﻿Olwaandiko aha Bahebrania.
1.
Aho kala, Múungu akahooya na besiichwe enkúlu entúlo nyíinzi na aha miháanda míinzi, kulabila aha babáasi. 
Náho óobu, omu bilo éebi byo omuhélo, Múungu yaágaamba neechwe kulabila ebikolwa byo Mutábani. Kulabila hali weényini Múungu akahaanga éensi, mále Múungu akamutooza ogwo Omutábani abone kuhuungula ebiintu byóona. 
Weényini no obweengelezi bwi ikuzo lya Múungu mále naayoleka butúnu óokwo Múungu aáli. Naaleételela ebiintu byóona kukwaátana hamo habwe echigaambo choómwe echiina obuhicha. Náwe akeésohoza kuba echitáambo cho kwihilaho abaantu ebiheno, yaázeenda omu igulu, yeékala olubazu lwo obúlyo lwo ogwo ali Mukúlu. 
Múungu akamukola Omutábani aábe mukúlu kuchila bamaléeka, nko óokwo akamuha obutégeki buháango kuchila obwa bamaléeka. 
Habwo kuba táliho maléeka óogwo Múungu akamugaambila amagaambo áago akamugaambila Yeézu aáti, “Íiwe níiwe Mutábani waanze, leélo íinye naaba Iíso.” Na Múungu talagaambile habwa maléeka weéna wéena aáti, “Íinye ndyáaba Iíse, náwe alyáaba Mutábani waanze.” 
Káandi, obuchilo Múungu akamusiíndika Omutábani nyakámo omukulu omu nsi, akagaamba aáti, “Bamaléeka bóona ba Múungu bamulámye Omutábani ogwo.” 
Habwa bamaléeka akagaamba aáti, “Niinkola bamaléeka baanze kuba omuyaga, na abazáana baanze kuba emyeengezi yo mulilo.” 
Náho habwo Omutábani akagaamba aáti, “Íiwe Múungu echitébe chaawe cho obutégeki ne cho obucha no obuchiile, íiwe nootégeka abaantu baawe aha mazima. 
Íiwe oyeénda ebizima, no kutamwa obuzilwa. Ha bwéecho Múungu, Múungu waawe akutoólize, akusiigile amazuta agalikukuha amanulilwa, kuba kukukola oóbe mukúlu, kuchila bazeenzi baawe bóona.” 
Káandi Múungu akamugaambila Omutábani aáti, “Íiwe Mukáma níiwe okahaanga éensi aha bubaandizo, nályo igulu ne emilimo ye engalo zaawe. 
Ebiintu ebyo byóona bilyaáhwaho, bilaákokola nko omwéenda, náho íiwe olama obucha no obuchiile, 
Íiwe olaábiziinga ziinga ebiintu ebyo nke enkaanzu, bilaahiindulwa nke emyéenda ya kala. Náho íiwe tolihiinduka nakáti, ne emyáaka yaawe tekuhwa.” 
Múungu talamugaambiile maléeka weéna wéena aáti, “Yikala olubazu lwaanze lwo obúlyo, kuhika obuchilo óobwo ndita ababisa baawe iífo ya amagulu gaawe.” 
Mbwéenu, bamaléeka ni chiintu chi? Na abazáana ba Múungu, mále ne emyooyo éezo Múungu alagila, zizeénde kwaágalalila abaantu áabo abalichuúngulwa. 
