yoo gan gab bega ndoꞌ ltsaꞌa bega: “Bsaꞌa ndoꞌ lu ko naꞌ gix tuzh ncho ndoꞌ lu”, ná bega ni lá naꞌ ti leꞌa ndoꞌ bega ntsaw dub bleꞌa ya siꞌil? Leꞌa bega ndab ugap nak stubga men, parea leꞌa bega ndi mas ugap nak. Ned udob bega ya siꞌil ntsaw ndoꞌ bega, weꞌeta sun bega gan koꞌo bega gix tuzh ncho ndoꞌ stub xa.
LUK 6:43 ’Leꞌa dub ya nsaꞌa ngus wen naꞌanpa usaꞌa ngus lá isuꞌu gaw men. No liga dub ya nsaꞌa ngus lá ndaw be men naꞌanpa usaꞌa ngus wen.
LUK 6:44 Leꞌa be ngus ten dub ya nluu xá ya na‑yá. No naꞌanpa usaꞌa yagich ngus laꞌaw, no ni lá usaꞌa‑yá uv.
LUK 6:45 No liga leꞌa be men wen ndadiꞌizh ta wen, lak ta wen ncho ladoꞌo xa. No leꞌa bexa ugap wa ndadiꞌizh ta ugap, lak ta ugap ncho ladoꞌo xa. Leꞌa ta na ncho ladoꞌo bexa wa, ta weꞌetsa ndadiꞌizh bexa.
LUK 6:46 ’¿Xtaꞌan níꞌi bega ndoꞌ naꞌ: “Señor, Señor”, ná lá ndun bega ta ndáp naꞌ zha?
LUK 6:47 Leꞌa tal ton ibii wats naꞌ, cha goꞌón xa be ta ndáp naꞌ, cha liga gun xa, leꞌa naꞌ gáp xteꞌe nak xa wa:
LUK 6:48 leꞌa xa nak cuentta dub xabgiꞌi gundeꞌe lid na, wat udan xa sa kwe xan‑a. Cha mtexan xa‑yá ndoꞌ geꞌdaꞌa. Weꞌe leꞌa gor na ulen nits kwaꞌal, leꞌa nits wa cha ukeꞌa niꞌi wa. Parea leꞌa nits wa ni lá ngun gan ukwiꞌinsob niꞌi wa, geal leꞌa xan‑a nsob ndoꞌ geꞌdaꞌa.
LUK 6:49 Ná leꞌa tal ton goꞌón ta ndáp naꞌ, ná lá uxobgek xa ndoꞌ‑yá, leꞌa xa wa cuent dub xa mtexan lid na ndoꞌ yotsa. Leꞌa gor na ulen nits kwaꞌal ukeꞌa niꞌi wa, cha ulate idub niꞌi wa.
LUK 7:1 Leꞌa gor na mtaꞌuluu Jesús be men wa, cha nchaꞌa xa gezh Capernaum.
LUK 7:2 Leꞌa sa wa ncho dub soldad Roma, xa nibeꞌe dub gayoꞌo soldad. Leꞌa xa wa uzhebpa nkweaꞌ ladna dub xa ndun tiꞌin ndoꞌ na, parea leꞌa xa na ndun tiꞌin wa uzhebpa kweaꞌ nsak gast ngi sat xa.
LUK 7:3 Leꞌa gor na mbiꞌín soldad wa leꞌa Jesús nkesea Capernaum, cha mtuꞌub xa pla bexa gox nsak ten bexa judio, yaꞌinab bexa ndoꞌ Jesús giꞌid Jesús yunyakna xa xa gizh wa.
LUK 7:4 Leꞌa gor na ulayaꞌ bexa wa wats Jesús, cha uzhebpa unab bexa ndoꞌ Jesús, ndab bexa: —Leꞌa go nsabndoꞌ gakno soldad wa,
LUK 7:5 leꞌa xa nkweaꞌ ladna beuna xa Israel, no ngokno xa ngokndeꞌe niꞌi sa nzhealbe beuna gezh ndee.
LUK 7:6 Leꞌa Jesús cha nchaꞌano bexa wa. Ná leꞌa gor na yá nchaꞌbe gax bexa ta lid soldad wa, leꞌa xa mtuꞌub pla bexa nchaꞌyab ndoꞌ Jesús: —Señor, naꞌantapa yuꞌno ladna go naꞌ, leꞌa naꞌ naꞌanpa isayaꞌ yate go len lid naꞌ.
LUK 7:7 Ta weꞌe naꞌanpa naꞌ ngalyáp ndoꞌ go giꞌid ga. Nat gudtsa go yakna xa wa, leꞌa xa syakkana.
LUK 7:8 Leꞌa naꞌ ndee nxobgek ndoꞌ xa mas nibeꞌe ndoꞌ naꞌ. No ncho be soldad nibeꞌe naꞌ ndoꞌ na. Leꞌa gor na ndáp naꞌ ndoꞌ dub xa yaꞌ xa, leꞌa xa cha ndaꞌkaga. No gor na ndáp naꞌ giꞌid stub xa, leꞌa xa cha ndiꞌidkaga. No gor na nibeꞌe naꞌ ndoꞌ xa ndun tiꞌin ndoꞌ naꞌ, leꞌa xa wa cha ndunkaga ta li ndáp naꞌ wa.
LUK 7:9 Leꞌa gor na mbiꞌín Jesús ta wa, cha ngwanseana xa. Cha mgeak Jesús mwiꞌi xa ndoꞌ be men nchankea tsoꞌo xa, ndab xa ndoꞌ bexa wa: —Leꞌa naꞌ gáp ndoꞌ bego, naꞌanpa izheal naꞌ ni dub xa Israel lndeꞌeta ngeꞌ ladna naꞌ.
LUK 7:10 Leꞌa gor na mlanseaꞌ bexa na mtuꞌub soldad wa ta lid soldad, leꞌa xa gizh wa myaklana.
LUK 7:11 Tsoꞌo wa leꞌa Jesús no be xmen xa no kwaꞌadta be men utoꞌo nchaꞌbe gezh nsaleaꞌ Naín.
LUK 7:12 Leꞌa gor na nchaꞌbe bexa gax sa nyote be men len gezh wa, cha uniꞌí bexa kwaꞌad be men gezh wa nchaꞌukaꞌach xinbgiꞌi dub xagots ngut xabgiꞌi ten na. Leꞌa xa wa dubkama xinbgiꞌi na ngop.
LUK 7:13 Leꞌa gor uniꞌí Jesús xagots wa, leꞌa Jesús cha mlats ladna xa, cha ndab Jesús ndoꞌ xa: —Yá lá goꞌonta lu.
LUK 7:14 Leꞌa Jesús cha ubii, cha mgal xa ta nchoꞌob xa ngut wa ndoꞌ na. Leꞌa be men nchaꞌano xa ngut wa cha ngwaꞌibe. Cha ndab Jesús: —Myoꞌ, leꞌa naꞌ gáp ndoꞌ lu, goste.
LUK 7:15 Leꞌa myoꞌ wa cha ngwasob, cha uníꞌi. Leꞌa Jesús cha myun cuent myoꞌ wa ndoꞌ xnaꞌa na.
LUK 7:16 Leꞌa itea be men cha mzheb, no msaꞌa bexa xno ndoꞌ Dios, ndab bexa: —¡Dub profet nsak ten Dios ulen lat beuna! No ndab bexa: —¡Leꞌa Dios mbiꞌid yakno be xmen na!
LUK 7:17 Leꞌa ta li mbin Jesús wa mgen idub distrit Judea, no iteanak be gezh nde idub gangeak sa wa.
LUK 7:18 Leꞌa be xmen Juan xa na ulaleaꞌ be men wa cha ndab ndoꞌ Juan itea be ta li mbin Jesús wa. Leꞌa Juan cha utezh top bexa,
LUK 7:19 cha mtuꞌub xa bexa wa ndoꞌ Jesús, ngwaꞌ inabdiꞌizh bexa naga leꞌa Jesús nak xa na li ndab Dios ilen wa, nati kweas bexa ilen stubga xa.
LUK 7:20 Leꞌa bexa wa cha ulayaꞌ wats Jesús, cha unabdiꞌizh bexa, ndab bexa ndoꞌ Jesús: —Leꞌa Juan xa ulaleaꞌ be men wa mtuꞌub besa inabdiꞌizh besa ndoꞌ ga naga go xa ndab Dios ilen wa, nati kweas besa ilen stubga xa.
LUK 7:21 Bi leꞌa gor wa leꞌa Jesús myunyakna kwaꞌadta bexa gizh, no ulantuꞌub xa be mbi bxin ncho len ladoꞌo be men, no myunyakna xa ngusndoꞌ bexa lá naꞌ.
LUK 7:22 Cha ndab Jesús ndoꞌ itop be xmen Juan wa: —Byaꞌbe bega, cha gud bega ndoꞌ Juan be ta uniꞌí bega no be ta ndoꞌón bega: leꞌa bexa lá yoo gan iwiꞌibe, nat leꞌa bexa wa naꞌla; leꞌa bexa na lá yoo gan isea, nat leꞌa bexa wa nseala; leꞌa bexa nsén gealgizh lepra, nat leꞌa bexa wa myaklana; leꞌa bexa ngwaꞌad, nat leꞌa bexa wa ndoꞌónla; leꞌa bexa ngut, nat leꞌa bexa wa nbanla; no leꞌa bexa uban nak ndoꞌón diꞌizh wen ten Dios.
LUK 7:23 Uzhebpa wen yoo ladna tal ton igondoꞌ ton nak naꞌ.
LUK 7:24 Leꞌa gor na nseaꞌbe bexa na mtuꞌub Juan wa, leꞌa Jesús cha usaxan mbidiꞌizh ndoꞌ be men cuent ten Juan, ndab xa: —Leꞌa gor na ngwaꞌbe bega geꞌe sa uxee ncho be men, ¿xtaꞌan ngwaꞌiwiꞌi bega zha? ¿Dub yalod nkwiꞌin mbi zha?
LUK 7:25 Nati, ¿xtaꞌan ngwaꞌiwiꞌi bega zha? ¿Dub xabgiꞌi ndak dub lad uyap nsak zha? Leꞌa bego uniꞌíka leꞌa bexa ndak lad uyap wa, no ndap bexa itea be ta nlad bexa, leꞌa bexa wa ncho ta lid bexa nibeꞌe.
LUK 7:26 ¿Xtaꞌan ngwaꞌiwiꞌi bega zha? ¿Ngwaꞌiwiꞌi bega dub xa ndadiꞌizh sakndoꞌ Dios zha? Leꞌa naꞌ gáp ndoꞌ bega leꞌa Juan ta ugeaka ndadiꞌizh sakndoꞌ Dios, parea leꞌa xa wa mas nsak ndoꞌ iteata bexa li ndun wa.
LUK 7:27 Leꞌa diꞌizh ten Dios nkeaniꞌi cuent ten Juan, ndab‑a: Bwiꞌi, leꞌa naꞌ utuꞌub dub xa yaꞌ ned ndoꞌ lu, uxaꞌal xa nes isea lu.
LUK 7:28 No gáp naꞌ ndoꞌ bego, leꞌa lat itea be men ngol ndoꞌ gizhliyo, naꞌan stub profet mas nsak ndoꞌ Juan wa. Ná leꞌa tal ton uxee nsak lat bexa nibeꞌe Dios, leꞌa cuent ten Dios leꞌa xa wa mas nsak ndoꞌ Juan.
LUK 7:29 Leꞌa itea be men no gast bexa nsen med nkix be men ndoꞌ gobier, leꞌa gor na mbiꞌín bexa ta mbidiꞌizh Juan, leꞌa bexa mgondoꞌ leꞌa Dios ndon leꞌa wen, cha ulaleaꞌ Juan bexa.
LUK 7:30 Ná leꞌa bexa fariseo no be mech ten ley, mxelad bexa ta na nlad Dios gun bexa, no lá nlad bexa koleaꞌ Juan bexa.
LUK 7:31 No ndab Jesús: —¿Xteꞌema nak be men ncho tiemp nat? ¿Xtaꞌanma dub ta li nak?
LUK 7:32 Leꞌa bexa wa nak cuent be meꞌed nde ndoꞌ xgeꞌe, ugeꞌ ndab be meꞌed ndoꞌ ltsaꞌa med: Mbiꞌil besa bzhee, ná leꞌa bega lá ngolndatsbe. No mbiltoꞌoga besa cant uban nsea, ná leꞌa bega lá ngoꞌonga.”
LUK 7:33 Li ndáp naꞌ geal leꞌa zha ulen Juan xa ulaleaꞌ be men wa, ncho wizh lá ngaw xa, no lá ndo xa vin. Cha ndab bega leꞌa xa ncho mbi bxin len ladoꞌo na, ta weꞌe li ndun xa.
LUK 7:34 Ná leꞌa nat ndalga naꞌ, Xa Myak Men Ndoꞌ Gizhliyo. Leꞌa naꞌ ndee ndaw, no ndoꞌo naꞌ, ná leꞌa bega ndab leꞌa naꞌ uzhebpa ndaw, no uzhebpa ndoꞌo naꞌ vin. Ndab bego leꞌa naꞌ nchealtsaꞌa bexa ugap nak no bexa nsen med nkix be men ndoꞌ gobier Roma.
LUK 7:35 Ná leꞌa bexa ndák lak nsaꞌa Dios, leꞌa be ta wen ndun bexa wa nluu leꞌa bexa ndákka.
LUK 7:36 Leꞌa dub xa fariseo cha unab ndoꞌ Jesús yaꞌdawno Jesús xa ta lid xa. Weꞌe leꞌa Jesús cha uyoꞌo len niꞌi wa, cha usob xa ndoꞌ mes.
LUK 7:37 Leꞌa gor na mbiꞌín dub xagots ndun be ta ugap leꞌa Jesús nsob ndoꞌ mes ta lid xa fariseo, cha ulenno xa dub bot tuzh nakchaꞌaw geꞌ alabastro, ncho ta uxeꞌe len‑a.
LUK 7:38 Cha usob xa lad tsoꞌo Jesús sa na nde xoꞌo xa. Cha uzheꞌeb ndoꞌon xa, gast nsalaꞌ nitsndoꞌ xa tsoꞌo xoꞌo Jesús. Leꞌa gichgek xa cha mtsambiꞌi xa tsoꞌo xoꞌo Jesús. Cha mchealtoꞌo xa tsoꞌo xoꞌo Jesús. Cha mtob xa ta uxeꞌe wa tsoꞌo xoꞌo Jesús.
LUK 7:39 Leꞌa xa fariseo na li mbin invit ndoꞌ Jesús wa, gor na uniꞌí xa ta mbin xagots wa, cha mbinbeꞌe xa: “Tal leꞌa xa ndee dub profetka, leꞌa xa sniꞌíka leꞌa xagots lbaꞌa ngal xoꞌo xa baꞌ uzheꞌeb dub xa ndun ta ugap.”
LUK 7:40 Weꞌe leꞌa Jesús cha ndab ndoꞌ xa fariseo: —Simón, leꞌa naꞌ nlad gáp dub taꞌa ndoꞌ lu. Leꞌa xa wa cha ukaꞌab ndab: —Gud go‑yá, Mech.
LUK 7:41 Cha ndab Jesús: —Uyoꞌo top xabgiꞌi nsaꞌab med ndoꞌ dub xa ngodiꞌin med nbeꞌe. Leꞌa dub xabgiꞌi wa nsaꞌab dub gaꞌay gayoꞌo med denario. Leꞌa stub xa wa nsaꞌab dub tol gayoꞌo med wa.
LUK 7:42 Leꞌa itop bexa wa lá ngun gan ikix be med wa, ta weꞌe leꞌa xa uladiꞌin med wa cha mbingeꞌ ladna ndoꞌ itop bexa wa. Nat gud ndoꞌ naꞌ, ¿ndoꞌ itop xa nsaꞌab med wa, ton mas nkea ladna xa na li uladiꞌin med wa zha?
LUK 7:43 Leꞌa Simón cha ukaꞌab ndab: —Leꞌa naꞌ ni xa na nsaꞌab mas sian med wa. Leꞌa Jesús cha ndab: —Leꞌaka ndab lu.
LUK 7:44 Cha mwiꞌi Jesús ndoꞌ xagots wa, cha ndab Jesús ndoꞌ Simón: —¿Naꞌ lu xagots ndee? Leꞌa gor uyoꞌo naꞌ len lid lu, leꞌa lu ni lá usaꞌa nits yat xoꞌo naꞌ. Ná leꞌa xagots ndee msat xoꞌo naꞌ nsea nitsndoꞌ xa, no mtsambiꞌi xa xoꞌo naꞌ gichgek xa.
LUK 7:45 Leꞌa lu ni lá uchealtoꞌo beꞌal ndoꞌ naꞌ, ná leꞌa xagots ndee bi xteꞌe uyoꞌo naꞌ len lid lu nunk xa lá ibeas uchealtoꞌo xoꞌo naꞌ.
LUK 7:46 No ni lá utob lu aceit gek naꞌ, ná leꞌa xagots ndee mtob ta uxeꞌe baꞌ tsoꞌo xoꞌo naꞌ.
LUK 7:47 Leꞌa naꞌ gáp ndoꞌ lu, leꞌa xagots ndee uzheꞌeb nkweaꞌ ladna naꞌ, ta nluu leꞌa be ke sian ndap xa myuꞌula. Leꞌa xa tuzh ke ten na mtsuꞌu Dios, leꞌa xa wa ndidotsa ndankea Dios.
LUK 7:48 Leꞌa Jesús cha ndab ndoꞌ xagots wa: —Leꞌa be ke ten lu myuꞌula.
LUK 7:49 Leꞌa bexa na no nde ndoꞌ mes nsob Jesús wa ndabbe ndoꞌ be ltsaꞌa na: —¿Tonxá xa ndee zhaga ndab xa leꞌa xa mtsuꞌu ke ten xagots baꞌ?
LUK 7:50 Leꞌa Jesús cha ndab ndoꞌ xagots wa: —Leꞌa ta na ngeꞌ ladna lu naꞌ, ta weꞌe myuꞌu be ke ten lu. Nat byaꞌ, cha bten ladna lu.
LUK 8:1 Tsoꞌo wa leꞌa Jesús ukeseano isatibtop be xmen na sian be gezh ubiꞌi no be gezh byux. Ukesea uluu Jesús be men, ndadiꞌizh xa diꞌizh wen ten Dios ná xteꞌe gak bexa dub xa leꞌa Dios nibeꞌe.
LUK 8:2 No stapla be xagots ukeseano bexa, bexa myunyakna Jesús no ulantuꞌub xa be mbi bxin len ladoꞌo bexa. Leꞌa dub xa wa Marí xa gezh Magdala, xa na utoꞌo dub gaꞌad be mbi bxin len ladoꞌo na.
LUK 8:3 Leꞌa stub xa wa Juana, xagots ten Chuza, xa na nchansu be tiꞌin ten Herodes. Leꞌa stub xa wa Susan. Leꞌa bexa wa, no kwaꞌadta be xagots msaꞌa be taꞌa nkiꞌin Jesús no be xmen xa.
LUK 8:4 Leꞌa kwaꞌad be men utoꞌo isandoꞌ be gezh ulen wats Jesús, cha msaktabeꞌe Jesús dub taꞌa mluu xa, ndab xa:
LUK 8:5 —Leꞌa dub xa ndun tiꞌin geꞌe utoꞌo nchaꞌutob xa bid ten trig ndoꞌ yo. Leꞌa gor na mteꞌach xa‑yá, ncho‑yá ulate toꞌo nes. Leꞌa be ná wa cha usoꞌ be men tsoꞌo na, cha ulen be migin cha udaw‑a.
LUK 8:6 No ncho‑yá ulate ndoꞌ yo geꞌ. Leꞌa gor na ulen ta wa, cha ubid‑a, geal leꞌa sa wa naꞌanpa kwazh.
LUK 8:7 No ncho‑yá ulate lat be gix nsoꞌ gich. Leꞌa gor na ulen trig nsea gix wa, leꞌa gix wa cha ulo xleaꞌ‑yá.
LUK 8:8 No ncho‑yá ulate sa utaꞌa yo, cha msaꞌa‑yá dub gayoꞌoga bid. Weꞌe ugeꞌ ndab Jesús: —¡Bego na ndap nchaꞌ na, blaꞌach bego ta ndáp naꞌ ndee!
LUK 8:9 Leꞌa be xmen Jesús cha unabdiꞌizh ndoꞌ xa, ndab bexa: —¿Xtaꞌan gab ta msaktabeꞌe go wa?
LUK 8:10 Leꞌa Jesús cha ukaꞌab ndab ndoꞌ bexa wa: —Leꞌa Dios nsaꞌa ta nyakbeꞌena bega be ta ugaꞌach cuent ten xteꞌe nibeꞌe Dios. Ná leꞌa ndoꞌ bexa xaꞌaga sbeꞌen nsaktabeꞌe naꞌ be taꞌa gor ndadiꞌizh naꞌ. Tal iwiꞌi bexa leꞌa bexa lá inaꞌ. No tal goꞌón bexa ta ndáp naꞌ, leꞌa bexa lá yakbeꞌena‑yá.
LUK 8:11 ’Leꞌa ta msaktabeꞌe naꞌ wa lndeꞌe nak: Leꞌa bid ten trig wa cuent diꞌizh ten Dios.
LUK 8:12 Leꞌa toꞌo nes sa ulate bid ten trig wa nak cuent be men ndoꞌón diꞌizh ten Dios, parea leꞌa maxuꞌu cha nlen ngoꞌo‑yá len ladoꞌo bexa, cha lá gungea ladna bexa‑yá, no lá usaꞌa Dios gealnaban ten bexa.
LUK 8:13 Leꞌa yo geꞌ sa ulate bid wa nak cuent be men nten ladna ndoꞌón diꞌizh ten Dios, ná leꞌa bexa wa cuent trig lá ndap sian loꞌ na. Ndangea ladna bexa diꞌizh ten Dios dub ndeꞌep, ná leꞌa gor na juert ncho xa geal ndangea ladna xa diꞌizh wa, cha nlaꞌa xa‑yá.
LUK 8:14 Leꞌa yo sa len gix nsoꞌ gich wa nak cuent be men ndoꞌón diꞌizh ten Dios. Ná leꞌa bexa nyuꞌ ladna, no ngeꞌ ladna bexa be ta siantsa ndap bexa, no nkwaꞌan bexa ta nladtsa bexa. Leꞌa bexa wa cuent dub trig lá nsaꞌa taꞌa.
LUK 8:15 Parea leꞌa sa utaꞌa yo wa nak cuent be men wen ladoꞌo na ndoꞌón diꞌizh ten Dios, no ndun bexa lak ndab‑a. Nxik bexa ndun bexa ta wen, leꞌa bexa nak cuent be trig nsaꞌa sian bid.
LUK 8:16 ’Naꞌan ton kich xeꞌa, cha usob xa‑yá len dub gets, natal xan loꞌon. Leꞌa xa ndi usob xeꞌa dub sa gaꞌap, ndontsa usu‑yá xeꞌa ndoꞌ bexa nyoꞌo len niꞌi wa.
LUK 8:17 Leꞌa itea be ta xgaꞌach, leꞌa gal dub wizh leꞌa ta wa igenka. No iteanak be ta ncho ngachyoꞌo, leꞌa gal dub gor leꞌa ta wa iluuka ndoꞌ xeꞌa.
LUK 8:18 ’Blaꞌach bego ta gáp naꞌ ndee, leꞌa ndoꞌ bexa nyakbeꞌena leꞌa Dios gun mas yakbeꞌena bexa. Ná leꞌa bexa na lá nyakbeꞌena, leꞌa Dios slat ta na nsak bexa nyakbeꞌena bexa wa.
LUK 8:19 Weꞌe leꞌa xnaꞌa Jesús no be wit xa ulayaꞌ sa nsob xa. Parea lá yoꞌo gan ibii bexa wats xa, geal leꞌa sa wa uzhebpa kwaꞌad be men ndebe.
LUK 8:20 Leꞌa dub men cha ndab ndoꞌ Jesús: —Leꞌa xnaꞌa ga no be wit ga ndebe tsoꞌo juer ndee, nlad bexa iniꞌí bexa ga.
LUK 8:21 Leꞌa Jesús cha ukaꞌab ndab: —Leꞌa bexa na ndoꞌón diꞌizh ten Dios no ndun xa lak ndab‑a, leꞌa bexa wa nak xnaꞌa naꞌ no wit naꞌ.
LUK 8:22 Ngok stub wizh leꞌa Jesús ukea ndoꞌ dub barco nsea be xmen na. Cha ndab Jesús ndoꞌ bexa: —Itakea beuna stub toꞌo nits. Cha nchaꞌbe bexa.
LUK 8:23 Ndalen li nchaꞌbe bexa ndoꞌ nits wa, leꞌa Jesús cha ngwadgats. Leꞌa ndoꞌ nits wa cha ulen dub mbi siꞌil, gast ngi slaꞌyoꞌo barco wa len nits. Cha uzhebpa rages nchaꞌbe bexa.
LUK 8:24 Cha mkwaꞌan bexa Jesús, ndab bexa: —¡Mech! ¡Mech! ¡Leꞌa beuna ngi sat! Cha uban Jesús, cha uteyo xa mbi siꞌil nsea be golp ten nits wa. Cha uleas mbi no xe ute nits.
LUK 8:25 Cha ndab Jesús ndoꞌ be xmen na: —¿Maxá ta ngeꞌ ladna bega naꞌ wa zhaga? Cha mzheb bexa, no ngwanseana bexa, ndab bexa ndoꞌ be ltsaꞌa xa: —¿Tonxá xa ndee zhaga, gast mbi nsea nits nxobgek ndoꞌ diꞌizh ten xa?
LUK 8:26 Cha ulayaꞌ bexa stub toꞌo nits, lad ndoꞌ distrit Galilea sa nibeꞌe gezh Gadara.
LUK 8:27 Leꞌa gor na ulaꞌ Jesús ndoꞌ barco wa, cha ulen dub xa gezh wa wats Jesús, dub xa kwenla ncho mbi bxin len ladoꞌo na. Leꞌa xa wa ni lá ndak xab na, no ni lá nyoꞌo xa ta lid xa, ndi sbeꞌen len be geꞌloꞌo ngaꞌach be men ngut ncho xa.
LUK 8:28 Leꞌa gor uniꞌí xa wa Jesús, cha ugeꞌ utezhat xa, cha msaxib xa ndoꞌ Jesús, cha ugeꞌ ndab mbi bxin wa: —¿Xtaꞌan ngi naꞌ nsea ugal lu zha, Jesús Xin Dios siꞌil? Leꞌa naꞌ naꞌab ndoꞌ lu lá utsaksi lu naꞌ.
LUK 8:29 Li ndab ta wa geal leꞌa Jesús unibeꞌela ndoꞌ mbi bxin wa itoꞌo ladoꞌo xa wa. Leꞌa mbi bxin wa uzheꞌeb pol‑lata nibeꞌe xabgiꞌi wa. Leꞌa be men sian biaj mxi yaꞌa xa no xoꞌo xa nsea caden, ná xa nkixka ta wa. Cha ndun mbi bxin wa gan nxoꞌon xa geꞌe sa naꞌan men.
LUK 8:30 Leꞌa Jesús cha unabdiꞌizh ndoꞌ mbi bxin wa, ndab xa: —¿Xteꞌe nsaleaꞌ lu? Leꞌa ta wa cha ukaꞌab ndab: —Naꞌ nsaleaꞌ Uzheꞌeb Kwaꞌad Xa. Li ndab ta wa geal leꞌa be mbi bxin wa kwaꞌadpa uyoꞌo len ladoꞌo xa wa.
LUK 8:31 Leꞌa be mbi bxin wa cha unab ndoꞌ Jesús lá utuꞌub Jesús be ta wa gast geꞌed uzheꞌeb lá ndap xan na.
LUK 8:32 Ndi unab be mbi bxin wa ndoꞌ Jesús ulaꞌa Jesús yoo beya len be kuch kwaꞌad ndeseayaw sa wa. Leꞌa Jesús cha msaꞌa diꞌizh li gun be ta wa.
LUK 8:33 Leꞌa be mbi bxin wa cha utoꞌo ladoꞌo xa wa, cha uyoꞌo beya len be kuch wa. Leꞌa bema cha karrel nchaꞌbe uxoꞌon gek dub weꞌa toꞌo nits. Cha ubix bema gast len nits ulaꞌyoꞌo bema, cha ngut bema.
LUK 8:34 Leꞌa bexa nkeno be kuch wa, gor na uniꞌí bexa ta wa, cha nseaꞌbe uxoꞌon bexa. Leꞌa nes nseaꞌbe bexa mbidiꞌizh bexa ta uyoꞌo wa ndoꞌ be men gezh no ndoꞌ be men ndesea geꞌe.
LUK 8:35 Leꞌa be men wa cha utoꞌobe nchaꞌwiꞌi ná xtaꞌan ta uyoꞌo wa. Leꞌa gor ulayaꞌ bexa wats Jesús, uniꞌí bexa xabgiꞌi na utoꞌo be mbi bxin len ladoꞌo na wa nsobma wats xoꞌo Jesús. Leꞌa xa wa nakla xab na no yá naꞌanlatapa tont nak xa. Leꞌa be men wa cha mzheb.
LUK 8:36 Leꞌa bexa na uniꞌí xteꞌe myakna xa wa cha mbidiꞌizh ta wa ndoꞌ be men.
LUK 8:37 Weꞌe leꞌa itea be men ncho sa nibeꞌe Gadara unab ndoꞌ Jesús ikaꞌan Jesús sa wa, leꞌa bexa uzhebpa nzheb. Leꞌa Jesús cha ukea ndoꞌ barco, cha ndiꞌizh yaꞌ xa.
LUK 8:38 Leꞌa xa na utoꞌo be mbi bxin len ladoꞌo na wa cha unab ndoꞌ Jesús no xa yaꞌno Jesús. Parea leꞌa Jesús ndi ndab:
LUK 8:39 —Nat byaꞌ ta lid lu. Cha bidiꞌizh xteꞌe wen mbinno Dios lu. Leꞌa xa wa cha nseaꞌ, usaxan ndadiꞌizh xa ndoꞌ itea be men gezh wa xteꞌe myunyakna Jesús xa.
LUK 8:40 Leꞌa gor na mlanseaꞌ Jesús stub toꞌo nits, leꞌa be men uzhebpa mten ladnabe, geal leꞌa bexa itea ndenkeaꞌ ilen Jesús.
LUK 8:41 Weꞌe ulen dub xabgiꞌi nsaleaꞌ Jairo, xa nchansu niꞌi sa nzhealbe bexa judio gezh wa. Leꞌa xa wa cha usaxib ndoꞌ Jesús, cha unab xa ndoꞌ Jesús yaꞌ Jesús ta lid xa.
LUK 8:42 Leꞌa xa wa ndap dubtsa xingots na ncho tibtop liꞌin, parea leꞌa meꞌed wa yamer gat. Leꞌa gor na nchaꞌbe bexa nes leꞌa be men kwaꞌad ngidko Jesús.
LUK 8:43 Ná leꞌa lat be men wa nchaꞌa dub xagots kweaꞌ nsak, nleꞌa xa ten idub dub tibtopla liꞌin. Leꞌa xa wa sianla biaj ngwaꞌ ndoꞌ be doctor gast mteꞌa xa itea be taꞌa ndap xa. Ná ni dub be doctor lá ngun gan yakna xa.
LUK 8:44 Leꞌa xa wa ubii ndi tsoꞌo Jesús, cha mgal xa ndats xab Jesús. Cha bi leꞌa gor wa leꞌa ten wa cha uleaslenla las xa.
LUK 8:45 Weꞌe leꞌa Jesús cha ndab: —¿Ton xa mgal xab naꞌ? Leꞌa itea be men wa ndab naꞌanpa ugal xab Jesús. Leꞌa Pedr no be ltsaꞌa xa ndab: —Mech, leꞌa be men baꞌ leꞌa ngidko go, ¿ná xtaꞌan ndab ga ton mgal xab go zha?
LUK 8:46 Leꞌa Jesús cha ndab: —Dub menka mgal xab naꞌ, leꞌa naꞌ mgenna utoꞌo dub tuzh juers ten naꞌ.
LUK 8:47 Leꞌa gor na uniꞌí xagots wa leꞌa Jesús mgenna ta mbin xa, cha nxis xa tant nzheb xa. Cha ubii xa msaxib xa ndoꞌ Jesús. Cha ndab xa ndoꞌ gaꞌal itea be men ná xtaꞌan mgal xa xab Jesús, no xteꞌe uxax myakna xa.
LUK 8:48 Leꞌa Jesús cha ndab ndoꞌ xa: —Xagots, leꞌa ta na ngeꞌ ladna lu naꞌ, ta weꞌe mbin myakna lu. Nat byaꞌ, cha bten ladna lu.
LUK 8:49 Ndalen li nsoꞌyadiꞌizh Jesús, ulen dub xa utoꞌo ta lid Jairo, ndab xa ndoꞌ Jairo: —Lá goꞌo ga mech baꞌ, leꞌa xin ga ngutla.
LUK 8:50 Leꞌa gor na mbiꞌín Jesús ta wa, cha ndab xa ndoꞌ Jairo: —Lá izheb lu. Bingeatsa ladna lu naꞌ, leꞌa xin lu sbanka.
LUK 8:51 Leꞌa gor na ulayaꞌ bexa ta lid Jairo, leꞌa Jesús cha uyoꞌo len niꞌi wa nsea Pedr no Jacob no Juan, nsea xus meꞌed nsea xnaꞌa meꞌed. Cha ni dubta men lá ulaꞌa Jesús yoꞌo len niꞌi wa.
LUK 8:52 Leꞌa be men kwaꞌad wa ndoꞌon, no nbezhat bexa geal ngut meꞌed wa. Ná leꞌa Jesús cha ndab: —Yá lá goꞌonta bega, leꞌa meꞌed baꞌ naꞌanpa ngut, leꞌa meꞌed ga naxyats.
LUK 8:53 Leꞌa be men wa ndi mxiꞌidno Jesús, geal leꞌa bexa uniꞌí leꞌa meꞌed wa ngutka.
LUK 8:54 Leꞌa Jesús cha usen yaꞌa meꞌed, cha ugeꞌ ndab Jesús: —¡Meꞌed gots, goste!
LUK 8:55 Weꞌe leꞌa gealnaban ten meꞌed wa cha myoꞌogal len ladoꞌo meꞌed, cha uxax ngwaste meꞌed. Leꞌa Jesús cha ndab ndoꞌ be usan ten meꞌed wa: —Bsaꞌa bega ta gaw med.
LUK 8:56 Leꞌa be usan ten meꞌed wa uzhebpa ndanseanabe, ná leꞌa Jesús cha unibeꞌe naꞌan ton ndoꞌ ná gab bexa ta ngok wa.
LUK 9:1 Leꞌa tsoꞌo wa leꞌa Jesús mchealte isatibtop be xmen na. Cha msaꞌa xa juers ndoꞌ bexa kontuꞌub bexa be mbi bxin, no yunyakna bexa be men gizh.
LUK 9:2 Cha mtuꞌub xa bexa yaꞌuluu bexa xteꞌe nibeꞌe Dios be men, no yunyakna bexa be men gizh.
LUK 9:3 No ndab Jesús ndoꞌ bexa: —Ni dub taꞌa guntiꞌin bega nes lá goꞌo bega, ni bordón no ni bols no ni pan no ni med. No ni lá goꞌo bega top nes xab bega.
LUK 9:4 Tal pa niꞌi na usaꞌa bexa yoo bega dub gezh, sa weꞌetsa yoo bega gast wizh ikaꞌan bega gezh wa.
LUK 9:5 No tal ncho gezh lá ulaꞌa bexa yoo bega, bkaꞌan bega gezh wa. Cha blate bega gast yakol ngwaꞌal xoꞌo bega, ta uluu leꞌa Dios ndakloo ndoꞌ bexa wa.
LUK 9:6 Leꞌa isatibtop bexa wa cha utoꞌo nchaꞌbeyadiꞌizh diꞌizh wen ten Dios itea be gezh nde gax sa wa, no myunyakna bexa be men gizh.
LUK 9:7 Leꞌa Herodes xa nibeꞌe distrit Galilea mbiꞌín itea be ta ndun Jesús. Ná leꞌa xa ni lá iniꞌí ton xa wa, geal leꞌa ncho be men ndab leꞌa Jesús wa Juan mbangal ndoꞌ gealgut.
LUK 9:8 No ncho bexa ndab leꞌa xa wa profet Elí mlengal. No nchoga bexa ndab leꞌa xa wa tonla dub profet uyoꞌo xapta mbangal.
LUK 9:9 Ta weꞌe mbinbeꞌe Herodes, ndab xa: —Leꞌa naꞌ unibeꞌe myabtoꞌog gen Juan. ¿Cha tonxá xa ndee ndon naꞌ ndun sian be ta ndee zhaga? Ta weꞌe uzhebpa nlad Herodes iniꞌí Jesús.
LUK 9:10 Leꞌa ngol gor na mlaꞌnchaꞌ isatibtop be xmen Jesús, leꞌa bexa cha mbidiꞌizh itea be ta mbin bexa. Leꞌa Jesús cha mbiꞌi bexa dub sa naꞌan men, gax gezh Betsaida.
LUK 9:11 Ná leꞌa gor na uniꞌí be men pa nchaꞌa Jesús, cha no bexa usankea tsoꞌo Jesús. Leꞌa xa cha utezh bexa wa sa nsob xa. Cha mbidiꞌizh xa xteꞌe nibeꞌe Dios be men, no myunyakna xa be men gizh.
LUK 9:12 Leꞌa ngol gor na mas uzhela, leꞌa isatibtop be xmen Jesús ubii wats xa, ndab bexa: —Gud go ndoꞌ be men baꞌ yaꞌbe bexa be ranch no be gezh nde gax baꞌ, ukwaꞌan bexa sa gadgats bexa no ta gaw bexa, leꞌa sa ndee dub sa naꞌanpa ncho men.
LUK 9:13 Leꞌa Jesús cha ndab: —Bsaꞌa bega ta gaw bexa. Leꞌa bexa wa cha ukaꞌab ndab: —Leꞌa besa ndap sgaꞌaytsa pan nsea stoptsa mbeal. Ná leꞌa besa lá yoo gan yaꞌisiꞌi ta gaw itea be men ndee.
LUK 9:14 Leꞌa lat itea be men wa ncho pa dub gaꞌay mil xabgiꞌi. Weꞌe leꞌa Jesús cha ndab ndoꞌ be xmen na: —Gud bega isob itol gayoꞌo gaꞌga bexa.
LUK 9:15 Cha li mte be xmen Jesús itea be men kwaꞌad wa.
LUK 9:16 Leꞌa Jesús cha usen isagaꞌay pan nsea itop mbeal wa, cha mwiꞌi xa gibeꞌa msaꞌa xa xno ndoꞌ Dios. Cha uleꞌa xa be pan no be mbeal wa sian bleꞌa, cha msaꞌa xa‑yá ndoꞌ be xmen xa, mtseꞌa bexa‑yá ndoꞌ be men wa.
LUK 9:17 Leꞌa itea be men wa udaw ta wa gast plo mzhea bexa. Leꞌa be xmen Jesús cha mteleꞌe stibtop zhum byux ta myaꞌan sobr wa.
LUK 9:18 Leꞌa dub wizh leꞌa Jesús ngwaꞌyadiꞌizhno Dios dub sa naꞌan men, nabtsa be xmen xa mbiꞌi xa. Leꞌa Jesús cha unabdiꞌizh ndoꞌ bexa wa, ndab xa: —¿Xteꞌe ndab be men zha ton nak naꞌ?
LUK 9:19 Leꞌa bexa wa cha ukaꞌab ndab: —Leꞌa ncho be men ndab leꞌa go Juan xa ulaleaꞌ be men. No ncho bexa ndab leꞌa go Elí. No nchoga bexa ndab leꞌa go stub profet uyoꞌo polta mbangal ndoꞌ gealgut.
LUK 9:20 Leꞌa Jesús cha ndab: —¿Bego zha xteꞌe gab bega ton nak naꞌ? Weꞌe leꞌa Pedr ndab: —Leꞌa go nak Cristo, xa mtuꞌub Dios.
LUK 9:21 Leꞌa Jesús unibeꞌe ndab ndoꞌ bexa: —Naꞌan ton ndoꞌ ná gudiꞌizh bega ta wa.
LUK 9:22 No ndab Jesús: —Leꞌa naꞌ, Xa Myak Men Ndoꞌ Gizhliyo, nsabndoꞌka sian gealkweaꞌ iní. Leꞌa bexa gox nsak no be uleꞌay nibeꞌe no be mech ten ley uxelad naꞌ, cha gat naꞌ. Cha gal wizh yon leꞌa naꞌ ibangal.
LUK 9:23 No ndab Jesús ndoꞌ bexa: —Tal ton nlad isankea tsoꞌo naꞌ, nsabndoꞌ ulaꞌa xa itea be ta nlad xa, cha goꞌo xa cruz ten xa itea wizh, cha isankea xa tsoꞌo naꞌ guniꞌi xtaꞌan gunno be men xa.
LUK 9:24 Leꞌa tal ton ukwaꞌan xteꞌe wen yoo xa, leꞌa xa wa ndi gun perdid gealnaban ten na ndoꞌ Dios. Ná leꞌa tal ton gat ke ten naꞌ, leꞌa xa wa gap gealnaban ndoꞌ Dios.
LUK 9:25 Tal leꞌa dub men ndap itea be ta ncho ndoꞌ gizhliyo ndee, cha gat xa, leꞌa iteanak be ta wa ta naꞌan xtiꞌin.
LUK 9:26 Leꞌa tal ton idono ladna naꞌ no diꞌizh ten naꞌ, leꞌa naꞌ, Xa Myak Men Ndoꞌ Gizhliyo, no idono ladna xa wa, gal wizh ilenno naꞌ xeꞌa siꞌil ten Dios Tad no be angel ten Dios.
LUK 9:27 Leꞌa naꞌ gáp ndoꞌ bega leꞌa ncho bexa nde ndee naꞌanpa cha gat gast iniꞌíka xa gal tiemp inibeꞌe Dios.
LUK 9:28 Leꞌa ngol pa stub sman tsoꞌo na li mbidiꞌizh Jesús ta wa, cha mbiꞌi xa Pedr no Juan no Jacob, ukea bexa dub bet sa ndaꞌyadiꞌizhno Jesús Dios.
LUK 9:29 Leꞌa gor na li nsoꞌyadiꞌizhno xa Dios, leꞌa xa cha mtixndoꞌ ndoꞌ gaꞌal bexa wa. Leꞌa xab xa cha mnaꞌ mbe, ndon nlaꞌbealꞌ‑a.
LUK 9:30 Zha leꞌa sa wa cha mlundoꞌ top xabgiꞌi ndeyadiꞌizhno Jesús, leꞌa ta wa Moisés no Elí.
LUK 9:31 Leꞌa bexa wa nde tlaw dub xeꞌa uzheꞌeb chul, ndeyadiꞌizhno bexa Jesús ná xteꞌe gat Jesús gezh Jerusalén.
LUK 9:32 Leꞌa Pedr no itop ltsaꞌa xa uzhebpa nyoxkaꞌal na, ná leꞌa bexa mxik lá ngadgats. Cha uniꞌí bexa xteꞌeta nlaꞌbealꞌ wats Jesús, no uniꞌí bexa top xabgiꞌi wa nde wats Jesús.
LUK 9:33 Ngol gor na yá nseaꞌbe sa sit Moisés nsea Elí wats Jesús, leꞌa Pedr cha ndab ndoꞌ Jesús: —Mech, uzhebpa wen ndebe beuna sa ndee. Gundeꞌe besa chon ramad: dub‑a na ten go, leꞌa stub‑a na ten Moisés, leꞌa stub‑a na ten Elí. Ná leꞌa Pedr ni lá iniꞌí xtaꞌan ndab.
LUK 9:34 Bi li nsoꞌyab Pedr ta wa, zha leꞌa dub xkaw ulaꞌla sa nde bexa wa, cha mzheb bexa.
LUK 9:35 Leꞌa lat xkaw wa mgen ti Dios ndab: —Leꞌa ta ndee Xiꞌín naꞌ, xa na mti naꞌ. Bsakyoꞌón bega ta ndab xa.
LUK 9:36 Leꞌa gor na uleas ti Dios wa, leꞌa Jesús nabla nsoꞌ. Leꞌa bexa wa lá ngudiꞌizh ta li uniꞌí bexa wa dub ndeꞌep ndoꞌ be men.
LUK 9:37 Leꞌa ngol stubtsa wizh gor na nchaꞌlayoꞌo bexa bet wa, leꞌa kwaꞌad be men utoꞌo, nchaꞌbe ucheꞌalndoꞌ Jesús.
LUK 9:38 Leꞌa dub xabgiꞌi nsea lat be men wa ugeꞌ ndab: —Mech, leꞌa naꞌ naꞌab ndoꞌ go iwiꞌi go ndoꞌ xmeꞌed naꞌ, leꞌa meꞌed ga dubkama ndap naꞌ.
LUK 9:39 Leꞌa gor na nsen dub mbi bxin med, cha nbezhat med, no uzheꞌeb nteꞌal med, no nlen bchiꞌin toꞌo med. Uzheꞌeb xela ndanno ta wa med, no kwenpa leꞌa zha nlaꞌa ta wa med.
LUK 9:40 Leꞌa naꞌ unaꞌabla ndoꞌ be xmen go kontuꞌub bexa mbi bxin wa, parea leꞌa bexa lá ngun gan.
LUK 9:41 Leꞌa Jesús cha ukaꞌab ndab: —¡Uzhebpa ngud nak bego ncho nat, no ndidotsa ngeꞌ ladna bega Dios! ¿Ploxá tiemp yoꞌo naꞌ lat bega zhaga? ¿Sta ploxá tiemp uxik naꞌ ndoꞌ bega zhaga? Cha ndab Jesús ndoꞌ xabgiꞌi wa: —Utseano xmeꞌed lu baꞌ sa ndee.
LUK 9:42 Leꞌa gor na nchaꞌbii gax meꞌed wa, leꞌa mbi bxin wa cha udingegal meꞌed ndoꞌ yo, no uzhebpa ngot bixte meꞌed. Leꞌa Jesús cha uteyo mbi bxin wa, cha myunyakna xa meꞌed wa. Cha myun Jesús cuent meꞌed wa ndoꞌ xus med.
LUK 9:43 Leꞌa itea be men wa ndanseanabe gor uniꞌí bexa xteꞌe juert nak Dios. Ndalen li ndeyanseana be men ndoꞌ ta mbin Jesús wa, leꞌa xa cha ndab ndoꞌ be xmen na:
LUK 9:44 —Uzhebpa blaꞌach bega ta gáp naꞌ ndee. Leꞌa naꞌ, Xa Myak Men Ndoꞌ Gizhliyo, yak cuent ndoꞌ yaꞌa be men.
LUK 9:45 Parea leꞌa be xmen Jesús ni lá yakbeꞌena ta li ndab xa wa, geal leꞌa Dios biseata ulaꞌa yakbeꞌena bexa‑yá. Ná leꞌa bexa nzhebta inabdiꞌizh ndoꞌ Jesús xteꞌe gab ta wa.
LUK 9:46 Weꞌe leꞌa be xmen Jesús cha ndeyadiꞌizhbe ná ton mas nsak lat bexa wa.
LUK 9:47 Leꞌa Jesús mgenna xtaꞌan ndanbeꞌe bexa, cha usen xa dub meꞌed, cha msoꞌ xa meꞌed wats xa.
LUK 9:48 Cha ndab xa ndoꞌ bexa: —Leꞌa tal ton dub xmen naꞌ utsin gak xa ndoꞌ dub meꞌed, leꞌa xa wa cuentkata ndoꞌ naꞌ utsin nak. Leꞌa xa na utsin nak ndoꞌ naꞌ wa, leꞌa xa wa utsinkaga nak ndoꞌ xa na mtuꞌub naꞌ. Leꞌa xa na uxee nsak lat bega wa, leꞌa xa wa ndon leꞌa xa nsak ndoꞌ Dios.
LUK 9:49 Leꞌa Juan cha ndab ndoꞌ Jesús: —Mech, leꞌa besa uniꞌí dub men ndantiꞌin leaꞌ go ngontuꞌub xa be mbi bxin. Leꞌa besa cha mka guntiꞌinta xa leaꞌ ga, geal leꞌa xa naꞌanpa no nkeseano beuna.
LUK 9:50 Leꞌa Jesús cha ndab: —Lá uka bega gun xa ta wa, leꞌa tal ton naꞌanpa ndakloo ndoꞌ beuna, leꞌa xa wa dubtsa nak no beuna.
LUK 9:51 Leꞌa zha na yamer ngol zha yaꞌ Jesús gibeꞌa stub biaj, leꞌa xa dubtsa ulo ladna yaꞌ Jerusalén.
LUK 9:52 Cha mtuꞌub xa pla xmen xa nchaꞌbe nedlabe. Leꞌa bexa wa cha ulayaꞌ dub gezh ten distrit Samaria, mkwaꞌan bexa sa yoo Jesús.
LUK 9:53 Ná leꞌa bexa gezh wa lá usaꞌa sa yoo xa, leꞌa bexa uniꞌí leꞌa Jesús nchaꞌa Jerusalén.
LUK 9:54 Leꞌa Jacob no Juan top xmen Jesús mbiꞌín ta wa, cha ndab bexa ndoꞌ Jesús: —Señor, ¿nlad ga inab besa ndoꞌ Dios ulaꞌ bealꞌ gibeꞌa utsoꞌol‑a be men baꞌ lak mbin Elí zha?
LUK 9:55 Leꞌa Jesús mgeaksoꞌ mwiꞌi ndoꞌ bexa. Cha uteyo Jesús bexa, ndab xa: —Bego ni lá iniꞌí ton ngo gek bega li ndab bega.
LUK 9:56 Leꞌa naꞌ, Xa Myak Men Ndoꞌ Gizhliyo, naꞌanpa ndalyut be men, leꞌa naꞌ ndi ndalusa gealnaban ten bexa. Cha nchaꞌbe bexa stubga gezh.
LUK 9:57 Leꞌa gor na li nchaꞌbe bexa nes, leꞌa dub men ndab ndoꞌ Jesús: —Señor, leꞌa naꞌ no isankea tsoꞌo go guniꞌi pa yaꞌ ga.
LUK 9:58 Leꞌa Jesús cha ndab ndoꞌ xa wa: —Leꞌa be mbeas ndap geꞌed nyoꞌo na, no leꞌa be migin ndap xuꞌun ten na, parea leꞌa Xa Myak Men Ndoꞌ Gizhliyo lá ndap sa uneꞌe xa.
LUK 9:59 Cha ndab Jesús ndoꞌ stub xa: —Usankea tsoꞌo naꞌ. Leꞌa xa wa cha ndab: —Señor, blaꞌa ga ned yaꞌukaꞌach naꞌ xus naꞌ. Weꞌeta isankea naꞌ tsoꞌo ga.
LUK 9:60 Leꞌa Jesús cha ndab: —Blaꞌa leꞌa bexa lá ndap gealnaban ndoꞌ Dios ukaꞌach ltsaꞌa ngut na. Ná leꞌa lu ndi waꞌyab ndoꞌ be men xteꞌe inibeꞌe Dios bexa.
LUK 9:61 Leꞌa stub xa cha ndabgal ndoꞌ Jesús: —Señor, leꞌa naꞌ no isankea tsoꞌo ga, parea blaꞌa ga ned nseayáp naꞌ‑yá ndoꞌ bexa ta lid naꞌ.
LUK 9:62 Leꞌa Jesús cha ndab: —Tal ton nlad isankea tsoꞌo naꞌ, ná leꞌa xa ndi ned stub ta xaꞌaga gun, leꞌa xa wa lá isuꞌu yoo lat be men nibeꞌe Dios. Leꞌa xa wa nak cuent dub xa ndun tiꞌin, nsén xa yaꞌa yarad, cha nwiꞌi xa ndi tsoꞌo.
LUK 10:1 Tsoꞌo wa leꞌa Jesús mti stub chon gaꞌal ncho tiꞌi be men, mtuꞌub xa bexa wa top gaꞌga bexa, yaꞌbe nedla bexa itea be gezh yaꞌ Jesús.
LUK 10:2 Ndab Jesús ndoꞌ bexa wa: —Ncho kwaꞌad be men gol goꞌón diꞌizh ten Dios, nak bexa cuent sianpa be taꞌa iganleꞌe, ná leꞌa bexa ndun tiꞌin wa platsa. Ta weꞌe unab bega ndoꞌ Dios Xwan tiꞌin, utuꞌubta xa bexa gudiꞌizh diꞌizh ten Dios.
LUK 10:3 Waꞌbe bega nat, leꞌa naꞌ ntuꞌub bega yaꞌbe bega cuentta be borreg nde lat be mbee.
LUK 10:4 Lá goꞌo bega bols ncho med, no ni stub bols ten bega, no ni stub nes ndab bega. No naꞌanpa gaisoꞌ bega nes inidiꞌizh bega ndoꞌ be men.
LUK 10:5 Leꞌa gor na yoo bega len dub niꞌi, cha gab bega ndoꞌ men wa: “Leꞌa Dios gun wen yoo ladna bega.”
LUK 10:6 Tal leꞌa xa ncho sa wa utsin ikaꞌab ndoꞌ bega, weꞌe leꞌa Dios gun wen yoo ladna xa wa. Ná tal leꞌa xa naꞌanpa utsin ikaꞌab, leꞌa xa naꞌanpa wen yoo ladna.
LUK 10:7 Leꞌa sa na utsin ikaꞌab bexa ndoꞌ bega, sa weꞌetsa yoo bega. Lá ido ladna bega gaw bega no goo bega ta usaꞌa xa, leꞌa dub xa ndun tiꞌin nsabndoꞌ yax ten na. No naꞌanpa ucheꞌa bega sa yoo bega.
LUK 10:8 Leꞌa gor na ilayaꞌ bega dub gezh sa utsin nak men ndoꞌ bega, gaw bega ta nsaꞌa bexa wa.
LUK 10:9 No byunyakna bega bexa gizh ncho gezh wa, cha gud bega ndoꞌ bexa leꞌa tiemp inibeꞌe Dios ladoꞌo be men yá gax nak.
LUK 10:10 Ná tal ncho gezh naꞌanpa utsin nak bexa ndoꞌ bega, bkaꞌan bega sa wa, cha gud bega ndoꞌ bexa wa:
LUK 10:11 “Gast yakol ngwaꞌal xoꞌo besa gezh ndee ulate besa, ta nluu leꞌa Dios utsaksi bega. Parea nlad besa iniꞌí bega ta ndee: leꞌa tiemp inibeꞌe Dios ladoꞌo be men yá gaxla nak.”
LUK 10:12 Leꞌa naꞌ gáp leꞌa gal wizh gab Dios ná ton ndap ke, leꞌa bexa gezh wa mas gealkweaꞌ iniꞌí ndoꞌ bexa uyoꞌo gezh Sodoma.
LUK 10:13 ’¡Proꞌob bego xa gezh Corazín no bego gezh Betsaida! Leꞌa tal be uyon mbin naꞌ lat bego wa ndi ngun naꞌ gezh Tiro no Sidón, polta ngokla bexa lad nagats, no usobla bexa ndoꞌ diꞌ, ta uluu leꞌa bexa mlaꞌala be ta ugap nak bexa.
LUK 10:14 Ta weꞌe leꞌa gal zha na gab Dios ná ton ndap ke, leꞌa bego xa gezh Corazín no bego gezh Betsaida mas uzheꞌeb iniꞌí gealkweaꞌ ndoꞌ bexa Tiro no Sidón wa.
LUK 10:15 No bego xa gezh Capernaum, ¿ndanbeꞌe bega zha gibeꞌa yaꞌ bega? Leꞌa Dios ndi utsaꞌab bega infierno.
LUK 10:16 Cha ndab Jesús ndoꞌ be xmen na: —Leꞌa tal ton isakyoꞌón be ta ndab bega wa, leꞌa xa wa isakyoꞌón diꞌizh ten naꞌ. Ná leꞌa tal ton uxelad bega, leꞌa xa wa no naꞌ ndee nxelad. Leꞌa xa na uxelad naꞌ wa, leꞌa xa wa no nxelad Dios xa mtuꞌub naꞌ.
LUK 10:17 Leꞌa gor na mlaꞌnchaꞌ isachon gaꞌal ncho tiꞌi bexa wa, leꞌa bexa uzhebpa mten ladna ndab ndoꞌ Jesús: —Señor, gast be mbi bxin nxobgek ndoꞌ besa gor ndantiꞌin besa leaꞌ go.
LUK 10:18 Leꞌa Jesús cha ndab: —Leꞌa naꞌ uní leꞌa maxuꞌu utoꞌo gaꞌap baꞌ ulayat ndoꞌ yo cuent bealꞌ usiꞌi.
LUK 10:19 Leꞌa naꞌ nsa juers ndoꞌ bego isoꞌ bega tsoꞌo mbeꞌal no nix, no mas gap bega juers ndoꞌ maxuꞌu. Ni dub taꞌa wa lá gun gan xteꞌe gunno bega.
LUK 10:20 Parea lá iten ladna bega xteꞌe nxobgek be mbi bxin ndoꞌ bega, ndi bten ladna bega leꞌa leaꞌ bega nkeala gibeꞌa.
LUK 10:21 Weꞌe leꞌa Espíritu ten Dios cha mbin mas nten ladna Jesús, cha ndab Jesús ndoꞌ Dios: —Nsa naꞌ xno ndoꞌ go, Xus naꞌ, go Xa Nibeꞌe gibeꞌa no gizhliyo, leꞌa go lá ulaꞌa leꞌa bexa ndák wa no bexa ntsid wa yakbeꞌena be ta ndee. Ndi mluu ga‑yá ndoꞌ bexa naꞌanpa ndák, bexa nak cuent be meꞌed. Li ngok‑a Xus naꞌ, geal leꞌa go li nlad gak‑a.
LUK 10:22 Cha ndab Jesús ndoꞌ be men nde sa wa: —Leꞌa Dios Xus naꞌ msaꞌa itea be taꞌa ndoꞌ naꞌ. No naꞌan ton nchandoꞌ naꞌ, nabtsa Xus naꞌ nchandoꞌ naꞌ. No naꞌan ton nchandoꞌ Dios Xus naꞌ, nabtsa naꞌ xa nak Xin xa nchandoꞌ xa, no bexa nlad naꞌ uluꞌu naꞌ ná ton nak Dios ndoꞌ bexa.
LUK 10:23 Cha mwiꞌi Jesús ndoꞌ be xmen na, cha ndab xa ndoꞌ nabtsa bexa wa: —Dios ndun wen nyo ladna be men na no uniꞌí ltsaꞌa ta uniꞌí bega nat.
LUK 10:24 Leꞌa naꞌ gáp leꞌa kwaꞌad bexa mbidiꞌizh sakndoꞌ Dios no bexa nibeꞌe polta, nlad bexa iniꞌí bexa ltsaꞌa ta uniꞌí bega nat, ná leꞌa bexa lá iniꞌí ta wa. No nlad bexa goꞌón bexa ltsaꞌa ta ndoꞌón bega nat, ná leꞌa bexa lá ngoꞌón ta wa.
LUK 10:25 Weꞌe leꞌa dub mech ten ley mbin preb Jesús, ndab xa: —Mech, ¿xteꞌe gun naꞌ ndontsa gap naꞌ gealnaban ndoꞌ Dios, ta nunk lá idub?
LUK 10:26 Leꞌa Jesús cha ukaꞌab ndab: —¿Xteꞌe nkeaniꞌi ley ten Dios? ¿Xteꞌe nyakbeꞌena lu ta wa?
LUK 10:27 Leꞌa mech ten ley wa cha ndab: —Leꞌa ley wa ndab: “Wankea Dios Xa Nibeꞌe idub ncho ladna ladoꞌo lu, no idub gealnaban ten lu, no idub juers ten lu, no idub lak ndanbeꞌe lu.” No ndab‑a: “Bkweaꞌ ladna lu be ltsaꞌa lu lakkata lu.”
LUK 10:28 Leꞌa Jesús cha ndab: —Leꞌaka ukaꞌab lu. Nat bin be ta wa, leꞌa lu sapka gealnaban ndoꞌ Dios.
LUK 10:29 Ná leꞌa mech wa nlad wen yaꞌan ndoꞌ be men, ta weꞌe unabdiꞌizhgal xa ndoꞌ Jesús, ndab xa: —¿Ton nak ltsaꞌa naꞌ zha?
LUK 10:30 Leꞌa Jesús cha ukaꞌab ndab: —Leꞌa dub xabgiꞌi utoꞌo Jerusalén nchaꞌa xa Jericó. Leꞌa nes nchaꞌa xa wa, mlat be waꞌan itea be ta noꞌo xa no gast xab xa. No udin bexa xa, cha mlaugix bexa xa cuent dub xa ngut.
LUK 10:31 Ngol gor leꞌa sa wa nseatid dub uleꞌay ten bexa judio. Leꞌa xa wa cha uniꞌí nax men wa, cha gandidtsa utid xa.
LUK 10:32 Tsoꞌo wa nseatid dub xa levita sa wa. Leꞌa gor uniꞌí xa xa nax wa, cha gandidgal utid xa.
LUK 10:33 Leꞌa tsoꞌo wa nseatidga dub xa gezh Samaria. Leꞌa gor uniꞌí xa men wa, cha mlats ladna xa xa wa.
LUK 10:34 Cha ubii xa wats xa wa, cha mbin ramed xa xa aceit no vin. No mtixko xa lad be sa gizh wa. Cha mxoꞌob xa xa wa tsoꞌo man ten xa. Cha mbiꞌi xa xa dub niꞌi sa nteꞌe bexa cuart, cha mlaꞌach xa xa sa wa.
LUK 10:35 Ngot xeꞌa wa gor na yá nseaꞌ xa Samaria wa, leꞌa xa cha uloꞌo top med nsak, cha msaꞌa xa‑yá ukaꞌa xwan niꞌi wa. Cha ndab xa ndoꞌ xa wa: “Blaꞌach ga xa ndee. Leꞌa itea be ta gun gast ga wa, leꞌa naꞌ skixka ta wa wizh yach naꞌ.”
LUK 10:36 Cha ndab Jesús ndoꞌ mech ten ley wa: —¿Xteꞌe nsak lu zha? Ndoꞌ yon bexa wa, ¿ton nak ltsaꞌa na xa na ulawaꞌan wa zha?
LUK 10:37 Leꞌa mech ten ley wa cha ukaꞌab ndab: —Xa na mlats ladna xa wa. Leꞌa Jesús cha ndab: —Nat byaꞌ, cha no lu li bin.
LUK 10:38 Leꞌa nes nchaꞌa Jesús Jerusalén, cha ulayaꞌ xa dub gezh tuzh. Weꞌe leꞌa dub xagots nsaleaꞌ Mart utezh xa ta lid na.
LUK 10:39 Leꞌa xa wa ndap dub beal na nsaleaꞌ Marí. Leꞌa gor na nsob Jesús len niꞌi, leꞌa Marí wa nsob ulaꞌach xtaꞌan ndadiꞌizh Jesús.
LUK 10:40 Leꞌa Mart ndi nyuꞌno ladna sian be tiꞌin ten na. Cha ubii xa wats Jesús, ndab xa: —Señor, ¿lá naꞌ go zha leꞌa beal naꞌ nlaꞌa nab naꞌ ndun itea be tiꞌin ndee? Gud go ndoꞌ xa no gakno naꞌ.
LUK 10:41 Leꞌa Jesús cha ukaꞌab ndab: —Mart, Mart, uzhebpa nyuꞌno ladna lu sian be taꞌa.
LUK 10:42 Ncho dub taꞌa ndon leꞌa nsak. Leꞌa Marí ndee mti ta nsak wa, no ni lá gáp naꞌ ndoꞌ xa lá ulaꞌachta xa‑yá.
LUK 11:1 Leꞌa dub wizh leꞌa Jesús ngwaꞌyadiꞌizhno Dios. Leꞌa gor na mtayadiꞌizh xa leꞌa dub xmen xa cha ndab ndoꞌ xa: —Señor, bluu ga besa xteꞌe gudiꞌizhno besa Dios, lak mluu Juan be xmen na.
LUK 11:2 Leꞌa Jesús cha ndab ndoꞌ bexa: —Leꞌa gor na gudiꞌizhno bega Dios, lndeꞌe gab bega: Go Dios Xus besa, go nsob gibeꞌa, yankea be men go. No uxax ilen tiemp inibeꞌe go be men nde ndoꞌ gizhliyo. Gak ta nlad go ndoꞌ gizhliyo, lak ndak‑a gibeꞌa.
LUK 11:3 Nab besa usaꞌa go ta gaw besa wizh nat, lak nkiꞌin besa‑yá itea wizh.
LUK 11:4 Bingeꞌ ladna go be ke ten besa, lak ndangeꞌ ladna besa ndoꞌ be men ugap ndanno besa. Lá ulaꞌa go gailaꞌ besa ndoꞌ ta ugap, ndi uloꞌo ga besa ndoꞌ itea be ta ugap.
LUK 11:5 No ndab Jesús ndoꞌ bexa: —Tal leꞌa bega yaꞌ ta lid dub amig ten bega utol teꞌal, cha gab bega: “Amig, bsaꞌa chontsa pan ika naꞌ,
LUK 11:6 leꞌa stub amig ten naꞌ ulansea ta lid naꞌ, leꞌa naꞌ lá ndap ta gaw xa wa.”
LUK 11:7 Leꞌa xa wa cha gab: “Lá gunta lu ruid. Leꞌa toꞌo lid naꞌ nsoꞌnyawla. No be xmeꞌed naꞌ ndeyatsla wats naꞌ. Leꞌa naꞌ lá yoo gan gaste usa ta nlad lu wa.”
LUK 11:8 Parea leꞌa naꞌ gáp ndoꞌ bega leꞌa xa wa gasteka, usaꞌa xa itea be ta nkiꞌin bega ndontsa yá lá gunta bega ruid, naꞌanpa ta na amigtsa ten xa bega.
LUK 11:9 ’Leꞌa naꞌ gáp ndoꞌ bega unab bega ta nkiꞌin bega ndoꞌ Dios, leꞌa Dios saꞌaka‑yá. Bkwaꞌan bega Dios, leꞌa bega szhealka xa. Utezh bega Dios, leꞌa Dios saknoka bega.
LUK 11:10 Leꞌa itea bexa na nab ta nkiꞌin na, leꞌa Dios nsaꞌaka‑yá. Leꞌa itea bexa na nkwaꞌan Dios, leꞌa bexa nzhealka xa. Leꞌa itea bexa na nbezh Dios, leꞌa Dios ndaknoka xa.
LUK 11:11 ’Leꞌa bego na ndap meꞌed, tal leꞌa dub xmeꞌed bega inab dub pan, ¿cha saꞌa bega ndi dub geꞌ ndoꞌ meꞌed zha? No tal leꞌa xmeꞌed bega inab dub mbeal, ¿cha saꞌa bega ndi dub mbeꞌal ndoꞌ meꞌed zha?
LUK 11:12 No tal leꞌa xmeꞌed bega inab dub nguꞌu, ¿cha saꞌa bega ndi dub nix zha?
LUK 11:13 Leꞌa bego bexa ugap, ná sbeꞌen be ta wen nsaꞌa bega ndoꞌ be xin bega, ¿matagal Dios Xus beuna nsob gibeꞌa usaꞌa Espíritu ten na ndoꞌ bexa inab‑a?
LUK 11:14 Leꞌa dub wizh leꞌa Jesús ulantuꞌub dub mbi bxin mbin mud dub xabgiꞌi. Leꞌa gor na utoꞌo mbi bxin wa, leꞌa xa mud wa usaxan ndadiꞌizhla. Leꞌa be men ngwanseanabe.
LUK 11:15 Ná leꞌa ncho be men ndab: —Leꞌa Jesús ngontuꞌub be mbi bxin juers ten Beelzebú, maxuꞌu nibeꞌe be mbi bxin.
LUK 11:16 No ncho xa mbin preb Jesús ndab bexa gun Jesús dub ta uluu ton nak xa.
LUK 11:17 Parea leꞌa Jesús mgenna xteꞌe ndanbeꞌe bexa wa, cha ndab Jesús: —Tal leꞌa be xmen dub xa nibeꞌe iteltsaꞌabe, cha bi leꞌakaga bexa kuyo, weꞌe leꞌa bexa wa naꞌantapa gak juertbe. No tal leꞌa be men ncho len dub niꞌi liga leꞌakaga kuyobe, leꞌa juers ten bexa idub.
LUK 11:18 Leꞌa bego ndab leꞌa naꞌ ngontuꞌub be bxin juers ten Beelzebú. Parea tal leꞌa maxuꞌu kuyono leꞌaka be mbi bxin ten na, weꞌe leꞌa maxuꞌu wa no be mbi bxin wa iteltsaꞌabe, cha idub juers ten maxuꞌu.
LUK 11:19 Ndab bega leꞌa naꞌ ndee ngontuꞌub be mbi bxin juers ten Beelzebú. ¿Ná ton nsaꞌa juers ngontuꞌub be xmen bega be mbi bxin wa zha? Leꞌa naꞌ gáp leꞌa ta na ndun be xmen bega wa leꞌa nluu leꞌa bega naꞌanpa utsin ndun.
LUK 11:20 Ná leꞌa naꞌ ndee ngontuꞌub be mbi bxin juers ten Espíritu ten Dios, ta na nluu leꞌa Dios yá ngol tiemp inibeꞌe be men ndoꞌ gizhliyo.
LUK 11:21 ’Leꞌa tal leꞌa dub xabgiꞌi juert noꞌo spad nlaꞌach xa ta lid xa, leꞌa itea taꞌa nlaꞌach xa segurka ndebe.
LUK 11:22 Parea tal leꞌa stubga xa mas juert ilen ta lid xa wa, cha gun xa gan ndoꞌ xa wa, leꞌa xa wa slat spad na ngeꞌ ladna xa wa. Cha slat xa be ta ndap xa ned wa no stseꞌa xa‑yá ndoꞌ be ltsaꞌa xa.
LUK 11:23 ’Leꞌa tal ton lá nsak ladna ta ndun naꞌ, leꞌa xa wa ndi ndakloo ndoꞌ naꞌ. No liga leꞌa tal ton bexa naꞌanpa ndakno naꞌ nyakjunt be men ndoꞌ Dios, leꞌa xa wa ndi ndun nsasit be men wats Dios.
LUK 11:24 ’Leꞌa gor na ntoꞌo dub mbi bxin len ladoꞌo dub men, leꞌa mbi bxin wa cha nchaꞌa sa naꞌan men nchaꞌkwaꞌan ná pa yoo na. Ná leꞌa gor na lá izheal pa yoo mbi bxin wa, cha ndab ta wa: “Nsea naꞌ leꞌaka ta lid naꞌ sa utoꞌo naꞌ.”
LUK 11:25 Leꞌa gor na mtanseaꞌ mbi bxin wa leꞌa ladoꞌo men wa cuent dub niꞌi ndon umbiꞌi nak no chul nsaxkwaꞌa‑yá.
LUK 11:26 Weꞌe leꞌa mbi bxin wa cha nchaꞌgiꞌi stub sgaꞌad be mbi bxin mas ugap nak. Leꞌa itea be mbi bxin wa cha yoo ladoꞌo men wa. Cha mas juert yoo xa wa ndoꞌ lak zha ned wa.
LUK 11:27 Leꞌa gor na li nsoꞌyadiꞌizh Jesús ta wa, leꞌa dub xagots nsoꞌ lat be men wa ugeꞌ ndab ndoꞌ Jesús: —¡Uzhebpa wen yoo ladna xa ngop go, no mbingaꞌal xa go!
LUK 11:28 Ná leꞌa Jesús cha ndi ndab: —Mas uzheꞌeb wen yoo ladna bexa ndoꞌón diꞌizh ten Dios, no ndun bexa lak ndab‑a.
LUK 11:29 Leꞌa be men wa mas kwaꞌad nsayakjunt wats Jesús, cha ndab Jesús ndoꞌ bexa: —Leꞌa be men ncho nat uzhebpa be men ugap. Nab bega gun naꞌ dub ta uluu ton nak naꞌ, parea leꞌa naꞌ lá gun ta nab bega wa. Ndi iniꞌítsa bega leꞌa naꞌ itiꞌid ltsaꞌa ta utid Jonás.
LUK 11:30 Leꞌa ta utid Jonás wa mluu leꞌa Dios leꞌaka mtuꞌub Jonás gezh Nínive. No liga leꞌa ta itiꞌid naꞌ, Xa Myak Men Ndoꞌ Gizhliyo, uluu ndoꞌ be men ncho nat leꞌa naꞌ Dioska mtuꞌub.
LUK 11:31 ’Leꞌa gal wizh na gab Dios ná ton ndap ke, leꞌa xagots unibeꞌe be men lad sur isoꞌ, gab xa leꞌa bego ndapka ke. Leꞌa xagots wa uzhebpa sit utoꞌo ndontsa mbidyoꞌón xa ta mbidiꞌizh Salomón, be ta uzheꞌeb ngók xa. Leꞌa sa ndee nsoꞌ dub xa mas nsak ndoꞌ Salomón wa, ná leꞌa bego lá nsakyoꞌón ta ndab xa.
LUK 11:32 Leꞌa bexa Nínive no kwe ndoꞌ Dios wizh na gab Dios ná ton ndap ke, gab bexa leꞌa be men ncho nat ndee ugap nak. Leꞌa bexa Nínive mlaꞌa be ta ugap nak bexa gor na mbiꞌín bexa ta mbidiꞌizh Jonás. Ná leꞌa nat leꞌa dub xa mas nsak ndoꞌ Jonás nsoꞌ sa ndee.
LUK 11:33 ’Leꞌa naꞌan ton kich dub xeꞌa, cha usob xa‑yá dub sa xgaꞌach. No ni len dub caj lá usob xa‑yá. Ndi gaꞌap usob xa‑yá, ndontsa leꞌa be men nyote len niꞌi wa inaꞌ xeꞌa wa.
LUK 11:34 Leꞌa ngusndoꞌ dub men leꞌa nak xeꞌa ten xa. Tal leꞌa ngusndoꞌ bega ta wen, leꞌa bega nkesea ndoꞌ xeꞌa. Ná tal leꞌa ngusndoꞌ bega naꞌanpa ta wen, leꞌa bega ndi nkesea sa ukaw.
LUK 11:35 Blaꞌach bega leꞌa len ladoꞌo bega nchoka xeꞌa ten Dios, naꞌanpa sa ukaw gak‑a.
LUK 11:36 Tal leꞌa len ladoꞌo bega idubka ncho xeꞌa ten Dios, leꞌa bega ni dub tuzh naꞌanpa ncho sa ukaw. Weꞌe leꞌa bega iniꞌí itea be taꞌa, cuent gor na nsu xeꞌa sa nsoꞌ bega.
LUK 11:37 Leꞌa gor na mtayadiꞌizh Jesús ndoꞌ be men, leꞌa dub xa fariseo cha unab ndoꞌ Jesús yaꞌdaw Jesús ta lid xa. Cha uyoꞌo Jesús, cha usob xa ndoꞌ mes.
LUK 11:38 Parea leꞌa Jesús naꞌanpa unaꞌa lak nibeꞌe costumbr ten bexa fariseo. Leꞌa gor na uniꞌí xa fariseo ta wa, cha ngwanseana xa.
LUK 11:39 Leꞌa Jesús cha ndab: —Leꞌa bego xa fariseo uzhebpa nyuꞌ ladna yat tsoꞌo vas nsea plat, parea leꞌa len ladoꞌo bega uzhebpa ugap nak, no uzhebpa nsaꞌab ladna bega be taꞌa.
LUK 11:40 ¡Bego xa lá nsakyoꞌón! ¿Lá iniꞌí bega zha leꞌa Dios xa na mbindeꞌe idub las men, leꞌa xa wa leꞌaka nsaꞌa gealnaban ten be men?
LUK 11:41 Bsaꞌa bega be ta gakno bexa uban nak, weꞌe umbiꞌi gak bega ndoꞌ Dios.
LUK 11:42 ’¡Proꞌob bego xa fariseo! Leꞌaka nak nsaꞌa bega dub gen byonxtil lat dub tiꞌi gen‑a uxen bega, no liga ndanno bega rud no iteata be ta xgeꞌa ndas bega. Parea naꞌanpa utsin nak bega ndoꞌ be men, no ni lá ndankea bega Dios. Be ta wen ndee nsabndoꞌ gun bega, no usaꞌaka bega be ta wa lakka ndun bega nat.
LUK 11:43 ’¡Proꞌob bego xa fariseo! Leꞌa bega nti be sa mas nsak isob bega len be niꞌi sa nzhealbe beuna xa judio. No nlad bega utsin inidiꞌizh be men ndoꞌ bega be ndoꞌ xgeꞌe.
LUK 11:44 ’¡Proꞌob bego mech ten ley no bexa fariseo! Leꞌa bega nluu cuentta xa wen, ná bega xa ugap. Leꞌa bego nak cuent dub baꞌa ni lá nluu. Leꞌa be men nsea tsoꞌo‑yá, parea ni lá iniꞌí bexa xtaꞌan‑a.
LUK 11:45 Leꞌa dub mech ten ley ukaꞌab ndab ndoꞌ Jesús: —Mech, leꞌa go no ndoꞌ besa kweaꞌ uníꞌi.
LUK 11:46 Leꞌa Jesús cha ndab: —¡Proꞌob bego mech ten ley! Leꞌa be ta sian nluu bega wa cuent dub yoꞌo kweꞌa ni lá uxik be men goꞌo‑yá. Ná leꞌa bega ni dub ngutsyaꞌa na lá ndakno bexa goꞌo bexa‑yá.
LUK 11:47 ’¡Proꞌob bego! Leꞌa be usan gox polta ten bega mbit bexa ndadiꞌizh sakndoꞌ Dios. Ná nat leꞌa bega ndi ndandeꞌe ta chul nsob sa mgaꞌach bexa wa.
LUK 11:48 Leꞌa ta wa nluu leꞌa bega dubtsaka nak no be usan gox polta ten bega. Leꞌa bexa wa mbit bexa mbidiꞌizh sakndoꞌ Dios, ná nat leꞌa bega nsaxkwaꞌaga baꞌa ten bexa wa.
LUK 11:49 ’Ta weꞌe lndeꞌe ndab Dios: “Leꞌa naꞌ utuꞌubkata bexa ndadiꞌizh sakndoꞌ naꞌ, no bexa ndadiꞌizh diꞌizh ten naꞌ. Leꞌa ncho bexa utuꞌub naꞌ wa leꞌa be men gut xa, no ncho bexa leꞌa be men ugap gunno xa.”
LUK 11:50 Ta weꞌe leꞌa bego ncho tiemp nat gap ke ten itea bexa ugap li ndut bexa mbidiꞌizh sakndoꞌ Dios wa gast idub zha utexanta gizhliyo.
LUK 11:51 Leꞌa ta wa gast zha ngut Abel no gast zha ngut Zacarías, mbit be men xa wa wats altar dub lad wats niꞌi ten Dios. Leꞌa naꞌ gáp ndoꞌ bega leꞌa Dios utsaksi be men ncho nat ke ten iteanak be ta mbin bexa polta wa.
LUK 11:52 ’¡Proꞌob bego mech ten ley! Leꞌa bega nka igondoꞌ be men Dios. Leꞌa bega lá nchandoꞌ Dios, no ni lá nlaꞌa bega igondoꞌ bexa Dios.
LUK 11:53 Leꞌa gor na mtayadiꞌizh Jesús, leꞌa be mech ten ley no bexa fariseo uzhebpa ndakloobe ndoꞌ Jesús. Cha usaxan bexa unabdiꞌizh bexa sian ta ugan,
LUK 11:54 nlad bexa gab Jesús dub ta lid leꞌa nak, ndontsa ke weꞌe usake bexa Jesús.
LUK 12:1 Leꞌa gor wa leꞌa sian mil be men ulayaꞌ wats Jesús, gast nsoꞌ bexa tsoꞌo xoꞌo ltsaꞌa bexa tant dub kwaꞌad bexa. Leꞌa Jesús cha ndab ndoꞌ be xmen na: —Uzhebpa gop bega cuent nsea levadur ten bexa fariseo, leꞌa bexa nluꞌu cuentta xa wen, ná leꞌa bexa ugap nak.
LUK 12:2 Leꞌa itea be ta ugaꞌach, leꞌa gal gor leꞌa be ta wa uluꞌukabe. No itea be ta ngachyoꞌo, leꞌa gal gor leꞌa be men iniꞌíka ta wa.
LUK 12:3 Ta weꞌe leꞌa itea ta ndadiꞌizh bega dub sa ukaw, leꞌa ta wa sgenka ndoꞌ xeꞌa. No itea ta xgaꞌach ndadiꞌizh bega len niꞌi, leꞌa ta wa gast idub gezh sgenka.
LUK 12:4 ’Leꞌa naꞌ gáp ndoꞌ bego nak amig ten naꞌ, lá izheb bega ndoꞌ bexa ndut men, leꞌa bexa wa ta weꞌetsa sun gan gun.
LUK 12:5 Ndi gáp naꞌ ndoꞌ bega ná ton ndoꞌ ná nsabndoꞌ izheb bega: bzheb bega ndoꞌ Dios, xa na sun gan gut be men, cha utsaꞌab xa gealnaban ten bexa infierno. Leꞌa naꞌ gáp ndoꞌ bego, ndoꞌ xa weꞌe bzheb bega.
LUK 12:6 ’Leꞌa dub gaꞌay migin nzheꞌa top med byux, ná leꞌa cuent ten Dios leꞌa kadga dub migin wa nsak.
LUK 12:7 Lá izheb bega leꞌa bega mas nsak ndoꞌ be migin. Leꞌa Dios uzhebpa nlaꞌach bega gast uniꞌí xa plo gichgek bega.
LUK 12:8 No ndab Jesús ndoꞌ be xmen na: —Leꞌa naꞌ gáp ndoꞌ bego leꞌa tal ton gab ndoꞌ be men leꞌa xa xmen naꞌ, leꞌa naꞌ, Xa Myak Men Ndoꞌ Gizhliyo, noga gáp ndoꞌ be angel ten Dios leꞌa xa xmenka naꞌ.
LUK 12:9 Parea leꞌa tal ton gab ndoꞌ be men leꞌa xa naꞌanpa xmen naꞌ, leꞌa naꞌ noga gáp ndoꞌ be angel ten Dios leꞌa xa wa naꞌanpa xmen naꞌ.
LUK 12:10 ’Leꞌa tal ton inisi naꞌ, Xa Myak Men Ndoꞌ Gizhliyo, leꞌa Dios sungeꞌka ladna ta wa. Ná leꞌa tal ton inisi Espíritu ten Dios, leꞌa Dios lá gungeꞌ ladna ke wa.
LUK 12:11 ’Leꞌa bega yak cuent ndoꞌ bexa nibeꞌe ten bexa judio no ndoꞌ be juez no ndoꞌ bexa naktiꞌin. Parea lá yuꞌ ladna bega xteꞌe ikaꞌab bega, no xteꞌe utsakndoꞌ bega,
LUK 12:12 leꞌa Espíritu ten Dios leꞌa uluu xteꞌe gab bega gor wa.
LUK 12:13 Leꞌa lat be men kwaꞌad wa utoꞌo dub xa ndab ndoꞌ Jesús: —Mech, gud go ndoꞌ wit naꞌ ite besa be taꞌa msaꞌa xus besa.
LUK 12:14 Ná leꞌa Jesús cha ukaꞌab ndab ndoꞌ xa wa: —Naꞌan ton msoꞌ naꞌ gak naꞌ juez ite naꞌ be taꞌa ten bega.
LUK 12:15 Cha ndab Jesús ndoꞌ be men wa: —Blaꞌach bega naꞌanpa isaꞌab ladna bega gap bega sian taꞌa, leꞌa be ta sian ndap dub men lá isuꞌu gun wen yoo xa.
LUK 12:16 No msaktabeꞌe Jesús dub taꞌa mluu xa ndab xa: —Uyoꞌo dub xabgiꞌi rik uzhebpa ngok taꞌa ndoꞌ yo ten xa.
LUK 12:17 Cha mbinbeꞌe xa wa: “¿Xteꞌe gun naꞌ nat? ¿Pa kochaꞌaw naꞌ be ta sian ndee?”
LUK 12:18 Tsoꞌo wa mbinbeꞌe xa: “Naꞌ uníla xteꞌe gunno naꞌ‑yá. Naꞌ ulate be sa nyochaꞌaw be taꞌa ten naꞌ. Cha gunde naꞌ stapla be sa mas ubiꞌi, sa yoo be ta sian ndee no iteata be taꞌa ndap naꞌ.
LUK 12:19 Cha gáp naꞌ ndoꞌ naꞌ leꞌa naꞌ ndap sianpa be ta gaw na sian liꞌin. Cha une naꞌ, no gaw naꞌ, no goꞌo naꞌ, no iten lad naꞌ.”
LUK 12:20 ’Ná leꞌa Dios ndab: “Mgiꞌi, ngud nak lu. Leꞌa teꞌal nat leꞌa lu gat. ¿Cha ton yaꞌanno be ta sian ulochaꞌaw lu baꞌ zha?”
LUK 12:21 Nsea ndab Jesús ndoꞌ be men: —Li nak be men na nlad gap sian taꞌa ndoꞌ gizhliyo, parea leꞌa ndoꞌ Dios leꞌa xa uban nak.
LUK 12:22 Weꞌe leꞌa Jesús cha ndab ndoꞌ be xmen na: —Ta weꞌe leꞌa naꞌ gáp ndoꞌ bega lá yuꞌ ladna bega xtaꞌan gaw bega ndontsa iban bega. No ni lad gak bega lá yuꞌ ladna bega.
LUK 12:23 Leꞌa gealnaban ten bega mas nsak ndoꞌ be ta gaw bega, no leꞌa bega mas nsak ndoꞌ be xab bega.
LUK 12:24 Binbeꞌe bega lak nak be migin, ni lá ndas ma bid, no ni lá nteleꞌe ma ta gaw ma, no ni lá ndap ma dub sa nyochaꞌaw ta gaw ma, ná leꞌa Dios ngawka ma. ¿Lá iniꞌí bega zha leꞌa bega uzhebpa mas nsak ndoꞌ be migin?
LUK 12:25 No ni dub bega tal leꞌa xa uzhebpa yuꞌ ladna, lá gun xa gan gaꞌal xa ni stol metr.
LUK 12:26 Tal leꞌa bega ni ta tuzh wa lá yoo gan gun, ¿xtaꞌan ngi nyuꞌ ladna bega iteata be taꞌa zhaga?
LUK 12:27 ’Bwiꞌi bega ndoꞌ be géꞌe no xteꞌe ndiꞌibyaꞌal‑a, parea ni lá ndun‑a tiꞌin, no ni lá ndandeꞌe‑yá lad. Ná leꞌa naꞌ gáp ndoꞌ bega leꞌa lat itea be lad uzhebpa wen ngok Salomón naꞌan dub lad chul lakta dub géꞌe.
LUK 12:28 Leꞌa Dios lita chul ndanno be géꞌe ndiꞌib be geꞌe, ná ta gal geꞌatsa yabtoꞌog‑a cha yolꞌ‑a. Parea leꞌa bega uzhebpa mas nsak ndoꞌ dub géꞌe, ta weꞌe leꞌa Dios saknokaga bega maska ndidotsa ngeꞌ ladna bega Dios.
LUK 12:29 Ta weꞌe lá gunbeꞌe bega xtaꞌan gaw bega no xtaꞌan goo bega. Ni lá yuꞌta ladna bega ta wa.
LUK 12:30 Leꞌa be men lá nchandoꞌ Dios wa itea be ta ndee nkwaꞌan xa, ná leꞌa Dios Xus beuna uniꞌíka xtaꞌan nkiꞌin bega.
LUK 12:31 Ndi bkwaꞌan bega xteꞌe gak bega dub men leꞌa Dios nibeꞌe, weꞌe leꞌa Dios saꞌaka iteanak be ta nkiꞌin bega.
LUK 12:32 ’Lá izheb bego nak cuent be borreg ten naꞌ, leꞌa Dios Xus bega usaꞌa sa nibeꞌe xa yoo bega.
LUK 12:33 Bdoꞌo bega be ta ten bega, cha btseꞌa bega med wa ndoꞌ bexa uban nak. Tal leꞌa bega li gun, leꞌa bega li kochaꞌaw sian taꞌa gibeꞌa. Leꞌa ta wa cuent dub bols lá gak gox, dub sa na ni waꞌan lá yoo gan yate, no ni mbes lá gaw‑a.
LUK 12:34 Tal leꞌa bega li gun ta wen wa, weꞌe leꞌa bega mas ukwaꞌan ta nsak ladna Dios.
LUK 12:35 ’List ute bega, no isengiꞌla xeꞌa ten bega.
LUK 12:36 Gok bega cuent dub mos nkenkeaꞌ gor ilen xa nibeꞌe ten xa, mtoꞌo xa sa mchilyaꞌa men. Leꞌa gor ilaꞌnchaꞌ xa wa cha kwezh xa mos, leꞌa mos wa listla nsoꞌuxaꞌal sa yoo xa.
LUK 12:37 Uzhebpa wen yoo ladna be mos ndenaꞌbe gor ilaꞌnchaꞌ xa nibeꞌe ten na. Leꞌa naꞌ gáp ndoꞌ bega leꞌa xa nibeꞌe wa cha gab ndoꞌ mos isob xa ndoꞌ mes, cha usaꞌa xa ta gaw mos wa.
LUK 12:38 Guniꞌi xá gor ilen xa, tal ilen xa utol teꞌal natal ilen xa gor nsayat xeꞌa, tal leꞌa be mos wa listka nde, leꞌa bexa wa wen yoo.
LUK 12:39 ’Parea leꞌa naꞌ nlad yakbeꞌena bega ta ndee: leꞌa tal leꞌa dub xwan niꞌi uniꞌí xá gor giꞌid dub waꞌan ta lid xa, leꞌa xa isob ulaꞌach ndontsa naꞌanpa yoo waꞌan len lid xa kowaꞌan be taꞌa ten xa.
LUK 12:40 Ta weꞌe no bega list ute, leꞌa naꞌ, Xa Myak Men Ndoꞌ Gizhliyo, ilengal dub gor ni lá ndanbeꞌe bega ti ilen naꞌ.
LUK 12:41 Leꞌa Pedr cha unabdiꞌizh ndoꞌ Jesús ndab: —Señor, ta msaktabeꞌe go wa, ¿ndab ga ta wa ndoꞌtsa besa zha, nate no ndoꞌ itea be men?
LUK 12:42 Leꞌa Jesús cha ndab: —¿Ton bega nak cuent dub mos ndák ndun lak ndab dub xwan niꞌi? Leꞌa xwan niꞌi wa uchaꞌan mos wa inibeꞌe xa stapla bexa ndun tiꞌin ten xa wa, no usaꞌa mos ta gaw bexa.
LUK 12:43 Leꞌa gor na ilaꞌnchaꞌ xwan niꞌi wa uzhebpa wen yoo ladna mos ndun lak ndab xa wa.
LUK 12:44 Leꞌa naꞌ gáp ndoꞌ bega leꞌa xwan niꞌi wa usoꞌ mos wen wa, inibeꞌe xa itea be ta ndap xa wa.
LUK 12:45 Ná tal leꞌa mos wa dub xa ugap, gunbeꞌe xa gab xa leꞌa xa nibeꞌe ten xa nleꞌata ilen. Cha ndi isaxan xa kin xa iteata be mos wa, be xabgiꞌi no be xagots. No gaw xa no goo xa no gun xa gealgu.
LUK 12:46 Weꞌe leꞌa xwan niꞌi wa cha ilaꞌnchaꞌ dub wizh no dub gor ni lá ndanbeꞌe mos ti ilen xa. Cha uzhebpa utsaksi xa mos wa lak ntsaksi xa itea be mos lá nxobgek.
LUK 12:47 ’Tal leꞌa dub mos uniꞌíka xtaꞌan nlad xa nibeꞌe ten na, ná ni lid list ngun xa, no ni lá ngun xa ta nlad xa nibeꞌe ten xa, leꞌa xa wa uzhebpa gealkweaꞌ iniꞌí.
LUK 12:48 Ná tal leꞌa dub mos ni lá nchandoꞌ xteꞌe nak ta nlad xa nibeꞌe ten na, cha ndun xa ta na nsabndoꞌ utsaksi bexa xa, leꞌa xa wa mas uxee gealkweaꞌ iniꞌí. Leꞌa itea bexa na mas sian taꞌa msaꞌa Dios ndák xa, leꞌa bexa wa liga sian tiꞌin nsabndoꞌ gun ndoꞌ Dios. No leꞌa bexa na mas sian taꞌa nsaꞌa Dios ulaꞌach bexa, leꞌa bexa wa liga nsabndoꞌ mas uxobgek ndoꞌ Dios.
LUK 12:49 ’Leꞌa naꞌ ndal utsengiꞌ ndoꞌ gizhliyo ndee. Leꞌa naꞌ nlad malay‑a nsayolꞌla.
LUK 12:50 Leꞌa naꞌ ned nsabndoꞌ itiꞌid ndoꞌ dub gealkweaꞌ siꞌil, no uzheꞌeb kweaꞌ ncho lad naꞌ gast itiꞌid naꞌ ta wa.
LUK 12:51 Lá gunbeꞌe bega leꞌa naꞌ ndee ndal ndontsa uzheꞌeb wen kwe be men ndoꞌ gizhliyo. Leꞌa naꞌ ndi ndal leꞌa be men iteltsaꞌa.
LUK 12:52 Leꞌa nat idubta ndoꞌ ndee, tal leꞌa dub niꞌi ncho gaꞌay men leꞌa chon xa wa gakloo ndoꞌ stop xa, no stop xa wa gakloga ndoꞌ yon xa wa.
LUK 12:53 Ncho be xabgiꞌi gakloo ndoꞌ be xinbgiꞌi na; no leꞌa be xin xa gakloga ndoꞌ xa. Leꞌa ncho be xagots gakloo ndoꞌ be xingots na; no leꞌa be xingots xa gakloga ndoꞌ xnaꞌa na. Leꞌa be xagots no gakloo ndoꞌ xinxix na; no leꞌa xinxix xa gakloga ndoꞌ leꞌaka xnazhaꞌap xa.
LUK 12:54 Cha ndab Jesús ndoꞌ be men kwaꞌad wa: —Leꞌa gor na naꞌ bega nlen xkaw lad ndaꞌas wizh, cha ndab bega leꞌa gi ilaꞌ, cha lika ndak‑a.
LUK 12:55 No zha na nlen mbi lad sur, cha ndab bega leꞌa wizh wa uzhebpa utii gak, cha likaga ndak‑a.
LUK 12:56 ¡Leꞌa bega nluu cuentta xa wen, ná bega xa ugap! Nyakbeꞌena bega xteꞌe nak ta naꞌ bega gibeꞌa baꞌ no be ta gizhliyo ndee, ná ni lá nyakbeꞌena bega ta ndun Dios tiemp nat.
LUK 12:57 ’Bwiꞌi bega naga leꞌa nak ta ndun bega.
LUK 12:58 Leꞌa tal ton nlad usake bega, waꞌyadiꞌizhno bega xa gor biseata isoꞌ xa ndoꞌ juez. Leꞌa tal xa usake bega ndoꞌ juez, leꞌa juez cha yun cuent bega ndoꞌ xa nlaꞌach litgiꞌib, cha ukeꞌa litgiꞌib xa bega.
LUK 12:59 Leꞌa naꞌ gáp leꞌa bega lá itoꞌo sa wa gast kixka bega iteanak ta nsaꞌab bega wa.
LUK 13:1 Leꞌa gor wa leꞌa be men cha ndab ndoꞌ Jesús, xteꞌe mbit be soldad ten Pilat pla bexa Galilea, gor na nsaꞌa bexa man xnab ndoꞌ Dios.
LUK 13:2 Leꞌa Jesús cha ndab: —¿Nsak bega zha leꞌa ta na li ngwasea bexa Galilea wa li ngok geal leꞌa bexa mas ndap ke ndoꞌ iteata be men Galilea zha?
LUK 13:3 Leꞌa naꞌ gáp leꞌa ta wa naꞌanpa li nak. Leꞌa tal bega lá ulaꞌa be ta ugap nak bega, leꞌa itea bega no sat.
LUK 13:4 ¿Nati nsak bega zha leꞌa isatiꞌin bchon be men na li ngut gor ulayat torre Siloé tsoꞌo bexa wa mas ndap ke ndoꞌ itea bexa ndencho Jerusalén wa?
LUK 13:5 Leꞌa naꞌ gáp leꞌa ta wa naꞌanpa li nak. Tal leꞌa bega lá ulaꞌa be ta ugap nak bega, leꞌa bega itea sat.
LUK 13:6 Cha msaktabeꞌe Jesús dub taꞌa mluu xa, ndab xa: —Leꞌa dub xabgiꞌi ndap dub ya nsaꞌa ngus laꞌaw. Leꞌa ya wa nsob ndoꞌ yo sa ncho ya uv ten xa wa. Cha ngol gor ngwaꞌkwaꞌan xa ngus ndoꞌ ya laꞌaw wa, ná lá izheal xa‑yá.
LUK 13:7 Cha ndab xa ndoꞌ mos ten xa, xa nlaꞌach be ya wa: “Unaꞌ, leꞌa chonla liꞌin nchasea ndalkwan naꞌ ngus ndoꞌ ya ndee, ná lá nzheal naꞌ‑yá. Nat ulobtoꞌog‑a, ndontsa ndi gaktiꞌin sa nsob‑a.”
LUK 13:8 Leꞌa xa na nlaꞌach ya wa cha ukaꞌab ndab ndoꞌ xa wa: “Señor, blaꞌa ga‑yá liꞌin ndeetsa. Leꞌa naꞌ uxach xan‑a no koꞌo naꞌ kweal‑a.
LUK 13:9 Tal leꞌa‑yá saꞌa ngus, lbaꞌatsa nsob‑a. Ná tal lá usaꞌa‑yá ngus, weꞌe yabtoꞌog‑a.”
LUK 13:10 Leꞌa dub wizh neꞌe bexa judio, leꞌa Jesús nluu bexa len dub niꞌi sa nzhealbe bexa wa.
LUK 13:11 Leꞌa sa wa ulen dub xagots tsoꞌotek dub tiꞌin bchonla liꞌin, ni lá yoo gan isoꞌgaꞌal xa. Leꞌa ta wa ta mbinno dub mbi bxin xa.
LUK 13:12 Leꞌa gor uniꞌí Jesús xagots wa, cha utezh Jesús xa, cha ndab xa ndoꞌ xagots wa: —Xagots, leꞌa lu myaklana.
LUK 13:13 Cha mxoꞌob Jesús be yaꞌa na tsoꞌo xa. Leꞌa xa wa cha usoꞌgaꞌal, cha msaꞌa xa xno ndoꞌ Dios.
LUK 13:14 Parea leꞌa xa nchansu niꞌi wa cha ngokloo ke na myunyakna Jesús xa wa dub wizh neꞌe bexa judio, ndab xa ndoꞌ be men: —Xoꞌop wizh nsabndoꞌ gun beuna tiꞌin. Leꞌa len be wizh wa syoꞌo gan giꞌid bega yakna bega, naꞌanpa be wizh neꞌe beuna ndee.
LUK 13:15 Leꞌa Jesús cha ndab: —Leꞌa bego lá ndun lak ndab bega wa. ¿Lak bego lá nxaꞌak bega xgon bega no xburr bega, ndaꞌugo bega ma nits wizh neꞌe beuna zha?
LUK 13:16 Leꞌa maxuꞌu dub tiꞌin bchonla liꞌin li mbinno xagots ndee, dub xa ras Abraham. ¿Lid nsabndoꞌ yakna xa wizh neꞌe beuna zha?
LUK 13:17 Leꞌa gor na li ndab Jesús, leꞌa itea bexa na ndakloo ndoꞌ Jesús wa cha mdo ladnabe. Ná leꞌa be men kwaꞌad wa uzhebpa mten ladna no be ta wen ndun Jesús.
LUK 13:18 Leꞌa Jesús cha ndab: —¿Xtaꞌan dub taꞌa nak lak nibeꞌe Dios be men? ¿Xteꞌema gudiꞌizh naꞌ‑yá?
LUK 13:19 Leꞌa ta wa nak cuent ta ngwasea dub bid ten mostas, ta ngos dub xabgiꞌi ndoꞌ dub bleꞌa yo ten na. Cha ngoꞌol‑a gast ngok‑a dub ya siꞌil, gast be migin mbindeꞌe xuꞌun ten na ndoꞌ xos‑a.
LUK 13:20 No ndab Jesús: —¿Xtaꞌan stub taꞌa nak lak nibeꞌe Dios?
LUK 13:21 Leꞌa ta wa nak lak nyak levadur. Leꞌa dub xagots mgoch dub tuzh‑a dub top gaꞌal kil arin. Ngol tsoꞌo wa leꞌa idub koꞌob arin wa usabich.
LUK 13:22 Leꞌa nes nchaꞌa Jesús Jerusalén, leꞌa xa nluu be men ncho be gezh ubiꞌi no be gezh byux.
LUK 13:23 Weꞌe leꞌa dub men unabdiꞌizh ndoꞌ Jesús ndab: —Señor, ¿ndidotsa bexa gap gealnaban nunk lá idub zha? Leꞌa Jesús cha ukaꞌab ndab ndoꞌ be men:
LUK 13:24 —Bin bega juers yate bega toꞌo puert uyaꞌa. Leꞌa naꞌ gáp ndoꞌ bega leꞌa kwaꞌadpa bexa nlad yate sa wa, ná leꞌa bexa lá gun gan.
LUK 13:25 Leꞌa gor na yá mtsawla xwan niꞌi toꞌo puert wa, leꞌa bega yaꞌanbe tsoꞌo juer utsiꞌid toꞌo niꞌi wa, gab bega: “Señor, bxaꞌal ga toꞌo niꞌi yoo besa.” Parea leꞌa xwan niꞌi wa ndi ikaꞌab gab: “Naꞌ ni lá nchandoꞌ bega.”
LUK 13:26 Weꞌe leꞌa bega isaxan gab: “Leꞌa besa udawno ga, no nguno besa ga. No mbidiꞌizh ga ndoꞌ besa be ndoꞌ xgeꞌe ten besa.”
LUK 13:27 Leꞌa xa wa cha ikaꞌab gab: “Leꞌa naꞌ lá nchandoꞌ bega. Nat bxoꞌon bega wats naꞌ, bego xa ndun ta ugap.”
LUK 13:28 Weꞌe leꞌa bego iniꞌí leꞌa Abraham no Isaac no Jacob no itea be profet wa nde wats Dios sa nibeꞌe Dios, ná leꞌa bega ndi dub lad tsoꞌo juer yaꞌanbe. Cha uzhebpa goꞌon bega no gaw bega ndeay bega, tant dub gealkweaꞌ siꞌil iniꞌí bega.
LUK 13:29 ’Leꞌa uzhebpa kwaꞌad be men ilen itea lad ndoꞌ gizhliyo, kwe bexa ndoꞌ mes sa nibeꞌe Dios.
LUK 13:30 Leꞌa ncho bexa naꞌanpa nsak nat wa, gal gor leꞌa bexa yak bexa nsak. No liga ncho bexa nsak nat wa, gal gor leꞌa bexa wa yak bexa naꞌanpa nsak.
LUK 13:31 Bi leꞌa wizh wa ulayaꞌ pla bexa fariseo ndab ndoꞌ Jesús: —Bkaꞌan sa ndee leꞌa Herodes ndab gut lu.
LUK 13:32 Leꞌa Jesús cha ukaꞌab ndab: —Byaꞌ bega cha gud bega ndoꞌ mbeas wa, leꞌa naꞌ bi ngontuꞌub be mbi bxin len ladoꞌo be men, no nyunyakna naꞌ be men gizh. Parea yamer usandoꞌ naꞌ tiꞌin ten naꞌ wa.
LUK 13:33 Leꞌa nat guniꞌi xtaꞌan yoo leꞌa naꞌ nda Jerusalén sa na nsabndoꞌka gaa naꞌ. Leꞌa dub xa ndadiꞌizh sakndoꞌ Dios naꞌanpa nsabndoꞌ gat dub lad sa nde Jerusalén.
LUK 13:34 ’Leꞌa bego ndencho Jerusalén, leꞌa bega ndut bexa ndadiꞌizh sakndoꞌ Dios, no nlaꞌgeꞌ bega bexa na ntuꞌub Dios ndoꞌ bega. Sian biaj nlad naꞌ yunjunt naꞌ bega, lak nyunjunt dub ngidtsan be ngid ben ten ma len xkwag ma, ná leꞌa bega nunk lá kaꞌab.
LUK 13:35 Blaꞌach bega, leꞌa nat leꞌa Dios ulaꞌalad bega. No gáp naꞌ ndoꞌ bega leꞌa bega yá naꞌantapa iniꞌí naꞌ gast gal wizh gab bega: “Dios uzhebpa nlaꞌach xa baꞌ, xa na mtuꞌub Dios Xa Nibeꞌe.”
LUK 14:1 Leꞌa dub wizh neꞌe bexa judio leꞌa dub xa nibeꞌe ten bexa fariseo mbiꞌi Jesús, nchaꞌdaw bexa ta lid xa. Leꞌa sa wa leꞌa bexa fariseo nlaꞌach ná xteꞌe gun Jesús.
LUK 14:2 Ná leꞌa lad ndoꞌ Jesús nsob dub xa uzhebpa ncho giꞌ.
LUK 14:3 Leꞌa Jesús cha ndab ndoꞌ be mech ten ley no ndoꞌ bexa fariseo: —¿Nsabndoꞌ yunyakna beuna dub xa gizh wizh neꞌe beuna zha nate naꞌan?
LUK 14:4 Ná leꞌa bexa ni lá ikaꞌabbe. Leꞌa Jesús cha mgal las xa gizh wa, cha myunyakna Jesús xa, cha ndab xa yaꞌ xa wa.
LUK 14:5 Cha ndab Jesús ndoꞌ bexa nde sa wa: —Tal leꞌa bega ndap dub burr natal dub ngon, cha ilaꞌyoꞌo ma len dub so wizh neꞌe beuna, ¿lid cha uxax yaꞌloꞌo bega ma bi leꞌaka wizh wa zha?
LUK 14:6 Leꞌa bexa wa ni lá yoꞌota gan xteꞌe ngabbe.
LUK 14:7 Leꞌa Jesús nsoꞌwiꞌi ndoꞌ bexa na ulo xa fariseo kombid ndoꞌ na wa, ná xteꞌe mti bexa sa mas nsak isob bexa. Cha mtenxeꞌa Jesús bexa xteꞌe nsabndoꞌ gun bexa, ndab xa:
LUK 14:8 —Leꞌa gor na ko dub men kombid ndoꞌ bega dub sa uchilyaꞌa xa, lá isob bega sa mas nsak. Leꞌa gal gor na ilen stub xa mas nsak ndoꞌ bega,
LUK 14:9 cha gab xwan niꞌi wa usaꞌa bega sa wa isob xa mas nsak wa. Weꞌe leꞌa bega uzhebpa ido ladna yatsob bega gast tsoꞌo li.
LUK 14:10 Leꞌa naꞌ gáp ndi usob bega mas sitxá, ndontsa gor na ilen xwan niꞌi wa, leꞌa xa ndi gab: “Amig, utsea isob lu mas gax ndee.” Weꞌe leꞌa be men iniꞌí leꞌa bega xa nsak.
LUK 14:11 Leꞌa tal ton gunbeꞌe leꞌa mas nsak, leꞌa gal gor leꞌa xa ido ladna. No liga leꞌa tal ton yak tuzh ndoꞌ be men, leꞌa gal gor leꞌa be men iniꞌí leꞌa xa wa nsakka.
LUK 14:12 No ndab Jesús ndoꞌ xa na ulo kombid wa: —Leꞌa gor na gun lu dub gast, lá ko lu kombid ndoꞌ be amig ten lu, ni ndoꞌ be wit lu, ni ndoꞌ be ltsaꞌa lu, ni ndoꞌ bexa rik ncho gax sa ncho lu. Ná nchaꞌa xa gal gor no ko kombid ndoꞌ lu, cha litsa myoꞌsoꞌ ta mbin lu wa.
LUK 14:13 Leꞌa gor na gun lu dub gast, utezh bexa prob no bexa moch no bexa coj no bexa lá naꞌ.
LUK 14:14 Li ndontsa wen yoo ladna lu, leꞌa bexa wa lá gun gan kix ta wa. Ná leꞌa Dios kixka ta wa gal wizh na ibangal bexa na ndun lak nlad Dios.
LUK 14:15 Weꞌe leꞌa dub xa na nsobno Jesús ndoꞌ mes wa gor na mbiꞌín xa ta wa, cha ndab xa ndoꞌ Jesús: —¡Uzhebpa wen yoo ladna xa na no gaw sa nibeꞌe Dios!
LUK 14:16 Weꞌe leꞌa Jesús cha ndab ndoꞌ xa wa: —Uyoꞌo dub xabgiꞌi ulo dub gast siꞌil ugaw xcheꞌe xa kwaꞌadpa be men.
LUK 14:17 Leꞌa ngol gor na yaꞌgaw bexa, leꞌa xa wa cha mtuꞌub dub mos ten xa, yaꞌyab xa ndoꞌ bexa wa gidbe bexa leꞌa itea taꞌa listla nak.
LUK 14:18 Parea leꞌa itea bexa wa cha ndab leꞌa bexa lá yoo gan yaꞌ. Leꞌa xa ned wa ndab: “Bingeꞌ ladna go, leꞌa naꞌ tiꞌi usiꞌi dub bleꞌa yo, ta weꞌe lá yoo gan isea naꞌ, leꞌa naꞌ tiꞌi gawiꞌi yo wa.”
LUK 14:19 Leꞌa xa itop wa cha ndab: “Bingeꞌ ladna go, leꞌa naꞌ tiꞌi usiꞌi gaꞌay nes ngon, ta weꞌe lá yoo gan isea naꞌ, leꞌa naꞌ tiꞌi gayun preb ma.”
LUK 14:20 Leꞌa stub xa cha ndab: “Leꞌa naꞌ tiꞌi mchilyaꞌa, ta weꞌe lá yoo gan isea naꞌ.”
LUK 14:21 Leꞌa mos wa cha myach myaꞌyab xa ta wa ndoꞌ xa nibeꞌe xa. Weꞌe leꞌa xa wa cha ngokloo, cha ndab xa ndoꞌ mos wa: “Uxax waꞌ ndoꞌ xgeꞌe baꞌ no be nes ten gezh ndee. Cha biꞌi bexa prob sa ndee no bexa moch no bexa coj no bexa lá naꞌ.”
LUK 14:22 Leꞌa mos wa cha nchaꞌ ndab xa ndoꞌ xwan niꞌi wa: “Señor, leꞌa naꞌ mbín ta ndab go wa, parea leꞌa ta lid ga ndee siꞌilta nsaꞌab.”
LUK 14:23 Leꞌa xa nibeꞌe wa cha ndabgal ndoꞌ mos: “Waꞌ be nes ubiꞌi no be nes byux, cha bin juers giꞌid bexa sa ndee, ndontsa izheaka ta lid naꞌ ndee.
LUK 14:24 Leꞌa bexa ned uloꞌo naꞌ kombid ndoꞌ na wa ni dub xa lá gawno naꞌ.”
LUK 14:25 Leꞌa tsoꞌo wa uzhebpa kwaꞌad be men nchaꞌano Jesús. Leꞌa Jesús cha mgeaksoꞌ mwiꞌi ndoꞌ bexa, ndab xa:
LUK 14:26 —Tal ton nlad isankea tsoꞌo naꞌ, leꞌa xa wa nsabndoꞌ mas yankea naꞌ ndoꞌ xus xa no xnaꞌa xa no xagots ten xa no be xin xa no wit xa no bsan xa. No mas yankea xa naꞌ ndoꞌ leꞌaka leꞌa xa. Tal leꞌa xa lid li gun, leꞌa xa lá yoo gan gak xmen naꞌ.
LUK 14:27 Leꞌa tal ton lá goꞌo cruz ten na cha isankea xa tsoꞌo naꞌ, leꞌa xa wa lá yoo gan gak xmen naꞌ.
LUK 14:28 ’¿Nati ton bega nlad gundeꞌe dub niꞌi siꞌil, lid ned ngoꞌo bega cuent naga ndap bega dub lak med itatsoꞌ yandoꞌ niꞌi wa zha?
LUK 14:29 Tal leꞌa bega utexan niꞌi wa, cha lá gun bega gan yandoꞌ‑yá, leꞌa itea be men na iniꞌí‑yá uxiꞌidno bega.
LUK 14:30 No gab bexa: “Leꞌa xabgiꞌi ndee msobxan niꞌi, parea lá ngun xa gan yandoꞌ‑yá.”
LUK 14:31 ¿No xá rey na kuyono stubga rey, lid ned ngoꞌo xa cuent naga sun dub tiꞌi mil xmen xa gan kuyono dub gaꞌal mil xmen stubga rey wa zha?
LUK 14:32 Tal leꞌa xa uniꞌí leꞌa xa lá gun gan, leꞌa gor na bi sitta nseabe bexa, leꞌa xa utuꞌub dub xmen na yaꞌinabdiꞌizh ndoꞌ stub rey wa ná plo taꞌa usaꞌa xa ndontsa lá kuyo bexa.
LUK 14:33 No liga bego na lá ulaꞌa itea be taꞌa ndap na, leꞌa bega lá yoo gan gak xmen naꞌ.
LUK 14:34 ’Leꞌa sed wa ta wen, parea tal leꞌa‑yá itoꞌo utix ten na, ¿xteꞌema yak utix‑a stub biaj zha?
LUK 14:35 Weꞌe leꞌa sed wa yá lá isuꞌuta, no ni kweal lá isuꞌu‑yá gak‑a, ndi yabitsa‑yá. Bego na ndap nchaꞌ na, blaꞌach bego ta ndáp naꞌ ndee.
LUK 15:1 Leꞌa kwaꞌad bexa nsen med nkix be men ndoꞌ gobier no kwaꞌadta bexa ugap ulen wats Jesús, goꞌón bexa ta ndadiꞌizh Jesús.
LUK 15:2 Leꞌa bexa fariseo no be mech ten ley cha unisi Jesús, ndab bexa: —Leꞌa xa baꞌ nchealtsaꞌa bexa ugap, no ndawno xa bexa baꞌ.
LUK 15:3 Cha msaktabeꞌe Jesús dub taꞌa mluu xa ndab xa:
LUK 15:4 —Tal leꞌa dub bego ndap dub gayoꞌo borreg, cha ulaꞌ dub ma, ¿lá ulaꞌa bega isadap gaꞌal ncho tiꞌin bdap ma wa geꞌe wa zha, cha ndi yaꞌkwaꞌan bega ma na li ulaꞌ wa, gast plo izhealka bega ma?
LUK 15:5 Leꞌa gor na mzheal bega ma, leꞌa bega iten ladna uxoꞌob bega ma tsoꞌo xik bega yoꞌo bega ma.
LUK 15:6 Leꞌa gal gor na ilanseaꞌ bega, cha uchealte bega be amig ten bega no bexa ncho gax wa. Cha gab bega: “Bten ladna bega lakta nten lad naꞌ, leꞌa naꞌ mzheal‑la borreg ten naꞌ, ma ulaꞌ wa.”
LUK 15:7 Leꞌa naꞌ gáp ndoꞌ bego leꞌa Dios no be angel li mas nten ladna gor na nyach dub xa ugap wats Dios, ndoꞌ isadap gaꞌal ncho tiꞌin bdap bexa wen, bexa lá ikiꞌinta yach bexa wats Dios.
LUK 15:8 ’Tal leꞌa dub xagots ndap dub tiꞌi med nsak, cha mlaꞌ xa dub‑a, ¿naꞌanpa cha ukegiꞌ xa dub xeꞌa ged zha, cha ndon ku uloꞌob xa len lid xa, gast plo izhealka xa‑yá?
LUK 15:9 Leꞌa gor na yá mzheal xa‑yá, cha gab xa ndoꞌ be amig ten xa no ndoꞌ bexa ncho gax wa: “Bten ladna bega lakta nten lad naꞌ, leꞌa naꞌ mzheal‑la med ulaꞌ wa.”
LUK 15:10 Leꞌa naꞌ gáp ndoꞌ bego li nten ladna be angel ten Dios gor na nyach dub men ugap wats Dios.
LUK 15:11 No ndab Jesús: —Uyoꞌo dub xabgiꞌi ndap top xinbgiꞌi na.
LUK 15:12 Leꞌa xa tuzh wa cha ndab ndoꞌ xus na: “Bsaꞌa ga be ta na ndal naꞌ.” Leꞌa xus xa cha mtseꞌa be ta ten na ndoꞌ bexa wa.
LUK 15:13 Ngol stapla wizh leꞌa xa tuzh wa cha mdoꞌo itea be ta li ukaꞌa xa wa, cha nchaꞌa xa stubga nacion sit. Leꞌa sa wa mbin gast xa med ten xa wa ndoꞌ be taꞌa ni lid nsabndoꞌ gun xa.
LUK 15:14 Leꞌa tsoꞌo na mteꞌa xa med wa, leꞌa sa wa uyoꞌo dub win siꞌil. Leꞌa xa wa no lá ndapla ta gaw na.
LUK 15:15 Cha mkwaꞌan xa tiꞌin gun xa ndoꞌ dub men ncho sa wa. Leꞌa xa wa mtuꞌub xa yaꞌkeno xa be kuch.
LUK 15:16 Leꞌa ta na lita ndanna xa wa, gast nlad xa gaw xa gix ndaw kuch wa. Ná leꞌa xwan kuch wa lá usaꞌa ta gaw xa.
LUK 15:17 Cha mbinbeꞌe xa: “Plota mos ndap xus naꞌ ta lid na no sian be ta ndaw xa ndap xa. Ná naꞌ gast ngi sat tant ndanna naꞌ.
LUK 15:18 Nat leꞌa naꞌ nsea ta lid xus naꞌ, gáp naꞌ ndoꞌ xa: Leꞌa naꞌ mbin dub ta ugap ndoꞌ Dios no ndoꞌ go.
LUK 15:19 Yá lá nsabndoꞌ gab go leꞌa naꞌ xin ga. Leꞌa naꞌ ndi gak masa dub mos ten ga.”
LUK 15:20 Weꞌe cha utoꞌo xa, nseaꞌ xa ta lid xus xa. ’Leꞌa gor na bi sitta nseaꞌ xa, leꞌa xus xa uniꞌíla xa, cha uzheꞌeb mlats ladna xus xa xa. Weꞌe utoꞌo xus xa karrel, cha udiꞌid xa xin xa.
LUK 15:21 Leꞌa xin xa cha ndab: “Leꞌa naꞌ mbin ta ugap ndoꞌ Dios no ndoꞌ go. Yá lá nsabndoꞌta gab go leꞌa naꞌ xin ga.”
LUK 15:22 ’Parea leꞌa xus xa ndi unibeꞌe ndoꞌ be mos ndab xa: “Utseano bega dub lad ndon leꞌa wen gak xa, no dub ganil yoo yaꞌa xa, no dub nes gelgid ukeꞌa xa.
LUK 15:23 No waꞌyoꞌo bega dub bser, ma ndon leꞌa ugeladna. Cha bit bega ma, leꞌa beuna ko dub gast siꞌil.
LUK 15:24 Leꞌa xiꞌín naꞌ ndee cuent dub xa ngutla, ná leꞌa xa mbangal. Leꞌa xa ndee dub xa ulaꞌ, ná nat mzhealgal naꞌ xa.” Cha usaxan ulo bexa gast wa.
LUK 15:25 ’Leꞌa gor wa leꞌa xin ned xa wa ndi geꞌe nkesea. Ngol gor na nsalanseaꞌ xa gax ta niꞌi, leꞌa xa mbiꞌínla ruid ten be musk no ruid ten bexa ndeyalndatsbe.
LUK 15:26 Leꞌa xa cha utezh dub mos, cha unabdiꞌizh xa ndoꞌ xa wa ná xtaꞌan ncho.
LUK 15:27 Leꞌa mos wa cha ndab: “Leꞌa wit ga mlaꞌnchaꞌ. Leꞌa xus bega mbit bser ndaꞌal wa, geal leꞌa wit ga ndon wen mtanchaꞌ.”
LUK 15:28 ’Cha ngokloo xa wa, lá nlad xa yoo xa len niꞌi. Leꞌa xus xa cha utoꞌo unab ndoꞌ xa yoo xa len niꞌi.
LUK 15:29 Leꞌa xa cha ukaꞌab ndab ndoꞌ xus xa: “Unaꞌ go plota liꞌin nxobgek naꞌ ndoꞌ ga, ndun naꞌ tiꞌin ten ga. Ná nunk go lá usaꞌa masa dub chiv koꞌo naꞌ dub gast no be amig ten naꞌ.
LUK 15:30 Ná nat mlaꞌnchaꞌ xin ga uloꞌo ga gast, mbit ga bser ndaꞌal wa, ná leꞌa xa wa ndi mbin gast be med ten ga lat be xagots ugap.”
LUK 15:31 Leꞌa xus xa cha ukaꞌab ndab: “Leꞌa lu nunkka lá nlaꞌa naꞌ. Leꞌa itea be ta ten naꞌ leꞌa ta wa ta tenka lu.
LUK 15:32 Leꞌa beuna nsabndoꞌka ko dub gast no iten ladna beuna, leꞌa wit lu ndee cuent xa yá ngutla, ná nat mbangal xa. Leꞌa xa cuent xa ulaꞌ, ná nat mzheꞌalgal min xa.”
LUK 16:1 No ndab Jesús ndoꞌ be xmen na: —Uyoꞌo dub xabgiꞌi rik, ndap xa dub mos nchansu be tiꞌin ten xa. Ngol dub wizh leꞌa be men msake xa ndoꞌ xa rik wa, ndab bexa leꞌa xa ndun gast med ndoꞌ dub ta ni lid nsabndoꞌ.
LUK 16:2 Weꞌe leꞌa xa rik wa cha utezh xa wa, ndab xa: “¿Xteꞌe nak ta na ndon naꞌ ndun lu? Uloꞌo cuent ten be tiꞌin ndun lu wa, leꞌa lu lá gakta xa yansu be tiꞌin ten naꞌ.”
LUK 16:3 Leꞌa mos wa cha mbinbeꞌe: “¿Xteꞌe gun naꞌ nat? Leꞌa xa ten tiꞌin ndee yá lá usaꞌata tiꞌin ndee gun naꞌ. Leꞌa naꞌ lá isuꞌu gun tiꞌin geꞌe. No ido lad naꞌ inaꞌab naꞌ med ndoꞌ be men.
LUK 16:4 Nat leꞌa naꞌ uníla xteꞌe gun naꞌ ndontsa gor na ulat xa tiꞌin ndun naꞌ ndee, leꞌa be men utsin gak ndoꞌ naꞌ ta lid bexa.”
LUK 16:5 ’Leꞌa mos wa cha utezh kadga dub xa na nsaꞌab ndoꞌ xa rik wa. Cha ndab xa ndoꞌ xa ned wa: “¿Plo taꞌa nsaꞌab go ndoꞌ xa nibeꞌe naꞌ?”
LUK 16:6 Leꞌa xa wa cha ndab: “Dub dap mil litr aceit nsaꞌab naꞌ.” Leꞌa mos wa cha ndab: “Leꞌa git ndee gab plo taꞌa nsaꞌab go. Uxax bkeꞌa ga top mil litr.”
LUK 16:7 Cha ndab mos wa ndoꞌ stubga xa: “Go zha, ¿plo taꞌa nsaꞌab ga?” Leꞌa xa wa cha ndab: “Dub gayoꞌo ngoch trig nsaꞌab naꞌ.” Leꞌa mos wa cha ndab: “Leꞌa git ndee gab ná plo taꞌa nsaꞌab ga. Bkeꞌa ga dub dap gaꞌal ngoch‑a.”
LUK 16:8 Leꞌa xwan tiꞌin wa cha mgondoꞌ leꞌa mos wa list mbin. Leꞌa be men lá nchandoꞌ Dios mas listbe cuent ten be ta ncho ndoꞌ gizhliyo, ndoꞌ be men nchandoꞌ Dios.
LUK 16:9 ’Leꞌa naꞌ gáp ndoꞌ bega, bintiꞌin bega med gizhliyo ndee ndontsa li gun bega gan amig. Leꞌa gal zha na itea med ten bega ndoꞌ gizhliyo ndee, gap bega dub sa yoo bega, sa nunk lá idub.
LUK 16:10 ’Leꞌa xa na utsin nyansu dub tuzh taꞌa, leꞌa xa wa liga utsin syansu be ta sian. Leꞌa xa na ni dub tuzh taꞌa naꞌanpa utsin nyansu, leꞌa xa wa liga naꞌanpa utsin yansu be ta sian.
LUK 16:11 No liga leꞌa bego na naꞌanpa utsin nyansu be ta ncho ndoꞌ gizhliyo ndee, leꞌa Dios naꞌanpa usaꞌa taꞌa ta ugeaka nsak yansu bega‑yá.
LUK 16:12 Tal leꞌa bega naꞌanpa utsin nyansu be ta naꞌanpa ta ten bega, leꞌa Dios naꞌanpa usaꞌa be ta na ndiꞌizh ikaꞌa bega wa.
LUK 16:13 ’Naꞌan ton yoo gan gun tiꞌin ndoꞌ top xa nibeꞌe ten na. Leꞌa gal gor leꞌa xa dubtsa xa ikea ladna, leꞌa ndoꞌ stub xa wa ixee ladna xa. No uxobgek xa ndoꞌ dubtsa xa, leꞌa ndoꞌ stub xa wa lá uxobgek xa. No liga tal leꞌa bega nkwaꞌan sian med, leꞌa bega lá isuꞌu gun tiꞌin ndoꞌ Dios.
LUK 16:14 Leꞌa bexa fariseo mbiꞌín ta li ndab Jesús wa, cha mxiꞌidno bexa Jesús, leꞌa bexa li nkwaꞌan sian med.
LUK 16:15 Leꞌa Jesús cha ndab ndoꞌ bexa wa: —Leꞌa bega wen ndun ndoꞌ gaꞌal be men, ná leꞌa Dios nchandoꞌ ladoꞌo bega. Leꞌa be ta ni be men uzheꞌeb nsak, leꞌa cuent ten Dios leꞌa ta wa naꞌan xtiꞌin.
LUK 16:16 ’Zha na biseata ilanseaꞌ Juan xa na ulaleaꞌ be men, leꞌa be ley mkeꞌa Moisés no ta na mkeꞌa bexa mbidiꞌizh sakndoꞌ Dios ndab xteꞌe gun be men. Ná leꞌa tsoꞌo wa ulen diꞌizh wen ten Dios, ta na ndab xteꞌe inibeꞌe Dios be men. Nat leꞌa kwaꞌad be men ndun juers gak bexa dub men leꞌa Dios nibeꞌe.
LUK 16:17 Parea leꞌa naꞌ gáp leꞌa gibeꞌa no gizhliyo snitndoꞌ, ná leꞌa ni dub tuzh ley ten Dios naꞌanpa initndoꞌ.
LUK 16:18 ’Leꞌa tal ton dub xabgiꞌi ulaꞌa xagots ten na, cha ikaꞌa xa stubga xagots, leꞌa xabgiꞌi wa ndapka ke ndoꞌ Dios. No liga tal stub xabgiꞌi ikaꞌaga xagots wa, leꞌa xa wa no ndap ke ndoꞌ Dios.
LUK 16:19 ’Uyoꞌo dub xabgiꞌi rik, ngok xa sbeꞌen lad uzheꞌeb uyap, ta konch ugats no ta nagud. Nsea itea wizh ngo xa dub gast uzhebpa wen ta lid xa.
LUK 16:20 No uyoꞌo dub xabgiꞌi prob nsaleaꞌ Lázaro uzhebpa gizh idub gid las xa. Leꞌa xa nsob tsoꞌo juer toꞌo lid xa rik wa.
LUK 16:21 Leꞌa xa prob wa nsaꞌab ladna gaw masa be taꞌa nlate toꞌo mes ten xa rik wa. No gast be mbek nlen ndawleꞌe las xa prob wa.
LUK 16:22 Ná ngol dub wizh leꞌa xa prob wa cha ngut. Leꞌa be angel ten Dios cha mbiꞌi xa, usob xa wats Abraham gibeꞌa. Tsoꞌo wa leꞌa xa rik wa no ngut, cha mgaꞌach xa.
LUK 16:23 ’Ná leꞌa gor na uzhebpa kweaꞌ naxncho xa rik wa infierno, leꞌa xa mwiꞌi gaꞌap, sit mnaꞌ xa Abraham no Lázaro nsob wats xa.
LUK 16:24 Weꞌe leꞌa xa rik wa cha ugeꞌ ndab: “Xus naꞌ Abraham, blats ladna go naꞌ. Btuꞌub ga Lázaro ugazh xa masa dub ngutsyaꞌa xa, cha gidlo xa‑yá toꞌo naꞌ ndontsa igalad naꞌ, leꞌa naꞌ uzhebpa kweaꞌ nchoꞌo ndoꞌ bealꞌ sa ndee.”
LUK 16:25 Leꞌa Abraham cha ndab: “Xiꞌín naꞌ, btseꞌa ladna lu leꞌa lu uzhebpa wen uyoꞌo ndoꞌ gizhliyo, ná leꞌa Lázaro ndee uzhebpa kweaꞌ uyoꞌo. Nat leꞌa Lázaro ndi wen ncho sa ndee, leꞌa lu kweaꞌ ncho sa baꞌ.
LUK 16:26 No stubga taꞌa gáp naꞌ: leꞌa sa nde besa ndee nsea sa nde bego baꞌ ncho dub bseꞌa uxenpa tlaw‑a. Ta weꞌe leꞌa besa nde sa ndee lá yoo gan yaꞌ sa baꞌ. No ni bego nde sa baꞌ lá yoo gan giꞌid sa ndee.”
LUK 16:27 ’Leꞌa xa rik wa cha ndab: “Naꞌab naꞌ ndoꞌ go xus naꞌ Abraham, utuꞌub ga Lázaro ta lid xus naꞌ,
LUK 16:28 sa na ncho sgaꞌay be wit naꞌ, yaꞌyab xa lá gun bexa lak mbin naꞌ, ndontsa naꞌanpa no bexa wa iniꞌí gealkweaꞌ ndee.”
LUK 16:29 Leꞌa Abraham cha ndab: “Leꞌa bexa wa ndenoka ta mkeꞌa Moisés no ta mkeꞌa bexa mbidiꞌizh sakndoꞌ Dios. ¡Nsabndoꞌ gun bexa lak ndab ta wa!”
LUK 16:30 Leꞌa xa rik wa cha ukaꞌab ndab: “Xus naꞌ Abraham, leꞌa bexa wa ndenoka ta wa, parea tal leꞌa dub xa ngutla cha ibangal xa, weꞌe gudiꞌizh xa‑yá ndoꞌ bexa wa, leꞌa bexa slaꞌaka be ta ugap nak bexa.”
LUK 16:31 Ná leꞌa Abraham cha ndab: “Leꞌa tal leꞌa bexa lá gun lak ndab ta mkeꞌa Moisés no ta mkeꞌa bexa mbidiꞌizh sakndoꞌ Dios, leꞌa bexa wa ni likaga lá gungea ladna ta gudiꞌizh dub xa ibangal ndoꞌ gealgut.”
LUK 17:1 Leꞌa Jesús cha ndab ndoꞌ be xmen na: —Idub tiemp ncho ta ntsabgix be men ndoꞌ ta ugap, parea uzhebpa proꞌob dub xa ntsabgix stubga men.
LUK 17:2 Leꞌa tal ton utsabgix dub xa ndangea ladna naꞌ ndoꞌ ta ugap, leꞌa xa wa mas gealkweaꞌ siꞌil iniꞌí ndoꞌ dub xa ikea dub geꞌ siꞌil gen na, cha utsaꞌab be men xa len nitsdoꞌo.
LUK 17:3 ’¡Blaꞌach bega xteꞌe nak bega! Tal leꞌa dub ltsaꞌa bega ugap gunno bega, bidiꞌizhno bega xa ndontsa lá gunta xa ta wa. Tal leꞌa xa igondoꞌka ta li mbin xa wa, bingeꞌ ladna bega ta wa.
LUK 17:4 Ná tal leꞌa xa dub gaꞌad biaj ugap gunno bega dub wizhtsa, cha dub gaꞌadga biaj gab xa gungeꞌ ladna bega ta li mbin xa wa, leꞌa bega nsabndoꞌka gungeꞌ ladna ndoꞌ xa wa.
LUK 17:5 Leꞌa isatibtop be xmen Jesús cha ndab ndoꞌ xa: —Gokno ga besa ndontsa mas igeꞌ ladna besa Dios.
LUK 17:6 Leꞌa Jesús cha ukaꞌab ndab: —Tal leꞌa bega ndidotsa ngeꞌ ladna Dios lak tuzh dub bid ten ya mostas, leꞌa bega sun gan gab ndoꞌ dub ya sicómoro baꞌ igiꞌib‑a sa nsob‑a, cha yaꞌtsob‑a len nitsdoꞌo. Weꞌe leꞌa ya baꞌ sunka lak ndab bega wa.
LUK 17:7 ’Tal leꞌa bega ndap dub xa ndun tiꞌin ndoꞌ bega, dub xa ngaꞌan ngon no nkeno xa be xman bega, leꞌa gor na mlaꞌnchaꞌ xa ngwaꞌ xa geꞌe, ni dub bega lá ndab ndoꞌ xa: “Uyoꞌo, cha usob ndoꞌ mes.”
LUK 17:8 Leꞌa bega ndi gab: “Bindeꞌe ta gaw xcheꞌe naꞌ, cha utseano‑yá. Cha list usoꞌ usaꞌa lu ta ikiꞌin naꞌ. Gast itayaw naꞌ weꞌeta gaw lu.”
LUK 17:9 No lá nsaꞌa bega xno ndoꞌ xa ndun tiꞌin ten bega wa geal mbintsa xa ta ndab bega.
LUK 17:10 No liga gok bega gor na yá mbin bega itea be ta unibeꞌe Dios, gudtsa bega ndoꞌ Dios: “Leꞌa besa naktsa dub xa ndun tiꞌin ndoꞌ ga, mbintsa besa lak unibeꞌe ga gun besa.”
LUK 17:11 Leꞌa nes nchaꞌa Jesús gezh Jerusalén, nchaꞌtid xa sa nzheꞌal distrit Samaria nsea distrit Galilea.
LUK 17:12 Leꞌa gor na ulayaꞌ xa toꞌo dub gezh, cha utoꞌo dub tiꞌi xabgiꞌi nsaꞌgea las na, nsén gealgizh lepra xa. Cha sittsa ngwaꞌibe bexa,
LUK 17:13 ugeꞌ ndab bexa: —¡Jesús! ¡Mech! ¡Blats ladna go besa!
LUK 17:14 Leꞌa gor uniꞌí Jesús bexa, cha ndab xa: —Waꞌ bego ndoꞌ be uleꞌay iwiꞌi xa bega. Ndalen nsoꞌ bexa nes, cha myakna bexa.
LUK 17:15 Leꞌa gor na uniꞌí dub xa wa leꞌa xa myaklana, cha myach xa, ugeꞌ msaꞌa xa xno ndoꞌ Dios.
LUK 17:16 Cha msaxib xa ndoꞌ Jesús gast ndoꞌ yo ngol xtuzh xa, msaꞌa xa xno ndoꞌ Jesús. Leꞌa xa wa dub xa Samaria.
LUK 17:17 Leꞌa Jesús cha ndab ndoꞌ be xmen na: —¿Ná lid dub tiꞌi bexa ta myakna wa zha? ¿Ma stub sgeꞌa bexa wa nat?
LUK 17:18 ¿Nabtsa dub xa naꞌanpa xa Israel ndee myach mlen msaꞌa xno ndoꞌ Dios?
LUK 17:19 Leꞌa Jesús cha ndab ndoꞌ xa wa: —¡Gosoꞌ, cha byaꞌ! Leꞌa ta na mgeꞌ ladna lu naꞌ wa mbin myakna lu.
LUK 17:20 Leꞌa bexa fariseo unabdiꞌizh ndoꞌ Jesús ná pol gal zha inibeꞌe Dios ndoꞌ gizhliyo. Leꞌa Jesús cha ukaꞌab ndab: —Leꞌa zha inibeꞌe Dios naꞌanpa dub ta iniꞌí be men.
LUK 17:21 Lá yoo gan gab be men: “Unaꞌ go, leꞌa sa ndee sa nibeꞌe Dios”, no lá gab xa: “Leꞌa sa baꞌ sa nibeꞌe Dios.” Leꞌa naꞌ gáp leꞌa Dios nibeꞌela len ladoꞌo be men.
LUK 17:22 Cha ndab Jesús ndoꞌ be xmen na: —Leꞌa gal zha leꞌa bega nlad iniꞌí naꞌ, Xa Myak Men Ndoꞌ Gizhliyo, masa dub wizhtsa, parea leꞌa bega lá iniꞌí naꞌ zha wa.
LUK 17:23 Leꞌa ncho be men gab zha wa: “Leꞌa xa wa nsoꞌ sa ndee”, natal gab xa: “Leꞌa xa wa nsoꞌ sa baꞌ.” Parea lá yaꞌ bega ni lá isankea bega tsoꞌo xa wa.
LUK 17:24 Leꞌa lak nlaꞌ bealꞌ usiꞌi nsu‑yá xeꞌa itea lad gibeꞌa, no liga gak‑a zha ilengal naꞌ, Xa Myak Men Ndoꞌ Gizhliyo.
LUK 17:25 Parea ned sian gealkweaꞌ nsabndoꞌ iní naꞌ, no be men ncho tiemp nat uxelad naꞌ.
LUK 17:26 ’Leꞌa lak ngok‑a tiemp uyoꞌo Noé, liga gak‑a gal zha ilengal naꞌ, Xa Myak Men Ndoꞌ Gizhliyo.
LUK 17:27 Leꞌa tiemp na uyoꞌo Noé wa leꞌa be men ndeyaw, no ndo bexa, no ndeuchilyaꞌa bexa gast wizh uyoꞌo Noé len barco siꞌil mbindeꞌe Noé. Weꞌe ulen gilog mbit itea be men wa.
LUK 17:28 No liga ngok‑a zha uyoꞌo Lot wa, ndeyaw bexa no ndo bexa no nsiꞌi bexa taꞌa no nadoꞌo bexa taꞌa no ndas bexa taꞌa no ndeyundeꞌe bexa lid bexa.
LUK 17:29 Ná leꞌa gor na utoꞌo Lot len gezh Sodoma wa, leꞌa Dios cha mtsoꞌol sa wa, cha ngut itea be men wa.
LUK 17:30 ’No liga gak‑a zha ilengal naꞌ, Xa Myak Men Ndoꞌ Gizhliyo.
LUK 17:31 Leꞌa gal wizh weꞌe leꞌa be men ndiꞌib gek lid na wa nsabndoꞌ uxoꞌonbe, ni lá igen koꞌo xa be taꞌa len lid xa. Leꞌa bexa ndeyun tiꞌin geꞌe ni lá igen ilanseaꞌ ta lid na.
LUK 17:32 Btseꞌa ladna bega lak ngwasea xagots ten Lot.
LUK 17:33 Leꞌa tal ton ukwaꞌan xteꞌe wen yoo xa ndoꞌ gizhliyo ndee, leꞌa xa wa ndi gat. Ná leꞌa tal ton ndi ukwaꞌan gun ta nlad Dios, leꞌa xa wa sbanka.
LUK 17:34 ’Leꞌa naꞌ gáp ndoꞌ bego, leꞌa teꞌal weꞌe leꞌa top xa ndeyats ndoꞌ dub loꞌon, cha yoꞌo Dios dubtsa xa, leꞌa stub xa wa yaꞌan.
LUK 17:35 No liga leꞌa top xagots junt ndeyajw, cha yoꞌo Dios dubtsa xa, leꞌa stub xa wa yaꞌan.
LUK 17:36 No liga leꞌa top xabgiꞌi junt ndeyun tiꞌin geꞌe, cha yoꞌo Dios dubtsa xa, leꞌa stub xa wa yaꞌan.
LUK 17:37 Weꞌe leꞌa be xmen Jesús cha unabdiꞌizh, ndab bexa: —Señor, ¿pa yoo ta wa zha? Leꞌa Jesús cha ukaꞌab ndab: —Leꞌa lak sa nyakjunt be bech nluu leꞌa sa wa nax dub man ngut, no liga leꞌa zha ilengal naꞌ leꞌa itea be men iniꞌí‑yá.
LUK 18:1 No msaktabeꞌe Jesús dub ta mluu xa ndoꞌ be xmen xa, ndontsa mas uxik bexa gudiꞌizhno bexa Dios.
LUK 18:2 Ndab xa: —Leꞌa dub gezh uyoꞌo dub juez ni lá ndap mod ndoꞌ Dios no ni ndoꞌ be men.
LUK 18:3 Leꞌa gezh wa nchoga dub xagots ngut xabgiꞌi ten na. Leꞌa xagots wa cha ngwaꞌusake dub xa nyono xa ndoꞌ juez wa, gun juez regl ta wa.
LUK 18:4 Leꞌa kwenla leꞌa juez lá kaꞌab gun ta nlad xagots wa, parea ngol gor mbinbeꞌe juez, ndab xa: “Naꞌ ni ndoꞌ Dioska lá ndap mod no ni ndoꞌ be men,
LUK 18:5 parea leꞌa naꞌ neꞌe ladna tant ndiꞌid xagots ndee ndoꞌ naꞌ. Nat gun naꞌ ta nlad xa, ndontsa yá lá giꞌidta xa, leꞌa naꞌ ngi saklola ndoꞌ xa.”
LUK 18:6 Leꞌa Jesús cha ndab: —Blaꞌach bego xteꞌe ndab juez wa, ná xa dub xa ugap nak.
LUK 18:7 ¿Nsak bega zha leꞌa Dios lá gakno bexa mti Dios, bexa na teꞌal tezhea nab ndoꞌ Dios gakno Dios xa? ¿Nsak bega zha kwenpa ti ikaꞌab Dios ndoꞌ bexa wa?
LUK 18:8 Leꞌa naꞌ gáp ndoꞌ bega leꞌa Dios uxax sakno bega. Ná leꞌa gor na ilengal naꞌ, Xa Myak Men Ndoꞌ Gizhliyo, ¿bi szheal naꞌ men ngeꞌ ladna Dios ndoꞌ gizhliyo zha wa zha?
LUK 18:9 Leꞌa wats Jesús nde pla bexa ndanbeꞌe leꞌa mas ndun be ta wen ndoꞌ lak ndun be ltsaꞌa bexa. Leꞌa Jesús cha mbidiꞌizh ndoꞌ bexa wa, msaktabeꞌe xa dub taꞌa, ndab xa:
LUK 18:10 —Leꞌa top xabgiꞌi utoꞌo nchaꞌyadiꞌizhno Dios tale ten niꞌi ten Dios. Leꞌa dub xa wa xa fariseo, leꞌa stub xa wa xa nsen med nkix be men ndoꞌ gobier.
LUK 18:11 Leꞌa xa fariseo wa cha usoꞌ ndab ndoꞌ Dios: “Dios, leꞌa naꞌ nsa xno ndoꞌ go, geal leꞌa naꞌ lá ndun lak ndun be men xaꞌaga, bexa na ndun gealwaꞌan no bexa ugap ndanno be men no bexa na ngal stub xa naꞌanpa xagots ten xa. No ni lá nak naꞌ lak nak xa nsen med baꞌ.
LUK 18:12 Leꞌa naꞌ lá ndaw top wizh kad dub len sman, no nsa naꞌ diezmo ten itea be tiꞌin ndun naꞌ.”
LUK 18:13 ’Ná leꞌa xa nsen med wa sittsa nsoꞌ. Ni lá nwiꞌi xa gaꞌap, ndi msagolp xa ladoꞌo xa tant kweaꞌ ncho ladna xa, cha ndab xa: “Dios, blats ladna go naꞌ, leꞌa naꞌ sian ta ugap ndun.”
LUK 18:14 ’Leꞌa naꞌ gáp ndoꞌ bega leꞌa xa nsen med wa wen myaꞌan ndoꞌ Dios gor na mlanseaꞌ xa ta lid xa. Ná leꞌa xa fariseo wa naꞌanpa wen myaꞌan ndoꞌ Dios. Leꞌa tal ton gab leꞌa nsak, leꞌa cuent ten Dios leꞌa xa wa naꞌanpa nsak. Ná leꞌa tal ton yak tuzh, leꞌa cuent ten Dios leꞌa xa wa nsakka.
LUK 18:15 No ulenno be men be meꞌed ten na wats Jesús, ndontsa uxoꞌob Jesús yaꞌa na gek be meꞌed, inab xa ulaꞌach Dios be meꞌed wa. Leꞌa gor uniꞌí be xmen Jesús li nseabeno be men meꞌed wa, cha uteyo bexa be men wa.
LUK 18:16 Ná leꞌa Jesús cha utezh be xmen na, cha ndab xa: —Blaꞌa bego giꞌid be meꞌed baꞌ wats naꞌ. Lá uka bego giꞌid be meꞌed, leꞌa sa nibeꞌe Dios yate bexa yak lak nak be meꞌed ndee.
LUK 18:17 Leꞌa naꞌ gáp ndoꞌ bega, leꞌa tal ton lá ulaꞌa inibeꞌe Dios xa lak dub meꞌed, leꞌa xa wa nunk lá yate sa nibeꞌe Dios.
LUK 18:18 Weꞌe leꞌa dub xa nibeꞌe ten bexa judio cha unabdiꞌizh ndoꞌ Jesús ndab xa: —Mech wen, ¿xtaꞌan gun naꞌ ndontsa no naꞌ gap gealnaban ndoꞌ Dios, ta nunk lá idub?
LUK 18:19 Leꞌa Jesús cha ukaꞌab ndab: —¿Xtaꞌan ngi wen ndab lu ndoꞌ naꞌ zha? Naꞌan ton wen ndoꞌ gizhliyo, ndon nabtsa Dios wen nak.
LUK 18:20 Leꞌa lu yá uniꞌíka ta ndab ley ten Dios: “Lá ugal lu xa ten stubga men. Lá gut lu men. Lá gun lu gealwaꞌan. Lá gun lu gealkwiꞌin. Wankea xus lu nsea xnaꞌa lu.”
LUK 18:21 Leꞌa xabgiꞌi wa cha ukaꞌab ndab: —Iteanak be ta wa ndunka naꞌ idub zha tuzhta naꞌ.
LUK 18:22 Leꞌa gor na mbiꞌín Jesús ta wa, cha ndab Jesús ndoꞌ xa: —Stub taꞌa ndun jwalt gun lu: bdoꞌo itea be taꞌa ten lu, cha btseꞌa med wa ndoꞌ bexa uban nak. Weꞌe gap lu sian taꞌa ndoꞌ Dios. Cha utsea cha usankea tsoꞌo naꞌ.
LUK 18:23 Leꞌa gor na mbiꞌín xabgiꞌi wa ta wa, leꞌa xa uzhebpa uban myoꞌo ladna, geal leꞌa xa dub xa rikpa.
LUK 18:24 Leꞌa gor na uniꞌí Jesús leꞌa xa uzhebpa uban myoꞌo ladna, cha ndab Jesús: —Uzhebpa ugan yate dub xa rik sa nibeꞌe Dios.
LUK 18:25 Ndi mas lid bid itid dub came geꞌed xan dub yagux, ndoꞌ yak dub xa rik xa nibeꞌe Dios.
LUK 18:26 Leꞌa bexa na mbiꞌín ta wa cha unabdiꞌizh bexa ndab bexa ndoꞌ Jesús: —¿Tonxá sun gan yate sa nibeꞌe Dios zhaga?
LUK 18:27 Leꞌa Jesús cha ndab: —Leꞌa cuent ten nabtsa be men leꞌa‑yá lá yoo gan. Ná leꞌa cuent ten Dios leꞌa‑yá syoꞌoka gan.
LUK 18:28 Weꞌe leꞌa Pedr cha ndab ndoꞌ Jesús: —Unaꞌ go, leꞌa besa mlaꞌa itea be taꞌa ndap besa, cha ndi usankea besa tsoꞌo ga.
LUK 18:29 Leꞌa Jesús cha ukaꞌab ndab: —Leꞌa naꞌ gáp ndoꞌ bega, leꞌa tal ton ulaꞌa inibeꞌe Dios xa, ta weꞌe nlaꞌa xa lid xa no xus xa no wit xa no xagots ten xa no xmeꞌed xa,
LUK 18:30 leꞌa xa wa mas sian be taꞌa ikaꞌa tiemp nat. No leꞌa tiemp tiꞌi ilen leꞌa xa wa gap gealnaban nunk lá idub.
LUK 18:31 Cha utezh Jesús isatibtop be xmen na, ndab xa: —Blaꞌach bego, leꞌa beuna nchaꞌbe Jerusalén, sa yoo itea be ta mkeꞌa bexa polta sakndoꞌ Dios cuent ten naꞌ ndee, Xa Myak Men Ndoꞌ Gizhliyo.
LUK 18:32 Leꞌa naꞌ yak cuent ndoꞌ yaꞌa bexa naꞌanpa xa judio. Leꞌa bexa wa usalad gunno naꞌ, no xela iníꞌi bexa ndoꞌ naꞌ, no uchukko bexa ndoꞌ naꞌ.
LUK 18:33 No uzhebpa kin bexa naꞌ, weꞌe gut bexa naꞌ. Parea gal wizh yon leꞌa naꞌ ibangal ndoꞌ gealgut.
LUK 18:34 Ná leꞌa be xmen Jesús ni lá iniꞌí bexa xtaꞌan mbidiꞌizh Jesús, geal leꞌa ta wa dub ta lá yoo gan yakbeꞌena bexa.
LUK 18:35 Leꞌa gor na yá nchaꞌlayaꞌ gax Jesús gezh Jericó, leꞌa toꞌo nes wa nsob dub xabgiꞌi lá naꞌ, nab xa med ndoꞌ be men.
LUK 18:36 Leꞌa gor na mbiꞌín xa nchaꞌtid be men, cha unabdiꞌizh xa ndoꞌ bexa wa ná xtaꞌan ta wa.
LUK 18:37 Leꞌa bexa wa cha ndab: —Leꞌa sa ndee nseatid Jesús xa Nazaret.
LUK 18:38 Weꞌe cha ugeꞌ ndab xa: —¡Jesús, xin David! ¡Blats ladna go naꞌ!
LUK 18:39 Leꞌa bexa na nseabe ned wa cha uteyo xa wa ndab bexa: —Lá kwezhta lu xa baꞌ. Parea leꞌa xa ndi mas ugeꞌ ndab: —¡Xin David! ¡Blats ladna go naꞌ!
LUK 18:40 Weꞌe leꞌa Jesús cha ngwaꞌisoꞌ, cha unibeꞌe xa yaꞌyoꞌo bexa xa lá naꞌ wa. Leꞌa gor na ulansea xa, cha unabdiꞌizh Jesús ndoꞌ xa ndab xa:
LUK 18:41 —¿Xtaꞌan nlad lu gunno naꞌ lu? Leꞌa xa cha ndab: —Señor, leꞌa naꞌ nlad inaꞌ.
LUK 18:42 Leꞌa Jesús cha ndab: —Nat myakna lu lak mgeꞌ ladna lu naꞌ.
LUK 18:43 Bi leꞌa gor wa leꞌa xa cha mnaꞌla, cha no xa usankea tsoꞌo Jesús, ndab xa leꞌa Dios uzheꞌeb dub Dios juert. No itea be men na uniꞌí ta wa noga li ndab.
LUK 19:1 Leꞌa gor ulayaꞌ Jesús gezh Jericó, leꞌa xa nseatid len gezh wa.
LUK 19:2 Leꞌa sa wa ncho dub xa rik nsaleaꞌ Zaqueo. Leꞌa xa wa xa nibeꞌe ten bexa nsen med, ta nkix be men ndoꞌ gobier Roma.
LUK 19:3 Leꞌa xa nlad iniꞌí Jesús, parea leꞌa xa lá naꞌ Jesús tant kwaꞌad men nde sa wa, leꞌa xa wa dub xa uxuꞌubma.
LUK 19:4 Cha uxax mned xa ndoꞌ be men wa, cha ukea xa ndoꞌ dub ya sicómoro sa itid Jesús ndontsa iniꞌí xa Jesús.
LUK 19:5 Leꞌa gor ulayaꞌ Jesús sa wa, cha mwiꞌi xa gaꞌap ndoꞌ ya wa, cha ndab xa ndoꞌ xa wa: —Zaqueo, uxax ulaꞌ sa baꞌ, leꞌa teꞌal ndee leꞌa naꞌ nsabndoꞌ yoꞌo ta lid lu.
LUK 19:6 Leꞌa Zaqueo cha uxax ulaꞌ, nten ladna xa mbiꞌi xa Jesús ta lid xa.
LUK 19:7 Leꞌa gor uniꞌí be men ta wa, itea bexa ndenisi Jesús, ndab bexa leꞌa Jesús uyote len lid dub xa ugap.
LUK 19:8 Ngol gor leꞌa Zaqueo cha usoꞌ ndab ndoꞌ Jesús: —Bwiꞌi go Señor, leꞌa naꞌ usa itol be taꞌa ndap naꞌ ndoꞌ bexa uban nak. No tal ncho xa mbin waꞌan naꞌ med ten na, leꞌa naꞌ yun cuent med wa gast dap biaj.
LUK 19:9 Leꞌa Jesús cha ndab ndoꞌ Zaqueo: —Nat leꞌa Dios mtsuꞌu ke ten lu no ke ten bexa ltsaꞌa lu, geal leꞌa lu ngeꞌ ladna Dios lak mgeꞌ ladna Abraham Dios.
LUK 19:10 Leꞌa naꞌ, Xa Myak Men Ndoꞌ Gizhliyo, ndalkwan bexa sit nak wats Dios, ndontsa ko naꞌ bexa ndoꞌ be ke ten bexa.
LUK 19:11 Leꞌa bexa na ndeyoꞌón ta ndadiꞌizh Jesús wa ndanbeꞌe leꞌa tiemp inibeꞌe Dios ndoꞌ gizhliyo yamer ilen. Ta weꞌe leꞌa Jesús cha msaktabeꞌe stub taꞌa, geal leꞌa xa nsoꞌla gax sa nde Jerusalén.
LUK 19:12 Ndab Jesús: —Uyoꞌo dub xabgiꞌi nsak. Leꞌa xa wa list nsoꞌ yaꞌ stubga nacion sit. Leꞌa sa wa leꞌa dub xa mas nibeꞌe usaꞌa permis gak xa rey leꞌaka lazh xa, leꞌa tsoꞌo wa cha yach xa.
LUK 19:13 Leꞌa gor na biseata itoꞌo xa nsak wa, cha utezh xa dub tiꞌi xmos xa, cha msaꞌa xa dub gaꞌga med nsakpa gunno bexa tiꞌin ndalen li naꞌan xa.
LUK 19:14 Parea leꞌa be men lazh xa wa nxee ladna ndoꞌ xa, cha mtuꞌub bexa dub men gab ndoꞌ xa mas nibeꞌe wa leꞌa bexa lazh xa nsak wa lá nlad leꞌa xa wa gak rey.
LUK 19:15 ’Ná leꞌa xa mas nibeꞌe wa ulaxoꞌobka xa wa gak xa wa rey. Leꞌa gor na mlanseaꞌ xa lazh xa, cha utezh xa be xmos xa, bexa na li msaꞌa xa dub tiꞌi med nsak ndoꞌ na wa, ndontsa iniꞌí xa na xtiꞌin mbinno bexa ta wa.
LUK 19:16 Leꞌa mos ned wa ulen cha ndab: “Señor, leꞌa med li msaꞌa go wa myak dub tiꞌi‑yá.”
LUK 19:17 Leꞌa rey wa cha ndab: “Uzhebpa wen lu mos. Leꞌa ta na li wen mbin lu tiꞌin nsea dub tuzh med ndee wa, ta weꞌe leꞌa nat leꞌa lu inibeꞌe dub tiꞌi gezh.”
LUK 19:18 No liga ulen xa itop wa, cha ndab xa: “Señor, leꞌa dub med li msaꞌa ga wa myak dub gaꞌay‑a.”
LUK 19:19 Leꞌa rey wa cha ndab: “Leꞌa lu no inibeꞌe dub gaꞌay gezh.”
LUK 19:20 ’Cha ulenga xa yon wa ndab: “Señor, ndee med ten go. Leꞌa naꞌ ndee ulochaꞌaw med ndee ndoꞌ dub bleꞌa lad.
LUK 19:21 Leꞌa naꞌ nzheb ndoꞌ go, geal leꞌa naꞌ uní leꞌa go uzhebpa dub xa nibeꞌe. Nsen ga be taꞌa ni lid ta ten ga, no nteleꞌe ga be taꞌa ni lid go ngas.”
LUK 19:22 Leꞌa rey wa cha ndab: “Leꞌa lu dub mos uzheꞌeb ugap. Leꞌa be diꞌizh ndab lu wa nluu leꞌa lu ugap ndun. Tal leꞌa lu uniꞌí leꞌa naꞌ ndee dub xa uzhebpa nibeꞌe, no nsen naꞌ be taꞌa ni lid ta ten naꞌ, no nteleꞌe naꞌ be taꞌa ni lid naꞌ ngas,
LUK 19:23 ¿xtaꞌan lá ngaꞌulaꞌa lu med baꞌ banco, ndontsa nat nseal naꞌ isen naꞌ be xin med wa?”
LUK 19:24 Cha ndab xa ndoꞌ bexa nde sa wa: “Blat bega med nsén xa baꞌ, cha bsaꞌa bega‑yá ndoꞌ xa nsén dub tiꞌi med baꞌ.”
LUK 19:25 Ná leꞌa bexa cha ndab: “Señor, leꞌa xa baꞌ yá ndapla dub tiꞌi‑yá.”
LUK 19:26 Leꞌa rey cha ndab: “Leꞌa naꞌ gáp leꞌa tal ton utsin gun, leꞌa bexa mas sian taꞌa ikaꞌa. Ná leꞌa tal ton naꞌanpa utsin gun, leꞌa bexa slat be ta ndido ndap xa wa.
LUK 19:27 Ná leꞌa bexa na li ndakloo ndoꞌ naꞌ wa, bexa na lá nlad gak naꞌ rey ten bexa, utseano bega bexa sa ndee. Cha ulobtoꞌog bega gen bexa.”
LUK 19:28 Leꞌa gor na mtayadiꞌizh Jesús ta wa, cha nchaꞌata xa Jerusalén.
LUK 19:29 Leꞌa gor na yá nsalayaꞌ gax bexa gezh Betfagé no gezh Betania, no gax Bet Olivo, cha mtuꞌub Jesús top be xmen na,
LUK 19:30 ndab xa ndoꞌ bexa wa: —Waꞌ bega len gezh nde mas ndoꞌ ndee. Leꞌa gor na yate bega toꞌo gezh baꞌ, leꞌa sa baꞌ iniꞌí bega nsoꞌ nchii dub burr tuzh, dub ma ni dub men gol sob tsoꞌo ma. Cha uxaꞌak bega ma, goꞌo bega ma sa ndee.
LUK 19:31 Leꞌa tal ton gab ndoꞌ bega ná xtaꞌan ngi burr baꞌ nxaꞌak bega, cha gud bega leꞌa Xa Nibeꞌe wa guntiꞌin ma.
LUK 19:32 Weꞌe leꞌa be xmen Jesús wa cha nchaꞌbe. Cha mzheal bexa burr wa lakka ndab Jesús.
LUK 19:33 Leꞌa gor na ndeuxaꞌak bexa ma, leꞌa be xwan ma cha ndab: —¿Xtaꞌan nxaꞌak bega burr baꞌ zha?
LUK 19:34 Leꞌa bexa cha ukaꞌab ndab: —Leꞌa Xa Nibeꞌe wa guntiꞌin ma.
LUK 19:35 Cha mbiꞌi bexa ma wats Jesús. Cha mxoꞌob bexa dubga xab bexa tsoꞌo ma. Cha usob Jesús tsoꞌo ma.
LUK 19:36 Leꞌa be men cha mte be lad nbix bexa ndoꞌ nes sa isea ma wa.
LUK 19:37 Leꞌa gor na nchaꞌbelaꞌyoꞌo bexa Bet Olivo, leꞌa bexa kwaꞌad na nseabenkea tsoꞌo Jesús wa mten ladnabe, ugeꞌ ndab bexa leꞌa Dios uzheꞌeb dub Dios siꞌil, geal leꞌa bexa uniꞌí be uyon mbin Jesús.
LUK 19:38 Ugeꞌ ndab bexa: —¡Dios uzhebpa nlaꞌach xa nibeꞌe baꞌ, xa na mtuꞌub Dios Xa Nibeꞌe! ¡Uzhebpa wen yoo be men ndoꞌ Dios gibeꞌa! ¡Siꞌil nak Dios nsob gaꞌap!
LUK 19:39 Leꞌa lat be men wa no pla bexa fariseo nseabe, cha ndab bexa ndoꞌ Jesús: —Mech, uteyo ga be xmen ga baꞌ naꞌantapa li gab bexa.
LUK 19:40 Leꞌa Jesús cha ukaꞌab ndab: —Leꞌa naꞌ gáp leꞌa tal bexa ndee naꞌanpa iníꞌibe, leꞌa be geꞌ baꞌ leꞌa isaxan iníꞌi.
LUK 19:41 Leꞌa gor na ulayaꞌ bexa sa nluxeꞌa Jerusalén, leꞌa Jesús cha mwiꞌi ndoꞌ gezh wa, cha mbiꞌin xa,
LUK 19:42 ndab xa: —Gezh Jerusalén, uzhebpa nlad naꞌ yakbeꞌena lu ta ncho wizh nat, leꞌa ta wa leꞌa sun gan wen yoo lu. Parea leꞌa nat leꞌa lu lá yoo gan yakbeꞌena‑yá.
LUK 19:43 Gal dub wizh ilen be men ukendoꞌ lu, gundeꞌe bexa dub muro idub gangeak wats lu, no idub gangeak kwe bexa ukendoꞌ bexa lu.
LUK 19:44 Cha ulate bexa lu Jerusalén, no bexa ncho sa baꞌ gatbe. Ni stub geꞌ ten lu lá kwiꞌibta tsoꞌo ltsaꞌa na, ke na lá igondoꞌ lu leꞌa Dios mbiꞌid ndoꞌ lu.
LUK 19:45 Leꞌa Jesús cha nchaꞌa tale ten niꞌi ten Dios, cha usaxan ngontuꞌub xa bexa na nadoꞌotiꞌix be taꞌa sa wa.
LUK 19:46 Ndab Jesús: —Leꞌa diꞌizh ten Dios nkeaniꞌi ndab Dios: “Leꞌa lid naꞌ nak dub sa ndadiꞌizhno be men naꞌ.” ¡Ná leꞌa bego ndi ndanno‑yá cuent dub geꞌloꞌo ten waꞌan!
LUK 19:47 Leꞌa Jesús itea wizh nluu be men wats niꞌi ten Dios, parea leꞌa be uleꞌay nibeꞌe, no be mech ten ley, no bexa nsak ten gezh wa nkwaꞌan ná xteꞌe gut bexa Jesús.
LUK 19:48 Parea leꞌa bexa ni lá izheal xteꞌe gut bexa xa, geal leꞌa itea be men uzhebpa nlaꞌach ta nluu Jesús.
LUK 20:1 Ngol stub wizh leꞌa Jesús nluugal be men tale ten niꞌi ten Dios, ndadiꞌizh xa diꞌizh wen ten Dios. Weꞌe leꞌa be mech ten ley, no be uleꞌay nibeꞌe, no bexa gox nsak ulen wats Jesús.
LUK 20:2 Cha ndab bexa ndoꞌ Jesús: —¿Ton ulaxoꞌob lu gun lu ta wa zha? ¿Nati ton mtuꞌub lu gun lu ta ndee?
LUK 20:3 Leꞌa Jesús cha ukaꞌab ndab: —Leꞌa naꞌ no inabdiꞌizh dub taꞌa ndoꞌ bego, ikaꞌab bega‑yá:
LUK 20:4 ¿Ton mtuꞌub Juan ulaleaꞌ Juan be men zha? ¿Dios nate dub men?
LUK 20:5 Leꞌa bexa cha ndabbe ndoꞌ ltsaꞌa na: —Tal leꞌa beuna gab leꞌa Dios leꞌaka mtuꞌub Juan, leꞌa Jesús inabdiꞌizh ná xtaꞌan lá ngungea ladna beuna xa.
LUK 20:6 Ná tal gab beuna leꞌa Juan dub men mtuꞌub, leꞌa be men ndee ulaꞌgeꞌ beuna gast gat beuna, leꞌa bexa itea mbingea ladna leꞌa Juan dub xa mbidiꞌizh sakndoꞌ Dios.
LUK 20:7 Ta weꞌe cha ukaꞌab bexa ndab bexa ndoꞌ Jesús: —Leꞌa besa lá iniꞌí ton mtuꞌub Juan.
LUK 20:8 Leꞌa Jesús cha noga ndab: —Naꞌ noga lá gáp ton ulaxoꞌob naꞌ gun naꞌ be ta ndee.
LUK 20:9 Cha mbidiꞌizh Jesús dub taꞌa msaktabeꞌe xa, ndab xa ndoꞌ be men: —Uyoꞌo dub xabgiꞌi ngos sian ya uv ndoꞌ dub bleꞌa yo siꞌil. Cha mkwaꞌan xa pla be men ulaꞌach sa wa, cha gal zha ite bexa uv usaꞌa ya wa. Leꞌa xa ten yo wa cha ukaꞌan kwenpa.
LUK 20:10 Leꞌa zha na yá ngol tiemp ten uv, cha mtuꞌub xa dub xmos xa yaꞌ ndoꞌ be men nlaꞌach sa wa, yaꞌyoꞌo xa be ta na ndal xwan yo wa. Ná leꞌa be men wa ndi udin mos wa. Cha naꞌan xtaꞌan usaꞌa men wa yoꞌo xa.
LUK 20:11 Leꞌa xwan yo wa cha mtuꞌubgal stub mos. Ná leꞌa bexa ndi uzheꞌeb udingal xa wa, cha naꞌan xtaꞌan usaꞌagal bexa yoꞌo xa.
LUK 20:12 Leꞌa xwan yo wa mtuꞌubgal stub mos. Leꞌa be men wa cha ndi mtsawiꞌi xa, no ulantuꞌub bexa xa.
LUK 20:13 ’Weꞌe leꞌa xwan yo wa cha mbinbeꞌe ndab xa: “¿Xteꞌe gun naꞌ nat? Leꞌa naꞌ utuꞌub xiꞌín naꞌ, xa na nkweaꞌ lad naꞌ. Leꞌa be men wa sapka mod ndoꞌ xa wa.”
LUK 20:14 Ná leꞌa gor na uniꞌí bexa xa, cha ndi ndab bexa ndoꞌ be ltsaꞌa xa: “Leꞌa xa baꞌ leꞌa yaꞌanno yo ndee. Nchaꞌyut beuna xa, cha yaꞌanno beuna‑yá.”
LUK 20:15 Cha uloꞌo bexa xa dub lad toꞌo yo wa, cha mbit bexa xa. Cha unabdiꞌizh Jesús ndab xa: —¿Xteꞌe nsak bega zha? ¿Xteꞌe gunno xwan yo wa bexa?
LUK 20:16 Leꞌa xa wa ilen gut bexa wa, cha usaꞌa xa yo wa ndoꞌ be men xaꞌaga ulaꞌach‑a. Leꞌa gor na mbiꞌín be men ta wa, cha ndab bexa: —¡Dios nunk lá ulaꞌa yoo ta wa!
LUK 20:17 Leꞌa Jesús cha mwiꞌi ndoꞌ bexa, cha ndab xa: —¿Lá iniꞌí bega xteꞌe nkeaniꞌi diꞌizh ten Dios zha? Ndab‑a: Leꞌa geꞌ na mxelad bexa ndandeꞌe niꞌi, leꞌa ta wa nat nak geꞌ ndon leꞌa nsak nbexan niꞌi.
LUK 20:18 Leꞌa itea bexa na ilayat tsoꞌo geꞌ wa, leꞌa bexa wa syuꞌbe. Leꞌa bexa ilaꞌ geꞌ wa tsoꞌo na, leꞌa bexa wa sachkeꞌe.
LUK 20:19 Bi leꞌa gor wa leꞌa be uleꞌay nibeꞌe no be mech ten ley nlad isen Jesús, geal leꞌa bexa myakbeꞌena leꞌa Jesús li ndab cuent ten bexa. Ná leꞌa bexa nzhebga ndoꞌ be men.
LUK 20:20 Cha mtuꞌub bexa wa pla be men cuentta bexa wen nak yaꞌyun preb Jesús, ndontsa gap bexa dub ta usake bexa Jesús ndoꞌ xa na ndon leꞌa nibeꞌe sa wa.
LUK 20:21 Leꞌa bexa wa cha ndab ndoꞌ Jesús: —Mech, leꞌa besa uniꞌí leꞌa go ndadiꞌizh gealngea. No ni lá nlaꞌach go ta ndab be men, no ni tal xteꞌe nak be men. Leꞌa go ndi wen nluu lak nlad Dios gak be men.
LUK 20:22 Nat gud go, ¿nsabndoꞌ kix beuna med nab César xa nibeꞌe Roma, nate naꞌanpa kix beuna ta wa?
LUK 20:23 Ná leꞌa Jesús mgenlana ta ugap ndanbeꞌe bexa, cha ndab Jesús: —¿Xtaꞌan ndun bega preb naꞌ zha?
LUK 20:24 Bsaꞌa bega dub med iwiꞌi naꞌ‑yá. ¿Ton gek ná no leaꞌ ná nkea las med ndee zha? Leꞌa bexa wa cha ukaꞌab ndab: —Gek César no leaꞌ César.
LUK 20:25 Cha ndab Jesús: —Bsaꞌa bego be ta ten César ndoꞌ César. Leꞌa ndoꞌ Dios bsaꞌa bego be ta ten Dios.
LUK 20:26 Leꞌa bexa wa ni lá ngun gan ngab Jesús dub ta lid leꞌa nak ndoꞌ gaꞌal be men wa. Ndi ngwanseana bexa xteꞌe ukaꞌab Jesús, cha yá naꞌanta xteꞌe ngab bexa.
LUK 20:27 Weꞌe leꞌa pla bexa saduceo cha ulen wats Jesús. Leꞌa itea bexa saduceo ndangea ladna leꞌa bexa ngut wa yá lá ibantabe. Cha unabdiꞌizh bexa ndoꞌ Jesús,
LUK 20:28 ndab bexa: —Mech, leꞌa ley mkeꞌa Moisés ndab leꞌa tal ton dub xabgiꞌi gat, ná lá ngap xa xin xa, leꞌa wit xa wa nsabndoꞌ uchilyaꞌano xagots ten xa ngut wa, ndontsa tal gap bexa dub meꞌed leꞌa meꞌed wa gak cuent xin xa ngut wa.
LUK 20:29 Uyoꞌo dub gaꞌad wit xa. Leꞌa xa ned wa mchilyaꞌano dub xagots, cha tsoꞌo wa ngut xa, ni lá ngap xagots wa xin xa.
LUK 20:30 Weꞌe cha mchilyaꞌano wit itop xa wa xagots wa. Leꞌa xabgiꞌi wa cha nogal ngut ni lá ngapgal bexa xin xa.
LUK 20:31 Leꞌa wit yon bexa wa litsagal ngwasea. Li ngwasea isagaꞌad wit bexa wa, ná ni dub xa lá ngap xin na.
LUK 20:32 Tsoꞌo wa leꞌa xagots wa cha noga ngut.
LUK 20:33 Leꞌa zha na iban bexa ngut wa, leꞌa lat bexa wa ¿ton gak xabgiꞌi ten xagots wa zha, xa na li mchilyaꞌano isagaꞌad xabgiꞌi wa?
LUK 20:34 Leꞌa Jesús cha ukaꞌab ndab: —Leꞌa be men nde ndoꞌ gizhliyo ndee nchilyaꞌano ltsaꞌa na.
LUK 20:35 Parea gal zha na gab Dios ná ton iban ndoꞌ gealgut, leꞌa bexa wa naꞌantapa uchilyaꞌano be ltsaꞌa na zha wa.
LUK 20:36 No ni lá gatta bexa, leꞌa bexa ndi gak cuent be angel ten Dios. No gak bexa xin Dios ta na ubangal bexa.
LUK 20:37 Parea leꞌa cuent ten ta na iban bexa ngut wa, leꞌa Moisés leꞌa mluu leꞌa bexa ngut wa ibankabe, zha na mkeꞌa xa leꞌa dub yagich nsayolꞌ. Leꞌa sa wa ndab‑a leꞌa Dios nak Dios ndankea Abraham, no Isaac, no Jacob.
LUK 20:38 Leꞌa Dios naꞌanpa Dios ten bexa ngut, leꞌa xa ndi Dios ten bexa nban. Ta weꞌe uniꞌí beuna leꞌa bexa wa nbanka. Leꞌa cuent ten Dios leꞌa itea bexa ngutla bi nbankabe.
LUK 20:39 Leꞌa ncho be mech ten ley cha ndab ndoꞌ Jesús: —Mech, leꞌaka nak ta ndab go.
LUK 20:40 Weꞌe leꞌa be men wa ni lá ngunta rages inabdiꞌizh bexa ndoꞌ Jesús.
LUK 20:41 Weꞌe cha ndab Jesús ndoꞌ bexa wa: —¿Xtaꞌan ndab be men leꞌa zha ilen Cristo leꞌa xa wa nak xin David?
LUK 20:42 Ná leꞌa David wa leꞌaka mkeꞌa libr ten Salmos, ndab‑a: Leꞌa Dios Xa Nibeꞌe ndab ndoꞌ Xa Nibeꞌe naꞌ: “Usob wats naꞌ lad gaꞌal ndee,
LUK 20:43 gast gal gor ute naꞌ bexa ndaklono lu xan ndats lu.”
LUK 20:44 Leꞌa David ndab leꞌa Cristo nak Xa Nibeꞌe ten xa. ¿Ná xteꞌe yoo gan gak Cristo wa xin David zha?
LUK 20:45 Leꞌa gor na ndeulaꞌach itea be men wa, leꞌa Jesús cha ndab ndoꞌ be xmen na:
LUK 20:46 —Blaꞌach bego lá gak bega lak nak be mech ten ley, leꞌa bexa ndal ladna ndesea nak lad koꞌol. No nlad bexa utsin inidiꞌizh be men ndoꞌ bexa be ndoꞌ xgeꞌe. No nti bexa be sa mas nsak isob bexa len be niꞌi sa nzhealbe beuna xa judio. No liga ndun bexa sa ndaꞌdaw bexa sa nyoꞌo dub gast.
LUK 20:47 Nsea nlat bexa itea ta ndap be xagots ngut xabgiꞌi ten na. No kwenpa ndadiꞌizhno bexa Dios ndontsa gab men leꞌa xa ndankeaka Dios. Leꞌa naꞌ gáp leꞌa bexa li ndun wa mas uzheꞌeb gealkweaꞌ iniꞌí.
LUK 21:1 Leꞌa Jesús cha mwiꞌi ná xteꞌe nsaꞌa be men rik wa med gon gax wats niꞌi ten Dios.
LUK 21:2 Leꞌa dub xagots prob ngut xabgiꞌi ten na no msaꞌa top med byux uxee nsak.
LUK 21:3 Leꞌa Jesús cha ndab: —Leꞌa naꞌ gáp leꞌa xagots prob ndee msaꞌa mas sian med ndoꞌ iteanak bexa baꞌ.
LUK 21:4 Leꞌa bexa msaꞌa sbeꞌen ta myaꞌan sobrtsa, parea leꞌa xagots ndee msaꞌa iteanak med isiꞌi xa be ta nkiꞌin xa.
LUK 21:5 Leꞌa ncho bexa ndadiꞌizh ndoꞌ Jesús cuent ten be geꞌ chul nakchaꞌaw niꞌi ten Dios, no be ta chul msaꞌa be men usaxkwaꞌa sa wa. Leꞌa Jesús cha ndab ndoꞌ bexa wa:
LUK 21:6 —Leꞌa gal dub wizh leꞌa itea be ta lbaꞌa naꞌ bego baꞌ ilate, gast ni stub geꞌ baꞌ lá kwiꞌibta tsoꞌo ltsaꞌa na.
LUK 21:7 Leꞌa bexa wa cha unabdiꞌizh ndoꞌ Jesús ndab bexa: —Mech, ¿pol gak ta wa zha? ¿Xteꞌe iniꞌí besa zha yamer gak‑a zha?
LUK 21:8 Leꞌa Jesús cha ukaꞌab ndab: —Blaꞌach bego naꞌan ton ukedino bega. Leꞌa kwaꞌad be men ilen gab leꞌa xa nak Cristo xa na mtuꞌub Dios. No gab bexa leꞌa tiemp wa yá nsoꞌ gax. Parea lá isankea bega tsoꞌo bexa wa.
LUK 21:9 Leꞌa gor na goꞌón bega ncho guerr no ncho be men ndakloo ndoꞌ bexa nibeꞌe bexa, lá yuꞌ ladna bega. Leꞌa ta wa ga nedka nsabndoꞌ li gak, ná leꞌa zha wa biseata gal be wizh lult.
LUK 21:10 No ndab Jesús: —No gal zha wa kuyo be nacion no stubga nacion. Leꞌa be xmen dub xa nibeꞌe kuyono be xmen stubga xa nibeꞌe.
LUK 21:11 No gak be xoꞌo ubiꞌi. No ncho be sa uzhebpa yoo win no gealgizh ugiꞌi. Leꞌa gibeꞌa iluu be ta yanseana be men no izheb bexa.
LUK 21:12 ’Ná leꞌa gor na biseata yoo itea be ta ndee, leꞌa be men isen bega, no isankea bexa tsoꞌo bega, no goꞌo bexa bega len be niꞌi sa nzhealbe bexa judio, sa usake bexa bega. No goꞌo bexa bega litgiꞌib, no usake bexa bega ndoꞌ bexa naktiꞌin ubiꞌi ke na nak bega xmen naꞌ.
LUK 21:13 Weꞌe sak gudiꞌizh bega diꞌizh ten naꞌ ndoꞌ bexa wa.
LUK 21:14 Ná lá gunbeꞌe bega xteꞌe utsakndoꞌ bega ikaꞌab bega ndoꞌ bexa wa,
LUK 21:15 leꞌa naꞌ usa be diꞌizh ikaꞌab bega, ta na ni dub bexa nyono bega lá gun gan ikaꞌab. Ni lá yoo gan gab bexa leꞌa ta ndab bega wa naꞌanpa utsin nak.
LUK 21:16 Leꞌa ncho xus bega no wit bega no ltsaꞌa bega no amig ten bega leꞌaka yun cuent bega. No gast gut bexa ncho bega.
LUK 21:17 Leꞌa itea be men ixeeno ladna bega ke na nak bega xmen naꞌ.
LUK 21:18 Ná leꞌa naꞌ gáp ni dub gichgek bega lá gak perdid.
LUK 21:19 Leꞌa tal bega uxik ndoꞌ be gealkweaꞌ wa, leꞌa bega gal usoꞌ gealnaban nsaꞌa Dios.
LUK 21:20 ’Leꞌa gor inaꞌ bega leꞌa kwaꞌad be soldad nde gangeak Jerusalén ndee, weꞌe iniꞌíla bega leꞌa tiemp initndoꞌ Jerusalén yá ngol.
LUK 21:21 Leꞌa bexa ndencho Judea nsabndoꞌ uxoꞌonbe yaꞌbe bexa be geꞌe ubiꞌi. Leꞌa bexa ndencho Jerusalén uxoꞌon gezh ndee. Leꞌa bexa ndesea geꞌe yá lá ilenta xa sa ndee.
LUK 21:22 Leꞌa zha wa uzhebpa iniꞌí bexa gealkweaꞌ, no gakka itea be ta nkeaniꞌi diꞌizh ten Dios.
LUK 21:23 Leꞌa be xagots nsoꞌno meꞌed no be xagots ndap medoꞌo uzhebpa kweaꞌ itid. Leꞌa be men uzhebpa gealkweaꞌ siꞌil iniꞌí zha wa, no uzhebpa juert yoo bexa ncho sa ndee.
LUK 21:24 Leꞌa kwaꞌad bexa Israel gat ndoꞌ spad, no sit goꞌo be men kwaꞌad bexa wa stub nacion xaꞌaga. Leꞌa bexa naꞌanpa xa Israel gunno Jerusalén ndee lakta nlad bexa, gast gal wizh idub tiemp ulaꞌa Dios li gun bexa ta wa.
LUK 21:25 ’Leꞌa wizh no mbeꞌe no be mbeal xaꞌaga inaꞌ ndoꞌ lak naꞌ‑yá nat. Leꞌa be men ncho ndoꞌ gizhliyo uzhebpa izheb, no ni lá iniꞌí bexa xteꞌe gun bexa tant uzheꞌeb nbezh nitsdoꞌo no be golp ten nits.
LUK 21:26 Leꞌa be men gast itid teꞌal ladna tant izheb bexa iniꞌí bexa be ta yoo ndoꞌ gizhliyo, no gast idub gibeꞌa iwiꞌin.
LUK 21:27 Weꞌe leꞌa be men iniꞌí leꞌa naꞌ, Xa Myak Men Ndoꞌ Gizhliyo, ilennogal juers ten Dios lat xkaw nsea dub xeꞌa siꞌil.
LUK 21:28 Leꞌa gor na isaxan yoo be ta ndee lá izheb bega, ndi bten ladna bega leꞌa naꞌ yamer ilen.
LUK 21:29 No ndab Jesús: —Bwiꞌi bega lak nak be ya laꞌaw no itea be ya.
LUK 21:30 Leꞌa zha na li nxich be ya wa, leꞌa bega uniꞌíka leꞌa tiemp bigi yá gal.
LUK 21:31 No liga zha na naꞌ bega ncho be ta ndee wa, weꞌe iniꞌí bega leꞌa tiemp inibeꞌe Dios ndoꞌ gizhliyo yamer ilen.
LUK 21:32 ’Leꞌa naꞌ gáp ndoꞌ bego leꞌa itea be ta ndee itidka zha na biseata gat be men ncho tiemp ndee wa.
LUK 21:33 Leꞌa gibeꞌa nsea gizhliyo initndoꞌ, parea leꞌa be ta ndáp naꞌ ndee naꞌanpa initndoꞌ.
LUK 21:34 ’Blaꞌach bega leꞌaka bega naꞌanpa gaw bega uzheꞌeb, no naꞌanpa gun bega gealgu, no ni lá yuꞌ ladna bega be ta ndoꞌ gizhliyo ndee. Ndi list ute bega, leꞌa wizh weꞌe uxax ilen tsoꞌo bega.
LUK 21:35 Leꞌa wizh wa ilenka cuent dub tramp tsoꞌo be men ncho idub ndoꞌ gizhliyo.
LUK 21:36 Ta weꞌe list ute bega, bidiꞌizhno tseꞌe bega Dios, ndontsa uxik bega ndoꞌ itea be ta uzheꞌeb yoo ndoꞌ gizhliyo ndee, no gun bega gan kwe bega ndoꞌ naꞌ, Xa Myak Men Ndoꞌ Gizhliyo.
LUK 21:37 Itea be wizh leꞌa Jesús nluu be men tale ten niꞌi ten Dios. Leꞌa gor teꞌal leꞌa xa ndaꞌ Bet Olivo.
LUK 21:38 Leꞌa iteanak be men Jerusalén wa itea tempran ndaꞌyoꞌón bexa ta ndadiꞌizh Jesús tale ten niꞌi ten Dios.
LUK 22:1 Leꞌa zha na nsayal gax ujest Pascua, zha ndaw bexa judio pan lá nyoꞌo levadur,
LUK 22:2 leꞌa be uleꞌay nibeꞌe wa no be mech ten ley nkwaꞌan bexa na xteꞌe gut bexa Jesús dub mod lá iniꞌí be men‑a, geal leꞌa bexa nzheb ndoꞌ be men.
LUK 22:3 Leꞌa maxuꞌu cha uyoꞌo len ladoꞌo Judas Iscariot, dub xa nak dub isatibtop be xmen Jesús.
LUK 22:4 Cha ngwaꞌyadiꞌizhno xa be uleꞌay nibeꞌe, no bexa nibeꞌe ten bexa nlaꞌach niꞌi ten Dios, ná xteꞌe yun xa cuent Jesús ndoꞌ yaꞌa bexa wa.
LUK 22:5 Leꞌa bexa wa cha mten ladnabe, ndab bexa leꞌa bexa usaꞌa med ikaꞌa Judas.
LUK 22:6 Leꞌa Judas cha uni lak ndab bexa wa, cha usaxan nkwaꞌan xa xteꞌe yun xa cuent Jesús, dub mod na lá iniꞌí be men ta wa.
LUK 22:7 Leꞌa ngol wizh ndaw bexa judio pan lá nyoꞌo levadur, wizh ndut bexa dub borreg ndaw bexa cuent ten ujest Pascua,
LUK 22:8 leꞌa Jesús cha mtuꞌub Pedr no Juan, ndab xa: —Waꞌyundeꞌe bega ta gaw beuna ujest Pascua.
LUK 22:9 Leꞌa bexa wa cha unabdiꞌizh ndoꞌ Jesús, ndab bexa: —¿Pa nlad go gundeꞌe besa ta wa zha?
LUK 22:10 Leꞌa Jesús cha ndab: —Waꞌ bega gezh Jerusalén baꞌ, leꞌa toꞌo gezh wa izheꞌal bega dub xabgiꞌi noꞌo dub te ncho nits. Cha isankea bega tsoꞌo xa gast len niꞌi sa ilanseaꞌ xa wa.
LUK 22:11 Cha gud bega ndoꞌ xwan niꞌi wa: “Leꞌa mech nabdiꞌizh ná ma len cuart gawno mech be xmen xa ta ten ujest Pascua.”
LUK 22:12 Leꞌa xa wa cha uluu dub cuart siꞌil ndoꞌ bega, ta nde gek niꞌi wa. Leꞌa sa wa listla nde be ta guntiꞌin bega. Cha bindeꞌe bega be ta gaw xcheꞌe beuna sa wa.
LUK 22:13 Weꞌe leꞌa Pedr no Juan cha nchaꞌbe, cha mzhealka bexa men wa, no be ta ndab Jesús wa. Cha mbindeꞌe bexa ta gaw bexa ujest Pascua.
LUK 22:14 Leꞌa ngol gor gaw xcheꞌe bexa, cha usob Jesús ndoꞌ mes no be xmen xa.
LUK 22:15 Cha ndab Jesús: —Uzhebpa nten lad naꞌ gawnogal naꞌ bega cuent ten ujest Pascua nattsa biseata gat naꞌ.
LUK 22:16 Li ndáp naꞌ ta wa geal leꞌa naꞌ yá naꞌantapa gaw cuent ten ujest ndee, gast gal tiemp inibeꞌe Dios ndoꞌ gizhliyo.
LUK 22:17 Cha usen Jesús dub vas ncho vin ten uv, cha msaꞌa xa xno ndoꞌ Dios, cha ndab xa: —Itea bego gu ta ndee.
LUK 22:18 Leꞌa naꞌ gáp ndoꞌ bega leꞌa naꞌ yá lá goꞌota vin ten uv gast gal zha ilen tiemp inibeꞌe Dios.
LUK 22:19 Cha liga usen xa pan, cha msaꞌa xa xno ndoꞌ Dios. Cha uleꞌa xa‑yá, msaꞌa xa‑yá ndoꞌ bexa wa, ndab xa: —Leꞌa pan ndee beꞌal las naꞌ, ta usa naꞌ por bego. Nat isaxan bega gun bega ta ndee, ndontsa lá yalad bega leꞌa naꞌ ngut sakndoꞌ bega.
LUK 22:20 Leꞌa gor na mtayaw xcheꞌe bexa, cha usengal Jesús dub vas ncho vin, ndab xa: —Leꞌa ta ndee ten ten naꞌ usa naꞌ por bego. Leꞌa ta ndee nluu leꞌa nat leꞌa Dios mbinno be men dub trat kub, ná xteꞌe wen yaꞌan bexa ndoꞌ Dios.
LUK 22:21 ’Ná leꞌa nat leꞌa xa na yun cuent naꞌ no nsob ndoꞌ mes ndee.
LUK 22:22 Leꞌa naꞌ, Xa Myak Men Ndoꞌ Gizhliyo, itiꞌidka lak nsabndoꞌ‑yá, parea proꞌob xabgiꞌi na yun cuent naꞌ ndoꞌ yaꞌa bexa wa.
LUK 22:23 Cha usaxan be xmen Jesús unabdiꞌizh ndoꞌ be ltsaꞌa na, ndab bexa: —¿Tonma beuna nde ndee yun cuent xa?
LUK 22:24 Leꞌa be xmen Jesús cha usaxan ndeyotoꞌo lat be ltsaꞌa na ná ton mas nsak.
LUK 22:25 Ná leꞌa Jesús cha ndab: —Leꞌa bexa nibeꞌe be nacion naꞌanpa ulaꞌa gun be men dub ta naꞌanpa nibeꞌe bexa. Leꞌa bexa wa leꞌatsa ndab leꞌa bexa uzhebpa be ta wen ndun.
LUK 22:26 Parea leꞌa bego ndee naꞌanpa nsabndoꞌ li gak. Leꞌa bexa mas nsak wa nsabndoꞌ ndi gak cuent dub xa ndon leꞌa tuzh. Leꞌa dub xa nibeꞌe wa nsabndoꞌ gun tiꞌin ndoꞌ iteata bega.
LUK 22:27 ¿Ton mas nsak? ¿Xa nsob ndoꞌ mes, nate xa ndun tiꞌin ndoꞌ xa wa? Leꞌa xa nsob ndoꞌ mes wa, leꞌa xa mas nsak. Parea leꞌa naꞌ ndee nkeseano bega cuent dub xa ndun tiꞌin ndoꞌ bega.
LUK 22:28 ’Leꞌa bego leꞌakama nak bexa mxik ndoꞌ itea be ta ugan utiꞌid naꞌ.
LUK 22:29 Ta weꞌe leꞌa naꞌ usa juers ndoꞌ bega ndontsa inibeꞌe bega, lak nsaꞌa Xus naꞌ ta nibeꞌe naꞌ,
LUK 22:30 ndontsa gaw bega no goo bega ndoꞌ mes ten naꞌ sa inibeꞌe naꞌ. No kadga dub bega isob sa inibeꞌe bega ndoꞌ isatibtop xkwaꞌa bexa Israel.
LUK 22:31 No ndab Jesús ndoꞌ Simón Pedr: —Simón, Simón, leꞌa maxuꞌu unab bega ndoꞌ Dios gunno maxuꞌu bega lak ngoꞌo bexa xab trig.
LUK 22:32 Parea leꞌa naꞌ naꞌab ndoꞌ Dios gakno lu, lá ulaꞌa lu ta ngeꞌ ladna lu naꞌ. Leꞌa gor na yach lu stub biaj igeꞌ ladna lu naꞌ, gokno be ltsaꞌa lu dubtsa kwe bexa igeꞌka ladna bexa naꞌ.
LUK 22:33 Leꞌa Simón cha ndab: —Señor, leꞌa naꞌ saano go gast litgiꞌib, no tal go gat leꞌa naꞌ no gat.
LUK 22:34 Leꞌa Jesús cha ndab ndoꞌ xa: —Pedr, leꞌa naꞌ gáp ndoꞌ lu, leꞌa teꞌal nat gor biseata kwezh boy, leꞌa lu mkwiꞌinla chon biaj, ndab lu leꞌa lu lá nchandoꞌ naꞌ.
LUK 22:35 No ndab Jesús ndoꞌ be xmen na: —Leꞌa zha na mtuꞌub naꞌ bego li lá ngoꞌo bega bols, no ni med, no ni stub nes ndab bega, ¿ncho xtaꞌan mbin jwalt zha wa zha? Leꞌa bexa cha ukaꞌab ndab: —Naꞌan xtaꞌan ngun jwalt zha wa.
LUK 22:36 Cha ndab Jesús: —Leꞌa nat leꞌa bego na ndap bols no med, biꞌi bega‑yá. Leꞌa bego na lá ndap spad, bdoꞌo bega dub xab bega cha usiꞌi bega dub spad.
LUK 22:37 Leꞌa lak nkeaniꞌi diꞌizh ten Dios cuent ten naꞌ, leꞌa ta wa gakka cumplir. Leꞌa ta wa ndab: “Leꞌa be men mbinno xa cuentta dub xa ugap.” Leꞌa itea be ta ndab diꞌizh ten Dios cuent ten naꞌ wa, leꞌa ta wa gakka cumplir.
LUK 22:38 Leꞌa be xmen Jesús cha ndab ndoꞌ xa: —Señor, leꞌa sa ndee nde top spad. Leꞌa Jesús cha ukaꞌab ndab: —Yá lá gudiꞌizhta beuna ta wa.
LUK 22:39 Cha utoꞌo Jesús nchaꞌa Bet Olivo lakka ndun xa. Leꞌa be xmen xa cha no usankea tsoꞌo xa.
LUK 22:40 Leꞌa gor na ulayaꞌ bexa sa wa, cha ndab Jesús ndoꞌ bexa: —Unab bega ndoꞌ Dios gakno bega, ndontsa naꞌanpa utsabgix maxuꞌu bega.
LUK 22:41 Cha nab Jesús usea stub tuzh sa, dub lak sit ntsaꞌab men dub geꞌ. Leꞌa sa wa leꞌa Jesús cha usaxib mbidiꞌizhno xa Dios,
LUK 22:42 ndab xa: —Xus naꞌ, tal leꞌa go nlad, lá ulaꞌa go itiꞌid naꞌ ndoꞌ be gealkweaꞌ uzheꞌeb ndee. Parea lá gak‑a lak nlad naꞌ, ndi gak‑a lak nlad go.
LUK 22:43 Weꞌe cha mlundoꞌ dub angel utoꞌo gibeꞌa msaꞌa juers ndoꞌ Jesús.
LUK 22:44 Leꞌa ta na uzhebpa kweaꞌ ncho ladna Jesús, leꞌa xa mas uzheꞌeb mbidiꞌizhno Dios. Leꞌa nits msanits ndoꞌ xa nsalaꞌ gast ndoꞌ yo cuent byach ten.
LUK 22:45 Leꞌa gor na mtayadiꞌizhno xa Dios, cha nseaꞌ xa sa ndebe be xmen xa. Ná leꞌa bexa ndeyatsbe tant uban ncho ladna bexa.
LUK 22:46 Leꞌa Jesús cha ndab: —¿Xtaꞌan ndi ndeyats bega zha? Goste bega, unab bega ndoꞌ Dios, ndontsa naꞌanpa utsabgix maxuꞌu bega.
LUK 22:47 Bi li nsoꞌyab Jesús ta wa leꞌa kwaꞌad be men ulen. Leꞌa Judas xa no nak isatibtop xmen Jesús leꞌa nsea ned ndoꞌ be men wa. Cha ubii xa, cha mchealtoꞌo xa ndoꞌ Jesús.
LUK 22:48 Leꞌa Jesús cha ndab: —Judas, ¿lbaꞌa myun lu cuent naꞌ Xa Myak Men Ndoꞌ Gizhliyo zha?
LUK 22:49 Leꞌa bexa ndeno Jesús uniꞌí ta wa, cha ndab bexa: —Señor, ¿kuyono besa bexa no be spad ndee zha?
LUK 22:50 Leꞌa dub bexa wa cha ulobtoꞌog nchaꞌ lad gaꞌal dub xa ndun tiꞌin ndoꞌ uleꞌay ndon leꞌa nsak.
LUK 22:51 Leꞌa Jesús cha ndab ndoꞌ be xmen na: —Unika‑yá. Blaꞌa bego bexa baꞌ. Leꞌa Jesús cha mgal nchaꞌ xa wa, cha myakna‑yá.
LUK 22:52 Cha ndab Jesús ndoꞌ be uleꞌay nibeꞌe, no ndoꞌ bexa nibeꞌe ten bexa nlaꞌach niꞌi ten Dios, no ndoꞌ bexa gox nsak, bexa na nseabegiꞌi Jesús, ndab xa: —¿Xtaꞌan nseano bega spad nsea garrot, nseabesen bega naꞌ cuent dub waꞌan?
LUK 22:53 Leꞌa itea wizh mluu naꞌ be men tale ten niꞌi ten Dios lat bega, ná naꞌan xtaꞌan ngunno bega naꞌ. Parea leꞌa nat ngolka gor ten bega, gor na gun maxuꞌu ta nlad na.
LUK 22:54 Cha usen bexa Jesús, cha mbiꞌi bexa xa ta lid uleꞌay ndon leꞌa nsak. Leꞌa Pedr sittsa nchankea tsoꞌo Jesús.
LUK 22:55 Leꞌa tlaw le ta lid uleꞌay wa mkwaꞌa bexa giꞌ, cha ute pla bexa wats giꞌ wa. Leꞌa Pedr cha no usob wats bexa wa.
LUK 22:56 Leꞌa dub xagots ndun tiꞌin sa wa uniꞌí nsob Pedr sa wa, cha ndab xa ndoꞌ bexa wa: —Leꞌa xa ndee no nkeseano Jesús.
LUK 22:57 Ná leꞌa Pedr cha mkwiꞌin ndab: —Xagots, naꞌ lá nchandoꞌ ton xa baꞌ.
LUK 22:58 Tsoꞌoma wa leꞌa stub xabgiꞌi wa uniꞌígal Pedr, cha ndab xa ndoꞌ Pedr: —Go no nak xmen Jesús. Leꞌa Pedr cha mkwiꞌingal ndab: —Mgiꞌi, leꞌa naꞌ naꞌanpa no.
LUK 22:59 Ngok pa stub gor tsoꞌo wa, leꞌa stub xa ndabgal ndoꞌ be ltsaꞌa na cuent ten Pedr: —Leꞌa xa ndee ta ugeaka no ukeseano Jesús, leꞌa xa ndee xa Galilea.
LUK 22:60 Leꞌa Pedr cha ndab: —Mgiꞌi, leꞌa naꞌ lá iní xtaꞌan ndab lu. Bi li gor wa zha leꞌa dub boy utezhla.
LUK 22:61 Leꞌa Jesús cha mgeak mwiꞌi ndoꞌ Pedr. Leꞌa Pedr cha mtseꞌa ladna ta ndab Jesús: “Leꞌa teꞌal nat gor na biseata kwezh boy, leꞌa lu mkwiꞌinla chon biaj ndab lu leꞌa lu lá nchandoꞌ naꞌ.”
LUK 22:62 Cha utoꞌo Pedr tsoꞌo juer, cha uzhebpa mbiꞌin xa.
LUK 22:63 Leꞌa be xabgiꞌi na li ndeulaꞌach Jesús wa kweaꞌ uníꞌi ndoꞌ Jesús, no udin bexa xa.
LUK 22:64 No mtsaw bexa ndoꞌ Jesús, cha utichyaꞌa bexa ndoꞌ xa, ndab bexa ndoꞌ xa: —¡Gud ton utichyaꞌa ndoꞌ lu!
LUK 22:65 No sianta be diꞌizh ugap ndab bexa ndoꞌ Jesús.
LUK 22:66 Leꞌa ngot xeꞌa wa, cha mzhealbe bexa gox nsak ten bexa judio, no be uleꞌay nibeꞌe, no be mech ten ley. Cha mbiꞌi bexa Jesús dub sa nzhealbe sbeꞌen bexa nibeꞌetsa ten bexa judio. Cha ndab bexa ndoꞌ Jesús:
LUK 22:67 —Gud naga lu nak Cristo xa mti Dios. Leꞌa Jesús cha ukaꞌab ndab: —Tal leꞌa naꞌ gáp leꞌa ta wa naꞌka, leꞌa bego lá gungea ladna‑yá.
LUK 22:68 No tal inabdiꞌizh naꞌ ndoꞌ bega, leꞌa bega lá ikaꞌab ndoꞌ naꞌ, no ni lá ulaꞌa bega naꞌ.
LUK 22:69 Parea leꞌa nat idub nchaꞌa ndoꞌ ndee, leꞌa naꞌ, Xa Myak Men Ndoꞌ Gizhliyo, yatsoꞌobgal wats Dios lad gaꞌal, Dios xa ndon leꞌa nibeꞌe.
LUK 22:70 Weꞌe cha itea bexa ndab: —¿Nat zha lu nak Xin Dios? Leꞌa Jesús cha ukaꞌab ndab: —Leꞌaka bega ndab‑a.
LUK 22:71 Weꞌe leꞌa bexa wa cha ndab ndoꞌ be ltsaꞌa na: —Yá lá nkiꞌin beuna kwaꞌadta xa usake xa. Leꞌa beuna ndoꞌón ndab xa leꞌa xa leꞌaka ta wa.
LUK 23:1 Leꞌa itea bexa wa cha mbiꞌi Jesús ndoꞌ Pilat.
LUK 23:2 Cha usaxan nsake bexa Jesús, ndab bexa: —Leꞌa xa ndee nkiꞌil be ltsaꞌa besa bexa judio, ndab xa leꞌa besa lá nsabndoꞌ kix med ndoꞌ César xa nibeꞌe Roma. No ndab xa leꞌa xa nak Cristo, dub xa nibeꞌe.
LUK 23:3 Leꞌa Pilat cha unabdiꞌizh ndab ndoꞌ Jesús: —¿Lu nak xa nibeꞌe ten bexa judio zha? Leꞌa Jesús cha ukaꞌab ndab: —Goka ndab‑a.
LUK 23:4 Leꞌa Pilat cha ndab ndoꞌ be uleꞌay nibeꞌe no ndoꞌ be men kwaꞌad wa: —Leꞌa naꞌ ni dub ke ten xa ndee lá ngaizheal naꞌ.
LUK 23:5 Ná leꞌa bexa wa ndi mas ugeꞌ ndabbe: —Leꞌa ta nluu xa baꞌ nchealuyo itea be men, ta usaxan nluu xa Galilea nsea gast Judea ndee.
LUK 23:6 Leꞌa gor na mbiꞌín Pilat ta wa, leꞌa xa cha unabdiꞌizh naga xa Galilea Jesús.
LUK 23:7 Leꞌa gor na mbiꞌín Pilat leꞌa Jesús xa Galilea sa nibeꞌe Herodes, cha mtuꞌub Pilat Jesús ndoꞌ Herodes. Leꞌa Herodes leꞌagala be wizh wa ncho Jerusalén.
LUK 23:8 Leꞌa gor na uniꞌí Herodes Jesús, leꞌa Herodes uzhebpa mten ladna, geal leꞌa xa polta nlad iniꞌí Jesús. Leꞌa xa ndoꞌón ndadiꞌizh be men cuent ten Jesús, no nlad xa iniꞌí xa dub uyon ndun Jesús.
LUK 23:9 Cha uzhebpa sian taꞌa unabdiꞌizh Herodes ndoꞌ Jesús, ná leꞌa Jesús ni lá ikaꞌab.
LUK 23:10 Leꞌa be uleꞌay nibeꞌe nsea be mech ten ley uzhebpa msake Jesús ndoꞌ Herodes.
LUK 23:11 Leꞌa Herodes no be soldad ten na cha kweaꞌ uníꞌi ndoꞌ Jesús, cha usalad mbinno bexa Jesús, mgak bexa xa dub lad uyappa, ta ndak sbeꞌen bexa nibeꞌetsa. Cha leꞌaka ndoꞌ Pilat mtuꞌub Herodes Jesús.
LUK 23:12 Leꞌa wizh wa mzhealdiꞌizh Pilat no Herodes, leꞌa mas polta leꞌa bexa nyobe.
LUK 23:13 Leꞌa Pilat cha mchealte be uleꞌay nibeꞌe, no bexa nsak, no kwaꞌadta be men gezh wa.
LUK 23:14 Cha ndab Pilat ndoꞌ bexa: —Leꞌa bego myun cuent mgiꞌi ndee ndoꞌ naꞌ, ndab bega leꞌa xa nchealuyo be men. Parea leꞌa bega ndewiꞌi leꞌa naꞌ unabdiꞌizh ndoꞌ xa, ná leꞌa xa lá ngun ni dub ta na lbaꞌa nsake bega xa.
LUK 23:15 No ni Herodes lá ngaizheal ke ten xa, ta weꞌe mtuꞌub Herodes xa leꞌaka sa ndee. Leꞌa bega uniꞌí leꞌa xa ndee ni dub ke gat xa lá ndap xa.
LUK 23:16 Nat leꞌa naꞌ utsaksitsa xa, weꞌeta ula naꞌ xa.
LUK 23:17 Li ndab Pilat geal leꞌa itea liꞌin zha ndal ujest wa, leꞌa Pilat ngoꞌo dub men nkea litgiꞌib.
LUK 23:18 Ná leꞌa be men ndi iteanak ugeꞌ ndabbe: —¡Gat Jesús! ¡Blaꞌa ga Barrabás!
LUK 23:19 Leꞌa Barrabás wa nkea litgiꞌib ke na uteyono xa bexa nibeꞌe Jerusalén wa, no mbit xa dub men.
LUK 23:20 Leꞌa Pilat nlad ulaꞌa Jesús, cha ndabgal xa ta wa ndoꞌ be men.
LUK 23:21 Ná leꞌa be men wa ugeꞌgal ndab: —¡Ikea xa ndoꞌ cruz! ¡Ikea xa ndoꞌ cruz!
LUK 23:22 Leꞌa Pilat cha ndabgal biaj yon: —Leꞌa xa ndee naꞌan xtaꞌan dub ta ugap ngun. Ni dub ke gat xa lá ndap xa. Leꞌa naꞌ utsaksitsa xa, weꞌeta ula naꞌ xa.
LUK 23:23 Ná leꞌa be men wa no be uleꞌay nibeꞌe ndi mas ugeꞌ ndabbe ikea Jesús ndoꞌ cruz. Kwenpa li ndab bexa gast plo mbinka bexa gan.
LUK 23:24 Weꞌe leꞌa Pilat ndab sunka ta ndab be men wa.
LUK 23:25 Cha mgoꞌo xa dub xa na li ndab be men itoꞌo wa, xa na li nkea litgiꞌib ke na mbit xa dub men, no uteyono xa bexa nibeꞌe wa. Cha myun Pilat cuent Jesús ndoꞌ bexa ukeꞌa bexa xa ndoꞌ cruz, lak nlad be men wa.
LUK 23:26 Leꞌa nes nchaꞌano be soldad Jesús, mzheꞌal bexa dub xabgiꞌi ngwaꞌ geꞌe, xa nsaleaꞌ Simón xa gezh Cirene. Cha mbin bexa juers goꞌo Simón cruz ten Jesús, cha mxoꞌob bexa‑yá tsoꞌo xa, nchaꞌnkea xa tsoꞌo Jesús.
LUK 23:27 No kwaꞌad be men usankea tsoꞌo Jesús, nsea lat bexa wa nchaꞌa kwaꞌad be xagots ugeꞌ ndoꞌonno Jesús.
LUK 23:28 Leꞌa Jesús cha mgeaksoꞌ mwiꞌi ndoꞌ be xagots wa, cha ndab xa: —Bego xagots Jerusalén, lá goꞌonno bega naꞌ, ndi biꞌinno bega leꞌaka leꞌa bega no be xin bega.
LUK 23:29 Leꞌa gal be wizh leꞌa be men gab: “Uzhebpa wen yoo be xagots lá yoꞌo gan gap meꞌed, no bexa lá yoxinna, no bexa lá ngungaꞌal meꞌed.”
LUK 23:30 Leꞌa be wizh weꞌe gab be men ndoꞌ be geꞌe ubiꞌi baꞌ: “Ulayat bega tsoꞌo besa”, no gab bexa ndoꞌ be bet: “Ulate bega tsoꞌo besa.”
LUK 23:31 Leꞌa bexa lndeꞌe ndanno naꞌ, ná naꞌ ni dub ke lá ndap, mata bexa ndap ke wa mas gealkweaꞌ iniꞌí.
LUK 23:32 Leꞌa be soldad wa mbiꞌi no stop bexa ugap ikea ndoꞌ cruz wats Jesús.
LUK 23:33 Leꞌa gor na ulayaꞌ bexa sa nsaleaꞌ tit gek men, cha mkeꞌa bexa Jesús ndoꞌ cruz. Cha mkeꞌa bexa dub xa ugap wa ndoꞌ cruz wats Jesús lad gaꞌal, leꞌa stub xa wa wats lad raves.
LUK 23:34 Leꞌa Jesús cha ndab: —Dios Xus naꞌ, bingeꞌ ladna go ndoꞌ be men ndee, leꞌa bexa ka lá iniꞌí xtaꞌan ndunbe. Cha uloꞌo be soldad dub suert ndontsa iniꞌí bexa ná tonpa ikaꞌa be xab Jesús.
LUK 23:35 Leꞌa kwaꞌad be men ndewiꞌi sa wa. Leꞌa bexa nsak ten bexa judio xela ndeníꞌi ndoꞌ Jesús, ndab bexa ndoꞌ be ltsaꞌa bexa: —Leꞌa xa baꞌ ngokno be men, nat ulat xa leꞌaka xa ndoꞌ gealgut, tal leꞌa xa ta ugeaka leꞌa nak Cristo xa na mti Dios.
LUK 23:36 Leꞌa be soldad no xela uníꞌibe ndoꞌ Jesús. No msaꞌa bexa vin ulaꞌ goo xa.
LUK 23:37 Ndab bexa ndoꞌ Jesús: —Tal lu leꞌa nak xa nibeꞌe ten bexa judio, nat blat leꞌaka lu.
LUK 23:38 Leꞌa gek cruz ten Jesús mkeꞌa bexa dub letr ndab‑a: “TA NDEE XA NIBEꞌE TEN BEXA JUDIO.” Leꞌa ta wa nkea diꞌizh griego, no diꞌizh latín, no diꞌizh hebreo.
LUK 23:39 Leꞌa dub xa ugap no nkea ndoꞌ cruz no xela uníꞌi ndoꞌ Jesús, ndab xa: —Tal lu nak Cristo, ulaꞌ ndoꞌ cruz baꞌ, cha uxeꞌe besa ndoꞌ be cruz ndee.
LUK 23:40 Ná leꞌa stub xa ugap wa cha uteyo xa na li ndab wa, ndab xa: —Lbaꞌa ntsaksi bexa lu, ¿ná lá nzheb lu ndoꞌ Dios zha?
LUK 23:41 Leꞌa wa nsabndoꞌka ndeniꞌí gealkweaꞌ ndee, leꞌa wa ndekix ta ugap mbin wa. Parea leꞌa xa ndee ni dub ta ugap lá ngun.
LUK 23:42 Cha no ndab xa ndoꞌ Jesús: —Jesús, utseꞌa ladna go naꞌ gor na isaxan inibeꞌe ga.
LUK 23:43 Leꞌa Jesús cha ukaꞌab ndab: —Leꞌa naꞌ gáp leꞌa wizh nat leꞌa lu no yoꞌono naꞌ gibeꞌa.
LUK 23:44 Leꞌa ngol gor gawizh cha mkaw idub ndoꞌ gizhliyo, gast gor nkea uyon uzhe.
LUK 23:45 Leꞌa be gor wa leꞌa wizh yá lá nluꞌuta. Cha usaw lad utaꞌa ncho bseꞌa len niꞌi ten Dios, ngok top bleꞌa‑yá.
LUK 23:46 Weꞌe leꞌa Jesús ugeꞌ ndab: —Dios Xus naꞌ, ndoꞌ yaꞌa ga uchan naꞌ gealnaban ten naꞌ. Cha ngut xa.
LUK 23:47 Leꞌa gor uniꞌí xa nibeꞌe ten be soldad ta uyoꞌo wa, cha ndab xa: —Leꞌa Dios uzhebpa dub Dios siꞌil. Ta ugeaka leꞌa xabgiꞌi ndee dub xa wenka.
LUK 23:48 Leꞌa itea be men nde sa wa, bexa na li uniꞌí be ta uyoꞌo wa, cha nseaꞌbe bexa uzheꞌeb kweaꞌ ncho ladna bexa.
LUK 23:49 Naꞌ leꞌa bexa na nchandoꞌ Jesús sittsa ndewiꞌibe, no liga be xagots na li usankea tsoꞌo Jesús zha utoꞌo bexa Galilea.
LUK 23:50 Uyoꞌo dub xabgiꞌi nsaleaꞌ Kosé xa gezh Arimatea ten distrit Judea. Leꞌa xa wa dub xa nsak ten bexa judio, dub xa wen nak ndoꞌ be men no ndoꞌ Dios.
LUK 23:51 No nkenkeaꞌ xa zha inibeꞌe Dios ndoꞌ gizhliyo. No naꞌanpa isak ladna xa ta mbinno be ltsaꞌa xa Jesús, bexa nsak ten bexa judio.
LUK 23:52 Weꞌe cha ngwaꞌ xa ndoꞌ Pilat unab xa Jesús.
LUK 23:53 Cha uxeꞌe xa Jesús ndoꞌ cruz, cha mtixko xa xa ngut wa dub bleꞌa lad nagud. Cha ulo xa xa wa len dub baꞌa cuent nak geꞌloꞌo len dub geꞌdaꞌa, dub sa ni dub men gol gaꞌach.
LUK 23:54 Leꞌa ta wa wizh nsaxkwaꞌa bexa judio ta guntiꞌin bexa wizh neꞌe bexa. Leꞌa gor mgaꞌach Jesús dub gor uzhe yamer yatsoꞌ wizh wa.
LUK 23:55 Leꞌa be xagots na ukeseano Jesús zha na utoꞌo bexa Galilea usankea tsoꞌo Kosé, cha uniꞌí bexa pa nde baꞌa sa mgaꞌach Jesús.
LUK 23:56 Cha nseaꞌ bexa leꞌaka gezh Jerusalén, cha msaxkwaꞌa bexa be ta uxeꞌe yaꞌlo bexa las Jesús. Cha mneꞌe bexa dub wizh lak nibeꞌe ley ten bexa.
LUK 24:1 Leꞌa ngol wizh ned ten sman gor bi ukalta naꞌ, utoꞌo be xagots wa, nchaꞌbe bexa sa nde baꞌa mgaꞌach Jesús. Mbiꞌi bexa be ta uxeꞌe li msaxkwaꞌa bexa wa, nsea stapla be xagots nchaꞌano bexa.
LUK 24:2 Leꞌa gor ulayaꞌ bexa sa wa, uniꞌí bexa leꞌa geꞌ li nsoꞌnyaw toꞌo baꞌa wa yá naꞌanlapa nsoꞌ sa wa.
LUK 24:3 Cha uyoꞌo bexa len baꞌa, cha uniꞌí bexa leꞌa Jesús naꞌanla sa wa.
LUK 24:4 Cha ngwatenaꞌ bexa, ni lá iniꞌí bexa xteꞌe gun bexa. Zha leꞌa bexa mnaꞌla top be xabgiꞌi nak lad nagud ndon nlaꞌbealꞌ ndela wats bexa.
LUK 24:5 Cha mzheb bexa, mwiꞌi bexa ndi ndoꞌ yo. Leꞌa be xabgiꞌi wa cha ndab: —¿Xtaꞌan nkwaꞌan bega dub xa nban sa ten bexa ngut?
LUK 24:6 Leꞌa Jesús wa naꞌanla len baꞌa ndee, leꞌa xa ubanla. Btseꞌa ladna bega ta ndab xa ndoꞌ bega zha na bi ncho xa Galilea,
LUK 24:7 ndab xa: “Leꞌa naꞌ, Xa Myak Men Ndoꞌ Gizhliyo, nsabndoꞌ yak cuent ndoꞌ yaꞌa be men ugap, no ikea naꞌ ndoꞌ cruz. Parea gal wizh yon leꞌa naꞌ ibangal.”
LUK 24:8 Weꞌe leꞌa be xagots wa cha mtseꞌa ladna be diꞌizh ndab Jesús wa.
LUK 24:9 Cha nseaꞌbe bexa leꞌaka Jerusalén, mbidiꞌizh bexa ta uniꞌí bexa ndoꞌ isatibdub be xmen Jesús no ndoꞌ iteata bexa ukeseano Jesús.
LUK 24:10 Leꞌa be xagots na li mbidiꞌizh ta wa ndoꞌ be xmen Jesús wa, leꞌa xa wa Marí xa gezh Magdala no Juana no Marí xnaꞌa Jacob no stapla xagots.
LUK 24:11 Ná leꞌa be xmen Jesús lá ngungea ladna ta ndab be xagots wa, leꞌa bexa ndi ndab leꞌa bexa wa xa loc.
LUK 24:12 Parea leꞌa Pedr cha utoꞌo karrel nchaꞌa toꞌo baꞌa. Leꞌa gor na mwiꞌi xa len baꞌa wa, ndon nabtsa be lad ubixyoꞌo Jesús uniꞌí xa. Cha myach Pedr, ngwanseana xa ta uyoꞌo wa.
LUK 24:13 Bi leꞌa wizh wa leꞌa top xabgiꞌi na no ukeseano Jesús nseaꞌbe nes nchaꞌa gezh Emaús. Leꞌa ta wa pa dub tibdub kilómetro sit wats Jerusalén.
LUK 24:14 Leꞌa bexa wa nseaꞌbe yadiꞌizh itea be ta na li uyoꞌo Jerusalén wa.
LUK 24:15 Ná ndalen li nseaꞌbe yadiꞌizh bexa ta wa, leꞌa Jesús cha ulayaꞌ wats bexa, cha no xa nchaꞌano bexa wa.
LUK 24:16 Parea leꞌa Dios lá ulaꞌa igondoꞌ bexa Jesús.
LUK 24:17 Leꞌa Jesús cha ndab: —¿Xtaꞌan nseaꞌbe yadiꞌizh bega nes ndee? ¿No xtaꞌan lbaꞌa uban ncho ladna bega zha?
LUK 24:18 Leꞌa dub xa nsaleaꞌ Cleofas cha ukaꞌab ndab: —¿Ndon gokama nak dub xa sit utoꞌo lá iniꞌí xtaꞌan uyoꞌo Jerusalén be wizh ndee zha?
LUK 24:19 Leꞌa Jesús cha ndab: —¿Xtaꞌan uyoꞌo sa wa zha? Leꞌa bexa wa cha ndab: —Ta ngwasea Jesús xa Nazaret, xa mbidiꞌizh sakndoꞌ Dios, no sian uyon mbin xa, no uzhebpa wen mluu xa be men. Leꞌa Dios nsea itea be men msak ladna lak mbin xa.
LUK 24:20 Ná leꞌa be uleꞌay nibeꞌe no bexa nsak ten besa myun cuent Jesús gat xa. Cha mkeꞌa bexa xa ndoꞌ cruz.
LUK 24:21 Leꞌa besa mbinbeꞌe leꞌa xa leꞌa ulat beuna xa Israel ndoꞌ yaꞌa bexa nibeꞌe, ná nat myonla wizh ngok ta wa.
LUK 24:22 Leꞌa pla be xagots ncho lat besa ngwaꞌ sa mgaꞌach Jesús wa gor bi ukalta naꞌ,
LUK 24:23 ná leꞌa bexa lá izheal‑la Jesús sa wa. Cha myach bexa ndab bexa leꞌa bexa uniꞌí be angel ndab leꞌa Jesús ubanla.
LUK 24:24 Leꞌa pla be ltsaꞌa besa cha no ngwaꞌwiꞌi sa wa, cha uniꞌí bexa be taꞌa lakkata ndab be xagots wa, ná leꞌa bexa no naꞌanpa iniꞌí Jesús.
LUK 24:25 Leꞌa Jesús cha ndab: —Uzhebpa lid leꞌa ndanbeꞌe bega. No uzhebpa chaꞌaw ndangea ladna bega be ta polta mbidiꞌizh be men sakndoꞌ Dios.
LUK 24:26 ¿Lá iniꞌí bega zha lid nsabndoꞌka itid Cristo itea be ta wa, weꞌeta yaꞌ xa wats Dios?
LUK 24:27 Cha usaxan Jesús ndadiꞌizh itea be ta nkeaniꞌi diꞌizh ten Dios cuent ten Jesús. Ned mbidiꞌizh xa ta mkeꞌa Moisés, weꞌeta mbidiꞌizh xa ta mkeꞌa iteata bexa mbidiꞌizh sakndoꞌ Dios.
LUK 24:28 Leꞌa gor na ulayaꞌ bexa gezh Emaús wa, leꞌa Jesús cha mbinta nchaꞌata mas sit.
LUK 24:29 Ná leꞌa bexa wa dubpa ndab ndoꞌ Jesús: —Sa ndeetsa byaꞌanno ga besa, leꞌa nat nseala teꞌal. Leꞌa Jesús cha weꞌetsa myaꞌanno bexa wa.
LUK 24:30 Ngol gor nde bexa ndoꞌ mes gaw bexa, leꞌa Jesús cha usen dub pan, cha msaꞌa xa xno ndoꞌ Dios. Cha uleꞌa xa‑yá, cha msaꞌa xa‑yá ndoꞌ bexa wa.
LUK 24:31 Leꞌa gor wa leꞌa bexa wa cha mgondoꞌ Jesús, ná leꞌa Jesús cha unitndoꞌ sa wa.
LUK 24:32 Cha ndab dub xa wa ndoꞌ stub xa: —Ta weꞌeka uzhebpa mten ladna wa gor na li mbidiꞌizh xa xteꞌe nkeaniꞌi diꞌizh ten Dios, gor na nseaꞌbe min nes wa.
LUK 24:33 Bi leꞌa gor wa cha myach bexa leꞌaka Jerusalén, sa ndebe isatibdub be xmen Jesús no stapla bexa ndeno bexa sa wa.
LUK 24:34 Leꞌa bexa nde sa wa cha ndab: —Leꞌa Jesús ta ugeaka mbanla, leꞌa xa wa mlundoꞌ ndoꞌ Simón.
LUK 24:35 Weꞌe leꞌa itop bexa wa cha no mbidiꞌizh ta ngwasea bexa nes nchaꞌa Emaús, no xteꞌe mgondoꞌ bexa Jesús gor uleꞌa xa pan.
LUK 24:36 Leꞌa ndalen ndeyadiꞌizh bexa ta wa, zha leꞌa Jesús ulatsoꞌla tlaw bexa. Cha ndab xa: —¡Dios gun wen yoo ladna bega!
LUK 24:37 Leꞌa bexa cha uzhebpa mzhebbe, mbinbeꞌe bexa leꞌa Jesús dub ta ntalad.
LUK 24:38 Ná leꞌa Jesús cha ndab: —¿Xtaꞌan nzheb bega? ¿No xtaꞌan lbaꞌa lá ndangea ladna bega leꞌa naꞌ Jesúska?
LUK 24:39 Bwiꞌi bega yaꞌa naꞌ no xoꞌo naꞌ, no bgal bega naꞌ. Leꞌa naꞌ leꞌaka Jesús. Leꞌa dub ta ntalad lá ndap ni tit no ni las na, lak naꞌ bega naꞌ.
LUK 24:40 Leꞌa gor na li ndab Jesús, cha mluu xa yaꞌa xa no xoꞌo xa.
LUK 24:41 Leꞌa bexa uzhebpa mten ladnabe no ndanseana bexa, parea bi lá ndangea ladna bexa ti leꞌa Jesús ta wa. Ta weꞌe leꞌa Jesús cha ndab: —¿Xtaꞌan ndap bega gaw naꞌ?
LUK 24:42 Cha msaꞌa bexa dub bleꞌa mbeal mgiꞌix no dub bleꞌa mguꞌud ncho mzhin.
LUK 24:43 Leꞌa Jesús cha usen‑a, cha udaw xa‑yá ndoꞌ gaꞌal bexa wa.
LUK 24:44 Cha ndab Jesús: —Btseꞌa ladna bega ta na li mbidiꞌizh naꞌ ndoꞌ bega, zha na li ndesea beuna wa. Ndáp naꞌ leꞌa itea be taꞌa nkeaniꞌi cuent ten naꞌ ndoꞌ be libr mkeꞌa Moisés, no ndoꞌ be libr mkeꞌa bexa mbidiꞌizh sakndoꞌ Dios, no ndoꞌ libr Salmos, leꞌa ta wa nsabndoꞌka li gak.
LUK 24:45 Leꞌa Jesús cha mbidiꞌizh ndoꞌ bexa lak nkeaniꞌi diꞌizh ten Dios, ndontsa yakbeꞌena bexa‑yá,
LUK 24:46 ndab xa: —Leꞌa diꞌizh ten Dios nkeaniꞌi leꞌa Cristo nsabndoꞌka li gat no iban xa wizh yon ndoꞌ gealgut.
LUK 24:47 No nsabndoꞌ gudiꞌizh be xmen naꞌ cuent ten naꞌ ndoꞌ itea be men, ndontsa ulaꞌa bexa be ta ugap nak bexa, no utsuꞌu Dios be ke ten bexa. Ndon ned Jerusalén ndee no gast idub ndoꞌ gizhliyo gudiꞌizh bega ta wa.
LUK 24:48 Leꞌa bego nak bexa uniꞌí be ta li utiꞌid naꞌ wa.
LUK 24:49 Blaꞌach bego leꞌa naꞌ utuꞌubka Espíritu ten Dios, xa ndabka Xus naꞌ usaꞌa ndoꞌ bega wa. Cha lá ikaꞌan bega Jerusalén ndee, gast ikaꞌaka bega juers ilen gibeꞌa wa.
LUK 24:50 Weꞌe leꞌa Jesús cha mbiꞌi bexa dub lad toꞌo Jerusalén gax gezh Betania. Cha msaꞌab Jesús be yaꞌa na lad nde bexa, cha unab xa ndoꞌ Dios ulaꞌach Dios bexa.
LUK 24:51 Ndalen li nsoꞌyadiꞌizh Jesús ta wa, leꞌa xa cha nseaꞌ, mkea xa gibeꞌa.
LUK 24:52 Leꞌa bexa wa cha msaxib, ngwankea bexa Jesús. Weꞌe cha uzhebpa mten ladna bexa, myach bexa leꞌaka Jerusalén.
LUK 24:53 Cha itea wizh ndaꞌbe bexa tale ten niꞌi ten Dios, ndankea bexa Dios, no nsaꞌa bexa xno ndoꞌ Dios. Lika nak‑a.
JOH 1:1 Leꞌa zha ndon leꞌa ned, leꞌa xa nak Diꞌizh nchola. No nsoꞌla xa nak Diꞌizh wa wats Dios, leꞌa xa wa nak Dios.
JOH 1:2 Leꞌa zha ndon leꞌa ned wa, leꞌa xa wa nsoꞌla wats Dios.
JOH 1:3 Leꞌa iteanak be ta ncho leꞌa ta wa ngokndeꞌe juers ten Diꞌizh wa. Ni dub taꞌa naꞌanpa yoꞌo tal leꞌa xa wa lá ngundeꞌe‑yá.
JOH 1:4 Leꞌa xa wa leꞌa nsaꞌa gealnaban ten be men, leꞌa gealnaban wa leꞌa nak xeꞌa ten bexa.
JOH 1:5 Leꞌa xeꞌa wa nsu sa ukaw, leꞌa sa ukaw wa lá gun gan yuꞌu xeꞌa wa.
JOH 1:6 Uyoꞌo dub xabgiꞌi leꞌa Dios mtuꞌub, leꞌa ta wa Juan xa ulaleaꞌ be men.
JOH 1:7 Leꞌa xa wa mbidyadiꞌizh cuent ten xa nak xeꞌa wa, ndontsa itea be men gungea ladna xa wa.
JOH 1:8 Leꞌa Juan naꞌanpa leꞌa nak xeꞌa wa, leꞌa xa ndi mbidyadiꞌizhtsa cuent ten xa nak xeꞌa.
JOH 1:9 Leꞌa xa na ta ugeaka nak xeꞌa, xa nsu xeꞌa ten Dios ndoꞌ be men, leꞌa xa wa mbiꞌid ndoꞌ gizhliyo ndee.
JOH 1:10 No ukesea xa ndoꞌ gizhliyo ndee. Leꞌa juers ten xa ngokndeꞌe gizhliyo, parea leꞌa be men ncho ndoꞌ gizhliyo lá igondoꞌ xa.
JOH 1:11 Mbiꞌid xa ndoꞌ bexa Israel, parea leꞌa be ltsaꞌa xa wa lá isakyoꞌón ta ndab xa.
JOH 1:12 Ná leꞌa itea be men na msakyoꞌón ta ndab xa no mbingea ladna bexa xa, ndoꞌ bexa wa msaꞌa xa juers myak bexa xin Dios.
JOH 1:13 Leꞌa ta na nak bexa xin Dios wa leꞌa ta wa naꞌanpa dub ta ndun be men, leꞌa ta wa ndi dub ta nsaꞌa Dios.
JOH 1:14 Leꞌa xa nak Diꞌizh wa myak men, cha uyoꞌo xa lat besa. Sbeꞌen nkweaꞌ ladna xa be men no sbeꞌen gealngea ndadiꞌizh xa. No uniꞌí besa xteꞌe juert nak xa ta na leꞌa xa ga dubkama nak Xin Dios.
JOH 1:15 Leꞌa Juan wa mluu be men xteꞌe nak xa nak Diꞌizh wa, ugeꞌ ndab Juan ndoꞌ bexa: —Leꞌa cuent ten xa ndee mbidiꞌizh naꞌ, gor na ndáp naꞌ leꞌa xa na ilen tsoꞌo naꞌ wa mas nsak ndoꞌ naꞌ, geal leꞌa xa wa nedka nchola ndoꞌ naꞌ.
JOH 1:16 Leꞌa xa uzhebpa utsin nak ndoꞌ beuna, no uzhebpa ndakno xa beuna itea be wizh.
JOH 1:17 Leꞌa juers ten Moisés leꞌa Dios msaꞌa ley ten na. Parea leꞌa juers ten Jesucristo leꞌa Dios mluu xteꞌe nkweaꞌ ladna xa beuna no xteꞌe nak gealngea ten xa.
JOH 1:18 Ni dub men gol niꞌí Dios. Ná leꞌa xa na ga dubkama nak Xin Dios, xa na nsob wats Tad Dios, leꞌa xa wa mluu ndoꞌ beuna xteꞌe nak Dios.
JOH 1:19 Leꞌa dub wizh leꞌa bexa nibeꞌe ten bexa judio mtuꞌub pla be uleꞌay no pla bexa levita, utoꞌo bexa gezh Jerusalén ngwaꞌinabdiꞌizh bexa ndoꞌ Juan xa ngoleaꞌ be men ná ton nak Juan.
JOH 1:20 Leꞌa Juan naꞌanpa ukwiꞌin, ndi gaꞌalka ndab xa ndoꞌ bexa wa: —Leꞌa naꞌ naꞌanpa leꞌa nak Cristo.
JOH 1:21 Leꞌa bexa wa cha unabdiꞌizhgal ndab bexa: —¿Tonxá lu zhaga? ¿Nak lu profet Elí zha? Leꞌa Juan cha ndab leꞌa xa naꞌanpa leꞌa ta wa. Weꞌe unabdiꞌizhgal bexa, ndab bexa: —¿Nati lu profet ndiꞌizh ga ilenka wa? Leꞌa Juan cha ndabgal leꞌa xa naꞌanpa leꞌa ta wa.
JOH 1:22 Leꞌa bexa wa cha ndabgal: —¿Ton nak lu zha? Leꞌa besa juerska gab‑a ndoꞌ bexa na mtuꞌub besa. Nat gud ton nak lu.
JOH 1:23 Leꞌa Juan cha ukaꞌab ndab: —Leꞌa naꞌ ndee leꞌa nak xa na nkeseyadiꞌizh geꞌe sa bid, ugeꞌ ndáp naꞌ: “Bkeasoꞌ bega nes ilen Xa Nibeꞌe.” Leꞌa ta wa ta ndab Isaías tiemp polta.
JOH 1:24 Leꞌa bexa mtuꞌub bexa fariseo wa
JOH 1:25 cha unabdiꞌizhgal ndab bexa: —¿Xtaꞌan ngoleaꞌ lu be men, tal lu lid leꞌa nak Cristo, ni Elí, ni profet ndiꞌizh ga ilenka wa?
JOH 1:26 Leꞌa Juan cha ukaꞌab ndab: —Leꞌa naꞌ nits‑tsa ngoleaꞌ be men, ná leꞌa lat bego ncho dub xa leꞌa bego bi lá nchandoꞌ.
JOH 1:27 Leꞌa xa wa nedla ncho ndoꞌ naꞌ ndee, parea leꞌa xa ilen ndi tsoꞌo naꞌ. Leꞌa naꞌ ni lá isaya kote ndab xa wa, leꞌa xa wa mas nsak ndoꞌ naꞌ.
JOH 1:28 Leꞌa be ta ndee uyoꞌo gezh Betábara, stub toꞌo yowbeꞌe Jordán, sa na ulaleaꞌ Juan be men.
JOH 1:29 Ngol stubtsa wizh leꞌa Juan uniꞌí leꞌa Jesús nsalayaꞌ gax wats Juan. Cha ndab Juan ndoꞌ be men: —Bwiꞌi bego, leꞌa xa baꞌ leꞌa xa nak cuent Borreg Ben ten Dios, xa ntsuꞌu be ke ten be men.
JOH 1:30 Leꞌa cuent ten xa baꞌ li mbidiꞌizh naꞌ gor na ndáp naꞌ leꞌa tsoꞌo naꞌ ilen dub xa mas nsak ndoꞌ naꞌ, geal leꞌa xa nedla ncho ndoꞌ naꞌ.
JOH 1:31 Leꞌa zha weꞌe leꞌa naꞌ ndee bi lá nchandoꞌ xa, ná leꞌa naꞌ ngwal ulaleaꞌ be men nsea nits, ndontsa li igondoꞌ bexa Israel wa xa.
JOH 1:32 No ndab Juan: —Leꞌa naꞌ uní leꞌa Espíritu ten Dios utoꞌo gibeꞌa cuent dub palom nchaꞌlaꞌ sa nsoꞌ Jesús.
JOH 1:33 Leꞌa zha wa leꞌa naꞌ bi lá nchandoꞌ xa baꞌ, parea leꞌa Dios xa mtuꞌub naꞌ koleaꞌ naꞌ be men nsea nits, leꞌa xa wa ndablaka ndoꞌ naꞌ leꞌa gek xa na iní naꞌ ilaꞌ Espíritu ten Dios, leꞌa xa wa koleaꞌ men nsea Espíritu ten Dios.
JOH 1:34 Leꞌa naꞌ uní ta wa ta weꞌe ndáp naꞌ ndoꞌ bego leꞌa xa baꞌ nakka Xin Dios.
JOH 1:35 Ngol stubtsa wizh leꞌa Juan nsoꞌgal sa wa nsea stop xmen xa.
JOH 1:36 Leꞌa gor uniꞌí Juan nsatid Jesús sa wa, cha ndab Juan ndoꞌ bexa: —Bwiꞌi bego, leꞌa xa baꞌ xa nak cuent Borreg Ben ten Dios.
JOH 1:37 Leꞌa gor na mbiꞌín itop be xmen Juan ta wa, cha usankea bexa tsoꞌo Jesús.
JOH 1:38 Leꞌa Jesús cha mgeaksoꞌ mwiꞌi xteꞌe nchankea bexa tsoꞌo na, cha ndab xa: —¿Xtaꞌan nkwaꞌan bega zha? Leꞌa bexa wa cha ukaꞌab ndab bexa: —Rabí, ¿pa ncho go zha? —leꞌa rabí wa dub diꞌizh gab mech.
JOH 1:39 Leꞌa Jesús cha ndab: —Waꞌa beuna, iniꞌí bega pa‑yá. Leꞌa bexa wa cha nchaꞌbe, uniꞌí bexa pa ncho Jesús. Leꞌa ta wa pa gor nkea udap gor uzhe. Cha uyoꞌono bexa Jesús sa wa idub uzhe wa.
JOH 1:40 Leꞌa itop bexa na li mbiꞌín ta ndab Juan wa cha usankea tsoꞌo Jesús, leꞌa dub xa wa nsaleaꞌ Ndres, wit Simón Pedr.
JOH 1:41 Weꞌe leꞌa Ndres wa ned ngwaꞌkwaꞌan wit na Simón, cha ndab xa: —Leꞌa besa mzheꞌal xa nak Mesías —leꞌa Mesías wa dub diꞌizh hebreo, gab‑a Cristo, xa mti Dios.
JOH 1:42 Leꞌa Ndres cha mbiꞌi Simón wats Jesús. Leꞌa Jesús cha mwiꞌi ndoꞌ Simón, cha ndab Jesús: —Leꞌa lu Simón, xin Jonás. Leꞌa nat leꞌa lu isaleaꞌ Cefas —leꞌa diꞌizh griego leꞌa ta wa Pedr, dub diꞌizh gab geꞌdaꞌa.
JOH 1:43 Ngol stubtsa wizh leꞌa Jesús nlad yaꞌ distrit Galilea. Cha mzheꞌal xa dub xabgiꞌi nsaleaꞌ Julip, cha ndab xa: —Usankea tsoꞌo naꞌ.
JOH 1:44 Leꞌa lazh Julip wa gezh Betsaida, lazh Ndres no Pedr.
JOH 1:45 Leꞌa Julip cha ngwaꞌkwaꞌan dub xabgiꞌi nsaleaꞌ Natanael, ndab xa: —Leꞌa besa mzheꞌal xa na mkeꞌa Moisés no be profet cuent ten na. Leꞌa xa wa Jesús xa gezh Nazaret, xin Kosé.
JOH 1:46 Leꞌa Natanael wa cha ndab: —¿Cha syoꞌo gan itoꞌo dub xa wen Nazaret zha? Leꞌa Julip cha ukaꞌab ndab: —Nchaꞌa wa igondoꞌ lu xa.
JOH 1:47 Leꞌa gor na uniꞌí Jesús nchaꞌlayaꞌ gax Natanael wats Jesús, cha ndab Jesús cuent ten Natanael: —Leꞌa xa baꞌ ta ugeakapa nak dub xa Israel, dub xa naꞌanpa nkwiꞌinno be men.
JOH 1:48 Leꞌa Natanael cha ndab: —¿Xteꞌe nchandoꞌ ga naꞌ? Leꞌa Jesús cha ndab: —Naꞌ uníla lu gor na nsob lu xan ya laꞌaw, gor biseata kwezh Julip lu.
JOH 1:49 Weꞌe leꞌa Natanael cha ndab: —Mech, nat uní naꞌ leꞌa go nak Xin Dios, no nak ga Xa Nibeꞌe ten Israel.
JOH 1:50 Leꞌa Jesús cha ndab: —Ta na ndáp naꞌ leꞌa naꞌ uní lu xan ya laꞌaw wa, ¿ta weꞌe ndangea ladna lu leꞌa naꞌ nak Xin Dios zha? Leꞌa lu iniꞌí be ta mas siꞌil ndoꞌ ta uniꞌí lu nat wa.
JOH 1:51 No ndab Jesús ndoꞌ bexa nde sa wa: —Leꞌa naꞌ gáp ndoꞌ bego leꞌa bego iniꞌí leꞌa gibeꞌa yaꞌal, leꞌa be angel ten Dios ikea no ilaꞌ wats naꞌ, Xa Myak Men Ndoꞌ Gizhliyo.
JOH 2:1 Ngol schon wizh leꞌa gezh Caná ten distrit Galilea uchilyaꞌa dub men. Leꞌa Marí xnaꞌa Jesús no nsoꞌ sa wa.
JOH 2:2 No uyoꞌo kombid ndoꞌ Jesús nsea be xmen xa.
JOH 2:3 Ngol gor leꞌa vin ubid, leꞌa xnaꞌa Jesús cha ndab ndoꞌ Jesús: —Leꞌa bexa yá lá ndapta vin.
JOH 2:4 Leꞌa Jesús cha ukaꞌab ndab: —Naa, ¿xtaꞌan ngi li ndab go zha? Leꞌa naꞌ biseata gal wizh ulu naꞌ ton nak naꞌ.
JOH 2:5 Parea leꞌa xnaꞌa Jesús cha ndab ndoꞌ bexa ndun tiꞌin sa wa: —Bin bega lak gab xa ndee.
JOH 2:6 Leꞌa sa wa ndebe dub xoꞌop gets ubiꞌi nakchaꞌaw sbeꞌen geꞌ ta nyoꞌo nits len na. Leꞌa nits nyoꞌo len ta wa ta naꞌa bexa, ndontsa umbiꞌi gak bexa ndoꞌ Dios lak nibeꞌe costumbr ten bexa judio. Leꞌa len kadga dub gets wa nyoꞌo pa dub gayoꞌo litr nits.
JOH 2:7 Leꞌa Jesús cha ndab ndoꞌ bexa ndun tiꞌin wa: —Bchea bega be gets ndee yoo nits‑a. Leꞌa bexa cha mchea be ta wa.
JOH 2:8 Weꞌe leꞌa Jesús cha ndabgal ndoꞌ bexa: —Nat uloꞌo bega dub tuzh‑a, cha biꞌi bega‑yá ndoꞌ xa nchansu gast baꞌ. Cha mbiꞌi bexa‑yá.
JOH 2:9 Leꞌa bexa wa uniꞌí pa utoꞌo‑yá, parea leꞌa xa nchansu gast wa gor na mbin xa preb nits myak vin wa, leꞌa xa lá iniꞌí pa utoꞌo‑yá. Cha utezh xa xabgiꞌi mchilyaꞌa wa,
JOH 2:10 cha ndab xa: —Leꞌa itea ndoꞌ be gast leꞌa be men ned vin wen nsaꞌa. Weꞌe leꞌa gor na yá ngula be men kwaꞌal‑a, weꞌe cha nsaꞌa xa vin mas ndidotsa wen. Parea leꞌa go gast gor nat nsaꞌa vin ndon leꞌa wen.
JOH 2:11 Leꞌa ta na li mbin Jesús gezh Caná ten Galilea wa, leꞌa ta wa uyon ned mbin Jesús. Leꞌa ta wa mluu ta juert nak Jesús, ta weꞌe leꞌa be xmen xa mgeꞌ ladna xa.
JOH 2:12 Tsoꞌo wa cha mlayoꞌo Jesús gezh Capernaum, no xnaꞌa Jesús no be wit xa no be xmen xa. Cha uyoꞌo bexa gezh wa pla wizh.
JOH 2:13 Leꞌa ngol zha yá nsayal gax ujest Pascua, ta ndun bexa judio, leꞌa Jesús no utoꞌo nchaꞌa gezh Jerusalén.
JOH 2:14 Leꞌa ngol sa wa cha uniꞌí Jesús leꞌa tale ten niꞌi ten Dios ndeudoꞌo bexa ngon, no borreg, no palom. No ndebe be men ntil med.
JOH 2:15 Cha usen Jesús dub doꞌo, mbintiꞌin xa‑yá ulantuꞌub xa be borreg no be ngon no bexa na li ndiꞌibudoꞌo bema wats niꞌi ten Dios wa. Cha mtixte xa be mes ten bexa ntil med, mteꞌachso xa be med ten bexa wa.
JOH 2:16 Cha ndab xa ndoꞌ bexa ndiꞌibudoꞌo palom wa: —¡Ulate bega be ta baꞌ sa ndee! ¡Lá gunno bega lid Xus naꞌ cuent dub ndoꞌ xgeꞌe!
JOH 2:17 Leꞌa gor weꞌe leꞌa be xmen Jesús cha mtseꞌa ladna lak nkeaniꞌi diꞌizh ten Dios, ndab‑a: “Uzhebpa ulach naꞌ lid go Dios.”
JOH 2:18 Leꞌa bexa nibeꞌe ten bexa judio cha ndabbe ndoꞌ Jesús: —¿Xtaꞌan ngi lbaꞌa ndun lu? ¿Xtaꞌan dub taꞌa gun lu uluu leꞌa Dios nlad mbin lu ta baꞌ?
JOH 2:19 Leꞌa Jesús cha ukaꞌab ndab: —Blate bega niꞌi ten Dios ndee, leꞌa naꞌ wizh yontsa ixiste‑yá stub biaj.
JOH 2:20 Leꞌa bexa cha ndabbe: —Leꞌa niꞌi ten Dios ndee ngokndeꞌe dub top gaꞌal ncho xoꞌop liꞌin. ¿Ná ndab lu zha chontsa wizh ixistegal lu‑yá?
JOH 2:21 Ná leꞌa Jesús ndab ta wa cuent ten leꞌaka xa.
JOH 2:22 Ta weꞌe leꞌa zha na mas tsoꞌo wa mban Jesús ndoꞌ gealgut, leꞌa be xmen xa cha mtseꞌa ladna ta li ndab xa wa. Cha mas mbingea ladna bexa lak nkeaniꞌi diꞌizh ten Dios cuent ten Jesús, no ta li ndab Jesús cuent ten leꞌaka xa.
JOH 2:23 Leꞌa zha li ncho Jesús Jerusalén ujest Pascua wa, leꞌa kwaꞌad men mbingea ladna Jesús ta na uniꞌí bexa be uyon mbin Jesús.
JOH 2:24 Ná leꞌa Jesús lá ngungea ladna ta wa, leꞌa Jesús nchandoꞌ xteꞌe ndanbeꞌe bexa.
JOH 2:25 No lá nkiꞌin ton gab ndoꞌ Jesús xteꞌe nak be men, leꞌa Jesús nchandoꞌla ladoꞌo be men.
JOH 3:1 Uyoꞌo dub xa fariseo nsaleaꞌ Nicodemo, xa no nak dub xa nsak ten bexa judio.
JOH 3:2 Leꞌa dub gor teꞌal ulayaꞌ xa wats Jesús, cha ndab xa: —Mech, leꞌa besa uniꞌí leꞌa go Dioska mtuꞌub, ndontsa uluu ga be men. Leꞌa naꞌan ton gun gan gun be uyon ndun ga, tal leꞌa Dios naꞌanpa isoꞌ wats xa.
JOH 3:3 Leꞌa Jesús cha ukaꞌab ndab: —Leꞌa naꞌ gáp ndoꞌ lu leꞌa tal ton lá gal stub biaj, leꞌa xa lá yoo gan iniꞌí sa nibeꞌe Dios.
JOH 3:4 Leꞌa Nicodemo cha ndab: —¿Xteꞌe yoo gan gal dub xa goxla stub biaj zha? Lá yoo gan yoꞌo xa len xnaꞌa xa, cha galgal xa stub biaj.
JOH 3:5 Leꞌa Jesús cha ndab: —Leꞌa naꞌ gáp ndoꞌ lu leꞌa tal ton lá gal nsea nits no Espíritu ten Dios, lá yoo gan yate xa sa nibeꞌe Dios.
JOH 3:6 Leꞌa bexa na ndal lak ndal be men, leꞌa xa wa mentsa nak. Ná leꞌa bexa na ndal stub biaj lak nsaꞌa Espíritu ten Dios leꞌa xa wa xa ten Espíritu wa.
JOH 3:7 Lá yanseana lu ta ndáp naꞌ leꞌa be men nsabndoꞌka gal stub biaj.
JOH 3:8 Leꞌa mbi ndaꞌ guniꞌi pa nlad na no ndoꞌón lu nbezh‑a, parea leꞌa lu ni lá iniꞌí pa nsea‑yá no pa nchaꞌa‑yá. No liga nak gealnaban nsaꞌa Espíritu ten Dios ndoꞌ be men.
JOH 3:9 Leꞌa Nicodemo cha ndab: —¿Xteꞌe nak ta ndee zha?
JOH 3:10 Leꞌa Jesús cha ndab: —Lu nak mech ten bexa Israel, ¿ná lá yakbeꞌena lu ta ndee zha?
JOH 3:11 Leꞌa naꞌ gáp leꞌa besa ndadiꞌizh ta nchandoꞌ besa no ta uniꞌí besa. Parea leꞌa bega lá ndangea ladna‑yá.
JOH 3:12 Ná tal leꞌa bega lá ndangea ladna gor ndadiꞌizh naꞌ cuent ten be ta ncho ndoꞌ gizhliyo ndee, ¿xteꞌema gungea ladna bega‑yá gor gudiꞌizh naꞌ cuent ten be ta ncho gibeꞌa baꞌ zha?
JOH 3:13 ’Naꞌan ton gol gaꞌ gibeꞌa, nabtsa naꞌ ulen gibeꞌa leꞌa naꞌ nak Xa Myak Men Ndoꞌ Gizhliyo.
JOH 3:14 No lak uxits Moisés dub uzhib giꞌib geꞌe sa bid wa, no liga ixits be men naꞌ, Xa Myak Men Ndoꞌ Gizhliyo,
JOH 3:15 ndontsa tal ton gungea ladna naꞌ lá gak perdid, ndi gap bexa gealnaban nunk lá idub.
JOH 3:16 ’Leꞌa Dios uzheꞌeb nkweaꞌ ladna be men, ta weꞌe msaꞌa xa dubkama Xin xa, ndontsa tal ton gungea ladna xa lá gak perdid ndoꞌ Dios, ndi gap xa gealnaban nunk lá idub.
JOH 3:17 Leꞌa Dios mtuꞌub Xin na ndoꞌ gizhliyo naꞌanpa nsea utsaksi xa be men, leꞌa xa ndi nsealoꞌo be men ndoꞌ be ke ten bexa.
JOH 3:18 ’Leꞌa bexa na ndangea ladna Xin Dios, leꞌa Dios naꞌanpa gab leꞌa bexa wa ndap ke. Parea leꞌa bexa na lá ndangea ladna xa wa, leꞌa Dios ndabla leꞌa bexa wa ndapka ke, geal leꞌa bexa lá ngungea ladna xa nabkama nak Xin Dios.
JOH 3:19 Leꞌa bexa wa ndap ke ndoꞌ Dios geal leꞌa zha ulen xa nak xeꞌa ten Dios ndoꞌ gizhliyo ndee, leꞌa bexa lá nlad xeꞌa wa, ndi sa ukaw nlad bexa leꞌa bexa sbeꞌen be ta ugap ndun.
JOH 3:20 Leꞌa tal ton gun be ta ugap, leꞌa xa wa nxeeno ladna xeꞌa, no lá ibii xa ndoꞌ xeꞌa, ndontsa lá uluꞌu‑yá be ta ugap ndun xa.
JOH 3:21 Parea tal ton gun lak nak gealngea ten Dios, leꞌa xa wa nbii ndoꞌ xeꞌa, ndontsa uluu xeꞌa wa leꞌa xa ndunka lak nlad Dios.
JOH 3:22 Tsoꞌo wa leꞌa Jesús cha nchaꞌano be xmen na distrit Judea, cha uyoꞌo bexa dub ndeꞌep sa wa, no ngoleaꞌ Jesús be men.
JOH 3:23 Leꞌa Juan noga ngoleaꞌ be men sa nsaleaꞌ Enón gax sa nde gezh Salim, geal leꞌa sa wa kwaꞌal nits ncho. Leꞌa be men nchaꞌbe wats Juan, cha ulaleaꞌ xa bexa wa.
JOH 3:24 Leꞌa ta wa zha biseata ikea Juan litgiꞌib.
JOH 3:25 Weꞌe leꞌa be xmen Juan no stapla bexa judio usaxan ndeyotoꞌo cuent ten xteꞌe nsambiꞌi bexa ndoꞌ Dios.
JOH 3:26 Leꞌa be xmen Juan cha ulayaꞌ wats Juan, cha ndab bexa: —Mech, leꞌa xa na li ulen wats go stub toꞌo yowbeꞌe Jordán, xa na li mbidiꞌizh ga cuent ten na, leꞌa xa wa no ngoleaꞌ be men no itea be men nchaꞌbe wats xa.
JOH 3:27 Leꞌa Juan cha ndab: —Naꞌan xtaꞌan yoo gan gun dub men tal leꞌa Dios naꞌanpa usaꞌa‑yá.
JOH 3:28 Leꞌa bego uniꞌí leꞌa naꞌ ndáp leꞌa naꞌ naꞌanpa leꞌa nak Cristo, leꞌa naꞌ ndee ndi nak xa nedtsa mtuꞌub Dios ndoꞌ xa wa.
JOH 3:29 Leꞌa sa nchilyaꞌa dub men leꞌa xagots nak xa tenka xabgiꞌi nchilyaꞌa wa. Leꞌa amig ten xabgiꞌi nchilyaꞌa wa nsoꞌ wats xa no uzhebpa nten ladna xa gor na ndoꞌón xa ti xabgiꞌi wa. No liga leꞌa naꞌ uzhebpa nten ladna nat ta na ndon naꞌ ta ndun Jesús.
JOH 3:30 Nsabndoꞌka leꞌa xa wa nsayak mas dub xa nsak, ná leꞌa naꞌ ndee ndi nsayak dub xa uxee nsak.
JOH 3:31 ’Leꞌa Jesús xa ulen gibeꞌa, no mas nsak xa ndoꞌ itea be men. Leꞌa bexa ncho ndoꞌ gizhliyo ndee mentsa nak, no ndadiꞌizh bexa ta ncho ndoꞌ gizhliyo. Ta weꞌe leꞌa xa na ulen gibeꞌa wa mas nsak ndoꞌ itea be men.
JOH 3:32 Leꞌa ta uniꞌí xa no ta mbiꞌín xa, ta weꞌe ndadiꞌizh xa, parea leꞌa be men lá ndangea ladna ta wa.
JOH 3:33 Ná leꞌa tal ton ndangea ladna ta ndadiꞌizh Jesús, leꞌa ta wa nluu leꞌa xa ngondoꞌ leꞌa Dios sbeꞌen gealngea ndadiꞌizh.
JOH 3:34 Leꞌa Dios leꞌa mtuꞌub Jesús ndadiꞌizh xa diꞌizh ten Dios, no uzhebpa nsaꞌa Dios Espíritu ten na ndoꞌ xa.
JOH 3:35 Leꞌa Tad Dios nkweaꞌ ladna Xin na, no msaꞌa Dios itea be taꞌa inibeꞌe xa.
JOH 3:36 Leꞌa tal ton gungea ladna Xin Dios, leꞌa xa wa gap gealnaban nunk lá idub. Parea leꞌa tal ton lá nlad gungea ladna Xin Dios, leꞌa xa wa naꞌanpa gap gealnaban wa, leꞌa Dios ndi utsaksi xa.
JOH 4:1 Leꞌa Jesús uniꞌí leꞌa bexa fariseo mbiꞌínbe leꞌa Jesús mas kwaꞌad men ndap, no mas kwaꞌad bexa ngoleaꞌ Jesús ndoꞌ Juan.
JOH 4:2 (Parea leꞌa Jesús naꞌanpa leꞌa igoleaꞌ be men, ndi be xmen xa ulaleaꞌ be men.)
JOH 4:3 Cha utoꞌo Jesús distrit Judea nseaꞌ xa leꞌakagal Galilea.
JOH 4:4 Leꞌa nes nseaꞌ xa wa nsabndoꞌ itid xa distrit Samaria.
JOH 4:5 Weꞌe ulayaꞌ xa toꞌo dub gezh ten Samaria nsaleaꞌ Sicar, gax sa nax yo msaꞌa Jacob xa uyoꞌo polta ndoꞌ xin xa Kosé.
JOH 4:6 Leꞌa sa wa nsob so nsaleaꞌ so ten Jacob. Leꞌa Jesús mzhanna tant dub usea xa, cha uyatsob xa toꞌo so wa pa gor gawizh.
JOH 4:7 Weꞌe cha ulen dub xagots xa Samaria nsealoꞌo nits. Leꞌa Jesús cha ndab ndoꞌ xa wa: —Bsaꞌa nits goꞌo naꞌ.
JOH 4:8 Leꞌa gor weꞌe leꞌa be xmen Jesús nchaꞌbela gezh Sicar nchaꞌisiꞌi bexa ta gaw bexa.
JOH 4:9 Leꞌa xagots Samaria wa cha ukaꞌab ndab ndoꞌ Jesús: —¿Xteꞌe nab ga nits goo ga ndoꞌ naꞌ zha? Leꞌa go xa judio, ná leꞌa naꞌ ndee xagots Samaria. Li ndab xa geal leꞌa bexa judio naꞌanpa wen nak nsea bexa Samaria.
JOH 4:10 Leꞌa Jesús cha ukaꞌab ndab: —Leꞌa lu lá iniꞌí xtaꞌan nsaꞌa Dios ndoꞌ be men, ni lá iniꞌí lu ton nak naꞌ naꞌab naꞌ nits ndoꞌ lu. Tal lu uniꞌí ta wa, leꞌa lu cha inab nits ndoꞌ naꞌ, leꞌa naꞌ cha usa nits nsaꞌa gealnaban.
JOH 4:11 Leꞌa xagots wa cha ndab: —Señor, leꞌa go ni lá ndap xtaꞌan koꞌo ga nits, ná leꞌa len so ndee wat. ¿Pa yaꞌloꞌo ga nits nsaꞌa gealnaban wa zha?
JOH 4:12 Leꞌa Jacob usan gox polta ten beuna msaꞌa so ndee ndoꞌ beuna. Leꞌa so ndee ngu xa nits no be xin xa no be xman xa. ¿Nat ndab go leꞌa go mas nsak ndoꞌ xa wa zha?
JOH 4:13 Leꞌa Jesús ukaꞌab ndab: —Leꞌa tal ton ndo nits ndee gal gor leꞌa xa gakgal ladna stub biaj.
JOH 4:14 Parea leꞌa tal ton goo nits usa naꞌ ndee wa, leꞌa xa wa naꞌantapa gak ladna. Leꞌa nits usa naꞌ wa yak cuent dub sa nsoblen nits, ta nsaꞌa gealnaban nunk lá idub.
JOH 4:15 Leꞌa xagots wa cha ndab: —Señor, bsaꞌa ga nits wa goꞌo naꞌ, ndontsa yá lá gakta lad naꞌ, no ni lá gal lota naꞌ nits sa ndee.
JOH 4:16 Ná leꞌa Jesús cha ndab: —Byaꞌyoꞌo cheꞌal lu.
JOH 4:17 Leꞌa xagots wa ukaꞌab ndab: —Leꞌa naꞌ lá ndap cheꞌal naꞌ. Leꞌa Jesús cha ndab: —Leꞌaka ndab lu lá ndap lu cheꞌal lu.
JOH 4:18 Leꞌa lu ngop dub gaꞌay cheꞌal la, parea leꞌa xa nchono lu nat ndee wa naꞌanpa cheꞌal la. Ta ugeaka ta ndab lu wa.
JOH 4:19 Weꞌe leꞌa xagots wa cha ndab: —Señor, nsak naꞌ leꞌa go dub xa ndadiꞌizh sakndoꞌ Dios.
JOH 4:20 Leꞌa be usan gox ten besa ngwankea Dios geꞌe siꞌil ndee, ná leꞌa bego bexa judio ndi ndab gezh Jerusalén nsabndoꞌ yankea be men Dios.
JOH 4:21 Leꞌa Jesús cha ndab: —Xagots, bingea ladna ta gáp naꞌ leꞌa gal dub wizh yankea bega Dios Xus beuna ni geꞌe ndee no ni Jerusalén wa.
JOH 4:22 Nat leꞌa bego xa Samaria ndankea Dios, parea leꞌa bego lá iniꞌíka xteꞌe nak xa. Leꞌa besa xa judio nchandoꞌka Dios xa na ndankea besa, leꞌa lat bexa judio itoꞌo xa koꞌo be men ndoꞌ be ke ten bexa.
JOH 4:23 No yoo dub wizh, leꞌa ta wa nat, leꞌa be men na ta ugeaka yankea Tad Dios wa yankea bexa xa idub ncho ladna bexa lak nak gealngea ten Dios. Leꞌa Dios nkwaꞌan be men na li yankea bexa xa.
JOH 4:24 Leꞌa Dios nak espíritu, ta weꞌe leꞌa be men nsabndoꞌ yankea Dios idub ncho ladna bexa lak nak gealngea ten Dios.
JOH 4:25 Leꞌa xagots wa cha ndab: —Leꞌa naꞌ uní leꞌa ndoꞌ gizhliyo ilen Mesías, xa noga nsaleaꞌ Cristo. Leꞌa zha ilen xa wa cha gudiꞌizh xa itea be taꞌa ndoꞌ besa.
JOH 4:26 Leꞌa Jesús cha ndab: —Leꞌa ta wa naꞌ, xa nsoꞌyadiꞌizhno lu.
JOH 4:27 Leꞌa gor wa leꞌa be xmen Jesús mlaꞌnchaꞌ wats xa, cha ngwanseana bexa geal leꞌa xa nsoꞌyadiꞌizhno dub xagots. Parea ni dub bexa lá inabdiꞌizh ndoꞌ xa ná xtaꞌan nabdiꞌizh xagots wa, no xtaꞌan ndadiꞌizh Jesús ndoꞌ xa.
JOH 4:28 Weꞌe leꞌa xagots wa cha mlausoꞌ te ten na, cha nseaꞌ xa len gezh wa, ndab xa ndoꞌ be men:
JOH 4:29 —Utseawiꞌi bega dub xa ndab itea be taꞌa mbin naꞌ. ¿Naꞌanpa leꞌa xa wa nak Cristo zha?
JOH 4:30 Weꞌe leꞌa bexa wa cha utoꞌo nchaꞌbe sa nsob Jesús.
JOH 4:31 Ndalen wa leꞌa be xmen Jesús ndab ndoꞌ xa: —Mech, udaw ga.
JOH 4:32 Ná leꞌa Jesús cha ndab: —Leꞌa naꞌ ndapka ta ndaw naꞌ, dub ta lá nchandoꞌ bega.
JOH 4:33 Weꞌe leꞌa bexa wa cha ndabbe ndoꞌ be ltsaꞌa na: —¿Ncho ton men mbiꞌid ulaꞌa ta gaw xa baꞌ zha?
JOH 4:34 Leꞌa Jesús cha ndab: —Leꞌa naꞌ ndun lak nlad Dios xa mtuꞌub naꞌ, no nsandoꞌ naꞌ tiꞌin msaꞌa xa gun naꞌ. Leꞌa be ta wa cuent ta ndaw naꞌ.
JOH 4:35 Ndab bega ndun jwalt sdap mbeꞌe gal zha na ibeleꞌe be taꞌa ndoꞌ yo. Parea leꞌa naꞌ gáp: Bwiꞌi bego nat, leꞌa be men nseabe baꞌ nak cuentta dub taꞌa myazh yá ngugal‑a ibeleꞌe‑yá.
JOH 4:36 Leꞌa bexa nteleꞌe be taꞌa wa nyax ten na. Leꞌa be ta nteleꞌe bexa wa leꞌa ta wa be men gap gealnaban kub, ta nunk lá idub. Weꞌe leꞌa bexa nteleꞌe wa no bexa ndas diꞌizh ten Dios wa junt iten ladnabe.
JOH 4:37 Leꞌa ta ndee nak lak ndab be men, ndab bexa leꞌa dub xa ndas‑a, cha stubga xa nteleꞌe‑yá.
JOH 4:38 Leꞌa naꞌ ntuꞌub bego uteleꞌe bega be men ndoꞌ Dios, bexa gol gudiꞌizh bega ndoꞌ na. Leꞌa be men xaꞌaga ned mbin tiꞌin lat bexa wa, ná nat leꞌa bego usandoꞌ tiꞌin usaxan bexa wa.
JOH 4:39 Leꞌa ta na li mbidiꞌizh xagots wa leꞌa Jesús ndab iteanak be ta mbin xa wa, ta weꞌe leꞌa kwaꞌad bexa Samaria ncho gezh wa mbingea ladna leꞌa Jesús nak Cristo xa mtuꞌub Dios.
JOH 4:40 Weꞌe leꞌa gor ulayaꞌ bexa wats Jesús, cha unab bexa ndoꞌ Jesús weꞌetsa yoo xa gezh wa. Leꞌa Jesús cha uyoꞌo sa wa top wizh.
JOH 4:41 No mas kwaꞌad bexa wa mbingea ladna Jesús, gor na mbiꞌín bexa ta ndadiꞌizh Jesús.
JOH 4:42 Ndab bexa ndoꞌ xagots wa: —Nat ndangea ladna besa Jesús naꞌanpa nabtsa ta ndab lu wa. Leꞌa besa no mbiꞌín ta ndadiꞌizh xa, ta weꞌe uniꞌí besa leꞌa xa baꞌ ta ugeaka leꞌa nak Cristo, xa ngoꞌo be men ndoꞌ be ke ten bexa.
JOH 4:43 Leꞌa zha na ngok stop wizh wa leꞌa Jesús cha utoꞌo sa wa nseaꞌ xa Galilea.
JOH 4:44 Leꞌa Jesús leꞌaka ndab leꞌa guniꞌi ton dub profet leꞌa bexa lazh xa wa lá ndap mod ndoꞌ xa.
JOH 4:45 Leꞌa Galilea ncho bexa ngwaꞌbela ujest Pascua gezh Jerusalén, sa uniꞌí bexa itea be ta mbin Jesús sa wa. Ta weꞌe leꞌa gor mlaꞌnchaꞌ Jesús distrit Galilea, leꞌa bexa wa utsin ngok ndoꞌ xa.
JOH 4:46 Cha nchaꞌagal Jesús gezh Caná ten Galilea, sa myunno xa nits vin. Leꞌa gezh Capernaum ncho dub xa nsak ten xa nibeꞌe sa wa. Leꞌa xin xa wa kweaꞌ nsak.
JOH 4:47 Leꞌa gor na mbiꞌín xa nsak wa leꞌa Jesús utoꞌo Judea mlaꞌnchaꞌgal xa Galilea, cha ulen xa wats Jesús, ndab xa yaꞌ Jesús yunyakna Jesús xin xa, leꞌa xin xa yamer gat.
JOH 4:48 Leꞌa Jesús cha ukaꞌab ndab: —Tal leꞌa bega lá iniꞌí be uyon ndun naꞌ, leꞌa bega naꞌanpa gungea ladna naꞌ.
JOH 4:49 Ná leꞌa xa nsak wa cha ndab: —Señor, uxax nchaꞌ una ndontsa naꞌanpa gat xiꞌín naꞌ.
JOH 4:50 Weꞌe leꞌa Jesús cha ndab: —Nat byaꞌ ta lid lu leꞌa xin lu myaklana. Leꞌa xa nsak wa cha mbingea ladna ta ndab Jesús, cha nseaꞌ xa ta lid xa.
JOH 4:51 Leꞌa gor mtanseaꞌ xa ta lid xa, leꞌa bexa ndun tiꞌin ten xa utoꞌolabe, ndab ndoꞌ xa leꞌa xin xa myaklana.
JOH 4:52 Leꞌa xa cha unabdiꞌizh ndoꞌ bexa ná xá gor usaxan nseayoꞌo wen ladna meꞌed wa. Leꞌa bexa cha ndab: —Naꞌag, gor nkea udub gor uzhe mtoꞌo xlea meꞌed.
JOH 4:53 Leꞌa xus meꞌed wa cha mtseꞌa ladna pa gor weꞌeka ndab Jesús leꞌa xin xa myaklana. Ta weꞌe cha mbingea ladna xa Jesús no iteata bexa ta lid xa.
JOH 4:54 Leꞌa ta wa biaj itop utoꞌo Jesús Judea nseaꞌ xa Galilea, cha mbin xa dub uyon sa wa.
JOH 5:1 Tsoꞌo wa nchogal stub ujest ten bexa judio, ta weꞌe leꞌa Jesús cha mkeagal Jerusalén.
JOH 5:2 Leꞌa sa nyote dub nes len gezh wa, leꞌa sa wa nsaleaꞌ Puert Ten Be Borreg. Leꞌa gax sa wa nde dub tank nits siꞌil, sa nsaleaꞌ Betesda diꞌizh hebreo. No ndebe dub gaꞌay ramad sa wa.
JOH 5:3 No ndebe kwaꞌad bexa gizh sa wa: bexa lá naꞌ, no bexa coj, no bexa lá yoo gan isoꞌ. Ndenkeaꞌ bexa zha na iwiꞌin nits wa,
JOH 5:4 geal leꞌa ncho gor ndaꞌukwiꞌin dub angel ten Dios nits wa. Leꞌa xa na ndon ned ilaꞌyoꞌo len nits wa gor na nwiꞌin‑a, leꞌa xa wa cha nyakna guniꞌi xá gealgizh ná nsén xa.
JOH 5:5 Leꞌa sa wa nax dub xabgiꞌi. Leꞌa xa wa gizh dub galntiꞌi bchonla liꞌin.
JOH 5:6 Leꞌa gor na uniꞌí Jesús nax xa sa wa, weꞌe mgenna Jesús leꞌa xa uzhebpa kwenla li gizh, cha unabdiꞌizh Jesús ndoꞌ xa ndab xa: —¿Nlad lu yakna lu zha?
JOH 5:7 Leꞌa xa gizh wa cha ukaꞌab ndab: —Señor, nladka naꞌ, parea leꞌa naꞌ lá ndap ton ulaꞌko naꞌ len nits baꞌ gor nwiꞌin‑a. Leꞌa gor nlad naꞌ ilaꞌyoꞌo naꞌ, leꞌa ncho xa nedla nlaꞌyoꞌo ndoꞌ naꞌ.
JOH 5:8 Leꞌa Jesús cha ndab: —¡Goste! Udob da ten lu baꞌ, cha usea.
JOH 5:9 Zha leꞌa xabgiꞌi wa cha myakna. Cha udob xa da ten xa, cha usaxan nsea xa. Ná leꞌa ta wa wizh neꞌe bexa judio.
JOH 5:10 Ta weꞌe leꞌa bexa nibeꞌe ten bexa judio cha ndab ndoꞌ xa na li myakna wa: —Leꞌa nat wizh neꞌe beuna, ta weꞌe leꞌa lu lá nsabndoꞌ yoꞌo da ten lu baꞌ.
JOH 5:11 Leꞌa xa wa cha ukaꞌab ndab: —Leꞌa xa na myunyakna naꞌ leꞌaka ndab ndoꞌ naꞌ koꞌob naꞌ da ten naꞌ, cha isea naꞌ.
JOH 5:12 Leꞌa bexa wa cha unabdiꞌizh ndab bexa: —¿Ton xa ndab ndoꞌ lu kob lu da ten lu baꞌ, cha isea lu zha?
JOH 5:13 Ná leꞌa xa na li myakna wa ni lá iniꞌí ton xa wa, geal leꞌa Jesús cha mkaꞌan lat be men nde sa wa.
JOH 5:14 Tsoꞌo wa leꞌa Jesús cha mzheal xa wa tale ten niꞌi ten Dios, cha ndab Jesús ndoꞌ xa: —Unaꞌ, nat leꞌa lu yá myakna, yá lá gunta lu be ta ugap, ndontsa naꞌanpa yasea lu stub ta mas kweaꞌ.
JOH 5:15 Leꞌa xabgiꞌi wa cha utoꞌo ngwaꞌyab ndoꞌ bexa nibeꞌe ten bexa judio, leꞌa xa na li myunyakna xa wa leꞌa ta wa Jesús.
JOH 5:16 Weꞌe leꞌa bexa wa cha ngokloo ndoꞌ Jesús, nlad bexa gut bexa Jesús, geal li mbin Jesús wizh neꞌe bexa.
JOH 5:17 Parea leꞌa Jesús cha ndab ndoꞌ bexa wa: —Leꞌa Dios Xus naꞌ itea wizh ndun tiꞌin ndakno be men. Leꞌa naꞌ no nsabndoꞌ li gun.
JOH 5:18 Leꞌa bexa wa nsak leꞌa ta li mbin Jesús wa dub ta lá nsabndoꞌ gun be men wizh neꞌe bexa. No ndab Jesús leꞌa Dios nak Xus xa, leꞌa ta wa gab leꞌa xa dubtsa nak no Dios. Ta weꞌe mas nlad bexa gut bexa Jesús.
JOH 5:19 Leꞌa Jesús cha ndab ndoꞌ bexa: —Leꞌa naꞌ gáp ndoꞌ bego leꞌa naꞌ xa nak Xin Dios lá yoo gan gun ni dub taꞌa leꞌatsa naꞌ nlad. Leꞌa naꞌ ndi naꞌ xteꞌe ndun Dios Xus naꞌ cha litsa ndun naꞌ. Leꞌa itea ta ndun Xus naꞌ, leꞌa naꞌ nokaga li ndun.
JOH 5:20 Leꞌa Dios Xus naꞌ nkweaꞌ ladna naꞌ, no nluu xa itea be ta ndun xa ndoꞌ naꞌ. No ncho be taꞌa mas siꞌil tiꞌi uluu xa ndoꞌ naꞌ, be ta yanseana bega.
JOH 5:21 Leꞌa lak nxiste Dios be men ngutla cha nsaꞌa xa gealnaban ndoꞌ bexa, no liga leꞌa naꞌ xa nak Xin Dios usaꞌa gealnaban ndoꞌ bexa nlad naꞌ.
JOH 5:22 Leꞌa Xus naꞌ naꞌanpa leꞌa gab ná ton ndap ke, leꞌa xa ndi msaꞌa ta wa gun naꞌ.
JOH 5:23 Leꞌa xa li mbin ndontsa itea be men yankea naꞌ lak ndankea be men Dios Xus naꞌ. Leꞌa tal ton lá ndankea naꞌ xa nak Xin Dios, leꞌa xa wa noga lá ndankea Dios Xus naꞌ, xa mtuꞌub naꞌ ndoꞌ gizhliyo.
JOH 5:24 ’Leꞌa naꞌ gáp ndoꞌ bego, leꞌa tal ton isakyoꞌón ta ndáp naꞌ, no igeꞌ ladna xa Dios xa mtuꞌub naꞌ, leꞌa xa wa ndapla gealnaban nunk lá idub. Naꞌanpa utsaksi Dios xa, leꞌa xa ngok cuent dub xa ngutla, ná nat leꞌa xa ndap gealnaban ndoꞌ Dios.
JOH 5:25 Leꞌa naꞌ gáp ndoꞌ bego leꞌa yoo dub gor leꞌa ta wa nat, leꞌa bexa na lá ndap gealnaban ndoꞌ Dios goꞌón ta gáp naꞌ, cha gap bexa gealnaban.
JOH 5:26 Leꞌa lak nsaꞌa Xus naꞌ gealnaban ndoꞌ be men, no liga msaꞌa xa juers ndoꞌ naꞌ, ndontsa no naꞌ usa gealnaban ndoꞌ be men.
JOH 5:27 No msaꞌa xa diꞌizh gáp naꞌ ná ton ndap ke, geal leꞌa naꞌ nak Xa Myak Men Ndoꞌ Gizhliyo.
JOH 5:28 Lá yanseana bega ta ndáp naꞌ wa, leꞌa gal gor leꞌa itea bexa ngut goꞌón ti naꞌ,
JOH 5:29 cha itoꞌo bexa len baꞌa. Leꞌa bexa na mbin be ta wen nak ndoꞌ Dios, leꞌa bexa wa yaste gap bexa gealnaban. Ná leꞌa bexa na mbin be ta ugap, leꞌa bexa wa yaste cha utsaksi Dios bexa.
JOH 5:30 ’Leꞌa naꞌ lá yoo gan gun ni dub taꞌa leꞌatsa naꞌ nlad. Leꞌa zha na gáp naꞌ ná ton ndap ke, leꞌa ta wa gun naꞌ lakka ndab Xus naꞌ. Ta weꞌe leꞌa ta gáp naꞌ wa leꞌaka nak, geal leꞌa naꞌ lá ndun laktsa nlad naꞌ, ndi ndun naꞌ lak nlad Xus naꞌ, xa mtuꞌub naꞌ.
JOH 5:31 Tal leꞌa naꞌ gudiꞌizh cuent tentsa naꞌ, leꞌa ta gudiꞌizh naꞌ wa naꞌanpa nsak.
JOH 5:32 Parea leꞌa Xus naꞌ ndab ton nak naꞌ, no uní naꞌ leꞌa ta ndab xa wa ta nsakka.
JOH 5:33 Leꞌa bego mtuꞌub pla be men ndoꞌ Juan xa uloleaꞌ be men. Leꞌa Juan cha ta ugeaka ndab ná ton nak naꞌ.
JOH 5:34 Ná leꞌa naꞌ ni lá nkiꞌin men gab ton nak naꞌ. Nseꞌat naꞌ Juan wa ndontsa gungea ladna bega ta ndab xa, cha koꞌo Dios bega ndoꞌ be ke ten bega.
JOH 5:35 Leꞌa Juan wa nak cuent dub xeꞌa aceit nsayolꞌ nsu‑yá xeꞌa ndoꞌ bego. Dub ndeꞌeptsa mten ladna bega mbiꞌín bega ta mbidiꞌizh xa wa.
JOH 5:36 ’Parea ncho stub taꞌa nluu ton nak naꞌ, dub ta mas nsak ndoꞌ ta ndab Juan. Leꞌa ta wa tiꞌin msaꞌa Dios gun naꞌ. Leꞌa be ta ndun naꞌ wa nluu ton nak naꞌ, no nluu‑yá leꞌa Dios Xus naꞌ leꞌaka mtuꞌub naꞌ.
JOH 5:37 No Xus naꞌ xa mtuꞌub naꞌ ndab ton nak naꞌ, parea leꞌa bega nunk gol goꞌón ti xa, no ni gol niꞌíndoꞌ bega xa.
JOH 5:38 No ni naꞌanpa ndangea ladna bega diꞌizh ten Xus naꞌ, geal leꞌa bega lá ndangea ladna naꞌ, xa mtuꞌub xa.
JOH 5:39 Leꞌa bego uzhebpa ntsid ta nkeaniꞌi diꞌizh ten Dios, ndanbeꞌe bega leꞌa ta weꞌe gap bega gealnaban nunk lá idub. Leꞌa leꞌaka diꞌizh ten Dios wa nkeaniꞌi cuent ten naꞌ,
JOH 5:40 parea leꞌa bega lá kaꞌab ibii wats naꞌ ndontsa gap bega gealnaban wa.
JOH 5:41 ’Leꞌa naꞌ lá nkwaꞌan ta gab be men leꞌa naꞌ xa wen.
JOH 5:42 No uní naꞌ xteꞌe nak bega, leꞌa bega naꞌanpa ta ugea ndankea Dios.
JOH 5:43 Leꞌa Xus naꞌ leꞌa mtuꞌub naꞌ ndal naꞌ, ná leꞌa bego naꞌanpa nsakyoꞌón ta ndáp naꞌ. Parea tal ilen stubga xa naꞌanpa Dios utuꞌub, leꞌa bega isakyoꞌón ta gab xa wa.
JOH 5:44 ¿Xteꞌe gungea ladna bega naꞌ, tal leꞌa bega nkwaꞌan ta gab be men leꞌa bega xa wen, ná bega ni lá nkwaꞌan ta gab Dios leꞌa bega xa wen?
JOH 5:45 Lá gunbeꞌe bega leꞌa naꞌ leꞌa usake bega ndoꞌ Xus naꞌ. Leꞌa bega ngeꞌ ladna ta mkeꞌa Moisés, parea leꞌa ta wa leꞌa nluu leꞌa bega ndap ke.
JOH 5:46 Tal leꞌa bega ta ugeaka ndangea ladna ta mkeꞌa Moisés, leꞌa bega no naꞌ gungea ladna, geal leꞌa Moisés mkeꞌa cuent ten naꞌ.
JOH 5:47 Ná tal leꞌa bega lá ndangea ladna ta mkeꞌa Moisés wa, ¿xteꞌema gungea ladna bega ta ndadiꞌizh naꞌ ndee zha?
JOH 6:1 Ngol tsoꞌo wa leꞌa Jesús nsea be xmen na ukea ndoꞌ dub barco, cha utakea bexa stub toꞌo lagun Galilea, no nsaleaꞌ sa wa Tiberias
JOH 6:2 Leꞌa kwaꞌad be men usankea tsoꞌo Jesús, geal leꞌa bexa uniꞌí be uyon mbin Jesús myunyakna xa be men gizh.
JOH 6:3 Weꞌe leꞌa Jesús cha ukea dub bet, cha usob xa no be xmen xa.
JOH 6:4 Leꞌa zha wa nsayal gax ujest Pascua, dub ujest ten bexa judio.
JOH 6:5 Leꞌa Jesús cha uniꞌí leꞌa be men kwaꞌad no nseabe wats xa. Cha ndab Jesús ndoꞌ Julip: —¿Pa isiꞌi beuna ta gaw itea be men baꞌ zha?
JOH 6:6 Leꞌa Jesús li ndab ndontsa iniꞌí xa ná xteꞌe gab Julip, leꞌa Jesús uniꞌíla xtaꞌan gun Jesús.
JOH 6:7 Leꞌa Julip cha ndab: —Top gayoꞌo med denario lá gal isiꞌi beuna dub tuzhga pan gaw bexa kwaꞌad baꞌ.
JOH 6:8 Leꞌa stub xmen Jesús, xa nsaleaꞌ Ndres wit Simón Pedr, cha ndab ndoꞌ Jesús:
JOH 6:9 —Leꞌa sa ndee nsoꞌ dub meꞌed bgiꞌi nsoꞌno gaꞌay pan cebad no top mbeal. Parea ¿xtiꞌin dub litsa taꞌa wa ndoꞌ dub lbaꞌata men kwaꞌad baꞌ zha?
JOH 6:10 Weꞌe leꞌa Jesús cha ndab ndoꞌ be xmen na: —Gud bego ndoꞌ be men baꞌ isob bexa. Leꞌa sa wa nchopa gixgi, cha ute be men ndoꞌ‑yá. Leꞌa lat itea bexa wa ncho pa gaꞌay mil xabgiꞌi.
JOH 6:11 Leꞌa Jesús cha usen be pan wa, cha msaꞌa xa xno ndoꞌ Dios. Cha msaꞌa xa‑yá ndoꞌ be xmen xa utseꞌa bexa‑yá ndoꞌ be men ndebe sa wa. No liga mbinno xa be mbeal wa. Leꞌa be men cha udaw‑a gast plo nlad bexa.
JOH 6:12 Leꞌa gor na yá mzhea bexa, cha ndab Jesús ndoꞌ be xmen na: —Bteleꞌe bega be ná myaꞌan sobr baꞌ, ndontsa naꞌanpa gazhaꞌa‑yá.
JOH 6:13 Leꞌa bexa wa cha mteleꞌe dub tibtop zhum byux be ná myaꞌan sobr ndoꞌ gaꞌay pan cebad wa.
JOH 6:14 Leꞌa gor na uniꞌí be men uyon li mbin Jesús wa, leꞌa bexa cha ndabbe: —Leꞌa xa ndee ta ugeaka leꞌa nak profet na li ndiꞌizh ga giꞌidka ndoꞌ gizhliyo.
JOH 6:15 Leꞌa Jesús cha mgenna leꞌa be men wa nlad goꞌo Jesús, gunno bexa Jesús dub rey. Ta weꞌe cha mkaꞌan Jesús sa wa, cha nabtsa xa ukeagal bet wa.
JOH 6:16 Leꞌa ngol gor uzhe leꞌa be xmen Jesús cha mlayoꞌo toꞌo nits wa.
JOH 6:17 Cha ukea bexa ndoꞌ barco, cha nchaꞌbe bexa lad gezh Capernaum. Leꞌa ta wa teꞌal‑la, ná leꞌa Jesús bi naꞌan ilaꞌnchaꞌ wats bexa.
JOH 6:18 Leꞌa mbi cha usaxan uzhebpa ulen ndoꞌ nits wa, cha uzhebpa nwiꞌinla nits wa.
JOH 6:19 Leꞌa gor na yá nchabeseala bexa pa dub gaꞌay natal xoꞌop kilómetro ndoꞌ nits wa, weꞌe uniꞌí bexa Jesús nsea gax wats barco, nchaꞌseandats xa ndoꞌ nits. Cha mzheb bexa.
JOH 6:20 Parea leꞌa Jesús cha ndab ndoꞌ bexa: —¡Lá izheb bego! ¡Leꞌa ta ndee naꞌ!
JOH 6:21 Cha mten ladna bexa ukea Jesús ndoꞌ barco. Zha leꞌa barco wa cha ulayaꞌ ndoꞌ yo toꞌo nits, sa na ndiꞌizh nchaꞌbeka bexa.
JOH 6:22 Leꞌa ngol stubtsa wizh leꞌa be men ndebe toꞌo nits sa utoꞌo be xmen Jesús wa mtseꞌa ladna leꞌa be xmen Jesús ukea ndoꞌ stubkama barco nde sa wa, ná leꞌa Jesús naꞌanpa no nchaꞌano bexa.
JOH 6:23 Weꞌe leꞌa stapla barco utoꞌo gezh Tiberias cha mlanseaꞌ sa ndebe be men wa. Leꞌa sa wa gax sa na msaꞌa Jesús xno ndoꞌ Dios cuent ten pan na li udaw bexa wa.
JOH 6:24 Leꞌa gor na uniꞌí be men leꞌa Jesús no be xmen xa naꞌanpa nde sa wa, weꞌe cha ukea bexa ndoꞌ be barco wa, nchaꞌkwaꞌan bexa Jesús gezh Capernaum.
JOH 6:25 Leꞌa gor na mzheal bexa Jesús sa wa cha ndab bexa ndoꞌ Jesús: —Mech, ¿xá gor ulansea ga sa ndee zha?
JOH 6:26 Leꞌa Jesús cha ndab ndoꞌ bexa: —Leꞌa naꞌ gáp leꞌa bego nseabekwaꞌan naꞌ ta na mzheatsa bega udaw bega pan wa, naꞌanpa ta na nyakbeꞌena bega be uyon ndun naꞌ wa.
JOH 6:27 Lá ukwaꞌan bega ta gaw bega be ta nitndoꞌ. Ndi bkwaꞌan bega ta naꞌanpa initndoꞌ, ta usaꞌa gealnaban nunk lá idub. Leꞌa naꞌ, Xa Myak Men Ndoꞌ Gizhliyo, usa ta wa ndoꞌ bega, lak msaꞌa Tad Dios gun naꞌ.
JOH 6:28 Weꞌe leꞌa bexa cha unabdiꞌizh ndoꞌ Jesús, ndab bexa: —¿Xtaꞌan ta nlad Dios gun besa zha?
JOH 6:29 Leꞌa Jesús cha ukaꞌab ndab: —Leꞌa ta ndee ta nlad Dios: gungea ladna bega naꞌ, xa mtuꞌub Dios.
JOH 6:30 Weꞌe cha ndabgal bexa ndoꞌ Jesús: —Tal leꞌa go nlad gungea ladna besa ga, ¿xtaꞌan dub ta gun ga nat ndontsa gungea ladna besa ga?
JOH 6:31 Leꞌa be usan gox polta ten beuna udaw maná utoꞌo gibeꞌa geꞌe sa bid wa, lak nkeaniꞌi diꞌizh ten Dios, ndab‑a: “Leꞌa Moisés msaꞌa pan utoꞌo gibeꞌa udaw bexa.”
JOH 6:32 Leꞌa Jesús cha ndab: —Leꞌa naꞌ gáp ndoꞌ bego leꞌa Moisés naꞌanpa leꞌa usaꞌa pan utoꞌo gibeꞌa wa. Leꞌa Xus naꞌ leꞌa nsaꞌa ta na ta ugeaka leꞌa nak pan ntoꞌo gibeꞌa.
JOH 6:33 Leꞌa pan na nsaꞌa Dios wa, leꞌa ta wa ta utoꞌo gibeꞌa, ta nsaꞌa gealnaban ndoꞌ be men nde ndoꞌ gizhliyo.
JOH 6:34 Leꞌa bexa cha ndab: —Señor, sbeꞌen pan weꞌe bsaꞌa go gaw besa.
JOH 6:35 Leꞌa Jesús cha ndab: —Leꞌa naꞌ nak pan nsaꞌa gealnaban. Leꞌa tal ton giꞌid wats naꞌ leꞌa xa wa naꞌantapa ganna. No tal ton gungea ladna naꞌ, leꞌa xa wa naꞌantapa gak ladna.
JOH 6:36 Parea lak ndápka naꞌ ndoꞌ bega, leꞌa bega uniꞌíka be ta ndun naꞌ, ná lá ndangea ladna bega naꞌ.
JOH 6:37 Leꞌa itea bexa na nsaꞌa Xus naꞌ ndoꞌ naꞌ, bexa weꞌe ndiꞌid wats naꞌ no nunk naꞌ lá uxelad bexa.
JOH 6:38 Leꞌa naꞌ ndee utoꞌo gibeꞌa, naꞌanpa ndal naꞌ gun naꞌ be ta nladtsa naꞌ. Leꞌa naꞌ ndi ndal ndontsa gun naꞌ be ta nlad Dios xa mtuꞌub naꞌ.
JOH 6:39 Leꞌa Xus naꞌ xa mtuꞌub naꞌ wa lá nlad gak perdid ni dub bexa nsaꞌa xa ndoꞌ naꞌ. Leꞌa xa ndi nlad ixiste naꞌ itea bexa wa ndoꞌ gealgut gal wizh lult.
JOH 6:40 Leꞌa Dios nlad leꞌa itea bexa na ngondoꞌ leꞌa naꞌ nak Xin Dios no ndangea ladna bexa naꞌ, leꞌa bexa wa cha gap gealnaban nunk lá idub. No ixiste naꞌ bexa wa ndoꞌ gealgut gal wizh lult.
JOH 6:41 Weꞌe leꞌa ncho bexa judio cha usaxan nisi Jesús geal ndab Jesús leꞌa Jesús leꞌa nak pan utoꞌo gibeꞌa.
JOH 6:42 Ndab bexa ndoꞌ ltsaꞌa bexa: —¿Naꞌanpa xa baꞌ Jesús xin Kosé wa zha? Leꞌa beuna nchandoꞌ xus xa no xnaꞌa xa. ¿Ná xteꞌema gab xa zha leꞌa xa xa ulen gibeꞌa?
JOH 6:43 Leꞌa Jesús cha ndab ndoꞌ bexa: —Blaꞌa bega ta lbaꞌa nisi bega naꞌ.
JOH 6:44 Naꞌan ton yoo gan giꞌid wats naꞌ, tal leꞌa Xus naꞌ xa mtuꞌub naꞌ lid leꞌa goꞌo xa wats naꞌ. Leꞌa naꞌ ixiste bexa wa ndoꞌ gealgut gal wizh lult.
JOH 6:45 Lak mkeꞌa bexa mbidiꞌizh sakndoꞌ Dios: “Leꞌa Dios uluu itea be men.” Ta weꞌe leꞌa tal ton goꞌón ta ndab Xus naꞌ, cha gun xa ta wa, leꞌa xa wa giꞌid wats naꞌ.
JOH 6:46 ’Parea naꞌan ton gol niꞌí Dios Xus naꞌ. Leꞌa dubtsa xa uniꞌíla xa, leꞌa ta wa naꞌ xa utoꞌoka wats Dios.
JOH 6:47 Leꞌa naꞌ gáp ndoꞌ bego leꞌa tal ton gungea ladna naꞌ, leꞌa xa wa gap gealnaban ta nunk lá idub.
JOH 6:48 Leꞌa naꞌ leꞌa nak pan nsaꞌa gealnaban.
JOH 6:49 Leꞌa zha uyoꞌo be usan gox polta ten bega geꞌe sa bid, leꞌa bexa udaw maná, parea tsoꞌo wa leꞌa bexa wa ngutkabe.
JOH 6:50 Ná leꞌa pan nlenka gibeꞌa, leꞌa tal ton gaw pan wa leꞌa xa wa lá gat.
JOH 6:51 Leꞌa naꞌ ndee leꞌa nak pan nban ulen gibeꞌa. Leꞌa tal ton gaw pan ndee, leꞌa xa wa gap gealnaban nunk lá idub. Leꞌa pan usa naꞌ wa beꞌal las naꞌ, ta usa naꞌ ndontsa gap be men gealnaban ndoꞌ Dios.
JOH 6:52 Leꞌa bexa judio wa cha ndakloo, ndab bexa ndoꞌ be ltsaꞌa xa: —¿Xteꞌe ndab xa usaꞌa xa beꞌal las xa gaw beuna zhaga?
JOH 6:53 Leꞌa Jesús cha ndab: —Leꞌa naꞌ gáp ndoꞌ bega leꞌa tal leꞌa bega lá gaw beꞌal las naꞌ, Xa Myak Men Ndoꞌ Gizhliyo, no lá goo bega ten ten naꞌ, leꞌa bega lá gap gealnaban ndoꞌ Dios.
JOH 6:54 Leꞌa tal ton gaw beꞌal las naꞌ no goo xa ten ten naꞌ, leꞌa xa wa ndapla gealnaban ta nunk lá idub. No ixiste naꞌ xa wa ndoꞌ gealgut gal wizh lult.
JOH 6:55 Leꞌa beꞌal las naꞌ nak ta nsabndoꞌ gaw men, no ten ten naꞌ nak ta nsabndoꞌ goo men.
JOH 6:56 Leꞌa tal ton gaw beꞌal las naꞌ no goo xa ten ten naꞌ, leꞌa xa wa dubtsa nak no naꞌ idub tiemp.
JOH 6:57 Leꞌa Xus naꞌ xa nban leꞌa mtuꞌub naꞌ, no nban naꞌ juers ten xa. No liga leꞌa tal ton gaw beꞌal las naꞌ, leꞌa xa wa ibanga juers ten naꞌ.
JOH 6:58 Leꞌa pan utoꞌoka gibeꞌa naꞌanpa ltsaꞌa maná udaw be usan gox polta ten bega, leꞌa bexa ngutkabe. Parea leꞌa tal ton gaw pan ndee nban idub tiemp.
JOH 6:59 Leꞌa be ta ndee mbidiꞌizh Jesús len niꞌi sa nzhealbe bexa judio gezh Capernaum.
JOH 6:60 Leꞌa bexa na ndangea ladna Jesús wa gor na mbiꞌín bexa ta li ndab Jesús, leꞌa kwaꞌad bexa cha ndab ndoꞌ be ltsaꞌa na: —Uzhebpa dub ta ugan ndadiꞌizh xa baꞌ. ¿Tonma gun gan isakyoꞌón‑a?
JOH 6:61 Leꞌa Jesús mgenna leꞌa bexa wa nisi ta ndab xa, cha ndab Jesús ndoꞌ bexa: —¿Lá nsak ladna bega ta ndáp naꞌ wa zha?
JOH 6:62 ¿Xteꞌema gunbeꞌe bega tal leꞌa bega iniꞌí leꞌa naꞌ, Xa Myak Men Ndoꞌ Gizhliyo, ikea gaꞌap, nsea naꞌ leꞌaka sa utoꞌo naꞌ?
JOH 6:63 Leꞌa Espíritu leꞌa nsaꞌa gealnaban kub, leꞌa leꞌatsa be men lá gun gan gap gealnaban wa. Leꞌa diꞌizh ndáp naꞌ wa diꞌizh ten Espíritu ten Dios xa nsaꞌa gealnaban ndoꞌ be men.
JOH 6:64 Parea leꞌa ncho bego bi lá ndangea ladna ta wa. Li ndab Jesús geal leꞌa xa zha nedkata uniꞌí ton bexa na naꞌanpa gungea ladna xa, no ton xa na yun cuent xa.
JOH 6:65 Cha no ndab Jesús: —Ta weꞌe lakka ndáp naꞌ ndoꞌ bego, leꞌa naꞌan ton yoo gan giꞌid wats naꞌ, tal leꞌa Xus naꞌ lid ned usaꞌa gun xa ta wa.
JOH 6:66 Tsoꞌo wa leꞌa kwaꞌad bexa na ndangea ladna Jesús cha mlaꞌa xa, lá ikeseanota bexa xa.
JOH 6:67 Leꞌa Jesús cha unabdiꞌizh ndoꞌ isatibtop be xmen na, ndab xa: —¿No bego nlad ulaꞌa naꞌ zha?
JOH 6:68 Leꞌa Simón Pedr cha ukaꞌab ndab: —Señor, ¿tonta ndoꞌ ná yaꞌbe besa zha? Leꞌa go nabtsa ndadiꞌizh diꞌizh nsaꞌa gealnaban nunk lá idub.
JOH 6:69 Leꞌa besa ndangeaka ladna go no uniꞌí besa leꞌa go nak Cristo, Xinka Dios nban.
JOH 6:70 Leꞌa Jesús cha ndab: —Leꞌa naꞌ leꞌa mti isatibtop bega, parea leꞌa dub bega xmen maxuꞌu.
JOH 6:71 Leꞌa Jesús li ndab cuent ten Judas Iscariot, xin dub xa nsaleaꞌ Simón. Leꞌa Judas no dub isatibtop xmen Jesús, parea tsoꞌo wa leꞌa xa leꞌa yun cuent Jesús.
JOH 7:1 Ngol tsoꞌo wa leꞌa Jesús cha nkesea idub Galilea. Leꞌa xa lá nlad yaꞌ Judea, geal leꞌa sa wa leꞌa bexa nibeꞌe ten bexa judio nlad gut xa.
JOH 7:2 Ná leꞌa zha wa nsayal gax dub ujest ten bexa judio, zha nyoꞌo bexa sbeꞌen len ramad dub sman.
JOH 7:3 Ta weꞌe leꞌa be wit Jesús cha ndab ndoꞌ xa: —Ikaꞌan beuna sa ndee, waꞌbe beuna Judea, ndontsa no bexa na ndangea ladna lu sa wa iniꞌí be uyon ndun lu.
JOH 7:4 Leꞌa tal ton nlad igondoꞌ be men xa, leꞌa xa wa naꞌanpa xgaꞌach ndun be taꞌa. Ta weꞌe tal gun lu be uyon, bin be ta wa sa iniꞌí itea be men‑a.
JOH 7:5 Li ndab bexa wa geal leꞌa bexa ni lá ndangea ladna leꞌa Jesús nak Cristo.
JOH 7:6 Leꞌa Jesús cha ndab ndoꞌ bexa: —Leꞌa zha nsabndoꞌ gaa naꞌ Judea biseata gal, parea leꞌa bega sak yaꞌbe guniꞌi pol.
JOH 7:7 Leꞌa be men gizhliyo naꞌanpa ndap xtaꞌan ixeeno ladna bega. Parea leꞌa ndoꞌ naꞌ ndee leꞌa bexa nxee ladna, geal leꞌa naꞌ ndadiꞌizh leꞌa be ta ndun bexa ta ugap.
JOH 7:8 Waꞌbe bega ujest Jerusalén. Leꞌa naꞌ naꞌanpa gaa nat, leꞌa wizh na gaa naꞌ biseata gal.
JOH 7:9 Tsoꞌo na li ndab Jesús ndoꞌ bexa wa, cha myaꞌan xa Galilea.
JOH 7:10 Ná leꞌa tsoꞌo na li nchaꞌbe be wit Jesús ujest wa, weꞌe cha no Jesús utoꞌo nchaꞌa sa wa. Parea leꞌa Jesús naꞌanpa ndoꞌ gaꞌal be men nchaꞌa, leꞌa xa ndi nchaꞌa dub mod lá igondoꞌ be men xa.
JOH 7:11 Leꞌa ndoꞌ ujest wa leꞌa bexa nibeꞌe ten bexa judio nkwaꞌan Jesús, nabdiꞌizh bexa ndoꞌ be men ndab bexa: —¿Ma xabgiꞌi weꞌe zha?
JOH 7:12 Leꞌa be men kwaꞌad wa xgaꞌach ndadiꞌizh cuent ten Jesús. Leꞌa ncho bexa ndab leꞌa Jesús dub xa wenka; ná nchoga bexa ndab leꞌa xa nkwiꞌinno be men.
JOH 7:13 Parea ni dub bexa naꞌanpa gaꞌal ngudiꞌizh cuent ten Jesús, geal leꞌa bexa nzheb ndoꞌ bexa nibeꞌe ten bexa judio.
JOH 7:14 Leꞌa ngol wizh na yá nchasea itol ujest wa, leꞌa Jesús cha nchaꞌa sa nde niꞌi ten Dios, cha usaxan nluu xa be men ndebe sa wa.
JOH 7:15 Leꞌa bexa nibeꞌe ten bexa judio ndanseanabe xteꞌe ndadiꞌizh Jesús, ndab bexa ndoꞌ be ltsaꞌa xa: —¿Xteꞌe uzhebpa ngok xabgiꞌi baꞌ zha, ná xa naꞌanpa utsid?
JOH 7:16 Leꞌa Jesús cha ndab ndoꞌ bexa wa: —Leꞌa ta nluu naꞌ ndee naꞌanpa dub ta naꞌtsa ulabeꞌe. Leꞌa‑yá ndi diꞌizh ten Dios xa mtuꞌub naꞌ.
JOH 7:17 Tal leꞌa bega nladka gun ta nlad Dios, leꞌa bega sgondoꞌ leꞌa ta nluꞌu naꞌ diꞌizh ten Dios, naꞌanpa ndadiꞌizh naꞌ ta ndanbeꞌetsa naꞌ.
JOH 7:18 Leꞌa tal ton gudiꞌizh cuent ten leꞌatsa xa, leꞌa xa nkwaꞌan ná xteꞌe gap be men mod ndoꞌ xa. Parea leꞌa naꞌ ndee nkwan ná xteꞌe gap be men mod ndoꞌ xa mtuꞌub naꞌ, ta weꞌe ndadiꞌizh naꞌ sbeꞌen ta ugea, naꞌanpa nkwiꞌinno naꞌ be men.
JOH 7:19 ¿Lid msaꞌa Moisés ley ten Dios ndoꞌ bega zha? Parea ni dub bega lá nxobgek ndoꞌ ley wa. ¿Cha xtaꞌan nlad bega gut bega naꞌ?
JOH 7:20 Leꞌa be men wa cha ndabbe: —¡Mbi bxin ncho len ladoꞌo ga! ¿Ton nlad gut ga zha?
JOH 7:21 Leꞌa Jesús cha ukaꞌab ndab: —Leꞌa naꞌ dubtsa uyon mbin wizh neꞌe be men, ta weꞌe ndanseana bega.
JOH 7:22 Leꞌa Moisés ndab yoo beꞌe be meꞌed bgiꞌi, ta na no wizh neꞌe be men ndun bega. (Parea leꞌa ta wa naꞌanpa ta ndab Moisés, leꞌa ta wa ta mbin bexa Israel mas polta ndoꞌ Moisés.)
JOH 7:23 Leꞌa bega ngo beꞌe be meꞌed bgiꞌi no wizh neꞌe be men ndontsa uxobgek bega ndoꞌ ley mkeꞌa Moisés. Ta weꞌe, ¿xtaꞌan ndakloo bega myunyakna naꞌ dub men gizh wizh neꞌe be men zha?
JOH 7:24 Naꞌanpa inisi bega naꞌ ta naꞌtsa bega ta ndun naꞌ. Ndi utsin binbeꞌe bega naga utsin nak ta ndun naꞌ wa.
JOH 7:25 Weꞌe leꞌa ncho bexa Jerusalén ndebe sa wa ndab ndoꞌ be ltsaꞌa na: —¿Naꞌanpa xa ndee xa nkwaꞌan bexa gut bexa zha?
JOH 7:26 Bwiꞌi bego xteꞌe ndoꞌ gaꞌal be men ndadiꞌizh xa, ná leꞌa bexa wa naꞌan xteꞌe ndab ndoꞌ xa. ¿Nati no bexa nibeꞌe ten beuna wa ndangea ladna leꞌa xa ndee leꞌa nak Cristo zha?
JOH 7:27 Ná leꞌa zha na ilen Cristo naꞌan ton iniꞌí pa ilen xa. Parea leꞌa xa ndee uniꞌí beuna pa nak lazh na.
JOH 7:28 Leꞌa gor wa leꞌa Jesús nsoꞌyadiꞌizh ndoꞌ be men tale ten niꞌi ten Dios, cha ugeꞌ ndab xa: —Ndab bega leꞌa bega nchandoꞌ naꞌ no uniꞌí bega pa nak lazh naꞌ. Parea leꞌa naꞌ naꞌanpa ga nladtsa naꞌ ndal. Leꞌa xa na mtuꞌub naꞌ sbeꞌen gealngea ndadiꞌizh, ná leꞌa bega lá nchandoꞌ xa wa.
JOH 7:29 Parea leꞌa naꞌ nchandoꞌka xa, geal leꞌa naꞌ mtoꞌo wats xa no mtuꞌub xa naꞌ.
JOH 7:30 Weꞌe leꞌa ncho bexa nlad isen Jesús, parea ni dub bexa naꞌan xteꞌe ngunno xa, geal leꞌa wizh ulaꞌa Dios gun bexa ta wa biseata gal.
JOH 7:31 Ná leꞌa kwaꞌad be men mbingea ladna Jesús, ndab bexa ndoꞌ be ltsaꞌa xa: —Leꞌa xa ndee ta ugeaka leꞌa nak Cristo, leꞌa xa ndun sian be uyon lak nsabndoꞌ gun Cristo gor ilen xa.
JOH 7:32 Leꞌa gor na mbiꞌín bexa fariseo ta na li xgaꞌach ndab be men cuent ten Jesús wa, weꞌe leꞌa bexa wa no be uleꞌay nibeꞌe cha mtuꞌub pla bexa nlaꞌach niꞌi ten Dios yaꞌbesen bexa Jesús.
JOH 7:33 Leꞌa Jesús cha ndab ndoꞌ be men: —Leꞌa naꞌ stub ndeꞌeptsa nchoꞌo lat bega, weꞌe nsea naꞌ wats xa mtuꞌub naꞌ.
JOH 7:34 Leꞌa bega ukwaꞌan naꞌ, parea leꞌa bega lá izheal naꞌ. No lá gun bega gan yaꞌbe sa yoꞌo naꞌ.
JOH 7:35 Weꞌe leꞌa bexa nibeꞌe ten bexa judio cha ndab ndoꞌ be ltsaꞌa na: —¿Pa yaꞌ xa baꞌ zha, dub sa na ni lá izheal beuna xa? ¿Nati yaꞌ xa sa sit, sa ndencho be ltsaꞌa beuna xa judio, cha gudiꞌizh xa ndoꞌ bexa naꞌanpa xa judio zha?
JOH 7:36 ¿Xteꞌe gab ta ndab xa baꞌ zha leꞌa beuna ukwaꞌan xa, parea leꞌa beuna lá izheal xa, no lá gun beuna gan yaꞌbe beuna sa yoo xa?
JOH 7:37 Leꞌa ngol wizh yandoꞌ ujest wa, wizh mas nsak ten ujest, leꞌa Jesús cha usoꞌ sa nluu xa, cha ugeꞌ ndab xa: —Leꞌa tal ncho bega ndak ladna, utsea bega wats naꞌ, cha usa naꞌ ta goo bega.
JOH 7:38 Leꞌa tal ton gungea ladna naꞌ, leꞌa lak nkeaniꞌi diꞌizh ten Dios leꞌa xa wa gap dub gealnaban kub cuent dub yowbeꞌe uxoꞌon nits len ladoꞌo xa.
JOH 7:39 Leꞌa ta na li ndab Jesús wa gab leꞌa Dios usaꞌa Espíritu ten na ndoꞌ bexa na ndangea ladna Jesús. Ná leꞌa Espíritu wa biseata ilen, geal leꞌa Jesús biseata ikea gibeꞌa zha wa.
JOH 7:40 Leꞌa gor na mbiꞌín be men ta li ndab Jesús, leꞌa ncho bexa ndab ndoꞌ be ltsaꞌa na: —¡Leꞌa xa baꞌ ta ugeaka leꞌaka profet ndiꞌizh giꞌidka wa!
JOH 7:41 No ncho bexa ndab: —¡Leꞌa xa baꞌ leꞌaka Cristo xa mti Dios! Ná leꞌa ncho stapla bexa ndabga: —¡Leꞌa Cristo naꞌanpa ilen Galilea!
JOH 7:42 Leꞌa diꞌizh ten Dios nkeaniꞌi leꞌa Cristo ilen lat be xin David, leꞌa xa gak xa gezh Belén lazh David.
JOH 7:43 Ta weꞌe leꞌa bexa wa usaxan ndeyotoꞌobe ke na ndab bexa ná ton nak Jesús.
JOH 7:44 Leꞌa ncho bexa wa nlad isen Jesús, parea ni dub bexa naꞌan xteꞌe ngunno Jesús.
JOH 7:45 Leꞌa bexa nlaꞌach niꞌi ten Dios wa cha mlaꞌnchaꞌ. Weꞌe leꞌa be uleꞌay nibeꞌe nsea bexa fariseo cha unabdiꞌizh ndoꞌ bexa, ndab bexa: —¿Xtaꞌan lá ngoꞌo bega Jesús zha?
JOH 7:46 Leꞌa bexa nlaꞌach niꞌi ten Dios wa cha ndabbe: —¡Nunk dub xabgiꞌi lá ndadiꞌizh lak ndadiꞌizh xa wa!
JOH 7:47 Weꞌe leꞌa bexa fariseo cha ndabbe: —¿No bego ndangea ladna be gealkwiꞌin wa zha?
JOH 7:48 ¿Lá iniꞌí bega zha leꞌa ni dub xa nibeꞌe ten beuna xa judio no ni dub xa fariseo lá ndangea ladna Jesús?
JOH 7:49 ¡Leꞌa Dios utsaksi be men kwaꞌad wa, bexa na ni lá nchandoꞌ ley mkeꞌa Moisés!
JOH 7:50 Ná leꞌa sa wa nsoꞌ dub xa nsaleaꞌ Nicodemo xa fariseo, xa na ngwaꞌyadiꞌizhno Jesús dub gor teꞌal. Leꞌa xa cha ndab:
JOH 7:51 —¿Nsak bega zha leꞌa ley ten beuna ndab leꞌa dub men ndap ke, gor biseata goꞌón beuna ta ntsakndoꞌ xa, no koxnes beuna ta ndun xa?
JOH 7:52 Leꞌa bexa wa cha ndabbe: —¿Noga lu nak dub xa Galilea zha? Btsid diꞌizh ten Dios, weꞌe iniꞌí lu leꞌa Galilea naꞌanpa itoꞌo ni dub profet ten Dios.
JOH 7:53 Cha nseaꞌbe bexa ta lid bexa.
JOH 8:1 Leꞌa Jesús cha nchaꞌa Bet Olivo.
JOH 8:2 Leꞌa ngol ngot xeꞌa wa mlengal Jesús tale ten niꞌi ten Dios. Cha kwaꞌad be men ulansea wats xa. Leꞌa xa cha usob, cha usaxan nluu xa be men.
JOH 8:3 Weꞌe leꞌa pla be mech ten ley nsea bexa fariseo ulenno dub xagots ngwaꞌigaꞌano dub xabgiꞌi naꞌanpa xabgiꞌi ten xa. Cha msoꞌ bexa xagots wa tlaw be men wa.
JOH 8:4 Cha ndab bexa ndoꞌ Jesús: —Mech, leꞌa xagots ndee ngwaꞌigaꞌano dub xabgiꞌi naꞌanpa xabgiꞌi ten xa.
JOH 8:5 Leꞌa ley mkeꞌa Moisés unibeꞌe ulaꞌgeꞌ beuna be xagots ndun lak ta mbin xa ndee wa gast gat xa. ¿Go zha, xteꞌe gab ga?
JOH 8:6 Leꞌa bexa wa ga ndun preb Jesús ná xteꞌe gab Jesús, ndontsa gap bexa xtaꞌan usake bexa Jesús. Weꞌe leꞌa Jesús cha usob, usaxan nkeꞌa xa ndoꞌ yo no ngutsyaꞌa xa.
JOH 8:7 Ná leꞌa be mech ten ley nsea bexa fariseo dubpa nabdiꞌizh ndoꞌ Jesús. Cha ngwasoꞌ xa, ndab xa ndoꞌ bexa wa: —Tal leꞌa dub xa nsoꞌ lat bega baꞌ lá ndap ni dub ke ndoꞌ Dios, ned xa wa ulaꞌgeꞌ xagots baꞌ.
JOH 8:8 Cha usobgal Jesús, cha mkeꞌagal xa ndoꞌ yo.
JOH 8:9 Ná leꞌa gor na mbiꞌín bexa na li msake xagots wa ta ndab Jesús, cha mbinbeꞌe bexa leꞌa bexa noga ndap ke. Cha ndon ned bexa gox no gast bexa ben mkaꞌan sa wa. Cha myansoꞌ nab xagots wa wats Jesús.
JOH 8:10 Leꞌa Jesús cha ngwasoꞌgal, cha unabdiꞌizh xa ndoꞌ xagots wa, ndab xa: —¿Nat zha ma bexa li msake lu wa nat? ¿Ni dub xa wa naꞌan xtaꞌan ngunno lu zha?
JOH 8:11 Leꞌa xagots wa cha ukaꞌab ndab: —Ni dub xa wa naꞌan xtaꞌan ngunno naꞌ, Señor. Leꞌa Jesús cha ndab: —Ni naꞌ lá gáp leꞌa lu nsabndoꞌ gat. Nat byaꞌ, yá lá gunta lu ta ugap wa.
JOH 8:12 Leꞌa stub biaj leꞌa Jesús ndadiꞌizh ndoꞌ be men, ndab xa: —Leꞌa naꞌ ndee leꞌa nak xeꞌa ndoꞌ be men nde ndoꞌ gizhliyo. Leꞌa tal ton isankea tsoꞌo naꞌ naꞌanpa ikesea sa ukaw, leꞌa xa ndi gap xeꞌa nsaꞌa gealnaban.
JOH 8:13 Weꞌe leꞌa bexa fariseo cha ndabbe: —Leꞌa lu ndadiꞌizh cuent ten leꞌaka lu, ta weꞌe leꞌa ta ndadiꞌizh lu baꞌ naꞌanpa nsak.
JOH 8:14 Leꞌa Jesús cha ukaꞌab ndab: —Mas leꞌaka naꞌ ndadiꞌizh cuent ten naꞌ, leꞌa ta ndadiꞌizh naꞌ wa ta nsakka, leꞌa naꞌ uní pa ulen naꞌ no pa gaa naꞌ. Parea leꞌa bego ni lá iniꞌí pa ulen naꞌ no pa gaa naꞌ.
JOH 8:15 Leꞌa bego nsake naꞌ laktsa ndanbeꞌe be men, ná leꞌa naꞌ ndee naꞌanpa nsake ni dub men nat.
JOH 8:16 Leꞌa tal usake naꞌ be men, leꞌa ta gáp naꞌ wa ta nsakka, geal leꞌa naꞌ naꞌanpa nabtsa gun ta wa, leꞌa Xus naꞌ xa mtuꞌub naꞌ no nsoꞌ wats naꞌ.
JOH 8:17 Lak nkeaniꞌi ley ten bega, tal top men dubtsa gab, leꞌa ta ndab bexa wa nsakka.
JOH 8:18 Leꞌa naꞌ ndee ndáp ton nak naꞌ, no Xus naꞌ xa mtuꞌub naꞌ noga dubtsa ndab ton nak naꞌ.
JOH 8:19 Leꞌa bexa wa cha ndabbe: —¿Ma xus lu zhaga? Leꞌa Jesús cha ukaꞌab ndab: —Leꞌa bego lá nchandoꞌ naꞌ, no ni lá nchandoꞌ bega Xus naꞌ. Tal leꞌa bega nchandoꞌ naꞌ, leꞌa bega no Xus naꞌ nchandoꞌ.
JOH 8:20 Be diꞌizh ndee uníꞌi Jesús gor nluu xa be men len niꞌi ten Dios, sa ndaꞌusaꞌa be men med gon. Parea ni dub bexa lá isen Jesús, geal leꞌa wizh ulaꞌa Dios gun bexa ta wa biseata gal.
JOH 8:21 Leꞌa Jesús cha mbidiꞌizhgal ndoꞌ bexa ndab xa: —Leꞌa naꞌ ikaꞌan sa ndee. Weꞌe leꞌa bega cha ukwaꞌan naꞌ, parea leꞌa sa na gaa naꞌ leꞌa bega lá gun gan no yaꞌ. No zha na gat bega leꞌa be ke ten bega naꞌanpa yuꞌu.
JOH 8:22 Leꞌa bexa nibeꞌe ten bexa judio cha ndab ndoꞌ be ltsaꞌa na: —¿Nati gut xa leꞌaka leꞌa xa, ta weꞌe ndab xa leꞌa sa yaꞌ xa leꞌa beuna lá gun gan no yaꞌ sa wa?
JOH 8:23 Leꞌa Jesús cha ndab: —Leꞌa bego xa xan ndee, parea leꞌa naꞌ xa gaꞌap baꞌ. Leꞌa bego xa ndoꞌ gizhliyo ndee, parea leꞌa naꞌ naꞌanpa xa ndoꞌ gizhliyo.
JOH 8:24 Ta weꞌe ndápka naꞌ leꞌa zha na gat bega, leꞌa be ke ten bega naꞌanpa yuꞌu. Tal leꞌa bega lá gungea ladna ton nak naꞌ, leꞌa be ke ten bega naꞌanpa yuꞌu gor na gat bega.
JOH 8:25 Leꞌa bexa cha ndabbe: —¿Tonxá lu zhaga? Leꞌa Jesús cha ndab: —Leꞌa naꞌ zha nedkata ndáp ton naꞌ.
JOH 8:26 Ncho sianta be ta gáp naꞌ cuent ten bega no ta usake naꞌ bega, parea ndoꞌ bego bexa ncho ndoꞌ gizhliyo leꞌa naꞌ ndáptsa ta na ndadiꞌizh xa mtuꞌub naꞌ wa, leꞌa xa gealngeatsa ndadiꞌizh.
JOH 8:27 Parea leꞌa bexa wa lá yakbeꞌena leꞌa Jesús ndadiꞌizh cuent ten Dios Xus xa.
JOH 8:28 Ta weꞌe no ndab Jesús ndoꞌ bexa: —Leꞌa gor na yá mbinno bega naꞌ ta nlad bega, weꞌe igondoꞌ bega ton nak naꞌ, Xa Myak Men Ndoꞌ Gizhliyo. No iniꞌí bega leꞌa naꞌ naꞌanpa ndun ta nladtsa naꞌ, leꞌa naꞌ ndi ndadiꞌizh lak mluu Xus naꞌ ndoꞌ naꞌ.
JOH 8:29 Leꞌa Xus naꞌ xa mtuꞌub naꞌ no nsoꞌ wats naꞌ. Leꞌa xa naꞌanpa nlaꞌa nab naꞌ, geal ndun naꞌ sbeꞌen ta nsak ladna xa.
JOH 8:30 Leꞌa gor na li ndab Jesús ta wa, weꞌe leꞌa kwaꞌad be men cha mbingea ladna Jesús.
JOH 8:31 Cha ndab Jesús ndoꞌ bexa judio na li mbingea ladna xa: —Tal leꞌa bega sbeꞌen uxobgek ndoꞌ be ta ndáp naꞌ, leꞌa bega ta ugeaka gak xmen naꞌ.
JOH 8:32 Weꞌe leꞌa bega igondoꞌ gealngea ten Dios, leꞌa gealngea wa uxaꞌak bega.
JOH 8:33 Leꞌa bexa wa cha ndabbe: —Leꞌa Abraham leꞌa nak usan gox polta ten besa. Leꞌa besa nunk lá igayoꞌota ndoꞌ stub men. ¿Ná xteꞌe li ndab lu leꞌa besa yaꞌak zha?
JOH 8:34 Leꞌa Jesús cha ukaꞌab ndab: —Leꞌa naꞌ gáp ndoꞌ bega leꞌa tal ton gun be ta ugap, leꞌa xa wa ndaigayoꞌo ndoꞌ ta ugap wa.
JOH 8:35 Leꞌa dub xa nyoꞌo ndoꞌ stubga men naꞌanpa idub tiemp yoo ta lid xa nibeꞌe xa wa. Parea leꞌa xin xa nibeꞌe wa idub tiemp ncho ta lid xus na.
JOH 8:36 No liga tal leꞌa Xin Dios leꞌa uxaꞌak bega ndoꞌ ta ugap, leꞌa bega ta ugeaka myaꞌak.
JOH 8:37 Leꞌa naꞌ uníka leꞌa usan gox polta ten bega Abraham, parea leꞌa bega nlad gut naꞌ, geal leꞌa bega lá nsakyoꞌón be ta ndáp naꞌ.
JOH 8:38 Leꞌa naꞌ ndee ndadiꞌizh be ta nluu Xus naꞌ ndoꞌ naꞌ, parea leꞌa bego ndun lak ndab xus bega.
JOH 8:39 Leꞌa bexa wa cha ukaꞌab ndab bexa: —Leꞌa Abraham nak xus besa. Leꞌa Jesús cha ndab: —Tal leꞌa bega nak xinka Abraham, leꞌa bega gun ltsaꞌa be ta mbin Abraham.
JOH 8:40 Parea nat leꞌa bega ndi nlad gut naꞌ, geal ndadiꞌizh naꞌ gealngea, ta mbidiꞌizh Dios ndoꞌ naꞌ. Leꞌa Abraham nunk lá ngun ltsaꞌa ta nlad bega gun bega wa.
JOH 8:41 Leꞌa bega ndi ndun lak ndun xus bega. Weꞌe cha ndab bexa: —Leꞌa besa naꞌanpa nak lak dub men ni lá iniꞌí ton nak xus na. Dubtsa xus besa ncho, leꞌa xa wa Dios.
JOH 8:42 Weꞌe leꞌa Jesús cha ndab: —Tal leꞌa xus bega Dios, leꞌa bega ta ugeaka yankea naꞌ, leꞌa naꞌ wats Dios utoꞌo ndal naꞌ ndoꞌ gizhliyo ndee. Leꞌa Dios leꞌa mtuꞌub naꞌ, naꞌanpa naꞌtsa nlad ndal.
JOH 8:43 ¿Xtaꞌan lá nyakbeꞌena bega ta ndáp naꞌ zha? Leꞌa bega lá nsakyoꞌón diꞌizh ten naꞌ.
JOH 8:44 Leꞌa xus bega nak maxuꞌu, no nlad bega gun bega ta nlad xa wa. Leꞌa maxuꞌu wa gast zha nedkata ndut men. No nunk lá ndadiꞌizh maxuꞌu gealngea, geal leꞌa xa naꞌanpa nchandoꞌ gealngea. Leꞌa gor na ndadiꞌizh xa gealkwiꞌin, leꞌa xa ndun lakka nak xa, leꞌa xa uzheꞌeb dub xa ukwiꞌin, no nkiꞌil xa be men ndun bexa gealkwiꞌin.
JOH 8:45 Ná leꞌa ta na ndadiꞌizh naꞌ gealngea, ta weꞌe leꞌa bega lá ndangea ladna naꞌ.
JOH 8:46 ¿Ton bega gun gan gab dub ta ugap ndun naꞌ zha? Leꞌa naꞌ ndi sbeꞌen gealngea ndadiꞌizh. Ta weꞌe ¿xtaꞌan lá ndangea ladna bega naꞌ zha?
JOH 8:47 Leꞌa tal ton xmenka Dios leꞌa xa wa ndoꞌón ta ndab Dios. Ná leꞌa bego naꞌanpa xmen Dios, ta weꞌe lá nsakyoꞌón bega ta ndab Dios.
JOH 8:48 Leꞌa bexa wa cha ukaꞌab ndab: —Leꞌaka nak ta ndab besa, leꞌa lu dub xa Samaria, no ncho mbi bxin len ladoꞌo lu.
JOH 8:49 Leꞌa Jesús cha ndab: —Leꞌa naꞌ naꞌanpa ncho mbi bxin len ladoꞌo naꞌ. Leꞌa naꞌ ndee utsintsa ndadiꞌizh cuent ten Xus naꞌ, parea leꞌa bega ndi nisi naꞌ.
JOH 8:50 Leꞌa naꞌ lá nkwan xteꞌe gap be men mod ndoꞌ naꞌ. Parea ncho dub xa na nlad gap be men mod ndoꞌ naꞌ, leꞌa xa wa leꞌa gab xteꞌe nak be ta ndun bega.
JOH 8:51 Leꞌa naꞌ gáp ndoꞌ bega leꞌa tal ton uxobgek ndoꞌ diꞌizh ten naꞌ, leꞌa xa wa nunk lá gat.
JOH 8:52 Weꞌe cha ndab bexa nibeꞌe wa: —Nat segurka uniꞌí besa leꞌa ladoꞌo lu nchoka mbi bxin. Leꞌa Abraham no be profet ngutkabe, ná lu ndab leꞌa tal ton uxobgek ndoꞌ diꞌizh ten lu leꞌa nunk lá gat.
JOH 8:53 ¿Xteꞌe gab lu zha mas nsak lu ndoꞌ Abraham usan gox polta ten besa? Leꞌa xa wa ngutka, no liga be profet. ¿Lu zha, xteꞌe nsak lu ton nak lu?
JOH 8:54 Leꞌa Jesús cha ukaꞌab ndab: —Tal leꞌaka naꞌ gáp leꞌa naꞌ xa nsak, leꞌa ta gáp naꞌ wa ta naꞌan xtiꞌin. Parea leꞌa Xus naꞌ, xa na ndab bega nak Dios ten bega, xa weꞌe ndab leꞌa naꞌ xa nsakka.
JOH 8:55 Leꞌa bego lá nchandoꞌ xa wa, ná leꞌa naꞌ ndee nchandoꞌka xa. No tal gáp naꞌ leꞌa naꞌ lá nchandoꞌ xa, leꞌa naꞌ no dub xa ukwiꞌin lak ukwiꞌin bego. Parea leꞌa naꞌ ta ugeaka nchandoꞌ xa no nxobgek naꞌ itea be ta ndab xa.
JOH 8:56 Leꞌa Abraham usan gox polta ten bega mten ladna ta na uniꞌí xa leꞌa naꞌ gal ndoꞌ gizhliyo. Leꞌa xa uniꞌíka ta wa, cha mten ladna xa.
JOH 8:57 Weꞌe leꞌa bexa judio wa cha ndabbe: —Lu ni tol gayoꞌo liꞌin lid ncho, ¿ná xteꞌe ndab lu leꞌa lu uniꞌí Abraham?
JOH 8:58 Leꞌa Jesús cha ndab: —Leꞌa naꞌ gáp ndoꞌ bega leꞌa zha na bi naꞌan Abraham yoo, leꞌa naꞌ nchoꞌola.
JOH 8:59 Weꞌe cha usen bexa geꞌ ndiꞌizh ulaꞌgeꞌ bexa Jesús, parea leꞌa Jesús cha mkachndoꞌ utoꞌo xa sa nde niꞌi ten Dios. Utid xa gandid lat bexa wa, cha nchaꞌa xa.
JOH 9:1 Ngol dub wizh nchasea Jesús leꞌa xa uniꞌí dub xabgiꞌi zha ngolta xa lá naꞌ xa.
JOH 9:2 Leꞌa be xmen Jesús cha unabdiꞌizh ndab bexa ndoꞌ Jesús: —Mech, ¿xtaꞌan lbaꞌa lá naꞌ xa baꞌ idub zha ngolta xa zha? ¿Ke ten be usan ten xa‑yá, nati ke tenka xa‑yá?
JOH 9:3 Leꞌa Jesús cha ndab: —Leꞌa xa lbaꞌa nak naꞌanpa ke ten xa no ni ke ten be usan ten xa. Parea leꞌa ta lbaꞌa nak xa baꞌ leꞌa be men iniꞌí juers ten Dios.
JOH 9:4 Nattsa bi tezhea leꞌa naꞌ nsabndoꞌ gun tiꞌin ndab Dios, xa mtuꞌub naꞌ. Leꞌa teꞌal sken ilen, gor na naꞌanta ton gun tiꞌin.
JOH 9:5 Leꞌa nat bi nsoꞌ naꞌ ndoꞌ gizhliyo ndee, leꞌa naꞌ nak xeꞌa ten Dios ndoꞌ be men nde ndoꞌ gizhliyo.
JOH 9:6 Leꞌa tsoꞌo na li ndab Jesús, cha mchuk xa ndoꞌ yo, cha mbindeꞌe xa dub tuzh yalan. Cha udaꞌab xa‑yá ngusndoꞌ xa lá naꞌ wa.
JOH 9:7 Cha ndab Jesús: —Waꞌdaꞌab ngusndoꞌ lu nits tank sa nsaleaꞌ Siloé —leꞌa ta wa dub diꞌizh gab: xa mtuꞌub. Weꞌe leꞌa xa wa cha nchaꞌdaꞌab ndoꞌ na sa wa. Leꞌa gor nseaꞌ xa ta lid xa leꞌa xa naꞌla.
JOH 9:8 Leꞌa bexa ncho gax ta lid xa, no iteata bexa na uniꞌí leꞌa xa wa ngok dub xa lá naꞌ, leꞌa bexa wa cha ndab ndoꞌ be ltsaꞌa na: —¿Naꞌanpa leꞌa xa baꞌ xa nsobnab med wa zha?
JOH 9:9 Leꞌa ncho bexa wa ndab: —Leꞌa xa baꞌ leꞌaka ta wa. Ná ncho bexa ndab: —Naꞌan, leꞌa xa baꞌ migabtsa xa wa. Parea leꞌaka xa wa cha ndab: —Leꞌa naꞌ ndee leꞌaka ta wa.
JOH 9:10 Leꞌa bexa wa cha unabdiꞌizh ndoꞌ xa ndab bexa: —¿Xteꞌe uyoꞌo gan naꞌla go nat zhaga?
JOH 9:11 Leꞌa xa cha ukaꞌab ndab: —Leꞌa xa nsaleaꞌ Jesús wa mbindeꞌe yalan, cha udaꞌab xa‑yá ngusndoꞌ naꞌ, cha ndab xa gadaꞌab naꞌ ndoꞌ naꞌ nits Siloé. Ta weꞌe ngwaa naꞌ, no udaꞌab naꞌ ndoꞌ naꞌ, cha mnaꞌ naꞌ.
JOH 9:12 Leꞌa bexa wa cha unabdiꞌizh ndab bexa: —¿Ma xa wa nat? Leꞌa xa wa cha ukaꞌab ndab xa: —Leꞌa naꞌ lá iní.
JOH 9:13 Weꞌe leꞌa bexa wa cha mbiꞌi xa na li myakna wa ndoꞌ bexa fariseo.
JOH 9:14 Leꞌa ta wa wizh neꞌe bexa judio, zha na li mbindeꞌe Jesús yalan, cha myunyakna Jesús ngusndoꞌ xa wa.
JOH 9:15 Weꞌe leꞌa bexa fariseo no unabdiꞌizh ndoꞌ xa wa ná xteꞌe myakna ngusndoꞌ xa. Leꞌa xa cha ukaꞌab ndab: —Leꞌa xa wa udaꞌab yalan ngusndoꞌ naꞌ, cha udaꞌab naꞌ ndoꞌ naꞌ, cha mnaꞌ naꞌ.
JOH 9:16 Weꞌe leꞌa ncho bexa fariseo cha ndabbe: —Leꞌa xabgiꞌi weꞌe naꞌanpa nak dub xa mtuꞌub Dios, leꞌa xa ndun ta lá nsabndoꞌ wizh neꞌe beuna. Ná nchoga bexa ndab: —Dub men ugap lá yoo gan gun be uyon ndun xa wa. Ta weꞌe naꞌanpa dubtsa ngudiꞌizh bexa ná ton nak Jesús.
JOH 9:17 Cha unabdiꞌizhgal bexa ndoꞌ xa myakna wa, ndab bexa: —¿Xteꞌe nsak lu? ¿Ton nak xa li myunyakna ngusndoꞌ lu baꞌ zha? Leꞌa xa wa cha ukaꞌab ndab xa: —Nsak naꞌ leꞌa xa wa dub profet ten Dios.
JOH 9:18 Parea leꞌa bexa nibeꞌe ten bexa judio lá ndangea ladna ti ngok xa wa dub xa lá naꞌ, no uyoꞌo gan mnaꞌ xa. Ta weꞌe mtuꞌub bexa dub men ngwaꞌtezh be usan ten xa.
JOH 9:19 Leꞌa gor na ulen bexa wa, leꞌa bexa nibeꞌe wa cha unabdiꞌizh ndoꞌ bexa, ndab bexa: —¿Xin bega xa ndee, xa ndab bego lá naꞌ zha ngolkata xa wa zha? ¿Xteꞌexá mnaꞌ xa nat zhaga?
JOH 9:20 Leꞌa be usan ten xa wa cha ukaꞌab ndab bexa: —Uniꞌíka besa leꞌa ta baꞌ xinka besa, noga lá naꞌka xa zha ngolta xa.
JOH 9:21 Parea leꞌa besa lá iniꞌí xteꞌe mnaꞌ xa nat, no ni lá iniꞌí besa ton myunyakna xa. Unabdiꞌizh bega ndoꞌ leꞌaka xa, leꞌa xa yá goxla, leꞌa xa sabka‑yá.
JOH 9:22 Li ndab bexa geal leꞌa bexa nzheb ndoꞌ bexa nibeꞌe, leꞌa bexa nibeꞌe wa yá mbidiꞌizh leꞌa guniꞌi ton gab leꞌa Jesús nak Cristo, leꞌa bexa wa kontuꞌub xa len niꞌi sa nzhealbe bexa judio.
JOH 9:23 Ta weꞌe ndab be usan ten xa wa leꞌa xa yá goxla, inabdiꞌizh bexa nibeꞌe wa leꞌaka ndoꞌ xa.
JOH 9:24 Weꞌe leꞌa bexa nibeꞌe wa cha utezhgal xabgiꞌi li myakna wa, cha ndab bexa: —Leꞌa Dios nsobwiꞌi gaꞌal gud ná xteꞌe nak xabgiꞌi wa, leꞌa besa uniꞌí leꞌa xa wa dub xa ndap ke.
JOH 9:25 Leꞌa xa wa cha ndab: —Leꞌa naꞌ lá iní tal leꞌa xa wa xa ndap ke natal naꞌan. Parea dub ta uní naꞌ: leꞌa naꞌ ngok dub xa lá naꞌ, ná nat leꞌa naꞌ naꞌla.
JOH 9:26 Cha ndabgal bexa: —¿Xteꞌe mbinno xa lu zha? ¿Xtaꞌan mbin xa ndontsa lbaꞌa naꞌ lu zha?
JOH 9:27 Leꞌa xa cha ukaꞌab ndab xa: —Leꞌa naꞌ yá ndáp‑a ndoꞌ bego, ná leꞌa bega lá kaꞌab isakyoꞌón‑a. ¿Nat xtaꞌan nlad bega gáp naꞌ‑yá stub biaj? ¿Nati no bega nlad gak xmen xa wa zha?
JOH 9:28 Cha xela uníꞌi bexa ndoꞌ xa, ndab bexa: —Lu nak xmen xa wa, parea leꞌa besa nak xmen Moisés.
JOH 9:29 Leꞌa besa uniꞌíka leꞌa Dios mbidiꞌizhno Moisés, parea leꞌa xa weꞌe leꞌa besa ni lá iniꞌí pa utoꞌo xa.
JOH 9:30 Leꞌa xabgiꞌi wa cha ukaꞌab ndab xa: —¡Leꞌa ta ndab bega wa uzhebpa ndanseana naꞌ! Leꞌa xa wa leꞌa myunyakna ngusndoꞌ naꞌ, parea leꞌa bega lá iniꞌí pa utoꞌo xa.
JOH 9:31 Leꞌa beuna uniꞌíka leꞌa Dios naꞌanpa goꞌón ta inab dub xa ndap ke. Parea leꞌa tal ton yankea Dios no uxobgek xa ndoꞌ Dios, leꞌa Dios soꞌónka ta inab xa wa.
JOH 9:32 Nunk beuna gol goꞌón yoo dub men yunyakna ngusndoꞌ dub xa lá naꞌ zha ngolta xa.
JOH 9:33 Tal leꞌa xa wa naꞌanpa nak dub xa mtuꞌub Dios, leꞌa xa lá yoo gan gun ta wa.
JOH 9:34 Leꞌa bexa cha ukaꞌab ndab bexa: —¡Leꞌa zha ngolkata lu leꞌa lu yá ndapka ke, ná lu nlad leꞌa uluu besa! Cha ulantuꞌub bexa xa sa wa.
JOH 9:35 Leꞌa Jesús mbiꞌín ta li ulantuꞌub bexa xa wa. Leꞌa ngol gor mzheal Jesús xa, cha ndab Jesús: —¿Ndangea ladna lu Xin Dios zha?
JOH 9:36 Leꞌa xa wa cha ukaꞌab ndab xa: —Señor, gud go ná ton xa wa, ndontsa gungea lad naꞌ xa wa.
JOH 9:37 Leꞌa Jesús cha ndab: —Leꞌa lu yá uniꞌíka xa, leꞌa xa wa naꞌ, xa ndadiꞌizhno lu nat.
JOH 9:38 Leꞌa xa wa cha ndab: —Ndangea lad naꞌ go, Señor. Cha usaxib xa ndoꞌ Jesús.
JOH 9:39 Leꞌa Jesús cha ndab: —Leꞌa naꞌ ndal ndoꞌ gizhliyo iní naꞌ ná xteꞌe nak be men. Li ndontsa leꞌa bexa lá naꞌ wa inaꞌbe, no bexa na nsak leꞌa xa naꞌka leꞌa bexa wa yaꞌan cuent dub xa lá naꞌ.
JOH 9:40 Leꞌa gor na mbiꞌín pla bexa fariseo nde sa wa ta li ndab Jesús, cha ndab bexa ndoꞌ Jesús: —¿Ndab lu zha leꞌa besa ndee naꞌanpa naꞌ?
JOH 9:41 Leꞌa Jesús cha ndab: —Tal leꞌa bega lá naꞌ, leꞌa bega naꞌanpa ndap ke ndoꞌ Dios. Parea leꞌa bega ndab leꞌa bega naꞌka, ta weꞌe leꞌa bega ndapka ke ndoꞌ Dios.
JOH 10:1 ’Leꞌa naꞌ gáp ndoꞌ bego leꞌa dub sa ndenchonyaw be borreg, tal leꞌa dub xa naꞌanpa nyoꞌo toꞌo puert sa wa cha ndi nyoꞌo xa stub lad, leꞌa xa wa dub waꞌan, dub xa nlat juers be man.
JOH 10:2 Parea leꞌa dub xa na nyoꞌo toꞌo puert wa, leꞌa xa wa leꞌa xa nlaꞌach be borreg wa.
JOH 10:3 Leꞌa xa na nlaꞌach toꞌo puert sa wa cha nxaꞌal‑a, cha nyoꞌo xa nlaꞌach be borreg wa. Leꞌa xa cha nbezhleaꞌ kadga dub ma ten xa. Leꞌa bema cha ndoꞌón ti xa, cha nchaꞌatoꞌono bema xa.
JOH 10:4 Leꞌa gor na yá utatela be borreg ten xa, leꞌa xa nlaꞌach ma cha nsaned ndoꞌ ma. Leꞌa be borreg wa nchandoꞌ ti xa, cha nsankea bema tsoꞌo xa.
JOH 10:5 Parea leꞌa bema naꞌanpa isankea tsoꞌo dub xa lá nchandoꞌ ma, ndi uxoꞌon bema ndoꞌ xa, geal leꞌa bema lá nchandoꞌ ti xa.
JOH 10:6 Leꞌa Jesús mbidiꞌizh ta ndee ndoꞌ be men, parea leꞌa bexa lá nyakbeꞌena xteꞌe gab ta wa.
JOH 10:7 Cha no ndab Jesús ndoꞌ bexa wa: —Leꞌa naꞌ gáp ndoꞌ bego leꞌa naꞌ leꞌa nak cuent puert sa nyote be borreg.
JOH 10:8 Leꞌa itea bexa na ned ulen ndoꞌ naꞌ, bexa na mluu dub diꞌizh naꞌanpa ta ugea, leꞌa bexa wa cuent dub waꞌan, dub xa nlat juers be man. Parea leꞌa bexa nak cuent be xborreg naꞌ lá isakyoꞌón ta ndab bexa wa.
JOH 10:9 Leꞌa naꞌ leꞌa nak cuent puert wa, geal leꞌa tal ton ndangea ladna naꞌ, leꞌa xa wa ndapka gealnaban ndoꞌ Dios. Leꞌa bexa wa nak cuent be borreg nyoꞌo ntoꞌo toꞌo puert no nzheal ma gixgi ndaw ma.
JOH 10:10 ’Leꞌa dub waꞌan nsealawaꞌantsa be borreg, no nseayut xa ma, nlad xa initndoꞌ ma. Parea leꞌa naꞌ ndee ndi ndal ndontsa leꞌa bexa nak cuent be xborreg naꞌ gap gealnaban ndoꞌ Dios, no uzhebpa wen yoo bexa ndoꞌ Dios.
JOH 10:11 Leꞌa naꞌ leꞌa nak xa utsin nlaꞌach be xmen naꞌ lak utsin nlaꞌach dub men be xborreg xa, no nsaꞌa xa leꞌaka leꞌa xa sakndoꞌ bema.
JOH 10:12 Parea leꞌa dub xa nyaxtsa ten na ndontsa ulaꞌach xa bema, leꞌa xa naꞌanpa leꞌa ten ma. Ta weꞌe leꞌa gor na iniꞌí xa nsea dub mbee cha ulaꞌa xa bema ndi uxoꞌon xa. Weꞌe leꞌa mbee wa cha ukendoꞌ bema cha iteꞌachso bema itea lad.
JOH 10:13 Leꞌa xa wa uxoꞌon geal leꞌa xa medtsa nlad, naꞌanpa nyuꞌno ladna xa bema.
JOH 10:14 ’Leꞌa naꞌ nak cuent dub xa utsin nlaꞌach be borreg ten na. Nchandoꞌ naꞌ bexa nak be borreg ten naꞌ, no liga leꞌa bexa nchandoꞌga naꞌ,
JOH 10:15 lak nchandoꞌ Xus naꞌ naꞌ, no liga nchandoꞌ naꞌ Xus naꞌ. No nsa naꞌ leꞌaka naꞌ sakndoꞌ be men nak be borreg ten naꞌ.
JOH 10:16 No ncho stub xkwaꞌa be xmen naꞌ, bexa lá nchandoꞌ bega. Leꞌa bexa wa cuent stub xkwaꞌa borreg ncho stubga corral. Leꞌa naꞌ yunjuntka bexa wa no bexa ndee, no uxobgek bexa ndoꞌ naꞌ. Weꞌe yoo dubtsa xkwaꞌa be xmen naꞌ, no nab naꞌ gak xa nlaꞌach iteanak bexa.
JOH 10:17 ’Leꞌa Xus naꞌ nkweaꞌ ladna naꞌ, geal leꞌa naꞌ nsa gealnaban ten naꞌ gat naꞌ ndontsa iban naꞌ stub biaj.
JOH 10:18 Naꞌan ton gut naꞌ, ndi naꞌka usa naꞌ gat naꞌ. Leꞌa naꞌ ndap juers usa naꞌ gealnaban ten naꞌ, no ndap naꞌ juers iban naꞌ stub biaj. Leꞌa ta wa ta unibeꞌe Xus naꞌ gun naꞌ.
JOH 10:19 Leꞌa gor na mbiꞌín bexa judio be ta li ndab Jesús, cha stub biaj usaxan uteyotoꞌo bexa no be ltsaꞌa xa.
JOH 10:20 Ncho kwaꞌad bexa ndab: —¿Xtaꞌan nlaꞌach bego ta ndab xa baꞌ zha? Leꞌa xa ncho mbi bxin len ladoꞌo na no nsak xa gizh tont.
JOH 10:21 Ná leꞌa ncho bexa wa ndabgabe: —Leꞌa xa baꞌ naꞌanpa ndadiꞌizh lak ndadiꞌizh dub men ncho mbi bxin len ladoꞌo na. No lá gun dub mbi bxin gan inaꞌ dub xa lá naꞌ lak mbin xa baꞌ.
JOH 10:22 Ngol zha kwal zha na ngo bexa judio dub ujest ten niꞌi ten Dios nde Jerusalén.
JOH 10:23 Leꞌa dub wizh wa, leꞌa Jesús nkesea sa nsaleaꞌ Corredor Salomón ten niꞌi ten Dios.
JOH 10:24 Weꞌe leꞌa ncho bexa judio cha myaklo wats Jesús, ndab bexa: —¿Gast polxá iniꞌí besa ton nak go zhaga? Tal go leꞌa nak Cristo, gud ga‑yá ndoꞌ gaꞌal besa.
JOH 10:25 Leꞌa Jesús cha ukaꞌab ndab: —Leꞌa naꞌ yá ndápka ndoꞌ bega ton nak naꞌ, ná leꞌa bego lá ngungea ladna‑yá. No leꞌa be uyon na ndun naꞌ nsea juers ten Dios Xus naꞌ, leꞌa ta wa nluukaga ton nak naꞌ.
JOH 10:26 Ná leꞌa bego lá ndangea ladna‑yá geal leꞌa bega naꞌanpa nak be borreg ten naꞌ.
JOH 10:27 Leꞌa bexa nak be borreg ten naꞌ, leꞌa bexa wa ndoꞌón ti naꞌ, no nchandoꞌ naꞌ bexa, no nsankea bexa tsoꞌo naꞌ.
JOH 10:28 No nsa naꞌ gealnaban nunk lá idub ndoꞌ bexa. Leꞌa bexa idub tiemp yoo wats Dios, no naꞌan ton koꞌo bexa ndoꞌ yaꞌa naꞌ.
JOH 10:29 Leꞌa Xus naꞌ, xa msaꞌa bexa ndoꞌ naꞌ, leꞌa xa wa ndon leꞌa nibeꞌe ndoꞌ itea be taꞌa, ta weꞌe naꞌan ton gun gan koꞌo bexa ndoꞌ yaꞌa xa.
JOH 10:30 Leꞌa naꞌ no Xus naꞌ leꞌa besa dubtsa nak.
JOH 10:31 Weꞌe leꞌa bexa wa usengal be geꞌ ndiꞌizh gut bexa Jesús.
JOH 10:32 Ná leꞌa Jesús cha ndab ndoꞌ bexa: —Sian be ta wen ndun naꞌ ndoꞌ gaꞌal bega lak msaꞌa Xus naꞌ gun naꞌ. ¿Ke ten xtaꞌanma dub ta li mbin naꞌ wa ulaꞌgeꞌ bega naꞌ zha?
JOH 10:33 Leꞌa bexa wa cha ukaꞌab ndabbe: —Leꞌa besa naꞌanpa ulaꞌgeꞌ lu ke ten dub ta wen ndun lu. Leꞌa besa ndi ulaꞌgeꞌ lu ke ten ta na kweaꞌ uníꞌi lu ndoꞌ Dios. Leꞌa lu men gizhliyotsa, ná ndab lu leꞌa lu Dios.
JOH 10:34 Leꞌa Jesús cha ukaꞌab ndab: —Leꞌa ley ndeno bega nkeaniꞌi leꞌa Dios ndab ndoꞌ be men: “Ndáp naꞌ leꞌa bega nak be dios.”
JOH 10:35 Leꞌa beuna uniꞌíka leꞌa itea be ta ndab diꞌizh ten Dios ta ugeaka. Ta weꞌe tal leꞌa Dios li ndab ndoꞌ bexa wa leꞌa bexa no nak dios,
JOH 10:36 ¿xteꞌe ndab bega leꞌa naꞌ kweaꞌ uníꞌi ndoꞌ Dios gor na ndáp naꞌ leꞌa naꞌ Xin Dios? Leꞌa Dios mti naꞌ no mtuꞌub xa naꞌ ndoꞌ gizhliyo ndee.
JOH 10:37 Tal leꞌa naꞌ naꞌanpa ndun be taꞌa lak ndun Xus naꞌ, leꞌa bega lá nsabndoꞌ gungea ladna naꞌ.
JOH 10:38 Leꞌa bega naꞌanpa ndangea ladna ta ndáp naꞌ, parea nsabndoꞌ gungea ladna bega ta ndun naꞌ. Weꞌe igondoꞌ bega Xus naꞌ, no gungea ladna bega leꞌa naꞌ no Xus naꞌ dubtsa nak besa.
JOH 10:39 Weꞌe stubgal biaj nlad bexa isen bexa Jesús, ná leꞌa Jesús cha utid tlaw bexa, naꞌanpa isen bexa xa.
JOH 10:40 Cha nchaꞌagal xa stub toꞌo yowbeꞌe Jordán, sa mas polta ulaleaꞌ Juan be men. Cha weꞌetsa uyoꞌo Jesús dub ndeꞌep.
JOH 10:41 Leꞌa kwaꞌad men nseabegal wats xa, ndab bexa ndoꞌ be ltsaꞌa xa: —Leꞌa Juan ta ugeaka ni dub uyon lá ngun, parea leꞌa itea ta ndab Juan cuent ten xa ndee, leꞌa ta wa ta ugeaka.
JOH 10:42 Weꞌe leꞌa kwaꞌad bexa nde sa wa mbingea ladna leꞌa Jesús nak Cristo.
JOH 11:1 Uyoꞌo dub xabgiꞌi nsaleaꞌ Lázaro usen gealgizh. Leꞌa xa wa xa gezh Betania, sa no nak lazh Marí no Mart itop bsan Lázaro.
JOH 11:2 (Leꞌa Marí bsan Lázaro wa xa ulo ta uxeꞌe xoꞌo Jesús tsoꞌo wa, cha mkwiꞌid xa xoꞌo Jesús nsea gichgek xa.)
JOH 11:3 Ngol gor leꞌa itop bsan Lázaro wa mtuꞌub dub men ndoꞌ Jesús, ndab xa: —Señor, leꞌa Lázaro amig ten ga usen gealgizh.
JOH 11:4 Leꞌa gor na mbiꞌín Jesús ta wa, cha ndab xa: —Leꞌa gealgizh wa naꞌanpa gut xa. Leꞌa ta wa ndi ndontsa iniꞌí be men juers ten Dios no juers ten Xin Dios.
JOH 11:5 Leꞌa Jesús nkea ladna Mart no Marí beal xa no Lázaro.
JOH 11:6 Parea leꞌa gor na mbiꞌín Jesús leꞌa Lázaro usen gizh, leꞌa Jesús cha uyoꞌokata sa wa stop wizh.
JOH 11:7 Weꞌe cha ndab xa ndoꞌ be xmen xa: —Nchaꞌbe beuna stub biaj distrit Judea.
JOH 11:8 Leꞌa be xmen Jesús cha ndabbe: —Mech, ti plama wizh leꞌa bexa judio ncho sa wa nlad gut ga, ná nat, ¿xtaꞌan li nlad go yaꞌgal ga sa wa zha?
JOH 11:9 Leꞌa Jesús cha ukaꞌab ndab: —Ncho dub tibtop gor tezhea kad dub wizh. Leꞌa tal ton ikesea gor tezhea naꞌanpa ikateꞌeb, geal leꞌa xa naꞌ bea ndoꞌ gizhliyo ndee.
JOH 11:10 Parea tal ton ikesea gor teꞌal, leꞌa xa skateꞌeb leꞌa gor wa naꞌan bea.
JOH 11:11 Cha no ndab Jesús: —Leꞌa Lázaro amig ten beuna ngwadgats, ná leꞌa naꞌ ndaukwan xa.
JOH 11:12 Weꞌe leꞌa be xmen Jesús cha ndabbe: —Señor, tal leꞌa xa naxyats, leꞌa xa syakkana.
JOH 11:13 Leꞌa ta li ndab Jesús wa gab leꞌa Lázaro ngutla, ná leꞌa be xmen Jesús ndanbeꞌe leꞌa xa naxyats‑tsa.
JOH 11:14 Weꞌe leꞌa Jesús cha gaꞌal ndab ndoꞌ bexa: —Leꞌa Lázaro ngut.
JOH 11:15 Leꞌa naꞌ nten ladna naꞌanpa ncho beuna sa wa gor ngut xa. Li ndontsa mas igeꞌ ladna bega naꞌ. Nat nchaꞌinaꞌ beuna xa.
JOH 11:16 Leꞌa Tomás, xa no nsaleaꞌ Dídimo, cha ndab ndoꞌ be ltsaꞌa na: —Nchaꞌbe beuna sa wa, ndontsa no beuna gatno Jesús.
JOH 11:17 Leꞌa wizh na ulayaꞌ Jesús toꞌo gezh Betania wa, mbiꞌín xa leꞌa Lázaro mdapla wizh mgaꞌach.
JOH 11:18 Leꞌa Betania nde pa chontsa kilómetro gax Jerusalén.
JOH 11:19 Ta weꞌe leꞌa kwaꞌad bexa judio ncho Jerusalén wa ngwaꞌinaꞌ Mart no Marí, mluꞌuzh be men wa itop bexa ta na ngut bsan bexa.
JOH 11:20 Leꞌa gor na mbiꞌín Mart leꞌa Jesús nsalayaꞌ gaxla, cha utoꞌo xa, ngwaꞌucheꞌalndoꞌ xa Jesús. Ná leꞌa Marí myaꞌan ta niꞌi.
JOH 11:21 Leꞌa Mart cha ndab ndoꞌ Jesús: —Señor, tal leꞌa go ncho sa ndee, leꞌa bsan naꞌ naꞌanpa ngat.
JOH 11:22 Parea leꞌa naꞌ uní leꞌa guniꞌi xtaꞌan inab go ndoꞌ Dios nat, leꞌa Dios saꞌaka‑yá.
JOH 11:23 Leꞌa Jesús cha ndab ndoꞌ Mart: —Leꞌa bsan lu sbanka.
JOH 11:24 Leꞌa Mart cha ndab: —Leꞌa naꞌ uní leꞌa xa sbanka gal wizh lult, zha iban itea be men ngut.
JOH 11:25 Leꞌa Jesús cha ndab: —Leꞌa naꞌ nak xa nxiste be men ndoꞌ gealgut, no nak naꞌ xa nsaꞌa gealnaban. Leꞌa tal ton gungea ladna naꞌ, maska ngut xa leꞌa xa sbanka.
JOH 11:26 Leꞌa itea bexa nban tal gungea ladna bexa naꞌ, leꞌa bexa wa naꞌanpa gat idub tiemp. ¿Ndangea ladna lu ta ndáp naꞌ ndee zha?
JOH 11:27 Leꞌa Mart cha ndab: —Ndungeaka lad naꞌ‑yá, Señor. No ndangea lad naꞌ leꞌa go nak Cristo Xin Dios, xa na ndiꞌizh ga giꞌidka ndoꞌ gizhliyo.
JOH 11:28 Tsoꞌo na li ndab Mart, weꞌe cha nseaꞌ xa ta lid xa, xagaꞌtsa ndab xa ndoꞌ Marí beal xa: —Leꞌa mech nseala no nbezh xa lu.
JOH 11:29 Leꞌa gor na mbiꞌín Marí ta wa, cha uxax utoꞌo xa, nchaꞌinaꞌ xa Jesús.
JOH 11:30 Leꞌa Jesús biseata yate len gezh wa, ndi bi nsoꞌ xa sa mzheꞌal Mart xa.
JOH 11:31 Weꞌe leꞌa bexa ndeuluꞌuzh Marí bexa nde ta lid xa, leꞌa gor uniꞌí bexa leꞌa Marí uxax utoꞌo nchaꞌa, cha usankea bexa tsoꞌo Marí, ndab bexa leꞌa Marí nchaꞌyoꞌon toꞌo baꞌa ten Lázaro.
JOH 11:32 Leꞌa gor na ulayaꞌ Marí wats Jesús no uniꞌí xa Jesús, cha msaxib xa ndoꞌ Jesús, ndab xa: —Señor, tal leꞌa go ncho sa ndee, leꞌa bsan naꞌ naꞌanpa ngat.
JOH 11:33 Leꞌa gor na uniꞌí Jesús xteꞌe ndoꞌon Marí, no bexa na li ulanseano Marí wa, leꞌa xa uzhebpa uban myoꞌo ladna no kweaꞌ myoꞌo ladna xa.
JOH 11:34 Cha ndab xa: —¿Pa mkaꞌach bega xa wa zha? Leꞌa bexa wa cha ukaꞌab ndab: —Señor, nchaꞌbe beuna, iniꞌí ga pa‑yá.
JOH 11:35 Leꞌa Jesús cha mbiꞌin.
JOH 11:36 Weꞌe leꞌa bexa nde sa wa cha ndab ndoꞌ ltsaꞌa na: —Bwiꞌi bego ná xteꞌeta nkweaꞌ ladna xa Lázaro.
JOH 11:37 Ná leꞌa ncho bexa cha ndabbe: —Leꞌa xa ndee myunyakna dub xa lá naꞌ, ¿xtaꞌan naꞌanpa li ngun xa baꞌ gan lá ngat Lázaro zhaga?
JOH 11:38 Leꞌa Jesús uzhebpa kweaꞌ myoꞌo ladna gor ulayaꞌ xa toꞌo baꞌa wa. Leꞌa ta wa dub geꞌloꞌo nsoꞌntsaw dub geꞌ siꞌil toꞌo‑yá.
JOH 11:39 Cha ndab Jesús: —Udob bega geꞌ baꞌ. Leꞌa Mart bsan xa ngut wa cha ndab: —Señor, leꞌa nat leꞌa xa baꞌ ugap nlaꞌala, leꞌa xa mdapla wizh mgaꞌach.
JOH 11:40 Leꞌa Jesús cha ndab ndoꞌ Mart: —¿Cha lid ndápka naꞌ ndoꞌ lu zha, tal leꞌa lu gungea ladna naꞌ, leꞌa lu iniꞌíka juers ten Dios?
JOH 11:41 Weꞌe leꞌa be men cha udob geꞌ toꞌo baꞌa wa. Leꞌa Jesús cha mwiꞌi gaꞌap, cha ndab xa: —Xus naꞌ, nsa naꞌ xno ndoꞌ go leꞌa go ndoꞌón ta unaꞌab naꞌ ndoꞌ ga.
JOH 11:42 Leꞌa naꞌ uníka leꞌa go ndoꞌónka itea be taꞌa ndáp naꞌ, parea nat li ndáp naꞌ ndontsa gungea ladna be men ndee leꞌa go leꞌaka mtuꞌub naꞌ.
JOH 11:43 Tsoꞌo na li ndab Jesús, cha ugeꞌ ndab xa: —¡Lázaro, utoꞌo sa baꞌ!
JOH 11:44 Leꞌa xa na li ngut wa cha utoꞌo sa wa, bi lima nbixyoꞌo lad yaꞌa xa no xoꞌo xa. No ndoꞌ xa bi li nbixyoꞌo dub bleꞌa lad. Leꞌa Jesús cha ndab ndoꞌ be men: —Bxaꞌak bega be lad baꞌ, cha blaꞌa bega iseaꞌ xa.
JOH 11:45 Weꞌe leꞌa bexa judio na li nseano Marí wa uniꞌí ta mbin Jesús, cha kwaꞌad bexa mbingea ladna Jesús.
JOH 11:46 Parea leꞌa ncho bexa wa cha ndi ngwaꞌyab ndoꞌ bexa fariseo xtaꞌan mbin Jesús.
JOH 11:47 Weꞌe leꞌa be uleꞌay nibeꞌe no bexa fariseo cha mchealte itea bexa nibeꞌe ten bexa judio. Cha ndab bexa: —¿Xteꞌe gun beuna zha? Leꞌa Jesús wa sian uyon ndun.
JOH 11:48 Tal leꞌa beuna ulaꞌa li gunta xa ta wa, leꞌa itea be men sangea ladna xa. Weꞌe leꞌa bexa Roma siꞌid ulate niꞌi ten Dios ten beuna no lá ulaꞌata bexa inibeꞌe beuna sa ndee.
JOH 11:49 Leꞌa dub bexa wa xa nsaleaꞌ Caifás, xa nak uleꞌay ndon leꞌa nsak zha wa. Leꞌa xa cha ndab ndoꞌ bexa nibeꞌe wa: —Leꞌa bego naꞌan xtaꞌan iniꞌí.
JOH 11:50 No ni lá nyakbeꞌena bega ndi mas wen gat dubtsa men sakndoꞌ beuna xa Israel, ndontsa naꞌanpa initndoꞌ itea beuna.
JOH 11:51 Leꞌa ta li ndab Caifás wa naꞌanpa ndanbeꞌe leꞌatsa xa. Leꞌa ta na nak xa uleꞌay ndon leꞌa nsak zha wa, ta weꞌe mbintiꞌin Dios xa, ndab xa leꞌa Jesús gat sakndoꞌ bexa Israel.
JOH 11:52 Parea leꞌa ta ndab xa wa naꞌanpa nabtsa gab leꞌa Jesús gat sakndoꞌ bexa Israel. Leꞌa ta wa no gab leꞌa Jesús gat ndontsa yunjunt xa itea bexa nak xin Dios, bexa ncho idub nax ndoꞌ gizhliyo.
JOH 11:53 Leꞌa wizh wa leꞌa bexa nibeꞌe ten bexa judio dubtsa mbidiꞌizh gut bexa Jesús.
JOH 11:54 Ta weꞌe leꞌa zha wa leꞌa Jesús naꞌantapa gaꞌal ikesea Judea. Leꞌa xa ndi mkaꞌan sa wa nchaꞌa xa gezh Efraín gax geꞌe sa bid. Cha uyoꞌo xa sa wa no be xmen xa.
JOH 11:55 Leꞌa zha wa nsayal gax ujest Pascua ten bexa judio. Ta weꞌe kwaꞌad be men judio ukea nchaꞌbe gezh Jerusalén, ndontsa gun bexa ta isambiꞌi bexa ndoꞌ Dios zha biseata gal ujest wa.
JOH 11:56 Leꞌa be men wa nkwaꞌan Jesús, no nabdiꞌizh bexa ndoꞌ be ltsaꞌa bexa nde sa nde niꞌi ten Dios: —¿Xteꞌe nsak bega zha? ¿Siꞌid Jesús ujest ndee nati naꞌan?
JOH 11:57 Leꞌa be uleꞌay nibeꞌe no bexa fariseo unibeꞌela ndoꞌ be men tal ncho ton iniꞌí pa nsoꞌ Jesús, cha gab xa‑yá ndoꞌ bexa wa ndontsa isen bexa Jesús.
JOH 12:1 Sxoꞌop wizh nsob gal ujest Pascua wa, leꞌa Jesús utoꞌo nchaꞌagal Betania, ta lid Lázaro xa mxiste Jesús ndoꞌ gealgut.
JOH 12:2 Leꞌa sa wa mbindeꞌe bexa dub ta gawno bexa Jesús. Leꞌa Mart nkego ta gaw bexa. Leꞌa Lázaro nsob ndoꞌ mes no Jesús.
JOH 12:3 Weꞌe leꞌa Marí usen tol litr sbeꞌen nardo ta uxeꞌe, dub ta uzhebpa uyap nsak. Cha mtob xa‑yá tsoꞌo xoꞌo Jesús, cha mkwiꞌid xa xoꞌo Jesús no gichgek xa. Leꞌa len niꞌi wa gast idub lita uxeꞌe mlaꞌa.
JOH 12:4 Leꞌa dub xmen Jesús no nsob sa wa xa na leꞌa yun cuent Jesús, xa na nsaleaꞌ Judas Iscariot xin Simón. Leꞌa xa wa cha ndab:
JOH 12:5 —¿Xtaꞌan lid ndi udoꞌo xa ta uxeꞌe baꞌ zha, cha utseꞌa xa med wa ndoꞌ be men uban nak? Leꞌa ta baꞌ nsak pa chon gayoꞌo denario.
JOH 12:6 Parea leꞌa Judas naꞌanpa nyuꞌno ladna bexa uban nak. Ndi li ndab xa geal leꞌa xa nlaꞌach med ten be xmen Jesús, no ncho zha ngowaꞌanga xa med noꞌo xa.
JOH 12:7 Weꞌe leꞌa Jesús cha ndab ndoꞌ Judas: —Blaꞌa xagots baꞌ, leꞌa xa ulochaꞌaw ta baꞌ gast gal zha na igaꞌach naꞌ.
JOH 12:8 Leꞌa bexa uban nak wa guniꞌi polga nchoka lat bega, parea leꞌa naꞌ ndee naꞌanpa kwenta nchoꞌono bega.
JOH 12:9 Leꞌa kwaꞌadpa bexa judio mbiꞌín leꞌa Jesús nchogal gezh Betania, cha nchaꞌbe bexa sa wa. Leꞌa bexa naꞌanpa nabtsa Jesús nchaꞌbewiꞌi, leꞌa bexa nlad iniꞌí no Lázaro xa mbangal ndoꞌ gealgut.
JOH 12:10 Weꞌe leꞌa be uleꞌay nibeꞌe wa dubtsa mbidiꞌizh gut no Lázaro,
JOH 12:11 geal mbangal Lázaro leꞌa kwaꞌad bexa judio nsaulaꞌa be uleꞌay nibeꞌe wa, cha ndi Jesús ndangea ladna bexa.
JOH 12:12 Ngol stub wizh wa leꞌa uzhebpa kwaꞌad be men ndencho ujest Pascua gezh Jerusalén. Leꞌa zha mbiꞌín bexa leꞌa Jesús no nchaꞌa Jerusalén,
JOH 12:13 cha ulobtoꞌog bexa be xos ya gin, cha utoꞌo bexa nchaꞌikanes bexa Jesús. No ugeꞌ ndab bexa: —¡Siꞌil nak xa baꞌ! ¡Dios uzhebpa nlaꞌach xa baꞌ, xa na mtuꞌub Dios Xa Nibeꞌe! ¡Leꞌa xa baꞌ leꞌa nibeꞌe beuna xa Israel!
JOH 12:14 Leꞌa Jesús mzheal dub burr tuzh, cha usob xa tsoꞌo ma. Leꞌa ta wa lak nkeaniꞌi diꞌizh ten Dios, ndab‑a:
JOH 12:15 Lá izheb bego, men gezh Sion. Bwiꞌi bego, leꞌa xa leꞌa nibeꞌe bega nsea nsob tsoꞌo dub burr tuzh.
JOH 12:16 Leꞌa zha wa leꞌa be xmen Jesús lá yakbeꞌena be ta li mbin Jesús wa. Parea tsoꞌo na mbangal Jesús cha nseaꞌ xa gibeꞌa, leꞌa bexa mtseꞌa ladna lak nkeaniꞌi diꞌizh ten Dios cuent ten Jesús, cha uniꞌí bexa leꞌa Jesús lika mbin.
JOH 12:17 Leꞌa zha na utezh Jesús Lázaro len baꞌa, cha mxiste Jesús xa ndoꞌ gealgut, leꞌa bexa nde sa wa cha mbidiꞌizh ta uniꞌí bexa wa ndoꞌ be men.
JOH 12:18 Ta weꞌe li ngwaꞌikanes be men Jesús, geal leꞌa bexa mbiꞌín ta na li mbin Jesús uyon wa.
JOH 12:19 Parea leꞌa bexa fariseo ndab ndoꞌ be ltsaꞌa na: —Bwiꞌi bega, leꞌa ta na ndun beuna naꞌan xtiꞌin. Leꞌa be men ndi itea nchaꞌbe wats Jesús.
JOH 12:20 Leꞌa lat bexa na li nchaꞌbe yankea Dios gezh Jerusalén ujest Pascua wa, ncho pla bexa naꞌanpa xa judio.
JOH 12:21 Leꞌa bexa wa cha ulen wats Julip xa gezh Betsaida ten Galilea, ndab bexa: —Señor, leꞌa besa nlad iniꞌí Jesús.
JOH 12:22 Leꞌa Julip cha ngwaꞌyab‑a ndoꞌ Ndres, weꞌe itop bexa ngwaꞌyab‑a ndoꞌ Jesús.
JOH 12:23 Leꞌa Jesús cha ukaꞌab ndab: —Yá ngol gor iniꞌí be men ta juert nak naꞌ, Xa Myak Men Ndoꞌ Gizhliyo.
JOH 12:24 Leꞌa naꞌ gáp ndoꞌ bego tal leꞌa dub bid ten trig lá igaꞌach len yo cuent dub ta ngut, leꞌa idub tiemp leꞌa‑yá bidtsa gak. Ná tal leꞌa‑yá igaꞌach, leꞌa‑yá sianpa bid usaꞌa.
JOH 12:25 Leꞌa tal ton ukwaꞌan xteꞌe wen yoo xa, leꞌa xa wa ndi gun perdid gealnaban ten na ndoꞌ Dios. Parea leꞌa tal ton ndi ukwaꞌan gun ta nlad Dios, leꞌa xa wa ndi gap gealnaban nunk lá idub.
JOH 12:26 Leꞌa tal ton nlad gun tiꞌin ndoꞌ naꞌ nsabndoꞌ isankea xa tsoꞌo naꞌ. Weꞌe leꞌa sa yoꞌo naꞌ leꞌa xa no yoo. Leꞌa tal ton gun tiꞌin ndoꞌ naꞌ, leꞌa Xus naꞌ gab leꞌa xa wa wenka ndun.
JOH 12:27 No ndab Jesús: —Nat uzheꞌeb kweaꞌ ncho lad naꞌ, no ni lá iní naꞌ xteꞌe gáp naꞌ ndoꞌ Xus naꞌ. Ndanbeꞌe naꞌ gáp naꞌ ndoꞌ xa koꞌo xa naꞌ ndoꞌ gealkweaꞌ ndee, parea leꞌa naꞌ tiꞌin weꞌe ndal ndoꞌ gizhliyo.
JOH 12:28 Leꞌa naꞌ ndi gáp: “Xus naꞌ, bin ga ta na uluu xteꞌe siꞌil nak go.” Leꞌa gor weꞌe cha mgen ti Dios ulen gibeꞌa, ndab xa ndoꞌ Jesús: —Leꞌa naꞌ mlula xteꞌe siꞌil nak naꞌ, no ulu naꞌ‑yá stub biaj.
JOH 12:29 Leꞌa lat bexa kwaꞌad wa ncho bexa ndab leꞌa ta mbiꞌín bexa wa usiꞌi. No ncho bexa ndab leꞌa‑yá dub angel uníꞌi ndoꞌ Jesús.
JOH 12:30 Leꞌa Jesús cha ndab ndoꞌ be men: —Leꞌa ta mgen wa naꞌanpa ulen por na goꞌón naꞌ‑yá, leꞌa‑yá ndi ulen ndontsa goꞌón bega‑yá.
JOH 12:31 Leꞌa nat leꞌa Dios gab ná ton ndap ke ndoꞌ gizhliyo. No nat kontuꞌub Dios maxuꞌu, xa nibeꞌe ndoꞌ gizhliyo.
JOH 12:32 Leꞌa gor na ixits bexa naꞌ gaꞌap ndoꞌ yo, leꞌa naꞌ gun leꞌa be men ilen wats naꞌ.
JOH 12:33 Leꞌa ta na li mbidiꞌizh Jesús wa gab leꞌa xa gat ndoꞌ cruz.
JOH 12:34 Leꞌa be men wa cha ndab: —Leꞌa besa mbiꞌín leꞌa ley ten Dios nkeaniꞌi leꞌa xa nak Cristo idub tiemp ncho. ¿Ná xteꞌe ndab ga zha leꞌa be men ixits Xa Myak Men Ndoꞌ Gizhliyo gaꞌap ndoꞌ yo? ¿Ton nak Xa Myak Men Ndoꞌ Gizhliyo wa zhaga?
JOH 12:35 Leꞌa Jesús cha ukaꞌab ndab: —Leꞌa nat leꞌa xa nak xeꞌa naꞌanpa kwenta ncho lat bega. Ta weꞌe usea bega nattsa bi ncho xeꞌa, ndontsa leꞌa sa ukaw naꞌanpa gun gan ndoꞌ bega. Leꞌa tal ton nsea sa ukaw, leꞌa xa wa ni lá iniꞌí pa nchaꞌa.
JOH 12:36 Leꞌa nat bi ncho xa nak xeꞌa wa, bingea ladna bega xa, ndontsa isea bega ndoꞌ xeꞌa. Leꞌa tsoꞌo na li ndab Jesús, cha nchaꞌukachndoꞌ xa ndoꞌ be men.
JOH 12:37 Sian be uyon mbin Jesús ndoꞌ gaꞌal be men, ná leꞌa bexa lá ngungea ladna Jesús.
JOH 12:38 Li ngok ta wa lak mbidiꞌizh Isaías sakndoꞌ Dios, ndab xa: Señor Dios, ¿tonma ndangea ladna ta ndadiꞌizh besa zha? ¿No ton ndoꞌ ná mluu ga xteꞌe juert nak go zha?
JOH 12:39 Ta weꞌe leꞌa be men lá ngungea ladna Jesús, no lak ndab Isaías:
JOH 12:40 Leꞌa Dios mtsaw ngusndoꞌ bexa, no mbin ngud Dios ladoꞌo bexa, ndontsa lá inaꞌ bexa, no ni lá yakbeꞌena bexa. Cha naꞌanpa ilen bexa wats Dios, utsuꞌu Dios be ke ten bexa.
JOH 12:41 Li ndab Isaías polta zha na uniꞌí xa xteꞌe siꞌil gak Cristo, cha mbidiꞌizh xa cuent ten Cristo.
JOH 12:42 Mas lika ná ncho kwaꞌad bexa mbingea ladna Jesús, no gast ncho bexa nibeꞌe ten bexa judio. Parea naꞌanpa gaꞌal ngudiꞌizh bexa‑yá, geal leꞌa bexa nzheb leꞌa bexa fariseo kontuꞌub bexa len niꞌi sa nzhealbe bexa judio wa.
JOH 12:43 Leꞌa bexa wa lá nkwaꞌan xteꞌe wen yaꞌan bexa ndoꞌ Dios, ndi mas nkwaꞌan bexa xteꞌe wen yaꞌan bexa ndoꞌ be men.
JOH 12:44 Leꞌa Jesús cha ugeꞌ ndab: —Leꞌa tal ton gungea ladna naꞌ, leꞌa xa wa naꞌanpa nabtsa naꞌ ndangea ladna. Leꞌa xa wa no xa mtuꞌub naꞌ ndangea ladna.
JOH 12:45 No liga tal ton iniꞌí naꞌ, leꞌa xa wa no iniꞌí xa mtuꞌub naꞌ wa.
JOH 12:46 Leꞌa naꞌ nak xeꞌa ulen ndoꞌ gizhliyo, ndontsa tal ton gungea ladna naꞌ, leꞌa xa wa naꞌantapa yoo sa ukaw.
JOH 12:47 ’Leꞌa tal ton goꞌón diꞌizh ndáp naꞌ, ná lá uxobgek xa ndoꞌ‑yá, leꞌa naꞌ ndee naꞌanpa nak xa usake xa. Leꞌa naꞌ naꞌanpa ndal ndoꞌ gizhliyo usake naꞌ be men, leꞌa naꞌ ndi ndal ko naꞌ be men ndoꞌ be ke ten bexa.
JOH 12:48 Leꞌa tal ton uxelad naꞌ no lá gungea ladna xa be diꞌizh ndáp naꞌ, leꞌa diꞌizh wa leꞌaka usake xa gal wizh lult.
JOH 12:49 Leꞌa naꞌ ndee naꞌanpa ndadiꞌizh ta nladtsa naꞌ, leꞌa Xus naꞌ xa mtuꞌub naꞌ unibeꞌe xtaꞌan gudiꞌizh naꞌ no xtaꞌan uluꞌu naꞌ.
JOH 12:50 Leꞌa naꞌ uní leꞌa diꞌizh unibeꞌe Xus naꞌ gáp naꞌ, leꞌa diꞌizh wa ta nsaꞌa gealnaban nunk lá idub. Ta weꞌe li ndadiꞌizh naꞌ lakka ndab Xus naꞌ ndoꞌ naꞌ.
JOH 13:1 Leꞌa zha na nsayal gax ujest Pascua, leꞌa Jesús uniꞌíla yamer gal gor ikaꞌan xa ndoꞌ gizhliyo, cha yaꞌ xa wats Xus xa. Lak nkweaꞌ ladna Jesús bexa nak xmen xa ndoꞌ gizhliyo ndee, bi li nkweaꞌ ladna xa bexa no gast gor ikaꞌan xa.
JOH 13:2 Leꞌa ngol gor na nsobyaw xcheꞌe Jesús no be xmen xa, leꞌa maxuꞌu uyoꞌola gek Judas Iscariot xin Simón yun cuent Jesús.
JOH 13:3 Leꞌa Jesús uniꞌíka leꞌa Dios Xus xa msaꞌa itea be taꞌa leꞌa xa inibeꞌe. No uniꞌí xa leꞌa xa watska Dios utoꞌo, no sa weꞌekaga yaꞌ xa.
JOH 13:4 Weꞌe ngwasoꞌ xa ndoꞌ mes sa ndeyaw bexa wa, cha ulate xa lad nbix xa. Cha mxi xa dub bleꞌa lad koꞌol len xa.
JOH 13:5 Cha ulo xa nits len dub cheꞌa. Cha usaxan xa nsat xa xoꞌo be xmen xa, no nkwiꞌid xa xoꞌo bexa wa no lad wa.
JOH 13:6 Leꞌa gor na ngol xa wats Simón Pedr, leꞌa Pedr cha ndab: —Señor, ¿go baꞌ usat xoꞌo naꞌ zha?
JOH 13:7 Leꞌa Jesús cha ukaꞌab ndab: —Leꞌa ta lndeꞌe ndun naꞌ, leꞌa lu lá yakbeꞌena‑yá nat. Parea gal zha yakbeꞌena lu‑yá.
JOH 13:8 Leꞌa Pedr cha ndab: —¡Leꞌa naꞌ nunk lá usa xoꞌo naꞌ usat ga! Leꞌa Jesús cha ndab: —Tal leꞌa naꞌ lá usat xoꞌo lu, leꞌa lu yá lá gakta xmen naꞌ.
JOH 13:9 Leꞌa Simón Pedr cha ndab: —¡Señor, naꞌanpa nabtsa xoꞌo naꞌ usat ga, ndi no yaꞌa naꞌ no gek naꞌ usat ga!
JOH 13:10 Leꞌa Jesús cha ukaꞌab ndab: —Leꞌa xa na tiꞌi ngos nsabndoꞌ nabtsa xoꞌo na yat, leꞌa xa wa yá umbiꞌi nak. Leꞌa bego yá umbiꞌika nak ndoꞌ Dios, parea naꞌanpa itea bega.
JOH 13:11 Leꞌa Jesús yá uniꞌíla ton yun cuent xa, ta weꞌe ndab xa leꞌa dub bexa naꞌanpa umbiꞌi nak.
JOH 13:12 Leꞌa gor na mtaꞌusat Jesús xoꞌo bexa wa, cha ngokgal xa lad nbix xa. Cha usobgal xa ndoꞌ mes, ndab xa: —¿Nyakbeꞌena bega xtaꞌan lbaꞌa mbinno naꞌ bega zha?
JOH 13:13 Leꞌa bega níꞌi ndoꞌ naꞌ Mech no Señor. Leꞌaka nak ta li níꞌi bega wa, geal leꞌa naꞌ lika nak.
JOH 13:14 Leꞌa naꞌ nak Señor ten bega no Mech ten bega, parea nat msat naꞌ xoꞌo bega. No liga leꞌa bego nsabndoꞌ usat xoꞌo ltsaꞌa bega.
JOH 13:15 Leꞌa naꞌ mluu xteꞌe nsabndoꞌ gun bega, ndontsa li gun bego lak mbinno naꞌ bega.
JOH 13:16 Leꞌa naꞌ gáp ndoꞌ bego leꞌa dub mos naꞌanpa mas nsak ndoꞌ xa nibeꞌe xa wa. No liga tal leꞌa dub xa mtuꞌub stubga men, leꞌa xa nchaꞌa wa naꞌanpa mas nsak ndoꞌ xa mtuꞌub xa.
JOH 13:17 Nat tal leꞌa bega nyakbeꞌena be ta ndee, no lika ndun bega, leꞌa Dios gun wen yoo ladna bega.
JOH 13:18 ’Leꞌa ta ndáp naꞌ ndee naꞌanpa ndáp naꞌ cuent ten itea bega. Leꞌa naꞌ mti bega no nchandoꞌ naꞌ bega, parea nsabndoꞌ gak cumplir lak nkeaniꞌi diꞌizh ten Dios, ndab‑a: “Leꞌa xa na ndawno naꞌ, leꞌa xa wa leꞌaka ngokloo ndoꞌ naꞌ.”
JOH 13:19 Nat ndáp naꞌ ta wa ndoꞌ bego gor na biseata gak‑a, ndontsa gor na gak‑a leꞌa bega gungea ladna ton nak naꞌ.
JOH 13:20 Leꞌa naꞌ gáp ndoꞌ bega leꞌa tal ton utsin gak ndoꞌ dub xa mtuꞌub naꞌ, leꞌa xa wa cuentkata ndoꞌ naꞌ li utsin nak. No liga tal ton utsin nak ndoꞌ naꞌ, leꞌa xa wa utsinga nak ndoꞌ Dios xa na mtuꞌub naꞌ.
JOH 13:21 Tsoꞌo na li ndab Jesús ta wa, cha uzheꞌeb kweaꞌ myoꞌo ladna xa. Cha gaꞌal ndab xa ndoꞌ be xmen xa: —Leꞌa naꞌ gáp ndoꞌ bega leꞌa dub bega yun cuent naꞌ ndoꞌ bexa nlad gut naꞌ.
JOH 13:22 Leꞌa be xmen xa ni lá iniꞌí ton gun ta na li ndab Jesús wa, ta weꞌe usaxan nwiꞌi bexa ndoꞌ be ltsaꞌa bexa.
JOH 13:23 Leꞌa dub xmen Jesús, xa na leꞌa Jesús uzheꞌeb nkweaꞌ ladna, nsob wats Jesús.
JOH 13:24 Leꞌa Simón Pedr cha mbin sein ndoꞌ xa wa, ndontsa inabdiꞌizh xa ndoꞌ Jesús ná ton xa li gun wa.
JOH 13:25 Leꞌa xa wa cha mas ubisob wats Jesús, cha unabdiꞌizh xa ndab xa: —Señor, ¿ton li yun cuent go zha?
JOH 13:26 Leꞌa Jesús cha ukaꞌab ndab ndoꞌ xa wa: —Leꞌa naꞌ ugazh dub bleꞌa pan ndee. Leꞌa xa na usa naꞌ‑yá ndoꞌ na, leꞌa ta wa xa weꞌe. Leꞌa Jesús cha mgazh dub bleꞌa pan, cha msaꞌa xa‑yá ndoꞌ Judas Iscariot xin Simón.
JOH 13:27 Leꞌa gor na li udaw Judas pan wa, leꞌa maxuꞌu cha uyote len ladoꞌo xa. Leꞌa Jesús cha ndab ndoꞌ Judas: —Leꞌa ta na li gun lu wa, uxaxtsa bin ta wa.
JOH 13:28 Parea ni dub bexa na li nde ndoꞌ mes wa lá yakbeꞌena xtaꞌan ngi li ndab Jesús.
JOH 13:29 Leꞌa Judas wa xa nlaꞌach med ndantiꞌin bexa wa. Ta weꞌe ncho bexa ndanbeꞌe leꞌa Jesús nlad yaꞌisiꞌi Judas ta guntiꞌin bexa ndoꞌ ujest. No nchoga bexa ndanbeꞌe leꞌa Jesús nlad usaꞌa Judas med ndoꞌ bexa uban nak.
JOH 13:30 Tsoꞌo na li udaw Judas dub bleꞌa pan wa, leꞌa Judas cha utoꞌo nchaꞌa. Leꞌa ta wa gor teꞌal‑la.
JOH 13:31 Weꞌe leꞌa gor yá ukaꞌanla Judas, leꞌa Jesús cha ndab: —Leꞌa nat leꞌa be men iniꞌí xteꞌe siꞌil nak naꞌ, Xa Myak Men Ndoꞌ Gizhliyo. No ta ndun naꞌ wa uluu xteꞌe siꞌil nak Dios.
JOH 13:32 Leꞌa ta na nluu naꞌ ndoꞌ be men xteꞌe siꞌil nak Dios, leꞌa ta ndun Dios noga uluu xteꞌe siꞌil nak naꞌ. Leꞌa ta na gun xa wa yamer gak.
JOH 13:33 Bego nak cuent xiꞌín naꞌ, yá naꞌantapa kwen nchoꞌo naꞌ lat bega. Leꞌa naꞌ gáp ndoꞌ bega lak ndápla naꞌ ndoꞌ bexa judio nibeꞌe wa: leꞌa bego ukwaꞌan naꞌ, ná leꞌa bega lá gun gan no yaꞌ sa gaa naꞌ.
JOH 13:34 Leꞌa naꞌ nibeꞌe dub ta kub ndoꞌ bega: Bkweaꞌ ladna bega be ltsaꞌa bega. Lak nkweaꞌ lad naꞌ bego, no liga bkweaꞌ ladna bega be ltsaꞌa bega.
JOH 13:35 Tal leꞌa bega li ikweaꞌ ladna be ltsaꞌa na, leꞌa be men igondoꞌ leꞌa bega xmenka naꞌ.
JOH 13:36 Leꞌa Simón Pedr cha unabdiꞌizh ndoꞌ Jesús, ndab xa: —Señor, ¿pa yaꞌ ga zha? Leꞌa Jesús cha ukaꞌab ndab: —Leꞌa sa na yaa naꞌ, leꞌa lu lá yoo gan yaꞌno naꞌ nat. Parea gal zha leꞌa lu noka yaꞌ sa wa.
JOH 13:37 Leꞌa Pedr cha ndab: —Señor, ¿xtaꞌan lá yoo gan gaano naꞌ go nat zhaga? Leꞌa naꞌ usa leꞌaka leꞌa naꞌ gat sakndoꞌ ga.
JOH 13:38 Leꞌa Jesús cha ukaꞌab ndab: —¿Snika lu gat lu sakndoꞌ naꞌ zha? Leꞌa naꞌ gáp ndoꞌ lu leꞌa teꞌal ndee gor na biseata kwezh boy leꞌa lu mkwiꞌinla chon biaj ndab lu leꞌa lu lá nchandoꞌ naꞌ.
JOH 14:1 ’Lá yuꞌta ladna bega, ndi bgeꞌ ladna bega Dios no bgeꞌ ladna bega naꞌ.
JOH 14:2 Leꞌa ta lid Xus naꞌ ncho sian sa yoo bega. Leꞌa naꞌ naꞌanpa li gáp ndoꞌ bega tal leꞌa‑yá naꞌanpa li nak. Nat leꞌa naꞌ nsea usaxkwaꞌa sa yoo bega.
JOH 14:3 Leꞌa zha na nsea naꞌ cha usaxkwaꞌa naꞌ be sa yoo bega, weꞌe leꞌa naꞌ leꞌaka ilen yoꞌo bega, ndontsa no bega yoo sa yoꞌo naꞌ.
JOH 14:4 Leꞌa bego uniꞌíka pa nsea naꞌ no nchandoꞌka bega nes nchaꞌa sa wa.
JOH 14:5 Leꞌa Tomás cha ndab: —Señor, leꞌa besa lá iniꞌí pa yaꞌ go. ¿Ta weꞌe xteꞌe ndab go leꞌa besa nchandoꞌ nes nchaꞌa sa wa zha?
JOH 14:6 Leꞌa Jesús cha ukaꞌab ndab: —Leꞌa naꞌ nak nes no nak naꞌ gealngea no nak naꞌ gealnaban. Naꞌan ton ilayaꞌ wats Xus naꞌ, tal leꞌa xa naꞌanpa ndangea ladna naꞌ.
JOH 14:7 Tal leꞌa bego nchandoꞌ naꞌ, leꞌa bega sgondoꞌka no Xus naꞌ. Leꞌa nat idub ndoꞌ ndee leꞌa bega yá nchandoꞌ Xus naꞌ, no mnaꞌla bega xa.
JOH 14:8 Leꞌa Julip cha ndab: —Señor, blaꞌa ga inaꞌ besa Xus ga, ta weꞌetsa nlad besa.
JOH 14:9 Leꞌa Jesús cha ukaꞌab ndab: —Julip, ¿kwen nkeseano naꞌ bega, ná lá nchandoꞌ lu naꞌ zha? Leꞌa tal ton nchandoꞌ naꞌ, leꞌa xa wa no Xus naꞌ nchandoꞌ. ¿Xtaꞌan li ndab lu ula naꞌ inaꞌ bega Xus naꞌ zha?
JOH 14:10 ¿Lá ndangea ladna lu zha leꞌa naꞌ nsea Xus naꞌ dubtsa nak besa? Leꞌa ta ndadiꞌizh naꞌ naꞌanpa leꞌatsa naꞌ ndadiꞌizh. Leꞌa Xus naꞌ xa nsoꞌ wats naꞌ nsaꞌa ta li ndun naꞌ wa.
JOH 14:11 Bingea ladna bega ta ndáp naꞌ leꞌa naꞌ nsea Xus naꞌ dubtsa nak besa. Nati bingea ladna bega naꞌ ke ten be ta ndun naꞌ.
JOH 14:12 ’Leꞌa naꞌ gáp ndoꞌ bega leꞌa tal ton gungea ladna naꞌ, leꞌa xa wa sun ltsaꞌa be ta ndun naꞌ, no gast be ta mas siꞌil sun xa, leꞌa naꞌ nsea wats Xus naꞌ.
JOH 14:13 No itea be ta inab bega ndoꞌ Xus naꞌ ta na nak bega xmen naꞌ, leꞌa ta wa sunka naꞌ ndontsa iniꞌí be men xteꞌe siꞌil nak Xus naꞌ.
JOH 14:14 Guniꞌi xtaꞌan inab bega ta na nak bega xmen naꞌ, leꞌa naꞌ sunka ta wa.
JOH 14:15 ’Leꞌa tal bega ndankeaka naꞌ, leꞌa bega uxobgek ndoꞌ be ta nibeꞌe naꞌ.
JOH 14:16 Leꞌa naꞌ inaꞌab ndoꞌ Xus naꞌ, cha utuꞌub xa stub xa gakno bega no yoono xa bega idub tiemp.
JOH 14:17 Leꞌa ta wa Espíritu ten Dios xa na nluu gealngea. Leꞌa be men gizhliyo lá yoo gan yoo wats Espíritu wa, geal leꞌa bexa naꞌanpa naꞌ xa no ni lá nchandoꞌ bexa xa. Parea leꞌa bega nchandoꞌka Espíritu wa, geal leꞌa xa nsoꞌ wats bega no ikeseano xa bega idub tiemp.
JOH 14:18 ’Leꞌa naꞌ naꞌanpa ula yaꞌan bega cuent be meꞌed usaꞌab, leꞌa naꞌ ndi ilenkata.
JOH 14:19 Yamer gal zha leꞌa be men gizhliyo ndee yá naꞌantapa iniꞌí naꞌ, parea leꞌa bega sniꞌíꞌkagal naꞌ. Leꞌa naꞌ sbanka, ta weꞌe no bega ibankaga.
JOH 14:20 Leꞌa gal wizh iban naꞌ leꞌa bega iniꞌí leꞌa naꞌ nsea Xus naꞌ dubtsa nak besa, no leꞌa bega nsea naꞌ dubtsa nak beuna.
JOH 14:21 Tal ton goꞌón be ta inibeꞌe naꞌ, no uxobgek xa ndoꞌ be ta wa, leꞌa xa wa ta ugeaka ndankea naꞌ. Leꞌa tal ton yankea naꞌ, leꞌa Xus naꞌ no naꞌ ikweaꞌ ladna xa, no ulundoꞌ naꞌ ndoꞌ xa.
JOH 14:22 Weꞌe leꞌa Judas xa naꞌanpa nsaleaꞌ Iscariot cha ndab ndoꞌ Jesús: —Señor, ¿xtaꞌan li ndoꞌtsa besa ulundoꞌ ga zha, naꞌanpa ulundoꞌ ga ndoꞌ iteata be men zha?
JOH 14:23 Leꞌa Jesús cha ukaꞌab ndab: —Leꞌa tal ton yankeaka naꞌ, leꞌa xa wa sxobgek ndoꞌ ta ndáp naꞌ. Leꞌa Xus naꞌ cha ikweaꞌ ladna xa. Leꞌa naꞌ no Xus naꞌ ilen wats xa, cha yoono besa xa.
JOH 14:24 Ná leꞌa tal ton naꞌanpa yankea naꞌ, leꞌa xa wa lá uxobgek ndoꞌ ta ndáp naꞌ. Leꞌa be ta ndáp naꞌ ndoꞌ bega, leꞌa ta wa naꞌanpa ta naꞌtsa ndáp. Leꞌa ta wa ndi ta ndab Xus naꞌ xa mtuꞌub naꞌ.
JOH 14:25 ’Leꞌa be ta ndee ndáp naꞌ ndoꞌ bega nat bi nsoꞌno naꞌ bega.
JOH 14:26 Parea leꞌa Dios utuꞌub Espíritu ten na ndoꞌ bega, gakno xa bega no yoono xa bega sakndoꞌ naꞌ. Leꞌa xa wa uluu itea taꞌa ndoꞌ bega, no gun xa utseꞌa ladna bega itea be ta ndáp naꞌ ndoꞌ bega.
JOH 14:27 ’Leꞌa zha na uchan naꞌ bega, leꞌa naꞌ gun utsin yoo ladna bega. Leꞌa ta na li gun naꞌ wa naꞌanpa lak ta ndun be men nde ndoꞌ gizhliyo ndee. Ta weꞌe lá yuꞌ ladna bega no lá izheb bega.
JOH 14:28 Leꞌa bega yá mbiꞌínka ta ndáp naꞌ, leꞌa naꞌ nsea, no ilenkagal naꞌ wats bega. Leꞌa tal bega ta ugeaka ndankea naꞌ, leꞌa bega iten ladna geal ndáp naꞌ leꞌa naꞌ nsea wats Xus naꞌ, geal leꞌa Xus naꞌ mas nsak ndoꞌ naꞌ.
JOH 14:29 Nattsa ndáp naꞌ ta ndee ndoꞌ bega zha biseata gak‑a ndontsa gal gor gak‑a leꞌa bega mas gungea ladna naꞌ.
JOH 14:30 ’Leꞌa naꞌ naꞌanpa kwenta gudiꞌizhno bega, leꞌa maxuꞌu xa nibeꞌe ndoꞌ gizhliyo ndee nseala. Leꞌa xa wa naꞌanpa nibeꞌe naꞌ ndee.
JOH 14:31 Parea li nsabndoꞌ gak‑a, ndontsa iniꞌí be men nde ndoꞌ gizhliyo ndee leꞌa naꞌ ndankeaka Xus naꞌ no nxobgek naꞌ ndoꞌ ta nibeꞌe xa. ’Nat gosoꞌ bega, nchaꞌbe beuna.
JOH 15:1 ’Leꞌa naꞌ ndee leꞌa xa nak cuent dub ya uv. Leꞌa Xus naꞌ nak xa na nlaꞌach‑a.
JOH 15:2 Leꞌa tal ncho xos ya lá usaꞌa uv, leꞌa xa kabtoꞌog‑a. Parea tal leꞌa‑yá nsaꞌaka uv, leꞌa xa ndi utsambiꞌi‑yá ndontsa mas usaꞌa‑yá uv.
JOH 15:3 Leꞌa diꞌizh ndadiꞌizh naꞌ ndoꞌ bega leꞌa mbin msambiꞌi ladoꞌo bega.
JOH 15:4 Dubtsa gok bega no naꞌ, lak nak naꞌ dubtsa no bega. Leꞌa lak dub xos ya naꞌanpa nsob las ya wa lá yoo gan usaꞌa ngus, no liga leꞌa bega lá yoo gan gun lak nlad Dios, tal leꞌa bega naꞌanpa dubtsa gak beuna.
JOH 15:5 ’Leꞌa naꞌ cuent ya uv. Leꞌa bega cuent be xos‑a. Tal leꞌa bega dubtsa nak no naꞌ, leꞌa naꞌ noga dubtsa nak no bega. Weꞌe leꞌa bega sun sianpa be taꞌa nlad Dios. Parea tal leꞌa ncho bega naꞌanpa dubtsa nak no naꞌ, leꞌa bega wa lá isuꞌu gun lak nlad Dios.
JOH 15:6 Leꞌa tal ton naꞌanpa dubtsa nak no naꞌ, leꞌa xa wa cuent dub xos ya yabi dub lad, cha ibid‑a. Weꞌe ibeleꞌe‑yá, cha yolꞌ‑a ndoꞌ giꞌ.
JOH 15:7 ’Leꞌa tal leꞌa bega dubtsa nak no naꞌ, no gunka bega lak mluu naꞌ bega, unab bega guniꞌitsa xtaꞌan nlad bega ndoꞌ Dios, leꞌa Dios saꞌaka‑yá.
JOH 15:8 Tal leꞌa bega gun lak nlad Dios, leꞌa ta wa uluu leꞌa bega xmenka naꞌ, weꞌe iniꞌí be men xteꞌe siꞌil nak Xus naꞌ.
JOH 15:9 Leꞌa lak nkweaꞌ ladna Xus naꞌ naꞌ, no liga leꞌa naꞌ nkweaꞌ ladna bega. Lá yalad bega leꞌa naꞌ nkweaꞌ ladna bega.
JOH 15:10 Tal leꞌa bega gun be ta nibeꞌe naꞌ, weꞌe iniꞌí bega leꞌa naꞌ nkweaꞌka ladna bega. Lak ndun naꞌ itea be taꞌa nibeꞌe Xus naꞌ ta weꞌe uní naꞌ leꞌa xa nkweaꞌka ladna naꞌ.
JOH 15:11 Leꞌa ta wa ndáp naꞌ ndoꞌ bega ndontsa uzheꞌeb iten ladna bega lak nten lad naꞌ.
JOH 15:12 ’Nat ta ndee nibeꞌe naꞌ ndoꞌ bega: bkweaꞌ ladna bega be ltsaꞌa bega, lakta nkweaꞌ lad naꞌ bega.
JOH 15:13 Leꞌa ta na ndon leꞌa mas nluu leꞌa dub men nkweaꞌ ladna stub xa, leꞌa ta wa usaꞌa xa xa gat xa sakndoꞌ be amig ten xa.
JOH 15:14 Nat leꞌa bego nak be amig ten naꞌ, tal leꞌa bega gun ta nibeꞌe naꞌ.
JOH 15:15 Leꞌa naꞌ yá lá gápta leꞌa bega nak bexa ndun tiꞌin ndoꞌ naꞌ, leꞌa dub xa ndun tiꞌin ndoꞌ stub xa lá iniꞌí xtiꞌin ndun xa nibeꞌe xa. Nat ndi gáp naꞌ leꞌa bega be amig ten naꞌ, geal leꞌa naꞌ mbidiꞌizh ndoꞌ bega itea be ta ndab Xus naꞌ ndoꞌ naꞌ.
JOH 15:16 Leꞌa bega naꞌanpa leꞌa mti naꞌ, leꞌa naꞌ ndi leꞌa mti bega. No ntuꞌub naꞌ bega gun bega ta nlad Dios, ta naꞌanpa initndoꞌ. Weꞌe leꞌa itea ta inab bega ndoꞌ Dios Xus naꞌ ta na nak bega xmen naꞌ, leꞌa xa saꞌaka‑yá.
JOH 15:17 Nat nibeꞌe naꞌ ta ndee ndoꞌ bega: bkweaꞌ ladna bega be ltsaꞌa bega.
JOH 15:18 ’Tal leꞌa be men gizhliyo ixeeno ladna bega, btseꞌa ladna bega leꞌa bexa wa nedla ndoꞌ naꞌ ndee li nxee ladna, weꞌeta ndoꞌ bego.
JOH 15:19 Tal leꞌa bega nak lak nak be men gizhliyo ndee, leꞌa be men wa utsin sak ndoꞌ bega lak utsin nak bexa ndoꞌ be ltsaꞌa xa. Parea leꞌa bega naꞌanpa nak men gizhliyo, leꞌa naꞌ mti bega utoꞌo bega lat bexa wa. Ta weꞌe nxeeno ladna bexa bega.
JOH 15:20 Btseꞌa ladna bega ta ndáp naꞌ ndee: Leꞌa dub xa ndun tiꞌin naꞌanpa mas nsak ndoꞌ xa nibeꞌe xa wa. Lak ncho bexa li xela ndanno naꞌ, no liga xela gunno bexa bega. No lak ncho bexa nxobgek ndoꞌ diꞌizh ndáp naꞌ, no liga uxobgekga bexa ndoꞌ ta gab bega.
JOH 15:21 Leꞌa bexa wa li gunno bega ke na nak bega xmen naꞌ, geal leꞌa bexa lá nchandoꞌ xa mtuꞌub naꞌ.
JOH 15:22 ’Leꞌa tal naꞌ lá ngal ndoꞌ gizhliyo ndee no ni lá ngudiꞌizh naꞌ ndoꞌ bexa, leꞌa ta ugap ndun bexa wa naꞌanpa dub ke ndoꞌ Dios. Parea nat leꞌa bexa lá yoo gan gabbe leꞌa bexa lá iniꞌí ti ta ugap ndun bexa.
JOH 15:23 Leꞌa tal ton ixee ladna ndoꞌ naꞌ, leꞌa xa wa no ndoꞌ Xus naꞌ nxee ladna.
JOH 15:24 Leꞌa naꞌ mbin be uyon ndoꞌ gaꞌal bexa, ta ni dub men lá gun gan gun. Tal leꞌa bexa naꞌanpa iniꞌí be ta wa, leꞌa bexa naꞌanpa ndap ke ndoꞌ Dios. Parea nat li uniꞌí bexa ta ndun naꞌ wa, ná leꞌa bexa nxee ladna ndoꞌ naꞌ no ndoꞌ Xus naꞌ.
JOH 15:25 Leꞌa ta wa nak lak nkeaniꞌi ndoꞌ ley ten bexa, ndab‑a: “Leꞌa naꞌ naꞌan xtaꞌan ngunno bexa, ná leꞌa bexa mxeeno ladna naꞌ.”
JOH 15:26 ’Leꞌa gal gor na utuꞌub naꞌ xa gakno bega, leꞌa xa wa itoꞌo wats Xus naꞌ, cha gudiꞌizh xa ndoꞌ bega cuent ten naꞌ. Leꞌa xa wa Espíritu ten Dios, xa ndadiꞌizh sbeꞌen gealngea.
JOH 15:27 Leꞌa bega cha gudiꞌizh ndoꞌ be men cuent ten naꞌ, geal leꞌa bega leꞌa ukeseano naꞌ zha nedkata usaxan naꞌ mluu naꞌ be men.
JOH 16:1 ’Ndáp naꞌ ta ndee ndoꞌ bego ndontsa lá ulaꞌa bega ta ndangea ladna bega naꞌ.
JOH 16:2 Leꞌa be men kontuꞌub bega len be niꞌi sa nzhealbe bexa judio. No gal zha gut bexa bega, gunbeꞌe bexa leꞌa ta wa ta nsak ladna Dios.
JOH 16:3 Li gun bexa geal leꞌa bexa lá nchandoꞌ Xus naꞌ no ni naꞌ.
JOH 16:4 Leꞌa naꞌ ndáp be ta ndee ndoꞌ bega nat, ndontsa gal gor wa utseꞌa ladna bega leꞌa naꞌ yá mbidiꞌizhka‑yá ndoꞌ bega. ’Leꞌa naꞌ naꞌanpa ngáp ta ndee ndoꞌ bega zha nedta, geal leꞌa naꞌ bi leꞌa ukeseano bega.
JOH 16:5 Parea nat leꞌa naꞌ nsea ndoꞌ Xa mtuꞌub naꞌ, ná ni dub bega lá nabdiꞌizh pa yaa naꞌ.
JOH 16:6 Ndi uzheꞌeb uban ncho ladna bega, geal ta na ndáp naꞌ be ta ndee.
JOH 16:7 Parea leꞌa naꞌ gáp mas wen yoo bega tal leꞌa naꞌ yaa. Leꞌa tal naꞌ lá yaa leꞌa Espíritu ten Dios xa gakno bega wa naꞌanpa ilen wats bega. Ná leꞌa tsoꞌo na yaa naꞌ leꞌa naꞌ cha utuꞌub xa wats bega.
JOH 16:8 Leꞌa zha ilen xa leꞌa xa gab ná ton ndap ke, no ton naꞌanpa ndap ke, no ton utsaksi Dios.
JOH 16:9 Leꞌa bexa ndap ke wa, leꞌa ta wa be men lá ndangea ladna naꞌ.
JOH 16:10 Leꞌa xa naꞌanpa ndap ke wa, leꞌa ta wa naꞌ, leꞌa naꞌ nsea wats Xus naꞌ no yá lá iniꞌíta bega naꞌ.
JOH 16:11 Leꞌa xa utsaksi Dios wa, leꞌa ta wa maxuꞌu xa nibeꞌe ndoꞌ gizhliyo ndee, leꞌa Dios yá mbinbeꞌela leꞌa xa li gunno xa wa.
JOH 16:12 ’Uzhebpa sianta be taꞌa nlad naꞌ gáp naꞌ ndoꞌ bega, parea leꞌa bega lá uxik yakbeꞌena‑yá.
JOH 16:13 Ná leꞌa zha na ilen Espíritu ten Dios xa na nluu gealngea, leꞌa xa wa gun yakbeꞌena bega idub gealngea ten Dios. Leꞌa xa wa naꞌanpa gudiꞌizh ta nitsa xa, leꞌa xa ndi gudiꞌizh be ta goꞌón xa. No gudiꞌizh xa be ta tiꞌi yoo.
JOH 16:14 No uluu xa xteꞌe siꞌil nak naꞌ, geal leꞌa xa gudiꞌizh cuent ten naꞌ ndoꞌ bega.
JOH 16:15 Leꞌa itea be ta ndap Xus naꞌ leꞌa ta wa ta ten naꞌ. Ta weꞌe ndáp naꞌ leꞌa cuent ten naꞌ leꞌa Espíritu wa gudiꞌizh ndoꞌ bega.
JOH 16:16 ’Yamer gal zha leꞌa bega yá lá iniꞌíta naꞌ. Parea gal stapla wizh leꞌa bega iniꞌígal naꞌ, geal leꞌa naꞌ yaa wats Xus naꞌ.
JOH 16:17 Weꞌe leꞌa ncho be xmen Jesús cha ndab ndoꞌ be ltsaꞌa na: —¿Xtaꞌan gab ta lbaꞌa ndab xa ndee zha? Ndab xa yamer gal zha leꞌa beuna lá iniꞌíta xa, ná gal stapla wizh leꞌa beuna iniꞌígal xa, geal leꞌa xa yaꞌ wats Xus xa.
JOH 16:18 ¿Xtaꞌan gab “yamer gal zha” wa zha? Lá nyakbeꞌena beuna xtaꞌan ndab xa.
JOH 16:19 Ná leꞌa Jesús mgenna leꞌa bexa nlad inabdiꞌizh, cha ndab Jesús: —Leꞌa bega nabdiꞌizh ndoꞌ ltsaꞌa bega cuent ten ta ndáp naꞌ, leꞌa yamer gal zha leꞌa bega lá iniꞌíta naꞌ, parea gal stapla wizh leꞌa bega iniꞌígal naꞌ.
JOH 16:20 Leꞌa naꞌ gáp ndoꞌ bego leꞌa bega goꞌon no uban yoo ladna bega, parea leꞌa be men gizhliyo iten ladnabe. Mas li uban ncho ladna bega, parea leꞌa ta wa yak ndi ta iten ladna bega.
JOH 16:21 Leꞌa ta wa cuent dub xagots gap meꞌed uzhebpa gealkweaꞌ niꞌí xa geal leꞌa gor gap xa meꞌed wa ngol‑la. Parea gor na ngol‑la medoꞌo leꞌa xa yalad be gealkweaꞌ wa tant nten ladna xa leꞌa ndoꞌ gizhliyo ulanseagal stub meꞌed.
JOH 16:22 No liga nat leꞌa bega uban ncho ladna, parea leꞌa naꞌ inígal bega. Leꞌa gor wa leꞌa bega uzhebpa iten ladna, gast naꞌan ton gun gan uban yoo ladna bega.
JOH 16:23 ’Leꞌa gal wizh wa leꞌa bega yá lá inabdiꞌizhta ndoꞌ naꞌ. Leꞌa naꞌ gáp ndoꞌ bega leꞌa iteanak ta inab bega nak xmenka naꞌ ndoꞌ Xus naꞌ, leꞌa xa saꞌaka‑yá.
JOH 16:24 Gast nat naꞌan xtaꞌan nab bega ndoꞌ Xus naꞌ ta na nak bega xmen naꞌ. Parea unab bega‑yá, leꞌa Xus naꞌ saꞌaka‑yá ndontsa itenka ladna bega.
JOH 16:25 ’Leꞌa be taꞌa ndadiꞌizh naꞌ wa sbeꞌen ta nsaktabeꞌe naꞌ. Parea gal gor na yá naꞌantapa li gudiꞌizh naꞌ, leꞌa naꞌ ndi gaꞌal gudiꞌizh ndoꞌ bega cuent ten Xus naꞌ.
JOH 16:26 Leꞌa gal zha weꞌe leꞌa naꞌ naꞌantapa leꞌa inaꞌab ndoꞌ Xus naꞌ sakndoꞌ bega. Leꞌa bega ndi inab ta nkiꞌin bega ndoꞌ Xus naꞌ ta na nak bega xmen naꞌ.
JOH 16:27 Leꞌa Xus naꞌ leꞌa nkweaꞌ ladna bega, geal leꞌa bega ndankea naꞌ no ndangea ladna bega leꞌa naꞌ watska Dios utoꞌo.
JOH 16:28 Leꞌa naꞌ wats Xus naꞌ utoꞌo, ndal naꞌ ndoꞌ gizhliyo ndee. Nat leꞌa naꞌ ikaꞌan ndoꞌ gizhliyo ndee, cha nsea naꞌ wats Xus naꞌ.
JOH 16:29 Leꞌa be xmen Jesús cha ndab: —Nat leꞌa go uzhebpa uyaꞌal ndadiꞌizh. Yá naꞌantapa nsaktabeꞌe ga be ta ndadiꞌizh ga.
JOH 16:30 Nat uniꞌí besa leꞌa go uniꞌí iteanak be taꞌa, naꞌanpa nkiꞌin inabdiꞌizh besa ndoꞌ ga. Ta weꞌe ndangea ladna besa leꞌa go watska Dios utoꞌo.
JOH 16:31 Leꞌa Jesús cha ukaꞌab ndab: —¿Nat zha yá ndangeaka ladna bega naꞌ?
JOH 16:32 Blaꞌach bega leꞌa gal dub gor leꞌa bega iteꞌachso itea lad, ulaꞌa bega nab naꞌ. Parea leꞌa naꞌ naꞌanpa nab yansoꞌ, leꞌa Xus naꞌ nokaga nsoꞌ wats naꞌ.
JOH 16:33 Leꞌa be ta ndee mbidiꞌizh naꞌ ndontsa wen yoo ladna bega ta na nak bega xmen naꞌ. Leꞌa ndoꞌ gizhliyo ndee sianpa gealkweaꞌ iniꞌí bega. Parea lá yuꞌ ladna bega, leꞌa naꞌ mbinla gan ndoꞌ itea be ta ncho ndoꞌ gizhliyo ndee.
JOH 17:1 Leꞌa tsoꞌo na li mbidiꞌizh Jesús, cha mwiꞌi xa gibeꞌa, ndab xa: —Xus naꞌ, leꞌa nat yá ngol gor uluu ga ndoꞌ be men xteꞌe siꞌil nak naꞌ, ndontsa no naꞌ uluuga xteꞌe siꞌil nak go.
JOH 17:2 Leꞌa go msaꞌa ta nibeꞌe naꞌ ndoꞌ itea be men, ndontsa usa naꞌ gealnaban nunk lá idub ndoꞌ bexa na msaꞌa go ndoꞌ naꞌ.
JOH 17:3 Leꞌa bexa wa ndap gealnaban nunk lá idub, geal leꞌa bexa nchandoꞌ ga, xa ndon leꞌakama nak Dios; no nchandoꞌ bexa naꞌ Jesucristo, xa na mtuꞌub ga.
JOH 17:4 ’Leꞌa naꞌ mluu xteꞌe siꞌil nak go ndoꞌ be men nde ndoꞌ gizhliyo ndee, no msandoꞌ naꞌ tiꞌin msaꞌa go gun naꞌ.
JOH 17:5 Xus naꞌ, leꞌa zha biseata yoo gizhliyo ndee, leꞌa naꞌ nak xa ndon leꞌa juert lak nak go. Nat blaꞌa ga likagal yak naꞌ wats ga stub biaj.
JOH 17:6 ’Leꞌa go mti bexa ndee ndoꞌ gizhliyo, no msaꞌa ga bexa ndoꞌ naꞌ. Cha mluu naꞌ xteꞌe nak go ndoꞌ bexa. Leꞌa bexa ndee nakla be xmen ga, cha msaꞌa ga bexa ndoꞌ naꞌ. No nxobgek bexa ndoꞌ diꞌizh ten ga.
JOH 17:7 Nat uniꞌí bexa leꞌa itea be taꞌa ndák naꞌ leꞌa ta wa ta msaꞌaka go.
JOH 17:8 Leꞌa be ta ndab ga ndoꞌ naꞌ wa leꞌa ta wa cha mbidiꞌizh naꞌ ndoꞌ bexa, cha mbingea ladna bexa‑yá. No nat uniꞌíka bexa leꞌa naꞌ watska go utoꞌo, no ndangea ladna bexa leꞌa go leꞌa mtuꞌub naꞌ.
JOH 17:9 ’Leꞌa nat leꞌa naꞌ naꞌab gakno ga bexa ndee. Naꞌanpa naꞌab naꞌ gakno ga be men gizhliyo, leꞌa naꞌ ndi naꞌab gakno ga bexa msaꞌaka go ndoꞌ naꞌ, geal leꞌa bexa wa xmenka go.
JOH 17:10 Leꞌa itea be xmen naꞌ, leꞌa bexa wa xmenka go. No liga leꞌa itea be xmen ga, leꞌa bexa wa xmenkaga naꞌ. Li nluu bexa xteꞌe siꞌil nak naꞌ.
JOH 17:11 ’Leꞌa naꞌ yá naꞌantapa yoo ndoꞌ gizhliyo ndee. Leꞌa bexa ndee bi yookata ndoꞌ gizhliyo, ná leꞌa naꞌ ndee ndi ilen wats go. Xus naꞌ, leꞌa go dubkama nak Dios, nat leꞌa juers ten ga blaꞌach ga bexa na msaꞌa ga ndoꞌ naꞌ, ndontsa dubtsa gak bexa lak dubtsa nak unaꞌ.
JOH 17:12 Leꞌa zha na nkeseano naꞌ bexa ndoꞌ gizhliyo ndee, leꞌa naꞌ nlach bexa nsea juers ten leaꞌ go. Leꞌa itea bexa na msaꞌa ga ndoꞌ naꞌ mlach naꞌ. Ni dub bexa lá isabgix, ndi nabtsa Judas usabgix, ndontsa gak cumplir lak nkeaniꞌi diꞌizh ten ga.
JOH 17:13 ’Parea nat leꞌa naꞌ nseal wats go. Ta ndee ndáp naꞌ nat bi nsoꞌ naꞌ ndoꞌ gizhliyo ndee, ndontsa iten ladna bexa ndee lak nten lad naꞌ.
JOH 17:14 Leꞌa naꞌ mbidiꞌizh be diꞌizh ten ga ndoꞌ bexa ndee, parea leꞌa be men gizhliyo nxeeno ladna bexa, geal leꞌa bexa ndee yá naꞌantapa bexa gizhliyo, lak leꞌa naꞌ naꞌanpa xa gizhliyo ndee.
JOH 17:15 Leꞌa naꞌ naꞌanpa naꞌab koꞌo ga bexa ndee ndoꞌ gizhliyo, ndi naꞌab naꞌ ulaꞌach ga bexa ndoꞌ maxuꞌu.
JOH 17:16 Leꞌa lak naꞌanpa ndun naꞌ lak ndun be men gizhliyo ndee, no liga leꞌa bexa ndee naꞌanpa ndun lak ndun bexa wa.
JOH 17:17 Btsambiꞌi ga ladoꞌo bexa juers ten diꞌizh ten ga, leꞌa diꞌizh wa gealngeaka.
JOH 17:18 Leꞌa lak mtuꞌub ga naꞌ ndoꞌ gizhliyo ndee, no liga ntuꞌub naꞌ bexa ndee ndoꞌ be men gizhliyo.
JOH 17:19 Leꞌa ke ten bexa ndee ndun naꞌ sbeꞌen ta nlad go, ndontsa no bexa gun sbeꞌen ta nladtsa go wa, ta na nchandoꞌ bexa gealngea wa.
JOH 17:20 ’Leꞌa naꞌ naꞌanpa naꞌab gakno ga nabtsa bexa ndee, no naꞌab naꞌ gakno ga bexa tiꞌi gungea ladna naꞌ gor na goꞌón bexa ta gudiꞌizh bexa ndee.
JOH 17:21 Gokno ga bexa wa ndontsa dubtsa gak iteanak bexa, lak dubtsa nak naꞌ nsea go Xus naꞌ. No dubtsa gak bexa nsea beuna, ndontsa gungea ladna be men gizhliyo leꞌa go leꞌaka mtuꞌub naꞌ.
JOH 17:22 Lak msaꞌa ga juers ndoꞌ naꞌ, no liga msa naꞌ juers ndoꞌ bexa, ndontsa dubtsa gak bexa, lak leꞌa go no naꞌ dubtsa nak.
JOH 17:23 Leꞌa naꞌ nsea bexa ndee dubtsa nak, no go nsea naꞌ dubtsa nak, ndontsa itea beuna dubtsa gak. Ta weꞌe iniꞌí be men leꞌa go leꞌaka mtuꞌub naꞌ, no iniꞌí bexa leꞌa go nkweaꞌ ladna bexa ndee lak nkweaꞌ ladna go naꞌ.
JOH 17:24 ’Xus naꞌ, leꞌa naꞌ nlad leꞌa sa yoo naꞌ itea bexa na msaꞌa ga ndoꞌ naꞌ wa yoo wats naꞌ, ndontsa iniꞌí bexa juers msaꞌa go ndoꞌ naꞌ, geal leꞌa go nkweaꞌ ladna naꞌ gast zha biseata gakndeꞌe gizhliyo.
JOH 17:25 Xus naꞌ xa ndon leꞌa wen, leꞌa be men gizhliyo naꞌanpa nchandoꞌ ga, parea leꞌa naꞌ nchandoꞌ ga no uniꞌíka bexa ndee leꞌa go leꞌa mtuꞌub naꞌ.
JOH 17:26 Leꞌa naꞌ mluu ndoꞌ bexa ndee xteꞌe nak go, no uluuta naꞌ ta wa ndoꞌ bexa, ndontsa ikweaꞌ ladna bexa be ltsaꞌa bexa lak nkweaꞌ ladna go naꞌ, no dubtsa gak naꞌ nsea bexa ndee.
JOH 18:1 Leꞌa gor na li mtayadiꞌizhno Jesús Dios, cha utoꞌo xa nchaꞌano xa be xmen xa stub toꞌo yoꞌow nsaleaꞌ Cedrón, sa nde dub lenya. Cha uyote bexa sa wa.
JOH 18:2 Leꞌa Judas xa na yun cuent Jesús no nchandoꞌ sa wa, geal leꞌa Jesús sianla biaj mbiꞌi be xmen na sa wa.
JOH 18:3 Ngol gor leꞌa Judas nchaꞌanola pla be soldad no stapla bexa nlaꞌach niꞌi ten Dios, bexa na mtuꞌub be uleꞌay nibeꞌe nsea bexa fariseo. Leꞌa bexa wa noꞌo be xeꞌa aceit no xeꞌa ged no spad.
JOH 18:4 Ná leꞌa Jesús yá uniꞌíka xtaꞌan yasea xa, ta weꞌe utoꞌo xa ndab xa ndoꞌ bexa wa: —¿Ton nkwaꞌan bega?
JOH 18:5 Leꞌa bexa wa cha ukaꞌab ndab: —Leꞌa besa nkwaꞌan Jesús xa gezh Nazaret. Leꞌa Jesús cha ndab: —Leꞌa ta wa naꞌ. Leꞌa Judas xa na nseayun cuent Jesús no nsoꞌ lat bexa wa.
JOH 18:6 Leꞌa gor na li ndab Jesús: “Leꞌa ta wa naꞌ”, leꞌa bexa wa cha msatatsoꞌobe, cha ulayat bexa ndoꞌ yo.
JOH 18:7 Leꞌa Jesús cha unabdiꞌizhgal ndab: —¿Ton nkwaꞌan bega? Leꞌa bexa cha ndabgal: —Nkwaꞌan besa Jesús xa Nazaret.
JOH 18:8 Leꞌa Jesús cha ndab: —Leꞌa naꞌ ndápka leꞌa ta wa naꞌ. Leꞌa tal bega naꞌ ndee nkwaꞌan, blaꞌa bega yaꞌ bexa ndee.
JOH 18:9 Li ndab Jesús ndontsa itid‑a lak ndab leꞌaka Jesús ndoꞌ Xus xa, leꞌa bexa na msaꞌa Dios ndoꞌ Jesús, ni dub bexa lá isabgix.
JOH 18:10 Weꞌe leꞌa Simón Pedr cha uloꞌo spad ten na, cha ulobtoꞌog xa nchaꞌ xa nsaleaꞌ Malco, ta lad gaꞌal. Leꞌa Malco wa dub xa ndun tiꞌin ndoꞌ uleꞌay ndon leꞌa nsak.
JOH 18:11 Leꞌa Jesús cha ndab ndoꞌ Pedr: —Ulochaꞌaw spad ten lu. ¿Lá iniꞌí lu zha leꞌa naꞌ nsabndoꞌ itiꞌid be gealkweaꞌ ndab Xus naꞌ itiꞌid naꞌ wa?
JOH 18:12 Weꞌe leꞌa be soldad no xa nibeꞌe ten bexa wa no bexa nlaꞌach niꞌi ten Dios cha usen bexa Jesús no mxi bexa yaꞌa xa.
JOH 18:13 Cha mbiꞌi bexa Jesús ndon ned ndoꞌ xa nsaleaꞌ Anás, xuszhaꞌap Caifás, xa nak uleꞌay ndon leꞌa nsak tiemp weꞌe.
JOH 18:14 Leꞌa Caifás wa xa na ndabka ndoꞌ bexa judio mas wen gat dubtsa men sakndoꞌ itea bexa.
JOH 18:15 Leꞌa Simón Pedr cha usankea tsoꞌo Jesús. Leꞌa stub xmen Jesús nchaꞌano Pedr nchandoꞌ xa nak uleꞌay ndon leꞌa nsak, cha uyoꞌono xa Jesús tale ten niꞌi ten uleꞌay wa.
JOH 18:16 Parea leꞌa Pedr myansoꞌ tsoꞌo juer toꞌo puert wa. Weꞌe leꞌa stub xmen Jesús xa na nchandoꞌ uleꞌay wa, cha utoꞌo mbidiꞌizhno xagots nlaꞌach toꞌo puert wa, ndontsa no Pedr uyote.
JOH 18:17 Leꞌa xa nlaꞌach toꞌo puert wa cha ndab ndoꞌ Pedr: —¿Lid no ga dub xmen xabgiꞌi baꞌ zha? Leꞌa Pedr cha ndab: —Leꞌa naꞌ naꞌanpa no xa wa.
JOH 18:18 Leꞌa zha wa kwal, ta weꞌe leꞌa bexa ndun tiꞌin ndoꞌ uleꞌay wa no bexa nlaꞌach niꞌi ten Dios mkwaꞌa giꞌ, cha ndeubizh bexa. Leꞌa lat bexa wa no Pedr nsoꞌubizh.
JOH 18:19 Leꞌa Anás xa ngok uleꞌay ndon leꞌa nsak wa cha unabdiꞌizh ndoꞌ Jesús ná ton be xmen Jesús, no xtaꞌan mluu Jesús be men.
JOH 18:20 Leꞌa Jesús cha ukaꞌab ndab: —Leꞌa ta mluu naꞌ wa mbidiꞌizh naꞌ ndoꞌ gaꞌal be men len be niꞌi sa ndaꞌutsid bexa wa no tale ten niꞌi ten Dios, sa nzhealbe iteanak bexa judio. Naꞌanpa xgaꞌach nluu naꞌ be men.
JOH 18:21 ¿Ta weꞌe xtaꞌan nabdiꞌizh ga ndoꞌ naꞌ xtaꞌan mluu naꞌ? Ndi nsabndoꞌ inabdiꞌizh ga ndoꞌ bexa mbiꞌín ta mluu naꞌ wa ná xtaꞌan mbidiꞌizh naꞌ ndoꞌ bexa. Leꞌa bexa uniꞌíka‑yá.
JOH 18:22 Leꞌa gor na li ndab Jesús, leꞌa dub men nsoꞌ sa wa cha utichyaꞌa ndoꞌ Jesús, leꞌa xa dub xa nlaꞌach niꞌi ten Dios. Cha ndab xa ndoꞌ Jesús: —¡Naꞌanpa li nsabndoꞌ ikaꞌab lu ndoꞌ uleꞌay ndon leꞌa nsak baꞌ!
JOH 18:23 Leꞌa Jesús cha ndab: —Tal leꞌa naꞌ ugap ndáp, gud ga ná xtaꞌan lid leꞌa ndáp naꞌ. Ná tal naꞌ leꞌakaga ndáp, ¿xtaꞌan ngi utichyaꞌa ga ndoꞌ naꞌ zha?
JOH 18:24 Weꞌe litsa nchii Jesús leꞌa Anás mtuꞌub xa ndoꞌ Caifás, xa nak uleꞌay ndon leꞌa nsak.
JOH 18:25 Ndalen li nsoꞌubizhnota Pedr bexa wa, leꞌa dub xa cha unabdiꞌizh ndoꞌ Pedr ndab: —¿Lid no go xmen xabgiꞌi baꞌ zha? Leꞌa Pedr cha ndabgal: —Leꞌa naꞌ naꞌanpa xmen xa baꞌ.
JOH 18:26 Leꞌa sa wa no dub xa ndun tiꞌin ndoꞌ uleꞌay ndon leꞌa nsak wa nsoꞌ, dub ltsaꞌa xa na ulobtoꞌog Pedr nchaꞌ na wa. Cha ndab xa ndoꞌ Pedr: —¿Naꞌanpa go ta uní naꞌ lenya wa no xabgiꞌi baꞌ zha?
JOH 18:27 Leꞌa Pedr cha ndabgal stub biaj: —Leꞌa naꞌ naꞌanpa leꞌa ta wa. Leꞌa gor wa leꞌa dub boy cha utezh.
JOH 18:28 Leꞌa gor yá nsayatla xeꞌa, cha utoꞌono bexa Jesús ta lid Caifás, mbiꞌi bexa Jesús ta lid Pilat, sa nsaleaꞌ pretorio. Parea leꞌa bexa nibeꞌe ten bexa judio naꞌanpa yatebe len niꞌi wa, leꞌa tal leꞌa bexa yate sa wa leꞌa bexa gak bzhiꞌik ndoꞌ Dios, cha lá yoo gan gaw bexa ta ten ujest Pascua.
JOH 18:29 Ta weꞌe leꞌa Pilat ndi utoꞌo gast sa ndebe bexa, cha ndab xa ndoꞌ bexa wa: —¿Xtaꞌan nsake bega xa ndee zha?
JOH 18:30 Leꞌa bexa wa cha ukaꞌab ndab: —¡Tal leꞌa xa baꞌ naꞌanpa xa ugap, leꞌa besa naꞌanpa yun cuent xa ndoꞌ ga!
JOH 18:31 Weꞌe leꞌa Pilat cha ndab: —Biꞌi bega xa. Cha binno bega xa lak nibeꞌe ley ten bega. Leꞌa bexa wa cha ndabbe ndoꞌ Pilat: —Leꞌa bega xa Roma naꞌanpa ulaꞌa gut besa dub men.
JOH 18:32 Li ngok cumplir ta mbidiꞌizh Jesús xteꞌe gat Jesús ndoꞌ cruz.
JOH 18:33 Weꞌe leꞌa Pilat cha myoꞌogal len lid na, cha utezh xa Jesús, cha ndab xa: —¿Lu nak xa nibeꞌe ten bexa judio zha?
JOH 18:34 Leꞌa Jesús cha ukaꞌab ndab: —¿Gotsa mbinbeꞌe ta wa zha? ¿Nati stub men mbidiꞌizh‑a ndoꞌ ga?
JOH 18:35 Leꞌa Pilat cha ndab: —Leꞌa naꞌ ndee naꞌanpa xa judio. Leꞌa be ltsaꞌa lu xa judio no be uleꞌay nibeꞌe wa myun cuent lu ndoꞌ naꞌ. ¿Xtaꞌan mbin lu zha?
JOH 18:36 Leꞌa Jesús cha ukaꞌab ndab: —Leꞌa naꞌ naꞌanpa nibeꞌe lak nibeꞌe bexa ndoꞌ gizhliyo ndee. Leꞌa tal naꞌ li nibeꞌe, leꞌa be xmen naꞌ leꞌa kuyobe ndontsa naꞌanpa yak cuent naꞌ ndoꞌ yaꞌa bexa judio. Parea leꞌa naꞌ naꞌanpa li nibeꞌe.
JOH 18:37 Leꞌa Pilat cha ndab: —¿Nat zha xa nibeꞌeka lu? Leꞌa Jesús cha ukaꞌab ndab: —Leꞌa go ndab leꞌa naꞌ nak xa nibeꞌe wa. Leꞌa naꞌ ngol, no ndal naꞌ ndoꞌ gizhliyo ndee ndontsa gudiꞌizh naꞌ gealngea ndoꞌ be men. Leꞌa tal ton nkwaꞌan gealngea, leꞌa xa wa isakyoꞌón ta ndáp naꞌ.
JOH 18:38 Leꞌa Pilat cha ndab: —¿Xtaꞌan gealngea wa zha? Tsoꞌo na li ndab Pilat, cha utoꞌogal xa sa ndebe be men wa, cha ndab xa: —Leꞌa naꞌ lá ngaizheal ni dub ke ten xa ndee.
JOH 18:39 Leꞌa lak nak costumbr ten bega itea liꞌin zha ndal ujest Pascua leꞌa naꞌ ngo dub men litgiꞌib dub xa inab bega. ¿Nat nlad bega ula naꞌ xa nak xa nibeꞌe ten bega xa judio zha?
JOH 18:40 Weꞌe leꞌa iteagal bexa ugeꞌ ndab: —¡Naꞌanpa ulaꞌa ga xa baꞌ! ¡Bgoꞌo ga ndi Barrabás! Leꞌa Barrabás wa dub waꞌan.
JOH 19:1 Weꞌe leꞌa Pilat cha unibeꞌe goꞌo be soldad Jesús len niꞌi wa, cha kin bexa Jesús.
JOH 19:2 No mbindeꞌe be soldad dub ta rued xos yagich usob gek Jesús cuent coron. No mgak bexa Jesús dub lad koꞌol, ta konch ugats.
JOH 19:3 Cha usalad mbinno be soldad Jesús, ugeꞌ ndab bexa: —¡Siꞌil nak xa nibeꞌe ten bexa judio! No utichyaꞌa bexa ndoꞌ Jesús.
JOH 19:4 Weꞌe leꞌa Pilat cha utoꞌogal stub biaj, cha ndab xa ndoꞌ be men wa: —Bwiꞌi bega, leꞌa naꞌ ko xa sa ndee, ndontsa yakbeꞌena bega leꞌa naꞌ ni dub ke ten xa lá ngaizheal.
JOH 19:5 Leꞌa Jesús cha utoꞌo, nsob coron yagich wa gek xa, no lad konch ugats wa nak xa. Leꞌa Pilat cha ndab ndoꞌ be men: —Nat bwiꞌi bega xa.
JOH 19:6 Leꞌa gor na uniꞌí be uleꞌay nibeꞌe no bexa nlaꞌach niꞌi ten Dios wa Jesús, cha ugeꞌ ndab bexa: —¡Ikea xa ndoꞌ cruz! ¡Ikea xa ndoꞌ cruz! Leꞌa Pilat cha ndab: —Biꞌi bega xa, cha bkeꞌa bega xa ndoꞌ cruz, leꞌa naꞌ ni dub ke ten xa lá ngaizheal.
JOH 19:7 Leꞌa bexa wa cha ndabbe: —Leꞌa ley ten besa ndab nsabndoꞌ gatka xa, leꞌa xa nkwiꞌin ndab xa leꞌa xa nak Xin Dios.
JOH 19:8 Leꞌa gor na mbiꞌín Pilat ta wa, leꞌa Pilat mas mzheb.
JOH 19:9 Cha myoꞌogal xa len lid xa, ndab xa ndoꞌ Jesús: —¿Pa utoꞌo lu zha? Parea leꞌa Jesús naꞌanpa ikaꞌab.
JOH 19:10 Leꞌa Pilat cha ndab: —¿Naꞌanpa ikaꞌab lu ndoꞌ naꞌ ndee zha? ¿Lá iniꞌí lu zha leꞌa naꞌ sak inibeꞌe ikea lu ndoꞌ cruz, no sak ndi ula naꞌ lu?
JOH 19:11 Leꞌa Jesús cha ukaꞌab ndab: —Leꞌa tal Dios lá usaꞌa diꞌizh li gun ga, leꞌa go naꞌan xtaꞌan gun gan gunno naꞌ. Ta weꞌe leꞌa xa na myun cuent naꞌ ndoꞌ ga mas uzheꞌeb ndap ke ndoꞌ lak ndap go.
JOH 19:12 Leꞌa gor weꞌe leꞌa Pilat nlad ulaꞌa Jesús, parea leꞌa bexa judio ugeꞌ ndab ndoꞌ Pilat: —Leꞌa tal go ulaꞌa xa baꞌ, leꞌa go naꞌanpa nak amig ten César xa nibeꞌe. Leꞌa tal ton gab leꞌa nak xa nibeꞌe, leꞌa xa wa xela níꞌi ndoꞌ César.
JOH 19:13 Weꞌe leꞌa gor na mbiꞌín Pilat ta wa, cha mbiꞌi xa Jesús sa nsaleaꞌ Tale Geꞌ. Leꞌa sa wa nsaleaꞌ Gabata diꞌizh hebreo. Cha usob Pilat sa nibeꞌe xa sa wa, gab xa ná xteꞌe gunno xa Jesús.
JOH 19:14 Leꞌa ta wa gawizh dub wizh lak geꞌatsa gal ujest Pascua. Cha ndab Pilat ndoꞌ be men kwaꞌad wa: —¡Bwiꞌi bega leꞌa xa ndee xa nibeꞌe ten bega!
JOH 19:15 Ná leꞌa bexa wa ugeꞌ ndabbe: —¡Gat xa! ¡Gat xa! ¡Ikea xa ndoꞌ cruz! Leꞌa Pilat cha ndab: —¿Ukeꞌa naꞌ xa nibeꞌe ten bega ndoꞌ cruz zha? Leꞌa be uleꞌay nibeꞌe cha ndabbe: —¡Nab César nak xa nibeꞌe ten besa!
JOH 19:16 Weꞌe leꞌa Pilat cha ndab ikea Jesús ndoꞌ cruz lak nlad bexa. Cha usen be soldad Jesús, cha mbiꞌi bexa xa.
JOH 19:17 Leꞌa Jesús cha nchaꞌano cruz ten na gast sa nsaleaꞌ Gólgota. Leꞌa ta wa dub diꞌizh hebreo gab‑a tit gek men.
JOH 19:18 Cha mkeꞌa bexa Jesús ndoꞌ cruz. No stop men mkeꞌa bexa ndoꞌ cruz dub lad gaꞌga wats Jesús.
JOH 19:19 No mkeꞌa Pilat dub letr ta ikea gek cruz ten Jesús. Leꞌa ta wa ndab: “JESÚS XA NAZARET, XA NIBEꞌE TEN BEXA JUDIO.”
JOH 19:20 Leꞌa ta wa nkeaniꞌi diꞌizh hebreo no diꞌizh griego no diꞌizh latín. Kwaꞌad bexa judio uniꞌí xteꞌe ndab letr wa, geal leꞌa sa nkea Jesús ndoꞌ cruz wa gax nde Jerusalén.
JOH 19:21 Ná leꞌa be uleꞌay nibeꞌe ten bexa judio ngwaꞌyab ndoꞌ Pilat: —Lá nsabndoꞌ gab ta wa “Xa nibeꞌe ten bexa judio.” Ndi nsabndoꞌ gab‑a “Xa na ndab leꞌa nak xa nibeꞌe ten bexa judio.”
JOH 19:22 Ná leꞌa Pilat cha ukaꞌab ndab: —Lak nkea‑yá, litsa yaꞌan‑a.
JOH 19:23 Leꞌa tsoꞌo na mkeꞌa dap be soldad Jesús ndoꞌ cruz, cha ukaꞌa kadga dub bexa wa dub xab Jesús. Cha usen bexa lad koꞌol ndak Jesús, leꞌa ná wa naꞌanpa ngeꞌal.
JOH 19:24 Cha ndab bexa ndoꞌ be ltsaꞌa xa: —Naꞌanpa itsaw beuna ta ndee, ndi koꞌo beuna dub suert ndontsa iniꞌí beuna ná ton ikaꞌa‑yá. Li ngok‑a lak nkeaniꞌi diꞌizh ten Dios, ndab‑a: Mtseꞌa bexa be xab naꞌ, no uloꞌo bexa suert ná ton ikaꞌa‑yá.
JOH 19:25 Leꞌa wats cruz ten Jesús wa nsoꞌ xnaꞌa Jesús no beal xa, no Marí xagots ten Cleofas, no Marí xa gezh Magdala.
JOH 19:26 Leꞌa gor na uniꞌí Jesús xnaꞌa na junt nsoꞌ wats dub xmen Jesús, xa na leꞌa Jesús uzheꞌeb nkweaꞌ ladna, cha ndab Jesús ndoꞌ xnaꞌa na: —Naa, leꞌa xa baꞌ ulaꞌach ga cuent dub xin ga nat.
JOH 19:27 Cha no ndab Jesús ndoꞌ xmen xa wa: —Nat ulaꞌach lu xa baꞌ cuent xnaꞌa lu. Leꞌa idub ndoꞌ wa leꞌa xmen Jesús wa cha mlaꞌach xnaꞌa Jesús ta lidka na.
JOH 19:28 Ngol tsoꞌo wa leꞌa Jesús uniꞌíka leꞌa xa mbinla itea be ta nlad Dios gun xa. Cha ndab xa: —Leꞌa naꞌ ndak ladna. Leꞌa xa li ndab ndontsa gak‑a lak nkeaniꞌi diꞌizh ten Dios.
JOH 19:29 Leꞌa sa wa nsoꞌ dub vas ncho vin ulaꞌ len‑a. Cha mgazh bexa dub bleꞌa lad xiꞌil len‑a. Cha msob xa ta wa gek dub xos ya hisopo, cha uxits bexa ta wa toꞌo Jesús.
JOH 19:30 Leꞌa gor na ngu Jesús ta wa, cha ndab xa: —Nat leꞌa itea be tiꞌin ndal naꞌ ngokla cumplir. Cha ubixkea gen xa, cha myun xa cuent gealnaban ten xa ndoꞌ Dios, cha ngut xa.
JOH 19:31 Leꞌa ta wa wizh lak geꞌatsa gal ujest Pascua, ta weꞌe leꞌa bexa judio lá nlad litsa nkea be men wa ndoꞌ be cruz gal wizh uneꞌe bexa wa, leꞌa wizh wa uzhebpa dub wizh nsak. Ta weꞌe unab bexa ndoꞌ Pilat inibeꞌe Pilat kiꞌich be soldad xoꞌo bexa li nkea ndoꞌ cruz, ndontsa mas uxax gat bexa, cha igeꞌe bexa ndoꞌ cruz wizh wa.
JOH 19:32 Leꞌa be soldad wa cha ulenbe, cha utiꞌich bexa xoꞌo dub xa wa. Cha liga mbinno bexa stubga xa nkea ndoꞌ cruz wa.
JOH 19:33 Ná leꞌa gor ngol bexa sa nkea Jesús, leꞌa bexa mnaꞌla leꞌa Jesús ngutla. Cha naꞌanpa igiꞌich bexa xoꞌo Jesús.
JOH 19:34 Parea leꞌa dub soldad wa cha utib dub lanza wats len Jesús. Zha leꞌa sa wa ulen ten no nits.
JOH 19:35 Leꞌa naꞌ ndee uní ta wa no sbeꞌen gealngea ndadiꞌizh naꞌ. Ta weꞌe nkeꞌa naꞌ‑yá, ndontsa no bega gungea ladna Jesús.
JOH 19:36 Leꞌa be ta wa li uyoꞌo lak nkeaniꞌi diꞌizh ten Dios, ndab‑a: “Ni dub tit las xa lá ngach.”
JOH 19:37 No lak nkeaniꞌiga diꞌizh ten Dios: “Leꞌa be men iwiꞌi ndoꞌ xa na utib bexa lanza las na wa.”
JOH 19:38 Uyoꞌo dub xabgiꞌi nsaleaꞌ Kosé xa gezh Arimatea, dub xa xgaꞌachtsa ndangea ladna Jesús, geal leꞌa xa nzheb ndoꞌ bexa nibeꞌe ten bexa judio. Leꞌa tsoꞌo na ngut Jesús leꞌa Kosé wa ngwaꞌinab Jesús xa ngut wa ndoꞌ Pilat. Leꞌa Pilat cha ndab goꞌo Kosé Jesús, cha ngwaꞌ Kosé cha mbiꞌi xa Jesús.
JOH 19:39 No Nicodemo xa ngwaꞌinaꞌ Jesús dub gor teꞌal noꞌo xa pa dub galntiꞌi kil ta uxeꞌe, noch‑a mirra nsea áloe.
JOH 19:40 Cha uxeꞌe bexa Jesús ndoꞌ cruz, cha mtixko bexa xa wa be lad lino no be ta uxeꞌe wa, lak nkaꞌach bexa judio be ltsaꞌa na.
JOH 19:41 Leꞌa sa li ukea Jesús ndoꞌ cruz wa nde gax dub lenya, sa nde dub baꞌa cuent geꞌloꞌo. Leꞌa ta wa dub sa ni dub men gol gaꞌach.
JOH 19:42 Leꞌa gor wa yamer gal wizh ten ujest Pascua ten bexa judio, ta weꞌe baꞌa weꞌetsa mkaꞌach bexa Jesús, leꞌa ta wa gax nsob sa wa.
JOH 20:1 Leꞌa ngol wizh ned ten sman, uzhebpa tempran ndon bi ukaw naꞌ, leꞌa Marí xa Magdala nchaꞌa sa nsob baꞌa mgaꞌach Jesús. Leꞌa gor ulayaꞌ xa uniꞌíla xa leꞌa geꞌ nsoꞌntsaw toꞌo baꞌa wa myoꞌobla.
JOH 20:2 Weꞌe cha utoꞌo xa karrel, ngwaꞌyab xa‑yá ndoꞌ Simón Pedr no ndoꞌ stub xmen Jesús, xa na leꞌa Jesús uzheꞌeb nkweaꞌ ladna. Ndab Marí ndoꞌ bexa wa: —Leꞌa men mbiwaꞌan Jesús len baꞌa wa. Leꞌa besa lá iniꞌí pa ngwaꞌulaꞌa bexa xa.
JOH 20:3 Leꞌa Pedr no stub xmen Jesús wa cha utoꞌo nchaꞌbe sa nsob baꞌa wa.
JOH 20:4 Leꞌa bexa wa karrel nchaꞌbe, parea leꞌa stub xa wa mas karrel nchaꞌa ndoꞌ Pedr, cha ned xa ulayaꞌ toꞌo baꞌa.
JOH 20:5 Cha mwiꞌiko xa len baꞌa, uniꞌí xa be lad lino myuꞌudyoꞌo Jesús, parea lá yoꞌo xa len wa.
JOH 20:6 Weꞌe cha ulen Simón Pedr, cha uyoꞌo xa len baꞌa wa, cha uniꞌí xa be lad wa.
JOH 20:7 No uniꞌí xa leꞌa lad ubixyoꞌo gek Jesús myuꞌudla, naꞌanpa junt nde‑yá no be lad ubixyoꞌo idub Jesús wa.
JOH 20:8 Weꞌe leꞌa stub xmen Jesús, xa na li ned ulayaꞌ wa, cha no uyoꞌo. Uniꞌí xa be taꞌa wa, cha mbingea ladna xa leꞌa Jesús mbanka.
JOH 20:9 Leꞌa gor weꞌe leꞌa bexa bi lá nyakbeꞌena lak nkeaniꞌi diꞌizh ten Dios, leꞌa Cristo nsabndoꞌka iban ndoꞌ gealgut.
JOH 20:10 Leꞌa itop bexa wa cha nseaꞌbe ta niꞌi ndencho bexa.
JOH 20:11 Leꞌa Marí xa Magdala cha myansoꞌ wats baꞌa wa ndoꞌon xa, cha mwiꞌiko xa len baꞌa wa.
JOH 20:12 Cha uniꞌí xa top angel ten Dios nak be lad nagud. Dub xa nsob sa ngot gek Jesús, leꞌa stub xa nsob sa ute yaꞌaxoꞌo Jesús.
JOH 20:13 Leꞌa be angel wa cha unabdiꞌizh ndoꞌ Marí ndab bexa: —Xagots, ¿xtaꞌan ndoꞌon lu zha? Leꞌa Marí cha ndab: —Leꞌa be men mbiwaꞌan Señor Jesús. Leꞌa naꞌ lá iní pa ngwaꞌulaꞌa bexa xa.
JOH 20:14 Tsoꞌo na li ndab Marí, cha mgeaksoꞌ xa mwiꞌi xa stub lad. Cha uniꞌí xa Jesús nsoꞌ sa wa, ná leꞌa xa lá igondoꞌ ti leꞌa Jesús ta wa.
JOH 20:15 Leꞌa Jesús cha ndab: —Xagots, ¿xtaꞌan ndoꞌon lu zha? ¿Ton nkwaꞌan lu zha? Leꞌa Marí mbinbeꞌe leꞌa ta wa xa nlaꞌach lenya wa, cha ndab Marí: —Señor, tal ga leꞌa mbiꞌi xa, gud go ná pa ngwaꞌulaꞌa ga xa, ndontsa gayoo naꞌ xa.
JOH 20:16 Leꞌa Jesús cha ndab: —¡Marí! Leꞌa xa cha mgeaksoꞌ mwiꞌi ndoꞌ Jesús, cha ndab xa: —¡Raboni! —leꞌa ta wa dub diꞌizh hebreo gab‑a Mech.
JOH 20:17 Leꞌa Jesús cha ndab: —Lá ugal lu naꞌ, leꞌa naꞌ biseata ikea wats Xus naꞌ. Ndi byaꞌyab ndoꞌ be xmen naꞌ leꞌa naꞌ yaa wats Xus naꞌ xa nak Dios ten naꞌ. Leꞌa ta wa leꞌakaga Xus bega no Dios ten bega.
JOH 20:18 Leꞌa Marí cha nseaꞌyab ndoꞌ be xmen Jesús leꞌa xa uniꞌí Jesús, no mbidiꞌizh xa ta ndab Jesús ndoꞌ xa.
JOH 20:19 Leꞌa ngol gor na ulaꞌ teꞌal bi leꞌa wizh ned ten sman wa, leꞌa be xmen Jesús mzhealbe len dub niꞌi. Leꞌa toꞌo niꞌi wa nsoꞌnyaw, geal leꞌa bexa nzheb ndoꞌ bexa judio nibeꞌe. Weꞌe leꞌa Jesús cha mlundoꞌ nsoꞌ tlaw bexa, cha ndab xa: —¡Dios gun wen yoo ladna bega!
JOH 20:20 Tsoꞌo na li ndab Jesús, cha mluu xa be yaꞌa xa no wats len xa. Cha uzhebpa mten ladna bexa gor uniꞌí bexa leꞌa ta wa Jesús.
JOH 20:21 Leꞌa Jesús cha ndabgal: —Dios gun wen yoo ladna bega. Leꞌa lak mtuꞌub Xus naꞌ naꞌ, no liga utuꞌub naꞌ bega gun bega tiꞌin ten naꞌ.
JOH 20:22 Cha mlabi xa sa nde bexa, cha ndab xa: —Ulaꞌa bega yoo Espíritu ten Dios len ladoꞌo bega.
JOH 20:23 Tal leꞌa bega gungeꞌ ladna ke ten dub men, leꞌa Dios noga sungeꞌ ladna ta wa. No liga tal leꞌa bega lá gungeꞌ ladna ke ten dub men, leꞌa Dios noga naꞌanpa gungeꞌ ladna ta wa.
JOH 20:24 Leꞌa Tomás xa no nsaleaꞌ Dídimo nak dub tibtop xmen Jesús, parea leꞌa xa naꞌanpa no nsoꞌno bexa wa gor na mlundoꞌ Jesús.
JOH 20:25 Leꞌa gor na ulen Tomás leꞌa be xmen Jesús cha ndab ndoꞌ Tomás: —Leꞌa besa uniꞌí Jesús. Leꞌa Tomás cha ndab: —Gast ned iní naꞌ be sa ngwaꞌas clav yaꞌa xa no ukikoꞌo naꞌ ngutsyaꞌa naꞌ sa wa, no ukikoꞌo naꞌ yaꞌa naꞌ wats len xa, lá ndangea lad naꞌ leꞌa xa mban.
JOH 20:26 Ngol sxoꞌon wizh leꞌa bexa ndebegal len niꞌi wa no Tomás. Leꞌa toꞌo niꞌi wa nsoꞌnyaw, parea leꞌa Jesús cha uyatsoꞌ tlaw bexa, cha ndab xa: —Dios gun wen yoo ladna bega.
JOH 20:27 Cha ndab Jesús ndoꞌ Tomás: —Bwiꞌi ndoꞌ yaꞌa naꞌ, no ulo ngutsyaꞌa lu sa ndee. No ulo yaꞌa la wats len naꞌ ndee. Yá naꞌantapa gunbeꞌe lu leꞌa naꞌ ngut, ndi bingea ladna leꞌa naꞌ mbangal.
JOH 20:28 Weꞌe leꞌa Tomás cha ukaꞌab ndab: —¡Go nak xa nibeꞌe naꞌ, no Dios ten naꞌ!
JOH 20:29 Cha ndab Jesús: —Tomás, geal uniꞌí lu naꞌ, ta weꞌe mbingea ladna lu leꞌa naꞌ mbankagal. Uzhebpa wen yoo ladna bexa gungea ladna naꞌ, maska lá iniꞌí bexa naꞌ.
JOH 20:30 No sianta be uyon mbin Jesús ndoꞌ gaꞌal be xmen xa, ta na naꞌanpa ikea ndoꞌ libr ndee.
JOH 20:31 Parea leꞌa be taꞌa nkea sa ndee, nkea‑yá ndontsa gungea ladna bega leꞌa Jesús leꞌa nak Cristo, Xin Dios. Tal leꞌa bega li gungea ladna ta wa, leꞌa bega gap gealnaban ndoꞌ Dios.
JOH 21:1 Ngol tsoꞌo wa leꞌa Jesús mlundoꞌgal ndoꞌ be xmen na toꞌo lagun Tiberias. Leꞌa xa lndeꞌe mlundoꞌ:
JOH 21:2 Leꞌa dub wizh leꞌa pla be xmen Jesús junt ndebe. Leꞌa ta wa Simón Pedr, no Tomás xa nsaleaꞌ Dídimo, no Natanael xa gezh Caná ten Galilea, no itop be xin Zebedeo, nsea stop be xmen Jesús.
JOH 21:3 Leꞌa Simón Pedr cha ndab ndoꞌ bexa wa: —Leꞌa naꞌ ndasen mbeal. Leꞌa bexa cha ndab: —Leꞌa besa no isea. Cha nchaꞌbe bexa, cha ukea bexa ndoꞌ dub barco. Parea leꞌa idub teꞌal wa ni dub mbeal lá isen bexa.
JOH 21:4 Leꞌa ngol gor na yá nsayat xeꞌa, leꞌa be xmen Jesús wa uniꞌí Jesús nsoꞌ toꞌo nits wa, parea leꞌa bexa lá iniꞌí ti leꞌa Jesús ta wa.
JOH 21:5 Leꞌa Jesús cha ndab ndoꞌ bexa: —Bego usa byux, ¿lid usen bega mbeal zha? Leꞌa bexa cha ukaꞌab ndab: —Leꞌa besa ni dub mbeal lá isen.
JOH 21:6 Cha ndab Jesús: —Btsaꞌab bega red baꞌ wats lad gaꞌal barco baꞌ, cha isen bega mbeal. Weꞌe leꞌa bexa cha li mbin, cha uzheꞌeb sian mbeal usen red wa, gast lá uxik bexa koꞌo bexa red len nits wa.
JOH 21:7 Leꞌa dub xmen Jesús, xa na leꞌa Jesús uzheꞌeb nkweaꞌ ladna, cha ndab ndoꞌ Pedr: —¡Leꞌa ta baꞌ Jesús! Leꞌa gor na mbiꞌín Simón Pedr leꞌa ta wa Jesús, cha ngok xa xab xa, ta nbix xa, ta na ulate xa gor usen xa mbeal. Cha nchaꞌa xa len nits, nchaꞌa xa sa nsoꞌ Jesús.
JOH 21:8 Leꞌa stapla be xmen Jesús wa cha myoꞌo barco wa toꞌo nits. Litsa ngobxazh bexa red na lita sian mbeal ncho len na wa. Leꞌa ta wa pa dub gayoꞌotsa metr sit ndoꞌ nits wa.
JOH 21:9 Leꞌa gor na yá ulaꞌ bexa ndoꞌ barco toꞌo nits wa, leꞌa bexa uniꞌí leꞌa dub mbeal nchoꞌob ndoꞌ bkuꞌu, no dub pan nchoꞌob sa wa.
JOH 21:10 Leꞌa Jesús cha ndab ndoꞌ bexa: —Utseano bega stapla be mbeal usen bega baꞌ.
JOH 21:11 Leꞌa Simón Pedr cha ukea ndoꞌ barco, cha udobxazh xa red gast ndoꞌ yo bid. Leꞌa len red wa ncho dub gayoꞌo itol ncho chon mbeal, bema ubiꞌi, parea ni lá isaw‑a mas lita sian mbeal ncho len‑a.
JOH 21:12 Leꞌa Jesús cha ndab: —Utseadaw bega. Leꞌa ni dub bexa lá inabdiꞌizh ndoꞌ xa ná ton xa, leꞌa bexa uniꞌí leꞌa‑yá Jesús.
JOH 21:13 Weꞌe leꞌa Jesús cha usen pan wa, cha mtseꞌa xa‑yá ndoꞌ bexa. No liga mtseꞌa xa mbeal wa.
JOH 21:14 Leꞌa ta ndee biaj yon mlundoꞌ Jesús ndoꞌ be xmen na, tsoꞌo na li mban xa ndoꞌ gealgut.
JOH 21:15 Leꞌa gor na mtayaw bexa, leꞌa Jesús cha unabdiꞌizh ndoꞌ Simón Pedr, ndab xa: —Simón xin Jonás, ¿ndankea lu naꞌ mas ndoꞌ lak ndankea bexa ndee naꞌ zha? Leꞌa Pedr cha ukaꞌab ndab: —Señor, go uniꞌíka leꞌa naꞌ ndankeaka go. Leꞌa Jesús cha ndab: —Blaꞌach be borreg ten naꞌ.
JOH 21:16 Cha ndabgal Jesús biaj itop: —Simón xin Jonás, ¿ndankeaka lu naꞌ zha? Leꞌa Pedr cha ndabgal: —Señor, go uniꞌíka leꞌa naꞌ ndankeaka go. Cha ndab Jesús: —Blaꞌach be borreg ten naꞌ.
JOH 21:17 Cha ndabgal Jesús biaj yon: —Simón xin Jonás, ¿ndankeaka lu naꞌ zha? Leꞌa Pedr cha uban myoꞌo ladna geal biaj yon li unabdiꞌizh Jesús naga ndankeaka Pedr Jesús. Cha ndab Pedr: —Señor, leꞌa go uniꞌí itea taꞌa. Uniꞌíka go leꞌa naꞌ ndankeaka go. Cha ndab Jesús: —Blaꞌach be borreg ten naꞌ zhaga.
JOH 21:18 Leꞌa naꞌ gáp leꞌa zha ben lu, leꞌa lu ndak xab na no nchaꞌa lu tal pa nlad lu. Parea leꞌa zha gak gox lu, leꞌa lu ndi utiꞌil be yaꞌa lu no xaꞌaga men ugak xab la. Cha goꞌo xa lu sa na lá nlad lu yaꞌ lu.
JOH 21:19 Leꞌa ta li ndab Jesús wa gab ná xteꞌe mod na gat Pedr, ta uluu xteꞌe juert nak Dios. Cha ndab Jesús ndoꞌ Pedr: —Usankea tsoꞌo naꞌ.
JOH 21:20 Leꞌa Pedr cha mgeaksoꞌ mwiꞌi, leꞌa stub xmen Jesús nchankea tsoꞌo Pedr no tsoꞌo Jesús. Leꞌa ta wa xa na leꞌa Jesús uzheꞌeb nkweaꞌ ladna, xa na li nsob wats Jesús zha na lult udaw xcheꞌe bexa, gor unabdiꞌizh xa ndoꞌ Jesús ná ton yun cuent Jesús.
JOH 21:21 Leꞌa gor uniꞌí Pedr xa wa, cha unabdiꞌizh Pedr ndoꞌ Jesús, ndab xa: —Señor, ¿leꞌa xa baꞌ zha xtaꞌan itid?
JOH 21:22 Leꞌa Jesús cha ndab: —Tal leꞌa naꞌ nlad leꞌa xa baꞌ lbaꞌatsa nban gast zha ilengal naꞌ, naꞌanpa yuꞌ ladna lu ta wa. Lu usankeatsa tsoꞌo naꞌ.
JOH 21:23 Leꞌa ta na li ndab Jesús, leꞌa ta wa mgen lat be xmen Jesús leꞌa xmen Jesús wa lá gat. Parea leꞌa Jesús naꞌanpa ngab leꞌa xa wa lá gat. Leꞌa Jesús ndi ndab: “Tal leꞌa naꞌ nlad leꞌa xa baꞌ lbaꞌatsa nban gast zha ilengal naꞌ, naꞌanpa yuꞌ ladna lu ta wa.”
JOH 21:24 Leꞌa xmen Jesús wa xa ndadiꞌizh be ta ndee ndoꞌ be men, no mkeꞌa xa‑yá ndoꞌ git. Leꞌa besa uniꞌíka leꞌa ta ndadiꞌizh xa ta ugeaka.
JOH 21:25 No uzhebpa sianta be taꞌa mbin Jesús. Leꞌa naꞌ nsak tal leꞌa be men ukeꞌa itea be ta wa, leꞌa idub ndoꞌ gizhliyo lá ugal yoo be libr wa.
ACT 1:1 Leꞌa go Teófilo, leꞌa git ned mkeꞌa naꞌ ndoꞌ go wa, mkeꞌa naꞌ cuent ten itea be ta mbin Jesús no be ta mluu xa,
ACT 1:2 gast wizh mkea xa gibeꞌa. Leꞌa wizh wa mbidiꞌizh xa ndoꞌ bexa na mti xa, ndab xa xteꞌe nsabndoꞌ gun bexa, lak msaꞌa Espíritu ten Dios gab xa‑yá ndoꞌ bexa.
ACT 1:3 Tsoꞌo na ngut Jesús, dub top gaꞌal wizh mlundoꞌ xa ndoꞌ bexa wa sian biaj, ndontsa uniꞌíka bexa leꞌa xa mbanka ndoꞌ gealgut. No mbidiꞌizh xa ndoꞌ bexa wa ná xteꞌe nibeꞌe Dios be men.
ACT 1:4 Leꞌa dub wizh wa gor na nsoꞌno xa bexa wa, ndab xa ndoꞌ bexa: —Lá ikaꞌan bega gezh Jerusalén ndee. Ndi kweas bega gast usaꞌa Tad Dios ta ndab xa usaꞌa xa, lakka mbidiꞌizh naꞌ gun xa.
ACT 1:5 Leꞌa Juan ulaleaꞌ be men no nits, parea yamer gal dub wizh leꞌa bega italeaꞌ nsea Espíritu ten Dios.
ACT 1:6 Weꞌe leꞌa bexa nde wats Jesús cha unabdiꞌizh, ndab bexa: —Señor, ¿nat zha gun ga gan leꞌa beuna xa Israel inibeꞌegal nacion ten beuna ndee?
ACT 1:7 Leꞌa Jesús cha ukaꞌab ndab: —Leꞌa bego lá nsabndoꞌ iniꞌí pol yoo ta wa ni xá wizh na‑yá, ta na gun Dios zha nlad xa.
ACT 1:8 Ná leꞌa Dios usaꞌa Espíritu ten na ndoꞌ bega, cha gap bega juers gudiꞌizh bega ndoꞌ be men itea be ta mbin naꞌ. Li gudiꞌizh bega ndoꞌ be men Jerusalén ndee no idub Judea ndee no Samaria no gast idub ndoꞌ gizhliyo.
ACT 1:9 Tsoꞌo na li ndab Jesús ta wa, cha mkea xa gibeꞌa, myoꞌo xa lat xkaw ndalen ndewiꞌi bexa wa. Cha lá iniꞌíta bexa xa.
ACT 1:10 Leꞌa gor na bi li ndewiꞌi bexa gibeꞌa sa nseaꞌ Jesús wa, weꞌe leꞌa top xabgiꞌi nak lad nagud cha mlundoꞌ sa wa,
ACT 1:11 ndab bexa: —Bego xa Galilea, ¿xtaꞌan lbaꞌata ndewiꞌi bego gibeꞌa baꞌ zha? Leꞌa Jesús xa mtoꞌo lat bego nseaꞌ gibeꞌa baꞌ wa, leꞌa xa baꞌ leꞌaka ilen stub biaj lakka uniꞌí bega nseaꞌ xa.
ACT 1:12 Weꞌe leꞌa bexa cha mkaꞌan Bet Olivo wa, cha myach bexa Jerusalén. Leꞌa bet wa nde pa dub kilómetro gax wats Jerusalén.
ACT 1:13 Gor ulayaꞌ bexa Jerusalén, cha ukea bexa cuart nde gaꞌap gek niꞌi sa ndencho bexa. Leꞌa ta wa Pedr no Jacob no Juan no Ndres no Julip no Tomás no Bartol no Mateo no Jacob xin Alfeo no Simón xa partid Zelote no Judas wit Jacob.
ACT 1:14 Leꞌa bexa wa nsea pla be xagots nsea Marí xnaꞌa Jesús nsea be wit Jesús, sian biaj nzhealbe bexa ndadiꞌizhno bexa Dios.
ACT 1:15 Leꞌa dub wizh leꞌa dub gayoꞌo ncho gaꞌal bexa ndangea ladna Jesús wa nzhealbe. Weꞌe leꞌa Pedr cha ngwasoꞌ lat bexa, cha ndab xa:
ACT 1:16 —Bego nak beuna xmen Jesús, juerska ngok cumplir ta ndab diꞌizh ten Dios, ta uníꞌi David sakndoꞌ Espíritu ten Dios cuent ten Judas, xa usaned ndoꞌ be men usen Jesús.
ACT 1:17 Leꞌa Judas wa no uyoꞌo cuent be ltsaꞌa besa no mbin xa ltsaꞌa tiꞌin ndun besa.
ACT 1:18 (Leꞌa med na ukaꞌa Judas myun xa cuent Jesús wa usiꞌi bexa dub bleꞌa yo. Leꞌa sa wa cha msobgek Judas gast ngoch len xa.
ACT 1:19 Leꞌa be men ncho Jerusalén, gor na mbiꞌín bexa ta wa, cha msaleaꞌ bexa yo wa Acéldama diꞌizh ten bexa, dub diꞌizh gab Yo Ten.)
ACT 1:20 Cha no ndab Pedr: —Leꞌa libr ten Salmos nkeaniꞌi ndab‑a: Yaꞌan nab lid xa, yá naꞌanta ton yoo len‑a. No ndab‑a: Stub xa gun tiꞌin ndun xa wa.
ACT 1:21 ’Nat leꞌa beuna nsabndoꞌ uti dub xabgiꞌi lat bexa na ukeseano besa idub ukeseano Jesús besa,
ACT 1:22 gast zha ulaleaꞌ Juan Jesús no gast zha nseaꞌ Jesús gibeꞌa. Leꞌa xa wa no yate lat besa, ndontsa no xa gudiꞌizh ndoꞌ be men leꞌa Jesús mbanka ndoꞌ gealgut.
ACT 1:23 Weꞌe cha mluu bexa top xabgiꞌi, dub xa nsaleaꞌ Kosé Barsabás no nsaleaꞌ xa Justo, no stub xa nsaleaꞌ Matí.
ACT 1:24 Cha mbidiꞌizhno bexa Dios ndab bexa: —Tad Dios, leꞌa go nchandoꞌ ladoꞌo itea be men. Nat bluu go ndoꞌ besa ná ton ndoꞌ itop bexa ndee mti ga.
ACT 1:25 Leꞌa xa wa yak dub xa gun tiꞌin ten go lak ndun besa ndee, gak xa dub apostol ten ga. Leꞌa ta wa ta mlaꞌa Judas ke na mbin xa ta ugap wa, cha nchaꞌa Judas sa nsabndoꞌ yaꞌ xa castig wa.
ACT 1:26 Cha uloꞌo bexa suert, weꞌe leꞌa Matí leꞌa ngol uyote xa lat stibdub bexa nak apostol wa.
ACT 2:1 Ngol wizh Pentecostés dub ujest ten bexa judio, leꞌa itea be xmen Jesús mzhealbe len dub niꞌi.
ACT 2:2 Ngol gor mbiꞌín bexa dub ruid ulen gibeꞌa cuent dub mbi siꞌil, cha uyoꞌo‑yá idub len niꞌi sa ndebe bexa.
ACT 2:3 Weꞌe cha mlundoꞌ ta cuent bealꞌ, ulaꞌ‑yá gek kadga dub bexa.
ACT 2:4 Cha uyoꞌo Espíritu ten Dios len ladoꞌo bexa. Cha usaxan bexa ndadiꞌizh bexa stubga diꞌizh, laktsa msaꞌa Espíritu ten Dios níꞌi bexa‑yá.
ACT 2:5 Leꞌa zha wa leꞌa Jerusalén ndencho kwaꞌad bexa judio ndankea Dios, bexa ulen itea lad ndoꞌ gizhliyo.
ACT 2:6 Leꞌa gor na mgen ruid siꞌil wa, cha mzhealbe kwaꞌadpa bexa sa wa. Ni lá iniꞌí bexa xteꞌe gun bexa gor na ndoꞌón bexa leꞌa bexa nde len niꞌi wa ndadiꞌizh be diꞌizh ten kadga dub be men wa.
ACT 2:7 Ngwatenaꞌ bexa no ngwanseana bexa, ndab bexa ndoꞌ ltsaꞌa xa: —Bwiꞌi bego, ¿naꞌanpa bexa Galilea itea bexa lndeꞌe ndadiꞌizh ndee zha?
ACT 2:8 ¿Tixa ndoꞌón beuna ndadiꞌizh bexa diꞌizh ten kadga dub beuna zhaga?
ACT 2:9 Leꞌa sa ndee nde men utoꞌo Partia no Media no Elam no Mesopotamia no Judea no Capadocia no Ponto no Asia
ACT 2:10 no Frigia no Panfilia no Egipto no be gezh nde mas sitxá ndoꞌ Cirene ten Africa. No ncho bexa Roma sa ndee, ncho xa wa bexa judio no ncho bexa wa tiꞌi mbingea ladna Dios ten beuna xa judio.
ACT 2:11 No ncho bexa utoꞌo Creta nsea Arabia. Ná leꞌa itea beuna ndoꞌón ndadiꞌizh bexa baꞌ be ta siꞌil ndun Dios kadga diꞌizh ten dubga beuna.
ACT 2:12 Weꞌe leꞌa bexa wa lá iniꞌí xteꞌe gun bexa tant ndanseana bexa, cha unabdiꞌizh bexa ndoꞌ be ltsaꞌa xa, ndab bexa: —¿Xtaꞌanxága ta ndee zhaga?
ACT 2:13 Ná ncho bexa ndun usalad ndab: —Bexa baꞌ ga tant nsudna.
ACT 2:14 Weꞌe leꞌa Pedr cha usoꞌ, no stibdub bexa wa. Cha ugeꞌ ndab xa: —Bego nak beuna xa judio no iteata bego na ndencho Jerusalén ndee, biꞌín bega ta ndee, blaꞌach bega xtaꞌan gáp naꞌ.
ACT 2:15 Leꞌa besa ndee naꞌanpa nsudna lak ndanbeꞌe bega, leꞌa nat pen gor nkea ugeꞌa tempran.
ACT 2:16 Ná leꞌa ta ndee nak lak ta ndab Joel polta sakndoꞌ Dios,
ACT 2:17 ndab Dios: Leꞌa gal be wizh lult leꞌa naꞌ uzhebpa usa Espíritu ten naꞌ ndoꞌ itea be men. Leꞌa be xinbgiꞌi bega no be xingots bega gudiꞌizh sakndoꞌ naꞌ. Leꞌa bexa ben ncho lat bega iniꞌí be ta ulu naꞌ. Leꞌa bexa gox ucheꞌa ladna be ta usa naꞌ.
ACT 2:18 Gal be wizh wa leꞌa naꞌ uzhebpa usa Espíritu ten naꞌ ndoꞌ be xabgiꞌi no ndoꞌ be xagots, bexa ndun tiꞌin ten naꞌ, cha gudiꞌizh bexa sakndoꞌ naꞌ.
ACT 2:19 Leꞌa naꞌ ulu sian be taꞌa yanseana be men, be ta gibeꞌa no be ta ndoꞌ gizhliyo; iniꞌí bexa ten, no bealꞌ, no xkaw zhen.
ACT 2:20 Leꞌa wizh lá usuta xeꞌa; leꞌa mbeꞌe inaꞌ cuent ten. Leꞌa tsoꞌo wa gal wizh uzhebpa wen ten Dios Xa Nibeꞌe.
ACT 2:21 Leꞌa tal ton ukwaꞌan Dios Xa Nibeꞌe, leꞌa xa wa gap gealnaban.
ACT 2:22 Cha no ndab Pedr: —Blaꞌach bego men Israel ta gáp naꞌ ndee. Leꞌa bego uniꞌíka leꞌa Jesús xa gezh Nazaret juers ten Dios mbin sian be uyon no sian be ta ngwanseana be men. Leꞌa ta wa mluꞌu leꞌa Dios leꞌaka mtuꞌub xa.
ACT 2:23 No myak cuent xa ndoꞌ yaꞌa bego lakka uniꞌí Dios tiemp polta. Leꞌa bego usen xa, cha myun bega cuent xa ndoꞌ yaꞌa be men ugap, cha mbit bexa wa xa ndoꞌ cruz.
ACT 2:24 Ná leꞌa Dios mxiste xa, mban xa ndoꞌ gealgut, leꞌa gealgut lá ngun gan ndoꞌ xa.
ACT 2:25 Leꞌa polta leꞌa David ndab cuent ten Jesús: Leꞌa naꞌ idub tiemp mnaꞌ Dios Xa Nibeꞌe wa wats naꞌ. Naꞌan xtaꞌan gasea naꞌ, leꞌa xa wa nsoꞌ wats naꞌ.
ACT 2:26 Ta weꞌe uzheꞌeb nten ladna ladoꞌo naꞌ no nten lad naꞌ ndadiꞌizh naꞌ. No uníka naꞌ leꞌa Dios ulaꞌach naꞌ.
ACT 2:27 Leꞌa go lá ulaꞌa naꞌ yan naꞌ lat bexa ngut. No ni lá ulaꞌa ga gazhaꞌa las naꞌ, leꞌa naꞌ nak xa mti go.
ACT 2:28 Mluu ga nes ten ga ndoꞌ naꞌ, sa ncho gealnaban. No uzheꞌeb nten lad naꞌ geal isoꞌ naꞌ wats ga.
ACT 2:29 ’Bego nak beuna xa Israel, leꞌa beuna uniꞌí leꞌa David uyoꞌo polta wa ngut no mgaꞌach. No leꞌa baꞌa ten xa bi nde sa ndee nat.
ACT 2:30 Leꞌa xa wa dub xa ndadiꞌizh sakndoꞌ Dios, no uniꞌíka xa leꞌa Dios ndab ndoꞌ xa leꞌa xa nak Cristo wa ta ugeaka ilen lat be xin David, cha inibeꞌe xa lak unibeꞌe David.
ACT 2:31 Leꞌa gor biseata yoo‑yá, leꞌa David ndab leꞌa Cristo iban ndoꞌ gealgut. Ndab xa leꞌa Dios lá ulaꞌa Cristo yaꞌan lat bexa ngut no ni lá ulaꞌa Dios gazhaꞌa las Cristo.
ACT 2:32 Leꞌa itea besa ndee uniꞌíndoꞌ leꞌa Dios mxiste Jesús ndoꞌ gealgut.
ACT 2:33 Leꞌa Dios cha myoꞌo Jesús gibeꞌa sa usob xa wats Dios lad gaꞌal. Leꞌa Tad Dios cha msaꞌa juers ndoꞌ Jesús msaꞌa xa Espíritu ten Dios ndoꞌ besa ndee, lakka ndab Jesús gun xa. Leꞌa Espíritu wa leꞌa ndun ta naꞌ bega no ta ndoꞌón bega wizh nat.
ACT 2:34 Leꞌa David naꞌanpa leꞌa ikea gibeꞌa, parea leꞌa David ndab: Leꞌa Dios Xa Nibeꞌe ndab ndoꞌ Xa Nibeꞌe ten naꞌ: “Usob wats naꞌ lad gaꞌal ndee,
ACT 2:35 gast gal gor ute naꞌ bexa ndaklono lu xan ndats lu.”
ACT 2:36 ’Nat blaꞌach itea bego xa Israel ta ugeakapa gáp naꞌ: leꞌa Jesús xa li mkeꞌa bega ndoꞌ cruz wa, leꞌa xa wa leꞌaka Dios msoꞌ nak Cristo Xa Nibeꞌe.
ACT 2:37 Leꞌa gor na mbiꞌín be men ta wa, cha kweaꞌ myoꞌo ladna bexa, cha unabdiꞌizh bexa ndoꞌ Pedr nsea ndoꞌ be ltsaꞌa xa, ndab bexa: —Bego nak beuna xa Israel, ¿xteꞌe nsabndoꞌ gun besa nat?
ACT 2:38 Leꞌa Pedr cha ukaꞌab ndab: —Blaꞌa bego be ta ugap nak bego no italeaꞌ kadga dub bega gak bega xmen Jesucristo, ndontsa utsuꞌu Dios be ke ten bega no usaꞌa xa Espíritu ten xa ndoꞌ bega.
ACT 2:39 Li gunno Dios bexa na nbezh Dios gak bexa xmen xa: leꞌa ta wa bego, no be xin bega, no itea bexa sit ndencho.
ACT 2:40 No sianta be diꞌizh mbidiꞌizh Pedr, no mtenxeꞌa xa bexa wa, ndab xa: —¡Lá gakta bega lak nak be men ugap ncho nat, ndontsa naꞌanpa utsaksi Dios bega!
ACT 2:41 Weꞌe leꞌa ncho bexa mbingea ladna ta li mbidiꞌizh Pedr wa, cha utaleaꞌ bexa. Leꞌa wizh wa pa schon mil men uyote lat bexa nak xmen Jesús.
ACT 2:42 Leꞌa bexa wa ntsid lak nluu be apostol wa, no uzhebpa wen nak bexa ndoꞌ be ltsaꞌa bexa. No nzhealbe bexa ndaw bexa, nsea ndadiꞌizhno bexa Dios.
ACT 2:43 Leꞌa itea be men ndanseana gor uniꞌí bexa be uyon ndun be apostol, be ta msaꞌa Dios gun bexa.
ACT 2:44 Leꞌa iteanak bexa na mbingea ladna Jesús wa dubtsa nak. No itea be taꞌa ndap bexa wa, leꞌa ta wa iteanakka bexa ten.
ACT 2:45 Ncho bexa mdoꞌo be yo ten na no be taꞌa ndap bexa, cha ntseꞌa bexa med wa ndoꞌ be ltsaꞌa xa bi lak nkiꞌin bexa‑yá.
ACT 2:46 Iteanak wizh nzhealbe bexa tale ten niꞌi ten Dios, no be ta lid bexa junt ndaw bexa, nten ladna bexa no utsin nak bexa.
ACT 2:47 No nsaꞌa tseꞌe bexa xno ndoꞌ Dios, no leꞌa itea be men nsak ladna lak nak bexa. Leꞌa Dios leꞌa ndun kad wizh mas nsayak kwaꞌad bexa wa, ngoꞌo Dios bexa ndoꞌ be ke ten bexa.
ACT 3:1 Leꞌa dub wizh leꞌa Pedr nsea Juan nchaꞌa sa nde niꞌi ten Dios pa gor nkea uyon uzhe, gor na ndaꞌyadiꞌizhno be men Dios.
ACT 3:2 Leꞌa sa wa nsob dub xabgiꞌi lá yoo gan isea zha ngolta xa. Itea wizh ndaꞌulaꞌa be ltsaꞌa xa xa dub sa nyote be men len tale ten niꞌi ten Dios, sa nsaleaꞌ Puert Chul, ndontsa inab xa med ndoꞌ be men.
ACT 3:3 Leꞌa gor na uniꞌí xa Pedr no Juan nchaꞌyote sa wa, cha unab xa dub med ndoꞌ bexa.
ACT 3:4 Weꞌe leꞌa Pedr no Juan mwiꞌi ndoꞌ xa, cha ndab Pedr: —Bwiꞌi ndoꞌ besa.
ACT 3:5 Leꞌa xa wa list usob, ndanbeꞌe xa gol ncho xtaꞌan usaꞌa bexa wa ndoꞌ xa.
ACT 3:6 Ná leꞌa Pedr cha ndab: —Leꞌa naꞌ lá nsén med plata ni med oro, parea leꞌa ta ndap naꞌ usa naꞌ ndoꞌ lu. Leꞌa juers ten leaꞌ Jesucristo xa Nazaret, leꞌa naꞌ gáp ndoꞌ lu gosoꞌ, cha usea.
ACT 3:7 Weꞌe leꞌa Pedr cha usen yaꞌa xa lad gaꞌal, cha uxisoꞌ Pedr xa. Bi leꞌa gor wa leꞌa be xoꞌo xa no be gendats xa cha mgeasoꞌbe.
ACT 3:8 Leꞌa xabgiꞌi wa cha uxax ngwasoꞌ gaꞌal, cha utsinla nsea xa. Cha no xa uyoꞌono bexa wa tale ten niꞌi ten Dios, nkesea xa no ndasagaꞌal xa, ndab xa leꞌa Dios uzheꞌeb dub Dios juert.
ACT 3:9 Leꞌa itea be men uniꞌí nsea xa, no nsaꞌa xa xno ndoꞌ Dios.
ACT 3:10 Weꞌe mgondoꞌ bexa leꞌa xa wa leꞌa xa li usob nab med toꞌo Puert Chul ten niꞌi ten Dios, cha uzheꞌeb ngwanseana bexa ta na li myakna xa wa.
ACT 3:11 Leꞌa xa li myakna wa lá nlaꞌapa Pedr no Juan. Weꞌe leꞌa itea be men na ndanseana cha utoꞌo karrel gast sa nsoꞌ Pedr no Juan sa nsaleaꞌ Corredor Salomón.
ACT 3:12 Leꞌa gor uniꞌí Pedr ta wa, cha ndab xa ndoꞌ be men: —Bego xa Israel, ¿xtaꞌan ndanseana bega ta ndee zha? ¿No xtaꞌan nwiꞌi bega ndoꞌ besa ndanbeꞌe bega juers ten besa myakna xa ndee zha?
ACT 3:13 Leꞌa Dios ten Abraham no Isaac no Jacob, xa na leꞌa nak Dios ten iteata be usan gox polta ten beuna, leꞌa xa wa leꞌa mbin mas gaꞌap ngobsoꞌ xin xa Jesús. Leꞌa Jesús wa xa na li myun bega cuent ndoꞌ yaꞌa bexa naktiꞌin, cha gor na ndiꞌizh ulaꞌa Pilat xa leꞌa bega lá kaꞌab.
ACT 3:14 Leꞌa Jesús nak xa na mti Dios no sbeꞌen be ta nlad Dios ndun xa. Parea leꞌa bega mxee ladna xa, cha ndi unab bega ulaꞌa Pilat dub xa ndut men.
ACT 3:15 Leꞌa bego mbit xa nsaꞌa gealnaban ndoꞌ be men, ná leꞌa Dios mxiste xa ndoꞌ gealgut lak uniꞌí besa‑yá.
ACT 3:16 Leꞌa xabgiꞌi ndee ngeꞌ ladna juers ten leaꞌ Jesús wa, ta weꞌe myakna xa. Leꞌa ta na ngeꞌ ladna xa Jesús leꞌa mbin gan dubtsa neꞌeka myakna xa ndoꞌ gaꞌal itea bego.
ACT 3:17 ’Bego nak beuna xa Israel, leꞌa bego no bexa nibeꞌe ten bega mbit Jesús, parea leꞌa naꞌ uní leꞌa bega ni lá iniꞌí ton xa wa.
ACT 3:18 Ná leꞌa Dios li mlaꞌa mbin bega lak ndab bexa mbidiꞌizh sakndoꞌ Dios tiemp polta, ndab bexa leꞌa Cristo nsabndoꞌ iniꞌí sian gealkweaꞌ.
ACT 3:19 Nat blaꞌa bega be ta ugap nak bega, cha byach bega wats Dios, ndontsa utsuꞌu xa be ke ten bega. Weꞌe yoo xa wats bega gakno xa bega,
ACT 3:20 no utuꞌubgal xa Jesucristo ndoꞌ bega lak ndabka Dios.
ACT 3:21 Nat leꞌa Jesús nsabndoꞌka ncho gibeꞌa, gast gal gor na utechaꞌaw Dios itea be taꞌa ndoꞌ gizhliyo, lakka mbidiꞌizh bexa sakndoꞌ Dios tiemp polta.
ACT 3:22 Lak ndab Moisés ndoꞌ be usan gox polta ten beuna: “Leꞌa Dios Xa Nibeꞌe ten beuna uti dub xa gudiꞌizh diꞌizh ten xa lat be ltsaꞌa bega, lak mti xa naꞌ. Blaꞌach bego itea ta gab xa wa ndoꞌ bega.
ACT 3:23 Leꞌa tal ton lá ulaꞌach ta gab xa wa, leꞌa bexa wa yá naꞌantapa gak xmen Dios.”
ACT 3:24 ’Leꞌa Samuel no iteata bexa mbidiꞌizh sakndoꞌ Dios tsoꞌo wa, mbidiꞌizh bexa cuent ten be ta ncho be wizh nat ndee wa.
ACT 3:25 Leꞌa ta ndab bexa polta usaꞌa Dios wa, leꞌa ta wa nsaꞌa Dios ndoꞌ bega nat. No usaꞌa Dios ndoꞌ bega lak ndab Dios gor na mbin Dios dub trat no be usan gox polta ten beuna, ndab Dios ndoꞌ Abraham: “Leꞌa naꞌ guntiꞌin dub xa ras ten lu, ndontsa wen yoo be men itea be nacion nde ndoꞌ gizhliyo.”
ACT 3:26 Leꞌa gor na mxiste Dios xin na ndoꞌ gealgut, leꞌa Dios mtuꞌub xa ned lak ndoꞌ beuna xa Israel, ndontsa gakno xa beuna no ulaꞌa beuna be ta ugap nak beuna.
ACT 4:1 Ndalen li ndeníꞌi Pedr no Juan ndoꞌ be men wa, weꞌe ulen pla be uleꞌay no dub xa nibeꞌe ten bexa nlaꞌach niꞌi ten Dios no pla bexa saduceo.
ACT 4:2 Leꞌa bexa wa ndakloo, geal leꞌa Pedr no Juan nluu be men wa leꞌa be men ngut wa iban ndoꞌ gealgut lak mban Jesús ndoꞌ gealgut.
ACT 4:3 Cha usen bexa wa Pedr no Juan, cha mkeꞌa bexa xa wa litgiꞌib gast stub wizh, leꞌa gor wa yá uzhe.
ACT 4:4 Ná leꞌa kwaꞌadpa be men na mbiꞌín diꞌizh ndab Pedr wa mbingea ladna‑yá. Leꞌa lat itea bexa wa ngok pa dub gaꞌay mil xabgiꞌi.
ACT 4:5 Ngol stubtsa wizh leꞌa bexa nibeꞌe ten bexa judio no bexa gox nsak no be mech ten ley mzhealbe Jerusalén.
ACT 4:6 No nsoꞌ Anás uleꞌay ndon leꞌa nsak no Caifás no stub Juan no Alejandro no iteata be xabgiꞌi ltsaꞌa uleꞌay ndon leꞌa nsak.
ACT 4:7 Cha mte bexa Pedr no Juan tlaw bexa, cha unabdiꞌizh bexa ndab bexa: —¿Ton msaꞌa juers nati ton mtuꞌub bego gun bega ta wa zha?
ACT 4:8 Weꞌe leꞌa Pedr noꞌo juers ten Espíritu ten Dios len ladoꞌo na ukaꞌab ndab: —Bego xa nibeꞌe, bego xa gox nsak ten beuna xa Israel:
ACT 4:9 leꞌa bega nabdiꞌizh ná xtaꞌan utsin mbinno besa dub xabgiꞌi gizh no xteꞌe li myakna xa.
ACT 4:10 Nat gab besa ndoꞌ itea bego no ndoꞌ iteata be men Israel leꞌa Jesucristo xa gezh Nazaret myunyakna xabgiꞌi nsoꞌ ndoꞌ bega ndee. Leꞌa Jesús wa xa na li mkeꞌa bega ndoꞌ cruz, cha mxiste Dios xa ndoꞌ gealgut.
ACT 4:11 Leꞌa xa wa xa na li mxelad bega cuent dub geꞌ nxelad bexa ndandeꞌe niꞌi, ná nat leꞌa geꞌ wa ndon leꞌa nak skin niꞌi.
ACT 4:12 Leꞌa ndon nab Jesús sun gan koꞌo be men ndoꞌ be ke ten bexa. Leꞌa idub ndoꞌ gizhliyo naꞌanta ton ntuꞌub Dios koꞌo beuna ndoꞌ be ke ten beuna.
ACT 4:13 Leꞌa bexa nibeꞌe wa ngwanseana gor uniꞌí bexa leꞌa Pedr no Juan ni lá nzheb ndadiꞌizh, maska ndidotsa mtsid bexa. Weꞌe mgondoꞌ bexa leꞌa Pedr no Juan xa ukeseano Jesús.
ACT 4:14 Leꞌa xa li myakna wa no nsoꞌ sa wa, ta weꞌe naꞌanta xteꞌe ngab bexa ndoꞌ Pedr no ndoꞌ Juan.
ACT 4:15 Cha unibeꞌe bexa itate bexa sa wa, cha myanbeyadiꞌizh nab bexa nibeꞌe wa,
ACT 4:16 ndab bexa: —¿Xteꞌe gunno beuna be xabgiꞌi baꞌ? Leꞌa itea be men ndencho Jerusalén ndee uniꞌí leꞌa ta mbin bexa wa dub uyon. Leꞌa beuna lá yoo gan gab leꞌa‑yá gealkwiꞌin.
ACT 4:17 Parea ndontsa lá igenta mas ta ndee, gabtsa beuna ndoꞌ bexa leꞌa beuna utsaksi bexa tal leꞌa bexa gudiꞌizhta cuent ten Jesús.
ACT 4:18 Weꞌe utezhgal bexa Pedr no Juan, cha li unibeꞌe bexa ndoꞌ bexa wa yá naꞌantapa gudiꞌizh bexa ndoꞌ be men cuent ten Jesús.
ACT 4:19 Ná leꞌa bexa wa ukaꞌab ndab: —¿Nsak bega zha leꞌa besa nsabndoꞌ uxobgek ndoꞌ bego, cha naꞌanpa uxobgek besa ndoꞌ Dios?
ACT 4:20 Leꞌa besa lá yoo gan ulaꞌa lá gudiꞌizhta besa ta uniꞌí besa no ta mbiꞌín besa.
ACT 4:21 Weꞌe leꞌa bexa nibeꞌe wa cha ndab ndoꞌ Pedr no ndoꞌ Juan: —Leꞌa besa utsaksi bega tal leꞌa bega gudiꞌizhta diꞌizh ten Jesús. Cha mlaꞌa bexa Pedr no Juan. Leꞌa bexa wa lá izheal xteꞌe utsaksi xa bexa wa, geal leꞌa itea be men ndab leꞌa Dios uzheꞌeb dub Dios wen, ta na li myakna xa gizh wa.
ACT 4:22 Leꞌa xabgiꞌi na li myakna juers ten Dios wa ncho masla top gaꞌal liꞌin.
ACT 4:23 Leꞌa gor na mkaꞌan Pedr no Juan sa wa, cha nseaꞌ bexa lat ltsaꞌa bexa, cha mbidiꞌizh bexa itea be ta ndab be uleꞌay nibeꞌe no bexa gox nsak.
ACT 4:24 Leꞌa gor na li mbiꞌín bexa ta wa, leꞌa bexa cha junt mbidiꞌizhno Dios, ndab bexa: —Go Dios Xa Nibeꞌe, go leꞌa nak Dios mbindeꞌe gibeꞌa no gizhliyo no nitsdoꞌo no iteata be ta ncho.
ACT 4:25 Leꞌa go msaꞌa ta mbidiꞌizh David sakndoꞌ ga, ndab David: ¿Xtaꞌan lbaꞌata ngiꞌi be men baꞌ zha? ¿No xtaꞌan ndanbeꞌe bexa be ta naꞌan xtiꞌin?
ACT 4:26 Leꞌa bexa nibeꞌe ndoꞌ gizhliyo mzhealbe, no bexa naktiꞌin myakjunt, ndakloo bexa ndoꞌ Dios Xa Nibeꞌe no ndoꞌ xa nak Cristo.
ACT 4:27 ’Ugeaka leꞌa Herodes no Poncio Pilat no bexa Israel nsea bexa naꞌanpa xa Israel li mzhealbe len gezh ndee, ngokloo bexa ndoꞌ Jesús xin go, xa wen mtuꞌub go.
ACT 4:28 Cha mbin bexa lakka ta ndab go gak‑a wa.
ACT 4:29 Nat bwiꞌi go, Dios Xa Nibeꞌe, xteꞌe ugap níꞌi bexa ndoꞌ besa. Bsaꞌa ga juers ndontsa lá izheb besa gudiꞌizh besa diꞌizh ten ga.
ACT 4:30 No bsaꞌa ga juers yunyakna besa be men gizh, no gun besa sian be uyon juers ten leaꞌ Jesús xin ga, ta uluu leꞌa go leꞌa mtuꞌub besa.
ACT 4:31 Leꞌa gor na mtayadiꞌizh bexa ndoꞌ Dios, leꞌa sa ndebe bexa cha mwiꞌin. Weꞌe leꞌa itea bexa wa mas uyoꞌo juers ten Espíritu ten Dios ladoꞌo na. Cha ni lá izhebta bexa ndadiꞌizh bexa diꞌizh ten Dios.
ACT 4:32 Leꞌa itea bexa na mbingea ladna Jesús wa dubtsa ncho ladna bexa, no dubtsa ndanbeꞌe bexa. No ni naꞌan ton ndab leꞌa be ta ndap bexa ta tentsa bexa, leꞌa ta ndap bexa wa ndi itea bexa ten.
ACT 4:33 Leꞌa be apostol ni lá nzheb ndadiꞌizh leꞌa Jesús Xa Nibeꞌe wa mbanka ndoꞌ gealgut. No uzhebpa ngokno Dios itea be xmen Jesús wa.
ACT 4:34 Leꞌa lat bexa wa lá yoꞌo ni dub bexa ngun jwalt ta nkiꞌin na, geal leꞌa bexa na ndap yo no niꞌi, ncho xa mdoꞌo ta wa cha nseano bexa med wa,
ACT 4:35 cha myun bexa cuent ta wa ndoꞌ be apostol. Leꞌa be apostol cha ntseꞌa med wa bi lak nkiꞌin bexa‑yá.
ACT 4:36 Leꞌa dub bexa wa dub xa levita nsaleaꞌ Kosé, xa isla Chipre. No msaleaꞌ be apostol xa Bernabé (leꞌa ta wa dub diꞌizh gab: xa nluꞌuzh men).
ACT 4:37 Leꞌa xa wa mdoꞌo dub bleꞌa yo ndap na, cha myun xa cuent med wa ndoꞌ be apostol.
ACT 5:1 Uyoꞌo dub xa nsaleaꞌ Ananías no Safira xagots ten xa. Leꞌa bexa wa mdoꞌo dub bleꞌa yo.
ACT 5:2 Ná leꞌa xa wa myaꞌanno stub tuzh med wa, cha myun xa cuent iteata med wa ndoꞌ be apostol. Leꞌa xagots ten xa wa noka uniꞌí ta wa.
ACT 5:3 Weꞌe leꞌa Pedr cha ndab ndoꞌ Ananías: —Ananías, ¿xteꞌe uyoꞌo maxuꞌu ladoꞌo lu myaꞌanno lu stub tuzh med ta na li mdoꞌo lu yo wa zha? ¿Xtaꞌan li nkwiꞌinno lu Espíritu ten Dios zha?
ACT 5:4 ¿Ná lid lu ten yo wa zha? Gor na mdoꞌo lu‑yá, ¿lid xmedka lu ta wa zha? ¿Xteꞌe ni lu lbaꞌa mbin lu? Leꞌa lu naꞌanpa ndoꞌ dub men mbin gealkwiꞌin, leꞌa lu ndi ndoꞌ Dios li mbin.
ACT 5:5 Leꞌa gor na mbiꞌín Ananías ta li ndab Pedr, cha ulayat xa cha ngut xa. Leꞌa itea bexa na mbiꞌín ta wa cha uzheꞌeb mzhebbe.
ACT 5:6 Cha ulen pla be xabgiꞌi ben mtixko Ananías lad, cha mbiꞌi bexa wa xa, cha mkaꞌach bexa xa.
ACT 5:7 Tsoꞌo wa pa schon gor ulenga xagots ten Ananías wa, ni lá iniꞌí xa xtaꞌan ngwasea xabgiꞌi ten xa.
ACT 5:8 Weꞌe leꞌa Pedr cha ndab ndoꞌ xa: —Gud naga lika ngok yo mdoꞌo bega wa zha. Leꞌa xagots wa mkwiꞌin ndab: —Leꞌa ta wa lika ngok.
ACT 5:9 Leꞌa Pedr cha ndab: —¿Xtaꞌanxá dubtsa mbidiꞌizh bega ukwiꞌinno bega Espíritu ten Dios zhaga? Ndoꞌón lu leꞌa bexa na mkaꞌach xabgiꞌi ten lu wa nchabela. Nat leꞌa bexa nogal lu li ukaꞌach.
ACT 5:10 Bi leꞌa gor wa leꞌa xagots wa noga ulayat sa nsoꞌ Pedr, cha ngut xa. Leꞌa gor uyoꞌo be xabgiꞌi wa len niꞌi, leꞌa xagots wa noga ngutla. Cha mbiꞌigal bexa xa, cha mkaꞌach bexa xa wats xabgiꞌi ten xa.
ACT 5:11 Weꞌe leꞌa itea be xmen Jesús no iteata be men na mbiꞌín ta wa cha uzhebpa mzheb.
ACT 5:12 Leꞌa be wizh wa leꞌa be apostol ndun sian be uyon ten Dios, be ta ndanseana be men. No itea wizh nzhealbe be xmen Jesús dub lad wats niꞌi ten Dios, sa nsaleaꞌ Corredor Salomón.
ACT 5:13 Leꞌa be men ndab leꞌa bexa wa xa wenka nak, parea ni dub bexa naꞌanpa nak xmen Jesús lá uchealtsaꞌa bexa wa.
ACT 5:14 Leꞌa bexa na ndangea ladna Jesucristo wa uzhebpa ngok kwaꞌadbe, lak be xabgiꞌi no liga be xagots.
ACT 5:15 Leꞌa be men ulote be men gizh ndiꞌib ndoꞌ yaloꞌon no ndoꞌ da toꞌo nes sa itid Pedr. Mbinbeꞌe bexa tal masa xiꞌíntsa Pedr igiꞌin las bexa gizh wa, cha yakna bexa.
ACT 5:16 No kwaꞌadpa be men be gezh nde gax wa ulenno be men gizh gast Jerusalén, no bexa nsak gizhtont ncho be mbi bxin len ladoꞌo na. Leꞌa itea bexa wa cha myaknabe.
ACT 5:17 Weꞌe leꞌa uleꞌay ndon leꞌa nsak no itea be xmen xa, bexa saduceo, uzheꞌeb ngoklobe.
ACT 5:18 Cha usen bexa wa be apostol, cha mkeꞌa bexa bexa litgiꞌib.
ACT 5:19 Ná leꞌa dub angel ten Dios ulen gor teꞌal, mxaꞌal be puert ten litgiꞌib, cha uloꞌo xa bexa wa. Cha ndab angel:
ACT 5:20 —Waꞌbe bega wats niꞌi ten Dios, cha bidiꞌizh bega be diꞌizh nsaꞌa gealnaban ndoꞌ be men.
ACT 5:21 Leꞌa ngot xeꞌa tempran leꞌa bexa nchaꞌbe wats niꞌi ten Dios. Cha usaxan bexa nluu bexa be men. Ngol gor leꞌa uleꞌay ndon leꞌa nsak no be xmen xa no bexa gox nsak ten bexa Israel mzhealbe. Cha unibeꞌe bexa ndoꞌ bexa nlaꞌach sa wa yaꞌyoꞌo bexa wa bexa len litgiꞌib.
ACT 5:22 Ná leꞌa gor na ulayaꞌ bexa sa wa, cha uniꞌí bexa leꞌa bexa wa naꞌanla sa wa. Cha myach bexa ndab bexa:
ACT 5:23 —Leꞌa gor ulayaꞌ besa leꞌa toꞌo litgiꞌib wa nsoꞌnyawka no bexa ndeulaꞌach wa ndeka. Parea leꞌa gor na mxaꞌal besa puert wa, leꞌa len wa naꞌanla ton ndencho.
ACT 5:24 Leꞌa gor na mbiꞌín bexa ta wa, leꞌa uleꞌay ndon leꞌa nsak no xa nibeꞌe ten bexa nlaꞌach niꞌi ten Dios no be uleꞌay nibeꞌe cha ndab ndoꞌ ltsaꞌa na: —¿Pa gast yandoꞌ ta ndee zha?
ACT 5:25 Weꞌe ulen stub xa ndab: —Blaꞌach bego, leꞌa bexa na li mkeꞌa bega litgiꞌib wa ndeuluugal be men dub lad wats niꞌi ten Dios.
ACT 5:26 Weꞌe leꞌa bexa nlaꞌach sa wa nsea xa nibeꞌe ten bexa wa ngwaꞌgiꞌigal be apostol, parea naꞌan xteꞌe ngunno bexa wa bexa, geal leꞌa bexa nzheb ndoꞌ be men nchaꞌa be men ulaꞌgeꞌ bexa.
ACT 5:27 Leꞌa gor na mlenno bexa wa bexa, cha mte bexa xa ndoꞌ be men nsak wa. Weꞌe leꞌa uleꞌay ndon leꞌa nsak cha ndab:
ACT 5:28 —¿Lá iniꞌí bega leꞌa besa yá ndabla lá uluuta bega cuent ten Jesús ndoꞌ be men zha? ¡Ná nat leꞌa idub gezh Jerusalén ndee ngen be ta nluu bega wa! No nlad bega ukeake bega besa ta li ngut Jesús wa.
ACT 5:29 Leꞌa Pedr no be ltsaꞌa xa cha ukaꞌab ndab: —Leꞌa besa nsabndoꞌ uxobgek ned ndoꞌ Dios, naꞌanpa ndoꞌ be men.
ACT 5:30 Leꞌa Dios xa na ngwankea be usan gox polta ten beuna wa, leꞌa xa wa mxiste Jesús ndoꞌ gealgut, xa na li mbit bego ukea ndoꞌ cruz wa.
ACT 5:31 Leꞌa Dios msaꞌa sa nsob Jesús wats Dios lad gaꞌal, no myunno xa Jesús dub xa nibeꞌe no xa nsaꞌa gealnaban, ndontsa ulaꞌa be men Israel be ta ugap nak bexa, cha yuꞌu be ke ten bexa.
ACT 5:32 Leꞌa ta wa ta ndadiꞌizh besa ndoꞌ be men, lak ndakno Espíritu ten Dios besa. Leꞌa Dios nsaꞌa Espíritu ten na ndoꞌ bexa nxobgek ndoꞌ xa.
ACT 5:33 Leꞌa gor na mbiꞌín bexa ta wa, cha uzhebpa ngokloo bexa, gast nlad bexa gut bexa bexa wa.
ACT 5:34 Ná leꞌa lat bexa wa nsob dub xa nsaleaꞌ Gamaliel xa fariseo, dub mech ten ley. Leꞌa be men uzhebpa ndap mod ndoꞌ xa wa. Cha usoꞌ xa ndab xa itoꞌo be apostol dub xlaꞌal.
ACT 5:35 Weꞌe ndab xa ndoꞌ bexa nibeꞌe wa: —Bego xa Israel, gop bega cuent nsea ta gunno bega be xabgiꞌi baꞌ.
ACT 5:36 Ntseꞌa ladna bega zha uyoꞌo dub xa nsaleaꞌ Teudas, ndab xa leꞌa xa uzhebpa dub xa nsak. Pa dub dap gayoꞌo xabgiꞌi usankea tsoꞌo xa. Ná leꞌa gor na mbit be men xa, leꞌa itea be xmen xa cha mteꞌachso. Cha litsa unitndoꞌ ta ndun bexa wa.
ACT 5:37 Tsoꞌo wa ligal uyoꞌo stub xa nsaleaꞌ Judas xa Galilea. Leꞌaga kwaꞌadpa be men usankea tsoꞌo xa be wizh ten censo. Parea gor na mbit be men xa, leꞌa be xmen xa itea mteꞌachsogal.
ACT 5:38 Leꞌa nat leꞌa naꞌ gáp ndoꞌ bego, blaꞌa bega no naꞌan xteꞌe gunno bega bexa baꞌ. Leꞌa tal ta ndun bexa baꞌ ta tentsa men, leꞌa‑yá sbeas yoꞌoka.
ACT 5:39 Ná tal leꞌa‑yá ta nlad Dios, leꞌa bego lá gun gan initndoꞌ‑yá. Blaꞌach bego naꞌanpa kuyono bego Dios.
ACT 5:40 Weꞌe leꞌa bexa nibeꞌe wa dubtsa nak nsea ta ndab xa wa. Cha utezh bexa be apostol wa, cha udin bexa bexa wa. Cha ndab bexa nibeꞌe wa: —Yá lá gudiꞌizhta bega cuent ten Jesús wa. Cha mlaꞌa bexa bexa wa.
ACT 5:41 Leꞌa gor na mkaꞌan bexa sa wa uzhebpa mten ladna bexa, geal leꞌa Dios mlaꞌa utid bexa gealkweaꞌ geal nak bexa xmen Jesús.
ACT 5:42 Weꞌe leꞌa iteanak wizh leꞌa bexa nluu be men dub lad wats niꞌi ten Dios no ta lid be men, ndab bexa leꞌa Jesús nak Cristo xa mtuꞌub Dios.
ACT 6:1 Leꞌa be wizh wa leꞌa be xmen Jesús nsayak kwaꞌad. Parea leꞌa lat bexa wa leꞌa bexa níꞌi diꞌizh griego usaxan ndakloo ndoꞌ bexa níꞌi diꞌizh hebreo, ndab bexa: —Leꞌa be xagots ngut xabgiꞌi ten na ncho lat besa ndee, ncho zha lá ndal bexa sian ta gaw bexa, gor na ntseꞌa bega ta wa.
ACT 6:2 Weꞌe leꞌa isatibtop be apostol wa mchealte iteanak be xmen Jesús, cha ndab bexa: —Lá nsabndoꞌ ulaꞌa besa lá gudiꞌizh besa diꞌizh ten Dios, cha ndi utseꞌa besa ta ndaw bexa wa.
ACT 6:3 Ta weꞌe bti bega gaꞌad xabgiꞌi ndák lat bega, bexa wen nak no uzheꞌeb ncho juers ten Espíritu ten Dios ladoꞌo xa. Leꞌa bexa wa leꞌa gun tiꞌin ndee.
ACT 6:4 Leꞌa besa ndee li syoꞌo gan gudiꞌizhnota Dios no uluuta besa be men diꞌizh ten Dios.
ACT 6:5 Leꞌa itea bexa wa ngol ladna ta ndab be apostol wa, cha mti bexa Xteb dub xa uzheꞌeb ngeꞌ ladna Dios no uzheꞌeb ndap xa juers ten Espíritu ten Dios. Nsea mti bexa Julip no Prócoro no Nicanor no Timón no Parmenas no Nicolás xa Antioquía. Leꞌa Nic wa naꞌanpa xa judio, parea ndankea xa Dios lak ndun bexa judio.
ACT 6:6 Weꞌe cha mte bexa isagaꞌad bexa wa ndoꞌ be apostol. Cha mxoꞌob be apostol yaꞌa na gek bexa wa, unab bexa ndoꞌ Dios gakno Dios isagaꞌad bexa wa.
ACT 6:7 Weꞌe leꞌa diꞌizh ten Jesús uzhebpa mteꞌachso. Leꞌa gezh Jerusalén uzhebpa nsayak kwaꞌad be xmen Jesús, no gast kwaꞌadpa be uleꞌay mbingea ladna Jesús.
ACT 6:8 Leꞌa Dios uzhebpa ndakno Xteb, no nsaꞌa xa juers ndoꞌ xa, ndun Xteb sian be uyon ten Dios, be ta ndanseana be men.
ACT 6:9 Leꞌa ncho dub sa nsaleaꞌ Be Men Myaꞌak, dub niꞌi sa nzhealbe bexa judio. Leꞌa pla bexa ten sa wa usaxan nyotoꞌono Xteb. Leꞌa xa wa bexa gezh Cirene nsea gezh Alejandría no Cilicia nsea Asia.
ACT 6:10 Ná lá ngun bexa gan ndoꞌ Xteb, leꞌa Xteb uzhebpa ndák, lak nsaꞌa Espíritu ten Dios ndoꞌ xa.
ACT 6:11 Weꞌe msaꞌa bexa med ukaꞌa stapla be men ndontsa gun bexa gealkwiꞌin, ndab bexa leꞌa bexa mbiꞌín leꞌa Xteb nisi Moisés no Dios.
ACT 6:12 Weꞌe uzheꞌeb ngokloo be men no bexa gox nsak no be mech ten ley. Cha usen bexa Xteb, cha mbiꞌi bexa xa sa nzhealbe bexa nibeꞌe wa.
ACT 6:13 Cha ulenno bexa be men gun gealkwiꞌin, ndab be men wa: —Leꞌa xabgiꞌi ndee ni lá nlaꞌa ta li nisi xa niꞌi ten Dios ndee no ley ten Dios.
ACT 6:14 Leꞌa besa mbiꞌín ndab xa leꞌa Jesús xa Nazaret wa ulate niꞌi ten Dios, no ucheꞌa xa be costumbr ndeno beuna, ta mchaꞌan Moisés.
ACT 6:15 Weꞌe leꞌa be men nibeꞌe wa no itea bexa nde sa wa, mwiꞌi bexa ndoꞌ Xteb. Cha uniꞌí bexa leꞌa ndoꞌ Xteb nluu cuent ndoꞌ angel ten Dios.
ACT 7:1 Leꞌa uleꞌay ndon leꞌa nsak cha unabdiꞌizh ndoꞌ Xteb, ndab xa: —¿Ta ugeaka ta lbaꞌa ndab be men baꞌ zha?
ACT 7:2 Leꞌa Xteb ukaꞌab ndab: —Bego bexa ltsaꞌa naꞌ, no bego xa nsak baꞌ, blaꞌach bego ta gáp naꞌ ndee. Leꞌa Dios siꞌil ten beuna mlundoꞌ ndoꞌ Abraham usan gox ten beuna, zha na bi ncho xa Mesopotamia, zha biseata yaꞌyoꞌo xa gezh Harán.
ACT 7:3 Ndab Dios ndoꞌ Abraham: “Blaꞌa lazh lu baꞌ no be ltsaꞌa lu, cha ndi waꞌ ndoꞌ yo sa uluu naꞌ ndoꞌ lu.”
ACT 7:4 Weꞌe leꞌa Abraham utoꞌo sa wa, sa no nsaleaꞌ Caldea, cha nchaꞌa xa uyoꞌo xa Harán. Tsoꞌo wa ngut xus Abraham, cha mbiꞌi Dios Abraham ndoꞌ yo ndee, sa ndencho beuna nat.
ACT 7:5 Ná leꞌa Dios lá usaꞌa ni dub bleꞌa yo ikaꞌa Abraham, ni dub tuzh sa isoꞌ Abraham. Ndi ndab Dios leꞌa Dios usaꞌaka yo ndee ndoꞌ be xin xa, ná leꞌa zha wa leꞌa Abraham ni dub xin na bi lá ndap.
ACT 7:6 Ndab Dios ndoꞌ Abraham: “Leꞌa be xin lu yaꞌyoo dub sa naꞌanpa lazh bexa. Leꞌa bexa wa lajuers gun tiꞌin ten be men sa wa, no ugap gunno bexa wa be xin lu dub dap gayoꞌo liꞌin.
ACT 7:7 Ná leꞌa naꞌ utsaksi bexa na li ugap gunno be xin la wa. Cha tsoꞌo wa leꞌa bexa itoꞌo sa wa, cha yankea bexa naꞌ sa ndee.”
ACT 7:8 Leꞌa Dios cha mbinno Abraham dub trat, ndab Dios xteꞌe yoo beꞌe be meꞌed bgiꞌi, ta uluu leꞌa bexa nxobgekka ndoꞌ trat wa. Ta weꞌe zha ngop Abraham Isaac, cha ulo Abraham beꞌe Isaac wizh xoꞌon ngol Isaac. Cha liga mbinno Isaac xin na Jacob. Leꞌa Jacob liga ulo beꞌe isatibtop be xin na, be usan gox polta ten beuna.
ACT 7:9 ’Leꞌa be xin Jacob wa nxeeno ladnabe leꞌaka dub wit bexa nsaleaꞌ Kosé. Cha mdoꞌo bexa Kosé ndoꞌ be men ngwaꞌudoꞌo xa Egipto. Ná leꞌa Dios lá nlaꞌa Kosé.
ACT 7:10 Leꞌa Dios ngokno xa ndoꞌ itea be ta juert utid xa. No mbin Dios uzhebpa ndák Kosé no msayaꞌ xa ndoꞌ faraón xa nibeꞌe Egipto. Leꞌa faraón cha ulaxoꞌob Kosé, leꞌa xa leꞌa unibeꞌe idub Egipto no nchansu xa ta lid faraón.
ACT 7:11 ’Tsoꞌo wa uyoꞌo win Egipto no Canaán ndee. Cha uzhebpa kweaꞌ uyoꞌo be men. Leꞌa be usan gox polta ten beuna lá ndapta ta gaw bexa.
ACT 7:12 Leꞌa gor na mbiꞌín Jacob leꞌa Egipto ncho trig gaw bexa, cha mtuꞌub xa be xin xa, be usan gox polta ten beuna. Leꞌa ta wa biaj ned ngwaꞌbe bexa sa wa.
ACT 7:13 Leꞌa biaj itop ngwaꞌbe bexa Egipto, leꞌa Kosé ndab ndoꞌ bexa leꞌa bexa wit na. Weꞌe uniꞌí faraón ta xan ná Kosé.
ACT 7:14 Cha ndab Kosé ndoꞌ be wit na yaꞌyoꞌo bexa Jacob xus bexa, no itea be ltsaꞌa xa. Leꞌa itea bexa wa pa chon gaꞌal ncho tiꞌin bexa.
ACT 7:15 Li nak nchaꞌa Jacob Egipto, sa ngut xa no be usan gox polta ten beuna.
ACT 7:16 Leꞌa bexa wa mgaꞌach gezh Siquem ten Canaán ndee, len baꞌa sa usiꞌi Abraham ndoꞌ be xin Hamor xa Siquem.
ACT 7:17 ’Ná leꞌa zha ndencho bexa wa Egipto leꞌa bexa uzheꞌeb ngok kwaꞌad. Leꞌa zha na nsaso gax zha gun Dios ta ndab Dios ndoꞌ Abraham,
ACT 7:18 zha weꞌe uyoꞌo stub xa nibeꞌe Egipto, dub xa lá igondoꞌ Kosé.
ACT 7:19 Leꞌa xa wa mkwiꞌinno bexa Israel no uzheꞌeb mtsaksi xa be usan gox polta ten beuna. No unibeꞌe xa ulaꞌa be xagots Israel gat be meꞌed bgiꞌi tiꞌi ngol, ndontsa naꞌanpa gak kwaꞌad bexa.
ACT 7:20 Leꞌa tiemp weꞌe ngol Moisés. Leꞌa Dios uzheꞌeb nsak ladna lak nak meꞌed wa. Leꞌa be usan ten meꞌed mlaꞌach meꞌed chon mbeꞌe ta lid xa.
ACT 7:21 Tsoꞌo wa mlaꞌa bexa meꞌed, parea leꞌa xingots faraón mzheꞌal meꞌed. Cha mlaꞌach xa meꞌed, cha ngoꞌol meꞌed cuentkata dub xin xa.
ACT 7:22 Weꞌe mtsid Moisés itea be ta ndák bexa Egipto. Cha myak xa dub xa ndák itea ta ndadiꞌizh xa no ta ndun xa.
ACT 7:23 ’Leꞌa zha ncho Moisés dub top gaꞌal liꞌin, weꞌe mbinbeꞌe xa yaꞌinaꞌ xa bexa Israel, bexa ltsaꞌa xa.
ACT 7:24 Ná leꞌa gor na uniꞌí xa leꞌa dub xa Egipto nibeꞌe ndoꞌ be men wa nkegin dub xa Israel, leꞌa Moisés utoꞌo ngwaꞌulat xa wa. Cha mbit Moisés xa Egipto wa.
ACT 7:25 Leꞌa Moisés mbinbeꞌe leꞌa bexa Israel, bexa ltsaꞌa xa, yakbeꞌena leꞌa Dios guntiꞌin Moisés igote bexa sa wa, ná leꞌa bexa lá yakbeꞌena ta wa.
ACT 7:26 Ngol stubtsa wizh leꞌa Moisés uniꞌí top xa Israel ndeyobe, cha nlad Moisés xe kwe bexa, ndab xa: “Leꞌa bego wit na, ¿xtaꞌan ngi ndeyo bega zha?”
ACT 7:27 Weꞌe leꞌa xa li nkegin ltsaꞌa na wa cha msiꞌi xa Moisés, ndab xa: “¿Ton ulaxoꞌob lu gak lu xa nibeꞌe no juez ten besa zha?
ACT 7:28 ¿Nati nlad lu gut lu naꞌ lak mbit lu xa Egipto naꞌag wa zha?”
ACT 7:29 Leꞌa gor na mbiꞌín Moisés ta wa, cha mxoꞌon xa, nchaꞌa xa dub sa sit nsaleaꞌ Madián. Leꞌa sa wa kwen uyoꞌo Moisés, cha ngop Moisés top xin na.
ACT 7:30 ’Ngol zha nchola Moisés sa wa top gaꞌal liꞌin, leꞌa dub angel ten Dios mlundoꞌ ndoꞌ Moisés lat bealꞌ sa nsayolꞌ dub yagich. Leꞌa sa wa geꞌe sa bid gax sa nsob geꞌe Sinaí.
ACT 7:31 Leꞌa gor na uniꞌí Moisés ta wa cha ngwanseana xa, cha nchaꞌwiꞌi xa mas gax. Cha mbiꞌín xa ti Dios Xa Nibeꞌe ndab:
ACT 7:32 “Leꞌa naꞌ nak Dios ndankea Abraham no Isaac no Jacob, be usan gox polta ten lu.” Leꞌa Moisés usaxan nxis tant nzheb, ni lá ndun xa rages iwiꞌi xa ndoꞌ ta wa.
ACT 7:33 Leꞌa Dios cha ndab ndoꞌ xa: “Ulate ndab lu, leꞌa sa nsoꞌ lu baꞌ dub sa umbiꞌi ndoꞌ naꞌ.
ACT 7:34 Leꞌa naꞌ uní xteꞌeta kweaꞌ ncho be xmen naꞌ ndencho Egipto, no ndón naꞌ xteꞌeta nbixti bexa. Ta weꞌe ndal naꞌ ndontsa ko naꞌ bexa ndoꞌ yaꞌa bexa Egipto. Utsea nat, leꞌa naꞌ utuꞌub lu Egipto.”
ACT 7:35 ’Leꞌa bexa Israel wa mxeladla Moisés, ndab bexa: “¿Ton ulaxoꞌob lu gak lu xa nibeꞌe no juez ten besa zha?” Ná leꞌa Dios mtuꞌubka xa cuent dub xa nibeꞌe, kote xa bexa sa wa, lak ndab angel li mlundoꞌ lat yagich wa.
ACT 7:36 ’Weꞌe leꞌa Moisés leꞌa uloꞌo be usan gox polta ten beuna Egipto. Mbin xa sian ta ngwanseana be men zha uyoꞌo bexa Egipto, no zha utakea bexa tlaw Nitsdoꞌo Nane, no zha ukesea bexa geꞌe sa bid dub top gaꞌal liꞌin.
ACT 7:37 Leꞌa Moisés leꞌaka ndab ndoꞌ bexa Israel: “Leꞌa Dios Xa Nibeꞌe ten beuna uti dub xa gudiꞌizh sakndoꞌ xa lat be ltsaꞌa bego lak mti xa naꞌ. Blaꞌach bego be ta gab xa wa.”
ACT 7:38 Leꞌa Moisés leꞌakaga xa uyoꞌo lat be usan gox polta ten beuna zha ukesea bexa geꞌe sa bid. Leꞌa geꞌe Sinaí leꞌa dub angel uníꞌi ndoꞌ Moisés, msaꞌa angel be diꞌizh nsaꞌa gealnaban, ndontsa utid xa diꞌizh wa ndoꞌ beuna.
ACT 7:39 ’Ná leꞌa be usan gox polta ten beuna naꞌanpa uxobgek ndoꞌ Moisés, leꞌa bexa ndi mxelad xa no nlad bexa yach bexa leꞌaka Egipto.
ACT 7:40 Ndab bexa ndoꞌ Aarón: “Bindeꞌe ga be dios isaned ndoꞌ beuna, leꞌa beuna lá iniꞌí tal xtaꞌan ngwasea Moisés, xa na li uloꞌo beuna Egipto wa.”
ACT 7:41 Weꞌe cha mbindeꞌe bexa dub ta cuent nak bser. Cha msaꞌa bexa man xnab ndoꞌ bser wa. No ulo bexa dub ujest ten bser, ta li mbindeꞌe leꞌaka bexa wa.
ACT 7:42 Weꞌe leꞌa Dios mlaꞌa bexa, yankea bexa be taꞌa ndiꞌib gibeꞌa, lak nkeaniꞌi ndoꞌ libr ten be profet, ndab Dios: Bego xa Israel, naꞌanpa ngut bega ni dub man ndoꞌ naꞌ, ndoꞌ idub top gaꞌal liꞌin utesea bega geꞌe sa bid wa.
ACT 7:43 Ndi mbiꞌi bega lid Moloc no mbeal ten Renfán, ta mbindeꞌe bega yankea bega. Nat leꞌa naꞌ ulaꞌa leꞌa be men goꞌo bega mas galbaꞌa gezh Babilonia.
ACT 7:44 ’Leꞌa zha na utesea be usan gox polta ten beuna geꞌe sa bid wa, ndeno bexa niꞌilad ten Dios, ta mluu leꞌa Dios nkeseanoka bexa. Leꞌa ta wa ngokndeꞌe lak unibeꞌe Dios no lak mluu Dios‑a ndoꞌ Moisés.
ACT 7:45 Cha myun bexa cuent niꞌilad wa ndoꞌ be xin xa. Weꞌe leꞌa zha uyoꞌo Josué, leꞌa bexa cha ulenno ta wa gast ndoꞌ yo ndee, zha na ulantuꞌub Dios be men naꞌanpa xa Israel sa ndee. Leꞌa bexa wa ndeno niꞌilad wa gast ngol zha na uyoꞌo David.
ACT 7:46 Leꞌa Dios uzhebpa nsak ladna lak nak David. Cha unab David permis ndoꞌ Dios gundeꞌe David dub niꞌi ten Dios, sa yankea bexa Israel xa.
ACT 7:47 Ná leꞌa Salomón xin David leꞌa mbindeꞌe niꞌi wa.
ACT 7:48 Parea leꞌa Dios naꞌanpa nyoꞌo len niꞌi ndandeꞌe be men, lak ndab dub xa ndadiꞌizh sakno Dios tiemp polta:
ACT 7:49 Leꞌa gibeꞌa nak sa nsoꞌob naꞌ, leꞌa ndoꞌ gizhliyo nak sa nsoꞌ xoꞌo naꞌ. ¿Xteꞌe nak niꞌi gundeꞌe be men guntiꞌin naꞌ zha? ¿Nati xteꞌe gak dub sa une naꞌ?
ACT 7:50 Leꞌa naꞌ ndee leꞌa mbinde iteanak be ta ncho.
ACT 7:51 Weꞌe no ndab Xteb: —¡Uzhebpa ngud nak ladoꞌo bego! Leꞌa bego ndap nchaꞌ na, ná lá nsakyoꞌón bega. Leꞌa bego nak lak ngok be usan gox polta ten bega, leꞌa bega sbeꞌen lá nlad uxobgek ndoꞌ Espíritu ten Dios.
ACT 7:52 Leꞌa be usan gox polta ten bega xela mbinno itea bexa mbidiꞌizh sakndoꞌ Dios. Leꞌa bexa wa mbit bexa mbidiꞌizh xteꞌe ilen Cristo, xa ndun sbeꞌen be ta wen. Leꞌa xa wa yá mbiꞌidla, ná leꞌa bego xela mbinno xa, cha mbit bega xa.
ACT 7:53 Leꞌa bego ndenoka ley ten Dios ta msaꞌa be angel, ná lá nxobgek bega ndoꞌ ta wa.
ACT 7:54 Leꞌa gor na mbiꞌín bexa ta li ndab Xteb wa, cha uzheꞌeb ngokloo bexa, gast ndaw bexa ndeay bexa.
ACT 7:55 Ná leꞌa Xteb uzheꞌeb ncho juers ten Espíritu ten Dios ladoꞌo na, mwiꞌi xa gibeꞌa cha uniꞌí xa xeꞌa chul ten Dios. No uniꞌí xa Jesús nsob lad gaꞌal wats Dios.
ACT 7:56 Cha ndab Xteb: —¡Bwiꞌi bego! Leꞌa gibeꞌa baꞌ nsaꞌnyaꞌal. Leꞌa Xin Dios, Xa Myak Men Ndoꞌ Gizhliyo nsob wats Dios lad gaꞌal.
ACT 7:57 Weꞌe leꞌa bexa mtsaw nchaꞌ na yaꞌa bexa, no nbezhat bexa. Cha uxax usen bexa Xteb.
ACT 7:58 Cha mbiꞌi bexa Xteb dub lad toꞌo gezh, cha mlaꞌgeꞌ bexa Xteb. Leꞌa bexa na mbin ta wa mchaꞌan xab koꞌol na sa nsoꞌ dub xabgiꞌi ben nsaleaꞌ Saulo.
ACT 7:59 Ndalen nlaꞌgeꞌ bexa Xteb, leꞌa Xteb cha ndab ndoꞌ Dios: —Jesús Xa Nibeꞌe, bsen ga gealnaban ten naꞌ.
ACT 7:60 Cha msaxib xa, cha ugeꞌ ndab xa: —Tad, lá gun ten ga ta ugap ndun bexa ndee. Leꞌa gor na mtayab xa ta wa, cha ngut xa.
ACT 8:1 Leꞌa Saulo wa mbinbeꞌe gol ndi wen mbit bexa Xteb. Leꞌa wizh weꞌe leꞌa be men usaxan uzhebpa xela ndanno be xmen Jesús gezh Jerusalén. Leꞌa bexa wa cha mteꞌachso idub Judea no Samaria, ná leꞌa be apostol naꞌanpa uxoꞌon Jerusalén.
ACT 8:2 Leꞌa pla be men utsin nak mkaꞌach Xteb wa, no uzheꞌeb ndoꞌonno bexa wa Xteb.
ACT 8:3 Weꞌe leꞌa Saulo usaxan ndaꞌwiꞌi ta lid kadga dub be xmen Jesús. Cha udobxazh xa bexa, guniꞌi tal xabgiꞌi natal xagots, cha mkeꞌa xa bexa litgiꞌib.
ACT 8:4 Leꞌa bexa li utoꞌo Jerusalén wa mbidiꞌizh diꞌizh wen ten Dios itea sa ndesea bexa.
ACT 8:5 Leꞌa Julip nchaꞌa gezh Samaria, cha usaxan ndadiꞌizh xa ndoꞌ be men leꞌa Jesús nak Cristo xa mtuꞌub Dios.
ACT 8:6 Leꞌa gor na mbiꞌín be men ta ndadiꞌizh Julip, no uniꞌí bexa be uyon ten Dios mbin Julip, cha uzhebpa mlaꞌach bexa xtaꞌan ndadiꞌizh Julip.
ACT 8:7 Leꞌa Julip myunyakna kwaꞌad bexa nsak gizhtont ncho mbi bxin len ladoꞌo na. Leꞌa gor na ntoꞌo be mbi bxin wa, leꞌa mbi bxin ugeꞌ nbezhat. Nsea myakna kwaꞌad bexa lá yoo gan isea, no kwaꞌadga bexa coj.
ACT 8:8 Cha uzhebpa mten ladna itea be men gezh wa.
ACT 8:9 Leꞌa gezh wa ncho dub xabgiꞌi nsaleaꞌ Simón, dub xa ndun ta bruj. Leꞌa xa wa nkwiꞌinno kwaꞌad be men Samaria, ndab xa leꞌa xa uzheꞌeb dub xa nsak.
ACT 8:10 Leꞌa itea bexa ben no bexa gox wa nlaꞌach xtaꞌan ndadiꞌizh Simón, ndab bexa leꞌa Simón wa uzhebpa ndap juers ten Dios.
ACT 8:11 Uzhebpa nlaꞌach bexa ta ndab xa, geal leꞌa xa kwen mkwiꞌinno be men no ta bruj ndun xa wa.
ACT 8:12 Ná leꞌa gor na mbingea ladna bexa diꞌizh wen ten Dios, ta mbidiꞌizh Julip ná xteꞌe nibeꞌe Dios be men no ton nak Jesucristo, weꞌe cha utaleaꞌ bexa, be xabgiꞌi no be xagots.
ACT 8:13 Weꞌe no Simón mbingea ladna Jesús cha utaleaꞌ xa. Cha no xa usaxan nkeseano Julip, ndanseana xa be uyon ndun Julip.
ACT 8:14 Leꞌa gor na mbiꞌín be apostol ndencho Jerusalén wa leꞌa bexa Samaria no mbingea ladna diꞌizh ten Dios, cha mtuꞌub bexa Pedr no Juan sa wa.
ACT 8:15 Leꞌa gor ulayaꞌ bexa wa Samaria, cha unab bexa ndoꞌ Dios yoo Espíritu ten Dios len ladoꞌo bexa na li ndangea ladna Jesús wa.
ACT 8:16 Leꞌa zha wa leꞌa Espíritu ten Dios bi naꞌan yoo len ladoꞌo bexa wa, nabtsa utaleaꞌ bexa ta na ndangea ladna bexa Jesús.
ACT 8:17 Weꞌe leꞌa Pedr no Juan mxoꞌob yaꞌa na gek bexa, cha uyoꞌo Espíritu ten Dios len ladoꞌo bexa.
ACT 8:18 Leꞌa gor na uniꞌí Simón leꞌa Espíritu ten Dios ulen gor na nxoꞌob Pedr no Juan yaꞌa na gek be men, cha msaꞌab xa med ndoꞌ bexa wa,
ACT 8:19 ndab xa ndoꞌ bexa: —No ndoꞌ naꞌ bsaꞌa bega juers baꞌ, ndontsa guniꞌi ton uxoꞌob naꞌ yaꞌa naꞌ gek na, cha yoo Espíritu ten Dios len ladoꞌo xa wa.
ACT 8:20 Leꞌa Pedr ukaꞌab ndab: —¡Leꞌa xmed lu junt initndoꞌ no lu! ¿Xteꞌe ndanbeꞌe lu zha leꞌa ta nsaꞌa Dios dub ta isiꞌi lu zha?
ACT 8:21 Naꞌanpa no lu gun tiꞌin ndun besa ndee, leꞌa len ladoꞌo lu naꞌanpa gaꞌal nak ndoꞌ Dios.
ACT 8:22 Blaꞌa be ta ugap nak lu, cha unab ndoꞌ Dios naga sungeꞌ ladna Dios be ta ugap ndanbeꞌe lu baꞌ.
ACT 8:23 Leꞌa naꞌ uní leꞌa ladoꞌo lu uzhebpa ugap nak, leꞌa ta ugap wa leꞌa nibeꞌe lu.
ACT 8:24 Cha ukaꞌab Simón ndab: —Unab bega ndoꞌ Dios, ndontsa lá itiꞌid naꞌ ta li ndab bega wa.
ACT 8:25 Weꞌe leꞌa Pedr no Juan mbidiꞌizh diꞌizh ten Dios ndoꞌ be men gezh wa, mbidiꞌizh bexa ton nak Jesús. Cha utoꞌo bexa nseaꞌbe bexa Jerusalén. Leꞌa nes wa mbidiꞌizh bexa diꞌizh wen ten Dios ndoꞌ be men sian be gezh ten Samaria wa.
ACT 8:26 Ngol dub wizh leꞌa dub angel ten Dios ndab ndoꞌ Julip: —Utoꞌo sa ndee, cha waꞌ lad sur nes nchaꞌa Gaza, nes ntid geꞌe sa bid.
ACT 8:27 Weꞌe leꞌa Julip ngwasoꞌ, cha nchaꞌa xa. Leꞌa nes wa uniꞌí Julip dub xa nacion Etiopía. Leꞌa xa wa dub xabgiꞌi nsak nchansu be ta uyap ten Candace, xagots nibeꞌe Etiopía. Leꞌa xabgiꞌi wa ngwaꞌ Jerusalén ndontsa yankea xa Dios sa wa.
ACT 8:28 Nes nseaꞌ xa lazh xa wa nsob xa ndoꞌ carret ten xa, ndoꞌol xa libr mkeꞌa profet Isaías.
ACT 8:29 Leꞌa Espíritu ten Dios ndab ndoꞌ Julip: —Waꞌ, cha ubii wats carret baꞌ.
ACT 8:30 Leꞌa gor ulayaꞌ Julip sa wa, leꞌa Julip mbiꞌín leꞌa xa Etiopía wa nsobyoꞌol libr mkeꞌa Isaías. Cha unabdiꞌizh Julip ndoꞌ xa: —¿Nyakbeꞌena go ta nsobyoꞌol go baꞌ zha?
ACT 8:31 Leꞌa xa ukaꞌab ndab: —¿Xteꞌe yakbeꞌena naꞌ‑yá, ná na naꞌan ton gudiꞌizh‑a ndoꞌ naꞌ? Cha ndab xa ikea Julip ndoꞌ carret wa, cha isob xa wats xa.
ACT 8:32 Leꞌa ta nsobyoꞌol xa wa lndeꞌe ndab: Mbiꞌi bexa xa cuent dub borreg nchaꞌa sa gat na. No cuent dub borreg ni lá nbezhat sa nchizh xa gich las ma, li naꞌan xteꞌe ngab xa.
ACT 8:33 Xela mbinno be men xa, ná naꞌan ton isoꞌ wats xa. Naꞌan ton gudiꞌizh cuent ten be xin xa, leꞌa xa naꞌanpa kwen uyoꞌo ndoꞌ gizhliyo.
ACT 8:34 Weꞌe leꞌa xa Etiopía wa unabdiꞌizh ndoꞌ Julip ndab: —Gud ga, ¿ná ton ten cuent ndab profet ndee? ¿Ta ten leꞌaka xa, nate ta ten stubga xa?
ACT 8:35 Weꞌe leꞌa Julip cha usaxan ndadiꞌizh xteꞌe nak sa li nsobyoꞌol xa wa, cha no diꞌizh wen ten Jesús mbidiꞌizh xa.
ACT 8:36 Ndalen li nchaꞌbesea bexa wa, ngol bexa dub sa ncho nits. Leꞌa xa Etiopía ndab: —Sa ndee ncho nits. ¿Lid syoꞌo gan italeaꞌ naꞌ zha?
ACT 8:37 Leꞌa Julip ukaꞌab ndab: —Tal leꞌa go ndangea ladna Jesús idub ncho ladna ga leꞌa‑yá syoꞌoka gan. Leꞌa xabgiꞌi wa ndab: —Naꞌ ndangeaka ladna leꞌa Jesucristo wa Xin Dios.
ACT 8:38 Weꞌe cha unibeꞌe xa yaꞌibe carret wa. Cha ulaꞌyoꞌo itop bexa len nits. Cha ulaleaꞌ Julip xa.
ACT 8:39 Leꞌa gor na utoꞌo bexa len nits, leꞌa Espíritu ten Dios cha mbiꞌi Julip. Leꞌa xa Etiopía wa yá lá iniꞌíta Julip, parea uzhebpa nten ladna xa mbin xa sig nes nseaꞌ xa.
ACT 8:40 Zha leꞌaka Julip nsoꞌla gast gezh Azoto. Cha nchaꞌyadiꞌizh xa diꞌizh wen ten Jesús ndoꞌ be men itea be gezh nchaꞌtid xa, gast ulayaꞌ xa Cesarea.
ACT 9:1 Leꞌa xa nsaleaꞌ Saulo wa bi nkwaꞌankata mod xteꞌe gut xa be xmen Jesús. Cha nchaꞌa xa ndoꞌ uleꞌay ndon leꞌa nsak,
ACT 9:2 unab xa dub git goꞌo xa ndoꞌ bexa gezh Damasco, bexa nchansu be niꞌi sa nzhealbe bexa judio. Weꞌe isen xa be xmen Jesús, cha goꞌo xa bexa wa gast litgiꞌib nde Jerusalén, guniꞌi tal xabgiꞌi natal xagots.
ACT 9:3 Ná gor na yá gax gezh Damasco wa nchaꞌa Saulo, zha leꞌa dub xeꞌa siꞌil utoꞌo gibeꞌa msula idub gangeak wats Saulo.
ACT 9:4 Leꞌa xa cha ulayat ndoꞌ yo, cha mbiꞌín xa ti dub men ndab: —Saulo, Saulo, ¿xtaꞌan lbaꞌata ugap ndanno lu naꞌ zha?
ACT 9:5 Leꞌa Saulo unabdiꞌizh ndab: —¿Ton go zha, Señor? Leꞌa xa wa cha ndab: —Leꞌa naꞌ nak Jesús, xa na li ndaklono lu baꞌ. Leꞌa lu ntsaksi leꞌaka leꞌa lu cuent dub ngon nkeꞌa patad ndoꞌ bar ncheb xa ma.
ACT 9:6 Leꞌa Saulo nxis tant nzheb, cha ndab xa: —¿Señor, xtaꞌan nlad ga gun naꞌ zhaga? Leꞌa Jesús cha ndab: —Goste, cha waꞌ len gezh baꞌ, cha gab bexa ná xtaꞌan nsabndoꞌ gun lu.
ACT 9:7 Leꞌa bexa nchaꞌano Saulo wa uzhebpa ngwatenaꞌ, ta na mbiꞌín bexa ti men wa, ná bexa naꞌan ton iniꞌí.
ACT 9:8 Leꞌa Saulo cha ngwaste, parea leꞌa gor na ndiꞌizh iwiꞌi xa, leꞌa xa yá lá naꞌta. Leꞌa bexa nchaꞌano Saulo cha usenla yaꞌa Saulo, mbiꞌi bexa wa xa Damasco.
ACT 9:9 Leꞌa sa wa uyoꞌo xa chon wizh ni lá yoo gan iwiꞌi xa, no ni lá ngaw xa, ni nits lá ngo xa.
ACT 9:10 Leꞌa Damasco wa ncho dub xmen Jesús nsaleaꞌ Ananías. Leꞌa xa cuent dub ta mcheꞌatsa ladna mbiꞌín xa ti Jesús ndab: —¡Ananías! Leꞌa xa ukaꞌab ndab: —Ndee naꞌ, Señor.
ACT 9:11 Leꞌa Jesús cha ndab ndoꞌ xa: —Gosoꞌ, cha waꞌ Nes Gaꞌal, ilayaꞌ lu ta lid Judas. Cha unabdiꞌizh ná ma dub xa nsaleaꞌ Saulo xa gezh Tarso, leꞌa xa wa nsobníꞌi ndoꞌ naꞌ sa wa.
ACT 9:12 Leꞌa Saulo cuent dub ta mcheꞌa ladna uniꞌí leꞌa dub xabgiꞌi nsaleaꞌ Ananías ilen uxoꞌob yaꞌa na gek Saulo ndontsa inaꞌ Saulo.
ACT 9:13 Leꞌa Ananías cha ukaꞌab ndab: —Tad, leꞌa kwaꞌad be men ndadiꞌizh cuent ten xabgiꞌi wa, plota ta ugap ndanno xa be xmen go Jerusalén.
ACT 9:14 Ná nat leꞌa xa ulansea sa ndee no permis ten be uleꞌay nibeꞌe, ndontsa goꞌo xa itea bexa na ngeꞌ ladna go.
ACT 9:15 Ná leꞌa Jesús ndab: —¡Waꞌ! Leꞌa naꞌ mti xa wa gun tiꞌin ten naꞌ. Gudiꞌizh xa diꞌizh ten naꞌ ndoꞌ be men naꞌanpa xa Israel no ndoꞌ bexa nibeꞌe ten bexa wa, nsea ndoꞌ bexa Israel.
ACT 9:16 Leꞌa naꞌ uluu ndoꞌ xa xteꞌe kweaꞌ itid xa ta na gun xa tiꞌin ten naꞌ.
ACT 9:17 Leꞌa Ananías cha nchaꞌa sa wa, cha mxoꞌob xa yaꞌa xa gek Saulo, ndab xa: —Saulo, go nak xmen Jesucristo, leꞌa Jesús xa na li mlundoꞌ ndoꞌ go nes nsea ga wa, leꞌa xa wa mtuꞌub naꞌ sa ndee, ndontsa inaꞌgal go, no yoo Espíritu ten Dios len ladoꞌo ga.
ACT 9:18 Bi leꞌa gor wa ulate be ta ntsaw ngusndoꞌ Saulo, cha mnaꞌgal xa. Weꞌe ngwasoꞌ xa, cha utaleaꞌ xa.
ACT 9:19 Tsoꞌo wa udaw xa, cha myoꞌo juers xa. Leꞌa xa wa cha uyoꞌo sa wa stapla wizh wats be xmen Jesús ndencho Damasco wa.
ACT 9:20 Weꞌe usaxan Saulo ndadiꞌizh ndoꞌ be men len be niꞌi sa nzhealbe bexa judio, ndab xa leꞌa Jesús nak Xin Dios.
ACT 9:21 Itea bexa na mbiꞌín ta wa cha ngwanseana, ndab bexa: —¿Lid leꞌa xa ndee xa li nlad gut bexa na ndangea ladna Jesús gezh Jerusalén wa zha? ¿No xa leꞌakaga ulen gezh ndee nseasen xa bexa wa, cha yak cuent bexa ndoꞌ yaꞌa be uleꞌay nibeꞌe zha?
ACT 9:22 Ná leꞌa Saulo kad wizh mas juert ndadiꞌizh diꞌizh ten Dios, mluu xa leꞌa Jesús nak Cristo, xa mtuꞌub Dios. Leꞌa bexa judio ndencho Damasco uzheꞌeb ngwanseana gor na mbiꞌín bexa ta mbidiꞌizh Saulo wa.
ACT 9:23 Ngok kwenlapa leꞌa ncho bexa judio dubtsa mbidiꞌizh gut Saulo.
ACT 9:24 Teꞌal tezhea nlaꞌach bexa be toꞌo puert ten gezh wa, ndontsa gut bexa Saulo gor itoꞌo Saulo, ná leꞌa Saulo mbiꞌín ta wa.
ACT 9:25 Weꞌe leꞌa ngol gor ulaꞌ teꞌal leꞌa be xmen Saulo cha ulo Saulo len dub zhum, cha mlaꞌ bexa xa toꞌo muro nchonyaw gezh wa, cha mxoꞌon xa.
ACT 9:26 Leꞌa gor ulayaꞌ Saulo Jerusalén, nlad xa uchealtsaꞌa xa be xmen Jesús. Ná leꞌa itea bexa wa nzheb ndoꞌ Saulo, lá ndangea ladna bexa ti no Saulo nak xmen Jesús.
ACT 9:27 Weꞌe leꞌa Bernabé ngokno Saulo, mbiꞌi xa Saulo ndoꞌ be apostol. Cha mbidiꞌizh xa xteꞌe uniꞌí Saulo Jesús nes nchaꞌa Damasco, no xteꞌe ndab Jesús ndoꞌ Saulo. No mbidiꞌizh Bernabé xteꞌe lá izheb Saulo mbidiꞌizh Saulo diꞌizh ten Jesús ndoꞌ be men Damasco wa.
ACT 9:28 Cha li myaꞌan Saulo wats bexa, ukeseano Saulo bexa wa Jerusalén.
ACT 9:29 No ndadiꞌizh Saulo diꞌizh ten Jesús ndoꞌ gaꞌal be men. Mbidiꞌizhno xa bexa judio, bexa ndadiꞌizh diꞌizh griego, no uteyotoꞌono xa bexa. Ná leꞌa bexa wa nlad gut Saulo.
ACT 9:30 Leꞌa gor na mbiꞌín be xmen Jesús ta wa, cha mbiꞌi bexa Saulo gezh Cesarea. Ngol sa wa cha mtuꞌub bexa Saulo gezh Tarso.
ACT 9:31 Weꞌe leꞌa itea be xmen Jesús ncho Judea no Galilea no Samaria naꞌantapa kweaꞌ ndenchobe. No mas ngeꞌ ladna bexa Dios, no ndun bexa sbeꞌen ta nsak ladna Dios, no mas nsayak kwaꞌad bexa lak nsaꞌa Espíritu ten Dios.
ACT 9:32 Leꞌa Pedr nkesea inaꞌ itea be xmen Jesús, cha ngol dub wizh ngwaꞌinaꞌ xa no bexa ncho gezh Lida.
ACT 9:33 Cha mzheꞌal xa dub xabgiꞌi nsaleaꞌ Eneas. Leꞌa xa wa dub xoꞌonla liꞌin lá yoo gan isea, sbeꞌen ndoꞌ loꞌon nax xa.
ACT 9:34 Leꞌa Pedr cha ndab ndoꞌ xa: —Eneas, Jesucristo myunyakna lu. Nat goste, cha bsaxkwaꞌa loꞌon ten lu. Cha bi leꞌa gor wa leꞌa Eneas ngwaste.
ACT 9:35 Leꞌa itea be men ncho gezh Lida no gezh Sarón wa uniꞌí xteꞌe myakna xa gizh wa, cha no bexa mbingea ladna Jesús.
ACT 9:36 Leꞌa gezh Jope uyoꞌo dub xagots nsaleaꞌ Tabita, xa no nak xmen Jesús. Leꞌa diꞌizh griego leꞌa xa nsaleaꞌ Dorcas. Leꞌa xa wa ndun sian be ta wen no ndakno xa bexa uban nak.
ACT 9:37 Leꞌa dub wizh leꞌa Dorcas ulen gizh, cha ngut xa. Leꞌa be xagots cha mgas xa ngut wa, cha uxoꞌob xa wa len dub cuart nde gaꞌap.
ACT 9:38 Leꞌa Jope nde gax gezh Lida. Ta weꞌe leꞌa gor na mbiꞌín be xmen Jesús ndencho gezh Jope leꞌa Pedr nkesea Lida, cha mtuꞌub bexa top xabgiꞌi yaꞌyab ndoꞌ Pedr uxax giꞌid xa Jope.
ACT 9:39 Leꞌa Pedr cha utoꞌo nchaꞌano bexa wa. Leꞌa gor na ulayaꞌ bexa ta niꞌi wa, cha mbiꞌi bexa Pedr len cuart gaꞌap, sa nax xa ngut wa. Leꞌa kwaꞌad be xagots nab ngut xabgiꞌi ten na myaklo wats Pedr, ndoꞌonno bexa xa ngut wa. Nluu bexa be lad mbindeꞌe xa zha na nban xa ndoꞌ Pedr.
ACT 9:40 Weꞌe leꞌa Pedr ndab itate itea bexa ndencho len cuart wa. Cha msaxib Pedr, ndadiꞌizhno Pedr Dios. Cha mwiꞌi xa ndoꞌ xa ngut wa, cha ndab xa: —Tabita, ¡goste! Leꞌa xagots wa cha mwiꞌi, cha uniꞌí xa Pedr, cha ngwasob xa.
ACT 9:41 Leꞌa Pedr cha usen yaꞌa xa uxisoꞌ xa. Cha utezh Pedr be xagots no iteata be xmen Jesús wa. Cha myun Pedr cuent xa nbanla xa.
ACT 9:42 Leꞌa ta li ngok wa mgen idub gezh Jope, cha kwaꞌadta bexa mbingea ladna Jesús.
ACT 9:43 Leꞌa Pedr cha ngwaꞌyoꞌo dub ndeꞌep Jope, ta lid dub xa nsaleaꞌ Simón, xa nkuꞌud gid man.
ACT 10:1 Leꞌa gezh Cesarea uyoꞌo dub xabgiꞌi nsaleaꞌ Cornel, dub soldad nibeꞌe dub gayoꞌo be soldad, bexa ten partid nsaleaꞌ Italiano.
ACT 10:2 Leꞌa xa wa no itea bexa ncho ta lid xa ndankea Dios, no nxobgek bexa ndoꞌ Dios. No ndakno xa be men, bexa uban nak; no ndadiꞌizhno tseꞌe xa Dios.
ACT 10:3 Leꞌa dub wizh pa gor nkea uyon gor uzhe, cuent dub ta mcheꞌa ladna xa uniꞌí xa dub angel ten Dios ulayaꞌ sa nsob xa. Cha ndab angel: —¡Cornel!
ACT 10:4 Leꞌa Cornel cha mwiꞌi ndoꞌ angel wa, no uzhebpa mzheb xa unabdiꞌizh xa: —¿Xtaꞌan nlad go? Leꞌa angel wa ndab: —Leꞌa Dios ndoꞌón ta ndab lu ndoꞌ xa, no naꞌ xa ta ndakno lu be men uban nak.
ACT 10:5 Nat btuꞌub pla be men yaꞌbe gezh Jope yaꞌtezh bexa xa nsaleaꞌ Simón, xa no nsaleaꞌga Pedr.
ACT 10:6 Leꞌa xa wa ncho ta lid stubga xa nsaleaꞌ Simón, xa nkuꞌud gid man, xa ncho gax toꞌo nitsdoꞌo wa. Leꞌa Pedr wa gab ná xtaꞌan nsabndoꞌ gun lu.
ACT 10:7 Leꞌa gor na unitndoꞌ angel ndoꞌ Cornel, leꞌa Cornel cha utezh top mos ten na nsea dub soldad ndankea Dios, dub xa ndun tiꞌin ndoꞌ Cornel.
ACT 10:8 Cha mbidiꞌizh xa itea be ta uniꞌí xa wa, cha mtuꞌub xa bexa wa Jope.
ACT 10:9 Ngol stubtsa wizh gor nsalayaꞌ gax bexa wa Jope, pa gor gawizh leꞌa Pedr ukea gek niꞌi, nchaꞌyadiꞌizhno xa Dios.
ACT 10:10 Ngol gor uzhebpa ndanna xa, nlad xa gaw xa. Ná leꞌa ndalen ndeyundeꞌe bexa ta gaw xa, weꞌe uniꞌí xa cuent dub ta mcheꞌa ladna xa.
ACT 10:11 Uniꞌí xa leꞌa gibeꞌa myaꞌal, cha dub ta cuent dub bleꞌa lad siꞌil nchii idap skin‑a nchaꞌlaꞌ ndoꞌ yo.
ACT 10:12 Leꞌa ndoꞌ lad wa ndiꞌib isandoꞌ be man ndap dap xoꞌo na nsea be wach no be man duꞌub.
ACT 10:13 Cha mbiꞌín xa ti Dios ndab: —Pedr, gosoꞌ. Bit dub man cha udaw ma.
ACT 10:14 Ná leꞌa Pedr ukaꞌab ndab: —Naꞌan, Señor. Naꞌ nunk gol gaw dub ta bzhiꞌik, dub ta lá nsabndoꞌ gaw be men judio.
ACT 10:15 Ná leꞌa ti Dios wa ulengal ndab: —Leꞌa be ta ndáp naꞌ leꞌa‑yá ta umbiꞌi, lá gab lu ndoꞌ‑yá ta bzhiꞌik.
ACT 10:16 Chon biaj li uníꞌi Dios ndoꞌ Pedr. Weꞌe leꞌa lad wa cha mkea leꞌakagal gibeꞌa.
ACT 10:17 Leꞌa Pedr cha uzheꞌeb ndanbeꞌe ná xtaꞌan gab ta li uniꞌí xa wa. Ndalen wa ulayaꞌ be men li mtuꞌub Cornel nchaꞌkwaꞌan Pedr ta lid Simón wa.
ACT 10:18 Cha unabdiꞌizh bexa naga lid sa weꞌe nbeas Simón, xa no nsaleaꞌ Pedr.
ACT 10:19 Ndalen li nsobyunbeꞌe Pedr ta li uniꞌí xa wa, leꞌa Espíritu ten Dios ndab: —Unaꞌ, leꞌa chon xabgiꞌi nseakwaꞌan lu.
ACT 10:20 Gosoꞌ, cha ulaꞌ, cha waꞌno bexa wa. Lá gunbeꞌe lu ti ton xa wa, leꞌa bexa wa naꞌ mtuꞌub.
ACT 10:21 Cha ulaꞌ Pedr sa nde bexa mtuꞌub Cornel wa, cha ndab xa ndoꞌ bexa: —Leꞌa naꞌ ndee Pedr, xa li nkwaꞌan bega wa. ¿Xtaꞌan gunno bego naꞌ?
ACT 10:22 Leꞌa bexa ukaꞌab ndab: —Leꞌa dub soldad nibeꞌe nsaleaꞌ Cornel mtuꞌub besa. Leꞌa xa wa dub xa wen nak no nxobgek xa ndoꞌ Dios no utsin nak xa ndoꞌ bexa judio. Leꞌa dub angel ten Dios ndab ndoꞌ Cornel kwezh xa go, giꞌid go ta lid xa, ndontsa goꞌón xa xtaꞌan gab ga.
ACT 10:23 Weꞌe leꞌa Pedr cha ndab ndoꞌ bexa yoo bexa len niꞌi. Cha sa weꞌe ngot bexa teꞌal wa. Ngot xeꞌa cha nchaꞌano bexa wa Pedr no stapla be xmen Jesús ncho Jope wa.
ACT 10:24 Ngol stubtsa wizh leꞌa bexa ulayaꞌ Cesarea. Leꞌa Cornel utezhla be ltsaꞌa xa nsea be amig ten xa. Leꞌa bexa wa ndenkeaꞌ ná xá gor ilayaꞌ Pedr.
ACT 10:25 Leꞌa gor ulayaꞌ xa wa, leꞌa Cornel utoꞌo usaxib ndoꞌ Pedr, ngwankea xa Pedr.
ACT 10:26 Ná leꞌa Pedr cha uxisoꞌ xa ndab xa: —Gosoꞌ ga. Leꞌa naꞌ ndee dub men cuentkaga go.
ACT 10:27 Ndalen ndeyadiꞌizh bexa cha li uyoꞌo bexa len niꞌi wa. Cha uniꞌí Pedr ndebe kwaꞌad be men wa.
ACT 10:28 Cha ndab Pedr ndoꞌ bexa: —Leꞌa bego uniꞌíka leꞌa ley ten besa judio nibeꞌe lá uchealtsaꞌa besa dub xa naꞌanpa xa judio, no ni lá yoo besa len lid dub xa wa. Ná leꞌa Dios mluu ndoꞌ naꞌ leꞌa naꞌ lá nsabndoꞌ gáp leꞌa dub men xa bzhiꞌik.
ACT 10:29 Ta weꞌe gor utezh bega naꞌ, cha uxax ndal naꞌ ni naꞌan xteꞌe ngáp naꞌ. Nat nabdiꞌizh naꞌ ndoꞌ bega, ¿xtaꞌan utezh bega naꞌ?
ACT 10:30 Weꞌe leꞌa Cornel ukaꞌab ndab: —Leꞌa nchaꞌala mdap wizh, pa gor nkea uyon uzhe gol gaw naꞌ, ndi nsobyadiꞌizh naꞌ ndoꞌ Dios sa ndee. Cha mlundoꞌ dub xabgiꞌi ndoꞌ naꞌ, nak xa dub lad ndon nlaꞌbealꞌ.
ACT 10:31 Cha ndab xa ndoꞌ naꞌ: “Cornel, leꞌa Dios ndoꞌón ta ndab lu ndoꞌ xa no naꞌ xa ta ndakno lu be men uban nak.
ACT 10:32 Nat btuꞌub ton yaꞌ gezh Jope yaꞌtezh xa Simón xa noga nsaleaꞌ Pedr. Leꞌa xa wa ncho ta lid stubga xa nsaleaꞌ Simón xa nkuꞌud gid, ncho gax toꞌo nitsdoꞌo. Leꞌa gor ilanseaꞌ Pedr ta lid lu, gudiꞌizh xa ndoꞌ lu.”
ACT 10:33 Weꞌe leꞌa naꞌ uxax mtuꞌub bexa mbidkwaꞌan go. Nat nten ladna besa cha nseaka go. Nat leꞌa besa nde sa ndee ndoꞌ Dios, ndontsa goꞌón besa itea ta unibeꞌe Dios gab go ndoꞌ besa.
ACT 10:34 Weꞌe leꞌa Pedr usaxan ndadiꞌizhla ndab: —Nat myakbeꞌena naꞌ leꞌa Dios lá nti ni dub men.
ACT 10:35 Guniꞌi pa nacion leꞌa Dios nsak ladna lak nak bexa nxobgek ndoꞌ Dios no ndun bexa ta wen.
ACT 10:36 Leꞌa Dios uníꞌi ndoꞌ besa xa Israel, mbidiꞌizh xa diꞌizh wen ná xteꞌe wen yaꞌan be men ndoꞌ xa juers ten ta mbin Jesucristo, Xa Nibeꞌe itea be men.
ACT 10:37 Leꞌa bego uniꞌíka xteꞌe nak ta uyoꞌo idub Judea, ta usaxan distrit Galilea, tsoꞌo na mbidiꞌizh Juan leꞌa be men nsabndoꞌ italeaꞌbe.
ACT 10:38 Uniꞌí bega xteꞌe msaꞌa Dios juers no Espíritu ten na ndoꞌ Jesús xa gezh Nazaret. Weꞌe leꞌa Jesús ukeseayun be ta wen no myunyakna xa itea bexa ntsaksi maxuꞌu, geal leꞌa Dios ndakno xa.
ACT 10:39 ’Leꞌa besa no uniꞌí itea ta mbin Jesús idub Judea no gast gezh Jerusalén, sa na mbit be men xa, mkeꞌa be men xa ndoꞌ cruz.
ACT 10:40 Ná leꞌa Dios ngol wizh yon mxiste Jesús ndoꞌ gealgut. Cha mbin Dios mlundoꞌ Jesús ndoꞌ besa.
ACT 10:41 Leꞌa Jesús wa naꞌanpa ulundoꞌ ndoꞌ itea be men, nabtsa ndoꞌ besa xa na mtila Dios mlundoꞌ xa. Leꞌa tsoꞌo na uban xa wa, leꞌa besa udawno xa no nguno besa xa.
ACT 10:42 Leꞌa Dios cha unibeꞌe gudiꞌizh besa ndoꞌ be men, gab besa leꞌa Dios leꞌa ulaxoꞌob Jesús gab Jesús ná ton ndap ke, bexa nban no bexa ngut.
ACT 10:43 Leꞌa itea be profet yá mbidiꞌizhka cuent ten Jesús, ndab bexa leꞌa tal ton igeꞌ ladna xa, leꞌa Dios stsuꞌu be ke ten bexa.
ACT 10:44 Ndalen li nsoꞌyadiꞌizh Pedr ta wa, leꞌa Espíritu ten Dios cha uyoꞌo len ladoꞌo itea bexa li ndeyoꞌón ta wa.
ACT 10:45 Leꞌa bexa judio na li ulenno Pedr wa ngwanseanabe ta na li msaꞌa Dios Espíritu ten na no ndoꞌ bexa naꞌanpa xa judio.
ACT 10:46 Ndoꞌón bexa leꞌa bexa nde sa wa usaxan ndadiꞌizh isandoꞌ diꞌizh, ndab bexa leꞌa Dios uzheꞌeb dub xa juert nak.
ACT 10:47 Weꞌe leꞌa Pedr cha ndab ndoꞌ bexa judio wa: —Leꞌa bexa ndee usen Espíritu ten Dios lakkaga beuna ndee, ta weꞌe lá nsabndoꞌ uka beuna italeaꞌ bexa len nits.
ACT 10:48 Cha ndab Pedr italeaꞌ bexa ta na nak bexa xmen Jesucristo. Weꞌe leꞌa bexa wa cha unab ndoꞌ Pedr yoo Pedr sa wa stapla wizh.
ACT 11:1 Leꞌa be apostol nsea iteata be xmen Jesús ndencho Judea mbiꞌín leꞌa bexa naꞌanpa xa judio no mbingea ladna diꞌizh ten Dios.
ACT 11:2 Ná leꞌa zha na nseaꞌ Pedr Jerusalén, leꞌa ncho bexa judio cha uteyo Pedr,
ACT 11:3 ndab bexa: —¿Xtaꞌan uyoꞌo lu len lid bexa naꞌanpa xa judio, no udawno lu bexa?
ACT 11:4 Leꞌa Pedr cha mbidiꞌizh be ta utid wa, ndab xa:
ACT 11:5 —Leꞌa dub wizh zha na uyoꞌo naꞌ gezh Jope, ndalen nsobyadiꞌizhno naꞌ Dios, cuent ta mcheꞌa lad naꞌ uní naꞌ dub ta cuent dub bleꞌa lad siꞌil nchii idap skin‑a. Leꞌa ta wa utoꞌo gibeꞌa nchaꞌlaꞌ‑yá sa nsoꞌob naꞌ.
ACT 11:6 Cha mwiꞌi naꞌ ná xtaꞌan ta ndiꞌib ndoꞌ‑yá, cha uní naꞌ be man ndap dap xoꞌo na, no be man gix, no be wach no be man duꞌub.
ACT 11:7 Weꞌe mbín naꞌ ti Dios ndab: “Pedr, gosoꞌ. Bit be man ndee, cha udaw ma.”
ACT 11:8 Leꞌa naꞌ ndáp: “Naꞌan, Señor. Naꞌ nunk gol gaw dub ta bzhiꞌik, dub ta lá nsabndoꞌ gaw be men.”
ACT 11:9 Weꞌe leꞌa ti Dios ta ntoꞌo gibeꞌa baꞌ wa cha ndabgal: “Leꞌa be ta ndáp naꞌ leꞌa‑yá ta umbiꞌi, lá gab lu ndoꞌ‑yá ta bzhiꞌik.”
ACT 11:10 Leꞌa ti Dios chon biaj li ndab ndoꞌ naꞌ. Weꞌe cha mkeagal lad wa gibeꞌa.
ACT 11:11 ’Bi leꞌa gor wa leꞌa chon xabgiꞌi utoꞌo gezh Cesarea ulansea niꞌi sa nchoꞌo naꞌ wa.
ACT 11:12 Leꞌa Espíritu ten Dios cha ndab ndoꞌ naꞌ gaano naꞌ bexa wa. Cha mbi naꞌ isaxoꞌop bexa no nak xmen Jesús, bexa nde ndee. Cha uyoꞌo besa len lid men wa.
ACT 11:13 Leꞌa xa wa mbidiꞌizh leꞌa ta lid xa wa uniꞌí xa dub angel ten Dios nsoꞌma sa wa, cha ndab angel ndoꞌ xa: “Btuꞌub bexa yaꞌtezh dub xa ncho Jope nsaleaꞌ Simón, xa no nsaleaꞌga Pedr.
ACT 11:14 Leꞌa xa wa gab ná xteꞌe gap lu gealnaban no itea bexa ta lid lu.”
ACT 11:15 Weꞌe leꞌa gor na usaxan mbidiꞌizh naꞌ ndoꞌ bexa wa, leꞌa Espíritu ten Dios uyoꞌo len ladoꞌo bexa lak uyoꞌo Espíritu ten Dios wa len ladoꞌo beuna zha ned wa.
ACT 11:16 Cha mtseꞌa lad naꞌ ta ndab Jesús ndoꞌ beuna: “Ugeaka leꞌa Juan ulaleaꞌ be men len nits, parea leꞌa bega italeaꞌ nsea Espíritu ten Dios.”
ACT 11:17 Nat leꞌa Dios no ndoꞌ bexa wa msaꞌa ta na msaꞌa xa ndoꞌ beuna ndangea ladna Jesucristo wa. Leꞌa naꞌ naꞌanpa uka ta ndun Dios.
ACT 11:18 Leꞌa gor na mbiꞌín bexa ta li ndab Pedr wa, cha xe ute bexa. Cha ndab bexa leꞌa Dios uzheꞌeb dub xa juert nak. No ndab bexa: —Nat uniꞌí beuna leꞌa noka be men naꞌanpa xa judio, tal leꞌa bexa ulaꞌa be ta ugap nak bexa, leꞌa Dios usaꞌaka gealnaban ndoꞌ bexa.
ACT 11:19 Leꞌa tsoꞌo na ngut Xteb, leꞌa be men uzheꞌeb usaxan xela ndanno bexa nak xmen Jesús. Leꞌa ncho bexa wa ngwaꞌuxoꞌon gast distrit Fenicia, nsea isla Chipre, nsea gezh Antioquía. Leꞌa be sa wa mbidiꞌizh bexa diꞌizh ten Jesús ndoꞌ nabtsa bexa judio.
ACT 11:20 Ná ncho pla bexa utoꞌo Chipre no Cirene, nchaꞌa bexa wa Antioquía, cha usaxan bexa ndadiꞌizh bexa diꞌizh wen ten Jesús wa ndoꞌ bexa naꞌanpa xa judio.
ACT 11:21 Leꞌa Dios uzheꞌeb ngokno bexa, cha uzheꞌeb kwaꞌad be men mbingea ladna diꞌizh wa, cha mgeꞌ ladna bexa Jesús.
ACT 11:22 Leꞌa gor na mbiꞌín be xmen Jesús ndencho Jerusalén ta wa, cha mtuꞌub bexa Bernabé gezh Antioquía.
ACT 11:23 Gor ulayaꞌ xa sa wa, weꞌe uniꞌí xa xteꞌe wen ndanno Dios bexa wa, cha uzheꞌeb mten ladna xa. Cha mtenxeꞌa xa bexa wa, ndab xa ndoꞌ bexa wa gaꞌaltsa kwe bexa, lá ulaꞌa bexa ta ngeꞌ ladna bexa Dios.
ACT 11:24 Leꞌa Bernabé wa uzheꞌeb dub xa wen, no ncho juers ten Espíritu ten Dios ladoꞌo xa, no ngeꞌ ladna xa Jesús idub ncho ladna xa. Weꞌe leꞌa uzheꞌeb kwaꞌad men gezh wa mbingea ladna Jesús.
ACT 11:25 Tsoꞌo wa leꞌa Bernabé cha nchaꞌa gezh Tarso nchaꞌkwaꞌan xa Saulo. Leꞌa gor mzheal xa Saulo, cha mbiꞌi xa Saulo Antioquía.
ACT 11:26 Cha uyoꞌo bexa pa dub liꞌin lat be xmen Jesús sa wa. No mluu bexa kwaꞌadpa be men wa. Leꞌa Antioquía wa sa na ndon leꞌa ned msaleaꞌ be men bexa na ndangea ladna Jesús wa “xmen Cristo.”
ACT 11:27 Leꞌa zha wa ncho pla bexa ndadiꞌizh sakndoꞌ Dios utoꞌo Jerusalén nchaꞌbe Antioquía wa.
ACT 11:28 Leꞌa dub xa wa nsaleaꞌ Ágabo. Leꞌa Espíritu ten Dios ndab ndoꞌ xa, gab xa leꞌa idub ndoꞌ gizhliyo yoo dub win siꞌil. Leꞌa win weꞌe uyoꞌo tiemp unibeꞌe Claudio idub sa nibeꞌe Roma.
ACT 11:29 Ta weꞌe leꞌa be xmen Jesús ndencho Antioquía wa mbidiꞌizh utuꞌub med ndoꞌ be xmen Jesús ndencho Judea, msaꞌa bexa bi lak sian‑a ndap bexa.
ACT 11:30 Leꞌa Bernabé no Saulo cha mbiꞌi med wa ndoꞌ bexa nchansu be xmen Jesús ndencho Judea.
ACT 12:1 Leꞌa be wizh wa leꞌa Herodes xa nibeꞌe Judea usaxan ntsaksi be xmen Jesús.
ACT 12:2 Unibeꞌe Herodes gat Jacob wit Juan ndoꞌ spad.
ACT 12:3 Weꞌe uniꞌí xa leꞌa bexa judio uzheꞌeb msak ladna ta wa, cha unibeꞌegal xa ikea Pedr litgiꞌib. Leꞌa ta wa ngok len ujest Pascua ten bexa judio, zha ndaw bexa pan naꞌan levadur.
ACT 12:4 Leꞌa gor usen bexa Pedr, cha mkeꞌa bexa Pedr litgiꞌib. Leꞌa sa wa nlaꞌach dap xkwaꞌa soldad, dap gaꞌga xa kad dub xkwaꞌa bexa wa. Leꞌa Herodes ndanbeꞌe kotsoꞌ Pedr ndoꞌ be men itidtsa ujest Pascua wa.
ACT 12:5 Ndalen li nkea Pedr litgiꞌib, leꞌa be xmen Jesús uzhebpa unab ndoꞌ Dios gakno Dios Pedr.
ACT 12:6 Leꞌa ngol teꞌal na li gat xeꞌa igoꞌo Herodes Pedr, isoꞌ Pedro ndoꞌ be men wa, leꞌa Pedr naxnchii top caden, naxyats xa tlaw top soldad. Leꞌa stapla bexa wa ndeulaꞌach toꞌo litgiꞌib wa.
ACT 12:7 Leꞌa sa wa mlundoꞌ dub angel ten Dios, msu xeꞌa idub len cuart wa. Leꞌa angel wa mkwaꞌan Pedr, utichyaꞌa xa las Pedr, cha ndab xa: —Uxax goste. Bi leꞌa gor wa leꞌa caden nchii yaꞌa Pedr wa yoꞌo ulate.
ACT 12:8 Leꞌa angel wa cha ndabgal: —Bte cha len lu no bkeꞌa ndab lu. Cha liga mbin Pedr. Leꞌa angel wa ndabgal: —Ubixyoꞌo lad nbix lu baꞌ, cha usankea tsoꞌo naꞌ.
ACT 12:9 Leꞌa Pedr cha usankea tsoꞌo angel, ni lá iniꞌí xa naga ta ugeaka ta li ndun angel wa, ndi nsak xa leꞌa‑yá dub ta ncheꞌa ladna xa.
ACT 12:10 Ná gor utid Pedr itop sa li ndeulaꞌach soldad wa, cha ulayaꞌ xa sa nak puert giꞌib wa, sa ntoꞌo be men nkea litgiꞌib wa, leꞌa puert wa yoꞌo myaꞌal. Cha utoꞌo angel wa no Pedr. Leꞌa gor na usea bexa dub tuzh sa, leꞌa angel wa cha mlaꞌa nab Pedr.
ACT 12:11 Leꞌa gor mteꞌach wen xkaꞌal Pedr, weꞌe mbinbeꞌe Pedr: —Nat ndon ndeꞌe uní naꞌ leꞌa Dios mtuꞌubka angel wa, no mlat Dios naꞌ ndoꞌ yaꞌa Herodes no ndoꞌ ta na ndiꞌizh gunno bexa judio naꞌ.
ACT 12:12 Leꞌa gor na li mbinbeꞌe Pedr wa, cha nchaꞌa xa ta lid Marí, xnaꞌa xa nsaleaꞌ Juan xa no nsaleaꞌ Marc. Leꞌa sa wa kwaꞌad be men nzhealbe, ndeyadiꞌizhno bexa Dios.
ACT 12:13 Leꞌa gor ulayaꞌ Pedr toꞌo niꞌi wa, cha utezh Pedr bexa. Leꞌa dub xagots ben nsaleaꞌ Rode utoꞌo nchaꞌwiꞌi ná ton ta li nbezh wa.
ACT 12:14 Ná gor mgondoꞌ xagots wa leꞌa ta wa ti Pedr, tant nten ladna xa ni lá igen uxaꞌal xa toꞌo niꞌi wa, ndi karrel myaꞌyab xa leꞌa Pedr nsoꞌ toꞌo niꞌi.
ACT 12:15 Ná leꞌa bexa wa ndab: —Lu ga usak ta wa. Ná leꞌa xagots wa ndab leꞌa ta wa ta ugeaka. Leꞌa bexa wa cha ndab: —Leꞌa ta wa naꞌanpa Pedr, leꞌa ta wa dub angel.
ACT 12:16 Ndalen wa leꞌa Pedr bi nsoꞌbezhka toꞌo niꞌi wa. Leꞌa gor na mxaꞌal bexa toꞌo niꞌi wa no uniꞌí bexa leꞌa‑yá Pedrka, weꞌe cha uzheꞌeb ngwanseana bexa.
ACT 12:17 Leꞌa Pedr cha uxits yaꞌa na ndontsa xe kwe bexa. Cha mbidiꞌizh Pedr ndoꞌ bexa xteꞌe mgoꞌo Dios xa litgiꞌib. Cha ndab xa: —Waꞌyadiꞌizh bega ta ndee ndoꞌ Jacob nsea ndoꞌ iteata be xmen Jesús. Cha ukaꞌan xa sa wa, cha nchaꞌa xa stubga gezh.
ACT 12:18 Ngot xeꞌa cha uzheꞌeb ndeseyoch be soldad len litgiꞌib, leꞌa bexa lá iniꞌí pa nchaꞌa Pedr.
ACT 12:19 Leꞌa Herodes unibeꞌe ukwaꞌan bexa Pedr, ná Pedr yá lá ngaꞌigaꞌata. Cha uzheꞌeb unabdiꞌizh Herodes ndoꞌ bexa nlaꞌach litgiꞌib wa ná xteꞌe mxoꞌon Pedr, cha unibeꞌe xa gat bexa wa. Tsoꞌo wa leꞌa Herodes cha mkaꞌan Judea, nchaꞌa xa yoo xa gezh Cesarea.
ACT 12:20 Leꞌa Herodes uzheꞌeb ndakloo ndoꞌ be men ndencho gezh Tiro no Sidón. Parea leꞌa be men itop gezh wa nsiꞌi ta gaw na ndoꞌ Herodes. Ta weꞌe leꞌa bexa wa mkwaꞌan xteꞌe lá gaklonota Herodes bexa. Cha mbidiꞌizhno bexa Blasto dub xmen Herodes, gab Blasto ndoꞌ Herodes leꞌa bexa nlad gudiꞌizhno Herodes.
ACT 12:21 Leꞌa Herodes cha msabeꞌe dub wizh gudiꞌizhno xa bexa. Zha ngol wizh wa leꞌa Herodes ngok lad uyap ten na. Cha usob xa sa ndun xa regl be taꞌa. Cha mbidiꞌizh xa ndoꞌ be men wa.
ACT 12:22 Leꞌa bexa wa usaxan ugeꞌ ndab: —¡Leꞌa xa na li ndadiꞌizh wa naꞌanpa dub men, leꞌa xa ndi leꞌa dub dios!
ACT 12:23 Bi leꞌa gor wa leꞌa dub angel ten Dios mbin usen gizh Herodes, geal leꞌa Herodes naꞌanpa ngab leꞌa bexa wa ndi Diostsa yankea. Weꞌe udaw mgeas Herodes, cha ngut xa.
ACT 12:24 Weꞌe leꞌa diꞌizh ten Dios uzheꞌeb nsateꞌachso itea lad no kwaꞌad men nsayungea ladna‑yá.
ACT 12:25 Leꞌa gor na unitsa tiꞌin ngwaꞌ Bernabé no Saulo gezh Jerusalén wa, cha myach bexa nseabe bexa leꞌaka Antioquía. Mbiꞌi bexa no Juan, xa noga nsaleaꞌ Marc.
ACT 13:1 Leꞌa lat be xmen Jesús ndencho Antioquía wa ncho bexa ndadiꞌizh sakndoꞌ Dios no bexa nluu diꞌizh ten Dios. Leꞌa bexa wa Bernabé, no Simón xa nsaleaꞌga Nagats, nsea Lucio xa gezh Cirene, nsea Manaén xa junt ngoꞌolno Herodes Antipas, nsea Saulo.
ACT 13:2 Ngol dub wizh ndalen nzhealbe be xmen Jesús sa wa, nsaꞌa bexa xno ndoꞌ Dios no lá ngaw bexa dub tiemp, leꞌa Espíritu ten Dios ndab ndoꞌ bexa: —Ulaxoꞌob bega Bernabé no Saulo, leꞌa naꞌ mti bexa gun bexa tiꞌin ten naꞌ.
ACT 13:3 Weꞌe leꞌa gor na mtayadiꞌizhno bexa Dios no utidla zha lá ngaw bexa, cha mxoꞌob bexa yaꞌa bexa gek Bernabé no Saulo. Cha mtuꞌub bexa itop xa wa gun bexa tiꞌin ten Dios.
ACT 13:4 Leꞌa Espíritu ten Dios ulogek Bernabé no Saulo yaꞌ bexa gezh Seleucia. Leꞌa sa wa cha uyoꞌo bexa len dub barco siꞌil nchaꞌa isla Chipre.
ACT 13:5 Gor na ulayaꞌ bexa gezh Salamina ten Chipre, cha usaxan ndadiꞌizh bexa diꞌizh ten Dios len be niꞌi sa nzhealbe bexa judio. Leꞌa Juan no ndakno bexa sa wa.
ACT 13:6 Weꞌe utid bexa idub isla wa, cha ulayaꞌ bexa gezh Pafos. Leꞌa sa wa mzheꞌal bexa dub xa judio nsaleaꞌ Barjesús, dub xa bruj. Leꞌa xa wa ndab ndadiꞌizh sakndoꞌ Dios, ná leꞌa ta wa gealkwiꞌin.
ACT 13:7 Leꞌa Barjesús wa dub amig ten Sergio Paulo, xa nibeꞌe idub Chipre, dub xa ndákpa. Leꞌa Sergio Paulo wa unab giꞌid Bernabé no Saulo, leꞌa xa nlad goꞌón diꞌizh ten Dios.
ACT 13:8 Ná leꞌa Barjesús xa noga nsaleaꞌ Elimas wa ndakloo ndoꞌ bexa, leꞌa xa lá nlad gungea ladna Sergio Paulo diꞌizh ten Cristo.
ACT 13:9 Weꞌe leꞌa Saulo xa nsaleaꞌga Pabl wa uzheꞌeb ncho juers ten Espíritu ten Dios ladoꞌo na, mwiꞌila ndon gaꞌal ndoꞌ xa bruj wa,
ACT 13:10 cha ndab xa: —¡Lu xin maxuꞌu! Lu xa ukwiꞌin, no ugap nak lu. Sbeꞌentsa nka lu ndoꞌ be ta wen ten Dios. ¿Xtaꞌan lá nlaꞌa lu gungea ladna be men diꞌizh ten Jesús zha?
ACT 13:11 Nat leꞌa Dios utsaksi lu, yak lu dub xa lá naꞌ, lá yoota gan inaꞌ lu xeꞌa wizh dub tiemp. Bi leꞌa gor wa leꞌa Elimas naꞌanpa inaꞌ, cha nkwaꞌan xa ton isen yaꞌa xa uluu nes ndoꞌ xa.
ACT 13:12 Leꞌa gor uniꞌí xa nibeꞌe Chipre ta wa, cha uzheꞌeb ngwanseana xa ndoꞌ diꞌizh ten Jesús, cha no xa mbingea ladna Jesús.
ACT 13:13 Leꞌa Pabl no be ltsaꞌa xa cha utoꞌo Pafos, nchaꞌbe bexa len dub barco siꞌil nchaꞌa gezh Perge ten región Panfilia. Ná leꞌa Pafos wa leꞌa Juan cha mlaꞌa bexa, nseaꞌ xa Jerusalén.
ACT 13:14 Leꞌa Pabl no Bernabé cha utoꞌo Perge, nchaꞌa bexa gezh Antioquía ten región Pisidia. Ngol dub wizh neꞌe be men cha ngwaꞌ bexa len niꞌi sa nzhealbe bexa judio gezh wa, cha usob bexa.
ACT 13:15 Gor mtayoꞌol dub xa dub tuzh ta mkeꞌa Moisés no be profet, leꞌa bexa nchansu sa wa cha ndab ndoꞌ dub men gab ndoꞌ Pabl no ndoꞌ Bernabé: —Bego nak beuna xmen Dios, tal leꞌa bego nlad gudiꞌizh ndoꞌ besa dub taꞌa gakno besa, gud bego‑yá nat.
ACT 13:16 Weꞌe leꞌa Pabl cha usoꞌ, cha uxits yaꞌa na, ndontsa xe kwe be men, cha ndab xa: —Blaꞌach bego xa Israel, no iteata bego ndankea Dios.
ACT 13:17 Leꞌa Dios ten beuna xa Israel mti be usan gox polta ten beuna wa no mbin Dios myak kwaꞌad bexa wa zha utencho bexa Egipto, cha juers ten Dios uloꞌo Dios bexa sa wa.
ACT 13:18 No mxik Dios ndoꞌ bexa dub top gaꞌal liꞌin uyoꞌo bexa geꞌe sa bid.
ACT 13:19 No juers ten Dios leꞌa bexa mbin gan ndoꞌ gaꞌad ras be men kwaꞌadpa ndencho ndoꞌ yo Canaán. Cha msaꞌa Dios yo siꞌil wa ndoꞌ bexa Israel wa.
ACT 13:20 Tsoꞌo wa pa dap gayoꞌo itol liꞌin, leꞌa Dios msaꞌa be juez nchansu bexa Israel, gast tiemp ten profet Samuel.
ACT 13:21 Leꞌa zha wa unab be men dub rey inibeꞌe bexa. Weꞌe leꞌa Dios msoꞌ Saúl xin Cis xa ras Benjamín, gak xa xa nibeꞌe top gaꞌal liꞌin.
ACT 13:22 Tsoꞌo wa leꞌa Dios ulatsoꞌ Saúl, cha msoꞌ Dios David gak xa xa nibeꞌe. Leꞌa Dios ndab: “Leꞌa David xin Isaí dub xa nsak lad naꞌ lak nak xa, leꞌa xa wa gun itea ta nlad naꞌ.”
ACT 13:23 No ndab Dios ndoꞌ David, leꞌa dub xa ras David wa gak xa na usaꞌa gealnaban ndoꞌ be men Israel. Leꞌa xa wa leꞌa Jesús.
ACT 13:24 Leꞌa zha na biseata ilen Jesús wa, leꞌa Juan ndadiꞌizhla diꞌizh ten Dios ndoꞌ be men Israel, ndab xa ulaꞌa bexa be ta ugap nak bexa no italeaꞌ bexa.
ACT 13:25 Ngol zha yamer usandoꞌ Juan tiꞌin wa, leꞌa xa ndab: “Leꞌa naꞌ ndee naꞌanpa leꞌa xa ndanbeꞌe bega wa. Tsoꞌo naꞌ ndee ilen stub xa mas nsak ndoꞌ naꞌ, gast ni lá isaya naꞌ kote naꞌ ndab xa wa.”
ACT 13:26 ’Blaꞌach bego nak beuna xa ras Abraham, no iteata bego ndankea Dios. Leꞌa ta na ndáp naꞌ ndee itea ndoꞌ beuna nsaꞌa gealnaban.
ACT 13:27 Leꞌa be men ncho Jerusalén no bexa nibeꞌe ten bexa wa lá yakbeꞌena bexa ton nak Jesús. Ni lá yakbeꞌena bexa be ta mbidiꞌizh be profet, ta junt ndoꞌol bexa itea be wizh neꞌe beuna wa. Ta weꞌe ndab bexa gat Jesús, lak mkeꞌa be profet polta wa gun bexa.
ACT 13:28 Leꞌa bexa ni lá izheal ni dub ke nsabndoꞌ gat Jesús, ná leꞌa bexa unab ndoꞌ Pilat inibeꞌe xa gat Jesús.
ACT 13:29 Weꞌe cha tsoꞌo na li ngwasea Jesús lak nkeaniꞌi diꞌizh ten Dios, cha uxeꞌe bexa xa ndoꞌ cruz, cha mkaꞌach bexa xa.
ACT 13:30 Ná leꞌa Dios mxiste xa wa mban xa ndoꞌ gealgut.
ACT 13:31 Leꞌa Jesús cha sian biaj mlundoꞌ ndoꞌ be xmen xa, bexa utoꞌono xa Galilea nchaꞌa xa Jerusalén. Nat leꞌa bexa wa leꞌa ndadiꞌizh ná ton nak Jesús ndoꞌ be men.
ACT 13:32 ’Nat leꞌa besa ndee ndadiꞌizh ndoꞌ bega be diꞌizh wen ná xteꞌe wen gunno Dios be men, lak ndab Dios ndoꞌ be usan gox polta ten beuna.
ACT 13:33 Nat ndoꞌ beuna nak xin bexa wa, leꞌa ta ndab Dios wa ngok cumplir gor na mxiste xa Jesús ndoꞌ gealgut, lak nkeaniꞌi ndoꞌ Salmo itop, ndab Dios ndoꞌ Jesús: “Leꞌa lu nak Xiꞌín naꞌ, leꞌa nat leꞌa naꞌ nak Xus lu.”
ACT 13:34 Leꞌa Dios leꞌa mxiste Jesús mban Jesús ndontsa lá gazhaꞌa beꞌal las xa, lakka nkeaniꞌi diꞌizh ten Dios, ndab Dios: “Usa naꞌ ta wen ndoꞌ bega, ta na ndáp naꞌ ndoꞌ David wa.”
ACT 13:35 No stub Salmo nkeaniꞌi ndab David: “Leꞌa go Dios lá ulaꞌa gazhaꞌa beꞌal las xa umbiꞌi ten ga.”
ACT 13:36 Leꞌa David mxobgekka ndoꞌ Dios, parea ngut xa, cha mgaꞌach xa baꞌa sa mgaꞌach be usan gox ten xa, cha ngwazhaꞌa beꞌal las xa.
ACT 13:37 Ná leꞌa Dios mxiste Jesús mban xa, leꞌa beꞌal las Jesús naꞌanpa ngazhaꞌa.
ACT 13:38 ’Bego nak beuna xmen Dios, blaꞌach bega leꞌa besa ndab ndoꞌ bega leꞌa Dios utsuꞌu be ke ten bega juers ten ta mbin Jesús.
ACT 13:39 Leꞌa naꞌan ton wen yaꞌan ndoꞌ Dios ta na nxobgektsa xa ndoꞌ ley mkeꞌa Moisés. Ná leꞌa tal ton igeꞌ ladna Jesús, leꞌa xa wa wen yaꞌan ndoꞌ Dios.
ACT 13:40 Blaꞌach bega naꞌanpa ilen ta li mkeꞌa be profet polta wa tsoꞌo bega, zha ndab Dios:
ACT 13:41 Bwiꞌi bego na ndun usaladno naꞌ, leꞌa bega yanseana no gat; geal leꞌa tiemp ten bega leꞌa naꞌ gun dub ta uzheꞌeb, dub ta lá gungea ladna bega, tal leꞌa dub men gudiꞌizh‑a ndoꞌ bega.
ACT 13:42 Weꞌe leꞌa gor na nchatoꞌo Pabl no Bernabé len niꞌi wa, leꞌa be men unab ndoꞌ itop bexa gudiꞌizhta bexa ta wa stub sman.
ACT 13:43 Leꞌa gor na nseaꞌbe bexa, leꞌa kwaꞌad be men usankea tsoꞌo Pabl no Bernabé. Leꞌa ta wa bexa judio no bexa naꞌanpa xa judio, bexa no ndankea Dios lak ndun bexa judio. Leꞌa Pabl no Bernabé cha mtenxeꞌa bexa wa, ndab bexa lá ulaꞌa bexa ta ngeꞌ ladna bexa Dios, xa na nkweaꞌ ladna bexa.
ACT 13:44 Ngol stub wizh neꞌe bexa, yamer iteanak be men gezh wa mzhealbe goꞌón diꞌizh ten Dios.
ACT 13:45 Ná leꞌa ncho pla bexa judio gor uniꞌí bexa leꞌa be men kwaꞌad mzhealbe sa wa, cha ngokloo bexa. Cha usaxan bexa ndab bexa leꞌa ta ndab Pabl wa naꞌanpa leꞌa nak, no xela uníꞌi bexa ndoꞌ Pabl.
ACT 13:46 Weꞌe leꞌa Pabl no Bernabé ni lá izheb bexa ndab bexa: —Besa nsabndoꞌ gudiꞌizh diꞌizh ten Dios, ned lak ndoꞌ bega xa judio. Ná nat leꞌa bega lá nsakyoꞌón‑a, ta nluu leꞌa bega naꞌanpa gap gealnaban ta nunk lá idub. Ta weꞌe leꞌa besa nchabeyadiꞌizh‑a ndi ndoꞌ bexa naꞌanpa xa judio.
ACT 13:47 Leꞌa Dios unibeꞌe li gun besa, ndab xa: Naꞌ msoꞌ lu cuent xeꞌa ten bexa naꞌanpa xa Israel, ndontsa gudiꞌizh lu idub ndoꞌ gizhliyo xteꞌe gap bexa gealnaban.
ACT 13:48 Leꞌa bexa naꞌanpa xa judio cha uzhebpa mten ladna bexa, ndab bexa leꞌa diꞌizh ten Jesús ta uzhebpa ta wenka. Weꞌe leꞌa kwaꞌad bexa wa mbingea ladna Jesús, bexa na mti Dios gap bexa gealnaban nunk lá idub.
ACT 13:49 Cha li mteꞌachso diꞌizh ten Jesús idub gax gezh wa.
ACT 13:50 Ná leꞌa bexa judio ngwaꞌyadiꞌizhno bexa naktiꞌin no pla be xagots nsak. Cha no bexa wa ngokloo ndoꞌ Pabl no ndoꞌ Bernabé, cha ulantuꞌub bexa Pabl no Bernabé gezh wa.
ACT 13:51 Leꞌa Pabl no Bernabé cha mlate yakol ngwaꞌal xoꞌo na, ta mluu leꞌa Dios utsaksi be men gezh wa. Cha nchaꞌa bexa gezh Iconio.
ACT 13:52 Parea leꞌa be xmen Jesús ndencho Antioquía wa uzheꞌeb nten ladna, no uzheꞌeb ncho juers ten Espíritu ten Dios ladoꞌo bexa.
ACT 14:1 Leꞌa gezh Iconio leꞌa Pabl no Bernabé uyote len niꞌi sa nzhealbe bexa judio, cha mbidiꞌizh bexa diꞌizh ten Dios ndoꞌ be men. Weꞌe leꞌa kwaꞌad bexa judio no kwaꞌad bexa naꞌanpa xa judio mbingea ladna Jesús.
ACT 14:2 Ná leꞌa bexa judio, bexa naꞌanpa ngungea ladna Jesús, mbin gan ngokloo kwaꞌad bexa naꞌanpa xa judio ndoꞌ be xmen Jesús wa.
ACT 14:3 Ná leꞌa Pabl no Bernabé kwen ngwaꞌyoꞌo gezh wa. Ngeꞌ ladna bexa Diostsa, ni lá nzheb bexa ndadiꞌizh bexa diꞌizh ten Dios. Leꞌa Dios msaꞌa juers ten na gun bexa be uyon ta yanseana be men, ndontsa gungea ladna be men leꞌa ta ndadiꞌizh bexa diꞌizh tenka Dios.
ACT 14:4 Ná leꞌa be men gezh wa myak top partid. Dub partid bexa nsoꞌ wats bexa judio wa. Leꞌa stub partid bexa nsoꞌ wats Pabl no Bernabé.
ACT 14:5 Weꞌe leꞌa pla bexa judio no bexa naꞌanpa xa judio no bexa naktiꞌin wa dubtsa mbidiꞌizh xela gunno bexa Pabl no Bernabé, cha gut bexa xa sbeꞌen ulaꞌgeꞌtsa bexa xa.
ACT 14:6 Ná gor na mbiꞌín Pabl no Bernabé ta wa, cha mxoꞌon bexa, nchaꞌa bexa gezh Listra no gezh Derbe no be gezh gax, be gezh ten sa nsaleaꞌ Licaonia.
ACT 14:7 Leꞌa sa wa mbidiꞌizh bexa diꞌizh wen ten Jesús ndoꞌ be men.
ACT 14:8 Leꞌa Listra ncho dub xabgiꞌi lá yoo gan isea zha ngolta xa.
ACT 14:9 Leꞌa dub wizh nsobyoꞌón xa ta ndadiꞌizh Pabl, ná gor uniꞌí Pabl xa wa, cha mgenna Pabl leꞌa xa wa ndangea ladna leꞌa Dios syunyakna xa.
ACT 14:10 Cha ugeꞌ ndab Pabl ndoꞌ xa: —¡Gosoꞌ! Bkeasoꞌ be xoꞌo lu baꞌ. Leꞌa xabgiꞌi wa cha ngwasoꞌ gast ngwasoꞌ gaꞌal xa, cha usaxan nseala xa.
ACT 14:11 Leꞌa gor uniꞌí be men ta li mbin Pabl wa, cha usaxan ugeꞌ ndadiꞌizh bexa diꞌizh ten bexa Licaonia, ndab bexa: —¡Leꞌa bexa ndee be dios myak cuent nak men ulansea lat beuna!
ACT 14:12 Cha ndab bexa leꞌa Bernabé nak dios nsaleaꞌ Júpiter. No ndab bexa leꞌa Pabl nak Mercurio stub dios ten bexa, geal leꞌa be men ndab leꞌa Pabl ndadiꞌizh lakga ndadiꞌizh Mercurio wa.
ACT 14:13 Leꞌa latbadoꞌo ndankea bexa dios Júpiter wa nde gax toꞌo gezh wa. Leꞌa uleꞌay ten sa wa cha utoꞌo, nchaꞌano pla be ngon no sian be géꞌe. Leꞌa xa no be men kwaꞌad wa ndiꞌizh usaꞌa be ta wa cuent dub xnab ndoꞌ Bernabé no ndoꞌ Pabl.
ACT 14:14 Ná gor na mbiꞌín Bernabé no Pabl ta wa, cha utsaw bexa lad nak bexa, tant lá nlad bexa ta wa. Cha ngwasyoꞌo bexa lat be men wa, cha ugeꞌ ndab bexa:
ACT 14:15 —¡Blaꞌach bego! ¿Xtaꞌan ngi lbaꞌa gun bega zha? Besa ndee men lakka bego baꞌ. Leꞌa besa ga nseabe yadiꞌizh ulaꞌa bega be ta naꞌan xtiꞌin baꞌ. Ndi bgeꞌ ladna bega Dios nban, xa mbindeꞌe gibeꞌa no gizhliyo no nitsdoꞌo nsea iteata be taꞌa ncho nat.
ACT 14:16 Leꞌa tiemp polta leꞌa Dios mlaꞌa be men kad bexa usen nes nlad na.
ACT 14:17 Ná leꞌa Dios idub tiemp nluu leꞌa xa nchoka, ndun xa be ta wen. Nlaꞌ xa gi, no ndun gaꞌal xa be taꞌa, ndontsa gap beuna ta gaw beuna no iten ladna beuna.
ACT 14:18 Parea maska li ndab Pabl no Bernabé ta wa, ná uzhebpa juert mbin bexa gan lá usaꞌa be men xnab ndoꞌ bexa.
ACT 14:19 Weꞌe ulayaꞌ pla bexa judio sa wa, bexa lá ndangea ladna Jesús utoꞌo gezh Antioquía nsea gezh Iconio. Leꞌa bexa wa mbin gan ngokloo be men Listra wa ndoꞌ Pabl. Cha mlaꞌgeꞌ bexa Pabl, gast ni bexa mbit bexa Pabl. Cha udobxazhtsa bexa Pabl dub lad toꞌo gezh wa, cha mchangix bexa Pabl sa wa.
ACT 14:20 Ná leꞌa be xmen Jesús myaklo wats Pabl. Leꞌa Pabl cha ngwaste, cha nseaꞌgal xa len gezh wa. Ngot xeꞌa leꞌa Pabl no Bernabé nchaꞌa ndi gezh Derbe.
ACT 14:21 Mbidiꞌizh bexa diꞌizh wen ten Jesús ndoꞌ be men Derbe wa, cha mbingea ladna kwaꞌad be men Jesús. Cha nseaꞌ bexa leꞌaka gezh Listra no Iconio no Antioquía ten Pisidia.
ACT 14:22 Ndab bexa ndoꞌ be xmen Jesús ndencho be gezh wa: —Gaꞌaltsa ute bega, lá ulaꞌa bega ta ngeꞌ ladna bega Dios. Leꞌa beuna itidka ndoꞌ sian gealkweaꞌ, weꞌeta yate beuna sa nibeꞌe Dios.
ACT 14:23 No ulaxoꞌob bexa pla bexa yansu be xmen Jesús be gezh wa. Weꞌe leꞌa bexa wa lá ngaw dub tiemp, no unab bexa gakno Dios bexa nchansu be men wa. Leꞌa Pabl nsea Bernabé cha mlaꞌa bexa wa ndoꞌ yaꞌa Dios, xa na li ndangea ladna bexa wa.
ACT 14:24 Cha utoꞌo bexa Pisidia, nchaꞌa bexa Panfilia.
ACT 14:25 Mbidiꞌizh bexa diꞌizh ten Jesús ndoꞌ be men gezh Perge, cha nchaꞌbega bexa gezh Atalía.
ACT 14:26 Leꞌa sa wa usen bexa dub barco siꞌil nchaꞌa gezh Antioquía ten Siria. Leꞌa Antioquía wa sa na li myun be men cuent bexa ndoꞌ yaꞌa Dios, gun bexa tiꞌin ten Dios, ta na li msandoꞌ bexa wa.
ACT 14:27 Leꞌa gor mlanseaꞌ bexa Antioquía, cha mchealte bexa be xmen Jesús. Cha mbidiꞌizh bexa xteꞌe mbintiꞌin Dios bexa sa ngwaꞌkesea bexa wa, no xteꞌe nlaꞌa Dios leꞌa bexa naꞌanpa xa judio no ndangea ladna Jesús.
ACT 14:28 Leꞌa Pabl no Bernabé kwen ngwaꞌyoꞌono be xmen Jesús gezh wa.
ACT 15:1 Weꞌe leꞌa pla men utoꞌo Judea ulayaꞌ Antioquía wa, cha usaxan nluu xa be xmen Jesús sa wa, ndab bexa ndoꞌ bexa naꞌanpa xa judio, leꞌa tal leꞌa be xabgiꞌi lá yoo beꞌe lak ndab ley ten Moisés, leꞌa Dios naꞌanpa koꞌo bexa ndoꞌ be ke ten bexa.
ACT 15:2 Leꞌa Pabl no Bernabé uzheꞌeb uteyotoꞌono bexa li nluꞌu ta wa. Ta weꞌe leꞌa be xmen Jesús ndencho sa wa cha mbidiꞌizh yaꞌ Pabl no Bernabé no stapla bexa gast Jerusalén, ndontsa gudiꞌizhno bexa be apostol no bexa nchansu be xmen Jesús sa wa, ná xteꞌe nak ta wa.
ACT 15:3 Leꞌa be xmen Jesús ncho gezh Antioquía cha mtuꞌub bexa wa. Leꞌa nes wa nchaꞌtid bexa sa nsaleaꞌ Fenicia no Samaria, cha mbidiꞌizh bexa ndoꞌ be xmen Jesús sa wa, ná xteꞌe no bexa naꞌanpa xa judio mbingea ladna Jesús. Cha uzheꞌeb mten ladna bexa na mbiꞌín ta wa.
ACT 15:4 Gor ulayaꞌ bexa Jerusalén, leꞌa be apostol nsea bexa nchansu no iteata be xmen Jesús wa utsin mbinno bexa. Leꞌa Pabl no be ltsaꞌa xa cha usaxan ndadiꞌizh xteꞌeta ndakno Dios bexa.
ACT 15:5 Ná leꞌa pla bexa fariseo na ndangea ladna Jesús ngwasoꞌ ndab: —Leꞌa bexa naꞌanpa xa judio nsabndoꞌka yoo beꞌe be xabgiꞌi wa, no yankeaka bexa ley ten Dios, ta mkeꞌa Moisés.
ACT 15:6 Leꞌa be apostol no bexa nchansu be xmen Jesús wa cha mzhealbe, mbidiꞌizh bexa ná xteꞌe nsabndoꞌ gun bexa.
ACT 15:7 Ngol gor tant dub stub bexa ndeyadiꞌizhbe, leꞌa Pedr cha ngwasoꞌ ndab: —Bego nak beuna xmen Jesús, leꞌa bego uniꞌíka leꞌa mas polta leꞌa Dios mti naꞌ gayadiꞌizh naꞌ diꞌizh wen ten Jesús ndoꞌ bexa naꞌanpa xa judio, ndontsa no bexa gungea ladna‑yá.
ACT 15:8 Leꞌa Dios, xa nchandoꞌ ladoꞌo beuna, msaꞌa Espíritu ten na ndoꞌ bexa wa lak msaꞌa xa‑yá ndoꞌ beuna, ta nluu leꞌa Dios no bexa wa nkweaꞌ ladna.
ACT 15:9 Leꞌa Dios parej mbinno bexa wa no beuna, mtsambiꞌi xa ladoꞌo bexa, geal leꞌa bexa ndangea ladna Jesús
ACT 15:10 Ná nat, ¿xtaꞌan nlad bega gun bega dub ta lá nsak ladna Dios zha? ¿Xtaꞌan nlad bega yankea bexa be ley ni be usan gox ten beuna ni leꞌa beuna lá ngun gan ngankea‑yá?
ACT 15:11 Leꞌa beuna ndi uniꞌíka leꞌa ta na nkweaꞌ ladna Jesús beuna, ta weꞌe uloꞌo Dios beuna ndoꞌ be ke ten beuna no liga bexa naꞌanpa xa judio.
ACT 15:12 Weꞌe leꞌa itea be men wa ndon xe ute. Cha mlaꞌach bexa ta ndadiꞌizh Bernabé no Pabl xteꞌe mbintiꞌin Dios bexa, mbin bexa sian be uyon ten Dios lat be men naꞌanpa xa judio.
ACT 15:13 Leꞌa gor na mtayadiꞌizh Bernabé no Pabl, leꞌa Jacob ukaꞌab ndab: —Bego nak beuna xmen Jesús, blaꞌach bego ta gáp naꞌ ndee.
ACT 15:14 Leꞌa Simón Pedr baꞌ mbidiꞌizh xteꞌe utsin mbinno Dios bexa naꞌanpa xa judio lak gor ned, ndontsa no bexa gak xmen Dios.
ACT 15:15 Leꞌa ta wa nak lak ta mkeꞌa bexa mbidiꞌizh sakndoꞌ Dios tiemp polta, ndab Dios:
ACT 15:16 Leꞌa gal dub wizh leꞌa naꞌ ilengal, cha usoꞌ naꞌ dub xa inibeꞌe lak unibeꞌe David. Leꞌa ta unibeꞌe David wa cuent dub niꞌi gox ulate, ná leꞌa naꞌ ixiste‑yá, yunchaꞌaw naꞌ‑yá lakka ngok‑a zha ned wa,
ACT 15:17 ndontsa iteata be men syoꞌo gan ukwaꞌan naꞌ, bexa na mti naꞌ gak bexa xmen naꞌ.
ACT 15:18 Leꞌa naꞌ nak Dios Xa Nibeꞌe ndáp ta ndee ndoꞌ be men tiemp polkata.
ACT 15:19 Weꞌe no ndab Jacob: —Ta weꞌe nsak naꞌ naꞌanpa kich ladna beuna bexa naꞌanpa bexa judio, bexa nlad gak xmen Dios.
ACT 15:20 Ndi utuꞌubtsa beuna dub git gab‑a naꞌantapa gaw bexa be xnab nsaꞌa be men ndoꞌ be dios gizhliyo, no naꞌanpa ugal bexa dub xa naꞌanpa xa ten xa, no lá gaw bexa be man lá utsiꞌi ten no ni ten lá gaw bexa.
ACT 15:21 Leꞌa bexa nsabndoꞌ li gun, leꞌa gast tiemp polta leꞌa kadga dub gezh nchoka men ndoꞌol ley mkeꞌa Moisés. Kadga wizh neꞌe bexa ndoꞌolga bexa ta wa len be niꞌi sa nzhealbe beuna bexa judio.
ACT 15:22 Weꞌe leꞌa be apostol, no bexa nchansu be xmen Jesús, no iteata be xmen Jesús wa cha mbidiꞌizh utuꞌub bexa pla be xabgiꞌi yaꞌno Pabl no Bernabé gezh Antioquía. Mti bexa Judas xa no nsaleaꞌ Barsabás, no Silas, top xabgiꞌi nsak lat bexa wa.
ACT 15:23 Lndeꞌe ndab git goꞌo bexa Antioquía wa: “Leꞌa besa nak be apostol no besa nchansu be xmen Jesús no iteata be xmen Jesús sa ndee, ntuꞌub besa git ndee ndoꞌ bego naꞌanpa xa judio no nak xmen Jesús wa, bego ncho Antioquía no Siria no Cilicia.
ACT 15:24 Leꞌa besa mbiꞌín leꞌa ncho be men utoꞌo lat besa, nluu bexa dub taꞌa ngochgek bega. Nibeꞌe bexa yoo beꞌe bega xabgiꞌi no yankea bega ley mkeꞌa Moisés. Ná leꞌa besa naꞌanpa leꞌa utuꞌub bexa uluu bexa ta wa.
ACT 15:25 Nat mbidiꞌizh besa ulaxoꞌob besa pla xabgiꞌi ncho lat besa ndee. Leꞌa bexa wa giꞌidno Pabl no Bernabé be ltsaꞌa beuna,
ACT 15:26 bexa ndun tiꞌin ten Jesucristo guniꞌi xteꞌe gunno be men bexa.
ACT 15:27 Ta weꞌe utuꞌub besa Judas no Silas, leꞌa bexa wa giꞌid yadiꞌizh masta xteꞌe nak ta mkeꞌa besa ndoꞌ git ndee.
ACT 15:28 Leꞌa Espíritu ten Dios mluu ndoꞌ besa lá gabta besa ni stub taꞌa mas gun bega, guntsa bega ta nsabndoꞌ ndee:
ACT 15:29 Lá gaw bega beꞌal ten man nsaꞌa bexa xnab ndoꞌ dios gizhliyo, no lá gaw bega ten no beꞌal ten be man lá utsiꞌi ten, no lá ugal bega stubga xa naꞌanpa xa ten bega. Tal leꞌa bega uxobgek ndoꞌ be ta ndee, leꞌa bega wen nak ndoꞌ Dios. Nzheal beuna stub wizh.”
ACT 15:30 Weꞌe leꞌa idap bexa na li mtuꞌub bexa wa nchaꞌbe Antioquía. Leꞌa gor ulayaꞌ bexa sa wa, cha mchealte bexa itea be xmen Jesús. Cha msaꞌa bexa git wa ndoꞌ bexa Antioquía wa.
ACT 15:31 Leꞌa be xmen Jesús wa cha mbiꞌil ta nkeaniꞌi ndoꞌ git wa, cha uzheꞌeb mten ladna bexa.
ACT 15:32 Leꞌa Judas no Silas nak xa ndadiꞌizh sakndoꞌ Dios, ta weꞌe kwen mbidiꞌizh bexa, mluꞌuzh bexa no mtenxeꞌa bexa be men Antioquía.
ACT 15:33 Leꞌa bexa wa dub ndeꞌep utencho sa wa. Weꞌe leꞌa gor na mkaꞌan bexa sa wa, leꞌa bexa gezh wa ndab leꞌa Dios gakno bexa nes nseaꞌ bexa. Cha nseaꞌbe bexa leꞌaka Jerusalén ndoꞌ bexa mtuꞌub bexa wa.
ACT 15:34 Ná leꞌa Silas ndi myaꞌan Antioquía.
ACT 15:35 Leꞌa Pabl no Bernabé no myaꞌan Antioquía no stapla bexa wa, nluu bexa diꞌizh ten Jesús no ndadiꞌizh bexa diꞌizh wen ten Jesús ndoꞌ be men.
ACT 15:36 Tsoꞌoma wa leꞌa Pabl ndab ndoꞌ Bernabé: —Leꞌa beuna yaꞌinaꞌ be xmen Jesús ndencho itea be gezh sa na li ngwaꞌyadiꞌizh beuna diꞌizh ten Dios wa, ná xteꞌe nde bexa.
ACT 15:37 Leꞌa Bernabé nlad goꞌo bexa no Juan, xa noga nsaleaꞌ Marc.
ACT 15:38 Ná leꞌa Pabl nsak lá utsin nak goꞌo bexa xa, leꞌa xa wa mkaꞌan wats bexa Panfilia, cha naꞌantapa no xa ngakno bexa.
ACT 15:39 Leꞌa Pabl no Bernabé uteyotoꞌo, cha mteltsaꞌa bexa. Leꞌa Bernabé cha mbiꞌi Marc, cha uyoꞌo bexa len dub barco siꞌil nchaꞌa isla Chipre.
ACT 15:40 Leꞌa Pabl mtiga ndi Silas, cha nchaꞌbe bexa. Leꞌa bexa ndencho sa wa mlaꞌa bexa wa ndoꞌ yaꞌa Dios ulaꞌach bexa.
ACT 15:41 Weꞌe utid Pabl no Silas sa nsaleaꞌ Siria no Cilicia, mtenxeꞌa bexa be xmen Jesús kadga sa nzhealbe bexa sa wa.
ACT 16:1 Tsoꞌo wa leꞌa Pabl utid gezh Derbe, cha ulayaꞌ xa gezh Listra, sa ncho Timoteo xa no nak xmen Jesús. Leꞌa xnaꞌa xa wa xa judio noga ndangea ladna Jesús. Leꞌa xus Timoteo wa xa griego.
ACT 16:2 Leꞌa be xmen Jesús ndencho Listra no Iconio ndab leꞌa Timoteo dub xa wenka.
ACT 16:3 Leꞌa Pabl nlad goꞌo Timoteo, ta weꞌe ulo Pabl beꞌe Timoteo lak ndun bexa judio. Li mbin xa ndontsa naꞌanpa gakloo bexa judio, leꞌa itea bexa judio ndencho sa yaꞌ bexa wa uniꞌí leꞌa xus Timoteo xa griego.
ACT 16:4 Weꞌe leꞌa Pabl no be ltsaꞌa xa nchaꞌtid sian be gezh, ndadiꞌizh bexa ndoꞌ be xmen Jesús xtaꞌan unibeꞌe be apostol no bexa nchansu be xmen Jesús ndencho Jerusalén wa.
ACT 16:5 Weꞌe leꞌa be men wa mas mgeꞌ ladna Jesús, no kad wizh mas nsayak kwaꞌad bexa.
ACT 16:6 Leꞌa Espíritu ten Dios lá ulaꞌa gudiꞌizh bexa diꞌizh ten Jesús ndoꞌ be men región Asia. Cha ndi nchaꞌtid bexa sa nsaleaꞌ Frigia no Galacia.
ACT 16:7 Leꞌa gor ulayaꞌ bexa wa Misia, mbinbeꞌe bexa nchaꞌbe bexa Bitinia. Ná leꞌa Espíritu ten Dios lá ulaꞌa ngaꞌbe bexa sa wa.
ACT 16:8 Cha utid bexa Misia gast ulayaꞌ bexa gezh Troas.
ACT 16:9 Weꞌe leꞌa gor teꞌal leꞌa Pabl cuent ta mcheꞌa ladna xa uniꞌí xa dub xabgiꞌi región Macedonia nsoꞌ ndoꞌ Pabl ndab xa giꞌid yakno Pabl bexa Macedonia wa.
ACT 16:10 Ngol tsoꞌo wa cha mbin list besa yaꞌbe besa Macedonia. Uniꞌí besa leꞌa Dios nlad yaꞌyadiꞌizh besa diꞌizh wen ten Jesús ndoꞌ be men sa wa.
ACT 16:11 Leꞌa Troas wa cha uyoꞌo besa len dub barco siꞌil nchaꞌa isla Samotracia. Leꞌa stubtsa wizh ulayaꞌ besa gezh Neápolis.
ACT 16:12 Cha nchaꞌbe besa gezh Filipos, dub gezh nsak nde región Macedonia, no leꞌa‑yá dub gezh leꞌa Roma nibeꞌe. Cha uyoꞌo besa sa wa pla wizh.
ACT 16:13 Leꞌa ngol dub wizh neꞌe be men, cha utoꞌo besa len gezh wa ngwaꞌ besa toꞌo yowbeꞌe, sa ndaꞌyadiꞌizhno be men Dios. Cha usob besa mbidiꞌizh besa ndoꞌ be xagots mzhealbe sa wa.
ACT 16:14 Leꞌa dub bexa wa nsaleaꞌ Lidia, dub xa ndankea Dios. Leꞌa xa dub xa gezh Tiatira, no nsiꞌi utiꞌix xa lad konch ta uyap nsak. Leꞌa gor wa leꞌa Dios mxaꞌal ladoꞌo xa, ndontsa mas ulaꞌach xa ta ndadiꞌizh Pabl.
ACT 16:15 Leꞌa xagots wa cha utaleaꞌ, no be ltsaꞌa xa. Weꞌe cha ndab xa ndoꞌ besa: —Tal leꞌa bega nsak leꞌa naꞌ noka ndangea ladna Jesús, waꞌa beuna yaꞌan bega ta lid naꞌ. Cha ngwaꞌyoꞌo besa ta lid xa.
ACT 16:16 Stub wizh gor nchaꞌbe besa sa li ndadiꞌizhno be men Dios wa, mzheꞌal besa dub xagots ben ncho mbi bxin len ladoꞌo na. Leꞌa mbi bxin wa nsaꞌa juers ngenna xagots wa be ta ugaꞌach, ndun xa gan sian med nkaꞌa be xwan xa.
ACT 16:17 Leꞌa xagots wa cha usaxan usankea tsoꞌo Pabl no besa, ugeꞌ ndab xa: —¡Leꞌa bexa ndee bexa ndun tiꞌin ten Dios nsob gibeꞌa! ¡Ndadiꞌizh bexa ndoꞌ bega xteꞌe nak nes ncho gealnaban!
ACT 16:18 Sian wizh li mbinno xa besa, gast ngol dub wizh leꞌa Pabl ngwaꞌineꞌe ladna ta wa. Cha mgeaksoꞌ Pabl ndab ndoꞌ mbi bxin wa: —Leꞌa juers ten leaꞌ Jesucristo leꞌa naꞌ nibeꞌe ndoꞌ lu, utoꞌo len ladoꞌo xagots baꞌ. Leꞌa mbi bxin wa cha bi leꞌa gor wa utoꞌo len ladoꞌo xa wa.
ACT 16:19 Leꞌa be xwan xagots wa cha uniꞌí leꞌa bexa yá naꞌanta xteꞌe gun gan med, cha usen bexa Pabl no Silas mbiꞌi bexa ndoꞌ bexa naktiꞌin.
ACT 16:20 Cha ndab bexa ndoꞌ bexa naktiꞌin wa: —Leꞌa bexa judio ndee nchealuyo be men gezh ndee.
ACT 16:21 Nluu bexa be costumbr xaꞌaga, ta lá nsabndoꞌ yankea beuna, leꞌa beuna ndee be men nibeꞌe Roma.
ACT 16:22 Weꞌe cha kwaꞌad be men ngoklopa ndoꞌ Pabl no ndoꞌ Silas. Leꞌa be men naktiꞌin wa cha unibeꞌe itate xab bexa, nsea kin be soldad bexa no bar.
ACT 16:23 Tsoꞌo na li uzheꞌeb udin be soldad wa Pabl no Silas, cha mkeꞌa soldad bexa litgiꞌib. Cha unibeꞌe bexa ndoꞌ xa nlaꞌach litgiꞌib wa uzheꞌeb ulaꞌach xa bexa wa.
ACT 16:24 Leꞌa gor na mbiꞌín xa li nlaꞌach litgiꞌib ta wa, cha mkiko xa Pabl no Silas dub cuart nde mas xanxá sa wa. Cha mkiko xa yaꞌaxoꞌo bexa wa lat top bleꞌa ya, dub sa ni lá yoo gan itoꞌo bexa.
ACT 16:25 Ná ngol utol teꞌal leꞌa Pabl no Silas ndadiꞌizhno Dios, no ndaltoꞌo bexa ndoꞌ Dios. Leꞌa itea bexa nkea litgiꞌib wa no ndeyoꞌón ta wa.
ACT 16:26 Zha leꞌa dub xoꞌo siꞌilpa usaxan nsayakla mkwiꞌin idub sa nde litgiꞌib wa. Bi leꞌa gor wa cha myaꞌal iteanak be puert ten litgiꞌib, no myaꞌak caden nchii itea bexa nkea sa wa.
ACT 16:27 Leꞌa xa nlaꞌach sa wa cha uban, cha mnaꞌla xa leꞌa be puert wa nsoꞌnyaꞌalbe. Cha uloꞌo xa spad ten xa ndiꞌizh gut xa leꞌaka leꞌa xa, leꞌa xa ndanbeꞌe leꞌa bexa nkea litgiꞌib wa itea mxoꞌonbe.
ACT 16:28 Ná leꞌa Pabl cha ugeꞌ ndab: —Naꞌanpa lbaꞌa gun ga, leꞌa besa iteaka ndencho sa ndee.
ACT 16:29 Weꞌe leꞌa xa nlaꞌach sa wa unab dub xeꞌa isu sa wa, cha uxax nchaꞌa xa uyoꞌo xa len wa. Cha msaxib xa ndoꞌ Pabl no ndoꞌ Silas, nxis xa tant nzheb xa.
ACT 16:30 Cha uloꞌo xa bexa wa, cha ndab xa: —¿Xteꞌe gun naꞌ ndontsa gap naꞌ gealnaban ndoꞌ Dios zha?
ACT 16:31 Leꞌa bexa wa ukaꞌab ndab: —Bgeꞌ ladna ga Jesucristo, weꞌe gap ga gealnaban, no bexa ncho ta lid ga.
ACT 16:32 Cha mbidiꞌizh bexa diꞌizh ten Jesús ndoꞌ xa wa no ndoꞌ itea bexa ncho ta lid xa.
ACT 16:33 Bi leꞌa gor teꞌal wa leꞌa xa nlaꞌach litgiꞌib cha mbin ramed las Pabl no Silas. Cha utaleaꞌ xa no itea bexa ta lid xa.
ACT 16:34 Cha myoꞌo xa Pabl no Silas ta lid xa, cha msaꞌa xa ta gaw bexa. Cha uzheꞌeb mten ladna xa no itea bexa ta lid xa geal mbingea ladna bexa Dios.
ACT 16:35 Leꞌa gor ngot xeꞌa wa leꞌa bexa naktiꞌin unibeꞌe ndoꞌ soldad yaꞌyab ndoꞌ xa nlaꞌach litgiꞌib wa koꞌo xa Pabl no Silas.
ACT 16:36 Leꞌa xa nlaꞌach sa wa cha ndab ndoꞌ Pabl: —Leꞌa bexa naktiꞌin wa unibeꞌe itoꞌo bega. Nat syoꞌo gan yaꞌbe bega.
ACT 16:37 Ná leꞌa Pabl ndab ndoꞌ be soldad wa: —Leꞌa besa xa Roma, ná udin bexa besa ndoꞌ gaꞌal be men, ni lá ngab bexa xá ke na‑yá. Cha mkiko bexa besa litgiꞌib ndee. Ná nat nlad bexa xgaꞌach yaꞌbe besa. Gud bega ndoꞌ bexa wa leꞌaka gidloꞌo besa.
ACT 16:38 Leꞌa bexa cha ngwaꞌyab ta wa ndoꞌ bexa naktiꞌin. Leꞌa bexa wa cha mzheb gor na mbiꞌín bexa leꞌa Pabl no Silas bexa Roma.
ACT 16:39 Cha ngwaꞌinab bexa naktiꞌin gungeꞌ ladna bexa be ta li utid wa. Cha uloꞌo bexa Pabl no Silas, cha unab bexa ikaꞌan bexa gezh wa.
ACT 16:40 Weꞌe leꞌa gor na mtoꞌo Pabl no Silas litgiꞌib, cha nchaꞌa bexa ta lid Lidia. Weꞌe mluꞌuzh bexa be xmen Jesús sa wa, cha mkaꞌan bexa gezh wa.
ACT 17:1 Weꞌe cha utid Pabl no Silas gezh Anfípolis no gezh Apolonia. Cha ulayaꞌ bexa gezh Tesalónica, sa nde dub niꞌi sa nzhealbe bexa judio.
ACT 17:2 Leꞌa Pabl cha nchaꞌa sa wa wizh neꞌe bexa, lakka ndun xa itea be gezh sa ndaꞌ xa. Weꞌe chon sman mbidiꞌizh Pabl ndoꞌ bexa sa wa.
ACT 17:3 Ndab xa leꞌa lak nkeaniꞌi diꞌizh ten Dios, leꞌa Cristo lika nsabndoꞌ kweaꞌ itid no gat xa, no yaste xa ndoꞌ gealgut. No ndab Pabl: —Leꞌa Jesús xa lndeꞌe ndadiꞌizh naꞌ ndoꞌ bega, leꞌa xa wa leꞌa nak Cristo xa mtuꞌub Dios.
ACT 17:4 Leꞌa ncho bexa wa mbingea ladna ta wa, cha dubtsa myak bexa nsea Pabl no Silas. No kwaꞌad bexa naꞌanpa xa judio ndankea Dios cha no mbingea ladna Jesús, no kwaꞌad be xagots nsak.
ACT 17:5 Ná leꞌa bexa judio na naꞌanpa ngungea ladna Jesús wa cha ngokloo geal kwaꞌadpa bexa judio no mbingea ladna. Leꞌa bexa wa cha mchealte pla be xabgiꞌi ugap. Weꞌe leꞌa bexa judio wa no bexa ugap wa mbin gan ngokloo kwaꞌadpa bexa gezh wa, gast uzheꞌeb dub uyo uyoꞌo sa wa. Cha uyoꞌo juers bexa len lid dub xa nsaleaꞌ Jasón, nkwaꞌan bexa Pabl no Silas, ndontsa yak cuent bexa ndoꞌ bexa naktiꞌin.
ACT 17:6 Parea lá ngaizheal bexa Pabl no Silas, cha mbiꞌi juers bexa Jasón no stapla be xmen Jesús. Cha myun bexa cuent bexa ndoꞌ bexa naktiꞌin, ugeꞌ ndab bexa: —Leꞌa bexa ngo uyo idub ndoꞌ gizhliyo wa nat nseabega sa ndee.
ACT 17:7 Leꞌa Jasón ndee nsaꞌa ta lid na uyoꞌo bexa. Ná leꞌa itea bexa wa lá nxobgek ndoꞌ César xa nibeꞌe Roma, ndab bexa ncho stubga xa mas nibeꞌe nsaleaꞌ Jesús.
ACT 17:8 Weꞌe leꞌa bexa naktiꞌin no be men gezh wa uzhebpa ngokloo bexa, gor na mbiꞌín bexa ta wa.
ACT 17:9 Ná leꞌa Jasón no be ltsaꞌa xa cha utixtsa dub mult ndoꞌ bexa naktiꞌin, cha myaꞌak bexa.
ACT 17:10 Leꞌa gor uyoꞌo teꞌal leꞌa be xmen Jesús wa cha uxax mtuꞌub Pabl no Silas gezh Berea. Cha uyote bexa len niꞌi sa nzhealbe bexa judio.
ACT 17:11 Leꞌa bexa ncho Berea wa mas utsin nak ndoꞌ lak nak bexa Tesalónica, leꞌa bexa Berea uzhebpa nlaꞌach xtaꞌan ndadiꞌizh Pabl no Silas. No itea wizh ntsid bexa ta nkeaniꞌi diꞌizh ten Dios, ndontsa iniꞌí bexa naga ta ugeaka ta ndadiꞌizh itop bexa wa.
ACT 17:12 Ta weꞌe leꞌa kwaꞌad bexa judio wa no mbingea ladna Jesús. No kwaꞌad bexa naꞌanpa xa judio, be xagots no be xabgiꞌi, mbingea ladna Jesús.
ACT 17:13 Ná leꞌa gor na mbiꞌín bexa judio ndencho Tesalónica, leꞌa Pabl ndadiꞌizhgal diꞌizh ten Jesús gezh Berea wa, cha utoꞌo pla bexa nchaꞌbe bexa sa wa. Cha mbin bexa gan ngokloo kwaꞌadpa be men Berea ndoꞌ Pabl.
ACT 17:14 Ná leꞌa be xmen Jesús uxax mbiꞌi Pabl lad toꞌo nitsdoꞌo. Leꞌa Silas no Timoteo myanyoꞌo Berea.
ACT 17:15 Leꞌa pla bexa cha mbiꞌi Pabl gast gezh Atenas. Cha ndab Pabl ndoꞌ bexa wa: —Leꞌa gor na yach bega gezh Berea, cha gud bega ndoꞌ Silas no ndoꞌ Timoteo uxax giꞌid bexa gezh Atenas ndee.
ACT 17:16 Ndalen li nchonkea Pabl ilen Silas no Timoteo gezh Atenas wa, leꞌa Pabl kweaꞌ ncho ladna uniꞌí xa xteꞌeta uzheꞌeb ndankea be men be dios gizhliyo.
ACT 17:17 Weꞌe leꞌa len niꞌi sa nzhealbe bexa judio, mbidiꞌizhno Pabl bexa judio no bexa naꞌanpa xa judio, bexa ndankea Dios. No ndoꞌ bexa nzheꞌal Pabl ndoꞌ xgeꞌe wa itea wizh ndadiꞌizh Pabl.
ACT 17:18 No mbidiꞌizhno Pabl pla bexa epicúreo no bexa estoico, leꞌa ta wa top partid men ncho Atenas wa. Ncho bexa wa ndab: —¿Xteꞌe nak ta ndadiꞌizh xa ndee zha? Leꞌa ncho bexa ukaꞌab ndab: —Nsak naꞌ cuent ten be dios xaꞌaga ndadiꞌizh xa. Leꞌa bexa li ndab geal leꞌa Pabl ndadiꞌizh diꞌizh wen ten Jesús ná xteꞌe mban Jesús.
ACT 17:19 Leꞌa bexa wa cha mbiꞌi Pabl sa nsaleaꞌ Areópago, dub sa nzhealbe be men gezh wa. Cha ndab bexa ndoꞌ Pabl: —Gud go ndoꞌ besa xtaꞌan ta ndadiꞌizh go wa.
ACT 17:20 Leꞌa go ndadiꞌizh dub ta nunk besa gol goꞌón. Nat nlad besa goꞌón besa ná xtaꞌan ta wa.
ACT 17:21 Leꞌa bexa Atenas no bexa xaꞌaga ndencho gezh wa, ndal ladna bexa ndadiꞌizh bexa no ndoꞌón bexa sbeꞌen be ta tiꞌi ulensea.
ACT 17:22 Weꞌe leꞌa Pabl cha ngwasoꞌ lat bexa ten Areópago wa, cha ndab xa: —Bego xa Atenas, uní naꞌ leꞌa bega uzhebpa ndankea be dios ten bega.
ACT 17:23 Leꞌa sa ndaltiꞌid naꞌ len gezh ndee, uní naꞌ be sa ndankea bega be dios wa. No mzheal naꞌ dub sa nkea dub letr ndab‑a: “Dub dios naꞌan ton nchandoꞌ.” Leꞌa Dios wa xa na li ndankea bega maska naꞌanpa nchandoꞌ bega xa, leꞌa naꞌ cuent ten Dios weꞌe ndadiꞌizh.
ACT 17:24 ’Leꞌa Dios weꞌe mbindeꞌe gizhliyo no itea be ta nde ndoꞌ gizhliyo, no nak xa Xwan gibeꞌa no gizhliyo. Leꞌa xa wa lá nyoꞌo len be latbadoꞌo ndandeꞌe men,
ACT 17:25 ni lá nkiꞌin gakno be men xa. Leꞌa xa leꞌa nsaꞌa gealnaban ten iteanak be men, no nsaꞌa xa iteanak be taꞌa nkiꞌin be men.
ACT 17:26 ’Leꞌa Dios mbindeꞌe dubtsa xabgiꞌi, cha weꞌe ulen itea ndoꞌ be men ndoꞌ idub nax gizhliyo. No ndab xa polga ilen itea ndoꞌ be men wa no pa yoo bexa.
ACT 17:27 Li ndontsa ukwaꞌan be men Dios no izheal bexa Dios, leꞌa Dios naꞌanpa sit nsoꞌ wats kadga dub beuna.
ACT 17:28 Leꞌa juers ten Dios leꞌa beuna nban no nsea beuna no ncho beuna. Leꞌa lat bega no ncho bexa ndab: “Leꞌa beuna nak be xin Dios.”
ACT 17:29 Tal leꞌa beuna nak xin Dios, lá nsabndoꞌ gunbeꞌe beuna leꞌa Dios nak cuent be dios nakchaꞌaw oro no plata no geꞌ, be ta ndanchaꞌaw be men laktsa ndanbeꞌe bexa.
ACT 17:30 Leꞌa Dios pol‑lata mbingeꞌ ladna ndoꞌ be men, leꞌa bexa lá iniꞌí xteꞌe nsabndoꞌ gun bexa. Ná nat leꞌa Dios nibeꞌe ndoꞌ itea be men nde ndoꞌ gizhliyo ulaꞌa bexa be ta ugap nak bexa.
ACT 17:31 Leꞌa Dios ulo dub wizh leꞌa dub xa mti Dios gab gaꞌal ndoꞌ itea be men ná xtaꞌan mbin bexa. Leꞌa Dios leꞌa mxiste xa wa ndoꞌ gealgut, ndontsa iniꞌí itea be men leꞌa Dios leꞌaka mti xa.
ACT 17:32 Leꞌa gor na mbiꞌín bexa ta na mban dub xa ndoꞌ gealgut, weꞌe ncho bexa wa mxiꞌidno Pabl. Ná ncho bexa ndab ndoꞌ Pabl: —Stub wizh goꞌónta besa ta ndab go wa.
ACT 17:33 Weꞌe leꞌa Pabl cha mkaꞌan lat bexa wa.
ACT 17:34 Ná leꞌa ncho bexa wa mbingea ladna ta mbidiꞌizh Pabl, cha dubtsa myakno bexa Pabl. Leꞌa lat bexa wa ncho dub xa nsaleaꞌ Dionisio, dub xa ten Areópago wa. No dub xagots nsaleaꞌ Dámaris no stapla bexa mbingea ladna Jesús.
ACT 18:1 Tsoꞌo wa leꞌa Pabl cha utoꞌo Atenas nchaꞌa xa gezh Corinto.
ACT 18:2 Leꞌa sa wa mzheꞌal xa dub xabgiꞌi judio nsaleaꞌ Aquila, dub xa Ponto. Leꞌa xa wa tiꞌi mlaꞌnchaꞌ mtoꞌo Italia no xagots ten xa Priscila. Nchaꞌbe bexa Corinto geal leꞌa Claudio, xa nibeꞌe Roma, ulantuꞌub iteanak bexa judio gezh Roma. Leꞌa Pabl cha ngwaꞌinaꞌ bexa wa,
ACT 18:3 cha ngwaꞌyoꞌo Pabl wats bexa ndontsa junt gun bexa tiꞌin, leꞌa bexa no ndandeꞌe niꞌilad, ltsaꞌa tiꞌin ndun Pabl.
ACT 18:4 Leꞌa itea be wizh neꞌe be men, leꞌa Pabl ndadiꞌizh len niꞌi sa nzhealbe bexa judio. Nlad xa leꞌa bexa judio nsea bexa naꞌanpa bexa judio no gungea ladna Jesús.
ACT 18:5 Cha mtoꞌo Silas no Timoteo región Macedonia wa, nchaꞌa bexa Corinto. Leꞌa Pabl sbeꞌen ndadiꞌizh diꞌizh ten Jesús, ndab xa ndoꞌ bexa judio leꞌa Jesús leꞌaka nak Cristo xa mtuꞌub Dios.
ACT 18:6 Ná leꞌa bexa judio ndi usaxan ndakloo, no kweaꞌ uníꞌi bexa ndoꞌ Pabl. Leꞌa Pabl cha utib xab na, ta nluu leꞌa Dios lá nsak ladna lak nak bexa wa, cha ndab xa ndoꞌ bexa wa: —Tal Dios utsaksi bega, leꞌa ta wa naꞌanpa ke ten naꞌ, leꞌa ta wa ke tenka bega. Leꞌa nat leꞌa naꞌ ndaꞌuluu ndi bexa naꞌanpa xa judio.
ACT 18:7 Cha mkaꞌan Pabl niꞌi wa, nchaꞌa xa ta lid dub xa nsaleaꞌ Justo, dub xa ndankeapa Dios. Leꞌa xa wa ncho gax wats sa nde niꞌi sa nzhealbe bexa judio.
ACT 18:8 Leꞌa dub xa nsaleaꞌ Crispo xa nchansu sa wa no mbingea ladna Jesús no itea be ltsaꞌa xa. No kwaꞌadta bexa Corinto gor na mbiꞌín bexa ta mbidiꞌizh Pabl wa, cha mbingea ladna bexa‑yá, no cha utaleaꞌ bexa.
ACT 18:9 Ngol dub teꞌal leꞌa Pabl cuent ta mcheꞌa ladna uniꞌí leꞌa Jesús ndab ndoꞌ xa: —Lá izheb lu gudiꞌizh lu diꞌizh ten naꞌ,
ACT 18:10 leꞌa naꞌ noka nsoꞌ wats lu, ta weꞌe naꞌan ton gun gan ugap gunno lu. Leꞌa gezh ndee kwaꞌadpa be xmen naꞌ ncho.
ACT 18:11 Leꞌa Pabl cha ngwaꞌyoꞌo Corinto wa dub liꞌin ncho xoꞌop mbeꞌe, nluu xa be men diꞌizh ten Dios.
ACT 18:12 Parea ngol zha nibeꞌe dub xa nsaleaꞌ Galión idub Acaya wa, weꞌe leꞌa pla bexa judio cha mzhealbe, cha mbiꞌi bexa Pabl ndoꞌ Galión.
ACT 18:13 Cha ndab bexa ndoꞌ Galión: —Leꞌa xa ndee nkesea uluu be men yankea bexa Dios ndi stubga mod, dub ta naꞌanpa nibeꞌe ley ten besa.
ACT 18:14 Leꞌa gor na ndiꞌizh utsakndoꞌ Pabl, leꞌa Galión ndab ndoꞌ bexa judio: —Bego xa judio, tal leꞌa xa baꞌ ndun dub ta ugap, no tal xa ndun dub taꞌa lá nibeꞌe ley ten Roma, leꞌa naꞌ slachka ta gab bego.
ACT 18:15 Parea leꞌa bego ndeyo cuent ten be diꞌizhtsa, no xteꞌe leaꞌ be men, no ta nibeꞌe ley ten bega xa judio. Ta weꞌe begoka bin regl ta ndee, leꞌa naꞌ lá yate ndoꞌ cuent ndee.
ACT 18:16 Leꞌa Galión cha unibeꞌe itate bexa sa wa.
ACT 18:17 Leꞌa be men naꞌanpa xa judio cha usen xa nsaleaꞌ Sóstenes, xa nchansu niꞌi sa nzhealbe bexa judio wa. Cha udin bexa xa wa ndoꞌ gaꞌal Galión. Ná leꞌa Galión naꞌanta xteꞌe ngunno bexa.
ACT 18:18 Leꞌa Pabl sianta wizh ngwaꞌyoꞌo gezh wa. Cha mlaꞌa xa be xmen Jesús sa wa, nchaꞌa xa gezh Cencrea. Cha mchizh Pabl gek na, ta nluu leꞌa xa mbinka dub ta ndab xa ndoꞌ Dios gun xa. Cha uyoꞌo xa len dub barco siꞌil no Aquila nsea Priscila, cha nchaꞌbe bexa región Siria.
ACT 18:19 Leꞌa tol nes wa leꞌa bexa ulayaꞌ gezh Éfeso, cha mteltsaꞌa Pabl no bexa wa. Cha nchaꞌyadiꞌizh Pabl ndoꞌ bexa judio len niꞌi sa nzhealbe bexa wa.
ACT 18:20 Leꞌa bexa wa unab ndoꞌ Pabl yoo Pabl sa wa stapla wizh, ná leꞌa Pabl lá kaꞌab.
ACT 18:21 Cha mkaꞌan Pabl sa wa, ndab xa ndoꞌ bexa wa: —Leꞌa naꞌ nsabndoꞌka Jerusalén itiꞌid ujest nsea ndee. Tal leꞌa Dios nlad leꞌa naꞌ syachka gal inaꞌ naꞌ bega stub biaj. Cha uyoꞌo xa len dub barco siꞌil mkaꞌan xa Éfeso.
ACT 18:22 Leꞌa gor ulayaꞌ barco wa gezh Cesarea, cha nchaꞌa Pabl Jerusalén ndontsa inidiꞌizh xa ndoꞌ be xmen Jesús sa wa. Weꞌe cha nchaꞌa xa gezh Antioquía ten Siria.
ACT 18:23 Leꞌa xa cha uyoꞌo dub ndeꞌep sa wa, cha nchaꞌagal xa Galacia no Frigia, ndadiꞌizhno xa be xmen Jesús, ndontsa gaꞌal kwe bexa ndoꞌ Jesús.
ACT 18:24 Leꞌa Éfeso ulayaꞌ dub xa judio nsaleaꞌ Apolos, dub xa gezh Alejandría. Leꞌa xa wa uzhebpa dub xa ndák ndadiꞌizh. No uzhebpa nchandoꞌ xa diꞌizh polta ten Dios.
ACT 18:25 Leꞌa xa wa mtsid nes ten Jesús, no idub ncho ladna xa ndadiꞌizh xa ta wa ndoꞌ be men. Ta ugeaka ta nluu xa wa, parea nluu xa laktsa mbidiꞌizh Juan cuent ten Jesús zha ulaleaꞌ Juan be men.
ACT 18:26 Leꞌa gezh Éfeso wa leꞌa Apolos usaxan ndadiꞌizh ndoꞌ be men len niꞌi sa nzhealbe bexa judio. Ná leꞌa gor na mbiꞌín Priscila no Aquila xteꞌe ndadiꞌizh xa wa, cha mbiꞌi bexa xa ta lid bexa. Cha mas wen mluu bexa ndoꞌ xa xteꞌe nak nes ten Dios.
ACT 18:27 Weꞌe leꞌa Apolos nlad yaꞌ región Acaya, cha ndab be xmen Jesús gezh Éfeso wa leꞌa ta wa ta wenka. No mkeꞌa bexa dub git mbiꞌi Apolos ndoꞌ be xmen Jesús ndencho Acaya wa, ndontsa utsin gak bexa ndoꞌ Apolos. Leꞌa gor na ulayaꞌ xa Acaya, leꞌa ta ndadiꞌizh xa wa uzheꞌeb ngokno bexa na ndangea ladna Jesús wa.
ACT 18:28 Ndab Apolos ndoꞌ bexa judio leꞌa ta ndanbeꞌe bexa wa naꞌanpa leꞌa nak, dub mod na lá gun bexa gan ikaꞌab bexa. Leꞌa xa mbidiꞌizh lak nkeaniꞌi diꞌizh ten Dios, nluu xa leꞌa Jesús leꞌaka nak Cristo, xa mtuꞌub Dios.
ACT 19:1 Leꞌa zha li ncho Apolos Corinto wa, leꞌa Pabl utid sa ndiꞌib be geꞌe ubiꞌi, cha ulayaꞌ xa gezh Éfeso. Leꞌa sa wa cha mzheꞌal xa pla be xmen Jesús.
ACT 19:2 Cha unabdiꞌizh xa ndoꞌ bexa ndab xa: —¿Uyoꞌo Espíritu ten Dios len ladoꞌo bega, gor na mbingea ladna bega Jesús zha? Leꞌa bexa wa ukaꞌab ndab: —Ni lá ndoꞌón besa ti ncho Espíritu ten Dios.
ACT 19:3 Leꞌa Pabl cha ndab: —¿Xteꞌe utaleaꞌ bega zhaga? Leꞌa bexa ukaꞌab ndab: —Utaleaꞌ besa lak ulaleaꞌ Juan be men wa.
ACT 19:4 Leꞌa Pabl cha ndab: —Leꞌa Juan ulaleaꞌ bexa na mlaꞌa be ta ugap nak bexa, no ndab Juan gungea ladna bexa xa na nsea tsoꞌo Juan wa. Leꞌa ta wa Jesús xa nak Cristo.
ACT 19:5 Leꞌa gor na mbiꞌín bexa ta wa, cha stub biaj utaleaꞌ bexa len nits, ta nluu leꞌa bexa xmenka Jesucristo.
ACT 19:6 Cha mxoꞌob Pabl yaꞌa na gek bexa, cha no bexa uyoꞌo Espíritu ten Dios len ladoꞌo na. Cha usaxan bexa ndadiꞌizh bexa stubga diꞌizh, no ndadiꞌizh bexa sakndoꞌ Dios.
ACT 19:7 Leꞌa bexa wa pa dub tibtop xabgiꞌi.
ACT 19:8 Leꞌa pa chon mbeꞌe be wizh sabd leꞌa Pabl ndaꞌuluu be men len niꞌi sa nzhealbe bexa judio. Ni lá nzheb Pabl ndadiꞌizhno bexa wa ná xteꞌe nibeꞌe Dios be men, ndontsa no bexa gungea ladna ta wa.
ACT 19:9 Ná leꞌa ncho bexa wa myak ngud ladoꞌo na, ni lá kaꞌab bexa gungea ladna bexa ta ndadiꞌizh Pabl. Ndi kweaꞌ uníꞌi bexa ndoꞌ gaꞌal be men cuent ten Nes ten Cristo. Ta weꞌe leꞌa Pabl cha mteltsaꞌa bexa wa, mbiꞌi xa bexa tiꞌi mbingea ladna Jesús dub niꞌi scuel ten dub mech nsaleaꞌ Tirano. Cha itea wizh mluu Pabl bexa sa wa.
ACT 19:10 Pa stop liꞌin li mbin Pabl gast itea bexa Asia wa mbiꞌín diꞌizh ten Jesús, bexa judio no bexa naꞌanpa xa judio.
ACT 19:11 Leꞌa Dios leꞌa msaꞌa juers mbin Pabl be uyon uzheꞌeb ndanseana be men,
ACT 19:12 gast ncho bexa mbiꞌi bay ten Pabl no dub xab Pabl ndoꞌ bexa gizh no ndoꞌ bexa ncho mbi bxin len ladoꞌo na. Cha myakna bexa gizh wa no utoꞌo mbi bxin len ladoꞌo bexa.
ACT 19:13 Ná leꞌa ncho bexa judio ndesea gezh Éfeso no nlad kontuꞌub be mbi bxin ncho len ladoꞌo be men. Leꞌa bexa wa no mbintiꞌin leaꞌ Jesús, ndab bexa ndoꞌ be mbi bxin wa: —Leꞌa juers ten leaꞌ Jesús na ndadiꞌizh Pabl wa, nibeꞌe naꞌ utoꞌo len ladoꞌo xa baꞌ.
ACT 19:14 Leꞌa ta wa ta ndun dub gaꞌad xin dub xa judio nsaleaꞌ Esceva, dub uleꞌay nibeꞌe.
ACT 19:15 Ná ngol gor leꞌa dub mbi bxin wa ukaꞌab ndab ndoꞌ bexa wa: —Naꞌ nchandoꞌ Jesús wa, no uní naꞌ ton nak Pabl. ¿Ná leꞌa bego zha, ton nak bego?
ACT 19:16 Leꞌa xabgiꞌi na ncho mbi bxin len ladoꞌo na cha usaxan udin bexa wa. Leꞌa xabgiꞌi wa ndi mbin gan ndoꞌ bexa, no mtsawiꞌi xa bexa. Leꞌa bexa naꞌantapa nak be xab na mxoꞌon bexa ta lid xabgiꞌi wa.
ACT 19:17 Leꞌa itea bexa Éfeso wa, bexa judio no bexa naꞌanpa xa judio, leꞌa gor na mbiꞌín bexa ta wa, cha mzheb bexa, ndab bexa leꞌa leaꞌ Jesús uzhebpa ta juert nak.
ACT 19:18 No kwaꞌad bexa na tiꞌi mbingea ladna Jesús cha mbidiꞌizh ndoꞌ be xmen Jesús be ta ugap ngok bexa.
ACT 19:19 Leꞌa kwaꞌad bexa wa bexa mbin ta bruj. Leꞌa bexa wa mbiꞌi be libr ten na, cha mtsoꞌol bexa‑yá ndoꞌ gaꞌal itea be men. Leꞌa be libr wa nsak pa dub tol gayoꞌo mil med plata.
ACT 19:20 Li mluu Dios juers ten na, cha mas mteꞌachso diꞌizh ten Jesús, no mas kwaꞌad be men mbingea ladna ton nak Jesús.
ACT 19:21 Tsoꞌo wa leꞌa Pabl ulo ladna itid be gezh nde Macedonia no Acaya, cha ilayaꞌ xa gast Jerusalén. No mbinbeꞌe xa gor na itoꞌo xa Jerusalén wa, leꞌa xa nsabndoꞌ yaꞌ Roma.
ACT 19:22 Cha mtuꞌub Pabl Timoteo no Erast, top bexa na ndakno xa, yaꞌ bexa Macedonia. Leꞌa Pabl cha myaꞌan steꞌep Asia wa.
ACT 19:23 Leꞌa zha weꞌe uzheꞌeb ngokloo be men Éfeso wa ke ten Nes ten Cristo.
ACT 19:24 Uyoꞌo dub xabgiꞌi nsaleaꞌ Demetrio, xa ndandeꞌe be ta plata, be ta byux cuent latbadoꞌo ten Diana dios ten bexa. Leꞌa Demetrio wa sian med ndun gan no bexa ndunno xa tiꞌin.
ACT 19:25 Leꞌa xa wa mchealte bexa, cha ndab xa: —Leꞌa bego uniꞌíka leꞌa beuna tiꞌin ndeema sian med nzheal beuna.
ACT 19:26 Ná leꞌa bega naꞌka no ndoꞌónka bega, leꞌa xa nsaleaꞌ Pabl ndadiꞌizh leꞌa be dios ndandeꞌe men, leꞌa ta wa naꞌanpa nak dios. Leꞌa kwaꞌad men ndangea ladna ta li ndab Pabl, bexa gezh Éfeso ndee no gast idub región Asia ndee.
ACT 19:27 Leꞌa be men rages lá isiꞌita ta ndandeꞌe beuna ndee, no rages lá yankeata bexa latbadoꞌo ten dios siꞌil Diana. No gab bexa yá lá nsakta dios Diana, xa ndankea itea bexa Asia no idub ndoꞌ gizhliyo.
ACT 19:28 Leꞌa gor na mbiꞌín bexa ta wa, uzheꞌeb ngokloo bexa, cha usaxan ugeꞌ ndab bexa: —¡Siꞌil nak dios Diana ten beuna xa Éfeso!
ACT 19:29 Weꞌe uzhebpa mxaꞌach be men idub len gezh wa. Cha usen bexa top xabgiꞌi Macedonia, bexa ndeseano Pabl. Leꞌa dub xa wa nsaleaꞌ Gayo, leꞌa stub xa wa nsaleaꞌ Aristarco. Cha mbiꞌi be men wa itop bexa gast sa nzhealbe be men gezh wa.
ACT 19:30 Leꞌa Pabl cha nlad itoꞌo yaꞌyadiꞌizh ndoꞌ be men, ná leꞌa be xmen Jesús lá ulaꞌa.
ACT 19:31 No ncho bexa naktiꞌin Asia wa nakga amig ten Pabl. Leꞌa bexa wa mtuꞌub dub men ngwaꞌyab ndoꞌ Pabl lá yaꞌ Pabl lat be men wa.
ACT 19:32 Leꞌa be men wa uzhebpa níꞌibe ndoꞌ junt wa, ná leꞌa kwaꞌad bexa ni lá iniꞌí xtaꞌan li mzhealbe bexa sa wa. Ncho men ndab dub taꞌa, no ncho xa ndi stubga taꞌa xaꞌaga ndab.
ACT 19:33 Leꞌa lat bexa wa nsoꞌ dub xa nsaleaꞌ Alejandro. Leꞌa bexa judio cha msiꞌi xa ndoꞌ be men, ndontsa gab xa leꞌa bexa judio naꞌanpa no ndap ke. Leꞌa xa wa cha uxits yaꞌa na ndontsa xe kwe be men wa.
ACT 19:34 Ná leꞌa gor na uniꞌí be men leꞌa Alejandro xa judio, weꞌe pa dub top gor ugeꞌ ndab bexa: —¡Siꞌil nak dios Diana ten beuna xa Éfeso!
ACT 19:35 Weꞌe leꞌa secretar ten gezh wa leꞌa mbin xe ute be men, cha ndab xa: —Bego bexa Éfeso, itea be men ncho ndoꞌ gizhliyo uniꞌí leꞌa beuna gezh ndee nsabndoꞌka nlaꞌach latbadoꞌo ten dios siꞌil Diana, no uniꞌí bexa leꞌa geꞌ ten Diana ta ndankea beuna wa ulen gibeꞌa utoꞌo‑yá wats dios Júpiter.
ACT 19:36 Leꞌa ta ndee iteaka men uniꞌí leꞌa‑yá ta ugeaka. Ta weꞌe xe ute bega no binbeꞌe bega xtaꞌan ndun bega.
ACT 19:37 Leꞌa be xabgiꞌi na mbiꞌi bega ndee naꞌan xtaꞌan ndab ndoꞌ latbadoꞌo ten Diana ni lid nisi bexa dios ten beuna wa.
ACT 19:38 Leꞌa tal Demetrio no bexa ltsaꞌa xa ndi nlad usake dub men, ndoꞌ be juez no ndoꞌ bexa naktiꞌin nsabndoꞌ usake bexa xa, leꞌa bexa wa tiꞌin weꞌe ncho.
ACT 19:39 Ná tal leꞌa bega nlad inab stub taꞌa, sak gudiꞌizh bega‑yá ndoꞌ dub junt ko bexa naktiꞌin wa.
ACT 19:40 Rages usake bexa beuna ke ten ta uyoꞌo nat ndee, gab bexa leꞌa beuna ndi ndakloo ndoꞌ bexa naktiꞌin. Ná leꞌa beuna lá yoo gan gab xtaꞌan ndun lndeꞌeta mxaꞌach be men ndee.
ACT 19:41 Tsoꞌo na li ndab xa ta wa, cha ndab xa yaꞌbe be men wa.
ACT 20:1 Leꞌa tsoꞌo na uleas ta li ndeyo bexa wa, leꞌa Pabl utezh be xmen Jesús ncho sa wa, cha mtenxeꞌa xa bexa dubtsa kwe bexa ndoꞌ Dios. Cha udiꞌid Pabl bexa, ndab Pabl: —Nzheal beuna stub wizh. Cha nchaꞌa Pabl Macedonia.
ACT 20:2 Leꞌa be gezh nde Macedonia wa, sian taꞌa mbidiꞌizh Pabl ndoꞌ be xmen Jesús, mtenxeꞌa xa bexa wa. Cha nchaꞌa Pabl región Grecia.
ACT 20:3 Leꞌa sa wa uyoꞌo xa chon mbeꞌe, cha ngol gor na ndiꞌizh yoo xa len dub barco siꞌil nchaꞌa Siria, weꞌe mbiꞌínla xa leꞌa ncho bexa judio ndadiꞌizh gut xa. Ta weꞌe lá nga xa len barco wa, ndi myach xa useandats xa, mtidgal xa Macedonia.
ACT 20:4 Cha pla xabgiꞌi nchaꞌano xa gast Asia. Leꞌa ta wa Sópater xa gezh Berea, no Aristarco nsea Segundo top bexa Tesalónica, no Gayo xa gezh Derbe, no Timoteo, no Tíquico nsea Trófimo top bexa Asia.
ACT 20:5 Leꞌa bexa wa cha mnedbe ndoꞌ besa, cha ndenkeaꞌla bexa besa gezh Troas ten Asia.
ACT 20:6 Tsoꞌo na utidtsa be wizh ujest ndaw bexa judio pan lá ndoch levadur, cha mtoꞌo besa gezh Filipos len barco. Leꞌa ngol sgaꞌay wizh leꞌa besa ulayaꞌ Troas, sa ndela bexa mned ndoꞌ besa. Leꞌa sa wa uyoꞌo besa dub gaꞌad wizh.
ACT 20:7 Ngol wizh ned ten sman, mzhealbe besa nak xmen Jesús junt gaw xcheꞌe besa. Leꞌa Pabl ndiꞌizh ikaꞌanka sa wa gat xeꞌa wa, ta weꞌe usaxan xa nluu xa besa, cha kwen mbidiꞌizh xa gast utol teꞌal.
ACT 20:8 Leꞌa cuart nde gaꞌap wa sa na mzhealbe besa sian xeꞌa aceit ndiꞌib.
ACT 20:9 Leꞌa dub xa ben nsaleaꞌ Eutico nsob toꞌo ventan piso yon wa. Ndalen li kwen mbidiꞌizh Pabl, leꞌa Eutico uzhebpa nyoꞌo xkaꞌal na, cha ngwadgats xa. Cha ubixte xa ulayat xa gast ndoꞌ yo. Cha uxax ngwaꞌixiste bexa xa, ná leꞌa xa ngutla.
ACT 20:10 Weꞌe leꞌa Pabl ulaꞌ, cha mxoꞌob xa yaꞌa xa tsoꞌo Eutico, cha udiꞌid xa xa wa. Cha ndab xa ndoꞌ bexa nde sa wa: —Lá izheb bega, leꞌa xa ndee nbanka.
ACT 20:11 Leꞌa Pabl cha mkeagal leꞌaka sa wa. Cha uleꞌa xa pan, cha udawno xa besa. Weꞌe mbidiꞌizhgal xa gast ngot xeꞌa, cha nchaꞌa xa.
ACT 20:12 Leꞌa Eutico wa nban myoꞌo bexa, uzhebpa mten ladna bexa.
ACT 20:13 Leꞌa Pabl nlad yaꞌndats gast gezh Asón, cha sa weꞌe yoꞌo xa len barco. Ta weꞌe leꞌa besa cha uyoꞌo len dub barco siꞌil nchaꞌa Asón, cha uyonkeaꞌ besa mlen Pabl sa wa.
ACT 20:14 Weꞌe mzheꞌal besa Pabl Asón wa, cha uyoꞌo besa len barco wa no Pabl, nchaꞌbe besa gezh Mitilene.
ACT 20:15 Ngol stubtsa wizh utoꞌo besa sa wa, utid besa gax isla Quío, cha ulayaꞌ besa isla Samos stubga wizh. Cha utoꞌo besa Samos, cha ulayaꞌ besa gezh Trogilio, cha uyoꞌo besa dub teꞌal sa wa. Ngol stubga wizh ulayaꞌ besa gezh Mileto.
ACT 20:16 Leꞌa Pabl ngen ladna yaꞌ Jerusalén, ndontsa naga syoꞌo gan no xa ncho sa wa gal ujest Pentecostés. Ta weꞌe lá nga besa gezh Éfeso, leꞌa Pabl lá nlad kwen yaꞌyoꞌo Asia wa.
ACT 20:17 Leꞌa zha ndencho besa Mileto wa, leꞌa Pabl ndi mtuꞌub dub xa yaꞌ gezh Éfeso, ndab xa ndoꞌ bexa nchansu be xmen Jesús sa wa giꞌid bexa Mileto.
ACT 20:18 Leꞌa gor na ulansea bexa wa, leꞌa Pabl cha ndab ndoꞌ bexa: —Bego uniꞌíka xteꞌe mbin naꞌ idub zha uyoꞌo naꞌ lat bega, gast zha ndon ned ngwal naꞌ Asia no gast nat.
ACT 20:19 Idub tiemp ndun naꞌ tiꞌin ten Dios, ni lá yoo naꞌ lat bega cuent dub xa nsak. No sian biaj utoꞌo nitsndoꞌ naꞌ tant sian gealkweaꞌ utiꞌid naꞌ, ta mbinno bexa judio naꞌ.
ACT 20:20 Parea leꞌa naꞌ naꞌanpa ula ndi mbidiꞌizhka naꞌ ndoꞌ bega ta nkiꞌin bega, no mluu naꞌ bega sa na nzhealbe bega no kadga ta lid bega.
ACT 20:21 Mbidiꞌizh naꞌ ndoꞌ bexa judio no ndoꞌ bexa naꞌanpa xa judio, ulaꞌa bexa be ta ugap nak bexa, cha yach bexa wats Dios, cha gungea ladna bexa Jesús Xa Nibeꞌe.
ACT 20:22 Nat leꞌa naꞌ nda Jerusalén lak nibeꞌe Espíritu ten Dios, parea leꞌa naꞌ ni lá iní xtaꞌan itiꞌid naꞌ sa wa.
ACT 20:23 Ta na unítsa naꞌ leꞌa itea gezh na nda naꞌ leꞌa Espíritu ten Dios ndab ndoꞌ naꞌ leꞌa be men ukeꞌa naꞌ litgiꞌib no sian gealkweaꞌ itiꞌid naꞌ.
ACT 20:24 Parea naꞌanpa nlach naꞌ ta wa, leꞌa guniꞌi xtaꞌan gunno bexa naꞌ, leꞌa naꞌ nten ladna usandoꞌ naꞌ tiꞌin msaꞌa Jesús gun naꞌ, ta na ndadiꞌizh naꞌ diꞌizh wen ten Dios ná xteꞌe uzheꞌeb utsin ndanno Dios be men.
ACT 20:25 ’Yá mbidiꞌizh naꞌ ndoꞌ bega xteꞌe nibeꞌe Dios be men, parea nat leꞌa naꞌ uní leꞌa ni dub bega yá naꞌantapa iniꞌí naꞌ.
ACT 20:26 No gáp naꞌ nat leꞌa tal ton dub bega xa Éfeso lá ndangea ladna Jesús, naꞌanpa ke ten naꞌ ta wa,
ACT 20:27 leꞌa naꞌ mbidiꞌizh ndoꞌ bega itea be ta nlad Dios iniꞌí bega.
ACT 20:28 Nat ndee list bin bega no blaꞌach bega itea be xmen Jesús gezh Éfeso wa, lak mti Espíritu ten Dios bega gun bega, leꞌa Jesús usiꞌi bexa wa ten ten xa.
ACT 20:29 Leꞌa naꞌ uní leꞌa tsoꞌo na ikan naꞌ sa ndee, weꞌe ilen pla be men lat bega, bexa nlad gungea ladna bega stub diꞌizh xaꞌaga. Leꞌa bexa wa nak cuent dub mbee ugiꞌi nlad gut be borreg.
ACT 20:30 No leꞌaka lat bega itoꞌo be xabgiꞌi gudiꞌizh ta lid leꞌa nak, ndontsa isankea be xmen Jesús tsoꞌo bexa.
ACT 20:31 Ta weꞌe list ute bega, no lá yalad bega xteꞌe mtenxeꞌa naꞌ bega idub chon liꞌin teꞌal tezhea, no nyuꞌno lad naꞌ kadga dub bega.
ACT 20:32 ’Nat ndoꞌ yaꞌa Dios ula naꞌ bega, ulaꞌach Dios bega lak ndab diꞌizh ten xa. Leꞌa diꞌizh wa gun gan mas igeꞌ ladna bega Dios, no ikaꞌa bega ta wen nsaꞌa Dios ndoꞌ itea be xmen xa.
ACT 20:33 No nunk lá isaꞌab lad naꞌ ndoꞌ med ten bega no ni xab bega.
ACT 20:34 Leꞌa bego uniꞌíka xteꞌeta ndi mbin naꞌ tiꞌin, ndontsa isiꞌi naꞌ be ta nkiꞌin naꞌ no be ta nkiꞌin bexa ukeseano naꞌ.
ACT 20:35 Li mluu naꞌ ndoꞌ bega xteꞌe nsabndoꞌ gun bega tiꞌin, ndontsa gakno beuna bexa uban nak. Btseꞌa ladna bega ta ndab Jesús: “Mas iten ladna xa nsaꞌa taꞌa, ndoꞌ lak iten ladna xa nkaꞌa taꞌa.”
ACT 20:36 Leꞌa gor na mtayadiꞌizh Pabl ta wa, cha msaxib xa no itea bexa, cha unab xa ulaꞌach Dios bexa.
ACT 20:37 Weꞌe cha uzhebpa mbiꞌin itea bexa. Cha udiꞌid bexa gen Pabl, cha udaw bexa chit ndoꞌ Pabl.
ACT 20:38 Uzhebpa uban myoꞌo ladna bexa, geal leꞌa Pabl ndab yá naꞌantapa iniꞌí bexa Pabl. Cha nchaꞌano bexa Pabl gast sa nde barco.
ACT 21:1 Leꞌa gor na mlaꞌa besa bexa Éfeso wa, cha nchaꞌa besa isla Cos len barco wa. Ngot xeꞌa cha utoꞌo besa sa wa, cha nchaꞌa besa isla Rodas, cha ulayaꞌ besa gezh Pátara.
ACT 21:2 Leꞌa Pátara wa mzheal besa stub barco nchaꞌa Fenicia. Cha uyoꞌo besa len ta wa, cha nchaꞌa besa.
ACT 21:3 Ngol gor nchaꞌtid barco wa gax isla Chipre leꞌa ta wa nde lad raves. Cha ulayaꞌ besa gast gezh Tiro ten Siria. Leꞌa barco wa sian taꞌa uxeꞌe bexa ndoꞌ na gezh wa.
ACT 21:4 Leꞌa sa wa mzheal besa pla be xmen Jesús, cha uyoꞌo besa lat bexa wa dub gaꞌad wizh. Leꞌa Espíritu ten Dios ndabla ndoꞌ bexa wa xtaꞌan yasea Pabl Jerusalén, ta weꞌe ndab bexa ndoꞌ Pabl lá yaꞌ xa sa wa.
ACT 21:5 Leꞌa zha ngwaꞌa gaꞌad wizh wa cha utoꞌo besa sa wa. Leꞌa be xabgiꞌi wa no be xagots ten xa no be xmeꞌed xa gast toꞌo nitsdoꞌo ngwaꞌno besa. Cha msaxib itea besa ndoꞌ yux, mbidiꞌizh besa ndoꞌ Dios.
ACT 21:6 Cha udiꞌid besa bexa, cha uyoꞌo besa len barco wa. Leꞌa bexa wa cha nseaꞌbe ta lid na.
ACT 21:7 Weꞌe utoꞌo besa Tiro, cha ulayaꞌ besa gezh Tolemaida. Leꞌa sa wa ngwaꞌinidiꞌizh besa ndoꞌ be xmen Jesús, no uyoꞌo besa dub wizh lat bexa wa.
ACT 21:8 Ngot xeꞌa wa cha nchaꞌa besa gezh Cesarea len barco wa. Leꞌa sa wa cha ngwaꞌ besa ta lid Julip, cha weꞌetsa uyoꞌo besa. Leꞌa Julip wa dub xa no ndadiꞌizh diꞌizh wen ten Dios ndoꞌ be men, no nak xa dub gaꞌad bexa na mti be apostol Jerusalén wa.
ACT 21:9 Leꞌa xa wa ndap dap xingots na, bexa nab. Leꞌa bexa wa ndadiꞌizh sakndoꞌ Dios.
ACT 21:10 Leꞌa zha na nchola besa Cesarea pla wizh, cha ulansea dub xabgiꞌi nsaleaꞌ Ágabo, xa utoꞌo Judea, dub xa noga ndadiꞌizh sakndoꞌ Dios.
ACT 21:11 Leꞌa gor ulen xa wats besa, cha uloꞌo xa sinch nde len Pabl, cha mxi xa‑yá yaꞌaxoꞌoka xa no yaꞌa xa, cha ndab xa: —Leꞌa Espíritu ten Dios ndab leꞌa bexa judio bexa ndencho Jerusalén lndeꞌe gunno xa ten sinch ndee. Cha yun bexa cuent xa ndoꞌ yaꞌa bexa naꞌanpa xa judio.
ACT 21:12 Leꞌa gor na mbiꞌín besa ta wa, leꞌa besa no bexa Cesarea cha uyoꞌo rueg ndab ndoꞌ Pabl lá yaꞌ Pabl Jerusalén.
ACT 21:13 Ná leꞌa Pabl ukaꞌab ndab: —¿Xtaꞌan lbaꞌa ndoꞌonno bega naꞌ zha, ta ndun uban nyoo lad naꞌ? Tal leꞌa Jesús nlad, leꞌa naꞌ gaaka Jerusalén, guniꞌi tal be men uxi naꞌ natal gut bexa naꞌ.
ACT 21:14 Leꞌa besa lá ngun gan lá yaꞌ Pabl Jerusalén. Ta weꞌe mlaꞌa besa, ndab besa: —Gakka‑yá lak nlad Dios Xa Nibeꞌe.
ACT 21:15 Ngol tsoꞌo wa, cha msaxkwaꞌa besa be ta goꞌo besa, cha nchaꞌbe besa Jerusalén.
ACT 21:16 Leꞌa pla bexa Cesarea, bexa no nak xmen Jesús, no ngwaꞌno besa Jerusalén. Leꞌa lat bexa wa ncho dub xa nsaleaꞌ Mnasón xa isla Chipre, dub xa pol‑lata mbingea ladna Jesús. Leꞌa xa wa msaꞌa ta lid na uyoꞌo besa Jerusalén wa.
ACT 21:17 Leꞌa gor ulayaꞌ besa Jerusalén, leꞌa be xmen Jesús ncho sa wa uzhebpa mten ladnabe.
ACT 21:18 Leꞌa ngol stubtsa wizh, leꞌa Pabl no iteata besa ngwaꞌinaꞌ Jacob. Leꞌa sa wa ndebe itea bexa nchansu be xmen Jesús Jerusalén.
ACT 21:19 Leꞌa Pabl unidiꞌizh ndoꞌ bexa, cha usaxan Pabl ndon xkwaꞌa mbidiꞌizh xa xteꞌe mbintiꞌin Dios Pabl lat bexa naꞌanpa xa judio.
ACT 21:20 Leꞌa gor na mbiꞌín bexa ta li ndab Pabl wa, cha ndab bexa leꞌa Dios uzheꞌeb dub Dios siꞌil. Cha ndab bexa ndoꞌ Pabl: —Pabl, leꞌa go uniꞌíka leꞌa sian mil men judio ndangea ladna Jesús. Leꞌa itea bexa wa ndab nsabndoꞌka yankea bexa ley mkeꞌa Moisés.
ACT 21:21 Parea mbiꞌín bexa leꞌa go nluu bexa judio ndencho lat bexa naꞌanpa bexa judio, ndab go lá yankeata bexa ley mkeꞌa Moisés wa. Ndab bexa leꞌa go nluu yá lá kota bexa beꞌe be meꞌed bgiꞌi, no yá lá yankeata bexa be costumbr ten beuna bexa judio.
ACT 21:22 ¿Nat zha xteꞌe gun beuna ndontsa iniꞌí bexa leꞌa go naꞌanpa li uluu ta wa? Leꞌa bexa soꞌónka leꞌa go nseaꞌla, cha syakjuntka kwaꞌadpa bexa wa.
ACT 21:23 Nat bin go ta gab besa ndee: Leꞌa lat besa ndee ncho dap xabgiꞌi nsabndoꞌ gun cumplir dub ta ndabla bexa ndoꞌ Dios gun bexa.
ACT 21:24 Nat waꞌno ga bexa ta niꞌi ten Dios, cha bin bega ta utsambiꞌi len ladoꞌo bega ndoꞌ Dios. No utix bega be xnab usaꞌa bexa ndontsa uchizh bexa gek bexa, ta na nluu leꞌa bexa mbinka ta ndab bexa ndoꞌ Dios. Weꞌe leꞌa itea be men iniꞌí leꞌa ta mbidiꞌizh be men cuent ten go wa naꞌanpa ta ugea. Ndi iniꞌí bexa leꞌa go ndankeaka ley wa.
ACT 21:25 ’Leꞌa bexa naꞌanpa xa judio ndangea ladna Jesús wa, mtuꞌub besa git ndoꞌ bexa, ndab git wa leꞌa bexa naꞌanpa juerska gun itea be costumbr ten beuna xa judio. Nabtsa be ta ndee unibeꞌe besa gun bexa: lá gaw bexa beꞌal ta nsaꞌa be men xnab ndoꞌ be dios gizhliyo, no lá gaw bexa ten no beꞌal ten be man lá utsiꞌi ten, no lá ugal bexa dub xa naꞌanpa xa ten bexa.
ACT 21:26 Weꞌe leꞌa Pabl cha mbiꞌi dap xabgiꞌi wa, cha mbin bexa ta imbiꞌi bexa ndoꞌ Dios. Leꞌa ngol stubtsa wizh leꞌa Pabl cha ngwaꞌ wats niꞌi ten Dios, nchaꞌyab xa ndoꞌ uleꞌay ná xá wizh na idub ta imbiꞌi bexa wa. Leꞌa gal wizh weꞌe, leꞌa idap bexa wa usaꞌa xnab dubga man ndoꞌ Dios.
ACT 21:27 Ná leꞌa wizh na yá gal dub gaꞌad wizh wa, leꞌa pla bexa judio bexa utoꞌo Asia uniꞌíla Pabl wats niꞌi ten Dios. Leꞌa bexa wa mbin gan ngokloo be men kwaꞌad ndoꞌ Pabl, cha usen bexa wa Pabl.
ACT 21:28 Ugeꞌ ndab bexa: —¡Bego xa Israel, gokno bega besa! Leꞌa xabgiꞌi ndee leꞌa xa itea lad nkesea uluu be men, ndab xa leꞌa nacion Israel no ley ten Dios no niꞌi ten Dios ndee naꞌanpa nsak. Ná nat leꞌa xa uyoꞌono pla be men naꞌanpa xa judio len niꞌi ten Dios ndee, mbin bzhiꞌik xa sa umbiꞌi ten Dios.
ACT 21:29 Li ndab bexa, geal leꞌa bexa uniꞌí Pabl len gezh Jerusalén, nkeseano xa dub xa naꞌanpa xa judio, dub xa Éfeso nsaleaꞌ Trófimo. Ta weꞌe mbinbeꞌe bexa leꞌa Pabl mbiꞌi xa wa len niꞌi ten Dios.
ACT 21:30 Weꞌe leꞌa idub gezh men wa ngoklobe, cha uxax ulen kwaꞌad bexa, cha usen bexa Pabl. Cha udobxazh bexa Pabl tsoꞌo niꞌi wa, cha uxax mtsaw bexa toꞌo puert ten sa wa.
ACT 21:31 Ngol gor na ndiꞌizh gut bexa Pabl, leꞌa xa nibeꞌe ten be soldad wa mbiꞌín leꞌa bexa Jerusalén wa uzheꞌeb ndeseaxaꞌach.
ACT 21:32 Leꞌa soldad nibeꞌe wa cha mbiꞌi pla be soldad, cha karrel nchaꞌbe bexa gast sa ndebe be men wa. Leꞌa gor na uniꞌí be men wa soldad nibeꞌe no stapla be soldad wa, cha yá lá iginta bexa Pabl.
ACT 21:33 Weꞌe leꞌa xa nibeꞌe ten be soldad cha usen Pabl, cha unibeꞌe xa uxii be soldad wa Pabl no top caden. Cha unabdiꞌizh xa ndoꞌ be men ná ton xa wa no xtaꞌan mbin xa.
ACT 21:34 Ná leꞌa ncho bexa wa ndab dub taꞌa, no ncho bexa ndab stubga taꞌa. Uzhebpa ruid mbin bexa, gast lá yakbeꞌena soldad ta wa. Cha unibeꞌe xa goꞌo be soldad wa Pabl sa nde niꞌi ndebe soldad wa.
ACT 21:35 Leꞌa gor na ulayaꞌ bexa ndoꞌ scaler ten niꞌi wa, leꞌa be soldad wa gaꞌap mbiꞌi Pabl tant uzheꞌeb ndakloo be men wa.
ACT 21:36 Leꞌa be men nseabe tsoꞌo be soldad wa uzheꞌeb ugeꞌ ndab bexa: —¡Gat xa baꞌ! ¡Gat xa baꞌ!
ACT 21:37 Leꞌa gor na yá nsayoꞌono be soldad Pabl len niꞌi wa, leꞌa Pabl cha ndab ndoꞌ soldad nibeꞌe wa: —¿Syoꞌo gan gáp naꞌ dub taꞌa ndoꞌ ga? Leꞌa xa wa cha ukaꞌab ndab: —¿Ndadiꞌizh lu diꞌizh griego zha?
ACT 21:38 ¿Naꞌanpa lu xa Egipto xa li uteyono bexa nibeꞌe wa zha, xa na ngwaꞌa geꞌe no dub dap mil xa ndut men?
ACT 21:39 Leꞌa Pabl cha ukaꞌab ndab: —Leꞌa naꞌ ndee dub xa judio, ngol naꞌ gezh Tarso, dub gezh nsak ten región Cilicia. Naꞌab naꞌ ulaꞌa ga gudiꞌizh naꞌ ndoꞌ be men baꞌ.
ACT 21:40 Leꞌa soldad wa cha ndab: —Leꞌa lu syoꞌoka gan li gun. Leꞌa Pabl cha usoꞌ ndoꞌ scaler wa, cha uxits xa yaꞌa xa ndoꞌ be men. Cha xe ute bexa, cha uníꞌi Pabl diꞌizh hebreo, ndab xa:
ACT 22:1 —Bego bexa ltsaꞌa naꞌ no bego xa gox, blaꞌach bega dub diꞌizh utsakndoꞌ naꞌ.
ACT 22:2 Leꞌa gor na mbiꞌín bexa leꞌa Pabl uníꞌi diꞌizh hebreo, cha mas xe ute bexa. Cha ndab Pabl ndoꞌ bexa:
ACT 22:3 —Leꞌa naꞌ ndee xa judio. Ngol naꞌ Tarso gezh ten Cilicia, parea Jerusalén ndee ngoꞌol naꞌ. Leꞌa xa nsaleaꞌ Gamaliel ngok mech ten naꞌ, mluu xa naꞌ lakta nak ley msaꞌa Dios ndoꞌ be usan gox polta ten beuna. Uzhebpa nlad naꞌ uxobgek naꞌ ndoꞌ Dios, lak nlad iteanak bego uxobgek bega ndoꞌ Dios.
ACT 22:4 No xela mbinno naꞌ be xmen Jesús, mkwan naꞌ xteꞌe gat bexa wa. Usen naꞌ bexa guniꞌi tal xabgiꞌi natal xagots, cha ukeꞌa bexa litgiꞌib.
ACT 22:5 Leꞌa uleꞌay ndon leꞌa nsak no bexa gox nsak gezh ndee uniꞌíka leꞌa bexa leꞌa msaꞌa git mbi naꞌ, ndiꞌizh usa naꞌ‑yá ndoꞌ bexa judio ncho gezh Damasco, ndontsa isen naꞌ be xmen Jesús sa wa, cha goo naꞌ bexa gast Jerusalén ndee, cha utsaksi bexa naktiꞌin bexa.
ACT 22:6 ’Ná leꞌa nes nda naꞌ gax gezh Damasco pa gor gawizh, weꞌe leꞌa dub xeꞌa siꞌil ulen gibeꞌa uzheꞌeb uxax msula idub gangeak wats naꞌ.
ACT 22:7 Leꞌa naꞌ cha ulayat ndoꞌ yo, cha mbín naꞌ dub ti men ndab ndoꞌ naꞌ: “Saulo, Saulo, ¿xtaꞌan lbaꞌata ndaklono lu naꞌ zha?”
ACT 22:8 Weꞌe leꞌa naꞌ cha unabdiꞌizh, ndáp naꞌ: “¿Ton go zha, Señor?” Leꞌa ti men wa cha ukaꞌab ndab: “Leꞌa naꞌ Jesús xa Nazaret, xa na lbaꞌa ndaklono lu baꞌ.”
ACT 22:9 Leꞌa bexa na ndano naꞌ wa no uniꞌí xeꞌa wa cha mzheb bexa, ná lá ngoꞌón bexa ta ndab ti men wa.
ACT 22:10 Leꞌa naꞌ cha ndáp: “¿Xtaꞌan nsabndoꞌ gun naꞌ, Señor?” Leꞌa xa wa cha ndab ndoꞌ naꞌ: “Goste, cha waꞌ len gezh Damasco. Leꞌa sa baꞌ gab bexa xtaꞌan nsabndoꞌ gun lu.”
ACT 22:11 Ná leꞌa ke ten xeꞌa utoꞌo gibeꞌa wa leꞌa naꞌ lá yoota gan iwiꞌi. Weꞌe leꞌa bexa ndano naꞌ wa usen yaꞌa naꞌ, mbiꞌi bexa naꞌ Damasco.
ACT 22:12 ’Leꞌa gezh wa ncho dub xabgiꞌi nsaleaꞌ Ananías, dub xa uzheꞌeb gaꞌal nsoꞌ ndoꞌ Dios lak nibeꞌe ley. Leꞌa itea bexa judio ndencho gezh wa ndab leꞌa xa wa uzheꞌeb xa wen.
ACT 22:13 Leꞌa xa wa cha mbiꞌid inaꞌ naꞌ, ndab xa ndoꞌ naꞌ: “Saulo, go no nak xmen Jesucristo, nat yakna ngusndoꞌ ga.” Cha bi leꞌa gor wa, leꞌa naꞌ mnaꞌla, cha mwiꞌi naꞌ ndoꞌ xa wa.
ACT 22:14 Leꞌa xa cha ndab ndoꞌ naꞌ: “Leꞌa Dios ngwankea be usan gox ten beuna wa mti ga ndontsa igondoꞌ ga ta na nlad Dios gun ga, no iniꞌí ga Jesús xa ndon leꞌa wen wa, no goꞌón ga ti xa.
ACT 22:15 Leꞌa go gak dub xa gudiꞌizh cuent ten xa ndoꞌ itea be men, gudiꞌizh ga be ta uniꞌí ga no be ta mbiꞌín ga wa.
ACT 22:16 Nat yá lá kweasta ga. Goste ga, cha utaleaꞌ ga. No igeꞌ ladna ga Dios ndontsa yuꞌu be ke ten ga.”
ACT 22:17 ’Leꞌa gor na mlansea naꞌ Jerusalén, cha ngwaꞌyadiꞌizhno naꞌ Dios wats niꞌi ten Dios. Leꞌa sa wa uní naꞌ cuent dub ta mcheꞌa lad naꞌ.
ACT 22:18 Ndab Dios ndoꞌ naꞌ: “Uxax lu, utoꞌo Jerusalén ndee, leꞌa bexa ndee lá gungea ladna ta gudiꞌizh lu cuent ten naꞌ.”
ACT 22:19 Leꞌa naꞌ ukab ndáp naꞌ: “Señor, leꞌa be men uniꞌí leꞌa naꞌ ngwaa itea be niꞌi sa nzhealbe beuna xa judio. Cha mbi naꞌ bexa ndangea ladna go litgiꞌib no udin naꞌ bexa.
ACT 22:20 No zha mbit bexa Xteb, xa mbidiꞌizh diꞌizh ten go wa, leꞌa naꞌ no nsoꞌ sa wa. Mbinbe naꞌ ndi wen mbit bexa Xteb, no mlach naꞌ be lad nbix bexa wa.”
ACT 22:21 Ná leꞌa Dios ndab ndoꞌ naꞌ: “Waꞌ, leꞌa naꞌ utuꞌub lu sit lat bexa naꞌanpa xa judio.”
ACT 22:22 Leꞌa be men wa nsakyoꞌónka ta ndab Pabl, parea leꞌa gor na ndab Pabl leꞌa xa yaꞌ lat bexa naꞌanpa xa judio, cha ngokloo bexa, usaxan bexa ugeꞌ ndab bexa: —¡Gat xa baꞌ! ¡Leꞌa xa lá nsabndoꞌ ibanta!
ACT 22:23 Leꞌa bexa uzheꞌeb ndebezhat, no ngobi bexa xab bexa, no ngo bexa yo gaꞌap tant ndakloo bexa.
ACT 22:24 Ta weꞌe leꞌa soldad nibeꞌe wa cha ndab ndoꞌ be soldad wa: —Biꞌi bega Pabl len niꞌi, cha udin bega xa, ndontsa gab xa ná xtaꞌan lita ndakloo be men ndoꞌ xa.
ACT 22:25 Ná gor na mxi bexa Pabl, leꞌa sa wa no nsoꞌ dub soldad nibeꞌe dub gayoꞌo soldad. Leꞌa Pabl cha ndab ndoꞌ xa: —¿Nibeꞌe ley kin bega dub xa Roma zha, gor na biseata iniꞌí bega ti ndap xa ke zha?
ACT 22:26 Leꞌa gor na mbiꞌín xa ta wa, leꞌa xa cha ngwaꞌyab‑a ndoꞌ soldad mas nibeꞌe wa, ndab xa: —¿Xteꞌe gun go zha? Leꞌa xabgiꞌi baꞌ xa Roma.
ACT 22:27 Weꞌe leꞌa soldad nibeꞌe wa cha ulen wats Pabl, cha unabdiꞌizh xa ndab xa: —¿Ta ugeaka xa Roma lu zha? Leꞌa Pabl cha ndab: —Naꞌ xa Romaka.
ACT 22:28 Leꞌa xa nibeꞌe wa cha ndab: —Leꞌa naꞌ sian med utix ndontsa uyoꞌo gan nak naꞌ xa Roma. Leꞌa Pabl ukaꞌab ndab: —Leꞌa naꞌ ndee zha ngolta naꞌ nakla naꞌ xa Roma.
ACT 22:29 Weꞌe leꞌa be soldad na ndiꞌizh igin Pabl wa cha mlaꞌa xa. No xa mas nibeꞌe ten be soldad wa mzheb ta na li mxi xa Pabl, leꞌa Pabl dub xa Roma.
ACT 22:30 Ngol stubtsa wizh, leꞌa xa nibeꞌe ten be soldad wa nlad iniꞌí ná xá ke na nsake bexa judio Pabl. Cha mxaꞌak xa caden nchii Pabl wa. Cha unibeꞌe xa izhealbe be uleꞌay nibeꞌe no iteata bexa judio nsak. Cha uloꞌo xa Pabl, mbiꞌi xa Pabl ndoꞌ bexa judio nibeꞌe wa.
ACT 23:1 Weꞌe leꞌa Pabl ndon gaꞌal nwiꞌi ndoꞌ bexa wa, ndab Pabl: —Bego nak beuna xa Israel, leꞌa naꞌ gast len ladoꞌo naꞌ uní naꞌ leꞌa naꞌ leꞌaka nsoꞌ ndoꞌ Dios gast wizh nat.
ACT 23:2 Leꞌa Ananías xa nak uleꞌay ndon leꞌa nsak cha unibeꞌe ndoꞌ bexa nde gax wats Pabl kichyaꞌa toꞌo Pabl.
ACT 23:3 Weꞌe leꞌa Pabl cha ndab ndoꞌ Ananías: —¡Dios utsaksi ga, leꞌa ga cuenttsa dub xa wen nluu! Nsob ga sa baꞌ gab ga naga leꞌa nak ta mbin naꞌ lak nibeꞌe ley, ná unibeꞌe ga ndi utichyaꞌa bexa toꞌo naꞌ, dub ta naꞌanpa nibeꞌe ley wa.
ACT 23:4 Leꞌa bexa nde wats Pabl cha ndab ndoꞌ Pabl: —¿Ndoꞌ uleꞌay ndon leꞌa nsak ten Dios lbaꞌa kweaꞌ níꞌi lu zha?
ACT 23:5 Leꞌa Pabl cha ukaꞌab ndab: —Bego nak beuna xa Israel, leꞌa naꞌ lá iní ti uleꞌay ndon leꞌa nsak xa baꞌ. Leꞌa diꞌizh ten Dios nkeaniꞌi ndab‑a naꞌanpa kweaꞌ iníꞌi beuna ndoꞌ dub xa naktiꞌin.
ACT 23:6 Weꞌe leꞌa Pabl cha mnaꞌ leꞌa pla bexa wa bexa partid saduceo, ná leꞌa stapla bexa wa bexa partid fariseo. Weꞌe cha ugeꞌ ndab Pabl: —Bego nak beuna xa Israel, leꞌa naꞌ xa fariseo xin bexa fariseo. Nsoꞌ naꞌ ndoꞌ bega nat geal ta na ndangea lad naꞌ leꞌa Dios ixiste bexa ngutla.
ACT 23:7 Leꞌa gor na li ndab Pabl, leꞌa bexa fariseo wa no bexa saduceo usaxan nyotoꞌobe. Cha myak top partid bexa wa,
ACT 23:8 geal leꞌa bexa saduceo ndangea ladna leꞌa bexa ngutla yá naꞌantapa ibanbe. No ndangea ladna bexa naꞌanpa ncho angel ni xbi men. Parea leꞌa bexa fariseo ndangea ladna leꞌa bexa ngutla wa ibanka, no ncho angel no ncho xbi men.
ACT 23:9 Weꞌe leꞌa itea bexa wa nbezhat níꞌibe. Leꞌa pla be mech ten ley bexa fariseo ngwasoꞌ ndab: —Leꞌa xabgiꞌi ndee naꞌan xtaꞌan dub ta ugap ngun. Tal dub xbi men natal dub angel uníꞌi ndoꞌ xa, leꞌa beuna lá nsabndoꞌ uka ta ndun Dios.
ACT 23:10 Ná leꞌa ta na tant dub uteyotoꞌo bexa wa, leꞌa soldad nibeꞌe wa nzheb nchaꞌa bexa usu Pabl. Ta weꞌe unibeꞌe xa yate be soldad sa wa koꞌo bexa Pabl, cha goꞌo bexa xa leꞌaka len niꞌi ten be soldad wa.
ACT 23:11 Ngol teꞌal wa leꞌa Jesús mlundoꞌ ndoꞌ Pabl, ndab xa: —Pabl, lá yuꞌta ladna lu. Lak mbidiꞌizh lu diꞌizh ten naꞌ Jerusalén ndee, li nsabndoꞌ gudiꞌizh lu‑yá gezh Roma.
ACT 23:12 Leꞌa ngot xeꞌa wa leꞌa ncho bexa judio dubtsa mbidiꞌizh, ndab bexa ndoꞌ be ltsaꞌa xa: —Nsobwiꞌi Dios leꞌa beuna ni lá gaw, no ni nits lá goo beuna, gastka gor gut beuna Pabl.
ACT 23:13 Leꞌa bexa na li mbidiꞌizh gut Pabl wa masla dub top gaꞌal.
ACT 23:14 Cha ngwaꞌbe bexa ndoꞌ be uleꞌay nibeꞌe no ndoꞌ bexa gox nsak, ndab bexa: —Leꞌa besa mbidiꞌizh ndoꞌ Dios lá gaw besa gastka gor gut besa Pabl.
ACT 23:15 Nat leꞌa bego no iteata bexa judio nsak, gud bego ndoꞌ xa nibeꞌe ten soldad wa leꞌa bega mas koxnes cuent ten Pabl. Unab bega ndoꞌ xa wa ilenno Pabl sa nzhealbe bega wa geꞌa. Leꞌa besa cha gut Pabl nes nchaꞌa xa sa wa.
ACT 23:16 Ná leꞌa dub xmeꞌed bsan Pabl mbiꞌín xteꞌe mbidiꞌizh bexa wa. Cha ngwaꞌ meꞌed sa ndebe be soldad wa, ngwaꞌyab meꞌed ta wa ndoꞌ Pabl.
ACT 23:17 Leꞌa Pabl cha utezh dub soldad nibeꞌe dub gayoꞌo soldad, cha ndab xa ndoꞌ xa wa: —Biꞌi ga meꞌed ndee ndoꞌ xa nibeꞌe ga wa, leꞌa meꞌed ndee ndap dub taꞌa gab meꞌed ndoꞌ xa wa.
ACT 23:18 Leꞌa soldad wa cha mbiꞌi meꞌed ndoꞌ xa nibeꞌe wa, ndab xa: —Leꞌa Pabl xa nkea litgiꞌib utezh naꞌ, unab xa goo naꞌ meꞌed ndee ndoꞌ go. Leꞌa meꞌed ndap dub taꞌa gab meꞌed ndoꞌ ga.
ACT 23:19 Leꞌa xa nibeꞌe wa cha usen yaꞌa meꞌed wa, cha mbiꞌi xa meꞌed dub lad, cha ndab xa: —¿Xtaꞌan gab lu ndoꞌ naꞌ zha?
ACT 23:20 Leꞌa meꞌed cha ndab: —Leꞌa bexa judio mbidiꞌizhbe inab ndoꞌ go goꞌo ga Pabl geꞌa sa nzhealbe bexa. Gab bexa ndoꞌ go leꞌa bexa mas nlad koxnes cuent ten Pabl.
ACT 23:21 Parea lá gungea ladna go ta wa, leꞌa masla top gaꞌal bexa wa xgaꞌach nde nes. Leꞌa bexa wa ndab Dios nsobwiꞌi leꞌa bexa lá gaw, no lá goo nits gastka gor gut bexa Pabl. Nat leꞌa bexa list ndebe ná xteꞌetsa gab go.
ACT 23:22 Weꞌe leꞌa xa nibeꞌe wa ndab ndoꞌ meꞌed: —Nat byaꞌ. Naꞌan ton ndoꞌ ná gudiꞌizh lu ti ndab lu ta wa ndoꞌ naꞌ.
ACT 23:23 Leꞌa xa nibeꞌe be soldad cha utezh top soldad nibeꞌe dub gayoꞌoga be soldad. Cha unibeꞌe xa ndoꞌ itop bexa wa: —Bin list bega top gayoꞌo soldad xa isea ndats na, no chon gaꞌal ncho tiꞌi bexa isob tsoꞌo way, no top gayoꞌo xa goꞌo be lanza. Leꞌa gal gor nkea ugeꞌa gor teꞌal, cha yaꞌbe bego gezh Cesarea.
ACT 23:24 No bsaxkwaꞌa bega dub way isob Pabl tsoꞌo na. No blaꞌach bega Pabl, biꞌi bega xa gast Cesarea ndoꞌ Félix xa nibeꞌe, ndontsa naꞌan xtaꞌan yasea xa.
ACT 23:25 Cha no dub git msaꞌa xa ndoꞌ itop be soldad wa. Leꞌa ta wa lndeꞌe ndab:
ACT 23:26 “Naꞌ Claudio Lisias nidiꞌizh naꞌ ndoꞌ go, Félix, xa nibeꞌe idub sa ndee.
ACT 23:27 Leꞌa bexa judio usen Pabl ndiꞌizh gut bexa xa. Ná leꞌa gor na mbín naꞌ leꞌa xa xa Roma, cha ngwaa ulat naꞌ xa no be soldad.
ACT 23:28 Leꞌa naꞌ nlad iní naꞌ xá ke na nsake bexa wa xa, ta weꞌe mbí naꞌ xa ndoꞌ bexa nibeꞌe ten bexa wa.
ACT 23:29 Cha uní naꞌ leꞌa‑yá ke tentsa ta nibeꞌe ley ten bexa judio wa. Leꞌa Pabl ni dub ke ta nibeꞌe gat xa ni ta nibeꞌe ikea xa litgiꞌib lá ndap xa.
ACT 23:30 Ná leꞌa naꞌ mbín leꞌa bexa judio mbidiꞌizhlabe xteꞌe gut bexa xa, ta weꞌe mtuꞌub naꞌ xa ndoꞌ go. No ndáp naꞌ ndoꞌ bexa nsake xa, yaꞌyab bexa ndoꞌ go ná xtaꞌan mbin xa.”
ACT 23:31 Leꞌa be soldad wa cha mbin lak ndab xa nibeꞌe wa, ngol gor teꞌal wa mbiꞌi bexa Pabl gast gezh Antípatris.
ACT 23:32 Leꞌa gor ngot xeꞌa wa, leꞌa be soldad nchaꞌbe ndats na wa myachbe leꞌaka Jerusalén sa ndebe bexa wa. Leꞌa bexa ndiꞌib tsoꞌo way wa nchaꞌano Pabl gezh Cesarea.
ACT 23:33 Leꞌa gor na ulayaꞌ bexa Cesarea, cha msaꞌa bexa git wa ndoꞌ Félix, no myun bexa cuent Pabl.
ACT 23:34 Weꞌe cha mbiꞌil Félix git wa, cha unabdiꞌizh xa ndoꞌ Pabl ná pa nak lazh Pabl. Ndab Pabl leꞌa xa xa Cilicia. Leꞌa gor na mbiꞌín Félix ta wa,
ACT 23:35 cha ndab xa ndoꞌ Pabl: —Leꞌa naꞌ sonka ta gab lu gor ilen bexa nsake lu wa. Cha ndab xa ndoꞌ be soldad ukeꞌa bexa Pabl len litgiꞌib, sa ngok lid Herodes xa unibeꞌe mas polta wa.
ACT 24:1 Leꞌa ngol sgaꞌay wizh ulayaꞌ Ananías uleꞌay ndon leꞌa nsak, no pla bexa gox nsak ten bexa judio, no dub xa nsaleaꞌ Tértulo dub xa ntsid ley. Leꞌa itea bexa ndee wa ulayaꞌ ndoꞌ Félix, usake bexa Pabl.
ACT 24:2 Leꞌa gor ulenno be soldad Pabl, leꞌa Tértulo usaxan ndadiꞌizh ndoꞌ Félix, nsake xa Pabl ndab xa: —Félix, uzhebpa wen nibeꞌe go sa ndee, ta weꞌe wen ndebe besa no leꞌaka nak itea be taꞌa.
ACT 24:3 Idub tiemp no itea lad nsaꞌa besa xno ndoꞌ go Félix idub ncho ladna besa.
ACT 24:4 Leꞌa naꞌ lá nlad koo tiemp ten ga, parea leꞌa nat inaꞌab naꞌ goꞌón ga ta gudiꞌizh besa dub xlaꞌaltsa.
ACT 24:5 Leꞌa besa ngwaꞌizheal leꞌa Pabl ndee uzhebpa ugap ndun, leꞌa xa nchealuyo bexa judio idub ndoꞌ gizhliyo. No leꞌa xa nak dub xa nsak ten partid ten bexa nsaleaꞌ nazareno.
ACT 24:6 No ndiꞌizh gun bzhiꞌik xa niꞌi ten Dios, ta weꞌe usen besa xa, nlad besa gunno besa xa lak nibeꞌe ley ten besa.
ACT 24:7 Ná leꞌa Lisias xa nibeꞌe be soldad wa cha ulen lat besa, cha lajuers mlat xa Pabl ndoꞌ besa.
ACT 24:8 Cha ndab xa usake besa Pabl ndoꞌ go sa ndee. Nat tal inabdiꞌizh go ndoꞌ xa, iniꞌí go leꞌa itea ta nsake besa xa ta ugeaka.
ACT 24:9 Leꞌa bexa judio wa dubtsa ndab leꞌa ta wa ta ugeaka.
ACT 24:10 Ná leꞌa Félix cha mbin sein ndoꞌ Pabl iníꞌi Pabl. Leꞌa Pabl cha ndab: —Leꞌa naꞌ uní leꞌa go kwenla nak juez ten idub sa ndee, ta weꞌe nten lad naꞌ utsakndoꞌ naꞌ ndoꞌ ga.
ACT 24:11 Tal leꞌa go koxnes‑a, leꞌa go szheal leꞌa pa msa tibtop wizh ngwaa naꞌ Jerusalén ngwankea naꞌ Dios.
ACT 24:12 Leꞌa bexa baꞌ naꞌanpa iniꞌí masa ton dub men uteyotoꞌo besa. No ni lá ngun naꞌ dub ta gun leꞌa be men gaklono naꞌ, ni tale ten niꞌi ten Dios, no ni len be niꞌi sa nzhealbe bexa judio, no ni len gezh wa.
ACT 24:13 No ni dub taꞌa li nsake bexa baꞌ naꞌ, lá gun bexa gan uluu leꞌa‑yá ta ugea.
ACT 24:14 Ta ugeaka leꞌa naꞌ ndankea Dios xa na ngwankea be usan gox polta ten besa, no ndankea naꞌ nes ten Jesús. Leꞌa bexa ndee ndab leꞌa ta wa naꞌanpa leꞌa nak, parea leꞌa naꞌ nxobgek ndoꞌ itea be diꞌizh ten Dios, ta mkeꞌa Moisés nsea bexa mbidiꞌizh sakndoꞌ Dios.
ACT 24:15 No ndangea lad naꞌ lak ndangea ladna bexa ndee, leꞌa Dios ixiste bexa ngutla, tal bexa wen natal bexa ugap.
ACT 24:16 Ta weꞌe uzhebpa ndun naꞌ juers utsin gak naꞌ ndoꞌ Dios no ndoꞌ be men.
ACT 24:17 ’Leꞌa naꞌ sian liꞌin ngwaꞌukesea be gezh sit, ná nat nsea naꞌ Jerusalén ndontsa usa naꞌ med ndoꞌ bexa uban nak no usa naꞌ man xnab ndoꞌ Dios sa wa.
ACT 24:18 Ná ndalen ndun naꞌ be ta wa, gor na mbinla naꞌ ta msambiꞌi naꞌ ndoꞌ Dios, weꞌe leꞌa pla bexa judio bexa Asia uniꞌíla naꞌ wats niꞌi ten Dios wa. Leꞌa wats naꞌ wa ni lid kwaꞌad men ndebe, no ni naꞌanpa ndakloo be men.
ACT 24:19 Leꞌa bexa wa nsabndoꞌ gidyab‑a ndoꞌ ga, tal bexa ndap ta nsake bexa naꞌ.
ACT 24:20 Ná tal gab bexa ndee tal leꞌa bexa ngwaꞌizheal leꞌa naꞌ ndun ta lid leꞌa nak, gor na usoꞌ naꞌ ndoꞌ bexa wa.
ACT 24:21 Nabtsa syoꞌo gan usake bexa naꞌ ta na ugeꞌ uníꞌi naꞌ ndoꞌ bexa wa, ndáp naꞌ leꞌa naꞌ nsoꞌ ndoꞌ bexa wa geal ta na ndangea lad naꞌ leꞌa Dios ixiste bexa ngutla.
ACT 24:22 Leꞌa Félix yá uniꞌíla cuent ten nes ten Jesús, ta weꞌe gor na mbiꞌín xa ta wa, cha ndab xa: —Uni ta ndee. Ilentsa Lisias, weꞌe gun naꞌ regl cuent ten bega.
ACT 24:23 Cha unibeꞌe Félix ndoꞌ soldad nibeꞌe wa ikeanyaw Pabl, parea ulaꞌa xa ikesea Pabl len niꞌi wa, no ulaꞌa xa tal be ltsaꞌa xa yaꞌinaꞌ xa no gakno bexa xa.
ACT 24:24 Leꞌa ngol stapla wizh wa leꞌa Félix no Drusila, xa judio xagots ten xa, ulayaꞌgal sa wa. Leꞌa Félix cha unibeꞌe goꞌo be soldad Pabl sa nsob Félix. Weꞌe cha mbiꞌín bexa ta mbidiꞌizh Pabl ná xteꞌe ndangea ladna men Jesucristo.
ACT 24:25 Ná leꞌa gor na mbidiꞌizh Pabl xteꞌe nlad Dios gun be men, no xteꞌe lá nsabndoꞌ gun be men sbeꞌen ta nladtsa na, no xteꞌe yoo dub wizh leꞌa Dios leꞌa gab ná ton ndap ke, weꞌe leꞌa Félix cha mzheb, cha ndab xa ndoꞌ Pabl: —Nat byaꞌ. Leꞌa wizh na ulat naꞌ wa, leꞌa naꞌ sbeꞌezhkagal lu.
ACT 24:26 Tsoꞌo wa nlad Félix leꞌa Pabl usaꞌa med ndontsa ulaꞌa xa Pabl, ta weꞌe sian biaj utezh xa Pabl gudiꞌizhno xa Pabl.
ACT 24:27 Ngok top liꞌin leꞌa Félix mtoꞌo sa wa. Cha uyatsob dub xa nsaleaꞌ Porcio Festo. Ná leꞌa Félix nlad wen yaꞌan ndoꞌ bexa judio wa, ta weꞌe lá igoꞌo xa Pabl sa nkeanyaw Pabl.
ACT 25:1 Ngok chon wizh nak Festo xa nibeꞌe sa wa, cha utoꞌo xa Cesarea nchaꞌa xa Jerusalén.
ACT 25:2 Leꞌa sa wa leꞌa be uleꞌay nibeꞌe no bexa judio mas nsak wa msake Pabl ndoꞌ Festo. No unab bexa ndoꞌ Festo,
ACT 25:3 ndab bexa gun Festo lak nlad bexa, inibeꞌe xa giꞌid Pabl Jerusalén. Ná leꞌa bexa nlad gut Pabl nes wa.
ACT 25:4 Leꞌa Festo ukaꞌab ndab ndoꞌ bexa: —Leꞌa naꞌ stapla wizh ndee yach Cesarea, sa na nkeanyaw Pabl.
ACT 25:5 Leꞌa bexa nibeꞌe ten bego baꞌ syoꞌo gan no isea sa wa. Cha sa weꞌe usake bexa Pabl, tal ncho xtaꞌan ta ugap mbin xa.
ACT 25:6 Leꞌa Festo uyoꞌo Jerusalén pa sxoꞌon nate stiꞌi wizh, cha myach xa leꞌaka Cesarea. Leꞌa ngol stubtsa wizh leꞌa xa usob sa ndun xa tiꞌin, cha unibeꞌe xa giꞌidno bexa Pabl sa wa.
ACT 25:7 Leꞌa gor uyoꞌo Pabl sa wa leꞌa bexa judio na utoꞌo Jerusalén wa myaklo wats Pabl. Cha msake bexa Pabl sian be taꞌa uzhebpa ugap. Ná leꞌa bexa lá ngun gan uluu leꞌa ta wa ta ugeaka.
ACT 25:8 Weꞌe leꞌa Pabl cha mtsakndoꞌ, ndab xa: —Naꞌ naꞌan xtaꞌan dub ta ugap ngun, dub ta lá nibeꞌe ley ten besa xa judio. Ni ndoꞌ niꞌi ten Dios ni ndoꞌ César xa nibeꞌe Roma naꞌan xtaꞌan ngun naꞌ.
ACT 25:9 Ná leꞌa Festo nlad wen yaꞌan ndoꞌ bexa judio, ta weꞌe cha unabdiꞌizh xa ndoꞌ Pabl, ndab xa: —¿Nlad lu yaꞌ lu Jerusalén, ndontsa sa weꞌe gun naꞌ regl cuent ten lu zha?
ACT 25:10 Leꞌa Pabl cha ukaꞌab ndab: —Nat nsoꞌ naꞌ ndoꞌ go, xa ndun tiꞌin ten César, sa na nsabndoꞌ gak regl cuent ten naꞌ. Leꞌa go uniꞌíka leꞌa naꞌ naꞌan xtaꞌan dub ta ugap ngunno bexa judio.
ACT 25:11 Ná tal naꞌ mbin dub ta nsabndoꞌ gat naꞌ, naꞌ naꞌanpa gáp lá gut bega naꞌ. Ná leꞌa be ta ndab bexa baꞌ naꞌanpa ta ugea, ta weꞌe naꞌan ton nsabndoꞌ yun cuent naꞌ ndoꞌ yaꞌa bexa baꞌ. Nat naꞌab naꞌ ndoꞌ ga leꞌa César gun regl cuent ten naꞌ.
ACT 25:12 Weꞌe leꞌa Festo cha mbidiꞌizhno be xmen na, ná xteꞌe nsabndoꞌ gun xa. Cha ndab xa ndoꞌ Pabl: —Leꞌa lu unab leꞌa César gun regl cuent ten lu, ta weꞌe ndoꞌ César yaꞌ lu.
ACT 25:13 Ngok stapla wizh leꞌa rey Agripa xa nibeꞌe wa no bsan xa Berenice ulayaꞌ Cesarea, ngwaꞌinaꞌ Festo.
ACT 25:14 Leꞌa zha na nchola bexa sa wa sian wizh, leꞌa Festo cha mbidiꞌizh cuent ten Pabl ndoꞌ Agripa, ndab xa: —Leꞌa sa ndee naxncho dub xabgiꞌi mchaꞌanko Félix litgiꞌib.
ACT 25:15 Leꞌa zha ngwaa naꞌ Jerusalén leꞌa be uleꞌay nibeꞌe no bexa gox nsak ten bexa judio unab ndoꞌ naꞌ inibeꞌe naꞌ gat xa wa.
ACT 25:16 Leꞌa naꞌ cha ukab leꞌa ley ten Roma nibeꞌe leꞌa dub xa ndap ke nsabndoꞌ isoꞌ ndoꞌ bexa nsake xa wa, ndontsa utsakndoꞌ xa. Leꞌa ley naꞌanpa nibeꞌe gat dub men tal lid ned gun bexa ta wa.
ACT 25:17 Weꞌe leꞌa wizh na ulen bexa sa ndee, cha uxax bi leꞌa ngottsa xeꞌa wa cha usoꞌob naꞌ sa ndun naꞌ tiꞌin, cha unibeꞌe naꞌ giꞌid xabgiꞌi wa.
ACT 25:18 Ná leꞌa ngol gor na ndebe bexa nsake xa wa, leꞌa bexa naꞌanpa usake xa lak ndanbeꞌe naꞌ.
ACT 25:19 Leꞌa bexa ndi nsake xa cuent tentsa lak ndankea bexa Dios, no cuent ten dub xa ngut usaleaꞌ Jesús, ná leꞌa Pabl ndab leꞌa xa wa nban.
ACT 25:20 Leꞌa naꞌ lá iní xteꞌe koxnes naꞌ ta wa, cha unabdiꞌizh naꞌ ndoꞌ Pabl naga nlad Pabl yaꞌ Jerusalén, ndontsa sa weꞌe itatsoꞌ xteꞌe nak be ta wa.
ACT 25:21 Ná leꞌa Pabl ndi unab yaꞌ ndoꞌ César Augusto. Ta weꞌe unibeꞌe naꞌ litsa nkeanyaw xa gast gal zha utuꞌub naꞌ xa ndoꞌ César.
ACT 25:22 Weꞌe leꞌa Agripa cha ndab ndoꞌ Festo: —Naꞌ no nlad gon xtaꞌan ndadiꞌizh xa wa. Leꞌa Festo cha ukaꞌab ndab: —Geꞌa goꞌón lu ta gab xa.
ACT 25:23 Ngok stubtsa wizh, leꞌa Agripa no Berenice ulayaꞌ sa wa, nak bexa be lad uyap nsak. Cha uyoꞌo bexa len dub cuart siꞌil no bexa nibeꞌe ten soldad no bexa nsak ncho Cesarea wa. Weꞌe leꞌa Festo cha unibeꞌe giꞌid Pabl.
ACT 25:24 Cha ndab Festo ndoꞌ bexa nde sa wa: —Go rey Agripa nsea bego mzhealbe beuna sa ndee, leꞌa ta ndee Pabl. Leꞌa xa ndee xa na kwaꞌad bexa judio nsake ndoꞌ naꞌ gezh Jerusalén no Cesarea ndee, ndab bexa leꞌa xa nsabndoꞌ gat.
ACT 25:25 Ná leꞌa naꞌ ndee nsak leꞌa xa naꞌan xtaꞌan dub ta nsabndoꞌ gat xa ngun xa. Parea leꞌa xa baꞌ leꞌaka unab gun César Augusto regl cuent ten xa, ta weꞌe mbinbe naꞌ utuꞌub naꞌ xa ndoꞌ César.
ACT 25:26 Ná leꞌa naꞌ lá ndap xtaꞌan ukeꞌa naꞌ ndoꞌ git utuꞌubno naꞌ xa ndoꞌ César wa. Ta weꞌe ulatsoꞌ naꞌ xa ndoꞌ go rey Agripa no ndoꞌ iteata bego, ndontsa gor na itayadiꞌizh beuna cuent ten xa baꞌ, leꞌa naꞌ yá ndap ta ukeꞌa naꞌ ndoꞌ git wa.
ACT 25:27 Nsak naꞌ naꞌanpa leꞌa nak utuꞌub naꞌ dub xa nkea litgiꞌib ndoꞌ César ni lá gáp naꞌ xá ke na nsake bexa xa.
ACT 26:1 Weꞌe leꞌa Agripa cha ndab ndoꞌ Pabl: —Sak utsakndoꞌ lu nat. Leꞌa Pabl uxits yaꞌa na, cha lndeꞌe ndab xa:
ACT 26:2 —Rey Agripa, naꞌ nten ladna gudiꞌizh naꞌ ndoꞌ go, ndontsa utsakndoꞌ naꞌ ndoꞌ itea be ta na li nsake bexa judio wa naꞌ.
ACT 26:3 Leꞌa go nchandoꞌ itea be costumbr ten besa xa judio wa nsea be ta ndadiꞌizh besa wa. Ta weꞌe naꞌab naꞌ ndoꞌ ga ulaꞌach ga xtaꞌan gudiꞌizh naꞌ.
ACT 26:4 ’Leꞌa itea bexa judio uniꞌí xteꞌe uyoꞌo naꞌ lat bexa lazh naꞌ no Jerusalén idub tuzhta naꞌ.
ACT 26:5 Leꞌa bexa uniꞌí, no syoꞌo gan gab bexa leꞌa naꞌ ndee no ngok xa fariseo, bexa na mas ndankea ley ten Dios ndoꞌ iteata bexa judio.
ACT 26:6 Leꞌa naꞌ ndangea ladna leꞌa Dios sunka ta ndab xa ndoꞌ be usan gox polta ten besa, ixiste Dios bexa ngutla. Ke weꞌe nat nsoꞌ naꞌ ndoꞌ go.
ACT 26:7 No liga leꞌa itea bexa isatibtop xkwaꞌa bexa Israel wa ndangea ladna ta wa, bexa ndankea Dios teꞌal tezhea. Rey Agripa, ke weꞌe nsake bexa judio wa naꞌ.
ACT 26:8 ¿Xtaꞌan lá ndangea ladna bega leꞌa Dios nxiste bexa ngutla zha?
ACT 26:9 ’Leꞌa naꞌ polta no mbinbeꞌe leꞌa naꞌ nsabndoꞌ utsaksi be xmen Jesús xa Nazaret wa.
ACT 26:10 Leꞌa ta wa ta mbin naꞌ Jerusalén wa. Nsea permis ten be uleꞌay nibeꞌe mkikoꞌo naꞌ kwaꞌad be xmen Jesús wa litgiꞌib. Nsea gor na mbit be men bexa wa, leꞌa naꞌ no nsak ladna ta wa.
ACT 26:11 Ukesea naꞌ itea be niꞌi sa nzhealbe bexa judio, cha mtsaksi naꞌ be xmen Jesús sa wa, ndontsa ulaꞌa bexa ta ndangea ladna bexa Jesús. Tant dub ngokloo naꞌ ndoꞌ bexa wa, leꞌa naꞌ ukesankea tsoꞌo bexa gast be gezh sit.
ACT 26:12 ’Tiꞌin weꞌe ngwalo naꞌ permis ten be uleꞌay nibeꞌe, cha mtuꞌub bexa naꞌ gezh Damasco.
ACT 26:13 Rey Agripa, leꞌa nes nda naꞌ pa gawizh uní naꞌ dub xeꞌa utoꞌo gibeꞌa, mas uzheꞌeb nsu ndoꞌ xeꞌa wizh. Leꞌa ta wa msu gangeak wats naꞌ no wats bexa ndano naꞌ wa.
ACT 26:14 Cha iteanak besa ulayat ndoꞌ yo. Cha mbín naꞌ dub ti men uníꞌi diꞌizh hebreo, ndab xa: “Saulo, Saulo, ¿xtaꞌan lbaꞌata ugap ndanno lu naꞌ zha? Lu ntsaksi leꞌaka leꞌa lu cuent dub ngon nkeꞌa patad ndoꞌ bar ncheb xa ma.”
ACT 26:15 Leꞌa naꞌ cha ndáp: “¿Ná ton go zha, Señor?” Leꞌa xa wa cha ndab: “Leꞌa naꞌ Jesús, xa na lbaꞌa ndaklono lu baꞌ.
ACT 26:16 Nat goste, leꞌa naꞌ mlundoꞌ ndoꞌ lu ndontsa gun lu tiꞌin ten naꞌ, gudiꞌizh lu be ta uniꞌí lu nat ndee no be ta tiꞌi ulu naꞌ ndoꞌ lu.
ACT 26:17 Leꞌa naꞌ utuꞌub lu ndoꞌ bexa judio no ndoꞌ bexa naꞌanpa xa judio. Leꞌa naꞌ lá ula ni dub bexa wa naꞌanpa ugap gunno lu.
ACT 26:18 Ndi gudiꞌizh lu diꞌizh ten naꞌ ndoꞌ bexa, ndontsa yaꞌal ndoꞌ bexa no itoꞌo bexa sa ukaw, cha ilen bexa ndoꞌ xeꞌa. Li ndontsa ulaꞌa bexa wa nes ten maxuꞌu, cha ndi isen bexa nes ten Dios. Leꞌa bexa igeꞌ ladna naꞌ, cha yuꞌu be ke ten bexa, no gak bexa be xmen Dios.”
ACT 26:19 ’Ta weꞌe, rey Agripa, leꞌa naꞌ mbinka ta li uníꞌi Dios ndoꞌ naꞌ wa.
ACT 26:20 Ned lak mbidiꞌizh naꞌ ndoꞌ bexa ndencho Damasco wa. Ndáp naꞌ ndoꞌ bexa wa ulaꞌa bexa be ta ugap nak bexa, cha ndi yach bexa wats Dios, no gun bexa ta wen, ta uluu leꞌa bexa mlaꞌaka be ta ugap nak bexa. Tsoꞌo wa mbidiꞌizhga naꞌ ndoꞌ bexa Jerusalén, no ndoꞌ bexa ndencho idub Judea, no ndoꞌ bexa naꞌanpa xa judio.
ACT 26:21 Ke weꞌetsa usen bexa judio naꞌ tale ten niꞌi ten Dios, cha ndiꞌizh gut bexa naꞌ.
ACT 26:22 Ná leꞌa Dios ndakno naꞌ, ta weꞌe nsoꞌ naꞌ gast gor nat, ndadiꞌizh naꞌ diꞌizh ten Dios ndoꞌ bexa nsak no ndoꞌ bexa naꞌanpa nsak. Leꞌa naꞌ ndadiꞌizh laktsa mkeꞌa be profet no Moisés, polta ndab bexa xteꞌe nak ta yoo.
ACT 26:23 Ndab bexa leꞌa xa utuꞌub Dios wa nsabndoꞌ iniꞌí sian gealkweaꞌ no gat xa. Weꞌe leꞌa xa ndon ned iban ndoꞌ gealgut, ndontsa uluu xa xeꞌa ten Dios ndoꞌ bexa judio no ndoꞌ bexa naꞌanpa xa judio.
ACT 26:24 Leꞌa gor na li ndab Pabl, leꞌa Festo cha ugeꞌ ndab: —¡Leꞌa lu xa tont, Pabl! Tant mtsid lu gast myak tont lu.
ACT 26:25 Ná leꞌa Pabl ukaꞌab ndab ndoꞌ Festo: —Naꞌ naꞌanpa xa tont, Festo. Leꞌa ta na ndadiꞌizh naꞌ ndee wa ta ugeaka no leꞌaka nak‑a.
ACT 26:26 Leꞌa rey Agripa baꞌ nchandoꞌ itea be ta ndee, ta weꞌe lá nyuꞌ lad naꞌ li ndadiꞌizh naꞌ ndoꞌ xa. Naꞌ uní leꞌa xa noka uniꞌí be ta ndáp naꞌ wa, leꞌa‑yá naꞌanpa ngak dub sa xgaꞌach.
ACT 26:27 Cha ndab Pabl ndoꞌ Agripa: —Go rey Agripa, ¿ndangea ladna ga ta mkeꞌa bexa mbidiꞌizh sakndoꞌ Dios wa zha? Naꞌ uní leꞌa go ndangeaka ladna‑yá.
ACT 26:28 Leꞌa rey Agripa cha ukaꞌab ndab ndoꞌ Pabl: —¿Nsak lu zha leꞌa tuzhtsa tiemp gun lu gan no naꞌ gak xmen Cristo?
ACT 26:29 Leꞌa Pabl ndab: —Tal tuzhtsa tiemp natal kwen‑a, leꞌa naꞌ naꞌab ndoꞌ Dios leꞌa go no itea bexa ndeyoꞌón ta ndáp naꞌ ndee nat wa, gak bega xmen Cristo, lakka nak naꞌ ndee. Parea lá nlad naꞌ leꞌa bega no yaa caden ndee.
ACT 26:30 Leꞌa gor na mtayadiꞌizh Pabl ta wa, cha usoꞌ rey Agripa no Festo nsea Berenice no itea bexa nde sa wa.
ACT 26:31 Cha utate bexa dub lad mbidiꞌizh bexa, ndab bexa ndoꞌ ltsaꞌa xa: —Leꞌa xa baꞌ naꞌan xtaꞌan ngun dub ta nsabndoꞌ gat xa, ni lá nsabndoꞌ ikea xa litgiꞌib.
ACT 26:32 Leꞌa Agripa ndab ndoꞌ Festo: —Syoꞌoka gan itoꞌo Pabl, taltsa xa lá inab gun César regl cuent ten xa.
ACT 27:1 Ngol gor leꞌa bexa wa mbidiꞌizh yaꞌbe besa Italia len dub barco, cha myak cuent Pabl no stapla bexa nkea litgiꞌib wa ndoꞌ xa nsaleaꞌ Julio, dub soldad nibeꞌe dub gayoꞌo soldad, bexa ten partid nsaleaꞌ Augusta.
ACT 27:2 Cha uyoꞌo besa len dub barco siꞌil utoꞌo gezh Adramitio nchaꞌa‑yá be gezh ten Asia. No nchaꞌano besa dub xa nsaleaꞌ Aristarco, xa gezh Tesalónica ten Macedonia.
ACT 27:3 Ngok stub wizh ulayaꞌ besa gezh Sidón. Leꞌa sa wa leꞌa Julio utsin mbin ndoꞌ Pabl, mlaꞌa xa ngwaꞌinaꞌ Pabl be amig ten Pabl, ndontsa usaꞌa bexa be ta nkiꞌin Pabl.
ACT 27:4 Cha nchaꞌagal besa len barco, cha utid besa lad sa nde isla Chipre, sa na xe nde mbi, leꞌa mbi nsaꞌab ndoꞌ nits wa ndi lad ndoꞌ besa nlen.
ACT 27:5 Cha utid besa gax toꞌo yo sa nde be región nsaleaꞌ Cilicia no Panfilia. Cha ulayaꞌ besa gast Mira, gezh ten Licia.
ACT 27:6 Leꞌa sa wa leꞌa Julio mzheal stub barco utoꞌo gezh Alejandría, nchaꞌa‑yá Italia sa nde Roma. Cha uyoꞌo besa len barco wa, cha nchaꞌa besa.
ACT 27:7 Leꞌa mbi wa bi lika nlen lad ndoꞌ besa, ta weꞌe staplata wizh chaꞌaw usea barco wa ndoꞌ nitsdoꞌo, no uzhebpa juert mbin bexa gan utid barco gax gezh Gnido. Cha utid besa gax sa nsaleaꞌ Salmón, dub lad sa nde isla Creta sa na xe nde mbi.
ACT 27:8 Uzhebpa bid mtseꞌa bexa barco nchaꞌtid‑a gax toꞌo yo isla Creta, gast ulayaꞌ besa dub sa nsaleaꞌ Sa Wen Nbe Barco, gax gezh Lasea.
ACT 27:9 Uzheꞌeb kwen nsoꞌla besa nes, leꞌa zha wa mas nsayal gax tiemp mas nxoꞌon mbi, zha na uzheꞌeb rages iseata barco wa ndoꞌ nitsdoꞌo. Ta weꞌe leꞌa Pabl ndab ndoꞌ bexa wa:
ACT 27:10 —Blaꞌach bega, leꞌa naꞌ nsak leꞌa tal beuna ikaꞌan sa ndee uzhebpa rages gak perdid barco ndee no be ta noꞌo‑yá no gast beuna rages gat.
ACT 27:11 Ná leꞌa soldad nibeꞌe wa naꞌanpa ulaꞌach ta ndab Pabl wa, ndi mas mlaꞌach xa diꞌizh ten xwan barco no xa ntseꞌa barco wa.
ACT 27:12 Leꞌa sa wa ni lid wen kwe barco wa tiemp nxoꞌon mbi. Weꞌe leꞌa kwaꞌad bexa wa mbidiꞌizh itate besa sa wa, gun bexa preb ná lid slayaꞌ barco wa Fenice, stub gezh ten Creta, dub sa mas xe nde mbi. Ndab bexa kweas besa sa wa ndalen itid tiemp li nxoꞌon mbi wa.
ACT 27:13 Tsoꞌo wa leꞌa mbi wa usaxan ndidoma nlen lad sur, ta weꞌe mbinbeꞌe bexa leꞌa besa syoꞌo gan ilayaꞌ gezh Fenice lakka mbidiꞌizh bexa. Cha utoꞌo besa sa wa, nchaꞌtid besa gax toꞌo yo isla Creta wa.
ACT 27:14 Parea cha ndi ulen dub mbi siꞌil ndi lad noreste.
ACT 27:15 Cha usaxan‑a ndoꞌo‑yá barco, ta na lá ngun bexa gan isen nsaꞌab bexa barco laktsa nchaꞌa besa wa, cha ndi mlaꞌa bexa mbiꞌi mbi‑yá.
ACT 27:16 Utid besa gax dub isla tuzh nsaleaꞌ Clauda, lad ndidoma nxoꞌon mbi. Leꞌa sa wa uzhebpa bid mbin besa gan mxaꞌap besa barco tuzh ndoꞌ ná siꞌil wa.
ACT 27:17 Tsoꞌo na mxaꞌap bexa‑yá, cha ulo bexa doꞌo utaꞌa las barco siꞌil ndontsa mas masis gak‑a. Leꞌa bexa nzheb yaꞌchoꞌo barco wa ndoꞌ yux len nits wa sa nsaleaꞌ Sirte. Ta weꞌe uxeꞌe bexa lad ten barco wa, cha mlaꞌa bexa mbiꞌi mbi‑yá.
ACT 27:18 Ngot xeꞌa wa leꞌa mbi wa bi lika uzhebpa nxoꞌon, cha usaxan bexa ntsaꞌab bexa be ta noꞌo barco wa ndoꞌ nitsdoꞌo ndontsa ixax‑a.
ACT 27:19 Ngol wizh yon cha usen besa pla be taꞌa ndantiꞌin bexa ntseꞌa bexa barco wa, cha udabi besa‑yá ndoꞌ nitsdoꞌo.
ACT 27:20 Sian wizh lá inaꞌta besa xeꞌa wizh ni be mbeal ndiꞌib gibeꞌa baꞌ, no lita uzheꞌeb nxoꞌon mbi siꞌil wa. Cha mbinbeꞌe besa leꞌa besa ga gatka.
ACT 27:21 Leꞌa besa kwen ni lá ngaw, ta weꞌe ngol gor leꞌa Pabl cha usoꞌ, cha ndab Pabl ndoꞌ itea besa: —Wenkata ngoꞌón bega ta li ndáp naꞌ wa lá ikaꞌan beuna Creta wa, ndontsa lá itid beuna itea be ta ndee.
ACT 27:22 Ná nat lá yuꞌta ladna bega, leꞌa bega ni dub lá gat, parea leꞌa barco ndee isabgix.
ACT 27:23 Leꞌa teꞌal nat mlundoꞌ dub angel mtuꞌub Dios xa nibeꞌe naꞌ no xa ndun naꞌ tiꞌin ten na.
ACT 27:24 Leꞌa angel wa ndab: “Pabl, lá izheb lu, leꞌa lu nsabndoꞌka yaꞌ ndoꞌ César. No lak unab lu ndoꞌ Dios leꞌa Dios lá ulaꞌa gat ni dub bexa nchaꞌano lu len barco baꞌ.”
ACT 27:25 Ta weꞌe gáp naꞌ ndoꞌ bego lá yuꞌ ladna bega. Leꞌa naꞌ ngeꞌ ladna Dios leꞌa ta wa gakka lak ndab xa wa.
ACT 27:26 Parea leꞌa barco ndee gazhaꞌa gax dub isla.
ACT 27:27 Ngok msa tidaꞌ wizh li nxoꞌon mbi wa, nchasea besa itea lad ndoꞌ nitsdoꞌo Adriático. Ná gor utol teꞌal leꞌa bexa ntseꞌa barco mgenna leꞌa besa ndela gax toꞌo yo bid.
ACT 27:28 Cha mkeꞌa bexa medid plo wat nak ndoꞌ yux sa wa. Leꞌa ta wa pa galntiꞌi bxoꞌop metr wat. Cha stub xlaꞌaltsa mkeꞌa medidgal bexa len nits wa. Leꞌa sa wa gaꞌal bgaꞌadtsa metr wat‑a.
ACT 27:29 Leꞌa bexa nzheb ikea barco wa be geꞌ, ta weꞌe mtsaꞌab bexa dap bleꞌa giꞌib kweꞌapa lad tsoꞌo barco wa nchii‑a las barco ndontsa yaisoꞌ‑yá. Cha uzhebpa nyuꞌ ladna bexa ndenkeaꞌ bexa gat xan xeꞌa.
ACT 27:30 Leꞌa bexa ntseꞌa barco wa ndanbeꞌe uxoꞌon, ta weꞌe uxeꞌe bexa barco tuzh wa ndoꞌ nitsdoꞌo. Mkwiꞌin bexa ndab bexa nchaꞌdabi bexa stapla giꞌib kweꞌa len nits lad ndoꞌ barco siꞌil wa.
ACT 27:31 Ná leꞌa Pabl cha ndab ndoꞌ be soldad no ndoꞌ xa nibeꞌe bexa wa: —Tal leꞌa bexa baꞌ lá kweas len barco ndee, leꞌa itea bega satka.
ACT 27:32 Weꞌe leꞌa be soldad wa cha uxen be doꞌo nchii barco tuzh wa, cha nchaꞌa‑yá ndoꞌ nits.
ACT 27:33 Leꞌa gor nsayat xeꞌa tempran, leꞌa Pabl ndab nsabndoꞌ gaw iteanak besa, ndab xa: —Leꞌa bega yá dub tiꞌinla wizh nyuꞌ ladna no ni lá ndaw bega.
ACT 27:34 Nat udaw bega ndontsa yoo juers bega, leꞌa bega ni dub lá gat.
ACT 27:35 Tsoꞌo na li ndab Pabl ta wa, cha usen Pabl dub pan, cha msaꞌa xa xno ndoꞌ Dios ndoꞌ gaꞌal besa. Cha uleꞌa xa‑yá, cha usaxan xa ndaw xa‑yá.
ACT 27:36 Weꞌe leꞌa itea besa mas uxee nyuꞌ ladna, cha no besa udaw.
ACT 27:37 Ndoꞌ itea besa ncho len barco wa pa top gayoꞌo ncho chon gaꞌal ncho tiꞌin bdub besa.
ACT 27:38 Leꞌa gor mtayaw besa, cha udabi besa itea be ngoch ten trig ndoꞌ nitsdoꞌo, ndontsa ixax barco wa.
ACT 27:39 Ngol gor ngot xeꞌa, leꞌa bexa ntseꞌa barco uniꞌí dub sa uxee ngi nyoꞌo mbi, dub sa ndebe yux toꞌo nits wa, parea lá igondoꞌ bexa pa ta wa. Cha mbidiꞌizh bexa goꞌo bexa barco sa wa, ná lid sun bexa gan weꞌetsa kwe‑yá.
ACT 27:40 Cha uxen bexa be doꞌo nchii giꞌib kweꞌa wa. Cha mlaꞌa bexa ta wa len nits tsoꞌo barco. No mxaꞌak bexa be doꞌo nchii be ya ntseꞌa barco. Cha mxaꞌap bexa lad nkea sa nak ndoꞌ barco, cha usaxan‑a nchaꞌa‑yá gax toꞌo yo bid wa.
ACT 27:41 Ná leꞌa barco wa ngwatsaꞌab dub sa ndepa yux len nits, ngwatsob lad ndoꞌ barco ndoꞌ yux wa, ni lá yoota gan iwiꞌin‑a. Leꞌa tant golp ten nits wa leꞌa xan barco usaxan nsayu.
ACT 27:42 Leꞌa be soldad wa mbidiꞌizh gut bexa utoꞌo ikea stubga litgiꞌib wa ndontsa ni dub bexa lá kob nits uxoꞌon.
ACT 27:43 Ná leꞌa soldad nibeꞌe wa lá nlad gat Pabl, ta weꞌe lá ulaꞌa xa li ngun be soldad. Cha ndi unibeꞌe xa ndab xa: —Tal ton bega ndák ngob nits, uxax utakea bega sa bid baꞌ.
ACT 27:44 Leꞌa iteata bego baꞌ usen be tabl no dub bleꞌaga las barco ndee. Litsa ulayaꞌ iteanak besa ndoꞌ yo sa bid wa.
ACT 28:1 Leꞌa gor na yá nde besa ndoꞌ yo wa, weꞌe leꞌa bexa ndencho sa wa ndab leꞌa ta wa dub isla nsaleaꞌ Malta.
ACT 28:2 Leꞌa bexa wa utsin mbinno besa, mkwaꞌa bexa giꞌ ndontsa ubizh besa, leꞌa sa wa nsoꞌ gi no kwal sa wa.
ACT 28:3 Leꞌa Pabl cha udob pla bleꞌa xos ya bid, cha mtsaꞌab xa‑yá ndoꞌ giꞌ wa. Cha uxax utoꞌo dub mbeꞌal ndoꞌ xtii ten giꞌ, cha udawkeꞌa ma yaꞌa Pabl.
ACT 28:4 Leꞌa gor na uniꞌí bexa ncho sa wa leꞌa mbeꞌal wa nkengaꞌa yaꞌa Pabl, cha ndab bexa ndoꞌ ltsaꞌa xa: —Leꞌa xabgiꞌi baꞌ ta ugeakapa dub xa ndut men. Mbin xa gan lá ngat xa len nits baꞌ, parea leꞌa dios ten beuna lá ulaꞌa ibanta xa.
ACT 28:5 Ná leꞌa Pabl cha udabi mbeꞌal wa ndoꞌ giꞌ, ni naꞌan xteꞌe isak xa.
ACT 28:6 Leꞌa bexa wa ndenkeaꞌ ná xá gor isigiꞌ yaꞌa Pabl, ná xá gor gat xa. Ná leꞌa gor na kwenlapa ndenkeaꞌ bexa, uniꞌí bexa leꞌa Pabl naꞌan xtaꞌan isak. Cha ndi xaꞌaga mbinbeꞌe bexa, ndab bexa leꞌa Pabl dub dios.
ACT 28:7 Leꞌa gax sa wa nax yo ten xa nibeꞌe isla wa, xa nsaleaꞌ Publio. Leꞌa xa wa uzheꞌeb utsin mbinno besa, no msaꞌa xa sa uyoꞌo besa chon wizh.
ACT 28:8 Leꞌa xus Publio wa kweaꞌ nsak nax ndoꞌ loꞌon, ncho xlea xa no uzheꞌeb ndakweaꞌ len xa. Leꞌa Pabl cha ngwaꞌinaꞌ xa wa. Weꞌe unab Pabl ndoꞌ Dios yunyakna xa. Cha mxoꞌob Pabl yaꞌa na gek xa, cha myakna xa.
ACT 28:9 Leꞌa tsoꞌo wa leꞌa bexa kweaꞌ nsak ncho isla wa ulen ndoꞌ Pabl, cha myakna bexa.
ACT 28:10 Leꞌa bexa uzhebpa utsin ngok ndoꞌ besa, no zha mkaꞌan besa sa wa leꞌa bexa msaꞌa be taꞌa nkiꞌin besa.
ACT 28:11 Zha na ngok chon mbeꞌe ndencho besa Malta wa, cha nchaꞌa besa len dub barco ute sa wa idub tiemp li mxoꞌon mbi wa. Leꞌa ta wa stub barco siꞌil utoꞌo gezh Alejandría. Leꞌa las‑a ncho beꞌe nkea Cástor nsea Pólux, top dios ten bexa.
ACT 28:12 Cha ulayaꞌ besa gezh Siracusa, sa uyoꞌo besa chon wizh.
ACT 28:13 Cha utoꞌo barco sa wa, cha ulayaꞌ besa gezh Regio. Leꞌa stub wizh wa ulen mbi ndi lad sur, cha ulayaꞌ besa wizh itop wa gezh Puteoli.
ACT 28:14 Leꞌa sa wa mzheꞌal besa pla bexa nak xmen Cristo. Leꞌa bexa wa cha ndab ndoꞌ besa yaꞌanno besa bexa. Ngok sgaꞌad wizh cha nchaꞌbe ndats besa Roma.
ACT 28:15 Leꞌa be xmen Cristo ncho Roma mbiꞌínla leꞌa besa nchaꞌbe gaxla sa wa. Cha utoꞌo pla bexa mbiꞌidka nes bexa besa gast ndoꞌ xgeꞌe gezh Apio, no stub plaga bexa gast gezh nsaleaꞌ Chon Posad. Leꞌa gor uniꞌí Pabl bexa wa, cha msaꞌa Pabl xno ndoꞌ Dios, cha mas mten ladna Pabl.
ACT 28:16 Leꞌa gor ulayaꞌ besa Roma, leꞌa soldad nibeꞌe wa myun cuent bexa ikea litgiꞌib ndoꞌ xa nibeꞌe be soldad sa wa. Ná leꞌa bexa mlaꞌa nabtsa Pabl uyoꞌo len dub niꞌi, no dubtsa soldad nlaꞌach sa nkea Pabl wa.
ACT 28:17 Ngol schon wizh leꞌa Pabl utezh bexa judio nsak ncho Roma. Leꞌa gor ulansea bexa, leꞌa Pabl cha ndab: —Bego nak beuna xa Israel, naꞌ naꞌan xtaꞌan ndanno bexa judio ni be costumbr ten be usan gox polta ten beuna wa. Leꞌa bexa Jerusalén leꞌa usen naꞌ, cha myun bexa cuent naꞌ ndoꞌ yaꞌa bexa Roma.
ACT 28:18 Leꞌa bexa wa uloxnes ta na msake bexa judio naꞌ, parea lá izheal bexa ni dub ke nsabndoꞌ gat naꞌ. Cha nlad bexa ulaꞌa bexa naꞌ.
ACT 28:19 Ná leꞌa bexa judio wa lá isak ladna ta wa, cha unaꞌab naꞌ gal naꞌ ndoꞌ César gun xa regl cuent ten naꞌ. Parea ni dub taꞌa lá usake naꞌ bexa judio wa.
ACT 28:20 Ta weꞌe uteꞌezh naꞌ bega, ndontsa iní naꞌ bega no gáp naꞌ ndoꞌ bega leꞌa naꞌ nchii nsea caden ndee ke na ngeꞌ lad naꞌ Cristo, xa ndenkeaꞌ beuna xa Israel.
ACT 28:21 Leꞌa bexa wa cha ndab ndoꞌ Pabl: —Leꞌa besa golsen dub git utuꞌub bexa Judea cuent ten go. No be ltsaꞌa beuna xa judio utoꞌo sa wa ulansea sa ndee, naꞌan xteꞌe ngab bexa leꞌa go ugap ta ndun.
ACT 28:22 Parea nlad besa goꞌón besa ta ndanbeꞌe go; leꞌa besa ndoꞌón leꞌa itea lad ncho bexa nisi ndoꞌ bego na ndangea ladna leꞌa Jesús wa nak Cristo.
ACT 28:23 Cha weꞌe msabeꞌe bexa dub wizh izhealbe bexa. Leꞌa ngol wizh wa cha mzhealbe kwaꞌad bexa judio sa li naxncho Pabl wa. Idub tempran no gast uzhe leꞌa Pabl mbidiꞌizh ná xteꞌe nibeꞌe Dios be men. Mbidiꞌizh Pabl be ta polta mkeꞌa Moisés no bexa mbidiꞌizh sakndoꞌ Dios, ndontsa gungea ladna bexa leꞌa Jesús leꞌa nak Cristo.
ACT 28:24 Ncho bexa mbingea ladna ta li mbidiꞌizh Pabl wa, no ncho bexa naꞌanpa ngungea ladna‑yá.
ACT 28:25 Leꞌa ta na li naꞌanpa dubtsa ndanbeꞌe bexa wa, ta weꞌe leꞌa gor na nsakaꞌan bexa sa wa leꞌa Pabl cha ndab ndoꞌ bexa: —Wenka mbidiꞌizh Isaías sakndoꞌ Espíritu ten Dios, ndab Isaías ta ndee ndoꞌ be usan gox polta ten beuna, ndab xa:
ACT 28:26 Waꞌ gud ndoꞌ be men wa: Ndoꞌón bega‑yá, ná lá nyakbeꞌena bega‑yá. No nwiꞌi bega‑yá, ná lá iniꞌí bega xtaꞌan‑a.
ACT 28:27 Leꞌa bega uzhebpa myak ngud ladoꞌo na, no lá nsakyoꞌón bega, no nsaꞌnyaw ndoꞌ bega. Ta weꞌe lá inaꞌ bega, no ni lá goꞌón bega, no ni lá yakbeꞌena bega, no ni naꞌanpa ilen bega wats naꞌ yunyakna naꞌ bego.
ACT 28:28 No ndab Pabl ndoꞌ bexa judio wa: —Blaꞌach bega leꞌa nat leꞌa Dios ntuꞌub besa ndoꞌ bexa naꞌanpa xa judio, gudiꞌizh besa leꞌa Dios koꞌo bexa ndoꞌ be ke ten bexa. Leꞌa bexa wa soꞌónka‑yá.
ACT 28:29 Tsoꞌo na li ndab Pabl leꞌa bexa judio cha nseaꞌbe, uzheꞌeb uteyotoꞌono bexa be ltsaꞌa bexa.
ACT 28:30 Leꞌa idub top liꞌin leꞌa Pabl ukeanyaw len niꞌi nbeꞌe wa, utsin ndun xa ndoꞌ itea bexa ndaꞌinaꞌ xa.
ACT 28:31 Ndoꞌ gaꞌal be men ndadiꞌizh xa ná xteꞌe nibeꞌe Dios be men, no mluu xa diꞌizh ten Jesucristo Xa Nibeꞌe. No ni naꞌan ton uka gudiꞌizh Pabl ta wa ndoꞌ be men.
ROM 1:1 Leꞌa naꞌ ndee Pabl, xa ndun tiꞌin ndoꞌ Jesucristo. Leꞌa Dios leꞌa utezh naꞌ no ulaxoꞌob xa naꞌ gudiꞌizh naꞌ diꞌizh wen ten xa ndoꞌ be men.
ROM 1:2 Leꞌa diꞌizh wa ta polta ndab Dios usaꞌa Dios ndoꞌ be men, lak nkeaniꞌi diꞌizh ten Dios ta mbidiꞌizh be profet sakndoꞌ xa.
ROM 1:3 Leꞌa ta wa cuent ten Xin Dios, Jesucristo Xwan beuna, xa ngol lat xin David.
ROM 1:4 No mban xa ndoꞌ gealgut juers ten Espíritu ten Dios, ta na mluu leꞌa xa Xin Dios no juert nak xa.
ROM 1:5 Leꞌa Cristo uzheꞌeb wen ndanno besa, mti xa naꞌ gun naꞌ tiꞌin ten xa, ndontsa gungea ladna be men xa no uxobgek bexa ndoꞌ xa, bexa ndencho idub ndoꞌ gizhliyo.
ROM 1:6 Leꞌa ta wa no bego baꞌ, leꞌa Dios leꞌa mti bega gak bega xmen Jesucristo.
ROM 1:7 Nkeꞌa naꞌ git ndee ndoꞌ bego ndencho gezh Roma baꞌ. Leꞌa Dios nkweaꞌ ladna bega no mti xa bega gak bega be men umbiꞌi ten Dios. Naꞌab naꞌ ndoꞌ Tad Dios no ndoꞌ Jesucristo Xa Nibeꞌe, utsin gak bexa ndoꞌ bega no gun bexa wen yoo ladna bega.
ROM 1:8 Leꞌa ta na nak beuna xmen Jesucristo, ned nsa naꞌ xno ndoꞌ Dios leꞌa ta na ngeꞌ ladna bega Jesús wa ngen idub ndoꞌ gizhliyo.
ROM 1:9 Idub ncho lad naꞌ ndun naꞌ tiꞌin ten xa, ndadiꞌizh naꞌ diꞌizh wen ten Xin xa. Leꞌa Dios nsobwiꞌi leꞌa naꞌ naꞌab tseꞌe ndoꞌ Dios gakno xa bega.
ROM 1:10 No naꞌab naꞌ ndoꞌ Dios tal leꞌa Dios nlad leꞌa naꞌ syoꞌo gan gal inaꞌ bega.
ROM 1:11 Nlad naꞌ gal inaꞌ naꞌ bega, ndontsa utenxeꞌa naꞌ bega lak nsaꞌa Espíritu ten Dios, cha mas juert gak ladoꞌo bega.
ROM 1:12 Mas wen gáp naꞌ leꞌa beuna utenxeꞌa be ltsaꞌa na, ta na dubtsa ngeꞌ ladna beuna Cristo.
ROM 1:13 Bego nak beuna xmen Cristo, leꞌa naꞌ nlad iniꞌí bega leꞌa sian biaj ndiꞌizh gal inaꞌ naꞌ bega, parea gast nat gol gun naꞌ gan gal naꞌ. Nlad naꞌ gun naꞌ gan leꞌa kwaꞌadta bexa ncho sa baꞌ igeꞌ ladna Cristo, lak mbin naꞌ be nacion xaꞌaga.
ROM 1:14 Li nsabndoꞌ gudiꞌizh naꞌ diꞌizh ten Dios ndoꞌ itea be men: tal xa xa ntsid natal xa naꞌanpa xa ntsid; tal xa xa ndák natal xa naꞌanpa xa ndák.
ROM 1:15 Ta weꞌe nlad naꞌ galyadiꞌizh naꞌ diꞌizh wen ten Cristo ndoꞌ be men ndencho Roma.
ROM 1:16 Leꞌa naꞌ naꞌanpa ndono ladna diꞌizh wen ten Cristo, geal leꞌa‑yá leꞌa nak juers ten Dios koꞌo be men ndoꞌ be ke ten bexa tal ton gungea ladna‑yá, tal xa xa judio natal naꞌanpa xa judio xa.
ROM 1:17 Leꞌa diꞌizh wa nluu xteꞌe wen yaꞌan be men ndoꞌ Dios, tal leꞌa bexa igeꞌtsa ladna Jesús, lak nkeaniꞌi diꞌizh ten Dios, ndab Dios: “Leꞌa bexa wen nak ndoꞌ naꞌ, leꞌa ta na ngeꞌ ladna bexa naꞌ, ta weꞌe gap bexa gealnaban.”
ROM 1:18 Gast gibeꞌa nlen ta ndakloo Dios ndoꞌ itea be ta ugap ndun be men, leꞌa ta ugap wa nka goꞌón be men gealngea ten Dios.
ROM 1:19 Leꞌa bexa wa nchandoꞌka xteꞌe nak Dios, leꞌa Dios leꞌa mluu‑yá ndoꞌ bexa.
ROM 1:20 Leꞌa gast zha utexankata gizhliyo leꞌa be taꞌa mbindeꞌe Dios gaꞌal nluu leꞌa xa ta ugeaka leꞌa nak Dios no juert nak xa idub tiemp. Ta weꞌe leꞌa be men lá yoo gan gab leꞌa bexa lá iniꞌí ti ncho Dios.
ROM 1:21 Leꞌa bexa wa uniꞌíka leꞌa Dios nchoka, parea lá ndankea bexa Dios lak nsabndoꞌ‑yá, no ni lá nsaꞌa bexa xno ndoꞌ xa. Ndi sbeꞌen be ta naꞌan xtiꞌin ndanbeꞌe bexa, cha mkaw ladoꞌo bexa, ngud myak bexa.
ROM 1:22 Ndab bexa leꞌa bexa xa ndák, ná leꞌa ta ndanbeꞌe bexa wa ta naꞌan xtiꞌin.
ROM 1:23 Leꞌa bexa wa naꞌanpa ndankea Dios, xa ndon leꞌa wen no xa naꞌanpa gat. Ndi ndankea bexa be dios ndandeꞌe bexa, be ta cuent nak men ngut no ta cuent nak be migin no be man ndap dap xoꞌo na no be mbeꞌal.
ROM 1:24 Ta weꞌe leꞌa Dios mlaꞌa gun bexa masta be ta bzhiꞌik nlad bexa, lak ta ugap ncho len ladoꞌo bexa, gast ndeyunno bexa las bexa be ta bzhiꞌik.
ROM 1:25 Leꞌa bexa wa lá ndangea ladna gealngea ten Dios, ndi ndankea bexa be ta naꞌanpa ta ugea Dios. Ndankea bexa ta mbindeꞌetsa Dios; naꞌanpa ndankea bexa Dios xa na leꞌa mbindeꞌe itea be taꞌa, xa na nsabndoꞌ yankea be men idub tiemp. ¡Lika nak‑a!
ROM 1:26 Ta weꞌe leꞌa Dios mlaꞌa bexa gun bexa be ta bzhiꞌik nlad bexa, gast ncho be xagots lá nlad xabgiꞌi, ndi ngal xa stubga ltsaꞌa gots xa dub ta lá nsabndoꞌ gun bexa.
ROM 1:27 No liga leꞌa ncho be xabgiꞌi lá nlad xagots, ndi uzhebpa nlad xa ugal xa stubga ltsaꞌa bgiꞌi xa. Cha li ndun bexa dub ta nsabndoꞌ idono ladna bexa. Ta weꞌe leꞌa nat leꞌa bexa wa nchaꞌtid dub gealkweaꞌ lakka nsabndoꞌ itid bexa ndun ta ugap wa.
ROM 1:28 Leꞌa bexa wa lá nlad igondoꞌ Dios, ta weꞌe leꞌa Dios mlaꞌa ndanbeꞌe bexa be ta ugap no ndun bexa sbeꞌen be ta lá nsabndoꞌ.
ROM 1:29 Uzhebpa ndun bexa be ta ugap nak. Ngal bexa dub xa naꞌanpa xa ten xa. No ndun bexa be taꞌa naꞌanpa gaꞌal nak. No uzhebpa nlad bexa sian taꞌa gap bexa. No ugap nak bexa ndoꞌ ltsaꞌa bexa. No uzheꞌeb ndaklono bexa be men ndap taꞌa. No ndut bexa men. No nkwaꞌan bexa uyo. No ndun bexa gealkwiꞌin. No nxeeno ladna bexa be men.
ROM 1:30 No nisi bexa be men. No ugap ndadiꞌizh bexa cuent ten stubga men. No nxeeno ladna bexa Dios. No kweaꞌ níꞌi bexa ndoꞌ be men. No ndanbeꞌe bexa leꞌa bexa mas nsak. No zhin nak bexa. No ngogek bexa sian be ta ugap. No lá nxobgek bexa ndoꞌ be usan ten xa.
ROM 1:31 No lá nsakyoꞌón bexa. No lá ndun bexa lak ndab bexa. No naꞌanpa nkweaꞌ ladna bexa be men. No lá ndangeꞌ ladna bexa ndoꞌ be men. No naꞌanpa nlats ladna bexa be men.
ROM 1:32 Uniꞌíka bexa ta ndabka Dios, leꞌa bexa li ndun wa nsabndoꞌ gat. Ná leꞌa bexa bi lika ndun be ta wa, no nten ladna bexa gor na ndun stubga xa be ta ugap wa.
ROM 2:1 Leꞌa gor na ndab bega leꞌa stubga men ndap ke, leꞌa bega nsake leꞌaka leꞌa bega, geal leꞌa bega noga ndap ke wa. Ta weꞌe lá nsabndoꞌ li usake bega stubga xa.
ROM 2:2 Parea leꞌa beuna uniꞌíka leꞌa gor na ntsaksi Dios bexa ndun ta ugap, leꞌa ta ndun xa wa utsinka nak.
ROM 2:3 Leꞌa bego na ndab leꞌa stub men ndap ke, dub ta no bega ndun, ¿xteꞌema nsak bega zha leꞌa Dios naꞌanpa utsaksi bega?
ROM 2:4 Leꞌa Dios uzhebpa utsin nak no naꞌanpa uxax ndakloo xa no uzhebpa nxik xa ndoꞌ be ta ugap ndun bega. ¿Ni lá nyakbeꞌena bega zha leꞌa xa li utsin nak ndoꞌ bega ndontsa yach bega wats xa?
ROM 2:5 Ná leꞌa gealngud ten bega lá kaꞌab bega ulaꞌa bega ta ugap nak bega. Ta weꞌe uzhebpa iniꞌí bega be gealkweaꞌ gal zha gakloo Dios, cha utsaksi xa be men ndap ke lak nsabndoꞌ gun xa.
ROM 2:6 Leꞌa xa wa kix ndoꞌ kadga be men lak xtaꞌan mbin bexa.
ROM 2:7 Usaꞌa xa dub gealnaban nunk lá idub ndoꞌ bexa ndun be ta wen, bexa nkwaꞌan ta gab Dios leꞌa bexa wen nak nsea nkwaꞌan bexa dub gealnaban naꞌanpa initndoꞌ.
ROM 2:8 Ná leꞌa Dios gaklono bexa ndun laktsa nlad na, bexa lá nxobgek ndoꞌ gealngea, ndi sbeꞌen ta ugap ndun bexa.
ROM 2:9 Leꞌa itea bexa ugap ndun wa uzhebpa iniꞌí gealkweaꞌ no juert yoo xa, guniꞌi tal leꞌa xa xa judio natal xa naꞌanpa xa judio.
ROM 2:10 Ná leꞌa iteanak bexa utsin ndun, leꞌa Dios gab leꞌa bexa wen mbin, no gun Dios wen yoo ladna bexa, no wen yaꞌan bexa ndoꞌ Dios, guniꞌi tal leꞌa xa xa judio natal xa naꞌanpa xa judio.
ROM 2:11 Leꞌa cuent ten Dios leꞌa itea be men parej nsak.
ROM 2:12 Leꞌa itea bexa na lá nchandoꞌ ley ten Dios no ugap ndun bexa, leꞌa Dios utsaksika bexa maska lá nchandoꞌ bexa ley wa. No liga leꞌa itea bexa na nchandoꞌ ley wa, cha no bexa ugap ndun, leꞌa Dios utsaksi bexa lak nibeꞌe ley wa.
ROM 2:13 Leꞌa bexa na ndoꞌóntsa ley wa cha lá nxobgek bexa ndoꞌ‑yá, leꞌa bexa naꞌanpa wen nak ndoꞌ Dios. Ná leꞌa bexa na nxobgek ndoꞌ ley ten Dios wa wenka nak ndoꞌ Dios.
ROM 2:14 Leꞌa bexa naꞌanpa xa judio wa lá nchandoꞌ ley ten Dios. Ná leꞌa gor na ndun bexa lakka ndab ley wa leꞌa ta wa nluu leꞌa len ladoꞌo bexa uniꞌí bexa xteꞌe nsabndoꞌ gun bexa.
ROM 2:15 Leꞌa ta ndun bexa wa nluu cuent nkeaniꞌi ley ten Dios len ladoꞌo bexa wa, leꞌa bexa uniꞌí len ladoꞌo na gor ugap ndun bexa no gor utsin ndun bexa.
ROM 2:16 Leꞌa gal dub wizh leꞌa lak nlad Dios leꞌa Jesucristo gab ná xteꞌe nak be ta xgaꞌach ndun be men. Li nak diꞌizh ndadiꞌizh naꞌ ndoꞌ be men.
ROM 2:17 Bego na nsaleaꞌ xa judio, ndeno bega ley ten Dios. Ta weꞌe nsak bega leꞌa bega wen yaꞌan ndoꞌ Dios, no zhin nak bega ndab bega leꞌa bega nak xmen Dios.
ROM 2:18 Uniꞌí bega xtaꞌan nlad Dios gun bega, no ntsid bega ley ten Dios ndontsa iniꞌí bega xtaꞌan ta wen gun bega.
ROM 2:19 Nsak bega leꞌa bega suꞌu gab ná xtaꞌan nsabndoꞌ gun bexa lá nchandoꞌ Dios, lak dub men ndakno stubga xa lá naꞌ no cuent dub xeꞌa nsu sa ukaw.
ROM 2:20 No nsak bega nsabndoꞌ uluu bega bexa lá isuꞌu no bexa lá utsid. Ndeno bega ley ten Dios, ta weꞌe nsak bega leꞌa bega uniꞌí itea be taꞌa no nyakbeꞌena bega itea be gealngea.
ROM 2:21 Parea, ¿xteꞌe uluu bega stubga men tal leꞌa bega lid ned utsid ta wa? Ndab bega lá gun bexa gealwaꞌan, ná leꞌa bega bi ndunkaga ta wa.
ROM 2:22 No ndab bega lá ugal bexa dub men naꞌanpa xa ten xa, ná leꞌa bega likaga ndun. No ndab bega nxee ladna bega ndoꞌ be dios ten be men, ná leꞌa bega ndowaꞌan be taꞌa ncho sa ndiꞌib be dios wa.
ROM 2:23 Nzhinnona bega ley ten Dios, ná leꞌa bega lá nxobgek ndoꞌ ley wa, ta ndun leꞌa be men lá ndap mod ndoꞌ Dios.
ROM 2:24 Leꞌa ta wa lak nkeaniꞌi diꞌizh ten Dios, ndab‑a: “Leꞌa ke ten ta ndun bego xa Israel, leꞌa bexa xaꞌaga nacion kweaꞌ níꞌi ndoꞌ Dios.”
ROM 2:25 Leꞌa ta na ncho beꞌe bega wa dub ta nsakka tal leꞌa bega nxobgek ndoꞌ ley ten Dios. Ná tal leꞌa bega naꞌanpa nxobgek ndoꞌ ley wa, leꞌa ta na ncho beꞌe bega wa galka naꞌan xtiꞌin.
ROM 2:26 No tal ton naꞌanpa ncho beꞌe cha nxobgek xa ndoꞌ ley, ¿lá iniꞌí bega zha leꞌa cuent ten Dios leꞌa xa wa cuent dub xa ncho beꞌe?
ROM 2:27 Leꞌa xa na li naꞌanpa ncho beꞌe cha nxobgek xa ndoꞌ idub ley ten Dios wa, leꞌa ta ndun xa wa nluu leꞌa bega leꞌa ndap ke. Nchandoꞌka bega ley wa no nchoka beꞌe bega, ná leꞌa bega lá nxobgek ndoꞌ ley.
ROM 2:28 Lá gunbeꞌe bega leꞌa bega nak bexa judio ta na ndankeatsa bega be costumbr ten bexa judio no ta na ncho beꞌe bega wa.
ROM 2:29 Leꞌa xa na ta ugeaka nak xa judio wa, leꞌa xa wa li nak len ladoꞌo xa, cuent nchoka beꞌe ladoꞌo xa. Leꞌa ta wa ta nsaꞌa Espíritu ten Dios, naꞌanpa ta ten ley ta wa. Leꞌa Dios leꞌa nsak ladna lak nak bexa wa, guniꞌi xteꞌe gab be men ndoꞌ bexa.
ROM 3:1 ¿Nat xtiꞌin ta nak beuna xa judio zha? ¿No xtiꞌin ta ncho beꞌe beuna zha?
ROM 3:2 Leꞌa naꞌ gáp leꞌa be ta wa nsakka, leꞌa Dios leꞌa msaꞌa diꞌizh ten na ndoꞌ bexa judio.
ROM 3:3 Leꞌa ncho bexa judio lá ngun lak ndab bexa ndoꞌ Dios gun bexa. ¿Ta weꞌe nsak bega zha leꞌa Dios lá gun ta ndab Dios gun xa wa?
ROM 3:4 ¡Leꞌa ta wa naꞌanpa li nak! Leꞌa Dios sbeꞌen gealngea ndadiꞌizh, maska itea be men gun gealkwiꞌin, lak nkeaniꞌi diꞌizh ten Dios, ndab‑a: Leꞌa bexa iniꞌí leꞌa ta ndab go ta ugeaka. No sun ga gan ndoꞌ bexa nsake ga.
ROM 3:5 Tal leꞌa be ta ugap ndun beuna wa nluu leꞌa Dios mas uzheꞌeb wen nak, ¿xteꞌe gab beuna zha? ¿Ta lid leꞌa nak ta na ntsaksi Dios bexa ndun ta ugap zha? (Ncho be men li ndab.)
ROM 3:6 ¡Leꞌa naꞌ gáp leꞌa ta wa naꞌanpa li nak! Tal leꞌa‑yá li nak, ¿xteꞌexá utsaksi Dios be men ndap ke wa zhaga?
ROM 3:7 Leꞌa gor na ndun naꞌ gealkwiꞌin, tal leꞌa ta wa mas nluu leꞌa Dios sbeꞌen gealngea ndadiꞌizh, ¿xtaꞌan ndab Dios zha leꞌa ta ndun naꞌ wa dub ta ugap?
ROM 3:8 ¿Xtaꞌan lid mas sian ta ugap gun beuna ndontsa wen itoꞌo‑yá? Ncho bexa ndun gealkwiꞌin, ndab bexa leꞌa besa li ndadiꞌizh ta wa. Ná leꞌa Dios utsaksi bexa li ndab wa lak nsabndoꞌ‑yá.
ROM 3:9 ¿Xteꞌe gab beuna zhaga? ¿Leꞌa beuna xa judio mas nsak ndoꞌ bexa naꞌanpa xa judio zha? ¡Leꞌa naꞌ gáp leꞌa ta wa naꞌanpa li nak! Leꞌa naꞌ yá ndápka leꞌa bexa judio no bexa naꞌanpa xa judio itea ndap ke ndoꞌ Dios.
ROM 3:10 Lak nkeaniꞌi diꞌizh ten Dios, ndab‑a: Naꞌan ton wen nak ndoꞌ Dios, naꞌanpa ncho ni dub xa.
ROM 3:11 Naꞌan ton nyakbeꞌena xteꞌe nak Dios. No naꞌan ton nkwaꞌan Dios.
ROM 3:12 Leꞌa itea be men mlaꞌa nes ten Dios, myak bexa cuent dub xa naꞌan xtiꞌin. Naꞌan ni dub xa utsin ndun; ni dub xa naꞌan.
ROM 3:13 Leꞌa ta ndadiꞌizh bexa wa dub ta bzhiꞌik, cuent dub baꞌa nsaꞌnyaꞌal. No uzhebpa ndun bexa gealkwiꞌin cuent venen ten dub mbeꞌal.
ROM 3:14 Uzhebpa nisi bexa be men, no nxeeno ladna bexa be men.
ROM 3:15 No uxax ndakloo bexa cha ndut bexa be men.
ROM 3:16 Guniꞌi pa ndesea bexa ndazhaꞌa bexa taꞌa, no kweaꞌ ndanno xa be men.
ROM 3:17 Lá nchandoꞌ bexa utsin yoono bexa be ltsaꞌa xa.
ROM 3:18 No ni lá nzheb bexa ndoꞌ Dios.
ROM 3:19 Ná leꞌa beuna uniꞌíka leꞌa itea be ta ndab ley ten Dios, leꞌa ta wa níꞌi ndoꞌ bexa ncho ndoꞌ ley wa, ndontsa naꞌan ton gab leꞌa xa utsin nak ndoꞌ Dios, leꞌa be men itea ndap ke ndoꞌ Dios.
ROM 3:20 Leꞌa naꞌan ton wen yaꞌan ndoꞌ Dios juers ten ta na nxobgek xa ndoꞌ ley, leꞌa ley wa ndi nluutsa leꞌa beuna ndap ke ndoꞌ Dios.
ROM 3:21 Ná leꞌa nat leꞌa Dios nluu xteꞌe syoꞌo gan wen yaꞌan beuna ndoꞌ Dios naꞌanpa juers ten ley wa. Leꞌa ley mkeꞌa Moisés no ta mkeꞌa be profet ndab xteꞌe nak ta wa:
ROM 3:22 leꞌa tal ton igeꞌ ladna Jesucristo, leꞌa xa wa wen yaꞌan ndoꞌ Dios. Li gunno Dios tal ton gungea ladna Cristo, guniꞌi ton nak xa.
ROM 3:23 Leꞌa itea be men ndap ke ndoꞌ Dios no sit nak bexa wats Dios.
ROM 3:24 Ná leꞌa Dios uzhebpa utsin nak ndoꞌ be men, ndun xa wen yaꞌan beuna ndoꞌ xa ni naꞌan xtaꞌan kix beuna. Leꞌa juers tentsa ta mbin Cristo Jesús leꞌa Dios uloꞌo beuna ndoꞌ be ke ten beuna.
ROM 3:25 Leꞌa Dios mtuꞌub Cristo ngut xa sakndoꞌ be men, ndontsa yuꞌu be ke ten bexa na igeꞌ ladna Cristo, ta mluu xteꞌe utsin nak Dios. Leꞌa ta ndun Dios nluu leꞌa xa wen nak, leꞌa xa mlaꞌa litsa ngwatid be ta ugap mbin be men polta wa.
ROM 3:26 Ná nat msaꞌa xa Jesucristo wa ta nluu leꞌa Dios uzhebpa wen nak. Leꞌa xa sbeꞌen utsin ndanno be men, ndun xa wen yaꞌan bexa ndoꞌ xa, tal ton igeꞌ ladna Jesús.
ROM 3:27 ¿Nat ncho xtaꞌan izhinna beuna zha? Naꞌanpa izhinna beuna, leꞌa naꞌan ton wen yaꞌan ndoꞌ Dios ta na dub ta wen ndun xa. Leꞌa‑yá ndi ta na ngeꞌtsa ladna xa Jesús.
ROM 3:28 Ta weꞌe uniꞌí beuna leꞌa be men wa wen nyaꞌan ndoꞌ Dios ta na ngeꞌ ladna bexa Jesús, naꞌanpa ta na nxobgek xa ndoꞌ dub ley.
ROM 3:29 ¿Nat zha gab beuna leꞌa Dios nak Dios tentsa bexa judio? ¿Lid no nak xa Dios ten bexa naꞌanpa xa judio zha? ¡Leꞌa naꞌ gáp leꞌa xa noka Dios ten bexa naꞌanpa xa judio!
ROM 3:30 Leꞌa Dios dubkama ncho. No dubtsa ndun xa wen nyaꞌan be men ndoꞌ xa, bexa ngeꞌ ladna Jesús, guniꞌi tal xa xa judio natal xa naꞌanpa xa judio.
ROM 3:31 ¿Cha gab beuna zha leꞌa ta na ngeꞌ ladna beuna Jesús wa, weꞌe leꞌa ley ten Dios ta naꞌan xtiꞌin zha? Naꞌanpa li nak ta wa, leꞌa ta na ngeꞌ ladna beuna Jesús, leꞌa ta wa ndi nluu leꞌa ley ndaktiꞌinka.
ROM 4:1 ¿Nat xteꞌe gab beuna cuent ten Abraham zha, usan gox polta ten besa xa judio?
ROM 4:2 Tal leꞌa xa wa wen myaꞌan ndoꞌ Dios no be ta wen mbin xa, leꞌa xa ndap xtaꞌan izhinna xa, parea leꞌa xa naꞌanpa izhinna ndoꞌ Dios.
ROM 4:3 ¿Xteꞌe nkeaniꞌi diꞌizh ten Dios? Ndab‑a: “Leꞌa Abraham mgeꞌ ladna Dios, ta weꞌe wen myaꞌan xa ndoꞌ Dios.”
ROM 4:4 Ná leꞌa tal ton ndun dub tiꞌin, leꞌa ta na nkaꞌa xa wa naꞌanpa dub ta ga nsaꞌa xwan tiꞌin wa, leꞌa‑yá ndi dub ta nsabndoꞌka ikaꞌa xa.
ROM 4:5 Parea leꞌa tal ton ndap ke ndoꞌ Dios tal leꞌa xa igeꞌ ladna Dios, leꞌa Dios sun wen yaꞌan xa ndoꞌ Dios naꞌanpa ta na ndun xa ta wen, ndi ta na ngeꞌtsa ladna xa Dios.
ROM 4:6 Leꞌa ta wa cuent ta mbidiꞌizh David ná xteꞌe wen yoo ladna bexa na wen yaꞌan ndoꞌ Dios naꞌanpa juers ten be ta wen ndun bexa.
ROM 4:7 Ndab David: Uzheꞌeb wen yoo ladna be men, bexa na mbingeꞌ ladna Dios be ta ugap mbin bexa, no mtsuꞌu Dios be ke ten bexa.
ROM 4:8 Uzhebpa wen yoo ladna bexa na lá igo Dios cuent be ta ugap mbin bexa.
ROM 4:9 ¿Nsak bega zha leꞌa sbeꞌen bexa nchotsa beꞌe syoꞌo gan li wen yoo ladna zha? ¿Nati no bexa naꞌanpa ncho beꞌe syoꞌo gan li wen yoo ladna ndoꞌ Dios zha? Ndápka naꞌ leꞌa Dios mbin wen myaꞌan Abraham ndoꞌ xa ta na mgeꞌtsa ladna Abraham Dios.
ROM 4:10 ¿Uniꞌí bega pol wen myaꞌan xa ndoꞌ Dios zha? ¿Nchola beꞌe xa zha nate biseata? Leꞌa ta wa ngok zha biseata yoo beꞌe xa.
ROM 4:11 Tsoꞌo wa uyoꞌo beꞌe Abraham, ta nluu leꞌa xa wen myaꞌan ndoꞌ Dios ta na mgeꞌ ladna xa Dios zha biseata yoo beꞌe xa. Ta weꞌe leꞌa Abraham nak cuent xus itea be men na ngeꞌ ladna Dios mas naꞌanpa ncho beꞌe bexa. Leꞌa bexa wenka yaꞌan ndoꞌ Dios ta na ngeꞌ ladna bexa Dios.
ROM 4:12 No liga leꞌa Abraham nak cuent xus bexa judio bexa ncho beꞌe, tal leꞌa bexa ngeꞌ ladna Dios lak mgeꞌ ladna Abraham Dios zha biseata yoo beꞌe xa.
ROM 4:13 Leꞌa Dios ndab leꞌa usaꞌa idub gizhliyo ndoꞌ Abraham no ndoꞌ be xin xa. Leꞌa ta wa naꞌanpa ta na nxobgek Abraham ndoꞌ ley wa, leꞌa‑yá ndi ta na ngeꞌ ladna xa Dios cha li wen myaꞌan xa ndoꞌ Dios.
ROM 4:14 Tal leꞌa bexa ndencho ndoꞌ ley wa ikaꞌa ta nsaꞌa Dios wa, leꞌa ta wa gab leꞌa ta na ngeꞌ ladna be men Dios wa ta naꞌan xtiꞌin. No ta na li ndab Dios ndoꞌ Abraham wa naꞌantapa gaktiꞌin.
ROM 4:15 Leꞌa Dios utsaksi bexa na lá uxobgek ndoꞌ ley ten Dios. Ná tal leꞌa ley wa naꞌanpa yoo, leꞌa bexa wa naꞌanpa ndap ke ndoꞌ ley.
ROM 4:16 Leꞌa ta na ngeꞌ ladna beuna Dios, ta weꞌe ikaꞌa beuna ta ndab Dios wa, dub ta ga nsaꞌa xa ndoꞌ itea bexa nak xin Abraham. Naꞌanpa nabtsa bexa judio ncho ndoꞌ ley wa ikaꞌa ta ndab Dios wa, ndi no itea bexa na ngeꞌ ladna Dios lak mgeꞌ ladna Abraham Dios ikaꞌa ta wa. Ta weꞌe leꞌa Abraham nak cuent xus itea beuna.
ROM 4:17 Lak nkeaniꞌi diꞌizh ten Dios, ndab Dios ndoꞌ Abraham: “Gunno naꞌ lu xus uzhebpa kwaꞌad be men nde ndoꞌ gizhliyo.” Li ndab Dios ndoꞌ Abraham geal leꞌa Abraham mgeꞌ ladna Dios, xa na leꞌa nsaꞌa gealnaban ndoꞌ be men ngut no ndanno xa dub ta bi naꞌan cuent dub ta nchola.
ROM 4:18 Leꞌa Abraham mbingea ladna leꞌa Dios gunka lak ndab Dios, parea ni lá iniꞌí Abraham xteꞌe ilen‑a. Cha ngol gor ngok Abraham xus uzhebpa kwaꞌad be men, lak ndabka Dios ndoꞌ Abraham: “Li uzhebpa gak kwaꞌad be xin lu.”
ROM 4:19 Leꞌa Abraham ncho gax dub gayoꞌo liꞌin, uniꞌí xa leꞌa xa yamer gat. No Sara xagots ten xa dub xa lá yoꞌo gan gap meꞌed. Ná leꞌa Abraham naꞌanpa ulaꞌa ta na ngeꞌ ladna xa Dios.
ROM 4:20 Leꞌa xa sbeꞌen mbingea ladna leꞌa Dios gunka lak ndab Dios. No mas mgeꞌ ladna xa Dios nsea msaꞌa xa xno ndoꞌ Dios,
ROM 4:21 leꞌa xa mbingeaka ladna leꞌa Dios suꞌu gun itea be ta ndab xa wa.
ROM 4:22 Leꞌa ta na li mgeꞌ ladna Abraham Dios wa, leꞌa Abraham wen myaꞌan ndoꞌ Dios.
ROM 4:23 Leꞌa diꞌizh ten Dios nkeaniꞌi leꞌa Abraham wen myaꞌan ndoꞌ Dios, parea leꞌa ta wa naꞌanpa nabtsa Abraham.
ROM 4:24 Leꞌa ta wa no beuna ndee, leꞌa beuna wen myaꞌan ndoꞌ Dios geal leꞌa beuna ngeꞌ ladna Dios, xa na mxiste Jesús Xwan beuna ndoꞌ gealgut.
ROM 4:25 Leꞌa Dios leꞌa mtuꞌub Jesús ngut xa ndontsa kix xa be ke ten beuna. Cha mxiste Dios Jesús ndoꞌ gealgut, ndontsa wen yaꞌan beuna ndoꞌ Dios.
ROM 5:1 Leꞌa ta na li ngeꞌ ladna beuna Dios, leꞌa Dios ndun wen yaꞌan beuna ndoꞌ xa, no myak utsin beuna ndoꞌ Dios juers ten ta mbin Jesucristo Xwan beuna.
ROM 5:2 No ta na ngeꞌ ladna beuna Cristo wa, weꞌe leꞌa Dios uzheꞌeb wen ndanno beuna. No nten ladna beuna ndenkeaꞌ beuna gal zha na yoo beuna wats Dios.
ROM 5:3 No ntenno ladna beuna be gealkweaꞌ nsatid beuna, leꞌa beuna uniꞌí leꞌa ta wa ndun mas nxik beuna.
ROM 5:4 Leꞌa gor na nxik beuna ndoꞌ be gealkweaꞌ, weꞌe mas gak beuna lak nsak ladna Dios. No gor na nsak ladna Dios lak nak beuna, weꞌe mas iniꞌí beuna leꞌa beuna ikaꞌa ta ndenkeaꞌ beuna.
ROM 5:5 Leꞌa beuna uniꞌí leꞌa ta na li ndenkeaꞌ beuna wa ta ugeakapa yoo, geal leꞌa Dios msaꞌa Espíritu ten na ndoꞌ beuna, ta nluu leꞌa Dios uzhebpa nkweaꞌ ladna beuna.
ROM 5:6 Leꞌa zha na lá ndap beuna juers itoꞌo beuna ndoꞌ be ke ten beuna, leꞌa Cristo ngut sakndoꞌ beuna, zha nsabndoꞌ li gun xa.
ROM 5:7 Uzhebpa uzhon bexa ini gat sakndoꞌ stub xa wen nak. Natal ncho xa sunka rages gat xa sakndoꞌ stub xa uzheꞌeb utsin nak.
ROM 5:8 Ná leꞌa Dios mluu leꞌa xa nkweaꞌpa ladna beuna, msaꞌa xa Cristo ngut xa sakndoꞌ beuna maska ugap nak beuna.
ROM 5:9 Leꞌa beuna li wen myaꞌan ndoꞌ Dios ta na ngut Cristo, mtsiꞌi xa ten ten xa. Ta weꞌe uniꞌí beuna leꞌa Cristo koꞌo beuna ndoꞌ ta utsaksi Dios be men.
ROM 5:10 Leꞌa zha na bi sit nak beuna wats Dios, leꞌa Cristo ngut ndontsa myak utsin beuna ndoꞌ Dios. Leꞌa nat nak beuna amig ten Dios, mas segurka uniꞌí beuna leꞌa beuna no gap gealnaban ndoꞌ Dios lak nban Cristo.
ROM 5:11 No ncho stub taꞌa gáp naꞌ, leꞌa beuna ntenno ladna ta mbin Dios, geal leꞌa Jesucristo Xwan beuna mbin myak utsin beuna ndoꞌ Dios.
ROM 5:12 Leꞌa Adán ngok xa ndon leꞌa ned lá uxobgek ndoꞌ Dios. Leꞌa ke weꞌe ngut Adán, no liga ndat itea be men ke na lá nxobgek bexa ndoꞌ Dios.
ROM 5:13 Leꞌa zha bi naꞌan ley ten Dios, leꞌa be men yá ugapka ndun. Ná leꞌa Dios naꞌanpa ndab leꞌa bexa ndap ke, leꞌa ley wa bi naꞌan zha wa.
ROM 5:14 Parea idub zha uyoꞌo Adán no gast zha uyoꞌo Moisés, leꞌa itea be men ngut. Parea leꞌa ta ugap mbin bexa wa naꞌanpa ltsaꞌa ta mbin Adán, leꞌa Adán wa lá uxobgek dub ta unibeꞌe Dios. Leꞌa ncho dub mod leꞌa Adán wa nak cuent Cristo xa ulen tsoꞌo wa.
ROM 5:15 Ná leꞌa ta wen nsaꞌa Dios ndoꞌ beuna wa xaꞌaga nak ndoꞌ ta ugap mbin Adán wa. Leꞌa Adán mbin ta ugap, ta weꞌe leꞌa kwaꞌad be men ngut. Ná leꞌa Jesucristo mbin ta wen, ta weꞌe leꞌa Dios uzhebpa wen ndanno be men, ntsuꞌu xa be ke ten bexa wa.
ROM 5:16 Leꞌa ta wen nsaꞌa Dios wa naꞌanpa nak lak nak ta ugap mbin Adán wa: leꞌa dubtsa men mbin dub ta ugap, cha ndab Dios leꞌa men wa ndap ke; ná leꞌa Dios msaꞌa dub ta wen ndoꞌ be men mbin sian ta ugap, ta ndun wen yaꞌan bexa ndoꞌ xa.
ROM 5:17 Leꞌa ke ten ta ugap mbin Adán wa leꞌa itea be men ndat. ¡Parea uzhebpa mas siꞌil nak ta na mbin Jesucristo! Leꞌa juers ten ta mbin Jesucristo wa, leꞌa Dios mluu xteꞌe uzheꞌeb nkweaꞌ ladna xa be men, nsaꞌa xa dub gealnaban kub, no ndun xa wen yaꞌan be men ndoꞌ xa.
ROM 5:18 Leꞌa Adán mbin ta ugap, ta weꞌe leꞌa itea be men nsabndoꞌ gat. Ná leꞌa Cristo mbin ta wen, ta weꞌe wen yaꞌan be men ndoꞌ Dios, no gap bexa gealnaban.
ROM 5:19 Leꞌa ta na lá uxobgek Adán ndoꞌ Dios wa, ta weꞌe leꞌa kwaꞌad be men ndap ke ndoꞌ Dios. Parea leꞌa ta na mxobgek Cristo ndoꞌ Dios wa, ta weꞌe leꞌa kwaꞌad be men wen syak ndoꞌ Dios.
ROM 5:20 Leꞌa Dios msaꞌa ley ten na ndontsa iniꞌí be men leꞌa bexa ndapka ke. Parea maska li sian ke ndap bexa, leꞌa Dios mas uzheꞌeb mluu leꞌa xa nkweaꞌ ladna bexa.
ROM 5:21 Leꞌa ta na ndap beuna ke ndoꞌ Dios wa, ta weꞌe nsabndoꞌ gat beuna. Ná leꞌa juers ten ta mbin Jesucristo Xwan beuna wa, leꞌa beuna wen myaꞌan ndoꞌ Dios no ndap beuna gealnaban nunk lá idub.
ROM 6:1 ¿Ta weꞌe xteꞌe gab beuna zhaga? ¿Gunta beuna ta ugap ndontsa mas uluu leꞌa Dios nkweaꞌ ladna beuna zha?
ROM 6:2 ¡Leꞌa naꞌ gáp leꞌa beuna lá nsabndoꞌ li gun! Leꞌa cuent ten be ta ugap wa, leꞌa beuna cuent dub xa ngut. ¿Cha xteꞌe ikeseata beuna ndoꞌ be ta ugap wa zha?
ROM 6:3 ¿Lá iniꞌí bega zha leꞌa beuna dubtsa myak no Cristo, cuent ngutno beuna xa gor na utaleaꞌ beuna wa?
ROM 6:4 Leꞌa beuna cuent ngutno xa no mgaꞌachno beuna xa gor na utaleaꞌ beuna. No lak mxiste Dios Cristo ndoꞌ gealgut, no liga nsaꞌa Tad Dios dub gealnaban kub ndoꞌ beuna.
ROM 6:5 Tal leꞌa beuna li ngutno Cristo, no liga gal zha ibanno beuna xa.
ROM 6:6 No uniꞌí beuna leꞌa ta ugap ngok beuna polta wa ngut ndoꞌ cruz gor na ngut Cristo. Ta weꞌe yá naꞌantapa ndencho beuna ndoꞌ be ta ugap.
ROM 6:7 Leꞌa gor na ndat dub men, leꞌa be ta ugap wa yá lá ndapta juers tsoꞌo xa wa.
ROM 6:8 Tal leꞌa beuna ngutno Cristo, no liga ndangea ladna beuna leꞌa beuna ibanno xa.
ROM 6:9 No uniꞌí beuna leꞌa Cristo mban ndoꞌ gealgut, yá naꞌantapa gat xa; leꞌa gealgut wa yá lá ndapta juers tsoꞌo xa.
ROM 6:10 Leꞌa gor na ngut Cristo, leꞌa xa dubtsa neꞌe mbin gan ndoꞌ be ta ugap wa. Ná nat nban xa ndontsa gun xa ta nsak ladna Dios.
ROM 6:11 No liga leꞌa bega nak cuent dub xa ngut, leꞌa ta ugap wa yá lá ndapta juers tsoꞌo bega. Ná leꞌa Cristo Jesús Xwan beuna msaꞌa dub gealnaban kub ndoꞌ bega, ndontsa gun bega ta nsak ladna Dios.
ROM 6:12 Ta weꞌe lá ulaꞌa bega leꞌa be ta ugap wa gunta gan ndoꞌ bega; yá lá gailaꞌta bega ndoꞌ be ta ugap nlad bega gun bega wa.
ROM 6:13 No lá guntiꞌinta bega las bega gun bega dub ta ugap. Ndi bsaꞌa bega leꞌaka leꞌa bega ndoꞌ Dios cuent dub xa ngutla cha mbangal xa, ndontsa gun bega sbeꞌen be ta wen ta nlad Dios.
ROM 6:14 Leꞌa be ta ugap wa yá lá gunta gan goꞌo bega. Leꞌa bega yá naꞌantapa ndencho ndoꞌ ley, leꞌa bega ndi ndenchola ndoꞌ ta na uzheꞌeb nkweaꞌ ladna Dios bega.
ROM 6:15 ¿Nat xteꞌe gab beuna zhaga? Leꞌa beuna naꞌantapa igeꞌ ladna ley wa, ndi ngeꞌ ladna beuna ta nkweaꞌ ladna Dios beuna, ¿ta weꞌe mas gunta beuna be ta ugap zha? ¡Leꞌa naꞌ gáp leꞌa beuna naꞌanpa li nsabndoꞌ gun!
ROM 6:16 ¿Lá iniꞌí bega zha leꞌa tal bega ndencho ndoꞌ dub men, leꞌa bega juerska uxobgek ndoꞌ xa wa? No liga tal leꞌa bega ndencho ndoꞌ ta ugap, leꞌa bega sat. Ná tal leꞌa bega nxobgek ndoꞌ Dios, leꞌa bega wen yaꞌan ndoꞌ Dios.
ROM 6:17 Polta ndencho bega ndoꞌ be ta ugap. Ná nat nsa naꞌ xno ndoꞌ Dios leꞌa bega idub ncho ladna nxobgek ndoꞌ be diꞌizh wen lak mluu be men bega‑yá.
ROM 6:18 Leꞌa bega utoꞌola ndoꞌ ta ugap wa, ndi myak bega dub xa ndun ta nsak ladna Dios.
ROM 6:19 Leꞌa naꞌ li ndadiꞌizh ta wa geal leꞌa bega ndido nyakbeꞌena. Leꞌa polta leꞌa bega ndencho ndoꞌ be ta ugap, no sbeꞌen be ta bzhiꞌik no be ta ugap mbin bega. Ná nat byun bega cuent leꞌaka bega ndoꞌ yaꞌa Dios, weꞌe umbiꞌi gak bega gun bega sbeꞌen lak nsak ladna Dios.
ROM 6:20 Leꞌa polta zha na bi ndencho bega ndoꞌ be ta ugap wa, leꞌa bega naꞌanpa ukwaꞌan gun bega ta nlad Dios.
ROM 6:21 ¿Parea xtiꞌin be ta ugap mbin bega wa? Nat leꞌa bega ndi ndono ladna be ta wa, leꞌa bega uniꞌí leꞌa bexa li ndun wa satka.
ROM 6:22 Nat leꞌa bega utoꞌola ndoꞌ ta ugap wa, myak bega dub xa ndun tiꞌin ndoꞌ Dios. Nat umbiꞌi nak ladoꞌo bega ndoꞌ Dios, no gap bega dub gealnaban nunk lá idub.
ROM 6:23 Leꞌa tal ton ndap ke ndoꞌ Dios, leꞌa xa wa satka. Ná leꞌa tal ton igeꞌ ladna Cristo Jesús Xwan beuna, leꞌa Dios usaꞌa dub gealnaban kub ta nunk lá idub.
ROM 7:1 Bego nak beuna xmen Cristo, bego na nchandoꞌ ley ten Dios, ¿lá iniꞌí bega zha leꞌa ley wa nibeꞌe ndoꞌ be men zha na nbantsa xa?
ROM 7:2 Ndab ley wa leꞌa dub xagots nak xa ten dub xabgiꞌi zha na nbantsa xabgiꞌi wa. Ná tal leꞌa xabgiꞌi wa gat leꞌa xagots wa yá naꞌantapa nak xa ten xa wa.
ROM 7:3 Tal leꞌa dub xagots ngal stub men zha bi nban xabgiꞌi ten xa, leꞌa ta wa dub ke ndoꞌ Dios. Ná tal leꞌa xabgiꞌi ten xa wa ngutla, leꞌa ley wa ndab leꞌa xagots syoꞌo gan ikaꞌa stub xabgiꞌi, leꞌa ta wa naꞌanpa dub ke ndoꞌ Dios.
ROM 7:4 No liga nak bega nak beuna xmen Cristo. Leꞌa gor na ngut Cristo, leꞌa cuent ten ley leꞌa bega noga ngut. Nat leꞌa bega ndi nak xa ten Cristo, xa na mban ndoꞌ gealgut, ndontsa gun bega ta nsak ladna Dios.
ROM 7:5 Leꞌa zha na bi ndesea beuna laktsa nlad beuna, leꞌa ley wa ndun mas nlad beuna gun beuna ta ugap. Weꞌe leꞌa ke ten be ta ugap mbin beuna wa, leꞌa beuna nsabndoꞌ gat.
ROM 7:6 Ná nat leꞌa beuna utoꞌo ndoꞌ ley wa, yá naꞌantapa nibeꞌe ta wa beuna. Naꞌanpa ndencho beuna ndoꞌ ley polta wa, ndi nxobgek beuna ndoꞌ Espíritu ten Dios.
ROM 7:7 ¿Nat xteꞌe gab beuna zhaga? ¿Gab beuna zha leꞌa ley ten Dios dub ta ugap? ¡Leꞌa naꞌ gáp leꞌa ta wa naꞌanpa li nak! Ná leꞌa ley wa mluu ndoꞌ naꞌ ná xtaꞌan be ta ugap. Tal leꞌa ley wa lá ngab: “Lá isaꞌab ladna lu ndoꞌ ta ndap stubga men”, leꞌa naꞌ ni lá iní ti leꞌa ta wa dub ke ndoꞌ Dios.
ROM 7:8 Leꞌa ta na ndab ley lá gun naꞌ ta wa, ta weꞌe mas nsaꞌab lad naꞌ ndoꞌ be taꞌa. Tal leꞌa ley naꞌanpa ngab lá gun naꞌ dub taꞌa, leꞌa naꞌ naꞌanpa nlad gun naꞌ ta wa.
ROM 7:9 Leꞌa polta zha na lá nchandoꞌ naꞌ ley ten Dios leꞌa naꞌ gust nchoꞌo. Ná leꞌa gor na mgondoꞌ naꞌ ley wa cha weꞌe uní naꞌ leꞌa naꞌ ndapka ke ndoꞌ Dios.
ROM 7:10 No mgondoꞌ naꞌ leꞌa ley wa ndiꞌizh usaꞌa gealnaban tal leꞌa naꞌ uxobgek ndoꞌ‑yá, parea leꞌa ta na lá uxobgek naꞌ ndoꞌ ley wa leꞌa naꞌ nsabndoꞌ gat.
ROM 7:11 Leꞌa be ta ugap ncho len ladoꞌo naꞌ wa mkedino naꞌ; ta weꞌe mbin naꞌ ta ugap ta nsabndoꞌ gat naꞌ.
ROM 7:12 Leꞌa ley wa ta msaꞌa Dios, no uzhebpa ta umbiꞌi‑yá no gaꞌal nak‑a no wen nak‑a.
ROM 7:13 ¿Ndiꞌizh dub ta wen cha ndi leꞌa gun gat naꞌ zha? ¡Leꞌa naꞌ gáp leꞌa ta wa naꞌanpa li nak! Leꞌa naꞌ mbin ta ugap ta weꞌe nsabndoꞌ gat naꞌ. Leꞌa ley wa nluutsa leꞌa be ta ndun naꞌ wa uzhebpa dub ta ugap ndoꞌ Dios.
ROM 7:14 Leꞌa beuna uniꞌíka leꞌa ley wa ta msaꞌa Dios, ná leꞌa naꞌ nak dub men nsobnchoꞌo ndoꞌ ta ugap.
ROM 7:15 Lá yakbeꞌena naꞌ xtaꞌan lndeꞌe nak naꞌ. Ncho zha naꞌanpa ndun naꞌ ta wen nlad naꞌ, leꞌa naꞌ ndi ndun ta ugap, ta nxee lad naꞌ ndoꞌ na.
ROM 7:16 Tal uní naꞌ leꞌa ta ndun naꞌ wa ta ugap nak, leꞌa ta wa nluu leꞌa naꞌ uní leꞌa ley ta wenka.
ROM 7:17 Leꞌa naꞌ lá nlad li gun naꞌ ta ugap wa, ndi juers ten ta ugap ncho len ladoꞌo naꞌ wa ta weꞌe li ndun naꞌ.
ROM 7:18 Leꞌa naꞌ uní leꞌa len ladoꞌo naꞌ naꞌanpa wen nak, leꞌa naꞌ nlad gun be ta wen, parea ncho zha lá gun naꞌ gan.
ROM 7:19 Naꞌanpa ndun naꞌ be ta wen nlad naꞌ, ndi ndun naꞌ be ta ugap ta lá nlad naꞌ.
ROM 7:20 Tal leꞌa naꞌ li ndun be ta ugap ta lá nlad naꞌ wa, leꞌa ta wa naꞌanpa leꞌa naꞌ li ndun, leꞌa ta wa ndi ta ugap ncho len ladoꞌo naꞌ.
ROM 7:21 Lndeꞌe nak ta ndun naꞌ wa: nlad naꞌ gun naꞌ dub ta wen, parea ncho ta ugap len ladoꞌo naꞌ.
ROM 7:22 Ta ugeaka nlad naꞌ uxobgek naꞌ ndoꞌ ley ten Dios,
ROM 7:23 parea uní naꞌ leꞌa len ladoꞌo naꞌ ncho be ta ugap. Leꞌa ta wa lá nlaꞌa gun naꞌ be ta wen ndanbeꞌe naꞌ, geal leꞌa naꞌ nsobnchoꞌo ndoꞌ be ta ugap ncho len ladoꞌo naꞌ wa.
ROM 7:24 ¡Uzhebpa proꞌob naꞌ! ¿Ton sun gan koꞌo naꞌ ndoꞌ be ta ugap nak naꞌ zha, ta nsabndoꞌ gat naꞌ wa?
ROM 7:25 ¡Nsa naꞌ xno ndoꞌ Dios, leꞌa Jesucristo Xwan beuna sun gan! Leꞌa naꞌ ta ugeaka nlad uxobgek ndoꞌ ley ten Dios, parea leꞌa naꞌ lá ndun gan ke ten be ta ugap ncho len ladoꞌo naꞌ wa.
ROM 8:1 Nat leꞌa Dios naꞌanpa utsaksi bexa nak xmen Cristo Jesús, bexa na yá naꞌantapa ndesea laktsa nlad na, ndi ndesea bexa lak nlad Espíritu ten Dios.
ROM 8:2 Leꞌa ta na nak naꞌ xmen Cristo Jesús leꞌa Espíritu ten Dios nsaꞌa dub gealnaban kub, yá lá gaigayoꞌota naꞌ ndoꞌ be ta ugap no ndoꞌ gealgut.
ROM 8:3 Naꞌan ton gun gan gaisaꞌab ndoꞌ be ta ugap, ta weꞌe leꞌa ley ten Dios wa lá yoo gan koꞌo beuna ndoꞌ ta wa. Parea leꞌa Dios mtuꞌub Xin xa ndoꞌ gizhliyo ndee, myak xa dub men cuent be men ndap ke, ná leꞌa xa ni dub ke lá ndap. Leꞌa xa ngut sakndoꞌ beuna, ndontsa naꞌantapa inibeꞌe ta ugap wa beuna.
ROM 8:4 Weꞌe leꞌa beuna sun gan gun lak nibeꞌe ley, leꞌa beuna yá naꞌantapa ndesea laktsa nlad beuna, leꞌa beuna ndi ndesea lak nsaꞌa Espíritu ten Dios.
ROM 8:5 Leꞌa bexa na ndesea laktsa nlad na wa, leꞌa bexa wa nkwaꞌan ta nladtsa na. Ná leꞌa bexa na ndesea lak nsaꞌa Espíritu ten Dios wa, leꞌa bexa wa nkwaꞌan gun ta nlad Espíritu wa.
ROM 8:6 Leꞌa tal ton ukwaꞌan be ta nladtsa na, leꞌa xa wa satka. Ná leꞌa tal ton ukwaꞌan be ta nlad Espíritu, leꞌa xa wa gap gealnaban no wen yoo ladna xa.
ROM 8:7 Leꞌa bexa na nkwaꞌan ta nladtsa na, leꞌa bexa wa ndun sbeꞌen be ta lá nsak ladna Dios, geal leꞌa bexa lá kaꞌab uxobgek ndoꞌ ley ten Dios no ni lá isuꞌuka xa.
ROM 8:8 Leꞌa bexa na ndesea laktsa nlad na wa lá yoo gan gun dub ta isak ladna Dios.
ROM 8:9 Ná leꞌa bego yá naꞌantapa ndesea laktsa nlad na, ndi ndesea bega lak nsaꞌa Espíritu wa, leꞌa xa wa ncho len ladoꞌo bega. Leꞌa tal ton naꞌanpa yoo Espíritu ten Cristo len ladoꞌo na, leꞌa xa wa naꞌanpa xmen Cristo.
ROM 8:10 Ná tal leꞌa Cristo ncho len ladoꞌo bega, leꞌa xbi bega ibanka leꞌa Dios mbin wen myaꞌan bega ndoꞌ xa. Ná leꞌa ke ten ta ugap mbin bega wa, leꞌa beꞌal las bega satka.
ROM 8:11 Leꞌa Espíritu ten Dios mxiste Cristo Jesús ndoꞌ gealgut, no liga ixiste xa beꞌal las ngut bega wa, tal leꞌa len ladoꞌo bega ncho Espíritu wa.
ROM 8:12 Bega nak beuna xmen Cristo, nat leꞌa beuna nsabndoꞌ uxobgek ndoꞌ Dios, lá gunta beuna laktsa nlad beuna.
ROM 8:13 Tal leꞌa bega ndesea laktsa nlad na, leꞌa bega satka. Ná tal leꞌa bega ulaꞌa leꞌa Espíritu ten Dios unitndoꞌ be ta nlad bega gun bega wa, leꞌa bega gap dub gealnaban nunk lá idub.
ROM 8:14 Leꞌa iteanak bexa na nlaꞌa leꞌa Espíritu ten Dios goꞌo bexa ndoꞌ ta wen, leꞌa bexa wa nak xin Dios.
ROM 8:15 Leꞌa Espíritu ncho len ladoꞌo bega wa naꞌanpa gun izheb bega ndoꞌ Dios, lak ncho bexa nzheb ndoꞌ stub men nibeꞌe xa. Leꞌa Espíritu wa ndi ndun myak bega xin Dios, ta weꞌe syoꞌo gan kwezh beuna Dios, gab beuna: “¡Tad, Xus naꞌ!”
ROM 8:16 Leꞌa Espíritu wa leꞌa ncho len ladoꞌo beuna, ta weꞌe nsaꞌa beuna cuent leꞌa beuna xinka Dios.
ROM 8:17 Leꞌa ta na nak beuna xin Dios, weꞌe leꞌa beuna no gal usoꞌ be ta wen usaꞌa Dios ndoꞌ Cristo. No tal uxik beuna ndoꞌ be gealkweaꞌ lak utid Cristo, weꞌe yoono beuna Cristo wats Dios.
ROM 8:18 Leꞌa naꞌ uníka leꞌa be gealkweaꞌ nsatid beuna nat naꞌanpa nak dub ta uzheꞌeb ndoꞌ lak ta uzheꞌeb chul gal usoꞌ beuna wa, dub ta tlaw iniꞌí beuna.
ROM 8:19 Leꞌa iteanak be taꞌa mbindeꞌe Dios ndenbeas gal gor uluu Dios ná ton nak be xin xa.
ROM 8:20 Nat leꞌa iteanak ta mbindeꞌe Dios naꞌanpa ndun tiꞌin lak nsabndoꞌ‑yá. Naꞌanpa ke ten na li nak be ta wa, leꞌa Dios leꞌa nsensaꞌab‑a li nak‑a.
ROM 8:21 Leꞌa gal dub wizh leꞌa itea be taꞌa mbindeꞌe Dios yá naꞌantapa gazhaꞌa, leꞌa‑yá ndi yak kub lak yak kub beuna nak xin Dios.
ROM 8:22 Leꞌa beuna uniꞌíka leꞌa nat leꞌa iteanak be taꞌa mbindeꞌe Dios cuent nbixti, no nsatid‑a dub gealkweaꞌ lak nsak dub xagots yamer gap meꞌed.
ROM 8:23 No naꞌanpa nabtsa be ta mbindeꞌe Dios nbixti, leꞌa beuna no nbixti len ladoꞌo beuna ndalen ndenkeaꞌ beuna zha na isen Dios beuna, usaꞌa xa dub las kub beuna. Leꞌa Dios leꞌa msaꞌala Espíritu ten na, ta nluu leꞌa xa sunka itea be ta ndab xa.
ROM 8:24 Leꞌa zha na mlat Dios beuna ndoꞌ be ta ugap, gast gor weꞌe ndenkeaꞌ beuna gal usoꞌ beuna ta usaꞌa xa wa. Leꞌa ta wa dub taꞌa biseata inaꞌ beuna, leꞌa dub ta naꞌ beuna wa naꞌanpa nak dub ta tiꞌi ndenkeaꞌ beuna.
ROM 8:25 Ná tal leꞌa beuna ndenkeaꞌ dub taꞌa bi lá naꞌ beuna, leꞌa beuna nxik kwenkeaꞌ beuna‑yá.
ROM 8:26 No liga leꞌa Espíritu ten Dios leꞌa ndakno beuna gun beuna ta lá isuꞌu beuna. Leꞌa beuna lá iniꞌí xteꞌe nsabndoꞌ inab beuna ndoꞌ Dios, ná leꞌa Espíritu ten Dios wa nab ndoꞌ Dios sakndoꞌ beuna dub mod na ni lá yoo gan gudiꞌizh beuna‑yá.
ROM 8:27 Leꞌa Dios xa na nchandoꞌ ladoꞌo beuna wa nyakbeꞌena ta li ndab Espíritu wa, geal leꞌa Espíritu wa nab ndoꞌ Dios sakndoꞌ beuna nak be xmen Dios lakka nlad Dios gun xa.
ROM 8:28 Leꞌa beuna uniꞌíka leꞌa bexa na ndankea Dios leꞌa Dios leꞌa gun wen itoꞌo itea be taꞌa nchaꞌtid bexa wa, bexa na mti Dios gak be xmen xa.
ROM 8:29 Leꞌa zha polta leꞌa Dios uniꞌí ná ton bexa gak xmen xa, no mbinbeꞌe Dios yak bexa wa lak nak Xin Dios. Li leꞌa Xin Dios wa nak cuent wit ned itea beuna nak xin Dios.
ROM 8:30 Leꞌa bexa na li mbinbeꞌe Dios gak be xin xa wa, leꞌa Dios no bexa wa utezh. Leꞌa bexa na li utezh Dios wa, leꞌa Dios no mbin wen nyaꞌan bexa ndoꞌ xa. Leꞌa bexa na li wen nyaꞌan ndoꞌ Dios wa, leꞌa Dios leꞌa usaꞌa sa yoo bexa wats Dios.
ROM 8:31 Nat, ¿xteꞌeta gab beuna zha? Tal leꞌa Dios nsoꞌ wats beuna, ¿cha ton gun gan ndoꞌ beuna zha?
ROM 8:32 Leꞌa Dios leꞌa msaꞌa leꞌaka Xin xa ngut ndontsa gap beuna gealnaban. ¿Lid usaꞌa Dios no itea be ta wen gal usoꞌ beuna nak xmen Cristo zha?
ROM 8:33 ¿Ton gun gan usake bexa na mti Dios zha? Naꞌan ton, leꞌa Dios leꞌa mtsuꞌu be ke ten beuna wa.
ROM 8:34 ¿No ton gun gan gab leꞌa beuna ndap ke? Naꞌan ton, leꞌa Cristo leꞌa ngut cha mban xa ndoꞌ gealgut. Leꞌa nat leꞌa xa nsob wats Dios lad gaꞌal, no nab xa ndoꞌ Dios gakno Dios beuna.
ROM 8:35 ¿No xtaꞌan gun gan lá ikea ladna Cristo beuna zha? Naꞌan xtaꞌan, ni gealkweaꞌ, no ni ta juert ncho beuna, no ni ta ugap ndanno be men beuna, no ni win, no ni ta lá ndap beuna xab na, no ni ta uzheꞌeb ntid beuna, no ni gealgut.
ROM 8:36 Leꞌa ta wa lak nkeaniꞌi diꞌizh ten Dios, ndab‑a: Leꞌa ta na nak besa xmen go, ta weꞌe leꞌa be men sbeꞌen nlad gut besa. Ndanno bexa besa cuent dub borreg gut bexa.
ROM 8:37 Ná leꞌa beuna uzhebpa ndun gan ndoꞌ iteanak be ta wa, juers ten Cristo xa na nkea ladna beuna.
ROM 8:38 Ta weꞌe leꞌa naꞌ uní ka naꞌan xtaꞌan gun gan lá ikea ladna Dios beuna, tal leꞌa beuna gat, no tal leꞌa beuna bi nban. No ni be angel ten Dios, no ni be mbi bxin, no ni be espíritu nibeꞌe, no ni be ta ncho nat, no ni be ta tiꞌi ilen,
ROM 8:39 no ni be taꞌa ncho gaꞌap, no ni be taꞌa ncho xan, no ni stubga taꞌa mbindeꞌe Dios lá gun gan lá ikea ladna Dios beuna, ta na nak beuna xmen Cristo Jesús Xwan beuna.
ROM 9:1 Leꞌa Cristo nsobwiꞌi leꞌa naꞌ naꞌanpa nkwiꞌinno bega. Leꞌa naꞌ ngenna len ladoꞌo naꞌ leꞌa Espíritu ten Dios ndab ndoꞌ naꞌ leꞌa ta nkeꞌa naꞌ ndee ta ugeaka:
ROM 9:2 leꞌa naꞌ uzhebpa uban nyoꞌo ladna no kweaꞌ ncho lad naꞌ.
ROM 9:3 Tant nkweaꞌ lad naꞌ be ltsaꞌa naꞌ bexa judio, gast sni naꞌ utsaksi Dios naꞌ, sit yoo naꞌ wats Cristo, tal leꞌa ta wa sakno bexa wa gungea ladna bexa Cristo.
ROM 9:4 Leꞌa bexa wa nak xa Israel, bexa na mti Dios gak xin Dios. Leꞌa Dios mlundoꞌ ndoꞌ bexa wa, no mbinno xa bexa dub trat, no msaꞌa xa ley ten xa ndoꞌ bexa wa. No ndab Dios ndoꞌ bexa wa xteꞌe yankea bexa xa, no xteꞌe wen gunno xa bexa.
ROM 9:5 Leꞌa bexa judio ncho nat wa nak xin bexa nsak uyoꞌo polta wa, bexa ngok usan gox polta ten Cristo, xa nak Dios nibeꞌe ndoꞌ itea be taꞌa. ¡Leꞌa itea be men yankea xa idub tiemp! ¡Lika gak‑a!
ROM 9:6 Leꞌa naꞌ naꞌanpa gáp leꞌa Dios lá ngun ta ndab xa ndoꞌ bexa Israel wa. Leꞌa naꞌ ndi gáp leꞌa naꞌanpa itea bexa Israel wa nak xin Dios.
ROM 9:7 No liga naꞌanpa itea be xin Abraham nak xin Dios, lak ndab Dios ndoꞌ Abraham: “Leꞌa cuent ten naꞌ, nabtsa bexa nak ras ten Isaac xin lu gak ras ten lu.”
ROM 9:8 Leꞌa ta wa gab leꞌa naꞌan ton gak xin Dios juers tentsa be usan ten xa. Leꞌa bexa nak xin Dios wa li nak juers ten ta ndab Dios usaꞌa Dios ndoꞌ Abraham.
ROM 9:9 Leꞌa ta ndee diꞌizh ndab Dios ndoꞌ Abraham: “Leꞌa stub liꞌin gal naꞌ leꞌa Sara xagots ten lu ndapla dub meꞌed.”
ROM 9:10 Leꞌa ta wa Isaac usan gox ten beuna, xa na ukaꞌa Rebec, cha ngop bexa top meꞌed kwach.
ROM 9:11 Leꞌa zha biseata gal itop meꞌed wa, no gor na biseata gun be meꞌed ni dub ta wen no ni dub ta ugap, leꞌa Dios uníꞌi ndoꞌ Rebec cuent ten meꞌed, ta na nluu leꞌa Dios nti be men nlad xa, naꞌanpa nwiꞌi xa tal xtaꞌan ndun bexa.
ROM 9:12 Ta ndee ta ndab Dios ndoꞌ Rebec wa: “Leꞌa xa gox gun tiꞌin ndoꞌ xa tuzh.”
ROM 9:13 Leꞌa ta wa lak nkeaniꞌi diꞌizh ten Dios ndab Dios: “Leꞌa naꞌ ndee nkweaꞌ ladna Jacob ndoꞌ Esaú.”
ROM 9:14 ¿Cha gab beuna zha leꞌa Dios ugap mbin ta na li mti xa dub bexa wa? ¡Leꞌa naꞌ gáp leꞌa ta wa naꞌanpa li nak!
ROM 9:15 Lak ndab Dios ndoꞌ Moisés: Leꞌa naꞌ ilats ladna xa na nlad naꞌ ilats lad naꞌ, no ikweaꞌ lad naꞌ xa na nlad xa ikweaꞌ lad naꞌ.
ROM 9:16 Leꞌa gor na nti Dios dub men, leꞌa ta wa naꞌanpa ta leꞌa men wa nlad no naꞌanpa ta nkwaꞌan xa‑yá. Leꞌa Dios ndi leꞌa nlats ladna xa, ta weꞌe nti Dios xa.
ROM 9:17 Lak nkeaniꞌi diꞌizh ten Dios ndab Dios ndoꞌ faraón: “Leꞌa naꞌ ulaxoꞌob lu nak lu xa nibeꞌe, ndontsa uluꞌu leꞌa naꞌ juert nak, no igondoꞌ itea be men nde ndoꞌ gizhliyo ton nak naꞌ.”
ROM 9:18 Leꞌa ta wa gab leꞌa tal Dios nlad ilats ladna dub men, leꞌa xa lika sun. No tal leꞌa Dios nlad yak ngud ladoꞌo dub men, leꞌa xa likaga sun.
ROM 9:19 Parea ncho bega gab: “¿Xtaꞌan ndab Dios leꞌa beuna ndap ke, tal leꞌa beuna lá yoo gan utsaw ndoꞌ ta nlad Dios gun Dios?”
ROM 9:20 Ná leꞌa naꞌ gáp, ¿ton nak lu zha gab lu leꞌa Dios naꞌanpa utsin ndun? ¿Syoꞌo gan gab dub gets ndoꞌ xa mbindeꞌe‑yá: “¿Xtaꞌan ngi lndeꞌe mbindeꞌe lu naꞌ zha?”
ROM 9:21 ¿Lá iniꞌí bega zha leꞌa xa ndandeꞌe be ta btsiꞌin leꞌa nibeꞌe ndoꞌ yosid, syoꞌo gan gunno xa dub bleꞌa yosid guniꞌi xtaꞌan nlad xa, tal dub vas mas nsak, natal dub vas uxee nsak?
ROM 9:22 No liga nak ta ndun Dios. Leꞌa xa nlad iniꞌí itea be men leꞌa xa juert nak, no leꞌa xa ntsaksi bexa ugap nak. Parea ndi mxik xa ndoꞌ bexa na nsabndoꞌ utsaksi xa, bexa ndiꞌizh gak perdid,
ROM 9:23 ndontsa iniꞌí be men xteꞌe uzheꞌeb utsin nak xa ndoꞌ beuna. Leꞌa polta leꞌa xa mlats ladna beuna no mti xa beuna yoo beuna wats xa.
ROM 9:24 Leꞌa beuna nak bexa na mti Dios wa, bexa judio no bexa naꞌanpa xa judio.
ROM 9:25 Leꞌa ta wa lak nkeaniꞌi ndoꞌ libr mkeꞌa Oseas, ndab Dios: Leꞌa bexa ndiꞌizh naꞌanpa nak gezh ten naꞌ wa, nat leꞌa naꞌ gáp leꞌa bexa wa xmenka naꞌ. Leꞌa bexa ndiꞌizh naꞌanpa nkea lad naꞌ wa, nat leꞌa naꞌ nkeꞌaka ladna bexa.
ROM 9:26 No sa na ndáp naꞌ: “Leꞌa bego naꞌanpa nak xmen naꞌ”, bi leꞌaka sa weꞌe leꞌa naꞌ gáp leꞌa bexa wa nakka xin Dios nban.
ROM 9:27 Leꞌa profet Isaías noga mbidiꞌizh cuent ten bexa Israel, ndab xa: Leꞌa be xin Israel uzhebpa yak kwaꞌad cuent yux nde toꞌo nitsdoꞌo, parea naꞌanpa kwaꞌad bexa gap gealnaban ndoꞌ Dios.
ROM 9:28 Leꞌa Dios Xa Nibeꞌe sken gun lak ndab diꞌizh ten xa, utsaksi xa be men nde ndoꞌ gizhliyo lak nsabndoꞌ‑yá.
ROM 9:29 Lak ndab Isaías polta: Tal leꞌa Dios xa ndon leꞌa nibeꞌe lá ulaꞌach dub ndeꞌep beuna, leꞌa beuna ndiꞌizh initndoꞌ lak unitndoꞌ be men ndencho Sodoma no Gomorra.
ROM 9:30 ¿Nat xteꞌe gab beuna zha? Leꞌa naꞌ gáp leꞌa bexa naꞌanpa xa Israel wa naꞌanpa ukwaꞌan xteꞌe wen yaꞌan bexa ndoꞌ Dios, parea leꞌa bexa wa mzhealka ta wa ta na ngeꞌ ladna bexa Cristo.
ROM 9:31 Ná leꞌa bexa Israel mkwaꞌan xteꞌe wen yaꞌan bexa ndoꞌ Dios ta na ndankea bexa ley, parea leꞌa bexa lá izheal‑a,
ROM 9:32 geal leꞌa bexa wa mkwaꞌan‑a juers ten ta na nxobgek bexa ndoꞌ ley, naꞌanpa juers ten ta na ngeꞌ ladna bexa Dios. Leꞌa cuent ten bexa Israel leꞌa Cristo nak cuent dub geꞌ nkateꞌeb bexa,
ROM 9:33 lak nkeaniꞌi diꞌizh ten Dios, ndab‑a: Blaꞌach bego leꞌa gezh Sion msoꞌ naꞌ dub xa nak cuent dub geꞌ, ta ikateꞌeb be men gast ilayat bexa. Ná leꞌa tal ton igeꞌ ladna xa wa, leꞌa bexa wa nunk naꞌanpa ido ladna.
ROM 10:1 Bega nak beuna xmen Cristo, leꞌa len ladoꞌo naꞌ uzhebpa nlad naꞌ gap bexa Israel gealnaban ndoꞌ Dios, no li naꞌab naꞌ ndoꞌ Dios.
ROM 10:2 Leꞌa naꞌ uní leꞌa bexa wa uzhebpa nlad ukwaꞌan Dios, parea ni lá iniꞌí bexa xteꞌe nsabndoꞌ gun bexa ta wa.
ROM 10:3 Leꞌa bexa wa lá iniꞌí xteꞌe wen yaꞌan bexa ndoꞌ Dios, ndi nkwaꞌan bexa ta wa juers ten leꞌatsa bexa. Lá kaꞌab bexa gun bexa ta nlad Dios ndontsa wen yaꞌan bexa ndoꞌ xa.
ROM 10:4 Leꞌa Cristo leꞌa mbin cumplir itea be ley ten Dios, ndontsa tal ton igeꞌ ladna Cristo leꞌa xa wa wen yaꞌan ndoꞌ Dios.
ROM 10:5 Leꞌa cuent ten bexa na nxobgek ndoꞌ ley ndontsa wen yaꞌan bexa ndoꞌ Dios, leꞌa Moisés lndeꞌe mkeꞌa: “Leꞌa tal ton uxobgek ndoꞌ itea be ley ndee, leꞌa xa wa gap gealnaban ndoꞌ Dios.”
ROM 10:6 Ná leꞌa cuent ten bexa na ngeꞌ ladna Cristo ndontsa wen yaꞌan bexa ndoꞌ Dios, leꞌa diꞌizh ten Dios ndab: “Lá gunbeꞌe lu: ¿Ton yaꞌ gibeꞌa baꞌ? —ndontsa ulaꞌ xa Cristo ndoꞌ gizhliyo—;
ROM 10:7 no ni lá gab lu: ¿Ton ilaꞌ gast xan gizhliyo?” —ndontsa ixiste xa Cristo lat bexa ngut.
ROM 10:8 ¿No xteꞌe ndab diꞌizh ten Dios zha? Nkeaniꞌi‑yá ndab‑a: Gax wats lu nsoꞌ diꞌizh ten Dios, toꞌo lu nsea len ladoꞌo lu. Leꞌa ta ndee ta ndadiꞌizh besa, ndab besa igeꞌ ladna be men Cristo:
ROM 10:9 Tal ton gaꞌal gab leꞌa Jesús leꞌa nak Xa Nibeꞌe ten xa, no gungea ladna xa len ladoꞌo xa leꞌa Dios mxiste Jesús ndoꞌ gealgut, leꞌa xa wa gap gealnaban ndoꞌ Dios.
ROM 10:10 Leꞌa ta na li ndangea ladna beuna len ladoꞌo beuna wa, ta weꞌe wen yaꞌan beuna ndoꞌ Dios. No ta na li ndab beuna wa, ta weꞌe leꞌa Dios usaꞌa dub gealnaban kub ndoꞌ beuna.
ROM 10:11 Lak nkeaniꞌi diꞌizh ten Dios, ndab‑a leꞌa tal ton igeꞌ ladna Dios, leꞌa bexa wa nunk naꞌanpa ido ladna.
ROM 10:12 Guniꞌi tal xa xa judio natal naꞌanpa xa judio xa, leꞌa Dios dubtsa nak Xa Nibeꞌe ten iteanak beuna. No uzhebpa wen nak Dios ndoꞌ itea be men na nkwaꞌan xa.
ROM 10:13 Lak nkeaniꞌi diꞌizh ten Dios, ndab‑a: “Leꞌa tal ton ukwaꞌan Dios Xa Nibeꞌe, leꞌa bexa wa gap gealnaban ndoꞌ Dios.”
ROM 10:14 ¿Parea xteꞌe ukwaꞌan bexa Dios tal leꞌa bexa lá ndangea ladna xa? ¿No xteꞌe gungea ladna bexa Dios tal leꞌa bexa lá ndoꞌón diꞌizh ten xa? ¿No xteꞌe goꞌón bexa diꞌizh ten xa wa tal naꞌan ton ndadiꞌizh‑a ndoꞌ bexa?
ROM 10:15 ¿No ton gudiꞌizh diꞌizh wa ndoꞌ bexa tal naꞌan ton utuꞌub xa? Lak nkeaniꞌi diꞌizh ten Dios, ndab‑a: “¡Uzhebpa chul gor ilanseaꞌ bexa ilenno diꞌizh wen ten Dios!”
ROM 10:16 Ná leꞌa bexa wa naꞌanpa itea nxobgek ndoꞌ diꞌizh wen ten Dios, lak mkeꞌa Isaías, ndab‑a: “Dios Xa Nibeꞌe, ¿ncho ton ndangea ladna ta ndadiꞌizh besa zha?”
ROM 10:17 Leꞌa bexa na ndangea ladna Cristo, ned mbiꞌín bexa diꞌizh ten Cristo, ta ndadiꞌizh be men ndoꞌ bexa.
ROM 10:18 ¿Ndáp naꞌ leꞌa bexa Israel lá ngoꞌón diꞌizh ten Dios zhaga? Leꞌa naꞌ gáp leꞌa bexa mbiꞌínka ta wa, lak nkeaniꞌi diꞌizh ten Dios: Leꞌa ti bexa wa mgen idub ndoꞌ gizhliyo, gast sa ndon leꞌa mas sit ndoꞌ gizhliyo mgen be diꞌizh ten bexa.
ROM 10:19 ¿Lid myakbeꞌena bexa Israel ta mbiꞌín bexa wa zha? Leꞌa Moisés mkeꞌa ta ndab Dios ndoꞌ bexa Israel wa: Leꞌa naꞌ gakno bexa naꞌanpa nak xmen naꞌ, ndontsa ixeeno ladna bego bexa. No gakno naꞌ bexa na lá nyakbeꞌena, ndontsa gakloo bego.
ROM 10:20 Leꞌa Isaías mas gaꞌal mkeꞌa‑yá, ndab Dios: Leꞌa bexa naꞌanpa ukwaꞌan naꞌ, ndi leꞌa mzheal naꞌ. No mlundoꞌ naꞌ ndoꞌ bexa na naꞌanpa inabdiꞌizh ma naꞌ.
ROM 10:21 Ná leꞌa cuent ten bexa Israel leꞌa Dios ndab: “Idub wizh nlad naꞌ ilen bexa wats naꞌ, bexa ngud nak, no ni lá nxobgek bexa ndoꞌ naꞌ.”
ROM 11:1 No inabdiꞌizh naꞌ ndoꞌ bega: ¿Mxelad Dios bexa Israel, bexa nak xmen xa zha? Leꞌa naꞌ gáp leꞌa ta wa naꞌanpa li nak, leꞌa naꞌ ndee no nak dub xa Israel, dub xa ras Abraham, no dub xa ras Benjamín.
ROM 11:2 Leꞌa Dios naꞌanpa uxelad be xmen na, bexa na polta mti Dios. ¿Lá iniꞌí bega zha xteꞌe ndab diꞌizh ten Dios cuent ten Elías? Leꞌa Elías mbidiꞌizh ndoꞌ Dios utixtino xa bexa Israel, ndab xa:
ROM 11:3 “Dios Xa Nibeꞌe, leꞌa bexa wa mbit be profet ten go, no mlate bexa be sa nsaꞌa besa xnab ndoꞌ go. Leꞌa naꞌ ndee nabtsa nban, ná nat leꞌa bexa nlad gut naꞌ.”
ROM 11:4 Ná leꞌa Dios cha ukaꞌab ndab: “Bi ncho stub sgaꞌad mil xabgiꞌi nlaꞌach naꞌ, bexa naꞌanpa nsaxib ndoꞌ Baal.”
ROM 11:5 No liga nat bi ncho steꞌep bexa Israel nak xmen Dios, leꞌa xa mti bexa wa ta na wen nak xa ndoꞌ bexa.
ROM 11:6 Leꞌa bexa wa nak xmen Dios ta na li wen nak Dios ndoꞌ bexa, naꞌanpa ta na wen ndun bexa. Tal leꞌa‑yá ta na wen mbin bexa, leꞌa ta wa gab leꞌa ta wen nak Dios wa naꞌanpa dub ta ga nsaꞌa Dios.
ROM 11:7 ¿Weꞌe xteꞌe gab beuna zha? Leꞌa bexa Israel wa mkwaꞌan ná xteꞌe wen yaꞌan bexa ndoꞌ Dios, ná leꞌa bexa lá ngun gan izheal ta wa. Nabtsa bexa na mti Dios wa mbin gan, leꞌa iteata bexa wa myak ngud ladoꞌo na.
ROM 11:8 Leꞌa ta wa lak nkeaniꞌi diꞌizh ten Dios, ndab‑a: “Leꞌa Dios mbin leꞌa bexa wa cuent dub xa mlaꞌbea. Ndap bexa ngusndoꞌ bexa, ná lá naꞌ bexa. No ndap bexa nchaꞌ bexa, ná lá ndoꞌón bexa. No bi leꞌa li myaꞌan bexa gast wizh nat.”
ROM 11:9 No ndab David: Leꞌa be ujest ndankea bexa wa yak dub sa yaꞌigaꞌa bexa; Leꞌa bexa wa ikateꞌeb, cha utsaksi Dios bexa.
ROM 11:10 Leꞌa ngusndoꞌ bexa wa yá lá yoota gan iwiꞌi, no itek tsoꞌo bexa idub tiemp.
ROM 11:11 Leꞌa stub taꞌa inabdiꞌizh naꞌ: ¿Ukateꞌebla bexa Israel, no ulayat bexa gast lá yoota gan yach bexa wats Dios zha? ¡Leꞌa naꞌ gáp leꞌa ta wa naꞌanpa li nak! Leꞌa ta na lá uxobgek bexa Israel ndoꞌ Dios wa, ta weꞌe leꞌa bexa naꞌanpa xa Israel syoꞌo gan gap gealnaban ndoꞌ Dios. Weꞌe iniꞌí bexa Israel ta wa, cha no bexa ilad yach wats Dios.
ROM 11:12 Leꞌa bexa Israel lá uxobgek ndoꞌ Dios, ta weꞌe leꞌa Dios wen mbinno be men gizhliyo; leꞌa bexa Israel leꞌa mlaꞌa Dios, ta weꞌe wen mbinno Dios bexa naꞌanpa xa Israel. ¿Lid mas uzhebpa wen yoo be men wa zha, gal zha na yach bexa Israel wa wats Dios?
ROM 11:13 Nat gáp naꞌ ndoꞌ bega naꞌanpa xa Israel, leꞌa Dios leꞌa mtuꞌub naꞌ gudiꞌizh naꞌ diꞌizh ten xa ndoꞌ bega, no nsak naꞌ leꞌa tiꞌin wa uzheꞌeb dub ta nsak.
ROM 11:14 Nlad naꞌ leꞌa bexa ltsaꞌa naꞌ bexa Israel iniꞌí ta ndun bega, cha no bexa yach wats Dios.
ROM 11:15 Leꞌa Dios mlaꞌa bexa Israel wa, ndontsa leꞌa iteata be men yoo gan ibii wats Dios. Leꞌa gal zha na yach bexa wa wats Dios, leꞌa ta wa gak cuent ibangal bexa ndoꞌ gealgut.
ROM 11:16 Tal ton usaꞌa dub pan ndon leꞌa ned ndoꞌ Dios, weꞌe leꞌa itea be pan ntoꞌo koꞌob wa ta tenka Dios. No tal leꞌa be lo dub ya ta ten Dios, weꞌe leꞌa itea be xos‑a ta tenka Dios. No liga leꞌa be usan gox ten bexa Israel wa ngok xmen Dios, ta weꞌe noga bexa nak xin bexa wa gal gor gak xmen Dios.
ROM 11:17 Leꞌa bexa Israel nak cuent be xos dub ya olivo, be ná myabtoꞌog. Ná leꞌa bego nak cuent xos stubga ya olivo yoꞌo ulen. Cha ndi leꞌa bega mgeꞌal ndoꞌ ya ned wa sakndoꞌ be ná myabtoꞌog wa, ndontsa guntiꞌin bega be lo ya wa no nits ten ya wa.
ROM 11:18 Parea lá izhinna bega ndoꞌ bexa Israel bexa nak cuent ta myabtoꞌog wa, leꞌa be xos dub ya naꞌanpa leꞌa ndun nsobngeꞌa xan ya wa. Leꞌa xan ya wa ndi leꞌa ndun ndiꞌibngeꞌa xos‑a.
ROM 11:19 Ncho bega gab leꞌa be xos ya wa myabtoꞌog ndontsa igeꞌal bega ndoꞌ ya wa.
ROM 11:20 Leꞌa ta wa ta ugeaka. Leꞌa bexa wa myabtoꞌog geal leꞌa bexa lá igeꞌ ladna Cristo. Weꞌe leꞌa bego mgeꞌ ladna Cristo, cha mgeꞌal bega ndoꞌ ya wa. Parea lá izhinna bega, ndi blaꞌach bega leꞌaka bega.
ROM 11:21 Tal leꞌa Dios li ulobtoꞌog bexa leꞌapa nak xos ya wa, no liga syoꞌo gan gunno xa bega.
ROM 11:22 Binbeꞌe bega xteꞌe uzheꞌeb utsin nak Dios ndoꞌ be men, no xteꞌe ntsaksi xa be men. Leꞌa xa ntsaksika bexa lá nxobgek, parea uzhebpa utsin gunno xa bega tal leꞌa bega igeꞌta ladna xa. Ná tal leꞌa bega naꞌanpa li gun, leꞌa Dios no bega kabtoꞌog.
ROM 11:23 No tal leꞌa bexa Israel igeꞌ ladna Cristo, leꞌa Dios ukeꞌal bexa leꞌaka ndoꞌ ya wa, leꞌa Dios ndap juers gun xa ta wa.
ROM 11:24 Leꞌa bego baꞌ nak cuent be xos ya olivo, ya yoꞌo ulen wa, cha mgeꞌal bega ndoꞌ ya olivo, ya wen wa. Parea leꞌa bexa Israel cuent nak be xos leꞌaka ya wen wa, ta weꞌe mas lid bid ukeꞌal Dios bexa ndoꞌ leꞌaka sa myabtoꞌog bexa wa.
ROM 11:25 Leꞌa naꞌ nlad iniꞌí bega dub ta ugaꞌach ten Dios, ndontsa lá izhinna bega: leꞌa bexa Israel myak ngud ladoꞌo na dub ndeꞌep, gast gal zha na leꞌa bexa naꞌanpa xa Israel gungea ladna Cristo, gast plo mti Dios bexa.
ROM 11:26 Weꞌe leꞌa itea bexa Israel gap gealnaban ndoꞌ Dios, lak nkeaniꞌi diꞌizh ten Dios ndab Dios: Leꞌa gezh Sion itoꞌo dub xa uxaꞌak be men, xa na koꞌo bexa Israel ndoꞌ ta ugap.
ROM 11:27 Leꞌa ta wa trat gunno naꞌ bexa, gor na utsuꞌu naꞌ be ke ten bexa.
ROM 11:28 Leꞌa kwaꞌad bexa Israel mxelad diꞌizh wen ten Cristo, ta weꞌe leꞌa bega naꞌanpa xa Israel syoꞌo gan ibii wats Dios. Ná leꞌa Dios bi nkweaꞌ ladna bexa wa leꞌa xa wa mti be usan gox polta ten bexa.
ROM 11:29 Leꞌa dub taꞌa ga nsaꞌa Dios, leꞌa xa lá ulat‑a. No liga leꞌa bexa na mti Dios, leꞌa Dios lá ulaꞌalad bexa.
ROM 11:30 Polta leꞌa bega lá nxobgek ndoꞌ Dios. Ná nat leꞌa Dios mlats ladna bega geal leꞌa bexa Israel wa lá uxobgek ndoꞌ Dios.
ROM 11:31 Nat leꞌa bexa wa lá nxobgek ndoꞌ Dios, ná leꞌa Dios ilats ladna bexa wa lak mlats ladna xa bego.
ROM 11:32 Leꞌa Dios leꞌa mluu leꞌa itea be men lá uxobgek ndoꞌ xa, ndontsa uluu xa leꞌa xa ilats ladna itea be men.
ROM 11:33 ¡Uzhebpa nyakbeꞌena Dios itea be taꞌa, no nchandoꞌ xa itea be taꞌa! ¡Naꞌan ton yoo gan iniꞌí xteꞌe ndanbeꞌe Dios, no xtaꞌan ndun xa!
ROM 11:34 ¿Ti ncho ton nyakbeꞌena ná xtaꞌan ndanbeꞌe Dios zha? ¿No ti ncho ton syoꞌo gan utenxeꞌa Dios zha?
ROM 11:35 ¿No ti ncho ton ned msaꞌa taꞌa ukaꞌa Dios zha, ndontsa juerska kix Dios ikaꞌa xa wa?
ROM 11:36 Leꞌa iteanak be ta ncho, leꞌa Dios leꞌa mbindeꞌe‑yá no ndun xa leꞌa‑yá ndun tiꞌin no nluu‑yá leꞌa xa ndon leꞌa juert nak. ¡Leꞌa Dios leꞌa nak xa ndon leꞌa siꞌil idub tiemp! Lika nak‑a.
ROM 12:1 Bego nak beuna xmen Cristo, leꞌa ta na uzheꞌeb nlats ladna Dios beuna, ta weꞌe naꞌab naꞌ ndoꞌ bega usaꞌa bega leꞌaka leꞌa bega ndoꞌ Dios, cuent dub xnab nban gak bega, ta umbiꞌi nak ndoꞌ xa, no ta nsak ladna xa. Leꞌa ta wa lak nsabndoꞌ yankea beuna Dios.
ROM 12:2 Lá gak bega lak nak be men ncho nat, ndi blaꞌa bega ucheꞌa Dios mod gunbeꞌe bega, ndontsa li igondoꞌ bega xtaꞌan nlad Dios gun bega: leꞌa ta wa ta utsin nak, no ta wen nak, no ta gaꞌal nak.
ROM 12:3 Leꞌa Dios utsin mbinno naꞌ, msaꞌa xa tiꞌin ten xa gun naꞌ. Ta weꞌe leꞌa naꞌ gáp ndoꞌ bega, leꞌa kadga bega lá gunbeꞌe leꞌa bega mas nsak ndoꞌ lakka nak bega. Ndi utsin binbeꞌe bega cuent ten leꞌaka leꞌa bega, laktsa msaꞌa Dios ngeꞌ ladna bega xa.
ROM 12:4 Leꞌa las dub men ndap sian leaꞌ na, parea naꞌanpa itea‑yá dubtsa tiꞌin ndun.
ROM 12:5 No liga leꞌa beuna kwaꞌad nak xmen Cristo, leꞌa beuna nak cuent las Cristo, no dubtsa xkwaꞌa be men nak beuna.
ROM 12:6 Leꞌa Dios nsaꞌa sian be ta ndák beuna, laktsa nlad xa usaꞌa xa‑yá ndoꞌ kadga dub beuna. Tal leꞌa Dios nsaꞌa gudiꞌizh dub xa sakndoꞌ Dios, leꞌa xa wa nsabndoꞌ li gun lak plo ngeꞌ ladna xa Dios.
ROM 12:7 No tal leꞌa stub xa ndák ndun tiꞌin ndoꞌ be ltsaꞌa xa, leꞌa xa wa nsabndoꞌ li gun tiꞌin wa. No dub xa ndák nluu be men, leꞌa xa wa nsabndoꞌ li uluu bexa.
ROM 12:8 No dub xa ndák ntenxeꞌa be men, leꞌa xa wa nsabndoꞌ li gun. No dub xa ndák nsaꞌa ta nkiꞌin stub men, leꞌa xa wa nsabndoꞌ usaꞌa‑yá dub lak ndap xa‑yá. No dub xa ndák nchansu be men, leꞌa xa wa nsabndoꞌ utsin gun ta wa. No dub xa ndák nlats ladna be men, leꞌa xa wa nsabndoꞌ iten ladna li gun xa.
ROM 12:9 No bkweaꞌ ladna bega be ltsaꞌa bega idub ncho ladna bega. No bxee ladna bega ndoꞌ ta ugap, ndi usankea bega tsoꞌo ta wen.
ROM 12:10 Utsin gok bega ndoꞌ be ltsaꞌa bega lak nsabndoꞌ gak dub xa ndoꞌ wit xa. No gop bega mod ndoꞌ be ltsaꞌa bega.
ROM 12:11 No lá ichaꞌab bega gun bega tiꞌin, ndi idub ncho ladna bega bin bega tiꞌin ten Dios Xa Nibeꞌe.
ROM 12:12 Bten ladna bega ndalen ndenkeaꞌ bega gal usoꞌ bega ta usaꞌa Dios. No bxik bega ndoꞌ be gealkweaꞌ. No gab geꞌal bidiꞌizhno bega Dios.
ROM 12:13 Gokno bega bexa no nak xmen Dios be ta nkiꞌin bexa. No utsin binno bega bexa ndiꞌid inaꞌ bega.
ROM 12:14 Leꞌa gor na ugap ndanno be men bega, unab bega ndoꞌ Dios gakno Dios bexa. Naꞌanpa inab bega iniꞌí bexa gealkweaꞌ, ndi unab bega gakno Dios bexa.
ROM 12:15 Bten ladna bega gor na ncho bexa nten ladna. No biꞌin bega gor na ncho bexa ndoꞌon.
ROM 12:16 Utsin ute bega no be ltsaꞌa bega. Lá izhinna bega, ndi bchealtsaꞌa bega bexa uban nak. No naꞌanpa izhinnona bega be ta ndák bega.
ROM 12:17 Lá ukixke bega be ta ugap ndanno be men bega, ndi bteꞌa ladna bega utsin gak bega ndoꞌ itea be men.
ROM 12:18 Tal syoꞌo gan gast plo yakea bega, wen kwe bega no itea be men.
ROM 12:19 Bego na nkweaꞌ lad naꞌ, lá ukixke bega ta ndanno dub men bega. Ndi blaꞌa bega leꞌa Dios leꞌa utsaksi xa wa, lak nkeaniꞌi diꞌizh ten Dios, ndab Dios: Leꞌa naꞌ ndee leꞌa utsaksi bexa, no ukixke naꞌ be ta ugap mbin bexa.
ROM 12:20 No ndab‑a: Leꞌa tal ton dub xa ndaklono bega, tal leꞌa xa wa ndanna, bsaꞌa bega ta gaw xa. No tal leꞌa xa ndak ladna, bsaꞌa bega ta goo xa. Weꞌe ido ladna xa no ta na ndun xa wa.
ROM 12:21 Lá ulaꞌa bega leꞌa ta ugap ndun stub men wa gun gan ndoꞌ bega, cha no bega gun ta ugap. Ndi wen binno bega bexa wa, cha li gun bega gan ndoꞌ ta ugap.
ROM 13:1 No bxobgek itea bega ndoꞌ bexa naktiꞌin, leꞌa bexa naktiꞌin wa naꞌan, tal leꞌa Dios lá igo bexa. Leꞌa itea bexa wa leꞌa Dios leꞌa mte xa.
ROM 13:2 Leꞌa tal ton nkabtoꞌo ndoꞌ bexa naktiꞌin, leꞌa xa wa ntidnsaꞌab ndoꞌ lak nlad Dios, cha iniꞌí xa gealkweaꞌ lak nsabndoꞌ‑yá.
ROM 13:3 Leꞌa bexa ndun ta wen naꞌanpa nzheb ndoꞌ bexa nak tiꞌin, ndi leꞌa bexa ndun ta ugap nzheb ndoꞌ bexa wa. Tal leꞌa bega lá nlad izheb ndoꞌ bexa naktiꞌin, utsintsa gak bega. Weꞌe leꞌa bexa wa gab leꞌa bega utsin nak.
ROM 13:4 Leꞌa Dios leꞌa ulo bexa naktiꞌin wa ndontsa gakno bexa bega. Ná tal leꞌa bega ugap gun, weꞌe bzheb bega ndoꞌ bexa wa leꞌa bexa naꞌanpa ga lbaꞌatsa ndeno spad. Leꞌa bexa wa nsoꞌ ndoꞌ tiꞌin ten Dios, ndontsa utsaksi bexa be men ndun ta ugap.
ROM 13:5 Ta weꞌe bxobgek bega ndoꞌ bexa wa, naꞌanpa ta na utsaksitsa xa bega, ndi ta na uniꞌíka bega leꞌa ta wa ta nsabndoꞌ gun bega.
ROM 13:6 No utix bega med ndoꞌ gobier lak nsabndoꞌ‑yá, leꞌa Dios leꞌa ulo bexa gun bexa tiꞌin wa.
ROM 13:7 Bsaꞌa bega ndoꞌ kad dub xa lak nsabndoꞌ‑yá: ndoꞌ bexa naktiꞌin bsaꞌa bega med lak nsabndoꞌ‑yá. No gop bega mod ndoꞌ bexa wa, no utsin bidiꞌizh bega ndoꞌ bexa wa lak nsabndoꞌ‑yá.
ROM 13:8 Naꞌanpa isaꞌab bega ndoꞌ ni dub men, ndi bkweaꞌ ladna bega be ltsaꞌa bega. Leꞌa tal ton ikweaꞌ ladna be ltsaꞌa na, leꞌa xa wa ndunka lak ndab ley ten Dios.
ROM 13:9 Ndab‑a: “Lá ugal bega stub xa naꞌanpa xa ten bega. Lá gut bega men. Lá gun bega gealwaꞌan. Lá gun bega gealkwiꞌin. Lá isaꞌab ladna bega ta ndap stub men.” Leꞌa ta gáp naꞌ ndee nak xan itea be ta wa no iteata be taꞌa unibeꞌe Dios: “Bkweaꞌ ladna lu be ltsaꞌa lu lakkata lu.”
ROM 13:10 Leꞌa tal ton nkweaꞌ ladna be ltsaꞌa na, leꞌa xa naꞌanpa ugap gunno bexa wa. Ta weꞌe tal leꞌa bega nkweaꞌ ladna be ltsaꞌa na, leꞌa bega ndunka lak nibeꞌe ley ten Dios.
ROM 13:11 Li nsabndoꞌ gun bega ta wa, leꞌa beuna uniꞌí xteꞌe nak tiemp nat. Lá gak beuna cuent dub xa naxyats, leꞌa nat leꞌa wizh ilen Cristo mas gax nak ndoꞌ zha ned mbingea ladna beuna xa.
ROM 13:12 Leꞌa nat uzhebpa nchaseala teꞌal, yamer gat stub xeꞌa. Nat yá lá gunta beuna be ta ugap nak, ta ndun be men sa ukaw. Ndi gun beuna be ta wen, ta ndun be men ndoꞌ xeꞌa.
ROM 13:13 Utsin ikesea beuna lak utsin nkesea dub xa ndoꞌ xeꞌa. Lá ikesea bega ndoꞌ be gast ncho ta ugap. No lá gun bega gealgu. No lá ugal bega stub men naꞌanpa xa ten bega. No lá gun bega be ta ugap ltsaꞌa ta wa. No lá ukwaꞌan bega uyo. No lá ixeeno ladna bega be men ta na ndap xa taꞌa.
ROM 13:14 Ndi gok bega lak nak Jesucristo Xa Nibeꞌe, yá lá ukwaꞌanta bega be ta nladtsa bega.
ROM 14:1 Utsin gok bega ndoꞌ bexa tilaw ndangea ladna Cristo, lá kuyotoꞌono bega xa.
ROM 14:2 Leꞌa ncho bexa ndab syoꞌo gan gaw itea be taꞌa, ná leꞌa ncho bexa tilaw ndangea ladna Cristo ndi ndaw xa sbeꞌen ta ugeꞌa.
ROM 14:3 Leꞌa bexa na ndaw itea be taꞌa wa lá nsabndoꞌ inisi bexa na lá ndaw‑a. No liga leꞌa bexa na lá ndaw itea be taꞌa lá nsabndoꞌga inisi bexa na ndaw ta wa, leꞌa iteanak bexa wa dubtsa nsak ndoꞌ Dios.
ROM 14:4 ¿Ton nak bego nisi bega bexa wa, bexa na no ndun tiꞌin ndoꞌ Dios? Leꞌa Dios leꞌa nak xa nibeꞌe bexa wa, gab xa tal leꞌa ta ndun bexa wa ta wen natal ta lid leꞌa nak‑a. Leꞌa Dios ndap juers ndakno xa bexa gun bexa ta wen.
ROM 14:5 Leꞌa ncho bexa ndab leꞌa dub wizh mas nsak ndoꞌ stub wizh, no ncho bexa ndab leꞌa itea be wizh parej nak. Leꞌa kadga dub beuna nsabndoꞌ iniꞌí xteꞌe ndanbeꞌe beuna cuent ten ta wa.
ROM 14:6 Leꞌa xa na ndab leꞌa dub wizh mas nsak ndoꞌ stub wizh wa, no xa na ndab leꞌa itea be wizh parej nak wa, leꞌa itop bexa wa nsak leꞌa ta ndun xa wa ta nsak ladna Dios. No liga leꞌa xa na ndaw itea be taꞌa wa no xa na lá ndaw‑a, leꞌa itop bexa wa nsak leꞌa ta ndun xa wa ta nsak ladna Dios, no nsaꞌa bexa xno ndoꞌ Dios.
ROM 14:7 Leꞌa zha nban beuna no zha gat beuna leꞌa beuna naꞌanpa leꞌa nibeꞌe beuna.
ROM 14:8 Leꞌa zha nban beuna leꞌa beuna nde ndoꞌ yaꞌa Dios. No zha gat beuna, leꞌa beuna nde ndoꞌ yaꞌaka Dios. Tal nban beuna natal gat beuna, leꞌa beuna ndeka ndoꞌ yaꞌa Dios.
ROM 14:9 Leꞌa Cristo ngut no mban xa ndontsa gak xa Xa Nibeꞌe ten bexa ngut nsea bexa nban.
ROM 14:10 ¿Parea xtaꞌan nisi bega stub xa no nak xmen Cristo zhaga? ¿No xtaꞌan ndab bega zha leꞌa bega mas nsak ndoꞌ xa wa? Leꞌa gal dub wizh leꞌa beuna itea kwe ndoꞌ Cristo.
ROM 14:11 Lak nkeaniꞌi diꞌizh ten Dios, ndab Dios: Leꞌa naꞌ gáp leꞌa itea be men isaxib ndoꞌ naꞌ. No igondoꞌ iteanak be men leꞌa naꞌ leꞌa nak Dios.
ROM 14:12 Leꞌa ta wa gab leꞌa kadga dub beuna isoꞌ ndoꞌ Dios, gab beuna ndoꞌ Dios ná xtaꞌan mbin beuna.
ROM 14:13 Ta weꞌe lá nsabndoꞌ inisi beuna stub xa no nak xmen Cristo. Ndi ulaꞌach beuna lá gun beuna dub taꞌa utsabgix xa ndoꞌ ta ugap.
ROM 14:14 Leꞌa naꞌ uní lak mluu Jesús ndoꞌ naꞌ, leꞌa ni dub ta ndaw men naꞌanpa gab Dios lá gaw beuna‑yá. Ná leꞌa tal ton gunbeꞌe leꞌa Dios lá nlad gaw xa dub taꞌa, leꞌa xa wa lá nsabndoꞌ gaw ta wa.
ROM 14:15 Ná leꞌa tal ta ndaw bega wa gun lá utsin yoo ladna dub ltsaꞌa bega, leꞌa ta wa nluu leꞌa bega naꞌanpa nkweaꞌ ladna xa wa. Leꞌa Cristo no sakndoꞌ xa wa ngut, ta weꞌe leꞌa bega lá nsabndoꞌ gaw dub taꞌa tal leꞌa ta wa utsabgix ltsaꞌa bega wa.
ROM 14:16 Tal leꞌa bexa no nak xmen Cristo gab leꞌa ta ndun bega wa ta lid leꞌa nak, yá gunta bega ta wa.
ROM 14:17 Leꞌa lak nibeꞌe Dios beuna, leꞌa ta ndaw beuna no ta ndo beuna naꞌanpa ta nsak. Leꞌa ta nsak wa ndi ta ndun beuna ta utsin nak, no wen nchono beuna be ltsaꞌa beuna, nsea nten ladna beuna, lak nsaꞌa Espíritu ten Dios.
ROM 14:18 Leꞌa tal ton bexa li gun tiꞌin ndoꞌ Cristo, leꞌa Dios isak ladna lak nak bexa wa no gab be men leꞌa bexa wenka nak.
ROM 14:19 Leꞌa beuna nsabndoꞌ gunta ta gun wen yoono beuna be ltsaꞌa beuna no ta gakno bexa wa.
ROM 14:20 Lá ulaꞌa bega leꞌa ta ndaw bega wa utsabgix stub xmen Cristo. Leꞌa itea be ta ndaw be men wa umbiꞌi nak ndoꞌ Dios, parea tal leꞌa ta ndaw beuna gun leꞌa stub xa gailaꞌ ndoꞌ ta ugap, leꞌa beuna lá nsabndoꞌ gaw ta wa.
ROM 14:21 Mas wen lá gaw beuna beꞌal, no ni lá goo beuna ta nsudna men, no ni lá gun beuna ni stub taꞌa, tal leꞌa ta wa utsabgix stub xa, natal lá utsin yoo ladna xa, natal gach ladna xa.
ROM 14:22 Leꞌa ta ndanbeꞌe bega cuent ten be ta ndee wa, leꞌa ta wa leꞌatsa bega uniꞌí nsea Dios. Uzheꞌeb wen yoo ladna bexa na uniꞌí len ladoꞌo na leꞌa utsin ndun ndoꞌ Dios.
ROM 14:23 Ná leꞌa tal ton gaw dub taꞌa ndanbeꞌe xa lá nsabndoꞌ gaw xa, leꞌa ta wa dub ke geal leꞌa xa naꞌanpa ndun lak ndanbeꞌe xa len ladoꞌo xa. Leꞌa itea be ta ndun bega tal ndanbeꞌe bega leꞌa ta wa lid leꞌa nak, leꞌa ta wa dub ke ndoꞌ Dios.
ROM 15:1 Ta weꞌe leꞌa beuna na mas nyakbeꞌena diꞌizh ten Dios nsabndoꞌ mas gap beuna mod ndoꞌ bexa tilaw ndangea ladna Cristo. Lá ukwaꞌan beuna be ta isak ladna leꞌatsa beuna.
ROM 15:2 Leꞌa kadga beuna nsabndoꞌ gakno be ltsaꞌa na ndontsa mas igeꞌ ladna bexa Dios.
ROM 15:3 Leꞌa Cristo naꞌanpa ukwaꞌan ta nladtsa xa, leꞌa lak nkeaniꞌi diꞌizh ten Dios leꞌa xa ndab ndoꞌ Dios: “Leꞌa gor na nisi bexa go, leꞌa naꞌ no kweaꞌ nyoꞌo ladna.”
ROM 15:4 Leꞌa be diꞌizh ten Dios nkea polta, leꞌa ta wa nkeaniꞌi ndontsa uluu‑yá beuna xteꞌe mas uxik beuna, no lá gach ladna beuna ndenkeaꞌ beuna gal usoꞌ beuna ta usaꞌa Dios.
ROM 15:5 Leꞌa Dios leꞌa ndun leꞌa beuna nxik, no lá ndach ladna beuna. Nat naꞌab naꞌ ndoꞌ xa wa gun xa dubtsa gak bega lak nlad Cristo Jesús,
ROM 15:6 ndontsa dubtsa gab bega leꞌa Dios uzheꞌeb dub Dios siꞌil, xa na leꞌa nak Xus Jesucristo Xwan beuna.
ROM 15:7 Leꞌa lak utsin nak Cristo ndoꞌ beuna, no liga utsin gok bega ndoꞌ be ltsaꞌa bega. Weꞌe leꞌa be men gab leꞌa Dios uzhebpa wen nak.
ROM 15:8 Leꞌa naꞌ ndáp leꞌa Cristo Jesús mbiꞌid ndoꞌ gizhliyo ndontsa gakno xa bexa Israel, mluu xa leꞌa Dios sbeꞌen gealngea ndadiꞌizh, ndunka Dios ta ndab xa ndoꞌ be usan gox polta ten bexa wa.
ROM 15:9 No mbiꞌid Cristo ndontsa leꞌa bexa naꞌanpa xa Israel usaꞌa xno ndoꞌ Dios ta na nlats ladna Dios bexa, lak nkeaniꞌi diꞌizh ten Dios, ndab‑a: Leꞌa naꞌ gáp ndoꞌ bexa naꞌanpa xa Israel leꞌa go leꞌa nak Dios. No goltoꞌo naꞌ ndoꞌ go.
ROM 15:10 No nkeaniꞌi diꞌizh ten Dios ndab‑a: Leꞌa bego bexa naꞌanpa xa Israel, bten ladna bega lak nten ladna be xmen Dios.
ROM 15:11 No nkeaniꞌi‑yá: Bsaꞌa bega xno ndoꞌ Dios, itea bego xa naꞌanpa xa Israel. Bidiꞌizh bega xteꞌe siꞌil nak xa, bego xa itea be nacion.
ROM 15:12 No stub taꞌa mkeꞌa Isaías ndab‑a: Gal zha ilen dub xa lat be xin Isaí, gak xa xa nibeꞌe bexa naꞌanpa xa Israel. Weꞌe leꞌa bexa wa igeꞌ ladna xa.
ROM 15:13 Leꞌa Dios leꞌa nak xa na usaꞌa itea be ta wen ndenkeaꞌ beuna. Nat naꞌab naꞌ ndoꞌ xa gun xa uzheꞌeb iten ladna bega no wen yoono bega be ltsaꞌa bega, bego na ndangea ladna xa wa. Li ndontsa juers ten Espíritu ten Dios leꞌa bega mas gungea ladna leꞌa Dios usaꞌaka ta ndab xa wa.
ROM 15:14 Bego nak beuna xmen Cristo, leꞌa naꞌ uníka leꞌa bega uzheꞌeb wen nak, no uniꞌí bega sian taꞌa gast gun bega gan utenxeꞌa bega be ltsaꞌa bega.
ROM 15:15 Ná leꞌa naꞌ ndee ngop valor mkeꞌa naꞌ ta ndee wa, ndontsa lá yalad bega‑yá. Leꞌa Dios uzheꞌeb wen ndanno naꞌ,
ROM 15:16 mti xa naꞌ gun naꞌ tiꞌin ten Jesucristo lat bexa naꞌanpa xa Israel, ndadiꞌizh naꞌ diꞌizh wen ten Dios ndoꞌ bexa, ndontsa gak bexa cuent dub xnab isak ladna Dios, no utsambiꞌi Espíritu ten Dios ladoꞌo bexa.
ROM 15:17 Leꞌa ta na nak naꞌ xmen Cristo Jesús leꞌa naꞌ nten ladna ndun naꞌ tiꞌin ndoꞌ Dios.
ROM 15:18 Lá ndadiꞌizh naꞌ be ta ndun naꞌ, leꞌa naꞌ ndi ndadiꞌizh ta mbinno Cristo naꞌ. Leꞌa bexa naꞌanpa xa Israel mxobgek ndoꞌ Dios gor na mbiꞌín bexa ta ndadiꞌizh naꞌ no uniꞌí bexa be ta ndun naꞌ,
ROM 15:19 be uyon mbin naꞌ juers ten Espíritu ten Dios. Ta weꞌe leꞌa diꞌizh wen ten Cristo mteꞌachso itea lad, gast Jerusalén nsea gast región Ilírico.
ROM 15:20 Leꞌa naꞌ mbin juers mbidiꞌizh naꞌ diꞌizh ten Cristo sa biseata goꞌón bexa‑yá, cuent dub xa ndandeꞌe niꞌi naꞌanpa gundeꞌe xa‑yá tsoꞌo ta mtexan xaꞌaga men.
ROM 15:21 Leꞌa ta wa lak nkeaniꞌi diꞌizh ten Dios, ndab‑a: Leꞌa bexa ncho sa na naꞌanpa ngen cuent ten xa, gal dub wizh leꞌa bexa igondoꞌ xa wa. No bexa na gol goꞌón diꞌizh ten xa wa, leꞌa bexa wa yakbeꞌena‑yá.
ROM 15:22 Leꞌa ta na li ndun naꞌ tiꞌin wa, ta weꞌe gast nat bi lá yoꞌo gan gal inaꞌ naꞌ bega.
ROM 15:23 Parea leꞌa nat leꞌa naꞌ yá msandoꞌ tiꞌin ndun naꞌ sa ndee, no sianla liꞌin nlad naꞌ gal inaꞌ naꞌ bega.
ROM 15:24 Ta weꞌe leꞌa zha na gaa naꞌ España, itiꞌid naꞌ sa ncho bega, yono naꞌ bega dub ndeꞌep. Weꞌe gakno bega naꞌ nes gaa naꞌ España.
ROM 15:25 Parea leꞌa naꞌ ned Jerusalén gaa, goo naꞌ ta gakno be xmen Cristo sa wa.
ROM 15:26 Leꞌa ta wa med myunjunt bexa Macedonia no bexa Acaya, ta ikaꞌa bexa uban nak ncho lat be xmen Cristo gezh Jerusalén.
ROM 15:27 Leꞌa bexa wa mten ladna msaꞌa bexa ta wa. Leꞌa ta wa dub ta lika nsabndoꞌ gun bexa, geal leꞌa bexa Israel mluu diꞌizh ten Dios ndoꞌ bexa be gezh xaꞌaga wa. Ta weꞌe leꞌa bexa wa liga nsabndoꞌ usaꞌa ta nkiꞌin bexa Israel wa.
ROM 15:28 Leꞌa tsoꞌo na yun naꞌ cuent med wa, gal inaꞌ naꞌ bega nes gaa naꞌ España.
ROM 15:29 Leꞌa naꞌ uní leꞌa gor na ilayal naꞌ wats bega, leꞌa Cristo gun uzhebpa wen yoo ladna beuna.
ROM 15:30 Leꞌa bego nak beuna xmen Cristo, leꞌa ta na ngeꞌ ladna beuna Jesucristo Xwan beuna, no ta na nkweaꞌ ladna beuna be ltsaꞌa beuna lak nsaꞌa Espíritu ten Dios, ta weꞌe gáp naꞌ ndoꞌ bega inab bega ndoꞌ Dios gakno xa naꞌ,
ROM 15:31 ndontsa naꞌan xtaꞌan gunno bexa Judea naꞌ, bexa lá ndangea ladna Cristo. No unab bega ndoꞌ Dios iten ladna be xmen Dios ndencho Jerusalén gor na yun naꞌ cuent med wa.
ROM 15:32 Weꞌe tal leꞌa Dios nlad, leꞌa naꞌ ilayal wats bega, no iten lad naꞌ zha wa, no une naꞌ lat bega.
ROM 15:33 Leꞌa Dios, xa ndun wen nyoꞌo ladna beuna, ulaꞌach iteanak bego baꞌ. Lika gak‑a.
ROM 16:1 No ndáp naꞌ ndoꞌ bega ta wen nak Febe, dub xagots no nak xmen Cristo, leꞌa xa no ndakno be xmen Cristo gezh Cencrea.
ROM 16:2 Utsin gok bega ndoꞌ Febe wa gor ilanseaꞌ xa sa baꞌ, lak nsabndoꞌ gak bega ndoꞌ itea bexa nak xmen Cristo. Gokno bega xa guniꞌi xtaꞌan nkiꞌin xa, leꞌa xa ndakno naꞌ lak ndakno xa kwaꞌad be men.
ROM 16:3 Unidiꞌizh bega ndoꞌ Priscila nsea ndoꞌ Aquila sakndoꞌ naꞌ, bexa ndunno naꞌ tiꞌin ten Cristo Jesús.
ROM 16:4 Leꞌa bexa wa ngokno naꞌ dub gor ngi rages ngat naꞌ, ni lá ndanbeꞌe bexa leꞌa bexa noga sat. Ta weꞌe nsa naꞌ xno ndoꞌ bexa. No liga leꞌa bexa naꞌanpa xa Israel, bexa no nak xmen Cristo, nsaꞌa xno ndoꞌ bexa wa.
ROM 16:5 No unidiꞌizh bega ndoꞌ be xmen Cristo nzhealbe ta lid Priscila no Aquila wa. Nsea unidiꞌizh bega ndoꞌ Epeneto dub xa nkweaꞌ lad naꞌ, xa ned mgeꞌ ladna Cristo región Acaya.
ROM 16:6 No unidiꞌizh bega ndoꞌ Marí, xa uzhebpa ndun tiꞌin lat bega.
ROM 16:7 No unidiꞌizh bega ndoꞌ Andrónico no ndoꞌ Junias, bexa no nak xa Israel. Leꞌa bexa wa ukeano naꞌ litgiꞌib, no uzheꞌeb wen ndun bexa tiꞌin ten apostol. Leꞌa bexa wa ned mbingea ladna Cristo ndoꞌ naꞌ.
ROM 16:8 No unidiꞌizh bega ndoꞌ Amplias dub xa nkweaꞌ lad naꞌ, xa no nak xmen Cristo.
ROM 16:9 No unidiꞌizh bega ndoꞌ Urbano, xa no ndun ltsaꞌa tiꞌin ndun naꞌ ndoꞌ Cristo Jesús. No unidiꞌizh bega ndoꞌ Estaquis xa nkweaꞌ lad naꞌ.
ROM 16:10 No unidiꞌizh bega ndoꞌ Apeles, xa wen ndun tiꞌin ten Cristo. No unidiꞌizh bega ndoꞌ bexa ncho ta lid Aristóbulo.
ROM 16:11 No unidiꞌizh bega ndoꞌ Herodión xa no nak xa Israel, no ndoꞌ bexa ncho ta lid Narciso, bexa ndangea ladna Cristo.
ROM 16:12 No unidiꞌizh bega ndoꞌ Trifena no ndoꞌ Trifosa, be xagots ndun tiꞌin ten Cristo. No unidiꞌizh bega ndoꞌ Pérsida xa no nak amig ten naꞌ, dub xagots uzhebpa ndun tiꞌin ten Cristo.
ROM 16:13 No unidiꞌizh bega ndoꞌ Rufo, dub xa na mti Dios, nsea ndoꞌ xnaꞌa xa, leꞌa naꞌ nkweaꞌ ladna xa cuentta xnaꞌa naꞌ.
ROM 16:14 No unidiꞌizh bega ndoꞌ Asíncrito nsea ndoꞌ Flegonte nsea ndoꞌ Hermas nsea ndoꞌ Patrobas nsea ndoꞌ Hermes nsea ndoꞌ bexa ncho wats bexa, bexa no nak xmen Cristo.
ROM 16:15 No unidiꞌizh bega ndoꞌ Filólogo nsea ndoꞌ Julia nsea ndoꞌ Nereo nsea ndoꞌ bsan xa no ndoꞌ Olimpas nsea ndoꞌ itea bexa ncho wats bexa wa, bexa no nak xmen Cristo.
ROM 16:16 Unidiꞌizh bega ndoꞌ be ltsaꞌa bega wa lak ta na nluu leꞌa bega nkweaꞌ ladna bexa. Leꞌa itea be xmen Cristo ndencho sa ndee no nlad inidiꞌizh ndoꞌ bega.
ROM 16:17 Bego nak beuna xmen Cristo, leꞌa naꞌ naꞌab ndoꞌ bega gap bega cuent ndoꞌ bexa nlad uteltsaꞌa bega, leꞌa bexa wa nluu be ta xaꞌaga ndoꞌ lak mtsidla bega wa. Leꞌa naꞌ gáp ndoꞌ bega lá uchealtsaꞌa bega bexa wa.
ROM 16:18 Leꞌa bexa li nak wa naꞌanpa ndun tiꞌin ten Jesucristo Xwan beuna, ndi nkwaꞌan bexa sbeꞌen ta nladtsa bexa, ndadiꞌizh bexa be diꞌizh chul no be diꞌizh uguꞌud nak, ndontsa ukwiꞌinno bexa be men lá nyakbeꞌena.
ROM 16:19 Leꞌa ta na nxobgek bega ndoꞌ Dios wa uzhebpa ngen itea lad, ta weꞌe ntenno lad naꞌ bega. Ná leꞌa naꞌ nlad list gak bega gun bega ta wen, no umbiꞌi gak bega ndoꞌ be ta ugap.
ROM 16:20 Leꞌa Dios, xa ndun wen yoo ladna beuna wa, sken usundats maxuꞌu xan ndats bega. Naꞌab naꞌ ndoꞌ Jesucristo Xwan beuna mas uzheꞌeb utsin gunno xa bega.
ROM 16:21 Leꞌa Timoteo, xa na no ndunno naꞌ tiꞌin, no nlad inidiꞌizh ndoꞌ bega. No liga leꞌa Lucio no Jasón no Sosípater, bexa Israel bexa ltsaꞌa naꞌ noga nlad inidiꞌizh ndoꞌ bega.
ROM 16:22 Leꞌa naꞌ Tercio, xa na leꞌa nsobukeꞌa git ndee sakndoꞌ Pabl, no nidiꞌizh naꞌ ndoꞌ bego nak beuna xmen Cristo.
ROM 16:23 No Gayo nidiꞌizh ndoꞌ bega. Leꞌa naꞌ Pabl nchoꞌo ta lid xa wa, no sa ndee nsaꞌa xa nzhealbe be xmen Cristo. No Erast xa nchansu med ten gezh ndee nidiꞌizh ndoꞌ bega. No Cuarto xa no nak xmen Cristo nidiꞌizh ndoꞌ bega.
ROM 16:24 Naꞌab naꞌ ndoꞌ Jesucristo Xwan beuna mas uzheꞌeb utsin gunno xa iteanak bega. Lika gak‑a.
ROM 16:25 Leꞌa Dios leꞌa sun gan dubtsa kwe bega lak nak diꞌizh wen ten Jesucristo ta ndadiꞌizh naꞌ. Leꞌa diꞌizh wa ta ugaꞌach ten Dios ta mluu xa ndoꞌ beuna, dub ta idub polta naꞌanpa nchandoꞌ be men.
ROM 16:26 Ná nat leꞌa beuna nchandoꞌ ta wa lak mkeꞌa be profet polta, bexa mbidiꞌizh sakndoꞌ Dios. Leꞌa Dios, xa na nban idub tiemp, unibeꞌe ndoꞌ bexa wa li ukea bexa, ndontsa gungea ladna itea be men Dios no uxobgek bexa ndoꞌ Dios.
ROM 16:27 Nat leꞌa juers ten ta ndun Jesucristo leꞌa beuna gab leꞌa Dios ndon leꞌa xa ndák, no leꞌakama xa nak Dios idub tiemp. Lika nak‑a.
1CO 1:1 Leꞌa naꞌ ndee Pabl, xa mti Dios no mtuꞌub xa naꞌ gun naꞌ tiꞌin ten Jesucristo. Leꞌa naꞌ nsea Sóstenes xa no nak xmen Cristo,
1CO 1:2 nkeꞌa besa git ndee ndoꞌ bego nak xmen Dios nzhealbe gezh Corinto baꞌ. Leꞌa Dios mtsambiꞌi ladoꞌo bego nak xmen Cristo Jesús. No utezh Dios bega umbiꞌi gak bega, lak umbiꞌi nak itea bexa ngeꞌ ladna Jesucristo, guniꞌi pa ncho bexa. Leꞌa xa wa nak Xa Nibeꞌe ten bexa wa no beuna.
1CO 1:3 Naꞌab naꞌ ndoꞌ Tad Dios no ndoꞌ Jesucristo Xa Nibeꞌe utsin gak bexa ndoꞌ bega, no gun bexa wen yoo ladna bega.
1CO 1:4 Nsa tseꞌe naꞌ xno ndoꞌ Dios, leꞌa Dios uzhebpa wen ndanno bega nak xmen Cristo Jesús.
1CO 1:5 Leꞌa ta na nak bega xmen Cristo wa, leꞌa Dios uzhebpa nsaꞌa be ta nsak ndoꞌ bega: leꞌa ta wa ta ndadiꞌizh bega no ta ndák bega.
1CO 1:6 Leꞌa bega ndangeaka ladna diꞌizh ten Cristo,
1CO 1:7 ta weꞌe leꞌa Dios msaꞌaga ta ndák kadga dub bega, yá naꞌan xtaꞌan ndun jwalt lat bega, ndalen ndenkeaꞌ beuna gal zha ilengal Jesucristo Xa Nibeꞌe.
1CO 1:8 Leꞌa Dios gakno bega gaꞌal kwe bega gast wizh lult, naꞌanpa gap bega ke ndoꞌ Dios gal zha ilen Jesucristo Xwan beuna.
1CO 1:9 Leꞌa Dios ndunka be ta ndab xa gun xa. Leꞌa xa leꞌa mti bega yoo bega wats Xin xa, Jesucristo Xwan beuna.
1CO 1:10 Bega nak beuna xmen Jesús, leꞌa ta na nak naꞌ xmen Jesucristo, leꞌa naꞌ naꞌab ndoꞌ bega dubtsa gunbeꞌe bega no naꞌanpa yak bega top partid. Utsin gok bega ndoꞌ be ltsaꞌa bega no dubtsa gok bega.
1CO 1:11 Li ndáp naꞌ geal leꞌa be ltsaꞌa Cloé ndab ndoꞌ naꞌ leꞌa lat bega ncho bexa nyotoꞌono be ltsaꞌa na.
1CO 1:12 Leꞌa lat bego baꞌ ncho bexa ndab leꞌa xa nak xmen Pabl; no nchoga bexa ndab leꞌa xa nak xmen Apolos; no ncho xa ndabga leꞌa xa xmen Pedr; no stub xkwaꞌaga bexa ndab leꞌa xa nak xmen Cristo.
1CO 1:13 ¡Leꞌa naꞌ gáp ndoꞌ bega leꞌa be xmen Cristo lá nsabndoꞌ gak pla xkwaꞌa na! ¡No naꞌanpa naꞌ ndee ukea ndoꞌ cruz sakndoꞌ bega! ¡No naꞌanpa italeaꞌ bega por na gak bega xmen naꞌ!
1CO 1:14 Nsa naꞌ xno ndoꞌ Dios leꞌa naꞌ naꞌanpa igoleaꞌ ni dub bega, nabtsa Crispo nsea Gayo ulaleaꞌ naꞌ.
1CO 1:15 Weꞌe naꞌan ton syoꞌo gan gab leꞌa utaleaꞌ natsa gak xa xmen naꞌ.
1CO 1:16 No ulaleaꞌ naꞌ bexa ta lid Estéfanas, parea nsak naꞌ lá igoleaꞌta naꞌ ni stub xa.
1CO 1:17 Leꞌa Cristo naꞌanpa mtuꞌub naꞌ koleaꞌ naꞌ be men, leꞌa xa ndi mtuꞌub naꞌ gal yadiꞌizh naꞌ diꞌizh wen ten xa. Leꞌa naꞌ naꞌanpa ndadiꞌizh ta gal ladna be men, leꞌa naꞌ ndi nlad iniꞌí bexa leꞌa ta na ngut Cristo ndoꞌ cruz wa dub ta mas nsak.
1CO 1:18 Leꞌa cuent ten bexa na lá gap gealnaban ndoꞌ Dios, leꞌa ta na ngut Cristo ndoꞌ cruz wa dub ta tont. Ná leꞌa cuent ten beuna, bexa na ndap gealnaban ndoꞌ Dios wa, leꞌa ta wa nluu ta juert nak Dios.
1CO 1:19 Lak nkeaniꞌi diꞌizh ten Dios, ndab Dios: Leꞌa naꞌ unitndoꞌ ta ndák bexa ndab leꞌa mas ndák, no uxelad naꞌ be ta nyakbeꞌena bexa wa.
1CO 1:20 ¿Xtiꞌin bexa ndák, no bexa ntsid, no bexa ndadiꞌizh be ta ten gizhliyo ndee zha? Leꞌa cuent ten Dios leꞌa ta ndák bexa wa ta tont.
1CO 1:21 Leꞌa lak ndák Dios wa, leꞌa xa lá ulaꞌa igondoꞌ be men xa laktsa ndák bexa. Leꞌa xa ndi nsaꞌa gealnaban ndoꞌ bexa ndangea ladna diꞌizh ten xa, dub ta na ndab be men leꞌa‑yá ta tont.
1CO 1:22 Leꞌa bexa judio nlad iniꞌí dub uyon gun Dios, no bexa naꞌanpa xa judio nlad goꞌón dub diꞌizh wen.
1CO 1:23 Parea leꞌa besa ndee ndi ndadiꞌizh leꞌa Cristo ngut ndoꞌ cruz sakndoꞌ beuna. Leꞌa bexa judio ndakloo ndoꞌ ta wa. No leꞌa bexa naꞌanpa xa judio wa nsak leꞌa ta wa ta tont.
1CO 1:24 Ná leꞌa cuent ten bexa na mti Dios, guniꞌi tal xa judio xa natal xa naꞌanpa xa judio xa, leꞌa ta na li ngut Cristo wa leꞌa nluu ta juert nak Dios nsea ta ndák Dios.
1CO 1:25 Leꞌa be men ndab leꞌa ta na li ngut Cristo wa dub ta tont, parea leꞌa Dios mas ndák ndoꞌ itea be men. Ndab bexa leꞌa Dios uleꞌa nak, parea leꞌa Dios mas juert nak ndoꞌ itea be men.
1CO 1:26 Bego nak beuna xmen Cristo, btseꞌa ladna bega leꞌa Dios mti bega maska uxeema bega ndák lak ndák be men, nsea uxeema bega nibeꞌe, nsea uxeema bega nsak.
1CO 1:27 Leꞌa Dios ndi mti bexa ndab be men xa naꞌanpa ndák, ndontsa ido ladna be men ndák. Nsea mti Dios bexa ndab be men uleꞌa nak, ndontsa ido ladna bexa juert nak.
1CO 1:28 Nsea mti Dios bexa ndab be men xa naꞌan xtiꞌin no bexa nxelad be men no bexa naꞌanpa nsak, ndontsa uluu Dios leꞌa ta nsak ndoꞌ gizhliyo ndee wa ta naꞌanpa nsak cuent ten Dios.
1CO 1:29 Ta weꞌe naꞌan ton nsabndoꞌ izhinna ndoꞌ Dios.
1CO 1:30 Leꞌa Dios myunno bega xmen Cristo Jesús, no msaꞌa xa ta ndák beuna lak ndák Cristo. Leꞌa juers ten Cristo leꞌa beuna wen nyaꞌan ndoꞌ Dios, no umbiꞌi nak ladoꞌo beuna ndoꞌ Dios, no uloꞌo xa beuna ndoꞌ be ke ten beuna.
1CO 1:31 Leꞌa ta wa lak nkeaniꞌi diꞌizh ten Dios, ndab‑a leꞌa tal ton nlad izhinna, ndi izhinnona xa ta mbin Dios.
1CO 2:1 Leꞌa bego nak beuna xmen Cristo, leꞌa zha na ngwalyadiꞌizh naꞌ diꞌizh ten Dios ndoꞌ bega, leꞌa naꞌ naꞌanpa ngudiꞌizh be diꞌizh ugan no lá nguntiꞌin naꞌ be diꞌizh nsak.
1CO 2:2 Ndi mbinbe naꞌ gudiꞌizh naꞌ sbeꞌen cuent ten Jesucristo, no ta na ngut xa ndoꞌ cruz.
1CO 2:3 Leꞌa gor na usoꞌ naꞌ lat bega mbin naꞌ cuent dub xa lá nsak, no gast nxis naꞌ tant nzheb naꞌ.
1CO 2:4 Leꞌa gor na mbidiꞌizh naꞌ diꞌizh ten Cristo ndoꞌ bega, naꞌanpa ngudiꞌizh naꞌ diꞌizh uguꞌud lak be taꞌa ndák be men. Leꞌa Espíritu ten Dios ndi mluu ndoꞌ bega leꞌa ta mbidiꞌizh naꞌ wa ta ugeaka,
1CO 2:5 ndontsa naꞌanpa igeꞌ ladna bega ta ndák be men, ndi mgeꞌ ladna bega juers ten Dios.
1CO 2:6 Parea leꞌa ndoꞌ be men mas ngeꞌ ladna Dios, leꞌa besa ndadiꞌizhka lak ndák Dios. Ná leꞌa ta wa naꞌanpa lak nak ta ndák be men nde ndoꞌ gizhliyo ndee, ni ta ndák bexa nibeꞌe, leꞌa ta ndák bexa wa ta initndoꞌ.
1CO 2:7 Leꞌa besa ndi ndadiꞌizh ta ndák Dios, dub ta tilaw mluu Dios ndoꞌ be men. Leꞌa zha biseata gakndeꞌe gizhliyo, leꞌa Dios mbinbeꞌe usaꞌa xa ta wa ndoꞌ beuna ndontsa no beuna yoo wats xa.
1CO 2:8 Leꞌa ta wa dub ta naꞌanpa nchandoꞌ be men nibeꞌe ndoꞌ gizhliyo ndee. Leꞌa tal xa igondoꞌ‑yá leꞌa bexa naꞌanpa ukeꞌa Cristo ndoꞌ cruz.
1CO 2:9 Leꞌa ta wa lak nkeaniꞌi diꞌizh ten Dios, ndab‑a: Be taꞌa naꞌan ton gol iniꞌí, no ni naꞌan ton gol goꞌón‑a, no ni naꞌan ton gol gunbeꞌe‑yá, leꞌa Dios leꞌa msaxkwaꞌa ta wa, usaꞌa xa‑yá ndoꞌ bexa ndankea xa.
1CO 2:10 Parea leꞌa Dios mluu be ta ndee wa ndoꞌ beuna juers ten Espíritu ten Dios, leꞌa Espíritu wa ngoxnes iteanak be taꞌa gast be ta mas ndák Dios.
1CO 2:11 Naꞌan ton iniꞌí xtaꞌan ndanbeꞌe stubga xa; ndon leꞌakama xa uniꞌí ta ndanbeꞌe xa wa. No liga leꞌa Espíritu ten Dios ndon leꞌakama uniꞌí ta ndanbeꞌe Dios.
1CO 2:12 Leꞌa beuna naꞌanpa ndanbeꞌe lak ndanbeꞌe be men gizhliyo, leꞌa beuna ndi ndap Espíritu msaꞌa Dios, ndontsa yakbeꞌena beuna ta wen nsaꞌa Dios ndoꞌ beuna.
1CO 2:13 Leꞌa ta na li ndadiꞌizh besa wa naꞌanpa be diꞌizh ndáktsa be men, leꞌa‑yá ndi be diꞌizh msaꞌa Espíritu ten Dios ndoꞌ besa. Li ndadiꞌizh besa be diꞌizh ten Espíritu ten Dios ndoꞌ bexa na ncho Espíritu wa len ladoꞌo na.
1CO 2:14 Leꞌa tal ton naꞌanpa nchandoꞌ Dios, leꞌa xa wa naꞌanpa ndangea ladna diꞌizh ten Espíritu ten Dios, leꞌa cuent ten xa leꞌa ta wa dub ta tont. No ni lá yoo gan yakbeꞌena xa‑yá, leꞌa Espíritu ten Dios leꞌa nsaꞌa ta yakbeꞌena bexa‑yá.
1CO 2:15 Ná leꞌa bexa ncho Espíritu ten Dios len ladoꞌo na, leꞌa bexa wa nyakbeꞌena xtaꞌan be ta wen no xtaꞌan be ta ugap. Parea leꞌa be men gizhliyo lá nyakbeꞌena xteꞌe nak bexa ncho Espíritu ten Dios len ladoꞌo na wa.
1CO 2:16 Lak nkeaniꞌi diꞌizh ten Dios, ndab‑a: ¿Tonma gun gan igondoꞌ ta ndanbeꞌe Dios zha? ¿Tonma isuꞌu ndi leꞌa utenxeꞌa Dios zha? Parea leꞌa beuna ndi ndanbeꞌe lak ndanbeꞌe Cristo.
1CO 3:1 Bego nak beuna xmen Cristo, uyoꞌo dub tiemp leꞌa naꞌ ndee lá yoꞌo gan ngudiꞌizh ndoꞌ bega lak ndadiꞌizh naꞌ ndoꞌ be men ncho Espíritu ten Dios. Ndi mbidiꞌizh naꞌ ndoꞌ bega lak ndadiꞌizh naꞌ ndoꞌ be men gizhliyo, cuent dub xa tiꞌi mbingea ladna Cristo.
1CO 3:2 Leꞌa naꞌ mbidiꞌizh dub ta ndon leꞌa mas uyaꞌal nak ndoꞌ bega, geal leꞌa bega lá yoꞌo gan yakbeꞌena be ta mas ugan, cuent dub medoꞌo bi lá isuꞌu gaw. No gast nat bi lá gunka bega gan yakbeꞌena bega‑yá.
1CO 3:3 Leꞌa bega bi nkwaꞌan be ta nladtsa bega, leꞌa ncho bega nxee ladna ndoꞌ stub men ke ten ta ndap xa, nsea nkwaꞌan bega uyo, no nlad bega yak bega top partid. Leꞌa ta wa nluu leꞌa bega ndun lakka ndun be men gizhliyo.
1CO 3:4 Leꞌa ncho bega ndab leꞌa bega xmen naꞌ, no ncho bega ndab leꞌa bega xmen Apolos. Leꞌa ta na li ndun bega wa nluu leꞌa bega nkwaꞌan ta nladtsa bega.
1CO 3:5 ¿Lá iniꞌí bega zha leꞌa Apolos wa nsea naꞌ ndee, leꞌa kadga dub besa ndun tiꞌin laktsa nlad Dios, ndontsa mbingea ladna bega Dios?
1CO 3:6 Leꞌa naꞌ ndee cuent dub xa ngos dub taꞌa, leꞌa Apolos cha mkaꞌal‑a, parea leꞌa Dios leꞌa mbin ngoꞌol‑a.
1CO 3:7 Leꞌa ta wa nluu leꞌa ni men ndas‑a wa no ni men nkaꞌal‑a wa naꞌanpa xa nsak, ndi Dios xa na ndun gaꞌal‑a wa, xa weꞌe xa nsakka.
1CO 3:8 Leꞌa bexa ndas diꞌizh wa no bexa nkaꞌal‑a, leꞌa bexa wa dubtsa nakbe. Leꞌa Dios kix ta ikaꞌa bexa wa kadga tiꞌin ndun bexa.
1CO 3:9 Leꞌa itop besa ltsaꞌa na junt ndun besa tiꞌin ten Dios. Leꞌa bega nak cuent dub bleꞌa yo ten Dios sa ndun besa tiꞌin, nsea cuent dub niꞌi ndandeꞌe Dios.
1CO 3:10 Leꞌa lak mluu Dios naꞌ, mbidiꞌizh naꞌ diꞌizh ten Dios ndoꞌ bega. Leꞌa naꞌ cuent dub mech mtexan dub niꞌi. Leꞌa stub xa mbindeꞌe‑yá tsoꞌo ná li mtexan naꞌ wa. Parea kadga dub men ulaꞌach xteꞌe gundeꞌe xa ná ten xa.
1CO 3:11 Leꞌa naꞌan ton yoo gan utexan stub‑a ndoꞌ lak ta na yá utexanla wa, leꞌa xan‑a wa nak Jesucristo.
1CO 3:12 Leꞌa tsoꞌo ta li utexanla wa, syoꞌo gan gundeꞌe xa‑yá oro, natal plata, natal be geꞌ chul, natal ya, natal gixgi, natal yalod.
1CO 3:13 Parea gal wizh ilengal Jesucristo, leꞌa tiꞌin mbin kadga dub beuna wa uluu. Leꞌa xa ilen no giꞌ, leꞌa giꞌ wa leꞌa gun preb tiꞌin na mbin beuna wa.
1CO 3:14 Leꞌa tal ta mbindeꞌe beuna wa lá yolꞌ ndoꞌ giꞌ wa, weꞌe leꞌa Dios kix ikaꞌa xa mbindeꞌe‑yá wa.
1CO 3:15 Ná tal leꞌa tiꞌin mbin xa wa yolꞌ, leꞌa tiꞌin wa initndoꞌ, parea leꞌa xa wa sapka gealnaban ndoꞌ Dios. Leꞌa xa wa gak cuent dub xa mxoꞌon sa nsayolꞌ lid na.
1CO 3:16 ¿Cha lá iniꞌí bega leꞌa bega nak niꞌi ten Dios zha, leꞌa Espíritu ten Dios ncho len ladoꞌo bega?
1CO 3:17 Tal ton utsabgix bexa nak niꞌi ten Dios, leꞌa Dios utsaksi men wa, leꞌa bega nak dub niꞌi umbiꞌi ten Dios.
1CO 3:18 Naꞌanpa ukwiꞌinno bega leꞌaka bega. Lá gunbeꞌe bega leꞌa bega nak be men ndák ndoꞌ gizhliyo ndee. Ndi gok bega cuent dub xa naꞌanpa ndák be ta gizhliyo, ndontsa gak bega dub xa ndákka ndoꞌ Dios.
1CO 3:19 Leꞌa ta na ndák be men ndoꞌ gizhliyo ndee wa, leꞌa cuent ten Dios leꞌa ta wa dub ta lá isuꞌu, lak nkeaniꞌi diꞌizh ten Dios: Leꞌa Dios gun ilayat be men ndoꞌ leꞌaka ta ndák bexa.
1CO 3:20 No ndab‑a: Leꞌa Dios uniꞌí leꞌa ta ndanbeꞌe be men ndák wa, leꞌa ta wa sbeꞌen be ta lá isuꞌu.
1CO 3:21 Ta weꞌe ni dub bega lá izhinnona ta nak bega partid ten dub men, leꞌa itea be ta ndee ta ten bega:
1CO 3:22 leꞌa naꞌ ndee no Apolos no Pedr no gizhliyo no gealnaban no gealgut no iteata be taꞌa ncho nat no be ta tiꞌi ilen. Leꞌa itea be ta ndee wa ta ten bega.
1CO 3:23 Leꞌa bega xa ten Cristo, leꞌa Cristo xa ten Dios.
1CO 4:1 Ta weꞌe leꞌa bego baꞌ nsabndoꞌ iniꞌí leꞌa besa naktsa dub xa nduntsa tiꞌin ten Cristo, nluutsa besa diꞌizh ten xa, dub ta polta naꞌanpa nchandoꞌ be men.
1CO 4:2 Leꞌa tal ton gun tiꞌin ten stubga men nsabndoꞌ utsin gun xa tiꞌin wa.
1CO 4:3 Leꞌa cuent ten naꞌ naꞌan xtiꞌin ta ndab bega no stapla be men xteꞌe nak ta ndun naꞌ. Ni naꞌ naꞌanpa gáp xteꞌe nak ta ndun leꞌaka naꞌ, tal utsin nak‑a natal naꞌan.
1CO 4:4 Leꞌa len ladoꞌo naꞌ nsak naꞌ leꞌa naꞌ naꞌan xá ke naꞌ ndap, ná leꞌa ta wa naꞌanpa gab leꞌa naꞌ utsin nak cuent ten Dios. Leꞌa Dios leꞌa gab xteꞌe nak ta ndun naꞌ.
1CO 4:5 Ta weꞌe naꞌanpa gab bega ton xa utsin no ton xa ugap. Ndi kweas bega gast zha ilen Cristo, leꞌa xa wa uluu be ta ugaꞌach. Leꞌa xa uluu ná xtaꞌan ndanbeꞌe kadga dub men len ladoꞌo na. Weꞌe leꞌa Dios gab kadga be ta wen mbin beuna.
1CO 4:6 Bego nak beuna xmen Cristo, leꞌa naꞌ ndee nkweaꞌ ladna bega, ta weꞌe nkeꞌa naꞌ be ta ndee wa ndontsa iwiꞌi bega xteꞌe ndun Apolos no xteꞌe ndun naꞌ. Cha li gun bega lak ndun besa laktsa ndab diꞌizh ten Dios, naꞌanpa gun bega stub ta xaꞌaga. No naꞌanpa gab bega leꞌa bega mas nsak ndoꞌ stubga xa.
1CO 4:7 ¿Ton ndab leꞌa bega mas nsak ndoꞌ be ltsaꞌa bega zha? ¿Lá iniꞌí bega zha leꞌa Dios leꞌa nsaꞌa itea taꞌa ndap bega? Ná tal xa leꞌa msaꞌa‑yá, ¿cha xtaꞌan nzhinna bega zha cuent dub taꞌa begotsa ndák?
1CO 4:8 Nat leꞌa bega nsak leꞌa bega ndap itea taꞌa, yá naꞌan xtaꞌan ndun jwalt. Nsak bega leꞌa bega nibeꞌela, yá naꞌanta xtaꞌan gunno bega besa. Nlad naꞌ malay gak bega dub xa ta ugeaka nibeꞌe, ndontsa no besa gak xa nibeꞌe wats bega.
1CO 4:9 Parea leꞌa naꞌ nsak leꞌa Dios mbinno besa nak apostol wa cuent dub xa naꞌanpa nsak, cuent dub xa ndap ke nsabndoꞌ gat xa. Leꞌa itea be men no be angel nlad iwiꞌi xtaꞌan yoo besa.
1CO 4:10 Leꞌa be men ndab leꞌa besa xa tont ta na ndun besa tiꞌin ndoꞌ Cristo; ná leꞌa bego ndanbeꞌe leꞌa bega nak be men ndák ten Cristo. Leꞌa be men ndab leꞌa besa uzhebpa be men uleꞌa nak; ná leꞌa bego ndanbeꞌe leꞌa bega uzhebpa xa juert nak. Leꞌa be men ndap mod ndoꞌ bego, parea nxelad bexa besa ndee.
1CO 4:11 Gast nat bi ntid yanna besa, no ntid yak ladna besa, no lá ndap besa sian xab besa, no ugap ndanno be men besa, no ni lá ndap besa sa yoo besa.
1CO 4:12 No uzhebpa nzhanna besa tant ndun besa tiꞌin yaꞌa besa. Ncho bexa kweaꞌ níꞌi ndoꞌ besa, ná besa ndi nab ndoꞌ Dios gakno Dios bexa. No ncho bexa ugap ndanno besa, ná besa ndi nxikka.
1CO 4:13 No ncho bexa nisi besa, ná besa ndi utsin nkaꞌab. Gast wizh nat ndanno bexa besa cuent dub gix, dub ta naꞌan xtiꞌin ndoꞌ gizhliyo ndee.
1CO 4:14 Nkeꞌa naꞌ be ta weꞌe naꞌanpa ndontsa ido ladna bega, ndi ndontsa iwiꞌi bega xteꞌe gun bega, cuentta dub xiꞌín naꞌ nkweaꞌ lad naꞌ bega.
1CO 4:15 Maska ncho dub tiꞌi mil men nluu bega diꞌizh ten Cristo, parea naꞌanpa ncho kwaꞌad xa cuent xus bega. Leꞌa gor na mbidiꞌizh naꞌ diꞌizh wen ten Cristo Jesús ndoꞌ bega, leꞌa bega li myak cuent dub xiꞌín naꞌ.
1CO 4:16 Nat naꞌab naꞌ ndoꞌ bega bin bega laktsa ndun naꞌ wa.
1CO 4:17 Ta weꞌe mtuꞌub naꞌ Timoteo ndoꞌ bega, xa na nkweaꞌ lad naꞌ cuentta dub xiꞌín naꞌ, no utsin ndun xa tiꞌin ten Cristo. Leꞌa xa wa gun utseꞌa ladna bega be ta ndun naꞌ ta na nak naꞌ xmen Cristo, lak nluu naꞌ be men itea lad sa nzhealbe be xmen Cristo.
1CO 4:18 Ncho bega nzhinna, ndanbeꞌe bega leꞌa naꞌ naꞌankapa gal inaꞌ bega.
1CO 4:19 Parea leꞌa naꞌ skenka gal inaꞌ bega tal leꞌa Dios nlad. Weꞌe iní naꞌ tal leꞌa bexa zhin wa ndap juers ten Dios natal ta ndadiꞌizhtsa bexa‑yá.
1CO 4:20 Leꞌa tal ton ncho ndoꞌ yaꞌa Dios, leꞌa xa wa ndun ta nlad Dios, naꞌanpa sbeꞌen diꞌizhtsa ndadiꞌizh xa.
1CO 4:21 ¿Xteꞌe nlad bega gal naꞌ zha? ¿Galteyo naꞌ bega, ná ti ndi diꞌizh utsin gal yáp naꞌ ndoꞌ bega?
1CO 5:1 Leꞌa naꞌ mbín leꞌa lat bega wa ncho dub xabgiꞌi ngal leꞌaka xagots ten xus xa. Leꞌa ta wa uzhebpa dub ta ugap, leꞌa ni bexa lá nchandoꞌ Dios naꞌanpa li ndun.
1CO 5:2 Ná leꞌa bega bi uzhebpa nzhinna. ¿Lá iniꞌí bega zha leꞌa bega nsabndoꞌ ndi uban yoo ladna, no koꞌo bega xa li ndun wa lat bega?
1CO 5:3 Leꞌa naꞌ naꞌanpa nsoꞌ sa baꞌ, parea leꞌa naꞌ nsak cuent nsoꞌka naꞌ wats bega sa baꞌ. No uníka naꞌ xteꞌe nsabndoꞌ gunno bega xa li ndun wa.
1CO 5:4 Leꞌa ta na nak beuna xmen Jesucristo Xwan beuna, leꞌa gor na yakjunt bega, leꞌa naꞌ cuent noka nsoꞌ lat bega, nsea utseꞌa ladna bega leꞌa Jesucristo Xwan beuna msaꞌa juers ten xa ndoꞌ bega.
1CO 5:5 Cha yun bega cuent xa li ndun wa ndoꞌ yaꞌa maxuꞌu. Weꞌe iniꞌí xa gealkweaꞌ, ndontsa ulaꞌa xa ta ugap li ndun xa wa, cha gap xa gealnaban gal zha ilen Cristo Xwan beuna.
1CO 5:6 Leꞌa bega naꞌanpa nsabndoꞌ izhinnona ta ndun xa wa. ¿Lá iniꞌí bega zha leꞌa dub tuzh levadur nsabich sian koꞌob arin?
1CO 5:7 Ta weꞌe ulantuꞌub bega xa ugap wa, ndontsa yak bega cuent dub koꞌob kub naꞌanpa noch levadur. Leꞌa Cristo ngut ndontsa myuꞌu be ke ten beuna, leꞌa xa cuent nak dub borreg ten ujest Pascua.
1CO 5:8 Leꞌa ujest Pascua leꞌa bexa judio lá ndantiꞌin levadur. No liga leꞌa beuna nsabndoꞌ ulaꞌa be ta ugap nak beuna. Cha ndi umbiꞌi gak ladoꞌo beuna nsea gaꞌal gak beuna ndoꞌ Dios, lak ndaw bexa judio be pan lá ndoch levadur tiemp ten Pascua wa.
1CO 5:9 Leꞌa naꞌ mtuꞌubla dub git ndoꞌ bega ndab ndoꞌ git wa lá uchealtsaꞌata bega bexa ngal stub men naꞌanpa xa ten xa.
1CO 5:10 Leꞌa naꞌ naꞌanpa gáp iteltsaꞌa bega iteanak be men ndun ta ugap wa, leꞌa idub ndoꞌ gizhliyo ncho bexa ngal dub xa naꞌanpa xa ten xa, no bexa nsaꞌab ladna gap sian taꞌa, no bexa ndun gealwaꞌan, no bexa ndankea be dios gizhliyo.
1CO 5:11 Leꞌa ta mkeꞌa naꞌ wa ndi gab lá uchealtsaꞌa bega ni dub be men na ndab leꞌa xa dub xmen Cristo, tal leꞌa xa wa nkeseano stub xa naꞌanpa xa ten xa, natal xa nsaꞌab ladna gap sian taꞌa, natal xa ndankea be dios gizhliyo, natal xa kweaꞌ níꞌi ndoꞌ be men, natal xa ndun gealgu, natal xa ndun gealwaꞌan. Leꞌa dub men li nak wa, gast ni lá gawno bega.
1CO 5:12 Leꞌa naꞌ lá nsabndoꞌ ulach xteꞌe nak bexa lá nchandoꞌ Cristo. Ná leꞌa bego baꞌ nsabndoꞌ ulaꞌach xteꞌe nak bexa ncho lat bega, bexa yá nak bega xmen Cristo.
1CO 5:13 Leꞌa Dios leꞌa gab xteꞌe nak ta ndun bexa lá nchandoꞌ Dios. Ta weꞌe uloꞌo bega xa li ugap nak wa lat bega.
1CO 6:1 Leꞌa zha na nyono bega stub ltsaꞌa bega, xa no nak xmen Cristo, ¿cha xtaꞌan ndaꞌyab bega‑yá ndi ndoꞌ dub juez lá nchandoꞌ Dios gun regl ta wa zha? ¿Cha xtaꞌan lá ndab bega‑yá ndoꞌ bexa nak xmen Dios gun regl ta wa zha?
1CO 6:2 ¿Lá iniꞌí bega zha leꞌa gal dub wizh leꞌa be xmen Dios leꞌa gun regl ta ten be men lá nchandoꞌ Dios zha? Leꞌa tal bega li gun regl ta wa, ¿xteꞌe lá isuꞌu bega gun bega regl be ta byux ndee zha?
1CO 6:3 ¿Lá iniꞌí bega leꞌa beuna leꞌa gun regl gast be ta ten be angel wa zha? Ta weꞌe leꞌa beuna nsabndoꞌ leꞌatsa gun regl be ta ncho ndoꞌ gizhliyo ndee.
1CO 6:4 Weꞌe tal leꞌa bega ndap dub uyo ndoꞌ gizhliyo ndee, ¿cha xtaꞌan ndaꞌtsoꞌ bega ndoꞌ dub xa lá nchandoꞌ Dios wa gun regl ta ten bega zha?
1CO 6:5 Leꞌa naꞌ gáp ta ndee wa ndontsa ido ladna bega: ¿Cha naꞌan ni dub xa ndák lat bega zha, dub xa suꞌu gun regl dub uyo lat bego nchandoꞌ Dios?
1CO 6:6 Ná leꞌa bega nyono ltsaꞌa na, no gast ndaꞌno bega uyo ten bega ndoꞌ dub juez, dub xa lá nchandoꞌ Dios.
1CO 6:7 Ta ugeaka leꞌa ta na li nyono bega leꞌaka ltsaꞌa bega wa dub ta ugap ndun bega. ¿Xtaꞌan naꞌanpa uxiktsa bega nsea ta ndanno stub xa bega zha? Mas wen ulaꞌa bega gowaꞌan bexa be ta ndap bega.
1CO 6:8 Parea leꞌa bega ndi no ugap ndun, no ndowaꞌan bega ta ndap leꞌaka ltsaꞌa bega nak xmen Cristo.
1CO 6:9 ¿Lá iniꞌí bega zha leꞌa be men ndun be ta ugap wa lá yoo gan yate sa nibeꞌe Dios? Lá ulaꞌa bega ukwiꞌinno be men bega. Leꞌa ncho bexa ngal xa ten stubga men, no ncho bexa ndankea be dios gizhliyo, no ncho bexa ndapka xa ten na ná ngalga xa stub xa, no ncho be xabgiꞌi ngal ltsaꞌa bgiꞌi na,
1CO 6:10 no ncho bexa ndun gealwaꞌan, no ncho bexa nsaꞌab ladna gap sian taꞌa, no ncho bexa ndun gealgu, no ncho bexa kweaꞌ níꞌi ndoꞌ be men, no ncho bexa nkwiꞌinno be men. Leꞌa itea bexa li nak wa lá yoo gan yate sa nibeꞌe Dios.
1CO 6:11 Leꞌa polta leꞌa ncho bega no mbin be ta ndee wa, parea leꞌa nat leꞌa Dios mtsuꞌu be ke ten bega, nsea mtsambiꞌi Dios ladoꞌo bega, nsea mbin Dios wen myaꞌan bega ndoꞌ Dios ta na mbingea ladna bega Jesús Xwan beuna, no ta na ncho Espíritu ten Dios len ladoꞌo bega.
1CO 6:12 Ncho be men ndab leꞌa bexa syoꞌo gan gun guniꞌi xtaꞌan nlad bexa. Ugeaka leꞌa‑yá syoꞌo gan, parea naꞌanpa itea‑yá ta nsabndoꞌ. Leꞌa naꞌ syoꞌoka gan gun be ta nlad naꞌ, parea lá ula naꞌ ni dub taꞌa wa gun gan ndoꞌ naꞌ.
1CO 6:13 Nsea ncho xa ndab: “Ta gaw beuna ta por len beuna. No leꞌa len beuna por yoo ta gaw beuna.” Leꞌa ta wa ta ugeaka, ná leꞌa gal gor leꞌa Dios unitndoꞌ itop taꞌa wa. Leꞌa Dios naꞌanpa ngundeꞌe las beuna por na ugal beuna stub xa naꞌanpa xa ten beuna. Leꞌa Dios ndi mbindeꞌe beuna ndontsa gun beuna tiꞌin ten Cristo, leꞌa Cristo leꞌa nibeꞌe beuna.
1CO 6:14 No lak mxiste Dios Jesús, no liga leꞌa juers ten Dios ixiste beuna.
1CO 6:15 ¿Cha lá iniꞌí bega zha leꞌa idub las bega dubtsa nak no Cristo? Leꞌa dub xa junt nak no Cristo lá nsabndoꞌ yakjunt no dub ngots ndun juis mgiꞌi.
1CO 6:16 ¿Lá iniꞌí bega zha leꞌa dub xa ugal dub xagots li nak wa, leꞌa xa dubtsa nak no xagots wa? Lak nkeaniꞌi diꞌizh ten Dios, leꞌa itop xa wa yak dubtsa men.
1CO 6:17 Ná leꞌa dub xa yakjunt no Cristo, leꞌa xa wa dubtsa nak no Cristo.
1CO 6:18 Ta weꞌe bxoꞌon bega ndoꞌ ta ugap wa, ta na ngal bexa dub xa naꞌanpa xa ten xa. Guniꞌi xtaꞌan stub ta ugap ndun dub men, leꞌa ta wa naꞌan xtaꞌan ugap ndanno las xa wa. Ná leꞌa xa na ngal dub xa naꞌanpa xa ten xa, leꞌa xa wa ugap ndanno leꞌaka las na.
1CO 6:19 ¿Lá iniꞌí bega zha leꞌa idub las beuna nak niꞌi ten Espíritu ten Dios, xa na msaꞌa Dios ndoꞌ beuna? Leꞌa Espíritu ten Dios ncho len ladoꞌo beuna, ta weꞌe naꞌanpa leꞌaka beuna nibeꞌe beuna.
1CO 6:20 Leꞌa Dios usiꞌi beuna gak beuna xa ten xa. Ta weꞌe leꞌa ta ndun beuna no ta ndanbeꞌe beuna, leꞌa ta wa nsabndoꞌ gak ta nsak ladna Dios, leꞌa beuna nak xmen Dios.
1CO 7:1 Nat ikab naꞌ ndoꞌ ta li mkeꞌa bega ndoꞌ git mtuꞌub bega wa, naga nsabndoꞌ ukwaꞌan dub xabgiꞌi xagots ikaꞌa na.
1CO 7:2 Nat ncho kwaꞌad men ngal dub xa naꞌanpa xa ten xa. Ndi mas wen kadga dub xabgiꞌi gapga dub xagots, no liga kadga dub xagots gapkaga dub xabgiꞌi.
1CO 7:3 Leꞌa xabgiꞌi no xagots nsabndoꞌ gun cumplir yankea xa xa tenka xa.
1CO 7:4 Leꞌa xagots wa naꞌanpa leꞌa inibeꞌe leꞌaka leꞌa xa, leꞌa xabgiꞌi wa leꞌa nibeꞌe xagots ten na. No liga leꞌa xabgiꞌi wa naꞌanpa leꞌa inibeꞌe leꞌaka leꞌa xa, leꞌa xagots wa leꞌa nibeꞌe xabgiꞌi wa.
1CO 7:5 Ta weꞌe lá igeaꞌna bega ugal bega leꞌaka xa ten bega. Ná leꞌa tal bega gudiꞌizh leꞌa dub ndeꞌep lá ugal bega ltsaꞌa bega ndontsa mas gudiꞌizhno bega Dios, leꞌa ta wa utsinka nak. Leꞌa tsoꞌo na li mkwaꞌan bega Dios dub ndeꞌep wa nsabndoꞌ yakjunt bega, ndontsa naꞌanpa gun maxuꞌu gan utsabgix bega, ugal bega stub men naꞌanpa xa ten bega.
1CO 7:6 Leꞌa ta ndee wa dub ta ntenxeꞌa naꞌ bega, naꞌanpa nak‑a dub ta juerska gun bega.
1CO 7:7 Nlad naꞌ gak bega lak nak naꞌ lá ndap naꞌ xagots. Ná leꞌa Dios nsaꞌa xteꞌe gak kadga dub beuna; ncho bexa nkwaꞌan ltsaꞌa na, no ncho bexa naꞌanpa li ndun.
1CO 7:8 Leꞌa naꞌ gáp ndoꞌ bexa nab no ndoꞌ be xagots ngut xabgiꞌi ten na, mas utsin yaꞌan nab bexa lak nak naꞌ.
1CO 7:9 Ná tal leꞌa xa lá uxik yoo nab, ukwaꞌan xa ltsaꞌa xa. Mas utsin nak ukwaꞌanka xa ltsaꞌa xa, ndoꞌka uzhebpa nlad xa gap xa ltsaꞌa xa, ná cha lá ukwaꞌan xa xa.
1CO 7:10 Leꞌa bexa yá ndap xa ten na wa, leꞌa naꞌ gáp ndoꞌ bexa wa dub ta naꞌanpa ta nibeꞌe naꞌ, leꞌa ta wa ta nibeꞌe Cristo: Leꞌa dub xagots naꞌanpa nsabndoꞌ ulaꞌa xabgiꞌi ten na.
1CO 7:11 Ndi tal leꞌa dub xagots ulaꞌa xabgiꞌi ten na, leꞌa xa wa naꞌanpa ikaꞌa stubga xabgiꞌi, parea syoꞌo gan ndi yach xa ndoꞌ leꞌaka xabgiꞌi mlaꞌa xa wa. No liga dub xabgiꞌi naꞌanpa nsabndoꞌ ulaꞌa xagots ten na.
1CO 7:12 Leꞌa naꞌ gáp ta ndee ndoꞌ iteata be men, dub ta ndanbeꞌetsa naꞌ, naꞌanpa dub ta ndab Cristo ndoꞌ naꞌ: tal ton dub xabgiꞌi ndap dub xagots lá ndangea ladna Cristo, ná xa nlad yoonoka xabgiꞌi wa, leꞌa xabgiꞌi wa naꞌanpa nsabndoꞌ ulaꞌa xagots wa.
1CO 7:13 No liga tal ton dub xagots ndap dub xabgiꞌi lá ndangea ladna Cristo, ná xa nlad yoonoka xagots wa, leꞌa xagots wa lá nsabndoꞌ ulaꞌa xabgiꞌi wa.
1CO 7:14 Leꞌa juers ten dub xagots nak xmen Cristo, leꞌa Dios gun wen yoo ladna xabgiꞌi ten xa, maska dub xa naꞌanpa ndangea ladna Cristo. No liga juers ten dub xabgiꞌi nak xmen Cristo leꞌa Dios gun wen yoo ladna xagots ten xa, maska dub xa naꞌanpa ndangea ladna Cristo. No liga gun Dios wen yoo ladna be xin bexa. Naꞌanpa gak be meꞌed wa cuent dub meꞌed lá ndangea ladna Cristo.
1CO 7:15 Ná tal leꞌa dub xabgiꞌi natal xagots naꞌanpa nchandoꞌ Cristo wa nlad ulaꞌa xa ten na wa, sak ulaꞌa xa xa. Leꞌa xa nak xmen Cristo wa naꞌanpa juerska bi leꞌa ikaꞌa xa lá nchandoꞌ Cristo wa, geal leꞌa Dios nlad wen yoono beuna ltsaꞌa beuna.
1CO 7:16 Leꞌa bego xagots baꞌ lá iniꞌí tal leꞌa xabgiꞌi ten bega gungea ladna Cristo geal ta wen ndun bega. No liga leꞌa bego xabgiꞌi baꞌ lá iniꞌí tal leꞌa xagots ten bega gungea ladna Cristo geal ta wen ndun bega.
1CO 7:17 Parea leꞌa kad dub bega bin laktsa msaꞌa Dios. Guniꞌi xteꞌe nak bega zha na utezh Dios bega gak bega xmen xa, litsa gok bega. Leꞌa ta wa ta ndáp naꞌ ndoꞌ bexa nak xmen Cristo itea sa ndaa naꞌ.
1CO 7:18 Tal ncho bega nchola beꞌe zha na utezh Dios bega wa, litsa blaꞌa bega ncho beꞌe bega. No liga tal ncho bega naꞌanpa ncho beꞌe zha utezh Dios bega wa, lá nsabndoꞌ yoo beꞌe bega.
1CO 7:19 Guniꞌi tal dub xa ncho beꞌe natal naꞌan beꞌe xa, leꞌa ta wa naꞌanpa leꞌa nsak. Leꞌa ta na nxobgek beuna ndoꞌ Dios, leꞌa ta wa leꞌa nsak.
1CO 7:20 Leꞌa itea bega nsabndoꞌ yaꞌan laktsa nak bega zha na utezh Dios bega wa.
1CO 7:21 Leꞌa zha na utezh Dios bega wa tal ndencho bega ndoꞌ yaꞌa stub men, lá yuꞌ ladna bega ta li nak bega. Ná tal leꞌa bega syoꞌo gan itoꞌo ndoꞌ yaꞌa men wa, bin bega juers itoꞌo bega.
1CO 7:22 Leꞌa dub xa na li nyoꞌo ndoꞌ yaꞌa dub men zha na utezh Dios xa, leꞌa cuent ten Cristo leꞌa xa myaꞌakla. No liga dub xa naꞌanpa nyoꞌo ndoꞌ yaꞌa dub men zha utezh Dios xa, nat leꞌa xa wa ncho ndoꞌ Cristo.
1CO 7:23 Leꞌa Dios usiꞌi bega gak bega xmen xa, ta weꞌe lá ulaꞌa bega inibeꞌe stubga men ndoꞌ bega.
1CO 7:24 Bega nak beuna xmen Cristo, laktsa nak beuna zha utezh Dios beuna, litsa yaꞌan beuna ndoꞌ Dios.
1CO 7:25 Leꞌa bego xa nab bi lá ndap ltsaꞌa na, leꞌa ta gáp naꞌ ndee naꞌanpa nak dub ta nibeꞌe Dios, leꞌa‑yá ndi ta ndanbeꞌetsa naꞌ. Parea leꞌa bega nsabndoꞌ isakyoꞌón ta gáp naꞌ ndee, leꞌa Dios uzheꞌeb utsin mbinno naꞌ msaꞌa xa ta ndák naꞌ.
1CO 7:26 Leꞌa ke ten be gealkweaꞌ ncho nat ndee, leꞌa naꞌ nsak leꞌa bega wenka kwe laktsa ndebe bega.
1CO 7:27 Tal bega ndap xagots, naꞌanpa ulaꞌa bega xa. No tal bega lá ndap xagots, naꞌanpa ukwaꞌan bega xa.
1CO 7:28 Parea tal bega ukwaꞌan xagots, leꞌa ta wa naꞌanpa ta ugap. No tal dub xagots nab ukwaꞌan xabgiꞌi, leꞌa ta wa naꞌanpa ta ugap. Parea leꞌa bexa na ukwaꞌan ltsaꞌa na wa mas bid itid bexa, ná leꞌa naꞌ nlad lá itid bega ta wa.
1CO 7:29 Bego nak beuna xmen Cristo, ta ndee gáp naꞌ: Leꞌa beuna yá stub ndeꞌeptsa ndencho, ta weꞌe leꞌa bexa ndap xagots wa nsabndoꞌ gun xa tiꞌin ten Dios cuent dub xa nab.
1CO 7:30 Leꞌa bexa ndoꞌon wa ndi gun cuent dub xa naꞌanpa ndoꞌon. Leꞌa bexa nten ladna wa ndi gun cuent dub xa naꞌanpa nten ladna. Leꞌa bexa nsiꞌi be taꞌa wa, ndi gun xa cuent dub xa naꞌan xtaꞌan ndap.
1CO 7:31 Leꞌa bexa ndal ladna be ta gizhliyo ndee wa, ndi gun xa cuent dub xa lá ndal ladna ta wa, leꞌa ta ncho ndoꞌ gizhliyo ndee wa ta snitndoꞌ.
1CO 7:32 Leꞌa naꞌ nlad lá yuꞌno ladna bega be ta gizhliyo ndee. Leꞌa dub xa nab wa mas nlaꞌach ta nlad Dios, nkwaꞌan xa ná xteꞌe isak ladna Dios.
1CO 7:33 Ná leꞌa dub xa ndap xagots wa mas nyuꞌ ladna be ta ncho ndoꞌ gizhliyo ndee, nkwaꞌan xa ná xteꞌe isak ladna xagots ten xa.
1CO 7:34 Liga leꞌa xagots na ndap xabgiꞌi naꞌanpa ndanbeꞌe lak ndanbeꞌe xagots nab wa. Leꞌa xagots nab wa mas nyuꞌ ladna gun ta nlad Dios, ndontsa mas umbiꞌi gak be ta gun xa wa no be ta gunbeꞌe xa wa ndoꞌ Dios. Ná leꞌa xagots ndap xabgiꞌi wa mas nyuꞌ ladna be ta ncho ndoꞌ gizhliyo ndee, nkwaꞌan xa ná xteꞌe isak ladna xabgiꞌi ten xa.
1CO 7:35 Leꞌa ta ndee wa naꞌanpa ndáp naꞌ por na mas bid itid bega. Ndi ndáp naꞌ‑yá ndontsa gakno‑yá bega, no utsin kwe bega no gun bega lak nsabndoꞌ‑yá. Weꞌe naꞌan xtaꞌan uka gun bega tiꞌin ndoꞌ Cristo.
1CO 7:36 Parea tal ncho bega ndap dub meꞌed gots nab, cha nlad bega izheal meꞌed wa xabgiꞌi geal leꞌa meꞌed wa yá goxla, leꞌa ta wa utsinka nak. Bin bega ta li nlad bega wa, leꞌa ta ukwaꞌan meꞌed wa ltsaꞌa meꞌed wa, leꞌa ta wa naꞌanpa ta ugap.
1CO 7:37 Ná leꞌa ncho xa ndab naꞌanpa li nsabndoꞌ gun xingots xa, cha ndun xa lakka nlad xa. Leꞌa tal meꞌed wa lá ukwaꞌan xabgiꞌi, leꞌa ta wa no utsinka nak.
1CO 7:38 Ta weꞌe tal ton ulaꞌa ukwaꞌan xingots na xabgiꞌi wa, leꞌa xa wa utsinka ndun. No liga tal ton lá ulaꞌa ukwaꞌan xingots na xabgiꞌi, leꞌa xa wa mas wen ndun.
1CO 7:39 Leꞌa ley ten Dios ndab leꞌa dub xagots ndap xabgiꞌi lá yoo gan ukwaꞌan stub xabgiꞌi tal xabgiꞌi ten xa wa bi nban. Ná leꞌa tal xabgiꞌi ten xa wa ngut, leꞌa xagots wa syoꞌo gan ukwaꞌan stubga xabgiꞌi tal xabgiꞌi wa nak xmen Cristo.
1CO 7:40 Parea leꞌa naꞌ nsak leꞌa xa mas wen tal xa li nabtsa isoꞌ, no nsak naꞌ leꞌa Espíritu ten Dios no li nlad.
1CO 8:1 Leꞌa nat gudiꞌizh naꞌ cuent ten be xnab nsaꞌa men ndoꞌ be dios gizhliyo. Leꞌa beuna uniꞌíka cuent ten ta wa, ná leꞌa ncho bega ndanbeꞌe leꞌa bega mas uniꞌí ta wa, cha nzhinna bega. Ndi nsabndoꞌ ikweaꞌ ladna beuna be ltsaꞌa beuna, ndontsa mas igeꞌ ladna bexa Cristo.
1CO 8:2 Leꞌa tal ton nsak leꞌa xa uzhebpa ndák, leꞌa xa wa ni lá nchandoꞌ be taꞌa nsabndoꞌ iniꞌí xa.
1CO 8:3 Ná leꞌa tal ton ndankeaka Dios, leꞌa Dios nchandoꞌka xa wa.
1CO 8:4 Nat leꞌa cuent ten be xnab nsaꞌa be men ndoꞌ be dios gizhliyo wa, leꞌa beuna uniꞌíka leꞌa be dios wa naꞌan xtiꞌin, leꞌa Dios dubtsa ncho.
1CO 8:5 Leꞌa ndoꞌ gizhliyo nsea gibeꞌa ncho be taꞌa ndab be men leꞌa ta wa dios, ndab bexa ncho sian dios no sian espíritu nibeꞌe.
1CO 8:6 Ná leꞌa beuna uniꞌí leꞌa ncho dubtsa Tad Dios, xa mbindeꞌe iteanak be taꞌa, no nsaꞌa xa gealnaban ndoꞌ beuna ndontsa gun beuna tiꞌin ndoꞌ xa. No dubtsa xa nibeꞌe ncho, leꞌa xa wa Jesucristo, xa na ulo iteanak be taꞌa ndoꞌ gizhliyo, no ulo xa beuna.
1CO 8:7 Parea naꞌanpa itea men nchandoꞌ ta wa. Nat ncho bega ngwankea be dios gizhliyo wa, no gast nat gor na ndaw bega ta msaꞌa be men ndoꞌ be dios wa, nsak bega leꞌa ta wa dub ke ndoꞌ Dios, leꞌa bega lá iniꞌí xtaꞌan ta wen no xtaꞌan ta ugap.
1CO 8:8 Parea leꞌa ta na ndaw beuna naꞌanpa gun gan mas isak ladna Dios nak beuna. Ni naꞌanpa mas wen nak beuna no ni naꞌanpa mas uleꞌa nak beuna, tal beuna gaw‑a natal beuna lá gaw‑a.
1CO 8:9 Leꞌa bega sak gaw guniꞌi xtaꞌan, parea blaꞌach bega naꞌanpa isabgix dub xa pen mgondoꞌ Dios ke ten ta ndaw bega.
1CO 8:10 Tal leꞌa bega nyakbeꞌena ta ndee wa, cha isob bega gaw bega dub sa nsob dub dios gizhliyo, cha iniꞌí dub men pen mgondoꞌ Dios ta wa, leꞌa xa wa rages no gaw ta nsaꞌa bexa ndoꞌ dios gizhliyo wa.
1CO 8:11 Cha leꞌa ke ten ta na nyakbeꞌena bega wa, sabgix dub men pen mgondoꞌ Dios, dub xa na no ngut Cristo sakndoꞌ na.
1CO 8:12 Tal bega li ugap gunno dub xmen Cristo, dub xa lá iniꞌí xtaꞌan ta wen no xtaꞌan ta ugap, leꞌa bega wa gap ke ndoꞌ Cristo.
1CO 8:13 Ta weꞌe tal ton dub ltsaꞌa naꞌ gailaꞌ ndoꞌ ta ugap ke ten ta ndaw naꞌ, leꞌa naꞌ nunk yá naꞌantapa gaw beꞌal wa, ndontsa naꞌanpa leꞌa naꞌ gun ikateꞌeb xa.
1CO 9:1 ¿Lá iniꞌí bega zha leꞌa naꞌ nak dub apostol, no syoꞌo gan gun naꞌ lak ndun be apostol? ¿No ni lá iniꞌí bega zha leꞌa naꞌ uníndoꞌ Jesucristo, no nak bega tiꞌin mbin naꞌ ndoꞌ Cristo?
1CO 9:2 Ncho men ndab leꞌa naꞌ ndee naꞌanpa dub apostol, ná leꞌa bego uniꞌíka leꞌa naꞌ lika nak. Leꞌa ta na li nak bega xmen Cristo, leꞌa ta wa nluu leꞌa naꞌ ta ugeaka dub apostol.
1CO 9:3 Lndeꞌe ntsakndo naꞌ ndoꞌ be men li nisi naꞌ wa:
1CO 9:4 Leꞌa besa nak apostol syoꞌoka gan gaw, no goo besa be ta usaꞌa bega.
1CO 9:5 No syoꞌo gan ikaꞌa besa dub xagots nak xmen Cristo lak ndun ncho be apostol wa, no be xin xnaꞌa Jesús, no Cefas.
1CO 9:6 ¿Nsak bega zha leꞌa naꞌtsa ndee no Bernabé juerska gun besa tiꞌin ndontsa iban besa?
1CO 9:7 ¿Lá iniꞌí bega zha leꞌa ni dub soldad lá kix ta ndaw na? No naꞌan ton ndas ya uv, cha lá ndaw xa uv nsaꞌa‑yá. No naꞌan ton dub xa nlaꞌach borreg, cha lá ndo xa lech ten ma.
1CO 9:8 Leꞌa ta ndáp naꞌ wa naꞌanpa dub ta ndanbeꞌetsa naꞌ, leꞌa ley ten Dios no li ndab.
1CO 9:9 Leꞌa ley msaꞌa Dios ndoꞌ Moisés wa nkeaniꞌi ndab‑a: “Lá ko bega gix xeꞌe ngon gor na ndun ma tiꞌin.” ¿Nsak bega zha leꞌa ta ndee wa gab leꞌa Dios nyuꞌno ladna be ngontsa?
1CO 9:10 Leꞌa ta wa ndi gab leꞌa Dios liga nyuꞌno ladna beuna. Leꞌa bexa na ndun tiꞌin ndoꞌ dub yo no bexa ngoꞌo xab trig wa, leꞌa bexa gal gor ikaꞌa be ta usaꞌa‑yá.
1CO 9:11 No liga tal leꞌa besa ndas diꞌizh ten Dios lat bega, ¿xteꞌe nsak bega zha leꞌa besa lá nsabndoꞌ ikaꞌa dub ta nkiꞌin besa ndoꞌ bega zha?
1CO 9:12 Ncho stapla bexa ndadiꞌizh diꞌizh ten Dios, nkaꞌa bexa ta nkiꞌin bexa ndoꞌ bega. ¿Lá iniꞌí bega zha leꞌa besa mas nsabndoꞌ ikaꞌa‑yá? Parea leꞌa besa naꞌanpa li ndun. Ndi nxik besa ndoꞌ itea taꞌa, ndontsa mas gungea ladna be men diꞌizh wen ten Cristo.
1CO 9:13 ¿Lá iniꞌí bega zha leꞌa bexa ndun tiꞌin len niꞌi ten Dios, leꞌa bexa wa ndaw be ta ncho sa wa? No liga be uleꞌay nsaꞌa be man xnab ndoꞌ Dios, leꞌa bexa wa ndaw dub tuzh be xnab wa.
1CO 9:14 No liga ndab Cristo leꞌa bexa na ndadiꞌizh diꞌizh wen ten xa, leꞌa bexa wa syoꞌo gan ikaꞌa be ta na usaꞌa be men na ndoꞌón diꞌizh wa.
1CO 9:15 Parea leꞌa naꞌ ndee ni dub biaj naꞌanpa li inaꞌab ta nkiꞌin naꞌ. No ni naꞌanpa nkeꞌa naꞌ ta ndee ndontsa usaꞌa bega taꞌa ndoꞌ naꞌ. Leꞌa cuent ten naꞌ mas wen gat naꞌ ndoꞌka ika naꞌ ta usaꞌa bega, leꞌa naꞌ uzheꞌeb nten lad naꞌ leꞌa naꞌ naꞌanpa li ngun.
1CO 9:16 Leꞌa ta ndadiꞌizh naꞌ diꞌizh wen ten Cristo wa, leꞌa ta wa naꞌanpa ta nzhinna naꞌ, geal leꞌa ta wa ta nsabndoꞌka gun naꞌ. ¡Proꞌob naꞌ tal naꞌ lá gudiꞌizh ta wa!
1CO 9:17 Tal leꞌa naꞌ gudiꞌizh diꞌizh wa galadtsa naꞌ, syoꞌoka gan gáp naꞌ kix bega ndoꞌ naꞌ. Parea leꞌa Dios ndi unibeꞌe gudiꞌizh naꞌ ta wa.
1CO 9:18 ¿Ta weꞌe xtaꞌan gun naꞌ gan zha? Leꞌa ta wa ta na nten lad naꞌ ndadiꞌizh naꞌ diꞌizh wen ten Cristo no ni naꞌan xtaꞌan inaꞌab naꞌ ndoꞌ bega. Leꞌa naꞌ syoꞌoka gan inaꞌab gakno bega naꞌ, parea naꞌanpa li ngun naꞌ.
1CO 9:19 Leꞌa naꞌ ndee naꞌanpa nchoꞌo ndoꞌ ni dub men nibeꞌe naꞌ, parea leꞌa naꞌ ndun cuent dub xa ncho ndoꞌ itea be men, ndontsa gun naꞌ gan kwaꞌad xa gungea ladna Cristo.
1CO 9:20 Leꞌa zha na nchoꞌo naꞌ lat bexa judio, leꞌa naꞌ ndun lak ndun bexa judio, ndontsa gun naꞌ gan gungea ladna bexa Cristo. Leꞌa ta wa gab leꞌa zha na nchoꞌo naꞌ lat bexa ndencho ndoꞌ ley ten Moisés wa, leꞌa naꞌ no ndun lak ndab ley wa, ndontsa gun naꞌ gan gungea ladna bexa Cristo, maska leꞌa naꞌ naꞌanpa no nchoꞌo ndoꞌ ley wa.
1CO 9:21 No zha na nchoꞌo naꞌ lat bexa naꞌanpa ndencho ndoꞌ ley wa, leꞌa naꞌ no ndun lak ndun bexa wa, ndontsa gun naꞌ gan gungea ladna bexa Cristo. Leꞌa ta wa naꞌanpa ndab leꞌa naꞌ lá uxobgek ndoꞌ Dios, leꞌa naꞌ ndi nxobgekka ndoꞌ ta nibeꞌe Cristo.
1CO 9:22 No liga zha na nchoꞌo naꞌ lat bexa pen mgondoꞌ Dios, leꞌa naꞌ no ndun lak ndun bexa wa, ndontsa gun naꞌ gan mas gungea ladna bexa Cristo. Leꞌa naꞌ nyak lak nak itea be men, ndontsa gun naꞌ gan ncho bexa gap gealnaban ndoꞌ Dios.
1CO 9:23 Li ndun naꞌ ndontsa mas igen diꞌizh wen ten Cristo, cha li gal usoꞌ naꞌ ta wen usaꞌa Dios.
1CO 9:24 Leꞌa bega uniꞌíka leꞌa sa ngit bexa ndoꞌ jueg, leꞌa itea bexa ngit parea dubtsa xa ndun gan nkaꞌa taꞌa. Li bin bega juers gun bega gan ikaꞌa bega ta usaꞌa Dios.
1CO 9:25 Leꞌa bexa na ngit ndoꞌ jueg wa uzheꞌeb ngo gan ndontsa lá yayo xa. Li ndun bexa ndontsa gun bexa gan ikaꞌa bexa dub coron xos géꞌe, dub ta sazhaꞌa. Ná leꞌa beuna ndee wa ko gan, ndontsa ikaꞌa beuna dub coron usaꞌa Dios, dub ta naꞌanpa gazhaꞌa.
1CO 9:26 Ta weꞌe leꞌa naꞌ naꞌanpa itoꞌo karrel cuent dub xa ni lá iniꞌí pa ilayaꞌ. No ni lá gun naꞌ cuent dub xa ndun uyo nkeꞌa payent sbeꞌen ndoꞌ mbitsa.
1CO 9:27 Ndi nsensaꞌab naꞌ leꞌaka naꞌ, ndontsa naꞌanpa gal gor gab Dios leꞌa naꞌ naꞌanpa utsin ngun, maska mbidiꞌizh naꞌ diꞌizh ten Dios ndoꞌ be men.
1CO 10:1 Bego nak beuna xmen Cristo, leꞌa naꞌ nlad lá yalad bega xteꞌe ngok be usan gox polta ten beuna. Leꞌa bexa wa useabe len ilaꞌ dub xkaw no utakea bexa tlaw Nitsdoꞌo Nane wa.
1CO 10:2 Leꞌa gor na li usea bexa wa len ilaꞌ xkaw wa no tlaw nitsdoꞌo wa, leꞌa ta wa cuent utaleaꞌ iteanak bexa, myak bexa xmen Moisés.
1CO 10:3 Leꞌa itea bexa wa udaw ta msaꞌa Dios geꞌe sa bid wa.
1CO 10:4 No ngu itea bexa nits msaꞌa Dios, ta ulen ndoꞌ geꞌdaꞌa wa. Leꞌa geꞌdaꞌa wa cuent Cristo, xa nchaꞌano bexa sa wa.
1CO 10:5 Ná leꞌa kwaꞌad bexa wa lá ngun ta nsak ladna Dios, cha ngut bexa geꞌe wa.
1CO 10:6 Leꞌa be ta ndee wa li ngok ndontsa naꞌanpa no beuna isaꞌab ladna be ta ugap, lak msaꞌab ladna bexa ta wa.
1CO 10:7 No ni lá yankea beuna be dios gizhliyo, lak mbin ncho bexa wa. Leꞌa diꞌizh ten Dios ndab leꞌa bexa uteyawbe no ngu bexa, cha weꞌe mbilndats bexa ndoꞌ be dios ten bexa.
1CO 10:8 No lá ugal beuna dub xa naꞌanpa xa ten beuna, lak mbin ncho bexa wa, cha ke weꞌe ngut dub gaꞌal bchon mil bexa dubtsa wizh.
1CO 10:9 No lá gun usaladno beuna Dios lak mbin ncho bexa wa, cha ke weꞌe udawkeꞌa be uzhib bexa, cha ngut bexa.
1CO 10:10 No lá ukeake beuna Dios lak ncho bexa wa mkeake Dios, cha mbit dub angel kwaꞌadgal bexa.
1CO 10:11 Leꞌa ta ndee wa ta ngwasea be usan gox polta ten beuna. No cha nkeaniꞌi‑yá ndontsa naꞌanpa no beuna gun be ta ugap wa, beuna ndencho be wizh lult ndee.
1CO 10:12 Ta weꞌe leꞌa bego na nsak gaꞌal nak bega ndoꞌ Cristo, blaꞌach bega naꞌanpa isabgix bega.
1CO 10:13 Leꞌa gor na ndanbeꞌe bega gun bega dub ta ugap, leꞌa ta wa ltsaꞌa ta ntid iteanak be men. Ná leꞌa Dios wen nak, lá ulaꞌa xa itid bega ndoꞌ ni dub taꞌa lá uxik bega. Ndi gor na li ndanbeꞌe bega gun bega ta ugap wa, leꞌa Dios no gakno bega gun bega gan ndoꞌ ta wa, ndontsa naꞌanpa gailaꞌ bega ndoꞌ ta ugap wa.
1CO 10:14 Leꞌa bego amig ten naꞌ, naꞌanpa yankea bega be dios gizhliyo ndee wa.
1CO 10:15 Leꞌa naꞌ uní leꞌa bega utsin ndanbeꞌe, no uní naꞌ leꞌa bega nsakyoꞌónka ta ndáp naꞌ ndee.
1CO 10:16 Leꞌa gor na ndo beuna nits ten uv lak unibeꞌe Cristo, ¿lá iniꞌí bega zha leꞌa ta wa gab leꞌa beuna dubtsa nak nsea Cristo, xa na mtsiꞌi ten ten na? No liga gor na junt ndaw beuna pan wa, ¿lá iniꞌí bega zha leꞌa ta wa gab leꞌa beuna dubtsa nak no Cristo, xa na ngut sakndoꞌ beuna?
1CO 10:17 Leꞌa beuna kwaꞌadpa, ná leꞌa gor na junt ndaw beuna dubtsa pan wa, leꞌa beuna dubtsa nak.
1CO 10:18 Blaꞌach bega xteꞌe ndun bexa Israel wa. Leꞌa gor na ndaw bexa xnab nsaꞌa uleꞌay ndoꞌ Dios, leꞌa ta wa gab leꞌa bexa no ndankea Dios.
1CO 10:19 Naꞌanpa gáp naꞌ leꞌa be dios gizhliyo dub ta nsak. No ni lá gáp naꞌ leꞌa xnab nsaꞌa bexa ndoꞌ be dios wa dub ta nsak.
1CO 10:20 Leꞌa naꞌ ndi gáp leꞌa zha na nsaꞌa bexa lá nchandoꞌ Dios wa xnab ndoꞌ be dios ten xa, leꞌa xa nsaꞌa be ta wa ndoꞌ be mbi bxin, naꞌanpa ndoꞌ Dios. Leꞌa naꞌ lá nlad no bega yankea be mbi bxin lak ndun bexa wa.
1CO 10:21 Leꞌa bega lá nsabndoꞌ goo vas ten Cristo, cha weꞌe googa bega vas ten be mbi bxin. No ni lá nsabndoꞌ gaw xcheꞌeno bega Cristo, cha gaw xcheꞌenoga bega be mbi bxin.
1CO 10:22 ¿Nati li gun beuna ndontsa gakloo Dios ndoꞌ beuna zha? ¿Nsak bega zha leꞌa beuna mas juert ndoꞌ Dios?
1CO 10:23 Ncho bega ndab leꞌa bega syoꞌo gan gun itea ta nlad bega. Leꞌa ta wa ta ugeaka, parea naꞌanpa itea‑yá ta nsabndoꞌ. Syoꞌoka gan gun naꞌ be ta nlad naꞌ, parea naꞌanpa itea‑yá gakno mas igeꞌ ladna beuna Dios.
1CO 10:24 Naꞌanpa ukwaꞌan beuna ta gakno leꞌatsa beuna, ndi ukwaꞌan beuna ta gakno beuna stubga men.
1CO 10:25 Leꞌa itea taꞌa nadoꞌo xa sa ndad beꞌal syoꞌo gan gaw bega, ni lá inabdiꞌizh bega pa utoꞌo‑yá.
1CO 10:26 Leꞌa Dios leꞌa ten idub gizhliyo ndee nsea itea be ta ncho ndoꞌ gizhliyo.
1CO 10:27 Tal ton naꞌanpa nchandoꞌ Dios gab yaꞌdaw bega ta lid xa no tal bega nlad yaꞌ, udaw bega guniꞌi xtaꞌan usaꞌa xa. Naꞌanpa inabdiꞌizh bega pa utoꞌo‑yá, ndontsa naꞌanpa yuꞌ ladna bega gaw bega ta wa.
1CO 10:28 Ná tal gab xa ndoꞌ bega leꞌa beꞌal wa ta msaꞌa xa xnab ndoꞌ be dios gizhliyo, weꞌe cha naꞌanpa gaw bega‑yá, ndontsa naꞌanpa gailaꞌ stub men ndoꞌ ta ugap. Leꞌa Dios leꞌa nibeꞌe gizhliyo no itea be taꞌa ncho ndoꞌ gizhliyo.
1CO 10:29 Naꞌanpa gáp naꞌ leꞌa cuent ten bega leꞌa ta wa ta lid leꞌa nak. Leꞌa naꞌ ndi gáp leꞌa cuent ten stub xa wa leꞌa ta wa ta lid leꞌa nak. ¿Parea xtaꞌan nsabndoꞌ ulach naꞌ ta ndanbeꞌe stubga men?
1CO 10:30 Tal leꞌa naꞌ ndee nsa xno ndoꞌ Dios no be ta ndaw naꞌ wa, ¿cha xtaꞌan gab men leꞌa naꞌ lá yoo gan gaw be ta wa zha?
1CO 10:31 Tal leꞌa bega gaw, no goo bega, no gun bega stubga taꞌa, bin bega itea be ta wa dub mod na no be men gab xteꞌe wen nak Dios.
1CO 10:32 Lá gun bega dub ta gun gailaꞌ bexa ndoꞌ ta ugap, lak bexa judio no bexa naꞌanpa xa judio no bexa nak xmen Cristo.
1CO 10:33 Leꞌa naꞌ ndun juers iteanak be taꞌa ndun naꞌ isak ladna be men. Naꞌanpa nkwan naꞌ dub ta gakno naꞌ nabtsa naꞌ, ndi nkwan naꞌ dub ta gakno kwaꞌad men, ndontsa no bexa gap gealnaban ndoꞌ Dios.
1CO 11:1 Bin bega lak ndun naꞌ ndee, leꞌa naꞌ ndun lak ndun Cristo.
1CO 11:2 Bega nak beuna xmen Cristo, leꞌa naꞌ ndáp leꞌa bega wenka ndun, geal leꞌa bega lá nyalad naꞌ nsea ndun bega ta mluu naꞌ.
1CO 11:3 Parea nlad naꞌ yakbeꞌena bega leꞌa Cristo leꞌa nibeꞌe be xabgiꞌi, no liga leꞌa be xabgiꞌi nibeꞌe xagots ten na, no leꞌa Dios leꞌa nibeꞌe Cristo.
1CO 11:4 Leꞌa tal ton dub xabgiꞌi utsaw gek na gor ndadiꞌizhno xa Dios, nsea gor ndadiꞌizh xa sakndoꞌ Dios, leꞌa xa wa naꞌanpa ndap mod ndoꞌ Cristo lak nsabndoꞌ‑yá.
1CO 11:5 Ná leꞌa tal ton dub xagots lá utsaw gek na gor ndadiꞌizhno xa Dios, nsea gor ndadiꞌizh xa sakndoꞌ Dios, leꞌa xa wa lá ndap mod ndoꞌ xabgiꞌi ten xa. Leꞌa ta wa cuent dub xagots ulobtoꞌog iteanak gichgek na.
1CO 11:6 Leꞌa tal dub xagots lá kaꞌab utsaw gek na, mas wen yabtoꞌog iteanak gichgek xa. Parea tal leꞌa xagots wa ndo ladna kabtoꞌog gichgek na, weꞌe nsabndoꞌka utsaw xa gek xa.
1CO 11:7 Leꞌa be xabgiꞌi wa naꞌanpa nsabndoꞌ utsaw gek na sa nzhealbe bega, leꞌa Dios mbindeꞌe xabgiꞌi lak nak Dios, no nluu xabgiꞌi ta wen nak Dios. Ná leꞌa ta ndun be xagots wa nsabndoꞌ uluu ta wen nak xabgiꞌi ten xa.
1CO 11:8 Li nak‑a geal leꞌa xabgiꞌi ned wa naꞌanpa leꞌa ngakndeꞌe dub bleꞌa las xagots wa, leꞌa xagots wa ndi leꞌa ngokndeꞌe no dub bleꞌa las xabgiꞌi.
1CO 11:9 Leꞌa xabgiꞌi wa naꞌanpa ngakndeꞌe por na gakno xa xagots, leꞌa xagots ned wa ndi ngokndeꞌe ndontsa gakno xa xabgiꞌi ten xa.
1CO 11:10 Ta weꞌe leꞌa dub xagots nsabndoꞌ utsaw gek na ndontsa iniꞌí be angel leꞌa xa nxobgek ndoꞌ xabgiꞌi ten xa.
1CO 11:11 Ná leꞌa beuna nak xmen Cristo, leꞌa be xabgiꞌi nsabndoꞌ gakno be xagots, no liga leꞌa be xagots gakno be xabgiꞌi.
1CO 11:12 Leꞌa xagots ngokndeꞌe no dub bleꞌa las xabgiꞌi, no liga leꞌa be meꞌed bgiꞌi ndal len xagots. Parea leꞌa iteanak beuna Dioska mbindeꞌe.
1CO 11:13 Leꞌaka bego binbeꞌe naga utsin nak tal leꞌa dub xagots lá utsaw gek na gor na gudiꞌizhno xa Dios.
1CO 11:14 Leꞌa lak uniꞌí iteanak be men leꞌa‑yá udalad nak tal dub xabgiꞌi ulaꞌa gaꞌal gichgek na.
1CO 11:15 Ná tal leꞌa dub xagots ulaꞌa gaꞌal gichgek na, leꞌa ta wa utsinka nak, leꞌa Dios msaꞌa koꞌol gak gichgek xagots ndontsa utsaw‑a gek xa.
1CO 11:16 Leꞌa tal ton lá ndal ladna ta ndáp naꞌ ndee wa, leꞌa naꞌ gáp li nak ta nluu besa no li nak ta ndun iteanak be xmen Dios.
1CO 11:17 Leꞌa ta ukeꞌa naꞌ nat, lá yoo gan gáp naꞌ leꞌa bega wen ndun, geal leꞌa zha na nzhealbe bega leꞌa bega mas ugap ndun, ma bega utsin gun.
1CO 11:18 Leꞌa ta ned gáp naꞌ, leꞌa ncho men ndab leꞌa gor nzhealbe bega leꞌa bega naꞌanpa dubtsa nak. Leꞌa ncho‑yá ndangea lad naꞌ.
1CO 11:19 Li nsabndoꞌka itid bega, ndontsa uluu ná ton ta ugeaka nak xmen Cristo lat bega.
1CO 11:20 Leꞌa zha na nzheal bega ndaw bega xcheꞌe ten Cristo, leꞌa bega lá ndun lak nsabndoꞌ‑yá.
1CO 11:21 Leꞌa gor na ndaw bega, leꞌa kadga dub bega uxax ned ndaꞌdob ta gaw na. Weꞌe ncho bega ndon ndeyanna geal mtea‑yá, no ncho bega gast nsudna.
1CO 11:22 ¿Lá ndap bega ta lid bega, sa ndaw bega no sa ndo bega zha? ¿Xtaꞌan usalad ndanno bega be xmen Dios zha? ¿No xtaꞌan udalad ndanno bega bexa naꞌan xtaꞌan ndap? ¿Xteꞌe gáp naꞌ ndoꞌ bega zha? ¿Nsak bega itenno lad naꞌ bega zha? ¡Leꞌa ta ndun bega wa naꞌanpa nsak lad naꞌ!
1CO 11:23 Leꞌa Jesucristo leꞌa mluu ta ndee ndoꞌ naꞌ, ta mluu naꞌ ndoꞌ bego: Leꞌa teꞌal na myak cuent Jesús Xwan beuna wa, usen xa dub pan.
1CO 11:24 Cha msaꞌa xa xno ndoꞌ Dios. Cha uleꞌa xa‑yá, cha ndab xa: “Usen bega pan ndee, cha udaw bega‑yá, leꞌa ta ndee beꞌal las naꞌ. Nat isaxan gun bega ta ndee, ndontsa utseꞌa ladna bega leꞌa naꞌ ngut sakndoꞌ bega.”
1CO 11:25 No tsoꞌo mtayaw xcheꞌe bexa wa, cha liga usen Jesús dub vas ncho vin, cha ndab xa: “Leꞌa ta ndee ten ten naꞌ. Leꞌa ta ndee nluu leꞌa nat leꞌa Dios mbinno be men dub trat kub ná xteꞌe wen yaꞌan bexa ndoꞌ Dios. Itea zha goo bega ta ndee, utseꞌa ladna bega leꞌa naꞌ ngut sakndoꞌ bega.”
1CO 11:26 Weꞌe gast gal wizh ilen Cristo, leꞌa itea biaj li ndaw bega pan wa no ndo bega nits uv wa, leꞌa ta wa cuent gudiꞌizh bega ndoꞌ be men xteꞌe ngut Jesús.
1CO 11:27 Ta weꞌe tal ton gaw pan wa no goo xa nits wa dub mod lá nsabndoꞌ‑yá, leꞌa xa wa ndap ke ndoꞌ Cristo no ndoꞌ ten ten xa.
1CO 11:28 Leꞌa kadga dub bega nsabndoꞌ gunbeꞌe xteꞌe nak ta gun bega, gor na biseata gaw bega pan no goo bega nits wa.
1CO 11:29 Ná tal bega gaw‑a no goo bega‑yá ni lá gunbeꞌe bega leꞌa ta wa cuerp ten Cristo, leꞌa Dios utsaksi bega.
1CO 11:30 Ta weꞌe kwaꞌad bega nsén gealgizh no uleꞌa nak bega no ncho bexa gast ngutla.
1CO 11:31 Parea tal leꞌa beuna iwiꞌi ná xteꞌe gun beuna be ta wa, leꞌa Dios naꞌanpa utsaksi beuna.
1CO 11:32 Leꞌa ta li ndiꞌizh utsaksi xa beuna, leꞌa xa naꞌanpa utsaksi beuna lak utsaksi xa bexa lá nchandoꞌ Dios.
1CO 11:33 Ta weꞌe zha na izhealbe bega gaw bega xcheꞌe ten Cristo, kweas bega itea bega dubtsa gaw.
1CO 11:34 No tal ncho bega ndanna nsabndoꞌ ned gaw bega ta lid bega, ndontsa naꞌanpa utsaksi Dios bega ke ten ta na li junt ndaw bega. Leꞌa cuent ten be ta wa ncho stapla be taꞌa gáp naꞌ ndoꞌ bega zha na gal inaꞌ naꞌ bega.
1CO 12:1 Bego nak beuna xmen Cristo, leꞌa naꞌ nlad iniꞌí bega xteꞌe nak be ta ndák beuna, ta nsaꞌa Espíritu ten Dios ndontsa mas gun beuna tiꞌin ten xa.
1CO 12:2 Leꞌa bega uniꞌíka leꞌa zha na bi lá ndangea ladna bega Cristo, ngwankea bega sbeꞌen be dios gizhliyo, ta na ni lá ndadiꞌizh.
1CO 12:3 Parea nat nlad naꞌ iniꞌí bega leꞌa tal ton ncho Espíritu ten Dios len ladoꞌo na, leꞌa xa wa naꞌanpa iníꞌi kweaꞌ ndoꞌ Jesús. No naꞌan ton gab leꞌa Jesús leꞌa nak Xwan xa, tal naꞌanpa ncho Espíritu ten Dios len ladoꞌo xa.
1CO 12:4 Ncho sian taꞌa ndák beuna ta nsaꞌa Espíritu ten Dios ndoꞌ beuna ndontsa gun beuna tiꞌin ten xa, parea leꞌa Espíritu ten Dios wa dubtsa.
1CO 12:5 Ncho sian mod ndun beuna tiꞌin ten Cristo, parea leꞌa Cristo Xwan beuna dubtsa.
1CO 12:6 Nsea ncho sian taꞌa ndun beuna ta na nak beuna xmen Dios, parea leꞌa Dios dubtsa, xa na nsaꞌa be ta gun beuna wa.
1CO 12:7 Leꞌa ndoꞌ kadga dub beuna nsaꞌa Espíritu ten Dios dubga taꞌa ndák beuna, ndontsa gakno beuna be ltsaꞌa beuna.
1CO 12:8 Leꞌa ndoꞌ pla xa nsaꞌa Espíritu wa gudiꞌizh xa ta ndák Dios. No ndoꞌ stapla xa nsaꞌa leꞌaka Espíritu gudiꞌizh bexa be ta ugaꞌach ten Dios.
1CO 12:9 No ndoꞌ stapla xa nsaꞌa leꞌaka Espíritu uzhebpa igeꞌ ladna bexa Cristo. No ndoꞌ stapla xa nsaꞌa leꞌaka Espíritu yunyakna bexa be men gizh.
1CO 12:10 No leꞌaka Espíritu nsaꞌa ndoꞌ stapla xa gun bexa uyon, no ndoꞌ stapla xa gudiꞌizh bexa sakndoꞌ Dios, no ndoꞌ stapla xa iniꞌí bexa naga ta ndab stub men ta nsaꞌa Espíritu ten Dios natal ta nsaꞌa maxuꞌu, no ndoꞌ stapla xa gudiꞌizh bexa stubga diꞌizh lá ndadiꞌizh be men, no ndoꞌ stapla xa ta yakbeꞌena bexa xtaꞌan ndab stub ndoꞌ diꞌizh wa.
1CO 12:11 Leꞌa itea be ta ndee nsaꞌa leꞌaka Espíritu ten Dios, nsaꞌa xa ndoꞌ beuna lakka nlad xa gák beuna.
1CO 12:12 Leꞌa dub men sian ndoꞌ nsaleaꞌ be las xa, ná leꞌa idub xa wa dubtsa men nak. No liga nak itea beuna nak xmen Cristo.
1CO 12:13 Leꞌa dubtsa Espíritu ten Dios utaleaꞌ iteanak beuna, cha dubtsa myak beuna, guniꞌi tal beuna xa judio natal xa naꞌanpa xa judio, guniꞌi tal beuna nak dub xa ncho ndoꞌ yaꞌa stubga men natal naꞌan. Leꞌa dubtsa Espíritu msaꞌa Dios uyoꞌo len ladoꞌo beuna.
1CO 12:14 Leꞌa dub men naꞌanpa dubtsa nsaleaꞌ idub xa, ndi sian ndoꞌ nsaleaꞌ be las xa.
1CO 12:15 Tal leꞌa xoꞌo xa gab: “Leꞌa naꞌ ndee naꞌanpa yaꞌa xa, ta weꞌe naꞌanpa no naꞌ nak las xa”, naꞌanpa ta weꞌetsa gun leꞌa xoꞌo xa naꞌanlapa las xa.
1CO 12:16 No tal leꞌa nchaꞌ xa gab: “Leꞌa naꞌ ndee naꞌanpa ngusndoꞌ xa, ta weꞌe naꞌanpa no naꞌ nak las xa”, naꞌanpa ta weꞌetsa gun leꞌa nchaꞌ xa naꞌanlapa las xa.
1CO 12:17 Tal leꞌa idub las dub men nak ngusndoꞌ xa, leꞌa xa wa lá yoo gan goꞌón. No tal leꞌa idub las xa nak nchaꞌ xa, leꞌa xa wa lá yoo gan igenna dub xlaꞌa.
1CO 12:18 Leꞌa Dios msob kadga dub ta wa las dubga men sa nladka Dios.
1CO 12:19 Tal leꞌa men idub nak dub bleꞌatsa las xa wa, ¿cha ma idub xa zha?
1CO 12:20 Sian ndoꞌ nsaleaꞌ xa, parea leꞌa idub xa wa dubtsa.
1CO 12:21 Leꞌa ngusndoꞌ xa lá yoo gan gab ndoꞌ yaꞌa xa: “Leꞌa naꞌ lá nkiꞌin lu.” No ni gek xa lá yoo gan gab ndoꞌ be xoꞌo xa: “Leꞌa naꞌ lá nkiꞌin bega.”
1CO 12:22 Ndi leꞌa be las beuna sa nsak beuna mas uleꞌa nak, leꞌa be sa wa ndi leꞌa mas ndantiꞌin beuna.
1CO 12:23 No leꞌa be las beuna sa na nsak beuna ndidotsa nsuꞌu wa, leꞌa be sa wa ndi leꞌa mas utsin ntsaw beuna. No leꞌa be las beuna sa na lá nsabndoꞌ uluu, leꞌa be sa wa no liga mas ntsaw beuna.
1CO 12:24 Parea naꞌanpa li utsaw beuna be las beuna sa mas nluꞌu. Leꞌa Dios mbindeꞌe idub dub men, dub mod na mas nlaꞌach beuna be las beuna sa na uxee nsak wa.
1CO 12:25 Li leꞌa be las beuna wa naꞌanpa kuyo, ndi gakno‑yá be ltsaꞌa‑yá.
1CO 12:26 Tal leꞌa dub bleꞌa las beuna ndakweaꞌ, leꞌa beuna idub nsén gealkweaꞌ wa. No tal leꞌa dub bleꞌa las beuna nten ladna, leꞌa beuna idub nten ladna.
1CO 12:27 Liga leꞌa beuna itea nak cuent las Cristo, no kadga beuna dub bleꞌaga las xa.
1CO 12:28 Leꞌa lat beuna nak xmen Cristo, leꞌa Dios mti bexa ndun be tiꞌin ten xa. Ned ncho bexa nak apostol, weꞌe ncho bexa ndadiꞌizh sakndoꞌ Dios, weꞌe ncho bexa nak mech uluu diꞌizh ten Dios, weꞌe ncho bexa ndun uyon. No ncho bexa nyunyakna xa gizh, no bexa ndakno bexa uban nak, no bexa nchansu be xmen Cristo, no bexa ndadiꞌizh stub diꞌizh xaꞌaga.
1CO 12:29 Naꞌanpa itea beuna nak apostol. No naꞌanpa itea beuna ndadiꞌizh sakndoꞌ Dios. No naꞌanpa itea beuna nak mech. No naꞌanpa itea beuna ndun uyon.
1CO 12:30 No naꞌanpa itea beuna nyunyakna men gizh. No naꞌanpa itea beuna ndadiꞌizh stubga diꞌizh ten Espíritu. No naꞌanpa itea beuna sun gan gab xteꞌe gab diꞌizh wa.
1CO 12:31 Bkwaꞌan bega be ta mas nsak lat be ta nsaꞌa Dios wa. Parea nat uluu naꞌ bega stub nes masga nsak.
1CO 13:1 Leꞌa tal naꞌ gudiꞌizh be diꞌizh ten be men no be angel, ná lá ikweaꞌ lad naꞌ be men, leꞌa ta ndadiꞌizh naꞌ wa ngen lak ngen dub bleꞌa giꞌib nsid natal dub plati ndun ruid.
1CO 13:2 No tal gudiꞌizh naꞌ sakndoꞌ Dios, no yakbeꞌena naꞌ itea be ta ugaꞌach ten Dios no iteata be taꞌa, no igeꞌ lad naꞌ Dios gast sun naꞌ gan itatsob be geꞌe ubiꞌi, parea tal leꞌa naꞌ lá ikweaꞌ ladna be men leꞌa naꞌ naꞌan xtiꞌin.
1CO 13:3 No tal utsea naꞌ iteanak be ta ndap naꞌ gaw bexa prob, no yun naꞌ cuent leꞌaka naꞌ gast yolꞌ naꞌ, parea tal leꞌa naꞌ lá ikweaꞌ ladna be men, leꞌa be ta ndun naꞌ wa naꞌan xtiꞌin.
1CO 13:4 Leꞌa tal ton nkweaꞌ ladna be ltsaꞌa na, leꞌa xa uxik ndoꞌ itea be taꞌa gun bexa, no utsin gak xa, no naꞌanpa gaklono xa dub xa ndap taꞌa, no ni lá izhinna xa, no lá gunbeꞌe xa leꞌa xa leꞌatsa nsak.
1CO 13:5 No naꞌanpa usalad gak xa, no naꞌanpa ukwaꞌan xa ta nladtsa xa, no naꞌanpa uxax gakloo xa, no yalad xa be ta ugap ndanno be men xa.
1CO 13:6 No naꞌanpa itenno ladna xa be ta ugap ndun be men, leꞌa xa ndi itenno ladna gealngea.
1CO 13:7 Leꞌa tal ton nkweaꞌka ladna be ltsaꞌa na naꞌanpa neꞌe ladna xa be ta ndun bexa, no ndangea ladna xa bexa, no ngeꞌ ladna xa bexa, no nxik xa ndoꞌ itea taꞌa ndun bexa wa.
1CO 13:8 Leꞌa ta na nkweaꞌ ladna be men be ltsaꞌa na wa naꞌanpa nak ta idub. Parea gal dub wizh yá naꞌantapa gudiꞌizh be men sakndoꞌ Dios, no naꞌantapa gudiꞌizh bexa stubga diꞌizh ta nsaꞌa Espíritu ten Dios, no naꞌantapa gudiꞌizh bexa be ta ugaꞌach ten Dios.
1CO 13:9 Leꞌa ta na nchandoꞌ beuna Dios no ta ndadiꞌizh beuna sakndoꞌ Dios, leꞌa be ta wa naꞌanpa itea nak lak nlad Dios.
1CO 13:10 Parea leꞌa gal zha gak cumplir ta ndab Dios, leꞌa beuna yá lá gunta be ta wa.
1CO 13:11 Leꞌa zha na ngok naꞌ meꞌed ndadiꞌizh naꞌ lak ndadiꞌizh be meꞌed, no ndanbeꞌe naꞌ lak ndanbeꞌe be meꞌed, no nyakbeꞌena naꞌ lak nyakbeꞌena be meꞌed. Parea leꞌa zha na ngok gox naꞌ, mla naꞌ ta ndun naꞌ zha meꞌed naꞌ wa.
1CO 13:12 Leꞌa nat leꞌa beuna nchandoꞌ Dios cuenttsa gor na nwiꞌi beuna ndoꞌ dub waꞌán lá nluu utsin. Parea leꞌa gal gor leꞌa beuna ndon ndeꞌe iniꞌí gaꞌal ndoꞌ Dios. Leꞌa nat leꞌa naꞌ ndidotsa nchandoꞌ Dios, parea leꞌa gal zha wa leꞌa naꞌ igondoꞌ Dios lak nchandoꞌ Dios naꞌ.
1CO 13:13 Ncho chon taꞌa naꞌanpa initndoꞌ: leꞌa ta wa ta ngeꞌ ladna beuna Dios, no ta ndenkeaꞌ beuna gun Dios ta ndab xa, no ta nkweaꞌ ladna beuna be ltsaꞌa beuna. Parea leꞌa ta mas nsak ndoꞌ yon ta ndee wa, leꞌa ta wa ta ikweaꞌ ladna beuna be ltsaꞌa beuna.
1CO 14:1 Bin bega juers ikweaꞌ ladna bega be ltsaꞌa bega, no bkwaꞌan bega be ta gák bega gun bega tiꞌin ten Dios, lak nsaꞌa Espíritu ten Dios. Parea leꞌa ndoꞌ itea be ta wa, mas byuꞌ ladna bega gudiꞌizh bega sakndoꞌ Dios.
1CO 14:2 Leꞌa xa na ndadiꞌizh stub ndoꞌ diꞌizh nsaꞌa Dios, leꞌa xa wa ndadiꞌizh ndoꞌ Dios naꞌanpa ndoꞌ men, leꞌa‑yá naꞌan ton nyakbeꞌena. Leꞌa ta ndadiꞌizh xa wa ta msaꞌaka Espíritu ten Dios ndoꞌ xa, dub ta ugaꞌach nak‑a.
1CO 14:3 Parea leꞌa bexa ndadiꞌizh sakndoꞌ Dios wa, leꞌa xa wa ndadiꞌizh ndoꞌ be men, ndun xa mas ngeꞌ ladna be men wa Dios, no ntenxeꞌa xa be men, no nluꞌuzh xa be men.
1CO 14:4 Leꞌa xa na ndadiꞌizh stubga diꞌizh nsaꞌa Dios wa, leꞌa ta wa leꞌatsa xa ndakno. Ná leꞌa xa ndadiꞌizh sakndoꞌ Dios wa, leꞌa ta wa ndakno itea be xmen Cristo wa.
1CO 14:5 Leꞌa naꞌ nlad leꞌa iteanak bego gudiꞌizh stubga diꞌizh nsaꞌa Dios, parea mas nlad naꞌ gudiꞌizh bega sakndoꞌ Dios. Leꞌa ta ndadiꞌizh bexa sakndoꞌ Dios wa mas nsak ndoꞌ ta ndadiꞌizh bexa stubga diꞌizh. Parea tal ncho xa gab xteꞌe ndab stub ndoꞌ diꞌizh wa, leꞌa ta wa gakno bexa mas igeꞌ ladna bexa Dios.
1CO 14:6 Bego nak beuna xmen Cristo, tal leꞌa naꞌ gal lat bega, cha gudiꞌizh naꞌ sbeꞌen stubga diꞌizh, leꞌa ta ndadiꞌizh naꞌ wa naꞌan xtiꞌin. Mas wen gudiꞌizh naꞌ dub ta mluu Dios ndoꞌ naꞌ, natal dub ta uní naꞌ cuent ten Dios, natal dub ta gudiꞌizh naꞌ sakndoꞌ Dios, natal dub ta ndab diꞌizh ten Dios.
1CO 14:7 Ta ugeakapa leꞌa iteanak be taꞌa nsid lak dub bzhee natal dub arpa, tal leꞌa itea‑yá dubtsa nsid, ¿xteꞌe iniꞌí beuna xtaꞌan ndoꞌol dub ná wa nsea stub ná wa zha?
1CO 14:8 No tal leꞌa dub trompet lá utsin kwezh gor isaxan dub guerr, ¿cha ton gun list gun xa guerr zha?
1CO 14:9 No liga bego, tal leꞌa bega gudiꞌizh dub diꞌizh ta lá yakbeꞌena be men, ¿xteꞌe iniꞌí bexa xtaꞌan ndab bega zha? Leꞌa ta ndab bega wa ta naꞌan xtiꞌin, cuent ndadiꞌizh bega‑yá ndoꞌ mbitsa.
1CO 14:10 Leꞌa ndoꞌ gizhliyo ndee ncho isandoꞌ diꞌizh, leꞌa itea be diꞌizh wa ndap xtaꞌan gab.
1CO 14:11 Parea tal leꞌa naꞌ lá yakbeꞌena ta ndab stubga xa, leꞌa xa gunbeꞌe leꞌa naꞌ dub xa utoꞌo sit. No liga gunbe naꞌ ndee leꞌa xa wa dub xa utoꞌo sitga.
1CO 14:12 No liga leꞌa bego na nlad gak be ta nsaꞌa Espíritu ten Dios, bkwaꞌan bega be ná mas gakno be xmen Cristo mas igeꞌ ladna bexa Cristo.
1CO 14:13 Ta weꞌe leꞌa bego na ndák ndadiꞌizh stubga diꞌizh nsaꞌa Dios, unab bega ndoꞌ Dios ndontsa syoꞌo gan gudiꞌizh bega xteꞌe gab ta ndab bega wa.
1CO 14:14 Tal leꞌa naꞌ gudiꞌizhno Dios dub diꞌizh lá nchandoꞌ men, leꞌa len ladoꞌo naꞌ ndadiꞌizhno naꞌ Dios, parea leꞌa naꞌ lá nyakbeꞌena ta ndáp naꞌ wa.
1CO 14:15 ¿Ta weꞌe xteꞌe nsabndoꞌ gun naꞌ zha? Leꞌa naꞌ gudiꞌizhno Dios no goltoꞌo naꞌ ndoꞌ Dios be diꞌizh ncho len ladoꞌo naꞌ lak nsaꞌa Espíritu ten Dios. No gudiꞌizhno naꞌ Dios nsea goltoꞌo naꞌ ndoꞌ Dios be diꞌizh nyakbeꞌena naꞌ.
1CO 14:16 Tal leꞌa bega nabtsa diꞌizh nsaꞌa Espíritu ten Dios nsaꞌa bega xno ndoꞌ Dios, leꞌa dub xa ndoꞌón‑a lá yoo gan no usaꞌa xno ndoꞌ Dios, leꞌa xa lá nyakbeꞌena ta ndab bega wa.
1CO 14:17 Leꞌa bego na li ndun wa ta ugeaka wen nsaꞌa xno ndoꞌ Dios, parea leꞌa‑yá lá ndakno stubga xa.
1CO 14:18 Nat nsa naꞌ xno ndoꞌ Dios leꞌa naꞌ mas ndák ndadiꞌizh stubga diꞌizh ndoꞌ iteanak bego.
1CO 14:19 Parea leꞌa dub sa nzhealbe be xmen Cristo, mas wen gudiꞌizh naꞌ gaꞌay diꞌizh nyakbeꞌena bexa ta uluu naꞌ bexa, ndoꞌ tiꞌi mil diꞌizh lá nyakbeꞌena bexa.
1CO 14:20 Bega nak beuna xmen Cristo, lá gunbeꞌe bega lak ndanbeꞌe dub meꞌed. Gok bega cuent dub meꞌed lá nchandoꞌ sian be ta ugap, parea utsin binbeꞌe bega lak ndanbeꞌe dub xa gox.
1CO 14:21 Leꞌa lak nkeaniꞌi diꞌizh ten Dios, ndab Dios: Leꞌa naꞌ guntiꞌin be men xaꞌaga nacion gudiꞌizh bexa stubga diꞌizh ndoꞌ bexa Israel, ná leꞌa bexa wa ni lika lá isakyoꞌón ta ndáp naꞌ.
1CO 14:22 Ta weꞌe leꞌa ta ndadiꞌizh bexa stubga diꞌizh wa, leꞌa ta wa nluu ndoꞌ bexa lá ndangea ladna Dios leꞌa Dios ndapka juers. Parea leꞌa ta ndadiꞌizh bexa sakndoꞌ Dios wa, leꞌa ta wa nluu dub diꞌizh ten Dios ndoꞌ bexa ndangea ladna Dios, naꞌanpa ndoꞌ bexa lá ndangea ladna Dios.
1CO 14:23 Ta weꞌe leꞌa gor na nyakjunt itea bega nak xmen Cristo, tal gudiꞌizh itea bega stubga diꞌizh nsaꞌa Dios, cha yate dub men lá nchandoꞌ Dios natal dub men lá ndangea ladna Dios, leꞌa men wa gab leꞌa bega xa tont.
1CO 14:24 Parea tal leꞌa itea bega gudiꞌizh sakndoꞌ Dios cha yate dub men lá nchandoꞌ Dios natal dub men lá ndangea ladna Dios, leꞌa gor na ndoꞌón xa ta ndadiꞌizh bega wa, cha igondoꞌ xa leꞌa xa noga ndap ke.
1CO 14:25 Cha iniꞌí xa leꞌa Dios nchandoꞌ be ta ugaꞌach ncho ladoꞌo xa, cha isaxib xa ndoꞌ Dios yankea xa Dios. Cha gab xa leꞌa Dios ta ugeaka ncho lat bega.
1CO 14:26 Bego nak beuna xmen Cristo, leꞌa zha na nzhealbe bega leꞌa pla bega goltoꞌo ndoꞌ Dios, no pla bega uluu be ltsaꞌa bega, no pla bega gudiꞌizh dub ta mluu Dios ndoꞌ bega, no pla bega gudiꞌizh stubga diꞌizh lá nchandoꞌ men, nsea pla bega gab xtaꞌan gab be diꞌizh wa. Li bin bega ndontsa gakno bega be ltsaꞌa bega nak xmen Cristo.
1CO 14:27 Leꞌa gor na ndadiꞌizh bega stubga diꞌizh nsaꞌa Dios wa, toptsa bega natal chon bega dub gaꞌga bega bidiꞌizh. Leꞌa stub xa gab ná xtaꞌan ndab bega.
1CO 14:28 Tal leꞌa naꞌan ton gun gan gab xtaꞌan ndab bega, naꞌanpa gudiꞌizh bega‑yá lat ltsaꞌa bega. Ndi nabtsa bega bidiꞌizh‑a ndoꞌ Dios.
1CO 14:29 No liga leꞌa bego na ndadiꞌizh sakndoꞌ Dios iníꞌi toptsa bega natal chon bega, leꞌa iteata bega blaꞌach‑a, gunbeꞌe bega naga leꞌa nak‑a.
1CO 14:30 Ná tal leꞌa Dios uluu dub taꞌa ndoꞌ stubga xa nsob sa wa, leꞌa xa nsoꞌyadiꞌizh ned wa nsabndoꞌ lá gudiꞌizhta, ndontsa gudiꞌizh stub xa wa.
1CO 14:31 Tal li dub gaꞌga bega gudiꞌizh sakndoꞌ Dios, weꞌe leꞌa itea bega gák, no itea bega ko gan.
1CO 14:32 Leꞌa bexa ndadiꞌizh sakndoꞌ Dios syoꞌo gan kweas gast gal gor nsabndoꞌ gudiꞌizh xa.
1CO 14:33 Leꞌa Dios lá nlad dub ta ruid ta lá yakbeꞌena bexa. Leꞌa Dios ndi nlad utsintsa gudiꞌizh bexa. Leꞌa lak nak costumbr itea sa ncho be xmen Cristo,
1CO 14:34 leꞌa xagots ten bega xetsa gak gor nzhealbe bega. Leꞌa bexa wa lá nsabndoꞌ gudiꞌizh, leꞌa ley ten Dios ndab isakyoꞌón bexa ta ndab xabgiꞌi ten xa.
1CO 14:35 Tal ton xagots nlad iniꞌí xteꞌe nak dub taꞌa, inabdiꞌizh xa ndoꞌ xabgiꞌi ten xa ta lidtsa bexa. Lá utsin nak‑a tal dub xagots gudiꞌizh sa nzhealbe bega nak xmen Cristo.
1CO 14:36 Btseꞌa ladna bega leꞌa diꞌizh ten Dios naꞌanpa lat bega utoꞌo, no naꞌanpa lattsa bega ulansea‑yá.
1CO 14:37 Tal ton nsak leꞌa xa ndadiꞌizh sakndoꞌ Dios, natal nsak xa leꞌa ta ndák xa wa ta nsaꞌa Espíritu ten Dios, igondoꞌ xa leꞌa be ta nkeꞌa naꞌ ndee ta unibeꞌe Cristo Xwan beuna.
1CO 14:38 Tal leꞌa xa lá igondoꞌ ta wa, leꞌa bega lá nsabndoꞌ isakyoꞌón ta ndab xa wa.
1CO 14:39 Bego nak beuna xmen Cristo, bkwaꞌan bega xteꞌe gudiꞌizh bega sakndoꞌ Dios, no lá uka bega gudiꞌizh bexa stubga diꞌizh nsaꞌa Dios.
1CO 14:40 Parea utsintsa bin bega itea‑yá ndon xkwaꞌatsa.
1CO 15:1 Bego nak beuna xmen Cristo, leꞌa naꞌ nlad utseꞌa ladna bega diꞌizh wen ten Cristo, ta mbidiꞌizh naꞌ ndoꞌ bega. Leꞌa diꞌizh wa ta mbingea ladna bega, no gast nat ndangea ladna bega‑yá.
1CO 15:2 Tal leꞌa bega lá ulaꞌa be diꞌizh mbidiꞌizh naꞌ wa, weꞌe leꞌa bega gap gealnaban ndoꞌ Dios. Ná tal leꞌa bega ulaꞌa diꞌizh wa, leꞌa ta na mbingea ladna bega ta wa ta naꞌan xtiꞌin.
1CO 15:3 Leꞌa ta mas nsak mluu naꞌ ndoꞌ bega wa leꞌakaga ta mluu bexa ndoꞌ naꞌ wa: leꞌa ta wa leꞌa Cristo ngut ndontsa yuꞌu be ke ten beuna, lak nkeaniꞌi diꞌizh ten Dios.
1CO 15:4 Cha mgaꞌach xa, no mban xa zha ngok myon wizh, lak nkeaniꞌi diꞌizh ten Dios.
1CO 15:5 Cha weꞌe mlundoꞌ xa ndoꞌ Pedr, tsoꞌo wa mlundoꞌga xa ndoꞌ be apostol ten xa.
1CO 15:6 Leꞌa tsoꞌoga wa mlundoꞌ xa ndoꞌ masla dub gaꞌay gayoꞌo be xmen xa. Ncho kwaꞌad bexa wa bi nbanbe, no ncho xa ngutla.
1CO 15:7 Tsoꞌo wa mlundoꞌ xa ndoꞌ Jacob, no mlundoꞌgal xa ndoꞌ be apostol wa.
1CO 15:8 Ndon lult mlundoꞌ xa ndoꞌ naꞌ, leꞌa naꞌ cuent dub meꞌed ngol dub gor ni lá nsabndoꞌ gal meꞌed.
1CO 15:9 Leꞌa naꞌ ndon leꞌa naꞌanpa nsak ndoꞌ itea be apostol ten Cristo gast ni lá nsabndoꞌ isaleaꞌ naꞌ apostol, geal leꞌa naꞌ ugap mbinno be xmen Cristo.
1CO 15:10 Ná leꞌa Dios mkweaꞌ ladna naꞌ, ta weꞌe msaꞌa xa ta nak naꞌ apostol. Leꞌa ta na li msaꞌa Dios ndoꞌ naꞌ wa uzhebpa ngoktiꞌin, leꞌa naꞌ mas ndun tiꞌin ten Dios ndoꞌ iteata bexa nak apostol. Parea naꞌanpa naꞌtsa ndun ta wa, leꞌa naꞌ juers ten Dios ndun ta wa.
1CO 15:11 Guniꞌi ton ndadiꞌizh cuent ten Cristo, tal naꞌ‑yá natal bexa weꞌe‑yá, parea lika ndadiꞌizh besa‑yá no lika mbingea ladna bega‑yá.
1CO 15:12 Leꞌa besa ndadiꞌizhka leꞌa Cristo mban ndoꞌ gealgut. Ta weꞌe, ¿xtaꞌan ncho bega ndab leꞌa bexa ngut naꞌanpa ibantabe?
1CO 15:13 Tal leꞌa bexa ngut wa naꞌanpa iban, weꞌe leꞌa Cristo no lá iban.
1CO 15:14 No tal leꞌa Cristo lá iban, weꞌe leꞌa ta ndadiꞌizh besa wa no ta ndangea ladna bega Cristo wa ta naꞌan xtiꞌin.
1CO 15:15 Tal leꞌa be men ngut naꞌanpa ibangal, weꞌe leꞌa ta ndadiꞌizh besa cuent ten Dios wa dub ta kwiꞌin, geal leꞌa besa ndadiꞌizh leꞌa Dios mxiste Cristo ndoꞌ gealgut.
1CO 15:16 Tal leꞌa bexa ngut wa naꞌanpa iban, weꞌe leꞌa Cristo noga naꞌanpa iban.
1CO 15:17 Tal leꞌa Cristo naꞌanpa iban, weꞌe leꞌa ta ndangea ladna bega Cristo wa ta naꞌan xtiꞌin, no naꞌanpa yuꞌu be ke ten bega.
1CO 15:18 No tal naꞌanpa iban Cristo, leꞌa ta wa gab leꞌa bexa na mbingea ladna Cristo cha tsoꞌo wa ngut bexa, leꞌa bexa wa ndi ngok perdid.
1CO 15:19 Tal leꞌa beuna ndanbeꞌe leꞌa Cristo ndakno beuna ndoꞌ gizhliyo ndeetsa, leꞌa beuna mas proꞌob nak ndoꞌ itea be men.
1CO 15:20 Parea ta ugeaka leꞌa Cristo mban ndoꞌ gealgut, ta weꞌe uniꞌíka beuna leꞌa bexa ngut wa ibanka, lak ned mban Cristo.
1CO 15:21 Leꞌa ke ten dub men, leꞌa itea be men ndat. No liga leꞌa juers ten dub men, leꞌa bexa ngut ibangal.
1CO 15:22 Leꞌa itea be men nak bexa ras Adán, ta weꞌe itea be men gat. No liga leꞌa itea bexa nak xa ten Cristo wa ibankabe.
1CO 15:23 Parea kad dub xa iban gor na nsabndoꞌ‑yá: leꞌa Cristo nak xa ned mban. Weꞌe ibanga be xmen Cristo gor na ilen xa.
1CO 15:24 Weꞌe gal zha lult, zha na gun Cristo gan ndoꞌ itea bexa nibeꞌe nsea bexa nsak, cha yun xa cuent ta nibeꞌe xa ndoꞌ Dios Xus beuna.
1CO 15:25 Leꞌa Cristo leꞌa nibeꞌe gast gal zha inibeꞌe xa ndoꞌ iteanak bexa ndaklono xa, kwe bexa wa xan ndats xa.
1CO 15:26 Leꞌa ta na ndon leꞌa lult unitndoꞌ Cristo wa leꞌa ta wa gealgut.
1CO 15:27 Leꞌa Dios ute itea be taꞌa xan ndats Cristo inibeꞌe xa‑yá, parea leꞌa ta wa naꞌanpa no Dios, leꞌa Dios leꞌa nak xa na nte itea be taꞌa sa wa.
1CO 15:28 Ná leꞌa gal zha na inibeꞌe Cristo itea be taꞌa, weꞌe leꞌa Cristo Xin Dios cha yun cuent be ta wa ndoꞌ Dios xa na msaꞌa ta wa inibeꞌe Cristo. Weꞌe leꞌa Dios inibeꞌe iteanak be taꞌa.
1CO 15:29 No stubga taꞌa gáp naꞌ. Leꞌa ncho bexa ntaleaꞌ sakndoꞌ bexa ngutla. Parea tal leꞌa bexa ndanbeꞌe leꞌa bexa ngut wa lá ibantabe, ¿xtaꞌan ngi li ndun bexa ta wa?
1CO 15:30 ¿No xtaꞌan ngi li rages nde besa itea wizh zhaga, tal leꞌa bexa ngut wa lá ibantabe?
1CO 15:31 Lak segur ntenno lad naꞌ bega nak xmen Jesucristo, no liga segur gáp naꞌ leꞌa naꞌ itea wizh ngi sat.
1CO 15:32 Leꞌa ncho bexa gezh Éfeso cuent man ugiꞌi ugap mbinno naꞌ. Parea tal ta ugeaka leꞌa bexa ngut wa lá ibantabe lak ncho bego ndab, leꞌa be ta mbin naꞌ sa wa dub ta naꞌan xtiꞌin. Ndi mas wen gun beuna lak ndab ncho bexa: gaw beuna no goo beuna, leꞌa geꞌa leꞌa beuna gat.
1CO 15:33 Lá ulaꞌa bega ukwiꞌinno be men bega. Leꞌa tal beuna nbeseano bexa ugap, leꞌa beuna noga gun ltsaꞌa ta ugap ndun bexa wa.
1CO 15:34 Ta weꞌe list gok bega, no lá gunta bega be ta ugap. Li ndáp naꞌ ndontsa ido ladna bega, leꞌa ncho bega bi lá nchandoꞌ Dios.
1CO 15:35 Leꞌa ncho xa inabdiꞌizh: “¿Xteꞌe iban bexa ngut? ¿Xteꞌe nak idub las bexa gal zha wa?”
1CO 15:36 Leꞌa xa li nabdiꞌizh wa lá iniꞌí xtaꞌan nabdiꞌizh. Leꞌa gor na ndas dub men dub bid leꞌa‑yá juerska ned gazhaꞌa, weꞌeta ilen‑a.
1CO 15:37 Leꞌa gor ndas xa dub bid tal trig‑a natal stubga bid‑a, leꞌa ta wa naꞌanpa lak ta ilen wa, leꞌa‑yá bidtsa.
1CO 15:38 Parea leꞌa Dios nsaꞌa be ya ten‑a lak nlad Dios, kadga dub bid xaꞌaga nak ya ten‑a.
1CO 15:39 No liga leꞌa itea be ta ncho ndoꞌ gizhliyo naꞌanpa dubtsa nak. Leꞌa be men nsea be man xaꞌaga nak. No be migin nsea be mbeal xaꞌaga nak.
1CO 15:40 Ncho be taꞌa gibeꞌa baꞌ no ncho be taꞌa gizhliyo ndee. Leꞌa ta chul ten be ta ncho gibeꞌa naꞌanpa nak lak nak ta chul ten be ta ncho ndoꞌ gizhliyo.
1CO 15:41 Leꞌa xeꞌa wizh xaꞌaga nak ndoꞌ xeꞌa mbeꞌe, no be xeꞌa mbeal xaꞌaga nak. No kadga be mbeal ndiꞌib gibeꞌa xaꞌaga nluu.
1CO 15:42 No liga gak‑a zha na iban bexa ngut. Leꞌa beꞌal las dub xa ngut igaꞌach no sazhaꞌa, parea gal zha iban xa leꞌa xa yá naꞌantapa gat.
1CO 15:43 Leꞌa beꞌal las dub xa ngut ugap nluu no naꞌan xtiꞌin‑a, parea gal zha iban xa leꞌa xa uzheꞌeb chul uluu no gap xa juers.
1CO 15:44 Leꞌa beꞌal las dub xa ngut dub ta gizhliyotsa, parea gal zha iban xa leꞌa las xa dub ta gibeꞌa. Leꞌa lak ncho las be men ta gizhliyo, no ncho las bexa ta gibeꞌa.
1CO 15:45 Leꞌa diꞌizh ten Dios nkeaniꞌi ndab‑a leꞌa Dios ned mbindeꞌe Adán ngok xa dub mgiꞌi ndap gealnaban. No ncho stub xa níꞌi beuna ndoꞌ xa Adán lult. Leꞌa ta wa Cristo xa gibeꞌa, xa nsaꞌa gealnaban nunk lá idub.
1CO 15:46 Leꞌa xa gibeꞌa wa naꞌanpa ned ulen. Leꞌa xa gizhliyo ndi leꞌa ned ulen, cha weꞌe xa gibeꞌa wa.
1CO 15:47 Leꞌa xabgiꞌi ned wa leꞌa ta wa Adán xa gizhliyo. Leꞌa xabgiꞌi itop wa leꞌa ta wa Cristo xa gibeꞌa.
1CO 15:48 Leꞌa beuna xa gizhliyo ndap beuna dub las na lak ngok las Adán xa gizhliyo. No liga leꞌa las bexa gibeꞌa nak lak nak las Cristo xa gibeꞌa.
1CO 15:49 Leꞌa nat leꞌa beuna nak lak ngok xa gizhliyo wa, parea gal zha wa leꞌa beuna yak lak nak Cristo xa gibeꞌa.
1CO 15:50 Bego nak beuna xmen Cristo, leꞌa naꞌ gáp ndoꞌ bega leꞌa beuna lndeꞌetsa ncho ndoꞌ gizhliyo ndee lá yoo gan yate sa nibeꞌe Dios. Leꞌa beꞌal las beuna ta ndat ndee wa lá yoo gan yoo idub tiemp lak be ta ncho gibeꞌa.
1CO 15:51 Leꞌa naꞌ gáp stub ta ugaꞌach ten Dios: leꞌa beuna naꞌanpa itea gat, parea gal zha wa itea beuna xaꞌaga yak.
1CO 15:52 Leꞌa ta wa ta uxax lak dub nsengichtsa men. Leꞌa gal gor kwezh trompet lult leꞌa bexa ngut wa iban, cha yá naꞌantapa gat bexa. Leꞌa beuna bi ndenban gal zha wa cha xaꞌaga yak.
1CO 15:53 Leꞌa be beꞌal las beuna dub ta sat no sazhaꞌa‑yá, parea leꞌa‑yá nsabndoꞌ yak dub ta lá gazhaꞌata no ni lá gatta‑yá.
1CO 15:54 Nat leꞌa beꞌal las beuna dub ta sazhaꞌa, parea gal zha wa yak‑a dub ta lá gazhaꞌata. Nat leꞌa beꞌal las beuna dub ta sat, parea yak‑a dub ta lá gatta. Leꞌa ta wa gak lak nkeaniꞌi diꞌizh ten Dios, ndab‑a: Leꞌa be men yá naꞌantapa gat, geal leꞌa Dios mbin gan ndoꞌ gealgut.
1CO 15:55 Yá lá izhebta beuna ndoꞌ gealgut, leꞌa gealgut yá lá gunta gan ndoꞌ beuna.
1CO 15:56 Leꞌa ley ten Dios ndab leꞌa tal ton ndap ke ndoꞌ Dios, leꞌa Dios utsaksika xa wa. Ta weꞌe leꞌa be men nzheb ndoꞌ gealgut, leꞌa bexa uniꞌí leꞌa bexa ndapka ke ndoꞌ Dios.
1CO 15:57 Nat usaꞌa beuna xno ndoꞌ Dios leꞌa juers ten ta mbin Jesucristo Xwan beuna wa leꞌa beuna ndun gan ndoꞌ gealgut.
1CO 15:58 Ta weꞌe dubtsa ute bega nak beuna xmen Cristo, no naꞌanpa ulaꞌa bega gealngea ten Cristo, no mas bin bega tiꞌin ten Dios idub tiemp. Leꞌa bega uniꞌí leꞌa itea tiꞌin ndun bega ndoꞌ Dios wa ta ndaktiꞌinka.
1CO 16:1 Leꞌa cuent ten be med ta gakno bega be xmen Cristo ndencho Jerusalén, bin bega lakka ndáp naꞌ gun be xmen Cristo ncho Galacia.
1CO 16:2 Leꞌa itea be wizh ned ten sman, leꞌa kadga dub bega kochaꞌaw dub tuzhga med usaꞌa bega bi lak mbin bega gan, ndontsa naꞌanpa tiꞌi uteleꞌe bega‑yá zha gal naꞌ.
1CO 16:3 Leꞌa zha gal naꞌ sa baꞌ leꞌa naꞌ utuꞌub bexa na mti bega yaꞌulaꞌa med wa Jerusalén, med msaꞌa bega wa. No goꞌo bexa dub git gab ná xtaꞌan li nchaꞌulaꞌa bexa med wa.
1CO 16:4 No tal leꞌa naꞌ ndanbeꞌe leꞌa naꞌ no nsabndoꞌ gaa, leꞌa naꞌ sanoka bexa wa.
1CO 16:5 Leꞌa zha gal inaꞌ naꞌ bega leꞌa naꞌ nsabndoꞌ ned itiꞌid Macedonia, weꞌeta gal naꞌ Corinto baꞌ.
1CO 16:6 Leꞌa naꞌ bi lá iní tal dub ndeꞌeptsa natal idub tiemp kwal yoꞌono naꞌ bega. Weꞌe leꞌa bega syoꞌo gan gakno naꞌ sa gaata naꞌ.
1CO 16:7 Leꞌa naꞌ lá nlad dub inítsa naꞌ bega zha itiꞌid naꞌ sa baꞌ. Leꞌa naꞌ ndi nlad yoꞌono bega dub ndeꞌep tal Dios nlad.
1CO 16:8 Parea leꞌa naꞌ kweas gezh Éfeso ndee gast itid ujest Pentecostés.
1CO 16:9 Leꞌa sa ndee ncho kwaꞌad be men ndakloo ndoꞌ naꞌ, parea no ncho kwaꞌadpa bexa nlad goꞌón diꞌizh ten Cristo ta ndadiꞌizh naꞌ.
1CO 16:10 Tal leꞌa Timoteo yaꞌ sa baꞌ, utsin binno bega xa, leꞌa xa wa no ndun tiꞌin ten Dios lakkaga ndun naꞌ.
1CO 16:11 Gop bega mod ndoꞌ xa no bsaꞌa bega ta nkiꞌin xa ndontsa syoꞌo gan giꞌid inaꞌ xa naꞌ. Leꞌa naꞌ no stapla be xmen Cristo ndee, nkenkeaꞌ besa zha giꞌid Timoteo.
1CO 16:12 Leꞌa sian biaj unaꞌab naꞌ ndoꞌ Apolos goꞌo xa stapla bexa nak xmen Cristo yaꞌinaꞌ bexa bega, ná leꞌa gast nat leꞌa xa lá kaꞌab yaꞌ. Parea leꞌa xa saꞌinaꞌka bega zha na syoꞌo gan yaꞌ xa.
1CO 16:13 Blaꞌach bega no dubtsa ute bega naꞌanpa ulaꞌa bega ta ndangea ladna bega Cristo. Bteꞌa ladna bega no gop bega valor.
1CO 16:14 Bkweaꞌ ladna bega be ltsaꞌa bega guniꞌi xtaꞌan gun bega.
1CO 16:15 Bego nak beuna xmen Cristo, leꞌa bega uniꞌíka leꞌa bexa ncho ta lid Estéfanas ndon ned mbingea ladna Cristo ndoꞌ idub región Acaya baꞌ. Leꞌa bexa wa ulo ladna sbeꞌen ndakno bexa be xmen Dios.
1CO 16:16 Leꞌa naꞌ gáp ndoꞌ bega uxobgek bega ndoꞌ bexa wa no ndoꞌ iteata bexa li ndun tiꞌin ten Dios wa.
1CO 16:17 Uzhebpa nten lad naꞌ ta na mbiꞌid Estéfanas no Fortunato no Acaico, leꞌa bexa ndakno naꞌ, dub ta lá yoo gan gakno bega naꞌ leꞌa bega sit ncho.
1CO 16:18 Leꞌa bexa wa ndun wen nyoꞌo lad naꞌ ndee lak ndanno bexa bega. Gop bega mod ndoꞌ itea bexa na ndun ltsaꞌa ta ndun bexa ndee.
1CO 16:19 Leꞌa be xmen Cristo ndencho be gezh región Asia ndee no nidiꞌizh ndoꞌ bega. No Aquila nsea Priscila nsea iteata be xmen Dios nzhealbe ta lid itop bexa wa uzhebpa nidiꞌizh ndoꞌ bega ta na nak bega xmen Cristo.
1CO 16:20 Leꞌa iteata bexa nak xmen Cristo no nidiꞌizh ndoꞌ bega. Unidiꞌizh bega ndoꞌ be ltsaꞌa bega ta nluu leꞌa bega nkweaꞌ ladna bexa.
1CO 16:21 Leꞌa naꞌ Pabl yaꞌa naꞌ nkeꞌa naꞌ ta ndee ndoꞌ git, ta nidiꞌizh naꞌ ndoꞌ bega.
1CO 16:22 Leꞌa tal ncho bega lá ndankea Jesucristo Xwan beuna, leꞌa Dios utsaksi bega. ¡Cristo Xa Nibeꞌe, uxax utsea ga!
1CO 16:23 Nat naꞌab naꞌ ndoꞌ Jesucristo Xwan beuna mas uzheꞌeb utsin gunno xa bega.
1CO 16:24 Leꞌa naꞌ nkweaꞌ ladna itea bega no nak xmen Cristo Jesús. Lika nak‑a.
2CO 1:1 Leꞌa naꞌ ndee Pabl, xa na mtuꞌub Dios gun naꞌ tiꞌin ten Jesucristo. Leꞌa naꞌ no Timoteo xa no nak xmen Cristo nkeꞌa besa git ndee ndoꞌ itea bego na nak xmen Dios, bego na nzhealbe gezh Corinto baꞌ; no ndoꞌ iteata be xmen Cristo ndencho idub Acaya baꞌ.
2CO 1:2 Naꞌab naꞌ ndoꞌ Tad Dios no ndoꞌ Jesucristo Xwan beuna mas utsin gak bexa ndoꞌ bega, no gun bexa wen yoo ladna bega.
2CO 1:3 Uzhebpa usaꞌa beuna xno ndoꞌ Dios Xus Jesucristo Xwan beuna, leꞌa xa nkweaꞌ ladna beuna no nluꞌuzh xa beuna ndoꞌ sian taꞌa.
2CO 1:4 Leꞌa xa wa nluꞌuzh besa ndoꞌ itea be gealkweaꞌ ntid besa, ndontsa no besa isuꞌu uluꞌuzhga bexa nsatid ndoꞌ isandoꞌ be gealkweaꞌ, lak nluꞌuzh Dios besa.
2CO 1:5 Dub lak niꞌí besa sian gealkweaꞌ lak uniꞌí Cristo be gealkweaꞌ, no liga ndák besa nluꞌuzh besa stubga men lak nluꞌuzh Cristo besa.
2CO 1:6 Leꞌa besa nsatid be gealkweaꞌ ndontsa noga besa suꞌu uluꞌuzh bega no gap bega gealnaban ndoꞌ Dios. No liga leꞌa Dios nluꞌuzh besa ndontsa noga besa uluꞌuzh bega, cha uxik bega ndoꞌ be gealkweaꞌ nsatid bega, ltsaꞌa be gealkweaꞌ nsatid besa ndee.
2CO 1:7 Leꞌa besa ngeꞌ ladna leꞌa bego sxikka, leꞌa lak dubtsa nsatid beuna be gealkweaꞌ, no liga dubtsa uluꞌuzh Dios beuna.
2CO 1:8 Bego nak beuna xmen Cristo, nlad besa iniꞌí bega xteꞌe juert uyoꞌo besa Asia. Uzhebpa dub gealkweaꞌ siꞌil uniꞌí besa gast yá lá uxikta besa ndoꞌ‑yá, ni besa lá ibanta besa.
2CO 1:9 Leꞌa besa ni leꞌa besa gatka, parea leꞌa ta weꞌe msuꞌu leꞌa besa naꞌanpa igeꞌ ladna leꞌaka leꞌa besa, ndi mas mgeꞌ ladna besa Dios, xa na nxiste be men ngutla.
2CO 1:10 Leꞌa xa cha ngokno besa lá ngat besa no bi ndakno xa besa nat, ta weꞌe ngeꞌ ladna besa leꞌa xa suꞌuka gaknota besa.
2CO 1:11 Leꞌa bega no nsabndoꞌ inab ndoꞌ Dios gaknota xa besa. Tal leꞌa kwaꞌad bega li nab ndoꞌ Dios, weꞌe leꞌa kwaꞌad be men no usaꞌa xno ndoꞌ Dios gor iniꞌí bexa xteꞌe ndakno Dios besa.
2CO 1:12 Leꞌa besa nten ladna leꞌa besa uniꞌí len ladoꞌo besa leꞌa besa sbeꞌen utsin ndanno bega no iteata be men lak nsaꞌa Dios gun besa. Leꞌa ta ndun besa wa naꞌanpa nak ta ndanbeꞌe leꞌatsa besa. Leꞌa‑yá ndi nak ta nsaꞌa Dios ndoꞌ besa.
2CO 1:13 Leꞌa ta nkeꞌa besa ndoꞌ git ndee naꞌanpa dub ta ugan lá yakbeꞌena bega. Leꞌa naꞌ nlad idub‑a yakbeꞌena bega.
2CO 1:14 Nat leꞌa bega ndido nyakbeꞌena leꞌa gal wizh ilengal Jesús Xwan beuna leꞌa bega itenno ladna besa, lak itenno ladna besa bega baꞌ.
2CO 1:15 Ta weꞌe leꞌa naꞌ nlad ned bega gal inaꞌgal naꞌ ndontsa gak top biaj yoꞌono naꞌ bega.
2CO 1:16 Mbinbe naꞌ gal inaꞌ naꞌ bega gor gaa naꞌ Macedonia, weꞌe stub biaj gal inaꞌgal naꞌ bega gor ilen naꞌ, cha gakno bega naꞌ ilaya naꞌ Judea.
2CO 1:17 Leꞌa ta na li ndáp naꞌ ta wa, leꞌa naꞌ juerska li gun. ¿Nate nsak bega leꞌa naꞌ ndun lak ndun ncho be men, ndab xa gun xa dub taꞌa cha lá ndun xa lak ndab xa wa?
2CO 1:18 Leꞌa Dios nsobwiꞌi leꞌa gor na ndáp naꞌ gun naꞌ dub taꞌa, leꞌa naꞌ sunka ta wa.
2CO 1:19 Leꞌa naꞌ ndee nsea Silvano nsea Timoteo mbidiꞌizh besa diꞌizh ten Jesucristo Xin Dios ndoꞌ bega. Leꞌa xa wa naꞌanpa ndab dub taꞌa ned, cha tgaꞌ xaꞌaga taꞌa gun xa. Ndi ndunka xa lak ndadiꞌizh xa.
2CO 1:20 Leꞌa be ta ndab Dios yoo wa, leꞌa Jesucristo leꞌa ndunka itea be ta wa. Ta weꞌe leꞌa beuna ndab leꞌa ta ndab Dios wa gealngeaka, no nsaꞌa beuna xno ndoꞌ Dios.
2CO 1:21 Leꞌa Dios ndun leꞌa besa ndee no bego dubtsa nak nsea Cristo, leꞌa Dios leꞌa mti beuna gak beuna xmen xa.
2CO 1:22 No msaꞌa Dios Espíritu ten na ncho len ladoꞌo beuna. Leꞌa ta wa cuent dub se gab leꞌa beuna ikaꞌaka be ta ndab xa usaꞌa xa ndoꞌ beuna wa.
2CO 1:23 Nat nsobwiꞌi Dios gáp naꞌ leꞌa naꞌ biseata gal inaꞌgal bega Corinto baꞌ, geal leꞌa naꞌ lá nlad kweaꞌ yoo ladna bega.
2CO 1:24 Leꞌa besa naꞌanpa nibeꞌe xteꞌe nsabndoꞌ gungea ladna bega, leꞌa bega yá wenka ndangea ladna Cristo. Leꞌa besa ndi nlad gakno bega, ndontsa mas iten ladna bega.
2CO 2:1 Ta weꞌe mbinbe naꞌ naꞌanpa gal inaꞌ naꞌ bega stub biaj, tal leꞌa ta wa gun mas uban yoo ladna bega.
2CO 2:2 Tal leꞌa naꞌ gun uban yoo ladna bega, ¿cha tonma gun gan iten ladna naꞌ zha? Leꞌa ta wa leꞌaka bego baꞌ.
2CO 2:3 Ta weꞌe li ned mkeꞌa naꞌ git wa ndoꞌ bega, ndontsa gor ilayal naꞌ sa baꞌ naꞌanpa uban yoꞌo lad naꞌ, ndi itenno lad naꞌ bega. Leꞌa naꞌ ngeꞌ ladna leꞌa tal leꞌa naꞌ iten ladna, leꞌa bega no iten ladna.
2CO 2:4 Leꞌa gor na mkeꞌa naꞌ git wa leꞌa naꞌ uzhebpa uban ncho ladna no kweaꞌ ncho lad naꞌ gast ndon naꞌ. Naꞌanpa ukeꞌa naꞌ git wa ndontsa uban yoo ladna bega, ndi mkeꞌa naꞌ‑yá ndontsa iniꞌí bega xteꞌe uzheꞌeb nkweaꞌ lad naꞌ bega.
2CO 2:5 Parea leꞌa lat bega ncho dub xa mbin uzhebpa uban myoꞌo lad naꞌ, no gast kwaꞌad bega uban myoꞌo ladna.
2CO 2:6 Leꞌa bega yá kwaꞌad uteyo xa wa, nat yá unika ta wa.
2CO 2:7 Leꞌa nat leꞌa bega nsabndoꞌ gungeꞌ ladna ndoꞌ xa wa no utsin gunno bega xa, ndontsa naꞌanpa uzheꞌeb uban yoo ladna xa, cha gach ladna xa.
2CO 2:8 Ta weꞌe naꞌab naꞌ ndoꞌ bega gun bega ta nluu leꞌa bega nkweaꞌ ladna xa.
2CO 2:9 Leꞌa cuent ten ta ndee wa mkeꞌala naꞌ ndoꞌ bega, ndontsa iní naꞌ naga sxobgek bega ndoꞌ naꞌ nate naꞌan.
2CO 2:10 Leꞌa xa na li ndangeꞌ ladna bega ndoꞌ na wa, leꞌa naꞌ no ndangeꞌ ladna ndoꞌ xa wa, tal ncho xtaꞌan nsabndoꞌ gungeꞌ lad naꞌ. Leꞌa Cristo nsobwiꞌi leꞌa naꞌ li ndangeꞌ ladna ndoꞌ xa wa ndontsa wen kwe bega.
2CO 2:11 Weꞌe naꞌanpa gun maxuꞌu gan ukedino beuna, leꞌa beuna uniꞌíka leꞌa maxuꞌu li nlad gunno beuna.
2CO 2:12 Leꞌa gor na ulaya naꞌ gezh Troas gudiꞌizh naꞌ diꞌizh wen ten Cristo, leꞌa Dios Xa Nibeꞌe mbin wen mtoꞌo ta wa.
2CO 2:13 Ná leꞌa naꞌ myuꞌ ladna ta na naꞌanpa izheal naꞌ Tito, xa no nak beuna xmen Cristo. Ta weꞌe cha mkaꞌan naꞌ sa wa, ulayal naꞌ Macedonia ndee.
2CO 2:14 Nsa naꞌ xno ndoꞌ Dios, leꞌa Cristo Jesús ndun gan, no ndantiꞌin xa besa ndontsa uteꞌachso diꞌizh ten xa itea lad, lak nteꞌachso dub xlaꞌa uxeꞌe.
2CO 2:15 Leꞌa cuent ten Dios leꞌa ta na li ndun besa tiꞌin ten Cristo wa cuent dub xlaꞌa uxeꞌe, ta nteꞌachso ndoꞌ bexa ndap gealnaban ndoꞌ Dios no ndoꞌ bexa gak perdid.
2CO 2:16 Leꞌa cuent ten bexa gak perdid wa, leꞌa ta wa cuent dub xlaꞌa ugap nlaꞌa, dub ta ndut men. Ná leꞌa cuent ten bexa ndap gealnaban wa, leꞌa ta wa cuent dub xlaꞌa uzhebpa uxeꞌe nlaꞌa, dub ta nsaꞌa gealnaban. ¿Ton sun gan gun ta wa zha?
2CO 2:17 Leꞌa besa naꞌanpa ndun lak ndun kwaꞌad bexa, bexa ndadiꞌizh diꞌizh ten Dios ndontsa gun xa gan med. Leꞌa Dios nsobwiꞌi leꞌa besa ndi idub ncho ladna ndadiꞌizh diꞌizh ten Dios, geal leꞌa Dios leꞌa mtuꞌub besa no dubtsa nak no besa Cristo.
2CO 3:1 ¿Nsak bega zha nzhinnona besa be ta li ndun besa wa? ¿Nsak bega zha nkiꞌin usaꞌa besa dub git ndoꞌ bega gudiꞌizh‑a xteꞌe wen nak besa zha? ¿Nate nkiꞌin besa ukeꞌa bega dub git li gab, usaꞌa besa‑yá ndoꞌ stub men? Ncho bexa nkiꞌinka‑yá, parea leꞌa besa naꞌanpa nkiꞌin‑a.
2CO 3:2 Leꞌa bega nak cuent dub git noꞌo besa len ladoꞌo besa. Leꞌa gor na iniꞌí be men ta wen nak bega, weꞌe iniꞌí bexa leꞌa ta ndun besa utsinka nak.
2CO 3:3 Leꞌa bega cuent dub git mkeꞌa Cristo ta nyun besa cuent. Parea naꞌanpa nkea‑yá no tint, leꞌa‑yá ndi nkea no Espíritu ten Dios nban. No naꞌanpa nkea‑yá ndoꞌ tabl geꞌ, leꞌa‑yá ndi nkea len ladoꞌo bega.
2CO 3:4 Li mbidiꞌizh besa ta wa geal leꞌa besa ngeꞌ ladna Dios ta na nak besa xmen Cristo.
2CO 3:5 Leꞌa besa lá yoo gan gun ni dub taꞌa leꞌaka leꞌatsa besa, leꞌa ta ndun besa wa leꞌa Dios leꞌa msaꞌa ta wa.
2CO 3:6 Leꞌa xa wa leꞌa msaꞌa ta ndák besa ndadiꞌizh besa ná xteꞌe nak trat kub mbinno Dios be men. Leꞌa trat wa naꞌanpa nak lak ndab ley, leꞌa‑yá ndi dub ta msaꞌa Espíritu ten Dios. Leꞌa bexa ndencho ndoꞌ ley wa satka, ná leꞌa Espíritu wa ndun nban beuna.
2CO 3:7 Leꞌa ley polta wa ta ukea ndoꞌ tabl geꞌ uzheꞌeb dub ta chul, gast lá yoꞌo gan iwiꞌi bexa Israel ndoꞌ Moisés, tant ndon nduꞌu naꞌ xa. Parea unitndoꞌka ta na li nduꞌu naꞌ Moisés wa. Leꞌa ley wa ndab leꞌa tal ton lá uxobgek ndoꞌ‑yá nsabndoꞌ gat.
2CO 3:8 Ná leꞌa trat kub ndanno Espíritu ten Dios beuna mas uzhebpa nluu ta juert nak Dios.
2CO 3:9 Leꞌa ley wa dub ta juert maska ndab‑a leꞌa be men nsabndoꞌ gat. ¡Parea mas uzheꞌeb dub ta juert ta na ndun Dios wen yaꞌan beuna ndoꞌ xa!
2CO 3:10 Leꞌa ta juert ten ley polta wa, leꞌa ta wa naꞌanpa juert nak lak uzheꞌeb juert ta ncho nat.
2CO 3:11 Leꞌa ta juert ten ley wa ta nitndoꞌ, ná leꞌa ta kub ndanno Dios beuna mas uzhebpa dub ta juert leꞌa‑yá naꞌanpa initndoꞌ.
2CO 3:12 Leꞌa ta na li uniꞌí beuna ta wa, ta weꞌe leꞌa besa naꞌanpa izheb gudiꞌizh besa diꞌizh ten Dios ndoꞌ gaꞌal be men.
2CO 3:13 Naꞌanpa ukachko besa diꞌizh wa lak mtsaw Moisés ndoꞌ na no dub bleꞌa lad, ndontsa naꞌanpa iniꞌí bexa Israel leꞌa ta na nduꞌu naꞌ ndoꞌ xa wa nsanitndoꞌ.
2CO 3:14 Parea leꞌa bexa wa lá kaꞌab yakbeꞌena ta wa. No gast nat leꞌa gor na ndoꞌol bexa ley polta ten Dios wa, bi ncho cuent dub ta ntsaw ndoꞌ ta ndanbeꞌe bexa, ndontsa lá yakbeꞌena bexa diꞌizh ten Dios. Leꞌa nabtsa Cristo gun gan yakbeꞌena bexa‑yá.
2CO 3:15 Leꞌa gor na ndoꞌol bexa ley ten Moisés wa, leꞌa bexa lá nyakbeꞌena‑yá, cuent ncho dub bleꞌa lad ntsaw gek bexa wa.
2CO 3:16 Ná leꞌa gor na ndangea ladna bexa Jesús Xwan beuna, weꞌe leꞌa ta ntsaw wa cha nitndoꞌ.
2CO 3:17 Leꞌa Cristo nak Espíritu, leꞌa tal Espíritu ten Dios ncho len ladoꞌo beuna, leꞌa beuna yá utoꞌo ndoꞌ ley polta wa.
2CO 3:18 Ta weꞌe nat leꞌa beuna naꞌanpa nsaꞌnyaw ndoꞌ na, leꞌa beuna nak cuent dub waꞌán nluꞌu be ta chul no ta juert nak Dios. Leꞌa Espíritu ten Dios ndun leꞌa beuna nsayak lak nak xa.
2CO 4:1 Leꞌa Dios utsin mbinno besa msaꞌa xa tiꞌin ndee ndun besa, ta weꞌe leꞌa besa naꞌanpa ndach ladna.
2CO 4:2 Leꞌa besa naꞌanpa gun dub ta xgaꞌach no ni dub ta idono ladna besa. Naꞌanpa ukwiꞌinno besa be men, no naꞌanpa ncheꞌa besa diꞌizh ten Dios. Leꞌa Dios nsobwiꞌi leꞌa besa ndadiꞌizh sbeꞌen gealngea ndoꞌ be men, ndontsa iniꞌí bexa leꞌa ta ndadiꞌizh besa leꞌaka nak.
2CO 4:3 Parea tal ncho bexa lá nyakbeꞌena diꞌizh wen ten Cristo ta ndadiꞌizh besa, leꞌa ta wa bexa na lá ndap gealnaban ndoꞌ Dios.
2CO 4:4 Leꞌa maxuꞌu ntsawuso gek be men ndoꞌ gizhliyo ndee, bexa lá ndangea ladna Dios, ndontsa naꞌanpa iniꞌí bexa xeꞌa chul ten Cristo. Leꞌa ta wa diꞌizh wen ten Cristo, xa na nak lakka nak Dios.
2CO 4:5 Leꞌa besa naꞌanpa ndadiꞌizh cuent tentsa besa, leꞌa besa ndi ndadiꞌizh leꞌa Jesucristo nak Xa Nibeꞌe. No ndab besa leꞌa besa ndakno bega geal nak beuna xmen Jesucristo.
2CO 4:6 Leꞌa Dios xa na unibeꞌe msu xeꞌa sa ukaw, no liga nsu xeꞌa len ladoꞌo beuna, ndontsa igondoꞌ beuna xeꞌa chul ten Dios, ta nsu ndoꞌ Jesucristo.
2CO 4:7 Leꞌa diꞌizh ten Dios dub ta uzhebpa nsak, ná leꞌa besa na ndadiꞌizh‑a wa nak cuent dub gets btsiꞌin, dub ta lá nsak. Li ndontsa iniꞌí be men leꞌa juers ten diꞌizh wa ta nsaꞌa Dios, naꞌanpa ta ndák besa‑yá.
2CO 4:8 Leꞌa besa nsatid sian gealkweaꞌ, parea naꞌanpa kweaꞌ ncho ladna besa. No ncho zha lá iniꞌí besa xteꞌe gun besa, parea naꞌanpa ndach ladna besa.
2CO 4:9 No ugap ndanno be men besa, parea naꞌanpa ulaꞌa Dios besa. No ncho zha ngabi bexa besa, parea naꞌanpa initndoꞌ besa.
2CO 4:10 Leꞌa lak uniꞌí Jesús gealkweaꞌ gast ngut xa, leꞌa besa no niꞌíka gealkweaꞌ guniꞌi pa ndesea besa, ta weꞌe no besa ndap gealnaban wats Jesús.
2CO 4:11 Leꞌa idub ndenban besa leꞌa be men nlad gut besa, geal nak besa xmen Jesús. Parea leꞌa bexa uniꞌí leꞌa besa ndap gealnaban ta nsaꞌa Jesús.
2CO 4:12 Leꞌa ta na li ngi sat besa, ta weꞌe leꞌa bega no ndap gealnaban ndoꞌ Dios.
2CO 4:13 Leꞌa diꞌizh ten Dios nkeaniꞌi ndab‑a: “Leꞌa naꞌ mgeꞌ ladna Dios, ta weꞌe mbidiꞌizh naꞌ”; no liga leꞌa besa ngeꞌ ladna Dios, ta weꞌe no besa ndadiꞌizh diꞌizh ten Dios.
2CO 4:14 Leꞌa besa uniꞌí leꞌa Dios mxiste Jesús Xwan beuna ndoꞌ gealgut; no liga ixiste xa besa, cha yoꞌo xa besa wats xa no bego baꞌ.
2CO 4:15 Leꞌa besa li nsatid ndoꞌ itea be gealkweaꞌ wa, geal leꞌa besa nkweaꞌ ladna bega. Weꞌe mas kwaꞌadta be men iniꞌí xteꞌe nkweaꞌ ladna Dios bexa, cha mas uzheꞌeb usaꞌa be men xno ndoꞌ Dios, gab bexa leꞌa Dios uzhebpa siꞌil nak.
2CO 4:16 Ta weꞌe naꞌanpa ndach ladna besa; leꞌa kad wizh leꞌa besa nsayak gox, ná leꞌa len ladoꞌo besa itea wizh nsayak juert.
2CO 4:17 Leꞌa be gealkweaꞌ nsatid besa nat, leꞌa ta wa dub ta ndidotsa no dub ta uxaxtsa nsatid. Parea leꞌa ta wa leꞌa ndun gal usoꞌ besa wen yoo besa wats Dios idub tiemp.
2CO 4:18 Naꞌanpa ndanbeꞌe besa be ta naꞌ besa, ndi ndanbeꞌe besa be ta lá naꞌ besa. Leꞌa be ta naꞌ besa wa naꞌanpa kwen ncho, ná leꞌa be ta lá naꞌ besa wa idub tiemp ncho.
2CO 5:1 Leꞌa beꞌal las beuna cuent nak dub niꞌilad ndoꞌ gizhliyo ndee. Leꞌa gor na gat beuna leꞌa Dios usaꞌa stub sa yoo beuna gibeꞌa. Leꞌa ta wa naꞌanpa nak dub ta ndandeꞌe men, leꞌa‑yá dub ta ncho gibeꞌa dub ta nunk lá idub.
2CO 5:2 Nat ngaꞌa ladna beuna tant nsaꞌab ladna beuna yoo beuna sa gibeꞌa wa.
2CO 5:3 Leꞌa sa wa naꞌanpa yaꞌan beuna cuent dub men lá ndap xab na, leꞌa beuna ndi gap xab kub na.
2CO 5:4 Leꞌa nat ndencho beuna ndoꞌ gizhliyo ndee, leꞌa beuna ngaꞌa ladna tant kweaꞌ ncho ladna beuna, geal leꞌa beuna lá nlad gak cuent dub xa lá ndap xab na, leꞌa beuna ndi nlad gap xab kub na. Leꞌa beꞌal las beuna dub ta snitndoꞌ, parea leꞌa Dios syunno‑yá dub ta nban idub tiemp.
2CO 5:5 Leꞌa Dios leꞌa mbindeꞌe beuna ndontsa li gak beuna, no msaꞌa xa Espíritu ten xa ndoꞌ beuna, ta na nluu leꞌa xa usaꞌaka itea ta ndab xa.
2CO 5:6 Ta weꞌe leꞌa besa idub tiemp ngeꞌ ladna Dios, leꞌa besa uniꞌí leꞌa idub zha ncho besa ndoꞌ gizhliyo ndee leꞌa besa naꞌanpa yoo wats Cristo.
2CO 5:7 Naꞌanpa naꞌ besa xa, parea leꞌa besa ngeꞌka ladna xa.
2CO 5:8 No ndangea ladna besa leꞌa besa yaꞌ wats Cristo zha ulaꞌa besa beꞌal las besa ndee, no li nlad besa gun besa.
2CO 5:9 Ta weꞌe ndun besa juers gun besa lak nsak ladna Cristo, tal ncho besa ndoꞌ gizhliyo ndee natal nseaꞌ besa wats Cristo.
2CO 5:10 Leꞌa gal dub wizh leꞌa beuna iteanak ilanseaꞌ ndoꞌ Cristo, weꞌe usaꞌa xa ta nsabndoꞌ ikaꞌa kadga dub beuna, lakka mbin beuna ndoꞌ gizhliyo, tal wen mbin beuna natal ugap mbin beuna.
2CO 5:11 Leꞌa besa uniꞌí leꞌa ta li gun Cristo wa ta nzheb be men ndoꞌ na. Ta weꞌe ntenxeꞌa besa be men gungea ladna bexa Cristo. Leꞌa Dios leꞌa nchandoꞌ xteꞌe nak besa, no nlad naꞌ iniꞌí bega xteꞌe nak besa.
2CO 5:12 Naꞌanpa izhinnona besa ta ndun besa, leꞌa besa ndi nladtsa itenno ladna bega besa. Weꞌe gap bega xtaꞌan ikaꞌab bega ndoꞌ bexa nzhinnona be ta nak bexa, parea leꞌa ladoꞌo bexa wa naꞌanpa gaꞌal nak ndoꞌ Dios.
2CO 5:13 Tal ncho bega nsak leꞌa besa loc nak, leꞌa ta wa geal ndun besa tiꞌin ten Dios. Ná tal ncho bega nsak leꞌa besa utsin ndanbeꞌe, leꞌa ta wa geal ndakno besa bega.
2CO 5:14 Leꞌa ta na nkweaꞌ ladna Cristo besa, ta weꞌe sbeꞌen ta nsak ladna xa ndun besa. Leꞌa besa uniꞌí leꞌa Cristo ngut sakndoꞌ itea beuna, ta weꞌe leꞌa itea beuna nak cuent dub xa ngut.
2CO 5:15 Leꞌa Cristo ngut sakndoꞌ beuna, ta weꞌe yá lá gunta beuna ta nladtsa beuna, ndi gun beuna ta nlad Cristo, xa na ngut no mban xa ndontsa gap beuna gealnaban.
2CO 5:16 Ta weꞌe leꞌa nat idub ndoꞌ ndee yá lá iwiꞌita besa ndoꞌ stub men lak ndanbeꞌetsa be men. Leꞌa polta leꞌa besa li mwiꞌi ndoꞌ Cristo, ná nat leꞌa besa yá lá gunta ta wa.
2CO 5:17 Leꞌa tal ton bexa nak xmen Cristo leꞌa bexa mzheꞌa. Leꞌa be ta ngok xa polta yá utidla, nat leꞌa‑yá myak dub ta kub.
2CO 5:18 Leꞌa itea be ta ndee wa ta ndun Dios, xa mbin wen myaꞌan besa ndoꞌ xa juers ten ta mbin Cristo. No msaꞌa xa tiꞌin ndun besa, ndadiꞌizh besa ná xteꞌe wen yaꞌan be men ndoꞌ Dios.
2CO 5:19 Leꞌa ta wa gab leꞌa juers ten Cristo leꞌa Dios utsuꞌu be ke ten be men, no mbin Dios leꞌa be men syoꞌo gan wen yaꞌan ndoꞌ xa. No ndab xa gudiꞌizh besa xteꞌe yak utsin be men ndoꞌ xa.
2CO 5:20 Leꞌa Cristo leꞌa mtuꞌub besa gudiꞌizh besa diꞌizh ten xa sakndoꞌ xa. Leꞌa ta wa gab leꞌa Dios ndadiꞌizh ndoꞌ bega juers ten ta ndadiꞌizh besa. Ta weꞌe leꞌa besa ndab ndoꞌ bega yak utsin bega ndoꞌ Dios, leꞌa ta wa ta ndab Cristo ndoꞌ bega.
2CO 5:21 Leꞌa Cristo ni dub ke lá ndap, parea leꞌa Dios mbinno xa cuent dub xa ndap ke. Nat leꞌa ta li mbin Cristo wa, leꞌa beuna naꞌantapa ndap ke ndoꞌ Dios.
2CO 6:1 Ta weꞌe leꞌa besa na nak xa ndun tiꞌin ten Dios wa, ntenxeꞌa besa bega naꞌanpa utsaꞌal bega ta na nkweaꞌ ladna Dios bega.
2CO 6:2 Leꞌa diꞌizh ten Dios nkeaniꞌi ndab Dios: Leꞌa gor na nsabndoꞌ‑yá, leꞌa naꞌ mbín ta ndab lu. No wizh na mkiꞌin lu naꞌ, leꞌa naꞌ ngokno lu. Leꞌa naꞌ gáp ndoꞌ bega leꞌa gor nsabndoꞌ‑yá wa no wizh nkiꞌin bega xa wa, nat leꞌa zha wa ngol.
2CO 6:3 Leꞌa besa ndun juers ni dub ta ugap lá gak besa, ndontsa naꞌanpa inisi be men be tiꞌin ndun besa.
2CO 6:4 Ndi ndun besa ta nluꞌu leꞌa besa tiꞌin tenka Dios ndun. Leꞌa besa nxik ndoꞌ sian be gealkweaꞌ. Ncho zha naꞌan xtaꞌan ndap besa, no ugap ndanno be men besa,
2CO 6:5 no ngin bexa besa, no nkeꞌa bexa besa litgiꞌib. No ncho zha leꞌa kwaꞌad be men ndaklono besa, no kwen ndun besa tiꞌin, no gast lá ndadgats utsin besa, no lá ndap besa ta gaw besa.
2CO 6:6 Parea umbiꞌi nak ladoꞌo besa ndoꞌ Dios, no ndák besa diꞌizh ten Dios, no ndap besa mod ndoꞌ be men, no utsin nak besa ndoꞌ bexa, no leꞌa Espíritu ten Dios ndakno besa, no nkweaꞌ ladna besa be men.
2CO 6:7 No sbeꞌen gealngea ndadiꞌizh besa, no ndap besa juers ten Dios. No ndantiꞌin besa be ta nsaꞌa Dios ndontsa utsaw besa ndoꞌ ta ndun bexa ugap no utsakndoꞌ besa ndoꞌ bexa wa.
2CO 6:8 Ncho be men ndap mod ndoꞌ besa, no ncho xa ugap ndanno besa. Ncho xa utsin ndadiꞌizh ndoꞌ besa, no ncho xa nisi besa. Ncho xa ndab leꞌa besa ndun gealkwiꞌin, parea leꞌa besa sbeꞌen gealngea ndadiꞌizh.
2CO 6:9 No ncho xa ndab leꞌa lá nchandoꞌ besa, maska nchandoꞌka bexa besa. No ncho zha ngi sat besa, ná bi nban besa. No ncho zha ntsaksi be men besa, ná naꞌanpa ndut bexa besa.
2CO 6:10 Ncho zha ndiꞌizh uban yoo ladna besa, ná leꞌa besa ndi nten ladna. No ncho zha uban nak besa, ná leꞌa ta ndadiꞌizh besa nyak rik be men ndoꞌ Dios. No ncho gor naꞌan xtaꞌan ndap besa, ná leꞌa ndoꞌ Dios leꞌa besa itea taꞌa ndap.
2CO 6:11 Leꞌa bego xa Corinto baꞌ, leꞌa besa gaꞌal ndadiꞌizh ndoꞌ bega idub ncho ladna besa.
2CO 6:12 Leꞌa besa uzheꞌeb nkweaꞌ ladna bega, ná leꞌa bega naꞌanpa uzheꞌeb nkweaꞌ ladna besa.
2CO 6:13 Ta weꞌe gáp naꞌ ndoꞌ bega lak ndab dub men ndoꞌ xmeꞌed na: bkweaꞌ ladna bega besa lak nkweaꞌ ladna besa bega.
2CO 6:14 Leꞌa bega lá nsabndoꞌ uchealtsaꞌa bexa lá ndangea ladna Cristo, leꞌa be ta wen naꞌanpa nak lak nak be ta ugap. Leꞌa dub sa ndoꞌ xeꞌa nsea dub sa ukaw uzhebpa xaꞌaga nak‑a.
2CO 6:15 Leꞌa Cristo nsea maxuꞌu naꞌanpa dubtsa nak. No liga leꞌa dub xa ndangea ladna Cristo naꞌanpa dubtsa nak nsea dub xa lá ndangea ladna Cristo.
2CO 6:16 Lá nsabndoꞌ yoo be dios gizhliyo len niꞌi ten Dios. Leꞌa beuna nak lak nak dub niꞌi ten Dios xa nban, lak ndab Dios: Leꞌa naꞌ yoꞌono bexa ndee, no ikesea naꞌ lat bexa. Leꞌa naꞌ gak Dios ten bexa, leꞌa bexa gak xmen naꞌ.
2CO 6:17 Ta weꞌe no ndab Dios: Utoꞌo bega lat bexa lá nchandoꞌ naꞌ, yá lá gakta bega lak nak bexa. Lá gun bega be ta bzhiꞌik ndun bexa, weꞌe cha yoo bega wats naꞌ.
2CO 6:18 Leꞌa naꞌ gak Xus bega, leꞌa bega gak xiꞌín naꞌ. Li ndab Dios xa ndon leꞌa juert.
2CO 7:1 Leꞌa bego nak amig ten naꞌ, leꞌa ta na li ndab Dios gun xa wa, ta weꞌe isambiꞌi beuna ndoꞌ itea be ta bzhiꞌik, lak be ta ndun beuna no be ta ndanbeꞌe beuna. Weꞌe izheb beuna ndoꞌ Dios, gun beuna juers umbiꞌi gak beuna ndoꞌ xa.
2CO 7:2 Leꞌa naꞌ nlad ikweaꞌ ladna bega besa, leꞌa besa naꞌanpa ugap ndanno bega, no ni lá ndun besa ta gailaꞌ bega ndoꞌ ta ugap, no ni lá nkwiꞌinno besa bega.
2CO 7:3 Naꞌanpa ndáp naꞌ ta wa por na inisi naꞌ bega, leꞌa naꞌ yá ndápka ndoꞌ bega leꞌa besa nkweaꞌ ladna bega. Ta weꞌe naꞌanpa iteltsaꞌa beuna idub nban beuna no gast zha gat beuna.
2CO 7:4 Leꞌa naꞌ gaꞌal ndadiꞌizh ndoꞌ bega no uzhebpa ntenno lad naꞌ bega. Maska ntid besa sian gealkweaꞌ, leꞌa naꞌ ntenka ladna.
2CO 7:5 Ta ugeaka leꞌa zha na ulanseata besa Macedonia ndee, leꞌa besa naꞌanpa wen yoꞌobe, leꞌa besa ndi uzhebpa juert utid. Itea lad ndakloo be men ndoꞌ besa no ngi nzheb besa.
2CO 7:6 Parea leꞌa Dios xa na nluꞌuzh bexa nsayach ladna, mluꞌuzh xa besa gor ulen Tito.
2CO 7:7 Naꞌanpa nabtsa ta ulen xa wa mten ladna besa. Leꞌa besa no mten ladna ta na ndab xa leꞌa xa ntenno ladna bega. Ndab xa leꞌa bega nlad iniꞌí besa, no ndoꞌonno bega besa no be gealkweaꞌ nsatid besa, no nyuꞌno ladna bega naꞌ. Ta weꞌe mas mten lad naꞌ.
2CO 7:8 Leꞌa gor na mbiꞌil bega git mtuꞌub naꞌ ndoꞌ bega wa, leꞌa bega uban myoꞌo ladna. Leꞌa gor mbin naꞌ ta wa, cha mbinbe naꞌ leꞌa naꞌ lá nsabndoꞌ utuꞌub ta wa. Ná nat leꞌa naꞌ naꞌanpa li ndunbeꞌe.
2CO 7:9 Nat naꞌanpa nten lad naꞌ uban myoꞌo ladna bega, parea nten lad naꞌ leꞌa ta na li uban myoꞌo ladna bega wa, ta weꞌe myach bega ndoꞌ Dios. Leꞌa bega uban myoꞌo ladna lak nlad Dios gun bega, ta weꞌe nsak naꞌ leꞌa git mtuꞌub naꞌ wa ngoknoka bega.
2CO 7:10 Leꞌa ta na uban nyoꞌo ladna dub men lak nsak ladna Dios, leꞌa ta wa leꞌa gun igondoꞌ xa be ke ten xa, cha gap xa gealnaban ndoꞌ Dios. Ná leꞌa ta na uban nyoꞌo ladna dub men ndoꞌ be ta gizhliyo ndee, leꞌa ta wa lá yoo gan gun gap xa gealnaban ndoꞌ Dios.
2CO 7:11 Blaꞌach bega ná xteꞌe wen mbin bega, ta na li uban myoꞌo ladna bega lak nsak ladna Dios. Ta weꞌe mbinbeꞌe bega gun bega ta nsabndoꞌ, no mtsakndoꞌ bega, no ngokloo bega, no mzheb bega, no nlad bega iniꞌí bega naꞌ, no myuꞌno ladna bega naꞌ, no mtsaksi bega xa ugap mbin wa. Ta weꞌe uní naꞌ leꞌa bega naꞌanpa no ngun ta ugap wa.
2CO 7:12 Leꞌa gor na mtuꞌub naꞌ git wa ndoꞌ bega, leꞌa naꞌ naꞌanpa li ngun ke tentsa xa li ugap mbin wa no ni ke ten xa na li ugap mbinno xa wa. Leꞌa naꞌ ndi mtuꞌub git wa ndontsa igondoꞌ bega ná xteꞌe nkweaꞌ ladna bega besa ndoꞌ Dios.
2CO 7:13 Ta weꞌe leꞌa besa ntenno ladna be ta li mbin bega wa. No uzheꞌeb mtenno ladna besa ta na li mtenno ladna Tito bega.
2CO 7:14 Leꞌa naꞌ ndápla ndoꞌ Tito leꞌa bega utsinka ndun, cha tsoꞌo wa leꞌa xa no uniꞌí leꞌa ta wa ta ugeaka. Leꞌa lak sbeꞌen gealngea ndadiꞌizh besa ndoꞌ bega, no liga leꞌa ta na li ndab besa ndoꞌ Tito wa ta ugeaka.
2CO 7:15 Nat leꞌa xa wa mas uzheꞌeb nkweaꞌ ladna bega, gor ntseꞌa ladna xa xteꞌe nxobgek bega ndoꞌ xa, no xteꞌe ngop bega mod ndoꞌ xa gor na mlaꞌnchaꞌ xa sa baꞌ.
2CO 7:16 Leꞌa naꞌ ndee nten ladna, leꞌa naꞌ uní leꞌa bega utsinka ndun.
2CO 8:1 Leꞌa bego nak beuna xmen Cristo, leꞌa nat leꞌa besa nlad iniꞌí bega ná xteꞌe uzhebpa wen ndanno Dios be xmen Cristo ndencho Macedonia ndee.
2CO 8:2 Maska nsatid bexa ndoꞌ sian gealkweaꞌ, leꞌa bexa ndi uzhebpa nten ladna. No maska uban nak bexa, leꞌa bexa ndi uzhebpa nsaꞌa med ndoꞌ bexa nkiꞌin‑a.
2CO 8:3 Leꞌa naꞌ gáp ndoꞌ bega, leꞌa bexa nten ladna nsaꞌa bexa dub lak syoꞌo gan usaꞌa bexa, no gast ndi mas sian‑a nsaꞌa bexa.
2CO 8:4 No unabpa bexa Macedonia wa ulaꞌa besa usaꞌa bexa med ta gakno bexa wa bexa no nak xmen Cristo.
2CO 8:5 No mbin bexa dub taꞌa ni lá ndanbeꞌe besa ti li gun bexa. Leꞌa bexa mbinbeꞌe leꞌa bexa idub ncho ladna ndun tiꞌin ndoꞌ Dios no ndoꞌ besa, lak nlad Dios gun bexa.
2CO 8:6 Leꞌa Tito usaxan nyunjunt be med na li nsaꞌa bega wa. Ta weꞌe ndab besa giꞌidgal xa sa baꞌ ndontsa li yunjuntgal xa med wa.
2CO 8:7 Leꞌa bega uzhebpa utsin ndun itea be taꞌa, lak ngeꞌ ladna bega Cristo, no ndadiꞌizh bega diꞌizh ten Dios, no nyakbeꞌena bega sian taꞌa, no ndakno bega be men, no nkweaꞌ ladna bega besa. Ta weꞌe nsabndoꞌ usaꞌa bega med wa.
2CO 8:8 Leꞌa naꞌ naꞌanpa inibeꞌe li gun bega, leꞌa naꞌ ndi nlad iniꞌí bega xteꞌe utsin mbin bexa xaꞌaga wa, weꞌe cha no bega uluꞌu xteꞌe nkweaꞌ ladna bega be ltsaꞌa bega.
2CO 8:9 Leꞌa bega uniꞌíka leꞌa Jesucristo Xwan beuna uzhebpa wen ndanno beuna. Leꞌa xa uzheꞌeb nkweaꞌ ladna bega, ta weꞌe mlaꞌa xa itea be ta ndap xa, myak xa dub xa prob, ndontsa leꞌa bega myak rik ndoꞌ Dios.
2CO 8:10 Nat ndee gáp naꞌ leꞌa bega nsabndoꞌ gun ta wen wa. Leꞌa udub liꞌin leꞌa bega ndon ned msaꞌa med wa, cha mten ladna bega li mbin bega.
2CO 8:11 Nat nsabndoꞌ usandoꞌ bega ta li usaxan bega wa. Leꞌa lak uxax ndab bega gakno bega bexa wa, no liga uxax usandoꞌ bega ta wa, usaꞌa bega tal plo‑yá syoꞌo gan usaꞌa bega.
2CO 8:12 Tal leꞌa bega nladka gakno bexa, leꞌa Dios itenno ladna tal plo‑yá syoꞌo gan usaꞌa bega. Naꞌanpa gab Dios juerska usaꞌa bega dub ta lá ndap bega.
2CO 8:13 Naꞌanpa li ndáp naꞌ ta wa por na nabtsa bexa wa wen yoobe, cha yá lá gapta bega ta nkiꞌin bega.
2CO 8:14 Leꞌa naꞌ ndi nlad parej gap bega taꞌa. Leꞌa nat leꞌa bega ndakno bexa nsaꞌa bega be ta nkiꞌin bexa. Leꞌa gal zha leꞌa bexa wa gaknoga bega usaꞌa bexa ta ikiꞌin bega. Cha li parej gap bega taꞌa.
2CO 8:15 Leꞌa ta wa lak nkeaniꞌi diꞌizh ten Dios, ndab‑a: Leꞌa bexa mteleꞌe sian‑a naꞌanpa yaꞌan sobr na ten na, geal leꞌa bexa wa ngokno bexa mteleꞌe dub tuzh‑a, ndontsa naꞌanpa ngun jwalt na ten bexa wa.
2CO 8:16 Nat nsa naꞌ xno ndoꞌ Dios leꞌa Tito no nlad gakno bega lakka nlad naꞌ ndee.
2CO 8:17 Unaꞌab naꞌ ndoꞌ Tito yaꞌinaꞌ xa bega, cha mten ladna xa ndab xa leꞌa xa saꞌka, leꞌa xa no nlad iniꞌí bega.
2CO 8:18 No utuꞌub besa stub xmen Cristo yaꞌno Tito. Leꞌa be xmen Cristo bexa ndencho itea lad ndab leꞌa xa wa uzheꞌeb ndadiꞌizh diꞌizh wen ten Cristo.
2CO 8:19 No mti bexa wa xa, yaꞌno xa besa zha yaꞌulaꞌa besa med wa Jerusalén, ndontsa usaꞌa bexa Jerusalén wa xno ndoꞌ Dios nsea iniꞌí bexa leꞌa besa no nlad gakno bexa.
2CO 8:20 Leꞌa besa lá nlad gab be men leꞌa besa lá isuꞌu yansu be med wa.
2CO 8:21 Leꞌa besa ndi nlad utsin gun besa, dub ta isak ladna Dios no be men.
2CO 8:22 No utuꞌub besa stub xmen Cristo yaꞌno itop bexa wa, leꞌa besa sianla biaj uniꞌí leꞌa xa wenka ndun. No nat mas li gun xa ta wa, leꞌa xa ngeꞌ ladna leꞌa bega gun lak nsabndoꞌ gun bega.
2CO 8:23 Leꞌa Tito nak xa ndunno naꞌ tiꞌin ten Dios, ndakno besa bega. Leꞌa cuent ten stop bexa wa, leꞌa be xmen Cristo mtuꞌub bexa yaꞌno bexa Tito, leꞌa itop bexa wa ndun ta nsak ladna Cristo.
2CO 8:24 Utsin binno bega bexa wa, ndontsa iniꞌí itea be xmen Cristo leꞌa bega nkweaꞌka ladna itop xa wa, no iniꞌí bexa ná xtaꞌan ntenno ladna besa bega.
2CO 9:1 Leꞌa naꞌ yá lá nkiꞌinta ukeꞌa cuent ten med usaꞌa bega wa, ta gakno bega be xmen Cristo wa.
2CO 9:2 Leꞌa naꞌ uníka leꞌa bega nlad gakno bexa, lak ndápka naꞌ ndoꞌ bexa ndencho Macedonia ndee. Ndáp naꞌ leꞌa bega xa Acaya baꞌ udub liꞌinta nlad usaꞌa med wa. Ta weꞌe leꞌa kwaꞌad bexa ncho sa ndee no nlad usaꞌa med wa.
2CO 9:3 Nat ntuꞌub naꞌ Tito nsea stop bexa wa ndoꞌ bega, ndontsa iniꞌí be men ndee leꞌa ta ndáp naꞌ cuent ten bega wa ta ugeaka, leꞌa bega listka nde usaꞌa med wa.
2CO 9:4 Leꞌa zha gal inaꞌgal naꞌ bega, leꞌa naꞌ goo pla bexa Macedonia ndee. Parea leꞌa naꞌ lá nlad iniꞌí bexa leꞌa bega naꞌanpa listla nde usaꞌa med wa. Leꞌa ta wa gun ido ladna besa, geal leꞌa besa ngeꞌ ladna leꞌa bega usaꞌaka med wa. ¡Parea leꞌa cuent ten bega leꞌa ta wa mas ta udalad!
2CO 9:5 Ta weꞌe mbinbe naꞌ nsabndoꞌ utuꞌub naꞌ yon bexa ndee ndoꞌ bega, gakno bexa iganleꞌe be med ndab bega usaꞌa bega wa. Weꞌe gal zha ilen naꞌ sa baꞌ leꞌa med usaꞌa bega wa listla nak, dub ta idub ncho ladna bega usaꞌa bega, naꞌanpa dub ta lajuerska usaꞌa bega.
2CO 9:6 Parea leꞌa naꞌ gáp leꞌa dub xa ndidotsa ndas be taꞌa, leꞌa xa wa ndidotsaga taꞌa uteleꞌe. Ná leꞌa dub xa sian taꞌa ndas, leꞌa xa wa sian taꞌa uteleꞌe.
2CO 9:7 Leꞌa kadga dub bega nsabndoꞌ usaꞌa dub lak ta ndanbeꞌe bega. Naꞌanpa uban yoo ladna bega gor na usaꞌa bega‑yá, no ni lá gunbeꞌe bega leꞌa bega juerska usaꞌa‑yá. Leꞌa Dios mas nkweaꞌ ladna dub xa nten ladna nsaꞌa taꞌa.
2CO 9:8 Leꞌa Dios usaꞌa iteanak be ta wen ndoꞌ bega, gap bega mas sian taꞌa ndoꞌ dub lak‑a nkiꞌin bega, ndontsa gakno bega itea bexa nkiꞌin‑a.
2CO 9:9 Lak nkeaniꞌi diꞌizh ten Dios, ndab‑a: Leꞌa xa mtseꞌa be taꞌa, msaꞌa xa‑yá ndoꞌ bexa uban nak. Leꞌa be ta wen ndun xa wa naꞌanpa initndoꞌ.
2CO 9:10 Leꞌa Dios ntseꞌa bid ndoꞌ bexa gas‑a, no ntseꞌa xa pan ndoꞌ bexa gaw‑a. No liga leꞌa Dios leꞌa usaꞌa ta nkiꞌin bega, cha gun xa gap bega sian be taꞌa, ndontsa sian be ta wen gun bega.
2CO 9:11 Weꞌe naꞌan xtaꞌan gun jwalt cuent ten bega, no usaꞌa bega ta nkiꞌin bexa wa. Weꞌe leꞌa bexa kwaꞌad wa usaꞌa xno ndoꞌ Dios.
2CO 9:12 Leꞌa ta na li wen gun bega wa, ta weꞌe leꞌa be xmen Cristo ndencho sa wa naꞌanta xtaꞌan gun jwalt, no uzhebpa usaꞌa bexa wa xno ndoꞌ Dios.
2CO 9:13 Leꞌa ta na ndakno bega bexa wa nluu leꞌa bega nxobgekka ndoꞌ diꞌizh wen ten Cristo, ta ndab bega ndangea ladna bega wa. Cha uzhebpa usaꞌa bexa xno ndoꞌ Dios, leꞌa bega sian med nsaꞌa ndoꞌ bexa wa no ndoꞌ itea be men.
2CO 9:14 Cha inab bexa ndoꞌ Dios gakno xa bega no ikweaꞌ ladna bexa bega, geal leꞌa bexa wa iniꞌí leꞌa Dios uzhebpa ndakno bega.
2CO 9:15 ¡Usaꞌa beuna xno ndoꞌ Dios leꞌa xa msaꞌa dub ta uzheꞌeb wen ndoꞌ beuna, dub ta gast ni lá iniꞌí min xteꞌe gab min ndoꞌ ta wa!
2CO 10:1 Leꞌa naꞌ Pabl inaꞌab naꞌ dub taꞌa ndoꞌ bega, parea utsintsa inaꞌab naꞌ‑yá lak utsin nak Cristo. Leꞌa ncho bexa ndab leꞌa zha na nchoꞌono naꞌ bega leꞌa naꞌ utsin nak ndoꞌ bega. Parea ndab bexa leꞌa naꞌ nbeyo bega ndoꞌ git nkeꞌa naꞌ zha na sit nchoꞌo naꞌ.
2CO 10:2 Nat naꞌab naꞌ ndoꞌ bega utsintsa gak bega, ndontsa gal zha gal inaꞌ naꞌ bega naꞌan xtaꞌan kuyo naꞌ bega. Parea ncho bega ndab leꞌa besa ndun lakka ndun be men gizhliyo. Leꞌa naꞌ kuyoka bexa wa.
2CO 10:3 Leꞌa besa ndee men ndenchoka ndoꞌ gizhliyo ndee, parea naꞌanpa ndun besa lak ndun be men gizhliyo.
2CO 10:4 Leꞌa ta ndun besa wa naꞌanpa nak lak nak ta ndun be men lá nchandoꞌ Dios. Leꞌa besa ndi ngeꞌ ladna juers ten Dios, ndontsa gun besa gan ndoꞌ be ta ugap.
2CO 10:5 Li ndun besa gan ndoꞌ bexa nyotoꞌono besa, no ndoꞌ bexa zhin nak, bexa ndaklono diꞌizh ten Dios. No ndun besa gan ndoꞌ itea be taꞌa ndanbeꞌe bexa, ndontsa li uxobgek bexa ndoꞌ Cristo.
2CO 10:6 Leꞌa zha na iniꞌí besa leꞌa bega nxobgekka, leꞌa besa kuyo bexa lá nxobgek wa.
2CO 10:7 Leꞌa bego nlaꞌach be ta naꞌtsa bega. Leꞌa tal ton bega nsak leꞌa bega nak xmen Cristo, nsabndoꞌ yakbeꞌena bega leꞌa besa no nak xmen Cristo.
2CO 10:8 Ta ugeaka leꞌa naꞌ nzhinna ta na msoꞌ Cristo besa, ndun besa tiꞌin ten xa. Leꞌa naꞌ naꞌanpa ndono ladna ta wa, geal leꞌa Cristo msaꞌa tiꞌin wa ndoꞌ besa, ndontsa gakno besa bega, naꞌanpa ndi ugap gunno besa bega.
2CO 10:9 Leꞌa naꞌ lá nlad izheb bega ndoꞌ naꞌ ta nkeꞌa naꞌ ndoꞌ be git ndee,
2CO 10:10 leꞌa ncho bega ndab leꞌa gor nkeꞌa naꞌ dub git leꞌa naꞌ uzhebpa ugiꞌi nak ndoꞌ bega, ná leꞌa zha nchoꞌono naꞌ bega, bchaꞌan nak naꞌ no lá isu naꞌ gudiꞌizh naꞌ.
2CO 10:11 Leꞌa bego na li ndab wa nsabndoꞌ yakbeꞌena leꞌa lak nkeꞌa naꞌ ndoꞌ git ndee gor sit nsoꞌ naꞌ, likaga gudiꞌizh naꞌ gal zha yoꞌo naꞌ lat bega.
2CO 10:12 Leꞌa besa naꞌanpa gab leꞌa besa ndák, lak ncho bexa li nzhinna leꞌa bexa ndák. Leꞌa bexa wa naꞌanpa wen ndanbeꞌe, leꞌa bexa leꞌaka nwiꞌi xteꞌe nak bexa.
2CO 10:13 Ná leꞌa besa naꞌanpa izhinnona dub taꞌa lá nsabndoꞌ. Leꞌa besa ndi nzhinnona tiꞌin msaꞌa Dios gun besa, ta mbin besa lat bego baꞌ wa.
2CO 10:14 Tal leꞌa besa lá ngiꞌid wats bega, leꞌa bega syoꞌo gan gab leꞌa ta ndab besa wa dub ta lá nsabndoꞌ, parea leꞌa bega uniꞌíka leꞌa besa ngok xa ned mbidiꞌizh diꞌizh wen ten Cristo ndoꞌ bega.
2CO 10:15 No naꞌanpa nzhinnona besa ta ndun stubga men. Leꞌa besa ndi nlad mas gungea ladna bega Cristo, ndontsa mas gaktiꞌin ta ndun besa lat bego baꞌ. Leꞌa laktsa msaꞌa Dios tiꞌin gun besa, litsa nlad besa gun besa.
2CO 10:16 No nlad besa gudiꞌizh besa diꞌizh wen ten Cristo ndoꞌ be men ncho mas sit ndoꞌ bego baꞌ, sa na ni dub xa gol gun tiꞌin wa. Weꞌe naꞌan ton gab leꞌa besa nzhinnona tiꞌin mbin stubga men.
2CO 10:17 Leꞌa tal ton nlad izhinna, izhinnona xa ta ndun Dios Xa Nibeꞌe.
2CO 10:18 Leꞌa bexa na leꞌa ndab leꞌa ta ndun xa wa ta wen, leꞌa ta ndab xa wa naꞌanpa ta nsak. Leꞌa ta nsak wa, leꞌa ta wa ta gab Dios naga wen ndun bexa.
2CO 11:1 Nat bxik bega ndoꞌ stub taꞌa gáp naꞌ ndoꞌ bega, maska gab bega leꞌa‑yá ta tont.
2CO 11:2 Leꞌa naꞌ nyuꞌno ladna bega lak nyuꞌno ladna Dios bega. Nlad naꞌ umbiꞌi gak ladoꞌo bega ndoꞌ Cristo, lak nsoꞌ dub xagots umbiꞌi nak ndoꞌ xabgiꞌi ikaꞌa xa.
2CO 11:3 Parea leꞌa naꞌ nzheb leꞌa lak mkwiꞌinno dub mbeꞌal Eva, no liga skwiꞌinno dub men bega, cha ulaꞌa bega ta na ndangea ladna bega Cristo.
2CO 11:4 Leꞌa ncho bexa ndab nluꞌu diꞌizh ten Jesús, parea xaꞌaga nak‑a ndoꞌ ta mluu besa wa. Ná leꞌa bega cha ndangea ladna ta ndab xa wa. Leꞌa ta nluꞌu bexa wa cuent ten dub espíritu xaꞌaga nak ndoꞌ Espíritu ten Dios. No ndab xa leꞌa ta ndadiꞌizh xa wa diꞌizh wen ten Cristo, parea xaꞌaga nak‑a ndoꞌ ta mbingea ladna bega zha ned wa.
2CO 11:5 Ndab bexa leꞌa bexa nak apostol ndon leꞌa nsak, parea leꞌa bexa naꞌanpa mas nsak ndoꞌ naꞌ.
2CO 11:6 Maska naꞌanpa chul ndadiꞌizh naꞌ lak ndadiꞌizh bexa wa, parea leꞌa naꞌ mas ndák ndoꞌ bexa wa, lak uniꞌíka bega zha uyoꞌo naꞌ lat bega.
2CO 11:7 Leꞌa naꞌ ndee lá isen med gor mbidiꞌizh naꞌ diꞌizh wen ten Dios ndoꞌ bega. Leꞌa naꞌ ndi mbin cuent dub xa naꞌanpa nsak lat bega, ndontsa mgeꞌ ladna bega Dios. ¿Nsak bega zha leꞌa ta li mbin naꞌ wa dub ta ugap?
2CO 11:8 Ndi usen naꞌ med msaꞌa stapla xkwaꞌa be xmen Cristo, ndontsa gakno naꞌ bega.
2CO 11:9 Leꞌa zha uyoꞌono naꞌ bega baꞌ ncho zha nkiꞌin naꞌ taꞌa. Parea naꞌanpa inaꞌab naꞌ‑yá ndoꞌ bega, leꞌa be xmen Cristo bexa Macedonia ndi leꞌa mbiꞌidno ta nkiꞌin naꞌ wa. Ta weꞌe naꞌan xtaꞌan inaꞌab naꞌ ndoꞌ bega zha wa, no naꞌanpa li gun naꞌ.
2CO 11:10 Leꞌa lak segurkapa nak gealngea ten Cristo, no liga segurkapa ta gáp naꞌ ndee: Naꞌan ton koꞌo ta nten lad naꞌ, leꞌa idub Acaya baꞌ leꞌa naꞌ naꞌanpa inaꞌab med ndoꞌ be men.
2CO 11:11 ¿Uniꞌí bega xtaꞌan li ndáp naꞌ zha? ¿Nsak bega zha leꞌa naꞌ naꞌanpa nkweaꞌ ladna bega? Leꞌa Dios uniꞌí leꞌa naꞌ nkweaꞌka ladna bega.
2CO 11:12 Leꞌa naꞌ gun sig naꞌanpa isen naꞌ med ten bega, ndontsa leꞌa bexa nluꞌu be ta ugap wa lá yoo gan gab leꞌa bexa wa ndun lakta ndun naꞌ.
2CO 11:13 Leꞌa bexa wa nkwiꞌin ndab leꞌa nak apostol ten Cristo, no ndab bexa leꞌa bexa leꞌa ndun tiꞌin ten Cristo. Nluꞌutsa bexa cuent dub apostol, parea naꞌanpa apostol bexa.
2CO 11:14 Leꞌa ta wa lá nsabndoꞌ yanseana bega, geal leꞌa maxuꞌu leꞌa ncheꞌa mod nak xa, ndontsa uluꞌu xa cuent dub angel ten Dios.
2CO 11:15 Ta weꞌe lá yanseana beuna leꞌa be xmen maxuꞌu wa nluu cuent dub xa uzheꞌeb wen nak. Parea leꞌa Dios utsaksi bexa wa lak nsabndoꞌ‑yá.
2CO 11:16 Leꞌa naꞌ stub biaj gáp naꞌanpa gunbeꞌe bega leꞌa naꞌ xa loc. Ná tal leꞌa bega li ndanbeꞌe, bxik bega izhinna naꞌ dub tuzhtsa cuent dub xa loc.
2CO 11:17 Leꞌa ta gáp naꞌ ndee naꞌanpa dub ta ndab Dios ndoꞌ naꞌ, leꞌa naꞌ ndi izhinna cuent dub xa loc.
2CO 11:18 Leꞌa lak ncho kwaꞌad bexa nzhinnona be ta ndun bexa, no liga izhinnona naꞌ be ta ndun naꞌ.
2CO 11:19 Leꞌa bego baꞌ nsak list nak bega, ta weꞌe ndal ladna bega ndoꞌón bega ta ndadiꞌizh bexa loc wa.
2CO 11:20 Leꞌa bega nxik ndoꞌ bexa uzhebpa nibeꞌe ndoꞌ bega, bexa nlat med ten bega, no nkwiꞌinno bexa bega, no gaꞌap ndun bexa ndoꞌ bega, gast ngichyaꞌa bexa dub‑a ndoꞌ bega.
2CO 11:21 Leꞌa naꞌ ngi ndo ladna ndáp naꞌ ndoꞌ bega, leꞌa besa naꞌanpa li ngunno bega, geal leꞌa besa uleꞌa nak ndoꞌ bexa wa. Parea tal leꞌa bexa nzhinna, leꞌa naꞌ no izhinna maska uní naꞌ leꞌa‑yá ta tont.
2CO 11:22 ¿Nak bexa xa hebreo zha? Leꞌa naꞌ noga xa wa. ¿Nak xa xa Israel zha? Leꞌa naꞌ noga xa wa. ¿Nak xa xa ras Abraham zha? Leꞌa naꞌ noga nak xa wa.
2CO 11:23 ¿Ndun bexa tiꞌin ten Cristo zha? Leꞌa naꞌ mas ndun tiꞌin ten Cristo ndoꞌ bexa wa, maska ndadiꞌizh naꞌ cuent dub xa loc ta na ndáp naꞌ ta wa. Leꞌa mas sian biaj udin be men naꞌ. No mas sian biaj mkeꞌa bexa naꞌ litgiꞌib. No sian biaj ndiꞌizh gut bexa naꞌ.
2CO 11:24 Leꞌa bexa nibeꞌe ten bexa judio dub gaꞌay biaj udin naꞌ nsea gib, mlaꞌ xa dub galntiꞌi bgeꞌa yaꞌa gib las naꞌ.
2CO 11:25 No chon biaj udin bexa naꞌ nsea bar. No dub biaj mlaꞌgeꞌ bexa naꞌ. No chon biaj zha na nsea naꞌ len dub barco siꞌil, cha ulaꞌyoꞌo be barco wa len nitsdoꞌo. No dub biaj ngwaꞌixoꞌob naꞌ ndoꞌ nitsdoꞌo dub teꞌal nsea dub wizh.
2CO 11:26 Leꞌa itea sa nkesea naꞌ leꞌa naꞌ uzhebpa rages nkesea. Ncho zha ngi slaꞌaw naꞌ len yowbeꞌe. No ngi sut be waꞌan naꞌ. No bexa Israel nsea bexa naꞌanpa xa Israel ngi sut naꞌ. Uzhebpa rages ukesea naꞌ len be gezh no be geꞌe no ndoꞌ nitsdoꞌo, no ndoꞌ bexa nkwiꞌin ndab leꞌa nak xmen Cristo.
2CO 11:27 Leꞌa naꞌ ndun tiꞌin gast nzhanna naꞌ, no ncho teꞌal lá ndadgats naꞌ. No ncho zha uzhebpa ndanna naꞌ no ndak lad naꞌ. No ncho zha naꞌan xtaꞌan ndap naꞌ gaw naꞌ. No ncho zha uzhebpa kwal nsak naꞌ nkiꞌin naꞌ xab naꞌ.
2CO 11:28 No ndoꞌ iteanak be ta wa ncho stub taꞌa ndun mas kweaꞌ nyoꞌo lad naꞌ itea wizh. Leꞌa ta wa ta nyuꞌno lad naꞌ itea xkwaꞌa be xmen Cristo.
2CO 11:29 Leꞌa tal dub xa wa isen gizh, leꞌa naꞌ no kweaꞌ yoo ladna. Natal leꞌa dub xa utsabgix stub men, leꞌa naꞌ sakloo.
2CO 11:30 Tal leꞌa naꞌ nsabndoꞌ izhinna, leꞌa naꞌ izhinnona ta uleꞌa nak naꞌ.
2CO 11:31 Leꞌa Dios Xus Jesucristo Xwan beuna uniꞌí leꞌa naꞌ naꞌanpa ndun gealkwiꞌin. Idub tiemp gab beuna leꞌa xa wa uzheꞌeb dub Dios siꞌil.
2CO 11:32 Leꞌa zha uyoꞌo naꞌ gezh Damasco, leꞌa xa nibeꞌe sa wa dub xmen rey Aretas unibeꞌe ulaꞌach bexa toꞌo gezh wa ndontsa isen bexa naꞌ.
2CO 11:33 Parea leꞌa pla bexa gezh wa mlaꞌ naꞌ toꞌo ventan ten muro wa len dub zhum. Cha li mxon naꞌ ndoꞌ bexa nlad isen naꞌ wa.
2CO 12:1 Leꞌa naꞌ naꞌanpa nlad izhinna, parea nsabndoꞌ gudiꞌizh naꞌ be ta uní naꞌ, be ta mluu Cristo ndoꞌ naꞌ.
2CO 12:2 Leꞌa naꞌ nchandoꞌ dub xmen Cristo, nchaꞌala dub tidaꞌ liꞌin leꞌa Dios mbiꞌi xa wa gast gibeꞌa yon baꞌ. Leꞌa naꞌ lá iní tal idub xa mbiꞌi Dios natal xbitsa xa‑yá. Ndon leꞌakama Dios uniꞌí.
2CO 12:3 Leꞌa Dios leꞌatsa uniꞌí tal idub xa ngwaꞌ natal xbitsa xa. Parea leꞌa naꞌ uní leꞌa xabgiꞌi wa
2CO 12:4 ukeaka gibeꞌa, sa na mbiꞌín xa be diꞌizh ugaꞌach, be ta lá nsabndoꞌ gudiꞌizh be men.
2CO 12:5 Leꞌa naꞌ izhinnona ta mbin xa wa, parea naꞌanpa izhinnona naꞌ ta ndun naꞌ. Ndi izhinnona naꞌ ta na uleꞌa nak naꞌ.
2CO 12:6 Ná tal leꞌa naꞌ nlad izhinna naꞌ, leꞌa ta wa naꞌanpa dub ta tont leꞌa naꞌ sbeꞌen gealngea ndadiꞌizh. Parea leꞌa naꞌ naꞌanpa izhinna, ndi iniꞌítsa be men be ta ndun naꞌ no goꞌóntsa bexa ta ndadiꞌizh naꞌ.
2CO 12:7 Leꞌa Dios lá nlad izhinnona naꞌ ta uní naꞌ sa wa. Ta weꞌe mlaꞌa Dios usen dub gealkweaꞌ siꞌil naꞌ, cuent dub gich nkaꞌas maxuꞌu las naꞌ, ndontsa naꞌanpa izhinna naꞌ.
2CO 12:8 Leꞌa naꞌ chon biaj unaꞌab ndoꞌ Dios koꞌo Dios ta wa.
2CO 12:9 Parea leꞌa Dios ukaꞌab, ndab xa ndoꞌ naꞌ: “Leꞌa naꞌ nkweaꞌ ladna lu, ta weꞌetsa nkiꞌin lu. Leꞌa ta na uleꞌa nak lu wa, leꞌa ta wa mas nluu leꞌa naꞌ juertka nak.” Ta weꞌe leꞌa nat leꞌa naꞌ nzhinnona ta na uleꞌa nak naꞌ, ndontsa mas usaꞌa Cristo juers ndoꞌ naꞌ.
2CO 12:10 No nten lad naꞌ gor nsatiꞌid naꞌ ndoꞌ be gealkweaꞌ geal nak naꞌ xmen Cristo, gor uleꞌa nak naꞌ, no gor nisi be men naꞌ, no gor nkiꞌin naꞌ taꞌa, no gor ntsaksi be men naꞌ, no gor kweaꞌ nsak naꞌ. Leꞌa gor na uleꞌa nak naꞌ, leꞌa Dios ndun leꞌa naꞌ ndi juert nyak.
2CO 12:11 Leꞌa ta na li nzhinna naꞌ wa dub ta tont, parea leꞌa ta wa ke ten bega li mbin naꞌ. Leꞌa bego nak bexa nsabndoꞌ gab xteꞌe wen ndun naꞌ, geal leꞌa bexa ndab leꞌa nak apostol nsak ten Cristo wa naꞌanpa mas nsak ndoꞌ naꞌ, maska naꞌanpa nsak naꞌ.
2CO 12:12 Leꞌa zha uyoꞌono naꞌ bega, leꞌa naꞌ kwen mxik ndoꞌ be gealkweaꞌ wa, no mbin naꞌ sian be taꞌa ngwanseana be men no sian be uyon ten Dios. Leꞌa be ta li mbin naꞌ wa nluu leꞌa naꞌ leꞌaka nak apostol ten Cristo.
2CO 12:13 Ncho dubtsa taꞌa mbinno naꞌ stapla xkwaꞌa be xmen Cristo naꞌanpa ngunno naꞌ bega. Leꞌa ta wa naꞌanpa inaꞌab naꞌ usaꞌa bega med. ¡Leꞌa naꞌ naꞌab ndoꞌ bega bingeꞌ ladna bega ta wa!
2CO 12:14 Blaꞌach bega leꞌa nat leꞌa naꞌ listla nsoꞌ, gal inaꞌgal naꞌ bega biaj yon, no naꞌanpa inaꞌab naꞌ taꞌa ndoꞌ bega. Leꞌa naꞌ naꞌanpa nlad usaꞌa bega med, leꞌa naꞌ ndi nlad ikweaꞌ ladna bega naꞌ, leꞌa bega cuent nak xiꞌín naꞌ. Leꞌa dub meꞌed naꞌanpa kochaꞌaw med guntiꞌin xus na, ndi xus meꞌed kochaꞌaw med guntiꞌin meꞌed.
2CO 12:15 Ta weꞌe leꞌa naꞌ nten ladna usa naꞌ itea be ta ndap naꞌ no gast nsa naꞌ gealnaban ten naꞌ, tant nkweaꞌ lad naꞌ bega. Leꞌa naꞌ uzheꞌeb nkweaꞌ ladna bega, ná leꞌa bego ndidotsa nkweaꞌ ladna naꞌ.
2CO 12:16 Leꞌa bega uniꞌíka leꞌa naꞌ naꞌanpa inaꞌab taꞌa ndoꞌ bega, parea ncho bega ndab leꞌa ta ndák naꞌ wa leꞌa naꞌ mkedino bega.
2CO 12:17 ¿Nate nsak bega zha leꞌa dub xa mtuꞌub naꞌ ndoꞌ bega wa mkedino bega?
2CO 12:18 Leꞌa naꞌ unaꞌab ndoꞌ Tito giꞌid inaꞌ xa bega no mtuꞌub naꞌ stub xa ngwaꞌno Tito. ¿Nsak bega zha mkedino Tito bega? ¿Lá iniꞌí bega zha leꞌa naꞌ nsea Tito dubtsa utsin ndanno besa bega?
2CO 12:19 ¿Nsak bega zha leꞌa besa nlad gungeꞌ ladna bega ndoꞌ besa? Naꞌanpa li nak‑a, leꞌa Dios nsea Cristo ndewiꞌi leꞌa besa nkweaꞌka ladna bega, no itea be ta ndun besa leꞌa besa ndun ta wa ndontsa mas ukwaꞌan bega Dios.
2CO 12:20 Leꞌa naꞌ nzheb leꞌa zha na ilayal naꞌ sa baꞌ, leꞌa naꞌ naꞌanpa isak ladna lak nak bega, no naꞌanpa isak ladna bega lak nak naꞌ. Nzheb naꞌ leꞌa bega ndeyotoꞌo, no ndaklono bega bexa ndap taꞌa, no ugiꞌi bega, no ndun bega ta nladtsa bega, no ndadiꞌizh bega cuent gix, no nisi bega be ltsaꞌa bega, no nzhinna bega, no ndeyo bega.
2CO 12:21 No nzheb naꞌ leꞌa zha na gal inaꞌgal naꞌ bega leꞌa Dios gun ido lad naꞌ, no gón naꞌ ke na bi lá nlaꞌa bega be ta ugap nak bega. Leꞌa bega bi ndun be ta bzhiꞌik, ngal bega stub xa naꞌanpa xa ten bega, no sianta be ta ugap ndun bega.
2CO 13:1 Leꞌa stub zha gal inaꞌ naꞌ bega, leꞌa ta wa gak biaj yon. Btseꞌa ladna bega leꞌa tal top natal chon xa usake stub men, leꞌa be men nsabndoꞌ ulaꞌach ta ndab bexa wa.
2CO 13:2 Leꞌa zha na ngwalinaꞌ naꞌ bega wa, leꞌa naꞌ ndáp ndoꞌ bego na bi ndun be ta ugap wa no ndoꞌ iteata bega leꞌa naꞌ kuyoka bega li ndun ta ugap wa. Leꞌa nat nchoꞌo naꞌ sit ndoꞌ bega, leꞌa naꞌ gáp stub biaj leꞌa gal zha ilayal naꞌ sa baꞌ, leꞌa naꞌ uzhebpa kuyo bego na bi ndun ta ugap wa.
2CO 13:3 Leꞌa bega nkwaꞌan ná xteꞌe iniꞌí bega naga ta ugea sakndoꞌ Cristo ndadiꞌizh naꞌ. Leꞌa Cristo naꞌanpa uleꞌa nak ndoꞌ bega leꞌa xa ndi nluu ta juert nak xa ndoꞌ bega.
2CO 13:4 Ta ugeaka ukea xa ndoꞌ cruz cuent dub xa uleꞌa nak, parea leꞌa nat leꞌa xa nban juers ten Dios. No liga leꞌa besa uleꞌa nak lak ngok Cristo, parea leꞌa besa no iban juers ten Dios lak nban Cristo ndontsa gakno besa bega.
2CO 13:5 Binbeꞌe bega naga ta ugeaka ngeꞌ ladna bega Cristo natal naꞌan. Bin bega preb leꞌaka leꞌa bega. ¿Lá iniꞌí bega zha leꞌa Jesucristo ncho len ladoꞌo bega tal bega ta ugea ngeꞌ ladna xa?
2CO 13:6 Leꞌa naꞌ nlad iniꞌí bega leꞌa besa ta ugeaka ngeꞌ ladna Cristo.
2CO 13:7 Ta weꞌe leꞌa besa nab ndoꞌ Dios gakno Dios bega naꞌanpa gun bega ta ugap. Parea leꞌa besa naꞌanpa li ngun ndontsa gab be men leꞌa besa utsin ndun. Leꞌa besa ndi nlad gun bega ta wen, guniꞌi xteꞌe gab be men cuent ten besa.
2CO 13:8 Tal leꞌa bega gun lak nak gealngea ten Dios, leꞌa besa naꞌanpa kuyo bega, leꞌa besa ndi gakno bega.
2CO 13:9 Ta weꞌe nten ladna besa ta na uleꞌa nak besa no juert nak bego. No nabta besa ndoꞌ Dios gak bega lak nlad Dios.
2CO 13:10 Nat nkeꞌa naꞌ git ndee zha bi sit nsoꞌ naꞌ wats bega, ndontsa gal zha na yoꞌono naꞌ bega leꞌa naꞌ naꞌanpa kuyo bega. Leꞌa Cristo leꞌa msoꞌ naꞌ gun naꞌ tiꞌin ndee ndontsa gakno naꞌ bega, naꞌanpa ndi gun naꞌ ta gach ladna bega.
2CO 13:11 Leꞌa bego nak beuna xmen Cristo, leꞌa naꞌ gáp ndoꞌ bega bten ladna bega, no bin bega juers utsin gak bega, no btenxeꞌa bega be ltsaꞌa bega, no dubtsa binbeꞌe bega, no lá kuyo bega. Weꞌe gakno Dios bega, leꞌa xa ndun wen yoo ladna beuna no nkweaꞌ ladna xa beuna.
2CO 13:12 Unidiꞌizh bega ndoꞌ be ltsaꞌa bega ta nluu leꞌa bega nkweaꞌ ladna xa.
2CO 13:13 Leꞌa itea be xmen Jesucristo ncho sa ndee no nidiꞌizh ndoꞌ bega.
2CO 13:14 Naꞌab naꞌ ndoꞌ Dios leꞌa Jesucristo Xwan beuna mas uzheꞌeb utsin gunno xa bega, no mas uzheꞌeb ikweaꞌ ladna Dios bega, no mas uzheꞌeb gun Espíritu ten Dios dubtsa gak bega. Lika nak‑a.
GAL 1:1 Leꞌa naꞌ ndee Pabl dub xa mtuꞌub Jesucristo gun naꞌ tiꞌin ten xa. Leꞌa naꞌ naꞌanpa men utuꞌub gak naꞌ ta wa, leꞌa naꞌ ndi Jesucristo no Tad Dios mtuꞌub, xa na mxiste Jesús ndoꞌ gealgut.
GAL 1:2 Leꞌa naꞌ ndee no itea be xmen Cristo ndencho sa ndee nidiꞌizh ndoꞌ bega nak xmen Cristo ndencho be gezh nde Galacia baꞌ.
GAL 1:3 Naꞌab naꞌ ndoꞌ Dios Xus beuna no ndoꞌ Jesucristo Xa Nibeꞌe utsin gak bexa ndoꞌ bega no gun bexa wen yoo ladna bega.
GAL 1:4 Leꞌa Jesucristo mbin lak nlad Dios Xus beuna gun xa, msaꞌa xa leꞌaka leꞌa xa ngut xa ndontsa yuꞌu be ke ten beuna, cha itoꞌo beuna ndoꞌ be ta ugap ncho ndoꞌ gizhliyo ndee.
GAL 1:5 ¡Idub tiemp gab beuna leꞌa Dios xa ndon leꞌa siꞌil! Lika nak‑a.
GAL 1:6 Leꞌa naꞌ uzhebpa ndanseana xteꞌe uxax nsaulaꞌa bega Dios. Leꞌa Cristo mti bega no nkweaꞌ ladna xa bega, parea leꞌa bega ndi ndankea stub diꞌizh xaꞌaga.
GAL 1:7 Leꞌa diꞌizh wa naꞌanpa diꞌizh wen ten Cristo, parea ncho be men nkwiꞌinno bega, nlad bexa ucheꞌa bexa ta na ta ugeaka nak diꞌizh ten Cristo.
GAL 1:8 Ná leꞌa tal ton gab ndadiꞌizh xa diꞌizh wen ten Cristo, parea ta nluu xa naꞌanpa diꞌizh mbidiꞌizhla besa ndoꞌ bega, leꞌa Dios uzhebpa utsaksi xa wa. Guniꞌi tal leꞌa dub besa li gudiꞌizh, natal dub angel ntoꞌo gibeꞌa li gudiꞌizh, leꞌa Dios utsaksika xa.
GAL 1:9 Lakka ndabka besa ndoꞌ bega, leꞌa naꞌ gáp‑a stub biaj: leꞌa tal ton gudiꞌizh stub diꞌizh xaꞌaga cuent ten Cristo, dub ta naꞌanpa nak lak nak ta mbingea ladna bega, leꞌa Dios utsaksika xa wa ta nunk lá idub.
GAL 1:10 ¿Nsak bega zha leꞌa naꞌ nkwan xteꞌe wen yaꞌan naꞌ ndoꞌ be men? ¿Nati ndi nkwan naꞌ xteꞌe wen yaꞌan naꞌ ndoꞌ Dios? ¿Ndanbeꞌe bega zha leꞌa naꞌ nkwan xteꞌe isak ladna be men ta ndadiꞌizh naꞌ? Leꞌa tal naꞌ li nlad isak ladna be men diꞌizh ten naꞌ wa, leꞌa naꞌ naꞌanpa gak xa ndun tiꞌin ten Cristo.
GAL 1:11 Bega nak beuna xmen Cristo, leꞌa naꞌ nlad yakbeꞌena bega leꞌa diꞌizh wen ten Cristo, ta ndadiꞌizh naꞌ wa, naꞌanpa ta ulabeꞌe dub men.
GAL 1:12 Leꞌa naꞌan ton ngudiꞌizh‑a ndoꞌ naꞌ, no naꞌanpa uluu dub men‑a ndoꞌ naꞌ. Leꞌa‑yá ndi Jesucristo mluu ndoꞌ naꞌ.
GAL 1:13 Leꞌa bega mbiꞌínla xteꞌe ngok naꞌ polta, zha na ndankea naꞌ Dios lak ndun besa xa judio. No uniꞌíla bega xteꞌe uzhebpa mtsaksi naꞌ be xmen Cristo, gast nlad naꞌ unitndoꞌ naꞌ bexa.
GAL 1:14 Leꞌa lat itea be ltsaꞌa naꞌ xa judio, leꞌa naꞌ mas utsin ndun lak ndankea besa Dios wa ndoꞌ kwaꞌadpa bexa, leꞌa naꞌ ndankea iteanak be costumbr mlaꞌa be usan gox polta ten besa.
GAL 1:15 Ná leꞌa Dios mti naꞌ zha na biseata gal naꞌ. No uzhebpa utsin mbinno xa naꞌ, utezh xa naꞌ gun naꞌ tiꞌin ten xa. Weꞌe ngol gor msak ladna Dios,
GAL 1:16 leꞌa xa cha mluu ndoꞌ naꞌ leꞌa Jesús nak Xin xa, ndontsa gudiꞌizh naꞌ diꞌizh ten xa ndoꞌ bexa naꞌanpa xa judio. Leꞌa zha wa leꞌa naꞌ ni lá ngakwan stub men ngab ná xteꞌe gun naꞌ.
GAL 1:17 Ni lá ngainaꞌ naꞌ bexa nakla apostol ndencho Jerusalén. Leꞌa naꞌ ndi ngwaa nacion Arabia, cha ngol tsoꞌo wa myach naꞌ gezh Damasco.
GAL 1:18 Ngol schon liꞌin cha ngwaa naꞌ Jerusalén, ndontsa igondoꞌ naꞌ Pedr, cha uyoꞌono naꞌ xa sa wa dub tiꞌin wizh.
GAL 1:19 Ná leꞌa zha weꞌe lá iní naꞌ stapla be apostol, nabtsa Jacob wit Jesús uní naꞌ.
GAL 1:20 Leꞌa Dios nsobwiꞌi leꞌa be ta nkeꞌa naꞌ ndee ta ugeaka.
GAL 1:21 Leꞌa tsoꞌo wa ngwaa naꞌ Siria no Cilicia.
GAL 1:22 Leꞌa zha wa leꞌa be xmen Cristo ndencho Judea bi lá igondoꞌ naꞌ.
GAL 1:23 Nabtsa mbiꞌín bexa leꞌa naꞌ, xa mtsaksi be xmen Cristo no mlad naꞌ initndoꞌ diꞌizh ten Cristo, nat ndadiꞌizh naꞌ leꞌaka diꞌizh wa ndoꞌ be men.
GAL 1:24 Cha ndab bexa leꞌa Dios uzheꞌeb dub Dios siꞌil, ta na li mbinno Dios naꞌ.
GAL 2:1 Ngol stidaꞌ liꞌin cha ngwaa naꞌ Jerusalén stub biaj, no Bernabé nsea Tito.
GAL 2:2 Li ngwaa naꞌ sa wa geal leꞌa Dios ndab leꞌa naꞌ nsabndoꞌka gaa. Cha nabtsa ndoꞌ bexa nsak ten be xmen Cristo mbidiꞌizh naꞌ xteꞌe nak diꞌizh ten Cristo, ta ndadiꞌizh naꞌ ndoꞌ bexa naꞌanpa xa judio. Li mbin naꞌ ndontsa naꞌanpa gab be men leꞌa ta mbin naꞌ no ta ndunta naꞌ dub ta naꞌan xtiꞌin.
GAL 2:3 Leꞌa Tito xa mbiꞌi naꞌ sa wa naꞌanpa xa judio, parea leꞌa bexa wa naꞌanpa ngun juers yoꞌo beꞌe xa.
GAL 2:4 Leꞌa sa wa ncho pla bexa nkwiꞌin ndab leꞌa bexa no nak xmen Cristo. Leꞌa bexa wa uyoꞌo lat besa, nlad bexa yoo beꞌe Tito. Mlaꞌach bexa ná xteꞌe lá ndankeata besa be ley ten bexa judio ta na nak besa xmen Cristo Jesús. Leꞌa bexa ndi nlad yankea besa ley wa.
GAL 2:5 Parea ni dub tuzh lá ngun besa ta nlad bexa wa, ndontsa naꞌanpa ulaꞌa bega diꞌizh gealngea ten Cristo.
GAL 2:6 Ná leꞌa bexa nsak wa naꞌanpa ngab leꞌa naꞌ xaꞌaga uluu. (Leꞌa cuent ten naꞌ leꞌa bexa wa naꞌanpa bexa nsak, geal leꞌa Dios naꞌanpa nti be men.)
GAL 2:7 Ndi myakbeꞌena bexa wa leꞌa Dios msoꞌ naꞌ gudiꞌizh naꞌ diꞌizh wen ten Cristo ndoꞌ bexa naꞌanpa xa judio, lak msoꞌ Dios Pedr gudiꞌizh xa leꞌaka diꞌizh wa ndoꞌ bexa judio.
GAL 2:8 Leꞌa Dios xa na li mtuꞌub Pedr ndoꞌ bexa judio wa, no liga mtuꞌub xa naꞌ ndoꞌ bexa naꞌanpa xa judio.
GAL 2:9 Ta weꞌe leꞌa Jacob no Pedr no Juan, bexa mas nsak wa, mgondoꞌ leꞌa Dios leꞌa msaꞌa tiꞌin gun naꞌ wa. Cha ndab bexa ndoꞌ naꞌ no ndoꞌ Bernabé leꞌa itea besa ltsaꞌa na. No ndab bexa leꞌa naꞌ no Bernabé yaꞌ ndoꞌ bexa naꞌanpa xa judio, leꞌa bexa wa ndi yaꞌ ndoꞌ bexa judio.
GAL 2:10 Unabtsa bexa gakno besa bexa uban nak lat be xmen Cristo, ta na uzheꞌeb ndun naꞌ juers.
GAL 2:11 Ná leꞌa ngol tsoꞌo wa zha na nchoꞌo naꞌ gezh Antioquía, leꞌa Pedr no ulayaꞌ sa wa. Cha uteyo naꞌ xa leꞌa xa ndun dub ta lid leꞌa nak.
GAL 2:12 Leꞌa zha ulayaꞌ xa sa wa, leꞌa xa ndawno bexa naꞌanpa xa judio. Ná leꞌa zha ulayaꞌ pla be men judio mtuꞌub Jacob, weꞌe cha yá naꞌantapa ngawno xa bexa wa, geal leꞌa xa mzheb ndoꞌ bexa judio wa.
GAL 2:13 No stapla bexa judio no gast Bernabé mbin ta lid leꞌa nak wa lak ndun Pedr, mlaꞌa bexa lá ngawnota bexa wa bexa naꞌanpa xa judio.
GAL 2:14 Ná leꞌa gor uní naꞌ leꞌa bexa wa naꞌanpa ndun lak ndab diꞌizh gealngea ten Cristo, weꞌe uteyo naꞌ Pedr ndoꞌ gaꞌal iteata bexa wa, ndáp naꞌ ndoꞌ Pedr: “Lu dub xa judio, ná lu mbin cuent dub xa naꞌanpa xa judio. ¿Xteꞌema nlad lu leꞌa bexa naꞌanpa xa judio yankea be costumbr ten bexa judio zha?”
GAL 2:15 Leꞌa besa nak xa judio gast zha ngolkata besa, naꞌanpa nak besa lak nak bexa naꞌanpa xa judio, bexa lá nxobgek ndoꞌ Dios.
GAL 2:16 Ná leꞌa besa uniꞌí leꞌa naꞌan ton wen yaꞌan ndoꞌ Dios tal xa guntsa lak ndab ley mkeꞌa Moisés. Leꞌa xa ndi wen yaꞌan ndoꞌ Dios tal leꞌa xa igeꞌ ladna Jesucristo. Ta weꞌe leꞌa besa ngeꞌ ladna Cristo, ndontsa gun Dios wen yaꞌan besa ndoꞌ xa. Leꞌa ta wa naꞌanpa juers ten ta na ndankea besa ley wa, leꞌa naꞌan ton wen yaꞌan ndoꞌ Dios tal xa leytsa wa yankea.
GAL 2:17 Leꞌa besa ngeꞌ ladna Cristo ndontsa wen yaꞌan besa ndoꞌ Dios. Ncho bexa ndab leꞌa ta na naꞌanpa yankea besa ley wa, ta weꞌe leꞌa besa ndap ke ndoꞌ Dios. ¿Nsak bega zha leꞌa Cristo leꞌa mbin ndap besa ke zha? ¡Leꞌa naꞌ gáp leꞌa ta wa naꞌanpa li nak!
GAL 2:18 Leꞌa naꞌ ndee lá ngeꞌta ladna ley wa, parea tal leꞌa naꞌ cha leꞌakaga igeꞌ ladna‑yá stub biaj, leꞌa naꞌ gapka ke.
GAL 2:19 Leꞌa cuent ten ley wa leꞌa naꞌ cuent dub xa ngut, leꞌa naꞌ ndi nban ndontsa gun naꞌ ta nlad Dios.
GAL 2:20 Leꞌa ta na ngut Cristo ndoꞌ cruz, leꞌa ta wa cuent no naꞌ li ngut. Ta weꞌe yá lá gun naꞌ laktsa ndanbeꞌe naꞌ, leꞌa naꞌ ndi ndun ta nlad Cristo, xa ncho ladoꞌo naꞌ. Leꞌa ndoꞌ itea taꞌa ndun naꞌ wa leꞌa naꞌ ngeꞌ ladna Xin Dios, xa nkweaꞌ ladna naꞌ no msaꞌa xa leꞌaka leꞌa xa ngut xa sakndoꞌ naꞌ.
GAL 2:21 Leꞌa naꞌ naꞌanpa uxelad ta na li msaꞌa Dios ndoꞌ beuna wa. Tal leꞌa beuna wen yaꞌan ndoꞌ Dios juers ten ley wa, leꞌa ta wa gab leꞌa ta ngut Cristo wa dub ta naꞌan xtiꞌin.
GAL 3:1 ¡Bego xa Galacia, uzhebpa ngud nak ladoꞌo bega! ¿Ton nkiꞌil bega ndontsa lá uxobgek bega ndoꞌ gealngea zha? Leꞌa naꞌ ndon lndeꞌe mbidiꞌizh ndoꞌ bega leꞌa Jesucristo ngut ndoꞌ cruz sakndoꞌ bega.
GAL 3:2 Nladtsa naꞌ ikaꞌab bega ndoꞌ dub taꞌa inabdiꞌizh naꞌ: ¿Msaꞌa Dios Espíritu ten na ndoꞌ bega ta na ngwankea bega ley zha, nati ta na mbiꞌín bega diꞌizh ten Cristo cha mbingea ladna bega‑yá?
GAL 3:3 ¡Uzhebpa ndidotsa nyakbeꞌena bega! Leꞌa bega mgeꞌ ladna Espíritu ten Dios, parea nat ndi ngeꞌ ladna bega be ta na nduntsa bega.
GAL 3:4 Sian ndoꞌ be ta juert utid bega, ná leꞌa bega ndanno ta wa cuent dub ta naꞌan xtiꞌin. Parea leꞌa naꞌ ndee lá ndangea ladna leꞌa ta wa ta naꞌan xtiꞌin.
GAL 3:5 Leꞌa Dios leꞌa msaꞌa Espíritu ten na ndoꞌ bega nsea ndun xa be uyon lat bega. ¿Nsak bega zha leꞌa xa li ndun ta wa geal leꞌa bega ngeꞌ ladna ley wa, nati li ndun xa geal leꞌa bega mbiꞌín diꞌizh ten Cristo cha mbingea ladna bega‑yá?
GAL 3:6 Leꞌa Abraham mgeꞌ ladna Dios, ta weꞌe mbin Dios wen myaꞌan xa ndoꞌ xa.
GAL 3:7 Leꞌa bega nsabndoꞌka iniꞌí leꞌa bexa na ngeꞌ ladna Dios, leꞌa cuent ten Dios leꞌa bexa wa nak xin Abraham.
GAL 3:8 Lak nkeaniꞌi diꞌizh ten Dios, leꞌa be men naꞌanpa xa judio wa no wen yaꞌan ndoꞌ Dios tal leꞌa bexa igeꞌ ladna Dios, lak ndab Dios diꞌizh wen ndee ndoꞌ Abraham: “Leꞌa naꞌ guntiꞌin lu, ndontsa wen yoo be men itea be nacion nde ndoꞌ gizhliyo.”
GAL 3:9 Ta weꞌe leꞌa be men na ngeꞌ ladna Dios wa leꞌa Dios gun wen yoo ladna bexa lak mbinno xa Abraham, xa na no mgeꞌ ladna Dios.
GAL 3:10 Leꞌa itea be men na ngeꞌ ladna ley mkeꞌa Moisés wa, leꞌa Dios utsaksi bexa wa lak nkeaniꞌi diꞌizh ten Dios, ndab‑a: “Leꞌa Dios utsaksi iteanak be men na lá ngun iteanak be taꞌa nkeaniꞌi ndoꞌ libr ten ley.”
GAL 3:11 Naꞌan ton wen yaꞌan ndoꞌ Dios juers ten ley wa, lak nkeaniꞌi diꞌizh ten Dios, ndab Dios: “Leꞌa bexa wen nak ndoꞌ naꞌ, leꞌa ta na ngeꞌ ladna bexa naꞌ, ta weꞌe gap bexa gealnaban.”
GAL 3:12 Leꞌa ley wa naꞌanpa ndab igeꞌ ladna bexa Dios ndontsa gap xa gealnaban. Ndi ndab‑a: “Leꞌa tal ton uxobgek ndoꞌ idub ley leꞌa xa gap gealnaban juers ten ta wa.”
GAL 3:13 Leꞌa Cristo uloꞌo beuna ndoꞌ ta nibeꞌe ley utsaksi Dios beuna wa, zha na mlaꞌa xa mbit be men xa ndoꞌ dub ya. Leꞌa diꞌizh ten Dios nkeaniꞌi ndab‑a: “Leꞌa tal ton gat ikea ndoꞌ dub ya, leꞌa ta wa ta ntsaksi Dios xa.”
GAL 3:14 Leꞌa ta na li ngut Cristo Jesús wa, ta weꞌe no bexa naꞌanpa xa judio wa wen kwe ndoꞌ Dios, lak ta ndab Dios ndoꞌ Abraham gunka Dios. Weꞌe tal leꞌa beuna igeꞌ ladna Cristo, leꞌa Dios usaꞌa Espíritu ten na ndoꞌ beuna, lak ndab xa usaꞌaka xa.
GAL 3:15 Bego nak beuna xmen Cristo, ukeꞌa naꞌ ta ndee dub mod yakbeꞌena bega‑yá: Leꞌa zha na nkeꞌa dub men dub git ndab‑a leꞌa xa gunka dub taꞌa, cha nkeꞌa xa firma ndoꞌ‑yá, weꞌe yá naꞌan ton gun gan leꞌa git wa lá isuꞌu, no naꞌan ton lá yoota gan koo ni stub diꞌizh ndoꞌ‑yá.
GAL 3:16 Leꞌa polta leꞌa Dios ndab usaꞌa dub taꞌa ndoꞌ Abraham no ndoꞌ dub xa ras ten Abraham. Leꞌa diꞌizh ten Dios naꞌanpa ndab usaꞌa Dios taꞌa ndoꞌ bexa ras ten Abraham lak ncho kwaꞌad xa. Leꞌa‑yá ndi ndab dubtsa xa, leꞌa xa wa Cristo.
GAL 3:17 Leꞌa ta ndáp naꞌ wa lndeꞌe gab: Leꞌa Dios ndab ta ugeakapa usaꞌa xa dub taꞌa ndoꞌ Abraham. Weꞌe leꞌa dub dap gayoꞌo ncho galntiꞌi liꞌin tsoꞌo wa leꞌa Dios msaꞌa ley ndoꞌ Moisés. Ta weꞌe leꞌa ley wa lá yoo gan gun leꞌa ta na ndab Dios ndoꞌ Abraham wa lá isuꞌu.
GAL 3:18 Tal leꞌa Dios usaꞌa ta ndab xa ndoꞌ bexa na nxobgektsa ndoꞌ ley wa, leꞌa ta wa gab leꞌa xa naꞌanpa ga usaꞌa‑yá lak ndab xa ndoꞌ Abraham. Ná leꞌa ta ndab Dios ndoꞌ Abraham usaꞌa xa wa, leꞌa ta wa dub ta ga nsaꞌa xa.
GAL 3:19 ¿Nat zha xtiꞌin ley mkeꞌa Moisés wa? Leꞌa ley wa msaꞌa Dios natsa uluu‑yá xtaꞌan be ta lá nsabndoꞌ gun be men, gast zha ilen xa ras ten Abraham, xa na lika ndab Dios ilen wa. Leꞌa be angel ten Dios msaꞌa ley wa ndoꞌ Moisés, cha utid xa diꞌizh wa ndoꞌ be men.
GAL 3:20 Parea leꞌa gor na mbidiꞌizhno Dios Abraham, leꞌa xa naꞌanpa nguntiꞌin dub men utid diꞌizh.
GAL 3:21 ¿Gab beuna zha leꞌa ke ten ley wa leꞌa ta ndab Dios ndoꞌ Abraham wa ta naꞌan xtiꞌin? ¡Leꞌa naꞌ gáp leꞌa ta wa naꞌanpa li nak! Tal leꞌa ley wa syoꞌo gan usaꞌa gealnaban, leꞌa beuna wen yaꞌan ndoꞌ Dios tal leꞌa beuna uxobgek ndoꞌ ley wa.
GAL 3:22 Parea lak nkeaniꞌi diꞌizh ten Dios, leꞌa itea be men ndencho ndoꞌ be ta ugap ndun bexa. Leꞌa nabtsa bexa ngeꞌ ladna Jesucristo ikaꞌa gealnaban na li ndab Dios usaꞌaka xa.
GAL 3:23 Leꞌa besa xa judio zha biseata igeꞌ ladna besa Cristo, leꞌa besa ndencho ndoꞌ ley cuent dub xa nkea litgiꞌib, gast zha ulen Cristo cha mbingea ladna besa xa.
GAL 3:24 Leꞌa ley wa mlaꞌach besa no mluu‑yá besa gast zha ulen Cristo, ndontsa igeꞌ ladna besa Cristo cha li wen yaꞌan besa ndoꞌ Dios.
GAL 3:25 Parea leꞌa besa yá naꞌantapa nkiꞌin ley uluu besa, leꞌa nat leꞌa besa ngeꞌ ladna Cristo.
GAL 3:26 Nat leꞌa bego no nak xin Dios, ta na ngeꞌ ladna bega Cristo Jesús.
GAL 3:27 Leꞌa gor na mbingea ladna bega Cristo cha utaleaꞌ bega, leꞌa bega myak lak nak Cristo, cuent ngok bega dub lad kub.
GAL 3:28 Nat leꞌa ta na nak beuna xmen Cristo Jesús, leꞌa itea bega dubtsa nak, guniꞌi tal bega xa judio natal bega naꞌanpa xa judio, guniꞌi tal bega ncho ndoꞌ yaꞌa stubga xa natal naꞌanpa li nak bega, guniꞌi tal bega xabgiꞌi natal xagots.
GAL 3:29 Leꞌa tal bega nak xmen Cristo, weꞌe leꞌa bega nakka xin Abraham, no ikaꞌa bega ta ndab Dios usaꞌaka xa ndoꞌ Abraham.
GAL 4:1 No gáp naꞌ leꞌa zha na nsaꞌa xus dub meꞌed ta ikaꞌa meꞌed wa, leꞌa zha tuzhta meꞌed leꞌa meꞌed cuent dub xa ncho ndoꞌ stubga men, ná leꞌa meꞌed wa ta ugeaka leꞌala nak xwan itea be ta wa.
GAL 4:2 Ncho be men nlaꞌach meꞌed wa no nchansu xa cuent ten meꞌed, gast zha na ulaꞌa xus meꞌed guntiꞌin meꞌed ta wa.
GAL 4:3 No liga nak ta utid beuna. Leꞌa zha bi lá nchandoꞌ beuna Cristo leꞌa beuna utencho ndoꞌ be ta ncho ndoꞌ gizhliyo ndee, lak ncho dub meꞌed ndoꞌ bexa nibeꞌe meꞌed.
GAL 4:4 Ná leꞌa ngol zha nsabndoꞌ‑yá, leꞌa Dios mtuꞌub Xin na, ngok xa medoꞌo ten dub xagots, no uyoꞌo xa ndoꞌ ley wa.
GAL 4:5 Li ndontsa koꞌo xa beuna ndencho ndoꞌ ley, cha yak beuna xin Dios.
GAL 4:6 Nat leꞌa bega nak xin Dios, ta weꞌe leꞌa Dios mtuꞌub Espíritu ten Xin na len ladoꞌo kadga dub bega. Ta weꞌe leꞌa beuna syoꞌo gan gab ndoꞌ Dios: “¡Tad, Xus naꞌ!”
GAL 4:7 Leꞌa bega yá naꞌantapa ndencho ndoꞌ ley wa, nat nak bega xin Dios. Leꞌa ta na nak bega xin Dios wa, ta weꞌe ikaꞌaka bega ta ndab Dios usaꞌaka xa, geal leꞌa bega xmen Cristo.
GAL 4:8 Leꞌa polta zha bi lá nchandoꞌ bega Dios leꞌa bega utencho ndoꞌ be dios gizhliyo, ta naꞌanpa ta ugea nak Dios.
GAL 4:9 Ná nat leꞌa bega nchandoꞌ Dios, natal mas wen gáp naꞌ leꞌa Dios leꞌa nchandoꞌ bega. Ta weꞌe, ¿xteꞌe nyach bega ndoꞌ be ta naꞌan xtiꞌin wa, ta na naꞌanpa ndakno bega, cha leꞌa‑yá inibeꞌegal ndoꞌ bega zha?
GAL 4:10 Leꞌa bega bi ndankea pla be wizh no be mbeꞌe no be tiemp no be liꞌin.
GAL 4:11 Leꞌa naꞌ nyuꞌ ladna nchaꞌa be tiꞌin mbin naꞌ lat bega gak dub ta naꞌan xtiꞌin.
GAL 4:12 Bega nak beuna xmen Cristo, naꞌab naꞌ ndoꞌ bega gak bega lak nak naꞌ, naꞌanpa igeꞌ ladna bega ley ten bexa judio. Maska nak naꞌ xa judio leꞌa naꞌ yá naꞌantapa nchoꞌo ndoꞌ ley wa, lak polta naꞌanpa ncho bega ndoꞌ‑yá. Leꞌa bega sbeꞌen utsin nak ndoꞌ naꞌ.
GAL 4:13 Leꞌa bega uniꞌíka leꞌa naꞌ kweaꞌ usak zha ned mbidiꞌizh naꞌ diꞌizh wen ten Cristo ndoꞌ bega.
GAL 4:14 Parea leꞌa bega naꞌanpa uxelad naꞌ geal ta na li kweaꞌ usak naꞌ wa. Ndi utsin ngok bega ndoꞌ naꞌ lak utsin gak bega tal ilen dub angel ten Dios natal ilen Cristo Jesús.
GAL 4:15 Malay yoꞌo gan gast igoꞌo bega ngusndoꞌ bega cha usaꞌa bega‑yá ndoꞌ naꞌ. ¿Parea leꞌa nat ma ta na li mten ladna bega wa zha?
GAL 4:16 Nat leꞌa bega ndakloo ndoꞌ naꞌ, geal leꞌa naꞌ ndadiꞌizh ta ugea ndoꞌ bega.
GAL 4:17 Leꞌa bexa na nlad yankea bega be costumbr ten bexa judio wa, utsin nak bexa ndoꞌ bega, parea leꞌa bexa naꞌanpa ta ugea nlad gakno bega. Ndi nladtsa bexa iteltsaꞌa beuna, cha isankea bega tsoꞌo bexa.
GAL 4:18 Utsinka nak‑a ukwaꞌan dub men be ta wen, parea leꞌa bega nsabndoꞌ li gun idub tiemp, naꞌanpa nabtsa zha nchoꞌo naꞌ lat bega.
GAL 4:19 Bego nak cuent xiꞌín naꞌ, leꞌa naꞌ kweaꞌ ncho ladna ke ten bega idub gast zha yak bega lak nak Cristo.
GAL 4:20 Malayka naꞌ nsoꞌ lat bega sa baꞌ, ndontsa gudiꞌizh naꞌ ndoꞌ bega stubga mod, leꞌa naꞌ ni lá iní xteꞌe gunbe naꞌ nsea ta ndun bega wa.
GAL 4:21 Leꞌa bego na nlad yankea ley ten Moisés wa, ¿lá iniꞌí bega xtaꞌan ndab leꞌaka ley wa zha?
GAL 4:22 Ndab‑a leꞌa Abraham ngop top xin na. Leꞌa xnaꞌa dub meꞌed wa Agar, dub xa ndun tiꞌin ndoꞌ Sara. Leꞌa xnaꞌa stub meꞌed wa Sara, xagots tenka Abraham.
GAL 4:23 Leꞌa xin xa ndun tiꞌin wa ngol laktsa ndal iteanak be men. Ná leꞌa xin xagots ten Abraham wa ngol geal leꞌa Dios ndab usaꞌa dub meꞌed ndoꞌ Abraham.
GAL 4:24 Leꞌa ta ndee wa nluu dub taꞌa: leꞌa itop xagots wa cuent nak top mod ndankea be men Dios. Leꞌa Agar wa nak cuent ley msaꞌa Dios ndoꞌ bexa Israel geꞌe Sinaí. Leꞌa bexa na ndankea ley wa cuent nak dub xa ndencho ndoꞌ yaꞌa stubga men.
GAL 4:25 Leꞌa nat leꞌa bexa gezh Jerusalén cuent nak Agar, geal leꞌa bexa ndencho ndoꞌ ley msaꞌa Dios geꞌe Sinaí nde Arabia wa.
GAL 4:26 Parea ncho stub Jerusalén nde gibeꞌa, leꞌa ta wa cuent nak xnaꞌa iteanak beuna nak xmen Cristo. Leꞌa beuna naꞌantapa ndencho ndoꞌ ley wa,
GAL 4:27 lak nkeaniꞌi diꞌizh ten Dios, ndab‑a: Bten ladna lu, xagots lá yoꞌo gan ngap xin na. Utezhat tant nten ladna lu, xa lá igondoꞌ gealkweaꞌ, ta nsak bexa zha ndap bexa xin xa. Leꞌa lu lá yoꞌo gan ngap xin lu nat, parea mas sian xin lu gap lu ndoꞌ xagots ndap xabgiꞌi wa nat.
GAL 4:28 Bega nak beuna xmen Cristo, leꞌa beuna nak cuent Isaac xin Sara, lak ndab Dios usaꞌa xa kwaꞌadpa xa ras Abraham.
GAL 4:29 Leꞌa zha weꞌe leꞌa xin Agar xa na li ngol laktsa ndal be men wa ugap mbinno xin Sara, xa na li ngol juers ten Espíritu ten Dios. No liga nak‑a nat.
GAL 4:30 Leꞌa diꞌizh ten Dios nkeaniꞌi, ndab Dios ndoꞌ Abraham: “Ulantuꞌub xagots ndun tiꞌin wa nsea xin xa, geal leꞌa xin xa wa lá ikaꞌa ta nsabndoꞌ ikaꞌa xin xagots tenka lu baꞌ.”
GAL 4:31 Bego nak beuna xmen Cristo, leꞌa beuna naꞌanpa nak cuent xin xa ndun tiꞌin wa. Leꞌa beuna ndi nak cuent xin xagots tenka Abraham wa.
GAL 5:1 Leꞌa Cristo yá uloꞌo beuna ndoꞌ ley wa, ta weꞌe gaꞌaltsa ute bega yá naꞌantapa yateta bega ndoꞌ ley wa.
GAL 5:2 Blaꞌach bega ta ndee, leꞌa naꞌ Pabl ndáp leꞌa tal bega koo beꞌe bega ndontsa wen yaꞌan bega ndoꞌ Dios, leꞌa cuent ten bega leꞌa ta na mbin Cristo wa dub ta naꞌan xtiꞌin.
GAL 5:3 Gáp naꞌ‑yá stub biaj, leꞌa itea bego xabgiꞌi na li yoo beꞌe wa, leꞌa bega wa juerska gun itea ta ndab ley ten Moisés wa.
GAL 5:4 Bego na nlad wen yaꞌan ndoꞌ Dios ta na ndankea bega ley wa, leꞌa bega nteltsaꞌa no Cristo, no nxelad bega ta na nkweaꞌ ladna Dios bega.
GAL 5:5 Parea leꞌa juers ten Espíritu ten Dios leꞌa besa uniꞌí leꞌa besa wen yaꞌan ndoꞌ Dios geal ngeꞌ ladna besa Cristo.
GAL 5:6 Leꞌa tal ton nak xmen Cristo Jesús, leꞌa tal xa ncho beꞌe natal naꞌan, leꞌa ta wa naꞌanpa leꞌa nsak. Leꞌa ta nsak wa ta na ngeꞌ ladna beuna Cristo no nkweaꞌ ladna beuna be men.
GAL 5:7 Leꞌa bega yá utsinka nchaꞌbe len nes ten Cristo. ¿Cha ton mka uxobgekta bega ndoꞌ gealngea zha?
GAL 5:8 Leꞌa Dios xa mti bega naꞌanpa li ngab gun bega.
GAL 5:9 Leꞌa lak dub tuzh levadur ndun nsabich sian koꞌob arin, no liga leꞌa dub tuzh ta lid leꞌa nak wa utsabgix kwaꞌad be men.
GAL 5:10 Leꞌa naꞌ ngeꞌ ladna Cristo leꞌa bega naꞌanpa gunbeꞌe stub taꞌa xaꞌaga ndoꞌ lak nkeꞌa naꞌ ndee. Ná leꞌa Dios utsaksi xa na li ntsabgix bega, guniꞌi ton‑a.
GAL 5:11 Bega nak beuna xmen Cristo, tal leꞌa naꞌ bi uluu leꞌa be xabgiꞌi nsabndoꞌ yoo beꞌe, weꞌe leꞌa bexa judio naꞌanpa ugap gunno naꞌ. Leꞌa naꞌ ndi ndadiꞌizh igeꞌ ladna bexa wa Cristo xa ngut ndoꞌ cruz, ta weꞌe ndakloo bexa judio ndoꞌ naꞌ.
GAL 5:12 Parea leꞌa bexa na lbaꞌata nlad utsabgix bega wa, ¡malay yabtoꞌog idub sa nyoꞌo beꞌe bexa!
GAL 5:13 Bega nak beuna xmen Cristo, leꞌa Dios leꞌa utezh bega ndontsa naꞌanpa kwencho bega ndoꞌ ley wa. Parea lá nsabndoꞌ gun bega ta nladtsa bega, ndi bkweaꞌ ladna bega be ltsaꞌa bega, no gokno bega bexa.
GAL 5:14 Leꞌa ta ndee nak xan idub ley ten Dios wa: “Bkweaꞌ ladna lu be ltsaꞌa lu lakkata lu.”
GAL 5:15 Blaꞌach bega, tal leꞌa bega inisi no kuyono bega leꞌaka be ltsaꞌa bega, leꞌa bega iteltsaꞌabe.
GAL 5:16 Ta weꞌe gáp naꞌ usea bega lak nlad Espíritu ten Dios, cha li naꞌanpa ukwaꞌan bega be ta nladtsa bega.
GAL 5:17 Leꞌa be ta nlad be men wa naꞌanpa nak ta nlad Espíritu, leꞌa ta na nlad Espíritu wa naꞌanpa nak lak ta nlad be men. Leꞌa itop ná wa xaꞌaga nak, ta weꞌe lá isuꞌu bega gun bega be ta wen nlad bega.
GAL 5:18 Parea tal leꞌa bega nxobgek ndoꞌ Espíritu ten Dios, leꞌa bega yá naꞌantapa ndencho ndoꞌ ley wa.
GAL 5:19 Uniꞌíka beuna xteꞌe nak bexa ndun ta nladtsa na: leꞌa bexa ngal dub xa naꞌanpa xa ten xa, no bexa nab ngal stubga men, no ndun xa be ta bzhiꞌik, no ugap ndanbeꞌe xa ndoꞌ stub xa,
GAL 5:20 no ndankea xa be dios gizhliyo, no ndun xa ta bruj, no nxee ladna xa ndoꞌ be men, no nkwaꞌan xa uyo, no nsaꞌab ladna xa ta ndap stubga xa, no ugiꞌi xa, no nlad xa gak xa dub xa nsak ndoꞌ be men, no lá nlad xa gun xa be taꞌa lak ndun be ltsaꞌa xa, no nlad xa leꞌatsa xa inibeꞌe dub xkwaꞌa men.
GAL 5:21 No ndaklono xa be men ndap taꞌa, no ndut xa men, no ndun xa gealgu, no ndal ladna xa be gast ndoꞌ gizhliyo ndee, no ndun xa sianta be ta ugap ltsaꞌa be ta ndee wa. Leꞌa naꞌ gáp ndoꞌ bega lakka ndápka naꞌ wa, leꞌa bexa ndun be ta li nak wa naꞌanpa ilayaꞌ sa nibeꞌe Dios.
GAL 5:22 Parea tal ton uxobgek ndoꞌ Espíritu ten Dios, leꞌa xa wa nkweaꞌ ladna be men, no nten ladna xa, no wen ncho xa lat be men, no nxik xa tal be men xela ndanno xa, no ndakno xa stubga men, no wen ndun xa ndoꞌ be men, no naꞌanpa ukwiꞌin nak xa,
GAL 5:23 no bchaꞌan nak xa, no nsensaꞌab xa xa ndoꞌ ta ugap. Leꞌa ndoꞌ itea be ta ndee wa naꞌanpa nibeꞌe ni dub ley.
GAL 5:24 Ná leꞌa beuna nak xmen Cristo yá mlaꞌa beuna be ta ugap ngok beuna nsea be ta mlad beuna. Leꞌa ta wa cuent mkeꞌa beuna be ta ugap wa ndoꞌ cruz.
GAL 5:25 Leꞌa Espíritu ten Dios msaꞌa gealnaban ndoꞌ beuna, ta weꞌe leꞌa beuna nsabndoꞌ ikesea lak nlad Espíritu wa.
GAL 5:26 Lá gak beuna zhin, no lá gun beuna dub taꞌa gakloo stub xa, no naꞌanpa gaklono beuna stub xa ndap taꞌa.
GAL 6:1 Bega nak beuna xmen Cristo, tal ncho dub bega ndaꞌigaꞌa ndun dub ta ugap, leꞌa bego na nxobgek ndoꞌ Espíritu wa nsabndoꞌ gakno xa yach xa wats Dios, parea utsintsa gokno bega xa. No blaꞌach bega leꞌaka bega ndontsa naꞌanpa no bega gailaꞌ ndoꞌ ta ugap wa.
GAL 6:2 Gokno bega be ltsaꞌa bega zha na kweaꞌ nsatid bexa, leꞌa ta wa ta nibeꞌe Cristo.
GAL 6:3 Leꞌa tal ton ndanbeꞌe leꞌa mas nsak, ná xa naꞌanpa xa nsak, leꞌa xa nkwiꞌinno leꞌaka leꞌa na.
GAL 6:4 Leꞌa kadga dub bega nsabndoꞌ iwiꞌi ná xteꞌe nak ta ndunka bega, weꞌe itenno ladna bega be ta wen ndun bega, naꞌanpa iwiꞌi bega ndoꞌ ta ndun be ltsaꞌa bega cha izhinna bega.
GAL 6:5 Leꞌa kadga dub men nsabndoꞌ ulaꞌach leꞌaka ta ndun xa.
GAL 6:6 Leꞌa tal ton ntsid diꞌizh ten Dios nsabndoꞌ gakno bexa na nluu‑yá.
GAL 6:7 Utsin binbeꞌe bega leꞌa naꞌan ton gun gan ukwiꞌinno Dios. Leꞌa ta na ndas dub men ta weꞌekaga nteleꞌe xa.
GAL 6:8 Leꞌa bexa na ndun be ta ugap ta nladtsa xa, leꞌa xa wa iniꞌí dub gealkweaꞌ nunk lá idub. Ná leꞌa bexa na nxobgek ndoꞌ Espíritu ten Dios, leꞌa Espíritu wa usaꞌa dub gealnaban nunk lá idub ndoꞌ bexa wa.
GAL 6:9 Lá izhanna bega gun bega ta wen, leꞌa tal beuna lá gach ladna leꞌa gal zha leꞌa beuna ikaꞌa dub ta usaꞌa Dios, lak nkanleꞌe dub men ta ngos leꞌaka xa.
GAL 6:10 Ta weꞌe leꞌa itea be ta utsin syoꞌo gan gunno beuna stub men, leꞌa beuna li nsabndoꞌ gun; parea mas nsabndoꞌ gakno beuna be ltsaꞌa na nak beuna xmen Cristo.
GAL 6:11 Bwiꞌi bega xteꞌeta be letr ubiꞌi ndee nkeꞌa naꞌ‑yá yaꞌa naꞌ ndoꞌ git ndee.
GAL 6:12 Leꞌa bexa na nlad wen yaꞌan ndoꞌ be men wa ndab leꞌa bega nsabndoꞌ yoo beꞌe. Leꞌa bexa uniꞌí leꞌa tal uluꞌu bexa leꞌa Cristo ngut ndoꞌ cruz ndontsa yuꞌu ke ten be men, leꞌa bexa judio ugap gunno bexa.
GAL 6:13 Leꞌaka bexa li nyoꞌo beꞌe wa naꞌanpa ndun itea ta ndab ley ten Moisés. Parea nlad bexa no bega yoo beꞌe, ndontsa izhinna bexa ndoꞌ men leꞌa bega noka uyoꞌo beꞌe.
GAL 6:14 Ná leꞌa naꞌ ndee naꞌanpa izhinnona ta ndun naꞌ. Dubtsa taꞌa nzhinnona naꞌ, leꞌa ta wa ta ngut Jesucristo Xa Nibeꞌe wa ndoꞌ cruz sakndoꞌ beuna. Leꞌa cuent ten naꞌ leꞌa be ta gizhliyo yá naꞌanta xtiꞌin, no cuent ten be men gizhliyo leꞌa ta ndun naꞌ ndee wa ta naꞌan xtiꞌin.
GAL 6:15 Leꞌa beuna nak xmen Cristo Jesús, tal leꞌa beuna yoo beꞌe natal naꞌan, leꞌa ta wa naꞌanpa leꞌa nsakbe. Leꞌa ta nsak wa ta na ndap beuna dub gealnaban kub ndoꞌ Dios.
GAL 6:16 Leꞌa itea bexa na ndun lak nkeꞌa naꞌ ndoꞌ git ndee, leꞌa xa wa ta ugeaka nak xmen Dios. Leꞌa Dios ndun wen yoo ladna bexa nsea nkweaꞌ ladna Dios bexa.
GAL 6:17 Leꞌa nat idub ndoꞌ ndee, yá naꞌantapa gun bega ta lá isak lad naꞌ, geal leꞌa naꞌ noꞌo be ngip las naꞌ, ta na nluu leꞌa naꞌ ndun tiꞌin ten Jesús Xa Nibeꞌe.
GAL 6:18 Bego nak beuna xmen Cristo, naꞌab naꞌ ndoꞌ Jesucristo Xa Nibeꞌe wa leꞌa xa mas uzheꞌeb utsin gunno bega. Lika gak‑a.
EPH 1:1 Leꞌa naꞌ ndee Pabl, xa mtuꞌub Dios gun naꞌ tiꞌin ten Jesucristo. Nkeꞌa naꞌ git ndee ndoꞌ bego ndencho Éfeso baꞌ, bego umbiꞌi nak ladoꞌo na ndoꞌ Dios, no ngeꞌka ladna bega Cristo Jesús.
EPH 1:2 Naꞌab naꞌ ndoꞌ Tad Dios no ndoꞌ Jesucristo Xwan beuna utsin gak bexa ndoꞌ bega no gun bexa wen yoo ladna bega.
EPH 1:3 Usaꞌa beuna xno ndoꞌ Dios Xus Jesucristo Xwan beuna, leꞌa xa uzhebpa ndakno beuna, nsaꞌa xa be ta wen ten xa ta ncho gibeꞌa, ta na nak beuna xmen Cristo.
EPH 1:4 Leꞌa zha biseata gakndeꞌe gizhliyo leꞌa Dios mti beuna, ndontsa umbiꞌi gak beuna ndoꞌ Dios, ni dub ke lá gap beuna.
EPH 1:5 Leꞌa ta na nkweaꞌ ladna Dios beuna, ta weꞌe mbinbeꞌe xa mtuꞌub xa Jesucristo ndontsa yak beuna xin xa. Leꞌa ta wa ta mbin Dios tiemp polta lak nsak ladna xa‑yá.
EPH 1:6 Ta weꞌe gab beuna leꞌa Dios uzheꞌeb dub xa wen, leꞌa xa uzheꞌeb wen ndanno beuna nak xmen Cristo, xa na leꞌa Dios nkweaꞌ ladna.
EPH 1:7 Leꞌa Jesucristo uloꞌo beuna ndoꞌ ta ugap, cha mtsuꞌu xa be ke ten beuna juers ten ta mtsiꞌi xa ten, gor na ngut xa ndoꞌ cruz. ¡Leꞌa ta wa dub ta uzhebpa wen mbinno Dios beuna!
EPH 1:8 No uzhebpa msaꞌa Dios ta ndák beuna no ta nyakbeꞌena beuna lak nak xa.
EPH 1:9 No msaꞌa xa ta ngondoꞌ beuna dub ta ugaꞌach, ta mbinbeꞌe xa gun xa juers ten Jesucristo.
EPH 1:10 Leꞌa ta wa ta gun Dios zha nsabndoꞌka li gun xa. Gal zha wa leꞌa Dios yunjunt itea be taꞌa ndoꞌ yaꞌa Cristo, lak be ta ncho gibeꞌa no be ta ncho ndoꞌ gizhliyo.
EPH 1:11 Leꞌa ta na nak beuna xmen Cristo, leꞌa Dios mti beuna ikaꞌa beuna ta ndab xa usaꞌa xa. Leꞌa ta wa ta mbinbeꞌe Dios, xa na ndun itea ta na naꞌ xa wenka nak.
EPH 1:12 Weꞌe leꞌa besa xa nak xa judio ngok besa xa ned mgeꞌ ladna Cristo, ndontsa gab besa leꞌa xa uzhebpa xa juert.
EPH 1:13 No liga leꞌa bego mbiꞌín diꞌizh gealngea ten Cristo, diꞌizh wen nsaꞌa gealnaban kub wa, cha mbingea ladna bega Cristo. Weꞌe leꞌa Dios cha msaꞌa Espíritu ten xa ndoꞌ bega, lakka ndab xa gun xa.
EPH 1:14 Leꞌa Espíritu wa dub sein, ta nluu leꞌa Dios saꞌaka ta ikaꞌa beuna, gal gor na mxaꞌakla Dios beuna ndoꞌ be ta ugap. Ta weꞌe nsabndoꞌ gab beuna leꞌa Dios uzheꞌeb dub xa wen nak.
EPH 1:15 Leꞌa naꞌ ndee mbín xteꞌe ngeꞌ ladna bega Jesús Xwan beuna no xteꞌe nkweaꞌ ladna bega itea be xmen Dios. Leꞌa ta na li wen ndun bega wa,
EPH 1:16 leꞌa naꞌ gab geꞌal nsa xno ndoꞌ Dios cuent ten bega, no naꞌab naꞌ ndoꞌ Dios gakno Dios bega.
EPH 1:17 Leꞌa Dios xa ndon leꞌa siꞌil nak, no nak xa Xus Jesucristo Xwan beuna. Ta weꞌe naꞌab naꞌ ndoꞌ xa gak bega dub xa ndák nsea dub xa nyakbeꞌena xteꞌe nak Dios.
EPH 1:18 No gun Dios yakbeꞌena bega ta na mti Dios bega ndontsa gal usoꞌ bega ta usaꞌa xa. Weꞌe cha iniꞌí bega be ta uzhebpa chul usaꞌa Dios gal usoꞌ beuna nak xmen xa.
EPH 1:19 No nlad naꞌ iniꞌí bega xteꞌe uzheꞌeb siꞌil nak juers ten Dios, ta na ndakno xa beuna ndangea ladna Cristo. Leꞌa ta wa leꞌaka juers ten Dios,
EPH 1:20 ta mxiste Cristo ndoꞌ gealgut, cha myatsob xa gibeꞌa wats Dios lad gaꞌal.
EPH 1:21 Mbin Dios leꞌa Cristo mas juert ndoꞌ iteanak bexa ndap juers tal espíritu‑yá natal men‑a, tal nibeꞌe bexa nat natal tlaw inibeꞌe bexa.
EPH 1:22 Leꞌa Dios leꞌa mte itea be taꞌa xan ndats Cristo inibeꞌe xa‑yá. No msoꞌ xa Cristo nibeꞌe xa ndoꞌ beuna nak xmen xa.
EPH 1:23 Leꞌa beuna nak xmen Cristo nak cuent yaꞌa xa nsea xoꞌo xa. Leꞌa lak uzheꞌeb nsaꞌa xa juers ndoꞌ beuna, leꞌa juers ten xa ncho itea lad ndoꞌ gizhliyo no gibeꞌa.
EPH 2:1 No ndoꞌ bego msaꞌa Dios gealnaban, zha bi nak bega cuent dub xa ngut, zha ndun bega ta ugap no ndap bega ke ndoꞌ Dios.
EPH 2:2 Leꞌa tiemp weꞌe leꞌa bega utesea ndoꞌ ta ugap lak ndesea be men ndoꞌ gizhliyo. Mbin bega lak nlad maxuꞌu, xa nibeꞌe ndoꞌ be mbi bxin no nkiꞌil xa be men lá uxobgek bexa ndoꞌ Dios.
EPH 2:3 Leꞌa polta leꞌa itea beuna li utesea, mbin beuna ta nladtsa beuna laktsa mbinbeꞌe beuna no laktsa ngol ladna beuna. Ta weꞌe leꞌa Dios ndiꞌizh utsaksi beuna lak ntsaksi xa itea be men ugap nak.
EPH 2:4 Ná leꞌa Dios uzhebpa mlats ladna beuna, no uzheꞌeb mkweaꞌ ladna xa beuna.
EPH 2:5 Ta weꞌe lak msaꞌa xa gealnaban ndoꞌ Cristo, leꞌa xa no ndoꞌ beuna msaꞌa‑yá, zha na bi nak beuna cuent dub xa ngut ndoꞌ Dios, ke ten be ta ugap ndun beuna. Leꞌa Dios nkweaꞌ ladna beuna, ta weꞌetsa li msaꞌa xa gealnaban ndoꞌ beuna.
EPH 2:6 No lak mxiste Dios Cristo, leꞌa xa no beuna mxiste, no msaꞌa xa sa isob beuna wats Cristo gibeꞌa.
EPH 2:7 Weꞌe uluu Dios gal tiemp ilen wa xteꞌe ta uzheꞌeb nkweaꞌ ladna xa beuna no xteꞌe ta wen nak xa ndoꞌ beuna nak xmen Cristo Jesús.
EPH 2:8 Leꞌa Dios uzheꞌeb nkweaꞌ ladna bega, ta weꞌe msaꞌa Dios gealnaban kub ndoꞌ bega gor na mgeꞌ ladna bega Cristo. Leꞌa ta wa naꞌanpa juers ten bega, leꞌa ta wa ndi ta ga msaꞌa Dios ndoꞌ bega.
EPH 2:9 Ta weꞌe naꞌanpa izhinnona bega ta wa, leꞌa‑yá naꞌanpa dub ta wen mbin bega.
EPH 2:10 Leꞌa Dios mbindeꞌe beuna no msaꞌa xa gealnaban kub ndoꞌ beuna nak xmen Cristo Jesús, ndontsa ikesea beuna ndoꞌ sbeꞌen be ta wen, lakka mbinbeꞌe Dios tiemp polta li gun beuna nat.
EPH 2:11 Leꞌa bego bexa naꞌanpa xa Israel, lá yalad bega leꞌa tiemp polta leꞌa bexa Israel mzhinna leꞌa bexa ncho beꞌe las bexa, ndab bexa leꞌa bega bexa naꞌanpa ncho beꞌe.
EPH 2:12 Leꞌa zha weꞌe leꞌa bega lá nchandoꞌ Cristo, no naꞌanpa nak bega xmen Dios lak nak bexa Israel. Ta weꞌe naꞌanpa ndiꞌizh ikaꞌa bega ta ndab Dios usaꞌa xa ndoꞌ be xmen xa. Leꞌa bega ncho ndoꞌ gizhliyo ndee, ná ni lá nkenkeaꞌ bega gakno Dios bega ni dub ta wen, no ni lá nchandoꞌ bega Dios.
EPH 2:13 Leꞌa polta leꞌa bega sit nak wats Dios, ná nat leꞌa bega dubtsa nak nsea Cristo Jesús no ubiila bega wats Dios ta na ngut Cristo ndoꞌ cruz, mtsiꞌi xa ten wa.
EPH 2:14 Leꞌa Cristo mbin gan leꞌa besa xa judio wen nchono bego xa naꞌanpa xa judio. Mbin xa gan leꞌa itea beuna dubtsa nak, cuent mlate xa dub muro ncho tlaw itop xkwaꞌa beuna wa.
EPH 2:15 Leꞌa xa mnitndoꞌ be ley ten bexa judio, be ta unibeꞌe Dios gun bexa wa, ndontsa dubtsa yak beuna nak be xmen xa, yá naꞌantapa gak beuna top xkwaꞌa men.
EPH 2:16 Leꞌa ta na ngut Cristo ndoꞌ cruz, leꞌa itea beuna dubtsa nak, no wen nyaꞌan beuna ndoꞌ Dios. Yá naꞌantapa gakloo dub xkwaꞌa men ndoꞌ stub xkwaꞌaga bexa.
EPH 2:17 Leꞌa Cristo mbiꞌid yadiꞌizh diꞌizh wen ná xteꞌe wen yaꞌan be men ndoꞌ Dios, leꞌa bego bexa sit nak wats Dios, no besa xa judio bexa gax nak wats Dios.
EPH 2:18 Leꞌa juers ten ta mbin Cristo wa leꞌa besa xa judio no bexa naꞌanpa xa judio ndap beuna dubtsa Espíritu ten Dios, no syoꞌo gan ibii beuna wats Tad Dios.
EPH 2:19 Nat leꞌa bega yá naꞌantapa sit nak wats Dios, no naꞌantapa nak bega dub xkwaꞌa men xaꞌaga. Nat leꞌa bega no nak xmen Dios, no xin Dios nak bega.
EPH 2:20 Leꞌa beuna nak be xmen Dios nak cuent dub niꞌi mbindeꞌe Dios. Leꞌa ta nak xan niꞌi wa, leꞌa ta wa bexa mtuꞌub Dios gun bexa tiꞌin ten xa no bexa mbidiꞌizh sakndoꞌ Dios. Leꞌa Jesucristo leꞌa nak geꞌ ned nbexan xan niꞌi wa.
EPH 2:21 Lak leꞌa dub geꞌ ned wa ndun masis nak idub niꞌi, no liga leꞌa Jesucristo ndun leꞌa be xmen xa dubtsa nak no nsayak kwaꞌad bexa, gak bexa cuent dub niꞌi umbiꞌi ten Dios.
EPH 2:22 Nat leꞌa bega no dubtsa nak nsea itea be xmen xa, nak beuna cuent dub niꞌi sa ncho Espíritu ten Dios.
EPH 3:1 Ta weꞌe leꞌa naꞌ Pabl nkea litgiꞌib ndee ta na ndadiꞌizh naꞌ diꞌizh wen ten Cristo Jesús ndoꞌ bego, bexa naꞌanpa xa judio.
EPH 3:2 Leꞌa naꞌ uní leꞌa bega mbiꞌínla xteꞌe msaꞌa Dios tiꞌin ndun naꞌ ndee ta gakno naꞌ bega.
EPH 3:3 Leꞌa Dios mluu ndoꞌ naꞌ dub ta ugaꞌach ten xa, lak mkeꞌala naꞌ ndido ta wa ndoꞌ bega.
EPH 3:4 Leꞌa tal bega goꞌol ta wa, weꞌe yakbeꞌena bega plo nchandoꞌ naꞌ ta ugaꞌach ten Cristo wa.
EPH 3:5 Leꞌa polta leꞌa Dios naꞌanpa uluu ta ugaꞌach wa ndoꞌ ni dub men, ná leꞌa nat leꞌa Espíritu ten Dios nluu‑yá ndoꞌ be apostol no ndoꞌ be profet.
EPH 3:6 Leꞌa ta ndee ta ugaꞌach wa: leꞌa bexa naꞌanpa xa judio no gal usoꞌ be ta wen ndab Dios gal usoꞌka bexa judio, no dubtsa yak bexa nsea bexa judio, tal leꞌa bexa gungea ladna diꞌizh wen ten Cristo Jesús.
EPH 3:7 Leꞌa Dios utsin mbinno naꞌ, msaꞌa xa ta ndadiꞌizh naꞌ diꞌizh wen ten xa wa, no nsaꞌa xa juers li ndun naꞌ.
EPH 3:8 Leꞌa naꞌ ndee ndon leꞌa lá nsak lat itea be xmen Dios. Ná leꞌa Dios mti naꞌ gaa naꞌ ndoꞌ bexa naꞌanpa xa judio wa, gudiꞌizh naꞌ diꞌizh wen ná xteꞌe usaꞌa Cristo uzheꞌeb be ta wen ndoꞌ bexa, dub ta lá yoo gan yakbeꞌena beuna.
EPH 3:9 No ndab Dios gudiꞌizh naꞌ ndoꞌ itea be men xteꞌe ndun Dios ta ugaꞌach mbinbeꞌe xa wa. Leꞌa Dios xa mbindeꞌe iteanak be taꞌa, mbinbeꞌe ta wa gast zha utexanta gizhliyo.
EPH 3:10 Leꞌa Dios li mchealte iteanak be xmen xa, ndontsa iniꞌí be angel no be espíritu nibeꞌe wa leꞌa Dios uzhebpa ndák itea be taꞌa.
EPH 3:11 Li mbin Dios lak ulo ladna xa polta, ta na nat mbin Cristo Jesús Xwan beuna cumplir.
EPH 3:12 Leꞌa ta na ngeꞌ ladna beuna Cristo wa leꞌa beuna naꞌanpa izheb ibii beuna wats Dios, no uniꞌíka beuna leꞌa xa soꞌónka ta inab beuna ndoꞌ xa.
EPH 3:13 Ta weꞌe naꞌab naꞌ ndoꞌ bega lá gach ladna bega maska nsatiꞌid naꞌ be gealkweaꞌ ndee ke na ndadiꞌizh naꞌ diꞌizh ten Cristo ndoꞌ bega. Ndi bten ladna bega leꞌa ta na nsatiꞌid naꞌ wa ta gaknoka bega.
EPH 3:14 Leꞌa ke ten iteanak be ta wen nsaꞌa Dios wa, leꞌa naꞌ nsaxib ndoꞌ Dios Xus Jesucristo Xwan beuna,
EPH 3:15 xa leꞌa nak Xus iteanak xkwaꞌa be men, bexa ncho gibeꞌa no bexa ncho ndoꞌ gizhliyo ndee.
EPH 3:16 Naꞌab naꞌ ndoꞌ Dios leꞌa Espíritu ten xa gun juert gak ladoꞌo bega, lak nsaꞌa xa sian be ta uzhebpa wen ndoꞌ be xmen xa.
EPH 3:17 Weꞌe leꞌa Cristo yoo len ladoꞌo bego na ngeꞌ ladna xa, no ndoꞌ itea be ta ndun bega ikweaꞌ ladna bega be ltsaꞌa bega nsea yankea bega Dios.
EPH 3:18 No yakbeꞌena itea bega nak beuna xmen Cristo baꞌ ná plo uxen no koꞌol no wat no gaꞌap nak ta uzheꞌeb nkweaꞌ ladna Cristo beuna.
EPH 3:19 Leꞌa naꞌan ton yoo gan yakbeꞌena idub ta na nkweaꞌ ladna Cristo beuna. Ná leꞌa naꞌ naꞌab ndoꞌ Dios leꞌa bega mas igondoꞌ ta wa ndontsa gak bega lak nak Dios.
EPH 3:20 Leꞌa Dios ndap juers gun xa itea be taꞌa mas uzheꞌeb ndoꞌ lak inab beuna ndoꞌ xa no lak yakbeꞌena beuna. Leꞌa juers ten Dios wa leꞌaka juers ncho len ladoꞌo beuna.
EPH 3:21 ¡Idub tiemp gab beuna leꞌa Dios uzheꞌeb dub Dios siꞌil, geal ta wen ndun be xmen xa no Cristo Jesús! Lika nak‑a.
EPH 4:1 Leꞌa naꞌ nkea litgiꞌib ndee ke na ndun naꞌ tiꞌin ten Cristo. Nat ndáp naꞌ ndoꞌ bega utsin bin bega lak nsabndoꞌ‑yá, leꞌa Dios leꞌa mti bega.
EPH 4:2 Bchaꞌan gok bega no lá gunbeꞌe bega leꞌa bega mas nsak ndoꞌ be ltsaꞌa bega. Bxik bega ndoꞌ bexa, ta na nkweaꞌ ladna bega bexa.
EPH 4:3 Leꞌa Espíritu ten Dios myunno bega dubtsa xkwaꞌa be men. Ta weꞌe utsin gak bega ndoꞌ be ltsaꞌa bega, ndontsa naꞌanpa iteltsaꞌa bega.
EPH 4:4 Leꞌa beuna nak xmen Cristo dubtsa nak beuna, no dubtsa Espíritu ncho ladoꞌo beuna, no dubtsa mti Dios beuna nkenkeaꞌ beuna gal usoꞌ beuna ta usaꞌa Dios.
EPH 4:5 No dubtsa xa nak Xwan beuna, nsea dubtsa xa ngeꞌ ladna beuna, nsea dubtsa ntaleaꞌ beuna ta na nak beuna xmen Cristo.
EPH 4:6 No dubtsa Dios Xus itea beuna, xa na leꞌa nibeꞌe itea beuna, no nsoꞌ xa wats itea beuna, no ncho xa len ladoꞌo itea beuna.
EPH 4:7 Ná leꞌa lak nlad Cristo leꞌa xa msaꞌa juers ndoꞌ kadga dub beuna gun beuna dub tiꞌin ten xa.
EPH 4:8 Leꞌa diꞌizh ten Dios nkeaniꞌi ndab: Leꞌa gor na mkea xa gaꞌap, leꞌa xa mbiꞌi bexa na mbin xa gan ndoꞌ na. No msaꞌa xa be ta wen ndoꞌ be men.
EPH 4:9 Leꞌa ta na ndab “mkea xa gaꞌap” wa, ¿lid gab ta wa zha leꞌa xa ned ulaꞌ sa mas wat ndoꞌ gizhliyo?
EPH 4:10 Leꞌa Cristo xa na ulaꞌ ndoꞌ gizhliyo wa leꞌaka xa mkea sa mas gaꞌap ndoꞌ gibeꞌa baꞌ, ndontsa yoo xa itea lad guniꞌi pa‑yá.
EPH 4:11 Leꞌa Cristo leꞌaka msaꞌa juers ndoꞌ pla bexa gak apostol gun tiꞌin ten xa, no pla bexa gudiꞌizh sakndoꞌ Dios, no pla bexa gudiꞌizh diꞌizh wen ten Cristo, no pla bexa gak pastor yansu be xmen xa, no stapla bexa gak mech uluu diꞌizh ten xa.
EPH 4:12 Ta weꞌe nsuꞌu beuna gun beuna tiꞌin ten xa, ta ndakno beuna be ltsaꞌa beuna nak xmen Cristo,
EPH 4:13 gast gal zha na dubtsa igeꞌ ladna beuna Cristo no dubtsa igondoꞌ beuna Xin Dios. Leꞌa zha wa leꞌa beuna gaꞌal gak ndoꞌ Dios, lakta nak Cristo.
EPH 4:14 Leꞌa beuna yá lá gakta lak nak dub meꞌed ndanbeꞌe dub taꞌa cha tsoꞌo wa stubga taꞌa. Naꞌanpa ulaꞌa beuna ukwiꞌinno be men beuna, bexa ndadiꞌizh cuent uzheꞌeb ta wen, parea leꞌa ta wa naꞌanpa leꞌa nak.
EPH 4:15 Ndi sbeꞌen gealngea gudiꞌizh beuna no ikweaꞌ ladna beuna be ltsaꞌa beuna, ndontsa mas isayak beuna lak nak Cristo, xa nibeꞌe ten iteanak beuna nak xmen xa.
EPH 4:16 Leꞌa Cristo ndun leꞌa iteanak be xmen xa dubtsa nak, no ndakno xa gun beuna tiꞌin lak nsabndoꞌ gun kadga dub beuna, ndontsa juert gak beuna no mas ikweaꞌ ladna beuna be ltsaꞌa beuna.
EPH 4:17 Leꞌa ta ndee ndáp naꞌ no nibeꞌe naꞌ ndoꞌ bega sakndoꞌ Cristo: yá lá gakta bega lak nak be men lá nchandoꞌ Dios, leꞌa bexa ndesea ndoꞌ be ta naꞌan xtiꞌin laktsa ndanbeꞌe bexa.
EPH 4:18 Lá nyakbeꞌena bexa xteꞌe nak Dios no ngud nak ladoꞌo bexa. Ta weꞌe sit nak bexa wats Dios, leꞌa bexa lá iniꞌí ti ndencho bexa ndoꞌ be ta ugap.
EPH 4:19 Leꞌa bexa wa yá lá ndonota ladna be ta ugap ndun xa. Ndi ndun bexa sbeꞌen ta ugap ta ndaltsa ladna bexa, no nkwaꞌan bexa mas sianta be ta bzhiꞌik li gun bexa.
EPH 4:20 Ná leꞌa bexa na mluu diꞌizh ten Cristo ndoꞌ bega wa naꞌanpa ngab li gak bega.
EPH 4:21 Leꞌa naꞌ uní leꞌa bega mbiꞌínla diꞌizh ten Cristo no nchandoꞌla bega gealngea ten Jesús.
EPH 4:22 Ta weꞌe lá gakta bega be ta ngok bega polta, zha biseata yak bega xmen Cristo. Yá lá gunta bega laktsa nlad bega, ta nsak bega ta wen ná leꞌa ta wa ndi ta ugap.
EPH 4:23 Ndi blaꞌa bega ucheꞌa Espíritu ten Dios ta ncho ladoꞌo bega no ta ndanbeꞌe bega.
EPH 4:24 Cha gok bega cuent dub men kub lak nlad Dios gak bega: umbiꞌi gak ladoꞌo bega no gaꞌal gak bega ndoꞌ Dios lak ndab gealngea ten Dios.
EPH 4:25 Ta weꞌe blaꞌa bega be gealkwiꞌin, ndi bidiꞌizh bega sbeꞌen ta ugea ndoꞌ be ltsaꞌa bega, geal leꞌa itea beuna dubtsa xkwaꞌa men nak.
EPH 4:26 Tal leꞌa bega gakloo ndoꞌ dub men, naꞌanpa gunno bega xa dub ta lid leꞌa nak. Ndi byalad bega ta ndakloo bega wa bi leꞌa wizh wa,
EPH 4:27 ndontsa lá ulaꞌa bega utsabgix maxuꞌu bega.
EPH 4:28 Tal ncho bega ndun gealwaꞌan, yá lá gunta bega ta wa. Ndi utsin bin bega tiꞌin lak nsabndoꞌ‑yá, natsa gap bega ta usaꞌa bega ndoꞌ bexa nkiꞌin‑a.
EPH 4:29 Ni dub ta usalad lá gudiꞌizh bega. Ndi sbeꞌen ta utsin bidiꞌizh bega, ta na sakno xa na goꞌón‑a.
EPH 4:30 Lá gun bega ta ndun uban yoo ladna Espíritu ten Dios. Leꞌa Espíritu wa cuent dub sein, ta nluu leꞌa beuna xinka Dios, no gal wizh koꞌo xa beuna ndoꞌ be ta ugap.
EPH 4:31 Blaꞌa bega ta nxee ladna bega, no ta ndakloo bega, no ta ugiꞌigeꞌa bega, no ta ugiꞌi níꞌi bega, no ta nisi bega be men, nsea iteata be ta ugap.
EPH 4:32 Ndi utsin gok bega ndoꞌ be ltsaꞌa bega, no bkweaꞌ ladna bega bexa, no bingeꞌ ladna bega ndoꞌ bexa, lak ndangeꞌ ladna Dios ndoꞌ bego nak xmen Cristo.
EPH 5:1 Leꞌa bega xin Dios no nkweaꞌ ladna xa bega. Ta weꞌe bin bega juers gak bega lak nak Dios.
EPH 5:2 Ndoꞌ itea be ta ndun bega bkweaꞌ ladna bega be men, lak nkweaꞌ ladna Cristo beuna no msaꞌa xa leꞌaka leꞌa xa ngut sakndoꞌ beuna, cuent dub xnab uzhebpa nsak ladna Dios.
EPH 5:3 Leꞌa bega nak be men umbiꞌi ten Dios, ta weꞌe ni dub be ta ndee lá nsabndoꞌ yoo lat bega: lá ugal bega dub xagots naꞌanpa xagots ten bega, no lá gun bega be ta ugap ltsaꞌa ta wa, no lá isaꞌab ladna bega be ta ndap stubga men.
EPH 5:4 No lá gudiꞌizh bega be ta ugap nak no be ta naꞌan xtiꞌin no be ta bzhiꞌik, leꞌa be ta wa naꞌanpa nsabndoꞌ. Mas utsin ndi bsaꞌa bega xno ndoꞌ Dios be ta ndun Dios.
EPH 5:5 Leꞌa bega uniꞌíka leꞌa bexa ngal dub xagots naꞌanpa xagots ten xa no bexa ndun be ta bzhiꞌik ltsaꞌa ta wa, leꞌa bexa wa naꞌanpa yate sa nibeꞌe Cristo no Dios. No bexa sbeꞌen nlad mas sian taꞌa gap lá yate sa nibeꞌe Dios, leꞌa xa wa lá ndankea Dios leꞌa xa ndi ndankea be ta ndap xa wa.
EPH 5:6 Lá ulaꞌa bega ukiꞌil stubga men bega gun bega be ta ugap wa, leꞌa Dios utsaksi bexa na lá nxobgek ndoꞌ xa.
EPH 5:7 Lá uchealtsaꞌa bega bexa li nak wa.
EPH 5:8 Leꞌa polta leꞌa bega ngok bexa ndesea cuent sa ukaw. Ná nat leꞌa bega ndi ndesea ndoꞌ xeꞌa ten Dios, ta na nak bega xin Dios. Ta weꞌe gok bega lak nak dub xa nkesea ndoꞌ xeꞌa.
EPH 5:9 Leꞌa tal ton nkesea ndoꞌ xeꞌa ten Dios, leꞌa xa wa nkweaꞌ ladna be men, no utsin nak xa, no gealngea ndadiꞌizh xa.
EPH 5:10 Bin bega juers gun bega be ta isak ladna Dios.
EPH 5:11 No lá gun bega be ta naꞌan xtiꞌin lak ndun bexa nde sa ukaw. Ndi gud bega ndoꞌ bexa leꞌa ta ndun bexa wa naꞌanpa leꞌa nak,
EPH 5:12 leꞌa be ta xgaꞌach ndun bexa wa dub ta udalad gudiꞌizh beuna.
EPH 5:13 Ná leꞌa sa ncho xeꞌa leꞌa itea be ta ugap ndun bexa wa cha nluu, leꞌa ndoꞌ xeꞌa ten Dios nluu iteanak be taꞌa.
EPH 5:14 Ta weꞌe lndeꞌe ndab be men: Utsin binbeꞌe, lu nak cuent dub xa naxyats. No lá gakta lu cuent dub xa ngut, leꞌa Cristo usaꞌa xeꞌa ten na ndoꞌ lu.
EPH 5:15 Ta weꞌe uzhebpa blaꞌach bega xteꞌe gak bega. Lá gak bega lak dub xa lá nsakyoꞌón diꞌizh, ndi gok bega dub xa utsin ndanbeꞌe.
EPH 5:16 Itea gor sbeꞌen ta wen gun bega, leꞌa tiemp ndee uzhebpa ugap nak be men.
EPH 5:17 No lá gak bega dub xa lá nsakyoꞌón, ndi bkwaꞌan bega xteꞌe nlad Dios gun bega.
EPH 5:18 No lá gun bega gealgu, leꞌa ta wa goꞌo bega ndoꞌ sian ta lá nsabndoꞌ. Ndi blaꞌa bega leꞌa Espíritu ten Dios goꞌo bega ndoꞌ ta wen.
EPH 5:19 Leꞌa gor na nyakjunt bega no be ltsaꞌa bega, idub ncho ladna bega biltoꞌo bega be salmo no be himno no be cant ndoꞌ Dios.
EPH 5:20 No bsaꞌa bega xno ndoꞌ Tad Dios guniꞌi xtaꞌan nsatid bega, ta na nak beuna xmen Jesucristo Xwan beuna.
EPH 5:21 Lak ndap bega mod ndoꞌ Dios, liga gop bega mod ndoꞌ be ltsaꞌa bega.
EPH 5:22 Leꞌa bego be xagots nsabndoꞌ uxobgek ndoꞌ xabgiꞌi ten bega, lak nxobgek bega ndoꞌ Cristo.
EPH 5:23 Leꞌa be xabgiꞌi nak xa nibeꞌe ndoꞌ xagots ten na lak nibeꞌe Cristo ndoꞌ be xmen na, no ngoꞌo Cristo bexa ndoꞌ be ke ten bexa.
EPH 5:24 Ta weꞌe lak nxobgek be xmen Cristo ndoꞌ xa, no liga nsabndoꞌ uxobgek be xagots ndoꞌ xabgiꞌi ten xa.
EPH 5:25 Leꞌa bego be xabgiꞌi, nsabndoꞌ ikweaꞌ ladna bega xagots ten bega, lak uzheꞌeb nkweaꞌ ladna Cristo beuna nak xmen xa, gast msaꞌa xa leꞌaka leꞌa xa ngut xa sakndoꞌ beuna.
EPH 5:26 Li mbin Cristo ndontsa utsambiꞌi xa ladoꞌo beuna nsea diꞌizh ten xa, lak nsat men dub taꞌa no nits.
EPH 5:27 Weꞌe gal gor kwe beuna ndoꞌ Cristo, leꞌa beuna uzhebpa chul no umbiꞌi nak ndoꞌ Dios, ni lá ndap beuna ni dub ke no ni dub taꞌa lá utsin nak, cuent dub lad umbiꞌi ndon lan nak, no ni dub mek naꞌan las‑a.
EPH 5:28 No liga leꞌa bego xabgiꞌi, lak nkweaꞌ ladna bega leꞌaka leꞌa bega, no liga bkweaꞌ ladna bega xagots ten bega. Leꞌa tal ton ikweaꞌ ladna xagots ten na wa, leꞌa xa wa noga ikweaꞌ ladna leꞌaka leꞌa xa.
EPH 5:29 Leꞌa naꞌan ton nxeeno ladna leꞌaka leꞌa na. Leꞌa xa ndi wen nlaꞌach leꞌaka leꞌa xa no nkeno xa leꞌaka xa, lak nlaꞌach Cristo be xmen xa,
EPH 5:30 geal leꞌa itea beuna dubtsa nak nsea Cristo, cuent nak beꞌal las xa no tit ten xa.
EPH 5:31 Lak nkeaniꞌi diꞌizh ten Dios, ndab‑a: “Ta weꞌe ulaꞌa xabgiꞌi xus na nsea xnaꞌa xa, cha ikaꞌa xa xagots ten xa. Leꞌa cuent ten Dios leꞌa itop xa wa yak dubtsa men.”
EPH 5:32 Leꞌa ta nkeaniꞌi wa bid nyakbeꞌena beuna, parea leꞌa naꞌ ndáp ta ndee cuent ten Cristo nsea iteanak beuna nak xmen xa.
EPH 5:33 Ná leꞌa ta wa no gab leꞌa be xabgiꞌi nsabndoꞌ ikweaꞌ ladna xagots ten na lakkata leꞌaka xa, no be xagots nsabndoꞌ gap mod ndoꞌ xabgiꞌi ten na.
EPH 6:1 Nat leꞌa bego be meꞌed no bexa ben, bxobgek bega ndoꞌ xus bega nsea ndoꞌ xnaꞌa bega ta na nak bega xmen Cristo.
EPH 6:2 Leꞌa lat itea be taꞌa unibeꞌe Dios, leꞌa ta ndee ta ned ndab Dios wen gunno xa bexa na li gun wa, ndab‑a wankea bega xus bega nsea xnaꞌa bega,
EPH 6:3 ndontsa wen yoo bega no sian liꞌin iban bega ndoꞌ gizhliyo ndee.
EPH 6:4 Leꞌa bego ndap xin na, lá gun bega ta gakloo bexa ndoꞌ bega. Ndi utsin bingaꞌal bega bexa, no bluu bega bexa, no btenxeꞌa bega bexa lak nlad Cristo Xwan beuna gak bexa.
EPH 6:5 Leꞌa bego na ndun tiꞌin ten stubga men, bxobgek bega ndoꞌ xwan tiꞌin wa, lak nxobgek bega ndoꞌ Cristo. No gop bega mod ndoꞌ bexa idub ncho ladna bega.
EPH 6:6 Utsin bin bega tiꞌin ten xa idub tiemp, naꞌanpa nabtsa gor nsoꞌwiꞌi xa lak ndun bexa nlad wen yaꞌan xa ndoꞌ be mentsa. Ndi bin bega tiꞌin ndoꞌ xa idub juers ten bega lak nlad Dios, cuent dub gor ndun bega tiꞌin ndoꞌ Cristo.
EPH 6:7 Bin bega tiꞌin ndoꞌ bexa wa idub ncho ladna bega, cuent ndoꞌ Cristo naꞌanpa ndoꞌ men wa‑yá.
EPH 6:8 Leꞌa bega uniꞌí leꞌa Cristo kix ta wen ndun itea be men, guniꞌi tal xa ndun tiꞌin ten stubga men natal naꞌan.
EPH 6:9 Leꞌa bego na ndap xa ndun tiꞌin ten bega, no liga utsin gok bega ndoꞌ bexa wa. Lá gun bega ta izheb bexa ndoꞌ bega, geal leꞌa bega uniꞌíka leꞌa dubtsa xa nibeꞌe ndoꞌ bego no ndoꞌ bexa wa, leꞌa ta wa Cristo xa nsob gibeꞌa. Leꞌa xa wa naꞌanpa nti be men.
EPH 6:10 Bego nak beuna xmen Cristo, nat bkwaꞌan bega ta gun juert gak ladoꞌo bega, ta usaꞌa Dios ikaꞌa beuna nak xmen xa.
EPH 6:11 Bintiꞌin bega itea be ta nsaꞌa Dios utsakndoꞌ bega, ndontsa gaꞌal kwe bega ndoꞌ be ta nlad maxuꞌu ukwiꞌinno bega.
EPH 6:12 Leꞌa beuna naꞌanpa ndeyono be men, leꞌa beuna ndi ndeyono be mbi bxin nibeꞌe. Leꞌa ta wa be mbi bxin nibeꞌe ndoꞌ gizhliyo ukaw ndee, no be mbi bxin ndesea ndoꞌ mbi.
EPH 6:13 Ta weꞌe bintiꞌin bega itea be ta nsaꞌa Dios utsakndoꞌ bega, ndontsa gun bega gan zha na ilen be ta ugap. Weꞌe gor utidla itea be ta ugap wa, leꞌa bega dubtsa nsoꞌ.
EPH 6:14 ¡Ta weꞌe dubtsa ute bega! Sbeꞌen gealngea bidiꞌizh bega, leꞌa ta wa cuent dub sinch ndantiꞌin dub soldad. No sbeꞌen utsin bin bega, leꞌa ta wa cuent dub bleꞌa giꞌib ntsaw dub soldad ladoꞌo na.
EPH 6:15 No bidiꞌizh bega diꞌizh wen ten Cristo ta ndun wen yaꞌan be men ndoꞌ Dios, leꞌa ta wa cuent nkeꞌa dub soldad ndab na.
EPH 6:16 No mas bgeꞌ ladna bega Cristo, ndontsa lá ukedino maxuꞌu bega, lak dub bleꞌa giꞌib nsén dub soldad ntsaw ndoꞌ be flech nsob bealꞌ.
EPH 6:17 No btseꞌa ladna bega leꞌa Dios msaꞌa dub gealnaban kub ikaꞌa beuna, leꞌa ta wa cuent dub xo giꞌib ncho gek soldad. No bintiꞌin bega diꞌizh ten Dios, ta na msaꞌa Espíritu ten Dios, leꞌa ta wa cuent spad ten soldad.
EPH 6:18 Bidiꞌizhno tseꞌe bega Dios. No unab bega ndoꞌ Dios lak nluu Espíritu ten Dios bega. No list ute bega, no ni lá gach ladna bega, no unab bega gakno Dios itea bexa nak xmen Cristo.
EPH 6:19 No unab bega ndoꞌ Dios usaꞌa Dios be diꞌizh gudiꞌizh naꞌ, ndontsa naꞌanpa izheb naꞌ gudiꞌizh naꞌ be ta ugaꞌach ten Dios, leꞌa ta wa diꞌizh wen ten Cristo.
EPH 6:20 Leꞌa Dios mtuꞌub naꞌ gudiꞌizh naꞌ ta wa, no ke weꞌe nkea naꞌ litgiꞌib ndee. Unab bega ndoꞌ Dios gakno xa naꞌ gudiꞌizh naꞌ diꞌizh ten Dios lak nsabndoꞌ gudiꞌizh naꞌ‑yá, naꞌanpa izheb naꞌ ndoꞌ be men.
EPH 6:21 Leꞌa Tíquico amig ten naꞌ, xa no nak xmen Cristo no utsin ndun xa tiꞌin ten Dios, leꞌa xa wa gab ndoꞌ bega xteꞌe nchoꞌo naꞌ no xtaꞌan ndun naꞌ.
EPH 6:22 Leꞌa naꞌ ntuꞌub xa ndoꞌ bega, gudiꞌizh xa ná xteꞌe ncho besa no utenxeꞌa xa bega ndontsa naꞌanpa yuꞌ ladna bega.
EPH 6:23 Nat naꞌab naꞌ ndoꞌ Tad Dios no ndoꞌ Jesucristo Xwan beuna, gun bexa wen yoo ladna bega nak xmen Cristo. No usaꞌa xa juers mas ikweaꞌ ladna bega be ltsaꞌa bega, no mas igeꞌ ladna bega Cristo.
EPH 6:24 No mas uzheꞌeb utsin gunno Dios itea bexa na lá nlaꞌa ta na ndankea bexa Jesucristo Xwan beuna. Lika gak‑a.
PHI 1:1 Leꞌa naꞌ ndee Pabl no ltsaꞌa naꞌ Timoteo besa ndun tiꞌin ndoꞌ Jesucristo, nkeꞌa besa git ndee ndoꞌ bego na nchansu be xmen Cristo no ndoꞌ bego ndakno be xmen Cristo no ndoꞌ iteata bego nak xmen Cristo Jesús ndencho gezh Filipos baꞌ.
PHI 1:2 Naꞌab naꞌ ndoꞌ Tad Dios no ndoꞌ Jesucristo Xwan beuna utsin gak bexa ndoꞌ bega, no gun bexa wen yoo ladna bega.
PHI 1:3 Itea gor na ntseꞌa lad naꞌ bega, nsa naꞌ xno ndoꞌ Dios ten beuna por bega.
PHI 1:4 No gor na ndadiꞌizhno naꞌ Dios, leꞌa naꞌ nten ladna naꞌab naꞌ gakno Dios itea bega,
PHI 1:5 geal leꞌa bega no ndakno mas ngen diꞌizh wen ten Cristo, gast wizh ned mbingea ladna bega‑yá no gast nat.
PHI 1:6 No uníka naꞌ leꞌa Dios, xa na usaxan ndun ta wen len ladoꞌo bega, leꞌa xa wa mas ndunta ta wa gast wizh ilen Jesucristo.
PHI 1:7 Wenka li ndunbeꞌe naꞌ cuent ten bega, geal leꞌa naꞌ nkweaꞌ ladna bega. Leꞌa zha na nkea naꞌ litgiꞌib no zha na ndadiꞌizh naꞌ diꞌizh wen ten Cristo ndoꞌ be men, leꞌa bega dubtsa nak no naꞌ.
PHI 1:8 Leꞌa Dios uniꞌí leꞌa naꞌ uzheꞌeb nkweaꞌ ladna iteanak bega, lak nkweaꞌ ladna Jesucristo beuna.
PHI 1:9 Naꞌab naꞌ ndoꞌ Dios leꞌa Dios gun mas ikweaꞌ ladna bega be ltsaꞌa bega, no mas igondoꞌ bega Dios, no mas yakbeꞌena bega lak nak Dios.
PHI 1:10 Weꞌe iniꞌí bega xteꞌe uti bega be ta nlad Dios gun bega, no umbiꞌi gak ladoꞌo bega ndoꞌ Dios, no ni dub ke lá gap bega zha ilen Cristo.
PHI 1:11 No leꞌa Jesucristo gun wen gak bega, ndontsa utsin gudiꞌizh be men cuent ten Dios, gab bexa leꞌa Dios uzheꞌeb dub Dios wen.
PHI 1:12 Bega nak beuna xmen Cristo, leꞌa naꞌ nlad iniꞌí bega leꞌa be gealkweaꞌ ntiꞌid naꞌ, leꞌa ta wa ndun mas ngen diꞌizh wen ten Cristo,
PHI 1:13 gast itea bexa nlaꞌach sa ncho xa nibeꞌe wa no be men xaꞌaga uniꞌíka leꞌa naꞌ nkea litgiꞌib ndee ke na ndun naꞌ tiꞌin ten Cristo.
PHI 1:14 No ta na nkea naꞌ litgiꞌib leꞌa kwaꞌadpa be xmen Cristo ndencho sa ndee naꞌanpa nzheb gaꞌal ndadiꞌizh bexa gealngea ten Cristo ndoꞌ be men.
PHI 1:15 Ta ugeaka leꞌa ncho bexa zhin nak, nlad bexa isankea be men tsoꞌo bexa, ta weꞌe ndadiꞌizh bexa diꞌizh ten Cristo. Parea no ncho bexa idub nchoka ladna ndadiꞌizh‑a.
PHI 1:16 Leꞌa bexa na nlad mas isankea be men tsoꞌo bexa wa, nladtsa bexa mas kweaꞌ yoꞌo lad naꞌ ke ten ta li ndun bexa. Naꞌanpa ta ugea nlad bexa gungea ladna be men Cristo.
PHI 1:17 Ná leꞌa ncho bexa nkweaꞌ ladna naꞌ, ta weꞌe ndadiꞌizh bexa diꞌizh ten Cristo. Leꞌa bexa wa uniꞌí leꞌa Dios msoꞌ naꞌ gudiꞌizh naꞌ diꞌizh wen ten Cristo.
PHI 1:18 Guniꞌi xteꞌe ndadiꞌizh be men diꞌizh ten Cristo, tal idub ncho ladna bexa natal naꞌan, leꞌa diꞌizh wa igenka. Ta weꞌe nten lad naꞌ no mas iten lad naꞌ.
PHI 1:19 Leꞌa naꞌ uní leꞌa naꞌ itoꞌo ndoꞌ be gealkweaꞌ ndee, geal leꞌa bega li nab ndoꞌ Dios no ndakno Espíritu ten Jesucristo naꞌ.
PHI 1:20 No uníka naꞌ leꞌa naꞌ naꞌanpa idono lad naꞌ ta ndun naꞌ, ta weꞌe naꞌanpa nzheb naꞌ gun naꞌ lak nlad Dios, ndontsa guniꞌi tal nban naꞌ natal gat naꞌ leꞌa ta ndun naꞌ uluu leꞌa Jesucristo xa uzheꞌeb juert nak.
PHI 1:21 Leꞌa zha nban naꞌ leꞌa naꞌ ndun laktsa nlad Cristo. Ná tal naꞌ gat leꞌa naꞌ mas wen yoo ladna.
PHI 1:22 Parea ndalen nchoꞌo naꞌ ndoꞌ gizhliyo ndee, leꞌa naꞌ mas gun tiꞌin ten Cristo. Ta weꞌe leꞌa naꞌ lá iní xtaꞌan mas nlad naꞌ.
PHI 1:23 Uzhebpa ngan lad naꞌ ndoꞌ itop ta ndee: ncho zha nlad naꞌ gat naꞌ cha yoꞌo naꞌ wats Cristo, leꞌa ta wa mas uzhebpa wen cuent ten naꞌ.
PHI 1:24 Ná leꞌa cuent ten bego mas wen nchoꞌota naꞌ ndoꞌ gizhliyo ndee.
PHI 1:25 Leꞌa naꞌ uní leꞌa ta wa lika nak, ta weꞌe uní naꞌ leꞌa naꞌ bi yoꞌono bega, ndontsa gakno naꞌ bega mas iten ladna bega no mas igeꞌ ladna bega Cristo,
PHI 1:26 no mas usaꞌa bega xno ndoꞌ Cristo Jesús, zha na gal inaꞌ naꞌ bega stub biaj.
PHI 1:27 Guniꞌi xtaꞌan itid naꞌ, leꞌa bega nsabndoꞌ gun lak ndab diꞌizh wen ten Cristo. Weꞌe cha tal leꞌa naꞌ gal inaꞌ bega natal naꞌanpa gal naꞌ, leꞌa naꞌ iníka leꞌa bega dubtsa nak, ndun bega juers goꞌón be men diꞌizh ten Cristo.
PHI 1:28 No naꞌanpa izheb bega ndoꞌ be men ndakloo ndoꞌ bega ta na nak bega xmen Cristo. Leꞌa ta ndun bega wa uluu ndoꞌ bexa leꞌa bexa gak perdid, ná leꞌa bega gap gealnaban, lak nlad Dios gak‑a.
PHI 1:29 Leꞌa lak nlaꞌa Dios ngeꞌ ladna bega Cristo, no liga nlaꞌa xa ntid bega ndoꞌ be gealkweaꞌ ta na nak bega xmen Cristo.
PHI 1:30 Leꞌa bega nchaꞌtid gealkweaꞌ wa lak uniꞌí bega utiꞌid naꞌ‑yá polta, no lak ndoꞌón bega ndaltiꞌid naꞌ‑yá nat.
PHI 2:1 Leꞌa bego uniꞌíka leꞌa Cristo ndun juert nak ladoꞌo beuna, no nkweaꞌ ladna xa beuna ta nluꞌuzh xa beuna, no dubtsa Espíritu ten Dios ncho len ladoꞌo beuna, no nlats ladna Cristo beuna.
PHI 2:2 Ta weꞌe bin bega be ta gáp naꞌ ndee, ndontsa mas iten lad naꞌ: lá kuyono bega be ltsaꞌa bega, no bkweaꞌ ladna bega bexa, no dubtsa gok bega, no dubtsa binbeꞌe bega.
PHI 2:3 Naꞌanpa izhinna bega, no ni lá ukwaꞌan bega ta gab men leꞌa bega dub xa nsak. Ndi xetsa gok bega ndoꞌ be ltsaꞌa bega, no binno bega bexa cuent dub xa mas nsak.
PHI 2:4 Lá ukwaꞌan bega be ta nladtsa bega, ndi no bkwaꞌan bega xteꞌe gakno bega be ltsaꞌa bega.
PHI 2:5 Lndeꞌe binbeꞌe bega lak ndanbeꞌe Cristo Jesús:
PHI 2:6 Leꞌa Cristo leꞌa nak Dios, parea leꞌa xa ndi mlaꞌa ta juert nak xa, lak juert nak Dios.
PHI 2:7 Mlaꞌa xa itea ta ndap xa cha ngok xa dub men cuent dub xa ndun tiꞌin ndoꞌ stubga xa.
PHI 2:8 Leꞌa zha na ngok xa men, leꞌa xa naꞌanpa ngunta xa nsak, ndi mxobgek xa ndoꞌ Dios gast ngut xa, mbit be men xa ndoꞌ cruz.
PHI 2:9 Weꞌe leꞌa Dios msaꞌa sa nsob Cristo sa ndon leꞌa nsak. No mbinno Dios xa wa xa nibeꞌe ndoꞌ iteanak be men,
PHI 2:10 ndontsa leꞌa iteanak be men isaxib ndoꞌ Jesús, bexa ncho gibeꞌa, no bexa ncho ndoꞌ gizhliyo ndee, no bexa ncho len gizhliyo.
PHI 2:11 Leꞌa itea be men igondoꞌ leꞌa Jesucristo nakka xa nibeꞌe ndoꞌ itea be taꞌa. Gab bexa leꞌa Tad Dios uzhebpa dub Dios siꞌil.
PHI 2:12 Bega nak amig ten naꞌ, lak mxobgek bega ndoꞌ naꞌ zha na bi nchoꞌo naꞌ lat bega, no nxobgek bega nat naꞌantapa nchoꞌo naꞌ sa baꞌ, no liga bin bega ta wen, ta uluu leꞌa Dios uloꞌola bega ndoꞌ be ke ten bega, no uzhebpa gop bega mod ndoꞌ Dios.
PHI 2:13 Leꞌa juers ten Dios leꞌa bega nlad gun bega lak nsak ladna xa, no liga ndakno xa bega gun bega ta wa.
PHI 2:14 Ndoꞌ itea be ta ndun bega, naꞌanpa inisi bega be ltsaꞌa bega, no naꞌanpa kuyotoꞌo bega,
PHI 2:15 ndontsa naꞌan ton gab leꞌa bega ndap ke. Leꞌa bega ncho ndoꞌ gizhliyo ndee lat be men ugap, ná leꞌa bega nak xin Dios wa nsabndoꞌ umbiꞌi gak ndoꞌ Dios no gak bega cuent dub xeꞌa ndoꞌ gizhliyo ndee.
PHI 2:16 Gaꞌaltsa ute bega no diꞌizh ten Cristo ta nsaꞌa gealnaban, ndontsa gal zha ilen Cristo leꞌa naꞌ iten ladna, leꞌa tiꞌin mbin naꞌ lat bega wa ngoktiꞌinka.
PHI 2:17 Leꞌa ta na ngeꞌ ladna bega Dios no ndun bega tiꞌin ten Dios nak cuent dub xnab nsaꞌa bega ndoꞌ Dios. Tal leꞌa naꞌ gat leꞌa naꞌ no gak cuent dub xnab usa naꞌ ndoꞌ Dios, parea leꞌa naꞌ nten ladna lak nten ladna bega nat.
PHI 2:18 No liga leꞌa bego nsabndoꞌ iten ladna lak nten lad naꞌ.
PHI 2:19 Tal leꞌa Jesús Xwan beuna ulaꞌa, leꞌa naꞌ sken utuꞌub Timoteo ndoꞌ bega, ndontsa mas iten lad naꞌ gor ilen xa gab xa xteꞌe nde bega.
PHI 2:20 Leꞌa nabtsa Timoteo ndanbeꞌe lakkata naꞌ, leꞌa xa idub ncho ladna nyuꞌno ladna bega.
PHI 2:21 Leꞌa iteata be men nkwaꞌan xteꞌe wen yoo leꞌaka leꞌa xa, naꞌanpa nkwaꞌan bexa ta nsak ladna Cristo Jesús.
PHI 2:22 Ná leꞌa bega yá uniꞌíka xteꞌe wen ndun Timoteo leꞌa xa nak cuent dub xiꞌín naꞌ, dubtsa ndadiꞌizh besa diꞌizh wen ten Cristo.
PHI 2:23 Ta weꞌe nlad naꞌ utuꞌub naꞌ xa ndoꞌ bega, zha na inítsa naꞌ ná xteꞌe itiꞌid naꞌ ndoꞌ be ta ndee.
PHI 2:24 No ndangea lad naꞌ leꞌa Dios ulaꞌa leꞌa naꞌ sken gal inaꞌ bega.
PHI 2:25 No nsak naꞌ nsabndoꞌ utuꞌub naꞌ no Epafrodito ndoꞌ bega, leꞌaka xa mtuꞌub bego gakno naꞌ wa. Leꞌa xa wa no nak beuna xmen Cristo no ndunno xa naꞌ tiꞌin ten Cristo, lak ndun dub soldad tiꞌin ndoꞌ xa nibeꞌe xa.
PHI 2:26 Leꞌa xa wa uzhebpa nlad yaꞌinaꞌ iteanak bega, no uzheꞌeb nyuꞌ ladna xa geal leꞌa bega mbiꞌín leꞌa xa kweaꞌ usak.
PHI 2:27 Ta ugeaka leꞌa xa kweaꞌ usak gast yamer ngat xa, ná leꞌa Dios ngokno xa lá ulaꞌa Dios ngat xa. No li ngokno Dios naꞌ ndontsa naꞌanpa mas uban yolad naꞌ tal leꞌa xa ngat.
PHI 2:28 Ta weꞌe leꞌa naꞌ sken utuꞌub xa ndoꞌ bega, ndontsa zha iniꞌígal bega xa leꞌa bega iten ladna no naꞌantapa yuꞌno lad naꞌ bega.
PHI 2:29 Leꞌa gor ilanseaꞌ xa, bten ladna bega no utsin binno bega xa, leꞌa xa no nak beuna xmen Dios. Leꞌa bega nsabndoꞌ gap mod ndoꞌ bexa na ndun lak ndun xa wa.
PHI 2:30 Leꞌa xa uzheꞌeb ndun tiꞌin ten Cristo gast yamer ngat xa. Msaꞌa xa xa guniꞌi mas gat xa, ndontsa gakno xa naꞌ itea be ta lá yoo gan gakno bega naꞌ wa.
PHI 3:1 Nat leꞌa bega nak beuna xmen Cristo wa, bten ladna bega ta na nak bega xmen xa. Leꞌa naꞌ naꞌanpa neꞌe ladna nkeꞌa be ta ndee wa stub biaj, leꞌa‑yá dub ta gakno bega.
PHI 3:2 Gop bega cuent ndoꞌ bexa ndeseayun be ta ugap. Leꞌa bexa ndab leꞌa be xabgiꞌi nsabndoꞌ yoo beꞌe ndontsa uluu leꞌa bexa xmen Dios.
PHI 3:3 Ná leꞌa ta nluu leꞌa beuna xmen Dios, leꞌa ta wa ta na ndankea beuna Dios lak ndakno Espíritu ten Dios beuna, no nten ladna beuna nak beuna xmen Cristo Jesús, naꞌanpa ngeꞌ ladna beuna ta ndun beuna ndontsa wen yaꞌan beuna ndoꞌ Dios.
PHI 3:4 Parea ncho be ta ndun naꞌ ndee syoꞌoka gan igeꞌ lad naꞌ. Tal ncho ton ngeꞌ ladna be ta ndun xa, leꞌa naꞌ mas syoꞌo gan li gun.
PHI 3:5 Ulo bexa beꞌe naꞌ zha na nchoꞌo naꞌ xoꞌon wizh. No leꞌa naꞌ xa ras Israel. Leꞌa usan gox polta ten naꞌ Benjamín. Leꞌa naꞌ xa hebreo, xin bexa hebreo. No ngok naꞌ xa fariseo, bexa na mas ndankea be ley ten bexa judio.
PHI 3:6 Uzheꞌeb ngwankea naꞌ ley ten besa xa judio, gast uzheꞌeb mtsaksi naꞌ be xmen Jesús. No naꞌan ton gab leꞌa naꞌ lá uxobgek ndoꞌ ley ten besa xa judio wa.
PHI 3:7 Parea leꞌa be ta na lita mbinbeꞌe naꞌ uzhebpa ta nsak wa, nat uní naꞌ leꞌa be ta wa sbeꞌen ta naꞌan xtiꞌin nat leꞌa naꞌ ndangea ladna Cristo.
PHI 3:8 Leꞌa itea be ta wa, nat uní naꞌ leꞌa be ta wa ta naꞌanpa nsak. Leꞌa ta mas nsak wa, leꞌa ta wa ta nchandoꞌ naꞌ Cristo Jesús, xa nibeꞌe naꞌ. Nat mla naꞌ itea be ta cuent nak gix ngabi beuna wa, ndontsa igondoꞌ naꞌ Cristo,
PHI 3:9 no yoꞌono naꞌ xa. Yá naꞌantapa ndanbeꞌe naꞌ leꞌa naꞌ wen yaꞌan ndoꞌ Dios ke ten ta ngwankea naꞌ ley wa. Ndi uní naꞌ leꞌa naꞌ wen yaꞌan ndoꞌ Dios ta na ngeꞌ lad naꞌ Cristo, lak tal ton igeꞌ ladna Cristo wen yaꞌan xa ndoꞌ Dios.
PHI 3:10 Leꞌa naꞌ nlad igondoꞌ Cristo no gap naꞌ juers ten Dios ta na mxiste Cristo ndoꞌ gealgut, no uxik naꞌ ndoꞌ be gealkweaꞌ lak mxik xa ndoꞌ gealkweaꞌ, no gast gat naꞌ lak ngut xa.
PHI 3:11 No ndangea lad naꞌ leꞌa Dios ixiste naꞌ ndoꞌ gealgut.
PHI 3:12 Naꞌanpa gáp naꞌ leꞌa naꞌ ndapla itea be ta wa, leꞌa naꞌ naꞌanpa nakla lakkata nlad Dios. Ná leꞌa naꞌ ndun juers gast li gak naꞌ geal leꞌa Cristo Jesús mti naꞌ ndontsa li gun naꞌ.
PHI 3:13 Bego nak beuna xmen Cristo, naꞌanpa gáp naꞌ leꞌa naꞌ ndee ngol usoꞌla‑yá. Parea mla naꞌ be ta mbin naꞌ polta wa, cha ndi ndun naꞌ juers gal usoꞌ naꞌ ta ncho mas ndoꞌ ndee,
PHI 3:14 ndontsa gak naꞌ lakta nlad Dios gak naꞌ wa. Weꞌe leꞌa naꞌ cha gun gan ta usaꞌa Dios wa, ta na gal usoꞌ be men mti Dios, bexa nak xmen Cristo Jesús wa.
PHI 3:15 Leꞌa itea beuna na ngeꞌka ladna Dios, lbaꞌa nsabndoꞌ gunbeꞌe beuna. Tal ncho dub bega ndanbeꞌe ndi stubga mod, leꞌa Dios sluuka ta wa ndoꞌ bega.
PHI 3:16 Parea leꞌa iteanak beuna nsabndoꞌ gun ta uniꞌíla beuna leꞌa Dios nlad gun beuna.
PHI 3:17 Bega nak beuna xmen Cristo, bin bega lakka ndun naꞌ, no bwiꞌi bega leꞌa ncho bexa yá likaga ndun lak ndun besa.
PHI 3:18 Leꞌa naꞌ sianla biaj ndáp ta ndee, nat gast ndon naꞌ gáp naꞌ‑yá stub biaj, leꞌa kwaꞌad be men ndi nxee ladna ta ngut Cristo ndoꞌ cruz.
PHI 3:19 Leꞌa bexa li ndun wa gak perdid, leꞌa bexa wa ndanno be ta ndal ladna xa cuent dub dios ten xa. Leꞌa bexa wa nsabndoꞌ idono ladna ta ndun bexa wa, ná leꞌa bexa ndi nzhinnona ta wa. Ndanbeꞌe bexa sbeꞌen be ta gizhliyo ndee.
PHI 3:20 Ná leꞌa beuna nak men gibeꞌa, sa ilen Jesucristo Xwan beuna, xa nsaꞌa dub gealnaban kub ndoꞌ beuna.
PHI 3:21 Leꞌa xa wa ndap juers nibeꞌe xa ndoꞌ iteanak be ta ncho. Leꞌa juers weꞌe ucheꞌa xa cuerp uleꞌa nak ten beuna, yak‑a lak nak cuerp uzheꞌeb wen ten Jesús.
PHI 4:1 Bego nak beuna xmen Cristo, gaꞌaltsa kwe bega ndoꞌ Dios Xa Nibeꞌe, bego nak amig ten naꞌ. Leꞌa naꞌ nkweaꞌ ladna bega no uzhebpa nlad naꞌ gal inaꞌ naꞌ bega. No ntenno lad naꞌ bega, leꞌa ta na ngeꞌ ladna bega Dios wa nluu leꞌa naꞌ wen mbin ndoꞌ Dios.
PHI 4:2 Leꞌa naꞌ naꞌab ndoꞌ Evodia no ndoꞌ Síntique dubtsa gak bexa lak nsabndoꞌ gak beuna nak xmen Cristo.
PHI 4:3 No naꞌab naꞌ ndoꞌ lu xa wen ndunno naꞌ tiꞌin, gakno lu itop be xagots wa, leꞌa bexa wa ngokno naꞌ mbidiꞌizhbe diꞌizh wen ten Cristo, no Clemente nsea stapla bexa mbinno naꞌ tiꞌin. Leꞌa bexa wa nak puntla ndoꞌ libr ncho gibeꞌa sa nkea leaꞌ bexa ndap gealnaban ndoꞌ Dios.
PHI 4:4 Sbeꞌen bten ladna bega leꞌa bega xmen Cristo Jesús. Stub biaj ndáp naꞌ‑yá: ¡Bten ladna bega!
PHI 4:5 Utsin gok bega ndoꞌ be men, ndontsa iniꞌí be men xteꞌe nak bega. Leꞌa Cristo yamer ilengal.
PHI 4:6 Naꞌanpa yuꞌ ladna bega ni dub taꞌa yasea bega. Ndi bidiꞌizhno bega Dios no unab bega ndoꞌ Dios ta nkiꞌin bega, no bsaꞌa bega xno ndoꞌ xa.
PHI 4:7 Leꞌa Dios gun wen yoo ladna bega, dub ta mas siꞌil ndoꞌ lak nyakbeꞌena beuna. Weꞌe leꞌa bega naꞌanpa izheb, no ni lá yuꞌ ladna bega, ta na nak bega xmen Cristo Jesús.
PHI 4:8 Bego nak beuna xmen Cristo, lulttsa stub taꞌa gáp naꞌ ndoꞌ bega: Binbeꞌe bega itea ta ugea, no itea be taꞌa leꞌa nak, no itea ta gaꞌal nak, no itea ta umbiꞌi nak ndoꞌ Dios, no itea ta nsak ladna Dios, no itea ta nchoꞌob diꞌizh wen nak. Binbeꞌe bega be ta mas utsin nak wa, ta na mas ndab be men wen nak.
PHI 4:9 No binta bega be ta mluu naꞌ no be ta mbidiꞌizh naꞌ, be ta mbiꞌín bega, no be ta uniꞌí bega ndun naꞌ. Weꞌe leꞌa Dios xa na ndun wen nyoꞌo ladna beuna isoꞌ wats bega.
PHI 4:10 Leꞌa naꞌ uzhebpa nten ladna no nsa naꞌ xno ndoꞌ Cristo, geal leꞌa bega ndaknogal naꞌ nat. Leꞌa naꞌ uní leꞌa bega nlad ngakno naꞌ zha wa, ná leꞌa bega lá yoꞌo gan ngun ta wa.
PHI 4:11 Naꞌanpa li ngáp naꞌ geal leꞌa naꞌ nkiꞌinka be taꞌa, leꞌa naꞌ ngók ntenno lad naꞌ guniꞌi xtaꞌan ndap naꞌ.
PHI 4:12 Ncho zha naꞌan xtaꞌan ndap naꞌ no ncho zha sian taꞌa ndap naꞌ. Naꞌ ngók nten lad naꞌ guniꞌitsa xteꞌe nchoꞌo naꞌ, tal mzhea naꞌ natal ndanna naꞌ, no tal gap naꞌ sian taꞌa natal ni dub taꞌa lá gap naꞌ.
PHI 4:13 Leꞌa naꞌ gun gan ndoꞌ guniꞌi xtaꞌan itiꞌid naꞌ, leꞌa Cristo leꞌa nsaꞌa juers ndoꞌ naꞌ.
PHI 4:14 Ná leꞌa bega wen mbin ngokno bega naꞌ zha na utiꞌid naꞌ ndoꞌ be gealkweaꞌ wa.
PHI 4:15 Leꞌa bego xa gezh Filipos baꞌ uniꞌíka leꞌa zha ned mbidiꞌizh naꞌ diꞌizh wen ten Cristo ndoꞌ bega, cha mkaꞌan naꞌ región Macedonia baꞌ, ni stub xkwaꞌa be xmen Cristo lá ngakno naꞌ. Ndon nabtsa bego baꞌ ngokno naꞌ, msaꞌa bega be ta nkiꞌin naꞌ.
PHI 4:16 No zha na nchoꞌota naꞌ gezh Tesalónica, leꞌa bega mtuꞌub ta nkiꞌin naꞌ plata biaj.
PHI 4:17 Naꞌanpa gáp naꞌ mas usaꞌa bega taꞌa ndoꞌ naꞌ, ndi nlad naꞌ leꞌa Dios kix ta ngokno bega naꞌ wa.
PHI 4:18 Leꞌa Epafrodito wa myun cuent itea be ta mtuꞌub bega wa. Leꞌa ta wa mas sian ngok ndoꞌ lak nkiꞌin naꞌ‑yá. Leꞌa ta na li mtuꞌub bega wa nak cuent dub xnab msaꞌa bega ndoꞌ Dios, dub ta uxeꞌe msak ladna Dios.
PHI 4:19 Leꞌa Dios ten beuna saꞌaka iteanak be taꞌa nkiꞌin bega, lakta ndap xa sian be ta wen nsaꞌa xa ndoꞌ be xmen Cristo Jesús.
PHI 4:20 ¡Idub tiemp gab beuna leꞌa Dios Xus beuna ndon leꞌa juert nak! Lika nak‑a.
PHI 4:21 Unidiꞌizh bega sakndoꞌ naꞌ ndoꞌ itea be xmen Cristo Jesús ndencho sa baꞌ. Leꞌa bexa nak xmen Cristo nchono naꞌ no nidiꞌizh ndoꞌ bega.
PHI 4:22 Leꞌa bexa ndun tiꞌin ndoꞌ César xa nibeꞌe Roma no iteata bexa nak xmen Cristo gezh ndee no nidiꞌizh ndoꞌ bega.
PHI 4:23 Naꞌab naꞌ ndoꞌ Jesucristo Xwan beuna mas uzheꞌeb utsin gunno xa iteanak bega. Lika gak‑a.
COL 1:1 Leꞌa naꞌ ndee Pabl, xa mtuꞌub Dios gun naꞌ tiꞌin ten Jesucristo. Leꞌa naꞌ no Timoteo xa no nak xmen Cristo,
COL 1:2 nkeꞌa besa git ndee ndoꞌ bego nak xmen Dios ndencho gezh Colosas baꞌ, bego na no ndangea ladna Cristo. Nab besa ndoꞌ Tad Dios nsea ndoꞌ Jesucristo Xwan beuna utsin gak bexa ndoꞌ bega no gun bexa wen yoo ladna bega.
COL 1:3 Leꞌa itea gor nab besa ndoꞌ Dios gakno bega, leꞌa besa no nsaꞌa xno ndoꞌ Dios Xus Jesucristo Xwan beuna,
COL 1:4 ta na mbiꞌín besa xteꞌe ngeꞌ ladna bega Cristo Jesús nsea xteꞌe nkweaꞌ ladna bega itea bexa nak xmen Dios.
COL 1:5 Li nak bega geal leꞌa bega ndenkeaꞌ ikaꞌa ta usaꞌa Dios ta ndap xa gibeꞌa, ta na li mbiꞌín bega ndab diꞌizh gealngea ten Cristo.
COL 1:6 Leꞌa diꞌizh wa ulanseala ndoꞌ bega lak mteꞌachso‑yá idub ndoꞌ gizhliyo. No kwaꞌad bexa nsayungea ladna‑yá no mas ndun bexa ta nsak ladna Dios. No liga bega mas nsayák ndoꞌ lak zha ned mbiꞌín bega ná xteꞌe nkweaꞌ ladna Dios bega, no mgondoꞌ bega leꞌa ta wa gealngea.
COL 1:7 Leꞌa diꞌizh wa ta mluu Epafras ndoꞌ bega. Leꞌa xa wa dub amig ten besa xa ndunno besa tiꞌin, no wen ndun xa tiꞌin ten Cristo lat bega.
COL 1:8 No mbidiꞌizh xa ndoꞌ besa xteꞌe nsaꞌa Espíritu ten Dios ta nkweaꞌ ladna bega be ltsaꞌa bega.
COL 1:9 Ta weꞌe gast wizh mbiꞌín besa ta wa no gast nat, nab tseꞌe besa ndoꞌ Dios gakno bega. No nab besa ndoꞌ Dios leꞌa Espíritu ten Dios uxaꞌal gek bega, ndontsa mas igondoꞌ bega xtaꞌan nlad Dios gun bega no mas yakbeꞌena bega‑yá.
COL 1:10 Weꞌe gak bega lak nsabndoꞌ gak dub xmen Cristo, gun bega be ta nsak ladna xa, no utsin gak bega ndoꞌ be men, no mas yakbeꞌena bega ná xteꞌe nak Dios.
COL 1:11 No nab besa ndoꞌ Dios leꞌa juers siꞌil ten Dios gun juert gak ladoꞌo bega, ndontsa uxik bega ndoꞌ itea be taꞌa, ni lá izhanna bega no ni lá gach ladna bega.
COL 1:12 Ndi iten ladna bega usaꞌa bega xno ndoꞌ Dios Xus beuna, xa na mcheꞌa ladoꞌo beuna ndontsa syoꞌo gan ikaꞌa beuna ta wen usaꞌa xa ndoꞌ be xmen xa, bexa nde ndoꞌ xeꞌa ten xa.
COL 1:13 Leꞌa Dios uloꞌo beuna ndoꞌ sa ukaw, cha mbiꞌi xa beuna sa nibeꞌe Xin xa, xa ndon leꞌa nkweaꞌ ladna xa.
COL 1:14 Leꞌa xa wa utix be ke ten beuna no ten ten xa, cha mtsuꞌu xa be ke ten beuna.
COL 1:15 Leꞌa Cristo dubtsa nak no Dios, xa na lá yoo gan iniꞌí beuna. Leꞌa zha na mtexan Dios iteanak be taꞌa, leꞌa Xin Dios yá nchoka, no leꞌa xa nibeꞌe itea be taꞌa.
COL 1:16 Leꞌa xa wa leꞌa mtexan iteanak be taꞌa, be ta ncho gibeꞌa no be ta ncho ndoꞌ gizhliyo, be ta naꞌ beuna no be ta lá yoo gan inaꞌ beuna, be angel no iteata be espíritu nibeꞌe. Leꞌa itea be ta ncho wa leꞌa Xin Dios leꞌa mtexan‑a, cha leꞌa xa nibeꞌe ta wa.
COL 1:17 Leꞌa xa wa ndon ned ncho ndoꞌ iteanak be taꞌa, no juers ten xa itea be taꞌa ndaktiꞌin.
COL 1:18 No nibeꞌe xa ndoꞌ iteanak beuna nak xmen xa, lak nibeꞌe gek dub men idub las xa. Leꞌa xa ndon leꞌa ned ncho ndoꞌ itea be taꞌa, no ndon ned xa mban ndoꞌ gealgut. Ta weꞌe leꞌa xa leꞌa nak xa nibeꞌe itea be taꞌa.
COL 1:19 Ta weꞌe leꞌa Dios msak ladna leꞌa Xin Dios nak idub lak nak Dios.
COL 1:20 No mbinbeꞌe Dios leꞌa juers ten Xin xa leꞌa itea be taꞌa yakchaꞌaw, be ta ncho ndoꞌ gizhliyo no be ta ncho gibeꞌa. Leꞌa Xin Dios wa ngut ndoꞌ cruz mtsiꞌi xa ten ten xa, ndontsa wen yaꞌan be men ndoꞌ Dios.
COL 1:21 Leꞌa polta leꞌa bega lá nchandoꞌ Dios, no lá ndun bega ta nsak ladna Dios, leꞌa ta ndanbeꞌe bega no ta ndun bega ta ugap nak. Parea nat leꞌa Dios mbin wen myaꞌan bega ndoꞌ xa,
COL 1:22 juers ten ta mbin Cristo. Leꞌa xa wa myak men no ngut xa, ndontsa gal zha usoꞌ xa bega ndoꞌ Dios leꞌa bega umbiꞌi gak, no ni dub ke lá gap bega.
COL 1:23 Li gunno xa bega tal leꞌa bega ta ugeaka ngeꞌ ladna Cristo, no ndenkeaꞌ bega ikaꞌa bega ta usaꞌa Dios lak ndab diꞌizh wen ten Dios ta mbiꞌín bega wa. Leꞌa diꞌizh wa ngenka idub ndoꞌ gizhliyo, ta na li no naꞌ ndadiꞌizh wa.
COL 1:24 Nat leꞌa naꞌ nten ladna ntiꞌid naꞌ be gealkweaꞌ ndee ndontsa gakno naꞌ bega. Leꞌa be gealkweaꞌ wa ta nsabndoꞌka itiꞌid naꞌ lak utid Cristo gealkweaꞌ ndontsa ngokno xa be xmen xa.
COL 1:25 Leꞌa Dios msoꞌ naꞌ gun naꞌ tiꞌin ten xa lat be xmen xa wa, mtuꞌub xa naꞌ gudiꞌizh naꞌ idub diꞌizh ten xa ndoꞌ bega.
COL 1:26 Leꞌa ta ndadiꞌizh naꞌ wa leꞌa polta leꞌa‑yá ugaꞌach nak, parea leꞌa nat leꞌa Dios mluu‑yá ndoꞌ bexa nak xmen xa,
COL 1:27 ndontsa leꞌa bexa naꞌanpa xa judio iniꞌí xteꞌe siꞌil no wen nak ta ugaꞌach wa. Leꞌa ta wa Cristo xa ncho len ladoꞌo bega nat, ta weꞌe ngeꞌ ladna bega yaꞌ bega wats Dios gibeꞌa.
COL 1:28 Leꞌa besa ndadiꞌizh diꞌizh ten Cristo ndoꞌ be men, ntenxeꞌa besa bexa, no nluu besa bexa iteanak be ta ndák besa, ndontsa gak bexa idub lakka nlad Cristo Jesús.
COL 1:29 Ta weꞌe uzhebpa ngoꞌo naꞌ gan ndun naꞌ tiꞌin ten Cristo, lak nsaꞌa xa juers ndoꞌ naꞌ.
COL 2:1 Leꞌa naꞌ nlad iniꞌí bega leꞌa naꞌ uzhebpa ngoꞌo gan ndakno naꞌ bega, nsea bexa gezh Laodicea, no iteata bexa nak xmen Cristo, bexa gol niꞌí naꞌ.
COL 2:2 Li ndontsa mas juert gak ladoꞌo bega, nsea dubtsa ikweaꞌ ladna bega be ltsaꞌa bega, no uzheꞌeb yakbeꞌena bega be ta wen ten Dios. Weꞌe igondoꞌ bega ta ugaꞌach mbinbeꞌe Tad Dios wa, leꞌa ta wa leꞌaka Cristo,
COL 2:3 xa na ndun nyakbeꞌena beuna itea be ta nsak ten Dios.
COL 2:4 Ta ndee wa ndáp naꞌ ndoꞌ bega, ndontsa naꞌan ton ukwiꞌinno bega no be diꞌizh chul ndadiꞌizh xa.
COL 2:5 Leꞌa naꞌ ndee naꞌanpa nchoꞌo wats bega, parea leꞌa naꞌ nyuꞌno ladna bega. No nten lad naꞌ ndón naꞌ xteꞌe utsin ndun bega no xteꞌe dubtsa ngeꞌ ladna bega Cristo.
COL 2:6 Leꞌa lak mbingea ladna bega Jesucristo Xwan beuna, no liga bin bega be ta nsak ladna xa.
COL 2:7 Gok bega cuent dub ya wat ncho loꞌ na, natal cuent dub niꞌi nsob ndoꞌ dub geꞌdaꞌa. Dubtsa ute bega, lá ulaꞌa bega ta ngeꞌ ladna bega Cristo lak mluꞌu bexa bega, no bsaꞌa tseꞌe bega xno ndoꞌ Dios.
COL 2:8 Blaꞌach bega naꞌan ton ukwiꞌinno bega be ta naꞌan xtiꞌin ndadiꞌizh bexa. Leꞌa ta wa laktsa ndanbeꞌe be men ndencho ndoꞌ gizhliyo, naꞌanpa lak nak diꞌizh ten Cristo.
COL 2:9 Leꞌa idub lak nak Dios, li nak Cristo.
COL 2:10 Leꞌa cuent ten Dios leꞌa bega naꞌan xtaꞌan ndun jwalt ta na nak bega xmen Cristo, xa juert nak ndoꞌ itea be espíritu nibeꞌe.
COL 2:11 Leꞌa ta na nak bega xmen Cristo, ta weꞌe leꞌa bega ncho beꞌe. Parea leꞌa beꞌe wa naꞌanpa men igo, leꞌa Dios leꞌa ulo‑yá gor na myak bega xmen Cristo, cha mlaꞌa bega ta ugap nak bega.
COL 2:12 Leꞌa gor na utaleaꞌ bega leꞌa ta wa cuent mgaꞌachno bega Cristo no mbanno bega Cristo, geal leꞌa bega ngeꞌ ladna juers ten Dios ta na mxiste Cristo ndoꞌ gealgut.
COL 2:13 Leꞌa zha na bi ndun bega be ta ugap no biseata ulaꞌa bega be ta ugap nak bega, leꞌa bega cuent dub xa ngut. Parea leꞌa Dios msaꞌa gealnaban ndoꞌ bega lak msaꞌa xa‑yá ndoꞌ Cristo, no mtsuꞌu xa itea be ke ten bega.
COL 2:14 Leꞌa ta wa cuent mnitndoꞌ xa dub git nkea itea be ke ten beuna ndoꞌ na, git na li nsake beuna wa, cha mkeꞌa xa git wa ndoꞌ cruz.
COL 2:15 No mlat Dios juers ten be espíritu nibeꞌe zha na ngut Cristo ndoꞌ cruz, ta mluu ndoꞌ gaꞌal be men leꞌa Cristo mbinla gan ndoꞌ be espíritu wa.
COL 2:16 Leꞌa ncho be men ndab leꞌa bega ugap nak gor na ndaw bega dub taꞌa no ndo bega stub taꞌa. No ndab bexa yankea bega ujest ten mbeꞌe kub, no be wizh neꞌe bexa, no iteata be ujest ten bexa. Parea naꞌanpa ulaꞌach bega ta ndab bexa wa.
COL 2:17 Leꞌa itea be ta nibeꞌe bexa wa nak cuent dub xiꞌín ta ndiꞌizh ilen tsoꞌo wa, leꞌa ta wa Cristo.
COL 2:18 No lá ulaꞌach bega ta ndadiꞌizh bexa migab uzhebpa bexa bchaꞌan nak, ndankea bexa be angel no ndab bexa uniꞌí bexa ta mluꞌu Dios cuent dub ta mcheꞌa ladna bexa. Leꞌa bexa wa uzhebpa nzhinna, ná leꞌa ta ndanbeꞌe bexa wa ta naꞌan xtiꞌin.
COL 2:19 Leꞌa bexa wa naꞌanpa igeꞌ ladna Cristo. Leꞌa Cristo leꞌa nak xa nibeꞌe ndoꞌ itea be xmen xa, no ndakno xa bexa, nsea nyunjunt xa bexa, ndontsa mas nsayakbeꞌena bexa lak nsaꞌa Dios.
COL 2:20 Leꞌa ta na ngut Cristo, leꞌa beuna no ngut cuent ten be ta gizhliyo. ¿Cha xtaꞌan bi ndun bega lak ndun be men gizhliyo, no lak nibeꞌe bexa wa zha?
COL 2:21 Ndab bexa: “Lá ugal lu ta ndee, no lá gaw lu ta baꞌ, no lá isen lu be ta ndee.”
COL 2:22 Leꞌa itea be ta li ndab bexa wa ndadiꞌizh cuent ten be ta initndoꞌ. Leꞌa ta wa mentsa nibeꞌe no mentsa nluꞌu‑yá.
COL 2:23 Leꞌa ta nibeꞌe bexa wa nluu cuent dub ta wen, leꞌa bexa ndab leꞌa beuna nsabndoꞌ yankea Dios, no lá izhinna beuna, no gaisaꞌab beuna ndoꞌ be ta nlad beuna. Parea leꞌa be ta nibeꞌe bexa wa lá isuꞌu gakno beuna gaisaꞌab beuna ndoꞌ be ta ugap nlad beuna.
COL 3:1 Leꞌa lak mban Cristo ndoꞌ gealgut liga ndap bega dub gealnaban kub. Ta weꞌe bkwaꞌan bega be ta gibeꞌa, sa nsob Cristo wats Dios lad gaꞌal.
COL 3:2 Binbeꞌe bega be ta ncho gibeꞌa, lá gunbeꞌeta bega be ta ugap ncho ndoꞌ gizhliyo.
COL 3:3 Leꞌa lak ngok bega polta wa leꞌa nat leꞌa ta wa cuent dub ta ngut. Nat ndap bega dub gealnaban kub ndoꞌ Dios wats Cristo, dub gealnaban naꞌanpa iniꞌí be men.
COL 3:4 Leꞌa zha na ulundoꞌ Cristo xa nsaꞌa gealnaban ten beuna wa, weꞌe leꞌa bega no ulundoꞌ wats xa ndoꞌ xeꞌa siꞌil ten xa.
COL 3:5 Bnitndoꞌ bega be ta ugap nak bega: lá ugal bega dub xa naꞌanpa xa ten bega, no lá gun bega be ta bzhiꞌik, no lá isankea bega tsoꞌo be ta ugap nlad bega. No lá isaꞌab ladna bega gap bega sian taꞌa, leꞌa ta wa cuentka gor ndankea bega dub dios gizhliyo.
COL 3:6 Leꞌa Dios utsaksika bexa na li ndun be ta ugap wa, bexa lá nxobgek ndoꞌ Dios.
COL 3:7 Leꞌa polta leꞌa bega no li ngok, zha bi ndencho bega ndoꞌ be ta ugap wa.
COL 3:8 Parea leꞌa nat yá nsabndoꞌ ulaꞌa bega itea be ta ndee: lá gakloo bega, no ni lá ukwaꞌan bega uyo, no lá ixee ladna bega ndoꞌ stub men, no lá inisi bega be men, no lá iníꞌi bega diꞌizh ugap.
COL 3:9 No lá gun bega gealkwiꞌin, leꞌa bega yá mlaꞌala ta ugap ngok bega no be ta ugap mbin bega.
COL 3:10 Leꞌa nat leꞌa bega mzheꞌa xaꞌaga nak bega, geal leꞌa bega mas nsayak lak nak Dios, no mas nsagondoꞌ bega Dios xa na leꞌa mbindeꞌe bega.
COL 3:11 Ta weꞌe naꞌanpa nsak‑a tal bega xa judio natal bega naꞌanpa xa judio, no tal ncho beꞌe bega natal naꞌan beꞌe bega, no tal xa sit bega natal naꞌanpa xa ntsid bega, no tal xa nchaꞌndoꞌo bega natal xa libr bega. Leꞌa ta nsak wa ta na nak beuna xmen Cristo, xa ncho len ladoꞌo beuna.
COL 3:12 Leꞌa Dios nkweaꞌ ladna bega no mti xa bega gak bega xmen xa bexa umbiꞌi. Ta weꞌe gok bega lak nsabndoꞌ gak dub xmen Dios: blats ladna bega be men, no utsin gok bega ndoꞌ bexa, no naꞌanpa zhin gak bega, no bchaꞌan gok bega, no naꞌanpa uxax gakloo bega.
COL 3:13 No bxik bega ndoꞌ be ltsaꞌa bega, no bingeꞌ ladna bega ndoꞌ tal ton ugap ndanno bega lak mbingeꞌ ladna Cristo ndoꞌ bega.
COL 3:14 Ndoꞌ itea be ta ndee wa nsabndoꞌ ikweaꞌ ladna bega be ltsaꞌa bega, ndontsa dubtsa gak bega.
COL 3:15 Blaꞌa bega inibeꞌe Dios len ladoꞌo bega ndontsa utsin kwe bega, leꞌa Dios ta weꞌe mti bega gak bega dub xkwaꞌa xmen xa. No gab geꞌal bsaꞌa bega xno ndoꞌ Dios.
COL 3:16 Idub tiemp lá yalad bega be diꞌizh ten Cristo, no gok bega idub lak ndab ta wa. Bluu bega no btenxeꞌa bega be ltsaꞌa bega idub lak ndák bega. Bsaꞌa bega xno ndoꞌ Dios gor ndaltoꞌo bega be salmo no be himno no be cant ndoꞌ Dios.
COL 3:17 Leꞌa itea be ta gudiꞌizh bega no be ta gun bega, bin bega sbeꞌen ta nsak ladna Jesús Xwan beuna. No bsaꞌa bega xno ndoꞌ Tad Dios no be ta wen ndun Jesús.
COL 3:18 Leꞌa bego xagots, bxobgek bega ndoꞌ xabgiꞌi ten bega lak nsabndoꞌ‑yá leꞌa bega nak xmen Cristo.
COL 3:19 Leꞌa bego xabgiꞌi, bkweaꞌ ladna bega xagots ten bega naꞌanpa ugiꞌi gak bega ndoꞌ xa.
COL 3:20 Leꞌa bego be meꞌed no bexa ben, sbeꞌen bxobgek bega ndoꞌ xus bega no ndoꞌ xnaꞌa bega, leꞌa ta wa ta nsak ladna Cristo Xwan beuna.
COL 3:21 No bego na ndap be xin na, lá gunno bega bexa ta gakloo bexa ndoꞌ bega cha gach ladna bexa.
COL 3:22 Leꞌa bego na nak dub xa nchaꞌndoꞌo ndoꞌ yaꞌa dub men, bxobgek bega ndoꞌ xa nak xwan bega ndoꞌ gizhliyo ndee naꞌanpa gor nsowiꞌitsa xa lak ndun bexa nlad wen yaꞌan ndoꞌ xwan na. Ndi idub ncho ladna bega bin bega tiꞌin ndoꞌ xa wa geal leꞌa bega xmen Dios.
COL 3:23 Itea tiꞌin gun bega, bin bega‑yá idub ncho ladna bega, cuent dub zha ndun bega tiꞌin wa ndoꞌ Cristo naꞌanpa ndoꞌ men‑a.
COL 3:24 Leꞌa bega uniꞌí leꞌa Dios kix be ta wen ndun bega wa lak ndab Dios gunka xa, leꞌa bega ndoꞌ Cristo ndun tiꞌin.
COL 3:25 Parea leꞌa tal ton gun be ta ugap, leꞌa Dios utsaksi xa tal plo be ta ugap mbin xa wa. Leꞌa Dios kix kadga ndoꞌ be men lak nsabndoꞌ‑yá.
COL 4:1 Leꞌa bego nak xwan bexa ndun tiꞌin ndoꞌ na, utsintsa binno bega bexa wa. Lá yalad bega leꞌa bega no ndap dub Xwan na ncho gibeꞌa.
COL 4:2 Leꞌa iteanak bega bidiꞌizhno tseꞌe bega Dios, no bsaꞌa bega xno ndoꞌ Dios.
COL 4:3 No unab bega ndoꞌ Dios uxaꞌal Dios nes ndontsa yoo gan gudiꞌizhta besa diꞌizh ten Cristo ndoꞌ be men, ta na lá nchandoꞌ bexa polta wa. Leꞌa ke na ndadiꞌizh naꞌ diꞌizh wa, ta weꞌe nkea naꞌ litgiꞌib ndee.
COL 4:4 Unab bega ndoꞌ Dios gakno Dios naꞌ, ndontsa uyaꞌal gudiꞌizh naꞌ diꞌizh wa lak nsabndoꞌ‑yá.
COL 4:5 Binbeꞌe bega xteꞌe gak bega ndoꞌ bexa lá nchandoꞌ Cristo, no list ute bega gudiꞌizh bega diꞌizh ten Dios ndoꞌ bexa.
COL 4:6 Leꞌa gor ndadiꞌizhno bega bexa wa nsabndoꞌ utsin gudiꞌizh bega dub mod isak ladna bexa‑yá. No binbeꞌe bega xteꞌe ikaꞌab bega tal ncho xtaꞌan inabdiꞌizh bexa ndoꞌ bega.
COL 4:7 Leꞌa Tíquico dub xa no nak xmen Cristo gab ndoꞌ bega xteꞌe nsatiꞌid naꞌ. Leꞌa xa wa dub amig ten naꞌ no ndakno xa naꞌ ndun besa tiꞌin ten Cristo.
COL 4:8 Leꞌa naꞌ ntuꞌub xa ndoꞌ bega ndontsa iniꞌí xa ná xteꞌe nde bega, no gun xa mas iten ladna bega.
COL 4:9 Leꞌa xa wa goꞌo no Onésimo dub xa ltsaꞌa bega, no nak xa dub amig ten naꞌ. Leꞌa bexa wa gudiꞌizh ndoꞌ bega itea taꞌa nsatid besa sa ndee.
COL 4:10 Leꞌa Aristarco dub xa no nkeano naꞌ litgiꞌib ndee nidiꞌizh ndoꞌ bega. No Marc sobrin ten Bernabé nidiꞌizh ndoꞌ bega. Leꞌa naꞌ ndápka ndoꞌ bega xteꞌe nsabndoꞌ utsin gak bega ndoꞌ Marc tal leꞌa xa yaꞌinaꞌ bega.
COL 4:11 No nidiꞌizh Jesús xa no nsaleaꞌ Justo. Lat bexa ndunno naꞌ tiꞌin ten Dios sa ndee, leꞌa yontsa bexa ndee nak xa judio, no ndun bexa mas nten lad naꞌ.
COL 4:12 No nidiꞌizh Epafras dub xa ltsaꞌa bega, dub xa no ndun tiꞌin ten Cristo. Uzhebpa nab xa ndoꞌ Dios gakno Dios bega, ndontsa dubtsa igeꞌ ladna bega Dios no gun bega iteanak be ta nlad Dios.
COL 4:13 Leꞌa naꞌ uní leꞌa Epafras nyuꞌno ladna bega no bexa ndencho gezh Laodicea nsea gezh Hierápolis.
COL 4:14 Leꞌa Luc xa nak doctor no amig ten besa nidiꞌizh ndoꞌ bega, no Demas nidiꞌizh ndoꞌ bega.
COL 4:15 Unidiꞌizh bega sakndoꞌ naꞌ ndoꞌ bexa ndencho Laodicea, bexa no nak xmen Cristo. No unidiꞌizh bega ndoꞌ Ninfas no ndoꞌ be xmen Cristo nzhealbe ta lid xa.
COL 4:16 Leꞌa gor na mtayoꞌol bega git ndee, cha btuꞌub bega‑yá ndoꞌ bexa nak xmen Cristo gezh Laodicea, ndontsa no bexa goꞌol‑a. Cha no bega goꞌol git mtuꞌub naꞌ ndoꞌ bexa Laodicea wa.
COL 4:17 Gud bega ndoꞌ Arquipo utsin gun xa tiꞌin msaꞌa Cristo gun xa.
COL 4:18 Leꞌa naꞌ ndee Pabl nkeꞌa naꞌ be letr ndee yaꞌa naꞌ, ta nidiꞌizh naꞌ ndoꞌ bega. Lá yalad bega leꞌa naꞌ nkea litgiꞌib. Nat naꞌab naꞌ ndoꞌ Dios uzhebpa utsin gunno xa bega. Lika gak‑a.
1TH 1:1 Leꞌa naꞌ ndee Pabl no be ltsaꞌa naꞌ Silvano nsea Timoteo nkeꞌa besa git ndee ndoꞌ bego nzhealbe gezh Tesalónica baꞌ, leꞌa bega xmen Tad Dios no Jesucristo Xwan beuna. Naꞌab naꞌ ndoꞌ Tad Dios no ndoꞌ Jesucristo Xwan beuna utsin gak bexa ndoꞌ bega, no gun bexa wen yoo ladna bega.
1TH 1:2 Leꞌa besa nsaꞌa tseꞌe xno ndoꞌ Dios por itea bega, no nab besa ndoꞌ Dios gakno Dios bega.
1TH 1:3 Leꞌa gor na ndadiꞌizhno besa Dios Xus beuna, ntseꞌa ladna besa be ta wen ndun bega geal ngeꞌ ladna bega Cristo, no xteꞌe utsin nak bega ndoꞌ be ltsaꞌa bega geal nkweaꞌ ladna bega bexa, no xteꞌe nkenkeaꞌ bega zha ilen Jesucristo Xwan beuna stub biaj.
1TH 1:4 Bego nak beuna xmen Cristo, leꞌa Dios nkweaꞌ ladna bega, no uniꞌí besa leꞌa xa leꞌa mti bega gak bega xmen xa.
1TH 1:5 Leꞌa zha mbidiꞌizh besa diꞌizh wen ten Cristo ndoꞌ bega, leꞌa ta wa naꞌanpa sbeꞌen diꞌizhtsa. Leꞌa besa no mbin sian be taꞌa juers ten Espíritu ten Dios, ta mluu leꞌa Dios leꞌaka mtuꞌub besa. Leꞌa bega uniꞌíka xteꞌe utsin ngok besa lat bega geal leꞌa besa nkweaꞌ ladna bega.
1TH 1:6 Leꞌa gor na mbingea ladna bega diꞌizh ten Dios, leꞌa bega myak lak nak besa no lak ngok Jesús Xwan beuna. Leꞌa zha wa leꞌa bega uniꞌí sian gealkweaꞌ, parea leꞌa Espíritu ten Dios mbin mten ladna bega.
1TH 1:7 Weꞌe leꞌa be xmen Jesús ndencho Macedonia no Acaya uniꞌí xteꞌe utsin nak bega, ta weꞌe cha no bexa nlad li gak.
1TH 1:8 Weꞌe leꞌa diꞌizh ten Jesús mteꞌachso idub Macedonia no Acaya. No gast itea lad mbiꞌín be men xteꞌe ndangea ladna bega Dios, gast ni lá nkiꞌinta besa gudiꞌizh xteꞌe nak bega.
1TH 1:9 Leꞌa bexa wa ndadiꞌizhbe ná xteꞌe utsin ngok bega ndoꞌ besa gor ulayaꞌ besa sa baꞌ, no xteꞌe mlaꞌa bega be dios gizhliyo, cha mbingea ladna bega Dios nban, xa ta ugeaka leꞌa nak Dios,
1TH 1:10 no xteꞌe ndenkeaꞌ bega zha ilen Xin Dios gibeꞌa, xa mxiste Dios ndoꞌ gealgut. Leꞌa ta wa Jesús, xa na koꞌo beuna ndoꞌ ta uzheꞌeb utsaksi Dios be men.
1TH 2:1 Bega nak beuna xmen Cristo, leꞌa bega uniꞌíka leꞌa zha na uyoꞌo besa lat bega wa, leꞌa ta wa uzheꞌeb ngokno bega.
1TH 2:2 Lak uniꞌí bega leꞌa bexa gezh Filipos ugap mbinno besa no unisi bexa besa. Ná leꞌa Dios ngokno besa ndontsa lá izheb besa mbidiꞌizh besa diꞌizh wen ten Dios ndoꞌ bega, maska uzheꞌeb ngoklono be men besa.
1TH 2:3 Leꞌa ta li mbidiꞌizh besa wa ta ugeaka, naꞌanpa nlad besa ugap gunno besa bega no naꞌanpa ukwiꞌinno besa bega.
1TH 2:4 Leꞌa besa ndi ndadiꞌizh diꞌizh wen ten Cristo lak msaꞌa Dios gun besa. Leꞌa besa naꞌanpa ndun ta isak ladna be men, leꞌa besa ndi ndun ta isak ladna Dios, xa nchandoꞌ ladoꞌo beuna.
1TH 2:5 Leꞌa bega uniꞌíka leꞌa besa nunk lá ngudiꞌizh diꞌizh uguꞌud ndontsa isak ladna bega ta nluu besa. Leꞌa Dios nsobwiꞌi leꞌa besa naꞌanpa ngudiꞌizh ta wa ndontsa gun besa gan med.
1TH 2:6 Leꞌa besa ni lid nkwaꞌan xteꞌe utsin gak be men ndoꞌ besa, ni bego no ni bexa xaꞌaga. Leꞌa ta na nak besa apostol ten Cristo, leꞌa besa syoꞌo gan inibeꞌe ndoꞌ bega.
1TH 2:7 Parea leꞌa besa ndi bchaꞌan ngok ndoꞌ bega, lakta utsin nlaꞌach dub xagots be xmeꞌed na.
1TH 2:8 Uzhebpa nkweaꞌ ladna besa bega. Ta weꞌe naꞌanpa nabtsa diꞌizh wen ten Dios mbidiꞌizh besa, gast no usaꞌa besa leꞌaka leꞌa besa geal leꞌa besa nkweaꞌ ladna bega.
1TH 2:9 Bego nak beuna xmen Cristo, ntseꞌaka ladna bega xteꞌe mbin besa tiꞌin teꞌal tezhea, ndontsa naꞌanpa sbeꞌen bega usaꞌa be ta nkiꞌin besa, zha mbidiꞌizh besa diꞌizh wen ten Dios ndoꞌ bega.
1TH 2:10 Leꞌa bega uniꞌíka no nsobwiꞌi Dios leꞌa besa utsin ngok lat bega ndangea ladna Jesús, no mbin besa lak nsak ladna Dios, no naꞌan xteꞌe yoꞌo gan ngab be men leꞌa besa ugap mbin.
1TH 2:11 No uniꞌíka bega leꞌa besa mbinno bega lak ndanno dub xabgiꞌi be xin na: mluꞌu besa ná xteꞌe gak kadga dub bega, no mluꞌuzh besa bega,
1TH 2:12 no unibeꞌe besa gun bega lak nsak ladna Dios, xa mti bega yoo bega sa uzhebpa chul sa nibeꞌe Dios.
1TH 2:13 Ta weꞌe leꞌa besa nsaꞌa tseꞌe xno ndoꞌ Dios, leꞌa zha na mbiꞌín bega diꞌizh ten Dios ta na mbidiꞌizh besa, leꞌa bega naꞌanpa ngab leꞌa‑yá diꞌizh ten mentsa. Ndi mbingea ladna bega leꞌa‑yá diꞌizh ten Dioska. Ta weꞌe mas ndun bega ta nsak ladna Dios, bega ndangea ladna Cristo.
1TH 2:14 Bego nak beuna xmen Cristo, leꞌa bexa lazh bega xela mbinno bega, lakta utid be xmen Dios ndencho Judea, bexa ndangea ladna Cristo Jesús. Leꞌa bexa judio leꞌaka bexa lazh xa xela mbinno bexa ndencho Judea wa.
1TH 2:15 Leꞌa bexa judio wa xa na mbit Jesús lak mbit be usan gox polta ten bexa wa be profet, no liga ulantuꞌub bexa besa lat bexa wa. Leꞌa ta ndun bexa wa ta lá nsak ladna Dios, leꞌa bexa ndi ndakloo ndoꞌ itea be men.
1TH 2:16 Leꞌa zha na nlad besa gudiꞌizh besa ndoꞌ bexa naꞌanpa xa judio ndontsa no bexa gak xmen Dios, weꞌe leꞌa bexa judio wa nka li gun besa. Leꞌa bexa wa ndi mas sian ke nsayap ndoꞌ Dios, no mas utsaksi Dios bexa wa.
1TH 2:17 Bega nak beuna xmen Cristo, leꞌa nat leꞌa besa sit ndencho ndoꞌ bega dub ndeꞌep, parea leꞌa besa lá nyalad bega, no uzhebpa nlad besa inaꞌ besa bega.
1TH 2:18 Nladka besa giꞌid inaꞌ besa bega, ta weꞌe leꞌa naꞌ Pabl ndiꞌizh plala biaj gal inaꞌka naꞌ bega, ná leꞌa maxuꞌu uyontsaw.
1TH 2:19 Leꞌa ta nlad besa wa, ta na leꞌa gun iten ladna besa, ta uluꞌu leꞌa ta mbin besa leꞌaka nak, leꞌa ta wa bego gor na kwe bega ndoꞌ Jesucristo Xwan beuna zha ilen xa stub biaj.
1TH 2:20 Ta ugeaka leꞌa besa nzhinnona bega no ntenno ladna besa bega.
1TH 3:1 Ngol zha leꞌa besa yá lá uxikta nkwaꞌan besa bega, ta weꞌe myaꞌan nab besa gezh Atenas,
1TH 3:2 cha mtuꞌub besa Timoteo ndoꞌ bega. Leꞌa xa wa cuent wit beuna, no ndun xa tiꞌin ndoꞌ Dios ndadiꞌizh xa diꞌizh wen ten Cristo lak ndun besa ndee. Li mtuꞌub besa xa ndoꞌ bega ndontsa utenxeꞌa xa bega mas igeꞌ ladna bega Cristo,
1TH 3:3 ndontsa ni dub bega lá gach ladna ndoꞌ be gealkweaꞌ nsatid bega. Leꞌa bega uniꞌíka leꞌa beuna sian gealkweaꞌ nsabndoꞌ itid.
1TH 3:4 Leꞌa zha na bi ncho besa lat bega, leꞌa besa mbidiꞌizhka leꞌa beuna sian gealkweaꞌ iniꞌí. Cha likaga ngok‑a lak uniꞌí bega wa.
1TH 3:5 Ta weꞌe ta na yá lá uxikta naꞌ wa mtuꞌub naꞌ Timoteo mbiꞌid inaꞌ bega, naga bi ngeꞌ ladna bega Jesús. Leꞌa naꞌ nzheb nchaꞌa maxuꞌu ukwiꞌinno bega, no nchaꞌa itea ta mbin besa lat bega wa naꞌan xtiꞌin.
1TH 3:6 Ná leꞌa gor na mlaꞌnchaꞌ Timoteo ngwaꞌ xa sa baꞌ, leꞌa xa mbidiꞌizh ndoꞌ besa ná xteꞌe bi ngeꞌka ladna bega Cristo, no xteꞌe nkweaꞌ ladna bega be ltsaꞌa bega. No mbidiꞌizh xa ná xteꞌe nten ladna bega gor ntseꞌa ladna bega besa, no nkwaꞌan bega besa lak nkwaꞌan besa bego baꞌ.
1TH 3:7 Bega nak beuna xmen Cristo, uzheꞌeb bid ndesea besa no nsatid besa be gealkweaꞌ. Parea ta na li nchoka bega len nes ten Dios wa leꞌa ndun nten ladna besa.
1TH 3:8 Leꞌa nat uzheꞌeb nkaꞌa besa juers ta na uniꞌí besa leꞌa bega ngeꞌka ladna Jesús.
1TH 3:9 Ni lá iniꞌíta besa xteꞌe usaꞌa besa xno ndoꞌ Dios por bega lak nsabndoꞌ‑yá. Leꞌa be ta li ndun bega wa leꞌa ndun uzheꞌeb nten ladna besa ndoꞌ Dios ten beuna.
1TH 3:10 Leꞌa besa teꞌal tezhea nab ndoꞌ Dios ulaꞌa Dios giꞌid inaꞌ besa bega, uluꞌu besa bega ná xteꞌe mas uzheꞌeb igeꞌ ladna bega Dios.
1TH 3:11 Leꞌa Dios Xus beuna no Jesucristo Xwan beuna gakno besa nes giꞌid inaꞌ besa bega.
1TH 3:12 Leꞌa Jesús gun mas ikweaꞌ ladna bega be ltsaꞌa bega no itea be men, lak uzheꞌeb nkweaꞌ ladna besa bega.
1TH 3:13 Weꞌe leꞌa Dios gun mas igeꞌ ladna bega xa, no umbiꞌi gak ladoꞌo bega ndoꞌ Tad Dios, gor ilen Jesucristo Xwan beuna nsea itea be xmen xa, bexa umbiꞌi nak ladoꞌo na ndoꞌ Dios.
1TH 4:1 Bego nak beuna xmen Cristo, leꞌa besa mluu ndoꞌ bega xteꞌe gun bega ta nsak ladna Dios lakka nchasea ndun bega nat. Leꞌa ta na nak beuna xmen Cristo wa, uzhebpa nab besa ndoꞌ bega gun bega juers mas li gak bega.
1TH 4:2 Leꞌa bega uniꞌíka xteꞌe ndab besa gak bega, lak nlad Jesús gab besa ndoꞌ bega.
1TH 4:3 Leꞌa Dios nlad umbiꞌi gak bega ndoꞌ xa; naꞌanpa ugal bega dub xa naꞌanpa xa ten bega.
1TH 4:4 No utsin gunno bega xagots ten bega lak nsak ladna Dios.
1TH 4:5 Naꞌanpa gun bega be ta nladtsa bega wa, lak ndun be men lá nchandoꞌ Dios.
1TH 4:6 Leꞌa cuent ten be ta ndee wa naꞌanpa ugap gunno bega stub xa, no naꞌanpa ukwiꞌinno bega xa, leꞌa lakka ndab besa ndoꞌ bega leꞌa Dios utsaksi bexa na li gun wa.
1TH 4:7 Leꞌa Dios naꞌanpa mti beuna bzhiꞌik gak beuna, leꞌa xa ndi mti beuna umbiꞌi gak beuna ndoꞌ xa.
1TH 4:8 Ta weꞌe leꞌa tal ton nxelad ta ndáp naꞌ ndee wa, leꞌa xa wa naꞌanpa dub mentsa nxelad, leꞌa xa wa ndi Dios nxelad, xa na nsaꞌa Espíritu ten na ndoꞌ beuna.
1TH 4:9 Leꞌa besa lá nkiꞌinta gab ndoꞌ bega ikweaꞌ ladna bega be ltsaꞌa bega, leꞌa Dios yá mluꞌu ndoꞌ bega leꞌa bega nsabndoꞌ li gun.
1TH 4:10 Leꞌa bega nkweaꞌka ladna itea bexa ndangea ladna Cristo, bexa ndencho idub Macedonia baꞌ. Ná leꞌa besa nab ndoꞌ bega mas ikweaꞌ ladna bega bexa,
1TH 4:11 no bchaꞌan gok bega, no blaꞌach bega tiꞌin tentsa bega, no bin bega tiꞌin ten bega lak unibeꞌe besa.
1TH 4:12 Weꞌe leꞌa be men lá ndangea ladna Jesús gap mod ndoꞌ bega, no gap bega be taꞌa nkiꞌin bega.
1TH 4:13 Bego nak beuna xmen Cristo, leꞌa besa nlad iniꞌí bega xteꞌe gak be men ngut, ndontsa lá yoo uban ladna bega lak ndun bexa lá nchandoꞌ Dios.
1TH 4:14 Leꞌa lak ndangea ladna beuna leꞌa Jesús ngut no mbangal xa, no liga ndangea ladna beuna leꞌa Dios utuꞌub Jesús ilenno xa bexa ngut, bexa mbingea ladna Jesús zha na bi nban bexa wa.
1TH 4:15 Ta weꞌe ndab besa ndoꞌ bega lak mluꞌu Jesús besa: Leꞌa wizh ilen Jesús leꞌa beuna bi ndenban ndee naꞌanpa ned yaꞌ ndoꞌ bexa ngut wa.
1TH 4:16 Leꞌa leꞌaka Jesús ugeꞌ iníꞌi, cha igen dub ti angel ndon leꞌa nibeꞌe, no kwezh trompet ten Dios, cha ilaꞌ Jesús gibeꞌa. Weꞌe leꞌa bexa ngut wa ned ibanbe, bexa na mbingea ladna Cristo zha bi nban bexa.
1TH 4:17 Weꞌe leꞌa beuna bi ndenban ndee cha ikeano bexa wa, cha izheal beuna Cristo ndoꞌ xkaw ndoꞌ mbi baꞌ. Cha litsa yoono beuna Cristo idub tiemp.
1TH 4:18 Ta weꞌe btenxeꞌa bega be ltsaꞌa bega no ta ndáp naꞌ ndee wa.
1TH 5:1 Bega nak beuna xmen Cristo, leꞌa cuent ten bega leꞌa naꞌ lá nkiꞌin ukeꞌa ná pol yoo be ta ndee wa.
1TH 5:2 Leꞌa bega uniꞌíka leꞌa gal wizh ilen Jesús wa, leꞌa xa wa ilen dub gor ni lá ndanbeꞌe bega, cuent nlaꞌ dub waꞌan ta lid dub men gor teꞌal.
1TH 5:3 Leꞌa zha na gab be men: “Itea taꞌa xe nak no naꞌan xtaꞌan yasea beuna”, leꞌa gor weꞌe uxax ilen dub gealkweaꞌ siꞌil tsoꞌo bexa wa, lakta uxax nlen dub gealkweaꞌ gor yamer gap dub xagots xin na. Leꞌa be men wa lá yoo gan uxoꞌon ndoꞌ gealkweaꞌ wa.
1TH 5:4 Ná leꞌa bega nak beuna xmen Cristo naꞌanpa nde sa ukaw ndontsa naꞌanpa yanseana bega gal zha wa, lak ndanseana dub men gor nlen dub waꞌan ta lid na.
1TH 5:5 Leꞌa itea bego nde tezhea ndoꞌ xeꞌa ten Dios. Leꞌa beuna naꞌanpa nde sa ukaw.
1TH 5:6 Ta weꞌe leꞌa beuna lá gak lak nak dub men lá iniꞌí xtaꞌan ncho. Leꞌa beuna ndi nsabndoꞌ kwenaꞌ no list kwe beuna.
1TH 5:7 Leꞌa bexa na ndadgats wa, gor teꞌal ndadgats. No bexa na ndun gealgu wa, gor teꞌal ndun gealgu.
1TH 5:8 Ná leꞌa beuna nde ndoꞌ xeꞌa ten Dios, ta weꞌe list kwe beuna. Leꞌa beuna ngeꞌ ladna Dios no ndankea beuna xa. Leꞌa ta wa gakno beuna lak ndakno dub giꞌib ntsaw ladoꞌo soldad. No ngeꞌ ladna beuna usaꞌa Dios gealnaban ndoꞌ beuna, lakta ngeꞌ ladna dub soldad xo giꞌib nsob gek na.
1TH 5:9 Leꞌa Dios naꞌanpa mti beuna ta na utsaksi Dios beuna, leꞌa xa ndi mti beuna ndontsa gap beuna gealnaban, ta nsaꞌa Jesucristo Xwan beuna.
1TH 5:10 Leꞌa Jesús ngut sakndoꞌ beuna ndontsa junt yoono beuna xa wa, guniꞌi tal ngut beuna natal bi ndenban beuna zha ilen xa.
1TH 5:11 Ta weꞌe btenxeꞌa bega be ltsaꞌa bega lakka nchasea ndun bega, ndontsa lá gach ladna bexa, ndi mas yankea bexa Dios.
1TH 5:12 Bega nak beuna xmen Cristo, leꞌa besa nab ndoꞌ bega utsin gok bega ndoꞌ bexa ndun tiꞌin ten Dios lat bega, bexa leꞌa nchansu bega nak xmen Cristo no ntenxeꞌa bexa bega.
1TH 5:13 Gop bega mod ndoꞌ bexa wa, no bkweaꞌ ladna bega bexa, leꞌa bexa wa bexa ndun tiꞌin ten Dios. No ni lá kuyo bega.
1TH 5:14 No ndab besa ndoꞌ bega utenxeꞌa bega bexa lá kaꞌab gun tiꞌin, no bluꞌuzh bega bexa nzheb, no gokno bega bexa ngi bi lá ndangea ladna Dios, no bxik bega ndoꞌ itea be men.
1TH 5:15 No blaꞌach bega naꞌanpa no bega ugap gunno tal ton ugap ndanno bega. Ndi sbeꞌen utsin bin bega ndoꞌ be ltsaꞌa bega no ndoꞌ itea be men.
1TH 5:16 Bten ladna bega idub tiemp.
1TH 5:17 No gab geꞌal bidiꞌizhno bega Dios.
1TH 5:18 No ndoꞌ itea be taꞌa itid bega bsaꞌa bega xno ndoꞌ Dios, lak nlad Dios gun bega nak xmen Cristo Jesús.
1TH 5:19 Lá uka bega gun Espíritu ten Dios ta nlad na.
1TH 5:20 Naꞌanpa uxelad bega ta ndab bexa ndadiꞌizh sakndoꞌ Dios.
1TH 5:21 Ndi blaꞌach bega naga leꞌa nak ta ndab bexa wa. Leꞌa itea ta na leꞌa nak wa, blaꞌach bega ta wa.
1TH 5:22 Parea lá ulaꞌach bega be ta lid leꞌa nak.
1TH 5:23 Leꞌa Dios xa ndun wen ncho ladna be men wa leꞌaka utsambiꞌi ladoꞌo bega. No utsambiꞌi xa idub bega ndoꞌ iteanak be ta ugap, gal zha ilen Jesucristo Xwan beuna.
1TH 5:24 Leꞌa Dios sunka be ta ndee, leꞌa xa leꞌa mti bega no ndunka xa ta ndab xa.
1TH 5:25 Bego nak beuna xmen Cristo, unab bega ndoꞌ Dios gakno xa besa.
1TH 5:26 Unidiꞌizh bega ndoꞌ itea be xmen Jesús sa baꞌ sakndoꞌ besa, ta na nluu leꞌa bega nkweaꞌ ladna bexa.
1TH 5:27 Leꞌa naꞌ gáp ndoꞌ bega goꞌol bega git ndee ndoꞌ iteanak be xmen Jesús sa baꞌ, leꞌa ta wa ta nlad Dios gun bega.
1TH 5:28 Nat naꞌab naꞌ ndoꞌ Jesucristo Xwan beuna mas uzheꞌeb utsin gunno xa bega. Lika gak‑a.
2TH 1:1 Leꞌa naꞌ ndee Pabl no be ltsaꞌa naꞌ Silvano nsea Timoteo nkeꞌa besa git ndee ndoꞌ bego nzhealbe gezh Tesalónica baꞌ, bega nak be xmen Tad Dios no Jesucristo Xwan beuna.
2TH 1:2 Naꞌab naꞌ ndoꞌ Tad Dios no ndoꞌ Jesucristo Xwan beuna utsin gak bexa ndoꞌ bega no gun bexa wen yoo ladna bega.
2TH 1:3 Bega nak beuna xmen Cristo, leꞌa besa gab geꞌal nsaꞌa xno ndoꞌ Dios por bega lak nsabndoꞌ gun besa, geal leꞌa bega mas nsayungea ladna Jesús no mas nsayunkweaꞌ ladna bega be ltsaꞌa bega.
2TH 1:4 Ta weꞌe nten ladna besa ndadiꞌizh besa ndoꞌ be xmen Dios ndencho stapla be gezh, ná xteꞌe bi nxik bega no ngeꞌ ladna bega Jesús, maska xela ndanno be men bega no sian gealkweaꞌ nsatid bega.
2TH 1:5 Leꞌa ta wa nluuka leꞌa Dios ndun lakka nsabndoꞌ‑yá. Leꞌa ta na li nxik bega ndoꞌ be gealkweaꞌ wa, ta weꞌe leꞌa Dios gab leꞌa bega syoꞌoka gan yate sa nibeꞌe xa.
2TH 1:6 Ná leꞌa Dios utsaksi be men lbaꞌata ntsaksi bego baꞌ, lak nsabndoꞌ gun Dios.
2TH 1:7 Leꞌa gal zha ilengal Jesús Xwan beuna wa, leꞌa Dios gun leꞌa bego baꞌ no besa ndee yá lá iniꞌíta gealkweaꞌ wa lak ta nsatid beuna nat. Leꞌa xa wa itoꞌo gibeꞌa nsea be angel juert ten xa.
2TH 1:8 Leꞌa xa wa ilen lat bealꞌ, ndontsa utsaksi xa bexa lá nchandoꞌ Dios, bexa lá uxobgek ndoꞌ diꞌizh wen ten Jesucristo Xwan beuna.
2TH 1:9 Weꞌe leꞌa bexa wa iniꞌí dub gealkweaꞌ nunk lá idub, naꞌanpa yoo bexa wats Jesús no naꞌanpa iniꞌí bexa juers siꞌil ten Jesús.
2TH 1:10 Leꞌa wizh ilen xa wa, leꞌa itea be xmen xa gab leꞌa xa uzheꞌeb dub xa wen, no uzheꞌeb dub xa juert xa. Leꞌa lat bexa wa no bega kwe, geal leꞌa bega mbingea ladna ta mbidiꞌizh besa ndoꞌ bega.
2TH 1:11 Ta weꞌe leꞌa besa nab tseꞌe ndoꞌ Dios ten beuna gak bega lak nsabndoꞌ gak dub xa mti Dios, no usaꞌa xa juers ten xa gun bega itea be ta wen nlad bega no itea be tiꞌin ndun bega geal ngeꞌ ladna bega xa.
2TH 1:12 Weꞌe leꞌa be ta wen ndun bega wa uluu ndoꞌ men leꞌa Jesucristo Xwan beuna wa uzhebpa xa wen nak. No gab Jesús leꞌa bega wenka ndun. Leꞌa be ta wa li gak, geal leꞌa Dios no Jesucristo Xwan beuna uzheꞌeb utsin nak ndoꞌ beuna.
2TH 2:1 Bego nak beuna xmen Cristo, leꞌa cuent ten zha ilen Jesucristo Xwan beuna no izheꞌal beuna xa, gab besa ndoꞌ bega
2TH 2:2 leꞌa gor na gab men leꞌa Jesús wa mlenla, lá gungea ladna bega ta wa no ni lá yuꞌ ladna bega. Ncho xa gab leꞌa Espíritu ten Dios li ndab ndoꞌ xa. No ncho bexa gab leꞌa besa li mkeꞌa ndoꞌ dub git natal li mbidiꞌizh besa‑yá.
2TH 2:3 Parea blaꞌach bega naꞌan ton ukwiꞌinno bega, leꞌa Jesús wa naꞌanpa cha ilen gast nedka gakloo kwaꞌad be men ndoꞌ Dios, no gast ilen dub xabgiꞌi ugap ndap ke wa. Leꞌa Dios uzheꞌeb utsaksi xa wa.
2TH 2:4 Leꞌa xa ugap wa uka yankea be men Dios no iteata be taꞌa ndankea be men. No isob xa len niꞌi ten Dios, gab xa leꞌa xa leꞌa nak Dios.
2TH 2:5 ¿Lá ntseꞌa ladna bega zha, leꞌa naꞌ mbidiꞌizhka ta ndee, zha nchoꞌo naꞌ lat bega baꞌ?
2TH 2:6 Leꞌa bega uniꞌíka xtaꞌan nkentsaw lid cha ilen xabgiꞌi ugap wa, ndi gast galka zha ilen xa wa.
2TH 2:7 Leꞌa maxuꞌu wa xgaꞌach ndeyunla tiꞌin, parea leꞌa be ta ugap yoo wa naꞌanpa cha yoo gastka lid itatsoꞌ xa nsoꞌntsaw wa.
2TH 2:8 Weꞌe cha ilen xa ugap wa. Ná leꞌa gor ilen Jesús leꞌa xeꞌa siꞌil ten Jesús unitndoꞌ xa ugap wa. Leꞌa Jesús ulabitsa ndoꞌ xabgiꞌi wa, weꞌe leꞌa juers ten Jesús unitndoꞌ xa wa.
2TH 2:9 Parea leꞌa xa ugap wa ilenno juers ten maxuꞌu, no gun xa sianpa be ta yanseana be men, ndontsa ukwiꞌinno xa be men.
2TH 2:10 No gun xa sian be ta ugap ukedino xa be men lá ndap gealnaban ndoꞌ Dios, bexa lá nlad yankea gealngea ten Dios, ta nsaꞌa gealnaban.
2TH 2:11 Ta weꞌe leꞌa Dios ulaꞌa ukwiꞌinno xa ugap wa bexa, cha gungea ladna bexa gealkwiꞌin wa.
2TH 2:12 Leꞌa Dios utsaksi itea bexa na li lá gungea ladna gealngea ten Dios, bexa na ndi mas ndal ladna be ta ugap.
2TH 2:13 Bega nak beuna xa nkweaꞌ ladna Jesús, leꞌa besa nsabndoꞌka nsaꞌa xno ndoꞌ Dios por bega, geal leꞌa Dios leꞌa mti bega gast zha utexanta gizhliyo, ndontsa koꞌo Dios bega ndoꞌ be ke ten bega. Leꞌa Espíritu ten Dios mtsambiꞌi ladoꞌo bega, no mbingea ladna bega gealngea ten Dios.
2TH 2:14 Leꞌa juers ten diꞌizh wen ten Cristo ta mbidiꞌizh besa wa leꞌa Dios utezh bega, ndontsa no bega yoo sa chul wats Jesucristo Xwan beuna.
2TH 2:15 Leꞌa bego nak beuna xmen Cristo, dubtsa ute bega ndoꞌ Dios, no lá yalad bega be ta mluu besa, ta mbidiꞌizh besa no ta mkeꞌa besa ndoꞌ git.
2TH 2:16 Leꞌa Tad Dios nkweaꞌ ladna beuna no ndun xa nten ladna beuna idub tiemp, no nsaꞌa xa ta na ndenkeaꞌ beuna. Leꞌa naꞌ ndee naꞌab ndoꞌ xa wa no ndoꞌ Jesucristo Xwan beuna,
2TH 2:17 gun bexa lá yuꞌ ladna bega, no gakno bexa bega ndontsa sbeꞌen ta wen gudiꞌizh bega no gun bega.
2TH 3:1 Bega nak beuna xmen Cristo, leꞌa stub ta gáp naꞌ ndoꞌ bega. Unab bega ndoꞌ Dios gakno xa besa, ndontsa uxax iteꞌachso diꞌizh ten Jesús no gungea ladna be men‑a lak mbingea ladna bego‑yá.
2TH 3:2 No unab bega ndoꞌ Dios lá ulaꞌa xa xela gunno be men ugap besa, leꞌa ncho kwaꞌad bexa naꞌanpa ndangea ladna Jesús.
2TH 3:3 Ná leꞌa Jesús ndunka ta ndab xa: Usaꞌa xa juers ndoꞌ bega no ulaꞌach xa bega ndoꞌ be ta ugap.
2TH 3:4 Leꞌa ta na nak bega xmen Cristo, ta weꞌe uniꞌíka besa leꞌa bega ndeyunka be ta unibeꞌe besa, no gunkata bega be ta wa.
2TH 3:5 Naꞌab naꞌ ndoꞌ Dios gakno xa bega ikweaꞌ ladna bega be men lak nkweaꞌ ladna Dios bega, no uxik bega ndoꞌ be gealkweaꞌ lak mxik Jesús ndoꞌ be gealkweaꞌ.
2TH 3:6 Bego nak beuna xmen Cristo, inibeꞌe besa ta ndee ndoꞌ bega lak nlad Jesucristo gun besa: lá uchealtsaꞌata bega bexa ndangea ladna Jesús tal leꞌa bexa lá nlad gun tiꞌin, no lá kaꞌab bexa gun bexa lak mluu besa bega.
2TH 3:7 Leꞌa bega uniꞌíka xteꞌe mbin besa tiꞌin lat bega, leꞌa bega noga li nsabndoꞌ gun.
2TH 3:8 Leꞌa besa utixka be ta msaꞌa bega udaw besa wa. Leꞌa besa juert mbin tiꞌin teꞌal tezhea, ndontsa naꞌanpa bega kix ta udaw besa.
2TH 3:9 Leꞌa besa yoꞌo gan ngab ndoꞌ bega usaꞌa bega ta wa, parea leꞌa besa ndi mbin tiꞌin ndontsa uniꞌí bega xteꞌe nsabndoꞌ gun bega.
2TH 3:10 Leꞌa zha na ndencho besa lat bega, leꞌa besa ndab ndoꞌ bega leꞌa tal ton lá nlad gun tiꞌin, leꞌa xa wa liga lá gaw.
2TH 3:11 Ná nat leꞌa besa ndoꞌón leꞌa ncho bega ndesea ni lá ndun tiꞌin, ndi sbeꞌen ndeseawiꞌitsa bega xtiꞌin ndun ltsaꞌa bega.
2TH 3:12 Leꞌa Jesucristo Xwan beuna nlad gáp naꞌ ndoꞌ bego na li lá nlad gun tiꞌin wa: utsintsa bin bega tiꞌin ndontsa gap bega ta gaw bega.
2TH 3:13 Bega nak beuna xmen Cristo, lá izhanna bega gun bega be ta wen.
2TH 3:14 Tal ton lá nxobgek ndoꞌ be ta nkeꞌa besa ndoꞌ git ndee, lá uchealtsaꞌata bega xa wa, ndontsa ido ladna xa li ndun wa.
2TH 3:15 Parea naꞌanpa gunno bega xa cuent dub xa nyono bega, ndi utsintsa btenxeꞌa bega xa, geal leꞌa xa no nak xmen Cristo.
2TH 3:16 Nat naꞌab naꞌ ndoꞌ Dios xa ndun wen nyoꞌo ladna beuna wa, gun xa wenta yoo ladna bega idub tiemp ndoꞌ itea be taꞌa ntid bega, no gakno xa iteanak bega.
2TH 3:17 Leꞌa naꞌ Pabl yaꞌa naꞌ nkeꞌa naꞌ letr ndee ndoꞌ git, ta nidiꞌizh naꞌ ndoꞌ bega. Lndeꞌe nkeꞌa naꞌ‑yá ndoꞌ itea be git ntuꞌub naꞌ.
2TH 3:18 Naꞌab naꞌ ndoꞌ Jesucristo Xwan beuna mas uzheꞌeb utsin gunno xa iteanak bega. Lika nak‑a.
1TI 1:1 Leꞌa naꞌ ndee Pabl, xa na ndun tiꞌin ten Jesucristo lak unibeꞌe Dios, xa na ngoꞌo beuna ndoꞌ be ke ten beuna, no lak unibeꞌe Jesucristo Xwan beuna, xa na ngeꞌ ladna beuna.
1TI 1:2 Nkeꞌa naꞌ git ndee ndoꞌ lu Timoteo, leꞌa lu nak cuent xiꞌín naꞌ ta na ngeꞌ ladna lu Cristo wa. Naꞌab naꞌ ndoꞌ Tad Dios no ndoꞌ Jesucristo Xwan beuna mas uzheꞌeb utsin gak bexa ndoꞌ lu, no mas ikweaꞌ ladna bexa lu, no gun bexa wen yoo ladna lu.
1TI 1:3 Lak unaꞌab naꞌ ndoꞌ lu zha na yamer gaa naꞌ Macedonia, byaꞌan gezh Éfeso baꞌ ndontsa inibeꞌe lu ndoꞌ be men naꞌanpa uluꞌu bexa be ta naꞌanpa gealngea.
1TI 1:4 No ni lá ukenchaꞌ bexa be cuent naꞌan xtiꞌin, cuent ten kwaꞌadpa be usan gox polta. Leꞌa be ta wa ndun nbeyotoꞌotsa bexa, naꞌanpa gakno‑yá mas igeꞌ ladna bexa Dios.
1TI 1:5 Li nibeꞌe naꞌ ndoꞌ lu ndontsa ta ugeaka ikweaꞌ ladna bexa be ltsaꞌa bexa. Li syoꞌo gan gun bexa tal leꞌa ladoꞌo bexa umbiꞌi nak, no tal leꞌa bexa lá ndap ke ndoꞌ Dios, no tal igeꞌka ladna bexa Jesús.
1TI 1:6 Parea ncho bexa mlaꞌa be ta wa, cha ndi ndeyotoꞌo bexa be ta naꞌan xtiꞌin.
1TI 1:7 Leꞌa bexa wa nlad gak mech ten ley ten Dios, ndab bexa leꞌa ta nluu bexa ta ugeaka, parea leꞌa bexa ni lá nyakbeꞌena xtaꞌan ndadiꞌizh bexa.
1TI 1:8 Leꞌa beuna uniꞌíka leꞌa ley ten Dios ta wenka, tal leꞌa beuna guntiꞌin‑a lak nsabndoꞌ‑yá.
1TI 1:9 Leꞌa ley wa naꞌanpa nibeꞌe ndoꞌ bexa ndun ta wen. Leꞌa‑yá ndi nibeꞌe ndoꞌ bexa ugap nak, bexa na lá nxobgek ndoꞌ Dios, bexa ugap ndun, bexa ndap ke ndoꞌ Dios, bexa lá ndap mod ndoꞌ Dios, bexa nisi Dios, bexa ndut leꞌaka xus na no leꞌaka xnaꞌa na, bexa ndut stubga men,
1TI 1:10 no bexa ngal stub xa naꞌanpa xa ten xa, no be xabgiꞌi ndal ladna leꞌaka ltsaꞌa bgiꞌi na, no bexa ndowaꞌan men, no bexa ukwiꞌin, no bexa ndun gealkwiꞌin ndoꞌ juez, no bexa ndun stub taꞌa naꞌanpa nak lak nak gealngea ten Dios.
1TI 1:11 Leꞌa gealngea wa diꞌizh wen ten Dios xa ndon leꞌa wen, ta msaꞌa Dios ndadiꞌizh naꞌ ndoꞌ be men.
1TI 1:12 Nsa naꞌ xno ndoꞌ Jesucristo Xwan beuna xa ndakno naꞌ, leꞌa xa mnaꞌ leꞌa naꞌ sun lakka nlad xa, ta weꞌe msoꞌ xa naꞌ gun naꞌ tiꞌin ten xa.
1TI 1:13 Leꞌa polta ndi unisi naꞌ Jesucristo, no ukesankea naꞌ tsoꞌo be xmen Jesús, no mtsaksi naꞌ bexa. Parea leꞌa Dios mkweaꞌ ladna naꞌ, geal leꞌa naꞌ galka lá iní ti ugap nak ta li mbin naꞌ wa, zha na bi lá ndangea lad naꞌ Jesús.
1TI 1:14 Leꞌa Dios uzhebpa utsin mbinno naꞌ, no ndun xa mas ngeꞌ lad naꞌ xa no mas nkweaꞌ lad naꞌ be men, ta na nak naꞌ xmen Cristo Jesús.
1TI 1:15 Leꞌa ta gáp naꞌ ndee ta ugeaka, nsabndoꞌ itea be men gungea ladna leꞌa Jesucristo mbiꞌid ndoꞌ gizhliyo ndontsa koꞌo xa bexa ugap nak ndoꞌ be ke ten bexa. Leꞌa lat itea bexa ugap wa leꞌa naꞌ ndee ndon leꞌa mas ugap ngok.
1TI 1:16 Ná leꞌa Dios mkweaꞌ ladna naꞌ, ndontsa iniꞌí be men xteꞌe mbingeꞌ ladna Jesucristo ndoꞌ naꞌ, cha no bexa gungea ladna Jesús. Cha li gap bexa gealnaban ndoꞌ Dios, ta nunk lá idub.
1TI 1:17 Leꞌa Dios leꞌa nak xa ndon leꞌa nibeꞌe idub tiemp, naꞌanpa gat xa no naꞌanpa naꞌ beuna xa. Leꞌa xa nabkama nak Dios xa ndon leꞌa ndák. Idub tiemp gap beuna mod ndoꞌ xa, no gab beuna leꞌa xa uzhebpa dub xa juert. Lika nak‑a.
1TI 1:18 Leꞌa ta ndee ndáp naꞌ ndoꞌ lu Timoteo leꞌa lu cuent nak xiꞌín naꞌ: bin tiꞌin ten Dios idub ncho ladna lu, lak ndabka bexa gun lu, bexa ndadiꞌizh sakndoꞌ Dios.
1TI 1:19 Dubtsa bgeꞌ ladna lu Jesucristo no bin laktsa nsabndoꞌ‑yá. Lá gun lu lak ndun ncho bexa mlaꞌa nes ten Dios,
1TI 1:20 lak mbin Himeneo no Alejandro. Leꞌa nat mla naꞌ bexa gunno maxuꞌu bexa lak nlad maxuꞌu, ndontsa yá lá inisita bexa Dios.
1TI 2:1 Ndon ned ta ndee gáp naꞌ ndoꞌ lu: unab ta nkiꞌin lu ndoꞌ Dios, no bidiꞌizhno Dios, no unab ndoꞌ Dios gakno Dios itea be men, no bsaꞌa xno ndoꞌ Dios.
1TI 2:2 No unab ndoꞌ Dios gakno Dios bexa naktiꞌin no itea bexa nibeꞌe. Weꞌe gust yoo beuna no wen yoo beuna, no idub tiemp uxobgek beuna ndoꞌ Dios no utsin gak beuna ndoꞌ be men.
1TI 2:3 Leꞌa Dios xa na ngoꞌo beuna ndoꞌ be ke ten beuna isak ladna tal li gudiꞌizhno beuna xa.
1TI 2:4 Leꞌa xa nlad itea be men itoꞌobe ndoꞌ be ke ten na, cha igondoꞌ bexa gealngea ten Dios.
1TI 2:5 Leꞌa Dios dubkama ncho, no ncho dubtsa xa sun gan wen yaꞌan beuna ndoꞌ Dios, leꞌa ta wa Jesucristo,
1TI 2:6 xa na msaꞌa leꞌaka leꞌa xa ngut sakndoꞌ itea be men, gor na nsabndoꞌka li gun xa wa.
1TI 2:7 Ta weꞌe leꞌa Dios msoꞌ naꞌ gudiꞌizh naꞌ be ta ndee, no mtuꞌub xa naꞌ gauluu naꞌ‑yá ndoꞌ bexa naꞌanpa xa Israel ndontsa gungea ladna bexa gealngea ndee. Leꞌa Cristo nsobwiꞌi leꞌa ta ndáp naꞌ ndee ta ugeaka, naꞌanpa gealkwiꞌin‑a.
1TI 2:8 Leꞌa naꞌ nlad leꞌa guniꞌi pa nyakjunt be xmen Jesús, gudiꞌizhno be xabgiꞌi Dios no ixits bexa yaꞌa bexa ndoꞌ Dios, no umbiꞌi gak ladoꞌo bexa, no naꞌanpa igiꞌi bexa, no naꞌanpa kuyo bexa.
1TI 2:9 No nladga naꞌ gak be xagots be xab na dub mod na naꞌanpa ugap iwiꞌi be xabgiꞌi ndoꞌ xa, no naꞌanpa izhinnona bexa be lad ndap bexa. No naꞌanpa uzheꞌeb usaxkwaꞌa bexa gek bexa. No naꞌanpa uzheꞌeb guntiꞌin bexa be ta oro no perla no be lad ndon leꞌa uyap.
1TI 2:10 Ndi gun be xagots sbeꞌen be ta wen, lak nsabndoꞌ gun be xagots ndankea Dios.
1TI 2:11 Leꞌa be xagots wa nsabndoꞌ xetsa ulaꞌach ta ndab xa nluꞌu diꞌizh ten Dios, ni naꞌan xteꞌe gab bexa.
1TI 2:12 Leꞌa naꞌ ndáp leꞌa be xagots lá nsabndoꞌ uluꞌu, no naꞌanpa ndi leꞌa be xagots inibeꞌe be xabgiꞌi sa ndaꞌutsid bexa diꞌizh ten Dios. Leꞌa be xagots wa nsabndoꞌ xetsa kwe,
1TI 2:13 geal leꞌa Dios ned Adán mbindeꞌe, weꞌeta mbindeꞌe xa Eva.
1TI 2:14 Leꞌa maxuꞌu naꞌanpa ukwiꞌinno Adán, leꞌa xa ndi Eva mkwiꞌinno, cha mbin Eva dub ta lid leꞌa nak ndoꞌ Dios.
1TI 2:15 Parea leꞌa ta na ndap be xagots meꞌed, leꞌa Dios sgoꞌo bexa ndoꞌ be ke ten bexa tal leꞌa bexa lá ulaꞌa nes ten Dios, no ikweaꞌ ladna bexa be ltsaꞌa bexa, no umbiꞌi gak ladoꞌo bexa ndoꞌ Dios.
1TI 3:1 Leꞌa ta gáp naꞌ ndee ta ugeaka: Tal ton dub xa nlad yansu be xmen Cristo, leꞌa ta nlad xa wa ta wenka.
1TI 3:2 Parea leꞌa dub xa nchansu be xmen Cristo nsabndoꞌ utsin gak gast naꞌan ton gab leꞌa xa ugap nak. No dubtsa xagots nsabndoꞌ gap xa, no wen gunbeꞌe xa, no list gak xa, no utsin gun xa ndontsa gap be men mod ndoꞌ xa, no utsin gak xa ndoꞌ itea be men nchaꞌa ta lid xa, no isuꞌu xa uluꞌu xa be men.
1TI 3:3 No lá gun xa gealgu, no naꞌanpa ukwaꞌan xa uyo, no naꞌanpa ukwiꞌinno xa be men natsa gun xa gan med. Ndi nsabndoꞌ utsin gak xa, no bchaꞌan gak xa, no lá ukwaꞌan xa sian med.
1TI 3:4 No nsabndoꞌ utsin ulaꞌach xa bexa ta lid xa. Leꞌa be xin xa wa nsabndoꞌ uxobgek ndoꞌ xa, no gap be xin xa mod ndoꞌ xa.
1TI 3:5 Leꞌa tal ton lá isuꞌu ulaꞌach ta lid na, leꞌa xa liga lá isuꞌu yansu gezh ten Dios.
1TI 3:6 No leꞌa dub xa tiꞌi mbingea ladna Cristo lá nsabndoꞌ gak xa yansu be xmen Cristo, ndontsa lá izhinna xa, cha utsaksi Dios xa lak utsaksi Dios maxuꞌu.
1TI 3:7 No nsabndoꞌ utsin gak xa, ndontsa gap be men mod ndoꞌ xa, bexa naꞌanpa nak xmen Cristo. Weꞌe leꞌa xa wa naꞌanpa ido ladna, no lá gailaꞌ xa ndoꞌ yaꞌa maxuꞌu.
1TI 3:8 No liga leꞌa bexa ndakno be xmen Cristo nsabndoꞌ gak dub xa gap be men mod ndoꞌ na. Lá nsabndoꞌ gun xa gealkwiꞌin. No naꞌanpa gun bexa gealgu. No naꞌanpa ukwiꞌinno bexa be men ndontsa li gun xa gan med.
1TI 3:9 No uxobgek bexa ndoꞌ diꞌizh wen ten Dios idub ncho ladna bexa.
1TI 3:10 Leꞌa bexa gakno wa nsabndoꞌ ned gak preb naga ndun xa itea be ta ndee. Weꞌeta gak xa tiꞌin wa, tal xa utsinka ndun.
1TI 3:11 No liga leꞌa be xagots nsabndoꞌ utsin gak. No naꞌanpa gudiꞌizh bexa be cuent gix, no wen gunbeꞌe bexa, no utsin gun xa itea be taꞌa ndontsa igeꞌ ladna be men xa.
1TI 3:12 Leꞌa be xabgiꞌi gakno wa nsabndoꞌ gap dubtsa xagots. No utsin ulaꞌach bexa be xin xa no iteata bexa ta lid xa.
1TI 3:13 Leꞌa bexa na wen ndun tiꞌin ndakno be xmen Cristo wa, liga ndun gan ndap be men mod ndoꞌ na, no naꞌanpa izheb bexa gudiꞌizh bexa ta ngeꞌ ladna bexa Cristo Jesús.
1TI 3:14 Ndanbeꞌe naꞌ leꞌa naꞌ sken gal inaꞌ lu. Leꞌa naꞌ nkeꞌa be ta ndee ndoꞌ lu,
1TI 3:15 ndontsa tal naꞌ naꞌanpa cha gal, yá uniꞌí lu xteꞌe nsabndoꞌ gak lu no itea bexa nak xmen Dios, leꞌa beuna nak xmen Dios nban, no lá ulaꞌa beuna initndoꞌ gealngea ten Cristo.
1TI 3:16 Ta ugeaka leꞌa ta ugaꞌach mluꞌu Dios ndoꞌ beuna dub ta uzheꞌeb siꞌil nak: Leꞌa Dios mbiꞌid ndoꞌ gizhliyo, myak xa men. Leꞌa Espíritu ten Dios cha mluu leꞌa xa Xinka Dios. Leꞌa be angel ten Dios cha uniꞌí xa. Leꞌa diꞌizh ten xa mgen itea be nacion. Weꞌe leꞌa be men mbingea ladna xa. Cha nseaꞌ xa gibeꞌa.
1TI 4:1 Parea leꞌa Espíritu ten Dios uyaꞌal ndab leꞌa be wizh lult wa ncho bexa ulaꞌa ta na ngeꞌ ladna bexa Dios. Ndi ulaꞌach bexa ta gudiꞌizh be mbi bxin ukwiꞌin, cha isankea bexa tsoꞌo be ta wa.
1TI 4:2 Leꞌa bexa wa gungea ladna ta nluu bexa ukwiꞌin, bexa na ndab nluu gealngea parea gealkwiꞌin‑a, gast ni lá ndo ladna bexa no be ta ugap ndun bexa wa.
1TI 4:3 Leꞌa bexa ukwiꞌin wa uka uchilyaꞌa be men, no gab bexa ncho be taꞌa lá nsabndoꞌ gaw be men. Parea leꞌa Dios mbindeꞌe be ta wa ndontsa usaꞌa beuna xno ndoꞌ Dios, cha gaw beuna‑yá, beuna nak be xmen xa, no nchandoꞌ beuna gealngea ten xa.
1TI 4:4 Leꞌa itea be taꞌa mbindeꞌe Dios sbeꞌen ta wen, syoꞌo gan gaw beuna‑yá tal leꞌa beuna usaꞌa xno ndoꞌ Dios.
1TI 4:5 Leꞌa beuna syoꞌoka gan gaw‑a, ta na li ndab diꞌizh ten Dios no ta na nsaꞌa beuna xno ndoꞌ Dios.
1TI 4:6 Tal leꞌa lu nluu be ta ndee ndoꞌ be xmen Cristo sa baꞌ, leꞌaka ndun lu tiꞌin ten Jesucristo. Leꞌa be diꞌizh ten Dios ta ndangea ladna beuna wa, no gealngea ten Dios ta nxobgek lu ndoꞌ na wa ndun gan mas juert gak lu.
1TI 4:7 Lá ulaꞌach lu be cuent gizhliyo, be ta naꞌan xtiꞌin, ndi mas ulo gan gun lu ta nsak ladna Dios.
1TI 4:8 Leꞌa bexa ndun ejercicio, leꞌa ta wa ndaknoka bexa. Parea leꞌa ta na ndun beuna ta nsak ladna Dios, leꞌa ta wa ndun wen yoo beuna tiemp nat no tiemp tiꞌi ilen.
1TI 4:9 Leꞌa ta ndee wa ta ugeaka, nsabndoꞌ itea be men gungea ladna‑yá.
1TI 4:10 Ta weꞌe ngo beuna gan ndun beuna tiꞌin ten Dios, geal leꞌa beuna ngeꞌ ladna Dios nban, xa na ngoꞌo be men ndoꞌ be ke ten bexa, bexa na ndangea ladna Dios.
1TI 4:11 Leꞌa be ta ndee wa nsabndoꞌ uluu lu no inibeꞌe lu ndoꞌ bexa.
1TI 4:12 Maska ben lu leꞌa bexa nsabndoꞌ gap mod ndoꞌ lu. Ta weꞌe nsabndoꞌ utsin gudiꞌizh lu, no utsin gak lu, no ikweaꞌ ladna lu bexa, no gun lu lak nlad Espíritu ten Dios, no igeꞌ ladna lu Cristo, no umbiꞌi gak ladoꞌo lu. Tal leꞌa lu li gun, leꞌa bexa iniꞌí xteꞌe nsabndoꞌ gun bexa.
1TI 4:13 Nat zha biseata gal naꞌ sa baꞌ, biꞌilta diꞌizh ten Dios ndoꞌ bexa, no btenxeꞌata bexa, no bluuta bexa.
1TI 4:14 No mas bintiꞌin ta ndák lu, ta msaꞌa Dios ndoꞌ lu gor na mxoꞌob bexa nchansu be men wa yaꞌa na gek lu, cha mbidiꞌizh bexa sakndoꞌ Dios cuent ten lu.
1TI 4:15 Bin be ta ndee no dub ndoꞌtsa li bin, ndontsa iniꞌí be men leꞌa lu mas nsayák ndun lak nlad Dios.
1TI 4:16 Uzhebpa blaꞌach xtaꞌan ndun lu no xtaꞌan nluꞌu lu bexa. Tal lu dubtsa li gun, leꞌa lu gap gealnaban ndoꞌ Dios no bexa na isakyoꞌón ta ndadiꞌizh lu baꞌ wa.
1TI 5:1 No lá kuyo lu be xabgiꞌi gox, ndi btenxeꞌa bexa cuentta xus lu; no btenxeꞌa be xabgiꞌi ben cuentta wit lu.
1TI 5:2 Btenxeꞌa be xagots gox cuentta xnaꞌa lu; no btenxeꞌa be xagots ben cuentta bsan lu, ni naꞌanpa ugap gunbeꞌe lu.
1TI 5:3 Gokno be xagots ngut xabgiꞌi ten na, bexa lá ndapta ton ulaꞌach na.
1TI 5:4 Parea leꞌa tal ncho dub xagots ngut xabgiꞌi ten na wa ndap xa xin xa no xinxots xa, leꞌa bexa wa nsabndoꞌ utsid xteꞌe gun bexa ta nlad Dios, ulaꞌach bexa ltsaꞌa xa wa, lak mlaꞌach xagots wa bexa. Leꞌa ta ndee ta wen nsak ladna Dios.
1TI 5:5 Parea leꞌa bexa na ngut xabgiꞌi ten na wa, bexa yá lá ndapta ton ulaꞌach, leꞌa bexa wa nsabndoꞌ igeꞌ ladna Dios no gudiꞌizhno xa Dios teꞌal tezhea.
1TI 5:6 Ná tal leꞌa bexa ndi ndun sbeꞌen ta nsak ladna bexa, leꞌa ndoꞌ Dios leꞌa xa nak cuent dub xa ngutla maska bi nban xa.
1TI 5:7 Unibeꞌe be ta ndee ndoꞌ bexa baꞌ, ndontsa naꞌan ton xteꞌe iníꞌi ndoꞌ bexa.
1TI 5:8 Leꞌa tal ton lá ulaꞌach bexa nchono xa no iteata be ltsaꞌa xa, leꞌa xa wa lá ndun lak nsabndoꞌ gun be xmen Cristo, no mas ugap nak xa ndoꞌ bexa lá ndangea ladna Cristo.
1TI 5:9 Leꞌa bexa na ngut xabgiꞌi ten na, bexa na ncho masla chon gaꞌal liꞌin, leꞌa bega nsabndoꞌ gakno bexa wa, tal xa dubtsa xabgiꞌi wa ngwankea,
1TI 5:10 no tal ndab be men leꞌa xa wenka ndun, no utsin mlaꞌach xa be xin xa, no utsin mbin xa ndoꞌ be men usea ta lid xa, no mbin xa tiꞌin ndoꞌ be xmen Cristo, no ngokno xa bexa na kweaꞌ uyoꞌobe, no sbeꞌen be ta wen mbin xa.
1TI 5:11 Parea leꞌa be xagots ben bexa ngut xabgiꞌi ten na, naꞌanpa nsabndoꞌ gakno bega xa, leꞌa gal gor leꞌa bexa nladgal uchilyaꞌa, weꞌe leꞌa bexa yá lá gunta tiꞌin ndoꞌ Cristo.
1TI 5:12 Leꞌa tal bexa li gun leꞌa bexa ndap ke ndoꞌ Dios, leꞌa bexa lá ngun lak ndab bexa gor ned wa.
1TI 5:13 No leꞌa be xagots ben wa syak zhaꞌab, sbeꞌen ikesea xa be ta lid men. No sadiꞌizh bexa cuent gix, no slaꞌach xa xtaꞌan ndun be men, no sadiꞌizh xa be ta lá nsabndoꞌ gudiꞌizh xa.
1TI 5:14 Ta weꞌe leꞌa naꞌ nlad leꞌa be xagots ben ngut xabgiꞌi ten na wa ndi uchilyaꞌa bexa, no gap bexa xin bexa, no ulaꞌach bexa ta lid bexa. Weꞌe leꞌa be men naꞌanpa inisi bexa wa.
1TI 5:15 Li ndáp naꞌ geal leꞌa ncho be xagots wa myach, cha ndi usankea bexa tsoꞌo maxuꞌu.
1TI 5:16 Leꞌa tal ton dub xabgiꞌi natal dub xagots nak xmen Cristo, no ndap xa dub ltsaꞌa xa dub xagots ngut xabgiꞌi ten na, leꞌa xa wa nsabndoꞌ ulaꞌach xagots wa, ndontsa naꞌanpa sbeꞌen gezh ten Dios gakno xa. Weꞌe leꞌa bexa syoꞌo gan mas gakno be xagots na ta ugeaka lá ndap ton gakno xa.
1TI 5:17 Leꞌa bexa na utsin nchansu be xmen Dios, leꞌa bega nsabndoꞌ gap mod ndoꞌ bexa no kix bega ikaꞌa bexa. No mas li binno bega bexa na nluu diꞌizh ten Cristo.
1TI 5:18 Lak nkeaniꞌi diꞌizh ten Dios, ndab‑a: “Lá ko bega gix xeꞌe ngon gor na ndun ma tiꞌin.” No ndab‑a: “Leꞌa xa ndun tiꞌin nsabndoꞌ yax ten na.”
1TI 5:19 Naꞌanpa ulaꞌach lu tal ton usake dub xa nchansu be xmen Cristo tal xa naꞌanpa top natal chon xa.
1TI 5:20 Leꞌa tal xa gunta ta ugap wa, uteyo xa wa ndoꞌ gaꞌal itea bexa, ndontsa izheb bexa naꞌanpa no bexa li gun.
1TI 5:21 Leꞌa Dios no Jesucristo Xwan beuna no be angel ten Dios ndewiꞌi gáp naꞌ ta ndee ndoꞌ lu: gun lu lak ndab ta nkeꞌa naꞌ ndee, ni naꞌanpa uti lu bexa nladtsa lu.
1TI 5:22 No gor na koxoꞌob lu dub xa yansu gezh ten Dios, nsabndoꞌ ned gunbeꞌe lu naga utsin nak xa. Leꞌa tal xa ndun dub ta ugap leꞌa be men gab leꞌa lu no ndap ke. Ndi umbiꞌitsa gok ndoꞌ Dios.
1TI 5:23 Leꞌa ta na sian biaj li ndakweaꞌ len lu wa, lá goo lu nabtsa nits. Ndi goo lu nits yoo dub tuzh vin ndoꞌ‑yá.
1TI 5:24 Leꞌa ncho bexa ndun dub ta ugap, cha uxax iniꞌí be men‑a mas biseata usake dub xa‑yá. No nchoga bexa chaꞌaw nluꞌu be ta ugap ndun na.
1TI 5:25 No liga ncho bexa ndun ta wen cha uxax iniꞌí be men‑a. No ncho bexa ndun ta wen cha naꞌanpa nluꞌu‑yá, parea gal dub wizh leꞌa‑yá uluꞌuka.
1TI 6:1 Leꞌa bexa nchaꞌndoꞌo ndoꞌ yaꞌa dub men, leꞌa bexa wa nsabndoꞌ gap mod ndoꞌ xa nak xwan bexa wa, ndontsa naꞌanpa inisi be men Dios no diꞌizh ten Dios.
1TI 6:2 No tal ncho xwan xa no ndangea ladna Cristo, naꞌanpa ni lá gap bexa mod ndoꞌ xa geal ta na no xa nak xmen Cristo. Ndi nsabndoꞌ mas wen gun bexa tiꞌin ndoꞌ xa wa, leꞌa xwan tiꞌin wa no nak xmen Cristo no nkweaꞌ ladna Dios xa wa. Be ta ndee wa bluꞌu lu bexa no btenxeꞌa lu bexa.
1TI 6:3 Leꞌa tal ton nluu dub ta xaꞌaga, dub ta naꞌanpa nak lak nak gealngea ten Jesucristo Xwan beuna, ni naꞌanpa lak nlad Dios gak beuna,
1TI 6:4 leꞌa xa wa dub xa zhinpa, ná xa naꞌan xtaꞌan ndák. Uzhebpa ndal ladna xa nyotoꞌo xa cuent ten xteꞌe gab be diꞌizh. Ta weꞌe ndaklono xa dub xa ndap taꞌa, no nyo bexa, no kweaꞌ níꞌi bexa ndoꞌ ltsaꞌa xa, no naꞌanpa ngeꞌ ladna bexa ltsaꞌa xa.
1TI 6:5 No sbeꞌen li nyotoꞌo bexa geal leꞌa xa naꞌanpa leꞌa ndanbeꞌe no lá nchandoꞌ xa gealngea. Ni xa tal xa uchealtsaꞌa bexa ndankea Dios leꞌa xa sian med gun gan. Lá uchealtsaꞌa lu bexa li nak wa.
1TI 6:6 Leꞌa ta na ndun beuna ta nsak ladna Dios wa uzhebpa ndun wen yoo beuna, tal leꞌa beuna ntenno ladna be ta ndap beuna.
1TI 6:7 Lak ulansea beuna ndoꞌ gizhliyo ndee naꞌan xtaꞌan nseano beuna, no liga naꞌan xtaꞌan yoꞌo beuna.
1TI 6:8 Ta weꞌe tal beuna ndap ta gawtsa beuna no xabtsa beuna, nsabndoꞌ itenno ladna beuna ta wa.
1TI 6:9 Parea leꞌa bexa na nsankea tsoꞌo med wa uxax ndailaꞌ ndoꞌ yaꞌa maxuꞌu. No uzheꞌeb nsaꞌab ladna bexa be ta naꞌan xtiꞌin, ta na leꞌa gun kweaꞌ yoo xa no sian gealkweaꞌ iniꞌí xa.
1TI 6:10 Leꞌa ta na nsankea be men tsoꞌo med wa, leꞌa ta wa nak xan itea be ta ugap. Leꞌa ncho bexa nsaꞌab ladna sian med, ta weꞌe mlaꞌa bexa nes ten Dios, cha sianpa gealkweaꞌ uniꞌí bexa.
1TI 6:11 Parea leꞌa lu Timoteo xmen Dios, bxoꞌon ndoꞌ be ta ugap wa. Ndi ulo gan gun lu sbeꞌen ta wen, lak nsak ladna Dios. No mas bgeꞌ ladna lu Cristo, no bkweaꞌ ladna lu be ltsaꞌa lu. No ulo gan uxik lu ndoꞌ itea be taꞌa, no bchaꞌan gok.
1TI 6:12 Uzhebpa bin juers gun lu lak nsabndoꞌ gun dub xa ngeꞌ ladna Cristo, weꞌe gap lu gealnaban nunk lá idub. Leꞌa Dios leꞌa mti lu gap lu gealnaban wa, no mbidiꞌizh lu ndoꞌ kwaꞌad men leꞌa lu ngeꞌ ladna Cristo.
1TI 6:13 Leꞌa nat nsobwiꞌi Dios, xa na nsaꞌa gealnaban ndoꞌ itea be ta ncho, no nsobwiꞌi Jesucristo, xa na utsin mbidiꞌizh ndoꞌ gaꞌal Poncio Pilat, leꞌa naꞌ gáp ndoꞌ lu,
1TI 6:14 uxobgek lu ndoꞌ iteanak be ta nlad Dios gun lu, weꞌe ni dub ke lá gap lu ndoꞌ Dios. Li bin gast gal zha ilen Jesucristo Xwan beuna.
1TI 6:15 Leꞌa gal zha na nlad Dios, leꞌa Jesús ilenka. Leꞌa Dios dubkama nak Dios, nak xa Xwan iteanak be taꞌa no Xa Nibeꞌe ndoꞌ itea bexa nibeꞌe.
1TI 6:16 Leꞌa Dios dubkama nak xa naꞌanpa gat, xa ncho ndoꞌ xeꞌa naꞌan ton ibii, xa ni dub men gol niꞌí, no ni lá yoo gan inaꞌ be men xa. ¡Idub tiemp gab beuna leꞌa Dios xa ndon leꞌa wen no idub tiemp nibeꞌe xa! Lika nak‑a.
1TI 6:17 Leꞌa bexa na ndap sian be taꞌa ndoꞌ gizhliyo ndee, gud ndoꞌ bexa lá izhinnona bexa‑yá, no ni lá igeꞌ ladna bexa ta wa, leꞌa ta wa uxax initndoꞌ. Nsabndoꞌ ndi igeꞌ ladna bexa Dios nban, xa na leꞌa nsaꞌa itea be taꞌa ndontsa wen yoo beuna.
1TI 6:18 Gud ndoꞌ bexa wa utsin gak bexa no sian be ta wen gun bexa, no naꞌanpa uxin gak bexa.
1TI 6:19 Leꞌa ta wa cuent kochaꞌaw bexa sian be ta wen gibeꞌa, ta ikaꞌa bexa tiemp ilen, no gap bexa gealnaban nunk lá idub.
1TI 6:20 Timoteo, uzhebpa blaꞌach tiꞌin msaꞌa Dios gun lu. Lá ulaꞌach lu be diꞌizh ugap ndadiꞌizh be men, leꞌa ta wa naꞌan xtiꞌin. No lá ulaꞌach lu be gealkwiꞌin ndadiꞌizh be men, maska ndab bexa leꞌa‑yá ta ugeaka.
1TI 6:21 Leꞌa ncho bexa usankea tsoꞌo be ta wa, cha ndi mlaꞌa bexa nes ten Dios. Leꞌa Dios gun wen yoo ladna lu. Lika gak‑a.
2TI 1:1 Leꞌa naꞌ ndee Pabl, xa mtuꞌub Dios gun naꞌ tiꞌin ten Jesucristo, gudiꞌizh naꞌ diꞌizh ten Dios, ta nsaꞌa gealnaban ndoꞌ bexa nak xmen Cristo Jesús.
2TI 1:2 Nkeꞌa naꞌ git ndee ndoꞌ lu Timoteo, leꞌa naꞌ nkweaꞌ ladna lu cuent dub xiꞌín naꞌ. Naꞌab naꞌ ndoꞌ Tad Dios no ndoꞌ Jesucristo Xwan beuna mas uzheꞌeb utsin gak bexa ndoꞌ lu, no mas ikweaꞌ ladna bexa lu, no gun bexa wen yoo ladna lu.
2TI 1:3 Leꞌa gor na ndadiꞌizhno naꞌ Dios teꞌal tezhea ntseꞌa lad naꞌ lu no nsa naꞌ xno ndoꞌ Dios, xa na idub ncho lad naꞌ ndun naꞌ tiꞌin ndoꞌ na, lak mbin be usan gox ten naꞌ.
2TI 1:4 Leꞌa gor na ntseꞌa lad naꞌ xteꞌe uban myoꞌo ladna lu, ta weꞌe nlad naꞌ gal inaꞌ naꞌ lu ndontsa iten lad naꞌ.
2TI 1:5 No ntseꞌa lad naꞌ xteꞌe ngeꞌka ladna lu Cristo, lak ned xnaxots lu Loida no xnaꞌa lu Eunice mgeꞌ ladna Cristo. Leꞌa naꞌ uní leꞌa lu likaga ngeꞌ ladna Cristo.
2TI 1:6 Ta weꞌe ndáp naꞌ ndoꞌ lu bin juers guntiꞌin lu ta ndák lu, ta msaꞌa Dios ndoꞌ lu gor mxoꞌob naꞌ yaꞌa naꞌ gek lu.
2TI 1:7 Leꞌa ta na nsaꞌa Dios ndoꞌ beuna naꞌanpa ta izheb beuna. Leꞌa Dios ndi nsaꞌa juers ndoꞌ beuna, ndontsa ikweaꞌ ladna beuna be men, no gaisaꞌab beuna ndoꞌ be ta ugap.
2TI 1:8 Ta weꞌe lá ido ladna lu gudiꞌizh lu cuent ten Cristo Xwan beuna. No naꞌanpa idono ladna lu naꞌ, ta nkea naꞌ litgiꞌib ndee. Ndi lá izheb lu itid lu gealkweaꞌ geal ndadiꞌizh lu diꞌizh wen ten Cristo, leꞌa Dios usaꞌa juers uxik lu ndoꞌ ta wa.
2TI 1:9 Leꞌa Dios uloꞌo beuna ndoꞌ be ke ten beuna, no utezh xa beuna, umbiꞌi gak ladoꞌo beuna ndoꞌ xa. Parea naꞌanpa li ngun xa ke na ndun beuna ta wen. Ndi leꞌa zha biseata gakndeꞌe gizhliyo leꞌa Dios mbinbeꞌe li utsin gunno xa beuna juers ten Cristo Jesús.
2TI 1:10 Nat leꞌa Dios mluu tant nkweaꞌ ladna xa beuna ta na ulen Jesucristo, xa ngoꞌo beuna ndoꞌ be ke ten beuna. Leꞌa xa wa mbin gan ndoꞌ juers ten gealgut, no nsaꞌa xa gealnaban nunk lá idub ndoꞌ bexa ndangea ladna diꞌizh wen ten xa.
2TI 1:11 Leꞌa Dios leꞌa mti naꞌ gudiꞌizh naꞌ diꞌizh wa. No msoꞌ xa naꞌ uluu naꞌ‑yá ndoꞌ bexa naꞌanpa xa Israel.
2TI 1:12 Ta weꞌe nat lndeꞌe ntiꞌid naꞌ be gealkweaꞌ ndee. Ná naꞌ ni lá ndo ladna, leꞌa naꞌ nchandoꞌ Cristo xa na ngeꞌ lad naꞌ. No uní naꞌ leꞌa xa ndapka juers ulaꞌach xa gealnaban ten naꞌ, gast gal wizh ilengal xa.
2TI 1:13 Nat bin laktsa ndab be diꞌizh wen mbidiꞌizh naꞌ ndoꞌ lu, ná xteꞌe ngeꞌ ladna beuna Dios no xteꞌe nkweaꞌ ladna beuna be men, ta na nak beuna xmen Cristo Jesús.
2TI 1:14 Leꞌa Espíritu ten Dios, xa na ncho len ladoꞌo beuna, gakno lu utsin gudiꞌizh lu be diꞌizh msaꞌa Dios ndoꞌ lu.
2TI 1:15 Leꞌa lu yá uniꞌíka leꞌa Figelo no Hermógenes no iteata bexa ndencho Asia yá naꞌantapa ndakno naꞌ.
2TI 1:16 Naꞌab naꞌ ndoꞌ Dios gakno Dios bexa ncho ta lid Onesíforo, geal leꞌa xa sianpa biaj ndakno naꞌ, no naꞌanpa idono ladna xa naꞌ, maska nkea naꞌ litgiꞌib.
2TI 1:17 Ndi patsa ulansea xa Roma ndee, cha uzhebpa mkwaꞌan xa naꞌ gast plo mzheal xa naꞌ.
2TI 1:18 Leꞌa naꞌ naꞌab ndoꞌ Dios ikweaꞌ ladna Dios xa, gal wizh isoꞌ xa ndoꞌ Dios. Leꞌa lu uniꞌíka xteꞌe ngokno xa besa zha ndencho besa gezh Éfeso.
2TI 2:1 Lu Timoteo nak cuent xiꞌín naꞌ, nat ulo gan gak juert ladoꞌo lu ta na nkweaꞌ ladna Cristo Jesús lu.
2TI 2:2 Leꞌa ta na mbin lu ndadiꞌizh naꞌ ndoꞌ kwaꞌad be men, nat bluu ta wa ndoꞌ bexa mas ngeꞌ ladna lu, bexa na suꞌu uluu‑yá ndoꞌ stapla be men.
2TI 2:3 No bxik ndoꞌ be gealkweaꞌ iniꞌí lu ta na nak lu xmen Jesucristo, lak nxik dub soldad wen ndoꞌ be gealkweaꞌ niꞌí xa.
2TI 2:4 Ni dub soldad naꞌanpa nsabyoꞌo ndoꞌ be tiꞌin ndun be men, leꞌa xa ndi ndun laktsa nlad xa nibeꞌe xa.
2TI 2:5 No liga leꞌa bexa nkeꞌa karrel lá gun gan tal leꞌa xa lá uxobgek lak nsabndoꞌ‑yá.
2TI 2:6 No liga leꞌa bexa ndun tiꞌin geꞌe nsabndoꞌ koo gan ndontsa ikaꞌa xa be ta usaꞌa‑yá.
2TI 2:7 Binbeꞌe be ta na nkeꞌa naꞌ ndee, leꞌa Cristo Xwan beuna usaꞌa ta yakbeꞌena lu itea taꞌa.
2TI 2:8 Btseꞌa ladna lu ta utid Jesucristo xa ras David. Leꞌa xa mban ndoꞌ gealgut, lak ndab diꞌizh wen ndadiꞌizh naꞌ ndoꞌ be men.
2TI 2:9 Leꞌa ke na li ndadiꞌizh naꞌ ta wa, ta weꞌe sian be gealkweaꞌ nsatiꞌid naꞌ, gast nkea naꞌ litgiꞌib cuent dub xa ugap. Parea leꞌa diꞌizh ten Dios naꞌanpa no nkea litgiꞌib.
2TI 2:10 Ta weꞌe nxik naꞌ ndoꞌ itea be gealkweaꞌ ndee, geal nkweaꞌ lad naꞌ bexa mti Dios, ndontsa no bexa gap gealnaban ndoꞌ Dios, no wenpa yoo bexa wats Cristo Jesús idub tiemp.
2TI 2:11 Ta ugeaka ta gáp naꞌ ndee: Leꞌa tal beuna ngutno Cristo, leꞌa beuna nokaga sbanno xa.
2TI 2:12 Leꞌa tal beuna uxik ndoꞌ be gealkweaꞌ, leꞌa beuna nokaga inibeꞌeno xa. Leꞌa tal beuna gab leꞌa beuna lá nchandoꞌ xa, leꞌa xa noga li gab leꞌa xa lá nchandoꞌ beuna.
2TI 2:13 Ncho zha lá ndun beuna lakka ndab beuna, parea leꞌa xa ndi ndunka ta ndab xa wa, leꞌa lak nak xa wa nunk lá izheꞌa.
2TI 2:14 Lá ulaꞌa lu yalad bexa wa be ta nkeꞌa naꞌ ndee. Ndi gud ndoꞌ bexa leꞌa Dios nsobwiꞌi yá lá kuyotoꞌota bexa ke ten xteꞌe gab be diꞌizh. Leꞌa ta li nyotoꞌo bexa wa leꞌa ta wa dub ta naꞌan xtiꞌin, leꞌa‑yá ndi ntsabgix bexa na ndoꞌón ta wa.
2TI 2:15 Uzhebpa bin juers gaꞌal isoꞌ lu ndoꞌ Dios, utsin bluu gealngea ten Dios, leꞌa dub xa wen ndun tiꞌin naꞌanpa ido ladna.
2TI 2:16 Lá gudiꞌizh lu be diꞌizh lá nsak ladna Dios, be diꞌizh naꞌan xtiꞌin, leꞌa bexa li ndadiꞌizh ta wa mas ugap nsayak.
2TI 2:17 Leꞌa be diꞌizh wa cuent dub gealgizh ugiꞌi nsasen idub xa. Li nak Himeneo no Fileto.
2TI 2:18 Leꞌa bexa wa mlaꞌa gealngea ten Dios, cha ndi nluu bexa leꞌa Dios yá mxistela bexa ngut. Ta weꞌe ncho bexa yá lá ngeꞌta ladna Cristo.
2TI 2:19 Parea leꞌa gealngea ten Dios nak cuent dub xan niꞌi, dub ta naꞌanpa iwiꞌin, no nkeaniꞌi sa wa: “Leꞌa Dios nchandoꞌ bexa nak xmen na.” No ndab‑a: “Blaꞌa bega be ta ugap wa, bego na nak xmen Cristo.”
2TI 2:20 Leꞌa lak be taꞌa ndantiꞌin bexa len dub niꞌi siꞌil, ncho be taꞌa nakndeꞌe oro no plata, ta ndantiꞌin bexa zha mas nsaktsa. No ncho be taꞌa nakndeꞌe ya no yosid, ta ndantiꞌin bexa iteanak be wizh.
2TI 2:21 No liga leꞌa tal ton ulaꞌa itea be ta ugap nak xa, leꞌa xa wa suꞌu gun dub tiꞌin mas nsak. Weꞌe umbiꞌi gak ladoꞌo xa ndoꞌ Dios, no isuꞌu xa guntiꞌin Dios xa, no sun xa guniꞌi xtiꞌin be ta wen.
2TI 2:22 Ta weꞌe bxoꞌon ndoꞌ be ta lid leꞌa nak, be ta nlad bexa ben gun bexa. Ndi mas bin lak nsak ladna Dios, no mas bgeꞌ ladna Cristo, no mas bkweaꞌ ladna lu be men, no bin ta gun wen yoono lu bexa. Leꞌa be ta wa ta ndun itea bexa na nkwaꞌan Dios, bexa umbiꞌi nak ladoꞌo na.
2TI 2:23 Naꞌanpa ulaꞌach lu be diꞌizh naꞌan xtiꞌin, leꞌa lu uniꞌíka leꞌa be ta wa leꞌa ndun nyotoꞌo be men.
2TI 2:24 Leꞌa dub xa ndun tiꞌin ndoꞌ Dios lá nsabndoꞌ kuyotoꞌono be men. Ndi uzhebpa utsin gak xa ndoꞌ itea bexa, no wen uluu xa bexa, no kwen uxik xa ndoꞌ bexa.
2TI 2:25 No diꞌizh chaꞌaw utenxeꞌa xa bexa na ndaklono xa. Weꞌe naga lid sgo Dios gek bexa yach bexa wats Dios, cha igondoꞌ bexa gealngea ten Dios.
2TI 2:26 Cha li itoꞌo bexa ndoꞌ yaꞌa maxuꞌu na li nchoyaꞌa bexa, ndun bexa ta nlad maxuꞌu wa.
2TI 3:1 No nsabndoꞌ yakbeꞌena lu leꞌa gal be wizh lult leꞌa be men uzhebpa juert itid.
2TI 3:2 Leꞌa gal zha wa yoo bexa ikweaꞌ ladna leꞌatsa xa, no isaꞌab ladna bexa gap xa sian med, no izhinnona bexa be ta ndáktsa xa, no gunbeꞌe bexa leꞌa xa mas nsak ndoꞌ itea men, no inisi bexa be men, no lá uxobgek bexa ndoꞌ xus xa, no nunk bexa lá iten ladna dub taꞌa, no lá gun bexa lak nlad Dios.
2TI 3:3 No lá ikweaꞌ ladna bexa be ltsaꞌa xa, no ni lá gungeꞌ ladna bexa ndoꞌ be men, no gudiꞌizh bexa cuent gix, no gun bexa sbeꞌen be ta nladtsa xa, no xela gunno bexa be men, no ixee ladna bexa ndoꞌ be ta wen nak.
2TI 3:4 No yun bexa cuent leꞌaka ltsaꞌa xa, no ni lid ned gunbeꞌe bexa gun bexa dub taꞌa, no gunbeꞌe bexa leꞌa xa uzhebpa dub xa wen, no mas ukwaꞌan bexa ta nladtsa bexa, cha ni lá ukwaꞌan bexa Dios.
2TI 3:5 No gunta bexa ndankea Dios bexa, no lá ulaꞌa bexa gun juers ten Dios tiꞌin len ladoꞌo bexa. Naꞌanpa uchealtsaꞌa lu bexa li nak wa.
2TI 3:6 Leꞌa ncho bexa wa ndaꞌ ta lid be men, cha nkwiꞌinno xa be xagots ndidotsa ndák. Leꞌa be xagots wa bexa ndap ke, ndun bexa guniꞌi xtaꞌan be ta ugap ndoꞌón bexa.
2TI 3:7 Nsakyoꞌón bexa be ta ndadiꞌizh be men, parea lá gun bexa gan igondoꞌ bexa gealngea.
2TI 3:8 Lak lá nsak ladna Janes no Jambres ta mbin Moisés, no liga leꞌa be xabgiꞌi ugap wa lá nsak ladna gealngea. Leꞌa bexa wa sbeꞌen ta ugap ndanbeꞌe, no naꞌanpa ndangea ladna bexa Dios.
2TI 3:9 Parea leꞌa bexa wa naꞌanpa kwen ukwiꞌinno be men, leꞌa itea be men sniꞌí leꞌa ta ndun bexa wa lid leꞌa nak, lak ngwasea Janes nsea Jambres.
2TI 3:10 Parea leꞌa lu uniꞌíka xteꞌe nluu naꞌ be men, no xteꞌe nak naꞌ, no xteꞌe ndun naꞌ juers gun naꞌ dub tiꞌin, no xteꞌe ngeꞌ lad naꞌ Cristo, no xteꞌe nxik naꞌ ndoꞌ be men, no xteꞌe nkweaꞌ lad naꞌ be men, no xteꞌe ndun naꞌ tiꞌin ten Dios maska bid‑a.
2TI 3:11 No uniꞌíka lu xteꞌe xela mbinno bexa naꞌ, no xteꞌe sian gealkweaꞌ utiꞌid naꞌ gezh Antioquía no gezh Iconio no gezh Listra. Uzhebpa xela mbinno bexa naꞌ, parea leꞌa Dios Xa Nibeꞌe uloꞌo naꞌ ndoꞌ ta wa.
2TI 3:12 No liga xela gunno be men itea bexa na nlad gun ta wen, bexa ngeꞌ ladna Cristo Jesús.
2TI 3:13 Parea leꞌa bexa ugap wa no bexa ukwiꞌin wa ndi mas ugap yakbe. Leꞌa bexa wa ukwiꞌinno be men, no liga ukwiꞌinno be men bexa.
2TI 3:14 Parea lá ulaꞌa lu be ta mtsid lu, be ta mbingea ladna lu, leꞌa lu nchandoꞌka besa na mluu ta wa ndoꞌ lu.
2TI 3:15 Leꞌa zha tuzhta lu mtsid lu lak nkeaniꞌi diꞌizh ten Dios. Leꞌa diꞌizh wa sun gan mas gák lu, ndontsa gap lu gealnaban ndoꞌ Dios, no mas igeꞌ ladna lu Cristo Jesús.
2TI 3:16 Leꞌa itea be taꞌa nkeaniꞌi diꞌizh ten Dios wa, leꞌa Dios msaꞌa‑yá ndoꞌ bexa na mkeꞌa‑yá. Leꞌa ta wa suꞌu uluu beuna, no ndab‑a xteꞌe nsabndoꞌ gun beuna, no xteꞌe yoo beuna nes ten Dios, no xteꞌe wen gak beuna,
2TI 3:17 ndontsa gak be xmen Dios idub lak nlad Dios, no isuꞌu beuna gun beuna itea be ta wen.
2TI 4:1 Leꞌa gal zha ilen Jesucristo inibeꞌe xa ndoꞌ gizhliyo, leꞌa xa gab ndoꞌ bexa nban no ndoꞌ bexa ngutla ná ton ndap ke. Ta weꞌe leꞌa nat nsobwiꞌi Dios no Jesucristo Xwan beuna leꞌa naꞌ gáp ndoꞌ lu,
2TI 4:2 bidiꞌizh diꞌizh ten Dios ndoꞌ be men, no uloo gan li gun lu guniꞌi tal leꞌa bexa nlad goꞌón‑a natal naꞌan. No btenxeꞌa bexa no gud ndoꞌ bexa xteꞌe yoo bexa nes ten Dios. No chaꞌawtsa bluꞌu bexa diꞌizh ten Dios.
2TI 4:3 Leꞌa gal dub wizh leꞌa be men lá isakyoꞌónta gealngea. Ndi ukwaꞌan bexa kwaꞌad be mech gudiꞌizh ta na ndaltsa ladna bexa goꞌón bexa.
2TI 4:4 Cha lá isakyoꞌónta bexa gealngea, ndi goꞌón bexa be cuent naꞌan xtiꞌin.
2TI 4:5 Ná leꞌa lu nsabndoꞌ bchaꞌan gak, no uxik lu ndoꞌ itea be gealkweaꞌ, no gudiꞌizh lu diꞌizh wen ten Cristo, no utsin gun lu tiꞌin msaꞌa Dios ndoꞌ lu.
2TI 4:6 Leꞌa naꞌ ndee sken gat, leꞌa wizh ikan naꞌ ndoꞌ gizhliyo ndee yá gaxla nak.
2TI 4:7 Leꞌa naꞌ uzhebpa ngoꞌo gan ndun tiꞌin ten Dios, mbin naꞌ iteanak ta ndab xa, no sbeꞌen leꞌa xa mgeꞌ lad naꞌ.
2TI 4:8 Leꞌa naꞌ nkenkeaꞌ gal dub wizh usaꞌa Dios dub coron ika naꞌ, ta uluu leꞌa naꞌ mxobgek ndoꞌ xa wa. Naꞌanpa nabtsa ndoꞌ naꞌ usaꞌa xa‑yá, no ndoꞌ itea bexa na ndenkeaꞌ gal wizh ilen xa wa.
2TI 4:9 Bin juers uxax giꞌid inaꞌ lu naꞌ,
2TI 4:10 leꞌa Demas mlaꞌa naꞌ nchaꞌa xa gezh Tesalónica, geal leꞌa xa nkwaꞌan be taꞌa ndoꞌ gizhliyo ndee. Leꞌa Crescente nchaꞌa Galacia. Leꞌa Tito nchaꞌa Dalmacia.
2TI 4:11 Nabtsa Luc ncho wats naꞌ, ta weꞌe biꞌi Marc sa ndee, leꞌa xa no suꞌu gunno naꞌ tiꞌin.
2TI 4:12 Leꞌa Tíquico mtuꞌubla naꞌ gezh Éfeso.
2TI 4:13 Leꞌa gor na giꞌid lu, goꞌo lu xab koꞌol naꞌ, ta na mchan naꞌ ta lid Carpo gezh Troas. No goꞌo lu be libr ten naꞌ, parea mas nkiꞌin naꞌ be libr nakchaꞌaw gid las man wa.
2TI 4:14 Leꞌa Alejandro xa ndandeꞌe be ta giꞌib uzheꞌeb ugap mbinno naꞌ. Leꞌa Dios Xa Nibeꞌe wa ukixke ta li mbinno xa naꞌ.
2TI 4:15 Gap lu cuent ndoꞌ xa wa, leꞌa xa uzhebpa lá nsak ladna ndadiꞌizh besa diꞌizh ten Dios.
2TI 4:16 Leꞌa zha ndon ned mtsakndoꞌ naꞌ ndoꞌ bexa naktiꞌin sa ndee, naꞌan ton isoꞌ wats naꞌ, leꞌa itea bexa cha ndi mlaꞌa naꞌ. Naꞌab naꞌ ndoꞌ Dios lá utsaksi Dios bexa ta na li mbin bexa wa.
2TI 4:17 Parea leꞌa Dios Xa Nibeꞌe nsoꞌka wats naꞌ, msaꞌa xa juers ndoꞌ naꞌ, ndontsa mbidiꞌizh naꞌ diꞌizh ten Dios ndoꞌ itea bexa naꞌanpa xa Israel nde sa wa. Cha uloꞌo Dios naꞌ ndoꞌ yaꞌa bexa, cuent utoꞌo naꞌ toꞌo dub mbiꞌizh ndiꞌizh gaw ma naꞌ.
2TI 4:18 Leꞌa Dios ndaknota naꞌ ndoꞌ itea be ta ugap, no ulaꞌach xa naꞌ gast yaa naꞌ gibeꞌa sa nibeꞌe xa. ¡Leꞌa nat no idub tiemp gab beuna leꞌa Dios uzhebpa dub Dios siꞌil! Lika nak‑a.
2TI 4:19 Unidiꞌizh ndoꞌ Prisca nsea Aquila no ndoꞌ bexa ncho ta lid Onesíforo wa sakndoꞌ naꞌ.
2TI 4:20 Leꞌa Erast myaꞌan gezh Corinto. Leꞌa Trófimo kweaꞌ nsak mchan naꞌ gezh Mileto.
2TI 4:21 Bin juers giꞌid lu nattsa biseata gal tiemp kwal. Leꞌa Eubulo no Pudente no Lino no Claudia no iteata be xmen Cristo ncho sa ndee nidiꞌizh ndoꞌ lu.
2TI 4:22 Leꞌa naꞌ naꞌab ndoꞌ Jesucristo Xwan beuna isoꞌ wats lu, no mas uzheꞌeb utsin gunno Dios bega. Lika nak‑a.
TIT 1:1 Leꞌa naꞌ ndee Pabl, xa ndun tiꞌin ndoꞌ Dios no mtuꞌub Jesucristo naꞌ ndoꞌ bexa na mti Dios, ndontsa mas igeꞌ ladna bexa Dios no mas igondoꞌ bexa gealngea, ta ndun mas nsayak bexa lak nlad Dios.
TIT 1:2 Ta weꞌe ndenkeaꞌ bexa gal zha gap bexa gealnaban ta nunk lá idub, ta na uzheꞌeb polta ndab Dios usaꞌa Dios, xa nunk lá ndun gealkwiꞌin.
TIT 1:3 Weꞌe leꞌa Dios mluu diꞌizh ten xa ndoꞌ be men zha nsabndoꞌ‑yá. Leꞌa ta wa ta ndadiꞌizh naꞌ ndoꞌ be men lak unibeꞌe Dios, xa na ngoꞌo beuna ndoꞌ be ke ten beuna.
TIT 1:4 Leꞌa git ndee nkeꞌa naꞌ ndoꞌ lu, Tito, geal leꞌa lu cuent xiꞌín naꞌ ta na no lu ngeꞌ ladna Cristo. Naꞌab naꞌ ndoꞌ Tad Dios no ndoꞌ Jesucristo Xwan beuna xa na ngoꞌo beuna ndoꞌ be ke ten beuna, uzheꞌeb utsin gak bexa ndoꞌ lu, no ikweaꞌ ladna bexa lu, no gun bexa wen yoo ladna lu.
TIT 1:5 Leꞌa naꞌ mchan lu isla Creta baꞌ, ndontsa utenxeꞌa lu be xmen Cristo be taꞌa ndun jwalt wa, no koxoꞌob lu pla bexa yansu be xmen Cristo kadga be gezh baꞌ, lak unibeꞌe naꞌ ndoꞌ lu.
TIT 1:6 Leꞌa bexa yansu wa nsabndoꞌ uzhebpa utsin gak gast naꞌan ton gab leꞌa xa ndap ke. No nsabndoꞌ dubtsa xagots gap xa. Leꞌa be xin xa nsabndoꞌ gungea ladna Jesús, no utsin gak bexa, no uxobgek bexa ndoꞌ xus xa.
TIT 1:7 Leꞌa dub xa nchansu wa nlaꞌach bexa nak xmen Dios, ta weꞌe nsabndoꞌ utsin gak xa, gast naꞌan ton gab leꞌa xa ugap ndun. No lá gunbeꞌe xa leꞌa xa mas nsak, no naꞌanpa uxax gakloo xa, no naꞌanpa gun xa gealgu, no naꞌanpa ukwaꞌan xa uyo, no naꞌanpa ukwiꞌinno xa be men ndontsa gun xa gan med.
TIT 1:8 Ndi utsin gak xa ndoꞌ itea be men nchaꞌa ta lid xa, no sbeꞌen be ta wen ukwaꞌan xa, no wen gunbeꞌe xa, no utsin gak xa, no umbiꞌi gak xa ndoꞌ Dios, no gun xa gan isensaꞌab xa xa ndoꞌ be ta ugap.
TIT 1:9 No nsabndoꞌ uluu bexa gealngea ten Dios lak mluu beuna‑yá, ndontsa wen utenxeꞌa xa be xmen Cristo, no utsin ikaꞌab xa ndoꞌ be men lá nsak ladna ta nluu xa.
TIT 1:10 Leꞌa sa baꞌ ncho kwaꞌadpa bexa lá nxobgek ndoꞌ Dios, ndadiꞌizh bexa be ta naꞌan xtiꞌin no nkwiꞌinno bexa be men. Leꞌa kwaꞌad bexa li nak wa ndab leꞌa itea be xmen Cristo nsabndoꞌ yoo beꞌe lak ndun bexa judio.
TIT 1:11 Leꞌa lu nsabndoꞌ lá ulaꞌata li gudiꞌizh bexa, leꞌa ke ten bexa wa leꞌa ncho be idub famil nsaulaꞌa nes ten Dios. Nluu bexa be men wa dub ta lid leꞌa nak, ndontsa gun bexa gan med.
TIT 1:12 Leꞌa dub xa ndák ncho leꞌaka isla Creta baꞌ ndab: “Leꞌa bexa Creta sbeꞌen bexa ukwiꞌin, no ugap nak bexa cuent nak be man, no uzhebpa ndaw bexa, no zhaꞌab bexa.”
TIT 1:13 Leꞌa ta li ndab xa wa ta ugeaka. Ta weꞌe nsabndoꞌ uzhebpa kuyo lu bexa wa, ndontsa igeꞌka ladna bexa Dios,
TIT 1:14 no yá lá isakyonta bexa be cuent naꞌan xtiꞌin ten bexa judio, no ni lá ulaꞌachta bexa be ta nibeꞌe be men mxelad gealngea ten Dios.
TIT 1:15 Leꞌa cuent ten be men umbiꞌi nak ladoꞌo na ndoꞌ Dios, leꞌa itea be taꞌa umbiꞌika. Parea leꞌa cuent ten bexa ugap nak, bexa lá ndangea ladna Jesús, leꞌa ni dub taꞌa naꞌanpa umbiꞌi. Leꞌa bexa wa gast itea ta ndanbeꞌe bexa no itea be ta ncho ladoꞌo bexa bzhiꞌik nak.
TIT 1:16 Ndab bexa leꞌa bexa nchandoꞌ Dios, parea leꞌa be ta ndun bexa nluu leꞌa bexa lá nchandoꞌ Dios. Leꞌa bexa uzhebpa ugap nak, no lá nxobgek bexa ndoꞌ Dios, no lá isuꞌu bexa gun bexa ni dub ta wen.
TIT 2:1 Parea leꞌa lu nsabndoꞌ gudiꞌizh sbeꞌen lak nak gealngea ten Dios.
TIT 2:2 Gud ndoꞌ be xabgiꞌi mas gox baꞌ isensaꞌab bexa xa ndoꞌ ta ugap, no gak bexa dub xa gap men mod ndoꞌ na, no wen gunbeꞌe bexa, no gungea ladna bexa gealngea ten Jesús, no ikweaꞌ ladna bexa be ltsaꞌa bexa, no uxik bexa ndoꞌ itea be taꞌa.
TIT 2:3 Gud ndoꞌ be xagots mas gox baꞌ gun bexa sbeꞌen ta wen, ta nluu leꞌa bexa ndankea Dios. Naꞌanpa gudiꞌizh bexa cuent gix, no naꞌanpa gun xa gealgu. Nsabndoꞌ ndi uluu bexa sbeꞌen be ta wen.
TIT 2:4 No uluu bexa be xagots ben ikweaꞌ ladna bexa xabgiꞌi ten bexa no be xin xa,
TIT 2:5 no list gak bexa, no yankea bexa dubtsa xabgiꞌi ten bexa, no ulaꞌach bexa ta lid bexa, no utsin gak bexa ndoꞌ be men, no uxobgek bexa ndoꞌ xabgiꞌi ten bexa. Itea be ta ndee nsabndoꞌ gun be xagots ben ndontsa lá inisi be men diꞌizh ten Dios.
TIT 2:6 No liga gud ndoꞌ be xabgiꞌi ben isensaꞌab bexa xa ndoꞌ be ta ugap.
TIT 2:7 Sbeꞌen be ta wen bin ndontsa iniꞌí bexa xteꞌe nsabndoꞌ gun bexa. Leꞌa gor nluu lu bexa wa, utsin bluu bexa lak nsak ladna Dios.
TIT 2:8 Bidiꞌizh sbeꞌen gealngea, ndontsa naꞌanpa xela iníꞌi be men ndoꞌ lu. Weꞌe leꞌa bexa na lá nsak ladna ta nluu lu wa, leꞌa bexa wa sdoka ladna no naꞌan xteꞌe gab bexa ndoꞌ bega.
TIT 2:9 No gud ndoꞌ bexa ndun tiꞌin ndoꞌ stubga men, uxobgek bexa ndoꞌ xa nibeꞌe ten xa, no utsin gun bexa ta nsak ladna xa wa, naꞌanpa ndi ikabtoꞌo bexa ndoꞌ xa wa.
TIT 2:10 No lá gun bexa gealwaꞌan, ndi gun bexa ta nluu leꞌa bexa men wen nak, ndontsa iniꞌí be men ta wen nak diꞌizh ten Dios, xa ngoꞌo beuna ndoꞌ be ke ten beuna wa.
TIT 2:11 Leꞌa Dios mluꞌu xteꞌe nkweaꞌ ladna xa be men, ta gun gan gap itea be men gealnaban.
TIT 2:12 Leꞌa xa wa nluu leꞌa beuna nsabndoꞌ ulaꞌa itea be taꞌa lá nsak ladna Dios no itea be ta ugap nlad beuna gun beuna. Ndi sbeꞌen be ta wen gunbeꞌe beuna, no umbiꞌi gak ladoꞌo beuna ndoꞌ Dios, no gun beuna ndoꞌ gizhliyo ndee lak nsak ladna Dios.
TIT 2:13 Li nsabndoꞌ gun beuna ndalen kwenkeaꞌ beuna gal wizh uzheꞌeb wen, zha na ilen Jesucristo, xa nak Dios siꞌil ten beuna, xa nsaꞌa gealnaban ndoꞌ beuna.
TIT 2:14 Leꞌa xa wa msaꞌa leꞌaka leꞌa xa sakndoꞌ beuna, ndontsa koꞌo xa beuna ndoꞌ itea be ke ten beuna. No mtsambiꞌi xa ladoꞌo beuna, ndontsa gak beuna xmen xa, bexa na uzhebpa nlad gun be ta wen.
TIT 2:15 Leꞌa be ta ndee bidiꞌizh ndoꞌ bexa, no utenxeꞌa lu bexa no kuyo lu bexa lakkata dub xa nibeꞌe. Lá ulaꞌa lu uxelad bexa ta ndab lu.
TIT 3:1 No gud ndoꞌ bexa baꞌ lá yalad bexa uxobgek bexa ndoꞌ bexa naktiꞌin no ndoꞌ itea bexa nibeꞌe. No list kwe bexa gakno bexa be men.
TIT 3:2 No naꞌanpa inisi bexa stubga men, no naꞌanpa kuyotoꞌo bexa. Ndi utsin gak bexa no bchaꞌan gak bexa ndoꞌ itea be men.
TIT 3:3 Leꞌa tiemp polta leꞌa beuna no naꞌanpa utsin ndanbeꞌe, no lá nxobgek beuna ndoꞌ Dios, no usankea beuna tsoꞌo bexa ugap nak, no ndencho beuna ndoꞌ ta ugap ncho ladoꞌo beuna no be ta ndal ladna beuna, no ugap nak beuna, no ndaklono beuna bexa ndap taꞌa. Leꞌa be men nxee ladna ndoꞌ beuna, no liga leꞌa beuna nxee ladna ndoꞌ be men.
TIT 3:4 Parea leꞌa Dios xa ngoꞌo beuna ndoꞌ be ke ten beuna, mluu xa leꞌa xa ta ugeaka dub xa wen, no nkweaꞌ ladna xa be men,
TIT 3:5 leꞌa xa uloꞌo beuna ndoꞌ be ke ten beuna. Parea naꞌanpa li ngun xa ke na ndun beuna ta wen, ndi ta na uzhebpa nkweaꞌ ladna Dios beuna uloꞌo xa beuna. No msaꞌa xa Espíritu ten xa uyoꞌo len ladoꞌo beuna, ndontsa umbiꞌi gak ladoꞌo beuna ndoꞌ xa, no gap beuna dub gealnaban kub.
TIT 3:6 No uzhebpa msaꞌa xa Espíritu ten xa ndoꞌ beuna, ta na ngeꞌ ladna beuna Jesucristo xa ngoꞌo beuna ndoꞌ be ke ten beuna.
TIT 3:7 Leꞌa ta na wen nyaꞌan beuna ndoꞌ Dios wa dub ta ga nsaꞌa xa. Ta weꞌe leꞌa beuna ndenkeaꞌ gal usoꞌ beuna dub gealnaban nunk lá idub.
TIT 3:8 Leꞌa ta ndáp naꞌ ndee wa ta ugeaka. Leꞌa naꞌ nlad inibeꞌe lu ta wa ndoꞌ bexa na ndangea ladna Dios sa baꞌ, ndontsa sbeꞌen be ta wen gun bexa. Leꞌa be ta ndee wa be ta wen no sakno‑yá itea be men.
TIT 3:9 Parea lá gasyoꞌo lu ndoꞌ be ta naꞌan xtiꞌin ndadiꞌizh bexa, be cuent ten bexa uyoꞌo polta, no nyotoꞌo bexa, no nyo bexa ke ten ley mkeꞌa Moisés. Leꞌa be ta li ndun bexa wa ta naꞌan xtiꞌin.
TIT 3:10 Leꞌa tal ton uchealuyo be xmen Cristo, gud ndoꞌ xa wa dub biaj natal top biaj yá lá gunta xa ta wa. Ná tal leꞌa xa lá nsakyoꞌón ta ndab lu wa, yá lá gudiꞌizhnota lu xa.
TIT 3:11 Leꞌa lu uniꞌíka leꞌa xa wa dub xa ugap nak. Leꞌa be ta ndun xa wa leꞌa nluu leꞌa xa ndap ke.
TIT 3:12 Leꞌa nat utuꞌub naꞌ Artemas natal Tíquico ndoꞌ lu. Leꞌa zha na ilanseaꞌ dub xa sa baꞌ, uxax giꞌid inaꞌ lu naꞌ gezh Nicópolis, leꞌa naꞌ ndee mbinbeꞌe yoꞌo naꞌ sa wa idub tiemp kwal.
TIT 3:13 No gokno Zenas xa ntsid ley no Apolos ndontsa gor na ikaꞌan bexa sa baꞌ naꞌan xtaꞌan gun jwalt nes yaꞌbe bexa.
TIT 3:14 Leꞌa bexa na no nak beuna xmen Cristo ndencho sa baꞌ nsabndoꞌ utsid bexa gun bexa be ta wen, usaꞌa bexa be taꞌa nkiꞌin be men, ndontsa isuꞌu bexa gakno bexa men.
TIT 3:15 Leꞌa itea bexa na ndeno naꞌ nidiꞌizh ndoꞌ lu. Unidiꞌizh sakndoꞌ naꞌ ndoꞌ itea bexa nak xmen Jesús sa baꞌ, leꞌa bexa nak amig ten besa. Leꞌa naꞌ naꞌab ndoꞌ Dios mas uzheꞌeb utsin gunno xa bega. Lika gak‑a.
PHM 1:1 Leꞌa naꞌ ndee Pabl xa nkea litgiꞌib ke na ndun naꞌ tiꞌin ten Jesucristo. Leꞌa naꞌ no Timoteo xa nak cuent dub wit naꞌ, nkeꞌa besa git ndee ndoꞌ lu Filemón, lu no ndun tiꞌin ten Cristo.
PHM 1:2 No nidiꞌizh besa ndoꞌ Apia xa nak cuent bsan beuna, no ndoꞌ Arquipo xa no ndakno beuna ndun beuna tiꞌin ten Dios, no ndoꞌ itea bexa nzhealbe ta lid lu baꞌ.
PHM 1:3 Naꞌab naꞌ ndoꞌ Dios Xus beuna no ndoꞌ Jesucristo Xwan beuna utsin gak bexa ndoꞌ bega, no gun bexa wen yoo ladna bega.
PHM 1:4 Leꞌa gor na ndadiꞌizhno naꞌ Dios, naꞌab naꞌ ndoꞌ Dios gakno Dios lu, no nsa naꞌ xno ndoꞌ Dios,
PHM 1:5 geal leꞌa naꞌ ndón xteꞌe ndankea lu Jesús Xwan beuna, no ngeꞌ ladna lu xa, no nkweaꞌ ladna lu itea bexa nak xmen Jesús.
PHM 1:6 Naꞌab naꞌ ndoꞌ Dios leꞌa ta na dubtsa ngeꞌ ladna beuna Cristo, ta weꞌe leꞌa lu mas igondoꞌ ta wen nsaꞌa Dios ndoꞌ beuna nak xmen Cristo.
PHM 1:7 Uzhebpa nten ladna besa no mas nsen besa juers, gor ndoꞌón besa xteꞌe nkweaꞌ ladna lu be xmen Cristo, leꞌa lu ndun mas utsin nyoꞌo ladna bexa.
PHM 1:8 Leꞌa ta na nak beuna xmen Cristo, ta weꞌe syoꞌo gan inibeꞌe naꞌ ndoꞌ lu ta nsabndoꞌ gun lu.
PHM 1:9 Ná leꞌa naꞌ ndi naꞌab ndoꞌ lu, geal leꞌa naꞌ uní leꞌa lu nkweaꞌ ladna naꞌ. Leꞌa naꞌ Pabl yá xa gox naꞌ, no nkea naꞌ litgiꞌib ke na ndun naꞌ tiꞌin ten Jesucristo.
PHM 1:10 Nat naꞌab naꞌ ndoꞌ lu utsin gak lu ndoꞌ Onésimo, leꞌa xa nak cuent dub xiꞌín naꞌ, ta na mbingea ladna xa Jesús len litgiꞌib ndee.
PHM 1:11 Polta leꞌa Onésimo naꞌanpa utsin ngun tiꞌin ten lu. Ná nat leꞌa xa suꞌu gun tiꞌin ndoꞌ lu, lak nsuꞌu xa ndakno xa naꞌ.
PHM 1:12 Leꞌa nat leꞌa naꞌ utuꞌubgal xa ndoꞌ lu. Cha utsin gunno lu xa gor ilanseaꞌ xa, lakta utsin ndanno lu naꞌ.
PHM 1:13 Leꞌa naꞌ nlad yanyoꞌo Onésimo wats naꞌ sa ndee, ndontsa gakno xa naꞌ sakndoꞌ lu, ndalen nkea naꞌ litgiꞌib ndee ke na ndadiꞌizh naꞌ diꞌizh ten Cristo.
PHM 1:14 Ná leꞌa naꞌ naꞌanpa gáp yanyoꞌo xa sa ndee tal leꞌa lu lá nlad. Leꞌa naꞌ nlad gun lu ta naꞌab naꞌ, parea naꞌanpa ta na juerska li gun lu, ndi ta na nlad lu li gun lu.
PHM 1:15 Natal ga ta weꞌe mlaꞌa Onésimo lu dub ndeꞌeptsa, natsa bi leꞌa itanchaꞌ xa ndoꞌ lu idub tiemp.
PHM 1:16 Nat leꞌa Onésimo naꞌanpa yak xa nduntsa tiꞌin ndoꞌ lu. Nat leꞌa xa no nak dub xmen Dios, cuent dub wit beuna xa. Leꞌa naꞌ uzheꞌeb nkweaꞌ ladna xa, ná leꞌa lu nsabndoꞌ mas ikweaꞌ ladna xa, leꞌa xa no nak xmen Jesús, no nak xa dub xa ndun tiꞌin ndoꞌ lu.
PHM 1:17 Tal lu nsak leꞌa naꞌ no nak ltsaꞌa lu, utsin binno Onésimo lakta utsin nak lu ndoꞌ naꞌ.
PHM 1:18 Ná tal xa xtaꞌan mbinno lu polta wa natal xa nsaꞌab ndoꞌ lu, leꞌa naꞌ skixka ta wa.
PHM 1:19 Leꞌa naꞌ ndee Pabl yaꞌa naꞌ nkeꞌa naꞌ letr ndee ndoꞌ git: leꞌa naꞌ skixka be ta nsaꞌab Onésimo ndoꞌ lu, maska uniꞌí lu leꞌa lu no nsaꞌab ndoꞌ naꞌ.
PHM 1:20 Leꞌa ta na dubtsa nak beuna xmen Cristo, naꞌab naꞌ ndoꞌ lu gun lu ta wa, ndontsa wen yoꞌo lad naꞌ.
PHM 1:21 Nkeꞌa naꞌ be ta ndee ndoꞌ lu, leꞌa naꞌ uní leꞌa lu sunka ta naꞌab naꞌ wa, no gast mas sian be ta wen gun lu.
PHM 1:22 Bsaxkwaꞌa dub sa yoꞌo naꞌ, leꞌa naꞌ nsak leꞌa Dios ulaꞌa gal inaꞌ naꞌ bega lak nab bega ndoꞌ Dios.
PHM 1:23 Leꞌa Epafras nidiꞌizh ndoꞌ lu, leꞌa xa nkeano naꞌ litgiꞌib ndee ke na ndun xa tiꞌin ten Cristo Jesús.
PHM 1:24 Nsea Marc no Aristarco no Demas no Luc bexa ndakno naꞌ ndun besa tiꞌin, leꞌa bexa wa no nidiꞌizh ndoꞌ lu.
PHM 1:25 Naꞌab naꞌ ndoꞌ Jesucristo Xwan beuna mas uzheꞌeb utsin gunno xa bega. Lika gak‑a.
HEB 1:1 Leꞌa polta leꞌa Dios sian biaj nsea sian mod mbidiꞌizh ndoꞌ be usan gox ten beuna, mbintiꞌin xa be profet gudiꞌizh sakndoꞌ xa.
HEB 1:2 Parea nat leꞌa be wizh lult ndee, leꞌa Dios mbintiꞌin leꞌaka Xin na mbidiꞌizh xa ndoꞌ beuna. Leꞌa Dios leꞌa mti xa wa mbindeꞌe xa gibeꞌa no gizhliyo, no msoꞌ Dios xa nak xa Xwan itea be taꞌa.
HEB 1:3 Leꞌa Xin Dios nluu xteꞌe uzheꞌeb siꞌil nak Dios, no nak xa lakkata nak Dios Xus xa. Leꞌa juers ten ta ndab xa, leꞌa xa ndun leꞌa gizhliyo no gibeꞌa ndaktiꞌin. Leꞌa tsoꞌo na mbin xa ta mtsambiꞌi xa beuna ndoꞌ be ke ten beuna, cha mkea xa gibeꞌa, usob xa wats lad gaꞌal sa nibeꞌe Dios.
HEB 1:4 Leꞌa nat leꞌa Xin Dios uzhebpa mas nsak ndoꞌ be angel, lak leaꞌ xa uzhebpa mas nsak ndoꞌ lak nsaleaꞌ be angel.
HEB 1:5 Leꞌa Dios naꞌanpa ngab ndoꞌ ni dub angel lak ndab xa ndoꞌ Xin xa, ndab xa: Leꞌa lu nak Xiꞌín naꞌ, nat leꞌa naꞌ nak Xus lu. No ndab Dios: Leꞌa naꞌ gak Xus xa, leꞌa xa gak Xiꞌín naꞌ.
HEB 1:6 Leꞌa gor na mtuꞌub Dios Xin na ndoꞌ gizhliyo, leꞌa xa ndab: Leꞌa itea be angel ten naꞌ yankea xa.
HEB 1:7 Leꞌa cuent ten be angel leꞌa diꞌizh ten Dios ndab: Leꞌa Dios ndun leꞌa be angel ten xa nyak cuent mbi, leꞌa bexa ndun tiꞌin ndoꞌ xa wa nyak cuent bealꞌ giꞌ.
HEB 1:8 Ná leꞌa cuent ten Xin Dios ndab Dios: Leꞌa lu Dios nibeꞌe idub tiemp. Lu ndon leꞌa utsin nibeꞌe ndoꞌ be men.
HEB 1:9 Leꞌa lu nsak ladna be ta wen ndun be men, no nxee ladna lu ndoꞌ ta ugap ndun bexa. Ta weꞌe leꞌa naꞌ Dios ten lu mti naꞌ lu inibeꞌe lu, ndontsa mas uzhebpa iten ladna lu ndoꞌ be ltsaꞌa lu.
HEB 1:10 No ndab Diꞌizh ten Dios: Leꞌa go xa nibeꞌe, zha ndon ned mtexan ga gizhliyo nsea gibeꞌa.
HEB 1:11 Leꞌa gal dub wizh leꞌa be ta wa initndoꞌ, ná leꞌa go idub tiemp nchoka. Leꞌa be ta wa gak gox lak ndak gox dub lad.
HEB 1:12 Cha uduꞌud ga‑yá cuent dub bleꞌa lad, cha izheꞌa‑yá lak ncheꞌa dub men xab na. Ná leꞌa go dubtsa nak, no idub tiemp ncho ga.
HEB 1:13 Leꞌa Dios naꞌanpa ngab ndoꞌ ni dub angel lak ndab xa ndoꞌ Xin xa: Usob wats naꞌ lad gaꞌal ndee, gast gal gor ute naꞌ bexa ndaklono lu xan ndats lu, inibeꞌe lu bexa.
HEB 1:14 Leꞌa itea be angel naktsa espíritu ndun tiꞌin ndoꞌ Dios, ntuꞌub Dios bexa gakno xa be men, bexa gap gealnaban ndoꞌ Dios.
HEB 2:1 Ta weꞌe leꞌa beuna mas nsabndoꞌ ulaꞌach gealngea ten Dios ta mbiꞌín beuna, naꞌanpa ulaꞌa beuna‑yá.
HEB 2:2 Leꞌa diꞌizh ten Dios ta mbidiꞌizh be angel ndoꞌ be men polta wa dub ta ta ugeaka. Leꞌa itea be men na lá uxobgek ndoꞌ diꞌizh wa, leꞌa Dios mtsaksi bexa lak nsabndoꞌ‑yá.
HEB 2:3 No liga mas segur utsaksika Dios beuna, tal leꞌa beuna lá igondoꞌ xteꞌe wen nak ta nsaꞌa Dios, ngoꞌo xa beuna ndoꞌ be ke ten beuna. Leꞌa Jesús ngok xa ned mbidiꞌizh diꞌizh wa ndoꞌ be men; weꞌe leꞌa bexa na mbiꞌín ta wa cha mbidiꞌizh ndoꞌ beuna leꞌa‑yá ta ugeaka.
HEB 2:4 Leꞌa Dios leꞌa mluu leꞌa diꞌizh mbidiꞌizh bexa wa ta ugeaka, msaꞌa Dios sian ndoꞌ be uyon ndun bexa, nsea sian be taꞌa ndanseana be men, nsea msaꞌa Dios Espíritu ten na ndoꞌ bexa lakka nlad Dios.
HEB 2:5 Leꞌa Dios naꞌanpa ngab ndoꞌ be angel leꞌa bexa wa inibeꞌe sa yoo beuna ndoꞌ gizhliyo kub ilen wa, ta na li ndadiꞌizh besa wa.
HEB 2:6 Ndi ncho dub sa nkeaniꞌi diꞌizh ten Dios, ndab dub men ndoꞌ Dios: ¿Ton nak besa zha nkweaꞌ ladna go besa? ¿No ton nak besa ndakno go besa zha?
HEB 2:7 Leꞌa go mbin leꞌa be men stidotsa uxee nsak ndoꞌ be angel. No msaꞌa go dub taꞌa no besa nsak, nsea msaꞌa go juers no besa inibeꞌe ndoꞌ be taꞌa mbindeꞌe go.
HEB 2:8 No mte go itea be taꞌa xan ndats be men inibeꞌe bexa‑yá. Leꞌa ta na li mte Dios itea be taꞌa xan ndats be men, ta weꞌe inibeꞌe beuna ndoꞌ itea be taꞌa guniꞌi xtaꞌan‑a. Parea leꞌa ta wa biseata gal zha gak cumplir.
HEB 2:9 Ná nat leꞌa beuna uniꞌí leꞌa Dios mbin leꞌa Jesús stidotsa uxee nsak ndoꞌ be angel dub ndeꞌep. Leꞌa Jesús uniꞌí gealkweaꞌ gast ngut xa sakndoꞌ beuna. Ná nat leꞌa Dios myunno Jesús uzhebpa dub xa nsak no dub xa nibeꞌe. Leꞌa ta na mkweaꞌ ladna Dios be men, ta weꞌe leꞌa Jesús ngut sakndoꞌ itea be men.
HEB 2:10 Leꞌa iteanak be ta ncho ta mbindeꞌeka Dios, no juers ten xa ndaktiꞌin iteanak be taꞌa. Leꞌa Dios nlad leꞌa kwaꞌad be men yak xin xa, cha yoꞌo xa bexa gibeꞌa sa ncho xa. Ta weꞌe mlaꞌa Dios utid Jesucristo be gealkweaꞌ ndontsa ngok cumplir ta na nsabndoꞌ gun Jesús, xa na ngoꞌo be men ndoꞌ be ke ten bexa.
HEB 2:11 Leꞌa Jesús mtsambiꞌi beuna ndoꞌ be ke ten beuna, no nak Dios Xus beuna na li msambiꞌila wa. Ta weꞌe leꞌa Jesús naꞌanpa ndo ladna ndab xa leꞌa beuna wit na nsea bsan xa.
HEB 2:12 Ndab Jesús ndoꞌ Dios: Gudiꞌizh naꞌ cuent ten go ndoꞌ be wit naꞌ nsea ndoꞌ be bsan naꞌ. No gankeꞌa naꞌ go lat bexa ndankea ga.
HEB 2:13 No ndab xa: Leꞌa naꞌ ndee Diostsa igeꞌ ladna. Nsea ndab xa: Leꞌa naꞌ nsoꞌno be men msaꞌa Dios ulach naꞌ, bexa nak xin xa.
HEB 2:14 Leꞌa beuna nak xin Dios wa, leꞌa beuna menka. Ta weꞌe leꞌa Xin Dios no ngok men, myak xa lak nak beuna. Cha ngut xa ndontsa gun xa gan ndoꞌ maxuꞌu, xa ndap juers gut be men.
HEB 2:15 Litsa mbin Jesús gan utoꞌo be men ndoꞌ yaꞌa maxuꞌu, bexa nzheb ndoꞌ gealgut idub nban xa.
HEB 2:16 Leꞌa beuna uniꞌíka leꞌa Jesús naꞌanpa mbiꞌid gakno xa be angel, leꞌa xa ndi mbiꞌid ndontsa gakno xa beuna nak xin Abraham.
HEB 2:17 Ta weꞌe li myak xa lakka nak beuna nak wit xa, ndontsa ikweaꞌ ladna xa beuna no wen gun xa tiꞌin ten uleꞌay, isoꞌ xa ndoꞌ Dios sakndoꞌ beuna ndontsa utsuꞌu Dios be ke ten beuna.
HEB 2:18 Leꞌa Jesús utid ndoꞌ gealkweaꞌ no mlad maxuꞌu utsabgix Jesús, ta weꞌe nat leꞌa Jesús suꞌu gakno beuna gor na nlad maxuꞌu utsabgix beuna.
HEB 3:1 Bego nak beuna xmen Dios, bexa mtsambiꞌi Dios ladoꞌo na, leꞌa Dios leꞌa mti bega gak bega xmen xa. Ta weꞌe nat binbeꞌe bega xteꞌe nak Cristo Jesús. Leꞌa xa leꞌaka Dios mtuꞌub, no nak xa uleꞌay ndon leꞌa nsak cuent ten ta nchankea beuna Dios.
HEB 3:2 Leꞌa Dios leꞌa ulaxoꞌob Jesús gak xa ta wa. Leꞌa Jesús cha uzheꞌeb utsin mbin tiꞌin wa, lak utsin mbin Moisés tiꞌin ten Dios lat bexa nak xmen Dios.
HEB 3:3 Ná leꞌa Jesús mas nsak ndoꞌ Moisés, lak dub xa mbindeꞌe dub niꞌi mas nsak ndoꞌ niꞌi wa.
HEB 3:4 Leꞌa itea be niꞌi menka ndandeꞌe, parea leꞌa Dios leꞌa ndandeꞌe iteanak be ta ncho.
HEB 3:5 Leꞌa Moisés ngokno be xmen Dios, utsin mbin xa tiꞌin ten Dios cuent dub mos. Mbidiꞌizh xa be diꞌizh na ndiꞌizh gab Dios ndoꞌ bexa wa.
HEB 3:6 Ná leꞌa Cristo leꞌa nak Xin Dios, utsin ndakno xa be xmen Dios. Leꞌa beuna no nak xmen Dios, tal leꞌa beuna lá ulaꞌa ta ngeꞌ ladna beuna Dios, no ta ndenkeaꞌ beuna ta usaꞌa Dios ndoꞌ beuna.
HEB 3:7 Lak nkeaniꞌi diꞌizh ten Dios, ndab Espíritu ten Dios ndoꞌ be men: Tal leꞌa bego goꞌón ta ndab Dios wizh nat,
HEB 3:8 lá gun ngud bega ladoꞌo bega, lak mbin bexa zha utencho bexa geꞌe sa bid, mbin bexa preb Dios ná xteꞌe gunno Dios bexa.
HEB 3:9 Ta weꞌe ndab Dios: “Leꞌa sa wa leꞌa be usan gox ten bega mbin preb naꞌ, maska dub top gaꞌal liꞌin uniꞌí bexa be ta wen mbinno naꞌ bexa.
HEB 3:10 Ta weꞌe ngokloo naꞌ ndoꞌ bexa ncho zha wa, ndáp naꞌ uzhebpa ndun bexa ta ugap, no naꞌanpa nxobgek bexa ndoꞌ naꞌ.
HEB 3:11 Ta weꞌe ngokloo naꞌ ndoꞌ bexa wa, ndáp naꞌ leꞌa bexa ni dub mod lá yoo gan yate sa ndiꞌizh uneꞌe bexa wats naꞌ.”
HEB 3:12 Bego nak beuna xmen Cristo, blaꞌach bega naꞌanpa yoo dub ta ugap len ladoꞌo bega, cha ulaꞌa bega ta ndangea ladna bega Dios, no isasit bega wats Dios nban.
HEB 3:13 Ndi btenxeꞌa bega be ltsaꞌa bega itea wizh, nattsa bi nchasea wizh nat. Weꞌe naꞌanpa ukedino maxuꞌu ni dub bega gun bega ta ugap, cha yak ngud ladoꞌo bega.
HEB 3:14 Leꞌa beuna dubtsa nak no Cristo, tal leꞌa beuna idub tiemp igeꞌ ladna xa, lak mgeꞌ ladna beuna xa zha ned wa.
HEB 3:15 Lak nkeaniꞌi diꞌizh ten Dios, ndab‑a: Tal leꞌa bega goꞌón ta ndab Dios wizh nat, lá gun ngud bega ladoꞌo bega, lak zha mbin bexa Israel preb Dios.
HEB 3:16 ¿Ton bexa na li mbiꞌín ta ndab Dios wa zha, ná cha mbin bexa preb xa wa? Leꞌa ta wa bexa Israel, bexa uloꞌo Moisés nacion Egipto.
HEB 3:17 ¿No ton ndoꞌ ná ngokloo Dios dub top gaꞌal liꞌin zha? Leꞌa ta wa ndoꞌ bexa na li ugap mbin, cha ngut bexa geꞌe sa bid wa.
HEB 3:18 ¿No ton ndoꞌ ná ndab Dios ni dub mod lá yoo gan yate bexa sa ndiꞌizh uneꞌe bexa wats Dios zha? Leꞌa ta wa ndoꞌ bexa na li lá uxobgek ndoꞌ Dios.
HEB 3:19 Leꞌa beuna uniꞌíka leꞌa bexa wa lá yoo gan yate sa wa, ta na lá ngungea ladna bexa ta ndab Dios wa.
HEB 4:1 Leꞌa nat leꞌa Dios bi ndab leꞌa beuna syoꞌo gan yate sa uneꞌe beuna wats xa. Ta weꞌe nsabndoꞌ ulaꞌach beuna leꞌaka beuna, ndontsa naꞌanpa ncho bega gal gor lá yoo gan yate sa wa.
HEB 4:2 Leꞌa beuna mbiꞌínka diꞌizh wen ten Dios, lak mbiꞌín bexa uyoꞌo polta‑yá. Parea leꞌa ta na mbiꞌín bexa diꞌizh wa naꞌanpa ngakno bexa, leꞌa bexa lá ngungea ladna‑yá.
HEB 4:3 Ná leꞌa beuna ndangea ladna diꞌizh wa, ta weꞌe syoteka beuna sa uneꞌe beuna, lak ndab Dios: Ta weꞌe ngokloo naꞌ ndoꞌ bexa wa, ndáp naꞌ leꞌa bexa ni dub mod lá yoo gan yate sa ndiꞌizh uneꞌe bexa wats naꞌ. Leꞌa be tiꞌin ten Dios myandoꞌla zha utexanta gizhliyo,
HEB 4:4 lak nkeaniꞌi diꞌizh ten Dios, ndab‑a: Wizh isagaꞌad leꞌa Dios mneꞌe ndoꞌ itea be tiꞌin ten xa.
HEB 4:5 No ncho sa nkeaniꞌi‑yá ndab Dios: Leꞌa bexa wa naꞌanpa yate sa ndiꞌizh uneꞌe bexa wats naꞌ.
HEB 4:6 Leꞌa be men bi syoꞌo gan yate wats Dios, ná leꞌa bexa na ned mbiꞌín diꞌizh wen ten Dios wa naꞌanpa yate, geal leꞌa bexa lá uxobgek ndoꞌ Dios.
HEB 4:7 Leꞌa Dios ndab leꞌa wizh nat bi ncho tiemp, lak ndab xa ndoꞌ David sian liꞌin tsoꞌo na uyoꞌo Moisés wa, lak nkeaniꞌi diꞌizh ten Dios: Tal leꞌa bega goꞌón ta ndab Dios wizh nat, lá gun ngud bega ladoꞌo bega.
HEB 4:8 Tal leꞌa Josué ngun gan uneꞌe bexa Israel polta wa, weꞌe leꞌa Dios naꞌanpa ngab ncho stubga wizh uneꞌe be men wats Dios.
HEB 4:9 Ta weꞌe leꞌa beuna uniꞌí bi ncho dub sa uneꞌe beuna nak xmen Dios.
HEB 4:10 Leꞌa tal ton yate sa uneꞌe xa wats Dios wa, leꞌa xa wa uneꞌe ndoꞌ tiꞌin ten na, lak mneꞌe Dios ndoꞌ tiꞌin ten na.
HEB 4:11 Ta weꞌe uzhebpa gun beuna juers yate beuna sa uneꞌe beuna wa, ndontsa naꞌanpa yasea ni dub beuna lak ngwasea bexa lá uxobgek ndoꞌ Dios tiemp polta.
HEB 4:12 Leꞌa itea be diꞌizh ndab Dios ta nban, no ndap‑a juers. No mas wach‑a ndoꞌ dub spad top toꞌo na wach, sun‑a gan usaxeꞌa‑yá be ta ugaꞌach, gast nluu‑yá xteꞌe nak ta ndanbeꞌe beuna nsea ta ncho len ladoꞌo beuna.
HEB 4:13 Leꞌa ni dub taꞌa wa lá yoo gan ukachko beuna ndoꞌ Dios, leꞌa cuent ten Dios leꞌa iteanak be taꞌa ndon usaxeꞌa nak. Leꞌa gal dub wizh ilayaꞌ beuna ndoꞌ Dios, gab beuna itea be taꞌa mbin beuna.
HEB 4:14 Nat leꞌa ncho dub xa nak uleꞌay ndon leꞌa nsak ten beuna. Leꞌa ta wa Jesús Xin Dios, xa nseaꞌ gibeꞌa baꞌ no nsoꞌ xa ndoꞌ Dios sakndoꞌ beuna. Ta weꞌe lá ulaꞌa beuna ta na ndangea ladna beuna xa.
HEB 4:15 Leꞌa xa na nak uleꞌay ndon leꞌa nsak ten beuna no uniꞌí leꞌa beuna lá ndun gan nxobgek ndoꞌ Dios ncho zha. Leꞌa lak nlad maxuꞌu utsabgix beuna, no likaga mlad maxuꞌu utsabgix Jesús, parea leꞌa Jesús ni dub ta ugap lá ngun.
HEB 4:16 Ta weꞌe lá izheb beuna ibii beuna wats Dios Xa Nibeꞌe, gor na ikiꞌin beuna gakno xa beuna, leꞌa xa nkweaꞌpa ladna beuna, no utsin ndanno xa beuna.
HEB 5:1 Leꞌa itea be uleꞌay ndon leꞌa nsak ten bexa Israel, leꞌa Dios leꞌa nti bexa lat be men. Ngoxoꞌob Dios bexa gun bexa tiꞌin ndoꞌ Dios sakndoꞌ be men, nsaꞌa bexa be taꞌa no be man xnab ndoꞌ Dios, ndontsa yuꞌu be ke ten be men.
HEB 5:2 Leꞌa dub uleꞌay nlats ladna bexa na lá iniꞌí xteꞌe gun, no bexa na ndun ta lid leꞌa nak, geal leꞌa uleꞌay wa ncho gor lá ndun gan uxobgek ndoꞌ Dios.
HEB 5:3 Ta weꞌe leꞌa xa wa nsabndoꞌ usaꞌa man xnab ndoꞌ Dios, ndontsa yuꞌu be ke ten leꞌaka leꞌa xa, no be ke ten be men.
HEB 5:4 Naꞌan ton yoo gan gab leꞌa gun tiꞌin ten uleꞌay ndon leꞌa nsak, leꞌa Dios ndi leꞌa uti xa wa lak mti Dios Aarón.
HEB 5:5 No liga leꞌa Cristo naꞌanpa ngab leꞌaka xa gak uleꞌay ndon leꞌa nsak. Leꞌa Dios leꞌa mti xa, ndab Dios ndoꞌ xa: Leꞌa lu nak Xiꞌín naꞌ, nat leꞌa naꞌ nak Xus lu.
HEB 5:6 Nsea stub sa nkeaniꞌi ndab Dios: Leꞌa lu leꞌa nak uleꞌay idub tiemp, lakta ngok Melquisedec uleꞌay.
HEB 5:7 Leꞌa zha uyoꞌo Cristo ndoꞌ gizhliyo ndee, leꞌa xa ugeꞌ uníꞌi no mbiꞌin xa gor ndadiꞌizhno xa Dios, unab xa ndoꞌ Dios gakno Dios xa, leꞌa Dios ndap juers lá gat xa. Leꞌa Dios mbiꞌínka ta li unab xa wa, geal leꞌa xa uzhebpa nxobgek ndoꞌ Dios.
HEB 5:8 Leꞌa Cristo leꞌa nak Xin Dios, ná leꞌa xa utidka gealkweaꞌ wa ndontsa ngók xa uxobgek xa ndoꞌ ta nlad Dios.
HEB 5:9 No ta na li mbin Cristo lakka nlad Dios wa, ta weꞌe leꞌa tal ton uxobgek ndoꞌ Cristo, leꞌa Dios usaꞌa dub gealnaban kub ta nunk lá idub.
HEB 5:10 No ulaxoꞌob Dios Jesús gak xa uleꞌay ndon leꞌa nsak, lak ngok uleꞌay Melquisedec.
HEB 5:11 Bi ncho sianta be taꞌa nlad naꞌ ukeꞌa naꞌ cuent ten ta wa, parea uzhebpa bid ukeꞌa naꞌ‑yá dub mod na yakbeꞌena bega‑yá, leꞌa bega uzhebpa chaꞌaw nyakbeꞌena.
HEB 5:12 Leꞌa nat leꞌa bega yá kwen ndangea ladna Cristo, nsabndoꞌ gakla bega mech nluu be men. Parea leꞌa bega bi nkiꞌin uluugal dub xa bega stub biaj be ta nak xan diꞌizh ten Dios. Leꞌa bega nak cuent medoꞌo ndo chizh, dub meꞌed bi lá isuꞌu gaw.
HEB 5:13 Leꞌa tal ton lá nyakbeꞌena xteꞌe nsabndoꞌ gun xa, leꞌa xa wa nak cuent dub medoꞌo.
HEB 5:14 Ná leꞌa bexa na uniꞌí xtaꞌan nsabndoꞌ gun xa, no xtaꞌan lá nsabndoꞌ gun xa, leꞌa xa wa nak cuent dub men gox ndákka ndaw.
HEB 6:1 Nat yá lá utsidta beuna be ta ned mtsid beuna cuent ten Cristo. Leꞌa beuna ndi utsid be ta nsabndoꞌ utsid dub xa mas ndákla. Yá lá gudiꞌizhta naꞌ ndoꞌ bega stub biaj be ta ned wa, xteꞌe ulaꞌa beuna be ta ugap ndun beuna, no xteꞌe igeꞌ ladna beuna Dios,
HEB 6:2 no xteꞌe nsabndoꞌ italeaꞌ beuna, no xteꞌe uxoꞌob beuna yaꞌa beuna tsoꞌo stub xa, no xteꞌe ixiste Dios bexa ngut, no xteꞌe utsaksi Dios bexa ta nunk lá idub, bexa ndap ke ndoꞌ Dios.
HEB 6:3 Tal leꞌa Dios ulaꞌa, leꞌa naꞌ ndi uluu dub taꞌa xaꞌaga ndoꞌ bega.
HEB 6:4 Leꞌa ncho bexa nchandoꞌla xeꞌa ten Dios, no ndákla xa ta msaꞌa Dios ndoꞌ xa, no nchola Espíritu ten Dios len ladoꞌo xa,
HEB 6:5 no nchandoꞌla bexa diꞌizh wen ten Dios, no uniꞌíla bexa leꞌa Cristo inibeꞌe tiemp ilen.
HEB 6:6 Parea tal leꞌa bexa wa ulaꞌa Cristo, leꞌa bexa lá yoota gan ulaꞌagal ta ugap nak bexa, no isengal bexa nes ten Dios. Leꞌa ta ugap ndun bexa wa cuent nkeꞌagal bexa Xin Dios ndoꞌ cruz, usalad ndanno bexa Jesús ndoꞌ gaꞌal be men.
HEB 6:7 Leꞌa bexa na ndangeaka ladna Cristo, leꞌa bexa wa nak cuent dub bleꞌa yo sian biaj nlaꞌ gi ndoꞌ‑yá, cha nzheꞌalyazh‑a, wen nsaꞌa‑yá be ta gaw bexa ndun tiꞌin sa wa.
HEB 6:8 Ná leꞌa bexa na nlaꞌa ta ndangea ladna bexa Cristo, leꞌa xa wa nak cuent dub bleꞌa yo nsaꞌa yagich nsea be gix nsoꞌ gich. Leꞌa yo wa naꞌan xtiꞌin, cha gal dub wizh yolꞌ ta wa.
HEB 6:9 Bego amig ten naꞌ, maska li mkeꞌa naꞌ be ta ndee, leꞌa besa uniꞌí leꞌa bega wenka nak, no ndapka bega gealnaban ndoꞌ Dios.
HEB 6:10 Leꞌa Dios ndun sbeꞌen ta nsabndoꞌka, leꞌa xa lá yalad xteꞌe ndun bega tiꞌin ten xa, ta nluu leꞌa bega ndankeaka Dios. Leꞌa ta wa ta na ndakno bega be ltsaꞌa bega, bexa no nak xmen Cristo, no bi leꞌaka ta wa ndun bega.
HEB 6:11 Parea leꞌa besa nlad leꞌa kadga dub bega li gun idub tiemp, ndontsa gal usoꞌ bega ta na ndenkeaꞌ bega usaꞌa Dios ndoꞌ bega.
HEB 6:12 Weꞌe naꞌanpa ichaꞌab bega gun bega ta wen, ndi gun bega lak ndun bexa na ngeꞌ ladna Dios, nxik bexa ndoꞌ itea be taꞌa, gast gal usoꞌ xa be ta ndab Dios usaꞌa Dios.
HEB 6:13 Naꞌan stub xa mas nsak ndoꞌ Dios, ta weꞌe leꞌa gor na ndab Dios leꞌa Dios ta ugeakapa usaꞌa dub ta ikaꞌa Abraham, leꞌa xa mbintiꞌin leꞌaka leaꞌ xa,
HEB 6:14 ndab xa: “Leꞌa naꞌ ta ugeaka mas gakno lu no sian be taꞌa, no gun naꞌ uzhebpa yak kwaꞌad be men gak ras ten lu.”
HEB 6:15 Leꞌa Abraham wa cha kwen ukenkeaꞌ ni lá ngach ladna xa. Weꞌe cha ngol usoꞌ xa ta li ndab Dios usaꞌa Dios ndoꞌ xa wa.
HEB 6:16 Leꞌa gor na ndab dub men leꞌa xa ta ugeakapa gun dub taꞌa, leꞌa xa nseꞌat leaꞌ stub xa mas nsak. Leꞌa ta wa nluu leꞌa xa ta ugeakapa gun ta wa.
HEB 6:17 Ta weꞌe leꞌa gor na nlad Dios gab Dios leꞌa xa ta ugeakapa usaꞌa ta ndab xa, naꞌanpa ucheꞌa xa ta ndab xa, leꞌa xa ndantiꞌin leꞌaka leaꞌ xa.
HEB 6:18 Leꞌa gor na ndab Dios gun Dios dub taꞌa, no ndantiꞌin xa leꞌaka leaꞌ xa, leꞌa itop ta wa gab leꞌa xa ta ugeakapa gun ta wa, geal leꞌa Dios naꞌanpa ndun gealkwiꞌin. Ta weꞌe nbii beuna wats Dios ndontsa gakno xa beuna. No ndenkeaꞌ beuna usaꞌa xa ta wen gal usoꞌ beuna, lak ndab xa ndoꞌ beuna.
HEB 6:19 Leꞌa ta ndenkeaꞌ beuna wa ta ugeakapa gak, cuent dub giꞌib kweꞌa nsensaꞌab dub barco ndoꞌ nitsdoꞌo. No uniꞌí beuna leꞌa beuna syoꞌo gan yate wats Dios.
HEB 6:20 Leꞌa Jesús ned uyote sa wa ndontsa no beuna syoꞌo gan yate wats Dios. No nak xa uleꞌay ndon leꞌa nsak idub tiemp, lak ngok Melquisedec uleꞌay.
HEB 7:1 Leꞌa Melquisedec wa ngok rey nibeꞌe gezh Salem, no ngok xa uleꞌay ndoꞌ Dios xa ndon leꞌa nsak. Leꞌa dub zha leꞌa Abraham uteyono pla be rey, cha mbin xa gan ndoꞌ bexa wa. Weꞌe leꞌa gor na nchalaꞌnchaꞌ xa, leꞌa Melquisedec utoꞌo ngwaꞌikanes Abraham, ndab xa xteꞌe uzheꞌeb wen gakno Dios Abraham.
HEB 7:2 Leꞌa Abraham cha myun cuent diezmo ten itea be taꞌa mlat xa ndoꞌ be rey wa ndoꞌ Melquisedec. Leꞌa diꞌizh Melquisedec wa gab: dub men utsin nibeꞌe. No nak xa rey ten Salem, dub diꞌizh gab: xa ndun wen kwe be men.
HEB 7:3 Leꞌa diꞌizh ten Dios ni lá ngab ná ton nak xus xa no xnaꞌa xa no be usan gox ten xa. No ni lá ngab‑a pol ngol xa no pol ngut xa. Ta weꞌe leꞌa xa ngok lak nak Xin Dios, nak xa uleꞌay idub tiemp.
HEB 7:4 Nat binbeꞌe bega ná xteꞌe uzhebpa nsak Melquisedec wa, leꞌa Abraham usan gox ten bexa Israel myun cuent be diezmo ten be ta mlat xa ndoꞌ be rey wa.
HEB 7:5 Leꞌa bexa nak uleꞌay ten bexa Israel nak ras ten Leví no ras ten Abraham. Leꞌa ley ten Dios nkeaniꞌi leꞌa be uleꞌay wa ikaꞌa be diezmo, ta nsaꞌa iteata bexa Israel, bexa no nak ras ten Abraham.
HEB 7:6 Leꞌa Melquisedec wa naꞌanpa dub xa ras Leví, parea leꞌa xa ukaꞌa be diezmo msaꞌa Abraham. Cha leꞌa Melquisedec ndab ndoꞌ Abraham leꞌa Dios uzheꞌeb gakno Abraham, xa na ndabla Dios usaꞌa Dios be ta wen ndoꞌ na.
HEB 7:7 Leꞌa beuna uniꞌíka leꞌa tal dub xa ndab ndoꞌ stubga men ná xteꞌe wen gunno Dios xa wa, leꞌa xa li ndab wa mas nsak ndoꞌ stub xa wa.
HEB 7:8 Leꞌa be uleꞌay na li nsen diezmo, leꞌa gal dub wizh leꞌa bexa satka. Parea leꞌa Melquisedec nak cuent dub xa bi nban, leꞌa diꞌizh ten Dios naꞌanpa ndab leꞌa xa wa ngut.
HEB 7:9 Leꞌa bexa ras ten Leví nak bexa nsen diezmo ndoꞌ be men. Parea leꞌa gor na myun Abraham cuent diezmo wa ndoꞌ Melquisedec, leꞌa ta wa cuent no bexa ras ten Leví msaꞌa.
HEB 7:10 Li syoꞌo gan gab beuna geal leꞌa Leví wa dub xa ras ten Abraham, parea leꞌa gor na li ngwaꞌikanes Melquisedec Abraham leꞌa Leví biseata gal.
HEB 7:11 Leꞌa ley msaꞌa Dios ndoꞌ bexa Israel wa ndab leꞌa bexa ras ten Leví gak be uleꞌay, ná leꞌa be uleꞌay wa lá gun gan wen yaꞌan be men ndoꞌ Dios. Ta weꞌe nsabndoꞌ ncho stub uleꞌay xaꞌaga, dub xa naꞌanpa nak lak ngok uleꞌay Aarón. Ndi nak xa dub uleꞌay lak ngok uleꞌay Melquisedec.
HEB 7:12 Leꞌa nat leꞌa ta na ncho stub uleꞌay xaꞌaga mod nak wa, ta weꞌe nsabndoꞌ yoo stub diꞌizh xaꞌaga nak ndoꞌ ley ten Moisés wa.
HEB 7:13 Leꞌa xa nak uleꞌay wa, leꞌa xa wa utoꞌo stubga ras ten bexa Israel, bexa naꞌanpa ndiꞌizh ngak be uleꞌay.
HEB 7:14 Leꞌa xa wa Jesucristo Xwan beuna, xa ulen ras ten Judá, dub ras naꞌanpa ngab Moisés itoꞌo be uleꞌay.
HEB 7:15 Leꞌa ta ndee wa mas lid bid yakbeꞌena beuna, tal leꞌa beuna gungea ladna leꞌa Jesús leꞌa nak stub uleꞌay lak ngok Melquisedec, xaꞌaga nak xa ndoꞌ iteata be uleꞌay.
HEB 7:16 Leꞌa Jesús naꞌanpa nak dub uleꞌay lak nak bexa ntoꞌo lat dub ras be men lak nibeꞌe ley, ndi nak xa uleꞌay geal ndap xa juers nban xa idub tiemp.
HEB 7:17 Lak nkeaniꞌi diꞌizh ten Dios: Leꞌa lu leꞌa nak uleꞌay idub tiemp, lak ngok Melquisedec uleꞌay.
HEB 7:18 Weꞌe leꞌa ley mkeꞌa Moisés wa yá naꞌanta xtiꞌin, uzhebpa uleꞌa nak‑a no lá isuꞌu‑yá.
HEB 7:19 Leꞌa ley wa ni dub tuzh lá ndakno beuna wen yaꞌan beuna ndoꞌ Dios. Nat ndi ncho stub taꞌa mas wen ndenkeaꞌ beuna usaꞌa Dios, ta ulaꞌa Dios ibii beuna wats xa.
HEB 7:20 Leꞌa Dios mbintiꞌin leꞌaka leaꞌ xa gor na ndab xa leꞌa Jesucristo nak uleꞌay wa.
HEB 7:21 Leꞌa gor na ngok be men uleꞌay, leꞌa Dios naꞌanpa li ngab. Parea leꞌa cuent ten Jesús leꞌa Dios mbintiꞌin leꞌaka leaꞌ xa, lak nkeaniꞌi diꞌizh ten Dios: Leꞌa ta ndee ta ndab Dios, leꞌa xa naꞌanpa ncheꞌa ta ndab xa: “Leꞌa lu leꞌa nak uleꞌay idub tiemp, lak ngok Melquisedec uleꞌay.”
HEB 7:22 Leꞌa ta li ndab Dios wa gab leꞌa ta wen yaꞌan beuna ndoꞌ Dios juers ten Jesús wa mas uzheꞌeb wen ndoꞌ ta polta wa.
HEB 7:23 Leꞌa be uleꞌay mbin tiꞌin wa dub tiemptsa, cha ngut bexa, ta weꞌe uyoꞌo kwaꞌad bexa.
HEB 7:24 Ná leꞌa Jesús idub tiemp nban, nak xa dub uleꞌay idub tiemp.
HEB 7:25 Ta weꞌe leꞌa xa leꞌa nsuꞌu dubtsa neꞌeka ngoꞌo be men ndoꞌ be ke ten bexa, bexa na ndangea ladna Jesús, cha nbii bexa wats Dios. Leꞌa Jesús idub tiemp nban, nsoꞌ xa wats beuna ndoꞌ Dios.
HEB 7:26 Leꞌa Jesús nak uleꞌay ndon leꞌa nsak lak nkiꞌin beuna xa: leꞌa xa umbiꞌi nak ndoꞌ Dios, ni dub ke lá ndap xa. Leꞌa Dios uloꞌo xa lat bexa ndap ke, cha myoꞌo xa xa gibeꞌa sa mas nsak.
HEB 7:27 Itea wizh leꞌa be uleꞌay ndon leꞌa nsak wa ned nsaꞌa xnab ndoꞌ Dios, ta nab bexa ndoꞌ Dios yuꞌu be ke ten leꞌaka bexa. Weꞌe nsaꞌa bexa stub xnab ndoꞌ Dios, ta nab bexa ndoꞌ Dios yuꞌu be ke ten iteata bexa Israel. Ná leꞌa Jesús leꞌaka ngok xnab dubtsa biaj, ndontsa utsuꞌu xa be ke ten beuna idub tiemp.
HEB 7:28 Leꞌa ley ten Moisés ndab ná ton gak uleꞌay ndon leꞌa nsak, parea leꞌa be uleꞌay wa no ncho gor lá ndun gan uxobgek ndoꞌ Dios. Ná leꞌa tsoꞌo na msaꞌa Dios ley wa, leꞌa Dios leꞌaka ndab usaꞌa leꞌaka Xin na gak uleꞌay ndon leꞌa nsak, xa ndon leꞌakama nak xa umbiꞌi ten Dios idub tiemp.
HEB 8:1 Leꞌa ta ndee ta mas nsak lat itea be ta li ndáp naꞌ wa: leꞌa Jesús nak uleꞌay ndon leꞌa nsak ten beuna, nsob xa gibeꞌa wats lad gaꞌal sa nsob Dios, xa ndon leꞌa nibeꞌe.
HEB 8:2 No ndun xa tiꞌin ten uleꞌay len ta na ta ugeaka nak niꞌi ten Dios gibeꞌa, dub ta mbindeꞌe Dios naꞌanpa dub ta mbindeꞌe be men.
HEB 8:3 Leꞌa itea be uleꞌay ndon leꞌa nsak wa ulaxoꞌob Dios, ndontsa usaꞌa bexa be taꞌa no be man xnab ndoꞌ Dios. Ta weꞌe leꞌa Jesucristo no nsabndoꞌ usaꞌa taꞌa ndoꞌ Dios.
HEB 8:4 Tal leꞌa xa ncho ndoꞌ gizhliyo, leꞌa xa naꞌanpa gak uleꞌay, geal ncho uleꞌay nsaꞌa xnab ndoꞌ Dios lak nibeꞌe ley.
HEB 8:5 Leꞌa tiꞌin ndun bexa wa ndoꞌ gizhliyo nak cuent xiꞌíntsa ta ncho gibeꞌa. Leꞌa ta wa lak ta ndab Dios ndoꞌ Moisés gor gundeꞌe Moisés niꞌilad ten Dios, ndab Dios: “Blaꞌach gundeꞌe lu itea be ta wa lak nak ta mluu naꞌ ndoꞌ lu gek geꞌe baꞌ.”
HEB 8:6 Leꞌa tiꞌin ndun Jesús wa uzhebpa mas nsak ndoꞌ ta ndun be uleꞌay ndoꞌ gizhliyo, leꞌa juers ten ta ndun Jesús, leꞌa Dios mbinno be men stubga trat kub. Leꞌa trat kub wa mas wen ndoꞌ trat ned wa, leꞌa ta ndab Dios gunno xa beuna nat wa mas uzhebpa wen nak ndoꞌ ta ndab xa polta.
HEB 8:7 Tal leꞌa trat ned wa ngun gan wen yaꞌan be men ndoꞌ Dios, weꞌe naꞌanpa ikiꞌin gun Dios trat itop wa.
HEB 8:8 Leꞌa gor na uniꞌí Dios leꞌa be men lá nxobgek ndoꞌ xa, weꞌe ndab Dios: Blaꞌach bego leꞌa gal be wizh gunno naꞌ bexa Israel no bexa Judá stub trat kub.
HEB 8:9 Leꞌa ta wa lá gak lak nak trat mbinno naꞌ bexa polta, zha na ulo naꞌ bexa Egipto. Leꞌa bexa wa lá uxobgek ndoꞌ trat wa, ta weꞌe mla naꞌ bexa.
HEB 8:10 Leꞌa gal be wizh wa leꞌa trat kub gunno naꞌ bexa Israel wa lndeꞌe gak: Leꞌa naꞌ gun leꞌa bexa yakbeꞌena be diꞌizh nibeꞌe naꞌ, no ukeꞌa naꞌ‑yá len ladoꞌo bexa. Leꞌa naꞌ gak Dios ten bexa, no gak bexa xmen naꞌ.
HEB 8:11 Yá lá uluuta bexa be ltsaꞌa xa ná ton nak naꞌ, geal leꞌa itea bexa igondoꞌ naꞌ, bexa ndon leꞌa ben no gast bexa ndon leꞌa gox.
HEB 8:12 No sungeꞌ lad naꞌ be ta ugap mbin bexa, no lá utseꞌata lad naꞌ be ke ten bexa.
HEB 8:13 Leꞌa ta na li ndab Dios yoo dub trat kub wa, leꞌa ta wa gab leꞌa trat ned wa ta polta. Leꞌa dub ta polta, leꞌa ta wa nsayak gox no initndoꞌ‑yá.
HEB 9:1 Leꞌa trat ned wa unibeꞌe ná xteꞌe yankea bexa Israel Dios, no xteꞌe gakndeꞌe niꞌilad sa ngwankea bexa Dios ndoꞌ gizhliyo.
HEB 9:2 Leꞌa niꞌilad wa lndeꞌe ngokndeꞌe: ned uyoꞌo cuart sa nsaleaꞌ sa umbiꞌi ndoꞌ Dios. Leꞌa len wa ncho ta ndiꞌib sian xeꞌa aceit ndoꞌ na, no dub mes ndiꞌib be pan umbiꞌi nak ndoꞌ Dios.
HEB 9:3 Weꞌe ncho dub lad nak bseꞌa. Leꞌa stub tsoꞌo lad wa nde stub cuart, sa mas umbiꞌi ten Dios.
HEB 9:4 Leꞌa len wa ncho dub ta nakchaꞌaw oro sa nyolꞌ ta uxeꞌe, no caj ten Dios ta nbixyoꞌo oro itea lad. Leꞌa len caj wa ncho dub tas siꞌil ta oro ncho maná len‑a, no ya bar ten Aarón ta mxich, no be tabl geꞌ nkea be ta unibeꞌe Dios ndoꞌ na.
HEB 9:5 No tsoꞌo caj wa nde top ta oro cuent angel nsaleaꞌ kerubin, ndiꞌib xkwag‑a tsoꞌo sa ntsuꞌu Dios ke ten be men wa. Leꞌa be kerubin wa nluu leꞌa sa wa sa ncho Dios. Parea nat leꞌa naꞌ naꞌantapa ukeꞌa cuent ten be ta wa.
HEB 9:6 Leꞌa zha na listla nde be taꞌa wa, leꞌa be uleꞌay itea wizh nyote len cuart ned ten niꞌilad wa, gun bexa tiꞌin ten uleꞌay.
HEB 9:7 Ná leꞌa len cuart itop wa nabtsa uleꞌay ndon leꞌa nsak nyote dubtsa biaj kadga liꞌin. No juerska goꞌo xa ten ten man xnab ta na usaꞌa xa ndoꞌ Dios ndontsa yuꞌu be ke ten leꞌaka xa no be ke ten be men, dub ta lá iniꞌí bexa.
HEB 9:8 Li nluu Espíritu ten Dios leꞌa zha na bi li nde niꞌilad ten Dios wa, leꞌa be men lá yoꞌo gan yate len sa mas umbiꞌi ibii beuna wats Dios.
HEB 9:9 Leꞌa be ta wa nluu leꞌa be ta nsaꞌa be uleꞌay ndoꞌ Dios no be man xnab ndut bexa ndoꞌ Dios, leꞌa ta wa lá isuꞌu utsambiꞌi len ladoꞌo bexa na li nsaꞌa be ta wa.
HEB 9:10 Leꞌa ley polta wa nibeꞌetsa ná xtaꞌan gaw bexa, no xtaꞌan goo bexa, no xteꞌe isambiꞌi las bexa ndoꞌ Dios, no sianta be taꞌa gun bexa. Leꞌa be ta wa ta ndab Dios gun bexa gast ngol zha mbinno Dios be men dub trat kub.
HEB 9:11 Ná leꞌa nat yá ulen Cristo xa nak uleꞌay ndon leꞌa nsak, xa nsobno be ta wen ikaꞌa beuna, be ta tiꞌi ilen. Leꞌa xa ndun tiꞌin len ta na ta ugeaka nak niꞌilad ten Dios nde gibeꞌa ta uzheꞌeb wen nak, leꞌa sa wa naꞌanpa ta gizhliyo ndee.
HEB 9:12 Leꞌa xa dubtsa biaj uyoꞌo len sa mas umbiꞌi wa wats Dios, parea naꞌanpa ngoꞌo xa ten ten chiv no ni ten ten bser. Leꞌa xa ndi msaꞌa ten ten leꞌaka xa, utix xa be ke ten beuna idub tiemp.
HEB 9:13 Leꞌa ten ten ngon no ten ten chiv no diꞌ ten bser myolꞌ ndoꞌ Dios, ntob be uleꞌay ta wa las be men bzhiꞌik nak ndoꞌ Dios, weꞌe nsambiꞌi las bexa ndoꞌ Dios.
HEB 9:14 ¡Ná leꞌa nat uzhebpa mas nsak ten ten Cristo! Leꞌa Cristo ngok dub xnab ndon leꞌa umbiꞌi ndoꞌ Dios, juers ten Espíritu ten Dios xa na nban idub tiemp. Leꞌa ten ten xa ntsambiꞌi be ta ugap ncho len ladoꞌo beuna, ndontsa gun beuna tiꞌin ndoꞌ Dios nban.
HEB 9:15 Leꞌa ta na li mbin Jesucristo ndun leꞌa trat kub wa ndaktiꞌin. Leꞌa xa ngut ndontsa yuꞌu be ta ugap mbin beuna zha bi ncho trat ned wa. Leꞌa ta na ngut xa wa, ta weꞌe leꞌa beuna nak xa na mti Dios gal usoꞌ ta ndab Dios usaꞌa Dios, dub ta nunk lá idub.
HEB 9:16 Leꞌa tal ton nkeꞌa dub git gab‑a ná ton bexa yaꞌanno be ta ulaꞌa xa, leꞌa zha biseata gat xa leꞌa git wa naꞌanpa gaktiꞌin.
HEB 9:17 Leꞌa zha na ngut men wa leꞌa git wa ndaktiꞌinka, parea tal leꞌa xa bi nban leꞌa‑yá lá isuꞌu.
HEB 9:18 No li nak trat ned wa, leꞌa bexa mbintiꞌin ten ten man ngut ndontsa gaktiꞌin ta wa.
HEB 9:19 Leꞌa Moisés ned mbidiꞌizh itea be ta unibeꞌe Dios ndoꞌ be men. Cha usen xa dub bleꞌa gich borreg ta nane no dub xos ya hisopo. Cha mtob xa ndido ten ten bser no ten ten chiv noch nits ndoꞌ libr nkea ley ten Dios. No mtob xa ta wa gek itea be men.
HEB 9:20 Cha ndab Moisés ndoꞌ bexa: “Leꞌa ten ten man ndee ndun leꞌa trat ndanno Dios bego ndaktiꞌinka.”
HEB 9:21 Cha mtob xa ten wa xtaꞌa niꞌilad ten Dios no tsoꞌo itea be taꞌa ndantiꞌin bexa gor ndankea bexa Dios sa wa.
HEB 9:22 Leꞌa ley ten Dios nkeaniꞌi ndab‑a, leꞌa ten wa ntsambiꞌi yamer itea be taꞌa ndoꞌ Dios. Tal naꞌanpa itsiꞌi ten, leꞌa Dios naꞌanpa utsuꞌu be ke ten be men.
HEB 9:23 Li nsabndoꞌ mtsambiꞌi bexa be ta wa, be ta cuent xiꞌíntsa ta ncho gibeꞌa. Parea leꞌa be ta nchoka gibeꞌa nkiꞌin dub xnab mas nsak.
HEB 9:24 Leꞌa Cristo naꞌanpa yate len sa umbiꞌi ndoꞌ Dios sa mbindeꞌe men, leꞌa sa wa cuent xiꞌíntsa ta ncho gibeꞌa. Leꞌa xa ndi uyote leꞌaka gibeꞌa baꞌ, sa nat nsoꞌ xa ndoꞌ Dios cuent ten beuna.
HEB 9:25 No naꞌanpa nyote xa gibeꞌa wa sian biaj, lak nyote uleꞌay ndon leꞌa nsak itea liꞌin sa mas umbiꞌi ten Dios, noꞌo xa ten ten man.
HEB 9:26 Tal leꞌa Cristo li ngun itea liꞌin leꞌa xa sianpa biaj ngat gast zha utexan gizhliyo no gast nat. Parea leꞌa nat leꞌa be wizh lult ndee, leꞌa xa dubtsa biaj msaꞌa xa ngut xa, ndontsa yuꞌu be ke ten be men idub tiemp.
HEB 9:27 Lak dubtsa biaj nsabndoꞌ gat be men, cha kwe beuna ndoꞌ Dios gab Dios ná xteꞌe nak ta mbin beuna,
HEB 9:28 no liga dubtsa biaj ngut Cristo ndontsa utsuꞌu xa be ke ten be men. No ilen xa stub biaj naꞌanpa ndontsa utsuꞌu xa be ke ten be men, ndi gidyoꞌo xa bexa na ndenkeaꞌ zha ilen xa.
HEB 10:1 Leꞌa ley mkeꞌa Moisés nak cuent dub xiꞌíntsa be ta wen ilen tsoꞌo wa, ná leꞌa‑yá naꞌanpa ta ugea ta wen wa. Leꞌa be men nsaꞌa be man xnab ndoꞌ Dios itea liꞌin lak nibeꞌe ley wa, parea leꞌa ta wa lá yoo gan utsambiꞌi len ladoꞌo be men na li nkwaꞌan Dios.
HEB 10:2 Tal leꞌa ley wa suꞌu utsambiꞌi bexa ndoꞌ Dios, leꞌa bexa yá lá usaꞌata be xnab wa ndoꞌ Dios, leꞌa bexa naꞌantapa ndap ke ndoꞌ Dios.
HEB 10:3 Ná leꞌa ta na li nsaꞌa bexa xnab wa, ta weꞌe itea liꞌin ntseꞌa ladna bexa leꞌa bexa ndap ke.
HEB 10:4 Leꞌa ten ten ngon no ten ten chiv lá yoo gan utsuꞌu be ke ten be men.
HEB 10:5 Ta weꞌe leꞌa zha ulen Cristo ndoꞌ gizhliyo ndee, leꞌa xa lndeꞌe ndab ndoꞌ Dios: Leꞌa go lá nlad usaꞌa be men be man xnab ndoꞌ ga, ta weꞌe mbin ga leꞌa naꞌ myak men.
HEB 10:6 Leꞌa bexa wa nsaꞌa be man xnab idub ma nyolꞌ no be xnab ta yuꞌu be ke ten bexa, parea leꞌa go naꞌanpa nsak ladna ta wa.
HEB 10:7 Ta weꞌe ndáp naꞌ leꞌa nat leꞌa naꞌ ndalyun ta nsak ladna go, Dios, lak ndab diꞌizh ten ga cuent ten naꞌ ndoꞌ git wa.
HEB 10:8 Ned ndab Cristo leꞌa Dios lá nlad no lá nsak ladna xa be man xnab idub nyolꞌ, no be xnab ta yuꞌu be ke ten bexa, maska li nibeꞌe ley gun bexa.
HEB 10:9 Weꞌe cha ndab Cristo leꞌa xa mbidyun ta nsak ladna Dios. Leꞌa ta wa gab leꞌa be men yá lá usaꞌata be man xnab wa, leꞌa nat ndi ncho stubga xnab xaꞌaga.
HEB 10:10 Leꞌa ta na li mbin Jesucristo lak nlad Dios, msaꞌa xa leꞌaka leꞌa xa ngut xa dub biaj, ta weꞌe leꞌa beuna umbiꞌi nak ladoꞌo na ndoꞌ Dios idub tiemp.
HEB 10:11 Ta ugeaka leꞌa itea be wizh ndun be uleꞌay tiꞌin ndoꞌ Dios, nsaꞌa bexa be man xnab ndoꞌ Dios sian biaj, dub ta lá isuꞌu utsuꞌu be ke ten bexa.
HEB 10:12 Ná leꞌa Jesucristo dubtsa biaj msaꞌa leꞌaka xa, ngok xa dub xnab utsuꞌu be ke ten be men idub tiemp, cha nseaꞌtsob xa wats Dios lad gaꞌal.
HEB 10:13 Sa weꞌe nkenkeaꞌ xa gast gal zha inibeꞌe xa ndoꞌ bexa na ndaklono xa, kwe bexa wa xan ndats xa.
HEB 10:14 Leꞌa xa dubtsa biaj ngok xnab, ta weꞌe leꞌa bexa na mti Dios, leꞌa bexa idub tiemp nak xmen Dios.
HEB 10:15 Leꞌa Espíritu ten Dios noga li ndab xteꞌe nak ta wa, lak nkeaniꞌi diꞌizh ten Dios, ndab Dios:
HEB 10:16 Lndeꞌe gak trat gunno naꞌ bexa Israel gal be wizh tsoꞌo wa: Leꞌa naꞌ gun leꞌa bexa yakbeꞌena be diꞌizh ten naꞌ, no ukeꞌa naꞌ‑yá len ladoꞌo bexa.
HEB 10:17 Cha weꞌe ndab xa: No ni lá utseꞌata lad naꞌ be ke ten bexa, no be ta ugap mbin bexa.
HEB 10:18 Leꞌa ta na myuꞌula be ke ten beuna, ta weꞌe yá lá nkiꞌinta beuna stubga xnab utsuꞌu be ke wa.
HEB 10:19 Bego nak beuna xmen Cristo, leꞌa ta na ngut Jesucristo mtsiꞌi xa ten ten xa, ta weꞌe leꞌa beuna syoꞌo gan gaꞌal yate len sa mas umbiꞌi wats Dios.
HEB 10:20 Leꞌa gor na ngut Cristo leꞌa ta wa cuent mxaꞌal xa sa ncho bseꞌa, ta nkentsaw sa nsob Dios. Mxaꞌal xa dub nes kub ta nsaꞌa gealnaban.
HEB 10:21 Leꞌa Jesucristo leꞌa nak dub uleꞌay nsak ten beuna, xa nchonsu niꞌi ten Dios gibeꞌa.
HEB 10:22 Ta weꞌe ibii beuna wats Dios, idub ncho ladna beuna gungea ladna beuna xa. No umbiꞌi nak ladoꞌo beuna, cuent nak dub zha ngos beuna nits umbiꞌi.
HEB 10:23 Nsabndoꞌ dubtsa kwe beuna lakka ndenkeaꞌ beuna ta ndab beuna usaꞌa Dios, leꞌa Dios sunka lak ndab xa.
HEB 10:24 No ukwaꞌan beuna xteꞌe gakno beuna be ltsaꞌa beuna, dub mod mas ikweaꞌ ladna beuna bexa, no mas utsin gak beuna.
HEB 10:25 No lá ulaꞌa beuna ta na nzhealbe beuna, lak ncho bexa li ndun. Ndi utenxeꞌa beuna be ltsaꞌa beuna, ndontsa mas ibiisoꞌ beuna ndoꞌ Dios. No mas nsabndoꞌ li gun beuna, leꞌa beuna uniꞌí leꞌa wizh ilen Cristo mas nsayal gax.
HEB 10:26 Leꞌa tal leꞌa beuna ndangea ladna gealngea ten Dios, cha bi ndunta beuna ta uniꞌí beuna naꞌanpa ta nsak ladna Dios, yá naꞌanpa ncho stub xnab utsuꞌu ke wa.
HEB 10:27 Yá naꞌantapa yuꞌu ke ten bexa na li gun wa, leꞌa Dios ndi uzheꞌeb utsaksi bexa, leꞌa ndoꞌ giꞌ initndoꞌ bexa ndakloo ndoꞌ Dios.
HEB 10:28 Leꞌa ley polta ndab leꞌa dub xa lá nxobgek ndoꞌ ley mkeꞌa Moisés nsabndoꞌ gatka, tal top chon men usake xa gab leꞌa xa ugapka mbin.
HEB 10:29 Nat binbeꞌe bega xteꞌe mas uzheꞌeb utsaksi Dios bexa nxeeno ladna Xin Dios, ndab bexa leꞌa ta ngut Cristo wa dub ta naꞌan xtiꞌin, no kweaꞌ níꞌi bexa ndoꞌ Espíritu ten Dios xa na nkweaꞌ ladna bexa. Leꞌa ten ten Cristo ndun leꞌa trat mbinno Dios be men ndaktiꞌin. Leꞌa ta wa ntsambiꞌi beuna ndoꞌ be ke ten beuna.
HEB 10:30 Leꞌa beuna uniꞌíka leꞌa Dios ndab: “Leꞌa naꞌ ndee leꞌa utsaksi bexa, no ukixke naꞌ be ta ugap mbin bexa.” No nkeaniꞌi diꞌizh ten Dios, ndab‑a: “Leꞌa Dios gab ndoꞌ be xmen xa ná ton ndap ke.”
HEB 10:31 ¡Uzheꞌeb gealkweaꞌ iniꞌí bexa na gailaꞌ ndoꞌ yaꞌa Dios nban!
HEB 10:32 Parea btseꞌa ladna bega ná xteꞌeta mxik bega ndoꞌ be gealkweaꞌ siꞌil utid bega zha ned mgondoꞌ bega xeꞌa ten Dios.
HEB 10:33 Ncho zha usalad mbinno be men bega, no mtsaksi xa bega ndoꞌ gaꞌal be men. No ncho zha leꞌa bega no usoꞌ wats bexa na li utid gealkweaꞌ wa.
HEB 10:34 Leꞌa bega mbinkweaꞌ ladna bexa nkea litgiꞌib. No gor na mlat be men be taꞌa ten bega, leꞌa bega naꞌanpa yuꞌ ladna, geal leꞌa bega uniꞌí leꞌa bega ndap dub ta mas nsak gibeꞌa, dub ta naꞌanpa initndoꞌ.
HEB 10:35 Ta weꞌe lá gach ladna bega, leꞌa bega gal usoꞌ ta uzhebpa nsak usaꞌa Dios.
HEB 10:36 Nsabndoꞌ uxik bega ndoꞌ be gealkweaꞌ no gun bega ta nlad Dios, ndontsa gal usoꞌ bega ta ndab Dios usaꞌa xa ikaꞌa bega.
HEB 10:37 Leꞌa diꞌizh ten Dios nkeaniꞌi ndab Dios: Leꞌa xa ndiꞌizh ilen wa sken ilen, leꞌa xa naꞌanpa kwen kweas.
HEB 10:38 Parea leꞌa bexa wen nak ndoꞌ naꞌ, bexa ngeꞌ ladna naꞌ, leꞌa bexa wa gap gealnaban. Parea tal leꞌa bexa ulaꞌa ta ngeꞌ ladna bexa naꞌ, leꞌa naꞌ lá isak ladna lak nak bexa.
HEB 10:39 Parea leꞌa beuna naꞌanpa nak lak nak bexa nlaꞌa ta ngeꞌ ladna bexa Dios, cha utsaksi Dios bexa. Leꞌa beuna ndi ngeꞌ ladna Dios, no ndap beuna gealnaban ndoꞌ Dios.
HEB 11:1 Leꞌa ta na ngeꞌ ladna beuna Dios, ta weꞌe uniꞌí beuna leꞌa Dios saꞌaka ta na ndenkeaꞌ beuna wa, no ndangeaka ladna beuna leꞌa dub taꞌa nchoka maska lá nluu‑yá.
HEB 11:2 Leꞌa be men polta mgeꞌ ladna Dios, ta weꞌe msak ladna Dios lak nak bexa.
HEB 11:3 Leꞌa ta na ngeꞌ ladna beuna Dios, ta weꞌe nyakbeꞌena beuna leꞌa Dios sbeꞌen diꞌizhtsa mbindeꞌe gibeꞌa no gizhliyo. Leꞌa nat iteanak be ta naꞌ beuna ncho, leꞌa‑yá dub ta naꞌan ton iniꞌí xteꞌe ngokndeꞌe.
HEB 11:4 Leꞌa Abel mgeꞌ ladna Dios, ta weꞌe msaꞌa xa dub man xnab ndoꞌ Dios, dub ta mas uzheꞌeb msak ladna Dios ndoꞌ ta msaꞌa Caín. Ta weꞌe wen msayaꞌ Abel ndoꞌ Dios, ta na nluu leꞌa Dios nsak ladna ta msaꞌa xa wa. Nat ngutla Abel, parea leꞌa ta mbin xa wa bi nluu leꞌa xa mgeꞌka ladna Dios.
HEB 11:5 Leꞌa Enoc mgeꞌ ladna Dios, ta weꞌe lá ngat xa. Leꞌa Dios ndi myoꞌo xa gibeꞌa, cha naꞌanta ton iniꞌí xa. Leꞌa diꞌizh ten Dios ndab leꞌa zha na biseata yoꞌo Dios xa, leꞌa Dios msak ladna ta nak xa.
HEB 11:6 Leꞌa tal ton lá ngeꞌ ladna Dios, leꞌa Dios lá nsak ladna lak nak xa wa. Tal ton nlad ibii wats Dios, leꞌa xa wa nsabndoꞌ gungea ladna leꞌa Dios nchoka, no gungea ladna xa leꞌa Dios nsaꞌa be ta wen ndoꞌ bexa nkwaꞌan Dios.
HEB 11:7 Leꞌa Noé mgeꞌ ladna Dios, ta weꞌe mxobgek xa ndoꞌ Dios gor uníꞌi Dios ndoꞌ xa cuent ten dub ta biseata ilen. Ta weꞌe mbindeꞌe xa dub barco siꞌil, ndontsa naꞌanpa gat xa no bexa ncho ta lid xa. Leꞌa ta na li mgeꞌ ladna Noé Dios, leꞌa ta wa mluu leꞌa be men ndap ke ndoꞌ Dios. No wen myaꞌan Noé ndoꞌ Dios, geal leꞌa xa mgeꞌ ladna Dios.
HEB 11:8 Leꞌa Abraham mgeꞌ ladna Dios, ta weꞌe mxobgek xa ndoꞌ Dios gor utezh Dios xa, ndab Dios yaꞌ xa sa sit usaꞌa Dios ikaꞌa xa. Ná leꞌa gor na utoꞌo xa nchaꞌa xa sa wa, leꞌa xa bi lá iniꞌí pa nchaꞌa.
HEB 11:9 No ta na mgeꞌ ladna xa Dios, ta weꞌe ngwaꞌyoꞌo xa dub sa naꞌanpa lazh xa, sa ndab Dios usaꞌa Dios ikaꞌa xa. Leꞌa sa wa uyoꞌo xa len niꞌilad no Isaac no Jacob, bexa no ndab Dios ndoꞌ na ikaꞌa sa wa.
HEB 11:10 Li mbin Abraham geal leꞌa xa nkenkeaꞌ gal zha yoo xa dub gezh mbindeꞌe Dios lak mbinbeꞌe Dios, dub sa nde idub tiemp.
HEB 11:11 Leꞌa Sara dub xagots ndiꞌizh lá yoꞌo gan gap meꞌed, parea mgeꞌ ladna xa Dios, cha msaꞌa Dios dub meꞌed ndoꞌ Sara. Cha ngop xa dub meꞌed zha goxlapa xa, geal leꞌa xa mbingea ladna leꞌa Dios sunka ta ndab na.
HEB 11:12 Leꞌa Abraham uzhebpa goxla zha na ngol meꞌed wa, parea leꞌa bexa ras ten Abraham uzhebpa myak kwaꞌad bexa, dub ta galka naꞌan ton gun gan ulaꞌab, lakta sian be mbeal ndiꞌib gibeꞌa baꞌ, no lakta sian be yux nde toꞌo nitsdoꞌo.
HEB 11:13 Leꞌa idub zha nban bexa wa, leꞌa itea bexa ngeꞌka ladna Dios. Leꞌa zha ngut bexa leꞌa bexa biseata ikaꞌa ta ndab Dios usaꞌa Dios wa. Parea mbingea ladna bexa ta ndab Dios, no uniꞌíka bexa leꞌa Dios saꞌaka ta wa. Leꞌa bexa myakbeꞌena leꞌa bexa wa nde ndoꞌ gizhliyo cuent dub xa sit utoꞌo dub nseatsa xa.
HEB 11:14 Leꞌa ta na li myakbeꞌena bexa ta wa nluu leꞌa bexa nkwaꞌan stub sa yoo na.
HEB 11:15 Tal leꞌa bexa mbinbeꞌe leꞌa bexa ilanseaꞌ leꞌaka sa utoꞌo bexa wa, leꞌa bexa syoꞌoka gan yach sa wa.
HEB 11:16 Parea leꞌa bexa mkwaꞌan stub sa mas wen yoo bexa wats Dios, leꞌa ta wa gibeꞌa. Ta weꞌe leꞌa Dios naꞌanpa ndo ladna gab xa leꞌa xa leꞌa nak Dios ten bexa wa, leꞌa xa msaxkwaꞌala dub gezh yoo bexa gibeꞌa.
HEB 11:17 Leꞌa Abraham mgeꞌ ladna Dios, ta weꞌe ndiꞌizh gut xa xin xa Isaac cuent dub xnab ndoꞌ Dios gor na mbin Dios preb Abraham. Ndiꞌizh usaꞌa Abraham dubkama xin xa, meꞌed ndab Dios usaꞌa Dios ndoꞌ xa.
HEB 11:18 Ndab Dios ndoꞌ Abraham: “Leꞌa Isaac leꞌa gap bexa gak ras ten lu.”
HEB 11:19 Leꞌa Abraham uniꞌíka leꞌa Dios ndap juers ixiste Isaac ndoꞌ gealgut. Leꞌa ta na naꞌanpa ngat Isaac wa, leꞌa ta wa cuent myaste Isaac ndoꞌ gealgut.
HEB 11:20 Leꞌa Isaac mgeꞌ ladna Dios, ta weꞌe ndab xa ndoꞌ be xin xa Jacob nsea Esaú gal zha leꞌa Dios gakno bexa.
HEB 11:21 Leꞌa Jacob no mgeꞌ ladna Dios, ta weꞌe leꞌa zha na yamer gat xa leꞌa xa ndab ndoꞌ be xin Kosé ná xteꞌe gakno Dios bexa. Cha ndankea xa Dios nak juers ten xa bordón nsob yaꞌa xa.
HEB 11:22 Leꞌa Kosé mgeꞌ ladna Dios, ta weꞌe leꞌa zha na yamer gat xa leꞌa xa ndab leꞌa bexa Israel itoꞌoka Egipto. No ndab xa yoꞌo bexa tit ten xa zha itoꞌo bexa sa wa.
HEB 11:23 Leꞌa be usan ten Moisés mgeꞌ ladna Dios, ta weꞌe leꞌa zha ngol Moisés leꞌa bexa mkachko Moisés pa chon mbeꞌe. Leꞌa bexa uniꞌí leꞌa meꞌed wa uzhebpa meꞌed chul, no ni lá izheb bexa ndoꞌ ta unibeꞌe faraón gat be meꞌed Israel wa.
HEB 11:24 Leꞌa Moisés mgeꞌ ladna Dios, ta weꞌe leꞌa zha na ngok gox Moisés leꞌa xa yá lá nladta gak xa cuent xmeꞌed xingots faraón.
HEB 11:25 Mbinbeꞌe xa mas utsin no xa iniꞌí gealkweaꞌ lat be xmen Dios bexa Israel, ni ka no xa gal ladna be ta ugap ndun bexa Egipto.
HEB 11:26 Mbinbeꞌe xa mas nsak itid xa ndoꞌ gealkweaꞌ lak itid Cristo, ni ka gap xa be ta nsak ten bexa Egipto. Leꞌa xa uniꞌí leꞌa Dios usaꞌa dub ta uzhebpa nsak ikaꞌa xa.
HEB 11:27 Leꞌa Moisés mgeꞌ ladna Dios, ta weꞌe utoꞌo xa Egipto ni lá izheb xa ndoꞌ ta ndakloo faraón. Leꞌa xa naꞌanpa naꞌ Dios, parea leꞌa xa dubtsa usoꞌ lak dub gor na naꞌka xa Dios.
HEB 11:28 No ta na mgeꞌ ladna xa Dios, ta weꞌe ulo xa ujest Pascua, no mtob xa byach ten ten borreg toꞌo lid bexa Israel, ndontsa naꞌanpa gut angel be xin ned bexa Israel.
HEB 11:29 Leꞌa bexa Israel wa mgeꞌ ladna Dios, ta weꞌe utakea bexa tlaw Nitsdoꞌo Nane ndoꞌ yo bid. Ná leꞌa gor na no bexa Egipto nlad itakea sa wa, leꞌa bexa ngwaigayoꞌo len nits wa.
HEB 11:30 No ta na mgeꞌ ladna bexa Israel Dios, ta weꞌe utesea bexa gangeak gezh Jericó dub gaꞌad wizh, cha ulate muro nchonyaw gezh wa.
HEB 11:31 Leꞌa Rahab ngok dub xagots mbin juis mgiꞌi, parea mgeꞌ ladna xa Dios ta weꞌe msaꞌa xa ta lid xa mkachndoꞌ bexa Israel, bexa xgaꞌach ngwaꞌigondoꞌ gezh Jericó. Ta weꞌe naꞌanpa no xa ngat zha ngut bexa Jericó, bexa lá uxobgek ndoꞌ Dios.
HEB 11:32 ¿Xteꞌeta gáp naꞌ nat zha? Naꞌanpa igen gudiꞌizh naꞌ cuent ten Gedeón nsea Barac nsea Sansón nsea Jefté nsea David nsea Samuel no iteata be profet.
HEB 11:33 Leꞌa bexa wa mgeꞌ ladna Dios, ta weꞌe mbin bexa gan ndoꞌ bexa nibeꞌe stubga nacion, no utsin unibeꞌe bexa ndoꞌ bexa Israel, no ngokno Dios bexa lak ndab Dios gun xa. Leꞌa ncho bexa wa mtsaw toꞌo be mbiꞌizh,
HEB 11:34 no ncho bexa mtsuꞌu be giꞌ ubiꞌi, no ncho bexa mbin gan ndoꞌ bexa nsén spad, no ncho bexa mkaꞌa juers gor na yá lá uxikta xa, no ncho bexa mbin gan ndoꞌ uyo, no ncho bexa ulantuꞌub be soldad nyono bexa Israel.
HEB 11:35 No ncho be xagots mgeꞌ ladna Dios, ta weꞌe mxiste Dios be xin bexa ndoꞌ gealgut. No ncho bexa naꞌanpa uxoꞌon gor nseayut be men bexa. Ndi mlaꞌa bexa uzheꞌeb mtsaksi be men bexa gast ngut bexa, leꞌa bexa uniꞌí leꞌa gal gor ibangal bexa leꞌa bexa mas wen yoo.
HEB 11:36 No liga leꞌa ncho bexa kweaꞌ uníꞌi be men ndoꞌ xa, no udin be men xa, no gast mxi be men xa nsea caden, no gast mkeꞌa be men bexa litgiꞌib.
HEB 11:37 No ncho bexa mlaꞌgeꞌ be men bexa gast ngut bexa, no ncho xa uxen be men xa ngok top bleꞌa xa, no ncho bexa mbit be men xa nsea machet. No ncho bexa mbin be men preb xa gun xa ta ugap. No ncho bexa ngok xab bexa gid xab borreg no gid xab chiv. Sbeꞌen utesea uxoꞌon bexa, no uban ngok bexa, no sian gealkweaꞌ utid bexa, no ugap mbinno be men bexa.
HEB 11:38 Leꞌa be men ncho ndoꞌ gizhliyo ndee naꞌanpa isayaꞌ yoo wats bexa na ngeꞌ ladna Dios wa, bexa na utesea be geꞌe sa bid no be geꞌe ubiꞌi, no be geꞌloꞌo no be geꞌed wat.
HEB 11:39 Leꞌa iteanak bexa li uyoꞌo wa wen myaꞌan ndoꞌ Dios ta na mgeꞌ ladna bexa Dios. Parea leꞌa ndoꞌ gizhliyo ndee leꞌa bexa ni dub lá ngal usoꞌ ikaꞌa ta ndab Dios usaꞌaka Dios ndoꞌ bexa,
HEB 11:40 geal leꞌa Dios mbinbeꞌe dub ta mas wen, ta gunno xa beuna, leꞌa bexa polta wa no beuna ncho nat junt ikaꞌa ta uzheꞌeb nsak usaꞌa Dios.
HEB 12:1 Leꞌa itea bexa na nseꞌat naꞌ wa nde gangeak beuna nwiꞌi bexa ná xteꞌe gun beuna. Ta weꞌe nsabndoꞌ ulaꞌa beuna iteanak be taꞌa leꞌa nka beuna no itea be ta ugap ndun beuna, ndontsa idub ndoꞌ ndee isea beuna lak nlad Dios, uxik beuna ndoꞌ itea be taꞌa.
HEB 12:2 No iwiꞌitsa beuna ndoꞌ Jesús, xa na nsaꞌa ta na li ngeꞌ ladna beuna Dios, no ndun xa mas igeꞌ ladna beuna xa. Leꞌa Jesús mxik ndoꞌ be gealkweaꞌ gast ngut xa ndoꞌ cruz. Ná leꞌa xa naꞌanpa ido ladna ta na li ngut xa cuent dub xa ugap, geal leꞌa xa uniꞌí gal dub wizh leꞌa xa iten ladna. Leꞌa nat leꞌa xa nsob wats lad gaꞌal sa nsob Dios.
HEB 12:3 Binbeꞌe bega xteꞌe mxik xa ndoꞌ be gealkweaꞌ, ta mbinno be men ugap xa. Ta weꞌe naꞌanpa izhanna bega, no ni li lá gach ladna bega, gor nseatid dub gealkweaꞌ tsoꞌo bega.
HEB 12:4 Leꞌa bega ndeuxik ndoꞌ bexa ugap nak, parea gast nat leꞌa bexa wa lá ngut bega.
HEB 12:5 Yá myalad bega xteꞌe ntenxeꞌa Dios be xin na, lak nkeaniꞌi diꞌizh ten Dios, ndab‑a: Chuu, lá ixee ladna lu ta na ngo Dios lu nes. No ni lá gach ladna lu gor na nbeyo Dios lu.
HEB 12:6 Leꞌa Dios li ngo bexa nes, bexa na nkweaꞌ ladna Dios. No ntsaksi Dios itea bexa nak xin Dios.
HEB 12:7 Li bxik bega gor igo Dios bega nes, geal leꞌa xa li ndanno bega cuent dub xin xa, lak ngo be men be xmeꞌed na nes.
HEB 12:8 Parea tal leꞌa Dios naꞌanpa li igo bega nes lak ndanno xa itea be xin xa, leꞌa ta wa gab leꞌa bega naꞌanpa no nak xin xa, leꞌa bega ndi nak cuent dub men lá ndap xus na.
HEB 12:9 Leꞌa zha byux beuna leꞌa be xus gizhliyo beuna ncho zha mgo beuna nes, no ngwankea beuna xa. Ta weꞌe leꞌa nat leꞌa beuna mas nsabndoꞌ ulaꞌa leꞌa Dios igo beuna nes, xa nak Xus beuna xa nsob gibeꞌa, li ndontsa gap beuna gealnaban.
HEB 12:10 Leꞌa be xus beuna mgo beuna nes dub ndeꞌep laktsa mbinbeꞌe bexa. Ná leꞌa Dios ngo beuna nes ndontsa gakno xa beuna, utsin gak beuna lak nak xa.
HEB 12:11 Ta ugeaka leꞌa tal ton ngo beuna nes, leꞌa mer gor wa naꞌanpa nsak ladna beuna ta wa, leꞌa beuna ndi kweaꞌ nyoꞌo ladna. Parea leꞌa tsoꞌo wa leꞌa ta wa ndaknoka beuna, ndun‑a wen yoo ladna beuna no mas utsin gak beuna.
HEB 12:12 Ta weꞌe bin bega juers uxits bega yaꞌa bega, no yaste bega.
HEB 12:13 Gaꞌal usea bega len nes ten Dios, ndontsa naꞌanpa gailaꞌ bega ndoꞌ ta ugap, ndi mas gaꞌal gak bega ndoꞌ Dios.
HEB 12:14 Bin bega juers naꞌanpa kuyono bega be men, no umbiꞌi gak ladoꞌo bega ndoꞌ Dios. Leꞌa bexa naꞌanpa umbiꞌi nak ndoꞌ Dios nunk lá inaꞌ Dios.
HEB 12:15 Blaꞌach bega leꞌaka leꞌa bega naꞌanpa uxelad bega ta na nkweaꞌ ladna Dios bega. Lá ulaꞌa bega gach dub ta uxelad bega len ladoꞌo bega, leꞌa ta wa gun isabgix kwaꞌad bexa.
HEB 12:16 No naꞌanpa gun bega dub ta bzhiꞌik nak, no naꞌanpa uxelad bega dub ta usaꞌa Dios, lak mxelad Esaú ta wen ndiꞌizh ikaꞌa xa ta na nak xa xin ned xus xa. Cha ndi mcheꞌa xa ta wa nsea dub plattsa ta gaw xa.
HEB 12:17 Leꞌa bego uniꞌíka leꞌa tsoꞌo wa leꞌa Esaú leꞌaka nlad ikaꞌa ta wa ndoꞌ xus xa, ná leꞌa xus xa yá lá usaꞌata ta wa. Maska mbiꞌin Esaú parea leꞌa xa yá lá yoꞌota gan ikaꞌa ta wa.
HEB 12:18 Leꞌa bega naꞌanpa ngun lak mbin bexa Israel polta. Leꞌa bexa wa ubii xan dub geꞌe nsayolꞌ, no uzhebpa ute teꞌal sa wa, no nde xkaw nsea nsoꞌ mbi siꞌil.
HEB 12:19 No mbiꞌín bexa ti trompet no ta ndab Dios ndoꞌ bexa, cha unab bexa ndoꞌ Dios yá lá iníꞌita Dios ndoꞌ bexa,
HEB 12:20 geal leꞌa bexa lá nsak ladna ta unibeꞌe Dios. Ndab Dios leꞌa tal dub men yatsoꞌ xan geꞌe wa, leꞌa bexa nsabndoꞌ ulaꞌgeꞌ men wa gast gat xa natal gut bexa xa nsea dub ya wach. No liga nsabndoꞌ gut bexa dub man tal ma li gun.
HEB 12:21 Leꞌa tant mzheb bexa ndoꞌ ta uniꞌí bexa sa wa, leꞌa Moisés no ndab leꞌa xa nxis tant mzheb xa.
HEB 12:22 Parea leꞌa bego baꞌ ndi ubii wats dub sa xaꞌaga, leꞌa ta wa geꞌe Sion, gezh ten Dios nban. Leꞌa ta wa gezh Jerusalén nde gibeꞌa, sa nyakjunt sian mil be angel ten Dios,
HEB 12:23 no nyakjunt be xin Dios, bexa ncho leaꞌ na gibeꞌa. Leꞌa sa wa sa ncho Dios ten beuna, xa gab ná xteꞌe nak itea be men, no ncho bexa ngut polta, bexa msambiꞌi ndoꞌ Dios.
HEB 12:24 Leꞌa Jesús no nsoꞌ sa wa, xa na mbinno beuna dub trat kub. Leꞌa ten ten Jesús ta mtsuꞌu be ke ten beuna mas nsak ndoꞌ ten ten Abel.
HEB 12:25 Ta weꞌe blaꞌach bega naꞌanpa uxelad bega ta ndab Dios. Leꞌa polta leꞌa bexa Israel lá isakyoꞌón diꞌizh mbiꞌín bexa ndoꞌ gizhliyo, cha mtsaksi Dios bexa. No liga utsaksika Dios beuna, tal leꞌa beuna lá isakyoꞌón diꞌizh ntoꞌo gibeꞌa.
HEB 12:26 Leꞌa polta leꞌa ti Dios mkwiꞌin gizhliyo, parea nat ndabgal Dios: “Leꞌa stub biaj leꞌa naꞌ naꞌanpa nabtsa gizhliyo ukwin, leꞌa naꞌ no gibeꞌa ukwin.”
HEB 12:27 Leꞌa ta na ndab xa “stub biaj”, leꞌa ta wa gab leꞌa gal zha initndoꞌ be ta mbindeꞌe Dios, be ta sak iwiꞌin, ndontsa yaꞌan be ta lá yoo gan iwiꞌin.
HEB 12:28 Leꞌa sa nibeꞌe Dios sa yate beuna wa dub sa nunk lá iwiꞌin. Ta weꞌe idub ncho ladna beuna usaꞌa beuna xno ndoꞌ Dios, no yankea beuna xa lakka nlad xa, no izheb beuna ndoꞌ xa, no gap beuna mod ndoꞌ xa,
HEB 12:29 geal leꞌa Dios ten beuna nak cuent dub giꞌ uzheꞌeb stsoꞌol be taꞌa.
HEB 13:1 Idub tiemp bkweaꞌ ladna bega be ltsaꞌa bega, bexa no nak xmen Cristo.
HEB 13:2 No lá yalad bega utsin gunno bega be men nseabe ta lid bega, leꞌa ncho bexa li utsin ndanno dub men, ni lá iniꞌí bexa ti dub angel ta wa.
HEB 13:3 No lá yalad bega bexa nkea litgiꞌib, no gokno bega bexa lak dub zha leꞌa bega nkea litgiꞌib malay dub men gakno bega. No lá yalad bega bexa nsatid ndoꞌ be gealkweaꞌ, no gokno bega bexa lak nlad bega gakno be men bega, gor na ncho bega ndoꞌ be gealkweaꞌ.
HEB 13:4 Uzhebpa utsin binno bega xa nak cheꞌal bega. Naꞌanpa ugal bega dub xa naꞌanpa xa ten bega, leꞌa Dios utsaksi bexa na li ndun ta bzhiꞌik wa.
HEB 13:5 Lá isaꞌab ladna bega xteꞌe gap bega sian med. Ndi btenno ladna bega dub laktsa‑yá ndap bega, lak ndab Dios: Leꞌa naꞌ naꞌanpa ulalad bega, no ni lá yalad naꞌ bega.
HEB 13:6 Ta weꞌe lá izheb beuna gab beuna: Leꞌa Dios Xa Nibeꞌe leꞌa ndakno naꞌ. Lá nzheb naꞌ ndoꞌ ni dub taꞌa nlad be men gunno naꞌ.
HEB 13:7 No lá yalad bega bexa uyoꞌonsu bega, bexa mbidiꞌizh diꞌizh ten Dios ndoꞌ bega sa nzhealbe bega. Binbeꞌe bega xteꞌe mtoꞌo be ta mbin bexa wa, no bgeꞌ ladna bega Dios lak uniꞌí bega xteꞌe mgeꞌ ladna bexa wa Dios.
HEB 13:8 Leꞌa Jesucristo leꞌaka polta no leꞌaka xa nat no leꞌaka xa idub tiemp ilen.
HEB 13:9 Lá gungea ladna bega be ta xaꞌaga nluu be men, ndab bexa ncho be ta lá nsabndoꞌ gaw beuna. Leꞌa ta na nkweaꞌ ladna Dios beuna ndun mas juert gak ladoꞌo beuna, ná leꞌa ta nluu bexa wa dub ta naꞌan xtiꞌin.
HEB 13:10 Leꞌa beuna ndap dub xnab nsaꞌa beuna ndoꞌ Dios, parea leꞌa xnab wa naꞌanpa nak ta ndaw be uleꞌay ndun tiꞌin len niꞌi ten Dios.
HEB 13:11 Leꞌa uleꞌay ndon leꞌa nsak nyoꞌono ten ten be man len sa mas umbiꞌi ten Dios, cha nsaꞌa xa ta wa ndoꞌ Dios ndontsa yuꞌu be ke ten be men. Parea leꞌa be man xnab wa nyolꞌ dub lad toꞌo gezh ten bexa wa.
HEB 13:12 Leꞌa Jesús liga ngut dub lad toꞌo gezh, mtsiꞌi xa ten ten xa, ndontsa utsambiꞌi xa be ke ten beuna, umbiꞌi gak ladoꞌo beuna ndoꞌ Dios.
HEB 13:13 Ta weꞌe mas ibii beuna wats Jesús, guniꞌi tal usalad gunno be men beuna lak usalad mbinno bexa Jesús.
HEB 13:14 Leꞌa ndoꞌ gizhliyo ndee leꞌa beuna naꞌanpa ndap dub gezh ncho beuna idub tiemp. Leꞌa beuna ndi ndenkeaꞌ ilayaꞌ beuna dub gezh usaꞌa Dios, dub sa ti yoo.
HEB 13:15 Ta weꞌe nsabndoꞌ idub tiemp usaꞌa beuna xno ndoꞌ Dios ta na mbin Jesucristo, gab beuna leꞌa Dios uzheꞌeb dub Dios wen. Leꞌa ta wa dub xnab nsaꞌa beuna ndoꞌ Dios.
HEB 13:16 No lá ulaꞌa bega ta na utsin nak bega ndoꞌ be men no ta ndakno bega bexa, leꞌa be ta li ndun bega wa cuent dub xnab nsak ladna Dios.
HEB 13:17 Bxobgek bega ndoꞌ bexa na nchonlaꞌach bega nak xmen Cristo, no gop bega mod ndoꞌ bexa. Leꞌa bexa wa uzhebpa nyuꞌno ladna bega, geal leꞌa Dios nsobwiꞌi xteꞌe ndun bexa tiꞌin ten Dios. Li utsin gok bega ndoꞌ bexa wa, ndontsa mas iten ladna bexa gun bexa tiꞌin wa no naꞌanpa ukeake bexa Dios, leꞌa ta wa naꞌanpa gakno bega.
HEB 13:18 Unab bega ndoꞌ Dios gakno Dios besa. Leꞌa besa nsak len ladoꞌo besa leꞌa besa umbiꞌi nak ndoꞌ Dios, nlad besa utsin gun besa itea be taꞌa.
HEB 13:19 No mas nlad naꞌ inab bega ndoꞌ Dios, ndontsa sken naꞌ gal inaꞌ naꞌ bega.
HEB 13:20 Leꞌa Dios nak xa ndun wen yoo ladna beuna, no mxiste xa Jesucristo ndoꞌ gealgut, xa na nlaꞌach beuna lak nlaꞌach dub men be xborreg na, no mtsiꞌi xa ten ten xa, ta mbinno Dios be men dub trat kub, ta nunk lá idub.
HEB 13:21 Naꞌab naꞌ ndoꞌ Dios gakno bega, ndontsa isuꞌu bega itea be ta wen, be ta nlad xa. No gakno Jesucristo bega gun bega be ta nsak ladna Dios. ¡Idub tiemp gab beuna leꞌa Dios ndon leꞌa xa juert nak! Lika nak‑a.
HEB 13:22 Bego nak beuna xmen Cristo, leꞌa naꞌ inaꞌab ndoꞌ bega uxik bega goꞌol bega be diꞌizh mkeꞌa naꞌ ndee, ta na ntenxeꞌa naꞌ bega, leꞌa‑yá naꞌanpa dub ta uzheꞌeb koꞌol nak.
HEB 13:23 No nlad naꞌ iniꞌí bega leꞌa Timoteo xa no nak xmen Cristo yá mtoꞌo litgiꞌib. Tal leꞌa xa sken ilen, leꞌa xa no goo naꞌ gor gal inaꞌ naꞌ bega.
HEB 13:24 Unidiꞌizh bega ndoꞌ bexa nlaꞌach bega sa baꞌ sakndoꞌ naꞌ, no ndoꞌ itea be xmen Cristo ndencho sa baꞌ. Leꞌa be xmen Cristo bexa nacion Italia no nidiꞌizh ndoꞌ bega.
HEB 13:25 Naꞌab naꞌ ndoꞌ Dios mas uzheꞌeb wen gunno xa itea bega. Lika gak‑a.
JAM 1:1 Leꞌa naꞌ ndee Santiaw, ndun naꞌ tiꞌin ndoꞌ Dios no ndoꞌ Jesucristo Xa Nibeꞌe. Nkeꞌa naꞌ git ndee ndoꞌ bego, bexa nak isatibtop xkwaꞌa be xin Israel mteꞌachso ndoꞌ gizhliyo.
JAM 1:2 Bego nak beuna xmen Cristo, uzheꞌeb bten ladna bega zha na nsatid bega isandoꞌ be gealkweaꞌ,
JAM 1:3 leꞌa bego uniꞌíka leꞌa gor na nxik bega ndoꞌ dub ta juert nyoꞌo bega, leꞌa ta wa ndakno mas dubtsa ngeꞌ ladna bega Dios.
JAM 1:4 Bin bega juers uxik bega ndoꞌ be gealkweaꞌ, ndontsa gak bega lak nsabndoꞌ‑yá, no isuꞌu bega gak bega lak nlad Dios.
JAM 1:5 Leꞌa tal ncho bega lá nyakbeꞌena xtaꞌan gun bega, unab bega‑yá ndoꞌ Dios, leꞌa Dios sluꞌuka ta wa. Leꞌa xa uzhebpa ndakno itea be men, naꞌanpa gakloo xa tal leꞌa bega inab ta wa.
JAM 1:6 Bingea ladna bega leꞌa Dios saꞌaka ta inab bega wa. Leꞌa gor na nab bega dub taꞌa ndoꞌ Dios, tal leꞌa bega igan ladna, leꞌa bega nak cuent dub golp ten nitsdoꞌo ndoꞌo mbi itea lad.
JAM 1:7 Leꞌa xa li nak wa lá gal usoꞌ ta unab xa ndoꞌ Dios,
JAM 1:8 leꞌa xa na li top ndanbeꞌe wa uzhebpa nzheꞌa ta ndun na.
JAM 1:9 Leꞌa dub xmen Dios, dub xa uban nak, nsabndoꞌ iten ladna xa, leꞌa cuent ten Dios leꞌa xa nsakka.
JAM 1:10 No liga leꞌa bexa rik nsabndoꞌ iten ladna leꞌa be ta ndap xa naꞌanpa nsak ndoꞌ Dios. Leꞌa gal gor leꞌa be ta wa initndoꞌ lak be géꞌe ten be gix.
JAM 1:11 Leꞌa gor nlen wizh gor utii, leꞌa gix wa sgoꞌol ndoꞌ bea, cha ilate be géꞌe ten‑a, cha li initndoꞌ ta chul nluꞌu‑yá. No liga snitndoꞌ bexa rik no itea be ta ndap bexa.
JAM 1:12 Uzhebpa wen yoo ladna bexa na uxik ndoꞌ be ta juert itid xa. Leꞌa zha na mxik bexa ndoꞌ ta wa, leꞌa Dios usaꞌa gealnaban ndoꞌ xa, lak ndab Dios usaꞌa Dios ndoꞌ be men ndankea xa.
JAM 1:13 Leꞌa gor na ndanbeꞌe dub men gun xa dub ta ugap, lá gab xa ti leꞌa Dios leꞌa nkiꞌil xa li gun xa. Leꞌa naꞌan ton yoo gan ukiꞌil Dios gun Dios dub ta ugap, no ni Dios naꞌanpa nkiꞌil men.
JAM 1:14 Leꞌa tal ton gunbeꞌe gun xa dub ta ugap, leꞌa ta wa leꞌaka ta ugap ncho len ladoꞌo xa nkiꞌil xa.
JAM 1:15 Weꞌe leꞌa ke ten ta na li nlad xa gun xa ta ugap wa, leꞌa gal gor gunka xa ta wa. Cha gal gor ikesea xa ndoꞌ ta ugap wa, leꞌa ta wa gun gan gak perdid xa ndoꞌ Dios.
JAM 1:16 Bego amig ten naꞌ, lá gunbeꞌe bego dub ta lid leꞌa nak.
JAM 1:17 Leꞌa itea be ta wen no be ta utsin nak, leꞌa ta wa ta nsaꞌa Tad Dios, xa mbindeꞌe be xeꞌa ndiꞌib gibeꞌa baꞌ, be ta nzheꞌa lak nluu‑yá. Parea leꞌa Dios naꞌanpa nzheꞌa lak nak xa.
JAM 1:18 Leꞌa lak nlad Dios leꞌa Dios msaꞌa diꞌizh gealngea ten na, ta nsaꞌa dub gealnaban kub, ndontsa gak beuna ta mas nsak lat itea be taꞌa mbindeꞌe Dios.
JAM 1:19 Bego nak beuna xmen Cristo, leꞌa bego nsabndoꞌ utsin isakyoꞌón ta ndab stub men. Naꞌanpa cha uxax itakaꞌab bega, no naꞌanpa cha gakloo bega.
JAM 1:20 Leꞌa be men ugiꞌi wa lá yoo gan gun ta isak ladna Dios.
JAM 1:21 Ta weꞌe blaꞌa bega itea be ta lá utsin nak no itea ndoꞌ be ta ugap. Ndi utsin gok bega, bxobgek bega ndoꞌ diꞌizh ten Dios, ta na yá mbingea ladna bega. Leꞌa diꞌizh wa suꞌu koꞌo beuna ndoꞌ be ke ten beuna.
JAM 1:22 Gok bega lak ndab diꞌizh ten Dios, naꞌanpa sbeꞌen goꞌóntsa bega‑yá. Tal leꞌa bega sbeꞌen goꞌóntsa‑yá, cha lá gak bega lak ndab diꞌizh wa, leꞌa bega ukwiꞌinno leꞌaka leꞌa na.
JAM 1:23 Leꞌa tal ton sbeꞌen ndoꞌóntsa diꞌizh ten Dios, ná lá gun xa lak ndab‑a, leꞌa xa wa cuent nak dub men mwiꞌi xteꞌe nak ndoꞌ na ndoꞌ waꞌán.
JAM 1:24 Mwiꞌi xa leꞌaka ndoꞌ xa cha nchaꞌa xa, cha uxax myalad xa xteꞌe nak xa.
JAM 1:25 Ná leꞌa tal ton isakyoꞌón ta ndab diꞌizh ten Dios, no gun xa lak ndab‑a idub tiemp, no naꞌanpa yalad xa‑yá, leꞌa xa wa uzhebpa wen yoo ladna ndoꞌ itea be ta ndun xa. Leꞌa diꞌizh ten Dios uzheꞌeb wen nak, naꞌan xtaꞌan ndun jwalt‑a, no sun‑a gan koꞌo‑yá beuna ndoꞌ be ke ten beuna.
JAM 1:26 Tal ncho dub xa lat bega, nsak xa uzheꞌeb wen ndun xa ta nlad Dios, ná lá ndaisaꞌab xa ndoꞌ be diꞌizh ugap ndadiꞌizh xa, leꞌa xa wa nkwiꞌinno leꞌaka leꞌa xa. Leꞌa ta li nsak xa wen ndun xa wa ta naꞌan xtiꞌin.
JAM 1:27 Leꞌa Tad Dios ndab leꞌa tal ton nlad gun ta isak ladna Dios, nsabndoꞌ gakno xa be meꞌed usaꞌab no be xagots nab ngut xabgiꞌi ten na ndoꞌ be ta juert ncho xa. No naꞌanpa gun xa be ta ugap nak, lak be ta ndun bexa lá nchandoꞌ Dios.
JAM 2:1 Bego nak beuna xmen Cristo, bexa ngeꞌ ladna Jesucristo xa ndon leꞌa nibeꞌe ten beuna, leꞌa bega lá nsabndoꞌ uti men.
JAM 2:2 Leꞌa lak sa nyakjunt bega ntsid bega, tal ilanseaꞌ dub men ncho sian ganil oro yaꞌa xa no nak xa be lad uyap, no tal dub xa nak lad myox uban nak xa noga ilanseaꞌ sa wa, ¿xteꞌe gun bega zha?
JAM 2:3 Leꞌa tal bega mas utsin gak ndoꞌ xa nak lad uyap wa no gab bega ndoꞌ xa: “Utsea go isob ga ndoꞌ yaxil ndee”, ná leꞌa ndoꞌ xa uban nak wa cha gab bega: “Baꞌatsa usoꞌ natal usob ndoꞌ yo baꞌ,”
JAM 2:4 ¿lá iniꞌí bega zha leꞌa tal bega li ndun leꞌa bega nti men no ndanbeꞌe bega ta ugap?
JAM 2:5 Bego amig ten naꞌ, blaꞌach bega ta gáp naꞌ ndee: ¿Lá iniꞌí bega zha leꞌa Dios leꞌa mti bexa uban nak ndoꞌ gizhliyo ndee, yak bexa xa rik ndoꞌ Dios ta na ngeꞌ ladna bexa Cristo? No usaꞌa Dios sa yoo bexa wats Dios, lakka ndab Dios usaꞌa Dios ndoꞌ bexa ndankea xa.
JAM 2:6 Ná leꞌa bego naꞌanpa utsin li ndanno bexa uban nak wa. ¿Lá iniꞌí bega zha leꞌa bexa rik wa mas ugap ndanno bega zha? No ndoꞌo juers xa bega ndoꞌ bexa naktiꞌin.
JAM 2:7 No uzheꞌeb kweaꞌ níꞌi bexa ndoꞌ Jesucristo xa nak Xwan beuna.
JAM 2:8 Uzheꞌeb utsin ndun bega tal nxobgekka bega ndoꞌ ley ten Dios, lak nkeaniꞌi diꞌizh ten Dios, ndab‑a: “Bkweaꞌ ladna lu be ltsaꞌa lu lakkata lu.”
JAM 2:9 Ná tal leꞌa bega nti men, leꞌa bega ndap ke ndoꞌ Dios, leꞌa bega naꞌanpa nxobgek ndoꞌ ley wa.
JAM 2:10 Leꞌa tal ton ndun itea be ta nibeꞌe Dios, ná lá nxobgek xa ndoꞌ stubtsa taꞌa nibeꞌe Dios, leꞌa xa wa ndap ke ndoꞌ Dios cuentka dub men ni dub taꞌa lá nxobgek ndoꞌ Dios.
JAM 2:11 Leꞌa Dios ndab: “Lá ugal bega stub xa naꞌanpa xa ten bega.” No ndab Dios: “Lá gut bega men.” Ta weꞌe tal leꞌa bega naꞌanpa ngal stub men, parea ndut bega men, leꞌa bega ndapka ke ndoꞌ ley ten Dios.
JAM 2:12 Ta weꞌe utsin bidiꞌizh bega no utsin bin bega, leꞌa gal dub wizh leꞌa Dios gab naga mxobgek beuna ndoꞌ diꞌizh ten Cristo, ta ngoꞌo beuna ndoꞌ be ke ten beuna.
JAM 2:13 Leꞌa tal ton lá nkweaꞌ ladna be ltsaꞌa na, leꞌa gal wizh wa leꞌa Dios liga naꞌanpa ikweaꞌ ladna xa wa. Ná leꞌa bexa nkweaꞌ ladna be ltsaꞌa na, leꞌa gal gor ilanseaꞌ xa ndoꞌ Dios leꞌa xa wa wen yaꞌan.
JAM 2:14 Bego nak beuna xmen Cristo, ¿xtiꞌin ta ndab dub men ngeꞌ ladna xa Dios, tal leꞌa xa lá ndun ta nsak ladna Dios zha? ¿Xteꞌema syoꞌo gan gap xa gealnaban ndoꞌ Dios zha?
JAM 2:15 No tal ncho dub xmen Jesús, cha lá ndap xa sian xab xa no ni lá ndap xa ta gaw xa,
JAM 2:16 cha gab bega ndoꞌ xa: “Byoꞌ wen ladna lu, no ubix xab lu no wen udaw”, leꞌa ta li ndab bego ndoꞌ xa wa naꞌan xtiꞌin, tal leꞌa bego lá usaꞌa ta nkiꞌin xa.
JAM 2:17 No liga tal ton ndab ngeꞌ ladna Dios, ná lá ndun xa ta nsak ladna Dios, leꞌa ta ndab xa wa naꞌan xtiꞌin.
JAM 2:18 Ná leꞌa ncho bego gab ndoꞌ naꞌ “leꞌa ncho bexa ngeꞌ ladna Dios, no nchoga bexa ndun be ta nsak ladna Dios.” Leꞌa naꞌ gáp ndoꞌ bego bluu bega ná xteꞌe ngeꞌ ladna bega Dios sin lá gun bego dub ta nsak ladna xa. Weꞌe leꞌa naꞌ uluu be ta wen ndun naꞌ, ta nluu leꞌa naꞌ ngeꞌka ladna xa.
JAM 2:19 Leꞌaka nak ta ndangea ladna bega leꞌa Dios dubtsa, parea leꞌa gast be mbi bxin no ndangea ladna ta wa, no nxis mbi bxin wa nzheb ta wa ndoꞌ Dios.
JAM 2:20 Lá gak bega dub xa tont. ¿Ni lá nyakbeꞌena bega zha leꞌa ta na ngeꞌ ladna bega Dios wa naꞌan xtiꞌin, tal leꞌa bega lá ndun ta nsak ladna xa?
JAM 2:21 ¿Lá iniꞌí bega zha leꞌa Abraham usan gox polta ten beuna wa mbin ta nsak ladna Dios, zha na ndiꞌizh ngut xa Isaac xmeꞌed xa cuent dub xnab ndoꞌ Dios?
JAM 2:22 ¿No lá nyakbeꞌena bega zha leꞌa Abraham mgeꞌ ladna Dios no mbin xa ta msak ladna Dios? Leꞌa ta na li mbin xa ta nlad Dios, ta weꞌe mluu leꞌa xa mgeꞌ ladna Dios.
JAM 2:23 Leꞌa ta wa lak nkeaniꞌi diꞌizh ten Dios, ndab‑a: “Leꞌa Abraham mgeꞌ ladna Dios, ta weꞌe myak Abraham dub xa wen nak ndoꞌ Dios.” Cha li myak Abraham amig ten Dios.
JAM 2:24 Leꞌa ta ndee nluu leꞌa beuna wen yaꞌan ndoꞌ Dios ta na ndun beuna ta nsak ladna xa, naꞌanpa nabtsa ta na ngeꞌ ladna beuna xa.
JAM 2:25 Leꞌa ta wa lak mbin Rahab dub xagots mbin juis mgiꞌi. Ngol dub wizh leꞌa xa mbin dub ta nsak ladna Dios, mkachko xa bexa ngwaꞌbewiꞌi gezh Jericó no msanes xa bexa wa stubga nes yaꞌbe bexa. Ta weꞌe wen myaꞌan xa ndoꞌ Dios.
JAM 2:26 Leꞌa lak dub men yá ngut wa naꞌan xtiꞌin, no liga leꞌa tal ton dub xa gab ngeꞌ ladna Cristo, ná lá ndun xa ta nsak ladna Dios, leꞌa ta na li ndab xa ngeꞌ ladna xa Cristo wa cuent nak dub ta ngut, dub ta naꞌan xtiꞌin.
JAM 3:1 Bego nak beuna xmen Cristo, naꞌanpa kwaꞌad bega ukwaꞌan xteꞌe gak bega mech nluu diꞌizh ten Dios. Leꞌa bego uniꞌíka leꞌa tal ton naꞌanpa utsin nluu diꞌizh ten Dios, leꞌa xa wa mas ndap ke ndoꞌ Dios.
JAM 3:2 Leꞌa iteanak beuna ncho sian biaj ndun beuna ta ugap. Ná tal dub xa nxik naꞌanpa cha kweaꞌ níꞌi xa ndoꞌ dub men, leꞌa xa weꞌe gaꞌal nsoꞌ ndoꞌ Dios, leꞌa xa wa sun gan isensaꞌab xa xa ndoꞌ itea be ta ugap.
JAM 3:3 Uniꞌí bego leꞌa beuna ngo fren toꞌo dub way natsa gun ma ta nlad beuna, goꞌo beuna idub ma guniꞌi pa nlad beuna.
JAM 3:4 No binbeꞌe bega ná xteꞌe nak dub barco nsea ndoꞌ nitsdoꞌo. Leꞌa ta wa dub ta siꞌil, no uzheꞌeb dub mbi juert nsiꞌi‑yá, parea leꞌa dub bleꞌa ya tuzhtsa ntseꞌa bexa‑yá guniꞌi pa nlad xa.
JAM 3:5 No liga nak luzh men. Mas dub ta tuzhtsa‑yá, parea leꞌa‑yá syoꞌo gan gun sian be ta uzheꞌeb, lak dub giꞌ tuzhtsa stsoꞌol idub geꞌe siꞌil.
JAM 3:6 Leꞌa luzh dub men ndun sian ta ugap, cuent dub giꞌ ndazhaꞌa sian be taꞌa. Leꞌa be ta ugap ndadiꞌizh dub men utsabgix idub xa, ndazhaꞌa‑yá idub gealnaban ten xa, cuent dub bealꞌ ntoꞌo infierno.
JAM 3:7 Leꞌa be men ndun gan ndoꞌ itea ndoꞌ be man ndap dap xoꞌo na, no be man nsaꞌab, no be mbeꞌal, no itea be man ncho len nits.
JAM 3:8 Ná leꞌa ni dub men lá gun gan isensaꞌab luzh na, leꞌa‑yá uzheꞌeb dub ta ugap nak, cuent dub venen ugiꞌi ndut men.
JAM 3:9 Leꞌa luzh beuna leꞌa ndab beuna ta juert nak Dios Xus beuna. Ná leꞌaga‑yá nisi beuna be ltsaꞌa beuna, bexa leꞌaka Dios mbindeꞌe lak nak Dios.
JAM 3:10 Leꞌaka toꞌo be men ntoꞌo be diꞌizh utsin no diꞌizh kweaꞌ. Bego nak beuna xmen Cristo, lá nsabndoꞌ li gun beuna ta wa.
JAM 3:11 ¿Ti ncho pa uniꞌí bega nsoblen nits wen no nits ulaꞌ dub seꞌetsa?
JAM 3:12 ¿Na ti ncho pa uniꞌí bega leꞌa ya laꞌaw nsaꞌa ngus olivo natal dub ya uv nsaꞌa ngus laꞌaw? No liga leꞌa dub sa nsoblen nits lá yoo gan ilen nits utix no nits wen.
JAM 3:13 ¿Ton bega nsak leꞌa mas ndák no nyakbeꞌena xteꞌe nak Dios zha? Leꞌa bego wa nsabndoꞌ gun sbeꞌen be ta wen no bchaꞌan gak bega, ta uluu leꞌa bega ndákka.
JAM 3:14 Ná leꞌa tal ton ixee ladna ndoꞌ be ltsaꞌa na ta na ndap xa taꞌa, no nlad xa sbeꞌen leꞌatsa xa gun gan, lá nsabndoꞌ gab xa leꞌa xa mas ndák. Leꞌa ta wa gealkwiꞌin, leꞌa xa wa naꞌanpa ta ugea ndák.
JAM 3:15 Leꞌa ta ndák xa wa naꞌanpa ta nsaꞌa Dios, leꞌa ta wa ndi ta gizhliyo lak ndanbeꞌetsa be men, no ta nsaꞌa maxuꞌu‑yá.
JAM 3:16 Leꞌa sa na ncho bexa nxeeno ladna be ltsaꞌa na, no nlad bexa sbeꞌen leꞌatsa xa gun gan, leꞌa sa wa sbeꞌen ndeyo bexa no ndun bexa itea ndoꞌ be ta ugap.
JAM 3:17 Ná leꞌa bexa ndák lak nsaꞌa Dios, leꞌa xa wa umbiꞌi nak ladoꞌo na ndoꞌ Dios: bchaꞌan nak xa, no utsin nak xa ndoꞌ be ltsaꞌa xa, no naꞌanpa kweaꞌ nak xa ndoꞌ be men, no uzheꞌeb nlats ladna xa be men, no itea taꞌa ndun xa wa utsin nak, no lá nti xa men, no idub ncho ladna xa ndun xa tiꞌin ndoꞌ Dios.
JAM 3:18 Tal leꞌa bega ukwaꞌan dub mod lá kuyono bega be ltsaꞌa bega, leꞌa ta wa gun gan wen yoo ladna bega, no gun bega ta nsak ladna Dios.
JAM 4:1 Binbeꞌe bega ná pa nsea ta na ndeyo bega, no pa nsea ta nyotoꞌo bega. Leꞌa naꞌ gáp leꞌa len ladoꞌo bega leꞌa ncho be ta ugap nlad bega gun bega, ta weꞌe ndeyo bega.
JAM 4:2 Leꞌa bega nsaꞌab ladna gap bega ta ndap stubga men, ná leꞌa bega lá ndun gan gap bega ta wa. Ta weꞌe ncho bega ndut men, no ndaklono bega bexa ndap taꞌa, no nyo bega. Ná leꞌa bega lá ndapka be ta nlad bega wa, geal leꞌa bega lá inab‑a ndoꞌ Dios.
JAM 4:3 Ná tal inab bega dub taꞌa ndoꞌ Dios, leꞌa xa naꞌanpa usaꞌa‑yá, geal leꞌa bega nab dub ta lá nsabndoꞌ, dub ta guntiꞌin bega laktsa nlad bega.
JAM 4:4 ¡Bego baꞌ naꞌanpa nab Dios ndankea! ¿Lá iniꞌí bega zha leꞌa tal ton ukwaꞌan be ta ugap ncho ndoꞌ gizhliyo ndee, leꞌa xa wa yak dub xa nyono Dios? Ta weꞌe tal leꞌa bega nkwaꞌan be ta gizhliyo ndee, leꞌa bega nak xa nyono Dios.
JAM 4:5 ¿Nsak bega zha naꞌan xtiꞌin be diꞌizh ten Dios? Ndab‑a leꞌa Dios ulo Espíritu ten na len ladoꞌo beuna, uzhebpa nlad Espíritu wa Diostsa yankea beuna.
JAM 4:6 Ta ugeaka leꞌa Dios uzhebpa ndakno beuna, lak ndab diꞌizh ten Dios: Leꞌa Dios lá ndakno bexa zhin nak, leꞌa xa ndi ndakno bexa bchaꞌan nak.
JAM 4:7 Ta weꞌe bxobgek bega ndoꞌ Dios. Lá ulaꞌa bega gak ta nlad maxuꞌu, weꞌe leꞌa maxuꞌu sxoꞌonka wats bega.
JAM 4:8 Ubii bega wats Dios, leꞌa Dios ibiiga wats bega. Bego na ndun ta ugap, blaꞌa bega be ta ugap wa. Bego na nlad yankea Dios no bi nlad bega gun bega ta ugap, btsambiꞌi bega len ladoꞌo bega, cha ndi bkwaꞌan bega Dios.
JAM 4:9 Kweaꞌ byoꞌ ladna bega, no uban byoꞌ ladna bega, no biꞌin bega. Yá lá uxiꞌidta bega, ndi biꞌin bega. No naꞌanpa iten ladna bega, ndi uban byoꞌ ladna bega.
JAM 4:10 Byak byux bega ndoꞌ Dios Xa Nibeꞌe, weꞌe leꞌa xa gunno bega dub xa nsak cuent ten Dios.
JAM 4:11 Bego nak beuna xmen Cristo, lá inisi bega be ltsaꞌa bega. Tal ton inisi ltsaꞌa na, no gab xa leꞌa ltsaꞌa xa lid leꞌa ndun, leꞌa ta wa cuent nisi xa ley ten Dios, no ndab xa leꞌa ley wa lid leꞌa nak. Mas wen uxobgek bega ndoꞌ ley ten Dios, cha naꞌanpa gab bega leꞌa‑yá lid leꞌa nak.
JAM 4:12 Ndon Diostsa nak xa msaꞌa ley wa, no ndon nabtsa Dios syoꞌo gan gab tal dub men yaꞌ wats Dios natal yaꞌ xa infierno. Parea bego zha, ¿ton nak bego gab bego leꞌa ltsaꞌa bega lid leꞌa ndun?
JAM 4:13 Blaꞌach bego nat, bego lndeꞌe ndab: “Wizh nat natal geꞌa nchaꞌa besa stub gezh. Leꞌa sa wa yoo besa dub liꞌin, gun besa tiꞌin, no gun besa gan sian med.”
JAM 4:14 Parea leꞌa bego ni lá iniꞌí xtaꞌan yoo geꞌa. Leꞌa gealnaban ten bega cuent nak mbe nlaꞌ ndoꞌ yo dub xlaꞌaltsa, cha uxax nitndoꞌ‑yá.
JAM 4:15 Ndi nsabndoꞌ gab bega: “Tal leꞌa Dios nlad, weꞌe gun besa ta ndee natal stubga taꞌa.”
JAM 4:16 Ná nat leꞌa bego ndi nzhinnona be ta gun bega. Leꞌa itea be ta li nzhinna be men wa, leꞌa ta wa ta lá nsak ladna Dios.
JAM 4:17 Leꞌa tal ton nchandoꞌ xtaꞌan dub ta wen gun xa, ná cha lá gun xa ta wa, leꞌa ta wa dub ke ndoꞌ Dios.
JAM 5:1 ¡Leꞌa bego xa rik, blaꞌach bego ta gáp naꞌ ndee! Utezhat bega biꞌin bega, leꞌa bega iniꞌí sian gealkweaꞌ.
JAM 5:2 Leꞌa be ta sian ndap bega wa ta ndazhaꞌa, no be xab bega nsayak guꞌud, ndaw mbes‑a.
JAM 5:3 No leꞌa ta oro nsea ta plata ten bega wa sach mbe. Leꞌa gal dub wizh leꞌa mbe wa uluu leꞌa bega ugap mbin, cha yolꞌ bega ndoꞌ giꞌ. Sian be taꞌa ndegochaꞌaw bega, ná nat be wizh lult.
JAM 5:4 Leꞌa be men ndun tiꞌin geꞌe ten bega wa nsake ndoꞌ Dios ta na lá nkix bega med ten bexa. Leꞌa Dios xa ndon leꞌa juert nak ndoꞌón ta ndab bexa li ndun tiꞌin wa.
JAM 5:5 Leꞌa bego xa rik baꞌ ndun itea be ta nlad na, be ta ncho ndoꞌ gizhliyo ndee, no ndap bega itea be ta ndal ladna bega. Leꞌa bega nak cuent dub man nyaꞌal ni lá iniꞌí ma ti gal wizh gat ma.
JAM 5:6 Leꞌa bego nkwiꞌin nsake bega be men utsin ndun, ndab bega gat bexa. Ná leꞌa bexa wa lá yoo gan utsakndoꞌ.
JAM 5:7 Bego nak beuna xmen Cristo, lá gach ladna bega uxik bega gast zha ilen Jesús Xwan beuna. Binbeꞌe bega xteꞌe nak dub xa ndun tiꞌin geꞌe, xteꞌe ni lá ndach ladna xa nkenkeaꞌ xa gast zha nlaꞌ gi ned, nsea gast zha myats gi nteleꞌe xa be ta nsaꞌa‑yá.
JAM 5:8 No liga bego baꞌ dubtsa ute bega lá gach ladna bega, leꞌa Jesús Xwan beuna sken ilen.
JAM 5:9 Bego nak beuna xmen Cristo, lá iníꞌi kweaꞌ bega ndoꞌ be ltsaꞌa bega, cha naꞌanpa gab Dios leꞌa bega ndap ke. Blaꞌach bega leꞌa Dios yamer giꞌid inaꞌ ná xteꞌe gak ta ndun be men.
JAM 5:10 Bega nak beuna xmen Cristo, bin bega lak mbin bexa mbidiꞌizh sakndoꞌ Dios tiemp polta. Leꞌa bexa wa sian gealkweaꞌ uniꞌí, ná nunk bexa lá ngach ladna.
JAM 5:11 Leꞌa beuna uniꞌí leꞌa bexa na nxik ndoꞌ be gealkweaꞌ wa wen yoo ladna. Ndoꞌónla bega lak mxik Job ndoꞌ be gealkweaꞌ uniꞌí xa. Cha ngol zha leꞌa Dios mbin uzheꞌeb wen myaꞌan xa, leꞌa Dios uzheꞌeb dub xa nlats ladna beuna no nkweaꞌ ladna xa beuna.
JAM 5:12 Ná leꞌa bego nak beuna xmen Cristo, leꞌa ta gáp naꞌ ndee ta mas nsabndoꞌ: leꞌa gor ndadiꞌizh bega gun bega dub taꞌa, lá useꞌat bega gibeꞌa ni gizhliyo no ni stubga taꞌa. Tal leꞌa bega gun dub taꞌa, litsa gud bega. Ná tal leꞌa bega lá gun ta wa, naꞌantsa gud bega. Sbeꞌen gealngea bidiꞌizh bega ndontsa naꞌanpa utsaksi Dios bega.
JAM 5:13 Tal ncho bega kweaꞌ ncho ladna, bidiꞌizhno bega Dios. No tal ncho bega nten ladna, biltoꞌo bega ndoꞌ Dios.
JAM 5:14 No tal ncho bega kweaꞌ nsak, utezh bega bexa nchansu be xmen Cristo, kaꞌab bexa aceit gek bego gizh wa, no inab bexa ndoꞌ Cristo yakna bega.
JAM 5:15 Tal leꞌa bexa idub ncho ladna igeꞌ ladna Dios gor na li nab xa ndoꞌ Dios, leꞌa Dios syunyakkana bega yaste bega. No tal leꞌa bega ndap ke ndoꞌ Dios, leꞌa Dios utsuꞌuka ke ten bega.
JAM 5:16 Bgondoꞌ bega tal ncho zha ntidnsaꞌab bega ndoꞌ be ltsaꞌa bega. No unab bega ndoꞌ Dios yunyakna Dios be ltsaꞌa bega. Leꞌa tal ton dub xa gaꞌal nak ndoꞌ Dios, leꞌa gor na idub ncho ladna xa inab xa ndoꞌ Dios, leꞌa Dios soꞌónka ta ndab xa wa.
JAM 5:17 Leꞌa Elí dub profet mbidiꞌizh sakndoꞌ Dios tiemp polta, dub men lakka leꞌa beuna. Leꞌa zha na idub ncho ladna xa unab xa ndoꞌ Dios lá ilaꞌta gi, cha yá lá ilaꞌkata gi chon liꞌin itol.
JAM 5:18 Weꞌe cha unabgal xa ndoꞌ Dios ilaꞌgal gi. Leꞌa gi wa cha ulaꞌkagal, cha ngokgal be taꞌa ndoꞌ yo.
JAM 5:19 Bego nak beuna xmen Cristo, tal ncho dub xa utoꞌo len nes ten Dios, ná leꞌa stub xa gun gan yach xa wa wats Dios,
JAM 5:20 nlad naꞌ iniꞌí bega leꞌa xa na li gun gan yach men wa wats Dios, leꞌa xa wa ulat gealnaban ten xa wa ndoꞌ gealgut no gun xa gan leꞌa Dios utsuꞌu itea be ke ten xa wa.
1PE 1:1 Leꞌa naꞌ ndee Pedr, xa mtuꞌub Jesucristo gun naꞌ tiꞌin ten xa. Nkeꞌa naꞌ git ndee ndoꞌ bego na naꞌanpa lazh na ndencho, bego na lbaꞌa ndencho Ponto no Galacia no Capadocia no Asia no Bitinia.
1PE 1:2 Leꞌa Tad Dios polkata mti bega, no mtsambiꞌi Espíritu ten Dios gealnaban ten bega, ndontsa uxobgek bega ndoꞌ Dios no utsuꞌu ten ten Jesucristo be ke ten bega. Naꞌab naꞌ ndoꞌ Dios uzheꞌeb utsin gak xa ndoꞌ bega no gun xa uzheꞌeb wen yoo ladna bega.
1PE 1:3 Leꞌa Dios Xus Jesucristo Xwan beuna uzheꞌeb dub xa wen. Tant nkweaꞌ ladna xa beuna, leꞌa xa mxiste Jesucristo ndoꞌ gealgut no msaꞌa xa dub gealnaban kub ndoꞌ beuna. Ta weꞌe ndenkeaꞌ beuna gal usoꞌ beuna ta usaꞌaka Dios.
1PE 1:4 Leꞌa ta wa ta lá initndoꞌ, no ni lá gak bzhiꞌik‑a, no ni lá gazhaꞌa‑yá; ndi nchochaꞌaw‑a gibeꞌa gast gal zha ikaꞌa beuna‑yá.
1PE 1:5 Leꞌa bega ngeꞌ ladna Dios, ta weꞌe leꞌa Dios nlaꞌach bega nsea juers ten xa, ndontsa gapka bega gealnaban kub wa, ta ikaꞌaka bega tiemp ilen ndee.
1PE 1:6 Ta weꞌe uzhebpa nten ladna bega nat, maska nsatid bega sian gealkweaꞌ dub ndeꞌep.
1PE 1:7 Leꞌa ta na ngeꞌ ladna bega Dios wa li gak preb ndoꞌ be gealkweaꞌ wa, lak ndak preb oro ndoꞌ giꞌ. Ná leꞌa ta na ngeꞌ ladna bega Dios wa uzhebpa mas nsak ndoꞌ oro, leꞌa oro wa ta nitndoꞌ. Tal leꞌa bega ta ugeaka ngeꞌ ladna Dios, leꞌa gal wizh ulundoꞌ Jesucristo leꞌa bega wenka kwe ndoꞌ Dios no gab xa leꞌa bega wenka li mbin.
1PE 1:8 Leꞌa bega ndankea Jesucristo maska gol niꞌí bega xa. No ndangea ladna bega xa maska lá naꞌ bega xa nat. No uzhebpa nten ladna bega gast ni lá iniꞌí bega xteꞌe gudiꞌizh bega‑yá.
1PE 1:9 Leꞌa ta na li ndangea ladna bega Cristo, leꞌa Dios usaꞌa dub gealnaban kub ndoꞌ bega.
1PE 1:10 Leꞌa be profet polta mbidiꞌizh xteꞌe uzheꞌeb utsin gunno Dios bega, mtsid bexa no uloxnes bexa ná xteꞌe nak gealnaban usaꞌa xa wa.
1PE 1:11 Leꞌa zha biseata ilen Cristo ndoꞌ gizhliyo, leꞌa Espíritu mluꞌu ndoꞌ bexa wa ná xteꞌe nsabndoꞌ iniꞌí Cristo be gealkweaꞌ, no xteꞌeta uzheꞌeb ta chul yoo tsoꞌo wa. Ta weꞌe mkwaꞌan bexa ná ton gak Cristo, no pol ilen xa ndoꞌ gizhliyo.
1PE 1:12 Leꞌa Dios mluu ndoꞌ bexa wa leꞌa ta ndadiꞌizh bexa wa naꞌanpa yoo zha bi ncho bexa wa, leꞌa ta wa ndi yoo zha na ncho beuna ndee. Leꞌa ta wa diꞌizh wen mbidiꞌizh be men ndoꞌ bega ta msaꞌa Espíritu ten Dios utoꞌo gibeꞌa baꞌ. No gast be angel ten Dios nlad yakbeꞌena be ta wa.
1PE 1:13 Ta weꞌe list ute bega, no utsin binbeꞌe bega, no bgeꞌ ladna bega leꞌa Dios uzheꞌeb utsin gunno bega zha ilen Jesucristo.
1PE 1:14 Gok bega cuent dub meꞌed nxobgek ndoꞌ xus na. Yá lá gunta bega be ta ugap mbin bega zha na lá nchandoꞌ bega Dios.
1PE 1:15 Ndi umbiꞌi gok bega ndoꞌ Dios guniꞌi xtaꞌan ndun bega, lak umbiꞌi nak Dios xa na leꞌa mti bega wa.
1PE 1:16 Lak nkeaniꞌi diꞌizh ten Dios ndab xa: “Umbiꞌi gok bega ndoꞌ naꞌ, lak umbiꞌi nak naꞌ.”
1PE 1:17 Leꞌa Dios naꞌanpa nti men, leꞌa xa ndi utsin gab ndoꞌ itea be men xteꞌe nak ta ndun bexa. Leꞌa bega ndab leꞌa xa wa Xus bega, ta weꞌe ndoꞌ itea be ta ndun bega nsabndoꞌ gap bega mod ndoꞌ xa idub tiemp nban bega ndoꞌ gizhliyo ndee.
1PE 1:18 Leꞌa Dios uloꞌo bega ndoꞌ be ta naꞌan xtiꞌin mbin bega lak mbin be usan gox ten bega. Ná leꞌa bego uniꞌíka leꞌa gealnaban ten bega naꞌanpa isiꞌi Dios no oro nsea plata, be ta initndoꞌ.
1PE 1:19 Leꞌa Dios ndi usiꞌi gealnaban ten bega wa no ten ten Cristo. Leꞌa xa wa ngut sakndoꞌ beuna, cuent dub borreg ndon umbiꞌi nak.
1PE 1:20 Leꞌa ta wa ta mbinbeꞌe Dios zha biseata gakndeꞌe gizhliyo, ná leꞌa gast tiemp ndee ulen Cristo, xa na nkweaꞌ ladna bega.
1PE 1:21 Leꞌa juers ten ta li mbin Cristo wa leꞌa bega ndangea ladna Dios, xa na leꞌa mxiste Cristo ndoꞌ gealgut, no msaꞌa xa sa ndon leꞌa nsak nsob Cristo. Ta weꞌe ngeꞌ ladna bega Dios no ndenkeaꞌ bega gal wizh gal usoꞌ bega ta ndab xa wa.
1PE 1:22 Nat leꞌa Espíritu ten Dios ndakno nxobgek bega ndoꞌ gealngea ten Dios. Leꞌa gealnaban ten bega li msambiꞌila ndoꞌ Dios, ndontsa ikweaꞌ ladna bega be ltsaꞌa bega, bexa no nak xmen Dios. Nat li bin bega idub ncho ladna bega no ni dub ta ugap lá gunbeꞌe bega.
1PE 1:23 Leꞌa bega nak cuent dub men ti ngol stub biaj. Ná leꞌa gealnaban kub ten bega wa naꞌanpa ta initndoꞌ. Leꞌa gealnaban wa ta nsaꞌa diꞌizh ten Dios, dub ta nban, dub ta nunk lá initndoꞌ.
1PE 1:24 Lak ndab diꞌizh ten Dios: Leꞌa itea be men nak cuent dub ya géꞌe. Leꞌa itea be ta wen ndun bexa nak cuent géꞌe ten ya wa. Leꞌa ya wa ta nbid, no géꞌe ten na ta nyab,
1PE 1:25 ná leꞌa diꞌizh ten Dios ta lá initndoꞌ. Leꞌa diꞌizh wa diꞌizh wen ten Cristo, ta mbidiꞌizh bexa ndoꞌ bega.
1PE 2:1 Nat blaꞌa bega iteanak be ta ugap nak bega, no itea be gealkwiꞌin ndun bega, no dub ta naꞌanpa ugea nak bega. No lá gaklono bega be men ndap taꞌa, no lá gudiꞌizhta bega be cuent gix.
1PE 2:2 Leꞌa lak dub medoꞌo nkwaꞌan chizh goo na, no liga bkwaꞌan bega diꞌizh ten Dios, ndontsa li mas igondoꞌ bega Dios, no gap bega gealnaban.
1PE 2:3 Leꞌa bega yá uniꞌíka leꞌa Dios wen nak ndoꞌ bega.
1PE 2:4 Ubii bega wats Cristo, xa nak cuent dub geꞌ nban. Leꞌa be men mxelad xa wa, ná leꞌa Dios mti xa cuent dub geꞌ ndon leꞌa nsak.
1PE 2:5 Leꞌa bego no nak cuent be geꞌ nban. Ta weꞌe blaꞌa bega leꞌa Dios guntiꞌin bega gak bega lid Dios. No gak bega cuent dub uleꞌay mti Dios, cha juers ten Jesucristo gun bega be ta nsak ladna Dios, leꞌa ta wa cuent dub xnab usaꞌa bega ndoꞌ Dios.
1PE 2:6 Lak nkeaniꞌi diꞌizh ten Dios, ndab Dios cuent ten Cristo: Bwiꞌi bego leꞌa gezh Sion uxoꞌob naꞌ dub geꞌ ned nbexan niꞌi. Leꞌa ta wa dub geꞌ mti naꞌ, ta ndon leꞌa nsak. Leꞌa tal ton igeꞌ ladna xa nak geꞌ wa, leꞌa bexa wa nunk naꞌanpa ido ladna.
1PE 2:7 Leꞌa cuent ten bego na li ngeꞌ ladna Cristo wa, leꞌa xa wa uzheꞌeb dub xa nsak. Parea leꞌa cuent ten bexa naꞌanpa ngeꞌ ladna xa, leꞌa diꞌizh ten Dios lndeꞌe ndab: Leꞌa geꞌ na mxelad bexa ndandeꞌe niꞌi, nat leꞌa ta wa leꞌa nak geꞌ ndon leꞌa nsak nbexan niꞌi.
1PE 2:8 No ndab‑a: Leꞌa geꞌ wa ta nkateꞌeb be men gast nlayat bexa. Leꞌa bexa wa li nkateꞌeb geal leꞌa bexa lá nxobgek ndoꞌ diꞌizh ten Dios, lak uniꞌí Dios gun bexa.
1PE 2:9 Ná leꞌa bega nak xmen Dios, leꞌa Dios mti bega gak bega cuent uleꞌay gun tiꞌin ndoꞌ Dios, xa ndon leꞌa nibeꞌe. Leꞌa bega nak cuent dub nacion umbiꞌi nak ndoꞌ Dios, dub gezh ten Dios, ndontsa gudiꞌizh bega be ta wen ndun Dios, xa na leꞌa uloꞌo bega ndoꞌ sa ukaw ndontsa kwe bega ndoꞌ xeꞌa chul ten xa.
1PE 2:10 Leꞌa polta leꞌa bega naꞌanpa nak gezh ten Dios, ná nat leꞌa bega myakla gezh ten xa wa. Leꞌa polta leꞌa bega lá iniꞌí ti nkweaꞌ ladna Dios bega, ná nat leꞌa bega uniꞌíka ta wa.
1PE 2:11 Bego amig ten naꞌ, leꞌa ndoꞌ gizhliyo ndee naꞌanpa lazh beuna, leꞌa beuna ga dub nseatid ndoꞌ‑yá. Ta weꞌe naꞌab naꞌ ndoꞌ bega gun bega juers lá gun bega be ta ugap nlad bega, leꞌa be ta wa uka gun bega be ta nlad Dios.
1PE 2:12 Uzhebpa wen gok bega ndoꞌ bexa lá nchandoꞌ Dios, bexa nisi bega, ndab bexa leꞌa bega xa ugap. Leꞌa gal gor iniꞌí bexa be ta wen ndun bega, weꞌe yankea bexa Dios gal wizh ilen Cristo.
1PE 2:13 Leꞌa ta na nak bega xmen Cristo, ta weꞌe bxobgek bega ndoꞌ itea bexa naktiꞌin. Ndoꞌ xa nibeꞌe Roma bxobgek bega, leꞌa xa wa ndon leꞌa nibeꞌe.
1PE 2:14 No ndoꞌ be xmen xa wa bxobgek bega, leꞌa xa ntuꞌub bexa utsaksi bexa be men ndun ta ugap, no utsin gak bexa ndoꞌ be men ndun ta wen.
1PE 2:15 Leꞌa Dios nlad li wen gak bega, ndontsa yá naꞌantapa inisi be men bega, bexa lá nchandoꞌ Dios no naꞌanpa nsakyoꞌón bexa.
1PE 2:16 Leꞌa Dios uloꞌo bega ndoꞌ be ke ten bega, ndontsa gun bega tiꞌin ndoꞌ Dios, naꞌanpa gun bega be ta ugap.
1PE 2:17 Gop bega mod ndoꞌ iteanak be men. No bkweaꞌ ladna bega bexa no nak xmen Cristo. No bxobgek bega ndoꞌ Dios, nsea gop bega mod ndoꞌ xa nibeꞌe Roma.
1PE 2:18 Bego na ncho ndoꞌ yaꞌa stubga men, gop bega mod ndoꞌ xa nak xwan bega, no bxobgek bega ndoꞌ xa. Li bin bega ndoꞌ bexa utsin nak no ndoꞌ bexa uxax nak.
1PE 2:19 Leꞌa Dios nten ladna gor na nxik bega ndoꞌ dub gealkweaꞌ ni lá nsabndoꞌ itid bega, ta na ndun bega lakta nlad Dios gak bega.
1PE 2:20 Tal leꞌa dub men ntsaksi bega ta na ndun bega dub ta ugap, cha uxik bega ndoꞌ gealkweaꞌ wa, naꞌanpa nsabndoꞌ itenno ladna bega ta wa. Ná tal leꞌa bega ntid dub gealkweaꞌ ta na ndun bega ta wen, no nxik bega ndoꞌ gealkweaꞌ wa, leꞌa ta wa ta nsak ladna Dios.
1PE 2:21 Leꞌa Dios mti bega li gun bega ta wa, leꞌa lak mxik Cristo ndoꞌ be gealkweaꞌ sakndoꞌ beuna, no liga nsabndoꞌ uxik beuna.
1PE 2:22 Leꞌa Cristo nunk lá ngun dub ta ugap, no ni dub gealkwiꞌin lá ngun xa.
1PE 2:23 Leꞌa gor na unisi bexa xa wa, leꞌa xa wa ni dub diꞌizh xela lá ikaꞌab ndoꞌ bexa wa. No gor na mtsaksi bexa xa, leꞌa xa ni dub ta ugap lá ngab ndoꞌ bexa wa. Ndi mlaꞌa xa ta wa cuent ten Dios, xa na utsin gab ndoꞌ itea be men ná ton ndap ke.
1PE 2:24 Leꞌa Cristo wa leꞌa mbiꞌi be ke ten beuna ngut xa ndoꞌ cruz, natsa ulaꞌa beuna be ta ugap nak beuna nsea iban beuna gun beuna ta wen. Leꞌa ta na utid Cristo ndoꞌ be gealkweaꞌ wa, ta weꞌe leꞌa bego myakna.
1PE 2:25 Leꞌa polta utesea bega cuent be borreg, ma ukegix. Ná nat myach bega wats Cristo, xa nlaꞌach gealnaban ten bega lak bexa nlaꞌach be borreg ten na.
1PE 3:1 No liga leꞌa bego xagots, bxobgek bega ndoꞌ xabgiꞌi ten bega. Tal leꞌa bexa lá ndangea ladna diꞌizh ten Dios, leꞌa ncho xa gungeaka ladna‑yá gor na naꞌ xa xteꞌe nak bega, lá nkiꞌin uzheꞌeb gudiꞌizh bega‑yá ndoꞌ xa.
1PE 3:2 Leꞌa xa inaꞌ xteꞌe utsin nak bega no xteꞌe umbiꞌi nak bega ndoꞌ Dios.
1PE 3:3 Leꞌa ta ndun chul nak bega wa naꞌanpa ta nsaxkwaꞌa bega gek bega no be ta oro no be lad uyap ndantiꞌin bega.
1PE 3:4 Leꞌa ta na chul nak bega wa, leꞌa ta wa ta ncho len ladoꞌo bega, dub ta lá initndoꞌ. Leꞌa ta wa ta na utsin nak bega no bchaꞌan nak bega, leꞌa be ta weꞌe uzhebpa ta nsak ndoꞌ Dios.
1PE 3:5 Li ngok be xagots polta, bexa wen ngok ndoꞌ Dios. Leꞌa bexa wa mgeꞌ ladna Dios, no mxobgek bexa ndoꞌ xabgiꞌi ten bexa.
1PE 3:6 Lak mxobgek Sara ndoꞌ Abraham, ndab xa leꞌa Abraham leꞌa nak xa nibeꞌe xa. Leꞌa bega slayaꞌ gak lak ngok Sara wa, tal leꞌa bega gun be ta wen no ni naꞌan xtaꞌan izheb bega.
1PE 3:7 No liga bego xabgiꞌi, uzhebpa blaꞌach bega xagots ten bega no utsin gok bega ndoꞌ xa. Leꞌa xa wa cuentta dub vas lid bid ileꞌa, ná leꞌa Dios dubtsa gealnaban kub msaꞌa ndoꞌ bega no ndoꞌ be xagots wa. Li gak bega ndontsa naꞌan xtaꞌan gun gan lá goꞌón Dios ta inab bega ndoꞌ xa.
1PE 3:8 Nat itea bego baꞌ, naꞌanpa kuyo bega, no blats ladna bega be ltsaꞌa bega, no bkweaꞌ ladna bega bexa, no utsin gok bega ndoꞌ bexa, no lá izhinna bega.
1PE 3:9 Ná tal ncho xa ugap gunno bega, naꞌanpa cha noga bega li ugap gunno xa wa. No tal ton inisi bega, naꞌanpa cha noga bega li inisi xa wa. Ndi unab bega ndoꞌ Dios utsin gunno Dios xa, leꞌa Dios leꞌa mti bega li gun bega, ndontsa utsin gunno Dios bega.
1PE 3:10 Lak nkeaniꞌi diꞌizh ten Dios, ndab‑a: Leꞌa tal ton nlad wen yoo, no iniꞌí xa be wizh wen, lá gudiꞌizh xa ta ugap no ni lá gun xa gealkwiꞌin.
1PE 3:11 No ulaꞌa xa be ta ugap, cha ndi utsin gak xa. No ukwaꞌan xa wen yoꞌono xa be men, no idub tiemp li nsabndoꞌ gun xa.
1PE 3:12 Leꞌa Dios nlaꞌach be men wen, no ndoꞌón xa xtaꞌan ndab bexa. Ná leꞌa Dios ndakloo ndoꞌ be men ndun ta ugap.
1PE 3:13 ¿Tonma dub xa xela gunno bega, tal leꞌa bega sbeꞌen ta utsin ndun?
1PE 3:14 Ná tal leꞌa bega iniꞌí dub gealkweaꞌ ta na utsin nak bega, leꞌa Dios gun wen yoo ladna bega. Ta weꞌe naꞌan ton ndoꞌ ná izheb bega, no ni lá yuꞌ ladna bega.
1PE 3:15 Ndi len ladoꞌo bega wankea bega Cristo Xwan beuna. No list gok bega ndontsa isuꞌu bega ikaꞌab bega guniꞌi ton inabdiꞌizh ndoꞌ bega cuent ten ta ngeꞌ ladna bega Cristo. No utsin ikaꞌab bega gap bega mod ndoꞌ xa.
1PE 3:16 Weꞌe leꞌa bexa na xela níꞌi ndoꞌ bega ndi ido ladnabe, gor iniꞌí bexa be ta wen ndun bega nak xmen Cristo.
1PE 3:17 Tal leꞌa Dios nlad, mas wen iniꞌí bega dub gealkweaꞌ ta na ndun bega dub ta wen, ni ka iniꞌí bega dub gealkweaꞌ ke na gun bega dub ta ugap.
1PE 3:18 Leꞌa Cristo uniꞌí gealkweaꞌ gast ngut xa, ndontsa myuꞌu be ke ten beuna. Leꞌa xa wa ni dub ke lá ndap, ná leꞌa xa ngut sakndoꞌ iteanak be men ndun be ta ugap, natsa yoꞌo xa beuna wats Dios. Leꞌa beꞌal las xa ngutka, ná leꞌa bi ten xa nbanka.
1PE 3:19 Cha li ngwaꞌyadiꞌizh bi ten xa ndoꞌ xbi be men ndenchonyaw.
1PE 3:20 Leꞌa ta wa bexa lá uxobgek ndoꞌ Dios tiemp xapta, zha na ukenkeaꞌ Dios naga syach be men wats xa, zha na mbindeꞌe Noé dub barco siꞌil. Leꞌa ta wa uyoꞌo dub xoꞌontsa men len na, bexa lá ngat ndoꞌ gilog wa.
1PE 3:21 Leꞌa ta utid bexa wa nak cuent ta ntaleaꞌ beuna len nits, ta ndun ndap beuna gealnaban ndoꞌ Dios. Naꞌanpa ntaleaꞌ beuna ndontsa ilate mek beuna, ndi ntaleaꞌ beuna ndontsa umbiꞌi gak ladoꞌo beuna ndoꞌ Dios, juers ten ta na mban Jesucristo ndoꞌ gealgut.
1PE 3:22 Leꞌa Cristo mkea gibeꞌa, cha nat nsob xa wats Dios lad gaꞌal. Leꞌa iteanak be angel nxobgek ndoꞌ xa, no be espíritu nibeꞌe.
1PE 4:1 No lak uniꞌí Cristo be gealkweaꞌ zha uyoꞌo xa ndoꞌ gizhliyo, ta weꞌe naꞌanpa izheb bega iniꞌí bega be gealkweaꞌ. Leꞌa tal ton itid ndoꞌ be gealkweaꞌ, leꞌa xa wa gun gan ndoꞌ ta ugap,
1PE 4:2 ndontsa idub nban xa naꞌanpa ukwaꞌan xa be ta nladtsa xa, ndi gun xa ta nsak ladna Dios.
1PE 4:3 Yá utid zha na mbin bega ta na ndal ladna bexa lá nchandoꞌ Dios, bexa ndun be ta bzhiꞌik, no nak bexa sian ta ugap, no ndun bexa gealgu, no ndesea bexa sa nyoꞌo gast ndun be men ta ugap, no ndun bexa itea be ta ndal ladna bexa ncho ndoꞌ gizhliyo, no ndankea bexa be ta naꞌanpa nak Dios, dub ta uzhebpa lá nsak ladna Dios.
1PE 4:4 Leꞌa nat leꞌa bexa lá nchandoꞌ Dios wa ndanseanabe xteꞌe lá ndunta bega ltsaꞌa be ta ugap ndun bexa wa. Ta weꞌe usalad ndanno bexa bega.
1PE 4:5 Parea gal dub wizh leꞌa bexa wa usaꞌa cuent ndoꞌ Dios itea be ta mbin bexa, gab Dios ná xteꞌe nak ta mbin kadga dub men, bexa ndenban no bexa ngutla.
1PE 4:6 Leꞌa bexa ngut wa mbiꞌínla diꞌizh ten Dios zha bi nban bexa, ndontsa ibangal bexa gap bexa gealnaban ndoꞌ Dios, mas ngutla bexa ndoꞌ gizhliyo ndee.
1PE 4:7 Leꞌa gizhliyo ndee yamer idub. Ta weꞌe list ute bega, bidiꞌizhno tseꞌe bega Dios.
1PE 4:8 Leꞌa ndoꞌ itea be taꞌa, leꞌa ta ndee ta mas nsak: Uzhebpa bkweaꞌ ladna bega be ltsaꞌa bega. Leꞌa tal beuna li gun, leꞌa beuna sungeꞌ ladna sian taꞌa ndanno bexa beuna.
1PE 4:9 No utsin gok bega ndoꞌ itea bexa nsea ta lid bega, naꞌanpa ineꞌe ladna bega xa.
1PE 4:10 Utsin bintiꞌin bega be ta ndák bega, ta msaꞌa Dios ndoꞌ kadga dub bega, ndontsa li gakno bega be ltsaꞌa bega, lak msaꞌa Dios gun bega.
1PE 4:11 Leꞌa bego na ndadiꞌizh diꞌizh ten Dios, bidiꞌizh bega‑yá lakkata nak‑a. No bego na ndakno be men, bin bega ta wa idub lak juers nsaꞌa Dios ndoꞌ bega. Weꞌe leꞌa be men iniꞌí ta ndun bega wa, cha gab bexa leꞌa Dios uzheꞌeb dub xa wen juers ten Jesucristo, xa ndon leꞌa wen no ndon leꞌa juert ndoꞌ itea be taꞌa idub tiemp. Lika nak‑a.
1PE 4:12 Bego amig ten naꞌ, lá yanseana bega gor na uzhebpa kweaꞌ nchaꞌtid bega, leꞌa ta wa ga lika gak.
1PE 4:13 Ndi bten ladna bega geal no bega nsatid ltsaꞌa be gealkweaꞌ utid Cristo, ndontsa liga uzhebpa iten ladna bega wizh ilengal xa.
1PE 4:14 Tal leꞌa be men xela níꞌi ndoꞌ bega ke na nak bega xmen Cristo, uzhebpa wen yoo ladna bega, leꞌa ta ndun bexa wa nluu leꞌa Espíritu ten Dios ncho ladoꞌo bega. Leꞌa bexa wa kweaꞌ níꞌi ndoꞌ Cristo, ná leꞌa bega ndi ndun ta nsak ladna Cristo.
1PE 4:15 Leꞌa bexa na ndut men nsabndoꞌka iniꞌí gealkweaꞌ, no liga bexa ndun gealwaꞌan, no bexa ndun ta ugap, no bexa nyote ndoꞌ ta ten stubga men. Parea leꞌa bega naꞌanpa li nak.
1PE 4:16 Ná tal leꞌa bega iniꞌí gealkweaꞌ ta na nak bega xmen Cristo, lá ido ladna bega; ndi bsaꞌa bega xno ndoꞌ Dios leꞌa bega nak xmen xa.
1PE 4:17 Leꞌa nat yamer isaxan tiemp iniꞌí be men be gealkweaꞌ. Leꞌa beuna nak xmen xa ned iniꞌí gealkweaꞌ wa, weꞌe mas juert yoo be men lá nxobgek ndoꞌ diꞌizh wen ten Dios.
1PE 4:18 Lak nkeaniꞌi diꞌizh ten Dios, ndab‑a: Leꞌa be men wen sian be gealkweaꞌ itid ndontsa gap xa gealnaban, ¿mata gal bexa ugap nak, bexa ndap ke ndoꞌ Dios?
1PE 4:19 Tal leꞌa bega itid ndoꞌ be gealkweaꞌ lak nlad Dios, byun bega cuent gealnaban ten bega ndoꞌ Dios xa mbindeꞌe bega, no bin bega be ta wen ndoꞌ Dios, leꞌa xa wa naꞌanpa ulaꞌa bega.
1PE 5:1 Leꞌa naꞌ ndee nak dub xa nchansu be xmen Cristo, no uní naꞌ xteꞌe utid Cristo be gealkweaꞌ, no gal usoꞌ naꞌ dub sa isoꞌob naꞌ wats Cristo zha ilen xa. Ta weꞌe naꞌab naꞌ ndoꞌ bego na nchansu be xmen Cristo,
1PE 5:2 utsin blaꞌach bega bexa wa, leꞌa Dios msaꞌa bexa ulaꞌach bega. Bin bega ta wa idub ncho ladna bega, naꞌanpa cuent dub ta lajuerska gun bega. No naꞌanpa ukwaꞌan bega med, ndi gaknotsa bega bexa lak nlad Dios.
1PE 5:3 No naꞌanpa gak bega cuent dub xa leꞌa nibeꞌe bexa wa, ndi utsin gok bega ndontsa iniꞌí bexa xteꞌe nsabndoꞌ gak bexa.
1PE 5:4 Weꞌe gor na ilen Cristo xa na nchansu beuna, leꞌa bega gal usoꞌ dub ta uzhebpa nsak, ta nunk lá idub.
1PE 5:5 No liga bego bexa ben nsabndoꞌ uxobgek bega ndoꞌ bexa nchansu bega. Iteanak bega utsin gok ndoꞌ be ltsaꞌa bega, naꞌanpa izhinna bega. Leꞌa diꞌizh ten Dios nkeaniꞌi ndab‑a: Leꞌa Dios lá ndakno bexa zhin, leꞌa xa ndi ndakno bexa bchaꞌan nak.
1PE 5:6 Byak byux bega ndoꞌ yaꞌa Dios xa ndon leꞌa juert, weꞌe uxapso Dios bega gal zha li nsabndoꞌ gun xa.
1PE 5:7 Blaꞌa bega itea be ta nyuꞌ ladna bega ndoꞌ yaꞌa Dios, leꞌa Dios nlaꞌachka bega.
1PE 5:8 List ute bega no blaꞌach bega, leꞌa maxuꞌu ndakloo ndoꞌ bega nlad utsabgix bega. Leꞌa maxuꞌu nkesea cuent dub mbiꞌizh nbezh, nkeseakwaꞌan ma ta gaw ma.
1PE 5:9 Lá ulaꞌa bega gak ta nlad maxuꞌu, ndi mas bgeꞌ ladna bega Dios. Leꞌa bego uniꞌíka leꞌa be gealkweaꞌ ntid bega wa, leꞌa idub ndoꞌ gizhliyo ndee ndencho ltsaꞌa bega nokaga lbaꞌa nchaꞌtid ndoꞌ gealkweaꞌ.
1PE 5:10 Leꞌa zha na yá utidla bega ndoꞌ ta wa dub ndeꞌep, leꞌa Dios gun gaꞌal gak bega, no gakno xa bega, no gun xa juert gak ladoꞌo bega, no mas igeꞌ ladna bega xa. Leꞌa Dios leꞌa nkweaꞌpa ladna beuna, no mti xa beuna yoo beuna wats Jesucristo gibeꞌa idub tiemp.
1PE 5:11 ¡Leꞌa Dios ndon leꞌa nsak no nibeꞌe xa idub tiemp! Lika nak‑a.
1PE 5:12 Leꞌa Silvano ngokno naꞌ mkeꞌa besa git tuzh ndee. Leꞌa naꞌ gáp leꞌa xa ndee dub xa ugeaka nak xmen Cristo. Mkeꞌa besa git ndee ndontsa utenxeꞌa naꞌ bega, no iniꞌí bega leꞌa Dios ta ugeaka nkweaꞌ ladna bega. ¡Lá yalad bega ta wa!
1PE 5:13 Leꞌa iteanak bexa nak xmen Cristo ndencho Babilonia ndee, bexa na mti Dios lak mti Dios bega, leꞌa bexa wa nidiꞌizh ndoꞌ bega. No Marc xa nak cuent xiꞌín naꞌ no nidiꞌizh ndoꞌ bega.
1PE 5:14 Unidiꞌizh bega ndoꞌ be ltsaꞌa bega sakndoꞌ naꞌ, ta na nluu leꞌa bega nkweaꞌ ladna bexa. Leꞌa Dios gun wen yoo ladna bega nak xmen Jesucristo. Lika gak‑a.
2PE 1:1 Leꞌa naꞌ ndee Simón Pedr, dub xa ndun tiꞌin ndoꞌ Jesucristo, xa mtuꞌub naꞌ gun naꞌ tiꞌin ten xa. Nkeꞌa naꞌ git ndee ndoꞌ bego na ndangea ladna Jesucristo lak ndangea ladna besa xa. Leꞌa ta wa ta msaꞌa Jesucristo, xa na leꞌa nak Dios ten beuna, xa na nsaꞌa gealnaban ndoꞌ beuna.
2PE 1:2 Naꞌab naꞌ ndoꞌ Dios mas utsin gak xa ndoꞌ bega, no gun xa mas wen yoo ladna bega, no mas igondoꞌ bega Dios no Jesús Xwan beuna.
2PE 1:3 Leꞌa iteanak be ta nkiꞌin beuna ndontsa gak beuna lak nsak ladna Dios, leꞌa juers siꞌil ten Dios nsaꞌa xa ta wa, geal nchandoꞌ beuna xa. No mti xa beuna ta na uzhebpa wen xa no juert nak xa.
2PE 1:4 Li nsaꞌa Dios uzhebpa be ta wen ndoꞌ beuna lak ndabka xa usaꞌa xa‑yá, ndontsa utsin gak bega lak nak Dios, no ulaꞌa bega be ta bzhiꞌik nde ndoꞌ gizhliyo, be ta ugap nkwaꞌan be men.
2PE 1:5 Ta weꞌe gáp naꞌ ndoꞌ bega, idub ncho ladna bega bgeꞌ ladna bega Cristo, no bin bega ta nsak ladna Dios, no mas bgondoꞌ bega xa,
2PE 1:6 no lá gun bega be ta nladtsa bega, no bxik bega ndoꞌ itea be taꞌa, no wankea bega Dios,
2PE 1:7 no utsin gok bega ndoꞌ be ltsaꞌa bega, no bkweaꞌ ladna bega be men.
2PE 1:8 Tal leꞌa bega ndunka be ta ndee no mas gunta bega ta wa, leꞌa bega mas igondoꞌ Jesucristo Xwan beuna, no wenka gun bega tiꞌin ndoꞌ Dios.
2PE 1:9 Ná leꞌa bexa na naꞌanpa ndun be ta ndee, leꞌa bexa wa cuent dub xa lá naꞌ. Leꞌa bexa wa myalad ta mtsambiꞌi Dios ladoꞌo bexa ndoꞌ be ta ugap mbin bexa.
2PE 1:10 Bega nak beuna xmen Cristo, leꞌa Dios utezh bega, no mti xa bega. Ta weꞌe bin bega itea be ta ndee wa, ndontsa naꞌanpa gailaꞌ bega ndoꞌ be ta ugap.
2PE 1:11 Leꞌa Dios ndi uxaꞌal sa yate bega, sa inibeꞌe Jesucristo Xwan beuna idub tiemp, xa na nsaꞌa gealnaban ndoꞌ beuna.
2PE 1:12 Leꞌa naꞌ ndee lá kweasyáp be ta ndee ndoꞌ bega, maska yá uniꞌíka bega‑yá, no ndangea ladna bega gealngea.
2PE 1:13 Leꞌa nat bi nban naꞌ leꞌa naꞌ nsabndoꞌ gáp be ta ndee ndoꞌ bega ndontsa lá yalad bega‑yá.
2PE 1:14 Leꞌa Jesucristo leꞌa mluu ndoꞌ naꞌ leꞌa naꞌ naꞌantapa kwen nban.
2PE 1:15 Leꞌa naꞌ gun iteatsa be taꞌa syoꞌo gan gun naꞌ, ndontsa naꞌanpa yalad bega be ta ndee gal zha gat naꞌ.
2PE 1:16 Leꞌa gor na mluꞌu besa bega xteꞌe juert nak Jesucristo Xwan beuna, no xteꞌe ilen xa stub biaj, leꞌa ta wa naꞌanpa dub ta ulogektsa besa. Leꞌa besa galka ndi uniꞌíndoꞌ xteꞌe juert nak xa.
2PE 1:17 Leꞌa Tad Dios leꞌa mluu ton nak Jesús no xteꞌe juert nak xa, zha na ulen ti Dios gibeꞌa ndab Dios: “Leꞌa ta ndee Xiꞌín naꞌ. Naꞌ nkweaꞌ ladna xa no ntenno lad naꞌ xa.”
2PE 1:18 Leꞌa besa leꞌa mbiꞌín ti Dios ta li ulen gibeꞌa wa, gor ndeno besa Jesús bet wa, dub sa umbiꞌi ndoꞌ Dios.
2PE 1:19 Ta weꞌe mas ngeꞌ ladna beuna be ta mkeꞌa be profet polta. Leꞌa bega nsabndoꞌ isakyoꞌón be diꞌizh wa, leꞌa ta wa cuent dub xeꞌa nsu len dub sa ukaw. No li bsakyoꞌón bega ta wa, gast gal gor na ilen Cristo cuent dub gor ndat xeꞌa, zha usu xa xeꞌa len ladoꞌo bega.
2PE 1:20 Parea nsabndoꞌ ned yakbeꞌena bega leꞌa ni dub diꞌizh mkeꞌa be profet wa, lá yoo gan lbaꞌatsa yakbeꞌena be men‑a.
2PE 1:21 Leꞌa iteanak be diꞌizh mbidiꞌizh bexa sakndoꞌ Dios tiemp polta wa, leꞌa ta wa naꞌanpa ta ulogektsa bexa. Leꞌa bexa ndi mbidiꞌizh ta wa laktsa mluu Espíritu ten Dios gudiꞌizh bexa.
2PE 2:1 Leꞌa polta leꞌa lat bexa Israel uyoꞌo bexa nkwiꞌin ndab leꞌa ndadiꞌizh sakndoꞌ Dios. No liga yoo be mech lat bega, bexa nlad ukwiꞌinno bega, gudiꞌizh bexa dub ta naꞌanpa ta ugea, ta utsabgix ncho bega. Leꞌa ta wa uluu leꞌa bexa naꞌanpa ta ugea ndangea ladna Cristo xa ngut sakndoꞌ beuna. Ta weꞌe gal dub wizh uxax initndoꞌ bexa.
2PE 2:2 Leꞌa kwaꞌad be men isankea tsoꞌo be ta ugap ndun bexa wa. No leꞌa ke ten ta nluu bexa, leꞌa be men iníꞌi kweaꞌ ndoꞌ gealngea ten Dios.
2PE 2:3 Leꞌa bexa wa ukwiꞌinno bega ndontsa gun bexa gan med. Leꞌa Dios polkata mbinbeꞌe utsaksi bexa li gun. Ta weꞌe leꞌa xa ta ugeakapa li gunno bexa wa.
2PE 2:4 Leꞌa Dios lá ngungeꞌ ladna ndoꞌ be angel mbin ta ugap, leꞌa xa ndi mtsaꞌab bexa wa infierno, dub sa ukaw, sa nchonyaw bexa gast gal wizh utsaksi Dios bexa.
2PE 2:5 No liga lá ngungeꞌ ladna Dios ndoꞌ be men uyoꞌo tiemp xapta, zha uyoꞌo Noé, xa na mbidiꞌizh xteꞌe nsabndoꞌ gak be men. Leꞌa Dios ndi mtuꞌub gilog siꞌil ndoꞌ gizhliyo ndontsa mnitndoꞌ nits be men ugap wa. Ná leꞌa Dios lá ulaꞌa ngat Noé ndoꞌ gilog wa nsea stub sgaꞌadga bexa.
2PE 2:6 No liga mtsaksi Dios bexa gezh Sodoma no gezh Gomorra, mtsoꞌol Dios be gezh wa gast ndon diꞌ myaꞌan‑a, ndontsa iniꞌí be men xteꞌe yasea bexa ndun ta ugap.
2PE 2:7 Naꞌ leꞌa Dios lá ulaꞌa yolꞌ Lot, leꞌa xa dub xa wen, uzheꞌeb kweaꞌ nyoꞌo ladna xa tant ta ugap nak be men sa wa.
2PE 2:8 Leꞌa Lot wa dub xa wen ngok uyoꞌo lat bexa ugap wa. Leꞌa xa uzhebpa kweaꞌ nyoꞌo ladna itea wizh gor na naꞌ xa no ndoꞌón xa ta ndun be men wa.
2PE 2:9 Leꞌa be ta ndee nluu leꞌa Dios sun gan koꞌo bexa utsin nak ndoꞌ be gealkweaꞌ. No sun Dios gan utsaksi bexa ugap, gal wizh na gab Dios ná ton ndap ke.
2PE 2:10 No mas utsaksi Dios bexa na ndun be ta bzhiꞌik nlad bexa, no lá nxobgek bexa ndoꞌ Dios. Leꞌa bexa ukwiꞌin wa uzhebpa zhin nak no ngud nak ladoꞌo bexa. No ni lá nzheb bexa xela níꞌi bexa ndoꞌ be espíritu nibeꞌe.
2PE 2:11 Leꞌa be angel ten Dios uzhebpa mas juert nak ndoꞌ bexa ukwiꞌin wa, parea ni lá gun be angel rages usake be espíritu wa ndoꞌ Dios.
2PE 2:12 Ná leꞌa be men wa xela níꞌi ndoꞌ be ta na ni lá nyakbeꞌena bexa. Naꞌanpa utsin ndanbeꞌe bexa, no ndun bexa sbeꞌen ta nladtsa bexa. Leꞌa ta na li nak bexa wa, ta weꞌe li gat bexa. Nak bexa cuent be man, bema ndal por na isen be men ma gat ma.
2PE 2:13 Leꞌa lak xela ndanno bexa be men, no liga iniꞌí bexa gealkweaꞌ. Leꞌa bexa wa ndal ladna ndun be ta ugap tezhea ndoꞌ gaꞌal be men. Leꞌa gor ndawno bexa bega, naꞌanpa ndo ladna bexa ndun bexa be ta bzhiꞌik, ndi nten ladna bexa ndun bexa ta wa.
2PE 2:14 Leꞌa bexa wa nsaꞌab ladna ndoꞌ itea be xagots niꞌí bexa. No nunk lá nzhanna bexa ndun bexa ta ugap. No nkwiꞌinno bexa be men ndidotsa ndangea ladna Dios. No nlad bexa uzhebpa ta sian gap bexa. Ná leꞌa Dios uzheꞌeb utsaksi bexa.
2PE 2:15 Mlaꞌa bexa nes ten Dios, cha usabgix bexa. Ndun bexa lak mbin profet Balaam xin Beor. Leꞌa Balaam ndal ladna ndun be ta ugap ndontsa gun xa gan med.
2PE 2:16 Ná leꞌa ngol gor leꞌa xburr xa uníꞌi ndoꞌ xa cuent dub men, uteyo ma xa. Naꞌanpa ulaꞌa ma gun Balaam ta li mbinbeꞌe xa gun xa wa, ta naꞌan xtiꞌin.
2PE 2:17 Leꞌa be mech ukwiꞌin wa xa naꞌan xtiꞌin, cuent dub so ni nits naꞌan, no cuent dub xkaw itea lad ndoꞌo mbi. Leꞌa Dios yá mbinbeꞌela leꞌa bexa wa yaꞌbe sa ndon leꞌa ukaw idub tiemp.
2PE 2:18 Chul ndadiꞌizh bexa, ná leꞌa ta ndab bexa ta naꞌan xtiꞌin. No nkiꞌil bexa be men gun bexa ta ugap lak ndun bexa, nkedino xa be men penkama mlaꞌa be ta ugap nak na.
2PE 2:19 No ndab be mech wa leꞌa be men syoꞌo gan gun itea be ta nlad na, ná leꞌa bexa wa ni leꞌa lá yoo gan ulaꞌa be ta ugap nak bexa, leꞌa be ta ugap wa nibeꞌe bexa. Leꞌa itea be taꞌa ndun gan ndoꞌ dub men, leꞌa ta wa leꞌa nibeꞌe ndoꞌ xa.
2PE 2:20 Ta ugeaka leꞌa bexa wa mgondoꞌ Jesucristo Xwan beuna, xa na leꞌa nsaꞌa gealnaban, cha utoꞌo bexa ndoꞌ be ta bzhiꞌik ncho ndoꞌ gizhliyo ndee. Ná nat leꞌa bexa myach leꞌakagal ndoꞌ be ta bzhiꞌik, leꞌa ta wa ndi leꞌa ndun gan ndoꞌ bexa. Ta weꞌe ndi mas proꞌob nak bexa ndoꞌ lak ngok bexa zha ned wa.
2PE 2:21 Ndi mas wen lá igondoꞌ bexa nes wen ten Dios, ndoꞌ li mgondoꞌ bexa‑yá cha mlaꞌa bexa ta unibeꞌe Dios gun bexa.
2PE 2:22 Leꞌa ta ndun bexa wa nak lakkata níꞌi be men: “Leꞌa mbek nyach ndaw leꞌaka ta nguꞌudna ma. No dub kuch tiꞌi ngos nyach ndatbixte ndoꞌ yalan stub biaj.”
2PE 3:1 Bego amig ten naꞌ, leꞌa ta ndee git itop nkeꞌa naꞌ ndoꞌ bega. Leꞌa ndoꞌ itop be git ntenxeꞌa naꞌ bega, ndontsa sbeꞌen be ta wen gunbeꞌe bega.
2PE 3:2 Leꞌa naꞌ nlad lá yalad bega ta mkeꞌa be profet ten Dios tiemp polta. No lá yalad bega ta mluu be apostol bega, be ta unibeꞌe Jesucristo xa nsaꞌa gealnaban, xa na leꞌa nak Xwan beuna.
2PE 3:3 Leꞌa naꞌ nlad iniꞌí bega leꞌa tiemp ilen ndee yoo be men gun laktsa nlad na. No inisi bexa bega,
2PE 3:4 gab bexa: “¿Lid ndab Jesús leꞌa xa ilen stub biaj zha? Leꞌa be usan gox polta ten beuna yá ngutla, ná leꞌa itea be taꞌa nak lakka nak‑a zha na ngokndeꞌeta gizhliyo.”
2PE 3:5 Leꞌa be men wa lá nlad igondoꞌ leꞌa tiemp xapta leꞌa Dios uníꞌi, cha li ngokndeꞌe gibeꞌa no gizhliyo. No leꞌa diꞌizh ten xa myunjunt nits, cha mluꞌu yo bid tlaw nits wa.
2PE 3:6 No leꞌaka nits wa mnitndoꞌ Dios be ta ncho ndoꞌ gizhliyo zha ulaꞌ gilog.
2PE 3:7 Parea leꞌaka diꞌizh ten Dios utsoꞌol gibeꞌa no gizhliyo ncho nat, gal wizh gab Dios ná ton ndap ke, zha na unitndoꞌ Dios be men ugap nak.
2PE 3:8 Bego amig ten naꞌ, lá yalad bega ti leꞌa cuent ten Cristo leꞌa dub wizh cuent dub mil liꞌin, no liga dub mil liꞌin cuenttsa dub wizh.
2PE 3:9 Leꞌa Cristo ilenka zha nsabndoꞌ‑yá lakka ndab xa, naꞌanpa lak ndanbeꞌe be men leꞌa xa chaꞌaw ilen. Leꞌa xa ndi nkenkeaꞌ leꞌa xa lá nlad gak perdid ni dub men. Leꞌa xa ndi nlad leꞌa itea be men ulaꞌa be ta ugap nak bexa.
2PE 3:10 Leꞌa wizh ilen Cristo, leꞌa ta wa cuent dub zha nlaꞌ dub waꞌan ta lid be men gor teꞌal, ni lá iniꞌí bexa ti ilen xa. Leꞌa gal wizh wa leꞌa gibeꞌa baꞌ initndoꞌ no uzheꞌeb dub ruid siꞌil igen. Leꞌa itea be ta ndiꞌib gibeꞌa baꞌ yolꞌbe. Cha yolꞌ gizhliyo ndee no itea be ta ncho ndoꞌ gizhliyo.
2PE 3:11 Leꞌa ta na li initndoꞌ itea be ta wa, ta weꞌe leꞌa bega nsabndoꞌ umbiꞌi gak ndoꞌ Dios, no gun bega sbeꞌen ta nsak ladna Dios.
2PE 3:12 Utenkeaꞌ bega gast gal zha ilen xa, no bin bega itea be ta na syoꞌo gan gun bega ndontsa mas uxax ilen xa. Leꞌa gal wizh wa leꞌa gibeꞌa baꞌ yolꞌ cha initndoꞌ‑yá. No be ta ndiꞌib gibeꞌa baꞌ yolꞌ no izhuꞌunbe.
2PE 3:13 Ná leꞌa beuna ndenbeas yoo dub gibeꞌa kub no dub gizhliyo kub lak ndab Dios yoo‑yá. Leꞌa sa wa sbeꞌen be ta nsak ladna Dios gun be men.
2PE 3:14 Bego amig ten naꞌ, bego na ndenbeas yoo be ta wa, uzhebpa bin bega juers wen yaꞌan bega ndoꞌ Dios, ni dub ke lá gap bega ndoꞌ Dios.
2PE 3:15 Lá yalad bega leꞌa Cristo li nkenkeaꞌ ilen ndontsa mas kwaꞌad be men gap gealnaban ndoꞌ Dios. Leꞌa Pabl xa cuent nak wit beuna no mkeꞌa ltsaꞌa be ta ndee ndoꞌ git mtuꞌub xa ndoꞌ bega, lak msaꞌa Dios nyakbeꞌena xa be ta wa.
2PE 3:16 Leꞌa sian be git nkeꞌa Pabl, leꞌa xa nkeꞌaka cuent ten be ta ndee, maska ncho ta nkeꞌa xa uzhebpa bid nyakbeꞌena beuna. Leꞌa ncho bexa ngud nak, bexa ndidotsa ngeꞌ ladna Cristo, naꞌanpa utsin nluu bexa be ta nkeꞌa Pabl wa. No liga ndanno bexa iteata be diꞌizh ten Dios, ta weꞌe leꞌa Dios utsaksi bexa.
2PE 3:17 Bego amig ten naꞌ, leꞌa nat leꞌa bega uniꞌíka be ta ndee gor na biseata yoo‑yá. Ta weꞌe uzhebpa blaꞌach bega naꞌanpa ukwiꞌinno bexa ugap wa bega, cha ulaꞌa bega ta ngeꞌ ladna bega Dios.
2PE 3:18 Ndi mas byakbeꞌena bega xteꞌe nkweaꞌ ladna Dios bega, no mas igondoꞌ bega Jesucristo Xwan beuna, xa nsaꞌa gealnaban ndoꞌ beuna. ¡Leꞌa nat no idub ndoꞌ ndee gab beuna leꞌa Dios uzhebpa dub xa juert no dub xa nsak! Lika nak‑a.
1JO 1:1 Leꞌa zha utexanta gizhliyo leꞌa Jesucristo nchola. Leꞌa besa mbiꞌín ta mbidiꞌizh xa, no uniꞌíndoꞌ besa xa, no uniꞌí besa ta mbin xa, no usen besa xa. Leꞌa xa wa leꞌa nak Diꞌizh nsaꞌa gealnaban, ta nunk lá idub.
1JO 1:2 Leꞌa xa wa ulen wats besa. Leꞌa besa uniꞌí xa no ndadiꞌizh besa cuent ten xa. Nat leꞌa besa ndadiꞌizh ndoꞌ bega leꞌa xa wa xa nsaꞌa gealnaban nunk lá idub, utoꞌo xa wats Tad Dios, cha mlundoꞌ xa ndoꞌ besa.
1JO 1:3 Leꞌa besa ndadiꞌizh ta uniꞌí besa nsea ta mbiꞌín besa, ndontsa no bega dubtsa gak beuna, lak dubtsa nak besa no Tad Dios nsea Xin xa Jesucristo.
1JO 1:4 Nkeꞌa besa be ta ndee ndoꞌ bega ndontsa mas iten ladna beuna.
1JO 1:5 Leꞌa ta ndee ta mluu Jesucristo ndoꞌ besa, no ndadiꞌizh besa‑yá ndoꞌ bega: leꞌa Dios leꞌa nak xeꞌa, leꞌa wats Dios naꞌan sa ukaw.
1JO 1:6 Tal leꞌa beuna ndab dubtsa nak beuna nsea Dios, ná cha ndesea beuna sa ukaw, leꞌa beuna ndun gealkwiꞌin, no naꞌanpa ndun beuna lak nak gealngea.
1JO 1:7 Ná tal leꞌa beuna ndesea ndoꞌ xeꞌa ten Dios lak ncho Dios ndoꞌ xeꞌa, weꞌe leꞌa beuna dubtsa nak nsea be ltsaꞌa beuna. No leꞌa ten ten Jesucristo Xin Dios ntsambiꞌi beuna ndoꞌ itea be ke ten beuna.
1JO 1:8 Tal leꞌa beuna gab leꞌa beuna naꞌanpa ndap ke, leꞌa beuna nkwiꞌinno leꞌaka leꞌa na, no lá nchandoꞌ beuna gealngea.
1JO 1:9 Ná tal leꞌa beuna igondoꞌ be ke ten na ndoꞌ Dios, leꞌa xa sungeꞌ ladna ndoꞌ beuna no utsambiꞌi xa beuna ndoꞌ itea be ta ugap. Li gun Dios leꞌa xa uzheꞌeb dub xa utsin nak, no ndun xa lakka ndab xa.
1JO 1:10 Ná tal leꞌa beuna gab leꞌa beuna lá ndap ke, leꞌa beuna ndanno Dios cuent dub xa ukwiꞌin, no naꞌanpa ta ugea ndangea ladna beuna diꞌizh ten xa.
1JO 2:1 Bega nak cuent xiꞌín naꞌ, nkeꞌa naꞌ be ta ndee ndoꞌ bega, ndontsa yá lá gunta bega be ta ugap nak. Tal leꞌa beuna mbin dub ta ugap nak, leꞌa beuna ndap dub xa isoꞌ wats beuna ndoꞌ Dios Xus beuna. Leꞌa ta wa Jesucristo xa ndon leꞌa wen.
1JO 2:2 Leꞌa xa wa msaꞌa leꞌaka leꞌa xa ngut xa, ndontsa utsuꞌu Dios be ke ten beuna, nsea be ke ten be men ncho idub ndoꞌ gizhliyo.
1JO 2:3 Tal leꞌa beuna nxobgek be ta unibeꞌe Dios, leꞌa ta wa nluu leꞌa beuna ta ugeaka nchandoꞌ xa.
1JO 2:4 Leꞌa tal ton gab leꞌa xa nchandoꞌ Dios, ná lá nxobgek xa be ta unibeꞌe Dios, leꞌa xa wa dub xa ukwiꞌin, no lá nchandoꞌ xa gealngea.
1JO 2:5 Ná leꞌa tal ton nxobgek ndoꞌ diꞌizh ten Dios, leꞌa xa wa ta ugeakapa nchankea Dios. Li iniꞌí beuna tal leꞌa beuna dubtsa nak nsea Dios natal naꞌan.
1JO 2:6 Leꞌa tal ton gab dubtsa nak nsea Dios, leꞌa xa wa nsabndoꞌ gun lak be ta mbin Jesucristo ndoꞌ gizhliyo.
1JO 2:7 Bega nak beuna xmen Cristo, leꞌa ta na li nibeꞌe naꞌ ndoꞌ bega wa naꞌanpa dub ta gol goꞌón bega. Leꞌa‑yá ndi dub ta nchandoꞌ bega gast zha ned mbingea ladna bega Cristo, leꞌa‑yá diꞌizh ten Dios mbiꞌín bega zha wa.
1JO 2:8 Parea leꞌa naꞌ nkeꞌa dub ta kub nibeꞌe naꞌ ndoꞌ bega, dub ta nchandoꞌ bega lakka nchandoꞌ Cristo‑yá. Leꞌa tiemp ten ta ukaw nsatid, leꞌa xa na ta ugeaka leꞌa nak xeꞌa ten Dios nsula.
1JO 2:9 Leꞌa tal ton gab leꞌa xa ncho ndoꞌ xeꞌa ten Dios, ná cha nxee ladna xa ndoꞌ ltsaꞌa xa, leꞌa xa wa bi nkesea sa ukaw.
1JO 2:10 Leꞌa tal ton ikweaꞌ ladna be ltsaꞌa na, leꞌa xa wa nchoka ndoꞌ xeꞌa ten Dios, no naꞌan xtaꞌan gun gan gailaꞌ xa ndoꞌ ta ugap.
1JO 2:11 Ná leꞌa tal ton ixee ladna ndoꞌ ltsaꞌa na, leꞌa xa wa nkesea sa ukaw, ni lá iniꞌí xa pa nchaꞌa xa, leꞌa ta ukaw wa leꞌa mbin gan lá inaꞌta xa.
1JO 2:12 Bego nak cuent xiꞌín naꞌ, nkeꞌa naꞌ git ndee ndoꞌ bega, geal leꞌa Jesucristo mtsuꞌula be ke ten bega.
1JO 2:13 Bego bexa gox, nkeꞌa naꞌ ta ndee ndoꞌ bega leꞌa bega nchandoꞌ Cristo, xa na ncho zha utexanta gizhliyo. Bego bexa ben, nkeꞌa naꞌ ta ndee ndoꞌ bega leꞌa bega mbin gan ndoꞌ maxuꞌu. No ndoꞌ bego na tiꞌi mbingea ladna Cristo, nkeꞌa naꞌ ta ndee leꞌa bego nchandoꞌ Dios Xus beuna.
1JO 2:14 Leꞌa ndoꞌ bego bexa gox, nkeꞌa naꞌ ta ndee leꞌa bego nchandoꞌ Cristo, xa ncho zha utexanta gizhliyo. No ndoꞌ bego xa ben, nkeꞌa naꞌ ta ndee leꞌa bego juert nak, no ncho diꞌizh ten Dios len ladoꞌo bega, no mbin bega gan ndoꞌ maxuꞌu.
1JO 2:15 Lá yankea bega gizhliyo ndee, ni be taꞌa ncho ndoꞌ gizhliyo. Tal ton ndankea gizhliyo, leꞌa xa wa naꞌanpa ndankea Tad Dios.
1JO 2:16 Leꞌa itea be ta ugap ncho ndoꞌ gizhliyo ndee naꞌanpa ta nsaꞌa Dios. Leꞌa bexa gizhliyo nkwaꞌan be ta ugap ndanbeꞌe bexa, no nsaꞌab ladna bexa be ta naꞌ bexa, nsea nzhinnona bexa be ta ndap bexa. Leꞌa be ta li ndun bexa wa naꞌanpa ta nsaꞌa Tad Dios, leꞌa ta wa ndi ta gizhliyotsa.
1JO 2:17 Leꞌa gizhliyo ndee initndoꞌ nsea itea be ta ugap nlad bexa; ná leꞌa tal ton gun lak nlad Dios, leꞌa xa wa iban idub tiemp.
1JO 2:18 Bega nak cuent xiꞌín naꞌ, leꞌa tiemp ndee be wizh lult. Leꞌa lak ndoꞌón bega leꞌa gal dub wizh ilen dub xa gak anticristo, xa na uka gun be men ta nlad Cristo. Ná leꞌa nat ncho kwaꞌad bexa li nak. Ta weꞌe uniꞌí beuna leꞌa tiemp ndee be wizh lult.
1JO 2:19 Leꞌa bexa wa utoꞌo lat beuna, parea naꞌanpa ta ugea nak bexa ltsaꞌa beuna. Tal leꞌa bexa nak ltsaꞌa beuna, nal no bexa ndi ncho lat beuna. Ná leꞌa ta na utoꞌo bexa wa nluu leꞌa xa naꞌanpa nak ltsaꞌa beuna nak xmen Cristo.
1JO 2:20 Leꞌa Cristo msaꞌa Espíritu ten Dios ndoꞌ bega, no nchandoꞌ bega gealngea.
1JO 2:21 Nkeꞌa naꞌ ta ndee ndoꞌ bega, leꞌa naꞌ uní leꞌa bega nchandoꞌka gealngea, no uniꞌíka beuna leꞌa ni dub gealkwiꞌin lá ilen lat gealngea.
1JO 2:22 ¿Ton bexa na ndun gealkwiꞌin? Leꞌa ta wa xa na ndab leꞌa Jesús naꞌanpa leꞌa nak Cristo. Leꞌa xa li ndab wa xa nka gun be men ta nlad Cristo, leꞌa xa nxelad Dios Xus beuna no Xin Dios.
1JO 2:23 Leꞌa tal ton gab leꞌa Jesús naꞌanpa nak Xin Dios, leꞌa xa wa lá nchandoꞌ Dios Xus beuna. Ná leꞌa tal ton gab leꞌa Jesús Xinka Dios, leꞌa xa wa nchandoꞌka Dios Xus beuna.
1JO 2:24 Ta weꞌe lá ulaꞌa bega ta mbiꞌín bega zha ned mbingea ladna bega Cristo. Tal leꞌa bega ndunka be ta mbiꞌín bega zha ned wa, leꞌa bega dubtsa nak no Xin Dios no Dios Xus beuna.
1JO 2:25 Leꞌa Cristo ndab leꞌa usaꞌa dub gealnaban kub ndoꞌ beuna, ta nunk lá idub.
1JO 2:26 Nkeꞌa naꞌ be ta ndee ndoꞌ bega, ndontsa gap bega cuent ndoꞌ bexa nlad ukwiꞌinno bega.
1JO 2:27 Leꞌa bego noꞌo Espíritu ten Dios ta na msaꞌa Cristo ndoꞌ bega. Ta weꞌe naꞌanpa nkiꞌin bega ni dub men uluu bega, leꞌa Espíritu wa leꞌa nluu xteꞌe nak itea be taꞌa. Leꞌa ta nluu Espíritu wa ta ugeaka naꞌanpa gealkwiꞌin‑a. Ta weꞌe dubtsa gok bega no Cristo, lak mluu Espíritu ten Dios bega.
1JO 2:28 Bega nak cuent xiꞌín naꞌ, nat naꞌanpa ulaꞌa beuna Cristo, ndontsa naꞌanpa izheb beuna zha ulundoꞌ xa, no naꞌanpa ido ladna beuna ndoꞌ xa zha ilen xa.
1JO 2:29 Leꞌa bega uniꞌíka leꞌa Jesucristo sbeꞌen ta wen ndun, ta weꞌe nsabndoꞌ iniꞌí bega leꞌa itea bexa na ndun ta wen wa xinka Dios.
1JO 3:1 Binbeꞌe bego xteꞌe uzheꞌeb nkweaꞌ ladna Tad Dios beuna, ndab xa leꞌa beuna nak xin xa. Leꞌa be men gizhliyo lá nchandoꞌ xa, ta weꞌe lá iniꞌí bexa leꞌa beuna xin Dios.
1JO 3:2 Bego amig ten naꞌ, nat leꞌa beuna nak xin Dios, parea biseata iniꞌí beuna xteꞌe gak beuna. Leꞌa gal zha na ilen Cristo leꞌa beuna yak lak nak xa, geal leꞌa beuna iniꞌí xteꞌe mer nak xa.
1JO 3:3 Tal ton ndangea ladna li yoo ta wa, leꞌa xa wa ntsambiꞌi leꞌaka leꞌa xa ndoꞌ ta ugap, lak umbiꞌi nak Cristo.
1JO 3:4 Leꞌa itea bexa na ndun be ta ugap, leꞌa bexa wa ndap ke ndoꞌ Dios, leꞌa Dios nibeꞌe naꞌanpa gun bexa be ta ugap wa.
1JO 3:5 Ná leꞌa bego yá uniꞌíka leꞌa Jesucristo mbiꞌid ndoꞌ gizhliyo ndontsa yuꞌu be ke ten beuna, leꞌa xa wa ni dub ke lá ndap.
1JO 3:6 Leꞌa iteanak bexa na dubtsa nak no Cristo naꞌanpa ndunta be ta ugap. Ná leꞌa itea bexa na ndunta be ta ugap, leꞌa bexa wa lá iniꞌí ton nak Cristo, no ni lá nchandoꞌ bexa xa.
1JO 3:7 Bega nak cuent xiꞌín naꞌ, lá ulaꞌa bega ukwiꞌinno be men bega: leꞌa tal ton ndun be ta wen, leꞌa xa wa xa wenka lak wen nak Cristo.
1JO 3:8 Ná leꞌa tal ton ndunta be ta ugap, leꞌa xa wa xmen maxuꞌu, leꞌa maxuꞌu li ndun be ta ugap zha utexanta gizhliyo. Ta weꞌe ulen Xin Dios mbizhaꞌa xa be tiꞌin ten maxuꞌu.
1JO 3:9 Leꞌa bexa nak xin Dios, leꞌa xa wa yá lá ndunta be ta ugap, geal leꞌa xa ndap gealnaban kub msaꞌa Dios len ladoꞌo xa. Lá yoota gan gun bexa be ta ugap, leꞌa bexa myak dub xin Dios.
1JO 3:10 Leꞌa ta ndee nluu ton nak xin Dios no ton nak xin maxuꞌu: leꞌa itea bexa na lá ndun be ta wen no lá nkweaꞌ ladna xa be ltsaꞌa xa, leꞌa xa wa naꞌanpa xin Dios.
1JO 3:11 Leꞌa diꞌizh ndee ta mbiꞌín bega zha nedta: ikweaꞌ ladna beuna be ltsaꞌa beuna.
1JO 3:12 Lá gak beuna lak ngok Caín xin maxuꞌu, xa mbit wit na. ¿Xtaꞌan li mbin xa zha? Li mbin Caín geal ugap nak ta mbin xa, ná leꞌa wit xa wa utsin nak ta mbin na.
1JO 3:13 Bego nak beuna xmen Cristo, lá yanseana bega tal leꞌa be men ncho ndoꞌ gizhliyo ndee nxeeno ladna bega.
1JO 3:14 Leꞌa ta na nkweaꞌ ladna beuna be ltsaꞌa nak beuna xmen Cristo, ta weꞌe nluu leꞌa beuna nban ndoꞌ gealgut. Ná leꞌa tal ton lá ikweaꞌ ladna be ltsaꞌa na, leꞌa xa wa bi ncho ndoꞌ gealgut.
1JO 3:15 Leꞌa tal ton ixee ladna ndoꞌ ltsaꞌa na, leꞌa xa wa cuent nak dub xa ndut men. No uniꞌí bego leꞌa ni dub xa ndut men lá yoo gan gap gealnaban ndoꞌ Dios ta nunk lá idub.
1JO 3:16 Leꞌa beuna yá nchandoꞌ xteꞌe nsabndoꞌ ikweaꞌ ladna beuna be ltsaꞌa beuna: leꞌa Jesucristo msaꞌa gealnaban ten na sakndoꞌ beuna. Ta weꞌe liga nsabndoꞌ usaꞌa beuna gealnaban ten beuna sakndoꞌ be ltsaꞌa nak beuna xmen Cristo.
1JO 3:17 Leꞌa tal ton ndap taꞌa ndoꞌ gizhliyo ndee, cha naꞌ xa leꞌa dub ltsaꞌa xa uban nak, ná lá gakno xa xa, leꞌa xa wa naꞌanpa nkweaꞌ ladna ltsaꞌa na wa lak nlad Dios gun xa.
1JO 3:18 Leꞌa bego nak cuent xiꞌín naꞌ, lá yoo gan ikweaꞌ ladna beuna be ltsaꞌa beuna sbeꞌen diꞌizhtsa. Ndi gakno beuna be ltsaꞌa beuna, ta na nluu leꞌa beuna nkweaꞌka ladna bexa.
1JO 3:19 Tal leꞌa beuna li ndun, leꞌa beuna uniꞌí leꞌa beuna ndun lak nak gealngea ten Dios, no uniꞌí beuna leꞌa beuna gaꞌal nak ndoꞌ Dios.
1JO 3:20 Tal leꞌa beuna nsak leꞌa beuna naꞌanpa gaꞌal nak ndoꞌ Dios, ná leꞌa Dios leꞌa uniꞌí xteꞌe nak beuna, leꞌa xa nchandoꞌ itea be taꞌa.
1JO 3:21 Bego amig ten naꞌ, tal leꞌa beuna uniꞌí len ladoꞌo beuna leꞌa beuna gaꞌal nak ndoꞌ Dios, leꞌa beuna naꞌanpa izheb ibii wats Dios.
1JO 3:22 Leꞌa Dios usaꞌa guniꞌi xtaꞌan inab beuna, tal leꞌa beuna nxobgek ta nibeꞌe Dios, no ndun beuna be ta nsak ladna xa.
1JO 3:23 Leꞌa ta ndee ta nibeꞌe Dios wa: gungea ladna beuna Jesucristo Xin xa, nsea ikweaꞌ ladna beuna be ltsaꞌa beuna lak ndab xa.
1JO 3:24 Leꞌa tal ton uxobgek ndoꞌ be ta nibeꞌe Dios, leꞌa xa wa dubtsa nak nsea Dios, leꞌa Dios ncho len ladoꞌo xa. Leꞌa bega uniꞌí leꞌa beuna dubtsa nak nsea Dios, ta na msaꞌa xa Espíritu ten xa ndoꞌ beuna.
1JO 4:1 Bego amig ten naꞌ, lá gungea ladna bega iteanak be ta nluu be men, ndi blaꞌach bega naga noꞌo bexa Espíritu ten Dios nate naꞌan, leꞌa ncho kwaꞌad bexa nkwiꞌin ndab leꞌa ndadiꞌizh sakndoꞌ Dios.
1JO 4:2 Lndeꞌe iniꞌí bega ná ton noꞌo Espíritu ten Dios: leꞌa itea bexa na gab leꞌa Jesucristo mbiꞌid ndoꞌ gizhliyo lak nak dub men, leꞌa xa wa noꞌo Espíritu ten Dios.
1JO 4:3 Ná leꞌa itea bexa na gab leꞌa Jesucristo naꞌanpa ngiꞌid lak nak dub men, leꞌa xa wa naꞌanpa noꞌo Espíritu ten Dios, ndi nak xa xmen anticristo. Leꞌa bega yá ndoꞌón leꞌa xa wa ilen, leꞌa juers ten xa wa yá ncho ndoꞌ gizhliyo.
1JO 4:4 Bega nak cuent xiꞌín naꞌ, leꞌa bega yá nak xmen Dios, no mbin bega gan ndoꞌ bexa ukwiꞌin wa, leꞌa Espíritu ten Dios ncho len ladoꞌo bega mas juert ndoꞌ espíritu ncho ndoꞌ gizhliyo ndee.
1JO 4:5 Leꞌa bexa wa xa gizhliyo, ta weꞌe ndadiꞌizh bexa be ta gizhliyo. Leꞌa be men gizhliyo cha nlaꞌachka ta ndab xa.
1JO 4:6 Parea leꞌa beuna xmen Dios. Leꞌa tal ton nchandoꞌ Dios, leꞌa xa wa nsakyoꞌón ta ndab beuna. Ná leꞌa tal ton naꞌanpa nchandoꞌ Dios, leꞌa xa wa lá isakyoꞌón ta ndab beuna. Li igondoꞌ beuna ná ton noꞌo Espíritu ndadiꞌizh gealngea, no ton noꞌo espíritu ukwiꞌin.
1JO 4:7 Bego amig ten naꞌ, nsabndoꞌ ikweaꞌ ladna beuna be ltsaꞌa beuna, leꞌa ta wa dub ta nsaꞌa Dios gun beuna. Leꞌa tal ton ikweaꞌ ladna ltsaꞌa na, leꞌa xa wa xin Dios no nchandoꞌ xa Dios.
1JO 4:8 Leꞌa tal ton lá ikweaꞌ ladna be ltsaꞌa na, leꞌa xa wa lá nchandoꞌ Dios, leꞌa Dios sbeꞌen nkweaꞌ ladna be men.
1JO 4:9 Lndeꞌe mluu Dios leꞌa xa nkweaꞌka ladna beuna: leꞌa xa mtuꞌub dubkama Xin xa ndoꞌ gizhliyo, ndontsa gap beuna gealnaban ta nunk lá idub.
1JO 4:10 Leꞌa Dios uzhebpa nkweaꞌ ladna be men, naꞌanpa lak nak ta ndankea beuna xa, ndi tant nkweaꞌ ladna xa beuna msaꞌa xa Xin xa ngut xa, ndontsa utsuꞌu xa be ke ten beuna.
1JO 4:11 Bego nak amig ten naꞌ, leꞌa ta na li nkweaꞌ ladna Dios beuna, leꞌa beuna no nsabndoꞌ ikweaꞌ ladna be ltsaꞌa na.
1JO 4:12 Naꞌan ton gol niꞌí Dios. Ná tal leꞌa beuna nkweaꞌ ladna be ltsaꞌa na, leꞌa Dios ncho len ladoꞌo beuna, no liga nkweaꞌ ladna beuna bexa lak nkweaꞌ ladna Dios beuna.
1JO 4:13 Lndeꞌe iniꞌí beuna leꞌa beuna dubtsa nak nsea Dios, no ncho Dios len ladoꞌo beuna: leꞌa xa msaꞌa Espíritu ten na ndoꞌ beuna.
1JO 4:14 Leꞌa beuna leꞌa uniꞌí no ndadiꞌizh beuna leꞌa Tad Dios mtuꞌub Xin na, utix xa be ke ten be men ncho ndoꞌ gizhliyo ndee.
1JO 4:15 Leꞌa tal ton gab leꞌa Jesús leꞌa nak Xin Dios, leꞌa xa wa ncho Dios len ladoꞌo na, no dubtsa nak xa nsea Dios.
1JO 4:16 Leꞌa beuna mgondoꞌ no ndangea ladna beuna leꞌa Dios nkweaꞌ ladna beuna. Leꞌa Dios sbeꞌen nkweaꞌ ladna be men. Ta weꞌe leꞌa bexa na nkweaꞌ ladna be ltsaꞌa na, leꞌa bexa wa dubtsa nak nsea Dios, no ncho Espíritu ten Dios len ladoꞌo xa.
1JO 4:17 Leꞌa ta na li nkweaꞌ ladna beuna be ltsaꞌa beuna wa, leꞌa gal wizh gab Dios ná ton ndap ke, leꞌa beuna naꞌanpa izheb, leꞌa ndoꞌ gizhliyo ndee leꞌa beuna nak lak nak Jesucristo.
1JO 4:18 Leꞌa Dios nkweaꞌka ladna beuna, ta weꞌe lá nzheb beuna ndoꞌ xa. Leꞌa tal ton igondoꞌ leꞌa Dios nkweaꞌ ladna xa, leꞌa xa wa naꞌanpa nzheb ndoꞌ Dios. Leꞌa bexa na nzheb ndoꞌ xa wa, leꞌa bexa wa uniꞌí leꞌa Dios utsaksi bexa. Ta weꞌe tal ton nzheb ndoꞌ Dios, leꞌa xa wa biseata igondoꞌ ta na nkweaꞌ ladna Dios xa.
1JO 4:19 Leꞌa beuna ndankea Dios, geal leꞌa Dios ned mkweaꞌ ladna beuna.
1JO 4:20 Tal ton gab leꞌa ndankea Dios, ná nxee ladna xa ndoꞌ be ltsaꞌa xa, leꞌa xa wa ndun gealkwiꞌin. Ná leꞌa bexa na lá nkweaꞌ ladna be ltsaꞌa na, bexa na naꞌ xa wa, ¿xteꞌema yoo gan yankea bexa Dios, dub xa lá naꞌ bexa zha?
1JO 4:21 Leꞌa Jesucristo unibeꞌe ta ndee ndoꞌ beuna: tal leꞌa beuna ndankea Dios, leꞌa beuna no nsabndoꞌ ikweaꞌ ladna be ltsaꞌa na.
1JO 5:1 Leꞌa tal ton ndangea ladna leꞌa Jesús leꞌa nak Cristo, leꞌa xa wa myak xin Dios. Leꞌa tal ton ndankea Dios Xus beuna, leꞌa xa wa no nkweaꞌ ladna bexa nak xin Dios.
1JO 5:2 Tal leꞌa beuna ndankea Dios no ndun beuna lak ndab Dios, weꞌe uniꞌí beuna leꞌa beuna nkweaꞌ ladna be xin Dios.
1JO 5:3 Tal leꞌa beuna ndankeaka Dios, leꞌa beuna nxobgek ndoꞌ ta nibeꞌe xa, leꞌa ta nibeꞌe xa wa naꞌanpa dub ta bid.
1JO 5:4 Leꞌa itea bexa nak xin Dios ndun gan ndoꞌ be ta gizhliyo. Leꞌa ta na ngeꞌ ladna beuna Cristo, ta weꞌe ndun beuna gan ndoꞌ gizhliyo.
1JO 5:5 ¿Tonma ndun gan ndoꞌ be ta gizhliyo zha? Leꞌa ta wa bexa na ndangea ladna leꞌa Jesús nak Xin Dios.
1JO 5:6 Leꞌa zha na mbiꞌid Jesucristo, leꞌa xa utaleaꞌ no ngut xa, mtsiꞌi xa ten ten xa. Naꞌanpa nabtsa utaleaꞌ xa, leꞌa xa no ngut mtsiꞌi xa ten. Leꞌa Espíritu ten Dios nluu leꞌa Cristo Xinka Dios, leꞌa Espíritu wa sbeꞌen gealngea ndadiꞌizh.
1JO 5:7 Leꞌa chon bexa ncho gibeꞌa nluu leꞌa Jesús nak Xin Dios: leꞌa ta wa Tad Dios, no Xin Dios xa nak Diꞌizh, no Espíritu ten Dios. Leꞌa yon bexa ndee dubtsa ndab.
1JO 5:8 Nsea ncho chon taꞌa ndoꞌ gizhliyo nsaꞌa cuent leꞌa Jesús nak Xin Dios: leꞌa ta wa ta ndab Espíritu ten Dios, no ta na utaleaꞌ Jesús len nits, no ten ten Jesucristo mtsiꞌi xa ndoꞌ cruz. Leꞌa yon ta ndee wa dubtsa ndab.
1JO 5:9 Leꞌa beuna ndangea ladna be ta ndadiꞌizh be men, parea leꞌa ta ndab Dios wa mas ta nsak, ta ndadiꞌizh xa cuent ten Xin xa.
1JO 5:10 Leꞌa tal ton igeꞌ ladna Xin Dios, leꞌa xa wa uniꞌí len ladoꞌo na leꞌa ta ndab Dios wa ta ugeaka. Ná leꞌa tal ton lá gungea ladna ta ndab Dios, leꞌa xa wa ndanno Dios cuent dub xa ukwiꞌin, leꞌa xa lá ngungea ladna ta mbidiꞌizh Dios lak nak Xin Dios.
1JO 5:11 Leꞌa ta ndee ta mbidiꞌizh Dios: leꞌa Dios nsaꞌa dub gealnaban nunk lá idub tal leꞌa beuna ngeꞌ ladna Xin Dios.
1JO 5:12 Leꞌa tal ton igeꞌ ladna Xin Dios, leꞌa xa wa ndap gealnaban wa. Ná leꞌa tal ton lá igeꞌ ladna xa, leꞌa xa naꞌanpa ndap gealnaban wa.
1JO 5:13 Leꞌa be ta ndee nkeꞌa naꞌ ndoꞌ bego na ngeꞌ ladna Xin Dios, ndontsa iniꞌí bega leꞌa bega ndap gealnaban nunk lá idub, no mas igeꞌ ladna bego Xin Dios.
1JO 5:14 Leꞌa beuna uniꞌíka tal leꞌa beuna inab dub taꞌa ndoꞌ Dios lak nlad Dios, leꞌa xa soꞌónka‑yá.
1JO 5:15 Lak uniꞌí beuna leꞌa Dios ndoꞌón ta nab beuna, no liga uniꞌí beuna leꞌa xa usaꞌaka ta wa.
1JO 5:16 Tal leꞌa dub bega naꞌ leꞌa dub ltsaꞌa bega ndun dub ta ugap nak, dub ta sungeꞌ ladna Dios, weꞌe unab bega ndoꞌ Dios gungeꞌ ladna ndoꞌ xa wa. Leꞌa Dios li gun tal ta mbin xa wa naꞌanpa dub ta uzhebpa ugap nak. Leꞌa ncho be ta ugap ndun be men yá lá gungeꞌta ladna Dios. Leꞌa bexa li ndun ke wa naꞌanpa gáp naꞌ inab bega ndoꞌ Dios gungeꞌ ladna ndoꞌ xa wa.
1JO 5:17 Itea be ta ugap ndun be men, leꞌa ta wa dub ke ndoꞌ Dios. Parea leꞌa ncho be ke wa leꞌa Dios sungeꞌka ladna.
1JO 5:18 No uniꞌí beuna leꞌa bexa nakla xin Dios yá naꞌantapa nsankea tsoꞌo be ta ugap. Leꞌa Xin Dios nlaꞌach bexa wa, ndontsa naꞌan xtaꞌan gunno maxuꞌu bexa.
1JO 5:19 No uniꞌí beuna leꞌa beuna nak xin Dios, maska idub gizhliyo ncho ndoꞌ yaꞌa maxuꞌu.
1JO 5:20 No uniꞌí beuna leꞌa Xin Dios mbiꞌid, no msaꞌa xa ta nyakbeꞌena beuna, ndontsa igondoꞌ beuna xa na ta ugeaka leꞌa nak Dios. Leꞌa ta wa Jesucristo Xin Dios, xa na dubtsa nak no beuna. Leꞌa xa wa ta ugeaka leꞌa nak Dios, xa nsaꞌa gealnaban nunk lá idub.
1JO 5:21 Bego nak cuent xiꞌín naꞌ, lá yankea bega be ta naꞌanpa leꞌa nak Dios. Lika nak‑a.
2JO 1:1 Leꞌa naꞌ ndee xa gox nkeꞌa git ndee ndoꞌ lu, dub xagots mti Dios, no ndoꞌ bexa nak xin la. Leꞌa naꞌ ta ugeaka nkweaꞌ ladna itea bego. No iteanak bexa na nchandoꞌ gealngea ten Dios nkweaꞌ ladna bega.
2JO 1:2 Leꞌa naꞌ li nkweaꞌ ladna bega, geal leꞌa beuna nchandoꞌ gealngea ten Dios, no idub tiemp nchandoꞌka beuna‑yá.
2JO 1:3 Leꞌa naꞌ naꞌab ndoꞌ Tad Dios no ndoꞌ Jesucristo Xin Dios Xa Nibeꞌe, mas utsin gak bexa ndoꞌ bega, no mas ikweaꞌ ladna bexa bega, no gun bexa wen yoo ladna bega. No mas igeꞌ ladna bega gealngea ten Dios, no mas ikweaꞌ ladna bega be ltsaꞌa bega.
2JO 1:4 Uzhebpa mten lad naꞌ gor na mbín naꞌ leꞌa ncho be xin lu ndunka lak ndab gealngea ten Dios, lak unibeꞌe Dios Xus beuna gun beuna.
2JO 1:5 Nat ndáp naꞌ ndoꞌ bego, ikweaꞌ ladna beuna be ltsaꞌa beuna. Leꞌa ta ndee naꞌanpa dub ta tilaw ndoꞌón beuna, leꞌa‑yá dub ta polkata uniꞌí beuna.
2JO 1:6 Leꞌa tal beuna nkweaꞌ ladna be ltsaꞌa beuna, leꞌa ta wa gab leꞌa beuna nxobgek ndoꞌ Dios. Leꞌa ta wa lakka mbiꞌín bega polta unibeꞌe Dios: ikweaꞌ ladna beuna be ltsaꞌa beuna.
2JO 1:7 Uzhebpa ncho be men ndun gealkwiꞌin ndoꞌ gizhliyo, ndab bexa leꞌa Jesucristo naꞌanpa ngiꞌid ndoꞌ gizhliyo cuent dub men. Leꞌa bexa na li ndadiꞌizh wa xa ukwiꞌin, no nka bexa ta nlad Cristo.
2JO 1:8 Blaꞌach bega lá gak perdid be tiꞌin na li mbin besa lat bega wa, ndi ikaꞌa bega itea be ta nlad Dios usaꞌa Dios ndoꞌ bega.
2JO 1:9 Leꞌa tal ton itoꞌo len ta ndab diꞌizh ten Jesucristo, cha gungea ladna xa stub ta xaꞌaga, leꞌa xa wa naꞌanpa xmen Dios. Ná leꞌa tal ton ndangea ladna lak mluu Jesucristo, leꞌa xa wa xmenka Dios Xus beuna no xmenka Xin Dios.
2JO 1:10 Tal leꞌa ncho bexa ilayaꞌ lat bega, cha uluu xa dub ta xaꞌaga nak, lá ulaꞌa bega yoo xa wa len lid bega, no ni lá inidiꞌizh bega ndoꞌ bexa wa.
2JO 1:11 Tal leꞌa ncho bega inidiꞌizh ndoꞌ bexa wa, leꞌa bega no ndunno bexa ta ugap wa.
2JO 1:12 Ncho sianta be taꞌa nlad naꞌ gáp naꞌ ndoꞌ bega, parea lá nlad naꞌ ukeꞌa naꞌ‑yá ndoꞌ git. Leꞌa naꞌ ndi nlad gal inaꞌ bega no gudiꞌizhno naꞌ bega, ndontsa mas uzheꞌeb iten ladna beuna.
2JO 1:13 Leꞌa be xin beal lu stub xagots mti Dios wa no nidiꞌizh ndoꞌ lu. Lika nak‑a.
3JO 1:1 Leꞌa naꞌ ndee xa gox ntuꞌub git ndee ndoꞌ lu Gayo, leꞌa naꞌ ta ugeaka nkweaꞌ ladna lu.
3JO 1:2 Amig ten naꞌ, naꞌab naꞌ ndoꞌ Dios wen itoꞌo itea taꞌa gun lu, no wen yoo lu, lak wen nak ladoꞌo lu ndoꞌ Dios.
3JO 1:3 Leꞌa gor na mlaꞌnchaꞌ pla be xmen Jesús sa ndee, mbidiꞌizh bexa ndoꞌ naꞌ xteꞌeta gaꞌal nsoꞌ lu ndoꞌ gealngea ten Dios. Cha uzhebpa mten lad naꞌ gor na mbín naꞌ ta wa.
3JO 1:4 Naꞌan stub ta mas nten lad naꞌ ndoꞌ gor na ndón naꞌ leꞌa bexa nak cuent xiꞌín naꞌ gaꞌal nde ndoꞌ gealngea ten Dios.
3JO 1:5 Amig ten naꞌ, uzhebpa wen ndun lu gor na ndakno lu be xmen Jesús, maska lá nchandoꞌ lu bexa.
3JO 1:6 Leꞌa bexa wa mbidiꞌizh ndoꞌ be xmen Jesús xteꞌe nkweaꞌ ladna lu bexa. Nat bin ta nsak ladna Dios, gakno lu bexa be ta nkiꞌin bexa nes yaꞌbe bexa.
3JO 1:7 Leꞌa bexa wa utoꞌo ndun bexa tiꞌin ten Jesús, ni lá inab bexa ta nkiꞌin bexa ndoꞌ bexa lá nchandoꞌ Dios.
3JO 1:8 Ta weꞌe leꞌa beuna nsabndoꞌ usaꞌa be ta nkiꞌin bexa, ndontsa li gakno beuna gudiꞌizh bexa gealngea ten Dios.
3JO 1:9 Leꞌa naꞌ mtuꞌubla dub git ndoꞌ be xmen Jesús nyakjunt sa baꞌ, ná leꞌa Diótrefes lá nlaꞌach ta nibeꞌe besa, ndi leꞌa xa nlad inibeꞌe.
3JO 1:10 Ta weꞌe leꞌa zha na gal naꞌ lat bega, leꞌa naꞌ gáp ndoꞌ xa wa itea ta ugap ndun xa, leꞌa xa uzhebpa nisi besa. Naꞌanpa nabtsa ta ndee wa ndun xa, no ni lá nsaꞌa xa ta lid xa yoo be xmen Jesús, no ni lá nlaꞌa xa tal leꞌa ncho bego nlad usaꞌa ta lid na yoo bexa wa. No ngontuꞌub xa bego na li utsin ndun wa sa nzhealbe bega.
3JO 1:11 Amig ten naꞌ, lá gun lu lak ndun bexa ugap, ndi bin lak ndun bexa wen. Leꞌa tal ton gun be ta wen, leꞌa xa wa xmenka Dios. Ná leꞌa tal ton gun be ta ugap, leꞌa xa wa lá nchandoꞌ Dios.
3JO 1:12 Leꞌa itea men ndab leꞌa Demetrio dub xa wen nak ndoꞌ Dios, ndun xa ta wen lak ndab gealngea ten Jesús. Leꞌa besa ndee no ndab leꞌa xa wa xa utsinka nak. No uniꞌí bega leꞌa besa sbeꞌen gealngeaka ndadiꞌizh.
3JO 1:13 Ncho sianta be taꞌa nlad naꞌ gáp naꞌ ndoꞌ lu, parea leꞌa naꞌ lá nlad ukeꞌa‑yá ndoꞌ git.
3JO 1:14 Leꞌa naꞌ ndi nlad iniꞌí xan lu, weꞌe gudiꞌizh wa.
3JO 1:15 Leꞌa naꞌ naꞌab ndoꞌ Dios gun wen yoo ladna lu. Leꞌa be amig ten lu ndencho sa ndee nidiꞌizh ndoꞌ lu. Unidiꞌizh sakndoꞌ besa ndoꞌ kadga dub be amig ten beuna ndencho sa baꞌ.
JUD 1:1 Leꞌa naꞌ ndee Judas wit Jacob, ndun naꞌ tiꞌin ndoꞌ Jesucristo. Nkeꞌa naꞌ git ndee ndoꞌ bego nak xmen Dios. Leꞌa Tad Dios leꞌa mti bega li gak bega xmen xa, no nlaꞌach Jesucristo bega.
JUD 1:2 Naꞌab naꞌ ndoꞌ Dios leꞌa xa mas gunkweaꞌ ladna bega, no mas wen yoo ladna bega, no mas ikea ladna Dios bega.
JUD 1:3 Bego amig ten naꞌ, leꞌa naꞌ uzhebpa nlad ukeꞌa dub git ndoꞌ bega, cuent ten ta na ngoꞌo Dios beuna ndoꞌ be ke ten beuna. Nsak naꞌ leꞌa naꞌ nsabndoꞌ ukeꞌa ta ndee ndoꞌ bega, ndontsa naꞌanpa ulaꞌa bega ucheꞌa be men diꞌizh ten Dios. Leꞌa diꞌizh wa ta ndangea ladna beuna, ta na msaꞌa Dios dubtsa biaj ndoꞌ beuna nak xmen xa.
JUD 1:4 Li ndáp naꞌ geal leꞌa lat bega baꞌ uyote pla bexa ndab leꞌa nak xmen Dios, ná leꞌa bexa naꞌanpa ta ugea nak ta wa. Leꞌa bexa wa nkwiꞌin ndab geal ta na nkweaꞌ ladna Dios bexa wa, ta weꞌe syoꞌo gan gun bexa guniꞌi xtaꞌan nlad bexa. No ndab bexa leꞌa Dios naꞌanpa dubkama nibeꞌe beuna, no naꞌanpa nak Jesucristo Xwan beuna. Parea polkata nkeaniꞌi diꞌizh ten Dios leꞌa Dios utsaksika bexa na li ugap ndadiꞌizh wa.
JUD 1:5 Leꞌa naꞌ nlad utseꞌa ladna bega stub biaj xteꞌe uloꞌo Dios bexa Israel, bexa nak xmen xa ndoꞌ yaꞌa bexa Egipto. Cha tsoꞌo wa mnitndoꞌ Dios bexa na mlaꞌa ta na ngeꞌ ladna bexa Dios.
JUD 1:6 Leꞌa ta wa lak ngwasea be angel tiemp polta, leꞌa bexa mlaꞌa sa msaꞌa Dios unibeꞌe bexa. Leꞌa Dios cha mtsaꞌab bexa wa sa uzhebpa ukaw, sa nchonyaw bexa idub tiemp, gast gal wizh utsaksi Dios itea bexa ugap nak.
JUD 1:7 No btseꞌa ladna bega xteꞌe mbin bexa uyoꞌo gezh Sodoma no Gomorra no be gezh nde gax sa wa. Leꞌa be men wa uzhebpa ugap ngok, mgal bexa be men naꞌanpa xa ten bexa, no mbin bexa sianta be ta ugap ltsaꞌa ta wa. Weꞌe leꞌa Dios mtsaksi bexa ndoꞌ giꞌ ta nunk lá yuꞌu, ndontsa iniꞌí be men leꞌa Dios ntsaksika be men ugap.
JUD 1:8 No liga nak bexa ugap ncho lat bego baꞌ. Leꞌa bexa wa ndun be taꞌa ncheꞌatsa ladna bexa, no ndun bexa be ta nladtsa bexa, be ta bzhiꞌik. No ngobi bexa be ta unibeꞌe Dios, no kweaꞌ níꞌi bexa ndoꞌ be angel.
JUD 1:9 Leꞌa zha na ngut Moisés leꞌa angel Miguel uteyono maxuꞌu ná ton goꞌo Moisés. Leꞌa Miguel wa leꞌa xa nibeꞌe lat be angel, parea ni lá ngun xa rages kweaꞌ iníꞌi xa ndoꞌ maxuꞌu. Leꞌa Miguel ndi ndabtsa ndoꞌ maxuꞌu: “¡Leꞌa Dios utsaksi lu!”
JUD 1:10 Ná leꞌa bexa ugap wa nisi be taꞌa lá nyakbeꞌena bexa. Leꞌa bexa wa nak cuent be man, nchandoꞌ bexa be taꞌa, ná leꞌa bexa ni lá nyakbeꞌena‑yá. Leꞌa ta na li ndun bexa wa leꞌa gun initndoꞌ bexa.
JUD 1:11 Proꞌob bexa wa, leꞌa bexa ugap nak lak ngok Caín. No ndun bexa ta ugap, ndontsa gun bexa gan med lak mbin Balaam. No gat bexa lak ngut Coré xa ngokloo ndoꞌ Moisés.
JUD 1:12 No ugap ndun bexa gor nzhealbe bega ndaw bega. Nten ladna bexa ndaw bexa no ndo bexa, parea naꞌanpa ndap bexa mod ndoꞌ be ltsaꞌa bexa, ndi ndun bexa ta nladtsa bexa. Leꞌa bexa wa xa naꞌan xtiꞌin cuent be xkaw ndoꞌo mbi ta lá noꞌo gi. No nak bexa cuent dub ya bid ta mgiꞌibla, ta lá yoota gan usaꞌa ngus.
JUD 1:13 Leꞌa bexa wa ugiꞌi nak cuent golp ten nitsdoꞌo, cuent bchiꞌin ntsaꞌab golp ten nits wa li udalad nak ta ndun bexa. Leꞌa bexa wa nak cuent be mbeal usabgix ni lá iniꞌí pa isob gibeꞌa baꞌ. Ta weꞌe leꞌa Dios utsaksi bexa, yaꞌ bexa sa ndon leꞌa ukaw idub tiemp.
JUD 1:14 Leꞌa cuent ten bexa wa leꞌa Enoc xa ngok isagaꞌad xkwaꞌa be men uyoꞌo tsoꞌo na uyoꞌo Adán wa mbidiꞌizh xa sakndoꞌ Dios, ndab xa: “Blaꞌach bego, leꞌa Dios Xa Nibeꞌe nseano uzhebpa kwaꞌad luzh be angel ten na,
JUD 1:15 gab xa ndoꞌ kadga be men xteꞌe nak ta ndun bexa. Cha utsaksi xa itea bexa ugap nak, leꞌa bexa uzheꞌeb be ta ugap ndun, no uzheꞌeb nisi bexa Dios.”
JUD 1:16 Leꞌa bexa wa xela níꞌi ndoꞌ Dios, no nisi bexa itea be taꞌa, no ndeseakwaꞌan bexa be ta nladtsa bexa. No zhin ndadiꞌizh bexa, no utsin níꞌi bexa ndoꞌ be men, natsa gun bexa gan be ta nlad bexa.
JUD 1:17 Ná leꞌa bego be amig ten naꞌ, btseꞌa ladna bego be ta mbidiꞌizh be apostol ten Jesucristo Xwan beuna.
JUD 1:18 Ndab bexa ndoꞌ bega: “Leꞌa be wizh lult ndee yoo bexa gun usalad no sian be taꞌa, no gun bexa be ta ugap laktsa nlad bexa.”
JUD 1:19 Leꞌa ta wa bexa na nlad uteltsaꞌa be xmen Cristo. Sbeꞌen ndun bexa laktsa nsak ladna bexa, no naꞌanpa ncho Espíritu ten Dios len ladoꞌo bexa.
JUD 1:20 Ná leꞌa bego amig ten naꞌ nsabndoꞌ mas igeꞌ ladna bega Cristo, no bidiꞌizhno bega Dios lak ndakno Espíritu ten Dios bega.
JUD 1:21 Lá yalad bego ta na uzheꞌeb nkweaꞌ ladna Dios beuna. No list ute bega gast gal zha usaꞌa Jesucristo gealnaban nunk lá idub ndoꞌ beuna, leꞌa xa uzhebpa utsin ndanno beuna.
JUD 1:22 Btenxeꞌa bego bexa na lá iniꞌí ná xtaꞌan nsabndoꞌ gungea ladna bexa.
JUD 1:23 Gokno bego bexa na ndailaꞌ ndoꞌ ta ugap, lak ngoꞌo be men dub xa len dub niꞌi nsayolꞌ. Bkweaꞌ ladna bego bexa ndun ta ugap, parea blaꞌach bega leꞌaka bega ndontsa naꞌanpa no bega gailaꞌ ndoꞌ ta wa, cuent dub taꞌa gast no xab bexa wa ta bzhiꞌik.
JUD 1:24 Leꞌa Dios sun gan lá gailaꞌ bega ndoꞌ be ta ugap, no sun xa gan isoꞌ bega ndoꞌ xa iten ladna bega no umbiꞌi gak ladoꞌo bega.
JUD 1:25 Leꞌa xa wa dubkama nak Dios, xa ndon leꞌa ndák, xa uloꞌo beuna ndoꞌ be ke ten beuna. Leꞌa nat no idub tiemp gab beuna leꞌa Dios nak xa ndon leꞌa siꞌil, no xa ndon leꞌa juert, no xa ndon leꞌa nibeꞌe, no xa ndon leꞌa nsak. Lika nak‑a.
REV 1:1 Leꞌa sa ndee nkeaniꞌi be ta mluu Dios ndoꞌ Jesucristo, ndontsa uluu xa ndoꞌ bexa ndun tiꞌin ndoꞌ xa be ta sken yoo. Leꞌa Jesucristo cha mtuꞌub dub angel mbid uluu‑yá ndoꞌ naꞌ xa nsaleaꞌ Juan, dub xa ndun tiꞌin ndoꞌ Cristo.
REV 1:2 Ta ugeaka gáp naꞌ leꞌa be ta uní naꞌ wa ta tenka Dios, no leꞌaka Jesucristo mluu ta wa ndoꞌ naꞌ.
REV 1:3 Uzhebpa wen yoo ladna bexa na goꞌol be diꞌizh ten Dios ndee no isakyoꞌón bexa‑yá, leꞌa tiemp yoo be ta wa sken ilen.
REV 1:4 Leꞌa naꞌ ndee Juan nidiꞌizh ndoꞌ bego nak isagaꞌad xkwaꞌa be xmen Jesucristo ndencho Asia. Leꞌa Dios xa na leꞌaka nak Dios nat no polta no idub tiemp ilen ndee, no isagaꞌad espíritu nde ndoꞌ sa nsob Dios, leꞌa bexa wa utsin gak ndoꞌ bega no gun bexa wen yoo ladna bega.
REV 1:5 No Jesucristo li gun, leꞌa xa wa gaꞌal mluu xteꞌe wen nak Dios, no ndon ned xa mbin gan ndoꞌ gealgut, no leꞌa xa nak xa nibeꞌe ndoꞌ itea bexa nibeꞌe ndoꞌ gizhliyo. Leꞌa xa wa nkweaꞌ ladna beuna no mtsambiꞌi xa ladoꞌo beuna ndoꞌ be ke ten beuna no ten ten xa.
REV 1:6 No myunno xa beuna dub xa nibeꞌe no dub uleꞌay ndun tiꞌin ndoꞌ Dios Xus xa. Idub tiemp yankea beuna Cristo xa ndon leꞌa nibeꞌe. Lika nak‑a.
REV 1:7 Blaꞌach bega leꞌa xa ilen ndoꞌ xkaw, nsea itea be men iniꞌí xa, gast no bexa ndap ke mbit xa wa. Nsea itea be ras men nde ndoꞌ gizhliyo uzheꞌeb goꞌonno xa. Ta ugeaka lika gak‑a.
REV 1:8 Leꞌa Cristo Xa Nibeꞌe wa xa ndon leꞌa juert nak ndab: “Leꞌa naꞌ ndee nak Alfa nsea Omega. Nak naꞌ xa ned nsea xa lult ndoꞌ itea be taꞌa.” Leꞌa xa wa leꞌaka nak Dios nat no polta no idub tiemp ilen ndee.
REV 1:9 Leꞌa naꞌ ndee Juan nak beuna xmen Jesucristo. Leꞌa naꞌ nsatid gealkweaꞌ lak nsatid bega‑yá. No nak beuna bexa nibeꞌe Dios, no ndakno Jesucristo beuna nchaꞌuxik beuna ndoꞌ be gealkweaꞌ. Leꞌa ke na ndadiꞌizh naꞌ diꞌizh ten Dios, no ndadiꞌizh naꞌ xteꞌe nak ta ndun Jesucristo, ta weꞌe mtsaꞌab be men naꞌ isla nsaleaꞌ Patmos cuent dub xa nkea litgiꞌib.
REV 1:10 Leꞌa ngol dub wizh doming leꞌa Espíritu ten Dios usen naꞌ. Cha weꞌe leꞌa lad tsoꞌo naꞌ mbín naꞌ dub ti men uzhebpa ugeꞌ cuent ti dub trompet,
REV 1:11 ndab xa: —Leꞌa naꞌ ndee nak Alfa nsea Omega, xa ned no xa lult ndoꞌ itea be taꞌa. Bkeꞌa ndoꞌ git be ta inaꞌ lu, cha btuꞌub‑a ndoꞌ isagaꞌad be gezh nde be xmen naꞌ sa nsaleaꞌ Asia. Leꞌa be gezh wa nsaleaꞌ Éfeso no Esmirna no Pérgamo no Tiatira no Sardis no Filadelfia nsea Laodicea.
REV 1:12 Cha mgeaksoꞌ naꞌ lad tsoꞌo naꞌ, ná ton ta na li uníꞌi ndoꞌ naꞌ wa. Cha weꞌe uní naꞌ dub gaꞌad candeler ta oro.
REV 1:13 Leꞌa tlaw be candeler wa uní naꞌ nsoꞌ dub xa cuent nluu dub men, nak xa dub lad koꞌol gast gendats xa ndakea‑yá. No nde dub sinch oro ta ladoꞌo xa.
REV 1:14 Leꞌa gek xa no gichgek xa ndon nagud naꞌ, cuent naꞌ gich borreg ndon mbe xiꞌil naꞌ‑yá. Leꞌa be ngusndoꞌ xa cuent bealꞌ giꞌ naꞌ.
REV 1:15 Leꞌa xoꞌo xa nduꞌu lak nduꞌu dub giꞌib guch ta bronce, dub ta tiꞌi utoꞌo len gor. Leꞌa ti xa ngen cuent sa nsalaꞌ kwaꞌal nits ndoꞌ dub geꞌdaꞌa.
REV 1:16 Leꞌa ndoꞌ yaꞌa lad gaꞌal xa ndiꞌib dub gaꞌad ta cuent mbeal ndiꞌib gibeꞌa. Leꞌa toꞌo xa ntoꞌo dub spad top toꞌo na wach. Leꞌa idub ndoꞌ xa nluu cuent nluu wizh gor na uzhebpa ugiꞌi naꞌ bea.
REV 1:17 Leꞌa gor uní naꞌ xa, cuent dub xa ngut ulayat naꞌ xan ndats xa. Leꞌa xa cha mxoꞌob yaꞌa lad gaꞌal xa tsoꞌo naꞌ, cha ndab xa: —Lá izheb lu. Naꞌ leꞌa nak xa ned no xa lult ndoꞌ itea be taꞌa,
REV 1:18 xa na nban. Leꞌa naꞌ ngut, parea leꞌa nat leꞌa naꞌ nban idub tiemp. No leꞌa naꞌ mas juert ndoꞌ gealgut no mas juert naꞌ ndoꞌ sa ndencho bexa ngut.
REV 1:19 Bkeꞌa be ta uniꞌí lu wa no be ta ncho nat no be ta tilaw yoo.
REV 1:20 Nat gáp naꞌ dub ta gol goꞌón lu, xteꞌe nak isagaꞌad mbeal ndiꞌib yaꞌa lad gaꞌal naꞌ ndee nsea isagaꞌad be candeler ndee wa: leꞌa isagaꞌad mbeal ndee nak isagaꞌad be angel nlaꞌach be xmen naꞌ ndencho isagaꞌad gezh wa; leꞌa isagaꞌad be candeler ta oro ta naꞌ lu ndee nak isagaꞌad xkwaꞌa be xmen na ndencho be gezh wa.
REV 2:1 ’Bkeꞌa ta ndee ndoꞌ angel nlaꞌach be xmen naꞌ ndencho Éfeso: “Lndeꞌe ndab xa nsén dub gaꞌad mbeal ndiꞌib gaꞌap yaꞌa lad gaꞌal na, xa na nkesea lat isagaꞌad candeler ta oro. Ndab xa:
REV 2:2 Naꞌ nchandoꞌ be ta ndun bega, xteꞌe juert ndun bega tiꞌin ten naꞌ no uzhebpa nxik bega. Leꞌa naꞌ uní leꞌa bega naꞌanpa nchealtsaꞌa bexa ugap nak; nsea mbin bega preb bexa nkwiꞌin ndab nak apostol ten naꞌ. Cha uniꞌí bega leꞌa bexa wa ndun gealkwiꞌin.
REV 2:3 No nxik bega ndoꞌ be gealkweaꞌ nsatid bega. No juert ndun bega tiꞌin ten naꞌ ta na ndankea bega naꞌ, ni lá ndach ladna bega.
REV 2:4 Parea ncho stub taꞌa lá nsak lad naꞌ ndun bega: leꞌa bega yá lá ndankeata naꞌ lakta zha ned wa.
REV 2:5 Btseꞌa ladna bega xteꞌe wen ngok bega, cha byach bega ndoꞌ naꞌ, cha bin bega lak mbin bega zha ned wa. Tal leꞌa bega lá gun li, leꞌa naꞌ sken ilen, cha ulat naꞌ candeler ten bega tal leꞌa bega lá ulaꞌa ta ugap ndun bega.
REV 2:6 Parea ncho stub ta wen ndun bega, leꞌa bega lá nsak ladna ta ndun bexa nicolaíta, lak lá nsak lad naꞌ ta ndun bexa wa.
REV 2:7 Leꞌa bego na ndap nchaꞌ na, bsakyoꞌón bega ta ndab Espíritu ten Dios ndoꞌ be xmen naꞌ. Leꞌa bexa na gun gan ndoꞌ be ta ugap, leꞌa naꞌ usa ngus ten ya nsaꞌa gealnaban gaw bexa wa, ya nsob tlaw be ya xgeꞌa ten Dios.”
REV 2:8 ’Bkeꞌa ta ndee ndoꞌ angel nlaꞌach be xmen naꞌ ndencho Esmirna: “Lndeꞌe ndab xa nak xa ned no xa lult ndoꞌ itea be taꞌa, xa na ngut no mbangal. Ndab xa:
REV 2:9 Leꞌa naꞌ nchandoꞌ be ta ndun bega, no be gealkweaꞌ nsatid bega, nsea ta uban nak bega, parea leꞌa bega xa rik ndoꞌ Dios. No nchandoꞌ naꞌ xteꞌe kweaꞌ níꞌi be men ndoꞌ bega, bexa nkwiꞌin ndab leꞌa xa xa judio, parea naꞌanpa nak bexa xmen Dios, leꞌa bexa ndi nde ndoꞌ yaꞌa maxuꞌu.
REV 2:10 Lá izheb bega ndoꞌ be gealkweaꞌ itid bega. Blaꞌach bego, leꞌa maxuꞌu ukeꞌa pla bega litgiꞌib, gun xa preb bega naga ugeaka xmen Dios bega, kweaꞌ yoo bega dub tiꞌi wizh. Dubtsa ulo ladna bega igeꞌ ladna bega naꞌ maska gut bexa bega. Weꞌe leꞌa naꞌ usa dub gealnaban nunk lá idub ndoꞌ bega.
REV 2:11 Leꞌa bego na ndap nchaꞌ na, bsakyoꞌón bega ta ndab Espíritu ten Dios ndoꞌ be xmen naꞌ: Leꞌa bexa na gun gan ndoꞌ be ta ugap, leꞌa bexa wa naꞌanpa itid ndoꞌ gealgut itop wa.”
REV 2:12 ’Bkeꞌa ta ndee ndoꞌ angel nlaꞌach be xmen naꞌ ndencho Pérgamo: “Lndeꞌe ndab xa ndap spad top toꞌo na wach. Ndab xa:
REV 2:13 Leꞌa naꞌ nchandoꞌ be ta ndun bega, no uní naꞌ leꞌa bega ncho dub gezh sa nibeꞌe maxuꞌu. Parea dubtsa ndankea bega naꞌ, no lá ukachko bega ta na ngeꞌ ladna bega naꞌ zha na mbit be men Antipas. Leꞌa xa wa utsin mbidiꞌizh diꞌizh ten naꞌ, ta weꞌe mbit be men xa sa ncho bega baꞌ, dub gezh sa nibeꞌe maxuꞌu.
REV 2:14 Parea ncho platsa taꞌa lá nsak lad naꞌ nak bega: leꞌa ncho bega bi ndun ltsaꞌa ta mbin Balaam, xa na mluu Balac xteꞌe gun xa ndontsa isabgix bexa Israel. Mkiꞌil xa bexa wa gaw bexa be xnab ten be dios gizhliyo, no ugal bexa dub xa naꞌanpa xagots ten xa.
REV 2:15 No ncho bega bi ndankea be ta nluu bexa nicolaíta wa, ta na uzhebpa lá nsak lad naꞌ.
REV 2:16 Ta weꞌe blaꞌa bega be ta ugap nak bega wa. Tal leꞌa bega naꞌanpa li gun, leꞌa naꞌ sken ilen, no kuyono naꞌ bega na li nak wa nsea spad ntoꞌo toꞌo naꞌ.
REV 2:17 Leꞌa bego na ndap nchaꞌ na, bsakyoꞌón bega ta ndab Espíritu ten Dios ndoꞌ be xmen naꞌ: Leꞌa bexa na gun gan ndoꞌ be ta ugap, leꞌa naꞌ usa maná gaw bexa ta lá nchandoꞌ bexa. Nsea usa naꞌ dub geꞌ tuzh ta nagud. Leꞌa las geꞌ wa ikea stub leaꞌ bexa dub ta kub, ta ni dub men lá nchandoꞌ, nabtsa xa na ikaꞌa geꞌ wa iniꞌí‑yá.”
REV 2:18 ’Bkeꞌa ta ndee ndoꞌ angel nlaꞌach be xmen naꞌ ndencho Tiatira: “Lndeꞌe ndab Xin Dios xa ndap ngusndoꞌ na cuent bealꞌ giꞌ wa, nsea xoꞌo xa cuent be giꞌib bronce ta nduꞌu. Ndab xa:
REV 2:19 Leꞌa naꞌ nchandoꞌ be ta ndun bega, xteꞌe utsin nak bega ndoꞌ be ltsaꞌa bega, no xteꞌe ngeꞌ ladna bega naꞌ, no xteꞌe ndun bega be tiꞌin ten naꞌ, nsea uzhebpa nxik bega. No uní naꞌ leꞌa bega mas utsin ndun nat ndoꞌ lak zha ned wa.
REV 2:20 Parea ncho platsa taꞌa lá nsak lad naꞌ nak bega: leꞌa bega nlaꞌa leꞌa xagots nsaleaꞌ Jezabel nkwiꞌinno be xmen naꞌ. Leꞌa xa wa ndab leꞌa ndadiꞌizh sakndoꞌ Dios, parea nkiꞌil xa bexa ugal bexa dub xa naꞌanpa xa ten bexa, no gaw bexa be xnab ten be dios gizhliyo.
REV 2:21 Leꞌa naꞌ msa dub tiemp ulaꞌa xa be ta bzhiꞌik ndun xa wa, parea leꞌa xa lá kaꞌab ulaꞌa be ta wa.
REV 2:22 Leꞌa nat leꞌa naꞌ ula isen dub gealgizh xa, no dub gealkweaꞌ siꞌil iniꞌí bexa na mgal xagots wa, tal leꞌa bexa lá ulaꞌa be ta ugap ndanno bexa xa wa.
REV 2:23 Leꞌa naꞌ gut be xin xagots wa, weꞌe iniꞌí bega nak xmen naꞌ leꞌa naꞌ nak xa nchandoꞌ gek bega nsea ladoꞌo bega. Leꞌa naꞌ kix ndoꞌ bega no be ta mbin bega.
REV 2:24 Parea leꞌa ncho bega ncho Tiatira baꞌ naꞌanpa no ndankea ta mluu xagots wa, no lá igondoꞌ bega be ta nsaleaꞌ bexa ta ugaꞌach ten maxuꞌu. Leꞌa naꞌ gáp ndoꞌ bega leꞌa naꞌ naꞌanpa inibeꞌe gun bega stubga taꞌa.
REV 2:25 Parea leꞌa be ta wen nak bega, litsa gok bega gast gal zha ilen naꞌ.
REV 2:26 Leꞌa bexa na gun gan ndoꞌ be ta ugap no gun xa lak ndáp naꞌ gast wizh lult, leꞌa naꞌ ula inibeꞌe bexa gast ndoꞌ be nacion.
REV 2:27 Usa naꞌ juers ndoꞌ bexa lak msaꞌa Xus naꞌ juers ndoꞌ naꞌ, ndontsa uzheꞌeb inibeꞌe bexa ndoꞌ be nacion, lak nleꞌa men dub gets btsiꞌin no dub bar giꞌib.
REV 2:28 No usa naꞌ mbeal siꞌil nlen gor tempran ndoꞌ bexa wa.
REV 2:29 Leꞌa bego na ndap nchaꞌ na, bsakyoꞌón bega ta ndab Espíritu ten Dios ndoꞌ be xmen naꞌ.”
REV 3:1 ’Bkeꞌa ta ndee ndoꞌ angel nlaꞌach be xmen naꞌ ndencho Sardis: “Lndeꞌe ndab xa nibeꞌe isagaꞌad espíritu ndun tiꞌin ndoꞌ Dios, xa na nsoꞌnsén isagaꞌad mbeal wa, ta ndiꞌib gibeꞌa. Ndab xa: Leꞌa naꞌ nchandoꞌ be ta ndun bega. Leꞌa ncho men ndab leꞌa bega ndap gealnaban ndoꞌ Dios, parea leꞌa cuent ten Dios leꞌa bega ngut.
REV 3:2 Bsuxeꞌa ladna bega, bxiste bega ta ngeꞌ ladna bega naꞌ, lá ulaꞌa bega initndoꞌ‑yá. Leꞌa naꞌ uní leꞌa ta ndun bega naꞌanpa utsin nak ndoꞌ Dios.
REV 3:3 Lá yalad bega be ta mbiꞌín bega, no bxobgek bega, nsea blaꞌa bega be ta ugap nak bega. Tal leꞌa bega lá isuxeꞌa ladna, leꞌa naꞌ ilen dub gor ni lá ndanbeꞌe bega lak nlen dub waꞌan.
REV 3:4 Parea ncho stapla bega ndencho Sardis baꞌ umbiꞌi nak ndoꞌ Dios. Leꞌa bega wa iseano naꞌ, gak bega lad nagud leꞌa bega yá nsabndoꞌ li gak.
REV 3:5 Leꞌa bexa na gun gan ndoꞌ be ta ugap, leꞌa bexa wa gak be lad nagud, no lá utsuꞌu naꞌ leaꞌ bexa ndoꞌ libr ten gealnaban, no gáp naꞌ ndoꞌ Xus naꞌ nsea ndoꞌ be angel ten xa leꞌa bexa wa xmen naꞌ.
REV 3:6 Leꞌa bego na ndap nchaꞌ na, bsakyoꞌón bega ta ndab Espíritu ten Dios ndoꞌ be xmen naꞌ.”
REV 3:7 ’Bkeꞌa ta ndee ndoꞌ angel nlaꞌach be xmen naꞌ ndencho Filadelfia: “Lndeꞌe ndab xa ta ugeaka nak xa umbiꞌi ten Dios, xa nibeꞌe lak unibeꞌe David. Leꞌa sa na nxaꞌal xa, naꞌan ton gun gan utsaw. No liga leꞌa sa ntsaw xa wa, naꞌan ton gun gan uxaꞌal. Ndab xa:
REV 3:8 Leꞌa naꞌ nchandoꞌ be ta ndun bega. Nat leꞌa naꞌ mxaꞌal dub puert ndoꞌ bega, dub ta naꞌan ton gun gan utsaw. Maska ndido juers ncho bega, leꞌa bega nxobgek ndoꞌ diꞌizh ndáp naꞌ, no lá ukachko bega leꞌa bega xmen naꞌ.
REV 3:9 Leꞌa nat iniꞌí bega xteꞌe gunno naꞌ bexa nde ndoꞌ yaꞌa maxuꞌu, bexa ndab leꞌa nak xmen Dios parea leꞌa xa naꞌanpa nak xmen Dios, leꞌa bexa ndi ndun gealkwiꞌin. Leꞌa nat leꞌa naꞌ gun ilen bexa ndoꞌ bega isaxib bexa ndoꞌ bega. Weꞌe igondoꞌ bexa leꞌa naꞌ nkweaꞌ ladna bega.
REV 3:10 Leꞌa naꞌ ndápka ndoꞌ bega uxik bega, cha lika mbin bega. Ta weꞌe leꞌa naꞌ ulach bega gor na nsea stub gealkweaꞌ ndoꞌ idub gizhliyo, ta na gun preb itea be men nde ndoꞌ gizhliyo.
REV 3:11 Nat leꞌa naꞌ sken ilen. Lá ulaꞌa bega be ta wen nak bega, ndontsa naꞌan ton ulat ta uzheꞌeb wen usaꞌa Dios ikaꞌa bega.
REV 3:12 Leꞌa bexa na gun gan ndoꞌ be ta ugap, leꞌa naꞌ gunno xa wa cuent dub yatsoꞌ ten lid Dios, dub ta nunk lá itatsoꞌ sa nsoꞌ na. No ukeꞌa naꞌ leaꞌ Dios ten naꞌ las xa no leaꞌ gezh siꞌil ten Dios. Leꞌa ta wa Jerusalén kub ten Dios ta itoꞌo gibeꞌa. No ukeꞌa naꞌ leaꞌ kub naꞌ las xa.
REV 3:13 Leꞌa bego na ndap nchaꞌ na, bsakyoꞌón bega ta ndab Espíritu ten Dios ndoꞌ be xmen naꞌ.”
REV 3:14 ’Bkeꞌa ta ndee ndoꞌ angel nlaꞌach be xmen naꞌ ndencho Laodicea: “Lndeꞌe ndab xa lika nak wa, xa na gaꞌal nluu xteꞌe nak Dios, xa na leꞌa usaned zha mbindeꞌe Dios itea be taꞌa. Ndab xa:
REV 3:15 Leꞌa naꞌ nchandoꞌ be ta ndun bega. Ni lid myalꞌ bega no ni lid utii bega. Mas wen myalꞌtsa bega natal utii bega.
REV 3:16 Parea leꞌa ta na uzheꞌatsa bega, ni naꞌanpa myalꞌ bega no ni naꞌanpa utii bega, leꞌa naꞌ sabna bega.
REV 3:17 Leꞌa bega ndab leꞌa bega xa rik no sian taꞌa ndap bega, naꞌan xtaꞌan ndun jwalt bega. Ná leꞌa bega lá iniꞌí leꞌa bega cuent dub xa uban nak, dub xa proꞌob ni lá naꞌ ni lá ndap xab na.
REV 3:18 Ta weꞌe ntenxeꞌa naꞌ bega isiꞌi bega be ta oro ndoꞌ naꞌ ta msambiꞌi ndoꞌ giꞌ, ndontsa ta ugeaka gak rik bega. No isiꞌi bega lad nagud ta gak bega, ndontsa lá uluu gealudalad ten bega ta lá ndap bega xab bega. No yoo colirio ta ramed ndoꞌ bega, ndontsa utsin inaꞌ bega.
REV 3:19 Leꞌa naꞌ nbeyo itea bexa nkweaꞌ lad naꞌ no ntsaksi naꞌ bexa. Ta weꞌe idub ncho ladna bega byach bega ndoꞌ naꞌ.
REV 3:20 Blaꞌach bego leꞌa naꞌ nsoꞌ toꞌo puert nsea nbeꞌezh naꞌ. Leꞌa tal ton goꞌón ta ndáp naꞌ, no uxaꞌal xa toꞌo puert, weꞌe yoꞌo naꞌ len lid xa no junt gaw xcheꞌe besa.
REV 3:21 Leꞌa bexa na gun gan ndoꞌ be ta ugap, leꞌa naꞌ usa dub sa isob bexa wats naꞌ sa inibeꞌe naꞌ, lak mbin naꞌ gan ndoꞌ ta ugap, cha nsoꞌob naꞌ wats Dios Xus naꞌ sa nibeꞌe xa.
REV 3:22 Leꞌa bego na ndap nchaꞌ na, bsakyoꞌón bega ta ndab Espíritu ten Dios ndoꞌ be xmen naꞌ.”
REV 4:1 Tsoꞌo wa leꞌa naꞌ uní leꞌa gibeꞌa myaꞌal dub ta cuent puert. Leꞌa ti ned xa mbín naꞌ cuent dub trompet wa cha uníꞌigal ndoꞌ naꞌ, ndab xa: —Ukea sa ndee, leꞌa naꞌ uluu ndoꞌ lu be ta tilaw yoo ndoꞌ ta ncho nat.
REV 4:2 Cha bi leꞌa gor wa leꞌa Espíritu ten Dios usen naꞌ. Cha li uní naꞌ leꞌa dub xa nibeꞌe nsob ndoꞌ dub yaxil siꞌil gibeꞌa.
REV 4:3 Leꞌa xa nsob sa wa ndon nlaꞌbealꞌ cuent be geꞌ jaspe nsea cornalina. Leꞌa gangeak sa nsoꞌ yaxil wa nkea dub mbeꞌalzhin nlaꞌbealꞌ cuent geꞌ esmeralda.
REV 4:4 Leꞌa gangeak sa nsoꞌ yaxil wa no nde stub gaꞌal bdap yaxil. Cha uní naꞌ leꞌa ndoꞌ be yaxil wa ndiꞌib dub gaꞌal bdap bexa gox xa nsak, bexa nak be lad nagud, ndiꞌib coron ta oro gek bexa.
REV 4:5 Leꞌa ndoꞌ yaxil nsoꞌ tlaw wa ntoꞌo bealꞌ usiꞌi no níꞌi usiꞌi nsea ngen ruid siꞌil. Leꞌa lad ndoꞌ yaxil wa ndibyolꞌ dub gaꞌad xeꞌa, leꞌa ta wa isagaꞌad be espíritu ten Dios.
REV 4:6 Leꞌa lad ndoꞌ yaxil wa nax dub ta cuent nitsdoꞌo gandid xeꞌa lakta naꞌ dub vidr. Leꞌa wats yaxil wa nsea gangeak wats yaxil wa uní naꞌ dap ta nban, idub las‑a nsoꞌ be ngusndoꞌ‑yá lad ndoꞌ‑yá no lad tsoꞌo‑yá.
REV 4:7 Leꞌa ta nban ta ned wa cuent nak dub mbiꞌizh. Leꞌa ta itop wa cuent nak dub bser. Leꞌa ta yon wa ndap ndoꞌ na cuent ndoꞌ men. Leꞌa ta idap wa cuent nak dub mtsi nchaꞌnsaꞌab.
REV 4:8 Leꞌa idap be ta nban wa leꞌa kadga dub‑a ndap dub xoꞌop xkwag na. Leꞌa gangeak tsoꞌo xkwag‑a no len xkwag‑a ndiꞌib ngusndoꞌ‑yá. No teꞌal tezhea lá nbeasyab be ta wa: Ndon go, ndon go, ndon go dubkama nak Dios Xa Nibeꞌe, xa ndon leꞌa juert ndoꞌ itea be taꞌa. Leꞌa go leꞌa nak Dios tiemp polta, no Dioska go nat, no Dioska go idub tiemp ilen.
REV 4:9 Leꞌa kad biaj li ndab be ta nban wa ndoꞌ Dios xa nsob ndoꞌ yaxil xa nban idub tiemp, ndankea be ta wa xa, no nsaꞌa be ta wa xno ndoꞌ xa.
REV 4:10 Weꞌe leꞌa isagaꞌal bdap bexa gox wa nsaxib ndoꞌ xa nsob ndoꞌ yaxil, xa nban idub tiemp, gast ndoꞌ yo ndal xtuzh bexa, ndankea bexa wa xa, no nte bexa coron ten bexa lad ndoꞌ yaxil, ndab bexa:
REV 4:11 Go Dios Xa Nibeꞌe, leꞌa besa nsabndoꞌ yankea go, no gab besa leꞌa go nak dub Dios uzhebpa xa juert. Leꞌa go mtexan iteanak be taꞌa; ngokndeꞌe‑yá lak nlad go yoo‑yá, no liga ncho‑yá nat.
REV 5:1 Cha uní naꞌ leꞌa yaꞌa lad gaꞌal xa na nsob ndoꞌ yaxil wa nchoꞌob dub libr nyuꞌud nkea letr ndoꞌ‑yá, leꞌa tsoꞌo‑yá nsénkea dub gaꞌad se.
REV 5:2 Cha uní naꞌ dub angel juert ten Dios, ugeꞌ unabdiꞌizh xa, ndab xa: —¿Ton dub xa suꞌu guzhaꞌa be se nsénkea libr baꞌ, cha uxaꞌal xa‑yá?
REV 5:3 Parea ni dub xa ncho gibeꞌa, no ni dub xa ncho ndoꞌ gizhliyo, no ni dub xa ncho xan gizhliyo lá isuꞌu uxaꞌal‑a ni iwiꞌi xa ndoꞌ‑yá.
REV 5:4 Cha uzhebpa ndon naꞌ geal lá izheal ni dub xa uxaꞌal libr wa, no goꞌol xa‑yá no ni iwiꞌi xa ndoꞌ‑yá.
REV 5:5 Parea leꞌa dub xa gox xa nsak wa ndab ndoꞌ naꞌ: —Yá lá goꞌonta lu. Unaꞌ leꞌa xa nsaleaꞌ Mbiꞌizh ten Judá, xa ulen ras ten David, leꞌa xa wa mbin gan ndoꞌ maxuꞌu. Leꞌa nat leꞌa xa wa sun gan guzhaꞌa isagaꞌad se nsénkea libr baꞌ wa, cha uxaꞌal xa‑yá.
REV 5:6 Cha weꞌe uní naꞌ leꞌa wats yaxil wa, tlaw be idap ta nban wa no tlaw bexa gox xa nsak wa, nsoꞌ dub Borreg Ben cuent nak dub man mbit be men. Ndap ma dub gaꞌad xkach ma nsea dub gaꞌad ngusndoꞌ ma, leꞌa ta wa isagaꞌad espíritu mtuꞌub Dios ndoꞌ idub gizhliyo.
REV 5:7 Weꞌe leꞌa Borreg wa cha ulen usen libr nchoꞌob ndoꞌ yaꞌa lad gaꞌal xa nsob ndoꞌ yaxil wa.
REV 5:8 Leꞌa gor usen Borreg libr wa, leꞌa idap be ta nban wa nsea be isagaꞌal bdap bexa gox xa nsak wa cha usaxib ndoꞌ Borreg wa, gast ndoꞌ yo ngol xtuzh bexa. Leꞌa itea bexa wa ndap be arpa no be vas oro ncho ta uxeꞌe len na, leꞌa ta wa ta ndadiꞌizhno be men Dios, bexa umbiꞌi nak ndoꞌ Dios.
REV 5:9 Cha mbiltoꞌo bexa dub cant kub, ndab bexa ndoꞌ Borreg: Leꞌa go nsabndoꞌ isen libr baꞌ, no guzhaꞌa ga be se nsénkea‑yá, geal leꞌa go ngut, mtsiꞌi ga ten ten ga, ta weꞌe myak besa xin Dios ndoꞌ itea be ras be men, no itea be diꞌizh ndadiꞌizh xa, no itea be gezh, no itea be nacion.
REV 5:10 No mbinno ga besa bexa nibeꞌe nsea be uleꞌay ndun tiꞌin ndoꞌ Dios, inibeꞌe besa ndoꞌ gizhliyo.
REV 5:11 Weꞌe cha mwiꞌi naꞌ, cha mbín naꞌ sian ti be angel idub gangeak sa nsoꞌ yaxil wa, nsea ti be ta nban wa, no ti bexa gox xa nsak wa. Leꞌa bexa wa uzhebpa bexa kwaꞌad luzh, gast lá gun naꞌ gan gáp naꞌ plo bexa.
REV 5:12 Ugeꞌ ndab bexa: Leꞌa Borreg Ben xa na leꞌa be men mbit wa, nsabndoꞌ gab beuna leꞌa xa wa xa nibeꞌe, no uzheꞌeb sian be taꞌa ndap xa, no uzheꞌeb ndák xa, no uzheꞌeb xa juert nak xa, no yankea beuna xa leꞌa xa uzhebpa xa nsak.
REV 5:13 Cha mbín naꞌ leꞌa itea be taꞌa mbindeꞌe Dios, be ta ncho gibeꞌa no ndoꞌ gizhliyo no xan gizhliyo no len nitsdoꞌo, leꞌa be ta wa ndab: Leꞌa xa nsob ndoꞌ yaxil baꞌ nsea Borreg Ben baꞌ, leꞌa beuna idub tiemp nsabndoꞌ yankea bexa baꞌ, no yankea beuna bexa ta na uzheꞌeb wen nak bexa, no ta na uzheꞌeb juert nak bexa.
REV 5:14 Leꞌa idap be ta nban wa cha ndab: —¡Lika nak‑a! Leꞌa isagaꞌal bdap bexa gox xa nsak wa cha usaxib gast ndoꞌ yo ngol xtuzh bexa, cha ngwankea bexa wa Dios, xa nban idub tiemp.
REV 6:1 Weꞌe cha uní naꞌ leꞌa Borreg Ben wa mbizhaꞌa se ned nsénkea libr nyuꞌud wa, nsea mbín naꞌ leꞌa dub ta nban wa uníꞌi cuent usiꞌi, ndab ta wa: —¡Utseawiꞌi!
REV 6:2 Cha uní naꞌ dub way nagud. Leꞌa xa nsob tsoꞌo ma wa nsén dub ya btangin. Cha weꞌe msaꞌa Dios dub coron ndoꞌ xa wa, cha utoꞌo xa gun xa gan lakka ndun xa gan wa.
REV 6:3 Cha mbizhaꞌa Borreg wa se itop nsénkea git wa, cha mbín naꞌ leꞌa ta nban ta itop wa ndab: —¡Utseawiꞌi!
REV 6:4 Cha weꞌe utoꞌo dub way nane. Leꞌa Dios msaꞌa juers ndoꞌ xa nsob tsoꞌo way wa, ndontsa gun xa naꞌantapa wen kwe be men ndoꞌ gizhliyo. Cha weꞌe isaxan bexa kuyo bexa, cha gut bexa leꞌaka ltsaꞌa bexa. No msaꞌa Dios dub spad siꞌil ndoꞌ xa wa.
REV 6:5 Cha mbizhaꞌa Borreg wa se yon nsénkea git wa, cha mbín naꞌ leꞌa ta nban ta yon wa ndab: —¡Utseawiꞌi! Cha mwiꞌi naꞌ cha uní naꞌ dub way nagats. Leꞌa xa nsob tsoꞌo ma wa nsén dub ta nben be taꞌa.
REV 6:6 Leꞌa lat idap be ta nban wa mbín naꞌ cuent ti dub men ndab: —Leꞌa dub kil trig natal chon kil cebad izheꞌa dub med denario. Parea lá guzhaꞌa lu aceit nsea vin.
REV 6:7 Cha mbizhaꞌa Borreg wa se idap nsénkea git wa, cha mbín naꞌ leꞌa ta nban ta idap wa ndab: —¡Utseawiꞌi!
REV 6:8 Cha uní naꞌ dub way lasan. Leꞌa xa nsob tsoꞌo ma wa nsaleaꞌ Gealgut. Leꞌa tsoꞌo xa wa nsankea xa nsaleaꞌ Hades, sa ndencho bexa ngut. Leꞌa bexa wa usen juers gut bexa dub cuart be men nde ndoꞌ gizhliyo, gut bexa be men nsea spad, nsea win, nsea gealgizh, nsea be man ugiꞌi.
REV 6:9 Weꞌe leꞌa Borreg wa cha mbizhaꞌa se isagaꞌay wa, cha uní naꞌ xbi be men xan dub altar, bexa na ngut ke na mbidiꞌizh bexa diꞌizh ten Dios.
REV 6:10 Cha ugeꞌ ndab bexa: —Dios Xa Nibeꞌe, leꞌa go dubkama nak Dios, no ndunka go ta ndab ga. ¿Polxá utsaksi ga be men ncho ndoꞌ gizhliyo, no ukixke ga ta mbit bexa besa zha?
REV 6:11 Weꞌe leꞌa dub angel ten Dios cha msaꞌa lad nagud gak bexa, cha ndab angel ndoꞌ bexa: —Bneꞌe bega steꞌep ndalen gatta be ltsaꞌa bega, bexa na ndun ltsaꞌa tiꞌin mbin bega, bexa no gat lak ngut bega.
REV 6:12 Cha uní naꞌ mbizhaꞌa Borreg wa se isaxoꞌop nsénkea libr wa, cha weꞌe ngok dub xoꞌo siꞌil. Leꞌa ndoꞌ wizh cha mkaw cuent dub bleꞌa lad nagats. Leꞌa ndoꞌ mbeꞌe cha mnaꞌ nane cuent ten.
REV 6:13 Leꞌa be mbeal ndiꞌib gibeꞌa cha ulate ndoꞌ gizhliyo, lak nlate be ngus laꞌaw gor na nkwiꞌin dub mbi siꞌil ya wa.
REV 6:14 Leꞌa gibeꞌa cha unitndoꞌ cuent dub gor nyuꞌud dub bleꞌa git. Leꞌa itea be geꞌe no be isla gast mzheꞌa be sa nde na.
REV 6:15 Leꞌa iteanak be men cha mkachndoꞌ len be geꞌloꞌo no lat be geꞌ las be geꞌe ubiꞌi. Leꞌa ta wa bexa mas nibeꞌe ndoꞌ gizhliyo, no bexa nsak, no bexa rik, no bexa naktiꞌin, no bexa juert nak, no iteanak bexa nchaꞌndoꞌo ndoꞌ stub men, no bexa naꞌanpa li nak.
REV 6:16 Ndab bexa ndoꞌ be geꞌe ubiꞌi nsea ndoꞌ be geꞌ wa: —¡Ulate bega tsoꞌo besa! Bkachko bega besa ndoꞌ Xa Nibeꞌe nsob ndoꞌ yaxil baꞌ, no ndoꞌ ta ndakloo Borreg Ben ndoꞌ besa,
REV 6:17 leꞌa nat ngol dub wizh uzheꞌeb utsaksi Borreg wa be men. ¿Tonma gun gan uxik ndoꞌ ta wa?
REV 7:1 Tsoꞌo wa uní naꞌ dap be angel nde idap skin gizhliyo. Leꞌa bexa wa nsénsaꞌab idap mbi ncho ndoꞌ gizhliyo, natsa lá uxoꞌon mbi ndoꞌ gizhliyo ni ndoꞌ nitsdoꞌo no ni dub ndoꞌ ya.
REV 7:2 No uní naꞌ stub angel nchaꞌkea lad sa nlen wizh, leꞌa xa wa nsén dub se ten Dios xa nban. Cha ugeꞌ uníꞌi xa ndoꞌ idap angel wa, bexa na msaꞌa Dios juers ndoꞌ na guzhaꞌa bexa gizhliyo no nitsdoꞌo.
REV 7:3 Ndab angel wa: —Lá guzhaꞌa bega gizhliyo ni nitsdoꞌo no ni be ya baꞌ, gast gor na ukeꞌa besa se xtuzh be men ndun tiꞌin ndoꞌ Dios ten beuna.
REV 7:4 Cha weꞌe mbín naꞌ plo bexa nkea se wa xtuzh na: dub gayoꞌo ncho top gaꞌal ncho dap mil bexa nkea se lat itea be ras bexa Israel.
REV 7:5 Leꞌa ta wa dub tibtop mil bexa ras ten Judá. Nsea stibtop milga bexa ras ten Rubén. Nsea stibtop milga bexa ras ten Gad.
REV 7:6 Nsea stibtop milga bexa ras ten Aser. Nsea stibtop milga bexa ras ten Neftalí. Nsea stibtop milga bexa ras ten Manasés.
REV 7:7 Nsea stibtop milga bexa ras ten Simeón. Nsea stibtop milga bexa ras ten Leví. Nsea stibtop milga bexa ras ten Isacar.
REV 7:8 Nsea stibtop milga bexa ras ten Zabulón. Nsea stibtop milga bexa ras ten Kosé. No stibtop milga bexa ras ten Benjamín.
REV 7:9 Tsoꞌo wa uní naꞌ uzhebpa kwaꞌad luzh be men, gast naꞌan ton gun gan ulaꞌab bexa. Leꞌa bexa wa bexa itea be nacion, nsea itea be ras, nsea itea be gezh, no itea be diꞌizh ndadiꞌizh bexa. Nde bexa lad ndoꞌ yaxil ten Xa Nibeꞌe no ndoꞌ Borreg Ben. Leꞌa bexa wa nak be lad nagud, nsea dubga xos yagin nsén bexa.
REV 7:10 Cha uzhebpa ugeꞌ ndab bexa: Leꞌa Dios ten beuna xa nsob ndoꞌ yaxil baꞌ nsea Borreg Ben baꞌ, leꞌa bexa wa leꞌa ngoꞌo beuna ndoꞌ be ke ten beuna.
REV 7:11 Leꞌa itea be angel wa nde idub gangeak wats yaxil wa, no wats bexa gox nsak wa, no wats idap be ta nban wa. Cha usaxib be angel wa ndoꞌ xa nsob ndoꞌ yaxil wa, gast ndoꞌ yo ngol xtuzh bexa. Cha ngwankea bexa Dios,
REV 7:12 ndab bexa: ¡Lika nak‑a! Idub tiemp gab beuna leꞌa Dios ten beuna dub Dios siꞌil, no ndon leꞌa xa juert nak, no ndon leꞌa xa nibeꞌe, no ndon leꞌa xa ndák. Yankea beuna xa, no uzheꞌeb usaꞌa beuna xno ndoꞌ xa idub tiemp. ¡Lika nak‑a!
REV 7:13 Weꞌe leꞌa dub xa gox nsak wa unabdiꞌizh ndoꞌ naꞌ, ndab xa: —¿Nchandoꞌ lu bexa nak lad nagud baꞌ zha? ¿Uniꞌí lu pa utoꞌo bexa baꞌ zha?
REV 7:14 Leꞌa naꞌ ndáp ndoꞌ xa: —Señor, go leꞌa uniꞌí. Leꞌa xa wa cha ndab ndoꞌ naꞌ: —Leꞌa bexa baꞌ bexa mxik ndoꞌ gealkweaꞌ siꞌil; msat bexa be xab bexa, no msambiꞌi bexa, no mgud xab bexa no ten ten Borreg Ben baꞌ.
REV 7:15 Ta weꞌe nde bexa baꞌ wats yaxil nsob Dios, teꞌal tezhea ndun bexa tiꞌin ndoꞌ Dios sa ncho Dios. Leꞌa xa nsob ndoꞌ yaxil baꞌ leꞌa nsobulaꞌach bexa.
REV 7:16 Yá lá gantana bexa, no lá gakta ladna bexa. No ni lá uchuta bea bexa, no ni stub xtii lá iniꞌíta bexa.
REV 7:17 Leꞌa Borreg nsoꞌ tlaw sa nsoꞌ yaxil baꞌ leꞌa ulaꞌach bexa, no goꞌo xa bexa sa ndiblen nits nsaꞌa gealnaban. Leꞌa Dios utsambiꞌi itea nitsndoꞌ bexa baꞌ.
REV 8:1 Leꞌa Borreg wa cha mbizhaꞌa se isagaꞌad nsénkea libr wa, cha msoꞌ ti gibeꞌa pa dub tol gor.
REV 8:2 Weꞌe cha uní naꞌ isagaꞌad angel nde ndoꞌ Dios wa, cha usen bexa wa dub gaꞌ trompet.
REV 8:3 Weꞌe ulen stub angel noꞌo dub tas oro, cha uyatsoꞌ xa lad ndoꞌ altar. Cha usen xa sian be ta uxeꞌe, cha mtsoꞌol xa‑yá len tas ndoꞌ altar ta oro nde sa nsob Dios, ndontsa gast ndoꞌ Dios ilayaꞌ xlaꞌa uxeꞌe wa, no be ta unab bexa nak xmen Dios.
REV 8:4 Leꞌa ta nsén angel wa utoꞌo zhen ten be ta uxeꞌe wa, ulayaꞌ‑yá ndoꞌ Dios nsea be ta unab be xmen Dios wa.
REV 8:5 Leꞌa angel wa cha uloꞌo bkuꞌu ncho ndoꞌ altar wa, cha ulo xa‑yá len tas wa, cha mtsaꞌab xa ta wa ndoꞌ gizhliyo. Cha weꞌe uníꞌi usiꞌi, no mgen dub ruid siꞌil, no nlaꞌ bealꞌ usiꞌi, nsea ngok dub xoꞌo siꞌil.
REV 8:6 Leꞌa isagaꞌad be angel li nsén dub gaꞌga trompet wa listla ndebe ukweꞌezh‑a.
REV 8:7 Leꞌa angel ned wa cha mkweꞌezh trompet wa, cha ulaꞌ gigeꞌ no giꞌ noch ten. Ulaꞌ‑yá ndoꞌ gizhliyo, cha mtsoꞌol‑a gax itol be ya ncho ndoꞌ gizhliyo nsea itea be gix ugeꞌa.
REV 8:8 Leꞌa angel itop wa cha mkweꞌezh trompet ten na, weꞌe leꞌa dub ta cuent geꞌe siꞌil nsayolꞌ ulayat ndoꞌ nitsdoꞌo. Cha myak ten gax itol nitsdoꞌo wa.
REV 8:9 Cha ngut gax itol be man ncho len nitsdoꞌo. Nsea gax itol be barco ndesea ndoꞌ nitsdoꞌo wa ngwazhaꞌa.
REV 8:10 Leꞌa angel yon wa cha mkweꞌezh trompet ten na, cha ulayat dub mbeal siꞌil nsob gibeꞌa, nsayolꞌ‑a cuent gor nsoꞌbealꞌ dub bleꞌa ged. Ulayat‑a ndoꞌ nits, pa gax itol be yowbeꞌe no be sa ndiblen nits.
REV 8:11 Leꞌa mbeal wa nsaleaꞌ Ta Ulaꞌ. Leꞌa gax itol be nits wa cha myak ulaꞌ. Weꞌe uzhebpa kwaꞌad be men ngut ta na lita myak ulaꞌ nits wa.
REV 8:12 Leꞌa angel idap wa cha mkweꞌezh trompet ten na, cha ngwazhaꞌa gax itol wizh no mbeꞌe no be mbeal ndiꞌib gibeꞌa. Cha mkaw ta niꞌi dap gor ten be wizh, no liga be teꞌal dap gor naꞌanpa isu xeꞌa mbeꞌe ni mbeal.
REV 8:13 Cha mwiꞌi naꞌ no uní naꞌ dub angel nchaꞌnsaꞌab gaꞌap, ugeꞌ ndab xa: —¡Ay, ay, ay! ¡Proꞌob bexa na ncho ndoꞌ gizhliyo gor na ukweꞌezh schon angel be trompet ten na!
REV 9:1 Leꞌa angel isagaꞌay wa cha mkweꞌezh trompet ten na, cha uní naꞌ dub mbeal utoꞌo gibeꞌa ulayat ndoꞌ gizhliyo. Leꞌa mbeal wa leꞌa usen liab ten geꞌed doꞌo.
REV 9:2 Cha mxaꞌal mbeal wa geꞌed wa. Leꞌa sa wa utoꞌo zhen cuent zhen ten dub gor siꞌil. Leꞌa zhen wa mtsaw ndoꞌ xeꞌa wizh, cha mkaw ndoꞌ gizhliyo.
REV 9:3 Leꞌa lat zhen wa cha utoꞌo mbit, cha mteꞌachso bema ndoꞌ gizhliyo. Leꞌa ma wa ndap juers god ma lak ndod dub nix.
REV 9:4 Leꞌa angel wa cha ndab ndoꞌ bema wa, lá gaw ma be gix ugeꞌa ncho ndoꞌ gizhliyo nsea ni dub ya ugeꞌa nsea ni dub ya ubiꞌi. Nabtsa be men naꞌanpa noꞌo se ten Dios xtuzh na god ma.
REV 9:5 Leꞌa angel wa ndab naꞌanpa gut bema bexa wa, ndi utsaksitsa ma bexa dub gaꞌay mbeꞌe. Leꞌa gealkweaꞌ ten ma wa lak gealkweaꞌ ndod be nix.
REV 9:6 Leꞌa gal be wizh wa leꞌa be men ukwaꞌan ná xteꞌe gat bexa, ná leꞌa bexa lá yoo gan gat. Nlad xa gat xa, ná leꞌa gealgut ndi uxoꞌon ndoꞌ bexa.
REV 9:7 Leꞌa be mbit wa cuent nak way list ndebe yaꞌ ndoꞌ guerr. Leꞌa gek ma nsob dub ta cuent nak coron ta oro. Leꞌa ndoꞌ ma nak cuent ndoꞌ be men.
REV 9:8 Leꞌa gichgek ma nak cuent gichgek xagots. Leꞌa ndeay ma nak cuent ndeay mbiꞌizh.
REV 9:9 Leꞌa las ma ntsaw be xo cuent xo giꞌib. Leꞌa be xkwag ma nbezh lak nbezh sianpa carret ten way karrel nchaꞌbe ndoꞌ guerr.
REV 9:10 Leꞌa ndoꞌ xne ma nsob dub xguꞌuch ma, ta cuent nak xguꞌuch nix. Leꞌa ta wa ndap juers utsaksi ma be men dub gaꞌay mbeꞌe.
REV 9:11 Leꞌa xa nibeꞌe ten be mbit wa, leꞌa ta wa dub mbi bxin nibeꞌe geꞌed doꞌo wa. Leꞌa diꞌizh hebreo leꞌa mbi bxin wa nsaleaꞌ Abadón, leꞌa diꞌizh griego leꞌa ta wa Apolión.
REV 9:12 Li utid gealkweaꞌ ned wa, parea ndun jwalt ilen stop gealkweaꞌ.
REV 9:13 Leꞌa angel isaxoꞌop wa cha mkweꞌezh trompet ten na, cha mbín naꞌ cuent ti dub men utoꞌo lat idap be xkach altar ta oro wa, ta nde lad ndoꞌ sa nsob Dios.
REV 9:14 Cha ndab ti men wa ndoꞌ angel isaxoꞌop wa, xa nsén trompet: —Bxaꞌak idap be angel ndenchii sa nax yowbeꞌe siꞌil nsaleaꞌ Eufrates.
REV 9:15 Cha weꞌe myaꞌak idap be angel wa, bexa ndenkeaꞌ gut gax itol be men nde ndoꞌ gizhliyo. Leꞌa Dios leꞌa ndab ná xá gor‑a no xá wizh na‑yá no xá mbeꞌe na‑yá no xá liꞌin na li gun bexa.
REV 9:16 Cha mbín naꞌ ndab xa plo kwaꞌad be soldad ndiꞌib tsoꞌo way. Leꞌa ta wa top gayoꞌo millón bexa.
REV 9:17 Cha uní naꞌ ta mluu Dios ndoꞌ naꞌ, leꞌa be way nsea bexa ndiꞌib tsoꞌo ma. Leꞌa ta ntsaw ladoꞌo bexa wa nane naꞌ cuent giꞌ, no azul naꞌ‑yá cuent naꞌ zafiro, no guch naꞌ‑yá cuent naꞌ azufre. Leꞌa gek be way wa cuent nak gek mbiꞌizh nak, leꞌa toꞌo ma ntoꞌo giꞌ no zhen no azufre.
REV 9:18 Cha ngut gax itol be men nde ndoꞌ gizhliyo, ta na li ntoꞌo giꞌ nsea zhen nsea azufre toꞌo way wa.
REV 9:19 Leꞌa ta juert nak be way wa, leꞌa ta wa xne ma nsea toꞌo ma. Leꞌa xne ma cuent nak mbeꞌal nak, ndap‑a gek‑a ta weꞌe ndawkeꞌa ma men.
REV 9:20 Leꞌa iteata be men lá ngat ndoꞌ be gealkweaꞌ wa, ni lika ná lá kaꞌab bexa ulaꞌa bexa be ta ugap ndun bexa, ta ndankea bexa be mbi bxin no be dios gizhliyo, be ta oro, nsea plata, nsea bronce, nsea geꞌ, nsea ya, be taꞌa ni lá naꞌ, no ni lá ndoꞌón, no ni lá nsea.
REV 9:21 No ni lá nlaꞌa bexa ta ndut bexa men, no ta bruj ndun bexa, no ta na ngal bexa dub men naꞌanpa xa ten bexa, no ta ndun bexa gealwaꞌan.
REV 10:1 Cha uní naꞌ stub angel juert utoꞌo gibeꞌa, nsea xa lat dub xkaw, no dub mbeꞌalzhin nkea gek xa. Leꞌa ndoꞌ xa wa uzheꞌeb nlaꞌbealꞌ cuent ndoꞌ wizh. Leꞌa idub xoꞌo xa uzhebpa nsoꞌ bealꞌ nsayolꞌ.
REV 10:2 Leꞌa yaꞌa xa nsob dub libr tuzh nsaꞌnyaꞌal ndoꞌ na. Leꞌa xoꞌo xa ná lad gaꞌal cha ulatsoꞌ ndoꞌ nitsdoꞌo, leꞌa ná raves ulatsoꞌ ndoꞌ yo.
REV 10:3 Cha ugeꞌ utezhat xa cuent gor ngiꞌi dub mbiꞌizh, cha ugeꞌ uníꞌi usiꞌi dub gaꞌad biaj.
REV 10:4 Leꞌa gor mtaníꞌi usiꞌi wa, leꞌa naꞌ ndiꞌizh ukeꞌa ta ndab usiꞌi wa, parea leꞌa naꞌ mbín dub diꞌizh utoꞌo gibeꞌa, ndab‑a ndoꞌ naꞌ: —Naꞌanpa ukeꞌa lu be ta ndab isagaꞌad usiꞌi wa, ndi nabtsa lu uniꞌí xtaꞌan‑a.
REV 10:5 Leꞌa angel na li uní naꞌ ulatsoꞌ ndoꞌ nitsdoꞌo no ndoꞌ yo wa, cha uxits xa dub yaꞌa xa gaꞌap.
REV 10:6 Cha ndab xa: —Lak ta ugeakapa ncho Dios nban idub tiemp, xa mtexan gibeꞌa no gizhliyo no nitsdoꞌo no iteata be ta ncho, no liga ta ugeakapa nak leꞌa tiemp gun Dios ta mbinbeꞌe xa wa yá ngol.
REV 10:7 Leꞌa gor na ukweꞌezh angel isagaꞌad wa trompet wa, leꞌa Dios gun itea be ta ugaꞌach mbinbeꞌe xa gun xa, lak mbidiꞌizh bexa polta sakndoꞌ Dios, bexa mbin tiꞌin ndoꞌ xa.
REV 10:8 Leꞌa ti men na li mbín naꞌ utoꞌo gibeꞌa wa uníꞌigal ndoꞌ naꞌ, ndab xa: —Waꞌ, cha usen libr nsaꞌnyaꞌal ndoꞌ na baꞌ, ta lbaꞌa nsén angel baꞌ wa, xa nsoꞌ ndoꞌ nitsdoꞌo nsea ndoꞌ yo.
REV 10:9 Cha ngwaa naꞌ ndoꞌ angel, cha ndáp naꞌ usaꞌa xa libr wa ndoꞌ naꞌ. Leꞌa xa cha ndab ndoꞌ naꞌ: —Usen‑a, cha udaw‑a. Leꞌa gor na ncho‑yá toꞌo lu leꞌa‑yá utiꞌi cuent mzhin, ná leꞌa gor na kab lu‑yá leꞌa‑yá yak ulaꞌ len lu.
REV 10:10 Cha weꞌe usen naꞌ libr tuzh nsob yaꞌa angel wa, cha udaw naꞌ‑yá. Leꞌa‑yá utiꞌika gor na ncho‑yá toꞌo naꞌ lak utiꞌi mzhin, ná leꞌa gor na udab naꞌ‑yá, leꞌa‑yá cha myak ulaꞌ len naꞌ.
REV 10:11 Leꞌa angel wa cha ndab ndoꞌ naꞌ: —Leꞌa lu nsabndoꞌ gudiꞌizh sakndoꞌ Dios stub biaj xteꞌe gunno Dios be gezh, nsea be nacion, nsea bexa ndadiꞌizh isandoꞌ diꞌizh, nsea bexa nibeꞌe ndoꞌ gizhliyo.
REV 11:1 Weꞌe cha usen naꞌ dub lod cuent bar nkeꞌa medid, cha mbín naꞌ dub ta cuent ti men ndab: —Waꞌ, cha bkeꞌa medid niꞌi ten Dios nsea ndoꞌ altar, no blaꞌab bexa ndankea Dios sa wa.
REV 11:2 Parea naꞌanpa ukeꞌa medid lu no tale ten niꞌi wa, leꞌa sa wa myak cuent ndoꞌ bexa lá nchandoꞌ Dios. Leꞌa bexa wa leꞌa inibeꞌe gezh ten Dios dub top gaꞌal ncho top mbeꞌe.
REV 11:3 Leꞌa naꞌ utuꞌub top men gudiꞌizh sakndoꞌ Dios dub mil ncho top gayoꞌo ncho chon gaꞌal wizh. Leꞌa bexa wa gak lad nagats, ta na nluu leꞌa bexa uban ncho ladna.
REV 11:4 Leꞌa itop bexa ndadiꞌizh wa nak cuent top ya olivo nsea top candeler, ta nde ndoꞌ Dios xa nibeꞌe ndoꞌ gizhliyo.
REV 11:5 Tal ton dub men nlad ugap gunno bexa wa, leꞌa bexa wa itoꞌo bealꞌ toꞌo na, ta utsoꞌol be men gakloo ndoꞌ bexa wa. Li gat itea be men nlad ugap gunno bexa.
REV 11:6 Leꞌa itop bexa wa gap juers utsaw bexa gibeꞌa, ndontsa lá ilaꞌ gi idub zha na gudiꞌizh bexa sakndoꞌ Dios. No gap bexa juers yunno bexa nits wa ten, no sian be gealkweaꞌ gast plo nlad bexa utsaksi bexa be men nde ndoꞌ gizhliyo.
REV 11:7 Leꞌa zha mtayadiꞌizh bexa wa, leꞌa dub man uzheꞌeb itoꞌo len geꞌed doꞌo. Cha kuyono ma itop xa wa, cha gun ma gan gat bexa.
REV 11:8 Leꞌa bexa ngut wa kwesaꞌal ndoꞌ xgeꞌe ten gezh wa, sa ngut Cristo ndoꞌ cruz. Leꞌa bexa gezh wa ugap nak cuent bexa Sodoma nsea bexa Egipto.
REV 11:9 Leꞌa bexa itea be gezh, no bexa itea be ras be men, no bexa ndadiꞌizh itea be diꞌizh, nsea bexa itea be nacion iniꞌí ndesaꞌal bexa wa chon wizh itol. No ni lá ulaꞌa bexa igaꞌach bexa ngut wa.
REV 11:10 Leꞌa be men gizhliyo uzhebpa iten ladna geal ngut bexa wa, gast usaꞌa bexa be regal ikaꞌa be ltsaꞌa bexa, leꞌa itop bexa wa mbin uzhebpa gealkweaꞌ utid be men.
REV 11:11 Leꞌa zha na ngwaꞌa chon wizh itol wa, leꞌa Dios cha msaꞌa gealnaban ten bexa, mban bexa ndoꞌ gealgut. Cha uzhebpa mzheb be men uniꞌí bexa wa.
REV 11:12 Cha mbiꞌín itop bexa wa dub diꞌizh ugeꞌ utoꞌo gibeꞌa, ndab‑a: —Ukea bega sa ndee. Weꞌe cha mkea bexa gibeꞌa ndoꞌ dub xkaw, ndewiꞌi bexa ndaklono bexa wa.
REV 11:13 Cha bi leꞌa gor wa ngok dub xoꞌo siꞌil. Leꞌa dub bleꞌa tuzh gezh wa myubyoꞌo, cha ngut dub gaꞌad mil men. Leꞌa bexa naꞌanpa ngat wa uzhebpa mzheb, ndab bexa leꞌa Dios nsob gibeꞌa uzheꞌeb dub Dios juert nak.
REV 11:14 Li utidla top gealkweaꞌ wa, parea leꞌa ta yon wa sken ilen.
REV 11:15 Leꞌa angel isagaꞌad wa cha mkweꞌezh trompet ten na. Cha mgen cuent ti be men gibeꞌa ugeꞌ ndab xa: Leꞌa sa nibeꞌe be men ndoꞌ gizhliyo myak sa nibeꞌe Dios ten beuna nsea Cristo. Leꞌa xa wa leꞌa inibeꞌe idub tiemp.
REV 11:16 Leꞌa isagaꞌal bdap bexa gox xa nsak nde ndoꞌ be yaxil lad ndoꞌ Dios, cha msaxib bexa gast ndoꞌ yo ngol xtuzh bexa, ngwankea bexa Dios,
REV 11:17 cha ndab bexa: Nsaꞌa besa xno ndoꞌ go Dios Xa Nibeꞌe, xa ndon leꞌa juert ndoꞌ itea be taꞌa. Leꞌa go leꞌa nak Dios nat no polta no idub tiemp ilen ndee. Leꞌa go nsobno juers siꞌil ten ga, nat leꞌa go leꞌa nibeꞌe.
REV 11:18 Leꞌa be men gizhliyo ngoklobe ndoꞌ go, ná leꞌa nat ngol wizh utsaksi ga bexa. No gab go ndoꞌ bexa ngutla ná xteꞌe nak be taꞌa mbin bexa. No usaꞌa ga ta wen ikaꞌa bexa ndadiꞌizh sakndoꞌ ga, bexa ndun tiꞌin ten ga, no bexa umbiꞌi ten ga, no itea bexa nxobgek ndoꞌ ga, lak bexa nsak no bexa naꞌanpa xa nsak. No unitndoꞌ ga bexa ndut be men ndoꞌ gizhliyo.
REV 11:19 Cha myaꞌal niꞌi ten Dios gibeꞌa. Leꞌa len niꞌi wa mluu caj ten Dios. Cha ulaꞌ bealꞌ usiꞌi, no uzheꞌeb nsoꞌ ruid, no uníꞌi usiꞌi. No ngok dub xoꞌo siꞌil, no uzheꞌeb ulaꞌ gigeꞌ ubiꞌi.
REV 12:1 Cha mluu dub ta uzheꞌeb gibeꞌa. Leꞌa ta wa dub xagots cuent wizh naꞌ xab xa, nsea xoꞌo xa ndiꞌib tsoꞌo mbeꞌe, nsea nsob dub coron gek xa. Leꞌa gek coron wa ndiꞌib dub tibtop ta cuent mbeal ndiꞌib gibeꞌa.
REV 12:2 Leꞌa xagots wa dub xa nchoxinna, ta weꞌe nbezhat xa nsea gealkweaꞌ gal xin xa.
REV 12:3 Cha no mluu stub taꞌa gibeꞌa. Leꞌa ta wa dub dragón nane, dub ma cuent nak wach siꞌil. Ndap ma gaꞌad gek ma, no dub tiꞌi xkach ma, nsea dub coron nsob kadga dub gek ma.
REV 12:4 Leꞌa xne dragón wa udobxazh gax itol be mbeal ndiꞌib gibeꞌa, cha ulate‑yá ndoꞌ gizhliyo. Cha ngwaꞌisoꞌ ma lad ndoꞌ xagots li gal xin na wa, ndontsa gaw ma xin xagots wa gor gal meꞌed.
REV 12:5 Leꞌa xagots wa cha ngop xin na dub meꞌed bgiꞌi, dub xa uzhebpa juert gak inibeꞌe ndoꞌ itea be nacion. Parea leꞌa dub angel cha myoꞌo meꞌed wa gast ndoꞌ yaxil sa nsob Dios.
REV 12:6 Leꞌa xagots wa cha mxoꞌon geꞌe sa bid, dub sa yá list nak msaxkwaꞌa Dios, ndontsa sa weꞌe ulaꞌach Dios xa dub mil ncho top gayoꞌo ncho chon gaꞌal wizh.
REV 12:7 Tsoꞌo wa uyoꞌo dub uyo siꞌil gibeꞌa. Leꞌa Miguel dub angel nibeꞌe nsea be ltsaꞌa xa uteyono dragón wa nsea be ltsaꞌa dragón.
REV 12:8 Weꞌe leꞌa dragón no be ltsaꞌa na wa lá ngun gan. Cha yá naꞌanta sa yoo dragón no be ltsaꞌa na gibeꞌa.
REV 12:9 Weꞌe leꞌa Miguel wa cha mtsaꞌab dragón tsoꞌo juer. Leꞌa ma wa mbeꞌal polta nsaleaꞌ maxuꞌu nsea Satanás, ma na li nkedino be men ncho idub nax ndoꞌ gizhliyo. Cha ulayat dragón no be ltsaꞌa na ndoꞌ gizhliyo.
REV 12:10 Cha weꞌe mbín naꞌ dub diꞌizh utoꞌo gibeꞌa ugeꞌ ndab: Nat ngol wizh leꞌa Dios ten beuna myun libr be xmen na, no mluu xa juers ten xa, no nibeꞌe xa, no msoꞌ xa Cristo inibeꞌe xa ndoꞌ gizhliyo. Nat leꞌa xa wa ulantuꞌub maxuꞌu na li nsake be ltsaꞌa beuna ndoꞌ Dios teꞌal tezhea.
REV 12:11 Leꞌa bexa wa mbin gan ndoꞌ maxuꞌu, ta na li mtsiꞌi Borreg ten ten na. No ta na li mbidiꞌizh bexa diꞌizh ten Dios, naꞌanpa izheb bexa gast mbit be men bexa.
REV 12:12 ¡Nat bten ladna lu gibeꞌa no bego ncho sa baꞌ! Parea proꞌob bego na ncho ndoꞌ gizhliyo nsea ndoꞌ nitsdoꞌo, leꞌa maxuꞌu uzhebpa ndakloo ulayat ndoꞌ gizhliyo. Leꞌa maxuꞌu uniꞌí leꞌa naꞌantapa kwen nkesea.
REV 12:13 Leꞌa gor na uniꞌí dragón wa leꞌa ma ulayat ndoꞌ gizhliyo, cha usankea ma tsoꞌo xagots na li ngop meꞌed bgiꞌi wa.
REV 12:14 Cha msaꞌa Dios top xkwag xagots wa cuent xkwag mtsi siꞌil, ndontsa isaꞌab xa sit uxoꞌon xa ndoꞌ dragón wa sa bid. Nchaꞌa xa sa ten xa, sa na ulaꞌach Dios xa chon liꞌin itol.
REV 12:15 Leꞌa toꞌo dragón wa cha utoꞌo nits mtsaꞌab ma tsoꞌo xagots wa cuent dub yowbeꞌe, ndiꞌizh goꞌo‑yá xagots wa.
REV 12:16 Parea leꞌa gizhliyo ngokno xagots wa, ubiꞌil ndoꞌ yo, cha ngu‑yá nits na utoꞌo toꞌo dragón wa.
REV 12:17 Weꞌe leꞌa dragón uzhebpa mxee ladna ndoꞌ xa wa. Cha ngwateyono ma itea be xin xagots wa, bexa na nxobgek ndoꞌ ta nibeꞌe Dios, no ndadiꞌizh bexa gealngea ten Jesucristo.
REV 13:1 Leꞌa naꞌ nsoꞌ ndoꞌ yux toꞌo nitsdoꞌo, cha uní naꞌ utoꞌo dub man uzheꞌeb ndoꞌ nitsdoꞌo, ndap ma gaꞌad gek ma nsea tiꞌi xkach ma. Leꞌa kadga dub xkach ma wa nsob dub coron. Leꞌa kadga gek ma wa nkea dub leaꞌ Dios, dub ta nisi ma Dios.
REV 13:2 Leꞌa naꞌ uní leꞌa las ma naꞌ cuent naꞌ las mbiꞌizh leopardo. Leꞌa be xoꞌo ma cuent nak xoꞌo os. Leꞌa toꞌo ma cuent nak toꞌo mbiꞌizh león. Leꞌa dragón msaꞌa sa nibeꞌe na no juers ten na ndoꞌ man uzheꞌeb wa.
REV 13:3 Cha uní naꞌ leꞌa dub gek ma wa mwiꞌi cuent ta ngutla, parea leꞌa sa mwiꞌi wa myaklana. Ta weꞌe leꞌa itea be men ncho ndoꞌ gizhliyo ngwanseana, no usankea bexa tsoꞌo ma.
REV 13:4 No ngwankea bexa dragón ma na li msaꞌa juers ten na ndoꞌ man uzheꞌeb wa. No ngwankea bexa man uzheꞌeb wa, ndab bexa: —¿Tonma dub xa juert lakta ma baꞌ? ¿No ton dub xa gun gan kuyono ma baꞌ?
REV 13:5 Leꞌa Dios mlaꞌa izhinna ma be ta ndák ma, no kweaꞌ iníꞌi ma ndoꞌ Dios. No mlaꞌa Dios inibeꞌe ma lak nlad ma dub top gaꞌal ncho top mbeꞌe.
REV 13:6 Cha unisi ma Dios no leaꞌ Dios no sa nsob Dios nsea bexa ncho wats Dios gibeꞌa.
REV 13:7 No mlaꞌa Dios kuyono ma be xmen Dios, no gun ma gan ndoꞌ bexa. No msaꞌa xa inibeꞌe ma ndoꞌ itea ras be men, no bexa ncho itea be gezh, no bexa ndadiꞌizh isandoꞌ diꞌizh, no bexa itea be nacion.
REV 13:8 Leꞌa itea bexa ncho ndoꞌ gizhliyo ngwankea ma, bexa naꞌanpa nkea leaꞌ na ndoꞌ libr ten Borreg Ben, xa na li ngut sakndoꞌ be men. Gast zha utexanta gizhliyo, leꞌa ndoꞌ libr wa nkeala leaꞌ bexa gap gealnaban nunk lá idub.
REV 13:9 Tal leꞌa bega ndap nchaꞌ na, bsakyoꞌón bega ta ndáp naꞌ ndee.
REV 13:10 Tal ncho bego nsabndoꞌ yaꞌ litgiꞌib, leꞌa bega yaꞌka litgiꞌib. No tal leꞌa ncho bega nsabndoꞌ gat ndoꞌ spad, leꞌa bega gatka ndoꞌ spad. Leꞌa ta wa gab leꞌa be xmen Dios nsabndoꞌ uxik ndoꞌ be gealkweaꞌ, no igeꞌ ladna bexa Dios.
REV 13:11 Tsoꞌo wa uní naꞌ stub man uzheꞌeb utoꞌo len yo. Leꞌa ma wa ndap top xkach na lak nak xkach borreg, parea ndadiꞌizh ma lak ndadiꞌizh dub dragón.
REV 13:12 Leꞌa ma wa ndap juers msaꞌa ma ned wa, ndontsa no ma inibeꞌe wats ma wa. Leꞌa ma nibeꞌe ndoꞌ itea be men ncho ndoꞌ gizhliyo yankea bexa ma ned wa, ma na li mwiꞌi cha myakna wa.
REV 13:13 No mbin ma be ta uzheꞌeb ndanseana be men, gast utoꞌo giꞌ gibeꞌa gast ndoꞌ yo ndoꞌ gaꞌal be men.
REV 13:14 No mkwiꞌinno ma be men ta na mbin ma be ta uzheꞌeb wa juers ten man ned wa. Cha unibeꞌe ma ndoꞌ be men nde ndoꞌ gizhliyo, gundeꞌe xa dub taꞌa lak nak ma ned wa, ma li mwiꞌi ngwa spad gek na wa, cha mban ma.
REV 13:15 Cha msaꞌa man itop wa gealnaban ndoꞌ ta cuent nak ma ned wa, ndontsa iníꞌi‑yá no inibeꞌe‑yá gat itea bexa na lá yankea‑yá.
REV 13:16 Leꞌa man itop wa cha unibeꞌe ndoꞌ iteanak be men ikea se yaꞌa lad gaꞌal xa natal xtuzh xa, bexa nsak nsea bexa naꞌanpa nsak, bexa rik nsea bexa uban nak, bexa libr no bexa nchaꞌndoꞌo ndoꞌ yaꞌa stubga men.
REV 13:17 Ni dub be men lá yoo gan isiꞌi taꞌa no ni udoꞌo xa taꞌa, tal leꞌa xa naꞌanpa noꞌo se wa, natal xa naꞌanpa noꞌo leaꞌ man ned wa, natal xa naꞌanpa noꞌo numr ten leaꞌ ma wa.
REV 13:18 Ta ndee nlad dub xa list nak yakbeꞌena, ulaꞌab xa numr ten man wa, leꞌa ta wa numr ten dub mgiꞌi. Leꞌa numr wa xoꞌop gayoꞌo ncho chon gaꞌal ncho xoꞌop.
REV 14:1 Leꞌa tsoꞌo wa uní naꞌ leꞌa Borreg Ben wa nsoꞌ gek geꞌe Sion, nsea dub gayoꞌo ncho top gaꞌal ncho dap mil bexa, bexa nkea leaꞌ xa nak Borreg xtuzh na nsea leaꞌ Xus xa wa.
REV 14:2 Cha mbín naꞌ nbezh dub ta ulen gibeꞌa, cuent dub sa nsalaꞌ kwaꞌal nits, nsea cuent níꞌi usiꞌi, nsea cuent ti sianpa arpa ndoꞌol bexa.
REV 14:3 Nsea ndaltoꞌo bexa dub cant kub lad ndoꞌ yaxil, sa ndiꞌib idap be ta nban wa nsea bexa gox xa nsak wa. Naꞌan ton gun gan utsid goltoꞌo cant wa, nabtsa dub gayoꞌo ncho top gaꞌal ncho dap mil bexa, bexa na uloꞌo Dios lat be men ncho ndoꞌ gizhliyo.
REV 14:4 Leꞌa xa wa bexa na naꞌanpa ugal ni dub xagots, leꞌa bexa xa umbiꞌi nak ndoꞌ Dios. No nsankea bexa tsoꞌo Borreg Ben guniꞌi pa nchaꞌa xa. Leꞌa bexa wa bexa mti Dios lat be men, nak bexa cuent dub ta ned gak xnab ndoꞌ Dios nsea ndoꞌ Borreg.
REV 14:5 Leꞌa bexa wa ni dub gealkwiꞌin lá ngun, no umbiꞌi nak bexa kwe bexa ndoꞌ sa nsob Dios.
REV 14:6 Cha uní naꞌ stub angel nchaꞌnsaꞌab gibeꞌa, noꞌo diꞌizh wen ten Dios ta nunk lá idub, ta gudiꞌizh angel ndoꞌ be men ncho ndoꞌ gizhliyo itea be nacion, nsea be ras, nsea be diꞌizh, nsea itea be gezh.
REV 14:7 No uzhebpa ugeꞌ ndab angel wa: —Bzheb bega ndoꞌ Dios, no gud bega leꞌa xa ndon leꞌa xa nsak. Leꞌa nat yá ngol gor na utsaksi xa be men. Wankea bega xa na mbindeꞌe gibeꞌa no gizhliyo no nitsdoꞌo no be sa ndiblen nits.
REV 14:8 Leꞌa stub angel cha utankea ndab: —Yá ulayat, yá ulayat gezh siꞌil Babilonia. Leꞌa bexa gezh wa mkiꞌil be men itea be nacion ndun bexa ta bzhiꞌik, ngwankea bexa be dios gizhliyo.
REV 14:9 Leꞌa angel yon wa utankea no ugeꞌ ndab xa: —Tal ton yankea man uzheꞌeb wa, nsea ta cuent nak man wa, no isob se ten ma xtuzh bexa natal yaꞌa bexa,
REV 14:10 leꞌa bexa wa no iniꞌí be gealkweaꞌ siꞌil utsaꞌab Dios tsoꞌo bexa wa, leꞌa Dios uzheꞌeb ndaklono bexa. Iniꞌí bexa gealkweaꞌ ndoꞌ giꞌ nsea ndoꞌ azufre nsayolꞌ ndoꞌ gaꞌal be angel ten Dios nsea ndoꞌ Borreg Ben wa.
REV 14:11 Leꞌa zhen sa utsaksi Dios bexa wa lá kweaskea idub tiemp. Teꞌal tezhea lá uneꞌe bexa, bexa na ngwankea man uzheꞌeb wa no ta cuent nak man wa, bexa nkea se ten leaꞌ ma.
REV 14:12 Leꞌa bexa umbiꞌi ten Dios nsabndoꞌ uxik ndoꞌ itea be taꞌa, no uxobgek bexa ndoꞌ be ta nibeꞌe Dios, nsea igeꞌ ladna bexa Jesús.
REV 14:13 Cha mbín naꞌ dub diꞌizh utoꞌo gibeꞌa, ndab ndoꞌ naꞌ: —Bkeꞌa ta ndee: leꞌa nat idub ndoꞌ ndee uzhebpa wen yoo ladna bexa nakla xmen Jesús zha ngut bexa. Leꞌa Espíritu ten Dios ndab: “Ugeaka leꞌa bexa baꞌ uneꞌe ndoꞌ be tiꞌin mbin bexa, leꞌa Dios kix be ta wen mbin bexa.”
REV 14:14 Cha mwiꞌi naꞌ no uní naꞌ dub xkaw nagud. Leꞌa ndoꞌ xkaw wa nsob dub xa cuent dub men nsob dub coron ta oro gek xa, nsea dub os wach nsob yaꞌa xa.
REV 14:15 Leꞌa len niꞌi ten Dios cha utoꞌo stub angel ugeꞌ ndab ndoꞌ xa nsob ndoꞌ xkaw wa: —¡Bintiꞌin os ten lu, uxen be taꞌa ndoꞌ yo! Leꞌa nat yá ngol gor ibeleꞌe be taꞌa ndoꞌ gizhliyo, leꞌa‑yá yá ngugaꞌal‑la.
REV 14:16 Weꞌe leꞌa xa nsob ndoꞌ xkaw wa mbintiꞌin os ten na ndoꞌ gizhliyo, mteleꞌe xa be taꞌa.
REV 14:17 Weꞌe utoꞌo stub angel len niꞌi ten Dios nde gibeꞌa. Leꞌa xa no nsob dub os wach yaꞌa na.
REV 14:18 Leꞌa sa nde altar wa utoꞌo stub angel nibeꞌe ndoꞌ giꞌ. Cha ugeꞌ ndab xa ndoꞌ angel nsén os wa: —¡Bintiꞌin os ten lu! ¡Uxen be bex uv nde ndoꞌ gizhliyo baꞌ, leꞌa‑yá yá ngugeala!
REV 14:19 Leꞌa angel wa cha mbintiꞌin os ten na ndoꞌ gizhliyo, uxen xa be bex uv, cha ulo xa uv wa sa gachkeꞌe‑yá. Leꞌa ta wa gab ta uzheꞌeb utsaksi Dios be men ugap.
REV 14:20 Cha ngochkeꞌe be uv wa dub lad toꞌo gezh wa. Leꞌa len sa ngochkeꞌe uv wa ulen ten. Leꞌa ten wa ngwapyoꞌo dub lak sa ndakea fren ten dub way. Cha li mxoꞌon ten wa pa dub chon gayoꞌo mil metr koꞌol sa.
REV 15:1 Cha uní naꞌ dub ta uzheꞌeb gibeꞌa, dub ta ngwanseana naꞌ. Leꞌa ta wa dub gaꞌad angel noꞌo stub sgaꞌad gealkweaꞌ, be ta lult ilen. Cha li yandoꞌ ta ntsaksi Dios be men.
REV 15:2 No uní naꞌ dub ta cuent nitsdoꞌo waꞌán, cuent naꞌ vidr noch giꞌ. Leꞌa ndoꞌ nitsdoꞌo wa ndebe bexa mbin gan ndoꞌ man uzheꞌeb wa, no ndoꞌ ta cuent nak man wa, no ndoꞌ se ten ma, no ndoꞌ numr ten leaꞌ ma wa. Leꞌa bexa wa nsén be arpa ten Dios.
REV 15:3 Ndaltoꞌo bexa dub cant, ta mbiltoꞌo Moisés xa mbin tiꞌin ndoꞌ Dios, no ndaltoꞌo bexa cant ten Borreg Ben wa, ndab bexa: Go Dios Xa Nibeꞌe, xa ndon leꞌa juert ndoꞌ itea be taꞌa. Uzheꞌeb ndanseana besa ndoꞌ be ta uzhebpa siꞌil ndun go. Itea be taꞌa ndun go utsinka nak no gealngea nak‑a, leꞌa go nibeꞌe itea be men umbiꞌi ten ga.
REV 15:4 ¿Ton lá izheb ndoꞌ go Dios? ¿No ton lá gab leꞌa go dub Dios uzheꞌeb juert? Leꞌa go nabkama nak Dios umbiꞌi. Leꞌa be men itea be nacion ilen ndoꞌ go, yankea bexa go, leꞌa bexa uniꞌí leꞌa itea be taꞌa ndanno ga bexa uzheꞌeb ta nsak no ta nsabndoꞌ.
REV 15:5 Leꞌa tsoꞌo wa cha mwiꞌi naꞌ, cha uní naꞌ myaꞌal niꞌi ten Dios nde gibeꞌa, sa ncho caj ten Dios.
REV 15:6 Leꞌa len sa wa cha utoꞌo isagaꞌad be angel noꞌo isagaꞌad gealkweaꞌ, bexa nak be lad lino ta umbiꞌi ndon nlaꞌbealꞌ. Nsea ncho dub sinch oro ta ladoꞌo bexa.
REV 15:7 Leꞌa dub be ta nban wa msaꞌa dubga vas oro ndoꞌ isagaꞌad be angel wa, ncho be taꞌa ndakloo Dios len na, Dios xa nban idub tiemp.
REV 15:8 Leꞌa len niꞌi ten Dios wa mzhea ncho zhen, ta nluu leꞌa Dios xa juert no siꞌil nak Dios. No naꞌan ton gun gan yate len niꞌi ten Dios gast yooka isagaꞌad be gealkweaꞌ, ta ncho len be vas nsén be angel wa.
REV 16:1 Cha mbín naꞌ cuent dub ti men utoꞌo len niꞌi ten Dios, ugeꞌ ndab‑a ndoꞌ isagaꞌad be angel wa: —Waꞌ bega, cha blatsob bega ta ncho len isagaꞌad vas baꞌ ndoꞌ gizhliyo, leꞌa ta wa ta utsaksi Dios be men.
REV 16:2 Leꞌa angel ned wa utoꞌo, ngwaꞌ ulatsob ta ncho len vas ten na ndoꞌ gizhliyo. Cha ulen geꞌezh ugiꞌi las bexa nsob se ten man uzheꞌeb wa, bexa na ndankea ta cuent nak man wa.
REV 16:3 Leꞌa angel itop wa ngwaꞌ ulatsob ta ncho len vas ten na ndoꞌ nitsdoꞌo. Cha myak‑a cuent ten ten dub xa ngut. Cha ngut iteanak be man ndencho len nitsdoꞌo wa.
REV 16:4 Leꞌa angel yon wa ngwaꞌ ulatsob ta ncho len vas ten na ndoꞌ be nits yowbeꞌe no be sa ndiblen nits. Leꞌa be nits wa cha myak ten.
REV 16:5 No mbín naꞌ uníꞌi angel nibeꞌe nits wa, ndab xa: Go Dios, xa nak Dios nat no idub tiemp utid wa, leꞌa go uzhebpa umbiꞌi nak, no utsin ndun ga ntsaksi ga be men lak nsabndoꞌ‑yá.
REV 16:6 Leꞌa bexa wa mtsiꞌi ten ten be men umbiꞌi ten go no bexa mbidiꞌizh sakndoꞌ go, ta weꞌe mtsaksi go bexa ngu bexa ten lak nsabndoꞌ‑yá.
REV 16:7 No mbín naꞌ stub ti men utoꞌo sa nde altar wa, ndab xa: Go Dios Xa Nibeꞌe, xa ndon leꞌa juert ndoꞌ itea be taꞌa. Leꞌa ta mtsaksi go be men baꞌ utsinka nak, no nsabndoꞌka li mbin ga.
REV 16:8 Leꞌa angel idap wa ngwaꞌ ulatsob ta ncho len vas ten na ndoꞌ wizh, ndontsa uchu giꞌ ten wizh wa be men.
REV 16:9 Cha ulen dub xtii siꞌil mchu be men. Weꞌe leꞌa bexa wa unisi Dios, xa leꞌa nibeꞌe ndoꞌ be gealkweaꞌ wa. Ná leꞌa bexa wa naꞌanpa ulaꞌa ta ugap nak bexa, no lá ngankea bexa Dios.
REV 16:10 Leꞌa angel isagaꞌay wa ngwaꞌ ulatsob ta ncho len vas ten na sa nsob man uzheꞌeb. Leꞌa sa nibeꞌe man wa cha mkaw. Leꞌa be men gast ndawkeꞌa be luzh na tant kweaꞌ ndencho bexa.
REV 16:11 Leꞌa bexa wa cha unisi Dios xa nsob gibeꞌa, ke ten be gealkweaꞌ no be geꞌezh wa. Ná naꞌanpa ulaꞌa bexa ta ugap nak bexa.
REV 16:12 Leꞌa angel isaxoꞌop wa ngwaꞌ ulatsob ta ncho len vas ten na ndoꞌ nits yowbeꞌe siꞌil nsaleaꞌ Eufrates. Leꞌa nits wa cha ubid ndontsa syoꞌo gan itakea bexa nibeꞌe wa, bexa ntoꞌo lad nlen wizh.
REV 16:13 Cha uní naꞌ leꞌa toꞌo dragón wa, nsea toꞌo man uzheꞌeb wa, nsea toꞌo profet ukwiꞌin wa utoꞌo dub gaꞌga mbi bxin cuent nak mbid.
REV 16:14 Leꞌa ta wa mbi bxin ten maxuꞌu, be na ndun be ta ndanseana be men. Nchaꞌbe be na wa ndoꞌ bexa nibeꞌe idub ndoꞌ gizhliyo, izhealbe bexa gal wizh uzheꞌeb ten Dios, ndontsa kuyono bexa Dios, xa ndon leꞌa juert nak.
REV 16:15 Cha ndab Jesús: “Blaꞌach bego leꞌa naꞌ ilen dub gor ni lá ndanbeꞌe bega cuent nlaꞌ dub waꞌan. Uzhebpa wen bexa ndenaꞌ, no list ndenak bexa xab xa, ndontsa naꞌanpa xinteꞌe bexa, no ni lá ido ladna bexa gal zha wa.”
REV 16:16 Cha mchealte be mbi bxin bexa nibeꞌe wa dub sa nsaleaꞌ Armagedón diꞌizh hebreo.
REV 16:17 Leꞌa angel isagaꞌad wa ngwaꞌ ulatsob ta ncho len vas ten na ndoꞌ mbi. Leꞌa len niꞌi ten Dios sa nsob Dios gibeꞌa wa, cha ulen cuent ti men ugeꞌ ndab: —¡Leꞌa ta wa myandoꞌla!
REV 16:18 Weꞌe cha ulaꞌ bealꞌ usiꞌi no uzheꞌeb usoꞌ ruid no uníꞌi usiꞌi. No ngok dub xoꞌo siꞌil mas uzheꞌeb mwiꞌin ndoꞌ iteanak be xoꞌo ngok idub zha ndencho be men ndoꞌ gizhliyo.
REV 16:19 Leꞌa gezh siꞌil Babilonia myak chon bleꞌa, no ulate be gezh ubiꞌi nde ndoꞌ gizhliyo. Leꞌa Dios lá yalad gezh Babilonia wa, leꞌa xa ndi uzheꞌeb mtsaksi‑yá idub lak ta ndakloo xa.
REV 16:20 Leꞌa iteanak be isla ndesaꞌal ndoꞌ nitsdoꞌo cha unitndoꞌ, nsea itea be geꞌe ubiꞌi.
REV 16:21 Cha ulaꞌ sian gigeꞌ ubiꞌi tsoꞌo be men. Leꞌa be gigeꞌ wa uzhebpa ta kweꞌa, pa top gaꞌal kil kadga dub‑a. Leꞌa be men cha unisi Dios ta li ulaꞌ gigeꞌ wa, geal utid bexa dub gealkweaꞌ uzhebpa ta siꞌil.
REV 17:1 Leꞌa lat isagaꞌad angel nsén be vas wa, utoꞌo dub angel cha ndab xa ndoꞌ naꞌ: —Utsea, leꞌa naꞌ uluꞌu plo utsaksi Dios ngots ndun juis mgiꞌi wa, ngots nsob ndoꞌ nits kwaꞌal baꞌ.
REV 17:2 Leꞌa bexa nibeꞌe ndoꞌ gizhliyo no be men ncho ndoꞌ gizhliyo mcheꞌal xagots wa, cuent usudna bexa no be ta bzhiꞌik ndun xa wa.
REV 17:3 Leꞌa ndoꞌ ta li mluu Espíritu ten Dios ndoꞌ naꞌ wa, leꞌa angel wa cha mbiꞌi naꞌ dub sa bid. Cha uní naꞌ leꞌa xagots wa nsob tsoꞌo dub man uzheꞌeb, dub man nane. Idub las ma nkeaniꞌi be leaꞌ Dios ta unisi ma Dios. Leꞌa ma ndap dub gaꞌad gek ma nsea dub tiꞌi xkach ma.
REV 17:4 Leꞌa xagots wa nak dub lad konch ugats no lad nane. Leꞌa las xa uzhebpa nsoꞌ be ta oro no be geꞌ chul no be perla. Leꞌa yaꞌa xa nsob dub vas oro. Leꞌa len vas wa ncho be ta uzhebpa ta ugap no ta bzhiꞌik ndun xa.
REV 17:5 Leꞌa xtuzh xa wa nkea stub leaꞌ xa, dub ta ugaꞌach nak, ndab‑a: “Babilonia siꞌil, xa nak xnaꞌa itea be xagots ndun juis mgiꞌi, nsea itea be ta bzhiꞌik ncho ndoꞌ gizhliyo.”
REV 17:6 Weꞌe uní naꞌ leꞌa xagots wa nsudna nsea ten ten be xmen Dios. Leꞌa bexa wa ndankea Jesús, ta weꞌe mbit be men bexa. Leꞌa gor uní naꞌ xagots wa, leꞌa naꞌ uzhebpa ngwanseana.
REV 17:7 Weꞌe leꞌa angel wa cha ndab ndoꞌ naꞌ: —¿Xtaꞌan lbaꞌa ndanseana lu? Leꞌa naꞌ gáp ndoꞌ lu xteꞌe gab ta ugaꞌach ten xagots wa, no man uzheꞌeb nsob xa tsoꞌo na, man ndap dub gaꞌad gek na nsea tiꞌi xkach na.
REV 17:8 Leꞌa man uzheꞌeb uniꞌí lu wa, dub man uyoꞌo parea naꞌanpa ncho ma nat. Leꞌa nat leꞌa ma itoꞌogal len geꞌed doꞌo, cha gal zha initndoꞌ ma. Leꞌa itea bexa gizhliyo bexa naꞌanpa nkea leaꞌ na ndoꞌ libr ten gealnaban gast zha utexanta gizhliyo, leꞌa bexa wa yanseana gor iniꞌí bexa man uzheꞌeb wa. Leꞌa ma wa uyoꞌo polta no naꞌanpa ncho ma nat, parea leꞌa ma ilen stub biaj.
REV 17:9 ’Leꞌa ta ndee yakbeꞌena bexa list gek na: leꞌa isagaꞌad gek man wa, leꞌa ta wa isagaꞌad bet sa nsob xagots wa,
REV 17:10 nsea dub gaꞌad xa nibeꞌe. Leꞌa dub gaꞌay bexa wa yá naꞌantapa inibeꞌe. Dub xa wa nibeꞌe nat, leꞌa stub xa biseata inibeꞌe. Leꞌa gor na ilen xa isagaꞌad wa leꞌa xa naꞌanpa kwen inibeꞌe.
REV 17:11 Leꞌa man uzheꞌeb wa leꞌa uyoꞌo, no naꞌanpa ncho ma nat, leꞌa ma wa dub xa itoꞌo lat bexa isagaꞌad wa, cha gak xa wa xa isaxoꞌon inibeꞌe. Cha gal zha utsaksi Dios xa.
REV 17:12 ’Leꞌa isatiꞌi kach uniꞌí lu wa, leꞌa ta wa dub tiꞌi xa nibeꞌe, parea nat biseata inibeꞌe bexa. Leꞌa bexa junt inibeꞌe dubtsa gor no man uzheꞌeb wa.
REV 17:13 Leꞌa bexa wa dubtsa ndanbeꞌe usaꞌa bexa juers, ndontsa no man uzheꞌeb wa inibeꞌe.
REV 17:14 Leꞌa bexa wa kuyono Borreg Ben wa, parea leꞌa Borreg wa no be xmen Borreg wa gun gan ndoꞌ bexa wa. Leꞌa xa nak Borreg Ben wa nak Xwan iteanak be taꞌa no Xa Nibeꞌe ndoꞌ iteanak bexa nibeꞌe. Leꞌa be xmen Borreg wa nak bexa utezh Dios, no mti Dios bexa, no nxobgek bexa ndoꞌ Dios.
REV 17:15 No ndab angel ndoꞌ naꞌ: —Leꞌa be nits uniꞌí lu sa nsob ngots ndun juis mgiꞌi wa, leꞌa ta wa be men sian be gezh no sian ras no sian nacion nsea sian diꞌizh ndadiꞌizh bexa.
REV 17:16 Leꞌa isatiꞌi be kach ten man uzheꞌeb li uniꞌí lu wa, leꞌa ta wa leꞌa be men nxee ladna ndoꞌ ngots wa. Leꞌa bexa wa ulat be ta ndap xa, no gast xab xa ulat bexa. No gaw bexa beꞌal las xa, cha utsoꞌol bexa xa ndoꞌ giꞌ.
REV 17:17 Leꞌa Dios ulogek bexa gun bexa lak nlad Dios. Leꞌa ta wa dubtsa gudiꞌizh bexa usaꞌa bexa juers inibeꞌe man uzheꞌeb wa, gast gak cumplir be ta ndab Dios.
REV 17:18 Leꞌa ngots uniꞌí lu wa, leꞌa ta wa gezh siꞌil nibeꞌe ndoꞌ bexa nibeꞌe idub ndoꞌ gizhliyo.
REV 18:1 Tsoꞌo na uyoꞌo be ta ndee wa, leꞌa naꞌ uní stub angel uzheꞌeb juert utoꞌo gibeꞌa gast ndoꞌ gizhliyo nsu xeꞌa ten xa.
REV 18:2 No ugeꞌpa uníꞌi xa ndab xa: ¡Yá ulayat, yá ulayat gezh siꞌil Babilonia! Leꞌa sa wa myak dub sa ncho be mbi bxin, no iteanak be bi bzhiꞌik, nsea sa ncho be man duꞌub man bxin, be man nxee ladna be men ndoꞌ na.
REV 18:3 Leꞌa gezh wa cuent dub xagots ndun juis mgiꞌi. Leꞌa be men ncho idub ndoꞌ gizhliyo mbinno bexa gezh wa sian ta ugap, ngok bexa cuent dub xa gu. Leꞌa bexa nibeꞌe ndoꞌ gizhliyo no mbinno bexa ta bzhiꞌik wa. Leꞌa bexa nsiꞌi utiꞌix be taꞌa ndoꞌ gizhliyo ngok rik no be ta ugap ndal ladna bexa gezh wa.
REV 18:4 Cha weꞌe mbín naꞌ ti Dios utoꞌo gibeꞌa ugeꞌ ndab: Bxoꞌon bego gezh Babilonia baꞌ, bego na nak xmen naꞌ, ndontsa naꞌanpa no bega gun be ta ugap ndun bexa wa, no ni lá iniꞌí bega be gealkweaꞌ itid bexa.
REV 18:5 Leꞌa bexa wa uzhebpa sian ke ndap ndoꞌ naꞌ, gast gibeꞌa nlayaꞌ be ta wa. Ta weꞌe leꞌa naꞌ Dios utsaksika naꞌ bexa.
REV 18:6 Binno bega bexa lak ugap mbinno bexa stubga men. Utix bega top lak mbinno bexa be men. Bgoch bega ta goo bexa wa top lak juert nak ndoꞌ ta mgo bexa be men.
REV 18:7 Lak uzheꞌeb mzhinnona bexa no be ta ugap mbin bexa, no liga utsaksi bega bexa kweaꞌ itid bexa, geal leꞌa bexa ndanbeꞌe len ladoꞌo na: “Leꞌa besa ndee nde cuent dub xa nibeꞌe. Naꞌanpa nak besa cuent dub xagots ngut xabgiꞌi ten na, no nunk besa lá iniꞌí gealkweaꞌ.”
REV 18:8 Ta weꞌe leꞌa nat dubtsa wizh ilanseaꞌ sian gealkweaꞌ tsoꞌo bexa wa. Leꞌa ta wa gealgut, no goꞌon bexa, no yoo win, no yolꞌ bexa ndoꞌ giꞌ. Leꞌa naꞌ ndee leꞌa Dios Xa Nibeꞌe uzhebpa xa juert, naꞌ utsaksi bexa wa.
REV 18:9 Leꞌa bexa nibeꞌe ndoꞌ gizhliyo mbin ta ugap ndun bexa gezh wa, no ngol ladna bexa be ta sian ndap bexa wa. Parea nat leꞌa bexa goꞌonno bexa gezh wa, no uzhebpa uban yoo ladna bexa, gor iniꞌí bexa zhen sa nsayolꞌ gezh wa.
REV 18:10 Nsea sittsa kwe bexa tant nzheb bexa ndoꞌ be gealkweaꞌ nchaꞌtid gezh wa, ndab bexa: ¡Ay, ay! ¡Proꞌob gezh siꞌil Babilonia, dub gezh juertpa ngok lu! Ná uxaxtsa mnitndoꞌ Dios lu.
REV 18:11 Leꞌa bexa nsiꞌi utiꞌix taꞌa ndoꞌ gizhliyo uzhebpa goꞌonno gezh wa, nsea uban yoo ladna bexa, geal yá naꞌanta ton isiꞌi be ta nadoꞌo bexa.
REV 18:12 Leꞌa ta wa be ta oro, nsea ta plata, no be geꞌ chul, nsea be perla, nsea be lad chul ta lino nsea seda, no be lad konch ugats nsea be lad nane, nsea be ya uxeꞌe nlaꞌa, no be taꞌa nakndeꞌe marfil, no be taꞌa nakndeꞌe ya chul, no bronce, no giꞌib, no geꞌ mármol,
REV 18:13 nsea canel, nsea isandoꞌ be ta uxeꞌe, nsea ta uxeꞌe ta nyolꞌ, nsea mirra, nsea olíbano, nsea vin, nsea aceit, nsea arin lan, nsea trig, no man yoꞌo, nsea borreg, nsea way, nsea carret, nsea bexa nchaꞌndoꞌo ndoꞌ stubga men.
REV 18:14 Leꞌa bexa nsiꞌi utiꞌix be taꞌa wa cha gab: Nat leꞌa bego yá naꞌantapa ndap be ta nsaꞌab ladna bego wa. Leꞌa bego mlaꞌ iteanak be ta chul no be ta uyap ndap bega, cha yá naꞌantapa izheal bega‑yá.
REV 18:15 Leꞌa bexa nsiꞌi utiꞌix be ta ndee wa, bexa na myak rik juers ten gezh wa, leꞌa bexa wa sit itate ta na nzheb bexa ndoꞌ be gealkweaꞌ nchaꞌtid gezh wa. Leꞌa bexa wa goꞌon, no uban yoo ladna bexa.
REV 18:16 No gab bexa: ¡Ay, ay! ¡Proꞌob gezh siꞌil Babilonia, Leꞌa bexa wa ngok lad lino ta chul, ta color konch ugats no nane! No uzhebpa usoꞌ be ta oro, no be geꞌ chul, no perla las bexa.
REV 18:17 Xlaꞌal unitndoꞌ be ta sian ten bexa. No iteanak bexa ntseꞌa be barco, no itea bexa na nsea len barco, no bexa ndun tiꞌin len barco, nsea iteata bexa ndun tiꞌin ndoꞌ nitsdoꞌo, leꞌa bexa wa sit utate.
REV 18:18 Leꞌa gor uniꞌí bexa zhen sa nsayolꞌ gezh wa, cha ugeꞌ ndab bexa: —¡Naꞌan stub gezh nsak lak nsak gezh baꞌ!
REV 18:19 No mtob bexa yo gek bexa tant uban myoꞌo ladna bexa. Cha utezhat bexa no mbiꞌin bexa, ugeꞌ ndab bexa: ¡Ay, ay! Proꞌob gezh siꞌil baꞌ, sa na myak rik itea besa ndap barco ndoꞌ nitsdoꞌo, leꞌa nat xlaꞌal unitndoꞌ‑yá.
REV 18:20 Parea bten ladna bego ndencho gibeꞌa, bego nak men umbiꞌi ten Dios, no bego nak be apostol, no bego ndadiꞌizh sakndoꞌ Dios. Leꞌa Dios leꞌa mtsaksi bexa Babilonia ta na li mbinno bexa bega.
REV 18:21 Weꞌe leꞌa stub angel juert cha usen dub geꞌ siꞌil ta nyajw taꞌa ndoꞌ na, cha mtsaꞌab xa‑yá ndoꞌ nitsdoꞌo, ndab xa: Lbaꞌa yaꞌ Babilonia gezh siꞌil, yá naꞌanta ton iniꞌí‑yá.
REV 18:22 No lá igenta be musk len gezh wa, bexa ndoꞌol arpa no bzhee no trompet. No ni stub bexa ndun tiꞌin lá yoota, ni ruid ten molin lá igenta.
REV 18:23 No ni xeꞌa aceit lá isuta sa wa, no ni lá igenta ruid ten dub gast sa nchilyaꞌa men. Leꞌa bexa nsiꞌi utiꞌix be taꞌa, leꞌa bexa wa leꞌa ngok bexa nsak ndoꞌ gizhliyo. No uzheꞌeb mkedino bexa gezh wa itea be nacion nsea be ta bruj ndun bexa.
REV 18:24 Leꞌa bexa wa leꞌa ndap ke ngut bexa mbidiꞌizh sakndoꞌ Dios, no bexa umbiꞌi nak ndoꞌ Dios. Leꞌa bexa gezh wa no ndap ke ngut be men idub ndoꞌ gizhliyo.
REV 19:1 Tsoꞌo wa mbín naꞌ ti kwaꞌad be men gibeꞌa, ugeꞌ ndab bexa: ¡Iteanak beuna yankea Dios! Leꞌa Dios ten beuna leꞌa uloꞌo beuna ndoꞌ be ke ten beuna, no ndankea beuna xa leꞌa xa uzheꞌeb dub xa wen nak, no uzhebpa juert nak xa.
REV 19:2 Leꞌa iteanak be ta ndun xa wa gealngea nak no utsin nak‑a, lak mtsaksi xa ngots ndun juis mgiꞌi wa, xa mtsabgix be men ndoꞌ gizhliyo nsea be ta ugap mbin xa. Ke weꞌe leꞌa Dios mkixke ta mbit xa wa be men, bexa ndun tiꞌin ndoꞌ Dios.
REV 19:3 Cha stub biaj ugeꞌ ndab bexa wa: ¡Iteanak beuna yankea Dios! Leꞌa zhen sa nsayolꞌ xagots wa nunk lá kweaskea idub tiemp.
REV 19:4 Leꞌa isagaꞌal bdap bexa gox xa nsak no idap be ta nban wa cha usaxib gast ndoꞌ yo ngol xtuzh bexa. Cha ngwankea bexa Dios sa nsob xa ndoꞌ yaxil, ndab bexa: —¡Lika nak‑a! ¡Iteanak beuna ndankea Dios!
REV 19:5 Leꞌa gast ndoꞌ sa nsob Dios wa ulen dub diꞌizh ndab: Wankea bego Dios ten beuna, itea bego na ndun tiꞌin ndoꞌ xa, bego na nzheb ndoꞌ xa, lak bego xa nsak no bega xa naꞌanpa nsak.
REV 19:6 No mbín naꞌ ti kwaꞌadpa men, cuent nsid dub sa nsalaꞌ kwaꞌal nits, no cuent sa uzheꞌeb uníꞌi usiꞌi, ndab bexa: ¡Iteanak beuna yankea Dios, leꞌa xa wa leꞌa nak xa nibeꞌe, xa ndon leꞌa juert nak!
REV 19:7 ¡Iten ladna beuna no usaꞌa beuna xno ndoꞌ Dios! Leꞌa nat ngol zha na uchilyaꞌa xa na nak Borreg Ben, leꞌa xagots ikaꞌa xa wa listla nsoꞌ.
REV 19:8 Leꞌa xagots wa gak dub lad lino chul, lad umbiꞌi ndon nlaꞌbealꞌ. Leꞌa lad lino chul wa, leꞌa ta wa nluu be ta utsin mbin be men umbiꞌi nak ladoꞌo na ndoꞌ Dios.
REV 19:9 Leꞌa angel wa cha ndab ndoꞌ naꞌ: —Bkeꞌa ta ndee: “Uzhebpa wen yoo ladna bexa na utezh Dios, gaw xcheꞌe bexa sa uchilyaꞌa xa nak Borreg wa.” No ndab xa: —Leꞌa ta ndee be diꞌizh gealngea ten Dios.
REV 19:10 Cha usaxib naꞌ xan ndats angel wa gast ndoꞌ yo ngol xtuzh naꞌ ndontsa gankeꞌa naꞌ xa. Zha leꞌa angel wa cha ndab ndoꞌ naꞌ: —¡Naꞌanpa lbaꞌa gun lu, ndi wankea Dios! Leꞌa naꞌ ndee no ndun tiꞌin laktsa ndun lu tiꞌin ndoꞌ Dios nsea bexa ltsaꞌa lu, bexa nxobgek ndoꞌ diꞌizh ten Jesús. Leꞌa ta ndadiꞌizh bexa sakndoꞌ Dios, leꞌa ta wa nsaꞌa juers ndoꞌ be diꞌizh ten Jesús.
REV 19:11 Weꞌe cha uní naꞌ leꞌa gibeꞌa myaꞌal, cha mlundoꞌ dub way nagud. Leꞌa xa nsob tsoꞌo ma wa dub xa sunka lak ndab xa, no gealngea nak xa. Leꞌa xa wa utsin nibeꞌe, no utsin ndun xa uyo lak nsabndoꞌ‑yá.
REV 19:12 Leꞌa ngusndoꞌ xa cuent naꞌ bealꞌ giꞌ. Nsea gek xa ndiꞌib sian be coron. Leꞌa stub leaꞌ xa nkea xtuzh xa, dub taꞌa ni dub men lá iniꞌí, nabtsa xa uniꞌí‑yá.
REV 19:13 Nsea nak xa dub lad koꞌol idub nsoꞌ ten. Leꞌa xa wa nsaleaꞌ Diꞌizh Ten Dios.
REV 19:14 Leꞌa kwaꞌad be soldad gibeꞌa nchankea tsoꞌo xa wa, ndiꞌib bexa tsoꞌo way nagud, no nak bexa lad lino ta uzheꞌeb chul, ta nagud no umbiꞌi.
REV 19:15 Leꞌa toꞌo xa wa ntoꞌo dub spad wach, ndontsa utsawiꞌi xa itea be nacion. Leꞌa xa wa juert inibeꞌe ndoꞌ bexa wa, no utsaksi xa be men lakta zha ngichkeꞌe bexa uv itoꞌo nits ten‑a. Leꞌa ta wa ta uzheꞌeb ndakloo Dios xa ndon leꞌa juert nak.
REV 19:16 Leꞌa las xab xa no xtaꞌa xoꞌo xa nkeaniꞌi stub leaꞌ xa ndab: “Xa Nibeꞌe ndoꞌ iteanak bexa nibeꞌe no Xa nak Xwan iteanak be taꞌa.”
REV 19:17 Cha uní naꞌ stub angel nsoꞌ ndoꞌ wizh, cha ugeꞌ utezh xa iteanak be man nsaꞌab gaꞌap, ndab xa: —Utseabe bego, byakjunt bega sa yoo xcheꞌe siꞌil ten Dios,
REV 19:18 ndontsa gaw bega beꞌal ten bexa unibeꞌe ndoꞌ be nacion, nsea bexa unibeꞌe be soldad, nsea be soldad. No gaw bega beꞌal ten be way, no bexa utiꞌib tsoꞌo ma, no beꞌal ten bexa nchaꞌndoꞌo ndoꞌ stubga men nsea bexa naꞌanpa li nak, no bexa nsak nsea bexa naꞌanpa nsak.
REV 19:19 Cha weꞌe uní naꞌ leꞌa man uzheꞌeb wa, no bexa nibeꞌe ndoꞌ gizhliyo, nsea be soldad ten bexa wa myakjunt ndontsa kuyono bexa xa nsob tsoꞌo way nagud no be soldad ten xa.
REV 19:20 Cha ngwaꞌigaꞌa man uzheꞌeb wa no profet ukwiꞌin wa. Leꞌa xa wa xa mbin sian be taꞌa ngwanseana be men ndoꞌ gaꞌal man uzheꞌeb wa, ta mkedino xa be men nkea se ten man wa, bexa ngwankea ta cuent nak man wa. Leꞌa xa nsob tsoꞌo way nagud wa usen man uzheꞌeb wa nsea profet ukwiꞌin wa, cha litsa nban bena wa mtsaꞌab xa len lagun giꞌ sa nsayolꞌ azufre.
REV 19:21 Weꞌe leꞌa xa nsob tsoꞌo way cha mbit iteanak be soldad ten man uzheꞌeb wa nsea spad ntoꞌo toꞌo xa. Cha weꞌe leꞌa iteanak be man duꞌub udaw be beꞌal ten bexa ngut wa gast plo mzhea bema.
REV 20:1 Cha uní naꞌ stub angel ulen gibeꞌa nsea dub liab ten geꞌed doꞌo, nsea dub caden siꞌil nsob yaꞌa xa.
REV 20:2 Cha usen xa dragón wa, leꞌa ta wa mbeꞌal polta, no leꞌakaga maxuꞌu ta wa, xa nsaleaꞌ Satanás. Cha mxi xa maxuꞌu wa nsea caden wa, ndontsa ikenchii maxuꞌu dub mil liꞌin.
REV 20:3 Cha mtsaꞌab angel wa maxuꞌu wa len geꞌed doꞌo, sa ikeanyaw maxuꞌu dub mil liꞌin. Cha weꞌe mxoꞌob angel dub ta myaw toꞌo geꞌed wa nsea se ten xa, ndontsa lá itoꞌota maxuꞌu, ukedino maxuꞌu be men nde ndoꞌ gizhliyo, gast zha ngok dub mil liꞌin wa. Weꞌe leꞌa maxuꞌu nsabndoꞌ yaꞌak steꞌeptsa.
REV 20:4 Weꞌe uní naꞌ pla be yaxil nsea bexa nsob ndoꞌ ta wa, bexa na msaꞌa Dios juers inibeꞌe ndoꞌ be men. No uní naꞌ xbi bexa na myabtoꞌog gen na ke na mbidiꞌizh bexa gealngea ten Jesús nsea diꞌizh ten Dios. No lá ngankea bexa wa man uzheꞌeb wa, ni ta cuent nak man wa. No ni lá ulaꞌa bexa ikea se ten man wa xtuzh bexa no yaꞌa bexa. Leꞌa bexa wa mbangal, cha no bexa unibeꞌe wats Cristo dub mil liꞌin.
REV 20:5 Leꞌa ta wa zha ned iban be men. Parea leꞌa iteata be men naꞌanpa no iban gast gaꞌa dub mil liꞌin wa.
REV 20:6 Uzhebpa wen yoo ladna bexa iban zha ned wa, bexa umbiꞌi nak ladoꞌo na ndoꞌ Dios, leꞌa bexa wa naꞌanpa no gat stub biaj. Leꞌa bexa ndi gak be uleꞌay ten Dios nsea uleꞌay ten Cristo, nsea no bexa inibeꞌe no Cristo dub mil liꞌin.
REV 20:7 Leꞌa zha na ngwaꞌa dub mil liꞌin wa, leꞌa maxuꞌu yaꞌak sa nkeanyaw na.
REV 20:8 Weꞌe itoꞌogal xa ukwiꞌinno xa be men itea be nacion idub ndoꞌ gizhliyo, be sa nsaleaꞌ Gog nsea Magog. Cha yunjunt xa bexa wa gun bexa guerr. Leꞌa bexa wa xa kwaꞌad, cuentta yux nde toꞌo nitsdoꞌo.
REV 20:9 Cha mteꞌachso bexa idub ndoꞌ gizhliyo, no ulotlaw bexa gezh nkweaꞌ ladna Dios, sa ndebe bexa umbiꞌi nak ndoꞌ Dios. Cha weꞌe leꞌa Dios mtuꞌub giꞌ utoꞌo gibeꞌa myolꞌ sa wa, cha unitndoꞌ bexa wa.
REV 20:10 Leꞌa Dios cha mtsaꞌab maxuꞌu na li mkedino be men wa len lagun giꞌ sa nsayolꞌ azufre, sa ncho man uzheꞌeb nsea profet ukwiꞌin. Leꞌa sa wa teꞌal no tezhea iniꞌí be na wa gealkweaꞌ uzheꞌeb siꞌil idub tiemp.
REV 20:11 Cha uní naꞌ dub yaxil nagud dub ta uzheꞌeb siꞌil, sa nsob Dios. Leꞌa sa nsob xa wa yá lá nluꞌuta ni gizhliyo no ni gibeꞌa no ni lá uluꞌuta be ta wa.
REV 20:12 Cha uní naꞌ bexa ngut, bexa nsak no bexa naꞌanpa nsak, ndebe ndoꞌ Dios. Cha myaꞌal pla be libr nkeaniꞌi ná xtaꞌan mbin bexa, no stub libr nkeaniꞌi ná ton bexa gap gealnaban. Leꞌa Dios cha ndab xteꞌe nak be ta mbin bexa wa, lak nkeaniꞌi‑yá ndoꞌ be libr wa.
REV 20:13 Leꞌa bexa ngut ndoꞌ nitsdoꞌo nsea iteata bexa ngut wa mlanseaꞌ ndoꞌ Dios. Cha ndab Dios ná xteꞌe nak be ta mbin bexa.
REV 20:14 Leꞌa bexa lá ndangea ladna Dios wa, bexa uyoꞌo sa ten bexa ngut wa, leꞌa Dios cha mtsaꞌab bexa wa len lagun nsayolꞌ wa. Leꞌa ta wa nsaleaꞌ gealgut itop.
REV 20:15 Leꞌa bexa wa lá izheal leaꞌ na ndoꞌ libr ten gealnaban wa, ta weꞌe mtsaꞌab Dios bexa len lagun giꞌ wa.
REV 21:1 Weꞌe uní naꞌ dub gibeꞌa kub no dub gizhliyo kub, geal leꞌa gibeꞌa ned wa no gizhliyo ned wa no nitsdoꞌo wa unitndoꞌla.
REV 21:2 Leꞌa naꞌ Juan uní gezh nsak ten Dios, sa nsaleaꞌ Jerusalén kub, utoꞌo‑yá gibeꞌa wats Dios. Leꞌa gezh wa uzheꞌeb chul nluu, lakta chul nluu dub xagots usaxkwaꞌa uchilyaꞌano xabgiꞌi ikaꞌa na.
REV 21:3 Cha mbín naꞌ dub diꞌizh utoꞌo gibeꞌa, ugeꞌ ndab‑a ndoꞌ naꞌ: —Bwiꞌi, leꞌa sa ndee ncho Dios nsea be xmen xa. Leꞌa Dios yoono bexa, no gak bexa xmen xa idub tiemp, leꞌa Dios leꞌaka nak Dios ten bexa.
REV 21:4 Leꞌa Dios utsambiꞌi itea nitsndoꞌ bexa, no yá lá gatta bexa. Ni lid uban yoota ladna bexa, no ni lá goꞌonta bexa, no ni stub gealkweaꞌ lá iniꞌí bexa, leꞌa iteanak be ta wa unitndoꞌla.
REV 21:5 Leꞌa Dios xa nsob ndoꞌ yaxil siꞌil wa cha ndab: —Unaꞌ, leꞌa naꞌ myunno kub iteanak be taꞌa. Cha ndab xa ndoꞌ naꞌ: —Bkeꞌa ta ndee, leꞌa be diꞌizh ndee uzheꞌeb be diꞌizh nsak no gealngea‑yá.
REV 21:6 Weꞌe cha ndab xa ndoꞌ naꞌ: —Leꞌa iteanak ta wa yá myandoꞌla. Leꞌa naꞌ ndee nak Alfa nsea Omega. Leꞌa naꞌ mtexan iteanak be taꞌa, no leꞌaka naꞌ unitndoꞌ‑yá. Leꞌa tal ton ndak ladna, leꞌa naꞌ ga usa nits nsoblen goo bexa, ta nsaꞌa gealnaban.
REV 21:7 Leꞌa bexa na gun gan ndoꞌ be ta ugap, usa naꞌ itea be ta wen wa. Leꞌa naꞌ gak Dios ten bexa, leꞌa bexa gak xiꞌín naꞌ.
REV 21:8 Ná leꞌa bexa nzheb ndoꞌ men, nsea bexa lá ndangea ladna naꞌ, no bexa ndun be ta lá nsak lad naꞌ, no bexa ndut men, no bexa ngal xa naꞌanpa xa ten xa, no bexa ndun ta bruj, no bexa ndankea be dios gizhliyo, nsea itea bexa ndun gealkwiꞌin, leꞌa iteanak bexa li ndun wa yaꞌbe len lagun sa nsayolꞌ azufre. Leꞌa ta wa ta nsaleaꞌ gealgut itop.
REV 21:9 Weꞌe cha mbiꞌid dub angel wats naꞌ. Leꞌa xa wa utoꞌo lat isagaꞌad be angel, bexa na li usen be vas ncho gealkweaꞌ lult wa. Cha ndab xa ndoꞌ naꞌ: —Utsea sa ndee, leꞌa naꞌ uluu xagots gak cheꞌal xa nak Borreg Ben wa.
REV 21:10 Leꞌa ndoꞌ ta li mluu Espíritu ten Dios ndoꞌ naꞌ wa, leꞌa angel wa cha mbiꞌi naꞌ dub geꞌe siꞌil sa gaꞌap. Cha mluu xa Jerusalén gezh siꞌil ten Dios, ta nchaꞌlaꞌ gibeꞌa wats Dios.
REV 21:11 Leꞌa gezh wa nsu xeꞌa ten Dios, nsea ndon nlaꞌbealꞌ‑a cuent dub geꞌ jaspe, dub ta uzhebpa ta chul, no nduꞌu naꞌ‑yá cuent dub vidr.
REV 21:12 Leꞌa idub gangeak gezh wa nchonyaw dub muro siꞌil no gaꞌap‑a. Nsea ndap‑a dub tibtop toꞌo puert, sa ndeulaꞌach dub tibtopga angel. Leꞌa kadga las puert wa nkea dubga leaꞌ bexa isatibtop ras bexa Israel.
REV 21:13 Leꞌa lad oriente nsoꞌ chon puert, no schonga‑yá lad nort, no schonga‑yá lad sur, nsea schonga‑yá lad poniente.
REV 21:14 Leꞌa muro nchonyaw gezh wa ndap dub tibtop geꞌ ubiꞌi nak xan na. Leꞌa kadga las geꞌ wa nkea dub leaꞌ bexa ngok isatibtop be apostol ten xa nak Borreg Ben wa.
REV 21:15 Leꞌa angel ndadiꞌizhno naꞌ wa noꞌo dub bar ta oro, ukeꞌa medid xa gezh wa nsea be puert ten na nsea muro nchonyaw‑a.
REV 21:16 Leꞌa gezh wa dub ta skin, lak koꞌol‑a liga uxen‑a. Leꞌa xa wa mkeꞌa medid‑a bar wa. Leꞌa sa wa noꞌo dub top mil ncho top gayoꞌo metr, lak koꞌol‑a no gaꞌap‑a no uxen‑a dubtsa medid noꞌo‑yá.
REV 21:17 No mkeꞌa medid xa plo gaꞌap muro wa. Leꞌa ta wa dub chon gaꞌal ncho dap metr, lak medid ten be men ndantiꞌin angel wa.
REV 21:18 Leꞌa muro wa nakndeꞌe geꞌ jaspe, parea leꞌa gezh wa nakndeꞌe sbeꞌen oro umbiꞌi cuent vidr umbiꞌi naꞌ‑yá.
REV 21:19 Leꞌa be geꞌ ubiꞌi ncho xan muro wa nsoꞌ be geꞌ chul las na. Leꞌa ta ned wa nsoꞌ geꞌ jaspe las na. Leꞌa ná itop wa nsoꞌ geꞌ zafiro. Leꞌa ná yon wa nsoꞌ geꞌ ágata. Leꞌa ná idap wa nsoꞌ geꞌ esmeralda.
REV 21:20 Leꞌa ná isagaꞌay wa nsoꞌ geꞌ ónice. Leꞌa ná isaxoꞌop wa nsoꞌ geꞌ cornalina. Leꞌa ná isagaꞌad wa nsoꞌ geꞌ crisólito. Leꞌa ná isaxoꞌon wa nsoꞌ geꞌ berilo. Leꞌa ná isageꞌa wa nsoꞌ geꞌ topacio. Leꞌa ná isatiꞌi wa nsoꞌ geꞌ crisopraso. Leꞌa ná isatibdub wa nsoꞌ geꞌ jacinto. Leꞌa ná isatibtop wa nsoꞌ geꞌ amatista.
REV 21:21 Leꞌa isatibtop puert wa leꞌa ta wa isatibtop perla, leꞌa kadga dub puert wa nak dubga perla. Leꞌa nes ten gezh wa sbeꞌen ta oro umbiꞌi gandid xeꞌa‑yá cuent dub vidr.
REV 21:22 Naꞌanpa iní naꞌ ni dub niꞌi yankea be men Dios sa wa, leꞌa idub len gezh wa leꞌa Dios xa ndon leꞌa juert nchoka nsea Borreg Ben.
REV 21:23 Leꞌa sa wa naꞌanpa nkiꞌin wizh ni mbeꞌe usu xeꞌa, leꞌa Dios nsea Borreg wa leꞌa nak xeꞌa nsu idub len gezh wa.
REV 21:24 Leꞌa be men ndencho ndoꞌ gizhliyo bexa nak xmen Dios ikesea ndoꞌ xeꞌa ten gezh wa. Leꞌa bexa nibeꞌe ndoꞌ gizhliyo yun cuent be ta nsak no be ta chul ten na.
REV 21:25 Leꞌa be puert ten gezh wa naꞌanpa yaw idub tezhea, no leꞌa sa wa naꞌanpa yoo teꞌal.
REV 21:26 Leꞌa bexa ndencho ndoꞌ gizhliyo yun cuent be ta nsak no be ta chul ten na ndoꞌ gezh wa.
REV 21:27 Naꞌanpa yate ni dub ta bzhiꞌik gezh wa. No ni dub bexa ndun be ta ugap, no ni dub bexa ndun gealkwiꞌin lá yoo gan yate sa wa, nabtsa bexa nkea leaꞌ na ndoꞌ libr ten Borreg Ben ta ten gealnaban nunk lá idub.
REV 22:1 Weꞌe leꞌa angel wa cha mluu dub yowbeꞌe umbiꞌi ncho nits nsaꞌa gealnaban, nits waꞌán cuent naꞌ vidr naꞌ. Leꞌa yowbeꞌe wa ntoꞌo sa nsob Dios nsea sa nsob Borreg Ben.
REV 22:2 No ntid‑a tlaw nes ten gezh wa. Nsea itop toꞌo yowbeꞌe wa ndiꞌib be ya nsaꞌa gealnaban. Leꞌa kadga dub mbeꞌe nsaꞌa‑yá xaꞌaga ngus. Leꞌa la ten ya wa leꞌa nyunyakna be men.
REV 22:3 Leꞌa sa wa lá yoota be taꞌa lá nsak ladna Dios. Leꞌa len gezh wa kwe sa isob Dios nsea Borreg wa. No be men ndun tiꞌin ndoꞌ Dios yankea bexa xa.
REV 22:4 No iniꞌíndoꞌ bexa Dios, nsea leaꞌ Dios ikea xtuzh bexa.
REV 22:5 Yá naꞌantapa yoo teꞌal sa wa, ni lá ikiꞌin bexa xeꞌa ni xeꞌa wizh. Leꞌa Dios Xa Nibeꞌe wa leꞌa nak xeꞌa sa wa, nsea inibeꞌe bexa sa wa idub tiemp.
REV 22:6 Cha ndab angel wa ndoꞌ naꞌ: —Leꞌa be diꞌizh ndee uzhebpa dub diꞌizh nsak no gealngea‑yá. Leꞌa Dios Xa Nibeꞌe wa, xa na nsaꞌa Espíritu ten na ndoꞌ bexa ndadiꞌizh sakndoꞌ xa wa, leꞌa xa wa mtuꞌub dub angel ten xa ndontsa uluu xa be ta sken yoo wa ndoꞌ bexa ndun tiꞌin ndoꞌ xa.
REV 22:7 Leꞌa Jesús cha ndab: —¡Blaꞌach bego, leꞌa naꞌ sken ilen! Uzhebpa wen yoo ladna bexa na nsakyoꞌón be diꞌizh ten Dios ta nsoꞌ ndoꞌ libr ndee.
REV 22:8 Leꞌa naꞌ ndee Juan mbín naꞌ no uní naꞌ be ta ndee wa. Leꞌa tsoꞌo na mbín naꞌ be ta ndee no uní naꞌ‑yá, cha usaxib naꞌ gast ndoꞌ yo ngol xtuzh naꞌ, ndiꞌizh gankeꞌa naꞌ angel, xa li mluu be ta ndee ndoꞌ naꞌ wa.
REV 22:9 Parea leꞌa angel wa ndab ndoꞌ naꞌ: —¡Naꞌanpa lbaꞌa gun lu! Leꞌa naꞌ ndee ndun tiꞌin ndoꞌ Dios lak ndunga lu tiꞌin ndoꞌ Dios nsea bexa ltsaꞌa lu, bexa ndadiꞌizh sakndoꞌ Dios, no bexa na nxobgek ndoꞌ ta nkea ndoꞌ libr ndee. Ndi wankea Dios.
REV 22:10 Cha ndab xa ndoꞌ naꞌ: —Naꞌanpa ukachko lu be diꞌizh mbidiꞌizh Dios nkea ndoꞌ libr baꞌ, leꞌa tiemp yoo be ta nkea ndoꞌ libr baꞌ yá nsaso gax.
REV 22:11 Leꞌa bexa ndun be ta ugap no bexa ndun be ta bzhiꞌik, lbaꞌatsa gunta bexa be ta wa. Leꞌa bexa ndun be ta utsin nak, lbaꞌatsa utsin gunta bexa. No liga leꞌa bexa umbiꞌi nak ndoꞌ Dios, lbaꞌatsa umbiꞌi gakta bexa.
REV 22:12 Cha ndab Jesús: —Blaꞌach bego leꞌa naꞌ sken ilen, cha usa naꞌ ta ikaꞌa kadga dub men lak nak be ta mbin bexa.
REV 22:13 Leꞌa naꞌ ndee nak Alfa nsea Omega, leꞌa naꞌ mtexan iteanak be taꞌa no leꞌaka naꞌ unitndoꞌ‑yá. No nak naꞌ xa ned no xa tsoꞌo li ndoꞌ itea be taꞌa.
REV 22:14 Uzhebpa wen yoo ladna bexa umbiꞌi nak ladoꞌo na ndoꞌ Dios. Leꞌa bexa wa nsabndoꞌ gaw ngus ten ya nsaꞌa gealnaban, no yate bexa toꞌo puert ten gezh wa.
REV 22:15 Parea leꞌa bexa ugap nak yaꞌanbe tsoꞌo juer. Leꞌa ta wa bexa ndun be ta bruj, no bexa ngal dub xa naꞌanpa xa ten xa, no bexa ndut men, no bexa ndankea be dios gizhliyo, nsea itea bexa ndal ladna ndun be gealkwiꞌin.
REV 22:16 Cha ndab Jesús: —Leꞌa naꞌ ndee Jesús mtuꞌub angel ten naꞌ gudiꞌizh be ta ndee ndoꞌ bexa nak xmen naꞌ. Leꞌa naꞌ ndee nak bi leꞌaka ras ten David. No nak naꞌ mbeal siꞌil nsu xeꞌa gor tempran.
REV 22:17 Cha ukaꞌab Espíritu ten Dios nsea xagots nak cheꞌal Borreg Ben wa, bexa nak be xmen Jesús, ndab bexa: —Utsea go, Jesús. Leꞌa bego na ndoꞌón ta ndee gud bega: —Utsea go, Jesús. Tal ncho bega ndak ladna, nlad bega goo bega nits nsaꞌa gealnaban, utseayoo bega‑yá, leꞌa xa ga nsaꞌa‑yá.
REV 22:18 Leꞌa naꞌ gáp ndoꞌ itea bexa na ndoꞌón diꞌizh mbidiꞌizh Dios nkea ndoꞌ libr ndee: Tal ton dub xa kota diꞌizh ndoꞌ be diꞌizh ten Dios ndee, leꞌa Dios utsaksi xa no iteanak be gealkweaꞌ nkeaniꞌi ndoꞌ libr ndee.
REV 22:19 No tal ton koꞌo diꞌizh mbidiꞌizh Dios nkea ndoꞌ libr ndee, leꞌa Dios koꞌoga leaꞌ xa ndoꞌ libr ten gealnaban, no lá ulaꞌa Dios yate xa gezh nsak ten Dios, lak nkeaniꞌi ndoꞌ libr ndee.
REV 22:20 Leꞌa xa ndadiꞌizh be ta ndee wa ndab: —Leꞌa naꞌ skenka ilen. Lika gak‑a. ¡Utsea go Jesús Xa Nibeꞌe besa!
REV 22:21 Nat naꞌab naꞌ ndoꞌ Jesucristo Xa Nibeꞌe, uzheꞌeb utsin gunno xa iteanak bego baꞌ. Lika nak‑a.
