﻿MATEO.
4.
Luxu güiyno xiSpirt Dioz Jesúz lo yu-bihdzy ru nehx nu meññ, lehdy güieꞌ bêndzab bâḻ beeiy nquihly me Jesúz ntzoo mod-ne me. 
Güyuꞌ Jesúz uga cuarent dzé no cuarent guiaal no nehx güdahgü me mbehty, no byluxu bylahn me. 
No biahd bêndzab lehdy güieꞌ bâḻ stzoo Jesúz mod-ga me lee. Ra me Jesúz: ―Bâḻ ulihbu Xiiñ Dioz lii, ptzoo mdad gac guie-rieꞌ yahc paṉ. 
Ra Jesúz bêndzab: ―Lo Guehtzy ru queꞌ xtiidz Dioz neu: “Dac‑e nunzy no paṉ rbahñ meññ, zehg rbahñ meññ no gyre diidz ni rnii Dioz.” 
Luxu güiyno bêndzab Jesúz ciuda-Jerusaléṉ ni rahc cuent lee Dioz, no gülepy me lee ihqy idoró to ru ma guia, 
no ra me Jesúz: ―Bâḻ ulihbu Xiiñ Dioz lii, güyubeꞌ lo yu; porni lo Guehtzy ru queꞌ xtiidz Dioz neu: Cshahl Dioz x‑ángel me ni gyla yahc lii. Glesy yâme lii lo ña yâme, lehdy di ctzuné guie nieꞌy. 
Ra Jesúz leeme: ―Zegahc‑e lo Guehtzy ru queꞌ xtiidz Dioz neu: “Di gnabiꞌ behch lo Dioz ni rtzoo mdad lii nunzy par güieꞌy bâḻ ctzoo me ni neꞌy.” 
Gyzac güiyno bêndzab leeme ihqy to dahñ ni modni nsuu par bluu leeme nter guiedzylie ru rtzoo meññ mdad no gyre ni rsahc ni nu lou, 
no ra me Jesúz: ―Naa gdedyaꞌ lii gyre nirieꞌ yahc bâḻ guisshibyiꞌ dloꞌn no gzacbeeiyiꞌ naa. 
Ra Jesúz leeme: ―Byruu de neꞌ, bêndzab, porni lo Guehtzy ru queꞌ xtiidz Dioz neu: “Bzacbeeiy Dioz ni rtzoo mdad lii, no ptzoo nunzy ni ne me.” 
Byluxu, byrusytzu bêndzab de ru zu Jesúz; no biahd yahc x‑ángel Dioz bidguiacno yâme Jesúz. 
Hor-bieññ Jesúz güluꞌ yâme Juaṉ lidzyguiib, za me lo ṟegioṉ-Galilea; 
per nehx biaꞌn me Nasaret, mazyg zia me guiedzy ni le Capernaum, ni nu coo nisdoo, lo ṟegióṉ ni le Zabulóṉ no Neftalí. 
Guhcu ze lehdy guhc ni bzaa profet-Isaíaz: 
Ṟegioṉ-Zabulóṉ no ṟegioṉ-Neftalí, ñaz-ru ria coo nisdoo, stiby chehsh guiagü-Jordáṉ, Galilea, ru nu meññ-nehx meññ-Isṟael. 
Meññ-nu beeiy to lo guibcawy bwieꞌ to byni-ro, no meññ-nu beeiy lo ximble guîlguhty, güyuꞌ to byni-ro par lee. 
No guzlo gahc Jesúz gaya me meññ: ―Lâ csaan ni nahcsy ni nac laꞌd, porni ba bydziñgahsh dze-ctzoo Dioz mdad neꞌ. 
Gadedy Jesúz coo nisdoo ni le Galilea, no bwieꞌ me chohp mpyquie; to me le Simóṉ ni zegahc ra yâme lee Pedr, no sto me le Ndréz, behtzy Simóṉ; galee yâme gueshmbaḻ lo nzeꞌ, porni meññ-rnahzy mbaḻ leeyâme. 
No ra Jesúz leeyâme: ―Lâ te náḻ laꞌd naa, no naa ctzon laꞌd meññ ni guidno zrieñ yahc ni gac dmeññaꞌ. 
No psaꞌn gahc yâme xgueshmbaḻ yâme, no za yâme no Jesúz. 
Güdedy Jesúz uga, bwieꞌ me schohp mpyquie ni nac yahc xiiñ Zebedeu; to me le Jacob, no behtzy me le Juaṉ. Nu yâme leññ barcü no xtad yâme; gaquieedy yâme gueshmbaḻ. Pquee Jesúz riedz leeyâme, 
no luxu psaꞌn gahc yâme barcü no xtad yâme uga, no za yâme no Jesúz. 
Güya Jesúz gyre guiedzy ni nu lo ṟegioṉ-Galilea, galuu me meññ xtiidz Dioz leññ xiydoo yâme cad guiedzy, no gayuno me meññ diidz de ni rtzoo Dioz mdad, no gasiaḻ me meññ-gayac-ure de gyre guîlguihdz no de gyre yoob ni rdedy meññ. 
Byzaꞌzy ru meññ diidz de Jesúz lo ṟegioṉ-Siry; no riyno yâme gyre meññ ni rahc gyrehzy, ni gayac-ure de gyre gyzasy guîlguihdz no yoob, no meññ ni nu mbenahcsy lee, no meññ-rnahzy mbeꞌ lee, no meññ-di raḻ gyniꞌby; psiaḻ me gyre yâme. 
No xtahl meññ-byruu lo ṟegioṉ-Galilea, no zegahc meññ-byruu lo ṟegioṉ-Decápolis, no meññ-Jerusaléṉ, no meññ-byruu lo ṟegioṉ-Judea, no meññ-nu stiby chehsh guiagü-Jordáṉ, náḻ yâme ru za Jesúz. 
