PSA 1:1 Ba neza zrente̱ naca na chee̱ bénnea' quebe dxezi'e̱ da dxuluzéajni'i benne' we̱n da cale̱la ca' le̱', ne quebe dxune̱' tuze benne' dul-la ca', ne quebe dxune̱' tu zren benne' ca' dxelún le̱' chee̱ Dios.
PSA 1:2 Zue̱' xel-la' dxebé lawe' da dxuzúe̱' dizra' da nadxixruj bea Xránadxu, ne ca naca da nadxixruj bea na, te zra ne chizrela dxelaba lazre̱' na.
PSA 1:3 Benne' nigá naque̱' ca tu xaga zua na dxu'a xe̱gu nisa, da dxunna na da zixre chee̱ na lu beu' cheé̱queze na, ne xrlegue na quebe dxase na. Ca naca da dxun benne' nigá, dxe̱pe ban na.
PSA 1:4 Quegá caní zaj naca benne' we̱n da cale̱la ca'. Zaj naque̱' ca tu xizre laga' da dxua be' bdunu'.
PSA 1:5 Quebe xelexegá'ana chawe' benne' we̱n da cale̱la ca' gate guchi'a Dios chee̱', ne quebe xelú'u benne' dul-la ca' naga zaj nazraga benne' xrlátaje ca'.
PSA 1:6 Dxezaca ba lazre' Dios ca da dxelún benne' xrlátaje ca'. Da dxelún benne' we̱n da cale̱la ca' che̱ na le̱' naga xelebía xi'e̱.
PSA 2:1 ¿Bizr chee̱ na' dxeledábaga benne' xe̱zr la xu ca' neda'? ¿Bizr chee̱ na' dxululaba lázrequeze bénneache da guzúa na neda' chalá'ala?
PSA 2:2 Dxeledábagaqueze benne' wenná bea ca', ne dxelún tuze dizra' benne' ca' dxelenná bea ca xelune̱' chee̱ Xránadxu Dios, ne chee̱ Bénnea' gucá'a Le̱'.
PSA 2:3 Dxelenné̱': “Guselá cuínadxu lu xel-la' dxenná bea chee̱', ne guzúadxu chalá'ala da zaj nadxixruj bé'ene̱' dxi'u.”
PSA 2:4 Naga dxe' Xránadxu xabáa dxuzrizre̱'. Quebe dxezí' le̱ne̱' chee̱ da dxelegú'u lazré̱' xelune̱'.
PSA 2:5 Lu xel-la' dxezrá'a chee̱' dxedil-le̱' le̱', ne lu xel-la' snia chee̱' dxuchebe̱' le̱'.
PSA 2:6 Dxenné̱': “Lu xi'a lá'azxa chia', xi'a Sión ba nuzúa' benne' gaque̱' Wenná Bea waláz chia' neda'.”
PSA 2:7 Dxenná Wenná Bea na': “Guzenda' le'e da guzre Xránadxu neda'.” Guzre̱' neda': “Lue' nacu' Zri'ina'. Ná'aqueze naca' Xrau'.
PSA 2:8 Gunabe neda', na' gunna' Lue' xúgute̱ cue' xe̱zr la xu ca', na' gaca chiu' dute̱ ca naca xe̱zr la xu.
PSA 2:9 Guzízxenu' bénneache xe̱zr la xu ca' nen vara xia, ne ca tu dxe'e xu guzuzru' le̱'.”
PSA 2:10 Na'a, le'e, wenná bea, le xene da nigá dxuzéajni'ida' le'e. Le guse̱de da nigá dxusízreda' le'e, benne' dxelenná bea lu xe̱zr la xu.
PSA 2:11 Le gun zrin chee̱ Xránadxu Dios, dute̱ xel-la' dxezrebe chee̱le. Nen xel-la' dxezrize chee̱le, le be lau Le̱'.
PSA 2:12 Le gapa ba lá'ana Zrí'ine̱' chee̱ quebe zre̱'e̱, checa' cuía xile la neza chee̱le, lawe' da la zra'ate̱ Le̱'. Da ba neza zrente̱ naca na chee̱ xúgute̱ benne' dxuluxrén lazre̱' Le̱'.
PSA 3:1 Xrana' Dios, ba naxánle̱'e̱ benne' dxeledábague̱' neda'. Benne' zante̱ dxeledíl-lale̱ne̱' neda'.
PSA 3:2 Benne' zante̱ dxelenné̱' chia': “Quebe guselá Dios le̱'.”
PSA 3:3 Lue', Xrana' Dios, dxucú'uju' neda'. Nacu' Benne' dxebéle̱na', ne Benne' dxuzé̱ chawe̱' neda'.
PSA 3:4 Gudxezre xa'a, bláwizra' Xrana' Dios, na' Le̱' beche̱be̱' chia' naga zue̱' lu xi'a lá'azxa chee̱'.
PSA 3:5 Guta', ne gusia', na' bebana' lawe' da nuxru Xrana' neda'.
PSA 3:6 Quebe zreba' gaxúa gaxúa bénneache, benne' zaj naxéchaje̱' neda'.
PSA 3:7 Guzé̱, Xrana' Dios. Bselá neda', Dios chia'. Be̱n we̱' xraga benne' ca' dxeledíl-lale̱ne̱' neda', ne guzuzruj lazxa benne' xriwe̱' ca'.
PSA 3:8 Xel-la' weselá za' lu na'u, Xrana' Dios. Be̱n da chawe' chee̱ bénneache chiu'.
PSA 4:1 Beche̱be chia' gate dxuláwizra' Lue', Dios. Nacu' Benne' dxuchi'e̱ ca da dxuna'. Gate guzúa' lu da ste̱be, Lue' btipu' lazra'. Bexache lazre' neda', ne bene ca da dxuchálajle̱na' Lue'.
PSA 4:2 Le'e, bénneache, ¿ájate̱scha' gucá'ana dítjale neda'? ¿Ájate̱scha' zri'ile da quebe zaca, ne chéajle̱le da we̱n lazre'?
PSA 4:3 Le xexúnbea ba gucá'a Xránadxu nu benne' dxape̱' Le̱' ba lá'ana. Xrana' Dios xenne̱' gate dxuláwizra' Le̱'.
PSA 4:4 Le zrebe lau Dios, ne quebe gunle dul-la. Le gulaba lazre' chee̱' naga dxásale, ne le sua zrize.
PSA 4:5 Le gute lau Le̱' béadu ca' lu da naca du lazre', ne le guxrén lázre' Xránadxu Dios.
PSA 4:6 Benne' zante̱ dxelenné̱': “¿Nuzra gun gá'anatu' chawe'?” Dute̱ xel-la' zri'i lazre' chiu' bxue netu', Xran.
PSA 4:7 Lue' bzu' xel-la' dxebé lu xichaj lázrdawa', da naca na zrendxa ca da zaj napa benne' zaj nápale̱'e̱ zrua', ne xrise uva wal-la.
PSA 4:8 Dute̱ xel-la' dxebeza zri lazre' gata', ne gasia', lawe' da dxunu' Lue', Xran, zua' zri'a chawe'.
PSA 5:1 Bze̱ naga dizra' chia', Xran. Bde lazre' ca dxebezre lazra'.
PSA 5:2 Bene ca guchálajlena' Lue', Wenná Bea chia', ne Dios chia', q lawe' da guláwizraja' Lue', Dios.
PSA 5:3 Xran, che zílala xennu' chi'a. Che zílala xídaqueza' lau Lue', ne wabeza lazra' Lue'.
PSA 5:4 Nacu' Dios quebe dxezaca ba lazru' da cale̱la. Benne' we̱n da cale̱la quebe súaqueze̱' naga zu' Lue'.
PSA 5:5 Quebe dxu'u lataj xelezrín benne' we̱n da cale̱la lau'. Dxecuídenu' xúgute̱ benne' dxelune̱' da zrinnaj.
PSA 5:6 Guzría xí'quezu' benne' ca' dxelezí xe̱'e̱. Guzú' chalá'ala benne' we̱te benne', ne benne' guzrí xe̱'.
PSA 5:7 Neda' waca chu'a lizru' lawe' da nazrí'ile̱'e̱nu' neda'. Güe lá'ana' Lue' lu xudau' lá'azxa chiu' dute̱ xel-la' dxezrebe.
PSA 5:8 Bsi neda' chee̱ guna' da xrlátaje chiu', Xran, lawe' da zrále̱'e̱ benne' dxeledábague̱' neda'. Gulú'u neda' neza chawe' chiu'.
PSA 5:9 Benne' caní quebe dxelenné̱' da li. Lu xichaj lázrdawe̱' xu'u da cale̱la. Xe̱dxu lbe̱'e̱ zaj naca na ca tu ba chee̱ benne' gate da naxalaj na. Zaj nupé̱'e̱ dizra' chawe' chee̱' da zaj naca na da we̱n lazre'.
PSA 5:10 Bde benne' ca' lu da ba xa', Xrana' Dios. Be̱n cheajlecházie̱' cáte̱ze zaj naca xrtízraqueze̱'. Lawe' da naxánle̱'e̱ da cale̱la da dxelune̱' ne lawe' da guledábague̱' Lue', bebéaje̱' chalá'ala.
PSA 5:11 Welebéle̱'e̱ benne' ca' dxuluxrén lazre̱' Lue'. Welebézre xá'aqueze̱' dute̱ xel-la' dxelebé lawe' da dxucú'uju' le̱'. Lau Lue' welebéle̱'e̱ benne' ca' zaj nazrí'ine̱' Lue'.
PSA 5:12 Gúnquezu' da chawe' chee̱ benne' xrlátaje, Xran. Gucu'uju' bénnea' lawe' da dxezaca ba lázrele̱nu' le̱'.
PSA 6:1 Lue', Xran, quebe til-lu' neda' lu xel-la' snia chiu', ne quebe gudéu' neda' ba xa' lu xel-la' dxezrá'a chiu'.
PSA 6:2 Bexache lazre' neda', Xran, lawe' da quebe chawe' zua'. Bexún neda', Xran, lawe' da dxedéa' xel-la' zi'.
PSA 6:3 Sté̱bele̱'e̱ zua xichaj lázrdawa'. Xran, ¿bátala gácale̱nu' neda'?
PSA 6:4 Gudá, Xran, bselá bénne'du xu'a. Bselá neda' dute̱ xel-la' zri'i lazre' chiu'.
PSA 6:5 Naga zaj zra' benne' gate ca', quebe nu dxeajsá lazre' Lue'. Lu lataj ba xa' ¿núzraqueze güe lá'ana Lue'?
PSA 6:6 Ba dxexedú lazra' lawe' da dxebezre lazra'. Tu zre' tu zre' dxebísane ga dxásia' nisa da dxebezra'. Dxusebisa' xrcugua' nisa da dxebezra'.
PSA 6:7 Ba dxane xiaj lawa' xel-la' dxebezre. Ba bebízrqueze nisa xuzru xiaj lawa' lawe' da zrále̱'e̱ benne' dxulusaca zi'e̱ neda'.
PSA 6:8 Le cuasa naga zua', xúgute̱le dxunle da zrinnaj lawe' da ba ben Dios dxebézrele̱'a.
PSA 6:9 Xrana' Dios ba benne̱' da dxata' xueda' Le̱'. Ba guzí' Xrana' Dios da dxuchálajle̱na' Le̱'.
PSA 6:10 Dxelexedué'e, ne zaj zua lu da sté̱bele̱'e̱ xúgute̱ benne' dxeledábague̱' neda'. Chadite̱ xelexebigue̱' naga zua', ne xelexedué'ene̱'.
PSA 7:1 Xrana' Dios, dxuxrén lazra' Lue'. Gúcale̱ neda' ne bselá neda' lu na' benne' ca' dxulusaca zi'e̱ neda',
PSA 7:2 chee̱ quebe xele̱l-le̱' neda' ca dxun be̱zre xixre', na' xuluzúzruje̱' neda' naga quebe nu chilá' nu guselá neda'.
PSA 7:3 Xrana' Dios, che be̱na' neda' caní: Che bi da zrinnaj be̱n ni'a na'a.
PSA 7:4 Che bi da cale̱la be̱na' chee̱ benne' zue̱' chawe' nen neda'. (Bselá' bénnea' dxedábague̱' neda' lácala quebe bi nuna' chee̱'.)
PSA 7:5 Che caní be̱na', be̱ lataj benne' dxedábague̱' neda' gau zi' ne xezrúnene̱' neda'. Be̱ lataj bénnea' guchuchu guléaje̱' neda' lu xu, ne xusunitie̱' xel-la' ba lá'ana chia'.
PSA 7:6 Xran, dute̱ xel-la' dxezrá'a chiu', guzé̱. Bexechaj benne' ca' dxulusaca zi'e̱ neda' lu xel-la' dxelezrá'a chee̱'. Gusel-la da gácale̱ na neda' gate guchi'u da dxaca chia' ca da gunná be'u.
PSA 7:7 Xúgute̱ benne' zaj zre̱'e̱ xe̱zr la xu xelezrague̱' lau'. Gunná be'e benne' ca' dute̱ xel-la' szren chiu'.
PSA 7:8 Lue', Xran, guchi'u chee̱ benne' xúgute̱ xe̱zre. Bchi'a ca da nuna' lu da naca xrlátaje, ne lu da naca du lazre' chia'.
PSA 7:9 Be̱n cheajsé̱ naze da zrinnaj da dxelún benne' we̱n da cale̱la ca', san bzua chawe' benne' xrlátaje, lawe' da nacu' xrlátaje, Dios, ne dxenná'u da xu'u xichaj lázrdau bénneache.
PSA 7:10 Diósqueze dxucu'uje̱' neda'. Dxuselé̱' benne' zaj naque̱' du lazre'.
PSA 7:11 Xlátaje̱ dxuchi'a Dios chee̱ da dxelún bénneache. Tu dxezrá'azqueze Dios da dxelún benne' we̱n da zrinnaj ca'.
PSA 7:12 Che quebe xelexíaje lazre̱' Dios gulé̱' xia chee̱'. Ba nuzúa cuásate̱' xaga nalá xéche'ze chee̱'.
PSA 7:13 Ba naxrúa cuásate̱' xia chee̱' ca' chee̱ wedil-la. Ba nuzúa cuásate̱' xaga nalá xéche'ze da dxelala.
PSA 7:14 Benne' we̱n da zrinnaj dxugú'u lazre̱' ca da cale̱la gune̱'. Xu'u lázrdawe̱' da zrinnaj da gune̱', na' dxebéajé̱' da we̱n lazre'.
PSA 7:15 Ba gude̱ne̱' tu xe̱dxu situj naga cheajlechaze bénneache, na' lé̱zqueze̱' xeajcházie̱' lu xe̱dxu na'.
PSA 7:16 Da zrinnaj da be̱ne̱' dxebague na lé̱queze̱', na' da bsaque̱' bénneache xezrizre na xíchaje̱'.
PSA 7:17 Güe lá'anaqueza' Xrana' Dios ca da xrlátaje da dxune̱', ne gúl-laqueza' chee̱ La Xrana' Dios, Bénnea' naque̱' szrente̱.
PSA 8:1 Lue' Dios, Xránantu', zrente̱ naca Lau' du gabí'i xe̱zr la xu. Zrendxa naca xel-la' szren chiu' ca xabáa.
PSA 8:2 Bidu ca', ne bidu dxe'ene ca' dxelúl-labe' ca naca na. Zúaquezu' lataj chawe' naga quebe xelezrín benne' ca' dxeledábague̱' lue'. Dxuzúa zriu' benne' dxeledábague̱' lue', ne benne' dxelecuídene̱' Lue'.
PSA 8:3 Gate dxenná'a xabáa da nunu' Lue', ne beu', ne belaj ca', da ca' nuzú' cha chee̱ na,
PSA 8:4 na' dxuche̱ba': “¿Ájazra naca bénneache, dxulaba lazru' chee̱ le̱'? ¿Ájazra naca bénneache, dxe'u gunne xue le̱'?”
PSA 8:5 Be̱nu' le̱' látezdxa szren ca nacu' Lué'queze, ne bzu' chee̱' xel-la' szren, ne xel-la' ba lá'ana.
PSA 8:6 Be̱nu' dxenná bé'ene̱' xúgute̱ da ca' nunu'. Xúgute̱ na bdeu' lu ne̱'e̱,
PSA 8:7 zrila' ca', ne be̱zre ca', ne xúgute̱ be̱ xixre' ca',
PSA 8:8 be̱ zaj zua xrila, ne bela ca', ne xúgute̱ da zaj zua na lu nísadau'.
PSA 8:9 Xránantu', Dios, szrente̱ naca Lau' du gabí'i xe̱zr la xu.
PSA 9:1 Xran, dute̱ lázrdawa' güe lá'ana' Lue'. Guzenda' bénneache ca zaj naca da zrente̱ da be̱nu'.
PSA 9:2 Wabéquezda', ne gúl-laqueza' ca naca chiu'. Gul-la' chee̱ lau' Lue', nacu' Dios zrente̱.
PSA 9:3 Buluzrunnuj benne' dxeledábague̱' neda'. Xeajlechazie̱', ne belexenitie̱' lau Lue'
PSA 9:4 lawe' da nucá'ana chawu' da xrlátaje da dxuna'. Dxe'u lataj blau chiu', ne lu da xrlátaje dxuchi'u.
PSA 9:5 Gudil-lu' benne' xe̱zr la xu ca', ne bzria xi'u benne' we̱n da cale̱la ca'. Bsulu' la benne' ca' chadía chacanna.
PSA 9:6 Ba gulebía xi' benne' dxeledábague̱' neda'. Chadía chacanna zaj nazrinnaj lataj chee̱ benne' ca', ne xe̱zre chee̱' ca', da ca' bchínnuju' Lue'. Netú benne' cheajsá lazre̱' benne' ca'.
PSA 9:7 Xránadxu Dios súatequeze̱' chadía chacanna. Ba nucueze̱' lataj blau chee̱' naga guchi'e̱ chee̱ bénneache.
PSA 9:8 Lu da xrlátaje guchi'e̱ chee̱ bénneache dute̱ xe̱zr la xu, ne chee̱ benne' xúgute̱ xe̱zre ca' lu da naca li lazre'.
PSA 9:9 Xránadxu Dios gaque̱' ca tu lataj ga xelezrá chawe' benne' xache', naga xelezré̱'e̱ chawe̱' gate zrin zra chee̱ da zi' da xa'.
PSA 9:10 Benne' ca' zaj núnbe'e̱ Lue', Xran, xuluxrén lazre̱' Lue', lawe' da quebe bsan lazru' benne' ca' belexílaje̱' Lue'.
PSA 9:11 Le gul-la chee̱ Xránadxu, Bénnea' zue̱' xe̱zre Sión. Le guzén benne' xe̱zre ca' ca zaj naca da ca' nune̱',
PSA 9:12 lawe' da dxeajsá lazre̱' chee̱ benne' ca', ne dxexebéaj lazre̱' chee̱ benne' we̱te benne'. Quebe gul-la lazre̱' ca da dxululáwizra benne' ba xache' ca' Le̱'.
PSA 9:13 Bexache lazre' neda', Xran. Gunná' da dxezaca' lu ni'a na' benne' ca' dxelecuídene̱' neda'. Dxeca'u neda' lu na' xel-la' gute,
PSA 9:14 chee̱ guzenda' bénneache da dxue lá'ana' Lue', naga dxu'untu' xe̱zre Sión, ne chee̱ beda' lawe' da bseláu' neda'.
PSA 9:15 Xeajlechaze benne' xe̱zr la xu ca' lu xe̱dxu da gule̱ne̱'. Xeajlechu'e̱ lu xralaj da bulucueze̱'.
PSA 9:16 Xránadxu Dios blé'ene̱' ca da zaj naque̱' ne̱ chee̱ da zi' da xa' da gudichaj be'e̱ chee̱ benne' ca' dxelune̱' da cale̱la. Xeajchaze benne' we̱n da cale̱la na' lu da nun ni'a ná'queze̱'.
PSA 9:17 Benne' we̱n da cale̱la ca' xeledéqueze̱' lu lataj ba xa'. Xúgute̱ benne' ca' dxelal-la lazre̱' Xránadxu Dios.
PSA 9:18 Quegá chadía chacanna gal-la lazre' Dios benne' xache' ca', ne quegá tu chi'ize xenite da dxelebeza lazre̱' le̱'.
PSA 9:19 Guxasa, Xrana' Dios. Quebe gu'u lataj xelexegá'ana szrénqueze bénneache. Xelelá' lau' benne' xe̱zr la xu ca' chee̱ guchi'u chee̱'.
PSA 9:20 Xran, be̱n xelezrebe benne' ca' Lue'. Be̱n xelexúnbea benne' xe̱zr la xu ca' zaj naque̱' bénneacheze.
PSA 10:1 ¿Bizr chee̱ na' zu' zitu', Xran? ¿Bizr chee̱ na' dxucache cuinu' gate dxeledé xel-la' zi' bénneache chiu'?
PSA 10:2 Benne' we̱n da cale̱la dxenáu zi' xuzre̱' benne' xache' lu xel-la' dxucá'ana szren cuine̱', na' xeajchaze benne' xache' na' lu da ba nucuéza bénnea'.
PSA 10:3 Dxucá'ana szren cuine̱' ca naca da dxezá lazre̱'. Nupé̱'e̱ dizra' da dxenné̱' chee̱ benne' dxucude', na' dxucá'ana dítaje̱' Xránadxu Dios.
PSA 10:4 Benne' we̱n da cale̱la na' lu xel-la' dxucá'ana szren cuine̱' quebe dxape' Dios ba lá'ana, ne quebe dxéquene̱' che zua Dios.
PSA 10:5 Tu dxúnzqueze̱' da cale̱la, ne quebe dxéquene̱' guchi'u Lue' ca da dxune̱'. Dxuzúe̱' chalá'ala xúgute̱ benne' dxeledábague̱' le̱'.
PSA 10:6 Lu xichaj lázrdawe̱' dxenné̱': “Quebe bi seque' guzaga na neda'. Cabata' bi gaca chia' da cale̱la.”
PSA 10:7 Tu dxenné̱zqueze̱' dizra' schanni', ne da we̱n lazre', ne ca naca da cale̱la da gune̱'. Dxeledxúaj dxu'e̱ dizra' cale̱la, ne dizra' xálaze.
PSA 10:8 Dxu'a xe̱zre ca' dxucache cuine̱' chee̱ que̱le̱' bénneache. Bagácheze dxutie̱' benne' dxeledeze̱' na'. Bagácheze dxenné̱'e̱ chee̱ bi gune̱' chee̱ benne' xache' ca'.
PSA 10:9 Bagácheze dxebeze̱' ca dxun be̱zre xixre'. Dxebeze̱' ga séquene̱' que̱l-le̱' benne' xache' ca'. Dxe̱l-le̱' benne' xache' lu xralaj chee̱', ne dxexu'e̱ le̱'.
PSA 10:10 Dxine̱' xu bénnea' gude̱l-le̱'. Dxusaca zie̱' benne' zan nen ne̱'e̱ wal-la.
PSA 10:11 Lu xichaj lázrdawe̱' dxenné̱': “Nal-la lazre' Dios benne' caní. Nucache lawe̱', ne quebe lé'ene̱' da dxuna'.”
PSA 10:12 Guxasa, Xrana' Dios, ne bze̱ na'u. Quebe gal-la lazru'u benne' xache' ca'.
PSA 10:13 ¿Ájazra che̱n' benne' ca' dxelune̱' da cale̱la dxuluzúe̱' Dios chalá'ala? Lu xichaj lázrdawe̱' dxelenné̱': “Quebe xebéaj lazre' Dios.”
PSA 10:14 Dios, Lue' blé'equeznu' da nigá, lawe' da dxenná'u benne' we̱n da cale̱la, ne da ca' dxune̱' quebe naca na xrlátaje, na' xebéaj lázrequezu' bénnea'. Dxuluzúa cuina benne' xache' ca' lu na'u. Lue' dxácale̱quezu' bi we̱zé̱bedu ca'.
PSA 10:15 Dxugú' xel-la' wal-la chee̱ benne' we̱n da cale̱la. Guleaj láwela da cale̱la da nune̱', da na' be̱ne̱' lu da bagache'.
PSA 10:16 Chadía chacanna naca Xránadxu Wenná Bea chee̱dxu. Lu xe̱zr la xu chee̱' ba gulebía xi' benne' dxelecuídene̱' Le̱'.
PSA 10:17 Bnézruju' ca da bululáwizra benne' dxexruj lázre'du ca' Lue', Xran. Lue' dxupa'u lázxdau bénne'du ca' chee̱ xuluzé̱ nague̱' xrtizru',
PSA 10:18 chee̱ guchi'u chee̱ bi we̱zé̱bedu ca', ne chee̱ benne' dxeledée̱' xel-la' zi', chee̱ québedxa bi da cale̱la xelún benne' ca' dxelune̱' da cale̱la chee̱ bénne'du caní.
PSA 11:1 Dxuxrén lazra' Xrana' Dios. Ájazra che̱n' dxi'u bénne'du xu'a: “Bzrunnuj, guxíaj lu xí'ala ca tu bxinne?”
PSA 11:2 Le na' xque, dxulucuéza benne' ca' dxelune̱' da cale̱la xaga nalá xéche'ze. Ba zaj naxrúe̱' xaga nalá xéche'ze chee̱' lu du chee̱ na, chee̱ xelútie̱' bagácheze benne' xrlátaje ca'.
PSA 11:3 Chete ca' xelexinnaj da dxulusé̱ chuchu da xrlátaje, ¿ájazra xelún benne' xrlátaje ca'?
PSA 11:4 Xránadxu Dios zúaqueze̱' lataj lá'azxa chee̱'. Xabáaqueze zua lataj blau naga dxe' Dios. Dxelenná' xanne xiaj lawe̱'. Dxelé'ene̱' ca da dxelún bénneache.
PSA 11:5 Xránadxu Dios dxudée̱' chawe' benne' xrlátaje ca' lu da ste̱be. Dxecuídene̱' benne' ca' dxelune̱' da cale̱la, ne benne' dxelune̱' da zrinnaj.
PSA 11:6 Gudée̱' benne' ca' dxelune̱' da cale̱la lu da zi' da xa', da zaj naca na xi', ne da dxuzézrele̱'e da dxala na ca xedxe, ne tu be' lále̱'e̱, da ca' sel-le̱' lawe' benne' ca'.
PSA 11:7 Caní gune̱' lawe' da naca xrlátaje Xránadxu Dios, ne nazrí'ine̱' da naca na xrlátaje. Benne' li lazre' ca' xelelé'ene̱' lawe̱'.
PSA 12:1 Xrana' Dios, bselá bénneache chiu' lawe' da québedxa dxape̱' benne' xezica Lue' ba lá'ana. Quebe nu chilá' benne' li lazre' ládujla bénneache ca'.
PSA 12:2 Xúgute̱ bénneache ca' dxelezí xe̱'e̱ le sa' ljwezre̱'. Lu da we̱n lazre' ba zaj nupé̱'e̱ dizra' chee̱ xelezí xe̱'e̱ le̱'.
PSA 12:3 Xránadxu Dios guzría xi'e̱ xúgute̱ benne' quebe dxuluchálaje̱' du lazre', ne benne' ca' dxuluchálaje̱' da dxucá'ana szren cuine̱'.
PSA 12:4 Benne' ca' gulenné̱': “Ne̱ chee̱ dizra' chee̱ntu' zrué'entu' da chawe'. Ca dxezá lázrentu' guchálajntu', ¿nuzra nna be'e netu', xca'?”
PSA 12:5 Dxenná Xránadxu Dios: “Na'a xídaqueza' lawe' da dxulusaca zi'e̱ benne' xache' ca', na' dxelebezre lazre' benne' baxache' ca'. Guselá' benne' ca' dxelánene̱' da guna'.”
PSA 12:6 Xrtizra' Xránadxu Dios zaj naca na du lazre'. Zaj naca na ca xiaj plata da ba gudé na lu xi', da ba gudé na lu xi' gazre lasa.
PSA 12:7 Xran, guxúequezu' Lue' bénneache chiu' ca'. Chadía chacanna gucu'uju' le̱' lu na' benne' zaj zre̱'e̱ lu zra na'a zra.
PSA 12:8 Gátete̱ze na' dxaca da cale̱la gate dxulucá'ana szren bénneache da naca sban.
PSA 13:1 ¿Ájate̱queze gal-la lazru' neda', Xran? ¿Gal-la lázrtequezu' neda'? ¿Ájatequeze quebe le'enu' da dxaca chia'?
PSA 13:2 ¿Ájatequeze gun na ba xen guchaga lawa' da dxezaca'? ¿Ájatequeze gaca wi'ine lazra' te zra, ne chizrela? ¿Ájatequeze nna be'e benne' dxedábague̱' Lue' neda'?
PSA 13:3 Gunná' da dxaca chia', Xran, ne beche̱be chia'. Btipa lazra' chee̱ quebe gatia',
PSA 13:4 ne chee̱ quebe nna benne' dxedábague̱' neda': “Ba be̱tia' ni'a ne̱'e̱.” Benne' ca' dxeledábague̱' neda' xelebene̱' che cheajcházia' lu da cale̱la.
PSA 13:5 Neda' dxuxrén lazra' Lue' xexache lazru' neda'. Dute̱ lázrdawa' dxebeda' lawe' da dxuseláu' neda'.
PSA 13:6 Gúl-laqueza' chee̱ Xrana' Dios lawe' da ba nune̱' chia' da xrlátaje.
PSA 14:1 Benne' lázxdau zide' dxezá' lazre̱', dxenné̱': “Quebe zua Dios.” Benne' caní zaj nazrinnaj xichaj lázrdawe̱'. Dxelune̱' da sban ca'. Quebe nu chilá' benne' dxune̱' da xrlátaje.
PSA 14:2 Xránadxu Dios zue̱' xabáa dxenné̱'e̱ bénneache chee̱ lé'ene̱' che zua nu benne' dxéajni'ine̱', bénnea' dxape̱' ba lá'ana Dios.
PSA 14:3 Xúgute̱' zaj xu'e̱ neza xuca'. Xúgute̱' zaj nazrinnaj xichaj lázrdawe̱'. Quebe nu chilá' benne' dxune̱' da xrlátaje, netúgue̱'.
PSA 14:4 ¿Quebe dxeléajni'i benne' ca' dxelune̱' da sban? Dxulusunítie̱' bénneache chia' ca dxuzuzruj tu benne' xeta da dxawe̱', ne quebe dxeléquebe'ene̱' zua Xrane̱' Dios.
PSA 14:5 Dute̱ xel-la' dxelezrebe dxelezrize benne' ca' lawe' da dxácale̱ Dios benne' xrlátaje ca'.
PSA 14:6 Belún le̱' chee̱ da gulenná benne' xache' ca', san benne' caní xelebeza lazre̱' Xránadxu Dios.
PSA 14:7 Xídatega Bénnea' guselé̱' benne' Israel ca'. Gate gun Xránadxu xelexezrín benne' chee̱' ca', benne' ca' zaj nada'u zítu'la, na' welebé zri'ine zre sua Jacob, ne welebéle̱'e̱quezne̱' benne' Israel ca'.
PSA 15:1 Xran, ¿núzraqueze benne' sue̱' naga zu' Lue'? ¿Núzraqueze benne' sue̱' naga naca lá'azxa chiu'?
PSA 15:2 Waca bénnea' naque̱' du lazre', ne dxune̱' da xrlátaje, bénnea' zua da líqueze lu xichaj lázrdawe̱',
PSA 15:3 bénnea' quebe dxenné̱' chee̱ le sa' ljwezre̱', ne quebe bi da cale̱la dxune̱' chee̱ le sa' ljwezre̱', ne quebe dxu'e̱ lataj nu benne' si tizre̱' le sa' ljwezre̱'.
PSA 15:4 Waca bénnea' quebe dxape̱' ba lá'ana nu benne' dxune̱' da sban. Dxape̱' ba lá'ana benne' ca' dxelape̱' ba lá'ana Xránadxu Dios, bénnea' quebe dxuché̱'e̱ dizra' da ba gunné̱' lácala bi da' gunítie̱'.
PSA 15:5 Waca bénnea' dxusane̱' dumí chee̱' ne quebe dxenabe̱' xíchaje̱n, ne quebe dxezí' lu ne̱'e̱ dumí chee̱ nnie̱' chee̱ nu benne' quebe bi zria nabague̱'. Nu benne' dxune̱' caní cabata' cheajchazie̱' lu da cale̱la.
PSA 16:1 Bxue neda', Dios, lawe' da dxuxrén lazra' Lue'.
PSA 16:2 Lu xichaj lázrdawa' gucha' Xrana' Dios: “Lue' nacu' Xrana'. Quebe bi xetú da xrlátaje de̱ chia' da quebe naca na chiu'.”
PSA 16:3 Tuze benne' ca' zaj naque̱' chee̱ Dios lu xe̱zr la xu, ne benne' ca' zaj naque̱' du lazre' dxezaca ba lázrele̱na'.
PSA 16:4 Waxánqueze da dxelezaca benne' ca' dxelape̱' ba lá'ana tu dios quebe bi zaca. Quebe guna' le̱' tu zren gate dxuluzríe̱' zren lau dios na', ne quebe guchíneda' la dios na'.
PSA 16:5 Xránadxu Dios dxugawe̱' neda', ne naque̱' da ba neza chia'. Lue', Dios, nuxru' ca da naca chia'.
PSA 16:6 Ca da nuzú' chia' zaj naca na da dxezi'a ba neza, ne xrtante̱ zaj naca da nunnu' chia'.
PSA 16:7 Tu gucá'ana szrénzqueza' Xránadxu Dios, Bénnea' dxusé̱dene̱' neda'. Chizrela gate ne dxasia' dxuzéajni'ine̱' neda' lu xichaj lázrdawa'.
PSA 16:8 Xránadxu Dios nuxrén lazra' gusi'e̱ neda'. Lawe' da zue̱' cuita', quebe bi seque' guchebe na neda'.
PSA 16:9 Chee̱ le̱ na' gubé lázrdawa', ne gubéle̱'e̱quezda', na' zra gacha' lu xe̱dxu ba cueza lazra'
PSA 16:10 lawe' da quebe gucá'anu' bénne'du xu'a lu lataj ba xa', ne quebe gu'u lataj guzru nu benne' nácaqueze̱' chiu'.
PSA 16:11 Gulé'enu' neda' da guna' chee̱ gata' chia' xel-la' nabán. Naga zu' Lue' wabéle̱'e̱quezda', na' cuitu' Lue' súatequeze da ba neza chia'.
PSA 17:1 Bze̱ naga chi'a, Xran. Ben xanne' da dxuláwizra' Lue'. Guzí' da dxenaba' Lue', naca' du lazra'.
PSA 17:2 Be̱nna lataj xelá'a lau' chee̱ guchi'u chia', lawe' da dxelé'enu' xúgute̱ cáte̱ze zaj naca na.
PSA 17:3 Lue' dxenná' xánniu' xichaj lázrdawa' ne dxelé'enu' neda' chizrela. Gunná' xánniu' da dxuna', na' quebe bi da cale̱la blé'enu'. Ba nuna' quebe bi dizra' cale̱la nnia'.
PSA 17:4 Dxuzúa' dizra' ca naca da dxennáu', na' quebe dxuna' ca da dxelún benne' we̱n da zrinnaj ca'.
PSA 17:5 Bxue neda' lu neza chawe' chiu', chee̱ quebe cheajcházia' lu da cale̱la.
PSA 17:6 Dxuláwizra' Lue', Dios, lawe' da dxennu' chi'a. Bze̱ naga chi'a, na' bene da dxennía'.
PSA 17:7 Ble'e ca dxexache lázrele̱'u bénneache. Bselá benne' ca' dxuluxrén lazre̱' Lue' lu na' benne' dxeledábague̱' le̱'.
PSA 17:8 Bxue neda' ca dxun benne' dxuxúe̱' xiaj lawe̱'. Gude̱zre neda' ca dxun bedxuj dxé̱zreba' zrí'ineba' zran xrílaba'
PSA 17:9 chee̱ quebe bi xelún chia' benne' ca' dxelune̱' da cale̱la, benne' dxeledábague̱' neda', ne dxelaca lazre̱' xelútie̱' neda'.
PSA 17:10 Quebe dxelexache lazre̱' le sa' ljwezre̱', na' dute̱ xel-la' dxulucá'ana szren cuine̱' dxuluchálaje̱'.
PSA 17:11 Gátete̱ze dxedá' dxeléchaje̱' neda'. Dxelaca lazre̱' xeline̱' neda' xu.
PSA 17:12 Zaj naque̱' ca tu be̱zre xíxre'dau' dxaca lázreba' bi gáguba'. Zaj naque̱' ca tu be̱zre xixre', ba nucache cuínaba' chee̱ qué̱l-laba' béadu ca'.
PSA 17:13 Gudá, Xran, gudábaga' benne' ca' dxelune̱' da cale̱la, na' bchiche̱' lu xu. Bselá neda' lu na' benne' ca' dxelune̱' da cale̱la, guchínenu' xia chiu'.
PSA 17:14 Bselá neda' lu na' benne' ca' nen ni'a ná'quezu', Xran. Bselá neda' lu na' bénneache, benne' ca' zaj dxe'e̱ gunne xue chee̱ xe̱zr la xu nigaze, benne' ca' dxeláguqueze̱' da zácale̱'e̱ chiu'. Da nigáqueze dxulugawe̱' zrí'ine̱' ca', ne dxexegá'anaqueze da dxelágu zri'ine zre sue̱'.
PSA 17:15 Le'eda' neda' lau Lue' lawe' da naca' xrlátaje. Xezaca ba lazra' gaca' ca nácaquezu' Lue' gate xebana'.
PSA 18:1 Nazrí'ida' Lue', Xran. Lue' dxuzé̱ chuchu' neda'.
PSA 18:2 Lue', Xran, nacu' ca tu xiaj naga ze̱ chúchua', ne ca tu xu'u zren naga xu'u chawa', na' nacu' weselá chia'. Dios chia', Lue' dxuzé̱ chuchu' neda', na' guxrén lazra' Lue'. Dxucu'uju' neda', ne dxuseláu' neda', ne dxucache chawu' neda'.
PSA 18:3 Wanné̱queza' Xránadxu Dios, Bénnea' naca chee̱' güe lá'anadxu Le̱'. Le̱' guselé̱' neda' lu na' benne' ca' dxeledábague̱' neda'.
PSA 18:4 Guzúa' lu da ste̱be chee̱ xel-la' gute, na' guca da cale̱la ca tu xe̱gu nisa da bchebe na neda'.
PSA 18:5 Guzúa' lu da ste̱be chu'a lataj ba xa' lawe' da zua' lu da ste̱be chee̱ xel-la' gute.
PSA 18:6 Lu da zi' da xa' bláwizra' Xrana' Dios, ne gunné̱queza' Dios chia'. Le̱' benne̱' chi'a naga zue̱' lataj lá'azxa chee̱', ne bze̱ nague̱' da bchálaja' lawe̱'.
PSA 18:7 Nadxa guzrú' lu xe̱zr la xu nigá. Gulezrize lane xi'a ca'. Gulezrízele̱'e̱ na lawe' da bzra'a Le'.
PSA 18:8 Bdxuaj zren chee̱ xi' lu zrine̱', ne bdxuaj xi' lu dxu'e̱ da bzezxe na da de̱ lawe̱', na' xi' na' gudel-la na bau ca'.
PSA 18:9 Bzéxruje̱' da zria zran xabáa, na' bétaje̱', na' guzúa da chul-la zran ni'e̱.
PSA 18:10 Gudée̱' lu be' zrie̱' tu da nazí le na querubín. Chadí gudée̱' lu be' bdunu'.
PSA 18:11 Gúcue̱' da chul-la, da bcache na Le̱', da na' naca na beuj bza da xuzru na nisa.
PSA 18:12 Lu da dxácatite legala chee̱' da xu'u lu beuj bza, na' beledxúaj bau dxelala, ne xiaj bezxe'.
PSA 18:13 Zran xabáa gunné̱ guziu' chee̱ chi'i Xránadxu, na' ben chi'i Dios szrente̱ ládujla bau dxelala ca', ne xiaj bezxe' na'.
PSA 18:14 Bsane̱' xaga nalá xéche'ze chee̱' ca', na' be̱se dínnaje̱' benne' ca' dxeledábague̱' neda'. Bsane̱' xesa guziu' ca', ne bzria xi'e̱ benne' ca'.
PSA 18:15 Nadxa belelá' da zaj de̱ lu situj chee̱ nísadau', ne ble'e lau lane xe̱zr la xu da zua na zran nísadau', gate na' gudil-lu' benne' ca' dxeledábague̱' neda', Xran, ne lu xel-la' dxezrá'a chiu' bzagu' benne' ca'.
PSA 18:16 Bétaje̱' lu da sibe, ne bequé̱'e̱ neda'. Bebéaje̱' neda' lu da naca ca tu nisa zila.
PSA 18:17 Bselé̱' neda' lu na' benne' wal-la dxeledábague̱' neda', ne lu na' benne' ca' dxelecuídene̱' neda', benne' zaj nácadxe̱' wál-la ca neda'.
PSA 18:18 Buluzague̱' neda' gate na' zua' lu da sté̱bele̱'e̱, san Xrana' Dios gúcale̱ne̱' neda'.
PSA 18:19 Bebéaje̱' neda' naga xu'a, ne bzue̱' neda' tu lataj zren. Bselé̱' neda' lawe' da bezaca ba lazre̱' chia'.
PSA 18:20 Xránadxu Dios bexunne̱' chia' cáte̱ze naca da xrlátaje da nuna'. Cáte̱ze naca da xrlátaje da nuna' bexunne̱' chia'
PSA 18:21 lawe' da dxuna' ca da dxuse̱de Xrana' neda', ne quebe guleaj xíchaja' Dios chia'.
PSA 18:22 Dxuna' ca naca da dxenná bé'ene̱' neda', ne quebe bsana' da ca' nadxíxruj be'e̱.
PSA 18:23 Guca' li lazre' lau Le̱', ne bxue cuina' chee̱ quebe guna' da cale̱la.
PSA 18:24 Chee̱ le̱ na' bexunna Xránadxu Dios chia' cáte̱ze naca da xrlátaje da be̱na', cáte̱ze naca da xrlátaje da nuna' lau Le̱'.
PSA 18:25 Dxexache lazru' chee̱ benne' dxexache lazre̱' le sa' ljwezre̱', ne nacu' li lazre' nen benne' naque̱' li lazre'.
PSA 18:26 Dxunu' da naca chawe' chee̱ benne' naque̱' chawe', na' gacu' snia nen benne' we̱n da cale̱la.
PSA 18:27 Guseláu' benne' zaj zue̱' lu da zi' da xa', san guzéxruju' benne' dxulucá'ana szren cuine̱'.
PSA 18:28 Lué'queze guzalju' xi' chia'. Xrana' Dios, guzani'u chia' naga zua' lu da chul-la.
PSA 18:29 Nen xel-la' waca chiu' guzría xi'a benne' zante̱ dxeledíl-lale̱ne̱' neda'. Che Lue', Dios, súale̱nu' neda' waca guchínnaja' ze'e da zaj naxechaj xe̱zre ca'.
PSA 18:30 Li lazre' zaj naca da dxun Dios, na' du lazre' naca xrtizre̱'. Dxucu'uje̱' xúgute̱ benne' ca' dxelebeza lazre̱' Le̱'.
PSA 18:31 Tuze Xránadxu naque̱' Dios. Tuze Dios chee̱dxu naque̱' Benne' dxucu'uje̱' dxi'u.
PSA 18:32 Dios naque̱' Bénnea' dxune̱' neda' benne' wal-la, ne Benne' dxune̱' li lazre' da dxuna' neda'.
PSA 18:33 Dxune̱' ni'a ca zaj naca ni'a bzrina' xixre' ne dxuzúa chúchue̱' neda' lu xi'a Sión chee̱'.
PSA 18:34 Dxusé̱dene̱' neda' chee̱ gaca cha'a lu wedil-la, ne̱ chee̱ gaca guchíneda' xaga nalá xéche'ze da naca na xia gache'.
PSA 18:35 Lu xel-la' weselá chiu' bcu'uju' neda', ne nen na'u xabe̱la gúcale̱nu' neda'. Xel-la' zri'i lazre' chiu' ba nucá'ana szren na neda'.
PSA 18:36 Be̱n chawu' neza naga tea', chee̱ quebe cuila' lu neza na'.
PSA 18:37 Blaga' benne' dxeledábague̱' neda', na' xeajzrena' le̱', na' quebe bebi'a cadxa bé̱tetea' benne' ca'.
PSA 18:38 Be̱na' benne' ca' we̱', na' quebe guca xelexase̱'. Xeajlecházie̱' zran ni'a.
PSA 18:39 Btipu' lazra' chee̱ cha'a lu wedil-la. Bzéxruju' benne' dxeledábague̱' neda' zran ni'a.
PSA 18:40 Be̱nu' buluzrunnuj benne' dxeledábague̱' neda' lawa', chee̱ bzria xi'a benne' ca' dxelecuídene̱' neda'.
PSA 18:41 Gulenné̱' nu benne' gácale̱ne̱' le̱' san quebe nu chilá'. Gulenné̱' Xránadxu Dios, san quebe benne̱' chee̱'.
PSA 18:42 Bzúzruja' benne' ca' ca bxrte xu da dxua be'. Bléaja' le̱' ca dxuléaja' guna' la neza ca'.
PSA 18:43 Bseláu' neda' lu na' benne' ca' dxeledábague̱', na' be̱nu' neda' benne' xíchaje̱ xe̱zr la xu ca', na' benne' ca' quebe núnbe'a dxelune̱' zrin chia'.
PSA 18:44 Gate belenne̱' chia', na' buluzúe̱' xrtizra'. Benne' zaj zra' xe̱zr la xu ca' belune̱' ca gunná be'eda'.
PSA 18:45 Benne' zitu' ca' gulate ni'a ne̱'e̱, na' beledxúaje̱' dxelezrízie̱' lu xe̱zre zrentau' chee̱' ca'.
PSA 18:46 Gaca ba lá'azxa Xránadxu Dios. Gaca ba Bénnea' dxucu'uje̱' neda'. Xegá'ana szrénqueze Dios, Bénnea' dxuselé̱' neda'.
PSA 18:47 Naca Dios Bénnea' dxebéaj lazre̱' benne' dxeledábague̱' neda', ne dxuzúe̱' benne' ca' zran ni'a.
PSA 18:48 Naque̱' Bénnea' dxuselé̱' neda' lu na' benne' ca' dxeledábague̱' neda'. Dxune̱' dxenná be'eda' benne' ca' guledábague̱' neda'. Bselé̱' neda' lu na' benne' xichaj zra'a ca'.
PSA 18:49 Chee̱ le̱ na' xeche̱ba' chiu', Xran, lau benne' xe̱zr la xu ca', na' gúl-laqueza' chee̱ Lau' Lue'.
PSA 18:50 Dxun Dios dxenná bea bénnea' waláz chee̱', ne dxexache lazre̱' bénnea' guqué̱'e̱, bénnea' naque̱' David, ne zri'ine zre sue̱' chadía chacanna.
PSA 19:1 Dxulé'e lau zran xabáa ca naca xel-la' szren chee̱ Dios. Dxuchálajqueze na ca zaj naca da nune̱'.
PSA 19:2 Tu zra tu zra dxuzén na zra xula da nigá, na' tu zre' tu zre' dxe̱ na zre' xula da ná'queze.
PSA 19:3 Quebe dxuluchine na xrtizra' bénneache, ne quebe nu dxen chi'i na,
PSA 19:4 san dxezriluj da dxelenná na du gabí'i xe̱zr la xu, ne dxelezrín xrtizra' na dapa saca chee̱ xe̱zr la xu. Dios be̱ne̱' xabáa ca tu xu'u naga zua gubizra.
PSA 19:5 Che zílala dxalaj na ca tu benne' wechaga na'. Dxebé na ca tu benne' dxezá chégüe̱' lu witja.
PSA 19:6 Dxedxuaj na chalá'a naga dxalaj na, na' dxezrín na chalá'a naga dxebía na. Dxuchá'a na xúgute̱ da zaj de̱.
PSA 19:7 Du lazre' naca da nadxixruj bea Xránadxu, ne dxuzé̱ chacha na bénne'du xú'udxu. Li lazre' naca da dxexeche̱be Xránadxu, ne dxunezruj na xel-la' sina chee̱ benne' ca' quebe zaj nape̱' na.
PSA 19:8 Da líqueze zaj naca da nadxixruj bea Xránadxu, na' dxelebéle̱'e̱ benne' ca' dxelune̱' ca zaj naca na. Du lazre' zaj naca da dxuzéajni'i Xránadxu dxi'u, da dxuluzúa na dxi'u lu xel-la' naxaní'.
PSA 19:9 Cháwedau' naca zrébedxu Xránadxu, da gun na súadxu chadía chacanna. Da líqueze zaj naca da dxuchi'a Xránadxu chee̱dxu, ne zaj naca na chawe'.
PSA 19:10 Zaj naca na da dxezá lázredxadxu ca oro, ne ca oro zrente̱ da zácale̱'e̱ na. Zaj naca na zíxredxa ca bzrína'dau', da nácale̱'e̱ na zixre.
PSA 19:11 Dxulusizre na neda', we̱n zrin chiu'. Lawe' da dxuna' ca zaj naca na, da zrente̱ dxezi'a.
PSA 19:12 Netú benne' quebe gaca lé'ene̱' da cale̱la da dxune̱'. Bselá neda', Xran, lu da cale̱la da quebe dxéquebe'eda' dxuna'.
PSA 19:13 Bucache chawe' neda', we̱n zrin chiu', chee̱ quebe bi dul-la guna' du lazra'. Quebe gu'u lataj nna be'e dul-la neda'. Nadxa gaca' du lazra', ne quebe baga' zria chee̱ dul-la na'.
PSA 19:14 Gaca da dxuchálaja', ne da dxulaba lazra' da dxezaca ba lazru' Lue', Xran Nacu' Benne' dxuxúe̱' neda', ne Benne' dxexá'ue̱' neda'.
PSA 20:1 Dxenaba' Xránadxu xenne̱' chi'u lu zra zu' lu da ste̱be, ne gucu'uj La Dios chee̱ Jacob lue'.
PSA 20:2 Dxenaba' Le̱' naga zue̱' lataj lá'azxa chee̱' sel-le̱' da gácale̱ na lue', ne chee̱ xi'a Sión xide̱' guxre̱' lue'.
PSA 20:3 Dxenaba' Le̱' cheajsá lazre̱' ca naca xúgute̱ guna' bzu' chee̱', ne si' lu ne̱'e̱ béadu ca' dxuzezxu' lawe̱'.
PSA 20:4 Dxenaba' Le̱' gunne̱' lue' ca naca da dxezá lazru', ne gune̱' xúgute̱ da dxéquenu' xrlátaje.
PSA 20:5 Béle̱'e̱ntu' gate guselé̱' lue', na' chísantu' tu da gulé'e lawe na La Dios chee̱dxu. Dxenaba' Xránadxu gunne̱' lue' xúgute̱ da dxenabu' lau Le̱'.
PSA 20:6 Na'a nezda' dxuselá Xránadxu bénnea' ba gucá'aqueze̱'. Naga zue̱' xabáa lá'azxa chee̱' xenne̱' chi'i bénnea'. Xel-la' waca zrente̱ chee̱' guselé̱' bénnea'.
PSA 20:7 Bal-la benne' dxuluxrén lazre̱' carro ca' chee̱ wedil-la, na' xezícadxe̱' dxuluxrén lázre̱' bzrina' ca'. Dxi'u dxuxrén lázredxu La Xránadxu Dios.
PSA 20:8 Benne' ca' gulate ni'a ne̱'e̱, ne xeajlechazie̱'. Dxi'u bexásadxu, na' ze̱dxu.
PSA 20:9 Bselá netu', Xran, nacu' Wenná Bea chee̱ntu'. Ben chi'intu' gate dxuláwizrantu' Lue'.
PSA 21:1 Benne' dxenná bea dxebéle̱'e̱ne̱' nen xel-la' waca chiu', Xran, na' ca naca xel-la' weselá chiu' dxebéle̱'e̱ne̱'.
PSA 21:2 Bnézruju' le̱' da guzá lazre̱', ne quebe bzagu' da gunabe̱' Lue'.
PSA 21:3 Guzí' lu na'u le̱', ne be̱nu' dxaca chawe' chee̱'. Nuzriu' xíchaje̱' tu da naca na oro.
PSA 21:4 Gunabe̱' Lue' gunnu' le̱' xel-la' nabán, na' bnézruju' na le̱' chee̱ súaqueze̱' zane' iza.
PSA 21:5 Zrente̱ naca xabáa chee̱' lawe' da bseláu' le̱'. Be̱nnu' le̱' xel-la' ba lá'ana, ne xel-la' szren.
PSA 21:6 Lawe' da nunu' gaca chawe' chee̱' chadía chacanna dxunu' dxebéle̱'e̱ne̱' lau Lue'.
PSA 21:7 Lawe' da dxuxrén lazre' wenná bea na' Xránadxu, xexache lazre' Dios szrente̱ le̱', na' quebe sue̱' lu da ste̱be.
PSA 21:8 Xulétaju' xúgute̱ benne' dxeledábague̱' lue'. Xel-la' waca chiu' xulétaju' benne' ca' dxelecuídene̱' lue'.
PSA 21:9 Lu zra na' zra'u le̱' gaca chee̱ benne' ca' ca guzú' le̱' lu xi' ga dxulúzrie̱' bla'dau'. Xránadxu guzúzruje̱' benne' ca' lu xel-la' dxezrá'a chee̱', na' xi' na' guzezxe na le̱'.
PSA 21:10 Xúgute̱ da belune̱' lu xe̱zr la xu nigá guzria xi'u, ne xegú' zri'ine zre sue̱' ládujla bénneache,
PSA 21:11 lawe' da gulaca lazre̱' xelune̱' da cale̱la chiu' Lue'. Gulilaj lazre̱' ca da xelune̱', san quebe bi xelezéquene̱',
PSA 21:12 lawe' da gulagu' benne' ca'. Nucuezu' xaga nalá xéche'ze chiu' chee̱ le̱'.
PSA 21:13 Begá'ana szrénqueze Lue', Xran, lu xel-la' wal-la chiu'. Tu gúl-lazquezdxu, ne tu güe lá'anazquezdxu Lue' ca naca xel-la' waca chiu'.
PSA 22:1 Dios chia', Dios chia', ¿bizr chee̱ na' nusán lazru' neda'? ¿Bizr chee̱ na' quebe dxennu' da dxenaba' Lue' chee̱ guseláu' neda'?
PSA 22:2 Dios chia', dxuláwizra' Lue' te zra, ne quebe dxexeche̱bu' chia'. Dxuláwizra' Lue' chizrela, ne quebe dxezí'i lazra'.
PSA 22:3 Lá'azxa nacu' Lue'. Nacu' Benne' dxebeze̱' naga dxelúe lá'ana benne' Israel Lue'.
PSA 22:4 Xra xrtáuntu' gulebeza lazre̱' Lue'. Gulebeza lazre̱', na' bseláu' le̱'.
PSA 22:5 Bululáwizre̱' Lue', na' belelé̱'. Buluxrén lazre̱' Lue', na' quebe belexedué'ene̱'.
PSA 22:6 Neda' naca' ca tu be̱la' gúna'dau', ne quegá bénneache. Dxelecuide bénneache neda', ne dxuluzúe̱' neda' chalá'ala.
PSA 22:7 Xúgute̱ benne' dxelelé'e neda' dxelún le̱' chia'. Lu da dxelún le̱' chia' dxelexrá dxu'e̱, ne dxulutá xíchaje̱', dxelenné̱':
PSA 22:8 “Bzua cuine̱' lu na' Xránadxu chee̱ guselé̱' le̱'. Guselé̱' le̱' che dxezaca ba lázrele̱ne̱' le̱'.”
PSA 22:9 Lue' nacu' Bénnea' be̱xru' neda' gate gúlaja'. Be̱nu' bxren lazra' Lue' gate na' ne dxázretea'.
PSA 22:10 Guxu'a lu na'u gate quebe ne gálajtea'. Gate ne xu'a lu le̱'e̱ xrna'a, báchequeze nacu' Dios chia'.
PSA 22:11 Quebe xebigu' naga zua' lawe' da zua gágute̱ da gusaca zi na neda', ne quebe nu chilá' benne' gácale̱ne̱' neda'.
PSA 22:12 Zaj naxechaj benne' dxeledábague̱' neda' ca be̱zre ca'. Zaj naxechaj benne' neda' zaj naque̱' ca be̱zre wal-la ca' chee̱ Basán.
PSA 22:13 Gulaca lazre̱' xuluzría xi'e̱ neda' ca tu be̱zre xixre' dxedunba', ne dxebezre xa'aba'.
PSA 22:14 Bebizre lazra' ca nisa da nalalaj na lu xu, na' ca naca zrita xu'a bulusán ljwezre na. Lázrdawa' guca na ca xina' da bxuna na lu le̱'a ca nisa.
PSA 22:15 Bexaca xel-la' wal-la chia' ca tu xé'ena xu la'a, na' luzra' bedá' na chichja'. Nuzú' neda' lu xu xrte chee̱ xel-la' gute.
PSA 22:16 Zaj naxéchaje̱' neda' ca becu' ca'. Zaj naxechaj benne' we̱n da zrinnaj ca' neda'. Gulídue̱' ni'a na'a.
PSA 22:17 Waca gulaba' ca naca zrita xu'a, na' benne' ca' dxelenné̱'e̱ neda', ne dxelenná' xánnie̱' neda'.
PSA 22:18 Belexelé̱'e̱ zra lana' late' weaj, na' lawe' zra lana' gulebeje̱' da gaca bea na.
PSA 22:19 Quebe xebigu' naga zua', Xran. Nacu' xel-la' wal-la chia'. Gudázega gácale̱nu' neda', Xran.
PSA 22:20 Bselá bénne'du xu'a lu na' benne' gu'e̱ neda' xia. Bénnea' guzría xi'e̱ neda' gune̱' ca dxun becu'.
PSA 22:21 Bselá neda' lu dxu'a be̱zre xixre'. Bselá neda' lu luzu be̱zre wal-la ca'.
PSA 22:22 Guzenda' bi bícha'dau' ca' lau' Lue'. Güe lá'anaqueza' Lue' ladaj benne' zaj nazrague̱' lau'.
PSA 22:23 Le'e, dxezrébele Xránadxu, le güe lá'ana Le̱'. Le gucá'ana szrene̱', le'e, zri'ine zre sua Jacob. Le zrebe Le̱', le'e, zri'ine zre sua Israel.
PSA 22:24 Quebe bzua Dios chalá'ala, ne quebe gucuídene̱' da zi' da xa' da guledé benne' xache' ca', ne quebe bcache lawe̱' lau benne' ca' san gate bululáwizre̱' Le̱', benne̱' chi'e̱.
PSA 22:25 Güe lá'anaqueza' Lue' laduj benne' zan zaj nazrague̱' lau'. Ca da guche̱be lazra' gúnqueza' lau benne' ca' dxelezrebe̱' Lue'.
PSA 22:26 Xelagu benne' dxexruj lazre', ne welélajquezne̱'. Benne' ca' dxelebigue̱' lau Xránadxu xelúe lá'anaqueze̱' Le̱'. Tu gácazqueze da ba neza chee̱ benne' ca'.
PSA 22:27 Cheajlesá lazre' benne' dute̱ xe̱zr la xu Xránadxu, na' xelexebí'e̱ lau Le̱'. Xúgute̱ cue' benne' chee̱ xúgute̱ cue' xe̱zr la xu xelúe lá'anaqueze̱' Le̱',
PSA 22:28 lawe' da xu'u lu na' Xránadxu xel-la' dxenná bea, na' nna bé'ene̱' xúgute̱ benne' xe̱zr la xu ca'.
PSA 22:29 Xeláguqueze xúgute̱ benne' zren ca' chee̱ xe̱zr la xu nigá, ne xelúe lá'anaqueze̱' Dios. Xuluzú zribe lau Le̱' xúgute̱ benne' ca' xelate, benne' ca' quebe xelezéquene̱' xelegú'u chawe̱' bénne'du zaj xu'e̱ chee̱ quebe xelatie̱'.
PSA 22:30 Zri'ine zre sua benne' ca' xelunbe' zrin chee̱ Xránadxu. Xuluzenne̱' zrí'ine̱' ca' ca naca chee̱ Xránadxu cadxa cheajse̱te̱ chee̱ bénneache.
PSA 22:31 Xelezrine̱', ne xuluzenne̱' bénneache ca naca da xrlátaje da dxun Dios. Xuluzenne̱' benne' quebe ne xelálaje̱' be̱n Dios da caní.
PSA 23:1 Xránadxu Dios dxuxúe̱' neda' ca tu benne' dxuxúe̱' zrila' chee̱'. Quebe bi dxexázrjeda'.
PSA 23:2 Ca dxelezrúa zríla'du ca' ba guláguba' xixre' xá'adau', caní dxune̱' chia' chee̱ xezí' lazra'. Gune̱' chia' ca dxaca chee̱ zrila' ca' dxeché̱'e̱-ba' dxu'a xe̱gu nisa da de̱ zrize.
PSA 23:3 Dxuxuzúa chúchue̱' neda' lu xichaj lázrdawa'. Dxusi'e̱ neda' lu da xrlátaje chee̱ gaca li da guche̱be lazre̱'.
PSA 23:4 Láqueze tea' naga sua' lu da ste̱be chee̱ xel-la' gute, quebe bi da cale̱la guchebe na neda', lawe' da zúale̱nu' Lue' neda', Xran, na' dxelácale̱ zrise', ne blazru chiu' neda'.
PSA 23:5 Dxucuezu' da xi'aj gawa' lácala benne' dxeledábague̱' neda' zaj naxechaj neda'. Dxugú'u da za xichja' da dxapa na neda' ba lá'ana, ne dxusezráteu' zriga' chia'.
PSA 23:6 Da xrlátaje, ne xel-la' dxexache lazre' chiu' da lítegaze xelezúale̱ na neda' xúgute̱ zra naca bana', na' lizru', Dios, gaca na lizra' chadía chacanna.
PSA 24:1 Chee̱ Dios naca xe̱zr la xu nigá ne xúgute̱ da zaj de̱ lawe na. Naca chee̱' xe̱zr la xu, ne xúgute̱ bénneache zaj zre̱'e̱ ga na'.
PSA 24:2 Bzue̱' na lawe' nísadau', ne bzale̱' lane na sítujla zran nísadau'.
PSA 24:3 ¿Nu seque' cuen xi'a chee̱ Xránadxu? ¿Nu seque' chu'u xudau' lá'azxa chee̱'?
PSA 24:4 Waca benne' ca' zaj naque̱' du lazre' ca naca da dxelune̱', ne ca naca da dxulaba lazre̱'. Benne' ca' quebe ne xelechisa ne̱'e̱ lau bedáu' xiaj xaga ca', ne quebe bi ne xeleche̱be lazre̱' da naca we̱n lazre'.
PSA 24:5 Xránadxu gune̱' da chawe' chee̱ benne' caní. Dios guchi'e̱ chee̱ benne' caní, ne guselé̱' le̱'.
PSA 24:6 Caní zaj naca bénneache dxelebigue̱' lau Le̱', benne' ca' dxelexu'e̱ naga zua Dios chee̱ Jacob.
PSA 24:7 Le salaj dxa xu'u chee̱ xudau'. Le salaj dxa xu'u chawe' ca', na' chu'u Wenná Bea szrente̱.
PSA 24:8 ¿Nuzra na' Wenná Bea szrente̱ nigá? Naque̱' Xránadxu, Benne' wal-la, Bénnea' nape̱' dute̱ xel-la' waca. Naque̱' Xránadxu, Bénnea' dxedxúaje̱' chawe' lu wedil-la.
PSA 24:9 Le salaj dxa xu'u chee̱ xudau'. Le salaj dxa xu'u chawe' ca', na' chu'u Wenná Bea szrente̱.
PSA 24:10 ¿Nuzra na' Wenná Bea szrente̱ nigá? Naque̱' Xránadxu, Benne' dxenná bé'ene̱' xúgute̱ da zaj zua. Le̱' naque̱' Wenná Bea szrente̱ na'.
PSA 25:1 Xran, dxennía' Lue' dute̱ lázrdawa'.
PSA 25:2 Dxuxrén lazra' Lue', Dios chia'. Quebe gu'u lataj xedué'eda'. Quebe gu'u lataj benne' dxeledábague̱' neda' xuluzétaje̱' neda'.
PSA 25:3 Da líqueze, benne' ca' dxelebeza lazre̱' Lue' quebe xeleque zréajene̱'. Xeledué'e benne' ca' dxeledábague̱' xrtizru'.
PSA 25:4 Xran, ble'e neda' da dxaca lazru' guna'. Ble'e neda' da dxezaca ba lazru' guna'.
PSA 25:5 Bse̱de neda' guna' ca naca da li chiu' lawe' da nacu' Dios dxuseláu' neda'. Tu dxebeza lázrezqueza' Lue'.
PSA 25:6 Bsa lazre', Xran, gacu' zri'i lazre', ne xexache lazru' chia' cáte̱ze da dxúntequezu'.
PSA 25:7 Quebe chajsá lazru' dul-la da be̱na' gate ne naca' benne' cuide', ne ca gudábaga' xrtizru'. Nen dute̱ xel-la' dxexache lazre' chiu', bsa lazre' neda', ne nen dute̱ xel-la' zri'i lazre' chiu', Xran.
PSA 25:8 Xrlátaje, ne li lazre' naca Xránadxu Dios. Chee̱ le̱ na' gusé̱dene̱' benne' dul-la ca' da dxal-la' xelune̱'.
PSA 25:9 Gulé'ene̱' benne' dxexruj lazre' ca' da xrlátaje da xelune̱', ne gusé̱dene̱' benne' zren lazre' ca' da xelune̱'.
PSA 25:10 Lu xel-la' dxexache lazre', ne lu da li dxeché̱ Xránadxu benne' ca' dxelune̱' ca naca xel-la' wezría chee̱', ne ca da dxuse̱de Le̱'.
PSA 25:11 Lawe' da dxunu' ca da ba gunníu', Xran, gunite lau' ca naca dul-la nuna', da naca na zren.
PSA 25:12 ¿Nu benne' dxezrebe̱' Xránadxu Dios? Le̱' gusé̱dene̱' benne' nigá da dxal-la' gune̱'.
PSA 25:13 Gaca chee̱' tu da ba neza zrente̱, na' zri'ine zre sue̱' gaca chee̱be' xe̱zr la xu.
PSA 25:14 Xránadxu Dios naque̱' tuze nen benne' ca' dxelezrebe̱' Le̱', na' gune̱' xelúnbe'e̱ xel-la' wezría chee̱'.
PSA 25:15 Tu dxennázqueza' Xránadxu Dios lawe' da guselé̱' neda' lu na' benne' ca' dxelaca lazre̱' xele̱l-le̱' neda'.
PSA 25:16 Gunná' neda', ne bexache lazre' neda' lawe' da zua' tuza', ne dxezaca zi'a.
PSA 25:17 Naxánle̱'e̱ da ste̱be da zaj zua lázrdawa'. Bselá neda' lu da ste̱be zua'.
PSA 25:18 Gunná' ca dxezaca zi'a, ne ca dxunle̱'a zrin, na' bnite lau xúgute̱ dul-la da nabaga'.
PSA 25:19 Gunná' benne' ca' dxeledábague̱' neda' ca naxánle̱'e̱ne̱', ne ca dxelecuídele̱'e̱ne̱' neda'.
PSA 25:20 Bxue bénne'du xu'a, ne bselá neda'. Quebe gu'u lataj xedué'eda' lawe' da dxuxrén lazra' Lue'.
PSA 25:21 Zaj nuxru da xrlátaje, ne xel-la' li lazre' neda' lawe' da dxebeza lazra' Lue'.
PSA 25:22 Dios, bselá benne' Israel ca' lu xúgute̱ da dxelezaca zi'e̱.
PSA 26:1 Bchi'a chia', Xran, lawe' da nuna' da xrlátaje. Bxren lazra' Lue', Xrana' Dios, ne quebe be̱n chupa lazra'.
PSA 26:2 Gunná' xanne' lázrdawa', Xran, ne bxue ca da nuna'. Gunná' xanne' da xu'u lu xichaj lázrdawa'
PSA 26:3 lawe' da dxeque be'eda' dxexache lazru' neda', ne dxuna' ca naca da li chiu'.
PSA 26:4 Quebe ne guna' tu zren benne' ca' dxelune̱' da xrlátaje cúzreze, ne quebe ne guna' tuze benne' ca' dxululé'e cuine̱' xrlátaje.
PSA 26:5 Dxecuídeda' da dxelún benne' ca' dxelune̱' da cale̱la naga dxelezrague̱', ne quebe ne chu'a tu zren benne' ca' dxuluzúe̱' Dios chalá'ala.
PSA 26:6 Dxelé'enu' quebe bi zria nabaga', na' waca biga' lu cugu chiu', Xran,
PSA 26:7 chee̱ cuezre xa'a, xapa' Lue': “Xcalenu'”, ne chee̱ guzenda' bénneache ca naca da zren ca' da nunu'.
PSA 26:8 Xran, nazrí'ida' lizru' naga zu', ne lataj lá'azxa naga zua da xabáa chiu'.
PSA 26:9 Quebe guzría xi'u neda' tu zren nen benne' dul-la ca', ne quebe gutiu' neda' tu zren nen benne' ca' dxelútie̱' benneáche,
PSA 26:10 benne' ca' dxelune̱' da cale̱la, ne tu dxulunézrujzqueze̱' dumí chee̱ xelelé̱' lu da zaj nune̱'.
PSA 26:11 Neda' tu gúnzqueza' da naca li lazre'. Bselá neda', ne bexache lazre' neda'.
PSA 26:12 Tu núnzqueza' da xrlátaje, na' güe lá'anaqueza' Xránadxu Dios lau benne' ca' zaj nazrague̱' chee̱'.
PSA 27:1 Xránadxu Dios naque̱' xel-la' naxaní' chia', ne Benne' dxuselé̱' neda'. ¿Nu benne' gaca guchebe̱' neda'? Xránadxu Dios naque̱' Benne' dxucu'uje̱' neda'. ¿Nu benne' gaca guzúe̱' neda' lu da sté̱bele̱'e̱?
PSA 27:2 Gate guléchaj benne' ca' dxelune̱' da cale̱la chia', nen benne' ca' dxulusaca zi'e̱ neda', ne benne' ca' dxeledábague̱' neda' chee̱ xuluzría xi'e̱ neda', na' gulechégüe̱', ne xeajlecházie̱'.
PSA 27:3 Láqueze xeléchaj tu cue' benne' dxjaque̱' wedil-la neda', benne' ca' dxeledábague̱' neda', quebe zrébequeza'. Láqueze xuluzúe̱' neda' lu wedil-la, neda' guxrén lázrequeza' Dios.
PSA 27:4 Tu da gunábeda' Xránadxu Dios. Da nigáze sa lazra', da naca na chee̱ sua' lizre Xránadxu xúgute̱ zra gaca bana', chee̱ gulaba lazra' ca naca da xrtante̱ chee̱ Xránadxu, ne chee̱ guchálajle̱na' Le̱' lu xudau' lá'azxa chee̱'.
PSA 27:5 Le̱' gucache chawe̱' neda' lu lataj lá'azxa chee̱' lu zra dxaca da cale̱la. Gucache chawe̱' neda' lu lataj cheé̱queze̱' naga zúaqueze̱'. Guzúe̱' neda' tu naga se̱ cháweda'.
PSA 27:6 Nadxa gune̱' guzétaja' benne' dxeledábague̱' neda', ne zaj naxéchaje̱' neda', na' nen dute̱ xel-la' dxebé gutia' béadu ca' guzúa'-ba' lu cugu chee̱'. Gúl-laqueza', ne tu güe lá'anazqueza' Xránadxu.
PSA 27:7 Xran, ben chi'a gate ne dxuláwizra' Lue'. Bexache lazre' neda', ne beche̱be chia'.
PSA 27:8 Lu xichaj lázrdawa' benda' chi'u, gunníu': “Bexilaj chia'.” Xexílaja' chiu', Xran.
PSA 27:9 Quebe gucache lau' chia' neda'. Lu xel-la' dxezrá'a chiu' quebe xebigu' naga zua' neda', we̱n zrin chiu'. Nacu' Benne' dxácale̱ne̱' neda'. Quebe gusanu' neda', ne quebe cueaj xichju' neda', Dios, weselá chia'.
PSA 27:10 Lácala xulusán xra xrna'a neda', tu xecá'azqueze Xránadxu Dios neda'.
PSA 27:11 Bse̱de neda' da dxaca lazru' guna', Xran, ne ble'e neda' da li lazre' da dxal-la' guna', lawe' da zaj naxán benne' dxeledábague̱' neda'.
PSA 27:12 Quebe gu'u lataj benne' dxeledábague̱' neda' xelune̱' chia' da dxelaca lazre̱' lawe' da zaj naxechaj benne' we̱n lazre' neda' nen benne' dxelaca lazre̱' xulusaca zi'e̱ neda'.
PSA 27:13 Xránadxu Dios guche̱be lazre̱' le'eda' da xrlátaje chee̱' naga gaca bana'. La quebe guxéajle̱'a da nigá, na' gute ni'a na'a.
PSA 27:14 Le cueza xelá' Xránadxu. Le gutipa lázrele, na' Le̱' guzé̱ chúchue̱' le'e. Awe', le cueza xelá' Xránadxu.
PSA 28:1 Xran, dxuláwizra' Lue'. Nacu' Benne' dxucú'uju' neda'. Bze̱ naga chi'a lawe' da che quebe xennu' neda' gaca' ca tu benne' dxu'e̱ lataj ba xa'.
PSA 28:2 Ben chi'a dxuláwizra' Lue', ne dxechisa na'a lau' naga zu' lataj lá'azxa chiu'.
PSA 28:3 Quebe guzría xi'u neda' tu zren nen benne' we̱n da cale̱la ca', ne cá'anqueze nen benne' ca' dxelune̱' da zrinnaj, benne' ca' dxelenné̱' dizra' cháwedau' lau le sa' ljwezre̱', san xu'u lázrdawe̱' da cale̱la gune̱' chee̱'.
PSA 28:4 Bde benne' ca' lu da ba xa' cáte̱ze naca chee̱ da belune̱', cáte̱ze naca da cale̱la da zaj nune̱'. Bunezruj chee̱ benne' ca' cáte̱ze da belune̱', da na' dxal-la' xelezí'e̱.
PSA 28:5 Lawe' da quebe gulape̱' ba lá'ana da be̱n Xránadxu, ne quegá da be̱ne̱' lu ni'a ná'queze̱', guxrínnaje̱' benne' ca', ne gudée̱' le̱' lu da ba xa'.
PSA 28:6 ¡Gaca ba Xránadxu Dios, Bénnea' benne̱' chi'a gate bláwizra' Le̱'!
PSA 28:7 Xránadxu naque̱' Bénnea' dxuzé̱ chúchue̱' neda', ne dxucu'uje̱' neda'. Bxren lazra' Le̱', na' gúcale̱ne̱' neda', na' chee̱ le̱ na' gubéle̱'e̱da', na' gul-laqueza', ne güe lá'anaqueza' Le̱'.
PSA 28:8 Xránadxu naque̱' Bénnea' dxuzé̱ chúchue̱' benne' chee̱' ca', ne naque̱' Benne' dxucu'uje̱', ne dxuselé̱' bénnea' guqué̱'e̱.
PSA 28:9 Bselá benne' chiu' ca', ne be̱n gaca chawe' chee̱ da naca chee̱'. Bxue benne' ca', ne be̱xru le̱' chadía chacanna.
PSA 29:1 Le güe lá'ana Xránadxu, le'e, zrale xabáa. Le güe lá'ana xel-la' szren chee̱', ne xel-la' waca chee̱'.
PSA 29:2 ¡Da xabáa naca La Xránadxu! ¡Le güe lá'ana na! Le guzú zríbele lau Xránadxu lá'azxa gate xelé̱'e̱.
PSA 29:3 Chi'i Xránadxu dxen na lawe' nísadau'. Dxen chi'i Dios xabáa ca guziu' da dxenné̱ na. Dxedá chi'e̱ lawe' nísadau'.
PSA 29:4 Dxen chi'i Xránadxu ca naca xel-la' wal-la chee̱ na. Dxen chi'i Xránadxu dute̱ xel-la' szren chee̱ na.
PSA 29:5 Chi'i Xránadxu dxichaj na xaga cedro ca'. Dxichaj na xaga cedro ca' zaj ze̱ na xi'a Líbano.
PSA 29:6 Dxuxrite na xi'a Líbano ca' ca dxelexrite bé̱zredu ca', na' dxuxrite xi'a Hermón ca tu bé̱zredau'.
PSA 29:7 Chi'i Xránadxu dxun na chaze xesa.
PSA 29:8 Chi'i Xránadxu dxuxrize na le̱'e̱ xixre' lawe' lataj. Dxuxrize na le̱'e̱ xixre' chee̱ xe̱zr la xu Cades.
PSA 29:9 Chi'i Xránadxu dxuxrize na xaga wal-la ca'. Dxuchibe na xrlegue xaga ca', na' lu xudau' chee̱' dxelenná xúgute̱ bénneache: “¡Gaca ba Dios!”
PSA 29:10 Dxenná be'e Xránadxu nísadau' ca'. Chadía chacanna dxenná be'e̱ ca Wenná Bea.
PSA 29:11 Xránadxu Dios dxuzé̱ chache̱' benne' chee̱' ca'. Dxuzúe̱' le̱' lu da ba neza chee̱ xel-la' dxebeza zri lazre'.
PSA 30:1 Gucá'ana szrena' Lue', Xran, lawe' da bechisu' neda', ne quebe bnézruju' lataj benne' ca' dxeledábague̱' neda' xelún le̱' chia'.
PSA 30:2 Xrana' Dios, bláwizra' Lue', na' bexunu' neda'.
PSA 30:3 Xran, bseláu' neda' lu lataj ba xa'. Bexunu' neda' chee̱ quebe chu'a xe̱dxu ba.
PSA 30:4 Le gul-la chee̱ Xránadxu, le'e nácale benne' cheé̱queze̱'. Le xe̱ Le̱': “Xcalenu'”, ne dxajsá lázrele naque̱' lá'azxa,
PSA 30:5 lawe' da tu chí'idauze dxezré̱'e̱ san chadía chacanna zua xel-la' zri'i lazre' chee̱'. Wabézredxu tu zreze, san che zílala wabéle̱'e̱dxu.
PSA 30:6 Gate guzúa chawa' gunnía': Quebe nu seque' gutá neda',
PSA 30:7 lawe' da bze̱ chuchu' neda', Xran, ca tu xi'a zren, ne blé'enu' neda' cháwedau'. Gate bcache lau', na' guzúa' ste̱be.
PSA 30:8 Xran, guláwizra' Lue', ne gata' xueda' Lue'.
PSA 30:9 ¿Bizra da ba neza gaca na chiu' che gatia', ne chu'a xe̱dxu ba? ¿Güe lá'ana' Lue' gate ba naca' xu xrte? ¿Waca nu guzenda' da li chiu'?
PSA 30:10 Bze̱ naga neda', Xran, ne bexache lazre' neda'. Xran, gúcale̱ neda'.
PSA 30:11 Be̱nu' bexaca xel-la' dxebezre chia' xel-la' wexá'a. Bcuasu' xel-la' dxewí'ine lazre' chia', ne bzu' chia' xel-la' dxebé.
PSA 30:12 Chee̱ le̱ na' tu gúl-lazqueza' chiu', lawe' da nacu' da ba neza chia', ne quebe sua zríqueza'. Xrana' Dios, tu güe lá'anazqueza' Lue' chadía chacanna.
PSA 31:1 Dxuxrén lazra' Lue', Xrana' Dios. Quebe gu'u lataj xedué'eda'. Lu da xrlátaje chiu' bselá neda'.
PSA 31:2 Bze̱ naga chi'a, ne bselá neda'. Bze̱ chuchu neda', ne bucú'uj neda' chee̱ la'.
PSA 31:3 Nacu' Benne' dxuzé̱ chuchu' neda', ne dxucú'uju' neda'. lawe' da nacu' li lazre' gulé'enu' neda' neza, ne gusi'u neda' neza na'.
PSA 31:4 Bebéaj neda' lu xralaj da ba zaj nucueze̱', chee̱ xele̱l-le̱' neda'. Lue' nacu' Benne' dxuxúe̱' neda'.
PSA 31:5 Lu na'u dxuzúa' bénne'du xu'a, Xran. Lue' bexá'awenu' neda', Dios li lazre'.
PSA 31:6 Dxecuídeda' benne' ca' dxelebeza lazre̱' dios ca' quebe bi zaj zaca. Neda' dxebeza lazra' Xrana' Dios.
PSA 31:7 Béle̱'e̱da', ne sua' lu da ba neza lawe' da dxexache lazru' neda'. Caní dxunu' lawe' da dxelé'equeznu' ca da dxezaca zi'a. Nézenu' ca dxedéa' lu da ba xa'.
PSA 31:8 Quebe bdeu' neda' lu na' benne' ca' dxeledábague̱' neda'. Bze̱ chuchu' neda' tu lataj chawe'.
PSA 31:9 Bexache lazre' neda', Xrana' Dios, lawe' da zua' lu da ba xa'. Ba bebizre nisa xuzru xiaj lawa' lawe' da dxewí'ine lazra' dute̱ bénne'du xu'a, ne dute̱ be̱la' dxen chia'
PSA 31:10 lawe' da dxedé xel-la' nabán chia' lu da ba xa', ne dxedéa' iza chia' ca' dxebezre lazra'. Dxedú lazra' lawe' da nabaga' zria, na' dxelelá zrita xu'a.
PSA 31:11 Xúgute̱ benne' ca' dxeledábague̱' neda' dxelecuídene̱' neda', na' benne' walízr chia' dxuluzúe̱' neda' chelá'ala, na' benne' zaj núnbe'e̱ neda' dxelecuase̱' neda'. Benne' ca' dxelelé'ene̱' neda' la neza dxuluzrúnnuje̱' naga zua'.
PSA 31:12 Benne' caní ba gulal-la lazre̱' neda' ca dxelal-la lazre̱' tu benne' gate. Naca' neda' ca tu xé'ena xu da nalá'a.
PSA 31:13 Dxenda' dizra' schanni' da dxelenná benne' zante̱ chia', na' gátete̱ze zua da dxuchebe na neda'. Dxácate̱ na' dxelune̱' tuze dizra' bi xelune̱' chia', ne zaj nune̱' xelútie̱' neda'.
PSA 31:14 Neda' dxuxrén lazra' Lue', Xran. Dxennía' nacu' Lue' Dios chia'.
PSA 31:15 Lu na'u Lue' zaj xu'u zra chia' ca'. Bselá neda' lu na' benne' ca' dxeledábague̱' neda', ne lu na' benne' ca' zaj nau zi' xuzre̱' neda'.
PSA 31:16 Lu xel-la' szren chiu' bxue neda', we̱n zrin chiu'. Lu xel-la' dxexache lazre' chiu' bselá neda'.
PSA 31:17 Quebe gu'u lataj xedué'eda', Xran, lawe' da dxuláwizra' Lue'. Be̱n xelexedué'e benne' ca' dxelebéaj xíchaje̱' Lue'. Be̱n xelezúa zrie̱' lu lataj ba xa'.
PSA 31:18 Be̱n quebe gaca xelenné̱ benne' ca' dxelezí xe̱'e̱, benne' ca' dxelenné̱' da cale̱la chee̱ benne' xrlátaje ca', da dxelenné̱' lu xel-la' dxulucá'ana szren cuina, ne lu xel-la' dxulucá'ana ditaj benne' caní.
PSA 31:19 Da zrente̱ naca xel-la' zri'i lazre' chiu' da napu' chee̱ bi gunu' chee̱ benne' ca' dxelape̱' Lue' ba lá'ana, da na' dxunu' lau xúgute̱ bénneache ne̱ chee̱ benne' ca' dxelebeza lazre̱' Lue'.
PSA 31:20 Lu da bagácheze naga zu' Lue' dxucachu' benne' ca' chee̱ quebe bi xelún bénneache chee̱'. Dxuzú' benne' ca' tu lu xu'u nagache chee̱ quebe bi gun chee̱' xel-la' wetil-la dizra' chee̱ bénneache.
PSA 31:21 ¡Gaca ba Xránadxu Dios! Lu xel-la' dxexache lazre' chee̱' be̱ne̱' da zrente̱ chee̱ gúcale̱ne̱' neda' tu lu xe̱zre naga guca wedil-la.
PSA 31:22 Gate na' guzúa da dxuchebe neda' gunnía': Zua' naga québedxa le'e Xrana' neda'. Lue' bennu' chi'a da guta' xueda' Lue' gate na' bláwizra' Lue'.
PSA 31:23 ¡Le zri'i Xránadxu, xúgute̱le le'e nácale benne' chee̱ Lé̱queze̱'! Xránadxu dxuxúe̱' benne' ca' quebe dxulusane̱' Le̱', na' dxuxunézrujle̱'e̱ chee̱ benne' ca' dxulucá'ana szrene̱' Le̱'.
PSA 31:24 Le gutipa lázrele, xúgute̱le le'e dxebeza lázrele Xránadxu Dios, na' Le̱' guzé̱ chúchue̱' le'e.
PSA 32:1 ¡Ba neza zrente̱ naca na chee̱ bénnea' Dios ba bnite lawe̱' dul-la da gubágue̱', ne ba gudúe̱' zria da guzúa chee̱'!
PSA 32:2 ¡Ba neza zrente̱ naca na chee̱ bénnea' Dios quebe dxusebague̱' le̱' zria, bénnea' quebe dxezí xe̱'e̱!
PSA 32:3 Gate quebe guxrúale̱pa' dul-la gubaga', bedú lazra' lawe' da gudxezra' bedú zra.
PSA 32:4 Te zra ne chizrela bdeu' neda' xel-la' zi', Xran. Bedú lazra' ca dxebizre beaj nisa beu' la.
PSA 32:5 Nadxa guxrúale̱pa' dul-la gubaga', ne quebe bcacha' zria da guzúa chia'. Bechugu lazra' guxrúale̱pa' na lau Lue', Xran, na' Lue' bnite lau' chee̱ dul-la gubaga'.
PSA 32:6 Xúgute̱ bénneache chiu' dxal-la' xuluchálajle̱ne̱' Lue' gate de̱ lataj xelexezrelne̱' Lue', na' gate zrin da zi' da xa' da xelezaque̱', da gaca na ca tu xe̱gu nisa zren da dxedxuaj na, na' quebe bi gune na benne' ca'.
PSA 32:7 Lue' nacu' ca tu lataj naga gaca gucache cuina', na' gucache chawu' neda' chee̱ quebe bi da saca'. Tu gul-lazqueza' zizraj ca bseláu' neda' lawe' da dxuxú' neda'.
PSA 32:8 Dxenná Xránadxu: “Gulé'eda' lue' neza naga dxal-la' tau'. Gusé̱deda' lue', ne guzéajni'ida' lue' ca dxal-la' gunu'.
PSA 32:9 Quebe gacu' ca tu bzrina' u tu bea, be̱ quebe bi dxeléajni'iba', bea ca' dxun na ba xen nna be'enu'-ba', na' cu'u xia dxú'aba', chee̱ gunu' xelunba' ca dxaca lazru'.”
PSA 32:10 Benne' we̱n da cale̱la ca' dxun na ba xen xeledée̱' lu da zi' da xa'. Benne' ca' dxuluxrén lazre̱' Xránadxu, tu dxuxúezqueze̱' le̱' nen dute̱ xel-la' zri'i lazre' chee̱'.
PSA 32:11 Le'e, benne' xrlátaje, le be, ne le sua lu da ba neza, ne̱ chee̱ da be̱n Xránadxu, gúcale̱ne̱' le'e. Nen dute̱ xel-la' dxebé le gul-la, le'e, nácale li lazre' lau Le̱'.
PSA 33:1 Le be le'e, benne' xrlátaje, lau Xránadxu Dios. Xrtante̱ naca lau Dios da dxelúe lá'ana benne' xrlátaje ca' Le̱'.
PSA 33:2 Le gucá'ana szren Dios nen da zríadi'i na du da dxínnele. Le gúl-laqueze chee̱' nen da dxúl-lale̱nle, ne nen tu da nua na chi du.
PSA 33:3 Le gul-la chee̱ Le̱' tu da cube. Le gul-la cháwedau', quínnele dute̱ xel-la' dxebé.
PSA 33:4 Li lazre' naca xrtizra' Xránadxu Dios, na' nune̱' dute̱ lu xel-la' li lazre' chee̱'.
PSA 33:5 Le̱' nazrí'ine̱' da naca xrlátaje, ne da naca du lazre'. Zaj núnbea bénneache xel-la' dxexache lazre' chee̱ Xránadxu du gabí'i xe̱zr la xu.
PSA 33:6 Ne̱ chee̱ xrtizra' Xránadxu Dios, be̱ne̱' xabáa, na' xúgute̱ belaj da zaj nalá' zran xabáa be̱ne̱' nen be' dxedxuaj dxu'e̱.
PSA 33:7 Le̱' dxuxutube̱' nísadau', ne dxexune̱' na ca tu xi'a nisa. Dxegá'a chawe̱' nisa lu da situj ca' naga nucueze̱' chee̱ na.
PSA 33:8 Le zrebe Xránadxu Dios, xúgute̱le zrale xe̱zr la xu nigá. Le zrebe lau Le̱', xúgute̱le le'e zrale lu xe̱zr la xu
PSA 33:9 lawe' da gunne̱ze̱', na' guca xe̱zr la xu. Gunná be'ene̱' na, na' zúaqueze na.
PSA 33:10 Xránadxu Dios dxune̱' dxexaca dácheze dizra' zaj nun bénneache xe̱zr la xu ca', ne dxune̱' dxelaca níteze da ca' zaj nune̱' xelune̱'.
PSA 33:11 Dizra' ba nun Xránadxu Dios tu súazqueze na chadía chacanna. Da dxegú'u be'e̱ lu lázrdawe̱' tu wadíazqueze na lau xúgute̱ bénneache.
PSA 33:12 Ba neza zrente̱ naca na chee̱ benne' xe̱zr la xu ca' Xránadxu naque̱' Dios chee̱ le̱', benne' xe̱zr la xu ca' gucá'a Dios chee̱ xelaque̱' benne' chee̱'.
PSA 33:13 Naga zue̱' xabáa chee̱' dxenná' Xránadxu Dios, na' dxelé'ene̱' xúgute̱ cuen bénneache.
PSA 33:14 Naga zue̱' lataj lá'azxa chee̱' dxenné̱'e̱, na' dxelé'ene̱' ca zaj zra' bénneache lu xe̱zr la xu.
PSA 33:15 Le̱' be̱ne̱' xichaj lázxdau xúgute̱ benne' ca', na' dxenné̱'e̱ xúgute̱ da dxelune̱'.
PSA 33:16 Quebe la benne' wenná bea ne̱ chee̱ benne' dxjaque̱' wedil-la zante̱ chee̱', ne quebe la benne' wal-la ne̱ chee̱ xel-la' wal-la da nape̱'.
PSA 33:17 Quebe nu benne' le̱' ne̱ chee̱ bzrina', ne quebe nu la ne̱ chee̱ xel-la' wal-la zren chee̱'.
PSA 33:18 Le na' xque, dxuxúe Xránadxu Dios benne' ca' dxelezrebe̱' Le̱'. Dxuxúe̱' benne' ca' dxelebeza lazre̱' Le̱' xexache lazre̱' le̱'
PSA 33:19 chee̱ guselé̱' le̱' lu xel-la' gute, ne chee̱ gugawe̱' le̱' gate dxaca gubina'.
PSA 33:20 Dxebeza lázredxu Xránadxu Dios. Le̱' naque̱' Bénnea' dxácale̱ne̱' dxi'u, ne dxucu'uje̱' dxi'u.
PSA 33:21 Chee̱ le̱ na' du lázredxu béle̱'e̱quezdxu lau Le̱', lawe' da tu dxuxrén lázrezquezdxu La lá'azxa chee̱'.
PSA 33:22 Bexache lazre' netu', Xránantu', lawe' da dxebeza lázrentu' Lue'.
PSA 34:1 Tu güe lá'anazqueza' Xránadxu Dios te zra chizrela. Tu gúl-lazqueza' da güe lá'ana na Le̱'.
PSA 34:2 Xezaca ba lázrele̱na' Xránadxu Dios. Xelén benne' dxexruj lazre' da caní, na' welebéle̱'e̱ne̱'.
PSA 34:3 Le gucá'ana szren Xránadxu Dios tu zren nen neda', na' tu zren gucá'ana szrendxu La lá'azxa chie̱'.
PSA 34:4 Bláwizra' Xránadxu Dios, na' Le̱' benne̱' chia', ne bselé̱' neda' lu xúgute̱ da buluchebe na neda'.
PSA 34:5 Benne' ca' gulebeza lazre̱' Le̱' belelé'ene̱' da xabáa chee̱', ne quebe belexedué'ene̱'.
PSA 34:6 Neda', benne' xache', bláwizra', na' ben Xránadxu Dios chia', ne bselé̱' neda' lu xúgute̱ da dxezaca zi'a.
PSA 34:7 Gubáz chee̱ Xránadxu zue̱' cuita benne' ca' dxelezrebe̱' Le̱', na' dxucu'uje̱' benne' ca'.
PSA 34:8 Le guxúe xque, na' lé'ele naca xrlátaje Xránadxu Dios. Ba neza zrente̱ naca na chee̱ bénnea' dxuxrén lazre̱' Le̱'.
PSA 34:9 Le zrebe Xránadxu Dios, le'e, nácale benne' chee̱ Lé̱queze̱', lawe' da quee bi dxelexazrje benne' ca' dxelezrebe̱' Le̱'.
PSA 34:10 Be̱zre xíxre'du ca' dxelexázrjeba', ne dxeledunba'. Benne' ca' dxelebeza lazre̱' Xránadxu Dios quebe bi da chawe' xelexázrjene̱'.
PSA 34:11 Le da, bidau', ne le xen chia'. Gusé̱deda' le'e chee̱ zrébele Xránadxu Dios.
PSA 34:12 ¿Nu benne' ládujla le'e dxaca lazre̱' xegá'ane̱' lu xel-la' nabán, bénnea' dxaca lazre̱' sue̱' zane' iza chee̱ lé'ene̱' da chawe'?
PSA 34:13 Bxue xanne' ca dxuchálaju' chee̱ quebe nneu' da cale̱la, ne chee̱ quebe guchálaju' da we̱n lazre'.
PSA 34:14 Bsan da cale̱la da dxunu', na' be̱n da xrlátaje. Be̱n ba xuzre gapu' xel-la' dxebeza zri lazre', ne be̱n ca naca chee̱ na.
PSA 34:15 Dxuxúe Xránadxu Dios benne' ca' zaj naque̱' xrlátaje, ne dxuzé̱ nague̱' da dxululáwizre̱' Le̱'.
PSA 34:16 Dxezrá'a Xránadxu Dios benne' ca' dxelune̱' da cale̱la, chee̱ quebe sua nu benne' chajsá lazre̱' benne' we̱n da cale̱la ca'.
PSA 34:17 Benne' xrlátaje ca' dxululáwizre̱' Xránadxu Dios, na' Le̱' dxenne̱' chee̱', ne dxuselé̱' benne' ca' lu xúgute̱ da dxelezaca zi'e̱.
PSA 34:18 Gágute̱ zua Xránadxu Dios naga zaj zra' benne' ca' dxelexewi'ine lazre̱', ne dxuselé̱' benne' ca' dxelexewi'ine lazre̱'.
PSA 34:19 Da zante̱ da dxezaca zi' benne' xrlátaje. Dxuselá Xránadxu Dios bénnea' lu xúgute̱ da ca'.
PSA 34:20 Le̱' dxuxúequeze̱' xúgute̱ zrita xu'e̱, na' netú zrita chee̱' quebe gachaj na.
PSA 34:21 Dul-la da dxun benne' we̱n da cale̱la gute na le̱', na' xelebía xi' benne' ca' dxelecuídene̱' benne' xrlátaje.
PSA 34:22 Xránadxu Dios dxexá'awe̱' bénne'du xu'u benne' we̱n zrin chee̱' ca', na' xúgute̱ benne' ca' dxuluxrén lazre̱' Le̱' québequeze xelebía xi'e̱.
PSA 35:1 Xran, bsizre benne' ca' dxelenné̱' chia'. Gudíl-lale̱ benne' ca' dxeledíl-lale̱ne̱' neda'.
PSA 35:2 Gudá gucu'uju' neda' lu wedil-la, ne gúcale̱ neda'.
PSA 35:3 Gude̱l-la xia chee̱ wedil-la chee̱ guzagu' benne' ca' dxululague̱' neda'. Guzre neda' nacu' Benne' dxuselé̱' neda'.
PSA 35:4 Be̱n xelexedué'e, ne xeleque zréaje benne' ca' dxelaca lazre̱' xelútie̱' neda'. Be̱n xuluzrunnuj, ne xelexedué'e benne' ca' dxelaca lazre̱' xelune̱' chia' da cale̱la.
PSA 35:5 Be̱n xelaque̱' ca tu xizre be̱be da dxua be', ne gusel-la gubáz chee̱ xabáa chiu' chee̱ gulague̱' benne' ca'.
PSA 35:6 Be̱n chul-la neza naga xeledée̱', na' gaca na naga xelebile̱', ne gusel-la gubáz chee̱ xabáa chiu' chee̱ gulague̱' benne' ca'.
PSA 35:7 Bulucache̱' tu xralaj chee̱ que̱la na neda', ne quegá bi nuna' chee̱'. Gule̱ne̱' tu xe̱dxu naga cheajcházia' neda', ne quegá bi de̱ da dxagu na zria chia'.
PSA 35:8 Gusel-la da guzría xi na benne' ca', ne quebe xeleque be'ene̱'. Be̱n que̱la xralaj chee̱' na' lé̱queze̱', ne cheajlecházie̱' naga xelebía xi'e̱.
PSA 35:9 Nadxa béle̱'e̱quezda' ca naca da nun Xránadxu Dios. Sua' lu da ba neza lawe' da bselé̱' neda'.
PSA 35:10 Xúgute̱ zrita xu'a xelenná na: Xran, ¿núzraqueze naca ca nacu' Lue'? Dxuseláu' benne' xache' lu na' benne' wál-ladxa ca le̱', ne benne' dxexazrje lu na' benne' dxebane̱' da du de̱ chee̱'.
PSA 35:11 Belasa benne' dxelexeche̱be̱' da we̱n lazre'. Gulawe̱' zria neda' chee̱ tu da quebe dxaca be'eda'.
PSA 35:12 Belexebi'e̱ neda' da cale̱la chee̱ tu da xrlátaje da be̱na', chee̱ xuluzúe̱' neda' lu da ba xa'.
PSA 35:13 Neda', gate quebe chawe' gulezúe̱', bewi'ine lazra'. Be̱na' gubasa da bsaca zi na neda', ne du lazra' bláwizra' Dios chee̱ xexune̱' benne' ca'.
PSA 35:14 Bewi'ine lazra' chee̱ benne' ca' ca dxuna' chee̱ le sa' ljwezra', u chee̱ bi bíchequeza'. Guzúa' lu da baxache' ca dxun benne' chee̱ xrne̱'e̱ gate dxatie̱'.
PSA 35:15 Gulebé benne' ca' gate zua' lu da ba xa', ne belezrague̱'. Belezraga benne' dxeledábague̱' neda', benne' we̱n da cale̱la, na' chadite̱ gule̱l-le̱' neda'. Tu belúezqueze̱' neda', ne quebe gulezúa zrie̱'.
PSA 35:16 Bulusaca zi'e̱ neda', ne belún le̱' chia', ne gulagu lazxe̱' lu xel-la' dxelezrá'a chee̱' neda'.
PSA 35:17 Xran, ¿ájate̱ scha' gu'u latja da dxelune̱'? Bselá neda' lu na' benne' caní dxuluzría xi'e̱ neda', benne' zaj naque̱' ca be̱zre xixre' ca'.
PSA 35:18 Xapa' Lue': Xcalenu', láwela benne' zan ca' zaj nadupe̱' chiu' Lue'. Tu güe lá'anazqueza' Lue' ládujla benne' zan ca'.
PSA 35:19 Quebe gu'u lataj xelebé benne' ca' dxeledábague̱' neda', ne quebe bi nuna' chee̱'. Quebe gu'u lataj xelún la benne' ca' chia', benne' dxelecuídene̱' neda', ne quebe bi de̱ da dxagu na zria chia'.
PSA 35:20 Benne' caní quebe dxelaca lazre̱' xelezúe̱' lu xel-la' dxebeza zri lazre', na' lu xel-la' dxelezí xe̱ chee̱' dxelenné̱' chee̱ benne' ca' dxelebeza zri lazre̱' lu xe̱zr la xu nigá.
PSA 35:21 Belún le̱' chia'. Gulenné̱': “¡E! ¡E! ¡Ba blé'entu' da nune̱'!”
PSA 35:22 ¡Xran, ba blé'equeznu' da dxelune̱'! ¡Quebe sua zriu'! ¡Xran, quebe gusanu' neda'!
PSA 35:23 ¡Guxasa, guzúa guchi'u chia'! ¡Gudá, Xrana' Dios, chee̱ gácale̱nu' neda'!
PSA 35:24 ¡Bchi'a chia' lu da xrlátaje chiu', Xrana' Dios! ¡Quebe gu'u benne' ca' lataj xuluzrizre̱' chia'!
PSA 35:25 ¡Quebe gu'u lataj xelenné̱': “Ba guca da dxezá lázredxu!” ¡Quebe xelenné̱': “Ba bendxu chie̱'!”
PSA 35:26 Be̱n xelexedué'e, ne xeleque zréaje xúgute̱ benne' ca' dxelebene̱' gate bi dxaca chia'. Bsi'e̱ xel-la' stu', ne be̱n xelaca xala benne' ca' dxeledábague̱' neda'.
PSA 35:27 Be̱n xelúl-la, ne xelebé benne' ca' zaj de̱'e̱ neda', chee̱ xelennáqueze̱': “Tu xegá'ana szrénzqueze Xránadxu, Bénnea' dxezá lazre̱' sua lu xel-la' dxebeza zri lazre' benne' we̱n zrin chee̱'!”
PSA 35:28 Tu guchálajzqueza' chee̱ da xrlátaje chiu', ne chee̱ da dxue lá'anaqueze na Lue' te zra chizrela.
PSA 36:1 Da zrinnaj da dxun benne' dxuzúa chalá'ala Dios dxuchálajle̱ na le̱' lu xichaj lázrdawe̱'. Quebe dxezá lázrequeze̱' gape̱' Dios ba lá'ana.
PSA 36:2 Chee̱ le̱ na' dxulé'e cuine̱' ca tu benne' zrente̱. Dxéquene̱' quebe dxelé'e Dios da zrinnaj da dxune̱', ne quebe dxecuide Dios le̱'.
PSA 36:3 Da tu dxuchálajzqueze̱' naca na da zrinnaj, ne da we̱n lazre'. Québedxa dxéajni'ine̱', ne québedxa dxune̱' da xrlátaje.
PSA 36:4 Dxulaba lazre̱' ca naca da cale̱la gune̱' gate de̱' naga dxate'. Xu'e̱ neza da quebe naca neza chawe'. Quebe dxecuídene̱' da cale̱la.
PSA 36:5 Xrana' Dios, zrente̱ naca xel-la' dxexache lazre' chiu' da dxezrinte̱ na xabáa, na' dxezrinte̱ lu beuj xel-la' li lazre' chiu'.
PSA 36:6 Da xrlátaje chiu' naca na ca tu xi'a zren chiu', na' ca dxuchi'u naca na ca tu nísadau' sítujte̱. Xrana' Dios, tu dxuxúezquezu' bénneache, ne be̱ xixre' ca'.
PSA 36:7 Xrdante̱ naca xel-la' dxexache lazre' chiu', Dios. Chee̱ le̱ na' dxuluxrén lazre' bénneache Lue' ca dxelún bedxuj dxé'enedu ca' dxelexezraba' zran xrila bedxuj.
PSA 36:8 Welélajquezne̱' chee̱ da de̱le̱'e̱ lizru', na' Lue' gunézruju' xelé'aje̱' da naca ca tu xe̱gu da naca na da dxezaca ba lazru' Lue'.
PSA 36:9 Naga zu' Lue' zua beaj naga dxalaj nisa da dxunna na xel-la' nabán. Lu xel-la' naxaní' chiu' walé'entu' da naca lení'.
PSA 36:10 Bexache lazre' benne' ca' zaj núnbe'e̱ Lue', ne bzua chee̱ benne' li lazre' ca' da xrlátaje chiu'.
PSA 36:11 Quebe gu'u lataj tábaga benne' dxucá'ana szren cuina neda', ne quebe gutá benne' dxun da cale̱la neda'.
PSA 36:12 Xeajlechaze benne' ca' dxelune̱' da zrinnaj. Lue' be̱nu' xeajlechaze benne' ca', na' quebe gaca xelexase̱'.
PSA 37:1 Quebe su' ste̱be ne̱ chee̱ da dxelún benne' ca' dxelune̱' da cale̱la, ne quebe se̱ lazru' da zaj nápale̱'e̱ benne' dxelune̱' da zrinnaj,
PSA 37:2 lawe' da xeledé chee̱ benne' ca' ca dxaca chee̱ xíxre'du ca', na' gaca chee̱ benne' ca' ca dxaca chee̱ xixre' da nadxugu, dxebizre na.
PSA 37:3 Bxren lazre' Xránadxu Dios, ne be̱n da xrlátaje, na' súaquezu' lu xe̱zr la xu, ne sí'quezu' ba neza da li.
PSA 37:4 Bezaca ba lazre' nen Xránadxu, na' Le̱' gúnnaqueze̱' chiu' da dxezá lazru'.
PSA 37:5 Bzua cuinu' lu na' Xránadxu, ne bxren lazre' Le̱', na' Le̱' gune̱' ca da dxenabu'.
PSA 37:6 Gulé'ene̱' da xrlátaje chiu' ca tu xel-la' naxaní', ne da li lazre' chiu' ca lawe' zra.
PSA 37:7 Guzúa zrize lau Xránadxu, ne guleza lazre Le̱'. Quebe su' ste̱be ne̱ chee̱ benne' dxezi'e̱ ba neza, bénnea' dxúnqueze̱' da cale̱la.
PSA 37:8 Bsan xel-la' xichaj zra'a, ne quebe cuídenu'. Quebe sa lazru' bi xusacu' benne' ca' dxelune̱' da cale̱la,
PSA 37:9 lawe' da guzría xi' Dios benne' ca' dxelune̱' da cale̱la. Benne' ca' dxelebeza lazre̱' Xránadxu, gaca chee̱' xe̱zr la xu.
PSA 37:10 Chadite te chee̱ benne' ca' dxelune̱' da cale̱la. Le'enu' lizre lataj benne' ca', san québedxa zaj zre̱'e̱ na'.
PSA 37:11 Benne' dxexruj lazre' ca' gaca chee̱' xe̱zr la xu, na' xelexezaca ba lazre̱' lu xel-la' dxebeza zri lazre' zrente̱.
PSA 37:12 Benne' dxelún da cale̱la dxelilaj lazre̱' bi xelune̱' chee̱ benne' xrlátaje, ne lu xel-la' dxelezrá'a chee̱' xelagu lazxa benne' ca'.
PSA 37:13 Xránadxu Dios guzrízrequeze̱' chee̱ benne' ca' dxelune̱' da cale̱la lawe' da nézene̱' ba za zra cheajsé̱ chee̱ benne' ca'.
PSA 37:14 Benne' dxelune̱' da zrinnaj dxelebéaje̱' xia chee̱', ne dxuluzé̱' xaga nalá xéche'ze chee̱', chee̱ xuluzría xi'e̱ benne' xache' ca', ne benne' dxelexazrje̱', chee̱ xelútie̱' benne' ca' dxelune̱' da li lazre'.
PSA 37:15 Xia nalá chee̱ benne' ca' chaze na lu lazrdáuqueze̱', na' gáchajqueze xaga nalá xéche'ze chee̱'.
PSA 37:16 Cháwedxa naca da du da de̱ chee̱ benne' xrlátaje ca da gunní'a da zaj napa zánete̱ benne' dul-la ca',
PSA 37:17 lawe' da welátequeze ni'a na' benne' dxelúne̱' da zrinnaj. Xránadxu ná'queze dxuxúe̱' benne' xrlátaje ca'.
PSA 37:18 Nunbea Xránadxu ca zaj naca zra xelezúa benne' du lazre' ca', na' da zaj napa benne' ca' xelezúa na chadía chacanna.
PSA 37:19 Quebe xelexedué'ene̱' gate quebe dxaca chawe' chee̱ bénneache, na' lu zra chee̱ gubina' gata' da xelawe̱'.
PSA 37:20 Xelebía xi' benne' dxelúne̱' da zrinnaj, na' benne' ca' dxeledábaga' Xránadxu, ca dxaca chee̱ xiaj xixre' ca'. Xeledé chee̱', ne xelexenitie̱' ca zren chee̱ xi'.
PSA 37:21 Benne' ca' dxelún da cale̱la tu da dxelenabe̱' tu chí'idauze, ne quebe dxuluxunézruje̱' na, na' benne' xrlátaje dxexache lazre̱' le̱', ne dxunézruje̱' chee̱'.
PSA 37:22 Benne' ca' dxelé'e Xránadxu le̱' chawe', gaca chee̱ benne' ca' xe̱zr la xu, na' benne' ca' quebe dxelé'ene̱' chawe', xelebía xí'queze̱'.
PSA 37:23 Da dxelún benne' xrlátaje ca' zaj naca na da ble'e Xránadxu le̱', na' dxelé'ene̱' cháwedau' ca da dxelune̱'.
PSA 37:24 Gate dxeleajchaze benne' xrlátaje ca' quebe cheajlechaze̱' tu chi'ize lawe' da nuxru Xránadxu na' benne' ca'.
PSA 37:25 Benne' cuide' guca', ne na'a ba gúxrua', ne cabata' ble'eda' tu benne' xrlátaje gusán Dios le̱', na' quebe xeledá zri'ine zre sue̱' xelebéaje̱' guna'.
PSA 37:26 Benne' xrlátaje nigá tu dxexache lázrezqueze̱', ne dxunézruje̱' bi dxexazrje nu benne', na' zri'ine zre sue̱' zaj naque̱' da ba neza chee̱ bénneache.
PSA 37:27 Québedxa gunu' da cale̱la, san be̱n da xrlátaje, na' gaca bánquezu' chadía chacanna,
PSA 37:28 lawe' da nazrí'i Xránadxu da naca li lazre', ne quebe dxusane̱' benne' zaj de̱'e̱ Le̱'. Chadía chacanna tu guxúezqueze̱' benne' ca', san guzría xi'e̱ xrtia ljwezre benne' ca' dxelune̱' da cale̱la.
PSA 37:29 Benne' xrlátaje ca' gaca chee̱' xe̱zr la xu nigá, na' xelezrá'queze̱' chadía chacanna lu xe̱zr la xu.
PSA 37:30 Benne' xrlátaje dxuchálajqueze̱' da naca sina, na' ca dxuchi'e̱ naca na xrlátaje.
PSA 37:31 Da nadxixruj bea Dios tu xú'uzqueze na xichaj lázrdawe̱'. Chee̱ le̱ na' quebe cheajchaze bénnea'.
PSA 37:32 Benne' we̱n da zrinnaj dxenné̱'e̱ benne' xrlátaje, ne dxune̱' ba xuzre gutie̱' le̱'.
PSA 37:33 Quebe gusán Xránadxu le̱' lu na' benne' we̱n da cale̱la na', ne quebe guzría xi'e̱ le̱' gate dxuchi'e̱ chee̱'.
PSA 37:34 Guleza lazre' Xránadxu, ne be̱n ca da ba gunné̱', na' Le̱' chísaqueze̱' Lue' chee̱ gaca chiu' xe̱zr la xu nigá. Gate xelebía xi' benne' dul-la ca', na' lé'enu' na.
PSA 37:35 Ble'eda' tu benne' we̱n da zrinnaj, nagá'ane̱' szrente̱, na' guxánle̱'e̱ da de̱ chee̱' ca dxegula tu xaga zrente̱.
PSA 37:36 Na' gudé chee̱', na' québedxa zue̱' na'a. Bexílaja' le̱', san quebe nu bezrelda'.
PSA 37:37 Blaba lazre' ca naca chee̱ benne' li lazre', ne gunná' benne' xrlátaje lawe' da naga cheajsé̱ gaca tu da ba neza chee̱ benne' dxebeze̱' zri lazre'.
PSA 37:38 Benne' dxelune̱' da cale̱la xelebía xí'queze̱'. Quebe nu cha' xrtia ljwezre benne' dxelune̱' da zrinnaj.
PSA 37:39 Xránadxu Dios guseláquezé̱' benne' xrlátaje ca', na' Le̱' gutipe̱' lazre' benne' ca' lu zra chee̱ da ste̱be.
PSA 37:40 Xránadxu Dios gácale̱ne̱' le̱', ne guselé̱' le̱'. Guselé̱' le̱' lu na' benne' ca' dxelune̱' da cale̱la, na' gune̱' gaca chawe' chee̱' lawe' da buluxrén lazre̱' Le̱'.
PSA 38:1 Xrana' Dios, quebe til-lu' neda' lu xel-la' dxezrá'a chiu'. Quebe gudéu' neda' da ba xa' lu xel-la' snia chiu',
PSA 38:2 lawe' da belúe xaga nalá xéche'ze chiu' neda', na' be̱ na'u neda'.
PSA 38:3 Quebe bi chawe' zua be̱la' dxen chia' lawe' da dxezra'u neda', ne quebe zaj zua zrita xu'a cháwedau' lawe' da nuna' dul-la.
PSA 38:4 Ca naca da zrinnaj da nuna' ba zria cháqueze na xíchaja'. Zaj naca na chia' ca tu xua' zí'ile̱'e̱.
PSA 38:5 We̱' da zaj zria be̱l-la' dxen chia' ba dxelelá na, ne ba dxeluzru na, da na' dxaca chia' lawe' da be̱na' da cale̱la.
PSA 38:6 Nucache lawa', ne dxexedué'ele̱'e̱da', ne dxebezre xacha' te zra chizrela,
PSA 38:7 lawe' da ca naca be̱l-la' dxen chia' dxelá na, ne quebe bi chawe' zua be̱la' dxen chia'.
PSA 38:8 Nate ni'a na'a, ne dxéqueda' ba naxúzrujne zrita xu'a. Dxebezre lazra' lawe' da zua ste̱be lázrdawa'.
PSA 38:9 Xran, ca naca da dxezá lazra' zaj zua na nen Lue', na' da dxebezre lazra' dxelé'equeznu' Lue'.
PSA 38:10 Dxate̱ lázrdawa', ne ba bedú lazra', ne québedxa dxelé'eda' cháwedau'.
PSA 38:11 Dxelexebiga ljwezra', ne le sa' ljwezra' ca' zítu'la ne̱ chee̱ xízrawe̱' chia', na' benne' walízr chia' ba belexecuase̱' zítu'la.
PSA 38:12 Benne' ca' dxelaca lazre̱' xelútie̱' neda' dxuluzale̱' xralaj, na' benne' ca' dxelúe lazre̱' bi gaca chia' dxelenné̱' chia' wabía xi'a, ne tu zaj zúaze̱' bi xulusaque̱' neda'.
PSA 38:13 Neda' quebe dxenda' ca dxaca chee̱ tu benne' cuezru, ne naca' ca tu benne' quebe dxaca nne̱', benne' quebe dxexrá dxu'e̱.
PSA 38:14 Naca' ca tu benne' quebe dxenne̱', bénnea' quebe dxexeche̱be̱',
PSA 38:15 lawe' da dxebeza lazra' Lue', Xrana' Dios. Lue' xeche̱bu' waláz chia', Xrana' Dios.
PSA 38:16 Gunnia': Quebe gu'u lataj xelebene̱' ne̱ chee̱ da dxaca chia'. Gate dxeajchazia', quebe gu'u le̱' lataj xulucá'ana szren cuine̱' lawe' da zua' lu da baxache'.
PSA 38:17 Ba zua' cheajcházia', ne tu dxelázqueze dute̱ be̱l-la' dxen chia'.
PSA 38:18 Chee̱ le̱ na' xrúale̱pequeza' da cale̱la da be̱na', ne xewine lazra' ca naca dul-la da nabaga'.
PSA 38:19 Benne' ca' dxeledábague̱' neda' zaj zúaqueze̱' chawe', ne zaj naque̱' benne' wal-la. Zaj naxánle̱'e̱ benne' ca' dxelecuídene̱' neda', ne quebe bi de̱ da dxagu na zria chia' lau le̱'.
PSA 38:20 Benne' ca' dxelune̱' da cale̱la chee̱ benne' ca' dxelune̱' da xrlátaje zaj naque̱' benne' dxeledábague̱' neda' lawe' da tu dxúnzqueza' da xrlátaje.
PSA 38:21 Quebe gusanu' neda', Xrana' Dios. Dios chia', quebe su' zitu' naga zua'.
PSA 38:22 Be̱n ba xuzre gácale̱nu' neda', Xran. Nacu' Benne' dxuselé̱' neda'.
PSA 39:1 Neda' gunnía': Guxúe xanne' cuina' chee̱ quebe guna' dul-la lu da guchálaja'. Tu guxúe xánnezqueza' ca da guchálaja' dxácate̱ na' zua benne' we̱n da cale̱la naga zua'.
PSA 39:2 Guzúa' zrize ca tu benne' quebe dxaca nnie̱', ne québequeze bchálaja' da xrlátaje, na' bzáladxa xel-la' dxudía chia'.
PSA 39:3 Guca lázrdawa' ca tu da dxala, na' lu da dxulaba lazra' guca na ca tu xi'. Na' gunaba' lau Xránadxu, gunnía':
PSA 39:4 Xran, ble'e neda' da gaca chia', ne ájate̱ zra gaca bana'. Bzéajni'i neda' chadite̱ nazruzre gatia'.
PSA 39:5 Nunu' chia' sua' bábaze zra, na' iza chia' québequeze bi naca na lau Lue'. ¡Da líqueze quebe bi zaj naca zra chee̱ xúgute̱ bénneache!
PSA 39:6 ¡Da líqueze zaj naca bénneache ca tu zrúl-laze! ¡Da líqueze dácheze naca zaj dxe' bénneache gunne xue chee̱ xel-la' nabán chee̱'! ¡Dxulucúdie̱' xel-la' gunní'a, ne quebe zaj nézene̱' nu chee̱ gaca na!
PSA 39:7 Na'a, Xran, ¿bízraqueze cueza lazra'? Tuzu' Lue' dxal-la' cueza lazra'.
PSA 39:8 Bselá neda' lu xúgute̱ da zrinnaj da be̱na'. Quebe gu'u lataj benne' xala ca' xelún le̱' chia'.
PSA 39:9 Guzúa' zrize, ne quebe bi bchálaja' lawe' da Lué'queze be̱nu' guca caní chia'.
PSA 39:10 Becá'a xízrawe̱' da bzu' lu be̱la' dxen chia'. Bache gatia' lu da dxusacu' neda'.
PSA 39:11 Dxudéu' ba xa' tu benne' ba nun dul-la chee̱ dxuzéajni'inu' le̱', ne ca dxun béadu dxuteba' ladxe' dxuzría xi'u da nazrí'idxe bénnea'. ¡Da líqueze quebe bi zaj naca zra chee̱ xúgute̱ bénneache!
PSA 39:12 Bene da dxenaba' lau Lue', Xran, ne bze̱ naga ca da dxuláwizra' Lue'. Quebe su' zrize gate zua' dxebezra' lau' lawe' da naca' lau Lue' ca tu benne' dxedaze̱', ne quebe de̱ lizre̱', ne naca' ca tu benne' quebe de̱ xe̱zr la xu chee̱' ca gulaca xra xrtawa' ca'.
PSA 39:13 Bsan neda' chee̱ gata' lataj xezí' le dipa' nédxula ca xexá'a xenitia'.
PSA 40:1 Nen dute̱ xel-la' zren lazre' chia' guleza lazra' Xrana' Dios, na' bze̱ nague̱' chia', ne benne̱' da gunábeda' Le̱'.
PSA 40:2 Bebéaje̱' neda' ca tu lu xe̱dxu situj, ne lu da naca ca guna' guzra'. Bzue̱' ni'a ca tu lu xiaj xre, ne begu'e̱ neda' neza li.
PSA 40:3 Be̱ne̱' dxul-la' tu da cube da naca na da dxue lá'ana' Xránadxu. Benne' zante̱ xelelé'ene̱' da nigá dxune̱', na' xelezrebe̱' Le̱', ne xuluxrén lazre̱' Xránadxu Dios.
PSA 40:4 Ba neza zrente̱ naca na chee̱ bénnea' dxuxrén lazre̱' Xránadxu Dios, ne quebe dxune̱' ca dxelún benne' ca' dxulucá'ana szrene̱' bedáu' xiaj xaga ca', ne quegá ca dxelún benne' ca' dxelún lazre̱'.
PSA 40:5 Da zante̱ be̱nu', Xrana' Dios, da dxebánentu', ne ca zaj naca da dxezá lazru' gunu' chee̱ntu' quebe gaca gulábantu' lau Lue'. Chela nu guzenda' ca zaj naca na, ne che guchálaja' chee̱ na, quebe baben tu na.
PSA 40:6 Quebe dxezaca ba lazru' béadu ca' gutia' lau', u da gunna' Lue', ne quebe gunabu' béadu ca' guzézxea' lau', u dxen chee̱ béadu ca' da guzúa' lau' ne̱ chee̱ dula nabaga', san gusálaju' naga' chee̱ xenda' chi'u.
PSA 40:7 Nadxa gunnía': Guná' xque, za'a neda'. Lu xiche lá'azxa naxúaj na ca naca chia'.
PSA 40:8 Dxezaca ba lazra' guna' ca da dxaca lazru' Lue', Dios chia', na' da nadxixruj be'u zua na lu xichaj lázrdawa'.
PSA 40:9 Ca naca da xrlátaje chiu' ba bzenda' bénneache naga zaj nazraga chiu' bénneache zante̱. Gunná' xque, quebe guzúa zria', ca nézqueznu' Lue', Xrana' Dios.
PSA 40:10 Quebe bcácheza' ca da xrlátaje chiu' lu lázrdawa'. Ba bchálajqueza' ca naca xel-la' li lazre' chiu', ne ca dxuseláu' bénneache. Quebe guzúa' zri ca naca xel-la' dxexache lazre' chiu', ne ca naca da li chiu' ládujla benne' zante̱ zaj nazrague̱' chiu'.
PSA 40:11 Xran, quebe chenu' xexache lazru' neda'. Xel-la' dxexache lazre' chiu', ne da li chiu' tu dxelácale̱zqueze na neda'.
PSA 40:12 Lawe' da ba guléchajle̱'e̱ da cale̱la ca' neda', da cale̱la ca' da ba nuna' zaj zria na neda', na' quebe gaca nna'a naga zu'. Zaj naxándxa na ca zaj naca xicha xíchaja', na' dxedú lazra'.
PSA 40:13 Dxenaba' lau', Xran, guseláu' neda'. Xran, be̱n ba xuzre gácale̱nu' neda'.
PSA 40:14 Be̱n xelexedué'e, ne xeleque zréaje xúgute̱ benne' ca' dxelaca lazre̱' xelútie̱' neda'. Be̱n xeajxaca bzé̱bela, ne xelexedué'e benne' ca' dxelezá lazre̱' xelune̱' chia' da cale̱la.
PSA 40:15 Be̱n xeleque zréaje̱' lawe' da belún zréaje̱' neda' benne' ca' gulé̱'e̱ neda': “E, e.”
PSA 40:16 Be̱n xelebé, ne xelezúe lu da ba neza xúgute̱ benne' ca' dxelebeze̱' Lue', ne be̱n xelennáqueze benne' ca' zaj nazrí'ine̱' Lue', weselá chee̱'. Xelenné̱': “Xegá'ana szrénqueze Xránadxu.”
PSA 40:17 Láqueze sua' neda' lu da ba xa', ne lu da baxache', guxúequeze Xrana' Dios ájala gune̱' chia'. Nacu' Benne' dxácale̱ne̱' neda', ne Benne' weselá chia'. Dios chia', quebe chenu' gácale̱nu' neda'.
PSA 41:1 Ba neza zrente̱ naca na chee̱ bénnea' dxe'e̱ gunne xue chee̱ benne' xache'. Lu zra gate zue̱' lu da ste̱be, guselá Xránadxu bénnea'.
PSA 41:2 Xránadxu guxúequeze̱' le̱', ne gunézruje̱' le̱' xel-la' nabán. Gaca na tu da ba neza zrente̱ chee̱ bénnea' lu xe̱zr la xu nigá, na' quebe gudé Xránadxu le̱' lu na' benne' ca' dxeledábague̱' Le̱'.
PSA 41:3 Xránadxu Dios gúxruqueze̱' le̱' gate zúe̱' lu xel-la' dxudía. Gun chawe̱' dute̱ da naque̱' gate na' quebe chawe' zue̱'.
PSA 41:4 Gunnía': Xrana' Dios, bexache lazre' neda'. Bexún bénne'du xu'a lawe' da be̱na' dul-la gate gudábaga' Lue'.
PSA 41:5 Benne' ca' dxeledábague̱' neda' dxelenné̱' chia' da cale̱la. Dxelenne̱': “¿Bátala gate benne' nigá, ne xenite le̱'?”
PSA 41:6 Che xedajlenné̱'e̱ neda', dxelún lazre̱'. Dxelebéaje̱' neda' dizra' chee̱ bi da cale̱la gaca xelenné̱' chia', na' gate dxelexedxúaje̱', na' dxelexrúe̱' dizra' na'.
PSA 41:7 Gate dxelezraga benne' dxelecuídene̱' neda', na' tu dxelenné̱zqueze̱' chia'. Tu dxuluchálajle̱zqueze̱' ljwezre̱' chia' neda' da naca da cale̱la, dxelenné̱':
PSA 41:8 “Ba guxú'e̱ tu xízrawe̱' da gute na le̱', ne québedxa xexásaqueze̱' ga na' de̱'.”
PSA 41:9 Cá'anqueze bénnea' guleza zri lazre' nen neda', bénnea' bxren lazra', na' gudágule̱queze̱' neda', benne' nigá dxedábagazegue̱' neda'.
PSA 41:10 Lue', Xrana' Dios, bexache lazre' neda', ne be̱n xexasa' neda', na' xunézruja' benne' ca' ca da dxal-la' xelezí'e̱.
PSA 41:11 Caníqueze nezda' ba be̱na' da dxezaca ba lazru' Lue', chee̱ quebe bi xelebéle̱ benne' ca' dxeledábague̱' neda'.
PSA 41:12 Ca naca chia' neda', ba bé̱xruquezu' neda' lawe' da naca' du lazre', ne ba bzu' neda' lau Lue' chadía chacanna.
PSA 41:13 ¡Gaca ba Xránadxu, Dios chee̱ benne' Israel ca' gaxuane iza, ne chadía chacanna! ¡Ca'an naca na, ne ca'an gaca na!
PSA 42:1 Ca dxun bzrina' xixre' dxebezre xa'aba' lawe' da dxebíleba' nisa, ca' dxuláwizra bénne'du xu'a da naca chiu', Dios.
PSA 42:2 Dxebile bénne'du xu'a da naca chiu', Dios ban. ¿Bata gaca xida' chee̱ guzúa cuina' lau Dios?
PSA 42:3 Nisa xuzru xiaj lawa' guca na ca xeta dxawa' te zra chizrela, dxácate̱ na' gulé̱'e̱ neda' xúgute̱ zra: “¿Ga na' Dios chiu'?”
PSA 42:4 Dxajsá lazra' chee̱ da caní, ne dxebezre lazra'. Dxajsá lazra' ca guxá'ale̱na' benne' zan ca', ne nuzúa' lawe' le̱' lizre Dios. Tu dxúl-lazquezdxu lu xel-la' dxebé, ne dxue lá'anaquezdxu Dios lu laní.
PSA 42:5 ¿Bizr chee̱ na' dxate ni'a na'u, bénne'du xu'a? ¿Bizr chee̱ na' zu' ste̱be lu xichaj lázrdawa'? Guleza lazre' Dios lawe' da güe lá'anaqueza' Le̱' da xula. Naque̱' Benne' dxuselé̱' neda', ne Dios chia'.
PSA 42:6 Dios chia', ba nate ni'a na' bénne'du xu'a lu xichaj lázrdawa'. Chee̱ le̱ na' dxajsá lazra' chiu' nigá zua' lu xe̱zr la xu xechalá'a xe̱gu Jordán, ne lu xe̱zr la xu chee̱ benne' Hermón naga zua xi'a Mizar.
PSA 42:7 Ca schaga da dxun nísadau', ne da dxun tu bdua nisa zren chiu', Dios, ca' dxeque bénne'du xu'a lawe' da dxusaca zi' na'u neda'.
PSA 42:8 Te zra xexache lazre' Xránadxu neda', na' chizrela tu gúl-lazqueza' da güe lá'ana' Le̱', ne tu guchálajle̱zqueza' Dios, Bénnea' dxunne̱' xel-la' nabán chia'.
PSA 42:9 Xapa' Dios: Lué'queze dxucu'uju' neda'. ¿Bizr chee̱ na' nal-la lazru' neda'? ¿Bizr chee̱ na' dxewí'ine lazra' lawe' da dxusaca zi' benne' dxedábague̱' neda'?
PSA 42:10 Ca tu benne' dxelé̱'e̱ zrita xu'a, ca' dxelún benne' ca' chia', dxelún le̱' chia'. Tu zra tu zra dxelenné̱' chia': “¿Ga na' Dios chiu'?”
PSA 42:11 ¿Bizr chee̱ na' dxate ni'a na'u, bénne'du xu'a? ¿Bizr chee̱ na' zu' ste̱be lu xichaj lázrdawa'? Guleza lazre' Dios lawe' da güe lá'anaqueza' Le̱' da xula. Naque̱' Benne' dxuselé̱' neda', ne Dios chia'.
PSA 43:1 Bchi'a chia', Dios, ne ble'e lau naca' xrlátaje. Bselá neda' lu na' benne' ca' dxuluzúe̱' Lue' chalá'ala, ne lu na' benne' ca' dxelezí xe̱'e̱, ne dxelune̱' da zrinnaj.
PSA 43:2 Nacu' Lue' Dios chia', ne dxuzé̱ chuchu' neda'. ¿Bizr chee̱ na' nusán lazru' neda'? ¿Bizr chee̱ na' dxewí'ine lazra' lawe' da dxusaca zi' neda' benne' ca' dxeledábague̱' neda'?
PSA 43:3 Gusel-la chia' xel-la' naxaní' chiu', ne da li chiu'. Da caní xulusí na neda' neza. Xeleché̱ na neda' lu xi'a lá'azxa chiu', ne naga zúaquezu' Lue'.
PSA 43:4 Chu'a naga zua lucugu chee̱ Dios. Chu'a lau Dios, Bénnea' dxune̱' dxebeda', na' zua' lu da ba neza. Güe lá'ana' Lue' nen da zríadi'i na du, Dios chia'.
PSA 43:5 ¿Bizr chee̱ na' dxate ni'a na'u, bénne'du xu'a? ¿Bizr chee̱ na' zu' ste̱be lu xichaj lázrdawa'? Guleza lazre' Dios lawe' da güe lá'anaqueza' Le̱' da xula. Naque̱' Benne' dxuselé̱' neda', ne Dios chia'.
PSA 44:1 Dios, bache bénentu' lawe' da buluzén Xra xrtáuntu' netu' ca naca da be̱nu' lu zra chee̱', da naca na iza ba guledé na.
PSA 44:2 Bzria xi'u bénneache xe̱zr la xu xezícadxa ca' lau xra xrtauntu' ca', na' bzu' le̱' xlataj benne' ca'. Bsaca zi'u benne' xe̱zr la xu ca', san bzua chachu' bénneache chiu' lu xe̱zr la xu nigá.
PSA 44:3 Xra xrtáuntu' ca' quebe gulezi'e̱ xe̱zr la xu nigá nen xia nalá cheé̱queze̱', Ne quebe buluselá cuine̱' nen xel-la' wal-la da zaj nape̱'. Lue' bseláuquezu' le̱' nen xel-la' waca chiu', ne nen xel-la' wal-la chiu', ne nen xel-la' naxaní' chiu', lawe' da bezaca ba lazru' nen le̱'.
PSA 44:4 Dios, nacu' wenná bea chia'. Bselá zri'ine zre sua Jacob.
PSA 44:5 Nen xel-la' waca chiu' xebéajntu' benne' ca' dxeledábague̱' netu'. Lu Lau' Lue' guchuchuj guléajntu' benne' ca' dxeledábague̱' netu'.
PSA 44:6 Quebe guxrén lazra' xaga nalá xéche'ze chia', ne quebe guselá xia chia' neda'.
PSA 44:7 Lue' bcu'uju' netu' lau benne' ca' dxeledábague̱' netu', ne be̱nu' belexedué'e benne' ca' belecuídene̱' netu'.
PSA 44:8 Ne̱ chee̱ Dios tu súazquezentu' lu da ba neza, na' chadía chacanna güe lá'anantu' Lau' Lue'.
PSA 44:9 Nusán lazru' netu', ne nunu' dxexedué'entu', ne quebe dxéajle̱nu' benne' chee̱ntu' ca' dxjaque̱' wedil-la.
PSA 44:10 Be̱nu' buzrúnnujntu' lau benne' ca' dxeledábague̱' netu', na' benne' ca' dxelecuídene̱' netu' gulegüe̱' ca naca da nápantu'.
PSA 44:11 Bdeu' netu' ca zrila' ca' lu na' benne' xelútie̱' netu', ne ba be̱se dínnaju' netu' ládujla benne' xe̱zr la xu ca'.
PSA 44:12 Bdéu' netu', benne' chiu' ca' cá'aze, ne quebe bi guzi'u.
PSA 44:13 Dxunu' dxelún la benne' walízre chee̱ntu'. Benne' zaj naxéchaje̱' netu' dxelún le̱', ne dxuluzrizre̱' chee̱ntu'.
PSA 44:14 Nuzú' netu' ca tu da dxelenná benne' xe̱zr la xu ca' naca na da baxáchele̱'e̱. Xúgute̱ benne' dxelelé'ene̱' netu' dxulutá xíchaje̱', ne dxelexebánene̱' ca da baxache' nácantu'.
PSA 44:15 Tu zra tu zra tu dxexedué'ezquezda', ne tu zúazqueza' lu da sté̱bele̱'e̱
PSA 44:16 lawe' da dxelenné̱' schanni' chia', ne dxuluzúe̱' neda' chalá'ala, ne dxulutíl-lale̱ neda' benne' ca' dxeledábague̱' neda', nen benne' ca' dxelexebeaj lazre̱' neda'.
PSA 44:17 Xúgute̱ da caní dxaca chee̱ntu', ne quebe ne gal-la lazrentu' Lue', ne quebe ne guzúantu' chalá'ala xel-la' wezría chiu'.
PSA 44:18 Quebe ne gusán lázrentu' Lue', ne quebe ne xecuásantu' lu da gunná be'enu' netu'.
PSA 44:19 ¿Bizr chee̱ na' nuzú' netu' chalá'ala tu lataj chee̱ be̱ snia ca', ne nuzú' netu' naga xelaze gátentu'?
PSA 44:20 La gul-la lázrentu' La Dios chee̱dxu, ne bca'ana szrentu' tu dios da quebe bi zaca,
PSA 44:21 ¿quebe dxal-la' zra'a Dios netu' ne̱ chee̱ da nigá? Le̱' nézquezne̱' da zaj zua lu xichaj lázxdau bénneache.
PSA 44:22 Lawe' da nácantu' chiu', tu zra tu zra ba zaj zúatequeze̱' xelútie̱' netu'. Zaj nune̱' netu' ca zrila' ca' ba zua xelútie̱'-ba'.
PSA 44:23 ¡Bebán, Xran! ¿Bizr chee̱ na' dxasiu'? ¡Bebán! ¡Quebe su' zitu' tu chi'ize!
PSA 44:24 ¿Bizr chee̱ na' nucache cuinu', ne quebe dxeque be'enu' ca dxezaca zí'intu', ne ca dxuluchine benne' ca' netu'?
PSA 44:25 Ba nate ni'a na' bénne'du xú'untu', ne dxeajcházete̱ntu' lu xu, na' ba dé̱te̱ntu' sudxú'ala lu xe̱zr la xu.
PSA 44:26 ¡Guxasa, gúcale̱ netu', ne dute̱ xel-la' dxexache lazre' chiu', bselá netu'!
PSA 45:1 Xu'u lázrdawa' tu dizra' xrtante̱, na' gúl-laqueza' tu da naca chee̱ Wenná Bea. Gúl-laqueza' tu da bzuaj tu benne' dxuchálajle̱'e̱ cháwedau'.
PSA 45:2 Nacu' xrtánle̱'e̱dxa ca xúgute̱ bénneache. Dxezíle̱'e̱ntu' ba neza chee̱ dizra' dxuchálaju', lawe' da nucá'anaqueze Dios Lue' cháwedau' tu chí'izqueze.
PSA 45:3 Bda' xia chiu' dxu'a le̱'u, Lue', benne' wal-la, lu dute̱ xel-la' szren chiu', ne xel-la' dxenná bea chiu'.
PSA 45:4 Lu xel-la' szren chiu' chepe bánquezu'. Bchine dizra' li, ne xel-la' dxexruj lazre', ne da xrlátaje, na' guzéajni'i Cuinu' da zri'a ca'.
PSA 45:5 Zaj nalále̱'e̱ xaga nalá xéche'ze chiu' ca', da xelute na benne' xe̱zr la xu ca' lau Lue', ne cheajlechaze na lu lázrdau benne' ca' dxeledábague̱' Lue'.
PSA 45:6 Lataj blau naga dxe'u, Dios, naca na da chadía chacanna, ne súatequeze na. ¡Xrlátaje naca ca dxenná be'u!
PSA 45:7 Nazri'inu' da naca xrlátaje, ne dxecuídenu' da cale̱la. Chee̱ le̱ na' ba nuzúa Dios chiu' Lue' xlátaju', naga dxebéle̱'e̱dxenu' ca le sa' ljwezru' ca'.
PSA 45:8 Dxelá zixre zra lanu' nen xala da naca na nizre xaga, ne xiaj, da ca' dxelelá na zixre. Lu xu'u lizru' da zácale̱'e̱ na dxuluzúe̱' Lue' lu da ba neza.
PSA 45:9 Bi nu'ula chee̱ wenná bea ca' zaj zúabe' ládujla nu'ula chiu' ca' zaj naque̱' blaudxa. Chalá'a xabe̱la chiu' dxe' nu'ula gácabe' zru'ulu' nácube' oro da za na xe̱zre Ofir.
PSA 45:10 Bene, nú'uladau', ne gunná' xque, ne bze̱ naga da nnia': Bzala lazru' lazriu' ne lizre xrau',
PSA 45:11 na' benne' wenná bea sa lazre̱' xel-la' xrtan chiu'. Bzexruj lazru' lau le̱' lawe' da naca le̱' xranu'.
PSA 45:12 Xelelá' nu'ula xe̱zre Tiro lau lue', zaj nu'e̱ da xelunne̱' chiu', na' xelenaba benne' gunní'a ca' gunu' tu culuén chee̱'.
PSA 45:13 Xrtanle̱'e̱ naca bi nu'ula chee̱ wenná bea lu xu'u naga zue̱'. Zra lánabe' nazí' lechítaje̱ na oro.
PSA 45:14 Xeleché̱'e̱-be' lau wenná bea, nácube' zra lánabe' da núale̱'e̱ lechítaje̱ na. Nu'ula wégu'du ca' chjácabe' cuzru le̱be'. Nu'ula caní, nu'ula ljwézrebe' xuluzúabe' lawe' lue'.
PSA 45:15 Lu dute̱ xel-la' dxebé, ne lu da ba neza xeleché̱'e̱-be', na' xelú'ube' lu xu'u lizru', wenná bea.
PSA 45:16 Waláz chee̱ xra xrna'u xelexezúa zri'inu', bi ca' gunu' xelenná beabe' du gabí'i xe̱zr la xu.
PSA 45:17 Guna' cheajlesá lazre' xúgute̱ bénneache lau' lue'. Chee̱ le̱ na' xelúe lá'ana bénneache lue' chadía chacanna, ne gaxuane iza.
PSA 46:1 Dios naque̱' Benne' dxuxúe̱' dxi'u, ne dxune̱' dxi'u benne' wal-la. Zúate̱queze̱' gácale̱ne̱' dxi'u gate dxededxu xel-la' zi'.
PSA 46:2 Chee̱ le̱ na', quebe zrébedxu lácala xru' xe̱zr la xu nigá na' cheajlechaze xi'a ca' lu nísadau',
PSA 46:3 ne lácala xeajxruza zren chee̱ nísadau' xuluninne na, ne dxelúnle̱'e̱ na schaga, na' welezrízequeze xi'a ca' ne̱ chee̱ da dxezrú'.
PSA 46:4 De̱ tu xe̱gu da dxunna na xel-la' dxebé lu xe̱zre chee̱ Dios, ne lu xu'u lá'azxa chee̱ Dios, Benne' nape̱' dute̱ xel-la' szren.
PSA 46:5 Dios zue̱' xe̱zre na', ne cabata' cuía xi na. Dxaní'sise̱' xide̱' gácale̱ne̱' bénneache zaj zre̱'e̱ xe̱zre na'.
PSA 46:6 Dxelezrébele̱'e̱ benne' xe̱zr la xu ca', na' dxelezrize benne' chee̱ wenná bea ca'. Dxenné̱ Dios ca dxenné̱ guziu', na' dxexuna xe̱zr la xu.
PSA 46:7 Dios, Bénnea' nape̱' dute̱ xel-la' waca, zúale̱ne̱' dxi'u. Dios na' chee̱ Jacob dxucache chawe̱' dxi'u.
PSA 46:8 Le da lé'ele da ca' nun Xránadxu. Le nna' ca naca da dxebánedxu da nune̱' lu xe̱zr la xu.
PSA 46:9 Dxebeque zrie̱' wedil-la da dxelaca du gabí'i xe̱zr la xu. Dxuzúzruje̱' da dxuzala na xaga nalá xéche'ze ca', ne dxíchuje̱' xaga tuche' ca' chee̱ wedil-la, na' dxuzezxe̱' da ca' zaj nache̱' benne' wedil-la ca'.
PSA 46:10 Dxenná Dios: “Le sua zrize, ne le xúnbea naca' Dios. Naca' szrendxa ca zaj naca xúgute̱ cue' xe̱zr la xu. Naca' szrendxa ca dute̱ xe̱zr la xu.”
PSA 46:11 Dios, Bénnea' nape̱' dute̱ xel-la' waca, zúale̱ne̱' dxi'u. Dios na' chee̱ Jacob dxucache chawe̱' dxi'u.
PSA 47:1 ¡Le capa na'le, le'e, xúgute̱ bénneache! ¡Le güe lá'ana Dios nen dute̱ xel-la' dxebé!
PSA 47:2 Dxal-la' zrébedxu Xránadxu, nape̱' dute̱ xel-la' szren. Naque̱' Wenná Bea zren dxenná bé'ene̱' dute̱ xe̱zr la xu.
PSA 47:3 Bzue̱' benne' xe̱zr ca' zran ní'adxu. Bzue̱' dxi'u chee̱ nna be'edxu zánete̱ cue' xe̱zr la xu ca'.
PSA 47:4 Bequé̱'e̱ tu xe̱zr la xu da gaca na chee̱dxu, Da naca tu xe̱zr la xu xrtante̱ chee̱ zri'ine zre sua Jacob, benne' ca' nazrí'ine̱'.
PSA 47:5 Dxegüén Dios naga dxe'e̱ dxenná be'e̱. Dxelebezre luzu da dxulucuezre̱' gate dxegüén Xránadxu ga na'.
PSA 47:6 ¡Le gul-la da gaca ba Dios! ¡Le gul-la! ¡Le gul-la da gaca ba Wenná Bea chee̱dxu! ¡Le gul-la!
PSA 47:7 ¡Dios naque̱' Wenná Bea dute̱ lu xe̱zr la xu nigá! ¡Le gul-la chee̱' nen dute̱ xel-la' dxéajni'i chee̱le!
PSA 47:8 Dxe' Dios naga dxenná be'e̱, lu lataj na' naca na lá'azxa. Dxenná bé'ene̱' xúgute̱ cue' xe̱zr la xu ca'.
PSA 47:9 Dxelezraga benne' dxelenná bé'ene̱' xúgute̱ cue' xe̱zr la xu tu zren nen bénneache chee̱ Dios chee̱ Abraham.
PSA 47:10 Benne' ca' dxelenná be'e̱ du gabí'i xe̱zr la xu buludée̱' xel-la' dxenná bea chee̱' lu na' Dios. Le̱' dxenná bé'ene̱' xúgute̱ benne' wenná bea ca'.
PSA 48:1 ¡Zrente̱ naca Xránadxu! ¡Naca chee̱' güe lá'anale̱'e̱dxu Le̱' ga naca lu xe̱zre chee̱ Dios chee̱dxu, da dxe' na lu xi'a lá'azxa chee̱'!
PSA 48:2 Sión, da naca na xi'a chee̱ Dios, naca na sibe, ne xrtante̱. Naca na xe̱zre chee̱ Wenná Bea zrente̱, da dxunna na xel-la' dxebé dute̱ xe̱zr la xu nigá.
PSA 48:3 Dios ba blé'ene̱' dxucache chawe̱' dxi'u, lu xu'u zaca ca' chee̱ xe̱zre chee̱' na'.
PSA 48:4 Belezraga benne' wenná bea ca', na' belelé̱'e̱ chee̱ xeledíl-lale̱ne̱' xe̱zre nigá,
PSA 48:5 na' gate belelé'ene̱' na, na' belexebánene̱'. Belezrébe̱', na' buluzrúnnuje̱'.
PSA 48:6 Gulezré̱'e̱ lu da ste̱be, ne gulezúe̱' xel-la' dxudía ca dxaca chee̱ tu nu'ula ba zua sane̱' bidau'.
PSA 48:7 Gulaque̱' ca da ca' dxeledá lawe' nísadau' dxexrite na gate dxácale̱'e be' bdunu' lu nísadau'.
PSA 48:8 Bendxu ca da be̱n Dios, na' na'a ba ble'edxu na, ga naca lu xe̱zre chee̱ Xránadxu, nape̱' dute̱ xel-la' waca, da naca na xe̱zre chee̱ Xránadxu Dios. Le̱' guzúa chawe̱' xe̱zre nigá chadía chacanna.
PSA 48:9 Ga naca lu xudau' chiu' Lue', Dios dxajsá lázredxu ca naca xel-la' zri'i lazre' zren chiu'.
PSA 48:10 Gátete̱ze na' dxelúe lá'ana bénneache Lue', na' ca naca xel-la' szren chiu' dxezrín na du gabí'i xe̱zr la xu. Ca naca da xrlátaje dxenná be'u.
PSA 48:11 Xelebéle̱'e̱ bénneache zaj zre̱'e̱ Sión. Xelebéle̱'e̱ bénneache zaj zre̱'e̱ xe̱zre ca' chee̱ Judá ne̱ chee̱ da dxuchi'u chee̱'.
PSA 48:12 Le'e, bénneache chee̱ Dios, le chechaj dxu'a xe̱zre na', ne le gulaba ca zaj naca xu'u sibe ca', da dxuluzé̱ chacha na xe̱zre na'.
PSA 48:13 Le nna' xque ca naca ze'e zren naxechaj na xe̱zre na'. Le nna' xanne' ca zaj naca xu'u wal-la chee̱ na, chee̱ guzenle bi chee̱le ca naca xe̱zre na'.
PSA 48:14 Dios nigá nácaqueze̱' Dios chee̱dxu chadía chacanna. Le̱' tu gulé'ezquezne̱' dxi'u neza.
PSA 49:1 Le xen da nigá, le'e, benne' xúgute̱ cue' xe̱zr la xu. Le guzé̱ nágale, le'e, benne' dute̱ xe̱zr la xu,
PSA 49:2 le'e, benne' blau, ne le'e, benne' xezícadxa, le'e, benne' gunní'a, ne le'e, benne' xache'.
PSA 49:3 Guchálajqueza' xel-la' sina, ne guzéajni'ida' le'e da xu'u lázrdawa'.
PSA 49:4 Guzé̱ naga' tu dizra' sina. Gúl-laqueza' chee̱ tu da nagache, ne quinnia' da zríadi'i na du che̱n.
PSA 49:5 ¿Bizr chee̱ na' dxun na ba xen zreba' lu zra chee̱ da ste̱be, gate naxechaj da cale̱la neda' da dxelún benne' dxeledábague̱' neda'?
PSA 49:6 Benne' ca' dxuluxrén lazre̱' da zaj de̱ chee̱', ne dxulucá'ana szren cuine̱' lawe' da zaj nápale̱'e̱.
PSA 49:7 Quebe xelezéquene̱' xelexá'awe̱' le sa' ljwezre̱', ne quebe gaca xulunézruje̱' Dios da guselá na le̱'
PSA 49:8 chee̱ tu xelaca bánzqueze̱', ne chee̱ cabata' xeluzru be̱l-la' dxen chee̱' lawe' da zrente̱ naca da dxexa'u na xel-la' nabán chee̱ bénneache, ne cabata' seque' nu benne' quízruje̱' na.
PSA 49:10 Xelelé'ene̱' dxelátequeze benne' sina ca', ne xelúzrue̱' cáte̱ze dxaca chee̱ benne' xala ca', ne chee̱ benne' lázrdau zide' ca', na' dxulucá'ane̱' xel-la' gunní'a chee̱' lu na' benne' xula ca'.
PSA 49:11 Dxeléquene̱' wazráqueze zri'ine zre sue̱' chadía chacanna, na' xelexegá'ana lizre̱' chee̱ xelaca na chee̱ xúgute̱ cuen xrtia ljwezre̱', na' dxelu'e̱ la xe̱zr la xu chee̱' ca' ca zaj nazí láqueze̱'.
PSA 49:12 Quebe xelexegá'anatequeze bénneache lu da ba lá'ana. Zaj naque̱' ca be̱ xixre' ca', be̱ dxeláteba'.
PSA 49:13 Ca da dxelune̱' naca na da xálaze, na' dxelexezaca ba lazre' xrtia ljwezre̱' ca' nen da dxelennaze̱'.
PSA 49:14 Zaj naque̱' ca tu cue' zrila' zjácaba' lataj ba xa', naga guxúe xel-la' gute le̱ba'. Benne' xrlátaje ca' xelenná bé'ene̱' benne' gunní'a ca' gate za' chaní', na' xelebía xi' da ca' guta' chee̱', na' lataj ba xa' gaca na naga tu xelezúazqueze̱'.
PSA 49:15 Dios xexá'awe̱' xel-la' nabán chia' lu lataj ba xa' lawe' da xeché̱'e̱ neda' naga zúaqueze̱' Le̱'.
PSA 49:16 Quebe su' ste̱be gate nu benne' dxezrué'ene̱' xel-la' gunní'a, ne gate dxune̱' lizre̱' da zácale̱'e̱dxa,
PSA 49:17 lawe' da gate gatie̱' quebe bi xexu'e̱, ne quebe chéajle̱ xel-la' gunní'a chee̱' le̱'.
PSA 49:18 Lácala dxácate̱ naca bane̱' dxe̱ cuine̱' zue̱' lu da ba neza zrente̱, na' dxelúe lá'ana bénneache le̱' gate dxe̱pe bane̱',
PSA 49:19 san chu'e̱ naga zaj zra xra xrtawe̱' ca', ne cabátadxa lé'ene̱' xel-la' naxaní'.
PSA 49:20 Bénnea' dxelapa bénneache le̱' ba lá'ana san quebe bi dxéajni'ine̱' naque̱' ca be̱ xixre' ca', be̱ dxeláteba'.
PSA 50:1 Ba gunné̱ Xránadxu Dios, ne ba nutube̱' bénneache chee̱ dute̱ xe̱zr la xu, benne' zaj zre̱'e̱ naga dxalaj gubizra, ne benne' zaj zre̱'e̱ naga dxebía na.
PSA 50:2 Lu xi'a Sión, da naca na xrtánle̱'e̱ ba bzaní' Dios.
PSA 50:3 Xelá' Dios chee̱dxu, ne quebe sua zrie̱'. Gálajqueze xi' lau Le̱', ne gácale̱'e̱ be' bdunu' da chechaj na Le̱'.
PSA 50:4 Xutúbequeze̱' benne' zaj zre̱'e̱ xabáa na'ala, ne benne' zaj zre̱'e̱ xe̱zr la xu, chee̱ guchi'e̱ chee̱ bénneache chee̱'.
PSA 50:5 Dxenné̱': “Le xutube benne' chia' ca', benne' ca' belune̱' tu xel-la' wezría nen neda' da buluzúa chúchue̱' nen dxen chee̱ béadu ca'.”
PSA 50:6 Da zua xabáala gulé'e lau na naque̱' xrlátaje, lawe' da naca Dios Benne' guchi'e̱ chee̱ bénneache.
PSA 50:7 Dxenné̱': “Le xen, bénneache chia', na' guchálaja'. Le guzé̱ nágale, benne' Israel, na' nnia' da gagu na zria chee̱le. Neda', Dios, naca' Dios chee̱le.
PSA 50:8 Quebe til-la' le'e ca naca béadu ca' bé̱tele lawa', ne ca naca béadu ca' bzézxele, da zaj zúaqueze na lawa' neda'.
PSA 50:9 Quebe ca'a lu na'ale me̱du ca', ne chivo biu ca', be̱ nápaquezle
PSA 50:10 lawe' da zaj naca chia' xúgute̱ be̱ xixre' ca', ne zane gaxúa be̱ xixre' zaj zraba' lu xí'adu ca'.
PSA 50:11 Xu'u lu na'a xúgute̱ be̱ zua xrila, ne naca chia' xúgute̱ be̱ zaj naca banba'.
PSA 50:12 Chela neda' dxeduna', quebe xapa' le'e ca' lawe' da naca chia' xe̱zr la xu, ne xúgute̱ da de̱ lawe na.
PSA 50:13 ¿Dxun na ba xen gawa' be̱la' be̱zre ca'? ¿Xí'aja' dxen chee̱ chivo biu ca'?
PSA 50:14 Le guzúa lau Dios da güe lá'anale Le̱' ne le gunezruj ca da guche̱be lázrele lau Dios szrente̱.
PSA 50:15 Bláwizra neda' lu zra zu' lu da zi' da xa', na' guselá' lue', na' lue' gapu' neda' ba lá'ana.”
PSA 50:16 Dios guzre̱' benne' we̱n da cale̱la: “¿Bi dxéquenu' lue', dxuchálaju' ca nadxixruj bi'a, ne dxenníu' ca naca chee̱ xel-la' wezría chia'?
PSA 50:17 Lue' dxecuídenu' neda' che dxusízreda' lue', ne dxuzú' chalá'ala dizra' chia'.
PSA 50:18 Gate dxelé'enu' gubán, na' dxunu' le̱' tu zren, ne nacu' tu zren benne' ca' dxeledále̱ne̱' nu'ula quebe zaj naca zru'ule̱'.
PSA 50:19 Dxuchálajquezu' da cale̱la, ne tu dxúnzquezu' da we̱n lazre'.
PSA 50:20 Tu dxenné̱zquezu' da cale̱la chee̱ bi bíchequezu', Ne dxagu' zria chee̱ bi chee̱ xrná'aquezu'.
PSA 50:21 Da caní be̱nu', na' neda' guzúa' zrize. Gúquenu' naca' tu benne' ca nacu' lue'. Na'a wadíl-laqueza' lue', ne gulé'eda' lue' ca ba be̱nu'.”
PSA 50:22 Le chéajni'i da nigá na'a, le'e dxal-la lázrele Dios. Ga gaze guzuzruj Dios le'e, ne québedxa sua nu guselá le'e.
PSA 50:23 Bénnea' guzúe̱' lawa' da güe lá'ane̱' neda' gape̱' neda' ba lá'ana, na' bénnea' dxuxuchá cuine̱' chee̱ gune̱' da xrlátaje, gulé'eda' le̱' ca guselá' le̱', naca' Dios chee̱'.
PSA 51:1 Gúcale̱ neda', Dios, lu dute̱ xel-la' dxexache lazre' chiu'. Dute̱ xel-la' dxexache lazre' chiu' bsula zria da nabaga'.
PSA 51:2 Gudibe neda' ca naca da cale̱la da nuna', ne bca'ana chawe' neda' chee̱ dul-la da be̱na',
PSA 51:3 lawe' da dxexúnbe'a ca be̱na' gudábaga' Lue', ne ca naca dul-la chia' tu dxáguze na zria neda'.
PSA 51:4 Lau' Lue' be̱na' dul-la. Awe', lau' Lué'queze, ne ba be̱na' da cale̱la lau' Lue'. Caní dxaca na chia' chee̱ gaca bea nacu' xrlátaje lu da dxenníu', ne nacu' du lazre' ca da dxuchi'u chee̱ bénneache.
PSA 51:5 Gunná' xque, báchequeze nabaga' dul-la gate gúlajtea', ne lu dul-la zúaqueza' gate guzrán xrna'a neda'.
PSA 51:6 Lue' dxezá lazru' sua da li lu xichaj lázrdawa', ne lu xichaj lázrdawa' ba bzéajni'inu' neda' da naca sina.
PSA 51:7 Bca'ana chawe' neda' nen da na' dxuchínenu', na' xegá'ana' xrlátaje. Gudibe neda', na' gaca' chíchedxa ca tu bezxe'.
PSA 51:8 Be̱n xenda' xel-la' dxebé, ne da ba neza, na' xelexezí' le dipa zrita xu'a, da ba gudíchaju'.
PSA 51:9 Quebe gusá lazru' ca naca dul-la da be̱na', na' bsula xúgute̱ da cale̱la da nuna'.
PSA 51:10 Dios, bzua neda' tu lázrdawa' xrlátaje, ne bzua tu be' li lazre' lu xichaj lázrdawa'.
PSA 51:11 Quebe gucuasu' neda' lau' Lue', ne quebe xeca'u lu xichaj lázrdawa' be' lá'azxa chiu'.
PSA 51:12 Bexunna neda' xel-la' dxebé chee̱ xel-la' weselá chiu', ne bzua chuchu be' chawe' da xu'a.
PSA 51:13 Nadxa gusé̱deda' benne' ca' dxelune̱' da zrinnaj ca dxaca lazru' xelune̱', na' benne' dul-la ca' xelexexaque̱' chiu' Lue'.
PSA 51:14 Bselá neda' lu zria da nabaga', be̱tia' benne'. Lue' Dios, nacu' Dios dxuseláu' neda', na' gúl-laqueza' chee̱ da xrlátaje nacu' Lue'.
PSA 51:15 Xran, gusalaj dxu'a, na' guzenda' bénneache da dxue lá'ana' Lue'.
PSA 51:16 Quebe dxaca lazru' béadu ca' gutia'-ba' lau', ne quebe dxaca lazru' béadu ca' guzézxea' lau'.
PSA 51:17 Da guzúadxu lau Dios da dxaca lazre̱' naca na tu lázxdau dxexruj lazre'. Tu lázxdau dxexruj lazre', ne da dxexíaje lazre' quebe guzú' chalá'ala, Dios.
PSA 51:18 Dute̱ xel-la' zri'i lazre' chiu', be̱n gaca chawe' chee̱ xe̱zre Sión. Bsegula ze'e da nazechaj na xe̱zre Jerusalén.
PSA 51:19 Nadxa xezaca ba lazru' nen béadu ca' gútentu' lau' dute̱ da naca xrlátaje chee̱ntu', ne béadu ca', ne da du ca' guzézxentu' lau'. Nadxa xelútie̱' béadu ca' lu cugu chiu'.
PSA 52:1 ¿Bizr chee̱ na' dxucá'ana szren cuinu' chee̱ da cale̱la da nunu', lue', benne' wal-la? Tu zúazqueze xel-la' dxexache lazre' chee̱ Dios.
PSA 52:2 Tu dxuchálajzquezu' chee̱ da cale̱la da gunu' chee̱ le sa' ljwezru'. Da dxenníu' naca na ca tu xia da nalále̱'e̱, dxezí xe̱'u ljwezru'.
PSA 52:3 Nazrí'idxenu' da cale̱la quézcala da xrlátaje, ne dxedánnedxenu' da we̱n lazre' quézcala da li.
PSA 52:4 Nazri'inu' xúgute̱ dizra' da dxulucá'ana ditaj na bénneache, lue', benne' dxezí xe̱'u.
PSA 52:5 Chee̱ le̱ na' guzría xi' Dios lue' tu chí'izqueze. Waxe̱le̱' lue', ne xequé̱'e̱ lue' naga zúaquezu', ne gucuase̱' lue' naga zaj zra' benne' ban ca'.
PSA 52:6 Xelelé'e benne' xrlátaje ca' da nigá, na' xelezrébequeze̱'. Xuluzrízrqueze̱' chiu' lue', xelenné̱':
PSA 52:7 “Le na' xque, benne' nigá quebe bxren lazre̱' Dios chee̱ gucu'uje̱' le̱'. Bxren lázrequeze̱' ca naca xel-la' gunní'a zrente̱ chee̱', ne guzúaqueze̱' lu da cale̱la da dxune̱'.”
PSA 52:8 Neda' naca' ca tu xaga olivo xa'a lu xu'u lizre Dios. Tu dxuxrén lázrezqueza' xel-la' dxexache lazre' chee̱ Dios chadía chacanna.
PSA 52:9 Güe lá'anaqueza' Lue' chadía chacanna lawe' da be̱nu' da caní, ne cueza lazra' lau Lue' lawe' da naca na xrlátaje lau xúgute̱ benne' chiu' Lue'.
PSA 53:1 Benne' xala ca' dxelenná lu lázrdawe̱': Quebe zua Dios. Xúgute̱' zaj naque̱' sban, ne zaj nune̱' da cale̱la. Quebe nu chilá' benne' dxune̱' da xrlátaje.
PSA 53:2 Dios zue̱' xabáa dxenné̱'e̱ bénneache chee̱ lé'ene̱' che zua tu benne' sina, bénnea' dxape̱' Dios ba lá'ana.
PSA 53:3 Xúgute̱ benne' zaj nabéaj xíchaje̱' Dios. Xúgute̱' zaj naque̱' sban. Quebe nu chilá' benne' dxune̱' da xrlátaje, netú gue̱'.
PSA 53:4 Dxenná Dios: “¿Quebe dxeléajni'i benne' caní dxelune̱' da cale̱la? Dxele̱'aj dxelawe̱' da dxelebane̱' chee̱ bénneache chia', ne quebe dxelexílaje̱' neda'.”
PSA 53:5 Za zrin zra xelexruse̱' ca da quebe ne xelezaque̱', lawe' da gusedinnaj Dios zrita ca' chee̱ benne' guledábague̱' bénneache chee̱'. Dios na' nuzúe̱' chalá'ala benne' ca', na' bénneache chee̱' xuluzría xi'e̱ benne' ca'.
PSA 53:6 Dxenaba' Dios gune̱' dxuaj Sión da gácale̱ na benne' Israel ca'. Gate ba nun Dios xelezrín bénneache chee̱' lu xe̱zr la xu cheé̱queze̱', xelebé zri'ine zre sua Jacob, ne xelezúa lu da ba neza benne' Israel ca'.
PSA 54:1 Bselá neda', Dios, nen xel-la' waca chiu'. Gúcale̱ neda', Dios, nen xel-la' wal-la chiu'.
PSA 54:2 Bene da dxenaba' lau', Dios, ne beche̱be chia'. Bze̱ naga da guchálajle̱na' Lue'.
PSA 54:3 Za'aca benne' snia ca' xeledíl-lale̱ne̱' neda'. Benne' xichaj zra'a ca' dxelaca lazre̱' xelútie̱' neda', benne' ca' quebe dxelape̱' ba lá'ana Lue', Dios.
PSA 54:4 Dios naque̱' Benne' dxácale̱ne̱' neda'. Xránadxu Dios zúale̱ne̱' benne' ca' dxuluxúe̱' neda'.
PSA 54:5 Ca naca da cale̱la dxelún benne' dxeledábague̱' neda', xuzrí'i Dios na chee̱ benne' ca'. Guzría xi'e̱ benne' ca' lawe' da naque̱' li lazre'.
PSA 54:6 Du lazra' cu'a da gudéa' lau Lue', Xran. Güe lá'anaqueza' Lau' lawe' da nácale̱'e̱ na xrlátaje.
PSA 54:7 Bseláu' neda' lu xúgute̱ da ste̱be guzúa'. Ble'eda' gulebía xi' benne' ca' dxeledábague̱' neda'.
PSA 55:1 Bze̱ naga, Xran, ca da dxuchálajle̱na' Lue', ne quebe guzú' chalá'ala ca da dxenaba' lau'.
PSA 55:2 Guzúa ban lazre', ne beche̱be chia'. Dxuláwizra' Lue' lu da dxuchálaja', ne zua' ste̱be,
PSA 55:3 lawe' da benne' dxeledábague̱' neda' dxelenné̱' chia', ne lawe' da dxelún la benne' we̱n da cale̱la neda'. Bulusebague̱' neda' da zrinnaj, ne dute̱ xel-la' dxelezrá'a zaj nau zi' xuzre̱' neda'.
PSA 55:4 Dxe' gunne xue lázrdawa' lu be̱la' dxen chia', ne dxuchebe xel-la' gute neda'.
PSA 55:5 Zua' lu xel-la' dxezrebe, ne dxezríztequeza', na' zúale̱ neda' da dxuchebe na neda'.
PSA 55:6 Na' gunnía': ¿Nuzra gunna neda' xrila' ca xrila tu bsia chee̱ cha'a lu be'la naga xezí' lazra'?
PSA 55:7 Da líqueze guzrúnnuja' zítu'la, na' súaqueza' le̱'e̱ xixre' lawe' lataj.
PSA 55:8 Guna' ba xuzre la' lu be' bdunu', ne lu be' wal-la.
PSA 55:9 Bzria xi' benne' ca' dxelune̱' da cale̱la, Xran. Bzaga naze da dxelune̱', lawe' da ble'eda' da zrinnaj, ne da cale̱la da dxelune̱' lu xe̱zre.
PSA 55:10 Te zra chizrela dxeledé̱' lawe' ze'e da naxechaj na xe̱zre, ne dxelune̱' da zrinnaj, ne da cale̱la lu xe̱zre nigá.
PSA 55:11 Nazrate̱ xe̱zre nigá da cale̱la da dxelune̱', ne tu dxelúnzqueze̱' da we̱n lazre', ne xel-la' dxezí xe̱ lu neza chee̱ na.
PSA 55:12 La guca tu benne' bénnea' dxedábague̱' neda', bénnea' be̱n le̱' chia', na' bchaga lawa' da na'. La guca tu benne' dxecuídene̱' neda' bénnea' gudábague' neda', na' bcache cuina' lau le̱'.
PSA 55:13 Lue', bénnea', gucu' ca tu le sa' ljwezra'. Bsi'u neda', ne gucu' tuze neda'.
PSA 55:14 Tu zren bchálajdxu du lázredxu, ne lu xel-la' zri'i lazre' gudadxu lu xu'u lizre Dios.
PSA 55:15 Dios, be̱n que̱la xel-la' gute benne' ca' dxelune̱' da cale̱la chadite̱. Be̱n xelexú'e̱ lu lataj ba xa' zaj naca bane̱', lawe' da nazrate̱ xu'u lizre̱' da cale̱la da dxelune̱'.
PSA 55:16 Ca naca chia' neda', bláwizra' Dios, na' Xrana' Dios bselé̱' neda'.
PSA 55:17 Che zílala, ne wagubizra, ne ca dxebía gubizra guchálajle̱queza' Dios, ne guláwizra' Le̱', na' Le̱' xenne̱' chia'.
PSA 55:18 Xexá'awe̱' bénne'du xu'a lu wedil-la da dxaca chia' neda', ne gune̱' cueza' zri lazra', lácala zaj zra' zánete̱ benne' dxeledábague̱' neda'.
PSA 55:19 Wene Dios, na' guzría xí'queze̱' benne' ca'. Naque̱' Bénnea' zúatequeze̱' dxenná be'e̱ nédxute̱. Caní gune̱' chee̱ benne' ca' lawe' da quebe dxuluché̱'e̱ ca dxelune̱', ne quebe dxelezrebe̱' Dios.
PSA 55:20 Guchisa na' benne' we̱n da zrinnaj chee̱ gu'e̱ benne' ca' dxelebeza zri lazre̱' nen le̱'. Gudíchaje̱' xrba chee̱ xel-la' wezría da be̱ne̱' nen benne' ca'.
PSA 55:21 Dizra' bchálaje̱' zaj naca na dizra' zren lazre', san xu'u lázrdawe̱' xel-la' dxezrá'a. Dxune̱' xrtante̱ dizra' dxuchálaje̱', san zaj naca na ca xia da zaj nalále̱'e̱.
PSA 55:22 Bda xua chiu' cuzru Xránadxu, na' Le̱' gutipe̱' lazru'. Québequeze gu'e̱ lataj cheajchaze benne' chawe' tu chi'ize.
PSA 55:23 Lue', Dios, gunu' xelexú'u benne' ca' dxelune̱' da cale̱la lataj ba xa', benne' dxelute benne', ne benne' dxelezí xe̱'e̱, gate quebe ne xelezrine̱' gachaj catite dxal-la' xelaca bane̱', san neda' guxrén lazra' Lue'.
PSA 56:1 Bexache lazre' neda', Dios, chee̱ quebe xuluzría xi' bénneache neda'. Tu zra tu zra dxulusaca zi' bénneache neda', benne' ca' dxeledíl-lale̱ne̱' neda'.
PSA 56:2 Te zra chizrela benne' ca' dxeledábague̱' neda' dxulucá'ana dítaje̱' neda', lawe' da zaj zra' benne' zante̱, benne' dxeledíl-lale̱ne̱' neda' lu xel-la' dxulucá'ana szren cuine̱'.
PSA 56:3 Lu zra dxezreba', dxuxrén lazra' Lue'.
PSA 56:4 ¡Dxuxrén lazra' Dios, na' güe lá'ana' xrtizre̱'! ¡Dxuxrén lazra' Dios, na' québedxa zreba'! ¿Bízraqueze gaca gun bénneache chia' neda'?
PSA 56:5 Xúgute̱ zra dxuluchuque̱' xrtizra'. Ca naca da dxelegú'u be'e̱ zaj naca na chee̱ xelune̱' chia' da cale̱la.
PSA 56:6 Dxelezrague̱', ne dxulucache cuine̱'. Dxelenná' xánnie̱' ca da dxuna'. Dxelilaj lazre̱' ca xelune̱' xelútie̱' neda'.
PSA 56:7 Dios, bxue ca da dxelune̱', na' dute̱ xel-la' dxezrá'a chiu' bzria xi' benne' ca'.
PSA 56:8 Nézqueznu' Lue' ca dxuzrúnnuja' lau benne' ca'. Bsa lazre' nisa da ba gudxezra'. ¿Quebe zaj naxúaj na lu xiche chiu'?
PSA 56:9 Gate dxuláwizra' Dios, lu zra ná'queze xuluxuzrunnuj benne' ca' dxeledábague̱' neda'. Nézquezda' zúale̱ Dios neda'.
PSA 56:10 ¡Dxuxrén lazra' Dios, na' güe lá'ana' xrtizre̱'! ¡Dxuxrén lazra' Xránadxu, na' güe lá'ana' xrtizre̱'!
PSA 56:11 ¡Dxuxrén lazra' Dios, na' québedxa zreba'! ¿Bízraqueze gaca gun bénneache chia' neda'?
PSA 56:12 Nabaga' ca da nache̱be lazra' chiu', Dios. Gúl-laqueza' da güe lá'ana' Lue'.
PSA 56:13 Ba bseláu' bénne'du xu'a lu xel-la' gute, ne bebéaju' ni'a naga zaj zua cheajlechaze na, chee̱ gaca chu'a lau Dios lu xel-la' naxaní' da dxunne̱' chee̱ benne' ca' zaj naca bane̱'.
PSA 57:1 Bexache lazre' neda', Dios. Bexache lazre' neda', lawe' da dxuxrén lazra' Lue' dute̱ lázrdawa'. Que̱zru' neda' ca dxun bedxuj dxé̱zreba' zrí'ineba' zran xrílaba', cadxa te chee̱ da ste̱be caní.
PSA 57:2 Guláwizra' Dios, Benne' zrente̱. Guláwizra' Dios chee̱ gácale̱ne̱' neda'.
PSA 57:3 Naga zúate̱' xabáa chee̱' sel-le̱' nu guselá neda' lu na' bénnea' dxáca lazre̱' guzría xi'e̱ neda'. Gusel-la Dios xel-la' dxexache lazre', ne da li chee̱'.
PSA 57:4 Zua' lu da ste̱be ca tu benne' zue̱' ládujla be̱zre xixre' ca'. Xu'a ládujla bénneache zaj naque̱' ca be̱zre xixre' ca' dxeláguba' bénneache. Dizra' da dxelenné̱' chia' zaj naca na ca tu xia natuche', ne xaga nalá xéche'ze ca', na' xrtizre̱' zaj naca na ca tu xia da nalále̱'e̱.
PSA 57:5 Xega'ana szrénquezu' lu xabáa, Dios. Xel-la' szren chiu' sua na lawe' dute̱ xe̱zr la xu.
PSA 57:6 Ba zaj nabeche̱' xralaj chee̱ xele̱l-le̱' neda'. Ba dxedú lazra' lu da dxaca chia'. Ba zaj naxe̱ne̱' tu xe̱dxu chee̱ cheajcházia' lu'ule na. Lu'ule da na' ba xeajlecházqueze le̱'.
PSA 57:7 Ba zúate̱queze lázrdawa', Dios. Ba zúate̱queze lázrdawa' chee̱ gúl-laqueza' da güe lá'ana' Lue'.
PSA 57:8 Bebán lazre', bénne'du xu'a, ne le xebán lázrele, le'e dxínnele da dxúl-lale̱nle, ne da zríadi'i na du. Che zílala chásaqueza'.
PSA 57:9 Güe lá'anaqueza' Lue' ládujla bénneache chiu', Xran. Gúl-laqueza' chiu' lau benne' xúgute̱ cue' xe̱zr la xu,
PSA 57:10 lawe' da naca xel-la' dxexache lazre' chiu' zrendxa ca xabáa, na' da li chiu' naca na zrendxa ca beuj bza ca'.
PSA 57:11 Xegá'ana szrénquezu' lu xabáa, Dios. Xel-la' szren chiu' sua na lawe' dute̱ xe̱zr la xu.
PSA 58:1 Le'e dxenná beale ¿da li dxuchálajle da naca xrlátaje? ¿Dxuchí'ale ca naca da li chee̱ bénneache chia'?
PSA 58:2 ¡Cabíze̱'! ¡Lu lázrdaule dxugú'u beale da zrinnaj! ¡Sté̱bele̱'e̱ dxuzúale bénneache lu xe̱zr la xu chia'!
PSA 58:3 Zaj nazrinnaj lázxdau benne' ca' zaj nabéaj xíchaje̱' neda' gate gulálajte̱'. Belexase dínnaje̱' dxelún lazre̱' gate gulezante̱ xrne̱'e̱ le̱'.
PSA 58:4 Dizra' da dxelenné̱' zaj naca na da dxelute bénneache ca da zria zran lazxa be̱la'. Zaj naca na ca be̱la' snia, be̱ nácaba' be̱ cuezru.
PSA 58:5 Quebe dxenba' chi'i benne' dxunné̱' le̱ba' lácala dxenné̱le̱'e̱ xrtandau'.
PSA 58:6 Dios, gudichaj lazxa benne' ca'. Gudichaj, Xran, lazxa benne' ca' zaj naque̱' ca be̱zre xixre' ca'.
PSA 58:7 Be̱n xelexenítie̱' ca nisa da dxelalaj na lu xu. Gate dxulusane̱' xaga nalá xéche'ze chee̱', be̱n xeledé na chalá'ala.
PSA 58:8 Be̱n xeledé chee̱' ca dxaca chee̱ be̱ zaga dxelexexúnaba'. Be̱n québedxa xelelé'ene̱' gubizra ca tu bidau' dxálajbe' ba nátebe'.
PSA 58:9 Nédxula gate quebe ne la xesu' lu xi' xecá'a Dios benne' ca' tu lu be' bdunu', benne' zaj naca bane̱', ne benne' ca' zaj zua xelatie̱'.
PSA 58:10 Wabé benne' xrlátaje gate lé'ene̱' xebéaj lazre' Dios benne' ca' dxelune̱' da cale̱la. Guchuchu guléaje̱' dxen chee̱ benne' zaj nabéaj xíchaje̱' Dios.
PSA 58:11 Nadxa nne̱ bénnea': “Da líqueze de̱ lazruj chee̱ benne' xrlátaje. Da líqueze zua Dios, Bénnea' dxuchi'e̱ chee̱ bénneache zaj zre̱'e̱ lu xe̱zr la xu.”
PSA 59:1 Bselá neda' lu na' benne' ca' dxeledábague̱' neda', Dios chia'. Bselá neda' lu na' benne' ca' dxelune̱' chia' da cale̱la.
PSA 59:2 Bselá neda' lu na' benne' ca' dxelune̱' da zrinnaj. Bselá neda' lu na' benne' ca' dxelutie̱' benne',
PSA 59:3 lawe' da dxelilaj lazre̱' xelútie̱' neda'. Zaj nazraga benne' wal-la ca' chee̱ xeledíl-lale̱ne̱' neda', quegá lawe' da bi zria nabaga', ne quegá ne̱ chee̱ dul-la nuna' neda', Xran.
PSA 59:4 Lácala quebe bi be̱na' chee̱ benne' ca', zá'aca chégüe̱', ne dxulucueze̱' bi xelune̱' chia'. Bebán chee̱ xidu' naga zua', na' le'enu' da dxelune̱'.
PSA 59:5 Lue', Xran, Dios chee̱ benne' zan dxjaque̱' wedil-la, ne Dios chee̱ benne' Israel ca', bebán chee̱ gudéu' ba xa' benne' xúgute̱ cue' xe̱zr la xu. Quebe xexache lazru' xúgute̱ benne' ca' dxeledábague̱' Lue', ne dxelune̱' da zrinnaj.
PSA 59:6 Xelelé̱'e̱ gate cuía gubizra, ne xelebezre xe̱'e̱ ca dxelún becu', na' xeléchaje̱' xe̱zre.
PSA 59:7 Gunná' xque, da dxuluchálaje̱' naca na ca da dxelexexe̱be̱'. Dizra' dxelenné̱' zaj naca na ca xia zaj nalá na, lawe' da dxelenné̱': “¿Nuzra xene?”
PSA 59:8 Lue', Xran, guzrizru' chee̱ benne' ca'. Gun lau' chee̱ benne' xúgute̱ cue' xe̱zr la xu ca'.
PSA 59:9 Zaj naca wal-la benne' ca' dxeledábague̱' neda'. Cueza lazra' Lue' lawe' da dxucu'uju' neda', Dios.
PSA 59:10 Dios, Bénnea' dxexache lazre̱' neda', cuía lawe̱' lawa' neda'. Dios gune̱' le'eda' gaca chee̱ benne' ca' dxeledábague̱' neda' ca da dxezá lazra'.
PSA 59:11 Quebe gutiu' benne' ca', chee̱ quebe xelal-la lazre' bénneache chia' ca da gunu'. Be̱se dinnaj benne' ca' nen xel-la' waca chiu'. Lue', Xran, Benne' dxucu'uj netu', ben cheajlecházie̱'.
PSA 59:12 Be̱n xeledule̱' lu xel-la' dxulucá'ana szren cuine̱', ne̱ chee̱ dul-la dxelune̱' lu da dxuluchálaje̱', ne ne̱ chee̱ dizra' schanni', ne da we̱n lazre' da dxelenné̱'.
PSA 59:13 Bzria xi'e̱ lu xel-la' dxezrá'a chiu'. Bzria xi'e̱ chee̱ québedxa xelezúe̱'. Dios, be̱n xeleque be'ene̱' dxenná be'enu' zri'ine zre sua Jacob. Dxenná be'u du ca naca xe̱zr la xu.
PSA 59:14 Dxelelé̱'e̱ gate dxebía gubizra, ne dxelebezre xe̱'e̱ ca dxelún becu', ne dxeléchaje̱' xe̱zre.
PSA 59:15 Dxeledé̱' ca benne' dxeledaze̱', dxelílaje̱' da xelawe̱', na' che quebe dxeléljane̱', na' du xe̱la dxelawe̱' zria tue̱' xetúe̱'.
PSA 59:16 Neda' gúl-laqueza' chee̱ xel-la' waca chiu', na' che zílala güe lá'ana' xel-la' dxexache lazre' chiu', lawe' da gúcale̱nu' Lué'queze neda', ne bcu'uju' neda' gate guzúa' lu da sté̱bele̱'e̱.
PSA 59:17 Lue' dxutipu' lazra', na' gúl-laqueza' chiu', lawe' da nacu' Lue', Dios, Bénnea' dxucu'uje̱' neda', ne Dios, dxexache lazru' neda'.
PSA 60:1 Dios, Lue' ba bzu' netu' chalá'ala, ne be̱nu' xeajcházentu'. Bzrá'ale̱'e̱nu' netu'. Na'a bedá gácale̱nu' netu'.
PSA 60:2 Be̱nu' guzrú' xe̱zr la xu, ne be̱nu' bxalaj na. Bexún na naga bxalaj na lawe' da dxebía xi na.
PSA 60:3 Be̱nu' blé'entu' netu', benne' chiu', da naca sté̱bele̱'e̱. Be̱nu' guca chee̱ntu' ca güé'entu' tu da be̱n na xeajcházentu'.
PSA 60:4 Bnézruju' tu da dxulé'e lau chee̱ benne' dxelezrebe̱' Lue', Da xeluxre̱' chee̱ gulé'e lau da naca li.
PSA 60:5 Chee̱ xelelá benne' ca' nazrí'iqueznu' Lue', bsel-la le̱' dute̱ xel-la' waca chiu', ne bene chia'.
PSA 60:6 Dios gunné̱' lu lataj lá'azxa chee̱': “Wabéquezda' neda'. Gunna' late weaj chee̱le xe̱zr la xu chee̱ benne' Siquem, ne gudxixra' chee̱le xe̱zr la xu de̱ cuita xe̱gu Sucot.
PSA 60:7 Chia' naca xe̱zr la xu Galaad, ne chia' naca xe̱zr la xu chee̱ zri'ine zre sua Manasés. Xe̱zr la xu chee̱ zri'ine zre sua Efraín naca na ca tu da napa chi'i na xíchaja'. Xe̱zr la xu chee̱ zri'ine zre sua Judá naca na naga dxenná be'a.
PSA 60:8 Xe̱zr la xu chee̱ benne' Moab naca na ca tu zriga' da xuzru nisa guná'a, na' xe̱zr la xu chee̱ benne' Edom guchichan' nen zrela'. Si'a ba neza xe̱zr la xu chee̱ benne' Filistea.”
PSA 60:9 ¿Nuzra che̱' neda' chee̱ guzétaja' xe̱zre da naxechaj na ze'e sibe? ¿Nuzra che̱' neda' chee̱ guzétaja' benne' Edom ca'?
PSA 60:10 ¿Quegá Lue' na' che̱'u neda', Dios, nacu' Bénnea' bzue' netu' chalá'ala, ne quebe guxeájle̱nu' benne' chee̱ntu' ca', benne' dxjaque' wedil-la?
PSA 60:11 Gúcale̱ netu' chee̱ séquentu' tíl-lale̱ntu' benne' ca' dxeledíl-lale̱ne̱' netu', lawe' da naca dácheze xelácale̱ bénneache netu'.
PSA 60:12 Tu zren nen Dios gundxu tu da zrente̱, na' Le̱' gulague̱' benne' ca' dxeledíl-lale̱ne̱' dxi'u.
PSA 61:1 Bene, Dios, da dxuláwizra' Lue'. Bze̱ naga da dxuchálajle̱na' Lue'.
PSA 61:2 Zitu' naga zua lazria' dxuláwizra' Lue', lawe' da dxedú lazra'. Guché̱' neda' naga zua Bénnea' naque̱' ca tu xi'a xiaj, Bénnea' nácadxe̱' szren ca neda',
PSA 61:3 Nacu' Lue' Benne' nuxrue̱' neda', ne nacu' ca tu ze'e xiaj da dxucu'uj na neda' lau benne' ca' dxeledábague̱' neda'.
PSA 61:4 Tu súazqueza' lu xu'u lá'azxa chiu'. Sua chawa'a cuitu' Lue' ca zaj zua chawe' bedxuj dxé'enedu ca' zran xrila bedxuj.
PSA 61:5 Lawe' da bennu' Lue', Dios, ca da guche̱be lazra' chiu', be̱nu' napa' ca da dxelapa benne' ca' dxelezrebe̱' Lue'.
PSA 61:6 Gunu' gaca bana' neda', wenná bea, zánete̱ zra. Iza chia' xelaca na ca da zaj naca chee̱ chupa cuen bénneache.
PSA 61:7 Tu súazqueza' lau', Dios. Bcueza xel-la' dxexache lazre' chiu', ne da li chee̱ xulucá'ana chawe' na neda', wenná bea.
PSA 61:8 Caníqueze gúl-laqueza' chee̱ lau' tu chí'izqueze, ne gúnqueza' tu zra tu zra ca da guche̱be lazra'.
PSA 62:1 Tuze nen Dios dxebeza zri lazre' bénne'du xu'a. Lé̱queze̱' dxuselé̱' neda'.
PSA 62:2 Tuze Le̱' dxucu'uje̱' neda', ne dxuselé̱' neda'. Naque̱' Bénnea' dxuxre̱' neda', na' quebe negue lazra'.
PSA 62:3 ¿Ajate̱zcha' gucuézale da gunle chee̱ tu benne', na' dxunle ba xen xúgute̱le guzría xile le̱', ca dxun tu benne' dxuchínnaje̱' tu ze'e da ba de̱ chalá'ala, u tu le'aj da ba guzru'?
PSA 62:4 Dxunle tuze dizra' ájazra xebéajle neda' lu xel-la' szren chia'. Nazrí'ile da we̱n lazre'. Nen dxú'ale dxenne̱le da xrlátaje, san xu'u lázrdaule da cale̱la.
PSA 62:5 Lue', bénne'du xu'a, guleza lazre' tuze Dios, lawe' da naca Le̱' Bénnea' dxebeza lazra'.
PSA 62:6 Tuze Le̱' dxucu'uje̱' neda', ne dxuselé̱' neda'. Naque̱' Bénnea' dxuxre̱' neda', na' quebe negue lazra'.
PSA 62:7 Naca Dios Bénnea' dxuselé̱' neda', ne naque̱' da ba neza chia'. Naca Dios Bénnea' dxucu'uje̱' neda', ne Benne' dxuxre̱' neda'.
PSA 62:8 Le cueza lazre' Le̱' tu chí'izqueze, le'e, bénneache. Le xe̱'e̱ ca da dxezá lázrele. Naca Dios Bénnea' dxuxre̱' dxi'u.
PSA 62:9 Da líqueze, da dácheze zaj naca bénneache, ne ca tu da we̱n lazre' benne' zren ca'. Quebe bi dxelé̱'e̱ tu lu zrgú'unsa. Zaj nácadxe̱' zraze ca tu be' da dxecá'a lázredxu.
PSA 62:10 Quebe guxrén lázrele da sile gate dxexúbele, ne quebe gucá'ana szren cuínale chee̱ da ca' dxebanle. Che dxegula xel-la' gunní'a chee̱le, quebe xezaca ba lázrele chee̱ da na'.
PSA 62:11 Tu lásaze gunná Dios: na' chupa lasa benda' da nigá: Chee̱ Dios naca xel-la' waca.
PSA 62:12 Chiu' Lue', Xran, naca xel-la' dxexache lazre' lawe' da dxunézruju' lazruj chee̱ tu tu bénneache cáte̱ze da zaj nune̱'.
PSA 63:1 Dios, Lue' nacu' Dios chia'. Dxebile bénne'du xu'a da naca chiu', na' be̱la' dxen chia' dxezá lazre' na da naca chiu'. Naca chia' ca zúaqueza' tu xe̱zr la xu bizre naga quebe bi nisa de̱. Dxaní'siseze xida' lau Lue' chee̱ le'eda' xel-la' waca chiu', ne xel-la' szren chiu', cáte̱ze ba ble'eda' da naca chiu' lu lataj lá'azxa chiu'.
PSA 63:3 Cháwedxa naca xel-la' dxexache lazre' chiu' ca xel-la' nabánqueze. Chee̱ le̱ na' güe lá'anaqueza' Lue'.
PSA 63:4 Caníqueze nnia' chiu' da xrlátaje dxácate̱ naca bana'. Chee̱ gucá'ana szrena' Lau' chísaqueza' na'a.
PSA 63:5 Xélaje bénne'du xu'a da naca na ca be̱se zrita, ne be̱la' da dxánnele̱'e̱, na' dute̱ xel-la' dxebé güe lá'anaqueza' Lue'
PSA 63:6 gate dxajsá lazra' chiu', ne dea' ga dxata', ne gate dxulaba lazra' ca naca chiu' gate dxennaza' chizrela.
PSA 63:7 Lawe' da dxácale̱nu' neda', béle̱'e̱da' cuitu' ca dxelún bedxuj dxé'enedu ca' zran xrila bedzuj.
PSA 63:8 Naca bénne'du xu'a Lue' tuze. Nen na'u wal-la nuxru' neda'.
PSA 63:9 Benne' ca' gulezá lazre̱' xuluzría xi'e̱ neda' cheajlecházie̱' lataj ba xa'.
PSA 63:10 Xelebía xi'e̱ lu xia nalá. Xelaque̱' da xelagu becu' xixre' ca'.
PSA 63:11 Neda', wenná bea, beda' lu da naca chee̱ Dios. Xegá'ana ba lá'ana nútete̱ze benne' dxuluchínene̱' la', lawe' da xelezxuj dxu'a benne' ca' dxelenné̱' da we̱n lazre'.
PSA 64:1 Dios, bze̱ naga chi'a lawe' da zua' ste̱be dxuláwizra' Lue'. Bxue xel-la' nabán chia' lawe' da dxezreba' bi xelún benne' ca' dxeledábague̱' neda'.
PSA 64:2 Bcache chawe' neda' chee̱ quebe xelún benne' we̱n da cale̱la chia' ca da dxelezá lazre̱', ne chee̱ quebe xelún benne' dxelún da zrinnaj chia' ca da zaj nune̱' xelune̱' chia'.
PSA 64:3 Dizra' dxuluchálaje̱' zaj naca na ca xia zaj nalále̱'e̱ na, ne dxelenné̱' schanni' ca dxun tu benne' dxusane̱' xaga nalá xéche'ze chee̱'.
PSA 64:4 Caní dxelenné̱' bagácheze chee̱ xelune̱' cheajlechaze benne' zaj naque̱' li lazre'. Chadite̱ dxelune̱' na, ne quebe bi dxelezrebe̱'.
PSA 64:5 Dxelune̱' ba xuzre xelune̱' da zrinnaj da zaj nune̱' xelune̱', na' dxuluzúe̱' xralaj ca' chee̱ xele̱le̱' bénneache, dxelenné̱': “¿Nuzra le'e da dxundxu?”
PSA 64:6 Dxelílaje̱' ca zaj naca da zrinnaj xelune̱', ne dxelenná' xánnie̱' ca zaj naca na. Ca da zaj xu'u xichaj lázrdawe̱' zaj naca na sté̱bele̱'e̱ ca zaj naca lázrdauqueze̱'.
PSA 64:7 Dios gune̱' benne' ca' we̱' nen tu xaga nalá xéche'ze chee̱'. Chadite̱ xelu'e̱ xízrawe̱' zren ca'.
PSA 64:8 Dizra' buluchalaj benne' ca' xelún na cheajlecházie̱', na' xelezrebe xúgute̱ bénneache gate xelelé'ene̱' benne' ca'.
PSA 64:9 Nadxa xelezrebe xúgute̱ bénneache, ne xuluzenne̱' ca da nun Dios, na' xuluxúnbe'e̱ ca zaj naca da be̱ne̱' Le̱'.
PSA 64:10 Béqueze benne' xrlátaje lau Xránadxu, ne guxrén lazre̱' Le̱', na' xelezúa lu da ba neza xúgute̱ benne' zaj naque̱' li lazre'.
PSA 65:1 Naca chiu' Lue', Dios, güe lá'anantu' Lue' lu xe̱zre Sión, na' guntu' da guche̱be lázrentu' chiu'.
PSA 65:2 Lue' dxénqueznu' da dxuchálajle̱ntu' Lue', na' xelelá' lau Lue' xúgute̱ bénneache.
PSA 65:3 Nabágale̱'a da zrinnaj da be̱na', san Lue' dxunite lau' ca da gudábagantu' Lue'.
PSA 65:4 Ba neza zrente̱ naca na chee̱ bénnea' dxeca'u Lue', ne dxenníu' le̱' gaque̱' chiu', chee̱ súaqueze̱' lataj lá'azxa chiu'. Xélajquezentu' da xrlátaje da de̱ lizru', da ca' da zaj de̱ xudau' lá'azxa chiu'.
PSA 65:5 Lu da xrlátaje chiu' gunu' da zaj naca zrente̱ gate gunu' ca da dxenábantu' Lue', Dios, Benne' dxuselé̱' netu'. Xúgute̱ bénneache zaj zra' dute̱ xe̱zr la xu dxelebeza lazre̱' Lue', ne cá'anqueze dxelebeza lazre' benne' dxeledée̱' zítu'la lawe' nísadau'.
PSA 65:6 Lué'queze dxuzúa chuchu' xi'a zren ca' nen xel-la' waca chiu'. Nácaquezu' Benne' wal-la.
PSA 65:7 Dxebeche zriu' nísadau' gate dxelucu na, ne schaga da dxelún xeajxruza chee̱ na. Dxebeche zriu' benne' xe̱zr la xu gate dxeledábague̱' Lue'.
PSA 65:8 Chee̱ le̱ na' benne' zaj zre̱'e̱ dute̱ xe̱zr la xu xelezrebe̱' ca naca da zrente̱ da dxunu'. Dxuzú' lu da ba neza bénneache zaj zra' du gabí'i xe̱zr la xu.
PSA 65:9 Dxenna'u xe̱zr la xu, ne dxesel-lu' nisa xiuj. Dxunu' dxúnnale̱'e̱ na lina chee̱ na. Nuzúaquezu' lu xe̱zr la xu xe̱gu ca' da zaj de̱le̱'e̱ na nisa. Dxucuezu' zrua' za da xelagu bénneache, ca ba núnquezu' gaca na.
PSA 65:10 Dxesel-lu' nisa xiuj naga ba zaj nune̱' na'. Dxunu' dxexaca na xu xa'a. Dxuculu na nen nisa xiuj na'. Dxunu' dxelegula chawe' da du ca' ba zaj naxaza na.
PSA 65:11 Dxunu' dxelexezí' bénneache ba neza tu iza tu iza ne̱ chee̱ da dxunézruju', na' ca zaj naca beuj bza chiu' dxelunna na xiuj da dxun na dxelegula chawe' da zaj naza bénneache.
PSA 65:12 Dxelunna na xiuj naga dxeledá be̱ xíxre'du ca' da dxeláguba', na' dxelebé bénneache dxelelé'ene̱' ca bane zaj zua xí'adu ca'.
PSA 65:13 Lache' ca' zaj zra' zrila' ca', na' dxu'a xé̱gudu ca' zaj naxaza zrua' xtila, na' dxelebezre xa'a bénneache chiu' dute̱ xel-la' dxelebé, ne dxelúl-laqueze̱' chiu'.
PSA 66:1 Le gucá'ana szren Dios dute̱ xel-la' dxebé, le'e zrale dute̱ xe̱zr la xu.
PSA 66:2 Le gul-la ca naca xel-la' szren chee̱ le̱'. Le gucá'ana szrene̱' gate dxue lá'anale Le̱'.
PSA 66:3 Le xe̱ Dios: “Dxebánele̱'e̱quezentu' ca zaj naca da nunu'.” Ne̱ chee̱ xel-la' szren chee̱ xel-la' waca chiu' xuluzúa xrtizru' benne' ca' dxeledábague̱' lue'.
PSA 66:4 Xúgute̱ bénneache zaj zra' dute̱ xe̱zr la xu xelúe lá'anaqueze̱' Lue', ne xelúl-laqueze̱' chiu'. Tu xelúl-lazqueze̱' chee̱ Láquezu'.
PSA 66:5 Le da, lé'ele ca zaj naca da nun Dios. Da zrébedxu zaj naca da be̱ne̱' chee̱ benne' ca' belune̱' da cale̱la.
PSA 66:6 Be̱ne̱' bexaca nísadau' xu bizre. Guledé bénneache chee̱' ní'aze̱' naga nedxu de̱ tu xe̱gu situj. Dxu'a nísadau' na' gubéle̱'e̱dxu lau Dios.
PSA 66:7 Dute̱ xel-la' waca chee̱' nna be'e̱ chadía chacanna. Dxuxúequeze̱' ca da dxelún bénneache dute̱ xe̱zr la xu. Benne' dxeledábague̱' Le̱' quebe xelezrué'equezne̱' xel-la' szren.
PSA 66:8 Le'e, bénneache, le gucá'ana szren Dios chee̱dxu, ne le guzén bénneache ca da dxue lá'anale Le̱'.
PSA 66:9 Lé̱queze̱' bxue̱' dxi'u chee̱ naca bandxu, ne quebe be̱'e̱ lataj cheajcházedxu.
PSA 66:10 Lué'queze bxu' netu' ca da be̱ntu', Dios. Bdeu' netu' xel-la' zi' ca dxelún bénneache dxuludée̱' xia plata lu xi' chee̱ xegá'ana chawe na.
PSA 66:11 Be̱nu' xeajchú'untu' tu lu xralaj. Bda'u cúzruntu' tu xua zí'ile̱'e̱.
PSA 66:12 Be̱nu' guledé xíchajntu' benne' zaj zrie̱' bzrina' chee̱' ca'. Gudentu' tu lu xi', ne tu lu nisa situj, na' bebéaju' netu', ne bzu' netu' tu lataj naga zúantu' lu da ba neza.
PSA 66:13 Chú'uqueza' lu xu'u lizru' chee̱ guzézxea' béadu ca', ne gunna' chiu' ca da guche̱be lazra' guna',
PSA 66:14 da na' guche̱be lazra' ca da gunnía' gate guzúa' lu da sté̱bele̱'e̱.
PSA 66:15 Guzézxea' béadu ca', be̱ dxelanne lau' Lue', ne guna' cuen zren chee̱ zríla'du ca' lau', ne gutia' be̱zre ca', ne chivo biu ca' lau'.
PSA 66:16 Le da, xénele, xúgute̱le dxezrébele Dios, na' guzenda' le'e ca da be̱ne̱' gúcale̱ne̱' neda'.
PSA 66:17 Du lazra' bláwizra' Le̱', ne bca'ana szrénqueza' Le̱'.
PSA 66:18 La guzé̱ lazra' tu da cale̱la, quebe ben Xránadxu chia'.
PSA 66:19 Da líqueze bene Dios chi'a. Bze̱ nague̱' ca da gunábeda' Le̱'.
PSA 66:20 ¡Gaca báqueze Dios! ¡Quebe bzue̱' chalá'ala da bchálajle̱na' Le̱', san bexache lazre̱' neda'!
PSA 67:1 Dios, bexache lazre' netu', ne be̱n da chawe' chee̱ntu'. Dute̱ xel-la' zri'i lazre' chiu' guzúale̱ netu',
PSA 67:2 chee̱ xelúnbea bénneache du gabí'i xe̱zr la xu ca naca da dxaca lazru', ne chee̱ xeleneze bénneache dute̱ xe̱zr la xu ca dxuseláu' bénneache.
PSA 67:3 Xúgute̱ bénneache dxelúe lá'ane̱' Lue', Dios. Dxelúe lá'ana xúgute̱ bénneache Lue'.
PSA 67:4 Le be, ne le sua lu da ba neza, le'e, bénneache dute̱ xe̱zr la xu, lawe' da guchi'a Dios chee̱le ca naca da xrlátaje, ne guxúequeze̱' xúgute̱ bénneache.
PSA 67:5 Xúgute̱ bénneache dxelúe lá'ane̱' Lue', Dios. Dxelúe lá'ana xúgute̱ bénneache Lue'.
PSA 67:6 Xe̱zr la xu nigá ba zria na lina chee̱ na, lawe' da be̱n Dios chee̱dxu da chawe' chee̱dxu.
PSA 67:7 Dios ba be̱ne̱' chawe' chee̱dxu, na' gátete̱ze dxal-la' xelapa bénneache Le̱' ba lá'ana.
PSA 68:1 Guzé̱, Dios, ne be̱se dinnaj benne' ca' dxeledábague̱' Lue', ne be̱n xuluzrunnuj benne' ca' dxelecuídene̱' Lue'.
PSA 68:2 Ca dxun tu be', dxulaga na zren chee̱ xi', ca' gulagu' benne' ca'. Ca dxuna xina' lu xi', ca' xelexenite benne' ca' lau Dios, benne' ca' dxelune̱' da zrinnaj.
PSA 68:3 Xelebé benne' xrlátaje ca', ne xelezúe̱' lu da ba neza lau Dios, ne xelexrítequeze̱' lu xel-la' dxelebé chee̱'.
PSA 68:4 ¡Le gul-la chee̱ Dios! ¡Le gul-la da du ca' chee̱ Láqueze̱'! ¡Le gucá'ana szren Bénnea' dxe'e̱ xabáa, nazí le̱' Jah! ¡Le be lau Le̱'!
PSA 68:5 Ca xra bi dxé'enedu ca', ne ca benne' dxuxúe nu'ula ca' zaj zue̱' tuze, naca Dios lu lataj lá'azxa naga zúaqueze̱'.
PSA 68:6 Dxun Dios xelezúa xrtia ljwezre bénneache quebe nu xrtia ljwezre̱' zaj zra'. Dxebéaje̱' benne' zaj xu'e̱ lu na' benne' zitu' ca' chee̱ xelezúe̱' lu da ba neza. Benne' ca' dxeledábaga Dios zaj zue̱' tu lu xe̱zr la xu bizre.
PSA 68:7 Dios, gate bdxúaju' lau bénneache chiu', ne gudáu' lu xe̱zr la xu bizre na',
PSA 68:8 na' guzrú' xe̱zr la xu na'. Cá'anqueze gúcale̱'e̱ xiuj lau Dios. Xi'a Sinaí guzrize na lau Dios, Dios chee̱ benne' Israel ca'.
PSA 68:9 Gusel-lu' tu nisa xiuj zílale̱'e̱, Dios. Gate belexedú lazre' bénneache chiu', Lue' btipu' lazre̱'.
PSA 68:10 Bénneache zaj naca chiu' zaj zúaqueze̱' lu xe̱zr la xu chiu'. Dute̱ da chawe' chiu', Dios, dxuxú' benne' xache' ca'.
PSA 68:11 Xránadxu Dios gusel-le̱' tu dizra' chawe', na' gulezrá' benne' zante̱, benne' buluzenne̱' bénneache ca naca dizra' chawe' na'.
PSA 68:12 ¡Buluzrúnnuje̱'! ¡Buluzrunnuj wenná bea ca' nen ca naca benne' chee̱' dxjaque̱' wedil-la, na' benne' ca' zaj nagá'ana lu xu'u lizre̱' belexequé̱'e̱ da bulucá'ana benne' ca' buluzrúnnuje̱'.
PSA 68:13 Lácala bcache cuínale naga dxuxúele zrila' ca', gacu zra lánale da naca na ca xrila bgúgudu ca' da zaj nazí lechítaje̱ na plata, na' dube' chee̱ xrílaba' ca' zaj nazí lechítaje̱ na oro.
PSA 68:14 Gate be̱se dinnaj Dios zrente̱ wenná bea ca' lataj na', na' bexruj bezxe' da bgacu na xi'a Salmón.
PSA 68:15 Tu xi'a zrente̱ naca xi'a Basán. Tu xi'a zri'a naca xi'a Basán na'.
PSA 68:16 ¿Bizr chee̱ na' dxenna'le, le'e, xi'a zri'a ca', xi'a na' naga dxaca lazre' Dios súaqueze̱'? Da líqueze súaqueze Xránadxu lu xi'a na' chadía chacanna.
PSA 68:17 Da zaj naché̱' benne' ca' lu wedil-la da napa Dios zánete̱ cue' gaxúa zaj naca na. Xránadxu Dios zezé̱'e̱ xi'a Sinaí chee̱ sue̱' lataj lá'azxa chee̱'.
PSA 68:18 Begüénu' xabáa, zeche̱'u benne' ca' bebéaju' lu na' xel-la' gute, na' guzi'u da chawe' ca' da belunna bénneache, ne cá'anqueze guzúa da be̱nnu' chee̱ benne' ca' guledábague̱' Lue', chee̱ súaquezu' ládujla bénneache, Dios, leu' Jah.
PSA 68:19 ¡Gaca ba Xránadxu! ¡Tu zra tu zra dxusezrate̱' dxi'u da chawe' chee̱'! ¡Naque̱' Dios, dxuselé̱' dxi'u!
PSA 68:20 Dios, Bénnea' naque̱' Dios chee̱dxu guselé̱' dxi'u. Lé̱queze Xránadxu Dios guselé̱' dxi'u lu na' xel-la' gute.
PSA 68:21 Da líqueze Dios gune̱' we̱' xichaj benne' ca' dxeledábague̱' Le̱'. Gune̱' we̱' xichaj benne' quebe dxulusane̱' ca zaj naca dul-la da dxelune̱'.
PSA 68:22 Gunná Xránadxu: “Guna' xezrinle lázrele, xeza'ale lu xi'a Basán. Guna' xeza'ale lu da situj chee̱ nísadau', xezrinle lázrele,
PSA 68:23 lawe' da guna' guchuchu guléajle dxen chee̱ benne' ca' dxeledábague̱' le'e, na' xelelé̱'e̱ becu' chee̱le dxen chee̱ benne' ca'.”
PSA 68:24 Belelé'e bénneache ca guledá bénneache chiu' belúe lá'ane̱' Lue', Dios. Dute̱ xel-la' dxelebé gulu'e̱ lataj lá'azxa chiu', Dios, Wenná Bea chia'.
PSA 68:25 Benne' ca' dxelul-la zeajzrie̱' láwe'la, na' benne' zaj nu'e̱ da dxulucuezre̱' zja'aque̱' bzé̱bela. Ládujla zjaca nu'ula cuíde'du ca' zaj núxrube' da du ca' dxulusézxebe'.
PSA 68:26 Le güe lá'ana Dios naga zaj nazraga bénneache chee̱'. Le güe lá'ana Xránadxu, le'e nácale zri'ine zre sua Israel.
PSA 68:27 Zaj zra' zri'ine zre sua Benjamín na', guque̱' benne' cuídedxa, na' dxelenná be'e̱. Zaj nazraga benne' xíchaje̱ chee̱ zri'ine zre sua Judá na', ne benne' xíchaje̱ chee̱ zri'ine zre sua Zabulón, ne benne' xíchaje̱ chee̱ zri'ine zre sua Neftalí.
PSA 68:28 Dios, ble'e lau xel-la' wal-la chiu'. Bzua chacha, Dios, da na' be̱nu' chee̱ntu'.
PSA 68:29 Ne̱ chee̱ xel-la' szren chee̱ xudau' chiu' da zua na xe̱zre Jerusalén, xelegú'u benne' wenná bea ca' da xelunne̱' lau'.
PSA 68:30 Gudil-la benne' dxjaque̱' wedil-la chee̱ dute̱ xe̱zr la xu zaj nazrague̱' chee̱ xeledíl-lale̱ne̱' Lue', benne' ca' zaj naque̱' ca be̱zre zan ca' nen biadu chee̱ba' ca', cadxa xuluzúa xúgute̱' dizra' chiu', na' xelunne̱' ca naca xia plata da zaj nape̱'. Be̱se dinnaj benne' dute̱ xe̱zr la xu dxelexezaca ba lazre̱' xelezúe̱' lu wedil-la.
PSA 68:31 Xelelá' benne' xíchaje̱ chee̱ xe̱zr la xu Egipto. Benne' xe̱zr la xu Etiopía xelune̱' ba xen xulucá'ana szrene̱' Dios.
PSA 68:32 ¡Le gul-la chee̱ Dios, le'e zrale du gabí'i xe̱zr la xu! ¡Le gul-la chee̱ Xránadxu!
PSA 68:33 ¡Le gul-la chee̱ Bénnea' dxe'e̱ xabáa na'ala, da zua na nédxute̱! ¡Le nna' xque, wanné̱', ne zízrajle̱'e̱ nne̱'!
PSA 68:34 ¡Le nne̱ nápale̱'e̱ Dios xel-la' waca! ¡Lu xel-la' szren chee̱' dxuxúequeze̱' benne' Israel ca', na' zran xabáa nalá' xel-la' waca chee̱'!
PSA 68:35 Benne' zrébentu' nacu' Lue', Dios, naga zu' lataj lá'azxa chiu'. Dios chee̱ benne' Israel ca', Lé̱queze̱' dxutipe̱' lazre' bénneache chee̱'. ¡Gaca ba Dios!
PSA 69:1 Bselá neda', Dios. Naca' ca tu benne' dxepe̱' lu nisa.
PSA 69:2 Naca' ca tu benne' xu'e̱ lu guzra' situj, ne quebe dxaca se̱'e̱. Naca' ca tu benne' xu'e̱ lu nisa sítujle̱'e̱, na' nisa na' ba dxacu na xíchaje̱'.
PSA 69:3 Ba dxajxréqueda' lawe' da ba gunné̱le̱'a, ne ba da lba'a. Ba dxelátete̱ lawa' dxenná'a gácale̱ Dios neda'.
PSA 69:4 Ba naxándxa benne' dxelecuídene̱' neda' ca naxán xicha xíchaja', ne quebe bi de̱ bi nuna'. Zaj naca benne' wál-lale̱'e̱ benne' dxeledábague̱' neda', benne' ca' dxuluzría xi'e̱ neda', ne quebe bi de̱ bizr chee̱ na'. ¿Dxal-la' quízruja' da quebe gulana'?
PSA 69:5 Dios, nézqueznu' Lue' naca da xálaze da nuna', ne dxelé'equeznu' dul-la da be̱na'.
PSA 69:6 Quebe gu'u lataj xelexedué'e ne̱ chia' neda' benne' ca' dxuluxrén lazre̱' Lue', Xrana' Dios szrente̱. Quebe gu'u lataj xeleque zréaje ne̱ chia' neda' benne' ca' dxelebeza lazre̱' Lue', Dios chee̱ benne' Israel ca'.
PSA 69:7 Lawe' da nazrí'ida' Lue' bulucháchale̱ne̱' neda', na' lu xel-la' stu' zúaqueza'.
PSA 69:8 Ca tu benne' zitu' naca' lau bi bícha'dau' ca', ne quebe zaj núnbea bi chee̱ xrna'a neda'.
PSA 69:9 Lawe' da dxé'le̱'a gunne xue chee̱ lizru' dxal-la na lu lázrdawa'. Gate dxelenné̱' benne' ca' schanni' chiu' Lue', Dios, naca ca dxelenné̱' schanni' chia' neda'.
PSA 69:10 Gudxezra', ne be̱na' gubasa, na' bde cuina' xel-la' zi', na' chee̱ le̱ na' bulucháchale̱ne̱' neda'.
PSA 69:11 Cá'anqueze bgacu cuina' zra lana' tuzruj. Buluzúe̱' neda' ca tu da dxulé'e na da baxache' zrente̱.
PSA 69:12 Gulenné̱ chia' benne' ca' zaj xu'e̱ xu'u lawe', na' benne' ca' dxelezuzre̱' belún le̱' chia' lu da belul-le̱'.
PSA 69:13 Neda' bláwizra' Lue', Xrana' Dios, lu zra dxezaca ba lazru' Lue'. Dios, lu xel-la' dxexache lazre' zren chiu', ne lawe' da líqueze nacu' weselá chee̱ntu', bene chia'.
PSA 69:14 Bebéaj neda' lu da ste̱be zua', naca' ca tu benne' xu'e̱ lu guzra' situj, ne quebe gu'u lataj cházedxa'. Bselá neda' lu na' benne' ca' dxelecuídene̱' neda'. Naca' ca tu benne' xu'e̱ lu nisa situj.
PSA 69:15 Quebe gu'u lataj gatia' ca tu benne' xegache̱' lu nisa situj, ne quebe gaca' ca tu benne' chu'e̱ lu da situj, ne quebe gaca' ca tu benne' cheajchazie̱' tu lu xe̱dxu situj.
PSA 69:16 Beche̱be chia', Xrana' Dios, lawe' da chawe' naca xel-la' dxexache lazre' chiu'. Gudá, gúcale̱ neda', lawe' da zrente̱ naca xel-la' dxexache lazre' chiu'.
PSA 69:17 Gunná' xque ca da dxaca chia' neda', we̱n zrin chiu'. lawe' da zua' lu da sté̱bele̱'e̱, be̱n ba xuzre xennu' chia'.
PSA 69:18 Gudá naga zua', ne bselá neda'. Bselá neda' lawe' da zaj naxánle̱'e̱ benne' ca' dxeledábague̱' neda'.
PSA 69:19 Lue' nézqueznu' ca dxulucháchale̱ne̱' neda', ne ca zua' lu da sté̱bele̱'e̱, ne ca dxulucá'ana dítaje̱' neda'. Dxelé'equeznu' xúgute̱ benne' ca' dxelecuídene̱' neda'.
PSA 69:20 Lawe' da dxelún le̱' chia' dxedú lazra', ne zua' lu da ste̱be. Guleza' nu benne' xexache lazre̱' neda', san quebe nu chilá'. Guleza' nu benne' xelexúe zrene̱' neda', san quebe nu chilá'.
PSA 69:21 Bulugawe̱' neda' da sla', na' gate gubíleda', buluxí'aje̱' neda' da zichaj.
PSA 69:22 Ca naca laní chee̱ benne' ca' be̱n gaca na ca tu xralaj naga cheajlecházie̱', ne be̱n xexaca da ba neza chee̱' tu da gun na cheajlecházie̱'.
PSA 69:23 Be̱n xelechul-la xiaj lawe̱' chee̱ québedxa xelelé'ene̱', ne be̱n tu xelexrízrezqueze benne' ca'.
PSA 69:24 Dute̱ xel-la' dxezrá'a chiu' ble'e benne' ca', ne dute̱ xel-la' xichaj zra'a chiu' be̱' benne' ca'.
PSA 69:25 Be̱n quebe nu chilá' lu xu'u lizre benne' ca', ne quebe nu sua lu xe̱zr la xu chee̱',
PSA 69:26 lawe' da guláu zi' xuzre̱' bénnea' be̱nu' Lue' we̱', ne dxuluzrizre̱' ca naca xel-la' zi' dxedé bénnea' be̱'u Lue'.
PSA 69:27 Ble'e dul-la da zaj nabaga benne' ca', ne quebe gu'u le̱' lataj xelaque̱' tuze benne' xrlátaje chiu'.
PSA 69:28 Busula la benne' ca' lu xiche chee̱ benne' ca' zaj nape̱' xel-la' nabán, ne quebe guzúaju' le̱' naga zaj naxúaj la benne' xrlátaje ca'.
PSA 69:29 Neda' zua' lu da ba xa', ne lu da sté̱bele̱'e̱. Bselá neda', Dios, ne bechisa neda'.
PSA 69:30 Gúl-laqueza' da güe lá'ana' La Dios chia'. Gucá'ana szrena' Le̱' nen da dxue lá'ana' Le̱'.
PSA 69:31 Da nigá xezaca ba lázredxa Dios ca tu be̱zre, be̱ gutia' lawe̱', u ca tu me̱', béadu zaj zua lúzuba', ne xrúguba'.
PSA 69:32 Xelelé'equeze benne' baxache' ca' da nigá, na' xelebene̱'. Le biga lau Dios, na' gaca bánquezle,
PSA 69:33 lawe' da dxene Xránadxu benne' ca' dxelexázrjene̱', ne quebe dxuzúe̱' chalá'ala benne' chee̱' ca', benne' zaj xu'e̱ lizre xia.
PSA 69:34 Le güe lá'ana Le̱', le'e zrale xabáa, ne le'e, zrale lu xe̱zr la xu, ne le'e zrale lawe' nísadau', ne cá'anqueze xúgute̱ da zaj naca ban xúgute̱ lataj caní.
PSA 69:35 Dios guselé̱' benne' zaj zre̱'e̱ xe̱zre Sión, ne xexune̱' xe̱zre ca' zaj zra na lu xe̱zr la xu chee̱ benne' Judá ca', na' tu xelezúazqueze̱' na', ne gata' chee̱' xe̱zr la xu na'.
PSA 69:36 Zri'ine zre sua benne' we̱n zrin chiu' ca', gaca chee̱' xe̱zr la xu na', na' benne' ca' zaj nazrí'ine̱' Lau' Lue' xelezúe̱' na'.
PSA 70:1 Bselá neda', Dios. Gúcale̱che neda', Xran.
PSA 70:2 Be̱n xelexedué'e, ne xelezúa lu da ste̱be benne' ca' dxelaca lazre̱' xelútie̱' neda'. Be̱n xelexebigue̱', ne xelexala benne' ca' dxelebene̱' lawe' da zua' lu da ste̱be.
PSA 70:3 Be̱n xelexegá'ana xala benne' ca' dxelún le̱' chia'.
PSA 70:4 Benne' ca' zá'aque̱' lau Lue' xelebene̱', ne xelezúe̱' lu da ba neza. Benne' ca' dxelé̱'e̱ Lue': “Xcalenu'” lawe' da bseláu' le̱', tu dxelennázqueze̱': “¡Zrente̱ naca Dios!”
PSA 70:5 Zua' lu da ste̱be, ne nate ni'a na'a. Gudázega gácale̱nu' neda', Dios. Nacu' Weselá chia', ne Xrana'. Quebe chenu', Xran.
PSA 71:1 Za'a lau' Lue', Xran, chee̱ guxru' neda'. Be̱n québedxa xedué'eda'.
PSA 71:2 Gúcale̱ neda', ne bselá neda' nen dute̱ da naca xrlátaje chiu'. Bze̱ naga chi'a, ne bselá neda'.
PSA 71:3 Nacu' ca tu xiaj xre naga sua' chawe', na' waca xida' naga zu' te zra chizrela. Gunná be'enu' nu guselá neda', lawe' da nacu' Lue' ca tu xiaj xre naga dxaca dipa lazra'.
PSA 71:4 Dios chia', bselá neda' lu na' benne' ca' zaj nabéaj xíchaje̱' Lue', ne lu na' benne' ca' dxelune̱' da cale̱la ne zaj naque̱' xichaj zra'a,
PSA 71:5 lawe' da dxebeza lazra' Lue', Xrana' Dios. Nacu' Bénnea' dxuxúe̱' neda' gate nácatea' bídau'te̱.
PSA 71:6 Lue' núxruquezu' neda' gate gúlajtea'. Lue' be̱nu' bdxuaja' lu le̱'e̱ xrna'a. ¡Tu güe lá'anazqueza' Lue'!
PSA 71:7 Belexebane benne' zante̱ ca naca chia', ne ca naca chiu', dxuxúe xánniu' neda'.
PSA 71:8 Be̱n tu gul-lazqueza' da güe lá'ana' Lue', ne gucá'ana szrena' Lue' du zra.
PSA 71:9 Quebe guzú' neda' chalá'ala gate ba guxrúa'. Gate ba bedú lazra', quebe gusanu' neda'.
PSA 71:10 Benne' dxeledábague̱' neda' dxelenné̱' chia', na' benne' ca' dxelezá lazre̱' xelútie̱' neda' belune̱' tuze dizra',
PSA 71:11 dxelenné̱': “Ba bsan Dios le̱'. Chéajdxu cheajté̱ladxu le̱' lawe' da québedxa nu zua nu guselá le̱'.”
PSA 71:12 ¡Dios, quebe su' zitu' naga zua'! ¡Dios chia', gudázega gácale̱nu' neda'!
PSA 71:13 ¡Be̱n xelexedué'ene̱'! “Be̱n xelexenite benne' ca' dxeledábague̱' neda'.” “Be̱n xelezúa xel-la' stu', ne xeleque zréaje benne' ca' dxelezá lazre̱' xelune̱' chia' da cale̱la.”
PSA 71:14 Neda' tu cueza lázrezqueza' Lue', ne tu güe lá'anazqueza' Lue'.
PSA 71:15 Guzenda' bénneache nacu' xrlátaje, ne tu guzénzquezda' le̱' ca da be̱nu' bseláu' neda', láqueze quebe nezda' bal-la lasa bseláu' neda'.
PSA 71:16 Tu guchálajzqueza' chee̱ da zrente̱ da be̱nu' Lue', Xrana' Dios, ne gusá'a lazre' bénneache chee̱ da xrlátaje cheé̱quezu'.
PSA 71:17 Dios, Lue' bsé̱denu' neda' gate nácatea' bidau'te̱. Dxulé'eda' bénneache ca naca da zrente̱ da be̱nu'.
PSA 71:18 Dios, quebe gusán lazru' neda' gate bache guxrúa', ne ba bgucha'. Be̱' neda' lataj guzenda' zri'ine zre sua' ca naca xel-la' waca chiu', ne guzenda' bi za xelalaj ca naca xel-la' wal-la chiu',
PSA 71:19 ne ca naca da xrlátaje chiu', da naca na da zrente̱, Dios. Lue' ba be̱nu' da zaj nácale̱'e̱ na zrente̱. Dios, ¿Núzraqueze ca Lue'?
PSA 71:20 Lue' be̱nu' gudéa' lu da ste̱be zante̱, ne lu da cale̱la ca', na' gunu' xexaca bana', na' da xula xechisu' neda' lu xe̱dxu ba.
PSA 71:21 ¡Gucá'ana szrendxu' neda', ne xue zrénquezu' neda'!
PSA 71:22 ¡Cá'anqueze güe lá'anaqueza' Lue', quínnia' da gul-lale̱na'! ¡Dios chia', gúl-laqueza' chee̱ da li chiu', quínnia' da du' zríadi'i na du! ¡Nacu' Benne' Lá'azxa chee̱ benne' Israel ca'!
PSA 71:23 ¡Sua' lu da ba neza gate gúl-laqueza' chiu' Lue', ne béqueze bénne'du xu'a, bénne'du' bexa'u!
PSA 71:24 ¡Tu guchálajzqueza' chee̱ da xrlátaje chiu' te zra chizrela, lawe' da be̱nu' belexedué'e, ne guleque zréaje benne' ca' belune̱' ba xuzre xelune̱' chia' da cale̱la!
PSA 72:1 ¡Dios, be̱n guchi'a wenná bea da dxaca chee̱ntu' ca dxuchí'aquezu' Lue', ne be̱n xelaca xrlátaje zri'ine wenná bea na'!
PSA 72:2 Nadxa le̱' guchi'a chee̱ bénneache chiu' ca naca da naca xrlátaje, ne ca naca da li guchi'e̱ chee̱ benne' chiu' ca' zaj zue̱' lu da ba xa'.
PSA 72:3 Lu xi'a ca' xelebeza zri lazre' bénneache chiu', ne lu xí'adu ca' xelezúe̱' lu da naca chawe'.
PSA 72:4 Guchi'e̱ chee̱ benne' ca' zaj zue̱' lu da ba xa' lu xe̱zre chee̱ntu', ne guselé̱' bidu ca' chee̱ benne' ca' dxelexázrjene̱', ne guzría xi'e̱ benne' ca' dxulusaca zi'e̱ bénneache.
PSA 72:5 Xelezrebe̱' Lue' dxácate̱ ne zua gubizra, ne beu' lawe' tu cuen tu cuen bénneache.
PSA 72:6 Gaca wenná bea na' ca nisa xiuj da dxaca naga ba nadín, ne ca xrle̱'e̱la da dxaca dxe̱la lu xe̱zr la xu.
PSA 72:7 Lu zra chee̱ wenná bea na' gaca da xrlátaje, ne xelebeza zri lazre' bénneache dxácate̱ ne zua beu'.
PSA 72:8 Nna be'e̱ dute̱ xe̱zr la xu, ne dxu'a xe̱gu Eufrates, ga zrinte̱ dxu'a nísadau'.
PSA 72:9 Lau le̱' xuluzú zribe benne' ca' zaj zre̱'e̱ xe̱zr la xu, na' guzéxruje̱' lazre' benne' guledábague̱' Le̱'.
PSA 72:10 Benne' wenná bea chee̱ xe̱zr la xu Tarsis, ne wenná bea ca' chee̱ tu tu cue' xe̱zr la xu zitu' ca' xelelé̱'e̱ zaj nu'e̱ da xulunézruje̱' chee̱', na' benne' wenná bea chee̱ xe̱zr la xu Sabá, ne wenná bea chee̱ Seba xulunézruje̱' chee̱' da gunní'a.
PSA 72:11 Xúgute̱ benne' wenná bea ca' xuluzú zribe̱' lau le̱', na' benne' xúgute̱ cue' xe̱zr la xu xelune̱' zrin chee̱'.
PSA 72:12 Le̱' guselé̱' benne' ca' dxelexázrjene̱', benne' dxululáwizre̱' le̱', ne guselé̱' benne' ca' zaj zue̱' lu da ba xa', ne quebe sua nu benne' gácale̱ne̱' le̱'.
PSA 72:13 Xexache lazre̱' benne' xache' ca', ne benne' ca' dxelexázrjene̱', na' guselé̱' benne' xache' ca' chee̱ xelaca bane̱'.
PSA 72:14 Xexá'awe̱' benne' xache' ca' lu na' benne' we̱n lazre' ca', ne benne' snia ca'. Gune̱' ba xuzre guselé̱' benne' ca' lu na' benne' ca' dxelutie̱' benne'.
PSA 72:15 Gaca ban wenná bea nigá, na' xulunézruje̱' chee̱' oro chee̱ xe̱zr la xu Sabá, na' tu xelenábazqueze bénneache Dios gácale̱ne̱' le̱', ne te zra chizrela xelenabe̱' Dios gune̱' gaca chawe' chee̱ wenná bea na'.
PSA 72:16 Tu zrígadauze zrua' xtila xelaze̱' lu xe̱zr la xu, ne lu xí'adu ca', da cuíale̱'e̱ na ca da dxebía lu xi'a Líbano, na' benne' zaj zre̱'e̱ lu xe̱zre ca' xelane̱' ca xixre' ze̱ lu xe̱zr la xu.
PSA 72:17 Tu súazqueze la benne' wenná bea na'. Tu xuluchálajzqueze̱' chee̱ la le̱' dxácate̱ ne zua gubizra. Ne̱ chee̱ le̱' gaca da ba neza chee̱ bénneache xúgute̱ cue' xe̱zr la xu, na' xelenné̱' chee̱' naca chee̱' da ba neza zrente̱.
PSA 72:18 Xrlátaje naca Xránadxu Dios, Dios chee̱ benne' Israel ca', na' tuze Le̱' dxune̱' da dxexebánedxu.
PSA 72:19 Xrlátaje naca La Le̱' da naca na da xabáa chadía chacanna, na' dute̱ xe̱zr la xu nigá xelelé'ene̱' da xabáa chee̱'. ¡Ca'an naca na, ne ca'an gaca na!
PSA 72:20 Nigá dxexuzre xrtizra' David, da dxuchálajle̱ne̱' Dios. David nigá naque̱' zri'ine Isaí.
PSA 73:1 Da líqueze ba be̱n Dios da chawe' chee̱ benne' Israel ca', benne' ca' zaj naque̱' du lazre' lau Dios.
PSA 73:2 Neda' ba guzúa cheajcházia' lu dul-la. Ba guzúa guna' tu da zrinnaj,
PSA 73:3 lawe' da guca' zre'e lazre' ne̱ chee̱ benne' gunní'a ca', gate ble'eda' ca dxelepe ban benne' ca' zaj nabéaj xíchaje̱' Dios.
PSA 73:4 Benne' caní quebe zaj zue̱' ste̱be chee̱ xel-la' gute, lawe' da zaj zúale̱'e̱ chawe'.
PSA 73:5 Quebe dxeledée̱' lu da ba xa' ca da dxeledé xúgute̱ benne' ca', ne quebe dxelezaca zi'e̱ ca da dxaca chee̱ xezícadxa bénneache.
PSA 73:6 Chee̱ le̱ na' dxulucá'ana szren cuine̱'. Tu dxelexúbezquezne̱' dxelune̱' da cale̱la.
PSA 73:7 Dxelánnie̱' lawe' da dxelagu cháwele̱'e̱. Dxelezíle̱'e̱ ca naca da dxelezá lazre̱'.
PSA 73:8 Dxelún le̱' chee̱ Dios, ne dxelenné̱' cale̱la ca da zrinnaj da xelune̱'. Dute̱ xel-la' dxulucá'ana szren cuina dxuluchálaje̱' da zrente̱.
PSA 73:9 Dxelenné̱' chee̱ da ca' zaj zua xabáa, ne dxuluchálaje̱' ca benne' zaj nape̱' dute̱ xe̱zr la xu.
PSA 73:10 Chee̱ le̱ na' xúgute̱ bénneache dxelune̱' le̱' tu zren, ne dxelezi'e̱ ca da dxelenná benne' gunni'a ca'.
PSA 73:11 Dxelenná benne' ca' dxelune̱' da cale̱la: “¿Ájazra gaca neze Dios? ¿Dxelé'equeze Bénnea' zue̱' na'ala?”
PSA 73:12 Benne' caní zaj naque̱' benne' zaj nabéaj xíchaje̱' Dios, na' dxelepe bane̱' lu xe̱zr la xu, ne dxelaque̱' gunní'a.
PSA 73:13 Da líqueze, dácheze naca guca' du lazre', ne quebe bi da cale̱la nuna'.
PSA 73:14 Gudéa' lu da ba xa' tu zra tu zra, ne gudéa' xel-la' zi' xúgute̱ zra.
PSA 73:15 La nnia' neda': Guchálaja' ca dxuluchalaj benne' ca', na' si xe̱'a bénneachedu ca' chiu', Dios.
PSA 73:16 Gate blaba lazra' chee̱ chéajni'ida' da nigá, guca na sté̱bele̱'e̱ chia' neda'.
PSA 73:17 Gate guxu'a lu lataj lá'azxa chee̱ Dios, na' guque be'eda' da gaca chee̱ benne' ca' gate cheajsé̱.
PSA 73:18 Da líqueze nunu' chee̱ benne' ca' cheajlecházie̱', ne gunu' xelebía xí'queze̱'.
PSA 73:19 Chadite̱ gulebía xí'queze̱'. Belexenite̱' lu xel-la' gulezrébele̱'e̱.
PSA 73:20 Zaj naque̱' ca tu da ble'edxu lu xe̱la da dxexenite na gate dxexebandxu. Ca'an gaca, Xran, gate chasu', guzú' chalá'ala ca da gulaca benne' ca'.
PSA 73:21 Gate guca' zre'e lazre' chee̱ benne' ca', guzúa lázrdawa' lu da ste̱be.
PSA 73:22 Lawe' da guca' xichaj zide', na' quebe guxéajni'ida' guca' ca tu be̱ xixre' lau Lue'.
PSA 73:23 Tu guzúazqueza' nen Lue', na' guca'u na'a xabe̱la.
PSA 73:24 Bsi'u neda' chee̱ guna' da dxulé'enu' neda', na' te nigá xezí' lu na'u neda' lu xabáa chiu'.
PSA 73:25 Quebe nu xetú zua chia' xabáa san tuzu' Lue', ne quebe nu xetú dxezá lazra' lu xe̱zr la xu, san tuzu' Lue'.
PSA 73:26 Dxelexedú lazre' be̱la' dxen chia', ne lázrdawa'. Dios naque̱' Benne' dxutipe̱' lazra', ne naque̱' da ba neza chia' chadía chacanna.
PSA 73:27 Benne' ca' dxelexecuase̱' naga zu' xelexenítie̱'. Guzría xi'u xúgute̱ benne' ca' xelexebeaj xíchaje̱' Lue'.
PSA 73:28 Ca naca chia' neda', dxaca chawe' chia' lawe' da gubiga' lau Dios. Tu dxebeza lázrezqueza' Xránadxu Dios, chee̱ guchálajqueza' ca naca da zrente̱ da nune̱'.
PSA 74:1 Dios, ¿tu chí'izqueze nuzú' netu' chalá'ala? ¿Dxezra'u netu', nácantu' ca zrila' chiu' ca'?
PSA 74:2 Bsá lazre' bénneache chiu', benne' ca' guzi'u nédxudaute̱. Benne' ca' bexa'u chee̱ gunu' xelaque̱' benne' cheé̱quezu', benne' ca' zaj zre̱'e̱ lu xi'a Sión nigá, naga zúaquezu' Lue'.
PSA 74:3 Gudá xedajnná'u ca nabía xi' xe̱zre nigá, ne ca naca da cale̱la da belún benne' ca' dxeledábague̱' netu', lu lataj lá'azxa chiu'.
PSA 74:4 Dxelebezre xa'a benne' ca' dxeledábague̱' Lue' laduj naga zaj nazraga bénneache chiu'. Zaj nuzúe̱' nigá da dxululé'e na xu'untu' lu na' benne' ca'.
PSA 74:5 Buluzría xi'e̱ xe̱zre nigá, ca dxun tu benne' dxine̱' ca naca xaga zaj ze̱ tu xi'a.
PSA 74:6 Na'a nen xa waga chee̱' ca', ne nen xaga chee̱' ca', ba buluzría xi'e̱ ca naca lechítaje̱ chee̱ xudau' chiu'.
PSA 74:7 Ba buluzézxie̱' lataj lá'azxa chiu'. Bulucá'ana dítaje̱' xu'u lizru'. Buluchínnaje̱' na.
PSA 74:8 Lu lázrdawe̱' gulenné̱': “Guzría xí'tegadxu na tu chi'ize.” Ba buluzézxie̱' xúgute̱ xu'u naga bezrágantu' chiu' lu xe̱zr la xu chiu'.
PSA 74:9 Québedxa dxelé'entu' da la'axza ca' da dxululé'e na da guchísantu' lu xe̱zr la xu chee̱ntu'. Québedxa nu chilá' benne' guchálaje̱' waláz chiu', ne quebe nu zua ládujla netu', benne' nézene̱' bátaqueze lantu'.
PSA 74:10 Dios, ¿Báta cueza na xulucháchale̱ benne' ca' netu', benne' ca' dxulusaca zi'e̱ netu'? ¿Chadía chacanna welenné̱ benne' dxeledábague̱' lue' schanni' chee̱ Lau'?
PSA 74:11 ¿Bizr chee̱ na' quebe dxebéaj lazru' benne' ca'? ¿Bizr chee̱ na' quebe dxuzría xi'u benne' ca' dxelune̱' da cale̱la?
PSA 74:12 Lue', Dios, nacu' Wenná Bea chia' nédxudaute̱. Lué'queze dxuseláu' bénneache dute̱ xe̱zr la xu.
PSA 74:13 Xel-la' waca chiu' be̱nu' nísadau' chupa la'a. Gula'u xichaj be̱ schanni' ca' lu nísadau'.
PSA 74:14 Bzúzruju' xichaj be̱ schanni' le̱ba' leviatán, Na' be̱nu' gulagu be̱ xixre' le̱ba', bea ca' zaj zraba' lu xu bizre.
PSA 74:15 Be̱nu' gulaj nisa beaj, ne nisa xe̱gu ca'. Bsebizru' xe̱gu zri'a ca'.
PSA 74:16 Chiu' Lue' naca te zra, ne cá'anqueze chiu' naca dxe̱la. Lue' bzu' beu', ne gubizra naga dxeledé na.
PSA 74:17 Lue' bzu' tu chi'ize ca naca da zaj de̱ xe̱zr la xu nigá. Lue' be̱nu' beu' la ca', ne beu' zaga ca'.
PSA 74:18 Bsa lazre' da nigá: Benne' ca' dxeledábague̱' lue' ba zaj nun le̱' chiu' Lue', Xran. Benne' xala ca' ba gulenné̱' schanni' chee̱ Lau'.
PSA 74:19 Quebe gusanu' lu na' benne' zaj naque̱' ca be̱ snia ca' benne' ca' nazrí'iquezu', ne quebe gal-la lazru' tu chi'ize bénneache chiu' zaj zue̱' lu da ba xa'.
PSA 74:20 Gunná' ca naca xel-la' wezría da be̱nu', lawe' da gátete̱ze naca chul-la lu xe̱zr la xu, na' zaj zra' benne' ca' dxelune̱' da zrinnaj.
PSA 74:21 Quebe gu'u lataj xelegá'ana lu xel-la' stu' benne' ca' zaj zue̱' lu da baxache'. Benne' dxelezaca zi'e̱, ne benne' dxelexázrjene̱' xelúe lá'ane̱' Lau'.
PSA 74:22 ¡Guzé̱, Dios! ¡Be̱n ca ba gunnáu'! ¡Bsa lazre' ca dxelún benne' xala ca', dxelún le̱' chiu' te zra te zra!
PSA 74:23 Quebe gal-la lazru' ca da gulenná benne' ca' dxeledábague̱' lue'. Da schaga dxelún benne' ca' dxeledábague̱' Lue' tu dxénzqueze na.
PSA 75:1 “Xcalenu'”, dxe̱ntu' Lue', Dios: “Xcalenu'.” Dxuzentu' bénneache zúale̱nu' netu', ne ba nunu' da ca' dxexebánequezentu'.
PSA 75:2 Dxenná Dios: “Ba nuzúa' zra guchi'a chee̱ bénneache. Guchi'a ca naca da xrlátaje.
PSA 75:3 Lácala xru' dute̱ xe̱zr la xu, ne xelezrize xúgute̱ da zaj naca ban na, neda' gúxruqueza' ca naca lane xe̱zr la xu na'.
PSA 75:4 Dxapa' benne' xala ca': Quebe gáwele. Dxapa' benne' ca' dxelune̱' da cale̱la: Quebe gucá'ana szren cuínale.
PSA 75:5 Quebe guxrén lázrele xel-la' wal-la chee̱le. Quebe gácale benne' lázxdau zide'.”
PSA 75:6 Quebe za xel-la' szren naga dxalaj gubizra, ne naga dxebía na, ne quebe za na le̱'e̱ xixre' lawe' lataj.
PSA 75:7 Dios naque̱' Bénnea' guchi'e̱ chee̱ bénneache. Dxucá'ane̱' cá'aze tu benne', ne dxucá'ane̱' szren xetú benne'.
PSA 75:8 Dios nuxre̱' tu zriga', da nazrate̱ na xrise uva wal-la, da zeaje na xel-la' dxezrá'a chee̱'. Dxulálaje̱' na chee̱ xele̱'aj benne' ca' dxelune̱' da cale̱la. Xelé̱'aje̱' na xebizrte̱ na.
PSA 75:9 Neda' guzénquezda' bénneache, ne gul-la' da güe lá'ana' Dios chee̱ Jacob.
PSA 75:10 Le̱' guchínnajqueze̱' xel-la' waca chee̱ benne' we̱n da cale̱la ca'. Gusezrendxe̱' xel-la' waca chee̱ benne' xrlátaje ca'.
PSA 76:1 Zaj núnbea benne' Judá ca' Dios, na' ládujla benne' Israel zrente̱ nácaqueze La Le̱'.
PSA 76:2 Lu xe̱zre Salem zua lataj lá'azxa chee̱'. Lu xe̱zre Sión zua naga zúaqueze̱'.
PSA 76:3 Lataj na' gudíchaje̱' xaga nalá xéche'ze ca', ne xia da dxucu'uj na benne' lu wedil-la, ne ca naca da dxuluchínene̱' lu wedil-la.
PSA 76:4 Benne' xabáa nacu' Lue', ne Benne' wál-ladxa ca xi'a zri'a ca'.
PSA 76:5 Xeajlechaze benne' wal-la ca', ne guláse dínnaje̱'. Netú benne' wal-la ca' quebe belexechisa ne̱'e̱ chee̱ xelune̱' wedil-la.
PSA 76:6 Dios chee̱ benne' Israel ca', gate gudil-lu' benne' ca', guláse dinnaj bzrina' ca', ne benne' gulebíe̱'-ba'.
PSA 76:7 Nacu' Lue' Benne' zrébedxu. ¿Nu benne' gaca se̱' lau Lue' gate dxezra'u?
PSA 76:8 Xabáate̱ gunná'u, na' guchi'u chee̱ bénneache. Dxelezrebe bénneache lu xe̱zr la xu, na' dxelebeze̱'
PSA 76:9 zra seu' Lue', Dios, chee̱ guchi'u chee̱ bénneache, ne chee̱ guseláu' xúgute̱ benne' dxexruj lazre' zaj zre̱'e̱ lu xe̱zr la xu.
PSA 76:10 Da líqueze xel-la' dxelezrá'a chee̱ bénneache gaca na tu da gucá'ana szren na Lue'. Guzúa zriu' xel-la' dxelezrá'a chee̱ bénneache zaj nagá'ane̱'.
PSA 76:11 Le che̱be lázrele da gunle chee̱ Dios, na' le gun da na' chee̱ Xránadxu, Dios chee̱le. Xúgute̱ benne' zaj zre̱'e̱ du gabi'ila xelelé̱'e̱, na' xulunézruje̱' da zaj nu'e̱ chee̱ Dios, Bénnea' dxezrébedxu.
PSA 76:12 Guzague̱' da xu'u lu xichaj lázxdau benne' blau ca'. Le̱' dxuchebe̱' benne' wenná bea ca' zaj zre̱'e̱ lu xe̱zr la xu.
PSA 77:1 Nen chi'a bláwizra' Dios. Bláwizra' Dios, na' Le̱' buzé̱ nague̱' chi'a.
PSA 77:2 Guxu'a lau Xránadxu lu zra guzúa' lu da ba xa'. Chizrela guchisa na'a lau Le̱', ne quebe guzúa zria'. Quebe be̱'a lataj nu benne' xue zrene̱' neda'.
PSA 77:3 Bsa lazra' chee̱ Dios, ne guzúa' ste̱be. Gudawa' zria lawe̱', ne bedú lazra'.
PSA 77:4 Begúe̱' bchigala chia'. Guzúa' sté̱bele̱'e̱, ne quebe guca guchálaja'.
PSA 77:5 Blaba lazra' ca naca zra nédxute̱. Ca naca iza zan ca' da ba guledé chee̱ na.
PSA 77:6 Bsa lazra' ca naca da bil-la' chizrélala, ne blaba lázrequeza' ca zaj naca na, na' gunaba be' xu'a:
PSA 77:7 ¿Guzúa Xránadxu dxi'u chalá'ala tu chi'ize ne québedxa gácale̱ne̱' dxi'u?
PSA 77:8 ¿Cabátadxa xexache lazre̱' dxi'u? ¿Cabátadxa gune̱' ca da guche̱be lazre̱'?
PSA 77:9 ¿Gul-la lázrequeze Dios xexache lazre̱' dxi'u? ¿Dxezré̱'e̱ dxi'u, na' québedxa xexache lazre̱' dxi'u?
PSA 77:10 Nadxa gunnía': Caní dxuna' lawe' da quebe chawe' zua'. Chee̱ le̱ na' cheajsá lazra' chee̱ xúgute̱ da zrente̱ da be̱n Dios zrente̱ lu iza ba guledé chee̱ na.
PSA 77:11 Cheajsá lazra' chee̱ da zrente̱ ca' da be̱n Jah. Awe', cheajsá lazra' chee̱ da be̱nu' nédxudaute̱ da ca' dxexebánentu'.
PSA 77:12 Gulaba lazra' ca naca xúgute̱ da ba be̱nu', ne guchálaja' ca zaj naca da nunu'.
PSA 77:13 Dios, lá'azxa naca da dxusé̱denu' netu' ca guntu'. ¿Zua xetú Dios naque̱' benne' zren ca naca Dios chee̱ntu'?
PSA 77:14 Lue' nacu' Dios, dxunu' da ca' dxexebánentu'. Blé'enu' xúgute̱ bénneache lu xe̱zr la xu ca zrente̱ naca xel-la' waca chiu'.
PSA 77:15 Nen xel-la' waca chiu' bexa'u bénneache chiu', zri'ine zre sua Jacob, ne zri'ine zre sua José.
PSA 77:16 Xe̱gu nisa ca' belelé'en Lue', Dios. Belelé'e xe̱gu nisa ca' Lue', na' belezrébele̱'e̱ na. Cá'anqueze gulezúa ste̱be nísadau' situj ca'.
PSA 77:17 Nisa xiuj zila bdxuaj na lu beuj bza ca', ne gulenné̱le̱'e̱ guziu', ne gulé̱pele̱'e̱ xesa.
PSA 77:18 Lu be' bdunu' ben guziu' chiu' da gunné̱le̱'e̱ na. Bulusaní' xesa guziu' ca naca xe̱zr la xu. Guzúa ste̱be, ne guzrize xe̱zr la xu.
PSA 77:19 Lawe' nísadau' guza'u, ne lawe' nisa zila ca' gudéquezu', ne quebe naca bea naga bléaju'.
PSA 77:20 Guche̱'u bénneache chiu' ca zrila' ca' lu na' Moisés, ne lu na' Aarón.
PSA 78:1 Le xen, le'e, bénneache chia', ca da dxusé̱deda'. Le xen xanne' ca da dxuchálaja'.
PSA 78:2 Guchíneda' dizra' ca da dxuluchalaj benne' sina ca', na' guzéajni'ida' le'e da ca' gulezúa na bagácheze gate nate,
PSA 78:3 da ca' bendxu, ne bé̱nbeadxu na, da ca' belixru be'e xra xrtáudxu ca' dxi'u.
PSA 78:4 Quebe gucáchedxu na lau zrí'inedxu ca'. Guzénquezdxu zrí'inedxu ca' ca naca xel-la' szren chee̱ Xránadxu, ne ca naca xel-la' waca chee̱', ne ca zaj naca da zren ca' da be̱ne̱'.
PSA 78:5 Bzue̱' tu da nadxixruj bea na da xelún benne' Israel ca', ne da bdxixruj be'ene̱' ca' da xelún zri'ine zre sua Jacob. Gunná bé'ene̱' xra xrtáudxu ca' xuluzenne̱' bi chee̱' ca' ca naca da gunná bé'ene̱',
PSA 78:6 chee̱ xelúnbea zrí'ine̱' bidu ca' za xelálajbe' ca naca na, na' bi caní xuluzenbe' zrí'inebe' da na',
PSA 78:7 chee̱ xuluxrén lázrebe' Dios, ne quebe xelal-la lázrebe' da ca' be̱n Dios, ne chee̱ xuluzúabe' dizra' da ca' gunná be'e̱.
PSA 78:8 Quebe xelácabe' ca gulaca xra xrtáube' ca'. Benne' ca' quebe buluzúe̱' dizra' chee̱', ne guledábague̱' Le̱', ne quebe buluzúa chúchue̱' ca buluxrén lazre̱' Dios, ne quebe gulaque̱' li lazre' lu da naca chee̱ Dios lu be' zaj nácaqueze̱'.
PSA 78:9 Benne' zrí'ine zre sua Efraín, benne' zaj nu'e̱ da dxuluchínene̱' lu wedil-la buluzrúnnuje̱' naga dxaca wedil-la.
PSA 78:10 Quebe belune̱' ca naca xel-la' wezría da be̱n Dios, ne quebe buluzúe̱' dizra' da gunná bé'ene̱'.
PSA 78:11 Gulal-la lazre̱' da ca' be̱n Dios, ne xel-la' waca ca' blé'ene̱' Le̱'.
PSA 78:12 Lau xra xrtawe̱' ca' be̱ne̱' xel-la' waca ca' lu xe̱zr la xu Egipto, ne lu xe̱zr la xu Zoán.
PSA 78:13 Gusalje̱' neza lu nísadau' naga guledé benne' ca'. Be̱ne̱' nísadau' na' ca xi'a ca' chalá'a weaj.
PSA 78:14 Te zra blé'ene̱' benne' ca' neza nen tu beuj bza da xjácale̱ne̱', ne chizrela nen beuj bza da naca na ca tu xi'.
PSA 78:15 Gulé̱'e̱ xiaj ca' naga naca xu bizre, na' bxí'aje̱' benne' ca' nisa da gulaj na le̱'e̱ xiaj ca' ca tu xe̱gu nisa.
PSA 78:16 Be̱ne̱' gulaj tu xe̱gu nisa le̱'e̱ xiaj na', na' bzriluj na ca tu xe̱gu zren.
PSA 78:17 Lácala be̱ne̱' caní belúndxaqueze̱' dul-la lau Dios le̱'e̱ xixre' lawe' lataj, ne guledábague̱' Dios nape̱' dute̱ xel-la' szren.
PSA 78:18 Gulegú'u lazre̱' xulu'zúa zrie̱' Dios. Gulenabe̱' xelawe̱' ca da dxelezá lazre' le̱'.
PSA 78:19 Gulenné̱' chee̱ Dios, gulenné̱': ¿Wazeque Dios na' gunne̱' da gágudxu le̱'e̱ xixre' nigá?
PSA 78:20 Da líqueze gulé̱'e̱ xiaj na', na' gulaj nisa na', na' bzriluj na ca tu xe̱gu zren. ¿Wazéquequezne̱' gunne̱' dxi'u xeta, ne gunne̱' be̱la' da gágudxu?
PSA 78:21 Chee̱ le̱ na' bzra'a Xránadxu gate benne̱' da na', ne gusel-le̱' xi' da bzezxe na bal-la bénneache chee̱', na' bsedxí'ule̱'e̱ xel-la' dxezrá'a chee̱' nen benne' Israel ca',
PSA 78:22 lawe' da quebe guléajle̱'e̱ chee̱ Dios, ne quebe buluxrén lazre̱' Le̱' guselé̱' le̱'.
PSA 78:23 Gunná bé'ene̱' beuj zran xabáa, ne gusálaje̱' dxa xu'u chee̱ xabáa,
PSA 78:24 na' be̱ne̱' bxinnaj xeta maná ca dxinnaj xiuj chee̱ gulagu benne' chee̱' na. Bnézruje̱' le̱' da naca ca zrua' chee̱ xabáa.
PSA 78:25 Gulawe̱' da dxelagu gubáz chee̱ xabáa ca'. Gusél-lale̱'e̱ da gulawe̱', na' gulélajte̱quezene̱'.
PSA 78:26 Be̱ne̱' guca be' da za' chalá'ala naga dxalaj gubizra, ne xel-la' waca chee̱' be̱ne̱' guca be' za' chalá'ala naga dxedé gubizra beu' zaga,
PSA 78:27 na' gusel-le̱' chee̱ benne' ca' be̱la' ca ze̱ bxrte xu, béadu zaj zua xrila naxanba' ca xuzre' da dxe' dxu'a tu xe̱gu zren.
PSA 78:28 Be̱ne̱' guléxrujba' chale'aj chee̱ benne' ca'. Guléxrujba' dúte̱queze naga zaj zua xu'u xide chee̱'.
PSA 78:29 Gulawe̱'-ba', ne gulélajquezene̱'. Dios bnézruje̱' chie̱' ca naca da gulaca lazre̱'.
PSA 78:30 Gate quebe ne xelélajene̱', ne ne dxelawe̱'-ba',
PSA 78:31 bzra'a Dios benne' ca', na' be̱tie̱' benne' zaj nácadxe̱' benne' wal-la, ne benne' Israel ca' zaj nácadxe̱' benne' waca.
PSA 78:32 Láqueze be̱ne̱' caní, na' belúndxaqueze̱' dul-la, ne láqueze belelé'ene̱' xel-la' waca ca' da be̱ne̱', quebe buluxrén lazre̱' Le̱'.
PSA 78:33 Chee̱ le̱ na' guchugue̱' zra chee̱ benne' ca' ca tu be' dxecá'adxu, ne ca zaj naca iza da gulezúe̱', bdee̱' le̱' lu da zi' da xa'.
PSA 78:34 Gate be̱tie̱' bal-la benne' ca', na' xezícadxe̱' belexaque̱' chee̱ Dios. Belexebí'i lazre̱', ne du lazre̱' buluchálajle̱ne̱' Le̱'.
PSA 78:35 Xeajlesá lazre̱' naca Dios Benne' dxuxúe̱' le̱', ne Dios na' nape̱' dute̱ xel-la' szren naque̱' Bénnea' bxá'awene̱' le̱',
PSA 78:36 san quebe guca li lazre' da gulenné̱' lawe' da belún lazre̱' lau Dios.
PSA 78:37 Quebe gulaque̱' li lazre' nen Le̱', ne quebe belune̱' du lazre' ca naca xel-la' wezría chee̱'.
PSA 78:38 Dios bexache lazre̱' chee̱ benne' ca', ne bnite lawe̱' dul-la belune̱', ne quebe bzria xi'e̱ le̱'. Zane' lásate̱ bzue̱' chalá'ala xel-la' dxezrá'a chee̱', ne quebe bzre̱'e̱ le̱' dute̱ ca da dxéquene̱'.
PSA 78:39 Xeajsá lazre' Dios zaj naque̱' be̱la' dxen. Zaj naque̱' ca tu be' da dxedé na, ne quebe xezrín na.
PSA 78:40 Zane' lasa guledábague̱' Le̱' le̱'e̱ xixre' lawe' lataj na', ne zane' lasa buluzúe̱' Le̱' baxache'.
PSA 78:41 Zane' lasa buluzúe̱' Dios chalá'ala, ne buluché̱'e̱ Dios lá'azxa chee̱ benne' Israel ca'.
PSA 78:42 Gulal-la lazre̱' ca naca xel-la' waca zren chee̱', ne ca be̱ne̱' lu zra na' bxá'awene̱' le̱' lu da zi' da xa',
PSA 78:43 gate be̱ne̱' xel-la' waca ca' lu xe̱zr la xu Egipto, ne blé'ene̱' da ca' da dxebánedxu lu xe̱zr la xu Zoán.
PSA 78:44 Bexune̱' xe̱gu chee̱' ca' dxen, na' québedxa guca da xele'aj benne' Egipto ca'.
PSA 78:45 Gusel-le̱' be̱'a ládujla benne' ca', be̱ buludeba' le̱' xel-la' zi'. Gusel-le̱' bluzru ca' buluzría xiba' xe̱zr la xu chee̱'.
PSA 78:46 Gusel-le̱' biche zu ca' guláguba' lina chee̱', ne buluzría xiba' da zaj zua lu xe̱zr la xu chee̱'.
PSA 78:47 Gusel-le̱' xiaj bezxe' zri'a da bzria xi na lba uva chee̱' ca', ne gusel-le̱' da zaga da bsebizre na xaga higo chee̱' ca'.
PSA 78:48 Gusel-le̱' xiaj bezxe' zri'a da be̱te na be̱ xixre' chee̱' ca', ne gusel-le̱' xesa da be̱te na zrila' chee̱' ca'.
PSA 78:49 Bdee̱' benne̱' Egipto ca' lu xel-la' zi' zren, lawe' da bzrá'ale̱'e̱ benne' ca', na' guca da ca' ca zánete̱ gubáz ca' chee̱ xel-la' gute.
PSA 78:50 Quebe bzague̱' xel-la' dxezrá'a chee̱', ne quebe bnite lawe̱' chee̱' chee̱ quebe xelátie̱', san be̱tie̱' le̱' nen tu xízrawe̱' wal-la.
PSA 78:51 Be̱tie̱' bi biu nedxu chee̱ benne' ca', bi biu nedxu ca' chee̱ benne' Egipto ca'.
PSA 78:52 Nadxa beche̱'e̱ benne' chee̱' ca' ca tu benne' dxeche̱'e̱ zrila' ca', ne bsi'e̱ le̱' le̱'e̱ xixre' lawe' lataj.
PSA 78:53 Bsi'e̱ le̱' zri'a chawe', ne quebe bi belezrebe̱', san gulate benne' guledábague̱' Le̱' lu nísadau'.
PSA 78:54 Beche̱'e̱ le̱' lu xe̱zr la xu lá'azxa chee̱', naga zua xi'a nigá da guca cheé̱queze̱'.
PSA 78:55 Bebéaje̱' benne' zaj zre̱'e̱ lu xe̱zr la xu na' lau benne' chie̱' ca', na' gulé̱'e̱ xe̱zr la xu chee̱' cha chee̱ benne' Israel ca', ne bzre̱'e̱ le̱' lizre benne' ca' bebéaje̱'.
PSA 78:56 Da xula buluzúe̱' Dios chalá'ala, ne buluché̱'e̱ Dios, nape̱' dute̱ xel-la' szren. Quebe buluzúe̱' dizra' da ca' gunná be'ene̱' le̱'.
PSA 78:57 Da xula guledábague̱' Dios ca belún xra xrtawe̱' ca'. Gulaque̱' ca tu bdxeque' xala chee̱ xaga nalá xéche'ze.
PSA 78:58 Buluché̱'e̱ Le̱' ne̱ chee̱ lataj ca' naga bulucá'ana szrene̱' bedáu' xiaj xaga ca', ne ne̱ chee̱ bedáu' xiaj xaga chee̱' ca' bzrá'ale̱'e̱ Dios.
PSA 78:59 Bzra'a Dios gate blé'ene̱' na, na' gucuídele̱'e̱ne̱' benne' chee̱' ca', benne' Israel.
PSA 78:60 Guleaj xíchaje̱' xu'u xide lá'azxa chee̱' zua na xe̱zre Silo, xu'u xide na' guzuáqueze̱' ládujla benne' ca'.
PSA 78:61 Be̱'e̱ lataj belecá'a benne' ca' dxeledábague̱' dxi'u xi'ina lá'azxa chee̱', da na' dxulé'e na xel-la' waca, ne xel-la' szren chee̱'.
PSA 78:62 Bzre̱'e̱ benne' chee̱' ca', na' bdee̱' le̱' lu na' benne' ca' belútie̱' le̱'.
PSA 78:63 Benne' wal-la ca' gulátie̱' lu wedil-la. Quebe nu zra' benne' wegu', benne' xelezúale̱ne̱' nu'ula wegu' ca'.
PSA 78:64 Cá'anqueze gulate bxruze ca' lu wedil-la, na' nu'ula chee̱ bxruze ca' quebe gulebezre xache̱' chee̱ bxruze ca'.
PSA 78:65 Nadxa guca Xránadxu ca tu benne' dxexebane̱' lu bchigala. Guque̱' ca tu benne' wal-la dxebezre xe̱'e̱ gate ba né'aje̱' xrise uva wal-la.
PSA 78:66 Na' blague̱' benne' guledábague̱' Le̱', ne bca'ane̱' le̱' cá'aze chadía chacanna.
PSA 78:67 Bzue̱' chalá'ala zri'ine zre sua José, ne quebe bequé̱'e̱ zri'ine zre sua Efraín,
PSA 78:68 san bequé̱'e̱ zri'ine zre sua Judá, ne xi'a Sión, da na' nazrí'ile̱'e̱ne̱'.
PSA 78:69 Lu xi'a na' be̱ne̱' xudau' lá'azxa chee̱', da guca na ca naca da zua na xabáa. Bzua chúchue̱' na chadía chacanna, ca nácaqueze xe̱zr la xu nigá.
PSA 78:70 Bequé̱'e̱ David, benne' we̱n zrin chee̱'. Bebéaje̱' le̱' naga zaj zra' zrila' ca'.
PSA 78:71 Beche̱'e̱ le̱' naga zue̱' dxuxúe̱' zrila' ca' zaj nache̱'e̱ba' be̱dau', chee̱ gaque̱' wenná bea, benne' guxúe̱' bénneache chee̱', zri'ine zre sua Jacob, benne' zaj naque̱' benne' Israel ca'.
PSA 78:72 Dute̱ xel-la' du lazre' chee̱' bxue̱' benne' ca'. Bxue̱' le̱' dute̱ xel-la' waca zren chee̱'.
PSA 79:1 Dios, ba gulú'u benne' xe̱zr la xu zitu' ca' lu xe̱zr la xu chee̱ bénneache chiu'. Bulucá'ana dítaje̱' xudau' lá'azxa chiu'. Buluzría xi'e̱ xe̱zre Jerusalén.
PSA 79:2 Bulucá'ane̱' be̱la' dxen chee̱ we̱n zrin chiu' ca' naga gulagu be̱ zua xrila le̱'. Be̱ xixre' ca' guláguba' be̱la' dxen chee̱ benne' ca' zaj naque̱' chiu'.
PSA 79:3 Ca nisa bululálaje̱' dxen chee̱ benne' ca' xúgute̱ lu neza chee̱ xe̱zre Jerusalén, ne quebe nu chilá' benne' gucache̱' benne' ca'.
PSA 79:4 Benne' xe̱zr la xu walizre' chee̱ntu' ca' dxulucháchale̱ne̱' netu'. Benne' zaj zre̱'e̱ xe̱zre walízr ca' dxulucá'ana dítaje̱' netu', ne dxelún le̱' chee̱ntu'.
PSA 79:5 ¿Bata cuézaqueze gaca caní chee̱ntu', Xran? ¿Tu chí'izqueze dxezra'u netu'? ¿Tu chí'izqueze gaca xel-la' dxezrá'a chiu' ca tu xi'?
PSA 79:6 Bzra'a benne' xe̱zr la xu ca' quebe zaj núnbe'e̱ Lue', na' benne' xe̱zr la xu ca' quebe dxululáwizre̱' Lue',
PSA 79:7 lawe' da ba buluzría xi'e̱ zri'ine zre sua Jacob, ne bulucá'ana dítaje̱' xu'u lizre benne' ca'.
PSA 79:8 Quebe gusebagu' netu' ca naca da zrinnaj da belún xra xrtauntu' ca'. Gudázega xexache lazru' netu', lawe' da dxezraga láule̱'e̱ntu'.
PSA 79:9 Gúcale̱ netu', Dios, nacu' Bénnea' dxuselé̱' netu', chee̱ gaca ba Lau'. Bselá netu', ne bnite lau dul-la nuntu' chee̱ xegá'ana szren Lau',
PSA 79:10 lawe' da xelenná bénneache: “¿Ga na Dios chee̱ benne' ca'?” Bebéaj lazre' benne' ca' belútie̱' we̱n zrin chiu' ca'.
PSA 79:11 Caní be̱n chee̱ xelelé'e xúgute̱ benne' chiu' ca' zaj xu'e̱ lu na' benne' ca' dxeledábague̱' netu'. Dute̱ xel-la' waca zren chiu' bselá benne' ca' ba zaj nachugue̱' chee̱' xelatie̱'.
PSA 79:12 Bunezruj chee̱ benne' xe̱zr la xu walizre' chee̱ntu' ca' xegazre cue' ca da cale̱la da belune̱', bulucá'ana dítaje̱' Lue', Xran.
PSA 79:13 Netu', bénneache chiu', nácantu' ca zrila' chiu' ca', güe lá'anaquezentu' Lue' chadía chacanna. Tu cuen tu cuen zri'ine zre suantu' gúl-laquezentu' da güe lá'anantu' Lue'.
PSA 80:1 Bene chee̱ntu', Lue' dxuxú' benne' Israel ca', Lue' na', dxuxú' zri'ine zre sua José ca zríla'du ca', ne dxe'u lataj blau chiu' da zua na láwela querubín ca'.
PSA 80:2 Ble'e xel-la' szren chiu' lau zri'ine zre sua Efraín, ne Benjamín, ne Manasés. Ble'e xel-la' waca chiu', ne gudá guseláu' netu'.
PSA 80:3 Beché̱' netu', Dios. Bexache lazre' netu', na' lantu'.
PSA 80:4 Xránantu' Dios, napu' dute̱ xel-la' waca, ¿bata chajse̱queze zra'u netu', ne quebe xennu' ca da nábantu' Lue'?
PSA 80:5 Bzúale̱'u netu' lu xel-la' dxewí'ine lazre', ne bzílale̱'u nisa dxebézrentu'.
PSA 80:6 Be̱'u lataj xe̱zr la xu walizre ca' bulucá'ana dítaje̱' netu', na' benne' ca' dxeledábague̱' netu' belún le̱' chee̱ntu'.
PSA 80:7 Beché̱' netu', Dios, napu' dute̱ xel-la' waca. Bexache lazre' netu', na' lantu'.
PSA 80:8 Bebéaju' tu zrigu' lba uva lu xe̱zr la xu Egipto da naca na bénneache chiu'. Blagu' benne' xe̱zr la xu gulezré̱'e̱ nigá, na' guzu' nigá zrigu' lba uva na'.
PSA 80:9 Gú'unu' lba uva na' chee̱ gula na. Bdéle̱'e̱ lue zrigu' lba uva na', na' gucu na xe̱zr la xu na'.
PSA 80:10 Gulú'u na zrul-la xúgute̱ xi'a ca', na' zruze na ca' gulegú'u na zrul-la xaga cedro zren ca'.
PSA 80:11 Gulechiluj zruze na, belezrinte̱ na dxu'a nísadau', ne belezrinte̱ na dxu'a xe̱gu Eufrates.
PSA 80:12 ¿Bizr chee̱ na' gucá'u le'aj da naxechaj na le̱ na? Na'a xúgute̱ benne' dxeledé na' dxelebane̱' da zixre chee̱ na.
PSA 80:13 Dxuluchuchu dxululéaj cuche xixre' ca' lba uva na', na' be̱ xixre' ca' dxeláguba' na.
PSA 80:14 Bedá chee̱ntu', Dios, napu' dute̱ xel-la' waca. Gunná' netu' ga na' zu' xabáa, ne gudá xedajnná'u lba uva chiu'.
PSA 80:15 Gudá, guseláu' lba uva nigá, da gúzaquezu'. Bechuj chee̱ lba uva na', ba bzua chuchu' gaca na chiu'.
PSA 80:16 Benne' ca' dxeledábague̱' netu' ba gulechúgue̱' lba na', ne ba guládue̱' na xi'. Gunná' benne' ca' lu xel-la' dxezrá'a chiu', ne bzria xi' benne' ca'.
PSA 80:17 Bzua chuchu, ne bxue benne' ca' ba guca'u, benne' xe̱zr la xu na' ba nuzúa chuchu'.
PSA 80:18 Cabátadxa cueaj xíchajntu' Lue' xecha lasa. Bcache chawe' netu', naca bantu', na' güe lá'anantu' Lau'.
PSA 80:19 Xránantu' Dios, napu' dute̱ xel-la' waca, beché̱' netu'. Bexache lazre' netu', na' lantu'.
PSA 81:1 Lu dute̱ xel-la' dxebé le gul-la chee̱ Dios, Bénnea' dxutipe̱' lázredxu. Lu da ba neza chee̱le le cuezre xa'a lau Dios chee̱ zri'ine zre sua Jacob.
PSA 81:2 Le gul-la, ne le capa xídedau'. Le quinne xrtan da con zríadi'i na du, ne da dxúl-lale̱nle.
PSA 81:3 Le gucuezre luzu da dxulucuezre̱' gate naca beu' dxe'ene, da naca na zra nuzúadxu gundxu laní lá'azxa.
PSA 81:4 Naca na tu da dxun na ba xen xelún benne' Israel ca', da bdxixruj bea Dios xelún zri'ine zre sua Jacob.
PSA 81:5 Bzue̱' na ca tu da gulé'e lau na zri'ine zre sua José gate beledxúaje̱' lu xe̱zr la xu Egipto, naga benda' tu xrtizra' bénneache da quebe guxéajni'ida'.
PSA 81:6 Gunná Dios: “Begúa' xua' da buludé̱'e̱' benne' chia' ca'. Bsezrá'a benne' chia' ca' da zi'i.”
PSA 81:7 Lu da ba xa' da guzúale, bláwizrale neda', na' bselá' le'e. Beche̱ba' chee̱le naga nagacha' lu beuj bza gate na' gunné̱le̱'e̱ guziu', na' bxua' ájala gunle naga zaj de̱ beaj nisa zaj nazí le Meriba.
PSA 81:8 Le xene, bénneache chia', na' gusízreda' le'e. Le'e, benne' Israel, che dxaca lázrele sile da dxennía',
PSA 81:9 quebe gápale tu dios chee̱ benne' xula, ne quebe guzú zríbele lau tu dios chee̱ benne' zitu'.
PSA 81:10 Neda', Xránale, naca' Dios chee̱le. Bebéaja' le'e lu xe̱zr la xu Egipto. Le salaj dxú'ale, na' gunna' da gágule.
PSA 81:11 Bénneache chia' quebe belúe lazre̱' da gunnía'. Benne' Israel ca' quebe gulaca lazre̱' xelezí' lu ne̱'e̱ neda'.
PSA 81:12 Chee̱ le̱ na' bsana' benne' ca' lawe' da gulaque̱' lázxdau zide'. Belune̱' ca da guléquene̱' xrlátaje.
PSA 81:13 Che la gulebé' gunne xue bénneache chia' chee̱ da gunnía', ne che la belún benne' Israel ca da ble'eda' le̱',
PSA 81:14 na' chadite̱ bzria xi'a benne' guledábague̱' le̱', ne gudíl-lale̱na' benne' guledíl-lale̱ne̱' le̱'.
PSA 81:15 Che la belún benne' Israel caní, na' benne' ca' dxelecuídene̱' Xránadxu buluzúe̱' xrtizre̱', (san chadía chacanna zaj nabague̱' zria),
PSA 81:16 na' Dios gune̱' xelawe̱' zrua' xtila cháwedau', ne gune̱' xelélajquezne̱' nen bzrína'dau'.
PSA 82:1 Zua Dios naga zaj nazraga benne' dxuluchi'e̱ chee̱ bénneache chee̱'. Dios dxuchi'e̱ chee̱ benne' ca' dxuluchi'e̱ chee̱ bénneache.
PSA 82:2 Dxenná Dios: “¿Bátadxa guchí'ale chee̱ bénneache chia' da quebe naca xrlátaje, ne gápale ba lá'ana benne' ca' zaj nabéaj xíchaje̱' Dios?”
PSA 82:3 Le gácale̱ benne' xache' ca', ne bidau' we̱ze̱be ca'. Le gun da xrlátaje chee̱ benne' baxache' ca' ne chee̱ benne' ca' dxelexázrjene̱'.
PSA 82:4 Le guselá benne' ca' dxeledée̱' lu da ba xa', ne benne' ca' quebe bi zaj nape̱'. Le guselá benne' ca' lu na' benne' ca' zaj nabéaj xíchaje̱' Dios.
PSA 82:5 Quebe bi zaj nézene̱', ne quebe dxeléajni'ine̱', na' dxeledé̱' lu da chul-la. Dxuluzrizre̱' ca naca da zaj de̱ lu xe̱zr la xu.
PSA 82:6 Neda' gunnía': Le'e nácaquezle ca dios ca', ne nácale xúgute̱le ca zrí'inequeze Dios szrente̱,
PSA 82:7 Wátele ca dxelate xezícadxa bénneache, na' cheajcházele ca cheajchaze nútete̱ze benne' dxenná be'e̱.
PSA 82:8 ¡Guxasa, Dios! ¡Bchi'a chee̱ bénneache zaj zra' lu xe̱zr la xu, lawe' da naca dute̱ xe̱zr la xu chiu' Lue'!
PSA 83:1 ¡Dios, quebe sua zriu'! Quebe su' zrize, Dios, ne quebe gusezxuj dxu'u,
PSA 83:2 lawe' da dxelebezre xa'a benne' ca' dxeledábague̱' Lue', ne dxulucá'ana szren cuina benne' ca' dxelecuídene̱' Lue'.
PSA 83:3 Bagácheze ba zaj nune̱' tuze dizra' bi xelune̱' chee̱ bénneache chiu', ne ba zaj nune̱' bi xelune̱' chee̱ benne' ca' dxuxúequezu' Lue'.
PSA 83:4 Gulenné̱': “Le chu'u, guzría xidxu benne' ca' chee̱ québedxa xelaque̱' tu cue' xe̱zr la xu, ne québedxa nu sua benne' cheajsá lazre̱' la Israel.”
PSA 83:5 Ba belune̱' tuze dizra'. Zaj nune̱' tuze dizra' xeledábague̱' Lue'
PSA 83:6 benne' Edom ca', ne benne' Ismael ca', ne benne' Moab ca', ne benne' zri'ine zre sua ca' Agar,
PSA 83:7 ne benne' Gebal ca', ne benne' Amón ca', ne benne' Amalec ca', ne benne' Filistea ca', ne benne' zaj zre̱'e̱ xe̱zre Tiro.
PSA 83:8 Cá'anqueze benne' Asiria ca' zaj nune̱' le̱' tuze. Xúgute̱ benne' caní dxelune̱' zrin chee̱ zri'ine zre sua Lot.
PSA 83:9 Be̱n chee̱ benne' caní ca be̱nu' chee̱ benne' Madián ca', ne ca be̱nu' chee̱ Sísara, ne ca be̱nu' chee̱ Jabín dxu'a xe̱gu Cisón,
PSA 83:10 benne' ca' gulátie̱' lu xe̱zr la xu Endor, na' belexaque̱' ca xrche̱'e̱ be̱zre da gun na be̱be lu xe̱zr la xu.
PSA 83:11 Be̱n gaca chee̱ benne' blau ca' chee̱ benne' caní ca guca chee̱ Oreb, ne chee̱ Zeeb, ne be̱n gaca chee̱ benne' dxelenná bé'ene̱' benne' caní ca guca chee̱ Zeba, ne chee̱ Zalmuna,
PSA 83:12 lawe' da gulenná benne' caní: “Gaca chee̱dxu xe̱zr la xu naga zaj zra' bénneache chee̱ Dios.”
PSA 83:13 Dios chia', be̱n xelaque̱' ca xizre be̱be da dxua be' gate dxedube na. Be̱n xelaque̱' ca xrlácue xia xéladu ca' da dxua be' bdunu'.
PSA 83:14 Ca dxun tu xi' da dxuzezxe na tu xi'a zren, ne ca dxun xi' da dxuzezxe na tu din zren,
PSA 83:15 ca'an gudáu zi' xuzre benne' caní tu lu be' bdunu', ne bchebe le̱' nen tu be' bdunu' chiu'.
PSA 83:16 Be̱n xelexedué'ele̱'e̱ne̱', ne be̱n xelape̱' Lue' ba lá'ana, Xran.
PSA 83:17 Be̱n xeleque zréajene̱' ne xelezúa sté̱bele̱'e̱ tu chí'izqueze. Be̱n xelexegá'ana dítaje̱', ne xelexenítie̱'.
PSA 83:18 Be̱n xelexúnbe'e̱ nacu' Lue' Xránantu' Dios. Tuzu' Lue' nacu' Dios zrente̱ lawe' dute̱ xe̱zr la xu.
PSA 84:1 Nazrí'ile̱'e̱da' xudau' chiu' Lue', Dios, napu' dute̱ xel-la' waca.
PSA 84:2 Dxaca lázrele̱'e̱da' sua' ga na', ne dxezá lazra' sua' lu xudau' chiu', Xran. Dute̱ da naca', ne dute̱ lázrdawa' dxul-la' chiu' Lue', Dios ban.
PSA 84:3 Ba belún chje̱gu ca' xrú'uneba', na' buchuj ca' zaj de̱ lataj naga dxuluzríaba' biadu chee̱ba' ca' naga zua lu cugu chiu' Lue', Dios, napu' dute̱ xel-la' waca. Nacu' Lue' Wenná Bea chia', ne Dios chia'.
PSA 84:4 Ba neza zrente̱ naca na chee̱ benne' ca' zaj zre̱'e̱ xudau' chiu'. Chadía chacanna xelúe lá'anaqueze̱' Lue'.
PSA 84:5 Ba neza zrente̱ naca na chee̱ benne' ca', Lue' dxuzúa chuchu' le̱', benne' ca' dxelezá lazre̱' chjaque̱' xi'a lá'azxa chiu', xi'a Sión.
PSA 84:6 Gate dxeledée̱' lache' bizre nazí le na Lache' Nisa Dxebézredxu, dxexaca na lataj naga dxalaj nisa, na' gusezrá nisa xiuj ca zaj naca beaj ca'.
PSA 84:7 Dxelácadxe̱' benne' wal-la dxácate̱ ne zaj xu'e̱ neza lawe' da xelelé'ene̱' Dios lu xi'a lá'azxa chee̱', xi'a Sión.
PSA 84:8 Bene, Xran, ca naca da dxenaba' Lue', Dios, napu' dute̱ xel-la' waca. Bene, Dios, nacu' Dios chee̱ Jacob.
PSA 84:9 Be̱n da xrlátaje chee̱ benne' wenná bea chee̱ntu', Dios, benne' wenná bea na' guca'u Lue'.
PSA 84:10 Cháwedxa naca sua' tu zraze lu xudau' chiu' quézcala sua' chi gaxúa iza naga xula. Dxaca lazredxa' sua' dxa xu'a xudau' chee̱ Dios chia' ca tu benne' nada'u, quézcala súaqueza' tu lizra' zaca naga quebe zua Dios.
PSA 84:11 Xránadxu Dios naque̱' Benne' dxuxúe̱' dxi'u, ne Benne' Wenná Bea xabáa chee̱dxu. Dxune̱' dxi'u da chawe' dute̱ xel-la' zri'i lazre' chee̱', ne dxune̱' dxelapa bénneache dxi'u ba lá'ana. Quebe xezúene̱' zi' gune̱' da chawe' chee̱ benne' ca' zaj naque̱' du lazre'.
PSA 84:12 ¡Dios, napu' dute̱ xel-la' waca! ¡Ba neza zrente̱ naca na chee̱ benne' ca' dxuluxrén lazre̱' Lue'!
PSA 85:1 Be̱nu' da xrlátaje chee̱ bénneache chiu', Xrana' Dios. Be̱nu' belexelá zri'ine zre sua Jacob, benne' ca' gulu'e̱ lu na' benne' zitu' ca'.
PSA 85:2 Bnite lau' da zrinnaj da belún bénneache chiu'. Bdeu' chalá'ala ca zaj naca dul-la chee̱ benne' ca'.
PSA 85:3 Bzua zriu' xel-la dxezrá'a chiu', ne bsanu' xel-la' xichaj zra'a chiu'.
PSA 85:4 Be̱n xezúantu' lu da ba neza chee̱ xel-la' weselá chiu', Dios, ne québedxa zra'u netu'.
PSA 85:5 ¿Tu chí'izqueze zra'u netu'? ¿Wazrá'aquezu' tu cuen tu cuen zri'ine zre suantu'?
PSA 85:6 ¿Québedxa gunu' xexaca bantu', chee̱ súantu' lu da ba neza lau Lue'?
PSA 85:7 ¡Xran, bexache lazre' netu', ne bselá netu'!
PSA 85:8 Guzé̱ naga' da nne̱ Xrana' Dios. Nne̱' da guzúa na bénneache chee̱' lu xel-la' dxebeza zri lazre', chee̱ québedxa xelún benne' lá'azxa chee̱' da xálaze.
PSA 85:9 Da líqueze Le̱' zúate̱queze̱' guselé̱' benne' ca' dxelezrebe̱' Le̱', chee̱ sua da xabáa chee̱' lu xe̱zr la xu chee̱dxu.
PSA 85:10 Zaj nazraga xel-la dxexache lazre', ne da li chee̱ Dios. Zaj naca tuze da xrlátaje, ne xel-la' dxebeza zri lazre'.
PSA 85:11 Da li chee̱' gusezrá na xe̱zr la xu nigá, na' sel-le̱' da xrlátaje chee̱' da za xabáa.
PSA 85:12 Xránadxu gúnnaqueze̱' dxi'u da cháwedau', na' gúnnale̱'e̱ xe̱zr la xu chee̱dxu.
PSA 85:13 Nu benne' naque̱' xrlátaje waca xezrine̱' lau Dios, na' gune̱' gundxu ca da ba blé'ene̱' gundxu.
PSA 86:1 Bze̱ naga, Xran, ne bene chia', lawe' da zua' lu da ba xa', ne dxexázrjeda'.
PSA 86:2 Bxue neda' lawe' da naca' chiu'. Bselá neda', Dios chia', naca' we̱n zrin chiu', ne dxuxrén lazra' Lue'.
PSA 86:3 Bexache lazre' neda', Xrana' Dios, lawe' da dxuláwizra' Lue' te zra chizrela.
PSA 86:4 Be̱n béle̱'e̱da' neda', we̱n zrin chiu', lawe' da dxuzúa cuina' lau Lue', Xran,
PSA 86:5 na' Lue', Xran, nacu' xrlátaje, ne dxunite lau' chee̱ntu'. Zúate̱quezu' xexache lazru' benne' ca' dxululáwizre̱' Lue'.
PSA 86:6 Xrana' Dios, bene da dxuchálajle̱na' Lue', ne bze̱ naga ca da dxenaba' lau'.
PSA 86:7 Lu zra sua' lu da sté̱bele̱'e̱ wanné̱queza' Lue', lawe' da dxexeché̱bequezu' Lue' chia'.
PSA 86:8 Xran, quebe nu chilá' Dios ca Lue', ne quebe nu dxun ca da dxunu' Lue'.
PSA 86:9 Xelelá' bénneache dute̱ xe̱zr la xu da be̱nu' Lue', na' xelúe lá'anaqueze̱' Lue', Xran, ne xulucá'ana szrene̱' Lau' Lue',
PSA 86:10 lawe' da nacu' Lue' szren, ne dxunu' da dxexebánentu'. Tuzu' Lue' nacu' Dios.
PSA 86:11 Bse̱de neda' da dxaca lazru' guna', Xrana' Dios, na' guna' ca naca da li chiu'. Gunná be'e lázrdawa' chee̱ zreba' La cuinu'.
PSA 86:12 Dute̱ lázrdawa' güe lá'anaqueza' Lue', Xrana' Dios, ne gucá'ana szrénqueza' Lau' chadía chacanna,
PSA 86:13 lawe' da zúate̱quezu' xexache lazru' neda', ne bseláu' bénne'du xu'a lu lataj ba xa'.
PSA 86:14 Dios, belasa benne' dxulucá'ana szren cuine̱', ne dxeledábague̱' neda', na' benne' xichaj zra'a ca' belune̱' tuze dizra' xelútie̱' neda', ne quebe dxelezrebe benne' ca' Lue'.
PSA 86:15 Lue', Xrana', nacu' Dios dxexache lazru' netu', ne nacu' zren lazre', ne quebe dxezrá'azeu', san zúate̱quezu' xexache lazru' netu', ne nacu' li lazre'.
PSA 86:16 Gunná' ca naca chia', ne bexache lazre' neda'. Be̱nna chia' neda', we̱n zrin chiu', xel-la' waca chiu', na' bxue neda', zri'ine nu'ula we̱n zrin chiu'.
PSA 86:17 Ble'e neda' tu da gaca bea na gaca chawe' chia', ne be̱n xelelé'e benne' ca' dxelecuídene̱' neda' da na', ne be̱n xelexedué'ene̱', lawe' da nacu' Lue', Xrana' Dios, Bénnea' gúcale̱ne̱' neda', ne bexúe zrene̱' neda'.
PSA 87:1 Lane xe̱zre Sión zria na lu xi'a lá'azxa.
PSA 87:2 Nazrí'idxa Xránadxu Dios lataj naga dxuluchi'a benne' zaj zre̱'e̱ xe̱zre Sión, ca nazrí'ine̱' xúgute̱ xu'u lizre zri'ine zre sua Jacob.
PSA 87:3 Da xrtante̱ ca' dxelenná bénneache ca naca xe̱zre chee̱ Dios.
PSA 87:4 Cheajsá lazra' lu xe̱zr la xu Egipto, ne lu xe̱zr la xu Babilonia ga na' zaj zra' bénneache zaj núnbe'e̱ neda'. Le nna' xque, lu xe̱zr la xu Filistea, ne lu xe̱zre Tiro, ne lu xe̱zr la xu Etiopía gulalaj benne' caní zaj naque̱' chia'.
PSA 87:5 Ca naca chee̱ xe̱zre Sión nnia': Benne' nigá, ne bénnea' gulálaje̱' ga na', na' neda', Dios zrente̱, guzúa chúchua' xe̱zre na'.
PSA 87:6 Gate gulaba Xránadxu Dios benne' ca' zaj naque̱' chee̱', nne̱': “Benne' nigá gúlaje̱' lu xe̱zre na'.”
PSA 87:7 Benne' ca' dxelul-le̱', ne benne' ca' dxeline̱' xide xelenné̱': Ca naca da ba neza zúantu' lu xe̱zre na'.
PSA 88:1 Xran, nacu' Dios dxuseláu' neda'. Te zra, ne chizrela dxuláwizra' Lue'.
PSA 88:2 Bene da dxuchálajle̱na' Lue', ne bze̱ naga da dxuláwizra' Lue'.
PSA 88:3 Dxedú lazra' lu da cale̱la ca' da dxaca na chia', ne ba zua' gatia'.
PSA 88:4 Dxeleque bénneache neda' ca tu benne' gate, lawe' da dxátele̱'e̱ ni'a na'a.
PSA 88:5 Nagá'ana' cá'aze ládujla benne' gate. Naca' ca benne' gulátie̱' lu wedil-la, ne zaj de̱' xe̱dxu ba ca', benne' ca' québedxa dxajsá lazru', Dios, ne québedxa zaj xu'e̱ lu na'u Lue'.
PSA 88:6 Dxaca chia' cáte̱ze ba nuzú' neda' tu xe̱dxu zren naga naca chul-la, ne nácale̱'e̱ situj.
PSA 88:7 Dxéqueda' dxezrá'le̱'u neda'. Da dxaca chia' naca na ca dxazia' zran xeajxruza zri'a chee̱ nísadau'.
PSA 88:8 Be̱nu' belexebiga bi ljwezra' ca' naga zua'. Be̱nu' neda' ca tu da dxusegute na benne' ca'. Naca' ca tu benne' xu'e̱ lizre xia ne quebe gaca xedxúaje̱'.
PSA 88:9 Dxelechul-la xiaj lawa' ne̱ chee̱ da dxezí dxezaca'. Xúgute̱ zra dxuláwizra' Lue', Xrana' Dios. Dxechisa na'a lau Lue'.
PSA 88:10 ¿Dxúnquezu' xel-la' waca chee̱ xabáa dxácale̱nu' benne' gate ca'? ¿Dxelexasa benne' gate ca' dxelúe lá'ane̱' Lue'?
PSA 88:11 ¿Dxuluchalaj benne' zaj nagache̱' lu xe̱dxu ba chee̱ xel-la zri'i lazre' chiu', na' dxuluchalaj chee̱ da li lazre' chiu' benne' zaj xu'e̱ lataj chul-la chee̱ benne' gate ca'?
PSA 88:12 ¿Welexúnbea benne' zaj xu'e̱ lataj chul-la na' ca naca da zrente̱ da dxunu', na' welexúnbea benne' zaj xu'e̱ naga quebe nu dxajsá lazre' le̱' ca nacu' xrlátaje?
PSA 88:13 Neda' dxuláwizra' Lue', Xrana' Dios. Xúgute̱ zila dxezrín lau' da dxenaba' Lue'.
PSA 88:14 ¿Bizr chee̱ na' dxebéaj xíchaju' neda', Xran? ¿Bizr chee̱ na' quebe dxenná'u neda' chee̱ gácale̱nu' neda'?
PSA 88:15 Dxezí dxezaca', ne ba zua' gatia'. Nácatea' bi cuíde'te̱ dxedéa' xel-la' zi' da dxudeu' neda', na' dxedú lazra'.
PSA 88:16 Dxéqueda' dxezrá'le̱'u neda'. Da dxuchebu' neda' ba bsedú na lazra'.
PSA 88:17 Zaj naxechaj da caní neda' du zra. Dxulusaca zi na neda' gátete̱ze na'.
PSA 88:18 Be̱nu' belexebiga bi ljwezra' ca' naga zua', na' tuze da naca chul-la dxedále̱ na neda'.
PSA 89:1 Tu gúl-lazqueza' chee̱ xel-la' zri'i lazre' chiu', Xran. Guzenda' tu cuen tu cuen zri'ine zre súantu' nacu' li lazre'.
PSA 89:2 Nezda' tu súazqueze xel-la zri'i lazre' chiu', ne chadía chacanna zua xel-la li lazre' chiu', cáte̱ze zúaqueze xabáa.
PSA 89:3 Lue' gunnáu': “Be̱na' xel-la wezría nen bénnea' ba gucá'a. Guche̱be lazra' chee̱ David, we̱n zrin chia',
PSA 89:4 gunnia': Guna' tu cházqueze zri'ine zre su'. Guna' xelenná be'e̱ tu chí'izqueze lu waláz chiu'.”
PSA 89:5 Benne' zaj zra' xabáa dxelúe lá'ane̱' Lue', ne̱ chee̱ da zrente̱ ca' da dxunu', Xran, ne ne̱ chee̱ xel-la' li lazre' chiu', naga zaj nazrague̱'.
PSA 89:6 Quebe nu zua xabáa, benne' naque̱' ca Lue', Xran. Quebe nu zua benne' szrente̱, benne' naque̱' ca Lue'.
PSA 89:7 Benne' zaj zra' xabáa dxelape̱' Dios ba lá'ana, na' xúgute̱ benne' ca' zaj nazraga chee̱' dxelezrebe̱' Le̱'.
PSA 89:8 Xran, nacu' Dios chee̱ benne' zante̱, benne' zaj zra' xabáa. Quebe nu zua, benne' naque̱' ca Lue', Xran. Nacu' Benne' wál-late̱, ne tu nácazquezu' li lazre'.
PSA 89:9 Xu'u lu na'u xeajxruza zren chee̱ nísadau'. Gate dxelasa xeajxruza ca' Lue' dxebeque zriu' na.
PSA 89:10 Bchúchuju' benne' Egipto ca', na' belexegá'ane̱' ca tu da gate. Be̱se dínnaju' benne' ca' dxeledábague̱' lue' nen na'u wál-late̱.
PSA 89:11 Chiu' Lue' naca xabáa, ne chiu' Lué'queze naca xe̱zr la xu. Be̱nu' xe̱zr la xu nigá, ne da ca' zaj nnita lawe na.
PSA 89:12 Be̱nu' da de̱ chalá'a naga za' be' zaga, ne da de̱ chalá'a naga dxedé gubizra beu' zaga ca'. Xel-la dxelebé dxelul-la chiu' xi'a Tabor, ne xi'a Hermón.
PSA 89:13 Benne' wál-late̱ nacu' Lue'. Da zrente̱ naca xel-la waca chiu', ne nagá'ana szren na.
PSA 89:14 Lu da xrlátaje, ne lu da li lazre' dxenná be'u. Lu xel-la zri'i lazre', ne lu da li lazre' zaj zua ca da dxunu'.
PSA 89:15 Ba neza zrente̱ naca na chee̱ benne' ca' dxelul-le̱' da dxue lá'ana na Lue', ne zaj zue̱' lu xel-la naxaní' chiu', Xran.
PSA 89:16 Ne̱ chiu' Lue' dxelebéle̱'e̱ne̱' du zra, ne dxulucá'ana szrene̱' Lue' ca naca da xrlátaje chiu'.
PSA 89:17 Lué'queze nacu' xel-la wal-la chee̱ benne' ca', ne xel-la xrtan chee̱'. Dxúnnadxu' netu' xel-la' waca lawe' da ca' dxéquenu' xrlátaje.
PSA 89:18 Xránadxu Dios dxucu'uje̱' dxi'u, na' Dios lá'azxa chee̱ benne' Israel ca' naque̱' Wenná Bea chee̱dxu.
PSA 89:19 Nédxudaute̱ bchálaju' lu da blé'enu' benne' we̱n zrin chiu' ca', benne' zaj naque̱' li lazre', gunnáu': Ba gucá'a tu benne' wal-la ládujla bénneache chia', ne ba bzua' le̱' gaque̱' wenná bea, ne dxácale̱na' le̱'.
PSA 89:20 Ba gucá'a David, we̱n zrin chia'. Bzúaqueza' le̱' gaque̱' wenná bea.
PSA 89:21 Neda' tu gácale̱zqueza' le̱'. Xel-la waca chia' gutípaqueza' lazre̱'.
PSA 89:22 Benne' ca' guledábague̱' Le̱' quebe xelezéquene̱' bi xelune̱' chee̱', na' benne' ca' dxelune̱' da cale̱la quebe xelezéquene̱' xuluchúchuje̱' le̱'.
PSA 89:23 Guchúchujqueza' benne' dxeledábague̱' Le̱', ne gucuasa' benne' ca' lau le̱'. Guna' we̱' benne' ca' dxelecuídene̱' le̱'.
PSA 89:24 Tu zrí'izqueza' le̱', ne gaca' li lazre' nen le̱', na' ne̱ chia' neda' gápadxe̱' xel-la' wal-la.
PSA 89:25 Guna' nna be'e̱ dute̱ dxu'a nísadau' zren, ne dute̱ dxu'a xe̱gu Eufrates.
PSA 89:26 Le̱' xe̱'e̱ neda': “Lue' nacu' Xra'. Nacu' Dios chia', dxucu'uju' neda', ne dxuseláu' neda'.”
PSA 89:27 Neda' guzúa' le̱' ca zri'ina' blau, na' nna bé'ene̱' xúgute̱ benne' wenná bea zaj zre̱'e̱ lu xe̱zr la xu.
PSA 89:28 Tu chí'izqueze nuzúa' chee̱' xel-la' zri'i lazre' chia', na' ca naca xel-la' wezría chia' gaca líqueze na nen le̱'.
PSA 89:29 Guna' tu cházqueze zri'ine zre sue̱', na' xelenná be'e̱ lu waláz chee̱' dxácate̱ ne zua xabáa.
PSA 89:30 Che xulusán zri'ine zre sua David da nadxixruj be'a, ne che quebe xelune̱' ca da nuchi'a chee̱',
PSA 89:31 ne che xelecuase̱' lu da dxenná be'a, ne che quebe xelune̱' ca da dxapa' le̱',
PSA 89:32 na' gu'a le̱' zrise lawe' da dxeledábague̱' neda', ne quina' le̱' xide lawe' da dxelune̱' da cale̱la.
PSA 89:33 Quebe gusana' ca nazrí'ida' David, ne quebe gusana' gaca' li lazre' nen le̱',
PSA 89:34 ne quebe gal-la lazra' xel-la' wezría da nuna', ne quebe guchá'a ca da ba gunnía'.
PSA 89:35 Tu lásaze bzetaj cuina' guche̱be lazra', na' cabata' gun lazra' chee̱ David,
PSA 89:36 gunnia': Tu cházqueze zri'ine zre sue̱', na' xelenná be'e̱ lu waláz chee̱' lawa' neda' dxácate̱ ne zua gubizra.
PSA 89:37 Xel-la' dxenná bea chee̱' tu sua chúchuzqueze na ca zua beu' zran xabáa. Tu sua chúchuzqueze na dxácate̱ ne zua xabáa.
PSA 89:38 Lue', Dios, guleaj xíchaju', ne bzu' chalá'ala bénnea' guca'u, ne dxezrá'le̱'u le̱'.
PSA 89:39 Nuzú' chalá'ala xel-la' wezría bé̱nle̱nu' David, we̱n zrin chiu', ne nucá'ana dítaju' xel-la' dxenná bea chee̱'.
PSA 89:40 Nuxrínnaju' ze'e da naxechaj na xe̱zre zréntau' chee̱', ne nuzría xi'u ca naca lataj wal-la chee̱' chee̱ wedil-la.
PSA 89:41 Xúgute̱ bénneache, benne' dxeledaze ga na' dxelebane̱' chee̱ da zaj de̱ chee̱', na' benne' xe̱zre walízr chee̱' dxelún le̱' chee̱'.
PSA 89:42 Ba be̱nu' bedxúaj chawe' benne' guledábague̱' Le̱', na' dxelebéle̱'e̱ne̱'.
PSA 89:43 Be̱n dítaju' da ca' dxuchínene̱' lu wedil-la, ne quebe gúcale̱nu' le̱' lu wedil-la na'.
PSA 89:44 Ba gudú' ca naca da xrtante̱ chee̱', ne nucá'ana dítaju' xel-la' dxenná bea chee̱'.
PSA 89:45 Be̱nu' naque̱' ca tu benne' gula gate ne zue̱' iza cuide' chee̱', ne bsi'u le̱' xel-la' stu'.
PSA 89:46 Xrana' Dios, ¿bátaqueze quebe xennu' chee̱ntu'? ¿Tu chí'izqueze dxezrá'aquezu' netu'?
PSA 89:47 Bsa lazre' látega sua' lu xe̱zr la xu. Látega nunu' xel-la' nabán chee̱ xúgute̱ bénneache.
PSA 89:48 Quebe zua nu benne' gaca bane̱' tu chí'izqueze. Xúgute̱' xelatie̱'. Quebe zua nu benne' le̱' lu na' xel-la' gute.
PSA 89:49 Xran, ¿ba bsanu' David, ne québedxa nazrí'inu' le̱', ca bzetaj cuinu' guche̱be lazru' zrí'iquezenu' le̱'?
PSA 89:50 Gunná' xque, Xran, ca dxelún le̱' chia' neda', we̱n zrin chiu', ne ca dxuchaga lawa' da dxelún lala benne' xúgute̱ xe̱zr la xu chia' neda'.
PSA 89:51 Benne' ca' dxeledábague̱' lue' dxulucá'ana dítaje̱' bénnea' guca'u Lue', Xran. Dxulucá'ana dítaje̱' le̱' gátete̱ze zéaje̱'.
PSA 89:52 Ba neza zrente̱ gaca Xránadxu Dios chadía chacanna. Ca' naca na, ne ca' gaca na.
PSA 90:1 Xránantu' Dios, ba cua ba cua, Lue' nacu' ca tu xu'u naga zra cháwentu'.
PSA 90:2 Nédxudaute̱ ca za gunu' xi'a zri'a ca', ne ca za sua xe̱zr la xu, ne bénneache, na' nédxudaute̱, ne lu da za za' nácaquezu' Lue' Dios.
PSA 90:3 Dxu'u bénneache xelexaque̱' da gulaque̱', dxelexaque̱' xu xrte.
PSA 90:4 Chiu' Lue' chi gaxúa iza zaj naca na ca neaje, da ba gudé na, ne ca tu chí'idau'ze chizrela.
PSA 90:5 Dxegú' bénneache ca dxun guba'u, da dxua na xúgute̱ xizre laga ca'. Zaj naque̱' ca tu bchigala da dxexenite na gate dxexebandxu.
PSA 90:6 Zaj naque̱' ca tu xixre' da dxegula na che zílala. Dxegula na, ne dxelá'te̱ na xiaj, na' xelate' zua gubizra dxelechugue̱' na, na' dxebizre na.
PSA 90:7 Dxebía xi'ntu' lawe' da dxezra'u netu'. Sté̱bele̱'e̱ zúantu' lawe' da dxezrá'le̱'u netu'.
PSA 90:8 Dxenna'u ca da cale̱la da nuntu'. Dxulé'enu' láwela zria da nabágantu'.
PSA 90:9 Dxuzáchiu' iza chee̱ntu' lawe' da dxezra'u netu'. Dxelexedú iza chee̱ntu' ca tu be' da dxecá'antu'.
PSA 90:10 Ca zaj naca zra naca bantu', zaj naca na ga xun chi iza, na' che nácantu' benne' wal-la, waca bantu' du tápalalaj iza, san ca zaj naca iza ca', dxedentu' xel-la' zi', ne dxéquentu' ze̱de. Chadí dxeledé iza ca', na' xenítentu'.
PSA 90:11 ¿Nuzra núnbea xanne' ca naca xel-la' dxezrá'a chiu'? ¿Nuzra núnbea ca naca xel-la' xichaj zra'a chiu'?
PSA 90:12 Ble'e netu' ca láteze zaj naca zra chee̱ntu' chee̱ gácantu' benne' dxeléajni'ine̱'.
PSA 90:13 Xran, bexaca netu' tuze. ¿Bátadxa chenu'? Bexache lazre' netu', we̱n zrin chiu'.
PSA 90:14 Tu tu zila bzua xichaj lázrdauntu' xel-la' zri'i lazre' chiu', na' dute̱ xel-la' dxebé tu gul-lazquezentu' chiu' xúgute̱ zra naca bantu'.
PSA 90:15 Be̱nna netu' zane' iza chee̱ bentu' ca zaj naca iza bsaca zi'u netu', ne ca zaj naca iza guzúantu' lu da ste̱be.
PSA 90:16 Be̱ lataj netu', we̱n zrin chiu', le'entu' da zrente̱ da dxunu', ne xelelé'e zri'ine zre suantu' da xabáa chiu'.
PSA 90:17 Xránantu' Dios, be̱n gaca chee̱ntu' da chawe' chiu'. Be̱n chepe ban ca naca zrin dxuntu'. Awe', Xran, be̱n chepe ban ca naca zrin dxuntu'.
PSA 91:1 Bénnea' dxuxrén lazre̱' Xránadxu Dios chee̱ guxúe̱' le̱', ne dxuzúe̱' Dios, Bénnea' nape̱' dute̱ xel-la' waca, chee̱ gácale̱ne̱' le̱',
PSA 91:2 waca xe̱'e̱ Dios: Nacu' Bénnea' dxebeza lazra', ne Bénnea' dxucache chawe̱' neda'. Nacu' Dios chia', na' dxuxrén lazra' Lue'.
PSA 91:3 Dios gucache chawe̱' lue' lu xúgute̱ da ste̱be da quebe zaj nalá', ne lu xúgute̱ xízrawe̱' da dxelute na bénneache.
PSA 91:4 Gucache chawe̱' lue' ca dxun tu bedxuj dxé̱zreba' biadu chee̱ba' zran xrílaba', na' chu'u chawu' lu na' Le̱'. Xel-la' li lazre' chee̱' gácale̱ na lue', ne gucache chawe na lue'.
PSA 91:5 Quebe bi guchebe lue' chizrela, ne quebe bi da ste̱be te zra,
PSA 91:6 ne quebe bi xízrawe̱' chee̱ da chul-la, ne quebe bi da cale̱la ca' da dxelute na bénneache te zra.
PSA 91:7 Welate chi gaxúa bénneache cuitu' lue', ne gaxúa gaxúa bénneache gáguze naga zu', san quebe bi sacu' lue'.
PSA 91:8 Wanna'u, na' walé'enu' ca ba xa' xeledé benne' ca' dxelune̱' da cale̱la.
PSA 91:9 Nuzú' Xránadxu Dios ca Benne' dxebeza lazru', ne Dios, Bénnea' nape̱' dute̱ xel-la' waca, chee̱ gucache chawe̱' lue'.
PSA 91:10 Chee̱ le̱ na' quebe bi da cale̱la gaca na chiu', ne quebe bi xízrawe̱' chu'u na lizru'.
PSA 91:11 Dios gusebague̱' gubáz chee̱ xabáa chee̱' ca' chee̱ xelácale̱ne̱' lue', na' xuluxúe̱' lue' gátete̱ze chéaju'.
PSA 91:12 Xeluxre̱' lue' lu ne̱'e̱ chee̱ quebe ga'a xiaj ni'u.
PSA 91:13 Guléajquezu' be̱zre xixre' ca', ne be̱la' ca', be̱zre xixre' schanní' ca', ne be̱ snia ca'.
PSA 91:14 Dxenná Dios: “Guselá' xúgute̱ benne' ca' zaj nazrí'ine̱' neda', ne gucache chawa' benne' ca' dxelexeche̱be̱' naca' Xrane̱'.
PSA 91:15 Gate xelenné̱' neda', na' xeche̱ba' chee̱'. Gate zaj xu'e̱ lu da ste̱be, súale̱queza' le̱'. Guselá' le̱', ne guna' le̱' ba lá'ana.
PSA 91:16 Guna' xelaca bane̱' zánete̱ iza, ne guselá' le̱'.”
PSA 92:1 Chawe' naca dxue lá'anantu' Lue', Xrana' Dios, ne gúl-lantu' da dxucá'ana szren na Lue', Dios szrente̱.
PSA 92:2 Chawe' naca dxuzénentu' bénneache tu zra tu zra ca dxexache lazru' netu', na' dxe̱la dxulé'entu' nacu' li lazre'.
PSA 92:3 Dxúl-lantu' da caní, dxínnentu' da dxúl-lale̱ntu' da ze̱ chi du chee̱ na, ne dxínnentu' da con zríadi'i na du da dxenné̱le̱'e̱ xrtandau'.
PSA 92:4 Xrana' Dios, ne̱ chee̱ da dxunu' Lue', dxunu' dxebéle̱'e̱da'. Ca zaj naca da nun na'u zua' lu da ba neza.
PSA 92:5 Da zrente̱ zaj naca da nunu', Xrana' Dios. Da zrénle̱'e̱ zaj naca da dxugú'u lazru' gunu'.
PSA 92:6 Québequeze neze benne' lázxdau zide', ne quebe dxéajni'i benne' xala ca naca da nigá.
PSA 92:7 Gate dxelegula benne' dxelebéaj xíchaje̱' Dios ca dxegula xixre', ne dxe̱pe ban da dxelún benne' we̱n da zrinnaj, naca na chee̱ xelebía xi'e̱ tu chí'izqueze.
PSA 92:8 Lue', Xrana' Dios, tu nácazquezu' Dios szrente̱.
PSA 92:9 Dxunna bea na ca gaca chee̱ benne' dxedábague̱' Lue', Xrana' Dios. Dxunna bea na xelebía xi' benne' ca' dxeledábague̱' Lue'. Xelase dinnaj xúgute̱ benne' ca' dxelune̱' da zrinnaj.
PSA 92:10 Lue' dxunu' dxezrendxa xel-la' wal-la chia' ca naca xel-la' wal-la chee̱ be̱zre. Dxugú'u da za xíchaja' da dxutipa na lazra'.
PSA 92:11 Dxal-la' le'eda' xelezrá' zran ni'a benne' dxeledábague̱' neda', na' xenda' xelebezre xache' benne' ca' guledíl-lale̱ne̱' neda', benne' ca' dxelune̱' da cale̱la.
PSA 92:12 Welexán benne' xrlátaje ca' ca dxun xaga zina'. Xelegule̱' ca dxun xaga cedro lu xi'a Líbano.
PSA 92:13 Zaj naque̱' ca tu xaga ze̱ na lu xudau' chee̱ Xránadxu Dios, da dxegúlale̱'e̱ na lu chale'aj chee̱ xu'u lizre Dios chee̱dxu.
PSA 92:14 Zaj naque̱' ca xaga ca' dxelebía da zixre chee̱ na gate ba zaj nagula na, ne zaj naca na xaga xa'a wal-la.
PSA 92:15 Benne' caní xuluzenne̱' bénneache naca li lazre' Xrana' Dios, Bénnea' dxuzé̱ chúchue̱' neda', ne quebe bi zúale̱ Le̱' da quebe naca xrlátaje.
PSA 93:1 Xránadxu Dios naque̱' Wenná Bea, ne nacue̱' zra lane̱' da zácale̱'e. Nácue̱' zra lane̱', ne da nagú'u le̱'e̱ naca na xel-la' waca zren. Nuzúa chúchue̱' xe̱zr la xu nigá, na' quebe nu seque' gutá na.
PSA 93:2 Lataj naga dxe'u dxenná be'u, Xran, zua chuchu na nédxudaute̱, na' Lue' zúaquezu' chadía chacanna.
PSA 93:3 Dxelebezre xa'a xe̱gu ca', Xran. Dxelebezre xa'a na, ne dxelenné̱ na zizraj.
PSA 93:4 Xránadxu, Bénnea' zue̱' xabáa nápadxe̱' xel-la' waca ca da zaj napa xe̱gu ca' dxelebezre xa'a na, ne ca da zaj napa xeajxruza chee̱ nísadau'.
PSA 93:5 Chúchule̱'e̱ zaj naca da nadxixru be'u, Xran. Lá'azxa nácaqueze xudau' chiu' chadía chacánnaqueze.
PSA 94:1 Xrana' Dios, dxebéaj lazru' bénneache. Lue', Bénnea' dxebéaj lazre̱' bénneache, ble'e cuinu'.
PSA 94:2 Dxuchi'u Lue' chee̱ da dxelún xúgute̱ bénneache. Guxasa, bexizruj da dxal-la' xelezí' benne' dxulucá'ana szren cuine̱'.
PSA 94:3 Xrana' Dios, ¿Bátadxaqueze xelún benne' we̱n da cale̱la caní? ¿Bátadxaqueze xelebé benne' ca' dxelebéaj xíchaje̱' Dios?
PSA 94:4 ¿Bátadxaqueze xulucá'ana szren cuine̱', ne xelenné̱' dizra' zi'? ¿Bátadxaqueze xulucá'ana szren cuina benne' ca' dxelebéaj xíchaje̱' Dios?
PSA 94:5 Benne' caní dxuluxrínnaje̱' bénneache chiu' Lue', Xran, ne dxulusaca zi'e̱ bénneache guca'u Lue'.
PSA 94:6 Dxelútie̱' nu'ula tuze ca', ne benne' zitu' ca', ne dxelune̱' xelátebe' bidau' we̱ze̱be ca'.
PSA 94:7 Dxelenné̱': “Quebe bi dxelé'e Dios, Xrana benne' ca'. Dios chee̱ benne' Israel ca' quebe dxue lazre̱' chee̱ da na'.”
PSA 94:8 Le chéajni'i, le'e, benne' lázxdau zide'. Le'e, benne' xala, ¿bátadxaqueze quebe chéajni'ile?
PSA 94:9 Dios be̱ne̱' nágadxu. ¿Québequeze dxénne̱' da dxennale? Dios be̱ne̱' xiaj laudxu. ¿Québequeze dxelé'ene̱' da dxunle?
PSA 94:10 Diósqueze dxuzúe̱' lu da ba xa' benne' xe̱zr la xu ca'. ¿Québequeze til-le̱' le'e? Diósqueze dxune̱' dxeléajni'i bénneache. ¿Québequeze gueque be'ene̱' da xu'u xichaj lázrdaule?
PSA 94:11 Xránadxu Dios nézquezne̱' da xu'u xichaj lázxdau xúgute̱ bénneache. Nézene̱' zaj naca na da dácheze.
PSA 94:12 Ba neza zrente̱ naca na chee̱ bénnea' dxuzéajni'inu', Xran, ne dxusé̱denu' le̱' ca naca da nadxixruj be'u,
PSA 94:13 chee̱ cueza zri lazre' gate za zra dxaca da cale̱la, ca zrin zra xelexú'u xe̱dxu ba benne' dxelune̱' da zrinnaj.
PSA 94:14 Québequeze cueaj xichaj Xránadxu Dios bénneache chee̱', ne quebe gusán lazre̱' benne' ca' ba gucá'a Le̱'.
PSA 94:15 Naca xrlátaje ca xuluchí'e̱ chee̱ bénneache, na' xelúnqueze da xrlátaje xúgute̱ benne' zaj naque̱' li lazre'.
PSA 94:16 ¿Núzraqueze gácale̱ neda' tíl-lale̱dxu benne' we̱n da cale̱la ca'? ¿Núzraqueze súale̱ neda' tíl-lale̱dxu benne' dxelune̱' da zrinnaj?
PSA 94:17 Chela ca gúcale̱ Xránadxu neda', báchelja xu'a xe̱dxu ba.
PSA 94:18 Gate gunnía': Xran, ba zua cheajcházia', na' Lue', dute̱ xel-la' zri'i lazre' chiu' gúcale̱nu' neda'.
PSA 94:19 Gate dxe'a gunne xue, ne zua' lu da ste̱be, Lué'queze dxexúe zrenu' neda', na' dxebéle̱'e̱da'.
PSA 94:20 Québequeze nacu' tuze benne' ca' dxuluchi'e̱ chee̱ bénneache da quebe naca xrlátaje, benne' ca' dxulucá'ane̱' ca xrlátaje da quebe naca na xrlátaje.
PSA 94:21 Benne' caní dxelune̱' tuze dizra' da xelune̱' chee̱ benne' xrlátaje, na' dxelechugue̱' chee̱ gate bénnea' quebe bi zria nabague̱'.
PSA 94:22 Xránadxu Dios naque̱' ca tu xu'u naga zua chawa'. Dios chia' naque̱' ca tu xiaj xre da dxuzé̱ chacha na neda'.
PSA 94:23 Le̱' xexízruje̱' benne' ca' dxelune̱' da cale̱la cáte̱ze naca da zrinnaj da belune̱'. Guzría xi'e̱ benne' ca' lu da cale̱la da dxelune̱'. Xránadxu Dios guzría xi'e̱ benne' ca' dxelune̱' da cale̱la.
PSA 95:1 Le da, güe lá'anadxu Xránadxu Dios dute̱ xel-la' dxebé. Dute̱ xel-la' dxebé gúl-ladxu chee̱ Bénnea' nuzúa chúchue̱' dxi'u naga ladxu.
PSA 95:2 Cheajdxu lau Le̱', ne xe̱dxu Le̱': Xcalenu'. Dute̱ xel-la' dxebé gúl-ladxu da güe lá'anadxu Le̱'.
PSA 95:3 Naca Xránadxu tu Dios szrente̱, ne naque̱' Wenná Bea szrente̱ lawe' dios ca' chee̱ bénneache.
PSA 95:4 Dxenná bé'ene̱' du gabí'i xe̱zr la xu, naga naca situj, ne naga naca sibe chee̱ xi'a ca'.
PSA 95:5 Dxenná bé'ene̱' nísadau' da núnqueze Le̱', ne cá'anqueze xe̱zr la xu da be̱ne̱'.
PSA 95:6 Le da, gucá'ana szrendxu Le̱', gátadxu sudxú'ala. Guzú zríbedxu lau Xránadxu, Bénnea' nune̱' dxi'u.
PSA 95:7 Le̱' naque̱' Dios chee̱dxu. Nácadxu benne' ca' dxuxúequeze̱', ne nácadxu ca zríla'du ca' cheé̱queze̱'.
PSA 95:8 Che dxenle chi'e̱ na'a zra, quebe gun zide' lázrdaule ca belún xra xrtáule ca' naga nazí le na Meriba, ne ca belune̱' lu zra na' le̱'e̱ xixre' lawe' lataj naga nazí le na Masah,
PSA 95:9 naga buluchá'a xra xrtáule neda', ne belune̱' neda' da ste̱be lácala belelé'ene̱' xúgute̱ da be̱na'.
PSA 95:10 Lawe' chua iza beditaj lazra' chee̱ benne' ca', na' gunnía': Zaj naque̱' benne' dxelebéaj xíchaje̱' neda', ne quebe dxelune̱' ca da dxulé'eda' le̱'.
PSA 95:11 Chee̱ le̱ na', dute̱ xel-la' dxezrá'a chia' bzetaj cuina' gunnía': Quebe xelexú'uqueze̱' naga xelexezí' lazre̱' nen neda'.
PSA 96:1 Le gul-la chee̱ Xránadxu tu da cube. Le gul-la chee̱ Xránadxu, le'e zrale du gabí'i xe̱zr la xu.
PSA 96:2 Le gul-la chee̱ Xránadxu, ne le güe lá'ana La lá'azxa chie̱'. Tu zra tu zra le guzén ca naca xel-la' weselá da dxunne̱'.
PSA 96:3 Le guzén benne' xe̱zr la xu ca' ca naca xel-la' szren chee̱', Ne benne' xúgute̱ xe̱zre ca zaj naca xel-la' waca zren nune̱'.
PSA 96:4 Szrente̱ naca Xránadxu, ne naca chee̱' güe lá'anale̱'e̱dxu Le̱'. Naca chee̱' gápadxe̱' xel-la' ba lá'ana ca dios ca' chee̱ bénneache,
PSA 96:5 lawe' da zaj naca xúgute̱ dios ca' bedáu' xiaj xaga ca'. Xránadxu Dios be̱ne̱' xabáa na'.
PSA 96:6 Zúale̱ Le̱' da xabáa, ne xel-la' szren. Nazrate̱ xudau' chee̱' xel-la' waca, ne da xrtante̱.
PSA 96:7 Le güe lá'ana Xránadxu, le'e zrale du gabí'i xe̱zr la xu. Le güe lá'ana xel-la' szren chee̱', ne xel-la' waca chee̱'.
PSA 96:8 Le gapa ba lá'ana Xránadxu ca da naca chee̱' si'e̱. Le gua da gunézrujle, ne le da chale'aj chee̱ xudau' chee̱'.
PSA 96:9 Le gucá'ana szren Xránadxu lu xel-la' xrtante̱ chee̱ da naca lá'azxa chee̱'. Le zrebe lau Le̱', le'e zrale du gabí'i xe̱zr la xu.
PSA 96:10 Le xe̱ bénneache xe̱zr la xu: Naca Xránadxu Wenná Bea. Nuzúa chúchue̱' xe̱zr la xu nigá, na' quebe nu seque' gutá na. Guchi'e̱ chee̱ bénneache ca naca da xrlátaje.
PSA 96:11 Le be, le'e, xabáa, ne xe̱zr la xu. Le cuezre xa'a, le'e, nísadau', ne bea ca' zrale na'.
PSA 96:12 Le be, le'e, le̱'e̱ xixre', ne bea ca' zrale na'. Xaga ca' zaj dxe' xi'a ca' welunna schaga lu xel-la' dxebé
PSA 96:13 lau Xránadxu gate xide̱'. Xide̱' guchi'e̱ chee̱ bénneache zaj zre̱'e̱ xe̱zr la xu. Nna bé'ene̱' bénneache du gabí'i xe̱zr la xu. Nna be'e Le̱' ca naca da xrlátaje, ne ca naca da li.
PSA 97:1 Naca Xránadxu Benne' Wenná Bea. Le be, le'e zrale xe̱zr la xu. Le be, le'e zrale dxu'a nísadu ca'.
PSA 97:2 Zaj naxechaj beuj, ne da chul-la Le̱'. Ca naca da li, ne da xrlátaje dxenná be'e̱.
PSA 97:3 Cuía lau xi' lau Le̱', ne guzezxe na benne' guledábague̱' Le̱'.
PSA 97:4 Ca naca xesa ca' chee̱' bulusení na xe̱zr la xu. Dxelé'e xe̱zr la xu na, ne dxezrize na.
PSA 97:5 Dxelexuna xi'a ca' ca da zixre chee̱ bézudau' lau Xránadxu, lau Xrana bénneache zaj zre̱'e̱ du gabí'i xe̱zr la xu.
PSA 97:6 Dxulé'e xabáa ca naca da xrlátaje chee̱', na' dxelelé'e bénneache dute̱ xe̱zr la xu ca naca xel-la' szren chee̱'.
PSA 97:7 Dxal-la' xelexedué'e xúgute̱ benne' ca' dxulucá'ana szrene̱' bedáu' xiaj xaga ca', benne' ca' dxulucá'ana szren cuine̱' ca zaj naca bedáu' xiaj xaga ca'. Xúgute̱ dios chee̱ bénneache ca' dxal-la' xuluzú zribe na lau Xránadxu Dios.
PSA 97:8 Belén benne' zaj zre̱'e̱ Sión, na' gulebene̱'. Gulebé benne' zaj zre̱'e̱ Judá, ne̱ chee̱ da guchi'u Lue', Xran.
PSA 97:9 Szrente̱ nacu' Lue', Xran, lawe' dute̱ xe̱zr la xu. Szrendxa nacu' Lue' ca xúgute̱ dios chee̱ bénneache.
PSA 97:10 Le'e, núlale nazrí'ile Xránadxu, le cuide da cale̱la. Le̱' dxuxúe̱' bénne'du zaj xu'e̱ bénneache chee̱'. Dxuselé̱' le̱' lu na' benne' dxelebéaj xíchaje̱' Dios.
PSA 97:11 Zuale̱ da dxusení na benne' xrlátaje ca', na' xel-la' dxebé zúale̱ na benne' li lazre' ca'.
PSA 97:12 Le be, le'e, benne' xrlátaje, lau Xránadxu. Le gusá lázrele ca da nun Dios lá'azxa, ne le güe lá'ana Le̱'.
PSA 98:1 Le gul-la chee̱ Xránadxu tu da cube lawe' da nune̱' da ca' da dxebánedxu. Ne̱ chee̱ xel-la' wal-la chee̱', ne xel-la' waca lá'azxa chee̱' ba bdinne̱'.
PSA 98:2 Ba nuzén Xránadxu ca dxune̱' dxuselé̱' bénneache. Ba bzenne̱' bénneache xe̱zr la xu ca' ca naca da xrlátaje chee̱'.
PSA 98:3 Ba nune̱' ca da guche̱be lazre̱' chee̱ benne' Israel ca' ca naca xel-la' li lazre' chee̱', ne xel-la' nazrí'i zren chee̱'. Bénneache du gabí'i xe̱zr la xu ba belelé'ene̱' ca naca da be̱n Dios chee̱dxu.
PSA 98:4 Le gul-la lu xel-la' dxebé lau Xránadxu, le'e zrale du gabí'i xe̱zr la xu. Le güe lá'ana Le̱' nen da gúl-lale, ne lu xel-la' dxebé chee̱le le cuezre xa'a.
PSA 98:5 Le gul-la da güe lá'anale Xránadxu. Le gul-la nen da con zríadi'i na du ca' da quínnele.
PSA 98:6 Le gucuezre luzu da ca' dxulucuezre̱', ne da dxutíl-lale ca', ne le cuezre xa'a lu xel-la' dxebé lau Xránadxu, Wenná Bea chee̱dxu.
PSA 98:7 Le gun schaga nísadau', ne bea ca' zrale na'. Le gul-la, le'e, xe̱zr la xu, ne le'e zrale na'.
PSA 98:8 Le capa na'le, le'e xe̱gu ca'. Le gul-la lu xel-la' dxebé, le'e, xi'a ca', lau Xránadxu
PSA 98:9 lawe' da xide̱' xedajnná bé'ene̱' xe̱zr la xu nigá. Nna bé'ene̱' benne' zaj zre̱'e̱ du gabí'i xe̱zr la xu lu da xrlátaje, ne bénneache dute̱ xe̱zr la xu lu da naca li lazre'.
PSA 99:1 Naca Xránadxu Dios Benne' Wenná Bea, na' dxelezrize xúgute̱ bénneache lau Le̱'. Dxe'e̱ lataj blau chee̱' da zua na láwela querubín ca', na' dxezrú' lu xe̱zr la xu.
PSA 99:2 Szrente̱ naca Xránadxu lu xi'a Sión. Naque̱' szren lawe' xúgute̱ cue' xe̱zr la xu ca'.
PSA 99:3 Le güe lá'ana La Xránadxu da naca na szren, ne da dxal-la' zrébedxu. ¡Lá'azxa naca Le̱'!
PSA 99:4 Lue', Wenná Bea szrente̱, nazrí'inu' da naca xrlátaje. Nuzúa chachu' da naca li lazre'. Ba nunu' da naca xrlátaje, ne da naca li lazre' ládujla zri'ine zre sua Jacob.
PSA 99:5 Le gucá'ana szren Xránadxu Dios. Le guzú zríbele lau Le̱' naga dxe'e̱. ¡Lá'azxa naca Le̱'!
PSA 99:6 Moisés, ne Aarón gulaque̱' bxruze chee̱' ca'. Samuel guque̱' tu benne' bchálajle̱ne̱' Le̱'. Gulenné̱' Xránadxu Dios, na' Le̱' beche̱be̱'.
PSA 99:7 Tu lu beuj bza bchálajle̱ne̱' benne' ca'. Buluzúe̱' dizra' da gunná bé'ene̱', ne da ca' bdxixruj be'ene̱' le̱'.
PSA 99:8 Xránantu' Dios, beche̱bu' lau benne' ca'. Blé'enu' le̱' nacu' Dios, dxunite lau' chee̱ bénneache, lácala dxudéu' le̱' xel-la' zi' ne̱ chee̱ dul-la da zaj nabague̱'.
PSA 99:9 Le gucá'ana szren Xránadxu Dios. Le guzú zríbele lau Le̱' lu xi'a lá'azxa chee̱', lawe' da lá'azxa naca Xránadxu Dios.
PSA 100:1 ¡Le gul-la lau Xránadxu Dios, le'e zrale du gabí'i xe̱zr la xu!
PSA 100:2 ¡Le gucá'ana szren Le̱' dute̱ xel-la' dxebé! ¡Le da lau Le̱', dxúl-lale dute̱ xel-la' dxebé!
PSA 100:3 Cabata' gal-la lázrele naca Xránadxu Diósqueze. Le̱' be̱ne̱' dxi'u, na' nácadxu chee̱ Le̱'. Nácadxu xe̱zre chee̱', ne zríla'du chee̱'.
PSA 100:4 Le chu'u lataj naga zua xudau' chee̱', xe̱le Le̱': Xcalenu', ne chale'aj chee̱ na, güe lá'anale Le̱'. Le xe̱ Le̱': Xcalenu', ne le güe lá'ana Le̱'.
PSA 100:5 Chawe' naca Xránadxu, na' chadía chacanna zua xel-la' zri'i lazre' chee̱'. Xel-la' li lazre' chee̱' tu súazqueze na chadía chacanna.
PSA 101:1 Tu gúl-lazqueza' ca naca xel-la' zri'i lazre', ne xel-la' li lazre' chiu'. Tu gúl-lazqueza' chiu' Lue', Xrana' Dios.
PSA 101:2 Dxaca lazra' guna' da naca li lazre'. ¿Bátala xidu' gácale̱nu' neda'? Guna' da naca du lazre', ne cá'anqueze guna' caní lu xu'u lizra'.
PSA 101:3 Québequeze cu'u lazra' guna' tu da zrinnaj. Dxecuídeda' da dxelún benne' ca' dxelebéaj xíchaje̱' Dios. Québequeze gu'a lataj xelebigue̱' naga zua' neda'.
PSA 101:4 Gucuasa' lu xichaj lázrdawa' da cale̱la, ne quebe cu'u lazra' chee̱ da cale̱la.
PSA 101:5 Guzúa' chalá'ala benne' dxelenné̱' bagácheze chee̱ benne' xula. Quebe gu'a lataj súale̱ neda' tu benne' dxucá'ana szren cuine̱', u naque̱' benne' wenná be'e.
PSA 101:6 Le'eda' chawe' benne' ca' zaj naque̱' li lazre' lau Dios, chee̱ xelezré̱'e̱ lawa' neda'. Tuze benne' ca' zaj naque̱' du lazre' xelune̱' zrin chia'.
PSA 101:7 Quebe gu'a lataj benne' wecache lan chu'e̱ lizra'. Quebe gu'a lataj tu benne' we̱n lazre' xegá'ane̱' naga zua'.
PSA 101:8 Tu zra tu zra guzría xi'a benne' ca' dxelune̱' da cale̱la, benne' ca' zaj zre̱'e̱ lu xe̱zr la xu chia'. Gucuasa' xúgute̱ benne' ca' dxelune̱' da zrinnaj lu xe̱zre chee̱ Xránadxu Dios.
PSA 102:1 Xrana' Dios, bene da dxenaba' lau', ne bze̱ naga da dxuláwizra' Lue'.
PSA 102:2 Quebe gucache lau' lawa' neda', lawe' da lu da ste̱be zua'. Bze̱ naga neda', ne beché̱beche chia' gate dxuláwizra' Lue'.
PSA 102:3 Naca xel-la' nabán chia' ca zren chee̱ xi' da dxexenítete̱. Xu'u da la lu zrita chia' ca tu xi' da dxálale̱'e̱ na.
PSA 102:4 Dxedú lazra', ne naca lázrdawa' ca tu xixre' da dxecuade, na' québedxa dxenná na gudagu xeta.
PSA 102:5 Lawe' da dxebezre wé̱'le̱'a ba nazrítale̱'a.
PSA 102:6 Naca' ca tu situgún dxedaba' tu lu xe̱zr la xu bizre, ne ca tu bzriu zríaba' lawe' tu xu'u ze la'a.
PSA 102:7 Dxíchaja' bchigala, ne naca' ca tu bxinne zríaba' túzeba' xrgu'u sibe.
PSA 102:8 Tu zra tu zra tu dxulucháchale̱zqueze benne' dxeledábague̱' neda'. Benne' ca' dxelecuídene̱' neda' dxuluchínene̱' la' neda' gate nu benne' dxelegú'e̱ de'.
PSA 102:9 Lu waláz chee̱ xeta dxawa' de, na' nisa dxebezra' dxechixre na da dxé'aja'.
PSA 102:10 Caní dxaca chia' lawe' da dxezra'u neda', ne dxecuídenu' neda'. Guca'u neda', na' gudxú'unu' neda'.
PSA 102:11 Naca xel-la' nabán chia' ca tu zrul-la da dxedeze, na' naca' ca tu xixre' da ba nabizre.
PSA 102:12 Lue', Xrana' Dios, tu chí'izqueze zu', na' cheajlesá lazre' xúgute̱ cuen bénneache Lau'.
PSA 102:13 Chasu', ne xexache lazru' benne' zaj zre̱'e̱ xe̱zre Sión, lawe' da ba bzrin zra xexache lazru' benne' ca'.
PSA 102:14 Netu', we̱n zrin chiu', nazrí'intu' xiaj ca' chee̱ xe̱zre na'. Dxéquentu' zi' lawe' da ba nabía xi na.
PSA 102:15 Nadxa benne' xe̱zr la xu ca' xelezrebe̱' lau Lue', Xran. Xelezrebe xúgute̱ benne' wenná bea chee̱ xe̱zr la xu nigá da xabáa chiu',
PSA 102:16 gate ba bechisu' xe̱zre Sión, Xran, ne xelelé'equezne̱' ca naca da xabáa chee̱ na,
PSA 102:17 gate na' guzé̱ nagu' da dxelenaba benne' ca' guleaj xíchaju', ne québedxa guzú' chalá'ala da dxelata' xuene̱' Lue'.
PSA 102:18 Xuaj da nigá chee̱ xululaba benne' ca' za zá'aca, na' benne' ca' za xelalaj xelúe lá'ane̱' Xránadxu Dios.
PSA 102:19 Naga zua Xránadxu xabáa gunné̱'e̱. Naga zue̱' xabáa blé'ene̱' lu xe̱zr la xu nigá.
PSA 102:20 Dxelé'ene̱' benne̱' dxelebezre xache', benne' zaj xu'e̱ lizre xia, na' gusane̱' benne' ca' ba zaj nachugue̱' chee̱' xelatie̱'.
PSA 102:21 Xuluzenne̱' benne' zaj zre̱'e̱ xe̱zre Sión ca szren naca La Xránadxu Dios, chee̱ xelúe lá'ane̱' Le̱' lu xe̱zre Jerusalén,
PSA 102:22 gate xelezraga bénneache chee̱ xúgute̱ xe̱zre, ne xúgute̱ cue' xe̱zr la xu chee̱ xulucá'ana szrene̱' Xránadxu Dios.
PSA 102:23 Xránadxu Dios be̱ne̱' gute ni'a na'a gate ne naca' cuide'. Xeláteze ca be̱tie̱' neda'.
PSA 102:24 Nadxa gunnía': Dios chia', quebe gutiu' neda', gate quebe ne gué̱xrua'. Lue' tu chí'izqueze zu'.
PSA 102:25 Nédxudaute̱ Lue' bzu' xe̱zr la xu nigá, na' nen na'u be̱nu' xabáa.
PSA 102:26 Xelebía xi' da ca', san tu zúazquezu' Lue'. Welexru xúgute̱ da ca' ca tu ladxe'. Ca dxuchadxu zra lánadxu tuzruj, ca' gucha'u da ca', na' xucúbeu' na.
PSA 102:27 Túzqueze ca nacu' Lue', ne québequeze te chiu' Lue'.
PSA 102:28 Zrí'inentu' netu', we̱n zrin chiu', xelezrabe' chawe', na' guzé̱ chúchuquezu' zri'ine zre súantu' lau Lue'.
PSA 103:1 Be̱ lá'ana Xránadxu Dios, lue', bénne'du xu'a. Be̱ lá'ana Le̱' lá'azxa, dute̱ da naca'.
PSA 103:2 Be̱ lá'ana Xránadxu, lue', bénne'du xu'a, ne quebe gal-la lazru' ca da chawe' da nune̱' chiu'.
PSA 103:3 Dxunite lawe̱' chee̱ xúgute̱ dul-la nabaga'a. Dxexune̱' neda' ca naca xúgute̱ xízrawe̱' da xu'a.
PSA 103:4 Dxuxúe̱' neda' chee̱ quebe gatia'. Lu xel-la' zri'i lazre' chee̱', ne xel-la' dxexache lazre' chee̱' dxune̱' chawe' chia'.
PSA 103:5 Dxuzánle̱'e̱ da chawe' da dxaca chia' chee̱ xegá'ana' benne' cuide', ne benne' wal-la ca dxaca chee̱ tu bsia.
PSA 103:6 Xránadxu Dios dxuchi'e̱ chee̱ da dxaca chee̱ benne' dxeledée̱' da ba xa', ne dxucá'ana chawe̱' da dxaca chee̱'.
PSA 103:7 Blé'ene̱' Moisés da ca' gulú'u lazre̱' gune̱', ne be̱'e̱ lataj benne' Israel ca' belelé'ene̱' da ca' be̱ne̱'.
PSA 103:8 Naca Xránadxu Benne' dxexache lazre', ne Benne' zri'i lazre'. Quebe dxezrá'azie̱', san zrente̱ naca xel-la' zri'i lazre' chee̱'.
PSA 103:9 Quebe nníaqueze̱', ne quebe zrá'aqueze̱'.
PSA 103:10 Quebe dxudée̱' dxi'u lu da ba xa' ca naca zria da nabágadxu, ne quebe ne guzría xi'e̱ dxi'u ne̱ chee̱ dul-la da nabágadxu.
PSA 103:11 Ca sibe naca xabáa lawe' xe̱zr la xu, caníqueze naca xel-la' zri'i lazre' zren chee̱' nen benne' ca' dxelape̱' Le̱' ba lá'ana.
PSA 103:12 Ca zitu' naca naga dxalaj gubizra, ne naga dxebía na, caníqueze dxucuase̱' zitu' dul-la da nabágadxu.
PSA 103:13 Ca zri'i lazre' naca xra bidu ca' nen zrí'inequeze̱', caníqueze naca zri'i lazre' Xránadxu nen benne' ca' dxelape̱' Le̱' ba lá'ana.
PSA 103:14 Le̱' nézene̱' ca nácadxu lu be̱la' dxen chee̱dxu. Dxajsá lazre̱' nácadxu xu xrte.
PSA 103:15 Ca naca xel-la' nabán chee̱dxu, nácadxu ca tu xixre'. Dxegúladxu ca tu xiaj xixre',
PSA 103:16 na' dxedé be' dxua na le̱ na, na' dxexenite na, na' québedxa nu dxelé'equeze le̱ na.
PSA 103:17 Ca naca chee̱ benne' ca' dxelape̱' ba lá'ana Xránadxu, zúale̱ xel-la' zri'i lazre' chee̱' benne' ca' chadía chacanna, na' xel-la' xrlátaje chee̱' zúale̱queze na xúgute̱ zri'ine zre sua benne' ca',
PSA 103:18 benne' ca' dxelúnqueze̱' ca naca xel-la' wezría nune̱', ne benne' ca' dxelune̱' ca zaj naca da nadxixruj be'e̱.
PSA 103:19 Nuzúa Xránadxu lataj chee̱' xabáa naga dxe'e̱ dxenná be'e̱. Nácaqueze̱' Wenná Bea lawe' xúgute̱ da zaj zua.
PSA 103:20 Le güe lá'ana Xránadxu, le'e, gubáz chee̱ xabáa ca', Nácale benne' wal-la, ne benne' chúchule̱'e̱, na' dxunle ca dxenná Le̱', ne dxuzé̱ nágale ca dxe̱'e̱ le'e.
PSA 103:21 Le güe lá'ana Xránadxu, le'e, dxenná beale xabáa. Nácale we̱n zrin chee̱', ne dxunle ca dxaca lazre' Le̱'.
PSA 103:22 Le güe lá'ana Xránadxu, xúgute̱le le'e ba nun Dios le'e, zrale xúgute̱ lataj naga dxenná bea Le̱'. ¡Be̱ lá'ana Xránadxu, lue', bénne'du xu'a!
PSA 104:1 Be̱ lá'ana Xránadxu Dios, lue', bénne'du xu'a. ¡Xrana' Dios, szrente̱ nacu' Lue'! Nacu' zra lanu' da xabáa, ne da xrtante̱.
PSA 104:2 Dxugacu cuinu' xel-la' naxaní' ca zra lanu'. Dxechilju' xabáa ca tu xu'u ladxe' chiu'.
PSA 104:3 Nunu' lizru' lawe' nisa da ze̱ ná'ala. Dxuchínenu' beuj ca' ca tu da dxudé xua naga dxe'u Lue', da dxedá na lu be'.
PSA 104:4 Dxuchínenu' be' ca' ca gubáz chiu' ca', ne xesa ca' ca we̱n zrin chiu' ca'.
PSA 104:5 Bzua chuchu' xe̱zr la xu nigá lu lane na, na' quebe nu gaca gutá le̱ na.
PSA 104:6 Bgacu' xe̱zr la xu nigá nen nísadau' ca dxun tu benne' dxacue̱' zra lane̱', na' nisa na' bgacu na xi'a ca'.
PSA 104:7 Gate gudil-lu' nisa na', na' bzrunnuj na. Bebiga na gate ben na chi'u zizraj.
PSA 104:8 Nisa na' bgacu na xi'a ca' xajxedxé na dxu'a xe̱gu ca', lataj ca' ba nunu' chee̱ nisa na'.
PSA 104:9 Bzu' naga ze lau cheajsé̱ na, naga québedxa gaca te na, chee̱ québedxa gacu na xe̱zr la xu bizre na'.
PSA 104:10 Dxunu' beaj ca' dxelalaj na dxu'a xé̱gudu ca', ne xe̱gu ca' dxeledé na ládujla xi'a ca'.
PSA 104:11 Lu xe̱gu ca' dxelé'aj be̱ xixre' ca' nisa, na' dxegúa na xel-la' dxelebile chee̱ burro xixre' ca'.
PSA 104:12 Lu xaga zaj nnita dxu'a xe̱gu ca' zaj zra' béadu ca' zaj zua xrila. Dxelúl-laba' ládujla zruze na ca'.
PSA 104:13 Zran xabáa dxesel-lu' xiuj da dxaca na lu xi'a ca', na' dxezrate̱ xe̱zr la xu na' ca naca da xrlátaje da dxunu'.
PSA 104:14 Dxusegulu' xixre' da dxelagu be̱zre ca', ne xíxre'du ca' da dxelagu bénneache, ne da ca' dxuluchine bénneache dxelune̱' xel-la' wagu,
PSA 104:15 ne uva ca' da dxelune̱' xrise uva wal-la da dxuzúa na bénneache ca' xel-la' dxelebé, ne olivo ca' da dxelune̱' da za da dxelegú'e̱ xíchaje̱', ne zrua' da dxelune̱' xeta chee̱ xelaca bane̱'.
PSA 104:16 Xaga cedro ca' da zaj zua na xi'a Líbano dxelezíle̱'e̱ na nisa xiuj. Zaj naca na xaga chee̱ Xránadxu Dios, da ca' guza Le̱'.
PSA 104:17 Lu xaga ca' dxuluzría bxínnedu ca' xrú'uneba', na' lu zruze na ca' zaj zua lizre bxuze' ca'.
PSA 104:18 Zaj zua chivo xi'a ca' lu xi'a zri'a ca', na' lu bluaj ca' chee̱ xi'a ca' zaj zua bzrizru' ca'.
PSA 104:19 Be̱nu' beu' da dxulé'e na tu beu' tu beu' chee̱ iza, na' gubizra núnbea na gate dxal-la' cuía na.
PSA 104:20 Be̱nu' dxe̱la, na' gate bache nachul-la, na' dxeledxúaj be̱ dxe̱la ca'.
PSA 104:21 Dxelebezre xa'a be̱zre xixre' ca', zaj nauba' be̱ xeláguba'. Dxelílajba' da nun Dios xeláguba'.
PSA 104:22 Gate dxalaj gubizra, na' dxelexezrinba' lu bluaj chee̱ba', naga dxeláseba' te zra.
PSA 104:23 Nadxa dxeledxúaj bénneache dxelune̱' zrin, na' dxelúnqueze̱' zrin ca dxebía gubizra.
PSA 104:24 Xran, da zante̱ zaj naca da be̱nu'. Dute̱ xel-la' sina chiu' be̱nu' da ca'. Nazrate̱ xe̱zr la xu nigá da ca' be̱nu'.
PSA 104:25 Na' zua nísadau', da zri'a, ne da laga, naga zaj xu'u zánete̱ bea ca', béadu ca', ne be̱ zri'a ca'.
PSA 104:26 Lu nísadau' na' zaj zra' da dxeledá lawe' nísadau' ca'. Zua be̱ zri'a na' be̱nu' Lue', nazí' laba' leviatán.
PSA 104:27 Xúgute̱ bea ca' dxuluxrén lázreba' Lue', chee̱ gunézruju' da xeláguba' ca zrin chee̱ na.
PSA 104:28 Dxunézruju' le̱ba', na' dxelecá'aba' na. Dxunézruju' da dxeláguba', na' dxeléljeba'.
PSA 104:29 Gate quebe dxenná'u-ba', na' dxelezrébeba'. Gate dxucuasu' be' dxelecá'aba', na' dxeláteba', ne dxelexácaba' xu xrte.
PSA 104:30 Gate dxesel-lu' be' chiu', na' xelexaca banba'. Dxunézruju' xel-la' nabán cube chee̱ da ca' zaj zua xe̱zr la xu nigá.
PSA 104:31 ¡Chadía chacanna gaca ba Xránadxu Dios! Dxezaca ba lazre' Xránadxu chee̱ da ca' ba núnqueze̱'.
PSA 104:32 Dxenné̱'e̱ xe̱zr la xu nigá, na' dxezrú' na. Dxuté̱' xi'a ca', na' dxeledxúaj na zren.
PSA 104:33 Gúl-laqueza' chee̱ Xránadxu dxácate̱ na' naca bana'. Xúgute̱ zra zúaqueza' neda' gul-la' da güe lá'ana' Dios chia'.
PSA 104:34 Chawe' naca chia' da ca' dxulaba lazra' ca naca chee̱', na' dxebéle̱'e̱da' ne̱ chee̱ Xrana' Dios.
PSA 104:35 Welebía xi' benne' dul-la ca' zaj zre̱'e̱ lu xe̱zr la xu nigá, Na' québedxa cha benne' ca' dxelebéaj xíchaje̱' Dios. ¡Be̱ lá'ana Xránadxu Dios, lue', bénne'du xu'a! ¡Le güe lá'ana Xránadxu!
PSA 105:1 ¡Le güe lá'ana Xránadxu Dios! ¡Le gucá'ana szren La Le̱'! ¡Le guzén bénneache dute̱ xe̱zr la xu ca naca da nune̱'!
PSA 105:2 ¡Le gul-la chee̱'! ¡Le gul-la da güe lá'anale Le̱'! ¡Le guchalaj chee̱ da zrente̱ ca' da nune̱'!
PSA 105:3 ¡Le be lu da naca chee̱'! Xúgute̱ benne' ca' dxelapa ba lá'ana Xránadxu dxal-la' xelebéle̱'e̱ne̱'.
PSA 105:4 Le naba Xránadxu gácale̱ne̱' le'e. Tu zra tu zra le guxrén lazre' Xránadxu Dios.
PSA 105:5 Le'e, zri'ine zre sua Abraham, we̱n zrin chee̱ Xránadxu. Le'e, zri'ine zre sua Jacob, bénnea' guqué̱'e̱, Le gusá lazre' xel-la' waca ca', ne da zrente̱ ca' da be̱ne̱', ne ca naca da bchi'e̱ chee̱le.
PSA 105:7 Le̱' naque̱' Xránadxu, ne Dios chee̱dxu. Le̱' dxenná bé'ene̱' bénneache zaj zre̱'e̱ dute̱ xe̱zr la xu.
PSA 105:8 Lácala te chee̱ chi gaxúa cuen bénneache, québequeze gal-la lazre̱' da guche̱be lazre̱' lu xel-la' wezría chee̱',
PSA 105:9 xel-la' wezría na' bé̱nle̱ne̱' Abraham, da na' bzetaj cuine̱' guche̱be lazre̱' chee̱ Isaac,
PSA 105:10 na' bzua chúchue̱' na ca tu da nadxixruj bea na, da gun Jacob, da gaca na tu xel-la' wezría da zeajlí canna nen benne' Israel ca',
PSA 105:11 da be̱ne̱' gate na' gunné̱': “Chiu' lue' gunna' xe̱zr la xu chee̱ benne' Canaán ca', da gaca na tu da xudele lu na' zri'ine zre súale.”
PSA 105:12 Gate na' bábaze zaj naque̱' gulezré̱'e̱ lu xe̱zr la xu nigá ca benne' zitu' ca',
PSA 105:13 ne guledée̱' tu xe̱zr la xu xetú xe̱zr la xu, ne tu xe̱zre xetú xe̱zre.
PSA 105:14 Quebe be̱' Dios lataj nu benne' bi gune̱' chee̱ bénneache chee̱', na' ne̱ chee̱ benne' ca' gudil-le̱' benne' wenná bea ca'.
PSA 105:15 Guzre̱' le̱': “Quebe bi gunle chee̱ benne' ca' gucá'a, ne quebe gunle da cale̱la chee̱ benne' ca' dxuluchalaje̱' waláz chia'.”
PSA 105:16 Be̱ne̱' guta' tu gubina' lu xe̱zr la xu na', na' gudúe̱' ca naca xeta xelawe̱'.
PSA 105:17 Gusel-le̱' tu benne' cuía lawe̱' lau benne' chie̱' ca', bénnea' naque̱' José, bi na' belutie̱'-be' chee̱ gácabe' we̱n zrin chee̱ benne' zitu'.
PSA 105:18 Buluzré̱'e̱ ní'abe' lu xe̱dxu chee̱ cuaga da be̱xru na ní'abe', gate na' gulu'e̱-be' lizre xia lu xe̱zr la xu Egipto,
PSA 105:19 ca bzrin zra guca li ca da gunná José dxal-la' gaca. Caní guca, ble'e xrtizra' Xránadxu cúnnabe' da li.
PSA 105:20 Nadxa benne' wenná bea chee̱ Egipto gusel-le̱' nu gusán José na'. Bénnea' dxenná bé'ene̱' zánete̱ cue' xe̱zr la xu bsane̱'-be'.
PSA 105:21 Bzue̱'-be' gácabe' xrana benne' zaj zre̱'e̱ lizre̱', ne chee̱ nna be'ebe' ca naca da xu'u lu ne̱'e̱,
PSA 105:22 chee̱ tíl-labe' benne' szren ca' chee̱ wenná bea cáte̱ze dxaca lázrebe', ne chee̱ guzéajni'ibe' benne' gula chee̱ xe̱zr la xu Egipto chee̱ xelaque̱' benne' sina.
PSA 105:23 Gudé na' gulu'e̱ benne' Israel ca' lu xe̱zr la xu Egipto, na' guzúa Jacob lu xe̱zr la xu chee̱ zri'ine zre sua Cam.
PSA 105:24 Gulánle̱'e̱ bénneache chee̱ Xránadxu lu xe̱zr la xu na', na' be̱ne̱' gulaque̱' wál-ladxa ca benne' guledábague̱' Le̱'.
PSA 105:25 Bcha Dios lázxdau benne' Egipto ca' chee̱ xelecuídene̱' bénneache chee̱', chee̱ xelegú'u lazre̱' xelune̱' da cale̱la chee̱ we̱n zrin chee̱' ca'.
PSA 105:26 Nadxa gusel-le̱' Moisés, we̱n zrin chee̱', lau bénneache chee̱' ca', ne Aarón, bénnea' guqué̱'e̱.
PSA 105:27 Benne' caní be̱'e̱ Dios lataj belune̱' xel-la' waca ca' chee̱ xabáa, ne xel-la' waca zrente̱ ca' lu xe̱zr la xu chee̱ zri'ine zre sua Cam.
PSA 105:28 Gusel-la Dios tu da chul-la da bgacu na dute̱ xe̱zr la xu na', san benne' Egipto ca' quebe buluzúe̱' dizra' da gunná be'ene̱' le̱'.
PSA 105:29 Nadxa be̱ne̱' bexaca nisa xe̱gu chee̱ benne' ca' dxen, ne be̱tie̱' xúgute̱ bela zaj zraba' xe̱gu ca'.
PSA 105:30 Busezrate̱' xe̱zr la xu chee̱' bluzru ca' ga bzrinte̱ gulezraba' xu'u lizre benne' wenná bea chee̱ benne' Egipto ca'.
PSA 105:31 Gunnaze Dios, na' belelá' zánete̱ be'a chee̱ be̱zre, ne be'a lase ca' dute̱ lu xe̱zr la xu chee̱ benne' ca'.
PSA 105:32 Waláz chee̱ nisa xiuj gusel-le̱' xiaj bezxe' lu xe̱zr la xu chee̱ benne' ca', ne xi' da bzezxe na ca naca xe̱zr la xu chee̱'.
PSA 105:33 Bzria xi'e̱ ca zaj naca lba uva chee̱', ne ca zaj naca xaga higo chee̱', na' bzúzxuje̱' ca zaj naca xaga zaj ze̱ lu xe̱zr la xu chee̱'.
PSA 105:34 Gunnaze̱', na' belelá' biche zu ca', da quebe nu seque' gulaba le̱ba',
PSA 105:35 na' guláguba' dute̱ xixre' xa'a lu xe̱zr la xu chee̱', ne guláguba' dute̱ lina da dxunna xe̱zr la xu na'.
PSA 105:36 Nadxa be̱tie̱' xúgute̱ bi biu nedxu chee̱ benne' Egipto ca', bi zaj nácabe̱' bi blau chee̱'.
PSA 105:37 Bebéaje̱' bénneache chee̱' na' zaj nu'e̱ dumí plata, ne dumí oro, na' quebe nu chilá' benne' ládujla le̱', benne' quebe chawe' zue̱'.
PSA 105:38 Gulebé benne' Egipto ca' gate beledxúaj benne' ca' ga na', lawe' da belezrébele̱'e̱ le̱'.
PSA 105:39 Bzalaj Dios tu beuj da gulú'u na benne' ca' zrul-la, ne tu xi' da bsaní na chee̱' chizrela.
PSA 105:40 Gulenabe̱' Dios, na' gusel-le̱' chee̱' btau ca', ne be̱ne̱' gulélajene̱' xeta da bdxuaj na xabáa.
PSA 105:41 Gule̱'e̱ tu xiaj xre, na' gulaj nisa da gudé na lu xe̱zr la xu bizre na' ca tu xe̱gu nisa.
PSA 105:42 Caní be̱n Dios lawe' da bsa lazre̱' xrtizre̱' lá'azxa da guche̱be lazre̱' gune̱' chee̱ Abraham, we̱n zrin chee̱'.
PSA 105:43 Bebéaje̱' bénneache chee̱' lu xe̱zr la xu Egipto, dxelebene̱'. Lu da ba neza gulezrá' benne' ca' guqué̱'e̱.
PSA 105:44 Bnézruje̱' benne' ca' xe̱zr la xu chee̱ benne' xezica ca', na' da belún benne' xe̱zr la xu ca' bexaca na chee̱ benne' chee̱' ca',
PSA 105:45 chee̱ xulupá'ane̱' ca naca xrba chee̱' ca', ne xelune̱' ca naca da gunná bé'ene̱' ca'. ¡Gaca ba lá'azxa Xránadxu Dios!
PSA 106:1 ¡Gaca ba lá'azxa Xránadxu Dios! ¡Le xe̱ Xránadxu Dios: “Xcalenu'!” Caní dxal-la' gunle lawe' da naque̱' xrlátaje, ne lawe' da tu chí'izqueze dxexache lazre̱' dxi'u.
PSA 106:2 ¿Núzraqueze seque' gulé'ene̱' ca naca xel-la' waca zrente̱ ca' da nune̱' Xránadxu? ¿Núzraqueze seque' güe lá'ane̱' Le̱' ca dxal-la' gundxu?
PSA 106:3 Ba neza zrente̱ naca na chee̱ benne' ca' dxelune̱' da xrlátaje, benne' ca' tu dxelúnzqueze̱' da naca xrlátaje.
PSA 106:4 Bsa lazre' chia', Xrana' Dios, gate dxunu' da chawe' chee̱ bénneache chiu'.
PSA 106:5 Gudá bselá neda' chee̱ gaca le'eda' da chawe' gunu' chee̱ benne' ca' ba guca'u Lue', ne chee̱ beda' gate xelezrá' bénneache chiu' lu da ba neza, ne chee̱ béle̱na' bénneache chiu'.
PSA 106:6 Ba be̱ntu' dul-la cáqueze belún xra xrtáuntu' ca'. Be̱ntu' da cale̱la, ne be̱ntu' da zrinnaj.
PSA 106:7 Gate gulezrá' xra xrtáuntu' lu xe̱zr la xu Egipto, quebe bululaba lazre̱' ca naca xel-la' waca ca' chee̱ xabáa da be̱nu'. Quebe xeajlesá lazre̱' ca bexache lázrele̱'u le̱'. Guledábague̱' Lue' dxu'a nísadau' da nazí le na Xrna.
PSA 106:8 Le̱' bselé̱' benne' ca' chee̱ gaca ba lá'ana La Le̱', ne chee̱ gulé'e lau ca naca xel-la' waca chee̱'.
PSA 106:9 Gudil-le̱' nísadau' Xrna na', na' bebizre na, na' guledé bénneache chee̱' laduj nísadau' na' lu xu bizre.
PSA 106:10 Bselé̱' benne' ca' lu na' benne' guledábague̱' Le̱', ne bebéaje̱' le̱' lu na' benne' ca' bulusaca zi'e̱ le̱'.
PSA 106:11 Nadxa nísadau' na' bgacu na benne' ca' guledábague̱' le̱'. Netú benne' ca' quebe nu begá'ana.
PSA 106:12 Nadxa benne' chee̱' ca' guléajle̱'e̱ dizra' chee̱', ne belul-le̱' da belúe lá'ane̱' Le̱'.
PSA 106:13 Chadí gulal-la lazre̱' ca da be̱ne̱'. Quebe gulebeze̱' ca la' dizra' chee̱ Dios.
PSA 106:14 Gulezá lazre̱' tu da cale̱la le̱'e̱ xixre' lawe' lataj na', na' buluché̱'e̱ Dios le̱'e̱ xixre' na'.
PSA 106:15 Gudé na' bnezruj Dios ca da gulenabe̱', san gusel-le̱' ládujla le̱' tu da gute na bal-la benne' ca'.
PSA 106:16 Gulaque̱' xa lazre' chee̱ Moisés naga zaj zre̱'e̱, ne chee̱ Aarón, Bénnea' gucá'a Xránadxu Dios.
PSA 106:17 Nadxa bzra xe̱zr la xu na', ne gude̱be na Datán, ne bgacu na benne' ca' zaj de̱'e̱ Abiram.
PSA 106:18 Nadxa guxalaj xi' naga zaj nazraga benne' ca', na' bzezxe na benne' ca' dxelune̱' da cale̱la.
PSA 106:19 Belune̱' tu bedáu' be̱zre da naca na oro lu xi'a Horeb, na' buluzú zribe̱' lau bedáu' oro na'.
PSA 106:20 Caní bulucá'ane̱' Dios, Benne' xabáa, chee̱ xulucá'ana szrene̱' tu bedáu' be̱zre, da naca na ca tu be̱zre dxáguba' xixre'.
PSA 106:21 Gulal-la lazre̱' Dios, Bénnea' bselé̱' le̱', Bénnea' be̱ne̱' xel-la' waca zrente̱ ca' lu xe̱zr la xu Egipto,
PSA 106:22 ne be̱ne̱' xel-la' waca ca' chee̱ xabáa lu xe̱zr la xu chee̱ zri'ine zre sua Cam, ne da ca' buluchebe na dxi'u dxu'a Nísadau' Xrna.
PSA 106:23 Nadxa guca lazre' Dios guzría xi'e̱ bénneache chee̱', san Moisés, bénnea' gucá'a Dios, bzua cuine̱' lau Dios chee̱ guzúa zrie̱' xel-la' dxezrá'a chee̱ Dios, na' be̱ne̱' quebe guzría xi' Dios benne' ca'.
PSA 106:24 Buluzúe̱' chalá'ala xe̱zr la xu xrtante̱ da gunezruj Dios le̱', ne quebe guléajle̱'e̱ dizra' chee̱'.
PSA 106:25 Tu gulenné̱zqueze̱' chee̱ Dios lu xu'u xide chee̱' ca', ne quebe buluzé̱ nague̱' da gunná Xránadxu Dios.
PSA 106:26 Chee̱ le̱ na' bzetaj cuine̱' gunné̱' ca da gune̱' chee̱ benne' ca'. Gunné̱' gune̱' xelate benne' ca' le̱'e̱ xixre' lawe' lataj na',
PSA 106:27 ne gusi'e̱ bénneache chee̱' lu xel-la' stu' lau benne' xe̱zr la xu ca', ne guse dínnaje̱' le̱' ládujla benne' xe̱zr la xu ca'.
PSA 106:28 Nadxa belune̱' tuze benne' ca' dxulucá'ana szrene̱' bedáu' xia nazí le na Baal-peor, ne gulawe̱' béadu ca' belútie̱' lau dios gate ca'.
PSA 106:29 Buluche̱'e̱ Dios ne̱ chee̱ da belune̱', na' guxalaj tu xízrawe̱' zren da be̱te na benne' zan benne' ca'.
PSA 106:30 Nadxa guxasa Finees, ne be̱tie̱' bénnea' be̱ne̱' dul-la, na' guleza xízrawe̱' zren na'.
PSA 106:31 Da na' be̱n Finees guzí' Dios ca tu da dxucá'ana xrlátaje na bénnea', da gulé'e lawe na lau xúgute̱ cuen bénneache ca'.
PSA 106:32 Cá'anqueze buluché̱'e̱ Dios dxu'a beaj nisa nazí le na Meriba, na' guca da cale̱la chee̱ Moisés ne̱ chee̱ benne' ca',
PSA 106:33 lawe' da ne̱ chee̱ da belune̱' guca Moisés xichaj zra'a, na' bexúbete̱ Moisés da gunné̱'.
PSA 106:34 Gate gulu'e̱ lu xe̱zr la xu nigá quebe buluzría xi'e̱ bénneache zaj nite̱' ga na'. Caní guca, quebe belune̱' ca da guzre Dios le̱' xelune̱'.
PSA 106:35 Gulaque̱' tuze benne' xe̱zr la xu ca', ne bulusé̱die̱' benne' Israel ca' xelune̱' ca dxelún benne' ca',
PSA 106:36 na' bulucá'ana szrene̱' bedáu' xia xaga ca' chee̱ benne' ca', da na' be̱n na bxrinnaj Dios bénneache chee̱'.
PSA 106:37 Belútie̱' zrí'ine̱' bi biu, ne bi nu'ula chee̱' lau bedáu' chee̱ da xriwe̱' ca',
PSA 106:38 ne bululálaje̱' dxen chee̱ bi dxé'enedu ca', bi quebe zaj nunbe' dul-la, da naca na dxen chee̱ zrí'ine̱' bi biu, ne bi nu'ula, bi ca' belútie̱' lau bedáu' xia xaga ca' chee̱ bénneache Canaán, na' guca sban xe̱zr la xu na' ne̱ chee̱ dxen chee̱ bidu ca'.
PSA 106:39 Da ca' belune̱' be̱n na le̱' sban, na' gulebéaj xíchaje̱' Dios lu da belune̱'.
PSA 106:40 Chee̱ le̱ na' bzrá'ale̱'e̱ Dios bénneache chee̱', na' gucuídene̱' benne' ca' zaj naca chee̱'.
PSA 106:41 Nadxa bdee̱' benne' ca' lu na' benne' xe̱zr la xu ca', na' benne' ca' dxelecuide bénneache chee̱ Dios gulenná bé'ene̱' le̱'.
PSA 106:42 Benne' ca' guledábague̱' le̱' bulusaca zi'e̱ bénneache chee̱ Dios, ne buluxrínnaje̱' le̱' lu xel-la' dxenná bea chee̱'.
PSA 106:43 Zánete̱ lasa Dios bselé̱' bénneache chee̱' ca', san guledábague̱' ca da bsízrene̱' le̱', na' gulape̱' xel-la' stu' lawe' da belune̱' da cale̱la.
PSA 106:44 Lácala caní belune̱', gate gulezré̱'e̱ lu da ste̱be, Dios gunné̱'e̱ ca da dxelezaque̱', ne benne̱' ca da bululáwizre̱' Le̱',
PSA 106:45 na' xeajsá lazre̱' xel-la' wezría da bé̱nle̱ne̱' benne' ca', na' bexíaje lazre̱' chee̱ xel-la' dxezrá'a chee̱' lawe' da nácale̱'e̱ benne' dxexache lazre'.
PSA 106:46 Cá'anqueze be̱ne̱' belexache lazre' benne' ca' benne' ca' guleché̱'e̱ le̱' ca benne' zaj nada'u.
PSA 106:47 ¡Bselá netu', Xránantu', nacu' Dios chee̱ntu'! ¡Becá'a netu' ládujla benne' xe̱zr la xu ca', chee̱ güe lá'anantu' Lau' lá'azxa, ne chee̱ béle̱'e̱ntu' lu da dxúl-lantu' chiu'!
PSA 106:48 Cháwedau' naca Xránadxu, Bénnea' naque̱' Dios chee̱ benne' Israel ca' nédxudaute̱, ne chadía chacanna. Xúgute̱ bénneache dxal-la' xelenné̱': ¡Ca'an gaca na! ¡Gaca ba lá'azxa Xránadxu Dios!
PSA 107:1 ¡Le güe lá'ana Xránadxu, Benne' xrlátaje! ¡Chadía chacanna naque̱' Benne' zri'i lazre'!
PSA 107:2 Da nigá dxal-la' xelenná benne' ca' ba naxá'awe Xránadxu le̱', benne' ca' bselé̱' lu na' benne' guledábague̱' Le̱'.
PSA 107:3 Beche̱'e̱ le̱' naga gulezrá' benne' xe̱zr la xu zitu' ca', da zaj zua naga dxalaj gubizra, ne naga dxebía na, ne naga za' be' zaga, ne naga dxedé gubizra beu' zaga ca'.
PSA 107:4 Bal-la benne' ca' guledé̱' le̱'e̱ xixre' naga quebe bi neza zua, ne quebe belezrelne̱' xe̱zre naga xelezúe̱'.
PSA 107:5 Guledune̱', ne gulebílene̱', ne québedxa bi gulebeza lazre̱'.
PSA 107:6 Nadxa lu da dxelezaque̱' gulenné̱' Xránadxu, na' bselé̱' benne' ca' lu da dxelezaque̱'.
PSA 107:7 Na' buzre̱'e̱ le̱' tu neza li, chee̱ chjaque̱' tu xe̱zre naga xelezúe̱'.
PSA 107:8 Dxal-la' xelúe lá'ane̱' Xránadxu lawe' da bexache lazre' Xránadxu le̱', ne lawe' da be̱ne̱' chee̱' da ca' da dxebánedxu.
PSA 107:9 Dxuxí'aje̱' benne' ca' dxelebile lazre', ne dxugawe̱' benne' ca' dxeledún nen da chawe' chee̱'.
PSA 107:10 Bal-la benne' caní gulezúe̱' lu da chul-la, ne lu da ste̱be chee̱ xel-la' gute. Gulaque̱' ca benne' zaj xu'e̱ lizre xia, ne zaj nadxéaj du xia, ne dxeledée̱' ba xa',
PSA 107:11 lawe' da guledábague̱' xrtizra' Xránadxu, ne buluzúe̱' chalá'ala da bzéajni'i Dios zrente̱ le̱'.
PSA 107:12 Belexedú lazre̱' lu zrin zí'ite̱ da dxelune̱'. Xeleajcházie̱' zran xua da zaj nu'e̱, ne quebe nu chilá' gácale̱ne̱' le̱'.
PSA 107:13 Nadxa lu da dxelezaque̱' gulenné̱' Xránadxu, na' bselé̱' benne' ca' lu da dxelezaque̱'.
PSA 107:14 Nadxa bebéaje̱' benne' ca' lu da chul-la ne lu da ste̱be chee̱ xel-la' gute, ne bzúzruje̱' du xia ca' da zaj nadxéaje̱'.
PSA 107:15 Dxal-la' xelúe lá'ane̱' Xránadxu lawe' da bexache lazre̱' le̱', ne lawe' da be̱ne̱' chee̱' da ca' da dxebánedxu.
PSA 107:16 Bchínnaje̱' dxa xu'u ca' zaj naca na xia gache, ne bzúzruje̱' xia ca' da zaj naxechaj na benne' ca'.
PSA 107:17 Bal-la benne' ca' gulaque̱' benne' xala, ne guledée̱' xel-la' zi' ne̱ chee̱ dul-la da zaj nabague', ne ne̱ chee̱ da zrinnaj ca' da belune̱'.
PSA 107:18 Belexegútene̱' da dxelé'aj dxelawe̱', na' xáteze ca gulátie̱'.
PSA 107:19 Nadxa lu da dxelezaque̱' gulenné̱' Xránadxu, na' bselé̱' benne' ca' lu da dxelezaque̱'.
PSA 107:20 Gusel-le̱' dizra' chee̱' chee̱ benne' ca', na' bexune̱' le̱', ne bselé̱' le̱' lu xel-la' gute.
PSA 107:21 Dxal-la' xelúe lá'ane̱' Xránadxu lawe' da bexache lazre̱' le̱', ne lawe' da be̱ne̱' chee̱' da ca' da dxebánedxu.
PSA 107:22 Dxal-la' xelé̱'e̱ Le̱': Xcalenu'. Dxal-la' xelú'e̱ da xulunézruje̱' Le̱', na' lu xel-la' dxelebé chee̱' dxal-la' xelúl-le̱', ne xuluzenne̱' bénneache ca zaj naca da nune̱'.
PSA 107:23 Bal-la benne' ca' guledée̱' lu nísadau' lu da zren ca' da dxedá lawe' nísadau'. Belezi'e̱ dumí zren lu zrin dxelune̱' lu nísadau'.
PSA 107:24 Belelé'ene̱' ca naca da ca' dxun Xránadxu, da ca' dxune̱' lu nísadau' da zaj naca na da dxebánedxu.
PSA 107:25 Gunné̱ze̱', na' guzú lau dxaca be' bdunu', na' gulasa xeajxruza zren lu nísadau'.
PSA 107:26 Belegüén da dxedá lawe' nísadau' ca' ca lu xi'a zri'a da naca na nísadau', na' belexexetaj na lu da situj lawe' nísadau' na'.
PSA 107:27 Gulechégüe̱', ne xeajleté̱' ni xeajleté̱' na' ca benne' dxelezuzre, na' guca dácheze ca da zaj nusé̱die̱'.
PSA 107:28 Nadxa lu da dxelezaque̱' gulenné̱' Xránadxu, na' bselé̱' benne' ca' lu da dxelezaque̱'.
PSA 107:29 Bzua zrie̱' be' bdunu' na' da dxaca na, ne gulezúa zri xeajxruza chee̱ nísadau' na'.
PSA 107:30 Gulebéle̱'e̱ne̱' lawe' da zaj zua zri xeajxruza ca', na' guché̱'e̱ Dios le̱' cháwedau' naga zjaque̱'.
PSA 107:31 Dxal-la' xelúe lá'ane̱' Xránadxu lawe' da bexache lazre̱' le̱', ne lawe' da be̱ne̱' chee̱' da ca' da dxebánedxu.
PSA 107:32 Dxal-la' xuluzenne̱' ca naca xel-la' szren chee̱' naga zaj nazraga bénneache chee̱', ne xelúe lá'ane̱' Le̱' naga zaj nazraga benne' gula ca', benne' dxelenná be'e̱.
PSA 107:33 Be̱n Xránadxu gulebizre xe̱gu nisa ca', ne busú'aje̱' beaj nisa ca'.
PSA 107:34 Xu xa'a bexune̱' na xu bizre, ne̱ chee̱ da cale̱la da belún benne' ca' zaj zre̱'e̱ na'.
PSA 107:35 Naga naca xu bizre bexune̱' na xu nisa, na' xu xiaj bexune̱' na naga dxalaj nisa.
PSA 107:36 Bzre̱'e̱ ga na' benne' ca' benne' dxeledún, na' belune̱' tu xe̱zre naga xelezúe̱'.
PSA 107:37 Gulaze̱' xe̱zr la xu na', na' belexaze̱' lba uva ca', na' belexezí'le̱'e̱ lina chee̱ na.
PSA 107:38 Be̱ne̱' da chawe' chee̱ benne' ca', na' gulánle̱'e̱ bidu chee̱' ca', ne quebe be̱'e̱ lataj xelelase ca zaj naca be̱ xixre' chee̱' ca'.
PSA 107:39 Gate buludé benne' dxelenná bea benne' ca' lu xel-la' zi', ne bulusaca zi'e̱ le̱', ne gulenná bé'edxene̱' le̱', ne belune̱' le̱' da cale̱la, ne buludée̱' le̱' lu da ba xa',
PSA 107:40 bca'ana ditaj Dios benne' xíchaje̱ ca', ne be̱ne̱' guledée̱' le̱'e̱ xixre' lawe' lataj naga quebe bi neza de̱.
PSA 107:41 Bselé̱' benne' xache' ca' lu da zi' da xa' da dxeledée̱', ne bzánle̱'e̱ zri'ine benne' ca' ca dxelán zrila' ca'.
PSA 107:42 Gate dxelelé'e benne' xrlátaje ca' da caní, na' dxelebéle̱'e̱ne̱', na' benne' ca' dxelune̱' da cale̱la quebe bi gaca xelenné̱'.
PSA 107:43 Benne' ca' zaj naque̱' sina dxal-la' xulaba lazre̱' ca zaj naca da caní, ne dxal-la' xelexúnbe'e̱ ca naca xel-la' zri'i lazre' chee̱ Xránadxu.
PSA 108:1 Ba zúate̱queze lázrdawa', Dios, chee̱ gúl-laqueza' da güe lá'ana' Lue'. Da nigá dxugú'u na neda' lu da ba neza.
PSA 108:2 Bebán lazre', bénne'du xu'a, na' le xebán lázrele, le'e dxínnele da dxúl-lale̱nle, ne da con zríadi'i na du. Che zílala cheajsá'queza'.
PSA 108:3 Güe lá'anaqueza' Lue' ládujla bénneache chiu', Xran. Gúl-laqueza' chiu' lau benne' dute̱ xe̱zr la xu,
PSA 108:4 lawe' da naca xel-la' dxexache lazre' chiu' zrendxa ca xabáa, na' da li chiu' naca na zrendxa ca beuj bza ca'.
PSA 108:5 Xegá'ana szrénquezu' xabáa, Dios. Xel-la' szren chiu' sua na lawe' dute̱ xe̱zr la xu.
PSA 108:6 Chee̱ xelelá benne' ca' nazrí'iqueznu' Lue', bselá le̱' dute̱ xel-la' waca chiu', ne bene chia'.
PSA 108:7 Lu lataj lá'azxa chee̱' gunná Dios: “Wabéquezda' neda'. Gunna' late weaj chee̱le xe̱zr la xu chee̱ benne' Siquem ca', ne gudixra' chee̱le xe̱zr la xu de̱ cuite xe̱gu Sucot.
PSA 108:8 Chia' naca xe̱zr la xu Galaad, ne chia' naca xe̱zr la xu chee̱ zri'ine zre sua Manasés. Xe̱zr la xu chee̱ zri'ine zre sua Efraín naca na ca tu da napa chi'i na xíchaja'. Xe̱zr la xu chee̱ zri'ine zre sua Judá naca na naga dxenná be'a.
PSA 108:9 Xe̱zr la xu chee̱ benne' Moab naca na ca tu zriga' da xuzru nisa guná'a, na' lu xe̱zr la xu chee̱ benne' Edom chu'una' zrela' gula. Si'a ba neza xe̱zr la xu chee̱ benne' Filistea.”
PSA 108:10 ¿Nuzra che̱' neda' chee̱ chu'a xe̱zre da naxechaj ze'e sibe? ¿Nuzra che̱' neda' chee̱ guzétaja' benne' Edom ca'?
PSA 108:11 ¿Quegá Lue' na' che̱'u neda', Dios. Nacu' Bénnea' bzua netu' chalá'ala, ne quebe guxéajle̱nu' benne' chee̱ntu' ca', benne' dxjaque̱' wedil-la, Dios?
PSA 108:12 Gúcale̱ netu' chee̱ séquentu' tíl-lale̱ntu' benne' ca' dxeledíl-lale̱ne̱' netu', lawe' da naca dácheze xelácale̱ bénneache netu'.
PSA 108:13 Tu zren nen Dios gundxu tu da zrente̱, na' Le̱' gulague̱' benne' ca' dxeledil-lale̱ne̱' dxi'u.
PSA 109:1 ¡Dios, dxue lá'ana' Lue'! Quebe xegá'anu' zrize
PSA 109:2 lawe' da dxelenná benne' ca' dxelune̱' da cale̱la, ne benne' we̱n lazre' ca' chia' neda'. Dxelenné̱' chia' da naca da we̱n lazre'.
PSA 109:3 Lu xel-la' dxelecuide chee̱' zaj naxéchaje̱' neda', ne dxelenné̱' chia'. Dxeledíl-lale̱ne̱' neda', ne quebe bi nuna' chee̱ benne' ca'.
PSA 109:4 Lácala bzri'ida' benne' ca', na'a dxeledábague̱' neda', san neda' dxenaba' gaca da chawe' chee̱ benne' ca'.
PSA 109:5 Lácala be̱na' neda' da chawe' chee̱ benne' ca', dxelune̱' chia' da cale̱la, ne lácala bzri'ida' le̱', dxelecuídene̱' neda'.
PSA 109:6 Bzua tu benne' we̱n da zrinnaj chee̱ guchi'e̱ chee̱ benne' we̱n da cale̱la ca', ne be̱n sua tu benne' nnie̱' chee̱ benne' ca', benne' guzúe̱' ca naca da cale̱la belún benne' ca'.
PSA 109:7 Gate na' zri'a chee̱', be̱n gaca bea na zaj nabague̱' zria. Ble'e da xelenabe̱' lau' ca tu dul-la da dxelune̱'.
PSA 109:8 Bzache zra xelaca ban benne' ca', ne be̱n xelú'u xezica' benne' waláz chee̱'.
PSA 109:9 Bca'ana zrí'ine̱' ca' bidau' we̱ze̱be, ne xelaca zru'ule̱' nu'ula tuze ca'.
PSA 109:10 Be̱n xelaca zrí'ine̱' bi dxeledaze chee̱ xelenábabe' guna', ne be̱n xelezrélebe' xeta xelágube' zitu' naga zaj zua lízrebe' da zaj naxinnaj.
PSA 109:11 Be̱n xelú'u da ca' zaj nape̱' lu na' bénne' ca' bulusane̱' le̱' dumí. Be̱n xelexúa benne' zitu' ca' da ca' zaj nune̱'.
PSA 109:12 Be̱n quebe nu zrel-la benne' xexache lazre̱' le̱', ne quebe nu benne' zrel-la xexache lazre̱' bidau' we̱ze̱be chee̱' ca'.
PSA 109:13 Be̱n xelebía xi' zri'ine zre sua benne' ca', ne québedxa nu cha' zri'ine zre sue̱', si' le̱' ca zaj nazi'i la benne' ca'.
PSA 109:14 Bsa lazre' ca da cale̱la da belún xra xrtawe̱', Xran, ne quebe xusulu' dul-la da gulún xrne̱'e̱ ca'.
PSA 109:15 Tu chí'izqueze bsa lazre' ca da cale̱la da zaj nune̱'. Québedxa cheajsá lazru' benne' ca'
PSA 109:16 lawe' da quebe xeleajsá lazre̱' xelexache lazre̱' le sa' ljwezre̱' ca', san bulusaca zi'e̱ benne' baxache' ca', benne' dxelexázrjene̱', ne benne' dxexruj lazre' ca', na' belútie̱' bénne'du ca'.
PSA 109:17 Beledánene̱' da dxugú'u na de', na' da caníze guca na chee̱'. Quebe gulaca lazre̱' xelenabe̱' gaca chawe' chee̱ bénneache, na' da chawe' bebiga na naga zaj zue̱'.
PSA 109:18 De' da gulegú'e̱ bénneache guca na ca tu da gulacu cuine̱', na' guxú'u na le̱'e̱ ca nisa gulé'aje̱', ne guxú'u na zrita chee̱' ca da za.
PSA 109:19 Tu chí'izqueze be̱n gaca na chee̱' ca xicha da dxelácue̱', ne gaca na ca tu xpádxue̱' dxuluchela le̱'e̱.
PSA 109:20 Gaca da nigá da quizruj Xránadxu Dios benne' ca' dxelenné̱' cale̱la chia', ne da quízruje̱' benne' ca' dxelune̱' da cale̱la, ne dxelenné̱' cale̱la chee̱ bénne'du xu'a.
PSA 109:21 Xrana' Dios, be̱n culuén chia' chee̱ xegá'ana' xrlátaje lau'. Bselá neda' lawe' da dxexache lázrele̱'u bénneache,
PSA 109:22 ne lawe' da dxezaca zi'a, ne dxexázrjeda', ne dxeque zi' lázrdawa'.
PSA 109:23 Dxedé chia' ca dxedé chee̱ tu zrul-la gate dxebía gubizra. Dxaca chia' ca dxaca chee̱ biche xuaj gate dxua be' le̱ba'.
PSA 109:24 Dxelate zriba' lawe' da dxuna' gubasa, ne nazrítale̱'a lawe' da quebe bi dxawa'.
PSA 109:25 Naca' ca tu da dxulucá'ana dítaje̱'. Dxelenné̱'e̱ neda', ne dxelún le̱' chia', dxulutá xíchaje̱'.
PSA 109:26 Gúcale̱ neda', Xrana' Dios. Bselá neda' lawe' da dxexache lazru' bénneache.
PSA 109:27 Be̱n xeleque be'ene̱' Lué'queze dxácale̱nu' neda'. Lué'queze, Xrana' Dios, ba nunu' da nigá.
PSA 109:28 Dxelegu'e̱ neda' de', san be̱n Lue' gaca chawe' chia'. Guxasa, be̱n xelexedué'e benne' ca' dxeledábague̱' neda', san be̱n beda' neda'.
PSA 109:29 Be̱n xelezrá' lu xel-la' stu' benne' ca' dxelenné̱' da cale̱la chia'. Be̱n xeleque zréajene̱' tu chí'izqueze.
PSA 109:30 Du lazra' gúl-laqueza' da güe lá'anale̱'a Xránadxu Dios. Ládujla benne' zan ca' güe lá'ana' Le̱'.
PSA 109:31 Le̱' zue̱' cuita xabe̱la chee̱ benne' xache' ca' chee̱ guselé̱' bénne'du zaj xu'e̱ lu na' benne' ca' dxuluchi'e̱ chee̱'.
PSA 110:1 Xránadxu Dios guzre̱' Xrana': “Gudxé'e chalá'a xabe̱la chia' cadxa zrin zra guna' ga benne' ca' dxeledábague̱' lue' xuluzúa zribe̱' lau'.”
PSA 110:2 Naga zu' Sión, gun Xránadxu zriluj xel-la' dxenná bea chiu'. Dxenné̱': “Gunná be'e benne' ca' dxeledábague̱' lue'.
PSA 110:3 Lu zra gate tíl-lale̱nu' benne' ca' dxeledábague̱' lue', du lázrequeze benne' chiu' ca' chjaque̱' wedil-la. Ca dxun xrle̱'e̱la chee̱ bálala, dxacu na xi'a lá'azxa, caníqueze xelaca benne' cuide' chiu' ca', xelelé̱'e̱ naga zu' xelácale̱ne' lue'.”
PSA 110:4 Guche̱be lazre' Xránadxu, ne quebe gunítie̱' xrtizre̱', gunné̱': “Chadía chacanna nacu' bxruze ca guca bxruze Melquisedec.”
PSA 110:5 Zua Xránadxu chalá'a xabe̱la chiu'. Gate zre̱'e̱, na' guzría xi'e̱ benne' wenná bea ca'.
PSA 110:6 Guchi'e̱ chee̱ benne' dute̱ xe̱zr la xu, na' gutie̱' zánete̱ benne' xe̱zr la xu ca'. Guzría xi'e̱ benne' dxelenná be'e̱ dute̱ xe̱zr la xu.
PSA 110:7 Xi'aj benne' wenná bea nigá nisa xé̱gudu zua na dxu'a neza, na' xexape̱' xel-la' wal-la chee̱'.
PSA 111:1 Dute̱ lázrdawa' güe lá'ana' Xránadxu Dios tu zren nen benne' xrlátaje ca', benne' zaj nazrague̱' lau Le̱'.
PSA 111:2 Da zrente̱ zaj naca da ca' nun Xránadxu Dios, na' xúgute̱ benne' ca' dxelezaca ba lázrele̱ne̱' da nune̱', ne dxelaca lazre̱' xelelé'ene̱' na.
PSA 111:3 Da xabáa, ne da xrtante̱ zaj naca da dxune̱' Le̱', ne tu chí'izqueze zua da xrlátaje chee̱'.
PSA 111:4 Dxune̱' dxeajsá lázredxu ca naca xel-la' waca zrente̱ da dxune̱'. Xránadxu Dios naque̱' zren lazre', ne dxexache lazre̱' bénneache.
PSA 111:5 Dxugawe̱' benne' ca' dxelezrebe̱' Le̱'. Tu chí'izqueze dxeajsá lazre̱' xel-la' wezría da nune̱'.
PSA 111:6 Blé'ene̱' bénneache chee̱' ca' ca naca xel-la' waca chee̱ da ca' be̱ne̱'. Dxunézruje̱' benne' chee̱' ca' da zaj napa benne' xezica xe̱zr la xu ca'.
PSA 111:7 Li lazre', ne xrlátaje zaj naca da ca' dxune̱'. Li lazre' zaj naca xúgute̱ da bdxixruj be̱'e̱.
PSA 111:8 Tu chí'izqueze, ne chadía chacanna zaj zua da ca' bdxíxruje̱'. Lu da li, ne lu da li lazre' nune̱' ca zaj naca na.
PSA 111:9 Gusel-le̱' tu benne' weselá chee̱ guselé̱' bénneache chee̱'. Tu chí'izqueze nadxixruj be'e̱ xel-la' wezría chee̱'. Lá'azxa, ne tu da zrébedxu naca La Le̱'.
PSA 111:10 Chee̱ su laudxu gácadxu sina, dxun na ba xen zrébedxu Xránadxu Dios. Dxeléajni'i xanne' xúgute̱ benne' ca' dxelune̱' ca zaj naca da nadxíxruje̱'. Tu chí'izqueze dxal-la' güe lá'anadxu Le̱'.
PSA 112:1 Ba neza zrente̱ naca na chee̱ bénnea' dxezrebe̱' Xránadxu Dios, ne ca zaj naca da bdxixruj be̱'e̱ dxezaca ba lázrele̱'e̱ne̱'.
PSA 112:2 Zri'ine zre sua bénnea' xelape̱' xel-la' dxenná bea lu xe̱zr la xu, na' gaca chawe' chee̱ benne' xrlátaje ca'.
PSA 112:3 Da zan da de̱, ne xel-la' gunní'a zaj zra na xu'u lizre̱', ne tu chí'izqueze zua da xrlátaje da dxun bénnea'.
PSA 112:4 Dxusaní' tu xi' lu da chul-la naga zaj zra' benne' li lazre' ca', benne' ca' zaj naque̱' zren lazre', ne xrlátaje, ne dxelexache lazre̱' bénneache.
PSA 112:5 Tu benne' xrlátaje dxexache lazre̱' bénneache, ne dxusane̱' le̱' dumí. Lu da xrlátaje dxenná bé'ene̱' da zaj xu'u lu ne̱'e̱.
PSA 112:6 Chee̱ le̱ na' quebe bi gutá na le̱' lu lataj naga zue̱', na' tu chí'izqueze xeajlesá lazre̱' bénneache ca'.
PSA 112:7 Quebe zrebe̱' gate xenne̱' dxaca da cale̱la chee̱ da xu'u lu ne̱'e̱. Ze̱ chacha lázrdawe̱' lawe' da dxuxrén lazre̱' Xránadxu Dios.
PSA 112:8 Zua chawe' lázrdawe̱', ne quebe bi dxezrebe̱', ca zrindxa zra lé'ene̱' gaca chee̱ benne' ca' guledábague̱' le̱' ca da dxezá lazre̱'.
PSA 112:9 Dxisie̱' da de̱ chee̱', ne dxunézruje̱' da gácale̱ benne' xache' ca', ne tu chí'izqueze zua da xrlátaje da dxune̱'. Lu da xabáa xegá'ana szren xel-la' dxenná bea chee̱'.
PSA 112:10 Walé'e benne' we̱n da cale̱la da nigá, na' gueque zréajene̱'. Gágu xa'ate̱ lazxe̱', ne cue'e̱ gunne xue. Xelenite da ca' dxelezá lazre' benne' ca' dxelune̱' da cale̱la.
PSA 113:1 ¡Le'e, we̱n zrin chee̱ Xránadxu Dios, le güe lá'ana Le̱'! ¡Le güe lá'ana La Xránadxu Dios!
PSA 113:2 ¡Gaca ba lá'azxa La Xránadxu Dios, na'a zra, ne chadía chacanna!
PSA 113:3 ¡Naga dxalaj gubizra ca zrinte̱ naga dxebía na gaca ba lá'azxa La Xránadxu Dios!
PSA 113:4 ¡Szrente̱ nagá'ana Xránadxu Dios lawe' dute̱ xe̱zr la xu, na' láwela xabáa dxe' da xabáa chee̱'!
PSA 113:5 ¿Núzraqueze naca ca naca Xránadxu Dios, Bénnea' dxe'e̱ xabáa na'la?
PSA 113:6 Dios dxun cuine̱' dxexruj lazre' chee̱ lé'ene̱' da de̱ zran xabáa, ne lu xe̱zr la xu.
PSA 113:7 Dios dxechise̱' benne' xache' lu xu xrte, ne dxebéaje̱' benne' baxache' lu da dxezaca zi'e̱,
PSA 113:8 na' dxune̱' dxelebé' benne' caní ládujla benne' dxelenná be'e̱, ládujla benne' ca' dxelenná bé'ene̱' bénneache chee̱'.
PSA 113:9 Dxune̱' zua nu'ula zue̱' tuze ládujla zrí'inequeze̱' ca', na' dxebé nu'ula nigá lawe' da naque̱' xrna bi cheé̱queze̱'. ¡Gaca ba lá'azxa Xránadxu Dios!
PSA 114:1 Gate beledxúaj benne' Israel ca' lu xe̱zr la xu Egipto, beledxúaj zri'ine zre sua Jacob lu xe̱zr la xu chee̱ benne' zitu' ca',
PSA 114:2 na' gulaca zri'ine zre sua Judá ca tu xu'u lizre Dios, gulaca benne' Israel ca' naga dxenná be̱'e̱.
PSA 114:3 Ble'e Nísadau' Xrna da nigá, na' bzrunnuj na, na' gugá xe̱gu Jordán.
PSA 114:4 Gulexrite xi'a zri'a ca' ca dxelexrite chivo ca', na' gulexrite xí'adu ca' ca dxelexrite chíbudu ca'.
PSA 114:5 ¿Bizra guca chiu', nísadau', lawe' da be̱n na bzrúnnuju'? ¿Bizra guca chiu', xe̱gu Jordán, lawe' da be̱n na gugú'?
PSA 114:6 Le'e, xi'a zri'a ca', ¿Bizr chee̱ na' guxrítele ca dxelexrite chivo ca'? Le'e, xi'adu ca', ¿Bizr chee̱ na' guxrítele ca dxelexrite chíbudu ca'?
PSA 114:7 Dxezrize xe̱zr la xu lau Xránadxu Dios, lau Dios chee̱ Jacob.
PSA 114:8 Dios nigá be̱ne̱' bexaca xiaj xre' tu beaj nisa, na' bexaca xiaj tu ga dxalaj nisa.
PSA 115:1 Quegá netu', Xran. Quegá cuintu', san Lué'queze dxal-la' xucá'ana szrentu' ne̱ chee̱ xel-la' zri'i lazre' chiu', ne xel-la' li lazre' chiu'.
PSA 115:2 ¿Bizr chee̱ na' dxun na ba xen xuluche̱be bénneache netu': “Gazra zua Dios chee̱le?”
PSA 115:3 Dios chee̱dxu zue̱' xabáa. Dxune̱' ca da dxaca lázrequeze̱'.
PSA 115:4 Dios ca' chee̱ benne' ca' zaj naca na bedáu' plata, ne bedáu' oro, da nun ni'a na' bénneache.
PSA 115:5 Zaj zua dxu'a na, san quebe dxelenné̱ na. Zaj zua xiaj lau na, san quebe dxelelé'e na.
PSA 115:6 Zaj zua naga na, san quebe dxelén na. Zaj zua zrina na, san quebe dxelelé'e na.
PSA 115:7 Zaj zua na' na, san quebe bi dxelecá'a na. Zaj zua ni'a na, san quebe dxeledá na. Quebe dxedxuaj chi'i na lba na.
PSA 115:8 Ca zaj naca na, zaj naca benne' ca' zaj nune̱' na, ne benne' ca' dxuluxrén lazre̱' na.
PSA 115:9 Le guxrén lazre' Xránadxu, le'e, benne' Israel ca'. Le̱' dxácale̱ne̱' le'e, ne dxuxúe̱' le'e.
PSA 115:10 Le guxrén lazre' Xránadxu, le'e, bxruze chee̱ Dios, nácale zri'ine zre sua Aarón. Le̱' dxácale̱ne̱' le'e, ne dxuxúe̱' le'e.
PSA 115:11 Le guxrén lazre' Xránadxu, le'e dxucá'ana szrenle Le̱'. Le̱' dxácale̱ne̱' le'e, ne dxuxúe̱' le'e.
PSA 115:12 Xránadxu dxajsá lazre̱' dxi'u, na' gune̱' dxi'u da chawe'. Gune̱' da chawe' chee̱ benne' Israel ca'. Gune̱' da chawe' chee̱ bxruze chee̱', zri'ine zre sua Aarón.
PSA 115:13 Gune̱' da chawe' chee̱ xúgute̱ benne' dxelape̱' Le̱' ba lá'ana, benne' blau ca', ne benne' quebe zaj naque̱' blau.
PSA 115:14 Gun Xránadxu chan zri'inu' ca', ne chan zri'ine bi biu chiu' ca'.
PSA 115:15 Gun Xránadxu da chawe' chiu'. Naque̱' Bénnea' be̱n xabáa, ne xe̱zr la xu.
PSA 115:16 Chee̱ tuze Xránadxu naca xabáa, san bnézruje̱' bénneache xe̱zr la xu.
PSA 115:17 Benne' zaj nate quebe gaca xelúe lá'ane̱' Xránadxu, ne quebe gaca benne' ca' zaj zue̱' lu xe̱dxu ba.
PSA 115:18 Dxi'u, benne' ban, güe lá'anadxu Xránadxu, na'a zra, ne chadía chacanna. ¡Le güe lá'ana Xránadxu!
PSA 116:1 ¡Nazrí'ida' Xránadxu Dios lawe' da benne̱' chi'a, ne da gunaba' lawe̱',
PSA 116:2 ne lawe' da bze̱ nague̱' chia'! Chee̱ le̱ na' guláwizra' Le̱' dxácate̱ naca bana'.
PSA 116:3 Guzúa' lu da ste̱be chee̱ xel-la' gute, ne bzreba' ba zua' chu'a lataj ba xa'. Guzúa' lu da ste̱be, ne guzaca zi'a.
PSA 116:4 Nadxa bláwizra' Xránadxu Dios, gunnía': Xrana' Dios, bselá bénne'du xu'a.
PSA 116:5 Cháwe'le̱'e̱ naca Xránadxu Dios, ne xrlátaje naque̱'. Awe', dxexache lazre' Dios chee̱dxu dxi'u.
PSA 116:6 Dxuxúe Xránadxu benne' dxexruj lazre' ca'. Gate na' guzúa' lu da ste̱be bselé̱' neda'.
PSA 116:7 Be̱n dipa lazre', bénne'du xu'a, lawe' da nun Xránadxu da chawe' chiu'.
PSA 116:8 Lue', Xran, bseláu' bénne'du xu'a lu na' xel-la' gute, chee̱ québedxa cuezre we̱'a, ne chee̱ quebe cheajcházia'.
PSA 116:9 Ta' lau Xránadxu Dios naga zaj zra' benne' ca' zaj naca bane̱'.
PSA 116:10 Guxéajle̱'a chee̱', na' chee̱ le̱ na' bchálaja', lácala guzaca zí'le̱'a.
PSA 116:11 Lu xel-la' dxezrebe chia', gunnía': Zaj naca xúgute̱ bénneache benne' we̱n lazre' ca'.
PSA 116:12 ¿Bizra quízrujqueza' Xránadxu Dios chee̱ xúgute̱ da chawe' da be̱ne̱' chia'?
PSA 116:13 Si'a lu ne̱'e̱ xel-la' weselá, ne guláwizra' Xránadxu Dios.
PSA 116:14 Na'a guna' da ca' guche̱be lazra' lau Xránadxu. Guna' na lau xúgute̱ bénneache chee̱'.
PSA 116:15 Xránadxu Dios dxe'e̱ gunne xue chee̱ bénneache chee̱' gate dxelátie̱'.
PSA 116:16 Xrana' Dios, da li naca' we̱n zrin chiu'. Naca' we̱n zrin chiu', ne zri'ine nu'ula we̱n zrin chiu'. Lue' bzúzruju' da zaj nadxéaj na neda'.
PSA 116:17 Da güe lá'ana' Lue' gaca na ca tu béadau' gutia' lau', ne gucá'ana szrena' Lau', Xrana' Dios.
PSA 116:18 Lau Xránadxu Dios guna' da ca' guche̱be lazra' chee̱', da guna' lau xúgute̱ bénneache chee̱'.
PSA 116:19 Guna' na chale'aj xu'u lizre Xránadxu Dios, da dxe' na lu'ule xe̱zre Jerusalén. ¡Gaca ba lá'azxa Xránadxu Dios!
PSA 117:1 ¡Le güe lá'ana Xránadxu Dios, le'e, benne' dute̱ xe̱zr la xu! ¡Le güe lá'ana Le̱', le'e, xúgute̱ bénneache,
PSA 117:2 lawe' da zrente̱ naca xel-la' zri'i lazre' chee̱' ca nazrí'ine̱' dxi'u, ne chadía chacanna naca xel-la' li lazre' chee̱'! ¡Le güe lá'ana Xránadxu!
PSA 118:1 ¡Le güe lá'ana Xránadxu Dios lawe' da naque̱' xrlátaje, ne lawe' da chadía chacanna dxexache lazre̱' dxi'u!
PSA 118:2 Dxal-la' xelenná benne' Israel ca': ¡Chadía chacanna dxexache lazre̱' dxi'u!
PSA 118:3 Dxal-la' xelenná zri'ine zre sua Aarón: ¡Chadía chacanna dxexache lazre̱' dxi'u!
PSA 118:4 Dxal-la' xelenná benne' ca' dxelezrebe̱' Xránadxu Dios: ¡Chadía chacanna dxexache lazre̱' dxi'u!
PSA 118:5 Gate na' guzúa' lu da ste̱be bláwizra' Xránadxu Dios, na' beche̱be Xránadxu, ne bselé̱' neda' lu da na' be̱xru na neda'.
PSA 118:6 Zuale̱ Xránadxu neda', na' québequeze zreba' bi xelún bénneache chia' neda'.
PSA 118:7 Zúale̱ Xránadxu neda' ládujla benne' ca' dxelácale̱ne̱' neda'. Chee̱ le̱ na' le'eda' cheajlechaze benne' ca' dxelecuídene̱' neda'.
PSA 118:8 Cháwe'dxa naca guxrén lázredxu Xránadxu Dios quézcala guxrén lázredxu bénneache.
PSA 118:9 Cháwe'dxa naca guxrén lázredxu Xránadxu Dios quézcala guxrén lázredxu benne' dxelenná be'e̱.
PSA 118:10 Gulechaj benne' xúgute̱ cue' xe̱zr la xu neda', na' lu La Xránadxu Dios guzría xi'a benne' ca'.
PSA 118:11 Guléchaje̱' neda', ne buluchídie̱' neda', na' lu La Xránadxu Dios guzría xi'a benne' ca'.
PSA 118:12 Guléchaje̱' neda' ca dxelún be̱scutuche', na' guca xel-la' dxelezrá'a chee̱' ca tu xi' da dxuzezxe na xixre' xeche' bizre, na' lu La Xránadxu Dios guzría xi'a benne' ca'.
PSA 118:13 Buluzrigue̱' neda' chee̱ cheajcházia' na' gúcale̱ Xránadxu Dios neda'.
PSA 118:14 Naca Xránadxu Dios ca tu xu'u naga zua chawa', na' tu gúl-lazqueza' chee̱' lawe' da Lé̱queze̱' dxuselé̱' neda'.
PSA 118:15 Xel-la' dxelebé dxelul-la benne' xrlátaje ca' lawe' da dxuselá Xránadxu le̱'. Dute̱ xel-la' waca chee̱' dxun Xránadxu Dios da zrente̱ ca'.
PSA 118:16 Szrente̱ nagá'ana xel-la' waca zren chee̱ Xránadxu Dios. Da zrente̱ ca' dxun xel-la' waca zren chee̱ Xránadxu.
PSA 118:17 Québequeze gatia', san gaca bana', na' guzenda' bénneache ca zaj naca da nun Xránadxu.
PSA 118:18 Bde Xránadxu neda' lu da ba xa', san quebe bdee̱' neda' lu na' xel-la' gute.
PSA 118:19 Gusalaj dxa xu'u chee̱ chu'a naga guchi'u chia', Xran, na' chu'a na', ne güe lá'ana' Lue', Xrana' Dios.
PSA 118:20 Dxa xu'u nigá naca na chee̱ Xránadxu Dios. Dxa xu'u nigá dxelú'u benne' xrlátaje ca'.
PSA 118:21 Güe lá'ana' Lue', Xran, lawe' da bennu' chia', ne bseláu' neda' lu da guca chia'.
PSA 118:22 Xiaj na' da buluzúa benne' we̱n xu'u ca' chalá'ala, le̱ na' naca na xiaj blau.
PSA 118:23 Da nigá be̱n Xránadxu, na' naca na tu da dxexebánedxu.
PSA 118:24 Zra nigá naca na zra da be̱n Xránadxu. Béle̱'e̱dxu, ne súadxu lu da ba neza lu zra nigá.
PSA 118:25 Xrana' Dios, dxata' xueda' Lue' guseláu' netu' na'a. Dxata' xueda' Lue', Xrana', gunu' chepe ban na'a da dxuntu'.
PSA 118:26 Ba neza zrente̱ naca na chee̱ bénnea' ze̱'e̱ waláz chee̱ Xránadxu Dios. Lu xu'u lizre Xránadxu Dios nigá dxenábantu' gaca chawe' chiu'.
PSA 118:27 Xránadxu naque̱' Dios, ne ba be̱nne̱' dxi'u tu da dxusaní na. Le guchéaj béadu ca' gútele lawe̱' lu luzu cugu chee̱'.
PSA 118:28 Nacu' Lue' Dios chia', na' güe lá'ana' Lue'. Dios chia', gucá'ana szrena' Lue'.
PSA 118:29 ¡Le güe lá'ana Xránadxu Dios lawe' da naque̱' xrlátaje, ne lawe' da chadía chacanna dxexache lazre̱' dxi'u!
PSA 119:1 Ba neza zrente̱ naca na chee̱ benne' ca' tu dxelúnzqueze̱' da naca du lazre', benne' ca' tu dxelúnzqueze̱' ca dxenná da bdxixruj bea Xránadxu Dios.
PSA 119:2 Ba neza zrente̱ naca na chee̱ benne' ca' tu dxelúnzqueze̱' ca dxuse̱de dizra' chee̱' dxi'u, na' dute̱ xichaj lázrdawe̱' dxuluzúe̱' dizra' chee̱'.
PSA 119:3 Benne' caní québequeze dxelune̱' da zrinnaj, benne' ca' tu dxelúnzqueze̱' ca dxenná Dios dxal-la' xelune̱'.
PSA 119:4 Lue', Xran, bsízrenu' netu' chee̱ gun xánnentu' ca zaj naca da bdxixruj be'u Lue'.
PSA 119:5 Dxaca lázrele̱'a tu gúnzqueza' ca zaj naca xrba chiu'.
PSA 119:6 Nadxa québequeze xedué'eda', na' cue'a gunne xue guna' xúgute̱ da bdxixruj be'u.
PSA 119:7 Dute̱ xel-la' li lazre' chia' güe lá'ana' Lue' gate ba nusé̱dia' da ca' nuchi'u chee̱ntu', da zaj naca na xrlátaje.
PSA 119:8 Tu gúnzqueza' ca da dxenná be'u. Québequeze cueaj xíchaju' neda'.
PSA 119:9 ¿Ájala gun benne' cuide' gunbe' da naca na xrlátaje? Dxal-la' tu gúnzquezebe' ca dxenná xrtizru'.
PSA 119:10 Dute̱ xichaj lázrdawa' dxuna' ba xuzre guna' da dxennáu' Lue'. Quebe gu'u lataj guzúa' chalá'ala ca da bdxixruj be'u.
PSA 119:11 Lu xichaj lázrdawa' tu dxúnzqueza' ca da dxennáu' Lue' chee̱ quebe guna' dul-la tábaga' Lue'.
PSA 119:12 Ba lá'azxa nacu' Lue', Xrana' Dios. Bsé̱de neda' da ca' dxenná be'u.
PSA 119:13 Nen dxú'aqueza' ba bzenda' bénneache ca zaj naca da ca' nuchi'u chee̱ntu'.
PSA 119:14 Dxebéle̱'e̱dxeda' tu dxúnzqueza' ca dxuse̱de dizra' chiu' netu', quez ca dxelebé benne' ca' dé̱le̱'e̱ xel-la' gunní'a chee̱'.
PSA 119:15 Gulaba lazra' ca zaj naca da bdxixruj be'u Lue', ne nna' xánnia' ca dxennáu' dxal-la' guntu'.
PSA 119:16 Béle̱'e̱da' guna' ca da dxenná be'u, ne quebe gal-la lazra' ca zaj naca xrtizru'.
PSA 119:17 Be̱n gaca chawe' chia' neda', we̱n zrin chiu', na' gaca bana', ne tu gúnzqueza' ca naca xrtizru'.
PSA 119:18 Gusalaj xiaj lawa' chee̱ nna'a da zrente̱ ca' da zaj zua na lu da bdxixruj be'u.
PSA 119:19 Naca' ca tu benne' dxedaze̱' lu xe̱zr la xu nigá. Be̱n chéajni'ida' da dxenná da bdxixruj be'u.
PSA 119:20 Dxedú lazra' lawe' da tu chí'izqueze dxezá lazra' guna' da ca' nuchi'u chee̱ntu'.
PSA 119:21 Gudil-lu' benne' ca' dxulucá'ana szren cuine̱', benne' we̱n da cale̱la ca', benne' ca' dxuluzúe̱' chalá'ala da bdxixruj be'u.
PSA 119:22 Quebe gu'u lataj nu benne' nne̱' schanni' chia', na' quegá gucá'ana dítaje̱' neda' lawe' da tu dxúnzqueza' ca dxusé̱denu' netu'.
PSA 119:23 Cá'anqueze benne' dxelenná bea ca' gulenné̱' chia'. Neda', we̱n zrin chiu', blaba lazra' ca zaj naca xrba chiu'.
PSA 119:24 Dxezaca ba lázrele̱na' da dxuse̱de dizra' chiu' netu'. Dxuluzéajni'i na neda'.
PSA 119:25 Zua bénne'du xu'a lu da ste̱be chee̱ xel-la' gute. Be̱n dipa xichaj lázrdawa' nen xrtizru'.
PSA 119:26 Ble'eda' Lue' ca zaj naca da dxuna', na' bezi'u neda'. Bse̱de neda' ca zaj naca xrba chiu'.
PSA 119:27 Be̱n chéajni'ida' ca gaca guna' ca bdxixruj be'u chee̱ gulaba lazra' ca zaj naca da zrente̱ ca' da be̱nu'.
PSA 119:28 Dxedú lazra' lawe' da dxewí'ine lázrele̱'a. Be̱xru chacha neda' ne̱ chee̱ xrtizru'.
PSA 119:29 Quebe gu'u lataj guna' da naca na we̱n lazre'. Lu xel-la' dxexache lazre' chiu' bse̱de neda' da bdxixruj be'u.
PSA 119:30 Bechugu lazra' guna' da naca li lazre', na' dxe'a gunne xue guna' da ca' nuchi'u chee̱ntu'.
PSA 119:31 Tu dxúnzqueza' ca dxuse̱de dizra' chiu' netu'. Xran, quebe guzú' neda' lu xel-la' stu'.
PSA 119:32 Tu gúnzqueza' ca bdxixruj be'u, gate guzéajni'idxenu' neda'.
PSA 119:33 Xran, bse̱de neda' chee̱ guna' ca naca xrba chiu', na' tu gúnzqueza' ca naca na ca zrindxa zra cheajsé̱ chia'.
PSA 119:34 Bzéajni'i neda', na' tu gúnzqueza' da bdxixruj be'u, na' dute̱ lázrdawa' guna' ca naca na.
PSA 119:35 Ble'e neda' chee̱ guna' da bdxixruj be'u, lawe' da dxaca lázrequeza' guna' ca dxenná na.
PSA 119:36 Be̱n sa lazra' guna' ca dxuse̱de dizra' chiu' netu', chee̱ quebe gaca' benne' wecude.
PSA 119:37 Quebe gu'u lataj gucá'ana szrena' bedáu' xia xaga ca'. Be̱n dipa xichaj lázrdawa' chee̱ guna' ca dxenná xrtizru'.
PSA 119:38 Be̱n ca dxenná xrtizru' da guche̱be lazru' chia' neda', we̱n zrin chiu', chee̱ zreba' Lue'.
PSA 119:39 Bde chalá'ala dizra' schanni' da dxelenné̱' chia', da na' dxezreba', lawe' da xrlátaje zaj naca xrba chiu'.
PSA 119:40 Dxezá lazra' guna' da bdxixruj be'u. Be̱n dipa xichaj lázrdawa' nen da xrlátaje chiu'.
PSA 119:41 Gudá xexache lazru' neda', Xrana' Dios. Gudá guseláu' neda', ca ba guche̱be lazru' gunu'.
PSA 119:42 Beche̱ba' lau bénnea' dxusi'e̱ neda' xel-la' stu', gunnía': Dxuxrén lazra' xrtizra' Xrana' Dios.
PSA 119:43 Be̱n tu séquezda' guchálaja' dizra' li lazre' chiu', lawe' da dxebeza lazra' da ca' dxuchi'u chee̱ntu'.
PSA 119:44 Tu gúnzqueza' ca dxenná da bdxixruj be'u. Guna' na tu chí'izqueze, ne chadía chacanna.
PSA 119:45 Láqueza' neda' lawe' da dxe'a gunne xue guna' ca bdxixruj be'u.
PSA 119:46 Guchálajqueza' ca dxuse̱de dizra' chiu' netu' lau benne' wenná bea ca', na' québequeze xedué'eda'.
PSA 119:47 Wabéle̱'e̱quezda' guna' ca bdxixruj be'u, da ca' nazrí'ile̱'e̱da'.
PSA 119:48 Dxeche̱be lazra' guna' ca bdxixruj be'u, da nazrí'ida', na' gulaba lazra' ca naca xrba chiu'.
PSA 119:49 Bsa lazre' da guche̱be lazru' chia' neda', we̱n zrin chiu', da na' be̱nu' dxebeza lazra'.
PSA 119:50 Gate na' guzaca zi'a, guzúa tu da bexúe zren na neda' lawe' da be̱n dipa xrtizru' xichaj lázrdawa'.
PSA 119:51 Benne' dxulucá'ana szren cuine̱' belún lale̱' chia' neda', san québequeze gusana' da dxenná da bdxixruj be'u.
PSA 119:52 Xeajsá lazra' da bchi'u chee̱ntu' nédxudaute̱, Xran, na' bexaca zrena'.
PSA 119:53 Nen dute̱ xel-la' dxezrá'a guzúa' lu da ste̱be ne̱ chee̱ benne' ca' dxelune̱' da zrinnaj, benne' ca' dxuluzúe̱' chalá'ala da bdxixruj be'u.
PSA 119:54 Xrba chiu' ca' gulaca na chia' ca tu da dxul-la' gate na' zua' tu xe̱zr la xu zitu'.
PSA 119:55 Chizrela xeajsá lazra' lau' Lue', Xrana' Dios, na' tu bénzqueza' ca dxenná da bdxixruj be'u.
PSA 119:56 Lu da ba neza caní guzúa' lawe' da tu bé̱nzqueza' ca zaj naca da bdxixruj be'u.
PSA 119:57 Da dxezá lazra' nácaquezu' Lue', Xrana' Dios. Ba gunnía' tu gúnzqueza' ca naca xrtizru'.
PSA 119:58 Dute̱ lázrdawa' dxenaba' Lue' xidu' gácale̱nu' neda'. Bexache lazre' neda' ca ba gunnáu' gunu'.
PSA 119:59 Gunná' xannia' ca zaj naca da dxuna', na' xecha lasa dxuna' ca dxuse̱de dizra' chiu' netu'.
PSA 119:60 Be̱na' ba xuzre, ne quebe guzreda' chee̱ tu gúnzqueza' ca bdxixruj be'u.
PSA 119:61 Xralaj chee̱ benne' ca' dxelune̱' da cale̱la zaj nuchele̱ na neda', san quebe ne gal-la lazra' ca dxenná da bdxixruj be'u.
PSA 119:62 Dxe̱la dxasa' chee̱ güe lá'ana' Lue' lawe' da xrlátaje zaj naca da ca' dxuchi'u chee̱ntu'.
PSA 119:63 Naca' tuze nen xúgute̱ benne' ca' dxelezrebe̱' Lue', benne' ca' tu dxelúnzqueze̱' da bdxixruj be'u.
PSA 119:64 Xrana' Dios, dxezrín dute̱ xe̱zr la xu xel-la' dxexache lazre' chiu'. Bse̱de neda' chee̱ guna' ca dxenná xrba chiu'.
PSA 119:65 Ba be̱nu' guca chawe' chia' neda', we̱n zrin chiu'. Xran, be̱nu' na cáte̱ze dxenná xrtizru'.
PSA 119:66 Bse̱de neda' chee̱ gueque be'eda' da naca xrlátaje, ne chee̱ chéajni'ida' lawe' da dxéajle̱'a da bdxixruj be'u.
PSA 119:67 Nédxula ca bzéxruju' neda' gudéa' chalá'ala, na' na'a tu dxúnzqueza' ca dxenná xrtizru'.
PSA 119:68 Nacu' xrlátaje, ne dxunu' gaca chawe' chee̱ntu'. Bse̱de neda' guna' ca naca xrba chiu'.
PSA 119:69 Benne' dxulucá'ana szren cuine̱' gulenné̱' chia' da we̱n lazre' san dute̱ lázrdawa' tu gúnzqueza' ca bdxixruj be'u.
PSA 119:70 Quebe xu'u xel-la' dxéajni'i lázrdau benne' ca'. Neda' dxezaca ba lázrele̱na' da dxenná da bdxixruj be'u.
PSA 119:71 Chawe' naca bzéxruju' neda' chee̱ gusé̱dia' guna' ca naca xrba chiu'.
PSA 119:72 Cháwedxa naca da bdxixruj be'u chia' neda' quez ca gaxúa gaxúane dumí oro, ne plata.
PSA 119:73 Nen ná'quezu' be̱nu' neda' cáte̱ze naca'. Bzéajni'i neda' chee̱ gusé̱dia' guna' ca bdxixruj be'u.
PSA 119:74 Benne' dxelezrebe̱' Lue' xelelé'ene̱' neda'. Xelebene̱' lawe' da dxebeza lazra' gaca ca dxenná xrtizru'.
PSA 119:75 Xran, ba nézquezda' xrlátaje naca da dxuchi'u chee̱ntu', na' lu dute̱ xel-la' li lazre' chiu' bsaca zi'u neda'.
PSA 119:76 Lu dute̱ xel-la' dxexache lazre' chiu' bexúe zren neda' cáte̱ze dxenná da guche̱be lazru' chia' neda', we̱n zrin chiu'.
PSA 119:77 Bexache lazre' neda' chee̱ gaca bana' lawe' da dxezaca ba lázrele̱na' da bdxixruj be'u.
PSA 119:78 Be̱n xelexedué'e benne' ca' dxulucá'ana szren cuina lawe' da gulenné̱' schanni' chia', ne quebe bi bena' chee̱'. Neda' gulaba lazra' ca da bdxixruj be'u.
PSA 119:79 Be̱n xelexelá' benne' ca' dxelezrebe̱' Lue', chee̱ xelenne̱' chia', na' xulusé̱die̱' da dxuse̱de dizra' chiu' netu'.
PSA 119:80 Be̱n gaca' du lazre' ca naca xrba chiu' chee̱ québequeze xedué'eda'.
PSA 119:81 Zua bénne'du xu'a lu da ste̱be lawe' da dxebeza' xidu' guseláu' neda', na' dxebeza lazra' gaca ca dxenná xrtizru'.
PSA 119:82 Dxezé̱ bxrinne xiaj lawa' lawe' da dxezá lazra' xrtizru', dxennia': ¿Bátaqueze xexúe zrenu' neda'?
PSA 119:83 Dxebizra' ca tu buzude xide ze̱ na lu zren, san quebe dxal-la lazra' guna' ca dxenná xrba chiu'.
PSA 119:84 ¿Bal-la zra gaca bana' neda', we̱n zrin chiu'? ¿Bátaqueze gudéu' lu da ba xa' benne' ca' dxeláu zi' xuzre̱' neda'?
PSA 119:85 Benne' dxulucá'ana szren cuine̱' gule̱ne̱' tu xe̱dxu naga cheajcházia'. Québequeze dxelune̱' ca dxenná da bdxixruj be'u.
PSA 119:86 Da líqueze zaj naca xúgute̱ da bdxixruj be'u. Gúcale̱ neda' lawe' da dxeláu zi' xuzre̱' neda', ne quebe bi nuna' chee̱'.
PSA 119:87 Xeláteze la belutie̱' neda', san quebe ne gusana' guna' ca bdxixruj be'u.
PSA 119:88 Lu xel-la' dxexache lazre' chiu' be̱n dipa xichaj lázrdawa', chee̱ tu gúnzqueza' ca dxuse̱de dizra' chiu' netu'.
PSA 119:89 Xrana' Dios, tu chí'izqueze zua xrtizru' xabáa na'la.
PSA 119:90 Xel-la' li lazre' chiu' sua na chee̱ xúgute̱ bénneache. Lue' bzua chúchuquezu' xe̱zr la xu, na' zúaqueze na.
PSA 119:91 Ne̱ chee̱ da gunnáquezu' zaj nnita xúgute̱ da de̱, na' xúgute̱ da ca' dxelún na zrin chiu'.
PSA 119:92 La quebe bezaca ba lázrele̱na' da bdxixruj be'u bache benítia' lu da guzaca zi'a.
PSA 119:93 Cabátaqueze gal-la lazra' da bdxixruj be'u lawe' da ne̱ chee̱ da ca' ba btipu' lazra'.
PSA 119:94 Chiu' Lue' naca' neda'. Bselá neda', lawe' da dxuna' ba xuzre guna' ca bdxixruj be'u.
PSA 119:95 Benne' dxelebéaj xichaj Dios gulenné̱'e̱ neda' chee̱ xuluzría xi'e̱ neda', san neda' dxulaba lazra' ca dxuse̱de dizra' chiu'.
PSA 119:96 Dxelé'equezda' dxeajsé̱ chee̱ xúgute̱ da de̱ lu xe̱zr la xu, san da bdxixruj be'u Lue' québequeze cheajsé̱ chee̱ na.
PSA 119:97 Dios, nazrí'ile̱'e̱da' da bdxixruj be'u. Du zra dxulaba lazra' ca naca na.
PSA 119:98 Ne̱ chee̱ da bdxixruj be'u nunu' nácadxa' sina ca benne' ca' dxeledábague̱' neda' lawe' da tu zúale̱zqueze da bdxixruj be'u neda'.
PSA 119:99 Dxéajni'idxeda' ca benne' ca' dxulusé̱dene̱' neda' lawe' da dxulaba lazra' ca dxuse̱de dizra' chiu' neda'.
PSA 119:100 Ba guxéajni'idxeda' ca benne' gula ca' lawe' da tu dxúnzqueza' ca dxenná da bdxixruj be'u.
PSA 119:101 Be̱na' ba xuzre quebe bi da cale̱la guna' chee̱ tu gúnzqueza' ca dxenná xrtizru'.
PSA 119:102 Quebe bsana' dxuna' da ca' nuchi'u chee̱ntu' lawe' da Lué'queze bsé̱denu' neda'.
PSA 119:103 Xrtizru' naca na ca tu da zíxrele̱'e̱ lu dxu'a. Nácadxa na zixre ca bzrína'dau' lu dxu'a.
PSA 119:104 Ne̱ chee̱ da bdxixruj be'u naca' benne' sina. Chee̱ le̱ na' dxecuídeda' xúgute̱ da we̱n lazre'.
PSA 119:105 Ca tu xi' naca xrtizru' naga dxedá', da dxusení na neza xu'a.
PSA 119:106 Bzétaja' Dios, ne guche̱be lazra' tu gúnzqueza' ca nuchi'u chee̱ntu' da naca na xrlátaje.
PSA 119:107 Dxezaca zí'le̱'a. Xrana' Dios, btipa lazra' cáte̱ze guche̱be lazru' gunu'.
PSA 119:108 Xrana' Dios, dxata' xueda' Lue' si'u da dxue lá'ana' Lue', ne gusé̱denu' neda' guna' ca nuchi'u chee̱ntu'.
PSA 119:109 Tu zúazqueza' lu da ste̱be chee̱ xel-la' gute, san québequeze ne gal-la lazra' guna' ca bdxixruj be'u.
PSA 119:110 Benne' dxelebéaj xichaj Dios buluzale̱' xralaj da que̱la na neda' san neda' quebe bsana' dxuna' ca bdxixruj be'u.
PSA 119:111 Ba gucá'a da dxuse̱de xrtizru' neda' chee̱ gaca na da gápaqueza' chadía chacanna lawe' da zaj naca xrtizru' da dxezaca ba lázrele̱'a.
PSA 119:112 Zúate̱queze lázrdawa' guna' ca zaj naca xrba chiu' tu chí'izqueze, ca zrindxa zra cheajsé̱ chia'.
PSA 119:113 Dxecuídeda' benne' ca' dxelune̱' láweze da xrlátaje, san nazrí'ida' da dxenná da bdxixruj be'u.
PSA 119:114 Nacu' Lue' ca tu xu'u naga zua chawa', ne ca tu da dxucu'uj na neda', lawe' da dxebeza lazra' gaca na ca dxenná xrtizru'.
PSA 119:115 Le gucuasa naga zua', le'e, benne' we̱n da cale̱la, lawe' da tu gúnzqueza' ca bdxixruj bea Dios chia'.
PSA 119:116 Bze̱ chacha neda' cáte̱ze dxenná xrtizru', na' gaca bana', ne quebe xedué'eda' chee̱ da na' dxebeza lazra'.
PSA 119:117 Bze̱ chacha neda', na' la', ne tu xezaca ba lázrezqueza' ca naca xrba chiu'.
PSA 119:118 Bchuchu bléaju' xúgute̱ benne' ca' bulusane̱' ca naca xrba chiu' lawe' da we̱n lazre' naca xel-la' sina chee̱ benne' ca'.
PSA 119:119 Ca be̱be bzria xi'u xúgute̱ benne' ca' dxelebéaj xíchaje̱' Lue' lu xe̱zr la xu nigá. Chee̱ le̱ na' nazrí'ida' da dxuse̱de dizra' chiu' netu'.
PSA 119:120 Dxezrize be̱la' dxen chia' lawe' da dxezreba' Lue', ne dxezreba' da dxuchi'u chee̱ntu' da naca na xrlátaje.
PSA 119:121 Ba be̱na' ca da nuchi'u chee̱ntu', ne ca naca da xrlátaje. Quebe gudéu' neda' lu na' benne' ca' dxuluchínene̱' neda'.
PSA 119:122 Guche̱be lazre' chia' gunu' gaca chawe' chia'. Quebe gu'u lataj benne' ca' dxulucá'ana szren cuine̱' xuluchínene̱' neda' xadía.
PSA 119:123 Guzé̱ bxrinne xiaj lawa' lawe' da dxebeza' xidu' guseláu' neda', ne guchi'u chee̱ntu' ca dxenná xrtizru'.
PSA 119:124 Dute̱ xel-la' dxexache lazre' chiu' be̱n gaca chawe' chia' neda', we̱n zrin chiu', ne bse̱de neda' guna' ca naca xrba chiu'.
PSA 119:125 Naca' we̱n zrin chiu'. Bzéajni'i neda' chee̱ gúnbe'a da dxuse̱de dizra' chiu' netu'.
PSA 119:126 Xrana' Dios, ba bzrin zra bi gunu', lawe' da ba buluzúe̱' chalá'ala da bdxixruj be'u.
PSA 119:127 Chee̱ le̱ na' neda' nazrí'idxeda' da bdxixruj be'u Lue' quézcala oro, ne quézcala galega oro.
PSA 119:128 Chee̱ le̱ na' dxéqueda' zaj nácadxa li lazre' da bdxixruj be'u ca xúgute̱ da de̱, na' dxecuídeda' xúgute̱ da zaj naca na da we̱n lazre'.
PSA 119:129 Dxebánentu' ca dxuse̱de dizra' chiu' netu'. Chee̱ le̱ na' du lazra' tu dxúnzqueza' ca dxenná na.
PSA 119:130 Gate nu dxuzájla'a ca naca xrtizru', dxusaní na. Dxun na dxeléajni'i benne' dxexruj lazre' ca'.
PSA 119:131 Guxá dxu'a, ne gucá'a lazra' lawe' da dxezá lazra' gúnbe'a da bdxixruj be'u.
PSA 119:132 Gunná' neda', ne bexache lazre' neda', ca tu dxúnzquezu' chee̱ benne' ca' zaj nazrí'ine̱' Lue'.
PSA 119:133 Be̱n tu gúnzqueza' ca dxenná xrtizru', ne quebe gu'u lataj da zrinnaj nna be'e na neda'.
PSA 119:134 Bselá neda' lu na' benne' xichaj zra'a ca', na' tu gúnzqueza' ca dxenná da bdxixruj be'u.
PSA 119:135 Be̱n gaca chawe' chia' neda', we̱n zrin chiu', ne bse̱de neda' guna' ca zaj naca xrba chiu' ca'.
PSA 119:136 Nisa gudxezra' guca na ca tu xe̱gu nisa lawe' da quebe dxelún bénneache ca bdxixruj be'u.
PSA 119:137 Xrana' Dios, xrlátaje nacu' Lue', ne li lazre' naca ca dxuchi'u chee̱ntu'.
PSA 119:138 Da dxuse̱de dizra' chiu' netu', da na' bzu' lu na'ntu', naca na da li, ne da li lazre'.
PSA 119:139 Dxedú lazra' lawe' da dxé'le̱'a gunne xue lawe' da gulal-la lazre' benne' ca' dxeledábague̱' neda' ca zaj naca xrtizru'.
PSA 119:140 Du lázrele̱'e̱ naca xrtizru', na' nazrí'ida' neda' na, naca' we̱n zrin chiu'.
PSA 119:141 Dxexruj lazre' naca', na' dxuluzúe̱' neda' chalá'ala, na' quebe ne gal-la lazra' da bdxixruj be'u.
PSA 119:142 Tu chí'izqueze zua da dxuchi'u chee̱ntu', na' da li naca da bdxixruj be'u.
PSA 119:143 Da dxezaca zi'a, ne da ste̱be zua' zaj nuchuchuj na neda', san dxezaca ba lázrele̱na' da bdxixruj be'u.
PSA 119:144 Tu chí'izqueze naca li lazre' da dxuse̱de dizra' chiu'. Bzéajni'i neda', na' gaca bana'.
PSA 119:145 Dute̱ lázrdawa' dxuláwizra' Lue', Xrana' Dios. Be̱n gaca chawe' chia', na' tu gúnzqueza' ca dxenná xrba chiu'.
PSA 119:146 Dxuláwizra' Lue'. Bselá neda', na' tu gúnzqueza' ca dxuse̱de dizra' chiu' netu'.
PSA 119:147 Bálala dxasa', na' dxuláwizra' Lue'. Dxebeza lazra' gaca ca dxenná xrtizru'.
PSA 119:148 Dxenná'aza' bedú xe̱la, chee̱ gulaba lazra' da bdxixruj be'u.
PSA 119:149 Dute̱ xel-la' dxexache lazre' chiu' bene chi'a. Xrana' Dios, da bchi'u chee̱ntu' btipa lazra'.
PSA 119:150 Benne' dxeláu zi' xuzre̱' neda' ba zaj zre̱'e̱ xelune̱' chia' da cale̱la. Zaj nusane̱' da dxenná da bdxixruj be'u.
PSA 119:151 Xrana' Dios, zu' Lue' gagu naga zua', ne da li zaj naca xúgute̱ da bdxixruj be'u.
PSA 119:152 Gate nate ba núnbe'a da dxuse̱de dizra' chiu' netu', da na' nuzú' chee̱ntu' tu chí'izqueze.
PSA 119:153 Gunná' xque ca dxezaca zi'a, ne bselá neda' lawe' da quebe ne gal-la lazra' da dxenná da bdxixruj be'u.
PSA 119:154 Beche̱be waláz chia', ne bexa'u neda'. Btipa lazra' nen xrtizru'.
PSA 119:155 Sté̱bele̱'e̱ naca xelelá benne' ca' dxelebéaj xíchaje̱' Lue', Dios, lawe' da quebe dxelebé'e̱ gunne xue xelune̱' ca naca xrba chiu'.
PSA 119:156 Xrana' Dios, dxexache lázrele̱'u bénneache chiu'. Btipa lazra' cáte̱ze dxenná xrtizru' gunu'.
PSA 119:157 Zánete̱ zaj naca benne' ca' zaj nau zi' xuzre̱' neda', ne benne' ca' dxeledábague̱' neda', san quebe ne gusana' dxuna' ca dxuse̱de dizra' chiu' netu'.
PSA 119:158 Ble'eda' benne' ca' dxelún lazre̱', na' dxegúteda' benne' ca' lawe' da quebe dxelune̱' ca dxenná xrtizru'.
PSA 119:159 Gunná'xque, Xran, ca nazrí'ida' da bdxixruj be'u. Dute̱ xel-la' dxexache lazre' chiu', btipa lazra'.
PSA 119:160 Da líqueze zaj naca xúgute̱ xrtizru', ne tu chí'izqueze zaj naca da dxuchi'u chee̱ntu' lu da xrlátaje chiu'.
PSA 119:161 Benne' ca' dxelenná be'e̱ dxeláu zi' xuzre̱' neda' na' quebe bi nuna' chee̱'. Dute̱ lázrdawa' dxezreba' ca zaj naca xrtizru'.
PSA 119:162 Dxebéle̱'e̱da' lu da dxenná xrtizru' ca dxebé bénnea' dxezrél-lene̱' tu xel-la' gunní'a zrente̱.
PSA 119:163 Dxecuídeda', ne dxegúteda' da we̱n lazre'. Nazrí'ida' da dxenná da bdxixruj be'u.
PSA 119:164 Gazre lasa tu zra dxue lá'ana' Lue' lawe' da xrlátaje naca ca dxuchi'u chee̱ntu'.
PSA 119:165 Dxelebeza zri lázrele̱'e̱ benne' ca' zaj nazrí'ine̱' da bdxixruj be'u, na' quebe bi de̱ da gun na cheajlecházie̱'.
PSA 119:166 Xrana' Dios, dxebeza' Lue' xidu' guseláu' neda', ne tu dxúnzqueza' ca naca da bdxixruj be'u.
PSA 119:167 Dute̱ lázrdawa' tu dxúnzqueza' da dxuse̱de dizra' chiu' netu', ne nazrí'ile̱'e̱da' ca naca na.
PSA 119:168 Tu dxúnzqueza' ca naca da bdxixruj be'u, ne ca dxuse̱de dizra' chiu' netu' lawe' da dxelé'equeznu' xúgute̱ da dxuna'.
PSA 119:169 Xrana' Dios, bene da dxuláwizra' Lue'. Bzéajni'i neda' ca dxenná xrtizru' gunu'.
PSA 119:170 Bene da dxenaba' lau Lue'. Bselá neda' ca dxenná xrtizru' gunu'.
PSA 119:171 Tu güe lá'anazqueza' Lue', Xran, gate ba nusé̱denu' neda' guna' ca naca xrba chiu'.
PSA 119:172 Tu guchálajzqueza' ca naca xrtizru' lawe' da xrlátaje naca ca dxenná be'enu' netu'.
PSA 119:173 Guzúate̱queze gácale̱nu' neda' lawe' da dxuna' ba xuzre guna' ca bdxixruj be'u.
PSA 119:174 Dxezá lazra' guseláu' neda', Xrana' Dios. Dxezaca ba lázrele̱na' da bdxixruj be'u.
PSA 119:175 Be̱n gaca bana', na' güe lá'ana' Lue', na' da dxuchi'u chia' xelácale̱ na neda'.
PSA 119:176 Gudéa' chalá'ala ca dxedá tu zrila' naníteba'. Bexilaj neda', we̱n zrin chiu', lawe' da quebe ne gal-la lazra' da bdxixruj be'u.
PSA 120:1 Gate guzúa' lu da ste̱be bláwizra' Xránadxu Dios, na' Le̱' gúcale̱ne̱' neda'.
PSA 120:2 Bselá neda', Xrana' Dios, lu na' benne' we̱n lazre' ca', ne lu na' benne' dxelezí xe̱'e̱ ca'.
PSA 120:3 ¿Bizra gunna Dios le'e, benne' dxelezí xe̱'e̱? ¿Bizra da ba neza gaca na chee̱le gate gudée̱' le'e lu da zi' da xa'?
PSA 120:4 Gudée̱' le'e lu na' benne' ca' xuludé̱'e̱ le'e xaga nalá xéche'ze, ne xuluzríe̱' le'e xi' galaj.
PSA 120:5 Edxugúa neda'. Dxaca chia' ca zúaqueza' ládujla benne' Mesec, ne ca zua' tu lu xu'u xide chee̱ benne' Cedar.
PSA 120:6 Da zrente̱ ba guzúa' ládujla benne' caní dxuluzúe̱' chalá'ala xel-la' dxebeza zri lazre'.
PSA 120:7 Neda' dxezá lazra' gata' xel-la' dxebeza zri lazre'. Gate dxuchálaja' chee̱n, dxeledíl-lale̱ benne' ca' neda'.
PSA 121:1 Chisa xíchaja' nna'a da dxelún bénneache lu xi'a ca'. ¿Gazra za' da gácale̱ na neda'?
PSA 121:2 Da gácale̱ na neda' za' lu na' Xránadxu Dios, Bénnea' be̱ne̱' xabáa, ne xe̱zr la xu.
PSA 121:3 Quebe gu'e̱ lataj cheajcháziu'. Quebe gase Bénnea' dxuxúequeze̱' lue'.
PSA 121:4 Gunná' xque, quebe te bchigala chee̱ Bénnea'. Québequeze gase Bénnea' dxuxúequeze̱' benne' Israel ca.
PSA 121:5 Xránadxu Dios dxucú'uje̱' lue'. Xránadxu Dios zue̱' cuitu' xabe̱la dxegu'e̱ lue' zrul-la.
PSA 121:6 Quebe guzezxe gubizra lue' te zra, ne quebe bi gune beu' lue' chizrela.
PSA 121:7 Xranu' Dios guxúequeze̱' lue' chee̱ quebe bi da cale̱la gaca na chiu'. Guxúequeze̱' bénne'du xu'u.
PSA 121:8 Xránadxu Dios guxúequeze̱' lue' gate dxedxúaju', ne gate dxexú'u, na'a zra, ne chadía chacanna.
PSA 122:1 Gubéle̱na' benne' ca' gulé̱'e̱ neda': “Chéajdxu xu'u lizre Xránadxu Dios.”
PSA 122:2 Na'a zúadxu nigá, ze̱ntu' dxa xu'u ze'e da naxechaj lue', xe̱zre Jerusalén.
PSA 122:3 Jerusalén naca na tu xe̱zre da belexune̱', na' naca na xrtante̱, ne dxé'le̱'e̱ na cháwedau'.
PSA 122:4 Lu xe̱zre na' zjaca xúgute̱ cuen bénneache zaj de̱'e̱ Xránadxu Dios. Dxelune̱' ca dxenná dizra' da guzre Dios benne' Israel ca', chee̱ xelúe lá'ane̱' La Xránadxu Dios.
PSA 122:5 Lu xe̱zre na' zaj dxe' benne' ca' dxuluchi'e̱ chee̱ benne' Israel ca', naga zaj dxe' benne' xrtia David, benne' ca' dxelenná be'e̱.
PSA 122:6 Le naba lau Dios gata' xel-la' dxebeza zri lazre' lu xe̱zre Jerusalén, chee̱ xelepe ban da dxelún benne' ca' zaj nazrí'ine̱' xe̱zre na'.
PSA 122:7 Dxenábantu' Dios sua xel-la' dxebeza zri lazre' lu'ule ze'e da naxechaj na lue', Jerusalén, ne chee̱ xelezrá' chawe' benne' zaj xu'e̱ xu'u zren chiu'.
PSA 122:8 Nazrí'ida' le sa' ljwezra', ne bi ljwezra' ca', na' dxennía': Gata' xel-la' dxebeza zri lazre' chiu', xe̱zre Jerusalén.
PSA 122:9 Lawe' da nazrí'ida' xu'u lizre Xránadxu Dios dxuna' ba xuzre gaca chawe' chiu'.
PSA 123:1 Chisa xíchaja' nna'a naga zu', Xran, naga zu' Lue', zu' xabáa na'la.
PSA 123:2 Ca dxun tu bi we̱n zrin dxenná'abe' bi nna xránabe', ne ca dxun nu'ula we̱n zrin dxenná'abe' bi nna nu'ula xránabe', caní dxenná'adxu bi nna Xránadxu Dios ca zrindxa zra xexache lazre̱' chee̱dxu.
PSA 123:3 Bexache lazre' chee̱ntu', Xránantu' Dios. Bexache lazre' chee̱ntu', lawe' da dxedú lázrentu' lawe' da dxulucá'ana ditaj bénneache netu'.
PSA 123:4 Dxedú lázrentu' lawe' da dxelún lala benne' gunní'a ca' chee̱ntu', ne dxulucá'ana ditaj netu', benne' ca' dxulucá'ana szren cuine̱'.
PSA 124:1 Chela ca gúcale̱ Xránadxu Dios dxi'u. Caní dxal-la' xelenná benne' Israel ca' na'a.
PSA 124:2 Chela ca gúcale̱ Xránadxu Dios dxi'u gate guledíl-lale̱ benne' ca' dxi'u,
PSA 124:3 na' buluzría xi'te̱' dxi'u lu dute̱ xel-la' dxelezrá'a zrente̱ chee̱',
PSA 124:4 ne guca chee̱dxu ca dxaca chee̱ benne' dxugacu nísadau' le̱', da na' gute na le̱'.
PSA 124:5 Chela guca caní chee̱dxu, na' bé̱tete̱ da na' dxi'u.
PSA 124:6 Dxal-la' xe̱dxu Xránadxu Dios; Xcalenu', lawe' da quebe be̱'e̱ lataj benne' ca' xuluzría xi'e̱ dxi'u.
PSA 124:7 Beladxu ca dxelá tu bxinne lu xixruj chee̱ benne' wezén bxinne. Bzria xi' Xránadxu xel-la' dxenná bea chee̱ benne' ca', na' beladxu.
PSA 124:8 Naca Xránadxu Dios Bénnea' dxácale̱ne̱' dxi'u, Bénnea' bé̱nqueze̱' xabáa, ne xe̱zr la xu.
PSA 125:1 Benne' ca' dxuluxrén lazre' Xránadxu Dios zaj naque̱' ca xi'a Sión, da quebe nu seque' gutá, san tu chí'izqueze zua chacha na.
PSA 125:2 Ca zaj zua xi'a ca' da zaj naxechaj na Jerusalén, zua Xránadxu Dios, dxuxúequeze̱' bénneache chee̱' na'a zra, ne chadía chacanna.
PSA 125:3 Quegá tu chí'izqueze xelenná bea benne' ca' dxelune̱' da cale̱la lu xe̱zr la xu chee̱ benne' xrlátaje ca', chee̱ quebe xelaca benne' xrlátaje ca' tuze nen benne' we̱n da zrinnaj ca'.
PSA 125:4 Xrana' Dios, be̱n gaca chawe' chee̱ benne' xrlátaje ca', ne chee̱ benne' ca' zaj naque̱' li lazre'.
PSA 125:5 Benne' ca' dxelebéaj xichaj Dios chee̱ xelune̱' da cale̱la, xucuasa Xránadxu Dios benne' ca' tu zren nen benne' ca' dxelune̱' da zrinnaj. Dxenaba' gata' xel-la' dxebeza zri lazre' chee̱ benne' Israel ca'.
PSA 126:1 Gate Xránadxu Dios bselé̱' dxi'u lu na' benne' zitu' ca', ne begu'e̱ dxi'u lu xe̱zre Sión, gúquedxu dxenne̱dxu xe̱la.
PSA 126:2 Nadxa bzrízredxu, ne be̱ lá'anadxu Xránadxu Dios. Nadxa gulenná benne' xe̱zr la xu ca': “Da zrente̱ ca' be̱n Dios, Xrana benne' ca', chee̱'.”
PSA 126:3 Da zrente̱ ca' be̱n Xránadxu Dios chee̱dxu dxi'u, na' zúadxu lu da ba neza zrente̱.
PSA 126:4 Bselá Xránadxu dxi'u lu na' benne' zitu' ca', na' bezrindxu lu xe̱zr la xu chee̱dxu ca dxezrín nisa guba'u lu xe̱gu bizre ca'.
PSA 126:5 Benne' ca' dxelebezre̱' tie̱' dxelaze̱', nen xel-la' dxelebé xelexezi'e̱ lina.
PSA 126:6 Dxebezre tie̱' zéaje̱' nu'e̱ binne cháwe'du ca', na' dute̱ xel-la' dxebé dxezrine̱' zeajnu'e̱ lina chee̱'.
PSA 127:1 Chela ca zúale̱ Xránadxu Dios benne' ca' dxelune̱' tu xu'u dácheze naca xelune̱' zrin na'. Chela ca dxuxúe Xránadxu Dios tu xe̱zre, dácheze naca dxuluxúe benne' ca' le̱ na.
PSA 127:2 Dácheze naca dxásaze̱le che zílala, ne dxunle zrin cáte̱ze dxalaj gubizra ca dxebíadxa na, ne dute̱ xel-la' dxudía dxezile da gágule, lawe' da dxunna Dios da xelagu benne' ca' nazrí'ine̱' dxácate̱ na' dxelásie̱'.
PSA 127:3 Le nna' xque, zaj naca zrí'inedxu bi ca' be̱nna Xránadxu dxi'u. Zaj naca be̱' tu da gunní'a zrente̱.
PSA 127:4 Zrí'inedxu dxelálajbe' chee̱dxu gate ne nácadxu cuide' zaj nácabe' ca xaga nalá xéche'ze ca' da nuxru benne' zeje̱' wedil-la.
PSA 127:5 Ba neza zrente̱ naca na chee̱ bénnea' nuxrue̱' zánete̱ xaga nalá xéche'ze caní. Québequeze xedué'ene̱' gate zri'a chee̱' tu zren nen benne' ca' dxeledíl-lale̱ne̱' le̱'.
PSA 128:1 Ba neza zrente̱ naca na chee̱ benne' ca' dxelezrebe̱' Xránadxu Dios, benne' ca' tu dxelúnzqueze̱' ca nadxixruj be'e Dios.
PSA 128:2 Gate dxagu' da dxezi'u chee̱ zrin da nunu' gaca chiu' tu da ba neza, ne gaca chawe' chiu'.
PSA 128:3 Gaca zru'ulu' ca tu lba uva da dxebía da zixre cuita xu'u lizru', na' zri'inu' ca' xelácabe' ca xaga olivo ca' zaj ze̱ dxu'a ga dxagu'.
PSA 128:4 Caní gun Xránadxu gaca chawe' chee̱ bénnea' dxezrebe̱' Le̱'.
PSA 128:5 Dxenaba' gun Xránadxu, zue̱' xi'a Sión, gaca chawe' chiu', chee̱ le'enu' gaca chawe' chee̱ xe̱zre Jerusalén xúgute̱ zra naca banu',
PSA 128:6 ne chee̱ le'enu' zri'ine zre su'. Dxenaba' gata' xel-la' dxebeza zri lazre' chee̱ benne' Israel ca'.
PSA 129:1 Zúadxu lu da sté̱bele̱'e̱ gate nácate̱dxu cuide', waca xelenná benne' Israel ca'.
PSA 129:2 Zúadxu lu da sté̱bele̱'e̱ gate nácate̱dxu cuide' san quebe buluzria xi'e̱ dxi'u.
PSA 129:3 Belune̱' we̱' cúzrudxu gate beline̱' dxi'u xide, na' gulaca cúzrudxu ca xe̱zr la xu naga dxedé xia chee̱ be̱zre.
PSA 129:4 Xlátaje̱ naca Xránadxu Dios. Bselé̱' dxi'u lu na' benne' ca' buluchínene̱' dxi'u xadíaze.
PSA 129:5 Be̱n cheajlechaze, ne xelebígaqueze xúgute̱ benne' ca' dxelecuídene̱' benne' Sión ca'.
PSA 129:6 Be̱n xelaque̱' ca xíxre'du ca' dxelebía na xrgu'u da dxelebizre na gate ne zaj nadxé'ene na,
PSA 129:7 da na' quebe nu benne' dxexequé̱'e̱ na, ne quebe seque' nu benne' gune̱' na tu cheaj weaj.
PSA 129:8 Quebe xelenná benne' dxeledée̱' naga zaj zria na: Dxenábantu' gun Xránantu' Dios gaca chawe' chee̱le. Lu La Xránantu' Dios dxenábantu' gaca chawe' chee̱le.
PSA 130:1 Ga ni zua' lu da sté̱bele̱'e̱ dxuláwizra' Lue', Xrana' Dios.
PSA 130:2 ¡Xran, bene chi'a! ¡Bze̱ naga da dxenaba' lau'!
PSA 130:3 Xrana' Dios, chela nna' xánniu' ca naca dul-la nabágantu' ¿núzraqueze xegá'ana xrlátaje lau Lue'?
PSA 130:4 Lué'quezu' dxunite lau' chee̱ntu' chee̱ gápantu' Lue' ba lá'ana.
PSA 130:5 Dute̱ lázrdawa' dxebeza lazra' Xránadxu Dios, ne dxuxrén lazra' xrtizre̱'.
PSA 130:6 Dxebeza lazredxa' Xránadxu Dios cáqueze dxelún benne' ca' dxuluxúe̱' xe̱zre ca', dxelebeze̱' chaní', ne cáqueze dxelún benne' ca' dxelicha bchigala, dxelebeze̱' chaní'.
PSA 130:7 Benne' Israel ca' dxal-la' xelebeza lazre̱' Xránadxu Dios lawe' da dxexache lazre' Xránadxu bénneache chee̱', ne dxexá'awe̱' benne' ca' lu na' benne' guledábague̱' Le̱'.
PSA 130:8 Dios xexá'awe̱' benne' Israel ca' lu na' xúgute̱ dul-la da zaj nabague̱'.
PSA 131:1 Xrana' Dios, ba bsana' xel-la' dxucá'ana szren cuina', ne ba bcuasa' xel-la' dxeque xrlátaje cuina'. Quebe dxulapa napa' lu da zaj naca szren, da ca' quebe naca chia' gulapa' na'a.
PSA 131:2 Quebe bi gunnía', ne guzúa' zrize ca tu bi dxe'ene za bexuzrte̱ gúzrebe'. Naca bénne'du xu'a ca tu bi dxe'ene za bexuzrte̱ gúzrebe'.
PSA 131:3 Le cueza lazre' Xránadxu Dios, le'e, benne' Israel na'a zra, ne chadía chacanna.
PSA 132:1 Bsa lazre', Xrana' Dios, ca guca chee̱ David, ne ca guzaca zi'e̱,
PSA 132:2 ne ca da guche̱be lazre̱' gune̱' chiu', da guche̱be lazre̱' lau', Dios wal-la chee̱ Jacob.
PSA 132:3 Guné̱': “Québequeze chu'a xu'u lizra', ne québequeze gáta'a ga dxasia'
PSA 132:4 ne québequeze guchúdia' xiaj lawa' ne québequeze gasia'
PSA 132:5 ca zrindxa zra ba be̱na' tu xu'u lizre Xrana' Dios naga súaqueze Dios wal-la chee̱ Jacob.”
PSA 132:6 Bénedxu zua xí'ina lá'azxa naga xu'u xel-la' wezría lu xe̱zr la xu Efrata, na' bezréledxu na lu xe̱zr la xu chee̱ bénnea' le̱' Jaar.
PSA 132:7 Gunnantu': Chéajntu' naga zua Dios chee̱ntu'. Guzú zríbentu' zran ni'a Le̱'.
PSA 132:8 Guxasa, Xránantu' Dios, nen xí'ina naga xu'u xel-la' wezría chiu', ne gudá lu xi'a naga súaquezu' Lue'.
PSA 132:9 Be̱n xelún bxruze chiu' ca' da naca xrlátaje, ne xelebezre xa'a xúgute̱ bénneache chiu', lu dute̱ xel-la' dxelebé chee̱'.
PSA 132:10 Lawe' da nazrí'inu' David, we̱n zrin chiu', quebe guzú' chalá'ala wenná bea na' ba guca'u Lue'.
PSA 132:11 Da líqueze bzetaj cuina Xránadxu Dios, guche̱be lazre̱' chee̱ David quebe gucuase̱' ca da gunné̱'. Gunné̱': “Guna' xelenná bea zri'ine zre su' naga dxenná béaquezu' Lue'.
PSA 132:12 Che zri'inu' ca' tu xelúnzqueze̱' ca naca xel-la' wezría chia', ne ca naca xrtizra' da gusé̱deda' le̱', zri'inu' ca' tu xelenná béazqueze̱' naga dxenná be'u lue'.”
PSA 132:13 Lawe' da gucá'a Xránadxu Dios xe̱zre Sión, guca lazre̱' sua xu'u lízrequeze̱' ga na'.
PSA 132:14 Gunné̱': “Tu gácazqueze lataj nigá naga súaqueza' neda'. Tu súazqueza' nigá lawe' da caní dxezaca ba lazra' guna'.
PSA 132:15 Guna' gáta'le̱'e̱ lina chee̱ benne' ca', ne guna' xelelaj benne' xache' ca' xeta.
PSA 132:16 Guna' xelún bxruze chia' ca' da naca chawe', na' xelebezre xa'a xúgute̱ bénneache chia' lu dute̱ xel-la' dxelebé chee̱'.
PSA 132:17 Lataj na' guna' xexaca xel-la' dxenná bea chee̱ David. Guna' xelezúa na' zri'ine zre sua wenná bea na' ba gucá'a neda'.
PSA 132:18 Guna' xeleque zréaje benne' guledábague̱' Le̱', na' guna' chepe ban xel-la' dxenná bea chee̱ David na'.”
PSA 133:1 Le nna' xque, xrtante̱ naca, ne cháwe'le̱'e̱ naca gate zaj nazraga bénneache chee̱ Dios, zaj naque̱' tuze.
PSA 133:2 Naca na ca tu da za da dxuluzúa xíchaje̱', da dxedínnete̱ na dxu'a lawe̱', ca na' dxedínnete̱ na lu luzru Aarón, ne dxedínnete̱ na ga zria zre̱'.
PSA 133:3 Dxedínnete̱ na ca xrle̱'e̱la da dxexruj lu xi'a Hermón, ne dxexruj na lu xi'a Sión lawe' da gun Xránadxu Dios gaca chawe' chee̱ bénneache zaj zre̱'e̱ na', ne gunne̱' benne' ca' xel-la' nabán da zeajlí canna.
PSA 134:1 Le na' xque, le güe lá'ana Xránadxu Dios, le'e, nácale we̱n zrin chee̱ Xránadxu, zrale xu'u lizre Xránadxu chizrela.
PSA 134:2 Le chisa na'le lau lataj lá'azxa, ne le güe lá'ana Xránadxu Dios.
PSA 134:3 Dxenaba' lau Xránadxu zue̱' Sión gune̱' gaca chawe' chiu', naque̱' Bénnea' be̱ne̱' xabáa, ne xe̱zr la xu.
PSA 135:1 ¡Le güe lá'ana La Xránadxu Dios! ¡Le güe lá'ana Le̱', le'e, we̱n zrin chee̱ Xránadxu,
PSA 135:2 le'e zrale xu'u lizre Xránadxu Dios, lu chale'aj chee̱ xu'u naga zúaqueze Dios!
PSA 135:3 ¡Le güe lá'ana Xránadxu lawe' da naque̱' xrlátaje! ¡Le gul-la da güe lá'anale La Le̱', lawe' da naque̱' zri'i lazre'!
PSA 135:4 Xránadxu Dios ba guqué̱'e̱ zri'ine zre sua Jacob. Guqué̱'e̱ zri'ine zre sua Israel chee̱ xelaque̱' bénneache chee̱'.
PSA 135:5 Nézquezdxu szrente̱ naca Xránadxu Dios. Xránadxu naque̱' szrendxa ca xúgute̱ dios chee̱ benne' zitu' ca'.
PSA 135:6 Xúgute̱ da dxaca lazre' Xránadxu gune̱', dxune̱' na zran xabáa, ne lu xe̱zr la xu, ne lu nísadau', ne lu da situj chee̱ nísadau' ca'.
PSA 135:7 Dxune̱' zá'aca beuj dapa saca chee̱ xe̱zr la xu. Dxune̱' dxelepe xesa guziu' gate dxaca xiuj. Dxune̱' dxaca be' gátete̱ze.
PSA 135:8 Be̱ne̱' gulate bi biu nedxu chee̱ benne' Egipto ca'. Gulate bi biu nedxu chee̱ bénneache, ne béadu ca' chee̱ be̱ xixre' chee̱' ca'.
PSA 135:9 Be̱ne̱' xel-la' waca ca' da za xabáa, ne da zrente̱ ca' da be̱ne̱' lu xe̱zr la xu chee̱ benne' Egipto ca', da ca' be̱n Dios da guca chee̱ Faraón, ne chee̱ xúgute̱ we̱n zrin chee̱ Faraón na'.
PSA 135:10 Bzria xi'e̱ bénneache zánete̱ cue' xe̱zr la xu ca', ne be̱tie̱' benne' wenná bea ca', benne' zaj nápale̱'e̱ xel-la' dxelenná bea.
PSA 135:11 Be̱tie̱' Sehón, wenná bea chee̱ benne' amorreo ca', ne Og, wenná bea chee̱ benne' Basán ca', ne xúgute̱ benne' wenná bea chee̱ benne' Canaán ca'.
PSA 135:12 Bequé̱'e̱ xe̱zr la xu nigá lu na' benne' wenná bea ca', na' bnézruje̱' na lu na' bénneache chee̱', benne' Israel ca'.
PSA 135:13 Xrana' Dios, chadía chacanna zua lau' Lue'. Tu cheajlesá lázrezqueze bénneache Lue'.
PSA 135:14 Xránadxu Dios guchi'e̱ chee̱ bénneache chee̱', ne xexache lazre̱' chee̱dxu dxi'u, we̱n zrin chee̱'.
PSA 135:15 Bedau' xia xaga ca' chee̱ benne' xe̱zr la xu ca' zaj naca na oro, ne plata. Zaj naca na da belún bénneache.
PSA 135:16 Zaj zua dxu'a na san quebe dxelenné̱ na. Zaj zua lau na san quebe dxelelé'e na.
PSA 135:17 Zaj zua naga na san quebe dxelén na, ne quebe dxelecá'a na be'.
PSA 135:18 Benne' ca' dxelune̱' na zaj nácaqueze̱' ca lé̱queze na, ne caní zaj naca xúgute̱ benne' dxuluxrén lazre̱' na.
PSA 135:19 Le'e, benne' xrtía Israel, le güe lá'ana Xránadxu Dios. Le'e, benne' xrtia Aarón, le güe lá'ana Xránadxu Dios.
PSA 135:20 Le'e, benne' xrtia Leví, le güe lá'ana Xránadxu Dios. Le'e, núlale dxezrébele Xránadxu Dios, le güe lá'ana Xránadxu Dios.
PSA 135:21 Le'e, zrale xe̱zre Sión, le güe lá'ana Xránadxu Dios, Bénnea' zúaqueze̱' xe̱zre Jerusalén. ¡Gaca ba lá'azxa Xránadxu Dios!
PSA 136:1 ¡Le güe lá'ana Xránadxu Dios, Benne' xrlátaje! ¡Chadía chacanna dxexache lazre̱' dxi'u!
PSA 136:2 ¡Le güe lá'ana Dios, naque̱' szrénte̱dxa ca zaj naca dios chee̱ xe̱zr la xu ca'! ¡Chadía chacanna dxexache lazre̱' dxi'u!
PSA 136:3 ¡Le güe lá'ana Xránadxu, naque̱' szrénte̱dxa ca zaj naca xrana xe̱zr la xu ca'! ¡Chadía chacanna dxexache lazre̱' dxi'u!
PSA 136:4 ¡Le güe lá'ana Dios na', dxune̱' xel-la' waca zri'a ca'! ¡Chadía chacanna dxexache lazre̱' dxi'u!
PSA 136:5 ¡Le güe lá'ana Dios na', be̱ne̱' xabáa dute̱ xel-la' sina chee̱'! ¡Chadía chacanna dxexache lazre̱' dxi'u!
PSA 136:6 ¡Le güe lá'ana Dios na', bzue̱' xe̱zr la xu lawe' nísadau'! ¡Chadía chacanna dxexache lazre̱' dxi'u!
PSA 136:7 ¡Le güe lá'ana Dios na', be̱ne̱' gubizra ne beu'! ¡Chadía chacanna dxexache lazre̱' dxi'u!
PSA 136:8 ¡Be̱ne̱' gubizra chee̱ gusení na te zra! ¡Chadía chacanna dxexache lazre̱' dxi'u!
PSA 136:9 ¡Be̱ne̱' beu' ne belaj ca' chee̱ xulusení na chizrela! ¡Chadía chacanna dxexache lazre̱' dxi'u!
PSA 136:10 ¡Le güe lá'ana Dios na', be̱tie̱' bi biu nedxu chee̱ benne' Egipto ca'! ¡Chadía chacanna dxexache lazre̱' dxi'u!
PSA 136:11 ¡Le güe lá'ana Dios na', bebéaje̱' benne' Israel ca' lu xe̱zr la xu Egipto na'! ¡Chadía chacanna dxexache lazre̱' dxi'u!
PSA 136:12 ¡Beche̱'e̱ le̱' dute̱ xel-la' waca zren chee̱'! ¡Chadía chacanna dxexache lazre̱' dxi'u!
PSA 136:13 ¡Le güe lá'ana Dios na', be̱ne̱' chupa la'a nísadau' da nazí le̱ na Xrna! ¡Chadía chacanna dxexache lazre̱' dxi'u!
PSA 136:14 ¡Bdee̱' benne' Israel ca' laduj nísadau' na'! ¡Chadía chacanna dxexache lazre̱' dxi'u!
PSA 136:15 ¡Bgacue̱' nísadau' na' Faraón, benne' wenná bea chee̱ Egipto, ne benne' zeje̱' wedil-la chee̱' ca'! ¡Chadía chacanna dxexache lazre̱' dxi'u!
PSA 136:16 ¡Le güe lá'ana Dios na', beche̱'e̱ benne' chee̱' ca' le̱'e̱ xixre' lawe' lataj! ¡Chadía chacanna dxexache lazre̱' dxi'u!
PSA 136:17 ¡Le güe lá'ana Dios na', be̱tie̱' wenná bea blau ca'! ¡Chadía chacanna dxexache lazre̱' dxi'u!
PSA 136:18 ¡Be̱tie̱' wenná bea wal-la ca'! ¡Chadía chacanna dxexache lazre̱' dxi'u!
PSA 136:19 ¡Be̱tie̱' Sehón, wenná bea chee̱ benne' amorreo ca'! ¡Chadía chacanna dxexache lazre̱' dxi'u!
PSA 136:20 ¡Be̱tie̱' Og, wenná bea chee̱ xe̱zr la xu Basán! ¡Chadía chacanna dxexache lazre̱' dxi'u!
PSA 136:21 ¡Bnézruje̱' xe̱zr la xu chee̱ benne' ca' chee̱ gaca na chee̱ benne' chee̱' ca'! ¡Chadía chacanna dxexache lazre̱' dxi'u!
PSA 136:22 ¡Be̱nne̱' na chee̱ benne' Israel ca', benne' we̱n zrin chee̱' ca'! ¡Chadía chacanna dxexache lazre̱' dxi'u!
PSA 136:23 ¡Naque̱' Dios na', quebe gul-la lazre̱' dxi'u gate buluzetja benne' ca' dxi'u! ¡Chadía chacanna dxexache lazre̱' dxi'u!
PSA 136:24 ¡Le̱' bselé̱' dxi'u lu na' benne' ca' guledíl-lale̱ne̱' dxi'u! ¡Chadía chacanna dxexache lazre̱' dxi'u!
PSA 136:25 ¡Naque̱' Dios na', dxugawe̱' xúgute̱ da zaj naca ban! ¡Chadía chacanna dxexache lazre̱' dxi'u!
PSA 136:26 ¡Le güe lá'ana Dios chee̱ xabáa! ¡Chadía chacanna dxexache lazre̱' dxi'u!
PSA 137:1 Dxu'a xe̱gu chee̱ xe̱zr la xu Babilonia gudxé'edxu, ne gudxézredxu gate xeajsá lázredxu chee̱ xe̱zre Sión.
PSA 137:2 Lu zruze xaga labada' dxu'a xe̱gu na' buqué̱ladxu da cun zríadi'i na du chee̱dxu ca'.
PSA 137:3 Benne' ca' guleché̱'e̱ dxi'u ca benne' zaj nada'u gulenábene̱' dxi'u gúl-ladxu. Benne' ca' buluzría xi' xe̱zre chee̱dxu gulé̱'e̱ dxi'u súadxu lu xel-la' dxebé, gulenné̱': Le gul-la chee̱ntu' da ca' bíl-lale lu xe̱zre Sión.
PSA 137:4 ¿Ájazra gúl-ladxu da güe lá'anadxu Xránadxu Dios naga zúantu' lu xe̱zr la xu chee̱ benne' zitu' ca'?
PSA 137:5 Chela gal-la lazra' lue', xe̱zre Jerusalén, gun Dios gunite na'a xabe̱la xel-la' waca chee̱ na.
PSA 137:6 Be̱n xedá' luzra' chíchajla' che quebe cheajsá lazra' chiu', ne che quebe gucá'ana szrena' lue', Jerusalén, nacu' da dxezaca ba lázrele̱da'.
PSA 137:7 Xrana' Dios, bsa lazre' da cale̱la da belún benne' Edom lu zra na' guzría xi' xe̱zre Jerusalén, gate na' gulenné̱': “Le guchinnaj na. Le guchinnaj na, ca zrinte̱ lu lane chee̱ na.”
PSA 137:8 Le'e, benne' Babilonia, cuía xile. Ba neza zrente̱ gaca na chee̱ bénnea' gune̱' chee̱le ca da be̱nle le'e chee̱ntu' netu'.
PSA 137:9 Ba neza zrente̱ gaca na chee̱ bénnea' que̱'e̱ bidu chee̱le ca', ne quine̱'-be' lu xiaj xre na'.
PSA 138:1 Xrana' Dios, dute̱ lázrdawa' güe lá'ana' Lue'. Tu dxúl-lazqueza' da dxue lá'ana' Lue' lau dios ca' chee̱ benne' zitu' ca'.
PSA 138:2 Dxuzú zriba' lau xudau' lá'azxa chiu', ne dxue lá'ana' Lau' lawe' da nacu' li lazre', ne dxexache lazru' bénneache chiu', ne lawe' da blé'enu' nacu' Benne' szrente̱, na' szrente̱ naca xrtizru'.
PSA 138:3 Gate bláwizra' Lue', na' gúcale̱nu' neda'. Nen dute̱ xel-la' waca chiu' btipu' lazra'.
PSA 138:4 Xúgute̱ benne' wenná bea du gabí'i xe̱zr la xu xelúe lá'ane̱' Lue', Xrana' Dios. Caní xelune̱' lawe' da ba belenne̱' ca naca xrtizru'.
PSA 138:5 Xelúl-le̱' chee̱ da ba nune̱' Xránadxu Dios, lawe' da zrente̱ naca xel-la' ba chee̱ Xránadxu.
PSA 138:6 Szrente̱ naca Xránadxu Dios, ne dxácale̱ne̱' benne' baxache' ca', na' quebe dxu'e̱ lataj benne' dxucá'ana szren cuine̱' zrine̱' lau Le̱'.
PSA 138:7 Lácala zua' lu da ba xa', Lue' dxutipu' lazra'. Dxedábagu' benne' ca' dxeledábague̱' neda', ne dute̱ xel-la' waca chiu' dxuseláu' neda'.
PSA 138:8 Gun Xránadxu Dios da guche̱be lazre̱' chia'. Xrana' Dios, tu dxexache lázrezquezu' bénneache chiu'. Quebe gusanu' dxunu' zrin da guzú lau' dxunu'.
PSA 139:1 Xrana' Dios, ba gunná' xánniu' neda' ne núnbea xánniu' neda'.
PSA 139:2 Nézqueznu' gate dxe'a, ne gate dxasa'. Zítu'la nézqueznu' da zaj xu'u xichaj lázrdawa'.
PSA 139:3 Ba gunná' xánniu' ca dxuna', ne ca dxexezí' lazra'. Nézqueznu' xúgute̱ da dxuna'.
PSA 139:4 Gate quebe ne guchálaja' ba nézqueznu' Lue', Xran, xúgute̱ da nnia'.
PSA 139:5 Gátete̱zla cuita' neda' zúaquezu' Lue', Xran, ne nuzé̱ na'u neda'.
PSA 139:6 Ca szrente̱ naca da nézenu' Lue' naca na da dxebáneda'. Nácale̱'e̱ na sina da quebe gaca chéajni'ida'.
PSA 139:7 ¿Gala cha'a zitu' naga quebe zúaqueze Be' chiu'? ¿Gala guzrúnnuja' naga quebe zúaquezu' Lue'?
PSA 139:8 Che cuena' sibe zran xabáa, na' zúaquezu' Lue', ne che xétaja' lu da situj chee̱ xe̱zr la xu, na' zu' Lue'.
PSA 139:9 La séqueda' tea' lu be', ne cha'a zitu' naga dxalaj gubizra, u tea' xechalá'a nísadau' naga dxebía gubizra,
PSA 139:10 cá'anqueze na' súale̱nu' neda', ne guxru na'u xabe̱la neda'.
PSA 139:11 Chela gaca guna' gacu da chul-la neda', u guna' xexaca lení' da naxechaj neda', chee̱ xaca na da chul-la,
PSA 139:12 da chul-la na' quebe gaca gucache na neda' lau Lue', na' chizrela xaca na ca te zra lau'. Túzqueze ca zaj naca da chul-la, ne xel-la' naxaní' lau Lue'.
PSA 139:13 Lue' be̱nu' da zaj xu'u lu be̱la' dxen chia'. Lue' bzalju' neda' lu le̱'e̱ xrna'a.
PSA 139:14 Güe lá'anaqueza' Lue' lawe' da szrente̱ zaj naca da dxunu', ne dxebáneda' ca zaj naca na. Dute̱ lázrdawa' nézquezda' caní naca na.
PSA 139:15 Blé'equeznu' neda' gate gulá' gubinna zrita xu'a, gate na' belezraga na lu le̱'e̱ xrna'a, gate na' bgula' lu da bagácheze na'.
PSA 139:16 Ble'enu' be̱la' dxen chia' gate gulá' gubinna na. Xúgute̱ da caní ba naxúaj na lu xiche chiu', na' ca gudé na' gulá' gubinna na, na' xúgute̱ na gulaca na cáte̱ze zaj naxúaj na.
PSA 139:17 Dios, szrente̱ zaj naca da dxuwía lazru' gunu'. Da zante̱ ca zaj naca na.
PSA 139:18 Chela gaca lazra' gulaba' ca zaj naca na, zaj naca na ca xuzre' dxe' dxu'a tu xe̱gu zren. Gate dxexebana', ne zúale̱queza' Lue'.
PSA 139:19 Dios, da líqueze gutiu' benne' ca' dxelune̱' da cale̱la. Chee̱ le̱ na', le gucuasa naga zua', le'e, we̱te benne'.
PSA 139:20 Chiu' Lue', Dios, dxelenné̱' dizra' schanni'. Benne' ca' dxeledábague̱' lue' dxuluzétaje̱' Lau' lu da xálaze.
PSA 139:21 Xrana' Dios, dxecuídeda' benne' ca' dxuluzúe̱' Lue' chalá'ala, ne dxezrá'li'a benne' ca' dxeledábague̱' Lue'.
PSA 139:22 Dute̱ lázrdawa' dxecuídeda' benne' ca'. Dxéqueda' benne' ca' ca benne' ca' dxeledábague̱' nédaqueza'.
PSA 139:23 Gunná' xanne' neda', Dios, ne gunná' da xu'u na lázrdawa'. Bxue neda' chee̱ nézenu' da xu'u lu xichaj lázrdawa'.
PSA 139:24 Gunná' che zúale̱ tu da cale̱la neda', na' bsi neda' lu neza chawe' chiu' da zeajlí canna.
PSA 140:1 Xrana' Dios, bselá neda' lu na' benne' ca' dxelune̱' da cale̱la. Bxue neda' chee̱ quebe bi xelún benne' xichaj zra'a ca' chia' neda'.
PSA 140:2 Benne' caní dxuluwía lazre̱' da cale̱la ca' da xelune̱'. Tu zra tu zra dxulutíl-lale̱ne̱' bénneache.
PSA 140:3 Da dxelenné̱' naca na ca lazxa be̱la' da zaj nalále̱'e̱. Xrtizra' benne' ca' zaj naca na ca nisa snia chee̱ be̱la'.
PSA 140:4 Xrana' Dios, bxue neda' chee̱ quebe bi xelún benne' ca' dxelune̱' da cale̱la chia' neda'. Bselá neda' lu na' benne' xichaj zra'a ca', benne' ca' dxelune̱' ba xuzre cheajcházia'.
PSA 140:5 Benne' ca' dxulucá'ana szren cuine̱' zaj nabeque̱' tu da que̱l-la na neda'. Ba zaj nuzale̱' xralaj dxu'a neza. Ba zaj nabeque̱' da ca' xele̱l-la na neda'.
PSA 140:6 Gucha' Xrana' Dios: Lue' nacu' Dios chia'. Xrana' Dios, bene chi'a dxuláwizra' Lue'.
PSA 140:7 Xrana' Dios, nacu' weselá chia'. Lue' bcu'uju' xíchaja' lu zra guca wedil-la.
PSA 140:8 Xran, quebe gu'u lataj gaca ca da dxelezá lazre' benne' ca' dxelune̱' da cale̱la. Quebe gu'u lataj chepe ban da dxuluwía lazre̱' xelune̱', chee̱ quebe xulucá'ana szren cuine̱'.
PSA 140:9 Zaj naxechaj benne' ca' dxelune̱' da cale̱la neda'. Be̱n gaca chee̱ benne' ca' ca de' da dxelaca lazre̱' gaca chee̱ benne' xula.
PSA 140:10 Be̱n xexruj xi' lawe' benne' ca'. Bzra benne' ca' lu xi'. Bzra benne' ca' lu da sítujle̱'e̱ naga cabátadxa xelexedxúaje̱'.
PSA 140:11 Quebe gu'u lataj xegá'ana lu xe̱zr la xu bénnea' dxenné̱' da cale̱la. Be̱n gaca da cale̱la chee̱ benne' xichaj zra'a, da guzría xi na le̱'.
PSA 140:12 Nezda' xeche̱be Xránadxu Dios waláz chee̱ benne' baxache', ne guzé̱ chache̱' da zaj xu'u lu na' benne' xache' ca'.
PSA 140:13 Da líqueze benne' xrlátaje ca' xelúe lá'ane̱' Lau' Lue', na' benne' li lazre' ca' xelezúe̱' naga zu' Lue'.
PSA 141:1 Xrana' Dios, dxuláwizra' Lue'. Gudázega gácale̱nu' neda'. Bene chi'a gate nnia' Lue'.
PSA 141:2 Be̱n la' da dxenaba' lau Lue' ca zren xala. Ble'e na'a da dxechisa' lau' ca tu béadau' dxútia'-ba' lau'.
PSA 141:3 Xrana' Dios, bxue dxu'a nigá, ne bxue xide dxu'a chee̱ quebe nnia' tu da cale̱la.
PSA 141:4 Quebe gu'u lataj gaca lazra' guna' tu da cale̱la, ne chee̱ quebe guna' tu da cale̱la tu zren nen benne' ca' dxelune̱' da zrinnaj, ne chee̱ quebe gágule̱na' benne' ca' dxelune̱' da cale̱la lu laní chee̱'.
PSA 141:5 Che gudé benne' xrlátaje neda' lu da ba xa', gaca na chia' tu da chawe', na' che til-le̱' neda', gaca na chia' ca tu da dxelále̱'e̱ zixre da dxegu'e̱ xíchaja'. Tu nábazqueza' Dios guzague̱' da cale̱la da dxelún benne' ca' dxelune̱' da cale̱la.
PSA 141:6 Gate xeledxú'une̱' benne' xíchaje̱ ca' chee̱ benne' we̱n da cale̱la ca' zran xi'a xiaj ca', na' xeleque be'e bénneache naca li ca da gunnía'.
PSA 141:7 Xelase dinnaj zrita chee̱ benne' ca' dxu'a xe̱dxu ba chee̱' ca'. Xelaca na ca bchecu xu, da dxelase dinnaj na naga dxa'ana be̱zre.
PSA 141:8 Chee̱ le̱ na' dxenná'a naga zu' Lue', Xrana' Dios. Dxuxrén lazra' Lue', quebe gusán lazru' neda'.
PSA 141:9 Bxue neda' chee̱ quebe xele̱l-la xralaj ca' chee̱ benne' ca' dxelune̱' da cale̱la neda', ne chee̱ quebe cheajcházia' lu da zaj nabeque' benne' we̱n da cale̱la ca'.
PSA 141:10 Be̱n cheajlechaze benne' ca' dxelune̱' da cale̱la lu xralaj da zaj nabéchequeze̱' dxácate̱ na' tea' neda' ga na' zri'a chawe'.
PSA 142:1 Zizraj dxuláwizra' Xránadxu Dios. Du lazra' dxenaba' Xránadxu xexache lazre̱' neda'.
PSA 142:2 Lau Le̱' dxawa' zría ca da dxaca chia'. Lau Le̱' dxulé'eda' ca da ste̱be zua' neda'.
PSA 142:3 Gate zua lázrdawa' lu da ste̱be, Lue', Xran, nézenu' da dxaca chia'. La neza naga dxedá' gulebeque̱' xralaj da que̱l-la na neda'.
PSA 142:4 Dxenná'a cuita' xabe̱la, san quebe nu chilá' gácale̱ neda'. Quebe nu chilá', benne' guxúequeze̱' neda'. Quebe nu chilá', benne' dxe' gunna xue̱' chia' neda'.
PSA 142:5 Dxuláwizra' Lue', Xrana' Dios, dxennia': Dxebeza lazra' tuzu' Lue'. Tuzu' Lue' dxezá lazra' lu xe̱zr la xu nigá.
PSA 142:6 Bene da dxuláwizra' Lue', lawe' da dxezaca zí'le̱'a. Bselá neda' lu na' benne' ca' dxeláu zi' xuzre̱' neda', lawe' da zaj naque̱' wál-ladxa ca neda'.
PSA 142:7 Bebéaj neda' lu da dxaca chia', chee̱ gaca güe lá'ana' Lue'. Benne' xrlátaje ca' xeléchaje̱' neda' lawe' da gunu' gaca chawe' chia'.
PSA 143:1 Xrana' Dios, bene da dxuchálaja' lau Lue'. Bze̱ naga da dxenaba' lau'. Gudá gácale̱nu' neda' lawe' da nacu' li lazre', ne xrlátaje.
PSA 143:2 Quebe guchi'u chia' neda', we̱n zrin chiu', ca naca da nabaga', lawe' da lau' Lue' quebe nu chilá' benne' naque̱' du lazre'.
PSA 143:3 Gúcale̱ neda' lawe' da dxeláu zi' xuzre' neda'. Xeláteze bache xelútie̱' neda'. Ba belune̱' naca' ca tu benne' dxedé' lu da chul-la ca naca chee̱ benne' gate ca'.
PSA 143:4 Zua lázrdawa' lu da sté̱bele̱'e̱, ne dxewí'ine lázrele̱'a.
PSA 143:5 Dxeajsá lazra' ca guca nédxudaute̱. Dxulaba lazra' ca naca xúgute̱ da be̱nu'. Dxeajsá lazra' ca naca da zrente̱ ca' da be̱nu'.
PSA 143:6 Dxechisa na'a lau Lue'. Naca' ca tu xe̱zr la xu bizre, dxebíleda' Lué'queze.
PSA 143:7 Gudázega gácale̱nu' neda', Xran, lawe' da dxedú lazra'. Quebe chenu' gácale̱nu' neda', chee̱ quebe gaca' ca tu benne' ba xu'e̱ xe̱dxu ba.
PSA 143:8 Che zílala be̱n cheajsá lazra' dxexache lazru' bénneache chiu' ca' lawe' da dxuxrén lázrequeza' Lue'. Bzéajni'i neda' ca dxal-la' guna' lawe' da dxezá lazra' guna' da dxaca lazru' Lue'.
PSA 143:9 Xrana' Dios, bselá neda' lu na' benne' ca' dxeledábague̱' neda' lawe' da dxuzúa cuina' lu na'u chee̱ guxúequezu' neda'.
PSA 143:10 Bse̱de neda' chee̱ guna' da dxaca lazru' Lue', lawe' da nacu' Lue' Dios chia'. Gusel-la Be' xrlátaje chiu' chee̱ che̱'e̱ neda' la neza chawe' chiu'.
PSA 143:11 Chee̱ gaca bea na nacu' xrlátaje, Xran, gutipu' lazra'. Lawe' da nacu' xrlátaje, guseláu' neda' lu da dxaca chia'.
PSA 143:12 Lawe' da nacu' li lazre', guzría xi'u benne' ca' dxeledábague̱' neda', ne guzría xi'u xúgute̱ benne' ca' dxelaca lazre̱' xuluzría xi'e̱ neda', lawe' da naca' neda' we̱n zrin chiu'.
PSA 144:1 ¡Gaca ba lá'azxa Xránadxu Dios, Bénnea' dxuzé̱ chache̱' neda'! Naque̱' Bénnea' dxuzázraje̱' na'a chee̱ cha'a lu wedil-la, ne dxuzázraje̱' zrube na'a chee̱ séqueda' tíl-lale̱na' benne' ca' dxelune̱' da cale̱la.
PSA 144:2 Naque̱' Benne' dxexache lazre̱' neda', ne naque̱' ca tu xu'u naga ze̱ chawa'. Dxuzúa chache̱' neda', ne dxuselé̱' neda'. Dxucu'uje̱' neda', na' dxuxrén lazra' Le̱'. Dxune̱' dxuluzúa bénneache chia' dizra' chia'.
PSA 144:3 Xrana' Dios, ¿ájazra naca nu benne', dxeajsá lazru' le̱'? ¿Ájazra naca nu benne' dxe'u gunne xue chee̱'?
PSA 144:4 Naca benne' ca tu da níteze. Zaj naca zra chee̱' ca tu zrul-la da dxedeze.
PSA 144:5 Xrana' Dios, gusalaj zran xabáa, ne betaj gácale̱nu' neda'. Bta xi'a ca', na' dxuaj zren chee̱ xi'.
PSA 144:6 Bzalaj xesa guziu', ne blaga benne' ca' dxelune̱' da cale̱la. Bzalaj xaga nalá xéche'ze chiu', ne bzria xi' le̱'.
PSA 144:7 Naga zu' na'la, bze̱ na'u, ne bselá neda' lu da sté̱bele̱'e̱ zua'. Bselá neda' lu na' benne' zitu' ca',
PSA 144:8 benne' ca' tu dxelenné̱zqueze̱' da we̱n lazre', ne dxuluzétaje̱' Dios gate dxelezí xe̱'e̱.
PSA 144:9 Dios, gúl-laqueza' chiu' da cube, quínnia' da dxúl-lale̱na'. Nen tu da dxínnia' da nua chi du chee̱ na gúl-laqueza' chiu'.
PSA 144:10 Nacu' Lue' Bénnea' dxune̱' dxeledxúaj chawe' benne' wenná bea ca'. Dxuseláu' David, we̱n zrin chiu', lu xia nalá chee̱ benne' we̱n da cale̱la ca'.
PSA 144:11 Bexa'u neda', ne bselá neda' lu na' benne' zitu' ca', benne' ca' tu dxelenné̱zqueze̱' da we̱n lazre', na' dxuluzétaje̱' Dios gate dxelezí xe̱'e̱.
PSA 144:12 Be̱n xelegula bi biu chee̱ntu' ca tu xaga da dxegula chawe', ne zaj nácabe' bi cuide'. Be̱n xelaca bi nu'ula chee̱ntu' ca bdu'a xiaj xrtante̱ ca' da zaj nnita tu lu xu'u zren.
PSA 144:13 Be̱n chate̱ lízrentu' xúgute̱ cuen lina chee̱ntu'. Be̱n xelánle̱'e̱ be̱ xixre' chee̱ntu', chee̱ xelácaba' gaxúa gaxúane be̱ xíxre'du ca' lu xe̱zr la xu chee̱ntu'.
PSA 144:14 Be̱n xelaca be̱zre chee̱ntu' be̱ wal-la chee̱ xelunba' zrin. Be̱n quebe xelezanba' gate quebe ne zrin cha beu' chee̱ba' ca'. Be̱n quebe nu cha' cuezre xache' la neza chee̱ntu'.
PSA 144:15 Ba neza zrente̱ naca na chee̱ bénneache ca' dxaca caní chee̱'. Ba neza zrente̱ naca na chee̱ bénneache ca' naca Xránadxu Dios chee̱'.
PSA 145:1 ¡Gucá'ana szrena' Lue', Dios chia', ne Wenná Bea chia'! ¡Tu güe lá'anazqueza' Lau' Lue' chadía chacanna!
PSA 145:2 ¡Tu zra tu zra güe lá'ana' Lue'! ¡Tu güe lá'anazqueza' Lau' Lue' chadía chacanna!
PSA 145:3 ¡Szrente̱ naca Xránadxu Dios, ne naca chee̱' tu güe lá'anazquezdxu Le̱'! ¡Québequeze séquedxu gúnbeadxu ca szrente̱ naque̱'!
PSA 145:4 Xúgute̱ cuen bénneache chiu' xelúe lá'ane̱' da be̱nu' Lue', ne xuluzenne̱' benne' xe̱zr la xu ca' ca naca da zrente̱ da be̱nu'.
PSA 145:5 Gulaba lazra' ca naca da xrtante̱ chee̱ da xabáa chee̱ xel-la' szren chiu', ne ca naca da zrente̱ da nunu'.
PSA 145:6 Xúgute̱ bénneache xuluchálaje̱' ca naca xel-la' waca chee̱ da zrente̱ da nunu', na' neda' guzenda' le̱' ca naca xel-la' szren chiu'.
PSA 145:7 Xuluzenne̱' le sa' ljwezre̱' ca naca xel-la' zri'i lazre' zren chiu', ne tu xelúl-lazqueze̱' chee̱ da xrlátaje da nacu' Lue'.
PSA 145:8 Xránadxu Dios naque̱' zri'i lazre', ne dxexache lazre̱' bénneache chee̱'. Dxezrene̱', ne quebe dxezrá'aze̱', na' dxexache lázrele̱'e̱ dxi'u.
PSA 145:9 Dxun Xránadxu Dios da chawe' chee̱ xúgute̱ bénneache, ne dxexache lazre̱' xúgute̱ da zaj naca ban da nune̱'.
PSA 145:10 Xúgute̱ da ca' nunu' xelúe lá'ana na Lue', Xran, na' bénneache chiu' xulucá'ana szrene̱' Lue'.
PSA 145:11 Dxelenné̱' ca szrente̱ naca xel-la' dxenná bea chiu'. Dxuluchálaje̱' ca naca xel-la' waca zrente̱ chiu',
PSA 145:12 chee̱ xuluzenne̱' xúgute̱ bénneache ca naca da zrente̱ ca' da nunu', ne ca naca da xabáa chee̱ xel-la' szren chee̱ xel-la' dxenná bea chiu'.
PSA 145:13 Xel-la' dxenná bea chiu' tu súazqueze na, ne nna be'enu' xúgute̱ cuen bénneache.
PSA 145:14 Nuxru Xránadxu Dios xúgute̱ benne' ca' dxeajlecházie̱', ne dxechise̱' xúgute̱ benne' ca' zaj nada'u lu zrin wal-la.
PSA 145:15 Xúgute̱ bénneache dxelenné̱'e̱ Lue' chee̱ gácale̱nu' le̱', na' Lue' gunézruju' da xelawe̱' ca zrin zra chee̱ na.
PSA 145:16 Dxuzé̱ na'u, ne dxunézruju' ca naca da chawe' da dxelexázrje xúgute̱ da zaj naca ban.
PSA 145:17 Xlátaje̱ naca Xránadxu Dios lu xúgute̱ da dxune̱', ne dxexache lazre̱' xúgute̱ da zaj naca ban da nun Le̱'.
PSA 145:18 Xránadxu Dios zúate̱queze̱' gácale̱ne̱' xúgute̱ benne' ca' dxululáwizre̱' Le̱', xúgute̱ benne' ca' du lazre̱' dxululáwizre̱' Le̱'.
PSA 145:19 Gune̱' ca dxelezá lazre' benne' ca' dxelezrebe̱' Le̱'. Cá'anqueze xenne̱' chee̱' gate xululáwizre̱' Le̱', ne guselé̱' benne' ca'.
PSA 145:20 Xránadxu Dios dxuxúequeze̱' xúgute̱ benne' ca' zaj nazrí'ine̱' Le̱', san guzría xi'e̱ xúgute̱ benne' ca' dxelebéaj xíchaje̱' Le̱'.
PSA 145:21 Du lazra' güe lá'ana' Xránadxu Dios. Xúgute̱ benne' dxal-la' tu xelúe lá'anazqueze̱' Le̱' lá'azxa chadía chacanna.
PSA 146:1 ¡Gaca ba lá'azxa Xránadxu Dios! ¡Du lazra' güe lá'ana' Xránadxu Dios!
PSA 146:2 ¡Dxácate̱ naca bana' güe lá'ana' Xránadxu Dios! ¡Tu gúl-lazqueza' da güe lá'ana' Xránadxu Dios dxácate̱ naca bana'!
PSA 146:3 Quebe guxrén lázrele benne' dxelenná bea, ne quegá bénneache lawe' da quebe xelezéquene̱' xuluselé̱' le'e.
PSA 146:4 Dxeledxúaj be' zaj xu'e̱, na' xelexexaque̱' xu xrte. Lu zra ná'queze xelenite da dxuluwía lazre̱' xelune̱'.
PSA 146:5 Ba neza zrente̱ naca na chee̱ bénnea', dxácale̱ Dios chee̱ Jacob le̱', bénnea' dxebeza lazre̱' Xránadxu Dios.
PSA 146:6 Dios na' be̱ne̱' xabáa, ne xe̱zr la xu, ne nísadau', ne xúgute̱ da zaj zra' lataj ca'. Naque̱' Bénnea' tu dxúnzqueze̱' da li lazre'.
PSA 146:7 Dxuchi'e̱ chee̱ benne' baxache' ca', ne dxugawe̱' benne' ca' dxeledune̱'. Xránadxu Dios dxuselé̱' benne' ca' zaj nada'u lu na' benne̱' ca'.
PSA 146:8 Xránadxu Dios dxexune̱' xiaj lau benne' la chul-la ca'. Xránadxu Dios dxechise̱' benne' ca' dxeajlecházie̱'. Xránadxu Dios nazrí'ine̱' benne' xrlátaje ca'.
PSA 146:9 Xránadxu Dios dxuxúe̱' benne' zitu' ca'. Nuxre̱' bidau' we̱ze̱be ca', ne nu'ula tuze ca', na' dxuchínnaje̱' da dxelún benne' ca' dxelune̱' da cale̱la.
PSA 146:10 Tu nna béazqueze Xránadxu Dios. Le'e, benne' xe̱zre Sión, nna be'e Dios chee̱le ne xúgute̱ cuen zri'ine zre súale. ¡Gaca ba lá'azxa Xránadxu Dios!
PSA 147:1 ¡Le güe lá'ana Xránadxu Dios lawe' da naca chawe' gúl-ladxu da güe lá'anadxu Dios chee̱dxu, lawe' da xrtante̱ naca güe lá'anadxu Le̱'!
PSA 147:2 Xránadxu Dios xexune̱' xe̱zre Jerusalén. Xequé̱'e̱ benne' Israel ca' zaj zue̱' xe̱zr la xu zitu' ca'.
PSA 147:3 Dxexune̱' benne' ca' dxelexewí'ine lázrele̱'e̱, ne dxudé̱'e̱ ladxe' naga zaj naca we̱' chee̱ benne' ca'.
PSA 147:4 ¡Nézquezne̱' ca zaj naxán belaj ca'! ¡Tu tu belaj ca' dxu'e̱ la na!
PSA 147:5 ¡Szrente̱ naca Xránadxu Dios, ne nape̱' dute̱ xel-la' waca! ¡Quebe bi de̱ da quebe dxéajni'ine̱'!
PSA 147:6 Xránadxu Dios dxácale̱ne̱' benne' dxexruj lazre' ca', na' dxuzéxruje̱' benne' ca' dxelune̱' da cale̱la.
PSA 147:7 ¡Le gul-la da güe lá'anale Xránadxu Dios! ¡Le gul-la, ne le quinne da cun zríadi'i na du lau Dios chee̱dxu!
PSA 147:8 ¡Le̱' dxudé̱'e̱ beuj ca' zran xabáa! ¡Le̱' dxesel-le̱' nisa xiuj lu xe̱zr la xu! ¡Le̱' dxune̱' dxelezría xíxre'du ca' lu xi'a ca'!
PSA 147:9 ¡Le̱' dxunézruje̱' da dxelagu be̱ xixre' ca'! ¡Dxunézruje̱' da dxelagu béchajdu ca', be̱ dxelebezre xa'aba'!
PSA 147:10 Da dxezaca ba lázrele̱ne̱' quebe naca na xel-la' wal-la chee̱ bzrina' ca', ne quegá xel-la' wal-la chee̱ bénneache.
PSA 147:11 Dxezaca ba lázrele̱ne̱' benne' ca' dxelezrebe̱' Le̱', ne benne' ca' dxelebeza lazre̱' Le̱' chee̱ xexache lazre̱' le̱'.
PSA 147:12 ¡Le güe lá'ana Xránadxu Dios, le'e zrale xe̱zre Jerusalén! ¡Le güe lá'ana Dios chee̱le, le'e zrale xe̱zre Sión!
PSA 147:13 ¡Le̱' dxuzúa chúchue̱' dxa xu'u chee̱ xe̱zre chee̱le! ¡Dxune̱' dxaca chawe' chee̱ benne' ca' zaj zre̱'e̱ xe̱zre chee̱le!
PSA 147:14 ¡Dxebeque̱' xel-la' dxebeza zri lazre' lu xe̱zr la xu chee̱le! ¡Gúnnale̱'e̱ chee̱le zrua' chawe'!
PSA 147:15 ¡Dxusel-le̱' xrtizre̱' chee̱ benne' ca' zaj zre̱'e̱ dute̱ xe̱zr la xu, na' chadí dxaca ca da dxenné̱'!
PSA 147:16 ¡Dxugacue̱' xe̱zr la xu bezxe' da naca na ca zrila'! ¡Dxuzéxruje̱' xrle̱'e̱la dxe̱la ca de!
PSA 147:17 ¡Dxune̱' dxelexruj xiaj bezxe' ca weaj xíajdu ca'! ¿Nu benne' gaca guchaga lawe̱' da zaga chee̱ na?
PSA 147:18 ¡Dxenná be'e̱, na' dxexuna na! ¡Dxune̱' dxaca be', na' dxexaca bezxe' na' nisa guba'u!
PSA 147:19 ¡Bzéajni'ine̱' Jacob ca naca xrtizre̱', ne bdee̱' xrba chee̱', ne da ca' gunná be'e̱ lu na' benne' Israel ca'!
PSA 147:20 Quebe ne gune̱' caní chee̱ xe̱zr la xu xezícadxa ca', na' benne' xe̱zr la xu ca' quebe dxelexúnbe'e̱ xrba chee̱'. ¡Gaca ba lá'azxa Xránadxu Dios!
PSA 148:1 ¡Le güe lá'ana Xránadxu Dios! ¡Le güe lá'ana Xránadxu, le'e, zrale xabáa! ¡Le güe lá'ana Le̱', le'e, zrale dxala!
PSA 148:2 ¡Le güe lá'ana Le̱', le'e, gubáz chee̱ xabáa chee̱' ca'! ¡Le güe lá'ana Le̱', le'e, benne' zante̱ chee̱'!
PSA 148:3 ¡Le güe lá'ana Le̱', le'e, gubizra, ne beu'! ¡Le güe lá'ana Le̱', le'e, belaj dxusenile!
PSA 148:4 ¡Le güe lá'ana Le̱', le'e, xabáa ca', ne le'e, nisa zrale láwela xabáa!
PSA 148:5 ¡Le güe lá'ana La Xránadxu, lawe' da gunná bé'ene̱', na' guzúale!
PSA 148:6 ¡Be̱ne̱' súale tu chi'ize, ne chadía chacanna! ¡Bzue̱' chee̱le tu da bdxixruj be'e̱ da quebe te chee̱ na!
PSA 148:7 ¡Le güe lá'ana Xránadxu lu xe̱zr la xu, le'e, bea zri'a zrale lu nísadau', ne xúgute̱ nisa situj,
PSA 148:8 ne le'e, xesa guziu', ne xiaj xiuj, ne bezxe', ne beuj ca', ne le'e, be' bdunu' ca', dxunle ca gunná be'e̱!
PSA 148:9 ¡Le güe lá'ana Le̱', le'e, xí'adu ca', ne xi'a zri'a ca', ne le'e, xaga zixre ca', ne xaga cedro ca',
PSA 148:10 ne le'e, be̱ xixre' ca', ne bea ca' dxuluxúe bénneache, ne le'e, be̱ snia ca', ne be̱ zaj zua xrila!
PSA 148:11 ¡Le güe lá'ana Le̱', le'e, benne' wenná bea ca', ne xúgute̱ bénneache, ne le'e, benne' dxelenná be'e̱, ne benne' dxuluchi'e̱,
PSA 148:12 ne le'e, benne' wegu' ca', ne nú'uladu ca', ne le'e, benne' gula ca', ne bidu ca'!
PSA 148:13 ¡Le güe lá'ana La Xránadxu! ¡Szrénte̱dxa naca La Le̱' ca xúgute̱ la bénneache! ¡Da xabáa chee̱' dxulé'e lau na lu xe̱zr la xu, ne xabáa!
PSA 148:14 ¡Le̱' nune̱' xe̱zr chee̱' xe̱zre wal-la! ¡Le güe lá'ana Le̱', le'e, bénneache chee̱', nácale zri'ine zre sua Israel! ¡Nácale benne' nazrí'i Le̱'! ¡Le güe lá'ana Xránadxu!
PSA 149:1 ¡Le güe lá'ana Xránadxu Dios! ¡Le gul-la chee̱ Xránadxu tu da cube! ¡Le güe lá'ana Le̱' naga zaj nazraga bénneache chee̱'!
PSA 149:2 ¡Le be, le'e, benne' Israel, lau Bénnea' be̱ne̱' le'e! ¡Le sua xel-la' dxebé, le'e, zrale Sion, lau Bénnea' naque̱' Wenná Bea chee̱le!
PSA 149:3 ¡Le güe lá'ana La Xránadxu, ne guxa'ale! ¡Le guchunchu xide ca', ne le quinne da cun zríadi'i na du ca', dxue lá'anale Le̱'!
PSA 149:4 ¡Xránadxu Dios dxezaca ba lázrele̱ne̱' bénneache chee̱'! ¡Dxape̱' ba lá'ana benne' dxexruj lazre' ca', ne dxuselé̱' le̱'!
PSA 149:5 Dxal-la' xelebéqueze bénneache chee̱' lu da xabáa chee̱', ne xelúl-le̱' dute̱ xel-la' dxelebé du xe̱la.
PSA 149:6 Dxal-la' xelebezre xe̱'e̱, xelúe lá'ane̱' Dios, zaj nu'e̱ xia da zaj nalá dxupa la'ate̱,
PSA 149:7 chee̱ xelexebéaj lazre̱' benne' xe̱zr la xu ca', ne xuludée̱' xel-la' zi' benne' xe̱zre ca',
PSA 149:8 ne xuluchéaje̱' benne' wenná bea chee̱' ca' du xia, ne benne' dxelenná be'e̱ nen du xia,
PSA 149:9 ne xuluzría xi'e̱ benne' ca' ca ba nun Dios gaca chee̱'. Da nigá gaca na da xabáa chee̱ bénneache chee̱ Dios. ¡Le güe lá'ana Xránadxu!
PSA 150:1 ¡Le güe lá'ana Xránadxu Dios! ¡Le güe lá'ana Xránadxu lu xudau' chee̱'! ¡Le güe lá'ana xel-la' waca chee̱' lu xabáa chee̱'!
PSA 150:2 ¡Le güe lá'ana Le̱' ca zaj naca da zren da nune̱'! ¡Le güe lá'ana Le̱' ca naca xel-la' szren chee̱'!
PSA 150:3 ¡Le güe lá'ana Le̱', gucuézrele luzu ca' da dxulucuezre̱'! ¡Le güe lá'ana Le̱', quínnele da cun zríadi'i na du, ne da ca' dxínnele!
PSA 150:4 ¡Le güe lá'ana Le̱', guchúnchule xide, ne guxa'ale! ¡Le güe lá'ana Le̱', quínnele da cun zríadi'i na du, ne gucuézrele bchiuj!
PSA 150:5 ¡Le güe lá'ana Le̱', gutíl-lale xíadu ca'! ¡Le güe lá'ana Le̱', gutíl-lale xia zren ca'!
PSA 150:6 ¡Le güe lá'ana Xránadxu, xúgute̱le naca banle! ¡Le güe lá'ana Xránadxu Dios!
MAT 1:1 Da caní zaj naca na la chee̱ benne' zaj naque̱' xra wdé chee̱ Jesucristo. Jesús nigá nababe̱' zri'ine zre sua David, ne zri'ine zre sua Abraham.
MAT 1:2 Abraham nigá guque̱' xra Isaac. Isaac nigá guque̱' xra Jacob. Jacob nigá guque̱' xra Judá, ne benne' biche̱' ca'.
MAT 1:3 Judá nigá guque̱' xra Fares, ne Zara, na' Tamar guque̱' xrna Fares, ne Zara caní. Fares nigá guque̱' xra Esrom. Esrom nigá guque̱' xra Aram.
MAT 1:4 Aram nigá guque̱' xra Aminadab. Aminadab nigá guque̱' xra Naasón. Naasón nigá guque̱' xra Salmón.
MAT 1:5 Salmón nigá guque̱' xra Booz, na' Rahab guque̱' xrna Booz nigá. Booz nigá guque̱' xra Obed, na' Rut guque̱' xrna Obed nigá. Obed nigá guque̱' xra Isaí.
MAT 1:6 Isaí nigá guque̱' xra David, benne' wenná bea. Wenná bea David nigá, ne nu'ula na' nédxute̱ guque̱' zru'ula Urías gulaque̱' xra xrna Salomón.
MAT 1:7 Salomón nigá guque̱' xra Roboam. Roboam nigá guque̱' xra Abías. Abías nigá guque̱' xra Asa.
MAT 1:8 Asa nigá guque̱' xra Josafat. Josafat nigá guque̱' xra Joram. Joram nigá guque̱' xra Uzías.
MAT 1:9 Uzías nigá guque̱' xra Jotam. Jotam nigá guque̱' xra Acaz. Acaz nigá guque̱' xra Ezequías.
MAT 1:10 Ezequías nigá guque̱' xra Manasés. Manasés nigá guque̱' xra Amón Amón nigá guque̱' xra Josías.
MAT 1:11 Josías nigá guque̱' xra Jeconías ne benne' biche̱' ca' ca lu zra ca' gate benne' Babilonia guleché̱'e̱ benne' Israel ca' lu xe̱zr la xu Babilonia.
MAT 1:12 Jeconías nigá guque̱' xra Salatiel. Salatiel nigá guque̱' xra Zorobabel.
MAT 1:13 Zorobabel nigá guque̱' xra Abiud. Abiud nigá guque̱' xra Eliaquim. Eliaquim nigá guque̱' xra Azor.
MAT 1:14 Azor nigá guque̱' xra Sadoc. Sadoc nigá guque̱' xra Aquim. Aquim nigá guque̱' xra Eliud.
MAT 1:15 Eliud nigá guque̱' xra Eleazar. Eleazar nigá guque̱' xra Matán. Matán nigá guque̱' xra xetú benne' le̱' Jacob.
MAT 1:16 Jacob nigá guque̱' xra José, benne' chee̱ María, xrna Jesús, Bénnea' naque̱' Cristo.
MAT 1:17 Caní naca, gulaca chidá' cue' bénneache gate guzú lau zua Abraham, ca bzrinte̱ zra zua David, na' gulaca xechidá' cue' bénneache ca' gate guzú lau zua David, ca bzrinte̱ zra gate na' benne' Babilonia ca' guleché̱'e̱ benne' Israel ca' lu xe̱zr la xu chee̱', na' gulaca xechidá' cue' bénneache ca' gate guzú lau zra na', ca bzrinte̱ zra gulaj Cristo.
MAT 1:18 Caní guca gate na' gulaj Jesucristo. María, xrna Jesús ba naché̱bebe' gácabe' zru'ula José. Nédxula ca za xelenite̱', nu'ula nigá ba zue̱' zi'i ne̱ chee̱ xel-la' waca chee̱ Be' Lá'azxa chee̱ Dios.
MAT 1:19 José, benne' chee̱ María nigá, naque̱' benne' xrlátaje. Quebe guca lazre̱' gulé'ene̱' ca ba naca chee̱ María lau benne' xe̱zre ca'. Guca lazre̱' gusane̱' le̱' bagácheze.
MAT 1:20 Dxácate̱ dxudé lazre̱' da nigá, ble'e lau tu gubáz chee̱ xabáa, gubáz chee̱ Xránadxu, ga zua José na' lu bchigala, na' guzre̱' le̱': ―José, zri'ine zre sua David, quebe zrebu' si' lu na'u María chee̱ gácabe' zru'ulu', lawe' da bidu biu na' sanbe' zabe' ne̱ chee̱ Be' Lá'azxa chee̱ Dios.
MAT 1:21 Zrú'ulu' gúxrube' tu bidu biu chee̱be', na' lue' gu'u labe' Jesús. Caní gu'u labe' lawe' da guselabe' bénneache lu dul-la da zaj nabague̱'.
MAT 1:22 Xúgute̱ da caní gulaca ca' chee̱ guca ca da gunná Xránadxu lu dxu'a benne' ca' buluchálaje̱' waláz chee̱'.
MAT 1:23 Caní gunné̱': Tu nú'uladau' gúadaube' sanbe' tu bidu biu chee̱be', na' xelu'e̱ labe' Emanuel. Emanuel zéaje̱ na: Dios zúale̱ne̱' dxi'u.
MAT 1:24 Ca bebán José, na' be̱ne̱' cáte̱ze gunná gubáz chee̱ Xránadxu, na' guzí' lu ne̱'e̱ María chee̱ gácabe' zru'ule̱'.
MAT 1:25 Quebe gulaque̱' tuze ca gusandxa María bidu biu nedxu chee̱be', na' buluzúe̱' labe' Jesús.
MAT 2:1 Bidau' Jesús gúlajbe' lu xe̱zre Belén da nababa xe̱zr la xu Judea gate dxenná bea benne' le̱' Herodes ga na'. Nadxa belezrín benne' ca' lu xe̱zre Jerusalén, benne' zá'aque̱' chalá'a naga dxalaj gubizra, zaj naque̱' benne' sina gula.
MAT 2:2 Na' gulenabe̱': ―¿Ga zua bidu na' ba gúlajbe' chee̱ gácabe' benne' nna bé'ene̱' benne' judío ca'? Gate zuantu' chalá'a naga dxalaj gubizra blé'entu' belaj chee̱be', na' bla'ntu' nigá chee̱ gúe lá'ana gúe szrentu'-be'.
MAT 2:3 Ca guneze Herodes, benne' wenná bea, da nigá, na' guzúe̱' ste̱be, ne cá'anqueze guca chee̱ xúgute̱ benne' zaj zre̱'e̱ Jerusalén.
MAT 2:4 Nadxa Herodes, wenná bea na', btupe̱' xúgute̱ benne' xíchaje̱ chee̱ bxruze ca', ne benne' dxuluxuzájle̱'e̱ da nadxixruj bea Dios, na' gunábene̱' benne' ca': ―¿Gazra na' galaj Cristo?
MAT 2:5 Benne' caní gulé̱'e̱ le̱': ―Lu xe̱zre Belén da nababa xe̱zr la xu Judea, lawe' da bzuaj caní tu benne' bchálaje̱' waláz chee̱ Dios, gate na' gunné̱':
MAT 2:6 Lue', Belén chee̱ xe̱zre ca' zaj nababa na Judá, nacu' lue' xe̱zre da quebe naca na da bzé̱bedxa ládujla benne' ca' dxelenná be'ene̱' xe̱zr la xu Judá nigá, lawe' da ládujla bénneache chiu' dxuaj tu benne' nna be'e̱, na' guxúequeze̱' bénneache chia', benne' Israel.
MAT 2:7 Nadxa Herodes, wenná bea na', bláwizre̱' bagácheze benne' sina gula ca', na' gunábene̱' le̱' bátala ble'e lau belaj na' belelé'ene̱'.
MAT 2:8 Nadxa gusel-le̱' benne' ca' chjaque̱' xe̱zre Belén, ne guzre̱' le̱': ―Le chjaca na', ne le naba xanne' chee̱ bidu na', na' ca cheajxrácale-be', na' le guzén neda' chee̱ cha'a neda' gúe lá'ana gúe szrena'-be'.
MAT 2:9 Ca bexuzre belén benne' sina gula ca da gunná Herodes, wenná bea, nadxa besiá'que̱', na' belaj da belelé'ene̱' gate zaj zre̱'e̱ chalá'a naga dxalaj gubizra zeaj na lau le̱', na' bzrinte̱ na, ne guzúa na naga zua bidu na'.
MAT 2:10 Gate benne' sina gula ca' belelé'ene̱' belaj na', nadxa gulebéle̱'e̱ne̱'.
MAT 2:11 Ca gulu'e̱ lu xu'u, belelé'ene̱' bidu na', ne xrnabe' María. Nadxa buluzú zribe̱' dxelúe lá'ana dxelúe szrene̱' bidu na'. Nadxa gulesálaje̱' xua chee̱' ca', ne bulunézruje̱'-be' oro, ne xalaj zixre, ne mirra da naca na zichaj.
MAT 2:12 Ca gudé na', Dios guzre̱' benne' ca' lu bchigala québedxa xelexedée̱' naga zua Herodes. Chee̱ le̱ na belexequé̱'e̱ neza xula, belexezrine̱' lazrie̱'.
MAT 2:13 Ca gudé besí'aca benne' sina gula ca', nadxa tu gubáz chee̱ xabáa, gubáz chee̱ Xránadxu ble'e lawe̱' José lu bchigala, na' guzre̱' le̱': ―Guxasa. Becá'a bidu na', ne xrnabe', na' le chjaca lu xe̱zr la xu Egipto, na' xegá'anu' ga na' ca zrindxa zra xapa' lue' xetú. Caní dxal-la' gunu' lawe' da wexilaj Herodes bidu nigá chee̱ gutie̱'-be'.
MAT 2:14 Nadxa José guxase̱', na' chizrélala beche̱'e̱ bidu na', ne xrnabe', na' bexu'e̱-be' lu xe̱zr la xu Egipto.
MAT 2:15 Gulezré̱'e̱ na' ca bzrindxa zra gute Herodes. Caní guca ca naca da gunná Xránadxu lu dxu'a benne' bchálaje̱' waláz chee̱', gunné̱': “Xuláwizra' bi biu chia' chee̱ xedxúajbe' lu xe̱zr la xu Egipto.”
MAT 2:16 Gate gúquebe'e Herodes gulezí xe̱ benne' sina ca' le̱', na' bzrá'ale̱'e̱, ne gunná bé'ene̱' benne' ca' xelútie̱' xúgute̱ bi biu dxé'enedau', ca zrinte̱ bidu ca' ba zaj zua chup iza, bidu ca' zaj zrabe' xe̱zre Belén, ne bidu ca' zaj zrabe' lu xé̱zredu ca' zaj naxechaj na xe̱zre Belén na'. Caní be̱n Herodes cáte̱ze buluzén benne' sina gula ca' le̱' ca naca zra na' belelé'ene̱' belaj na'.
MAT 2:17 Ca'an guca ca da bzuaj Jeremías, bénnea' bchálaje̱' waláz chee̱ Dios ba guca zan' iza, gunné̱':
MAT 2:18 Guca tu schaga lu xe̱zre Ramá. Guca webezre, ne gulebezre xache̱'. Raquel na' dxebézrele̱'e̱ chee̱ bi chee̱' ca'. Québequeze dxaca lazre̱' xexaca zrene̱' lawe' da ba gulate bi chee̱' ca'.
MAT 2:19 Ca gudé gute Herodes, na' tu gubáz chee̱ xabáa, gubáz chee̱ Xránadxu ble'e lawe̱' José lu bchigala naga zue̱' Egipto, na' guzre̱' le̱':
MAT 2:20 ―Guxásache. Beche̱'e̱ bidu chiu' nigá, ne xrnabe'. Bexíaj lu xe̱zr la xu Israel, lawe' da ba gulate benne' ca' gulaca lazre̱' xelútie̱' bidu nigá.
MAT 2:21 Nadxa guxasa José, na' beche̱'e̱ bidu na', ne xrnabe', na' belexezrine̱' lu xe̱zr la xu Israel.
MAT 2:22 Ca guneze José dxenná bea Arquelao naga nababa Judea waláz chee̱ xre̱', Herodes na', na' bzrebe José xexíaje̱' ga na'. Nadxa bexíaje̱' naga nababa Galilea ca da ba guzre gubáz chee̱ xabáa le̱' lu bchigala.
MAT 2:23 Ca bezrine̱' na', na' bexíaje̱' cheajxezúe̱' lu xe̱zre Nazaret. Caní guca ca da gulenná benne' ca' buluchálaje̱' waláz chee̱ Dios, gulenné̱' Jesús nigá si le̱' benne' Nazaret.
MAT 3:1 Ca lu zra ca' bla' Juan, bénnea' bchue̱' bénneache nisa, dxegu'e̱ lban le̱'e̱ xixre' lawe' lataj naga nababa Judea.
MAT 3:2 Dxenné̱': ―Le xebí'i lazre' lawe' da ba zua gáguze zra nna bea Dios lu xe̱zr la xu nigá.
MAT 3:3 Juan nigá naque̱' bénnea' bchalaj Isaías chee̱'. Isaías bchálaje̱' waláz chee̱ Dios gate bzuaje̱' caní: Dxene chi'i benne' dxebezre xe̱'e̱ le̱'e̱ xixre' lawe' lataj, dxenné̱': Le gucá'ana chawe' neza naga te Xránadxu. Le xulí neza lase ca' lau Le̱' naga tée̱'.
MAT 3:4 Zra lana Juan nigá nune na xicha zra camello, ne bazxu dxu'a le̱'e̱ chee̱' naca na xide, na' dxawe̱' biche xuaj, ne bzrína'dau' chee̱ bézudau'.
MAT 3:5 Belezrín benne' belenne̱' ca da dxuchalaj Juan, benne' zá'aque̱' xe̱zre Jerusalén, ne benne' chee̱ xúgute̱ xe̱zre ca' zaj nababa Judea, ne benne' zá'aque̱' xé̱zredu ca' zaj nnita gáguze xe̱gu Jordán.
MAT 3:6 Ca gulexrúale̱pe̱' dul-la chee̱', Juan nigá bchue̱' benne' ca' nisa lu xe̱gu Jordán.
MAT 3:7 Gate ble'e Juan benne' zan benne' xudau' fariseo, ne benne' xudau' saduceo zá'aque̱' chee̱ xelexedxúe̱' nisa, na' guzre̱' benne' ca': ―Le'e, be̱ snia. ¿Zua nu guzre le'e guzrúnnajle da ba xa' da za'?
MAT 3:8 Le gun da xrlátaje da xelunna bea na ba bebí'i lázrele.
MAT 3:9 Quebe guéquele lale, dxennale le'eze: “Nalatu' lawe' da nácantu' xrtia Abraham.” Neda' dxapa' le'e: Dios waca xexune̱' xiaj caní zri'ine xrtia Abraham.
MAT 3:10 Le'e nácale ca xaga ca'. Xia waga bache nalá na chee̱ chugu na xaga ca', na' xúgute̱ xaga ca' quebe dxelebía na da zixre chawe' welechugue na, na' xelezxe na lu xi'.
MAT 3:11 Da li neda' dxuchúa' le'e nisa, da dxunna bea na ba bebí'i lázrele, san Bénnea' ze̱'e̱ ca te chia' neda', Le̱' gune̱' ca da zéaje̱ xel-la' dxedxúa nisa, guzúe̱' le'e Dios Be' Lá'azxa, ne xi' chee̱'. Benne' nigá nácadxe̱' blau ca neda', na' quebe zaca' cuéajza' zrele̱' xu'u ni'e̱.
MAT 3:12 Cá'anqueze nácale ca zrua' xtila. Benne' nigá ba nu'e̱ da dxun be', cuéaje̱' xrte zrua' xtila na', na' xebéaje̱' chalá'ala xizre chee̱ na, na' xuzrá chawe̱' zrua' xtila na' lu da'a chee̱ na, san guzezxe̱' xizre na' lu xi' da quebe xexula na.
MAT 3:13 Nadxa Jesús bezé̱'e̱ naga nababa Galilea, na' bezrine̱' dxu'a xe̱gu Jordán naga zua Juan chee̱ guchúe̱' Le̱' nisa.
MAT 3:14 Nédxute̱ Juan quebe guca lazre̱', na' dxe̱'e̱ Jesús: ―Lue' dxal-la' guchú'u neda' nisa. Quebe zaca' neda' guchúa' Lue' nisa.
MAT 3:15 Jesús guzre̱' le̱': ―Be̱' lataj gaca caní na'a. Dxun na ba xen gundxu xúgute̱ da xrlátaje lau Dios. Nadxa Juan be̱ne̱' ca'.
MAT 3:16 Gate bexuzre gudxúa Jesús nisa, na' la bxálajte̱ xabáa, na' ble'e Juan Be' Lá'azxa chee̱ Dios dxétaje̱' ca tu gugu chíchidau', zeajsúaba' lawe Jesús.
MAT 3:17 Nadxa ben tu chi'i lu be', gunné̱': ―Benne' nigá naque̱' Zrí'inequeza' nazrí'ite̱ lazra'. Dxezaca ba lázrele̱na' Le̱'.
MAT 4:1 Nadxa Be' Lá'azxa chee̱ Dios la guché̱'te̱' Jesús le̱'e̱ xixre' lawe' lataj naga gúe lazre' da xriwe̱' gun zréaje na Le̱'.
MAT 4:2 Quebe bi gudagu Jesús chua zra chua xe̱la, na' ca gudé na' gudune̱'.
MAT 4:3 Nadxa da xriwe̱' bzrin na naga zua Jesús chee̱ gun zréaje na Le̱', na' dxe̱ na Le̱': ―Che Lue' nacu' Zri'ine Dios, gunná be'e xiaj caní xelexaca na xeta xtila.
MAT 4:4 Jesús beche̱be̱': ―Lu xiche chee̱ Dios dxenné̱': “Quebe gaca ban nu benne' gawe̱' xétaze, san nen xúgute̱ dizra' chee̱ Dios gaca bane̱'.”
MAT 4:5 Nadxa da xriwe̱' guché̱ na Jesús lu xe̱zre lá'azxa Jerusalén, na' bzua na Le̱' xíchajte̱ xudau',
MAT 4:6 na' guzre na Le̱': ―Che Lue' nacu' Zri'ine Dios, guxrite' nigá, lawe' da dxenná lu xiche chee̱ Dios: Dios nna bé'ene̱' gubáz chee̱ xabáa chee̱' ca' chee̱ xelácale̱ne̱' Lue'. Welexechise̱' Lue' nen ne̱'e̱ chee̱ quebe gunu' zi' ni'u lu xiaj ca'.
MAT 4:7 Na' gunná Jesús: ―Cá'anqueze dxenná lu xiche chee̱ Dios, dxe̱'e̱ bénneache: “Quebe guchínenu' Xranu' Dios cáte̱ze dxaca lazru'.”
MAT 4:8 Nadxa da xriwe̱' guché̱ na Le̱' tu lu xi'a sibe, na' ble'e na Le̱' ca naca xúgute̱ cue' xe̱zr la xu zaj nnita lu xe̱zr la xu, ne ca naca xel-la' guni'a chee̱ na.
MAT 4:9 Na' gunná da xriwe̱', dxe̱ na Le̱': ―Xúgute̱ da caní gunna' chiu' che guzú zribu' gucá'ana szrenu' neda'.
MAT 4:10 Nadxa Jesús guzre̱' na: ―Bexíaj, da xriwe̱', lawe' da dxenná Dios lu xiche chee̱', dxe̱'e̱ bénneache: “Bca'ana szren Xranu' Dios, ne be lá'ana tuze Le̱'.”
MAT 4:11 Nadxa da xriwe̱' becuasa na lau Jesús, na' belezrín gubáz chee̱ xabáa chee̱ Dios, ne bulunézruje̱' da dxechine Jesús.
MAT 4:12 Gate ben Jesús xu'u Juan lizre xia, na' bezé̱'e̱ zexíaje̱' naga nababa Galilea.
MAT 4:13 Quebe bga'ana Jesús xe̱zre Nazaret. Xeajsúe̱' lu xe̱zre Capernaum da zua na dxu'a nísadau' naga zaj zra' xrtia Zabulón, ne xrtia Neftalí.
MAT 4:14 Caní guca ca da bzuaj Isaías, benne' bchálaje̱' waláz chee̱ Dios, gunné̱':
MAT 4:15 Lu xe̱zr la xu chee̱ Zabulón, ne chee̱ Neftalí, naga zrua neza da zeaj na dxu'a nísadau', chalá'a naga dxalaj gubizra xechalá'a xe̱gu Jordán. Naga nababa Galilea, naga zaj zra' benne' quebe zaj naque̱' judío.
MAT 4:16 Bénneache zaj zra' lu da chul-la belelé'ene̱' tu da dxusaníle̱'e̱ na, na' benne' zaj zra' naga xu'u zrul-la chee̱ xel-la' gute ba bsaní' tu xi' naga zaj zre̱'e̱.
MAT 4:17 Ca lu zra na' guzú lau Jesús dxegu'e̱ lban, dxenné̱': ―Le xebí'i lázrele, lawe' da ba zua gáguze zra nna bea Dios lu xe̱zr la xu nigá.
MAT 4:18 Gate na' zeaj Jesús dxu'a nísadau' ga nababa Galilea, na' blé'ene̱' chupa benne'. Tue̱' le̱' Simón, ne zua xetú le̱' Pedro, na' xetúe̱' le̱' Andrés, biche Simón na'. Benne' caní zaj naque̱' benne' wezén bela, na' dxuluzale̱' xixruj bela chee̱' lu nisa.
MAT 4:19 Nadxa Jesús dxe̱'e̱ benne' caní: ―Le gun neda' tuze, na' guna' le'e benne' gutúpale chia' bénneache ca dxunle dxezenle bela.
MAT 4:20 La bulucá'anate̱' xixruj chee̱' ca', na' zjácale̱ne̱' Jesús.
MAT 4:21 Xelátedauze gusá'aque̱', na' ble'e Jesús xechupa benne'. Tue̱' le̱' Jacobo, ne xetúe̱' le̱' Juan, biche Jacobo nigá. Zaj naque̱' zri'ine Zebedeo, ne zaj xu'e̱ tu lu da dxedá lawe' nísadau' nen xre̱', dxelexún chawe̱' xixruj chee̱'. Jesús bláwizre̱' le̱',
MAT 4:22 na' la bulucá'anate̱' da dxedá lawe' nísadau' na', ne xre̱', na' zjácale̱ne̱' Jesús.
MAT 4:23 Zeaj Jesús xúgute̱ xe̱zre zaj nababa Galilea, na' tu tu xe̱zre ca' dxuzéajni'ine̱' bénneache lu xu'u ca' naga dxulucá'ana szren benne' judío ca' Dios. Na' dxegu'e̱ lban ca nna bea Dios, ne dxexune̱' xúgute̱ benne' ca' ca zaj naca xízrawe̱' cha chee̱'.
MAT 4:24 Ca'an guca, xúgute̱ benne' chee̱ xe̱zr la xu Siria belenne̱' ca da dxun Jesús, na' belezrine̱' lau Jesús, zaj naché̱'e̱ benne' we̱' ca', benne' zaj xu'e̱ xízrawe̱', ne benne' zaj zue̱' lu xel-la' dxudía, ne benne' zaj xu'e̱ be' xriwe̱', ne benne' zaj xu'e̱ chuna', ne benne' zaj naxrú'unie̱' bine, na' bexún Jesús xúgute̱ benne' caní.
MAT 4:25 Zjácale̱ benne' zan Le̱', benne' zaj nababe̱' xe̱zre ca' zaj nababa Galilea, ne benne' zá'aque̱' xe̱zre Decápolis ca', ne benne' Jerusalén, ne benne' zaj nababe̱' xe̱zre ca' zaj nababa Judea, ne benne' zá'aque̱' xechalá'ala xe̱gu Jordán naga dxalaj gubizra.
MAT 5:1 Gate ble'e Jesús xúgute̱ benne' zan ca' zá'aque̱' naga zue̱', nadxa guluéne̱' tu lu xi'a, ne gudxé'e̱ na'. Nadxa benne' ca' dxuse̱de Jesús beledube̱' cuite̱'.
MAT 5:2 Nadxa guzú lau Jesús dxusé̱dene̱' benne' ca'.
MAT 5:3 Gunná Jesús: ―Da ba neza zrente̱ naca na chee̱ benne' ca' dxelexúnbe'e̱ ca naca xel-la' dxexazrje chee̱' lau Dios. Benne' caní zaj naca chee̱' xelexú'e̱ naga dxenná bea Dios xabáa.
MAT 5:4 ’Da ba neza zrente̱ naca na chee̱ benne' ca' dxelelé'ele̱' zaj zue̱' lu da baxache' lawe' da zaj nabague̱' dul-la. Dios dxexúe zrene̱' benne' caní.
MAT 5:5 ’Da ba neza zrente̱ naca na chee̱ benne' zaj naque̱' zren lazre'. Benne' caní xelezí'e̱ chee̱' xe̱zr la xu da nache̱be lazre' Dios gunézruje̱' benne' caní.
MAT 5:6 ’Da ba neza zrente̱ naca na chee̱ benne' du lazre' dxelaca lazre̱' xelune̱' da naca xrlátaje lau Dios. Dios gácale̱ne̱' benne' caní.
MAT 5:7 ’Da ba neza zrente̱ naca na chee̱ benne' dxelexexache lazre̱' benne' xula. Dios wexache lazre̱' benne' caní.
MAT 5:8 ’Da ba neza zrente̱ naca na chee̱ benne' ca' zaj xu'u xichaj lázrdawe̱' da xrlátaje. Benne' caní welelé'ene̱' Dios.
MAT 5:9 ’Da ba neza zrente̱ naca na chee̱ benne' dxelebeza zri lazre̱' nen bénneache. Dios guzúe̱' le̱' ca bi cheé̱queze̱'.
MAT 5:10 ’Da ba neza zrente̱ naca na chee̱ benne' dxeledée̱' xel-la' zi' lu na' benne' ca' dxelune̱' chee̱' da cale̱la cate' dxelune̱' da xrlátaje. Benne' caní zaj naca chee̱' xelexú'e̱ naga dxenná bea Dios xabáa.
MAT 5:11 ’Da ba neza zrente̱ naca na chee̱le le'e che benne' dxelenné̱' schanni' chee̱le, ne dxelune̱' chee̱le da cale̱la, ne dxelenné̱' chee̱le xúgute̱ dizra' we̱n lazre' lawe' da nácale chia' neda'.
MAT 5:12 Le be, ne le xezaca ba lázrele lawe' da wazile tu da zrente̱ da gunna Dios le'e xabáa. Caní gaca na lawe' da cá'anqueze caní guláu zi' xuzre̱' benne' ca' buluchálaje̱' waláz chee̱ Dios, benne' ca' gulezré̱'e̱ nédxudxa ca le'e.
MAT 5:13 Na' gunná Jesús: ―Le'e nácale ca zede' chee̱ bénneache lu xe̱zrla xu nigá. Che zede' nigá xenite xel-la' sna'a chee̱ na, ¿ájazra gácale̱le bénneache ca'? Québedxa gaca guchínedxu zede' caní. ¡Chú'unadxu na, na' xululéaj bénneache le̱ na!
MAT 5:14 ’Le'e nácale ca tu xi' chee̱ bénneache zaj zre̱'e̱ xe̱zr la xu. Tu xe̱zre da zua na tu lu xi'a, quebe gáchequeze na.
MAT 5:15 Gate guzálajdxu tu xi', quebe gudúsedxu na. Guzúadxu na sibe naga gusení na chee̱ xelelé'e xúgute̱ benne' zaj zre̱'e̱ lu xu'u.
MAT 5:16 Cá'anqueze le gun le'e. Le güe lataj gusení xi' da nácale lau bénneache ca' chee̱ xelelé'ene̱' ca da xrlátaje da dxunle. Nadxa xelúe lá'ane̱' Xrale Dios zue̱' xabáa.
MAT 5:17 Gunná Jesús: ―Quebe dxal-la' guéquele le'e za'a neda' chee̱ cua' ca naca da bdxixruj be'e Moisés, ne ca naca dizra' da buluchalaj benne' ca' buluchálaje̱' waláz chee̱ Dios. Quebe za'a chee̱ cua' na. Za'a chee̱ gulé'eda' cáte̱ze zéaje̱ na.
MAT 5:18 Da li dxapa' le'e. Dxácate̱ zaj zua xabáa, ne xe̱zr la xu nigá, quebe dúaqueze tu dizra', ne tu da da' lu da nadxixruj bea na nigá ca zrindxa zra gaca xúgute̱ ca da dxal-la' gaca na.
MAT 5:19 Chee̱ le̱ na', che tu benne' guzúe̱' chalá'ala bítete̱zla da nigá da bdxixruj bea Dios, láqueze naca na tu da dauze, ne che guzéajni'ine̱' bénneache chee̱ xelúnqueze̱' ca', benne' nigá xegá'ane̱' cá'aze naga dxenná bea Dios xabáa. Bénnea' guzúe̱' dizra' da nadxixruj bea nigá, ne gulé'ene̱' bénneache chee̱ xelúnqueze̱' ca', benne' nigá wegá'anaqueze̱' ba lá'ana naga dxenná bea Dios xabáa.
MAT 5:20 Dxapa' le'e, che quebe gunle da nácadxa xrlátaje ca da dxelún benne' ca' dxuluxuzájle̱'e̱ da nadxixruj bea Dios, ne ca da dxelún benne' xudau' fariseo ca', cabata' xexú'ule le'e naga dxenná bea Dios xabáa.
MAT 5:21 Na' gunná Jesús: ―Le'e ba bénele ca gulenná xrtíale gula ca': “Quebe gútele benne',” na' “Nútete̱ze benne' gutie̱' benne' waxíaje̱' chee̱ cuía xi'e̱.”
MAT 5:22 Neda' dxapa' le'e, nútete̱ze benne' dxezré̱'e̱ le sa' ljwezre̱' waxíaje̱' chee̱ cuía xi'e̱. Na' bénnea' dxenné̱' schanni' chee̱ le sa' ljwezre̱' waxíaje̱' lau benne' chee̱ xu'u lawe' blau, na' xuludée̱' le̱' chee̱ cuía xi'e̱. Bénnea' dxenné̱' chee̱ le sa' ljwezre̱' tu dizra' sban, benne' nigá nácaqueze chee̱' chéaje̱' lu lataj ba xa'.
MAT 5:23 ’Che gu'u lu xudau' tu da gunézruju' lau Dios, ne na' cheajsá lazru' chee̱ tu da nunu' chee̱ le sa' ljwezru',
MAT 5:24 bca'ana da na' gunézruju' na', teca xexíaju' xegá'anu' chawe' nen le sa' ljwezru'. Nadxa waca xexíaju' lu xudau' chee̱ bi gunézruju' lau Dios.
MAT 5:25 ’Che zua nu benne' dxebagu' chee̱', na' che̱'e̱ lue' lau benne' guchi'e̱ chiu', bexaca chawe' nen le̱' la neza na', chee̱ quebe gudée̱' lue' lau bénnea' dxuchi'e̱ da dxaca. Che quebe gunu' caní, nadxa benne' dxuchi'e̱ da dxaca na' gudée̱' lue' lu na' benne' dxusézxuje̱' bénne' ca' lizre xia, na' xelegú'e̱ lue' lizre xia na'.
MAT 5:26 Da li dxapa' lue'. Quebe xedxúaju' na' che quebe quízruju' xúgute̱ da dxebagu' chee̱ benne' na'.
MAT 5:27 Na' gunná Jesús: ―Le'e bache bénquezle ca gulenné̱' nédxute̱: “Quebe gunu' dul-la da dxichaj na xrba chee̱ xel-la' nuchaga na'.”
MAT 5:28 Neda' dxapa' le'e, nútete̱ze benne' ne̱'e̱ tu nu'ula, ne sa lazre̱' le̱', báchequeze be̱ne̱' dul-la nen nu'ula na' lu xichaj lázrdawe̱'.
MAT 5:29 ’Che xiaj lau' da zua xabe̱la dxuzúa na lue' lu dul-la, guleaj na, ne gudxú'una na zítu'la. Nácadxa chawe' nite late' da naca na chee̱ be̱l-la' dxen chiu' quézcala chu'u lataj ba xa' dute̱ be̱l-la' dxen chiu'.
MAT 5:30 Che na'u da zua xabe̱la chiu' dxuzúa na lue' lu dul-la, guchugu na, ne gudxú'una na zitu'. Nácadxa chawe' nite late' da naca na chee̱ be̱l-la' dxen chiu', quézcala chu'u lataj ba xa' dute̱ be̱l-la' dxen chiu'.
MAT 5:31 Na' gunná Jesús: ―Cá'anqueze gulenné̱' nédxute̱: “Nútete̱ze benne' dxexelé̱'e̱ nen zru'ule̱', dxal-la' gunézruje̱' nu'ula na' tu xiche da dxulé'e na belexelé̱'e̱.”
MAT 5:32 Neda' dxapa' le'e, che tu benne' dxexelé̱'e̱ nen zru'ule̱', na' nu'ula nigá quebe guzúale̱ne̱' benne' xula, benne' chee̱ nu'ula nigá dxuzúe̱' le̱' lu dul-la chee̱ da dxichaj na xrba chee̱ xel-la' nuchaga na' che tu benne' biu xula guchaga ne̱'e̱ nen nu'ula na' bsan benne' chee̱' le̱'. Cá'anqueze le̱' dxune̱' dul-la nen nu'ula na'.
MAT 5:33 Na' gunná Jesús: ―Cá'anqueze ba bénele ca gulenná benne' gula ca', gulenné̱': “Quebe gucá'anu' cá'aze ca da nache̱be lazru' nen dizra' bca'ana liu' lau Xránadxu Dios.”
MAT 5:34 Neda' dxapa' le'e: Quebe dxal-la' guzétjale xabáa chee̱ guca'ana lile dizra' chee̱le, lawe' da naca na naga dxe' Dios,
MAT 5:35 ne quebe guzétjale xe̱zr la xu nigá lawe' da naca na naga nuzúa Dios ni'e̱, ne quebe guzétjale Jerusalén lawe' da naca na xe̱zre chee̱ Benne' Blau naque̱' Wenná Bea.
MAT 5:36 Quebe guzétjale xíchajle chee̱ guca'ana lile dizra' chee̱le lawe' da quebe séquele gunle da chiche, ne da gasaj netú xicha xíchajle.
MAT 5:37 Le nnaze: “Awe',” u le nnaze: “Cabí,” lawe' da gate tu benne' dxudadxe̱' chee̱' chee̱ da nigá, naca na chee̱ da xriwe̱'.
MAT 5:38 Na' gunná Jesús: ―Le'e ba bénele ca da gulenné̱' nédxute̱: “Che tu benne' cuéaje̱' xiaj lau', cá'anqueze gunu' chee̱', ne che cuéaje̱' lazxu', cá'anqueze gunu' chee̱'.”
MAT 5:39 Neda' dxapa' le'e, quebe tíl-lale̱le nu benne', san che tu benne' gu'e̱ chalá'a xragu', be̱' lataj gu'e̱ xechalá'a xragu'.
MAT 5:40 Che tu benne' gaca xúzre'le̱ne̱' lue', ne dxaca lazre̱' cue̱' zrau', be̱' lataj xúate̱' xicha chiu'.
MAT 5:41 Che dxulusebágue̱' lue' gu'u xua chee̱' tu cuéndau', bia na chupa cuenla.
MAT 5:42 Che nútete̱ze benne' bi dxenabe̱' chiu', bnézruje̱' na, ne quebe guzagu' ca gunézruju' chee̱ nu benne' bi dxenabe̱' chite̱.
MAT 5:43 Na' gunná Jesús: ―Cá'anqueze ba bénele ca da gulenné̱' nédxute̱: “Bzri'i le sa' ljwezru', ne gucuide benne' dxedábague̱' lue'.”
MAT 5:44 Neda' dxapa' le'e, le zri'i benne' ca' dxeledábague̱' le'e. Le naba gaca chawe' chee̱ benne' dxelenné̱' chee̱le. Le gun da chawe' chee̱ benne' dxelecuídene̱' le'e. Le naba lau Dios gaca chawe' chee̱ benne' dxelenné̱' schanni' chee̱le ne dxelune̱' chee̱le da cale̱la.
MAT 5:45 Che gunle caní gácale bi cheé̱queze Xrale zue̱' xabáa, lawe' da dxun Le̱' dxusaní' gubizra naga zaj zra' benne' we̱n da cale̱la ne naga zaj zra' benne' xrlátaje ca', ne dxusel-la' nisa xiuj lu xe̱zr la xu chee̱ benne' chawe' ca', ne lu xe̱zr la xu chee̱ benne' ca' dxelune̱' da cale̱la.
MAT 5:46 Che nazrí'ile tuze benne' zaj nazrí'ine̱' le'e, ¿ájazra na' dxezá lázrele quizruj Dios le'e? Cá'anqueze dxelún benne' wechizruj ca', zaj nazrí'ine̱' le sa' ljwezre̱'.
MAT 5:47 Che le'e dxugápale diuzre tuze le sa' ljwézrele, ¿bizra da xrlátaje dxunle? Cá'anqueze dxelún benne' quebe zaj núnbe'e̱ Dios.
MAT 5:48 Le gaca benne' xrlátaje cáte̱ze naca Xrale zue̱' xabáa, naque̱' xrlátaje.
MAT 6:1 Caní gunná Jesús: ―Le guxúe xanne' cuínale chee̱ quebe gunle da naca chee̱ xel-la' benne' xudau' chee̱le lau bénneache chee̱ xelelé'ene̱' na. Che ca'an dxunle, na' Xrale Dios zue̱' xabáa québequeze bi gunne̱' le'e.
MAT 6:2 Chee̱ le̱ na', gate lue' dxácale̱nu' benne' dxelexázrjene̱', quebe guzennu' xúgute̱ bénneache ca da dxunu', ca dxelún benne' ca' dxelune̱' xrlátaje cúzreze la neza, ne lu xu'u naga dxulucá'ana szren benne' judío ca' Dios. Dxelune̱' da caní chee̱ xelenné̱ bénneache xrlátaje chee̱'. Da li dxapa' le'e, ba dé̱queze lazruj chee̱'.
MAT 6:3 Gate lue' gunézruju' late' chee̱ benne' dxelexázrjene̱', be̱n na luéze chee̱ quebe neze le sa' ljwezru'.
MAT 6:4 Be̱n da caní bagácheze, na' Xrau' Dios, Bénnea' dxelé'ene̱' ca da dxunu' bagácheze, Le̱' gunne̱' lazruj chiu'.
MAT 6:5 Na' gunná Jesús: ―Gate le'e gunle xel-la' dxuláwizra Dios, quebe gunle ca dxelún benne' ca' dxelune̱' xrlátaje cúzreze. Dxeledánene̱' dxelune̱' xel-la' dxuláwizra Dios zaj ze̱ze̱' lu xu'u naga dxulucá'ana szren benne' judío ca' Dios, ne la neza, chee̱ xelelé'e bénneache da dxelune̱'. Da li dxapa' le'e, ba dé̱queze lazruj chee̱'.
MAT 6:6 Gate lue' dxuláwizru' Dios, guxú'u lu xu'u chiu'. Bsezxuj dxa xu'u chiu', na' bláwizra Dios guchálajle̱nu' Xrau' Dios zúale̱ne̱' lue' naga zu' tuzu'. Nadxa Xrau' Dios, Bénnea' dxelé'ene̱' ca da dxunu' bagácheze, Le̱' xuzri'e̱ chiu'.
MAT 6:7 ’Gate dxuláwizru' Dios dxuchálajle̱nu' Le̱', quebe tuz ca da nneu' zánete̱ lasa ca dxelún benne' ca' quebe zaj núnbe'e̱ Dios. Dxeléquene̱' wen Dios chee̱' lawe' da dxelenné̱le̱'e̱.
MAT 6:8 Quebe gunle ca dxelún benne' ca', lawe' da Xrale Dios ba nézquezne̱' ca da dxechínnele le'e nédxula ca za nábale na.
MAT 6:9 Chee̱ le̱ na', le guláwizra Dios nnale caní: Xrantu' Dios, zu' xabáa, gaca lá'azxaqueze Lau'.
MAT 6:10 Gudá nna be'u lu xe̱zr la xu nigá. Gaca lu xe̱zr la xu nigá ca dxaca lazru' Lue', cáte̱ze dxaca xabáa.
MAT 6:11 Be̱nna netu' da gáguntu' na'a.
MAT 6:12 Bnite lau chee̱ntu' ca naca da cale̱la da be̱ntu', ca netu' ba bnite launtu' chee̱ benne' belune̱' chee̱ntu' da cale̱la.
MAT 6:13 Quebe gu'u lataj nu gun zréaje netu', 2 san bselá netu' lu na' da xriwe̱'. Naca chiu' gápaquezu' xel-la' dxenná bea, ne xel-la' waca, ne da xabáa chadía chacanna. ¡Ca'an gaca na!
MAT 6:14 ’Che le'e gunite laule chee̱ benne' belune̱' chee̱le da cale̱la, na' Xrale Dios zue̱' xabáa gunite lawe̱' chee̱le le'e.
MAT 6:15 Che le'e quebe gunite laule chee̱ benne' ca', na' Xrale Dios quebe gunite láuqueze̱' chee̱le le'e ca naca dul-la da nabágale.
MAT 6:16 Na' gunná Jesús: ―Gate le'e dxunle gubasa, quebe guzúale baxache' laule ca dxelún benne' dxelune̱' xrlátaje cúzreze. Benne' caní dxelune̱' ca' chee̱ xelelé'e bénneache le̱' dxelune̱' gubasa. Da li dxapa' le'e, ba dé̱queze lazruj chee̱ benne' ca'.
MAT 6:17 Lue', gate dxunu' gubasa, bza xíchaju' chawe', ne gudibe lau',
MAT 6:18 chee̱ quebe xeléquebe'e bénneache dxunu' gubasa. Tuze Xrau' Dios na', Bénnea' zúale̱ne̱' lue' naga zu' tuzu', Le̱' dxennátequeze̱', na' gunne̱' da naca na chiu'.
MAT 6:19 Na' gunná Jesús: ―Quebe gutúpale da gunní'a lu xe̱zr la xu nigá, naga guteba' na, ne da ca' dxelebía xi na, na' xelú'u gubán ne xelebane̱' na.
MAT 6:20 Le'e, le gun da xrlátaje, da gaca na ca guzrá cháwele da gunní'a xabáa, naga quebe guteba' na, ne da ca' quebe bi xeleque na, na' québequeze xelú'u gubán chee̱ xelequé̱'e̱ na.
MAT 6:21 Naga nuzrale da gunní'a chee̱le, na' zúaqueze lázrdaule.
MAT 6:22 Na' gunná Jesús: ―Xiaj laule zaj naca na ca tu xi' chee̱ be̱l-la' dxen chee̱le. Che xiaj laule zaj naca na chawe', dute̱ ca naca be̱l-la' dxen chee̱le naxaní'.
MAT 6:23 Che xiaj laule quebe zaj naca na chawe', dute̱ ca naca be̱l-la' dxen chee̱le nachul-la na. Cá'anqueze che xi' da xu'ule xexaca na tu da chul-la, chúl-lale̱'e̱dxa súaquezle.
MAT 6:24 Na' gunná Jesús: ―Netú benne' quebe séquene̱' guzúa cuine̱' lu na' chupa xrane̱', lawe' da wazré̱'e̱ tu xrane̱' ne wazrí'ine̱' xetúe̱', u wéquene̱' ba lá'ana tu xrane̱' na' xetúe̱' guzúe̱' chalá'ala. Quebe séquele guzúa cuinle lu na' Dios, ne lu na' da gunní'a.
MAT 6:25 Na' gunná Jesús: ―Chee̱ le̱ na' dxapa' le'e, quebe cue'le gunne xue ga sa' da gágule da xí'ajle chee̱ gaca banle, ne ga sa' zra lánale da gácule. Zácadxa xel-la' nabán chee̱le ca da dxágule, ne zácadxa be̱l-la' dxen chee̱le ca zra lánale.
MAT 6:26 Le nna'xque bxínnedu ca' dxeledaba' lu be'. Quebe dxelázaba'. Quebe dxelelápaba'. Quebe ga dxuluxuzrá cháweba' na. Xrale Dios zue̱' xabáa dxunézruje̱' da dxeláguba'. Zácadxale le'e ca bxínnedu ca'.
MAT 6:27 ¿Nuzra benne' ládujla le'e gaca gusetunna cuine̱' xate' lawe' da dxe'e̱ gunne xue?
MAT 6:28 ’¿Bizr chee̱ na' dxe'le le'e gunne xue chee̱ zra lánale? Le nna'xque ca dxelegula xiaj ca' zaj ze̱ le̱'e̱ xixre'. Quebe dxelún na zrin, ne quebe dxelache na du.
MAT 6:29 Dxapa' le'e, Salomón benne' wenná bea na' quebe gucue̱' ca da xrtan chee̱ xiaj caní, na' le̱' gúta'le̱'e̱ chee̱' da gunní'a.
MAT 6:30 Che Dios dxudxe̱ne̱' xrtánle̱'e̱ xiaj caní da ca' zaj zua na na'a le̱'e̱ xixre', na' wxre xelezxe na lu xi', quegá gundxe̱' da chawe' chee̱le le'e, benne' québete̱ ca dxeajlí lazre'.
MAT 6:31 Chee̱ le̱ na', quebe cué'tecale gunne xue, nnale: “¿Ga sa' da gágudxu? ¿Ga sa' da xí'ajdxu? ¿Ga sa' da gácudxu?”
MAT 6:32 Chee̱ da caní zaj dxe' gunne xue benne' quebe zaj núnbe'e̱ Dios, san le'e, zua tu Xrale xabáa ba nézquezne̱' ca naca xúgute̱ da dxechínnele.
MAT 6:33 Zria laudxa cuele gunne xue chee̱ nna bea Dios lu xichaj lázrdaule, ne chee̱ gunle da xrlátaje da xezaca ba lazre' Dios, na' sile xúgute̱ da ca' dxechínnele.
MAT 6:34 Quebe cuele gunne xue na'a da naca na chee̱ wxre, lawe' da wxre ca'an gáta'queze da cuele gunne xue. Tu zra tu zra dé̱queze da guchaga laudxu.
MAT 7:1 Na' gunná Jesús: ―Quebe guchí'ale da dxelún le sa' ljwézrele chee̱ quebe guchi'a Dios caní chee̱le le'e.
MAT 7:2 Le̱' guchi'e̱ chee̱le le'e cáte̱ze dxunle le'e chee̱ le sa' ljwézrele, ne cáte̱ze dxunle le'e chee̱ le sa' ljwézrele, ca'an gun Dios nen le'e.
MAT 7:3 ¿Bizr chee̱ na' dxená'u bé̱bedau' da xu'u xiaj lau le sa' ljwezru', ne quebe dxená'u da zrente̱ da xu'u na xiaj láuquezu' lue'?
MAT 7:4 ¿Ájazra gunu' xu'u le sa' ljwezru': “Be̱nna lataj xebéaja' bé̱bedau' da xu'u xiaj lau'”, che da zrendxa xu'u xiaj láuquezu' lue'?
MAT 7:5 Lue', benne' dxun xrlátaje cúzreze. Bebéaj nedxu da zrente̱ da xu'u xiaj láuquezu', na' gaca le'enu' cháwedau' xebéaju' bé̱bedau' da xu'u xiaj lau le sa' ljwezru'.
MAT 7:6 ’Quebe gunézrujle da naca lá'azxa chee̱ benne' dxelune̱' ca dxelún becu' snia, checa xelexéchaje̱', ne xuluzúzrue̱' le'e. Quebe guzúale da zaca chee̱le lau benne' dxelune̱' ca dxelún cuche, dxuluchuchuj dxululéajba' da dxugágule-ba'.
MAT 7:7 Na' gunná Jesús: ―Le naba, na' Dios gunne̱' na chee̱le. Le xilaj na, na' xezrélele na. Le nne̱ dxu'a dxa xu'u, na' sáluje̱' chee̱le.
MAT 7:8 Le gun caní lawe' da benne' bi dxenabe̱', dxezi'e̱ na. Benne' bi dxexílaje̱', dxeajxraque̱' na, na' benne' dxenné̱' dxu'a dxa xu'u, zua nu benne' sáluje̱' chee̱'.
MAT 7:9 ’Netule le'e quebe gunézrujle zrí'inele tu xiaj che le̱be' dxenábabe' le'e tu xeta.
MAT 7:10 Quebe gunézrujle zrí'inele tu be̱la' snia che le̱be' dxenábabe' le'e tu bela.
MAT 7:11 Che le'e, benne' we̱n da cale̱la, nézele gunézrujle zrí'inele da naca na chawe', da cháwedxa gunna Xrale Dios zua xabáa, gunne̱' da chawe' chee̱ benne' bi dxenábene̱' Le̱'.
MAT 7:12 ’Le gun chee̱ le sa' ljwézrele ca dxaca lázrele le'e xelún le̱be' chee̱le. Da nigá naca da nadxixruj bea na Moisés, ne da dxenná na lu xiche naga naxúaj da gulenná benne' ca' buluchálaje̱' waláz chee̱ Dios.
MAT 7:13 Na' gunná Jesús: ―Le chu'u lu dxa xu'u lechide'. Dxa xu'u laga, ne neza xu zaj naca naga zjaca benne' xelebía xi'e̱, na' benne' zante̱ zjaque̱' na'.
MAT 7:14 Dxa xu'u lechide', ne neza lase zaj naca naga zjaca benne' xelezí'e̱ xel-la' nabán da zeajlí canna, na' bábaze benne' dxelexezrelne̱' na.
MAT 7:15 Na' gunná Jesús: ―Le guxúe cuínale chee̱ benne' we̱n lazre' ca', benne' dxelenné̱' zaj naque̱' benne' dxuluchálaje̱' waláz chee̱ Dios. Benne' caní zá'aque̱' naga zrale le'e, zaj nun cuine̱' ca tu benne' dxexruj lazre' ca naca tu zríla'dau', san lu xichaj lázrdawe̱' zaj naque̱' snia ca tu becu' xi'a.
MAT 7:16 Le'e xúnbeale le̱' ne̱ chee̱ da dxelune̱'. Da zixre da dxebía lba uva quebe xuchíbedxu na lu xaga xeche', na' da zixre da dxebía xaga higo quebe xuchíbedxu na lu xeche' ga'.
MAT 7:17 Ca'an naca, xúgute̱ xaga chawe' dxelebía na da zixre chawe', na' xaga da quebe naca na chawe', quebe dxebía na da zixre chawe'.
MAT 7:18 Xaga chawe' ca' quebe dxelebía na da zrinnaj, na' xaga zrinnaj na' quebe dxebía na da chawe'.
MAT 7:19 Xúgute̱ xaga zrinnaj welechugue na, na' xelezxe na lu xi'.
MAT 7:20 Ca'an naca, le'e xúnbeale benne' ca' ne̱ chee̱ da ca' dxelune̱'.
MAT 7:21 Na' gunná Jesús: ―Quebe xelu'e̱ naga dxenná bea Dios xabáa xugute̱ benne' ca' dxelé̱'e̱ neda': “Xrana', Xrana'.” Welú'u tuze benne' ca' dxelune̱' ca da dxaca lazre' Dios zue̱' xabáa.
MAT 7:22 Ca zrin zra na', benne' zante̱ xelé̱'e̱ neda': “Xránantu', Xránantu', netu' bchálajntu' ne̱ chee̱ Lau' Lue', ne bchínentu' Lau' bebéajntu' be' xriwe̱' ca', ne nen Lau' Lue' bé̱nle̱'e̱ntu' xel-la' waca ca' chee̱ xabáa.”
MAT 7:23 Nadxa neda' xápaqueza' benne' ca': “Quebe núnbe'a le'e. Le cuasa cuita' neda', le'e, ba be̱nle da cale̱la.”
MAT 7:24 Na' gunná Jesús: ―Bénnea' dxenne̱' chia', ne dxune̱' ca da dxennía', naque̱' ca tu benne' naxéajni'iqueze', benne' be̱ne̱' tu lizre̱' lu xiaj xre.
MAT 7:25 Guca xiuj, na' bdxuaj guba'u, ne guxasa be' bdunu' chee̱ xuluzría xi na xu'u na', san quebe guzré'e na lawe' da xu'u lane na lu xiaj xre.
MAT 7:26 Bénnea' quebe dxuzé̱ nague̱' chia', ne quebe dxune̱' ca da dxennía', naque̱' ca tu benne' xala, benne' be̱ne̱' tu lizre̱' lu xu dxeze.
MAT 7:27 Guca xiuj, na' bdxuaj guba'u ne guxasa be' bdunu' chee̱ xuluzría xi na xu'u na', na' chadite guzré'e na, ne guzría xite̱ na.
MAT 7:28 Ca bexuzre bchalaj Jesús, na' belexebanne benne' ca' ca naca da bsé̱dene̱',
MAT 7:29 lawe' da dxusé̱dene̱' benne' ca' ca tu benne' nape̱' xel-la' dxenná bea, ne quegá ca dxelún benne' ca' dxuluxuzájle̱'e̱ da nadxixruj bea Dios.
MAT 8:1 Gate bexetaj Jesús lu xi'a na', benne' zante̱ zjácale̱ne̱' Le̱'.
MAT 8:2 Na' bzrin tu benne' we̱' dxuzru lu xpe̱le̱', ne bzu zribe̱' lau Jesús. Dxe̱'e̱ Le̱': ―Xran, che dxaca lazru', waca xexunu' neda'.
MAT 8:3 Nadxa Jesús guxrúa ne̱'e̱ bénnea'. Dxe̱'e̱ le̱': ―Dxaca lazra'. Na'a dxexuna' lue'. Ca gunné̱' caní, benne' we̱' na' bexácate̱' ca naca xízrawe̱' chee̱'.
MAT 8:4 Na' Jesús guzre̱' le̱': ―Gunná' xque. Quebe nu xu'u ca'. Bexíajze na'a xeajxelé'e cuinu' lau bxruze, ne xeajnezruj guna' ca da dxenná bea lu da bdxixruj be'e Moisés, chee̱ xelelé'e benne' ca' ba bexacu' na'a.
MAT 8:5 Ca bexú'u Jesús lu xe̱zre Capernaum, na' bzrin lawe' tu benne' Roma, benne' dxenná be'ene̱' benne' ca' dxjaque̱' wedil-la, na' guta' xuene̱' Le̱',
MAT 8:6 dxe̱'e̱ Le̱': ―Xran, bi we̱n zrin chia' de̱be' lizra'. Naxrú'unebe' bine, ne dxezácale̱'e̱be'.
MAT 8:7 Jesús dxe̱'e̱ le̱': ―Wazá'a xexuna'-be'.
MAT 8:8 Benne' dxenná be'e̱ na' gunné̱': ―Xran, quebe naca chia' chu'u lizra'. Cun gunne̱ze, na' xexaca bi we̱n zrin chia'.
MAT 8:9 Caní waca gunu' lawe' da zua benne' dxenná bé'ene̱' neda', ne cá'anqueze neda' dxenná be'eda' benne' ca' dxjaque̱' wedil-la. Gate dxapa' tube': “Guxíaj”, na' dxéajbe'. Na' gate dxapa' bi xula: “Gudá”, na' dxídabe'. Na' gate dxuchíneda' bi we̱n zrin chia' chee̱ bi da gunbe', na' dxunbe' na.
MAT 8:10 Gate bene Jesús da nigá, bebánene̱', na' guzre̱' benne' ca' zjácale̱ne̱' Le̱': ―Da li dxapa' le'e, ládujla benne' Israel quebe nu ne xezrelda', benne' dxéajle̱'e̱ chia' ca dxun benne' nigá.
MAT 8:11 Neda' dxapa' le'e, zá'aca benne' zante̱ chalá'a naga dxalaj gubizra, ne xechalá'ala naga dxebía gubizra, na' xelebé'e̱ tu zren xelawe̱' nen Abraham, ne Isaac, ne Jacob naga dxenná bea Dios xabáa.
MAT 8:12 Benne' ca' gucá'a zga'ale Dios chee̱ xelu'e̱ naga dxenná bea Le̱', guzale̱' benne' ca' lataj chul-la naga xelebezre̱', ne xeláguxa'ate̱ lazxe̱'.
MAT 8:13 Nadxa Jesús guzre̱' benne' dxenná be'e̱ na': ―Bexíaj lizru'. Waca ca da ba guxéajle̱'u. Ca lu zra ná'queze bexácate̱ bi we̱n zrin chee̱'.
MAT 8:14 Guxíaj Jesús lizre Pedro, na' blé'ene̱' xrna zru'ule̱' de̱' lu da'a, xu'e̱ da la.
MAT 8:15 Xeajté̱' ne̱'e̱, na' bedxúaj da la da xu'e̱. Nadxa nu'ula na' guxase̱', ne guzú lawe̱' dxusení'e̱ da xelagu benne' ca'.
MAT 8:16 Ca guzría gubizra, na' belezrín benne' zante̱ lau Jesús, zaj naché̱'e̱ benne' zaj xu'e̱ be' xriwe̱' ca'. Nen dízra'ze da gunná Jesús, bebéaje̱' be' xriwe̱' ca', ne bexune̱' xúgute̱ benne' we̱' ca'.
MAT 8:17 Da nigá guca na ca da gunná Isaías, benne' bchálaje̱' waláz chee̱ Dios, gunné̱': “Le̱' bequé̱'e̱ xízrawe̱' ca' da nápadxu, ne gubague̱' ca da dxezácadxu.”
MAT 8:18 Gate na' ble'e Jesús benne' zante̱ zaj naxéchaje̱' Le̱', na' guzre̱' benne' ca' dxusé̱dene̱' gulelague̱' xechalá'a nísadau' tu lu da dxedá lawe' nisa.
MAT 8:19 Na' bzrin lau Jesús tu benne' dxuxuzájle̱'e̱ da bdxixruj be'e Dios, na' dxe̱'e̱ Le̱': ―Benne' Wesede, dxaca lazra' sále̱na' Lue' gátete̱ze chéaju'.
MAT 8:20 Na' Jesús guzre̱' le̱': ―Beza' zaj zua bluaj chee̱ba', na' bxinne zaj zria xrú'uneba', san neda', Benne' Gulje̱' Bénneache, ne naga xrua xíchaja' quebe ga zua.
MAT 8:21 Bzrin xetú benne' naque̱' benne' ba bsé̱dequeze Jesús, na' guzre̱' Le̱': ―Xran, be̱nna neda' lataj xexá'a nedxu chee̱ cheajxecacha' xra'.
MAT 8:22 Nadxa Jesús guzre̱' le̱': ―Gudále̱n neda'. Be̱' lataj benne' gate ca' xulucache ljwezre̱'.
MAT 8:23 Nadxa guxú'u Jesús lu da dxedá lawe' nísadau', na' benne' ca' dxusé̱dene̱' belune̱' Le̱' tu zren.
MAT 8:24 Na' guzú lau dxaca tu be' bdunu' lawe' nísadau', na' xeajxruza chee̱ nísadau' guxú'u na lu da dxedá lawe' nísadau' na', dxácate̱ dxase Jesús.
MAT 8:25 Nadxa benne' ca' dxusé̱dene̱' bulusebane̱' Le̱', na' dxelé̱'e̱ Le̱': ―Xránantu'. Bselá netu'. Ba dxázentu' lu nisa.
MAT 8:26 Jesús guzre̱' le̱': ―¿Bizr chee̱ na' dxezrébele̱'e̱le? Nácale benne' látega dxeleajlí lázre' Dios. Nadxa guxasa Jesús. Gudil-le̱' be' bdunu', ne nísadau', na' la belebé zrite̱ na.
MAT 8:27 Benne' ca' belexebánene̱', gulenné̱': ―¿Núzraqueze benne' nigá? Dxuluzúa be', ne nísadau' dizra' chee̱'.
MAT 8:28 Gate bezrín Jesús xechalá'a nísadau' na' lu xe̱zr la xu chee̱ benne' Gadara, na' chupa benne' biu belexedxúaje̱' lu bluaj chee̱ benne' gate, na' belezrine̱' lau Jesús. Dxúpate̱ benne' ca' zaj xu'e̱ be' xriwe̱', ne zaj naque̱' benne' sníale̱'e̱, na' netú benne' quebe dxexázrene̱' xedée̱' la neza na'.
MAT 8:29 Na' gulezú lawe' dxelebézrexe̱'e̱. Dxelenné̱': ―¿Bizr chee̱ na' za'u naga zúantu', Jesús, Zri'ine Dios? ¿Za'u nigá chee̱ gusaca zi'u netu', ne quebe ne zrin zra?
MAT 8:30 Tu chi na' zra tu cue' cuche dxeláguba'.
MAT 8:31 Be' xriwe̱' ca' gulata' xue na Jesús, gulenná na: ―Che Lue' xebéaju' netu' nigá, be̱nna lataj cheajchú'untu' lu cuche ca'.
MAT 8:32 Nadxa Jesús guzre̱' na: ―Le chjaca xca'. Nadxa be' xriwe̱' ca' belexedxúaj na lu benne' ca', na' belexú'u na lu cuche ca'. Nadxa xúgute̱ cuche ca' belelázruba' tu dxu'a xi'a zren, na' xeajlecházeba' lu nísadau' naga gulázeba' nisa, na' guláteba'.
MAT 8:33 Benne' ca' buluxúe̱'-ba' belezrebe̱', na' besá'aca chégüe̱', ne belexezrine̱' lu xe̱zre. Buluchálaje̱' ca guca xúgute̱ da caní, ne ca guca chee̱ benne' ca', belexedxúaj be' xriwe̱' zaj xu'e̱.
MAT 8:34 Nadxa xúgute̱ benne' zaj zre̱'e̱ lu xe̱zre na' beledxúaje̱', ne belezrine̱' naga zua Jesús. Na' ca belelé'ene̱' Le̱', gulata' xuene̱' Le̱' xezé̱'e̱ lu xe̱zr la xu chee̱'.
MAT 9:1 Nadxa Jesús guxú'e̱ tu lu da dxedá lawe' nísadau', na' gulague̱' xechalá'a nísadau', na' bezrine̱' lázrequeze̱'.
MAT 9:2 Na' bedajlegu'e̱ tu benne' biu lau Le̱', zaj zua zri ni'a ne̱'e̱, zaj naxrúe̱' benne' na' tu lu ta'a blaga'. Gate ble'e Jesús ca dxeléajle̱'e̱ chee̱', na' gunné̱', dxe̱'e̱ benne' we̱': ―Be̱n dipa lazru', zrí'ina'dau'. Dul-la chiu' dxunite lawa'.
MAT 9:3 Nadxa bal-la benne' dxuluxuzájle̱'e̱ da nadxixruj bea Dios gulenné̱' lu xichaj lázrdawe̱': “Benne' nigá dxucá'ana dítaje̱' Dios nen xrtizre̱'.”
MAT 9:4 Lawe' da neze Jesús ca gulenné̱' lu xichaj lázrdawe̱', na' dxe̱'e̱ benne' ca', gunné̱': ―¿Bizr chee̱ na' dxennale caní lu xichaj lázrdaule?
MAT 9:5 ¿Bízrala da quebe nácadxa ste̱be guna'? ¿Nnia': “Dul-la chiu' ba bnite lawa'”, u che nnia': “Bexasa, guzá?”
MAT 9:6 Chee̱ le̱ na' gulé'eda' le'e neda', Benne' Gulje̱' Bénneache, napa' xel-la' dxenná bea lu xe̱zr la xu nigá gunite lawa' dul-la. Nadxa dxe̱'e̱ benne' zaj zua zri ni'a ne̱'e̱, gunné̱': ―Bexasa. Becá'a ta'a chiu'. Bexíaj lizru'.
MAT 9:7 Bénnea' zaj zua zri ni'a ne̱'e̱ bexase̱', na' zexíajte̱' lizre̱'.
MAT 9:8 Gate belelé'e bénneache da nigá, na' belezrebe̱', ne belúe lá'ane̱' Dios lawe' ba bnézruje̱' xel-la' waca caní chee̱ bénneache.
MAT 9:9 Ca bezá Jesús na', na' blé'ene̱' tu benne' biu le̱' Mateo, dxe'e̱ lataj naga dxuchízruje̱' waláz chee̱ xe̱zre Roma, na' dxe̱'e̱ le̱', gunné̱': 6 ―Be̱n neda' tuze. Nadxa Mateo nigá guxase̱' zéajle̱ne̱' Jesús.
MAT 9:10 Gate na' dxe' Jesús dxawe̱' xeta lizre Mateo nigá, benne' zante̱ wechizruj, ne benne' dul-la belezrine̱', ne gulebé'queze̱' dxelawe̱' cuita Jesús, ne benne' ca' dxusé̱dene̱'.
MAT 9:11 Benne' xudau' fariseo ca', gate belelé'ene̱' da nigá, dxelé̱'e̱ benne' ca' dxuse̱de Jesús, gulenné̱': ―¿Bizr chee̱ na' Benne' dxusédene̱' le'e dxágule̱ne̱' benne' wechizruj ca', ne benne' we̱n da zrinnaj ca'?
MAT 9:12 Jesús benne̱' da nigá, na' dxe̱'e̱ benne' ca', gunné̱': ―Quebe dxelechine benne' chawe' nu benne' dxexune̱' bénneache. Benne' we̱' dxelechínene̱' le̱'.
MAT 9:13 Le chjaca, le cheajse̱de ca da dxenná da naxúaj na lu xiche chee̱ Dios, dxenné̱': “Neda' dxaca lazra' xexache lázrele le sa' ljwézrele, quegá gútele be̱ xíxre'du ca' lu cugu chia'.” Bla' neda', quegá chee̱ guláwizra' benne' xrlátaje. Dxuláwizra' benne' dul-la chee̱ xelexebí'i lazre̱'.
MAT 9:14 Nadxa belezrín lau Jesús benne' ca' dxeledále̱ne̱' Juan, bénnea' dxuchúe̱' bénneache nisa, na' gulenábene̱' Le̱': ―¿Bizr chee̱ na' quebe dxelún gubasa benne' dxusé̱denu' Lue', ca dxuntu' netu', ne ca dxelún benne' xudau' fariseo ca'? Tu dxúnzquezentu' gubasa.
MAT 9:15 Na' Jesús dxe̱'e̱ benne' ca', gunné̱': ―¿Ájala chee̱ na' xelezúa ba xácheze benne' zaj zue̱' laní chee̱ wechaga na' dxácate̱ zua benne' wechaga na' nen le̱'? Wazrín zra gate dua benne' wechaga na'. Nadxa xelúnqueze̱' gubasa.
MAT 9:16 ’Quegá nu dxudá tu ladxe' cube le̱'e̱ tu zra lánadxu gula, lawe' da gate cheajxedxé' da cube na', ne xrube xu na da gula na', na' dxézadxa da gula na'.
MAT 9:17 Cá'anqueze quebe nu benne' que̱'e̱ xrise uva wal-la cube lu bzude xide gula lawe' da che ca'an gune̱', gate cue' chi'i xrise uva wal-la, na' dxeza bzude xide na', na' xelebía xi' xrise uva wal-la na', ne bzude xide na'. Chee̱ le̱ na' dxal-la' ca'adxu xrise uva wal-la cube lu bzude xide cube. Che ca'an gundxu, xelegá'ana chawe' dxúpate̱ na. Bchalaj Jesús da caní ca naca chee̱ benne' ca' dxelezí' lu ne̱'e̱ xrtizre̱'.
MAT 9:18 Dxácate̱ na' dxuchalaj Jesús da nigá, na' bzrin tu benne' xíchaje̱ chee̱ benne' judío ca', na' bzu zribe̱' lau Jesús, dxenné̱': ―Bi nu'ula chia' za gútete̱be'. Che Lue' xidu' ne guzé̱ na'u le̱be', wexaca banbe'.
MAT 9:19 Na' guxasa Jesús, guxíajle̱ne̱' le̱' nen benne' ca' dxusé̱dene̱'.
MAT 9:20 Nadxa bzrin tu nu'ula we̱' cúzrula Jesús, ba naca chazrinnu iza dxé'ene̱' tu we̱' dxaque dxen, na' xeajté̱'e̱ zra lana Jesús.
MAT 9:21 Dxenné̱' lu xichaj lázrdawe̱': “Che cheajtaza' zra lane̱', na' xexaca'.”
MAT 9:22 Jesús guxéchaje̱', guné̱'e̱ nu'ula', na' dxe̱'e̱ le̱': ―Be̱n dipa lazru', zrí'ina'dau'. Bache bexacu' lawe' da dxéajle̱'u chia'. La bexácate̱ nu'ula na'.
MAT 9:23 Gate na' bzrin Jesús lizre benne' xíchaje̱ chee̱ benne' judío ca', na' blé'ene̱' zaj zra' benne' wil-la xulucache̱' bi nu'ula na', ne benne' zaj zre̱'e̱ dxelune̱' zralaj.
MAT 9:24 Gunná Jesús, dxe̱'e̱ benne' ca': ―Le xedxúaj nigá. Quegá nate bi nú'uladau' nigá. Dxásezebe'. Na' buluzrizre̱' chee̱'.
MAT 9:25 Gudé bebéaje̱' benne' ca', na' guxú'u Jesús, ne bé̱xrue̱' na' bi nu'ula na', na' guxásabe'.
MAT 9:26 Du ca naca xe̱zre ca' bzriluj dizra' chee̱ da be̱n Jesús.
MAT 9:27 Ca bedxúaj Jesús na', na' chupa benne' xjaque̱' cuzru Le̱', dxelenné̱' zizraj: ―Bexache lazre' netu', Lue', Zri'ine David.
MAT 9:28 Ca guxú'u Jesús lu xu'u naga zúaqueze̱', na' benne' la chul-la caní gulebigue̱' lau Le̱', na' Jesús guzre̱' benne' ca': ―¿Dxéajle̱le wazéqueda' xexuna' le'e? Na' gulé̱'e̱ Le̱': ―Awe', Xran.
MAT 9:29 Nadxa Jesús gudane̱' xiaj lau benne' ca', dxenné̱': ―Gaca chee̱le ca dxéajle̱le.
MAT 9:30 Belexaca xiaj lawe̱'. Nadxa Jesús gunné̱ xuene̱' benne' ca', gunné̱': ―Le guxúe xanne' chee̱ quebe nu neze da nigá.
MAT 9:31 Gate beledxúaje̱', na' buluchálaje̱' du ca naca xe̱zre ca' ca da be̱n Jesús chee̱'.
MAT 9:32 Ca bezá' Jesús nen benne' ca', na' belezrín bal-la benne' zaj naché̱'e̱ tu benne' biu quebe dxaca nnie̱', benne' xu'e̱ be' xriwe̱'.
MAT 9:33 Cáte̱ze bebéaj Jesús be' xriwe̱' nigá, na' benne' quebe dxaca nnie̱' bezú lawe̱' dxuchálaje̱'. Na' benne' ca' belexebánele̱'e̱, dxelenné̱': ―Cabata' ne lé'edxu gaca caní ládujla benne' Israel ca'.
MAT 9:34 Benne' xudau' fariseo ca' gulenné̱': ―Benne' nigá dxebéaje̱' be' xriwe̱', dxuchínene̱' xel-la' waca chee̱ da xriwe̱', da na' dxenná be'e na be' xriwe̱' ca'.
MAT 9:35 Gudé Jesús tu tu xe̱zre zren, ne tu tu xé̱zredau', dxusé̱dene̱' benne' ca' lu xu'u ca' naga dxulucá'ana szrene̱' Dios tu tu lataj ca'. Gulu'e̱ lban chee̱ dizra' chawe' ca nna bea Dios, ne bexunte̱' bénneache zaj nape̱' tu tu cue' xízrawe̱' ca da dxelezaque̱'.
MAT 9:36 Gate ble'e Jesús bénneache ca', na' bexache lazre̱' le̱' lawe' da zaj zre̱'e̱ xácheze̱', ne dxelecuán lazre̱'. Zaj naque̱' ca zrila' ca' quebe zua benne' guxúe̱'-ba'.
MAT 9:37 Nadxa guzre̱' benne' ca' dxusé̱dene̱': ―Da li, da zrente̱ de̱ da lápadxu, na' bábaze benne' we̱n zrin zaj zre̱'e̱.
MAT 9:38 Chee̱ le̱ na' le naba lau Xrana lina nigá, sel-le̱' benne' we̱n zrin xelelape̱' lina chee̱'.
MAT 10:1 Nadxa Jesús bláwizre̱' chazrinnu benne' ca' dxusé̱dene̱', na' bnézruje̱' le̱' xel-la' dxenná bea chee̱ xelexebéaje̱' be' xriwe̱' ca', ne chee̱ xelexexune̱' bénneache zaj xu'e̱ tu tu cue' xízrawe̱' ca da dxelezaque̱'.
MAT 10:2 Caní zaj le̱ chazrinnu benne' gubáz ca' chee̱ Jesús: Benne' nedxu le̱' Simón, ne lé̱queze̱' Pedro. Xetúe̱' naque̱' benne' biche Pedro, le̱' Andrés. Xechupe̱' zaj le̱' Jacobo, ne Juan, benne' zaj naque̱' zri'ine Zebedeo.
MAT 10:3 Xezícala benne' ca' zaj le̱' Felipe, ne Bartolomé, ne Tomás. Xetue̱' le̱' Mateo, benne' wechizruj chee̱ xe̱zre. Xetue̱' le̱' Jacobo, zri'ine Alfeo. Xetue̱' le̱' Lebeo, benne' lé̱queze̱' Tadeo.
MAT 10:4 Xetúe̱' le̱' Simón, benne' dxe'e̱ gunne xue chee̱ xe̱zr la xu Israel. Xetúe̱' le̱' Judas Iscariote, bénnea' gudée̱' Jesús lu na' benne' dxeledábague̱' Le̱'.
MAT 10:5 Nadxa gusel-la Jesús benne' chazrinnu caní. Guzre̱' le̱': ―Quebe cheajle naga zaj zra' benne' quebe zaj naque̱' judío, ne quebe chu'ule xe̱zre ca' zaj nababa Samaria.
MAT 10:6 Le chjaca naga zaj zra' benne' Israel zaj naque̱' ca zrila' zaj naníteba'.
MAT 10:7 Le chjaca cu'ule lban, xe̱le bénneache ba bzrin gáguze zra nna bea Dios lu xe̱zr la xu nigá.
MAT 10:8 Le xexún benne' zaj xu'e̱ we̱' guzru', ne benne' bila xízrawe̱' dxelé'ene̱'. Le gusebán benne' gate. Le xebéaj be' xriwe̱' da zaj xu'u bénneache. Cá'aze guzile xel-la' dxenná bea nigá, na' cá'aze le guchine na, quebe bi sile.
MAT 10:9 ’Quebe gúale dumí oro, ne dumí plata, ne dumí lase.
MAT 10:10 Quebe gúale xixruj xeta da gágule la neza. Quebe gúale xetú cue' zra lánale, ne zrélale, ne xaga da gúxrule. Benne' we̱n zrin wazrúequeze̱' da gawe̱'.
MAT 10:11 ’Gate na' zrinle le'e tu xe̱zre zren u tu xé̱zredau', le quilaj na' tu benne' du lazre', na' le xegá'ana lizre̱' ca zrindxa zra xeza'ale na'.
MAT 10:12 Gate na' chu'ule lu xu'u na', le xe̱ bénnea' naca lizre̱' na': “Xela dxebeza zri lazre' suale̱ na le'e.”
MAT 10:13 Che benne' ca' zaj naca chee̱' xelezí'e̱ xel-la' ba lá'ana caní, le gucá'ana cá'aze na. Che quebe zaj naca chee̱' xelezí'e̱ da nigá, na' quebe gata' chee̱'.
MAT 10:14 Che quebe lataj dxelune̱' le'e, ne quebe dxelenne̱' chee̱le, le xedxúaj lu xu'u na' u lu xe̱zre na', na' le xebibe bxrtedu na' zria ní'ale.
MAT 10:15 Da li dxapa' le'e, ca zrin zra guchi'a Dios, Dios gundxe̱' da ba xa' chee̱ benne' xe̱zre na' quez ca da gune̱' chee̱ benne' Sodoma, ne benne' Gomorra, xe̱zre ca' guzría xi'e̱.
MAT 10:16 Na' gunná Jesús: ―Le na' xque nigá. Neda' dxesel-la' le'e, gácale ca zrila' zaj zraba' ládujla becu' xi'a ca'. Chee̱ le̱ na', le gaca sina ca zaj naca be̱la', san le gaca dxexruj lazre' ca zaj naca bgúgudu ca'.
MAT 10:17 Le guxúe cuínale. Zaj zra' benne' xuludée̱' le'e lu na' benne' xu'u lawe', ne xuluzálaje̱' le'e lu xu'u naga dxulucá'ana szrene̱' Dios.
MAT 10:18 Cá'anqueze weleché̱'e̱ le'e lau benne' xu'u lawe' ca', ne lau benne' dxelenná bea lawe' da nácale chia' neda'. Ca'an gaca guchálajle ca naca chia' neda' lau benne' ca', ne lau benne' quebe zaj naque̱' judío.
MAT 10:19 Gate na' xuludée̱' le'e lu na' benne' dxuchi'a da dxaca, quebe gunne xue cue'le ca da nnale u ájala guchálajle, lawe' da gate zrin zra guchálajle, Dios gunne̱' ca da guchálajle.
MAT 10:20 Quegá le'eze guchálajle, lawe' da Be' Lá'azxa chee̱ Dios guchálaje̱' lu dxú'ale.
MAT 10:21 ’Xuludé bénneache benne' bíchequeze̱' lu na' benne' xelútie̱' le̱'. Cá'anqueze xra xrna xuludée̱' zrí'ine̱', na' zrí'ine̱' ca' xeledábagabe' xra xrnáquezebe' chee̱ xelátie̱'.
MAT 10:22 Xúgute̱ bénneache xelezré̱'e̱ le'e lawe' da nácale chia' neda', san bénnea' guxru chache̱' dizra' chee̱ Dios ca zrin zra cheajsé̱ chee̱', la bénnea'.
MAT 10:23 Gate xelebé nawe̱' le'e tu xe̱zre, le xuzrunnuj xetú xe̱zre. Da li neda', Benne' Gulje̱' Bénneache, dxapa' le'e, xida' nédxula ca quebe ne tache tale xúgute̱ xe̱zre chee̱ benne' Israel.
MAT 10:24 ’Netú benne' quebe naque̱' szrendxa ca benne' dxusé̱dene̱' le̱'. Cá'anqueze netú benne' we̱n zrin quebe naque̱' szrendxa ca xrane̱'.
MAT 10:25 Tu benne' dxuse̱de dxal-la' gun zi' lazre̱' gaque̱' ca naca benne' dxusé̱dene̱' le̱', na' benne' we̱n zrin dxal-la' gun zi' lazre̱' gaque̱' ca naca xrane̱'. Che benne' naque̱' xrane xu'u dxelé̱'e̱ le̱' Beelzebú, da xriwe̱', chezradxa xelenné̱' chee̱ bi chee̱' ca'.
MAT 10:26 Na' gunná Jesús: ―Chee̱ le̱ na', quebe zrébele bénneache. Xúgute̱ da bagácheze gaca béaqueze na, na' xúgute̱ da dxelaca ga nagache gulé'e láuqueze na.
MAT 10:27 Da nigá dxapa' le'e lu da chul-la, le guchalaj na te zra. Da dxapa' le'e bagácheze, le nne̱ zizraj chee̱ xelén xúgute̱ benne'.
MAT 10:28 Quebe zrébele benne' xelútie̱' be̱l-la' dxen chee̱le. Quebe xelezéquene̱' xelútie̱' bénne'du xu'ule. Le zrebe Dios. Le̱' dxezéquene̱' guzría xi'e̱ be̱l-la' dxen chee̱le, ne bénne'du xu'ule lu lataj ba xa'.
MAT 10:29 ’Dxelúti'e̱ chupa bxínnedu ca' nen tu dumídau'. Netuba' quebe gáteba' chee̱ quebe ne güe lataj Xrale.
MAT 10:30 Cá'anqueze xicha xíchajle, xúgute̱ na zaj nababa na.
MAT 10:31 Chee̱ le̱ na', quebe zrébele. Zácadxale le'e quézcala be̱ zan bxínnedu ca'.
MAT 10:32 Na' gunná Jesús: ―Xúgute̱ benne' ca' dxelexeche̱be̱' zaj naque̱' chia' neda' lau bénneache, cá'anqueze neda' weché̱bequeza' zaj naque̱' chia' neda' lau Xra' zue̱' xabáa.
MAT 10:33 Benne' ca' quebe dxelexeche̱be̱' zaj naque̱' chia' lau bénneache, néda'queza' québequeze xeche̱ba' zaj naque̱' chia' lau Xra' zue̱' xabáa.
MAT 10:34 Na' gunná Jesús: ―Quebe guéquele bla'a neda' chee̱ guzúa' xel-la' dxebeza zri lazre' ládujla bénneache. Bla'a neda', quegá chee̱ guzúa' xel-la' dxebeza zri lazre', san chee̱ guzúa' wedil-la.
MAT 10:35 Bla'a neda' chee̱ guna' tábaga' tu benne' xre̱', ne chee̱ guna' tábaga' tu bi nu'ula xrnabe', ne chee̱ guna' tábaga' tu zru'a lizre̱' tau zrí'ine̱'.
MAT 10:36 Ca'an gaca, tu tu benne' tíl-lale̱ xrtía ljwezre̱' le̱'.
MAT 10:37 ’Che tu benne' nazrí'idxene̱' xra xrne̱'e̱ quezca neda', quebe naca chee̱' gaque̱' chia', na' che nazrí'idxene̱' bi chee̱' ca' quezca neda', quebe naca chee̱' gaque̱' chia'.
MAT 10:38 Che tu benne' quebe gun cuine̱' ca tu benne' zéajte̱'e̱ le̱'e̱ xaga béguaj, ne gune̱' neda' tuze, quebe naca chee̱' gaque̱' chia'.
MAT 10:39 Benne' dxaca lazre̱' gapa chi'e̱ xel-la' nabán chee̱' gunitie̱' na. Bénnea' zúatequeze gudée̱' xel-la' nabán chee̱' ne̱ chia' neda', guselé̱' xel-la' nabán chee̱'.
MAT 10:40 Na' gunná Jesús: ―Che tu benne' gape̱' le'e ba lá'ana, néda'queze gape̱' ba lá'ana, na' bénnea' dxape̱' neda' ba lá'ana, dxápaqueze̱' ba lá'ana Dios, Bénnea' gusel-le̱' neda'.
MAT 10:41 Che tu benne' gape̱' ba lá'ana tu benne' dxuchalaje̱' waláz chee̱ Dios lawe' da ze̱'e̱ waláz chee̱ Dios, benne' nigá wazí'queze̱' tuze ca da si' bénnea' dxuchálaje̱' waláz chee̱ Dios. Na' che tu benne' gape̱' ba lá'ana tu benne' xrlátaje lawe' da naque̱' benne' xrlátaje, benne' nigá wazí'queze̱' tuze ca da si' benne' xrlátaje na'.
MAT 10:42 Nútete̱ze benne' gunézruje̱' tu zriga' nisa zaga da xi'aj tu bidu caní lawe' da naque̱' chia' neda', da líqueze wazi'e̱ da gunezruj Dios le̱'.
MAT 11:1 Gate bexuzre Jesús bchálajle̱ne̱' bénneache, na' bchálajle̱ne̱' chazrinnu benne' ca' dxusé̱dene̱'. Bezé̱'e̱ na' chee̱ cheajsédene̱', ne cheajchálaje̱' lban xúgute̱ xe̱zre ca' lu xe̱zr la xu na'.
MAT 11:2 Juan, bénnea' bchue̱' bénneache nisa, xu'e̱ lizre xia, na' benne̱' ca naca da dxun Cristo. Nadxa gusel-le̱' chupa benne' ca' dxeledále̱ne̱' le̱' lau Jesús.
MAT 11:3 Benne' chupe̱' caní buluche̱be̱' Jesús: ―¿Nacu' Lue' Cristo, Bénnea' dxal-la' xide̱', u che dxal-la' cuézantu' xelá' xetú benne'?
MAT 11:4 Na' beche̱be Jesús: ―Le chjaca cheajé̱zrele Juan da caní dxelé'ele, ne da dxenle.
MAT 11:5 Le xe̱'e̱ ca dxaca, dxelexelé'e benne' gulaque̱' la chul-la. Dxelexedá benne' gulezúa zri ni'a ne̱'e̱. Belexexaca benne' gulezaque̱' we̱' guzru', ne belexexaca ban benne' ca' gulatie̱'. Benne' xache' ca' dxelenne̱' dizra' chawe' chee̱ Dios.
MAT 11:6 Ba neza zrente̱ naca na chee̱ bénnea' quebe xucuán lazre̱' sále̱ne̱' neda'.
MAT 11:7 Ca besí'aca benne' chupa ca', na' guzú lau Jesús dxuchálajle̱ne̱' benne' zaj zre̱'e̱ na' ca naca chee̱ Juan. Dxenné̱': ―¿Bizra xeajnna'le le'e le̱'e̱ xixre' na'? ¿Xeajnna'le tu xia da dxuxrize be'?
MAT 11:8 Che cabí, ¿bizra xeajnna'le na'? ¿Xeajnna'le tu benne' nacue̱' zra lane̱' da zaca? Nézquezle benne' ca' zaj nácue̱' ladxe' zaca, lizre benne' dxelenná be'e̱ zaj zra' benne' caní.
MAT 11:9 ¿Bízraqueze xeajnna'le? ¿Xeajnna'le tu benne' dxuchálaje̱' waláz chee̱ Dios? Awe'. Ca'an guca. Bénnea' ble'ele na' nácadxe̱' blau ca tu benne' dxuchálaje̱' waláz chee̱ Dios.
MAT 11:10 Lu xiche chee̱ Dios naxúaj na ca naca chee̱ Juan na'. Dxenná na: Neda' dxesel-la' benne' gubáz chia' nédxula ca Lue', chee̱ gucueze̱' neza naga teu'.
MAT 11:11 Da li dxapa' le'e, ládujla xúgute̱ bénneache quebe nu chilá' benne' nácadxe̱' blau ca naca Juan, bénnea' bchue̱' bénneache nisa. Naga dxenná bea Dios, bénnea' nácadxe̱' benne' dxexruj lazre' nácadxe̱' blau ca naca Juan na'.
MAT 11:12 ’Ca lu zra bla' Juan, bénnea' bchue̱' bénneache nisa, bzrinte̱ na'a zra, zaj zra' benne' dxelune̱' zi' lazre' xelu'e̱ naga dxenná bea Dios xabáa, na' benne' dxelune̱' zi' lazre' dxelezrué'ene̱' na.
MAT 11:13 Ca da bzuaj Moisés lu xiche chee̱ da nadxixruj bea na, ne ca gulenná xúgute̱ benne' buluchálaje̱' waláz chee̱ Dios, dxuchalaj na ca naca chee̱ xel-la' dxenná bea chee̱ Dios, bzrinte̱ ca bla' Juan na'.
MAT 11:14 Che le'e dxaca lázrele chéajle̱le da nigá, Juan na' naque̱' Elías, bénnea' bchálaje̱' waláz chee̱ Dios gate nate, na' dxal-la' xelé̱'e̱ chee̱ guchálaje̱' waláz chee̱ Dios.
MAT 11:15 Che zua nágale, le xen da nigá.
MAT 11:16 ’¿Ájazra zaj naca benne' zaj zre̱'e̱ na'a zra? Zaj naque̱' ca bidu ca' dxelebé'ebe' dxelítajbe' lawe' xi'a, ne dxelenne̱be' zizraj, dxelé̱ ljwézrebe' ca':
MAT 11:17 “Bcuézrentu' bchiuj san quebe bxá'ale le'e. Bil-la xáchentu' san quebe gudxézrele.”
MAT 11:18 Caní zaj naque̱' lawe' da bla' Juan, quebe dxawe̱', ne quebe dxí'aje̱' da zaca, na' le'e dxennale xu'e̱ be' xriwe̱'.
MAT 11:19 Nadxa bla' neda', Benne' Gulje̱' Bénneache, dxawa', ne dxí'aja', na' dxennale naca' neda' benne' wagu xrata, ne benne' dxi'aj, ne ljwezre benne' dul-la, ne benne' wechizruj chee̱ Roma. Naca bea nu benne' nape̱' xel-la' sina chee̱ Dios ne̱ chee̱ da dxun bénnea'.
MAT 11:20 Nadxa guzú lau Jesús dxedil-le̱' bénneache chee̱ xe̱zre ca' naga be̱ne̱' xel-la' waca ca' chee̱ xabáa, lawe' da quebe belexebí'i lazre' benne' zaj zre̱'e̱ na'. Na' gunné̱':
MAT 11:21 ―Baxache' nácale le'e zrale xe̱zre Corazín. Baxache' nácale le'e zrale xe̱zre Betsaida. Caní nácale lawe' da checa' la ba guca lu xe̱zre Tiro, ne lu xe̱zre Sidón ca naca xel-la' waca ca' chee̱ xabáa ca da gulaca ládujla le'e, da zrente̱ ba zeaj gulácue̱' zra lane̱' tuzruj, ne gulegú'e̱ de xíchaje̱' da zaj naca bea na belexebí'i lazre̱'.
MAT 11:22 Neda' dxapa' le'e, lu zra guchi'a Dios, gundxe̱' da ba xa' chee̱le quez ca da ba xa' gune̱' chee̱ benne' Tiro, ne benne' Sidón.
MAT 11:23 Le'e zrale xe̱zre Capernaum, ¿dxéquele Dios wechise̱' le'e xabáa? Dios gudée̱' le'e lataj ba xa'. Caní gaca na lawe' da checa' la ba guca lu xe̱zre Sodoma ca naca xel-la' waca ca' chee̱ xabáa ca da gulaca ládujla le'e, nagá'anate̱queze xe̱zre na' lu zra na'a zra.
MAT 11:24 Neda' dxapa' le'e, lu zra guchi'a Dios, gundxe̱' da ba xa' chee̱le quez ca gune̱' da ba xa' chee̱ benne' Sodoma ca'.
MAT 11:25 Ca lu zra na' gunná Jesús: ―Dxue lá'ana' Lue', Xrae, nacu' Xrana xabáa, ne Xrana xe̱zr la xu nigá. Dxue lá'ana' Lue' lawe' da bcácheu' da caní lau benne' sina ca', ne lau benne' dxeléajni'ine̱', san blé'enu' na bidu caní.
MAT 11:26 Ca'an naca, Xrae, lawe' da naca na ca dxaca lazru' Lue'.
MAT 11:27 ’Xra' ba bdee̱' lu na'a xúgute̱ da caní. Quegá nu benne' núnbe'e̱ neda', Zri'ine Dios, san Xra' Dios núnbe'e̱ neda'. Quegá nu benne' núnbe'e̱ Xra', san neda', Zri'ine Dios, núnbe'a Le̱', ne zaj núnbea benne' ca' Le̱', benne' ca' dxaca lazra' gulé'eda' le̱' ca naca Xra'.
MAT 11:28 Le da naga zua', xúgute̱le le'e dxeajxréquele lu zrin dxunle chee̱ xudau', ne ca naca xua da núale, na' neda' guna' xezí' lázrele.
MAT 11:29 Le gunna lataj xrua' le'e ca nu benne' xrue̱' be̱zre xugu' chee̱ba', ne le guse̱de chia' lawe' da naca' dxexruj lazre', ne dxe'ene lazre', na' wazrué'ele xezí' lázrele lu bénne'du xu'ule.
MAT 11:30 Da na' naca na ca xugu' chee̱ be̱zre da xrua' le'e québete̱ ca naca na ste̱be chee̱ gúale na, na' xua da xrua' le'e naca na zraze.
MAT 12:1 Ca lu zra na' xu'u Jesús neza zéaje̱' ládujla naga de̱ xel-la' zrua' xtila, ne naca zra dxulupá'ana benne' judío. Dxeledún benne' ca' dxuse̱de Jesús, na' gulezú lawe̱' dxelálaje̱' dau naga zria zrua' xtila, ne dxelawe̱' na.
MAT 12:2 Gate belelé'e benne' xudau' fariseo ca' da caní, na' gulé̱'e̱ Jesús: ―Guná' xque ca dxelún benne' ca' dxusé̱denu', dxelune̱' zrin da quebe naca chee̱' xelune̱' lu zra dxupá'anadxu.
MAT 12:3 Jesús guzre̱' benne' ca': ―¿Quebe ne gulábale le'e ca be̱n David gate na' le̱', ne benne' ljwezre̱' ca' guledune̱'?
MAT 12:4 Guxú'e̱ lu xu'u chee̱ Dios, ne gulawe̱' xeta xtila lá'azxa, da quebe zaj naca chee̱' xelawe̱', le̱', ne benne' ljwezre̱' ca', san tuze bxruze ca' zaj naca chee̱' xelawe̱' na.
MAT 12:5 ¿Quebe ne gulábale da naxúaj na lu da bdxixruj be'e Moisés ca dxelún bxruze ca' lu xudau', dxelune̱' zrin chee̱ xudau' lu zra dxupá'anadxu, ne quebe zaj nabague̱' zria?
MAT 12:6 Neda' dxapa' le'e, de̱ tu da naca blaudxa ca xudau' nigá.
MAT 12:7 ¿Quebe ne chéajni'ile ca zéaje̱ da naxúaj na lu xiche chee̱ Dios? Dxenná na: Neda' dxaca lazra' xexache lázrele le sa' ljwézrele, ne quegá gútele be̱ xíxre'du ca' lu cugu chia'. La ba guxéajni'ile da nigá, quebe ne guzría xile bénneache quebe zaj nabague̱' dul-la.
MAT 12:8 Chee̱ le̱ na', neda', Benne' Gulje̱' Bénneache, napa' xel-la' dxenná bea dxuna' zrin chia' lu zra dxupá'anadxu.
MAT 12:9 Nadxa Jesús bezé̱'e̱ na', na' guxú'e̱ tu lu xu'u naga dxelúe lá'ane̱' Dios.
MAT 12:10 Zua tu benne' zua zri ne̱'e̱ ga na'. Benne' judío ca' gulaca lazre̱' xelezrelne̱' ájala xelune̱' chee̱ gaca xelagu zrie̱' chee̱ Jesús. Chee̱ le̱ na' gulenábene̱' Le̱': ―¿Dxunna Dios lataj xexundxu benne' we̱' lu zra dxupá'anadxu?
MAT 12:11 Jesús guzre̱' benne' ca': ―Nútete̱ze benne' zue̱' ládujla le'e, che zua tu zrila' chee̱', ne che bíxreba' tu xe̱dxu situj lu zra dxupá'anadxu, ¿quebe chéaje̱' cheajxeléaje̱'-ba' xca'?
MAT 12:12 Da zrendxa zaca tu benne' quez ca tu zrila'. Ca'an naca dxunna Dios lataj gundxu tu da xrlátaje lu zra dxupá'anadxu.
MAT 12:13 Nadxa Jesús guzre̱' benne' we̱' na': ―Bli na'u. Ca blí ne̱'e̱, na' bexaca na ca ne̱'e̱ xetú.
MAT 12:14 Nadxa beledxúaj benne' xudau' fariseo ca', ne gulezú lawe̱' dxelílaje̱' ájala xelune̱' xelútie̱' Jesús.
MAT 12:15 Gate gúquebe'e Jesús da nigá, na' bezé̱'e̱ na', na' benne' zante̱ zjácale̱ne̱' Le̱'. Bexún Jesús xúgute̱ benne' we̱' zaj zre̱'e̱ ládujla benne' ca'.
MAT 12:16 Jesús gunné̱ xúene̱' benne' ca' quebe nu xululé'ene̱' nu naca Le̱'.
MAT 12:17 Caní guca ca da gunná Isaías, benne' bchálaje̱' waláz chee̱ Dios, gunné̱':
MAT 12:18 Benne' nigá naque̱' we̱n zrin chia', benne' ba gucá'a. Benne' nigá nazrí'ida', ne dxezaca ba lázrele̱na' Le̱'. Guzúaqueza' xichaj lázrdawe̱' Be' Lá'azxa chia'. Guzenne̱' bénneache xúgute̱ xe̱zr la xu ca dxuchi'a da dxaca.
MAT 12:19 Quebe tíl-lale̱queze̱' bénneache, ne quebe cuézrexe̱'e̱. Netú benne' quebe xenne̱' chi'e̱ la neza.
MAT 12:20 Quebe quichje̱' tu xia da ba nachaj, ne quebe xusul-le̱' xi' da ba dxaca wexul-la na, ca zrindxa zra xuzúe̱' xel-la' dxenná bea chawe' chee̱'.
MAT 12:21 Bénneache xúgute̱ xe̱zr la xu xuluxrén lázrequeze̱' Le̱'.
MAT 12:22 Nadxa guleché̱'e̱ lau Jesús tu benne' la chul-la, benne' quebe dxaca nnie̱', lawe' da xu'e̱ be' xriwe̱'. Jesús bexune̱' benne' nigá, na' belé'ene̱', ne benníe̱'.
MAT 12:23 Xúgute̱ benne' ca' belexebánene̱', gulenné̱': ―¿Naca benne' nigá Zri'ine David zra?
MAT 12:24 Gate belén benne' xudau' fariseo da nigá, na' gulenné̱': ―Benne' nigá dxebéaje̱' be' xriwe̱', dxuchínene̱' xel-la' dxenná bea chee̱ Beelzebú, xrane be' xriwe̱' ca'.
MAT 12:25 Dxeque be'e Jesús ca da dxelenné̱', dxelé̱'e̱ ljwezre̱', na' guzre̱' le̱': ―Lu xu'u lawe' chee̱ gátete̱ze xe̱zre, che xelaca chupa la'a benne' xu'u lawe' ca', ne bal-le̱' xeledíl-lale̱ne̱' xezícadxe̱', na' wexul-la wenite xel-la' dxenná bea chee̱ benne' ca'. Cá'anqueze che tu xe̱zre benne', u tu cue' xrtía ljwezre xelaque̱' chupa la'a, ne xeledíl-lale̱ne̱' le sa' ljwezre̱', wenítequeze xe̱zre na', u xrtía ljwezre ca'.
MAT 12:26 Cá'anqueze, che Satanás, da xriwe̱', dxebéaje na ljwezre da xriwe̱', le̱ze na dxexún na chupa la'a cuina na. ¿Ájazra gácaqueze nna bea na?
MAT 12:27 Le'e dxennale chia' dxebéaja' be' xriwe̱' ca', dxuchíneda' xel-la' dxenná bea chee̱ Beelzebú da xriwe̱'. Che naca na ca', ¿Nuzra dxúnnaqueze xel-la' dxenná bea chee̱ benne' ca' zaj naca le'e tuze chee̱ xelebéaje̱' be' xriwe̱' ca'? Chee̱ le̱ na' lé̱queze̱' dxululé'ete̱ne̱' nanéguele le'e.
MAT 12:28 Che neda' dxebéaja' be' xriwe̱' ca' dxuchíneda' xel-la' waca chee̱ Be' Lá'azxa chee̱ Dios, da nigá dxunna bea na ba bla' xel-la' dxenná bea chee̱ Dios ládujla le'e.
MAT 12:29 ’¿Ájazra gun tu benne' chu'e̱ lizre tu benne' wal-la chee̱ que̱'e̱ da de̱ chee̱' che nédxula quebe guchéaje̱' ni'a na' bénnea'? Che gune̱' caní, na' wazéquene̱' que̱'e̱ da de̱ chee̱ bénnea'.
MAT 12:30 ’Nu benne' quebe dxácale̱ne̱' neda', dxedábague̱' neda', na' benne' quebe dxexezígale̱ne̱' neda', dxexúsie̱' na.
MAT 12:31 ’Chee̱ le̱ na' dxapa' le'e, gunite lau Dios chee̱ bénneache xúgute̱ dul-la zaj nabague̱', ne xúgute̱ da cale̱la da dxelenné̱', san che xelenné̱' schanni' chee̱ Be' Lá'azxa, cabata' gunite lau Dios chee̱'.
MAT 12:32 Nútete̱ze benne', che bi nnie̱' schanní' chia' neda', Benne' Gulje̱' Bénneache, Dios gunite lawe̱' chee̱', san che tu benne' nnie̱' schanni' chee̱ Be' Lá'azxa, québequeze gunite lau Dios chee̱' lu xe̱zr la xu nigá ne cá'anqueze lu xe̱zr la xu da za za'.
MAT 12:33 Na' gunná Jesús: ―Che naca chawe' tu xaga, dxebía na da zixre chawe', na' che naca tu xaga bize, dxebía na da zixre bize. Ca'an naca, tu xaga naca bea na ne̱ chee̱ da zixre da dxebía na.
MAT 12:34 Le'e, be̱ snia ca'. ¿Ájazra gunle le'e nne̱le da xrlátaje che le'e nácaquezle benne' we̱n da cale̱la xca'? Ca da dxedxuaj dxú'adxu naca na ca da zua na lu xichaj lázrdaudxu.
MAT 12:35 Benne' xrlátaje dxenné̱' da naca xrlátaje lawe' da zua da xrlátaje lu xichaj lázrdawe̱', na' benne' we̱n da cale̱la dxenné̱' da cale̱la lawe' da zua da cale̱la lu xichaj lázrdawe̱'.
MAT 12:36 Neda' dxapa' le'e, lu zra guchi'a Dios, xúgute̱ bénneache xuludée̱' ca da gulenné̱', tu tu dizra' xala da gulenné̱'.
MAT 12:37 Ca naca dizra' da ba gunníu', Dios guchi'e̱ chiu', na' Le̱' nnáqueze̱' che xedxúaju' xrlátaje, u che webagu' zria.
MAT 12:38 Nadxa bal-la benne' xudau' fariseo, ne benne' dxuluxuzájle̱'e̱ da nadxixruj bea Dios gulé̱'e̱ Jesús: ―Benne' Wese̱de, dxaca lázrentu' le'entu' chiu' gunu' tu xel-la' waca da za xabáa.
MAT 12:39 Na' guzre Jesús benne' ca': ―Bénneache we̱n da cale̱la, benne' zaj naque̱' chupa lazre', dxelenábene̱' neda' guna' tu xel-la' waca da za xabáa. Quebe xelelé'equezne̱' tu xel-la' waca, san tuze ca da dxunna bea na ca da guca chee̱ Jonás, benne' bchálaje̱' waláz chee̱ Dios.
MAT 12:40 Ca guca chee̱ Jonás, guxú'e̱ lu le̱'e̱ bela zren chunna zra chunna xe̱la, cá'anqueze gaca chia' neda', Benne' Gulje̱' Bénneache, waxú'uqueza' lu xe̱dxu ba chunna zra chunna xe̱la.
MAT 12:41 Benne' gulezré̱'e̱ xe̱zre Nínive welexásaqueze̱' lu zra guchi'a Dios gate guchi'e̱ chee̱ bénneache zaj zre̱'e̱ na'a, na' benne' Nínive ca' xululé'ene̱' zaj nabaga zria benne' caní lawe' da belexebí'i lazre' benne' Nínive gate na' bchalaj Jonás dizra' chee̱ Dios lau benne' ca', na' blaudxa ca Jonás na' naca Benne' zue̱' nigá.
MAT 12:42 Cá'anqueze nu'ula na' gunná be'e̱ chalá'a naga dxedá gubizra beu' zaga ca' wexásaqueze̱' lu zra guchi'a Dios gate guchi'e̱ chee̱ bénneache zaj zre̱'e̱ na'a, na' nu'ula na' gulé'ene̱' zaj nabaga zria benne' caní lawe' da bezé̱'e̱ naga naca zítu'te̱ chee̱ xe̱zr la xu nigá chee̱ xenne̱' dizra' sina da bchalaj Salomón, na' blaudxa ca Salomón na' naca Benne' zue̱' nigá.
MAT 12:43 Na' gunná Jesús: ―Gate tu be' xriwe̱' dxedxuaj na tu benne', na' dxedá na lataj naga nabizre, dxexilaj na naga xezí' lazre' na, na' che quebe xezrele na, na' dxenná na lu xichaj lázrdau na:
MAT 12:44 “Webi'a xexá'a lizra' naga bedxúaja'.” Ca xezrín na, le'e na benne' na', naque̱' ca tu xu'u da naxíajlbe̱ lu'ule na, ne nalúa na, ne nagá'ana chawe na.
MAT 12:45 Nadxa cheaj na cheajxezrí na xegazre be' xriwe̱' da zaj naca na xríwe̱dxa ca le̱ na, na' xúgute̱ na dxelú'u na lu bénnea', na' naca chee̱ benne' na' da calé̱ladxa ca guca chee̱' nedxu. Cá'anqueze gaca chee̱ bénneache we̱n da cale̱la caní.
MAT 12:46 Jesús ne zue̱' dxuchálajle̱ne̱' benne' caní gate belezrín xrne̱'e̱ ne benne' biche̱' ca' ga na'. Gulezré̱'e̱ chalé'ajla, ne dxelaca lazre̱' xuluchálajle̱ne̱' Jesús.
MAT 12:47 Nadxa tu benne' guzre̱' Jesús: ―Xrna'u, ne bi bichu' ca' zaj zre̱'e̱ chalé'ajla. Dxelaca lazre̱' xuluchálajle̱ne̱' Lue'.
MAT 12:48 Jesús guzre̱' benne' nigá: ―¿Núnbeale nuzra na' xrna'a, ne bi bícha'dau' ca'?
MAT 12:49 Nadxa ble'e Jesús benne' ca' dxusé̱dene̱', dxenné̱': ―Benne' caní zaj naque̱' xrna'a, ne bi bícha'dau' ca'.
MAT 12:50 Caní naca na lawe' da nútete̱ze benne' dxune̱' ca da dxaca lazre' Xra' zue̱' xabáa, benne' nigá naque̱' benne' bicha', ne benne' zana', ne xrna'a.
MAT 13:1 Lu zra na' bdxuaj Jesús xu'u, na' xeajdxé'e̱ dxu'a nísadau'.
MAT 13:2 Na' lawe' da belezraga benne' zante̱ naga zua Jesús, guxú'e̱ tu lu da dxedá lawe' nísadau', ne gudxé'e̱ na'. Xúgute̱ benne' ca' belexegá'ane̱' dxu'a nísadau' na'.
MAT 13:3 Nadxa bse̱de Jesús benne' ca' da zante̱ da bchálaje̱', dxenné̱': ―Tu benne' dxaza guzé̱'e̱ zíaje̱' guza.
MAT 13:4 Dxácate̱ dxaze̱', bal-la bínnedu ca' xeajlechaze na dxu'a neza. Na' belelá' bxínnedu ca', guláguba' bínnedu ca'.
MAT 13:5 Bal-la bínnedu ca' xeajlechaze na lu xiaj naga quebe dxé'teca xu. Bínnedu caní chadí gulezría na lawe' da quebe dxé'teca xu.
MAT 13:6 Gate bla' gubizra, na' gulecuade na. Lawe' da quebe dxé'teca xu, na' gulebizre na.
MAT 13:7 Bal-la bínnedu ca' xeajlechaze na naga bezríale̱'e̱ lba xeche', na' lba xeche' ca' belegula na, ne blule na da du ca' naze̱'.
MAT 13:8 Bal-la bínnedu ca' xeajlechaze na lu xu be̱be, na' belúnnale̱'e̱ na. Bal-la xágadu ca' belunna na tu gaxúa tu tu na, na' xebal-la na belunna na ga xun tu tu na, na' xebal-la na belunna na chi dxua tu tu na.
MAT 13:9 Che zua nágale, le xene.
MAT 13:10 Nadxa benne' ca' dxuse̱de Jesús gulebigue̱' naga zue̱' Le̱', ne buluche̱be̱' Le̱': ―¿Bizr chee̱ na' dxuchálajle̱nu' benne' ca' da dxululé'e na?
MAT 13:11 Beche̱be Jesús, dxenné̱': ―Dios dxunne̱' lataj nézele le'e da nagache ca dxenná bea Le̱' xabáa, san benne' caní quebe dxu'e̱ lataj.
MAT 13:12 Benne' nape̱' late', Dios gunézrujdxe̱' le̱', na' gápale̱'e̱, san benne' quebe bi nape̱', Dios wequé̱'e̱ ca da du nape̱'.
MAT 13:13 Chee̱ le̱ na' dxuchálajle̱na' benne' caní da dxululé'e na, lawe' da cate' dxelenné̱'e̱ quebe dxelelé'ene̱'. Cate' dxelenne̱' quebe dxeléajni'ine̱'.
MAT 13:14 Ca naca da dxaca chee̱ benne' caní dxaca na ca gunná Isaías, bénnea' bchálaje̱' waláz chee̱ Dios, gunné̱': Da li wenle. Cate' dxenle quebe dxéajni'ile. Da li wanná'le. Cate' dxenna'le quebe dxelé'ele.
MAT 13:15 Caní naca na lawe' da zaj naca lázrdau zide' benne' caní. Quebe dxelaca lazre̱' xelenne̱'. Dxulugácue̱' xiaj lawe̱' chee̱ quebe xelelé'ene̱'. Quebe dxelenne̱', na' quebe dxeléajni'ine̱'. Quebe dxelexílaje̱' neda' chee̱ xexuna' le̱'.
MAT 13:16 ’Ba neza zrente̱ naca na chee̱le le'e lawe' da dxelé'ele nen xiaj laule, ne dxenle nen nágale.
MAT 13:17 Da li dxapa' le'e, benne' zante̱, benne' ca' buluchálaje̱' waláz chee̱ Dios, ne benne' xrlátaje ca' gulaca lazre̱' xelelé'ene̱' da caní dxelé'ele le'e. Quebe belelé'ene̱' na. Gulaca lazre̱' xelenne̱' da caní dxénnele le'e. Quebe belenne̱' na.
MAT 13:18 Na' gunná Jesús: ―Le xenne ca zéaje̱ da naca chee̱ benne' dxaza nigá.
MAT 13:19 Benne' dxelenne̱' ca naca chee̱ Bénnea' dxenná be'e̱ xabáa, ne quebe dxeléajni'ine̱' zaj naque̱' ca bínnedu ca' xeajlechaze na dxu'a neza. Za da xriwe̱' ne dxugúa na ca naca dizra' da ba gulezí'e̱ lu xichaj lázrdawe̱'.
MAT 13:20 Ca naca chee̱ bínnedu ca' xeajlechaze na lu xiaj, da caní dxululé'e na ca naca chee̱ benne' ca' dxelezi'e̱ dizra' na' du lazre̱'.
MAT 13:21 Ca na' guca chee̱ bínnedu ca', quebe guca xuludé lue na, ne quebe guzí bea na, ca'an dxaca chee̱ benne' caní, gate na' bi da dxelezaque̱', u che nu zeajnáu zi' xuzre̱' le̱' lawe' da zaj nazi'e̱ dizra' nigá, na' dxelexebigue̱'.
MAT 13:22 Bínnedu ca' xeajlechaze na ládujla xeche' dxululé'e na ca naca chee̱ benne' dxelenne̱' dizra' nigá, san dxelebé'le̱'e̱ gunne xue da naca chee̱ xe̱zr la xu nigá, na' ca naca xel-la' gunní'a dxezí xe̱ na benne' ca'. Xúgute̱ da caní dxuluzaga na dizra' nigá, na' quebe dxun na da dxal-la' gun dizra' nigá lu xichaj lázrdawe̱'.
MAT 13:23 Ca naca chee̱ bínnedu ca' da xeajlechaze na lu xu be̱be, da caní dxululé'e na ca naca chee̱ benne' ca' dxelenne̱' dizra' nigá, ne dxeléajni'ine̱' na, na' zaj naque̱' ca bínnedu ca' belúnnale̱'e̱ na. Bal-la benne' zaj naque̱' ca bínnedu ca' belunna na tu gaxúa tu tu na, na' xebal-le̱' zaj naque̱' ca bínnedu ca' belunna na ga xun tu tu na, na' xebal-le̱' zaj naque̱' ca bínnedu ca' belunna na chi dxua tu tu na.
MAT 13:24 Nadxa bchalaj Jesús xetú da dxulé'e na, dxenné̱': ―Ca dxaca ga ni dxenná bea Dios naca na ca da guca gate tu benne' guze̱' binne cháwe'dau' lu xe̱zr la xu chee̱'.
MAT 13:25 Gate dxelase xúgute̱', na' bzrin tu benne' dxezré̱'e̱ le̱', ne xeajaze̱' binne xixre' zrinnaj láwela zrua' xtila, na' bezé̱'e̱.
MAT 13:26 Gate na' bgula xel-la' zrua' xtila, ne bla' dau chee̱ na, cá'anqueze bla' xixre' zrinnaj ca'.
MAT 13:27 Nadxa benne' we̱n zrin ca' xeajlegue̱zre̱' xrane na, dxelé̱'e̱ le̱': “Xran, guzu' binne cháwe'dau' lu xe̱zr la xu chiu'. ¿Gazra guzá xixre' zrinnaj caní?”
MAT 13:28 Gunná xránabe': “Tu benne' dxezré̱'e̱ neda' be̱ne̱' da nigá.” Nadxa benne' we̱n zrin ca' buluche̱be̱' le̱': “¿Dxaca lazru' chéajntu' cheajlé̱pentu' xixre' zrinnaj ca'?”
MAT 13:29 Le̱' guzre̱' we̱n zrin ca': “Quebe gaca na. Gate na' lázrule xixre' zrinnaj ca', walázrute̱le xel-la' zrua' xtila.
MAT 13:30 Xelegúladxa na cháwe'la tu zren ca xecá'adxadxu zrua' xtila. Nadxa nna be'eda' benne' we̱n zrin ca' xelequé̱'e̱ nedxu xixre' zrinnaj ca', na' xuluchéaje̱' xelune̱' tu xrúnujdu weaj chee̱ guzézxedxu na. Nadxa xelelape̱' zrua' xtila na', ne xezrá chawe' na lizra'.”
MAT 13:31 Nadxa bchalaj Jesús xetú da dxulé'e na, dxenné̱': ―Da dxaca chee̱ benne' dxelezí' lu ne̱'e̱ nna be'e Dios le̱' naca na ca da guca gate tu benne' guze̱' binne mostaza lu xe̱zr la xu chee̱'.
MAT 13:32 Da li binne mostaza nigá naca na da bízrujdxa lawe' xúgute̱ binne ca'. Gate ba nagula na naca na tu xaga zrendxa lawe' xúgute̱ xixre' cuan. Dxaca na ca tu xaga zren naga dxelezeque' cheajlezría bxínnedu ca' xrú'uneba' lu zruze na.
MAT 13:33 Nadxa bchalaj Jesús xetú da dxulé'e na, dxenné̱': ―Da dxaca chee̱ benne' dxelezí' lu ne̱'e̱ nna be'e Dios le̱' naca na ca da guca gate tu nu'ula bchixre cua zichaj chee̱ xeta xtila lawe' chunna xaga cua zrua' xtila, na' dute̱ na guxasa na bliche.
MAT 13:34 Xúgute̱ da caní bchálajle̱ Jesús benne' ca', dxuchálaje̱' da dxululé'e na, na' quebe bchálajle̱ne̱' benne' ca' che quebe bchálaje̱' da dxululé'e na.
MAT 13:35 Caní guca ca da gunná benne' bchálaje̱' waláz chee̱ Dios, gunné̱': Guchálaja' ca naca da dxulé'e na da guchálaja'. Gulé'eda' ca naca da nagache gate guzrete̱ xe̱zr la xu.
MAT 13:36 Nadxa Jesús bze̱' benne' ca' dizra', na' guxú'e̱ lu xu'u. Benne' ca' dxuse̱de Jesús gulebigue̱' lau Le̱', na' gulé̱'e̱ Le̱': ―Bzéajni'i netu' da dxulé'e na ca naca chee̱ xixre' zrinnaj da dxenná'queze na ca dxenná' xel-la' zrua' xtila.
MAT 13:37 Nadxa Jesús guzre̱' benne' ca': ―Bénnea' dxaze̱' binne cháwe'dau' nigá naque̱' Benne' Gulje̱' Bénneache.
MAT 13:38 Naga dxaze̱' binne nigá naca na lu xichaj lázrdau bénneache. Binne cháwe'du ca' zaj naca benne' ca' dxenná be'e Dios, na' xixre' zrinnaj ca' zaj naca na benne' ca' zaj naque̱' chee̱ da xriwe̱'.
MAT 13:39 Bénnea' dxezré̱'e̱ xrane xe̱zr la xu na', ne xeajaze̱' xixre' zrinnaj naque̱' da xriwe̱' ná'queze. Zra xelelape̱' naca na zra bze̱be chee̱ xe̱zr la xu nigá, na' benne' ca' xelelape̱' zrua' xtila na' zaj naque̱' gubáz chee̱ xabáa chee̱ Dios.
MAT 13:40 Ca belexequé̱'e̱ xixre' zrinnaj ca', ne buluzré̱'e̱ na lu xi' chee̱ xelezxe na, ca'an gácaqueze lu zra bze̱be na'.
MAT 13:41 Neda', Benne' Gulje̱' Bénneache, sel-la' gubáz chee̱ xabáa chia' ca' chee̱ xulucuase̱' naga nna be'a xúgute̱ benne' ca' dxuluxrínnajte̱' benne' xula, ne benne' ca' dxelune̱' da cale̱la.
MAT 13:42 Nadxa gubáz chee̱ xabáa ca' xuluzré̱'e̱ benne' ca' dxelune̱' da cale̱la lu xi' gabila naga xelebezre̱', ne xeláguxa'ate̱ lazxe̱'.
MAT 13:43 Nadxa benne' ca' dxelune̱' da xrlátaje ca da dxenná be'e Dios xelácaqueze̱' ca gubizra naga dxenná bea Dios, Xra benne' ca'. Che le'e zua nágale, le xene.
MAT 13:44 Na' gunná Jesús: ―Naga dxenná bea Dios naca na ca tu xel-la' gunní'a da nagache na tu lu xe̱zr la xu. Tu benne' bezrélene̱' xel-la' gunní'a nigá, na' bucache̱' na. Ne zúale̱'e̱ xel-la' dxebé zexíaje̱' xeajxé̱tie̱' xúgute̱ da nape̱', na' bezi'e̱ xe̱zr la xu na'.
MAT 13:45 Na' gunná Jesús: ―Naga dxenná bea Dios naca na ca tu da dxexilaj tu benne' we̱te, dxexílaje̱' bga ca' da zaj zaca na.
MAT 13:46 Gate dxezrélene̱' tu da zácale̱'e̱, na' zexíaje̱' zeajxé̱tie̱' xúgute̱ da nape̱', na' si'e̱ bga na'.
MAT 13:47 Na' gunná Jesús: ―Ca naca chee̱ benne' ca' xelexú'e̱ naga dxenná bea Dios, naca na ca tu xixruj bela, da dxuluzale̱' lu nísadau', na' dxelezene̱' zane' cue' bela.
MAT 13:48 Gate dxezrá xixruj na', na' benne' ca' dxelezene̱' bela dxelexequé̱'e̱ na dxu'a nísadau', na' dxelebé'e̱ dxelexebée̱' bela ca'. Bela chawe' ca' dxuluxuzré̱'e̱-ba' lu xcuite, na' bela xala ca' dxeledxú'une̱'-ba'.
MAT 13:49 Ca'an gaca lu zra bze̱be na'. Xeledxúaj gubáz chee̱ xabáa ca', xelexebéaje̱' benne' ca' dxelune̱' da cale̱la ládujla benne' xrlátaje ca'.
MAT 13:50 Xuluzré̱'e̱ benne' ca' dxelune̱' da cale̱la lu xi' gabila, naga xelebezre̱', ne xeláguxa'ate̱ lazxe̱'.
MAT 13:51 Nadxa bche̱be Jesús benne' ca', dxenné̱': ―¿Dxéajni'ile le'e xúgute̱ da caní? Benne' ca' gulenné̱': ―Awe', Xran.
MAT 13:52 Nadxa guzre̱' benne' ca': ―Gate tu benne' dxusé̱dene̱' da nadxixruj bea Dios, ne nazé̱dene̱' ca dxenná bea Dios, naque̱' ca tu benne' xrane xu'u nézene̱' cuéaje̱' da zaj naca na da cube, ne da zaj naca na da gula ládujla da nuzrá chawe̱'.
MAT 13:53 Gate bexuzre bchalaj Jesús da dxulé'e na caní, na' bezé̱'e̱ na'.
MAT 13:54 Bezrine̱' naga naca lazrie̱'. Na' guzú lawe̱' dxusé̱dene̱' benne' ca' zaj zre̱'e̱ lu xudau' chee̱ xe̱zre na', na' belexebanne benne' ca', gulenné̱': ―¿Gazra bse̱de benne' nigá xel-la' sina nigá? ¿Ájazra dxune̱' xel-la' waca caní?
MAT 13:55 Benne' nigá naque̱' zri'ine gubizre xaga, na' naca xrne̱'e̱ María. Naque̱' bi biche Jacobo, ne José, ne Simón, ne Judas.
MAT 13:56 Bi zane̱' zaj zue̱' nigá nen dxi'u. ¿Ájazra na' dxaca dxune̱' da caní?
MAT 13:57 Chee̱ le̱ na' buluzúe̱' Jesús chalá'ala. Jesús guzre̱' benne' ca': ―Xúgute̱ benne' xula dxelape̱' ba lá'ana tu benne' dxuchálaje̱' waláz chee̱ Dios. Benne' lazrie̱', ne xrtia ljwezre̱' quebe dxelúne̱' ca'.
MAT 13:58 Jesús quebe bé̱nteque̱' na' xel-la' waca ca' lawe' da quebe guléajle̱'e̱ chee̱'.
MAT 14:1 Lu zra na' Herodes, benne' dxenná be'e̱ xe̱zre ca' zaj nababa na Galilea, benne̱' ca naca da dxun Jesús.
MAT 14:2 Na' guzre̱' bi we̱n zrin chee̱' ca': ―Benne' nigá naque̱' Juan, bénnea' bchue̱' bénneache nisa. Ba bebane̱' ládujla benne' gate. Chee̱ le̱ na' nape̱' xel-la' waca zren nigá.
MAT 14:3 Caní gunné̱' lawe' da gude̱la Herodes nigá Juan na', ne bchéaje̱' le̱' du xia, ne gulu'e̱ le̱' lizre xia. Be̱ne̱' caní ne̱ chee̱ Herodías, zru'ula Felipe, biche Herodes na'.
MAT 14:4 Caní be̱ne̱' lawe' da guzre Juan le̱': ―Quebe naca chiu' súale̱nu' nu'ula nigá.
MAT 14:5 Herodes guca lazre̱' gutie̱' le̱', san dxezrebe̱' da xelún bénneache ca' lawe' da dxeléquene̱' naca Juan benne' dxuchálaje̱' waláz chee̱ Dios.
MAT 14:6 Gate bzrin zra dxezría iza Herodes, na' belune̱' laní chee̱', na' bxa'a bi nu'ula chee̱ Herodías na', na' bezaca ba lazre' Herodes na' da dxunbe'.
MAT 14:7 Chee̱ le̱ na' Herodes guche̱be lazre̱' lau benne' ca' gunézruje̱' ca da naba bi nú'uladu na'.
MAT 14:8 Lawe' da ba guzre xrnabe' le̱be', na' gunabe': ―Be̱nna nigá xichaj Juan, bénnea' bchue̱' bénneache nisa. Gulú'u na tu lu xé'ena.
MAT 14:9 Nadxa guzúa ste̱be Herodes, bénnea' dxenná be'e̱, san lawe' da ba guche̱be lazre̱', na' benne' zaj zre̱'e̱ dxágule̱ne̱' le̱' belenne̱' ca', chee̱ le̱ na' guzre̱' tu benne' we̱n zrin chee̱' gunézruje̱' na le̱be'.
MAT 14:10 Gunná bé'ene̱' nu benne' guchugue̱' xichaj Juan naga xu'e̱ lizre xia.
MAT 14:11 Nadxa xeajlexrí'e̱ xíchaje̱' tu lu xé'ena, ne bulunézruje̱' na bi nú'uladu na', na' le̱be' bnézrujbe' na xrnabe'.
MAT 14:12 Nadxa belezrín benne' ca' bse̱de Juan, na' belexú'e̱ le̱', ne xeajlecache̱' le̱'. Nadxa xjaque̱' xeajlegue̱zre̱' Jesús.
MAT 14:13 Gate ben Jesús da na', na' bezé̱'e̱ na', bexu'e̱ tu lu da dxedá lawe' nísadau', na' bzrine̱' tu naga quebe nu zra' benne'. Gate belén bénneache, na' gusiá'que̱' ni'e̱, na' belezrine̱' naga zua Jesús.
MAT 14:14 Gate bedxúaj Jesús lu da dxedá lawe' nísadau', na' blé'ene̱' benne' zante̱, ne bexache lazre̱' le̱', na' bexune̱' benne' ca' quebe chawe' zaj zue̱'.
MAT 14:15 Gate ba za xrinne, benne' ca' dxuse̱de Jesús gulebigue̱' lau Le̱', dxelenné̱': ―Lataj nigá quebe bi de̱, ne ba dxedé zra. Bze̱ benne' caní dizra' chee̱ chjaque̱' xé̱zredu ca', ne xelezí'e̱ da xelawe̱'.
MAT 14:16 Jesús guzre̱' le̱': ―Quebe dxun na ba xen chjaque̱'. Le gunezruj le'e da xelawe̱'.
MAT 14:17 Benne' ca' gulé̱'e̱ Le̱': ―Gázxuze xeta xtila de̱ chee̱dxu nigá, ne chúpaze bela.
MAT 14:18 Jesús guzre̱' benne' ca': ―Le gunna na nigá.
MAT 14:19 Nadxa gunná bé'ene̱' gulebé' benne' zan ca' lawe' zrie̱. Guqué̱'e̱ xeta xtila, ne bela ca', na' gunné̱'e̱ xabaala, ne guzre̱' Dios: “Xcalenu'.” Nadxa bzúzruje̱' xeta xtila, ne bnézruje̱' na benne' ca' dxusé̱dene̱', na' benne' ca' gulísie̱' na láwela benne' zan ca'.
MAT 14:20 Xúgute̱' gulawe̱', ne gulélajene̱'. Ca gudé na' bulusuzré̱'e̱ chazrinnu ga' da bízrujdu ca' zaj nagá'ana.
MAT 14:21 Benne' gulawe̱' na zaj naque̱' chi xun gaxúa benne' biu, ne quebe nu blaba nu'ula, ne bidu ca'.
MAT 14:22 Nadxa gunná be'e Jesús benne' ca' dxusé̱dene̱' xelu'e̱ lu da dxedá lawe' nísadau' chee̱ xelague̱' nísadau' nédxudxa ca Le̱' chee̱ xelexezrine̱' xéchala'a nísadau' na', dxácate̱ Le̱' dxuzé̱ benne' zan ca' dizra'.
MAT 14:23 Ca gudé bze̱' dizra' benne' zan ca', na' guluéne̱' tu lu xi'a xeajchálajle̱ne̱' Dios naga zue̱' tuze̱'. Gate guxrinne zua Jesús tuze̱' na'.
MAT 14:24 Dxácate̱ na' ba zeaj da na' dxedá lawe' nísadau' gachaj láwe'te̱ nísadau' na'. Nadxa guxasa xeajxruza chee̱ nísadau' na', da dxutá na da dxedá lawe' nísadau' na', lawe' da dxácale̱'e̱ be', ne quebe dxue na lataj sa na.
MAT 14:25 Gate gudé dxe̱la gubiga Jesús naga zaj zre̱'e̱, zéaje̱' lawe' nisa.
MAT 14:26 Gate belelé'e benne' ca' dxedá Jesús lawe' nisa, na' belezrebe̱', na' lu xel-la' dxelezrebe gulebézrexe̱'e̱, gulenné̱': ―Da dxedá dxe̱la na'.
MAT 14:27 Jesús guzre̱' benne' ca': ―Le gun dipa lázrele. Neda' nigá. Quebe zrébele.
MAT 14:28 Na' gunná Pedro, dxe̱'e̱ Jesús: ―Xran, che Lue' na', gunná be'e xida' lawe' nisa naga zu' na'te.
MAT 14:29 Jesús guzre̱' le̱': ―Gudá xca'. Nadxa Pedro bdxúaje̱' lu da dxedá lawe' nísadau', ne guzú lawe̱' dxezé̱'e̱ lawe' nisa chee̱ zrine̱' naga zua Jesús.
MAT 14:30 Gate dxeque be'ene̱' ca dxun be' na', na' bzrebe̱', ne guzú lau dxazie̱' lu nísadau' na'. Ca'an guca gudxezre xe̱'e̱, gunné̱': ―Xran, becá'a neda'.
MAT 14:31 Nadxa becá'a Jesús ne̱'e̱, ne guzre̱' le̱': ―Látega dxeajlí lazru' neda'. ¿Bizr chee̱ na' be̱n chupa lazru'?
MAT 14:32 Gate belexegüene̱' lu da dxedá lawe' nísadau', na' bebé' zri be' na'.
MAT 14:33 Nadxa benne' ca' zaj zre̱'e̱ lu da dxedá lawe' nísadau' na' buluzú zribe̱' lau Jesús, dxelé̱'e̱ Le̱': ―Da li nacu' Zri'ine Dios.
MAT 14:34 Guledée̱' xecha la'a nísadau', na' belezrine̱' lu xe̱zr la xu chee̱ benne' Genesaret ca'.
MAT 14:35 Gate benne' ca' zaj zre̱'e̱ xe̱zre na' belexexúnbe'e̱ Jesús, na' buludée̱' dizra' xezícala xé̱zredu ca', na' guleché̱'e̱ xúgute̱ benne' we̱' naga zua Jesús.
MAT 14:36 Gulata' xuene̱' Jesús gu'e̱ lataj xulutá benne' ca' zra lane̱' naze. Xúgute̱ benne' buluté̱' zra lane̱' belexexaque̱'.
MAT 15:1 Nadxa benne' fariseo ca', ne benne' dxuluxuzájle̱'e̱ da bdxixruj be'e Moisés, benne' ca' beledxuaje̱' lu xe̱zre Jerusalén, gulebigue̱' lau Jesús, na' buluche̱be̱' Le̱', dxelenné̱':
MAT 15:2 ―¿Bizr chee̱ na' benne' ca' dxusé̱denu' quebe dxuluzúe̱' dizra' ca naca da gulún xra xrtaudxu? Quebe dxelíbequeze ne̱'e̱ ca naca da zéajle̱ntu' gate dxelawe̱'.
MAT 15:3 Jesús bche̱be̱' benne' ca', gunné̱': ―¿Bizr chee̱ na' le'e quebe dxuzuale dizra' da dxenná be'e Dios? Dxunle ca naca da zéajle̱le.
MAT 15:4 Dios gunné̱': “Gudapa ba lá'ana xra xrna'u.” Cá'anqueze gunné̱': “Benne' nne̱' schanni' chee̱ xra xrne̱'e̱, le gute bénnea'.”
MAT 15:5 Le'e dxennale waca xe̱ tu benne' xra xrne̱'e̱: “Quebe séqueda' bi gunna' le'e lawe' da ba guche̱be lazra' gunézruja' Dios xúgute̱ da de̱ chia'.”
MAT 15:6 Dxennale che tu benne' dxune̱' caní québedxa dxun na ba xen gácale̱ne̱' xra xrne̱'e̱. Caní dxunle le'e, dxuzuale chala'ala da bdxixruj be'e Dios, chee̱ gunle ca naca da zéajle̱le.
MAT 15:7 Le'e, láweze dxunle da xrlátaje. Da li naca da gunná Isaías, bénnea' bchálaje̱' waláz chee̱ Dios, ca naca chee̱le le'e, gunné̱':
MAT 15:8 Benne' caní dxelape̱' neda' ba lá'ana nen dxú'aze̱'. Quebe dxelape̱' neda' ba lá'ana dute̱ lázrdawe̱'.
MAT 15:9 Dácheze naca dxelúe lá'ane̱' neda'. Da gulenná be'ene̱' bénneache naca na da ca' dxulusé̱dene̱'.
MAT 15:10 Nadxa Jesús gunné̱' benne' ca', dxenné̱': ―Le xene, ne le chéajni'i.
MAT 15:11 Da dxu'u na dxu'a bénneache quegá le̱ na guxrinnaj na bénneache. Da dxedxuaj na dxu'a bénneache naca na da dxuxrinnaj na bénneache.
MAT 15:12 Nadxa benne' ca' dxuse̱de Jesús gulebigue̱' lau Le̱'. Dxelé̱'e̱ Le̱': ―¿Nézenu' gulaca tula benne' xudau' fariseo ca' gate belenne̱' da gunnáu'?
MAT 15:13 Jesús guzre̱' benne' ca': ―Bítete̱ze xágadau' da quebe guza Xra' zue̱' xabáa, welé̱peda'.
MAT 15:14 Le gusán benne' ca'. La chul-la zaj naque̱', ne dxulusi'e̱ neza le sa' ljwezre̱' la chul-la ca'. Che tu la chul-la che̱'e̱ le sa' ljwezre̱' la chul-la, dxúpate̱' xelebixre̱' tu lu xe̱dxu.
MAT 15:15 Nadxa Pedro guzre̱' Jesús: ―Bzéajni'i netu' ca naca chee̱ da dxulé'e nigá.
MAT 15:16 Gunná Jesús: ―¿Cá'anqueze le'e quebe dxéajni'ile?
MAT 15:17 ¿Quebe nézele xúgute̱ da dxu'u na dxú'adxu zeaj na le̱'e̱dxu, na' te na' xedxuaj na?
MAT 15:18 Da dxedxuaj na dxú'adxu naca na da za' lu xichaj lázrdaudxu. Da nigá naca na da dxuxrinnaj na bénneache.
MAT 15:19 Lu xichaj lázrdau bénneache dxeledxuaj da dxezá lazre̱' da cale̱la, ca naca xel-la' we̱te benne', ne ca naca xel-la' zuale̱ zru'ula benne' xula, ne ca naca da sban da dxelún bénneache, ne ca naca xel-la' gubán, ne xel-la' we̱n lazre', ne xel-la' wetupa dizra' bizruj.
MAT 15:20 Da caní dxuluxrinnaj na bénneache. Che tu benne' quebe dxexibe ne̱'e̱ ca da zéajle̱le gate dxawe̱' xeta, da nigá quebe dxuxrinnaj na le̱'.
MAT 15:21 Nadxa bedxuaj Jesús na', zexíaje̱' chala'a naga zaj nababa xe̱zre Tiro, ne xe̱zre Sidón.
MAT 15:22 Tu nu'ula Canaán zue̱' na' ze̱'e̱ dxebezre xe̱'e̱ cúzrela Jesús, dxenné̱': ―Xran, Zri'ine David, bexache lazre' neda'. Xu'ube' be' xriwe̱' zri'ina' nu'ula, ne cátitega dxezácabe'.
MAT 15:23 Quebe bi beche̱be Jesús. Nadxa belezrín benne' ca' dxusé̱dene̱', ne gulata' xuene̱' Le̱', gulé̱'e̱ Le̱': ―Bsel-la nu'ula nigá lawe' da ze̱'e̱ dxebezre xe̱'e̱ cúzrudxu.
MAT 15:24 Nadxa gunná Jesús: ―Dios gusel-le̱' neda' gácale̱za' benne' Israel ca' zaj naque̱' ca zríla'du ca' zaj naníteba'.
MAT 15:25 Gubiga nu'ula na' naga zua Jesús, ne bzu zribe̱' lau Le̱', ne dxe̱'e̱ Le̱': ―Xran, gúcale̱ neda'.
MAT 15:26 Jesús guzre̱' le̱': ―Quebe naca xrlátaje cá'adxu da dxelagu zrí'inedxu, chee̱ gunézrujdxu na bécudu ca'.
MAT 15:27 Nadxa nu'ula na' guzre̱' Jesús: ―Awe', Xran, san bécudu ca' dxeláguquezeba' da bízrujdu ca' dxelexruj zran naga dxelagu xránaba'.
MAT 15:28 Nadxa Jesús guzre̱' le̱': ―Nú'uladu, da zrente̱ naca xel-la' dxeajlí lazre' chiu'. Gaca ca dxaca lazru'. Lu zra ná'queze bexaca zrí'ine̱' nú'uladu na'.
MAT 15:29 Jesús guzé̱'e̱ na', gudée̱' dxu'a nísadau' chee̱ Galilea. Guluéne̱' tu lu xi'a, ne gudxé'e̱ na'.
MAT 15:30 Benne' zan belezrine̱' naga zua Jesús, zaj naché̱'e̱ benne' zrinnaj ca', ne benne' la chul-la ca', ne benne' quebe dxaca xelenné̱', ne benne' zan zaj nadxugu ni'a na', ne zánedxa benne' we̱'. Buluzré̱'e̱ benne' ca' lau Jesús, na' Le̱' bexune̱' le̱'.
MAT 15:31 Ca'an guca belexebane benne' ca' gate belelé'ene̱' dxelenné̱' benne' ca' quebe guca xelenné̱' nédxula, ne belexexaca benne' ca' gulaque̱' benne' ni'a na' dxugu, ne dxeledá benne' ca' gulaque̱' benne' zrinnaj, ne dxelelé'e benne' ca' gulaque̱' benne' la chul-la. Gulezú lawe̱' dxelúe lá'ane̱' Dios chee̱ benne' Israel ca'.
MAT 15:32 Nadxa Jesús gunné̱' benne' ca' dxusé̱dene̱'. Dxe̱'e̱ le̱': ―Dxexache lazra' chee̱ benne' caní lawe' da ba zeaj chunna zra zrále̱ne̱' neda' nigá, ne quebe bi de̱ da xelawe̱'. Quebe dxaca lazra' xesel-la' le̱' chee̱ cheajxaque̱' lizre̱' quebe ne xelawe̱' chee̱ quebe xelate ni'a ne̱'e̱ la neza.
MAT 15:33 Nadxa benne' ca' dxuse̱de Jesús gulé̱'e̱ Le̱': ―¿Ájazra guntu' zrélentu' da xelagu cátite̱ benne' zan caní? Lataj nigá quebe nu chilá' benne' zua lizre̱' nigá.
MAT 15:34 Jesús bche̱be̱' benne' ca', dxenné̱': ―¿Bal-la xeta xtila nápale? Benne' ca' belexeche̱be̱': ―Gazre na, ne xetú chupa béladau'.
MAT 15:35 Nadxa Jesús gunná bé'ene̱' benne' zan ca' xelebé'e̱ lu xu.
MAT 15:36 Guqué̱'e̱ da gazre xeta xtila, ne béladu ca', na' guzre̱' Dios: “Xcalenu'.” Nadxa bzúzruje̱' na, ne bnézruje̱' na benne' ca' dxusé̱dene̱', na' benne' ca' gulísie̱' na chee̱ benne' zan ca'.
MAT 15:37 Xúgute̱' gulawe̱', ne belélajte̱ne̱'. Gudé na' bulusuzrate̱' gazre ga' da bízrujdu ca' zaj nagá'ana.
MAT 15:38 Benne' gulagu zaj naque̱' tapa cue' chi gaxúa benne' biu, ne quebe nu blaba nu'ula, ne bidu ca'.
MAT 15:39 Gudé na' Jesús bze̱' benne' zan ca' dizra', na' bexu'e̱ lu da dxedá lawe' nísadau' zexíaje̱' naga nababa xe̱zre Magdala.
MAT 16:1 Benne' xudau' fariseo ca', ne benne' xudau' saduceo ca' xjaque̱' naga zua Jesús chee̱ xuluxunéguene̱' Le̱'. Chee̱ le̱ na' gulenabe̱' Jesús gune̱' tu xel-la' waca zrente̱ da za xabáa.
MAT 16:2 Jesús beche̱be̱' benne' ca': ―Xelate' zua gubizra dxennale le'e: “Gun chawe' wxre lawe' da da' beuj xrna zran xabáa.”
MAT 16:3 Che zílala dxennale: “Quebe chawe' gun na'a zra lawe' da dá'le̱'e̱ beuj xrna zran xabáa.” Le'e dxulé'e cuínale da quebe nácale. Dxácaqueze dxennale ca naca da gun zran xabáa. Quebe dxaca xuzájla'ale ca sa'yeaj da dxaca na'a zra.
MAT 16:4 Benne' we̱n da cale̱la caní, benne' zaj nabéaj xíchaje̱' Dios, dxelenabe̱' guna' tu xel-la' waca zrente̱. Quebe xelelé'ene̱' xetú xel-la' waca. Welelé'ene̱' tuze da gaca na ca da guca chee̱ Jonás. Nadxa bulucá'ana Jesús benne' ca', zjá'aque̱'.
MAT 16:5 Gate benne' ca' dxuse̱de Jesús guladée̱' xechalá'a nísadau', na' gulal-la lazre̱' xelu'e̱ chizre̱'.
MAT 16:6 Jesús guzre̱' le̱': ―Le nna'xque. Le guxúe cuínale ca naca chee̱ cua zichaj chee̱ xeta xtila chee̱ benne' fariseo ca', ne chee̱ benne' saduceo ca'.
MAT 16:7 Benne' ca' dxuse̱de Jesús gulezú lawe̱' dxelé̱ ljwezre̱': ―Caní dxenné̱' lawe' da quebe núadxu xeta xtila.
MAT 16:8 Jesús dxeque be'ene̱', na' guzre̱' le̱': ―¿Bizr chee̱ na' dxennale naca na lawe' da quebe núale xeta xtila? Láteze dxéajle̱le chia'.
MAT 16:9 ¿Quebe ne chéajni'ile, ne quebe dxeajsá lázrele chee̱ da gazxu' xeta xtila da bgawa' gazxu' cue' chi gaxúa benne' biu, ne bal-la ga' becá'ale?
MAT 16:10 ¿Quebe dxeajsá lázrele chee̱ da gazre xeta xtila da bgawa' tapa cue' chi gaxúa benne' biu ca', ne bal-la ga' becá'ale?
MAT 16:11 ¿Ájazra na' quebe dxeque be'ele quegá bchálaja' chee̱ xeta xtila gate gunnía' le guxúe cuínale ca naca chee̱ cua zichaj chee̱ xeta xtila chee̱ benne' fariseo ca', ne chee̱ benne' saduceo ca'?
MAT 16:12 Nadxa guleque bé'ene̱' quegá guzre Jesús le̱' xuluxúe cuine̱' chee̱ da naca cua zichaj chee̱ xeta xtila, san ca naca da dxuluse̱de benne' fariseo ca', ne benne' saduceo ca'.
MAT 16:13 Gate bzrin Jesús naga nababa xe̱zre Cesarea da be̱n Filipo, na' bche̱be̱' benne' ca' dxusé̱dene̱': ―¿Nuzra na' dxelenná bénneache naca' neda', Benne' Gulje̱' Bénneache?
MAT 16:14 Na' benne' ca' gulenné̱': ―Bal-la benne' dxelenné̱' nacu' Juan, bénnea' bchue̱' bénneache nisa. Xebal-le̱' dxelenné̱' nacu' Elías, na' xebal-le̱' dxelennáqueze̱' nacu' Jeremías, u xetú benne' bchálaje̱' waláz chee̱ Dios.
MAT 16:15 Nadxa guzre Jesús benne' ca': ―¿Gazra le'e? ¿Nuzra na' dxennale naca'?
MAT 16:16 Gunná Simón Pedro: ―Lue' nacu' Cristo, Zri'ine Dios ban.
MAT 16:17 Beche̱be Jesús: ―Ba neza zren naca na chiu' Simón, zri'ine Jonás. Netú benne' quebe ne gulé'ene̱' lue' da nigá, san Xra' zua xabáa, Le̱' blé'ene̱' lue'.
MAT 16:18 Neda' dxapa' lue', nacu' Pedro, da zéaje̱ na tu xiaj, na' lawe' xiaj xre nigá guzúa' benne' xeleajlí lazre̱' neda', na' xel-la' dxenná bea chee̱ da xriwe̱' quebe seque na gucu'uj na benne' ca'.
MAT 16:19 Neda' gunna' lue' da naca na zren xia chee̱ xel-la' dxenná bea chee̱ xabáa, na' da guchéaju' lue' lu xe̱zr la xu nigá gaca na da ba nadxéajqueze na xabáa, na' da xese̱zru' lue' lu xe̱zr la xu nigá gaca na da ba naxé̱zrequeze na xabáa.
MAT 16:20 Nadxa Jesús gunná bé'ene̱' benne' ca' dxusé̱dene̱' chee̱ quebe nu xelé̱'e̱ naca Le̱' Cristo.
MAT 16:21 Lu zra ná'queze guzú lau Jesús dxuzéajni'ine̱' benne' ca' dxusé̱dene̱' dxal-la' xexíaje̱' xe̱zre Jerusalén, na' benne' gula ca', ne benne' xíchaje̱ ca' chee̱ bxruze ca', ne benne' dxuluxuzájle̱'e̱ da nadxixruj bea Dios wulusaca zi'e̱ Le̱'. Na' guzre̱' benne' ca' dxusé̱dene̱' welute benne' Jerusalén ca' Le̱'. Nadxa gate gaca chunna zra xebane̱'.
MAT 16:22 Nadxa Pedro guléaje̱' Jesús chalá'ala, ne guzú lawe̱' dxedil-le̱' Le̱', dxenné̱': ―Dios quebe gu'e̱ lataj, Xran. Cabata' gaca chiu' da caní.
MAT 16:23 Jesús bexéchaje̱', na' guzre̱' Pedro: ―Gucuasa cuita' neda', lue', da xriwe̱', lawe' da nacu' tu da dxusunegue na neda'. Quebe dxulaba lazru' ca dxun Dios. Ca dxun bénneache dxulaba lazru'.
MAT 16:24 Nadxa Jesús guzre̱' benne' ca' dxusé̱dene̱': ―Che nu benne' dxaca lazre̱' gaque̱' neda' tuze, dxal-la' guzúe̱' chalá'ala da naca chee̱', ne guzúa cuine̱' chee̱ gatie̱', na' nadxa gaca xídale̱ne̱' neda'.
MAT 16:25 Bénnea' dxaca lazre̱' gapa chi'e̱ xel-la' nabán chee̱' gunitie̱' na. Bénnea' gunitie̱' xel-la' nabán chee̱' lawe' da dxune̱' zrin chia', benne' nigá zrué'ene̱' xel-la' nabán du lazre'.
MAT 16:26 ¿Bízraqueze ba neza naca na chee̱ tu benne' che gata' chee̱' xúgute̱ xel-la' gunní'a da de̱ lu xe̱zr la xu nigá, na' cuía xi'e̱ lau Dios? Quebe bi gaca quizruj tu benne' chee̱ la bénne'du xu'e lau Dios.
MAT 16:27 Neda', Benne' Gulje̱' Bénneache wida' xecha lasa nen xel-la' szren chee̱ Xra', ne nen gubáz chee̱ xabáa ca'. Nadxa xuzría chee̱ tu tu benne' ca naca da zaj nun tu tue̱'.
MAT 16:28 Da li dxapa' le'e, bal-la benne' zaj zre̱'e̱ nigá quebe xelatie̱' cadxa xelelé'ene̱' neda', Benne' Gulje̱' Bénneache, xida' xedajnná be'a.
MAT 17:1 Ca gudé guca xrupa zra, na' Jesús guché̱'e̱ Pedro, ne Jacobo, ne Juan, bi biche Jacobo, na' bi cá'aze xjácale̱ne̱' Le̱' tu lau xi'a sibe.
MAT 17:2 Na' Dios bche̱'e̱ ca dxenná' lau Jesús láwela benne' ca'. Lawe̱' guca tite na ca gubizra, na' zra lane̱' guca na da chiche ca xel-la' naxaní'.
MAT 17:3 Na' benne' caní belelé'ene̱' Moisés, ne Elías, benne' gulezrá' gate nate, dxuluchálajle̱ne̱' Jesús.
MAT 17:4 Nadxa Pedro guzre̱' Jesús: ―Xran, cháwe'le̱'e̱ zúadxu nigá. Che dxaca lazru', guntu' chunna xu'u lágadau', tu chiu', ne tu chee̱ Moisés, ne tu chee̱ Elías.
MAT 17:5 Dxácate̱ dxenné̱ Pedro, bla' tu beuj da dxaca tite na, da gucu na benne' ca', na' lu beuj na' belenne̱' chi'i Dios, dxenné̱': ―Benne' nigá naque̱' Zri'ina' nazrí'ite̱ lazra', ne chee̱ Le̱' dxezaca ba lazra'. Chee̱ Le̱' le xene.
MAT 17:6 Gate belenne̱' da nigá, na' gulate̱' sudxú'ala lu xu. Dxelezrébele̱'e̱.
MAT 17:7 Nadxa Jesús gubigue̱' naga zaj zre̱'e̱, na' bte̱' benne' ca', ne guzre̱' le̱': ―Le chasa. Quebe zrébele.
MAT 17:8 Gate na' belenné̱'e̱, québedxa nu belelé'ene̱'. Tuze Jesús zue̱'.
MAT 17:9 Nadxa gate dxelexexétaje̱' lu xi'a na', Jesús gunná bé'ene̱' benne' ca', dxenné̱': ―Quebe nu guchálajle̱le ca da ble'ele ca zrindxa zra neda', Benne' Gulje̱' Bénneache, xebana' ládujla benne' gate.
MAT 17:10 Nadxa benne' ca' dxuse̱de Jesús buluche̱be̱' Le̱': ―¿Bizr chee̱ na' dxelenná benne' ca' dxuluxuzájle̱'e̱ da nadxixruj bea Dios dxun na ba xen xelá' Elías nédxudxa ca xelá' Cristo?
MAT 17:11 Jesús guzre̱' benne' ca': ―Da li xelá' Elías nédxudxa, ne gucá'ana chawe̱' ca naca da dxal-la' gaca.
MAT 17:12 Neda' dxapa' le'e, ba bla' Elías, na' benne' ca' quebe belexúnbe'e̱ le̱'. Bulusaque̱' le̱' cáte̱ze da gulaca lazre̱'. Cá'anqueze xulusaque̱' neda', Benne' Gulje̱' Bénneache.
MAT 17:13 Nadxa benne' ca' dxuse̱de Jesús guléque be'ene̱' dxuchalaj Jesús ca naca chee̱ Juan, bénnea' bchue̱' bénneache nisa.
MAT 17:14 Gate belezrine̱' naga zaj zra' benne' zante̱, na' tu benne' gubigue̱' naga zua Jesús, ne bzu zribe̱' lau Le̱', dxenné̱':
MAT 17:15 ―Xran, bexache lazre' zri'ina', dxe'ebe' chuna', ne da zrente̱ da dxezácabe'. Zánete̱ lasa ba xeajcházebe' lu xi', ne lu nisa.
MAT 17:16 Ba bedajgu'a-be' lau benne' caní dxusé̱denu', na' quebe guca xelexune̱'-be'.
MAT 17:17 Jesús beche̱be̱': ―Le'e, benne' we̱n chupa lazre', ne benne' lázrdau zide'. ¿Bátate̱ zúale̱na' le'e? ¿Bátate̱ naca' zren lazre' nen le'e? Le cheajxrí' bi cuide' na' nigá.
MAT 17:18 Nadxa Jesús gudil-le̱' be' xriwe̱' na', na' bebéaje̱' na lu be̱l-la' dxen chee̱ bi cuide' na', na' zra ná'queze bexácate̱be'.
MAT 17:19 Gudé na' benne' ca' dxuse̱de Jesús gulenné̱' Le̱' chalá'ala, na' buluche̱be̱' Le̱': ―¿Bizr chee̱ na' quebe guca netu' xebéajntu' be' xriwe̱' na'?
MAT 17:20 Jesús guzre̱' benne' ca': ―Lawe' da naca láteze ca dxéajle̱le chia'. Da li dxapa' le'e, che la nápale xel-la' dxeajlí lazre', lácala naca na láteze ca naca tu bínnedau' chee̱ mostaza, waca xe̱le xi'a nigá: “Gucuasa nigá chéaju' xetú lataj”, na' xi'a na' wacuasa na. Quebe bi de̱ da quebe gaca gunle che nápale xel-la' dxeajlí lazre'.
MAT 17:21 Ca naca be' xriwe̱' caní, dxun na ba xen guchálajle̱le Dios, ne gunle gubasa chee̱ séquele xebéajle be' xriwe̱' caní.
MAT 17:22 Dxácate̱ na' dxeledé̱' naga nababa Galilea, Jesús guzre̱' benne' ca': ―Neda', Benne' Gulje̱' Bénneache wadéa' lu na' bénneache.
MAT 17:23 Xelútie̱' neda', na' gate gaca chunna zra, xebana'. Gate belenne̱' dizra' nigá, na' bewi'ine lázrele̱'e̱ne̱'.
MAT 17:24 Gate Jesús ne benne' ca' dxusé̱dene̱' belezrine̱' lu xe̱zre Capernaum, na' benne' dxuluchízruje̱' chee̱ xudau' belezrine̱' lau Pedro, na' buluche̱be̱' le̱': ―¿Quebe dxizruj benne' dxusé̱dene̱' le'e chee̱ xudau'?
MAT 17:25 Pedro beche̱be̱': ―Awe'. Dxízruje̱' na. Nadxa, gate na' guxú'u Pedro lu xu'u, guzre Jesús le̱': ―¿Aja dxéquenu', Simón? ¿Nuzra na' dxuluchizruj lazruj chee̱ xe̱zr la xu benne' ca' dxelenná bea lu xe̱zr la xu nigá? ¿Dxuluchízruje̱' benne' walázr chee̱', u benne' zitu' ca'?
MAT 17:26 Beche̱be Pedro: ―Benne' zitu' dxuluchízruje̱'. Jesús guzre̱' le̱': ―Na' benne' walázr chee̱' quebe xelízruje̱'.
MAT 17:27 Na'a, chee̱ quebe nu guchá'adxu, guxíaj lu nísadau' na', ne guchize da na' dxeláleu' bela lu nisa na', na' bebéaj bela nedxu que̱lu'-ba'. Dxú'aba' na' xezrelnu' tu dumí da quízruju' chiu' lue', ne chia' neda'. Bia na, ne xeajtizruj na lau benne' ca'.
MAT 18:1 Tu lasa gulebiga benne' ca' dxuse̱de Jesús naga zue̱', na' buluche̱be̱' Le̱': ―¿Nuzra benne' nácadxe̱' blau naga dxenná bea Dios?
MAT 18:2 Nadxa Jesús gunné̱' tu bidau', na' bze̱'-be' lau benne' ca' dxusé̱dene̱'.
MAT 18:3 Dxenné̱': ―Da li dxapa' le'e, che quebe xexácale ca bidu nigá, québequeze chu'ule naga dxenná bea Dios xabáa.
MAT 18:4 Ca'an naca, benne' nácadxe̱' blau naga dxenná bea Dios xabáa, naca benne' gaque̱' dxexruj lazre', ne xexaque̱' ca bidu nigá.
MAT 18:5 Benne' gape̱' ba lá'ana tu bidau' caní lu La' neda', néda'queza' gape̱' ba lá'ana.
MAT 18:6 Na' gunná Jesús: ―Nútete̱ze benne' gune̱' gun tu bidu caní dul-la, bi dxeajlí lázrebe' neda', cháwela guchéajladxu lbe̱'e̱ tu xiaj zi'i da dxutu, na' cheajchú'unadxu le̱' situj lu nísadau'.
MAT 18:7 Edxugúa bénneache lawe' da dé̱le̱'e̱ da dxun na xelún bénneache dul-la. Tu gátazqueze da caní, na' edxugúa bénneache dxelune̱' xelún bénneache dul-la.
MAT 18:8 Chee̱ le̱ na', che na'u u ni'u dxun na gunu' dul-la, guchugu na, ne gudxú'una na zitu'. Cháwedxa xexú'u lu xel-la' nabán li lazre' nadxugu ni'u u na'u, quézcala xelegú'e̱ lue' lataj ba xa', zua dxúpate̱ na'u, ne dxúpate̱ ni'u.
MAT 18:9 Che xiaj lau' dxun na gunu' dul-la, guleaj na, ne gudxú'una na zitu'. Wenla chu'u lu xel-la' nabán li lazre' nen tuze xiaj lau', quézcala xelegú'e̱ lue' lu xi' gabila, zua dxúpate̱ xiaj lau'.
MAT 18:10 Na' gunná Jesús: ―Gutu guzú' chalá'ala netú bidu caní. Neda' dxapa' le'e, zaj zra' gubáz chee̱ xabáa chee̱ bidu caní lau Xra' xabáa.
MAT 18:11 Neda', Benne' Gulje̱' Bénneache, bla'a bedajselá' benne' zaj nanitie̱'.
MAT 18:12 ’¿Ájazra dxéquele le'e? Che tu benne' nape̱' tu gaxúa zrila', na' nite tuba', ¿quebe gucá'ane̱' be̱ tápalalaj che̱nnu na' le̱'e̱ xixre', na' cheajdilje̱' zrila' na' naníteba'?
MAT 18:13 Gate ba bezrelne̱'-ba', wabéle̱'e̱dxene̱' chee̱ be̱ tu na' quézcala chee̱ be̱ tápalalaj che̱nnu ca' quebe guleníteba'.
MAT 18:14 Cá'anqueze Xrale le'e, zue̱' xabáa, quebe dxaca lazre̱' nite netú bidu caní.
MAT 18:15 Na' gunná Jesús: ―Che bi bichu' dxunbe' chiu' da cale̱la, bchálajle̱ tuze le̱be', chee̱ xúnbeabe' da cale̱la da be̱nbe'. Che xenbe' da dxu'u-be', na' ba bexacu' tuze bi bichu'.
MAT 18:16 Che quebe xenbe' da dxu'u-be', guché̱' tu chupa benne' chee̱ gaca chupa u chunna benne' xelexeche̱be̱' ca naca da dxu'u-be'.
MAT 18:17 Che quebe xenbe' chee̱ benne' ca', guzre ca naca benne' dxelezraga lu xudau'. Che quebe xenbe' chee̱ benne' ca', le guzúa-be' ca tu benne' quebe dxéajle̱'e̱ chee̱ Dios, u ca tu benne' dxuchízruje̱' waláz chee̱ benne' zitu' ca'.
MAT 18:18 ’Da li dxapa' le'e, da guchéajle lu xe̱zr la xu nigá, naca na da ba nadxéajqueze na xabáa, ne da xesé̱zrele lu xe̱zr la xu nigá naca na da ba nazé̱zrequeze na xabáa.
MAT 18:19 ’Cá'anqueze dxapa' le'e, che chúpale le'e gácale tuze ca da nábale Dios, na' Xra' zua xabáa gunne̱' na.
MAT 18:20 Naga zaj zra' chúpabe', u chúnnabe' zaj nazrágabe' lu La' neda', na' zúaqueza' neda' laduj le̱be'.
MAT 18:21 Nadxa Pedro bche̱be̱' Jesús: ―Xran, che bi bícha'dau' gunbe' chia' da cale̱la, ¿bal-la lasa dxun na ba xen gunite lawa' chee̱be'? ¿Gazre lasa?
MAT 18:22 Beche̱be Jesús: ―Dxapa' lue', quegá gazre lasa, san ga xun chi da gazre lasa.
MAT 18:23 Na' gunná Jesús: ―Da gaca naga dxenná bea Dios xabáa naca na ca da guca gate tu benne' dxenná bea guca lazre̱' gucá'ana chawe̱' da dxelal-la benne' we̱n zrin chee̱'.
MAT 18:24 Gate guzú lawe̱' dxucá'ana chawe̱' na, na' guleché̱'e̱ lau le̱' tu benne' dxebague̱' chee̱' zane' cue' chi gaxúa dumí.
MAT 18:25 Lawe' da quebe de̱ chee̱ benne' we̱n zrin na' da quízruje̱' xrane̱', na' gunná be'e xrane̱' ta'u benne' we̱n zrin na', ne zru'ule̱', ne zrí'ine̱' ca', ne ca nácaqueze da nape̱', chee̱ gazruj da na' dxebague̱'.
MAT 18:26 Nadxa bzu zribe benne' we̱n zrin na' lau xrane̱', na' guta' xuene̱' le̱', dxenné̱': “Xran, be̱n zren lazre' neda', na' quízrujqueza' ca naca na.”
MAT 18:27 Na' xrane̱' bexache lazre̱' le̱', ne bnite lawe̱' da na' dxebague̱' chee̱', ne bsane̱' le̱'.
MAT 18:28 Gate benne' we̱n zrin na' bedxúaje̱', na' bezrague̱' xetú benne' we̱n zrin ljwezre̱', benne' dxebague̱' chee̱' látedau'. Na' gude̱le̱' lba bénnea', ne guzú lawe̱' dxusézxuje̱' chi'i bénnea', dxe̱'e̱ le̱': “Gudizruj neda' da dxal-lu' chia'.”
MAT 18:29 Nadxa benne' we̱n zrin ljwezre̱' na' bzu zribe̱' lau le̱', ne guta' xuene̱' le̱', dxenné̱': “Be̱n zren lazre' neda', na' quízrujqueza' ca naca na.”
MAT 18:30 Bénnea' quebe guca lazre̱', na' guxíaje̱' xeajlu'e̱ we̱n zrin ljwezre̱' na' lizre xia dxácate̱ quízruje̱' da na' dxebague̱'.
MAT 18:31 Gate benne' we̱n zrin ca' xezícala guleque bé'ene̱' da nigá, na' belewí'ine lázrele̱'e̱ne̱', na' xjaque̱' xeajlegue̱zre̱' xrane̱' xúgute̱ da ba guca.
MAT 18:32 Nadxa xrane̱' na' gunná bé'ene̱' xeajlenné̱' benne' we̱n zrin na', na' guzre̱' le̱': “Bi we̱n zrin cale̱la. Neda' bnite lawa' chiu' ca naca da na' dxebagu' chia' lawe' da guta' xúenu' neda'.
MAT 18:33 Cá'anqueze lue' dxal-la' xexache lazru' le sa' ljwezru' na' ca be̱na' neda' bexache lazra' lue'.”
MAT 18:34 Xrane̱' na' bzrá'ale̱'e̱ bénnea', na' bdee̱' le̱' xel-la' zi' dxácate̱ na' quízruje̱' ca naca da na' dxal-le̱' chee̱'.
MAT 18:35 Nadxa gunná Jesús: ―Cá'anqueze gun Xra' zua xabáa chee̱le le'e che quebe gunite laule dute̱ lázrdaule chee̱ le sa' ljwézrele.
MAT 19:1 Ca gudé bchalaj Jesús da caní, na' bezé̱'e̱ xe̱zre ca' zaj nababa Galilea, na' bezrine̱' chalá'ala naga nababa Judea, da zua chalá'ala xe̱gu Jordán naga dxalaj gubizra.
MAT 19:2 Benne' zan zjácale̱ne̱' Le̱', na' bexune̱' benne' zante̱, benne' we̱'.
MAT 19:3 Nadxa bal-la benne' xudau' fariseo gulebigue̱' naga zua Jesús chee̱ xelebéaje̱' Le̱' dizra' chee̱ gaca xelagu zrie̱' Jesús, na' buluche̱be̱' Le̱': ―¿Waca nu benne' gusane̱' zru'ule̱' ne̱ chee̱ bítete̱ze da gune̱'?
MAT 19:4 Beche̱be Jesús: ―¿Quebe ne gulábale le'e lu xiche lá'azxa da na' dxenná na: “Bennea' be̱ne̱' benne' ca' nédxudaute̱ be̱ne̱' le̱' benne' biu, ne nu'ula”?
MAT 19:5 Cá'anqueze gunné̱': “Chee̱ le̱ na' benne' biu gusane̱' xra xrne̱'e̱ chee̱ gaque̱' tuze nen zru'ule̱', na' dxupe̱' xelaque̱' ca tuze benne'.”
MAT 19:6 Caní naca na, québedxa zaj naque̱' chupe̱', san tuze benne' zaj naque̱'. Chee̱ le̱ na' quebe dxal-la' xelá'a bénneache da na' ba nuchaga Dios.
MAT 19:7 Nadxa buluche̱be̱' Jesús: ―¿Bizr chee̱ na' gunná be'e Moisés nu benne' gunézruje̱' zru'ule̱' tu xiche da dxulé'e na belexelé̱'e̱, na' gusane̱' le̱'?
MAT 19:8 Jesús guzre̱' benne' ca': ―Caní be̱ne̱' lawe' da gulaca lazrdau zizraj xra xrtaule. Moisés be̱nne̱' lataj gusanle zrú'ulale, san nédxudaute̱ quebe guca na ca'.
MAT 19:9 Neda' dxapa' le'e, che tu benne' gusane̱' zru'ule̱', ne quebe dxedále̱ne̱' benne' biu xula, na' che xezúale̱ne̱' nu'ula xula, benne' nigá gune̱' dul-la súale̱ne̱' nu'ula quebe naque̱' zru'ule̱', na' che nu benne' biu xequé̱'e̱ tu nu'ula nusán benne' chee̱', cá'anqueze gun dul-la bénnea' súale̱ne̱' nu'ula quebe naque̱' zru'ule̱'.
MAT 19:10 Nadxa benne' ca' dxuse̱de Jesús gulé̱'e̱ Le̱': ―Che ca' dxaca chee̱ benne' zúale̱ne̱' nu'ula, quebe dxal-la' súale̱ntu' nu'ula.
MAT 19:11 Jesús guzre̱' benne' ca': ―Quegá xúgute̱ benne' gaca xelezí'e̱ dizra' nigá, san tuze benne' ca' ba nun Dios chee̱' xelezí'e̱ na.
MAT 19:12 Zaj zra' benne' quebe dxelezúale̱ne̱' nu'ula lawe' da quebe zaj naca xánnie̱' benne' biu. Na' zaj zra' benne' québedxa zaj naca xánnie̱' benne' biu lawe' da zaj nun bénneache naca caní. Na' zaj zra' benne' dxelexegá'ane̱' cá'aze, quebe nu dxelezúale̱ne̱' chee̱ gaca xelune̱' zrin chee̱ Dios, Bénnea' dxenná be'e̱ xabáa. Benne' gaca si'e̱ dizra' nigá dxal-la' si'e̱ na.
MAT 19:13 Nadxa belezrín benne' lau Jesús zaj naché̱'e̱ bal-la bidau' chee̱ guzé̱ ne̱'e̱ bidu ca', ne nabe̱' Dios gaca chawe' chee̱be', san benne' ca' dxuse̱de Jesús gulezú lawe̱' dxeledil-le̱' benne' ca' zaj naché̱'e̱ bidu ca'.
MAT 19:14 Jesús guzre̱' le̱': ―Le güe bidu ca' lataj xelela'be' naga zua'. Quebe guzrúnnale-be', lawe' da benne' zaj naque̱' ca bidu caní xelu'e̱ naga dxenná bea Dios xabáa.
MAT 19:15 Nadxa bze̱ Jesús ne̱'e̱ lawe' bidu ca', na' gudé na' bezé̱'e̱ lataj na'.
MAT 19:16 Tu benne' cuide' guxíaje̱' naga zua Jesús, na' bche̱be̱' Le̱': ―Benne' Wese̱de chawe'. ¿Bi da xrlátaje dxal-la' guna' chee̱ gapa' xel-la' nabán zeajlí canna?
MAT 19:17 Jesús guzre̱' le̱': ―¿Bizr chee̱ na' dxu'u neda', benne' wese̱de chawe'? Quebe nu chilá' benne' naque̱' chawe', san tuze Dios. Che dxaca lazru' zrué'enu' xel-la' nabán li lazre', bzua dizra' ca bdxixruj be'e Dios.
MAT 19:18 Benne' cuide' na' gunné̱': ―¿Bila na'? Jesús guzre̱' le̱': ―Quebe gutiu' benne'. Quebe súale̱nu' zru'ula benne' xula. Quebe cuanu'. Quebe nneu' da we̱n lazre' chee̱ benne'.
MAT 19:19 Gudapa ba lá'ana xra xrna'u. Bzri'i le sa' ljwezru' ca nazrí'i cuinu'.
MAT 19:20 Benne' cuide' na' gunné̱': ―Xúgute̱ da caní dxuna' nácatea' bídau'te̱. ¿Bízradxa quebe ne guna'?
MAT 19:21 Na' guzre Jesús le̱': ―Che dxaca lazru' gacu' benne' li lazre', bexíaj, xeaje̱te ca naca da napu', ne bnezruj na benne' xache' ca'. Nadxa gapu' xel-la' gunní'a xabáa. Na' gudátega nen neda'.
MAT 19:22 Gate benne' cuide' na' benne̱' da nigá, bezé̱'e̱ dxexíaje lazre̱' lawe' da nápale̱'e̱ xel-la' gunní'a.
MAT 19:23 Nadxa gunná Jesús, dxe̱'e̱ benne' ca' dxusé̱dene̱': ―Da li dxapa' le'e, sté̱bele̱'e̱ naca chu'u tu benne' gunní'a naga dxenná bea Dios xabáa.
MAT 19:24 Da xula dxapa' le'e, chadidxa gaca te tu bea', be̱ dxebía bénneache lu negue' tu xeche' zriche, quézcala chu'u tu benne' gunní'a naga dxenná bea Dios.
MAT 19:25 Gate belenne̱' benne' ca' dxuse̱de Jesús da nigá, na' belexebánele̱'e̱ne̱', na' buluche̱be ljwezre̱': ―¿Nuzra la xca'?
MAT 19:26 Jesús guné̱'e̱ benne' ca', ne guzre̱' le̱': ―Da nigá quebe gaca xelún bénneache, san Dios waca gune̱' ca naca.
MAT 19:27 Nadxa gunná Pedro: ―Xran, netu' ba bcá'anantu' ca naca da nápantu', ne zéajle̱ntu' Lue'. ¿Bizra gápantu' xca'?
MAT 19:28 Beche̱be Jesús: ―Da li dxapa' le'e, ca lu zra na' gate na' xúgute̱ xelexaca na cube, gate neda', Benne' Gulje̱' Bénneache, cue'a lataj chawe' chia' naga nna be'a, le'e na' ba gudále̱le neda' cué'quezle lu chazrinnu lataj naga nna beale, chee̱ guchí'ale chee̱ chazrinnu cue' benne' Israel, benne' judío ca'.
MAT 19:29 Xúgute̱ benne' ca' ba bulucá'ane̱' lizre̱', u benne' biche̱', u nu'ula zane̱', u xre̱', u xrne̱'e̱, u zru'ule̱', u zrí'ine̱', u xe̱zr la xu chee̱', chee̱ xelune̱' zrin chia', xelezí'queze̱' tu gaxúala na, ne xelezí'queze̱' xel-la' nabán zeajlí canna.
MAT 19:30 Benne' zante̱ zaj naca blau na'a xelaque̱' benne' bze̱be, na' benne' zante̱ zaj naca benne' bze̱be na'a xelaque̱' benne' blau.
MAT 20:1 Na' gunná Jesús: ―Da gaca naga dxenná bea Dios xabáa naca na ca da guca gate tu xrane zánete̱ cue' xe̱zr la xu guzé̱'e̱ lizre̱' che zílala, zéaje̱' zeajtílaje̱' benne' we̱n zrin ca' chee̱ cheajlechibe̱' uva chee̱'.
MAT 20:2 Bca'ana cháwele̱ne̱' benne' we̱n zrin ca' quízruje̱' tu dumí lazruj chee̱ tu zra, na' gusel-le̱' benne' ca' zeajlegue̱ne̱' zrin lu xe̱zr la xu chee̱'.
MAT 20:3 Ca gudé na' guzé̱'e̱ lizre̱' ca dxedá na, na' blé'ene̱' benne' zaj zre̱'e̱ lawe' xi'a zaj nalátajze̱'.
MAT 20:4 Na' guzre̱' benne' ca': “Cá'anqueze le'e, le chjaca we̱n zrin lu xe̱zr la xu chia', na' gunna' le'e da naca chawe'.” Na' benne' ca' xjaque̱'.
MAT 20:5 Xrane na' guzé̱'e̱ da xula wa gubizra, ne cá'anqueze dxexedá' chunna, ne tuze ca be̱ne̱'.
MAT 20:6 Xetú du dxedá' gazxu' guxíaje̱' lawe' xi'a, na' blé'ene̱' zaj zra' na' benne' zaj nalátajzqueze̱', ne guzre̱' le̱': “¿Bizr chee̱ na' zrale le'e nigá bedú zra quebe bi zrin dxunle?”
MAT 20:7 ’Gulenné̱': “Quebe nu ne xe̱ netu' guntu' zrin chee̱'.” ’Na' guzre̱' benne' ca': “Cá'anqueze le'e, le cheajé̱n zrin lu lina chia', na' gunna' le'e da naca chawe'.”
MAT 20:8 Gate gul-la' chizrela, xrane na' guzre̱' benne' xu'u lu ne̱'e̱ zrin na': “Gunné̱ benne' we̱n zrin ca', ne gudízruje̱', su lau' quízruju' benne' ca' belelá' bzé̱bedxa, na' bzé̱bete̱ quízruju' benne' ca' belelá' nédxute̱.”
MAT 20:9 Nadxa belezrín benne' ca' belú'e̱ lu zrin na' gate dxexedadxa gazxu', na' tu tu benne' ca' belezi'e̱ lazruj chee̱' du naxá' lazruj tu zra we̱n zrin.
MAT 20:10 Gudé na' gate belezrín benne' ca' gulu'e̱ nédxute̱ lu zrin na', guléquene̱' xelezí'e̱ da zrendxa, san cá'anqueze gulezí' tu tu benne' ca' lazruj tu zra we̱n zrin weaj.
MAT 20:11 ’Gate gulezí'e̱ na, na' gulezú lawe̱' dxelawe̱' zria lau xrane zrin na',
MAT 20:12 dxelenné̱': “Benne' caní belelá' bzé̱bedxa, tu chí'idau'ze ga belune̱' zrin, na' gudízrujquezu' benne' caní ca gudízruju' netu', na' netu' bedú zra be̱ntu' zrin, ne ca naca da la chee̱ zra nigá bchaga launtu'.”
MAT 20:13 ’Beche̱be̱ xrane na', dxe̱'e̱ tu benne' ca': “Ljwézra'dau', quebe bi dxuna' chiu' da quebe naca na chawe'. ¿Quebe bca'ana cháwele̱na' lue' quízruja' lue' lazruj tu zra we̱n zrin?
MAT 20:14 Guzí' lazruj chiu', ne bexíaj. Neda' dxaca lazra' gunézruja' chee̱ benne' ca' belú'e̱ bzé̱bedxa ca da gudízrujqueza' lue'.
MAT 20:15 ¿Quebe gaca guna' ca da dxaca lazra' nen dumí chia'? ¿Dxacu' xa lazre' lawe' da naca' neda' benne' xrlátaje?”
MAT 20:16 Na' gunná Jesús: ―Ca'an naca, benne' ca' zaj naca benne' bze̱be xelaque̱' benne' blau, na' benne' blau ca' xelaque̱' benne' bze̱be lawe' da ba gunnía' benne' zan, san bábaze benne' ca' xelaque̱' blau.
MAT 20:17 Gate xu'u Jesús neza, zexíaje̱' Jerusalén, guléaje̱' chee̱ze benne' chazrinnu ca' dxusé̱dene̱', ne guzre̱' le̱':
MAT 20:18 ―Dxelé'ele le'e ba zexíajdxu Jerusalén naga neda', Benne' Gulje̱' Bénneache, xuludé benne' ca' neda' lau benne' xíchaje̱ ca' chee̱ bxruze ca', ne lau benne' ca' dxuluxuzájle̱'e̱ da bdxixruj be'e Dios, na' xelechugue̱' chia' gatia'.
MAT 20:19 Xuludée̱' neda' lu na' benne' zitu' ca' chee̱ xelún le̱' chia', na' xelu'e̱ neda', ne xuludé̱'e̱ neda' xaga béguaj, san zra guxunne zra xebana'.
MAT 20:20 Nadxa gubiga xrna Jacobo, ne Juan lau Jesús, bi ca' zaj naca be̱' zri'ine Zebedeo, naché̱'e̱ bi ca', na' bzu zribe̱' lau Jesús, dxenabe̱' culuén.
MAT 20:21 Jesús bche̱be̱' nu'ula na': ―¿Bi na' dxenabu'? Nu'ula na' guzre̱' Jesús: ―Gate zrin zra nna be'u, na' gudxixruj be'e cue' tu zri'ina' caní chalá'a xabe̱la chiu', ne xetube' xéglala.
MAT 20:22 Jesús beche̱be̱', guzre̱' bi ca': ―Quebe nézele le'e bi na' dxenábale. ¿Waca xí'ajle le'e ca da xí'aja' neda', da na' naca na ca xel-la' zi' da tea' neda', ne waca si'le da naca na ca xel-la' dxedxúa nisa ca da si'a neda' gate chu'a lu xel-la' gute? Na' gulenabe': ―Wácantu'.
MAT 20:23 Nadxa Jesús guzre̱' bi ca': ―Da li xí'ajle ca da xí'aja' neda', ne si'le da naca ca xel-la' dxedxúa nisa na' da si'a neda', san da cue'le chalá'a xabe̱la chia', ne chalá'a xéglala chia' quebe naca na chia' gunna' na le'e. Xra' gunézruje̱' na chee̱ bi ca' ca da ba nucueze̱'.
MAT 20:24 Gate xechí benne' ca' dxuse̱de Jesús belenne̱' ca', na' belezré̱'e̱ dxupa bi chee̱ nu'ula na'.
MAT 20:25 Jesús gunné̱' benne' ca', ne guzre̱' le̱': ―Ba nézele le'e ca dxelún benne' xíchaje̱ chee̱ xe̱zr la xu ca', dxelenná bé'ene̱' benne' ca', na' benne' nácadxe̱' blau ládujla benne' ca' dxelenná be'e̱, dxuchínene̱' xel-la' dxenná bea chee̱'.
MAT 20:26 Le'e quebe dxal-la' gunle ca'. Benne' dxaca lazre̱' gaque̱' blau ládujla le'e dxal-la' gune̱' zrin chee̱ xezícadxale le'e,
MAT 20:27 na' bénnea' dxaca lazre̱' gaque̱' xíchaje̱ chee̱le, dxal-la' gaque̱' we̱n zrin chee̱ xúgute̱le le'e.
MAT 20:28 Dxal-la' gune̱' ca be̱na' neda', Benne' Gulje̱' Bénneache, quebe bida' chee̱ nu gun zrin chia' neda', san bla'a chee̱ guna' zrin chee̱ bénneache, ne chee̱ guzúa' xel-la' nabán chia' ca da quízruja' chee̱ guselá' benne' zante̱.
MAT 20:29 Gate dxelexedxúaje̱' xe̱zre Jericó, na' benne' zante̱ zjácale̱ne̱' Jesús.
MAT 20:30 Naga dxeledée̱' zaj dxe' chupa benne' la chul-la dxu'a neza, na' gate belenne̱' dxedé Jesús na' gulebezre xe̱'e̱, dxelenné̱': ―Xran, Zri'ine David, bexache lazre' netu'.
MAT 20:31 Benne' zan ca' guledil-le̱' dxúpate̱' na' chee̱ xelezúe̱' zrize, san le̱' gulebezre xe̱'e̱ zízrajdxa, dxelenné̱': ―Xran, Zri'ine David, bexache lazre' netu'.
MAT 20:32 Nadxa Jesús guleze̱', na' gunné̱' benne' la chul-la ca', na' bche̱be̱' le̱': ―¿Bi dxaca lázrele guna' chee̱le?
MAT 20:33 Belexeche̱be benne' ca': ―Xran, dxaca lázrentu' xelé'entu'.
MAT 20:34 Jesús bexache lazre̱' benne' ca', ne bte̱' xiaj lawe̱'. Na' belexelé'ete̱ benne' la chul-la ca', na' xjácale̱ne̱' Jesús.
MAT 21:1 Gate belezrín Jesús, ne benne' ca' dxusé̱dene̱' gagu naga zua xe̱zre Jerusalén, ne ba belezrine̱' xe̱zre Betfagé, da zua na gagu naga zua xi'a naga zaj da' xaga olivo, na' Jesús gusel-le̱' chupa benne' ca' dxusé̱dene̱' chee̱ tu da xelune̱'.
MAT 21:2 Dxe̱'e̱ le̱': ―Le chjaca xé̱zredu na' da zua le nna' nigá. Na' lé'ele tu burro bzrise' da'ba' xaga, na' tu búrrodau' zúale̱ba' le̱ba'. Le se̱zre-ba', ne le che̱'e̱ dxúpate̱ba' nigá.
MAT 21:3 Che nu benne' bi xe̱'e̱ le'e, le xe̱'e̱: “Xránadxu nachinne̱' le̱ba', na' la xesél-la'te̱queze̱'-ba'.”
MAT 21:4 Da nigá guca na chee̱ guxá ca da gunná benne' bchálaje̱' waláz chee̱ Dios, gunné̱':
MAT 21:5 Le xe̱ benne' zaj zra' xe̱zre Sión: “Le nna', Benne' nna bé'ene̱' le'e ze̱'e̱ naga zúale. Dute̱ xel-la' dxexruj lazre' zrie̱' tu burro bzrise'. Zrie̱' tu búrrodau', zri'ine tu be̱ dxua xua.”
MAT 21:6 Nadxa dxupa benne' ca' dxuse̱de Jesús besiá'que̱', ne belune̱' ca da ba gunná be'e Jesús le̱'.
MAT 21:7 Xeajlexrí'e̱ burro bzrise', ne zrí'ineba', na' belezrúe̱' zra lane̱' cúzruba', na' guzría Jesús le̱ba'.
MAT 21:8 Benne' zan ca' gulechílaje̱' zra lane̱' la neza na', na' xebal-le̱' buluchibe̱' zina' da buluzale̱' la neza.
MAT 21:9 Benne' zjaque̱' láwela, ne benne' zá'aque̱' bze̱be gulezú lawe̱' dxelebezre xe̱'e̱, dxelenné̱': ―¡Gaca ba lá'azxa Zri'ine wenná bea David! ¡Ba neza zrente̱ naca na chee̱ bénnea' ze̱'e̱ waláz chee̱ Xránadxu Dios! ¡Gaca ba lá'azxa Dios!
MAT 21:10 Gate guxú'u Jesús xe̱zre Jerusalén, ca naca bénneache zaj zre̱'e̱ na' beledxé'ena zrague̱', na' buluche̱be ljwezre̱': ―¿Nuzra benne' nigá?
MAT 21:11 Bal-la benne' ca' gulenné̱': ―Benne' nigá naque̱' Jesús, benne' dxuchálaje̱' waláz chee̱ Dios, ze̱'e̱ xe̱zre Nazaret da nababa Galilea.
MAT 21:12 Ca gudé na' guxú'u Jesús dxale'aj xudau' chee̱ Dios, na' bebéaje̱' xúgute̱ benne' we̱te, ne benne' dxelá'awe̱' na'. Bdxixre̱' blag ca' chee̱ benne' ca' dxuluché̱'e̱ dumí, ne bdxixre̱' da ca' zaj dxe' benne' ca' dxelútie̱' bgúgudu ca'.
MAT 21:13 Nadxa guzre̱' benne' ca': ―Lu xiche lá'azxa naxúaj da dxenná Dios: “Lizra' nigá naca na xu'u naga xelenaba bénneache lawa' neda'”, san le'e ba nunle na ca tu lizre gubán.
MAT 21:14 Lu dxale'aj xudau' na' gulebiga lau Jesús bal-la benne' la chul-la, ne benne' zrinnaj ca', na' Le̱' bexune̱' benne' ca'.
MAT 21:15 Belezrá' benne' xíchaje̱ ca' chee̱ bxruze ca', ne benne' ca' dxuluxuzájle̱'e̱ da nadxixruj bea Dios, gate na' belenne̱' ca dxelebezre xa'a bidu ca' lu xudau', dxelennabe': “¡Gaca ba lá'azxa zri'ine wenná bea David!”
MAT 21:16 Gulé̱'e̱ Jesús: ―¿Dxennu' ca dxelenná benne' caní? Beche̱be Jesús: ―Dxenda' na. ¿Quebe ne gulábale le'e lu xiche lá'azxa naga naxúaj na chee̱ da dxaca nigá? Dxenná na caní: Ba be̱nu' xelúl-la bidu ca', ne bidu dxe'ene ca'. Da dxelúe lá'anabe' Dios naca na da li.
MAT 21:17 Nadxa bca'ana Jesús benne' ca'. Bezé̱'e̱ xe̱zre na', na' bezrine̱' xe̱zre Betania, naga bejgá'ane̱' xe̱la na'.
MAT 21:18 Che zílala ca zexíaj Jesús xe̱zre na', na' gudune̱'.
MAT 21:19 Zítu'la blé'ene̱' tu xaga higo dxu'a neza, na' gate bzrine̱' naga zua na, quebe bi da zixre chee̱ na blé'ene̱'. Lágaze zria na. Nadxa Jesús guzre̱' xaga higo na': ―Cabata' cuíaquezu' da zixre. Gubízrete̱ xaga higo na'.
MAT 21:20 Ca belelé'e benne' ca' dxuse̱de Jesús da nigá, na' belexebánene̱', ne buluche̱be̱' Jesús: ―¿Ájazra na' chadite̱ gubizre xaga higo nigá?
MAT 21:21 Beche̱be Jesús: ―Da li dxapa' le'e, che nápale xel-la' dxeajlí lazre', ne quebe gun chupa lázrele, quegaze da nigá gaca gunle ca da be̱na' neda' chee̱ xaga higo nigá, san waca xe̱le xi'a nigá: Gucuasa nigá, xeajsúa lu nísadau', na' gaca na.
MAT 21:22 Che dxeajlí lázrele, na' xezi'le bítete̱ze da nábale Dios.
MAT 21:23 Nadxa guxú'u Jesús lu chila xudau', na' dxácate̱ na' dxusé̱dene̱' benne' zaj zre̱'e̱ na', gulebiga naga zua Jesús benne' xíchaje̱ ca' chee̱ bxruze ca', ne benne' gula chee̱ judío ca', na' buluche̱be̱' Le̱': ―¿Bi xel-la' dxenná bea napu' dxunu' da caní? ¿Núzraqueze be̱nna lue' xel-la' dxenná bea nigá?
MAT 21:24 Beche̱be Jesús: ―Cá'anqueze neda' guche̱ba' le'e tu. Che xeché̱bele da nigá, na' neda' xapa' le'e bi xel-la' dxenná bea napa' dxuna' da caní.
MAT 21:25 ¿Nu benne' gusel-le̱' Juan dxuchúe̱' bénneache nisa? ¿Dios, che bénneacheze? Gulezú lawe̱' dxuluchálajle̱ ljwezre̱', dxelenné̱': ―Che nnadxu Dios gusel-le̱' le̱', na' xe̱'e̱ dxi'u: “¿Bizr chee̱ na' quebe guxéajle̱le chee̱'?”
MAT 21:26 Che nnadxu bénneache gusel-le̱' le̱', dxal-la' zrébedxu bi xelún benne' zan ca' chee̱dxu dxi'u, lawe' da dxeleque xúgute̱ bénneache bchalaj Juan na' waláz chee̱ Dios.
MAT 21:27 Chee̱ le̱ na' gulé̱'e̱ Jesús: ―Quebe nézentu'. Nadxa Jesús guzre̱' benne' ca': ―Cá'anqueze neda' quebe xapa' le'e bi xel-la' dxenná bea napa' dxuna' da caní.
MAT 21:28 Na' guzre Jesús benne' ca': ―¿Aja dxéquele le'e chee̱ da nigá? Tu benne' zaj zra' chupa zrí'ine̱' bi biu, na' guzre̱' tube': “Zri'ina', guxíaj xeajé̱n zrin lu lina chee̱ uva chia'.”
MAT 21:29 Zrí'ine̱' na' beché̱bebe': “Quebe dxaca lazra'.” Ca gudé na' bexíaje lázrebe', na' guxíajbe' xeajé̱nquezbe' zrin.
MAT 21:30 Cá'anqueze xrabe' na' guxíaje̱' xeajné̱'e̱ xetube', ne guzre̱'-be', na' bi nigá beché̱bebe': “Waca, xrae. Na'a cha'a.” Quebe guxíajbe'.
MAT 21:31 ¿Núlabe' bi chupa caní be̱nbe' ca da guca lazre' xrabe'? Gulenná benne' ca': ―Bi nedxu. Na' gunná Jesús, dxe̱'e̱ benne' ca': ―Da li dxapa' le'e, benne' wechizruj ca', ne nu'ula dxeledále̱ benne' biu zante̱ xelexú'e̱ naga dxenná bea Dios nédxudxa ca le'e
MAT 21:32 lawe' da bla' Juan, bedajlé'ene̱' le'e da naca xrlátaje, na' le'e quebe guxéajle̱le chee̱'. Benne' wechizruj ca', ne nu'ula ca' dxeledále̱ benne' biu zante̱ guléajle̱'e̱ chee̱'. Le'e, gate ble'ele da nigá, quebe bexíaje lázrele chee̱ chéajle̱le chee̱'.
MAT 21:33 Nadxa gunná Jesús: ―Le xene ca naca da nadxixruj bea nigá. Tu benne' xrane tu xe̱zr la xu guze̱' lba uva ca', ne be̱ne̱' le'aj chee̱ na. Be̱ne̱' tu xe̱dxu naga xelesíe̱' uva ca', ne guchise̱' tu xu'u sibe chee̱ gaca nu guxúe ca naca na. Na' bca'ane̱' na lu na' benne' we̱n zrin ca', ne guzé̱'e̱ zéaje̱' zitu'.
MAT 21:34 Gate bzrin zra xuluchibe̱' uva ca', na' gusel-le̱' tu chupa bi we̱n zrin chee̱' zeajlexezri'be' da dxal-la' xezí' xrane na'.
MAT 21:35 Benne' we̱n zrin ca' gulequé̱'e̱ bi we̱n zrin chee̱' ca'. Belúele̱'e̱ tube', ne belutie̱' xetube', na' xetube' buluzríe̱'-be' xiaj.
MAT 21:36 Nadxa xrane na' gusél-ladxe̱' bi we̱n zrin chee̱' bi zandxa ca nedxu. Benne' we̱n zrin ca' tuz ca bulusaque̱' bi ca'.
MAT 21:37 Naga xeajché'tequeze na gusel-le̱' zrí'inequeze̱' lawe' da dxéquene̱': Welape̱' ba lá'ana zri'ina'.
MAT 21:38 Gate belelé'ene̱' zrí'ine̱', na' benne' we̱n zrin ca' gulé̱ ljwezre̱': “Bi nigá xezí' lu na'be' ca naca da caní. Du gute-be' chee̱ xegá'ana chee̱dxu da caní.”
MAT 21:39 Chee̱ le̱ na' gule̱le̱'-be', ne belexebéaje̱'-be' lu xe̱zr la xu na', na' belutie̱'-be'.
MAT 21:40 Nadxa Jesús bche̱be̱' benne' ca': ―Gate xida xrane xe̱zr la xu na', ¿ájazra gune̱' chee̱ benne' we̱n zrin ca'?
MAT 21:41 Gulé̱'e̱ Le̱': ―Gutie̱' benne' ca' dxelune̱' da cale̱la ne quebe xexache lazre̱' le̱'. Nadxa gucá'anale̱ne̱' xe̱zr la xu na' benne' we̱n zrin xula, benne' xuluxunézruje̱' da dxal-la' xezí' le̱' gate zrin zra chee̱ na.
MAT 21:42 Nadxa Jesús guzre̱' benne' ca': ―¿Quebe ne gulábale le'e xiche lá'azxa? Caní dxenná na: Xiaj na' da buluzúa benne' we̱n xu'u ca' chalá'ala, le̱ na' naca na xiaj blau na'a. Da nigá naca na da be̱n Xránadxu, ne naca na tu da dxexebánedxu.
MAT 21:43 Chee̱ le̱ na' dxapa' le'e, Dios wequé̱'e̱ da naca chee̱le le'e naga dxenná be'e̱, na' gunézruje̱' na benne' xelune̱' da naca chee̱ xel-la' dxenná bea chee̱ Dios.
MAT 21:44 Che tu benne' cheajchazie̱' lawe' xiaj nigá waxúzruje̱', na' che xexruj na lawe' tu benne', na' guzuzruj na le̱'.
MAT 21:45 Gate benne' xíchaje̱ ca' chee̱ bxruze ca', ne benne' xudau' fariseo ca' belenne̱' da bchalaj Jesús, guleque bé'ene̱' chee̱ lé̱queze̱' bchalaj Jesús da caní.
MAT 21:46 Gate gulaca lazre̱' xele̱le̱' Le̱', belezrebe̱' benne' xe̱zre ca' lawe' da dxeléajle̱ benne' ca' naca Jesús benne' dxuchálaje̱' waláz chee̱ Dios.
MAT 22:1 Guzú lau Jesús dxuchálajle̱ne̱' benne' ca' xecha lasa tu da dxulé'e na, dxe̱'e̱ le̱':
MAT 22:2 ―Ca da gaca xabáa naga dxenná bea Dios naca na ca da guca gate tu benne' wenná bea be̱ne̱' tu laní wechaga na' chee̱ bi biu chee̱'.
MAT 22:3 Gusel-le̱' benne' we̱n zrin chee̱' ca' cheajletupe̱' benne' ca'an gunné̱' lizre̱', san benne' ca' quebe gulaca lazre̱' xédajgaque̱'.
MAT 22:4 Nadxa gusél-ladxe̱' benne' we̱n zrin chee̱' ca', benne' xula. Dxe̱'e̱ le̱': “Le xe̱ benne' ca' gunnía', ba nucueza' xel-la' wagu. Ba gunná be'eda' xelútie̱' be̱zre ca', ne be̱ dxelanne, na' ca naca na bache de̱. Dxal-la' xelelé̱'e̱ nigá naga zra' wechaga na'.”
MAT 22:5 Benne' ca' gunné̱' quebe gulaca lazre̱' xédajgaque̱'. Tu benne' ca' guxíaje̱' lu xe̱zr la xu chee̱', ne xetú benne' guxíaje̱' we̱te.
MAT 22:6 Xebal-la benne' ca' gule̱le̱' bi we̱n zrin ca' chee̱ wenná bea na', na' bulucháchale̱ne̱'-be', ne belútete̱'-be'.
MAT 22:7 Nadxa wenná bea na' bzrá'ale̱'e̱, na' gusel-le̱' benne' chee̱' ca', benne' zjaca wedil-la xeajlegué̱tie̱' benne' we̱te benne' ca', ne xeajlezézxe'te̱' lazre' benne' ca'.
MAT 22:8 Nadxa guzre̱' bi we̱n zrin chee̱' ca': “Bal-la bi de̱ ba de̱ chee̱ wechaga na', na' benne' ca' gunnía' quebe zaj naca chee̱' xelelé̱'e̱.
MAT 22:9 Le chjaca neza zri'a ca', ne le nne̱ xúgute̱ benne' lé'ele, chee̱ xelelé̱'e̱ laní chee̱ wechaga na'.”
MAT 22:10 Benne' we̱n zrin ca' xjaque̱' la neza ca', na' xeajletupe̱' xúgute̱ bénneache, benne' belelé'ene̱' zaj naque̱' benne' cale̱la, ne benne' xrlátaje. Ca'an guca guzrate̱ xu'u na' bénneache.
MAT 22:11 Nadxa wenná bea na' guxú'e̱ xeajné̱'e̱ benne' ca' gunné̱', na' blé'ene̱' tu benne' dxe'e̱ na', quebe nazi'e̱ zra lane̱' chee̱ laní chee̱ wechaga na'.
MAT 22:12 Guzre̱' le̱': “Lue', benne', ¿ájazra guca guxú'u nigá, ne quebe nazi'u zra lanu' chee̱ laní wechaga na'?” Bénnea' gudxé'e̱ zrize.
MAT 22:13 Nadxa wenná bea na' guzre̱' bi zaj zúabe' ga na', “Le guchéaj ni'a ne̱'e̱, ne le guzale̱' chalé'ajla naga naca chul-la, naga cuezre̱', ne xáguxa'ate̱ lazxe̱'.”
MAT 22:14 Benne' zante̱ gunnía', na' bábaze̱' zaj naca chee̱' xelu'e̱ nigá.
MAT 22:15 Nadxa benne' fariseo ca' besiá'que̱', ne belune̱' tuze dizra' xelebéaje̱' Jesús dizra' chee̱ xelezéquene̱' xelawe̱' zría chee̱'.
MAT 22:16 Nadxa gulesel-le̱' bal-la benne' ca' zaj naque̱' fariseo ca' tuze, ne bal-la benne' ca' zaj de̱'e̱ Herodes, chee̱ zeajlegue̱zre̱' Jesús: ―Benne' wese̱de, nézentu' dxenníu' da li, ne dxusé̱denu' da li da zaj naca chee̱ Dios, ne quebe dxezrebu' bi xelenná bénneache, ne quebe dxenná'u ca da zaj napa bénneache.
MAT 22:17 Gunná xque. ¿Aja dxéquenu' lue'? ¿Dxun na ba xen quízrujdxu da dxuluchizruj benne' ca' nasel-la César, benne' zitu', che cabí?
MAT 22:18 Jesús ba nézene̱' ca da dxelaca lazre̱' xelune̱' chee̱', na' guzre̱' benne' ca': ―Le'e, láweze dxunle da xrlátaje. ¿Bizr chee̱ na' dxuzúale da guzría xi na neda'?
MAT 22:19 Le gulé'e neda' dumí na' da dxízrujle chee̱ wechizruj. Nadxa bulunézruje̱' Le̱' tu dumí chee̱ xe̱zre Roma.
MAT 22:20 Gate blé'ene̱' na, na' Jesús bche̱be̱' benne' ca': ―¿Nuzra lau ni, ne le̱' da naxúaj na nigá?
MAT 22:21 Belexeche̱be̱': ―Chee̱ César na'. Na' guzre Jesús benne' ca': ―Le gunezruj chee̱ César da naca chee̱ César, ne le gunezruj chee̱ Dios da naca chee̱'.
MAT 22:22 Gate belenne̱' da nigá, na' belexebánene̱', ne besiá'que̱' naga zua Jesús.
MAT 22:23 Zra ná'queze belezrín bal-la benne' saduceo ca' naga zua Jesús. Benne' saduceo ca' dxelenné̱' quebe xelexebán benne' gate. Gulé̱'e̱ Jesús:
MAT 22:24 ―Benne' wese̱de, Moisés gunné̱' che tu benne' nuchaga ne̱'e̱ gatie̱', ne quebe nu bidu chee̱' chilá', na' bi biche̱' dxal-la' guchaga na'abe' nen nu'ula gute benne' biu chee̱' na' chee̱ sua tu bi chee̱ benne' ba gutie̱'.
MAT 22:25 Naga zúantu' gulezrá' gazre benne' gulácabe' zri'ine tuze benne'. Bi nedxu bchaga na'abe', na' gútebe'. Bi gudxupe' bchaga na'abe' nen nu'ula na' gute benne' biu chee̱' lawe' da quebe nu zri'ine bi nedxu na' gúlajbe'.
MAT 22:26 Cá'anqueze gúcaqueze na chee̱ bi gudxupe', na' gudé na' chee̱ bi guxunne', na' cá'anqueze guca chee̱ xúgute̱ bi gazre ca'.
MAT 22:27 Ca gudé na', na' gute nu'ula na'.
MAT 22:28 Gate xelexebán benne' gate, ¿nula bi gazre caní gácabe' benne' chee̱ nu'ula na' lawe' da tu tu bi gazre ca' bchaga na'abe' nen nu'ula na'?
MAT 22:29 Jesús beche̱be̱': ―Le'e dxeque zréajele lawe' da quebe núnbeale da naxúaj na lu xiche lá'azxa, ne ca naca xel-la' waca chee̱ Dios.
MAT 22:30 Gate zrin zra xelexebán benne' gate, québedxa xuluchaga na' bénneache, ne québedxa xelútie̱' bi nu'ula chee̱ xuluchaga na'abe'. Xelaque̱' ca zaj naca gubáz chee̱ xabáa chee̱ Dios.
MAT 22:31 Ca naca na che dxal-la' xelexebán benne' gate, ¿quebe ne gulábale le'e ca gunná Dios? Gunné̱':
MAT 22:32 “Neda' naca' Dios chee̱ Abraham, ne Dios chee̱ Isaac, ne Dios chee̱ Jacob.” Dios quebe naque̱' Dios chee̱ benne' gate, san naque̱' Dios chee̱ benne' ban, benne' ca' ba gulatie̱' lu xe̱zr la xu nigá.
MAT 22:33 Gate belenne̱' da nigá, na' belexebane benne' ca' ca naca da dxuse̱de Jesús.
MAT 22:34 Gate benne' fariseo ca' guleque bé'ene̱' ba bzua zri Jesús benne' saduceo ca', na' belezrague̱'.
MAT 22:35 Tu benne' ca', benne' naque̱' benne' dxuxuzájle̱'e̱ da nadxixruj bea na, guca lazre̱' guxúe̱' ájala nne̱ Jesús. Bche̱be̱' Le̱':
MAT 22:36 ―Benne' wese̱de, ¿bizrla da gunná be'e Dios naca blau?
MAT 22:37 Beché̱be Jesús: ―Dxal-la' zri'inu' Xranu' Dios dute̱ xichaj lázrda'u, ne dute̱ bénne'du xu'u, ne dute̱ xel-la' dxéajni'i chiu'.
MAT 22:38 Da nigá naca da nadxixruj bea da blaudxa, ne da dxundxa na ba xen.
MAT 22:39 Da nadxixruj bea da gudxupe' nácaqueze na ca', da dxenná na: Bzri'i le sa' ljwezru' ca nazrí'i cuinu'.
MAT 22:40 Che tu benne' dxune̱' ca zaj naca chupa da nadxixruj bea caní, dxune̱' ca naca xúgute̱ da nadxixruj bea da bzuaj Moisés, ne ca naca xúgute̱ da buluse̱de benne' ca' buluchálaje̱' waláz chee̱ Dios.
MAT 22:41 Dxácate̱ ne zaj nazraga benne' fariseo ca' na',
MAT 22:42 Jesús bche̱be̱' le̱': ―¿Ájala dxéquele le'e chee̱ Cristo? ¿Nuzra zri'ine naque̱'? Benne' ca' gulé̱'e̱ Le̱': ―Zri'ine David na'.
MAT 22:43 Nadxa guzre Jesús benne' ca': ―¿Ájazra na' David gate bchálaje̱' chee̱ Cristo dxe̱'e̱ Le̱': Xran? Gate gunná David da nigá bchálaje̱' da ble'e Be' Lá'azxa le̱'. Caní naca da na' gunná David:
MAT 22:44 Xrana' Dios guzre̱' Xrana': “Gudxé'e chalá'a xabe̱la chia' cadxa guzúa' zran ni'u benne' ca' quebe chawe' dxelelé'ene̱' Lue'.”
MAT 22:45 ¿Ájazra naca na naca Cristo zri'ine David, che David ná'queze dxe̱'e̱ Le̱': “Xrana'”?
MAT 22:46 Quebe nu benne' guca xeché̱bequeze̱' chee̱', na' ze lau zra na' netú québedxa nu bexazre bi guché̱bedxa Le̱'.
MAT 23:1 Nadxa Jesús guzre̱' benne' ca' zaj zre̱'e̱ na', ne benne' ca' dxusé̱dene̱',
MAT 23:2 dxenné̱': ―Benne' ca' dxuluxuzájle̱'e̱ da nadxixruj bea Moisés, ne benne' xudau' fariseo ca' zaj nape̱' xel-la' dxenná bea xuluxuzájle̱'e̱ da nadxixruj bea Moisés.
MAT 23:3 Chee̱ le̱ na' le guzúa dizra' chee̱ benne' caní, ne le gun xúgute̱ da xelenné̱'. Quebe gunle ca da dxelún benne' ca', lawe' da dxelenné̱' da ca' dxal-la' gunle, na' quebe dxelúnqueze̱' na.
MAT 23:4 Dxelune̱' xua zí'ile̱'e̱ da quebe dxelezeque xelezúe bénneache, ne dxelenná bé'ene̱' bénneache chee̱ xelu'e̱ na. Benne' ca' ne quebe dxuluzúe̱' na netú zrube ne̱'e̱ chee̱ da dxuluzúe benne' xubla.
MAT 23:5 Xúgute̱ da dxelún benne' ca' naca na chee̱ xelelé'e bénneache. Dxeledánnene̱' dxelu'e̱ luzxgue̱', ne ne̱'e̱ ladxe' laga naga naxúaj dizra' chee̱ Dios, ne dxelácue̱' zra lane̱' da zeajzé̱ luzre na tunna.
MAT 23:6 Dxelaca lazre̱' xelebé'e̱ naga ze̱ láweze naga dxelawe̱', ne naga naca blau lu xu'u ca' naga dxeledube̱'.
MAT 23:7 Dxelaca lazre̱' xelapa bénneache le̱' ba lá'ana la neza ca', ne xelé̱'e̱ le̱': “Benne' wese̱de.”
MAT 23:8 Na'a le'e, quebe güele lataj nu xe̱ le'e, “Benne' wesede”, lawe' da xúgute̱le nácale bi bíchele tule xetule, ne tuze Benne' dxusédene̱' le'e, neda', Cristo.
MAT 23:9 Quebe nu xe̱le le'e: Xrae, lu xe̱zr la xu nigá, lawe' da zua tuze Xrale, Dios na' zue̱' xabáa.
MAT 23:10 Quebe güele lataj nu xe̱ le'e: Xran, lawe' da zua tuze Xránale, neda', Cristo.
MAT 23:11 Bénnea' dxune̱' zrin chee̱ xezícadxale le'e nácadxe̱' blau ládujla le'e.
MAT 23:12 Bénnea' dxucá'ana szren cuine̱' wexéxrujla bénnea', na' bénnea' dxaque̱' dxexruj lazre' wegá'ane̱' szren.
MAT 23:13 ’Edxugua le'e, benne' dxusé̱dele da nadxixruj bea na, ne le'e, benne' fariseo ca'. Láweze dxunle da xrlátaje. Dxusézxujle neza chee̱ xabáa chee̱ quebe nu chu'u na. Lé'equeze quebe dxú'ule, ne quebe dxuele lataj benne' dxelaca lazre̱' xelu'e̱.
MAT 23:14 ’Edxugua le'e, benne' dxusé̱dele da nadxixruj bea na, ne le'e, benne' fariseo ca'. Láweze dxunle da xrlátaje. Dxegúale lizre nu'ula ca' ba gulate benne' biu chee̱', na' chee̱ xulé'ele xrlátaje cuínale, dxuwízrale Dios xcha lu xudau'. chee̱ le̱ na' da zrente̱ da guzría xi na le'e.
MAT 23:15 ’Edxugua le'e, benne' dxusé̱dele da nadxixruj bea na, ne le'e, benne' fariseo ca'. Láweze dxunle da xrlátaje. Le'e dxedale du ca naca xe̱zr la xu nigá ne ca naca nísadau' chee̱ si' tu benne' ca naca da zéajle̱le chee̱ Dios, na' gate bache dxunle na, na' dxugápadxale bénnea' dul-la ca da nabágale le'e chee̱ cuía xi'e̱ lu lataj ba xa'.
MAT 23:16 ’Edxugua le'e. La chul-la nácale, ne dxaca lázrele cu'ule benne' neza. Dxennale che tu benne' dxuzétaje̱' xudau', quebe dxun na le̱' ba xen, na' che dxuzétaje̱' oro chee̱ xudau', da na' dxun na le̱' ba xen.
MAT 23:17 Nácale benne' xala, ne la chul-la. ¿Nula da naca na blaudxa, oro, che xudau' na' da dxucá'ana na lá'azxa oro na'?
MAT 23:18 Cá'anqueze dxennale le'e che nu dxuzetaj cugu lá'azxa, quebe dxun na le̱' ba xen, san che dxuzétaje̱' guna' da zria na lawe' cugu lá'azxa, da na' dxun na le̱' ba xen.
MAT 23:19 Nácale benne' xala ne la chul-la. ¿Nula da naca na blaudxa, guna' na', u cugu lá'azxa na' da dxucá'ana na lá'azxa guna' na'?
MAT 23:20 Che nu benne' dxuzétaje̱' cugu lá'azxa, quegaze cugu lá'azxa dxuzétaje̱', san cá'anqueze dxuzétaje̱' ca naca da zria lawe na.
MAT 23:21 Bénnea' dxuzétaje̱' xudau', quegaze xudau' na' dxuzétaje̱'. Cá'anqueze dxuzétaje̱' Dios zue̱' lataj na'.
MAT 23:22 Cá'anqueze benne' dxuzétaje̱' xabáa, dxuzétaje̱' lataj naga zria Dios, ne Diósqueze, Bénnea' zrie̱' lataj na' dxuzétaje̱'.
MAT 23:23 ’Edxugua le'e, benne' dxusé̱dele da nadxixruj bea na, ne le'e, benne' fariseo ca'. Láweze dxunle da xrlátaje. Dxunézrujle chee̱ xudau' tu cue' chee̱ da chi cue' chee̱ xixruj weaj, ne chee̱ bínnedu ca' chee̱ anís, ne chee̱ cumín. Quebe dxunle da zaj naca na blaudxa da zaj zua na lu da nadxixruj bea na, ca naca chee̱ gácale xrlátaje, ne chee̱ xexache lázrele le sa' ljwézrele, ne chee̱ chéajle̱le chee̱ Dios. Da caní zaj naca na da dxun na ba xen gunle, ne quebe gusanle da ca' ba dxunle.
MAT 23:24 La chul-la nácale, ne dxaca lázrele cu'ule benne' neza. Dxecá'ale da naca ca tu bé'adau', be̱ zrua lawe' da dxí'ajle, na' quebe dxeque be'ele dxí'ajle da naca ca tu camello, be̱ dxelaga benneache.
MAT 23:25 ’Edxugua le'e, benne' dxusé̱dele da nadxixruj bea na, ne le'e, benne' fariseo ca'. Láweze dxunle da xrlátaje. Nácale ca zaj naca zriga', ne xé'ena da dxíbele cúzreze na. Lu'ule na quebe dxíbele. Caní nácale lawe' da lu lázrdaule nácale ca gubán, ne benne' dxucude.
MAT 23:26 Benne' fariseo la chul-la. Nedxu le quibe lu'ule zriga', ne xé'ena, na' cá'anqueze xegá'ana chawe' cúzrela.
MAT 23:27 ’Edxugua le'e, benne' dxusé̱dele da nadxixruj bea na, ne le'e, benne' fariseo ca'. Láweze dxunle da xrlátaje. Nácale ca tu ba chiche da nalá na xrtante̱ cúzrela, na' lu'ule na nazrate̱ na zrita chee̱ benne' gate', ne xúgute̱ da sgute.
MAT 23:28 Ca'an nácale le'e. Cúzrela nala'le ca benne' xlátaje̱, na' lu lázrdaule nazrate̱ na da we̱n lazre', ne da cale̱la da dxunle.
MAT 23:29 ’Edxugua le'e, benne' dxusé̱dele da nadxixruj bea na, ne le'e, benne' fariseo ca'. Láweze dxunle da xrlátaje. Dxucá'anale cháwedau' ba ca' naga zaj nagache benne' ca' buluchálaje̱' waláz chee̱ Dios, ne dxuele lechítaje̱ lu'a chee̱ benne' xrlátaje ca'.
MAT 23:30 Dxennale: “Chela netu' ba zúantu' gate na' gulezrá' xra xrtauntu' ca', quebe gúcale̱ntu' benne' ca' belutie̱' benne' ca' buluchálaje̱' waláz chee̱ Dios.”
MAT 23:31 Gate dxennale ca', le'e dxexúnbeaquezle nácale zri'ine zre sua benne' ca' belutie̱' benne' ca' buluchálaje̱' waláz chee̱ Dios.
MAT 23:32 Dxusexúzrele dxunle ca da gulezú lau belún xra xrtáule ca'.
MAT 23:33 ’Be̱ snia nácale, ne xrtia be̱ snia. ¿Ájazra gunle chee̱ gáchele lu da zi' da xa' chee̱ lataj ba xa'?
MAT 23:34 Chee̱ le̱ na' neda' sel-la' chee̱le benne' ca' xuluchálaje̱' waláz chee̱ Dios, ne benne' sina ca', ne benne' ca' xulusé̱dene̱' le'e. Lé'equeze gútele, ne gudá'le xaga béguaj bal-la benne' ca', na' xebal-le̱' gunle le̱' zi' lu xudau' ca', na' gau zi' xúzrele le̱' tu xe̱zre xetú xe̱zre.
MAT 23:35 Ca'an gaca, le'e bágale zria chee̱ xel-la' gute chee̱ xúgute̱ benne' xrlátaje ca' belute xra xrtáule ca', gate guzú lau na nu be̱te Abel, benne' xrlátaje, ne naga bzrinte̱ bé̱tele Zacarías ládujla naga zua lataj lá'azxa chee̱ xudau' ne lataj naga dxuluzezxe̱' be̱ xíxre'du ca', be̱ dxelegú'e̱ lu cugu chee̱ Dios.
MAT 23:36 Da li dxapa' le'e, bénneache zaj zre̱'e̱ na'a xelebague̱' zria chee̱ xúgute̱ da caní.
MAT 23:37 Nadxa gunná Jesús: ―Jerusalén, Jerusalén, le'e na' dxútele benne' ca' dxuluchálaje̱' waláz chee̱ Dios, ne dxuzríale xiaj benne' gubáz ca' dxesel-la Dios naga zúale. Zane' lásate̱ guca lazra' gutupa' zrí'inele chia' ca dxun bedxuj, dxutúpaba' be dxé'enedau' zran xrílaba', san quebe guca lázrele.
MAT 23:38 Le nna'xque na'a, lízrele xelexegá'ana na dácheze,
MAT 23:39 lawe' da dxapa' le'e, québedxa lé'ele neda' cadxa zrin zra nnale: La'azxa naca bénnea' ze̱'e̱ waláz chee̱ Xránadxu.
MAT 24:1 Nadxa bedxúaj Jesús xudau', na' dxácate̱ dxexedxúaje̱' na', gulebiga benne' ca' dxusé̱dene̱' lau Jesús, ne gulezú lawe̱' dxuluchálajle̱ne̱' Le̱' ca naca chee̱ xudau' na'.
MAT 24:2 Beche̱be Jesús: ―¿Dxelé'ele xúgute̱ da caní? Da li dxapa' le'e, netú xiaj caní quebe xegá'ana zeajzría cuzru ljwezre na. Ca naca na cuía xi na.
MAT 24:3 Nadxa xjaque̱' lu xi'a naga zaj ze̱ xaga olivo, na' gate dxe' Jesús na', benne' ca' dxusé̱dene̱' belezrine̱' lau Le̱', ne bagácheze buluche̱be̱' Le̱': ―Gunná netu'. ¿Bata gaca da na'? ¿Bi gunna bea na gate zrin zra xela'u, ne gate cheajsé̱ chee̱ xe̱zr la xu nigá?
MAT 24:4 Nadxa Jesús guzre̱' benne' ca': ―Le guxúe cuínale chee̱ quebe nu si xe̱ le'e.
MAT 24:5 Benne' zan xelelé̱'e̱. Xelún lazre̱' xelenné̱' zaj naque̱' Cristo, na' xelezí xe̱'e̱ benne' zan.
MAT 24:6 Wenle le'e dxaca wedil-la, ne waca wedil-la gátete̱ze na'. Quebe zrébele, lawe' da dxal-la' xelaca da caní. Da caní quebe zaj naca na chee̱ zra bze̱be.
MAT 24:7 Tu cue' xe̱zr la xu tíl-lale̱ na xetú cue' xe̱zr la xu, ne tu xe̱zre tíl-lale̱ na xetú xe̱zre. Wata' gubina', ne welata' xízrawe̱' ca', ne wazrú' gátete̱ze na'.
MAT 24:8 Xúgute̱ da caní zaj naca na naga dxezú lau ca da xelezaca bénneache.
MAT 24:9 ’Nadxa xuludée̱' le'e naga si sácale, na' bál-lale welútequeze̱'. Ca naca bénneache xelecuídene̱' le'e lawe' da dxunle da naca chia'.
MAT 24:10 Lu zra na' benne' zan québedxa xeléajle̱'e̱ chia', na' xelecuídene̱' le sa' ljwezre̱', ne xuludée̱' le sa' ljwezre̱' lu na' benne' guledábague̱' le̱'.
MAT 24:11 Welelá' benne' zan benne' we̱n lazre'. Xelenné̱' dxuluchálaje̱' waláz chee̱ Dios, na' xelezí xe̱'e̱ benne' zante̱.
MAT 24:12 Lawe' da gáta'le̱'e̱ da cale̱la, benne' zan québedxa xelezrí'ine̱' le sa' ljwezre̱'.
MAT 24:13 Bénnea' zua chache̱' ca zrinte̱ zra bze̱be, la bénnea'.
MAT 24:14 Ca naca dizra' chawe' nigá ca nna bea Dios, zralaj na du gabí'i xe̱zr la xu chee̱ xelén ca naca benne' chee̱ xúgute̱ cue' xe̱zr la xu, na' te na' cheajsé̱ chee̱ xe̱zr la xu nigá.
MAT 24:15 ’Benne' gulabe̱' da nigá dxal-la' chéajni'ine̱'. Daniel, benne' bchálaje̱' waláz chee̱ Dios, bzuaje̱' ca naca chee̱ tu da dxezrá'a Dios, da dxuxrinnaj na. Gate lé'ele da nigá zua na lataj lá'azxa chee̱ xudau',
MAT 24:16 nadxa benne' zaj zre̱'e̱ xe̱zre ca' zaj nababa Judea dxal-la' xuluzrúnnuje̱', ne chjaque̱' lu xi'a zren.
MAT 24:17 Che tu benne' ze̱' chju'u chee̱', quebe dxal-la' xexétaje̱' bi cheajxeléaje̱' lu xu'u. Dxal-la' guzrúnnujte̱'.
MAT 24:18 Benne' zue̱' le̱'e̱ xixre' quebe dxal-la' xezrine̱' lizre̱' cheajxezri'e̱ xicha chee̱' da gácue̱'.
MAT 24:19 Edxugúa nu'ula ca' zaj zre̱'e̱ lu zra na' zaj zue̱' zi'i, ne nu'ula ca' zaj nu'e̱ bidau', ne dxelázrebe'.
MAT 24:20 Le naba Dios quebe gun na ba xen guzrúnnujle beu' zaga, ne quegá lu zra dxupá'anale,
MAT 24:21 lawe' da che ca' gaca na, na' da zrénte̱dxa da xelezí saca bénneache ca da quebe ne xelezaque̱' ca guzú laute̱ zua xe̱zr la xu nigá, ne québedxa bi xelezaque̱' caní ca te chee̱ da nigá.
MAT 24:22 Che Dios quebe guzáchie̱' zra ca', na' netú quebe nu la. Guzáchie̱' na chee̱ gácale̱ne̱' benne' ca' bache nabéaje̱' chee̱'.
MAT 24:23 ’Chee̱ le̱ na', quebe chéajle̱le che nu xe̱ le'e: “Le nna'xque, nigá zua Cristo”, u che nu xe̱ le'e: “Le nna' xque, na'la zue̱'.”
MAT 24:24 Caní dxapa' le'e lawe' da xelelá' benne' zan, benne' guzrí xe̱'e̱, na' xelenné̱' zaj naque̱' Cristo, u zaj naque̱' benne' dxuluchálaje̱' waláz chee̱ Dios, na' da zrente̱ xululé'ene̱', ne xelune̱' xel-la' waca zren ca' chee̱ xelezí xe̱'e̱ benne' ca' ba nabéaj Dios. Caní xelune̱' che xelezéquene̱'.
MAT 24:25 Ba bchálajle̱na' le'e caníqueze na'a quebe ne gaca na.
MAT 24:26 Chee̱ le̱ na', che nu xe̱ le'e: “Le nna'xque, na' zue̱' le̱'e̱ xixre'”, quebe chéajle na', u che nu xe̱ le'e: “Le nna'xque, lu xu'u nigá zue̱'”, quebe chéajle̱le.
MAT 24:27 Ca dxun tu xesa guziu', dxe̱pe na naga dxalaj gubizra, na' dxelé'edxu na naga dxebía gubizra, ca'an gaca gate xida' neda', Benne' Gulje̱' Bénneache.
MAT 24:28 Gátete̱ze de̱ tu da nate, na' dxelexezraga laba ca'.
MAT 24:29 Na' gunná Jesús: ―Gate bache guca zra na' gate xelezaca zi' bénneache, nadxa gubizra chul-la na naga zua na, na' beu' quebe gusení na, na' belaj xelexruj na, na' xelezrízequeze ca naca da zaj naca na szren da dxeledá' lu be'.
MAT 24:30 Nadxa lé'ele zran xabáa da gulé'e na ba zua xelá'a neda', Benne' Gulje̱' Bénneache, na' ca naca bénneache zaj zre̱'e̱ xe̱zr la xu xelebézrequeze̱'. Nadxa xelelé'ene̱' neda', Benne' Gulje̱' Bénneache, zezá'a lu beuj zran xabáa, zúale̱ neda' dute̱ xel-la' dxenná bea, ne da xabáa.
MAT 24:31 Nadxa sél-laqueza' gubáz chee̱ xabáa chia' ca', na' xulucuézre̱' zizraj lúzuba' chee̱ xuluxutupe̱' benne' ca' ba nabéaja' chia' dapa saca chee̱ xe̱zr la xu nigá, ne du ca naca xe̱zr la xu nigá.
MAT 24:32 ’Le guse̱de ca naca da dxulé'e xaga higo. Gate dxelexedxé'ene zruze na, ne dxezría na laga' dxe'ene, ba nézele ba za xaca beu' la.
MAT 24:33 Cá'anqueze gate lé'ele dxelaca xúgute̱ da caní, dxal-la' nézele gágute̱ ba zua cheajsé̱ chee̱ xe̱zr la xu, ne ba zua gaca na.
MAT 24:34 Da li dxapa' le'e, xúgute̱ da caní xelaca na nédxula gate quebe ne xelate bénneache zaj zre̱'e̱ lu zra na'.
MAT 24:35 Xabáa ne xe̱zr la xu weledé chee̱ na. Dizra' chia' quebe te chee̱ na.
MAT 24:36 ’Gate za zra na', ne bila zra na', quebe nu neze, quegá gubáz chee̱ xabáa zaj zre̱'e̱ xabáa, ne neda', Zri'ine Dios. Tuze Xradxu Dios nézene̱' gate zrin zra na'.
MAT 24:37 ’Ca guca lu zra ca' gate zua Noé, cá'anqueze gaca na gate xelá'a neda', Benne' Gulje̱' Bénneache.
MAT 24:38 Ca lu zra ca' gate quebe ne gun Dios nisa xiuj da guzría xi na bénneache, gulezrá' bénneache ca' dxelé'aj dxelawe̱', ne dxuluchaga ne̱'e̱, ne dxulunézruje̱' zrí'ine̱' ca' chee̱ xuluchaga na'be', cadxa bzrin zra guxú'u Noé lu da zren na' dxedá lawe' nísadau' da nazí le na arca.
MAT 24:39 Quebe guleque bé'ene̱' ca da dxal-la' gaca na, cadxa bzrin zra guca xiuj na', ne be̱te na ca naca benne' ca'. Cá'anqueze gaca gate xelá'a neda', Benne' Gulje̱' Bénneache.
MAT 24:40 Ca lu zra ca' xelezrá' chupa benne' biu le̱'e̱ xixre'. Tue̱' xeché̱'e̱, na' xetúe̱' xegá'ane̱'.
MAT 24:41 Xelezrá' chupa nu'ula dxelútue̱'. Tue̱' xeché̱'e̱, na' xetúe̱' xegá'ane̱'.
MAT 24:42 ’Le sua le'e ban lazre' lawe' da quebe nézele bi zra xelá'a neda', Xránale.
MAT 24:43 Da nigá dxal-la' nézele: Che tu xrane xu'u nézene̱' bi zra chizrela zrin gubán, waxíchaje̱' bchigala, ne quebe gu'e̱ lataj xusalaj benne' gubán lizre̱' chee̱ cuane̱'.
MAT 24:44 Chee̱ le̱ na', le sua le'e ban lazre' lawe' da xelá'a neda', Benne' Gulje̱' Bénneache, gate québela dxéquele ca'.
MAT 24:45 Na' gunná Jesús: ―¿Nuzra na' benne' we̱n zrin li lazre' ne dxéajni'ine̱', bénnea' xrane̱' dxucá'anale̱ne̱' le̱' benne' zaj zre̱'e lizre̱' chee̱ gunézruje̱' da xelawe̱' gate zrin zra chee̱ na?
MAT 24:46 Ba neza naca na chee̱ benne' we̱n zrin na', gate xezrín xrane̱', lé'ene̱' le̱' dxune̱' ca naca da nabague̱'.
MAT 24:47 Da li dxapa' le'e, xrane̱' gucá'anale̱ne̱' le̱' ca naca da nape̱'.
MAT 24:48 Che benne' we̱n zrin na' gaque̱' benne' we̱n da cale̱la, ne guéquene̱' quebe xelá' ze̱ xrane̱',
MAT 24:49 ne che su lawe̱' gusaca zi'e̱ xezícala benne' we̱n zrin ca', ne xi'aj gágule̱ne̱' benne' dxelezuzre̱',
MAT 24:50 nadxa xrane̱' xezrine̱' zra gate québela dxebeze̱'. Gaca na zra quebe nézene̱',
MAT 24:51 na' gusaca zí'le̱'e̱ le̱'. Chugue̱' chee̱' gaque̱' tuze benne' ca' dxelune̱' láweze da xrlátaje. Cuezre̱', ne xáguxa'ate̱ lazxe̱'.
MAT 25:1 Gunná Jesús: ―Ca gaca chee̱ benne' xelu'e̱ naga dxenná bea Dios xabáa naca na ca da guca chee̱ chi nu'ula cuide' caní. Gulequé̱'e̱ xi' chee̱' ca', chee̱ chjaque̱' laní chee̱ wechaga na', dxelebeze̱' bátala xelá' benne' wechaga na'.
MAT 25:2 Gazxu' nu'ula caní gulaque̱' gat lazre', na' xegazxu' nu'ula caní zaj naque̱' ban lazre'.
MAT 25:3 Nu'ula ca' quebe zaj naque̱' ban lazre' belú'e̱ xi' chee̱' ca', san quebe belú'e̱ da za zxezxe na da xelegué̱'e̱ lu xi' chee̱' ca'.
MAT 25:4 Nu'ula ban lazre' ca' belú'e̱ xi' chee̱' ca', ne da za zxezxe na da xelegué̱'e̱ na.
MAT 25:5 Lawe' da guzré benne' wechaga na', na' gulaca wase ca zaj naque̱', na' xúgute̱' gulasie̱'.
MAT 25:6 Dxe̱la ben tu chi'i benne' dxebezre xe̱'e̱, dxenné̱': “Ba za' wechaga na'. Le dxuaj si' lu na'le le̱'.”
MAT 25:7 Xúgute̱ nu'ula cuide' caní gulase̱', na' gulezú lawe̱' bulugale̱' xi' chee̱' ca'.
MAT 25:8 Nadxa gazxu' nu'ula ca' quebe zaj naque̱' ban lazre' gulé̱'e̱ gazxu' nu'ula ban lazre' ca': “Le gunna late' da za zxezxe na chee̱ntu', lawe' da ba dxelexula xi' chee̱ntu'.”
MAT 25:9 Nu'ula ban lazre' ca' belexeche̱be̱': “Quebe gaca, lawe' da che gúnnantu' late' chee̱le, quebe gaca na da dxechínnentu' netu', ne da dxechínnele le'e. Le chjácala naga dxutie̱' na, ne le cheajxrí chee̱le.”
MAT 25:10 Dxácate̱ zjaca nu'ula ca' quebe zaj naque̱' ban lazre', na' bezrín wechaga na'. Nu'ula ban lazre' ca' gulu'e̱ nen le̱' lu laní chee̱ wechaga na', na' bsezxuj dxa xu'u na'.
MAT 25:11 Gudé na' belexezrín xegazxu' nu'ula ca', na' gulenné̱': “Xran, Xran, gusalaj chú'untu'.”
MAT 25:12 Le̱' beche̱be̱': “Cabata'. Da líqueze quebe núnbe'a le'e.”
MAT 25:13 Nadxa Jesús guzre̱' benne' ca': ―Le sua le'e ban lazre', lawe' da quebe nézele bi zra, u bi xel-la' xelá'a neda', Benne' Gulje̱' Bénneache.
MAT 25:14 Na' gunná Jesús: ―Ca gaca chee̱ benne' xelu'e̱ naga dxenná bea Dios xabáa, naca na ca da guca gate tu benne' zue̱' chee̱ se̱'e̱ chéaje̱' zitu', na' gunné̱' bi we̱n zrin chee̱' ca', ne bcá'anale̱ne̱' bi we̱n zrin ca' dumí chee̱'.
MAT 25:15 ’Tu bi ca' bnézruje̱' gazxu' cue' dumí, na' xetube' bnézruje̱' chupa cue' dumí, na' xetube' bnézruje̱' tu cue' dumí. Bnézruje̱' chee̱ tu tube' ca da xelezéquebe' xuluchínebe' na. Nadxa guzé̱'e̱ zéaje̱' zitu'.
MAT 25:16 Bi we̱n zrin na' guzi'be' gazxu' cue' dumí bchínebe' dumí na', na' bezi'be' xegazxu' cue' dumí.
MAT 25:17 Cá'anqueze bi we̱n zrin na' guzi'be' chupa cue' dumí, bezi'be' xechupa cue' dumí.
MAT 25:18 Bi we̱n zrin na' guzí'be' tu cue' dumí na' guxíajbe', ne bcáchebe' dumí chee̱ xránabe' tu lu xe̱dxu da be̱nbe' lu xu.
MAT 25:19 ’Zane' iza ba guca gate bezrín xrane bi we̱n zrin ca', na' guzú lawe̱' dxezi'e̱ da bdee̱' lu na' bi we̱n zrin ca'.
MAT 25:20 Nedxu bzrin bi we̱n zrin na' guzí'be' gazxu' cue' dumí, na' bnézrujbe' xránabe' xegazxu' cue' dumí, na' gúzrebe' le̱': “Xran, be̱nnu' neda' gazxu' cue' dumí. Nigá de̱ xegazxu' cue' da bezi'a nen dumí chiu'.”
MAT 25:21 Na' xránabe' guzre̱' le̱be': “Da chawe' be̱nu'. Nacu' tu bi we̱n zrin xrlátaje, ne li lazre'. Gucu' li lazre' lu late' da be̱nna' lue', na' gúnnaqueza' lue' da zréndxaqueze. Guxú'u naga zua' neda', ne gubéle̱'e̱.”
MAT 25:22 Gudé na' bzrin bi we̱n zrin na' guzi'be' chupa cue' dumí, na' gunabe': “Xran, be̱nnu' neda' chupa cue' dumí. Nigá de̱ xechupa cue' da bezi'a nen dumí chiu'.”
MAT 25:23 Na' xránabe' guzre̱' le̱be': “Da chawe' be̱nu'. Nacu' tu bi we̱n zrin xrlátaje, ne li lazre'. Gucu' li lazre' lu late' da be̱nna' lue', na' gúnnaqueza' lue' da zréndxaqueze. Guxú'u naga zua' neda', ne gubéle̱'e̱.”
MAT 25:24 Gate bzrin bi we̱n zrin na' guzi'be' tu cue' dumí, na' gúzrebe' xránabe': “Xran, nezda' nacu' benne' dxenné̱ xue, ne dxezi'u da quebe guzu', ne dxexeca'u da quebe be̱siu'.
MAT 25:25 Chee̱ le̱ na' bzreba', na' guxá'a xeajcáchia' dumí chiu' lu xu. Nigá de̱ da naca chiu'.”
MAT 25:26 Na' xránabe' guzre̱' le̱be': “Nacu' bi we̱n zrin cale̱la, ne zrawe̱de. Ba nézqueznu' dxezi'a da quebe guza', ne dxexecá'a da quebe be̱sia'.
MAT 25:27 Chee̱ le̱ na' la xju'u dumí chia' na' lu na' benne' dxelízruje̱' chee̱ dumí da dxuluchínene̱', na' gate za' neda', na' xezi'a da naca chia' nen da belezí'e̱.”
MAT 25:28 Nadxa guzre̱' benne' ca' zaj zre̱'e̱ na': “Le xecá'a dumí na' da núxrube', ne le gunezruj na bénnea' nape̱' chi cue' dumí.
MAT 25:29 Benne' nape̱' wazidxe̱' da zrendxa, na' benne' quebe nape̱', ca late' da du na' nape̱' wecá'a na.
MAT 25:30 Ca naca bi we̱n zrin nigá, bi wedegún, le xebéaj-be' chalé'ajla naga naca chul-la, naga cuézrebe', ne xáguxa'ate̱ lázxabe'.”
MAT 25:31 Na' gunná Jesús: ―Gate xelá'a neda', Benne' Gulje̱' Bénneache, ne Benne' Wenná Bea, nen ca naca gubáz chee̱ xabáa chia', na' cué'queza' lataj naga nna be'a, da naca na da xabáa.
MAT 25:32 Na' bénneache chee̱ xúgute̱ cue' xe̱zr la xu xelexezrague̱' lawa' neda', na' xebéaja' cha chee̱' ca dxun benne' dxuxúe̱' zrila'. xebéaje̱' chíbudu ca' ládujla zrila' ca'.
MAT 25:33 Guzrá'a benne' ca' zaj naca zrila' chia' chalá'a xabe̱la chia', na' benne' ca' zaj naca ca chíbudu ca' guzrá'a le̱' chalá'a xéglala chia'.
MAT 25:34 Nadxa xapa' benne' ca' zaj zra' chalá'a xabe̱la chia': “Le da le'e, nácale xrlátaje lau Xra'. Le chu'u naga dxenná bea Xra', lataj na' bcueze̱' chee̱le gate na' be̱ne̱' xe̱zr la xu nigá.
MAT 25:35 Caní dxaca lawe' da guduna', na' bgágule neda'. Gubíleda', na' bé̱nnale da gu'a. Gudá' ca tu benne' xu'e̱ neza, na' gulu'ule neda' lízrele.
MAT 25:36 Bxázrjeda' zra lana' gácua', na' bgácule neda'. Quebe chawe' guzúa', na' bedajnábale neda'. Guxu'a lizre xia, na' bedajnábale neda'.”
MAT 25:37 Nadxa benne' xrlátaje caní xelenné̱': “Xran, ¿bata blé'entu' Lue' dxedunu', na' bgáguntu' Lue'? ¿Bata blé'entu' Lue' dxebílenu', na' bé̱nnantu' da gu'u?
MAT 25:38 ¿Bata blé'entu' Lue' ca tu benne' xu'e̱ neza, na' gulú'untu' Lue' lízrentu'? ¿Bata blé'entu' Lue' dxexázrjenu' zra lanu', na' bgácuntu' Lue'?
MAT 25:39 ¿Bata bénentu' quebe chawe' zu', u xu'u lizre xia, na' bedajnábantu' Lue'?”
MAT 25:40 Neda' xeche̱ba': Da li dxapa' le'e, ca da be̱nle chee̱ bénnedu caní, benne' zaj naca dxexruj lazre', chee̱ néda'queza' be̱nle ca'.
MAT 25:41 ’Nadxa neda', Benne' Wenná Bea, xapa' benne' ca' zaj zra' chalá'a xéglala chia': Le cuasa cuita' neda', le'e, nácale we̱n da cale̱la lau Xra'. Le chjaca lu xi' chee̱ lataj ba xa' da nabeza na chee̱ da xriwe̱', ne chee̱ gubáz chee̱ na ca'.
MAT 25:42 Caní dxaca lawe' da guduna', na' le'e quebe bé̱nnale da gawa'. Gubíleda', na' quebe bé̱nnale da xí'aja'.
MAT 25:43 Gudá' ca tu benne' xu'e̱ neza, na' quebe gulu'ule neda' lízrele. Bxázrjeda' zra lana' gacua', na' quebe bgácule neda'. Quebe chawe' guzúa' ne guxu'a lizre xia, na' quebe bedajnábale neda'.
MAT 25:44 Nadxa benne' ca' xelé̱queze̱' neda': “Xran, ¿bata blé'entu' Lue' dxedunu', u dxebílenu', u xu'u neza, u dxexázrjenu' zra lanu', u quebe chawe' zu', u xu'u lizre xia, na' quebe gúcale̱ntu' Lue'?”
MAT 25:45 Neda', benne' wenná bea, xeche̱ba': Da li dxapa' le'e, lawe' da quebe bi be̱nle chee̱ bénnedu caní, benne' zaj naca dxexruj lazre', quebe bi be̱nle chee̱ néda'queza'.
MAT 25:46 Benne' caní chjácaqueze̱' lataj ba xa', na' benne' xrlátaje ca' chjaque̱' lu xel-la' nabán da zeajlí canna.
MAT 26:1 Gate bexuzre bchalaj Jesús caní, na' guzre̱' benne' ca' dxusé̱dene̱':
MAT 26:2 ―Ca ba nézquezle, xechupa zraze na'a súadxu Laní Pascua, da naca na zra dxuluxucube benne' judío ca guca gate Dios bebéaje̱' bénneache chee̱' lu xe̱zr la xu Egipto, na' neda', Benne' Gulje̱' Bénneache, xuludée̱' neda' lu na' benne' xuludé̱'e̱ neda' xaga béguaj.
MAT 26:3 Ca lu zra na' benne' xíchaje̱ ca' chee̱ bxruze ca', ne benne' dxuluxuzájle̱'e̱ da bdxixruj Moisés, ne benne' gula sina ca' chee̱ judío ca', belezrague̱' chale'aj chee̱ xu'u zaca chee̱ Caifás, bxruze blau.
MAT 26:4 Na' belílaje̱' ájala xele̱le̱' Jesús lu da we̱n lazre' chee̱ xelútie̱' Le̱'.
MAT 26:5 Gulenné̱': ―Quebe gundxu na lu zra laní nigá, chee̱ quebe xeledábaga benne' ca' dxi'u.
MAT 26:6 Zua Jesús xe̱zre Betania lizre Simón, bénnea' güé'ene̱' we̱' guzru'.
MAT 26:7 Bzrin tu nu'ula naga zua Jesús, nu'e̱ tu zruágadau' da naca na xiaj alabastro, ne nazrate̱ na da dxelá zixre da zácale̱'e̱ na. Gate na' dxe' Jesús ga dxelawé̱', na' nu'ula nigá gulu'e̱ na xichaj Jesús.
MAT 26:8 Gate belelé'e benne' ca' dxuse̱de Jesús da nigá, na' belezré̱'e̱, ne gulezú lawe̱' dxelenné̱': ―¿Bizr chee̱ na' guzría xi' da nigá?
MAT 26:9 Da nigá waca la gudá'u na sí'adxu da zrente̱, chee̱ gácale̱dxu benne' xache' ca'.
MAT 26:10 Jesús benne̱' da nigá, na' guzre̱' benne' ca': ―¿Bizr chee̱ na' dxunle nu'ula nigá ze̱de? Da nigá be̱ne̱' naca na tu da xrlátaje.
MAT 26:11 Benne' xache' ca' tu zrázqueze̱' ládujla le'e, na' neda' quegá tu súale̱za' le'e.
MAT 26:12 Ca naca da be̱n nu'ula nigá, gulu'e̱ da zixre na' be̱l-la' dxen chia', naca na da xucá'ana chawe na neda' chee̱ zra gachia' lu xe̱dxu ba.
MAT 26:13 Da li dxapa' le'e, gátete̱ze xuluchálaje̱' dizra' chawe' chia' nigá du gabí'i xe̱zr la xu, na' zrálajqueze ca da be̱n nu'ula nigá, chee̱ cheajlesá lazre' bénneache le̱'.
MAT 26:14 Nadxa tu benne' chazrinnu ca' dxuse̱de Jesús, bénnea' le̱' Judas Iscariote, guxíaje̱' xeajchálajle̱ne̱' benne' xíchaje̱ ca' chee̱ bxruze ca'.
MAT 26:15 Guzre̱' le̱': ―¿Ájate̱ gúnnale neda' che ca' gudéa' Jesús lu na'le? Nadxa benne' ca' gulízruje̱' le̱' chi dxua dumí plata.
MAT 26:16 Ca lu zra na' guzú lau Judas dxexílaje̱' ájala gune̱' gudée̱' Jesús lu na' benne' ca'.
MAT 26:17 Zra nedxu chee̱ laní na' gate na' dxelawe̱' xeta xtila da quebe nachixre cua zichaj chee̱ na, benne' ca' dxuse̱de Jesús belezrine̱' lau Le̱', na' buluche̱be̱' Le̱': ―¿Gazra dxaca lazru' gucuézentu' da gágudxu chee̱ laní pascua chee̱ benne' judío?
MAT 26:18 Jesús guzre̱' le̱': ―Le chjaca lu xe̱zre na', naga zua lizre tu benne', na' le xe̱'e̱: “Bennea' dxusé̱dene̱' dxi'u dxenné̱': Zra chia' gatia' ba zua gágute̱, na' lizru' lue' gawa' chee̱ Laní Pascua tu zren nen benne' ca' dxusé̱deda'.”
MAT 26:19 Benne' ca' dxuse̱de Jesús belune̱' ca da gunná bé'ene̱' le̱', na' bulucueze̱' da xelawe̱' chee̱ Laní Pascua.
MAT 26:20 Gate gula chizrela, na' gudxé' Jesús ga gawe̱' tu zren nen benne' ca' dxusé̱dene̱'.
MAT 26:21 Dxácate̱ na' dxelawe̱', guzre Jesús benne' ca': ―Da li dxapa' le'e, tule le'e naca bénnea' gudée̱' neda' lu na' benne' ca' dxelune̱' da cale̱la.
MAT 26:22 Nadxa benne' ca' belexewí'inele̱'e̱, na' gulezú lawe̱' tu tue̱' dxuluche̱be̱' Jesús: ―Xran, ¿quebe naca neda'?
MAT 26:23 Na' beche̱be Jesús: ―Bénnea' dxudé ne̱'e̱ lu xé'ena tu zren nen neda', benne' na' gudée̱' neda'.
MAT 26:24 Neda', Benne' Gulje̱' Bénneache, waxá'a naga dxal-la' gatia' ca naxúaj na lu xiche chee̱ Dios, san edxugúa bénnea' gudée̱' neda'. Cháwedxa naca la quebe gulaj bénnea'.
MAT 26:25 Nadxa gunná Judas, bénnea' gudée̱' Jesús, dxenné̱': ―Benne' dxuse̱de, ¿quebe naca neda'? Na' beche̱be Jesús, gunné̱': ―Awe', lue' na'.
MAT 26:26 Dxácate̱ dxelawe̱', Jesús guqué̱'e̱ xeta xtila, na' guzre̱' Dios: “Xcalenu'.” Gudé na' bzúzruje̱' na, na' bnézruje̱' na benne' ca' dxusé̱dene̱', dxenné̱': ―Le gagu. Da nigá naca na be̱l-la' dxen chia'.
MAT 26:27 Gudé na' guqué̱'e̱ tu zriga', na' guzre̱' Dios: “Xcalenu'”, na' bnézruje̱' na benne' ca', dxenné̱': ―Le xi'aj xúgute̱le da xuzru lu zriga' nigá.
MAT 26:28 Da nigá naca na dxen chia' da guzúa chacha na xel-la' wezría cube da dxun Dios. Dxen nigá lalaj na ne̱ chee̱ benne' zante̱ chee̱ gunite lau Dios dul-la zaj nabaga benne' ca'.
MAT 26:29 Dxapa' le'e, québedxa xí'aja' ca naca xrise uva nigá ca zrindxa zra xí'aja' da cube tu zren nen le'e naga dxenná bea Xra'.
MAT 26:30 Ca gudé belul-le̱' chee̱ Dios, na' gusiá'que̱' zjaque̱' lu Xi'a Xaga Olivo Ca'.
MAT 26:31 Nadxa Jesús guzre̱' benne' ca': ―Xúgute̱le le'e gusán lázrele neda' na'a zre', lawe' da naxúaj na lu xiche chee̱ Dios, dxenné̱': “Gutia' benne' dxuxúe̱' zrila', na' zrila' ca' xelase dínnajba'.”
MAT 26:32 Gate te xebana' neda', cha'a neda' ga nababa Galilea nédxudxa ca le'e.
MAT 26:33 Nadxa beche̱be Pedro: ―Lácala xúgute̱ benne' caní xulusán lazre̱' Lue', quebe guna' neda' ca'.
MAT 26:34 Nadxa Jesús guzre̱' le̱': ―Da li dxapa' lue', lu zre' na'a zre' nédxudxa gate cuezre xjeaj, lue' wannáu' chunna lasa quebe núnbe'u neda'.
MAT 26:35 Pedro guzre̱' Jesús: ―Lácala gatia' neda' tu zren nen Lue', québequeze nnia' quebe núnbe'a Lue'. Cá'anqueze gulenná xúgute̱ benne' ca' dxuse̱de Jesús.
MAT 26:36 Nadxa bzrin Jesús nen benne' ca' dxusé̱dene̱' tu lataj nazí le na Getsemaní, na' guzre̱' le̱': ―Le cue'e nigá dxácate̱ cha'a neda', guchálajle̱na' Dios.
MAT 26:37 Jesús guché̱'e̱ Pedro, ne dxúpate̱ zri'ine Zebedeo, na' guzú lawe̱' bewí'inele̱'e̱ne̱' ne guzúale̱'e̱ ste̱be.
MAT 26:38 Nadxa guzre̱' benne' ca': ―Dxewí'ine lázrele̱'a dxunte̱ na gute na neda'. Le xegá'ana le'e nigá, ne le sua ban lazre' tu zren nen neda'.
MAT 26:39 Nadxa Jesús guzé̱'e̱ zéaje̱' xelate' caníladxa, na' gute̱' sudxú'ala lu xu, ne bchálajle̱ne̱' Dios, dxenné̱': ―Xrae, chela gaca, bde na chalá'ala quebe gaca chia' ca naca xel-la' gute caní da naca na ca tu da sla' da xí'aja'. Quebe gaca na ca dxaca lazra' neda'. Gaca na ca dxaca lazru' Lue'.
MAT 26:40 Nadxa bezrín Jesús naga zaj zra' benne' ca' dxusé̱dene̱', na' blé'ene̱' benne' ca' dxelásie̱', na' guzre̱' Pedro: ―¿Quebe gúcale le'e quíchale bchigala nen neda' tu chí'idau'ze?
MAT 26:41 Le nnaze, ne le guchálajle̱ Dios chee̱ quebe gun zréaje da xriwe̱' le'e. Da li bénne'du xu'ule dxaca lázre'le̱'e na, san lu be̱la' dxen chee̱le dxate ni'a na'le.
MAT 26:42 Da gudxupe' lasa guxíaj Jesús bchálajle̱ne̱' Dios caní: ―Xrae, che quebe gaca te chalá'ala ca naca da dxal-la' saca', gaca na ca dxaca lazru' Lue'.
MAT 26:43 Ca gudé na' bezrine̱', ne belé'ene̱' benne' ca' dxusé̱dene̱', dxelásie̱' lawe' da ba dxelezrude' lawe̱' dxelaca wásele̱'e̱.
MAT 26:44 Bca'ane̱' benne' ca', guzé̱'e̱ zéaje̱' bchálajle̱ne̱' Dios da guxunne' lasa, na' gunnáqueze̱' ca da ba gunné̱' ca'an bache.
MAT 26:45 Nadxa bezrine̱' naga zaj zra' benne' ca' dxusé̱dene̱', na' guzre̱' le̱': ―Le gase na'a, ne le xezí' lazre'. Ba bzrin zra gate neda', Benne' Gulje̱' Bénneache, tea' lu na' benne' dul-la ca'.
MAT 26:46 Le chasa, ne le chu'u. Ba za bénnea' dxudée̱' neda'.
MAT 26:47 Ne dxuchálajte̱ Jesús na' gate bzrin Judas. Naque̱' tu benne' chazrinnu ca', na' zá'acale̱ benne' zante̱ le̱', benne' zaj nu'e̱ xia ca' ne xaga ca'. Benne' caní zaj naque̱' benne' gulesel-la benne' xíchaje̱ ca' chee̱ bxruze ca', ne benne' gula sina ca' chee̱ judío ca'.
MAT 26:48 Judas, bénnea' dxudée̱' Jesús, ba blé'ene̱' benne' ca' ca tu da gune̱' da gulé'e na nu na' naca Jesús. Gunné̱': ―Bénnea' gunupa' neda', Le̱' na'. Le che̱'e̱ ca tu benne' we̱n da zrinnaj.
MAT 26:49 Nadxa bzrin Judas lau Jesús, dxenné̱': ―Diuzre, Benne' dxuse̱de. Na' bnupe̱' Jesús.
MAT 26:50 Beche̱be Jesús: ―Ljwezra', ¿bi chee̱ za'u? Nadxa gulebiga benne' ca', gule̱le̱' Jesús, na' beleché̱'e̱ Le̱' ca tu benne' we̱n da zrinnaj.
MAT 26:51 Tu benne' ca' dxuse̱de Jesús guléaje̱' xia chee̱', ne guchugue̱' chalá'a naga bi we̱n zrin chee̱ bxruze blau.
MAT 26:52 Nadxa Jesús guzre̱' le̱': ―Begú'u xia chiu' lu zre na, lawe' da xúgute̱ benne' dxelute benne' nen xia nalá, cá'anqueze gate le̱'.
MAT 26:53 ¿Quebe nézenu' wazéqueda' neda' naba' Xra', na' Le̱' sél-late̱' na'a naga zua' da zandxa ca chazrinnu cue' gubáz chee̱ xabáa, zaj naque̱' zánete̱ tu tu cue'?
MAT 26:54 Na'a che ca'an guna', ¿ájazra gaca gaca na ca da naxúaj na lu xiche chee̱ Dios, da dxenná na caní dxal-la' gaca na?
MAT 26:55 Nadxa guzre Jesús benne' ca': ―Le'e bdxuajle nen xia nalá ca', ne nen xaga ca' chee̱ qué̱lale neda', dxunle neda' ca tu benne' gubán. Xúgute̱ zra gudxe'a neda' lu xudau' dxusé̱deda' le'e, ne quebe gudé̱lale neda'.
MAT 26:56 Xúgute̱ da caní dxaca na chee̱ gaca na ca da gulenná benne' ca' buluchálaje̱' waláz chee̱ Dios, da na' naxúaj na lu xiche chee̱ Dios. Nadxa xúgute̱ benne' ca' dxuse̱de Jesús bulucá'ane̱' Le̱' tuze̱', buluxuzrúnnuje̱'.
MAT 26:57 Benne' ca' gule̱le̱' Jesús guleché̱'e̱ Le̱' lau Caifás, bxruze blau, ga na' zaj nazraga benne' ca' dxuluxuzájle̱'e̱ da bdixruj be'e Moisés, nen benne' gula sina ca'.
MAT 26:58 Pedro zéaje nawe̱' Jesús zítu'la, na' bzrine̱' chale'aj chee̱ lizre bxruze blau, na' guxú'e̱, ne gudxé'e̱ tu zren nen bi xa'aga chee̱ lé'ene̱' ájala xexuzre da dxaca na'.
MAT 26:59 Benne' xíchaje̱ ca' chee̱ bxruze ca', ne benne' gula sina ca', ne xúgute̱ benne' ca' chee̱ xu'u lawe' blau chee̱ judío ca' belílaje̱' ájala xuluzría xi'e̱ Jesús, lácala naca na da we̱n lazre', chee̱ xelezéquene̱' xuludée̱' Le̱' gatie̱'.
MAT 26:60 Quebe bi belezrelne̱', lácala belezrín benne' zan benne' gulenné̱' da we̱n lazre' chee̱ Jesús. Naga xeajse̱te̱ na belezrín chupa benne' we̱n lazre'.
MAT 26:61 Dxelenné̱': ―Benne' nigá gunné̱': “Wazéqueda' neda' guchínnaja' xudau' chee̱ Dios, na' xexuna' na lawe' chunna zraze.”
MAT 26:62 Nadxa guxasa bxruze blau, na' guzre̱' Jesús: ―¿Quebe bi dxexeche̱bu'? ¿Bizra da dxelenné̱' chiu' lue'?
MAT 26:63 Jesús guzúe̱' zrize. Nadxa bxruze blau na' guzre̱' Le̱': ―Lu La Dios ban dxenná be'eda' lue' nneu' da li. Gunná che nacu' lue' Cristo, Zri'ine Dios.
MAT 26:64 Jesús guzre̱' le̱': ―Nácaqueza' ca dxennáu' lue'. Cá'anqueze dxapa' le'e, walé'ele neda', Benne' Gulje̱' Bénneache, cue'a chalá'a xabe̱la chee̱ Dios nen xel-la' szren chee̱', na' xelá'a lu beuj bza chee̱ xabáa.
MAT 26:65 Nadxa bxruze blau gucheze̱' zra lane̱' chee̱ blé'ene̱' quebe nabague̱' zria, na' gunné̱': ―Benne' nigá dxenné̱' schanni' chee̱ Dios. ¿Nachínnedxadxu benne' xeche̱be̱'? Ba bénquezle le'e ca dizra' schanni' dxenné̱'.
MAT 26:66 ¿Bi dxennale le'e? Benne' ca' gulenné̱': ―Nabague̱' zria, ne dxal-la' gatie̱'.
MAT 26:67 Nadxa buluzré̱'e̱ zrene̱' lau Jesús, ne belú'e̱ Le̱', na' xebal-le̱' belegape̱' dxu'a lawe̱'.
MAT 26:68 Na' gulé̱'e̱ Le̱': ―¿Nácaquezu' Lue' Cristo? Gunné̱ xa'a nu be̱ Lue'.
MAT 26:69 Dxácate̱ na' dxe' Pedro chalé'ajla, na' tu nu'ula we̱n zrin bzrine̱' lau Pedro ne guzre̱' le̱': ―Cá'anqueze lue' nacu' Jesús, benne' Galilea na', tuze.
MAT 26:70 Pedro be̱n chúchue̱' xrtizre̱' láwela xúgute̱ benne' ca', gunné̱': ―Quebe nezda' nu chee̱ na' dxenníu'.
MAT 26:71 Nadxa Pedro zexíaje̱' chee̱ xedxúaje̱' chale'aj na', na' ble'e xetú nu'ula ca' le̱', ne guzre̱' benne' ca' zaj zre̱'e̱ na': ―Cá'anqueze benne' nigá dxedále̱ne̱' Jesús, benne' Nazaret na'.
MAT 26:72 Xecha lasa be̱n chúchue̱' Pedro xrtizre̱', na' bzétaje̱' Dios, gunné̱': ―Quebe núnbe'a benne' na'.
MAT 26:73 Xetú chí'idau' guca belezrín benne' zaj zre̱'e̱ na' lau Pedro, na' gulé̱'e̱ le̱': ―Da li, tuze nácaquezu' nen bénnea' lawe' da xel-la' dxenné̱ chiu' dxunna bea na lue'.
MAT 26:74 Nadxa guzú lau Pedro dxuzría xi' cuínazqueze̱', ne dxuzétaje̱' Dios, dxenné̱': ―Quebe núnbeaqueza' benne' na'. Dxácate̱ na' gudxezre xjeaj.
MAT 26:75 Nadxa xeajsá lazre' Pedro ca da guzre Jesús le̱': Nédxudxa ca cuezre xjeaj, lue' wannáu' chunna lasa quebe núnbe'u neda'. Bedxúaj Pedro na', na' gudxézrele̱'e̱.
MAT 27:1 Gate guxaní', xúgute̱ benne' xíchaje̱ ca' chee̱ bxruze ca', ne benne' gula sina ca' chee̱ benne' judío ca' belune̱' tuze dizra' ájala xelune̱' chee̱ xelútie̱' Jesús.
MAT 27:2 Nadxa beleché̱'e̱ Le̱' nadxéaje̱', ne xeajlegu'e̱ Le̱' lau Poncio Pilato, benne' dxenná be'e waláz chee̱ xezr la xu Roma.
MAT 27:3 Nadxa Judas, bénnea' bdee̱' Jesús, gate guque bé'ene̱' ba buluzría xi'e̱ Jesús, bexíajele̱'e̱ne̱', na' bunézruje̱' da chi dxua dumí plata lau benne' xíchaje̱ ca' chee̱ bxruze ca', ne benne' gula sina ca'.
MAT 27:4 Dxe̱'e̱ le̱': ―Neda' be̱na' dul-la lawe' da bdea' tu benne' naque̱' du lazre' chee̱ gatie̱'. Belexeche̱be benne' xíchaje̱ ca': ―¿Bizra naca chee̱ntu' da nigá? Chiu' lue' naca da na'.
MAT 27:5 Nadxa Judas buzale̱' dumí na' lu xudau', ne bezé̱'e̱, na' xeajxelú'u du lbe̱'e̱.
MAT 27:6 Benne' xíchaje̱ ca' chee̱ bxruze ca' buluxutupe̱' dumí na', dxelenné̱': ―Quebe gaca cú'udxu dumí nigá naga xu'u dumí chee̱ xudau', lawe' da naca na lazruj chee̱ benne' dxute benne'.
MAT 27:7 Nadxa belune̱' tuze dizra' xelá'awe̱' tu xe̱zr la xu nen dumí na' da nazí le na xe̱zr la xu chee̱ we̱n xesu' zruaga, chee̱ gaca na tu lataj naga xelegache benne' zitu'.
MAT 27:8 Chee̱ le̱ na' nazí le xe̱zr la xu na' Xe̱zr La Xu Chee̱ Dxen ca lu zra na'a zra.
MAT 27:9 Caní guca na chee̱ gaca ca da gunná Jeremías, benne' bchálaje̱' waláz chee̱ Dios, gunné̱': “Gulequé̱'e̱ chi dxua dumí plata da naca na da zaca Le̱' da buluzúa benne' Israel.
MAT 27:10 Nen dumí na' belá'awe̱' xe̱zr la xu chee̱ benne' we̱n xesu' zruaga, cáte̱ze gunná be'e Xrana' neda'.”
MAT 27:11 Guleché̱'e̱ Jesús lau bénnea' dxenná be'e̱ waláz chee̱ xe̱zr la xu Roma, na' le̱' bche̱be̱' Jesús: ―¿Nacu' Lue' Wenná Bea chee̱ judío ca'? Jesús gunné̱': ―Ca' naca na, ca dxennáu' lue'.
MAT 27:12 Gate benne' xíchaje̱ ca' chee̱ bxruze ca', ne benne' gula sina ca' gulawe̱' zria chee̱ Jesús, na' Le̱' quebe bi beche̱be̱'.
MAT 27:13 Nadxa gunná Pilato, dxe̱'e̱ Jesús: ―¿Quebe dxennu' ca da dxelenná benne' caní chiu'?
MAT 27:14 Jesús quebe bi beche̱be̱'. Ca'an guca bebanne bénnea', ne quebe bezrela lazre̱' ájala nne̱'.
MAT 27:15 Gate dxu'u laní na', bénnea' dxenná be'e̱ na' xu'u lawe̱' dxusane̱' tu benne' we̱n da zrinnaj, nútete̱ze benne' dxelaca lazre' benne' ca'.
MAT 27:16 Ca lu zra na' xu'u tu benne' lizre xia, benne' wé̱nle̱'e̱ da zrinnaj, nazí le̱' Barrabás.
MAT 27:17 Ca zaj nazraga benne' ca' na', Pilato bche̱be̱' le̱': ―¿Nuzra dxaca lázrele gusana' neda'? ¿Gusana' Barrabás, che Jesús, bénnea' le̱' Cristo?
MAT 27:18 Caní gunné̱' lawe' da ba nézene̱' buludée̱' Jesús lawe̱' le̱' lawe' da dxelaque̱' xa lazre' chee̱ Jesús.
MAT 27:19 Dxácate̱ na' dxe' Pilato naga dxuchi'e̱ chee̱ bénneache, na' zru'ule̱' gusel-le̱' tu benne' xeaje̱zre̱' Pilato: “Quebe guchixre chiu' da naca chee̱ benne' xrlátaje na', lawe' da guneda' xe̱la ba dxe̱le, da bzúale̱'e̱ na neda' ste̱be ne̱ chee̱ Le̱'.”
MAT 27:20 Benne' xíchaje̱ ca' chee̱ bxruze ca', ne benne' gula sina ca' belegú'u xele̱' benne' ca' chee̱ xelenabe̱' la Barrabás, ne gate Jesús.
MAT 27:21 Bénnea' dxenná be'e̱ bchálajle̱ne̱' benne' ca' xecha lasa. Buche̱be̱' le̱': ―¿Nula benne' chupa caní dxaca lázrele le'e gusana'? Benne' zan ca' gulenné̱': ―Barrabás.
MAT 27:22 Pilato bche̱be̱' benne' ca': ―¿Bizra guna' chee̱ Jesús, benne' le̱' Cristo? Xúgute̱' belexeche̱be̱': ―Bde̱'e̱ xaga béguaj.
MAT 27:23 Nadxa gunná Pilato, dxe̱'e̱ benne' ca': ―¿Bizra da cale̱la nune̱'? Benne' ca' gulezú lawe̱' dxelebezre xe̱'e̱, gulenné̱': ―Bde̱'e̱ xaga béguaj. Bde̱'e̱ xaga béguaj.
MAT 27:24 Gate Pilato guque bé'ene̱' quebe bi séquene̱', na' benne' zan ca' dxeledábague̱' le̱', na' gunná bé'ene̱' bla' nisa, na' gudibe ne̱'e̱ láwela benne' ca', dxenné̱': ―Quebe bi dul-la nabaga' chee̱ xel-la' gute chee̱ benne' xrlátaje nigá. Naca na chee̱le le'e.
MAT 27:25 Xúgute̱ benne' ca' belexeche̱be̱': ―Netu', ne zrí'inentu' nabágantu' ca naca chee̱ xel-la' gute chee̱'.
MAT 27:26 Nadxa Pilato bsane̱' Barrabás, ne gunná bé'ene̱' beleché̱'e̱ Jesús chee̱ xelu'e̱ Le̱', na' bdee̱' Le̱' chee̱ te̱'e̱ xaga béguaj.
MAT 27:27 Nadxa benne' dxjaque̱' wedil-la chee̱ bénnea' dxenná be'e̱ guleché̱'e̱ Jesús, ne gulegú'e̱ Le̱' lu xu'u lawe'. Belexezraga ca naca benne' dxjaque̱' wedil-la naga ze̱ Jesús.
MAT 27:28 Belequé̱'e̱ zra lane̱', ne bulugácue̱' Le̱' tu ladxe' bzawe.
MAT 27:29 Buluzúe̱' xíchaje̱' tu da naca na zruze xaga xeche', ne buluguxre̱' Le̱' tu xaga ne̱'e̱ xabe̱la. Nadxa buluzú zribe̱' lau Jesús, ne belún le̱' chee̱', dxelenné̱': ―Gaca xabáa chiu', Wenná Bea chee̱ judío ca'.
MAT 27:30 Cá'anqueze buluzré̱'e̱ Le̱' zrene̱', na' gulequé̱'e̱ xaga da nuxru Jesús, ne guline̱' na xíchaje̱'.
MAT 27:31 Ca gudé belún le̱' chee̱ Jesús, na' belexegüe̱' ladxe' bzawe, na' buluxugácue̱' Le̱' zra lánaqueze̱'. Nadxa beleché̱'e̱ Le̱' chee̱ te̱'e̱ xaga béguaj.
MAT 27:32 Ca gusiá'que̱' na', belexezrague̱' tu benne' xe̱zre Cirene, le̱' Simón, na' gulenná bé'ene̱' le̱' bi'e̱ xaga béguaj chee̱ Jesús.
MAT 27:33 Ca'an guca belezrine̱' tu lataj nazí le na Gólgota, da dxennadxu, Lataj Chee̱ Zrita Xichaj Benne' Gate.
MAT 27:34 Na' bulunézruje̱' da xi'aj Jesús xrise uva wal-la da nachixre na da sla', san gate bxue Jesús ca naca na, quebe gu'e̱ na.
MAT 27:35 Ca bexuzre benne' dxjaca wedil-la buludé̱'e̱ Le̱' xaga béguaj, na' gulebéaje̱' da gaca bea na chee̱ xelexelé̱'e̱ ca naca zra lana Jesús. Ca'an guca guxá ca da gunná benne' bchálaje̱' waláz chee̱ Dios, gunné̱': “Belexelé̱'e̱ zra lana' le̱ze̱'. Gulebéaje̱' da gaca bea na.”
MAT 27:36 Nadxa gulebé'e̱ dxuluzuzre̱' Jesús.
MAT 27:37 Buluzríe̱' xichaj Jesús na' tu xiche da naxúaj na da nabague̱', da dxenná na: Jesús, wenná bea chee̱ judío ca'.
MAT 27:38 Cá'anqueze buludé̱'e̱ chupa benne' gubán tu zren nen Jesús le̱'e̱ xaga béguaj ca', tue̱' chalá'a xabe̱la, ne xetúe̱' chalá'a xéglala ga da' xaga béguaj chee̱ Jesús.
MAT 27:39 Benne' dxeledée̱' na' dxelún le̱' chee̱ Jesús. Dxulutá xíchaje̱',
MAT 27:40 ne dxelenné̱': ―¿Dxuchínnaju' xudau', na' lawe' chunna zraze xexunu' na? Bselá cuinu'. Che nacu' Zri'ine Dios, bexetaj le̱'e̱ xaga béguaj na'.
MAT 27:41 Cá'anqueze belún la chee̱' benne' xíchaje̱ ca' chee̱ bxruze ca', ne benne' dxuluxuzájle̱'e̱ da bdxixruj be'e Moisés, ne benne' xudau' fariseo ca', ne benne' gula sina ca'. Dxelé̱ ljwezre̱':
MAT 27:42 ―Bselé̱' benne' xula, san quebe dxezéquene̱' guselá cuine̱'. Che naque̱' Wenná Bea Chee̱ Xe̱zre Israel, dxal-la' xexétaje̱' le̱'e̱ xaga béguaj, na' chéajle̱dxu chee̱'.
MAT 27:43 Le̱' bxren lazre̱' Dios. Na'a guselá Dios Le̱' che da li dxaca lazre̱', lawe' da gunná Le̱' naque̱' Zri'ine Dios.
MAT 27:44 Cá'anqueze gubán ca' zaj da' xaga béguaj ca' nen Jesús gulenné̱' schanni' chee̱ Jesús.
MAT 27:45 Nadxa ca naca xe̱zr la xu na' guchul-la na. Guzú lau na wagubizra ca bzrinte̱ na ca dxedá chunna.
MAT 27:46 La ná'queze Jesús gudxezre xe̱'e̱, dxenné̱': ―Elí, Elí, ¿lama sabactani? (Da nigá zéaje̱ na: Dios chia', Dios chia', ¿bizr chee̱ na' nusán lazru' neda'?)
MAT 27:47 Bal-la benne' zaj zre̱'e̱ na' belenne̱' ca da gunná Jesús, na' gulenné̱': ―Benne' nigá dxenné̱' Elías, benne' bchálaje̱' waláz chee̱ Dios.
MAT 27:48 Dxácate̱ na' guzá' chegu tu benne' ca', xeajxrí'e̱ tu da dxezrupe nisa, na' ca bsebise̱' na nen nupe zichaj, na' bzue̱' na lawe' tu xaga, ne bzrigue̱' na dxu'a Jesús chee̱ xrupe̱' na.
MAT 27:49 Benne' xezica ca' gulenné̱': ―Le guxúe xca'. Quebe gunu' ca'. Nná'xquedxu che wida Elías guselé̱' Le̱'.
MAT 27:50 Xecha lasa gudxezre xa'a Jesús, na' gutie̱'.
MAT 27:51 Lu zra ná'queze ladxe' da ze̱ lu xudau' bdxuaj na chúpala, guzú lau na xíchaje̱, bedxúajte̱ na dxe'ela. Guzrú' xe̱zr la xu, na' xiaj xre ca' gulúzruqueze na.
MAT 27:52 Gulexalaj ba, na' belexebán benne' gate ca', benne' guléajle̱'e̱ da naca chee̱ Dios.
MAT 27:53 Ca gudé bebán Jesús, na' benne' caní belexedxúaje̱' lu xe̱dxu ba, ne belexexú'e̱ lu xe̱zre lá'azxa Jerusalén, naga benne' zan belelé'ene̱' benne' ca'.
MAT 27:54 Nadxa benne' dxenná be'e̱ lu wedil-la, ne benne' dxjaque̱' wedil-la, benne' ca' dxuluzuzre̱' Jesús, gate belelé'ene̱' guzrú', ne xezícadxa da ca'an gulaca, na' belezrébele̱'e̱, dxelenné̱': ―Da lítegaze benne' nigá guque̱' Zri'ine Dios.
MAT 27:55 Nu'ula zan zaj zre̱'e̱ na' dxelenné̱'e̱ zítu'la, nu'ula ca' xjácale̱ne̱' Jesús gate bezé̱'e̱ ga nababa Galilea, ne gulácale̱queze̱' Le̱'.
MAT 27:56 Ládujla nu'ula ca' xu'u María Magdalena, ne María xrna Jacobo ne José, ne xrna zri'ine Zebedeo ca'.
MAT 27:57 Ca guzú lau dxaca waxrinne, na' bla' tu benne' gunní'a le̱' José, benne' xe̱zre Arimatea, benne' dxéajle̱queze̱' chee̱ Jesús.
MAT 27:58 Benne' nigá guxíaje̱' xeajchálajle̱ne̱' Pilato, na' benabe̱' be̱l-la' dxen chee̱ Jesús. Pilato gunná bé'ene̱' xulunézruje̱' le̱' be̱l-la' dxen na'.
MAT 27:59 Nadxa José bequé̱'e̱ be̱l-la' dxen na', na' bchele̱' na tu ladxe' da naxadxe.
MAT 27:60 Nadxa gulu'e̱ Le̱' lu ba da naca na cheé̱queze José na', da be̱ne̱' tu lu xiaj. Gulexrúe̱' tu xiaj blaga zren dxu'a ba chee̱ Jesús, na' bezé̱'e̱ ga na'.
MAT 27:61 Gulezrá' María Magdalena, ne xetú María, zaj dxe'e̱ le nna' dxu'a ba na'.
MAT 27:62 Zeaj zra xula, da naca na zra ca gudé zra bulucueze̱', na' benne' xíchaje̱ ca' chee̱ bxruze ca', ne benne' xudau' fariseo ca' belezrine̱' lau Pilato.
MAT 27:63 Dxelé̱'e̱ le̱': ―Xran, dxeajsá lázrentu' ca naca da gunná benne' we̱n lazre' na' gate na' zue̱'. Gunné̱' gate gaca chunna zra, na' xebane̱' ládujla benne' gate.
MAT 27:64 Chee̱ le̱ na', bdixruj be'ene̱' benne' ca' xulubia xuluxue̱' ba chee̱' na' cadxa gaca chunna zra, chee̱ quebe xelelá' benne' ca' bsé̱dene̱' xedajlexebéaje̱' be̱l-la' dxen na' chizrela, na' te na' xuluzenne̱' bénneache ba bebane̱' ládujla benne' gate. Che ca'an gaca, na' dizra' we̱n lazre' bze̱be nigá gun na da zrinnaj zrendxa ca da nedxu.
MAT 27:65 Pilato guzre̱' benne' ca': ―Na' zaj zra' benne' dxjaque̱' wedil-la xuluzuzre̱' na. Le chjaca le'e, ne le guxúe xanne' ba na' ca se̱ lau séquele.
MAT 27:66 Nadxa xjaque̱', xeajlexúe̱' ba na'. Buluchiche̱' tu da gunna bea na che xalaj ba na', na' bulucá'ane̱' benne' dxjaca wedil-la ga na'.
MAT 28:1 Ca gudé chee̱ zra dxulupá'ana judío ca', ca za dxaní' zra nedxu, na' María Magdalena, ne xetú María na' xjaque̱' xeajlenné̱'e̱ ba chee̱ Jesús.
MAT 28:2 Chadite guzrú'le̱'e̱ na lawe' da betaj tu gubáz chee̱ xabáa chee̱ Xránadxu, na' bzrine̱' dxu'a ba na', ne bequé̱'e̱ xíajta'a zren na' da zrua na dxu'a ba na', na' gudxé'e̱ lawe na.
MAT 28:3 Gubáz na' dxácatite legale̱', ne naca chiche zra lane̱' ca bezxe'.
MAT 28:4 Gate belelé'e benne' dxjaque̱' wedil-la gubáz chee̱ xabáa na', na' belezrízene̱' xel-la' dxelezrebe, ne belexegá'ane̱' ca benne' gate ca'.
MAT 28:5 Nadxa gunná gubáz chee̱ xabáa na', dxe̱'e̱ nu'ula ca': ―Quebe zrébele. Nezda' dxexílajle Jesús, bénnea' gudé̱'e̱ xaga béguaj.
MAT 28:6 Quebe zue̱' nigá lawe' da ba bebane̱', cáte̱ze na' gunné̱'. Le da nna'le lu ba naga gulegú'e̱ Le̱'.
MAT 28:7 Le cheajxáquezega, le cheaje̱zre benne' ca' bsé̱dene̱' ba bebane̱' ládujla benne' gate, na' chéaje̱' ga nababa Galilea nédxudxa ca le'e. Na' lé'ele Le̱'. Da nigá naca na da nabaga'a xapa' le'e.
MAT 28:8 Nadxa nu'ula ca' besiá'que̱' dxu'a ba na', zeajxaca chégüe̱'. Dxelezrebe̱', ne dxelebene̱'. Zjaque̱' zeajlegue̱zre̱' benne' ca' bse̱de Jesús.
MAT 28:9 Dxácate̱ na' Jesús bchague̱' nu'ula ca', ne bgape̱' le̱' diuzre. Belezrine̱' lau Jesús, dxelúe lá'ane̱' Le̱', ne bulunide̱' ni'a Jesús.
MAT 28:10 Le̱' guzre̱' nu'ula ca': ―Quebe zrébele. Le chjaca, le cheajé̱zre bi bícha'dau' ca' dxal-la' chjaque̱' naga nababa Galilea. Na' xelexelé'ene̱' neda'.
MAT 28:11 Dxácate̱ zjaca nu'ula ca', na' benne' ca' dxjaca wedil-la gulu'e̱ xe̱zre, ne buluchálajle̱ne̱' benne' xíchaje̱ ca' chee̱ bxruze ca' ca da guca.
MAT 28:12 Benne' xíchaje̱ ca' buluchálajle̱ne̱' benne' gula sina ca' chee̱ xelune̱' tuze dizra'. Nadxa bulunézruje̱' benne' dxjaque̱' wedil-la dumí zrente̱.
MAT 28:13 Dxelenné̱': ―Le nna le'e belelá' benne' ca' bse̱de Jesús na' chizrela, dxácate̱ dxásele le'e, na' belexexú'e̱ be̱l-la' dxen chee̱'.
MAT 28:14 Che benne' dxenná be̱'e̱ na' xenne̱' da nigá, netu' guchálajle̱ntu' le̱', ne gucá'ana cháwentu' chee̱ quebe bi gaca chee̱le le'e.
MAT 28:15 Nadxa benne' dxjaque̱' wedil-la gulezí' lu ne̱'e̱ dumí na', na' besiá'que̱' belune̱' ca bache zaj nézene̱'. Da nigá naca na ca dxelenná judío ca' zéajte̱ lu zra na'a zra.
MAT 28:16 Nadxa xjaca benne' chinéaj ca' bse̱de Jesús, na' belezrine̱' lu xi'a naga ba guzre Jesús le̱'.
MAT 28:17 Gate belelé'ene̱' Jesús, na' bulucá'ana szrene̱' Le̱'. Bal-le̱' gulaca chupa lazre̱'.
MAT 28:18 Nadxa Jesús gubigue̱' naga zaj zra' benne' ca', na' guzre̱' le̱': ―Neda' ba nazí' lu na'a ca naca xel-la' dxenná bea xabáa, ne lu xe̱zr la xu nigá.
MAT 28:19 Chee̱ le̱ na' le chjaca, le cheajchálajle̱ benne' zaj zre̱'e̱ du ca naca xe̱zr la xu nigá, ne le cheajsé̱dene̱' ca naca da bsé̱deda' le'e. Le guchúe̱' le̱' nisa lu La Xra', ne lu La Zrí'ine̱', ne lu La Be' Lá'azxa.
MAT 28:20 Le gusé̱de-ne̱' xelaque̱' wezúa dizra' ca naca da ba gunná be'eda' le'e, na' neda' tu súale̱zqueza' le'e xúgute̱ zra cadxa cheajsé̱ chee̱ xe̱zr la xu nigá. ¡Ca'an gaca na!
MAR 1:1 Caní guzú lau dizra' chawe' ca naca chee̱ Jesucristo, Zri'ine Dios.
MAR 1:2 Bzrin lazre' da bzuaj Isaías, benne' bchálaje̱' waláz chee̱ Dios, ca da gunná Dios: ¡Le nna'xque nigá! Neda' dxesel-la' benne' gubáz chia', benne' cuía lawe̱' lau Lue'. Bénnea' gupé̱'e̱ neza naga teu' chee̱ ilúnbe'e bénneache Lue'.
MAR 1:3 Welénqueze chi'i benne' dxebezre xe̱'e̱ le̱'e̱ xixre' lawe' lataj. Dxenné̱': “Le gupá'a neza naga te Xránadxu lu xichaj lázrdaule. Le xebéaj li neza lase chee̱' ca'.”
MAR 1:4 Caní guca lawe' da bla' Juan le̱'e̱ xixre' lawe' lataj, na' bchálaje̱' dizra' chee̱ Dios, ne gunné̱' dxal-la' xeledxúa bénneache nisa, na' bchue̱' le̱' nisa, benne' ca' belexebí'i lazre̱' chee̱ gunite lau Dios dul-la da zaj nabague'.
MAR 1:5 Ca'an guca, guledxúaj bénneache zan lu xe̱zre Jerusalén, ne xúgute̱ xe̱zre ca' zaj nababa Judea, na' xjaque̱' naga zua Juan, na' Juan nigá bchue̱' benne' ca' nisa lu xe̱gu Jordán, benne' ca' gulexrúale̱pe̱' dul-la da zaj nabague'.
MAR 1:6 Caní guca zra lana Juan. Gucue̱' zra lane̱' ladxe' xicha zra camello, bia dxelebía bénneache, ne tu xpádxue̱' xide bchela le̱'e̱. Dxawe̱' biche xuaj, ne dxé'aje̱' bzrína'dau' chee̱ bézudau'.
MAR 1:7 Ca dxuchálaje̱' dizra' chee̱ Dios, dxenné̱': ―Gate te chia' neda', na' xida xetú benne', bénnea' nápadxe̱' xel-la dxenná bea ca neda'. Quebe naca chia' xáchua' chee̱ lechja' zrele̱'.
MAR 1:8 Da lítega, neda' bchua' le'e nisa. Le̱' gune̱' da zéaje̱ xel-la dxedxúa nisa nigá, guzúe̱' Be' Lá'azxa lu xichaj lázrdaule.
MAR 1:9 Ca da guca lu zra ca', guzá' Jesús lu xe̱zre Nazaret chee̱ ga nababa Galilea, na' bzrine̱' lau Juan. Juan nigá bchue̱' Jesús nisa lu xe̱gu Jordán.
MAR 1:10 Gate bdxuaj Jesús lu nisa, la blé'ete̱ne̱' naxalaj xabáa, ne blé'ene̱' betaj Be' Lá'azxa. Dxulé'e lawe̱' ca tu bgúgudu chiche, na' bzrine̱' ca li xichaj Jesús.
MAR 1:11 Ben tu chi'i da za xabáa, da dxenná na: ―Lue' nacu' Zri'ina'. Nazrí'ida' Lue', ne dxezaca ba lázrele̱da' Lue'.
MAR 1:12 Nadxa Be' Lá'azxa guché̱'e̱ Jesús le̱'e̱ xixre' lawe' lataj.
MAR 1:13 Guzúa Jesús le̱'e̱ xixre' lawe' lataj chua zra chua xe̱la. Na' bzrin Satanás da xriwe̱', ne guca lazre' na gun na baga Jesús dul-la. Guzúa Jesús naga zaj zra' be̱ xixre' be̱ snia, na' gubáz chee̱ xabáa chee̱ Dios gulácale̱ne̱' Jesús.
MAR 1:14 Ca gudé guxú'u Juan lizre xia, na' bzrin Jesús lu xe̱zre ca' zaj nababa Galilea, ne dxuchálajle̱ne̱' bénneache dizra' chawe' ca dxenná bea Dios.
MAR 1:15 Gunná Jesús: ―Ba bzrin zra. Ba zua báguze gate nna bea Dios xe̱zr la xu nigá. Chee̱ le̱ na', le xebí'i lazre', ne le cheajlí lazre' dizra' chawe' nigá.
MAR 1:16 Gate gudá Jesús dxu'a nísadau' chee̱ Galilea, na' blé'ene̱' Simón, ne Andrés, biche Simón na'. Benne' caní dxuluzale̱' xixruj bela chee̱' lu nísadau' lawe' da zaj naque̱' wezén bela.
MAR 1:17 Na' gunná Jesús: ―Le gun neda' tuze, na' guzúa' le'e gácale we̱n zrin chia'. Cheajxrile bénneache ca dxunle dxezenle bela.
MAR 1:18 La bulucá'anate̱' xixruj chee̱' ca', na' zjácale̱ne̱' Jesús.
MAR 1:19 Nadxa gudé Jesús xelate' ca na'la, na' blé'ene̱' Jacobo, ne Juan, benne' ca' zaj naque̱' zri'ine Zebedeo. Zaj zre̱'e̱ lu da dxedá lawe' nísadau', dxelexexune̱' xixruj bela chee̱' ca'.
MAR 1:20 Ca gunné̱ Jesús Jacobo, ne Juan, na' la bulucá'anate̱' xre̱' Zebedeo ne we̱n zrin chie̱' ca' zaj zre̱'e̱ lu da dxedá lawe' nísadau', na' zjácale̱ne̱' Jesús.
MAR 1:21 Gate gul-la na gulu'e̱ lu xe̱zre Capernaum, na' gate bzrin zra dxulupá'ana benne' judío ca', guxú'u Jesús lu xu'u naga dxelúe lá'ana judío ca' Dios, ne bsé̱dene̱' benne' ca' zaj zre̱'e̱ na'.
MAR 1:22 Belexebánene̱' ca naca da dxuse̱de Jesús le̱' lawe' da dxuchálaje̱' nen dute̱ xel-la dxenná bea, ne quegá ca dxuluchalaj benne' ca' dxuluxuzájle̱'e̱ da nadxixruj bea Dios.
MAR 1:23 Nadxa bla' tu benne' xu'e̱ be' xriwe̱' lu xu'u na', na' gudxezre xa'a na lu dxu'a bénnea'.
MAR 1:24 Gunná na: ―¿Bizra nápantu' chiu', Jesús, benne' Nazaret? ¿Za'u guzría xi'u netu'? Ba nézquezda' nu nacu'. Benne' Lá'azxa chee̱ Dios nacu'.
MAR 1:25 Jesús gudil-le̱' na, gunné̱': ―Zrize guzúa. Bedxúaj lu be̱l-la' dxen chee̱ benne' nigá.
MAR 1:26 Nadxa be' xriwe̱' na' bxrízele̱'e̱ na bénnea', ne gudxezre xá'ale̱'e̱ na, na' bedxúaj na.
MAR 1:27 Belexebánele̱'e̱ xúgute̱ benne' zaj zre̱'e̱ na', dxelé̱ ljwezre̱': ―¿Bizra dizra' cube da nigá? Dute̱ xel-la dxenná bea chee̱' dxenná be'ene̱' be' xriwe̱' ca', na' dxuluzúa na dizra' chee̱'.
MAR 1:28 La bzrílujte̱ dizra' chee̱ xel-la waca chee̱ Jesús du ca naca xe̱zre ca' zaj nababa Galilea.
MAR 1:29 Ca belexedxúaje̱' lu xu'u na' chee̱ judío ca', na' belezrine̱' lizre Simón, ne Andrés. Jacobo ne Juan dxelune̱' Jesús tu zren.
MAR 1:30 Lu xu'u na' de̱ xrna' zru'ula Simón, xu'e̱ da la. La buluchálajle̱te̱' Jesús ca dxaca chee̱ nu'ula nigá.
MAR 1:31 Le̱' la bé̱xrute̱' ne̱'e̱, bechise̱' le̱'. La bedxúajte̱ da la da xu'e̱, na' bseni'e̱ da gulawe̱'.
MAR 1:32 Ca gula guzré zra na', ca guzría gubizra, na' guleché̱'e̱ xúgute̱ benne' we̱' lau Jesús, ne benne' ca' zaj xu'e̱ be' xriwe̱'.
MAR 1:33 Ca naca benne' xe̱zre gulebigue̱' dxa xu'u naga zua Jesús.
MAR 1:34 Jesús bexune̱' zánete̱ benne' we̱' ca zaj naca xízrawe̱' da xu'u tu tue̱', ne bebéaje̱' zane' be' xriwe̱' zaj xu'u bénneache ca'. Quebe be̱'e̱ lataj be' xriwe̱' ca' xelenné̱ na lawe' da zaj núnbea na Le̱'.
MAR 1:35 Ca bebán Jesús bál-lala, ne nachúl-late̱, bedxúaje̱' guzé̱'e̱ zéaje̱' tu lataj naga nadache' bénneache, na' bchálajle̱ne̱' Dios.
MAR 1:36 Simón Pedro, ne benne' ca' zaj zrále̱ne̱' le̱' belexexílaje̱' Jesús.
MAR 1:37 Ca xeajlexraque̱' Jesús, na' gulé̱'e̱ Le̱': ―Xúgute̱ bénneache dxelexexílaje̱' Lue'.
MAR 1:38 Na' gunná Jesús: ―Chéajdxu xe̱xre walizre ca' chee̱ guchálajle̱na' benne' ca' xrtizra Dios. Chee̱ le̱ na' belja'.
MAR 1:39 Lu xu'u ca' naga dxelúe lá'ana judío ca' Dios, da ca' zaj zua tu tu xe̱zre ca' chee̱ ga nababa Galilea, bchalaj Jesús dizra' chee̱ Dios, ne bebéaje̱' xízrawe̱' xriwe̱' ca' da zaj xu'u benne' we̱' ca'.
MAR 1:40 Nadxa bzrin lau Jesús tu benne' dxé'ene̱' xízrawe̱' guzru', na' bzu zribe̱', ne guta' xuene̱' Le̱', dxenné̱': ―Che Lue' dxaca lazru', waca xexunu' neda'.
MAR 1:41 Jesús bexache lazre̱' le̱', na' bli ne̱'e̱, gudane̱' le̱'. Dxenné̱': ―Dxaca lazra'. Na'a dxexacu'.
MAR 1:42 Ca gunné̱' caní, la becuásate̱ xízrawe̱' na', na' begá'ane̱' chawe'.
MAR 1:43 Nadxa Jesús bsízrene̱' le̱', na' besel-le̱' le̱'.
MAR 1:44 Caní gunné̱': ―Quebe nu xu'u ca da guca chiu'. Guxíaj lau bxruze xeajlé'e cuinu', ne bnezruj ca naca da gunná be'e Moisés xelún benne' ca' xelexexaque̱'. Caní gunu' chee̱ xelelé'ene̱' ba bexacu' na'a.
MAR 1:45 Nadxa benne' nigá, ca bezé̱'e̱, guzú lawe̱' dxuchálajle̱ne̱' tu tu benne' ca guca chee̱' bexaque̱'. Ca'an guca, québedxa guca chu'u Jesús zaca bal-la lau lu xe̱zre. Begá'ane̱' le̱'e̱ xixre' lawe' lataj. Bénneache chee̱ xúgute̱ xe̱zre ca' belezrine̱' lau Jesús naga zue̱'.
MAR 2:1 Ca gudé chupa chunna zra, na' guxú'u Jesús xecha lasa lu xe̱zre Capernaum. Belénne bénneache zua Jesús tu lu xu'u.
MAR 2:2 La belezrágate̱ benne' zante̱ naga zua Jesús. Ca'an guca, québedxa guque lu xu'u, ne dxa xu'u. Bchalaj Jesús xrtizra Dios.
MAR 2:3 Na' belezrín tapa benne' lu xu'u naga zua Jesús, zaj nu'e̱ tu benne' quebe gaca se̱'e̱.
MAR 2:4 Lawe' da quebe gulezéquene̱' xelezrine̱' lau Jesús, lawe' da zaj zra' bénneache zante̱ ga na', na' gulesáluje̱' chju'u chee̱ xu'u naga zua Jesús. Na' bululétaje̱' da'a da zrua benne' na' quebe gaca se̱'e̱.
MAR 2:5 Lawe' da dxeque be'e Jesús ca dxeleajlí lazre' benne' ca' Le̱', na' gunné̱', dxe̱'e̱ bénnea' quebe gaca se̱'e̱: ―Zrí'ina'dau', ba nanite lau dul-la da nabagu'.
MAR 2:6 Zaj dxe'e bal-la benne' ga na', benne' dxuluxuzájle̱'e̱ da nadxixruj bea Dios, na' gulenné̱ lanze̱':
MAR 2:7 ―¿Bizr chee̱ na' dxuchalaj caní benne' nigá? Dxucá'ana dítaje̱' Xránadxu Dios. ¿Núzraqueze gaca gunite lau dul-la da zaj nabaga bénneache? Tuze Dios na'.
MAR 2:8 Dxeque be'e Jesús lu lázrdawe̱' ca dxelenné̱ lane̱' chee̱', na' gunné̱': ―¿Bizr chee̱ na' dxéquele caní?
MAR 2:9 ¿Bizra dizra' quebe naca na sté̱bela xapa' benne' nigá quebe gaca se̱'e̱? ¿Naca na ste̱be xapa' le̱', ba nanite lau dul-la nabagu'? Cabí. ¿U che ste̱be xapa' le̱', bexasa, becá'a da denu', ne bexíaj?
MAR 2:10 Na'a, chee̱ nézele le'e neda', Benne' Gulje̱' Bénneache, napa' xel-la dxenná bea lu xe̱zr la xu gunite lawa' dul-la da zaj nabaga bénneache. Na' gunná Jesús, dxe̱'e̱ bénnea'.
MAR 2:11 ―Lue' dxapa', bexasa, becá'a da'a chiu', ne bexíaj lizru'.
MAR 2:12 Ca'an guca, la bexásate̱', na' bequé̱'e̱ da'a chee̱', ne bedxúaje̱' lau xúgute̱ bénneache. Ca'an guca, xúgute̱ benne' ca' belexebánene̱', na' belúe lá'ane̱' Xránadxu Dios. Dxelenné̱': ―Cabata' ne lé'edxu gaca na ca guca da nigá.
MAR 2:13 Ca gudé na' bedxúaj Jesús zéaje̱' dxu'a nísadau', na' xúgute̱ bénneache lu xe̱zre ca' belezrine̱' lau Le̱'. Nadxa bsé̱dene̱' benne' ca' xrtizra Dios.
MAR 2:14 Ca gudé Jesús na', ble'ene' Leví, zri'ine Alfeo, dxe'e̱ lataj chee̱ wechizruj. Na' gunná Jesús, dxe̱'e̱ le̱': ―Be̱n neda' tuze. La guxásate̱ Leví, guxíajle̱ne̱' Jesús.
MAR 2:15 Ca' guca, gate gudxé' Jesús dxawe̱' lizre Leví, na' zánete̱ benne' wechizruj, ne benne' dul-la ca' gulebé'e̱ dxelágule̱ne̱' tu zren nen Jesús, ne benne' ca' dxusé̱dene̱'. Caní naca lawe' da zjácale̱ benne' zante̱ Jesús.
MAR 2:16 Nadxa benne' ca' dxuluxuzájle̱'e̱ da nadxixruj bea Dios, ne benne' fariseo ca', gate belelé'ene̱' ca da dxun Jesús, dxágule̱ne̱' benne' wechizruj ca', ne benne' dul-la ca', na' gulenné̱', dxelé̱'e̱ benne' ca' dxuse̱de Jesús: ―¿Bizra da nigá? Dxagu dxé'ajle̱ne̱' benne' wechizruj ca', ne benne' dul-la ca'.
MAR 2:17 Ca ben Jesús da nigá, gunné̱': ―Benne' chawe' ca' quebe dxelechínene̱' benne' dxexún bénneache. Benne' we̱' ca' dxelechínene̱' bénnea'. Quegá bla'a dxennéa' benne' xrlátaje ca'. Benne' dul-la ca' dxennéa'.
MAR 2:18 Ca guca lu zra na', belún gubasa benne' ca' dxuse̱de Juan, ne benne' ca' dxuluse̱de benne' fariseo ca'. Na' belezrín benne' ca', bedajlegue̱zre̱' Jesús: ―¿Bizr chee̱ na' dxelún gubasa benne' ca' dxuse̱de Juan, ne benne' ca' dxuluse̱de benne' fariseo ca', na' benne' ca' dxusé̱denu' Lue' quebe dxelune̱' gubasa? ¿Bizr chee̱ na'?
MAR 2:19 Na' Jesús guzre̱' benne' ca': ―¿Waca xelún gubasa benne' zaj zre̱'e̱ laní chee̱ wechaga na' dxácate̱ na' zua benne' wechaga na' nen le̱'? Dxácate̱ na' zua wechaga na' nen le̱' quebe gaca xelune̱' gubasa.
MAR 2:20 Wazrín tu zra gate dua benne' wechaga na'. Lu zra na' xelune̱' gubasa.
MAR 2:21 ’Quegá nu benne' xudé̱'e̱ tu ladxe' cube le̱'e̱ zradxu gula. Che ca'an gune̱', ladxe' cube da xudé̱'e̱ wazrube xu na da gula, na' wachézadxa na.
MAR 2:22 Cá'anqueze, quegá nu benne' que̱'e̱ xrise uva wal-la cube lu bzude xide gula. Che ca'an gune̱', na' xrise uva wal-la cube na' wacheza na bzude xide gula, na' walalaj xrise uva wal-la, ne cuía xi bzude xide na'. Xrise uva wal-la cube lu bzude xide cube dxal-la' chuzruj na.
MAR 2:23 Gate gudé Jesús naga ze̱ zrua' xtila zra dxulupá'ana benne' judío ca', ná'ate̱ na' benne' ca' dxuse̱de Jesús, ca zaj xu'e̱ neza, gulezú lawe̱' dxelíchaje̱' dau naga zria zrua' xtila.
MAR 2:24 Nadxa benne' fariseo ca' gulé̱'e̱ Jesús: ―Gunná'xque. ¿Bizr chee̱ na' dxelune̱' zrin da quebe dxal-la' xelune̱' zra dxupá'anadxu?
MAR 2:25 Jesús guzre̱' benne' ca': ―¿Cabata' ne gulábale ca da be̱n David gate gudune̱', ne bxázrjene̱' da gagu le̱', ne da gugawe̱' benne' ca' zaj zrále̱ne̱' le̱'?
MAR 2:26 Guxú'e̱ lu xu'u chee̱ Dios gate naca Abiatar bxruze blau, na' David gudawe̱' xeta xtila da dxelu'e̱ lau Dios, da quebe dxal-la' gagu benne' xula, san tuze bxruze ca' zaj naca chee̱' xelawe̱' na. Na' bnézrujte̱ David da gulagu benne' ca' zrále̱ne̱' le̱' chee̱ xeta xtila na'.
MAR 2:27 Cá'anqueze gunná Jesús, dxe̱'e̱ benne' ca': ―Dios gudíxruje̱' zra dxupá'anadxu chee̱ gaca ba neza chee̱ bénneache, quegá be̱ne̱' bénneache chee̱ xelune̱' zrin chee̱ zra dxupá'anadxu.
MAR 2:28 Chee̱ le̱ na', neda', Benne' Gulje̱' Bénneache, naca' xrane zra dxupá'anadxu.
MAR 3:1 Gate guxú'u Jesús da xula lu xu'u naga dxelúe lá'ana judío ca' Dios, ze̱ tu benne' biu nazrinnaj ne̱'e̱ ga na'.
MAR 3:2 Judío ca' buluzuzre̱' Jesús che xexune̱' benne' we̱' nigá lu zra dxulupá'ane̱', chee̱ xelezéquene̱' xelagu zria Jesús.
MAR 3:3 Nadxa gunná Jesús, dxe̱'e̱ benne' biu na' nazrinnaj ne̱'e̱: ―Guxasa. Guzé̱ laduj benne' caní.
MAR 3:4 Nadxa gunaba Jesús lau judío ca', dxe̱'e̱ le̱': ―¿Naca chee̱ zra dxupá'anadxu gundxu da xrlátaje, u che gundxu da cale̱la? ¿Waca gupá'adxu xel-la nabán chee̱ nu benne', u che guzría xidxu xel-la nabán chee̱'? Na' gulezúa zrize judío ca'.
MAR 3:5 Nadxa Jesús gunná zi'e̱ benne' ca'. Bewí'inene̱' ca naca xel-la lázrdau zide' chee̱'. Nadxa guzre̱' benne' nazrinnaj ne̱'e̱: ―Guchiluj na'u. Guchiluj ne̱'e̱, na' bexaca na.
MAR 3:6 Ca'an guca, belexedxúaj benne' fariseo ca', na' belune̱' xel-la wezría nen benne' ca' zaj de̱'e̱ Herodes ájala xelútie̱' Jesús.
MAR 3:7 Nadxa gucuasa Jesús laduj benne' ca', na' guxíaje̱' dxu'a nísadau' nen benne' ca' dxusé̱dene̱'. Zjácale̱ benne' zan ca' Jesús, benne' chee̱ xe̱zre ca' zaj nababa Galilea.
MAR 3:8 Gate belén bénneache ca naca da zren ca' da dxun Jesús, belezrín benne' zan lau Le̱', benne' chee̱ xe̱zre ca' zaj nababa Judea, ne benne' xe̱zre Jerusalén, ne benne' chee̱ xe̱zre ca' zaj nababa Idumea, ne benne' gusá'aque̱' xechalá'a xe̱gu Jordán, ne benne' gusá'aque̱' xe̱zre ca' zaj naxechaj na xe̱zre Tiro, ne xe̱zre Sidón.
MAR 3:9 Chee̱ le̱ na' gunná be'e Jesús benne' ca' dxusé̱dene̱' xulucueze̱' tu da dxedá lawe' nísadau' checa xuluchide' bénneache zan Le̱'.
MAR 3:10 Caní guca lawe' da bexún Jesús benne' zante̱, na' benne' we̱' ca' gulebigue̱' lau le̱' chee̱ cheajleté̱' Le̱'.
MAR 3:11 Gate be' xriwe̱' ca' zaj xu'u bénneache belelé'e na Jesús, na' buluzú zribe na lau Le̱', ne gulebezre xa'a na. Dxelenná na: ―Lue' nacu' Zri'ine Dios.
MAR 3:12 Jesús gudil-le̱' be' xriwe̱' ca' chee̱ quebe xululé'e na da naca Le̱'.
MAR 3:13 Ca gudé na' guluén Jesús tu lu xi'a, na' gunné̱' benne' ca' guca lazre̱'. Na' gulebigue̱' lau Le̱'.
MAR 3:14 Bchague̱' chazrinnu benne' xelune̱' Le̱' tuze, benne' sel-le̱' cheajlechálaje̱' xrtizra Dios.
MAR 3:15 Bzue̱' lu na' benne' caní xel-la dxenná bea chee̱ xelexexune̱' benne' we̱' ca', ne chee̱ xelexebéaje̱' be' xriwe̱' ca' lu be̱l-la' dxen chee̱ bénneache ca'.
MAR 3:16 Benne' chazrinnu caní zaj le̱': Simón, bénnea' bzua Jesús xetú le̱' Pedro,
MAR 3:17 ne Jacobo ne Juan, biche Jacobo, benne' ca' zaj naque̱' zri'ine Zebedeo. (Benne' chupa caní bzua Jesús le̱' Boanerges, da zéaje̱ na benne' wal-la ca guziu'.)
MAR 3:18 Bchague̱' Andrés ne Felipe, ne Bartolomé, ne Mateo, ne Tomás, ne Jacobo zri'ine Alfeo, ne Tadeo, ne Simón, benne' dxue lázrele̱'e̱ chee̱ lazrie̱',
MAR 3:19 ne Judas Iscariote, bénnea' xudée̱' Jesús lu na' benne' ca' dxeledábague̱' Le̱'. Ca gudé na' bzrin Jesús tu lu xu'u nen benne' ca' dxusé̱dene̱'.
MAR 3:20 Xecha lasa gulebiga bénneache zan naga zua Jesús, na' québedxa dxaca lataj xelawe̱'.
MAR 3:21 Gate belene benne' xrtia Jesús ca da dxun Le̱', na' belezrine̱' chee̱ xelexeché̱'e̱ le̱'. Dxelenné̱': ―Quebe zua xrlátaje xichaj lázrdawe̱'.
MAR 3:22 Cá'anqueze benne' ca' dxuluxuzájle̱'e̱ da nadxixruj bea Dios, benne' gusá'aque̱' Jerusalén, dxelenné': ―Benne' nigá zrague̱' Beelzebú, xrane be' xriwe̱' ca', na' ne̱ chee̱ xrane be' xriwe̱' ca' dxebéaje̱' be' xriwe̱' ca'.
MAR 3:23 Nadxa gunné̱ Jesús benne' ca', na' bchálajle̱ne̱' le̱' tu da dxulé'e na. Dxenné̱': ―¿Wazeque Satanás da xriwe̱' xebéaj cuine na?
MAR 3:24 Che benne' dxelenná bea xelexaque̱' chupa la'a, quebe díaqueze xel-la dxenná bea chee̱'.
MAR 3:25 Cá'anqueze che benne' zaj zre̱'e̱ tu lu xu'u xelaque̱' chupa la'a, quebe xeledíaqueze benne' zaj zre̱'e̱ lu xu'u na'.
MAR 3:26 Cá'anqueze, che Satanás tábaga cuínaqueze na, ne xexaca na chupa la'a, quebe díaqueze na. Wadéqueze chee̱ na.
MAR 3:27 ’Quebe nu seque chu'u lizre benne' wal-la chee̱ cuane̱' da de̱ chee̱' che quebe guchéaje̱' le̱' nédxula. Nadxa seque̱' cuane̱' da de̱ lizre benne' wal-la na'.
MAR 3:28 ’Da li dxennía', dxapa' le'e: Xúgute̱ dul-la da dxelún bénneache, ne dizra' schanni' da dxelenné̱', ájate̱ze zaj naca na, gunite láuqueze Dios chee̱'.
MAR 3:29 Na'a, ca naca nútete̱ze benne' nne̱' schanni' chee̱ Be' Lá'azxa, cabata' gunite lau Dios chee̱ bénnea'. Webía xí'queze̱'.
MAR 3:30 Caní gunná Jesús lawe' da dxelenné̱': ―Zraga Jesús da xriwe̱'.
MAR 3:31 Ca gudé na' bzrin xrna Jesús nen bi biche̱' ca'. Gulebeze̱' chalé'ajla, na' gulesel-le̱' tu benne' nne̱' Jesús.
MAR 3:32 Benne' ca' zaj zre̱'e̱ cuita Jesús gulé̱'e̱ le̱': ―Xrna'u ne bi bichu' ca' zaj ze̱' chalé'ajla, dxelenné̱' Lue'.
MAR 3:33 Gunná Jesús, dxe̱'e̱ benne' ca': ―¿Nézele nuzra na' xrna'a, ne bi bicha' ca'?
MAR 3:34 Nadxa gunná' Jesús benne' ca' zaj zre̱'e̱ cuita Le̱', na' gunné̱': ―Benne' caní zaj zrále̱ne̱' neda' nigá zaj naque̱' ca xrnáqueza', ne bi bicha' ca'.
MAR 3:35 Caní naca na lawe' da xúgute̱ benne' dxelune̱' ca da dxaca lazre' Dios, benne' caní zaj naque̱' bi bicha' ca', ne bi zana' ca', ne xrna'a.
MAR 4:1 Xetú lasa guzú lau Jesús dxusé̱dene̱' benne' ca' dxu'a nísadau', na' belezraga bénneache zante̱ naga zue̱'. Naxánle̱'e̱ benne', na' be̱n na ba xen guxú'u Jesús tu lu da dxedá lawe' nísadau' da dxe na', na' gudxé'e̱ lu'ule da dxedá lawe' nísadau', na' bénneache zan ca' gulezré̱'e̱ dxu'a nísadau'.
MAR 4:2 Nadxa bchalaj Jesús da dxululé'e na, na' bsé̱dene̱' benne' ca' da zante̱. Ca dxusé̱dene̱' benne' ca', na' bchálaje̱' caní:
MAR 4:3 ―Le xene da nigá. Tu benne' dxaza dxa'ana zéaje̱' guza.
MAR 4:4 Ca zéaje̱' dxaze̱', na' xeajlechaze bal-la bínnedu ca' dxu'a neza. Na' belezrín bxinne, ne guláguba' bínnedu caní.
MAR 4:5 Xezícadxa bínnedu ca' xeajlechaze na lu xiaj naga quebe dé̱teca xu. Bínnedu caní belezría na lawe' da quebe dé̱teca xu.
MAR 4:6 Ca bdxuaj gubizra, na' bzezxe na le̱ na, na' lawe' da quebe zaj nun lue na lu da situj, gulebizre na.
MAR 4:7 Xezícadxa bínnedu ca' xeajlechaze na naga dxelezría xixre' xeche'. Xixre' xeche' caní gulegúladxa na ca le̱ na, na' bululule na le̱ na, na' quebe gulebía na da gágudxu.
MAR 4:8 Xezícadxa bínnedu ca' xeajlechaze na lu xu be̱be. Belezría na cháwedau', na' belegula na, ne gulezríale̱'e̱ na da gágudxu. Bal-la na gulebía na chi dxua tu tu na. Xebal-la na gulebía na ga xun tu tu na. Xebal-la na gulebía na tu gaxúa tu tu na.
MAR 4:9 Gunnadxa Jesús, dxe̱'e̱ benne' ca': ―Che nu benne' zua nague̱', dxal-la' xenne̱' da nigá.
MAR 4:10 Ca gudé na', ca gucuasa Jesús cuita benne' zan ca', na' gulenaba benne' ca' zrále̱ne̱' benne' ca' dxuse̱de Jesús bi zéaje̱ ca naca da dxulé'e nigá.
MAR 4:11 Na' gunná Jesús, dxe̱'e̱ benne' ca': ―Dios dxunne̱' le'e lataj nézele ca naca chee̱ da nagache chee̱ da dxenná bea Le̱'. Na'a, ca naca chee̱ benne' ca' zaj zre̱'e̱ cúzrela, dxuchálajle̱na' le̱' dízra'ze da dxulé'e na.
MAR 4:12 Caní dxuna' lawe' da dxelenné̱'e̱, na' quebe dxelaca lazre̱' xelelé'ene̱'. Dxelenne̱', na' quebe dxelaca lazre̱' xeléajni'ine̱', chee̱ quebe xelexebí'i lazre̱', na' chu'u xel-la wenite lau chee̱ dul-la da za nabague̱'.
MAR 4:13 Na' gunnadxa Jesús: ―¿Quebe dxéajni'ile ca naca da dxulé'e nigá? ¿Ájalaqueze chéajni'ile xezícadxa dizra' ca' da dxululé'e na?
MAR 4:14 Benne' dxaza dxá'ane̱' naque̱' benne' dxuchálaje̱' xrtizra Dios.
MAR 4:15 Bal-la bénneache zaj naque̱' ca bínnedu ca' xeajlechaze na dxu'a neza. Dxelenne̱' xrtizra Dios, na' ca dxedé na', dxezrín Satanás, na' dxucuasa na dizra' nigá da zua na xichaj lázrdau benne' ca'.
MAR 4:16 Benne' xula ca' zaj naque̱' ca bínnedu ca' xeajlechaze na lu xiaj. Ca dxelenne̱' xrtizra Dios, na' dxelebéle̱'e̱ne̱' dxelezi'e̱ na.
MAR 4:17 Tu chí'idauze dxelune̱' caní. Gate dxeledée̱' xel-la zi', ne zua da dxedábaga le̱' ne̱ chee̱ xrtizra Dios, na' dxelexecuase̱' lawe' da quebe guxaze xrtizra Dios lú'ulete̱ xichaj lázrdawe̱' ca guca chee̱ bínnedu ca' quebe belún lue na lu xu situj.
MAR 4:18 Benne' xula ca' zaj naque̱' ca bínnedu ca' xeajlechaze na ládujla xixre' xeche' ca'. Dxelenne̱' xrtizra Dios.
MAR 4:19 Lawe' da dxelebe'dxe̱' gunne xue da naca chee̱ xe̱zr la xu nigá dxezí xe̱ xel-la gunní'a le̱', na' dxelezá lazre̱' da zante̱ da dxelelé'ene̱'. Xúgute̱ da caní dxelú'u na xichaj lázrdau benne' caní, na' xuluxunite na dizra' da guxú'u xichaj lázrdawe̱', na' quebe gaca gun na ca da dxal-la' gun dizra' nigá.
MAR 4:20 Zaj zra' benne' dxelenne̱' xrtizra Dios, ne dxelezí' lu ne̱'e̱ na. Bal-le̱' zaj naque̱' ca bínnedu ca' gulebía na chi dxua tu tu na. Benne' xula zaj naque̱' ca bínnedu ca' gulebía na ga xun tu tu na. Benne' xula zaj naque̱' ca bínnedu ca' gulebía na tu gaxúa tu tu na.
MAR 4:21 Cá'anqueze gunná Jesús, dxe̱'e̱ benne' ca': ―¿Gúadxu xi', ne guzúadxu na zran xi'ina u che zran ga dxásedxu? Quebe gundxu ca', san guzúadxu na sibe chee̱ gusení na.
MAR 4:22 Xúgute̱ da nagache gulé'e lawe na, na' xúgute̱ da xu'u xichaj lázrdaudxu wénqueze na.
MAR 4:23 Che nu benne' zua nague̱', dxal-la' xenne̱' da nigá.
MAR 4:24 Cá'anqueze gunná Jesús: ―¡Le xene xanne' ca da dxénele! Ca da dxudxíxrele, nen le̱ na' gudxíxrequeze Dios chee̱le, na' gúnnadxe̱' le'e dxénele.
MAR 4:25 Caní gaca na, benne' nape̱' da naca chee̱ xrtizre̱'e, gunézrujdxe̱' chee̱', na' benne' quebe bi nape̱', ca da dauze da nape̱' xecá'ate̱' na.
MAR 4:26 Na' gunnáqueze Jesús: ―Da dxenná bea Dios naca na ca da dxaca gate tu benne' dxaze̱' bínnedu ca' lu xu.
MAR 4:27 Dxásie̱' chizrela, dxase̱' te zra, na' bínnedu caní dxelezría na, ne dxelegula na, ne quegá nézene̱' ájala.
MAR 4:28 Dxaca na caní lawe' da nácaqueze ca da dxun xe̱zr la xu. Nedxu dxebía na xrlegue na, nadxa za dau, na' bzé̱bete̱ dxebía na bínnedu ca' lu dau.
MAR 4:29 Gate ba gulegula xíxredu caní, na' dxechugue̱' na lawe' da ba bzrin zra xequé̱'e̱ na.
MAR 4:30 Cá'anqueze gunná Jesús: ―¿Ájala gutil-la lé̱bedxu da dxenná bea Dios, u che bila dizra' da dxulé'e na cá'adxu da gutil-la lé̱bedxu le̱ na?
MAR 4:31 Naca na ca tu binne mostaza da dxázadxu lu xu. Bínnedu nigá nácadxa cuide' ca da zaj nnita lu xe̱zr la xu.
MAR 4:32 Gate ba gúzadxu na dxegula na, na' dxaca na da zrendxa ca xixre' ca' da zaj naca na ba dagu, na' dxebía zruze na zren, na' dxácate̱ dxelebía bxínnedu ca' zran zrula chee̱ na.
MAR 4:33 Caní bse̱de Jesús benne' ca' xrtizra Dios, na' bchálaje̱' zánete̱ da dxululé'e na caní, cadite̱ guléajni'ine̱'.
MAR 4:34 Quebe bchálaje̱' da xula. Tuze dizra' da dxulé'e na bchálajle̱ne̱' benne' ca'. Bzájla'adxe̱' ca naca na benne' ca' dxusé̱dene̱'.
MAR 4:35 Lu zra ná'queze, ca gul-la chizrela, na' gunná Jesús, dxe̱'e̱ benne' ca' dxusé̱dene̱': ―Chéajdxu xecha la'a nísadau'.
MAR 4:36 Besá'aque̱' naga zaj zra' benne' zan ca', na' guleché̱'e̱ Jesús lu da dxedá lawe' nísadau' naga ba dxé'queze̱', na' gulennita xezícadxa da ca' dxeledá lawe' nísadau' ca' naga zaj zra' benne', na' xjácale̱ne̱' Le̱'.
MAR 4:37 Nadxa guzú lau dxaca tu be' bdunu' lu nísadau' na', na' dxu'ute̱ nisa lu da dxedá lawe' nísadau'. Caní guca guzú lau dxezrá nisa lu da dxedá lawe' nísadau'.
MAR 4:38 Jesús de̱' dxasie̱' lu xcúgüe̱' naga nácadxa sibe lu da dxedá lawe' nísadau'. Na' bulusebane̱' Jesús, dxelé̱'e̱ Le̱': ―Benne' wese̱de, ¿quebe dxe'u gunne xue wátedxu nate ca na'a?
MAR 4:39 Nadxa guxasa Jesús, na' bchálajle̱ne̱' be' bdunu', ne nísadau'. Dxenné̱': ―¡Gudxé zri'! ¡Zrize guzúa! Gudxé zri' be' bdunu', na' nísadau' guzúa zri na.
MAR 4:40 Nadxa gunná Jesús, dxe̱'e̱ benne' ca' dxusé̱dene̱': ―¿Bizr chee̱ na' dxezrébele̱'e̱le le'e? ¿Quebe dxeajlí lázrele Dios?
MAR 4:41 Belezrébele̱'e̱dxe̱', ne dxelé̱ ljwezre̱': ―¿Núzraqueze benne' nigá? Dxuluzúa dizra' be' bdunu', ne nísadau' chee̱'.
MAR 5:1 Bezrín Jesús, tu zren nen benne' ca' dxusé̱dene̱' xecha la'a nísadau' lu xe̱zr la xu chee̱ benne' Gadara ca'.
MAR 5:2 Ca bedxúaj Jesús lu da dxedá lawe' nísadau', na' bzrin tu benne' xu'e̱ be' xriwe̱' naga zua Jesús. Bedxúaje̱' lu bluaj naga zaj nagache benne' gate ca'.
MAR 5:3 Benne' biu nigá zúaqueze̱' lu bluaj na'. Quebe nu dxezúe guchéaj le̱be' chalásaze, lácala nu guchéaj le̱be' nen du xia.
MAR 5:4 Zane' lasa buluchéaje̱' le̱be' nen du xia na'abe', ne ní'abe'. Bzúzrujbe' du xia ca', na' quegá nu guzeque nna bé'ene̱' le̱be'.
MAR 5:5 Dxedáquezebe' te zra chizrela lu xi'a ca', ne lu bluaj ca' naga zaj nagache benne' gate. Dxebezre xa'abe', ne dxeajcházebe' lu xiaj ca', dxun we̱' cuínabe'.
MAR 5:6 Gate ble'ebe' zítu'la ba za Jesús, na' guzá chégube', xeajzú zríbebe' lau Le̱'.
MAR 5:7 Gunné̱ zizraj be' xriwe̱' xu'ube', dxe̱ na Jesús: ―¿Bizra dxaca chiu' nen neda', Jesús, Zri'ine Dios szrente̱? Lu La Xránadxu Dios, dxata' xueda' Lue', quebe gudéu' neda' xel-la zi'.
MAR 5:8 Caní gunná na lawe' da gunná Jesús, dxe̱'e̱ na: ―Lue', da xriwe̱', bedxúaj lu be̱l-la' dxen chee̱ benne' nigá.
MAR 5:9 Nadxa gunaba Jesús, dxe̱'e̱ na: ―¿Bi leu'? Na' beche̱be na: ―Da Zan lea', lawe' da naxantu'.
MAR 5:10 Guta' xue na Jesús chee̱ quebe xesel-le̱' na, ne quebe gucuase̱' na zitu' lu xe̱zr la xu na'.
MAR 5:11 Zaj zra' gagu lu xi'a na' tu cue' cuche zaj zraba' dxeláguba'.
MAR 5:12 Gulata' xue be' xriwe̱' ca' Jesús, gulenná na: ―Besel-la netu' lu cuche ca'. Be̱nna lataj chú'untu' le̱ba'.
MAR 5:13 Nadxa Jesús be̱'e̱ na lataj. Na' be' xriwe̱' ca' beledxúaj na lu bénnea', na' gulú'u na cuche ca'. Zaj nácaba' ca galaj gaxúa cuche ca', na' buludxixre cuínaba' tu chejéa. Xeajlecháste̱ba' lu nísadau', ne gulátete̱ba' lu nisa na'.
MAR 5:14 Benne' ca' dxuluxúe̱' cuche ca' buluxuzrúnnuje̱', na' xeajlezenne̱' benne' zaj zre̱'e̱ lu xe̱zre, ne benne' zaj zre̱'e̱ le̱'e̱ xixre'. Na' belezrín benne' ca' naga zua Jesús, benne' ca' belenne̱' ca da ba guca.
MAR 5:15 Gate belezrín benne' ca' naga zua Jesús, na' belelé'ene̱' bénnea' guxú'ube' be' xriwe̱' ca', dxe'ebe' ga zua Jesús, nácube' tu ladze', ne ba bezúa xrlátaje lu xichaj lázrdaube', na' gulezrebe̱'.
MAR 5:16 Benne' ca' belelé'e ca naca da guca chee̱ benne' guxú'ube' be' xriwe̱' ca', ne ca guca chee̱ cuche ca' buluchálaje̱' chee̱ da ba guca.
MAR 5:17 Nadxa benne' xe̱zre ca' gulata' xuene̱' Jesús xedxúaje̱' lu xe̱zr la xu chee̱'.
MAR 5:18 Ca bexú'u Jesús lu da dxedá lawe' nísadau', na' bénnea' guxú'ube' be' xriwe̱' ca' guta' xuebe' Jesús gu'e̱ lataj chéajle̱be' Le̱'.
MAR 5:19 Quebe be̱' Jesús le̱be' lataj, san dxe̱'e̱ le̱be', gunné̱': ―Bexiaj lizru', ne xeajchálajle̱ xrtiu' ca' ca naca da zren ca' da be̱n Xranu' nen lue', ne ca bexache lazre̱' lue'.
MAR 5:20 Nadxa bezá'abe' zexíajbe', ne guzú laube' dxuchálajbe' lu xe̱zre ca' zaj nababa Decápolis ca naca da zren da be̱n Jesús nen le̱be'. Belexebánele̱'e̱ xúgute̱ benne' zaj zre̱'e̱ xe̱zre ca'.
MAR 5:21 Begüén Jesús lu da dxedá lawe' nísadau', na' bezrine̱' xecha la'a nísadau'. Belezrín benne' zan naga ze̱', na' Le̱' begá'ane̱' dxu'a nísadau'.
MAR 5:22 Ca'an guca bzrin tu benne' xíchaje̱ chee̱ xu'u naga dxelúe lá'ana judío ca' Dios, benne' le̱' Jairo. Gate blé'ene̱' Jesús, na' bzu zribe̱' zran ni'e̱.
MAR 5:23 Guta' xuene̱' Jesús, dxe̱'e̱ Le̱': ―¡Bi nu'ula chia' ba dxátebe'! ¡Gudá, bze̱ na'u le̱be' chee̱ xexácabe', ne xaca banbe'!
MAR 5:24 Nadxa guxíajle̱ Jesús bénnea', na' bénneache zan xjácale̱ne̱' Le̱', ne dxuluchítee̱' Le̱'.
MAR 5:25 Ládujla bénneache ca' za tu nu'ula quebe chawe' zue̱', ba zeaj chazrinnu iza nape̱' we̱' dxen.
MAR 5:26 Da zren da bulusaca benne' dxelexún bénneache ca' nu'ula nigá, na' bache be̱n dítaje̱' xúgute̱ da nape̱'. Quegá bi gúcale̱ na le̱', san bzáladxa we̱' chee̱'.
MAR 5:27 Gate ben nú'ula' dxuluchalaj bénneache ca naca chee̱ Jesús, na' bzrine̱' cúzrula Jesús ládujla bénneache, na' xeajté̱' zra lana Jesús.
MAR 5:28 Caní be̱ne̱' lawe' da gunné̱' lu xichaj lázrdawe̱': Cun cheajtaza' zra lana Jesús, na' xexácatea'.
MAR 5:29 La gulézate̱ xel-la we̱' chie̱', ne la guque bé'ete̱ne̱' ba bexaca be̱l-la' dxen chee̱' chee̱ xízrawe̱' na'.
MAR 5:30 Gúquebe'e Jesús be̱n zrin xel-la waca chee̱'. Chee̱ le̱ na' bexéchaje̱', dxenné̱'e̱ bénneache ca', na' gunábene̱' le̱': ―¿Nuzra bedajtá zra lana'?
MAR 5:31 Nadxa benne' ca' dxuse̱de Jesús gulé̱'e̱ Le̱': ―Dxelé'equeznu' bénneache zan dxuluchíe̱' Lue'. ¿Bizr chee̱ na' dxenabu': “Nuzra bedajtá neda'?”
MAR 5:32 Jesús guzúe̱' dxenné̱'e̱ cuite̱' chee̱ lé'ene̱' nua' bedajtá Le̱'.
MAR 5:33 Nadxa guxíaj nu'ula nigá, dxezrízie̱' dxezrebe̱' lawe' da nézene̱' ca da ba guca chee̱', na' bzu zribe̱' lau Jesús, na' gunné̱' ca naca da li.
MAR 5:34 Nadxa gunná Jesús, dxe̱'e̱ nu'ula': ―Bi nú'uladau', ba bexacu' lawe' da guxeajlí lazru' neda'. Bexíaj, cútudxa zrebu'. Ba bexácate̱quezu' chee̱ xízrawe̱' da guzxacu'.
MAR 5:35 Ne dxuchálajte̱ Jesús gate belezrín benne' gusá'aca lizre benne' xíchaje̱ chee̱ xu'u naga dxelúe lá'ana judío ca' Dios, na' gulé̱'e̱ xra nú'uladau' na': ―Bi nú'uladau' chiu' ba gútebe'. ¿Bizr chee̱ na' dxunu' zé̱dedxa benne' dxuse̱de nigá?
MAR 5:36 Gate Jesús benne̱' ca da gulenná benne' caní, dxe̱'e̱ benne' xíchaje̱ chee̱ xu'u na', gunné̱': ―Quebe zrebu'. Guxeajlí lazre' neda'.
MAR 5:37 Quebe be̱'e̱ lataj chjácale̱ bénneache zan ca' Le̱'. Tuze be̱'e̱ lataj gusá'acale̱ Pedro, ne Jacobo, ne Juan, biche Jacobo nigá, nen Le̱'.
MAR 5:38 Ca belezrine̱' lizre benne' xíchaje̱ na', na' ble'e Jesús bénneache dxelún schaga. Dxelebezre benne', ne dxelebezre xa'ate̱'.
MAR 5:39 Nadxa guxú'u Jesús lu xu'u, na' dxe̱'e̱ benne' ca', gunné̱': ―¿Bizr chee̱ na' dxunle schaga? ¿Bizr chee̱ na' dxebézrele? Quegá nate bidau' nu'ula. Dxásezebe'.
MAR 5:40 Belún lala benne' ca' chee̱'. Nadxa Jesús bebéaje̱' xúgute̱ benne' ca', na' guché̱'e̱ xrabe', ne xrna bidau' nigá, ne benne' ca' zjácale̱ne̱' Le̱', na' guxú'e̱ naga de̱ nú'uladu na'.
MAR 5:41 Bé̱xrue̱' na'be', ne guzre̱' le̱be': ―Bi nú'uladau', lue' dxapa': ¡Guxasa!
MAR 5:42 La bexásate̱ nú'uladu na', na' guzáte̱be' lawe' da ba zéajbe' chazrinnu iza. Na' benne' ca' zaj zre̱'e̱ lu xu'u na' belezrébele̱'e̱.
MAR 5:43 Jesús gunná bé'ene̱' benne' ca' chee̱ quebe nu xelé̱'e̱ ca da be̱ne̱'. Nadxa guzré̱' benne' ca' xulugawe̱' nú'uladu na'.
MAR 6:1 Jesús bezé̱'e̱ naga zue̱', ne bezrine̱' lazrie̱', na' benne' ca' dxusé̱dene̱' xjácale̱ne̱' Le̱'.
MAR 6:2 Ca gula zra dxulupá'ana judío ca', na' bezú lau Jesús dxusé̱dene̱' benne' ca' zaj zre̱'e̱ lu xu'u naga dxelúe lá'ana judío ca' Dios. Bénneache zan belenne̱' chee̱', ne belexebánene̱', dxelenné̱': ―¿Gazra bse̱de benne' nigá ca nácate̱? ¿Bizra xel-la sina da nunezruj Le̱', ne xel-la waca zren caní da dxune̱'?
MAR 6:3 ¿Quegá benne' nigá gubizre xaga, zri'ine María, na' benne' biche̱' ca' zaj naque̱' Jacobo, ne José, ne Judas, ne Simón, na' nu'ula zane̱' ca' cá'anqueze zaj zrále̱ne̱' dxi'u? Chee̱ le̱ na' quebe guléajle̱'e̱ chee̱ Jesús.
MAR 6:4 Na' gunná Jesús, dxe̱'e̱ benne' ca': ―Xúgute̱ benne' dxelape̱' ba lá'ana tu benne' dxuchálaje̱' waláz chee̱ Dios, san benne' walázr chee̱' ca', ne benne' xrtie̱' ca', ne benne' zaj zre̱'e̱ xu'u lizre̱' quebe dxelape̱' le̱' ba lá'ana.
MAR 6:5 Chee̱ le̱ na' quebe be̱n Jesús lazrie̱' na' netú xel-la waca zren. Tuze bexune̱' bál-laze benne' we̱' gate na' guxrúa ne̱'e̱ xichaj benne' ca'.
MAR 6:6 Bebane Jesús lawe' da quebe guléajle̱'e̱ chee̱'. Ca gudé na' bedé Jesús xecha lasa xé̱zredu ca' zaj nnita gáguze, na' bsé̱dene̱' benne' zaj zre̱'e̱ ga na'.
MAR 6:7 Gunné̱' benne' chazrinnu dxusé̱dene̱', ne guzú lawe̱' dxesel-le̱' le̱' chupa weaje̱', ne bnézruje̱' le̱' xel-la waca xulucuase̱' be' xriwe̱' ca' lu be̱l-la' dxen chee̱ bénneache ca'.
MAR 6:8 Gunná bé'ene̱' le̱' quebe bi xelu'e̱ chee̱ la neza, con tuze xaga da xuluchiche̱'. Quebe xelu'e̱ xixruj xeta, ne xeta, ne dumí.
MAR 6:9 Waca xululéaje̱' zrele̱', ne xelácue̱' tu cueze zra lane̱'.
MAR 6:10 Gunnadxa Jesús, dxe̱'e̱ benne' ca': ―Gate na' chu'ule le'e tu lu xu'u chee̱ benne', waca xegá'anate̱le lizre bénnea' ca zrindxa zra xezá'ale lu xe̱zre na'.
MAR 6:11 Che zrinle tu lu xe̱zre naga quebe xuluxé lawe̱' le'e, ne quebe xelénene̱' chee̱le, waca xezá'ale, na' cuíbete̱le bxrte xu da dxedá' ní'ale. Da nigá gaca na tu da dxulé'e na zaj nabaga benne' xe̱zre na' zria, benne' dxeledábaga' le'e. Da li dxennéa', lu zra guchi'a Dios chee̱ bénneache, waxache' gácadxa da ba xa' da xeledé benne' xe̱zre Sodoma, ne benne' xe̱zre Gomorra quézcala da xeledé benne' xe̱zre ca' naga quebe buluzé̱ nague̱' chee̱le.
MAR 6:12 Nadxa gusá'aca benne' ca' dxuse̱de Jesús, na' buluchálajle̱ne̱' bénneache chee̱ xelexebí'i lazre̱'.
MAR 6:13 Cá'anqueze belexebéaje̱' zánete̱ be' xriwe̱' ca' lu be̱l-la' dxen chee̱ bénneache ca', na' gulegüe̱'e̱ da za zane' benne' we̱', na' belexexaque̱'.
MAR 6:14 Na' ben wenná bea Herodes ca naca da zren ca' da dxun Jesús lawe' da guzé̱ dizra' chee̱'. Bal-la benne' dxelenné̱': ―Juan, benne' bchue̱' bénneache nisa, bache bebane̱' ládujla benne' gate, na' chee̱ le̱ na' nape̱' xel-la waca zren nigá.
MAR 6:15 Benne' xula dxelenné̱': ―Elías, bénnea' bchálaje̱' waláz chee̱ Dios benne' nigá. Benne' xula dxelenné̱': ―Nácalje̱' bénnea' dxal-la' xelá' guchálaje̱' waláz chee̱ Dios, che nácalje̱' benne' gulasa, benne' bchálaje̱' waláz chee̱ Dios.
MAR 6:16 Ca ben Herodes da caní, na' gunné̱': ―Benne' nigá naque̱' Juan, bénnea' gunná be'eda' neda' gulechugue̱' xíchaje̱'. Benne' nigá ba bebane̱' ládujla benne' gate.
MAR 6:17 Caní gunná Herodes lawe' da gunná be'e le̱' buluzúe̱' Juan na' lizre xia, ne buluchéaje̱' le̱' du xia, da na' be̱ne̱' lawe' da dxezrá'a Herodías le̱'. Herodías nigá guque̱' zru'ula Felipe, benne' biche Herodes. Herodes nigá bequé̱'e̱ nu'ula' chee̱ guque̱' zru'ule̱'.
MAR 6:18 Gunná Juan, dxe̱'e̱ Herodes: ―Quebe dxal-la' súale̱nu' zru'ula bi bichu'.
MAR 6:19 Chee̱ le̱ na' Herodías guzré̱'e̱ Juan, ne guca lazre̱' gútete̱' le̱'. Quebe guca chee̱'
MAR 6:20 lawe' da neze Herodes naca Juan nigá tu benne' xrlátaje, ne benne' naque̱' tuze nen Dios, na' bezrebe̱' le̱'. Chee̱ le̱ na' quebe be̱'e̱ lataj Herodías na' gútete̱' Juan nigá, na' lácala quebe guxéajni'ine̱' ca naca xúgute̱ da bchalaj Juan, Herodes nigá bze̱ nague̱' chee̱' du lazre̱'.
MAR 6:21 Herodías na' bzrélene̱' ájala gune̱' ca da dxaca lazre̱' gate na' guxú'u laní ca gula la Herodes. Gulé'aj gulagu benne' xíchaje̱ ca', ne benne' dxelenná be'e̱ lu wedil-la, ne benne' zaj naque̱' blau lu xe̱zre ca' zaj nababa Galilea.
MAR 6:22 Nadxa guxú'u bi nu'ula chee̱ Herodías na' lu xu'u naga dxelé'aj dxelawe̱', ne bxá'abe' lau benne' ca'. Bezaca ba lazre' Herodes ca bxá'abe', ne tuze ca belún benne' ca' zaj zra' dxelawe̱' tu zren nen le̱'. Gunná wenná bea Herodes, dxe̱'e̱ nu'ula cuide' nigá: ―Gunaba neda' ca da dxedánenu', na' gunna' na chiu'.
MAR 6:23 Guche̱be lazre' Herodes, ne bzétaje̱' Dios gunézruje̱' bítete̱ze da nábabe', lácala nábabe' gáchajte̱ naga dxenná be'e̱ le̱'.
MAR 6:24 Nadxa nu'ula cuide' nigá bdxúajbe', xeajchálajle̱be' xrnabe', gunabe': ―¿Bizra naba'? Gunná xrnabe': ―Gunaba xichaj Juan, bénnea' bchue̱' bénneache nisa.
MAR 6:25 La guxu'ute̱ nu'ula cuide' nigá naga zua wenná bea, na' gunabe', dxe̱'e̱be' le̱': ―Dxaca lazra' gunnu' neda' na'a tu lu xé'ena xichaj Juan, bénnea' bchue̱' bénneache nisa.
MAR 6:26 Nadxa wenná bea nigá bewí'inele̱'e̱, ne lawe' da ba bzétaje̱' Dios, na' belénete̱ benne' ca' da gunné̱', quebe guca lazre̱' guzrune̱' ca da gunaba bi nu'ula nigá.
MAR 6:27 Chee̱ le̱ na' gusel-la wenná bea tu benne' dxeje̱' wedil-la, ne gunná bé'ene̱' le̱' cheajxrí'e̱ xichaj Juan na'.
MAR 6:28 Guxíaj benne' nigá lu xu'u lizre xia, na' bdxixre̱' xichaj Juan na', ne bexu'e̱ na tu lu xé'ena. Bnézrujte̱' na bi nu'ula na', na' le̱be' bnézrujbe' na xrnabe'.
MAR 6:29 Gate gulénneze benne' ca' da nigá, benne' ca' bse̱de Juan, na' xeajlexexrí'e̱ be̱l-la' dxen chee̱', na' xeajlecáchete̱' na.
MAR 6:30 Ca gudé na' belexezrín benne' gubáz ca' chee̱ Jesús naga zua Le̱', ne buluzenne̱' Le̱' xúgute̱ ca da belune̱', ne ca da bulusé̱dene̱' benne' ca' naga xjaque̱'.
MAR 6:31 Nadxa gunná Jesús, dxe̱'e̱ benne' ca': ―Le chu'u. Chéajdxu xezí' lázredxu chadite' naga xu'u lataj. Gunné̱' caní lawe' da dxesá'aca benne' dxesá'aca, ne dxelexezrín benne' dxelexezrín, na' quebe dxelu'e̱ lataj xelawe̱'.
MAR 6:32 Nadxa Jesús ne benne' gubáz chee̱' ca' belexexú'e̱ le̱ze̱' tu lu da dxedá lawe' nísadau', na' belezrine̱' tu lataj naga quebe nu chilá' benne'.
MAR 6:33 Benne' zan ca' belelé'ene̱' ca zjaque̱', ne belexexúnbe'e̱ Jesús, na' gusá'aca chégüe̱' xjá'aque̱' na'. Benne' xúgute̱ xe̱zre ca' belezrine̱' lataj na' nédxudxa ca Jesús.
MAR 6:34 Gate bedxúaj Jesús lu da dxedá lawe' nísadau', na' blé'ene̱' benne' zante̱, ne bexache lazre̱' le̱' lawe' da zaj zre̱'e̱ ca zrila' ca' quebe zua benne' dxuxúe̱' le̱ba'. Na' guzú lawe̱' dxusé̱dene̱' benne' ca' da zante̱.
MAR 6:35 Ca gula guzré', belezrín benne' ca' dxuse̱de Jesús lau Le̱', na' gulé̱'e̱ Le̱': ―Ba dxaca waxrinne, na' quegá nu lizre benne' zua lataj nigá.
MAR 6:36 Besel-la benne' caní chee̱ cheajxaque̱' xe̱zre ca' zaj nnita gálaze chee̱ xelezí'e̱ xeta xelawe̱' lawe' da quebe bi de̱ nigá da xelawe̱'.
MAR 6:37 Na' gunná Jesús, dxe̱'e̱ le̱': ―Le gunezruj le'e da xelawe̱'. Na' gulenné̱', dxelé̱'e̱ Jesús: ―¿Waca chéajntu' cheajgá'untu' xeta xtila, quízrujntu' lazruj chee̱ chupa gaxúa zra chee̱ gugágudxu benne' zan caní?
MAR 6:38 Na' gunná Jesús, dxe̱'e̱ le̱': ―¿Bal-la xeta xtila nápale? Le cheajnná'. Ca gulenézene̱', na' gulenné̱', dxelé̱'e̱ Jesús: ―Gazxu' xeta xtila, ne chupa béladau'.
MAR 6:39 Nadxa gunná be'e Jesús gulebé'e xúgute̱ bénneache ca' tu cue' weaj lu xrguíe xa'a.
MAR 6:40 Na' gulebé'e̱ tu cue' weaj, du tu gaxúe̱', du chi xune̱'.
MAR 6:41 Nadxa Jesús bé̱xrue̱' gazxu' xeta xtila ca', ne da chupa béladau'. Na' guchisa lawe̱' xabaala, gunabe̱' lau Dios gun la'azxe̱' na, na' bzúzruje̱' xeta xtila ca', ne bnézruje̱' na benne' ca' dxusé̱dene̱' chee̱ gulísie̱' na chee̱ benne' ca'. Cá'anqueze gudísie̱' da chupa béladau' chee̱ xúgute̱ benne' ca'.
MAR 6:42 Na' gulagu xúgute̱' ne gulélajte̱'.
MAR 6:43 Nadxa buluxutube̱' ca da begá'ana chee̱ xeta xtila, ne chee̱ béladu ca', na' guca chazrinnu xcuite xca'a.
MAR 6:44 Benne' ca' gulawe̱' xeta xtila ca' zaj naque̱' chi xun gaxúa benne' biu.
MAR 6:45 La gunná bé'ete̱ Jesús benne' ca' dxusé̱dene̱' gulu'e̱ lu da dxedá lawe' nísadau' chee̱ gulelague̱' nísadau' na' nédxudxa ca Le̱', chee̱ xelexezrine̱' lu xe̱zre Betsaida dxácate̱ Le̱' dxuzé̱' dizra' bénne' ca'.
MAR 6:46 Ca gudé bze̱' dizra' benne' ca', na' guzé̱'e̱ zéaje̱' lu xi'a zeajchálajle̱ne̱' Dios.
MAR 6:47 Gate gula guxrínnequeze, ba zeaj da dxedá lawe' nísadau' na' gachaj lawe' nísadau', na' begá'ana Jesús tuze̱' lu xu dxu'a nísadau'.
MAR 6:48 Gate blé'ene̱' ca dxelezraga lawe̱' dxulusé̱'e̱ da dxedá lawe' nísadau' lawe' da za be' na', dxuzrí'i na da dxedá lawe' nísadau' na', na' gula balá' gubiga Jesús naga zaj zre̱'e̱, dxezé̱'e̱ lawe' nísadau' na', ne guca lazre̱' tée̱' lau da dxedá lawe' nísadau' na'.
MAR 6:49 Gate belelé'ene̱' Le̱' ze̱'e̱ lawe' nísadau' na', guléquene̱' da dxedá dxe̱la, na' gulebezre xe̱'e̱.
MAR 6:50 Belelé'e xúgute̱' ca dxezé̱'e̱ lawe' nísadau', na' belezrébele̱'e̱. Na' gunná Jesús, dxe̱'e̱ benne' ca' dxusé̱dene̱': ―Ga zrébele. Neda' nigá. Le gun chuchu lázrele.
MAR 6:51 Nadxa guluén Jesús lu da dxedá lawe' nísadau' naga zaj zre̱'e̱, na' guleza be' na'. Na' guleque zréajene̱', ne belexebánele̱'e̱ne̱',
MAR 6:52 lawe' da quebe ne xeléajni'ine̱' ca naca xel-la waca zren da be̱ne̱' chee̱ xeta xtila ca', lawe' da ne dxun zide' xichaj lázrdawe̱'.
MAR 6:53 Gate na' gulelague̱' nísadau', belezrine̱' lu xe̱zr la xu chee̱ benne' xe̱zre Genesaret, na' buluchéaje̱' xaga da dxedá lawe' nísadau' dxu'a nísadau' na'.
MAR 6:54 Ca beledxúaje̱' lu da dxedá lawe' nísadau', la belexexúnbeate̱ bénneache ca' Jesús.
MAR 6:55 La gusá'aca chégute̱' zjaque̱' lu xe̱zre ca' xeajlexrí'e̱ benne' we̱' ca' tu tu lu ta'a, na' zeajlegüé̱'e̱ le̱' naga zaj nézene̱' xedé Jesús.
MAR 6:56 Gátete̱ze xé̱zredu ca', ne xe̱zre ca', ne le̱'e̱ xixre' naga dxedé Jesús, na' buluzúe̱' benne' we̱' ca' du la neza, ne gulata' xuene̱' Jesús gunézruje̱' lataj cheajletaze̱' zra lane̱', na' xúgute̱ benne' ca' xeajleté̱' zra lane̱' belexexácate̱'.
MAR 7:1 Benne' fariseo ca' nen bal-la benne' dxuluxuzájle̱'e̱ da bdxixruj be'e Moisés, benne' gusá'aque̱' Jerusalén, belezríne̱' lau Jesús.
MAR 7:2 Benne' caní belelé'ene̱' ca dxelún bal-la benne' dxuse̱de Jesús, dxelawe̱' xeta ne quebe zaj naxibe ne̱'e̱ ca dxelenná bea benne' xudau' ca'. Chee̱ le̱ na' gulenná benne' Jerusalén ca': ―Zaj naca sban na' benne' ca' dxuse̱de Jesús. Nadxa gulezí tizre̱' le̱'.
MAR 7:3 Caní gulenná benne' ca' lawe' da zjácale̱ benne' xudau' fariseo ca', ne xúgute̱ benne' judío ca' ca naca da belún xra xtau benne' ca', quebe dxelawe̱' xeta che quebe zaj naxibe ne̱'e̱ zane' lasa.
MAR 7:4 Gate zjaque̱' lawe' xi'a wa'u, ca dxelexezrine̱' quebe dxelawe̱' xeta che quebe xelibe ne̱'e̱ ca zaj nadxixruj bea benne' xudau' ca'. Cá'anqueze de̱dxa da zante̱ da zjácale̱ne̱', ca xexadxe zriga' da dxelé'aje̱', ne zruaga, ne zriga xé'ena, ne da naga dxelásie̱'.
MAR 7:5 Nadxa benne' fariseo ca', ne benne' ca' dxuluxuzájle̱'e̱ da bdxixruj be'e Moisés gulenábene̱' Jesús: ―¿Bizr chee̱ na' quebe zjácale̱ benne' ca' dxusé̱denu' ca naca da gulún benne' gula? Dxelawe̱' xeta, zaj naca sban ne̱'e̱.
MAR 7:6 Na' beche̱be Jesús: ―Láweze dxunle da xrlátaje. Lu lázrdaule xu'ule da cale̱la. Cháwedau' bchálajqueze Isaías ca nácale le'e gate na' bzuaje̱' caní: Bénneache caní dxelúe lá'ane̱' neda' nen dxú'aze̱'. Xichaj lázrdawe̱' ca' zaj nacuasa na neda'.
MAR 7:7 Níteze naca xel-la ba lá'ana da dxelu'e̱ neda', lawe' da dxulusé̱dene̱' da zaj nadxixruj bea bénneacheze.
MAR 7:8 Caní naca xca', le'e dxuzúale chalá'ala ca da nadxixruj bea Dios, na' zéajle̱le ca naca da gulún bénneache ca dxíbele zruaga, ne zriga' chee̱le, ne zánete̱ da caní da dxunle.
MAR 7:9 Na' gunnadxe̱', dxe̱'e̱ benne' ca': ―Chala'ala dxuzúale ca da nadxixruj bea Dios chee̱ zéajle̱le ca naca da tu dxúnzquezle.
MAR 7:10 Caní gunná Moisés na': “Gudapa ba lá'ana xra xrna'u.” Cá'anqueze gunné̱': “Che tu benne' nne̱' schanni' chee̱ xre', che xrne'e̱, con gátequeze bénnea'.”
MAR 7:11 Le'e dxennale, “Che tu benne' xe̱'e̱ xra xrne̱'e̱: Corbán,” da zéaje̱ na, quebe gaca gácale̱na' le'e lawe' da bache bnézruja' chee̱ Dios ca naca da de̱ chia'.
MAR 7:12 Che ca'an dxenné̱', nadxa le'e québedxa dxu'ule le̱' lataj gácale̱ne̱' xra xrne̱'e̱.
MAR 7:13 Gate dxunle caní dxuzúale chalá'ala xrtizra Dios, chee̱ gunle ca da zéajle̱le. Na' zéajquezle dxunle zánete̱ da zaj naca na caní.
MAR 7:14 Xecha lasa gunné̱ Jesús bénneache ca', na' gunné̱', dxe̱'e̱ le̱': ―Le guzé̱ nágale xúgute̱le, ne le chéajni'i.
MAR 7:15 Netú da dxe'aj dxagu benne' quebe seque gucá'ana na le̱' sban. Da dxedxuaj na lu xichaj lázrdau bénneache, le̱ na' dxucá'ana na le̱' sban.
MAR 7:16 Le'e zua nágale, le xene.
MAR 7:17 Gate gucuasa Jesús naga zaj zra' benne' ca', na' guxú'e̱ lu xu'u. Nadxa benne' ca' dxusé̱dene̱' gulenábene̱' Le̱' ca naca chee̱ da dxulé'e nigá.
MAR 7:18 Nadxa gunná Jesús, dxe̱'e̱ le̱': ―¿Cá'anqueze le'e quebe dxéajni'ile? ¿Quebe dxéajni'ile xúgute̱ da dxe'aj dxagu bénneache quebe seque gucá'ana na le̱' sban
MAR 7:19 lawe' da quebe dxu'u na lu xichaj lázrdawe̱'. Dxu'u na lu le̱'e̱, na' dxedxuaj na? Cate' gunná Jesús caní blé'ene̱' zaj naca chawe' xúgute̱ da dxe'aj dxágudxu.
MAR 7:20 Na' gunnadxe̱': ―Ca naca da dxedxuaj na lu xichaj lázrdau bénneache, le̱ na' dxucá'ana na le̱' sban
MAR 7:21 lawe' da lu xichaj lázrdau bénnea' dxeledxúaj ca da cale̱la da dxuwía lazre̱', ne dul-la da dxucá'ana ditaj xel-la wechaga na', ne dul-la chee̱ da sban, ne we̱te benne',
MAR 7:22 ne xel-la gubán, ne da dxezá lazre' gapa da naca chee̱ benne' xula, ne da cale̱la ca', ne xel-la wezrí xe̱', ne da dxezá lazre' da sban, ne xel-la zre̱'e lazre', ne xel-la wechalaj dizra' bizruj, ne xel-la dxun szren cuina, ne xel-la dxuchalaj bigaze.
MAR 7:23 Xúgute̱ da cale̱la caní dxeledxúaj na lu xichaj lázrdau bénneache, ne dxuluxrinnaj na le̱'.
MAR 7:24 Na' bezá'a Jesús naga zue̱', guxíaje̱' lu xe̱zre ca' zaj nababa xe̱zre Tiro, ne xe̱zre Sidón. Guxú'u Jesús tu lu xu'u, ne quegá guca lazre̱' nu xene. Quebe guca gache̱'.
MAR 7:25 La gunézete̱ tu nu'ula zua Jesús na'. Nu'ula nigá zua tu zrí'ine̱' nu'ula, xu'ube' be' xriwe̱'. Bla' nu'ula' naga zua Jesús, ne bzu zribe̱' lawe̱'.
MAR 7:26 Nu'ula nigá quebe naque̱' nu'ula judío. Naque̱' nu'ula chee̱ tu xe̱zre nababa xe̱zr la xu Sirofenicia. Bzrine̱' lau Jesús, na' gunabe̱' Le̱' xebéaje̱' be' xriwe̱' da xu'u zrí'ine̱' nu'ula.
MAR 7:27 Gunná Jesús, dxe̱'e̱ nu'ula': ―Be̱' lataj xelagu nedxu zri'ine benne' lu xu'u, lawe' da quebe naca chawe' cúadxu xeta xtila chee̱ bidu ca', ne gunézrujdxu na chee̱ bécudu ca'.
MAR 7:28 Na' gunná nu'ula': ―Awe', Xran, san bécudu ca' zaj zra' zran ga dxelágube' dxeláguquezba' xeta bizruj da dxuluzexruj bidu ca'.
MAR 7:29 Nadxa gunná Jesús: ―Ne̱ chee̱ dizra' da ba gunnéu', bexíaj na'a. Bache bedxúaj be' xriwe̱' lu be̱l-la' dxen chee̱ zri'inu' nu'ula.
MAR 7:30 Gate bezrín nu'ula' lizre̱', na' blé'ene̱' zrí'ine̱' nu'ula de̱be' lu da naga dxásebe', na' be' xriwe̱' ba bedxúaj na lu be̱l-la' dxen chee̱be'.
MAR 7:31 Nadxa bedxúaj Jesús, bezé̱'e̱ naga nababa xe̱zre Tiro, na' gudétie̱' naga nababa xe̱zre Sidón, ne xe̱zre ca' zaj nababa Decápolis, na' bezrine̱' dxu'a nísadau' chee̱ xe̱zr la xu Galilea.
MAR 7:32 Nadxa bedajleguá' benne' ca' tu benne' nacuézrue̱', ne quebe dxaca nnie̱', na' gulenábe̱' Jesús xrua ne̱'e̱ benne' nigá.
MAR 7:33 Guché̱ Jesús benne' nigá chalá'ala naga zaj zra' benne' ca', na' bdie̱' zrube ne̱'e̱ lu naga bénnea', na' bzre̱'e̱ zrene̱', ne bte̱' lawe' luzre bénnea'.
MAR 7:34 Nadxa la gunná'te̱' xabáa, ne gucá'a lazre̱', gunné̱': ―Efata. Dizxa' nigá zéaje̱ na: Bxalaj.
MAR 7:35 Ca gunné̱' caní, na' bxalaj naga benne' cuezru nigá, ne bexaca luzre̱'. Nadxa guca bchálaje̱'.
MAR 7:36 Na' gunná Jesús, dxe̱'e̱ benne' ca' quebe nu xelé̱'e̱ ca da be̱ne̱'. Lácala gunná be'ene̱' le̱' caní, buluchílujdxe̱' dizra' ca da be̱ne̱'.
MAR 7:37 Benne' ca' zaj zra' na' belexebánele̱'e̱ne̱', dxelenné̱': ―Xúgute̱ dxune̱' cháwedau'. Dxexune̱' benne' cuezru ca', na' dxelénte̱ne̱', ne dxexune̱' benne' ca' quebe dxaca nnie̱', na' dxelenné̱tie̱'.
MAR 8:1 Ca lu zra ca' zaj nazraga benne' zan, na' quebe bi de̱ da xelawe̱'. Ca'an guca gunné̱ Jesús benne' ca' dxusé̱dene̱', na' guzre̱' le̱':
MAR 8:2 ―Neda' dxexache lazra' benne' caní lawe' da bache guca chunna zra zaj zre̱'e̱ nigá nen neda', ne quebe bi de̱ da xelawe̱'.
MAR 8:3 Che ca' xesel-la' le̱' lizre̱' quebe xelawe̱', na' xelate ni'a ne̱'e̱ la neza lawe' da zá'aca bal-le̱' zitu'.
MAR 8:4 Na' belexeche̱be benne' ca' dxuse̱de Jesús, dxelé̱'e̱ Le̱': ―¿Ájazra gundxu gunézrujdxu da xelawe̱' nigá, ga quebe nu chilá' benne'?
MAR 8:5 Jesús bche̱be̱' le̱': ―¿Bal-la xeta xtila nápale le'e? Benne' ca' gulenné̱': ―Gazre na.
MAR 8:6 Nadxa gunná be'e Jesús xelebé' xúgute̱ bénneache ca' lu xu. Nadxa guqué̱'e̱ xeta xtila, ne guzre̱' Dios: ―Xcalenu'. Nadxa bzúzruje̱' na, ne bnézruje̱' na benne' ca' dxusé̱dene̱', na' benne' caní gulísie̱' na láwela xúgute̱ bénneache ca'.
MAR 8:7 Zaj nápaqueze̱' tu chupa béladau'. Na' Jesús gunabe̱' Dios gune̱' na chawe'. Nadxa gunná bé'ene̱' gulise benne' ca' le̱ na.
MAR 8:8 Gulagu xúgute̱ bénneache ca', ne belezúale̱'e̱ chawe'. Ca gudé na' bulusuzré̱'e̱ gazre xcuite xca'a nen xeta bizruj da belegá'ana.
MAR 8:9 Benne' ca' gulawe̱' zaj naque̱' ca chua gaxúa benne' biu. Nadxa Jesús bze̱' benne' ca' dizra'.
MAR 8:10 Nadxa guxú'e̱ lu da dxedá lawe' nísadau' nen benne' ca' dxusé̱dene̱'. Xjaque̱' lu xe̱zr la xu chee̱ benne' xe̱zre Dalmanuta.
MAR 8:11 Nadxa belezrín benne' xudau' fariseo ca' ga na', ne gulezú lawe̱' dxulutil-le̱' dizra' nen Jesús. Gulenabe̱' Jesús gune̱' tu xel-la waca da za xabáa, chee̱ xelenézene̱' bi xel-la waca nape̱'.
MAR 8:12 Nadxa Jesús gucá'a dxgua lazre̱', gunné̱': ―¿Bizr chee̱ na' dxelenaba benne' caní guna' tu xel-la' waca da za xabáa? Da li dxapa' le'e, québequeze bi xel-la waca guna' lau le'e.
MAR 8:13 Nadxa Jesús bca'ane̱' benne' ca', na' bexu'e̱ lu da dxedá lawe' nísadau', dxexíaje̱' xechelá'a chee̱ nísadau'.
MAR 8:14 Gulal-la lazre' benne' ca' dxuse̱de Jesús xelu'e̱ da xelawe̱', na' zaj nu'e̱ tuze xeta xtila lu da dxedá lawe' nísadau'.
MAR 8:15 Nadxa Jesús gunná bé'ene̱', dxe̱'e̱ benne' ca': ―¡Le nna'xque nigá! Le guxúe cuínale da naca cua zichaj chee̱ xeta xtila chee̱ benne' xudau' fariseo ca', ne ca naca cua zichaj chee̱ xeta xtila chee̱ Herodes.
MAR 8:16 Nadxa benne' ca' dxuse̱de Jesús gulé̱ ljwezre̱': ―Le̱' dxenné̱' caní lawe' da quebe de̱ xeta xtila gágudxu.
MAR 8:17 Dxeque be'e Jesús da dxelenné̱', na' guzre̱' le̱': ―¿Bizr chee̱ na' dxennale quebe de̱ xeta xtila gágudxu? ¿Quebe ne chéajni'ile ne quebe dxeque be'ele? ¿Nácale̱'e̱ zide' lázrdaule?
MAR 8:18 ¿Quebe dxelé'ele nen xiaj laule, ne quebe dxenle nen nágale? ¿Quebe dxeajsá lázrele?
MAR 8:19 Gate na' bgawa' chi xun gaxúa benne' biu nen gazxu' xeta xtila, ¿bal-la xcuite xca'a xeta bizruj da becá'ale? Benne' ca' gulenné̱': ―Chazrinnu na.
MAR 8:20 Na' gunná Jesús: ―Na' gate na' bgawa' chua gaxúa benne' biu nen gazre xeta xtila, ¿bal-la xcuite xca'a da zaj zrate̱ becá'ale? Le̱' gulenné̱': ―Gazre na.
MAR 8:21 Nadxa Jesús guzre̱' benne' ca': ―¿Ne la gázqueze quebe dxéajni'ile?
MAR 8:22 Ca gudé na' Jesús, ne benne' ca' dxusé̱dene̱' belexezrine̱' lu xe̱zre Betsaida, na' benne' Betsaida guleché̱'e̱ tu benne' la chul-la lau Jesús, na' gulata' xuene̱' Le̱' guté̱' le̱'.
MAR 8:23 Jesús gudele̱' na' benne' la chul-la, ne bebéaje̱' le̱' dxu'a xe̱zre. Na' btupe̱' zrene̱' lu xiaj lawe̱', ne guxrúa ne̱'e̱ le̱'. Na' bche̱be̱' le̱' chete dxelé'ene̱'.
MAR 8:24 Benne' la chul-la gunné̱'e̱, na' gunné̱': ―Dxelé'eda' benne' ca', zaj naque̱' ca weaj xaga, na' dxesí'aque̱'.
MAR 8:25 Nadxa Jesús guxrúa ne̱'e̱ xiaj lawe̱' da xula, na' benne' na' gunná' dxgüe̱'. Na' bexaque̱', ne xúgute̱ bache dxelé'ene̱' cháwedau'.
MAR 8:26 Nadxa Jesús besel-le̱' le̱' lizre̱', dxe̱'e̱ le̱': ―Quebe chu'u lu xe̱zre nigá, ne quebe nu xu'u caní.
MAR 8:27 Ca gudé na' Jesús, ne benne' ca' dxusé̱dene̱' xjaque̱' lu xé̱zredu ca' zaj nababa xe̱zre Cesarea naga dxenná bea Filipo. Dxácate̱ zaj xu'e̱ neza bche̱be Jesús benne' ca': ―¿Nuzra na' dxelenná benne' naca' neda'?
MAR 8:28 Belexeche̱be̱': ―Bal-la benne' dxelenné̱' nacu' Juan, bénnea' bchue̱' bénneache nisa. Benne' xula dxelenné̱' nacu' Elías, bénnea' bchálaje̱' waláz chee̱ Dios. Benne' xula dxelenné̱' nacu' tu benne' xula bchálaje̱' waláz chee̱ Dios.
MAR 8:29 Nadxa Jesús bche̱be̱' le̱': ―¿Gazra le'e? ¿Nuzra dxennale le'e naca' neda'? Pedro gunné̱': ―Lue' nacu' Cristo, benne' nasel-la Dios.
MAR 8:30 Nadxa gunná be'e Jesús benne' ca'. Gunné̱': ―Quebe nu xe̱le ca'.
MAR 8:31 Nadxa guzú lau Jesús dxulé'ene̱' benne' ca' ca dxal-la' sáca'le̱'e̱ Le̱', Benne' Gulje̱' Bénneache, ne ca xelún benne' gula chee̱ judío ca', ne benne' xíchaje̱ ca' chee̱ bxruze ca', ne benne' dxuluxuzájle̱'e̱ da nadxixruj bea Dios, xuluzúe̱' Le̱' chalá'ala. Nadxa guzre̱' le̱' welútie̱' Le̱', san xebane̱' zra guxunne zra.
MAR 8:32 Da nigá guzre̱' le̱' caníqueze. Nadxa Pedro guché̱'e̱ Jesús chalá'ala, ne guzú lawe̱' dxedil-le̱' Le̱'.
MAR 8:33 Jesús bexéchaje̱', ne gunné̱'e̱ benne' ca' dxusé̱dene̱', na' gudil-le̱' Pedro, dxe̱'e̱ le̱': ―Gucuasa cuita' nigá, lue', da xriwe̱'. Quebe dxéquenu' da nigá ca dxun Dios. Ca dxun bénneache dxunu'.
MAR 8:34 Nadxa Jesús gunné̱' benne' ca' dxusé̱dene̱', ne xúgute̱ bénneache ca', na' guzre̱' le̱': ―Che núlale dxaca lázrele gunle neda' tuze, dxal-la' guzúale chalá'ala xúgute̱ da dxezá lázrele le'e, ne gácale ca tu benne' zéaje̱' chee̱ te̱'e̱ xaga béguaj, na' gunle neda' tu zren.
MAR 8:35 Che tu benne' dxaca lazre̱' guselé̱' xel-la nabán chee̱', benne' nigá gunitie̱' xel-la nabán chee̱'. Bénnea' gunitie̱' xel-la nabán chee̱' ne̱ chia' neda', ne ne̱ chee̱ dizra' chawe' chia', benne' nigá guselé̱' xel-la nabán chee̱'.
MAR 8:36 Che tu benne' gape̱' xúgute̱ da naca chee̱ xe̱zr la xu nigá, na' gunitie̱' bénne'du xu'e̱, ¿bízraqueze da ba neza gaca na chee̱ bénnea'?
MAR 8:37 Quebe bi gaca gunezruj tu benne' chee̱ guselé̱' bénne'du xu'e̱.
MAR 8:38 Che tu benne' gapa stu'e̱ chia' neda', ne chee̱ dizra' chawe' chia' lau bénne' caní, benne' dxulucá'ana Dios, ne dxelún dul-la, la gaze neda', Benne' Gulje̱' Bénneache, gapa stú'queza' chee̱ bénnea' gate xida' nen xel-la szren chee̱ Xra', ne nen gubáz chee̱ xabáa lá'azxa ca'.
MAR 9:1 Cá'anqueze guzre Jesús benne' ca': ―Da li dxapa' le'e, zaj zra' nigá benne' quebe xelatie̱' nédxula ca xelelé'ene̱' xida xel-la dxenná bea chee̱ Dios nen xel-la waca chee̱'.
MAR 9:2 Ca gudé xrupa zra, guché̱ Jesús Pedro, ne Jacobo, ne Juan, na' guxíajle̱ne̱' benne' canize tu lu xi'a sibe. Na' bcha ca gunná' Jesús lau benne' ca'.
MAR 9:3 Zra lana Jesús bexaca na chiche ca bezxe' da dxágute̱ na laudxu. Quegá nu chilá' benne' lu xe̱zr la xu gaca quibe̱' zra lane̱' chee̱ xegá'ana na chiche ca guca zra lana Jesús.
MAR 9:4 Na' benne' ca' dxuse̱de Jesús belelé'ene̱' Elías, ne Moisés, benne' gulate nédxudaute̱, dxuluchálajle̱ne̱' Jesús.
MAR 9:5 Pedro guzre̱' Jesús: ―Benne' wese̱de, cháwele̱'e̱ naca zradxu nigá. Guntu' chunna xu'u lágadau', tu chiu', ne tu chee̱ Moisés, ne tu chee̱ Elías.
MAR 9:6 Caní gunná Pedro lawe' da dxelezrebe benne' ca' dxuse̱de Jesús, na' Pedro quebe nézene̱' ca da dxenné̱'.
MAR 9:7 Nadxa betaj tu beuj naga zaj zre̱'e̱, da bcache na le̱', na' lu beuj na' belenne̱' tu chi'i benne', gunné̱': ―Benne' nigá naque̱' Zri'ina' nazrí'ite̱ lazra'. Le xen da dxenné̱'.
MAR 9:8 Gate gulenné̱'e̱, québedxa nu nalá' nen le̱', san tuze Jesús.
MAR 9:9 Dxácate̱ dxelexétaje̱' lu xi'a na', gunná be'e Jesús benne' ca' quebe nu xuluchálajle̱ne̱' ca naca da belelé'ene̱' gate te na' xebán Benne' Gulje̱' Bénneache ládujla benne' gate.
MAR 9:10 Chee̱ le̱ na' gulezúe̱' zrize ca naca da ba guca. Buluche̱be ljwezre̱': ―¿Bizra zéaje̱ da na', xebane̱' ládujla benne' gate?
MAR 9:11 Nadxa buluche̱be̱' Jesús: ―¿Bizr chee̱ na' dxelenná benne' ca' dxuluxuzájle̱'e̱ da nadxixruj bea Dios dxal-la' xelá' Elías nédxula ca Cristo?
MAR 9:12 Beche̱be Jesús, na' guzre̱' le̱': ―Da li xelá' Elías nedxu, ne gucá'ana chawe̱' xúgute̱. ¿Bizra dxenná da naxúaj na lu xiche chee̱ Dios ca gaca chia' neda', Benne' Gulje̱' Bénneache? Dxenná na da zan da saca', na' xuluzúa bénneache neda' chalá'ala.
MAR 9:13 Neda' dxapa' le'e, ba bla' Elías, na' belune̱' chee̱' ca naca xúgute̱ da gulaca lazre̱' ca da dxenná na lu xiche chee̱ Dios ca da dxal-la' gaca chee̱'.
MAR 9:14 Ca gudé na' belexezrine̱' naga zaj zra' xezícadxa benne' ca' dxuse̱de Jesús, na' belelé'ene̱' benne' zan zaj naxéchaje̱' le̱', ne zaj zráqueze na' benne' dxuluxuzájle̱'e̱ da nadxixruj bea Dios, na' dxulutíl-lale̱ne̱' le̱' dizra'.
MAR 9:15 Gate belelé'ene̱' Jesús, na' xúgute̱' belexebánene̱', na' gusí'aca chégüe̱' naga zua Jesús, ne bulugape̱' Le̱' diuzre.
MAR 9:16 Ca'an guca, Jesús bche̱be̱' benne' ca': ―¿Bizra na' dxedíl-lale̱le benne' ca'?
MAR 9:17 Nadxa tu benne' ze̱' ga na' beche̱be̱': ―Benne' wese̱de, nache̱'a zri'ina' nigá chee̱ xexunu'-be' lawe' da xu'ube' be' xriwe̱' da ba nun na le̱be' bi quebe dxaca nne̱be'.
MAR 9:18 Gátete̱ze na' dxu'ube' da xriwe̱', na' dxe̱l-la na le̱be', ne dxin na le̱be' lu xu. Dxezría bzrina' xú'abe', ne dxagu lázxabe'. Chee̱ le̱ na' ba dxéxrujle̱'e̱be'. Ba gunaba' benne' ca' dxusé̱denu' xelexebéaje̱' be' xriwe̱' na', san quebe gulezéquene̱'.
MAR 9:19 Beche̱be Jesús: ―Le'e, benne' quebe dxéajle̱le chia'. ¿Ájate̱ dxal-la' súale̱na' le'e? ¿Ájate̱ dxal-la' gaca' benne' zren lazre' nen le'e? Le cheajxrí' bi cuide' na' nigá.
MAR 9:20 Na' xeajlexrí'e̱-be'. Gate be' xriwe̱' na' ble'e na Jesús, na' be̱n na gudel-la chuna' bi cuide' na', ne gudinna le̱be' xu, na' dxebixre dxetúl-labe' lu xu, ne guzría bzrina' dxú'abe'.
MAR 9:21 Nadxa bche̱be Jesús xrabe': ―¿Bátate̱ dxezácabe' caní? Gunná xrabe': ―Gate nácate̱be' bidau'.
MAR 9:22 Zane' lasa be' xriwe̱' na' dxugú'u na le̱be' lu xi', ne lu nisa chee̱ gute na le̱be'. Che wazéquenu' bi gunu' chee̱be', bexache lazre' netu', ne gúcale̱ netu'.
MAR 9:23 Na' guzre Jesús le̱': ―Che wazéquenu' lue' chéajle̱'u chia', xúgute̱ wazeque chee̱ benne' dxéajle̱'e̱ chia'.
MAR 9:24 Nadxa xra bi cuide' nigá gunné̱' zizraj: ―Dxéajle̱'a chiu'. Gúcale̱ neda' chee̱ chéajle̱dxa'.
MAR 9:25 Gate ble'e Jesús dxelezraga benne' zan, na' gudil-le̱' be' xriwe̱' na', dxenné̱': ―Lue', be' xriwe̱', dxunu' benne' quebe dxaca nnie̱', ne cuezru, neda' dxenná be'eda' lue' xedxúaju'. ¡Bsan bi cuide' nigá! ¡Québedxa xexú'u lu be̱l-la' dxen chee̱be'!
MAR 9:26 Na' be' xriwe̱' na' gudxezre xa'a na, ne be̱n na gudel-la chuna' bi cuide' na', na' bedxúaj na. Na' begá'anabe' ca tu benne' gate. Ca'an guca, gulenná benne' zan ca': ―Ba gútebe'.
MAR 9:27 Nadxa gucá'a Jesús na'be', bechise̱'-be'. Na' benne' cuide' na' beze̱be'.
MAR 9:28 Nadxa guxú'u Jesús tu lu xu'u, na' benne' ca' dxusé̱dene̱' buluche̱be̱' Le̱' naga zue̱' tuze̱': ―¿Bizr chee̱ na' quebe guzéquentu' netu' xebéajntu' be' xriwe̱' na'?
MAR 9:29 Nadxa Jesús guzre̱' benne' ca': ―Ca naca be' xriwe̱' caní séquele xebéajle na che nábale lau Dios, ne gunle gubasa.
MAR 9:30 Gate besí'aque̱' naga zaj zre̱'e̱, na' belexedée̱' naga nababa Galilea. Jesús quebe guca lazre̱' nu neze ga zue̱',
MAR 9:31 lawe' da dxuzéajni'ine̱' benne' ca' dxusé̱dene̱', na' guzre̱' le̱': ―Zua tu benne' gudée̱' neda', Benne' Gulje̱' Bénneache, lu na' benne' ca' dxeledábague̱' neda', na' xelútie̱' neda', san gate gaca chunna zra natia', na' xebana'.
MAR 9:32 Benne' ca' quebe guléajni'ine̱' ca da dxe̱'e̱ le̱', ne belezrebe̱' xuluche̱be̱' Le̱'.
MAR 9:33 Nadxa belezrine̱' lu xe̱zre Capernaum, na' gate zaj zre̱'e̱ lu xu'u na', bche̱be Jesús benne' ca' dxusé̱dene̱': ―¿Bizra dizra' dxutíl-lale̱le ljwézrele za'le la neza?
MAR 9:34 Gulezré̱'e̱ zrize lawe' da bulutil-le̱' dizra' la neza na' che nule̱' nácadxe̱' benne' blau.
MAR 9:35 Nadxa Jesús gudxé'e̱, na' gunné̱' benne' chazrinnu, benne' ca' dxusé̱dene̱', na' guzre̱' le̱': ―Che núlale dxaca lázrele gácale benne' blau, dxal-la' gácale ca benne' bze̱be, ne gunle zrin chee̱ xúgute̱ bénneache.
MAR 9:36 Nadxa guqué̱'e̱ tu bidau', na' bzue̱' le̱be' gachaj lawe' benne' ca'. Na' bnide̱'-be', ne guzre̱' benne' ca':
MAR 9:37 ―Benne' na' gape̱' ba lá'ana tu bidau' ca bidu nigá lawe' da nazrí'ine̱' neda', bénnea' gape̱' ba lá'ana neda', na' bénnea' gape̱' ba lá'ana neda', quegá tuza' neda' gape̱' ba lá'ana, cá'anqueze gape̱' ba lá'ana Xra' nasel-le̱' neda'.
MAR 9:38 Nadxa Juan guzre̱' Jesús: ―Benne' Wese̱de, blé'entu' tu benne' dxebéaje̱' be' xriwe̱' da xu'u bénneache, dxuchínene̱' Lau' Lue', san bénnea' quebe dxune̱' dxi'u tu zren. Chee̱ le̱ na' gúzrentu' le̱' québedxa gune̱' ca'.
MAR 9:39 Jesús guzre̱' benne' ca' dxusé̱dene̱': ―Quebe bi xe̱le le̱'. Che nu benne' gune̱' tu xel-la waca, guchínene̱' La' neda', benne' nigá quebe gaca nne̱' schanni' chia'.
MAR 9:40 Caní naca na lawe' da benne' quebe dxedábague̱' dxi'u, dxácale̱ne̱' dxi'u.
MAR 9:41 Nútete̱ze benne' gunne̱' le'e tu zriga' nisa ne̱ chee̱ La' neda' lawe' da nácale chia' neda', Cristo, da líqueze dxennía', wazí'queze̱' da dxal-la' si'e̱.
MAR 9:42 Gunnadxa Jesús: ―Nútete̱ze benne' gulé'ene̱' tu bidau' chee̱ gunbe' dul-la, bidu na' dxéajle̱be' chia', cháwedxa guchéajdxu tu xiaj zi'i lba bénnea', ne cheajchú'unadxu le̱' lu da situj chee̱ nísadau'.
MAR 9:43 Che na'u dxun na gunu' dul-la, wendxa guchugu na'u na'. Cháwedxa xexú'u xabáa naga gaca banu' nen tuze na'u quézcala xexíaju' lataj ba xa' nen dxúpate̱ na'u, naga quebe xexula xi' da xezacu'.
MAR 9:44 Lataj ba xa' na' quebe xelate bzuga', be̱ dxeláguba' benne' ca' dxelune̱' da cale̱la, na' xi' na' cabata' xexúl-laqueze na.
MAR 9:45 Na' che ni'u dxun na gunu' dul-la, guchugu ni'u na'. Cháwedxa xexú'u xabáa naga gaca banu' nen tu ni'u, quézcala xexíaju' lataj ba xa' nen dxúpate̱ ni'u, naga quebe xexula xi'.
MAR 9:46 Lataj ba xa' na' quebe xelate bzuga', be̱ dxeláguba' benne' ca' dxelune̱' da cale̱la, na' xi' na' cabata' xexúl-laqueze na.
MAR 9:47 Che xiaj lau' dxun na gunu' dul-la, guleaj xiaj lau' na'. Cháwedxa xexú'u naga dxenná bea Dios nen tuze xiaj lau', quézcala xexíaju' lataj ba xa' nen dxúpate̱ xiaj lau'.
MAR 9:48 Lataj ba xa' na' quebe xelate bzuga', be̱ dxeláguba' benne' ca' dxelune̱' da cale̱la, na' xi' na' cabata' xexúl-laqueze na.
MAR 9:49 ’Ca dxundxu gate dxugú'udxu zede' be̱la' da guzáladxu lu xi' chee̱ xegá'ana chawe' na, ca'an gaca chee̱ xúgute̱ benne'. Cá'anqueze dxugú'udxu zede' da dxuzézxedxu lau Dios.
MAR 9:50 Zede' na' naca na da chawe', san che xenite xel-la sna'a chee̱ na, ¿ájala gundxu chee̱ guchínedxu zede' na'? Le gaca le'e ca zede' chawe' na', ne le sua lu xel-la zri lázre' tule nen xetule.
MAR 10:1 Nadxa bedxúaj Jesús xe̱zre Capernaum, na' guxíaje̱' naga nababa Judea xechalá'a xe̱gu Jordán naga dxalaj gubizra. Na' belezraga bénneache zan naga zua Jesús, na' xecha lasa na' bsé̱dene̱' le̱' cáqueze dxune̱'.
MAR 10:2 Nadxa bal-la benne' xudau' fariseo ca' belezrine̱' lau Jesús, na' buluche̱be̱' Le̱' chee̱ da gun nne̱ Le̱' tu da quebe dxal-la' nne̱'. Buluche̱be̱' Le̱': ―¿Waca tu benne' xelé̱'e̱ nen zru'ule̱'?
MAR 10:3 Nadxa beche̱be Jesús: ―¿Bizra gunná be'e Moisés le'e?
MAR 10:4 Na' belexeche̱be benne' ca': ―Be̱nna Moisés lataj gunézrujdxu zrú'uladxu tu xiche da dxenná na dxelá'adxu, na' gusandxu le̱'.
MAR 10:5 Nadxa Jesús guzre̱' le̱': ―Caní gunná be'e Moisés lawe' da zaj naca zizraj lázrdaule le'e.
MAR 10:6 Gate nédxudau' gate be̱n Dios xúgute̱ da dxelé'edxu, na' be̱ne̱' bénneache benne' biu, ne nu'ula, na' gunné̱':
MAR 10:7 “Chee̱ le̱ na' benne' biu na' gusane̱' xruze xrne̱'e̱ chee̱ gaque̱' tuze nen zru'ule̱',
MAR 10:8 na' dxupe̱' xelaque̱' ca tuze benne'.” Ca' naca na, québedxa zaj naca chupe̱', san tuze benne' zaj naque̱'.
MAR 10:9 Chee̱ le̱ na' netú benne' quebe dxal-la' xelé̱'e̱ da nuchaga Dios.
MAR 10:10 Gate zaj zra' lu xu'u benne' ca' dxuse̱de Jesús buluche̱be̱' Le̱' xetú lasa ca naca chee̱ da nigá.
MAR 10:11 Na' Jesús guzre̱' benne' ca': ―Che tu benne' xelé̱'e̱ nen zru'ule̱', ne xezúale̱ne̱' nu'ula xula, dxíchuje̱' xrba chee̱ wechaga na' lawe' da dxusebague̱' zru'ule̱' nedxu na' dul-la.
MAR 10:12 Cá'anqueze che tu nu'ula gusane̱' benne' chee̱', ne xezúale̱ne̱' benne' xula, la gázqueze dxíchuje̱' xrba chee̱ wechaga na' da dxusebague̱' benne' chee̱' dul-la.
MAR 10:13 Nadxa bénneache ca' guleché̱'e̱ bidu chee̱' ca' lau Jesús chee̱ xrua ne̱'e̱ le̱be', na' benne' ca' dxuse̱de Jesús gulezú lawe̱' dxeledil-le̱' benne' ca' zaj naché̱'e̱ bidu ca'.
MAR 10:14 Gate ble'e Jesús da dxelune̱', na' bzre̱'e̱, ne guzre̱' le̱': ―Le güe bidu ca' lataj xelelá'abe' naga zua'. Quebe guzágale-be' lawe' da benne' zaj naque̱' ca bidu caní xelu'e̱ naga dxenná bea Dios.
MAR 10:15 Da li dxapa' le'e, che tu benne' quebe gape̱' ba lá'ana da dxenná bea Dios ca dxelún bidu caní, cabata' chu'u bénnea' naga dxenná bea Le̱'.
MAR 10:16 Nadxa gucá'a Jesús bidu ca', ne bnide̱'-be'. Guxrúa ne̱'e̱ le̱be', na' gunabe̱' Dios gun chawe̱'e̱-be'.
MAR 10:17 Gate bexú'u Jesús neza, na' guzá chegu tu benne' biu, na' bzu zribe̱' lau Jesús, ne bche̱be̱' Le̱': ―Benne' xrlátaje, bi dxal-la' guna' chee̱ gapa' xel-la nabán zeajlí canna?
MAR 10:18 Jesús guzre̱' le̱': ―¿Bizr chee̱ na' dxu'u neda' xrlátaje? Québedxa nu chilá' naca xrlátaje. Tuze Dios naque̱' xrlátaje.
MAR 10:19 Núnbeaquezu' ca da bdxixruj bea Dios gate na' gunné̱': Quebe quichju' xrba chee̱ wechaga na'. Quebe gutiu' benne'. Quebe cuanu' chee̱ benne'. Quebe nneu' chee̱ nu benne' da quebe naca na. Quebe gagu lanu'. Gudapa ba lá'ana xra xrna'u.
MAR 10:20 Nadxa bénnea' beche̱be̱': ―Benne' wese̱de, xúgute̱ da caní dxuna' nácatea' bidau'.
MAR 10:21 Na' Jesús gunné̱'e̱ le̱' xrtandau', ne guzre̱' le̱': ―Tu da dxexázrjenu'. Guxíaj xeaje̱te xúgute̱ da napu', na' bnezruj benne' xache' ca' dumí chee̱ na. Nadxa gapu' da gunní'a xabáa. Na' gudá, gacu' ca tu benne' zéaje̱' chee̱ te̱'e̱ xaga béguaj, ne be̱n neda' tuze.
MAR 10:22 Gate bene̱' da nigá, na' benne' cuide' na' bewi'ine lázrele̱'e̱, na' bexíaje̱' dxewí'ine̱' lawe' da nácale̱'e̱ benne' gunní'a.
MAR 10:23 Nadxa Jesús gunné̱'e̱ ni naze, na' guzre̱' benne' ca' dxusé̱dene̱': ―Sté̱bete̱ naca chu'u benne' gunní'a naga dxenná bea Dios.
MAR 10:24 Belexebánele̱'e̱ benne' ca' dxuse̱de Jesús ca naca dizra' gunná Jesús, na' Le̱' guzre̱' le̱' xetú lasa: ―Zrí'ina'dau', sté̱bete̱ naca xelú'u naga dxenná bea Dios benne' dxuluxrén lazre̱' xel-la gunní'a.
MAR 10:25 Chadidxa te tu bea zren lu negue xeche' quézcala chu'u tu benne' gunní'a naga dxenná bea Dios.
MAR 10:26 Gate belén benne' ca' dizra' nigá, na' belexebánele̱'e̱ne̱', na' buluche̱be ljwezre̱': ―¿Núzraqueze la xca'?
MAR 10:27 Jesús gunné̱'e̱ benne' ca', ne guzre̱' le̱': ―Quebe seque' nu bénne' gune̱' da nigá, san Dios wazéquene̱'. Quebe bi de̱ da quebe gaca gun Dios.
MAR 10:28 Nadxa Pedro guzre̱' Jesús: ―Xránantu', netu' ba bcá'anantu' xúgute̱ da nápantu', ne zéajle̱ntu' Lue'.
MAR 10:29 Na' beche̱be Jesús: ―Da li dxapa' le'e, nútete̱ze benne' gusane̱' lizre̱', u benne' biche̱', u nu'ula zane̱', u xre̱', u xrne̱'e̱, u zru'ule̱', u zrí'ine̱', u xe̱zr la xu chee̱' ne̱ chia' neda', u ne̱ chee̱ dizra' chawe' chia',
MAR 10:30 benne' nigá si'e̱ na'a lu xe̱zr la xu nigá tu gaxúa cue' ca' da si'e̱, xu'u ca', ne benne' biche̱' ca', ne nu'ula zane̱' ca', ne xrne̱'e̱ ca', ne xe̱zr la xu chee̱' ca', na' weláu zi' xúzrequeze bénneache le̱'. Lu xe̱zr la xu da za za' wazí'queze̱' xel-la nabán zeajlí canna.
MAR 10:31 Zánete̱ benne' zaj naca na'a benne' blau xelaque̱' ca benne' bze̱be, na' zánete̱ benne' zaj naca na'a ca benne' bze̱be xelaque̱' benne' blau.
MAR 10:32 Gate zaj xu'e̱ neza dxelegüene̱' zjaque̱' Jerusalén, na' Jesús zria lawe̱' lau benne' ca' dxusé̱dene̱'. Dxelezrebe benne' ca', ne lu xel-la dxelezrebe zjácale̱ne̱' Le̱'. Na' da xula gucá'a Jesús benne' chazrinnu ca' dxusé̱dene̱', na' guzú lawe̱' dxe̱'e̱ le̱' ca naca da dxal-la' gaca chee̱'.
MAR 10:33 Na' guzre̱' le̱': ―¡Le na' xque nigá! Dxegüendxu zéajdxu Jerusalén naga tu benne' gudée̱' neda', Benne' Gulje̱' Bénneache, lu na' benne' xíchaje̱ ca' chee̱ bxruze ca', ne lu na' benne' dxuluxuzájle̱'e̱ da nadxixruj bea Dios, na' xelechugue̱' chia' chee̱ gatia', na' wuludee̱' neda' lu na' benne' zitu' ca'.
MAR 10:34 Nadxa xelún le̱' chia' neda', ne xelu'e̱ neda', ne xuluzré̱'e̱ neda' zrene̱', na' xelutie̱' neda'. Gate gaca chunna zra xebana' ládujla benne' gate.
MAR 10:35 Nadxa Jacobo ne Juan, zri'ine Zebedeo, belezrine̱' lau Jesús, na' gulé̱'e̱ Le̱': ―Benne' Wese̱de, dxaca lázrentu' gunu' chee̱ntu' da nábantu' Lue'.
MAR 10:36 Nadxa bche̱be Jesús le̱': ―¿Bi dxaca lázrele guna'?
MAR 10:37 Na' belexeche̱be̱' Le̱': ―Be̱nna netu' lataj cué'entu', tuntu' chalá'a xabe̱la chiu', ne xetuntu' chalá'a xéglala chiu' naga nna be'u xabáa chiu'.
MAR 10:38 Na' guzre Jesús le̱': ―Le'e quebe nézele da dxenábale. ¿Waca xí'ajle le'e da na' xi'aj neda', da zéaje̱ na ca naca da sácadxu? ¿Waca chuale nisa ca chua' neda' nisa lu xel-la gute?
MAR 10:39 Le̱' belexeche̱be̱': ―Wácantu'. Na' Jesús guzre̱' le̱': ―Da li wé'ajle ca naca da na' xi'aj neda', ne chuale nisa ca chua' neda' nisa.
MAR 10:40 Chee̱ cué'ele chalá'a xabe̱la chia' u chalá'a xéglala chia', quegá neda' gunna' na. Gaca chee̱ benne' ca' ba nucueza Dios chee̱'.
MAR 10:41 Gate xechí benne' ca' dxuse̱de Jesús belenne̱' na, na' belezré̱'e̱ nen Jacobo ne Juan.
MAR 10:42 Jesús gunné̱' benne' ca', na' guzre̱' le̱': ―Ba nézquezle ca dxelún benne' dxelenná be'e benne' xe̱zr la xu ca'. Dxelún cuine̱' xrane benne' xe̱zr la xu ca'. Benne' blau ládujla le̱' dxezi'e̱ ba neza xel-la dxenná bea chee̱'.
MAR 10:43 Quebe gaca caní ládujla le'e. Che nu benne' dxaca lazre̱' gaque̱' benne' blau ládujla le'e, benne' nigá dxal-la' gune̱' zrin chee̱ ljwezre̱',
MAR 10:44 na' che nu benne' ládujla le'e dxaca lazre̱' gaque̱' benne' xíchaje̱, benne' nigá dxal-la' gaque̱' ca tu benne' nada'u chee̱ gune̱' zrin chee̱ xúgute̱ ljwezre̱'.
MAR 10:45 Caní gaca na lawe' da cá'anqueze neda', Benne' Gulje̱' Bénneache, bla'a, quegá chee̱ xelún bénneache zrin chia' neda'. Bla'a chee̱ guna' zrin chee̱ bénneache, ne chee̱ guzúa' xel-la nabán chia' chee̱ guselá' benne' zan.
MAR 10:46 Nadxa belezrine̱' xe̱zre Jericó. Gate na' bedxúaj Jesús xe̱zre nigá nen benne' ca' dxusé̱dene̱', ne nen benne' zante̱, na' zua tu benne' la chul-la le̱' Bartimeo, zri'ine Timeo, dxe'e̱ dxu'a neza dxenabe̱' guna'.
MAR 10:47 Na' ca bénne̱' dxedé Jesús, benne' Nazaret, ga na', na' benne' la chul-la nigá guzú lawe̱' dxenné̱' zizraj: ―¡Jesús, Zri'ine David, bexache lazre' neda'!
MAR 10:48 Benne' zan ca' guledil-le̱' le̱' chee̱ sue̱' zrize, na' le̱' zízrajdxa gunné̱': ―¡Zri'ine David, bexache lazre' neda'!
MAR 10:49 Nadxa gugá Jesús, na' gunné̱': ―Le nne̱ le̱'. Na' gulenné̱' benne' la chul-la na', gulé̱'e̱ le̱': ―Bdipa lazru'. Guxasa lawe' da dxenné̱' lue'.
MAR 10:50 Nadxa bzale̱' lazxe' naxrúa cuzre̱' chalá'ala, na' guxritie̱' chee̱ zrine̱' lau Jesús.
MAR 10:51 Nadxa Jesús gunábene̱' le̱': ―¿Bizra dxaca lazru' guna' chiu'? Na' gunná benne' la chul-la: ―Benne' Wese̱de, dxaca lazra' xexunu' xiaj lawa'.
MAR 10:52 Na' Jesús guzre̱' le̱': ―Waca xexíaju'. Bache bexacu' lawe' da guxéajle̱'u chia'. La ble'ete̱ benne' la chul-la na', na' guxíajle̱ne̱' Jesús la neza.
MAR 11:1 Gate belezrine̱' gáguze naga dxe' xe̱zre Jerusalén, ne zaj xu'e̱ la neza naga zaj dxe' xe̱zre Betfagé, ne xe̱zre Betania zran xi'a chee̱ xaga olivo ca', na' Jesús gusel-le̱' chupa benne' ca' dxusé̱dene̱',
MAR 11:2 na' guzre̱' le̱': ―Le chjaca lu xé̱zredau' da dxe' tu chi na', na' gate zrinle na', cheajxrácale tu burro da'ba' xaga, bea na' netú benne' quebe ne cuie̱' le̱ba'. Le se̱zre-ba', ne le che̱'-ba' nigá.
MAR 11:3 Che nu benne' nabe̱' le'e bizr chee̱ na' dxesé̱zrele-ba', xé̱gale le̱': “Xránadxu dxechine̱'-ba'”, na' la xesél-la'te̱' le̱ba'.
MAR 11:4 Nadxa xjaque̱', ne xeajlexraque̱' burro na' da'ba' xaga dxu'a dxa xu'u cuita neza, na' gulesé̱zre̱'-ba'.
MAR 11:5 Nadxa bal-la benne' zaj zre̱'e̱ na' gulé̱'e̱ le̱': ―¿Bizra' dxunle? ¿Bizr chee̱ na' dxesé̱zrele búrrua'?
MAR 11:6 Nadxa le̱' gulé̱'e̱ benne' ca' ca ba gunnáqueze Jesús, na' belúe̱' le̱' lataj.
MAR 11:7 La belexeché̱'e̱te̱' búrrua' lau Jesús, na' buluzríe̱' zra lane̱' cúzruba', na' guzría Jesús le̱ba'.
MAR 11:8 Benne' zante̱ gulechíluje̱' xicha chee̱', ne xladxe̱' la neza, na' benne' xula gulechugue̱' zina' da gulíxrue̱' la neza.
MAR 11:9 Na' benne' ca' zaj zrie̱' lawe', ne benne' ca' zjaque̱' bze̱be, gulezú lawe̱' dxelenné̱' zizraj: ―¡Gaca ba! ¡Lá'azxa naca benne' ze̱'e̱, nasel-la Xránadxu Dios Le̱'!
MAR 11:10 ¡Lá'azxa naca xel-la dxenná bea da za', xel-la dxenná bea chee̱ xradxu David! ¡Gaca ba Dios!
MAR 11:11 Ca'an guca gate na' guxú'u Jesús xe̱zre Jerusalén, na' guxú'e̱ lu xudau'. Ca gudé gunné̱'e̱ xúgute̱ da zaj nnita du cuite̱', na' bezé̱'e̱ zexíaje̱' xe̱zre Betania nen benne' chazrinnu ca' dxusé̱dene̱', lawe' da ba zeaj dxezré'.
MAR 11:12 Gute xu zra xula gate na' gusá'aque̱' xe̱zre Betania, gudún Jesús.
MAR 11:13 Na' blé'ene̱' zítu'la dxe' tu xaga higo zria na laga', na' xeajnné̱'e̱ che zria da zixre lu xaga na', san quebe bi zria na. Lágaze zria na lawe' da quebe ne zrin zra cuía na da zixre.
MAR 11:14 Nadxa Jesús guzre̱' xaga higo na': ―Cabátadxa nu gagu da zixre chiu'. Benne' ca' dxuse̱de Jesús belénqueze̱' na.
MAR 11:15 Ca gudé na' belexezrine̱' xe̱zre Jerusalén. Ca guxú'u Jesús lu xudau', guzú lawe̱' dxulague̱' lu xudau' benne' zaj zre̱'e̱ we̱te, ne benne' zaj zre̱'e̱ wewa'u na'. Na' bdxixre̱' blaga chee̱ benne' weche̱'e̱ dumí chee̱ benne' zitu', ne bdxixre̱' naga dxelebé' benne' we̱te bgúgudu ca'.
MAR 11:16 Quebe be̱'e̱ lataj nu benne' xudée̱' xua ca' lu xudau'.
MAR 11:17 Nadxa bsé̱dene̱' bénneache ca', dxenné̱': ―Lu xiche lá'azxa dxenná Dios: “Lizra' gaca na tu xu'u naga xuluchálajle̱ Dios benne' zá'aque̱' xúgute̱ xe̱zre.” Le'e ba nunle lizra' ca tu lizre benne' gubán ca'.
MAR 11:18 Na' benne' xíchaje̱ ca' chee̱ bxruze ca', ne benne' dxuluxuzájle̱'e̱ ca da nadxixruj bea Dios belenne̱', na' gulezú lawe̱' dxelexíluje̱' ájala gaca xelútete̱' Jesús lawe' da dxelezrebe̱' Le̱'. Ca'an guca lawe' da dxelexebane xúgute̱ bénneache ca naca da dxuse̱de Jesús le̱'.
MAR 11:19 Ca gula chizrela, Jesús bezé̱'e̱ lu xe̱zre.
MAR 11:20 Ca gula zra xula che zílala, na' Jesús, ne benne' ca' dxusé̱dene̱' belexedée̱' na', na' belelé'ene̱' xaga higo na', ba nabizre na dute̱ lue na.
MAR 11:21 Nadxa xeajsá lazre Pedro, na' guzre̱' Jesús: ―Benne' wese̱de, gunná'xque xaga higo nigá da gulú'u na de'. Bache gubizre na.
MAR 11:22 Jesús gunné̱': ―Le cheajlí lazre Dios.
MAR 11:23 Da li dxapa' le'e, che nútete̱zele nnale, xe̱le xi'a nigá: “Cuasa lue' nigá, xeajchú'u lu nísadau'”, ne che quebe dxun chupa lázrele, na' chéajle̱le waca da ba gunnale, na' gácaqueze na.
MAR 11:24 Chee̱ le̱ na' dxapa' le'e, xúgute̱ da nábale Dios gate dxuchálajle̱le Le̱', che chéajle̱le ba guzile na, ca'an gácaqueze.
MAR 11:25 Gate na' dxuchálajle̱le Dios, che dxezrá'ale nu benne', le gunite lau chee̱ bénnea' chee̱ cá'anqueze Xrale zue̱' xabáa gunite lawe̱' dul-la da nabágale.
MAR 11:26 Che quebe gunite laule chee̱ bénnea', Xrale zue̱' xabáa quebe gunite lawe̱' dul-la da nabágale.
MAR 11:27 Nadxa belexezrine̱' xe̱zre Jerusalén, na' ca dxedá Jesús le̱'aj xudau', na' gulebiga lau Le̱' benne' xíchaje̱ ca' chee̱ bxruze ca', ne benne' dxuluxuzájle̱'e̱ da nadxixruj bea Dios, ne benne' gula ca'.
MAR 11:28 Na' benne' caní gulenábene̱' Jesús: ―¿Bizra xel-la dxenná bea napu' dxunu' da caní? ¿Nuzra be̱nna lue' xel-la dxenná bea nigá?
MAR 11:29 Na' beche̱be Jesús: ―Cá'anqueze neda' de̱ tu da nábeda' le'e. Che xeché̱bele chia', nadxa xapa' le'e ca naca xel-la dxenná bea da napa' dxuna' da caní.
MAR 11:30 ¿Nuzra gusel-la Juan bchue̱' bénneache nisa? ¿Dios che bénneache? Le xeche̱be na'a.
MAR 11:31 Nadxa gulezú lau benne' ca' dxuluchálaje̱' le̱ze̱', dxelé̱ ljwezre̱': ―Che xe̱dxu Le̱', Dios gusel-le̱' le̱', na' nnáqueze̱': “¿Bizr chee̱ na' quebe guxéajle̱le chee̱'?”
MAR 11:32 Che nnadxu bénneache gulesel-le̱' le̱', dxal-la' zrébedxu da xelún benne' xe̱zre ca'. Caní gulenné̱' lawe' da xúgute̱ benne' xe̱zre nigá dxeléajle̱'e̱ guca Juan benne' bchálaje̱' waláz chee̱ Dios.
MAR 11:33 Ca'an guca, gulenná benne' ca', dxelé̱'e̱ Jesús: ―Quebe nézentu'. Nadxa gunná Jesús, dxe̱'e̱ le̱': ―Cá'anqueze neda' quebe nnia' ca naca xel-la dxenná bea da napa' dxuna' da caní.
MAR 12:1 Nadxa guzú lau Jesús dxuchálajle̱ne̱' benne' ca' tu da dxulé'e na. Dxe̱'e̱ le̱': ―Zua tu benne' bde̱'e̱ lba uva ca' lu xe̱zr la xu chee̱', na' be̱ne̱' le̱'aj chee̱ na. Be̱ne̱' tu xiaj lutju naga guchuchuje̱' uva ca', ne be̱ne̱' tu bdupa' naga cue' benne' guxúe̱' da caní. ’Nadxa bdee̱' xe̱zr la xu chee̱' na' lu na' benne' we̱n zrin ca' chee̱ xelune̱' la'a lina chee̱ na, na' guzé̱'e̱ zéaje̱' xe̱zre zitu'.
MAR 12:2 Ca gula zra chee̱ lina, na' gusel-le̱' tu bi we̱n zrin chee̱' cheajxezri'ibe' lu na' benne' we̱n zrin ca' ca naca lina da dxal-la' xezí' benne' xranbe'.
MAR 12:3 Na' benne' we̱n zrin ca' gule̱l-le̱'-be', ne buluzalje̱'-be', na' belexesel-le̱'-be' dáchezebe'.
MAR 12:4 Nadxa xránabe' gusel-le̱' bi we̱n zrin xula, na' bi nigá belú'e̱-be' xiaj, ne gulelé̱'e̱ xíchajbe', ne bulucháchale̱ne̱'-be'.
MAR 12:5 Na' xránabe' na' gusel-le̱' xetube', na' bi nigá belútete̱ benne' ca' le̱be'. Ca gudé na' xránabe' gusel-le̱' bi zandxa bi xula, na' cá'anqueze belú'e̱ bál-labe', ne belútete̱' xebál-labe'.
MAR 12:6 ’Xránabe' zua tu zrí'ine̱' bi biu, bi nazrí'ile̱'e̱ne̱', na' naga bzé̱bete̱ gusel-le̱' zrí'ine̱' nigá, dxenné̱' lu xichaj lázrdawe̱': Dxal-la' xelape̱' ba lá'ana zri'ina'.
MAR 12:7 Benne' we̱n zrin ca' gulenné̱', dxelé̱ ljwezre̱': “Bi nigá gueque chee̱be' xe̱zr la xu nigá. Gútete̱dxu-be' na'a, na' dxi'u xegá'anale̱dxu da nigá.”
MAR 12:8 Ca'an guca, gule̱l-le̱'-be', ne belútete̱'-be', na' gulebéaje̱' be̱l-la' dxen chee̱be' lu xe̱zr la xu na'.
MAR 12:9 Nadxa Jesús gunábene̱' benne' xudau' ca': ―¿Ájazra gun xrane xe̱zr la xu nigá? Walé̱'e̱, na' gútete̱' benne' we̱n zrin ca', na' gudée̱' xe̱zr la xu chee̱' lu na' benne' xula ca'.
MAR 12:10 Ba blábale da naxúaj na lu xiche chee̱ Dios. Dxenná na: Xiaj na' da quebe buluchine benne' we̱n xu'u, xiaj na' naca na'a xiaj blau chee̱ xu'u.
MAR 12:11 Da nigá be̱n Xránadxu, na' dxexebánedxu chee̱ na.
MAR 12:12 Nadxa gulaca lazre̱' xele̱l-le̱' Jesús lawe' da zaj nézene̱' bchálaje̱' da dxulé'e nigá chee̱ gulé'ene̱' ca zaj naca le̱'. Quebe bi gulune̱' lawe' da gulezrebe̱' bi xelún benne' xe̱zre ca'. Chee̱ le̱ na' bulusane̱' Jesús, besí'aque̱'.
MAR 12:13 Ca gudé na' gulesel-le̱' lau Jesús bal-la benne' xudau' fariseo, ne benne' zaj de̱'e̱ Herodes chee̱ gulebéaje̱' Le̱' dizra' chee̱ xelezéquene̱' xelawe̱' Le̱' zria.
MAR 12:14 Benne' caní belelé̱'e̱ lau Jesús, na' gulé̱'e̱ Le̱': ―Benne' wese̱de, ba nézentu' ca dxennáu' da li, ne quebe dxezí'u ca da dxelennaze bénneache, lawe' da quebe dxenná'u Lue' ca zaj naca cúzreze bénneache. Da li naca ca dxusé̱denu' bénneache da naca chee̱ Dios. ¿Dxunna da nadxixruj bea Dios lataj quízrujdxu da dxuchizruj benne' dxenná bea Roma dxi'u, che cabí? ¿Dxal-la' quízrujdxu, che quebe quízrujdxu?
MAR 12:15 Jesús dxéquebe'ene̱' quegá du lazre̱' dxelenábene̱' Le̱' da nigá, na' guzre̱' le̱': ―¿Bizr chee̱ na' dxebéajle neda' dizra'? Le dajguá nigá tu dumí da dxízrujle chee̱ le'eda' na.
MAR 12:16 Na' bedajlegüé̱'e̱ na, na' ca ble'e Jesús le̱ na, na' gunábene̱' le̱': ―¿Nu lau da' dumí nigá, ne nu la naxúaj na nigá? Na' gulé̱'e̱ Le̱': ―Chee̱ benne' dxenná bea Roma.
MAR 12:17 Nadxa Jesús guzre̱' benne' ca': ―Le gunezruj chee̱ benne' dxenná bea Roma da naca chee̱', na' le gunezruj chee̱ Dios da naca chee̱ Dios. Na' belexebánene̱' ca naca da bchalaj Jesús.
MAR 12:18 Nadxa belezrín lau Jesús bal-la benne' xudau' saduceo. Benne' caní dxelenné̱' quebe xelexebán benne' gate. Ca'an guca, gulenábene̱' Jesús caní:
MAR 12:19 ―Benne' wese̱de, Moisés bzuaje̱' chee̱dxu da nadxixruj bea nigá: “Che tu benne' biu gatie̱', ne xegá'ana zru'ule̱', na' quebe nu zua bi chee̱ bénnea', na' benne' biche̱' dxal-la' xequé̱'e̱ nu'ula na' gute benne' chee̱' chee̱ sua zri'ine bénnea' gutie̱'.”
MAR 12:20 Gulezrá' gazre benne' biche̱'. Benne' nedxu bchaga na'abe', na' gútebe' quebe nu zrí'inebe' zua.
MAR 12:21 Na' benne' gudxupe' bequé̱'e̱ nu'ula na', na' cá'anqueze gutie̱' quebe nu zrí'ine̱' zúaqueze. Cá'anqueze guca chee̱ benne' guxunne'.
MAR 12:22 Ca'an guca, benne' gazre caní gulezúale̱ne̱' nu'ula na', na' netue̱' quebe nu zrí'ine̱' guzúa. Naga xeajse̱te̱ na gútete̱ nu'ula'.
MAR 12:23 Na'a xca', gate na' xelexebán benne' gate, ¿nula benne' biu caní gaque̱' benne' chee̱ nu'ula na', lawe' da gulezúale̱ benne' gazre ca' le̱'?
MAR 12:24 Nadxa Jesús guzre̱' benne' ca': ―Nanítele le'e lawe' da quebe núnbeale da naxúaj na lu xiche chee̱ Dios, ne quebe nézele ca naca xel-la waca chee̱ Dios.
MAR 12:25 Gate na' xelexebán benne' gate, québedxa xuluchaga ne̱'e̱, ne québedxa xuluchaga na' bi nu'ula ca'. Xelaque̱' ca zaj naca gubáz chee̱ xabáa.
MAR 12:26 Na'a, ca naca chee̱ benne' gate che xelexebane̱', ¿quebe ne gulábale ca da naxúaj na lu xiche chee̱ Moisés ca gunná Dios gate na' bchálajle̱ne̱' Moisés tu lu xágadau' da dxala xi'? Gunná Dios caní: “Neda' naca' Dios chee̱ Abraham, ne chee̱ Isaac, ne chee̱ Jacob.”
MAR 12:27 Dios naque̱' Dios, quegá chee̱ benne' gate ca'. Naque̱' Dios chee̱ benne' ban ca'. Ca'an naca, álega nanítele le'e.
MAR 12:28 Na' zé̱queze tu benne' dxuxuzájle̱'e̱ da nadxixruj bea Dios, na' benne̱' da dxuchalaj Jesús, ne nézene̱' bzri'e̱ dizra' chawe', na' gunábene̱' Le̱': ―¿Bizra da nadxixruj be'e Dios naca na da blaudxa?
MAR 12:29 Na' Jesús guzre̱' le̱': ―Da bdxixruj be'e̱ da naca na da blaudxa ca xúgute̱ dxenná na caní: Le xene benne' Israel. Xránadxu Dios tuze naque̱'.
MAR 12:30 Bzri'i Xranu' Dios du lazru', ne nen dute̱ bénne'du xu'u, ne nen dute̱ xichaj lázrda'u, ne nen dute̱ xel-la wal-la da napu'. Da nigá naca da nadxixruj bea da blaudxa,
MAR 12:31 na' da nadxixruj bea gudxupe' nácaqueze na ca le̱ na, da dxenná na caní: Bzri'i benne' xula ca nazrí'i cuinu'. Quebe zua xetú da nadxixruj bea da naca blaudxa ca da chupa caní.
MAR 12:32 Nadxa gunná bénnea' dxuxuzájle̱'e̱ da nadxixruj bea Dios, dxe̱'e̱ Jesús: ―Ca'an xanne naca ca beche̱bu', Benne' dxuse̱de. Da li naca ca dxennáu'. Zua tuze Dios, ne quebe nu zua xetú ca Le̱',
MAR 12:33 na' che zri'idxu Dios du lázredxu, ne nen dute̱ xichaj lázrdaudxu, ne nen dute̱ bénne'du xú'udxu, ne nen dute̱ xel-la wal-la da nápadxu, ne che zri'idxu benne' xula ca nazrí'i cuínadxu, da caní zaj zácadxa na ca xúgute̱ be̱ xixre' ca' dxútedxu-ba' lau Dios, ne ca xúgute̱ da dxuzézxedxu lu cugu chee̱ Dios.
MAR 12:34 Nadxa Jesús, ca benne̱' bchálaje̱' chawe', na' guzre̱' le̱': ―Xeláteze ne de̱ na chee̱ nna bea Dios xichaj lázrda'u. Na' québedxa nu bexazre nábene̱' Le̱' dizra' ca'.
MAR 12:35 Jesús dxusé̱dene̱' benne' ca' lu xudau', na' gunné̱': ―¿Bizr chee̱ na' dxelenná benne' dxuluxuzájle̱'e̱ da nadxixruj bea Dios naca Cristo zri'ine David?
MAR 12:36 David ná'queze ca bzéajni'i Be' Lá'azxa le̱', gunné̱': Xránadxu Dios guzre̱' Xrana': “Gudxé'e chalá'a xabe̱la chia', ca zrin zra ba nuzúa' benne' dxeledábague̱' lue', chee̱ na be'enu' le̱'.”
MAR 12:37 Che David ná'queze dxenné̱': “Xrana'”, ¿ájala chee̱ na' naque̱' zrí'ine̱'? Benne' zan ca' du lazre̱' buluzé̱ nague̱' chee̱'.
MAR 12:38 Ca dxuse̱de Jesús benne' ca', na' gunné̱': ―Le gapa chi'i cuínale chee̱ benne' ca'an dxuluxuzájle̱'e̱ da nadxixruj bea Dios. Benne' caní dxeledánene̱' dxelácue̱' zra lane̱' tunna, ne dxeledánene̱' xulugapa bénneache le̱' diuzre nen dizra' ba lá'ana lau bénneache ca'.
MAR 12:39 Benne' caní dxeledánene̱' dxelebé'e̱ lataj blau lu xu'u naga dxelezraga benne' dxelúe lá'ane̱' Dios, ne dxeledánene̱' dxelebé'e̱ lataj blau naga dxelawe̱' xrche'.
MAR 12:40 Benne' caní dxelegüe̱' lizre xrlataj nu'ula ca' ba gulate benne' chee̱', na' chee̱ xululé'e cuine̱' ca benne' xrlátaje, dxelune̱' xel-la dxuluwizraj Dios tunna. Le̱' zaj nabágadxe̱' zria.
MAR 12:41 Tu lasa gate na' dxe' Jesús lu xudau' cuita naga dxelegú'e̱ dumí, na' dxenné̱'e̱ ca dxelún benne' ca' dxelegú'e̱ dumí, ne ca dxelún benne' gunní'a ca', dxelegú'e̱ dumí zren.
MAR 12:42 Ca'an guca, bzrin tu nu'ula xache' ba gute benne' chie̱', na' gulu'e̱ chupa dumí lásedau' da quebe zaj zácate̱ can.
MAR 12:43 Nadxa gunné̱ Jesús benne' ca'an dxusé̱dene̱', na' guzre̱' le̱': ―Da li dxapa' le'e, nu'ula xache' nigá bnézrujdxe̱' ca xúgute̱ benne' ca'an gulegú'e̱ dumí.
MAR 12:44 Xúgute̱ benne' ca' gulegú'e̱ da québedxa dxelechínne̱'. Nu'ula xache' nigá gulu'e̱ ca naca da nape̱', da nunte̱ gawe̱'.
MAR 13:1 Gate bedxúaj Jesús lu xudau', na' tu benne' dxusé̱dene̱' guzre̱' Le̱': ―Benne' Wese̱de, gunná'xque ca zren naca xudau', ne xiaj xrtante̱ caní.
MAR 13:2 Beche̱be Jesús: ―¿Dxelé'enu' na'a ca zren naca xudau' nigá? Québedxa xegá'ana tu xiaj cuzru ljwezre nigá. Ca naca xudau' nigá wabía xí'queze na.
MAR 13:3 Nadxa xjaque̱' lu xi'a chee̱ xaga olivo ca', da zua na chalá'a ca li dxa xu'u xudau'. Gate dxe' Jesús ga na', na' Pedro, ne Jacobo, ne Juan, ne Andrés gulé̱'e̱ Jesús le̱ze̱':
MAR 13:4 ―Dxaca lázrentu' gulé'enu' netu' bata gaca caní. ¿Bizra da ca' xelunna bea na gaca xúgute̱ da caní?
MAR 13:5 Na' beche̱be Jesús: ―Le gapa chi'i cuínale chee̱ quebe nu si xe̱ le'e,
MAR 13:6 lawe' da xelelá' benne' zante̱ xelún lu'a neda', welenné̱' zaj naque̱' Cristo, na' welezí xe̱'e̱ benne' zante̱.
MAR 13:7 ’Le'e, gate xénele gaca wedil-la, ne ba dxaca wedil-la, quebe zrébele. Cá'queze dxal-la' gaca na, san quegá ne zrin zra cheajsé̱ chee̱ na,
MAR 13:8 lawe' da xeledíl-lale̱ benne' tu xe̱zr la xu benne' xetú xe̱zr la xu, na' tu xe̱zre benne' tíl-lale̱ na xetú xe̱zre. Wazrú' zánete̱ xe̱zre, ne wata' gubina', ne wadxé'e na zraga bénneache. Da caní zaj naca na naga su lauze ca naca da xelezaca zi' bénneache.
MAR 13:9 ’Le guxúe cuínale lawe' da xuludée̱' le'e lu na' benne' xu'u lawe', na' xuluzalje̱' le'e lu xu'u naga dxulucá'ana szrene̱' Dios. Xuludée̱' le'e lau benne' xu'u lawe' ca', ne lau benne' dxelenná be'e̱ lawe' da nácale chia' neda'. Gate ca'an gaca, na' guchálajle chia' neda' lau benne' ca'.
MAR 13:10 Nédxudxa ca zrin zra cheajsé̱ chee̱ na, dizra' chawe' chia' gaca lban chee̱ na lau bénneache zaj zre̱'e xúgute̱ xe̱zr la xu.
MAR 13:11 Gate xeleché̱'e̱ le'e chee̱ xuludée̱' le'e lu na' benne' xu'u lawe' ca', quebe cue'le gunne xue bi nnale, ne quebe quilaj lázrele ájala guchálajle. Nne̱le ca da gunna Dios le'e zra na' lawe' da quegá le'eze nne̱le, san Be' Lá'azxa, Le̱' nne̱'.
MAR 13:12 Ca xelún bénneache lu zra na', xuludée̱' bi biche̱' ca' lu na' benne' xelútie̱' le̱be'. Cá'anqueze xelún xruze xrna' ca', xuludée̱' zrí'inequeze̱'. Na' zrí'ine̱' ca' weledábagabe' xruze xrnabe', ne xelunbe' xelátie̱'.
MAR 13:13 Xúgute̱ bénneache xelezré̱'e̱ le'e lawe' da nácale chia' neda'. Bénnea' ze̱ tipe̱' ca zrindxa zra cheajsé̱ chee̱ na, la bénnea'.
MAR 13:14 ’Daniel, bénnea' bchálaje̱' waláz chee̱ Dios bzuaje̱' ca naca chee̱ da sban da guzría xi na. Gate lé'ele le'e zria da nigá lataj lá'azxa naga quebe dxal-la' cuía na, nadxa benne' zaj zre̱'e̱ xe̱zre ca' zaj nababa xe̱zr la xu Judea dxal-la' xuluzrúnnuje̱', ne chjaque̱' lu xi'a zren. (Benne' dxulabe̱' da nigá dxal-la' cheajní'ine̱' da naca chee̱ na.)
MAR 13:15 Nu benne' zria chju'u lizre̱' lu zra na' quebe dxal-la' xexétaje̱' chee̱ bi xebéaje̱' lu xu'u.
MAR 13:16 Benne' ze̱ le̱'e̱ xixre' quebe dxal-la' xezrine̱' lizre̱' chee̱ xequé̱'e̱ zra lane̱'. Dxal-la' xuluzrúnnujte̱ benne' caní.
MAR 13:17 Baxache' xelaca nu'ula zaj zue̱' zi'i, ne nu'ula ca' zaj nuxre̱' bidu dxe'ene lu zra na'.
MAR 13:18 Le naba lau Dios chee̱ quebe gaca beu' zaga gate na' dxal-la' guzrúnnujle,
MAR 13:19 lawe' da xelezaca zidxa bénneache lu zra ca'an ca da quebe ne xelezácate̱', gulala be̱n Xránadxu Dios xe̱zr la xu nigá, ne québedxa xelezácadxe̱' ca'.
MAR 13:20 Che Xránadxu Dios quebe guzáchie̱' zra ca', québedxa nu láqueze̱', san ba bzachie̱' zra ca'an lawe' da nazrí'ine̱' bi chee̱' ca', bi ca' ba gucá'a Le̱'.
MAR 13:21 ’Lu zra na', che nu benne' dxe̱'e̱ le'e: “Le na' xque, nigá zua Cristo”, u che nne̱': “Le na' xque, na' ze̱'”, quebe chéajle̱le chee̱'.
MAR 13:22 Welelá' benne' xelezí xe̱'e̱, benne' xelune̱' lu'a Cristo, ne xelune̱' lu'a xel-la waca chee̱ xabáa chee̱ xelezí xe̱'e̱ bi ca' ba gucá'a Dios che xelezéquene̱'.
MAR 13:23 Le sua le'e ban lazre'. Neda' ba gucha' le'e xúgute̱ nédxute̱ ca gaca na.
MAR 13:24 Nadxa gunná Jesús: ―Lu zra ca', gate te zra chee̱ xel-la zi' caní, na' chul-la gubizra, ne québedxa gusení' beu'.
MAR 13:25 Belaj ca' xelexruj na zran xabáa, na' ca da zaj nalá' zaj ze̱ tipa zran xabáa welezrízete̱ na.
MAR 13:26 Ca nadxa xelelé'ene̱' neda', Benne' Gulje̱' Bénneache, za'a lu beuj bza, napa' xel-la waca zren, ne da xabáa chia'.
MAR 13:27 Na' la sél-latea' gubáz chee̱ xabáa chia' ca' chee̱ xuluchague̱' benne' ca' gunnía', benne' zaj zre̱'e̱ dapa saca chee̱ xe̱zr la xu nigá, benne' zitu' zá'aca nila, zá'aca na'la.
MAR 13:28 ’Le guse̱de ca naca da dxulé'e na ca naca chee̱ xaga higo. Gate na' dxelexedxé'ene zruze na, ne zá'aca xrlegue na, na' ba nézele za beu' la.
MAR 13:29 Cá'anqueze, gate na' lé'ele ba dxelaca da caní, nézele ba zua gáguze zra cheajsé̱ na, ne gácate̱ na.
MAR 13:30 Da li dxapa' le'e, xúgute̱ da caní gaca na nédxudxa ca xelate bénneache zaj zre̱'e̱ lu zra na'.
MAR 13:31 Xabáa ne xe̱zr la xu nigá wadé chee̱ na. Xrtizra' nigá quebe te na ca'anze, san waca li na.
MAR 13:32 ’Ca naca chee̱ zra na', ne chee̱ beu' na' quegá nu neze bata gaca na. Quebe zaj neze gubáz chee̱ xabáa, ne Zrí'inequeze Dios quebe nézene̱'. Tuze Xradxu Dios nézene̱'.
MAR 13:33 ’Chee̱ le̱ na', le sua le'e ban lazre'. Le guxúe, ne le guchálajle̱ Dios lawe' da quebe nézele bátala zrin zra na'.
MAR 13:34 Gaca na ca guca chee̱ tu benne' biu, benne' guzé̱'e̱ zéaje̱' zitu'. Gate na' za dxúaje̱' xu'u, na' dxudée̱' da nape̱' lu na' bi we̱n zrin chee̱' ca', ne dxunézruje̱' tu tube' zrin da xelunbe', ne dxusebague̱' benne' ze̱' dxa xu'u guxúe xánnie̱'.
MAR 13:35 Chee̱ le̱ na', le sua le'e ban lazre' lawe' da quebe nézele le'e bátala xelá' xrane xu'u, che dxe xrínneze, che dxe̱la, che ca cuezre xjeaj, che che zílala,
MAR 13:36 ga gaze xelé̱'e̱ chadí dute̱, na' cheajxraque̱' le'e dxásele.
MAR 13:37 Ca da dxennía', dxapa' le'e, dxapa' xúgute̱ benne': ¡Le sua ban lazre'!
MAR 14:1 Xechupa zra za zrin chee̱ xelune̱' laní chee̱ xulusá lazre̱' ca naca da be̱n Dios gate na' bebéaje̱' benne' Israel ca' lu xe̱zr la xu Egipto, laní na' dxelawe̱' xeta xtila da quebe nachixre cua zichaj chee̱ na. Na' benne' xíchaje̱ ca' chee̱ bxruze ca', ne benne' dxuluxuzájle̱'e̱ da nadxixruj bea Dios belilaj lazre̱' ájala xelune̱' chee̱ xele̱l-le̱' Jesús bagácheze chee̱ xelútie̱' Le̱'.
MAR 14:2 Na' gulenné̱': ―Quegá gundxu na lu laní, chee̱ quebe dxe'ena zraga bénneache.
MAR 14:3 Zua Jesús lu xe̱zre Betania, lu lizre tu benne' le̱' Simón, benne' guzríe̱' we̱' guzru'. Dxácate̱ zaj dxe'e̱ dxelawe̱' na', na' bzrin tu nu'ula nu'e̱ tu da dau' da naca na xiaj xrtan da nazí le na alabastro, ne nazrate̱ na da za da dxelá zixre chee̱ xiaj nardo, da zácale̱'e̱ na. Na' gulé̱'e̱ da dau' na', ne blálaje̱' da za na' xichaj Jesús.
MAR 14:4 Bal-la benne' ca', benne' zaj zre̱'e̱ na', belezré̱'e̱, na' gulenné̱', dxelé̱ ljwezre̱': ―¿Bizr chee̱ na' be̱n ditaj nu'ula nigá da za na'?
MAR 14:5 Waca ta'u da na' chee̱ sídxadxu ca lázrujdxu chee̱ tu iza, chee̱ gácale̱dxu benne' xache' ca'. Na' guledil-le̱' nu'ula'.
MAR 14:6 Na' Jesús guzre̱' le̱': ―Quebe xe̱le nu'ula nigá ca'. ¿Bizr chee̱ na' dxunle le̱' ze̱de? Ca naca da be̱n nu'ula nigá chia' neda' naca na da cháwele̱'e̱.
MAR 14:7 Benne' xache' ca' tu zrázqueze̱' ládujla le'e. Waca gunle benne' ca' chawe' gate dxaca lázrele, san neda' quegá tu súale̱za' le'e.
MAR 14:8 Nu'ula nigá be̱ne̱' ca da guzéquene̱', gulu'e̱ da za be̱l-la' dxen chia' nédxula chee̱ zra gate gachia' lu xe̱dxu ba.
MAR 14:9 Da li dxapa' le'e, gátete̱ze na' gaca lban chee̱ dizra' chawe' chia' lu xúgute̱ xe̱zre zaj nnita xe̱zr la xu nigá, cá'anqueze zrálajqueze ca naca da be̱n nu'ula nigá, chee̱ xulusá lazre̱' chee̱'.
MAR 14:10 Nadxa Judas Iscariote, tu benne' chazrinnu ca' dxuse̱de Jesús, guxíaje̱' xeajchálajle̱ne̱' benne' xíchaje̱ ca' chee̱ bxruze ca' chee̱ xelexegá'ane̱' dizra' ájala gune̱' gudée̱' Jesús lu na' benne' ca'.
MAR 14:11 Ca belén benne' ca' ca gunná Judas, gulebéle̱'e̱ne̱', na' guleche̱be lazre̱' xulunézruje̱' le̱' dumí. Nadxa Judas guzú lawe̱' dxexílaje̱' ájala gudée̱' Jesús lu na' benne' ca'.
MAR 14:12 Zra nedxu chee̱ laní gate dxelawe̱' xeta xtila da quebe nachixre cua zichaj chee̱ na, ne dxelutie̱' zríla'dau' chee̱ Laní Pascua, gate na' dxulusá lazre̱' ca guca gate bebéaj Dios benne' Israel ca' lu xe̱zr la xu Egipto, na' benne' ca' dxuse̱de Jesús buluche̱be̱' Le̱': ―¿Gazra dxaca lazru' chéajntu' cheajcuézentu' da gágudxu Laní Pascua?
MAR 14:13 Nadxa Jesús gusel-le̱' chupa benne' ca' dxusé̱dene̱'. Dxe̱'e̱ le̱': ―Le chjaca lu xe̱zre Jerusalén, na' cheajxrácale tu benne' biu ze nu'e̱ tu dxe'e nisa. Le chjácale̱ne̱',
MAR 14:14 na' naga xexu'e̱, xe̱le benne' xrane xu'u na': “Benne' Wese̱de chee̱dxu dxenné̱': ¿Gazra zua xu'u naga guna' Laní Pascua, chee̱ gawa' tu zren nen benne' ca' dxusé̱deda'?”
MAR 14:15 Nadxa gulé'ene̱' le'e tu xu'u zren da naca na gudxupe' cuía sibe da bache nabeza na. Na' gucuézale da gágudxu.
MAR 14:16 Nadxa benne' ca' dxusé̱dene̱' belexedxúaje̱' gusá'aque̱', na' belezrine̱' xe̱zre Jerusalén. Na' guca xúgute̱ ca da ba guzre Jesús le̱', na' bulucueze̱' da xelawe̱' lu Laní Pascua.
MAR 14:17 Ca gula chizrela, na' bzrin Jesús nen benne' chazrinnu ca' dxusé̱dene̱'.
MAR 14:18 Na' ca zaj dxe'e̱ dxelawe̱', na' gunná Jesús, dxe̱'e̱ le̱': ―Da li dxapa' le'e, tu benne' ládujla le'e, benne' dxawe̱' tu zren nen neda', gudée̱' neda' lu na' benne' ca' dxeledábague̱' neda'.
MAR 14:19 Nadxa benne' ca' gulezúa xácheze̱', ne gulezú lawe̱' dxuluche̱be̱' Jesús tu tue̱': ―¿Neda' xca'? Na' xetúe̱' cá'anqueze guzre̱' Le̱': ―¿Neda' xca'?
MAR 14:20 Nadxa beche̱be Jesús, dxe̱'e̱ le̱': ―Tu benne' ládujla le'e chazrínnule, benne' dxawe̱' tu zren nen neda' lu xé'ena nigá.
MAR 14:21 Da li gatia' neda', Benne' Gulje̱' Bénneache, ca da naxúaj na chia' lu xiche chee̱ Dios. Baxache' naca chee̱ benne' na' gudée̱' neda' lu na' benne' ca' dxeledábague̱' neda'. Cháwedxa gaca chee̱ bénnea' la ca gúlaje̱'.
MAR 14:22 Dxácate̱ zaj zre̱'e̱ dxelawe̱', na' gucá'a Jesús xeta xtila, ne guzre̱' Dios: “Xcalenu'.” Ca gudé bzúzruje̱' na, na' bnézruje̱' na chee̱ benne' ca', ne guzre̱' le̱': ―Le gagu na. Da nigá dxulé'e na ca gaca chee̱ be̱l-la' dxen chia'.
MAR 14:23 Nadxa guqué̱'e̱ tu da dxé'ajdxu, ne ca gudé guzre̱' Dios: “Xcalenu'”, na' bnézruje̱' na benne' ca', na' xúgute̱' gulé'aje̱' late' weaj da na'.
MAR 14:24 Nadxa Jesús guzre̱' le̱': ―Da nigá zéaje̱ na dxen chia' da dxucá'ana chawe na xel-la wezría cube. Dxen chia' nigá lalaj na ne̱ chee̱ benne' zan.
MAR 14:25 Da li dxapa' le'e, québedxa xí'aja' xrise uva caní ca zrindxa zra gate na' xí'aja' da cube naga dxenná bea Dios xabáa.
MAR 14:26 Ca gudé belul-le̱' da gaca ba Dios, na' belegüene̱' lu Xi'a Xaga Olivo Ca'.
MAR 14:27 Nadxa gunná Jesús, dxe̱'e̱ le̱': ―Xúgute̱le le'e gusán lázrele neda' na'a xe̱la lawe' da naxúaj na lu xiche chee̱ Dios, dxenné̱': “Gutia' benne' dxuxúe̱' zrila' ca', na' zrila' ca' welase dínnajba'.”
MAR 14:28 Gate te xebana' lu xe̱dxu ba, wexá'a neda' nédxula ca le'e naga nababa Galilea.
MAR 14:29 Nadxa Pedro guzre̱' Jesús: ―Láqueze xúgute̱ benne' caní xulusán lazre̱' Lue', neda' québequeze guna' ca'.
MAR 14:30 Jesús guzre̱' le̱': ―Da li dxapa' lue', lu xe̱la nigaze, nédxula ca za cuezre xjeaj chupa lasa, nnau' chunna lasa quebe núnbe'u neda'.
MAR 14:31 Na' dxennáqueze Pedro na', gunné̱': ―Láqueze gatia' tu zren nen Lue', québequeze nnia' quebe núnbe'a Lue'. Cá'anqueze gulenná xúgute̱'.
MAR 14:32 Nadxa belezrine̱' tu lataj naga nazí le na Getsemaní, na' gunná Jesús, dxe̱'e̱ benne' ca' dxusé̱dene̱': ―Le cueza nigá dxácate̱ cha'a cheajchálajle̱na' Dios.
MAR 14:33 Nadxa Jesús guché̱'e̱ Pedro, ne Jacobo, ne Juan, na' guzú lau dxezúa xáche'le̱'e̱.
MAR 14:34 Na' dxe̱'e̱ benne' ca', dxenné̱': ―Ba dxunte̱ na watia' lawe' da zua xáche'le̱'a. Le xegá'ana le'e nigá, ne le sua ban lazre'.
MAR 14:35 Nadxa Jesús guzé̱'e̱ zéaje̱' xelate' ca na'la, na' guzúe̱' sudxú'ala, gunabe̱' Dios che gaca, quebe tée̱' xel-la zi' ca da dxal-la' saque̱' lu zra na'.
MAR 14:36 Ca dxuchálajle̱ne̱' Dios na', gunné̱': ―Xrae, xúgute̱ wazéquenu' Lue'. Bselá neda' chee̱ quebe saca zi'a lu da caní. Quebe gaca ca dxaca lázreza' neda', san ca dxaca lazru' Lue' gaca na.
MAR 14:37 Nadxa bezrine̱' naga zaj zra' benne' ca'an dxusé̱dene̱', ne xeajxraque̱' le̱' dxelásie̱'. Na' Jesús guzre' Pedro: ―Simón, ¿dxásequezu' nigá? ¿Quebe guzéquenu' gusebán lazru' tu chí'idau'ze?
MAR 14:38 Le sua ban lazre', ne le guchálajle̱ Dios chee̱ quebe gun zréaje da xriwe̱' le'e. Da li, lu xichaj lázrdaule dxaca lázrele gunle da xrlátaje, san lu be̱la' dxen chee̱le dxate ni'a na'le.
MAR 14:39 Nadxa Jesús guxíaje̱' da xula zeajchálajle̱ne̱' Dios, na' tuze ca dxenné̱'.
MAR 14:40 Nadxa ca bezrine̱', xecha lasa xeajxraque̱' benne' ca'an dxusé̱dene̱', dxelásie̱' lawe' da xu'u bchigala xiaj lawe̱'. Benne' caní quebe belexezrela lazre̱' bi xelé̱'e̱ Le̱'.
MAR 14:41 Na' ca bezrín Jesús da guxunne' lasa, na' guzre̱' benne' ca': ―¡Le gase na'a, ne le xezí' lázre'! ¡Bache na! ¡Ba bzrin zra tea' neda', Benne' Gulje̱' Bénneache, lu na' benne' dul-la ca'!
MAR 14:42 ¡Le chasa! ¡Le chu'u na'a! ¡Ba za benne' gudée̱' neda' lu na' benne' ca' dxeledábague̱' neda'!
MAR 14:43 Dxácate̱ dxuchalaj Jesús caní, na' bzrin Judas, tu benne' nabábale̱ne̱' benne' chazrinnu ca' dxuse̱de Jesús, na' zjácale̱ benne' zan le̱', zaj nu'e̱ xia nalá, ne xaga ca'. Zaj naque̱' benne' gulesel-la benne' xíchaje̱ ca' chee̱ bxruze ca', ne benne' ca' dxuluxuzájle̱'e̱ da nadxixruj bea Dios, ne benne' gula sina ca'.
MAR 14:44 Judas, benne' dxudée̱' Jesús lu na' benne' ca' dxeledábague̱' Le̱', ba blé'ene̱' benne' ca' tu da gune̱' da gaca bea na nule̱' naca Jesús, gunné̱': ―Bénnea' gunupa', benne' na' qué̱l-lale. Le xeché̱'e̱, ne le guxúe xanne' chee̱ quebe xelé̱'.
MAR 14:45 Na' ca bzrine̱' na', gubigue̱' lau Jesús, ne dxe̱'e̱ Le̱': ―Benne' Wese̱de. Na' bnupe̱' Le̱'.
MAR 14:46 Nadxa benne' ca' gule̱l-le̱' Jesús, ne belexeché̱'e̱ Le̱' ba nadxéaje̱'.
MAR 14:47 Tu benne' dxune̱' Jesús tu zren guléaje̱' xia nalá chee̱', na' guchugue̱' naga tu bi we̱n zrin chee̱ bxruze blau.
MAR 14:48 Nadxa Jesús guzre̱' benne' ca': ―¿Bdxuajle le'e zale nen xia nalá, ne xaga ca' chee̱ qué̱l-lale neda', dxugúnele neda' ca tu benne' gubán?
MAR 14:49 Xúgute̱ zra guzúa' neda' ládujla le'e dxusé̱deda' le'e lu xudau', na' cabata' gudé̱l-lale neda'. Da nigá dxaca na chee̱ gaca li ca da naxúaj na lu xiche chee̱ Dios.
MAR 14:50 Nadxa xúgute̱ benne' ca' dxuse̱de Jesús bulusán lazre̱' Le̱'. Buluzrúnnuje̱'.
MAR 14:51 Tu bi cuide', bi zéajle̱be' Jesús, ne nácube' tu ladxe' laga, gule̱l-la benne' ca' le̱be'.
MAR 14:52 Na' bsanbe' ladxe' laga da nácube', na' bzrúnnujbe' gala xídezebe'.
MAR 14:53 Nadxa beleché̱'e̱ Jesús lau bxruze blau, na' belezraga xúgute̱ benne' xíchaje̱ ca' chee̱ bxruze ca' ga na', ne benne' gula sina ca', ne benne' ca' dxuluxuzájle̱'e̱ da nadxixruj bea Dios.
MAR 14:54 Pedro nawe̱' Jesús zítu'la, na' bzrine̱' chale'aj chee̱ lizre bxruze blau, naga begá'ane̱' tu zren nen zruza ni'a na' benne' xu'u lawe' ca', dxuluxuché̱'e̱ dxu'a xi'.
MAR 14:55 Na' bxruze blau, ne xúgute̱ benne' chee̱ xu'u lawe' blau chee̱ judío ca' gulíl-laje̱' tu da gagu na zria Jesús chee̱ xelezéquene̱' xuluzría xi'e̱ Le̱' chee̱ gatie̱', na' quebe bi belezrélene̱'.
MAR 14:56 Benne' zante̱ belún lazre̱' chee̱ Jesús. Quebe bedxúaj dizra' chee̱' tuze ca dxelenné̱' tue̱' ne xetúe̱'.
MAR 14:57 Bal-le̱' belase̱', na' gulagu zría Jesús da we̱n lazre', dxelenné̱':
MAR 14:58 ―Netu' ba bénnentu' chee̱', gunné̱': “Neda' guchínnaja' xudau' nigá da belún bénneache, na' ca gaca chunna zra xechisa' xetú xudau' da quebe xelún bénneache.”
MAR 14:59 Cá'anqueze quebe butil-le ca da dxelenné̱'.
MAR 14:60 Nadxa bxruze blau guxase̱' ládujla xúgute̱ benne' ca', na' bche̱be̱' Jesús: ―¿Québequeze bi dizra' dxuxuzri'u Lue'? ¿Bizra da nigá dxelenné̱' chiu' Lue'?
MAR 14:61 Jesús guzúe̱' zrize, ne gútuqueze bi dizra' buzri'e̱. Na' bxruze blau bche̱be̱' Le̱' xecha lasa, dxenné̱': ―¿Nacu' Lue' Cristo, Zri'ine Dios Lá'azxa?
MAR 14:62 Na' gunná Jesús, dxe̱'e̱ le̱': ―Awe', ca' naca'. Walé'ele neda', Benne' Gulje̱' Bénneache, dxe'a chalá'a xabe̱la chee̱ Dios, nape̱' dute̱ xel-la waca. Walé'ele neda' zezá'a lu beuj bza.
MAR 14:63 Nadxa bxruze blau gucheze̱' zra lane̱', na' gunné̱': ―¿Núzradxa nachínedxu benne' xelagu zria Le̱'?
MAR 14:64 Le'e bache bénquezle ca dxenné̱' schanni' chee̱ Dios. ¿Bi dxennale le'e xca'? Xúgute̱ benne' ca' gulenné̱': ―Nabía xi'e̱ dxal-la gatie̱'.
MAR 14:65 Nadxa bal-la benne' ca' gulezú lawe̱' dxuluzré̱'e̱ Le̱' zrene̱', na' bulucache̱' lau Jesús, ne buluzálaje̱' Le̱'. Dxelenné̱': ―Gunné̱ xa'a nuzra dxue Lue'. Na' benne' zruza ni'a na' benne' xu'u lawe' belú'e̱ lau Jesús.
MAR 14:66 Pedro guzúe̱' lu chale'aj zrila, na' bzrin tu nu'ula we̱n zrin chee̱ bxruze blau,
MAR 14:67 na' ca ble'ebe' Pedro dxe'e̱ dxu'a xi' dxuxuché'e̱, na' gunná'abe' le̱', ne gúzrebe' le̱': ―Lue' dxedále̱quezu' Jesús, benne' Nazaret na'.
MAR 14:68 Na' beche̱be Pedro, dxenné̱': ―Quebe núnbe'a bénnea', ne quebe nezda' nu chee̱ na' dxuchálaju'. Na' bedxúaj Pedro chale'aj naga dxelu'e̱. Nadxa gudxezre xjeaj.
MAR 14:69 Nadxa nu'ula we̱n zrin chee̱ bxruze blau na' gunná'abe' Pedro xecha lasa, na' gunabe', dxe̱'e̱be' benne' ca' zaj zre̱'e̱ na': ―Benne' nigá naque̱' tuze benne' ca'an.
MAR 14:70 Pedro xecha lasa bzue̱' Jesús chalá'ala. Xetú chí'idau' benne' ca' zaj zre̱'e̱ na' gulé̱'e̱ Pedro xecha lasa: ―Da líqueze lue' nacu' tuze benne' ca'an lawe' da nacu' benne' chee̱ xe̱zre ca' zaj nababa Galilea. Ca dxuchálaju' naca bea na da na'.
MAR 14:71 Nadxa Pedro guzú lawe̱' dxuzría xi' cuine̱', ne be̱n chúchue̱' xrtizre̱', gunné̱': ―Quebe núnbe'a bénnea' dxennale le'e ca'.
MAR 14:72 Ca'an guca, gudxezre xjeaj da gudxupe' lasa. Nadxa Pedro xeajsá lazre̱' ca da guzre Jesús le̱', gunné̱': “Nédxudxa ca za cuezre xjeaj chupa lasa, lue' nnau' chunna lasa quebe núnbe'u neda'.” Na' ca xeajsá lazre̱' da nigá, gudxézrele̱'e̱.
MAR 15:1 Ca guxaní' che zila, na' benne' xíchaje̱ ca' chee̱ bxruze ca' belexedupe̱' nen benne' gula sina ca', ne benne' ca' dxuluxuzájle̱'e̱ da nadxixruj bea Dios, ne xúgute̱ benne' chee̱ xu'u lawe' blau chee̱ judío ca'. Guleché̱'e̱ Jesús nadxéaje̱', na' buludée̱' Le̱' lu na' Pilato.
MAR 15:2 Pilato gunábene̱' Jesús: ―¿Nacu' Lue' wenná bea chee̱ judío ca'? Na' beche̱be Jesús: ―Ca' naca na, ca ba gunnáu' lue'.
MAR 15:3 Na' benne' xíchaje̱ ca' chee̱ bxruze ca' gulawe̱' zria Jesús da zante̱.
MAR 15:4 Nadxa Pilato gunábene̱' Jesús xecha lasa: ―¿Quebe bi dizra' dxuzri'u? Gunná'xque ca da zánete̱ da dxelawe̱' zria Lue'.
MAR 15:5 Jesús quebe bi dizra' ca buzri'e̱. Ca' guca, bebánele̱'e̱ Pilato.
MAR 15:6 Pilato zua tu da dxúnqueze̱' tu iza tu iza gate dxaca Laní Pascua. Dxusane̱' tu benne' xu'e̱ lizre xia, nútete̱ze benne' xelenaba bénneache ca' le̱'.
MAR 15:7 Lu xu'u lizre xia na' xu'u tu benne' le̱' Barrabás, benne' nune̱' tu zren benne' ca' belutie̱' benne' ca', gate na' gudíl-lale̱ne̱' benne' Roma ca'.
MAR 15:8 Na' belezrín lau Pilato benne' xe̱zre ca', ne gulezú lawe̱' dxelenabe̱' lau Pilato gune̱' ca dxúnqueze̱'.
MAR 15:9 Na' beche̱be Pilato: ―¿Dxaca lázrele le'e gusana' bénnea' naque̱' wenná bea chee̱ judío ca'?
MAR 15:10 Caní gunná Pilato lawe' da dxeque be'ene̱' buludée̱' benne' xíchaje̱ ca' chee̱ bxruze ca' Jesús lu ne̱'e̱ lawe' da dxelaque̱' zre'e lazre' Le̱'.
MAR 15:11 Na' benne' xíchaje̱ ca' chee̱ bxruze ca' beleché̱'e̱ benne' xe̱zre ca', ne gulegú'u xel-le̱' le̱' chee̱ xelexenabe̱' lau Pilato gusane̱' Barrabás.
MAR 15:12 Nadxa Pilato gunábene̱' benne' ca': ―¿Bi dxaca lázrele le'e guna' chee̱ bénnea' naque̱' wenná bea chee̱ judío ca'?
MAR 15:13 Nadxa belexeche̱be̱', gulenné̱' zizraj: ―Bde̱'e̱ xaga béguaj.
MAR 15:14 Na' Pilato bche̱be̱' benne' ca': ―¿Bizra da cale̱la nun benne? Xecha lasa gulenné̱' zizraj: ―Bde̱'e̱ xaga béguaj.
MAR 15:15 Nadxa Pilato bsane̱' Barrabás lawe' da dxaca lazre̱' xegá'ane̱' chawe' nen benne' xe̱zre ca'. Na' ca gudé na' bsebague̱' benne' ca' xeline̱' Jesús tu xide, na' bdee̱' Le̱' lu na' benne' ca' chee̱ xuludé̱'e̱ Le̱' xaga béguaj.
MAR 15:16 Nadxa benne' dxjaque̱' wedil-la guleché̱'e̱ Jesús lu chale'aj xu'u lawe', na' bulutupe̱' xúgute̱ ljwezre' benne' dxjaque̱' wedil-la lataj na'.
MAR 15:17 Na' bulugácue̱' Jesús tu ladxe' bzawe, ne buluzríe̱' xíchaje̱' tu da zaj nune̱' nen zruze xaga xeche'.
MAR 15:18 Nadxa gulezú lawe̱' dxelenné̱' zizraj: ―¡Gaca ba wenná bea chee̱ judío ca'!
MAR 15:19 Na' belú'e̱ xichaj Jesús nen tu xia xtila, ne buluzré̱'e̱ Le̱' zrene̱'. Na' buluzú zribe̱' lawe̱', dxelape̱' Le̱' ba lá'ana.
MAR 15:20 Ca gudé bulucá'ana dítaje̱' Le̱' caní, na' belexegu'e̱ ladxe' bzawe, na' buluxugácue̱' Le̱' zra lá'anaqueze̱'. Nadxa belexebéaje̱' Le̱' chee̱ chjaque̱' naga xuludé̱'e̱ Le̱' xaga béguaj.
MAR 15:21 Tu benne' chee̱ xe̱zre Cirene le̱' Simón, xra Alejandro, ne Rufo, zezé̱'e̱ le̱'e̱ xixre', na' ca bedée̱' na', na' bulusebague̱' le̱' gu'e̱ xaga béguaj chee̱ Jesús.
MAR 15:22 Guleché̱'e̱ Jesús tu lataj nazí le na Gólgota, da zéaje̱ na “Lataj Chee̱ Zrita Xichaj Benne' Gate.”
MAR 15:23 Nadxa bulunézruje̱' Jesús xrise uva wal-la da nachixre da sla' chee̱ mirra. Jesús quebe gu'e̱ na.
MAR 15:24 Nadxa buludé̱'e̱ Le̱' xaga béguaj, na' benne' dxjaque̱' wedil-la gulebéaje̱' da gulé'e na nule̱' xelexale̱' zra lana Jesús, na' bila xelexúa tu tue̱'.
MAR 15:25 Guca che zílala gate na' buludé̱'e̱ Jesús xaga béguaj.
MAR 15:26 Buludé̱'e̱ da naxúaj xichaj xaga béguaj chee̱ Jesús da dxulé'e na da nabague̱', da naxúaj na caní: “Wenná Bea Chee̱ Judío Ca'.”
MAR 15:27 Cuita Jesús buludé̱'e̱ le̱'e xaga béguaj ca' chupa benne' gubán, tue̱' chalá'a xabe̱la chee̱', ne xetúe̱' chalá'a xéglala chee̱'.
MAR 15:28 Ca'an guca, guca li ca da naxúaj na lu xiche chee̱ Dios naga dxenné̱' caní: “Buluzue̱' Le̱' tu zren nen benne' we̱n da zrinnaj ca'.”
MAR 15:29 Na' benne' dxeledée̱' na' gulenné̱' schanni' chee̱ Jesús, ne buluté̱' xíchaje̱', dxelenné̱': ―Awe'. Guchínnaju' Lue' xudau' chee̱ntu', na' gate gaca chunna zra, na' xechisu' na.
MAR 15:30 Bselá cuinu' na'a, ne bexetaj le̱'e xaga béguaj na'.
MAR 15:31 Cá'anqueze belún benne' xíchaje̱ ca' chee̱ bxruze ca', ne benne' dxuluxuzájle̱'e̱ da nadxixruj bea Dios. Belún le̱' chee̱ Jesús, dxelé̱' ljwezre̱': ―Benne' xula bselá benne, san Le̱' québequeze dxezéquene̱' guselá cuine̱'.
MAR 15:32 Lue', Cristo, wenná bea chee̱ benne' Israel, bexetaj le̱'e̱ xaga béguaj na' chee̱ le'entu', na' chéajle̱ntu' chiu'. Cá'anqueze belún benne' ca' zaj de̱'e̱ le̱'e xaga béguaj ca' tu zren nen Jesús, gulenné̱' schanni' chee̱'.
MAR 15:33 Ca bzrin wagubizra, na' guchul-la dute̱ lu xe̱zr la xu nigá tu chi'i wal-la gula.
MAR 15:34 Ca gudé na', na' gunná Jesús zizraj: ―Eloi, Eloi, ¿lama sabactani? Da nigá zéaje̱ na: “Dios chia', Dios chia', ¿bizr chee̱ na' nusanu' neda'?”
MAR 15:35 Bal-la benne' ca' zaj zre̱'e̱ na' belenne̱' na, na' gulenné̱': ―Le xene. Dxenné̱' Elías, bénnea' bchálaje̱' waláz chee̱ Dios.
MAR 15:36 Nadxa tu benne' guzá chégüe̱', na' xeajlá'awaje̱' lu xrise uva zichaj tu da dxezrupe na nisa, na' bzue̱' na lawe' tu xia xtila da bcuene̱' dxu'a Jesús chee̱ xi'aje̱', na' gunná benne' nigá: ―Cuézadxu. Guxúexquedxu che wida Elías chee̱ xulétaje̱' Le̱'.
MAR 15:37 Nadxa Jesús gudxezre xe̱'e̱, na' gútete̱'.
MAR 15:38 Ca ná'queze gudxeza ladxe' da ze̱ lu xudau', guca na chúpala. Gucá'a na dxa'la, bedxúajte̱ na zri'la.
MAR 15:39 Na' benne' dxenná be'e̱ lu wedil-la, benne' ze̱' lau Jesús, gate na' blé'ene̱' ca gudxezre xe̱'e̱, ne ca guca gútete̱', na' gunné̱': ―Da líqueze benne' nigá guque̱' Zri'ine Dios.
MAR 15:40 Cá'anqueze zaj ze̱ na' bal-la nu'ula dxelenné̱'e̱ zítu'la. Ládujla nu'ula caní zaj ze̱ María Magdalena, ne Salomé, ne María, xrna Jacobo cuide' ne José.
MAR 15:41 Nu'ula caní gusá'acale̱ne̱' Jesús, ne gulácale̱ne̱' Le̱' gate na' gudé̱' naga nababa Galilea. Cá'anqueze zaj ze̱ na' zánedxa nu'ula xula, nu'ula ca' belezrine̱' Jerusalén tu zren nen Jesús.
MAR 15:42 Ca za chizrela bzrin José, benne' Arimatea ga na'. Benne' nigá naque̱' benne' blau ládujla benne' ca' chee̱ xu'u lawe' blau chee̱ judío ca'. Cá'anqueze le̱' dxebeze̱' zra la' Dios chee̱ nna be'e̱. Lawe' da naca zra dxulucueze̱', zra nedxu chee̱ zra dxulupá'ane̱', du lazre̱' guxú'e̱ lau Pilato, na' gunabe̱' si'e̱ lataj xexu'e̱ Jesús.
MAR 15:44 Bebánele̱'e̱ Pilato ca bénnene̱' ba gute Jesús, na' gunné̱' benne' dxenná be'e̱ lu wedil-la na' chee̱ gunabe̱' che ba guca ca'.
MAR 15:45 Gate bénnea' dxenná be'e̱ lu wedil-la gunné̱' ca'an guca, nadxa Pilato bnézruje̱' José lataj bexu'e̱ Jesús.
MAR 15:46 Nadxa José guzi'e̱ tu ladxe' xtila laga, na' bulétaje̱' Jesús, ne bulazre̱' Le̱' ladxe' xtila na'. Na' gúxrue̱' Jesús tu lu ba da ba gude̱ne̱' le̱'e̱ xiaj xre, na' bsézxuje̱' ba na' nen tu xiaj zren.
MAR 15:47 María Magdalena, ne María, xrna José belelé'equezne̱' naga bulucache̱' Jesús.
MAR 16:1 Ca gudé zra dxulupá'ane̱', na' María Magdalena, ne Salomé, ne María, xrna Jacobo, gulezí'e̱ da dxelá zixre chee̱ cheajlelu'e̱ Jesús.
MAR 16:2 Na' bál-la'la zra nedxu chee̱ da gazre zra belezrine̱' dxu'a ba gate na' za dxalaj gubizra.
MAR 16:3 Na' gulenné̱', dxelé̱' ljwezre̱': ―¿Nuzra cua xiaj da naxezxuj ba?
MAR 16:4 Ca gulenné̱'e̱, na' belelé'ene̱' xiaj zren na' da bulusézxuje̱' ba, ba nadúa na.
MAR 16:5 Ca gulu'e̱ lu ba, na' belelé'ene̱' tu benne' dxe'e̱ chalá'a xabe̱la, nácue̱' zra lane̱' tunna da chiche, na' belezrebe̱'.
MAR 16:6 Na' gunná benne' nigá, dxe̱'e̱ nu'ula ca': ―Quebe zrébele. Le'e dxexílajle Jesús, benne' Nazaret, bénnea' gudé̱'e̱ le̱'e̱ xaga béguaj. Bache bebán bénnea'. Québedxa xu'e̱ nigá. Le nna' lataj naga gulexrúe̱' Le̱'.
MAR 16:7 Le chjaca na'a, le cheaje̱zre benne' ca' bsé̱dene̱', ne Pedro cuía lau Jesús chéaje̱' naga nababa Galilea ca le'e. Na' xelé'equezle Le̱' ca ba gunnáqueze̱'.
MAR 16:8 Nadxa nu'ula ca' buluzrúnnuje̱', besí'aque̱' dxu'a ba lawe' da belezrébele̱'e̱. Quebe nu gulé̱queze̱' ca da guca na lawe' da dxelezrébele̱'e̱.
MAR 16:9 Ca gudé bebán Jesús ládujla benne' gate ca guxaní' zra nedxu chee̱ da gazre zra, na' ble'e lawe̱' zate ca' María Magdalena, nu'ula na' bebéaj Jesús gazre be' xriwe̱' guxú'e̱.
MAR 16:10 Nu'ula nigá guxíaje̱' xeaje̱zre̱' benne' ca' gulaque̱' Jesús tuze, zaj zre̱'e̱ baxácheze, ne dxelebezre̱'.
MAR 16:11 Gate na' gulenne̱' nabán Jesús, na' ba ble'e nu'ula nigá Le̱', quebe guléajle̱'e̱.
MAR 16:12 Ca gudé na' ble'e lau Jesús nazrala chupa benne' ca' bsé̱dene̱' zaj xu'e̱ neza le̱'e̱ xixre'.
MAR 16:13 Benne' caní belexebi'e̱, na' xeajlegue̱zre̱' benne' xezícala. Cá'anqueze benne' caní quebe guléajle̱'e̱.
MAR 16:14 Ca gudédxa, na' ble'e lau Jesús chinéaj benne' ca' bsé̱dene̱' ca zaj dxe'e̱ dxelawe̱', na' gudil-le̱' le̱' lawe' da quebe guléajle̱'e̱ ba bebane̱', ne lawe' da zaj naque̱' lázrdau zide' lawe' da quebe guléajle̱'e̱ chee̱ benne' ca' belexelé'ene̱' Le̱' ca gudé bebane̱'.
MAR 16:15 Na' gunné̱', dxe̱'e̱ benne' ca': ―Le chjaca du ca naca xe̱zr la xu. Le cu'u lban chee̱ dizra' chawe' chia' chee̱ xelénqueze xúgute̱ bénneache.
MAR 16:16 Benne' chéajle̱'e̱, ne chue̱' nisa, la bénnea', na' benne' quebe chéajle̱'e̱, wabía xi' bénnea'.
MAR 16:17 Da dxelunna bea caní xululé'e benne' ca' xeléajle̱'e̱ chia', xuluchínene̱' La neda' chee̱ xelexebéaje̱' be' xriwe̱'. Xuluchálaje̱' dizra' nazrala.
MAR 16:18 Welúxrue̱' be̱la' ca', ne che xelé'aje̱' da gute benne', quebe bi xeléquene̱'. Cá'anqueze wuluxrúa ne̱'e̱ benne' quebe chawe' zaj zue̱', na' xelexexaque̱'.
MAR 16:19 Ca gudé bchálaj Xránadxu Jesús nen benne' ca', na' Dios bechise̱' Le̱' xabáa, na' gudxé'e̱ chalá'a xabe̱la chee̱ Dios.
MAR 16:20 Nadxa benne' ca' guledxúaje̱', xeajlelu'e̱ lban chee̱ dizra' chawe' nigá du ca naca xe̱zr la xu nigá. Lé̱queze Xránadxu gúcale̱ne̱' le̱', na' bdxixruj be'e̱ dizra' chee̱' ne̱ chee̱ xel-la waca ca' da za xabáa da belune̱'. ¡Ca'an gaca na!
LUK 1:1 Benne' zan ba belune̱' ca da gulezéquene̱' buluzúaje̱' cáte̱ze naca da guca ládujla dxi'u,
LUK 1:2 cáte̱ze na' gulé̱ benne' ca', benne' belelé'ene̱' nédxudaute̱ ca naca da guca na, na' buluchálaje̱' dizra' chawe' na'.
LUK 1:3 Cá'anqueze neda' ba bchi'a xánnia' xúgute̱ da ca' gulaca na nédxudaute̱, na' dxéqueda' chawe' guzúaja' da nigá chiu' cáte̱ze guca, bi nazrí'ite̱ lazra', lue', Teófilo.
LUK 1:4 Dxuna' caní chee̱ nézenu' naca na da li ca da ba bululé'ene̱' lue'.
LUK 1:5 Gate na' naca Herodes wenná bea chee̱ xe̱zre ca' zaj nababa Judea, na' zua tu bxruze le̱' Zacarías, benne' nababe̱' cue' bxruze ca' gunná be'e Abías ca ni'te. Zru'ula Zacarías na' le̱' Elisabet, na' nácaqueze Zacarías na' zre sua benne' ca' gulebábale̱ bxruze Aarón.
LUK 1:6 Zacarías ne zru'ule̱' Elisabet gulaque̱' xrlátaje lau Dios, ne dxelune̱' ca zaj naca da bdxixruj bea Xránadxu, ne ca da naxúaj na lu da gunné̱'. Ca'an guca, quebe nu guzeque gagu zria le̱' lau Dios.
LUK 1:7 Quebe nu zrí'ine̱' chilá', lawe' da naca Elisabet na' nu'ula wizre, na' dxúpate̱' zaj bezúale̱'e̱ gula.
LUK 1:8 Tu zra, gate belexala bxruze ca' naga nababa Zacarías xelune̱' zrin lu xel-la bxruze chee̱' lau Dios,
LUK 1:9 cáte̱ze naca da dxelún bxruze ca', na' bexala Zacarías chu'e̱ lu lataj lá'azxa chee̱ Xránadxu lu xudau' chee̱ guzezxe̱' xala.
LUK 1:10 Dxácate̱ na' dxezxe xala na', ca naca benne' ca' zaj zra' chalé'ajla dxuluchálajle̱ne̱' Dios.
LUK 1:11 Nadxa ble'e lau tu gubáz chee̱ xabáa chee̱ Xránadxu, ze̱' chalá'a xabe̱la chee̱ cugu naga zría xala dxezxe na.
LUK 1:12 Ca ble'e Zacarías gubáz chee̱ xabáa na', guzúe̱' ste̱be, ne bzrébele̱'e̱.
LUK 1:13 Gubáz chee̱ xabáa na' guzre̱' le̱': ―Zacarías, quebe zrebu', lawe' da ba ben Dios dizra' da dxuchálajle̱nu' Le̱', na' nu'ula chiu', Elisabet, walaj tu zri'ine̱', bi na' guzú' labe' Juan.
LUK 1:14 Wabéle̱'e̱nu', ne gaca chiu' tu da ba neza zrente̱, na' benne' zan xelebene̱' lawe' da ba gulaj bidu na'.
LUK 1:15 Ca'an gaca lawe' da gaca zri'inu' szrente̱ lau Dios. Quebe xí'ajbe' xrise uva wal-la, u da dxusuzre na bénneache, na' gate gálajte̱be' tu súale̱zqueze Be' Lá'azxa nen le̱be'.
LUK 1:16 Ne̱ chee̱ le̱be' benne' zan xelexaque̱' bi chee̱ Xránadxu Dios.
LUK 1:17 Juan nigá quia laube' lau Xránadxu, na' Be' na', ne xel-la waca da gulezúale̱ na Elías, bénnea' bchálaje̱' waláz chee̱ Dios gate nate, xelezúale̱ na le̱be', chee̱ guzúabe' tuze benne' ca' zaj naque̱' xra xrna nen zrí'ine̱', ne chee̱ gulé'ebe' benne' dxeledábague̱' Dios chee̱ xelune̱' ca dxenná xrtizra' Dios. Ca'an gaca, gucá'ana cháwebe' bénneache chee̱ xelezí' lu ne̱'e̱ Xránadxu.
LUK 1:18 Zacarías na' bche̱be̱' gubáz chee̱ xabáa: ―¿Ájazra gaca nezda' gaca caní? Neda' ba nagúlale̱'a, ne cá'anqueze naca nu'ula chia'.
LUK 1:19 Na' beche̱be gubáz chee̱ xabáa na': ―Neda' naca' Gabriel, ne naca' we̱n zrin chee̱ Dios. Le̱' gusel-le̱' neda' chee̱ guchálajle̱na' lue', ne guzenda' lue' dizra' chawe' nigá.
LUK 1:20 Na'a, lawe' da quebe guxéajle̱'u da gucha' lue', xegá'anu' quebe gaca nníu' cadxa galaj zri'inu'. Caní gaca na ca zrinte̱ zra chee̱ na.
LUK 1:21 Dxácate̱ na' zaj zra' benne' ca' chalé'ajla, dxelebeze̱' Zacarías, ne dxelexebánene̱' lawe' da dxezréle̱'e̱ne̱', quebe dxedxúaje̱' lu lataj lá'azxa.
LUK 1:22 Gate bedxúaj Zacarías, québedxa dxaca nnie̱'. Nadxa guleque bé'ene̱' ba ble'e Zacarías tu da ble'e Dios le̱' lu lataj lá'azxa na'. Na' le̱' bta ná'ase̱', lawe' da quebe dxaca nnie̱'.
LUK 1:23 Ca xeajsé̱ chee̱ zra ca' dxal-la' gun Zacarías zrin chee̱ xudau', na' bezé̱'e̱ zexíaje̱' lizre̱'.
LUK 1:24 Ca gudé na' zru'ule̱' Elisabet ba zue̱' zi'i, na' quebe bdxúaje̱' lataj bchina' chie̱' ca gazxu' beu', na' dxenné̱' lu lázrdawe̱':
LUK 1:25 “Xrana' Dios ba be̱ne̱' chia' da nigá chee̱ québedxa xuluzúa bénneache neda' chalá'ala.”
LUK 1:26 Ca gudé xrupa beu' gate na' bchálajle̱ gubáz chee̱ xabáa na' Zacarías, na' Dios gusel-le̱' le̱' tu xe̱zre nababa Galilea nazí le na Nazaret,
LUK 1:27 chee̱ cheajchálajle̱ne̱' tu nu'ula cuíde'dau' le̱be' María. Le̱be' ba zua guchaga na'be' benne' biu na' le̱' José, benne' naque̱' zri'ine zre sua wenná bea David.
LUK 1:28 Gubáz chee̱ xabáa na' guxú'e̱ naga zua María na', na' guzre̱'-be': ―Padiuzre. Dios dxune̱' lue' tu culuén. Xránadxu zúale̱ne̱' lue'. Dios ba be̱ne̱' tu da cháwedxa chiu' quézcala chee̱ xúgute̱ nu'ula ca'.
LUK 1:29 Gate María na' ble'ebe' gubáz chee̱ xabáa na', bebánebe' ca naca dizra' na', na' gunabe' lu lázrdaube': ¿Bizr chee̱ na' dxugape̱' neda' diuzre caní?
LUK 1:30 Nadxa gunná gubáz chee̱ xabáa na': ―María, quebe zrebu' lawe' da ba bzrué'enu' tu culuén da dxun Dios chiu' lue'.
LUK 1:31 Na'a, zua da gunna Dios chiu', na' galaj tu bidu biu chiu', na' guzú' labe' Jesús.
LUK 1:32 Le̱be' gácabe' szren, na' xelennáqueze̱' naque̱' Zri'ine Dios szrente̱, na' Xránadxu Dios gune̱' Le̱' wenná bea ca guca xra xrtawe̱' David,
LUK 1:33 chee̱ nna bé'etecaze̱' xe̱zr la xu Israel, na' xel-la dxenná bea chee̱' quebe cheajsé̱queze chee̱ na.
LUK 1:34 Nadxa María bché̱bebe' gubáz chee̱ xabáa: ―¿Ájazra gaca da nigá, lawe' da quebe nu benne' biu zúale̱na'?
LUK 1:35 Gubáz chee̱ xabáa na' gunné̱': ―Be' Lá'azxa chee̱ Dios sue̱' xichaj lázrda'u, na' xel-la waca chee̱ Dios szrente̱ sua na nen lue'. Chee̱ le̱ na' bidu na' gálajbe' gácaquezebe' chee̱ Dios, na' sí'queze labe' Zri'ine Dios.
LUK 1:36 Cá'anqueze bila ljwezru' Elisabet wálajqueze bidu chee̱' lácala ba naque̱' benne' gula. Ca'an naca, nu'ula na' gulenné̱' naque̱' wizre, ba zeaj xrupa beu' bnezruj Dios chee̱'.
LUK 1:37 Quebe bi de̱ da quebe gaca gun Dios.
LUK 1:38 Nadxa gunná María: ―Neda' nácaqueza' we̱n zrin chee̱ Xránadxu. Gun Dios chia' ca da ba gunnáu'. Na' gubáz chee̱ xabáa na' bezé̱'e̱ naga zua María na'.
LUK 1:39 Ca lu zra na' María guzá'abe' zéajbe' tu xé̱zredau' da zua na laduj xi'a ca' chee̱ ga nababa Judea.
LUK 1:40 Na' guxú'ube' lizre Zacarías, ne bgápabe' diuzre Elisabet.
LUK 1:41 Gate ben Elisabet dizra' da gunné̱ María, na' bidu na' xú'ube' le̱'e Elisabet guxrítebe', na' guzúale̱ Be' Lá'azxa le̱'.
LUK 1:42 Nadxa gunné̱' tu chi'e̱ zizraj: ―Dios ba be̱ne̱' tu da cháwedxa chiu' quézcala chee̱ xúgute̱ nu'ula ca', lawe' da ba zua da be̱nna Dios chiu'.
LUK 1:43 ¿Núzraqueze naca' neda', za xrna Xrana' ga zua' neda'?
LUK 1:44 Cáte̱ze benda' dizra' da gunnéu', na' guxrite bidu chia' lu le̱'a lu xel-la dxebé chee̱be'.
LUK 1:45 Ba neza naca na chiu' guxéajle̱'u lawe' da gaca li ca da gunná Xránadxu.
LUK 1:46 Nadxa gunná María: Bénne'du xu'a dxue lá'ana na Xrana'.
LUK 1:47 Lázrdawa' dxebé na ca dxun Dios, weselá chia'.
LUK 1:48 Lawe' da gudxé' Dios gunne xue chia', nácaqueza' we̱n zrin chee̱'. Na'a su lau na, xúgute̱ benne' xelenné̱' nazi'a tu culuen zren chee̱ Dios.
LUK 1:49 Dios Szrente̱ ba be̱ne̱' tu da zrente̱ chia' neda'. Chee̱ le̱ na' lá'azxa naca La Le̱'.
LUK 1:50 Le̱' xexache lázrqueze̱' xúgute̱ benne' ca' dxelezrebe̱' Le̱'.
LUK 1:51 Da zrente̱ ba be̱n Le̱'. Bzue̱' zrila benne' ca' dxulucá'ana szren cuine̱'.
LUK 1:52 Bebéaje̱' benne' blau ca' lu lataj chee̱', ne bechise̱' benne' dxexruj lazre' ca'.
LUK 1:53 Bnézrujle̱'e̱ da gulagu benne' dxeledún, na' benne' gunní'a ca' bca'ane̱' le̱' cá'aze.
LUK 1:54 Gúcale̱ne̱' benne' Israel, benne' we̱n zrin chee̱' ca' lawe' da bezrí lázrqueze̱' le̱',
LUK 1:55 ca da guche̱be lazre̱' chee̱ xra xrtáudxu ca', chee̱ Abraham, ne chee̱ benne' xrtie̱' ca' chadía chacanna.
LUK 1:56 María begá'anale̱be' Elisabet ca chunna beu', na' ca gudé na' bezrinbe' lízrebe'.
LUK 1:57 Ca gudé na' guxá' beu' chee̱ Elisabet na' chee̱ galaj bidu chee̱', na' guzane̱' tu bi biu chee̱'.
LUK 1:58 Benne' walízr chee̱' ca', ne xrtia ljwezre̱' belezrine̱' dxelebene̱' nen le̱', gate belenne̱' Dios bezrí lázrele̱'e̱ le̱'.
LUK 1:59 Gate guca xrunu' zra, belezrine̱' chee̱ xelechúgue̱' lu xpé̱labe' da gulé'e na naca be̱' bi chee̱ Dios, na' gulaca lazre̱' xuluzúe̱' labe' Zacarías ca le̱ xrabe'.
LUK 1:60 Na' gunná xrnabe': ―Quebe gaca. Dxal-la' si' labe' Juan.
LUK 1:61 Na' gulé̱'e̱ le̱': ―¿Bizr chee̱ na'? Quebe nu chilá' xrtia ljwézrele le̱' ca'.
LUK 1:62 Na' buluche̱be̱' xra bidu na', bulutá ne̱'e̱ chee̱ xelenézene̱' ájazra guzúe̱' labe'.
LUK 1:63 Na' xrabe' na' gunabe̱' tu blágadau', na' bzuaje̱' le̱'e̱ na: Juan si' labe'. Na' xúgute̱ benne' ca' belexebánene̱'.
LUK 1:64 Ca' guca Zacarías benné̱', na' guzú lawe̱' dxue lá'ane̱' Dios.
LUK 1:65 Ca belelé'ene̱' da nigá, xúgute̱ benne' walízr chee̱' belexebánene̱', na' ca naca xe̱zre zaj nnita laduj xi'a ca ga nababa Judea, buluchálaje̱' ca da guca.
LUK 1:66 Xúgute̱ benne' belenne̱' na, gulezú lawe̱' dxelenné̱' lu lázrdawe̱', ne buluche̱be ljwezre̱' tue̱' xetúe̱': ―¿Ájazraqueze gun bi nigá? Naca bea na Xránadxu zúale̱ne̱'-be'.
LUK 1:67 Na' Be' Lá'azxa guzúale̱ne̱' Zacarías, xra bidu nigá, na' bchálaje̱' waláz chee̱ Dios, gunné̱':
LUK 1:68 ¡Gaca ba Xránadxu, Dios chee̱ xe̱zre Israel! Ba ble̱'e̱ naga zúadxu, bénneache chee̱', na' bselé̱' dxi'u.
LUK 1:69 Ba gusel-le̱' tu benne' wál-lale̱'e̱, weselá chee̱dxu. Bénnea' gulaj ládujla xrtia David, benne' we̱n zrin chee̱'.
LUK 1:70 Ca'an guche̱be lazre' Dios lu dxu'a benne' ca' buluchálaje̱' waláz chee̱' nédxudaute̱.
LUK 1:71 Guche̱be lazre̱' guselé̱' dxi'u lu na' benne' dxelezré̱'e̱ dxi'u, ne lu na' benne' dxelecuídene̱' dxi'u.
LUK 1:72 Xezrí lazre̱' xra xrtáudxu ca', ne quebe gal-la lazre̱' xel-la wezría lá'azxa chee̱'.
LUK 1:73 Da nigá naca na da guche̱be lazre' Dios da bzua chache̱' nen xra xrtáudxu Abraham, da naca tu da gunne̱' chee̱dxu dxi'u.
LUK 1:74 Guche̱be lazre̱' guselé̱' dxi'u lu na' benne' dxelezré̱'e̱ dxi'u chee̱ gaca gundxu zrin chee̱', ne quebe zrébedxu,
LUK 1:75 ne gácadxu xrlátaje lau Le̱', ne gácadxu bi cheé̱queze̱' xúgute̱ zra naca bandxu.
LUK 1:76 Lue', zrí'ina'dau', sí'queze lau' bi guchálajqueze waláz chee̱ Dios szrente̱, lawe' da quia lau' lau Xránadxu, salju' neza chee̱ Xránadxu,
LUK 1:77 Guzénenu' bénneache chee̱', Le̱' gunite lawe̱' dul-la chee̱', ne guselé̱' benne' ca'.
LUK 1:78 Ca'an gaca lawe' da dxexezrí lazre' Dios dxi'u. Dxune̱' na'a dxalaj tu xi' chee̱ xabáa da dxusení' chee̱dxu,
LUK 1:79 na' gusení na naga zaj zra' benne' zaj zre̱'e̱ lu na' xel-la gute, chee̱ cu'u na dxi'u lu neza xrtante̱ lau Dios.
LUK 1:80 Bidu na' bgúlabe', ne bgula bénne'du xu'ube' chawe' lu da naca chee̱ Dios. Guzúaquezbe' le̱'e̱ xixre' lawe' lataj cadxa bzrin zra ble'e laube' xe̱zre Israel.
LUK 2:1 Ca lu zra na' gate dxenná bea Augusto, benne' xe̱zre Roma, benne' dxenná be'e̱ xúgute̱ cue' xe̱zr la xu, le̱' gunná bé'ene̱' xelú'u lu xiche xúgute̱ benne' zaj zre̱'e̱ xe̱zr la xu.
LUK 2:2 Da nigá naca da nédxudau' gulú'u bénneache lu xiche. Guca caní gate naca Cirenio benne' zaj xu'u lu ne̱'e̱ xe̱zre ca' zaj nababa Siria.
LUK 2:3 Xúgute̱ bénneache dxun na ba xen chjaque̱' lu xe̱zre naga zaj nababe̱' chee̱ xelu'e̱ lu xiche.
LUK 2:4 Chee̱ le̱ na' José guzé̱'e̱ lu xe̱zre Nazaret, da nababa Galilea, chee̱ bzrine̱' lu xe̱zre Belén, da nababa Judea, naga gulaj wenná bea David. Bzrin José na' lawe' da naque̱' xrtia David na'.
LUK 2:5 José guxíaje̱' Belén chee̱ chu'e̱ lu xiche tu zren nen María. María nigá ba naché̱bebe' guchaga ná'ale̱be' José, na' ba bnezruj Dios chee̱be'.
LUK 2:6 Dxácate̱ na' zaj zre̱'e̱ lu xe̱zre Belén, na' bzrin zra san María bidu chee̱'.
LUK 2:7 Lu xe̱zre na' gulaj bidu nedxu chee̱', na' bchele̱'-be' ládxe'du ca', na' gúxrue̱'-be' xu'u naga dxelún chi'e̱ da dxelagu bea ca', lawe' da quebe ga bzrela tu lataj lu xu'u naga che̱'e̱.
LUK 2:8 Gagu cuita xe̱zre Belén zaj zra' benne' ca' dxuluxúe̱' zrila' ca', dxelexegá'ane̱' le̱'e̱ xixre' chizrela, dxuluxúe̱' zrila' chee̱' ca'.
LUK 2:9 Naga zaj zre̱'e̱ ble'e lau tu gubáz chee̱ xabáa chee̱ Xránadxu. Na' xel-la naxaní' chee̱ Xránadxu Dios bsaní na naga zaj zre̱'e̱. Ca'an guca, belezrébele̱'e̱.
LUK 2:10 Na' gubáz chee̱ xabáa na' guzre̱' le̱': ―Quebe zrébele, lawe' da dxuzenla' le'e tu dizra' chawe'. Ne̱ chee̱ dizra' nigá xelebéle̱'e̱ xúgute̱ bénneache.
LUK 2:11 Na'a, lu xe̱zre chee̱ David, ba gulaj tu bidau' gácabe' weselá chee̱le. Bi nigá naque̱' Cristo, Xránadxu.
LUK 2:12 Da nigá gaca na tu da gunna bea na chee̱le. Cheajxrácale bidu dxe'ene nigá, dxélabe' ládxe'du ca', ne de̱be' tu xu'u naga dxelún chi'e̱ da xelagu bea ca'.
LUK 2:13 Chadí lau, cuita gubáz chee̱ xabáa na' bululé'e lau zandxa gubáz chee̱ xabáa, dxelúe lá'ane̱' Dios, dxelenné̱':
LUK 2:14 ¡Gaca ba Dios na'ala, na' lu xe̱zr la xu nigá sua xel-la dxebeza zri lazre' chee̱ bénneache, benne' dxelune̱' ca da dxaca lazre' Dios!
LUK 2:15 Gate besí'aca gubáz chee̱ xabáa ca', zeajxaque̱' xabáa, nadxa benne' ca' dxuluxúe̱' zrila' gulezú lawe̱' dxelé̱' ljwezre̱' tue̱' xetúe̱': ―Chéajxquedxu lu xe̱zre Belén cheajnnadxu da ba guca, ca da ba gunná Xránadxu Dios, guzre̱' dxi'u.
LUK 2:16 Ca'an guca, besí'aca zé̱zxuje̱', na' xeajlexraque̱' María ne José, ne bidu dxe'ene na', de̱be' xu'u naga dxelún chi'e̱ da xelagu bea ca'.
LUK 2:17 Gate belelé'ene̱' bidu na', na' buluchálajle̱ne̱' benne' ca' ca da gunná gubáz chee̱ xabáa ca da naca chee̱ bidu na'.
LUK 2:18 Na' xúgute̱ benne' ca' belenne̱' da nigá belexebánele̱'e̱ne̱' ca da gulenná benne' caní.
LUK 2:19 María bcache̱' da nigá lu xichaj lázrdawe̱', na' blaba lazre̱' ca naca da nigá.
LUK 2:20 Ca'an guca besí'aca benne' ca' dxuluxúe zrila', dxulucá'ana szrene̱' Dios, ne dxelúe lá'ane̱' Le̱' ca naca xúgute̱ da belenne̱', ne da belelé'ene̱', lawe' da guca xúgute̱ ca da guzre gubáz chee̱ xabáa na' le̱'.
LUK 2:21 Ca guca xrunu' zra, na' gulechugue̱' tu lu xpe̱la bidu na' ca da nadxixruj bea na chee̱ Dios, na' belú'e̱ La bidu na' Jesús, cáte̱ze naca da gunná gubáz chee̱ xabáa na', guzre̱' María nédxudxa ca za gu'e̱ bidu na'.
LUK 2:22 Ca bzrin zra chee̱ xelune̱' ca bdxixruj bea Moisés chee̱ xelexexaque̱' chawe' lau Dios, na' belú'e̱ bidu na' lu xe̱zre Jerusalén chee̱ xuluzúe̱'-be' lu na' Xránadxu Dios.
LUK 2:23 Belune̱' caní lawe' da ba naxúaj lu da nadxixruj bea Xránadxu Dios da dxenná na caní: Xúgute̱ bi biu, bi nedxu gálajbe' dxal-la' guzúale-be' chee̱ Xránadxu Dios.
LUK 2:24 Na' xjaque̱' xeajlegu'e̱ dxen chee̱ be̱ xíxre'du ca' lau Dios ca da dxenná da nadxixruj bea na chee̱ Xránadxu Dios, da dxenná na: Chupa bgugu, che chupa bxínnedau'.
LUK 2:25 Ca lu zra na' zua tu benne' biu gula lu xe̱zre Jerusalén, le̱' Simeón. Naque̱' tu benne' chawe', na' dxue lá'anaqueze̱' Dios, ne dxebeze̱' benne' sel-la Dios chee̱ guselé̱' bénneache Israel. Zúale̱ Be' Lá'azxa chee̱ Dios Simeón na'.
LUK 2:26 Be' Lá'azxa ba guzre̱' Simeón na' quebe gatie̱' cadxa lé'ene̱' Cristo, benne' na' sel-la Xránadxu Dios.
LUK 2:27 Simeón nigá guxíaje̱' lu xudau' lawe' da bsi' Be' Lá'azxa chee̱ Dios le̱'. Na' gate xra xrna bidu Jesús zaj nu'e̱-be' lu xudau' chee̱ xelune̱' chee̱be' ca da bdxixruj be'e Moisés,
LUK 2:28 na' Simeón na' guqué̱'e̱ bidu na'. Bnide̱'-be', ne be̱ lá'ane̱' Dios, gunné̱':
LUK 2:29 Xrana', na'a waca gunnu' lataj gatia' lu xel-la dxebeza zri lazre' lawe' da ba be̱nu' ca da guche̱be lazru' chia', naca' we̱n zrin chiu'.
LUK 2:30 Nen xiaj láuqueza' ba ble'eda' Benne' Weselá,
LUK 2:31 Bénnea' ba bzu' chee̱ gácalene̱' xúgute̱ bénneache.
LUK 2:32 Le̱' naque̱' tu xi' da gusení na chee̱ benne' quebe zaj nababe̱' Israel. Ne̱ chee̱ Le̱' gaca tu da ba neza chee̱ bénneache chiu', benne' Israel.
LUK 2:33 José ne xrna Jesús belexebánele̱'e̱ne̱' ca da gunná Simeón chee̱ bidu Jesús.
LUK 2:34 Nadxa Simeón gunabe̱' lau Dios gune̱' chee̱' da chawe', na' guzre̱' María, xrna Jesús: ―¡Gunná'xque nigá! Bidu nigá, Dios nuzúe̱' le̱be' chee̱ gunbe' chee̱ benne' Israel ca', cheajlecházie̱' benne' zante̱ lu na' da xriwe̱', na' benne' zante̱ xelexexase̱' lau Dios. Le̱be' gácabe' tu da dxunna bea chee̱ Dios, na' benne' zante̱ xuluzúe̱' le̱be' chalá'ala.
LUK 2:35 Ne̱ chee̱ le̱be' gulé'e lau ca da dxeajlesá lazre' tu tue̱'. Na' chiu' lue' da nigá gaca na ca tu xia nalá, da cheajsúa lu lázrda'u.
LUK 2:36 Cá'anqueze zua na' tu nu'ula dxenné̱' waláz chee̱ Dios, le̱' Ana. Nu'ula nigá naque̱' zri'ine Fanuel, ne xrtia Aser. Ba naque̱' nu'ula gúlale̱'e̱. Bchaga ne̱'e̱ gate na' naque̱' nu'ula cuíde'te̱, na' guzúale̱ne̱' benne' chee̱' gazre iza.
LUK 2:37 Na' begá'ane̱' tuze̱', ne ba xu'e̱ tapa lalaj tapa iza. Quebe becuase̱' xudau', na' dxune̱' zrin chee̱ Xránadxu Dios te zra chizrela. Dxune̱' gubasa, ne dxuchálajle̱ne̱' Dios.
LUK 2:38 Ana na' bzrínqueze̱' na', na' ca gudé guzre̱' Dios: “Xcalenu'”, na' guzú lawe̱' dxuchálaje̱' chee̱ bidu Jesús nen xúgute̱ benne' ca' dxelebeze̱' benne' na' sel-la Dios chee̱ guselé̱' benne' Jerusalén ca'.
LUK 2:39 Ca belune̱' xúgute̱ ca da dxenná da nadxixruj bea Xránadxu, nadxa besiá'que̱' xjaque̱' naga nababa Galilea, na' belexezrine̱' xe̱zre Nazaret da naca lazrie̱'.
LUK 2:40 Na' bidu Jesús bgúlabe', ne gúcadxabe' chuchu, ne gúcadxabe' bi naxéajni'i, na' Dios bca'ane̱' le̱be' chawe'.
LUK 2:41 Xra xrna' Jesús, tu tu iza dxjá'aque̱' xe̱zre Jerusalén gate dxu'u laní chee̱ xulusá lazre' benne' judío ca da be̱n Dios, bebéaje̱' xra xrtawe̱' ca' lu xe̱zr la xu Egipto.
LUK 2:42 Ca guque Jesús chazrinnu iza, na' xjá'aque̱' xúgute̱' Jerusalén, ca dxelúnqueze̱' ca dxaca laní.
LUK 2:43 Ca gudé laní, na' besiá'que̱', na' bidu Jesús begá'anabe' Jerusalén, ne quebe guleque be'e xrnabe', ne José.
LUK 2:44 Dxeléquene̱' Jesús zezabe' ládujla benne' zan ca', na' besiá'que̱' tu zra nez. Gate belexilje̱'-be' ládujla benne' xrtie̱' ca', ne benne' ca' zaj núnbe'e̱,
LUK 2:45 quebe belexezrélne̱'-be'. Ca'an guca belexebi'e̱ zeajxá'aque̱' Jerusalén chee̱ cheajlexedílje̱'-be' na'.
LUK 2:46 Ca gudé guca chunna zra, nadxa belexezrélne̱'-be' lu xudau', dxe'ebe' ládujla benne' ca' dxuluxuzájle̱'e̱ da nadxixruj bea Dios, na' dxenbe' ca dxelenné̱', ne dxuché̱bebe' benne' ca'.
LUK 2:47 Xúgute̱ benne' ca' dxelenne̱' dxelexebánene̱' chee̱be' ca naca xel-la sina chee̱be', ne ca naca da dxuchálajle̱be' le̱'.
LUK 2:48 Gate belelé'e xra xrnabe' le̱be', na' belexebánene̱'. Na' gunná xrnabe', dxe̱'e̱-be': ―Zri'ina', ¿bizr chee̱ na' be̱nu' caní nen netu'? Cadite ste̱be ba guzúantu' chiu' dxexílajntu' lue', xrau' ne neda'.
LUK 2:49 Nadxa Jesús dxe̱'e̱be' le̱': ―¿Bizr chee̱ na' dxexílajle neda'? ¿Quebe nézele le'e dxal-la' guna' neda' da naca chee̱ Xra'?
LUK 2:50 Xra xrnabe' quebe guléajni'ine̱' ca da gúzrebe' le̱'.
LUK 2:51 Nadxa bezále̱be' le̱' zeajxá'aque̱' Nazaret, na' gúcaquezebe' bi wezúa dizra' chee̱ xra xrnabe'. Na' xrnabe' bcache chawe̱' xúgute̱ da nigá lu lázrdawe̱'.
LUK 2:52 Jesús zéajbe' dxegúlabe' lu be̱l-la' dxen chee̱be', ne lu xichaj lázrdaube', na' dxedxúajquezebe' chawe' lau Dios, ne lau bénneache.
LUK 3:1 Iza chinu' ca dxenná bea Tiberio, benne' dxenná be'e ca naca xe̱zr la xu, na' Poncio Pilato dxenná be'e̱ naga nababa Judea, na' Herodes dxenná be'e̱ naga nababa Galilea, na' Felipe, benne' biche Herodes, dxenná be'e̱ naga nababa Iturea, ne Traconite, na' Lisanias dxenná be'e̱ naga nababa Abilinia.
LUK 3:2 Na' Anás, ne Caifás zaj naque̱' bxruze blau. Ca lu zra na' Dios bchálajle̱ne̱' Juan, zri'ine Zacarías, naga zua Juan le̱'e̱ xixre' lawe' lataj.
LUK 3:3 Juan na' gudée̱' ca naca xé̱zredu ca' zaj nnitan' chalá'a weaj xe̱gu Jordán, na' dxe̱'e̱ benne' ca' dxal-la' xelexebí'i lazre̱', ne xeledxúe̱' nisa chee̱ gunite lau Dios chee̱ xtul-le'.
LUK 3:4 Caní guca ca na' gunná Isaías, benne' bchálaje̱' waláz chee̱ Dios, gunné̱': Nen tu chi'i bénnea' dxenné̱' zizraj le̱'e̱ xixre' lawe' lataj. Dxenné̱': Le gucueza neza naga te Xránadxu. Le xulí chawe' neza lase chee̱'.
LUK 3:5 Ca naca zrítudu ca' le xuzrá na. Ca naca xi'a ca', ne xí'adu ca' xelexaca na tu li. Neza xúca'du ca' xelexelí na. Neza da quebe nalí xelexaca na tu li.
LUK 3:6 Ca naca bénneache xelelé'ene̱' Benne' Weselá sel-la Dios.
LUK 3:7 Gate benne' ca' belezrine̱' lau Juan chee̱ xeledxúe̱' nisa, na' le̱' dxe̱'e̱ benne' ca': ―Xrtia be̱la snia. ¿Ble'e nu benne' le'e chee̱ cuásale ca naca xel-la dxezrá'a chee̱ Dios da ba za?
LUK 3:8 Le gun da gulé'e na ba bebí'i lázrele, ne quebe nnale lu lázrdaule: Nácantu' xrtia ljwezre Abraham. Neda' dxapa' le'e, Dios wazéquene̱' xexune̱' xiaj caní xrtia Abraham.
LUK 3:9 Xa waga ba de̱ cuásate̱ na chee̱ chugue̱' xaga ca', na' xúgute̱ xaga da quebe dxelebía na da zixre chawe' welechugue na, na' xuluzré̱'e̱ na lu xi'.
LUK 3:10 Nadxa benne' ca' buluche̱be̱' le̱': ―¿Bi dxal-la' guntu'?
LUK 3:11 Juan beche̱be̱': ―Benne' de̱ chupa zre̱' dxal-la' gunézruje̱' tu na benne' quebe de̱ chee̱', na' benne' de̱ da dxawe̱' dxal-la' gunézruje̱' da gagu bénnea' quebe bi de̱ chee̱'.
LUK 3:12 Cá'anqueze belelá' benne' wechizruj ca' chee̱ xeledxúe̱' nisa, na' buluche̱be̱' Juan: ―Benne' wese̱de, ¿bi da dxal-la' guntu' netu'?
LUK 3:13 Juan guzre̱' le̱': ―Quebe guchízrujle da zrendxa ca da nadxixruj bea na.
LUK 3:14 Cá'anqueze bal-la benne' dxjaque̱' wedil-la buluche̱be̱' le̱': ―¿Gazra netu'? ¿Bi da dxal-la' guntu'? Juan beche̱be̱': ―Quebe guchébele benne', ne quebe gágule le̱' zria lu da we̱n lazre' chee̱ cuale dumí chee̱', na' le be nen cadite názrujle.
LUK 3:15 Benne' zaj zre̱'e̱ na' zaj zue̱' ste̱be, na' dxuluche̱be̱' lu lázrdawe̱' che Juan na' naque̱' Cristo, benne' nasel-la Dios.
LUK 3:16 Juan na' gunné̱': ―Neda', da li dxuchúa' le'e nisa nen nisa. Wida tu benne' gune̱' da dxulé'e xel-la dxedxúa nisa nigá, guzúe̱' le'e Be' Lá'azxa, ne xi' chee̱'. Benne' nigá nápadxe̱' xel-la dxenná bea ca neda', na' quebe naca chia' cuéaja' xel-la chee̱' da xu'u ni'e̱.
LUK 3:17 Ba nuxre̱' da dxun be' chee̱', na' guchi'e̱ naga dxine̱' zrua' xtila. Na' xutupe̱' zrua' xtila, guzrá' chawe̱' na lizre̱'. Guzezxe̱' xizre chee̱ na lu xi' da cabata' xul-la na.
LUK 3:18 Ca naca dizra' nigá, ne xezícadxa dizra' zan bchálajle̱ne̱' benne' ca' ca naca dizra' chawe' chee̱ Dios.
LUK 3:19 Juan gudil-le̱' Herodes, benne' dxenná be'e̱, lawe' da zúale̱ne̱' Herodías, zru'ula Felipe, benne' biche Herodes na', ne lawe' da ba be̱ne̱' da zante̱ da cale̱la. Nadxa Herodes
LUK 3:20 bé̱ndxaqueze̱' da cale̱la, gulu'e̱ Juan lizre xia.
LUK 3:21 Gate ne dxuchúa Juan na' bénneache nisa, cá'anqueze Jesús gudxúe̱' nisa, na' gate dxuchálajle̱ne̱' Dios, na' bxalaj xabáa,
LUK 3:22 na' betaj Be' Lá'azxa lawe' Jesús. Ble'e lawe̱' ca tu bgugu chiche, na' ben tu chi'e̱ xabáa, dxenné̱': ―Lue' nacu' zri'ina' nazrí'ite̱ lazra'. Dxezaca ba lázrele̱na' Lue'.
LUK 3:23 Jesús nape̱' ca chi dxua iza gate guzú lawe̱' dxune̱' zrin chee̱'. Dxeleque benne' naque̱' zri'ine José. Naca Jesús zre sua Elí, xra María.
LUK 3:24 Elí na' guque̱' zri'ine Matat, Matat na' guque̱' zri'ine Leví, Leví na' guque̱' zri'ine Melqui, Melqui na' guque̱' zri'ine Jana, Jana na' guque̱' zri'ine xetú José.
LUK 3:25 José nigá guque̱' zri'ine Matatías, Matatías na' guque̱' zri'ine Amós, Amós na' guque̱' zri'ine Nahum, Nahum na' guque̱' zri'ine Esli, Esli na' guque̱' zri'ine Nagai.
LUK 3:26 Nagai na' guque̱' zri'ine Maat, Maat na' guque̱' zri'ine xetú Matatías, Matatías nigá guque̱' zri'ine Semei, Semei na' guque̱' zri'ine xetú José, José nigá guque̱' zri'ine Judá.
LUK 3:27 Judá na' guque̱' zri'ine Joana, Joana na' guque̱' zri'ine Resa, Resa na' guque̱' zri'ine Zorobabel, Zorobabel na' guque̱' zri'ine Salatiel, Salatiel na' guque̱' zri'ine Neri.
LUK 3:28 Neri na' guque̱' zri'ine xetú Melqui, Melqui nigá guque̱' zri'ine Adi, Adi na' guque̱' zri'ine Cosam, Cosam na' guque̱' zri'ine Elmodam, Elmodam na' guque̱' zri'ine Er,
LUK 3:29 Er na' guque̱' zri'ine Josué, Josué na' guque̱' zri'ine Eliezer, Eliezer na' guque̱' zri'ine Jorim, Jorim na' guque̱' zri'ine xetú Matat,
LUK 3:30 Matat nigá guque̱' zri'ine xetú Leví, Leví nigá guque̱' zri'ine Simeón, Simeón na' guque̱' zri'ine xetú Judá, Judá nigá guque̱' zri'ine xetú José, José nigá guque̱' zri'ine Jonán, Jonán na' guque̱' zri'ine Eliaquim,
LUK 3:31 Eliaquim na' guque̱' zri'ine Melea, Melea na' guque̱' zri'ine Mainán, Mainán na' guque̱' zri'ine Matata, Matata na' guque̱' zri'ine Natán.
LUK 3:32 Natán na' guque̱' zri'ine David, David na' guque̱' zri'ine Isaí, Isaí na' guque̱' zri'ine Obed, Obed na' guque̱' zri'ine Booz, Booz na' guque̱' zri'ine Salmón, Salmón na' guque̱' zri'ine Naasón.
LUK 3:33 Naasón na' guque̱' zri'ine Aminadab, Aminadab na' guque̱' zri'ine Aram, Aram na' guque̱' zri'ine Esrom, Esrom na' guque̱' zri'ine Fares, Fares na' guque̱' zri'ine xetú Judá,
LUK 3:34 Judá nigá guque̱' zri'ine Jacob, Jacob na' guque̱' zri'ine Isaac, Isaac na' guque̱' zri'ine Abraham, Abraham na' guque̱' zri'ine Taré, Taré na' guque̱' zri'ine Nacor.
LUK 3:35 Nacor na' guque̱' zri'ine Serug, Serug na' guque̱' zri'ine Ragau, Ragau na' guque̱' zri'ine Peleg, Peleg na' guque̱' zri'ine Heber, Heber na' guque̱' zri'ine Sala,
LUK 3:36 Sala na' guque̱' zri'ine Cainán, Cainán na' guque̱' zri'ine Arfaxad, Arfaxad na' guque̱' zri'ine Sem, Sem na' guque̱' zri'ine Noé, Noé na' guque̱' zri'ine Lamec,
LUK 3:37 Lamec na' guque̱' zri'ine Matusalén, Matusalén na' guque̱' zri'ine Enoc, Enoc na' guque̱' zri'ine Jared, Jared na' guque̱' zri'ine Mahalaleel, Mahalaleel na' guque̱' zri'ine xetú Cainán.
LUK 3:38 Cainán na' guque̱' zri'ine Enós, Enós na' guque̱' zri'ine Set, Set na' guque̱' zri'ine Adán, Adán na' guque̱' ca zrí'inequeze Dios.
LUK 4:1 Jesús, zúale̱ Be' Lá'azxa Le̱', bezé̱'e̱ xe̱gu Jordán, na' guché̱ Be' Lá'azxa Le̱' le̱'e̱ xixre' lawe' lataj.
LUK 4:2 Na' guzúe̱' chua zra, na' Satanás da xriwe̱' gudilaj lazre' na ájala si xe̱ na Le̱'. Quebe bi gudagu Jesús da chua zra ca', na' ca gudé na' gudune̱'.
LUK 4:3 Nadxa gunná da xriwe̱', guzre na Le̱': ―Che da li nacu' Lue' Zri'ine Dios, be̱n xelexaca xiaj caní xeta xtila.
LUK 4:4 Na' beche̱be Jesús: ―Naxúajqueze na lu xiche chee̱ Dios, dxenné̱': Quegá nen xeta xtílaze gaca ban bénneache, san cá'anqueze nen xrtizra' Dios gaca ban bénneache.
LUK 4:5 Nadxa da xriwe̱' guché̱ na Jesús tu xi'a sibe, na' chadite̱ ble'e na Le̱' xúgute̱ cue' xe̱zr la xu da zaj nnita lu xe̱zr la xu nigá,
LUK 4:6 na' guzre na Le̱': ―Neda' gunna' Lue' ca naca xel-la dxenná bea nigá, ne xel-la szren chee̱ xúgute̱ xe̱zr la xu caní, lawe' da zaj xu'u da caní lu na'a neda', na' gunézruja' na nu dxaca lazra' gunézruja' na.
LUK 4:7 Gunna' na chiu' che lue' guzú zribu' lawa', ne gucá'ana szrenu' neda'.
LUK 4:8 Jesús beche̱be̱': ―Gucuasa lue', Satanás, lawe' da dxenná xiche chee̱ Dios, dxe̱'e̱ bénneache: “Bca'ana szren Xranu' Dios, ne be̱n zrin chee̱ tuze Le̱'.”
LUK 4:9 Nadxa da xriwe̱' na' guché̱ na Jesús lu xe̱zre Jerusalén, na' bcuén na Le̱' xichaj ze'e xudau', na' guzre na Le̱': ―Che da li na' nacu' Zri'ine Dios, guxrite' nigá cheajxe̱zu' lu xu,
LUK 4:10 lawe' da lu xiche chee̱ Dios dxenné̱': Dios gusebague̱' gubáz chee̱ xabáa chee̱' ca' xuluxue̱' Lue'.
LUK 4:11 Xelechísaqueze̱' Lue' nen ne̱'e̱, chee̱ quebe gaca we̱' ni'u lawe' xiaj ca'.
LUK 4:12 Jesús beche̱be̱': ―Cá'anqueze naxúaj na lu xiche chee̱ Dios, dxe̱'e̱ bénneache: “Quebe guchínenu' ca dxaca lazru' Xranu' Dios.”
LUK 4:13 Gate da xriwe̱' québedxa bezrela lazre' na ájala gun zréaje na Jesús, na' becuasa na tu chi'i.
LUK 4:14 Na' Jesús bezrine̱' Galilea, ba nápale̱'e̱ xel-la waca chee̱ Be' Lá'azxa, na' ca naca xé̱zredu ca' zaj nababa na' buluchálaj bénneache ca naca xel-la waca chee̱'.
LUK 4:15 Jesús bsé̱dene̱' benne' ca' tu tu lu xudau' ca', na' xúgute̱' belúe lá'ane̱' Le̱'.
LUK 4:16 Nadxa Jesús bezrine̱' Nazaret, xe̱zre naga bgule̱'. Lu zra dxulupá'ana benne' judío ca' guxú'e̱ lu xu'u ga na' dxelezraga benne' judío ca', ca xu'u lawe̱' dxune̱', chee̱ gulabe̱' da naxúaj na lu xiche chee̱ Dios.
LUK 4:17 Buludée̱' Lu ne̱'e̱ xiche naga naxúaj dizra' bzuaj Isaías, benne' bchálaje̱' waláz chee̱ Dios, na' gate gusálaje̱' na, na' blabe̱' naga naxúaj da dxenná:
LUK 4:18 Be' Lá'azxa chee̱ Xránadxu zúale̱ne̱' neda', lawe' da guqué̱'e̱ neda' chee̱ guchálajle̱na' benne' baxache' ca' dizra' chawe' chee̱'. Gusel-le̱' neda' chee̱ xexuna' benne' ca' quebe chawe' zaj zue̱', ne chee̱ guzenda' benne' ba zaj nadxéaje̱' lu da zrinnaj, waca xelelé̱', ne chee̱ xexuna' lau benne' la chul-la ca', ne chee̱ guselá' benne' dxelezaca zi'e̱,
LUK 4:19 ne chee̱ guzenda' bénneache ba bzrin zra Xránadxu Dios gucá'ane̱' le̱' chawe'.
LUK 4:20 Nadxa Jesús butube̱' xiche na', na' bdee̱' na lu na' benne' dxuxúe̱' xu'u na', na' bebé'e̱. Xúgute̱ benne' zaj zre̱'e̱ lu xu'u na' dxelenné̱'e̱ Le̱',
LUK 4:21 na' Jesús guzú lawe̱' dxe̱'e̱ benne' ca': ―Na'a zra guca ca da naxúaj na laule le'e.
LUK 4:22 Xúgute̱' gulenné̱' chawe' chee̱ Jesús, ne belexebánene̱' ca naca dizra' chawe' da dxuchalaje̱'. Na' buluche̱be ljwezre̱': ―¿Quegá benne' nigá zri'ine José?
LUK 4:23 Jesús guzre̱' le̱': ―Da líqueze le'e we̱le neda' dizra' nigá: Lue', benne' dxexúnu' benne' we̱' ca', bexún cuinu', ne xe̱le neda': Ca da bénentu' be̱nu' lu xe̱zre Capernaum, cá'anqueze be̱n na lázriu' nigá na'a.
LUK 4:24 Nadxa gunná Jesús: ―Da li dxapa' le'e, tu benne' dxuchálaje̱' waláz chee̱ Dios, quebe nu dxue le̱' ba lá'ana lazrie̱'.
LUK 4:25 Dxapa' le'e, gulezrá' nu'ula zan ba gulate benne' chee̱' lu xe̱zr la xu Israel ca lu zra guzúa Elías, benne' bchálaje̱' waláz chee̱ Dios, gate na' quebe guca xiuj chun iza xugachaj, ne gúcale̱'e̱ gubina' ca naca xe̱zr la xu na'.
LUK 4:26 Dios quebe gusel-le̱' Elías lau netú nu'ula, nate benne' chee̱', zue̱' xe̱zr la xu Israel. Gusel-le̱' le̱' lau tu nu'ula, nate benne' chee̱', zue̱' lu xe̱zre Sarepta, da zua na gagu naga dxe' xe̱zre Sidón.
LUK 4:27 Cá'anqueze gulezrá' benne' zan benne' dxeledxé'ene̱' we̱' guzru' lu xe̱zr la xu Israel ca lu zra guzúa Eliseo, benne' bchálaje̱' waláz chee̱ Dios, na' netúe̱' quebe bexaque̱'. Tuze Naamán, benne' xe̱zr la xu Siria bexaque̱'.
LUK 4:28 Gate belén benne' ca' zaj zre̱'e̱ xu'u na' da nigá, na' belezrá'ale̱'e̱.
LUK 4:29 Na' gulase̱', ne belexebéaje̱' Jesús xe̱zre na', na' beleché̱'e̱ Le̱' dxu'a chjéaj naga zria xe̱zre na', chee̱ xuludxixre̱' Le̱' na'.
LUK 4:30 Na' Jesús bedée̱' ládujla benne' ca', na' bezé̱'e̱ zexíaje̱'.
LUK 4:31 Nadxa Jesús bexíaje̱' Capernaum, tu xe̱zre nababa Galilea, na' guzú lawe̱' dxusé̱dene̱' benne' ca' lu zra lá'azxa chee̱ judío ca'.
LUK 4:32 Belexebánene̱' ca naca da dxusé̱dene̱', lawe' da dxuchálaje̱' ca tu benne' nape̱' xel-la dxenná bea.
LUK 4:33 Lu xu'u na' zua tu benne' xu'e̱ be' xriwe̱', na' dxebezre xe̱'e̱,
LUK 4:34 dxenné̱': ―Bsan netu'. ¿Bizr chee̱ na' dxunu' netu' ze̱de, Jesús, benne' Nazaret? ¿Za'u guzría xi'u netu'? Neda' núnbe'a Lue', ne nezda' nacu' benne' lá'azxa chee̱ Dios.
LUK 4:35 Jesús gudil-le̱' be' xriwe̱' na', dxenné̱': ―Zrize guzúa. Bsan benne' biu nigá. Nadxa be' xriwe̱' na' gudín na bénnea' xu lau xúgute̱ benne' ca', na' bedxúaj na lu xichaj lázrdau bénnea', ne quebe bi be̱n na chee̱'.
LUK 4:36 Xúgute̱' belexebánene̱', na' gulé̱' ljwezre̱': ―¿Bizra dizra' da caní? Benne' nigá dxenná bé'ene̱' be' xriwe̱' ca' nen dute̱ xel-la dxenná bea chee̱', ne nen xel-la waca, na' be' xriwe̱' ca' dxeledxúaj na.
LUK 4:37 Na' buluchálaje̱' ca naca chee̱ Jesús xúgute̱ lu xe̱zre ca' zaj nababa na'.
LUK 4:38 Nadxa bedxúaj Jesús lu xu'u na', na' guxú'e̱ lizre Simón. Xrna zru'ula Simón na' quebe chawe' zue̱', xú'ule̱'e̱ da la, na' gulata' xuene̱' Jesús xexune̱' le̱'.
LUK 4:39 Jesús gubigue̱'e̱ cuite̱', na' gudil-le̱' da la na', na' bedxúaj na. Ca ná'queze bexásate̱', na' guzú lawe̱' dxuseni'e̱ da xelawe̱'.
LUK 4:40 Ca dxebía gubizra, benne' ca' zaj nnita' benne' quebe chawe' zaj zue̱' lizre̱' belú'e̱ le̱' lau Jesús, na' Le̱' bze̱ ne̱'e̱ tu tu benne' ca', ne bexune̱' le̱'.
LUK 4:41 Cá'anqueze zánete̱ be' xriwe̱' belexedxúaj na lu xichaj lázrdau benne' ca'. Dxelenná na: ―Lue' nacu' Zri'ine Dios. Jesús gudil-le̱' be' xriwe̱' ca'. Quebe be̱'e̱ na lataj xelenné̱ na, lawe' da zaj neze na naca Le̱' Cristo.
LUK 4:42 Ca dxaní'sise̱', bdxuaj Jesús xe̱zre na', guxíaje̱' naga xeajsúe̱' tuze̱'. Na' benne' ca' belexexílaje̱' Le̱', na' belezrine̱' xuluzague̱' Le̱' chee̱ quebe xeze̱'e̱.
LUK 4:43 Jesús gunné̱': ―Dxun na ba xen guzenda' bénneache xezícadxa xe̱zrdu ca' ca dxenná bea Dios, lawe' da chee̱ guna' caní gusel-le̱' neda'.
LUK 4:44 Ca'an guca gudá Jesús ca naca xe̱zre ca' zaj nababa Galilea, na' bchálaje̱' lu xu'u naga dxelezraga judío ca' lu xe̱zre ca'.
LUK 5:1 Gate zua Jesús dxu'a nísadau' chee̱ Genesaret, na' belezrín benne' zan, ne buluchídete̱' Le̱', lawe' da dxelaca lazre̱' xelenne̱' xrtizra' Dios.
LUK 5:2 Jesús blé'ene̱' chupa da dxedá lawe' nísadau' lu nísadau' na', zaj zra' gáguze lu xu bizre, lawe' da ba belexedxúaj benne' wezén bela ca' lu'ule da dxedá lawe' nísadau', na' zaj zre̱'e̱ dxelexibe̱' xixruj chee̱' ca'.
LUK 5:3 Nadxa guxú'u Jesús tu lu da dxedá lawe' nísadau', da naca na chee̱ Simón, na' guzre̱' Simón guzrigue̱' na xelate' lu nísadau' na'. Jesús gudxé'e̱ lu da dxedá lawe' nísadau' na', na' guzú lawe̱' dxusé̱dene̱' benne' ca'.
LUK 5:4 Ca bexuzre bchálaje̱', na' guzre̱' Simón: ―Bsa da dxedá lawe' nísadau' chiu' naga nácadxa situj nísadau', na' le guzal-la xixruj chee̱le na' chee̱ senle bela.
LUK 5:5 Simón beche̱be̱': ―Benne' Wese̱de, bedú xe̱la be̱ntu' zrin, ne quebe bi bela ne sentu'. Lu dizra' chiu', na'a guzal-la' xixruj nigá.
LUK 5:6 Ca belune̱' ca gunná Jesús, na' bela zante̱ gulezene̱', na' gúcate̱ wadxeza xixruj na'.
LUK 5:7 Nadxa bulutá ne̱'e̱ gulenné̱' benne' ljwezre̱' zaj zre̱'e̱ xetú lu da dxedá lawe' nísadau' chee̱ xelácale̱ne̱' le̱'. Benne' ca' belezrine̱', na' bulusezrate̱' dxúpate̱ da dxedá lawe' nísadau' ca', na' gulácate̱ na zi'i, ne dxácate̱ welaze na lu nísadau'.
LUK 5:8 Gate ble'e Simón Pedro da nigá, na' bzu zribe̱' lau Jesús, gunné̱': ―Gucuasa cuita' neda', Xran, lawe' da naca' neda' benne' dul-la.
LUK 5:9 Caní gunná Simón lawe' da dxezrébele̱'e̱ ne̱ chee̱ da guca na, ne cá'anqueze dxelezrebe benne' ljwezre̱' ca', gate belelé'ene̱' bela zan ca'.
LUK 5:10 Cá'anqueze belezrebe Jacobo ne Juan, zri'ine Zebedeo, benne' zaj naque̱' ljwezre Simón na'. Jesús guzre̱' Simón: ―Quebe zrebu'. Ná'ate̱la su lau' senu' bénneache lu da naca chee̱ Dios.
LUK 5:11 Nadxa, ca belexebéaje̱' da dxedá lawe' nísadau' na' dxú'ela nísadau', na' bulucá'ane̱' ca naca da ca', na' zjácale̱ne̱' Jesús.
LUK 5:12 Gate Jesús zue̱' tu xe̱zre, na' bzrin tu benne' dxé'ene̱' we̱' guzru', na' ca blé'ene̱' Jesús, bzu zribe̱', ne gudíxrujte̱ lawe̱' lu xu, na' bca'ana szrene̱' Le̱', gunné̱': ―Xran, che dxaca lazru', waca xexunu' neda'.
LUK 5:13 Nadxa Jesús bte̱'-be' nen ne̱'e̱, gunné̱': ―Dxaca lazra'. Bache bexacu'. Ca gunné̱' ca', we̱' guzru' na' bedxúajte̱ na.
LUK 5:14 Jesús bsebague̱' bénnea' quebe nu xe̱'e̱ da nigá. Nadxa gunné̱': ―Guxíaj na'a, xeajlé'e cuinu' lau bxruze, ne gulú'u dumí chee̱ xexádxeu' lau Dios ca da gunná be'e Moisés chee̱ xeleneze benne' ba bexacu' ca naca xízrawe̱' chiu'.
LUK 5:15 Ca naca xel-la waca chee̱ Jesús bzrílujdxa na, na' benne' zante̱ belezrague̱' lau Jesús chee̱ xelenne̱' da dxuchálaje̱', ne chee̱ xexune̱' le̱' ca naca xízrawe̱' chee̱'.
LUK 5:16 Nadxa Jesús bezé̱'e̱ na', na' bzrine̱' naga quebe nu chilá' benne', na' bchálajle̱ne̱' Dios.
LUK 5:17 Tu zra zua Jesús dxusé̱dene̱', na' bal-la benne' xudau' fariseo ca', ne benne' dxuluxuzájle̱'e̱ da nadxixruj be'e Moisés, zaj dxe'e̱ na', benne' zá'aque̱' ca naca xé̱zredu ca' zaj nababa Galilea, ne xe̱zre ca' zaj nababa Judea, ne chee̱ xe̱zre Jerusalén, na' zúale̱ xel-la waca chee̱ Xránadxu Dios Jesús, na' bexune̱' benne' ca' quebe chawe' zaj zue̱'.
LUK 5:18 Nadxa belezrín tapa benne' zaj nu'e̱ tu benne' zua zri ni'a ne̱'e̱, dee̱' tu lu blaga', na' gulaca lazre̱' xelegú'e̱ le̱' lu xu'u chee̱ xelíxrue̱' le̱' lau Jesús.
LUK 5:19 Quebe guca xelezrine̱' lau Jesús lawe' da zrále̱'e̱ benne' zan ga na'. Nadxa gulegüéne̱' chju'ula, ne gulesaluje̱' chju'u, na' bululétaje̱' benne' na' de̱' lu blaga' ládujla benne' zan ca' lau Jesús.
LUK 5:20 Gate ble'e Jesús ca dxeléajle̱ benne' ca' chee̱', na' guzre̱' benne' quebe chawe' zue̱': ―Bénne'dau', ba bnite lawa' dul-la chiu'.
LUK 5:21 Nadxa benne' ca' dxuluxuzájle̱'e̱ da nadxixruj bea na, ne benne' xudau' fariseo ca' gulezú lawe̱' dxelenné̱' lu xichaj lázrdawe̱': ¿Nuzra benne' nigá, dxenné̱' schanni' chee̱ Dios? Quebe nu benne' séquene̱' gunite lawe̱' dul-la chee̱ bénneache. Tuze Dios gaque̱'.
LUK 5:22 Jesús dxéquebe'ene̱' da dxelenné̱' lu xichaj lázrdawe̱', na' guzre̱' benne' ca': ―¿Bizr chee̱ na' dxéquele le'e caní?
LUK 5:23 ¿Bízrala na quebe naca na ste̱be guna', che xapa' benne' nigá: Ba bnite lawa' dul-la chiu', u che xapa' le̱': Guxasa bexíaj?
LUK 5:24 Gulé'eda' le'e neda', Benne' Gulje̱' Bénneache, napa' xel-la dxenná bea lu xe̱zr la xu nigá chee̱ gunite lawa' dul-la chee̱ bénneache. Nadxa guzre̱' benne' na' naxrú'une ni'a ne̱'e̱: ―Lue' dxapa', bexasa, bexúa blaga' chiu', ne bexíaj.
LUK 5:25 Ca gunné̱' ca', bexásate̱ benne' na' lau xúgute̱ benne' ca', na' bequé̱'e̱ blaga' chee̱', ne bezé̱'e̱ zexíaje̱' lizre̱' zeajxé̱ lá'ane̱' Dios.
LUK 5:26 Xúgute̱ benne' ca' belexebánene̱', na' belúe lá'ane̱' Dios, ne nen xel-la dxelezrebe gulenné̱': ―Na'a ble'edxu da dxebánequezdxu.
LUK 5:27 Ca gudé na' bezá'a Jesús, na' blé'ene̱' tu benne' dxuchizruje̱' waláz chee̱ xe̱zre Roma, le̱' Leví. Dxe'e̱ naga dxuchízruje̱', na' guzre̱' le̱': ―Be̱n neda' tuze.
LUK 5:28 Na' guxasa Leví, bca'ane̱' ca naca chee̱' ca', na' guxíajle̱ne̱' Jesús.
LUK 5:29 Ca gudé na', Leví gulu'e̱ tu xrche' zrente̱ lizre̱' chee̱ bca'ana szrene̱' Jesús, na' zrále̱'e̱queze na' xezícadxa wechizruj ca', ne xezícadxa benne' zaj dxe'e̱ dxágule̱ne̱' benne' ca'.
LUK 5:30 Na' benne' xudau' fariseo ca', ne benne' ca' dxuluxuzájle̱'e̱ da nadxixruj bea na gulezú lawe̱' dxelezí tizre̱' benne' ca' dxuse̱de Jesús, dxelé̱'e̱ le̱': ―¿Bizr chee̱ na' dxe'aj dxágule̱le benne' wechizruj caní, ne benne' dul-la ca'?
LUK 5:31 Jesús beche̱be̱': ―Quebe zaj nachine benne' zaj zua chawe' nu benne' dxexúne̱' le̱'. Benne' quebe chawe' zaj zue̱' dxelechínene̱' le̱'.
LUK 5:32 Neda' quegá za'a dxennéa' benne' xrlátaje. Za'a dxennéa' benne' dul-la, chee̱ xelexebí'i lazre̱'.
LUK 5:33 Nadxa buluche̱be̱' Jesús: ―¿Bizr chee̱ na' dxelúnle̱'e̱ gubasa, ne dxuluchálajle̱ Dios benne' ca' zjácale̱ne̱' Juan, ne benne' ca' zjácale̱ne̱' benne' xudau' fariseo ca', san benne' ca' dxusé̱denu' tu dxelé'aj dxeláguzqueze̱'?
LUK 5:34 Jesús beche̱be̱': ―¿Wazéquele xe̱le benne' zaj zra' laní chee̱ wechaga na' xelune̱' gubasa dxácate̱ na' zua benne' wechaga na' nen benne' ca'?
LUK 5:35 Wazrín zra gate wechaga na' na' xecuase̱' nen benne' ca'. Ca lu zra na' xelune̱' gubasa.
LUK 5:36 Nadxa bchálajle̱ne̱' le̱' ca naca da dxulé'e nigá: ―Quegá nu benne' cheze̱' tu zre̱' cube chee̱ xudé̱'e̱ na tu zre̱' gula. Che ca' gune̱', na' guzría xi'e̱ ca naca zre̱' cube na', na' ládxe'du cube na' quebe gulé'e na cháwedau' nen ladxe' gula na'.
LUK 5:37 Cá'anqueze quebe gaca cá'adxu xrise uva cube lu bzude xide gula, lawe' da che ca' gundxu, xrise uva cube na' gutín na bzude xide gula, na' gaca ditje xrise uva na', ne bzude xide na'.
LUK 5:38 Chee̱ le̱ na' dxal-la' cá'adxu xrise uva cube lu bzude xide cube, na' dxúpate̱ na' xegá'ana chawe' na.
LUK 5:39 Che tu benne' xí'aje̱' xrise uva wal-la gula, québedxa nna na chee̱' xí'aje̱' xrise uva cube, lawe' da dxenné̱': “Nétajdxa da gula na'.”
LUK 6:1 Tu lu zra lá'azxa chee̱ judío ca', gudé Jesús naga naxaza zrua' xtila, na' benne' ca' dxusé̱dene̱' zjaque̱' dxelálaje̱' dau zrua' xtila, na' dxelezrube na nen ne̱'e̱, ne dxelawe̱' zrua' xtila na'.
LUK 6:2 Nadxa benne' xudau' fariseo ca' buluche̱be̱' le̱': ―¿Bizr chee̱ na' dxunle le'e tu zrin da quebe naca na gunle zra lá'azxa chee̱dxu?
LUK 6:3 Jesús beche̱be̱': ―¿Quebe ne gulábale le'e ca be̱n David ne benne' ljwezre̱' ca' gate guledune̱'?
LUK 6:4 Guxú'u David na' tu lu xudau' chee̱ Dios, ne guqué̱'e̱ xeta xtila da gulú'u bxruze lau Dios, na' gudawe̱' na, ne bnézrujte̱' chee̱ benne' ca' zjácale̱ne̱' le̱', ne quebe naca chee̱' xelawe̱' xeta xtila na'. Tuze bxruze ca' naca chee̱' xelawe̱' na.
LUK 6:5 Cá'anqueze guzre Jesús benne' ca': ―Neda', Benne' Gulje̱' Bénneache, nápaqueza' xel-la dxenná bea ca naca chee̱ zra lá'azxa.
LUK 6:6 Xetú lu zra lá'azxa chee̱ judío ca', guxú'u Jesús tu lu xu'u, na' guzú lawe̱' dxusé̱dene̱' benne' zaj nazrague̱' na'. Zua na' tu benne' nazrinnaj ne̱'e̱ xabe̱la.
LUK 6:7 Benne' ca' dxuluxuzájle̱'e̱ da nadxixruj bea na, ne benne' xudau' fariseo ca' dxuluzuzre̱' Jesús chee̱ xelelé'ene̱' che xexún Jesús bénnea' lu zra lá'azxa chee̱', chee̱ xelezéquene̱' xelawe' zria Jesús.
LUK 6:8 Jesús ba nézene̱' ca da dxelegú'u lazre̱', na' guzre̱' bénnea' nazrinnaj ne̱'e̱: ―Guxasa, ne guzé̱ laduj nigá. Benne' na' guxase̱', na' guzé̱' na'.
LUK 6:9 Nadxa gunná Jesús, guzre̱' benne' ca': ―Na'a guche̱ba' le'e tu: ¿Bízrala na' waca gundxu zra lá'azxa chee̱le, da xrlátaje che da cale̱la? ¿Gucache cháwedxu xel-la nabán chee̱ tu benne', che guzría xidxu na?
LUK 6:10 Nadxa Jesús guné̱'e̱ benne' ca' zaj naxechaj Le̱', na' guzre̱' benne' we̱' na': ―Bli na'u nigá. Benne' na' be̱ne̱' ca', na' bexácate̱ ne̱'e̱ na'.
LUK 6:11 Na' benne' ca' zaj zre̱'e̱ na' belezrá'ale̱'e̱, na' gulezú lawe̱' dxuluche̱be ljwezre̱' bi xelezéquene̱' xelune̱' chee̱ Jesús chee̱ xuluzría xi'e̱ Le̱'.
LUK 6:12 Ca lu zra na' Jesús guxíaje̱' tu lu xi'a xeajchálajle̱ne̱' Dios, na' guzúe̱' bedú xe̱la dxuchálajle̱ne̱' Dios.
LUK 6:13 Ca guxaní' gunné̱' benne' ca' dxusé̱dene̱', ne guqué̱'e̱ chazrinnu benne' ca', na' bzre̱'e̱ benne' ca' xelaque̱' gubáz chee̱'.
LUK 6:14 Benne' caní zaj naque̱': Simón, (bénnea' bzue̱' le̱' Pedro), Andrés, (benne' biche Simón na'), Jacobo, Juan, Felipe, Bartolomé,
LUK 6:15 Mateo, Tomás, Jacobo, (zri'ine Alfeo), Simón, (bénnea' dxedábague̱' benne' Roma ca')
LUK 6:16 Judas, (benne' biche Jacobo), ne Judas Iscariote, (bénnea' gudée̱' Jesús lu na' benne' ca' dxeledábague̱' Le̱'.)
LUK 6:17 Jesús bdinne̱' lu xi'a na' nen benne' ca' dxusé̱dene̱', na' bzrine̱' tu lache' nen benne' ca'. Benne' zan zaj zre̱'e̱ na' zaj nababe̱' xe̱zre ca' zaj nababa Judea, ne Jerusalén, nen benne' zaj nababe̱' Tiro, ne Sidón. Benne' caní belelé̱'e̱ chee̱ xelenne̱' da dxuchalaj Jesús, ne chee̱ xexún Jesús le̱' ca naca xízrawe̱' dxeledxé'ene̱'.
LUK 6:18 Cá'anqueze benne' ca' zaj xu'e̱ be' xriwe̱' belexaque̱'.
LUK 6:19 Xúgute̱ benne' ca' gulaca lazre̱' xuluté̱' Jesús lawe' da dxexún Le̱' xúgute̱' nen xel-la waca chee̱'.
LUK 6:20 Nadxa Jesús gunné̱'e̱ benne' ca' dxusé̱dene̱', na' guzre̱' le̱': ―Ba neza zrente̱ naca na chee̱le le'e, dxéquebe'ele nácale benne' xache', lawe' da waxú'ule le'e naga dxenná bea Dios.
LUK 6:21 ’Ba neza zrente̱ naca na chee̱le le'e, dxedunle da dxunna Dios, lawe' da wélajquezle. ’Ba neza zrente̱ naca na chee̱le le'e, dxebézrele ne̱ chee̱ dula, lawe' da guzrízrequezle.
LUK 6:22 ’Ba neza zrente̱ naca na chee̱le le'e, gate xelecuide bénneache le'e, ne gate xelexebéaje̱' le'e chalé'ajla, ne gate xelenné̱' schanni' chee̱le, ne gate xulucá'ana ditje̱' lale ca tu da sban lawe' da nácale bi chia' neda', Benne' Gulje̱' Bénneache.
LUK 6:23 Le béle̱'e̱, ne le sua lu da ba neza lu zra na' lawe' da zrué'ele tu da zren lu xabáa chee̱ Dios. Cá'anqueze benne' xra xrtau benne' caní bulusaca zi'e̱ benne' ca' buluchálajé̱' waláz chee̱ Dios.
LUK 6:24 ’Baxache' nácale le'e, benne' gunní'a, lawe' da ba nápale xel-la dxebé da naca chee̱ xe̱zr la xu nigá.
LUK 6:25 ’Baxache' nácale le'e, nélajle na'a, lawe' da wadunle le'e. ’Baxache' nácale le'e dxuzrízrele na'a, lawe' da cuezre xáchele.
LUK 6:26 ’Baxache' nácale le'e gate xúgute̱ bénneache dxelenné̱' da chawe' chee̱le, lawe' da ca' belún xra xrtáule, gulenné̱' da chawe' chee̱ benne' we̱n lazre' ca', benne' gulenné̱': “Netu' dxuchálajntu' waláz chee̱ Dios.”
LUK 6:27 Na' gunná Jesús: ―Dxapa' le'e dxénele chia', le zri'i benne' ca' dxelecuídene̱' le'e, ne le gun chawe' chee̱ benne' ca' dxelezré̱'e̱ le'e.
LUK 6:28 Le nne̱ chawe' chee̱ benne' ca' dxelenné̱' cale̱la chee̱le, ne le naba lau Dios gaca chawe' chee̱ benne' ca' dxelenné̱' schanni' chee̱le.
LUK 6:29 Che nu benne' cape̱' xrágale, le guze̱te̱ xecha la'a, ne che nu benne' que̱'e̱ xicha chee̱le, le güe lataj ca'ate̱' zrale.
LUK 6:30 Le gunezruj nútete̱ze benne' bi nabe̱' le'e, ne che nu benne' que̱'e̱ da naca chee̱le, quebe xenábale na.
LUK 6:31 Le gun chee̱ bénneache cáte̱ze na' dxaca lázrele xelune̱' chee̱le.
LUK 6:32 ’Che le'e nazri'ile tuze benne' ca' zaj nazrí'ine̱' le'e, ¿bízraqueze da chawe' dxunle? Cá'anqueze dxelún benne' ca' dxelune̱' da cale̱la.
LUK 6:33 Che dxunle chawe' chee̱ tuze benne' ca' dxelune̱' le'e chawe', ¿bízraqueze da chawe' dxunle? Cá'anqueze dxelún benne' we̱n da zrinnaj ca'.
LUK 6:34 Che bi dxusanle chee̱ tuze benne' ba nézele wexunne̱' na, ¿bízraqueze da chawe' dxunle? Cá'anqueze benne' we̱n da cale̱la ca' dxulusane̱' da naca chee̱' chee̱ benne' ca' dxelune̱' da cale̱la, lawe' da zaj nézene̱' wulunézrujte̱ benne' ca' le̱ na.
LUK 6:35 Dxal-la' zri'ile le'e benne' ca' dxelezré̱'e̱ le'e, ne gunle da chawe' chee̱', ne gusanle chee̱ benne' ca' da xelenabe̱' le'e, lácala quebe xelexexunne̱' na. Che gunle ca', da zrendxa da si' lu na'le, ne gácale bi ca' chee̱ Dios szrente̱, lawe' da naca Le̱' zri'i lazre' nen benne' ca' quebe dxelexezaca ba lazre̱', ne benne' we̱n da cale̱la ca'.
LUK 6:36 Le xezrí lazre' bénneache ca dxun Dios, dxezrí lazre̱' le'e.
LUK 6:37 Na' gunná Jesús: ―Quebe guzúale chalá'ala le sa' ljwézrele, na' Dios quebe guzúe̱' le'e chalá'ala. Quebe bi nne̱le chee̱ le sa' ljwézrele, na' Dios quebe guchi'e̱ chee̱le le'e. Le gunite lau chee̱ le sa' ljwézrele, na' Dios gunite lawe̱' chee̱le le'e.
LUK 6:38 Le gunezruj chee̱ bénneache, na' Dios gunne̱' chee̱le le'e. Dios cu'e̱ lu xcuite chee̱le tu xi'ina da nálate̱, ne da naxí'tequeze, ne guníbete̱' na, ne sua dí'atequeze na. Dios gudxíxrequeze̱' chee̱le ca da dxudxíxrele chee̱ bénneache.
LUK 6:39 Nadxa Jesús bchálaje̱' da dxulé'e nigá, gunné̱': ―¿Waca tu benne' la chul-la cu'e̱ neza xetú la chul-la? Che ca' gune̱', dxúpate̱' xelebixre̱' tu lu xe̱dxu.
LUK 6:40 Netú benne' dxuse̱de gácadxe̱' szren ca naca bénnea' dxusé̱dene̱' le̱', na' gate xuzre gusé̱die̱', gaque̱' ca naca bénnea' bsé̱dene̱' le̱'.
LUK 6:41 ’¿Bizr chee̱ na' dxenná'u bé̱bedu na' xu'u na xiaj lau le sa' ljwezru', ne quebe dxéquebe'enu' ca naca da zren da xu'u na xiaj lau' lue'?
LUK 6:42 Che quebe dxéquebe'enu' ca naca da zren na' da xu'u na xiaj lau' lue', ¿ájazra dxunu' dxexázrenu' dxu'u le sa' ljwezru': “Be̱nna lataj xebéaja' bé̱bedu na' xu'u na xiaj lau'?” Lue', benne' dxun láweze xrlátaje, bebéaj zá'teca lue' ca naca da zren da xu'u na xiaj lau', na' nadxa le'enu' cháwedau' xebéaju' bé̱bedu na' xu'u na xiaj lau le sa' ljwezru'. Nadxa gunná Jesús:
LUK 6:43 ―Tu xaga xrlátaje quebe cuía na da zixre cale̱la, na' xaga da quebe naca chawe' quebe gaca cuía na da zixre chawe'.
LUK 6:44 Tu tu xaga naca bea na ne̱ chee̱ da zixre da dxebía na. Quebe gaca guchíbedxu da zixre chee̱ xaga higo tu lu xaga xeche', ne quebe guchíbedxu da zixre chee̱ lba uva lu xeche' bisigá.
LUK 6:45 Benne' xrlátaje, da xrlátaje dxenné̱ bénnea' lawe' da naxaza da xrlátaje lu xichaj lázrdawe̱', na' benne' we̱n da cale̱la, da cale̱la dxenné̱ bénnea' lawe' da xu'u da cale̱la lu xichaj lázrdawe̱'. Dxu'e̱ na' dxenné̱ na ca naca da xu'u lu xichaj lázrdawe̱'. Gunná Jesús:
LUK 6:46 ―¿Bizr chee̱ na' dxe̱le neda': “Xran, Xran”, ne quebe dxunle ca da dxapa' le'e?
LUK 6:47 Xapa' le'e aja naca bénnea' ze̱'e̱ nen neda', ne dxenne̱' xrtizra'a, ne dxune̱' ca da dxapa' le̱'.
LUK 6:48 Naque̱' ca tu benne' be̱ne̱' tu xu'u. Da zren gude̱ne̱', na' bzrie̱' lane na lawe' xiaj xre. Gate bdxuaj xe̱gu, na' xeajchú'ule̱'e̱ na le̱'e̱ xu'u na', quebe bi guzeque' gune na xu'u na' lawe' da zria lane na lawe' xiaj xre.
LUK 6:49 Na' bénnea' dxenne̱' xrtizra'a, ne quebe dxune̱' ca da dxapa' le̱', naque̱' ca tu benne' be̱ne̱' xu'u chee̱' lawe' xu dxeze, ne quebe guzale̱' lane na, na' gate bdxuaj xe̱gu na', ne xeajchú'ule̱'e̱ na le̱'e̱ xu'u na', na' guché̱ na le̱ na, na' tu chí'izqueze bzria xi na le̱ na.
LUK 7:1 Gate bexuzre bchálajle̱ Jesús benne' ca', na' bezé̱'e̱ zexíaje̱' Capernaum.
LUK 7:2 Zua tu benne' Roma na', benne' dxenná be'e̱ lu wedil-la, na' zua tu bi we̱n zrin chee̱' nazrí'ile̱'e̱ne̱'-be', na' bi na' quebe chawe' zúabe', ne dxaca wátebe'.
LUK 7:3 Gate ben benne' Roma na' ca da dxun Jesús, na' gusél-le̱' bal-la benne' gula sina chee̱ judío ca', chee̱ xeajlegue̱zre̱' Jesús xide̱' xexune̱' bi we̱n zrin chee̱'.
LUK 7:4 Benne' gula ca' belezrine̱' lau Jesús, na' gulezú lawe̱' dxelata' xuene̱' Le̱', dxelenné̱': ―Benne' Roma nigá naca chee̱' gácale̱nu' le̱',
LUK 7:5 lawe' da dxape̱' ba lá'ana xe̱zre chee̱dxu, na' lé̱queze̱' be̱ne̱' tu xu'u chee̱dxu ga dxezrágadxu.
LUK 7:6 Nadxa Jesús guxíajle̱ne̱' benne' gula ca'. Gate belezrine̱' gagu naga zua lizre benne' Roma na', le̱' gusél-le̱' bal-la benne' ljwezre̱' xeajlegue̱zre̱' Jesús: ―Xran, quebe senu' gunne xue, lawe' da quebe naca chia' chu'u lizra'.
LUK 7:7 Chee̱ le̱ na' ne quebe bexazrda' néda'queza' xedajdilja' Lue'. Cun gunnaze, na' xexaca bi we̱n zrin chia'.
LUK 7:8 Néda'queza' zua benne' dxenná bé'ene̱' neda', na' neda' dxenná be'eda' benne' dxjaca wedil-la. Che xapa' tu bénnea': Guxíaj, na' waxíajbe', ne che xapa' xetube': Gudá, na' wídabe', ne che nna be'eda' bi we̱n zrin chia' da gunbe', na' gunbe' na.
LUK 7:9 Gate ben Jesús da nigá, na' bebánene̱', na' gunné̱'e̱ benne' ca' zjácale̱ Le̱', gunné̱': ―Da li, quebe ne cheajxraca' tu benne' xe̱zre Israel dxeajlí lazre̱' neda' ca dxun benne' nigá.
LUK 7:10 Gate belexezrín benne' ljwezre benne' Roma na' lizre̱', na' belelé'ene̱' ba bexaca bi we̱n zrin na'.
LUK 7:11 Ca gudé na' Jesús guzé̱'e̱ zéaje̱' tu xe̱zre da nazí le na Naín, na' xjácale̱ Le̱' benne' ca' dxusé̱dene̱', ne benne' zante̱.
LUK 7:12 Gate bzrine̱' gáguze naga zua xe̱zre na', blé'ene̱' benne' zaj nu'e̱ tu bi gate zeajlecache̱'-be', na' naca be̱' bi tulicha' chee̱ xrnabe', nu'ula na' ba gute benne' chie̱'. Benne' zan, benne' lazrie̱' zjácale̱ne̱' le̱'.
LUK 7:13 Gate Xránadxu blé'ene̱' nu'ula na', na' bexache lazre̱' le̱', ne guzre̱' le̱': ―Québedxa cuezru'.
LUK 7:14 Nadxa gubiga Jesús dxu'a xi'ina xu'ube', na' bte̱' na. Na' benne' ca' zeajlexexu'e̱-be' gulague̱'. Na' Jesús guzre̱' bi gate na': ―Bidau', dxapa' lue', guxasa.
LUK 7:15 Na' bi na' ba nate bexásabe' gudxe'be', na' bezú laube' dxuchálajbe'. Na' Jesús bunézruje̱'-be' lu na' xrnabe'.
LUK 7:16 Gate belelé'e benne' ca' da nigá, na' belezrebe̱', ne gulezú lawe̱' dxelúe lá'ane̱' Dios, dxelenné̱': ―Tu benne' zrente̱, benne' dxenné̱' waláz chee̱ Dios, ba ble̱'e̱ ládujla dxi'u. Cá'anqueze dxelenné̱': ―Dios ba ble̱'e̱ dxácale̱ne̱' xe̱zr chee̱'.
LUK 7:17 Ca naca naga nababa Judea, ne xe̱zre walízr chee̱ na belén bénneache ca naca xel-la waca chee̱ Jesús.
LUK 7:18 Naga xu'u Juan lizre xia, bénene̱' ca naca chee̱ da nigá lawe' da benne' ca' zjácale̱ne̱' Juan buluzenne̱' le̱' da dxaca na. Juan gunné̱' chupa benne' ca',
LUK 7:19 na' gusel-le̱' le̱' lau Jesús chee̱ cheajleche̱be̱' Le̱' che da li naque̱' Cristo, bénnea' dxal-la' xide̱', u che dxal-la' xelebeze̱' benne' xula.
LUK 7:20 Nadxa benne' ca' gusel-la Juan belezrine̱' lau Jesús, na' gulé̱'e̱ Le̱': ―Juan, bénnea' bchue̱' bénneache nisa nasel-le̱' netu' zedajché̱bentu' Lue' che Lue' na' nacu' Cristo, bénnea' dxal-la' xide̱', u che dxal-la' cuézantu' benne' xula.
LUK 7:21 Ca lu zra na' Jesús bexune̱' benne' zante̱ benne' we̱', ne benne' dxé'ene̱' xízrawe̱' da dxedá du zren, ne benne' ca' zaj xu'e̱ be' xriwe̱', na' bexune̱' benne' la chul-la ca'.
LUK 7:22 Nadxa Jesús guzre̱' benne' ca' nasel-la Juan: ―Le cheajxaca, ne le xe̱ Juan ca naca da ba ble'ele, ne da bénele. Benne' la chul-la ca' dxelexelé'ene̱', na' benne' zrinnaj ca' dxelexedé̱', na' benne' dxeledxé'ene̱' we̱' guzru' ba belexaque̱', na' benne' xache' ca' dxelenne̱' dizra' chawe' chee̱ Dios.
LUK 7:23 Ba neza zren naca na chee̱ benne' quebe gusán lazre̱' neda'.
LUK 7:24 Gate besí'aca benne' ca' gusel-la Juan, na' Jesús guzú lawe̱' dxuchálajle̱ne̱' benne' zaj zre̱'e̱ na' ca naca chee̱ Juan na', dxenné̱': ―¿Bizra guxiajle le'e xeajnna'le le̱'e̱ xixre' lawe' lataj? ¿Tu xia xtila da dxutá be'?
LUK 7:25 Che cabí, ¿bizra xeajnna'le? ¿Tu benne' nacu zra lane̱' da zácale̱'e̱? Ba nézquezle le'e benne' ca' dxelacu zra lane̱' da zácale̱'e̱, ne dxelé'aj dxelawe̱' da zácale̱'e̱ zaj zre̱'e̱ lizre benne' blau ca'.
LUK 7:26 Che cabí, ¿bizra xeajnna'le? ¿Tu benne' dxuchálaje̱' waláz chee̱ Dios? Awe', ble'ele tu benne' nácadxe̱' szren ca tu benne' dxuchálajé̱' waláz chee̱ Dios.
LUK 7:27 Juan nigá naque̱' bénnea' naxúaj na chee̱' lu xiche chee̱ Dios, dxenné̱': Dxesel-la' gubáz chia' lau Lue', chee̱ gucá'ana chawe̱' neza naga teu'.
LUK 7:28 Dxapa' le'e, ládujla xúgute̱ benne' quebe nu chilá' benne' dxuchálaje̱' waláz chee̱ Dios nácadxe̱' szren ca Juan nigá. Na'a benne' nácadxe̱' dxexruj lazre' naga dxenná bea Dios nácadxe̱' blau ca Juan nigá.
LUK 7:29 Na' gunná Jesús: ―Gate na' benne' dxexruj lazre' ca', ne benne' wechizruj ca' belenne̱' da dxuchalaj Juan, guleque bé'ene̱' Dios naque̱' xrlátaje, na' beledxúe̱' nisa lu na' Juan.
LUK 7:30 Benne' xudau' fariseo ca', ne benne' ca' dxuluxuzájle̱'e̱ da nadxixruj bea na buluzúe̱' chalá'ala ca naca da dxaca lazre' Dios gune̱' chee̱', na' quebe beledxúe̱' nisa lu na' Juan.
LUK 7:31 Na' gunná Xránadxu: ―¿Ájazra gutil-la lé̱beda' benne' zaj zre̱'e̱ na'a zra? ¿ájazra zaj naque̱'?
LUK 7:32 Zaj naque̱' ca bidu ca' dxelebe'be' dxelítajbe' lawe' xi'a, ne dxelebezre xa'abe', dxele̱be' bidu ljwézrebe': “Bcuézrentu' bchiuj da bénele, san quebe bxá'ale. Bil-la xáchentu', san quebe gudxézrele.”
LUK 7:33 Caní zaj naca benne' ca' lawe' da bla' Juan, bénnea' bchue̱' bénneache nisa, ne quebe gudawe̱' xeta, ne quebe gu'e̱ xrise uva wal-la, na' gulenné̱' xu'e̱ be' xriwe̱'.
LUK 7:34 Nadxa bla'a neda', Benne' Gulje̱' Bénneache, dxe'aj dxawa', na' dxelenné̱' naca' wagu xrata, ne benne' dxé'ajle̱'e̱, ne dxelenné̱' naca' ljwezre benne' dul-la ca', ne benne' wechizruj ca'.
LUK 7:35 Xel-la sina chee̱ Dios naca bea na ne̱ chee̱ da dxelún benne' ca' zaj nape̱' xel-la sina chee̱ Dios.
LUK 7:36 Tu benne' xudau' fariseo gunné̱' Jesús cheajtawe̱' xeta lizre̱', na' Jesús guxíaje̱' lizre bénnea', na' gudxé'e̱ dxawe̱'.
LUK 7:37 Nadxa tu nu'ula dul-la chee̱ xe̱zre na', gate benne̱' bzrin Jesús dxawe̱' xeta lizre benne' fariseo na', na' bzrin nu'ula na' ga na', nu'e̱ tu da' naca na xiaj zaca, da nazráte̱ na da dxelá zixre.
LUK 7:38 Gate bzrin nu'ula na' naga zua Jesús, na' gudxé'e̱ zran ni'e̱ dxebezre̱', ne guzú lawe̱' dxibe̱' ni'a Jesús nen nisa dxebezre̱', ne bsebizre̱' ni'e̱ nen xicha xíchaje̱', ne bnupe̱' ni'a Jesús, na' gulu'e̱ na da dxelá zixre na'.
LUK 7:39 Na' benne' xudau' fariseo, bénnea' gunné̱' Jesús lizre̱', gate blé'ene̱' da nigá, gunné̱' lu lázrdawe̱': “Chela benne' nigá da li naque̱' benne' dxuchálaje̱' waláz chee̱ Dios, guéquebe'equeze̱' aja naca chee̱ nu'ula nigá dxuté̱' ni'e̱, lawe' da naque̱' nu'ula dul-la.”
LUK 7:40 Nadxa Jesús guzre̱' benne' fariseo na': ―Simón, de̱ tu da guchálajle̱na' lue'. Na' beche̱be benne' fariseo na': ―Gunná, Benne' Wese̱de.
LUK 7:41 Jesús gunné̱': ―Chupa benne' dxelal-le̱' dumí chee̱ tu benne' tu dxusánte̱zqueze̱' benne' dumí. Tue̱' dxal-le̱' chee̱' lazruj chee̱ chupiza, na' xetúe̱' dxebague̱' lazruj chee̱ chupa beu'.
LUK 7:42 Lawe' da quebe dxelezéquene̱' xelexexízruje̱' chee̱ bénnea', na' le̱' bnite lawe̱' chee̱ dxúpate̱ benne' ca' ca naca da dxelebague̱' chee̱'. Na'a gunná, ¿nula benne' caní zrí'idxene̱' bénnea'?
LUK 7:43 Simón beche̱be̱': ―Dxéqueda' bénnea' bnite lawe̱' chee̱' da zrendxa. Na' Jesús guzre̱' le̱': ―Da li dxennáu'.
LUK 7:44 Nadxa Jesús gunné̱'e̱ nu'ula na', na' guzre̱' Simón: ―¿Dxelé'enu' nu'ula nigá? Neda' guxu'a lizru', ne quebe nu gunná be'enu' quibe ni'a, san nu'ula nigá gudibe̱' ni'a nen nisa dxebezre̱', ne bsebizre̱' na nen xicha xíchaje̱'.
LUK 7:45 Quebe bnupu' neda', san nu'ula nigá, gate guxú'utea', quebe dxusane̱' dxunúpequeze̱' ni'a.
LUK 7:46 Quebe gulú'u da za xíchaja', san nu'ula nigá gulu'e̱ ni'a da dxelále̱'e̱ zixre.
LUK 7:47 Chee̱ le̱ na' dxapa' lue', lawe' da nazrí'ile̱'e̱ne̱' neda', da nigá naca bea na ba bnite lawa' chee̱' ca naca dul-la zan chee̱', san bénnea' naca bábaze dul-la chee̱' da bnite lawa', láteze zrí'ine̱' neda'.
LUK 7:48 Nadxa Jesús guzre̱' nu'ula': ―Dul-la chiu' ba bnite lawa'.
LUK 7:49 Na' benne' ca' zaj zre̱'e nen Le̱', ne zaj dxe'e̱ na' gulezú lawe̱' dxelenné̱' lu lázrdawe̱': “¿Nuzra benne' nigá, dxunite láuqueze̱' dul-la?”
LUK 7:50 Jesús guzre̱' nu'ula na': ―Ba naláu' lawe' da guxéajle̱'u chia'. Bexíaj dute̱ xel-la dxebeza zri lazre'.
LUK 8:1 Ca gudé da nigá, gudá Jesús zane' xe̱zre, ne xé̱zredu ca', dxusé̱dene̱', ne dxuchálaje̱' ca dxenná bea Dios. Benne' chazrinnu gubáz ca' zjácale̱ne̱' Le̱'.
LUK 8:2 Cá'anqueze zjácale̱ Le̱' bal-la nu'ula ca', benne' ca' bexune̱' le̱' ca naca xízrawe̱' chee̱', ne bebéaje̱' be' xriwe̱' ca' da zaj xu'e̱. Ládujla nu'ula ca' ziaj María Magdalena, nu'ula na' belexedxúaj gazre be' xriwe̱' lu xichaj lázrdawe̱'.
LUK 8:3 Ládujla le̱' zíajqueze Juana, zru'ula Chuza, benne' na' xu'u lu ne̱'e̱ da napa Herodes. Cá'anqueze ládujla le̱' ziaj Susana, na' zjaca nu'ula zandxa na', nu'ula ca' dxelácale̱ne̱' Jesús nen da zaj nape̱'.
LUK 8:4 Benne' zan beledxúaje̱' lu xe̱zre ca' chee̱ xelelé'ene̱' Jesús, na' gate belezraga benne' zan naga zue̱', na' bchálaje̱' tu da dxulé'e na, dxe̱'e̱ le̱':
LUK 8:5 ―Tu benne' dxaze̱' guzé̱'e̱ zjaze̱' zrua' xtila. Ca zéaje̱' dxaze̱' na, bal-la bínnedu ca' xeajlechaze na dxu'a neza, na' benne' ca' bululéaje̱' na, na' belezrín bxínnedau' guláguba' na.
LUK 8:6 Xebal-la bínnedu ca' xeajlechaze na lu xiaj ca', na' gate bínnedu caní belezría na, chadite̱ gulebizre na, lawe' da quebe gudxé' gupa'.
LUK 8:7 Xebal-la bínnedu ca' xeajlechaze na naga zaj dxe' lue xeche', na' bululule xeche' ca' le̱ na.
LUK 8:8 Xebal-la bínnedu ca' xeajlechaze na lu xu be̱be, na' gate belegula na, na' gulezríale̱'e̱ na. Bal-la na gulezría na tu gaxúa weaj. Gate bexuzre bchalaj Jesús da nigá, na' gunné̱' zizraj: ―¡Che le'e zua nágale, le xene!
LUK 8:9 Nadxa benne' ca' dxuse̱de Jesús gulenábene̱' Le̱' bizra zéaje̱ da dxulé'e nigá.
LUK 8:10 Jesús guzre̱' le̱': ―Dios dxuzéajni'ine̱' le'e ca naca da nagache chee̱ xel-la dxenná bea chee̱', san benne' xula, dxuchálajle̱na' le̱' da dxulé'e na caní, chee̱ gate dxelelé'ene̱' xelaque̱' ca benne' quebe dxelelé'ene̱', ne gate dxelenne̱' quebe dxeléajni'ine̱'.
LUK 8:11 Na' gunná Jesús: ―Da nigá naca ca zéaje̱ da dxulé'e na': Bínnedu ca' zéaje̱ na xrtizra' Dios.
LUK 8:12 Bínnedu ca' xeajlechaze na dxu'a neza zéaje̱ na benne' ca' dxelenne̱' xrtizra' Dios, san za' da xriwe̱', na' dxegúa na dizra' na' lu xichaj lázrdau benne' ca', chee̱ quebe xeléajle̱'e̱, ne quebe xelelé̱'.
LUK 8:13 Bínnedu ca' xeajlechaze na lu xiaj ca' zéaje̱ na benne' ca' dxelenne̱' dizra' na', ne dxelezi'e̱ na dute̱ xel-la dxelebé, san quebe dxaze na lu xichaj lázrdawe̱'. Dxeléajle̱'e̱ tu chí'idau'ze, na' gate dxeledée̱' lu da zi' da xa', na' dxulusán lazre̱' na.
LUK 8:14 Bínnedu ca' xeajlechaze na naga zaj dxe' lue xeche' zéaje̱ na benne' ca' dxelenne̱' dizra' na', na' dxeajxaque̱', na' lawe' da dxeleze̱ne̱' gunne xue da zante̱, ne dxelezé̱ lazre̱' xel-la gunní'a, ne da xele'aj xelawe̱' da zácale̱'e̱, na' xúgute̱ da caní dxulusunite na dizra' na', na' quebe dxun na zrin lu xichaj lázrdawe̱'.
LUK 8:15 Na' bínnedu ca' xeajlechaze na lu xu be̱be zéaje̱ na benne' ca' zua chawe', ne du lazre' lázrdawe̱', na' gate dxelenne̱' dizra' na', dxuluzúa chache̱' na, na' dxun zrin dizra' na' lu xichaj lázrdawe̱'.
LUK 8:16 Gunná Jesús: ―Netú benne' che gugale̱' da dxegú'u lení', quebe gudúsie̱' na tu xi'ina, u zranle ga dxasie̱', san guzúe̱' na sibe, chee̱ cu'u lení' na chee̱ benne' zaj zre̱'e̱ lu xu'u na'.
LUK 8:17 Quebe bi de̱ da nagache' da quebe gulé'e lau na, ne quebe bi xu'u lu xichaj lázrdau bénneache da quebe gaca bea na, ne lá'te̱queze na.
LUK 8:18 ’Chee̱ le̱ na', le xene xanne'. Tu benne' nazi'e̱ xrtizra' Dios, wazidxe̱', san benne' quebe dxezi'e̱ na, wegá'a ca da du dxéquene̱' nape̱'.
LUK 8:19 Nadxa xrna Jesús, ne benne' biche̱' ca' belezrine̱' naga zue̱', san quebe gulezéquene̱' xelezrine̱' lau Le', lawe' da zrále̱'e benne' zan ga na'.
LUK 8:20 Tu benne' na' bzenne̱' Jesús, gunné̱': ―Xrna'u, ne bi bichu' ca' zaj zre̱'e̱ chale'aj nigá, dxelaca lazre̱' xuluchálajle̱ne̱' Lue'.
LUK 8:21 Jesús guzre̱' le̱': ―Benne' ca' dxelenne̱' xrtizra' Dios, ne dxelune̱' ca dxenná na, benne' caní zaj naque̱' ca xrna'a, ne benne' bícha'dau' ca'.
LUK 8:22 Tu zra guxú'u Jesús tu lu da dxedá lawe' nísadau' nen benne' ca' dxusé̱dene̱', na' guzre̱' le̱': ―Cheajdxu xecha la'a nísadau'. Na' gusiá'que̱',
LUK 8:23 ne dxácate̱ zjaque̱' lu nísadau' na', guse Jesús. Na' guzú lau dxácale̱'e̱ be' bdunu' lu nísadau', na' guzú lau dxu'u nisa lu da dxedá lawe' nísadau' na', ne ba dxácate̱ waxaze na lu nísadau'.
LUK 8:24 Nadxa bulusebane̱' Jesús, dxelé̱'e̱ Le̱': ―¡Benne' Wese̱de! ¡Benne' Wese̱de! ¡Ba dxázedxu lu nisa nigá! Nadxa guxasa Jesús, na' gudil-le̱' be' bdunu' na', ne nisa na', na' ca naca da ca' belezúa zri na.
LUK 8:25 Nadxa Jesús guzre̱' benne' ca' dxusé̱dene̱': ―¿Quebe ne chéajle̱le chee̱ Dios? Benne' ca' belezrebe̱', ne belexebánene̱', na' buluche̱be ljwezre̱': ―¿Núzraqueze benne' nigá, dxenná bé'ene̱' be', ne nisa, na' dxuluzúa na dizra' chee̱'?
LUK 8:26 Nadxa belezrine̱' xecha la'a nisa lu xe̱zr la xu chee̱ xe̱zre Gadara, chalá'a ca'ala chee̱ Galilea.
LUK 8:27 Gate bedxúaj Jesús lu da dxedá lawe' nísadau' na', na' bzrin tu benne' xe̱zre na' lau Le̱'. Zánete̱ iza ba guca xu'u be' xriwe̱' ca' benne' nigá. Quebe gúcue̱' zra lane̱', ne quebe guzúe̱' netú lu xu'u, san xeajchu'e̱ tu lu ba ca'.
LUK 8:28 Gate blé'ene̱' Jesús, na' xeajzú zribe̱' lau Le̱', na' gudxezre xe̱'e̱, dxenné̱': ―¿Bizr chee̱ na' za'u naga zua', Jesús, Zri'ine Dios szrente̱? Dxata' xueda' Lue' quebe gusaca zi'u neda'.
LUK 8:29 Gunná na caní lawe' da ba gunná be'e Jesús be' xriwe̱' ca' xelexedxúaj na lu xichaj lázrdau benne' nigá. Zane' lasa be' xriwe̱' ca' ba gule̱la na benne' nigá. Benne' xe̱zre na' gule̱le̱' benne' nigá, ne buluchéaje̱' le̱' ni'a ne̱'e̱ nen du xia, san le̱' bzúzxuje̱' du xia na', na' be' xriwe̱' ca' guleché̱ na le̱' le̱'e̱ xixre' lawe' lataj.
LUK 8:30 Jesús bche̱be̱' be' xriwe̱' ca': ―¿Bi le̱le? Na' beche̱be le̱ na: ―Neda' lea': Da Zan. Ca' gunná na lawe' da xu'u be' xriwe̱' zante̱ benne' na'.
LUK 8:31 Be' xriwe̱' ca' gulenaba na Jesús quebe sel-le̱' na lataj chul-la.
LUK 8:32 Lu xi'a naga zua Jesús, na' zrále̱'e̱ cuche zan dxeláguba', na' be' xriwe̱' ca' gulata' xue na Jesús gu'e̱ lataj da ca' cheajxezrá na lu cuche ca', na' bnezruj Jesús na lataj.
LUK 8:33 Nadxa be' xriwe̱' ca' belexedxúaj na lu xichaj lázrdau benne' na', na' gulú'u na lu cuche ca', na' xúgute̱ cuche ca' buluzrúnnujba', ne gulebíxreba' dxu'a chjéa, na' xeajlecházeba' lu nísadau', naga gulé̱peba', guláteba'.
LUK 8:34 Benne' ca' dxuluxúe̱' cuche ca', gate belelé'ene̱' ca da guca, na' buluzrúnnuje̱' lu xel-la dxelezrebe, na' gulé̱'e̱ benne' zaj zre̱'e̱ le̱'e̱ xixre', ne benne' zaj zre̱'e̱ lawe' xe̱zre ca da guca.
LUK 8:35 Nadxa benne' ca' beledxúaje̱' xeajlenné̱'e̱ ca da guca. Gate belezrine̱' naga zua Jesús, na' belelé'ene̱' bénnea' belexedxúaj be' xriwe̱' ca' lu xichaj lázrdawe̱', dxe'e̱ zran ni'a Jesús, ba nácue̱' ladxe', ne ba bezúa chawe' xichaj lázrdawe̱', na' benne' ca' belezrebe̱'.
LUK 8:36 Na' benne' belelé'e ca da guca buluchálajle̱ne̱' benne' xula ca' ca guca gate bexaca bénnea' guxú'e̱ be' xriwe̱' ca'.
LUK 8:37 Gate belenne̱' caní, ca naca benne' zaj zre̱'e̱ lu xe̱zr la xu chee̱ xe̱zre Gadara gulezú lawe̱' dxelata' xúene̱' Jesús xezé̱'e̱ lazrie', lawe' da dxelezrébele̱'e̱. Ca'an guca, guxú'u Jesús lu da dxedá lawe' nísadau', chee̱ xezé̱'e̱ xéaje̱'.
LUK 8:38 Bénnea' belexedxúaj be' xriwe̱' ca' lu xichaj lázrdawe̱' gunabe̱' lau Jesús gunézruje̱' lataj chéajle̱ne̱' Le̱', san Jesús busebague̱' le̱' xegá'ane̱' lázrie̱', na' guzre̱' le̱':
LUK 8:39 ―Bexiaj lizru', na' bchalaj chee̱ xúgute̱ ca da ba be̱n Dios chiu'. Na' benne' na' bezé̱'e̱ zexíaje̱', na' bchálajle̱ne̱' benne' xe̱zre ca' ca da be̱n Jesús chee̱ le̱'.
LUK 8:40 Gate bezrín Jesús xecha la'a dxu'a nísadau', benne' ca' zaj zre̱'e̱ na' gulezí' lu ne̱'e̱ Le̱' nen dute̱ xel-la dxelebé, lawe' da xúgute̱' dxelebeze̱' Le̱'.
LUK 8:41 Nadxa bzrin tu benne' le̱' Jairo, benne' blau chee̱ xu'u naga dxelezraga judío ca', na' bzu zribe̱' lau Jesús, ne guta' xúene̱' Le̱' chéaje̱' lizre̱',
LUK 8:42 lawe' da zua tuze bi nu'ula chee̱'. Xu'ube' chazrinnu iza, na' ba dxaca wátebe'. Gate guzá' Jesús zéaje̱', benne' zante̱ zjácale̱ne̱' Le̱', ne buluchídete̱ ljwezre̱'.
LUK 8:43 Ládujla benne' ca' zeaj tu nu'ula quebe chawe' zue̱', na' chazrinnu iza ba zeaj dxé'ene̱' we̱' dxen da dxaca chee̱ nu'ula ca'. Ba gudízruje̱' benne' dxelexún bénneache ca' xúgute̱ ca da gudape̱', na' quebe bi gulezéquene̱' xelune̱' chee̱ xexaca nu'ula na'.
LUK 8:44 Nu'ula na' gubigue̱' cúzrula Jesús, na' xeajté̱' zran ni'a zre̱', na' la ná'queze bexágate̱ dxen da dxaca nu'ula na'.
LUK 8:45 Nadxa Jesús bche̱be̱': ―¿Nuzra bta neda'? Xúgute̱' gulenné̱': “Quebe nu ne gutá Lue'”, na' Pedro, ne benne' ljwezre̱' ca' gulenné̱': ―Benne' Wese̱de, benne' caní dxuluchídee̱' Lue', ne dxuluzrigue̱' Lue', na' dxuché̱bequezu', dxennáu': “¿Nuzra bta neda'?”
LUK 8:46 Jesús gunné̱': ―Tu benne' bte̱' neda' lawe' da gúquebe'eda' ben zrin xel-la waca chia' da bexún na tu benne'.
LUK 8:47 Gate gúquebe'e nu'ula na' ba neze Jesús da guca, nadxa gudée̱' dxezrízete̱', na' bzu zribe̱' lau Jesús, ne guxrúale̱pe̱' lau xúgute̱ benne' ca' bizr chee̱ na' bte̱' Jesús, ne ca guca bexácate̱'.
LUK 8:48 Nadxa gunná Jesús, guzre̱' nu'ula na': ―Zrí'ina'dau', ba bexacu' lawe' da guxéajle̱'u chia'. Bexíaj na'a, dute̱ xel-la dxebeza zri lazre'.
LUK 8:49 Ne dxuchálajte̱ Jesús, bzrin tu benne' naga ze̱ Jesús, benne' guzé̱'e̱ lizre Jairo, benne' blau chee̱ xu'u ga na' dxelezraga judío ca', na' guzre̱' Jairo: ―Ba gute bi nu'ula chiu'. Québedxa guzúa xuzru' Benne' Wese̱de nigá.
LUK 8:50 Gate ben Jesús ca gunné̱', na' guzre̱' Jairo: ―Quebe zrebu'. Con guxeajle̱. Bi nu'ula chiu' na' xexácabe'.
LUK 8:51 Gate bzrin Jesús xu'u na', netú quebe be̱' lataj chú'ule̱ Le̱', san tuze Pedro, ne Jacobo, ne Juan, ne xra xrna bi nu'ula na'.
LUK 8:52 Xúgute̱ benne' zaj zre̱'e̱ na' dxelebezre̱', ne dxelebezre xache̱' chee̱ bi nu'ula na'. Jesús gunné̱': ―Quebe cuézrele. Bi nú'uladu nigá quebe nátebe'. Dxásezebe' na'.
LUK 8:53 Na' benne' ca' buluzrizre̱' chee̱', lawe' da zaj nézquezne̱' ba gútebe'.
LUK 8:54 Nadxa Jesús guqué̱'e̱ na' bi na', na' gunné̱' zizraj: ―¡Bi nu'ula, bexasa!
LUK 8:55 Na' bebanbe', ne bexásate̱be'. Na' Jesús busebague̱' le̱' xulunézruje̱' da gágube'.
LUK 8:56 Xra xrnabe' belexebánele̱'e̱ne̱'. Jesús busebague̱' le̱' quebe nu xelé̱'e̱ ca da guca.
LUK 9:1 Jesús bchague̱' benne' chazrinnu ca' dxusé̱dene̱', na' bnézruje̱' le̱' xel-la waca, ne xel-la dxenná bea chee̱ xelexebéaje̱' xúgute̱ cue' be' xriwe̱' ca' da zaj xu'u bénneache, ne chee̱ xelexexune̱' benne' ca' zaj xu'e̱ xízrawe̱'.
LUK 9:2 Na' gusel-le̱' le̱' chee̱ xuluzenne̱' bénneache ca dxenná bea Dios, ne chee̱ xelexexune̱' benne' zaj xu'e̱ xízrawe̱' ca'.
LUK 9:3 Na' guzre̱' le̱': ―Quebe bi gúale chee̱ la neza. Quebe gúale xaga da guchíchele, na' xixruj chee̱le, ne da gágule, ne dumí. Le gua' tu cue'ze zra lánale.
LUK 9:4 Gátete̱ze xu'u naga chú'ule, le xegá'ana na' cadxa zrin zra xeza'ale lu xe̱zre na'.
LUK 9:5 Naga quebe xelezí'e̱ dizra' guchálajle̱le le̱', le xedxúaj xe̱zre na', ne le cuibe bxrte xu da da' ní'ale, da gulé'e na zaj nabague̱' zria lau Dios.
LUK 9:6 Nadxa beledxúaje̱', na' ca naca xé̱zredu ca' xeajlechálaje̱' dizra' chawe' chee̱ Dios, ne belexexune̱' benne' zaj xu'e̱ xízrawe̱' ca'.
LUK 9:7 Herodes, benne' dxenná be'ene̱' xe̱zr la xu na', benne̱' ca naca xúgute̱ da dxun Jesús, na' guzúe̱' ste̱be lawe' da dxelenná bal-la benne' ba bebán Juan ládujla benne' gate.
LUK 9:8 Xebal-le̱' dxelenné̱' Elías, bénnea' bchálaje̱' waláz chee̱ Dios ba bele̱'e̱, na' xebal-le̱' dxelenné̱' ba bebán tu benne' ca' buluchálaje̱' waláz chee̱ Dios ca ni'te̱.
LUK 9:9 Herodes gunné̱': ―Néda'queza' gunná be'eda' nu gudxugu xichaj Juan. ¿Nuzra benne' nigá xca' da zante̱ dxenda' dxune̱'? Nadxa Herodes be̱ne̱' ba xuzre lé'ene̱' Jesús.
LUK 9:10 Gate belexezrín benne' gubáz ca' chee̱ Jesús lau Le̱', na' gulé̱'e̱ Le̱' ca da ba belune̱'. Na' Jesús beche̱'e̱ benne' ca', na' besiá'que̱' zeajxaque̱' tu lataj da nagá'ana zitu' naga zaj dxe' xe̱zre ca', naga zua lu xe̱zr la xu chee̱ xe̱zre Betsaida.
LUK 9:11 Gate benne' xe̱zre na' belenne̱' zua Jesús na', na' gusiá'que̱' zjaque̱' naga zua Le̱'. Na' Jesús guzí' lu ne̱'e̱ benne' ca', ne bchálajle̱ne̱' le̱' ca dxenná bea Dios, ne bexune̱' benne' zaj xu'e̱ xízrawe̱' ca'.
LUK 9:12 Gate guzú lau zeaj dxezré', na' gulebiga benne' chazrinnu gubáz ca' chee̱ Jesús lau Le̱', na' gulé̱'e̱ Le̱': ―Bze̱ benne' caní dizra' chee̱ chjaque̱' naga xelasie̱', ne xelílaje̱' da xelawe̱' xé̱zredu ca' zaj nnita gagu, lawe' da ga zúadxu nigá quebe bi de̱.
LUK 9:13 Jesús guzre̱' le̱': ―Le gunezruj le'e da xelawe̱'. Nadxa benne' ca' bele̱'e̱ Jesús: ―Quebe de̱dxa chee̱ntu' ca gázxuga xeta xtíladau', ne chúpaga bela, u ¿wacheajxríquezentu' da xelagu catite benne' zan caní?
LUK 9:14 Zaj zra ca chi xun gaxúa benne' biu ca' ga na'. Nadxa Jesús guzre̱' benne' ca' dxusé̱dene̱': ―Le xe̱ benne' ca' xelebé'e̱ chi xun weaje̱' tu cue' tu cue'.
LUK 9:15 Ca'an belune̱', na' gulebe'e̱ xúgute̱'.
LUK 9:16 Nadxa Jesús guqué̱'e̱ da gazxu' xeta xtila ca', ne chupa bela ca'. Na' guchisa lawe̱' xabaala, ne guzre̱' Dios “Xcalenu'”, na' ca bexuzre bzúzruje̱' na, na' bnézruje̱' na benne' ca' dxusé̱dene̱' chee̱ xelisie̱' na chee̱ benne' zan ca'.
LUK 9:17 Xúgute̱' gulawe̱', ne belélaje̱'. Ca gudé na' bulusuzré̱'e̱ chazrinnu ga' da bízrujdu ca' belexegá'ana na.
LUK 9:18 Tu zra gate zua Jesús dxuchálajle̱ne̱' Dios naga quebe zaj zra benne' zan ca', na' zrale̱ benne' ca' dxusé̱dene̱' Le̱', na' Le̱' bche̱be̱' benne' ca': ―¿Nuzra dxelenná benne' naca' neda'?
LUK 9:19 Le̱' belexeche̱be̱': ―Bal-le̱' dxelenné̱' nacu' Juan, bénnea' bchue̱' bénneache nisa, na' xebal-le̱' dxelenné̱' nacu' Elías, bénnea' bchálaje̱' waláz chee̱ Dios, na' xebal-le̱' dxelenné̱' nacu' tu benne' ca' buluchálaje̱' waláz chee̱ Dios ca ni'ite̱, na' bebane̱'.
LUK 9:20 Nadxa Jesús bche̱be̱': ―Na' le'e, ¿nuzra dxennale naca'? Na' gunná Pedro: ―Nacu' Cristo chee̱ Dios.
LUK 9:21 Jesús bsebague̱' benne' ca' quebe nu xelé̱'e̱ ca'.
LUK 9:22 Na' guzre̱' le̱': ―Neda', Benne' Gulje̱' Bénneache, dxal-la' téle̱'a xel-la zi', na' benne' gula sina ca', ne benne' xíchaje̱ ca' chee̱ bxruze, ne benne' ca' dxuluxuzájle̱'e̱ da nadxixruj bea na xuluzúe̱' neda' chalá'ala. Xelútie̱' neda', san gate gaca chunna zra, na' xebana'.
LUK 9:23 Ca gudé na' guzre̱' ca naca benne' zaj zre̱'e̱ na': ―Che nu benne' dxaca lazre̱' gaque̱' neda' tuze, dxal-la' guzúe̱' chalá'ala xúgute̱ da naca chee̱', na' gune̱' neda' tuze xúgute̱ zra, lácala gate benne' na'.
LUK 9:24 Benne' dxaca lazre̱' gapa chi'e̱ xel-la nabán chee̱', gunítie̱' na, san benne' gunítie̱' xel-la nabán chee̱' lawe' da naque̱' chia', wazrué'ene̱' na.
LUK 9:25 ¿Bizra da ba neza gaca na chee̱ tu benne' che gape̱' ca naca da de̱ lu xe̱zr la xu nigá, san cuía xi' lé̱queze̱'?
LUK 9:26 Che nu benne' xedué'ene̱' chia' neda', ne chee̱ dizra' chia', cá'anqueze neda', Benne' Gulje̱' Bénneache, wedué'eda' chee̱ bénnea' gate za'a neda' chee̱ nna be'a nen xel-la szren chee̱ Xra', ne chee̱ gubáz lá'azxa chee̱ xabáa ca'.
LUK 9:27 Da li dxapa' le'e, bál-lale zrale nigá quebe gátele nédxudxa ca lé'ele zra nna bea Dios.
LUK 9:28 Ca guzre xi' gudé gunná Jesús da nigá, na' guluéne̱' tu lu xi'a chee̱ guchálajle̱ne̱' Dios, na' xjácale̱ Pedro, ne Jacobo, ne Juan Le̱'.
LUK 9:29 Dxácate̱ dxuchálajle̱ne̱' Dios, na' bcha lu'a lesaca Jesús, na' zra lane̱' bexaca na da chiche, ne guca tite na.
LUK 9:30 Nadxa bululé'e lau chupa benne' dxuluchálajle̱ne̱' Jesús. Zaj naque̱' Moisés ne Elías.
LUK 9:31 Naga ze̱le̱ Jesús benne' ca' gúcatite' legala, na' dxuluchálajle̱ne̱' Jesús ca gaca gate gatie̱' Le̱' xe̱zre Jerusalén.
LUK 9:32 Gulácale̱'e̱ welase Pedro ne benne' ljwezre̱' ca', san bulusebán lazre̱', na' belelé'ene̱' ca naca xel-la szren chee̱ Jesús, ne chupa benne' ca' zaj zé̱le̱ne̱' Jesús.
LUK 9:33 Gate benne' ca' belexesiá'que̱' naga ze̱ Jesús, na' Pedro gunné̱': ―Benne' Wese̱de, néquega zúadxu nigá. Be̱nna netu' lataj guntu' chunna xu'u lága'dau', tu chiu', ne tu chee̱ Moisés, ne tu chee̱ Elías. Pedro quebe dxéquebe'ene̱' ca da dxenné̱'.
LUK 9:34 Dxácate̱ dxenná Pedro caní, na' bla' tu beuj da gucu na naga zaj zre̱'e̱, na' belezrebe Pedro, ne benne' ljwezre̱' ca' gate gulezré̱'e̱ lu beuj na'.
LUK 9:35 Na' belenne̱' chi'i nu dxuchalaj lu beuj na', gunná: ―Bi nigá naque̱' Zri'ina', nazrí'ite̱ lazra'. Le xen da dxuchálajbe'.
LUK 9:36 Ca gudé belenne̱' chi'i na', na' belelé'ene̱' Jesús ba ze̱' tuze̱'. Na' benne' caní gulezúe̱' zrize, na' quebe nu gulé̱'e̱ ca da belelé'ene̱'.
LUK 9:37 Gute xu, gate belexexétaje̱' lu xi'a na', na' benne' zan zjaque̱' zeajlexrígale̱' Jesús.
LUK 9:38 Nadxa tu benne' ca' gunné̱' zizraj, guzre̱' Jesús: ―Benne' Wese̱de, dxata' xueda' Lue' dajxú' bi biu chia' lawe' da tu lícha'te̱ bi chia' naca,
LUK 9:39 na' tu be' xriwe̱' dxaze na le̱be', ne dxucuezre xa'a na le̱be', ne dxudxixre dxutula na le̱be', na' dxebía bzrina' dxú'abe'. Dxusaca zi na le̱be', ne quebe dxaca lazre' na gusán na le̱be'.
LUK 9:40 Ba guta' xueda' benne' ca' dxusé̱denu' chee̱ xelexebéaje̱' na, san quebe gulezéquene̱'.
LUK 9:41 Jesús beche̱be̱': ―Le'e, benne' we̱n chupa lazre', ne we̱n da cale̱la. ¿Ájate̱ dxal-la' súale̱na' le'e? ¿Ájate̱ dxal-la' guchaga lawa' nen le'e? Xeajxrí' zri'inu' na' nigá.
LUK 9:42 Gate bi cuide' na' ba zéajbe' gagu, na' be' xriwe̱' na' gudín na le̱be' xu, ne bdxixre btula na le̱be'. Na' Jesús gudil-le̱' be' xriwe̱' na', ne bexune̱' bi cuide' na', na' bdee̱'-be' lu na' xrabe'.
LUK 9:43 Xúgute̱ benne' ca' belexebánene̱' ca naca xel-la szren chee̱ Dios. Dxácate̱ na' xúgute̱ benne' ca' dxelexebánene̱' ca da dxun Jesús, Le̱' guzre̱' benne' ca' dxusé̱dene̱':
LUK 9:44 ―Le xen xanne' da nigá, ne quebe gal-la lázrele na. Neda', Benne' Gulje̱' Bénneache, wuludée̱' neda' lu na' bénneache.
LUK 9:45 Benne' ca' dxusé̱dene̱' quebe guléajni'ine̱' ca da dxenná Jesús lawe' da quebe ne gunézruj Dios lataj xeléajni'ine̱', na' belezrebe̱' xelenabe̱' Jesús guzéajni'ine̱' le̱' ca da na' gunné̱'.
LUK 9:46 Nadxa benne' ca' dxuse̱de Jesús gulezú lawe̱' dxuluche̱be ljwezre̱' núzraqueze naca blau ládujla le̱'.
LUK 9:47 Jesús gúquebe'ene̱' ca da dxelenné̱'. Nadxa guqué̱'e̱ tu bi biúdau', ne bze̱'-be' cuite̱',
LUK 9:48 na' guzre̱' benne' ca': ―Benne' gape̱' ba lá'ana tu bidu caní lawe' da nazrí'ine̱' neda', néda'queza' dxape̱' ba lá'ana, na' benne' dxape̱' ba lá'ana neda', dxápaqueze̱' ba lá'ana Dios, Bénnea' nasel-le̱' neda'. Cá'anqueze bénnea' nácadxe̱' benne' dxexruj lazre' ládujla le'e, benne' nigá naque̱' benne' blau.
LUK 9:49 Nadxa Juan guzre̱' Jesús: ―Benne' Wese̱de, blé'entu' tu benne' dxuchínene̱' Lau', dxebéaje̱' be' xriwe̱' ca' lu xichaj lázrdau benne' ca', na' gúzrentu' le̱' quebe gune̱' ca' lawe' da quebe naque' dxi'u tuze.
LUK 9:50 Jesús guzre̱' le̱': ―Quebe guzágale ca da dxune̱' lawe' da benne' quebe dxedábague̱' dxi'u zue̱' gácale̱ne̱' dxi'u.
LUK 9:51 Gate ba za zrin zra dxal-la' xexíaj Jesús xabáa, be̱n zi' lazre̱' chéaje̱' Jerusalén.
LUK 9:52 Na' gusél-le̱' gubáz chee̱' ca' xelebía lawe̱', na' benne' ca' xjaque̱' tu xé̱zredau' nababa Samaria chee̱ cheajlecuéze̱' naga sua Jesús.
LUK 9:53 Benne' Samaria ca' quebe gulaca lazre̱' xegá'ana Jesús na', lawe' da guleque bé'ene̱' zéaje̱' Jerusalén.
LUK 9:54 Gate Jacobo ne Juan, benne' ca' dxuse̱de Jesús, belelé'ene̱' da nigá, na' gulé̱'e̱ Jesús: ―Xran, ¿dxaca lazru' nna béantu' xetaj xi' da za xabáa chee̱ guzría xi na benne' caní, ca be̱n Elías, bénnea' bchálaje̱' waláz chee̱ Dios?
LUK 9:55 Nadxa Jesús guné̱'e̱ le̱', ne gudil-le̱' le̱', dxenné̱': ―Le'e quebe nézele nu be' zúale̱ le'e.
LUK 9:56 Caní naca lawe' da bla' neda', Benne' Gulje̱' Bénneache, quegá chee̱ guzría xi'a xel-la nabán chee̱ bénneache, san chee̱ gucache chawa' le̱ na. Nadxa xjaque̱' xetú xé̱zredau'.
LUK 9:57 Ca zjaque̱' lu neza na', tu benne' biu guzre̱' Jesús: ―Xran, dxaca lazra' sále̱na' Lue' gátete̱ze chéaju'.
LUK 9:58 Jesús beche̱be̱': ―Beza ca' zaj zua bluaj chee̱ba', na' bxínnedu ca' zaj zria xrú'uneba', san neda', Benne' Gulje̱' Bénneache, quebe bi de̱ ga xrua xíchaja'.
LUK 9:59 Na' Jesús guzre̱' xetú benne': ―Be̱n neda' tuze. Benne' nigá gunné̱': ―Xran, be̱nna neda' lataj cheajcáchea' xra'.
LUK 9:60 Na' Jesús beche̱be̱': ―Be̱ lataj benne' ca' zaj naque̱' ca benne' gate xulucache' ljwezre̱', na' lue', guxíaj, xeajchalaj ca dxenná bea Dios.
LUK 9:61 Nadxa tu benne' xula guzre̱' Jesús: ―Xran, dxaca lazra' guna' Lue' tuze, san steca, be̱nna neda' lataj xexá'a cheajzéa' dizra' benne' zaj zra' lizra'.
LUK 9:62 Jesús guzre̱' benne' na': ―Benne' dxugá'ane̱' be̱zre, na' nne̱'e̱ cúzrule̱', quebe gaca chee̱ bénnea' gune̱' zrin chee̱ da dxenná bea Dios.
LUK 10:1 Ca gudé na', Xránadxu guqué̱'e̱ xegaxún chi benne' ca', na' gusél-le̱' chupa weaje̱' xelebía lawe̱' lau Le̱' xúgute̱ xe̱zre, ne xé̱zredu ca' naga dxal-la' chéaje̱' Le̱'.
LUK 10:2 Guzre̱' benne' ca': ―Da li dxennéa', lina da zren naca na, na' benne' we̱n zrin bábaze zaj naque̱'. Chee̱ le̱ na' le naba lau Xrane zrin na' sel-le̱' benne' we̱n zrin ca' xelexequé̱'e̱ lina na'.
LUK 10:3 ¡Le chjaca! Le nna'xque, neda' dxesel-la' le'e, gácale ca zríla'du ca' ládujla becu' xi'a ca'.
LUK 10:4 Quebe gúale xixruj, ne dumí, ne zrélale, ne quebe gagale la neza nu guchálajle̱le.
LUK 10:5 Gate chu'ule tu lu xu'u, na' gugápale diuzre, nnale: “Xel-la dxebeza zri lazre' gaca chee̱ benne' zaj zre̱'e̱ lu xu'u nigá.”
LUK 10:6 Che zaj zra' na' benne' dxelebeza zri lazre̱', na' da gunábale gaca chee̱ benne' ca', san che quebe nu chilá' naca caní, le naba quebe gaca da ba gunábale.
LUK 10:7 Le xegá'ana lu xu'u ná'queze, na' le xi'aj le gagu ca da xelunne̱' lawe' da benne' we̱n zrin quebe te le tune̱'. Quebe cheajsúale tu xu'u xetú xu'u.
LUK 10:8 Gate zrinle tu xe̱zre naga xelezí' lu ne̱'e̱ le'e, le gagu ca da xelunne̱'.
LUK 10:9 Le xexún benne' zaj xu'e̱ xízrawe̱' zaj zre̱'e̱ na', na' le xe̱'e̱: “Xel-la dxenná bea chee̱ Dios ba zua nen le'e.”
LUK 10:10 Che zrinle tu xe̱zre naga quebe xelezí' lu ne̱'e̱ le'e, le xedxúaj la neza chee̱ xe̱zre na', na' nnale:
LUK 10:11 “Ca naca bxrtedu' da' ní'antu' dxexebíbentu' na chee̱ gaca tu da gulé'e na le'e nabágale zria lau Dios. Dxal-la' nézele ba bla' ládujla le'e xel-la dxenná bea chee̱ Dios.”
LUK 10:12 Dxapa' le'e, ca lu zra guchi'a Dios, da xelezaca benne' zaj zre̱'e̱ lu xe̱zre nigá gácadxa na xel-la zi' ca da xelezaca benne' xe̱zre Sodoma, xe̱zre na' bzria xi' Dios.
LUK 10:13 Na' gunná Jesús: ―¡Edxugúa le'e, benne' xe̱zre Corazín! ¡Edxugúa le'e, benne' xe̱zre Betsaida! Chela lu xe̱zre Tiro, ne lu xe̱zre Sidón belelé'ene̱' ca naca xel-la waca chee̱ xabáa da ba gulaca ládujla le'e, gate na'te ba belexebí'i lazre̱', belácue̱' zra lane̱' tuzruj, ne buluzríe̱' de xíchaje̱'.
LUK 10:14 Lu zra guchi'a Dios da dxaca, na' sácadxale le'e xel-la zi' ca da xelezaca benne' Tiro, ne Sidón.
LUK 10:15 Na' le'e, benne' xe̱zre Capernaum, ¿dxéquele waxásale zrínte̱le xabáa? ¡Lataj chúl-lala xétajle!
LUK 10:16 Nadxa guzre̱' benne' ca' dxusé̱dene̱': ―Benne' xenne̱' chee̱le le'e, chia' neda' xenne̱', na' benne' guzúe̱' le'e chalá'ala, neda' na' gusaque̱' ca', na' benne' guzúe̱' neda' chalá'ala, Dios, Bénnea' gusel-le̱' neda', guzúe̱' chalá'ala.
LUK 10:17 Benne' gaxún chi ca' belexezrine̱' lu xel-la dxelebé, dxelenné̱': ―Xran, be' xriwe̱' ca' dxuluzúaqueze na dizra' chee̱ntu' gate dxuchínentu' Lau'.
LUK 10:18 Jesús guzre̱' benne' ca': ―Ca' naca, na' neda' ble'eda' da xriwe̱' be̱xruj na zran xabáa ca tu xesa da dxeajsúa na lu xu.
LUK 10:19 Neda' ba be̱nna' le'e xel-la dxenná bea chee̱ guléajle be̱ snia ca', ne bé̱xrujni, ne chee̱ guchúchujle dute̱ xel-la dxenná bea chee̱ da xriwe̱', na' quebe bi seque gune na le'e.
LUK 10:20 Quebe bele lawe' da dxelún be' xriwe̱' ca dxennale le'e, san le be lawe' da ba naxúaj lale xabáa na'la.
LUK 10:21 Lu zra ná'queze gubéle̱'e̱ Jesús, zúale̱ Be' Lá'azxa Le̱', na' gunné̱': ―Dxue lá'ana' Lue', Xrae, Xrane xabáa ne xe̱zr la xu, lawe' da ba blé'enu' bénne'du caní da bcácheu' chee̱ benne' sina ca', ne benne' dxeléajni'ine̱'. ¡Ca' naca, Xrae, lawe' da ca'an guca lazru' Lue'!
LUK 10:22 ’Xra' ba be̱nne̱' neda' xúgute̱. Quegá nu neze nu na' naca Zrí'ine̱', san tuze Xrá'queza', ne quegá nu neze nu na' naca Xra', san tuze Zrí'inequeze̱', ne nu benne' ca' dxaca lazre' Zrí'ine̱' guzéajni'ine̱' le̱' Nu na' naca Xre̱'.
LUK 10:23 Nadxa guné̱'e̱ benne' ca' dxusé̱dene̱', na' guzre̱' benne' cá'anze: ―Ba neza naca na chee̱ benne' ca' dxelelé'ene̱' ca da dxelé'ele le'e,
LUK 10:24 lawe' da dxapa' le'e, zánete̱ benne' ca', benne' buluchálaje̱' waláz chee̱ Dios, ne benne' wenná bea ca' gulaca lazre̱' xelelé'ene̱' ca da dxelé'ele le'e, san quebe belelé'ene̱' na. Gulaca lazre̱' xelenne̱' ca da dxenle le'e, san quebe belenne̱' na.
LUK 10:25 Nadxa tu benne' dxuxuzájle̱'e̱ da nadxixruj bea Dios bdxúaje̱', ne guxíaje̱' xeajchálajle̱ne̱' Jesús chee̱ gaca guzúa zrie̱' Le̱', na' bche̱be̱' Le̱': ―Benne' Wese̱de, ¿bizra dxal-la' guna' chee̱ gata' chia' xel-la nabán da zeajlí canna?
LUK 10:26 Jesús beche̱be̱': ―¿Bizra da naxúaj na lu da nadxixruj bea Dios? ¿Aja dxéquenu' da dxulabu'?
LUK 10:27 Bénnea' dxuxuzájle̱'e̱ da nadxixruj bea Dios beche̱be̱': ―Bzri'i Xranu' Dios dute̱ lázrda'u, ne nen dute̱ bénne'du xu'u, ne nen dute̱ xel-la dxun zi' lazre' chiu', ne nen dute̱ xel-la dxulaba lazre' chiu', na' bzri'i le sa' ljwezru' ca nazrí'i cuinu'.
LUK 10:28 Nadxa gunná Jesús, guzre̱' le̱': ―Cháwe'le̱'e̱ beche̱bu'. Che dxunu' caní, na' gapu' xel-la nabán na'.
LUK 10:29 Bénnea' dxuxuzájle̱'e̱ da nadxixruj bea Dios guca lazre̱' gucá'ana chawe' cuine̱', na' guzre̱' Jesús: ―¿Nuzra na' le sa' lwezra'?
LUK 10:30 Beche̱be Jesús: ―Tu benne' guzé̱'e̱ Jerusalén, bétaje̱' zíaje̱' Jericó. Lu neza na' xu'e̱, na' gule̱la gubán le̱', ne gulebane̱' ca naca da nape̱', ne zra lane̱'. Na' buluzálaje̱' le̱', ne besiá'que̱' zaj nucá'ane̱' le̱' ca benne' gate.
LUK 10:31 Nadxa gudé tu bxruze neza na', na' gate blé'ene̱' le̱', gudée̱' chalá'ala.
LUK 10:32 Cá'anqueze gudé na' tu benne' xrtia Leví, benne' dxune̱' zrin chee̱ xudau', na' gate blé'ene̱' bénnea', gudée̱' chalá'ala.
LUK 10:33 Nadxa tu benne' Samaria gudée̱' neza na', na' gate blé'ene̱' le̱' bexache lazre̱' le̱'.
LUK 10:34 Gubigue̱' cuita benne' na', ne btupe̱' tu da za lu we̱' chee̱', ne xrise uva wal-la, na' bchele̱' na ladxe'. Nadxa bcuene̱' le̱' cuzru bea chee̱', na' beche̱'e̱ le̱' tu lu xu'u naga xegá'ane̱', ne bxue̱' le̱' na'.
LUK 10:35 Zra xula, ca bezá' benne' Samaria na', na' guléaje̱' chupa dumí da bnézruje̱' xrane xu'u na', ne guzre̱' le̱': “Bxue benne' nigá, na' che ba gucá'adxa xelate' dumí chiu', neda' xexunna' na gate xelá'a.”
LUK 10:36 Nadxa Jesús guzre̱' benne' dxuxuzájle̱'e̱ da nadxixruj bea Dios: ―¿Nula benne' chunna caní guque̱' le sa' ljwezre bénnea' gule̱la gubán ca'?
LUK 10:37 Na' gunná bénnea' dxuxuzájle̱'e̱ da nadxixruj bea Dios: ―Bénnea' bexache lazre̱' le̱'. Nadxa Jesús guzre̱' le̱': ―Bexíaj lue', na' gúnquezu' ca'.
LUK 10:38 Jesús bexu'e̱ neza, na' bezrine̱' tu xé̱zredau', na' lu xe̱zre na' zua tu nu'ula le̱' Marta, na' gulu'e̱ Jesús lizre̱'.
LUK 10:39 Marta na', zua tu bi bile̱' le̱' María, na' María na' gudxé'e̱ zran ni'a Jesús chee̱ xenne̱' da dxuchálaje̱'.
LUK 10:40 Marta dé̱le̱'e̱ da dxune̱', na' bzrine̱' lau Jesús, ne guzre̱' Le̱': ―Xran, ¿quebe dxexache lazru' neda' lawe' da dxucá'ana bi bila' neda' chee̱ guna' tuza' zrin chee̱ntu'? Guzre-be' gácale̱be' neda'.
LUK 10:41 Jesús beche̱be̱': ―Marta, Marta, dxezé̱le̱'e̱nu' gunne xue, ne zu' ste̱be ca naca chee̱ da ca' dxunu',
LUK 10:42 san de̱ tuze da dxun na ba xen nu gun. María ba bezrelne̱' da cháwedxa, na' netú benne' quebe seque' cue̱' na.
LUK 11:1 Tu zra Jesús bchálajle̱ne̱' Dios tu lataj, na' gate bexuzre bchálajle̱ne̱' Dios, na' tu benne' ca' dxusé̱dene̱' guzre̱' Le̱': ―Xran, bse̱de netu' guchálajle̱ntu' Dios, ca be̱n Juan, bsé̱dene̱' benne' ca' zaj de̱'e̱ le̱'.
LUK 11:2 Jesús gunné̱': ―Gate guchálajle̱le Dios, na' nnale: Xrantu' Dios, zu' xabáa, gaca lá'azxa Lau' Lue'. Gudá nna be'u. Gaca ca dxaca lazru' lu xe̱zr la xu, ca da dxaca xabáa.
LUK 11:3 Be̱nna chee̱ntu' da gáguntu' na'a zra.
LUK 11:4 Bnite lau dul-la chee̱ntu' ca dxunite launtu' chee̱ benne' ca' dxelune̱' chee̱ntu' da cale̱la. Quebe gu'u lataj da xriwe̱' cu'u na netu' neza chee̱ na, na' bselá netu' lu na' da cale̱la.
LUK 11:5 Nadxa Jesús guzre̱' benne' ca': ―Che tu benne' ládujla le'e zua tu ljwezre̱', na' che zrine̱' lizre benne' ljwezre̱' na' dxe̱la, ne xe̱'e̱ le̱': “Bi ljwezra', guleaj neda' chunna xeta xtila
LUK 11:6 lawe' da zua tu bi ljwezra' za belá'te̱be' lizra', na' quebe bi de̱ chia' gugawa'-be'.”
LUK 11:7 ¿Weche̱be benne' ljwezre̱' na', benne' xu'u lu xu'u: “Quebe gunu' neda' ze̱de. Naxezxuj dxa xu'u chia', na' bi chia' zaj de̱be' nigá. Quebe gaca chasa' bi gunna' chiu'?”
LUK 11:8 Neda' dxapa' le'e, lácala quebe chase̱' bi gunézruje̱' le̱' lawe' da naque̱' ljwezre̱', san chase̱' chee̱ québedxa gune̱' le̱' ze̱de, na' gunézruje̱' le̱' ca naca da nachínnene̱'.
LUK 11:9 Caní dxapa' le'e: Le naba, na' Dios gunne̱' chee̱le. Le xexilaj, na' xezrélele. Le nne̱ dxu'a dxa xu'u, na' xalaj chee̱le.
LUK 11:10 Ca' naca na, lawe' da benne' dxenabe̱', na' si'e̱, ne benne' dxexílaje̱', na' xezrélene̱', ne benne' dxenné̱' dxu'a dxa xu'u, na' xalaj chee̱'.
LUK 11:11 ’Che tu benne' ládujla le'e naque̱' xra xrna', ¿waca gunézruje̱' zrí'ine̱' tu xiaj che nábabe' tu xeta xtila? ¿Waca gunézruje̱'-be' tu be̱la' che nábabe' tu bela?
LUK 11:12 ¿Waca gunézruje̱'-be' tu bé̱xrujni che nábabe' tu zrita?
LUK 11:13 Che le'e nácale benne' we̱n da cale̱la, na' nézele gunézrujle da chawe' chee̱ zrí'inele, ¿quebe nácadxa Xrale zua xabáa li lazre' chee̱ gunne̱' chee̱ nu benne' nabe̱' Be' Lá'azxa?
LUK 11:14 Tu zra Jesús bebéaje̱' be' xriwe̱' lu xichaj lázrdau tu benne', da nucá'ana na le̱' quebe dxaca nnie̱', na' gate bedxúaj be' xriwe̱' na', na' benné' bénnea'. Na' benne' ca' belexebánene̱' chee̱ da nigá.
LUK 11:15 Na' bal-le̱' gulenné̱': ―Benne' nigá dxebéaje̱' be' xriwe̱' ca', dxuchínene̱' xel-la dxenná bea chee̱ Beelzebú, xrane be' xriwe̱' ca'.
LUK 11:16 Xebal-la benne' gulaca lazre̱' gulé'e Jesús xel-la waca chee̱', na' gulenabe̱' Le̱' gune̱' tu xel-la waca da za xabáa.
LUK 11:17 Le̱' nézene̱' ca da dxelaca lazre̱', na' guzre̱' benne' ca': ―Che benne' zaj zre̱'e̱ tu xe̱zre xelaque̱' chupa la'a, ne xeledil-le̱', wabía xi' xe̱zre na', na' che benne' tu lu xu'u xelaque̱' chupa la'a, cá'anqueze welebía xi' benne' ca'.
LUK 11:18 Cá'anqueze, che da xriwe̱' ca' xelaca na chupa la'a, ¿ájazra xegá'ana xel-la dxenná bea chee̱ na? Da nigá dxapa' le'e lawe' da dxenné̱le dxebéaja' be' xriwe̱' ca', dxuchíneda' xel-la dxenná bea chee̱ Beelzebú da xriwe̱'.
LUK 11:19 Che caní naca na, ¿nuzra dxunezruj xel-la dxenná bea benne' ca' dxusé̱dele le'e chee̱ xelexebéaje̱' be' xriwe̱' ca'? Chee̱ le̱ na', benne' caníqueze dxululé'ene̱' dxeque zréajele.
LUK 11:20 Na'a che neda' dxebéaja' be' xriwe̱' ca', dxuchíneda' xel-la dxenná bea chee̱ Dios, da li xel-la dxenná bea chee̱ Dios ba bla' na ládujla le'e.
LUK 11:21 ’Che tu benne' wal-la nape̱' da guchínene̱' lu wedil-la, ne dxuxúequeze̱' lizre̱', na' da zra lizre̱' napa chi'e̱ na.
LUK 11:22 Che za' xetú benne' nácadxe̱' wal-la ca le̱', ne dxucul-le̱' le̱', nadxa que̱'e̱ ca naca da dxuchínene̱' lu wedil-la, da na' dxuxrén lazre̱', na' quisie̱' da gudapa bénnea'.
LUK 11:23 ’Benne' quebe zue̱' gácale̱ne̱' neda', dxedábague̱' neda', na' benne' quebe dxexequé̱'e̱ nen neda' dxúsela bénnea'.
LUK 11:24 Gunná Jesús: ―Gate tu be' xriwe̱' dxedxuaj na lu xichaj lázrdau tu benne', dxedá na lataj naga nabizre dxexilaj na naga sua na xezí' lazre' na, na' gate quebe dxezrele na, na' dxenná na: “Wexá'a lizra' naga bezá'a.”
LUK 11:25 Gate xezrín na, na' le'e na bénnea' naque̱' ca tu xu'u da nalúa lu'ule na, ne nabá'ate̱ na.
LUK 11:26 Nadxa zexíaj na, zeajxezrí na xegazre be' xriwe̱' da zaj nácadxa na xriwe' ca le̱ na, na' ca naca da ca' xelú'u na xelezúa na lu xichaj lázrdau bénnea', na' naga cheajse̱te̱ chee̱ benne' na' nácadxa da cale̱la chee̱' ca da guca chee̱' nédxula.
LUK 11:27 Dxácate̱ Jesús dxenné̱' da caní, tu nu'ula ládujla benne' ca' gunné̱' zizraj: ―Ba neza zrente̱ naca na chee̱ nu'ula na' guzane̱' Lue', ne bsegule̱' Lue'.
LUK 11:28 Na' gunná Jesús: ―Ba neza zrendxa naca na chee̱ benne' ca' dxelenne̱' ca da dxenná Dios, ne dxune̱' ca dxenná dizra' na'.
LUK 11:29 Benne' ca' ne zaj zre̱'e̱ cuita Jesús, na' Le̱' guzú lawe̱' dxuchálajle̱ne̱' le̱', gunné̱': ―Benne' zaj zre̱'e̱ lu zra caní zaj naque̱' benne' we̱n da cale̱la, na' dxelenabe̱' neda' guna' tu xel-la waca da za xabáa, na' québedxa bi xelelé'ene̱' ca da ble'e Jonás, bénnea' bchálaje̱' waláz chee̱ Dios.
LUK 11:30 Ca guca chee̱ Jonás, guque̱' tu da ble'e na benne' gulezré̱'e̱ lu xe̱zre Nínive, cá'anqueze neda', Benne' Gulje̱' Bénneache, gaca' tu da gulé'e na benne' zaj zre̱'e̱ lu zra na'a zra.
LUK 11:31 Lu zra guchi'a Dios, gate Dios guchi'e̱ chee̱ benne' zaj zre̱'e̱ lu zra na'a zra, na' chasa nu'ula na' gunná bé'ene̱' xe̱zr la xu da zua chalá'a naga dxedé gubizra beu' zaga ca', na' gulé'ene̱' zaj nabaga zria benne' caní, lawe' da nu'ula na' guzé̱'e̱ zítu'te̱ chee̱ xenne̱' ca naca xel-la sina chee̱ Salomón, na' nigá zua tu Benne' nácadxe̱' blau ca Salomón na'.
LUK 11:32 Lu zra guchi'a Dios, gate Dios guchi'e̱ chee̱ benne' zaj zre̱'e̱ lu zra na'a zra, na' xelase̱' benne' ca' gulezré̱'e̱ xe̱zre Nínive, na' xululé'ene̱' zaj nabaga zria benne' caní, lawe' da benne' ca' gulezré̱'e̱ xe̱zre Nínive belexebí'i lazre̱' gate Jonás bchálajle̱ne̱' benne' ca' xrtizra' Dios, na' nigá zua tu Benne' nácadxe̱' blau ca Jonás na'.
LUK 11:33 Gunná Jesús: ―Netú benne' che dxugale̱' xi' chee̱', quebe guzúe̱' na tu naga nagache, ne quebe gudusie̱' na tu xi'ina, san guzúe̱' na sibe chee̱ xelelé'e benne' ca' xelu'e̱ lu xu'u na'.
LUK 11:34 Xiaj laudxu zaj naca na ca tu xi' da dxusení na lu xichaj lázrdaudxu. Che xiaj lau' zaj naca na chawe', ca naca xichaj lázrda'u xu'u na lení', na' che xiaj lau' quebe zaj naca na chawe', na' xu'u da chul-la lu xichaj lázrda'u.
LUK 11:35 Bxue xanne' ca naca xi' da napu' chee̱ quebe xexaca na da chul-la.
LUK 11:36 Che ca naca xichaj lázrda'u xu'u na lení', na' quebe bi xu'u da chul-la, na' le'enu' chawe' xúgute̱ ca dxaca gate tu xi' dxusení na lizru'.
LUK 11:37 Gate bexuzre bchalaj Jesús, na' tu benne' xudau' fariseo gunné̱' Le̱' cheajtawe̱' xeta lizre̱'. Na' guxú'u Jesús, gudxé'e̱ dxawe̱'.
LUK 11:38 Na' benne' fariseo na' bebánene̱' gate blé'ene̱' Jesús quebe gudibe ne̱'e̱ ca da zjácale̱ benne' judío gate dxelawe̱' xeta.
LUK 11:39 Xránadxu guzre̱' le̱': ―Le'e, benne' fariseo, dxíbele cúzrela zriga', ne xé'ena, san lu'ule na, nazráte̱le ca naca da ba gulanle, ne da cale̱la da dxunle.
LUK 11:40 Le'e, benne' lázrdau zide', ¿quebe nézele Bénnea' be̱ne̱' da zua cúzrela bé̱nqueze̱' da zua lu'ula?
LUK 11:41 Le gunezruj benne' xache' ca' chee̱ da nápale, na' ca nácale xegá'anale chawe'.
LUK 11:42 ’¡Edxugúa le'e, benne' fariseo ca'! Le'e dxunézrujle Dios tu cue' chee̱ da chi cue' chee̱ xixru weaj, ne chee̱ binne chee̱ ruda, ne chee̱ xúgute̱ xixre' cuan, san dxuzúale chalá'ala ca naca xel-la we̱n xrlátaje, ne xel-la zri'i lazre' chee̱ Dios. Da caní dxal-la' gunle, ne quebe gusanle ca da ba dxunle.
LUK 11:43 ’¡Edxugúa le'e, benne' fariseo ca'! Dxaca lázrele gápale lataj blau naga cue'le lu xu'u naga dxezrágale, ne dxaca lázrele xelapa benne' le'e ba lá'ana lawe' xi'a ca'.
LUK 11:44 ’¡Edxugúa le'e, benne' dxuluxuzájla'a da nadxixruj bea na, ne le'e, benne' fariseo ca', benne' dxelúne̱' láweze da xrlátaje! Nácale ca xe̱dxu ba ca' da quebe zaj nalá', na' benne' ca' dxeledée̱' láwela na, ne quebe zaj nézene̱' da dxululéaje̱'.
LUK 11:45 Nadxa gunná tu benne' dxuxuzájle̱'e̱ da nadxixruj bea na, guzre̱' Jesús: ―Benne' Wese̱de, gate dxennáu' da nigá, dxenné̱teu' ca' chee̱ntu'.
LUK 11:46 Na' Jesús gunné̱': ―¡Edxugúa le'e, benne' dxuluxuzájle̱'e̱ da nadxixruj bea na! Dxugúale bénneache xua da quebe xelezuéne̱', na' le'e netú zrube názele quebe dxaca lázrele gutale na.
LUK 11:47 ’¡Edxugúa le'e! Dxunle lu'a chee̱ ba ca' chee̱ benne' ca' buluchálaje̱' waláz chee̱ Dios, benne' ca' belute xra xrtáule.
LUK 11:48 Ca da dxunle dxulé'e na nácale tuze nen da belún xra xrtáule ca'. Benne' ca' belutie̱' le̱', na' le'e dxunle lu'a chee̱ ba chee̱' ca'.
LUK 11:49 ’Chee̱ le̱ na' gunná Dios lu xel-la sina chee̱', gunné̱': “Wasel-la' naga zaj zra' benne' ca' benne' xelenné̱' waláz chia', ne gubáz chia' ca', na' bal-le̱' xelútie̱', na' xebal-le̱' xeláu zi' xúzrequeze̱' le̱'.”
LUK 11:50 Dios gusebague̱' benne' zaj zre̱'e̱ lu zra na'a zra ca naca xel-la gute chee̱ xúgute̱ benne' ca' gulenné̱' waláz chee̱', benne' gulatie̱' lu na' benne' ca' zaj zre̱'e̱ gate bente̱' xe̱zr la xu,
LUK 11:51 gate na' tu benne' be̱tie̱' Abel, zri'ine Adán, ca bzrinte̱ zra belutie̱' Zacarías gachaj láwela naga zua lucugu, ne naga zua lataj lá'azxa. Ca'an dxapa' le'e, Dios gusebague̱' benne' zaj zre̱'e̱ lu zra na'a zra xel-la gute chee̱ benne' ca'.
LUK 11:52 ’¡Edxugúa le'e, benne' dxuluxuzájla'a da nadxixruj bea na! Xu'u lu na'le ca naca zren xia chee̱ dxa xu'u naga za xel-la sina, san le'e quebe dxu'ule, ne quebe dxuele lataj xelú'u benne' dxelaca lazre̱' xelu'e̱ na'.
LUK 11:53 Gate Jesús guzre̱' benne' ca' da caní, na' benne' ca' dxuluxuzájle̱'e̱ da nadxixruj bea na, ne benne' fariseo ca' belezrá'ale̱'e̱ Le̱', na' gulezú lawe̱' dxelune̱' Le̱' ze̱de, na' da zante̱ da buluche̱be̱' Le̱',
LUK 11:54 na' buluzuzre̱' che bi nna Jesús chee̱ xelezéquene̱' xelagu zrie̱' Le̱'.
LUK 12:1 Ca lu zra na' belezraga zane gaxúa benne' ca', na' dxululéajte̱ ljwezre̱'. Na' guzú lau Jesús dxe̱'e̱ benne' ca' dxusé̱dene̱': ―Le guxúe xanne' cuínale ca naca cua zichaj chee̱ xeta xtila chee̱ benne' xudau' fariseo ca', da naca na da dxulé'e na láweze da xrlátaje chee̱ benne' ca'.
LUK 12:2 Quebe bi de̱ da dxundxu bagácheze da quebe gulé'e lawe', ne quebe bi de̱ da nagache da quebe nu neze.
LUK 12:3 Chee̱ le̱ na', xúgute̱ da gunle lu da chul-la, xululé'e lawe' te zra, na' da gunle bagácheze lu xu'u naga naxézxujte̱ dxa xu'u, wénqueze na lau xúgute̱ bénneache.
LUK 12:4 Na' gunná Jesús: ―Dxapa' le'e, bi ljwézra'du ca', quebe dxal-la' zrébele benne' dxelute be̱la' dxen chee̱ bénneache, san gate te na', québedxa xelezéquene̱' bi xelune̱'.
LUK 12:5 Na'a dxapa' le'e nu dxal-la' zrébele. Le zrebe Bénnea' gate te xequé̱'e̱ xel-la nabán chee̱ bénneache, nape̱' xel-la dxenná bea gudée̱' bénneache ca' lataj ba xa'. Awe', Le̱' le zrebe.
LUK 12:6 ’¿Quebe ta'u gazxu' bxínnedau' lawe' chupa dumí lásedau'? Dios quebe dxal-la lazre̱' netú bxínnedu ca'.
LUK 12:7 Cá'anqueze xicha xíchajle le'e xúgute̱ na zaj nababa na lau Dios. Chee̱ le̱ na' quebe zrébele. Zácadxale le'e ca be̱ zante̱ bxínnedu ca'.
LUK 12:8 Na' gunná Jesús: ―Dxapa' le'e, xúgute̱ benne' xelexeche̱be̱' zaj naque̱' chia' neda' lau bénneache, cá'anqueze neda', Benne' Gulje̱' Bénneache, xeché̱bequeza' chee̱ benne' ca' lau gubáz chee̱ xabáa ca' chee̱ Dios,
LUK 12:9 san benne' ca' quebe xelexeche̱be̱' chia' lau bénneache, néda'queza' quebe xeche̱ba' chee̱' lau gubáz chee̱ xabáa ca' chee̱ Dios.
LUK 12:10 ’Che nu benne' bi nnie̱' chia' neda', Benne' Gulje̱' Bénneache, gunite lau Dios chee̱', na' benne' nnie̱' chee̱ Be' Lá'azxa, quebe gunite lau Dios chee̱ bénnea'.
LUK 12:11 ’Gate xeleché̱'e̱ le'e lau benne' xíchaje̱ chee̱ xudau', u lau benne' dxuchi'e̱ da dxaca, u lau benne' xu'u lawe', quebe cue'le gunne xue bi xeché̱bele u bi nnale,
LUK 12:12 lawe' da gate zrin zra dxal-la' nne̱le, Be' Lá'azxa gulé'ene̱' le'e da dxal-la' nne̱le.
LUK 12:13 Tu benne' ládujla benne' ca' guzre̱' Jesús: ―Benne' Wese̱de, guzre bi bicha' gúnnabe' chia' da xexal-la' chee̱ da guca chee̱ xrantu'.
LUK 12:14 Jesús guzre̱'-be': ―Benne', ¿zua nu bzua neda' ca benne' dxuchi'e̱ da dxaca u ca benne' le̱'e̱ xe̱zr la xu?
LUK 12:15 Nadxa guzre̱' benne' ca': ―¡Le na' xque! ¡Le guxúe xanne' cuínale chee̱ quebe gucúdele! Xel-la nabán chee̱ nu benne' quebe zua na lu da nápale̱'e̱.
LUK 12:16 Nadxa bchalaj Jesús da dxulé'e nigá, gunné̱': ―Guzúa tu benne' gunní'a, na' xe̱zr la xu chee̱' bnézrujle̱'e̱ na.
LUK 12:17 Na' benne' gunní'a na' guzú lawe̱' dxenné̱': ¿Bizra guna'? Québedxa de̱ naga guzrá'a lina chia' nigá.
LUK 12:18 Nadxa dxenné̱': “¡Ba nezda' ca da guna'! Guchínnaja' naga dxezrá' lina chia', chee̱ guna' da zrí'adxa, na' guzrá'a na' ca naca lina chia' nigá, ne ca naca da ba napa'.
LUK 12:19 Nadxa nníqueza' néda'queza': Ba dé̱le̱'e̱ chiu' da zante̱ chee̱ zane' iza. Bezí' lazre'. Güe'e gudagu, ne gubé.”
LUK 12:20 Na' Dios guzre̱' bénnea': “Lue', benne' zide', lu zre' na'a zre' gatiu', na' da nuzrá' chawu', quebe nézenu' nu chee̱ gaca na.”
LUK 12:21 Ca'an dxaca chee̱ benne' dxutupe̱' xel-la gunní'a da gaca cheé̱queze̱'. Naque̱' ca tu benne' xache' lau Dios.
LUK 12:22 Ca gudé na', Jesús guzre̱' benne' ca' dxusé̱dene̱': ―Dxapa' le'e, quebe cue'le gunne xue ca naca da gágule chee̱ gaca banle, ne ca naca zra lánale da gácule.
LUK 12:23 Xel-la nabán chee̱le zácadxa na ca da gágule, na' be̱l-la' dxen chee̱le zácadxa na ca zra lánale.
LUK 12:24 Le nna'xque ca dxaca chee̱ bxínnedu ca'. Quebe dxelázaba', ne quebe dxelelápaba', ne quebe zaj zua naga dxuluxuzraba', na' Diósqueze̱' dxuxi'aj dxugawe̱'-ba'. Zácadxale le'e ca bxínnedu ca'.
LUK 12:25 ¿Núlale le'e séquele gusetunna cuínale xetú ben lawe' da dxebé'le̱'e̱le gunne xue?
LUK 12:26 Che quebe gaca gunle tu da naca da dauze, ¿bizr chee̱ na' dxebe'le gunne xue chee̱ da ca' xezícala?
LUK 12:27 ’Le nna'xque ca dxelegula xiaj xrtandu ca'. Quebe dxelún na zrin, ne quebe dxelún na du ladxe', na' dxapa' le'e, wenná bea Salomón quebe gucue̱' da xrtandxa ca tu xiajdu caní.
LUK 12:28 Che Dios dxugacue̱' caní xíxre'du ca', da zaj zua na'a le̱'e̱ xixre', na' wxre xelezxe na, ¿quegá gundxe̱' chee̱le le'e, benne' dxeléajle̱'e̱ láteze chia'?
LUK 12:29 Chee̱ le̱ na', quebe cue'le gunne xue ca naca da gágule, u ca naca da xí'ajle, ne quebe súale ste̱be.
LUK 12:30 Ca' naca na, lawe' da ca naca benne' ca' zaj zre̱'e̱ xe̱zr la xu dxelexílaje̱' ca naca da caní, san le'e, zua Xrale xabáa ba nézene̱' nachínnele ca naca da caní.
LUK 12:31 Le cue' gunne xue nna bea Dios lu xichaj lázrdaule, na' sile ca naca da caní.
LUK 12:32 Na' gunná Jesús: ―Quebe zrébele, zríla'du chia', bábaze nácale le'e. Xrale Dios dxezaca ba lazre̱' gunne̱' chee̱le lataj naga dxenná be'e̱.
LUK 12:33 Le gute da nápale, na' le gunezruj benne' xache' ca'. Ca'an gaca, guzrale na naga quebe te chee̱ na, na' gápale da gunní'a xabáa da quebe xedú, naga quebe gaca chu'u gubán, ne quebe gaca xelú'u béadu ca' xuluteba' na.
LUK 12:34 Naga nuzúale xel-la gunní'a chee̱le, na' súaqueze lázrdaule.
LUK 12:35 Na' gunná Jesús: ―Le gupá'a cuínale, ne le gugala xi' chee̱le.
LUK 12:36 Le gaca ca benne' we̱n zrin ca' dxelebeze̱' xrane̱' xezrine̱' lu laní chee̱ wechaga na', na' nne̱' dxu'a dxa xu'u na'.
LUK 12:37 Ba neza zrente̱ naca na chee̱ benne' we̱n zrin ca', benne' ca' xedajxraca xrane̱' le̱' dxelenaze̱' gate xezrine̱'. Da li dxapa' le'e, xrane̱' na' cueche̱' benne' ca' xelawe̱', na' guzúa cuine̱' chee̱ que̱'e̱ da xelagu benne' we̱n zrin ca'.
LUK 12:38 Lácala xezrine̱' dxe̱la u dxaní'sise̱', che xedajxraque̱' le̱' dxelennaze̱', ba neza naca na chee̱ benne' we̱n zrin ca'.
LUK 12:39 Dxal-la' nézele da nigá, che xrane xu'u gunézene̱' bi zra zrin gubán, na' quebe gasie̱' chee̱ quebe gu'e̱ lataj quíduje̱' lizre̱' chee̱ cuane̱' da nape̱'.
LUK 12:40 Cá'anqueze le'e, le sua ban lazre', lawe' da gate québela nézele, xelá'a neda', Benne' Gulje̱' Bénneache.
LUK 12:41 Nadxa Pedro bche̱be̱' Jesús: ―Xran, ¿bchálaju' da dxulé'e nigá chee̱ nétu'ze, che chee̱ xúgute̱ benne'?
LUK 12:42 Xránadxu gunné̱': ―¿Nuzra naca we̱n zrin li lazre', bénnea' dxucá'ana xrane̱' lu ne̱'e̱ benne' zaj zra' lizre̱' chee̱ gunézruje̱' da xelagu benne' ca' gate zrin zra chee̱ na?
LUK 12:43 Ba neza naca na chee̱ benne' we̱n zrin na', gate xezrín xrane̱', xedajxraque̱' le̱' dxune̱' ca da nabague̱'.
LUK 12:44 Da li dxapa' le'e, xrane̱' gucá'ane̱' lu ne̱'e̱ xúgute̱ da nape̱'.
LUK 12:45 Che benne' we̱n zrin na' dxéquene̱' wazré xrane̱' xelé̱'e̱, ne su lawe̱' gusaca zi'e̱ benne' we̱n zrin xezica ca', ne nu'ula we̱n zrin ca', ne su lawe̱' xi'aj gawe̱', ne súzrene̱',
LUK 12:46 nadxa xrane̱' xelé̱'e̱ lu zra quebe dxebeze̱' le̱', ne lu zra quebe nézene̱', na' gusaca zí'le̱'e̱ le̱', ne chugue̱' chee̱' saque̱' ca xelezaca benne' ca' quebe zaj naque̱' chee̱ Dios.
LUK 12:47 ’Benne' we̱n zrin na' nézene̱' ca da dxaca lazre' xrane̱' san quebe nucueze̱', ne quebe dxuzúe̱' dizra', benne' nigá gudée̱' le̱' ba xa'.
LUK 12:48 Benne' we̱n zrin na' quebe nézene̱' da na', ne dxune̱' da dxusebaga na le̱' zria, benne' nigá tée̱' láteze xel-la zi'. Che tu benne' dxezí'le̱'e̱ da dxunezruj Dios le̱', Dios wanábale̱'e̱ le̱, na' bénnea' Dios nuxrén lazre̱' le̱' da zrente̱, Dios wanné̱ xúele̱'e̱ne̱' le̱'.
LUK 12:49 Na' gunná Jesús: ―Neda' bla'a guzrena' xi' lu xe̱zr la xu nigá, na' la guzreda' ba dxala xi' na'.
LUK 12:50 Dxal-la' chu'a lu xel-la gute ca dxu'u tu benne' lu nisa gate dxedxúe̱' nisa, na' téle̱'a xel-la zi' cadxa gácatequeze na.
LUK 12:51 ¿Dxéquele le'e za' neda' cu'a xel-la dxebeza zri lazre' lu xe̱zr la xu nigá? Dxapa' le'e: Cabí. Za'a chee̱ guna' benne' chupa la'a.
LUK 12:52 Na'a su lau, gazxu' benne' zaj zre̱'e̱ tu xu'u xelaque̱' chupa la'a. Chunne̱' xeledábague̱' chupe̱', na' chupe̱' xeledábague̱' chunne̱'.
LUK 12:53 Xra tu bi biu tábague̱' bi biu chee̱', na' bi biu na' tábagabe' xrabe'. Xrna tu bi nu'ula tábague̱' bi nu'ula chee̱', na' bi nu'ula na' tábagabe' xrnabe'. Tau zri'ine tu nu'ula tábague̱' zru'a lizre̱', na' zru'a lizre̱' na' tábague̱' tau zrí'ine̱'.
LUK 12:54 Na' Jesús guzre̱' benne' ca': ―Gate le'e dxelé'ele da' beuj naga dxebía gubizra, na' dxennale, waca xiuj, ne ca' dxaca.
LUK 12:55 Gate dxaca be' za na chalá'a naga dxedé gubizra beu' zaga ca', na' dxennale waca da la, ne dxaca ca'.
LUK 12:56 Le'e, benne' dxunle láweze da xrlátaje. Le'e nézele nnale ca da gaca zran xabáa, ne lu xe̱zr la xu nigá, san quebe dxezéquele xuzájla'ale da dxululé'e na ca gaca chee̱le lu zra na'a zra.
LUK 12:57 Na' gunná Jesús: ―¿Bizr chee̱ na' quebe dxeque be'ele da naca xrlátaje?
LUK 12:58 Che nu benne' dxaca lazre̱' guzúe̱' lue' lau benne' dxuchi'e̱, na' gate chéajle̱nu' le̱' chee̱ zrinle lau bénnea', be̱n ba xen xezú' lu xel-la dxebeza zri lazre' nen bénnea' dxácate̱ xu'ule neza, chee̱ quebe che̱'e̱ lue' lau bénnea', na' bénnea' gudée̱' lue' lu na' benne' gusézxuje̱' lue' lizre xia.
LUK 12:59 Dxapa' lue' quebe xedxúaju' na' cadxa quízruju' ca da dxebagu'.
LUK 13:1 Ca lu zra na' belezrín bal-la benne' lau Jesús, na' buluzenne̱' Le̱' ca be̱n Pilato, be̱tie̱' bal-la benne' Galilea, na' bchague̱' dxen chee̱ benne' ca' nen dxen chee̱ be̱ xixre', bea ca' ba belutie̱' chee̱ xuluzríe̱' dxen chee̱ na lau Dios.
LUK 13:2 Na' Jesús guzre̱' le̱': ―¿Dxéquele le'e caní gulezaca benne' ca' lawe' da zaj nácadxe̱' benne' dul-la ca benne' ca' xezícala zaj zre̱'e̱ xe̱zre ca' zaj nababa Galilea?
LUK 13:3 Dxapa' le'e: Cabí, na' che quebe xebí'i lázrele le'e, xúgute̱le le'e cuía xile.
LUK 13:4 ¿Dxéquele le'e benne' chinu chunna ca' gulatie̱' gate guzría cha xu'u sibe le̱' da nazí le na Siloé zaj nabágadxe̱' dul-la ca xezícala benne' ca' zaj zre̱'e̱ xe̱zre Jerusalén?
LUK 13:5 Dxapa' le'e: Cabí, na' che le'e quebe xebí'i lázrele, cá'anqueze le'e wabía xile.
LUK 13:6 Nadxa Jesús bchálajle̱ne̱' benne' ca' da dxulé'e nigá, dxenné̱': ―Tu benne' zua tu xaga higo chee̱' zua na lu xe̱zr la xu chee̱', na' xeajné̱'e̱ na che zría na, na' quebe bi bezrélene̱'.
LUK 13:7 Nadxa guzre̱' benne' dxun zrin lu xe̱zr la xu chee̱': “Gunná'xque, chun ízate̱ ba bida' dxenná'a che zria xaga nigá, ne quebe bi bezréleda'. ¡Guchugu na! ¿Bizr chee̱ na' nulán na xe̱zr la xu nigá?”
LUK 13:8 Bénnea' dxun zrin chee̱ xe̱zr la xu na' beche̱be̱': “Xran, bca'ana na xetú iza na'a. Guzúlujdxa' zran na, ne cua'a na be̱be.
LUK 13:9 Nen da na', gúnnalja na, san che cabí, na' chugu' na.”
LUK 13:10 Gate naca zra dxulupá'ana judío ca', na' zua Jesús tu lu xu'u naga dxelezraga judío ca' dxusé̱dene̱' benne' ca',
LUK 13:11 na' zua na' tu nu'ula xu'e̱ we̱' ba guca chinu chunna iza. Tu be' xriwe̱' nun na le̱' cuzru legu, na' quebe dxácaqueze̱' xelíe̱'.
LUK 13:12 Gate ble'e Jesús le̱', na' gunné̱' le̱', ne guzre̱' le̱': ―Nu'ula, ba bexacu' chee̱ xízrawe̱' chiu'.
LUK 13:13 Nadxa guxrúa ne̱'e̱ nu'ula na', na' la ná'queze nu'ula na' belite̱', na' guzú lawe̱' dxue lá'ane̱' Dios.
LUK 13:14 Na' benne' xíchaje̱ chee̱ xu'u na' bzre̱'e̱ lawe' da bexún Jesús nu'ula na' lu zra dxulupá'ane̱', na' guzre̱' benne' zaj zre̱'e̱ na': ―Xrupa zra dxal-la' gundxu zrin. Lu zra ca' waca xídale xexácale, quegá lu zra dxupá'anadxu.
LUK 13:15 Nadxa Xránadxu beche̱be̱': ―Le'e, benne' dxelún láweze da xrlátaje, ¿quebe dxesé̱zrele le'e be̱zre chee̱le u burro chee̱le lu zra dxupá'anadxu chjua'le-ba' xelé'ajba' nisa?
LUK 13:16 Nú'ula nigá naque̱' xrtia Abraham, na' da xriwe̱' nuchéaj na le̱' lu xízrawe̱' nigá ba zeaj chinu chunna iza, na' ¿quebe dxal-la' xebéaja' xízrawe̱' da nuchéaj na le̱' lu zra dxupá'anadxu?
LUK 13:17 Gate gunná Jesús da nigá, xúgute̱ benne' dxeledábague̱' Le̱' belexedué'ene̱', na' xúgute̱ benne' xezícadxa gulebene̱' gate belelé'ene̱' ca naca da zrente̱ da dxun Jesús.
LUK 13:18 Nadxa gunná Jesús: ―¿Aja naca xel-la dxenná bea chee̱ Dios, ne bi gutil-le lé̱beda' na?
LUK 13:19 Naca na ca tu bínnedau' chee̱ mostaza, tu benne' dxaze̱' na lu xe̱zr la xu chee̱', na' dxegula na, ne dxácate̱ na ca tu xaga zren, na' bxínnedu ca' dxuluzríaba' xrú'uneba' lu zruze na ca'.
LUK 13:20 Cá'anqueze gunná Jesús: ―¿Bizra gutil-le lé̱beda' xel-la dxenná bea chee̱ Dios?
LUK 13:21 Naca na ca cua zichaj chee̱ xeta xtila tu nu'ula dxuchague̱' na chunna xaga de xezaj, na' dxuchazra na ca naca cua na'.
LUK 13:22 Dxácate̱ xu'u Jesús neza zexíaje̱' xe̱zre Jerusalén, dxusé̱dene̱' bénneache lu xe̱zre ca', ne xé̱zredu ca' naga dxedée̱'.
LUK 13:23 Na' bche̱be tu benne' Le̱': ―Xran, ¿bábaze benne' xelelá? Beche̱be Jesús:
LUK 13:24 ―Le gun ba xuzre chu'ule dxa xu'u lechide', lawe' da dxapa' le'e, benne' zan xelaca lazre̱' xelu'e̱ na', na' quebe xelezéquene̱'.
LUK 13:25 Ca te na' chasa xrane xu'u, ne gusézxuje̱' dxa xu'u, na' le'e zrale chalé'ajla nne̱le dxu'a dxa xu'u na', nnale: “Xran, gusalaj chú'untu'.” Na' le̱' xeche̱be̱': “Quebe nezda' ga benne' le'e.”
LUK 13:26 Nadxa su láuquezle le'e nnale: “Güe'e gudágule̱ntu' lue', na' lue' bsé̱denu' lu neza chee̱ntu' ca'.”
LUK 13:27 Le̱' xeche̱be̱': “Dxapa' le'e, quebe nezda' ga benne' le'e. Le cuasa cuita' neda', xúgute̱le le'e dxunle da cale̱la.”
LUK 13:28 Na' cuézrele, ne xagu xá'ate̱ lázxale gate lé'ele Abraham, ne Isaac, ne Jacob, ne xúgute̱ benne' ca' gulenné̱' waláz chee̱ Dios, zaj zue̱' naga dxenná bea Dios, na' le'e zrale chalé'ajla.
LUK 13:29 Welelá' benne' zaj zre̱'e̱ dapa saca chee̱ xe̱zr la xu nigá, na' xelebé'e̱ xelawe̱' naga dxenná bea Dios.
LUK 13:30 Nadxa bal-la benne' zaj naque̱' bzé̱bedxa na'a xelaque̱' benne' blau, na' benne' zaj naque̱' blau na'a xelaque̱' bzé̱bedxa.
LUK 13:31 Lu zra ná'queze, belezrín lau Jesús bal-la benne' fariseo ca', na' gulé̱'e̱ Le̱': ―Bezá' nigá, lawe' da dxaca lazre' Herodes gutie̱' Lue'.
LUK 13:32 Jesús beche̱be̱': ―Le chjaca cheajgué̱zrele benne' wilaj lazre' cale̱la na': “Na'a, ne wxre xebéaja' be' xriwe̱' ca' lu xichaj lázrdau benne' ca', ne xexuna' benne' we̱' ca', na' wizraj sueda'.”
LUK 13:33 Dxun na ba xen chéajle̱na' neza chia' na'a, ne wxre, ne wizraj, lawe' da quebe gaca gate tu benne' dxenné̱' waláz chee̱ Dios che quebe xelute benne' Jerusalén le̱'.
LUK 13:34 “Jerusalén, Jerusalén, le'e na' dxútele benne' dxelenné̱' waláz chee̱ Dios, ne dxuzríale xiaj benne' gubáz ca' dxesel-la Dios. Zane' lasa guca lazra' gutupa' bi chee̱le ca' ca dxun bedxuj, dxutúpaba' bédxujdu ca' zran xrílaba', san quebe guca lázrele.
LUK 13:35 ¡Le nna'xque, na'a! Lízrele le'e xegá'ana na cá'aze. Dxapa' le'e québedxa xelé'ele neda' ca zrindxa zra nnale: ¡Lá'azxa naca Bénnea' ze̱'e̱ lu La Xránadxu!”
LUK 14:1 Tu zra dxulupá'ana benne' judío ca' guxíaj Jesús zeajtawe̱' lizre tu benne' blau chee̱ benne' fariseo ca', na' benne' fariseo ca' dxuluzuzre̱' Jesús bi gune̱'.
LUK 14:2 Zúaqueze lau Jesús tu benne' de̱ xi' ca naca be̱l-la' dxen chee̱'.
LUK 14:3 Nadxa Jesús bche̱be̱' benne' ca' dxuluxuzájle̱'e̱ da nadxixruj bea na, ne benne' fariseo ca', gunné̱': ―¿Waca nu benne' xexune̱' benne' we̱' lu zra dxupá'anadxu, che cabí?
LUK 14:4 Benne' ca' gulezúe̱' zrize. Nadxa Jesús guqué̱'e̱ benne' we̱' na', ne bexune̱' le̱', na' guzre̱' le̱' xexíaje̱'.
LUK 14:5 Nadxa guzre̱' benne' fariseo ca': ―¿Núlale le'e, che be̱zre chee̱le u bia chee̱le bíxreba' tu lu xe̱dxu, quebe xebéajle-ba' zra ná'queze lácala naca zra dxupá'anadxu?
LUK 14:6 Quebe bi guca xelexeche̱be̱'.
LUK 14:7 Gate ble'e Jesús ca dxelún benne' ca', dxelebé'e̱ lataj blaudxa ga dxelawe̱', na' bchálaje̱' da dxulé'e na, dxenné̱':
LUK 14:8 ―Gate tu benne' dxenné̱' lue' laní chee̱ wechaga na', quebe cue'u lataj blau, lawe' da che wazá tu benne' nácadxe̱' blau ca lue',
LUK 14:9 na' bénnea' gunné̱' dxúpate̱le xide̱' xe̱'e̱ lue': “Bnezruj lataj nigá benne' nigá.” Nadxa gun na ba xen xexíaju' lataj bzé̱bedxa lu xel-la stu'.
LUK 14:10 Na'a, gate nu benne' nne̱' lue', gudxé'e lataj bzé̱bedxa, chee̱ gate za bénnea' gunné̱' lue', wanné̱': “Bi ljwezra', gudé nigala naga nácadxa blau.” Ca'an gaca, xegá'anu' szren lau benne' ca' zaj zre̱'e̱ dxelágule̱ne̱' lue'.
LUK 14:11 Benne' dxucá'ana szren cuine̱', wexéxrujla bénnea', na' benne' dxucá'ana baxache' cuine̱' wegá'ana szrénqueze̱'.
LUK 14:12 Nadxa Jesús guzre̱' benne' na' gunné̱' Le̱': ―Gate gunézruju' tu zrue u tu xrche' quebe nneu' bi ljwezru' ca', ne bi bichu' ca', ne xrtia ljwezru', ne benne' walízr chiu' ca' zaj nape̱' da gunní'a, lawe' da benne' caní welenné̱queze̱' lue', na' zrué'equeznu' da xelexexunne̱' chiu'.
LUK 14:13 Gate dxunu' tu laní, gunné̱ benne' xache' ca', ne benne' zaj nadxugu ni'a ne̱'e̱, ne benne' zrinnaj ca', ne benne' la chul-la ca'.
LUK 14:14 Caní gaca tu da ba neza chiu', lawe' da benne' caní quebe gaca xelexexunne̱' ca' chiu', na' wazrué'enu' lazrju' gate xelexebán benne' xrlátaje ca'.
LUK 14:15 Gate ben tu benne' dxágule̱ Le̱' da na', na' guzre̱' Jesús: ―Ba neza zrente̱ naca na chee̱ benne' gawe̱' xeta naga dxenná bea Dios.
LUK 14:16 Jesús guzre̱' le̱': ―Tu benne' gulu'e̱ tu xrche' zren, na' gunné̱' benne' zan.
LUK 14:17 Ca bzrin zra xelawe̱' xrche' na', gusél-le̱' we̱n zrin chee̱' chee̱ cheaje̱zre̱' benne' ca' gunné̱': “Le da, lawe' da ba nuseni'a da gágudxu.”
LUK 14:18 Xúgute̱' gulezú lawe̱' dxelenabe̱' gu'e̱ le̱' lataj quebe xelide̱'. Benne' nedxu gunné̱': “Za bezítea' tu cue' xe̱zr la xu chia', na' dxal-la' cheajnná'a na. Dxata' xueda' lue' si zrenu' chia'.”
LUK 14:19 Xetúe̱' gunné̱': “Za bezítea' gazxu' cue' be̱zr chia', na' guxúa' aja xelunba'. Dxata' xueda' lue' si zrenu' chia'.”
LUK 14:20 Na' xetúe̱' gunné̱': “Za bchágate̱ na'a, na' quebe gaca xida'.”
LUK 14:21 Gate bezrín benne' we̱n zrin na', guzre̱' xrane̱' ca naca da nigá. Nadxa bzra'a xrane̱' na', na' guzre̱' we̱n zrin na': “Guxíaj na'a la neza ca', ne neza chee̱ xe̱zre nigá, na' xeajxrí' xúgute̱ benne' xache' ca', ne benne' zaj nadxugu ni'a ne̱'e̱, ne benne' zrinnaj ca', ne benne' la chul-la ca'.”
LUK 14:22 Ca gudé na' gunná benne' we̱n zrin na': “Xran, ba be̱na' ca gunnáu', na' ne de̱dxa lataj.”
LUK 14:23 Nadxa gunná xrane̱' na': “Guxíaj na'a la neza ca', ne neza lásedu ca', na' xeajé̱n ba xen xelelé̱'e̱, chee̱ cha' lizra' nigá.
LUK 14:24 Dxapa' le'e, netú benne' ca' gunnéa' nédxula quebe xelawe̱' xrche' chia'.”
LUK 14:25 Benne' zan zjácale̱ne̱' Jesús, na' Le̱' bexéchaje̱', na' guzre̱' benne' ca':
LUK 14:26 ―Che nu benne' ze̱'e̱ naga zua', ne quebe guzúe̱' chalá'ala xre̱', ne xrne̱'e̱, ne zru'ule̱', ne zrí'ine̱' ca', ne bi biche̱' ca', ne bi zane̱' ca', ne xel-la nabán chee̱', quebe gaca gaque̱' neda' tuze.
LUK 14:27 Benne' quebe sá'le̱ne̱' neda' lácala dxal-la' te̱'e̱ xaga béguaj, quebe gaca gaque̱' neda' tuze.
LUK 14:28 Che tu benne' ládujla le'e dxaca lazre̱' gune̱' tu xu'u sibe, ¿quebe cue'e̱ nedxu gune̱' xrbaba chee̱' che wazúene̱' xuzrte̱' na?
LUK 14:29 Che quebe gune̱' caní, ne che cueche̱' lane na, na' ca te na' quebe suene̱' xuzre̱' na, na' xúgute̱ benne' xelelé'ene̱' na xelezú lawe̱' xelún le̱' chee̱ bénnea',
LUK 14:30 na' xelenné̱': “Benne' nigá guzú lawe̱' dxune̱' tu xu'u. Quebe guque̱' gune̱' ca naca.”
LUK 14:31 Che tu benne' wenná bea dxal-la' cheajtíl-lale̱ne̱' xetú benne' wenná bea, ¿quebe cue'e̱ gune̱' xrbaba chee̱' che wazúene̱' nen tu gaxúa gaxúa benne' dxjaque̱' wedil-la cheajtíl-lale̱ne̱' bénnea' za' nen chupa gaxúa gaxúa benne' dxjaque̱' wedil-la?
LUK 14:32 Che quebe séquene̱', gate benne' wenná bea na' xetú ne ze̱'e̱ zitu', na' sel-le̱' gubáz chee̱' ca' xelenabe̱' gata' xel-la dxebeza zri lazre'.
LUK 14:33 Ca' naca na, nútete̱ze benne' ládujla le'e, che quebe gusane̱' ca naca da nape̱', quebe gaca gaque̱' neda' tuze.
LUK 14:34 Na' gunná Jesús: ―Zede' naca na da chawe', san che québedxa naca na sna'a, ¿ájazra guchínedxu na?
LUK 14:35 Quebe gaca guchínedxu na, quegá chee̱ gucá'ana cháwedxu xe̱zr la xu, ne quegá chee̱ guchíxredxu be̱be, san dxal-la' chú'unadxu na. Benne' ca' zaj zua nague̱', dxal-la' xelenne̱'.
LUK 15:1 Benne' zante̱ benne' wechizruj waláz chee̱ Roma, ne benne' dul-la ca' gulebigue̱' naga zua Jesús chee̱ xelenne̱' da dxuchálaje̱'.
LUK 15:2 Chee̱ le̱ na' benne' fariseo ca', ne benne' dxuluxuzájle̱'e̱ da nadxixruj bea na gulezí tizre̱' Jesús, gulenné̱': ―Benne' nigá dxune̱' tu zren benne' dul-la ca', ne dxágule̱ne̱' le̱'.
LUK 15:3 Nadxa bchalaj Jesús da dxulé'e na, gunné̱':
LUK 15:4 ―Nu benne' ládujla le'e, che nape̱' tu gaxúa zrila', na' nite tuba', ¿quebe gucá'ane̱' xetápalalaj che̱nnu zrila' ca', bea ca' zaj zraba' le̱'e̱ xixre', na' se̱'e̱ cheajdílaje̱' bea na' guníteba' cadxa xezrelne̱'-ba'?
LUK 15:5 Na' gate xezrelne̱'-ba', bene̱', na' xequé̱'e̱-ba' xexrúe̱'-ba' xe̱'a xe̱ne̱'.
LUK 15:6 Na' ca xezrine̱' lizre̱', gutupe̱' ljwezre̱' ca', ne benne' walizre chee̱' ca'. Na' xe̱'e̱ le̱': “Le be nen neda', lawe' da bezrelda' zrila' chia' guníteba'.”
LUK 15:7 Na' gunná Jesús, dxe̱'e̱ benne' ca': ―Cá'anqueze zúale̱'e̱dxa xel-la dxebé xabáa gate tu benne' dul-la dxexebí'i lazre̱', quézcala chee̱ tápalalaj che̱nnu benne' xrlátaje ca' dxeléquene̱' quebe dxun na ba xen xelexebí'i lazre̱'.
LUK 15:8 Nadxa Jesús bchálaje̱' xetú da dxulé'e na, dxe̱'e̱ benne' ca': ―Tu nu'ula nape̱' chi dumí zaca, na' che nite tu na, nadxa guzúe̱' xi' chee̱' chee̱ gusaní na lu xu'u chee̱'. Nadxa su lawe̱' gulúe̱' lu xu'u chee̱', xexílaje̱' bínnalu ca xezrelne̱' dumí chee̱' da gunite na.
LUK 15:9 Na' ca xezrelne̱' dumí na', gutupe̱' nu'ula ljwezre̱' ca', ne nu'ula walízr chee̱' ca', na' xe̱'e̱ le̱': “Le be nen neda', lawe' da bache bezrelda' dumí chia' da gunite na.”
LUK 15:10 Na' gunná Jesús, dxe̱'e̱ benne' ca': ―Cá'anqueze dxelebé gubáz chee̱ xabáa ca' chee̱ Dios gate tu benne' dul-la dxexebí'i lazre̱'.
LUK 15:11 Nadxa Jesús bchálaje̱' xetú da dxulé'e na, dxe̱'e̱ le̱': ―Tu benne' zaj zra' chupa bi chee̱'.
LUK 15:12 Na' bi cuide' chee̱' gúzrebe' xrabe': “Xrae, be̱nna chia' da dxal-la' si'a chee̱ da naca chiu'.” Nadxa xrabe' be̱ne̱' gachaj da bnézruje̱' cha chee̱be' tube', ne xetube'.
LUK 15:13 Ca gudé tu chupa zra, bi cuide' chee̱ bénnea' btúpabe' xúgute̱ da naca chee̱be', na' guzabe' zitu', na' bzrinbe' xetú xe̱zr la xu. Na' be̱n dítajbe' dumí chee̱be' lu da cale̱la da be̱nbe'.
LUK 15:14 Na' ca gudache xúgute̱ dumí chee̱be', bzrin tu gubina' lu xe̱zr la xu na', na' le̱be' gudunbe'.
LUK 15:15 Nadxa guzabe' xeajtílajbe' zrin gunbe' chee̱ tu benne' lu xe̱zr la xu na'. Benne' na' gusél-le̱'-be' le̱'e̱ xixre' chee̱' chee̱ cheajxúebe' cuche chee̱' ca'.
LUK 15:16 Guca lázrebe' gágube' da cale̱la da dxelagu cuche ca'. Netú benne' quebe bi bnézruje̱' da gágube'.
LUK 15:17 Nadxa xeajsá lázrebe', dxennabe': “Benne' zante̱, benne' we̱n zrin zaj zre̱'e̱ lizre xra', na' dé̱le̱'e̱ da dxelawe̱'. Neda' dxátequeza' xel-la dxedún.
LUK 15:18 Webí'iza' xexá'a naga zua xra', na' xapa' le̱': Xrae, be̱na' dul-la lau Dios, ne lau lue'.
LUK 15:19 Québedxa naca chia' gaca' zri'inu'. Bzua neda' ca tu benne' we̱n zrin chiu'.”
LUK 15:20 Nadxa begú'ube' neza, bezrinbe' lizre xrabe'. ’Tu chi na', ble'e xrabe' le̱be' ba zezabe', na' bexache lazre̱'-be'. Na' guzá chégüe̱' xeajchague̱'-be', na' bnide̱'-be', ne bnúpete̱'-be'.
LUK 15:21 Nadxa gunabe': “Xrae, be̱na' dul-la lau Dios, ne lau lue'. Québedxa naca chia' gaca' zri'inu'.”
LUK 15:22 Na' gunná xrabe', dxe̱'e̱ benne' we̱n zrin chee̱' ca': “Le cueaj zra lana' da zaca, ne le gugacu-be'. Le cu'u tu da naca oro zrube nabe', ne le cu'u xel-la ní'abe'.
LUK 15:23 Le cheajzrí' tu be̱zre be̱ dxanne, na' gútele-ba'. Gágudxu, ne gundxu laní,
LUK 15:24 lawe' da bi chia' nigá guca chee̱be' ca tu benne' ba gute, na' bebanbe'. Gunítebe', na' ba bezrágadxu-be'.” Na' gulezú lawe̱' dxelune̱' laní.
LUK 15:25 ’Dxácate̱ na', zrí'ine̱' bi waca zúabe' le̱'e̱ xixre' dxunbe' zrin. Na' chizrela' ca bezrinbe' gagu cuita xu'u lizre xrabe', na' benbe' dxaca wil-la, ne dxaca wexá'a.
LUK 15:26 Nadxa gunné̱be' tu bi we̱n zrin na', dxe̱'e̱be' le̱be': “¿Bi dxaca nigá?”
LUK 15:27 Bi we̱n zrin nigá cúnnabe': “Ba belá' bi bichu', na' xrau' gunná bé'ene̱' nu gute tu be̱zre be̱ dxanne, lawe' da belabe' zúabe' zri'a chawe'.”
LUK 15:28 Bzra'a bi waca na', na' quebe guca lázrebe' xexú'ube'. Nadxa bdxuaj xrabe', ne guta' xuene̱' le̱be' xexú'ube'.
LUK 15:29 Na' cúnnabe', dxe̱'e̱be' xrabe': “Nézqueznu' zane' iza ba be̱na' zrin chiu', ne cabata' bcha'a lue', na' ne tu lasa quebe ne gunnu' chia' tu chíbudau' chee̱ guna' tu laní nen ljwezra' ca'.
LUK 15:30 Na'a belá' bi chiu' nigá, bi ba be̱n dítajbe' dumí chiu', guzúale̱be' nu'ula dxeledá zraga ca', na' be̱te lizu' be̱zre be̱ dxanne ne̱ chee̱ le̱be'.”
LUK 15:31 Nadxa gunná xrabe', dxe̱'e̱-be': “Zri'ina', lue' tu zúale̱zquezu' nen neda', na' xúgute̱ da de̱ chia' naca na chiu'.
LUK 15:32 Na'a dxun na ba xen gundxu laní, ne bedxu, lawe' da bi bichu' gúcabe' ca tu benne' ba gute, ne naca banbe'. Gunítebe', na' ba bezrágadxu-be'.”
LUK 16:1 Nadxa Jesús guzre̱' benne' ca' dxusé̱dene̱': ―Guzúa tu benne' gunní'a, na' zua tu benne' we̱n zrin blau chee̱'. Na' bal-la benne' xeajlegue̱zre̱' le̱' benne' we̱n zrin blau na' dxun dítaje̱' da de̱ chee̱ xrane̱'.
LUK 16:2 Nadxa xrane̱' gunné̱' le̱', ne guzre̱' le̱': “¿Bizra da nigá dxelenné̱' chiu'? Blué'e neda' ca naca chee̱ zrin dxunu', lawe' da québedxa gaca gacu' we̱n zrin blau chia'.”
LUK 16:3 Nadxa benne' we̱n zrin blau na' guzú lawe̱' dxenné̱' lu xichaj lázrdawe̱': ¿ájazra guna' na'a, lawe' da xebéaj xrana' neda' lu zrin chia'? Quebe sueda' guna' zrin le̱'e̱ xixre', ne wedué'eda' naba' guna'.
LUK 16:4 Na'a ba nezda' tu da guna' chee̱ xelezúa benne' xelezí' lu ne̱'e̱ neda' gate québedxa de̱ zrin chia'.
LUK 16:5 Nadxa gunné̱' tu tu benne' dxelal-le̱' chee̱ xrane̱' na'. Na' bche̱be̱' benne' nedxu: “¿ájate̱ dxal-lu' chee̱ xrana'?”
LUK 16:6 Benne' na' beche̱be̱': “Dxal-la' chee̱' tu gaxúa zruaga da za.” Nadxa benne' we̱n zrin blau na' guzre̱' le̱': “Nigá de̱ xiche chiu'. Gudxé'e bexún xetú na, na' bzuaj na dxebagu' chi xun zruaga ca'.”
LUK 16:7 Gudé na' bche̱be̱' xetú benne' ca': “¿Gazra lue', ájate̱ dxebagu'?” Na' benne' nigá guzre̱' le̱': “Dxebaga' tu gaxúa bzude' zrua' xtila.” Nadxa benne' we̱n zrin blau guzre̱' le̱': “Nigá de̱ xiche chiu'. Be̱n xetú na, na' bzuaj na dxebagu' tápalalajze.”
LUK 16:8 Xrane̱' gúquebe'ene̱' nácale̱'e̱ sina benne' we̱n zrin blau na' ca be̱ne̱' da ca'. Nadxa gunná Jesús: ―Ca' naca na, benne' zaj zre̱'e̱ na'a zra zaj nácadxe̱' sina lu da dxelune̱' nen le sa' ljwezre̱' ca', ca zaj naca benne' zaj naque̱' chee̱ Dios.
LUK 16:9 ’Neda' dxapa' le'e, le guchine xel-la gunní'a chee̱ xe̱zr la xu nigá chee̱ cha benne' ljwézrele, chee̱ gate te chee̱ xel-la gunní'a na', na' sua nu si' lu na' le'e naga gaca banle chadía chacanna.
LUK 16:10 ’Benne' dxuchínene̱' láteze lu dute̱ xel-la li lazre' chee̱', cá'anqueze guchínene̱' tu da zrendxa dute̱ xel-la li lazre' chee̱', na' benne' quebe naque̱' li lazre' ca dxuchínene̱' láteze, cá'anqueze quebe gaque̱' li lazre' ca guchínene̱' tu da zrendxa.
LUK 16:11 Ca' naca na, che quebe nácale li lazre' ca dxuchínele xel-la gunní'a chee̱ xe̱zr la xu nigá, ¿nuzra guxrén lazre̱' le'e chee̱ guchínele xel-la gunní'a li?
LUK 16:12 Che quebe nácale li lazre' ca dxuchínele da naca chee̱ benne' xula, ¿nuzra gunna le'e da gaca cheé̱quezle?
LUK 16:13 ’Quebe gaca tu benne' we̱n zrin gune̱' zrin chee̱ chupa xrane̱', lawe' da cuídene̱' tue̱', na' xetúe̱' zrí'ine̱', u gaque̱' li lazre' nen tue̱', na' xetúe̱' guzúe̱' chalá'ala. Quebe gaca nu gun zrin chee̱ Dios, ne chee̱ da gunní'a da nape̱'.
LUK 16:14 Benne' fariseo ca', benne' dxulucúdee̱' dumí, ne dxuluzé̱ nague̱' da dxenná Jesús, belún le̱' chee̱'.
LUK 16:15 Nadxa gunná Jesús: ―Le'e dxulé'e cuínale xrlátaje lau bénneache ca', san Dios núnbe'e̱ lázrdaule. Da dxeleque bénneache naca na xrlátaje, naca na da dxuzúa Dios chalá'ala.
LUK 16:16 Na' gunná Jesús: ―Ca bzrin zra zua Juan gulenná bea da nadxixruj bea na, ne da bululé'e benne' ca' buluchálaje̱' waláz chee̱ Dios. Na'a, ca na'te̱ dxendxu dizra' chawe' ca gaca chú'udxu naga dxenná bea Dios, na' xúgute̱ benne' dxelune̱' ba xuzre xelu'e̱ na'.
LUK 16:17 ’Waca te chee̱ xabáa, ne chee̱ xe̱zr la xu nigá, san quebe te chee̱ tu da naxúaj na lu da nadxixruj bea na.
LUK 16:18 Na' gunná Jesús: ―Che tu benne' biu gusane̱' zru'ule̱', ne súale̱ne̱' nu'ula xula, benne' biu nigá dxune̱' dul-la dxáchajne̱' xrba chee̱ xel-la wechaga na', na' benne' biu zúale̱ne̱' tu nu'ula ba bsan benne' chee̱' le̱', benne' nigá cá'anqueze dxune̱' dul-la dxáchajne̱' xrba chee̱ xel-la wechaga na'.
LUK 16:19 Na' gunná Jesús: ―Guzúa tu benne' gunní'a, gúcue̱' zra lane̱' da zaca, ne da zri'a xrtan, na' xúgute̱ zra be̱ne̱' laní zren.
LUK 16:20 Cá'anqueze guzúa tu benne' xache' le̱' Lázaro, nazrate̱ we̱' lu be̱l-la' dxen chee̱', na' dxeajché'e̱ lu xu dxu'a lizre benne' gunní'a na'.
LUK 16:21 Benne' xache' nigá guzá lazre̱' gawe̱' ca da dxelexruj zranla ga dxelagu benne' gunní'a na', na' bécudu ca' dxelelé̱'e̱ba' lu we̱' ca' chee̱ Lázaro.
LUK 16:22 Bzrin zra gute benne' xache' na', na' belexeché̱' gubáz chee̱ xabáa ca' le̱' zeajxezúale̱ne̱' Abraham lu lataj chawe' chee̱ Dios. Cá'anqueze gute benne' gunní'a na', na' bulucache̱' le̱'.
LUK 16:23 Gate benne' gunní'a na' dxezaca zi'e̱ lataj chul-la chee̱ benne' gate, na' guchisa lawe̱', na' blé'ene̱' Abraham zue̱' zitu', ne Lázaro zúale̱ne̱' le̱'.
LUK 16:24 Nadxa gudxezre xe̱'e̱, gunné̱': “¡Xrae, Abraham, bexache lazre' neda', ne gusel-la Lázaro, cheajsebise̱' tu zrube ne̱'e̱, na' xide̱' xucule̱' luzra' nigá! Dxezaca zi'a lu xi' nigá.”
LUK 16:25 Na' Abraham gunné̱': “Bi chia', bsa lazre' gúcale̱'e̱ chawe' chiu' lu xe̱zr la xu, san Lázaro gúcale̱'e̱ da zi' da xa' chee̱'. Na'a le̱' dxezi'e̱ da ba neza nigá, na' lue' dxezaca zi'u na'.
LUK 16:26 Xetú da zua, zua tu chejéa zrente̱ laduj netu' ne le'e. Ca' naca na, che nu benne' zua nigá dxaca lazre̱' chéaje̱' naga zu', quebe gaca, ne quebe gaca benne' zua naga zu' xide̱' naga zúantu' netu'.”
LUK 16:27 Nadxa gunná benne' gunní'a na': “Dxata' xueda' lue', xrae Abraham, sel-lu' Lázaro lizre xra',
LUK 16:28 naga zaj zra' gazxu' bi bícha'dau', chee̱ cheajchálajle̱ne̱'-be', chee̱ quebe xelelá' le̱be' nigá xelezaca zi'be' ca dxaca chia'.”
LUK 16:29 Abraham gunné̱': “Zaj nape̱' da buluzúaj Moisés, ne benne' ca' buluchálaje̱' waláz chee̱ Dios. Dxal-la' xelená' xánnie̱' da na' naxúaj na.”
LUK 16:30 Benne' gunní'a na' beche̱be̱': “Awe', xrae Abraham, san che nu benne' ládujla benne' gate chéaje̱' cheajchálajle̱ne̱' le̱', welexebí'i lazre̱'.”
LUK 16:31 Abraham gunné̱': “Che quebe xelenne̱' ca da gulenná Moisés, ne benne' ca' buluchálaje̱' waláz chee̱ Dios, québequeze xeléajle̱'e̱ che tu benne' xebane̱' ládujla benne' gate.”
LUK 17:1 Jesús guzre̱' benne' ca' dxusé̱dene̱': ―Welezúaqueze da xelún na xelebaga bénneache dul-la, na' edxugúa bénnea' gune̱' da gun na xebaga benne' xula dul-la.
LUK 17:2 Gácadxa chawe' chee̱ bénnea' che nu guchéaj xiaj xiche lbe̱', na' chu'e̱ lu nísadau' naga gátete̱' quézcala gune̱' da gun na xebaga bidu caní dul-la.
LUK 17:3 Le guxúe xanne' cuínale. ’Che le sa' ljwezru' gune̱' chiu' da cale̱la, bzéajni'ine̱', na' che xebí'i lazre̱', bnite lau chee̱'.
LUK 17:4 Lácala gune̱' chiu' da cale̱la gazre lasa tu zra, na' gazre lasa xide̱' xe̱'e̱ lue': “Dxexebí'i lazra'”, dxal-la' gunite lau' chee̱'.
LUK 17:5 Benne' gubáz ca' chee̱ Xránadxu gulé̱'e̱ Le̱': ―Be̱n ga cheajlí lázredxantu' Dios.
LUK 17:6 Nadxa gunná Xránadxu: ―Che le'e zrué'ele xel-la dxeajlí lazre', lácala naca na láteze ca tu bínnedu chee̱ mostaza, waca xe̱le xaga zrente̱ nigá: “Gucuasa nigá, ne xeajsúa lu nísadau',” na' xaga na' guzúa na dizra' chee̱le.
LUK 17:7 ’Che tu benne' ládujla le'e zua tu benne' we̱n zrin chee̱', na' xelé̱'e̱ le̱'e̱ xixre' gate te gudée̱' be̱zre u guxúe̱' béadu ca', ¿we̱'e̱ benne' we̱n zrin na': “Gudé nigala, gudxé'e gagu'?”
LUK 17:8 Cabí, san nne̱': “Bcueza da gawa', ne gusí' chawe' le̱'u chee̱ gaca ca'u chia' da xi'aj gawa'. Te na' waca xi'aj gagu' lue'.”
LUK 17:9 ¿We̱'e̱ benne' we̱n zrin na': “Xcalenu'”, lawe' da be̱ne̱' da gunná be'e xrane̱' le̱'? Cabí.
LUK 17:10 Cá'anqueze le'e, gate xuzre gunle xúgute̱ da gunná be'e Dios le'e, dxal-la' nnale: “Nácantu' benne' we̱n zrin quebe bi zaj zaca, lawe' da quebe bi ne guntu' da zréndxala ca naca da nabágantu'.”
LUK 17:11 Ca zexíaj Jesús zéaje̱' Jerusalén, gudée̱' lu xe̱zr la xu chee̱ xe̱zre ca' zaj nababa Samaria, ne xe̱zre ca' zaj nababa Galilea.
LUK 17:12 Gate bzrine̱' tu xé̱zredau', bedajlechaga Le̱' chi benne' zaj de̱'e̱ we̱' guzru', na' belezé̱' zítu'la,
LUK 17:13 ne gulebezre xe̱'e̱, dxelenné̱': ―Jesús, Benne' Wese̱de, bexache lazre' netu'.
LUK 17:14 Gate ble'e Jesús le̱', na' gunné̱': ―Le chjaca le cheajlué'e cuínale lau bxruze ca'. Dxácate̱ zjaque̱' na', na' belexexaque̱' chee̱ xízrawe̱' chee̱'.
LUK 17:15 Nadxa tu benne' ca', gate guque bé'ene̱' ba bexaque̱', na' bebi'e̱, dxue lá'ane̱' Dios du lazre̱'.
LUK 17:16 Bzu zribe̱' lau Jesús, ne gudíxrujte̱' lawe̱' lu xu, dxe̱'e̱ Le̱': “Xcalenu'.” Benne' nigá naque̱' tu benne' Samaria.
LUK 17:17 Nadxa gunná Jesús: ―¿Quegá chie̱' na' belexexaque̱' lu xízrawe̱' na'? ¿Gazra na' xegué̱'?
LUK 17:18 ¿Tuze benne' zitu' nigá belá' güe lá'ane̱' Dios?
LUK 17:19 Nadxa Jesús guzre̱' benne' na' bexaque̱': ―Bexasa, bexíaj. Ba bexacu' lawe' da guxéajle̱'u chia'.
LUK 17:20 Benne' fariseo ca' buluche̱be̱' Jesús bátala la' xel-la dxenná bea chee̱ Dios, na' beche̱be Le̱': ―Ca la' xel-la dxenná bea chee̱ Dios quebe naca na da lé'ele.
LUK 17:21 Quegá nu nna: “Nigá zua na”, u “Na' zua na”, lawe' da ba zua lu'ule le'e xel-la dxenná bea chee̱ Dios.
LUK 17:22 Nadxa guzre̱' benne' ca' dxusé̱dene̱': ―Wazrín zra gate le'e gaca lázrele lé'ele tu zra zua' neda', Benne' Gulje̱' Bénneache, na' quebe lé'ele na.
LUK 17:23 Che xelenná bénneache, xelé̱'e̱ le'e: “Nigá zue̱'”, u: “Na' zue̱'”, quebe chéajle, ne quebe gaule benne' ca'.
LUK 17:24 Ca dxeajsúa xesa chalá'a zran xabáa, na' nalá'te̱queze na xechalá'a zran xabáa, ca'an gaca gate xelá' neda', Benne' Gulje̱' Bénneache, lu zra xelá'a neda'.
LUK 17:25 Nédxula dxal-la' téle̱'a xel-la zi', na' benne' zaj zre̱'e̱ lu zra na'a zra xuluzúe̱' neda' chalá'ala.
LUK 17:26 Ca guca lu zra gate zua Noé, cá'anqueze gaca lu zra gate xelá'a neda', Benne' Gulje̱' Bénneache.
LUK 17:27 Lu zra na' zua Noé gulé'aj gulawe̱', ne buluchaga ne̱'e̱, ne bulunézruje̱' bi nu'ula chee̱' ca' lu xel-la wechaga na', cadxa bzrin zra guxú'u Noé lu da zren na' da dxedá lawe' nísadau', na' gúcale̱'e̱ xiuj, na' gulate xúgute̱ benne' ca'.
LUK 17:28 Cá'anqueze guca lu zra zua Lot, gulé'aj gulawe̱', ne gulá'awe̱', ne belútie̱', na' gulaze̱', ne belune̱' lizre̱',
LUK 17:29 na' gate Lot bedxúaje̱' lu xe̱zre Sodoma, na' ca dxaca gate dxaca xiuj, ca'an guca be̱xruj xi', ne da gache da dxuzézxele̱'e zran xabáa, ne bzria xi na ca naca benne' ca'.
LUK 17:30 Ca'an gaca lu zra xelá'a neda', Benne' Gulje̱' Bénneache.
LUK 17:31 ’Lu zra na', che nu benne' ze̱' chju'u chee̱', na' da de̱ chee̱' zra na lu xu'u chee̱' na', quebe dxal-la' chu'e̱ cuéaje̱' na, na' che nu benne' zue̱' le̱'e̱ xixre', quebe dxal-la' xezrine̱' lizre̱'.
LUK 17:32 Le cheajsá lazre' ca guca chee̱ zru'ula Lot.
LUK 17:33 Benne' dxaca lazre̱' gapa chi'e̱ xel-la nabán chee̱' gunitie̱' na, na' bénnea' wdee̱' na, wazrué'e bénnea' xel-la nabán.
LUK 17:34 ’Dxapa' le'e, lu zre na', chupa benne' xelate̱' tu zren ga dxelase̱'. Tue̱' xeché̱'e̱, na' xetúe̱' xegá'ane̱'.
LUK 17:35 Chupa nu'ula xelezré̱'e̱ dxelútue̱'. Tue̱' xeché̱'e̱, na' xetúe̱' xegá'ane̱'.
LUK 17:36 Chupa benne' xelezré̱'e̱ le̱'e̱ xixre'. Tue̱' xeché̱'e̱, na' xetúe̱' xegá'ane̱'.
LUK 17:37 Gate belén benne' ca' da nigá, na' buluche̱be̱' Jesús: ―¿Gazra gaca ca', Xran? Le̱' beche̱be̱': ―Naga de̱ tu da nate, na' xeledúpaqueze laba ca'.
LUK 18:1 Jesús bchálaje̱' da dxulé'e na ca naca chee̱ gusé̱dene̱' benne' ca' dxal-la' xuluwízrajtecaze̱' Dios, ne quebe xelexebigue̱'.
LUK 18:2 Na' guzre̱' benne' ca': ―Tu xe̱zre guzúa tu benne' dxuchi'e̱ da dxaca, na' quebe gudape̱' ba lá'ana Dios, ne cá'anqueze bénneache.
LUK 18:3 Lu xe̱zre ná'queze guzúa tu nu'ula ba gute benne' chee̱'. Guxíaje̱' xeajnabe̱' lau benne' dxuchi'e̱ da dxaca chee̱ guchi'e̱ da dxaca chee̱' nen tu benne' dxune̱' chee̱' da cale̱la.
LUK 18:4 Zane' lásate̱ benne' dxuchi'e̱ da dxaca quebe guca lazre̱' guchi'e̱ chee̱ nu'ula na', san ca gudé na' gunné̱' lu xichaj lázrdawe̱': Lácala quebe dxapa' ba lá'ana Dios, ne cá'anqueze bénneache,
LUK 18:5 san lawe' da nu'ula nigá dxune̱' neda' ze̱de, guchí'a chaza' da dxaca chee̱' chee̱ québedxa xide̱' gúnle̱'e̱ neda' ze̱de.
LUK 18:6 Na' gunná Xránadxu: ―Caní na' gunná benne' we̱n da cale̱la na', benne' dxuchi'e̱ da dxaca.
LUK 18:7 ¿Quebe guchi'a Dios da dxaca chee̱ benne' ca' ba guqué̱'e̱, benne' ca' dxelenné̱' Le̱' te zra, ne chizrela? ¿Wazrene̱' xeche̱be̱' chee̱ benne' ca'?
LUK 18:8 Dxapa' le'e, Le̱' guchi'e̱ da dxaca chee̱', ne quebe chene̱'. Gate xelá'a neda', Benne' Gulje̱' Bénneache, ¿wazréldxeda' tu benne' lu xe̱zr la xu nigá, benne' dxéajle̱'e̱ chia'?
LUK 18:9 Jesús bchálaje̱' xetú da dxulé'e na, chee̱ xelene benne' ca' dxeléquene̱' zaj naque̱' xrlátaje, san dxuluzúe̱' chalá'ala le sa' ljwezre̱'.
LUK 18:10 Gunné̱': ―Chupa benne' xjaque̱' xudau' chee̱ xuluchálajle̱ne̱' Dios. Tue̱' naque̱' benne' xudau' fariseo, na' xetúe̱' naque̱' wechizruj waláz chee̱ xe̱zre zitu'.
LUK 18:11 Benne' xudau' na' guzé̱' dxuchálajle̱ne̱' Dios, gunné̱': “Dios, xcalenu' quebe naca' ca benne' xula ca', zaj naque̱' gubán, ne benne' ca' dxelune̱' da cale̱la, ne benne' dxelún dul-la dxeláchajne̱' xrba chee̱ wechaga na', ne quegá ca benne' wechizruj nigá.
LUK 18:12 Neda' dxuna' gubasa chupa lasa da gazre zra, ne dxunna' chiu' tu cue' chee̱ da chi cue' da dxezi'a.”
LUK 18:13 Benne' wechizruj na' guzúe̱' dxu'a dxa xú'uze, ne quebe bexazrjne̱' chisa lawe̱' xabáa. Bé̱le̱'e̱ la chu'e̱, dxenné̱': “Dios, bexache lazre' neda', naca' benne' dul-la.”
LUK 18:14 Dxapa' le'e, benne' wechizruj na' bezé̱'e̱ xexíaje̱' lizre̱', ne bexaque̱' xrlátaje lau Dios, san quegá caní guca chee̱ benne' xudau' na'. Ca' guca lawe' da benne' dxucá'ana szren cuine̱' wexéxrujla bénnea', san benne' dxucá'ana baxache' cuine̱' wegá'ana szrénqueze bénnea'.
LUK 18:15 Belezrín benne' ca' zaj naché̱'e̱ bidu ca' lau Jesús chee̱ guzé̱ ne̱'e̱ le̱be'. Gate belelé'e benne' ca' dxuse̱de Jesús da nigá, na' gulezú lawe̱' dxeledil-le̱' benne' ca'.
LUK 18:16 Jesús gunné̱' benne' ca' dxusé̱dene̱', na' dxe̱'e̱ le̱': ―Le güe lataj xelelá' bidu ca' naga zua', ne quebe guzágale-be', lawe' da benne' zaj naque̱' ca bidu caní welexu'e̱ naga dxenná bea Dios.
LUK 18:17 Da li dxapa' le'e, benne' quebe si' lu ne̱'e̱ nna bea Dios le̱' ca dxelún bidu caní, québequeze chu'e̱ naga dxenná bea Dios.
LUK 18:18 Tu benne' xíchaje̱ bche̱be̱' Jesús: ―Benne' Wese̱de xrlátaje, ¿bi da dxal-la' guna' chee̱ zrué'eda' xel-la nabán zeajlí canna?
LUK 18:19 Jesús guzre̱' le̱': ―¿Bizr chee̱ na' dxennáu' naca' xrlátaje? Netú benne' quebe naque̱' xrlátaje. Tuze Dios naque̱' xrlátaje.
LUK 18:20 Lue' núnbe'u ca zaj naca xrba chee̱ Dios: Quebe gunu' dul-la da dxachaj na xrba chee̱ wechaga na'. Quebe gutiu' benne'. Quebe cuanu'. Quebe nneu' chee̱ le sa' ljwezru' da quebe naca na. Gudapa ba lá'ana xra xrna'u.
LUK 18:21 Benne' na' guzre̱' Jesús: ―Xúgute̱ da caní dxuna' ne nácatea' bídau'te̱.
LUK 18:22 Gate ben Jesús da nigá, na' guzre̱'-be': ―Ne dxexázrjenu' xetú da dxal-la' gunu'. Be̱te ca naca da de̱ chiu', na' bnezruj na chee̱ benne' xache' ca'. Nadxa gapu' xel-la gunní'a lu xabáa chee̱ Dios. Na' gudá sále̱nu' neda'.
LUK 18:23 Gate benne' cuide' na' benne̱' da nigá, bewí'inele̱'e̱ne̱' lawe' da nápale̱'e̱ da gunní'a.
LUK 18:24 Gate ble'e Jesús ca bewi'ine benne' na', gunné̱': ―Sté̱bete̱ naca chee̱ benne' gunní'a ca' xelexú'e̱ naga dxenná bea Dios.
LUK 18:25 Chadídxala te tu bea zren lu negue' tu xeche' zriche quegala chu'u tu benne' gunní'a naga dxenná bea Dios.
LUK 18:26 Na' benne' ca' dxelenne̱' gulenné̱': ―Che ca' naca na, ¿núzraqueze la?
LUK 18:27 Jesús guzre̱' benne' ca': ―Da quebe gaca xelún bénneache, waca Dios gúnqueze̱' na.
LUK 18:28 Na' gunná Pedro, guzre̱' Jesús: ―Xran, ba bsantu' ca da gudápantu' chee̱ zále̱ntu' Lue'.
LUK 18:29 Nadxa Jesús beche̱be̱': ―Da li dxapa' le'e, nútete̱ze benne' gusane̱' lizre̱', u xra xrne̱'e̱, u bi biche̱', bi zane̱' ca', u zru'ule̱', u zrí'ine̱' ca', chee̱ gune̱' zrin chee̱ xel-la dxenná bea chee̱ Dios,
LUK 18:30 benne' nigá wazi'e̱ da zrendxa lu xe̱zr la xu nigá, na' lu xe̱zr la xu da za za' wazi'e̱ xel-la nabán da zeajlí canna.
LUK 18:31 Na' Jesús gunné̱' chalá'ala benne' chazrinnu ca' dxusé̱dene̱', na' guzre̱' le̱': ―Na'a zexíajdxu Jerusalén, naga gaca li ca naca da buluzúaj benne' ca' buluchálaje̱' waláz chee̱ Dios ca gaca chia' neda', Benne' Gulje̱' Bénneache.
LUK 18:32 Benne' zaj zre̱'e̱ Jerusalén xuludée̱' neda' lu na' benne' zitu' ca', na' xelún le̱' chia', ne xelenné̱queze̱' schanni' chia', ne wuluzráqueze̱' neda' zrene̱'.
LUK 18:33 Welúequeze̱' neda', na' te na' xelútie̱' neda', na' zra guxunne' zra xebana' ládujla benne' gate.
LUK 18:34 Benne' ca' quebe guléajni'ine̱' da nigá, ne quebe zaj nézene̱' bi chee̱ na' dxuchálajle̱ne̱' le̱', lawe' da zaj naca da quebe guca xeléajni'iquezne̱'.
LUK 18:35 Gate Jesús bzrine̱' gagu naga zua xe̱zre Jericó, na' dxe' tu benne' la chul-la dxu'a neza dxenabe̱' guna'.
LUK 18:36 Gate benne̱' dxeledé benne' zante̱, na' benne' la chul-la na' bche̱be̱' benne' ca' bizra na' dxaca na.
LUK 18:37 Na' gulé̱'e̱ le̱': ―Jesús, benne' Nazaret dxedée̱' nigá.
LUK 18:38 Nadxa gudxezre xa'a la chul-la na', gunné̱': ―¡Jesús, Zri'ine David, bexache lazre' neda'!
LUK 18:39 Benne' ca' zaj zria lawe̱' lau Jesús guledil-le̱' benne' la chul-la na' chee̱ sue̱' zrize, san gudxezre xá'adxa le̱', dxenné̱': ―¡Zri'ine David, bexache lazre' neda'!
LUK 18:40 Nadxa gugá Jesús, na' gunná bé'ene̱' xeajlexrí'e̱ le̱'. Gate ble̱'e̱ lau Jesús, na' Jesús bche̱be̱' le̱':
LUK 18:41 ―¿Bi dxaca lazru' guna' chiu'? Beche̱be la chul-la na': ―Xran, dxaca lazra' xelé'eda'.
LUK 18:42 Jesús guzre̱' le̱': ―Gaca ca dxennáu'. Ba bexacu' lawe' da guxéajle̱'u chia'.
LUK 18:43 Zra ná'queze belé'e benne' la chul-la na', na' guxíajle̱ne̱' Jesús, dxue lá'ane̱' Dios. Xúgute̱ benne' ca' belelé'ene̱' da nigá cá'anqueze belúe lá'ane̱' Dios.
LUK 19:1 Nadxa Jesús guxú'e̱ xe̱zre Jericó, ne dxedée̱' xe̱zre na'.
LUK 19:2 Lu xe̱zre na' zua tu benne' gunní'a le̱' Zaqueo. Naque̱' xíchaje̱ chee̱ benne' wechizruj ca'.
LUK 19:3 Benne' nigá dxaca lazre̱' gúnbe'e̱ Jesús, san quebe guca lé'ene̱' Le̱' lawe' da zaj zra' benne' zante̱ na', na' Zaqueo na' quebe naque̱' benne' tunna.
LUK 19:4 Nadxa guxíaj chégüe̱' guzría lawe̱', ne chee̱ gaca lé'ene̱' guluéne̱' tu lu xaga zren da zua gagu naga dxal-la' te Jesús.
LUK 19:5 Gate gudé Jesús na', gunné̱'e̱ lu xaga na', ne guzre̱' le̱': ―Zaqueo, bexétajche, lawe' da na'a dxun na ba xen xegá'ana' lizru'.
LUK 19:6 Nadxa Zaqueo na' bexétaje̱' chadí, na' nen dute̱ xel-la dxebé guzí' lu ne̱'e̱ Jesús.
LUK 19:7 Gate belelé'e benne' ca' da nigá, xúgute̱' gulezú lawe̱' dxelezí tizre̱' Jesús, dxelenné̱': ―Jesús bzrine̱' begá'ane̱' lizre tu benne' dul-la.
LUK 19:8 Nadxa Zaqueo na' guzé̱', na' guzre̱' Xránadxu: ―Gunná'xque, Xran, gunézruja' benne' xache' ca' gáchajte̱ ca da de̱ chia', na' che nu benne' bsaca zia' le̱', xunézruja' tapa cue'la chee̱'.
LUK 19:9 Na' Jesús guzre̱' le̱': ―Na'a bla' xel-la weselá lu xu'u nigá, lawe' da nácaqueze benne' nigá xrtia Abraham.
LUK 19:10 Ca' naca na lawe' da bla' neda', Benne' Gulje̱' Bénneache, chee̱ xexílaja', ne guselá' benne' ca' zaj nanítie̱'.
LUK 19:11 Dxácate̱ na' dxuluzé̱ naga benne' ca' dxenná Jesús da caní, na' bchálaje̱' tu da dxulé'e na lawe' da ba zue̱' gáguze xe̱zre Jerusalén, na' benne' ca' dxeléquene̱' zra ná'queze nna bea Dios lu xe̱zr la xu nigá.
LUK 19:12 Nadxa guzre̱' benne' ca': ―Guzúa tu benne' gunní'a xrlátaje, na' dxal-la' chéaje̱' zitu' chee̱ xuluzúe̱' le̱' gaque̱' wenná bea, na' te na' xezrine̱' lazrie̱'.
LUK 19:13 Gate za se̱'e̱, gunné̱' chi benne' we̱n zrin chee̱', na' bnézruje̱' tu tu benne' ca' tuwéaj dumí zácale̱'e̱, ne guzre̱' benne' ca': “Le guchine dumí nigá cadxa xelá'a.”
LUK 19:14 Benne' zaj zre̱'e̱ lázrie̱' dxelecuídene̱' le̱', na' gulesel-le̱' bal-la benne' gubáz chee̱' naga zéaje̱' chee̱ cheajlegue̱zre̱' benne' zaj zre̱'e̱ na': “Quebe dxaca lázrentu' gaca benne' nigá wenná bea chee̱ntu'.”
LUK 19:15 Buluzúe̱' le̱' gaque̱' wenná bea, na' bezrine̱' lázrie̱'. Gate bezrine̱' gunné̱' benne' we̱n zrin ca' bnézruje̱' dumí, chee̱ nézene̱' ájate̱ bezí' tu tu benne' ca'.
LUK 19:16 Benne' nedxu bzrine̱' lawe̱', na' gunné̱': “Xran, dumí chiu' ba bezí na chi cue'la.”
LUK 19:17 Wenná bea na' beche̱be̱': “Chawe' be̱nu'. Nacu' we̱n zrin xrlátaje. Lawe' da gucu' li lazre' lu late' da be̱nna' lue', na'a guna' lue' benne' nna be'ene̱' chi xe̱zre ca'.”
LUK 19:18 Na' bzrin xetúe̱' lawe̱', na' gunné̱': “Xran, dumí chiu' ba bezí na gazxu' cue'la.”
LUK 19:19 Cá'anqueze guzre̱' benne' nigá: “Lue' gacu' benne' nna be'ene̱' gazxu' xe̱zre ca'.”
LUK 19:20 Nadxa xetúe̱' bzrine̱', na' gunné̱': “Xran, nigá de̱ dumí chiu'. Bcache chawa'a na tu lu bazxu,
LUK 19:21 lawe' da bzreba' lue'. Nacu' tu benne' dxuzúa xuzre. Dxexeca'u da quebe guxru', ne dxexelapu' naga quebe guzu'.”
LUK 19:22 Nadxa wenná bea na' guzre̱' le̱': “We̱n zrin cale̱la. Ca dizra' da gunnéu' chuga' ca gaca chiu'. Che nézquezenu' naca' benne' dxuzúa xuzre, ne xecá'a da quebe guxrúa', ne dxelapa' naga quebe guza',
LUK 19:23 ¿bizr chee̱ na' quebe xju'u dumí chia' lu na' benne' xuluchínene̱' na, chee̱ xezí' lu na'a neda' dumí chia' nen da gun xíchaje̱ na, gate xezrina' neda' lizra'?”
LUK 19:24 Nadxa guzre̱' benne' ca' zaj zre̱'e̱ na': “Le xecá'a dumí na' lu ne̱'e̱, na' le gunezruj na benne' nape̱' chi dumí ca'.”
LUK 19:25 Benne' ca' gulé̱'e̱ le̱': “Xran, ba nape̱' chi dumí.”
LUK 19:26 Na' beche̱be̱' wenná bea na': “Dxapa' le'e, benne' nape̱' wazidxe̱' da zrendxa, na benne' quebe nape̱', wecá'a ca da du nape̱'.
LUK 19:27 Na'a, ca naca chee̱ benne' ca' quebe gulaca lazre̱' gaca' neda' wenná bea chee̱', le cheajxri'e̱ nigá, ne le gutie̱' lawa' neda'.”
LUK 19:28 Ca gudé gunné̱' da nigá, na' bexú'u Jesús neza zexíaje̱' Jerusalén.
LUK 19:29 Gate ba zua xezrine̱' xe̱zre Betfagé, ne xe̱zre Betania, ne zue̱' gáguze naga zua Xi'a Xaga Olivo, na' gusel-le̱' chupa benne' ca' dxusé̱dene̱'.
LUK 19:30 Guzre̱' le̱': ―Le chjaca xé̱zredu na' zua gáguze, na' ca zrinle na' lé'ele tu burru da'ba' xaga, be̱ netú quebe nu ne cuía le̱ba'. Le se̱zre-ba', na' le che̱'-ba' nigá.
LUK 19:31 Che nu naba le'e bizr chee̱ na' dxesé̱zrele-ba', le xe̱'e̱ Xránadxu nachínene̱'-ba'.
LUK 19:32 Na' gusiá'ca benne' ca', na' belelé'ene̱' xúgute̱ naca na ca ba guzre Jesús le̱'.
LUK 19:33 Na' gate dxelese̱zre̱' búrrua', na' xránaba' buluche̱be̱' le̱': ―¿Bizr chee̱ na' dxesé̱zrele búrrua'?
LUK 19:34 Benne' chupa ca' belexeche̱be̱': ―Lawe' da nachine Xránadxu le̱ba'.
LUK 19:35 Na' beleché̱'e̱-ba' lau Jesús, na' belexrúe̱' xicha chee̱' cúzruba', na' buluzríe̱' Jesús cúzruba'.
LUK 19:36 Ca zeaj Jesús, xu'e̱ neza zrie̱' búrrudu na', na' dxelechiluj benne' ca' xicha chee̱' la neza naga tée̱'.
LUK 19:37 Gate bzrine̱' gagu naga naca létajla chee̱ Xi'a Xaga Olivo, xúgute̱ benne' ca' zaj de̱'e̱ Le̱' gulezú lawe̱' dxelebezre xe̱'e̱ lu xel-la dxelebé, ne dxelúe lá'ane̱' Dios ca naca xúgute̱ xel-la waca chee̱ xabáa da belelé'ene̱'.
LUK 19:38 Gulenné̱': ―La'azxa naca wenná bea, benne' za' waláz chee̱ Xránadxu Dios. Gaca xel-la dxebeza zri lazre' da za xabáa, ne gaca ba Dios.
LUK 19:39 Nadxa bal-la benne' fariseo ca' zaj zra' ládujla benne' ca' gulé̱'e̱ Jesús: ―Benne' Wese̱de, gudil-la benne' caní zaj de̱'e̱ Lue'.
LUK 19:40 Jesús beche̱be̱': ―Dxapa' le'e, che benne' caní xelezúa zrie̱', xiaj caní xelebezre xa'a na.
LUK 19:41 Gate bzrine̱' gagu xe̱zre Jerusalén, ne ca blé'ene̱' na, na' gudxezre Jesús ca naca chee̱ na.
LUK 19:42 Na' gunné̱': ―La chéajni'ile lu zra chee̱le nigá da gaca gunna chee̱le xel-la dxebeza zri lazre'. Na'a da na' nagache na, na' quebe gaca lé'ele na.
LUK 19:43 Welezrín zra gaca chee̱le da zrinnaj, gate benne' dxelecuídene̱' le'e xeléchaje̱' ze'e dxu'a xe̱zre chee̱le, ne xuluzague̱' le'e gátete̱ze na',
LUK 19:44 na' xuluchínnaje̱' xe̱zre chee̱le. Na' xelútie̱' ca naca benne' zaj zre̱'e̱ nigá, na' quebe xuluxucá'ane̱' tu xiaj cuzru ljwezre na. Caní gaca chee̱le lawe' da quebe gúquebe'ele zra bla' Dios chee̱ gácale̱ne̱' le'e.
LUK 19:45 Nadxa guxú'u Jesús chale'aj xudau', na' guzú lawe̱' dxebéaje̱' na' benne' ca' dxelutie̱', ne dxelá'awe̱' na'.
LUK 19:46 Na' guzre̱' benne' ca': ―Lu xiche chee̱ Dios dxenné̱': “Lizra' naca na xu'u naga guchálajle̱le neda',” na' le'e nunle na ca tu lizre gubán ca'.
LUK 19:47 Tu zra tu zra Jesús dxusé̱dene̱' benne' ca' zaj zra' chale'aj xudau'. Benne' xíchaje̱ ca' chee̱ bxruze, ne benne' dxuluxuzájle̱'e̱ da nadxixruj bea na, ne benne' xu'u lawe' chee̱ xe̱zre na' dxelílaje̱' ájala xelune̱' xelútie̱' Le̱'.
LUK 19:48 Quebe belezrélene̱' ájala xelune̱', lawe' da dxuluzé̱ naga xanne' xúgute̱ benne' ca' Jesús, chee̱ xelenne̱' ca da dxenné̱'.
LUK 20:1 Tu zra gate zua Jesús chale'aj xudau' dxusé̱dene̱' benne' ca', ne dxuchálajle̱ne̱' le̱' ca naca dizra' chawe' chee̱ Dios, na' belezrín na' benne' xíchaje̱ ca' chee̱ bxruze ca', ne benne' ca' dxuluxuzájle̱'e̱ da nadxixruj bea na, ne benne' gula sina ca',
LUK 20:2 na' gulé̱'e̱ Le̱': ―Gunná bi xel-la dxenná bea napu' dxunu' da caní. ¿Nuzra be̱nna lue' xel-la dxenná bea nigá?
LUK 20:3 Na' gunná Jesús: ―Cá'anqueze neda' guche̱ba' le'e tu. Le xeche̱be chia'.
LUK 20:4 ¿Nuzra gusel-la Juan guchúe̱' bénneache nisa? ¿Dios che bénneache?
LUK 20:5 Na' gulezú lawe̱' dxelé̱ ljwezre̱': ―¿Bizra nnadxu? Che nnadxu gusel-la Dios le̱', na' guche̱be̱' dxi'u: “¿Bizr chee̱ na' quebe guxéajle̱le chee̱'?”
LUK 20:6 Che xe̱dxu Le̱', bénneache gulesel-le̱' le̱', benne' zaj zre̱'e̱ nigá wuluzríe̱' dxi'u xiaj, lawe' da zaj neze xánnie̱' bchalaj Juan waláz chee̱ Dios.
LUK 20:7 Nadxa belexeche̱be̱' quebe zaj nézene̱' nu gusel-la Juan bchue̱' bénneache nisa.
LUK 20:8 Na' Jesús guzre̱' benne' ca': ―Cá'anqueze neda' quebe xapa' le'e bi xel-la dxenná bea napa' dxuna' da caní.
LUK 20:9 Na' guzú lau Jesús dxuchálajle̱ne̱' benne' ca' zaj zre̱'e̱ na', dxuchálaje̱' da dxulé'e na, dxenné̱': ―Guzúa tu benne' bde̱'e̱ lba uva lu xe̱zr la xu chee̱', na' ca gudé na' bca'ane̱' na lu na' benne' we̱n zrin ca', na' guzé̱'e̱ na' zane' iza.
LUK 20:10 Gate bzrin zra xuluchibe̱' uva ca', na' gusel-le̱' tu bi we̱n zrin chee̱' zeajxenábabe' tu cue' chee̱ lina na' da dxal-la' xezi'e̱, san benne' we̱n zrin ca' buluzálaje̱'-be', na' belexesel-le̱'-be' cá'aze.
LUK 20:11 Nadxa xrane lina na' gusél-le̱' xetú bi we̱n zrin chee̱', na' cá'anqueze bi nigá bulucháchale̱ne̱-be', ne buluzálaje̱'-be', na' belexesel-le̱'-be' cá'aze.
LUK 20:12 Xrane na' gusél-le̱' xetú bi we̱n zrin chee̱', na' benne' we̱n zrin ca', cá'anqueze belune̱'-be' zi', na' belexebéaje̱'-be' lu lina na'.
LUK 20:13 ’Naga xeajche'te̱ na, xrane na' gunné̱': “¿ájazra guna'? Sel-la' zri'ina' nazrí'ite̱ lazra'. Gate xelelé'ene̱'-be' nalja xelape̱'-be' ba lá'ana.”
LUK 20:14 Na' gate benne' we̱n zrin ca' belelé'ene̱'-be', na' gulé̱ ljwezre̱': “Bi nigá xezí' lu na'be' da de̱ chee̱ xránadxu. Gútedxu-be', chee̱ gácadxu xrane na dxí'uqueze.”
LUK 20:15 Nadxa belexebéaje̱'-be' lu xe̱zr la xu na', na' belutie̱'-be'. Nadxa Jesús bche̱be̱' benne' ca': ―¿Bizra gun xrane na' chee̱ benne' we̱n zrin ca'?
LUK 20:16 Xelé̱'e̱, na' gutie̱' benne' we̱n zrin ca', na' gudée̱' xe̱zr la xu na' lu na' benne' xula ca'. Gate belén benne' ca' ca gunná Jesús, na' gulenné̱': ―Dios quebe gu'e̱ lataj gaca ca'.
LUK 20:17 Na' Jesús gunné̱'e̱ benne' ca', na' gunné̱': ―¿Bizra zéaje̱ da naxúaj na lu xiche chee̱ Dios? Dxenné̱' caní: Xiaj na' da buluzúa benne' we̱n xu'u ca' chalá'ala, le̱ na' naca na xiaj blau.
LUK 20:18 Nútete̱ze benne' cheajchazie̱' lawe' xiaj na', na' chúzrujqueze bénnea', na' che xiaj na' xexruj na lawe' nu benne', gútute̱ na le̱'.
LUK 20:19 Benne' xíchaje̱ ca' chee̱ bxruze ca', ne benne' ca' dxuluxuzájle̱'e̱ da nadxixruj bea na gulaca lazre̱' xele̱le̱' Jesús zra ná'queze, lawe' da guleque bé'ene̱' bchalaj Jesús da dxulé'e na ca zaj naca le̱', san belezrebe̱' da xelún bénneache ca'.
LUK 20:20 Nadxa gulesel-le̱' benne' ca' xuluzuzre̱' Jesús, benne' xululé'e cuine̱' ca benne' xrlátaje ca'. Benne' caní dxelaca lazre̱' xelebéaje̱' Jesús dizra' chee̱ xelezéquene̱' xuludée̱' Le̱' lu na' bénnea' dxenná be'e̱.
LUK 20:21 Chee̱ xelune̱' da nigá, buluche̱be̱' Le̱': ―Benne' Wese̱de, nézentu' dxennáu', ne dxusé̱denu' da naca li lazre', ne quebe dxuchi'u chee̱ bénneache cáte̱ze dxululé'e cuine̱', san lu da li dxusé̱denu' da naca chee̱ Dios.
LUK 20:22 Guzre netu', ¿naca na chawe' quízrujdxu da dxuchizruj César, bénnea' dxenná bé'ene̱' dute̱ xe̱zr la xu, che cabí?
LUK 20:23 Dxeque be'e Jesús ca naca da dxelaca lazre̱' xelune̱' chee̱', na' guzre̱' benne' ca': ―¿Bizr chee̱ na' dxaca lázrele gun xálele neda'?
LUK 20:24 Le gulé'e neda' tu dumí. ¿Nuzra lu'a na' da na nigá, ne nu la naxúaj nigá? Benne' ca' belexeche̱be̱': ―Chee̱ benne' dxenná bea na'.
LUK 20:25 Nadxa gunná Jesús: ―Le gunezruj bénnea' da naca chee̱', na' le gunezruj Dios da naca chee̱ Dios.
LUK 20:26 Quebe gulezéquene̱' xelún xálene̱' Jesús ca naca da beche̱be̱' lau benne' ca'. Belexebánene̱' ca naca da beche̱be̱', na' gulezúa zrie̱'.
LUK 20:27 Ca gudé na' bal-la benne' xudau' saduceo ca' belezrine̱' lau Jesús. Benne' saduceo ca' dxeléquene̱' quebe xelexebán benne' gate, na' gulé̱'e̱ Jesús:
LUK 20:28 ―Benne' Wese̱de, Moisés bzúaje̱' chee̱ntu' che tu benne' gatie̱', ne gucá'ane̱' zru'ule̱', ne che quebe nu chilá' zrí'ine̱', na' bi biche bénnea' dxal-la' guchaga na'abe' nen nu'ula na' gute benne' chee̱' chee̱ galaj tu bidau' gácabe' ca zri'ine bénnea' ba gútee̱'.
LUK 20:29 Gulezrá' gazre benne' gulaque̱' zri'ine tuze xre̱'. Bi nedxu bchaga na'abe' nen tu nu'ula, na' gútebe', quebe nu chilá' bi chee̱be'.
LUK 20:30 Bi gudxupe' bchaga na'abe' nen nu'ula na', ne cá'anqueze gútebe' quebe nu chilá' bi chee̱be'.
LUK 20:31 Nadxa bi guxunne' bchaga na'abe' nen nu'ula na', na' cá'anqueze belún bi ca' xezica, na' bi gazre ca' gulátebe' quebe nu chilá' bi chee̱be'.
LUK 20:32 Naga xeajche'te̱ na, na' gute nu'ula na'.
LUK 20:33 Gate xelexebán benne' gate, ¿nula bi ca' gaca zrú'ulabe' nu'ula na', lawe' da ca naca bi gazre ca' buluchaga na'abe' nen nu'ula na'?
LUK 20:34 Nadxa beche̱be Jesús: ―Lu xe̱zr la xu nigá dxuluchaga na' benne' biu ca' nen nu'ula ca'.
LUK 20:35 Na' benne' ca' naca chee̱' xelexexú'e̱ xe̱zr la xu da za za', ne chee̱ xelexebane̱' ládujla benne' gate, québedxa xuluchaga ne̱'e̱, ne québedxa xulunézruje̱' zrí'ine̱' lu xel-la wechaga na'.
LUK 20:36 Ca'an gaca lawe' da quebe nu gátedxa na'. Xelaque̱' ca zaj naca gubáz chee̱ xabáa ca', ne xelaque̱' bi chee̱ Dios lawe' da belexebane̱'.
LUK 20:37 Moisésqueze, gate bzuaje̱' ca guca chee̱ bisigá da guzúa na' xi', dxulé'ene̱' dxi'u dxal-la' xelexebán benne' gate. Naga naxúaj da nigá dxenná na ca naca chee̱ Dios, naque̱' Dios chee̱ Abraham, ne Dios chee̱ Isaac, ne Dios chee̱ Jacob.
LUK 20:38 Dios quebe naque̱' Dios chee̱ benne' gate ca'. Naque̱' Dios chee̱ benne' ban ca', lawe' da lau Le̱' zaj naca ban xúgute̱ bénneache.
LUK 20:39 Nadxa bal-la benne' ca', benne' dxuluxuzájle̱'e̱ da nadxixruj bea na gulé̱'e̱ Jesús: ―Cháwedau' dxennáu', Benne' Wese̱de.
LUK 20:40 Québedxa belexázrjne̱' bi xuluche̱be̱' Jesús.
LUK 20:41 Jesús guzre̱' le̱': ―¿Bizr chee̱ na' dxennale le'e naca Cristo zri'ine David?
LUK 20:42 Davídqueze gunné̱' lu xiche naga zaj naxúaj salmo ca': Xránadxu Dios guzre̱' Xrana': “Gudxé'e cuita' xabe̱la chia',
LUK 20:43 Cadxa guzúa' benne' dxelecuídene̱' lue' ca' zran ni'u.”
LUK 20:44 ¿ájazra chee̱ na' naca Cristo zri'ine David, na' Davídqueze dxe̱'e̱ Le̱': “Xran”?
LUK 20:45 Ca naca benne' ca' zaj zra' na' dxuluzé̱ nague̱' chee̱ Jesús gate guzre̱' benne' ca' dxusé̱dene̱':
LUK 20:46 ―Le guxúe xanne' cuínale chee̱ benne' ca' dxuluxuzájle̱'e̱ da nadxixruj bea na, lawe' da dxeledánene̱' dxeledé̱' zaj nacue̱' zre̱' tunna, ne dxelaca lazre̱' xelapa bénneache le̱' ba lá'ana lawe' xi'a ca', ne dxelebé'e̱ lu lataj blau ca' lu xu'u naga dxezrágale, ne lataj blau ca' naga dxelawe̱' zrue.
LUK 20:47 Benne' caní dxelequé̱'e̱ ca naca lizre nu'ula ca' ba gulate benne' chee̱', na' chee̱ xulucá'ana cuine̱' xrlátaje lau bénneache ca' dxululawízraje̱' Dios da tunna lu xu'u ca' naga dxezrágale. Benne' caní xelezaca zídxaqueze̱'.
LUK 21:1 Gate zua Jesús chale'aj xudau', blé'ene̱' benne' gunní'a ca' dxelegú'e̱ dumí lu xí'ina chee̱ xudau'.
LUK 21:2 Na' blé'ene̱' tu nu'ula naque̱' benne' xache', ne ba gute benne' chee̱', gulu'e̱ chupa dumídau'.
LUK 21:3 Na' gunná Jesús: ―Da li dxapa' le'e, nu'ula xache' nigá gulú'udxe̱' da zrendxa ca benne' gunní'a caní,
LUK 21:4 lawe' da dxelegú'u benne' ca' chee̱ da dxutínneze na, san nu'ula nigá, lu xel-la baxache' chee̱' bnézruje̱' ca naca da nape̱' da nunte̱ gawe̱'.
LUK 21:5 Bal-la benne' dxuluchálaje̱' ca naca chee̱ xudau' na', ne chee̱ xiaj xrtante̱ da zaj zrále̱'e̱ na ze'e xudau' na', ne chee̱ da xrtan da bulunezruj benne' chee̱ xudau' na'. Nadxa gunná Jesús, dxe̱'e̱ le̱':
LUK 21:6 ―Wazrín zra gate xelebía xi' xúgute̱ da caní dxelé'ele, ne quebe xegá'ana netú xiaj cuzru ljwezre na.
LUK 21:7 Nadxa benne' ca' buluche̱be̱' Jesús: ―Benne' Wese̱de, ¿bata gaca da na'? ¿Bi gulé'e na gate ba za xelaca da caní?
LUK 21:8 Jesús gunné̱': ―Le guxúe xanne' cuínale, ne quebe güele lataj nu si xe̱ le'e, lawe' da xelelá' benne' zante̱ benne' xulusí' cuine̱' La' neda', xelenné̱' zaj naque̱' Cristo, ne xelenné̱' ba bzrin zra. Quebe chéajle̱le benne' ca'.
LUK 21:9 Gate xénele dxaca wedil-la, ne xeledábague̱' bénneache xu'u lawe', quebe zrébele, lawe' da dxal-la' gaca da caní nedxu, san quebe ne zrin zra cheajsé̱ chee̱ xe̱zr la xu nigá.
LUK 21:10 Nadxa guzre̱' benne' ca': ―Bénneache tu xe̱zr la xu xeledíl-lale̱ bénneache xetú xe̱zr la xu, na' benne' tu xe̱zre xeledíl-lale̱ benne' xetú xe̱zre.
LUK 21:11 Wazrú'le̱'e̱queze, ne gácale̱'e̱ gubina', ne gáta'le̱'e̱ xízrawe̱' du ca nácaqueze, na' zran xabáa lé'ele da guchébequeze na le'e, ne xel-la waca zri'a ca'.
LUK 21:12 ’Nédxudxa gate quebe ne gaca da caní xelé̱laqueze̱' le'e, ne xeláu zi' xúzrequeze̱' le'e. Xeleché̱'e̱ le'e lu xu'u ca' ga dxelezrague̱' chee̱ xelechugue̱' ca xelune̱' chee̱le, na' xelegú'e̱ le'e lizre xia, ne xeleché̱'e̱ le'e lau benne' wenná bea ca', ne lau benne' xu'u lawe' ca' lawe' da nácale neda' tuze.
LUK 21:13 Gate gaca da caní gata' lataj guchálajle̱le benne' ca' ca naca chia' neda'.
LUK 21:14 Le guzúa chacha lázrdaule, quebe gucuézale nédxula da dxal-la' nne̱le,
LUK 21:15 lawe' da gunna' neda' le'e dizra', ne xel-la sina da quebe xelezeque benne' dxeledábague̱' le'e bi xelenné̱' chee̱ na.
LUK 21:16 Wuludéqueze bénneache le'e lu na' benne' dxeledábague̱' le'e. Caní xelúnqueze xra xrnale, ne bi bíchele, ne xrtia ljwézrele, ne bi ljwézrele ca'. Welútequeze̱' bál-lale le'e,
LUK 21:17 na' xúgute̱ bénneache welecuídene̱' le'e lawe' da nácale neda' tuze,
LUK 21:18 san quebe nite tu xicha xíchajle lau Dios.
LUK 21:19 Che sua cháchale, na' gápale xel-la nabán.
LUK 21:20 ’Gate lé'ele zaj naxechaj benne' dxjaque̱' wedil-la xe̱zre Jerusalén, na' nézele ba za cuía xi' xe̱zre nigá.
LUK 21:21 Lu zra na', benne' zaj zre̱'e̱ xe̱zre ca' zaj nababa Judea dxal-la' xuluzrúnnuje̱' chjaque̱' lu xi'a ca', na' benne' zaj zre̱'e̱ xe̱zre Jerusalén dxal-la' xeledxúaje̱' na', na' benne' zaj zre̱'e̱ le̱'e̱ xixre' quebe dxal-la' xelexezrine̱' xe̱zre na'.
LUK 21:22 Lu zra ca' Dios gudée̱' benne' ca' lu da zi' da xa', na' gaca li ca naca da naxúaj na lu xiche chee̱ Dios ca dxal-la' gaca chee̱ benne' ca'.
LUK 21:23 Edxugúa nu'ula zaj zue̱' zi'i lu zra ca', ne nu'ula ca' zaj nuxre̱' bidu dxelázrebe', lawe' da gáta'le̱'e̱ da xelezaca bénneache ca', na' gaca tu da ba xa' zrente̱ chee̱ benne' ca'.
LUK 21:24 Bal-le̱' xelatie̱' lu wedil-la na', na' xebal-le̱' xeleché̱'e̱ le̱' zaj nadxéaje̱' tu tu xe̱zr la xu ca', na' benne' zitu' ca' xululéaje̱' xe̱zre Jerusalén cadxa cheajsé̱ chee̱ zra xelenná bea benne' zitu' ca'.
LUK 21:25 Na' gunná Jesús: ―Lu zra na' xelata' da xululé'e na lau gubizra, ne lau beu', ne lau belaj ca', na' lu xe̱zr la xu xelezúa ste̱be benne' ca', ne xelezrebe̱' ca naca schaga' da gun nísadau', ne xeajxruza chee̱ na.
LUK 21:26 Benne' ca' xelate ni'a ne̱'e̱ ne̱ chee̱ xel-la dxelezrebe gate xulusá lazre̱' ca da dxal-la' gaca lu xe̱zr la xu, ne ca naca da zaj zra' zran xabáa, da zaj napa xel-la waca xelezrízequeze na.
LUK 21:27 Lu zra na' xelelé'equezne̱' neda', Benne' Gulje̱' Bénneache, xelá'a tu lu beuj, nen dute̱ xel-la waca zren, ne da xabáa chia'.
LUK 21:28 Gate su lau gaca da caní, le gun dipa lázrele, ne le chisa xíchajle, lawe' da ba za zrin zra lale lu da dxaca chee̱le.
LUK 21:29 Nadxa bchalaj Jesús tu da dxulé'e na, gunné̱': ―Le nna'xque xaga higo, u bítete̱ze xaga.
LUK 21:30 Gate lé'ele ba dxezría na laga' dxe'ene, nézquezle le'e ba za xaca beu' la.
LUK 21:31 Cá'anqueze, gate lé'ele gaca da caní, dxal-la' nézele ba zua gagu zra nna bea Dios.
LUK 21:32 ’Da li dxapa' le'e, xúgute̱ da caní xelaca na nédxudxa gate quebe ne xelate bénneache zaj zra' lu zra na'a zra.
LUK 21:33 Xabáa, ne xe̱zr la xu weledé chee̱ na, san dizra' chia' quebe te chee̱ na.
LUK 21:34 Le guxúe xanne' cuínale, quebe güele lataj xelú'u lu xichaj lázrdaule da cale̱la ca' ca naca xel-la dxagu xrata, ne xel-la dxezuzre, ne xel-la dxezá lazre' da naca chee̱ xe̱zr la xu nigá, chee̱ quebe gácale ca tu benne' nachúl-lene̱' lu xichaj lázrdawe̱' gate zrin zra na',
LUK 21:35 ne chee̱ quebe gaca na ca tu da que̱la na le'e, lawe' da caní gaca chee̱ xúgute̱ benne' zaj zre̱'e̱ lu xe̱zr la xu nigá.
LUK 21:36 Le sua le'e ban lazre', ne le naba lau Dios chee̱ gaca lale lu da dxal-la' gaca lu xe̱zr la xu nigá, ne chee̱ gaca gulé'e cuínale du lázrele lawa' neda', Benne' Gulje̱' Bénneache.
LUK 21:37 Jesús bsé̱dene̱' benne' ca' lu xudau' te zra, na' chizrela dxexíaje̱' lu Xi'a Xaga Olivo.
LUK 21:38 Xúgute̱ benne' ca' belezrine̱' lu xudau' na' xugu' zila chee̱ xelenne̱' chee̱ Jesús.
LUK 22:1 Ba zua gagu laní gate dxelawe̱' xeta xtila da quebe nachixre cua zichaj chee̱ xeta xtila, da naca na Laní Pascua gate dxulusá lazre̱' ca da be̱n Dios gate bebéaje̱' bénneache chee̱' lu xe̱zr la xu Egipto.
LUK 22:2 Lu zra ca' benne' xíchaje̱ ca' chee̱ bxruze ca', ne benne' ca' dxuluxuzájle̱'e̱ da nadxixruj bea na belílaje̱' ájala xelune̱' xelútie̱' Jesús bagácheze, lawe' da dxelezrebe̱' da xelún benne' zan ca'.
LUK 22:3 Nadxa guxú'u Satanás da xriwe̱' lu lázrdau Judas, bénnea' cá'anqueze le̱' Iscariote. Naque̱' tu benne' chazrinnu gubáz ca' chee̱ Jesús.
LUK 22:4 Judas nigá guxíaje̱' xeajchálajle̱ne̱' benne' xíchaje̱ ca' chee̱ bxruze ca', ne benne' blau ca' chee̱ xudau', na' bchálajle̱ne̱' benne' ca' ájala gune̱' gudée̱' Jesús lu na' benne' ca'.
LUK 22:5 Benne' caní gulebene̱', na' guleche̱be lazre̱' xulunézruje̱' le̱' dumí.
LUK 22:6 Judas na' guzí' lu ne̱'e̱ dumí na', na' guzú lawe̱' dxílaje̱' ájala gune̱' gudée̱' Jesús lu na' benne' ca' gate quebe nu chilá' benne'.
LUK 22:7 Bzrin zra laní gate dxelawe̱' xeta xtila da quebe nachixre cua zichaj chee̱ xeta xtila, gate dxal-la' xelútie̱' zríla'dau' ca' chee̱ Laní Pascua.
LUK 22:8 Na' Jesús gusel-le̱' Pedro ne Juan, na' guzre̱'-be': ―Le chjaca, ne le gucuéza da gágudxu chee̱ Laní Pascua.
LUK 22:9 Benne' caní buluche̱be̱' Le̱': ―¿Ga dxaca lazru' gucuézentu' na?
LUK 22:10 Na' beche̱be Jesusen': ―Gate chu'ule lu xe̱zre, na' xezrágale tu benne' biu zenu'e̱ tu dxe'e nisa. Le chjácale̱ne̱' xu'u naga xezrine̱',
LUK 22:11 na' le xe̱ xrane xu'u na': “Benne' Wese̱de dxe̱'e̱ lue': ¿Ga zua xu'u naga gágule̱na' benne' ca' dxusé̱dea' zríla'dau' chee̱ Laní Pascua?”
LUK 22:12 Nadxa gulé'ene̱' le'e tu xu'u zren da zua chupa cuia sibe, da bache nucá'ana chawe'. Le gucuéza da gágudxu na'.
LUK 22:13 Benne' ca' xjaque̱', na' belezrélene̱' xúgute̱ ca da ba guzre Jesús le̱', na' bulucueze̱' da xelawe̱' chee̱ Laní Pascua.
LUK 22:14 Gate bzrin zra, Jesús ne benne' ca' dxusé̱dene̱' gulezré̱'e̱ ga xelawe̱' na.
LUK 22:15 Nadxa gunná Jesús, dxe̱'e̱ benne' ca': ―Guzá lázrele̱'a gágule̱na' le'e chee̱ Laní Pascua nigá nédxudxa ca quebe ne gatia'.
LUK 22:16 Dxapa' le'e québedxa gawa' da nigá cadxa gaca li na naga dxenná bea Dios.
LUK 22:17 Nadxa guqué̱'e̱ tu zruágadau', na' guzre̱' Dios: “Xcalenu'”, na' gunné̱': ―Le xi'aj late' weaj tu tule le'e.
LUK 22:18 Dxapa' le'e québedxa xí'aja' chee̱ nisa uva caní cadxa xida xel-la dxenná bea chee̱ Dios.
LUK 22:19 Nadxa guqué̱'e̱ xeta xtila, ne guzre̱' Dios: “Xcalenu'”, na' bzúzruje̱' na, ne bnézruje̱' na benne' ca', dxenné̱': ―Da nigá naca na be̱l-la' dxen chia', da guzúa' waláz chee̱le. Le gun da nigá chee̱ cheajsá lázrele chia' neda'.
LUK 22:20 Cá'anqueze be̱ne̱' nen zruágadau' na' ca gudé gulawe̱' xrche', na' gunné̱': ―Zruágadau' nigá zéaje̱ na xel-la wezría cube, da guzúa chúchua' nen dxen chia', da gulálaja' waláz chee̱le.
LUK 22:21 ’Na'a, zrua na' benne' biu na' tu zren nen na'a ga zua da dxágadxu, bénnea' gudée̱' neda' lu na' benne' dxeledábague̱' neda'.
LUK 22:22 Neda', Benne' Gulje̱' Bénneache, waxá'a lu neza da ble'e Dios neda' naga gatia', san edxugúa bénnea' gudée̱' neda' chee̱ gatia'.
LUK 22:23 Nadxa benne' ca' dxuse̱de Jesús gulezú lawe̱' dxuluche̱be ljwezre̱' nu na' gudé Jesús.
LUK 22:24 Cá'anqueze buluche̱be ljwezre̱' nule̱' gácadxe̱' benne' blau.
LUK 22:25 Na' Jesús guzre̱' le̱': ―Benne' wenná bea chee̱ xe̱zr la xu ca' dxelenná bé'ene̱' bénneache ca xrane bénneache ca', na' benne' xíchaje̱ chee̱ benne' ca' dxelenné̱' zaj naque̱' benne' dxelune̱' da chawe' chee̱ benneáche ca'.
LUK 22:26 Le'e quebe dxal-la' gunle ca'. Benne' nácadxe̱' blau ládujla le'e dxal-la' gaque̱' ca benne' nácadxe̱' cuide', na' benne' dxenná be'e̱ dxal-la' gaque̱' ca benne' nada'u chee̱ ljwezre̱' ca'.
LUK 22:27 ¿Nu nácadxa blau, benne' dxe'e̱ dxawe̱', che benne' dxudée̱' xel-la wagu? ¿Quebe naca bénnea' dxe'e̱ dxawe̱'? Neda' zúale̱na' le'e ca tu benne' dxune̱' zrin chee̱le.
LUK 22:28 ’Le'e guzúale̱quezle neda' gate neda' guzí guzaca'.
LUK 22:29 Chee̱ le̱ na' dxunna' le'e lataj nna beale, ca be̱n Xra', be̱nne̱' na neda',
LUK 22:30 chee̱ xi'aj gágule ga naca chia' naga nna be'a neda', na' cue'le lataj blau ca' chee̱ guchí'ale chee̱ chazrinnu cue' xrtia Israel.
LUK 22:31 Na' gunnáqueze Xránadxu: ―Simón, Simón, Satanás, da xriwe̱' ba gunaba na le'e chee̱ seque gudé na le'e lu dul-la ca dxun tu benne' dxudxixre dxutul-le̱' xizre za.
LUK 22:32 Neda' guta' xueda' Xra' gácale̱ne̱' lue' chee̱ quebe guníteu' xel-la dxeajlí lazre chiu'. Na' lue', gate bache bexacu' dipa lazre', gúcale̱ le sa' ljwezru' ca' chee̱ xelezé̱ chache̱'.
LUK 22:33 Na' gunná Simón, guzre̱' Jesús: ―Xran, ba zúaqueza' sá'le̱na' Lue' lizre xia, ne chee̱ gátequeza' nen Lue'.
LUK 22:34 Jesús guzre̱' le̱': ―Pedro, dxapa' lue', ná'ate̱la ne dé̱dxela cuezre xjeaj, lue' wannáu' chunna lasa quebe núnbe'u neda'.
LUK 22:35 Nadxa Jesús bche̱be̱' benne' ca': ―Gate gusel-la' le'e quebe bíale xixruj, ne naga cu'ule dumí, ne zrélale, ¿bxázrjele bi da guchínnele? Benne' ca' belexeche̱be̱': ―Gutu bi de̱.
LUK 22:36 Nadxa guzre̱' benne' ca': ―Na'a, benne' nape̱' xixruj dxal-la' gu'e̱ na, ne naga dxugu'e̱ dumí. Bénnea' quebe nape̱' xia da dxuluchínene̱' lu wedil-la, dxal-la' xexutie̱' xicha chee̱', na' si'e̱ xia chee̱'.
LUK 22:37 Dxapa' le'e dxal-la' gaca chia' néda'queza' ca da naxúaj na lu xiche chee̱ Dios, dxenné̱': “Gubabe̱' ca tu benne' we̱n da zrinnaj.” Xúgute̱ da naxúaj na chia' dxal-la' gaca li na.
LUK 22:38 Nadxa benne' ca' gulenné̱': ―Xran, nigá de̱ chupa xia. Le̱' beche̱be̱': ―Da naze.
LUK 22:39 Nadxa bedxúaj Jesús xu'u na', na' ca dxúnqueze̱', guxíaje̱' lu Xi'a Xaga Olivo, na' benne' ca' dxusé̱dene̱' xjácale̱ne̱' Le̱'.
LUK 22:40 Gate belezrine̱' na', Jesús guzre̱' le̱': ―Le naba lau Dios chee̱ quebe seque da xriwe̱' cu'u na le'e lu dul-la.
LUK 22:41 Nadxa Jesús guzé̱'e̱ ca tu legu'una xiaj naga zaj zra' benne' ca', na' bzu zribe̱' bchálajle̱ne̱' Dios.
LUK 22:42 Gunne̱': ―Xrae, che dxaca lazru', bcuasa neda' ca naca da dxal-la' saca', da naca na ca tu da sla' da dxal-la' xí'aja', quegá gaca na ca dxaca lazra' neda', san ca dxaca lazru' Lue'.
LUK 22:43 Nadxa ble'e lau naga zua Jesús tu gubáz chee̱ xabáa, na' btipe̱' lazre' Jesús.
LUK 22:44 Gate ne dxezácale̱'e̱, du lazre̱' bchálajle̱ne̱' Dios, na' xesa chee̱' guca na ca dxen dxelezrún na lu xu.
LUK 22:45 Ca bexuzre bchálajle̱ne̱' Dios, na' bexase̱', na' bezrine̱' naga zaj zra' benne' ca' dxusé̱dene̱', na' blé'ene̱' dxelase benne' ca', lu xel-la dxelexewi'ine lazre' chee̱'.
LUK 22:46 Nadxa guzre̱' benne' ca': ―¿Dxáselale le'e na'a? Le chasa, ne le naba lau Dios chee̱ quebe seque da xriwe̱' cu'u na le'e lu dul-la.
LUK 22:47 Ne dxuchálajte̱ Jesús gate belelá' benne' zan ca'. Bénnea' le̱' Judas, tu benne' chazrinnu ca', ze̱'e̱ zria lawe̱' lau benne' ca', na' gubigue̱' cuita Jesús chee̱ gunupe̱' Le̱'.
LUK 22:48 Nadxa Jesús guzre̱' le̱': ―Judas, ¿dxunupu' neda', Benne' Gulje̱' Bénneache, chee̱ gudéu' neda' lu na' benne' dxeledábague̱' neda'?
LUK 22:49 Benne' ca' zrále̱ne̱' Jesús, ca belelé'ene̱' ca da dxaca, na' buluche̱be̱' Jesús: ―Xran, ¿guchínentu' xia?
LUK 22:50 Tu benne' ca' dxedále̱ Jesús be̱ne̱' zi' tu bi we̱n zrin chee̱ bxruze blau, guchugue̱' nágabe' zua xabe̱la.
LUK 22:51 Jesús gunné̱': ―Québedxa gunle ca'. Cá'anze. Nadxa Jesús bte̱' naga bi we̱n zrin na', na' bexune̱' na.
LUK 22:52 Na' guzre̱' benne' xíchaje̱ ca' chee̱ bxruze, ne benne' blau ca' chee̱ xudau', ne benne' gula sina ca', benne' zá'aque̱' xeleché̱'e̱ Jesús, gunné̱': ―¿Blale le'e nen xia, ne xaga chee̱ qué̱lale neda' ca dxé̱lale tu gubán?
LUK 22:53 Gate guzúa' neda' lu xudau' nen le'e tu zra tu zra, quebe bi be̱nle le'e chia', san zra nigá naca na zra chee̱le, gate dxenná bea da zua na lataj chul-la.
LUK 22:54 Nadxa gule̱le̱' Jesús, na' guleché̱'e̱ Le̱' lizre bxruze blau, na' Pedro zíaje̱' nawe̱' Le̱' zítu'la.
LUK 22:55 Na' gulebé'e̱ guléchaje̱' xi' na', na' Pedro gudxé'e̱ ládujla benne' ca'.
LUK 22:56 Nadxa tu nu'ula we̱n zrin, gate blé'ene̱' Pedro dxe'e̱ dxu'a xi' na', guzúe̱' dxenné̱'e̱ le̱', na' gunné̱': ―Cá'anqueze benne' nigá guque̱' tuze le̱n Jesús.
LUK 22:57 Pedro gunné̱': ―Nu'ula, quebe núnbe'a bénnea'.
LUK 22:58 Xetú chí'idau' guca, na' ble'e xetú benne' xula Pedro na', na' gunné̱': ―Cá'anqueze lue' nacu' tu zren benne' ca'. Pedro gunné̱': ―Cabí. Quebe naca ca'.
LUK 22:59 Xelate gudé na', xetú benne' be̱n chúchue̱' xrtizre̱', gunné̱': ―Da li, benne' nigá guque̱' tuze le̱n Jesús, lawe' da naque̱' benne' Galilea.
LUK 22:60 Nadxa gunná Pedro: ―Benne', quebe nezda' nu chee̱ na' dxuchálaju'. Dxácate̱ na' ne dxuchálajte̱ Pedro ca', na' gudxezre xjeaj.
LUK 22:61 Nadxa Xránadxu bzechaj xíchaje̱', gunné̱'e̱ Pedro, na' Pedro xeajsá lazre̱' ca da guzre Xránadxu le̱', gunné̱': “Ná'ate̱la ne dé̱dxela cuezre xjeaj, lue' wannáu' chunna lasa quebe núnbe'u neda'.”
LUK 22:62 Nadxa bedxúaj Pedro, na' gudxezre xáche'le̱'e̱.
LUK 22:63 Na' benne' ca' zaj nuxre̱' Jesús belún le̱' chee̱', na' buluzalje̱' Le̱'.
LUK 22:64 Bulucache̱' lawe̱', na' belegape̱' xrague̱', dxelé̱'e̱ Le̱': ―Gunné̱ xa'a nu be̱ Lue'.
LUK 22:65 Da zan da gulenné̱', dxelenné̱' schanni' chee̱ Jesús.
LUK 22:66 Gate naca te zra, na' belezraga benne' gula sina ca' chee̱ judío ca', ne benne' xíchaje̱ ca' chee̱ bxruze ca', ne benne' ca' dxuluxuzájle̱'e̱ da nadxixruj bea na, na' guleché̱'e̱ Jesús lau benne' ca' chee̱ xu'u lawe' blau chee̱ judío ca'. Na' buluche̱be̱' Le̱':
LUK 22:67 ―Gunná, ¿nacu' lue' Cristo? Na' beche̱be Jesús: ―Che xapa' le'e: Awe', quebe chéajle̱le,
LUK 22:68 na' che bi guche̱ba' le'e, quebe xeché̱bele chia', ne quebe gusanle neda'.
LUK 22:69 Ná'ate̱la neda', Benne' Gulje̱' Bénneache, cue'a chalá'a xabe̱la chee̱ Dios nape̱' dute̱ xel-la waca.
LUK 22:70 Nadxa xúgute̱' buluche̱be̱' Le̱': ―¿Nacu' Lue' Zri'ine Dios? Jesús beche̱be̱': ―Naca', ca dxennáquezle le'e.
LUK 22:71 Nadxa gulenná benne' ca': ―¿Núzradxa chínnedxu bi nne̱' chee̱ benne' nigá? Dxí'uqueze ba bénedxu ca da gunnáqueze̱'.
LUK 23:1 Nadxa gulasa xúgute̱ benne' dxuluchi'e̱, na' guleché̱'e̱ Jesús lau Pilato, benne' dxenná be'e̱ waláz chee̱ Roma.
LUK 23:2 Na' gulezú lawe̱' dxelagu zrie̱' Jesús, dxelenné̱': ―Ble'entu' benne' nigá dxegú'u xel-le̱' bénneache chee̱ xeledábague̱' xu'u lawe'. Dxenné̱' quebe dxal-la' quízrujntu' da dxuchizruj César, benne' Roma, na' cá'anqueze dxenné̱' naque̱' Cristo, Benne' Wenná Bea.
LUK 23:3 Nadxa Pilato bche̱be̱' Jesús: ―¿Nacu' Lue' Wenná Bea chee̱ judío ca'? Na' beche̱be Jesús: ―Ca' naca na, ca ba gunnáu' lue'.
LUK 23:4 Nadxa gunná Pilato, guzre̱' benne' xíchaje̱ ca' chee̱ bxruze ca', ne bénneache ca': ―Quebe bi da zrinnaj dxezrelda' nun benne' nigá.
LUK 23:5 Benne' ca' belún chúchue̱' dizra' chee̱', gulenné̱': ―Dxegu'u xel-le̱' xúgute̱ benne' zaj zre̱'e̱ xe̱zre ca' zaj nababa Judea chee̱ xeledábague̱' xu'u lawe'. Guzú lawe̱' dxune̱' na naga nababa Galilea, na' na'a dxune̱' na nigá.
LUK 23:6 Gate ben Pilato da nigá, na' bche̱be̱' che naca Jesús benne' Galilea.
LUK 23:7 Gate gulé̱'e̱ le̱' naca Jesús benne' Galilea, na' Pilato gusél-le̱' Le̱' lau Herodes, benne' dxenná be'e̱ xe̱zre ca' zaj nababa Galilea, na' lu zra na' zue̱' Jerusalén.
LUK 23:8 Gate ble'e Herodes Jesús, gubéle̱'e̱ne̱', lawe' da bátate̱ dxaca lazre̱' lé'ene̱' Le̱', lawe' da ba benne̱' dxuluchalaj bénneache chee̱ Jesús, na' guca lazre̱' lé'ene̱' gun Jesús tu xel-la waca da za xabáa.
LUK 23:9 Da zante̱ da bche̱be̱' Jesús, na' Le̱' quebe bi beche̱be̱'.
LUK 23:10 Zráqueze benne' xíchaje̱ ca' chee̱ bxruze ca' na', nen benne' ca' dxuluxuzájle̱'e̱ da nadxixruj bea na, na' belún chúchue̱' dizra' chee̱' da dxelagu zria Jesús.
LUK 23:11 Nadxa Herodes, ne benne' chee̱' ca' dxjaque̱' wedil-la buluzúe̱' Le̱' chalá'ala, na' chee̱ xelún le̱' chee̱', bulugácue̱' Le̱' ladxe' bzawe ca naca zra tu benne' wenná bea. Nadxa Herodes besel-le̱' Le̱' lau Pilato.
LUK 23:12 Lu zra na' Pilato, ne Herodes belexaque̱' tuze, lawe' da belezrá'a ljwezre̱' nédxute̱.
LUK 23:13 Nadxa Pilato bchague̱' benne' xíchaje̱ ca' chee̱ bxruze ca', ne benne' xu'u lawe' ca',
LUK 23:14 na' guzre̱' benne' ca': ―Le'e guche̱le benne' nigá za'le naga zua', dxennale dxegú'u xel-le̱' bénneache chee̱ xeledábague̱' xu'u lawe'. Neda' ba bche̱ba' Le̱' laule le'e, na' quebe bi da zrinnaj dxezréleda' nune̱' ca naca da dxennale chee̱'.
LUK 23:15 Cá'anqueze Herodes quebe bi da zrinnaj bzrélene̱' da nun Jesús, na' budée̱' Le̱' launtu'. Quebe bi ne gune̱' chee̱ chuga' chee̱' gatie̱'.
LUK 23:16 Gudéa' Le̱' xel-la zi', na' gusánqueza' Le̱'.
LUK 23:17 Dxácate̱ dxaca laní na', Pilato dxal-la' gune̱' tu da dxelezaca ba lazre' bénneache, gusane̱' tu benne' xu'e̱ lizre xia.
LUK 23:18 Xúgute̱ benne' ca' gulezú lawe̱' dxelebezre xe̱'e̱, dxelenné̱': ―¡Gate benne' nigá! ¡Bsan Barrabás na'!
LUK 23:19 Barrabás nigá gulegú'e̱ le̱' lizre xia lawe' da gudábague̱' xu'u lawe', na' be̱tie̱' tu benne'.
LUK 23:20 Pilato guca lazre̱' gusane̱' Jesús, na' bchálajle̱ne̱' benne' ca' xetú.
LUK 23:21 Na' benne' ca' gulebezre xe̱'e̱ zízrajdxa, dxelenné̱': ―¡Bde̱'e̱ xaga béguaj! ¡Bde̱'e̱ xaga béguaj!
LUK 23:22 Da guxunne' lasa gunná Pilato: ―¿Bizra da zrinnaj nune̱'? Quebe bi dxezréleda' da gudé na Le̱' gatie̱'. Gudéa' Le̱' xel-la zi', na' te na' gusana' Le̱'.
LUK 23:23 Na' benne' ca' belún chúchue̱' dizra' chee̱' chee̱ te̱'e̱ xaga béguaj, ne gulebezre xá'atie̱', nen benne' xíchaje̱ ca' chee̱ bxruze ca', cadxa guca ca da gulaca lazre̱'.
LUK 23:24 Nadxa Pilato guchugue̱' chee̱ Jesús gaca chee̱' ca da dxelaca lazre' benne' ca'.
LUK 23:25 Na' bsane̱' bénnea' belenabe̱', xu'e̱ lizre xia lawe' da gudábague̱' xu'u lawe', ne be̱tie̱' tu benne', na' bdee̱' Jesús chee̱ gaca chee̱' ca dxelaca lazre' benne' ca'.
LUK 23:26 Gate zjaque̱' zaj naché̱'e̱ Jesús chee̱ xuludé̱'e̱ Le̱' xaga béguaj, na' gule̱le̱' tu benne' Cirene, le̱' Simón, zezé̱'e̱ le̱'e̱ xixre', na' bulugu'e̱ le̱' xaga béguaj chee̱ Jesús, na' zéaje̱' cuzru Jesús na'.
LUK 23:27 Na' xjácale̱ Le̱' benne' zante̱, ne nu'ula zan dxelebezre̱', na' dxelebezre xache̱' ne̱ chee̱ da dxaca chee̱ Jesús.
LUK 23:28 Nadxa Jesús gunné̱'e̱ nu'ula ca', na' guzre̱' le̱': ―Le'e, nu'ula Jerusalén, quebe cuézrele chia' neda'. Le cuezre cheé̱quezle, ne chee̱ zrí'inele,
LUK 23:29 lawe' da zrin zra gate xelenné̱': “Ba neza zren naca na chee̱ nu'ula wizre, ne nu'ula ca' cabata' gulezúe̱' zi'i, ne nu'ula ca' cabata' bulugazre̱' bidau'.”
LUK 23:30 Lu zra na' xelezú lau bénneache xelé̱'e̱ xi'a ca': “Le gugacu netu' xu.” Na' xelé̱'e̱ xí'adu ca': “Le gucache netu'.”
LUK 23:31 Che dxelune̱' da caní chia' neda', naca' ca tu xaga ban, ¿gázradxa xelune̱' chee̱le le'e, nácale ca xaga bizre ca'?
LUK 23:32 Cá'anqueze guleché̱'e̱ chupa benne' we̱n da zrinnaj chee̱ xelútie̱' le̱' tu zren nen Jesús.
LUK 23:33 Gate belezrine̱' lataj na' nazí le na, Calavera, da zéaje̱ na, Xi'a Zrita Xíchajdxu, na' buludé̱'e̱ Jesús xaga béguaj, ne cá'anqueze belune̱' chee̱ benne' we̱n da zrinnaj ca', tue̱' cuite̱' xabe̱la, ne xetúe̱' cuite̱' xéglala.
LUK 23:34 Ca dxuludé̱'e̱ Le̱' xaga béguaj, na' gunná Jesús: ―Xrae, bnite lau chee̱ benne' caní lawe' da quebe zaj nézene' bi na' dxelune'. Na' benne' dxjaque̱' wedil-la gulebeje̱' da dxunna bea' chee̱ xelezí'e̱ late' weaj zra lana Jesús.
LUK 23:35 Benne' ca' zaj zre̱'e̱ na' dxelenné̱'e̱, ne benne' xu'u lawe' ca' belún le̱' chee̱', dxelenné̱': ―Bselé̱' benne' xula ca'. Na'a dxal-la' guselá cuine̱' che da li naque̱' Cristo, Bénnea' Gucá'a Dios.
LUK 23:36 Cá'anqueze benne' dxjaque̱' wedil-la belún le̱' chee̱', na' gulebigue̱' cuita Jesús, ne buluxí'aje̱' Le̱' nupe zichaj.
LUK 23:37 Gulé̱'e̱ Le̱': ―Che lue' nacu' Wenná Bea chee̱ judío ca', bselá cuinu'.
LUK 23:38 Zua xichaj Jesús tu da naxúaj nen dizra' griego, ne dizra' latín, ne dizra' hebreo, da dxenná na: ―Wenná Bea chee̱ judío ca'.
LUK 23:39 Tu benne' we̱n da zrinnaj, bénnea' de̱'e̱ xaga béguaj be̱n le̱' chee̱ Jesús, dxenné̱': ―Che Lue' nacu' Cristo, bselá cuinu', ne bselate̱ netu'.
LUK 23:40 Na' xetú benne' we̱n da zrinnaj na' gudil-le̱' ljwezre̱'. Guzre̱' le̱': ―¿Quebe dxezrebu' Dios? Lue' dxezácaquezu' ca da gulechugue̱' chee̱' Le̱'.
LUK 23:41 Dxi'u dxezácadxu ca da dxál-la'queze sácadxu, lawe' da dxaca chee̱dxu da dxal-la' sidxu ca naca da zrinnaj da nundxu, san benne' nigá quebe bi da zrinnaj nune̱'.
LUK 23:42 Nadxa gunné̱': ―Jesús, xeajsá lazre' neda' gate su lau' nna be'u.
LUK 23:43 Na' beche̱be Jesús: ―Da li dxapa' lue', ná'ate̱la súale̱quezu' neda' lu lataj chawe' chee̱ Dios.
LUK 23:44 Guca ca wagubizra. Nadxa ca naca lu xe̱zr la xu guchul-la na cadxa bzrinte̱ na dxedá' chunna.
LUK 23:45 Gubizra guchul-la na, na' ladxe' ze̱ lu xudau' bdxuaj na chúpala.
LUK 23:46 Nadxa gudxezre xa'a Jesús, dxenné̱': ―Xrae, lu na'u dxegu'a be' xu'a. Ca gunné̱' ca', na' gutie̱'.
LUK 23:47 Gate benne' dxenná bé'ene̱' benne' dxjaque̱' wedil-la blé'ene̱' ca da guca, na' be̱ lá'ane̱' Dios, gunné̱': ―Da li, benne' nigá quebe bi da zrinnaj be̱ne̱'.
LUK 23:48 Xúgute̱ benne' ca' zaj zre̱'e̱ na', gate belelé'ene̱' ca da guca, na' besiá'que̱' na', dxelu'e̱ lachu'e̱.
LUK 23:49 Xúgute̱ benne' ca' zaj núnbe'e̱ Jesús, ne nu'ula ca' xjácale̱ne̱' Jesús gate bezé̱'e̱ Galilea, belexegá'ane̱' zítu'la dxelenné̱'e̱ da caní.
LUK 23:50 Zua tu benne' chawe' ne xrlátaje le̱' José, benne' xe̱zre Arimatea chee̱ xe̱zre ca' zaj nababa Judea. Nababe̱' xu'u lawe' blau chee̱ judío ca'.
LUK 23:51 José nigá dxebeze̱' zra nna bea Dios, na' quebe be̱ne̱' tuze ca da belún benne' xu'u lawe' blau ca'.
LUK 23:52 Benne' nigá guxíaje̱' xeajchálajle̱ne̱' Pilato, na' gunabe̱' latja gucache̱' Jesús.
LUK 23:53 Ca bexuzre buluxulétaje̱' Le̱' xaga béguaj, na' buluxuchele̱' Le̱' tu ladxe', na' gulu'e̱ Le̱' tu lu xe̱dxu ba, da ba gude̱ne̱' tu le̱'e̱ xi'a xiaj, naga quebe nu ne gáchequeze.
LUK 23:54 Naca na zra dxulucueze̱' chee̱ zra dxulupá'ane̱', da ba zua su lau na.
LUK 23:55 Nu'ula ca' xjácale̱ne̱' Jesús gate bezé̱'e̱ xe̱zre ca' zaj nababa Galilea, xjaque̱' na', ne belelé'ene̱' ba na', ne belené̱'e̱ ájala zaj nagu'e̱ Le̱' xe̱dxu ba.
LUK 23:56 Gate belexezrine̱' xu'u naga zaj zre̱'e̱, na' bulucueze̱' da du ca' dxelelále̱'e̱ zixre, ne da zaj naca na ca za dxelelále̱'e̱ na zixre. Belexezí' lazre̱' zra dxulupá'ane̱' cáte̱ze naca da gunná bea Dios.
LUK 24:1 Zra nedxu chee̱ da gazre zra, nu'ula ca' belezrine̱' dxu'a ba na' dxaní'sise̱', zaj nu'e̱ ca naca da ca' dxelelá zixre da bulucueze̱', na' xebal-la nu'ula xjácale̱ne̱' le̱'.
LUK 24:2 Gate belezrine̱' na', belelé'ene̱' xiaj da guduse dxu'a ba na', québedxa naduse na naga guduse na.
LUK 24:3 Belú'e̱ lu ba na', san quebe belexezrelne̱' Xránadxu Jesús na'.
LUK 24:4 Na' belezrébele̱'e̱, ne quebe zaj nézene̱' ájala xelune̱', na' belelé'ene̱' chupa benne' zaj ze̱' cuite̱', zaj nacue̱' zra lane̱' dxácatite na.
LUK 24:5 Nu'ula ca' belezúe̱' sudxú'ala lu xu, ne belezrébele̱'e̱. Na' benne' ca' gulé̱'e̱ le̱': ―¿Bizr chee̱ na' dxexílajle le'e tu benne' naca bane̱' láwela benne' gate?
LUK 24:6 Quebe zue̱' nigá, lawe' da ba bebane̱'. Le gusá lázre' da bchálajle̱ne̱' le'e gate ne zue̱' Galilea.
LUK 24:7 Gunné̱': “Benne' Gulje̱' Bénneache dxal-la' xuludée̱' Le̱' lu na' benne' dul-la ca', na' xuludé̱'e̱ Le̱' xaga béguaj, na' zra guxunne' zra xebane̱'.”
LUK 24:8 Nadxa nu'ula ca' xeajlesá lazre̱' ca naca da gunná Jesús.
LUK 24:9 Ca gudé besiá'que̱' dxu'a ba na', na' belexezrine̱' lu xe̱zre na', na' buluchálajle̱ne̱' benne' chinéaj gubáz ca' chee̱ Jesús, ne xúgute̱ benne' ca' xezica, ca naca da guca na'.
LUK 24:10 Nu'ula ca' xjaque̱' xeajlezenne̱' gubáz ca', zaj naque̱' María Magdalena, ne Juana, ne María xrna Jacobo, ne xebal-la nu'ula ca'.
LUK 24:11 Benne' gubáz ca' guléquene̱' da xálaze dxelenná nu'ula caní, na' quebe guléajle̱'e̱ chee̱'.
LUK 24:12 Nadxa bdxuaj Pedro, zeaj chégüe̱' dxu'a ba na', na' gate guné̱'e̱ lu ba na', blé'ene̱' ladxe' da bedxela Jesús xu'u na chalá'ala, na' bezé̱'e̱ zexíaje̱' xu'u naga guzé̱'e̱, dxexebánene̱' ca naca da guca.
LUK 24:13 Lu zra ná'queze, zjaca chupa benne' ca' busede Jesús xe̱zre Emaús, da naca na láte'ze zitu' naga zua Jerusalén.
LUK 24:14 Zjaque̱' dxuluchálaje̱' ca naca da guca lu zra ca'.
LUK 24:15 Dxácate̱ na' dxuluchálaje̱' caní, na' Jesús ná'queze gubigue̱' cuita benne' ca', na' guzú lawe̱' zéajle̱ne̱' le̱'.
LUK 24:16 Quebe belexúnbe'e̱ Jesús, lawe' da guzúa tu da guxúa na xiaj lau benne' ca'.
LUK 24:17 Nadxa bche̱be Jesús benne' ca': ―¿Bizra da na' dxuchálajle̱ ljwézrele dxácate̱ xu'ule neza? ¿Bizr chee̱ na' zale dxewí'ine lázrele?
LUK 24:18 Tu benne' ca' le̱' Cleofas beche̱be̱': ―Xúgute̱ benne' zaj nézene̱' ca da guca xe̱zre Jerusalén lu zra caní. ¿Nacu' lue' benne' zitu' zu' Jerusalén, na' tuze lue' quebe nézenu' ca da guca na'?
LUK 24:19 Nadxa Le̱' guzre̱' benne' ca': ―¿Bizra guca na'? Gulé̱'e̱ Le̱': ―Da guca chee̱ Jesús, benne' Nazaret. Guque̱' tu benne' bchálaje̱' waláz chee̱ Dios, na' xel-la waca zren ca' be̱ne̱', ne bchálaje̱' dizra' lau Dios, ne lau xúgute̱ bénneache.
LUK 24:20 Na' benne' xíchaje̱ ca' chee̱ bxruze ca', ne benne' xu'u lawe' chee̱ntu' ca' buludée̱' Le̱' chee̱ gulechugue̱' chee̱' gatie̱', na' buludé̱'e̱ Le̱' xaga béguaj.
LUK 24:21 Netu' guleza lázrentu' Le̱' naque̱' Benne' dxal-la' guselé̱' xe̱zr la xu Israel. Na'a, ba zeaj chunna zra guca da ca'.
LUK 24:22 Bal-la nu'ula ca' ládujla netu' buluzúaqueze̱' netu' lu da ste̱be, lawe' da xjaque̱' dxaní'sise̱' dxu'a ba chee̱' na',
LUK 24:23 na' gate quebe belexezrelne̱' Le̱', na' belexelé̱'e̱ naga zúantu', ne gulenné̱' belelé'ene̱' chupa gubáz chee̱ xabáa ca' bululé'e lawe̱' nu'ula ca', na' gulé̱'e̱ le̱' nabán Jesús.
LUK 24:24 Nadxa bal-la benne' ljwézrentu' ca' xjaque̱' dxu'a ba na', na' belelé'ene̱' cáte̱ze na' gulenná nu'ula ca', san quebe belelé'ene̱' Jesús.
LUK 24:25 Nadxa gunná Jesús: ―Le'e quebe dxéajni'ile, na' ne naca zide' lázrdaule chee̱ quebe chéajle̱le xúgute̱ da gulenná benne' ca' buluchálaje̱' waláz chee̱ Dios.
LUK 24:26 ¿Quebe dxal-la' saca Cristo da caní nédxudxa ca xegá'ane̱' szren?
LUK 24:27 Nadxa guzú lawe̱' dxuzéajni'ine̱' benne' ca' ca naca xúgute̱ da naxúaj lu xiche chee̱ Dios naga dxuchalaj na chee̱ Le̱'. Guzú lawe̱' lu xiche ca' chee̱ Moisés, na' ne zéajdxaqueze na lu xiche ca' chee̱ benne' ca' buluchálaje̱' waláz chee̱ Dios.
LUK 24:28 Gate belezrine̱' lu xe̱zre naga zjaque̱', Jesús be̱ne̱' ca benne' zeajte̱ze̱' xu'e̱ neza.
LUK 24:29 Na' benne' ca' buluxucá'ane̱' Le̱' xadía, dxelenné̱': ―Begá'anale̱ netu', lawe' da ba zeaj dxezré', ne ba dxe' xrínnequeze na'a. Nadxa Jesús guxú'ule̱ne̱' benne' ca'.
LUK 24:30 Gate na' dxé'le̱ne̱' le̱' dxelawe̱', guqué̱'e̱ xeta xtila, ne bzúzruje̱' na, na' guzre̱' Dios “Xcalenu'”, ne bnézruje̱' na benne' ca'.
LUK 24:31 La' ná'queze becuasa ca naca da guxúa na xiaj lau benne' ca', na' belexúnbe'e̱ Jesús, san la' ná'queze benite Le̱' lau benne' ca'.
LUK 24:32 Na' gulé̱ ljwezre̱': ―¿Quebe guzúa xel-la dxebé lu lázrdaudxu gate ze̱'e̱ dxuchálajle̱ne̱' dxi'u tu neza, ne bzéajni'ine̱' dxi'u ca naca da naxúaj lu xiche chee̱ Dios?
LUK 24:33 Nadxa, ne québedxa gulezrene̱', belexegu'e̱ neza, zeajxaque̱' Jerusalén, naga belelé'ene̱' zaj nazraga benne' chinéaj gubáz ca', ne benne' ljwezre̱' ca'.
LUK 24:34 Benne' ca' zaj nazrague̱' na' gulé̱'e̱ benne' chupa ca': ―Da li bebán Xránadxu, na' Simón ba blé'ene̱' Le̱'.
LUK 24:35 Nadxa benne' chupa ca' buluzenne̱' le̱' ca naca da guca la neza, ne ca belexúnbe'e̱ Jesús gate bzúzruje̱' xeta xtila na'.
LUK 24:36 Ne dxuluchálajte̱' caní gate ble'e lau Jesús gachaj lawe' benne' ca', na' bgape̱' le̱' diuzre, dxenné̱': ―Xela dxebeza zri lazre' súale̱ na le'e.
LUK 24:37 Na' benne' ca' belexruse̱', ne belezrébele̱'e̱. Guléquene̱' dxelelé'ene̱' bxinne dxe̱la.
LUK 24:38 Na' Jesús guzre̱' benne' ca': ―¿Bizr chee̱ na' dxezrébele? ¿Bizr chee̱ na' dxaca chupa lázrele?
LUK 24:39 Le na' na'a caní, ne le na' ni'a. Néda'queza' na'. Le gutá neda', ne le guxúe xque neda'. Tu bxinne dxe̱la quebe napa na be̱la' zrita, ca dxelé'ele le'e napa' neda'.
LUK 24:40 Ca dxe̱'e̱ benne' ca' da nigá, na' blé'ene̱' le̱' ne̱'e̱, ne ni'e̱.
LUK 24:41 Benne' ca' québequeze dxeléajle̱'e̱ chee̱' lawe' da dxelebéle̱'e̱ne̱', ne dxelexebánele̱'e̱ne̱', na' guzre Jesús le̱': ―¿De̱ late' da gawa' nigá?
LUK 24:42 Nadxa bulunézruje̱' Le̱' late' be̱la' guzrúa xi', ne late' da zixre che bézudau',
LUK 24:43 na' gucá'a Jesús da ca', ne gudawe̱' na lau benne' ca'.
LUK 24:44 Nadxa guzre̱' benne' ca': ―Da ba guca chia' naca na ca da gucha' le'e gate ne zúale̱queza' le'e, gunnéa' dxal-la' gaca li ca naca xúgute̱ da naxúaj lu da bdxixruj be'e Moisés, ne lu xiche naga zaj naxúaj salmo ca', ne lu xiche ca' chee̱ benne' ca' buluchálaje̱' waláz chee̱ Dios.
LUK 24:45 Nadxa bzéajni'ine̱' benne' ca' ca da naxúaj lu xiche chee̱ Dios,
LUK 24:46 na' guzre̱' benne' ca': ―Caní naxúaj na dxal-la' gate Cristo, na' zra guxunne' zra dxal-la' xebane̱' ládujla benne' gate ca',
LUK 24:47 na' lu La Le̱' dxal-la' xuluchalaj bénneache lau xúgute̱ xe̱zr la xu ca'. Su lau gunle na lu xe̱zre Jerusalén, xe̱le bénneache dxal-la' xelexebí'i lazre̱' chee̱ gunite lau Dios dul-la zaj nabaga benne' ca'.
LUK 24:48 Le'e nácale benne' xelexeche̱be̱' da caní.
LUK 24:49 ¡Le nna'xque! Neda' sel-la' chee̱le ca da guche̱be lazre' Xra'. Le xegá'ana nigá lu xe̱zre Jerusalén, cadxa si'le xel-la waca da za xabáa.
LUK 24:50 Nadxa Jesús beche̱'e̱ benne' ca', belexedxúaje̱' Jerusalén, xeajxaque̱' xe̱zre Betania, na' guchisa na' Jesús, ne gunabe̱' gaca chawe' chee̱ benne' ca'.
LUK 24:51 Ne dxúntee̱' ca', na' bezé̱'e̱ naga zaj zra' benne' ca', begüéne̱' zexíaje̱' xabáa.
LUK 24:52 Ca bexuzre belúe lá'ane̱' Le̱', besiá'que̱' zeajxaque̱' Jerusalén lu dute̱ xel-la dxelebé,
LUK 24:53 na' gulezráqueze̱' chale'aj xudau' dxelúe lá'ane̱' Dios. Ca' naca na.
JOH 1:1 Gate guzú lau zua xúgute̱ da de̱, ba zúaqueze Bénnea' le̱' Xrtizra' Dios, da zéaje̱ na Benne' naque̱' dute̱ da nácaqueze Dios, na' Bénnea' le̱' Xrtizra' Dios zúale̱ne̱' Dios, ne nácaqueze̱' Dios.
JOH 1:2 Nédxudaute̱ Benne' nigá zúale̱ne̱' Dios.
JOH 1:3 Lu na' Benne' nigá be̱n Dios xúgute̱ da de̱. Quebe bi de̱ da quebe nun Le̱'.
JOH 1:4 Nácaqueze Le̱' xel-la' nabán, na' xel-la' nabán nigá naca na da dxusení na lu xichaj lázrdau bénneache chee̱ xelaca bane̱'.
JOH 1:5 Xel-la' naxaní' nigá dxusení na lu da chul-la chee̱ dul-la da zaj nabaga bénneache, na' da chul-la nigá quebe dxezeque na xusula na xel-la' naxaní' nigá.
JOH 1:6 Guzúa tu benne' le̱' Juan, gusel-la Dios bennea'.
JOH 1:7 Benne' nigá ble̱'e̱ chee̱ bchálaje̱' ca naca chee̱ Bénnea' naque̱' xel-la' naxaní' nigá, chee̱ xeléajle̱ xúgute̱ bénneache chee̱ Bénnea' ne̱ chee̱ da dxenné̱'.
JOH 1:8 Juan nigá quebe naque̱' xel-la' naxaní' na'. Ble̱'e̱ chee̱ bchálaje̱' ca naca chee̱ Bénnea' naque̱' xel-la' naxaní' nigá.
JOH 1:9 Xel-la' naxaní' li, da dxusení na lu xichaj lázrdau xúgute̱ bénneache ba za' la' na lu xe̱zr la xu nigá.
JOH 1:10 Bénnea' naque̱' Xrtizra' Dios zue̱' lu xe̱zr la xu nigá, na' lácala be̱n Dios xe̱zr la xu lu na' Bénnea', bénneache zaj zre̱'e̱ lu xe̱zr la xu quebe belexexúnbe'e̱ Le̱'.
JOH 1:11 Ble̱'e̱ naga zua da naca chee̱', na' benne' lazrie̱' ca' quebe gulezí' lu ne̱'e̱ Le̱'.
JOH 1:12 Benne' ca' gulezí' lu ne̱'e̱ Le̱', ne guléajle̱'e̱ chee̱', be̱'e benne' caní lataj xelaque̱' bi ca' chee̱ Dios.
JOH 1:13 Benne' caní québedxa zaj naque̱' ca zri'ine bénneacheze, bi ca' dxelálajbe' ne̱ chee̱ bénneache, u ne̱ chee̱ da dxezá lazre' tu benne'. Benne' caní zaj naque̱' bi ca' chee̱ Dios ná'queze.
JOH 1:14 Bénnea' naque̱' Xrtizra' Dios gúlaje̱' ca tu bénneache, na' guzúe̱' ládujla dxi'u, zaj zúale̱ xel-la' zri'i lazre', ne da li Le̱'. Blé'entu' ca naca xel-la' szren chee̱', tu xel-la' szren da nunezruj Xradxu Dios chee̱ Zrí'ine̱' tu licha'.
JOH 1:15 Juan bchálaje̱' ca naca chee̱ Bénnea', gunné̱': ―Benne' nigá naque̱' Bénnea' bchálaja' neda' chee̱' gate gunnéa' Bénnea' ze̱'e̱ te chia' neda' naque̱' szrendxa ca neda' lawe' da zúaqueze̱' nédxute̱ ca neda'.
JOH 1:16 Xúgute̱dxu ba guzidxu xel-la' zri'i lazre' chee̱' da dxúnnaqueze Le̱'.
JOH 1:17 Bla' da nadxixruj bea Dios ládujla dxi'u lu na' Moisés, na' xel-la' zri'i lazre', ne da li belelá' na lu na' Jesucristo.
JOH 1:18 Netú benne' quebe ne lé'ene̱' Dios. Zrí'ine̱' tu licha', bi nazrí'ite̱ lazre̱', benne' nigá guque̱' tuz ca nácaqueze Xre̱'.
JOH 1:19 Benne' xíchaje̱ ca' chee̱ judío ca', benne' zaj zre̱'e̱ Jerusalén, gulesel-le̱' bxruze ca', ne xrtia Leví, benne' ca' dxelune̱' zrin chee̱ xudau', na' belezrine̱' lau Juan chee̱ xuluche̱be xánnie̱' le̱' nu naque̱'.
JOH 1:20 Beche̱be Juan du lazre̱', gunné̱': ―Quebe naca' neda' Cristo. (Dizra' nigá zéaje̱ na Benne' guche̱be lazre' Dios sel-le̱'.)
JOH 1:21 Nadxa buluche̱be̱' le̱': ―¿Nuzra nacu'? ¿Nacu' Elías, bénnea' bchálaje̱' waláz chee̱ Dios? Beche̱be Juan: ―Cabí. Na' buluché̱bequeze̱' le̱': ―¿Nacu' bénnea' dxal-la' le̱'e̱, ne guchalaje̱' waláz chee̱ Dios, ca da gunná Moisés dxal-la' gaca na? Le̱' beche̱be̱': ―Cabí.
JOH 1:22 Nadxa buluché̱bedxaqueze̱' le̱': ―¿Nuzra nacu'? Dxun na ba xen gata' bi xeché̱bentu' chee̱ benne' gulesel-le̱' netu'. ¿Bi dxennáquezu' nu nacu'?
JOH 1:23 Juan beche̱be̱': ―Neda' naca' bénnea' naxúaj na ca naca chee̱' lu xiche chee̱ Dios, da dxenná: Wen chi'i tu benne' dxebezre xe̱'e̱ le̱'e̱ xixre' lawe' lataj, dxenné̱': “Le salaj tu neza li naga te Xránadxu.” Naquen cáte̱ze gunná Isaías, bénnea' bchalaje̱' waláz chee̱ Dios.
JOH 1:24 Benne' xudau' fariseo ca' gulesel-le̱' benne' caní chee̱ cheajlechálajle̱ne̱' Juan.
JOH 1:25 Le̱' buluche̱be̱' le̱': ―Che lue' quebe nacu' Cristo, ne Elías, ne bénnea' dxal-la' xedajchalaje̱' waláz chee̱ Dios, ¿bi xel-la' dxenná bea napu' dxuchú' bénneache nisa?
JOH 1:26 Juan guzre̱' benne' ca': ―Neda' dxuchúa' bénneache nisa lu nísaze. Zua tu benne' ládujla le'e quebe nézele ca szren naque̱'.
JOH 1:27 Benne' nigá ze̱'e̱ ca te chia' neda', na' zúaqueze̱' nédxudxa ca neda'. Quebe zaca' neda' cuéaja' zrele̱' da xu'u ni'e̱.
JOH 1:28 Xúgute̱ da caní guca na lu xe̱zr la xu chee̱ xe̱zre Betábara, da zua na chalá'a xe̱gu Jordán naga dxalaj gubizra, naga zua Juan dxuchúe̱' bénneache nisa.
JOH 1:29 Zra xula ble'e Juan dxezrín Jesús naga zue̱', na' gunné̱': ―¡Le nna'xque! Benne' nigá naque̱' Zríla'dau' chee̱ Dios, cue̱' dul-la zaj nabaga bénneache.
JOH 1:30 Neda' bchálaja' ca naca chee̱' gate gunnéa': Te chia' neda' za tu benne' naque̱' szrendxa ca neda' lawe' da zúaqueze̱' nédxudaute̱ ca neda'.
JOH 1:31 Néda'queza' quebe gunezda' nu naque̱'. Bla'a dxuchúa' bénneache nisa chee̱ xeleneze xe̱zre Israel nu Benne' naca Le̱'.
JOH 1:32 Cá'anqueze gunná Juan: ―Neda' ble'eda' Be' Lá'azxa bétaje̱' xabáa ca tu bgugu chíchedau', ne begá'anale̱ne̱' Benne' nigá.
JOH 1:33 Neda' quebe ne nezda' nu naque̱'. Dios na' nasel-le̱' neda' chee̱ guchúa' bénneache nisa, Le̱' guzre̱' neda': “Gate le'enu' Be' Lá'azxa xétaje̱' xegá'anale̱ne̱' tu benne', Benne' nigá gune̱' da zéaje̱ xel-la' dxedxúa nisa, guzúe̱' Be' Lá'azxa lu xichaj lázrdaule.”
JOH 1:34 Na'a ba ble'eda' guca da nigá, ne dxexeche̱ba' nácaqueze Benne' nigá Zri'ine Dios.
JOH 1:35 Zra xula zúaqueze na' Juan nen chupa benne' ca' dxusé̱dene̱'.
JOH 1:36 Gate blé'ene̱' dxedé na' Jesús, na' gunná Juan: ―¡Le nna'xque! ¡Benne' nigá naque̱' Zríla'dau' chee̱ Dios, bia gáteba' ne̱ chee̱ dul-la nabágadxu!
JOH 1:37 Dxúpate̱ benne' ca' dxuse̱de Juan belenne̱' ca da gunné̱', na' xjácale̱ne̱' Jesús.
JOH 1:38 Nadxa bexechaj Jesús, gunné̱'e̱ cúzrule̱', ne blé'ene̱' benne' ca' zá'aque̱' cúzrule̱', na' guzre̱' le̱': ―¿Bi dxexílajle? Benne' caní gulé̱'e̱ Jesús: ―Benne' Wese̱de, ¿gazra zu'?
JOH 1:39 Jesús beche̱be̱': ―Le da nna'le. Nadxa xjácale̱ne̱' Jesús, ne belelé'ene̱' naga zue̱', na' belexegá'anale̱ne̱' Le̱' zra na' lawe' da bache zeaj du dxedá' tapa.
JOH 1:40 Tu benne' chupa ca', benne' belenne̱' ca da gunná Juan, ne xjácale̱ne̱' Jesús, naque̱' Andrés, benne' biche Simón Pedro.
JOH 1:41 Andrés nigá la guxíajte̱' xeajdílaje̱' bi biche̱' Simón, na' guzre̱' le̱': ―Ba bezrélentu' Mesías. (Dizra' nigá zéaje̱ na Cristo, Bénnea' guche̱be lazre' Dios sel-le̱'.)
JOH 1:42 Nadxa Andrés guché̱'e̱ Simón naga zua Jesús, na' gate ble'e Jesús Simón na', na' guzre̱' le̱': ―Lue' nacu' Simón, zri'ine Jonás. Si' lau' Cefas. (Dizra' hebreo nigá zéaje̱ na: Pedro, da zeaje̱ na: Xiaj.)
JOH 1:43 Zra xula guca lazre' Jesús chéaje̱' naga nababa Galilea, na' bezrague̱' Felipe, ne guzre̱' le̱': ―Be̱n neda' tuze.
JOH 1:44 Felipe nigá naque̱' benne' xe̱zre Betsaida, da naca na lazre Andrés, ne Pedro.
JOH 1:45 Felipe guxíaje̱' xeajdílaje̱' Natanael, na' guzre̱' le̱': ―Ba bezrélentu' Bénnea' bzuaj Moisés chee̱' lu xiche naga zaj naxúaj da nadxixruj bea na, ne cá'anqueze chee̱ Benne' nigá buluzúaj benne' ca' buluchálaje̱' waláz chee̱ Dios. Benne' nigá naque̱' Jesús, zri'ine José, tu benne' xe̱zre Nazaret.
JOH 1:46 Na' gunná Natanael: ―¿Waca dxuaj tu da chawe' Nazaret? Felipe beche̱be̱': ―Gudá le'enu'.
JOH 1:47 Gate ble'e Jesús za Natanael naga zue̱', gunné̱': ―Nigá za' tu benne' naca xánnie̱' benne' Israel, benne' dxenné̱queze̱' da dxéquene̱'.
JOH 1:48 Nadxa Natanael bche̱be̱' Jesús: ―¿Ájazra naca núnbe'u neda'? Jesús guzre̱' le̱': ―Ble'eda' lue' nédxudxa gate za nne̱ Felipe lue', gate ze'u zran xaga higo.
JOH 1:49 Nadxa Natanael guzre̱' Jesús: ―Benne' Wese̱de, Lue' nacu' Zri'ine Dios. Lue' nacu' Wenná Bea chee̱ntu', benne' Israel.
JOH 1:50 Beche̱be Jesús: ―¿Dxéajle̱'u chia' lawe' da gucha' lue' ble'eda' lue' zran xaga higo? Walé'enu' da zaj naca na da szrendxa ca da nigá.
JOH 1:51 Da li dxapa' le'e, walé'equezle le'e naxalaj xabáa, na' gubáz chee̱ xabáa ca' chee̱ Dios dxelétaje̱', ne dxelexegüene̱' naga zua neda', Benne' Gulje̱' Bénneache.
JOH 2:1 Zra guxunne zra, na' guca laní chee̱ wechaga na' lu xe̱zre Caná da nababa Galilea. Xrna Jesús zue̱' na',
JOH 2:2 na' zua nu gunné̱ Jesús, ne benne' ca' dxusé̱dene̱' lu laní na'.
JOH 2:3 Bebizre xrise uva wal-la, na' xrna Jesús guzre̱' Le̱': ―Québedxa bi de̱ xrise uva wal-la xelé'aje̱'.
JOH 2:4 Jesús beche̱be̱': ―Nú'uladau', ¿bizr chee̱ na' dxu'u neda' caní? Quebe ne zrin zra gulé'e lau da naca'.
JOH 2:5 Xrne̱'e̱ guzre̱' benne' we̱n zrin ca': ―Le gun ca naca da xe̱'e̱ le'e.
JOH 2:6 Zaj nnita xrupa xesu' xiaj na', da dxuluchine judío ca' gate dxelibe ni'a ne̱'e̱ ca naca da zjácale̱ne̱'. Tu tu xesu' xiaj ca' dxeluzru na chupa u chunna dxe'e nisa.
JOH 2:7 Jesús guzre̱' benne' we̱n zrin ca': ―Le gusezrá nisa xesu' xiaj caní. Gulegué̱'e̱ nisa na, ne bulusuzrate̱' tu tu xesu' xiaj ca'.
JOH 2:8 Nadxa Jesús guzre̱' benne' ca': ―Le ca'a na, na'a, ne le gua na lau benne' ze̱' dxu'a ga dxelawe̱'. Ca'an belune̱'.
JOH 2:9 Bénnea' zue̱' dxu'a ga dxelawe̱' bxue̱' nisa na' da bexaca na xrise uva wal-la, ne quebe nézene̱' ga za na. Benne' we̱n zrin ca' zaj nézene̱' ga za na lawe' da gulegué̱'e̱ nisa na'. Nadxa bénnea' zue̱' dxu'a ga dxelawe̱' gunné̱' benne' wechaga na',
JOH 2:10 na' guzre̱' le̱': ―Xúgute̱ benne' dxelebéaje̱' nedxu xrise uva wal-la nácadxa chawe', na' gate ba gulé'ajle̱'e̱ benne' ca' zaj zre̱'e̱ laní, nadxa dxelebéaje̱' xrise uva wal-la quebe zúateca chawe'. Lue' bcuézaquezu' xrise uva wal-la chawe' na', ne guléaju' na na'a.
JOH 2:11 Da nigá da be̱n Jesús lu xe̱zre Caná da nababa Galilea naca na tu xel-la' waca zrente̱ da be̱ne̱' nedxu, da ble'e na xel-la' szren chee̱', na' benne' ca' dxusé̱dene̱' guléajle̱'e̱ chee̱'.
JOH 2:12 Gudé na' Jesús bezé̱'e̱ zexíaje̱' xe̱zre Capernaum, zéajle̱ xrne̱'e̱ Le̱' nen benne' biche̱' ca', ne benne' ca' dxusé̱dene̱'. Na' gulezúe̱' na' zane' zra.
JOH 2:13 Na' Jesús guxíaje̱' xe̱zre Jerusalén lawe' da ba za Laní Pascua gate benne' judío ca' dxulusá lazre̱' ca be̱n Dios, bebéaje̱' xra xrtawe̱' ca' lu xe̱zr la xu Egipto.
JOH 2:14 Lu xe̱zre Jerusalén blé'ene̱' lu chale'aj xudau' na' zaj zra' benne' dxelexutie̱' be̱zre ca', ne zrila' ca', ne bgúgudu ca', béadu ca' dxelutie̱' lau Dios. Cá'anqueze blé'ene̱' na' benne' dxuluxuché̱'e̱ dumí chee̱ xe̱zr zitu' ca'.
JOH 2:15 Gate ble'e Jesús da caní, na' bgu'e̱ du ca' da güe̱'e̱ benne' ca', na' bebéaje̱' ca naca benne' ca' tu zrente̱ nen be̱zre chee̱' ca', ne zrila' chee̱' ca'. Na' gudxú'une̱' lu xula dumí chee̱ benne' ca' dxuluxuché̱'e̱ dumí, ne bdxixre̱' blaga' ca' chee̱ benne' ca'.
JOH 2:16 Na' guzre̱' benne' ca' dxelexutie̱' bgúgudu ca': ―¡Le xebéaj da caní! Quebe gunle lizre Xra' ca tu lawe' xi'a.
JOH 2:17 Nadxa benne' ca' dxuse̱de Jesús xeajlesá lazre̱' da naxúaj na lu xiche chee̱ Dios, da dxenná na: Dxácate̱ zi' lázrdawa' lawe' da dxé'le̱'a gunne xue chee̱ lizru'.
JOH 2:18 Nadxa judío blau ca' buluche̱be̱' Jesús: ―¿Bi xel-la' waca da za xabáa gulé'enu' netu' da gulé'e na napu' xel-la' dxenná bea dxunu' da caní?
JOH 2:19 Beche̱be Jesús: ―Le guzría xi' xudau' nigá, na' neda', te chunna zra xechisa' na.
JOH 2:20 Nadxa judío ca' gulé̱'e̱ Le̱': ―Xrupe xun iza ba zeaj dxelune̱' xudau' nigá, na' Lue', ¿xechisu' na chunna zraze?
JOH 2:21 Bchalaj Jesús chee̱ xudau' na' da naca na be̱l-la' dxen chee̱'.
JOH 2:22 Chee̱ le̱ na', gate bebán Jesús ládujla benne' gate, na' benne' ca' bsé̱dene̱' xeajlesá lazre̱' ca da gunné̱', na' guléajle̱'e̱ chee̱ da naxúaj na lu xiche chee̱ Dios ca naca chee̱ Jesús, ne chee̱ da guzre Jesús le̱'.
JOH 2:23 Gate zua Jesús xe̱zre Jerusalén lu Laní Pascua chee̱ judío ca', na' benne' zan guléajle̱'e̱ chee̱' gate belelé'ene̱' ca naca xel-la' waca zren ca' da dxune̱'.
JOH 2:24 Jesús quebe bde cuine̱' lu na' benne' ca' lawe' da nézquezne̱' quegá xúgute̱ benne' ca' dxeléajle̱'e̱ chee̱'.
JOH 2:25 Quebe guchínene̱' nu benne' xe̱'e̱ Le̱' ca zaj naca bénneache lawe' da nézquezne̱' ca da zaj xu'u xichaj lázxdau bénneache.
JOH 3:1 Zua tu benne' xudau' fariseo le̱' Nicodemo. Naque̱' benne' blau láwela benne' judío ca'.
JOH 3:2 Benne' nigá guxíaje̱' xeajnné̱'e̱ Jesús chizrela, na' guzre̱' Le̱': ―Benne' Wese̱de, nézentu' Dios nasel-le̱' Lue' chee̱ gusé̱denu' netu' lawe' da quebe nu benne' gaca gune̱' ca zaj naca xel-la' waca zrente̱ da dxunu' Lue' che quebe zúale̱ Dios le̱'.
JOH 3:3 Nadxa Jesús guzre̱' le̱': ―Da li dxapa' lue', nu benne' quebe gálaje̱' xecha lasa quebe gaca gaque̱' tuze benne' ca' dxenná be'e Dios.
JOH 3:4 Nicodemo bche̱be̱' Jesús: ―¿Ájazra gaca xexalaj tu benne' ba naque̱' gula? ¿Waca xexu'e̱ le̱'e xrne̱'e̱ chee̱ gálaje̱' xetú?
JOH 3:5 Jesús beche̱be̱': ―Da li dxapa' lue', nu benne' quebe gálaje̱' ne̱ chee̱ nisa chee̱ xrtizra' Dios, ne ne̱ chee̱ Be' Lá'azxa, quebe gaca chu'e̱ naga dxenná bea Dios.
JOH 3:6 Benne' nálaje̱' lu ni'a lu na' bénneache, naque̱' bénneacheze. Nu benne' nálaje̱' ne̱ chee̱ Be' Lá'azxa, naca ban bénnea' ne̱ chee̱ Be' Lá'azxa.
JOH 3:7 Quebe xebánenu' lawe' da dxapa' lue', dxun na ba xen gálaju' xecha lasa.
JOH 3:8 Gátete̱ze dxaca be'. Dxennu' ca schaga da dxun na, na' quebe nézenu' gala za na, ne gala zeaj na. Cá'anqueze naca chee̱ benne' zaj nálaje̱' ne̱ chee̱ Be' Lá'azxa. Gaca le'enu' da ba nun Be' na' lu xichaj lázxdau bénnea', na' quebe dxelé'enu' ájala dxun Be' na'.
JOH 3:9 Nadxa Nicodemo bche̱be̱' Jesús: ―¿Ájazra gaca da caní?
JOH 3:10 Beche̱be Jesús: ―Lue' nacu' tu benne' wesé̱de blau ládujla benne' Israel ca', na' ¿quebe nézenu' da caní?
JOH 3:11 Da li dxapa' lue', netu' dxuchálajntu' ca naca da nézentu', ne dxexeché̱bentu' ca da blé'entu', na' le'e quebe dxéajle̱le da dxe̱ntu' le'e.
JOH 3:12 Che quebe dxéajle̱le chia' gate dxuchálajle̱na' le'e ca naca chee̱ da dxaca lu xe̱zr la xu nigá, ¿ájazra gaca chéajle̱le chia' che guchálajle̱na' le'e chee̱ da dxaca xabáa?
JOH 3:13 ’Quebe ne cuen tu benne' xabáa chee̱ lé'ene̱' ca dxaca na'. Tuze Bénnea' bétaje̱' xabáa, Bénnea' naca' neda', Benne' Gulje̱' Bénneache, naca' Bénnea' zúaqueze̱' xabáa.
JOH 3:14 Ca be̱n Moisés, bde̱'e̱ tu be̱la' xia le̱'e̱ xaga naga zua le̱'e̱ xixre' lawe' lataj, cá'anqueze neda', Benne' Gulje̱' Bénneache, wuludá'queze̱' neda' tu le̱'e̱ xaga,
JOH 3:15 chee̱ quebe xelebía xi' nu benne' xeléajle̱'e̱ chia'. Zrué'e bénnea' xel-la' nabán da zeajlí canna.
JOH 3:16 Dios dxezrí'i lázrele̱'e̱ne̱' bénneache, na' chee̱ le̱ na' bdee̱' Zrí'ine̱' tu licha' chee̱ quebe xelebía xi' nu benne' dxeléajle̱'e̱ chee̱'. Zrué'e bénnea' xel-la' nabán da zeajlí canna.
JOH 3:17 Dios gusél-le̱' Zrí'ine̱' lu xe̱zr la xu nigá, quegá chee̱ guzría xi'e̱ bénneache, san chee̱ guselé̱' bénneache.
JOH 3:18 Bénnea' dxéajle̱'e̱ chee̱ Zri'ine Dios quebe naca chee̱' cuía xi'e̱, san nu benne' quebe dxéajle̱'e̱ chee̱' ba naca chee̱' cuía xi'e̱ lawe' da quebe dxéajle̱'e̱ chee̱ Zri'ine Dios, bi tu licha' chee̱'.
JOH 3:19 Benne' ca' quebe dxeléajle̱'e̱ chee̱' ba zaj naca chee̱' cuía xi'e̱ lawe' da gate bla' xel-la' naxaní' lu xe̱zr la xu nigá, beledánedxene̱' da chul-la ca xel-la' naxaní', lawe' da dxelune̱' da cale̱la.
JOH 3:20 Xúgute̱ benne' dxelune̱' da cale̱la dxelecuídene̱' xel-la' naxaní', ne quebe dxelebigue̱' lu xel-la' naxaní', chee̱ quebe gaca bea da cale̱la da dxelune̱'.
JOH 3:21 Benne' ca' dxelune̱' ca naca da li dxelebigue̱' lu xel-la' naxaní' chee̱ gaca bea naca na chee̱ Dios da dxelune̱'.
JOH 3:22 Gudé na' guxíaj Jesús naga nababa Judea nen benne' ca' dxusé̱dene̱', na' guzúe̱' na' zane' zra nen benne' ca', dxuluchúe̱' bénneache nisa.
JOH 3:23 Cá'anqueze zua Juan lu xe̱zr la xu chee̱ xe̱zre Enón da zua gáguze naga dxe' xe̱zre Salím, dxuchúe̱' bénneache nisa lataj na' lawe' da dé̱le̱'e̱ na' nisa zila, na' belezrín benne' zan naga zua Juan, na' beledxúe̱' nisa.
JOH 3:24 Da nigá guca na nédxudxa gate quebe ne xelegú'e̱ Juan lizre xia.
JOH 3:25 Nadxa bal-la benne' zaj de̱'e̱ Juan gulezú lawe̱' dxulutil-le̱' judío ca' dizra' ca naca chee̱ da dxucá'ana chawe na bénneache lau Dios.
JOH 3:26 Nadxa xeajlegue̱zre̱' Juan: ―Benne' wese̱de, bénnea' ble̱'e̱ naga zu' chalá'a xe̱gu Jordán naga dxalaj gubizra, bénnea' bchálajle̱nu' netu' chee̱', na'a dxuchúe̱' bénneache nisa, na' xúgute̱ bénneache zjácale̱ne̱' Le̱'.
JOH 3:27 Nadxa Juan guzre̱' benne' ca': ―Quegá nu benne' gaca bi gape̱' che quebe gunezruj Dios na chee̱'.
JOH 3:28 Le'e bénquezle gunnía' neda' quebe nácaqueza' neda' Cristo, Bénnea' guche̱be lazre' Dios sel-le̱'. Naca' tu benne' nasel-la Dios chee̱ quia lawa' lau Le̱'.
JOH 3:29 Lu laní chee̱ wechaga na', bénnea' si'e̱ nu'ula wechaga na' naque̱' benne' wechaga na', na' benne' ljwezre benne' wechaga na', bénnea' zue̱' na', ne dxenne̱' chee̱', dxebéle̱'e̱ne̱' gate dxenne̱' da dxuchalaj benne' wechaga na'. Cá'anqueze neda' dxebéle̱'e̱da' lawe' da caní naca' ljwezre Cristo.
JOH 3:30 Le̱' dxal-la' gácadxe̱' szren, na' neda' dxal-la' gácadxa' cá'aze.
JOH 3:31 Na' gunná Juan: ―Bénnea' za' xabáa nácadxe̱' blau ca xúgute̱ bénneache. Benne' naque̱' chee̱ xe̱zr la xu nigá naque̱' bénneacheze, ne dxuchálaje̱' ca naca chee̱ da dxaca lu xe̱zr la xu nigáze. Bénnea' ze̱'e̱ xabáa nácadxe̱' szren ca xúgute̱ bénneache.
JOH 3:32 Le̱' dxuchálaje̱' ca naca chee̱ da ba blé'ene̱', ne da ba benne̱' xabaala, na' quebe dxéajle̱' nu benne' chee̱ da dxenné̱'.
JOH 3:33 Che nu benne' dxéajle̱'e̱ chee̱', benne' nigá dxulé'ene̱' naca li ca da dxenná Dios.
JOH 3:34 Bénnea' nasel-la Dios dxuchálaje̱' xrtizra' Dios lawe' da dxunna Dios Le̱' Be' Lá'azxa chee̱' dute̱ ca naque̱'.
JOH 3:35 Xradxu Dios nazrí'ine̱' Zrí'inequeze̱', ne ba bdee̱' lu ne̱'e̱ xúgute̱ da de̱.
JOH 3:36 Nu benne' dxéajle̱'e̱ chee̱ Zri'ine Dios nape̱' xel-la' nabán da zeajlí canna, na' benne' quebe dxuzúe̱' dizra' chee̱ Zri'ine Dios quebe gape̱' xel-la' nabán caní. Wadée̱' lu da ba xa' da gun Dios.
JOH 4:1 Benne' fariseo ca' belenne̱' zjácale̱ benne' zandxa Jesús ca benne' zjácale̱ne̱' Juan, na' dxuchúa Jesús benne' zandxa nisa ca benne' dxuchúa Juan nisa.
JOH 4:2 Quebe dxuchúaqueze Jesús bénneache nisa. Benne' ca' dxusé̱dene̱' dxuluchúe̱' bénneache nisa.
JOH 4:3 Gate guque be'e Jesús da nigá, na' bezé̱'e̱ naga nababa Judea, xexíaje̱' naga nababa Galilea.
JOH 4:4 Ca xu'u Jesús neza, be̱n na ba xen tée̱' naga nababa Samaria.
JOH 4:5 Ca'an guca, bzrine̱' tu xe̱zre naga nababa Samaria nazí le na Sicar, da dxe' gáguze naga zua xe̱zr la xu na' bnezruj Jacob chee̱ zrí'ine̱', bi le̱be' José.
JOH 4:6 Lu xe̱zr la xu na' gudé̱n Jacob, zre sua Abraham, tu beaj situj. Ba dxeajxreque Jesús xu'e̱ neza, na' gudxé'e̱ dxu'a beaj na'. Naca na zran wagubizra.
JOH 4:7 Benne' ca' dxuse̱de Jesús xjaque̱' lu xe̱zre Sicar, xeajlegá'awe̱' da xelawe̱'. Dxácate̱ na' bzrin tu nu'ula Samaria dxu'a beaj na' zeajxri'e̱ nisa, na' Jesús guzre̱' le̱': ―Be̱nna nisa xí'aja'.
JOH 4:9 Nadxa nu'ula na' beche̱be̱': ―¿Ájazra naca, lue', benne' judío, dxenabu' neda' nisa, naca' nu'ula Samaria? Caní gunné̱' lawe' da quebe zaj zra' chawe' benne' judío ca' nen benne' Samaria ca'.
JOH 4:10 Nadxa beche̱be Jesús: ―Chela nézenu' da dxunna Dios, ne nua' dxenabe̱' lue' nisa xí'aje̱', lue' nábenu' neda', na' neda' gunna' lue' nisa da gunna na lue' xel-la' nabán.
JOH 4:11 Na' nu'ula na' guzre̱' Le̱': ―Benne', quebe bi nuxru' cuéaju' nisa, na' beaj nigá nácale̱'e̱ na situj. ¿Ájazra na' gunu' gunnu' neda' nisa chee̱ xel-la' nabán?
JOH 4:12 Xra xrtáuntu', Jacob, be̱nne̱' netu' beaj nigá, naga güé'equeze le̱' nisa, ne naga gulé'ajqueze zrí'ine̱', ne be̱ xixre' chee̱'. ¿Nácadxu' szrendxa ca le̱'?
JOH 4:13 Jesús beche̱be̱': ―Xúgute̱ benne' dxelé'aje̱' nisa chee̱ beaj nigá welexebílequezne̱' nisa.
JOH 4:14 Nu benne' xí'aje̱' nisa da gunézruja' neda', québedxa bílene̱' na, lawe' da nisa na' dxunézruja' neda' galaj na lu xichaj lázrdawe̱' ca tu beaj nisa da gunna na le̱' xel-la' nabán da zeajlí canna.
JOH 4:15 Nadxa nu'ula na' guzre̱' Le̱': ―Benne', be̱nna neda' nisa na', chee̱ québedxa gun na ba xen xida' nigá xedajxrí'a nisa.
JOH 4:16 Na' Jesús guzre̱' nu'ula na': ―Guxíaj xeajnné̱ benne' chiu', na' xídale nigá.
JOH 4:17 Na' beche̱be nu'ula na': ―Quebe nu chilá' benne' chia'. Nadxa Jesús guzre̱' le̱': ―Da li dxennáu' quebe nu chilá' benne' chiu',
JOH 4:18 lawe' da ba guzúale̱nu' gazxu' benne', na' bénnea' zúale̱nu' na'a quebe naque̱' benne' chiu'. Ca naca da nigá gunnáu' da li.
JOH 4:19 Gate nu'ula' benne̱' da nigá, na' gunné̱': ―Xran, dxéqueda' nacu' lue' benne' dxuchalaje̱' waláz chee̱ Dios.
JOH 4:20 Xra xrtáuntu' ca' bulucá'ana szrene̱' Dios lu xi'a nigá, na' le'e, benne' judío, dxennale dxun na ba xen gucá'ana szrendxu Dios xe̱zre Jerusalén.
JOH 4:21 Na' beche̱be Jesús: ―Guxéajle̱ chia', nu'ula. Ba za zra gate le'e gucá'ana szrenle Xradxu Dios, ne quebe gun na ba xen xídale lu xi'a nigá, ne quebe gun na ba xen chéajle Jerusalén.
JOH 4:22 Le'e, benne' Samaria, quebe núnbeale nua' dxucá'ana szrenle. Netu' núnbeantu' Nua' dxucá'ana szrentu', lawe' da za' benne' weselá ládujla benne' judío ca'.
JOH 4:23 Wazrín zra, ne ba dxezrín zra na', gate benne' ca' da li dxulucá'ana szrene̱' Xradxu Dios, xelune̱' na ne̱ chee̱ Be' Lá'azxa, ne ne̱ chee̱ da li, lawe' da dxaca lazre' Xradxu Dios xulucá'ana szren bénneache Le̱' caní.
JOH 4:24 Dios naque̱' Be', na' benne' dxulucá'ana szrene̱' Le̱', dxun na ba xen xulucá'ana szrene̱' Le̱' ne̱ chee̱ Be' Lá'azxa, ne ne̱ chee̱ da li.
JOH 4:25 Na' nu'ula na' guzre̱' Le̱': ―Neda' nezda' walá' benne' Mesías (da zéaje̱ na Cristo), na' gate la' Le̱', na' guzéajni'ine̱' dxi'u ca naca xúgute̱.
JOH 4:26 Jesús guzre̱' le̱': ―Neda' naca' Bénnea', dxuchálajle̱na' lue'.
JOH 4:27 Ca gunné̱' ca', na' belexezrín benne' ca' dxuse̱dene̱', na' belexebánene̱' lawe' da dxuchálajle̱ Jesús tu nu'ula Netúe̱' quebe bexázrjene̱' guche̱be̱' Le̱' bi da dxaca lazre̱', u bizra chee̱n dxuchálajle̱ne̱' nu'ula na'.
JOH 4:28 Nadxa nu'ula na' bca'ane̱' dxe'e chee̱' dxu'a beaj na', na' bezé̱'e̱ zexíaje̱' xe̱zre na' naga xeaje̱zre̱' benne' ca':
JOH 4:29 ―Le da lé'ele tu benne' guzre̱' neda' xúgute̱ da ba be̱na'. ¿Quegá benne' nigá Cristo, Bénnea' sel-la Dios?
JOH 4:30 Nadxa beledxúaj benne' ca' xe̱zre na', zjaque̱' naga zua Jesús.
JOH 4:31 Dxácate̱ na', benne' ca' dxuse̱de Jesús gulata' xuene̱' Le̱', gulenné̱': ―Benne' Wese̱de, gudagu late'.
JOH 4:32 Jesús guzre̱' benne' ca': ―De̱ da dxawa', da quebe núnbeale le'e.
JOH 4:33 Nadxa benne' ca' dxuse̱de Jesús gulezú lawe̱' dxuluche̱be ljwezre̱', dxelenné̱': ―¿Núteca bedajgú'e̱ da gudawe̱'?
JOH 4:34 Jesús guzre̱' le̱': ―Xela wagu chia' naca na chee̱ guna' da dxaca lazre' Xra', Bénnea' nasel-le̱' neda', ne chee̱ gusexuzra' guna' zrin chee̱'.
JOH 4:35 Le'e dxennale: “Xetapa beu' xelápadxu.” Neda' dxapa' le'e, le nna' bénneache zaj naque̱' ca tu lina, da bache naca na xelápadxu.
JOH 4:36 Benne' dxelape̱' dxezi'e̱ lazruj chee̱', na' da dxelape̱' naca na chee̱ xelapa bénneache xel-la' nabán da zeajlí canna, chee̱ sua xel-la' dxebé benne' dxaza tu zren nen benne' ca' dxelelape̱'.
JOH 4:37 Da li naca ca da dxelenná bénneache: Tu benne' dxaze̱', na' xetúe̱' dxelape̱'.
JOH 4:38 Neda' gusel-la' le'e xelápale naga quebe gúzale. Ca' naca na, benne' xula belune̱' zrin gulaze̱', na' le'e dxezile ba neza zrin da belún benne' ca'.
JOH 4:39 Benne' zan, benne' xe̱zre na' naga nababa Samaria, guléajle̱'e̱ chee̱ Jesús ne̱ chee̱ xrtizra' nu'ula na', gunné̱': “Guzre̱' neda' xúgute̱ da ba be̱na'.”
JOH 4:40 Gate belelá' benne' Samaria ca' naga zua Jesús, na' gulata' xuene̱' Le̱' xegá'ane̱' nen le̱', na' begá'ane̱' na' chupa zra.
JOH 4:41 Benne' zandxa guléajle̱'e̱ chee̱ Jesús gate belenne̱' ca da dxenná Le̱'.
JOH 4:42 Nadxa gulé̱'e̱ nu'ula na': ―Na'a dxéajle̱ntu' chee̱' quegá tuze ne̱ chee̱ da guzru' lue' netu', na' cá'anqueze lawe' da bénquezentu' netu' chee̱', na' nézentu' da li naque̱' Cristo, Bénnea' guselé̱' ca naca bénneache.
JOH 4:43 Gudé chupa zra bezá' Jesús xe̱zre ca' zaj nababa Samaria, na' guzé̱'e̱ zéaje̱' naga nababa Galilea.
JOH 4:44 Guxíaje̱' na' lawe' da gunnáqueze Jesús, gunné̱': “Tu benne' dxuchalaje̱' waláz chee̱ Dios, quebe dxelapa benne' lazrie̱' le̱' ba lá'ana.”
JOH 4:45 Gate bezrine̱' naga nababa Galilea, benne' zaj zre̱'e̱ na' belezí' lu ne̱'e̱ Le̱' du lazre̱', lawe' da xjácaqueze le̱' Laní Pascua da guca na Jerusalén, na' belelé'ene̱' xúgute̱ da be̱n Jesús lu laní na'.
JOH 4:46 Nadxa bezrín Jesús xe̱zre Caná naga nababa Galilea naga be̱ne̱' bexaca nisa xrise uva wal-la. Zua lu xe̱zre Capernaum tu benne' we̱n zrin blau chee̱ xu'u lawe', zua tu zrí'ine̱' bi biu quebe chawe' zúabe'.
JOH 4:47 Gate ben benne' we̱n zrin blau nigá ba bezá' Jesús naga nababa Judea, ne ba bezrine̱' naga nababa Galilea, na' guxíaje̱' xeajnné̱'e̱ Jesús, na' gutá' xuene̱' Le̱' chéaje̱' lizre̱' xexune̱' bi biu chee̱', bi na' ba zua gátebe'.
JOH 4:48 Nadxa Jesús guzre̱' le̱': ―Le'e quebe chéajle̱le chia' che quebe lé'ele xel-la' waca chee̱ xabáa da dxulé'eda'.
JOH 4:49 Benne' we̱n zrin blau na' gunné̱': ―Xran, gudázega na'a quebe ne gate zri'ina'.
JOH 4:50 Nadxa guzre Jesús le̱': ―Bexíaj lizru'. Naca ban bi chiu'. Benne' we̱n zrin blau na' guxéajle̱'e̱ chee̱ da guzre Jesús lé̱', na' bezé̱'e̱ zexíaje̱'.
JOH 4:51 Gate ba zua xezrine̱' lizre̱', na' benne' we̱n zrin chee̱' xeajlexezrígale̱' le̱', na' gulé̱'e̱ le̱': ―Naca ban zri'inu'.
JOH 4:52 Nadxa bche̱be̱' benne' ca' bátala guzú lau bexácabe', na' gulé̱'e̱ le̱': ―Ná'aqueze dxedé wagubizra bedxúaj da la da xu'ube'.
JOH 4:53 Nadxa benne' we̱n zrin blau na' bexúnene̱' guca na la' ná'queze gate guzre Jesús le̱': “Naca ban zri'inu'.” Ca'an guca, le̱', ne xúgute̱ benne' zaj zra' lizre̱' guléajle̱'e̱ chee̱ Jesús.
JOH 4:54 Da nigá naca na xel-la' waca zren da gudxupe' da be̱n Jesús gate bezrine̱' naga nababa Galilea.
JOH 5:1 Ca gudé na' guxú'u tu laní chee̱ judío ca', na' bezrín Jesús xe̱zre Jerusalén.
JOH 5:2 Lu xe̱zre na', gáguze naga zua dxa xu'u chee̱ xe̱zre da nazí le na Dxa Xu'u Chee̱ Zrila' Ca', dxe' tu cue'la nisa nazí le na Betesda lu dizra' hebreo, na' dxu'a nisa na' zaj nnita gazxu' lachila.
JOH 5:3 Lachila ca' zaj de̱ benne' zan zaj xu'e̱ we̱', benne' la chul-la ca', ne benne' zaj zua zri ni'a ne̱'e̱, ne benne' zrinnaj ca'. Dxelebeze̱' ca bixre nisa na'.
JOH 5:4 Ca'an naca lawe' da dxetaj tu gubáz chee̱ xabáa bata gala, ne dxunibe̱' nisa na', na' benne' nedxu dxeajchu'e̱ lu nisa na' ca dxedé dxunibe̱' na, dxexaque̱' chee̱ bítete̱ze xel-la' we̱' xu'e̱.
JOH 5:5 Zua tu benne' na' ba guca chinu chunne dxua iza xu'e̱ we̱'.
JOH 5:6 Gate ble'e Jesús benne' nigá, ne dxeque bé'ene̱' ba guca zane' iza xu'e̱ we̱' na', na' bche̱be̱' le̱': ―¿Dxaca lazru' xexacu'?
JOH 5:7 Benne' we̱' na' beche̱be̱': ―Benne', quebe nu chilá' benne' cu'e̱ neda' lu nisa na' ca dxedé dxebixre na. Tu tu lasa gate dxaca lazra' chu'a, benne' xula dxu'e̱ nédxudxa.
JOH 5:8 Jesús guzre̱' le̱': ―¡Guxasa! Becá'a da'a chiu', ne bexíaj.
JOH 5:9 La' ná'queze bexaca benne' we̱' na', na' bequé̱'e̱ da'a chee̱', ne guzú lawe̱' dxedé̱'. Zra na' naca zra dxulupá'ana judío ca',
JOH 5:10 na' benne' judío ca' gulé̱'e̱ bénnea' bexaque̱': ―Na'a naca na zra dxupá'anadxu. Quebe naca na gu'u da'a chiu'.
JOH 5:11 Na' benne' na' beche̱be̱': ―Bénnea' bexune̱' neda' guzre̱' neda': “Becá'a da'a chiu', ne bexíaj.”
JOH 5:12 Nadxa buluche̱be̱' le̱': ―¿Nuzra na' guzre̱' lue': Becá'a da'a chiu', ne bexiaj?
JOH 5:13 Benne' na' quebe nézene̱' nu bénnea' bexune̱' le̱' lawe' da ba zexíaj Jesús láwela benne' zan ca' zaj zre̱'e̱ na'.
JOH 5:14 Ca gudé na' Jesús bezrague̱' bénnea', dxedé̱' chale'aj xudau', na' guzre̱' le̱': ―¡Gunná'xque! Ba bexacu' na'a. Québedxa gunu' dul-la, chee̱ quebe bi sacu' xetú da wál-ladxa.
JOH 5:15 Nadxa benne' na' bezé̱'e̱ zexíaje̱', na' bzenne̱' judío ca' bexún Jesús le̱'.
JOH 5:16 Chee̱ le̱ na' benne' judío ca' guláu zi' xuzre̱' Jesús, ne gulaca lazre̱' xelútie̱' Le̱' lawe' da dxune̱' da caní lu zra dxulupá'ane̱'.
JOH 5:17 Jesús guzre̱' benne' ca': ―Dios, Xra', tu dxúnzqueze̱' zrin, na' neda' dxuna' zrin.
JOH 5:18 Chee̱ le̱ na' benne' judío ca' gulaca lázredxe̱' xelútie̱' Jesús lawe' da quegá tuze dxuzúe̱' chalá'ala da nadxixruj bea na chee̱ zra dxulupá'ane̱', na' cá'anqueze dxun cuine̱' ca Dios gate gunné̱' Dios nácaqueze̱' Xre̱'.
JOH 5:19 Nadxa Jesús guzre̱' benne' judío ca': ―Da li dxapa' le'e, neda', Zri'ine Dios, quebe gaca bi guna' cheé̱zqueza'. Tuze dxuna' da dxelé'eda' dxun Xra'. Xúgute̱ da dxun Xra', cá'anqueze dxuna' neda', Zrí'ine̱'.
JOH 5:20 Dios, Xra', nazrí'ine̱' neda', Zrí'ine̱', ne dxulé'ene̱' neda' xúgute̱ da dxúnqueze̱' Le̱', na' gulé'ene̱' neda' da zaj nácadxa szren ca da ca' dxuna', na' xebánequezle le'e ca xelaca na.
JOH 5:21 Ca dxun Xradxu Dios, dxusebane̱' benne' gate, ne dxuxunézruje̱' xel-la' nabán chee̱', cá'anqueze neda', Zrí'ine̱', dxuxunézruja' xel-la' nabán chee̱ benne' ca' dxaca lazra' xunézruja' na.
JOH 5:22 Xradxu Dios quebe dxuchi'e̱ nu benne', san ba be̱nne̱' neda', Zrí'ine̱', xel-la' dxenná bea guchi'a da dxelún tu tu bénneache,
JOH 5:23 chee̱ xelapa xúgute̱ benne' neda', Zrí'ine̱', ba lá'ana, cáte̱ze na' dxelape̱' ba lá'ana Dios, Xra'. Nu benne' quebe dxape̱' ba lá'ana neda', Zrí'ine̱', cá'anqueze quebe dxape̱' ba lá'ana Xradxu Dios nasel-le̱' neda'.
JOH 5:24 ’Da li dxapa' le'e, benne' dxenne̱' da dxennéa' neda', ne dxéajle̱'e̱ chee̱ Dios nasel-le̱' neda', benne' nigá nape̱' xel-la' nabán da zeajlí canna, na' quebe cuía xi'e̱ lawe' da ba bedxúaje̱' lu na' xel-la' gute, ne ba zue̱' lu xel-la' nabán.
JOH 5:25 Da li dxapa' le'e, wazrín zra, ne ba dxezrín zra na' gate benne' gate ca' xelenne̱' chi'a neda', Zri'ine Dios, na' benne' xuluzúa xrtizra' welaca bánqueze̱'.
JOH 5:26 Xráqueza' nape̱' xel-la' dxenná bea xunézruje̱' xel-la' nabán da naca na li lazre' chee̱ bénneache, ne cá'anqueze ba be̱nne̱' neda', Zrí'ine̱', xel-la' dxenná bea xunézruja' bénneache xel-la' nabán caní,
JOH 5:27 ne ba be̱nne̱' neda' xel-la' dxenná bea guchi'a chee̱ bénneache lawe' da naca' Benne' Gulje̱' Bénneache.
JOH 5:28 Quebe xebánele chee̱ da nigá lawe' da zrin zra gate xúgute̱ benne' gate xelenne̱' chi'a
JOH 5:29 xelexedxúaje̱' lu xe̱dxu ba. Benne' ca' belune̱' da xrlátaje xelexebane̱' chee̱ xelape̱' xel-la' nabán da zeajlí canna. Benne' ca' belune̱' da cale̱la xelexebane̱' chee̱ xelebía xi'e̱.
JOH 5:30 Na' gunná Jesús: ―Neda' quebe bi gaca guna' cheé̱zqueza'. Neda' dxuchi'a chee̱ bénneache ca gunná bea Dios, Xra', neda', na' ca dxuchi'a naca na xrlátaje lawe' da quebe dxuna' ca da dxaca lázrequeza' neda'. Dxuna' ca da dxaca lazre' Xra', nasel-le̱' neda'.
JOH 5:31 Che neda' dxexeche̱ba' da nácaze cheé̱queza', da dxennéa' quebe naca na da dxunna bea na.
JOH 5:32 Zua tu benne' xula dxexeche̱be̱' da nácaqueze chia', na' da dxenné̱' naca na da dxunna bea na.
JOH 5:33 Le'e gusél-lale benne' xeajleche̱be̱' Juan, na' ca da beche̱be̱' naca na da li.
JOH 5:34 Da dxunna bea na da dxuxrén lazra' neda' quebe naca na chee̱ bénneacheze. Dxapa' le'e da nigá chee̱ lale le'e.
JOH 5:35 Juan na' guque̱' ca tu xi' da gula na, ne bsení na, na' le'e bezaca ba lázrele lu xi' na' tu chí'idau'.
JOH 5:36 Zua tu da dxunna bea na chia' neda', da nácadxa szren ca da bchalaj Juan. Da ca' dxuna' neda', da bsebaga Xra' neda' dxuna'. Da caní dxelunna bea na da li Dios, Xra', gusél-le̱' neda'.
JOH 5:37 Cá'anqueze Xra' nasel-le̱' neda' dxexeche̱be̱' chia'. Lácala ba bchalaj Le̱', le'e quebe ne xénele chi'e̱, ne quebe ne lé'ele Le̱',
JOH 5:38 ne quebe nuzúale dizra' chee̱' xichaj lázrdaule lawe' da quebe dxéajle̱le chia' neda', nasel-la Xra' neda'.
JOH 5:39 Le'e dxusé̱dele du lázrele da naxúaj na lu xiche chee̱ Dios lawe' da dxéquele xezrélele xel-la' nabán da zeajlí canna lu xiche na', na' da naxúaj na lu xiche chee̱ Dios dxuchalaj na ca naca chia' neda'.
JOH 5:40 Le'e quebe dxaca lázrele xídale naga zua' neda' chee̱ gápale xel-la' nabán na'.
JOH 5:41 ’Neda' quebe dxezi'a xel-la' ba lá'ana ca da dxelunna bénneache, da quebe naca na li lazre'.
JOH 5:42 Neda' núnbe'a le'e, ne nezda' quebe nazrí'ile Dios.
JOH 5:43 Bla'a neda' waláz chee̱ Dios, Xra', na' le'e quebe dxezí' lu na'le neda'. Che za' tu benne' lu da naca cheé̱zqueze̱', benne' na' wazí' lu na'le.
JOH 5:44 ¿Ájazra gaca chéajle̱le le'e chia' che dxunle zrin chee̱ xelapa ljwézrele le'e ba lá'ana, ne quebe dxue lázrele sile xel-la' ba lá'ana da dxunna Dios tu licha'?
JOH 5:45 Quebe guéquele néda'queza' gusebaga' le'e zria lau Dios, Xra'. Da gusebaga le'e zria naca na da ba gunná Moisésqueze, da na' dxuxrén lázrele guselá na le'e.
JOH 5:46 Che da li guxéajle̱le le'e chee̱ da gunná Moisés, cá'anqueze chéajle̱le chia' neda' lawe' da bzuaj Moisés ca naca chia' neda'.
JOH 5:47 Na'a, che quebe dxéajle̱le chee̱ da bzuaj le̱', ¿ájazra gaca chéajle̱le chee̱ da dxapa' le'e?
JOH 6:1 Ca gudé na' guxíaj Jesús xecha la'a dxu'a nísadau' chee̱ Galilea, da nazíqueze le na nísadau' chee̱ Tiberias.
JOH 6:2 Benne' zante̱ zjácale̱ne̱' Jesús lawe' da ba belelé'ene̱' xel-la' waca zren ca' da dxun Le̱', dxexune̱' benne' we̱' ca'.
JOH 6:3 Nadxa Jesús guluéne̱' tu lu xi'a, na' gudxé'e̱ na' nen benne' ca' dxusé̱dene̱'.
JOH 6:4 Ba zua gagu Laní Pascua chee̱ judío ca'.
JOH 6:5 Gate ble'e Jesús benne' zan ca' zá'aque̱' zeaj nawe̱' Le̱', na' guzre̱' Felipe: ―¿Gazra cheajxridxu da xelagu benne' zan caní?
JOH 6:6 Gunná caní Jesús chee̱ la' bi nna Felipe, lawe' da ba neze Jesús ca da gune̱'.
JOH 6:7 Nadxa beche̱be Felipe: ―Che sidxu xeta xtila lazruj da sidxu chee̱ chupa gaxúa zra, quebe gueque na xelezí' benne' caní late' weaj.
JOH 6:8 Nadxa Andrés, xetú benne' ca' dxuse̱de Jesús, ne naque̱' bi biche Simón Pedro, guzre̱' Jesús:
JOH 6:9 ―Ze̱ tu bi cuide' nigá nápabe' gazxu' xeta xtila zrua' cebada, ne chupa bela. ¿Ájazra gun da nigá gueque na chee̱ xúgute̱ benne' caní?
JOH 6:10 Nadxa gunná Jesús: ―Le xe̱ xúgute̱' xelebé'e̱. Naca lu daca lataj na', na' gulebé' ca du chi xun gaxúa benne' biu.
JOH 6:11 Nadxa gucá'a Jesús xeta xtila ca', na' ca gudé guzre̱' Dios “Xcalenu'”, bnézruje̱' na benne' ca' dxusé̱dene̱', na' benne' caní gulísie̱' na láwele benne' zan ca' zaj dxe'e̱ na'. Cá'anqueze be̱n Jesús chee̱ bela ca', na' bnézruje̱' ca da gulaca lazre' benne' ca'.
JOH 6:12 Gate gulélaje benne' ca', na' Jesús guzre̱' benne' ca' dxusé̱dene̱': ―Le xutupa da bízrujdu ca' da dxelexegá'ana na, chee̱ quebe bi gaca dítaje.
JOH 6:13 Belexequé̱'e̱ na, na' buluzré̱'e̱ chazrinnu xcuite da bizruj ca' zaj nagá'ana na chee̱ da gazxu' xeta xtila zrua' cebada ca'.
JOH 6:14 Nadxa benne' zan ca', gate belelé'ene̱' xel-la' waca zren nigá da be̱n Jesús, gulenné̱': ―Da li benne' nigá naque̱' bénnea' guchálaje̱' waláz chee̱ Dios, bénnea' dxal-la' le̱'e̱.
JOH 6:15 Guque bé'ene̱' Jesús dxelaca lazre̱' xeleché̱'e̱ Le̱' xadía chee̱ xuluzúe̱' Le̱' ca benne' wenná bea, na' bezé̱'e̱ na', ne begüéne̱' lu xi'a sibe na' chee̱ sue̱' le̱ze̱'.
JOH 6:16 Gate ba za xrinne, benne' ca' dxuse̱de Jesús belétaje̱' dxu'a nísadau',
JOH 6:17 na' gulu'e̱ lu da dxedá lawe' nísadau', ne gulezú lawe̱' zjaque̱' xeledée̱' xechalá'a nísadau' chee̱ xelezrine̱' xe̱zre Capernaum. Ca guxrinne, quebe ne xezrín Jesús na'.
JOH 6:18 Nadxa guzú lau dxaca tu be' bdunu' lawe' nísadau' na', na' xeajxruza chee̱ nísadau' na' guxásale̱'e̱ na.
JOH 6:19 Gate ba guledée̱' lu nísadau' na' catite sadxu tu chi'i zren, na' belelé'ene̱' Jesús ba dxezrine̱' naga ziaj da dxedá lawe' nísadau', dxezé̱'e̱ lawe' nísadau', na' belezrebe̱'.
JOH 6:20 Nadxa Jesús guzre̱' benne' ca': ―Neda' na'. Quebe zrébele.
JOH 6:21 Nadxa lu dute̱ xel-la' dxelebé gulezí' lu ne̱'e̱ Le̱' lu da dxedá lawe' nísadau' na', na' chadite̱ belezrine̱' lu xe̱zr la xu naga zjaque̱'.
JOH 6:22 Zra xula benne' zan ca', benne' belexegá'ana xecha la'a nísadau', guleque bé'ene̱' ba zeajxaca benne' ca' dxuse̱de Jesús lu da dxedá lawe' nísadau' tu licha' da dxe' chalá'a na', na' Jesús quebe guxíajle̱ne̱' benne' ca'.
JOH 6:23 Dxácate̱ na' xezícala da dxeledá lawe' nísadau', da ca' beledxúaj na xe̱zre Tiberias, belezrín na tu lataj da zua gáguze naga gulawe̱' xeta xtila na' ca gudé guzre Xránadxu Dios: “Xcalenu'.”
JOH 6:24 Chee̱ le̱ na' gate benne' zan ca' guleque bé'ene̱' québedxa zua Jesús na', ne cá'anqueze benne' ca' dxusé̱dene̱', na' gulu'e̱ lu da dxeledá lawe' nísadau', ne xjaque̱' xe̱zre Capernaum zeajlexedílaje̱' Jesús.
JOH 6:25 Gate benne' zan ca' belezrine̱' xecha la'a dxu'a nísadau', na' belexezrague̱' Jesús, ne buluche̱be̱' Le̱': ―Benne' Wese̱de, ¿bata bla'u nigá?
JOH 6:26 Jesús guzre̱' benne' ca': ―Da li dxapa' le'e, dxexílajle le'e neda' lawe' da gudágule, ne béljele, ne quegá lawe' da ble'ele xel-la' waca ca' da ble'eda' le'e.
JOH 6:27 Quebe cue'le gunne xue sile da gágule da te chee̱ na. Le cue' gunne xue sile da gágule da zeajlí canna, da na' gunna na le'e xel-la' nabán da zeajlí canna. Da nigá naca na xel-la' wagu da gunna' neda', Benne' Gulje̱' Bénneache, le'e, lawe' da bzua Xra' Dios nen neda' da dxunna bea na naca' Zrí'ine̱'.
JOH 6:28 Nadxa buluche̱be̱' Le̱': ―¿Bi dxal-la' guntu' chee̱ gaca ca da dxaca lazre' Dios guntu'?
JOH 6:29 Jesús beche̱be̱': ―Da dxaca lazre' Dios gunle naca na chéajle̱le chia' neda', naca' Bénnea' gusel-la Dios.
JOH 6:30 Nadxa buluche̱be̱' Le̱': ―¿Bizra xel-la' waca gunu' chee̱ le'entu' na, na' chéajle̱ntu chiu'? ¿Bizra dxunu'?
JOH 6:31 Xra xrtauntu' ca' gulawe̱' xeta maná le̱'e̱ xixre' lawe' lataj, ca naxúaj na lu xiche chee̱ Dios, dxenná na: Dios bgawe̱' benne' ca' xeta xtila da za xabáa.
JOH 6:32 Beche̱be Jesús: ―Da li dxapa' le'e, quegá Moisés na' bnézruje̱' benne' ca' xeta xtila da za xabáa. Dios, Xra', dxunne̱' le'e xeta xtila da za xabáa da naca na li lazre'.
JOH 6:33 Xeta xtila na' da dxunna Dios le'e naca na Bénnea' bétaje̱' xabáa, ne dxunézruje̱' chee̱ bénneache xel-la' nabán li lazre'.
JOH 6:34 Nadxa benne' ca' gulé̱'e̱ Le̱': ―Xran, tu bé̱nnazqueze chee̱ntu' xeta xtila caní.
JOH 6:35 Jesús guzre̱' benne' ca': ―Neda' naca' xeta xtila da dxunna na xel-la' nabán li lazre'. Benne' xide̱' naga zua' neda' cabátadxa tune̱', na' benne' chéajle̱'e̱ chia' cabátadxa bílene̱'.
JOH 6:36 Naca na ca ba gucha' le'e. Le'e na' quebe dxéajle̱le chia', lácala ba ble'ele neda'.
JOH 6:37 Xúgute̱ benne' ca' dxunna Xra' neda', xelelé̱'e̱ lawa', na' benne' ca' xelelé̱'e̱ naga zua', quebe guzúa' benne' ca' chalá'ala.
JOH 6:38 Neda' guzá'a xabáa, quegá chee̱ guna' ca dxaca lázrequeza' neda'. Bla'a chee̱ guna' ca da dxaca lazre' Xra', gusel-le̱' neda'.
JOH 6:39 Da dxaca lazre' Xra', nasel-le̱' neda', naca na chee̱ quebe gunitia' netú benne' ca' ba be̱nne̱' chia'. Nacan chee̱ gusebana' benne' ca' lu zra bze̱be.
JOH 6:40 Da dxaca lazre' Xra', nasel-le̱' neda', naca na chee̱ xelapa bénneache xel-la' nabán da zeajlí canna, xúgute̱ benne' ca' xelenné̱'e̱ neda', Zri'ine Dios, ne xeléajle̱'e̱ chia' neda', na' chee̱ gusebana' neda' benne' ca' lu zra bze̱be na'.
JOH 6:41 Gate belenne̱' da nigá, na' judío ca' gulezú lawe̱' dxelezí tizre̱' Jesús lawe' da gunné̱': “Neda' naca' xeta xtila da betaj xabáa.”
JOH 6:42 Nadxa gulenné̱': ―¿Quegá benne' nigá zri'ine José? Dxi'u núnbeadxu xra xrne̱'e̱. ¿Bizr chee̱ na' dxenné̱' bétaje̱' xabáa?
JOH 6:43 Nadxa Jesús guzre̱' benne' ca': ―Québedxa si tízrale.
JOH 6:44 Quebe nu benne' gaca xide̱' naga zua' neda', che quebe xedajgúa Xra' nasel-le̱' neda' bénnea', na' neda' gusebana' bénnea' lu zra bze̱be na'.
JOH 6:45 Lu xiche ca' naga naxúaj da gulenná benne' ca' buluchalaje̱' waláz chee̱ Dios, dxenná na: Dios gusé̱dene̱' xúgute̱ bénneache. Ca' gaca na, xúgute̱ benne' ca' dxuluzé̱ nague̱' ca da dxuse̱de Xra', dxelelé̱'e̱ naga zua'.
JOH 6:46 ’Quebe ne le'e nu benne' Xra'. Benne' tu licha', bénnea' blé'ene̱' Le̱', naca bénnea' guzé̱'e̱ naga zua Dios.
JOH 6:47 Da li dxapa' le'e, nu benne' dxéajle̱'e̱ chia' neda' nape̱' xel-la' nabán da zeajlí canna.
JOH 6:48 Neda' naca' xeta xtila da dxunna na xel-la' nabán li lazre'.
JOH 6:49 Xra xrtáule ca' gulawe̱' xeta maná le̱'e̱ xixre' lawe' lataj, na' gudé na' xúgute̱ benne' ca' gulatie̱'.
JOH 6:50 Xeta xtila nigá naca na da za xabáa, na' che nu benne' gawe̱' na, quebe gatie̱' tu chi'ize.
JOH 6:51 Néda'queza' naca' xeta xtila da dxunna na xel-la' nabán da za xabáa. Benne' gawe̱' xeta xtila nigá waca bánqueze̱' chadía chacanna. Xeta xtila na' da dxunna' neda' naca na be̱la' dxen cheé̱zqueza', da gunna' chee̱ xelaca bánqueze bénneache.
JOH 6:52 Nadxa benne' judío ca' gulezú lawe̱' dxuluche̱be ljwezre̱', dxelenné̱': ―¿Ájazra gun benne' nigá, gunne̱' dxi'u be̱la' dxen cheé̱zqueze̱' chee̱ gágudxu na?
JOH 6:53 Jesús guzre̱' benne' ca': ―Da li dxapa' le'e, che le'e quebe gágule be̱la' dxen chia' neda', Benne' Gulje̱' Bénneache, ne che quebe xí'ajle dxen chia', quebe gápale xel-la' nabán li lazre'.
JOH 6:54 Benne' dxawe̱' be̱la' dxen chia', ne dxí'aje̱' dxen chia' nape̱' xel-la' nabán da zeajlí canna, na' neda' gusebana' bénnea' lu zra bze̱be na'.
JOH 6:55 Be̱la' dxen chia' naca na xel-la' wagu li lazre' chee̱ bénne'du xu'ule, na' dxen chia' naca na da xele'aj bénneache da naca na li lazre'.
JOH 6:56 Benne' dxawe̱' be̱la' dxen chia', ne dxí'aje̱' dxen chia', naque̱' neda' tuze, na' néda'queza' naca' bénnea' tuze.
JOH 6:57 Xra' nasel-le̱' neda' xu'u lu ne̱'e̱ xel-la' nabán li lazre', na' neda' naca bana' ne̱ chee̱ Le̱'. Cá'anqueze bénnea' dxawe̱' da naca chia' neda' gaca bánqueze̱' ne̱ chia' neda'.
JOH 6:58 Da nigá naca na xeta xtila da za xabáa. Xeta xtila nigá quebe naca na ca xeta maná da gulagu xra xrtáule ca', na' gudé na' gulate xúgute̱'. Benne' dxawe̱' xeta xtila nigá waca bánqueze̱' chadía chacanna.
JOH 6:59 Bse̱de Jesús ca naca da caní naga zaj zra' benne' zan ca' lu xu'u naga dxelezraga bénneache chee̱ xe̱zre Capernaum.
JOH 6:60 Gate belén benne' zan ca' da nigá dxuse̱de Jesús, na' benne' ca' zjácale̱ Jesús gulenné̱': ―Dizra' caní dxenná Jesús zaj nácale̱'e̱ na ste̱be sidxu. ¿Nuzra gaca gun caní?
JOH 6:61 Guque bé'ene̱' Jesús dxelenné̱' chee̱ xrtizre̱', na' bche̱be̱' benne' ca': ―¿Dxuzúa dizra' nigá le'e ste̱be?
JOH 6:62 ¿Ájazra gunle checa' lé'ele neda', Benne' Gulje̱' Bénneache, xegüéna' xabáa naga zua' nédxute̱?
JOH 6:63 Be' naca na da dxunna xel-la' nabán li lazre'. Da naca na be̱la' dxen quebe bi zaca na. Dizra' ca' da ba gucha' le'e zaj naca na chee̱ Be', ne zaj naca na da dxelunna na xel-la' nabán li lazre'.
JOH 6:64 Bál-lale le'e quebe dxéajle̱le chia'. Caní gunná Jesús lawe' da nézene̱' nédxudaute̱ nu benne' ca' quebe dxeléajle̱'e̱ chee̱', ne nua' gudé Le̱' lu na' benne' guledábague̱' Le̱'.
JOH 6:65 Nadxa gunná Jesús: ―Chee̱ le̱ na' gucha' le'e, quebe nu benne' gaca xide̱' naga zua' neda' che quebe xedajgúa Xra' bénnea'.
JOH 6:66 Lu zra ná'queze benne' zan ca', benne' xjácale̱ne̱' Jesús, québedxa xjácale̱ne̱' Le̱'.
JOH 6:67 Nadxa Jesús bche̱be̱' benne' chazrinnu ca' dxusé̱dene̱', gunné̱': ―¿Cá'anqueze le'e dxaca lázrele xexíajle?
JOH 6:68 Beche̱be Simón Pedro: ―Xran, ¿nuzra chéajle̱ntu'? Dizra' chiu' naca na da dxunna na xel-la' nabán da zeajlí canna.
JOH 6:69 Netu' dxéajle̱ntu' chiu', ne nézentu' nacu' Cristo, Zri'ine Dios ban.
JOH 6:70 Jesús beche̱be̱': ―Neda' gucá'a le'e, benne' chazrinnu, na' tu benne' ládujla le'e xu'e̱ da xriwe̱'.
JOH 6:71 Da nigá gunná Jesús, bchálaje̱' ca naca chee̱ Judas Iscariote, zri'ine tu benne' le̱' Simón, lawe' da gudé Judas nigá Jesús lu na' benne' guledábague̱' Le̱'. Naque̱' tu benne' chazrinnu ca' dxuse̱de Jesús.
JOH 7:1 Gudé na' gudé Jesús naga nababa Galilea. Quebe guca lazre̱' tee̱' naga nababa Judea lawe' da dxelaca lazre' judío blau zaj zre̱'e̱ na' xelútie̱' Le̱'.
JOH 7:2 Ba za laní gate judío ca' dxelezúe̱' lu xu'u laga' ca'.
JOH 7:3 Chee̱ le̱ na' bi biche Jesús gulé̱'e̱ Le̱': ―Quebe xegá'anu' nigáze. Bexíaj Judea, chee̱ cá'anqueze benne' ca' dxeléajle̱ chiu' zaj zre̱'e̱ na' gaca xelelé'ene̱' ca da dxunu'.
JOH 7:4 Che nu benne' dxaca lazre̱' xelúnbe'e bénneache le̱', quebe dxune̱' da ca' bagácheze. Lawe' da dxunu' Lue' da caní, be̱n na lau xúgute̱ bénneache.
JOH 7:5 Caní gulenné̱' lawe' da quebe dxeléajle̱ benne' biche̱' ca' chee̱ Jesús.
JOH 7:6 Nadxa Jesús guzre̱' benne' ca': ―Quebe ne zrin zra cha'a na'. Chee̱le le'e bítete̱ze zra waca chéajle.
JOH 7:7 Benne' ca' zaj naca chee̱ xe̱zr la xu nigá quebe gaca xelecuídene̱' le'e. Dxelecuídene̱' neda' lawe' da dxulé'eda' neda' naca da cale̱la da dxelún benne' ca'.
JOH 7:8 Le chjaca le'e laní na'. Quebe sa'a neda' na'a lawe' da quebe ne zrin zra cha'a.
JOH 7:9 Ca gudé guzre Jesús benne' ca' da nigá, na' begá'ane̱' naga nababa Galilea na'.
JOH 7:10 Ca gudé besiá'aca benne' biche Jesús, na' cá'anqueze Le̱' guxíaje̱' laní na'. Bagácheze guxíaje̱' chee̱ quebe nu le'e Le̱'.
JOH 7:11 Benne' xíchaje̱ chee̱ judío ca' belexílaje̱' Jesús lu laní na'. Dxelenné̱': ―¿Gazra zua bénnea'?
JOH 7:12 Ládujla benne' zan ca', benne' zan buluchálaje̱' ca naca chee̱ Jesús. Bal-le̱' gulenné̱': “Naque̱' benne' xrlátaje.” Xebal-le̱' gulenné̱': “Quebe naque̱' xrlátaje lawe' da dxezí xe̱'e̱ bénneache.”
JOH 7:13 Quebe nu benne' bchálaje̱' caníqueze ca naca chee̱' lawe' da dxelezrebe̱' da xelún benne' xíchaje̱ ca' chee̱ judío ca'.
JOH 7:14 Ba zeaj gachaj laní na' gate guxú'u Jesús lu chale'aj xudau', na' guzú lawe̱' dxusé̱dene̱' benne' zaj zre̱'e̱ na'.
JOH 7:15 Belexebane benne' judío ca', dxelenné̱': ―¿Ájazra na' benne' nigá da zante̱ nézene̱', ne quebe bsé̱die̱' chee̱ xudau'?
JOH 7:16 Beche̱be Jesús: ―Da dxusé̱deda' neda' le'e quebe naca na cheé̱zqueza'. Naca na chee̱ Xra' nasel-le̱' neda'.
JOH 7:17 Che nu benne' dxaca lazre̱' gune̱' ca da dxaca lazre' Dios, na' wanézene̱' che da dxusé̱deda' naca na chee̱ Dios, u che dxennéa' ca da naca cheé̱zqueza'.
JOH 7:18 Benne' dxuchálaje̱' da naca cheé̱zqueze̱' dxune̱' na chee̱ xelapa bénneache le̱' ba lá'ana. Bénnea' dxue lazre̱' xelapa bénneache ba lá'ana bénnea' gusel-le̱' le̱', benne' nigá dxenné̱' da li, ne quebe bi dxenné̱' da naca na da we̱n lazre'.
JOH 7:19 ’Moisésqueze be̱nne̱' le'e da nadxixruj bea na, na' netule le'e quebe dxuzúale dizra' chee̱ da nadxixruj bea na na'. ¿Bizr chee̱ na' dxaca lázrele gútele neda'?
JOH 7:20 Belexeche̱be benne' zan ca': ―Xu'u lue' be' xriwe̱'. ¿Núzraqueze dxaca lazre' gutie̱' lue'?
JOH 7:21 Jesús guzre̱' benne' ca': ―Tu xel-la' waca be̱na' lu zra dxupá'anale, na' xúgute̱le le'e dxebánele.
JOH 7:22 Moisés be̱nne̱' da zéajle̱le, dxechúgule late' weaj be̱la' chee̱ be̱l-la' dxen chee̱ zrí'inele bi biudu ca' chee̱ xelexegá'anabe' xrlátaje lau Dios. Da nigá da dxunle quebe guzú lau na gate na' zua Moisés. Guzú lau na gate zaj zra' xra xrtau Moisés cá'ante̱. Chee̱ le̱ na' le'e dxechúgule late' be̱la' chee̱ be̱l-la' dxen chee̱ tu bi biúdau' chee̱ xegá'anabe' xrlátaje lau Dios lácala naca zra dxupá'anale.
JOH 7:23 Che caní dxunle lu zra dxupá'anale chee̱ quebe gusanle ca naca da bdxixruj be'e Moisés, ¿bizr chee̱ na' dxezrá'ale neda' lawe' da bexuna' dute̱ be̱l-la' dxen chee̱ tu benne' gate naca zra dxupá'anale?
JOH 7:24 Quebe guchí'ale le'e chee̱ tu da dxun benne' ca naca da dxelé'ezele. Gate bi da guchí'ale, le gun na lu da naca xrlátaje.
JOH 7:25 Nadxa bal-la benne' ca' zaj zre̱'e̱ Jerusalén gulezú lawe̱' dxuluche̱be ljwezre̱': ―¿Quegá benne' nigá bénnea' dxelexílaje̱' chee̱ xelútie̱' le̱'?
JOH 7:26 Nigá zue̱' dxuchálaje̱' láwela bénneache, na' quebe nu bi dxe̱ Le̱'. ¿Zaj neze benne' xíchaje̱ ca' da li naca benne' nigá Cristo, Bénnea' nasel-la Dios?
JOH 7:27 Netu' nézentu' ga za' benne' nigá. Gate xida Cristo, quegá nu neze ga ze̱'e̱.
JOH 7:28 Jesús zue̱' dxusé̱dene̱' benne' ca' chale'aj xudau', na' gate benne̱' da nigá, na' gunné̱' zizraj: ―Dxennale núnbeale neda', ne dxennale nézele ga za'a. Bla'a nigá, quegá cheé̱zqueza'. Bénnea' nasel-le̱' neda' naque̱' li lazre', na' Bénnea' quebe núnbeale le'e.
JOH 7:29 Neda' núnbe'a Le̱' lawe' da za'a naga zua Le̱', na' Le̱' gusél-le̱' neda'.
JOH 7:30 Nadxa gulaca lazre̱' xele̱l-le̱' Jesús. Quebe nu gude̱la Le̱' lawe' da quebe ne zrin zra chee̱ xelútie̱' Le̱'.
JOH 7:31 Benne' zan guléajle̱'e̱ chee̱ Jesús, na' gulenné̱': ―Gate xida Cristo, ¿gúnljadxe̱' xel-la' waca zrente̱ ca da dxun benne' nigá?
JOH 7:32 Benne' fariseo ca' belenne̱' ca da dxelenná bénneache ca naca chee̱ Jesús, na' le̱', ne benne' xíchaje̱ ca' chee̱ bxruze ca' gulesel-le̱' xra'aga we̱n zrin chee̱ xudau' chee̱ xele̱l-le̱' Jesús.
JOH 7:33 Nadxa gunná Jesús: ―Wazúale̱na' le'e xetú chí'idau', na' xezrínqueza' naga zua Bénnea' gusél-le̱' neda'.
JOH 7:34 Le'e wexílajle neda', na' quebe xezrélele neda', lawe' da quebe gaca sa'le naga sua' neda'.
JOH 7:35 Nadxa benne' judío ca' gulezú lawe̱' dxuluche̱be ljwezre̱': ―¿Gazra cheaj benne' nigá, naga quebe gaca xezreldxu Le̱'? ¿Waxíaje̱' naga zaj zra' benne' judío ca' zaj nase dínnaje̱' ládujla benne' xe̱zr la xu ca' chee̱ gusé̱dene̱' benne' quebe zaj naque̱' judío?
JOH 7:36 ¿Bizra zéaje̱ da nigá guzre̱' dxi'u: Wexílajle neda', na' quebe xezrélele neda' lawe' da quebe gaca sa'le naga sua' neda'?
JOH 7:37 Zra bze̱be chee̱ laní na' naca na zra blaudxa. Lu zra na' guzé̱ Jesús, na' gunné̱' zizraj: ―Che nu benne' dxebílene̱', dxal-la' xide̱' naga zua' neda', na' xí'aje̱'.
JOH 7:38 Naca na ca naxúaj na lu xiche chee̱ Dios, dxenné̱': “Benne' dxéajle̱'e̱ chia', lu lázrdawe̱' galaj xe̱gu nisa da gunna na xel-la' nabán.”
JOH 7:39 Da nigá gunná Jesús ca naca chee̱ Be' Lá'azxa, Bénnea' xelezí' benne' ca' xeléajle̱'e̱ chee̱ Jesús, lawe' da quebe ne la' Be' Lá'azxa lawe' da quebe ne xegá'ana szren Jesús naga zua Xre̱'.
JOH 7:40 Bal-la bénneache, gate belenne̱' da nigá, gulenné̱': ―Da li benne' nigá naque̱' Bénnea' guchalaje̱' waláz chee̱ Dios, Bénnea' dxal-la' xide̱'.
JOH 7:41 Xebal-le̱' gulenné̱': ―Benne' nigá naque̱' Cristo, Benne' guche̱be lazre' Dios sel-le̱'. Xebal-le̱' gulenné̱': ―¿Waca Cristo benne' Galilea?
JOH 7:42 Lu da naxúaj na lu xiche chee̱ Dios dxenná na gaca Cristo zri'ine zre sua David, ne gaque̱' benne' xe̱zre Belén, xe̱zre na' naga gulaj David.
JOH 7:43 Ca'an guca, gulaca benne' ca' chupa la'a ne̱ chee̱ Jesús.
JOH 7:44 Bal-le̱' gulaca lazre̱' xele̱l-le̱' Jesús, na' quebe nu bexazre gune̱' na.
JOH 7:45 Xra'aga we̱n zrin ca' chee̱ xudau' belexezrine̱' naga zaj zra' fariseo ca', ne benne' xíchaje̱ ca' chee̱ bxruze ca', na' benne' caní buluche̱be̱' xra'aga we̱n zrin ca': ―¿Bizr chee̱ na' quebe guche̱le bénnea'?
JOH 7:46 Belexeche̱be xra'aga we̱n zrin ca': ―Quebe ne guchalaj nu bénneache ca dxuchalaj benne' nigá.
JOH 7:47 Nadxa fariseo ca' gulé̱'e̱ xra'aga we̱n zrin ca': ―¿Cá'anqueze le'e be̱le lataj guzí xe̱'e̱ le'e?
JOH 7:48 Quebe nu ne chéajle̱ chee̱ bénnea', benne' xíchaje̱ caní, ne cá'anqueze benne' fariseo ca'.
JOH 7:49 Benne' ca' dxeléajle̱'e̱ chee̱ bénnea' quebe zaj núnbe'e̱ da nadxixruj bea na, ne zaj nabía xi'e̱.
JOH 7:50 Nicodemo, bénnea' guxíaje̱' xeajnné̱'e̱ Jesús chizrela naque̱' tu benne' fariseo ca', na' guzre̱' benne' ca':
JOH 7:51 ―Cate̱ze dxenná da nadxixruj bea chee̱dxu quebe gaca guzría xidxu tu benne' che quebe ne xénedxu xeche̱be̱' chee̱ nézedxu che bi da nabague̱'e̱.
JOH 7:52 Nadxa belexeche̱be benne' ca': ―¿Nácaquezu' lue' benne' Galilea? Gunná' xanne' da naxúaj na lu xiche chee̱ Dios, na' le'enu' netú benne' dxuchalaje̱' waláz chee̱ Dios quebe ne gálaje̱' naga nababa Galilea, naga zaj zra' bénneache quebe zaj naca xánnie̱' judío.
JOH 7:53 Nadxa tu tu benne' ca' xeajxaque̱' lizre̱'.
JOH 8:1 Na' Jesús guzé̱'e̱ zéaje̱' lu Xi'a Xaga Olivo.
JOH 8:2 Zra xula, gate guxaní', na' bezrín Jesús chale'aj xudau' na'. Xúgute̱ benne' ca' gulebigue̱' naga zua Jesús, na' Le̱' gudxé'e̱, ne guzú lawe̱' dxusé̱dene̱' benne' ca'.
JOH 8:3 Nadxa benne' ca' dxuluxuzájle̱'e̱ da nadxixruj bea Dios, ne benne' fariseo ca' guleché̱'e̱ tu nu'ula naga zua Jesús, belelé'ene̱' le̱' dxune̱' dul-la dxíchaje̱' xrba chee̱ xel-la' nuchaga na'. Buluzé̱' nu'ula na' laduj benne' zaj zre̱'e̱ na',
JOH 8:4 na' gulé̱'e̱ Jesús: ―Benne' Wese̱de, nu'ula nigá blé'entu' le̱' dxune̱' dul-la dxíchaje̱' xrba chee̱ xel-la' nuchaga na'.
JOH 8:5 Da bdxixruj be'e Moisés dxenná be'e netu' gútentu' nu'ula caní, güentu' le̱' xiaj. ¿Bizra dxennáu' Lue'?
JOH 8:6 Caní gulenná benne' ca' chee̱ xuludxixre̱' Jesús chee̱ xelezéquene̱' xelagu zria Le̱'. Nadxa gudxé' luche Jesús, ne guzú lawe̱' dxuzúaje̱' lu xu nen zrube ne̱'e̱.
JOH 8:7 Benne' ca' buluché̱bequeze̱' Jesús, na' Le̱' bezé̱' dxe̱'e̱ benne' ca': ―Nútete̱zlale le'e quebe nabágale dul-la, waca su laule güele nu'ula nigá xiaj.
JOH 8:8 Na' bebé' luche Jesús, ne bzúajqueze̱' lu xu.
JOH 8:9 Benne' ca', gate belenne̱' da nigá, quebe bzua xichaj lázrdawe̱' le̱' zrize, na' belexedxúaje̱' tu weaje̱'. Belexedxúaj za'a benne' gúladxa, na' ca belexedxúaj xúgute̱ benne' ca' dxelagu zrie̱' nu'ula', na' begá'ana Jesús tuze̱' nen nu'ula na', ze̱' laduj benne' ca' dxuluzé̱ nague̱' chee̱'.
JOH 8:10 Nadxa bezé̱' Jesús, ne gate québedxa nu benne' ca' ble'e Jesús, benne' dxulagu zrie̱' nu'ula na', nadxa guzre̱' le̱': ―Nu'ula, ¿gazra na' benne' ca' gulagu zrie̱' lue'? ¿Quebe nu chilá' benne' guzría xi'e̱ lue'?
JOH 8:11 Nu'ula na' gunné̱': ―Quebe nu chilá', Xran. Nadxa Jesús guzre̱' nu'ula na': ―Cá'anqueze neda', quebe guzría xi'a lue'. Bexíaj, ne québedxa gunu' dul-la.
JOH 8:12 Bchálajle̱ Jesús benne' ca' xecha lasa, gunné̱': ―Neda' naca' xel-la' naxaní' chee̱ lu xichaj lázxdau bénneache. Benne' dxedále̱ne̱' neda' gape̱' xel-la' naxaní' nigá da gunezruj na le̱' xel-la' nabán li lazre', na' cabata' tadxe̱' lu da chul-la chee̱ dul-la da zaj nabague̱'.
JOH 8:13 Nadxa benne' fariseo ca' gulé̱'e̱ Le̱': ―Lue' dxexeche̱bu' cheé̱zquezu', na' da dxexeche̱bu' quebe bi zaca na.
JOH 8:14 Beche̱be Jesús: ―Da dxexeche̱ba' zaca na lácala néda'queza' dxexeche̱ba' cheé̱zqueza'. Neda' nezda' gala za'a, ne gala cha'a. Le'e quebe nézele gala za'a, ne gala cha'a.
JOH 8:15 Le'e dxuchí'ale cáte̱ze dxenná xichaj lázrdaule. Bla'a neda', quegá chee̱ guchi'a ca da dxun nu benne'.
JOH 8:16 Che dxuchi'a, dxuchi'a cáte̱ze naca na, lawe' da quebe dxuchi'a néda'za'. Xra' nasel-le̱' neda' dxuchi'e̱ tu zren nen neda' ca naca da dxelún bénneache.
JOH 8:17 Lu da nadxixruj bea chee̱le le'e naxúaj gate zaj zra' chupa benne' dxelexeche̱be̱' tuz ca dxelenné̱', naca da li xrtizra' benne' ca'.
JOH 8:18 Néda'queza' dxexeche̱ba' da naca cheé̱zqueza', na' Xra' nasel-le̱' neda', cá'anqueze dxexeche̱be̱' chia'.
JOH 8:19 Nadxa benne' ca' buluche̱be̱' Jesús: ―¿Ga na' Xrau'? Jesús beche̱be̱': ―Le'e quebe núnbeale da nácaqueza' neda', ne quebe núnbeaquezle Xra'. Chela da li núnbeale neda', cá'anqueze núnbeale Xra'.
JOH 8:20 Da caní bchalaj Jesús dxácate̱ na' dxusé̱dene̱' bénneache chale'aj xudau' naga zaj nnita xi'ina dumí chee̱ xudau'. Quebe nu gude̱la Le̱' lawe' da quebe ne zrin zra chee̱'.
JOH 8:21 Nadxa Jesús guzre̱' benne' ca': ―Wexá'a neda', na' le'e xexílajle neda', na' wátele lu dul-la nabágale, lawe' da naga cha'a neda', le'e quebe gaca sa'le.
JOH 8:22 Nadxa benne' judío ca' gulé̱ ljwezre̱': ―¿Gute cuine̱', ne chee̱ le̱ na' dxenné̱' quebe gaca chéajdxu naga cheaj Le̱'?
JOH 8:23 Nadxa Jesús guzre̱' benne' ca': ―Le'e nácale chee̱ zran xabáa nigá. Neda' naca' chee̱ xabáa na'la. Le'e nácale chee̱ xe̱zr la xu nigá. Neda' quebe naca' chee̱ xe̱zr la xu nigá.
JOH 8:24 Chee̱ le̱ na' gucha' le'e wátele lu dul-la nabágale, lawe' da che quebe dxéajle̱le zúaqueza' neda', wátele lu dul-la nabágale.
JOH 8:25 Nadxa benne' ca' buluche̱be̱' Jesús: ―¿Nuzra nacu' Lue'? Beche̱be Jesús: ―Nácaqueza' ca ba gucha' le'e nédxudaute̱.
JOH 8:26 Dé̱le̱'e̱ da dxal-la' nnia' chee̱le, ne da dxal-la' guchi'a ca naca da dxunle. Bénnea' gusél-le̱' neda' dxenné̱' da li, na' da dxapa' bénneache naca na da ba benda' gunné̱ Le̱', lácala quebe dxezaca ba lázrele̱nle na.
JOH 8:27 Benne' ca' quebe guléajni'ine̱' dxuchálajle̱ Jesús le̱' ca naca chee̱ Dios, Xre̱'.
JOH 8:28 Nadxa Jesús guzre̱' benne' ca': ―Gate le'e chísale sibe neda', Benne' Gulje̱' Bénneache, nadxa xúnbeale zúaqueza' neda', ne quebe bi dxuna' da naca cheé̱zqueza'. Tuze dxennéa' ca da ba ble'e Xra' neda'.
JOH 8:29 Bénnea' gusél-le̱' neda' zúale̱queze̱' neda'. Xra' quebe nucá'ane̱' neda' tuza' lawe' da tu dxúnzqueza' ca da dxezaca ba lazre' Le̱'.
JOH 8:30 Ca gunná Jesús da caní, guléajle̱ benne' zan chee̱'.
JOH 8:31 Nadxa Jesús guzre̱' benne' judío ca', benne' dxeléajle̱'e̱ chee̱': ―Che le'e se̱ típale lu da dxapa' le'e, da li nácale neda' tuze.
JOH 8:32 Gúnbeale da li, na' da li na' guselá na le'e.
JOH 8:33 Belexeche̱be benne' zan ca': ―Netu' nácantu' xrtia Abraham, ne quebe ne chú'untu' lu na' nu benne' ca benne' zaj nada'u. ¿Bizr chee̱ na' dxennáu' Lue' lantu'?
JOH 8:34 Jesús guzre̱' benne' ca': ―Da li dxapa' le'e, xúgute̱ benne' dxelúnqueze̱' dul-la, dúl-laqueze na' nuxru na benne' ca'.
JOH 8:35 Nu benne' xu'e̱ lu na' tu benne' ca benne' nada'u quebe tu súazqueze̱' xu'u na'. Zrí'inequeze bénnea' wazúatequezebe'.
JOH 8:36 Chee̱ le̱ na', che neda', Zri'ine Xra', guselá' le'e, da li láquezle le'e.
JOH 8:37 Nezda' nácale le'e xrtia Abraham. Na'a dxaca lázrele gútele neda' lawe' da quebe dxezí' lu na'le da dxapa' le'e.
JOH 8:38 Neda' dxuchálaja' ca naca da ble'e Xra' neda', na' le'e dxunle ca da guzre xráquezle le'e.
JOH 8:39 Belexeche̱be benne' ca': ―Xra xrtauntu' naca Abraham. Na' Jesús guzre̱' benne' ca': ―Chela nácale da li xrtia Abraham, na' gunle ca da be̱n Abraham.
JOH 8:40 Lácala gucha' le'e da li da ble'e Xra' neda', le'e dxaca lázrele gútele neda'. Abraham cabata' be̱ne̱' da caní.
JOH 8:41 Le'e dxúnquezle ca da dxun xráquezle. Nadxa benne' ca' gulé̱'e̱ Jesús: ―Netu' quebe nácantu' bi lan. Zua tuze Xrantu', Dios.
JOH 8:42 Nadxa Jesús guzre̱' benne' ca': ―Chela naca Dios da li Xrale, le'e wazrí'ile neda' lawe' da za'a neda' naga zua Dios, ne zúaqueza' nigá. Quebe za'a da naca cheé̱zqueza'. Dios nasel-le̱' neda'.
JOH 8:43 ¿Bizr chee̱ na' quebe dxezéquele chéajni'ile da dxennéa'? Naca na lawe' da quebe dxaca lázrele xénele dizra' chia'.
JOH 8:44 Xráquezle le'e naca da xriwe̱'. Le'e nácale chee̱ da na', ne dxaca lázrele gunle ca da dxaca lazre' le̱ na. Da xriwe̱' na' naca na we̱te benne' nédxudaute̱. Cabata' dxenné̱ na da li lawe' da quebe bi zua da li nen le̱ na. Gate dxun lazre' na, dxenné̱ na cáte̱ze naca na, lawe' da tu dxun lázrezqueze na, ne naca na da guzú lau na be̱n lazre' na.
JOH 8:45 Lácala dxapa' le'e da li, le'e quebe dxéajle̱le chia'.
JOH 8:46 ¿Núlale le'e séquele gulé'ele nabaga neda' tu dul-la? Che dxennéa' da li, ¿bizr chee̱ na' quebe dxéajle̱le chia'?
JOH 8:47 Benne' naque̱' chee̱ Dios dxenne̱' dizra' chee̱ Dios. Le'e quebe nácale chee̱ Dios. Chee̱ le̱ na' quebe dxaca lázrele xénele chee̱ Dios.
JOH 8:48 Nadxa benne' judío ca' gulé̱'e̱ Jesús: ―Da li dxennantu' gate dxennantu' nacu' benne' Samaria, ne xu'u be' xriwe̱'.
JOH 8:49 Jesús beche̱be̱': ―Quebe xu'a be' xriwe̱'. Neda' dxapa' ba lá'ana Xra' Dios, na' le'e dxuzúale neda' chalá'ala.
JOH 8:50 Quebe dxe'a gunne xue chee̱ gápale neda' ba lá'ana, ne si' lu na'le neda'. Zua Benne' xabáa dxezá lazre̱' gápale neda' ba lá'ana, ne Le̱' dxuchi'e̱ ca da dxunle.
JOH 8:51 Da li dxapa' le'e: Benne' dxune̱' ca naca dizra' chia', cabata' gátequeze bénnea'.
JOH 8:52 Nadxa benne' judío ca' belexeche̱be̱': ―Na'a nézquezentu' xu'u be' xriwe̱'. Ba gulátequeze Abraham, ne xúgute̱ benne' ca' buluchálaje̱' waláz chee̱ Dios, na' lue' dxennáu' benne' gune̱' ca naca dizra' chiu' cabata' gátequeze̱'.
JOH 8:53 ¿Nácadxu' szrendxa ca xra xrtáudxu Abraham? Gútequeze Le̱', ne cá'anqueze gulate benne' ca' buluchálaje̱' waláz chee̱ Dios. ¿Bízraqueze dxugune cuinu'?
JOH 8:54 Beche̱be Jesús: ―Che neda' dxucá'ana cuina' ba lá'ana, quebe bi zaca na. Benne' dxape̱' neda' ba lá'ana naque̱' Xra', Bénnea' dxennale le'e naque̱' Xrale.
JOH 8:55 Le'e quebe núnbeale Le̱'. Neda' núnbeaqueza' Le̱'. Chela dxennéa' quebe núnbe'a Le̱', naca' we̱n lazre' ca nácale le'e. Neda' da li núnbe'a Le̱', ne dxuna' ca da dxenné̱'.
JOH 8:56 Xra xrtáule Abraham, bénnea' gutie̱' nédxudaute̱, gubéle̱'e̱ne̱' lawe' da dxal-la' lé'ene̱' zra zua neda'. Blé'ene̱' na, na' gubéle̱'e̱ne̱'.
JOH 8:57 Nadxa benne' judío ca' gulé̱'e̱ Jesús: ―Québequeze ne su' chi xun iza, na' ¿dxennáu' blé'enu' Abraham?
JOH 8:58 Jesús beche̱be̱': ―Da li dxapa' le'e, nédxudaute̱ gate quebe ne sua Abraham, báchequeze zua' neda'.
JOH 8:59 Nadxa gulequé̱'e̱ xiaj chee̱ xelu'e̱ Jesús, na' Le̱' bcache cuine̱'. Bdee̱' ládujla benne' ca', na' bedxúaje̱' chale'aj xudau', ne bezé̱'e̱.
JOH 9:1 Gate gudé Jesús tu lataj, na' blé'ene̱' tu benne' gúlaje̱' la chul-la.
JOH 9:2 Benne' ca' dxuse̱de Jesús buluche̱be̱' Le̱': ―Benne' Wese̱de, ¿bizr chee̱ na' gulaj benne' nigá la chul-la? ¿Naca na lawe' da belún xra xrne̱'e̱ dul-la, che lawe' da be̱n lé̱queze̱' dul-la?
JOH 9:3 Jesús guzre̱' benne' ca': ―Quebe naca na lawe' da be̱n le̱' dul-la, ne quebe naca na lawe' da belún xra xrne̱'e̱ dul-la. Naca na chee̱ gulé'e lau xel-la' szren chee̱ Dios ne̱ chee̱ benne' nigá.
JOH 9:4 Dxácate̱ naca te zra dxal-la' guna' zrin chee̱ Bénnea' nasel-le̱' neda' lawe' da ba za da chul-la gate netú benne' quebe seque' gune̱' zrin.
JOH 9:5 Dxácate̱ ne zua' neda' xe̱zr la xu nigá, naca' xel-la' naxaní' chee̱ bénneache.
JOH 9:6 Ca gudé gunná Jesús da nigá, na' bzre̱'e̱ zrene̱' lu xu, ne be̱ne̱' guna' nen zrene̱' na', na' btupe̱' na xiaj lau benne' la chul-la na'.
JOH 9:7 Nadxa guzre̱' le̱': ―Guxíaj xeajtibe lau' lu beaj nisa nazí le na Siloé. (Dizra' nigá zéaje̱ na: Da Nasel-la Na.) Benne' la chul-la na' guxíaje̱' xeajtibe lawe̱', na' gate bezrine̱' ba dxelé'ene̱'.
JOH 9:8 Nadxa benne' walízr chee̱' ca', ne benne' ca' belelé'ene̱' le̱' nédxula, naque̱' la chul-la, gulenné̱': ―¿Quegá benne' nigá bénnea' dxebé'e̱ dxenabe̱' guna'?
JOH 9:9 Bal-le̱' gulenné̱': ―Le̱' na'. Xebal-le̱' gulenné̱': ―Quegá le̱' na', na' ca'an ca dxenné̱'e̱. Benne' ná'queze gunné̱': ―Neda' na'.
JOH 9:10 Nadxa buluche̱be̱' le̱': ―¿Ájazra na' ba dxelé'enu'?
JOH 9:11 Beche̱be bénnea': ―Bénnea' le̱' Jesús be̱ne̱' guna', ne btupe̱' na xiaj lawa', na' gunné̱': “Guxíaj beaj nisa nazí le na Siloé, xeajtibe lau'.” Guxá'a na', na' gate gudiba' lawa', guca ble'eda'.
JOH 9:12 Nadxa buluche̱be̱' le̱': ―¿Ga na' zua bénnea'? Le̱' guzre̱' benne' ca': ―Quebe nezda'.
JOH 9:13 Nadxa benne' ca' guleché̱'e̱ bénnea' guque̱' la chul-la lau benne' fariseo ca'.
JOH 9:14 Naca na zra dxulupá'ana judío ca' gate be̱n Jesús guna', ne btupe̱' na xiaj lau benne' la chul-la na'.
JOH 9:15 Chee̱ le̱ na' benne' fariseo ca' buluche̱be̱' bénnea' guque̱' la chul-la ájazra guca dxelé'ene̱'. Le̱' guzre̱' benne' ca': ―Bzrie̱' guna' xiaj lawa', na' bexiba' na, ne dxelé'eda'.
JOH 9:16 Nadxa bal-la benne' judío ca' gulenné̱': ―Bénnea' be̱ne̱' da nigá quebe naque̱' chee̱ Dios lawe' da quebe dxape̱' ba lá'ana zra dxupá'anadxu. Na' xebal-le̱' gulenné̱': ―¿Ájazra na' dxune̱' xel-la' waca zrente̱ caní che naque̱' benne' dul-la? Ca'an guca, gulaca chupa la'a benne' fariseo ca'.
JOH 9:17 Xecha lasa buluche̱be̱' bénnea' guque̱' la chul-la: ―¿Bi dxennáu' lue' chee̱ bénnea' bexune̱' lue'? Le̱' gunné̱': ―Neda' dxennéa' naque̱' benne' dxuchalaje̱' waláz chee̱ Dios.
JOH 9:18 Benne' judío ca' quebe guléajle̱'e̱ guque̱' la chul-la, ne na'a dxelé'ene̱', na' gulenné̱' xra xrna bénnea' bexaque̱'.
JOH 9:19 Na' buluche̱be̱' xra xrna bénnea': ―¿Nácaqueze benne' nigá zrí'inele, dxennale le'e gúlaje̱' la chul-la? ¿Ájazra na' dxaca dxelé'ene̱'?
JOH 9:20 Belexeche̱be xra xrne̱'e̱: ―Nézentu' benne' nigá naque̱' zrí'inentu', ne gúlaje̱' la chul-la.
JOH 9:21 Quebe nézentu' aja guca dxelé'ene̱' na'a, ne quebe nézentu' nu bexún xiaj lawe̱'. Le guche̱be le̱'. Ba nápaqueze̱' iza, ne waca xeché̱bequeze̱'.
JOH 9:22 Caní gulenná xra xrne̱'e̱ lu xel-la' dxelezrebe lawe' da ba zaj nun benne' xíchaje̱ chee̱ judío ca' tuze dizra' xelexebéaje̱' xu'u na' nútete̱ze benne' xeche̱be̱' Jesús naque̱' Cristo.
JOH 9:23 Chee̱ le̱ na' gulenná xra xrne̱'e̱: “Le guche̱be le̱'. Ba nápaqueze̱' iza.”
JOH 9:24 Nadxa benne' judío ca' belenné̱' bénnea' guque̱' la chul-la, na' gulé̱'e̱ le̱': ―¡Gunné̱ da li lau Dios! Nézentu' naca benne' nigá benne' dul-la.
JOH 9:25 Le̱' beche̱be̱': ―Quebe nezda' che naque̱' benne' dul-la, che cabí. Tuze da nezda'. Neda' guca' la chul-la, na' na'a dxelé'eda'.
JOH 9:26 Na' buluché̱bequeze̱' le̱': ―¿Bizra be̱ne̱' chiu'? ¿Ájazra be̱ne̱' chee̱ bexune̱' xiaj lau'?
JOH 9:27 Na' beche̱be bénnea': ―Ba gucha' le'e, ne quebe dxénele chia'. ¿Bizr chee̱ na' dxaca lázrele nnia' xetú? ¿Cá'anqueze le'e dxaca lázrele gácale Le̱' tuze?
JOH 9:28 Nadxa benne' judío ca' gulenné̱' schanni' chee̱ bénnea' guque̱' la chul-la, dxelenné̱': ―Lue' da'u bénnea', na' netu' da'ntu' Moisés.
JOH 9:29 Netu' nézentu' Dios bchálajle̱ne̱' Moisés. Quebe nézentu' ga benne' benne' nigá.
JOH 9:30 Nadxa bénnea' beche̱be̱': ―Da nigá naca na da dxebáneda'. Le'e quebe nézele ga bénnea', na' bexune̱' xiaj lawa'.
JOH 9:31 Nézquezdxu Dios quebe dxenne̱' chee̱ benne' dul-la. Tuze dxenne̱' chee̱ benne' ca' dxulucá'ana szrene̱' Le̱', ne dxelune̱' ca da dxaca lazre' Le̱'.
JOH 9:32 Quebe ne xendxu che nu benne' xexune̱' tu benne' gúlaje̱' la chul-la.
JOH 9:33 Chela benne' nigá quebe naque̱' chee̱ Dios, quebe gaca bi gune̱'.
JOH 9:34 Nadxa gulé̱'e̱ le̱': ―Ca gúlajquezu' dxulé'e na nabagu' dul-la. Na'a, ¿dxaca lazru' guzéajni'inu' netu'? Nadxa belexebéaje̱' le̱' lu xu'u na'.
JOH 9:35 Jesús benne̱' belexebéaje̱' bénnea' guque̱' la chul-la, na' gate bezrague̱' le̱', guzre̱' le̱': ―¿Dxéajle̱'u lue' chee̱ Zri'ine Dios?
JOH 9:36 Benne' na' guzre̱' Jesús: ―Xran, guzre neda' Nu na', chee̱ chéajle̱'a chee̱'.
JOH 9:37 Beche̱be Jesús: ―Ba blé'equeznu' Le̱'. Neda', dxuchálajle̱na' lue' naca' Bénnea'.
JOH 9:38 Nadxa benne' na' bzu zribe̱' lau Jesús, na' gunné̱': ―Dxéajle̱'a chiu', Xran.
JOH 9:39 Nadxa gunná Jesús: ―Neda' bla'a lu xe̱zr la xu nigá chee̱ guchi'a ca da dxelún bénneache, chee̱ xelelé'e la chul-la ca', ne chee̱ xelexaca ca la chul-la benne' ca' dxelenné̱' dxelelé'ene̱'.
JOH 9:40 Nadxa bal-la benne' fariseo ca', benne' zaj zre̱'e̱ nen Jesús, gate belenne̱' da nigá gunná Jesús, buluche̱be̱' Le̱': ―¿Cá'anqueze netu' nácantu' la chul-la?
JOH 9:41 Jesús beche̱be̱': ―Chela nácale le'e la chul-la quebe nabágale ca naca dul-la da be̱nle. Dxennale dxelé'ele, na' chee̱ le̱ na' nabágale dul-la.
JOH 10:1 Na' gunná Jesús: ―Da li dxapa' le'e, bénnea' quebe dxu'e̱ dxu'a dxa xu'u chee̱ le'aj chee̱ zrila' ca', na' dxu'e̱ naga xula, naque̱' gubán, ne tu dxebánzqueze̱'.
JOH 10:2 Bénnea' dxu'e̱ dxu'a dxa xu'u na' naque̱' benne' dxuxúequeze̱' zrila' ca'.
JOH 10:3 Bénnea' zue̱' dxu'a dxa xu'u dxesálaje̱' chee̱ chu'u bénnea' dxuxúequeze̱'-ba', na' zrila' ca' dxelexúnbeaba' chi'e̱. Benne' nigá dxu'e̱ la tu tu zrila' ca', ne dxebéaje̱'-ba' lu le'aj chee̱ba'.
JOH 10:4 Ca dxedé dxebéaje̱' xúgute̱ba', na' dxebía lawe̱' lauba', na' zrila' ca' zjácale̱ba' Le̱', lawe' da dxelexúnbeaba' chi'e̱.
JOH 10:5 Quebe zjácale̱ba' tu benne' quebe zaj núnbeaba'. Dxuluzrúnnujba' lau benne' na' lawe' da quebe dxelexúnbeaba' chi'i benne' quebe zaj núnbeaba'.
JOH 10:6 Bchálajle̱ Jesús benne' ca' da dxulé'e nigá, na' benne' ca' quebe guléajni'ine̱' bi zéaje̱ da guzre Jesús le̱'.
JOH 10:7 Nadxa Jesús guzre̱' benne' ca' da xula: ―Da li dxapa' le'e, neda' naca' dxa xu'u naga dxelú'u bénneache zaj naque̱' ca zrila' chia' ca'.
JOH 10:8 Xúgute̱ benne' dxuluxúe̱' zrila', benne' belelé̱'e̱ nédxudxa ca neda', gulaque̱' gubán, ne tu gulebánzqueze̱'. Zrila' ca' quebe beléneba' chee̱ benne' ca'.
JOH 10:9 Neda' naca' dxa xu'u. Bénnea' chu'e̱ ne̱ chia' neda', láqueze bénnea'. Gaque̱' ca tu zrila' dxu'uba', ne dxuajba' le'aj chee̱ba', na' dxezréleba' zríe̱du dxáguba'.
JOH 10:10 ’Benne' gubán ze̱'e̱ tuze chee̱ cuane̱'-ba', ne chee̱ gútete̱'-ba, ne chee̱ guzría xi'te̱'-ba'. Neda' bla'a chee̱ gápale xel-la' nabán, ne chee̱ gapa xánnele na.
JOH 10:11 Neda' naca' benne' chawe' dxuxúa' zrila' ca'. Benne' chawe' dxuxúe̱' zrila' ca' dxuzúe̱' xel-la' nabán chee̱' chee̱ guselé̱' zrila' ca'.
JOH 10:12 Benne' dxuxúe̱'-ba' lawe' da dxezi'e̱ lazruj, gate dxelé'ene̱' za becu' xi'a, na' dxusane̱' zrila' ca', ne dxuzrúnnuje̱', lawe' da quebe nácaqueze̱' benne' dxuxúe̱' le̱ba', na' zrila' ca' quebe zaj nácaba' be̱ cheé̱zqueze̱'.
JOH 10:13 Benne' nigá dxuzrúnnuje̱' lawe' da dxunze̱' zrin chee̱ si'e̱ lázruje̱', na' quebe dxe'e̱ gunne xue chee̱ba'.
JOH 10:14 ’Neda' naca' benne' chawe' dxuxúa' zrila' ca'. Cáte̱ze núnbea Xra' neda', na' neda' núnbe'a Xra', cá'anqueze neda' núnbe'a zrila' chia' ca', na' le̱ba' zaj núnbeaba' neda'. Neda' dxuzúa' xel-la' nabán chia' chee̱ guselá' zrila' ca'.
JOH 10:16 Cá'anqueze zaj zra' zrila' chia' quebe zaj zraba' lu le'aj nigá. Dxal-la' cheajxexri'a-ba'. Zrila' ca' xelunba' ca dxenná xrtizra', ne xelácaba' tu cueze, na' tuze benne' guxúe̱' le̱ba'.
JOH 10:17 ’Xra' nazrí'ine̱' neda' lawe' da dxuzúa' xel-la' nabán chia', na' xecá'a na.
JOH 10:18 Quebe nu seque' cua xel-la' nabán chia'. Neda' xuzúa' na cáte̱ze dxaca lázrequeza' neda'. Napa' xel-la' dxenná bea guzúa' na, ne chee̱ xecá'a na. Da nigá naca na da gunná be'e Xra' neda' guna'.
JOH 10:19 Gate benne' judío ca' belenne̱' dizra' caní, na' gulaque̱' chupa la'a xetú.
JOH 10:20 Benne' zan benne' ca' gulenné̱': ―¿Bizr chee̱ na' dxuzé̱ nágale chee̱ benne' nigá? Xu'e̱ be' xriwe̱', ne nadá xichaj lázrdawe̱'.
JOH 10:21 Xebal-le̱' gulenné̱': ―Tu benne' xu'e̱ be' xriwe̱' quebe séquene̱' guchálaje̱' caní. ¿Waca tu be' xriwe̱' xexún na xiaj lau tu benne' la chul-la?
JOH 10:22 Naca na beu' zaga, na' lu xe̱zre Jerusalén zaj zue̱' laní gate dxulusá lazre̱' ca guca gate gulegú'e̱ xudau' na' lu na' Dios.
JOH 10:23 Jesús dxedé̱' chale'aj xudau' na' naga naca lachila chee̱ Salomón.
JOH 10:24 Nadxa benne' judío ca' guléchaje̱' Le̱', ne gulé̱'e̱ Le̱': ―¿Bátalaqueze québedxa gunu' lue' chupa lázrentu'? Che lue' nacu' Cristo, Bénnea' sel-la Dios, gunnáte̱gala.
JOH 10:25 Beche̱be Jesús: ―Ba gucha' le'e, na' quebe guxéajle̱le chia'. Ca naca da dxuna' neda', ne dxuchíneda' xel-la' dxenná bea chee̱ Xra', dxululé'e na nu naca' neda'.
JOH 10:26 Le'e quebe dxéajle̱le chia' lawe' da quebe nácale zrila' chia', ca ba gucha' le'e nédxula.
JOH 10:27 Zrila' chia' dxelexúnbeaba' chi'a, na' neda' núnbe'a-ba', na' le̱ba' dxelauba' neda'.
JOH 10:28 Benne' zaj naque̱' zrila' chia', dxunézruja' chee̱ benne' ca' xel-la' nabán da zeajlí canna, ne cabáta'quezdxa xelebía xi'e̱, na' quebe nu seque' xecá'a le̱' lu na'a neda'.
JOH 10:29 Xra' be̱nne̱' neda' benne' caní, na' Le̱' nácadxe̱' szren ca xúgute̱ bénneache, na' quebe nu seque' xecá'a benne' ca' lu na' Xra'.
JOH 10:30 Neda', ne Xra' tuze nácantu'.
JOH 10:31 Nadxa benne' judío ca' gulequé̱'e̱ xiaj xetú chee̱ xelútie̱' Jesús.
JOH 10:32 Nadxa Jesús guzre̱' benne' ca': ―Ba bé̱nqueza' da zan da chawe' laule le'e, dxuchíneda' xel-la' waca chee̱ Xra'. ¿Nula chee̱ da chawe' caní güele neda' xiaj?
JOH 10:33 Belexeche̱be benne' judío ca': ―Quebe güentu' lue' xiaj lawe' da nunu' da chawe'. Dxuntu' na lawe' da gunnéu' schanni' chee̱ Dios. Lue' nacu' bénneache, na' dxun cuinu' Dios.
JOH 10:34 Nadxa Jesús guzre̱' benne' ca': ―Lu da nadxixruj bea chee̱le le'e naxúaj xrtizra' Dios, dxenná na: Le'e nácale dios ca'.
JOH 10:35 Quebe gaca tábagadxu ca da naxúaj na lu xiche chee̱ Dios, na' Diósqueze̱' gunné̱' chee̱ benne' ca' gulezí'e̱ xrtizre̱' zaj naque̱' dios ca'.
JOH 10:36 Che Dios bzue̱' neda', ne gusél-le̱' neda' lu xe̱zr la xu nigá, ¿bizr chee̱ na' dxennale le'e gunnéa' schanni' chee̱ Dios lawe' da gunnéa' naca' Zri'ine Dios?
JOH 10:37 Che quebe dxuna' ca naca da dxun Xra', quebe chéajle̱le chia'.
JOH 10:38 Che dxuna' na, lácala quebe dxéajle̱le chia' ne̱ chee̱ da dxennéa', le chéajle̱ chia' ne̱ chee̱ da ca' dxuna', chee̱ nézele Xra' zúale̱ne̱' neda', na' neda' zúale̱na' Xra'.
JOH 10:39 Xetú lasa gulaca lazre̱' xele̱l-le̱' Jesús, na' Le̱' gulé̱' lu na' benne' ca'.
JOH 10:40 Nadxa bezrín Jesús dxu'a xe̱gu Jordán chalá'a naga dxalaj gubizra, na' begá'ane̱' na', naga guzúa Juan nédxute̱ dxuchúe̱' bénneache nisa.
JOH 10:41 Benne' zan xjaque̱' xeajlenné̱'e̱ Jesús, na' gulenné̱': ―Juan, da li quebe bi xel-la' waca zren be̱ne̱', na' xúgute̱ da gunné̱' ca naca chee̱ benne' nigá naca na da li.
JOH 10:42 Benne' zan guléajle̱'e̱ chee̱ Jesús lataj na'.
JOH 11:1 Zua tu benne' dxé'ene̱' le̱' Lázaro, benne' xe̱zre Betania, da naca na lazre María, ne bi bile̱' le̱' Marta.
JOH 11:2 María nigá, bi zan Lázaro, benne' dxé'ene̱' na', naque̱' nu'ula na' gulu'e̱ ni'a Jesús da na' dxelále̱'e̱ zixre, ne bsebizre̱' na nen xicha xíchaje̱'.
JOH 11:3 Dxúpate̱ nu'ula caní gulesel-le̱' benne' xeaje̱zre̱' Jesús: ―Xran, bénnea' nazrí'inu' quebe chawe' zue̱'.
JOH 11:4 Ca ben Jesús da nigá, na' gunné̱': ―Da dxé'ene̱' quebe naca na da gútete̱ na le̱'. Naca na chee̱ gulé'e lau na xel-la' szren chee̱ Dios, ne cá'anqueze chee̱ gulé'e lau na xel-la' szren chia' neda', Zri'ine Dios, ne̱ chee̱ xel-la' we̱' na'.
JOH 11:5 Lácala nazrí'i Jesús Marta, ne bi bile̱', ne Lázaro,
JOH 11:6 gate benne̱' quebe chawe' zua Lázaro na', begá'ane̱' naga zue̱' xechupa zra.
JOH 11:7 Ca gudé na' guzre̱' benne' ca' dxusé̱dene̱': ―Le chu'u naga nababa Judea xetú.
JOH 11:8 Nadxa benne' ca' gulé̱'e̱ Le̱': ―Benne' Wese̱de, ná'asca benne' judío ca' zaj zre̱'e̱ na' gulaca lazre̱' xelútie̱' Lue' nen xiaj. ¿Dxaca lazru' chéaju' na' xetú?
JOH 11:9 Jesús guzre̱' benne' ca': ―¿Quebe nun Dios dute̱ te zra gate dxelún bénneache zrin? Che nu benne' dxedé̱' te zra, quebe cheajchazie̱' lu da ste̱be lawe' da dxelé'ene̱' xel-la' naxaní' da nuzúa Dios lu xe̱zr la xu nigá.
JOH 11:10 Che nu benne' dxedé̱' chizrela, dxechégüe̱' lawe' da quebe zúale̱ xel-la' naxaní' le̱'.
JOH 11:11 Ca gudé na' guzre Jesús benne' ca': ―Benne' ljwézredxu Lázaro ba dxásie̱'. Cha'a neda' cheajsebana' le̱'.
JOH 11:12 Nadxa benne' ca' gulé̱'e̱ Jesús: ―Xran, che dxásie̱', wexaque̱'.
JOH 11:13 Da nigá da gunná Jesús zéaje̱ na ba gute Lázaro. Benne' ca' dxusé̱dene̱' guléquene̱' gunná Jesús dxáseze̱'.
JOH 11:14 Nadxa Jesús bzéajni'ine̱' benne' ca', gunné̱': ―Ba gútequeze Lázaro.
JOH 11:15 Dxebeda' lawe' da quebe zua' na'. Caní gácadxa chawe' chee̱le le'e, chee̱ chéajle̱le chia'. Le chu'u cheajnnadxu Lázaro.
JOH 11:16 Nadxa Tomás, bénnea' lé̱queze̱' bilide', guzre̱' xezícala benne' ca': ―Le chú'uqueze dxi'u chee̱ gátedxu tu zren nen Jesús.
JOH 11:17 Gate belezrine̱' xe̱zre Betania, na' bene Jesús gudapa zra bulucache̱' Lázaro.
JOH 11:18 Betania dxe' na gáguze naga dxe' Jerusalén, ca cadite sadxu tu chí'idau'ze zrindxu na',
JOH 11:19 na' benne' zan benne' judío ca' xjaque̱' xeajlenné̱'e̱ Marta ne María, na' xulunézruje̱' le̱' xel-la' zren lazre' lawe' da gute bi zane̱'.
JOH 11:20 Gate ben Marta ba za' Jesús, na' guzé̱'e̱ zeajxrígale̱' Le̱', na' María begá'ane̱' xu'u.
JOH 11:21 Marta guzre̱' Jesús: ―Xran, chela zu' nigá, quebe gute bi zana'.
JOH 11:22 Neda' nezda' Dios gunne̱' Lue' bítete̱ze da nabu'.
JOH 11:23 Jesús gunné̱': ―Webán bi zanu'.
JOH 11:24 Nadxa Marta guzre̱' Le̱': ―Nezda' webane̱' lu zra xelexebán benne' gate ca', zra bze̱be na'.
JOH 11:25 Nadxa gunná Jesús: ―Neda' naca' benne' dxusebáne̱' benne' gate ca', ne benne' dxunne̱' xel-la' nabán li lazre'. Nu benne' dxéajle̱'e̱ chia', lácala gatie̱', webane̱',
JOH 11:26 na' xúgute̱ benne' zaj naca bane̱', ne dxeléajle̱'e̱ chia', québequeze xelatie̱' tu chi'ize. ¿Dxéajle̱'u da nigá?
JOH 11:27 Marta guzre̱' Jesús: ―Awe', Xran. Neda' dxéajle̱'a nacu' Cristo, Zri'ine Dios, Bénnea' guche̱be lazre' Dios sel-le̱'.
JOH 11:28 Ca gudé gunná Marta da nigá, na' guxíaje̱' xeajzenne̱' bi bile̱' María, na' guzre̱' le̱' zrize: ―Ba bla' Benne' dxuse̱de, ne dxenné̱' lue'.
JOH 11:29 Ca ben María da nigá, na' guxase̱' guzé̱'e̱, xeajnné̱'e̱ Jesús.
JOH 11:30 Jesús quebe ne chu'e̱ xe̱zre na', na' zue̱' naga bezraga Marta Le̱'.
JOH 11:31 Benne' judío ca' zaj zra' xu'u na' dxulunézruje̱' María xel-la' zren lazre', gate belelé'ene̱' guxasa María, ne chadí bdxúaje̱', na' xjácale̱ benne' caní le̱', dxeléquene̱' zéaje̱' dxu'a ba zeajchezre̱' na'.
JOH 11:32 Gate bzrin María naga zua Jesús, na' bzu zribe̱' zran ni'a Jesús, gunné̱': ―Xran, chela zu' nigá, quebe gute bi zana'.
JOH 11:33 Gate ble'e Jesús dxebezre María, ne cá'anqueze dxelebezre judío ca', benne' zjácale̱ne̱' María, na' bexíajele̱'e̱ne̱', ne guzúe̱' ste̱be lu lázrdawe̱'.
JOH 11:34 Na' bche̱be̱' benne' ca': ―¿Ga bcáchele bénnea'? Na' gulé̱'e̱ Le̱': ―Xran, gudá le'enu'.
JOH 11:35 Na' gudxezre Jesús.
JOH 11:36 Nadxa gulenná benne' judío ca': ―Le nna'xque cátite̱ nazrí'ine̱' le̱'.
JOH 11:37 Bal-la benne' ca' gulenné̱': ―Benne' nigá bexune̱' benne' la chul-la. La zue̱' nigá, ¿quebe guzéquene̱' ájala gune̱' chee̱ quebe gute Lázaro?
JOH 11:38 Jesús guzúe̱' ste̱be xetú, na' bzrine̱' dxu'a ba. Ba na' naca na tu bluaj, na' da' tu xiaj ta'a dxu'e na.
JOH 11:39 Gunná Jesús: ―Le xecá'a xiaj nigá. Marta, bi zan benne' gate na' guzre̱' Jesús: ―Xran, ba dxelá bénnea' tula, lawe' da ba guca tapa zra na'a gutie̱'.
JOH 11:40 Na' Jesús gunné̱': ―¿Quebe gucha' lue' che chéajle̱'u chia', walé'enu' xel-la' szren chee̱ Dios?
JOH 11:41 Nadxa belexequé̱'e̱ xiaj ta'a na'. Jesús guné̱'e̱ xabáa, gunné̱': ―Xrae, dxapa' Lue': “Xcalenu'” lawe' da ba bennu' chia'.
JOH 11:42 Neda' nezda' tu dxénzquezenu' chia'. Dxennéa' da nigá chee̱ gaca tu da ba neza chee̱ benne' caní, chee̱ xeléajle̱'e̱ chiu' nasel-lu' neda'.
JOH 11:43 Ca gudé gunné̱' da nigá, na' gunné̱' zizraj: ―¡Lázaro, bedxúaj nigá!
JOH 11:44 Bedxúaj benne' gate na', nadxéaj ni'a ne̱'e̱ nen ládxe'dau' da buluchele̱' ni'a ne̱'e̱, na' lawe̱' dxela na ladxe'. Jesús guzre̱' benne' ca': ―Le xese̱zre̱', ne le gusane̱' xexíaje̱'.
JOH 11:45 Nadxa guléajle̱ benne' zan chee̱ Jesús, benne' judío ca' xjácale̱ María, ne belelé'ene̱' ca da be̱n Jesús.
JOH 11:46 Bal-la benne' ca' xjaque̱' xeajlechálajle̱ne̱' benne' fariseo ca', na' buluzenne̱' le̱' ca da be̱n Jesús.
JOH 11:47 Nadxa fariseo ca', ne benne' xíchaje̱ ca' chee̱ bxruze ca' belezrague̱' nen benne' xu'u lawe' blau chee̱ judío ca', na' gulenné̱': ―¿Ájazra gundxu? Benne' nigá dxúnle̱'e̱ xel-la' waca da za xabáa.
JOH 11:48 Che ca' güedxu Le̱' lataj, xúgute̱ bénneache xeleajlé̱'e̱ chee̱' chee̱ xuluzúe̱' Le̱' ca wenná bea, na' xelelá' benne' Roma ca', benne' zjaque̱' wedil-la, na' xuluzría xi'e̱ xudau' chee̱dxu, ne xe̱zr la xu chee̱dxu.
JOH 11:49 Nadxa tu benne' le̱' Caifás, bxruze blau iza na', guzre̱' benne' ca': ―Le'e québequeze bi nézele,
JOH 11:50 ne quebe dxeque be'ele gácadxa chawe' chee̱dxu gate' tuze benne' ne̱ chee̱ xe̱zre nigá, ne quegala ca naca xe̱zr la xu nigá cuía xi na.
JOH 11:51 (Quegá gunná Caifás da nigá cheé̱zqueze̱'. Lawe' da naque̱' bxruze blau iza na', bchálaje̱' waláz chee̱ Dios, gunné̱' gate' Jesús ne̱ chee̱ xe̱zr la xu judío.
JOH 11:52 Quegá gatie̱' tuze ne̱ chee̱ xe̱zr la xu naze. Cá'anqueze chee̱ xutupe̱' lu na' Dios xúgute̱ benne' zaj naque̱' chee̱ Dios, benne' zaj nase dínnaje̱', benne' ca' zaj nababe̱' xúgute̱ cue' xe̱zr la xu.)
JOH 11:53 Ca'an guca, ca lu zra na'te̱ benne' judío wenná bea ca' belune̱' tuze dizra' xelútie̱' Jesús.
JOH 11:54 Chee̱ le̱ na' Jesús québedxa gudé̱' naga zaj zra' benne' wenná bea ca' chee̱ judío ca', na' guzé̱'e̱ naga nababa Judea, na' guxíaje̱' xe̱zre Efraín naga zua gáguze tu le̱'e̱ xixre' lawe' lataj. Begá'ane̱' xe̱zre na' nen benne' ca' dxusé̱dene̱'.
JOH 11:55 Ba zua gáguze zrin Laní Pascua chee̱ judío ca', na' benne' zan chee̱ xe̱zre ca' xjaque̱' Jerusalén chee̱ xulucá'ana chawe' cuine̱' nédxudxa ca zrin Laní Pascua.
JOH 11:56 Guledé̱' dxelexílaje̱' Jesús, na' gate zaj zre̱'e̱ chale'aj xudau' na', buluche̱be ljwezre̱': ―¿'Ajazra dxéquele? ¿Wide̱' laní, che quebe xide̱'?
JOH 11:57 Benne' fariseo ca', ne benne' xíchaje̱ ca' chee̱ bxruze ca' ba gulebéaje̱' dizra' che nu benne' ca' nézene̱' ga zua Jesús, na' xelé̱'e̱ benne' ca' chee̱ gaca xele̱l-le̱' Le̱'.
JOH 12:1 Xrupa zra nédxudxa gate za chu'u Laní Pascua chee̱ judío ca', guxíaj Jesús xe̱zre Betania naga zua Lázaro, bénnea' bsebán Jesús ládujla benne' gate'.
JOH 12:2 Lu xe̱zre na' belune̱' tu xrche', chee̱ gulape̱' ba lá'ana Jesús. Marta bdee̱' xel-la' wagu, na' Lázaro dxé'le̱ne̱' benne' ca' dxelágule̱ne̱' Jesús.
JOH 12:3 Nadxa María guqué̱'e̱ tu xia da za da dxelále̱'e̱ zixre, da naca na chee̱ dusén lase, da zácale̱'e̱ na, na' gulu'e̱ da za na' ni'a Jesús, ne bsebizre̱' na nen xicha xíchaje̱'. Ca naca benne' zaj zra' xu'u na' gulelé'ene̱' ca dxelá da zixre na'.
JOH 12:4 Nadxa Judas Iscariote, zri'ine Simón, tu benne' ca' dxuse̱de Jesús, ne naque̱' bénnea' gudée̱' Jesús lu na' benne' guledábague̱' Le̱', gunné̱':
JOH 12:5 ―¿Bizr chee̱ na' quebe gudá'u da zixre na', na' sidxu na dumí lazruj chee̱ chunna gaxúa zra chee̱ gácale̱dxu benne' xache' ca'?
JOH 12:6 Quebe gunná Judas da nigá lawe' da dxe'e̱ gunne xue chee̱ benne' xache' ca'. Naque̱' gubán, ne nu'e̱ bzude dumí chee̱ benne' ca' dxuse̱de Jesús, ne dxebane̱' late' weaj dumí na' da dxuluzré̱'e̱ lu bzude na'.
JOH 12:7 Nadxa Jesús guzre̱' Judas na': ―Be̱ lataj nu'ula nigá lawe' da be̱ne̱' da nigá chee̱ dxucá'ana chawe̱' neda' chee̱ gate xulucache̱' neda' lu xe̱dxu ba.
JOH 12:8 Benne' xache' ca' tu zrázqueze̱' ládujla le'e. Neda' quebe tu súazqueza' nen le'e.
JOH 12:9 Zane' benne' judío ca' belenne̱' zua Jesús xe̱zre Betania, na' xjaque̱' na', quegá tuze zeajlenné̱'e̱ Jesús. Cá'anqueze zeajlenné̱'e̱ Lázaro, bénnea' bsebán Jesús ládujla benne' gate ca'.
JOH 12:10 Nadxa benne' xíchaje̱ ca' chee̱ bxruze ca' belune̱' tuze dizra' cá'anqueze xelútie̱' Lázaro,
JOH 12:11 lawe' da ne̱ chee̱ Lázaro benne' zan benne' judío ca' dxelebéaj xíchaje̱' bxruze ca' chee̱ xeleajlé̱'e̱ chee̱ Jesús.
JOH 12:12 Benne' zan ba zjaca Jerusalén, zjaque̱' Laní Pascua na', na' zra xula belenne̱' ba za' Jesús lu xe̱zre na'.
JOH 12:13 Nadxa gulechugue̱' zina', na' xjaque̱' xeajlexrígale̱' Jesús, ne dxelenné̱' zizraj: ―¡Gaca ba lá'azxa Dios! ¡Ba neza zrente̱ naca na chee̱ Benne' ze̱'e̱ waláz chee̱ Xránadxu Dios! ¡Ba neza zrente̱ naca na chee̱ Wenná Bea chee̱ xe̱zre Israel!
JOH 12:14 Jesús xeajxraque̱' tu burro, na' guzríe̱'-ba', ca naxúaj na lu xiche chee̱ Dios, dxenná na:
JOH 12:15 Quebe zrébele le'e, benne' zre̱'e̱ xe̱zre Sión. Le nna'xque, ba za' Wenná Bea chee̱le. Zrie̱' tu burro.
JOH 12:16 Nédxute̱ benne' ca' dxuse̱de Jesús quebe guléajni'ine̱' da na' dxaca na. Ca gudé na', gate begá'ana szren Jesús lau Dios, na' xeajlesá lazre̱' xúgute̱ da caní zaj naxúaj na lu xiche chee̱ Dios ca naca chee̱ Jesús, na' ca'an guca chee̱'.
JOH 12:17 Benne' ca' zaj zre̱'e̱ nen Jesús gate gunné̱' Lázaro lu xe̱dxu ba, ne bsebane̱' le̱' ládujla benne' gate, buluzenne̱' bénneache Jerusalén ca da guca na'.
JOH 12:18 Chee̱ le̱ na' benne' caní xeajlexrígale̱' Jesús lawe' da belenne̱' ca naca xel-la' waca zrente̱ da be̱ne̱'.
JOH 12:19 Nadxa benne' fariseo ca' gulé̱ ljwezre̱': ―Ba dxelé'ele quebe séquedxu bi gundxu. Ca naca bénneache dxelune̱' Le̱' tuze.
JOH 12:20 Zaj zra' bal-la benne' griego ca' ládujla benne' ca' belezrine̱' Jerusalén chee̱ xulucá'ana szrene̱' Dios lu laní na'.
JOH 12:21 Benne' caní belezrine̱' lau Felipe, benne' Betsaida chee̱ ga nababa Galilea, ne naque̱' Jesús tuze, na' gulata' xuene̱' le̱', dxelenné̱': ―Benne', dxaca lázrentu' le'entu' Jesús.
JOH 12:22 Felipe guxíaje̱' xeaje̱zre̱' Andrés caní, na' xjaca dxupe̱' xeajlegue̱zre̱' Jesús ca'.
JOH 12:23 Nadxa Jesús guzre̱' benne' dxupa ca': ―Ba bzrin zra xegá'ana szrena' neda', Benne' Gulje̱' Bénneache.
JOH 12:24 Da li dxapa' le'e, tu binne zrua' xtila wegá'ana na tuze na che quebe xexruj na lu xu, ne gacu na xu. Che gacu na xu, na' gunna na lina. Caní dxal-la' gaca chia' neda'.
JOH 12:25 Benne' dxe'e̱ gunne xue gapa chi'e̱ xel-la' nabán chee̱' gunitie̱' na. Bénnea' dxuzúe̱' chalá'ala xel-la' nabán chee̱' lu xe̱zr la xu nigá, gapa chi'e̱ na, ne zrué'ene̱' xel-la' nabán da zeajlí canna.
JOH 12:26 Che nu benne' dxaca lazre̱' gune̱' zrin chia', dxal-la' gaque̱' neda' tuze, na' gátete̱ze sua' neda', na' súaqueze benne' dxune̱' zrin chia'. Che nu benne' dxune̱' zrin chia', Xra' gape̱' le̱' ba lá'ana.
JOH 12:27 Gunná Jesús: ―Na'a sté̱bele̱'e̱ zua'. ¿Bizra nnia'? ¿Nnia': Xrae, bselá neda' lu da dxal-la' gaca chia' na'a? Belájqueza' chee̱ gaca chia' da caní.
JOH 12:28 Xrae, bca'ana szren lau'. Nadxa ben tu chi'i benne' dxenné̱' xabáa: ―Ba bca'ana szrena' na, ne gucá'ana szrena' na xetú.
JOH 12:29 Benne' ca' zre̱'e̱ na' dxelenne̱' gulenné̱' guziu' gunné̱. Xebal-le̱' gulenné̱': ―Tu gubáz chee̱ xabáa bchálajle̱ne̱' Le̱'.
JOH 12:30 Nadxa Jesús guzre̱' benne' ca': ―Quegá gunné̱ chi'e̱ na' ne̱ chia' neda'. Gunné̱ na ne̱ chee̱le le'e.
JOH 12:31 Na'a ba bzrin zra guchi'a Dios chee̱ bénneache zre̱'e̱ xe̱zr la xu nigá, na' na'a cueaj Dios chalá'ala da xriwe̱', da na' dxenná bea na lu xe̱zr la xu nigá, chee̱ québedxa nna bea na.
JOH 12:32 Gate xelechise̱' neda' lu xe̱zr la xu nigá le̱'e̱ xaga béguaj, na' neda' nnia' xúgute̱ bénneache chee̱ xelaque̱' neda' tuze.
JOH 12:33 Gate gunné̱' caní, ble'e Jesús ca gatie̱'.
JOH 12:34 Nadxa benne' zan ca' gulé̱'e̱ Jesús: ―Netu' bénentu' ca da naxúaj na lu xiche chee̱ da nadxixruj bea na da dxenná na waca bánqueze Cristo chadía chacanna. ¿Bizr chee̱ na' dxennáu' Benne' Gulje̱' Bénneache xelechise̱' Le̱'? ¿Nuzra na' Benne' Gulje̱' Bénneache?
JOH 12:35 Nadxa Jesús guzre̱' benne' ca': ―Xetú chí'idauze xel-la' naxaní' sua na ládujla le'e. Le ta na'a dxácate̱ ne zua xel-la' naxaní' nen le'e, chee̱ quebe xrínnele, lawe' da benne' dxedé̱' lu da chul-la quebe nézene̱' ga zéaje̱'.
JOH 12:36 Le cheajlé̱ chee̱ xel-la' naxaní' da naca' neda' dxácate̱ zua xel-la' naxaní' nen le'e, chee̱ gácale tuze xel-la' naxaní' na'. Ca gudé gunná Jesús da nigá, na' bezé̱'e̱ bcache cuine̱' lau benne' ca'.
JOH 12:37 Lácala ble'e Jesús zane' xel-la' waca zrente̱ lau benne' judío ca', quegá xúgute̱' guleajlé̱'e̱ chee̱',
JOH 12:38 lawe' da be̱n na ba xen guca ca da gunná Isaías, benne' bchálaje̱' waláz chee̱ Dios, gunné̱': Xran, ¿nuzra guxeajlé̱ chee̱ dizra' chee̱dxu? ¿Nuzra na' ble'e Xránadxu xel-la' waca chee̱'?
JOH 12:39 Ca'an guca, quebe guca xeleajlé̱'e̱ chee̱' lawe' da caní gunnáqueze Isaías na':
JOH 12:40 Dios be̱ne̱' benne' ca' la chul-la, ne be̱ne̱' zide' lázrdawe̱', chee̱ quebe xelelé'ene̱' nen xiaj lawe̱', ne quebe xeléajni'ine̱' lu xichaj lázrdawe̱', ne quebe xelelé̱'e̱ lawa' neda' chee̱ xexuna' le̱'.
JOH 12:41 Isaías na' gunné̱' da nigá lawe' da blé'ene̱' xel-la' szren chee̱ Jesús, ne bchálaje̱' ca naca chee̱'.
JOH 12:42 Zane' benne' judío ca' guléajle̱'e̱ chee̱ Jesús, ne cá'anqueze bal-la benne' xíchaje̱ ca'. Quebe belexeche̱be̱' láwela bénneache lawe' da belezrebe̱' da xelún benne' fariseo ca', chee̱ quebe xelexebéaje̱' le̱' xu'u naga dxelezrague̱'.
JOH 12:43 Caní belune̱' lawe' da beledánedxene̱' xel-la' ba lá'ana da dxelúe bénneache le̱' ca xel-la' ba lá'ana da dxue Dios le̱'.
JOH 12:44 Jesús gunné̱' zizraj: ―Benne' dxéajle̱'e̱ chia', quegá chee̱za' dxéajle̱'e̱, cá'anqueze dxéajle̱'e̱ chee̱ Xra' nasel-le̱' neda'.
JOH 12:45 Bénnea' dxelé'ene̱' neda', dxelé'equezne̱' Xra' nasel-le̱' neda'.
JOH 12:46 Neda', xel-la' naxaní', bla'a lu xe̱zr la xu nigá chee̱ québedxa xelexegá'ana benne' dxeléajle̱'e̱ chia' lu da chul-la.
JOH 12:47 Che nu benne' dxenne̱' dizra' chia', ne quebe dxune̱' ca naca na, quegá neda' guzría xi'a le̱', lawe' da quebe bla'a neda' chee̱ guzría xi'a bénneache. Bla'a chee̱ guselá' benne' ca'.
JOH 12:48 Benne' dxuzúe̱' neda' chalá'ala, ne quebe dxune̱' ca naca dizra' chia', ba zua da guzría xi na le̱'. Dizra' da ba gunnéa' naca na da guzría xi na bénnea' lu zra bze̱be na'.
JOH 12:49 Caní gaca na lawe' da quebe dxuchálaja' cheé̱zqueza', lawe' da Xra' nasel-le̱' neda' ba gunná bé'ene̱' neda' bi dxal-la' nnia', ne bi dxal-la' gusé̱deda'.
JOH 12:50 Neda' nezda' gunná be'e Xra' neda' caní chee̱ xelezeque bénneache xelape̱' xel-la' nabán da zeajlí canna. Ca'an naca, da dxennéa' neda', dxennéa' na ca gunná be'e Xra' neda'.
JOH 13:1 Naca na zra nedxu gate za chu'u Laní Pascua chee̱ judío ca'. Jesús ba nézene̱' ba bzrin zra xezé̱'e̱ lu xe̱zr la xu nigá chee̱ xexíaje̱' naga zua Xre̱'. Nazrí'iquezne̱' benne' zaj naca chee̱', benne' zaj zre̱'e̱ xe̱zr la xu, na' na'a ba zua gulé'ene̱' benne' ca' tu da zrendxa da gulé'e na nazrí'ine̱' le̱'.
JOH 13:2 Da xriwe̱' ba nagú'u na xichaj lázxdau Judas Iscariote, zri'ine Simón, ca dxal-la' gune̱' chee̱ gudée̱' Jesús lu na' benne' guledábague̱' Le̱'. Nézqueze Jesús ze̱'e̱ naga zua Dios, ne dxal-la' xezrine̱' naga zua Dios, na' Xre̱' ba bnézruje̱' Le̱' dute̱ xel-la' dxenná bea. Chee̱ le̱ na', gate dxelawe̱' xrche', guxasa Jesús, na' gudúe̱' ladxe' naxrúa cuzre̱', ne bnase̱' tu ladxe' dxu'a le̱'e̱.
JOH 13:5 Nadxa gudé̱'e̱ nisa tu zriga xia zren, ne guzú lawe̱' dxibe̱' ni'a benne' ca' dxusé̱dene̱', na' bsebizre̱' ni'e̱ nen ladxe' na' da nunase̱' dxu'a le̱'e̱.
JOH 13:6 Ca bzrine̱' chee̱ quibe̱' ni'a Simón Pedro, le̱' guzre̱' Jesús: ―Xran, ¿Lue' quíbequezu' ni'a?
JOH 13:7 Jesús beche̱be̱': ―Na'a quebe dxéajni'inu' da dxuna'. Te na'a chéajni'inu' na.
JOH 13:8 Pedro guzre̱' Le̱': ―Cabata' quibu' ni'a. Jesús guzre̱' le̱': ―Che quebe quiba' ni'u, quebe gaca gacu' neda' tuze.
JOH 13:9 Na' Simón Pedro guzre̱' Jesús: ―Xran, quegá tuze ni'a quibu'. Cá'anqueze na'a, ne xíchaja'.
JOH 13:10 Jesús guzre̱' le̱': ―Benne' ba bexuzrte̱ guzje̱', tuze ni'e̱ dxal-la' chadxe lawe' da ba naxádxequeze̱'. Le'e ba naxádxele, san quegá xúgute̱le.
JOH 13:11 Gunná Jesús: “Quegá xúgute̱le”, lawe' da nézene̱' nu na' gudée̱' Le̱' lu na' benne' dxeledábague̱' Le̱'.
JOH 13:12 Ca gudé gudibe Jesús ni'a benne' ca', na' bexrúe̱' ladxe' chee̱' cuzre', ne bebe'e̱ ga dxelawe̱', na' guzre̱' benne' ca': ―¿Dxéajni'ile le'e da ba be̱na'?
JOH 13:13 Le'e dxe̱le neda': Benne' Wese̱de, ne: Xran, na' caní dxal-la' nnale lawe' da caní naca'.
JOH 13:14 Che neda', Benne' Weséde chee̱le, ne Xránale, ba gudiba' ní'ale, cá'anqueze le'e dxal-la' quíbele ni'a ljwézrele tule xetule.
JOH 13:15 Neda' ba ble'eda' le'e tu da dxulé'e na, chee̱ gunle le'e ca da be̱na' neda'.
JOH 13:16 Da li dxapa' le'e, tu benne' we̱n zrin quebe nácadxe̱' szren ca xrane̱', na' tu benne' gubáz quebe nácadxe̱' szren ca benne' nasel-le̱' le̱'.
JOH 13:17 Che dxéajni'ile da caní, ne dxunle ca zaj naca na, gaca chee̱le tu da ba neza.
JOH 13:18 ’Quebe dxuchálaja' chee̱ xúgute̱le le'e. Neda' núnbe'a benne' ca' gucá'a, san dxal-la' gaca ca naxúaj na lu xiche chee̱ Dios, dxenná na: Benne' dxágule̱ neda' ba gudábague̱' neda' chee̱ gudée̱' neda'.
JOH 13:19 Dxapa' le'e da nigá na'a, nédxula gate quebe ne gaca na, chee̱ gate gaca na, na' chéajle̱le le'e zúaqueza' neda'.
JOH 13:20 Da li dxapa' le'e: Benne' dxezí' lu ne̱'e̱ Bénnea' dxusel-le̱' neda', neda' na' dxezí' lu ne̱'e̱, na' benne' dxezí' lu ne̱'e̱ neda', dxezí' lu ne̱'e̱ Xra' nasel-le̱' neda'.
JOH 13:21 Ca gudé gunná Jesús da nigá, na' guzúe̱' ste̱be lu xichaj lázrdawe̱', na' bzéajni'ine̱' benne' ca', gunné̱': ―Da li dxapa' le'e, tu benne' ládujla le'e gudée̱' neda' lu na' benne' ca' dxeledábague̱' neda'.
JOH 13:22 Nadxa benne' ca' dxuse̱de Jesús gulezú lawe̱' dxelenná' ljwezre̱', ne quebe zaj nézene̱' nu chee̱ na' dxuchalaj Jesús.
JOH 13:23 Tu benne' ca' dxuse̱de Jesús, bénnea' nazrí'ile̱'e̱ Jesús le̱', zue̱' cuita Jesús naga dxelawe̱' xrche',
JOH 13:24 na' Simón Pedro be̱ne̱' tu da dxunna bea lau bénnea' chee̱ guche̱be̱' Jesús nu chee̱ na' dxenné̱' caní.
JOH 13:25 Nadxa bénnea' de̱'e̱ cuita Jesús bche̱be̱' Le̱': ―Xran, ¿nuzra na'?
JOH 13:26 Beche̱be Jesús: ―Gusebisa' late' xeta xtila, na' bénnea' gunézruja' na, benne' ná'queze̱'. Nadxa Jesús bsebise̱' late' xeta xtila, na' bnézruje̱' na chee̱ Judas Iscariote, zri'ine Simón.
JOH 13:27 Ca gucá'a Judas xeta xtila na', na' da xriwe̱' guxú'ute̱ na lu xichaj lázrdawe̱'. Nadxa Jesús guzre̱' le̱': ―Da dxal-la' gunu', bé̱ntega na.
JOH 13:28 Benne' ca' zaj zre̱'e̱ dxelawe̱' na' quebe guléajni'ine̱' bizr chee̱ na' guzre̱' Judas na' caní.
JOH 13:29 Lawe' da nua Judas bzude' dumí, bal-le̱' guléquene̱' Jesús guzre̱' le̱' bi si'e̱ chee̱ laní na', u bi gunézruje̱' benne' xache' ca'.
JOH 13:30 Ca gudé gudagu Judas xeta xtila na', na' bdxúaje̱'. Ba guxrinne.
JOH 13:31 Ca gudé bdxuaj Judas, gunná Jesús: ―Na'a gulé'e lau xel-la' szren chia' neda', Benne' Gulje̱' Bénneache, na' xegá'ana szren Dios ne̱ chia' neda'.
JOH 13:32 Che neda', Benne' Gulje̱' Bénneache, dxulé'eda' ca naca xel-la' szren chee̱ Dios, na' Dios gulé'ene̱' ca naca xel-la' szren chia' neda', ne la gúnte̱queze̱' na.
JOH 13:33 Le'e, bidu chia' ca', québedxa sua' scha' nen le'e. Le'e wexílajle neda', san ca gucha' benne' judío ca', dxapa' le'e na'a, quebe gaca sa'le le'e naga cha'a neda'.
JOH 13:34 Tu da cube dxixruj be'eda' le'e. Le zri'i le sa' ljwézrele tule xetule ca neda' nazrí'ida' le'e. Caní dxal-la' zri'i ljwézrele tule xetule.
JOH 13:35 Che nazrí'i ljwézrele tule xetule, na' xúgute̱ bénneache xeleque bé'ene̱' nácale neda' tuze.
JOH 13:36 Simón Pedro bche̱be̱' Jesús: ―Xran, ¿gazra chéaju'? Beche̱be Jesús: ―Naga cha'a neda', quebe gaca sá'le̱nu' neda' na'a. Te na'a wadéquezu' naga tea' neda'.
JOH 13:37 Nadxa gunná Pedro: ―Xran, ¿bizr chee̱ na' quebe gaca sá'le̱na' Lue' na'a? Zúaqueza' guzúa' xel-la' nabán chia' chee̱ guna' Lue' tuze.
JOH 13:38 Jesús beche̱be̱': ―¿Zúaquezu' guzú' xel-la' nabán chiu' chee̱ gacu' neda' tuze? Da li dxapa' lue', nédxudxa ca cuezre xjeaj, lue' wannáquezu' chunna lasa quebe núnbe'u neda'.
JOH 14:1 Gunná Jesús: ―Quebe cuele le'e gunne xue. Le guxrén lazre' Dios, ne le guxrén lazre' neda'.
JOH 14:2 Lizre Xra' dé̱le̱'e̱ lataj naga súale. Chela quebe naca na caní, neda' ba gucha' le'e. Wexá'a cheajxecueza' lataj chee̱le.
JOH 14:3 Ca te xexá'a cheajxecueza' lataj chee̱le, na' wexelájqueza' xetú chee̱ xedajxezri'a le'e súale̱le neda', chee̱ súale le'e naga súaqueza' neda'.
JOH 14:4 Le'e nézele naga cha'a, ne núnbeale neza na'.
JOH 14:5 Tomás guzre̱' Jesús: ―Xran, quebe nézentu' ga chéaju'. ¿Ájazra guntu' gúnbeantu' neza na'?
JOH 14:6 Jesús beche̱be̱': ―Neda' naca' neza na', ne naca' da li, ne naca' xel-la' nabán. Tuze ne̱ chia' neda' waca zrinle naga zua Xra'.
JOH 14:7 Chela núnbeale neda', cá'anqueze núnbeale Xra'. Ná'ate̱la núnbeale Le̱' lawe' da ba dxelé'ele Le̱'.
JOH 14:8 Nadxa Felipe guzre̱' Jesús: ―Xran, ble'e netu' Xrau', xetú da ná'te̱ze.
JOH 14:9 Beche̱be Jesús: ―Felipe, scha' ba guzúale̱na' le'e, na' ¿quebe ne gúnbe'u neda'? Benne' dxelé'ene̱' neda', dxelé'equezene̱' Xra'. Chee̱ le̱ na', ¿bizr chee̱ na' dxenabu' neda' gulé'eda' le'e Xra'?
JOH 14:10 ¿Quebe dxéajle̱'u zúale̱na' Xra', na' Xra' zúale̱ne̱' neda'? Da dxapa' le'e, quegá dxennéa' na cheé̱zqueza'. Xra', Bénnea' zúale̱ne̱' neda', Lé̱queze̱' na' dxune̱' zrin chee̱' lu na'a neda'.
JOH 14:11 Le chéajle̱le zúale̱na' Xra', na' Xra' zúale̱ne̱' neda', u che cabí dxéajle̱le ca da dxennéa', le chéajle̱ chia' ne̱ chee̱ da ca' dxuna'.
JOH 14:12 Da li dxapa' le'e, benne' dxéajle̱'e̱ chia', gúnqueze̱' ca da dxuna' neda', na' gune̱' da zaj nácadxa zren ca da caní dxuna' lawe' da xexá'a neda' naga zua Xra'.
JOH 14:13 Xúgute̱ da nábale le'e lu La' neda', neda' guna' na, chee̱ gulé'eda' neda' xel-la' szren chee̱ Xra'.
JOH 14:14 Néda'queza' guna' bítete̱ze da nábale lu La' neda'.
JOH 14:15 Gunná Jesús: ―Che le'e nazrí'ile neda', le guzúa dizra' ca naca da dxixruj be'eda' le'e.
JOH 14:16 Neda' gata' xueda' Xra' sel-le̱' chee̱le xetú Benne' gácale̱queze̱' le'e, ne súale̱tecaze̱' le'e.
JOH 14:17 Benne' nigá naque̱' Be' Lá'azxa gulé'ene̱' le'e ca naca da li. Benne' zaj naca chee̱ xe̱zr la xu nigá quebe xelezéquene̱' xelezí' lu ne̱'e̱ Le̱' lawe' da quebe gaca xelelé'ene̱' Le̱', ne quebe zaj núnbe'e̱ Le̱'. Le'e núnbeale Le̱' lawe' da zúale̱ne̱' le'e, ne súaqueze̱' lu xichaj lázrdaule.
JOH 14:18 Quebe gucá'ana' le'e ca bi we̱ze̱be ca'. Welá'queza' súale̱na' le'e.
JOH 14:19 Xetú chí'idau' bénneache ca' québedxa xelelé'ene̱' neda', san le'e welé'ele neda'. Le'e tu gaca bánzquezle lawe' da tu naca bánzqueza' neda'.
JOH 14:20 Lu zra na' guéquebe'ele neda' zúale̱na' Xra', na' le'e zúale̱le neda', na' neda' zúale̱na' le'e.
JOH 14:21 Benne' nézene̱' ca naca da nadxixruj bea na nuna' neda', ne dxune̱' na, dxulé'ene̱' nazrí'iqueze̱' neda'. Xra' zrí'ine̱' benne' nazrí'ine̱' neda', na' cá'anqueze neda' zri'ida' bénnea', ne gulé'e lawa' le̱'.
JOH 14:22 Judas, quegá bénnea' le̱' Iscariote, guzre̱' Jesús: ―Xran, ¿bizr chee̱ na' gulé'e lau' netu', ne quegá gulé'e lau' lau bénneache zaj zre̱'e̱ xe̱zr la xu nigá?
JOH 14:23 Jesús beche̱be̱': ―Benne' nazrí'ine̱' neda' dxune̱' ca naca da dxennéa', na' Xra' zrí'ine̱' bénnea', na' neda' ne Xra' xedajsúale̱ntu' le̱'.
JOH 14:24 Benne' quebe nazrí'ine̱' neda' quebe dxune̱' ca da dxennéa'. Ca naca dizra' da dxénele quebe zaj naca na cheé̱zqueza'. Zaj naca na chee̱ Xra' nasel-le̱' neda'.
JOH 14:25 ’Dxapa' le'e xúgute̱ da caní dxácate̱ ne zúale̱na' le'e,
JOH 14:26 na' Be' Lá'azxa, Bénnea' sel-la Xra' lu La' neda' chee̱ gácale̱ne̱' le'e, Le̱' gulé'ene̱' le'e xúgute̱, ne gusá'queze̱' lázrele ca naca xúgute̱ da ba gucha' le'e.
JOH 14:27 ’Xel-la' dxebeza zri lazre' dxuca'ana' chee̱le. Dxunna' le'e xel-la' dxebeza zri lazre' chia'. Quebe dxunna' na ca dxelunna bénneache xel-la' dxebeza zri lazre'. Quebe cuele gunne xue, ne quebe zrébele.
JOH 14:28 Ba bénele gunnéa' wexá'a, ne welá'a súale̱na' le'e xetú. Chela da li nazrí'ile neda', suale xel-la' dxebé, lawe' da xexá'a naga zua Xra', na' nácadxa Le̱' szren ca neda'.
JOH 14:29 Da nigá dxapa' le'e na'a nédxula gate quebe ne gaca na, chee̱ gate gaca na, na' chéajle̱le chee̱ da dxennéa'.
JOH 14:30 ’Québedxa guchálajle̱teca' le'e da zren lawe' da ba za' da xriwe̱', da na' dxenná bea na lu xe̱zr la xu nigá. Da na' quebe seque na bi gune na neda'.
JOH 14:31 Caní dxal-la' gaca chee̱ xeleneze bénneache neda' nazrí'ida' Xra', ne dxuna' ca da gunná bé'ene̱' neda'. ¡Le chasa! ¡Le xebú'u nigá!
JOH 15:1 Gunná Jesús: ―Neda' naca' ca tu lba uva da naca na li lazre', na' Xra' naque̱' ca tu benne' dxá'ane̱' na.
JOH 15:2 Le̱' dxechugue̱' zruze na ca' da quebe dxelebía na da zixre, ne dxun chi'e̱ zruze na ca' da dxelebía na da zixre chee̱ xelebíadxa na.
JOH 15:3 Le'e nácale ca zruze na ca' da ba nun chi'e̱, ne̱ chee̱ dizra' da ba gucha' le'e.
JOH 15:4 Le súaqueze gácale neda' tuze ca neda' tu zúale̱zqueza' le'e. Tu zruze xaga quebe gaca cuía na da zixre cheé̱zqueze na che quebe súale̱queze na xaga na'. Cá'anqueze le'e quebe bi gaca gunle che quebe tu gácazquezle neda' tuze.
JOH 15:5 ’Neda' naca' bzrigu lba uva, na' le'e nácale zruze na ca'. Bénnea' naque̱' neda' tuze, na' neda' naca' le̱' tuze, naque̱' ca tu zruze na da dxebíale̱'e̱ na da zixre, lawe' da quebe bi seque' gunle che quebe gácale neda' tuze.
JOH 15:6 Benne' quebe súate̱queze̱' nen neda' gaque̱' ca tu zruze na da dxugu na, na' bizre na. Xuluxutupe̱' zruze na bizre ca', ne xuluzré̱'e̱ na lu xi'.
JOH 15:7 ’Che le'e súate̱quezle neda' tuze, ne quebe gusanle dizra' chia', waca nábale ca da dxaca lázrele, na' sile na.
JOH 15:8 Xra' dxegá'ana szrene̱' gate nácale ca zruze na ca' da dxelebíale̱'e̱ na da zixre, ne caní gaca bea na nácale neda' tuze.
JOH 15:9 Neda' nazrí'ida' le'e ca nazrí'i Xra' neda'. Chee̱ le̱ na' le súaquezle lu xel-la' zri'i lazre' chia'.
JOH 15:10 Che gunle ca da dxixruj be'eda' le'e, na' súate̱quezle lu xel-la' zri'i lazre' chia', ca dxuna' neda', dxuna' ca bdxixruj be'e Xra' neda', ne zúate̱queza' lu xel-la' zri'i lazre' chee̱'.
JOH 15:11 ’Neda' dxuchálajle̱na' le'e caní chee̱ súale lu xel-la' dxebé chia', ne chee̱ gaca du lazre' xel-la' dxebé chee̱le.
JOH 15:12 Cani naca da dxixruj be'eda' le'e: Le zri'i le sa' ljwézrele tule xetule ca neda' nazrí'ida' le'e.
JOH 15:13 Xel-la' zri'i lazre' da naca szrendxa naca bea na che tu benne' guzúe̱' xel-la' nabán chee̱' chee̱ gácale̱ne̱' bi ljwezre̱' ca'.
JOH 15:14 Le'e nácale bi ljwezra' che dxunle ca da dxixruj be'eda' le'e.
JOH 15:15 Québedxa xapa' le'e nácale bi we̱n zrin chia' lawe' da quebe neze bi we̱n zrin bi da gun xránabe'. Dxapa' le'e nácale bi ljwezra' lawe' da ba bzenda' le'e xúgute̱ da guzre Xra' neda'.
JOH 15:16 Le'e quebe gunné̱le neda'. Neda' gunnéa' le'e, ne ba nuzúa' le'e chee̱ gácale ca zruze lba na' da dxelebíale̱'e̱ na da zixre, na' tu súazqueze da zixre na'. Che gunle caní, na' Xra' gunne̱' le'e xúgute̱ da nábale lu La' neda'.
JOH 15:17 Da nigá naca na da dxixruj be'eda' le'e: Le zri'i le sa' ljwézrele tule xetule.
JOH 15:18 Nadxa gunná Jesús: ―Che bénneache dxelecuídene̱' le'e, dxal-la' cheajsá lázrele belecuídequeze̱' neda' nédxute̱.
JOH 15:19 Chela nácale le'e chee̱ xe̱zr la xu nigá, na' xelezrí'i bénneache le'e ca zaj nazrí'ine̱' le sa' ljwezre̱' ca'. Neda' ba gucá'a le'e ládujla bénneache chee̱ xe̱zr la xu nigá, na' chee̱ le̱ na' dxelecuide bénneache le'e lawe' da québedxa nácale xe̱zr la xu nigá tuze.
JOH 15:20 Le gusá lázrele da gucha' le'e, gunnéa': Netú benne' we̱n zrin quebe nácadxe̱' szren ca xrane̱'. Che guláu zi' xuzre̱' neda', cá'anqueze xelau zi' xuzre̱' le'e, na' che belune̱' ca dxenná dizra' chia', cá'anqueze xelune̱' ca dxenná dizra' chee̱le le'e.
JOH 15:21 Xúgute̱ da caní xelune̱' chee̱le lawe' da nácale chia', ne lawe' da quebe zaj núnbe'e̱ Xra' nasel-le̱' neda'.
JOH 15:22 ’Chela quebe bla'a neda', ne bchálajle̱na' benne' ca', quebe bi dul-la zaj nabague̱'. Na'a zaj nabágaqueze̱' dul-la
JOH 15:23 lawe' da nu benne' dxecuídene̱' neda', cá'anqueze dxecuídene̱' Xra'.
JOH 15:24 Chela quebe be̱na' neda' xel-la' waca zren ca' láwela benne' ca' ca da netú benne' quebe ne gune̱', na' quebe bi dul-la xelebágue̱'. Lácala ba belelé'ene̱' da ca', dxelecuídene̱' neda', ne dxelecuídene̱' Xra'.
JOH 15:25 Da nigá dxaca na chee̱ gaca li ca naxúaj na lu da nadxixruj bea na da zjácale̱ benne' ca'. Dxenná na: Belecuídene̱' neda' ne quebe bi da cale̱la be̱na' chee̱ benne' ca'.
JOH 15:26 ’Gate xida Bénnea' gácale̱ne̱' le'e, Bénnea' naque̱' Be' Lá'azxa, ne dxulé'ene̱' da li, Bénnea' sel-la' neda' waláz chee̱ Xra', Lé̱queze̱' xeche̱be̱' ca naca chia' neda'.
JOH 15:27 Cá'anqueze le'e weché̱bequezle ca naca chia' neda' lawe' da zúale̱le neda' nédxudaute̱.
JOH 16:1 Gunná Jesús: ―Dxapa' le'e da caní chee̱ quebe gusán lázrele da naca chia'.
JOH 16:2 Welexebéaje̱' le'e lu xu'u naga dxelezrague̱', na' zrin zra gate nútete̱ze benne' gutie̱' le'e guéquene̱' gune̱' zrin chee̱ Dios.
JOH 16:3 Caní xelune̱' lawe' da quebe ne xelúnbe'e̱ Xra', ne neda'.
JOH 16:4 Dxapa' le'e da nigá chee̱ gate zrin zra na', na' cheajsá lázrele ba gucha' le'e da nigá. Nadxa gunná Jesús: ―Quebe gucha' le'e da nigá nédxute̱ lawe' da zúale̱queza' le'e.
JOH 16:5 Na'a wexá'a cheajxezúale̱na' Xra' nasel-le̱' neda', na' netule le'e quebe dxuché̱bele neda' ga cha'a.
JOH 16:6 Dxewí'ine lázrele lawe' da gucha' le'e da caní.
JOH 16:7 Na'a dxapa' le'e da li: Cháwe'dxa gaca chee̱le le'e che xexá'a neda' lawe' da che quebe xexá'a, quebe xida Be' Lá'azxa xedajsúale̱ne̱' le'e, Bénnea' gácale̱ne̱' le'e. Che xexá'a neda', sel-la' Le̱' chee̱le.
JOH 16:8 Gate xida Le̱', na' gulé'ene̱' bénneache zaj naque̱' benne' dul-la, ne quebe dxelune̱' da xrlátaje, na' Dios guzría xi'e̱ benne' caní.
JOH 16:9 Zaj naque̱' benne' dul-la lawe' da quebe dxeléajle̱'e̱ chia' neda'.
JOH 16:10 Xeleque bé'ene̱' quebe dxelune̱' da xrlátaje lawe' da xexá'a neda' naga zua Xra', na' le'e québedxa lé'ele neda'.
JOH 16:11 Xeleque bé'ene̱' Dios guzría xi'e̱ le̱' lawe' da ba guchugue̱' chee̱ da xriwe̱', da na' dxenná bea na lu xe̱zr la xu nigá.
JOH 16:12 ’Ne dé̱le̱'e̱ da dxal-la' xapa' le'e, san le'e quebe gaca chéajni'ile na na'a.
JOH 16:13 Gate xida Be' Lá'azxa, Bénnea' dxulé'ene̱' da li, Le̱' gulé'ene̱' le'e ca naca xúgute̱ da li lawe' da quebe guchálaje̱' cheé̱zqueze̱'. Wanné̱' xúgute̱ da xénene̱', na' guzéajni'ine̱' le'e ca da dxal-la' gaca na.
JOH 16:14 Le̱' gucá'ana szrene̱' neda' lawe' da wazi'e̱ chee̱ da naca chia' neda', na' guzéajni'ine̱' na le'e.
JOH 16:15 Xúgute̱ da napa Xra', cheé̱queza' naca na, na' chee̱ le̱ na' gunnéa', wazí' Be' Lá'azxa da naca chia', na' guzéajni'ine̱' na le'e.
JOH 16:16 Gunná Jesús: ―Xetú chí'idau', na' le'e québedxa lé'ele neda', na' xetú chi'i, na' xelé'ele neda' lawe' da xexá'a neda' naga zua Xra'.
JOH 16:17 Nadxa bal-la benne' ca' dxuse̱de Jesús buluche̱be ljwezre̱': ―¿Bizra zéaje̱ da nigá? Dxe̱'e̱ dxi'u, xetú chí'idau' québedxa lé'edxu Le̱', na' xetú chi'i, na' xelé'edxu Le̱' lawe' da xexíaje̱' naga zua Xre̱'.
JOH 16:18 ¿Bi zéaje̱ da na', xetú chí'idau'? Quebe dxéajni'idxu bi chee̱ dxuchálaje̱'.
JOH 16:19 Guque be'e Jesús dxelaca lazre̱' xuluche̱be̱' Le̱', na' guzre̱' benne' ca': ―Neda' gucha' le'e, xetú chí'idau' québedxa lé'ele neda', na' xetú chi'i, na' xelé'ele neda'. ¿Da nigá na' dxuche̱be ljwézrele?
JOH 16:20 Da li dxapa' le'e, wabézrele le'e, ne xewi'ine lázrele, san bénneache chee̱ xe̱zr la xu nigá xelebene̱'. Lácala le'e xewi'ine lázrele, xel-la' dxewí'ine lazre' chee̱le xexaca na xel-la' dxebé.
JOH 16:21 Gate tu nu'ula zua sane̱' bidau' zue̱' ste̱be lawe' da ba bzrin zra sua xel-la' dxudía chee̱'. Gate te galaj bidu na', na' québedxa dxeajsá lazre̱' da guzaque̱' lawe' da dxebéle̱'e̱ne̱' chee̱ bidu na' ba gúlajbe'.
JOH 16:22 Cá'anqueze le'e zúale ste̱be na'a, san neda' welá'queza' xedajxenná'a le'e, na' lu xichaj lázrdaule súate̱queze xel-la' dxebé, da naca na tu xel-la' dxebé da quebe nu seque' cua.
JOH 16:23 ’Lu zra na' québedxa bi guché̱bele neda'. Da li dxapa' le'e, Xra' gunne̱' le'e xúgute̱ da nábale lu La' neda'.
JOH 16:24 Nédxula quebe bi gunábale lu La' neda'. Na'a le naba, na' si'le, chee̱ súale̱'e̱le xel-la' dxebé.
JOH 16:25 Gunná Jesús: ―Ba gucha' le'e da caní nen dizra' ca' da dxululé'e na. Wazrín zra gate québedxa guchálajle̱na' le'e da naca da dxulé'e na. Guchálajle̱na' le'e caníqueze da naca chee̱ Xra'.
JOH 16:26 Lu zra na' nábale Xra' lu La' neda', na' quebe dxennéa' neda' gata' xueda' Xra' waláz chee̱le,
JOH 16:27 lawe' da Xrá'queze nazrí'ine̱' le'e. Nazrí'ine̱' le'e lawe' da nazrí'ile le'e neda', ne dxéajle̱le chia' za'a naga zua Dios.
JOH 16:28 Guzá'a lau Xra' chee̱ bla'a lu xe̱zr la xu nigá chee̱ xexá'a naga zua Xra'.
JOH 16:29 Nadxa benne' ca' dxuse̱de Jesús gulé̱'e̱ Le̱': ―Na'a dxuchálajle̱nu' netu' caníqueze. Quebe dxuchínenu' dizra' ca' da dxululé'e na.
JOH 16:30 Na'a dxeque bé'entu' nézenu' xúgute̱ da ca', na' quebe dxal-la' nu guche̱be Lue'. Chee̱ le̱ na' dxéajle̱ntu' chiu' za'u naga zua Dios.
JOH 16:31 Jesús guzre̱' benne' ca': ―¿Dxéajle̱le chia' na'a?
JOH 16:32 Za' zra, ne ba naca zra ná'queze gate le'e gase dínnajle ca'ale xrneza cha chee̱le, na' gucá'anale neda' tuza'. Quebe zúaqueza' tuza' lawe' da zúale̱ Xra' neda'.
JOH 16:33 Dxapa' le'e da nigá chee̱ gápale xel-la' dxebeza zri lazre' lawe' da nácale neda' tuze. Lu xe̱zr la xu nigá dxun na ba xen si sácale. Le gun chuchu lázrdaule, lawe' da ba bchuchuj bléaja' da dxaca lu xe̱zr la xu nigá.
JOH 17:1 Ca gudé gunné̱' da nigá, na' Jesús gunné̱'e̱ xabáa, dxenné̱': ―Xrae, ba bzrin zra. Bca'ana szren neda', Zri'inu', chee̱ cá'anqueze neda', Zri'inu', gucá'ana szrena' Lue'.
JOH 17:2 Lue' ba be̱nnu' neda', Zri'inu', xel-la' dxenná bea chee̱ nna be'eda' xúgute̱ bénneache, chee̱ gunézruja' xel-la' nabán da zeajlí canna chee̱ xúgute̱ benne' ca' be̱nnu' neda'.
JOH 17:3 Xel-la' nabán da zeajlí canna naca na chee̱ xelúnbe'e̱ Lue', nacu' Dios tu licha', ne li lazre', na' chee̱ xelúnbe'e̱ neda', Jesucristo, Bénnea' gusel-lu' Lue'.
JOH 17:4 ’Neda' ba bca'ana szrena' Lue' lu xe̱zr la xu nigá, ne ba bexuzre be̱na' da bdxixruj be'enu' neda'.
JOH 17:5 Na'a, Xrae, be̱nna neda' xel-la' szren lau Lue', da naca na xel-la' szren na' da guca na chia' naga zu' Lue' nédxudaute̱ gate za gata' xe̱zr la xu nigá.
JOH 17:6 ’Benne' ca' guca'u Lue' ládujla bénneache, benne' ca' be̱nnu' neda', neda' ba bzéajni'ida' le̱' Nu nacu' Lue'. Gulaque̱' chiu', na' Lue' be̱nnu' neda' benne' ca', na' ba belune̱' ca dxenná xrtizru'.
JOH 17:7 Na'a zaj nézene̱' xúgute̱ da be̱nnu' neda' za na naga zu' Lue'.
JOH 17:8 Ba bnézruja' chee̱ benne' caní dizra' chiu' da be̱nnu' neda', na' benne' caní ba gulezí' lu ne̱'e̱ na. Ba guleque bé'ene̱' da li neda' za'a naga zu' Lue', ne ba guléajle̱'e̱ chiu', gusel-lu' neda'.
JOH 17:9 ’Neda' dxata' xueda' Lue' gaca chawe' chee̱ benne' caní. Quebe dxata' xueda' Lue' ne̱ chee̱ benne' ca' zaj naque̱' chee̱ xe̱zr la xu nigá. Dxenaba' Lue' ne̱ chee̱ benne' ca' be̱nnu' neda', lawe' da zaj naque̱' chiu'.
JOH 17:10 Xúgute̱ da naca chia' naca na chiu', na' da naca chiu' naca na chia' neda', na' xel-la' szren chia' dxulé'e lawe' na ne̱ chee̱ benne' caní.
JOH 17:11 ’Neda' québedxa sua' lu xe̱zr la xu nigá, san benne' caní xelexegá'ane̱' lu xe̱zr la xu nigá, na' neda' wezá'a nigá, ne xedajxezúale̱queza' Lue'. Xrae Lá'azxa, lu xel-la' dxenná bea chiu' bxue benne' caní, benne' ca' be̱nnu' neda', chee̱ xelácaqueze̱' tuze ca nácadxu dxi'u tuze, Lue' ne neda'.
JOH 17:12 Gate ne zua' neda' lu xe̱zr la xu nigá, bxua' benne' caní nen xel-la' dxenná bea chiu', benne' caní be̱nnu' neda', ne bcache chawa' le̱'. Netú benne' caní quebe gunite, san tuze bénnea' ba nanítequeze̱', na' caní guca na chee̱ guca li ca naxúaj na lu xiche chiu'.
JOH 17:13 ’Na'a ba zezá'a naga zu' Lue'. Dxácate̱ ne zua' lu xe̱zr la xu nigá dxennéa' da caní chee̱ xelápale̱'e̱ benne' caní xel-la' dxebé ca da nápaqueza' neda'.
JOH 17:14 Neda' bnézruja' benne' caní dizra' chiu'. Bénneache chee̱ xe̱zr la xu nigá dxelecuídene̱' benne' caní lawe' da québedxa zaj naque̱' tuze nen benne' ca' chee̱ xe̱zr la xu nigá, ca na' neda' quebe naca' tuze nen da naca chee̱ xe̱zr la xu nigá.
JOH 17:15 Quebe dxenaba' Lue' xeca'u benne' caní lu xe̱zr la xu nigá. Dxenaba' guzrá chawu' benne' caní chee̱ quebe seque' da xriwe̱' bi gun na chee̱' le̱'.
JOH 17:16 Ca neda' quebe naca' chee̱ xe̱zr la xu nigá, cá'anqueze benne' caní quebe zaj naque̱' chee̱ xe̱zr la xu nigá.
JOH 17:17 Bzua benne' caní chee̱ xelaque̱' cheé̱quezu' Lue' ne̱ chee̱ da li. Dizra' chiu' naca na da li.
JOH 17:18 Ca gusel-lu' Lue' neda' ládujla bénneache zaj naque̱' chee̱ xe̱zr la xu nigá, cá'anqueze neda' dxusel-le̱' benne' caní ládujla bénneache zaj naque̱' chee̱ xe̱zr la xu nigá.
JOH 17:19 Ne̱ chee̱ benne' caní nuzúa cuina' cheé̱quezu' Lue', chee̱ cá'anqueze benne' caní xelaque̱' cheé̱quezu' Lue' ne̱ chee̱ da li.
JOH 17:20 ’Dxata' xueda' Lue', quegaze chee̱ benne' caní, san cá'anqueze chee̱ benne' ca' xeléajle̱'e̱ chia' gate xelenne̱' da xuluchalaj benne' caní.
JOH 17:21 Dxenaba' Lue' chee̱ xelaca xúgute̱ benne' caní túzqueze, ca Lue', Xrae, nácaquezu' neda' tuze, ne neda' nácaqueza' Lue' tuze, ne chee̱ xelaca benne' caní tuze nen dxi'u, chee̱ xeléajle̱ bénneache zaj naca chee̱ xe̱zr la xu nigá Lue' gusel-lu' neda'.
JOH 17:22 Neda' ba bnézruja' chee̱ benne' caní xel-la' szren na' da be̱nnu' neda' chee̱ xelaque̱' tuze ca nácaquezdxu tuze dxi'u.
JOH 17:23 Neda' súale̱na' benne' caní, na' Lue' súale̱nu' neda', chee̱ xelácaqueze benne' caní tuze, na' caní xeleque be'e bénneache Lue' gusel-lu' neda', ne nazrí'inu' benne' caní cáte̱ze nazrí'inu' neda'.
JOH 17:24 ’Xrae, Lue' be̱nnu' neda' benne' caní, na' dxaca lazra' xelezúale̱ne̱' neda' naga sua' neda', chee̱ xelelé'ene̱' xel-la' szren da ba be̱nnu' neda', lawe' da nazrí'inu' neda' nédxudaute̱ gate quebe ne gunu' xe̱zr la xu nigá.
JOH 17:25 Xrae chawe', benne' zaj naque̱' chee̱ xe̱zr la xu nigá quebe zaj núnbe'e̱ Lue', san neda' núnbe'a Lue', na' benne' caní ba zaj nézene̱' Lue' gusel-lu' neda'.
JOH 17:26 Neda' bzéajni'ida' benne' caní Nu nacu' Lue', ne zúaqueza' dxuzéajni'ida' le̱' chee̱ sua xel-la' zri'i lazre' dxéquenu' Lue' neda' lu xichaj lázrdau benne' caní, ne chee̱ súale̱ néda'queza' le̱'.
JOH 18:1 Ca gudé gunná Jesús da caní, na' bdxúaje̱' nen benne' ca' dxusé̱dene̱' chee̱ chjaque̱' xecha la'a xe̱gu Cedrón. Lataj na' zé̱le̱'e̱ xaga olivo naga guxú'u Jesús nen benne' ca'.
JOH 18:2 Cá'anqueze Judas, bénnea' dxudée̱' Jesús lu na' benne' ca' dxeledábague̱' Le̱', núnbe'e̱ lataj na' lawe' da zane' lasa guxíaj Jesús na' nen benne' ca' dxusé̱dene̱'.
JOH 18:3 Ca' guca, bzrin Judas na' nen tu cue' benne' ca' dxjaque̱' wedil-la, ne nen bal-la benne' xra'aga we̱n zrin chee̱ xudau', benne' ca' gulesel-la benne' xíchaje̱ ca' chee̱ bxruze ca', ne benne' fariseo ca'. Zaj nu'e̱ xaga, ne xia ca', ne xi' ca', ne xi' xedxe.
JOH 18:4 Jesús ba nézene̱' ca da gaca chee̱', na' chee̱ le̱ na' bdxúaje̱' lau benne' ca', na' bche̱be̱' le̱': ―¿Nuzra dxexílajle?
JOH 18:5 Belexeche̱be benne' ca': ―Jesús, benne' Nazaret. Jesús beche̱be̱': ―Neda' na'. Judas, bénnea' dxudée̱' Jesús lu na' benne' ca' zúaqueze̱' ládujla benne' ca'.
JOH 18:6 Gate gunná Jesús: Neda' na', na' benne' ca' belexebigue̱' lau Jesús, ne xeajlechazte̱' lu xu.
JOH 18:7 Nadxa Jesús bche̱be̱' benne' ca' da xula: ―¿Nuzra dxexílajle? Gulenná benne' ca': ―Jesús, benne' Nazaret.
JOH 18:8 Nadxa guzre Jesús benne' ca': ―Ba gucha' le'e neda' na'. Che dxexílajle neda', le güe benne' caní lataj cheajxaque̱'.
JOH 18:9 Ca guca da nigá guca li ca gunná Jesús, gunné̱': “Benne' ca' be̱nna Xra' neda', netue̱' quebe bnitia'.”
JOH 18:10 Nadxa Simón Pedro, ne nu'e̱ xia, guléaje̱' na, na' guchugue̱' naga da zua xabe̱la chee̱ Malco, we̱n zrin chee̱ bxruze blau.
JOH 18:11 Jesús guzre̱' Pedro: ―Begú'u xia chiu' lu zre na. Ca da ba nun Xra' si' saca' neda', ¿quebe dxal-la' saca' na?
JOH 18:12 Nadxa benne' dxjaca wedil-la, ne benne' dxenná be'ene̱' le̱', ne benne' xra'aga we̱n zrin chee̱ judío ca' gule̱l-le̱' Jesús, ne buluchéaje̱' Le̱'.
JOH 18:13 Nadxa guleché̱'e̱ Jesús lizre Anás. Anás nigá naque̱' xrtau zri'ine Caifás, bénnea' naque̱' bxruze blau iza na'.
JOH 18:14 Caifás nigá naque̱' bénnea' guzre̱' judío blau ca' gácadxa chawe' gate tuze benne' waláz chee̱ xe̱zr la xu chee̱'.
JOH 18:15 Simón Pedro, ne xetú benne' ca' dxuse̱de Jesús zjaque̱' zeajnawe̱' Jesús. Benne' ljwezre Pedro nigá núnbea bxruze blau le̱'. Ca'an guca, benne' nigá guxú'ule̱ne̱' Jesús chale'aj lizre bxruze blau na'.
JOH 18:16 Pedro begá'ane̱' dxu'a dxa xu'u da zua chale'aj na'. Chee̱ le̱ na' bdxuaj bénnea' núnbea bxruze blau le̱', na' bchálajle̱ne̱' nu'ula zua dxu'a dxa xu'u na', na' gulu'e̱ Pedro chale'aj na'.
JOH 18:17 Nadxa nu'ula na' zua dxu'a dxa xu'u bche̱be̱' Pedro: ―¿Quebe nacu' lue' tuze nen benne' Nazaret na'? Pedro beche̱be̱': ―Quebe naca'.
JOH 18:18 Lawe' da dxun na zaga, benne' we̱n zrin ca', ne benne' xra'aga we̱n zrin chee̱ bxruze ca' ba zaj nabeque̱' xi', ne zaj ze̱' dxu'a xi' na' dxelexezré'ene̱'. Pedro ze̱' nen benne' ca', dxexezré'ene̱' dxu'a xi' na'.
JOH 18:19 Bxruze blau guzú lawe̱' dxuche̱be̱' Jesús nuca benne' ca' zaj naque̱' benne' dxusé̱dene̱', ne bi da dxusé̱dene̱' le̱'.
JOH 18:20 Jesús guzre̱' le̱': ―Neda' ba bchálajqueza' láwela xúgute̱ bénneache. Bsé̱dequeza' lu xu'u ca', ne lu xu'u naga dxelezraga xúgute̱ benne' judío ca'. Quebe bi bchálaja' bagácheze.
JOH 18:21 ¿Bizr chee̱ na' dxuche̱bu' neda'? Bche̱be benne' ca' ba belenne̱' chia', na' le̱' xelenné̱' bi da bchálajle̱na' le̱'. Benne' ca' zaj nézene̱' da ba gunnéa'.
JOH 18:22 Gate gunná Jesús da nigá, na' tu benne' xra'aga we̱n zrin chee̱ xudau', benne' ze̱' na', gudape̱' xraga Jesús, na' gunné̱': ―¿Caní dxexeche̱bu' lau bxruze blau nigá?
JOH 18:23 Jesús beche̱be̱': ―Che gunnéa' tu da cale̱la, gunná ájala naca na. Che da gunnéa' naca na xrlátaje, ¿bizr chee̱ na' dxu'u neda'?
JOH 18:24 Nadxa Anás gusél-le̱' Jesús, zaj nadxéaj ne̱'e̱, lau Caifás, bxruze blau.
JOH 18:25 Dxácate̱ na' ze̱ Pedro dxu'a xi' na' dxexezré'ene̱', na' gulé̱'e̱ le̱': ―¿Quebe nacu' lue' tu benne' ca' zaj naque̱' tuze nen bénnea'? Na' Pedro gunné̱': ―Quebe naca'.
JOH 18:26 Nadxa tu benne' we̱n zrin chee̱ bxruze blau, benne' naque̱' xrtia bénnea' guchugu Pedro nague̱', bche̱be̱' le̱': ―¿Quegá ble'eda' lue' nen bénnea' naga zaj ze̱ xaga olivo ca'?
JOH 18:27 Pedro gunné̱' xecha lasa: ―Quebe núnbe'a bénnea'. La' ná'queze gudxezre xjeaj.
JOH 18:28 Nadxa belexebéaje̱' Jesús lizre Caifás, na' guleché̱'e̱ Le̱' xu'u lizre benne' xu'u lu ne̱'e̱ xe̱zr la xu na' waláz chee̱ Roma. Ba dxezú lau dxaní'sise̱', na' benne' judío ca' quebe gulu'e̱ xu'u na' chee̱ quebe xelexegá'ane̱' sban, lawe' da che xelu'e̱ na', quebe gaca xelawe̱' xrche' chee̱ Laní Pascua.
JOH 18:29 Chee̱ le̱ na' bdxuaj Pilato bchálajle̱ne̱' benne' ca', na' guzre̱' le̱': ―¿Bizra da zria dxágule benne' nigá?
JOH 18:30 Belexeche̱be benne' ca': ―Chela ca naque̱' tu benne' we̱n da zrinnaj, quebe gudentu' le̱' lau'.
JOH 18:31 Nadxa Pilato guzre̱' benne' ca': ―Le xeché̱'e̱, ne le guchi'a chee̱' cáte̱ze naca da nadxixruj bea chee̱le. Belexeche̱be benne' judío ca': ―Netu', benne' judío, quebe naca chee̱ntu' nu gútentu'.
JOH 18:32 Ca'an guca, guca li ca naca da ba gunná Jesús ca gatie̱'.
JOH 18:33 Pilato bexu'e̱ xu'u na', na' gunné̱' Jesús, ne bche̱be̱' Le̱': ―¿Nacu' Lue' Wenná Bea chee̱ judío ca'?
JOH 18:34 Jesús gunné̱': ―¿Dxenabu' da nigá lue'zqueze, u lawe' da nu guzre lue' ca naca chia'?
JOH 18:35 Pilato beche̱be̱': ―¿Naca' neda' judío? Benne' xe̱zr la xu chiu', ne benne' xíchaje̱ ca' chee̱ bxruze ca' buludée̱' lue' lawa' neda'. ¿Bizra be̱nu'?
JOH 18:36 Nadxa beche̱be Jesús: ―Naga dxenná be'a quebe naca na chee̱ xe̱zr la xu nigá. Chela naca na chee̱ xe̱zr la xu nigá, na' benne' ca' zaj naque̱' neda' tuze welásaqueze̱' chee̱ quebe tea' neda' lu na' benne' judío caní. Naga dxenná be'a quebe naca na nigá.
JOH 18:37 Nadxa guzre Pilato Jesús: ―¿Nacu' Lue' wenná bea? Beche̱be Jesús: ―Naca' wenná bea, cáte̱ze dxennáu' lue'. Neda' gúlaja', ne bla'a lu xe̱zr la xu nigá chee̱ nnia' da li. Xúgute̱ benne' ca' dxelune̱' ca dxenná dizra' chee̱ da li dxelenne̱' da dxennéa' neda'.
JOH 18:38 Pilato gunné̱': ―¿Bizra na' da li? Ca gudé bche̱be Pilato Jesús caní, na' bdxúaje̱' xetú. Bchálajle̱ne̱' benne' judío ca', na' guzre̱' le̱': ―Neda' quebe bi da cale̱la dxezrelda' nun benne' nigá.
JOH 18:39 Le'e zua tu da zéajle̱le. Gusana' neda' tu benne' xu'u lizre xia lu Laní Pascua nigá. ¿Dxaca lázrele gusana' wenná bea chee̱ judío ca'?
JOH 18:40 Nadxa xúgute̱' gulenné̱' zizraj: ―¡Quegá benne' nigá! ¡Bsan Barrabás! Barrabás na' naque̱' gubán.
JOH 19:1 Nadxa Pilato guqué̱'e̱ Jesús, na' bdxixruj bé'ene̱' xelu'e̱ Le̱' xide'.
JOH 19:2 Benne' dxjaque̱' wedil-la buluzríe̱' xichaj Jesús tu da' belune̱' zruze xaga xeche', ne bulugácue̱' Le̱' tu ladxe' bzawe.
JOH 19:3 Nadxa guléchaje̱' Le̱', dxelenné̱': ―¡Gaca ba lue', wenná bea chee̱ judío ca'! Nadxa belú'e̱ dxu'a lau Jesús.
JOH 19:4 Nadxa bdxuaj Pilato da xula, ne guzre̱' benne' ca': ―¡Le nna'xque! Dxebéaja' benne' nigá chee̱ nézele quebe dxezrelda' bi da zrinnaj nabague̱'.
JOH 19:5 Bdxuaj Jesús zria xíchaje̱' da naca zruze xaga xeche', ne nacue̱' ladxe' bzawe na'. Nadxa Pilato guzre̱' benne' ca': ―Nigá zua bénnea'.
JOH 19:6 Gate benne' xíchaje̱ ca' chee̱ bxruze ca', ne xra'aga we̱n zrin chee̱' ca' belelé'ene̱' Jesús, na' gulezú lawe̱' dxelenné̱' zizraj: ―¡Bde̱'e̱ xaga béguaj! ¡Bde̱'e̱ xaga béguaj! Pilato guzre̱' benne' ca': ―Le che̱'e̱, ne le gudé̱'e̱ xaga béguaj lé'equeze, lawe' da quebe dxezrelda' bi da zrinnaj nabague̱'.
JOH 19:7 Na' benne' judío ca' belexeche̱be̱': ―Netu' nápantu' tu da nadxixruj bea na, ne ca dxenná na dxal-la' gatie̱' lawe' da dxun cuine̱' Zri'ine Dios.
JOH 19:8 Gate ben Pilato da nigá, na' bezrébedxe̱'.
JOH 19:9 Bexu'e̱ xu'u na', na' bche̱be̱' Jesús: ―¿Gazra benne' Lue'? Quebe bi beche̱be Jesús.
JOH 19:10 Nadxa guzre Pilato Le̱': ―¿Quebe dxexeche̱bu' chia'? ¿Quebe nézenu' Lue' napa' neda' xel-la' dxenná bea gudá'a Lue' xaga béguaj, ne napa' xel-la' dxenná bea gusana' Lue'?
JOH 19:11 Beche̱be Jesús: ―Quebe bi xel-la' dxenná bea napu' bi gunu' chia' chela ca be̱nna Dios lue' xel-la' dxenná bea nigá. Chee̱ le̱ na', bénnea' bdee̱' neda' lu na'u dul-la zrendxa nabague̱' ca lue'.
JOH 19:12 Lu zra na'te̱ gudilaj lazre' Pilato ájala gune̱' gusane̱' Jesús, san benne' judío ca' gulenné̱' zizraj: ―Che gusanu' benne' nigá, quebe nacu' César tuze, bénnea' dxenná bea Roma. Nu benne' dxun cuine̱' wenná bea dxedábague̱' César.
JOH 19:13 Nadxa Pilato, gate benne̱' da nigá, bdxixruj bé'ene̱' xelexebéaje̱' Jesús, na' gudxé'e̱ lataj blau chee̱', da zua lataj na' nazí le na Gabata nen dizra' hebreo, da zéaje̱ na chale'aj xiaj ta'a.
JOH 19:14 Naca na zra za zrin Laní Pascua, ca du wagubizra. Nadxa Pilato guzre̱' benne' judío ca': ―Nigá zua wenná bea chee̱le.
JOH 19:15 Na' benne' ca' gulenné̱' zizraj: ―¡Gatie̱'! ¡Gatie̱'! ¡Bde̱'e̱ xaga béguaj! Pilato guzre̱' benne' ca': ―¿Gudá'a wenná bea chee̱le xaga béguaj? Belexeche̱be benne' xíchaje̱ ca' chee̱ bxruze ca': ―Netu' zua tuze wenná bea chee̱ntu'. ¡César!
JOH 19:16 Nadxa Pilato bdee̱' Jesús lu na' benne' ca' chee̱ te̱'e̱ xaga béguaj, na' guleché̱'e̱ Jesús.
JOH 19:17 Na' bdxuaj Jesús nu'e̱ xaga béguaj chee̱ chéaje̱' lataj na' nazí le na Zrita Xichaj Benne' Gate, na' nen dizra' hebreo nazí le na Gólgota.
JOH 19:18 Buludé̱'e̱ Jesús xaga béguaj lataj na', na' tu zren nen Jesús buludé̱'e̱ xechupa benne' xaga béguaj ca' chalá'a weaj naga da' Jesús.
JOH 19:19 Pilato bdxixruj bé'ene̱' buluzúe̱' le̱'e xaga béguaj xichaj Jesús da dxenná na: Jesús, Benne' Nazaret, Wenná Bea Chee̱ Judío Ca'.
JOH 19:20 Zane' benne' judío ca' bululabe̱' da na' lawe' da zua lataj na' naga buludé̱'e̱ Jesús xaga béguaj gáguze naga dxe' xe̱zre na', na' da na' naxúaj na nen dizra' hebreo, ne nen dizra' griego, ne nen dizra' latín.
JOH 19:21 Chee̱ le̱ na' benne' xíchaje̱ ca' chee̱ bxruze chee̱ judío ca' gulé̱'e̱ Pilato: ―Quebe guzúaju' na: Wenná Bea Chee̱ Judío Ca'. Bzuaj na: Le̱' Gunné̱' Naque̱' Wenná Bea Chee̱ Judío Ca'.
JOH 19:22 Beche̱be Pilato: ―Da bzuaja', ba naxúajqueze na.
JOH 19:23 Ca gudé buludá' benne' dxjaque̱' wedil-la Jesús xaga béguaj, na' belexequé̱'e̱ zra lane̱', ne belebeque̱' na tapa cue', tu cue' weaj chee̱ tu tu benne' dxjaque̱' wedil-la. Belecá'aqueze̱' ladxe' dxexrúa cuzre̱' da quebe nadía na. Tu ca nácheze na.
JOH 19:24 Chee̱ le̱ na' benne' dxjaque̱' wedil-la gulé̱ ljwezre̱': ―Quebe chézadxu na. Cwéajdxu da gunna bea na chee̱ la' nu xala le̱ na. Ca'an guca, guca li da naxúaj na lu xiche chee̱ Dios, da dxenná na: Belexelé̱'e̱ zra lana', ne guléaje̱' da gunna bea na chee̱ le̱ na. Caní belún benne' dxjaque̱' wedil-la.
JOH 19:25 Gáguze naga zua xaga béguaj chee̱ Jesús ze̱ xrna Jesús nen bi bila xrne̱'e̱, ne María, zru'ula Cleofas, ne María Magdalena.
JOH 19:26 Gate ble'e Jesús xrne̱'e̱, ne cuita xrne̱'e̱ na' ze̱ Juan, benne' bse̱de Jesús, bénnea' nazri'idxe̱', na' guzre̱' xrne̱'e̱: ―Nú'uladau', na' ze̱ zri'inu'.
JOH 19:27 Nadxa guzre Jesús bénnea': ―Na' ze̱ xrna'u. Zra na'te̱ benne' nigá beche̱'e̱ nu'ula na' lizre̱'.
JOH 19:28 Ca gudé gunná Jesús da nigá, lawe' da nézene̱' xúgute̱ na ba guca li, ne chee̱ guca li ca naxúaj na lu xiche chee̱ Dios, gunné̱': ―Dxebíleda'.
JOH 19:29 Zua na' tu dxe'e nupe zichaj, na' bulusubise̱' tu da dxezrupe na nupe zichaj na', ne buluzúe̱' na lawe' tu xia tunna, na' buluzúe̱' na dxu'a Jesús.
JOH 19:30 Na' Jesús guzrupe̱' nupe zichaj na', na' gunné̱': ―Ba guca li ca naca na. Nadxa bse dxu'a xíchaje̱', gutie̱'.
JOH 19:31 Naca na zra za zrin Laní Pascua, na' judío ca' quebe gulaca lazre̱' xelexegá'ana benne' ca' le̱'e̱ xaga béguaj ca' lu zra dxulupá'ane̱' lawe' da naca zra na' tu zra blau. Chee̱ le̱ na' gulenabe̱' lau Pilato dxixruj bé'ene̱' xelíchaje̱' ni'a benne' ca' zaj de̱'e̱ xaga béguaj ca', ne xelexequé̱'e̱ le̱' le̱'e̱ xaga béguaj ca'.
JOH 19:32 Nadxa tu benne' ca' dxjaque̱' wedil-la gudíchaje̱' ni'a benne' nedxu na', ne cá'anqueze chee̱ benne' xetú de̱'e̱ cuita Jesús.
JOH 19:33 Gate bzrine̱' naga da' Jesús, blé'ene̱' ba gutie̱', na' chee̱ le̱ na' quebe gudíchaje̱' ni'e̱.
JOH 19:34 Tu benne' ca' dxjaque̱' wedil-la guchízie̱' xia chee̱' lachú'u Jesús, na' bdxuaj dxen, ne nisa na'.
JOH 19:35 Benne' dxuchalaj da nigá naque̱' benne' blé'ene̱' na, ne dxuchálaje̱' da li, ne nézene̱' dxenné̱' da li, chee̱ cá'anqueze le'e chéajle̱le chee̱ Jesús.
JOH 19:36 Da caní guca na chee̱ guca li ca da naxúaj na lu xiche chee̱ Dios, da dxenná na: Quebe gulíchaje̱' netú zrita chee̱'.
JOH 19:37 Xetú da naxúaj na lu xiche chee̱ Dios dxenná na: Welelé'ene̱' bénnea' belune̱' we̱'.
JOH 19:38 Ca gudé na' José, benne' xe̱zre Arimatea, xeajnabe̱' Pilato gu'e̱ le̱' lataj xexu'e̱ Jesús. José naque̱' tu benne' guque̱' Jesús tuze, san bagácheze lawe' da bzrebe̱' judío blau ca'. Pilato be̱'e̱ le̱' lataj, na' bexu'e̱ Jesús.
JOH 19:39 Cá'anqueze Nicodemo, bénnea' xeajchálajle̱ne̱' Jesús chizrela, bzrine̱' na', nu'e̱ tu gaxúa xiaj nedxe, ne tu da dxelále̱'e̱ zixre.
JOH 19:40 Nadxa José, ne Nicodemo belexequé̱'e̱ Jesús, na' buluchele̱' Le̱' ladxe' nen nedxe na' ca naca da zjácale̱ benne' judío ca' da dxelune̱' chee̱ benne' gate', gate na' dxulucache̱' le̱'.
JOH 19:41 Lataj na' naga buludé̱'e̱ Jesús xaga béguaj zua tu lataj naga zaj ze̱ xaga ca', na' láwela lataj na' zua tu ba cube le̱'e̱ xiaj na', naga quebe nu ne chú'uqueze benne' gate'.
JOH 19:42 Lu ba na' belegu'e̱ Jesús lawe' da zua ba na' gáguze, ne lawe' da ba dxebía gubizra, ne ba zua su lau zra dxulupá'ana judío ca'.
JOH 20:1 Zra nedxu, guxíaj María Magdalena dxu'a ba na' dxaní'sise̱', gate ne nachúl-late̱, na' blé'ene̱' québedxa naduse xiaj dxu'a ba na'.
JOH 20:2 Nadxa bexíaj chégüe̱' naga zua Simón Pedro nen xetú benne' bse̱de Jesús, bénnea' bzri'idxe̱' Jesús, na' guzre̱' benne' ca': ―Ba belequé̱'e̱ Xránadxu lu ba na', ne quebe nézentu' ga xeajlelú'e̱ Le̱'.
JOH 20:3 Nadxa Pedro, ne bénnea' xetú beledxúaje̱' zjaque̱' dxu'a ba na'.
JOH 20:4 Dxúpate̱' zjaca chégüe̱' tu zren, san bénnea' xetú guzá chégudxe̱' ca Pedro, ne bzrine̱' nédxudxa dxu'a ba na'.
JOH 20:5 Na' xeajsé̱' su dxú'ala xeajnné̱'e̱ lu ba na', na' blé'ene̱' ladxe' da buluchele̱' Jesús xu'u na na', san quebe guxú'e̱ lu ba na'.
JOH 20:6 Ca gudé na', bzrin Simón Pedro, na' guxú'e̱ lu ba na'. Cá'anqueze le̱' blé'ene̱' ladxe' na' xu'u na na',
JOH 20:7 ne blé'ene̱' ladxe' da buluchele̱' xichaj Jesús, quebe xu'u na tu zren nen ladxe' da bedxela na le̱'. Nadube na, dxe' na chalá'ala.
JOH 20:8 Nadxa cá'anqueze guxú'u bénnea' xetú, bénnea' bzrin nedxu dxu'a ba na', na' blé'ene̱' ladxe' ca', ne guxéajle̱'e̱.
JOH 20:9 Quebe ne xeléajni'ine̱' da naxúaj na lu xiche chee̱ Dios da dxenná na xebán Jesús ládujla benne' gate'.
JOH 20:10 Nadxa benne' ca' bse̱de Jesús belexezrine̱' xu'u naga zaj zre̱'e̱.
JOH 20:11 María begá'ane̱' dxu'a ba na', dxebezre̱'. Ca dxebezre̱' na', na' gulégüe̱' dxenné̱'e̱ lu ba na',
JOH 20:12 na' blé'ene̱' chupa gubáz chee̱ xabáa zaj nácue̱' zra lane̱' chiche, zaj dxe'e̱ naga guxú'u Jesús. Tue̱' dxe'e̱ naga guzrúa xichaj Jesús, na' xetúe̱' dxe'e̱ zeaj zranle ga guzrúa ni'a Le̱'.
JOH 20:13 Na' buluche̱be gubáz chee̱ xabáa ca' María na': ―Nu'ula, ¿bizr chee̱ na' dxebezru'? Le̱' guzre̱' gubáz chee̱ xabáa ca': ―Lawe' da belú'e̱ Xrana', ne quebe nezda' ga xeajlelú'e̱ Le̱'.
JOH 20:14 Caní dxenné̱', na' bzéchaj xíchaje̱', ne blé'ene̱' Jesús ze̱' ca'ala, san quebe nézene̱' che Jesús na'.
JOH 20:15 Nadxa Jesús bche̱be̱' María na': ―Nú'uladau', ¿bizr chee̱ na' dxebezru'? ¿Nu dxexílaju'? María gúquene̱' naque̱' benne' dxá'ane̱' xaga ca' zaj ze̱ na', na' guzre̱' Le̱': ―Benne', che lue' bi'u Le̱', gunná ga xeajlú'u Le̱', chee̱ cheajxezri'a Le̱'.
JOH 20:16 Nadxa Jesús guzre̱' nu'ula na': ―María. María na' bexéchaje̱', ne guzre̱' Le̱' nen dizra' hebreo: ―¡Raboni! Dizra' nigá zéaje̱ na: Benne' Dxuse̱de.
JOH 20:17 Jesús guzre̱' María na': ―Bsan neda' lawe' da quebe ne xegüéna' naga zua Xra'. Bexíaj, xeajxe̱zre bi bícha'dau' ca', benne' ca' bsé̱deda', xegüéna' naga zua Xra', ne nácaqueze̱' Xrale. Naque̱' Dios chia', ne Dios chee̱le.
JOH 20:18 Nadxa bexíaj María Magdalena, xeajzenne̱' benne' ca' bse̱de Jesús ba blé'ene̱' Jesús, na' Le̱' guzre̱' le̱' da caní.
JOH 20:19 Lu zra ná'queze, da naca na zra nedxu chee̱ da gazre zra, na' chizrela zaj nazraga benne' ca' bse̱de Jesús, ne zaj nusézxuje̱' dxa xu'u ca' lawe' da dxelezrebe̱' judío blau ca'. Na' guxú'u Jesús, guzé̱' laduj benne' ca', na' bgape̱' benne' ca' diuzre, dxenné̱': ―Le gapa xel-la' dxebeza zri lazre'.
JOH 20:20 Ca gudé gunná Jesús da nigá, na' blé'ene̱' benne' ca' ne̱'e̱, ne le̱'e̱ naga gudé xia na'. Benne' ca' bse̱de Jesús gulebéle̱'e̱ne̱' gate belelé'ene̱' Xránadxu.
JOH 20:21 Nadxa Jesús guzre̱' benne' ca' xecha lasa: ―Le gapa xel-la' dxebeza zri lazre'. Cáte̱ze gusel-la Xra' neda', cá'anqueze dxusel-la' neda' le'e.
JOH 20:22 Nadxa blube̱' lau benne' ca' ne guzre̱' le̱': ―Le si' Be' Lá'azxa chee̱ Dios.
JOH 20:23 Benne' ca' dxunite laule le'e chee̱ dul-la zaj nabague̱' ba bnite lau Dios chee̱', na' benne' ca' quebe dxunite laule le'e chee̱ dul-la zaj nabague̱', quebe bunite lau Dios chee̱'.
JOH 20:24 Tomás, tu benne' chazrinnu ca' bse̱de Jesús, bénnea' le̱' Bi Lide', quebe zue̱' nen benne' ca' xezícadxa gate ble'e lau Jesús.
JOH 20:25 Ca gudé na' gulé̱'e̱ Tomás na': ―Ba blé'entu' Xránadxu. Gunná Tomás: ―Che quebe le'eda' ne̱'e̱ naga guledé bdiduj ca', ne gudéa' zrube na'a lu xe̱dxu chee̱ bdiduj ca', ne gudéa' na'a le̱'e̱ naga gudé xia na', québequeze chéajle̱'a.
JOH 20:26 Ca guca xrunu' zra, benne' ca' bse̱de Jesús zaj nazrágaqueze̱' lu xu'u na' xetú lasa, na' zua Tomás nen benne' ca'. Nadxa, lácala zaj naxezxuj dxa xu'u ca', ble'e lau Jesús lau benne' ca', ne guzé̱' laduj le̱', na' bgape̱' le̱' diuzre, gunné̱': ―Le gapa xel-la' dxebeza zri lazre'.
JOH 20:27 Nadxa Jesús guzre̱' Tomás: ―Bde zrube na'u nigá, ne gunná' na'a nigá. Be̱nna na'u, bde na le̱'a nigá. Québedxa gun chupa lazru', san guxéajle̱.
JOH 20:28 Nadxa beche̱be Tomás: ―Xrana', ne Dios chia'.
JOH 20:29 Jesús guzre̱' le̱': ―Tomás, na'a dxéajle̱'u lawe' da ba blé'enu' neda'. Ba neza zrente̱ naca na chee̱ benne' ca' dxeléajle̱'e̱ chia' lácala quebe ne xelelé'ene̱' neda'.
JOH 20:30 Jesús be̱ne̱' da zandxa xel-la' waca zrente̱ lau benne' ca' bsé̱dene̱' da quebe zaj naxúaj na lu xiche nigá.
JOH 20:31 Da caní zaj naxúaj na chee̱ chéajle̱le le'e chee̱ Jesús, naque̱' Cristo nasel-la Dios, ne Zri'ine Dios, ne chee̱ gápale xel-la' nabán lawe' da dxéajle̱le chee̱'.
JOH 21:1 Ca gudé na' Jesús ble'e lawe̱' lau benne' ca' bsé̱dene̱' dxu'a nísadau' chee̱ Tiberias. Caní guca na.
JOH 21:2 Zaj nazraga Simón Pedro, ne Tomás, bénnea' lé̱queze̱' Bi Lide', ne Natanael, benne' xe̱zre Caná da nababa Galilea, ne chupa zri'ine Zebedeo, ne xechupa benne' ca' bse̱de Jesús.
JOH 21:3 Simón Pedro guzre̱' benne' ca': ―Cheajsendxa' bela. Benne' ca' gulenné̱': ―Cá'anqueze netu' wazá'le̱ntu' lue'. Nadxa xjaque̱', na' gulu'e̱ tu lu da dxedá lawe' nísadau'. Xe̱la na' quebe nu bela gulezénqueze̱'.
JOH 21:4 Ca guzú lau dxaní'sise̱', ble'e lau Jesús dxu'a nísadau' na'. Benne' ca' bsé̱dene̱' quebe zaj nézene̱' che Jesús na'.
JOH 21:5 Nadxa Jesús guzre̱' benne' ca': ―Bénne'dau', ¿quebe nu bela ne senle? Belexeche̱be benne' ca': ―Quebe bi ne sentu'-ba'.
JOH 21:6 Nadxa guzre Jesús benne' ca': ―Le guzala xixruj na' chalá'a xabe̱la chee̱ da dxedá lawe' nísadau' na', na' senle bela. Ca' belune̱', na' ca dxelexequé̱'e̱ xixruj na' quebe dxelexegué'ene̱' na lawe' da nazrate̱ na bela zan.
JOH 21:7 Nadxa bénnea' nazrí'idxa Jesús guzre̱' Pedro: ―Xránadxu na'. Ca ben Simón Pedro naca Xránadxu, na' bexázie̱' ladxe' dxexrúa cuzre̱' lawe' da nagüe̱' na, na' bexétaje̱' lu nisa.
JOH 21:8 Xezícadxa benne' ca' belexezrine̱' dxu'a nísadau' na', zaj zre̱'e̱ lu da dxedá lawe' nísadau', dxelexezrube xue̱' xixruj na' nazrate̱ na bela ca' lawe' da dxe' da dxedá lawe' nísadau' na' lu nísadau' ca tu le gu'una xiaj.
JOH 21:9 Gate belexétaje̱' lu xu bizre, na' belelé'ene̱' ba dxe' xi', ne ba zrua tu bela lawe' xi' na', na' de̱ na' xeta xtila.
JOH 21:10 Nadxa Jesús guzre̱' benne' ca': ―Le cheajxrí' tu chupa bela ca', be̱ za guzénte̱le.
JOH 21:11 Begüén Simón Pedro lu da dxedá lawe' nísadau' na', ne bezrube xue̱' xixruj na' dxu'a nísadau' na'te̱, nazrate̱ na bela zri'a, tu gaxúa chi'inu xunba', na' lácala naca tu cá'ante̱ba' quebe gudxeza xixruj na'.
JOH 21:12 Nadxa guzre Jesús benne' ca': ―Le da gágule xrsila. Netú benne' ca' quebe dxelexázrene̱' xuluche̱be̱' Le̱' nu Le̱', lawe' da zaj nézene̱' naque̱' Xránadxu.
JOH 21:13 Nadxa Jesús guqué̱'e̱ xeta xtila na', na' bnézruje̱' na benne' ca', ne cá'anqueze be̱ne̱' chee̱ bela ca'.
JOH 21:14 Da nigá naca na da guxunne' lasa ble'e lau Jesús lau benne' ca' bsé̱dene̱' ca gudé bebane̱' ládujla benne' gate.
JOH 21:15 Ca gudé gulawe̱' xrsila, na' Jesús bche̱be̱' Simón Pedro: ―Simón, zri'ine Jonás, ¿nazrí'idxenu' neda' ca benne' caní? Beche̱be Pedro: ―Awe', Xran, nézenu' dxelé'eda' Lue' chawe'. Na' Jesús guzre̱' le̱': ―Bxue zríla'du chia' ca'.
JOH 21:16 Nadxa Jesús bche̱be̱' le̱' da xula: ―Simón, zri'ine Jonás, ¿nazrí'inu' neda'? Pedro beche̱be̱': ―Awe', Xran, Lue' nézenu' dxelé'eda' Lue' chawe'. Jesús guzre̱' le̱': ―Bxue zrila' chia' ca'.
JOH 21:17 Da guxunne' lasa Jesús bche̱be̱' le̱': ―Simón, zri'ine Jonás, ¿dxelé'enu' neda' chawe'? Pedro bewi'ine lazre̱' lawe' da bche̱be Jesús le̱' da guxunne' lasa che dxelé'ene̱' Le̱' chawe', na' guzre̱' Jesús: ―Xran, Lue' nézquezenu' xúgute̱. Lue' nézenu' dxelé'eda' Lue' chawe'. Na' Jesús guzre̱' le̱': ―Bxue zrila' chia' ca'.
JOH 21:18 Da li dxapa' lue', gate ne nacu' benne' cuide' gucu' zra lanu', ne guxíaju' naga dxaca lazru'. Gate bache nacu' benne' gula, chilju' na'u, na' benne' xula gugácue̱' lue', ne che̱'e̱ lue' naga quebe gaca lazru' chéaju'.
JOH 21:19 Gate gunná Jesús da nigá, dxuzéajni'ine̱' benne' ca' ca dxal-la' gate' Pedro chee̱ gucá'ana szrene̱' Dios. Ca gudé na' Jesús guzre̱' le̱': ―Be̱n neda' tuze.
JOH 21:20 Gate bexechaj Pedro, blé'ene̱' bénnea' nazrí'idxa Jesús zéaje̱ nawe̱' le̱', naque̱' bénnea' dxe'e̱ cuita Jesús gate na' gulawe̱' xrche' na', ne bche̱be̱' Jesús: “Xran, ¿nuzra na' gudé Lue' lu na' benne' ca' dxeledábague̱' lue'?”
JOH 21:21 Gate Pedro blé'ene̱' bénnea', na' bche̱be̱' Jesús: ―Xran, ¿gazra benne' nigá? ¿Aja gaca chee̱'?
JOH 21:22 Jesús beche̱be̱': ―Che neda' dxaca lazra' xegá'ane̱' nigá ca zrindxa zra xelá'a neda', ¿naca na chiu' lue' nézenu'? Lue', be̱n neda' tuze.
JOH 21:23 Belén benne' ca' zaj de̱'e̱ Jesús quebe gate benne' na'. Jesús quebe guzre̱' le̱' quebe gatie̱'. Guzre̱' le̱': “Che neda' dxaca lazra' xegá'ane̱' ca zrindxa zra xelá'a neda', ¿naca na chiu' lue' nézenu'?”
JOH 21:24 Benne' nigá naque̱' benne' dxexeche̱be̱' chee̱ da nigá, ne ba nuzúaje̱' na. Nézentu' dxenné̱' da li.
JOH 21:25 Cá'anqueze ne zaj de̱dxa da zante̱ da be̱n Jesús, na' chela xuaj tu tu na, dxéqueda' quebe gueque lu xe̱zr la xu nigá cha' xiche ca' dxal-la' guzúajdxu. Ca' naca na.
ACT 1:1 Lue', Teófilo, bzuaja' chiu' lu xiche nedxu ca naca xúgute̱ da guzú lau Jesús dxune̱', ne dxusé̱dene̱' nédxudaute̱,
ACT 1:2 cadxa begüéne̱' xabáa. Gate za xezé̱'e̱ xexíaje̱' xabáa guqué̱'e̱ gubáz chee̱' ca', na' zúale̱ Be' Lá'azxa Le̱' guzre̱' benne' ca' ca da dxal-la' xelune̱'.
ACT 1:3 Ca gudé gutie̱', Jesús ná'queze ble'e lawe̱' benne' ca', ne lawe' chua zra ble'e lawe̱' benne' ca', na' blé'ene̱' da zan da dxelunna bea na naca bane̱', ne bchálajle̱ne̱' benne' ca' ca dxal-la' nna bea Dios.
ACT 1:4 Gate ne zúale̱ Jesús benne' gubáz ca', gunné̱ xuene̱' le̱' quebe xesí'aque̱' xe̱zre Jerusalén. Na' guzre̱' benne' ca': ―Le cueza ca da guche̱be lazre' Xra' gunne̱' chee̱le, ca gunníqueza' neda'.
ACT 1:5 Da li Juan bchue̱' bénneache nisa, san lu zra caní gaca chee̱le ca da zéaje̱ xel-la' dxedxúa nisa, xida Be' Lá'azxa xedajsúe̱' lu xichaj lázrdaule.
ACT 1:6 Gate na' zaj nazrague̱' nen Jesús, na' buluche̱be̱' Le̱': ―Xran, ¿güe Dios lataj nna béaqueze xe̱zre Israel lu zra caní?
ACT 1:7 Na' beche̱be Jesús: ―Quebe naca chee̱le nézele bátala, u bi zra gun Dios da ca' tuze Le̱' nape̱' xel-la' waca gune̱'.
ACT 1:8 Gate xida Be' Lá'azxa súale̱ne̱' le'e, sile xel-la' waca, na' chéajle cheajchálajle da naca chia' lu xe̱zre Jerusalén, ne ca naca naga nababa Judea, ne naga nababa Samaria, ne ca nácaqueze xe̱zr la xu nigá.
ACT 1:9 Ca gudé gunné̱' da nigá, ne dxácate̱ dxelenná' benne' ca' Le̱', begüén Jesús xabáa, na' ca bexu'e̱ tu lu beuj benite Jesús lau benne' ca'.
ACT 1:10 Ne zaj zra' benne' ca' dxelenné̱'e̱ dxácate̱ dxegüén Jesús, belelá' chupa benne' zaj nácue̱' ladxe' chiche lau benne' ca',
ACT 1:11 na' gulé̱'e̱ benne' gubáz ca': ―Le'e, benne' Galilea, ¿bizr chee̱ na' ze̱le dxenna'le xabáa? Jesús nigáqueze begüéne̱' zexíaje̱' xabáa, bezé̱'e̱ ládujla le'e, welé̱'e̱ xetú cáqueze ble'ele Le̱' zexíaje̱'.
ACT 1:12 Nadxa besí'aca benne' gubáz ca' lu Xi'a Xaga Olivo, ne belexezrine̱' Jerusalén, da quebe naca na zitu', san dxe' cátite̱ze da dxunna da nadxixruj bea na lataj xesí'aque̱' lu zra dxulupá'ane̱'.
ACT 1:13 Gate belexezrine̱' lu xe̱zre na', belexegüéne̱' xu'u sibe naga zaj zue̱'. Benne' caní zaj naque̱' Pedro, ne Jacobo, ne Juan, ne Andrés, ne Felipe, ne Tomás, ne Bartolomé, ne Mateo, ne Jacobo zri'ine Alfeo, ne Simón, bénnea' dxedábague̱' benne' Roma ca', ne Judas, zri'ine Jacobo.
ACT 1:14 Xúgute̱ benne' caní tu dxelezrágazqueze̱' nen benne' biche Jesús, ne María xrna Jesús, ne xebal-la nu'ula ca', chee̱ xuluchálajle̱ne̱' Dios.
ACT 1:15 Lu zra ca' Pedro guzé̱' laduj bi bíchedxu ca', zaj naque̱' ca tu gaxúa galaj bénneache, na' guzre̱' le̱':
ACT 1:16 ―Le'e, bi bícha'dau', be̱n na ba xen guca li ca da gunná Be' Lá'azxa lu xiche chee̱ Dios, da na' gunná David waláz chee̱ Dios ca naca da dxal-la' gaca chee̱ Judas, bénnea' guché̱'e̱ benne' ca' gule̱l-le̱' Jesús.
ACT 1:17 Judas nigá guzúale̱ne̱' dxi'u tu zren, ne guque̱' dxi'u tuze lu zrin nigá.
ACT 1:18 Bxa'u tu cue' xe̱zr la xu ca naca lazruj chee̱ Judas, da guzí' lu ne̱'e̱ chee̱ da cale̱la da be̱ne̱'. Na' benne' nigá xeajcházie̱' suxíchajla, ne gutín le̱'e̱, na' bdxuaj ca naca zrájlue̱'.
ACT 1:19 Xúgute̱ benne' zaj zre̱'e̱ Jerusalén belenne̱' da nigá, na' buluzúe̱' la xe̱zr la xu na' Acéldama, da zéaje̱ na: Xe̱zr La Xu Chee̱ Dxen.
ACT 1:20 Guca li ca da dxal-la' gaca chee̱' lawe' da naxúaj lu xiche lá'azxa naga zaj naxúaj salmo ca', da dxenná na: Xegá'ana cá'aze lizre̱', ne quebe nu chilá' sua na'. Cá'anqueze dxenná na: Xetú benne' tée̱' waláz chee̱'.
ACT 1:21 ’Zaj zra' nigá benne' ca' gusá'acale̱ne̱' dxi'u ca naca dxácate̱ guzúale̱ Jesús dxi'u.
ACT 1:22 Guzú lau na gate bchua Juan Jesús nisa, cadxa bzrin zra begüéne̱' xabáa. Dxun na ba xen tu benne' caní gaque̱' dxi'u tuze chee̱ xeche̱be̱' ca guca gate bebán Jesús lu xel-la' gute.
ACT 1:23 Nadxa gulebéaje̱' chupa benne' ca', José ne Matías. José na' lé̱queze̱' Barsabás ne lé̱queze̱' Justo.
ACT 1:24 Buluchálajle̱ne̱' Dios, gulenné̱': ―Xran, Lue' nézqueznu' ca naca da xu'u lu xichaj lázxdau xúgute̱ bénneache. Ble'e netu' nula benne' chupa caní ba nabéaju' Lue',
ACT 1:25 chee̱ gaque̱' gubáz chiu', ne xedée̱' waláz chee̱ Judas, bénnea' bnitie̱' da naca chee̱' lawe' da be̱ne̱' dul-la, na' bexíaje̱' lataj naga naca chee̱'.
ACT 1:26 Nadxa gulebéaje̱' da gaca bea na, na' bexala Matías, na' gúcate̱' tuze benne' chinéaj gubáz ca'.
ACT 2:1 Ca bzrin zra Pentecostés, xúgute̱ benne' ca' dxeléajle̱'e̱ chee̱ Jesús zaj nazrague̱' tuze lataj.
ACT 2:2 Ca' guca, belenne̱' tu schaga da za' lu be' zran xabáa, ca dxun tu be' bdunu', na' belén na xúgute̱ benne' zaj zre̱'e̱ lu xu'u naga zaj dxe'e̱.
ACT 2:3 Nadxa belelé'ene̱' lu be' xi' ca', da dxelala, na' xeajlezúa na xíchaj tu tu benne' ca'.
ACT 2:4 Nadxa guzúale̱tequeze Be' Lá'azxa xúgute̱ benne' ca', na' tu tue̱' gulezú lawe̱' dxuluchálaje̱' dizra' nazrala cáte̱ze dxuchine Be' Lá'azxa le̱'.
ACT 2:5 Ca lu zra ca' zaj zra' xe̱zre Jerusalén benne' judío ca' dxulucá'ana szrénqueze̱' Dios. Benne' caní zá'aque̱' xúgute̱ xe̱zr la xu zaj dxe' lu xe̱zr la xu nigá.
ACT 2:6 Ca belenne̱' bénneache ca naca schaga na' da dxaca na, na' belexezrague̱', ne quebe zaj nézene̱' bi na', lawe' da dxelén tu tu benne' ca' dizra' cha chee̱' da dxuluchalaj benne' ca' dxeléajle̱'e̱ chee̱ Jesús.
ACT 2:7 Na' belexebánele̱'e̱ne̱', ne belexruse̱', ne gulé̱ ljwezre̱' tue̱' xetúe̱': ―Zaj naca benne' Galilea xúgute̱ benne' caní dxuluchálaje̱'.
ACT 2:8 ¿Ájazra na' dxendxu dxuluchálaje̱' dizra' cha chee̱dxu dxi'u?
ACT 2:9 Zradxu dxi'u nigá, nácadxu benne' xe̱zr la xu Partia, ne benne' xe̱zr la xu Media, ne benne' xe̱zr la xu Elam, ne benne' xe̱zr la xu Mesopotamia, ne benne' chee̱ xe̱zre ca' zaj nababa Judea, ne benne' chee̱ naga nababa Capadocia, ne benne' chee̱ naga nababa Ponto, ne benne' chee̱ naga nababa Asia,
ACT 2:10 ne benne' chee̱ naga nababa Frigia, ne benne' chee̱ naga nababa Panfilia, ne benne' xe̱zr la xu Egipto, ne benne' chee̱ xe̱zr la xu Africa da zua dédedxa chee̱ xe̱zre Cirene. Cá'anqueze zaj zra' benne' xe̱zr la xu Roma nigá. Bal-la benne' Roma ca' zaj naque̱' benne' judío, benne' gulálaje̱' ca', ne benne' zaj nazi'e̱ ca naca da nadxixruj bea chee̱ benne' judío ca'.
ACT 2:11 Cá'anqueze nácadxu benne' xe̱zr la xu Creta, ne benne' xe̱zr la xu Arabia. Xúgute̱dxu dxendxu lu dizra' cha chee̱dxu dxuluchalaj benne' caní ca naca da zren ca' da dxun Dios.
ACT 2:12 Xúgute̱' belexebánene̱', ne quebe zaj nézene̱' bi da dxaca na', na' gulenaba ljwezre̱' tue̱' xetúe̱': ―¿Bizra zéaje̱ da nigá?
ACT 2:13 Benne' xula ca' belún le̱', gulenné̱': ―Dxelezuzre benne' caní.
ACT 2:14 Nadxa guxasa Pedro nen benne' chinéaj gubáz chee̱ Cristo, na' zizraj bchálajle̱ne̱' bénneache zaj zra' na'. Dxe̱'e̱ le̱': ―Le'e, benne' Judea, ne xúgute̱le le'e nazrágale xe̱zre Jerusalén. Dxal-la' nézele le'e da nigá. Le xen xanne' ca naca da xapa' le'e.
ACT 2:15 Netu' quebe dxezúzrentu' ca dxéquele le'e. Za gudete̱ xrsila na'a. Netú benne' quebe dxezúzrene̱' ca ná'queze.
ACT 2:16 Da nigá naca da gunnáqueze Joel, bénnea' bchálaje̱' waláz chee̱ Dios gate na' gunné̱':
ACT 2:17 Caní dxenná Dios: “Lu zra bze̱be wasél-laqueza' Be' Lá'azxa chia' chee̱ súale̱ne̱' xúgute̱ bénneache. Zrí'inele bi biu ne bi nu'ula welenné̱quezebe' waláz chia' neda'. Bi cuide' ca' welelé'equezebe' ca da gulé'eda'-be'. Na' benne' gula ca' welennéquezene̱' xe̱la.
ACT 2:18 Ca lu zra na' guzuáqueza' Be' Lá'azxa chia' nen bi we̱n zrin chia' ca', benne' biu ne nu'ula ca', na' guchálajquezebe' waláz chia' neda'.
ACT 2:19 Lu be' zran xabáa gulé'equezda' xel-la' waca chia', na' lu xe̱zr la xu dxe'ela gulé'eda' da xelunna bea na, dxen, ne xi', ne zren da naca ca beuj gasaj.”
ACT 2:20 Gubizra xechul-la na, na' beu' xexaca na xrna ca dxen nedxu ca za zrin zra xelá' Xránadxu. Zra na' gaca na tu zra chee̱ da xebánedxu ne zra na' walé'equezdxu xel-la' szren chee̱ Dios.
ACT 2:21 Nadxa xelelá xúgute̱ benne' ca' xelenné̱' Xránadxu lu xel-la' dxeleajlí lazre' chee̱'.
ACT 2:22 ’Chee̱ le̱ na', le'e, benne' Israel, le xen ca da xapa' le'e. Jesús, benne' Nazaret, guque̱' tu benne' bedxúaje̱' xrlátaje lau xúgute̱le le'e ne̱ chee̱ da be̱n Dios laule le'e. Lu na' Jesús Dios blé'ene̱' da zan da dxebánedxu, ne xel-la' waca ca', ne da dxelunna bea na ca ba nézquezle le'e.
ACT 2:23 Gate Dios be̱'e̱ lataj tu benne' bdee̱' Le̱' lu na'le le'e cáte̱ze bache núnqueze̱' nedxu, nadxa le'e gudé̱l-lale Le̱', na' bé̱tele Le̱' gate na' bdele Le̱' lu na' benne' ca' dxelune̱' da cale̱la, benne' ca' buludé̱'e̱ Le̱' xaga béguaj naga gutie̱'.
ACT 2:24 Nadxa Dios bsebane̱' Le̱', bebéaje̱' Le̱' lu xel-la' gute. Quebe guxú'u ájala xegá'ane̱' chalásaze lu xel-la' gute na'.
ACT 2:25 Ca naca da nigá bchalaj wenná bea David ca naca chee̱ Jesús na', gate gunné̱': Belé'equezda' Xrana' lawa' nigá. Le̱' zue̱' cuita' xabe̱la, chee̱ quebe bi guchebe na neda'.
ACT 2:26 Chee̱ le̱ na' gubéle̱'e̱da', ne bil-la' lu xel-la' dxebé chia'. Chee̱ le̱ na' guxrén lázrequeza' Le̱' gate gatia',
ACT 2:27 lawe' da quebe xucá'anaquezu' neda' lu lataj chee̱ benne' gate. Quebe güéquezu' lataj guzru be̱l-la' dxen chia' neda', naca' benne' we̱n zrin chiu', ne benne' nazrí'inu'.
ACT 2:28 Blé'equezenu' neda' ca dxal-la' guna' chee̱ zrué'eda' xel-la' nabán, na' gúnnale̱'u neda' xel-la' dxebé lawe' da zúale̱nu' neda'.
ACT 2:29 ’Le'e, bi bícha'dau'. Naca bea na gute xra xrtáudxu David, na' bulucache̱' le̱' lu xe̱dxu ba chee̱' da zúaqueze na na'a nagá zúadxu.
ACT 2:30 David na' guque̱' tu benne' bchálaje̱' waláz chee̱ Dios, ne gunézene̱' ca da nache̱be lázrequeze Dios gune̱'. Gunné̱ lie̱' tu benne' zri'ine zre sua David na' gaque̱' Cristo, Bénnea' nna béaqueze̱', xequé̱'e̱ lawe̱' chee̱ David.
ACT 2:31 Ca' guca, David nigá belé'equezne̱' nedxu ca naca da dxal-la' gaca chee̱ Cristo, na' bchálaje̱' ca guca gate bebán Cristo, gunné̱': “Benne' nigá quebe xegá'anaqueze̱' lataj chee̱ benne' gate, ne quebe gúzruqueze be̱l-la' dxen chee̱'.”
ACT 2:32 Caní guca, Dios bsebane̱' Jesús nigá, na' netu' dxexeché̱bentu' da li ca guca da nigá.
ACT 2:33 Ca' guca, Dios bzue̱' Jesús lu xabáa chee̱' nen xel-la' waca chee̱', na' be̱'e̱ Le̱' lataj gusel-le̱' Be' Lá'azxa chee̱' nigá ca nache̱be lázrequeze̱' nedxu gune̱', na' xúgute̱ da caní dxelé'ele le'e, ne dxenle zaj naca na da dxun Be' Lá'azxa na'.
ACT 2:34 David na' quebe begüéne̱' xabáa, san lé̱queze̱' gune̱': Xránadxu Dios guzre̱' Xrana': “Gudxe'e cuita' xabe̱la nigá
ACT 2:35 ca zrindxa zra guzúa' benne' dxedábague̱' lue' chee̱ nna be'enu le̱'.”
ACT 2:36 ’Xúgute̱le le'e, benne' Israel, dxal-la' nézquezle da nigá: Jesús nigá, bénnea' bda'le le'e xaga béguaj, Dios ba nune̱' Le̱' Xránale ne Cristo chee̱le, Benne' guselé̱' le'e.
ACT 2:37 Gate benne' ca' belenne̱' da nigá, na' belexewí'ine lazre̱', na' buluche̱be̱' Pedro, ne benne' gubáz ca' chee̱ Jesús, dxelé̱'e̱ le̱': ―Benne' bíchentu', ¿ájazra dxal-la' guntu' xca'?
ACT 2:38 Nadxa gunná Pedro: ―Le xebí'i lazre' lau Dios, ne le chua nisa tu tule chee̱ gácale Jesucristo tuze, chee̱ gunite lau Le̱' chee̱le le'e ca naca dul-la da nabágale. Ca' gaca, nadxa Dios sél-laqueze̱' Be' Lá'azxa chee̱' chee̱ súale̱ne̱' le'e.
ACT 2:39 Da nigá nache̱be lazre' Dios naca na chee̱le le'e, ne chee̱ zrí'inele, ne chee̱ xúgute̱ benne' zaj zre̱'e̱ zitu', xúgute̱ benne' ca' dxaca lazre' Dios nne̱'.
ACT 2:40 Ca naca dizra' nigá, ne xezícaladxa dizra' da bchalaj Pedro, bzéajni'ine̱' benne' ca', na' gunné̱': ―Le la ládujla benne' we̱n da cale̱la caní.
ACT 2:41 Ca'an guca, benne' ca' guléajle̱'e̱ chee̱ da bchalaj Pedro belexedxúe̱' nisa, na' lu zra na' belaca tuze ca chi dxua gaxúa benne' nen benne' ca' ba dxeléajle̱'e̱ chee̱ Jesús.
ACT 2:42 Na' xúgute̱ benne' ca' gulezúa típaqueze̱' ca da dxuluse̱de benne' gubáz chee̱ Jesús le̱', na' gulezúe̱' tuze nen le sa' ljwezre̱' chee̱ bululáwizre̱' Dios, ne buluzrague̱' chee̱ xelawe̱' da dxusá lázredxu ca guca gate gute Cristo.
ACT 2:43 Xúgute̱ benne' ca' gulezrebe̱' gate belelé'ene̱' xel-la' waca zante̱, ne da dxelunna bea na da dxelún benne' gubáz chee̱ Jesús.
ACT 2:44 Xúgute̱ benne' ca' dxeléajle̱'e̱ chee̱ Jesús gulaque̱' tuze, ne bulunézruje̱' da de̱ chee̱' tue̱' xetúe̱'.
ACT 2:45 Belutie̱' xúgute̱ da zaj nape̱', ne bulunézruje̱' dumí na' chee̱ benne' ca' ca da dxelexázrjene̱'.
ACT 2:46 Xugu' zra belexezrague̱' lu xudau', ne cá'anqueze lu lizre cha chee̱', chee̱ xelawe̱' da dxusá lázredxu ca guca gate gute Cristo. Gulawe̱' tu zrente̱ lu xel-la' dxelebé, ne dute̱ xel-la' dxelexruj lazre' chee̱'.
ACT 2:47 Belúe lá'ane̱' Dios, na' xúgute̱ bénneache guléquene̱' benne' ca' ba lá'ana. Tu zra tu zra Xránadxu bzane̱' benne' ca' chee̱ Cristo ca dxelezí' lu ne̱'e̱ tu tue̱' Cristo.
ACT 3:1 Tu zra xjaque̱' Pedro ne Juan lu xudau' dxexedá' chunna, da naca na gate dxululáwizraj bénneache Dios lu xudau'.
ACT 3:2 Tu zra tu zra zua tu benne' na' naque̱' zrinnaj ca nálajte̱'. Dxeleché̱' benne' ljwezre̱' le̱' xudau' na', ne dxelebeche̱' le̱' dxu'a dxa xu'u na' nazí le na: Da Xrtante̱, chee̱ nabe̱' guna' chee̱ benne' dxelu'e̱ na'.
ACT 3:3 Gate benne' zrinnaj nigá blé'ene̱' Pedro ne Juan, dxelu'e̱ xudau', na' gunabe̱' guna' lau benne' caní.
ACT 3:4 Nadxa Pedro ne Juan gulenné̱'e̱ le̱', na' Pedro guzre̱' benne' na': ―Gunná' netu'.
ACT 3:5 Benne' na' gunná' xánnie̱' le̱' lawe' da dxéquene̱' bi xulunezruje̱' le̱'.
ACT 3:6 Pedro guzre̱' le̱': ―Quebe bi de̱ chia' dumí plata ne dumí oro. Da napa' gunna' lue'. Lu La Jesucristo, benne' Nazaret, guxasa gudá.
ACT 3:7 Nadxa Pedro guqué̱'e̱ na' benne' zrinnaj na' da zua xabe̱la, ne bechise̱' le̱', na' ca be̱ne̱' caní, belexezúa chacha ni'e̱, ne béchajdu chee̱' ca'.
ACT 3:8 Nadxa benne' zrinnaj na' guxrítie̱' tu, na' guzé̱', ne guzú lawe̱' dxedé̱'. Guxú'e̱ nen benne' ca' xudau', dxedé̱', dxexrítie̱', ne dxue lá'ane̱' Dios.
ACT 3:9 Xúgute̱ benne' zaj zre̱'e̱ na' belelé'ene̱' le̱' dxedé̱', ne dxue lá'ane̱' Dios.
ACT 3:10 Belexebánene̱', ne belezrebe̱' ca da belelé'ene̱' guca na, lawe' da zaj núnbe'e̱ benne' zrinnaj na', ne zaj nézene̱' naque̱' bénnea' dxebé'e̱ dxenabe̱' guna' ga dxelexú'u bénneache xudau', da na' nazí le na Da Xrtante̱.
ACT 3:11 Benne' zrinnaj na', benne' ba bexaque̱', quebe bsane̱' na' Pedro ne Juan, na' xúgute̱ benne' dxelexebánene̱', ne xjaque̱' naga nazí le na La Chila Chee̱ Salomón, naga zaj zra' Pedro ne Juan.
ACT 3:12 Gate ble'e Pedro da nigá, na' guzre̱' benne' ca': ―Le'e, benne' Israel, ¿bizr chee̱ na' dxebánele le'e? ¿Bizr chee̱ na' dxenná'le netu' caní, ne dxéquele netu' bexuntu' benne' nigá, na' dxexedé̱' ne̱ chee̱ xel-la' waca chee̱ntu', u ne̱ chee̱ xel-la' benne' xudau' chee̱ntu'?
ACT 3:13 ¡Cabí! Dios chee̱ xra xrtáudxu Abraham, ne Isaac, ne Jacob bca'ana szrene̱' Zrí'ine̱', Jesús, Bénnea' bdele le'e lu na' benne' xu'u lawe'. Gate guca lazre' Pilato gusane̱' Le̱', le'e quebe guca lázrele.
ACT 3:14 Bzúale chalá'ala Benne' na' naque̱' lá'azxa ne xrlátaje, na' gunábale la tu benne' we̱n da zrinnaj.
ACT 3:15 Ca'an guca, bé̱tele le'e Bénnea' dxunne̱' bénneache xel-la' nabán, san Dios bsebane̱' Le̱' ládujla benne' gate, na' netu' dxexeché̱bentu' chee̱ da nigá.
ACT 3:16 Guca lu La Jesús nigáqueze, u nnadxu guca na lawe' da guxéajle̱ chee̱ La Jesús, chee̱ bezí' le dipa benne' nigá dxelé'ele, ne núnbeale le̱'. Lawe' da guxéajle̱'e̱ chee̱ Jesús, ba bexácate̱queze̱' ca dxelé'ele le'e xúgute̱le.
ACT 3:17 ’Le'e, Bi bicha', nezda' gate le'e, ne benne' xíchaje̱ ca' chee̱le bé̱tele Jesús, quebe guque be'ele ca da dxunle.
ACT 3:18 Dios be̱ne̱' guca caní chee̱ guca li ca da ba gunné̱' nédxute̱ gate buluchalaj waláz chee̱' benne' ca', na' gulenné̱' dxal-la' si' saca Cristo chee̱ Dios.
ACT 3:19 Chee̱ le̱ na', le xebí'i lázrele, ne le xexaca Dios tuze, chee̱ xusule̱' dul-la nabágale. Nadxa Xránadxu Dios gunne̱' le'e lataj xexaca chawe' xichaj lázrdaule.
ACT 3:20 Sel-le̱' chee̱le Jesús, Bénnea' guche̱be lazre̱' sel-le̱' chee̱le nédxudaute̱.
ACT 3:21 Lu zra caní Jesucristo dxal-la' xegá'ane̱' xabáa cadxa gucá'ana chawe' Dios xúgute̱ da dxaca, ca na' gunné̱' lu dxu'a benne' ca' buluchálaje̱' waláz chee̱' nédxudaute̱.
ACT 3:22 Ca' naca na, lawe' da gunná Moisés, guzre̱' xra xrtáudxu ca': “Sel-la Xránadxu Dios chee̱le tu benne' guchálaje̱' waláz chee̱'. Gaque̱' tu benne' ládujla bi bíchele ca', na' sel-le̱' le̱' chee̱le ca gusel-le̱' neda'. Le xen xanne' xúgute̱ da xe̱'e̱ le'e,
ACT 3:23 lawe' da welebía xi' xúgute̱ benne' quebe xelapa Le̱' ba lá'ana, na' cuase̱' benne' ca' ládujla xe̱zre Israel.”
ACT 3:24 ’Xúgute̱ benne' ca', benne' buluchálaje̱' waláz chee̱ Dios, guzú lau na gate zua Samuel, ne zeaj na, buluchálaje̱' chee̱ zra caní.
ACT 3:25 Le'e dxezile ca da gulenná benne' ca' buluchálaje̱' waláz chee̱ Dios, ne nácale tuze lu xel-la' wezría da be̱n Dios nen xra xrtáule ca', ca guzre̱' Abraham: “Lu na' benne' zri'ine zre su' gaca chawe' chee̱ xúgute̱ bénneache zaj zre̱'e̱ lu xe̱zr la xu.”
ACT 3:26 Gate Dios bsebane̱' Zrí'ine̱', gusel-le̱' Le̱' nedxu laule le'e chee̱ gaca chawe' chee̱le, chee̱ gusanle tu tule le'e da cale̱la da dxunle.
ACT 4:1 Pedro ne Juan ne dxuluchálajle̱ne̱' benne' ca' gate belezrín na' bxruze ca', ne benne' xu'u lu ne̱'e̱ bi xra'aga chee̱ xudau', ne benne' saduceo ca'.
ACT 4:2 Dxelezré̱'e̱ lawe' da dxuluse̱de Pedro, ne Juan benne' ca', dxelenné̱' welexebán benne' gate lawe' da bebán Jesús.
ACT 4:3 Nadxa gule̱l-le̱' Pedro ne Juan, na' guleché̱'e̱ le̱' lizre xia ca zrindxa zra xula lawe' da ba dxezré' zra na'.
ACT 4:4 Guléajle̱' benne' zan ládujla benne' ca' belénne̱' da bchalaj Pedro, na' cátite benne' ca' dxeléajle̱'e̱ chee̱ Jesús zaj naque̱' ca gazxu' cue' chi gaxúa benne' biu.
ACT 4:5 Zra xula na' benne' xíchaje̱ ca' chee̱ judío ca', ne benne' gula sina ca', ne benne' ca' dxuluxuzájle̱'e̱ da nadxixruj bea na, belezrague̱' lu xe̱zre Jerusalén
ACT 4:6 nen Anás, bxruze blau, ne Caifás, ne Juan, ne Alejandro, ne xúgute̱ benne' xrtia bxruze blau ca'.
ACT 4:7 Nadxa gulenná be'e xeajlexrí'e̱ Pedro ne Juan, na' buluzé̱' le̱' laduj naga zaj zre̱'e̱, na' buluche̱be̱' le̱': ―¿Bi xel-la' dxenná bea, u nu lu La dxunle da caní?
ACT 4:8 Nadxa Pedro, zúale̱queze Be' Lá'azxa le̱', guzre̱' benne' ca': ―Le'e, benne' xíchaje̱ ca' chee̱ bxruze, ne benne' gula sina ca',
ACT 4:9 le'e dxuché̱bele netu' chee̱ tu da chawe' da guca chee̱ tu benne' we̱', chee̱ nézele ájala guca bexaca bénnea'.
ACT 4:10 Dxuzentu' xúgute̱le le'e chee̱ xeleneze xúgute̱ benne' Israel, benne' nigá ze̱' lau xúgute̱le le'e, ba bexaque̱' lu La Jesucristo, Benne' Nazaret, Bénnea' bda'le le'e le̱'e̱ xaga béguaj, na' Dios bsebane̱' Le̱' ládujla benne' gate.
ACT 4:11 Jesús nigá naque̱' xiaj na', le'e, benne' we̱n xu'u bzúale chalá'ala, san na'a Lé̱queze̱' naque̱' xiaj blau chee̱ xu'u.
ACT 4:12 Quebe nu chilá' bénneache seque' guselé̱' dxi'u lawe' da quebe ne gunna Dios xetú La bénneache lu xe̱zr la xu nigá, benne' séquene̱' guselé̱' dxi'u.
ACT 4:13 Gate benne' xu'u lawe' belelé'ene̱' Pedro ne Juan dxuluchálaje̱' du lazre̱', ne dxeleque bé'ene̱' quebe zaj nazé̱die̱' lu na' bxruze ca', san zaj naque̱' benne' zre̱'e̱ cá'aze, na' belexebáne benne' xíchaje̱ ca', san guleque bé'ene̱' zaj naque̱' benne' guledále̱ne̱' Jesús.
ACT 4:14 Cá'anqueze bénnea' bexaque̱' ze̱' na' nen Pedro ne Juan, na' chee̱ le̱ na' quebe gulezéquene̱' bi xelenné̱' chee̱'.
ACT 4:15 Nadxa gulenná be'e̱ belexedxúaj benne' gubáz ca' ládujla le̱'. Cate' belexegá'ana le̱ze̱' buluche̱be ljwezre̱',
ACT 4:16 dxelenné̱': ―¿Ájazra gundxu chee̱ benne' caní? Xúgute̱ benne' zaj zre̱'e̱ Jerusalén zaj nézene̱' belune̱' xel-la' waca zren nigá, na' quebe gaca tábagadxu na.
ACT 4:17 Na'a, chee̱ québedxa zriluj da nigá láwela bénneache, guxrúsadxu benne' caní chee̱ québedxa nu xuluchálajle̱ne̱' lu La Jesús.
ACT 4:18 Nadxa gulenná be'e̱ belexezrín Pedro ne Juan, na' gulenná bé'ene̱' le̱' québedxa nu xuluchálajle̱ne̱', ne quebe nu xulusé̱dene̱' lu La Jesús.
ACT 4:19 Pedro ne Juan belexeche̱be̱': ―Le nna' le'e che naca xrlátaje lau Dios guzúazrantu' xrtízrale le'e, quézcala xrtizra' Dios.
ACT 4:20 Netu' quebe gaca gusantu' gucháljantu' ca naca da blé'entu', ne da bénentu'.
ACT 4:21 Nadxa benne' xu'u lawe' ca' buluxruse̱' Pedro ne Juan, san bulusane̱' le̱'. Quebe belezrelne̱' ájala xelune̱' xuluzaca zi'e̱ le̱' lawe' da dxelúe lá'ana xúgute̱ bénneache Dios ca naca da ba guca.
ACT 4:22 Bénnea' bexaque̱' ne̱ chee̱ xel-la' waca zren nigá ba gudée̱' chua iza.
ACT 4:23 Gate bulusane̱' Pedro ne Juan, benne' caní xjaque̱' naga zaj zra' benne' ljwezre̱', na' buluzenne̱' le̱' ca naca xúgute̱ da gulenná benne' xíchaje̱ ca' chee̱ bxruze ca', ne benne' gula sina ca'.
ACT 4:24 Gate belenne̱' da caní, xúgute̱' buluchálajle̱ne̱' Dios, gulenné̱': ―Xránantu', Lue' nacu' Dios. Be̱nu' xabáa, ne xe̱zr la xu, ne nísadau', ne xúgute̱ da zaj nnita lataj ca'.
ACT 4:25 Lue', lu na' Be' Lá'azxa, ne lu dxu'a David, benne' we̱n zrin chiu', gunnáu': ¿Bizr chee̱ na' dxelasa bénneache xe̱zr la xu ca', na' bénneache dxelegú'u lazre̱' da quebe bi zaj zaca?
ACT 4:26 Benne' wenná bea ca' chee̱ xe̱zr la xu gulune̱' tuz, na' benne' blau ca' chee̱ xe̱zr ca' belezrague̱' chee̱ xeledábague̱'e̱ Xránadxu Dios, ne Cristo chee̱'.
ACT 4:27 ’Da li, Herodes. ne Poncio Pilato belezrague̱' lu xe̱zre nigá nen benne' zitu' ca', ne nen benne' Israel ca', na' guledábague̱' Zri'inu' Lá'azxa, Jesús, Bénnea' bzúaquezu' Lue'.
ACT 4:28 Ca'an guca, benne' ca' belune̱' xúgute̱ ca da ba núnquezu' Lue' dxal-la' gaca na.
ACT 4:29 Na'a, Xran, gunná' ca dxuluxruse̱' netu', ne be̱nna netu', we̱n zrin chiu' ca', xel-la' dxuxrén lazre' chee̱ guchálajntu' xrtizru', ne quebe zrébentu',
ACT 4:30 ne be̱nna netu' xel-la' waca chiu' chee̱ gaca xexuntu' benne' we̱' ca', ne chee̱ guntu' xel-la' waca chee̱ xabáa lu La Zri'inu' Lá'azxa Jesús. ¡Ca'an gaca!
ACT 4:31 Gate bexuzre buluchálajle̱ne̱' Dios, lu lataj naga zaj nazrague̱' guzrú', na' xúgute̱' guzúale̱ Be' Lá'azxa le̱', na' buluchálaje̱' xrtizra' Dios dute̱ xel-la' dxuluxrén lazre' chee̱'.
ACT 4:32 Benne' zan ca', benne' dxeléajle̱'e̱ chee̱ Jesús gulaque̱' tuze lu xichaj lázrdawe̱'. Netúe̱' quebe gunné̱' chee̱ze̱' naca da nape̱'. Xúgute̱ da zaj nape̱' zaj nune̱' tuze.
ACT 4:33 Benne' gubáz ca' chee̱ Jesús, nen dute̱ xel-la' dxelenná bea buluchálajqueze̱' ca guca gate bebán Xránadxu Jesús, na' Dios be̱ne̱' guca chawe' chee̱ xúgute̱ benne' ca'.
ACT 4:34 Quebe nu guzúa ládujla benne' ca' bi bxázrjene̱' lawe' da caní belún xúgute̱ benne' zaj nape̱' xe̱zr la xu ca' u xu'u ca'. Belutie̱' na, na' belú'e̱ dumí na',
ACT 4:35 ne xeajlenézruje̱' na lu na' benne' gubáz ca', chee̱ xelexele̱'e̱ na tu tu benne' ca' ca da dxelechínene̱'.
ACT 4:36 Zua ládujla benne' ca' tu benne' xrtia Leví le̱' José, benne' gúlaje̱' Chipre da naca tu xe̱zr la xudau' naxechaj nísadau' le̱ na. Benne' nigá, buluzúa gubáz ca' le̱' Bernabé, da zéaje̱ na benne' dxexúe zrene̱'.
ACT 4:37 Benne' nigá be̱tie̱' tu xe̱zr la xu da nape̱', na' bi'e̱ dumí na', ne bnézruje̱' na lu na' benne' gubáz ca'.
ACT 5:1 Xetú benne' le̱' Ananías nen zru'ule̱' Safira, be̱tie̱' tu xe̱zr la xu chee̱'.
ACT 5:2 Benne' nigá bequé̱'e̱ late' dumí na', na' da begá'anaze bi'e̱ lau benne' gubáz ca', ne gunné̱' ca naca na'. Zru'ule̱' ca naca na nézene̱'.
ACT 5:3 Nadxa guzre Pedro le̱': ―Ananías, ¿bizr chee̱ na' be̱'u lataj Satanás guxú'u na lu xichaj lázrda'u chee̱ si xe̱'u Be' Lá'azxa, na' beca'u late' chiu' ca naca da guzi'u chee̱ xe̱zr la xu na'?
ACT 5:4 ¿Quebe guca xe̱zr la xu na' chiu'? Na' gate be̱tiu' na, ¿quebe guca dumí na' chiu'? ¿Ájazra guca be̱nu' da nigá? Dios guzí xe̱'u, quegá bénneache.
ACT 5:5 Ca ben Ananías da nigá, na' guzré'e̱ gútete̱'. Xúgute̱ benne' belén da nigá belezrébele̱'e̱.
ACT 5:6 Nadxa gulebiga bal-la bi cuide' ca', ne buluchélabe' le̱' tu ladxe', na' belúabe' le̱' cheajlecáchebe' le̱' lu ba.
ACT 5:7 Ca guca chunna hora gudé na', guxú'u zru'ula Ananías na', ne quebe nézene̱' bi ba guca.
ACT 5:8 Pedro bche̱be̱' le̱': ―Gunná, ¿bé̱tele le'e xe̱zr la xu na' ca dxennale guzile na? Gunná Safira na': ―Awe', ca naca na'.
ACT 5:9 Nadxa Pedro guzre̱' le̱': ―¿Bizr chee̱ na' be̱nle le'e tuze dizra' gúquele si xe̱le Be' Lá'azxa? Chale'aj na' ba zesí'aca bi ca' xeajlecáchebe' benne' chiu', na' na'a xelúatequezebe' lue'.
ACT 5:10 La' ná'queze nu'ula na' guzré'e̱ gútete̱' zran ni'a Pedro. Gate belú'u benne' cuide' ca', na' belelé'ebe' le̱' ba gutie̱', na' belexebéajbe' le̱' xeajlecáchebe' le̱' cuita ba chee̱ benne' chee̱'.
ACT 5:11 Xúgute̱ benne' ca' zaj nazrague̱' na', ne xúgute̱ bénneache, benne' belén da caní belezrébele̱'e̱.
ACT 5:12 Benne' gubáz ca' belúnle̱'e̱ xel-la' waca chee̱ xabáa, ne da dxelunna bea na lau benne' ca', na' xúgute̱' belezrague̱' La Chila Chee̱ Salomón, da naca na chee̱ xudau'.
ACT 5:13 Netú benne' ca', benne' quebe dxeléajle̱'e̱ chee̱ Jesús, quebe belexázrene̱' gune̱' benne' ca' tuze, san xúgute̱ bénneache belape̱' benne' caní ba lá'ana.
ACT 5:14 Benne' zandxa gulezú lawe̱' dxeléajle̱'e̱ chee̱ Xránadxu, benne' biu ne nu'ula ca'.
ACT 5:15 Ca' guca na, belebéaje̱' benne' we̱' ca', zaj de̱' lu da dxeláta'ne̱', ne da'a chee̱', na' gulíxrue̱' le̱' la neza ca' chee̱ gate te Pedro na', na' te zrula chee̱' lawe' benne' ca'.
ACT 5:16 Cá'anqueze benne' xe̱zre walizre ca' belelé̱'e̱ lu xe̱zre Jerusalén, zaj nu'e̱ benne' we̱' chee̱' ca', ne benne' ca' zaj xu'e̱ be' xriwe̱' ca', na' xúgute̱' belexexaque̱'.
ACT 5:17 Nadxa bxruze blau, ne benne' saduceo ca' zaj zúale̱ne̱' le̱', gulaque̱' xa lazre',
ACT 5:18 na' gule̱l-le̱' benne' gubáz ca', ne buluzré̱'e̱ le̱' lizre xia.
ACT 5:19 Na' tu gubáz chee̱ xabáa chee̱ Xránadxu gusálaje̱' dxa xu'u chee̱ lizre xia na' chizrela, na' bebéaje̱' benne' ca', ne dxe̱'e̱ le̱':
ACT 5:20 ―Le chjaca, ne le cheajsé̱ lu xudau', ne le guzén benne' ca' ca naca chee̱ xel-la' nabán cube nigá.
ACT 5:21 Ca belenne̱' da nigá, zra xula belú'e̱ chila xudau' che zílala, na' gulezú lawe̱' dxulusé̱dene̱' benne' zaj zre̱'e̱ na'. Dxácate̱ na', bxruze blau na', ne benne' zrále̱ne̱' le̱', buluchague̱' benne' ca' chee̱ xu'u lawe' blau, ne benne' gula sina ca' chee̱ xe̱zre Israel, na' gulenná be'e̱ xelexebéaje̱' gubáz ca' zaj xu'e̱ lizre xia.
ACT 5:22 Gate belezrín bi xra'aga chee̱ xudau' na', quebe nu belelé'ene̱' lu xu'u lizre xia, na' belexezrine̱', ne buluzenne̱' benne' ca',
ACT 5:23 dxelenné̱': ―Gate bzrintu' lizre xia na', naxezxuj tipa na, na' benne' dxjaque̱' wedil-la zaj zre̱'e̱ dxu'a dxa xu'u na', ne dxuluxúe̱' na, san gate gusálajntu' na, quebe nu bezrélentu' lu xu'u na'.
ACT 5:24 Gate bxruze blau, ne benne' xíchaje̱ ca' chee̱ bxruze ca', ne xíchaje̱ chee̱ bi xra'aga ca', belenne̱' da nigá, na' buluche̱be ljwezre̱' ga cheajsé̱ da nigá.
ACT 5:25 La' ná'queze bzrin tu benne' guzre̱' le̱': ―Benne' ca' bzra'le le'e lizre xia zaj zre̱'e̱ lu chila xudau', dxulusé̱dene̱' bénneache.
ACT 5:26 Nadxa benne' xíchaje̱ chee̱ bi xra'aga chee̱ xudau' guxíajle̱ne̱' bi xra'aga ca', na' xeajlexrí'e̱ gubáz ca'. Quebe bi belúnene̱' le̱' lawe' da belezrebe̱' bi xelún benne' ca' dxelenne̱' chee̱ gubáz ca', lawe' da dxeléquene̱' xelu'e̱ le̱' xiaj.
ACT 5:27 Gate xeajlexrí'e̱ gubáz ca', na' buluzré̱'e̱ le̱' lau benne' xu'u lawe' blau, na' gunná bxruze blau na', dxe̱'e̱ benne' gubáz ca':
ACT 5:28 ―Netu' bzrúnantu' le'e quebe guchálajle̱dxale bénneache lu la bénnea'. ¿Bizra na' be̱nle? Ba bzenle ca naca benne' zaj zre̱'e̱ xe̱zre Jerusalén ca naca da dxusé̱dele, ne dxaca lázrele gusebágale netu' xel-la' gute chee̱ benne' na'.
ACT 5:29 Nadxa belexeche̱be Pedro, ne xezícadxa benne' gubáz ca': ―Dxala' guzúantu' xrtizra' Dios, quegá xrtizra' bénneache.
ACT 5:30 Dios chee̱ xra xrtáudxu ca' bsebane̱' Jesús, Bénnea' bé̱tele le'e bda'ale Le̱' xaga béguaj.
ACT 5:31 Dios bca'ana szrene̱' Le̱' chalá'a xabe̱la chee̱', ne be̱ne̱' Le̱' Benne' Blau, ne Weselá, chee̱ gata' lataj chee̱ benne' Israel xelexebí'i lazre̱' chee̱ gunite lau Dios dul-la chee̱'.
ACT 5:32 Chee̱ le̱ na' netu' dxexeché̱bentu', ne cá'anqueze dxun Be' Lá'azxa. Dios dxunézruje̱' Be' Lá'azxa benne' dxuluzúe̱' dizra' chee̱'.
ACT 5:33 Gate belenne̱' da nigá, na' belezré̱'e̱, ne gulaca lazre̱' xelútie̱' gubáz ca'.
ACT 5:34 Ládujla benne' xu'u lawe' ca' zua tu benne' fariseo le̱' Gamaliel. Naque̱' benne' dxuxuzájle̱'e̱ da nadxixruj bea na, na' dxelápale̱'e̱ bénneache le̱' ba lá'ana. Benne' nigá guzé̱', na' gunná bé'ene̱' xelexebéaje̱' gubáz ca' chalé'ajla tu chí'idau'.
ACT 5:35 Nadxa guzre̱' benne' xu'u lawe' ca': ―Le'e, benne' Israel, le guxúe xanne' ca gunle chee̱ benne' caní.
ACT 5:36 Le gusá lazre', bache guca zane' iza, gudábaga Teudas xu'u lawe', gunné̱' naque̱' tu benne' blau, na' xjácale̱ ca tapa gaxúa benne' biu le̱'. Na' belutie̱' le̱', na' xúgute̱ benne' ca' gulaca le̱' tuze belexase dinnaje̱' ca', na' gudé chee̱ da na'.
ACT 5:37 Gudé na', lu zra gate belú'u bénneache xiche, na' bla' Judas, benne' Galilea, na' benne' zan xjácale̱ne̱' le̱'. Cá'anqueze belutie̱' bénnea', na' xúgute̱ benne' gulede̱'e̱ le̱' belexase dínnaje̱'.
ACT 5:38 Chee̱ le̱ na', le gusán benne' caní, ne quebe guchixre chee̱le nen benne' ca'. Che da nigá naca na da dxun beneácheze, wadé chee̱ na.
ACT 5:39 Che naca na da dxun Dios, quebe séquele le'e guzría xile na. Le guxúe xanne' chee̱ quebe tíl-lale̱le Dios.
ACT 5:40 Xúgute̱' belexaque̱' tuze. Nadxa gulenná be'e̱ belú'u gubáz ca' da xula, na' ca belú'u benne' ca', na' buluzrune̱' le̱' québedxa nu xuluchálajle̱ benne' ca' lu La Jesús. Gudé na' bulusane̱' le̱'.
ACT 5:41 Na' benne' gubáz ca' belexedxúaje̱' naga zaj zra' benne' xu'u lawe' ca', dxelebéle̱'e̱ne̱' lawe' da be̱' Dios lataj guledée̱' xel-la' zi' lawe' da zaj naque' Jesús tuze.
ACT 5:42 Quebe bulusane̱' dxuluchálaje̱', ne dxulusé̱dene̱' bénneache ca naca chee̱ Jesucristo xúgute̱ zra, lu chila xudau', ne lu xu'u ca'.
ACT 6:1 Lu zra ca', gate zaj dxan benne' ca' zaj de̱'e̱ Jesús, na' benne' ca' dxelenné̱' dizra' griego gulawe̱' zria benne' ca' dxelenné̱' dizra' hebreo. Dxelenné̱' quebe nu dxunezruj xanne' da xeláw nu'ula ba gulate benne' chee̱' zaj zre̱'e̱ ládujla le̱' gate dxelísie̱' xel-la' wagu tu zra tu zra.
ACT 6:2 Nadxa benne' gubáz ca' buluchague̱' ca naca benne' ca' dxeléajle̱'e̱ chee̱ Jesús, na' gulé̱'e̱ le̱': ―Quebe naca xrlátaje gusantu' guchálajntu' xrtizra' Dios chee̱ gudentu' xel-la' wagu.
ACT 6:3 Chee̱ le̱ na', biche ljwézrentu', le quilaj gazre benne' láwela le'e, benne' zaj naque̱' du lazre', ne dxeléajni'ine̱', ne zúale̱ Be' Lá'azxa le̱', na' le gusebague̱' zrin nigá.
ACT 6:4 Netu' tu guchálajle̱zquezentu' Dios, ne gusé̱dentu' bénneache xrtizra' Dios.
ACT 6:5 Xúgute̱' gulaza lazre̱', na' gulequé̱'e̱ Esteban, tu benne' dxéajle̱'e̱ dute̱ lázrdawe̱' chee̱ Jesús, ne zúale̱ Be' Lá'azxa le̱'. Cá'anqueze gulequé̱'e̱ Felipe, ne Prócoro, ne Nicanor, ne Timón, ne Parmenas, ne Nicolás, tu benne' xe̱zre Antioquía, benne' nédxute̱ bexaque̱' tuze benne' judío ca'.
ACT 6:6 Na' guleché̱'e̱ benne' caní lau benne' gubáz ca', na' le̱' bululáwizre̱' Dios, ne buluzé̱ ne̱'e̱ lawe' benne' gazre caní.
ACT 6:7 Xrtizra' Dios zeaj dxezriluj na, na' benne' ca' dxeléajle̱ chee̱ Jesús guxánle̱'e̱ lu xe̱zre Jerusalén, na' bxruze zan chee̱ judío ca' guléajle̱'e̱ chee̱'.
ACT 6:8 Esteban, tu benne' nápale̱'e̱ xel-la' waca, ne naque̱' chawe' lau Dios, be̱ne̱' xel-la' waca ca' chee̱ xabáa, ne da dxelunna bea na chee̱ da ca' lau bénneache ca'.
ACT 6:9 Nadxa bal-la benne' chee̱ xu'u naga dxelezraga bénneache ca', nazí le na Xu'u Chee̱ Benne' Québedxa Zaj Nada'u, benne' xe̱zre Cirene ca', ne benne' xe̱zre Alejandría ca', ne benne' chee̱ ga nababa Cilicia, ne Asia, gulezú lawe̱' dxulutíl-lale̱ne̱' Esteban dizra'.
ACT 6:10 Quebe gulezéquene̱' bi xelenné̱' chee̱ xrtizra' Esteban lawe' da bchálaje̱' nen dute̱ xel-la' sina chee̱ Be' Lá'azxa.
ACT 6:11 Nadxa gulízruje̱' bal-la benne' ca' chee̱ xelenné̱' belenne̱' gunné̱ Esteban dizra' schanni' chee̱ Moisés, ne chee̱ Dios.
ACT 6:12 Caní belune̱', ne gulu'e̱ xel-le̱' bénneache ca', ne benne' gula sina ca', ne benne' dxuluxuzájle̱'e̱ da nadxixruj bea na, na' gulebía di'e̱ Esteban. Gule̱l-le̱' le̱', ne guleché̱'e̱ le̱' lau benne' xu'u lawe' blau.
ACT 6:13 Cá'anqueze gulílaje̱' benne' we̱n lazre' xelenné̱' chee̱ Esteban, na' gulenné̱': ―Benne' nigá quebe dxusane̱' dxenné̱' schanni' chee̱ xudau' lá'azxa nigá, ne chee̱ da bdxixruj bea Dios.
ACT 6:14 Ba bentu' gunné̱' ca gun Jesús, benne' Nazaret, dxenné̱' guzría xi'e̱ xudau' nigá, ne guché̱'e̱ ca naca da zéajle̱dxu da bca'ana Moisés.
ACT 6:15 Nadxa benne' xu'u lawe' ca', ne xúgute̱ benne' zaj zre̱'e̱ na', gate gulenné̱'e̱ Esteban, belelé'ene̱' lawe̱', naca na ca lau tu gubáz chee̱ xabáa.
ACT 7:1 Nadxa bxruze blau bche̱be̱' Esteban: ―¿Zaj naca da li da caní?
ACT 7:2 Na' Esteban beche̱be̱': ―Le'e, benne' gula, ne le'e biche ljwezra', le xene. Xradxu zue̱' xabáa ble'e lawe̱' lau xra xrtáudxu Abraham gate ne zue̱' lu xe̱zr la xu Mesopotamia, nédxudxa gate quebe ne xezé̱'e̱ cheajxezúe̱ xe̱zre Harán.
ACT 7:3 Dios guzre̱' le̱': “Bsan lázriu' ne xúgute̱ xrtia ljwezru', na' guxíaj lu xe̱zr la xu da gulé'eda' lue'.”
ACT 7:4 Nadxa Abraham guzé̱'e̱ lu xe̱zr la xu Caldea, xeajsúe̱' xe̱zre Harán. Ca gudé gute xra Abraham, Dios guché̱'e̱ Abraham lu xe̱zr la xu nigá, naga zrale le'e na'a.
ACT 7:5 Dios quebe bi bnézruje̱' chee̱ Abraham naga sue̱' lu xe̱zr la xu nigá, ne naga gune̱' lizre̱', san guche̱be lazre̱' gunézruje̱' le̱' xe̱zr la xu nigá, na' gate te gate le̱', na' gaca na chee̱ zrí'ine̱', lácala lu zra na' quebe ne galaj nu zri'ine Abraham.
ACT 7:6 Cá'anqueze Dios guzre̱' le̱' xelezúa zri'ine zre sue̱' ca benne' zitu' tu lu xe̱zr la xu chee̱ benne' xula, ne xelaque̱' benne' zaj nada'u, na' xuluzálaje̱' le̱' tapa gaxúa iza.
ACT 7:7 Cá'anqueze guzre Dios le̱': “Neda' chuga' ca gaca chee̱ xe̱zr la xu na' guchine na zri'ine zre su', na' te na' xelexedxúaje̱' ga na', ne xelúe lá'ane̱' neda' lu xe̱zr la xu nigá.”
ACT 7:8 Dios be̱ne̱' tu xel-la' wezría nen Abraham, na' gunná bé'ene̱' le̱' chugu látedu weaj be̱la' chee̱ benne' biu ca' lu be̱l-la' dxen chee̱', tu da guzúa chuchu na xel-la' wezría na'. Chee̱ le̱ na' gate gulaj Isaac, zri'ine Abraham, guchugue̱' látedau' be̱la' chee̱ be̱l-la' dxen chee̱ Isaac gate gúquebe' xrunu' zra, na' cá'anqueze be̱n Isaac chee̱ zrí'ine̱', Jacob, ne cá'anqueze be̱n Jacob chee̱ zrí'ine̱' ca', benne' ca' gulaque̱' xra chazrinnu cue' benne' Israel.
ACT 7:9 ’Zri'ine Jacob na', benne' ca' zaj naque̱' xra xrtáudxu, gulaque̱' xa lazre' chee̱ bi biche̱' José, na' belutie̱-be' chee̱ chu'ube' lu na' benne' guchínene̱'-be' lu xe̱zr la xu Egipto. Dios guzúale̱ne̱' José,
ACT 7:10 na' bselé̱'-be' lu xúgute̱ da zi' da xa'. Bnézruje̱'-be' xel-la' dxéajni'i, na' be̱n Dios bezaca ba lázrele̱ Faraón José na'. Faraón nigá guque̱' wenná bea lu xe̱zr la xu Egipto, na' bzue̱' José gácabe' benne' xu'u lu ne̱'e̱ xe̱zr la xu Egipto na', ne benne' walizre Faraón na'.
ACT 7:11 ’Nadxa guca gubina' du ca naca xe̱zr la xu Egipto, ne ca naca xe̱zr la xu Canaán, na' xra xrtáudxu ca' quebe bi belezrélene̱' da xelawe̱'.
ACT 7:12 Gate ben Jacob de̱ zrua' xtila lu xe̱zr la xu Egipto, na' gusel-le̱' na' zrí'ine̱' ca', benne' ca' zaj naque̱' xra xrtáudxu. Da nigá guca na da nedxu lasa xjaque̱' Egipto.
ACT 7:13 Da gudxupe' lasa xjaque̱' na', José ble'e lawe̱' benne' biche̱' ca', na' ca'an guca guneze wenná bea chee̱ Egipto ga benne' José na'.
ACT 7:14 Nadxa José gunná bé'ene̱' xeajlexrí'e̱ xre̱', ne ca naca xrtia ljwezre̱', zaj naque̱' ga xun chínue̱'.
ACT 7:15 Ca'an guca, Jacob xeajsúe̱' Egipto naga gutie̱', ne naga gulátequeze xra xrtáudxu ca'.
ACT 7:16 Ca gudé na' belú'e̱ be̱l-la' dxen gate chee̱ benne' ca' lu xe̱zre Siquem, naga bulucache̱' le̱' lu ba da zua na lu xe̱zr la xu na' da guzí' Abraham nen dumí da gudízruje̱' bi ca' zri'ine Hamor lu xe̱zre Siquem na'.
ACT 7:17 ’Gate ba zua gagu zra gaca li da guche̱be lazre' Dios da na' be̱n chúchue̱' lau Abraham, na' benne' Israel zaj zre̱'e̱ xe̱zr la xu Egipto gulánle̱'e̱.
ACT 7:18 Nadxa guzú lau dxenná bea tu wenná bea lu xe̱zr la xu Egipto, benne' quebe núnbe'e̱ José.
ACT 7:19 Wenná bea nigá guzí xe̱'e̱ benne' ljwézredxu, ne bzálaje̱' xra xrtáudxu ca', na' gunná bé'ene̱' le̱' cheajlecá'ane̱'-be' bidu dxe'ene chee̱' ca' chee̱ xelátebe'.
ACT 7:20 Lu zra ca' gulaj Moisés, ne gúcabe' tu bidau' bezaca ba lazre' Dios chee̱be', na' xra xrnabe' bulusegule̱'-be' lizre̱' chunna beu'.
ACT 7:21 Gate bzrin zra zxal-la' cheajlega'ane̱'-be', na' bi nu'ula chee̱ wenná bea na' bequé̱'e̱-be', ne bsegule̱'-be' ca zrí'inequeze̱'.
ACT 7:22 Chee̱ le̱ na', Moisés guzé̱debe' ca naca xel-la' sina chee̱ Egipto, na' gúcabe' tu benne' nape̱' xel-la' dxenná bea ca naca da gunné̱', ne da be̱ne̱'.
ACT 7:23 ’Gate bzrie̱' chua iza, Moisés guca lazre̱' cheajnné̱'e̱ benne' ljwezre̱', benne' Israel ca'.
ACT 7:24 Blé'ene̱' tu benne' Egipto dxu'e̱ tu benne' Israel. Chee̱ gúcale̱ne̱' benne' na', ne chee̱ bebéaj lazre̱' bénnea', be̱tie̱' benne' Egipto na'.
ACT 7:25 Moisés gúquene̱' benne' lazrie̱', benne' Israel ca', xeleque bé'ene̱' Dios guselé̱' benne' ca' ne̱ chee̱ le̱'. Benne' ca' quebe guleque bé'ene̱' na.
ACT 7:26 Zra xula Moisés blé'ene̱' chupa benne' Israel dxeledil-le̱', na' lawe' da guca lazre̱' xelezrá zrie̱' benne' ca', na' guzre̱' le̱': “Le'e nácale biche ljwézrele. ¿Bizr chee̱ na' dxue ljwézrele?”
ACT 7:27 Nadxa benne' na' dxu'e̱ benne' ljwezre̱' bzrigue̱' Moisés, na' guzre̱' le̱': “¿Nu bzua lue' ca benne' xíchaje̱ chee̱ntu' chee̱ guchi'u ca da dxuntu'?
ACT 7:28 ¿Dxaca lazru' gutiu' neda' ca be̱nu' neaje, be̱tiu' benne' Egipto na'?”
ACT 7:29 Ca ben Moisés da nigá, na' bzrúnnaje̱' zexíaje̱' lu xe̱zr la xu chee̱ benne' Madián ca'. Na' guzúe̱' ca tu benne' zitu', na' bchaga ná'le̱ne̱' nu'ula, na' gulaj chupa zrí'ine̱'.
ACT 7:30 ’Ca gudé chua iza, gate zue̱' le̱'e̱ xixre' lawe' lataj da zua na gagu lu xi'a Sinaí, na' ble'e lau tu gubáz chee̱ xabáa le̱' tu lu xi' da dxe' lu xeche' bisigá.
ACT 7:31 Moisés bzrebe̱' ca naca da blé'ene̱', san gate gubigue̱' chee̱ le'e xánnene̱', benne̱' chi'i Xránadxu, dxenné̱':
ACT 7:32 “Neda' naca' Dios chee̱ xra xrta'u ca', Dios chee̱ Abraham, ne Dios chee̱ Isaac, ne Dios chee̱ Jacob.” Nadxa Moisés guzú lau dxezrízie̱' lu xel-la' dxezrebe, na' quebe bexázrjene̱' nne̱'e̱.
ACT 7:33 Xránadxu guzre̱' le̱': “Guleaj zrelu' xu'u ni'u lawe' da naca lá'azxa lataj naga dxeléaju'.
ACT 7:34 Neda' ba ble'eda' ca naca da dxelezaca zi' bénneache chia' zaj zre̱'e̱ lu xe̱zr la xu Egipto. Dxenda' ca dxelebezre xache̱', ne ba bla'a chee̱ guselá' benne' ca'. Gudá lue', sel-la' lue' lu xe̱zr la xu Egipto.”
ACT 7:35 ’Lácala benne' ca' buluzúe̱' Moisés chalá'ala, gulé̱'e̱ le̱': “¿Nu bzua lue' ca benne' xíchaje̱ chee̱ntu' chee̱ guchi'u ca da dxuntu'?” Dios gusel-le̱' le̱' ca benne' xíchaje̱, ne benne' guselá le̱', ne̱ chee̱ gubáz chee̱ xabáa na' ble'e lawe̱' le̱' lu xeche' bisigá.
ACT 7:36 Moisés na' bebéaje̱' xra xrtáudxu ca' lu xe̱zr la xu Egipto, ne be̱ne̱' xel-la' waca ca', ne da gulunna bea na da be̱ne̱' lu xe̱zr la xu na', ne lu nísadau' Xrna, ne le̱'e̱ xixre' lawe' lataj da chua iza na'.
ACT 7:37 Moisés nigáqueze guzre̱' benne' Israel ca': “Dios sel-le̱' tu benne' guchálaje̱' waláz chee̱', benne' gálaje̱' ládujla xrtia ljwézrele le'e, ca gusel-le̱' neda'. Chee̱ Le̱' le xen.”
ACT 7:38 Cá'anqueze Moisés nigá, bénnea' guzúale̱ benne' ca' le̱'e̱ xixre' lawe' lataj, tu zren nen gubáz chee̱ xabáa na' bchálajle̱ le̱' lu xi'a Sinaí, guzúale̱ne̱' xra xrtáudxu ca', ne guzi'e̱ dizra' chee̱ xel-la' nabán chee̱ bdee̱' na chee̱ntu'.
ACT 7:39 ’Xra xrtáudxu ca' quebe gulaca lazre̱' xuluzúa dizra' chee̱ Moisés, san buluzúe̱' le̱' chalá'ala, ne gulaca lazre̱' xelexezrine̱' Egipto.
ACT 7:40 Gate cabí zue̱' Moisés ga na' gulé̱'e̱ Aarón: “Dxaca lázrentu' gunu' dios ca' chee̱ xelebía lawe̱' launtu', lawe' da quebe nézentu' bi guca chee̱ Moisés, bénnea' bebéaje̱' netu' lu xe̱zr la xu Egipto.”
ACT 7:41 Nadxa belune̱' tu bedáu' guca na ca tu bé̱zredau', ne belutie̱' be̱ xíxre'du ca' lau bedáu' na', ne gulebene̱' chee̱ da zaj nune̱'.
ACT 7:42 Nadxa Dios becuase̱' nen benne' ca', na' be̱'e̱ le̱' lataj belúe lá'ane̱' belaj zaj zria zran xabáa. Ca'an naxúaj na lu xiche chee̱ benne' ca' buluchálaje̱' waláz chee̱ Dios. Dxelenné̱': Le'e, benne' Israel ca', ¿guzríale-ba' chia' neda' be̱ xíxre'du ca' bé̱tele dute̱ chua iza gate na' guzúale le̱'e̱ xixre' lawe' lataj?
ACT 7:43 ¡Cabí! Bíale xudau' xide zra be̱ xixre' chee̱ dios chee̱le, Moloc, ne xudau' chee̱ belaj nazí le na Renfán, dios chee̱le, bedáu' ca' bé̱nquezle le'e chee̱ be̱ lá'anale na. Chee̱ le̱ na' cuéaja' le'e lu xe̱zr la xu chee̱le, ne sel-la' le'e dédedxa ca naga dxe' Babilonia.
ACT 7:44 ’Le̱'e̱ xixre' lawe' lataj na' xra xrtáudxu ca' belune̱' tu xudau' xide naga buluzrá chawe̱' blaga' xiaj naga naxúaj da nadxixruj bea na. Belune̱' na ca naca da ble'e Dios Moisés, gate guzre̱' le̱' gune̱' na ca naca da na' ba blé'ene̱'.
ACT 7:45 Zri'ine xra xrtáudxu ca' belexaca lu ne̱'e̱ xudau' xide na', na' belú'e̱ na gate belezrine̱' lu xe̱zr la xu nigá nen Josué, chee̱ belequé̱'e̱ xe̱zr la xu nigá lu na' benne' xe̱zr la xu ca' zaj zre̱'e̱ nigá, benne' ca' Dios bebéaje̱' le̱' chee̱ bnézruje̱' xe̱zr la xu nigá chee̱ xra xrtáudxu ca'. Ca'an guca ca bzrinte̱ zra ca' zua David.
ACT 7:46 Wenná bea David na', Dios bezaca ba lazre̱' chee̱', na' guca lazre' David gune̱' tu xudau' naga sua Dios chee̱ Jacob.
ACT 7:47 Salomón, zri'ine David, be̱ne̱' lizre Dios na'.
ACT 7:48 Dios szrente̱ quebe zue̱' lu xudau' ca' da zaj nun bénneache. Caní gunná tu benne' bchálaje̱' waláz chee̱ Dios, gunné̱':
ACT 7:49 Xabáa naca lataj naga dxe'a, na' xe̱zr la xu naca na naga nuléaj ni'a. ¿Ájazra naca xu'u gunle le'e chia'? dxenná Xránadxu. ¿Ájazra naca lataj naga dxal-la' xezí' lazra'?
ACT 7:50 ¿Quegá neda' bé̱nqueza' da ca'?
ACT 7:51 Nadxa gunná Esteban: ―Le'e nácaquezle lázxdau zide', ne zria nágale, ne lázrdaule ca zaj naca chee̱ benne' quebe zaj núnbe'e̱ Dios, quebe dxezile xrtizre̱'. Dxedábagaquezle Be' Lá'azxa. Nácale ca gulaca xra xrtáule ca'.
ACT 7:52 Xra xrtáule ca' buluzría xi'e̱ xúgute̱ benne' ca' buluchálaje̱' waláz chee̱ Dios. Belutie̱' benne' ca' buluchálaje̱' nédxudaute̱ ca dxal-la' gaca chee̱ benne' xrlátaje nigá, na' gate ble̱'e̱, lé'equezle bdele Le̱' lu na' benne' ca' guledábague̱' Le̱', ne bé̱tele Le̱'.
ACT 7:53 Le'e guzile da nadxixruj bea na da be̱nna gubáz chee̱ xabáa dxi'u, san quebe dxuzúale dizra' chee̱ na.
ACT 7:54 Gate belén benne' ca' da caní, na' gulagu lazxe̱' lu xel-la' dxelezrá'a Esteban.
ACT 7:55 Nadxa Esteban, zúale̱ Be' Lá'azxa le̱', gunné̱'e̱ xabáa, ne blé'ene̱' xel-la' szren chee̱ Dios, na' Jesús ze̱' chalá'a xabe̱la chee̱ Dios.
ACT 7:56 Nadxa gunné̱': ―Le nna'xque, dxelé'eda' naxalaj xabáa, na' Benne' Gulje̱' Bénneache ze̱' chalá'a xabe̱la chee̱ Dios.
ACT 7:57 Benne' ca' bulusézxuje̱' nague̱', na' gulebezre xe̱'e̱, ne xeajlechía che̱'e̱ Esteban na'.
ACT 7:58 Na' belebéaje̱' le̱' lu xe̱zre na', naga belú'e̱ le̱' xiaj. Na' benne' ca' gulenné̱' chee̱ Esteban bulucá'ane̱' zra lane̱' lu na' tu benne' cuide' le̱' Saulo.
ACT 7:59 Dxácate̱ dxuluzríe̱' le̱' xiaj, Esteban na' bláwizre̱' Dios, gunné̱': ―Xrana' Jesús, bezí' lu na'u be' nácaqueza'.
ACT 7:60 Gudé na' bzu zribe̱', na' gunné̱' zizraj: ―Xran, quebe gusebagu' benne' caní dul-la nigá. Ca bexuzre gunné̱' ca', na' gutie̱'.
ACT 8:1 Saulo guque̱' tuze nen benne' ca' belutie̱' Esteban. Lu zra ná'queze gulezú lawe̱' dxelau zi' xuzre̱' benne' ca' dxeléajle̱'e̱ chee̱ Jesús, benne' ca' zaj zre̱'e̱ xe̱zre Jerusalén. Xúgute̱' belexase dínnaje̱' ca naca xe̱zre ca' zaj nababa Judea, ne xe̱zre ca' zaj nababa Samaria. Benne' gubáz ca' belexegá'ane̱' xe̱zre Jerusalén na'.
ACT 8:2 Bal-la benne' ca' zaj naque̱' chee̱ Dios bulucache̱' Esteban na', ne gulebézrele̱'e̱ chee̱'.
ACT 8:3 Dxácate̱ na' Saulo dxenáu zi' xuzre̱' benne' ca' dxeléajle̱'e̱ chee̱ Jesús, na' guxú'e̱ tu tu xu'u chee̱ cheajxrube xue̱' benne' ca', ne cheajlu'e̱ le̱' lizre xia.
ACT 8:4 Benne' ca' chee̱ Cristo, benne' buluzrúnnuje̱' Jerusalén, buluchálaje̱' dizra' chawe' chee̱ Jesús gátete̱ze na' zjaque̱'.
ACT 8:5 Felipe, tue̱' benne' ca', guxíaje̱' tu xe̱zre naga nababa Samaria, na' guzú lawe̱' dxuchálajle̱ne̱' benne' ca' ca naca chee̱ Cristo.
ACT 8:6 Benne' ca' zaj nazrague̱' belén xánnene̱' ca da dxuchalaj Felipe, ne belelé'equezne̱' ca naca xel-la' waca ca' da dxune̱'.
ACT 8:7 Benne' zan, benne' zaj xu'e̱ be' xriwe̱' belexexaque̱', na' be' xriwe̱' ca' belexedxúaj na lu xichaj lázrdau benne' ca', dxelebezre xa'a na, na' benne' zan benne' zaj zua zri ni'a ne̱'e̱, ne benne' zrinnaj ca' belexexaque̱'.
ACT 8:8 Ca'an guca, gulebéle̱'e̱ xúgute̱ benne' ca' lu xe̱zre na'.
ACT 8:9 Zua na' tu benne' le̱' Simón, nédxute̱ guque̱' benne' wazrá', ne guzí xe̱'e̱ benne' Samaria ca', dxenné̱' naque̱' tu benne' szren.
ACT 8:10 Xúgute̱' belén xánnene̱' chee̱', benne' cazraze ca', ne benne' blau ca', gulenné̱': ―Benne' nigá nape̱' xel-la' szren chee̱ Dios.
ACT 8:11 Gulape̱' le̱' ba lá'ana lawe' da lu xel-la' wazrá' chee̱' na' guzí xe̱'e̱ benne' ca' zane' iza.
ACT 8:12 Gate guléajle̱'e̱ chee̱ dizra' chawe' da dxuchalaj Felipe ca dxenná bea Dios, ne ca naca chee̱ La Jesucristo, xúgute̱', benne' biu, ne nu'ula ca', beledxúe̱' nisa.
ACT 8:13 Cá'anqueze Simón na' guxéajle̱'e̱ chee̱ Jesús, ne gudxúe̱' nisa, na' guzú lawe̱' zéajle̱ne̱' Felipe, na' dxexebánene̱' ca naca xel-la' waca da za xabáa da dxun Felipe.
ACT 8:14 Gate benne' gubáz ca' chee̱ Jesús, benne' zaj zre̱'e̱ Jerusalén, belenne̱' gulezí' lu na' benne' Samaria ca' xrtizra' Dios, na' gulesel-le̱' Pedro ne Juan na'.
ACT 8:15 Gate belezrine̱' na', na' belenabe̱' law Dios chee̱ benne' Samaria ca' dxeléajle̱'e̱ chee̱ Jesús chee̱ xelezí'e̱ Be' Lá'azxa.
ACT 8:16 Quebe ne xida Be' Lá'azxa súale̱ne̱' netú benne' ca'. Tuze beledxúaze̱' nisa lu La Xránadxu Jesús.
ACT 8:17 Nadxa Pedro ne Juan buluzé̱ ne̱'e̱ lawe' benne' ca', na' gulezí'e̱ Be' Lá'azxa.
ACT 8:18 Gate ble'e Simón bla' Be' Lá'azxa gate gubáz ca' buluzé̱ ne̱'e̱ benne' ca', na' guca lazre̱' gunézruje̱' gubáz ca' dumí,
ACT 8:19 gunné̱': ―Le gunna neda' xel-la' waca nigá chee̱ gate guzéa' na'a lawe' nútete̱ze benne', na' si'e̱ Be' Lá'azxa.
ACT 8:20 Nadxa guzre Pedro le̱': ―Wabía xi' dumí chiu' na' nen lue' lawe' da dxéquenu' wazéquenu' ga'u nen dumí ca da dxúnnaze Dios.
ACT 8:21 Quebe naca chiu', ne quebe napu' lataj lu da nigá lawe' da quebe naca xrlátaje xichaj lázrda'u lau Dios.
ACT 8:22 Bsan ca naca da cale̱la chiu' nigá, ne guta' xue Dios chee̱ gunite lawe̱' chiu' ca da gúquenu' lu xichaj lázrda'u.
ACT 8:23 Dxeque be'eda' nazrate̱ xichaj lázrda'u da cale̱la, na' da cale̱la na' nuchéaj na lue'.
ACT 8:24 Na' beche̱be Simón: ―Le gata' xue Xránadxu chia' neda', chee̱ quebe gaca chia' ca da gunnáu'.
ACT 8:25 Ca gudé belexeche̱be̱' chee̱ Jesús, ne buluchálaje̱' dizra' chee̱ Dios, na' benne' gubáz ca' buluzenne̱' bénneache dizra' chawe' chee̱ Jesús lu xé̱zredu ca' zaj nababa Samaria, na' ca gudé na' belexezrine̱' Jerusalén.
ACT 8:26 Gudé na' guzre tu gubáz chee̱ xabáa chee̱ Xránadxu Felipe: ―Guxasa, guxíaj chalá'a naga dxedé gubizra beu' zaga ca', naga zrua neza chee̱ Jerusalén da zeaj xe̱zre Gaza, da dxedé na le̱'e̱ xixre' lawe' lataj.
ACT 8:27 Felipe guxase̱', na' guzé̱'e̱ zéaje̱', na' la neza na' bezrague̱' tu benne' Etiopía. Benne' nigá naque̱' wizre, ne naque̱' benne' szren xu'u lu ne'e̱ xel-la' gunní'a chee̱ Candace, nu'ula na' dxenná bé'ene̱' xe̱zr la xu Etiopía. Ba guxíaj benne' nigá Jerusalén chee̱ be̱ lá'ane̱' Dios.
ACT 8:28 Na'a zexíaje̱' Etiopía na', dxe'e̱ lu carreta chee̱' da dxelecá'a bzrina', ne dxulabe̱' xiche naga zaj naxúaj xrtizra' Isaías, benne' bchálaje̱' waláz chee̱ Dios.
ACT 8:29 Nadxa gunná Be' Lá'azxa, guzre̱' Felipe: ―Gubiga gagu cuita carreta na'.
ACT 8:30 Gate gubiga Felipe na' benne̱' dxulaba bénnea' xiche chee̱ Isaías, na' bche̱be̱' le̱': ―¿Dxéajni'inu' ca naca da dxulabu'?
ACT 8:31 Benne' biu na' guzre̱' le̱': ―¿Ájazra gaca chéajni'ida' che quebe nu chilá' guzéajni'i neda'? Na' guzre̱' Felipe cuene̱' cué'le̱ne̱' le̱'.
ACT 8:32 Naga dxulabe̱' lu xiche chee̱ Dios dxenná na caní: Beleché̱'e̱ Le̱' naga gatie̱' ca tu zríla'dau', na' ca zrila' na' dxátaba' zrize lau benne' ca' dxuluchibe̱' zraba', ca' bé̱nqueze Le̱', quebe bi gunné̱'.
ACT 8:33 Bulucá'ana ditje̱' Le̱', ne quebe belú'e̱ lataj nu guchi'a chee̱', ne quebe nu gaca guchálaje̱' ca naca chee̱ zri'ine zre sue̱', lawe' da belutie̱' Le̱'.
ACT 8:34 Na' benne' Etiopía na' bche̱be̱' Felipe: ―Gunná, ¿nuzra chee̱ dxenná benne' nigá, cheé̱queze̱' na', che chee̱ xetú benne' xula?
ACT 8:35 Nadxa guzú lau Felipe bzéajni'ine̱' le̱' ca naca naga dxulabe̱', ne bchálajle̱ne̱' le̱' dizra' chawe' ca naca chee̱ Jesús.
ACT 8:36 Gate guledée̱' tu naga de̱ nisa, na' gunná benne' Etiopía na': ―Nigá de̱ nisa. ¿Quebe gaca chua' nisa, zra?
ACT 8:37 Felipe guzre̱' le̱': ―Che dxéajle̱'u dute̱ lázrda'u, waca. Benne' na' beche̱be̱': ―Dxéajle̱'a naca Jesucristo Zri'ine Dios.
ACT 8:38 Nadxa gunná bé'ene̱' guleza carreta na', na' dxúpate̱' gulu'e̱ lu nisa, na' Felipe bchue̱' le̱' nisa.
ACT 8:39 Gate belexedxúaje̱' lu nisa na', na' Be' chee̱ Xránadxu beche̱'e̱ Felipe naga xula. Benne' Etiopía na' québedxa blé'ene̱' le̱', na' bexu'e̱ neza chee̱' dute̱ xel-la' dxebé.
ACT 8:40 Felipe na' guque bé'ene̱' ba zue̱' xe̱zre Azoto, na' gudée̱' tu tu xe̱zre dxuchálaje̱' dizra' chawe' ca naca chee̱ Jesús cadxa bezrine̱' Cesarea.
ACT 9:1 Dxácate̱ na' Saulo quebe dxusane̱' dxune̱' ba xuzre gutie̱' benne' ca' dxeléajle̱'e̱ chee̱ Xránadxu. Chee̱ gune̱' caní guxíaje̱' xeajchálajle̱ne̱' bxruze blau.
ACT 9:2 Gunabe̱' xiche da dxulé'e na nape̱' xel-la' dxenná bea da gu'e̱ chéaje̱' xudau' ca' zaj nnita xe̱zre Damasco, chee̱ séquene̱' cheajxedílaje̱' benne' ca' dxeléajle̱'e̱ chee̱ dizra' chawe' chee̱ Jesús, ne che̱'e̱ le̱', benne' biu, ne nu'ula ca', chee̱ guzré̱'e̱ le̱' lizre xia lu xe̱zre Jerusalén.
ACT 9:3 Na' gate ne xu'e̱ neza zéaje̱', ne ca ba zua zrine̱' xe̱zre Damasco, na' bsaní' tu xi' naga zéaje̱' da za' xabáa.
ACT 9:4 Saulo xeajcházie̱' lu xu, na' benne̱' chi'i tu benne' dxe̱'e̱ le̱': ―Saulo, Saulo, ¿bizr chee̱ na' nau zi' xuzru' neda'?
ACT 9:5 Nadxa Saulo bche̱be̱': ―¿Nuzra Lue', Xran? Na' bénnea' beche̱be̱': ―Neda' naca' Jesús, benne' na' nau zi' xuzru'. Lue'ze dxun zi' cuinu', ca dxun be̱zre gate dxulíbeba' lawe' xágala da dxádue̱'-ba'.
ACT 9:6 Nadxa Saulo dxezrizque̱' dxezrebe̱', gunné̱': ―Xran, ¿bi dxaca lazru' guna'? Na' Xránadxu guzre̱' le̱': ―Guxasa, guxú'u lu xe̱zre, na' xelé̱queze̱' lue' da dxal-la' gunu'.
ACT 9:7 Benne' ca' zjácale̱ Saulo belezrébele̱'e̱ lawe' da belenne̱' chi'i benne' na', san quebe nu belelé'ene̱'.
ACT 9:8 Nadxa Saulo bexase̱' lu xu na', na' gate guxá' lawe̱', quebe guca lé'ene̱'. Ca' guca, belequé̱'e̱ ne̱'e̱, ne guleché̱'e̱ le̱' lu xe̱zre Damasco.
ACT 9:9 Guzúe̱' na' chunna zra quebe dxelé'ene̱', ne quebe bi güe'e gudawe̱'.
ACT 9:10 Lu xe̱zre Damasco na' zua tu benne' dxéajle̱'e̱ chee̱ Jesús le̱' Ananías, na' Xránadxu ble'e lawe̱' le̱' tu lu da ble'e le̱', na' guzre̱' le̱': ―Ananías. Na' le̱' beche̱be̱': ―Nigá zua', Xran.
ACT 9:11 Nadxa gunná Xránadxu, dxe̱'e̱ le̱': ―Guxasa, guxíaj neza da nazí le na: Neza Li, na' lizre Judas guche̱bu' chee̱ tu benne' Tarso, le̱' Saulo. Benne' nigá dxuláwizre̱' Dios.
ACT 9:12 Tu lu da blé'ene̱', ba blé'ene̱' tu benne' le̱' Ananías chu'e̱ guzé̱ ne̱'e̱ le̱' chee̱ xelé'ene̱'.
ACT 9:13 Gate benne̱' da nigá, na' gunná Ananías: ―Xran, benne' zan ba buluzenne̱' neda' chee̱ benne' nigá, ne chee̱ xúgute̱ da cale̱la da dxune̱' chee̱ benne' ca' dxeléajle̱'e̱ chiu' Lue' lu xe̱zre Jerusalén.
ACT 9:14 Na'a ble̱'e̱ nigá nape̱' xel-la' dxenná bea chee̱ benne' xíchaje̱ ca' chee̱ bxruze ca', chee̱ che̱'e̱ lizre xia xúgute̱ benne' dxelenné̱' Dios lu Lau' Lue'.
ACT 9:15 Na' Xránadxu guzre̱' le̱': ―Guxíaj. Neda' ba gucá'a benne' na' chee̱ cheajzenne̱' benne' xe̱zr la xu ca', ne benne' wenná bea ca', ne benne' Israel ca', ca naca chia' neda'.
ACT 9:16 Neda' gulé'eda' le̱' ca naca da zante̱ da saque̱'e̱ ne̱ chia' neda'.
ACT 9:17 Nadxa Ananías guzé̱'e̱ zéaje̱' xu'u naga zua Saulo. Gate guxú'e̱ na', guxrúa ne̱'e̱ lawe' le̱', na' guzre̱' le̱': ―Saulo, bicha'. Xránadxu Jesús, Bénnea' ble'e lawe̱' lue' la neza naga za'u, nasel-le̱' neda' chee̱ xelé'enu', ne chee̱ súale̱ Be' Lá'azxa lue'.
ACT 9:18 Ca' guca beléxrujte̱ lu xiaj lawe̱' da zaj naca ca xrlacu bela, na' belé'ene̱'. Na' bexasa Saulo, ne gudxúate̱' nisa.
ACT 9:19 Gudé na' gudawe̱', ne bedipe̱'. Begá'ane̱' tu chupa zra nen benne' Damasco ca' dxeléajle̱'e̱ chee̱ Jesús.
ACT 9:20 Nadxa guzú lau Saulo dxuchálaje̱' chee̱ Jesús lu xu'u ga dxelezraga judío ca' zaj nnite̱' Damasco, dxenné̱' Jesús naque̱' Zri'ine Dios.
ACT 9:21 Xúgute̱ benne' belénene̱' chee̱' belexebánene̱', dxelenné̱': ―¿Quegá benne' nigá bénnea' gudáu zi' xuzre̱' benne' ca' zaj zre̱'e̱ Jerusalén, benne' ca' dxelenné̱' Dios lu La Jesús? ¿Quegá lé̱queze̱' na' ble̱'e̱ nigá chee̱ che̱'e̱ benne' ca' xe̱zre Jerusalén chee̱ gudée̱' le̱' lu na' benne' xíchaje̱ ca' chee̱ bxruze ca'?
ACT 9:22 Saulo bchálajdxe̱' du lazre̱' chee̱ Jesús, ne dxulé'ene̱' Jesús naque̱' Cristo chee̱ Dios, na' bzua zrie̱' benne' judío ca' zaj zre̱'e̱ Damasco.
ACT 9:23 Ca gudé zane' zra, benne' judío ca' belune̱' tuze dizra' xelútie̱' Saulo.
ACT 9:24 Gunezne̱' le̱' da nigá. Te zra ne chizrela gulebeza benne' judío ca' dxu'a dxa xu'u ca' naga dxelexedxúaj bénneache xe̱zre na', chee̱ xelútie̱' le̱'.
ACT 9:25 Nadxa benne' ca' dxeléajle̱'e̱ chee̱ Jesús gulegú'e̱ Saulo tu lu xcuite lba zren, na' buluxulétaje̱' le̱' chizrela le̱'e̱ ze'e da naxechaj na xe̱zre. Ca' guca, gulá Saulo.
ACT 9:26 Gate bezrín Saulo Jerusalén, guca lazre̱' gune̱' tuze benne' ca' dxeléajle̱'e̱ chee̱ Jesús, san benne' ca' dxelezrebe̱' le̱' lawe' da quebe dxeléajle̱'e̱ ba dxéajle̱'e̱ Saulo chee̱ Jesús.
ACT 9:27 Bernabé guché̱'e̱ Saulo, ne bze̱' le̱' lau benne' gubáz ca' chee̱ Jesús. Na' bchálajle̱ Bernabé gubáz ca' ca ble'e Saulo Xránadxu la neza, ne ca be̱n Xránadxu bchálajle̱ne̱' Saulo, ne ca bchalaj Saulo du lazre̱' lu xe̱zre Damasco nen xel-la' dxenná bea chee̱ La Jesús.
ACT 9:28 Nadxa Saulo begá'ane̱' Jerusalén, dxedále̱ne̱' benne' ca'.
ACT 9:29 Bchalaj Saulo du lazre̱' lu La Xránadxu, dxuchálajle̱ne̱' benne' ca' dxelenné̱' dizra' griego, san benne' caní gulaca lazre̱' xelútie̱' le̱'.
ACT 9:30 Gate guleque be'e biche ljwézredxu da caní, na' guleché̱'e̱ Saulo lu xe̱zre Cesarea, na' lu xe̱zre na' gulesel-le̱' le̱' xe̱zre Tarso.
ACT 9:31 Nadxa benne' ca' dxelezrague̱' lu La Jesús tu tu xe̱zre zaj nababa Judea, ne Galilea, ne Samaria, gulebeza zri lazre̱', ne beledipa lazre̱'. Xel-la' dxelezrebe gulaque̱' Xránadxu tuze, na' lawe' da gúcale̱ Be' Lá'azxa le̱', gulane̱'.
ACT 9:32 Gate dxedá Pedro dxeajnné̱'e̱ biche ljwézredxu ca', na' guxíajqueze̱' xeajnné̱'e̱ benne' ca' dxeléajle̱'e̱ chee̱ Jesús lu xe̱zre Lida.
ACT 9:33 Na' bezrague̱' tu benne' le̱' Eneas, bache guca xrunu' iza de̱' lu da'a lawe' da naque̱' benne' zrinnaj.
ACT 9:34 Na' gunná Pedro, dxe̱'e̱ le̱': ―Eneas, Jesucristo ba bexune̱' lue'. Bexasa, ne butube da'a chiu'. Na' bexásate̱ Eneas na'.
ACT 9:35 Belelé'e xúgute̱ benne' le̱', benne' zaj zre̱'e̱ xe̱zre Lida, ne xe̱zre Sarón, na' belexaque̱' chee̱ Xránadxu.
ACT 9:36 Lu zra na' zua tu nu'ula le̱' Tabita lu xe̱zre Jope. Dxéajle̱'e̱ chee̱ Jesús. Lu dizra' griego le̱' Dorcas. Nu'ula nigá dxúnqueze̱' da xrlátaje, ne dxácale̱ne̱' benne' xache' ca'.
ACT 9:37 Lu zra ca' guxú'u Dorcas xel-la' we̱', na' gutie̱'. Na' bulugazje̱' le̱', ne belexrue̱' le̱' tu lu xu'u naga zua gudxupe' cuía dxala.
ACT 9:38 Xe̱zre Jope na' zua na gagu naga zua xe̱zre Lida naga zua Pedro, na' lawe' da zaj neze benne' Jope ca' zue̱' na', na' gulesel-le̱' chupa benne' biu cheajlegue̱zre̱' le̱': ―Gudázega xe̱zre Jope.
ACT 9:39 Nadxa Pedro guxíajle̱ne̱' benne' ca'. Gate bzrine̱' na', na' beleché̱'e̱ le̱' naga zrua Dorcas na', na' xúgute̱ nu'ula ca' ba zaj nate benne' chie̱' zaj naxéchaje̱' Pedro dxelebezre̱', ne dxululé'ene̱' le̱' zra nu'ula, ne zra benne' biu, da ca' be̱n Dorcas na' gate ne zue̱' nen benne' ca'.
ACT 9:40 Nadxa guleaj Pedro xúgute̱ benne' ca', na' bzu zribe̱' bchálajle̱ne̱' Dios. Na' gunné̱'e̱ nu'ula gate na', gunné̱': ―Tabita, bexasa. Nadxa nu'ula na' bexá' lawe̱', na' gate blé'ene̱' Pedro, bexase̱' gudxé'e̱.
ACT 9:41 Na' Pedro bequé̱'e̱ ne̱'e̱, bechise̱' le̱'. Nadxa gunné̱' biche ljwézredxu ca', ne nu'ula ca' ba gute benne' biu chee̱', na' blé'ene̱' benne' ca' le̱' naca bane̱'.
ACT 9:42 Ca guca da nigá belén ca naca benne' zaj zre̱'e̱ xe̱zre Jope, na' benne' zan guléajle̱'e̱ chee̱ Xránadxu.
ACT 9:43 Pedro begá'ane̱' zane' zra lu xe̱zre na' lizre Simón, tu benne' dxucá'ana chawe' xide zra be̱ xixre'.
ACT 10:1 Zua lu xe̱zre Cesarea tu benne' le̱' Cornelio, benne' dxenná be'e̱ lu wedil-la tu cue' benne' nazí le na Benne' Italia Zjaque̱' Wedil-la.
ACT 10:2 Benne' nigá, ne benne' zaj zre̱'e̱ lizre̱' dxulucá'ana szrene̱' Dios, ne dxelezrebe̱' Le̱'. Cá'anqueze dxunézrujle̱'e̱ dumí dxácale̱ne̱' benne' judío ca', ne tu dxuchálajle̱zqueze̱' Dios.
ACT 10:3 Tu zra gate dxexedá chunna ble'e Cornelio tu da ble'e Dios le̱', na' blé'ene̱' cáte̱queze guxú'u tu gubáz chee̱ xabáa naga zue̱', na' guzre̱' le̱': ―Cornelio.
ACT 10:4 Cornelio guzúe̱' dxenné̱'e̱ gubáz chee̱ xabáa na' dute̱ xel-la' dxezrebe, na' bche̱be̱' le̱': ―¿Bizra na', Xran? Nadxa gunná gubáz chee̱ xabáa, guzre̱' le̱': ―Dios ba benne̱' da dxuláwizru' Le̱', ne nézene̱' ca da dxunu' dxácale̱nu' benne' xache' ca'.
ACT 10:5 Gusel-la benne' chjaque̱' xe̱zre Jope, cheajlenné̱' Simón, bénnea' lé̱queze̱' Pedro.
ACT 10:6 Zue̱' lizre xetú benne' le̱' Simón, benne' dxucá'ana chawe̱' xide zra be̱ xixre', na' zua lizre̱' dxu'a nísadau'. Pedro na' xe̱'e̱ lue' ca da dxal-la' gunu'.
ACT 10:7 Gate bezá' gubáz chee̱ xabáa na' bchálajle̱ne̱' le̱', na' gunné̱ Cornelio chupa bi we̱n zrin chee̱', ne tu benne' dxeje̱' wedil-la, ne dxape̱' Dios ba lá'ana, ne zúaqueze̱' lizre Cornelio na'.
ACT 10:8 Na' bchálajle̱ne̱' benne' ca' ca naca da ba guca, na' ca gudé na' gusel-le̱' le̱' chjaque̱' xe̱zre Jope.
ACT 10:9 Zra xula, dxácate̱ zaj xu'e̱ benne' ca' neza, ne ba dxezrine̱' gagu naga dxe' Jope, na' guluén Pedro chju'u sibe du wagubizra chee̱ guchálajle̱ne̱' Dios.
ACT 10:10 Ba dxedúnle̱'e̱, ne guca lazre̱' gawe̱', na' dxácate̱ ne dxulucueze̱' da gawe̱', blé'ene̱' tu da ble'e Dios le̱'.
ACT 10:11 Blé'ene̱' naxalaj xabáa, ne dxetaj lu xe̱zr la xu da naca na ca tu ladxe' zren nadxéaj na dápate̱ la'a chee̱ na.
ACT 10:12 Lawe' ladxe' na' zaj zria xúgute̱ cue' be̱ xixre', be̱ zria tapa ni'a na'ba', ne be̱ snia ca', ne be̱ zua xrila ca'.
ACT 10:13 Nadxa benne̱' tu chi'i benne' dxe̱'e̱ le̱': ―Guxasa, Pedro. Be̱te tu bea ca' chee̱ gagu'-ba'.
ACT 10:14 Pedro beche̱be̱': ―Cabí, Xran. Neda' cabata' ne gawa' da quebe nun Dios gagu bénneache, ne quegá da naca na sban.
ACT 10:15 Benne' na' bchálaje̱' da xula, dxe̱'e̱ le̱': ―Da ba nucá'ana chawe' Dios, quebe nnau' lue' naca na sban.
ACT 10:16 Da nigá guca na chunna lasa, na' ladxe' na' begüén na xabáala.
ACT 10:17 Dxácate̱ dxe' Pedro dxulaba lazre̱' bi zéaje̱ ca naca da blé'ene̱', na' belezrín benne' ca' nasel-la Cornelio dxu'a dxa xu'u, dxuluche̱be̱' ga zua lizre Simón.
ACT 10:18 Gate belezrine̱' lizre Simón na', na' gulenné̱' zizraj, dxelenabe̱' che zua xu'u na' tu benne' le̱' Simón, bénnea' lé̱queze̱' Pedro.
ACT 10:19 Gate Pedro ne dxulaba lazre̱' ca naca da blé'ene̱', na' Be' Lá'azxa guzre̱' le̱': ―Gunná'xque, chunna benne' dxelexílaje̱' lue'.
ACT 10:20 Guxasa, bexetaj. Guxíajle̱ benne' ca', ne quebe gun chupa lazru' lawe' da nasel-la' neda' benne' ca'.
ACT 10:21 Nadxa Pedro bexétaje̱' naga zaj zra' benne' ca' nasel-la Cornelio, na' guzre̱' le̱': ―Neda' na' dxexílajle le'e. ¿Bizra chee̱ za'le?
ACT 10:22 Benne' ca' belexeche̱be̱': ―Za'ntu' waláz chee̱ Cornelio, benne' dxenná be'e̱ lu wedil-la. Naque̱' benne' xrlátaje, ne dxezrebe̱' Dios, na' xúgute̱ benne' judío ca' dxelape̱' le̱' ba lá'ana, ne zaj nazrí'ine̱' le̱'. Tu gubáz chee̱ xabáa chee̱ Dios guzre̱' le̱' dxal-la' sel-le̱' benne' xedajlenné̱' lue' xidu' lizre̱' chee̱ xenne̱' ca da dxal-la' xu'u le̱'.
ACT 10:23 Nadxa Pedro bzre̱'e̱ benne' ca' xu'u na', na' belexegá'ane̱' nen le̱' xe̱la na'. Zra xula guxíajle̱ Pedro benne' ca', na' xjácale̱ bal-la biche ljwézredxu le̱', benne' zaj zre̱'e̱ Jope.
ACT 10:24 Zra gudxupe' zra belezrine̱' xe̱zre Cesarea naga zua Cornelio dxebeze̱' le̱', ne zrale̱ bal-la benne' xrtie̱' le̱', ne xezícadxa benne' ljwezre̱', benne' ca' gunné̱'.
ACT 10:25 Gate bzrin Pedro chale'aj, bdxuaj Cornelio guzí' lu ne̱'e̱ le̱'. Bzu zribe̱' lau Pedro chee̱ gucá'ana szrene̱' le̱'.
ACT 10:26 Pedro bechise̱' le̱', dxenné̱': ―Guzé̱. La gázqueze neda' naca' bénneache ca lue'.
ACT 10:27 Dxácate̱ dxuchálajle̱ Pedro Cornelio, gulu'e̱ lu xu'ula, na' blé'ene̱' benne' zan zaj nazrague̱' na'.
ACT 10:28 Nadxa gunná Pedro, dxe̱'e̱ le̱': ―Nézquezle le'e quebe dxunna da nadxixruj bea chee̱ judío ca' neda' lataj gaca' tuze nen benne' quebe zaj naque̱' judío u chu'a lizre̱'. Na'a Dios ba blé'ene̱' neda' quebe dxal-la' nnia' chee̱ netú benne', quebe nnia' naque̱' sban, u naque̱' benne' quebe gapa' ba lá'ana.
ACT 10:29 Chee̱ le̱ na', gate gulenné̱' neda', la guzá'tea', ne quebe be̱n chupa lazra'. Dxaca lazra' nezda' bi chee̱ na' gunne̱le neda'.
ACT 10:30 Nadxa beche̱be Cornelio: ―Ba zeaj tapa zra ca zúadxu na'a, zua' lizra' nigá dxuna' gubasa, ne dxuchálajle̱na' Dios, gate ble'e lau tu benne' neda', nacue̱' zra lane̱' da dxácatite na.
ACT 10:31 Benne' na' guzre̱' neda': “Cornelio, Dios ba benne̱' da dxuchálajle̱nu' Le̱', na' nézene̱' ca da dxunu' dxácale̱nu' benne' xache' ca'.
ACT 10:32 Gusel-la benne' chjaque̱' xe̱zre Jope, cheajlexri'e̱ Simón, bénnea' lé̱queze̱' Pedro. Zue̱' lizre xetú benne' le̱' Simón, benne' dxucá'ana chawe̱' xide zra be̱ xixre' ca', na' zua lizre̱' dxu'a nísadau'. Gate xide̱' nigá, na' guchálajle̱ne̱' lue'.”
ACT 10:33 Ca'an guca, gusél-latea' benne' ca' bedajlexedílaje̱' lue', na' be̱nu' da chawe' bla'u nigá. Na'a xúgute̱ntu' zrantu' nigá lau Dios, ne dxaca lázrentu' xénentu' xúgute̱ ca da gunná be'e Xránadxu lue' guchálajle̱nu' netu'.
ACT 10:34 Nadxa guzú lau Pedro dxuchálaje̱', dxenné̱': ―Na'a dxéajni'ida' Dios quebe dxebéaje̱' bál-laze bénneache,
ACT 10:35 Na' xúgute̱ xe̱zr la xu Dios dxezí' lu ne̱'e̱ benne' ca' dxelezrebe Le̱', ne dxelune̱' da xrlátaje.
ACT 10:36 Dios bchálajle̱ne̱' zri'ine zre sua Israel ca', ne bchálaje̱' dizra' chawe' chee̱ xel-la' dxebeza zri lazre', da dxezidxu ne̱ chee̱ Jesucristo, Bénnea' naque̱' Xrana xúgute̱ bénneache.
ACT 10:37 Le'e ba nézquezle ca naca da guca du ca naca lu xe̱zr la xu chee̱ benne' judío ca', da guzú lau na naga nababa Galilea ca gudé bchalaj Juan xrtizra' Dios, ne bchue̱' bénneache nisa.
ACT 10:38 Nézele ca be̱n Dios, bnézruje̱' Jesús, benne' Nazaret, xel-la' waca chee̱ Be' Lá'azxa, ne ca gudá Le̱' dxune̱' da chawe', ne dxexune̱' xúgute̱ benne' dxelezaca zi'e̱ lu na' da xriwe̱'. Da nigá be̱ne̱' lawe' da guzúale̱ Dios Le̱'.
ACT 10:39 Netu' dxexeché̱bentu' chee̱ da caní, xúgute̱ da be̱n Jesús naga nababa Galilea, ne da be̱ne̱' lu xe̱zre Jerusalén. Gudé na' belutie̱' Le̱', gate buludé̱'e̱ Le̱' xaga béguaj,
ACT 10:40 na' Dios bsebane̱' Le̱' gate guca chunna zra, na' be̱'e̱ lataj ble'e lau Jesús netu'.
ACT 10:41 Quebe ble'e lawe̱' xúgute̱ bénneache, san launtu' nétu'ze, nácantu' benne' ca' guleaj Dios nédxudaute̱ chee̱ xeché̱bentu' chee̱ da caní. Netu' güe'e gudáguntu' nen Le̱' gate gudé bebane̱' ládujla benne' gate.
ACT 10:42 Gusel-le̱' netu' guchálajle̱ntu' bénneache, ne xeché̱bentu' ca da nun Dios, nuzúe̱' Jesús nigá chee̱ guchi'e̱ chee̱ benne' ban ca', ne chee̱ benne' gate ca'.
ACT 10:43 La gázqueze nédxudaute̱ gulenná xúgute̱ benne' ca' buluchálaje̱' waláz chee̱ Dios, buluchálaje̱' ca dxal-la' gaca chee̱ Jesús, gulenné̱' xúgute̱ benne' xeléajle̱'e̱ chee̱ Jesús, na' ne̱ chee̱ Le̱' Dios gunite lawe̱' xtul-la benne' ca'.
ACT 10:44 Ne dxuchalaj Pedro gate bzrin Be' Lá'azxa bedajsúale̱ne̱' xúgute̱ benne' ca' dxelenne̱' da dxuchalaj Pedro.
ACT 10:45 Benne' judío ca' dxeléajle̱'e̱ chee̱ Jesús, benne' ca' zá'acale̱ne̱' Pedro, belexebánene̱' gate guleque bé'ene̱' ba zúale̱ Be' Lá'azxa benne' ca' quebe zaj naque̱' judío.
ACT 10:46 Dxeleque bé'ene̱' na lawe' da belenne̱' dxuluchalaj benne' ca' dizra' chee̱ benne' xula, ne dxelúe lá'ane̱' Dios.
ACT 10:47 Nadxa gunná Pedro: ―¿Waca nnadxu quebe dxal-la' xeledxúa benne' caní nisa, benne' ca' bache gulezí'e̱ Be' Lá'azxa ca be̱ntu' netu'?
ACT 10:48 Nadxa gunná bea Pedro xeledxúa benne' ca' nisa lu La Jesucristo. Gudé na', benne' ca' gulata' xuene̱' Pedro xegá'ane̱' nen le̱' tu chupa zra.
ACT 11:1 Benne' gubáz ca', ne biche ljwézredxu ca' zaj zre̱'e̱ Jerusalén belenne̱' ba gulezí' lu na' benne' quebe zaj naque̱' judío dizra' chee̱ Dios.
ACT 11:2 Gate bezrín Pedro xe̱zre Jerusalén, gulezí' tizra' benne' ca' le̱', benne' ca' dxelenné̱' dxal-la' chugu late' be̱la' chee̱ benne' ca' zaj naque̱' chee̱ Dios.
ACT 11:3 Benne' caní buluche̱be̱' Pedro: ―¿Bizr chee̱ na' guxíaju' xeajsúale̱nu' benne' ca' quebe zaj naque̱' judío, ne gudágule̱nu' le̱'?
ACT 11:4 Nadxa Pedro bzenne̱' benne' ca' xúgute̱ da guca cha chee̱ na, gunné̱':
ACT 11:5 ―Neda' zua' lu xe̱zre Jope, na' gate dxuchálajle̱na' Dios, ble'eda' tu da ble'e Dios neda'. Ble'eda' tu ladxe' zren nadxéaj dápate̱ la'a chee̱ na, da dxetaj na xabáa, ne bedajsé̱ na lawa'.
ACT 11:6 Gate gunná' xánnia' chee̱ ble'eda' bi na' zaj zria na lawe', ble'eda' be̱ xixre', be̱ zria tapa ni'a na'ba', ne be̱ snia ca', ne bea ca' zaj zua xrílaba'.
ACT 11:7 Na' benda' tu chi'i benne' guzre̱' neda': “Guxasa Pedro, be̱te tu bea ca', na' gagu'-ba'.”
ACT 11:8 Neda' gunnéa': Cabí, Xran, lawe' da cabata' ne gawa' neda' tu da quebe nun Dios gagu bénneache, ne quegá da naca sban.
ACT 11:9 Nadxa bénnea' dxenné̱' xabáa gunné̱' neda' da xula, na' guzre̱' neda': “Da ba nucá'ana chawe' Dios, quebe nnau' lue' naca na sban.”
ACT 11:10 Da nigá guca na chunna lasa, na' ca gudé na' xúgute̱ da ca' belexegüén na xabáa.
ACT 11:11 Lu zra ná'queze belelá' chunna benne' lu xu'u naga zua', benne' ca' gusel-la tu benne' zua Cesarea chee̱ zedajlexedilaj neda'.
ACT 11:12 Be' Lá'azxa gunná bé'ene̱' neda' chéajle̱na' benne' ca', ne quebe gun chupa lazra'. La gázqueze gusiá'cale̱ xrupa benne' biche ljwézredxu caní neda'. Xúgute̱ntu' guxú'untu' lizre tu benne'.
ACT 11:13 Le̱' bchálajle̱ne̱' netu' ca blé'ene̱' lizre̱' tu gubáz chee̱ xabáa, ze̱ ni'e̱, ne guzre̱' le̱': “Gusel-la benne' chjaca xe̱zre Jope chee̱ cheajlenné̱' Simón, benne' lé̱queze̱' Pedro.
ACT 11:14 Benne' nigá xe̱'e̱ lue' aja gunu' chee̱ lau' lue', ne xelelá xúgute̱ benne' zaj zre̱'e̱ lizru'.”
ACT 11:15 Gate guzú lawa' dxuchálajle̱na' benne' ca', na' bzrin Be' Lá'azxa guzúale̱ne̱' benne' ca', ca ble̱'e̱ guzúale̱ne̱' dxi'u nédxudaute̱.
ACT 11:16 Nadxa xeajsá lazra' ca gunná Xránadxu, gunné̱': “Da li Juan bchue̱' bénneache nisa, na' gaca chee̱le da zéaje̱ xel-la' dxedxúa nisa, súale̱ Be' Lá'azxa le'e.”
ACT 11:17 Che Dios bnézruje̱' chee̱ benne' ca' ca be̱nne̱' dxi'u, guxéajle̱dxu chee̱ Xránadxu Jesucristo, ¿nuzra naca' neda' chee̱ tábaga' Dios?
ACT 11:18 Nadxa gate biche ljwézredxu ca' zaj zre̱'e̱ Jerusalén belenne̱' da caní, na' gulezúa zrie̱', ne gulezú lawe̱' dxelúe lá'ane̱' Dios, dxelenné̱': ―Ca' naca, la gázqueze dxunna Dios lataj benne' quebe zaj naque̱' judío xelexebí'i lazre̱' chee̱ xelezi'e̱ xel-la' nabán zeajlí canna.
ACT 11:19 Gate belutie̱' Esteban, na' belau zi' xuzre̱' xezícala benne' dxeléajle̱'e̱ chee̱ Jesús, na' bal-le̱' buluzrúnnaje̱', xjaque̱' xe̱zre Fenicia, ne lu xu Chipre, ne xe̱zre Antioquía. Gate belezrine̱' lataj ca', na' buluchálaje̱' dizra' chee̱ Jesús lau benne' judío cá'aze, ne quegá lau benne' quebe zaj naque̱' judío.
ACT 11:20 Nadxa bal-la benne' dxeléajle̱'e̱ chee̱ Jesús, benne' Chipre, ne benne' Cirene, belelé̱'e̱ xe̱zre Antioquía, na' buluchálajle̱ne̱' benne' ca' quebe zaj naque̱' judío, ne buluzenne̱' le̱' dizra' chawe' ca naca chee̱ Xránadxu Jesús.
ACT 11:21 Xel-la' waca chee̱ Xránadxu guzúale̱ na benne' ca', na' ca'an guca, benne' zan belexexaque̱' chee̱ Xránadxu.
ACT 11:22 Gate belén benne' ca' da nigá, benne' dxeléajle̱'e̱ chee̱ Jesús zaj zre̱'e̱ Jerusalén, na' gulesel-le̱' Bernabé xe̱zre Antioquía.
ACT 11:23 Gate bzrin Bernabé na', blé'ene̱' ca da chawe' da dxun Dios chee̱ benne' ca', na' gubéle̱'e̱ne̱'. Na' bsízrene̱' xúgute̱ benne' ca' chee̱ xelezúa chúchue̱' lu da naca chee̱ Xránadxu.
ACT 11:24 Bernabé naque̱' benne' xrlátaje, na' zúale̱ Be' Lá'azxa le̱', ne dute̱ lázrdawe̱' dxéajle̱'e̱ chee̱ Jesús. Ca'an guca, ne̱ chee̱ le̱' guléajle̱ benne' zan chee̱ Xránadxu.
ACT 11:25 Gudé na' guxíaj Bernabé xe̱zre Tarso, zeajxedílaje̱' Saulo, na' gate bezrelne̱' le̱', beche̱'e̱ le̱' Antioquía.
ACT 11:26 Gulezúe̱' na' tu iza naxá' nen benne' ca' dxeléajle̱'e̱ chee̱ Jesús, na' bulusé̱dene̱' benne' zan. Lu xe̱zre Antioquía na' guca na da nedxu gulé̱'e̱ benne' ca' dxeléajle̱'e̱ chee̱ Xránadxu, Benne' Cristiano.
ACT 11:27 Ca lu zra ca', bal-la benne' dxelenné̱' waláz chee̱ Dios besiá'que̱' Jerusalén, xjaque̱' Antioquía.
ACT 11:28 Tu benne' ca' le̱' Agabo guzé̱' láwela biche ljwézredxu ca', na' ca da bnezruj Be' Lá'azxa le̱', gunné̱' waca tu gubina' zren du ca naca xe̱zr la xu, na' gubina' nigá guca na gate naca Claudio benne' dxenná bé'ene̱' ca naca xe̱zr la xu Roma.
ACT 11:29 Nadxa benne' ca' dxeléajle̱'e̱ chee̱ Jesús, benne' zaj zre̱'e̱ Antioquía belún zi' lazre̱' xelesel-le̱' da gácale̱ na biche ljwézredxu zaj zre̱'e̱ xe̱zre ca' zaj nababa Judea, ca da xelezeque̱' tu tue̱' xulunézruje̱'.
ACT 11:30 Ca'an belune̱', na' belesel-le̱' tu guna' lau benne' gula ca' chee̱ Cristo zaj zre̱'e̱ Judea, na' Bernabé ne Saulo belú'e̱ na na'.
ACT 12:1 Lu zra ca' guzú lau wenná bea Herodes nau zi' xuzre̱' bal-la benne' ca' dxeléajle̱'e̱ chee̱ Jesús.
ACT 12:2 Gunná bé'ene̱' belutie̱' Jacobo, biche Juan nen xia nalá.
ACT 12:3 Gate ble'e Herodes dxelexezaca ba lazre' benne' judío ca' ca naca da be̱ne̱', na' gude̱l-le̱' Pedro. Da nigá guca na lu zra laní ca' gate dxelawe̱' xeta xtila da quebe nachixre na cua zichaj chee̱ xeta xtila.
ACT 12:4 Ca gudé gude̱l-le̱' Pedro, na' gulu'e̱ le̱' lizre xia naga buluxúe tapa cue' benne' dxjaca wedil-la le̱', zaj naca tapa benne' zeje̱' wedil-la tu cue' tu cue'. Herodes guca lazre̱' guzúe̱' Pedro lau benne' xe̱zre ca' te laní.
ACT 12:5 Ca'an guca xu'u Pedro lizre xia naga dxuluxúe xánnie̱' le̱', na' benne' biche ljwézredxu ca' buluchálajle̱queze̱' Dios du lazre̱'.
ACT 12:6 Dxe̱la xanne' ca za chaní' zra xula gate dxal-la' guzúa Herodes le̱' lau benne' xe̱zre ca', Pedro de̱' dxásie̱' laduj chupa benne' dxjaque' wedil-la, nadxéaje̱' chupa du xia, na' xebal-la benne' dxjaca wedil-la zaj zre̱'e̱ dxu'a dxa xu'u dxuluxúe̱' lizre xia na'.
ACT 12:7 Nadxa ble'e lau tu gubáz chee̱ xabáa chee̱ Xránadxu, na' ca naca lizre xia na' guxaní'. Na' gubáz chee̱ xabáa na' bte̱' le̱'e̱ Pedro, ne bsebane̱' le̱', na' guzre̱' le̱': ―Guxásache. Ca'an guca, du xia ca' belexexe̱zre na na' Pedro.
ACT 12:8 Na' gunná gubáz chee̱ xabáa na', guzre̱' le̱': ―Besí le̱'u, ne buléaj zrelu'. Gate bexuzre be̱n Pedro da na', na' guzre gubáz chee̱ xabáa na' le̱': ―Guxrúa xicha chiu' cuxru', ne gudále̱ neda'.
ACT 12:9 Pedro bedxúaje̱' cuzru gubáz chee̱ xabáa na', ne quebe nézene̱' che naca da li che cabí ca da dxun gubáz chee̱ xabáa na'. Dxéquene̱' dxelé'ene̱' tu da dxulé'e Dios le̱'.
ACT 12:10 Belexedée̱' naga zaj zra' benne' dxjaque̱' wedil-la nedxu ca', ne naga zaj zra' benne' gudxupe' benne' dxjaque̱' wedil-la, na' gate belexezrine̱' dxu'a dxa xu'u xia da dxedxuaj zeaj la nézala, dxa xu'u na' le̱ze na bxalaj na. Belexedxúaje̱', na' ca gudé besiá'que̱' belezrine̱' xetú neza xula chee̱ xe̱zr na', na' bca'ana gubáz chee̱ xabáa na' le̱ze̱'.
ACT 12:11 Nadxa guque be'e Pedro ba bedxúaje̱', na' guzá' lazre̱', gunné̱': Na'a dxelé'eda' naca na da li. Xrana' gusel-le̱' gubáz chee̱ xabáa chee̱' chee̱ bselé̱' neda' lu na' Herodes, ne lu xúgute̱ da gulaca lazre' judío ca' xelune̱' chia'.
ACT 12:12 Da nigá dxulaba lazre' Pedro gate bzrine̱' lizre María, xrna Juan, bi na' lé̱quezebe' Marcos, na' lu xu'u na' zaj nazraga benne' zan dxelenabe̱' Dios gácale̱ne̱' Pedro.
ACT 12:13 Gate gunné̱ Pedro dxu'a dxa xu'u na', bzrin na' tu bi nu'ula le̱be' Rode zeajnabe' nu na'.
ACT 12:14 Gate bexúnbeabe' chi'i Pedro, quebe gusálajbe' dxa xu'u. Xel-la' dxebé chee̱be' zexíaj chégube' naga zaj nazraga benne' ca' chee̱ zeajé̱zrebe' benne' ca' ze̱ Pedro dxu'a dxa xu'u.
ACT 12:15 Nadxa benne' ca' gulé̱'e̱ bi nu'ula na': ―Nadá xichaj lázrda'u. Bi nu'ula na' be̱n chúchube' xrtízrabe'. Benne' ca' gulenné̱': ―Quebe le̱' na'. Be' guxu'e̱ na'.
ACT 12:16 Dxácate̱ na' ze̱ Pedro tu dxenné̱zqueze̱' dxu'a dxa xu'u. Na' gate gulesálaje̱', ne belelé'ene̱' Pedro, na' belexebánene̱'.
ACT 12:17 Pedro guchisa ne̱'e̱ chee̱ xelezúa benne' ca' zrize, na' bchálajle̱ne̱' benne' ca' ca be̱n Xránadxu bebéaje̱' le̱' lizre xia. Na' guzre̱' benne' ca': ―Le guzén Jacobo, ne biche ljwézredxu ca' ca naca da nigá. Nadxa bezé̱'e̱ zexíaje̱' naga xula.
ACT 12:18 Gate guxaní', gulezúale̱'e̱ ste̱be benne' dxjaque̱' wedil-la ca' lawe' da quebe zaj nézene̱' aja guca chee̱ Pedro.
ACT 12:19 Herodes gunná bé'ene̱' xelexilaj benne' dxjaca wedil-la Pedro, na' lawe' da quebe belexezrelne̱' le̱', na' gunáb xánnie̱' benne' dxjaque̱' wedil-la bi guca, na' gudé na' gunná bé'ene̱' xelate benne' ca' dxjaque̱' wedil-la. Ca gudé na' guzá' Herodes xe̱zre ca' zaj nababa Judea, guxíaje̱' xeajsúe̱' xe̱zre Cesarea.
ACT 12:20 Herodes dxezré̱'e̱ benne' ca' zaj zre̱'e̱ xe̱zre Tiro, ne xe̱zre Sidón. Benne' chee̱ xe̱zre ca' belune̱' tuze dizra' chee̱ cheajlelé'e cuine̱' lau Herodes na'. Belune̱' Blasto benne' ljwezre̱'. Naque̱' tu benne' blau chee̱ wenná bea Herodes, na' gulesel-le̱' le̱' lau Herodes na' chee̱ nabe̱' le̱' sua zri ca naca da dxaca chee̱ Herodes nen benne' ca'. Caní belune̱' lawe' da nédxute̱ dxelagu benne' xe̱zre Tiro, ne Sidón da guzá' xe̱zre Cesarea naga zua Herodes.
ACT 12:21 Nadxa Herodes bzue̱' tu zra xelezrín benne' ca' lawe̱'. Lu zra na' Herodes gucue̱' zra lane̱' da zácale̱'e̱, na' gudxé'e̱ lataj blau chee̱', ne bchálajle̱ne̱' benne' zan ca'.
ACT 12:22 Nadxa benne' zan ca' gulezú lawe̱' dxelenné̱' zizraj: ―¡Benne' nigá dxuchálaje̱' quebe naque̱' beniácheze! ¡Dios na'!
ACT 12:23 Zra na'te̱ tu gubáz chee̱ xabáa chee̱ Xránadxu gulu'e̱ Herodes tu xízrawe̱' lawe' da guzi'e̱ xel-la' ba lá'ana da dxal-la' si' Dios, na' guzré̱'e̱ bzuga', ne gútete̱'.
ACT 12:24 Bzriluj dizra' chawe' chee̱ Xránadxu, na' benne' ca' buluchálaje̱' ca naca na gátete̱ze na'.
ACT 12:25 Gate belezúe Bernabé, ne Saulo zrin dxelune̱' lu xe̱zre Jerusalén, besiá'que̱' xe̱zre na', zaj naché̱'e̱ Juan, bi na' lé̱quezebe' Marcos.
ACT 13:1 Ládujla benne' ca' zaj nazraga chee̱ Cristo lu xe̱zre Antioquía zaj zra' benne' ca' dxelenné̱' waláz chee̱ Dios, ne benne' ca' dxulusé̱dene̱' bénneache xrtizra' Dios. Ládujla benne' caní zaj zua Bernabé, ne Simón, bénnea' lé̱queze̱' benne' gasaj, ne Lucio, benne' xe̱zre Cirene, ne Manaén, benne' gúlale̱be' Herodes, benne' xu'u lu ne̱'e̱ xe̱zr la xu Galilea na', ne Saulo.
ACT 13:2 Tu zra gate benne' caní zaj zre̱'e̱ dxelúe lá'ane̱' Dios, ne dxelune̱' gubasa, Be' Lá'azxa gunné̱': ―Le cueaj Bernabé, ne Saulo chee̱ xelune̱' zrin na' da gunnéa' le̱' xelune̱'.
ACT 13:3 Chee̱ le̱ na', ca gudé buluchálajle̱ne̱' Dios, ne belune̱' gubasa, na' buluzé̱ ne̱'e̱ lawe' benne' ca', ne buluzé̱' le̱' dizra'.
ACT 13:4 Gudé na', ca gusel-la Be' Lá'azxa le̱', na' Bernabé, ne Saulo xjaque̱' xe̱zre Seleucia naga gulu'e̱ tu lu da dxedá lawe' nísadau' chee̱ chjaque̱' lu xe̱zr la xu da naxechaj nísadau' da nazí le na Chipre.
ACT 13:5 Gate belezrine̱' na', na' belexedxúaje̱' lu da dxedá lawe' nísadau' naga zua xe̱zre Salamina, na' gulezú lawe̱' dxuluchálaje̱' dizra' chee̱ Dios lu xudau' ca' chee̱ benne' judío ca'. Juan zéajle̱quezebe' gubáz ca' chee̱ gácale̱be' le̱'.
ACT 13:6 Na' guledée̱' xúgute̱ xé̱zredu ca' da zaj nnita lu xe̱zr la xu na', na' belezrine̱' xe̱zre Pafos. Na' belexezrague̱' tu benne' judío le̱' Barjesús, naque̱' benne' wazrá'. Naque̱' tu benne' we̱n lazre' dxenné̱' dxuchálaje̱' waláz chee̱ Dios.
ACT 13:7 Benne' wazrá' nigá zue̱' nen Sergio Paulo, benne' xu'u lu ne̱'e̱ xe̱zr la xu na', ne naque̱' benne' sina. Benne' xu'u lu ne̱'e̱ xe̱zr la xu na' gusel-le̱' benne' xeajnné̱' Bernabé, ne Saulo lawe' da dxaca lazre̱' xenne̱' dizra' chee̱ Dios.
ACT 13:8 Na' benne' wazrá' na', lé̱queze̱' Elimas gudábague̱' gubáz ca' lawe' da guca lazre̱' quebe chéajle̱ chee̱ Jesús benne' xu'u lu ne̱'e̱ xe̱zr la xu na'.
ACT 13:9 Nadxa Saulo, bénnea' lé̱queze̱' Pablo, zúale̱ Be' Lá'azxa le̱', gunná' dxugüe̱' le̱',
ACT 13:10 na' guzre̱' le̱': ―Guzrí xe̱, benne' we̱n da cale̱la. Zri'ine da xriwe̱', ne benne' dxusezxuj xrneza xúgute̱ bénneache. ¿Bizr chee̱ na' quebe dxusanu' dxusézxuju' neza chee̱ benne' ca' dxelaca lazre̱' chjácale̱ne̱' Xránantu'?
ACT 13:11 Na'a, Xránantu' gudée̱' lue' ba xa'. Xegá'anu' la chul-la, na' tu chí'iqueze quebe le'enu' xel-la' naxaní' chee̱ gubizra. Benne' na' guzúe̱' lu da chul-la, na' guzú lawe̱' dxílaje̱' nu xecá'a ne̱'e̱ lawe' da québedxa dxelé'ene̱'.
ACT 13:12 Gate ble'e benne' xu'u lu ne̱'e̱ xe̱zr la xu na' da nigá, na' guxéajle̱'e̱ chee̱ Jesús lawe' da bebánene̱' ca naca da dxuse̱de Pablo ca naca chee̱ Xránadxu.
ACT 13:13 Pablo ne benne' ljwezre̱' ca' belú'e̱ tu lu da dxedá lawe' nísadau' lu xe̱zre Pafos na', na' belezrine̱' xe̱zre Perge da nababa na xe̱zr la xu Panfilia. Lu xe̱zre na' Juan bsanbe' gubáz ca', na' bexíajbe' xe̱zre Jerusalén.
ACT 13:14 Gudé na' gubáz ca' besiá'que̱' Perge, na' belezrine̱' xe̱zre Antioquía da nababa na xe̱zr la xu Pisidia. Lu xe̱zre na', gate naca zra dxulupá'ana judío ca', gulu'e̱ xudau' chee̱ judío ca', na' gulebé'e̱.
ACT 13:15 Nadxa, ca gudé bululabe̱' lu xiche naga naxúaj da bdxixruj bea Moisés, ne da gulenná benne' ca' buluchálaje̱' waláz chee̱ Dios, na' benne' xíchaje̱ ca' chee̱ xudau' na' gulesel-le̱' benne' xeaje̱zre̱' Pablo, ne Bernabé: ―Le'e, biche ljwézrentu', che nápale dizra' da guzéajni'ile netu', waca nne̱le na na'a.
ACT 13:16 Nadxa Pablo guxase̱', na' guchisa ne̱'e̱ chee̱ xelezúa zri benne' ca', na' gunné̱': ―Le xene le'e, benne' Israel, ne le'e dxezrébele Dios.
ACT 13:17 Dios chee̱ xe̱zre Israel guqué̱'e̱ xra xrtáudxu ca', na' be̱ne̱' benne' ca' tu cue' benne' zante̱ gate ne zaj zre̱'e̱ ca benne' zitu' ca' lu xe̱zr la xu Egipto, na' ca gudé na' bebéaje̱' le̱' lu xe̱zr la xu na' dute̱ xel-la' waca chee̱'.
ACT 13:18 Dios bchaga lawe̱' benne' ca' chua iza le̱'e̱ xixre' lawe' lataj,
ACT 13:19 na' bzria xi'e̱ gazre cue' bénneache gulezúa lu xe̱zr la xu Canaán, chee̱ bnézruje̱' xra xrtáudxu ca' xe̱zr la xu chee̱ benne' ca'.
ACT 13:20 Gudé na', lawe' tapa gaxúa xu gachaj iza gunná be'e Dios benne' ca' lu na' benne' ca' buluchi'e̱ chee̱', cadxa bzrin zra zua Samuel, benne' bchálaje̱' waláz chee̱ Dios.
ACT 13:21 Nadxa benne' ca' gulenabe̱' Dios sua tu benne' gaque̱' wenná bea chee̱', na' Dios bzue̱' wenná bea tu benne' le̱' Saúl, zri'ine Cis, tu benne' chee̱ tu cue' benne' judío zaj naque̱' zri'ine zre sua Benjamín. Saúl nigá guque̱' wenná bea lawe' chua iza.
ACT 13:22 Gudé na' Dios begüe̱' Saúl lataj chee̱', na' bzue̱' David gaque̱' wenná bea chee̱', na' chee̱ benne' nigá gunné̱': “Nezda' David, zri'ine Isaí, naque̱' tu benne' dxune̱' da dxezaca ba lazra', ne gune̱' xúgute̱ da dxaca lazra'.”
ACT 13:23 Tu benne' zri'ine zre sua David nigá naca Jesús, bénnea' bzua Dios chee̱ guselé̱' benne' Israel ca', ca ba guche̱be lazre̱' chee̱ David.
ACT 13:24 Nédxudxa gate za xida Jesús, Juan bchálajle̱ne̱' ca naca benne' Israel ca', guzre̱' benne' ca' dxal-la' xelexebí'i lazre̱', ne xelexedxúe̱' nisa.
ACT 13:25 Na' gate ba za cheajsé̱ chee̱ Juan, na' gunné̱': “Neda' quebe naca' bénnea' dxéquele naca', san ca te chia' neda' za xetú benne' quebe naca chia' neda' cuéaja' zrele̱' da xu'u ni'e̱.”
ACT 13:26 ’Le'e, biche ljwezra', zri'ine zre sua Abraham, ne le'e dxezrébele Dios. Dios nasel-le̱' chee̱le dizra' nigá chee̱ lale.
ACT 13:27 Benne' ca' gulezrá' Jerusalén, ne benne' blau chee̱' ca', quebe belexúnbe'e̱ nu na' Jesús, ne quebe guléajni'ine̱' dizra' da buluchalaj benne' ca' buluchálaje̱' waláz chee̱ Dios da dxelenne̱' xúgute̱ zra dxulupá'ane̱'. Ca' guca, benne' ca' belún líqueze̱' ca naca da naxúaj na chee̱ Jesús gate gulechugue̱' chee̱' gatie̱'.
ACT 13:28 Lácala quebe belezrelne̱' tu da nabaga Jesús chee̱ xelútie̱' Le̱', gulenabe̱' lau Pilato nna bé'ene̱' gatie'.
ACT 13:29 Nadxa, gate gudé belune̱' xúgute̱ da naxúaj na lu xiche chee̱ Dios ca naca da dxal-la' gaca chee̱ Jesús, na' buluxulétaje̱' Le̱' xaga béguaj, ne bulucache̱' Le̱'.
ACT 13:30 Nadxa Dios bsebane̱' Le̱' ládujla benne' gate.
ACT 13:31 Lu zane' zra Jesús ble'e lawe̱' benne' ca' guledále̱ne̱' Le̱' gate bezé̱'e̱ Galilea dxeaje̱' Jerusalén, na' na'a, benne' caní dxelexeche̱be̱' ca naca chee̱' lau bénneache.
ACT 13:32 ’Cá'anqueze netu' dxuzénentu' le'e dizra' chawe' ca naca da guche̱be lazre' Dios lau xra xrtáudxu ca'.
ACT 13:33 Be̱n lie̱' ca naca da guche̱be lazre̱' chee̱dxu dxi'u, nácadxu zri'ine zre sua benne' ca', gate bsebane̱' Jesús, ca naxúaj gudxupe' salmo, dxenné̱': “Lue' nacu' zri'ina'. Neda' bzua' Lue' na'a.”
ACT 13:34 Dios blé'ene̱' gusebane̱' Le̱' ládujla benne' gate, chee̱ quebe guzru be̱l-la' dxen chee̱' gate gunné̱' lu xiche chee̱': “Gunna' le'e da chawe' da guche̱be lazra' lau David.”
ACT 13:35 Cá'anqueze dxenné̱' xetú lu salmo: “Quebe gu'u lataj guzru be̱l-la' dxen chee̱ we̱n zrin chiu', bi nazri'ite̱ lazru'.”
ACT 13:36 Da li David be̱ne̱' zrin chee̱ benne' ca' zaj zre̱'e̱ gate zua le̱', ca gunná be'e Dios le̱', san ca gudé na' gutie̱', na' bulucache̱' le̱' naga belegache xra xrtawe̱' ca', na' guzru be̱l-la' dxen chee̱'.
ACT 13:37 Quebe guzru be̱l-la' dxen chee̱ Bénnea' bsebán Dios Le̱'.
ACT 13:38 Biche ljwezra', dxuzenda' le'e, dxal-la' nézele Dios gunite lawe̱' chee̱ dul-la chee̱le ne̱ chee̱ Jesús.
ACT 13:39 Ne̱ chee̱ Le̱', xúgute̱ benne' dxeleajlí lazre̱' Le̱', Dios dxunite lawe̱' chee̱ benne' ca' ca naca xúgute̱ da quebe guca gunite lawe̱' chee̱' lácala belune̱' ca naca da bdxixruj be'e Moisés.
ACT 13:40 Le guxúe xanne' cuínale chee̱ quebe gaca chee̱le ca naca da buluzúaj benne' ca' buluchálaje̱' waláz chee̱ Dios, gate gulenné̱':
ACT 13:41 Le nna', le'e, benne' we̱n la, ne le xebane, ne le xenite, lawe' da guna' neda', Dios chee̱le, lu zra chee̱le, tu da naca da zrente̱, da quebe chéajle̱le lácala nu guzén le'e.
ACT 13:42 Gate Pablo ne benne' ljwezre̱' ca' belexedxúaje̱' lu xudau' chee̱ judío ca', na' benne' ca' quebe zaj nálaje̱' judío gulenabe̱' le̱' guchálajle̱ne̱' le̱' chee̱ da caní gate zrin xetú zra dxulupá'ane̱'.
ACT 13:43 Gate belexedxúaje̱' lu xudau' na', benne' zan benne' judío ca', ne benne' ca' belexaque̱' judío, ne dxelune̱' da naca chee̱ Dios, xjácale̱ne̱' Pablo ne Bernabé. Gubáz caní buluzéajni'ine̱' benne' ca' dxal-la' xelezúa chache̱' lu xel-la' zri'i lazre' chee̱ Dios.
ACT 13:44 Guledé xrunu' zra gate naca zra dxulupá'ane̱', belezraga ca nácaqueze benne' zaj zre̱'e̱ xe̱zre na' chee̱ xelenne̱' dizra' chee̱ Dios.
ACT 13:45 Gate benne' judío ca' belelé'ene̱' benne' zante̱ zaj nazrague̱' na', na' belaque̱' xa lazre' ne gulezú lawe̱' dxelenné̱' chee̱ da dxenná Pablo, ne gulenné̱' schanni' chee̱'.
ACT 13:46 Nadxa Pablo ne Bernabé gulenné̱' du lazre̱', gulé̱'e̱ benne' judío ca': ―Be̱n na ba xen bzénentu' le'e nedxu dizra' chee̱ Dios, le'e nácale judío, san lawe' da quebe dxaca lázrele xénele, ne da dxunle dxulé'e na quebe naca chee̱le gápale xel-la' nabán zeajlí canna, chee̱ le̱ na' chéajntu' na'a chálajle̱ntu' benne' quebe zaj naque̱' judío.
ACT 13:47 Caní guntu' lawe' da caní gunná bea Xránadxu gate gunné̱': Bzua' Lue' ca tu xi' da gusení na benne' xe̱zr la xu ca', ne chee̱ gacu' weselá chee̱ bénneache zaj zre̱'e̱ ca naca xe̱zr la xu.
ACT 13:48 Gate belenne̱' da nigá, benne' quebe zaj naque̱' judío gulebéle̱'e̱ne̱', na' gulezú lawe̱' dxelenné̱' xrlátaje naca dizra' chee̱ Xránadxu, na' guléajle̱ xúgute̱ benne' ca' ba nabéaj Dios chee̱ xelape̱' xel-la' nabán zeajlí canna.
ACT 13:49 Ca' guca, bzriluj dizra' chee̱ Dios du ca naca lu xe̱zre ca' zaj nababa na'.
ACT 13:50 Benne' judío ca' buluchálajle̱ne̱' bal-la nu'ula blau ca' zjácale̱ne̱' da dxulusé̱dene̱' chee̱ Dios, ne benne' biu blau ca' chee̱ xe̱zre, na' gulegú'u xel-le̱' benne' ca' chee̱ xeláu zi' xuzre̱' Pablo, ne Bernabé, ne chee̱ xuluxulague̱' le̱' naga nababa na'.
ACT 13:51 Nadxa gubáz ca' belexebibe̱' bxrte xu da zeajzría na zrele̱' da dxulé'e na zaj nabaga benne' ca' zria, na' xjaque̱' lu xe̱zre Iconio.
ACT 13:52 Gulebéle̱'e̱ benne' zaj zre̱'e̱ Antioquía na', benne' dxeléajle̱'e̱ chee̱ Jesús, zúale̱ Be' Lá'azxa le̱'.
ACT 14:1 Gate belezrin Pablo ne Bernabé xe̱zre Iconio, na' belú'e̱ tu zrente̱ lu xudau' chee̱ judío ca', na' ca buluchálaje̱' dizra' chee̱ Dios, benne' zante̱ guléajle̱'e̱ chee̱ Jesús, benne' judío ca', ne benne' quebe zaj naque̱' judío.
ACT 14:2 Nadxa benne' judío ca', benne' quebe dxeléajle̱'e̱ chee̱ Jesús belegú'u xel-le̱' benne' quebe zaj naque̱' judío chee̱ xelecuídene̱' biche ljwézredxu ca'.
ACT 14:3 Lácala belune̱' caní, benne' gubáz ca' gulezúaqueze̱' na' zane' zra, ne du lazre̱' buluchálaje̱' dizra' chee̱ Dios, dxuluxrén lazre̱' Xránadxu, na' Xránadxu bzua chúchue̱' ca da dxelenná benne' gubáz ca' ca naca xel-la' zri'i lazre' chee̱ Dios, na' Le̱' bnézruje̱' gubáz ca' xel-la' dxenná bea xelune̱' xel-la' waca ca' chee̱ xabáa ne da dxelunna bea na naca da li da dxelenné̱'.
ACT 14:4 Benne' ca' zaj zre̱'e̱ xe̱zre na' gulaque̱' chupa la'a. Bal-le̱' beledé̱'e̱ judío ca', na' xebal-le̱' beledé̱'e̱ gubáz ca' chee̱ Jesús.
ACT 14:5 Nadxa benne' judío ca', ne benne' quebe zaj naque̱' judío belune̱' tuze dizra' nen benne' xu'u lawe' ca' chee̱ gulenné̱' schanni' chee̱ benne' gubáz ca', na' gulaca lazre̱' xuluzríe̱' le̱' xiaj.
ACT 14:6 Pablo ne Bernabé, gate belenne̱' ca', buluzrúnnaje̱' zjaque̱' naga zaj dxe' xe̱zre Listra, ne xe̱zre Derbe, da zaj nababa Licaonia, na' guledée̱' ca naca xé̱zredu ca' chee̱ xe̱zre ca' zaj nababa na',
ACT 14:7 na' buluchálaje̱' na' ca naca dizra' chawe' chee̱ Jesús.
ACT 14:8 Lu xe̱zre Listra zua tu benne' nazrinnaj ni'e̱. Dxe'e̱ na' lawe' da gúlaje̱' nazrinnaj ni'e̱, ne quebe dxácaqueze se̱'e̱.
ACT 14:9 Benne' nigá dxenne̱' da dxuchalaj Pablo, na' Pablo gunné̱'e̱ benne' zrinnaj na', na' guque bé'ene̱' nape̱' xel-la' dxeajlí lazre' chee̱ xexaque̱'.
ACT 14:10 Nadxa Pablo gunné̱' zizraj: ―Guzé̱ ni'u. Benne' na' guxase̱' guze̱te̱', na' guzú lawe̱' dxedé̱'.
ACT 14:11 Gate belelé'e benne' ca' da be̱n Pablo, na' gulezú lawe̱' dxelenné̱' zizraj nen dizra' walazre' chee̱ benne' Licaonia, dxelenné̱': ―Dios ca' zaj naca ca bénneache ba belelé̱'e̱ naga zúadxu.
ACT 14:12 Dxelenné̱' naca Bernabé dios Júpiter, ne naca Pablo dios Mercurio lawe' da dxuchálajqueze Pablo.
ACT 14:13 Na' bxruze chee̱ dios Júpiter, zua xudau' chee̱ na ca dxú'udxu xe̱zre na', guché̱'e̱ be̱zre ca' ne xiaj zaj nuzé̱'e̱ na du, na' bxruze na', ne benne' zan ca' gulaca lazre̱' xuluxucá'ana szrene̱' benne' gubáz ca', ne xelútie̱' be̱zr ca' lau benne' gubáz ca' ca dxelúnqueze benne' xe̱zre Listra na' chee̱ dios chee̱'.
ACT 14:14 Gate guleque be'e Bernabé ne Pablo, benne' gubáz ca', na' gulecheze̱' zra lane̱' da dxulé'e na dxelezrebe̱' bi gun Dios, na' gulu'e̱ láwela benne' ca', dxelenné̱' zizraj:
ACT 14:15 ―Le'e, benne', ¿bizr chee̱ na' dxunle da nigá? Netu' nácantu' bénneache ca lé'equeze, ne za'ntu' nigá chee̱ xe̱ntu' le'e dxal-la' gusanle québedxa gunle da caní da quebe bi zaca na, ne chéajle̱le chee̱ Dios ban, Bénnea' be̱ne̱' xabáa ne xe̱zr la xu, ne nísadau', ne xúgute̱ da de̱ lu'ule na.
ACT 14:16 Lu iza da ba guledé Dios be̱'e̱ lataj xúgute̱ bénneache guledé̱' lu xrneza cha chee̱', na' belune̱' ca da gulaca lazre̱',
ACT 14:17 lácala blé'equezne̱' benne' ca' nu naca Le̱' ne̱ chee̱ da chawe' da dxune̱' chee̱ benne' ca'. Le̱' dxusel-la' xiuj chee̱dxu ne ca naca lina xrtante̱, ne dxunne̱' da dxechínedxu da gágudxu, ne chee̱ bedxu.
ACT 14:18 Lácala gulenná gubáz ca' da nigá, gúcale̱'e̱ na ste̱be buluzague̱' benne' ca' chee̱ quebe xelútie̱' be̱zr ca' lau le̱' chee̱ xuluxucá'ana szrene̱' le̱'.
ACT 14:19 Gudé na' belezrín bal-la benne' judío, benne' Antioquía, ne benne' Iconio, na' belegú'u xel-le̱' bénneache ca', na' buluzríe̱' Pablo xiaj. Guléquene̱' ba belutie̱' Pablo, na' gulezrube xue̱' le̱' belebéaje̱' le̱' xe̱zre na'.
ACT 14:20 Gate benne' ca' dxeléajle̱'e̱ chee̱ Jesús belezrague̱' zaj naxéchaje̱' naga de̱' Pablo, na' bexasa le̱', ne bexu'e̱ xe̱zre na', na' zra xula bezá'le̱ne̱' Bernabé, zjaque̱' xe̱zre Derbe.
ACT 14:21 Ca gudé bchálaje̱' dizra' chawe' chee̱ Jesús lu xe̱zre Derbe, naga benne' zante̱ gulezí' lu ne̱'e̱ dizra' chee̱ Dios, na' gubáz ca' belexedée̱' xe̱zre Listra, ne xe̱zre Iconio, ne xe̱zre Antioquía.
ACT 14:22 Lu xe̱zre caní belún chache̱' lázrdau benne' ca' dxeléajle̱'e̱ chee̱ Jesús, ne bulusízrene̱' le̱' chjácale̱ne̱' da naca chee̱ Dios, dxelé̱'e̱ le̱': ―Benne' xelu'e̱ naga dxenná bea Dios, xel-la' zi' zrente̱ xeledée̱'.
ACT 14:23 La gázqueze buluzúe̱' benne' gula ca' chee̱ xuluxúe̱' tu tu cue' benne' ca' dxeléajle̱'e̱ chee̱ Jesús, na' ca gudé na' buluzré̱'e̱ benne' ca' lu na' Xránadxu, Bénnea' ba guléajle̱'e̱ chee̱'.
ACT 14:24 Ca gudé na' belexedée̱' naga nababa Pisidia, na' belezrine̱' naga nababa Panfilia.
ACT 14:25 Buluchálaje̱' dizra' chee̱ Dios lu xe̱zre Perge, na' ca gudé na' xjaque̱' xe̱zre Atalia.
ACT 14:26 Na' belexú'e̱ da dxedá lawe' nísadau', na' belexezrine̱' xe̱zre Antioquía, naga zaj zra' benne' belegu'e̱ gubáz ca' lu na' Dios chee̱ xelune̱' zrin na', da ba belezuene̱' na'a.
ACT 14:27 Gate belezrine̱' Antioquía na', na' bulutupe̱' benne' ca' dxeléajle̱'e̱ chee̱ Jesús, ne buluzenne̱' benne' ca' xúgute̱ da ba be̱n Dios, bchínene̱' gubáz ca', ne ca be̱n Xránadxu, be̱'e̱ benne' quebe zaj naque̱' judío lataj xeléajle̱'e̱ chee̱ Jesús.
ACT 14:28 Na' Pablo, ne Bernabé belexegá'ane̱' na' zane' beu' nen benne' ca' dxeléajle̱'e̱ chee̱ Jesús.
ACT 15:1 Ca lu zra ca', bal-la benne' gusiá'que̱' xe̱zre ca' zaj nababa Judea, ne belezrine̱' xe̱zre Antioquía na', na' gulezú lawe̱' dxelé̱'e̱ biche ljwézredxu ca' dxal-la' chugu late' weaj be̱la' chee̱ be̱l-la' dxen chee̱ benne' biu ca' chee̱ xelelé̱', ca gunná bea Moisés.
ACT 15:2 Pablo ne Bernabé bulutíl-lale̱'e̱ le̱' dizra', na' naga xeajche'te̱ na, biche ljwézredxu ca' buluzúe̱' Pablo, ne Bernabé, ne xezícala benne' ca' chee̱ chjaque̱' Jerusalén chee̱ cheajlechálaje̱' chee̱ da nigá nen benne' gubáz ca', ne benne' gula ca' chee̱ cue' benne' dxeléajle̱'e̱ chee̱ Jesús zaj zre̱'e̱ Jerusalén.
ACT 15:3 Benne' dxeléajle̱'e̱ chee̱ Jesús, benne' zaj zre̱'e̱ Antioquía, belexegu'e̱ benne' caní neza, na' belexedée̱' xe̱zre ca' zaj nababa Fenicia, ne xe̱zre ca' zaj nababa Samaria, na' dxuluzenne̱' benne' xé̱zredu ca' ca belún benne' quebe zaj naque̱' judío, ba belexexaque̱' chee̱ Dios, na' xúgute̱ biche ljwézredxu belebéle̱'e̱ne̱' gate belenne̱' da nigá.
ACT 15:4 Gate Pablo ne Bernabé belexezrine̱' Jerusalén, na' benne' ca' dxeléajle̱'e̱ chee̱ Jesús ne benne' gubáz ca', ne benne' gula ca' gulezí' lu ne̱'e̱ le̱', na' Pablo ne Bernabé buluzenne̱' le̱' ca naca da be̱n Dios lu na' le̱'.
ACT 15:5 Bal-la benne' fariseo ca', benne' ba guléajle̱'e̱ chee̱ Jesús, gulezé̱' gulenné̱': ―Dxun na ba xen chugu late' weaj be̱la' chee̱ be̱l-la' dxen chee̱ benne' biu ca', benne' ba guléajle̱'e̱ chee̱ Jesús, benne' quebe zaj naque̱' judío, ne nna be'edxu le̱' xuluzúe̱' dizra' da bdxixruj be'e Moisés.
ACT 15:6 Nadxa belezraga benne' gubáz ca' ne benne' gula ca', benne' dxeléajle̱'e̱ chee̱ Cristo, chee̱ xulucá'ana chawe̱' da na' dxaca.
ACT 15:7 Ca gudé buluchálajle̱ ljwezre̱' chee̱ da nigá, na' Pedro guxase̱', ne guzre̱' benne' ca': ―Biche ljwezra', nézquezle le'e Dios guqué̱'e̱ neda' nédxute̱ ládujla le'e chee̱ guzenda' benne' quebe zaj naque̱' judío dizra' chawe' ca naca chee̱ Jesús, chee̱ xeléajle̱ benne' ca' chee̱ Le̱'.
ACT 15:8 Dios nézene̱' ca naca da xu'u lu xichaj lázxdau bénneache, na' blé'ene̱' dxezí' lu ne̱'e̱ benne' ca', lawe' da bnézruje̱' benne' ca' Be' Lá'azxa ca be̱ne̱' chee̱dxu dxi'u.
ACT 15:9 Dios quebe dxuché̱'e̱ ca zrí'ine̱' tudxu xetudxu lawe' da bca'ana cháwequeze̱' lázxdau benne' ca' guleajlí lazre̱' Jesús.
ACT 15:10 Na'a, ¿bizr chee̱ na' dxaca lázrele le'e guchale ca da ba be̱n Dios, dxuzúale tu xua' lawe' benne' ca' dxeléajle̱'e̱ chee̱ Jesús, da quebe gaca gúadxu dxi'u, ne quebe guca xelúa xra xrtáudxu na?
ACT 15:11 Na'a, dxéajle̱dxu dxi'u bache naladxu ne̱ chee̱ xel-la' zri'i lazre' chee̱ Xránadxu Jesús, ne cá'anqueze zaj nalá benne' ca'.
ACT 15:12 Nadxa xúgute̱' gulezúa zrie̱', ne buluzé̱ nague̱' dxácate̱ dxuchalaj Pablo ne Bernabé ca naca da be̱n Dios, be̱ne̱' da zan da dxelunna bea na naca li xrtizre̱' nen xel-la' waca ca' da za xabáa, da ca' be̱ne̱' lu na' Pablo ne Bernabé láwela benne' ca' quebe zaj naque̱' judío.
ACT 15:13 Gate bexuzre buluchálaje̱', na' gunná Jacobo: ―Biche ljwezra', le xene chia'.
ACT 15:14 Simón Pedro bzenne̱' dxi'u ca be̱n Dios, be̱'e̱ lataj benne' ca' quebe zaj naca judío xelexexaque̱' chee̱' da nedxu lasa, bequé̱'e̱ ládujla benne' ca' bénneache xelexexaque̱' chee̱'.
ACT 15:15 Da na' guca naca na tuze nen da buluzúaj benne' ca' buluchálaje̱' waláz chee̱ Dios, da na' naxúaj na lu xiche chee̱ Dios, dxenné̱':
ACT 15:16 Te nigá xelá'a na' xechisa' ca naca lizre David da nazre'e. Gucá'ana chawa' da nagá'ana chee̱ na, na' xechísaqueza' na,
ACT 15:17 chee̱ xelexílaj xúgute̱ benne' xezica ca' Xrane̱' Dios, ne cá'anqueze xelún xúgute̱ benne' zaj zra' xe̱zr la xu ca', benne' ca' xelenne̱' chee̱ La' neda'.
ACT 15:18 Ca' dxenná Xránadxu, blé'ene̱' da nigá nédxudaute̱.
ACT 15:19 ’Chee̱ le̱ na' dxapa' le'e quebe dxal-la' gunle ze̱de benne' quebe zaj naque̱' judío, benne' ca' dxelexexaque̱' chee̱ Dios.
ACT 15:20 Dxal-la' guzúajntu' chee̱ benne' ca' dxal-la' xulusane̱' da naca chee̱ bedáu' xaga ca' u bedáu' xiaj, ne quebe dxal-la' xelune̱' dul-la chee̱ da dxucá'ana sban bénneache, ne quebe dxal-la' xelawe̱' be̱la' chee̱ be̱ xixre', be̱ quebe bdxuaj dxen, ne quebe dxal-la' xelawe̱' dxen chee̱ba'.
ACT 15:21 Caní dxal-la' xelune̱' lawe' da ca ni'i zaj zra' benne' tu tu xe̱zre, benne' dxuluzenne̱' bénneache ca naca da bdxixruj bea Moisés, da na' dxululabe̱' lu xudau' ca' chee̱ benne' judío ca' tu tu zra ca' dxulupá'ane̱'.
ACT 15:22 Nadxa benne' gubáz ca', ne benne' gula ca', ne xúgute̱ benne' dxeléajle̱'e̱ chee̱ Jesús belune̱' tuze dizra' xelequé̱'e̱ bal-la benne' ca' ládujla le̱' ne xelesel-le̱' le̱' xe̱zre Antioquía nen Pablo, ne Bernabé. Belequé̱'e̱ Judas, bénnea' lé̱queze̱' Barsabás, ne Silas. Chupa benne' caní zaj naque̱' benne' blau ládujla biche ljwézredxu ca'.
ACT 15:23 Bulugüé̱'e̱ benne' ca' tu xiche da dxenná na: “Netu', benne' gubáz zrantu' nigá, ne benne' gula zrantu' nigá, ne biche ljwézrele zrantu' nigá, dxugápantu' le'e diuzre, biche ljwézrentu' quebe nácale judío, zrale xe̱zre Antioquía, ne le'e zrale xe̱zre ca' zaj nababa Siria, ne xe̱zre ca' zaj nababa Cilicia.
ACT 15:24 Ba bénentu' bal-la benne' ba besiá'que̱' nigá, ne quebe nasél-lantu' netu' le̱', na' belune̱' le'e ze̱de nen dizra' da buluchálaje̱', ne belún zréajene̱' le'e, dxelenné̱' dxal-la' chugu late' weaj be̱la' chee̱ be̱l-la' dxen chee̱le, benne' biu ca', ne chéajle̱le ca naca da bdxixruj be'e Moisés.
ACT 15:25 Chee̱ le̱ na' dxéquentu' naca xrlátaje cá'antu' bal-la benne' ládujla netu' chee̱ xelelé̱'e̱ xedajlenné̱'e̱ le'e nen biche ljwézredxu Bernabé ne Pablo, benne' ca' nazrí'i lázrele̱'e̱ntu'.
ACT 15:26 Benne' caní belune̱' zrin chee̱ Xránadxu Jesucristo, xjaque̱' lu da ste̱be naga gulaca lazre' bénneache xelútie̱' le̱'.
ACT 15:27 Ca' naca na, dxesél-lantu' naga zúale Judas ne Silas, na' benne' caní xuluchálajle̱ne̱' le'e ca naca chee̱ da nigá.
ACT 15:28 Guque Be' Lá'azxa xrlátaje, ne cá'anqueze netu' gúquentu' xrlátaje quebe bi xua' guzúantu' lawe' le'e, san da canize dxun na ba xen gunle.
ACT 15:29 Dxal-la' gusanle da naca chee̱ bedáu' xaga, ne bedáu' xiaj ca', ne quebe dxal-la' gunle dul-la chee̱ da dxucá'ana sban bénneache, ne quebe dxal-la' gágule be̱la' chee̱ be̱ xixre', be̱ quebe bdxuaj dxen, ne quebe dxal-la' gágule dxen chee̱ba'. Che gunle ca naca da nadxixruj bea caní, gunle xrlátaje. Dxenábantu' lau Dios gaca chawe' chee̱le.”
ACT 15:30 Nadxa benne' ca' gulesel-le̱' xjaque̱' xe̱zre Antioquía. Na' buluchague̱' benne' ca' zaj naque̱' chee̱ Dios, ne bulunézruje̱' le̱' xiche na'.
ACT 15:31 Gate biche ljwézredxu ca' bululabe̱' na, na' gulebéle̱'e̱ne̱' lawe' da dxue zren na le̱'.
ACT 15:32 Judas ne Silas zaj naque̱' benne' dxelenné̱' waláz chee̱ Dios. Chee̱ le̱ na' buluchálajle̱ne̱' biche ljwézredxu ca', belúe zrene̱' le̱', ne bulutipe̱' lazre' le̱'.
ACT 15:33 Gate gudé guca tu chi'i zaj zre̱'e̱ na', na' benne' bíchedxu ca' buluzé̱' benne' ca' dizra', ne gulenabe̱' Dios sua xel-la' dxebeza zri lazre' nen benne' ca', chee̱ xesí'aque̱' xelexezrine̱' naga zaj zra' benne' ca' gulesel-le̱' le̱'.
ACT 15:34 Silas gúquene̱' xrlátaje xegá'ane̱' na'.
ACT 15:35 Cá'anqueze Pablo, ne Bernabé belexegá'ane̱' lu xe̱zre Antioquía, na' tu zren nen benne' zandxa gulezúe̱' dxulusé̱dene̱' bénneache, ne dxuluchálaje̱' ca naca dizra' chee̱ Xránadxu.
ACT 15:36 Ca gudé na', Pablo guzre̱' Bernabé: ―Xu'u xecha lasa cheajnnadxu biche ljwézredxu ca' zaj zre̱'e̱ xúgute̱ xe̱zre ca' naga xeajchálajdxu dizra' chee̱ Xránadxu, chee̱ cheajnnadxu aja dxaca zaj zre̱'e̱.
ACT 15:37 Bernabé guca lazre̱' che̱'e̱ Juan nen le̱', bi na' lé̱quezebe' Marcos,
ACT 15:38 san Pablo quebe guxáza lazre̱' che̱'e̱-be' lawe' da bsanbe' benne' ca' gate zaj zre̱'e̱ xe̱zre ca' zaj nababa Panfilia, ne québedxa guxíajle̱be' le̱' lu zrin chee̱ Xránadxu.
ACT 15:39 Na' Pablo, ne Bernabé bulutil-la ljwezre̱' dizra'. Ca'an guca, belexela'a cha chee̱'. Bernabé guché̱'e̱ Marcos, na' gulu'e̱ tu lu da dxedá lawe' nísadau', na' xjaque̱' Chipre.
ACT 15:40 Na' Pablo guqué̱'e̱ Silas, na' ca gudé biche ljwézredxu ca' belegüe̱'e̱ Pablo ne Silas lu na' Xránadxu chee̱ gune̱' da chawe' chee̱ benne' ca',
ACT 15:41 na' gusiá'que̱', ne guledée̱' xe̱zre ca' zaj nababa Siria, ne xe̱zre ca' zaj nababa Cilicia, na' bulutipe̱' lazre' bi bíchedxu ca'.
ACT 16:1 Pablo ne Silas belezrine̱' xe̱zre Derbe, ne xe̱zre Listra naga belexezrague̱' tu benne' cuide' dxéajle̱be' chee̱ Jesús, le̱be' Timoteo, zri'ine tu nu'ula judío dxéajle̱'e̱ chee̱ Jesús, san xrabe' naque̱' benne' griego.
ACT 16:2 Bi bíchedxu zaj zre̱'e̱ xe̱zre Listra, ne xe̱zre Iconio dxelenné̱' xrlátaje dxgua dxunbe'.
ACT 16:3 Pablo guca lazre̱' chéajle̱ Timoteo le̱', na' guchugue̱' late' be̱la' chee̱ be̱l-la' dxen chee̱be' ca dxenná bea da bdxixruj be'e Moisés, chee̱ quebe xelezrá'a benne' judío ca' zaj zre̱'e̱ naga nababa na lawe' da zaj neze xúgute̱ benne' ca' naca xra Timoteo benne' griego.
ACT 16:4 Lu xúgute̱ xe̱zre naga dxeledée̱' buluzenne̱' benne' bíchedxu ca' ca naca da zaj nadxixruj bea na belún benne' gubáz ca', ne benne' gula ca' zaj zre̱'e̱ Jerusalén.
ACT 16:5 Ca'an guca bi bíchedxu ca' gulezúa chúchue̱' ca dxeleajlí lazre̱' Jesús, na' benne' ca' dxeléajle̱'e̱ chee̱', tu zra tu zra zeajte̱ dxelane̱'.
ACT 16:6 Be' Lá'azxa quebe be̱'e̱ benne' gubáz ca' lataj xuluchálaje̱' dizra' chee̱ Dios naga nababa Asia. Chee̱ le̱ na' guledée̱' naga nababa Frigia, ne xe̱zre ca' zaj nababa Galacia.
ACT 16:7 Belezrine̱' naga nazraga xe̱zre ca' zaj nababa Misia. Gulaca lazre̱' chjaque̱' naga nababa Bitinia, san Be' Lá'azxa chee̱ Jesús quebe be̱'e̱ le̱' lataj.
ACT 16:8 Nadxa guledée̱' naga nababa Misia, na' belezrine̱' xe̱zre Troas.
ACT 16:9 Lu xe̱zre na' Pablo blé'ene̱' tu da ba ble'e Dios le̱' chizrela, blé'ene̱' tu benne' biu chee̱ ga nababa Macedonia, ze̱' dxata' xuene̱' Pablo, dxenné̱': “Gudá Macedonia nigá, gácale̱nu' netu'.”
ACT 16:10 Gate ble'e Pablo da nigá, na' benne' ca', ne neda', Lucas, la gudílajte̱ntu' ájala guntu' chee̱ chéajntu' ga nababa Macedonia lawe' da gúquequezentu' Dios dxenné̱' netu' chee̱ cheajchálajle̱ntu' benne' ca' dizra' chawe' ca naca chee̱ Jesús.
ACT 16:11 Lu xe̱zre Troas na' guxú'untu' tu lu da dxedá lawe' nísadau', na' guxéajntu' tu xe̱zr la xu da naxechaj nísadau', nazí le na Samotracia, na' zra xula bzrintu' xe̱zre Neápolis.
ACT 16:12 Beza'ntu' Neápolis, na' bzrintu' xe̱zre Filipos, da naca tu xe̱zre naga zaj zra' benne' Roma, ne naca xe̱zre blau ga nababa Macedonia. Lu xe̱zre na' guzúantu' tu chupa zra.
ACT 16:13 Gate naca zra dxulupá'ana judío ca', na' bdxúajntu' dxu'a xe̱zre na', ne bzrintu' dxu'a xe̱gu naga zaj nabéaje̱' dxeajlechálajle̱ne̱' Dios. Gudxe'ntu' na' ne bchálajle̱ntu' nu'ula ca' zaj nazrague̱' na' ca naca dizra' chawe' ca naca chee̱ Jesús.
ACT 16:14 Tu nu'ula ca' le̱' Lidia, naque̱' nu'ula chee̱ xe̱zre Tiatira, nu'ula dxute̱' ladxe' zaca da naca bzawe. Nu'ula nigá zéajle̱ne̱' da naca chee̱ Dios, na' benne̱' chee̱ntu', na' Xránadxu bzani'e̱ lázrdawe̱' chee̱ guzí' lu ne̱'e̱ da dxuchalaj Pablo.
ACT 16:15 Na' bdxue nisa nu'ula nigá nen benne' zaj zre̱'e̱ lizre̱'. Gudé na' guta' xuene̱' netu', gunné̱': ―Che le'e dxéquele da li dxeajlí lazra' Xránadxu, le da súale lizra'. Na' be̱ne̱' ba xuzre begá'anantu' na'.
ACT 16:16 Tu zra gate zéajntu' naga zeajchálajle̱ntu' Dios, bezrágantu' tu bi nu'ula cuide' xu'ube' be' xriwe̱', ne dxenné̱ xa'abe' ne̱ chee̱ be' xriwe̱' na'. Bi nu'ula nigá xú'ube' lu na' benne' ca' dxuluchínene̱' le̱be' xadía, na' xránabe' ca' dxelezíle̱'e̱ dumí da dxezibe', dxenné̱ xa'abe'.
ACT 16:17 Bi nu'ula nigá guzú laube' za'be' cuzru Pablo ne netu', dxennabe' zizraj: ―Benne' caní dxelune̱' zrin chee̱ Dios szrente̱, ne dxuluzenne̱' le'e ájala gunle lale.
ACT 16:18 Zane' zra be̱nbe' caní cadxa guque Pablo ze̱de, na' bexéchaje̱', ne guzre̱' be' xriwe̱' da xu'ube': ―Lu La Jesucristo dxenná be'eda' lue' xedxúaju' lu be̱l-la' dxen chee̱ bi nu'ula nigá. Na' be' xriwe̱' na' bedxúajte̱ na.
ACT 16:19 Gate benne' ca' dxuluchínene̱'-be' xadía guleque bé'ene̱' québedxa bi xelexezí'e̱ ne̱ chee̱be', na' gule̱l-le̱' Pablo ne Silas, na' guleché̱'e̱ benne' caní lau benne' xu'u lawe' naga zua chale'aj xu'u lawe' blau.
ACT 16:20 Na' buluzúe̱' benne' caní lau benne' xu'u lawe' ca', na' gulenné̱': ―Benne' caní zaj naque̱' judío ne dxelún zréajene̱' benne' zaj zre̱'e̱ xe̱zre chee̱dxu,
ACT 16:21 ne dxulusé̱dene̱' ca naca da zjácale̱ne̱', da quebe gaca sidxu, ne quebe gaca gundxu na lawe' da nábabadxu Roma.
ACT 16:22 Nadxa benne' zaj zre̱'e̱ xe̱zre na' guledábague̱' Pablo ne Silas, na' benne' xu'u lawe' na' gulenná be'e xeleléchaje̱' zra lana Pablo ne Silas, ne xelu'e̱ le̱' zrise.
ACT 16:23 Ca gudé belúele̱'e̱ le̱', na' buluzré̱'e̱ le̱' lizre xia, ne gulenná bé'ene̱' benne' xu'u lu ne̱'e̱ lizre xia na' guxúe xánnie̱' benne' ca'.
ACT 16:24 Gate benne̱' ca gulenná be'e̱, na' bzre̱'e̱ le̱' zane' lézxudxa ne bzre̱'e̱ ni'a benne' ca' lu xe̱dxu chee̱ cuaga da dxuxru na ni'e̱.
ACT 16:25 Gate gula dxe̱la Pablo ne Silas dxuluchálajle̱ne̱' Dios, ne dxelul-le̱' da dxelúe lá'ane̱' Dios, na' xezícadxa benne' zaj zre̱'e̱ lizre xia dxuluzé̱ nague̱' chee̱'.
ACT 16:26 La' na'te̱ guzrú'le̱'e̱ da bxrize na ca naca lizre xia, na' belexalaj xúgute̱ dxa xu'u ca', ne belexexe̱zre du xia da zaj nadxéaj ni'a xúgute̱ benne' ca' zaj zre̱'e̱ lizre xia.
ACT 16:27 Na' benne' xu'u lu ne̱'e̱ lizre xia na' bebane̱', ne gate blé'ene̱' zaj naxalaj dxa xu'u ca' chee̱ lizre xia, gúlaje̱' xia chee̱ xute cuine̱' lawe' da dxéquene̱' ba buluxuzrúnnaj benne' ca' zaj zre̱'e lizre xia.
ACT 16:28 Pablo gudxezre xe̱'e̱, guzre̱' le̱': ―Quebe bi gune cuinu'. Xúgute̱ntu' zúantu' nigá.
ACT 16:29 Nadxa benne' na' xu'u lu ne̱'e̱ lizre xia gunabe̱' tu xi', na' guxú'u chégüe̱', dxezrízequeze̱' xel-la' dxezrebe, na' bzu zribe̱' lau Pablo ne Silas.
ACT 16:30 Nadxa guléaje̱' benne' ca' ne bche̱be̱' le̱': ―Le'e, benne', ¿bizra dxal-la' guna' chee̱ la'?
ACT 16:31 Benne' ca' belexeche̱be̱': ―Guxéajle̱ chee̱ Xránadxu Jesucristo, na' lau', ne cá'anqueze benne' zaj zre̱'e lizru'.
ACT 16:32 Na' buluchálajle̱ne̱' le̱', ne xúgute̱ benne' zaj zre̱'e̱ lizre̱' ca naca dizra' chee̱ Xránadxu.
ACT 16:33 Lu xe̱la ná'queze benne' na' xu'u lu ne̱'e̱ lizre xia gudibe̱' we̱' chee̱ Pablo ne Silas, na' ca gudé na', le̱' ne xúgute̱ benne' zaj zre̱'e̱ lizre̱' guledxúe̱' nisa.
ACT 16:34 Ca gudé na' beche̱'e̱ Pablo ne Silas lizre̱', na' bnézruje̱' da gulawe̱', na' le̱' ne benne' zaj zre̱'e̱ lizre̱' gulebéle̱'e̱ne̱' lawe' da ba guléajle̱'e̱ chee̱ Dios.
ACT 16:35 Che zílala benne' xu'u lawe' ca' gulesel-le̱' bi xra'aga lau benne' na' xu'u lu ne̱'e̱ lizre xia, ne gulenná bé'ene̱' le̱' gusane̱' Pablo ne Silas.
ACT 16:36 Nadxa benne' na' xu'u lu ne̱'e̱ lizre xia guzre̱' Pablo: ―Benne' xu'u lawe' ca' gulenná bé'ene̱' neda' gusana' le'e. Na'a waca xedxúajle du lázrele.
ACT 16:37 Pablo guzre̱' bi xra'aga ca': ―Netu' nabábantu' Roma, na' belú'e̱ netu' láwela benne' xe̱zre ca', ne quebe ne xuluchí'e̱ chee̱ntu', na' buluzré̱'e̱ netu' lizre xia. Na'a ¿dxeléquene̱' xulusane̱' netu' bagácheze? Quebe gaca. Xelída lé̱queze̱' xelexebéaje̱' netu'.
ACT 16:38 Bi xra'aga ca' xeajlexezénnebe' benne' xu'u lawe' ca', na' benne' caní belezrebe̱' gate guleque bé'ene̱' Pablo ne Silas zaj nababe̱' Roma.
ACT 16:39 Na' xjaque̱' lizre xia na', ne gulenabe̱' Pablo ne Silas xelezí zrene̱' chee̱'. Nadxa belexebéaje̱' le̱', ne gulata' xuene̱' le̱' xelexedxúaje̱' xe̱zre na'.
ACT 16:40 Gate Pablo ne Silas belexedxúaje̱' lizre xia na', na' xjaque̱' lizre Lidia, na' ca gudé buluchálajle̱ne̱' biche ljwézredxu ca', ne bulutipe̱' lazre̱', na' besiá'que̱'.
ACT 17:1 Nadxa Pablo ne Silas guledée̱' xe̱zre Anfípolis, ne xe̱zre Apolonia, na' belezrine̱' xe̱zre Tesalónica, naga zua tu xudau' chee̱ judío ca'.
ACT 17:2 Pablo guxíaje̱' xudau' na', na' ca dxúnqueze̱' bchálajle̱ne̱' benne' ca' tu tu zra dxulupá'ane̱' du chunna da gazre zra.
ACT 17:3 Ca da naxúaj na lu xiche chee̱ Dios, bzéajni'ine̱' le̱' be̱n na ba xen Cristo guzí guzaque̱', ne gutie̱', na' ca gudé na' be̱n na ba xen bebane̱' ládujla benne' gate. Na' guzre̱' benne' ca': ―Jesús nigáqueze, bénnea' dxuzenda' le'e chee̱', naque̱' Cristo, Bénnea' guche̱be lazre' Dios sel-le̱'.
ACT 17:4 Nadxa bal-la benne' judío ca' guléajle̱'e̱ chee̱ Jesús, ne gulaque̱' tuze Pablo ne Silas. La gázqueze guléajle̱ benne' zan benne' griego, ne nu'ula zan zaj naque̱' nu'ula blau.
ACT 17:5 Benne' judío ca', benne' quebe dxeléajle̱'e̱ chee̱ Jesús gulaque̱' xa lazre' chee̱ Pablo, na' buluchague̱' bal-la benne' ca' dxelune̱' da cale̱la dxeledaze̱', ne bulutupa ljwezre̱', na' buluzúe̱' ste̱be ca naca benne' xe̱zre. Gulu'e̱ xadía lizre Jasón, dxelexílaje̱' Pablo ne Silas, chee̱ xelebéaje̱' le̱', ne xuludée̱' le̱' lu na' benne' xe̱zre ca'.
ACT 17:6 Gate quebe belexezrelne̱' Pablo ne Silas lu xu'u na', nadxa beleché̱'e̱ xadía Jasón ne xebal-la biche ljwézredxu ca' lau benne' xu'u lawe' ca' chee̱ xe̱zre, na' dxelebezre xe̱'e̱, dxelenné̱': ―Benne' ca', benne' ba belún zréajene̱' ca naca benne' zaj zre̱'e̱ xe̱zr la xu, cá'anqueze ba belelé̱'e̱ nigá.
ACT 17:7 Jasón nigá ba gulu'e̱ benne' ca' lizre̱'. Ca naca benne' ca' dxeledábague̱' da bdxixruj bea César lawe' da dxelenné̱' zua xetú wenná bea, tu benne' le̱' Jesús.
ACT 17:8 Gate belenne̱' da caní, na' benne' xe̱zre ca', ne benne' xu'u lawe' ca' gulezúe̱' ste̱be.
ACT 17:9 Jasón, ne biche ljwézredxu ca' bulucá'ane̱' dumí chee̱ gulezí'e̱ lataj, na' benne' xu'u lawe' ca' bulusane̱' le̱'.
ACT 17:10 Nadxa biche ljwézredxu gulé̱'e̱ Pablo ne Silas chee̱ xesí'aque̱' chizrela, chee̱ chjaque̱' xe̱zre Berea. Gate belezrine̱' na', na' belú'e̱ lu xudau' chee̱ judío ca'.
ACT 17:11 Benne' judío caní zaj nácadxe̱' zren lazre' ca benne' Tesalónica ca' lawe' da du lazre̱' gulezí'e̱ dizra' chee̱ Dios, na' tu zra tu zra dxululabe̱' lu xiche chee̱ Dios chee̱ xuluxúe̱' che naca da li da dxelé̱'e̱ le̱'.
ACT 17:12 Ca'an guca, benne' zan benne' judío ca' guléajle̱'e̱ chee̱ Jesús, ne cá'anqueze benne' griego. Benne' zan guléajle̱'e̱, nu'ula blau ca', ne benne' biu ca'.
ACT 17:13 Gate benne' judío ca' zaj zre̱'e̱ xe̱zre Tesalónica guleque bé'ene̱' dxuchalaj Pablo dizra' chee̱ Dios lu xe̱zre Berea, na' belezrine̱' na', ne gulegú'u xel-le̱' bénneache chee̱ xeledábague̱' Pablo ne Silas.
ACT 17:14 Biche ljwézredxu ca' la gulesél-la'te̱' Pablo chéaje̱' dxu'a nísadau', na' Silas ne Timoteo belexegá'ane̱' lu xe̱zre Berea.
ACT 17:15 Benne' ca' zjácale̱ne̱' Pablo beleché̱'e̱ le̱' lu xe̱zre Atenas. Nadxa benne' ca' belexezrine̱' lazrie̱', ne gulé̱'e̱ Silas, ne Timoteo chjácazegue̱' naga zua Pablo.
ACT 17:16 Dxácate̱ na' Pablo dxebeze̱' Silas ne Timoteo naga zue̱' lu xe̱zre Atenas, na' guzúale̱'e̱ ste̱be gate blé'ene̱' ca naca xe̱zre na', ni' naze nítale̱'e̱ bedáu' xiaj.
ACT 17:17 Chee̱ le̱ na' bchálaje̱' lu xudau' chee̱ judío ca' nen benne' judío ca', ne xezícala benne' ca' zjácale̱ne̱' da naca chee̱ Dios, na' tu zra tu zra bchálajle̱ne̱' benne' ca' zaj zre̱'e̱ lawe' xi'a.
ACT 17:18 Bal-la benne' zjácale̱ne̱' ca naca da dxuluse̱de benne' ca' zaj le̱' benne' epicureo, ne benne' estoico gulezú lawe̱' dxuluchálajle̱ne̱' Pablo. Bal-le̱' gulenné̱': ―¿Bizra xe̱ga benne' wechalaj nigá dxi'u? Na' xebal-le̱' gulenné̱': ―Dxéquentu' naque̱' benne' dxuse dizra' chee̱ dios zitu' ca'. Ca'an gulenné̱' lawe' da dxuchalaj Pablo dizra' chawe' ca naca chee̱ Jesús, ne ca naca chee̱ xel-la' dxexebán.
ACT 17:19 Nadxa guleché̱'e̱ Pablo lu lataj nazí le na Areópago, naga dxelezrágaqueze̱' bi xuluzén ljwezre̱'. Na' buluche̱be̱' Pablo: ―¿Waca guzénenu' netu' ca naca da cube nigá da dxusé̱denu' bénneache?
ACT 17:20 Lue' dxuchálaju' dizra' da quebe ne xénentu', na' dxaca lázrentu' nézentu' bi zéaje̱ ca naca da caní.
ACT 17:21 Caní gulenné̱' lawe' da dxuluzé̱ nágaze, ne dxuluchálajze ca naca tu dizra' cube xúgute̱ benne' Atenas, ne benne' zitu' ca' zaj zre̱'e̱ xe̱zre na'.
ACT 17:22 Nadxa Pablo guzé̱' laduj benne' ca' zaj zre̱'e̱ Areópago na', na' guzre̱' le̱': ―Le'e, benne' Atenas, ca naca xúgute̱ da dxelé'eda', dxulé'e na dxápale̱'e̱le ba lá'ana dios chee̱le ca',
ACT 17:23 lawe' da gate gudá' neda' gunná'a ca zaj naca xudau' ca' naga dxue lá'anale dios chee̱le ca', na' ble'eda' tu xudáudau' naga naxúaj dizra' caní: Chee̱ Dios Quebe Nu Núnbea. Na'a, Dios na' dxue lá'anale le'e, ne quebe núnbeale Le̱', chee̱ Dios na' dxuchálajle̱na' le'e.
ACT 17:24 ’Naque̱' Dios na' be̱ne̱' xe̱zr la xu nigá, ne xúgute̱ da de̱ lawe na. Naque̱' Xrane xabáa, ne Xrane xe̱zr la xu nigá. Quebe zue̱' xudau' da nun ni'a na' bénneache.
ACT 17:25 Quebe nachínene̱' bi da gaca xelún bénneache chee̱ Le̱' lawe' da dxunna Dios ná'queze xúgute̱dxu xel-la' nabán, ne be' da dxeca'adxu, ne xúgute̱ da de̱.
ACT 17:26 ’Tuze benne' be̱ne̱' naque̱' xra xúgute̱ cue' xe̱zr la xu ca' chee̱ che̱'e̱ du gabí'i xe̱zr la xu, na' blé'ene̱' zra, ne lataj naga dxal-la' xelezré̱'e̱,
ACT 17:27 chee̱ xelexexílaje̱' Dios chee̱ ájala xelexezrelne̱' Le̱' lácala quebe xelúnbea xánnie̱' Le̱', san da li Dios quebe zue̱' zitu' naga zua tu tudxu dxi'u.
ACT 17:28 Ne̱ chee̱ Dios nigá naca bandxu, ne dxedadxu, ne zradxu. Naca ca gulenná bal-la benne' wila chee̱le, gulenné̱': “Nácadxu xrtia Dios.”
ACT 17:29 Che nácadxu xrtia Dios, quebe dxal-la' guéquedxu naca Dios ca tu bedáu' oro, u tu bedáu' plata, u tu bedáu' xiaj, da zaj nun bénneache cáte̱ze dxululaba lázrequeze̱'.
ACT 17:30 Dios bzue̱' chalá'ala da belún bénneache ca ni'te̱ lu xel-la' quebe zaj neze chee̱', san na'a dxenná bé'ene̱' xúgute̱ benne' gátete̱ze zaj zre̱'e̱ xelexebí'i lazre̱'.
ACT 17:31 Dios ba nuzúe̱' tu zra gate guchi'e̱ chee̱ xúgute̱ bénneache lu da xrlátaje chee̱' lu na' tu benne' ba gucá'a Le̱', na' chee̱ da nigá bzue̱' tu da dxunna bea na gate bsebane̱' bénnea' ládujla benne' gate.
ACT 17:32 Gate benne' ca' belenne̱' dizra' nigá ca naca chee̱ tu benne' bebane̱' ládujla benne' gate, na' bal-le̱' belún le̱' chee̱', ne xebal-le̱' gulenné̱': ―Waca guchálajle̱nu' netu' ca naca da nigá xetú zra.
ACT 17:33 Nadxa Pablo bezé̱'e̱ naga zaj zra' benne' ca'.
ACT 17:34 Bal-la benne' ca' guléajle̱'e̱ chee̱ Jesús, na' gulaque̱' Pablo tuze. Ládujla benne' caní zua Dionisio, benne' naque̱' tuze nen benne' dxelezrague̱' Areópago na', ne tu nu'ula le̱' Dámaris, ne xebal-la benne' ca'.
ACT 18:1 Gudé na' bezá' Pablo xe̱zre Atenas, bexíaje̱' xe̱zre Corinto.
ACT 18:2 Lu xe̱zre na' xeajxraque̱' tu benne' judío le̱' Aquilo, naque̱' benne' nababe̱' tu xe̱zre nababa Ponto. Láteze ba guca belexezrín Aquilo, ne zru'ule̱' Priscila ga na'. Benne' caní besiá'que̱' xe̱zr la xu Italia lawe' da gunná bea César Claudio xelexedxúaj xúgute̱ benne' judío ca' xe̱zre Roma. Pablo guxíaje̱' xeajnné̱'e̱ Aquilo ne Priscila,
ACT 18:3 na' lawe' da tuze ca naca zrin da dxelún Pablo ne Aquilo, dxelune̱' xu'u xide zra be̱ xixre' da dxelútie̱' chee̱ benne' dxjaca wedil-la, na' begá'ana Pablo nen benne' caní chee̱ xelune̱' tu zren zrin.
ACT 18:4 Tu zra tu zra gate naca zra dxulupá'ana judío ca', Pablo zéaje̱' lu xudáudau' chee̱ judío ca' naga bchálaje̱', ne blé'ene̱' benne' ca', benne' judío, ne benne' quebe zaj naque̱' judío, Jesús naque̱' Cristo, Bénnea' guche̱be lazre' Dios sel-le̱'.
ACT 18:5 Gate belezrín Silas, ne Timoteo ga na', gudé belexesí'aque̱' xe̱zre ca' zaj nababa Macedonia, na' Pablo tu dxuchálajzqueze̱' dizra' chee̱ Dios, ne dxulé'ene̱' benne' judío ca' da li Jesús naque̱' Cristo, bénnea' nasel-la Dios, bénnea' dxelebeza judío ca'.
ACT 18:6 Benne' judío ca' gulezú lawe̱' dxeledábague̱' Pablo, ne dxelenné̱' schanni' chee̱'. Nadxa Pablo guzribe̱' gabán chee̱' da dxulé'e na dxebéaj xíchaje̱' benne' ca', dxenné̱': ―Le'e nabágale chee̱ xel-la' gute chee̱ bénne'du xu'ule. Québedxa nabaga' neda' chee̱ na lawe' da ba bzenda' le'e dizra' chawe' chee̱ Cristo. Ná'ate̱la guchálajle̱na' benne' quebe zaj naque̱' judío.
ACT 18:7 Bezé̱'e̱ lu xudáudau' na', na' bezrine̱' lizre tu benne' le̱' Justo, benne' dxucá'ana szrene̱' Dios ne zua lizre̱' cuita xudáudau' chee̱ judío ca'.
ACT 18:8 Na' Crispo, benne' xíchaje̱ chee̱ xudáudau' chee̱ judío ca', ne ca naca benne' zaj zre̱'e̱ lizre̱' guléajle̱'e̱ chee̱ Xránadxu. Cá'anqueze benne' zan benne' Corinto, gate belenne̱' dizra' chee̱ Dios, guléajle̱'e̱ ne guledxúe̱' nisa.
ACT 18:9 Nadxa Xránadxu ble'e lawe̱' Pablo tu zre' tu lu da ble'e Dios le̱', ne guzre̱' le̱': ―Quebe zrebu'. Bchálajte̱ze, ne quebe sua zriu'.
ACT 18:10 Neda' zúale̱na' lue', na' quebe nu seque' bi gune lue' lawe' da zaj zrále̱'e̱ benne' zaj naque̱' chia' lu xe̱zre nigá.
ACT 18:11 Ca'an guca, begá'ana Pablo tu iza xugachaj lu xe̱zre Corinto, dxusé̱dene̱' benne' ca' dizra' chee̱ Dios.
ACT 18:12 Lu zra ca' gate naca Galión benne' xu'u lu ne̱'e̱ xe̱zr la xu na' naga nababa Acaya, waláz chee̱ Roma, na' benne' judío ca' guledábague̱' Pablo. Beleché̱'e̱ le̱' xu'u lawe',
ACT 18:13 ne gulé̱'e̱ benne' xu'u lu ne̱'e̱ xe̱zr la xu na': ―Benne' nigá dxedé̱' dxegú'u xel-le̱' bénneache chee̱ xelúe lá'ane̱' Dios, ne xelune̱' tu da dxedábaga da nadxixruj bea chee̱ntu'.
ACT 18:14 Pablo ba zue̱' guchálaje̱' gate Galión guzre̱' benne' judío ca': ―Chela naca na chee̱ tu da dxuzúa chalá'ala da bdxixruj bea César u chee̱ tu da zrinnaj zren, na' gun na ba xen xenda' ca da dxennale le'e, benne' judío.
ACT 18:15 Lawe' da naca na chee̱ dízra'ze, ne chee̱ la tu benne', ne chee̱ da nadxixruj bea na cheé̱zele, le gucá'ana chawe' na lé'equeze, lawe' da quebe dxaca lazra' neda' guchi'e̱ da dxaca chee̱ da ca'.
ACT 18:16 Nadxa bebéaje̱' benne' ca' lu xu'u lawe' na'.
ACT 18:17 Nadxa xúgute̱ benne' griego gule̱l-le̱' Sóstenes, benne' xíchaje̱ chee̱ xudáudau' chee̱ judío ca', ne belú'e̱ le̱' lau benne' xu'u lu ne̱'e̱ xe̱zr la xu na', le̱' Galión. Galión na' quebe be̱' lazre'e chee̱ da na'.
ACT 18:18 Pablo begá'ane̱' xe̱zre na' xezane' zra. Gudé na' bze̱' biche ljwézredxu ca' dizra', na' guxú'e̱ tu lu da dxedá lawe' nísadau' zéaje̱' naga nababa Siria tu zren nen Priscila ne Aquilo. Lu xe̱zre Cencrea nédxudxa gate za chu'e̱ lu da dxedá lawe' nísadau', Pablo bzuate̱' xídeze xíchaje̱', da dxunna bea na zua tu da nache̱be lazre̱' gune̱' lau Dios.
ACT 18:19 Gate belezrine̱' lu xe̱zre Efeso, Pablo bsane̱' Priscila ne Aquilo, na' guxíaje̱' lu xudáudau' chee̱ judío ca', ne bchálajle̱ne̱' judío ca' zaj nazrague̱' na'.
ACT 18:20 Benne' ca' gulata' xuene̱' le̱' xegá'anadxe̱' xetú chi'i, na' le̱' quebe guca lazre̱'.
ACT 18:21 Nadxa Pablo bze̱' benne' ca' dizra', dxenné̱': ―Dxun na ba xen xezrina' sua' Jerusalén chee̱ súaqueza' lu laní da ba za'. Welá'aqueza' xedajnná'a le'e che gunna Dios lataj. Na' guxú'e̱ lu da dxedá lawe' nísadau', ne bezé̱'e̱ Efeso na'.
ACT 18:22 Gate bezrine̱' xe̱zre Cesarea, Pablo guxíaje̱' Jerusalén xeajape̱' diuzre benne' ca' dxeléajle̱'e̱ chee̱ Jesús, na' gudé na' guxíaje̱' xe̱zre Antioquía.
ACT 18:23 Ca gudé guzúe̱' na' tu chi'i, na' bezé̱'e̱ na', gudée̱' tu tu xé̱zredu ca' zaj nababa Galacia, ne xe̱zre ca' zaj nababa Frigia, dxutipe̱' lazre' benne' ca' dxeléajle̱'e̱ chee̱ Jesús.
ACT 18:24 Ca lu zra ca' tu benne' judío le̱' Apolos bzrine̱' lu xe̱zre Efeso, naque̱' benne' xe̱zre Alejandría, lu xu Egipto. Naque̱' tu benne' nupá'ale̱'e̱ xrtizre̱', ne núnbeale̱'e̱ da naxúaj na lu xiche chee̱ Dios.
ACT 18:25 Naxéajni'ile̱'e̱ne̱' ca naca chee̱ Xránadxu, ne dute̱ lázrdawe̱' dxuchálaje̱', dxusé̱dene̱' cáte̱ze naca chee̱ Jesús, lácala dxusé̱dezene̱' xel-la' dxuchúa nisa ca be̱n Juan.
ACT 18:26 Apolos guzú lawe̱' dxusé̱dene̱' benne' ca' zaj zre̱'e̱ xudáudau' chee̱ judío ca' du lazre̱'. Gate belén Priscila, ne Aquilo chee̱', na' guleché̱'e̱ le̱' chalá'ala, ne buluzéajni'idxene̱' le̱' cáte̱ze naca dizra' chee̱ Dios.
ACT 18:27 Ca gudé na', gate guca lazre' Apolos chéaje̱' naga nababa Acaya, bi bíchedxu ca' bulutipe̱' lazre̱', ne buluzuaje̱' tu xiche chee̱ benne' ca' dxeléajle̱'e̱ chee̱ Jesús zaj zre̱'e̱ xe̱zre ca' zaj nababa Acaya na' chee̱ xelezí' lu ne̱'e̱ Apolos na'. Gate bzrin le̱' naga nababa Acaya, gúcale̱le̱'e̱ne̱' benne' ca', na' Dios be̱'e̱ le̱' lataj guléajle̱'e̱ chee̱ Jesús.
ACT 18:28 Apolos blé'ene̱' lau xúgute̱ benne' ca' ca dxeleque zréaje benne' judío ca', ne blé'ene̱' ne̱ chee̱ da naxúaj na lu xiche chee̱ Dios Jesús naque' Cristo, Bénnea' nasel-la Dios, Bénnea' dxelebeza judío ca'.
ACT 19:1 Dxácate̱ zua Apolos lu xe̱zre Corinto, na' gudé Pablo xé̱zredu ca' zaj dxe' laduj xi'a ca', na' bzrine̱' lu xe̱zre Efeso naga xeajxraque̱' bal-la benne' dxeléajle̱'e̱ chee̱ Jesús.
ACT 19:2 Na' bche̱be̱' benne' ca': ―¿Guzi'le le'e Be' Lá'azxa gate guxéajle̱le? Belexeche̱be̱': ―Ne quebe xénentu' che zua Be' Lá'azxa.
ACT 19:3 Nadxa Pablo bche̱be̱' benne' ca': ―¿Bi xel-la' dxedxúa nisa guzi'le le'e? Benne' ca' belexeche̱be̱': ―Xela dxuchúa nisa ca be̱n Juan.
ACT 19:4 Na' gunná Pablo, guzre̱' benne' ca': ―Awe', Juan bchue̱' nisa benne' ca' belexebí'i lazre̱', san guzre̱' benne' ca' dxal-la' xeléajle̱'e̱ chee̱ Bénnea' xide̱' ca te chee̱ le̱', da zéaje̱ na, chee̱ Jesús, Bénnea' naque̱' Cristo, nasel-la Dios.
ACT 19:5 Gate belenne̱' da nigá, na' beledxúe̱' nisa lu La Xránadxu Jesús.
ACT 19:6 Gate bze̱ na' Pablo benne' ca', na' guzúale̱ Be' Lá'azxa le̱', na' gulenné̱' dizra' chee̱ benne' zitu' da quebe buluse̱de̱', ne buluchálaje̱' waláz chee̱ Dios.
ACT 19:7 Benne' caní zaj naca chazrínnue̱'.
ACT 19:8 Lawe' chunna beu' dxeaj Pablo lu xu'u ca' naga buluzraga judío ca' naga bchálajle̱ne̱' benne' ca' dizra' chee̱ Dios, ne blé'ene̱' benne' ca' naca da li da dxuchálaje̱' ca naca xel-la' dxenná bea chee̱ Dios.
ACT 19:9 Bal-le̱' belún zide' lázrdawe̱', ne quebe gulaca lazre̱' xeléajle̱'e̱ chee̱ Jesús, na' gulenné̱' schanni' chee̱ dizra' chawe' ca naca chee̱ Jesús láwela benne' ca'. Nadxa Pablo bezé̱'e̱ naga zaj zra' benne' ca', ne guché̱'e̱ benne' ca' dxeléajle̱'e̱ chee̱ Jesús lu xu'u ga dxuse̱de tu benne' le̱' Tiranno, na' lu xu'u na' bchálajle̱ne̱' benne' ca' tu zra tu zra.
ACT 19:10 Ca' be̱ne̱' lawe' chupa iza, na' ca'an guca xúgute̱ benne' zaj zre̱'e̱ xe̱zre ca' zaj nababa Asia belenne̱' dizra' chee̱ Xránadxu Jesús, benne' judío ca', ne benne' quebe zaj naque̱' judío.
ACT 19:11 Dios be̱ne̱' xel-la' waca zri'a ca' lu na' Pablo lu zra ca'.
ACT 19:12 Ca'an guca, gulequé̱'e̱ ladxe' ca' da dxuchéaj xichaj Pablo, ne ladxe' ca' da bde̱'e̱ lachu'e̱, na' belú'e̱ na naga zaj de̱ benne' we̱' ca', na' benne' caní belexexaque̱' ca naca xízrawe̱' da zaj nape̱', na' be' xriwe̱' ca' belexedxúaj na lu be̱l-la' dxen chee̱ benne' ca'.
ACT 19:13 Bal-la benne' judío ca', benne' dxeledé̱' dxelexebéaje̱' be' xriwe̱' ca' lu xichaj lázxdau benne' ca', gulaca lazre̱' xuluchínene̱' La Xránadxu Jesús chee̱ xelexebéaje̱' na, na' gulé̱'e̱ be' xriwe̱' ca': ―Dxenná bé'entu' le'e xedxúajle lu xichaj lázxdau benne' nigá lu La Jesucristo, Bénnea' dxuchalaj Pablo chee̱'.
ACT 19:14 Caní belún gazre benne' zaj naque̱' zri'ine tu benne' judío le̱' Esceva, naque̱' tu benne' xíchaje̱ chee̱ bxruze ca'.
ACT 19:15 Gate belune̱' caní, be' xriwe̱' na' beche̱be na chee̱': ―Núnbe'a Jesús, ne nezda' nua' Pablo, san le'e, ¿nuzra le'e?
ACT 19:16 Gate gunná na da nigá, na' benne' biu na' xu'e̱ be' xriwe̱' na', guxritie̱' guzría che̱'e̱ benne' ca', na' dute̱ xel-la' wal-la chee̱' bucule̱' xúgute̱ benne' ca', na' bé̱'le̱'e̱ benne' ca' cadxa buluzrúnnuje̱' lu xu'u na' gala' xídeze, ne dxelaque̱' dxen.
ACT 19:17 Xúgute̱ benne' zaj zre̱'e̱ xe̱zre Efeso, benne' judío ca', ne benne' quebe zaj naque̱' judío, belenne̱' ca guca da nigá, na' chee̱ le̱ na' belezrébele̱'e̱, ne bulucá'ana szrene̱' La Xránadxu Jesús.
ACT 19:18 Cá'anqueze benne' zan láwela benne' ca' dxeléajle̱'e̱ chee̱ Jesús belelé̱'e̱ dxelexrúale̱pe̱' da cale̱la da belune̱',
ACT 19:19 na' benne' zan, benne' belúne̱' xel-la' wazrá', zaj nu'e̱ xiche chee̱ wazrá', na' buluzezxe̱' na lau xúgute̱ benne' ca'. Gate bululabe̱' ca gulezaca xiche ca', na' gulenézene̱' gulezaca na ca gazxu gaxúa cue' tu gaxúa dumí plata.
ACT 19:20 Ca'an guca, guxíaj bzriluj dizra' chee̱ Xránadxu, ne ble'e na xel-la' waca chee̱ na.
ACT 19:21 Gudé na' Pablo guca lazre̱' tée̱' xé̱zredu ca' zaj nababa Macedonia, ne Acaya, na' te na' chéaje̱' xe̱zre Jerusalén. Gunné̱' ca te chéaje̱' Jerusalén, na' dxal-la' cheajte̱' xe̱zre Roma.
ACT 19:22 Nadxa gusel-le̱' chupa benne' dxelácale̱ le̱', Timoteo ne Erasto, naga nababa Macedonia, dxácate̱ begá'ana le̱' xetú chi'i naga nababa Asia.
ACT 19:23 Ca lu zra na' benne' zan guledábague̱' dizra' chawe' ca naca chee̱ Jesús,
ACT 19:24 da na' guca na ne̱ chee̱ tu benne' le̱' Demetrio, benne' gubizre plata. Benne' nigá dxune̱' níchudu ca' da zaj naca plata ca xudau' chee̱ dios nu'ula le̱' Diana, na' benne' ca' dxelúnle̱ne̱' le̱' zrin nigá dxelezí'le̱'e̱ dumí.
ACT 19:25 Demetrio na' bchague̱' benne' caní tu zren nen xezica benne' dxelune̱' zrin caní, na' guzre̱' benne' ca': ―Le'e, benne', nézquezle lu zrin nigá dxaca chee̱dxu da cháwele̱'e̱,
ACT 19:26 na' ca dxelé'equezle le'e ne dxenle, Pablo nigá dxedé̱' dxenné̱' dios ca' da zaj nun bénneache quebe zaj naca na dios, na' caní ba bsé̱dene̱' benne' zan, quegá Efeso nigáze, san du ca nababa Asia.
ACT 19:27 Da nigá nácale̱'e̱ na ste̱be chee̱dxu, lawe' da ca naca zrin chee̱dxu nigá nazruzre cuía xi na, ne la gaze xudau' chee̱ dios nu'ula Diana nazruzre nite xel-la' nuzé̱ chee̱ na, na' caní xegá'ana ditaj ca naca xel-la' szren chee̱ dios nu'ula, bénnea' dxelúe lá'ana ca naca benne' zaj zre̱'e̱ ga nababa Asia, ne du ca naca bénneache zaj zre̱'e̱ xe̱zr la xu.
ACT 19:28 Gate belenne̱' da nigá, na' belezrá'ale̱'e̱ benne' ca', ne gulebezre xe̱'e̱, dxelenné̱': ―¡Ga'ana szren Diana, dios chee̱dxu, benne' Efeso!
ACT 19:29 Na' ca naca benne' zaj zre̱'e̱ xe̱zre na' guleque zréajene̱'. Gule̱le̱' Gayo, ne Aristarco, benne' Macedonia dxeledále̱ne̱' Pablo, na' gulezrube xue̱' benne' caní chale'aj xu'u lawe'.
ACT 19:30 Pablo guca lazre̱' chu'e̱ na' chee̱ guchálajle̱ne̱' benne' ca', san bi bíchedxu ca' quebe gulegú'e̱ le̱' lataj.
ACT 19:31 Cá'anqueze bal-la benne' xu'u lawe' chee̱ xe̱zre ca' zaj nababa Asia gulesel-le̱' benne' xeaje̱zre̱' Pablo quebe dxal-la' chu'e̱ na'.
ACT 19:32 Dxácate̱ na', naga zaj nazraga benne' ca', bal-le̱' gulebezre xe̱'e̱, tu da dxelenné̱', na' xebal-le̱' dxelebezre xe̱'e̱, dxelenné̱' da xula, lawe' da beledxé'ena zraga benne' zan, na' benne' zante̱ quebe zaj nézene̱' bizr chee̱ na' zaj nazrague̱' na'.
ACT 19:33 Nadxa benne' judío ca' buluzúe̱' Alejandro lau benne' ca' chee̱ guzéajni'ine̱' le̱' ca naca da nigá, na' le̱' guchisa ne̱'e̱ chee̱ xelezúa zri benne' ca' lawe' da guca lazre̱' guchálajle̱ne̱' benne' zan ca' da gácale̱ na judío ca'.
ACT 19:34 Gate benne' zan ca' guleque bé'ene̱' naque̱' benne' judío, na' gulebezre xa'a xúgute̱' ca chupa hora, dxelenné̱': ―¡Ga'ana szren Diana, dios chee̱dxu, benne' Efeso!
ACT 19:35 Nadxa benne' dxuzúaje̱' ne̱ chee̱ xe̱zre na', gate ba bzua zrie̱' benne' zan ca', gunné̱': ―Le'e, benne' Efeso. Ca naca bénneache zaj zra' xe̱zr la xu nigá zaj nézene̱' benne' zaj zre̱'e̱ xe̱zre Efeso nigá zaj nabague̱' xuluxúe̱' xudau' chee̱ dios nu'ula Diana, ne bedáu' chee̱' da bexruj na zran xabáa.
ACT 19:36 Quebe nu seque' tábaga' da nigá. Chee̱ le̱ na' le sua zrize, ne quebe bi gunle da quebe ne guxúe xánnele.
ACT 19:37 Benne' caní nache̱'le nigá quebe bi da cale̱la ne xelune̱', ne quebe bi schanni' ne xelenné̱' chee̱ dios nu'ula chee̱le.
ACT 19:38 Che Demetrio, ne benne' ca' dxelune̱' zrin nen le̱' dxelaca lazre̱' xelagu zria chee̱ tu benne', zaj zra' benne' dxuluchi'e̱ da dxaca, ne zaj zua xu'u lawe' ca' naga gaca xelawe̱' zría chee̱ benne' ca'.
ACT 19:39 Na' che le'e bi xetú da nábale, dxal-la' nábale na naga zaj nazraga benne' xu'u lawe' ca dxenná bea da bdxixruj bea César.
ACT 19:40 Na'a zúadxu ste̱be ga gaze nu gagu zria chee̱dxu ca naca da be̱ndxu, xelenné̱' dxedábagadxu xu'u lawe' lawe' da quebe seque' bi xeché̱bedxu che nu gagu zria dxi'u ne̱ chee̱ da guca na'a.
ACT 19:41 Ca gudé gunné̱' da nigá, na' bze̱' benne' zan ca' dizra'.
ACT 20:1 Gate gudé guca da ste̱be na' lu xe̱zre Efeso, na' Pablo btupe̱' benne' ca' dxeléajle̱'e̱ chee̱ Jesús chee̱ guzéajni'ine̱' le̱'. Nadxa bze̱' benne' ca' dizra', ne bnide̱' le̱', na' guzé̱'e̱ zéaje̱' xe̱zre ca' zaj nababa Macedonia.
ACT 20:2 Xeajné̱'e̱ bíchedxu ca' zaj zre̱'e̱ xúgute̱ xé̱zredu ca', ne btípale̱'e̱ lazre' benne' ca' ne̱ chee̱ dizra' da bchálajle̱ne̱' le̱'. Ca gudé na' bezrine̱' naga nababa Grecia.
ACT 20:3 Begá'ane̱' na' chunna beu', na' gudé na' gate ba zuate̱' chu'e̱ tu lu da dxedá lawe' nísadau' chéaje̱' xe̱zre ca' zaj nababa Siria, guque bé'ene̱' ba zaj nun judío ca' ca da xelune̱' chee̱'. Chee̱ le̱ na' gulú'u bi'e̱ xezé̱'e̱ ni'e̱ tée̱' naga nababa Macedonia.
ACT 20:4 Belún le̱' tuze Sópater, benne' xe̱zre Berea, ne Aristarco, ne Segundo, benne' xe̱zre Tesalónica na', ne Gayo, benne' xe̱zre Derbe, ne Timoteo, ne Tíquico, ne Trófimo, benne' ca' chee̱ xe̱zre ca' zaj nababa Asia.
ACT 20:5 Bi bíchedxu caní gulebía lawe̱' launtu', neda', Lucas, ne xezícadxa ljwezre Pablo, na' gulebeze̱' netu' lu xe̱zre Troas.
ACT 20:6 Netu', gate gudé laní gate dxelagu benne' judío xeta xtila da quebe nachixre cua zichaj chee̱ na, guxú'untu' tu lu da dxedá lawe' nísadau', na' beza'ntu' xe̱zre Filipos. Zra gazxu' zra na' xeajzrentu' bi bíchedxu ca' lu xe̱zre Troas, naga guzúantu' gazre zra.
ACT 20:7 Zra nedxu chee̱ da gazre zra bezrágantu' chee̱ gáguntu' da dxusá lázredxu ca guca gate gute Xránadxu, na' Pablo bsé̱dene̱' bi bíchedxu ca'. Be̱n na ba xen xeza'ntu' zra xula, na' chee̱ le̱ na' bchálajqueze Pablo cadxa bzrinte̱ dxe̱la.
ACT 20:8 Nazrágantu' tu xu'u da zua chunna cuía sibe, na' zaj zé̱le̱'e̱ xi' da dxulusení na.
ACT 20:9 Tu bi cuide' zríabe' ga dxu'u lení', na' gate Pablo bsetúnnadxe̱' xrtizre̱', na' guca wásele̱'e̱ bi cuide' na', na' naga xeajchete̱ na, na' dxásete̱be' gubíxrebe' chunna cuía sibe, na' xeajlechise̱'-be' ba nátebe'.
ACT 20:10 Nadxa betaj Pablo, na' gulégüe̱' bequé̱'e̱-be', ne bnide̱'-be'. Nadxa guzre̱' bi bíchedxu ca': ―Quebe zrébele. Nabanbe'.
ACT 20:11 Nadxa Pablo begüéne̱' bezrine̱' chunna cuía sibe na'. Na' bzúzruje̱' xeta xtila gudawe̱', na' bezú lawe̱' dxuchálaje̱' cadxa guxaní'te̱. Zra na' bezé̱'e̱ na'.
ACT 20:12 Nadxa bíchedxu ca' belexeché̱'e̱ bi na' gubíxrebe' ba bexaca banbe', na' xúgute̱' gulezúe̱' lu xel-la' dxelezrén lazre'.
ACT 20:13 Netu' guzría launtu' lau Pablo, na' guxu'untu' lu da dxedá lawe' nísadau', na' bzrintu' xe̱zre Asón naga xezrágantu' Pablo ca ba nun le̱' lawe' da guca lazre̱' zéaje̱' ní'aze̱'.
ACT 20:14 Gate bezrágantu' le̱' lu xe̱zre Asón, na' guxú'e̱ lu da dxedá lawe' nísadau' naga xu'untu', na' guxíajntu' xe̱zre Mitilene.
ACT 20:15 Beza'ntu' na', na' zra xula bedentu' le nna' xe̱zre Quío, na' xetú zra, zra xula bezrintu' lu xe̱zre Samos. Na' guzúantu' xe̱zre Trogilio naga bezí' lázrentu', na' zra xula bzrintu' xe̱zre Mileto.
ACT 20:16 Ca' be̱ntu' chee̱ quebe guzré'te̱cantu' naga nababa Asia. Chee̱ le̱ na' Pablo quebe guca lazre̱' chéaje̱' Efeso lawe' da guca lazre̱' xezrinze̱' lu xe̱zre Jerusalén chee̱ sue̱' na' lu zra Pentecostés che ba guca.
ACT 20:17 Ca zrantu' lu xe̱zre Mileto, Pablo gusel-le̱' tu benne' cheajnné̱' benne' gula ca' dxeléajle̱'e̱ chee̱ Jesús zaj zre̱'e̱ xe̱zre Efeso.
ACT 20:18 Gate belelá' benne' ca', Pablo guzre̱' le̱': ―Le'e nézquezle ca be̱na' neda' xúgute̱ zra ca gudé bla'a ga nababa Asia.
ACT 20:19 Xúgute̱ zra guzúa' láwela le'e dxuna' zrin chee̱ Xránadxu dute̱ xel-la' dxexruj lazre', ne zane' lasa gudxezra', na' gudéa' lu zane' da guzxaca' ca naca da gulaca lazre' benne' judío ca' xelune̱' chia'.
ACT 20:20 Bchálajle̱na' le'e xúgute̱ da naca na xrlátaje, ne bsé̱deda' le'e láwela benne' zan, ne lízrquezle.
ACT 20:21 Benne' zaj naque̱' judío, ne benne' quebe zaj naca judío, gúchequeza' benne' ca' dxal-la' xelexebí'i lazre̱' lau Dios, ne xeléajle̱'e̱ chee̱ Xránadxu Jesucristo.
ACT 20:22 Na'a zexá'a Jerusalén, ca dxenná be'e Be' Lá'azxa neda', ne quebe nezda' bi gaca chia' na'.
ACT 20:23 Tuze da nezda', lu xúgute̱ xe̱zre ca' naga dxedéa', Be' Lá'azxa dxe̱'e̱ neda' dxal-la' chu'a lizre xia, ne tea' zane' xel-la' zi'.
ACT 20:24 Quebe dxebe'a gunne xue chee̱ da nigá, ne quebe bi zaca xel-la' nabán chia', san tuze che gaca chéajle̱na' ca naca da dxuna', ne chee̱ gusexúzrqueza' guna' ca naca da nusebaga Xránadxu Jesús neda', guchálaja' dizra' chawe' ca nazrí'i Dios dxi'u.
ACT 20:25 ’Nézquezda' netule le'e, ba bchálajle̱na' le'e ca dxenná bea Dios, québedxa lé'ele neda'.
ACT 20:26 Chee̱ le̱ na', dxaca lazra' xapa' le'e na'a, quebe nabaga' zria ne̱ chee̱ tule le'e,
ACT 20:27 lawe' da ba bzenda' le'e ca naca da dxaca lazre' Dios gune̱', ne quebe bi bcá'ana' da quebe bzéajni'ida' le'e.
ACT 20:28 Chee̱ le̱ na', le guxúe cuínale, ne le guxúe ca naca benne' ca' nácale tuze, benne' ca' Be' Lá'azxa ba nuzúe̱' le'e ládujla le̱' chee̱ chu'u lu na'le guxuele benne' ca' zaj nazrague̱' chee̱ Xránadxu, benne' ca' naxá'awene̱' nen dxen cheé̱queze̱'.
ACT 20:29 Nezda' gate xezá'a neda' xelelá' bal-la benne' xelaca lazre̱' guzría xi'e̱ benne' zaj nazraga chee̱ Xránadxu ca dxelún becu' xi'a, be̱ snia ca' dxuluzría xiba' zrila' ca'.
ACT 20:30 Ládujla le'e welelá' bal-la benne' xulusé̱dene̱' da we̱n lazre', ne quegá da li, chee̱ chjácale̱ benne' ca' dxeléajle̱'e̱ chee̱ Jesús le̱'.
ACT 20:31 Chee̱ le̱ na', le guxúe cuínale. Le gusá' lázrele ca be̱na' chun iza, te zra ne chizrela quebe bsana' bzéajni'ida' le'e tu tule le'e, ne gudxézretea'.
ACT 20:32 ’Na'a, biche ljwezra', dxuzúa' le'e lu na' Dios, ne lu dizra' chee̱ xel-la' zri'i lazre' chee̱', da napa na xel-la' waca chee̱ gun na le'e benne' chuchu lazre', ne chee̱ guzúa na le'e láwela xúgute̱ benne' ca' ba guleaj Dios cheé̱queze̱'.
ACT 20:33 Quebe guca lazra' neda' si'a chia' dumí ne zra lana nu benne'.
ACT 20:34 Nézquezle le'e ca be̱na', be̱na' zrin nen ni'a ná'queza' chee̱ guta' da guchínneda' neda', ne da gulechinne benne' ca' gulaque̱' neda' tuze.
ACT 20:35 Blé'equezda' le'e, ca'an dxal-la' gunle zrin chee̱ séquele gácale̱le benne' dxelexazrje. Bsa lázrele xrtizra' Xránadxu Jesús, gate gunné̱': “Ba neza zrendxa naca na chee̱ benne' dxunezruj, quézcala chee̱ benne' si' lu ne̱'e̱.”
ACT 20:36 Ca gudé gunná Pablo da nigá, na' bzu zribe̱', ne bchálajle̱ne̱' Dios nen xúgute̱ benne' ca'.
ACT 20:37 Xúgute̱' gulebezre̱', na' bulunide̱', ne bulunupe̱' Pablo.
ACT 20:38 Belexewí'inele̱'e̱ne̱' lawe' da guzre̱' le̱' québedxa xelelé'ene̱' le̱'. Na' xjácale̱ne̱' le̱' naga bexu'e̱ lu da dxedá lawe' nísadau'.
ACT 21:1 Gate beza'ntu' naga zaj zra' bi bíchedxu ca', na' bexú'untu' lu da dxedá lawe' nísadau', na' bexíajteczentu' naga dxe' xe̱zre Cos, na' zra xula gudentu' naga dxe' xe̱zre Rodas, na' gudé na' bzrintu' xe̱zre Pátara.
ACT 21:2 Lu xe̱zre Pátara xeajxrácantu' tu da dxedá lawe' nísadau' da zeaj na naga nababa Fenicia. Na' guxu'untu' lu da dxedá lawe' nísadau' nigá, na' beza'ntu' na'.
ACT 21:3 Gate gudentu' naga dxe' xe̱zr la xu Chipre, blé'entu' na chalá'a xéglala, na' bexíajteczentu', bzrintu' lu xe̱zre ca' zaj nababa Siria. Lu xe̱zre Tiro be̱n na ba xen xuluxulétaje̱' xua' da nua da dxedá lawe' nísadau' na', na' chee̱ le̱ na' bzrintu' na'.
ACT 21:4 Na' bezrágantu' benne' ca' dxeléajle̱'e̱ chee̱ Jesús, benne' zaj zre̱'e̱ xe̱zre Tiro na', na' begá'anantu' nen benne' ca' gazre zra. Benne' caní, lawe' da bzéajni'i Be' Lá'azxa le̱' da gaca, gulé̱'e̱ Pablo quebe dxal-la' chéaje̱' Jerusalén.
ACT 21:5 Gate gudé guca gazre zra ca', na' zua xeza'ntu' na'. Xúgute̱ benne' ca' dxeléajle'e̱ chee̱ Xránadxu, ne zru'ule̱' ca', ne bidu chee̱' ca' gusá'acale̱ne̱' netu' bedxúajte̱ntu' xe̱zre na', na' dxu'a nísadau' na' bzu zríbentu' bchálajle̱ntu' Dios.
ACT 21:6 Nadxa bze̱ ljwézrentu' dizra', ne bnídate̱ ljwézrentu'. Nadxa bexú'untu' lu da dxedá lawe' nísadau', na' bi bíchedxu ca' belexezrine̱' lizre̱'.
ACT 21:7 Beza'ntu' Tiro, gudentu' lu nísadau', ne bzrínte̱ntu' xe̱zre Tolemaida, naga bgápantu' bi bíchedxu ca' diuzre, ne begá'anantu' nen benne' ca' tu zra.
ACT 21:8 Zra xula Pablo, ne netu' zrále̱ntu' le̱' bezá'ntu' na', na' bzrintu' xe̱zre Cesarea. Na' bzrintu' lizre Felipe, benne' dxedá dxuchálaje̱' dizra' chee̱ Dios. Naque̱' tu benne' gazre, benne' ca' buluzúa gubáz ca' xelune̱' zrin chee̱ Jesús. Begá'anantu' nen benne' nigá.
ACT 21:9 Felipe na' zaj zra' tapa zrí'ine̱' nu'ula quebe ne xuluchaga na'abe', ne dxuluchálajbe' waláz chee̱ Dios.
ACT 21:10 Guzúantu' na' zane' zra gate bla' tu benne' le̱' Agabo chee̱ xe̱zre ca' zaj nababa Judea. Naque̱' benne' dxuchálaje̱' waláz chee̱ Dios.
ACT 21:11 Agabo na' bide̱' bedajnné̱'e̱ netu'. Guqué̱'e̱ bazxu dxu'a le̱'e̱ chee̱ Pablo, na' bchéaje̱' na ni'a na' cuine̱', dxenné̱': ―Be' Lá'azxa dxenné̱' judío ca' lu xe̱zre Jerusalén xuluchéaj caní benne' xrane bazxu dxu'a le̱'e̱ nigá, na' xuludée̱' le̱' lu na' benne' zitu' ca'.
ACT 21:12 Gate bentu' netu', ne benne' Cesarea da nigá, na' guta' xuentu' Pablo quebe chéaje̱' Jerusalén.
ACT 21:13 Pablo beche̱be̱': ―¿Bizr chee̱ na' dxebézrele, ne dxuzúale neda' xel-la' dxewí'ine lazre'? Ba zúaqueza', quegá tuze xuluchéaje̱' neda', san la gázqueze zua' chee̱ gatia' lu xe̱zre Jerusalén ne̱ chee̱ Xránadxu Jesús.
ACT 21:14 Gate guque bé'entu' quebe séquentu' guzágantu' Pablo, na' québedxa bi gúzrentu' le̱', dxennantu': ―Gaca ca dxaca lazre' Xránadxu.
ACT 21:15 Gudé na' bsení'antu' chee̱ntu', na' guxíajntu' Jerusalén.
ACT 21:16 Na' gusiá'acale̱ bal-la benne' netu', benne' Cesarea dxeléajle̱'e̱ chee̱ Jesús, na' ládujla benne' ca' zua tu benne' Chipre le̱' Mnasón, zane' iza ba zeaj dxéajle̱'e̱ chee̱ Jesús, na' lizre benne' nigá dxal-la' zrintu' súantu'.
ACT 21:17 Gate bzrintu' Jerusalén, bi bíchedxu ca' belezí' lu ne̱'e̱ netu' dute̱ xel-la' dxelebé.
ACT 21:18 Zra xula Pablo guxíajle̱ne̱' netu' xeajnná'ntu' Jacobo, na' zaj zrá'queze na' xúgute̱ benne' gula ca' dxeléajle̱'e̱ chee̱ Jesús.
ACT 21:19 Pablo bgape̱' le̱' diuzre, na' bzenne̱' benne' ca' tu tu da be̱n Dios lu na' le̱' ládujla benne' quebe zaj naque̱' judío.
ACT 21:20 Gate belenne̱' ca', na' belúe lá'ane̱' Dios. Nadxa gulé̱'e̱ Pablo: ―Chawe' naca na, bi bícha'dau'. Dxelé'equezenu' zane gaxúa benne' judío dxeléajle̱'e̱ chee̱ Jesús, na' xúgute̱' dxelenné̱' dxun na ba xen chéajle̱dxu da bdxixruj bea Moisés.
ACT 21:21 Zaj zra' benne' ba gulé̱'e̱ benne' judío caní lue' dxusé̱denu' xúgute̱ benne' judío zaj zre̱'e̱ zitu' québedxa xelune̱' ca da gunná be'e Moisés, ne quebe xelechugue̱' late' bé̱la'dau' chee̱ be̱l-la' dxen chee̱ bidu biu chee̱' ca', ne quebe chjácale̱ne̱' ca naca da zéajle̱dxu dxi'u dxundxu.
ACT 21:22 ¿Ájala dxal-la' gundxu? Benne' judío caní welezrague̱' gate xelenne̱' ba bla'u.
ACT 21:23 Cháwedxa gunu' da caní: Zaj zra' tapa benne' láwela dxi'u dxal-la' xelune̱' tu da zaj nache̱be lazre̱' lau Dios.
ACT 21:24 Guché̱ benne' caní chjá'acale̱ne̱' lue', ne bca'ana chawe' cuinu' lau Dios nen benne' caní, na' gudizruj ca naca da dxal-la' xelízruje̱' benne' guchibe̱' xicha xichaj benne' caní. Ca'an gaca, xúgute̱ benne' xeleque bé'ene̱' quebe naca da li ca da gulenné̱' chiu', san la gázqueze lue' dxunu' xúgute̱ ca da dxenná da nadxixruj bea na.
ACT 21:25 Ca naca chee̱ benne' ca' quebe zaj naque̱' judío, ba bzúajntu' chee̱' quebe dxun na ba xen xelune̱' da caní, san tuze dxal-la' xulusane̱' da naca chee̱ bedáu' xiaj xaga ca', ne quebe xelawe̱' dxen chee̱ be̱ xixre' ca', ne quebe xelawe̱' be̱la' chee̱ be̱ xixre', be̱ quebe bdxuaj dxen, ne quebe xelune̱' dul-la chee̱ da dxucá'ana sban bénneache.
ACT 21:26 Nadxa Pablo guché̱'e̱ tapa benne' ca', na' zra xula bca'ana chawe' cuine̱' lau Dios nen benne' ca', na' belexú'e̱ lu xudau' chee̱ buluzenne̱' bxruze ca' gate xexuzre zra ca' chee̱ da dxulucá'ana chawe' cuine̱' lau Dios, gate na' tu tue̱' dxal-la' xelegú'e̱ guna'.
ACT 21:27 Gate ba zua xuzre da gazre zra, na' bal-la judío ca', benne' zá'aca xe̱zre ca' zaj nababa Asia, belelé'ene̱' Pablo lu xudau' na', na' buluchague̱' ca naca benne' ca' zaj zre̱'e̱ na', na' gulebía che̱'e̱ Pablo.
ACT 21:28 Dxelenné̱' zizraj: ―Benne' Israel, le gácale̱ netu'. Benne' nigá dxedé̱' gátete̱ze dxusé̱dene̱' xúgute̱ bénneache xuluzúe̱' chalá'ala xe̱zr la xu chee̱dxu, ne da bdxixruj be'e Moisés, ne xudau' nigá, ne ba guzre̱'e̱ lu xudau' nigá bal-la benne' griego. Dxucá'ana dítaje̱' lataj lá'azxa nigá.
ACT 21:29 Caní gulenné̱' lawe' da ba belelé'ene̱' Pablo lu xe̱zre na' nen Trófimo, tu benne' xe̱zre Efeso, na' dxeléquene̱' gulú'u Pablo le̱' lu xudau'.
ACT 21:30 Ca naca benne' zaj zre̱'e̱ xe̱zre na' beledxé'ena zrague̱', ne zá'aca chégüe̱'. Nadxa gule̱l-le̱' Pablo, ne gulezrube xue̱' le̱' chale'aj xudau' na', na' bulusézxuje̱' dxa xu'u chee̱ na.
ACT 21:31 Ba zuate̱ xelútie̱' Pablo gate benne' Roma dxenná be'e̱ lu wedil-la benne̱' ba dxeledxé'ena zraga ca naca benne' zaj zre̱'e̱ xe̱zre Jerusalén.
ACT 21:32 Nadxa benne' nigá bchague̱' benne' dxjaque̱' wedil-la nen benne' dxenná bé'ene̱' le̱', na' xjaca chégüe̱' naga zaj nazraga benne' zan ca'. Gate benne' ca' belelé'ene̱' benne' na' dxenná be'e̱ lu wedil-la, na' bulusane̱' québedxa buluzálaje̱' Pablo.
ACT 21:33 Nadxa gubiga' benne' na' dxenná be'e̱ lu wedil-la, na' gude̱l-le̱' Pablo, ne gunná bé'ene̱' xuluchéaje̱' le̱' chupa du xia. Gudé na' bche̱be̱' benne' ca' nua' benne' nigá, ne bi ba be̱ne̱'.
ACT 21:34 Benne' ca' gulebezre xe̱'e̱ da zan da gulenné̱'. Ca'an guca benne' dxenná be'e̱ lu wedil-la quebe bi guxéajni'ine̱' lawe' da dxelúnle̱'e̱ schaga'. Nadxa gunná bé'ene̱' xeleché̱'e̱ Pablo xu'u naga zaj zra' benne' dxjaque̱' wedil-la, benne' zan ca'.
ACT 21:35 Gate belezrine̱' dxa xu'u naga zaj zra' benne' dxjaque̱' wedil-la, na' benne' dxjaque̱' wedil-la belexú'e̱ Pablo lu na'ze̱' lawe' da dxelúele̱'e̱ benne' zan ca' Pablo,
ACT 21:36 na' xúgute̱' zá'aque̱' cuzre na' dxelenné̱' zizraj: ―Gate bénnea'.
ACT 21:37 Gate dxelegú'e̱ Pablo lu xu'u naga zaj zra' benne' dxjaque̱' wedil-la, le̱' guzre̱' benne' na' dxenná bé'ene̱' le̱': ―¿Waca bi nnia'? Na' bche̱be bénnea' le̱': ―¿Waca nneu' dizra' griego?
ACT 21:38 ¿Quebe nacu' lue' benne' Egipto na' ba zeaj tu chupa iza btupe̱' benne' ca' guledábague̱' xu'u lawe', na' guché̱'e̱ tapa gaxúa benne' dxelutie̱' benne', xeajzré̱'e̱ le̱' le̱'e̱ xixre' lawe' lataj?
ACT 21:39 Nadxa Pablo guzre̱' benne' na': ―Neda' naca' benne' judío, ne nababa' tu xe̱zre blau chee̱ ga nababa Cilicia. Be̱n culuén gunu' neda' lataj guchálajle̱na' benne' zan caní.
ACT 21:40 Benne' na' be̱'e̱ le̱' lataj, na' Pablo guzé̱' lachila chee̱ xu'u na', na' guchisa ne̱'e̱ chee̱ xelezúa zri benne' zan ca'. Gate gudxé' zri, na' bchálajle̱ne̱' le̱' dizra' hebreo, dxenné̱':
ACT 22:1 ―Le'e, benne' gula, ne le'e, bi bicha', le xen ca da xapa' le'e da dxexeche̱ba' chee̱le.
ACT 22:2 Gate belenne̱' dxuchálajle̱ Pablo le̱' dizra' hebreo, na' gulezúadxe̱' zrize, na' Pablo guzre̱' le̱':
ACT 22:3 ―Neda' naca' judío. Gúlaja' xe̱zre Tarso naga nababa Cilicia, na' bgula' Jerusalén nigá, na' Gamaliel bsé̱dene̱' neda' cáte̱ze naca da nadxixruj bea na chee̱ xra xrtáudxu ca'. Tu dxue lázrezqueza' dxuna' da naca chee̱ Dios cáte̱ze dxunle le'e na'a.
ACT 22:4 Nédxute̱ gudáu zi' xuzra' benne' ca' dxeléajle̱'e̱ chee̱ Jesús, ne bé̱tequeza' bal-le̱', ne guche̱'a benne' biu, ne nu'ula chee̱, na' bzra'a le̱' lizre xia.
ACT 22:5 Bxruze blau, ne xúgute̱ benne' gula sina waca xelexeché̱bequeze̱' belunne̱' neda' xiche chee̱ bi'a na lau bi bíchedxu judío ca' zaj zre̱'e̱ xe̱zre Damasco. Guxá'a na' xeajxedilja' naga zaj zra' benne' ca' dxeléajle̱'e̱ chee̱ Jesús chee̱ che̱'a benne' ca' Jerusalén nigá, chee̱ xeledée̱' ba xa'.
ACT 22:6 ’Gate zexá'a xu'a neza, ne ba zua zrina' Damasco, ca du wagubizra gúcatite' tu xi' naga zexá'a da za' xabáa.
ACT 22:7 Na' xeajchazia' lu xu, ne benda' chi'i tu benne' guzre̱' neda': “Saulo, Saulo, ¿bizr chee̱ na' nau zi' xuzru' neda'?”
ACT 22:8 Nadxa bche̱ba' le̱': ¿Núzraqueze lue', Xran? Na' guzre̱' neda': “Neda' naca' Jesús, benne' Nazaret, bénnea' nau zi' xuzru' lue'.”
ACT 22:9 Benne' ca' zrále̱ne̱' neda' belelé'ene̱' xi' na', ne belezrebe̱', san quebe belenne̱' chi'i bénnea' gunné̱' neda'.
ACT 22:10 Nadxa gunnéa': ¿Bi dxal-la' guna', Xran? Na' Xránadxu gunné̱': “Guxasa, ne guxíajte̱ze Damasco, ga na' zua benne' xelé̱'e̱ lue' ca da dxal-la' gunu'.”
ACT 22:11 Benne' ca' zjácale̱ne̱' neda' belequé̱'e̱ na'a zeajntu' Damasco lawe' da bca'ana xi' na' neda' la chul-la.
ACT 22:12 ’Zua na' tu benne' le̱' Ananías, benne' dxune̱' du lazre̱' ca naca da bdxixruj be'e Moisés, na' xúgute̱ benne' judío zaj zre̱'e̱ Damasco dxelenné̱' cháwele̱'e̱ ca dxune̱'.
ACT 22:13 Ananías na' ble̱'e̱ naga zua' neda', na' guzre̱' neda': “Bicha' Saulo, na'a xele'enu'.” Lu zra ná'queze belé'ete̱da', ne ble'eda' benne' na'.
ACT 22:14 Nadxa guzre̱' neda': “Dios chee̱ xra xrtáudxu guqué̱'e̱ lue' nédxute̱ chee̱ gúnbe'u ca naca da dxaca lazre' Le̱', ne chee̱ le'enu' Benne' xrlátaje chee̱ Dios, ne xennu' chi'i Bénnea'.
ACT 22:15 Lue' guchálaju' da naca chee̱ Le̱' lau ca naca bénneache zaj zre̱'e̱ lu xe̱zr la xu, ne guzennu' benne' ca' ca naca da blé'enu', ne da bennu'.
ACT 22:16 Na'a, ¿bizr chee̱ na' dxezrenu'? Guxasa, gudxúa nisa, ne bxren lazre' chee̱ Xránu' Dios chee̱ cuee̱' dul-la chiu'.”
ACT 22:17 ’Gate bezrina' Jerusalén, guxá'a lu xudau' xeajchálajle̱na' Dios, na' ble'eda' tu da ble'e Dios neda'.
ACT 22:18 Ble'eda' Xránadxu, na' guzre̱' neda': “Bdxuajche Jerusalén nigá lawe' da quebe xelezí'e̱ ca naca da guchálaju' chia'.”
ACT 22:19 Nadxa gucha' Le̱': Xran, zaj nézquezne̱' guxá'a neda' xúgute̱ xu'u naga dxelezraga judío ca', ne xeajxri'a benne' ca' dxeléajle̱'e̱ chiu', na' bzra'a le̱' lizre xia, ne bzálajqueza' benne' ca',
ACT 22:20 na' gate belútie̱' Esteban, benne' we̱n zrin chiu', na' zé̱queza' neda' naca' tuze nen benne' ca' belútie̱' le̱'.
ACT 22:21 Xránadxu guzre̱' neda': “Guxíaj, lawe' da sel-la' lue' zitu' naga zaj zra' benne' quebe zaj naque̱' judío.”
ACT 22:22 Dizra' caní belenne̱', san lu dizra' nigá gulezú lawe̱' dxelebezre xe̱'e̱, dxelenné̱': ―¡Gate benne' nigá! ¡Québedxa dxal-la' gaca bane̱'!
ACT 22:23 Na' gulebezre xá'aqueze̱', ne buluzale̱' sibe zra lane̱', ne belequé̱'e̱ bxrte xu da buluzale̱' sibe.
ACT 22:24 Chee̱ le̱ na' benne' na' dxenná be'e̱ lu wedil-la gunná bé'ene̱' xelegú'e̱ Pablo lu xu'ula, ne xelu'e̱ le̱' chee̱ nne̱' da li, bizr chee̱ na' gulebezre xa'a benne' zan ca' chee̱ le̱'.
ACT 22:25 Gate bexuzre buluchéaje̱' na' Pablo, chee̱ xelu'e̱ le̱', Pablo guzre̱' tu benne' dxeaje̱' wedil-la zue̱' na': ―¿Naca chee̱le le'e güele tu benne' nababe̱' Roma, ne quebe ne guchí'ale aja naca chee̱'?
ACT 22:26 Gate ben benne' dxeaje̱' wedil-la da nigá, na' guxíaje̱' xeaje̱zre̱' benne' dxenná be'e̱ lu wedil-la: ―Guxúe xánniu' bi na' gunu', lawe' da nababa Roma benne' nigá.
ACT 22:27 Nadxa benne' nigá gubigue̱' naga ze̱ Pablo, na' bche̱be̱' le̱': ―¿Da li na' nababu' Roma? Pablo beche̱be̱': ―Awe'.
ACT 22:28 Na' benne' dxenná be'e̱ lu wedil-la gunné̱': ―Neda' da zrente̱ gudízruja' chee̱ gubaba' Roma. Na' Pablo gunné̱': ―Neda' nabábaqueza' Roma gate gúlajtea'.
ACT 22:29 Gate belenne̱' da nigá, na' benne' ca' ba zaj ze̱' xelu'e̱ Pablo belexecuase̱' cuita le̱', na' la gaze benne' na' dxenná be'e̱ lu wedil-la, gate guque bé'ene̱' nababa Pablo Roma, bzrebe̱' lawe' da nuchéaje̱' le̱ du xia.
ACT 22:30 Zra xula, benne' na' dxenná be'e̱ lu wedil-la guca lazre̱' nézene̱' bi chee̱ na' dxelagu zria judío ca' Pablo, na' bequé̱'e̱ du xia na' nadxéaj na na' Pablo, na' gunná bé'ene̱' xelezraga benne' xíchaje̱ ca' chee̱ bxruze, ne xúgute̱ benne' xu'u lawe' blau. Nadxa guléaje̱' Pablo, na' bze̱' le̱' lau benne' ca'.
ACT 23:1 Pablo gunné̱'e̱ benne' xu'u lawe' blau ca', na' guzre̱' le̱': ―Le'e, bi bicha', ca naca xúgute̱ da ba be̱na' neda', zua zri xichaj lázrdawa' lau Dios.
ACT 23:2 Nadxa Ananías, bxruze blau, gunná bé'ene̱' benne' zaj ze̱' na' xelegape̱' dxu'a Pablo.
ACT 23:3 Na' Pablo beche̱be̱': ―Dios güe̱'e̱ lue', benne' dxun láweze da xrlátaje. Dxe'u na' chee̱ guchi'u chia' neda' ca dxenná bea da nadxixruj bea Dios. ¿Bizr chee̱ na' dxunu' da dxedábaga da bdxixruje̱', dxenná be'enu' xelu'e̱ neda'?
ACT 23:4 Benne' ca' zaj zre̱'e̱ na' gulé̱'e̱ Pablo: ―¿Caní schanni' dxennáu' chee̱ bxruze blau chee̱ Dios?
ACT 23:5 Pablo gunné̱': ―Le'e, bi bicha', quebe gunezda' che benne' nigá naque̱' bxruze blau lawe' da dxenná lu xiche chee̱ Dios: Quebe nneu' schanni' chee̱ benne' dxenná be'e̱ lázriu'.
ACT 23:6 Nadxa guque bé'ene̱' Pablo bal-le̱' benne' xu'u lawe' zaj naque̱' benne' saduceo ca', na' xebal-le̱' zaj naque̱' benne' fariseo ca', na' gunné̱' zizraj: ―Le'e, bi bicha', neda' naca' fariseo, ne xrtia' zaj naue̱' fariseo ca', na' dxuchí'ale ca naca chia' lawe' da dxebeza lazra' xelexebán benne' gate.
ACT 23:7 Gate gunná Pablo da nigá, na' benne' fariseo ca', ne benne' saduceo ca' gulezú lawe̱' dxulutil-la ljwezre̱' dizra', na' gulaca chupa la'a ca naca benne' ca'.
ACT 23:8 Ca'an guca lawe' da dxelenná saduceo ca' quebe xelexebán benne' gate, ne quebe nu chilá' gubáz chee̱ xabáa ca', ne quebe nu chilá' bénne'du xu'u bénneache, san benne' fariseo ca' dxeléajle̱'e̱ dxata' xúgute̱ da ca'.
ACT 23:9 Xúgute̱' gulebezre xe̱'e̱, na' gulezé̱ bal-la benne' dxuluxuzájle̱'e̱ da nadxixruj bea na, benne' zaj naque̱' fariseo, na' gulenné̱': ―Benne' nigá quebe bi da cale̱la ne gune̱'. Che nu bénnedu xu'u bénneache, u tu gubáz chee̱ xabáa ba gunné̱' le̱', quebe dxal-la' nne̱dxu chee̱ Dios.
ACT 23:10 Na' bulutíl-lale̱'e̱ ljwezre̱' dizra', na' benne' na' dxenná be'e̱ lu wedil-la bzrebe̱' xele̱l-le̱' Pablo xuluzúzruje̱' le̱'. Chee̱ le̱ na' gunná bé'ene̱' benne' dxjaca wedil-la xelexebéaje̱' le̱' láwela benne' ca', ne xelexeché'e̱ le̱' lu xu'u na' naga zaj zra' benne' dxjaque̱' wedil-la.
ACT 23:11 Xe̱la xula, Xránadxu ble'e lawe̱' Pablo, na' guzre̱' le̱': ―Be̱n dipa lazru', Pablo, lawe' da ca bchálajquezu' chia' Jerusalén nigá, ca'an dxál-la'queze guchálaju' chia' lu xe̱zre Roma.
ACT 23:12 Zra xula bal-la benne' judío ca' belune̱' tuze dizra' xelútie̱' Pablo. Gulenné̱': ―Dios cu'e̱ dxi'u de' che bi xi'aj gágudxu, ne quebe ne gútedxu Pablo.
ACT 23:13 Nadé chua benne' biu ca' zaj nache̱be lazre̱' xelune̱' da nigá.
ACT 23:14 Benne' caní xjaque̱' lau benne' xíchaje̱ ca' chee̱ bxruze ca', ne benne' gula sina ca', na' gulenné̱': ―Netu' ba guche̱be lázrentu' lau Dios cu'e̱ netu' de' che bi gáguntu', ne quebe ne gútentu' Pablo.
ACT 23:15 Na'a, le'e, ne xezícadxa benne' xu'u lawe' blau ca' dxal-la' nábale benne' dxenná be'e̱ lu wedil-la xedajlegüe̱'e̱ Pablo wxre zila laule le'e, xe̱le bénnea' dxaca lázrele guché̱be xánnele Pablo, na' netu' se̱ cuásantu' gútentu' le̱' québela ne xide̱' nigá.
ACT 23:16 Zri'ine bi zan Pablo benbe' ca naca da nigá, na' guxíajbe' naga zua Pablo cheajé̱zrebe' le̱'.
ACT 23:17 Nadxa Pablo gunné̱' tu benne' xu'u lu ne̱'e̱ benne' ca' dxjaque̱' wedil-la, na' guzre̱' le̱': ―Guché̱' bi cuide' nigá lau benne' xíchaje̱ chiu' lawe' da de̱ da dxal-la' xe̱be' le̱'.
ACT 23:18 Na' benne' na' xu'u lu ne̱'e̱ benne' ca' dxjaque̱' wedil-la guché̱'e̱-be' lau xrane̱', na' guzre̱' le̱': ―Pablo, bénnea' nadxéaje̱' gunné̱' neda', na' gunabe̱' xedajgu'a bi cuide' nigá naga zu' lawe' da de̱ da dxal-la' xe̱be' lue'.
ACT 23:19 Benne' xíchaje̱ na' guqué̱'e̱ na' bi cuide' na', na' guché̱'e̱-be' chalá'ala, ne bche̱be̱'-be': ―¿Bi dxaca lazru' xu'u neda'?
ACT 23:20 Na' gunná bi cuide' na', gúzrebe' le̱': ―Benne' judío ca' ba zaj nune̱' tuze dizra' xelenabe̱' lue' che̱'u Pablo wxre zila lau benne' xu'u lawe' blau ca', xelenné̱' dxelaca lazre̱' xuluche̱be xánnie̱' le̱'.
ACT 23:21 Quebe chéajle̱'u chee̱ benne' ca' lawe' da nadé chua benne' ca' xelebeze̱' le̱' bagácheze, ne ba guleche̱be lazre̱' lau Dios Le̱' cu'e̱ benne' ca' de' che bi xele'aj xelawe̱', ne quebe ne xelútie̱' Pablo. Na'a ba zaj zue̱' dxelebeze̱' xrtizru'.
ACT 23:22 Nadxa benne' xíchaje̱ na' bze̱' bi cuide' na' dizra', na' guzre̱'-be' quebe nu xe̱be' ba xeajé̱zrebe' le̱' caní.
ACT 23:23 Benne' xíchaje̱ na' gunné̱' chupa benne' chee̱', benne' xu'u lu ne̱'e̱ benne' ca' dxjaque̱' wedil-la, na' gunná bé'ene̱' le̱' xulucueze̱' chupa gaxúa benne' dxjaque̱' wedil-la, benne' sa'aca ni'e̱, ne ga xun chi benne' dxjaque̱' wedil-la, benne' xelebía bzrina', ne chupa gaxúa benne' dxjaque̱' wedil-la, benne' xelu'e̱ xia tunna, chee̱ chjaque̱' lu xe̱zre Cesarea dxedá' ga chizrela.
ACT 23:24 La gázqueze gunná bé'ene̱' xulucueze̱' bzrina' cuía Pablo, ne gunná bé'ene̱' xeleché̱'e̱ le̱' cháwedau' lau Félix, benne' xu'u lu ne̱'e̱ xe̱zr la xu na' waláz chee̱ Roma.
ACT 23:25 Gusel-le̱' tu xiche da belúa benne' dxjaque̱' wedil-la. Caní naxúaj na:
ACT 23:26 Neda' Claudio, dxugapa' lue' diuzre Félix, benne' xu'u lu na'u xe̱zr la xu nigá.
ACT 23:27 Benne' judío ca' gule̱l-le̱' benne' nigá ná'tega na'a chee̱ xelútie̱' le̱'. Gate gunezda' neda' nababe̱' Roma, na' guxíajle̱na' benne' chia' ca', benne' dxjaque̱' wedil-la, xeajselá' le̱'.
ACT 23:28 Guca lazra' nezda' bi dxelagu zria le̱', na' guche̱'a le̱' lau benne' xu'u lawe' ca' chee̱ judío ca'.
ACT 23:29 Na' gunezda' dxelagu zria le̱' da naca chee̱ da nadxixruj bea chee̱ judío ca', san quebe naca na chee̱ xelútie̱' le̱', ne chee̱ chu'e̱ lizre xia.
ACT 23:30 Gate benda' ca ba zaj nun judío ca' chee̱ xelútie̱' le̱', na' dxusel-la' le̱' naga zu', ne ba gucha' benne' ca' dxelagu zria le̱' waca xelawe̱' le̱' zria lau lue'. Gaca xrlátaje chiu'.
ACT 23:31 Nadxa benne' dxjaque̱' wedil-la belune̱' ca gunná be'e benne' xíchaje̱ chee̱', na' beleché̱'e̱ Pablo chizrela, na' belezrine̱' xe̱zre Antípatris.
ACT 23:32 Zra xula benne' dxjaca wedil-la, benne' ca' dxeledá' ní'aze, belexezrine̱' Jerusalén, na' benne' dxjaque̱' wedil-la zaj zrie̱' bzrina' beleché̱'e̱ Pablo naga dxal-la' zrine̱'.
ACT 23:33 Gate belezrine̱' xe̱zre Cesarea, na' bulunézruje̱' benne' xu'u lu ne̱'e̱ xe̱zr la xu na' xiche na', ne buludée̱' Pablo lu ne̱'e̱.
ACT 23:34 Ca bexuzre blabe̱' xiche na', na' benne' xu'u lu ne̱'e̱ xe̱zr la xu na' bche̱be̱' ga benne' Pablo. Gate benne̱' naque̱' benne' chee̱ xe̱zre nababa Cilicia,
ACT 23:35 na' guzre̱' le̱': ―Guchi'a chee̱ da dxaca chiu' gate xelelá' benne' ca' dxelagu zria lue'. Nadxa gunná bé'ene̱' cha benne' dxjaca wedil-la xuluxúe̱' Pablo naga zua xu'u lawe' chee̱ Herodes.
ACT 24:1 Ca gudé gazxu' zra, Ananías, bxruze blau, bzrine̱' xe̱zre Cesarea nen bal-la benne' gula sina ca', ne tu benne' dxenné̱' waláz chee̱ benne' ca', le̱' Tértulo. Benne' caní belezrine̱' lau benne' xu'u lu ne̱'e̱ xe̱zr la xu na' chee̱ xelagu zria Pablo.
ACT 24:2 Gate xeajlexrí'e̱ Pablo, na' guzú lau Tértulo dxawe̱' xria Pablo, dxe̱'e̱ Félix: ―Xcalenu' lue', benne' xu'u lu na'u xe̱zr la xu nigá, lawe' da zúantu' xel-la' dxebeza zri lazre', na' da chawe' dxgua dxaca na chee̱ntu', na' ca dxenná be'enu' netu' lu xel-la' sina chiu' dxexedxúaj na chawe'.
ACT 24:3 Xúgute̱ da nigá dxezí'queze lu na'ntu' gátete̱ze na', ne dxe̱ntu' lue' xcalén cuinu', Félix.
ACT 24:4 Chee̱ québedxa guntu' lue' zé̱dete̱, dxata' xueda' lue' gun zren lazru' xennu' chee̱ntu' tu chí'idau'.
ACT 24:5 Dxenná'antu' benne' nigá dxúnle̱'e̱ da cale̱la, ne gátete̱ze na' lu xe̱zr la xu nigá dxune̱' benne' judío chupa la'a, ne naque̱' benne' xíchaje̱ chee̱ benne' ca' zaj da' tu benne' Nazaret.
ACT 24:6 Benne' nigá guca lazre̱' guzúe̱' chalá'ala xudau' chee̱ntu', na' netu' gudé̱l-lantu' le̱', ne guca lázrentu' guchí'antu' da naca chee̱' ca nadxixruj bea na chee̱ntu'.
ACT 24:7 Na' Lisias, benne' dxenná be'e̱ lu wedil-la, bequé̱'e̱ le̱' lu na'ntu' xadía.
ACT 24:8 Na' gunné̱' che zaj zra benne' xelagu zrie̱' Le̱', dxal-la' xelelé̱'e̱ lau lue'. Lue' gaca guche̱bu' benne' nigá, na' nézenu' naca da li zria dxáguntu' le̱'.
ACT 24:9 Benne' judío ca' zaj zre̱'e̱ na' gulenné̱' naca da li xúgute̱ da ca'.
ACT 24:10 Nadxa benne' xu'u lu ne̱'e̱ xe̱zr la xu na' guchisa ne̱'e̱ chee̱ guchalaj Pablo, na' gunná Pablo: ―Dxebéle̱'e̱da' dxunu' neda' lataj xeche̱ba' lau lue', lawe' da nezda' naca xrlátaje ca dxuchi'u da dxaca chee̱ xe̱zr la xu chee̱ntu' ba zeaj zane' iza.
ACT 24:11 Lué'queze waca chéajni'inu' ba zeaj chazrinnu zraze bla'a Jerusalén chee̱ güe lá'ana' Dios.
ACT 24:12 Quebe belelé'ene̱' neda' nu gutil-la' dizra', ne quebe nu benne' guché'ena' zraga lu xudau' blau, ne lu xezícala xu'u ca', ne lu neza ca' chee̱ xe̱zre na'.
ACT 24:13 Benne' caní quebe xelezéquene̱' xululé'ene̱' naca da li ca zaj naca da dxelawe̱' neda' zria.
ACT 24:14 Tu da dxexeche̱ba', dxucá'ana szrena' Dios chee̱ xra xrtáudxu ca', dxuna' ca da dxelenná benne' caní naca na da we̱n lazre', lawe' da dxéajle̱'a xúgute̱ da naxúaj na lu xiche chee̱ da nadxixruj bea na, ne chee̱ benne' ca' buluchálaje̱' waláz chee̱ Dios.
ACT 24:15 Neda' dxebeza lázrqueza' ca da gun Dios, ca dxelebeza lazre' benne' caní, dxebeza lázrentu' Dios gusebane̱' benne' gate ca', benne' xrlátaje, ne benne' ca' dxelune̱' da cale̱la.
ACT 24:16 Chee̱ le̱ na' dxue lazra' sua zri xichaj lázrdawa' lau Dios, ne lau bénneache ca'.
ACT 24:17 ’Ca gudé gudá' xe̱zre xula ca' zane' iza, na' bezrina' lazria' chee̱ gunézruja' da gácale̱ na benne' xache' ca', ne cu'a guna' lau Dios.
ACT 24:18 Da nigá dxuna' neda' gate bal-la benne' judío chee̱ xe̱zre ca' zaj nababa Asia belexezrague̱' neda' lu xudau' ca gudé bca'ana chawe' cuina' cáte̱ze naca da zéajle̱ntu', san quebe nu benne' bchaga', ne quebe nu benne' guché'ena' zraga.
ACT 24:19 Benne' caní dxal-la' xelelé̱'e̱ nigá chee̱ xelawe̱' neda' zria che bi zua dxelaca chee̱' nen neda',
ACT 24:20 san che quebe bi de̱, na' benne' caní zaj zre̱'e̱ nigá dxal-la' xelenné̱' che bi belezrélene̱' da dxebaga' gate zua' lau benne' xu'u lawe' blau ca' chee̱ judío ca'.
ACT 24:21 Tuze da be̱na' gate zua' lau benne' ca', gunnéa' zizraj: Na'a dxuchí'ale chia' lawe' da dxeajlí lazra' xelexebán benne' gate.
ACT 24:22 Gate Félix benne̱' da nigá, na' bca'ane̱' na cá'aze lawe' da neze xanne' le̱' ca naca chee̱ benne' ca' dxeléajle̱'e̱ chee̱ Jesús, na' guzre̱' benne' ca': ―Gate xida Lisias, benne' dxenná be'e̱ lu wedil-la, na' chéajni'idxeda' chee̱ da nigá dxaca chee̱le.
ACT 24:23 Nadxa Félix gunná bé'ene̱' benne' dxenná be'e̱ lu wedil-la, ne benne' ca' dxenná be'ene̱' xelexegu'e̱ Pablo lu xu'u lawe' na', na' xelu'e̱ le̱' lataj bi gune̱', ne xelu'e̱ lataj benne' ljwezre Pablo cheajlenné̱'e̱ le̱', ne bi xelune̱' chee̱'.
ACT 24:24 Gudé tu chupa zra Félix belé̱'e̱ xetú nen zru'ule̱' Drusila, nu'ula judío, na' gunná bé'ene̱' bzrin Pablo chee̱ guchálajle̱ne̱' le̱' ca naca xel-la' dxeajlí lazre' chee̱' chee̱ Jesucristo.
ACT 24:25 Gate Pablo bchálajle̱ne̱' le̱' ca dxal-la' gundxu da xrlátaje, ne nna be'e cuínadxu, na' zrin zra guchi'a Dios chee̱dxu gate cheajsé̱ chee̱ xe̱zr la xu, na' bzrebe Félix, ne guzre̱' Pablo: ―Bexíaj na'a. Gate nalátaja', na' nné̱queza' lue'.
ACT 24:26 La gaze dxaca lazre' Félix gunezruj Pablo le̱' dumí chee̱ gusane̱' le̱'. Chee̱ le̱ na' gunné̱le̱'e̱ Pablo chee̱ guchálajle̱ne̱' le̱'.
ACT 24:27 Ca' guca, gudé chupa iza, na' Félix bedxúaje̱' xrlátaje̱' ga xu'u lu ne̱'e̱ xe̱zr la xu na', na' bedé tu benne' le̱' Porcio Festo waláz chee̱ Félix. Félix bca'ane̱' Pablo lizre xia lawe' da guca lazre̱' xegá'ane̱' chawe' lau judío ca'.
ACT 25:1 Nadxa Festo bzrine̱' xe̱zre Cesarea chee̱ si' lu ne̱'e̱ gaque̱' benne' xu'u lu ne̱'e̱ xe̱zr la xu na', na' gate guca chunna zra, guxíaje̱' Jerusalén.
ACT 25:2 Lu xe̱zre na' belezrín benne' xíchaje̱ ca' chee̱ bxruze ca', ne benne' judío blau ca' lau le̱', ne gulawe̱' zria Pablo.
ACT 25:3 Gulata' xuene̱' benne' xu'u lu ne̱'e̱ xe̱zr la xu na' sel-le̱' benne' cheajlexezri'e̱ Pablo chee̱ xezrine̱' Jerusalén. Benne' judío ca' ba zaj nune̱' xelútie̱' Pablo la neza gate zezé̱'e̱ na'.
ACT 25:4 Beche̱be Festo ba xu'u Pablo lizre xia lu xe̱zre Cesarea, na' lé̱queze̱' ba nune̱' chéaje̱' na' xetú chupa zra.
ACT 25:5 Na' guzre̱' benne' ca': ―Benne' ca' zaj zre̱'e̱ láwela le'e, benne' zaj nape̱' xel-la' dxenná bea, dxal-la' chjácale̱ne̱' neda' Cesarea, na' che benne' na' zua bi da cale̱la da be̱ne̱', waca gágule le̱' zria.
ACT 25:6 Festo begá'ane̱' Jerusalén ca du xrunu' ga chi zraze, na' bezrine̱' Cesarea. Zra xula gudxé'e̱ lataj blau chee̱', ne gunná bé'ene̱' xeajlexrí'e̱ Pablo.
ACT 25:7 Gate bzrin Pablo lau benne' xu'u lu ne̱'e̱ xe̱zr la xu na', na' gulebiga judío ca' zá'aca Jerusalén, ne gulágule̱'e̱ zria Pablo, san quebe guca xululé'ene̱' naca na da li.
ACT 25:8 Nadxa Pablo beche̱be̱' waláz chee̱', gunné̱': ―Neda' quebe bi da cale̱la ne guna', quegá chee̱ da nadxixruj bea chee̱ judío ca', ne quegá chee̱ xudau' chee̱', ne quegá chee̱ César.
ACT 25:9 Festo guca lazre̱' xegá'ane̱' xrlátaje lau benne' judío ca', na' bche̱be̱' Pablo: ―¿Dxaca lazru' chéaju' Jerusalén chee̱ guchi'a neda' ca naca chiu' na'?
ACT 25:10 Pablo beche̱be̱': ―Zua' lau xu'u lawe' da nuzúa César naga dxal-la' zri'a ca naca chia'. Lue' nézqueznu' quebe bi da zrinnaj ne guna' chee̱ benne' judío ca'.
ACT 25:11 Che ba be̱na' tu da zrinnaj da dxun na gútele neda', waca gútele neda'. Che quebe bi de̱ naca na da li ca naca zria da dxelawe̱' neda', quebe nu napa xel-la' dxenná bea gudée̱' neda' lu na' benne' ca'. Dxenaba' zri'a chia' lau César.
ACT 25:12 Ca gudé bchálajle̱ne̱' benne' dxuluzéajni'i le̱', na' Festo guzre̱' Pablo: ―Ba gunabu' zri'a chiu' lau César. Chéaju' lau César.
ACT 25:13 Ca gudé zane' zra Agripa, benne' wenná bea, ne bi zane̱' belezrine̱' Cesarea chee̱ xulugape̱' Festo diuzre.
ACT 25:14 Gulezúe̱' na' tu chupa zra, na' Festo bzenne̱' Agripa, benne' wenná bea na' ca naca chee̱ Pablo. Guzre̱' le̱': ―Zua tu benne' nigá, benne' bca'ana Félix lizre xia.
ACT 25:15 Gate guzúa' xe̱zre Jerusalén, na' benne' xíchaje̱ ca' chee̱ bxruze ca', ne benne' gula sina ca' chee̱ judío ca' gulenné̱' chee̱ benne' nigá, ne gulenabe̱' neda' chuga' chee̱' gatie̱'.
ACT 25:16 Neda' beche̱ba' benne' ca', gunnía' benne' xu'u lawe' chee̱ Roma quebe nu benne' dxelechugue̱' chee̱' gatie̱' che quebe zrine̱' lau benne' ca' dxelawe' le̱' zria chee̱ xeche̱be̱' waláz chee̱'.
ACT 25:17 Chee̱ le̱ na', gate belelá' benne' ca' nigá, quebe guzreda', na' zra xula gudxe'a lataj blau chia', ne gunná be'eda' bla' benne' na'.
ACT 25:18 Benne' ca' gulawe̱' le̱' zria quebe bi gulenné̱' chee̱' ca da gúqueda' neda'.
ACT 25:19 Laze láweze da gulenné̱' chee̱' naca na ca naca da dxeléajle̱'e̱ chee̱ Dios, ne chee̱ tu benne' le̱' Jesús, benne' gute, san dxenná Pablo naca bane̱'.
ACT 25:20 Quebe bezréleda' ájala guna' chee̱ da na', na' bche̱ba' Pablo che dxaca lazre̱' chéaje̱' Jerusalén chee̱ zri'a ca naca chee̱' na'.
ACT 25:21 Nadxa le̱' gunabe̱' zri'a chee̱' lau César Augusto, na' gunná be'eda' xegá'ane̱' lizre xia cadxa séqueda' sel-la' le̱' lau César.
ACT 25:22 Nadxa gunná Agripa, dxe̱'e̱ Festo: ―La gaze neda' dxaca lazra' xenda' chee̱ benne' nigá. Na' beche̱be Festo: ―Wxre xennu' chee̱'.
ACT 25:23 Zra xula, gate belezrín Agripa, ne Berenice ga na', belú'e̱ lu dute̱ xel-la' szren nen benne' dxenná be'e̱ lu wedil-la, ne benne' blau ca' chee̱ xe̱zre. Na' Festo gunná bé'ene̱' xeajlexrí'e̱ Pablo,
ACT 25:24 na' gunné̱': ―Agripa, benne' wenná bea, ne le'e, nazrágale nigá nen netu'. Nigá zua benne' na'. Benne' zan, benne' judío zaj zre̱'e̱ Jerusalén, ne benne' zaj zre̱'e̱ Cesarea nigá, gulenné̱' chee̱ benne' nigá, na' tu gulé̱zqueze̱' neda' dxal-la' gatie̱'.
ACT 25:25 Neda' dxéqueda' quebe bi be̱ne̱' da gudé na le̱' gatie̱', san lé̱queze̱' gunabe̱' zri'a chee̱' lau César. Chee̱ le̱ na' ba nuna' chee̱' sel-la' le̱' lau César.
ACT 25:26 Quebe bi de̱ da guzúaja' chee̱ Xrana' César ca naca chee̱ benne' nigá. Chee̱ le̱ na' dxuzúa' benne' nigá laule le'e, ne da naca bláuqueze, dxuzúa' le̱' lau lue', wenná bea Agripa, chee̱ guche̱bu' le̱' chee̱ gata' late' da guzúaja' ca naca chee̱'.
ACT 25:27 Dxéqueda' quebe naca chawe' sel-la' tu benne' nadxéaje̱' du xia, ne quebe nnia' bi da zria nape̱'.
ACT 26:1 Nadxa gunná wenná bea Agripa, guzre̱' Pablo: ―Waca xeche̱bu'. Na' Pablo guchisa ne̱'e̱, ne guzú lawe̱' dxuchálaje̱', dxenné̱':
ACT 26:2 ―Dxebéle̱'e̱da' dxunu' neda' lataj dxuchálaja' lau lue', wenná bea Agripa, chee̱ xeche̱ba' ca da gulenná benne' judío chia' neda',
ACT 26:3 ne da naca blaudxa, lawe' da nézqueznu' lue' ca naca da zéajle̱ntu' netu', benne' judío ca', ne ca naca dizra' dxutil-la ljwézrentu'. Chee̱ le̱ na' dxenaba' lue' xennu' chia' dute̱ xel-la' zren lazre' chiu'.
ACT 26:4 ’Xúgute̱ benne' judío ca' zaj nézene̱' ca be̱na' lazria', ne lu xe̱zre Jerusalén gate nácatea' bidau'te̱.
ACT 26:5 Zaj nézqueze benne' ca', ne waca xelexeche̱be̱' che dxelaca lazre̱', ca nácatea' benne' cuíde'te̱, naca' fariseo. Benne' fariseo ca' zjácale̱dxe̱' ca naca chee̱ da dxeléajle̱ judío ca' chee̱ Dios.
ACT 26:6 Na'a lawe' da dxebeza lazra' gusebán Dios benne' gate ca', ca guche̱be lazre̱' chee̱ xra xrtáuntu' ca', benne' ca' buluzúe̱' neda' lau xu'u lawe'.
ACT 26:7 Dxelebeza lazre' chazrinnu cue' zri'ine zre sua Israel xelelé'ene̱' gaca ca naca da nigá guche̱be lazre' Dios, na' chee̱ le̱ na' dxulucá'ana szrene̱' Dios, ne dxelune̱' zrin chee̱' te zra ne chizrela. Na'a, wenná bea Agripa, benne' judío ca' dxelawe̱' neda' zria lawe' da dxebeza lazra' ca naca da caníqueze da nache̱be lazre' Dios.
ACT 26:8 ¿Quebe dxéajle̱'u gusebán Dios benne' gate ca'?
ACT 26:9 ’Néda'queza' nédxute̱ gúqueda' da zan da dxal-la' guna' chee̱ benne' ca' dxeléajle̱'e̱ chee̱ Jesús, benne' Nazaret.
ACT 26:10 Caní be̱na' lu xe̱zre Jerusalén. Lu xel-la' dxenná bea chee̱ benne' xíchaje̱ ca' chee̱ bxruze ca', benne' zan bzra'a lizre xia, benne' dxeléajle̱'e̱ chee̱ Jesús, na' gate belútie̱' benne' ca' neda' bé̱nqueza' tuze benne' ca' belútie̱' le̱'.
ACT 26:11 Zane' lásate̱ bdea' benne' ca' ba xa' chee̱ xulusane̱' xel-la' dxeleajlí lazre' chee̱'. Caní be̱na' xúgute̱ lu xu'u ca' naga dxelezraga judío ca', na' lu xel-la' dxezrá'a chia' benne' ca', gudáu zi' xuzra' benne' ca' zaj zre̱'e̱ lu xe̱zre zitu' ca'.
ACT 26:12 ’Chee̱ guna' da nigá zexá'a xe̱zre Damasco, zaj nasel-la benne' xíchaje̱ ca' chee̱ bxruze ca' neda' nen xel-la' dxenná bea chee̱'.
ACT 26:13 Ca zexá'a xu'a neza na', du wagubizra ble'eda' tu xi' da za' xabáa da nácadxa ca xel-la' dxenná' chee̱ gubizra, na' gusení na naga zexá'a neda' nen benne' zjácale̱ne̱' neda'.
ACT 26:14 Nadxa xúgute̱ntu' xeajcházentu' lu xu, na' benda' chi'i tu benne' gunné̱' dizra' hebreo, guzre̱' neda': “Saulo, Saulo, ¿bizr chee̱ na' nau zi' xuzru' neda'? Lue'ze dxun zi' cuinu' ca dxun be̱zre gate dxulíbeba' lawe' xágala da dxádue̱'-ba'.”
ACT 26:15 Nadxa gunnéa': ¿Nuzra Lue', Xran? na' Xránadxu guzre̱' neda': “Neda' naca' Jesús, bénnea' nau zi' xuzru'.
ACT 26:16 Bexasa, guzé̱, lawe' da ble'e lawa' lue' chee̱ gunu' zrin chia', ne chee̱ xeche̱bu' ca naca da ba blé'enu', ne ca naca da za le'enu' gate te na'a.
ACT 26:17 Guselá' lue' lu na' benne' judío ca', ne lu na' benne' zitu' ca' naga dxusel-la' lue' na'a.
ACT 26:18 Dxusel-la' lue' lau benne' ca' chee̱ sálaju' xiaj lau benne' ca' chee̱ xulusane̱' da naca chee̱ da chul-la, na' xelune̱' da naca chee̱ xel-la' naxaní', ne chee̱ xelexedxúaje̱' lu na' da xriwe̱', ne xelexú'e̱ lu na' Dios, ne chee̱ xeléajle̱'e̱ chia' neda', na' xunite lau Dios ca naca dul-la chee̱', ne gaca chee̱' tu da xelape̱' láwela benne' ca' ba gucá'a Dios.”
ACT 26:19 ’Ca' guca, wenná bea Agripa. Bzua' dizra' ca naca da ble'e Dios neda' da naca chee̱ xabáa.
ACT 26:20 Nedxu bchálaja' dizra' chee̱ Dios lau benne' zaj zre̱'e̱ xe̱zre Damasco, na' gudé na' lau benne' zaj zre̱'e̱ Jerusalén, ne ca naca naga nababa Judea, ne lau benne' ca' quebe zaj naque̱' judío. Gucha' benne' ca' dxal-la' xelexebí'i lazre̱', ne xelexexaque̱' chee̱ Dios, na' xelune̱' da xelunna bea na ca da ba zaj naque̱'.
ACT 26:21 Chee̱ le̱ na' benne' judío ca' gule̱l-le̱' neda' lu xudau', ne gulaca lazre̱' xelútie̱' neda'.
ACT 26:22 Dios dxácale̱ne̱' neda', na' ze̱ chúchuqueza' lu zra na'a zra, dxuchálajle̱na' xúgute̱ benne' ca naca chee̱ Dios, benne' cá'aze ca', ne benne' blau ca'. Dxapa' benne' ca' tuze ca naca da gulenná benne' ca' buluchálaje̱' waláz chee̱ Dios, ne da gunná Moisés dxal-la' gaca.
ACT 26:23 Gulenné̱' Cristo dxal-la' si' saque̱', na' ca te gatie̱' dxal-la' xebane̱' ládujla benne' gate nédxudxa ca xúgute̱ benne' ca', na' gulenné̱' xelén benne' judío ca', ne benne' quebe zaj naque̱' judío ca naca chee̱ xel-la' naxaní' chee̱ Dios, da dxulé'e na le̱' ca gaca xelelé̱'.
ACT 26:24 Gate gunná Pablo da caní, na' gunná zizraj Festo: ―Nadá xichaj lázrda'u, Pablo. Lawe' da dxusé̱dele̱'u, na' nadá xichaj lázrda'u.
ACT 26:25 Pablo beche̱be̱': ―Quebe nadá xichaj lázrdawa', dxapa' cuinu' Festo. Da dxennéa' naca na da gaca chéajle̱dxu, ne da li.
ACT 26:26 Nigá zua wenná bea Agripa. Nézele̱'e̱ne̱' ca naca chee̱ da caní, na' chee̱ le̱ na' dxuchálaja' dute̱ xel-la' dxuxrén lazre' chia' lawe̱'. Nézquezda' le̱' nézene̱' ca naca da nigá lawe' da dxuchálaja' ca naca chee̱ da quebe guca na bagácheze.
ACT 26:27 ¿Dxéajle̱'u lue', wenná bea Agripa, ca naca da gulenná benne' ca' buluchálaje̱' waláz chee̱ Dios? Nezda' dxéajle̱'u.
ACT 26:28 Nadxa gunná Agripa: ―Xeláteze guzéajni'inu' neda' gaca' chee̱ Cristo.
ACT 26:29 Nadxa gunná Pablo: ―Che xeláteze u che da zrendxa dxenaba' gun Dios, quegá lue'ze, san cá'anqueze xúgute̱ benne' dxelenne̱' chia' na'a, xelaque̱' ca néda'queza', san quebe xeledxéaje̱' du xia.
ACT 26:30 Ca gudé gunná Pablo da nigá, na' gulexasa wenná bea, ne benne' xu'u lu ne̱'e̱ xe̱zr la xu na' tu zren nen Berenice, ne xúgute̱ benne' ca' zaj dxe'e̱ na'.
ACT 26:31 Belexedxúaje̱' chee̱ze̱' chee̱ xuluchálajle̱ ljwezre̱' ca naca chee̱ da nigá. Na' gulenné̱', dxelé̱ ljwezre̱': ―Benne' nigá quebe bi da cale̱la ne gune̱' da gudé na le̱' gatie̱', ne quebe dxal-la' chu'e̱ lizre xia.
ACT 26:32 Na' gunná Agripa, guzre̱' Festo: ―Waca gusandxu benne' nigá chela quebe gunabe̱' zri'a chee̱' lau César.
ACT 27:1 Gate ba zaj nune̱' xelesel-le̱' netu' lu xe̱zr la xu Italia, na' Pablo, ne xezícala benne' ca' zaj zre̱'e̱ lizre xia, buludée̱' le̱' lu na' tu benne' dxenná bé'ene̱ lu wedil-la le̱' Julio, benne' yu'u lu ne̱'e̱ tu cue' benne' dxjaque̱' wedil-la nazí le na Benne' Chee̱ Augusto Dxjaque̱' Wedil-la.
ACT 27:2 Na' guxú'untu' tu lu da dxedá lawe' nísadau' chee̱ xe̱zre Adramitio, da ba zua te na xé̱zredu ca' chee̱ ga nababa Asia. Zúale̱queze Aristarco netu', tu benne' xe̱zre Tesalónica chee̱ ga nababa Macedonia.
ACT 27:3 Zra xula bzrintu' xe̱zre Sidón, naga Julio bé̱nle̱'e̱ da chawe' chee̱ Pablo, na' be̱'e̱ le̱' lataj xeajnné̱'e̱ bi bíchedxu ca' chee̱ bi belune̱' chee̱'.
ACT 27:4 Gate beza'ntu' xe̱zre Sidón, na' gudentu' naga dxe' xe̱zr la xu Chipre da naxechaj nísadau'. Blé'entu' na chalá'a xéglala lawe' da dxaca be' da quebe dxue na da dxedá lawe' nísadau' lataj cheaj na lizra lidau'.
ACT 27:5 Gudentu' lu nísadau' le nna' xe̱zre ca' zaj nababa Cilicia, ne Panfilia, na' bzrintu' xe̱zre Mira da nababa Licia.
ACT 27:6 Lu xe̱zre na' benne' dxenná be'e̱ lu wedil-la bezrague̱' tu da dxedá lawe' nísadau' chee̱ xe̱zre Alejandría da zeaj na xe̱zr la xu Italia, na' bzre̱'e̱ netu' lawle chee̱ zeajntu' Italia na'.
ACT 27:7 Zane' zra zéajntu' chawe' lazre', na' sté̱bele̱'e̱ bzrintu' le nna' xe̱zre Gnido. Lawe' da ne za be' na' dxedábaga na da dxedá lawe' nísadau', na' gudentu' le nna' Salmón, ne guxéchajntu' naga dxe' xe̱zr la xu Creta da naxechaj nísadau'.
ACT 27:8 Sté̱bele̱'e̱ gudentu' chalá'ala naga dxe' Creta na', na' bzrintu' tu xé̱zredau' nazí le na Buenos Puertos, da zua gagu naga zua xe̱zre Lasea.
ACT 27:9 Záne'te̱ zra bnítentu' xu'untu' da dxedá lawe' nísadau' na', na' ba naca ste̱be zéajntu' lu nísadau' na' lawe' da ba dxexú'udxu beu' zaga. Chee̱ le̱ na' bzéajni'i Pablo benne' ca'.
ACT 27:10 Dxenné̱': ―Le'e, benne', dxelé'eda' wácale̱'e̱ ste̱be naga zéajdxu na'a, na' wabía xi' da dxedá lawe' nísadau' nigá ne xua da nua na, na' zrúzrete̱ cuía xidxu dxi'u.
ACT 27:11 Benne' dxenná be'e̱ lu wedil-la guxéajle̱dxe̱' chee̱ xrane da dxedá lawe' nísadau' na', ne chee̱ benne' xu'u na lu ne̱'e̱, ca chee̱ Pablo.
ACT 27:12 Na' lawe' da quebe naca lataj na' chawe' súadxu na' beu' zaga ca', na' xúgute̱' guléquene̱' nácadxa chawe' xezá' da dxedá lawe' nísadau' na' chee̱ xexéaj na Fenice, tu xe̱zre chee̱ Creta na', da dxe' chalá'a chee̱ xe̱zr la xu Creta naga dxebía gubizra, na' xegá'anadxu na' beu' zaga ca'.
ACT 27:13 Nadxa guzú lau dxaca lase be' da za' chalá'a naga dxedé gubizra beu' zaga, na' guléquene̱' waca chéajte̱zentu' lu nísadau', na' gudentu' gáguze lu xe̱zr la xu Creta na'.
ACT 27:14 Nadxa chíte̱ze guca guzú lau dxácale̱'e̱ be' bdunu' da za' chalá'a ga za' be' zaga.
ACT 27:15 Be' na' guzú lau dxuzriga na chalá'ala da dxedá lawe' nísadau' na', na' lawe' da québedxa guca chéajdxantu' naga za' be' na' be̱n na ba xen be̱ntu' lataj bzriga na da dxedá lawe' nísadau' na'.
ACT 27:16 Na' gudentu' cúzrela tu xe̱zr la xudau' naxechaj nísadau' da nazí le na Clauda, naga québedxa dxácate̱ na be' na' wal-la, na' sté̱bele̱'e̱ gúquentu' bcuentu' da dau' da dxedá lawe' nísadau' da nazrube xu da zren na' xu'untu', na' bzuantu' na lu da zren da dxedá lawe' nísadau' na'.
ACT 27:17 Ca gudé bulucuene̱' da dau' na', na' buludée̱' du zri'a ca' zran da dxedá lawe' nísadau' na' da xeluxru chacha na. Nadxa, lawe' da belezrebe̱' chaze da dxedá lawe' nísadau' na' lu xuzre' naga nazí le Sirte, na' bululétaje̱' ladxe' ca' da dxelecá'a be' lu da dxedá lawe' nísadau' na', na' belúe lataj be' na' bzriga na le̱n.
ACT 27:18 Zra xula, lawe' da ne dxácale̱'e̱ be' bdunu', gulezú lawe̱' dxeledxú'une̱' xua ca' lu nísadau', da nua da dxedá lawe' nísadau' na'.
ACT 27:19 Zra guxunne' zra nen ná'quezentu' gudxú'unantu' lu nísadau' da dxuluchínene̱' chee̱ da dxedá lawe' nísadau' na'.
ACT 27:20 Zane' zra quebe blé'entu' gubizra ne belaj ca', ne ca naca be' bdunu' zren na' ne dxuzriga na da dxedá lawe' nísadau' na', na' québedxa guleza lázrentu' láquezentu'.
ACT 27:21 Zane' zra gudentu' quebe náguntu', na' guzé̱ Pablo láwela benne' ca', ne gunné̱': ―Le'e, benne', cháwedxa la guca chee̱dxu la be̱nle da gucha' le'e, na' quebe bedxúajdxu lu xe̱zr la xu Creta, ne quebe bi guque da dxedá lawe' nísadau' nigá, na' xua' da nua na quebe guzría xi'.
ACT 27:22 Na'a, quebe guchebe lázrele. Netudxu dxi'u quebe cuía xidxu, lácala cuía xi' da dxedá lawe' nísadau' nigá.
ACT 27:23 Ba dxe̱le ble'e lau tu gubáz chee̱ xabáa chee̱ Dios neda'. Naca' chee̱ Dios nigá ne dxuna' zrin chee̱'.
ACT 27:24 Gubáz na' guzre̱' neda': “Quebe zrebu', Pablo, lawe' da dxun na ba xen zrinu' lau César, na' ne̱ chiu' lue' Dios guselé̱' lu xel-la' gute xúgute̱ benne' zaj zra' nen lue' lu da dxedá lawe' nísadau' nigá.”
ACT 27:25 Chee̱ le̱ na', benne', le gun dipa lázrele, lawe' da dxuxrén lazra' Dios, ne nezda' waca ca gunná gubáz chee̱ xabáa na' bchálajle̱ne̱' neda'.
ACT 27:26 Na'a dxun na ba xen cheajchaze da dxedá lawe' nísadau' nigá tu lu xe̱zr la xu da naxechaj nísadau'.
ACT 27:27 Ca gudé chinu' zra gate naca chizrela, ne zrantu' lu nísadau' nazí le na Adria, na' be' na' dxaca dxuzriga na da dxedá lawe' nísadau' quela ca'ala, na' dxe̱la guleque be'e benne' ca' dxulusá da dxedá lawe' nísadau' na' ba dxezrín na dxu'a xu bizre.
ACT 27:28 Na' buludxixre̱' cátite situj dxe' nisa na', na' dxe' na galaj esa. Na' xetú chí'idau' gudé buludxixre̱' da xula, na' dxe' na chinu' ésaze.
ACT 27:29 Belezrebe̱' cheajtá da dxedá lawe' nísadau' na' xiaj, na' buluzale̱' tapa xia da nácale̱'e̱ zi'i zran nisa zeaj zranla da dxedá lawe' nísadau' na', na' gulebeze̱' chaní' dudxuze dxelezrebe̱'.
ACT 27:30 Nadxa benne' ca' dxulusá da dxedá lawe' nísadau' na' guléquene̱' xelexedxúaje̱' lu da dxedá lawe' nísadau' na', na' gulezú lawe̱' dxululétaje̱' da dau' na' zria lawe' da zren na' dxedá lawe' nísadau', dxelune̱' ca benne' xuluzáladxa xia da guxru na da dxedá lawe' nísadau' zren na' da zeaj laula na.
ACT 27:31 Pablo bzenne̱' benne' dxenná be'e̱ lu wedil-la, ne benne' dxjaque̱' wedil-la, dxenné̱': ―Che quebe xelegá'ana benne' caní lu da dxedá lawe' nísadau', quebe lale le'e.
ACT 27:32 Nadxa benne' dxjaque̱' wedil-la gulechugue̱' du zri'a da nadxéaj da dau' na', na' belú'e̱ na lataj bexruj na lu nísadau'.
ACT 27:33 Ca guxaní'sise̱' bzéajni'i Pablo xúgute̱ benne' ca' dxal-la' xelawe̱' xeta, gunné̱': ―Ba zeaj chinu' zra quebe dxásele ne quebe dxágule.
ACT 27:34 Dxata' xueda' le'e gágule. Da nigá dxun na ba xen chee̱ lale. Netudxu dxi'u quebe cuía xi' netú xicha xíchajdxu.
ACT 27:35 Ca gunné̱' caní, Pablo guqué̱'e̱ tu xeta xtila, na' guzre̱' Dios: “Xcalenu'”, lau xúgute̱ benne' ca'. Nadxa bzúzruje̱' na, na' guzú lawe̱' dxawe̱'.
ACT 27:36 Nadxa xúgute̱' belún dipa lazre̱', na' gulezú lau dxelawe̱'.
ACT 27:37 Cátite netu' zrantu' lu da dxedá lawe' nísadau' na' nácantu' chupa gaxúa ga xun chinu tuntu'.
ACT 27:38 Ca gudé gulawe̱' cátite guléljene̱', na' buluzale̱' zrua' xtila lu nísadau' chee̱ bezrá' da dxedá lawe' nísadau' na'.
ACT 27:39 Gate guxaní', benne' ca' dxulusá da dxedá lawe' nísadau' na' quebe belexúnbe'e̱ xe̱zr la xu na' da zua na le nna' naga zaj zre̱'e̱. Belelé'ene̱' naga dxexú'u nísadau' gachaj láwela xe̱zr la xu na', na' dxu'e na' naca lache'. Na' gulaca lazre̱' xuluxudée̱' da dxedá lawe' nísadau' laduj na'.
ACT 27:40 Gulechugue̱' du zri'a ca' zaj nacá'a xia ca', ne bulucá'ane̱' xia ca' lu nísadau'. Gulese̱zre̱' du zri'a da nadxéaj ne̱'e xaga da dxuzechaj na da dxedá lawe' nísadau'. Nadxa gulechise̱' ladxe' da dxecá'a be' da zeaj láwela da dxedá lawe' nísadau', na' da dxedá lawe' nísadau' na' guzú lau dxebiga na naga naca lache'.
ACT 27:41 Bzrin na naga dxezraga nisa na' dxupa la'a, na' da dxedá lawe' nísadau' na' guxaze na lu xuzre' da dxe' zran nisa na'. Zeaj láwela da dxedá lawe' nísadau', na' begá'ana na chalásaze lu xuzre' na', ne québedxa gulezéquene̱' xuluté̱' na. Da zeaj zranla guzú lau dxuzruj na lawe' da dxeajé̱le̱'e̱ xeajxruza chee̱ nísadau' na' zran da dxedá lawe' nísadau' na'.
ACT 27:42 Benne' dxjaque̱' wedil-la gulaca lazre̱' xelútie̱' benne' zaj nadxéaje̱' chee̱ quebe xuluxuzrúnnuje̱' xelezrúe̱' lawe' nisa na'.
ACT 27:43 Benne' dxenná be'e̱ lu wedil-la guca lazre̱' guselé̱' Pablo, na' quebe be̱'e̱ lataj benne' dxjaque̱' wedil-la xelútie̱' benne' ca'. Na' gunná bé'ene̱' benne' ca' dxelaque̱' dxelezrúe̱' nisa cheajlexexrítie̱' lu nisa na' chee̱ xelexezrine̱' lu xu bizre.
ACT 27:44 Benne' ca' xezícala, bal-le̱' gulequé̱'e̱ blaga', ne xebal-le̱' gulequé̱'e̱ blaga' bizruj chee̱ da dxedá lawe' nísadau' na', na' caní guca, xúgute̱' belexezrine̱' lu xu bizre.
ACT 28:1 Ca gulá xúgute̱ntu', na' gunézentu' xe̱zr la xu na' da naxechaj nísadau' nazí le na Malta.
ACT 28:2 Benne' zaj zre̱'e̱ na' belúnle̱'e̱ netu' cháwedau'. Gulebéche'le̱'e̱ xi' lawe' da dxúnle̱'e̱ zaga, ne dxaca xiuj, na' gulenné̱' netu' cheajse̱ntu' dxu'a xi' chee̱ xezré'entu'.
ACT 28:3 Nadxa Pablo guqué̱'e̱ tu xrunu zruze xaga, na' ca dxuzré̱'e̱ na lu xi', bedxúaj tu be̱la' da na' dxuzrúnnujba' lu da la na', na' gudagu xa'aba' na' Pablo.
ACT 28:4 Gate belelé'e benne' ca' zaj zre̱'e̱ lu xe̱zr la xu na', nal-la' be̱la' na' na' Pablo, na' gulé̱ ljwezre̱': ―Benne' nigá naque̱' we̱te benne' lawe' da lácala gulé̱' lu nísadau', quebe dxue lataj dios na' nazí'i le̱' Xrlátaje gaca ban le̱'.
ACT 28:5 Pablo guzribe̱' be̱la' na' lu xi', ne quebe bi gúquene̱'.
ACT 28:6 Xúgute̱' gulebeze̱' chee̱ gata' xi' na' Pablo u che'e̱ gatie̱'. Ca gudé gulebeze̱' tu chi'i wal-la, ne belelé'ene̱' quebe bi gúquene̱', na' buluché̱'e̱ ca da dxeléquene̱', ne gulezú lawe̱' dxelenné̱' naca Pablo tu dios.
ACT 28:7 Gágute̱ naga zrantu' de̱ xe̱zr la xu chee̱ benne' blau chee̱ xe̱zr la xu na', le̱' Publio. Benne' nigá guzí' lu ne̱'e̱ netu', ne bxúele̱'e̱ netu' cháwedau' lawe' chunna zra.
ACT 28:8 Xra Publio de̱ze̱', quebe chawe' zue̱', na' xu'e̱ da la, ne dxaque̱' xízrawe̱' dxen. Pablo guxíaje̱' xeajnné̱'e̱ le̱', na' ca gudé bchálajle̱ne̱' Dios, bze̱ ne̱'e̱ lawe' le̱', na' bexaque̱'.
ACT 28:9 Gate belenne̱' da nigá, na' benne' ca' xezícadxa, benne' we̱' ca' zaj zre̱'e̱ xe̱zr la xu na', belezrine̱' lau Pablo, na' belexaque̱'.
ACT 28:10 Gulápale̱'e̱ netu' ba lá'ana, na' ca gudé na', gate ba zua chú'untu' da xula tu lu da dxedá lawe' nísadau', belunne̱' xúgute̱ da nachínnentu'.
ACT 28:11 Ca gudé guca chunna beu' zúantu' lu xe̱zr la xu na', na' bexú'untu' tu lu da dxedá lawe' nísadau' da gudxé' na na' dxácate̱ naca beu' zaga ca'. Naca na tu da dxedá lawe' nísadau' chee̱ xe̱zre Alejandría, na' luzrgue da dxedá lawe' nísadau' na' zaj da bedáu' chee̱ dios bi lide' ca' zaj le̱' Cástor ne Pólux.
ACT 28:12 Bzrintu' dxu'a xe̱zre Siracusa naga begá'anantu' chunna zra.
ACT 28:13 Gate beza'ntu' na', na' gudentu' dxu'a xe̱zr la xu na', ne bzrintu' xe̱zre Regio. Zra xula dxaca be' da za' chalá'a naga dxedé gubizra beu' zaga ca', na' zra gudxupe' zra bzrintu' xe̱zre Puteoli.
ACT 28:14 Lu xe̱zre na' bezrágantu' bal-la bi bíchedxu, benne' gulenné̱' netu' lizre̱' xegá'anale̱ntu' le̱' xrunu' zra, na' ca gudé na' guza'ntu' ní'antu' zéajntu' Roma.
ACT 28:15 Bi bíchedxu zaj zra' Roma ba belenne̱' chee̱ntu', na' beledxúaje̱' xe̱zre na', bedajlechague̱' netu' tu xé̱zredau' nazí le na Xi'a Chee̱ Apio, na' xebal-le̱' belexezrague̱' netu' tu lataj nazí le na Chunna Xú'udau'. Gate ble'e Pablo bi bíchedxu ca', na' guzre̱' Dios: “Xcalenu'”, ne be̱n dipa lazre̱'.
ACT 28:16 Gate bzrintu' Roma, benne' dxenná be'e̱ lu wedil-la bdee̱' benne' zaj nadxéaje̱' lu na' benne' xíchaje̱ chee̱ bi xra'aga ca', san be̱'e̱ lataj Pablo sue̱' chee̱ze̱' nen tu benne' dxéaje̱' wedil-la, benne' guxúe̱' le̱' chee̱ quebe xuzrúnnuje̱'.
ACT 28:17 Ca gudé chunna zra Pablo gusel-le̱' benne' xeajnné̱' benne' judío blau ca' zaj zre̱'e̱ Roma, na' gate belezrague̱', guzre̱' benne' ca': ―Le'e, bi bicha'. Neda' quebe gudábaga' judío ca', ne quebe gudábaga' da xjácale̱ xra xrtáudxu ca', san benne' judío ca' zaj zre̱'e̱ Jerusalén buludée̱' neda' lu na' benne' Roma ca'.
ACT 28:18 Gate benne' Roma zaj zre̱'e̱ na' buluche̱be̱' neda', gulaca lazre̱' xulusane̱' neda' lawe' da quebe belezrelne̱' bi da be̱na' da gun na xelechugue̱' chia' gatia'.
ACT 28:19 Judío ca' guledábague̱', na' be̱n na ba xen gunaba' neda' zri'a chia' lau César. Quebe nacan chee̱ gawa' zria benne' lázredxu.
ACT 28:20 Chee̱ le̱ na' gunnéa' le'e chee̱ le'eda' le'e, ne guchálajle̱na' le'e lawe' da naca ne̱ chee̱ da dxebeza lázredxu dxi'u, benne' Israel, zua' nigá nadxéaja' xia.
ACT 28:21 Nadxa gulé̱'e̱ le̱': ―Netu' quebe bi xiche ne si' lu na'ntu' da za na Judea ca naca chiu' lue', na' netú bi bíchedxu, benne' judío, benne' ba bele̱'e̱ nigá bezé̱'e̱ Judea, quebe bi da cale̱la dxenné̱' be̱nu'.
ACT 28:22 Dxaca lázrentu' xénentu' ca da dxéquenu' lue' lawe' da nézentu' gátete̱ze na' dxelenné̱' chee̱ benne' ca' dxeléajle̱'e̱ dizra' cube nigá.
ACT 28:23 Buluzúe̱' tu zra gate xelexezrague̱', na' lu zra na' benne' zan belezrague̱' naga zua Pablo. Bchálajle̱ne̱' benne' ca' ca naca xel-la' dxenná bea chee̱ Dios che zílate̱la guxrínnele̱te̱. Be̱ne̱' ba xuzre guzéajni'ine̱' benne' ca' ca naca chee̱ Jesús ne̱ chee̱ da bdxixruj be'e Moisés, ne ne̱ chee̱ da buluzúaj benne' ca' buluchálaje̱' waláz chee̱ Dios.
ACT 28:24 Bal-le̱' gulezí'e̱ xrtizra' Pablo, san xebal-le̱' quebe guléajle̱'e̱.
ACT 28:25 Quebe belune̱' tuze dizra', na' gulezú lawe̱' dxelexedxúaje̱'. Nadxa gunná Pablo: ―Da li naca da gunná Be' Lá'azxa, guzre̱' xra xrtáudxu ca' lu dxu'a Isaías, bénnea' bchalaje̱' waláz chee̱ Dios, gunné̱':
ACT 28:26 Guxíaj, xeaje̱zre benne' ca': Da li wenle le'e san quebe chéajni'ile. Da li walé'ele, ne quebe gueque be'ele.
ACT 28:27 Zaj naca zide' lázxdau benne' caní, ne quebe dxelenne̱' chawe'. Zaj naxezxuj xiaj lawe̱' chee̱ quebe xelelé'ene̱' nen xiaj lawe̱', ne quebe xelénene̱' nen nague̱', ne quebe xeléajni'ine̱' nen lázrdawe̱', ne quebe xelexelé̱'e̱ lawa' neda' chee̱ xexuna' neda' le̱'.
ACT 28:28 ’Dxal-la' nézele le'e, na'a ne da za za' xel-la' weselá chee̱ Dios guchálajle̱ntu' benne' quebe zaj naque̱' judío, na' benne' ca' xelezí'e̱ na.
ACT 28:29 Gate gunná Pablo da nigá, na' besiá'aca judío ca', dxuluché̱bele̱'e̱ ljwezre̱'.
ACT 28:30 Pablo guzúe̱' chupa iza lu xu'u da dxízruje̱', ne dxezí' lu ne̱'e̱ xúgute̱ benne' dxedajlenné̱'e̱ le̱'.
ACT 28:31 Du lazre̱' bchálaje̱' ca naca xel-la' dxenná bea chee̱ Dios, ne bsé̱dene̱' ca naca chee̱ Xránadxu Jesucristo, na' netú quebe nu blale̱' le̱'.
ROM 1:1 Neda', Pablo, naca' we̱n zrin chee̱ Jesucristo. Dios bláwizre̱' neda' chee̱ gaca' gubáz chee̱', ne guqué̱'e̱ neda' chee̱ guzenda' bénneache dizra' chawe' chee̱'.
ROM 1:2 Dios guche̱be lazre̱' sel-le̱' dizra' chawe' nigá gate nate lu dizra' lá'azxa chee̱' lu na' benne' ca' buluchálaje̱' waláz chee̱'.
ROM 1:3 Dizra' chawe' nigá dxulé'e na ca naca chee̱ Xránadxu Jesucristo, Zri'ine Dios. Lu be̱la' dxen chee̱' naque̱' zri'ine zre sua wenná bea David.
ROM 1:4 Lu be' nácaqueze̱' da naca na lá'azxa, naque̱' Zri'ine Dios. Dios blé'ene̱' naca caní gate bsebane̱' Le̱' ládujla benne' gate ne̱ chee̱ xel-la waca chee̱'.
ROM 1:5 Ne̱ chee̱ Zrí'ine̱' Dios nunne̱' netu' lataj nácantu' gubáz chee̱' chee̱ xelezrá' benne' ládujla xúgute̱ cue' xe̱zr la xu, benne' xeleajlí lazre̱' Cristo, ne xuluzúe̱' dizra' chee̱' chee̱ gaca ba La Le̱'.
ROM 1:6 Ládujla benne' caní zrale le'e chee̱ gácale bi chee̱ Jesucristo.
ROM 1:7 Dxuzúaja' chee̱ xúgute̱le le'e dxéajle̱le chee̱ Cristo, zrale xe̱zre Roma. Dios nazrí'ine̱' le'e, ne bláwizre̱' le'e chee̱ gácale bi cheé̱queze̱'. Dxenaba' Xradxu Dios, ne Xránadxu Jesucristo gune̱' chawe' chee̱le, ne gunne̱' le'e xel-la dxebeza zri lazre'.
ROM 1:8 Da naca blaudxa, ne̱ chee̱ Jesucristo dxapa' Dios chia' xcalene̱' ca naca chee̱ xúgute̱le lawe' da dxezralaj ca dxeajlí lázrele Cristo du gabí'i xe̱zr la xu.
ROM 1:9 Duté̱ lázrdawa' dxuna' zrin chee̱ Dios, dxuzenda' bénneache dizra' chawe' chee̱ Zrí'ine̱'. Le̱' nézquezne̱' dxeajsá lázrqueza' le'e gate dxuchálajle̱na' Le'.
ROM 1:10 Dxata' xúeda' Dios, che naca da dxaca lazre' Le̱', chee̱ ájala gunne̱' neda' lataj xedajnná'a le'e
ROM 1:11 lawe' da dxaca lazra' le'eda' le'e ne gunna' le'e lataj si'le da naca chee̱ Be' Lá'azxa, chee̱ se̱ cháchadxale.
ROM 1:12 Caní gutipa lázredxu tudxu xetudxu lu xel-la dxeajlí lazre' chee̱dxu.
ROM 1:13 Bi bícha'dau', dxaca lazra' nézele zane' lasa guca lazra' xida' xedajnná'a le'e, san dxácate̱ ca' dxecuasa na. Dxaca lázrele̱'a xida' chee̱ guna' zrin gusé̱deda' da naca chee̱ Cristo ládujla le'e, cáte̱ze ba be̱na' ládujla xezícadxa bénneache zaj zre̱'e̱ lu xe̱zr la xu nigá.
ROM 1:14 Nabaga' guna' zrin caní ládujla xúgute̱ bénneache, che zaj naque̱' benne' blau u ca zaj naque̱', u che zaj naque̱' benne' zaj naxéajni'i u ca zaj naque̱'.
ROM 1:15 Chee̱ le̱ na', neda' ba zúaqueza' guzenda' le'e zrale xe̱zre Roma dizra' chawe' chee̱ Cristo.
ROM 1:16 Quebe dxedué'eda' chee̱ dizra' chawe' chee̱ Cristo lawe' da napa na xel-la waca chee̱ Dios chee̱ guselá na xúgute̱ benne' dxeleajlí lazre̱' le̱ na, nédxula benne' judío ca', san cá'anqueze benne' quebe zaj naque̱' judío.
ROM 1:17 Dizra' chawe' nigá dxulé'e na dxi'u nagá'anadxu chawe' lau Dios che dxeajlí lázredxu le̱ na, chee̱ cheajlí lázredxu Le̱' ca naxúaj na lu dizra' lá'azxa, da dxenná na: Benne' nagá'ane̱' chawe' lau Dios gata' chee̱' xel-la nabán li lazre' che dxeajlí lazre̱' Le̱'.
ROM 1:18 Ba ble'e Dios lu xabáa chee̱' ca gune̱', gudée̱' xel-la zi' xúgute̱ benne' dxuluzúe̱' chalá'ala Dios, ne benne' we̱n da cale̱la, benne' dxuluzague̱' da li ne̱ chee̱ da cale̱la da dxelune̱'.
ROM 1:19 Zaj nézquezne̱' ca gaca xelúnbea bénneache da naca chee̱ Dios lawe' da Lé̱queze Dios na' bache blé'ene̱' na zaca ba lau.
ROM 1:20 Da quebe gaca lé'edxu chee̱ Dios gaca gúnbeadxu na ne̱ chee̱ da ca' da be̱n Dios. Gate be̱nte̱' xe̱zr la xu dxunna bea na nácaqueze Dios, ne nápaqueze̱' xel-la waca. Chee̱ le̱ na' quebe bi de̱ xuludé'ene̱'.
ROM 1:21 Lácala zaj núnbe'e̱ ca naca Dios, quebe ne xelape̱' Le̱' ba lá'ana ca Dios, ne quebe ne xelé̱'e̱ Le̱'; Xcalenu', san dxuludé lazre̱' da níteze, na' gulechul-la xichaj lázrdawe̱' lawe' da zaj naque̱' benne' zide'.
ROM 1:22 Lácala dxeléquene̱' zaj naxéajni'ine̱', da li zaj naque̱' benne' xala,
ROM 1:23 lawe' da buluzúe̱' chalá'ala Dios xabáa, Bénnea' quebe dxedé chee̱', ne dxelúe lá'ane̱' bedáu' xiaj xaga zaj naca na lu'a bénneache dxelate, ne lu'a bea ca' zaj zua xrila, ne lu'a be̱ snia, ne lu'a be̱ xixre' be̱ zria tapa ni'a na'ba'.
ROM 1:24 Chee̱ le̱ na' Dios ba guleaj xíchaje̱' benne' ca' chee̱ xelune̱' xúgute̱ da sban da dxelezá lazre̱', na' bulucá'ana ditaj cuine̱' tue̱' xetue̱',
ROM 1:25 lawe' da buluzúe̱' chalá'ala xel-la li chee̱ Dios, na' gulezí' lu ne̱'e̱ da we̱n lazre', ne belúe lá'ane̱', ne belecá'ana szrene̱' da ca' nun Dios, ne quegá Diosqueze, Bénnea' dxal-la' güe lá'anaquezdxu. ¡Ca'an gaca na!
ROM 1:26 Chee̱ le̱ na' Dios ba guleaj xíchaje̱' benne' ca' chee̱ xelune̱' da dxelezá lazre̱' da ca' xedué'edxu. Cá'anqueze nu'ula buluzúe̱' chalá'ala xel-la zúale̱ benne' chee̱', ne dxelune̱' da quebe zaj naca chee̱' xelune̱'.
ROM 1:27 Cá'anqueze belún benne' biu, buluzúe̱' chalá'ala xel-la zúale̱ zru'ule̱', ne dxelune̱' da sban da dxelezá lazre̱' tue̱' xetue̱', ne dxelune̱' da ca' xedué'edxu tue̱' xetue̱', na' dxeledée̱' xel-la zi' lu be̱l-la' dxen chee̱' ne̱ chee̱ da sban da dxelune̱'.
ROM 1:28 Lawe' da québedxa gulaca lazre̱' xelexúnbe'e̱ Dios, Le̱' guleaj xíchaje̱' benne' ca' chee̱ xuludé lazre̱' da cale̱la, ne chee̱ xelune̱' da quebe dxal-la' xelune̱'.
ROM 1:29 Dxelune̱' xúgute̱ da cale̱la. Dxulucá'ana ditje̱' bénneache. Dxelune̱' da quebe naca xrlátaje. Zaj naque̱' benne' wecude'. Dxelune̱' da zrinnaj. Zaj naque̱' benne' xa lazre'. Dxelutie̱' benne'. Dxelílaje̱' da ba xa'. Dxelezí xe̱'e̱. Dxeledanne̱' da xálaze. Dxuluchálaje̱' dizra' bizruj.
ROM 1:30 Dxelenné̱' schanni' chee̱ ljwezre̱'. Dxelecuídene̱' Dios. Zaj naque̱' benne' wenné̱ wal-la. Dxulucá'ana szren cuine̱'. Zaj naque̱' benne' wezé cua. Dxelalaj lazre̱' bícala da sban. Quebe dxuluzúe̱' dizra' chee̱ xra xrne̱'e̱.
ROM 1:31 Zaj naque̱' benne' lázrdau zide'. Dxulunitie̱' xrtizre̱'. Quebe zaj naque̱' zri'i lazre'. Quebe dxulunite lawe̱' chee̱ ljwezre̱'. Quebe dxelexache lazre̱' chee̱ ljwezre̱'.
ROM 1:32 Zaj nézene̱' Dios guzría xi'e̱ bénneache, na' benne' dxelune̱' da caní dxal-la' xelátie̱'. Benne' caní tu dxelúnzqueze̱' na, ne dxelexezaca ba lazre̱' nen benne' dxelune̱' da caníqueze.
ROM 2:1 Chee̱ le̱ na' québedxa bi de̱ da gudé'enu', lue' dxuchi'u da dxun benne' xula, nútete̱ze nacu'. Gate dxuchi'u da dxun benne' xula, na' dxule'enu' nabagu' zria, lawe' da dxuchi'u da dxun benne' xula, ne cá'anqueze dxunu' lue'.
ROM 2:2 Nézquezdxu dxuchi'a Dios cáte̱ze da naca na gate dxenné̱' zaj nabaga zria benne' ca' dxelún da caní.
ROM 2:3 ¿Dxéquenu' lue' wadé gun ca'aze chiu' gate Dios nne̱' zaj nabaga zria bénneache, lue' na' dxennáu' zaj nabaga zria benne' dxelún da caní, ne cá'anqueze dxunu' lue'?
ROM 2:4 ¿Dxuzú' chalá'ala xel-la zri'i lazre', ne xel-la zren lazre' zren chee̱ Dios, ne quebe nézenu' lu xel-la zri'i lazre' chee̱' dxunne̱' lue' lataj xebi'i lazru'?
ROM 2:5 Nacu' lázrdau zide', ne quebe dxexebí'i lazru'. Chee̱ le̱ na' dxuzanu' da si sacu' lu zra na' gate Dios nne̱' zaj nabaga zria benne' ca' dxelune̱' da cale̱la. Naca xrlátaje gune̱' da caní.
ROM 2:6 Lu zra na' gunne̱' ca da dxal-la' si' tu tudxu cáte̱ze naca da be̱ndxu.
ROM 2:7 Xel-la nabán zeajlí canna gunna Le̱' xúgute̱ benne' dxelaca lazre̱' xelezí'e̱ lu na' Dios da xabáa, ne xel-la ba lá'ana, ne da zaj naca na da chadía chacanna ne̱ chee̱ da chawe' da tu dxelúnzqueze̱'.
ROM 2:8 Lu xel-la dxezrá'a chee̱' nne̱' zaj nabaga zria xúgute̱ benne' zre'e lazre' ca', benne' quebe dxuluzúe̱' dizra' da li, san dxuluzúe̱' dizra' da we̱n lazre'.
ROM 2:9 Gusaca zi'e̱, ne gudée̱' lu da ba xa' xúgute̱ benne' dxelune̱' da cale̱la. Ga su lau gune̱' caní chee̱ benne' judío ca', ne cá'anqueze gune̱' chee̱ benne' quebe zaj naque̱' judío.
ROM 2:10 Da xabáa, ne da ba lá'ana, ne xel-la dxebeza zri lazre' gunne̱' xúgute̱ benne' dxelune̱' da chawe'. Ga su lau gune̱' caní chee̱ benne' judío ca', ne cá'anqueze gune̱' chee̱ benne' quebe zaj naque̱' judío.
ROM 2:11 Dios tuze ca dxuchi'e̱ da dxelún xúgute̱ bénneache,
ROM 2:12 na' benne' dxelune̱' dul-la, ne quebe zaj núnbe'e̱ da bdxixruj be'e Moisés welebía xi'e̱ lácala quebe belúnbe'e̱ da nadxixruj bea na, na' benne' dxelune̱' dul-la lácala zaj núnbe'e̱ da bdxixruj be'e Moisés welebía xi'e̱ ne̱ chee̱ da nadxixruj bea na na'.
ROM 2:13 Quebe zaj nagá'ana chawe' lau Dios benne' dxelénzene̱' da nadxixruj bea na, san zaj nagá'ana chawe' lau Dios benne' dxuluzúe̱' dizra' da nadxixruj bea na.
ROM 2:14 Benne' zitu' ca', benne' quebe zaj núnbe'e̱ da bdxixruj be'e Moisés, gate dxelune̱' ca dxenná da nadxixruj bea na na', lácala quebe zaj núnbe'e̱ da nadxixruj bea na, naca chee̱' cáte̱ze zua da nadxixruj bea na lu xichaj lázrdawe̱'.
ROM 2:15 Caní naquen lawe' da ca dxelune̱' dxulé'e na zua xichaj lázrdawe̱' ca naca da nadxixruj bea na, na' naca na ca naca da bdxixruj be'e Moisés. Xichaj lázrdawe̱' dxunna bea na chee̱ da nigá, na' da dxelegú'u lazre̱' guzría xi na le̱', u xecá'a na le̱'
ROM 2:16 lu zra na' gate Dios guchi'e̱ xúgute̱ da nagache' chee̱ xúgute̱ bénneache lu na' Jesucristo cáte̱ze dxenná dizra' chawe' na' da dxuzenda' bénneache.
ROM 2:17 Dxennáu' nacu' judío, ne dxenné̱le̱nu' da bdxixruj be'e Moisés, ne dxucá'ana szren cuinu' lawe' da núnbe'u Dios chiu'.
ROM 2:18 Nézenu' da dxaca lazre' Dios, na' da gunná bé'ene̱' dxulé'e na lue' gunu' da nácadxa chawe'.
ROM 2:19 Dxuxrén lazru' cuinu' waca gulé'enu' ca da xelún benne' zaj naque̱' ca lo chul-la, ne guseni'u benne' zaj zra' lu da chul-la.
ROM 2:20 Dxéquenu' waca guzéajni'inu' benne' quebe zaj naxéajni'e̱, ne gusé̱denu' benne' quebe ne cheajni'e̱ lawe' da naca da nadxixruj bea na da napu' tu da dxulé'e na dxi'u chee̱ gúnbeadxu da li.
ROM 2:21 Lue' dxusé̱denu' benne' xula. ¿Bizr chee̱ na' quebe dxuse̱de cuinu'? Lue' dxuzennu' benne' quebe dxal-la' cuandxu. ¿Bizr chee̱ na' dxebanu' lue'?
ROM 2:22 Lue' dxennáu' quebe dxal-la' súale̱dxu zru'ula benne' xula. ¿Bizr chee̱ na' dxunu' lue' ca'? Lue' dxecuídenu' bedáu' xiaj xaga. ¿Bizr chee̱ na' dxebanu' lue' da gunní'a da de̱ lu xudau' ca' chee̱ bedáu' xiaj xaga ca'?
ROM 2:23 Dxucá'ana szren cuinu' lawe' da núnbe'u da nadxixruj bea na, san dxucá'ana ditju' Dios lawe' da quebe dxunu' lue' ca da dxenná bea da nadxixruj bea na.
ROM 2:24 Naxúaj lu dizra' lá'azxa da dxenná na: Benne' quebe zaj naque̱' judío dxelenné̱' schanni' chee̱ Dios ne̱ chee̱ da cale̱la da dxunle le'e.
ROM 2:25 Da li da nadxugu lu be̱la' chiu' da dxulé'e na nacu' bi chee̱ Dios, naca na tu da chawe' che dxunu' ca da dxenná bea da bdxixruj be'e Moisés, san che quebe dxunu' ca dxenná na, nacu' ca tu benne' quebe nadxugu lu be̱la' chee̱' da na' dxulé'e na.
ROM 2:26 Che benne' quebe nadxugu lu be̱la' chee̱' dxune̱' ca nadxixruj bea na, naque̱' ca tu benne' nadxúguqueze lu be̱la' chee̱' da na', lácala quebe naca caní chee̱'.
ROM 2:27 Benne' quebe nadxugu lu be̱la' chee̱' da na' dxulé'e na, san dxune̱' da nadxixruj bea na, da na' dxune̱' dxulé'e na nabagu' zria lue', lawe' da quebe dxunu' da dxenná bea da nadxixruj bea na, lácala zua lu na'u da nadxixruj bea na, ne nadxugu lu be̱la' chiu' da na'.
ROM 2:28 Quebe naca xanne' judío bénnea' naque̱' caní cúzreze, ne quebe naca xanne' da nadxugu na lu be̱la' chee̱ benne' da naca na cúzreze, lu bé̱la'ze.
ROM 2:29 Benne' naca xánnie̱' judío naque̱' bénnea' naque̱' judío lu xichaj lázrdawe̱', ne da naca xanne' da nadxugu lu be̱la' chee̱ benne' naca na da zua na lázrdawe̱'. Quebe nácaqueze na nen dízra'ze san naca na chee̱ be' chee̱'. Benne' caní dxelezi'e̱ xel-la ba lá'ana, quegá chee̱ bénneache, san chee̱ Dios.
ROM 3:1 ¿Bizra da ba neza naca na chee̱ benne' lawe' da nadxugu lu be̱la' chee̱' da na' dxulé'e na?
ROM 3:2 Nácale̱'e̱ na, ne zánete̱ ca naca na. Da nédxute̱, Dios bdee̱' dizra' chee̱' lu na' benne' judío ca'.
ROM 3:3 ¿Bizra xca'? Che bal-la benne' judío ca' quebe zaj naque̱' li lazre', ¿nnadxu chee̱ da na' quebe naca Dios li lazre'?
ROM 3:4 ¡Cabata'! Dios dxúnqueze̱' ca naca da li lácala xúgute̱ bénneache zaj naque̱' we̱n lazre', lawe' da naxúaj lu dizra' lá'azxa da dxenná Dios. Dxenné̱': Nacu' xrlátaje ca da dxennáu', na' wegá'anaquezu' xrlátaje gate xuluchí'e̱ ca da dxunu'.
ROM 3:5 Che da cale̱la da dxundxu dxulé'e na naca Dios xrlátaje, ¿Bízraqueze nnadxu? (Dxuchálaja' ca da dxuluchalaj bénneache.) ¿Naca Dios benne' quebe naca xrlátaje lawe' da dxudée̱' dxi'u xel-la zi'?
ROM 3:6 ¡Cabata'! Chela naca Dios Benne' quebe dxun da xrlátaje, ¿ájazra gune̱' guchi'e̱ ca da dxelún bénneache?
ROM 3:7 Che da we̱n lazre' da dxuna' gun na chee̱ xegá'ana zrendxa da li da dxun Dios, ¿bizr chee̱ na' dxuchi'e̱ chia' neda', dxenné̱' naca' benne' dul-la?
ROM 3:8 Che naca na caní, ¿bizr chee̱ na' quebe gundxu da cale̱la chee̱ gulé'e laudxa da xrlátaje? Da nigá naca na da dxelenná bal-la benne' dxundxu, benne' ca' dxelún da cale̱la, ne dxelenné̱' schanni' chee̱dxu. Xrlátaje naca Dios nne̱' zaj nabaga zria benne' caní.
ROM 3:9 ¿Bizra xca'? Dxi'u, benne' judío, ¿nácadxadxu xrlátaje ca xezícadxa benne' ca'? ¡Cabata'! Bache blé'entu' zaj nabaga dul-la benne' judío, ne cá'anqueze xezícadxa benne' ca'.
ROM 3:10 Naxúaj lu xiche lá'azxa da dxenná na: Quebe nu chilá' benne' xrlátaje, netú gue̱'.
ROM 3:11 Quebe nu chilá' benne' dxéajni'ine̱'. Quebe nu chilá' benne' dxexílaje̱' Dios.
ROM 3:12 Xúgute̱' dxeledé̱' cale̱la. Xúgute̱' zaj nanítie̱'. Quebe nu chilá' benne' dxune̱' da xrlátaje, netú gue̱'.
ROM 3:13 Da dxelenné̱queze̱' naca na ca tu da sgute, ca tu ba da naxálajze. Nen luzre̱' ca' dxelezí xe̱'e̱. Xrtizre̱' zaj naca na ca nisa snia chee̱ be̱la' da dxe na zran lázxaba'.
ROM 3:14 Tu dxelenné̱zqueze̱' dizra' schanni', ne dizra' zi'.
ROM 3:15 Chadite̱ dxelútie̱' bénneache.
ROM 3:16 Gátete̱ze dxeledée̱' dxuluzría xi'e̱, ne dxulusaca zi'e̱.
ROM 3:17 Quebe zaj nézene̱' ájala xelebeza zri lazre̱'.
ROM 3:18 Quebe dxelezrebe̱' Dios.
ROM 3:19 Nezdxu xúgute̱ ca da dxenná da nadxixruj bea gula na' da bzuaj Moisés, dxe̱ na benne' ca' zaj xu'e̱ lu na' da nadxixruj bea na na', chee̱ xelezúa zri xúgute̱', ne chee̱ xelexúnbea xúgute̱ bénneache zaj nabague̱' zria lau Dios.
ROM 3:20 Netú benne' quebe xegá'ane̱' xrlátaje lau Dios lawe' da nune̱' da dxenná bea da nadxixruj bea na, lawe' da dxulé'eze da nadxixruj bea na dxi'u nácadxu benne' dul-la.
ROM 3:21 Na'a, dxunna bea na ca gaca xegá'anadxu xrlátaje lau Dios, da quebe naca na ne̱ chee̱ da nadxixruj bea na, lácala lu da nadxixruj bea na, ne lu da buluzúaj benne' ca' gulenné̱' waláz chee̱ Dios dxuluchalaj na ca naca chee̱ da nigá.
ROM 3:22 Nagá'anadxu xrlátaje lau Dios caní che dxeajlí lázredxu Jesucristo, ne cá'anqueze gaca chee̱ xúgute̱ bénneache xeleajlí lazre̱' Le̱'. Tuz ca naca chee̱ bénneache
ROM 3:23 lawe' da zaj nun xúgute̱ bénneache dul-la, ne quebe zaj naca chee̱' xelexú'e̱ lu xabáa chee̱ Dios.
ROM 3:24 Lu da chawe' chee̱ Dios, cá'aze nune̱' chee̱ xegá'anadxu xrlátaje lau Le̱' lawe' da bexa'u Jesucristo dxi'u lu dul-la da nabágadxu.
ROM 3:25 Dios bzue̱' Jesucristo gutie̱' ne̱ chee̱ xtúl-ladxu chee̱ xegá'anadxu xrlátaje lau Le̱' che dxeajlí lázredxu da be̱n Le̱'. Da nigá guca na chee̱ ble'e Dios naque̱' xrlátaje lácala lu xel-la zren lazre' chee̱' bdee̱' cá'aze ca naca dul-la da be̱ndxu nédxute̱.
ROM 3:26 Gúcaqueze da nigá chee̱ gulé'e lawe' naca Dios xrlátaje na'a, ne gácaqueze̱' xrlátaje gate gucá'ane̱' xrlátaje benne' ca' dxeleajlí lazre̱' Jesús.
ROM 3:27 Na'a, ¿waca gucá'ana szren cuínadxu? ¡Cabata'! ¿Bizr chee̱ na'? Naca na lawe' da nagá'anadxu xrlátaje, quegá lawe' da be̱ndxu ca nadxixruj bea na, san lawe' da guxeajlí lázredxu Cristo.
ROM 3:28 Ca'an naca, dxunna bea na nagá'ana xrlátaje tu benne' lau Dios lawe' da dxeajlí lazre̱' Cristo, ne quegá lawe' da nune̱' ca da nadxixruj bea na.
ROM 3:29 ¿Naca Dios chee̱ze benne' judío ca'? ¿Quegá nácaqueze̱' Dios chee̱ benne' ca' quebe zaj naque̱' judío? Da li nácaqueze̱' Dios chee̱ benne' ca'
ROM 3:30 lawe' da zua tuze Dios, na' Le̱' gucá'ane̱' xrlátaje benne' ca' zaj nadxugu lu be̱la' chee̱' da na' dxunna bea na che dxeleajlí lazre̱' Cristo, ne cá'anqueze gucá'ane̱' xrlátaje benne' ca' quebe zaj nadxugu lu be̱la' chee̱' da na', che dxeleajlí lazre̱' Cristo.
ROM 3:31 Na'a che dxucá'ana Dios xrlátaje benne' dxeleajlí lázreze̱', ¿naca da nadxixruj bea na tu da québedxa zaca? ¡Cabata'! Che dxéajle̱dxu chee̱ Cristo dxúnquezdxu ca dxenná da nadxixruj bea na.
ROM 4:1 ¿Bízraqueze nnadxu chee̱ da ba neza da guca na chee̱ xra xrtáudxu Abraham?
ROM 4:2 Che Abraham bega'ane̱' xrlátaje lau Dios ne̱ chee̱ tu da be̱ne̱', waca gucá'ana szren cuine̱' san quegá lau Dios.
ROM 4:3 ¿Bízraqueze naxúaj na lu dizra' lá'azxa? Dxenná na: Abraham guxeajlí lazre̱' Dios, na' Dios guzí' lu ne̱'e̱ le̱' ca tu benne' xrlátaje.
ROM 4:4 Che nu benne' dxune̱' zrin, lazruj da si'e̱ quebe naca na tu da dxunézrujzedxu, san naca na tu da nabágaquezdxu chee̱'.
ROM 4:5 Che nu benne' quebe bi nune̱', san dxeajlí lázreze̱' Dios, Bénnea' dxucá'ane̱' xrlátaje benne' dul-la, nacan lawe' da dxezí' lu na' Dios xel-la dxeajlí lazre' chee̱' chee̱ xuca'ane̱' le̱' xrlátaje.
ROM 4:6 Cá'anqueze bchalaj David ca naca chee̱ benne' naca da ba neza chee̱' lawe' da dxucá'ana Dios le̱' xrlátaje lácala quebe bi nune̱' chee̱ xegá'ane̱' xrlátaje.
ROM 4:7 Gunná David: Ba neza zrente̱ naca na chee̱ benne' ca' ba bunite lau Dios chee̱' da zrinnaj da zaj nune̱', ne gudée̱' cá'aze dul-la da belún benne' ca'.
ROM 4:8 Ba neza zrente̱ naca na chee̱ benne' ca' quebe dxusebaga Xránadxu le̱' dul-la da belune̱'.
ROM 4:9 ¿Naca ba neza nigá chee̱ze benne' ca' zaj nadxugu lu be̱la' chee̱' da na' dxulé'e na, u che nácaqueze na chee̱ benne' ca' quebe zaj nadxugu lu be̱la' chee̱' da na'? Bache blé'entu' bca'ana Dios Abraham xrlátaje lawe' da guxeajlí lazre̱' Le̱'.
ROM 4:10 ¿Bátazra bca'ane̱' le̱' xrlátaje? ¿Guca na ca gudé gudxugu lu be̱la' chee̱ Abraham da na' dxulé'e na, u che nédxula? Quebe guca na ca gudé na', san nédxula guca na.
ROM 4:11 Gudxugu da na' lu be̱la' chee̱ Abraham ca tu da dxunna bea na chee̱ gulé'e na nagá'ane̱' xrlátaje lau Dios lawe' da guxeajlí lazre̱' Dios gate na' quebe ne chugu da na' lu be̱la' chee̱'. Ca'an guca, naca Abraham xra xúgute̱ benne' dxeleajlí lazre̱' Dios, ne quebe zaj nadxugu da na' lu be̱la' chee̱'. Cá'anqueze dxucá'ana Dios le̱' xrlátaje lawe' da dxeleajlí lazre̱' Le̱'.
ROM 4:12 Da li naca Abraham xra benne' ca' zaj nadxugu da na' lu be̱la' chee̱', na' cá'anqueze dxeleajlí lazre̱' Dios ca be̱n xradxu Abraham gate na' quebe ne chugu lu be̱la' chee̱' da na'.
ROM 4:13 Dios guche̱be lazre̱' chee̱ Abraham, ne chee̱ zri'ine zre sue̱' gaca chee̱ benne' ca' xe̱zr la xu nigá. Quebe guche̱be lazre̱' na chee̱' lawe' da nune̱' ca dxenná bea da nadxixruj bea na, san lawe' da bega'ane̱' xrlátaje lau Dios gate guxeajlí lazre̱' Le̱'.
ROM 4:14 Che xe̱zr la xu nigá gaca na tuze chee̱ benne' ca' dxelune̱' ca da dxenná bea da nadxixruj bea na, dácheze nagá'ana xel-la dxeajlí lazre', ne québedxa zaca da guche̱be lazre' Dios.
ROM 4:15 Lu da nadxixruj bea na xelebía xi' bénneache, san naga quebe ne zrin da nadxixruj bea na, quebe bi zaj nabaga bénneache chee̱ da nadxixruj bea na na'.
ROM 4:16 Ca' naca na, dxezí' lu nnadxu da guche̱be lazre' Dios ne̱ chee̱ xel-la dxeajlí lazre' chee̱dxu Le̱', chee̱ gaca na tu da sidxu cá'aze, ne chee̱ gaca na tu da súatequeze chee̱ xúgute̱ zri'ine zre sua Abraham. Ca' naca na, quegá naca na chee̱ze benne' ca' dxelune̱' ca da nadxixruj bea na, san cá'anqueze naca na chee̱ benne' ca' dxeleajlí lazre̱' Dios ca be̱n Abraham. Ca' naca na, le̱' naque̱' xra xúgute̱dxu
ROM 4:17 lau Dios, Bénnea' guxeajlí lazre' Abraham Le̱'. Naca na ca da naxúaj na lu dizra' lá'azxa, dxenná na: Nuna' lue' xra bénneache zánete̱ cue' xe̱zr la xu. Dios na' dxu'e̱ xel-la nabán chee̱ benne' ca' zaj nate, ne dxuchálaje̱' chee̱ da quebe ne sua ca dxuchálaje̱' chee̱ da ba zua.
ROM 4:18 Abraham guxeajlí lazre̱' Dios, ne guleza lazre̱' si'e̱ da guche̱be lazre' Dios, lácala ba gudé chee̱ si'e̱ da dxebeza lazre̱'. Ca'an guca, guque̱' xra bénneache zánete̱ cue' xe̱zr la xu cáte̱ze ba guzre Dios le̱', gunné̱': “Canite̱ chan zri'ine zre su'.”
ROM 4:19 Abraham ba zue̱' ca tu gaxúa iza, san quebe gute ni'a ne̱'e̱ lu xel-la dxeajlí lazre' chee̱' gate xeajsá lazre̱' zaj naque̱' ca benne' ba zaj nate, le̱' ne zru'ule̱' Sara, ne naca Sara nu'ula wizre.
ROM 4:20 Quebe be̱n chupa lazre̱', san bxren lazre̱' da guche̱be lazre' Dios chee̱', na' gudápadxe̱' xel-la dxeajlí lazre', ne bxren lázredxe̱'. Bca'ana szrene̱' Dios,
ROM 4:21 ne bé̱ntequeze̱' neza napa Dios xel-la waca gune̱' xúgute̱ ca da guche̱be lazre̱'.
ROM 4:22 Chee̱ le̱ na' Dios guzí' lu ne̱'e̱ xel-la dxeajlí lazre' chee̱' chee̱ bca'ane̱' le̱' xrlátaje.
ROM 4:23 Gate dxenná na: “Dios guzí' lu ne̱'e̱ xel-la dxeajlí lazre' chee̱'”, quebe guxuaj na chee̱ tuze Abraham
ROM 4:24 san cá'anqueze chee̱dxu dxi'u lawe' da si' lu na' Dios xel-la dxeajlí lazre' chee̱dxu che dxeajlí lázredxu Bénnea' bsebane̱' Xránadxu Jesucristo ládujla benne' gate,
ROM 4:25 na' naca Jesús Bénnea' bde Dios Le̱' chee̱ gutie̱' ne̱ chee̱ dul-la da nabágadxu dxi'u, ne bsebane̱' Le̱' chee̱ xegá'anadxu xrlátaje lau Dios.
ROM 5:1 Che nagá'anadxu xrlátaje lau Dios lawe' da dxeajlí lázredxu Cristo zúadxu xrlátaje nen Dios ne̱ chee̱ Xránadxu Jesucristo.
ROM 5:2 Cá'anqueze lawe' da dxeajlí lázredxu Cristo, ne̱ chee̱ Le̱' dxezidxu da xrlátaje chee̱ Dios da tu dxeajlé̱zquezdxu, ne dxebéle̱'e̱dxu lawe' da dxebeza lázredxu sidxu da xabáa chee̱ Dios.
ROM 5:3 Quegaze da nigá, san cá'anqueze dxebéle̱'e̱dxu gate dxededxu xel-la zi', lawe' da nézedxu xel-la zi' da dxededxu dxun na dxi'u zren lazre',
ROM 5:4 na' xel-la zren lazre' dxucá'ana na dxi'u xrlátaje lau Dios, na' gate nagá'anadxu xrlátaje dxebeza lázredxu.
ROM 5:5 Quebe naca tu da dácheze da na' dxebeza lázredxu lawe' da ba nuzúa Dios lu lázrdaudxu xel-la zri'i lazre' chee̱' ne̱ chee̱ Be' Lá'azxa, Bénnea' ba nunna Dios dxi'u.
ROM 5:6 Gate na' quebe guzéquedxu guselá cuínadxu, lu zra blé'equeze Dios, gute Cristo waláz chee̱ benne' we̱n da zrinnaj ca'.
ROM 5:7 Sté̱bele̱'e̱ naca che nu benne' gatie̱' waláz chee̱ tu benne' xrlátaje, lácala wexázrelja tu benne' gatie̱' waláz chee̱ tu benne' naque̱' dute̱ li lazre'.
ROM 5:8 Dios dxulé'ene̱' dxi'u ca nazrí'ile̱'e̱ne̱' dxi'u lawe' da gute Cristo waláz chee̱dxu gate ne nácadxu benne' dul-la.
ROM 5:9 Na'a nagá'anadxu xrlátaje lau Dios lawe' da gute Cristo waláz chee̱dxu, ne ba nácaqueze chee̱dxu ladxu ne̱ chee̱ Le̱' lu da zi' da xa', da za za' lu zra ni'.
ROM 5:10 Gate na' ne dxecuídedxu Dios, Le̱' bexune̱' dxi'u tuze nen Le̱' lawe' da gute Cristo waláz chee̱dxu, na' na'a lawe' da nácadxu tuze nen Dios ba nácaqueze chee̱dxu ladxu ne̱ chee̱ xel-la nabán chee̱ Cristo da zúale̱ na dxi'u.
ROM 5:11 Quegá tuze da nigá, san cá'anqueze dxebéle̱'e̱dxu lu da naca chee̱ Dios ne̱ chee̱ Xránadxu Jesucristo, ne ne̱ chee̱ Le̱' nácadxu tuze nen Dios.
ROM 5:12 Ca guca, guxú'u dul-la lu xe̱zr la xu nigá ne̱ chee̱ da be̱n tuze benne', na' bla' xel-la gute ne̱ chee̱ dul-la, ca'an guca gulú'u bénneache lu na' xel-la gute lawe' da zaj nun xúgute̱' dul-la.
ROM 5:13 Nédxula ca bla' da nadxixruj bea na, ba zaj nun bénneache dul-la lu xe̱zr la xu nigá, lácala quebe dxusebaga Dios bénneache dul-la gate quebe ne zrin da nadxixruj bea na.
ROM 5:14 Ca guzú lau lu zra zua Adán ca bzrin zra zua Moisés, gulú'u bénneache lu na' xel-la gute, benne' ca' zaj nune̱' dul-la, lácala quebe belune̱' dul-la ca da be̱n Adán, bénnea' gudichje̱' da gunná be'e Dios, na' Adán na' naque̱' tu da dxulé'eze na ca naca Bénnea' dxal-la' xide̱', Le̱' Cristo.
ROM 5:15 Da zrinnaj da be̱n Adán quebe gaca díl-lale̱be na ca da dxunna Dios dxi'u. Ne̱ chee̱ da zrinnaj da be̱n tuze benne', gulate benne' zante̱, san xel-la weselá da nunna Dios dxi'u cá'aze ne̱ chee̱ xetuze benne', Jesucristo, naca na da zréndxaqueze, ne naca na da ba neza chee̱ benne' zante̱.
ROM 5:16 Da zrinnaj na' da be̱n tuze benne' quebe gaca díl-lale̱be na ca da dxunna Dios dxi'u lawe' da ne̱ chee̱ tuze da zrinnaj, zaj nabaga zria bénneache, san da dxunna Dios dxi'u naca na chee̱ xelexegá'ana xrlátaje benne' zante̱ benne' zaj nune̱' da zrinnaj.
ROM 5:17 Ne̱ chee̱ da zrinnaj da be̱n tuze benne' gulú'u bénneache lu na' xel-la gute, na' benne' ca' zaj nazí' lu ne̱'e̱ da dxunna Dios cá'aze, ne zaj nagá'ane̱' xrlátaje lau Le̱' ba zaj nalé̱' lu na' dul-la, ne dxelezéquene̱' xelenná be'e cuine̱' lu xel-la nabán chee̱' ne̱ chee̱ da nun xetuze benne', Jesucristo.
ROM 5:18 Ca guca zaj nabaga zria xúgute̱ bénneache ne̱ chee̱ da zrinnaj da be̱n tuze benne', Adán, cá'anqueze ne̱ chee̱ da xrlátaje da be̱n xetuze benne', Jesucristo, belexexaca bénneache xrlátaje chee̱ xelaca bane̱'.
ROM 5:19 Ca guca belexexaca bénneache zante̱ benne' dul-la lawe' da quebe bzua dizra' tuze benne', cá'anqueze lawe' da bzua dizra' xetuze benne', xelexegá'ana benne' zante̱ xrlátaje lau Dios.
ROM 5:20 Bzua Dios da nadxixruj bea na chee̱ gunná béadxa na da naca dul-la, na' gate dul-la guxánle̱'e̱ na, ca' guzrendxa xel-la zri'i lazre' chee̱ Dios.
ROM 5:21 Ca naca zua lu na' dul-la gute na bénneache, cá'anqueze zua lu na' xel-la zri'i lazre' chee̱ Dios gucá'ana na dxi'u xrlátaje lau Dios chee̱ gaca bandxu chadía chacanna ne̱ chee̱ Xránadxu Jesucristo.
ROM 6:1 ¿Bízraqueze nnadxu? ¿Gúndxadxu dul-la chee̱ gulé'e láwedxa xel-la zri'i lazre' chee̱ Dios?
ROM 6:2 ¡Cabata'! Ba nácadxu ca benne' gate chee̱ québedxa gundxu dul-la. ¿Ájazra gúndxadxu dul-la?
ROM 6:3 ¿Quebe nézele le'e, xúgute̱dxu dxi'u ba nadxúadxu nisa chee̱ gácadxu tuze nen Jesucristo, naca na ca ba nátedxu tu zren nen Le̱' lu da nadxúadxu nisa?
ROM 6:4 Ca' naca na, ne̱ chee̱ da nadxúadxu nisa naca ca bgáchedxu tu zren nen Le̱', ne nátedxu chee̱ xebandxu, ne súadxu tu lu xel-la nabán cube cáte̱ze guca chee̱ Cristo, bebane̱' ládujla benne' gate ne̱ chee̱ xel-la waca xabáa chee̱ Xre̱'.
ROM 6:5 Che gúcadxu tuze nen Cristo lu xel-la gute, cá'anqueze gácadxu tuze nen Le̱' lu xel-la dxexebán chee̱'.
ROM 6:6 Nezdxu da gúcadxu gate nate ba gudá na le̱'e̱ xaga béguaj tu zren nen Le̱' chee̱ cuía xi' benne' dul-la da gúcadxu chee̱ québedxa gundxu zrin chee̱ dul-la ca benne' zaj nada'u chee̱n.
ROM 6:7 Tu benne' ba nate, ba bedxúaje̱' lu na' dul-la.
ROM 6:8 Che ba gútedxu tu zren nen Cristo, dxuxrén lázredxu gaca bánquezdxu tu zren nen Le̱'
ROM 6:9 lawe' da nezdxu quebe gate Cristo da xula lawe' da ba bebane̱' ládujla benne' gate, na' québedxa xu'e̱ lu na' xel-la gute.
ROM 6:10 Gate gute Cristo, tu lásaze gutie̱' ne̱ chee̱ dul-la waláz chee̱ xúgute̱ bénneache, san na'a naca bane̱', na' lu na' Dios naca bane̱'.
ROM 6:11 Cá'anqueze le'e, le gueque nácale benne' gate chee̱ québedxa gunle dul-la, san naca banle lu na' Dios tu zren nen Xránadxu Jesucristo.
ROM 6:12 Chee̱ le̱ na' québedxa güele lataj nna be'e dul-la be̱la' dxen chee̱le da dxal-la' gate, chee̱ québedxa gun na gunle da dxezá lazre' be̱la' dxen chee̱le.
ROM 6:13 Quebe guzúa cuínale lu na' dul-la chee̱ guchine na le'e lu da cale̱la, san le guzúa cuínale lu na' Dios, gácale ca benne' belexebán ládujla benne' gate, chee̱ guchínene̱' le'e lu da xrlátaje.
ROM 6:14 Québedxa gaca dul-la nna be'e na le'e lawe' da québedxa xu'ule lu na' da nadxixruj bea na, san xu'ule lu na' xel-la zri'i lazre' chee̱ Dios.
ROM 6:15 ¿Bizra xca'? ¿Gundxu dul-la lawe' da québedxa xú'udxu lu na' da nadxixruj bea na, san xú'udxu lu na' xel-la zri'i lazre' chee̱ Dios? ¡Cabata'!
ROM 6:16 Ba nézquezle che guzúa cuínale lu na' tu xránale ca benne' zaj nada'u chee̱ guzúale dizra' chee̱', nadxa nácale benne' zaj nada'u chee̱ xránale, ne dxun na ba xen guzúale dizra' chee̱'. Cá'anqueze naca chee̱le le'e che guzúale dizra' chee̱ dul-la, da gunna na le'e xel-la gute, u che guzúale dizra' chee̱ Dios, chee̱ gácale xrlátaje.
ROM 6:17 Xcalén Dios, lácala gúcale ca benne' zaj nada'u lu na' dul-la, na'a du lázrele dxuzúale dizra' chee̱ dizra' li na', lu da na' bzua cuínale.
ROM 6:18 Gate bedxúajle le'e lu na' dul-la, bexácale we̱n zrin chee̱ da xrlátaje.
ROM 6:19 (Dxuchálajle̱na' le'e ca dxuluchalaj bénneache lawe' da lu be̱la' dxen chee̱le quebe gaca chéajni'ile ca naca da nigá.) Cáte̱ze be̱nle gate na' bzua cuínale lu na' da sban, ne lu na' da zrinnaj chee̱ gunle da zrinnaj, cá'anqueze le gun na'a, le guzúa cuínale lu na' da xrlátaje chee̱ gácaquezle bi chee̱ Dios.
ROM 6:20 Gate ne nácale ca benne' zaj nada'u lu na' dul-la, quebe be̱n na ba xen gunle da xrlátaje.
ROM 6:21 Na'a ¿bizra da ba neza guca chee̱le da ca' dxexedué'ele chee̱n na'a? Da ca' be̱nle nédxute̱ guché̱ na le'e lu xel-la gute.
ROM 6:22 Na'a nadxúajle lu na' dul-la, ne ba nácale we̱n zrin chee̱ Dios chee̱ gácaquezle bi chee̱ Dios da naché̱ na le'e lu xel-la nabán da zeajlí canna.
ROM 6:23 Benne' dxune̱' dul-la dzezi'e̱ lazruj chee̱' da naca na xel-la gute, san da dxúnnaze Dios dxi'u naca na xel-la nabán da zeajlí canna tu zren nen Xránadxu Jesucristo.
ROM 7:1 Bi bícha'dau', le'e núnbeale da nadxixruj bea na, zaj xu'u lu na' da nadxixruj bea na bénneache tuze dxácate̱ ne zaj naca bane̱'.
ROM 7:2 Ca naca da nigá, tu nu'ula nuchaga na' xu'e̱ lu na' benne' chee̱' ne̱ chee̱ da nadxixruj bea na dxácate̱ zue̱' nabane̱', san che gate benne' chee̱', na' xedxúaj zru'ule̱' lu na' da nadxixruj bea na na'.
ROM 7:3 Ca' naca na, che nu'ula na' súale̱ne̱' benne' xula dxácate̱ ne nabán benne' chee̱', gune̱' dul-la gáchajne̱' xrba chee̱ xel-la nuchaga na', san che benne' chee̱' na' gatie̱', xedxúaj zru'ule̱' lu na' da nadxixruj bea na na', na' waca xuchaga ná'le̱ne̱' benne' xula, ne quebe gune̱' dul-la da gáchajne̱' xrba chee̱ xel-la nuchaga na'.
ROM 7:4 Cá'anqueze naca chee̱le le'e, bi bícha'dau', le'e zrágale be̱l-la' dxen chee̱ Cristo, ba nácale ca benne' gate, ne québedxa xu'ule lu na' da bdxixruj be'e Moisés, chee̱ gácale ca zru'ula benne' xula. Na'a nácale ca zru'ula Cristo, Bénnea' bebane̱' ládujla benne' gate, chee̱ gácadxu bi guchine Dios.
ROM 7:5 Dxácate̱ na' be̱ndxu da naca chee̱ be̱la' dxen chee̱dxu, da nadxixruj bea na ble'e na dxi'u naca dul-la da be̱ndxu ca da dxezá lazre' be̱la' dxen chee̱dxu, na' da na' guché̱ na dxi'u lu xel-la gute.
ROM 7:6 Na'a ba nácadxu ca benne' zaj nate, na' ba bedxúajdxu lu na' da nadxixruj bea na da gunná be'e na dxi'u, chee̱ gaca gundxu zrin chee̱ Dios lu xel-la nabán cube da dxunna Be' Lá'azxa dxi'u, ne quegá gundxu zrin na' lu da nadxixruj bea gula da naxúaj na.
ROM 7:7 ¿Bizra nnadxu xca'? ¿Dxun da nadxixruj bea na nácadxu benne' dul-la? ¡Cabata'! Quebe gunezda' da naca na dul-la chela ca ble'e da nadxixruj bea na neda'. Quebe gunezda' naca dul-la sa lazra' da naca chee̱ nu benne' chela ca gunná da nadxixruj bea na: Quebe sa lazru' da naca chee̱ nu benne'.
ROM 7:8 Ble'e da nadxixruj bea na neda' da naca dul-la, na' guque be'eda' zúale̱'e̱ zánete̱ da cale̱la lu xichaj lázrdawa' da guzá lazra', lawe' da gate quebe ne gúnbe'a da nadxixruj bea na, guca dul-la chia' tu da nagache lawa' neda'.
ROM 7:9 Guzúa tu zra gate quebe ne la' da nadxixruj bea, na' gúqueda' naca bana' neda', san gate benda' da na' gunná be'e na neda', bénbe'a da naca dul-la, na' guque be'eda' nabaga' zria, ne dxal-la' gatia'.
ROM 7:10 Ca'an guca, da nadxixruj bea na' naca na chee̱ gunna na neda' xel-la nabán, san guca na chia' ca tu da be̱te neda'
ROM 7:11 lawe' da ble'e da nadxixruj bea na' neda' da naca na dul-la, da na' guzí xe̱ na neda', na' ne̱ chee̱ da nadxixruj bea na' guque be'eda' nabaga' zria, ne dxal-la' gatia'.
ROM 7:12 Ca' naca na, da li naca lá'azxa da nadxixruj bea na. Da nadxixruj bea na' naca na lá'azxa, ne xrlátaje, ne chawe'.
ROM 7:13 ¿Ájazra naca da nigá? ¿Be̱te da nadxixruj bea xrlátaje na' neda'? ¡Cabata'! Dul-la na' be̱te na neda', na' caní guque be'eda' naca na dul-la. Da nigá guque be'eda' ne̱ chee̱ da nadxixruj bea xrlátaje na', na' caní ble'e da nadxixruj bea na' da sbánle̱'e̱ naca dul-la.
ROM 7:14 Nezdxu da nadxixruj bea na naca na da be̱nna Be' Lá'azxa chee̱ Dios dxi'u, san lu be̱la' dxen chia' naca' ca tu benne' nada'u, na' da naca' dxun na guna' dul-la.
ROM 7:15 Neda' quebe dxéajni'ida' da dxaca chia' lawe' da quebe dxuna' da dxaca lazra' guna', san da dxecuídeda' naca na da dxuna'.
ROM 7:16 Che dxuna' da cale̱la da quebe dxaca lazra' guna', da na' dxenná da nadxixruj bea na naca na dul-la, na' nezda' xrlátaje naca da nadxixruj bea na.
ROM 7:17 Ca' naca na, quegá neda' dxuna' da na', san dul-la da zúale̱ neda', le̱ na' dxun na ca'.
ROM 7:18 Nezda' quebe bi zúale̱ be̱la' dxen chia' da naca xrlátaje, lawe' da dxezá lazra' guna' da xrlátaje, san quebe dxezéqueda' guna' na.
ROM 7:19 Quebe dxuna' da xrlátaje da dxaca lazra' guna', san dxuna' da cale̱la da quebe dxaca lazra' guna'.
ROM 7:20 Chee̱ le̱ na', che dxuna' da quebe dxaca lazra' guna', quebe naca neda' dxuna' na, san dul-la da zúale̱ neda' dxun na ca'.
ROM 7:21 Caní naca da dxaca chia': Gate dxaca lazra' guna' da xrlátaje, dxulé'e lawe zúale̱ da cale̱la neda'.
ROM 7:22 Lu xichaj lázrdawa' dxedáneda' da nadxixruj bea Dios,
ROM 7:23 san dxeque be'eda' lu be̱la' dxen chia' zua tu da dxedábaga na ca da dxaca lazra', da naca da nadxixruj bea dul-la da zúale̱ be̱la' dxen chia', na' dxenná be'e na neda'.
ROM 7:24 ¡Edxugúa neda'! ¿Nu guselá neda' lu be̱la' dxen chia' da naché̱ na neda' lu xel-la gute?
ROM 7:25 Xcalén Dios, Le̱' gune̱' na ne̱ chee̱ Xránadxu Jesucristo. Ca' naca, lu xichaj lázrdawa' dxuzúa cuina' lu na' Dios, san lu be̱la' dxen chia' naca' ca tu benne' nada'u lu na' da nadxixruj bea dul-la.
ROM 8:1 Na'a, quebe zaj nabía xi' benne' ca' zaj naque̱' tuze nen Jesucristo, benne' ca' québedxa dxelune̱' da cale̱la cáte̱ze dxenná bea be̱la' dxen chee̱', san dxelune̱' da xrlátaje cáte̱ze dxenná bea Be' Lá'azxa.
ROM 8:2 Da nadxixruj bea na da dxunna Be' Lá'azxa, Bénnea' dxunne̱' dxi'u xel-la nabán lawe' da nácadxu tuze nen Jesucristo, ba bselá na neda' lu na' da bdxixruj be'e Moisés da dxulé'e na neda' naca' benne' dul-la, ne nabaga' zria, ne dxal-la' gatia'.
ROM 8:3 Ba be̱n Dios da quebe guca gun da bdxixruj be'e Moisés, ba gudúe̱' dul-la da zaj nabaga bénneache. Da nadxixruj bea na quebe guca gun na gundxu da xrlátaje lawe' da nate ni'a na' be̱la' dxen chee̱dxu. Chee̱ le̱ na' Dios gusel-le̱' Zrí'inequeze̱', na' guque̱' bénneache ca naca be̱la' dxen chee̱dxu da xu'u na lu na' dul-la, chee̱ gutie̱' ne̱ chee̱ dul-la chee̱dxu, lawe' da nabágadxu zria gátedxu ne̱ chee̱ dul-la da zúale̱ be̱la' dxen chee̱dxu.
ROM 8:4 Caní be̱ne̱' chee̱ gaca gundxu da nadxixruj bea na, dxi'u québedxa dxundxu ca dxenná bea be̱la' dxen chee̱dxu, san dxundxu ca dxenná bea Be' Lá'azxa.
ROM 8:5 Benne' dxelune̱' ca dxenná bea be̱la' dxen chee̱' zaj dxe'e̱ gunne xue da naca chee̱ be̱la' dxen chee̱', san benne' dxelune̱' ca dxenná bea Be' Lá'azxa zaj dxe'e̱ gunne xue da naca chee̱ Be' Lá'azxa.
ROM 8:6 Benne' zaj dxe'e̱ gunne xue da naca chee̱ be̱la' dxen chee̱' welátequeze̱', san benne' ca' zaj dxe'e̱ gunne xue da naca chee̱ Be' Lá'azxa xelaca bane̱', ne xelebeza zri lazre̱'.
ROM 8:7 Benne' zaj dxe'e̱ gunne xue chee̱ be̱la' dxen chee̱' dxelecuídene̱' Dios, lawe' da quebe dxelaca lazre̱', ne quebe gaca xuluzúa cuine̱' lu na' da nadxixruj bea Le̱'.
ROM 8:8 Chee̱ le̱ na' benne' dxelune̱' ca da dxezá lazre' be̱la' dxen chee̱' quebe gaca xelune̱' da dxezaca ba lazre' Dios.
ROM 8:9 Le'e quebe dxunle ca dxenná bea be̱la' dxen chee̱le, san dxunle ca dxenná bea Be' Lá'azxa, lawe' da ba zúale̱ Be' Lá'azxa chee̱ Dios le'e. Benne' quebe zúale̱ Be' Lá'azxa le̱', Be' da nasel-la Cristo, quebe naque̱' bi chee̱ Cristo.
ROM 8:10 Lácala zua Cristo lu xichaj lázrdaule, lu be̱la' dxen chee̱le dxal-la' gátele, san lu xichaj lázrdaule ba xu'ule tu xel-la nabán cube lawe' da bca'ana Dios le'e xrlátaje.
ROM 8:11 Che zúale̱ Be' Lá'azxa le'e, Be' chee̱ Dios, Bénnea' bsebane̱' Jesucristo ládujla benne' gate, Lé̱queze Dios na', Bénnea' bsebane̱' Le̱', gunne̱' xel-la nabán cube chee̱ be̱la' dxen chee̱le da gátequeze na. Da nigá gune̱' ne̱ chee̱ Be' Lá'azxa chee̱ Dios, Bénnea' zue̱' xichaj lázrdaule.
ROM 8:12 Ca' naca na, bi bícha'dau', nabágadxu tu da gundxu, san quegá chee̱ gundxu ca dxenná bea be̱la' dxen chee̱dxu.
ROM 8:13 Che gundxu ca dxenná bea be̱la' dxen chee̱dxu, gátequezdxu, san che ne̱ chee̱ Be' Lá'azxa guzúadxu chalá'ala da dxun be̱la' dxen chee̱dxu, na' gaca bandxu.
ROM 8:14 Xúgute̱ benne' ca' dxelún ca dxulé'e Be' Lá'azxa le̱', benne' caní zaj naque̱' bi chee̱ Dios.
ROM 8:15 Be' Lá'azxa da guzí' lu na'le quebe dxugu'e̱ le'e lu xel-la dxezrebe ca benne' zaj nada'u, san dxune̱' nácale bi chee̱ Dios. Ne̱ chee̱ Be' Lá'azxa nigá dxenne̱dxu: “Xrae”, gate dxuláwizredxu Dios.
ROM 8:16 Lé̱queze Be' Lá'azxa nigá dxexeché̱bele̱ne̱' be' nácadxu, dxenné̱' nácadxu bi chee̱ Dios.
ROM 8:17 Che nácadxu bi chee̱' ca', gácaqueze chee̱dxu da naca chee̱ Dios. Gaca chee̱dxu da dxal-la' gaca chee̱ Cristo che gudedxu xel-la zi' tu zren nen Le̱', chee̱ xegá'ana szrendxu tu zren nen Le̱'.
ROM 8:18 Dxéqueda' ca xel-la zi' da dxededxu na'a quebe gutíl-lele̱be na ca da xabáa da sidxu lu zra da za za'.
ROM 8:19 Da dxelezá lazre', ne da dxelebeza xúgute̱ da nun Dios naca na chee̱ gulé'e Dios bi zaj naca be̱' bi chee̱' ca'.
ROM 8:20 Ca naca da nun Dios belexaca na dácheze, quegá ca gulaca lazre' le̱ na, san lawe' da núnqueze Dios gaca na ca'. Be̱ne̱' zua da dxelebeza lazre na
ROM 8:21 lawe' da xeledxúaj ca da nun Dios lu na' da dxuzría xi' le̱ na, chee̱ gaca ba neza chee̱ na tu zren nen bi ca' zaj naca bi ca' chee̱ Dios lu xel-la weselá chee̱be' da naca xabáa.
ROM 8:22 Nézquezdxu, ca zrin na'a zra, xúgute̱ da nun Dios dxelebezre we̱' na, ne dxeledé na xel-la zi' ca tu nu'ula zue̱' xel-la dxudía chee̱ sane̱' bidau'.
ROM 8:23 Quegá tuze da na' nun Dios dxedé na xel-la zi', san cá'anqueze dxi'u dxededxu xel-la zi', dxi'u na' ba zúale̱ Be' Lá'azxa dxi'u, da naca chee̱dxu tu da dxunna bea na da dxal-la' sidxu. Cá'anqueze dxi'u dxebezre lázredxu dxácate̱ na' dxebézadxu zra gulé'e Dios nácadxu bi chee̱' ca', gate na' gunne̱' cheedxu tu be̱la' dxen cube.
ROM 8:24 Lu da dxebeza lázredxu guládxu, san che gaca lé'edxu da dxebeza lázredxu, québedxa naca na tu da dxebeza lázredxu. Tu da ba dxelé'edxu, québedxa dxun na ba xen cueza lázredxu na.
ROM 8:25 Che da dxebeza lázredxu naca na tu da quebe gaca lé'edxu, dxun na ba xen cuézadxu na lu dute̱ xel-la zren lazre' chee̱dxu.
ROM 8:26 Cá'anqueze Be' Lá'azxa dxácale̱ne̱' dxi'u lu xel-la nate ni'a na' chee̱dxu. Quebe nezdxu guchálajle̱dxu Dios ca dxal-la' gundxu, san Lé̱queze Be' Lá'azxa dxue lazre̱' lau Dios waláz chee̱dxu, ne dxebezre lazre̱' ca da quebe dxezeque' nu nne̱.
ROM 8:27 Dios, Bénnea' dxenné̱'e̱ da zua xichaj lázrdaudxu nézene̱' da dxaca lazre' nne̱ Be' Lá'azxa lawe' da dxue lazre' Be' Lá'azxa lau Dios cáte̱ze naca da dxaca lazre' Dios waláz chee̱ bi zaj naca be̱' chee̱'.
ROM 8:28 Nezdxu dxuchine Dios xúgute̱ da dxaca chee̱dxu chee̱ gucá'ana na dxi'u chawe', dxi'u na' nazri'idxu Le̱', na' Le̱' bláwizre̱' dxi'u ca naca da nune̱' gune̱'.
ROM 8:29 Benne' ca' bénbea Dios nédxudaute̱, be̱n Le̱' nédxudaute̱ xelaque̱' ca naca Zrí'inequeze̱', chee̱ gaca Zrí'ine̱' na' Benne' blau ládujla zánete̱ bi biche̱'.
ROM 8:30 Benne' ca' be̱n Dios nédxudaute̱ ca xelaque̱', cá'anqueze bláwizre̱' le̱', na' benne' ca' bláwizre̱', cá'anqueze bca'ane̱' le̱' xrlátaje, na' benne' ca' bca'ane̱' xrlátaje, cá'anqueze bca'ana szrénqueze̱' le̱'.
ROM 8:31 ¿Bizra nnadxu chee̱ da caní? Che caní dxácale̱ Dios dxi'u, ¿nuzra benne' seque' tábague̱' dxi'u?
ROM 8:32 Dios quebe bezúene̱' zi' gunne̱' dxi'u Zrí'inequeze̱', san bdee̱' Le̱' chee̱ gútie̱' waláz chee̱dxu. ¿Quebe gunne̱' chee̱dxu xúgute̱ da ca' tu zren nen Zrí'ine̱'?
ROM 8:33 ¿Nuzra seque' bi nne̱ chee̱ benne' ca' ba gucá'a Dios le̱'? Lé̱queze Dios na' bca'ane̱' benne' ca' xrlátaje.
ROM 8:34 ¿Nuzra benne' seque' nne̱' zaj nabaga zria benne' ca'? Lé̱queze Cristo gutie̱' waláz chee̱dxu, ne da naca na blaudxa, naque̱' Bénnea' bebán ládujla benne' gate, na' zue̱' chalá'a xabe̱la chee̱ Dios, ga dxue lazre̱' lau Le̱' waláz chee̱dxu.
ROM 8:35 ¿Nuzra seque' xecá'a dxi'u lu na' Cristo, Bénnea' nazrí'ine̱' dxi'u? ¿Wazeque' xel-la zi', u xel-la xache', u da nau zi' xuzre na dxi'u, u xel-la dxedún, u da dxugúa zra lánadxu, u da ste̱be, u xel-la gute?
ROM 8:36 Naca na ca da naxúaj na lu dizra' lá'azxa, dxenná na: Lawe' da nácantu' bi chiu' zúaquezentu' gátentu' xúgute̱ zra. Dxelune̱' netu' ca zríla'dau' ba zaj zúaba' chee̱ xelútie̱'-ba'.
ROM 8:37 Lu xúgute̱ da caní nácadxadxu szren ca benne' dxelezrué'ene̱', ne̱ chee̱ Bénnea' bzri'ine̱' dxi'u.
ROM 8:38 Chee̱ le̱ na' dxuxrén lazra' quebe bi de̱ da seque' gucuasa na dxi'u lu na' Dios, Bénnea' nazrí'ine̱' dxi'u. Ne xel-la gute, ne xel-la nabán, ne gubáz chee̱ xabáa ca', ne be' xriwe̱' dxelenná bea, ne xel-la waca chee̱ be' xriwe̱' ca', ne da dxaca na'a, ne da za za',
ROM 8:39 ne da zua xabáa, ne da zua lu xe̱zr la xu, ne xetú da nun Dios, quebe seque' xecá'a na dxi'u lu xel-la zri'i lazre' chee̱ Dios, da blé'ene̱' dxi'u gate bdee̱' Xránadxu Jesucristo waláz chee̱dxu.
ROM 9:1 Dxennía' da li ca bi chee̱ Cristo, ne quebe dxun lazra', na' xichaj lázrdawa' ne̱ chee̱ Be' Lá'azxa dxe̱ na neda' naca na da li.
ROM 9:2 Dxexíaje lázrele̱'e̱da', ne tu zúazqueze xel-la dxudía lu lázrdawa',
ROM 9:3 na' dxezá lázrtea' cuía xi'a neda', ne xecuasa' nen Cristo, la naca da nigá da gácale̱ na bi bícha'dau' ca', benne' walázr chia', benne' judío.
ROM 9:4 Benne' caní zaj naque̱' zri'ine zre sua Israel, na' Dios guzí' lu ne̱'e̱ benne' caní ca bi chee̱' ca'. Dios guzúe̱' ládujla benne' ca' lu da xabáa chee̱', ne be̱ne̱' tu xel-la wezría nen benne' ca', ne bnézruje̱' le̱' da nadxixruj bea na da bzuaj Moisés, ne xel-la wil-la chee̱ xudau', ne da nache̱be lazre̱'.
ROM 9:5 Zaj naque̱' zri'ine zre zua xra xrtáudxu ca', na' ládujla benne' walázr chee̱' ca', lu be̱la' dxen chee̱' bla' Cristo, Bénnea' naque̱' Dios lawe' xúgute̱ da de̱, ne gaca báqueze̱' chadía chacanna. ¡Ca' gaca na!
ROM 9:6 Quebe nnadxu quebe dxun Dios da dxenná xrtizre̱', san da naca na, quegá xúgute̱ zri'ine zre sua Israel zaj nababa benne' Israel ca' chee̱ Dios.
ROM 9:7 Quegá xúgute̱ zri'ine zre sua Abraham zaj naca xánnie̱' zrí'inequeze̱', san naca na ca guzre Dios le̱', gunné̱': “Lu zri'ine zre sua Isaac xelaca zri'ine zre su'.”
ROM 9:8 Da nigá dxulé'e na dxi'u quebe nu naca bi chee̱ Dios cáte̱ze nálajbe', san zaj naca bi chee̱' benne' ca' zaj nálaje̱' ca naca da guche̱be lazre' Dios.
ROM 9:9 Ca naca da guche̱be lazre' Dios da gunné̱' chee̱ Abraham naca na da nigá: Lu zra da ba gunnía' xida', na' Sara chiu' sane̱' tu zrí'inu'.
ROM 9:10 Quegá tuze da nigá, san cá'anqueze gate Rebeca guzrá' chupa zrí'ine̱' naca tuze xrabe', Isáac, xra xrtáudxu,
ROM 9:11 ne gate bi ca' quebe ne xelálajbe', ne quebe ne xelunbe' da xrlátaje u da cale̱la, Dios guzre̱' Rebeca: “Bi waca chiu' gácabe' we̱n zrin chee̱ bi cuide'.” Da nigá naca na tuze nen da naxúaj lu dizra' lá'azxa, da dxenná na: Bzri'ida' Jacob, ne quegá Esaú. Ca' guca na, begá'ana chawe' da xu'u lu na' Dios chee̱ gudxée̱' ca naca da núnqueze̱', benne' ca' dxaca lazre̱' guláwizre̱', ne quebe dxuché̱'e̱ ca da zaj nune̱'.
ROM 9:14 ¿Bízraqueze nnadxu? ¿Naca Dios Benne' quebe dxun da xrlátaje? ¡Cabata'!
ROM 9:15 Guzre̱' Moisés: “Wezrí lazra' benne' dxaca lazra', ne wexache lazra' benne' dxaca lazra'.”
ROM 9:16 Ca' naca na, quebe naca lawe' da dxaca lázredxu, ne quegá lawe' da dxun zi' lázredxu, san naca na lawe' da dxexache lazre' Dios dxi'u.
ROM 9:17 Lu dizra' lá'azxa Dios dxe̱'e̱ wenná bea chee̱ xe̱zr la xu Egipto: “Be̱na' lue' wenná bea chee̱ gulé'eda' ne̱ chiu' lue' xel-la waca chia', ne chee̱ xelúnbea bénneache La neda' du gabí'i xe̱zr la xu.”
ROM 9:18 Ca' naca na, Dios dxexache lazre̱' benne' dxaca lazre̱', ne cá'anqueze dxu'e̱ lataj gaque̱' zizraj lazre' benne' dxaca lazre̱' gu'e̱ lataj gaque̱' zizraj lazre'.
ROM 9:19 Na'a xi'u neda': Che caní naca na, ¿bizr chee̱ na' dxugapa Dios bénneache dul-la? ¿Núzraqueze seque' tábaga ca da dxaca lazre' Le̱'?
ROM 9:20 Lue', benne', ¿nuzra nacu' lue' chee̱ gutil-lu' Dios dizra'? ¿Waca tu xesu' xe̱ na benne' be̱ne̱' le̱ na: ¿Bizr chée̱ na' be̱nu' neda' caní?
ROM 9:21 Benne' we̱n xesu' zruaga na' wazéquene̱' gune̱' chee̱ guna' na' ca dxaca lazre̱'. Wazéquene̱' gune̱' chee̱ guna' ná'queze tu xesu' da zácadxa, ne tu xesu' da xálaze.
ROM 9:22 ¿Bizra nnáquezdxu che Dios guca lazre̱' gulé'ene̱' dxi'u ca dxuzría xi'e bénneache, ne ca naca xel-la waca chee̱', na' lu xel-la zren lazre' chee̱' bchaga lawe̱' chee̱ benne' ca' lácala dxal-la' xeledée̱' le̱' xel-la zi', na' xelebía xí'te̱queze̱'?
ROM 9:23 Be̱ne̱' na chee̱ blé'ene̱' ca naca xel-la szren chee̱ da xabáa chee̱' lu da naca chee̱dxu dxi'u, nácadxu benne' dxexache lazre̱' Le̱', ne bequé̱'e̱ dxi'u nédxute̱ chee̱ gaca chee̱dxu xabáa na' da nucueza Le̱'.
ROM 9:24 Dios bláwizre̱' dxi'u ládujla benne' judío, ne ládujla benne' quebe zaj naque̱' judío.
ROM 9:25 Naca na ca naxúaj na lu dizra' lá'azxa ca gunná Oseas, gunné̱': Benne' ca' quebe zaj naque̱' bi chia', xapa' le̱' bi chia', na' benne' quebe bzri'ida', xapa' le̱' bi nazri'ite̱ lazra'.
ROM 9:26 Lu lataj naga gucha'-be': Quebe nácale bi chia', ná'queze xapa' le̱' bi chee̱ Dios ban.
ROM 9:27 Ca naca chee̱ benne' Israel ca', Isaías dxenné̱': “Lácala zaj naxán zri'ine zre sua Israel ca naxán xuzre' dxe' dxu'a tu xe̱gu zren, bábaze benne' ca' xelexegá'ane̱' chee̱ xelelé̱'”,
ROM 9:28 lawe' da gun Xránadxu ca dxenná xrtizre̱', guzría xi'e̱ ze̱zr la xu nigá lu da naca xrlátaje, ne chadite.
ROM 9:29 Naca na ca gunná lé̱queze Isaías na' gate nate, gunné̱': Chela Xránadxu, Xrana zánete̱ gubáz chee̱ xabáa, quebe bca'ane̱' zri'ine zre súadxu ca', na' xenítedxu ca guca chee̱ xe̱zre Sodoma, ne chee̱ xe̱zre Gomorra.
ROM 9:30 ¿Bízraqueze nnadxu? Benne' quebe zaj naque̱' judío, ne quebe belexexílaj lazre̱' xelexegá'ane̱' xrlátaje lau Dios, zaj naque̱' benne' belexegá'ane̱' xrlátaje lau Dios, da zéaje̱ na, belexegá'ane̱' xrlátaje lawe' da guleajlí lazre̱' Cristo.
ROM 9:31 Benne' Israel ca', benne' belune̱' ca dxenná da nadxixruj bea na da dxal-la' xucá'ana na le̱' xrlátaje lau Dios, quebe gulezéquene̱' xelexegá'ane̱' xrlátaje lawe̱' Le̱'.
ROM 9:32 ¿Bizr chee̱ na'? Naca na lawe' da quebe belune̱' ba xuzre xelexegá'ane̱' xrlátaje ne̱ chee̱ xel-la dxeajlí lazre' chee̱', san gulaca lazre̱' xelexegá'ane̱' xrlátaje ne̱ chee̱ da belúnqueze̱' le̱'. Chee̱ le̱ na' xeajlecházie̱' lawe' xiaj da dxelechegu bénneache, da na' naca Cristo
ROM 9:33 ca da dxenná Dios lu dizra' lá'azxa chee̱', dxenné̱': Neda' dxuzúa' lu xe̱zre Sión tu benne' naque̱' xiaj da dxelechegu bénneache. Nu benne' cheajlí lazre̱' Le̱' quebe xedué'equezne̱'.
ROM 10:1 Le'e, bi bícha'dau', da dxezá lazra', ne da dxenaba' Dios gune̱' chee̱ benne' Israel ca' naca na chee̱ xelelé̱'.
ROM 10:2 Ca naca chee̱ benne' ca', da li dxelebile lazre̱' da naca chee̱ Dios, san quebe naca na chee̱ xel-la sina li.
ROM 10:3 Quebe zaj nézene̱' ca xrlátaje dxucá'ana Dios bénneache, san dxelaca lazre̱' xulucá'ana xrlátaje cuine̱', ne quebe dxelezí' lu ne̱'e̱ ca xrlátaje dxucá'ana Dios bénneache.
ROM 10:4 Cristo dxune̱' da dxaca lazre' Dios gun da nadxixruj bea na, lawe' da dxucá'ana Cristo xrlátaje xúgute̱ bénneache dxeleajlí lazre̱' Le̱'.
ROM 10:5 Ca naca chee̱ da dxucá'ana xrlátaje bénneache lau Dios da naca na ne̱ chee̱ da nadxixruj bea na, bzuaj Moisés caní: Benne' dxune̱' ca naca da dxenná da nadxixruj bea na gaca bane̱' ne̱ chee̱ le̱ na.
ROM 10:6 Ca naca chee̱ da dxucá'ana xrlátaje bénneache lau Dios da naca na ne̱ chee̱ xel-la dxeajlí lazre' dxenná na caní: Quebe nnau' lu lazrda'u: “¿Núzraqueze benne' cuéne̱' xabáa?” (da naca na chee̱ gulétaje̱' Cristo),
ROM 10:7 ne quebe nnau': “¿Núzraqueze benne' xétaje̱' lataj chul-la chee̱ benne' gate ca'?” (da naca na chee̱ xebéaje̱' Cristo ládujla benne' gate.)
ROM 10:8 ¿Bizra da na' dxenná na: Dizra' na' zua na gágute̱ naga zu', lu dxu'u ne lu lazrda'u? Dizra' nigá naca na dizra' chawe' da dxuzénentu' bénneache chee̱ xeléajle̱'e̱ chee̱ Cristo.
ROM 10:9 Che nen dxu'u dxennáu' naca Cristo Xranu', ne che lu lazrda'u dxeajlí lazru' Dios bsebane̱' Le̱' ládujla benne' gate, nadxa lau'.
ROM 10:10 Lu lázrdaudxu dxeajlí lázredxu chee̱ xegá'anadxu xrlátaje lau Dios, ne nen dxú'adxu dxexeché̱bedxu nácadxu chee̱ Cristo chee̱ ladxu.
ROM 10:11 Lu dizra' lá'azxa dxenná na: Nu benne' dxeajlí lazre̱' Le̱' quebe xedué'ene̱'.
ROM 10:12 Dios quebe dxebée̱' benne' judío ca', u benne' quebe zaj naque̱' judío lawe' da Lé̱queze Xránadxu na' naque̱' Xrana xúgute̱ bénneache, na' dxunézrujle̱'e̱ xúgute̱ benne' ca' dxululáwizre̱' Le̱'.
ROM 10:13 Naca na ca da dxenná na: Xúgute̱ benne' dxululáwizre̱' La Xránadxu xelelé̱'.
ROM 10:14 Na'a ¿ájazra xululáwizre̱' Le̱' che quebe ne xeléajle̱'e̱ chee̱'? ¿Ájazra xeléajle̱'e̱ chee̱' che quebe ne xelenne̱' nu dxuchalaj chee̱'? ¿Ájazra xelenne̱' che quebe nu chilá' benne' guzenne̱' le̱'?
ROM 10:15 ¿Ájazra xuluzenne̱' bénneache che quebe nu nasel-la le̱'? Naca na ca dxenná dizra' lá'azxa, dxenná na: Xrtante̱ naca lau Dios da dxelún benne' dxeledé̱' dxuluzenne̱' bénneache dizra' chee̱ xel-la dxebeza zri lazre', ne dizra' chawe'.
ROM 10:16 Quegá xúgute̱ bénneache dxelezí' lu ne̱'e̱ dizra' chawe' nigá. Naca na ca gunná Isaías, gunné̱': “Xran, ¿zua nu benne' ba guxéajle̱'e̱ ca da dxuchálajntu'?”
ROM 10:17 Ca' naca na, dxéajle̱dxu chee̱' gate dxénedxu, na' da dxal-la' xénedxu naca na da gunná Cristo.
ROM 10:18 Na'a dxenaba': ¿Quebe ne xelenne̱'? Da li ba belenne̱'. Lu dizra' lá'azxa dxenná na: Da dxuluzén benne' caní bache belén bénneache du ca naca xe̱zr la xu nigá. Dizra' chee̱ benne' caní bache belén bénneache du gabí'i xe̱zr la xu.
ROM 10:19 Xecha lasa dxenaba': ¿Quebe ne xeleque be'e benne' Israel ca da gunná Dios? Za'a Moisés bzuaje̱' ca gunná Dios, gunné̱': Neda' guna' gácale benne' se̱ lazre' chee̱ tu xe̱zre benne' quebe ne xelaque̱' tu xe̱zre. Guna' zrá'ale tu xe̱zre benne' quebe ne xeléajni'ine̱'.
ROM 10:20 Gudé na' bzuaj Isaías ca gunná Dios, gunné̱': Benne' quebe belexílaje̱' neda' belexezrélene̱' neda'. Ble'e lawa' benne' ca' quebe bululáwizre̱' neda'.
ROM 10:21 Ca naca chee̱ benne' Israel, gunná Dios: “Tu dxuláwizrazqueza' benne' quebe dxuluzúe̱' dizra', ne dxeledábague̱' xrtizra'.”
ROM 11:1 Na'a dxenaba': ¿Ba bzua Dios chalá'ala xe̱zre chee̱', benne' Israel ca', tu chí'izqueze? ¡Cabata'! Néda'queza' naca' benne' Israel. Neda' nabábale̱na' zri'ine zre sua Abraham, ne nabábale̱na' zri'ine zre sua Benjamín.
ROM 11:2 Gate nate Dios guzí' lu ne̱'e̱ benne' Israel ca', na' na'a quebe nuzúe̱' benne' ca' chalá'ala. ¿Quebe nézele le'e da dxenná dizra' lá'azxa ca naca chee̱ Elías, bénnea' bchálaje̱' waláz chee̱ Dios, gate na' gudawe̱' zria benne' Israel ca' lau Dios? Gunné̱':
ROM 11:3 “Xran, ba belútie̱' benne' buluchálaje̱' waláz chiu', ne buluzría xi'e̱ lataj lá'azxa chiu' ca', na' tuza' neda' nagá'ana', na' cá'anqueze neda' dxelaca lazre̱' xelútie̱'.”
ROM 11:4 Dios beche̱be̱', guzre̱' Elías: “Ba gucá'a chia' ga xun chi gaxúa benne' quebe ne xuluzúa zribe̱' lau bedáu' xiaj xaga le̱ na Baal.”
ROM 11:5 Cá'anqueze na'a ba begá'ana tu cue' benne' ca', benne' ba gucá'a Dios chee̱' lu xel-la zri'i lazre' chee̱'.
ROM 11:6 Na'a, che naca na ne̱ chee̱ xel-la zri'i lazre' chee̱ Dios, quebe naca na ne̱ chee̱ da gaca gun nu benne', lawe' da la guca na ca', na' xel-la zri'i lazre' chee̱ Dios quebe naca na xel-la zri'i lazre'.
ROM 11:7 ¿Bizra xca'? Benne' Israel ca' quebe belezrué'ene̱' da dxelexílaje̱', san benne' ca' gucá'a Dios le̱' belezrué'ene̱' na, san xezícadxa benne' ca' gulaque̱' benne' zide'.
ROM 11:8 Naca ca dxenná dizra' lá'azxa, dxenná na: Dios be̱'e̱ lataj gulaca benne' ca' lázrdau zide'. Be̱'e̱ le̱' lataj gulaque̱' ca benne' la chul-la, ne ca benne' cwezru' ca', na' caní zaj naque̱' na'a.
ROM 11:9 Cá'anqueze gunná Davíd, gunné̱': Ca naca laní chee̱ benne' ca' be̱n xelaca na ca tu xralaj, u ca tu da que̱la na le̱' chee̱ cheajlecházie̱', na' gudé Dios le̱' lu da ba xa'.
ROM 11:10 Xiaj lawe̱' xelechul-la na chee̱ québedxa xelelé'ene̱', na' xelelégüe̱' chadía chacanna zran xua da naca na dul-la chee̱'.
ROM 11:11 Na'a dxenaba': ¿Tu chi'ize belenite benne' judío ca' gate xeajlecházie̱'? ¡Cabata'! Gate benne' judío ca' guledábague̱' xrtizra Dios, guta' lataj xelelá benne' quebe zaj naque̱' judío, chee̱ xelezúa benne' judío ca' lu xel-la dxezá lazre'.
ROM 11:12 Na'a, che da zrinnaj da belún benne' judío ca' be̱n na guca tu da ba neza chee̱ xúgute̱ bénneache, ne che gate belenitie̱' guca na tu da ba neza chee̱ benne' quebe zaj naque̱' judío, gaca na tu da ba neza zrendxa gate xelexú'u xúgute̱ benne' judío ca' lu na' Dios.
ROM 11:13 De̱ tu da dxal-la' xapa' le'e, núlale quebe nácale benne' judío. Lawe' da gusel-la Dios neda' chee̱ guzenda' benne' quebe zaj naque̱' judío xrtizre̱', dxé'le̱'a gunne xue chee̱ zrin nabaga' guna'.
ROM 11:14 Dxaca lazra' guna' xelezúa lu xel-la dxezá lazre' bal-la benne' walázr chia' chee̱ xelelé̱'.
ROM 11:15 Che gate bzua Dios chalá'ala benne' judío ca', belexaca tuze nen Dios benne' quebe zaj naque̱' judío, ¿ájazra gaca gate xelexaca benne' judío ca' tuze nen Dios? Gaca na ca xelexaca bane̱' ládujla benne' gate.
ROM 11:16 Che guzúadxu lau Dios xeta nedxu chee̱ cua, na' nácaqueze chee̱' dute̱ cua na'. Na' che naca chee̱ Dios lue xaga, zaj nácaqueze chee̱' ca naca zruze xaga na'.
ROM 11:17 Benne' judío ca' zaj naque̱' ca zrúzequeze tu xaga olivo, san bal-la zruze guledxugu na, na' lue' beda'u waláz chee̱ zruze ca', ne nacu' ca tu zruze xaga olivo xixre'. Ca'an guca, gucu' tuze nen lue xaga olivo chawe' na', ne dxezi'u ba neza xel-la nabán chee̱ xaga olivo na'.
ROM 11:18 Quebe gucá'ana szren cuinu' lawe' zrúzequeze xaga olivo na'. Che dxucá'ana szren cuinu', naca be'e quebe dxugagu' lue' lue xaga na', san luéqueze na' dxugagu na lue'.
ROM 11:19 Wannáu': Awe', guledxugu zruze ca' chee̱ cheajxedá'a neda' le̱'e̱ xaga olivo na'.
ROM 11:20 Ca'an naca, san guledxugu na lawe' da quebe guléajle̱'e̱ chee̱ Dios, na' lue' bedá'azu' le̱'e̱ xaga na' lawe' da dxéajle̱'u. Ca'an naca, quebe gucá'ana szren cuinu', san bxue xanne' cuinu'.
ROM 11:21 Che Dios quebe bnite lawe̱' chee̱ benne' ca' zaj naque̱' ca zrúzequeze xaga na', na' bebéaje̱' le̱', cá'anqueze quebe gunite lawe̱' chiu' lue', na' xebéaje̱' lue'.
ROM 11:22 Le nna'xque ca xrlátaje naca Dios, na' cá'anqueze ca snia naque̱'. Guque̱' snia nen benne' ca' xeajlecházie̱', na' naque̱' chawe' nen lue'. Dxun na ba xen tu gúnzquezu' ca dxal-la' gunu' chee̱ tu sí'zquezu' da chawe' chee̱', lawe' da che quebe gunu' caní, cá'anqueze wegüe̱' lue'.
ROM 11:23 Che benne' judío ca' xelexexéaj lazre̱', na' xelexaque̱' tuze nen xaga olivo na', lawe' da napa Dios xel-la waca xune̱' le̱' tuze.
ROM 11:24 Lue' quebe nacu' judío, san guchugue̱' lue' le̱'e̱ tu xaga olivo xixre', na' bexune̱' lue' tuze nen xaga olivo chawe' na', da quebe nu dxun. Benne' judío ca', benne' zaj naque̱' ca zrúzequeze xaga olivo chawe' na', gácadxa chawe' xexune̱' le̱' tuze nen xaga olivo cheé̱queze̱' na'.
ROM 11:25 Le'e, bi bícha'dau', dxaca lazra' chéajni'ile chee̱ da nagache nigá, chee̱ quebe guéquele nácale benne' sina. Benne' Israel ca' zaj naque̱' benne' lázrdau zide' tu chí'idauze, ca zrin zra xelexú'u lu na' Dios xúgute̱ benne' quebe zaj naque̱' judío.
ROM 11:26 Gate gaca na, nadxa xelelá xúgute̱ benne' Israel ca' lawe' da naxúaj lu dizra' lá'azxa da dxenná na: Benne' weselá ze̱'e̱ Sión, na' cue̱' da cale̱la da zaj nabaga zri'ine zre sua Jacob.
ROM 11:27 Da nigá gaca xel-la wezría guna' nen benne' ca', gate neda' cua' dul-la chee̱'.
ROM 11:28 Ca naca chee̱ dizra' chawe' chee̱ Cristo, zaj naca benne' judío ca' ca benne' dxelecuídene̱' Dios chee̱ gaca da ba neza chee̱le le'e, san Dios ne nazrí'ine̱' benne' ca' lawe' da guqué̱'e̱ xra xrtawe̱' ca'.
ROM 11:29 Ca da dxunna Dios, quebe xequé̱'e̱ na, ne quebe dxuzúe̱' chalá'ala nu ba bláwizre̱'.
ROM 11:30 Le'e nédxute̱ gudábagale xrtizra Dios, san na'a, lawe' da guledábaga benne' judío ca' xrtizre̱', Dios dxexache lazre̱' le'e.
ROM 11:31 Cá'anqueze na'a, benne' judío ca' dxeledábague̱' xrtizra Dios, san naca na chee̱ xexache lazre' Dios le̱' ca dxexache lazre̱' le'e.
ROM 11:32 Dios be̱' lataj xúgute̱' guledábague̱' xrtizre̱' chee̱ gaca xexache lazre̱' xúgute̱'.
ROM 11:33 Szrente̱ naca xel-la gunní'a chee̱ xel-la sina, ne xel-la dxéajni'i chee̱ Dios. Quebe séquedxu chéajni'idxu ca da dxuchi'e̱, ne quebe gaca gúnbea xánnedxu da dxune̱'.
ROM 11:34 ¿Núzraqueze gaca chéajni'i ca da xu'u xichaj lázrdau Xránadxu? ¿Núzraqueze gaca guzéajni'i Le̱'?
ROM 11:35 ¿Núzraqueze benne' bi bnézruje̱' chee̱ Xránadxu, chee̱ gun na ba xen bi xuzri'e̱ chee̱ bénnea'?
ROM 11:36 Xúgute̱ da dxelé'edxu zá'aca na lu na' Dios, na' Le̱' be̱ne̱' da ca', ne zaj naca na chee̱ Lé̱queze̱'. ¡Gaca ba Dios chadía chacanna! ¡Ca'an gaca na!
ROM 12:1 Ca'an naca, bi bícha'dau', lu xel-la dxexache lazre' chee̱ Dios, dxata' xúeda' le'e guzúa cuínale lu na' Dios ca tu guna' ban, da naca na lá'azxa, ne da xezaca ba lazre' Dios. Da nigá naca na tu da gucá'ana szrene Dios da dxal-la' gunle.
ROM 12:2 Québedxa gunle ca dxelún bénneache chee̱ xe̱zr la xu nigá, san le guchá cuínale chee̱ caní zra dute̱ ca naca lu xichaj lázrdaule. Ca'an gaca, gúnbeale da dxaca lazre' Dios gunle, da na' naca xrlátaje, ne da dxezaca ba lazre' Dios, ne da naca na li lazre'.
ROM 12:3 Ne̱ chee̱ da nusebaga Dios neda' lu da chawe' chee̱' dxapa' xúgute̱le le'e quebe nu benne' dxal-la' gucá'ana cuine̱' szrendxa ca dxal-la' gune̱', san dxal-la' guxúe̱' ca da naque̱' lu xel-la dxexruj lazre', cáte̱ze naca xel-la dxeajlí lazre' da nunezruj Dios le̱'.
ROM 12:4 Ca naca chee̱ be̱l-la' dxen chee̱dxu, zánete̱ da napa na, na' xúgute̱ da ca' quebe dxelún na tuze zrin,
ROM 12:5 cá'anqueze dxi'u, láqueze naxandxu, nácadxu ca tuze be̱l-la' dxen chee̱ Cristo, ne nácadxu tuze tudxu xetudxu ca zaj naca da ca' napa tu be̱l-la' dxen chee̱ nu benne'.
ROM 12:6 Dios nunne̱' dxi'u cha chee̱dxu ca da gaca gundxu ca da dxaca lazre̱' gunne̱' tu tudxu. Dxal-la' guchine xánnedxu ca da nunne̱' dxi'u. Che nunne̱' dxi'u chee̱ guchálajdxu waláz chee̱', dxal-la' gundxu na dute̱ xel-la dxeajlí lazre' da nápadxu.
ROM 12:7 Che nunne̱' dxi'u chee̱ gundxu zrin chee̱ ljwézredxu, dxal-la' gundxu na cháwe'dau'. Che nunne̱' dxi'u chee̱ gusé̱dedxu bénneache, dxal-la' guse̱de xánnedxu le̱'.
ROM 12:8 Che nunne̱' dxi'u chee̱ gutípadxu lazre' bénneache, dxal-la' gutipa xánnedxu lazre' le̱'. Che nunne̱' dxi'u chee̱ bi gunézrujdxu, dxal-la' gundxu na du lázredxu. Che nunne̱' dxi'u chee̱ nne̱ xuedxu, dxal-la' guxúe xánnedxu ca dxundxu na. Che nunne̱' dxi'u gácale̱dxu benne' xache' ca', dxal-la' gundxu na dute̱ xel-la dxebé chee̱dxu.
ROM 12:9 Le zri'i ljwézrele du lázrele tule xetule. Le guzúa chalá'ala da cale̱la, ne le gun da xrlátaje.
ROM 12:10 Dxal-la' zri'i ljwézrele tule xetule ca nazri'ile bi bíchequezle. Le gapa ba lá'ana ljwézrele, ne le güe lataj tule xetule.
ROM 12:11 Le gun zi' lázrele, ne quebe gácale zrawe̱de, na' le gun zrin chee̱ Xránadxu dute̱ lázrdaule.
ROM 12:12 Le sua xel-la dxebé lu da dxebeza lázrele. Le gaca dxexruj lazre' gate dxedele xel-la zi'. Le guchálajle̱teze Xránadxu.
ROM 12:13 Le gunezruj da dxelexazrje benne' ca' zaj naque̱' bi chee̱ Dios. Le si' lu na'le du lázrele benne' ca' zá'aque̱' dxelenabe̱' le'e.
ROM 12:14 Le naba da chawe' chee̱ benne' ca' zaj nau zi' xuzre̱' le'e. Le naba da xrlátaje chee̱', ne quebe nábale da cale̱la chee̱ benne' ca'.
ROM 12:15 Le be nen benne' dxelebé, ne le xexache lazre' benne' ca' dxelebezre xache̱'.
ROM 12:16 Le gaca tuze nen ljwézrele tule xetule. Quebe gucá'ana szren cuínale, san le gaca tuze nen benne' dxexruj lazre' ca'. Quebe guéquele ba nápale dute̱ xel-la sina.
ROM 12:17 Quebe xebi'ile da cale̱la chee̱ benne' nune̱' chee̱le da cale̱la. Le gun ba xuzre gunle da xrlátaje lau xúgute̱ bénneache.
ROM 12:18 Che naca chee̱le, le gun naga ze̱ lau séquele cueza zri lázrele nen xúgute̱ bénneache.
ROM 12:19 Bi bícha'dau' nazri'ite̱ lazra', quebe xebéaj lázrele, san le güe lataj Dios xebéaj lazre̱', lawe' da naxúaj lu dizra' lá'azxa da dxenná na: Chia' neda' naca xebéaj lazra'. “Neda' xebi'a chee̱ bénneache,” dxenná Xránadxu.
ROM 12:20 Cá'anqueze dxenná na: Che dxedún benne' dxecuídene̱' lue', bnezruj da gawe̱', na' che dxebílene̱', bnezruj da xí'aje̱', lawe' da gate dxunle caní, xedué'e bénnea'.
ROM 12:21 Quebe gu'u lataj da cale̱la nna be'e na lue', san gunná be'e da cale̱la ne̱ chee̱ da xrlátaje da dxunu'.
ROM 13:1 Xúgute̱dxu dxal-la' guzúadxu dizra' chee̱ benne' xu'u lawe', lawe' da quebe nu chilá' benne' xu'u lawe' che quebe nunna Dios le̱' xel-la dxenná bea chee̱'. Benne' xu'u lawe' ca' zaj naque̱' benne' nuzúa Dios.
ROM 13:2 Chee̱ le̱ na' nu benne' dxedábague̱' benne' xu'u lawe' dxedábague̱' ca da nun Dios. Benne' dxeledábague̱' caní zaj nabague̱' zria, na' Dios xuzri'e̱ chee̱' da xexal-le̱'.
ROM 13:3 Benne' ca' dxelenná be'e̱ quebe nuzúa Dios le̱' chee̱ xuluchebe̱' benne' dxelune̱' da xrlátaje, san chee̱ xuluchebe̱' benne' dxelune̱' da cale̱la. ¿Dxaca lazru' quebe zrebu' benne' xu'u lawe'? Be̱n da xrlátaje, na' benne' xu'u lawe' ca' xelape̱' ba lá'ana lue'
ROM 13:4 lawe' da zaj naque̱' we̱n zrin chee̱ Dios chee̱ xelune̱' chiu' da xrlátaje. Che dxunu' da cale̱la, dxal-la' zrebu' lawe' da quegá dácheze zaj nape̱' xel-la dxenná bea xelexebi'e̱ chee̱ bénneache lawe' da zaj naque̱' we̱n zrin chee̱ Dios chee̱ xuluzúe̱' lu da ba xa' benne' ca' dxelune̱' da cale̱la.
ROM 13:5 Chee̱ le̱ na', dxun na ba xen guzúadxu dizra' chee̱ benne' xu'u lawe', quegá tuze chee̱ quebe xuluzúe̱' dxi'u lu da ba xa', san lawe' da nezdxu naca na da nadxixruj bea Dios.
ROM 13:6 Chee̱ le̱ na' dxízrujle da dxebágale chee̱ xu'u lawe', lawe' da zaj naca benne' xu'u lawe' we̱n zrin chee̱ Dios, ne dxelún xánnie̱' zrin chee̱' na'.
ROM 13:7 Le quizruj xúgute̱ bénneache ca da nabágale chee̱'. Da nabágale chee̱ benne' wechizruj, le quizruj da nabágale. Da nabágale chee̱ xu'u lawe', le quizruj na. Benne' dxal-la' gápale ba lá'ana, le gape̱' ba lá'ana. Benne' dxal-la' gucá'ana szrenle, le gucá'ane̱' szren.
ROM 13:8 Quebe dxal-la' cue zria chee̱le nen nu benne' san tuze chee̱ zri'ile le̱' ca dxal-la' gunle chee̱ le sa' ljwézrele tule xetule. Che gunle da nigá, na' gunle da nadxixruj bea na.
ROM 13:9 Naga zaj naxúaj da nadxixruj be'e Dios dxenná na: Quebe súale̱nu' zru'ula benne' xula. Quebe gutiu' benne'. Quebe cuanu'. Quebe gun lazru' chee̱ benne'. Quebe sa lazru' da naca chee̱ benne'. Xúgute̱ da nadxixruj bea caní, ne xúgute̱ da nadxixruj bea xezícadxa dxun bénnea' dxuzúe̱' dizra' da nadxixruj bea na' dxenná na: Bzri'i le sa' ljwezru' ca nazrí'i cuinu'.
ROM 13:10 Bénnea' nazrí'ine̱' le sa' ljwezre̱' quebe dxune̱' da cale̱la chee̱ le sa' ljwezre̱' na'. Ca'an naca, bénnea' nazrí'ine̱' le sa' ljwezre̱' dxuzúe̱' dizra' chee̱ da nadxixruj bea na.
ROM 13:11 Ca naca da caní, le guxúe xanne' ca naca zra zúadxu na'a lawe' da ba bzrin zra xebandxu lu bchigala lawe' da ba zua gágudxa zra ladxu lu da nácadxu ca guzúa na gate na' guzú lau dxéajle̱dxu.
ROM 13:12 Ba dxedé chee̱ da chul-la, ne ba za te zra. Chee̱ le̱ na' dxal-la' gusandxu da dxelún bénneache lu da chul-la, na' gácadxu ca tu benne' zeje̱' wedil-la dxacu zra lane̱' xia, chee̱ tadxu lu xel-la naxaní' chee̱ Dios.
ROM 13:13 Dxal-la' tadxu li lazre' ca dxal-la' tadxu te zra. Quebe dxal-la' xí'ajdxu da dxuzuzre na bénneache, ne quebe gagu xrátadxu. Quebe gundxu da sban, ne da cale̱la. Quebe tíl-lale̱dxu le sa' ljwézredxu, ne quebe gácadxu xa lazre'.
ROM 13:14 Xránadxu Jesucristo gácaqueze̱' ca zra lánadxu xia, na' quebe gundxu da dxezá lazre' be̱la' dxen chee̱dxu.
ROM 14:1 Che tu bi bíchedxu quebe ne se̱ cháchabe' lu xel-la dxeajlí lazre', le si' lu na'le le̱be', san quegá chee̱ gutíl-lale̱le le̱be' dizra' ca naca da quebe dxun na ba xen.
ROM 14:2 Ca naca na, zaj zra' benne' dxeleajlí lazre̱' naca chee̱' xelawe̱' bal-la bi de̱, san zaj zra' benne' xezícadxa quebe ne xelezé̱ chache̱' lu xel-la dxeajlí lazre', na' dxeléquene̱' waca xelawe̱' tuze xixre' cuan.
ROM 14:3 Benne' dxawe̱' xúgute̱ da ca' quebe dxal-la' guzúe̱' chalá'ala bénnea' nadxúaj nadxeze da dxawe̱', na' benne' nadxúaj nadxeze da dxawe̱' quebe dxal-la' si tizre̱' bénnea' dxawe̱' bal-la bi de̱, lawe' da nazí' lu na' Dios bénnea'.
ROM 14:4 ¿Nuzra nacu' lue' dxezí tizru' we̱n zrin chee̱ Xránadxu? Che xegá'ane̱' xrlátaje, u che quegá, naca na da nabaga Xránadxu. Xegá'ane̱' xrlátaje lawe' da napa Xránadxu xel-la waca chee̱ gucá'ane̱' le̱' xrlátaje.
ROM 14:5 Caní naca xetú. Zaj zra' benne' dxulupá'anadxe̱' tu zra ca xetú zra, na' zaj zra' benne' dxeléquene̱' tuz ca zaj naca xúgute̱ zra. Tu tudxu dxal-la' se̱ cháchadxu lu xichaj lázrdaudxu ca naca da caní.
ROM 14:6 Benne' dxupá'ane̱' tu zra dxune̱' na chee̱ gape̱' ba lá'ana Xránadxu, na' bénnea' quebe dxupá'ane̱' zra na' dxune̱' ca' chee̱ gape̱' ba lá'ana Xránadxu. Benne' dxawe̱' bal-la bi de̱ dxune̱' na chee̱ gape̱' ba lá'ana Xránadxu lawe' da dxe̱'e̱ Dios: Xcalenu', na' bénnea' nadxúaj nadxeze da dxawe̱' dxune̱' na chee̱ gape̱' ba lá'ana Xránadxu, na' cá'anqueze dxe̱'e̱ Dios: Xcalenu'.
ROM 14:7 Netudxu dxi'u naca bandxu chee̱ gundxu da naca cheé̱zedxu, ne quegá gátedxu lu da naca cheé̱zedxu.
ROM 14:8 Che naca bandxu, naca na chee̱ gaca ba Xránadxu. Ca' naca na, che gaca bandxu, u che gátedxu nácadxu bi chee̱ Xránadxu.
ROM 14:9 Cristo gutie̱', ne bebane̱' chee̱ gaque̱' Xrana benne' gate ca', ne Xrana benne' ban ca'.
ROM 14:10 Na'a lue', ¿bizr chee̱ na' quebe dxelé'enu' chawe' ca da dxun le sa' ljwezru', bi bíchedxu? ¿Bizr chee̱ na' dxuzú' le̱' chalá'ala? Xúgute̱dxu dxal-la' zrindxu lau Cristo chee̱ guchi'e̱ ca da nundxu tu tudxu.
ROM 14:11 Naxúaj lu xiche lá'azxa da dxenná na: Dxenná Xránadxu: “Dxuzetaj cuina' dxennía': Xúgute̱ bénneache xuluzú zribe̱' lawa'. Xúgute̱' xelexeche̱be̱' lawe' lau naca' Dios.”
ROM 14:12 Ca'an naca, tu tudxu dxi'u dxun na ba xen gulé'edxu ca da nundxu lau Dios.
ROM 14:13 Chee̱ le̱ na' québedxa dxal-la' si tízradxu tudxu xetudxu. Le gun ba xuzre quebe bi gunle da gun na ga chegu bi bíchele, u da gun na cheajcházie̱' lu dul-la.
ROM 14:14 Dxuxrén lazra' Xránadxu Jesús, ne nezda' quebe bi da dxágudxu nácaqueze sban, san che tu bi bíchedxu dxéquebe' de̱ tu da dxágudxu da naca na sban, chee̱ le̱be' naca na da sban.
ROM 14:15 Che ne̱ chee̱ da dxagu' lue', dxunu' dxeajchaze bi bichu', quebe dxunu' da naca chee̱ xel-la zri'i lazre'. Quebe gunu' cuía xi' tu benne', bénnea' gute Cristo waláz chee̱', lawe' da dxaca lazru' lue' gagu' bi xel-la wagu.
ROM 14:16 Quebe bi gunle da güe lataj nu nne̱ schanní' chee̱ da dxéquele naca na da xrlátaje.
ROM 14:17 Chee̱ súadxu naga dxenná be'e Dios dxi'u quebe naca na chee̱ da dxágudxu, u chee̱ da dxí'ajdxu, san naca na chee̱ xegá'anadxu xrlátaje lau Dios, ne chee̱ gápadxu xel-la dxebeza zri lazre', ne chee̱ súadxu xel-la dxebé, da ca' nápadxu ne̱ chee̱ Be' Lá'azxa.
ROM 14:18 Nu benne' dxune̱' zrin chee̱ Cristo caní dxune̱' da dxezaca ba lazre' Dios, na' dxelapa bénneache le̱' ba lá'ana.
ROM 14:19 Ca' naca na, dxal-la' gundxu da dxulusá na xel-la dxebeza zri lazre', ne da dxuluzúa chacha na dxi'u.
ROM 14:20 Quebe guzría xi'u da nun Dios lu xichaj lázrdau le sa' ljwezru' ne̱ chee̱ da dxagu'. Da li xúgute̱ da dxágudxu zaj naca na xrlátaje, san quebe naca xrlátaje bi gágudxu da gun na cheajchaze benne' xula lu dul-la.
ROM 14:21 Xrlátaje naca quebe gágudxu be̱la', ne quebe xí'ajdxu xrise uva wal-la, ne quebe bi gundxu da gun na cheajchaze bi bíchedxu lu dul-la, u da guzría xi na xel-la dxeajlí lazre' chee̱'.
ROM 14:22 Che napu' xel-la dxeajlí lazre' bi gaca gunu', dxal-la' gunu' na lué'queze lau Dios. Ba neza naca na chee̱ benne' quebe guzría xi' cuine̱' ne̱ chee̱ da dxéquene̱' naca na da xrlátaje gune̱'.
ROM 14:23 Bénnea' dxawe̱' da dxéquene̱' quebe dxal-la' gawe̱', nabague̱' zria gate dxawe̱' na lawe' da dxawe̱' da quebe dxeajlí lazre̱' naca chee̱' gawe'. Xúgute̱ da dxundxu zaj naca dul-la che quebe dxuxrén lázredxu zaj naca na xrlátaje.
ROM 15:1 Dxi'u ba ze̱ cháchadxu lu xel-la dxeajlí lazre' dxal-la' gácale̱dxu benne' quebe ne se̱ chache̱' lu xel-la dxeajlí lazre', ne quebe gundxu da dxezaca ba lázredxu dxí'uze.
ROM 15:2 Tu tudxu dxal-la' gundxu da dxezaca ba lazre' bi bíchedxu lu da gun na chawe' chee̱be', ne lu da gusegula na le̱be' lu xel-la dxeajlí lazre' chee̱be'.
ROM 15:3 Crístoqueze quebe be̱ne̱' da dxezaca ba lazre' le̱ze̱', san guca chee̱' ca naxúaj na lu dizra' lá'azxa, dxenná na: Benne' ca' gulenné̱' schanni' chiu' Lue', Dios, guca na ca gulenné̱' schanni' chia' neda'.
ROM 15:4 Xúgute̱ da naxúaj nédxudaute̱ lu dizra' lá'azxa zaj naxúaj na chee̱ guzéajni'i na dxi'u, chee̱ gápadxu xel-la dxebeza lazre' ne̱ chee̱ xel-la zren lazre', ne xel-la dxexúe zren, da ca' nápadxu ne̱ chee̱ da ca' zaj naxúaj na.
ROM 15:5 Dxenaba' lau Dios, Bénnea' dxunne̱' dxi'u xel-la zren lazre', ne dxexúe zrene̱' dxi'u, chee̱ gácale̱ne̱' le'e chee̱ gácale tuze tule xetule ne̱ chee̱ Jesucristo,
ROM 15:6 chee̱ gunle xúgute̱le tu zren güe lá'anale Dios, Xra Xránadxu Jesucristo.
ROM 15:7 Ca'an naca, chee̱ gaca ba Dios, le si' lu na'le ljwézrele tule xetule ca be̱n Cristo, guzí' lu ne̱'e̱ dxi'u.
ROM 15:8 Ca da dxennéa' neda', dxennéa' bla' Cristo, ne be̱ne̱' zrin chee̱ benne' judío ca', chee̱ be̱ne̱' ca da guche̱be lazre' Dios lau xra xrtáudxu ca', ne caní blé'ene̱' naca Dios li lazre'.
ROM 15:9 Cá'anqueze ble̱'e̱ chee̱ xelúe lá'ana Dios benne' ca' quebe zaj naque̱' judío lawe' da dxexache lazre̱' bénneache, ca da naxúaj na caní chee̱ Cristo lu dizra' lá'azxa, dxenné̱': Güe lá'ana' lue', Dios, lau benne' xe̱zr la xu ca', ne tu gul-lazqueza' da xelapa ba lá'ana Lue'.
ROM 15:10 Cá'anqueze dxenná na: Le be, le'e, bénneache dute̱ xe̱zr la xu nen benne' zaj naque̱' bi chee̱ Dios.
ROM 15:11 Cá'anqueze dxenná na: Le güe lá'ana Xránadxu, le'e, bénneache chee̱ xúgute̱ xe̱zr la xu, ne le guchalaj chee̱ xel-la szren chee̱', le'e, xúgute̱ bénneache.
ROM 15:12 Cá'anqueze bchalaj Isaías ca naca chee̱ Cristo, gunné̱': Welá'queze tu zri'ine zre sua Isaí, Bénnea' nna bé'ene̱' xúgute̱ cue' xe̱zr la xu, na' benne' ca' xelebeza lazre̱' Le̱'.
ROM 15:13 Dxenaba' Dios, Bénnea' dxunne̱' dxi'u xel-la dxebeza lazre', chee̱ gúnnale̱'e̱ le'e xel-la dxebé, ne xel-la dxebeza zri lazre' lawe' da dxeajlí lázrele Le̱', chee̱ gápale̱'e̱quezle xel-la dxebeza lazre' ne̱ chee̱ xel-la waca chee̱ Be' Lá'azxa.
ROM 15:14 Le'e, bi bícha'dau', dxuxrén lazra' nápale̱'e̱le da chawe', ne núnbeale xúgute̱ chee̱ gaca guzéajni'ile ljwézrele tule xetule.
ROM 15:15 Lu xiche nigá bechugu lazra' guzúaja' chee̱ da caní chee̱ quebe gal-la lázrele na. Dxuna' na ne̱ chee̱ da bsebaga Dios neda' lu da chawe' chee̱'.
ROM 15:16 Caní guna' zrin chee̱ Jesucristo ládujla benne' quebe zaj naque̱' judío. Zrin dxuna' naca na chee̱ guzenda' bénneache dizra' chawe' chee̱ Dios chee̱ guzrá'a benne' quebe zaj naque̱' judío lau Dios ca tu guna' da dxezaca ba lazre' Le̱'. Xelaque̱' benne' lá'azxa ne̱ chee̱ Be' Lá'azxa.
ROM 15:17 Lu da naca' chee̱ Jesucristo waca xezaca ba lazra' lu zrin dxuna' chee̱ Dios
ROM 15:18 lawe' da quebe dxedxugu lazra' guchálaja', san tuze ca naca da nun Cristo ne̱ chia' neda', chee̱ guna' xuluzúa benne' quebe zaj naque̱' judío xrtizra Dios. Da nigá be̱na' ne̱ chee̱ da bchálaja', ne da be̱na',
ROM 15:19 ne ne̱ chee̱ xel-la waca chee̱ da ble'e Dios, nen xel-la waca chee̱ xabáa, ne ne̱ chee̱ xel-la waca chee̱ Be' Lá'azxa. Caní bchálaja' dizra' chawe' chee̱ Cristo du ca naca xe̱zr la xu. Guzú lawa' dxuna' na xe̱zre Jerusalén, bzrintea' naga nababa Ilírico.
ROM 15:20 Caní naca, be̱na' ba xuzre bchálaja' dizra' chawe' naga quebe ne xelenne̱' La Cristo, chee̱ quebe guna' zrin naga ba zaj nun zrin xezícadxa benne',
ROM 15:21 na', ca dxenná dizra' lá'azxa: Xelelé'e benne' ca' quebe ne zrin nu benne' guzenne̱' le̱' chee̱ Cristo, na' benne' ca' quebe ne xelén chee̱ Le̱' xeléajni'ine̱ da naca chee̱'.
ROM 15:22 Chee̱ guzenda' le'e da caní, da zan lasa guca lazra' xedajnná'a le'e zrale xe̱zre Roma, san quebe guca chia'.
ROM 15:23 Na'a, ba bexuzre be̱na' zrin nigá, ne lawe' da zánete̱ iza ba guca lazra' xida' súale̱na' le'e,
ROM 15:24 dxebeza lazra' tea' xedajnná'a le'e gate cha'a lu xe̱zr la xu España. Gate te sua' xel-la dxebé nen le'e dxebeza lazra' xusi'ile neda' neza, na' cha'a ná'ala.
ROM 15:25 Na'a cha'a Jerusalén, gu'a late' da gácale̱ na bi bíchedxu zaj zre̱'e̱ na',
ROM 15:26 lawe' da bi bíchedxu zaj zre̱'e̱ xe̱zre ca' zaj nababa Macedonia, ne xe̱zre ca' zaj nababa Acaya guléquene̱' naca xrlátaje bulutube̱' dumí da xelesel-le̱' chee̱ bi bíchedxu zaj naque̱' baxache', zaj zrabe' Jerusalén.
ROM 15:27 Guléquene̱' naca xrlátaje xelune̱' da nigá, na' caní naca na lawe' da dxelebague̱' chee̱ benne' ca', lawe' da benne' judío ca', benne' dxeléajle̱'e̱ chee̱ Cristo, bulunézruje̱' chee̱ benne' quebe zaj naque̱' judío chee̱ da zaj nape̱' chee̱ Dios, na' benne' caní dxal-la' xulunézruje̱' chee̱ benne' judío ca' chee̱ da zaj nape̱' chee̱ xe̱zr la xu nigá.
ROM 15:28 Caní naca, gate xexuzre guna' da nigá, ne ba bnézruja' le̱' dumí nigá, na' cha'a lu xe̱zr la xu España, na' ca teza' xedajnná'a le'e.
ROM 15:29 Dxuxrén lazra' gate xida' naga zrale le'e, gúale̱'a da chawe' chee̱ dizra' chawe' chee̱ Cristo.
ROM 15:30 Le'e, bi bícha'dau', dxata' xúeda' le'e ne̱ chee̱ Xránadxu Jesucristo, ne ne̱ chee̱ xel-la zri'i lazre' da dxunna Be' Lá'azxa dxi'u, chee̱ gácale tuze nen neda' guchálajle̱dxu Dios chee̱ gácale̱ne̱' neda'.
ROM 15:31 Le naba Dios chee̱ guselé̱' neda' lu na' benne' quebe dxeléajle̱'e̱ chee̱ Cristo naga nababa Judea, ne chee̱ xelezí' du lazre' bi bíchedxu zaj zre̱'e̱ Jerusalén dumí nigá da nu'a,
ROM 15:32 na' che naca da dxaca lazre' Dios, la'a lu dute̱ xel-la dxebé xedajnná'a le'e, ne chee̱ xezí' lazra' naga zrale le'e.
ROM 15:33 Dxenaba' Dios, Bénnea' dxunne̱' dxi'u xel-la dxebeza zri lazre', súale̱ne̱' xúgute̱le le'e. ¡Ca'an gaca na!
ROM 16:1 Dxegu'a lu na'le nu'ula zandxu Febe, nu'ula na' ba be̱ne̱' zrin chee̱ Cristo ládujla bi bíchedxu zaj zre̱'e̱ xe̱zre Cencrea.
ROM 16:2 Le si' lu na'le le̱' cháwedau' lu La Xránadxu, ca dxal-la' gaca ládujla bi bíchedxu dxeléajle̱'e̱ chee̱ Cristo, na' le gácale̱ne̱' bítete̱ze da dxexázrjene̱', lawe' da ba gúcale̱ le̱' benne' zan, ne néda'queza'.
ROM 16:3 Le gugapa diuzre Priscila ne Aquilo, benne' belún zrin chee̱ Jesucristo tu zren nen neda'.
ROM 16:4 Benne' caní buluzúe̱' xel-la nabán chee̱' lu da ste̱be chee̱ gúcale̱ne̱' neda'. Ca' naca na, dxapa' benne' ca' xcalenle, ne quegaze neda', san cá'anqueze dxelún xúgute̱ bi bíchedxu quebe zaj naque̱' judío.
ROM 16:5 Le gugapa diuzre bi bíchedxu ca' dxelezrágabe' lizre Priscila, ne Aquilo. Le gugapa diuzre Epeneto, benne' ljwezra' nazri'ite̱ lazra'. Le̱' guque̱' benne' nedxu naga nababa Acaya guxéajle̱'e̱ chee̱ Cristo.
ROM 16:6 Le gugapa diuzre María, nu'ula na' ba be̱nle̱'e̱ zrin ládujla le'e.
ROM 16:7 Le gugapa diuzre benne' walázr chia', Andrónico, ne Junias, benne' ca' gulaque̱' ljwezra' lizre xia. Zaj naque̱' benne' blau ládujla benne' gubáz ca' chee̱ Cristo, na' guléajle̱'e̱ chee̱ Cristo nédxudxa ca neda'.
ROM 16:8 Le gugapa diuzre Amplias, benne' ljwezra' nazri'ite̱ lazra' lu La Xránadxu.
ROM 16:9 Le gugapa diuzre Urbano, benne' ljwezra' lu zrin chee̱ Jesucristo, ne le gugapa diuzre Estaquis, benne' nazri'ite̱ lazra'.
ROM 16:10 Le gugapa diuzre Apeles, benne' blé'ene̱' da zan lasa ca dxeajlí lazre̱' Cristo. Cá'anqueze le gugapa diuzre Aristóbulo, benne' xrtia'.
ROM 16:11 Le gugapa diuzre Herodión, benne' walázr chia', ne Narciso, benne' xrtia', benne' dxeléajle̱'e̱ chee̱ Xránadxu.
ROM 16:12 Le gugapa diuzre Trifena ne Trifosa, nu'ula ca' dxelune̱' zrin chee̱ Xránadxu, ne le gugapa diuzre Pérsida, bi zandxu nazri'ite̱ lazrdxu, nu'ula na' ba be̱nle̱'e̱ zrin chee̱ Xránadxu.
ROM 16:13 Le gugapa diuzre Rufo, benne' blau dxéajle̱'e̱ chee̱ Xránadxu, ne xrne̱'e̱, nu'ula na' naque̱' ca xrnáqueza'.
ROM 16:14 Le gugapa diuzre Asíncrito, ne Flegonte, ne Hermas, ne Patrobas, ne Hermes, ne bi bíchedxu ca' zrále̱ne̱' le̱'.
ROM 16:15 Cá'anqueze le gugapa diuzre Filólogo, ne Julia, ne Nereo, ne nu'ula zane̱', ne Olimpas, ne xúgute̱ bi bíchedxu dxeleajlí lazre̱' Cristo, benne' zrále̱ne̱' benne' caní.
ROM 16:16 Le gugapa diuzre ljwézrele tule xetule, gunídate̱ ljwézrele. Xúgute̱ cue' bi bíchedxu dxulugape̱' le'e diuzre.
ROM 16:17 Le'e, bi bícha'dau', dxata' xúeda' le'e, nna' xánnele benne' ca' dxelune̱' chupa la'a bi bíchedxu ca', ne dxelune̱' dxeajlecházie̱' benne' ca', na' dxulusé̱dene̱' da dxedábaga na ca da nusé̱dele. Le cuasa naga zaj zra' benne' ca'
ROM 16:18 lawe' da quebe dxelún benne' ca' zrin chee̱ Xránadxu Jesucristo. Dxelune̱' ca da dxezaca ba lazre' be̱la' dxen chee̱queze̱', ne dxelezí xe̱'e̱ benneáchedu ca' quebe ne xeleneze xánnie̱' ca naca dizra' chawe'. Benne' wen lazre' ca' cadite zaj nupé̱'e̱, ne zaj nézene̱' da dxuluchálaje̱'.
ROM 16:19 Xúgute̱ bénneache zaj nézene̱' ca ba bzúale xtizra' Dios. Chee̱ le̱ na' dxebeda', ne dxaca lazra' gácale ban lazre' gunle da xrlátaje, na' quegá gunle da cale̱la.
ROM 16:20 Dios, Bénnea' dxunne̱' dxi'u xel-la dxebeza zri lazre' ba zúaqueze̱' gácale̱ne̱' le'e, chee̱ guchúchujle Satanás da xriwe̱'. Dxenaba' lau Xránadxu Jesucristo gune̱' gaca chawe' chee̱le.
ROM 16:21 Bi bíchedxu Timoteo dxugápabe' le'e diuzre. Nácabe' ljwezra' lu zrin chee̱ Cristo. Cá'anqueze dxulugape̱' le'e diuzre benne' walázr chia' Lucio, ne Jasón, ne Sosípater.
ROM 16:22 Neda', Tercio, dxuzúaja' xtizra' Pablo caní, dxugapa' le'e diuzre lu La Xránadxu.
ROM 16:23 Gayo dxugape̱' le'e diuzre, bénnea' zua' lizre̱', na' dxunne̱' lizre̱' naga dxelezraga xúgute̱ benne' bíchedxu caní. Cá'anqueze dxulugape̱' le'e diuzre Erasto, benne' xu'u lu ne̱'e̱ dumí chee̱ xe̱zre, ne bi bíchedxu Cuarto.
ROM 16:24 Dxenaba' Xránadxu Jesucristo gune̱' gaca chawe' chee̱ xúgute̱le le'e. ¡Ca'an gaca na!
ROM 16:25 Na'a, dxue lá'anantu' Dios, Bénnea' séquene̱' guzé̱ cháchadxe̱' le'e lu dizra' chawe' da dxuzenda' bénneache, ne lu da dxusé̱deda' ca naca chee̱ Jesucristo. Da nigá naca na tuze nen da ble'e Dios chee̱ da nagache da gulú'u chawe̱' bagácheze nédxudaute̱,
ROM 16:26 san na'a ba ble'e lawe' na ne̱ chee̱ dizra' lá'azxa da buluzúaj benne' ca' buluchálaje̱' waláz chee̱ Dios, ca da bdxixruj be'e Dios chadía chacanna. Ba ble'e lau dizra' chawe' nigá na'a lau benne' xúgute̱ xe̱zr la xu chee̱ xeléajle̱'e̱ chee̱ na, ne xuluzúe̱' dizra' chee̱ na.
ROM 16:27 Dios, Benne' tu licha', ne Benne' sina, gaca ba Le̱' chadía chacanna ne̱ chee̱ Jesucristo. ¡Ca'an gaca na!
1CO 1:1 Neda', Pablo, naca' benne' bláwizra Dios chee̱ gaca' gubáz chee̱ Jesucristo. Naca na da guca lazre' Dios gaca'. Tu zren nen bíchedxu Sóstenes
1CO 1:2 dxuzúaja' da nigá chee̱le le'e, bi bicha', zrágale chee̱ Dios lu xe̱zre Corinto. Nácale bi chee̱ Dios lawe' da nácale tuze nen Jesucristo. Dios ba bláwizre̱' le'e chee̱ gácale bi chee̱queze̱' tu zren nen xúgute̱ benne' ca' zaj zre̱'e̱ du ca naca xe̱zr la xu, ne dxululáwizre̱' La Xránadxu Jesucristo, Bénnea' naque̱' Xrane benne' ca', ne Xránadxu dxi'u.
1CO 1:3 Dxenaba' Xradxu Dios, ne Xránadxu Jesucristo gunne̱' le'e xel-la dxebeza zri lazre', ne gun chawe̱'e̱ le'e.
1CO 1:4 Dxápequeza' Dios: Xcalenu', ca naca chee̱le ne̱ chee̱ da chawe' da be̱nna Dios le'e ne̱ chee̱ Jesucristo.
1CO 1:5 Lawe' da nácale tuze nen Cristo, Dios ba be̱nne̱' le'e xel-la gunní'a zante̱ da naca chee̱ Be' Lá'azxa chee̱', lu da dxuchálajle, ne lu da nézele.
1CO 1:6 Ca' naca na, da dxuchálajdxu ca naca chee̱ Cristo ba guca na li chee̱le le'e.
1CO 1:7 Ca' naca na, quebe bi dxexázrjele ca da dxunna Dios dxi'u dxácate̱ dxebézadxu zra xelá' Xránadxu Jesucristo.
1CO 1:8 Le̱' guxru chache̱' le'e ca zrin zra bze̱be, chee̱ quebe nu benne' gaca gusebágue̱' le'e zría gate xelá' Xránadxu Jesucristo.
1CO 1:9 Dios tu dxúnzqueze̱' ca da nache̱be lazre̱', naque̱' Bénnea' bláwizre̱' le'e chee̱ gácale tuze nen Zrí'ine̱', Xránadxu Jesucristo.
1CO 1:10 Bi bicha', dxata' xúeda' le'e lu La Xránadxu Jesucristo, chee̱ gácale tuze, ne quebe gácale chupa la'a. Le gaca xanne' tuze, ne tuze da cu'u xichaj lázrdaule, ne da gunle.
1CO 1:11 Da nigá dxapa' le'e, bi bicha', lawe' da buluzén benne' xrtia Cloé neda' dxutíl-lale dizra'.
1CO 1:12 Da nigá zéaje̱ na nácale chupa la'a, na' bál-lale dxennale: Netu' da'ntu' Pablo. Xezícale' dxennale: Netu' da'ntu' Apolos. Xezícale dxennale: Netu' da'ntu' Pedro. Xezícale dxennale: Netu' da'ntu' Cristo.
1CO 1:13 ¿Dxéquele naca Cristo chupa la'a? ¿Dxéquele gudá'a neda', Pablo, le̱'e̱ xaga béguaj waláz chee̱le? ¿Bedxúale le'e nisa lu la Pablo?
1CO 1:14 Xcalén Dios quebe núlale le'e bchua' nisa san tuze Crispo, ne Gayo
1CO 1:15 lawe' da quebe nu gaca nna: Lu la Pablo gudxúa' nisa.
1CO 1:16 Cá'anqueze bchua' nisa benne' xrtia Estéfanas, san quebe dxeajsá lazra' che nu xetú bchua' nisa.
1CO 1:17 Cristo quebe gusel-le̱' neda' nu guchúa' nisa, san chee̱ guzenda' bénneache dizra' chawe' chee̱', quegá nen dizra' sina, chee̱ quebe gaca dácheze da be̱n Cristo gate gutie̱' le̱'e̱ xaga béguaj.
1CO 1:18 Dizra' ca gute Cristo le̱'e̱ xaga béguaj naca na ca tu da xálaze lau benne' xelebía xi'e̱, san chee̱dxu dxi'u, nápadxu xel-la weselá, dizra' nigá napa na xel-la waca chee̱ Dios.
1CO 1:19 Naca na ca naxúaj na lu dizra' lá'azxa. Dxenná Dios: Guzría xi'a xel-la sina chee̱ benne' sina ca', ne guzúa' chalá'ala xel-la naxéajni'i chee̱ benne' dxeléajni'ine̱'.
1CO 1:20 ¿Gazra nagá'ana benne' sina na'a? ¿Waca guselá cuine̱'? ¿Gazra nagá'ana benne' dxusé̱dene̱' bénneache? ¿Gazra nagá'ana benne' dxuchálaje̱' ca naca da dxaca lu xe̱zr la xu nigá? Ca naca xel-la sina chee̱ xe̱zr la xu nigá, Dios ba nune̱' na tu da xálaze lawe' da tuze Le̱' gaca guselé̱' bénneache.
1CO 1:21 Dios nézene̱' xúgute̱. Quebe be̱'e̱ lataj bénneache xelúnbe'e̱ Le̱' ne̱ chee̱ xel-la sina chee̱ bénneache. Bezaca ba lazre̱' Dios ne̱ chee̱ dizra' nigá bselé̱' benne' ca' dxuluxrén lazre̱' Le̱', lácala zaj zra' benne' dxeléquene̱' naca dizra' nigá tu da xálaze.
1CO 1:22 Benne' judío ca' dxelaca lazre̱' xelelé'ene̱' xel-la waca da za xabáa, na' benne' griego ca' dxelexílaje̱' xel-la sina,
1CO 1:23 san dxi'u dxuzendxu bénneache ca naca chee̱ Cristo, ca gutie̱' le̱'e̱ xaga béguaj. Benne' judío dxelexedué'ene̱' chee̱ dizra' nigá, na' benne' quebe zaj naque̱' judío dxeléquene̱' naca na tu da ca zeaje na.
1CO 1:24 Na'a, benne' ca' ba bláwizra Dios, benne' judío ca', ne benne' quebe zaj naque̱' judío, Cristo nácaqueze̱' xel-la waca, ne xel-la sina chee̱ Dios.
1CO 1:25 Da dxeleque bénneache naca tu da xálaze chee̱ Dios nácadxa na sina ca xel-la sina chee̱ bénneache, na' da dxeleque bénneache naca na tu da naca bea nate ni'a na' Dios nápadxa na xel-la waca ca xel-la waca chee̱ bénneache.
1CO 1:26 Le'e, bi bicha', dxal-la' gueque be'ele ba bláwizra Dios le'e lácala bábaze le'e nácale sina lau bénneache chee̱ xe̱zr la xu nigá, ne bábaze le'e nápale xel-la dxenná bea, u nácale xrtia benne' zaj naque̱' blau.
1CO 1:27 Dios ba guqué̱'e̱ benne' ca' dxeleque bénneache zaj naque̱' benne' xálaze, chee̱ xelexedué'e benne' sina ca', ne ba guqué̱'e̱ benne' ca' dxeleque bénneache zaj nate ni'a ne̱'e̱, chee̱ xelexedué'e benne' wal-la ca'.
1CO 1:28 Dios ba guqué̱'e̱ benne' ca' quebe zaj naque̱' blau, ne benne' ca' zaj nuzúa bénneache chalá'ala, benne' ca' quebe nu zaj naque̱', chee̱ guzague̱' naze benne' zaj naque̱' blau,
1CO 1:29 chee̱ quebe nu seque' gucá'ana szren cuina lau Dios.
1CO 1:30 Diósqueze ba nune̱' le'e tuze nen Jesucristo, ne nune̱' naca Cristo Benne' dxunna dxi'u xel-la sina, ne Benne' gucá'ana dxi'u xrlátaje, ne Benne' dxuzúe̱' dxi'u lu na' Dios, ne benne' dxexá'awe̱' dxi'u.
1CO 1:31 Ca' naca na ca da naxúaj na lu dizra' lá'azxa, da dxenná na: Che nu benne' dxaca lazre̱' nu gucá'ana szrene̱', dxal-la' gucá'ana szrene̱' Xránadxu.
1CO 2:1 Na'a, bi bícha'dau', gate bedajchálajle̱na' le'e da li chee̱ Dios, quebe bchíneda' dizra' sina, ne dizra' zaca.
1CO 2:2 Gate ne zúale̱na' le'e quebe guca lazra' guchálaja' chee̱ bila da xetú san tuze chee̱ Jesucristo, Bénnea' gudé̱'e̱ xaga béguaj.
1CO 2:3 Gate guzúale̱na' le'e ne nátete̱ ni'a na'a, ne guzrízetea' lawe' da bzreba' quebe guca guna' da nusebaga' Cristo neda'.
1CO 2:4 Gate bchálajle̱na' le'e, ne bzenda' le'e dizra' chawe', quebe guca lazra' guna' chéajle̱le chee̱' nen dizra' sina chee̱ bénneache da guchálaja', san be̱na' guxéajle̱le chee̱' ne̱ chee̱ Be' Lá'azxa, ne ne̱ chee̱ xel-la waca chee̱ Dios
1CO 2:5 chee̱ gápale xel-la dxeajlí lazre' da naca na ne̱ chee̱ xel-la waca chee̱ Dios, ne quegá ne̱ chee̱ xel-la sina chee̱ bénneache.
1CO 2:6 Dxuchálajntu' dizra' sina lau benne' ca' ba zaj ze̱ chache̱' lu xel-la dxeleajlí lazre' chee̱'. Xel-la sina nigá quebe naca na xel-la sina chee̱ xe̱zr la xu nigá, ne chee̱ benne' dxelenná be'e̱ lu xe̱zr la xu nigá, benne' ca' xeledé chie̱'.
1CO 2:7 Dxuchálajntu' xel-la sina nagache chee̱ Dios, da na' bzua Dios nédxudaute̱ ca be̱ne̱' xe̱zr la xu nigá, chee̱ ladxu chadía chacanna.
1CO 2:8 Netú benne' ca', benne' dxelenná be'e̱ lu xe̱zr la xu nigá, quebe guléajni'ine̱' da nigá, lawe' da la guléajni'ine̱' na quebe buludé̱'e̱ Xránadxu, Benne' xabáa, le̱'e xaga béguaj.
1CO 2:9 Naca na ca da naxúaj na lu dizra' lá'azxa, dxenná na: Dios ba nucueze̱' chee̱ benne' ca' zaj nazrí'ine̱' Le̱' da ca' quebe nu ne le'e, ne quebe nu ne xen, ne da quebe nu ne cu'u lazre'.
1CO 2:10 Da caní zaj naca na da ble'e Dios dxi'u ne̱ chee̱ Be' Lá'azxa nasel-la Le̱', lawe' da dxelé'e Be' Lá'azxa xúgute̱ da de̱, ne dute̱ da xu'u na lu xichaj lázrdau Diósqueze.
1CO 2:11 Ládujla bénneache, ¿nu seque' neze da xu'u lu xichaj lázrdau xetú benne', san tuze be' da nacaque̱ze̱'? Cá'anqueze, tuze Be' Lá'azxa chee̱ Dios nézene̱' da xu'u lu xichaj lázrdau Dios.
1CO 2:12 Be' Lá'azxa da xú'udxu quebe naca na chee̱ xe̱zr la xu nigá. Nazidxu Be' Lá'azxa da dxunna Dios dxi'u chee̱ chéajni'idxu da ca' ba nunna Dios dxi'u.
1CO 2:13 Dxuchálajntu' ca naca da caní nen dizra' da bse̱de Be' Lá'azxa chee̱ Dios netu', ne quegá nen dizra' da bsé̱dentu' lu xel-la sina chee̱ntu'. Ca' naca na, dxuzéajni'intu' benne' zaj nazi'e̱ Be' Lá'azxa chee̱ Dios da nuse̱de Be' Lá'azxa nigá dxi'u.
1CO 2:14 Nu benne' quebe nazi'e̱ Be' Lá'azxa chee̱ Dios quebe dxezí' lu ne̱'e̱ da zaj naca na chee̱ Be' Lá'azxa chee̱ Dios, lawe' da dxéquene̱' zaj naca na tu da xálaze. Quebe dxezeque' chéajni'ine̱' na lawe' da zaj naca na da dxéajni'idxu tuze ne̱ chee̱ Be' Lá'azxa.
1CO 2:15 Bénnea' nazi'e̱ Be' Lá'azxa chee̱ Dios dxezéquene̱' chéajni'ine̱' xúgute̱ da dxulé'e Be' Lá'azxa le̱'. Benne' quebe zúale̱ Be' Lá'azxa le̱', quebe séquene̱' chéajni'ine̱' da dxusé̱de Be' Lá'azxa dxi'u.
1CO 2:16 Naxúaj lu dizra' lá'azxa da dxenná na: ¿Nuzra ba guxéajni'i da xu'u xichaj lázrdau Xránadxu? ¿Nuzra benne' séquene̱' guzéajni'ine̱' Dios? Dxi'u nazidxu ca da xu'u xichaj lázrdau Cristo.
1CO 3:1 Na'a, le'e, bi bícha'dau', quebe guca guchálajle̱na' le'e ca dxuchálajle̱na' benne' ca' zúale̱ Be' Lá'azxa chee̱ Dios le̱', san bchálajle̱na' le'e ca dxuchálajle̱na' benne' ca' quebe zúale̱ Be' Lá'azxa le̱', lawe' da ne nácale ca bidu ca' lu da naca chee̱ Cristo.
1CO 3:2 Bsé̱deda' le'e da quebe zaj naca na ste̱be da naca na ca da dxugágudxu bidu dxe'ene, bidu ne dxázrebe', ne quebe gaca gágube' xel-la wagu da naca na zibaj, lawe' da quebe ne séquele chéajni'ile da zaj naca na ste̱be. Cá'anqueze na'a quebe ne séquele chéajni'ile na
1CO 3:3 lawe' da ne nácale ca zaj naca benne' cun ca nalaje̱'. Dxácate̱ ne xu'ule xel-la zre lazre', ne dxutil-la ljwézrele dizra' ne nácale chupa la'a, ne nácale ca zaj naca benne' cun ca nálaje̱', ne dxunle cáte̱ze dxelún xúgute̱ bénneache.
1CO 3:4 Dxácate̱ ne dxennale: Netu' da'ntu' Pablo, na' xezícale dxennale: Netu' da'ntu' Apolos, ne dxunle ca dxelún benne' cun ca nálajze̱'.
1CO 3:5 Na'a, ¿nuzra na' Pablo? ¿Nuzra na' Apolos? Nácantu' we̱n zrin chee̱ Dios, na' ne̱ chee̱ netu' guxéajle̱le chee̱ Xránadxu. Tu tuntu' be̱ntu' zrin chee̱ Xránadxu da blé'ene̱' netu'.
1CO 3:6 Neda' guza' bínnedu ca' lu xichaj lázrdaule, bchálajle̱na' le'e xrtizra Dios, na' Apolos gudile̱' na, san Dios bsegule̱' na.
1CO 3:7 Ca' naca na, ne benne' dxaze̱', ne benne' dxile̱' na, quebe bi zaque̱', san Dios na' dxune̱' xúgute̱, lawe' da dxusegule̱' da du ca'.
1CO 3:8 Benne' dxelaze̱', ne benne' dxelile̱' zaj naque̱' lé̱bete̱, san Dios quízruje̱' tu tu benne' caní ca naca zrin da belune̱'.
1CO 3:9 Nácantu' we̱n zrin tu zren nen Dios, na' le'e nácale ca tu xe̱zr la xu naga dxun Dios zrin. Cá'anqueze nácale ca tu xu'u da dxun Dios.
1CO 3:10 Neda' naca' ca tu we̱n xu'u blau, na' Dios be̱nne̱' neda' lataj gulecha' lane na, na' benne' xula dxusegule̱' ze'e na'. Tu tu benne' dxal-la' guxúe xánnie̱' ca dxusegule̱' na.
1CO 3:11 Québedxa nu seque' cueche̱' xetú lane ca da ba dxe', da na' naca na Jesucrístoqueze,
1CO 3:12 san waca nu benne' gusegule̱' lawe' na da zaca na ca oro, ne plata, ne xiaj da zaj zaca, u waca gusegule̱' lawe' na da quebe zaca na ca blaga', ne xizre, ne luaj laga'.
1CO 3:13 Zrin da nun tu tu benne' gulé'equeze lawe na lu zra guchi'a Dios, lawe' da lu zra na' la' tu xi', na' lu xi' na' gulé'e lawe na ca naca zrin nun tu tudxu.
1CO 3:14 Che nu benne' nune̱' tu zrin da quebe chezxe na lu xi', na' wazi'e̱ lazruj chee̱'.
1CO 3:15 Che chezxe zrin na', ca naca na nite na, san lé̱queze̱' walé̱', ca tu benne' dxexedxúaje̱' lu xi'.
1CO 3:16 ¿Quebe nézele le'e nácale xudau' chee̱ Dios, na' Be' Lá'azxa chee̱ Dios zue̱' lu xichaj lázrdaule?
1CO 3:17 Che nu benne' gucá'ana dítaje̱' xudau' nigá chee̱ Dios, Dios guzría xi'e̱ bénnea' lawe' da naca lá'azxa xudau' chee̱ Dios, na' lé'equezle nácale xudau' na'.
1CO 3:18 Quebe si xe̱ cuínale. Che núlale dxéquele nácale benne' sina lu da naca chee̱ xe̱zr la xu nigá, dxal-la' xun cuínale ca tu benne' quebe bi dxaque̱', chee̱ gunna Dios le'e xel-la sina li.
1CO 3:19 Xel-la sina chee̱ xe̱zr la xu nigá naca na tu da xálaze lau Dios. Naxúaj lu dizra' lá'azxa da dxenná na: Dios dxun zréajane̱' benne' sina ca' lu xel-la sina da zaj nápaqueze̱'.
1CO 3:20 Cá'anqueze dxenná na: Xránadxu nézene̱' quebe bi zaca da dxululaba lazre' benne' sina ca'.
1CO 3:21 Chee̱ le̱ na' quebe nu benne' dxal-la' gun szren cuine̱' lawe' da de̱'e̱ tu benne', lawe' da Dios dxunne̱' le'e xúgute̱ da ca' dxechínnele.
1CO 3:22 Pablo, ne Apolos, ne Pedro, ne xe̱zr la xu nigá, ne xel-la nabán, ne xel-la gute, ne na'a zra, ne da za za', ne xúgute̱ da ca' zaj naca na chee̱ gaca da chawe' chee̱le,
1CO 3:23 na' lé'equezle xu'ule lu na' Cristo, na' Cristo xu'e̱ lu na' Xradxu Dios.
1CO 4:1 Ca' naca na, dxal-la' guéquele nácazentu' we̱n zrin chee̱ Cristo, ne nabágantu' gusé̱dentu' bénneache da zaj nagache chee̱ Dios.
1CO 4:2 Na'a, benne' nabague̱' tu zrin, dxun na ba xen gaque̱' li lazre'.
1CO 4:3 Neda' quebe dxe'a gunne xue bi dxéquele naca' neda', u bi dxeleque bénneache naca'. Quebe gaca nnia' xrlátaje u quegá chee̱ da nuna'
1CO 4:4 lawe' da lácala quebe dxagu na zria neda' lázrdawa', da nigá quebe dxulé'e na quebe nabaga' zria. Xránadxu naque̱' Benne' dxuchi'e̱ ca da dxuna'.
1CO 4:5 Ca' naca na, quebe guchí'ale chee̱ da ca' che quebe ne zrin zra. Le cueza zra xelá' Xránadxu, na' xebéaje̱' lu xel-la naxaní' ca naca da nagache lu da chul-la. Xránadxu gulé'ene̱' ca naca da dxulaba lázredxu, na' Dios gulé'ene̱' chawe' tu tudxu ca da dxal-la' sidxu.
1CO 4:6 Le'e, bi bicha', dxuchálajle̱na' le'e da caní chee̱ gaca chawe' chee̱le, dxuzúa' ca tu da gulé'e na le'e Apolos, ne néda'queza'. Dxennía' da nigá chee̱ gusé̱dele ne̱ chee̱ netu' chee̱ quebe gundxale ca da dxue lataj dizra' lá'azxa le'e, ne chee̱ quebe gucá'ana szren cuínale, ne chee̱ quebe guzúale chalá'ala le sa' ljwézrele.
1CO 4:7 ¿Nuzra nun lue' blaudxa ca xezícadxa benne'? ¿Bizra napu' da quebe nunna Dios lue'? Che Le̱' be̱nne̱' chiu' da na', ¿bizr chee̱ na' dxucá'ana szren cuinu', dxéquenu' lué'queze gudilju' da na'?
1CO 4:8 ¿Nácale le'e benne' gunní'a? ¿Nápale xúgute̱ da dxechínele? ¿Dxequele nácale wenná bea lácala quebe nácantu' netu' wenná bea? Xrlátaje dxgua la nácaquezle wenná bea chee̱ guntu' netu' le'e tu zren lu xel-la dxenná bea chee̱le.
1CO 4:9 Dxéqueda' Dios nuzúe̱' netu', benne' gubáz chee̱', lu lataj bze̱be. Nácantu' ca benne' ba zaj nabía xi' chee̱ gátentu'. Nácantu' ca tu da dxuzé̱ na lau bénneache, na' dxelenná' gubáz chee̱ xabáa ca', ne bénneache netu'.
1CO 4:10 Dxeleque bénneache nácantu' netu' tu da xálaze lawe' da dxuntu' zrin chee̱ Cristo, san le'e dxéquele dxéajni'i xánnele da zaj naca chee̱ Cristo. Dxeleque bénneache nate ni'a na'ntu' netu' san le'e dxéquele nácale le'e benne' wal-la. Dxuluzúa bénneache netu' chalá'ala, san dxelape̱' le'e ba lá'ana.
1CO 4:11 Ga bzrinte̱ lu zra na'a zra dxeduntu', ne dxebílentu', ne nácantu' gala xídeze, na' bénneache dxulucháchale̱ne̱' netu', ne quebe zua lízrentu'.
1CO 4:12 Dxexedú lázrentu' dxuntu' zrin. Dxelenné̱ bénneache schanni' chee̱ntu', san netu' dxexeché̱bentu' dizra' chawe'. Zaj nau zi' xuzre̱' netu' san dxuchaga launtu' na.
1CO 4:13 Dxelenné̱' schanni' chee̱ntu', san netu' dxuchálajle̱ntu' le̱' da li dute̱ xel-la zren lazre' chee̱ntu'. Dxelune̱' netu' ca tu xizre be̱be, ne ca tu da ba guca ditaj chee̱ bénneache ca lu zra na'a zra.
1CO 4:14 Quegá dxuzúaja' chee̱le da nigá chee̱ xedué'ele, san chee̱ guzéajni'ida' le'e, nácale ca bi chia' nazri'ite̱ lazra'.
1CO 4:15 Lácala zaj zúale̱ le'e gaxúa gaxúane benne' dxulusé̱dene̱' le'e ca naca chee̱ Cristo, quebe nu zua xetú xrale. Néda'queza' naca' xrale lu xel-la dxeajlí lazre' chee̱le Cristo lawe' da bzenda' le'e dizra' chawe' chee̱ Jesucristo.
1CO 4:16 Ca' naca na, dxata' xúeda' le'e gunle ca dxuna' neda'.
1CO 4:17 Chee̱ le̱ na' dxusel-la' Timoteo xedajná'abe' le'e, nácabe' ca bi li lazre' chia' nazri'ite̱ lazra', lu da naca chee̱ Xránadxu. Le̱be' gusá'abe' lázrele ca dxuna' lu da naca chee̱ Cristo, ne ca naca da dxusé̱deda' bénneache gátete̱ze na', ne lau xúgute̱ cue' bi chee̱ Cristo.
1CO 4:18 Bál-lale le'e ba nucá'ana szren cuínale lawe' da dxéquele quebe xida' xedajnnaba' le'e,
1CO 4:19 san dxebeza lazra' xídazequeza' xedajnná'a le'e che gunna Xránadxu lataj. Nadxa le'eda' da dxelezeque' xelún benne' ca' dxulucá'ana szren cuine̱', ne quegá tuze da dxelenné̱'.
1CO 4:20 Che dxenná be'e Dios dxi'u quebe naca na chee̱ tu da dxuchálajzedxu. Lé̱caze̱' ba nunne̱' dxi'u xel-la waca chee̱'.
1CO 4:21 ¿Bizra dxaca lázrele le'e? ¿Dxaca lázrele gun na ba xen gudéa' le'e xel-la zi', u che xida' xedajnná'a le'e lu xel-la zri'i lazre', ne xel-la dxexruj lazre'?
1CO 5:1 Ba benda' zua tu benne' ládujla le'e nune̱' ca zru'ule̱' xrna zie̱'. Da nigá naca na tu da sbánle̱'e̱ da quebe ne xelún benne' quebe zaj núnbe'ene̱' Dios.
1CO 5:2 Ca naca da na' le'e ne dxucá'ana szren cuínale. Dxal-la' cuezre xáchele. Bénnea' nune̱' da nigá dxal-la' xebéajle le̱' ládujla le'e.
1CO 5:3 Quebe zua' neda' naga zúale lu be̱la' dxen chia', san naca cáte̱ze zúale̱na' le'e lu be' nácaqueza', na' ba bchi'a chee̱ bénnea' nune̱' dul-la nigá ca tu benne' zúale̱tequeze le'e.
1CO 5:4 Le zraga le'e lu La Xránadxu Jesucristo, na' gaca na cáte̱ze neda' súale̱na' le'e lu be' nácaqueza', na' xel-la waca chee̱ Xránadxu Jesús suale̱ na le'e.
1CO 5:5 Nadxa dxal-la' xudele bénnea' lu na' Satanás da xriwe̱', na' lácala cuía xi' be̱la' dxen chee̱' na' be' nácaqueze̱' la na lu zra xelá' Xránadxu Jesús.
1CO 5:6 Quebe dxal-la' gucá'ana szren cuínale ca naca da dxunle. ¿Quebe núnbeale dizra' na' dxenná na: Láteze cua zichaj dxuchazra na ca naca cua na'?
1CO 5:7 Le xebéaj chalá'ala cua zichaj gula na' da dxuxrinnaj na le'e, chee̱ gácale ca tu xeta xtila da dxágudxu Laní Pascua, da dxundxu nen cua cube da quebe nachixre na cua zichaj, ca da li nácale le'e. Crístoqueze gutie̱' waláz chee̱dxu. Naque̱' chee̱dxu zrila', be̱ dxelutie̱' laní pascua.
1CO 5:8 Ca' naca na, dxal-la' gupá'adxu Laní Pascua chee̱dxu lu da naca du lazre', ne lu da li, da ca' zaj naca na ca xeta xtila da quebe nachixre na cua zichaj. Quebe gupá'adxu na lu da cale̱la, ne lu da zrinnaj, da ca' zaj naca na ca cua zichaj gula na'.
1CO 5:9 Lu da bzuaja' chee̱le nédxudxa gucha' le'e quebe guchixre chee̱le nen benne' ca' dxelune̱' da sban.
1CO 5:10 Quebe gucha' le'e xecuásatequezele chee̱ benne' zaj zre̱'e̱ xe̱zr la xu nigá, benne' dxelune̱' da sban, ne benne' wecude' ca', ne benne' gubán ca', ne benne' dxelúe lá'ane̱' bedáu' xiaj xaga ca', lawe' da chee̱ quebe guchixre chee̱le nen benne' caní, dxun na ba xen xedxúajle xe̱zr la xu nigá.
1CO 5:11 Da guca lazra' xapa' le'e naca na chee̱ quebe guchixre chee̱le nen netú benne' dxenné̱' naque̱' bíchedxu, san dxune̱' da sban, u naque̱' benne' wecude', u dxue lá'ane̱' bedáu' xiaj xaga, u dxutupe̱' dizra' bizruj, u dxí'aje̱', u naque̱' gubán. Quebe dxal-la' gágule̱le benne' caní.
1CO 5:12 Quegá naca chia' guchi'a chee̱ benne' dxeledá cúzrela. Dios guchi'e̱ chee̱ benne' ca'. Le'e dxal-la' guchí'ale chee̱ benne' zaj naque̱' bi bíchedxu. Chee̱ le̱ na' le xebéaj benne' dul-la na' ládujla le'e.
1CO 6:1 Gate tule le'e zua da dxaca chee̱le nen xetule le'e, ¿bizr chee̱ na' dxeajle lau benne' dxuchi'e̱ da dxaca, na' quebe dxéajle̱'e̱ chee̱ Cristo, ne quebe dxeajle lau bi bíchele?
1CO 6:2 ¿Quebe nézele le'e, benne' zaj naca bi chee̱ Dios xuluchí'e̱ ca da dxelún bénneache chee̱ xe̱zr la xu nigá? Che le'e guchí'ale chee̱ bénneache lu xe̱zr la xu nigá, ¿quebe naca chee̱le guchí'ale chee̱ tu da dauze?
1CO 6:3 ¿Quebe nézele le'e guchí'adxu chee̱ gubáz chee̱ xabáa ca'? Cá'anqueze dxal-la' guchí'adxu da naca chee̱ xe̱zr la xu nigá.
1CO 6:4 Che le'e zua da dxaca chee̱le lu xe̱zr la xu nigá, ¿bizr chee̱ na' dxeajle lau benne' ca' quebe nu zaj naque̱' ládujla bi bíchedxu ca' chee̱ xuluchí'e̱ chee̱ da na'?
1CO 6:5 Da nigá dxapa' le'e chee̱ gapa stu'le. ¿Quebe nu chilá' ládujla le'e nu bíchedxu, benne' naxéajni'ine̱' chee̱ guchi'e̱ tu da dxaca chee̱ bi bíchedxu ca'?
1CO 6:6 ¿Dxun na ba xen tu bi bíchedxu cheajtágube' zria da dxaca chee̱be' nen benne' ljwézrebe' lau tu benne' dxuchi'e̱ da dxaca, na' quebe naque̱' bi chee̱ Dios?
1CO 6:7 Che zua da dxedíl-lale̱le biche ljwézrele, naca na tu zria da ba nabágale. ¿Bizr chee̱ na' quebe dxucá'anale na cá'aze? ¿Bizr chee̱ na' quebe dxuele lataj nu benne' cuane̱' chee̱le?
1CO 6:8 Le'e dxunle da quebe naca na xrlátaje, ne dxebanle, na' dxunle caní chee̱ bi bíchele.
1CO 6:9 ¿Quebe nézele le'e, quebe xelexú'u benne' we̱n da cale̱la naga dxenná bea Dios? Quebe güele lataj nu si xe̱ le'e. Quebe xelexú'u naga dxenná bea Dios benne' ca' dxelune̱' da sban, ne benne' ca' dxelúe lá'ane̱' bedáu' xiaj xaga, ne benne' ca' dxelezúale̱ne̱' zru'ula benne' xula, ne benne' ca' dxeledále̱ne̱' ljwezre biue̱', ne benne' gubán ca', ne benne' wecude' ca', ne benne' ca' dxelé'aje̱', ne benne' ca' dxulutupe̱' dizra' bizruj, ne benne' ca' dxulucache lane̱'.
1CO 6:11 Caní gúcale bál-lale le'e, san na'a bache bexádxele lu xichaj lázrdaule, ne nuzúa cuínale lu na' Dios, na' nazí' lu ne̱'e̱ le'e lu La Xránadxu Jesús ne̱ chee̱ Be' Lá'azxa chee̱ Dios chee̱dxu.
1CO 6:12 Da li naca da dxelenné̱': Nápadxu lataj gundxu da dxaca lazre' tu tudxu. Quegá xúgute̱ na naca na da ba neza. Awe', napa tu benne' lataj gune̱' da dxaca lazre̱', san quebe dxal-la' gu'e̱ lataj bi da nna be'e na le̱'.
1CO 6:13 Naca da li da dxelenné̱': Xela wagu naca na chee̱ le̱'e̱dxu, na' le̱'e̱dxu naca na chee̱ xel-la wagu, san Dios gusexuzre̱' dxúpate̱ na. Quebe naca be̱la' dxen chee̱dxu chee̱ gun na da sban. Be̱la' dxen chee̱dxu naca na da gunézrujdxu chee̱ Xránadxu, na' Xránadxu naque̱' Bénnea' guchínene̱' be̱la' dxen chee̱dxu lu da xrlátaje.
1CO 6:14 Ca be̱n Dios bsebane̱' Xránadxu ládujla benne' gate ca', cá'anqueze gusebane̱' dxi'u nen xel-la waca chee̱'.
1CO 6:15 ¿Quebe nézele le'e be̱la' dxen chee̱le naca na chee̱ Cristo? ¿Wacá'a tu da naca na be̱la' dxen chee̱ Cristo, ne guchaga' na nen be̱la' dxen chee̱ tu nu'ula we̱n da sban? ¡Cabata'!
1CO 6:16 ¿Quebe nézele le'e gate tu benne' biu dxuchague̱' tu nu'ula we̱n da sban dxúpate̱' zaj naque̱' ca tuze be̱la' dxen? Naxúaj lu dizra' lá'azxa da dxenná na: Dxúpate̱' xelexaque̱' tuze be̱la' dxen.
1CO 6:17 Gate tu benne' dxuchague̱' Xránadxu, dxelexaque̱' tuze be'.
1CO 6:18 Le guzrunnaj chee̱ da sban. Zaj nita dul-la xula da dxun benne' da quebe dxulucá'ana ditaj na be̱la' dxen chee̱', san benne' dxuchague̱' nu'ula quebe naca zru'ule̱' dxune̱' dul-la lu be̱la' dxen chee̱queze̱'.
1CO 6:19 ¿Quebe nézele le'e naca be̱la' dxen chee̱le xudau' chee̱ Be' Lá'azxa, Bénnea' nunna Dios le'e, na' Be' Lá'azxa zue̱' xichaj lázrdaule? Quebe nácale xrana be̱la' dxen chee̱le,
1CO 6:20 lawe' da guzí' Dios le̱ na nen tu lazruj zrente̱. Chee̱ le̱ na', dxal-la' gápale ba lá'ana Dios nen be̱la' dxen chee̱le, ne nen be' nácaquezle, lawe' da dxúpate̱ na' zaj naca na chee̱ Dios.
1CO 7:1 Na'a xeche̱ba' ca zaj naca da bché̱bele neda'. Da li naca xrlátaje quebe guchaga na' tu benne'.
1CO 7:2 Lawe' da dxácale̱'e̱ da sban naga zúale, tu tu benne' biu dxal-la' súale̱ne̱' nu'ula chee̱queze̱', na' tu tu nu'ula dxal-la' súale̱ne̱' benne' biu chee̱queze̱'.
1CO 7:3 Benne' biu dxal-la' gune̱' nen zru'ule̱' da nabague̱' chee̱ zru'ule̱', na' cá'anqueze nu'ula dxal-la' gune̱' nen benne' biu chee̱' da nabague̱' chee̱ benne' chee̱'.
1CO 7:4 Nu'ula na' quebe naque̱' xrana be̱la' dxen chee̱', san naca na chee̱ benne' biu chee̱'. Cá'anqueze benne' biu quebe naque̱' xrana be̱la' dxen chee̱', san naca na chee̱ zru'ule̱'.
1CO 7:5 Quebe dxal-la' xeledábaga ljwezre̱', san tuze gate xelezúe̱' xel-la wezría tu chí'idauze chee̱ xuluzúa cuine̱' lau Dios chee̱ xuluchálajle̱ne̱' Le̱'. Te na' dxal-la' xuluchaga ljwezre̱' chee̱ quebe seque' Satanás nna be'e na le̱' che quebe xelezéquene̱' xelenná be'e cuine̱'.
1CO 7:6 Da nigá dxapa' le'e naca na tu da dxue le'e lataj. Quebe naca na tu da nadxixruj bea na.
1CO 7:7 Neda' dxezá lazra' súale xúgute̱le ca zua' neda', san Dios ba nunne̱' tu tudxu da gaca gundxu. Tu da nunne̱' tudxu, na' da xula xetudxu.
1CO 7:8 Dxapa' benne' wegu', ne nu'ula we̱ze̱be, naca xrlátaje xelexegá'ane̱' cá'aze ca zua' neda'.
1CO 7:9 Che quebe xelezéquene̱' xelenná be'e cuine̱', waca xuluchaga ne̱'e̱, lawe' da nácadxa xrlátaje xuluchaga ne̱'e̱ quézcala xeledée̱' ba xa' lu be̱la' dxen chee̱'.
1CO 7:10 Benne' zaj nuchaga ne̱'e̱ dxapa' nu'ula quebe gusane̱' benne' biu chee̱'. Quebe naca chee̱za' da nadxixruj bea nigá, san naca na da dxun Xránadxu.
1CO 7:11 Che nu nu'ula gusane̱' benne' biu chee̱', dxal-la' xegá'ane̱' cá'aze, u xexaque̱' tuze nen benne' biu chee̱' na'. Cá'anqueze benne' biu quebe dxal-la' gusane̱' zru'ule̱'.
1CO 7:12 Dxapa' xezícadxa benne' néda'queza', quegá Xránadxu, che zru'ula tu bi bíchedxu quebe dxéajle̱'e̱ chee̱ Xránadxu, dxéquene̱' xrlátaje zúale̱ne̱' benne' chee̱', bi bíchedxu na' quebe dxal-la' gusane̱' le̱'.
1CO 7:13 Che benne' biu chee̱ tu nu'ula zandxu quebe dxéajle̱'e̱ chee̱ Xránadxu, san dxéquene̱' xrlátaje zúale̱ne̱' zru'ule̱', nu'ula zandxu na' quebe dxal-la' gusane̱' benne' biu chee̱' na'.
1CO 7:14 Benne' biu na' quebe dxéajle̱'e̱ chee̱ Xránadxu naque̱' ca tu bi chee̱ Dios lawe' da nuchague̱' zru'ule̱' dxéajle̱'e̱ chee̱ Xránadxu, na' nu'ula na' quebe dxéajle̱'e̱ chee̱ Xránadxu naque̱' ca tu bi chee̱ Dios lawe' da nuchague̱' benne' biu chee̱' dxéajle̱'e̱ chee̱ Xránadxu. La quebe naca na caní, zrí'inele le'e xelácabe' ca zri'ine benne' quebe zaj naque̱' chee̱ Dios, san da li zaj nácabe' ca bi chee̱ Dios.
1CO 7:15 Che benne' biu na' u zru'ule̱', benne' quebe dxéajle̱'e̱ chee̱ Xránadxu, dxaca lázrtequeze̱' gusane̱' ljwezre̱', waca na. Che caní dxaca chee̱ tu bi bíchedxu u chee̱ tu bi zandxu, nape̱' lataj lawe' da gunné̱ Dios dxi'u chee̱ cueza zri lázredxu.
1CO 7:16 Che quebe gaca caní, quebe nézenu' lue', nu'ula, che wazéquenu' cu'u benne' biu chiu' lu na' Cristo, na' lue', benne' biu, quebe nézenu' che wazéquenu' cu'u zru'ulu' lu na' Cristo.
1CO 7:17 Ájate̱ze naca, tu tudxu dxal-la' gundxu ca naca da nunna Xránadxu dxi'u, ne xegá'anadxu cáte̱ze nácadxu gate gunné̱ Dios dxi'u. Caní dxapa' xúgute̱ cue' bi chee̱ Cristo.
1CO 7:18 Che Dios dxenné̱' tu benne' biu nadxugu lu be̱la' chee̱' da dxulé'e na naque̱' bi chee̱ Dios, benne' nigá dxal-la' xegá'ane̱' ca', na' che dxenné̱ Dios tu benne' quebe nadxugu lu be̱la' chee̱' da na', quebe dxal-la' chugu lu be̱la' chee̱' da na'.
1CO 7:19 Quebe bi naca che nadxugu da na' lu be̱la' chee̱dxu, u quebe. Da dxun na ba xen naca gundxu da dxaca lazre' Dios.
1CO 7:20 Tu tudxu dxal-la' xegá'anadxu cáte̱ze nácadxu gate Dios dxenné̱' dxi'u chee̱ gácadxu bi chee̱'.
1CO 7:21 Che gucu' benne' nada'u gate Dios gunné̱' lue', quebe cue'u gunne xue, san che gapu' lataj gacu' benne' quebe nada'u, dxal-la' guchínenu' na.
1CO 7:22 Bénnea' guque̱' benne' nada'u gate gunné̱ Xránadxu le̱' naque̱' ca benne' quebe nada'u chee̱ gune̱' zrin chee̱ Xránadxu, na' cá'anqueze bénnea' quebe naque̱' benne' nada'u gate gunné̱ Xránadxu le̱', naque̱' ca benne' nada'u chee̱ Xránadxu.
1CO 7:23 Dios ba ná'awe̱' le'e nen tu lazruj zrente̱. Quebe güele lataj nu benne' gune̱' le'e benne' zaj nada'u.
1CO 7:24 Ca' naca na, bi bicha', tu tudxu dxal-la' xegá'anadxu lau Dios cáte̱ze nácadxu gate gunné̱' dxi'u.
1CO 7:25 Ca naca chee̱ benne' ca' quebe zaj nuchaga ne̱'e̱ quebe bi gunná be'e Xránadxu neda', san dxapa' le'e ca da dxéqueda', na' waca guxrén lázrele neda' lawe' da bexache lazre' Xránadxu neda'.
1CO 7:26 Dxéqueda' neda' dxal-la' xegá'ana tu benne' biu cáte̱ze naque̱' lawe' da zúadxu zra sté̱bele̱'e̱.
1CO 7:27 Che nuchagu' nu'ula quebe cuasu' le̱', na' che quebe nuchagu' nu'ula, quebe guchaga na'u.
1CO 7:28 Che guchaga na'u, quebe gunu' dul-la, na' che tu nú'uladau' guchaga na'abe', quebe gunbe' dul-la. Benne' ca' dxuluchaga ne̱'e̱ welezúe̱' ste̱be lu zra caní, na' dxaca lazra' quebe súale ste̱be caní.
1CO 7:29 Bi bícha'dau', da nigá dxaca lazra' xapa' le'e. Xelátega ne de̱ súadxu lu xe̱zr la xu nigá. Ná'ate̱la benne' zaj nuchaga ne̱'e̱ dxal-la' gune̱' da naca chee̱ Cristo ca dxelún benne' quebe zaj nuchaga ne̱'e̱.
1CO 7:30 Benne' dxelebezre xache̱' dxal-la' xelune̱' da naca chee̱ Cristo ca dxelún benne' quebe zaj naque̱' baxache'. Benne' zaj zra' laní dxal-la' xelune̱' da naca chee̱ Cristo ca dxelún benne' quebe zaj zue̱' xel-la dxebé, na' benne' dxelá'awe̱' dxal-la' xelune̱' da naca chee̱ Cristo ca dxelún benne' quebe zaj nape̱' da na' dxelá'awe̱'.
1CO 7:31 Benne' dxelezi'e̱ ba neza lu xe̱zr la xu nigá dxal-la' xelune̱' da naca chee̱ Cristo ca dxelún benne' quebe dxelezi'e̱ ba neza na, lawe' da ba dxexuzre lazre' xe̱zr la xu nigá.
1CO 7:32 Dxaca lazra' quebe bi cue'le gunne xue. Gate tu benne' biu nácabe' wegu' dxe'ebe' gunne xue da naca chee̱ Xránadxu chee̱ gunbe' da dxezaca ba lazre' Xránadxu.
1CO 7:33 Gate ba nuchaga ne̱'e̱, dxe'e̱ gunne xue da naca chee̱ xe̱zr la xu nigá chee̱ gune̱' da dxezaca ba lazre' zru'ule̱'.
1CO 7:34 Cá'anqueze dxaca chee̱ nu'ula zua benne' biu chee̱', ne nu'ula wegu'. Nu'ula wegu' dxe'ebe' gunne xue da naca chee̱ Xránadxu chee̱ chu'ube' lu na' Dios dute̱ be̱la' dxen chee̱be', ne dute̱ be' chee̱be', san nu'ula zua benne' biu chee̱' dxe'e̱ gunne xue da naca chee̱ xe̱zr la xu nigá chee̱ gune̱' da xezaca ba lazre' benne' chee̱'.
1CO 7:35 Dxapa' le'e da nigá chee̱ gaca chawe' chee̱le, ne quebe chee̱ nna be'eda' le'e, san chee̱ gunle da xrlátaje, ne da li, chee̱ chu'ule du lázrele lu na' Xránadxu.
1CO 7:36 Che nu benne' dxéquene̱' nácadxa xrlátaje guchaga na' zrí'ine̱' nu'ula lawe' da ba dxedé xel-la cuide' chee̱be', ne naca da dxal-la' gunbe', dxal-la' gune̱' da dxéquene̱' naca xrlátaje. Waca guchaga na'abe'. Quebe naca na dul-la.
1CO 7:37 Che nu benne' quebe dxéquene̱' dxun na ba xen, ne che nape̱' lataj gune̱' da dxaca lazre̱', ne che ba nune̱' lu xichaj lázrdawe̱' xegá'ana zrí'ine̱' nu'ula wegu', dxune̱' da xrlátaje.
1CO 7:38 Ca' naca na, benne' dxu'e̱ lataj guchaga na'abe' zrí'ine̱' nu'ula, dxune̱' da xrlátaje, na' bénnea' quebe dxu'e̱ lataj dxune̱' da nácadxa xrlátaje.
1CO 7:39 Nu'ula zua benne' biu chee̱' nuchague̱' bénnea' ne̱ chee̱ da nadxixruj bea na dxácate̱ ne zue̱' nabane̱', san che gate benne' chee̱', de̱ lataj nu'ula na' guchaga ne̱'e̱ nen nútete̱ze benne' biu, san dxun na ba xen dxéajle̱'e̱ chee̱ Xránadxu.
1CO 7:40 Gácadxa chee̱' da ba neza che xegá'ane̱' cá'aze. Caní dxéqueda' neda', ne dxéqueda' dxun Be' Lá'azxa chee̱ Dios neda' tuze.
1CO 8:1 Na'a guchálaja' ca naca chee̱ xel-la wagu da zaj nuzúa bénneache lau bedáu' xiaj xaga. Da li xúgute̱dxu nápadxu xel-la dxéajni'i ca naca da nigá. Xel-la dxéajni'i dxun na dxi'u benne' dxulucá'ana szren cuina, san xel-la zri'i lazre' dxusegula na dxi'u lu xel-la dxeajlí lazre' chee̱dxu.
1CO 8:2 Che nu benne' dxéquene̱' nape̱' dute̱ xel-la dxéajni'i, quebe ne chéajni'ine̱' ca dxal-la' chéajni'ine̱'.
1CO 8:3 Che nu benne' nazrí'ine̱' Dios, Dios ba nazí' lu ne̱'e̱ bénnea'.
1CO 8:4 Na'a, ca naca chee̱ xel-la wagu da zaj nuzúa bénneache lau bedáu' xiaj xaga, nezdxu quebe bi naca tu bedáu' xiaj xaga lu xe̱zr la xu nigá, ne tuze Bénnea' naque̱' Dios.
1CO 8:5 Lácala zaj zra' xabáa, ne xe̱zr la xu nigá da zante̱ da dxeleque bénneache zaj naca na dios, ne chee̱ benne' caní zante̱ dios zaj zra na, ne zante̱ xrane̱' zaj zra na,
1CO 8:6 chee̱dxu dxi'u che nácadxu chee̱ Cristo, tuze Bénnea' naque̱' Dios, Bénnea' naque̱' Xradxu. Xradxu Dios be̱ne̱' xúgute̱ da de̱, na' dxi'u zúadxu chee̱ guchínene̱' dxi'u. Cá'anqueze tuze Bénnea' naque̱' Xránadxu, Jesucristo. Ne̱ chee̱ Le̱' guzrá' xúgute̱ da de̱, na' zúadxu dxi'u ne̱ chee̱ Le̱'.
1CO 8:7 Quegá xúgute̱ bi chee̱ Cristo zaj nézene̱' da nigá. Bal-la benne' caní gulú'u lawe̱' belúe lá'ane̱' bedáu' xiaj xaga, na' gate dxelawe̱' xel-la wagu na', dxeléquene̱' naca na tu da naca na chee̱ bedáu', na' lawe' da quebe zaj ze̱ chache̱' lu xichaj lázrdawe̱', dxeléquene̱' zaj nabague̱' zria ne̱ chee̱ da dxelawe̱'.
1CO 8:8 Da na' dxágudxu quebe dxucá'anadxa na dxi'u xrlátaje lau Dios, lawe' da quebe nácadxadxu xrlátaje che dxágudxu, ne quebe nácadxadxu cale̱la che quebe dxágudxu.
1CO 8:9 Le guxúe xanne' cuínale ca naca lataj da nápale bi gágule chee̱ quebe guzría xile tu benne' quebe ze̱ chache̱' lu xel-la dxeajlí lazre' chee̱'.
1CO 8:10 Ca' naca na, che lue' nézenu' da nigá, na' che cue'u gagu' tu naga zra' bedáu' xiaj xaga, na' che tu bi bíchedxu, benne' quebe ze̱ chache̱' lu xel-la dxeajlí lazre' chee̱', lé'ene̱' lue' dxe'u dxagu' na', na' bi bíchedxu na' wexázrquezne̱' cue'e̱ gawe̱' da na' zaj nuzúa bénneache lau tu dios quebe bi naca.
1CO 8:11 Ca' naca na, lue', lawe' da napu' xel-la dxéajni'i, guzría xi'u tu bi bichu' quebe ze̱ chache̱' lu xel-la dxeajlí lazre' chee̱', na' naque̱' benne' gute Cristo waláz chee̱'.
1CO 8:12 Ca' naca na, gate dxuzría xile bi bíchedxu quebe zaj ze̱ chache̱' lu xel-la dxeleajlí lazre' chee̱', dxunle dul-la da dxuzúa Crístoqueze chalá'ala.
1CO 8:13 Chee̱ le̱ na', che guzría xi'a tu bi bicha' ne̱ chee̱ da dxawa', nácadxa chawe' cabátadxa gawa' be̱la' chee̱ quebe guzría xi'a le̱'.
1CO 9:1 Naca chia' naca' gubáz chee̱ Cristo, ne napa' lataj bi guna' lawe' da ble'eda' Xránadxu Jesús, na' nácale le'e bi chee̱ Cristo ne̱ chee̱ zrin be̱na' chee̱'.
1CO 9:2 Che dxeleque xezícadxa benne' quebe naca' gubáz chee̱ Cristo, san dxun na ba xen guéquele le'e naca' gubáz chee̱' lawe' da dxunna bea da nácale chee̱ Xránadxu da li naca' gubáz chee̱'.
1CO 9:3 Da nigá naca na da dxapa' benne' ca' dxelezí tizre̱' neda':
1CO 9:4 Naca chia' si' lu na'a da xi'aj gawa' ne̱ chee̱ zrin da dxuna'.
1CO 9:5 Cá'anqueze naca chia' guchaga na'a tu nu'ula zandxu chee̱ chéajle̱ne̱' neda' ca dxelún xezícadxa benne' gubáz chee̱ Cristo, ne benne' bíchequeze Xránadxu, ne Pedro.
1CO 9:6 ¿Dxéquele tuze Bernabé, ne neda' dxal-la' guntu' zrin chee̱ gata' da xi'aj gáguntu' gate dxuzénentu' bénneache dizra' chawe'?
1CO 9:7 ¿Nuzra benne' gaque̱' benne' zeje̱' wedil-la che quebe nu quizruj le̱'? ¿Nuzra benne' dxaze̱' lba uva che quebe gawe̱' na? ¿Nuzra benne' gusegule̱' zrila' che quebe xequé̱'e̱ xicha zraba'?
1CO 9:8 Quebe dxal-la' guéquele dxapa' le'e da nigá néda'queza', lawe' da caníqueze dxenná na lu da bdxixruj be'e Moisés.
1CO 9:9 Naxúaj lu da nadxixruj bea na da dxenná Dios: Quebe cu'ule xixruj dxu'a be̱zre, be̱ dxíchuba' zrua' xtila. Quebe gunná Dios da nigá lawe' da dxue lazre̱' chee̱ be̱zre cá'aze.
1CO 9:10 Gunné̱' na ne̱ chee̱dxu dxi'u. Naxúaj da nadxixruj bea nigá chee̱ gaca da ba neza chee̱dxu, lawe' da benne' dxugá'ane̱' be̱zre, ne benne' dxine̱' dxal-la' xelebeza lazre̱' xelexezi'e̱ ca naca da gunna lina da xelaze̱'.
1CO 9:11 Na'a, che netu' ba gúzantu' lu xichaj lázrdaule da naca na chee̱ Be' Lá'azxa, ¿quebe dxal-la' si' lu na'ntu' látedauze da naca chee̱le lu xe̱zr la xu nigá?
1CO 9:12 Che xezícadxa benne' naca chee̱' xelezí' lu ne̱'e̱ da naca chee̱le, ¿gázradxa netu'? Quebe ne guchínentu' da nigá naca na chee̱ntu'. Bchaga launtu' xúgute̱ chee̱ quebe guzágantu' ca naca dizra' chawe' chee̱ Cristo.
1CO 9:13 Ba nézele benne' dxelune̱' zrin chee̱ xudau' dxelawe̱' chee̱ da xu'u lu xudau' na', na' benne' dxelune̱' zrin chee̱ lu cugu naga dxelutie̱' be̱ xíxre'du ca' lau Dios dxelawe̱' be̱la' chee̱ béadu ca'.
1CO 9:14 Cá'anqueze ba nun Xránadxu chee̱ benne' dxuluchalaje̱' dizra' chawe', xelezí'e̱ ba neza zrin da dxelune̱'.
1CO 9:15 Cabata' guchíneda' netú da caní zaj naca na chia', ne quebe dxuzúaja' da nigá chee̱ gúnnale neda' late'. Gaca lázredxa' gatia' quézcala nu gucuasa da ba neza da napa'.
1CO 9:16 Quebe dxal-la' gucá'ana szren cuina' lawe' da dxuzenda' bénneache dizra' chawe' chee̱ Cristo, lawe' da dxun na ba xen guna' na. Baxache' naca' che quebe guzenda' bénneache dizra' chawe' nigá.
1CO 9:17 Chee̱ le̱ na', che dxuna' na lawe' da naca na da dxaca lazra' guna', ba de̱ lazruj chia'. Na'a, che dxuna' na xadíaze, naca na tu da nusebaga Dios neda'.
1CO 9:18 Ca' naca na, lazruj da dxezi'a naca na da ba neza napa' gate dxuzenda' bénneache dizra' chawe' chee̱ Cristo, ne quebe bi dxuchízruja' benne' ca'. Ca' naca na, quebe dxuchíneda' da naca na chia' lawe' da dxuna' zrin nigá.
1CO 9:19 Lácala quebe naca' benne' nada'u chee̱ nu benne', ba nun cuina' ca tu benne' nada'u chee̱ xúgute̱ bénneache, chee̱ séqueda' cu'a benne' zandxa lu na' Cristo.
1CO 9:20 Gate zua' ládujla benne' judío ca', dxun cuina' benne' judío chee̱ cu'a le̱' lu na' Cristo. Ca' naca na, ládujla benne' zaj xu'e̱ lu na' da nadxixruj bea na dxun cuina' ca tu benne' xu'e̱ lu na' da nadxixruj bea na, chee̱ cu'a le̱' lu na' Cristo lácala da li quebe xu'a lu na' da nadxixruj bea na na'.
1CO 9:21 Xetú na'a, chee̱ séqueda' cu'a lu na' Cristo benne' ca' quebe zaj xu'e̱ lu na' da bdxixruj be'e Moisés, dxun cuina' ca tu benne' quebe xu'e̱ lu na' da nadxixruj bea na na', lácala da li xu'a lu na' da nadxixruj bea na chee̱ Dios lawe' da xu'a lu na' da nadxixruj bea na chee̱ Cristo.
1CO 9:22 Gate zua' ládujla benne' ca' quebe zaj ze̱ chache̱' lu xel-la dxeajlí lazre' chee̱' dxun cuina' ca zaj naca benne' ca' chee̱ séqueda' cu'a le̱' lu na' Cristo. Ca' naca na, dxun cuina' ca naca tu tu benne' ca' chee̱ ájate̱zla séqueda' cu'a bal-la benne' ca' lu na' Cristo.
1CO 9:23 Dxuna' xúgute̱ da nigá ne̱ chee̱ dizra' chawe' chee̱ Cristo chee̱ gapa' tu da ba neza chee̱ na.
1CO 9:24 Ba nézquezle le'e tu lu da huitaj benne' zan dxesí'aca chégüe̱' na' tuze̱' dxezrué'ene̱' lataj blau. Le sa'aca chegu le'e chee̱ zrué'ele da dxunna Cristo.
1CO 9:25 Xúgute̱ benne' ca' dxulupá'a cuine̱' chee̱ xelu'e̱ da huitaj, dxuluzúe̱' chalá'ala xúgute̱ da dxun na cale̱la chee̱'. Benne' caní dxelune̱' da caní chee̱ xelezí' lu ne̱'e̱ tu da guzúe̱' xíchaje̱' da naca na laga' da québequeze si bea, san dxi'u dxundxu zrin chee̱ zrué'edxu da zeajlí canna.
1CO 9:26 Neda' quebe dxezá chégua' ájate̱zla, ne quebe dxedil-la' ca tu benne' dxu'e̱ lu be'ze gate dxedil-le̱'.
1CO 9:27 Neda' dxudéa' xel-la zi' be̱la' dxen chia', ne dxenná be'eda' na, chee̱ quebe gunitia' neda' da naca chia' lu zrin nigá, ca te na' ba bsé̱deda' benne' xula ca'.
1CO 10:1 Dxaca lazra' nézele, bi bícha'dau', ca guca chee̱ xra xrtáudxu ca' xjácale̱ne̱' Moisés. Dios guché̱'e̱ xúgute̱ benne' ca' ne̱ chee̱ beuj bza na', na' xúgute̱' guledée̱' ládujla nísadau' da nazí le na Xrna.
1CO 10:2 Ca' naca na, waca nnadxu xúgute̱' beledxúe̱' nisa lu nísadau' na', ne gulaque̱' tuze nen Moisés gate guledále̱ne̱' beuj bza na'.
1CO 10:3 Cá'anqueze xúgute̱' gulawe̱' tuze xel-la wagu da bnezruj Dios le̱',
1CO 10:4 ne gule'aj xúgute̱' tuze nisa da bnezruj Dios le̱', lawe' da gulé'aje̱' nisa na' bedxúaj na xiaj xre na'. Xiaj xre nigá dxulé'e na ca naca Crístoqueze, Bénnea' guxéajle̱ne̱' benne' ca' le̱'e̱ xixre' lawe' lataj na'.
1CO 10:5 Benne' zan benne' ca' quebe belune̱' da bezaca ba lazre' Dios, na' chee̱ le̱ na' gulatie̱' le̱'e̱ xixre' lawe' lataj.
1CO 10:6 Xúgute̱ da caní guca na chee̱ guzéajni'i na dxi'u chee̱ quebe sa lázredxu da cale̱la ca', ca belún benne' ca'.
1CO 10:7 Chee̱ le̱ na' quebe gucá'ana szrenle bedáu' xiaj xaga ca' ca belún bal-la benne' ca', ca naxúaj na lu dizra' lá'azxa, dxenná na: Bénneache gulebé'e̱, ne gule'aj gulawe̱' lau bedáu' xiaj xaga, na' belexase̱' chee̱ buluxé̱'e̱.
1CO 10:8 Quebe dxal-la' gundxu da sban ca belún bal-la benne' ca', na' tu zraze gulate chupa gaxúa chi dxua gaxue̱'.
1CO 10:9 Quebe dxal-la' guchínedxu xel-la zren lazre' chee̱ Xránadxu chee̱ gundxu da cale̱la ca belún bal-la benne' ca', na' gulatie̱', gate gulí'ina be̱la' le̱'.
1CO 10:10 Quebe nne̱le chee̱ Dios ca gulenné̱ bal-la benne' ca', na' gubáz chee̱ xabáa chee̱ xel-la gute be̱te̱' benne' ca'.
1CO 10:11 Xúgute̱ da caní gulezaca xra xrtáudxu, na' zaj naxúaj na lu dizra' lá'azxa chee̱ guzéajni'i na dxi'u, zúadxu lu zra bze̱be caní.
1CO 10:12 Ca' naca na, nu benne' dxéquene̱' ze̱ chache̱' lu da naca chee̱ Dios dxal-la' guxúe xanne' cuine̱' chee̱ quebe cheajcházie̱'.
1CO 10:13 Da dxelún zréaje le'e naca na tuze ca da dxelún zréaje xúgute̱ bénneache, na' waca guxrén lázrele Dios lawe' da quebe gu'e̱ lataj bi gun zréaje le'e da quebe séquele guchaga laule, na' gate gaca tu da gun zréaje na le'e, Dios gunne̱' le'e ájala gunle chee̱ lale lu da na', chee̱ séquele guchaga laule na.
1CO 10:14 Chee̱ le̱ na', bi bicha' nazri'ite̱ lazra', québedxa gucá'ana szrenle bedáu' xiaj xaga ca'.
1CO 10:15 Dxuchálajle̱na' le'e ca dxuchálajle̱na' benne' dxeléajni'ine̱', na' lé'equeze waca guchí'ale chee̱ da dxapa' le'e.
1CO 10:16 Gate dxágadxu da dxucube na ca guca gate gute Xránadxu, dxápadxu ba lá'ana Dios. Gate dxí'ajdxu xrisa uva lá'azxa, da nigá dxulé'e na dxezidxu ba neza dxen chee̱ Cristo da gulalaj na le̱'e̱ xaga béguaj. Xeta xtila na' da dxuzúzrujdxu dxulé'e na xezidxu ba neza be̱la' dxen chee̱ Cristo da bdee̱' waláz chee̱dxu le̱'e̱ xaga béguaj.
1CO 10:17 Lácala naxandxu, xúgute̱dxu dxágudxu tu xeta xtílaqueze da naca na tuze, da na' dxulé'e na nácadxu ca tuze be̱la' dxen chee̱ Cristo.
1CO 10:18 Le nna'xque ca zaj naca benne' Israel ca'. Benne' caní, benne' dxelawe̱' da dxuluzré̱'e̱ lu cugu chee̱ Dios dxelezi'e̱ ba neza lu cugu na'.
1CO 10:19 Quebe dxennía' naca tu bedáu' xiaj xaga tu da zaca, na' be̱la' da dxuluzría bénneache lau bedáu' xiaj xaga quebe zácadxa ca bítete̱ze xetú be̱la'.
1CO 10:20 Dxennía' da dxuluzría lau bedáu' xiaj xaga benne' ca' quebe zaj núnbe'e̱ Dios, dxuluzríe̱' na lau be' xriwe̱' ca' ne quegá lau Dios, na' quebe dxaca lazra' gunle tuze be' xriwe̱' ca'.
1CO 10:21 Quebe gaca xí'ajle da na' dxulé'e na nácale Xránadxu tuze, ne xí'ajte̱le da gulé'e na nácale tuze be' xriwe̱' ca', ne quebe gaca gágule da naca na chee̱ Xránadxu, ne gágute̱le da naca na chee̱ be' xriwe̱' ca'.
1CO 10:22 ¿Dxaca lázrele xewine lazre' Xránadxu lawe' da dxusandxu Le̱'? ¿Dxéquele le'e nácadxu benne' wáladxa ca Le̱'?
1CO 10:23 Da li naca da na' dxelenná bénneache, dxelenné̱': Naca chia' guna' da dxaca lazra'. Quegá xúgute̱ naca na da sidxu ba neza. Naca chee̱ nu benne' gune̱' ca dxaca lazre̱' san quegá xúgute̱ gusegula na le̱' lu xel-la dxeajlí lazre' chee̱'.
1CO 10:24 Dxal-la' gundxu da gaca chawe' chee̱ benne' xula, ne quegá da gaca na chawe' cheé̱zedxu.
1CO 10:25 Le gagu le'e ca naca da dxeda'u lawe' xi'a, ne quebe naba xúzrele chee̱ na chee̱ quebe sua ste̱be xichaj lázrdaule,
1CO 10:26 lawe' da zaj naca chee̱ Xránadxu xe̱zr la xu nigá, ne xúgute̱ da ca' zaj zra' lu xe̱zr la xu.
1CO 10:27 Che nu benne', benne' quebe dxéajle̱'e̱ chee̱ Xránadxu, dxenné̱' le'e gágule xeta, na' che dxaca lázrele chéajle, le gagu xúgute̱ da guzríe̱' laule, ne quebe naba xúzrele chee̱ na chee̱ quebe sua ste̱be xichaj lázrdaule.
1CO 10:28 Che nna nu benne' zúale̱ le'e, na' xe̱'e̱ le'e: “Be̱la' nigá bache guzría na lau bedáu' xiaj xaga”, quebe gágule na, chee̱ quebe guzúale ste̱be bénnea' gunné̱' ca', ne chee̱ quebe sua ste̱be xichaj lázrdaule.
1CO 10:29 Dxennía' da nigá chee̱ xichaj lázrdau benne' zúale̱ne̱' lue', ne quegá chee̱ xichaj lázrdau' lué'queze. Waca naba xuzre tu benne': “¿Bizr chee̱ na' dxuchi'u da naca chia' lawe' da sua ste̱be xichaj lázrdau benne' xula?
1CO 10:30 Che dxapa' Dios: Xcalenu' chee̱ da dxawa', ¿bizr chee̱ na' xelezí tizre̱' neda' chee̱ da dxawa'?”
1CO 10:31 Chee̱ le̱ na', che dxágule u dxí'ajle, u bítete̱ze da dxunle, le gun xúgute̱ chee̱ gaca ba Dios.
1CO 10:32 Quebe bi gunle da guzúa na ste̱be benne' xula, quegá benne' judío ca', ne quegá benne' quebe zaj naque̱' judío, ne quegá nu benne' naque̱' bi chee̱ Dios.
1CO 10:33 Neda' dxuna' ba xuzre guna' da xelezaca ba lazre' xúgute̱ bénneache ca naca xúgute̱ da dxuna'. Quebe dxuna' da gaca chawe' chee̱za' san da gaca chawe' chee̱ xezícadxa bénneache chee̱ xelelé̱'.
1CO 11:1 Le gun ca dxuna' neda', ca neda' dxúnqueza' ca be̱n Cristo.
1CO 11:2 Bi bicha', dxapa' le'e ba lá'ana lawe' da dxeajsá lázrequezle neda', ne dxunle ca naca da bzéajni'ida' le'e.
1CO 11:3 Na'a dxaca lazra' chéajni'ile naca Cristo xíchaje̱ chee̱ tu tu benne' biu, na' benne' biu naque̱' xíchaje̱ chee̱ zru'ule̱', ca naca Dios, naque̱' xíchaje̱ chee̱ Cristo.
1CO 11:4 Che tu benne' biu gugácue̱' xíchaje̱' gate dxuchálajle̱ne̱' Dios naga zaj nadupa bi chee̱ Cristo, u gate dxuchálaje̱' waláz chee̱ Dios, naca na tu xel-la stu' chee̱ Bénnea' naque̱' xíchaje̱'.
1CO 11:5 Che tu nu'ula quebe gugácue̱' xíchaje̱' gate dxuchálajle̱ne̱' Dios, u gate dxuchálaje̱' waláz chee̱ Dios, naca na tu xel-la stu' chee̱', lawe' da dxun cuine̱' ca tu benne' biu. Lé̱bezqueze naca na chugue̱' xíchaje̱'.
1CO 11:6 Che tu nu'ula quebe gugacu xíchaje̱', nácadxa xrlátaje chugue̱' tu chi'ize ca naca xicha xíchaje̱'. Na' che naca na tu xel-la stu' chee̱ nu'ula che chugue̱' xíchaje̱', u che guzúe̱' zrígaze xíchaje̱' ca dxun tu benne' biu, dxal-la' gugacu xíchaje̱' naga zaj nazraga bi chee̱ Cristo.
1CO 11:7 Benne' biu quebe dxal-la' gugacu xíchaje̱' lawe' da naque̱' lu'a le saca Dios, na' da naque̱' dxulé'e na ca naca xel-la szren chee̱ Dios. Da naca nu'ula dxulé'e na ca naca xel-la szren chee̱ benne' biu.
1CO 11:8 Gate be̱n Dios benne' biu, quebe bi guléaje̱' le̱' lu be̱la' dxen chee̱ nu'ula, san guléaje̱' lu be̱la' dxen chee̱ benne' biu da na' bexune̱' nu'ula na'.
1CO 11:9 Dios be̱ne̱' nu'ula na' chee̱ nna be'e benne' biu le̱', ne quegá be̱ne̱' benne' biu chee̱ nna be'e nu'ula le̱'.
1CO 11:10 Chee̱ le̱ na' nu'ula dxal-la' guzúe̱' xíchaje̱' tu da dxulé'e na zua nu dxenná be'e le̱' chee̱ quebe gun zréajene̱' gubáz chee̱ xabáa ca' chee̱ Dios.
1CO 11:11 Lu da nácadxu chee̱ Cristo, benne' biu dxechinne̱' nu'ula, ne cá'anqueze dxechín nu'ula benne' biu.
1CO 11:12 Da li Dios guléaje̱' nu'ula na' lu be̱la' dxen chee̱ benne' biu, na' cá'anqueze benne' biu dxálaje̱' chee̱ nu'ula, na' xúgute̱dxu zadxu lu na' Dios.
1CO 11:13 Le nna'xque le'e che naca xrlátaje che tu nu'ula guchálajle̱ne̱' Dios, ne quebe gugacu xíchaje̱'.
1CO 11:14 Da nácaquezdxu dxulé'e na dxi'u naca tu xel-la stu' che benne' biu se̱ tunna xicha xíchaje̱',
1CO 11:15 na' naca tu da ba lá'ana chee̱ nu'ula se̱ na tunna, lawe' da nunna Dios le̱' xicha xíchaje̱' tunna chee̱ gugacu na xíchaje̱'.
1CO 11:16 Na'a che nu benne' dxaca lazre̱' gutil-le̱' dizra' ca naca da nigá, dxal-la' nézene̱' quegá dxi'u ne quegá benne' zaj nazraga chee̱ Cristo quebe núnbeadxu xetú da xula.
1CO 11:17 Ca naca chee̱ da nigá quebe dxapa' le'e ba lá'ana lawe' da dxaca da cale̱la chee̱le gate nazrágale, ne quegá da chawe'.
1CO 11:18 Da nédxuteca, dxulé̱'e̱ neda' gate dxezrágale chee̱ güe lá'anale Dios nácale chupa la'a. Dxéqueda' naca da li da dxelenné̱'.
1CO 11:19 Dxál-la'queze gácale chupa la'a chee̱ gulé'e lawe' nu benne' ládujla le'e da li naque̱' bi chee̱ Cristo.
1CO 11:20 Chee̱ le̱ na' gate dxezrágale le'e chee̱ gágule da naca chee̱ Xránadxu, da li québedxa naca na chee̱ Xránadxu.
1CO 11:21 Gate dxezrín zra dxágule, tu tule le'e dxebía lau chee̱le dxecá'ale xel-la wagu cha chee̱le, na' bál-lale le'e dxegá'anale dxedunle, na' xezícadxale dxezúzrele.
1CO 11:22 ¿Quebe bi de̱ chee̱le naga xi'aj gágule? Ca'an dxunle, dxuzúale chalá'ala bi ca' chee̱ Dios, ne dxugu'ule xel-la stu' benne' ca' quebe bi de̱ chee̱'. ¿Bízraqueze xapa' le'e? ¿Dxal-la' gapa' le'e ba lá'ana? ¡Cabata'!
1CO 11:23 Xránaquezdxu bzéajni'ine̱' neda' da nigá bsé̱deda' le'e: Lu zre' ná'queze gate Judas bdee̱' Xránadxu Jesús lu na' benne' guledábague̱' Le̱', na' Jesús guqué̱'e̱ xeta xtila,
1CO 11:24 na' gudé guzre̱' Dios: Xcalenu', bzúzruje̱' na, na' gunné̱': “Le gagu. Xeta xtila nigá dxulé'e na ca gaca chee̱ be̱l-la' dxen chia' lu da na' saca zi'a waláz chee̱le. Le gun da nigá chee̱ cheajsá lázrele neda'.”
1CO 11:25 Cá'anqueze, gudé gulawe̱', guqué̱'e̱ xrisa uva, na' gunné̱': “Xrisa uva nigá dxulé'e na ca naca da dxuzé̱ chacha na xel-la wezría cube da naca na dxen chia'. Tu tu lasa xí'ajle na, le gun na chee̱ cheajsá lázrele neda'.”
1CO 11:26 Ca' naca na, ca zrin zra xelá' Xránadxu, gulé'ele ca guca gate gute Xránadxu tu tu lasa gate gágule xeta xtila nigá, ne xí'ajle xrisa uva nigá.
1CO 11:27 Ca' naca na, nútete̱ze benne' gawe̱' xeta xtila nigá, u xí'aje̱' xrisa uva chee̱ Xránadxu, ne quebe dxape̱' ba lá'ana na, na' dxune̱' dul-la da dxuzúa be̱la' dxen chee̱ Xránadxu chalá'ala.
1CO 11:28 Chee̱ le̱ na' tu tudxu dxal-la' guxúe xánnedxu xichaj lázrdaudxu gate za gágudxu xeta xtila nigá, ne za xí'ajdxu xrisa uva nigá,
1CO 11:29 lawe' da che xi'aj gágudxu, ne quebe dxéquedxu dxulé'e na ca naca be̱la' dxen chee̱ Xránadxu, na' da xi'aj gágudxu gun na bágadxu zria.
1CO 11:30 Chee̱ le̱ na' benne' zan ládujla le'e quebe chawe' zaj zue̱', ne zaj nate ni'a ne̱'e̱, na' bal-la benne' ládujla le'e ba gulatie̱'.
1CO 11:31 Che guxúe xanne' cuínadxu, quebe gun na ba xen guchi'a Xránadxu chee̱dxu caní.
1CO 11:32 Gate Xránadxu dxuchi'e̱ chee̱dxu, dxudée̱' dxi'u xel-la zi' chee̱ quebe cuía xidxu nen benne' zaj zre̱'e xe̱zr la xu nigá.
1CO 11:33 Ca' naca na, bi bicha'. Gate dxezrágale chee̱ gágule da naca chee̱ Xránadxu, le cueza ljwézrele tule xetule chee̱ bi gágule.
1CO 11:34 Che núlale dxedunle, le gagu lu xu'u lízrquezle, chee̱ quebe gun na ba xen guzría xi' Dios le'e gate na' nazrágale. Xezícadxa da ca' dxelaca chee̱le gucá'ana' chawe' gate xida' xedajnná'a le'e.
1CO 12:1 Bi bicha', zaj de̱ da dxaca lazra' chéajni'ile ca naca chee̱ xel-la waca ca' da dxunna Be' Lá'azxa tu tudxu dxi'u.
1CO 12:2 Ba nézquezle gate na' quebe ne chéajle̱le chee̱ Xránadxu, be̱'e̱le lataj gulezrube xue̱' le'e chee̱ xeajé̱ lá'anale bedáu' xiaj xaga ca', da quebe dxelenné̱ na.
1CO 12:3 Chee̱ le̱ na' dxaca lazra' nézele che zua nu benne' nne̱': Nabía xi' Jesús, quebe dxuchálaje̱' ne̱ chee̱ Be' Lá'azxa chee̱ Dios. Na' netú benne' gaca nne̱': Jesús naque̱' Xrana', che quebe dxuchálaje̱' ne̱ chee̱ Be' Lá'azxa.
1CO 12:4 Zaj nazrá' xel-la waca ca' da gaca si' lu nnadxu, q san tuze naca Be' Lá'azxa, Bénnea' dxunne̱' dxi'u na.
1CO 12:5 Zaj nazrá' ca gaca gundxu zrin, san tuze naca Xránadxu, Bénnea' dxundxu zrin chee̱'.
1CO 12:6 Zaj nazrá' ca da gaca gundxu, san tuze naca Dios, Bénnea' dxunne̱' dxi'u xel-la waca gundxu na.
1CO 12:7 Dios dxunne̱' cha chee̱dxu tu xel-la waca chee̱ Be' Lá'azxa chee̱ gaca da ba neza chee̱ xúgute̱dxu.
1CO 12:8 Ne̱ chee̱ Be' Lá'azxa dxunne̱' bal-la benne' xel-la waca xuluchálaje̱' dute̱ xel-la sina, na' xebal-le̱' ne̱ chee̱ Be' ná'queze dxunne̱' le̱' xel-la waca xuluchálaje̱' dute̱ xel-la naxéajni'i.
1CO 12:9 Xebal-le̱' dxelezi'e̱ xel-la dxeajlí lazre' ne̱ chee̱ Be' ná'queze, na' xebal-le̱' dxelezi'e̱ xel-la waca chee̱ xelexune̱' benne' we̱' ca'.
1CO 12:10 Xebal-le̱' dxelezi'e̱ xel-la waca xelune̱' xel-la waca ca' chee̱ xabáa, na' xebal-le̱' dxelezi'e̱ xel-la waca chee̱ xuluchálaje̱' waláz chee̱ Dios. Xebal-le̱', Dios dxunne̱' le̱' xel-la waca xelenézene̱' nu be' dxuchalaj na lu dxu'a bénneache. Xebal-le̱' dxelezi'e̱ xel-la waca xuluchálaje̱' dizra' nazrá', da quebe naca xrtízrqueze̱', na' xebal-le̱' dxelezi'e̱ xel-la waca xuluxuzájle̱'e̱ dizra' nazrá' na'.
1CO 12:11 Xúgute̱ da caní dxun tuze Be' ná'queze, Bénnea' dxunne̱' cha chee̱dxu xel-la waca caní cáte̱ze da dxaca lázrequeze̱'.
1CO 12:12 Zua chee̱dxu tu be̱la' dxen da napa na zánete̱ cue'. Dxi'u, dxéajle̱dxu chee̱ Cristo, nácadxu ca tuze be̱la' dxen chee̱ Cristo.
1CO 12:13 Xúgute̱dxu dxi'u, che nácadxu benne' judío, u benne' quebe nácadxu judío, ne che nácadxu benne' zaj nada'u, u benne' quebe zaj nada'u, gate gudxúadxu nisa da dxulé'e na nácadxu Cristo tuze, cá'anqueze bexácadxu ca tuze be̱la' dxen, da na' be̱n tuze Be' Lá'azxa, na' Diosqueze be̱nne̱' dxi'u lataj sidxu tuze Be' ná'queze.
1CO 12:14 Tu be̱la' dxen quebe naca na tu cue'ze, san naca na zane' cue'.
1CO 12:15 Che ní'adxu nna na: Quebe naca' na'u, ne chee̱ le̱ na' quebe naca' chee̱ be̱la' dxen chiu', quegá da ni gun na québedxa naca na chee̱ be̱la' dxen na'.
1CO 12:16 Na' che nágadxu nna na: Quebe naca' lau', ne chee̱ le̱ na' quebe naca' chee̱ be̱la' dxen chiu', quegá da ni gun na québedxa naca na chee̱ be̱la' dxen na'.
1CO 12:17 Che dute̱ be̱la' dxen chee̱dxu naca na laudxu, ¿ájazra gundxu xendxu? Che dute̱ be̱la' dxen chee̱dxu naca na nágadxu, ¿ájazra gundxu lé'edxu?
1CO 12:18 Dios nuzúe̱' cha chee̱ cue' be̱la' dxen na' naga dxaca lazre' Le̱'.
1CO 12:19 Che dute̱ na' naca na tuze cue', ¿gazra zúaqueze be̱la' dxen na'?
1CO 12:20 Ca naca na, lácala naca na zane' cue', tuze be̱la' dxen naca na.
1CO 12:21 Xia laudxu quebe dxal-la' xe̱ na nadxu: Quebe nachinda' lue', ne quebe dxal-la' nna xíchajdxu, xe̱ na ní'adxu: Quebe nachinda' le'e.
1CO 12:22 Da naca na, da zaj naca chee̱ be̱la' dxen chee̱dxu da dxéquedxu quebe zaj nácateca na blau, zaj naca na da dxechínedxadxu,
1CO 12:23 Da zaj naca na chee̱ be̱la' dxen chee̱dxu da quebe dxápadxu ba lá'ana zaj naca na da dxugacu xánnedxadxu. Da ca' dxéquedxadxu quebe dxal-la' gulé'edxu zaj naca na da dxucáchedxu,
1CO 12:24 da quebe dxun na ba xen gundxu chee̱ da ca' gaca gulé'edxu. Ca' naca na, Dios be̱ne̱' be̱la' dxen chee̱dxu chee̱ gápadxadxu ba lá'ana da ca' dxéquedxu quebe nácateca na da gápadxu ba lá'ana,
1CO 12:25 chee̱ quebe gaca chupa la'a be̱la' dxen chee̱dxu. Tu tu cue' chee̱ be̱la' dxen cue' na gunne xue chee̱ ljwezre na.
1CO 12:26 Che dxedé xel-la zi' tu da naca na chee̱ be̱la' dxen chee̱dxu, xúgute̱ da ca' dxeledé na xel-la zi', na' che tu da na' gaca da ba neza chee̱ na, na' xúgute̱ da ca' dxelebé na tu zren.
1CO 12:27 Ca' naca na, le'e nácale be̱la' dxen chee̱ Cristo, na' tu tule nácale ca tu tu cue' chee̱ be̱la' dxen chee̱' na'.
1CO 12:28 Ca' naca na, Dios nunézruje̱' lataj blau chee̱ bal-la benne' ládujla bi chee̱ Cristo. Lu lataj blau nuzré̱'e̱ benne' gubáz chee̱' ca', na' lu lataj gudxupe' nuzré̱'e̱ benne' dxuluchálaje̱' waláz chee̱', na' lu lataj guxunne' nuzré̱'e̱ benne' dxulusé̱dene̱' bi chee̱' ca', na' gudé na' nuzré̱'e̱ benne' dxelune̱' xel-la waca da za xabáa. Gudé na' nuzré̱'e̱ benne' ca' dxelexune̱' benne' we̱' ca', ne benne' ca' dxelácale̱ne̱' bi chee̱' ca', ne benne' ca' dxelenná be'e̱, ne benne' ca' dxuluchálaje̱' dizra' nazrá' da quebe zaj nézene̱'.
1CO 12:29 ¿Zaj naca xúgute̱' benne' gubáz chee̱'? ¿Dxuluchalaj xúgute̱' waláz chee̱'? ¿Dxuluse̱de xúgute̱' bi chee̱' ca'? ¿Dxelún xúgute̱' xel-la waca chee̱ xabáa?
1CO 12:30 ¿Dxelexún xúgute̱' benne' we̱' ca'? ¿Dxuluchalaj xúgute̱' dizra' nazrá' da quebe naca xrtizre̱'? ¿Dxuluxuzájla'a xúgute̱' dizra' nazrá' na'? ¡Cabí!
1CO 12:31 Le gun ba xuzre si' lu na'le chee̱ Dios xel-la waca ca' da nácadxa chawe'. Na'a gulé'eda' le'e tu da cháwedxa.
1CO 13:1 Che dxuchálaja' dizra' chee̱ benne', ne chee̱ gubáz chee̱ xabáa ca', san quebe napa' xel-la zri'i lazre' li, quebe nácadxa' ca tu xide da dxenné̱ na, u ca tu xia da dxenné̱ na.
1CO 13:2 Che dxuchálaja' waláz chee̱ Dios, ne che nezda' xúgute̱ da zaj nagache, ne dxéajni'ida' xúgute̱ da dxelaca, ne napa' xel-la dxeajlí lazre' chee̱ séqueda' gucuasa' xi'a ca', san che quebe napa' xel-la zri'i lazre' li, quebe nu nácaqueza'.
1CO 13:3 Che quísia' xúgute̱ da de̱ chia', ne che guzúa' be̱la' dxen chia' chee̱ chezxe na, san che quebe napa' xel-la zri'i lazre' li, quebe bi da ba neza naca na chia'.
1CO 13:4 Bénnea' nape̱' xel-la zri'i lazre' li: Naque̱' zren lazre'. Naque̱' zri'i lazre', ne quebe naque̱' xa lazre'. Quebe dxucá'ana szren cuine̱', ne quebe dxuzé̱cu'e̱.
1CO 13:5 Quebe dxune̱' da cale̱la, ne quebe naque̱' zre'e lazre'. Quebe dxezre̱'e̱, ne quebe dxu'u lazre̱'.
1CO 13:6 Quebe dxebene̱' gate nu benne' dxeajcházie̱' lu dul-la, san dxebene̱' lu da li.
1CO 13:7 Dxuchaga lawe̱' xúgute̱ da dxaca nen dute̱ xel-la dxeajlí lazre' chee̱', ne dute̱ xel-la dxebeza lazre' chee̱', ne dute̱ xel-la zren lazre' chee̱'.
1CO 13:8 Xel-la zri'i lazre' li quebe te chee̱ na. Wazrín zra gate québedxa chínedxu nu benne' guchálajle̱ne̱' dxi'u waláz chee̱ Dios, ne benne' dxéajni'ine̱' xúgute̱.
1CO 13:9 Na'a dxéajni'idxu látedauze, ne látedauze dxuchálajdxu waláz chee̱ Dios.
1CO 13:10 Zrin zra gate na' chéajni'idxu dute̱ ca naca, na' te chee̱ da na' naca na látedauze.
1CO 13:11 Gate ne naca' bidau' bchálaja' ca bidau', ne gulaba lazra' ca bidau', ne bchi'a ca bidau', san gate guca' benne' waca, bzua' chalá'ala da zaj naca chee̱ bidau'.
1CO 13:12 Cá'anqueze na'a quebe dxelé'edxu cáte̱queze, ne da dxelé'edxu ze̱ zrul-la, san lu zra na' lé'edxu cáte̱queze. Na'a látedauze núnbe'a, san lu zra na' gúnbe'a cáte̱queze ca dxun Dios, núnbe'tequeze̱' neda'.
1CO 13:13 Ca' naca na, xel-la dxeajlí lazre', ne xel-la dxebeza lazre', ne xel-la zri'i lazre' li xelezúaqueze na chadía chacanna, san da blaudxa chee̱ da caní naca na xel-la zri'i lazre' li.
1CO 14:1 Le gun ba xuzre gápale xel-la zri'i lazre' li, ne cá'anqueze le naba Dios gunne̱' le'e xel-la waca ca' chee̱ Be' Lá'azxa, ne da naca blaudxa, chee̱ gaca guchálajle waláz chee̱ Dios.
1CO 14:2 Bénnea' dxuchálaje̱' dizra' nazrá' da quebe naca na xrtizre̱' dxuchálajle̱ne̱' Dios, quegá nen bénneache, lawe' da quegá nu dxéajni'i da dxenné̱'. Dxuchálaje̱' ne̱ chee̱ Be' Lá'azxa da zaj nagache.
1CO 14:3 Bénnea' dxuchálaje̱' waláz chee̱ Dios dxuchálajle̱ne̱' bénneache chee̱ gusegule̱' benne' ca' lu da naca chee̱ Dios, ne chee̱ ne̱ xúene̱'-be', ne chee̱ xue zrene̱'-be'.
1CO 14:4 Bénnea' dxuchálaje̱' dizra' nazrá' na' dxusegula cuine̱', san bénnea' dxuchálaje̱' waláz chee̱ Dios dxusegule̱' bi ca' chee̱ Cristo lu da naca chee̱ Dios.
1CO 14:5 Dxaca lazra' gapa xúgute̱le xel-la waca guchálajle dizra' nazrá', san dxaca lázredxa' gaca guchálajle waláz chee̱ Dios, lawe' da nácadxa chawe' guchálajle waláz chee̱ Dios quézcala guchálajle dizra' nazrá', che quebe zua nu benne' xuzájle̱'e̱ dizra' nazrá' na' chee̱ xelegula bi chee̱ Cristo lu da naca chee̱ Dios.
1CO 14:6 Chee̱ le̱ na', bi bícha'dau', che xida' xedajnná'a le'e, ne guchálajle̱na' le'e dizra' nazrá', ¿bizra da ba neza gaca na chee̱le che quebe guchálajle̱na' le'e tu da ba ble'e Dios neda', u tu da bzéajni'ine̱' neda', u tu da guchálaja' waláz chee̱ Dios, u tu da guzéajni'ida' le'e?
1CO 14:7 Nná'xquedxu ca da ca' dxelenné̱ na da quebe zaj naca bane na ca bchiuj, ne bihuel-la. Che quebe gaca chéajni'idxu da dxelenné̱ na, quebe gaca nezdxu ca da dxelul-la na.
1CO 14:8 Gate dxaca wedil-la, che quebe dxebezre luzu da dxulucuezre̱' cáte̱queze, quebe nu se̱ lu wedil-la.
1CO 14:9 Cá'anqueze dxaca chee̱le le'e. Che quebe guchálaja' dizra' da dxéajni'ile, ¿ájazra gaca nézele da dxennía'? Guchálaja' lu be'.
1CO 14:10 Da zante̱ dizra' nazrá' zaj de̱ lu xe̱zr la xu nigá, ne da li xúgute̱ na zaj zéaje̱ na.
1CO 14:11 Na'a che quebe dxéajni'ida' dizra' dxuchálajle̱ tu benne' neda', gaca' ca tu benne' zitu' lau bénnea', na' le̱' gaque̱' ca tu benne' zitu' lawa' neda'.
1CO 14:12 Chee̱ le̱ na', lawe' da dxaca lázrele si' lu na'le xel-la waca ca' da dxunna Be' Lá'azxa dxi'u, le gun ba xuzre si' lu na'le da ca' xulusegula na bi ca' chee̱ Cristo lu da naca chee̱ Dios.
1CO 14:13 Ca' naca na, bénnea' dxuchálaje̱' dizra' nazrá' dxal-la' naba lau Dios gunne̱' le̱' xel-la waca xuzájle̱'e̱ dizra' nazrá' na'.
1CO 14:14 Che guchálajle̱na' Dios tu dizra' nazrá'la, da li dxuchálajle̱na' Le̱' lu be' nácaqueza', san quebe bi da ba neza naca na chee̱ xel-la dxéajni'i chia'.
1CO 14:15 ¿Bizra da dxal-la' guna' xca'? Dxal-la' guchálajle̱na' Dios lu be' nácaqueza', ne cá'anqueze nen xel-la dxéajni'i chia'. Dxal-la' gul-la' chee̱ Dios lu be' nácaqueza', ne cá'anqueze nen xel-la dxéajni'i chia'.
1CO 14:16 Che dxue la'anu' Dios tuze lu be' nácaquezu', na' benne' ljwezru' dxenne̱' chiu' quebe gaca gune̱' tu zren lue' gate dxu'u Dios: Xcalenu', lawe' da quebe dxéajni'ine̱' da dxennáu'.
1CO 14:17 Da dxuchálajle̱nu' Dios nácale̱'e̱ na chawe', san bénnea' dxenne̱' quebe dxegule̱' lu da naca chee̱ Dios.
1CO 14:18 Dxapa' Dios: Xcale̱ne̱' lawe' da dxuchálajdxa' dizra' nazrá' ca xúgute̱le le'e,
1CO 14:19 san naga zaj nazraga bi chee̱ Cristo dxaca lázredxa' guchálaja' gázxuze dizra' da xeléajni'ibe' chee̱ gusé̱deda'-be', quézcala guchálaja' chi mila dizra' nazrá' da quebe gaca xeléajni'ibe'.
1CO 14:20 Bi bícha'dau'. Quebe gulaba lázrele ca bidau'. Le gaca ca bidau' chee̱ quebe gunle da cale̱la, san le gaca benne' wal-la chee̱ gulaba lázrele cháwe'dau'.
1CO 14:21 Naxúaj lu xiche lá'azxa chee̱ da dxenná bea Dios, da dxenná na: Guchálajle̱na' benne' xe̱zr la xu nigá nen dizra' nazrá', ne lu dxu'a benne' zitu' ca', san ne caní quebe xelenne̱' chia'. Caní dxenná Xránadxu.
1CO 14:22 Ca' naca na, xel-la waca chee̱ guchálajdxu dizra' nazrá' naca na tu da dxulé'e na lau benne' quebe dxeléajle̱'e̱ chee̱ Dios, ne quegá lau benne' dxeléajle̱'e̱ chee̱'.
1CO 14:23 Na'a, gate nazrágale, che xúgute̱le dxuchálajle dizra' nazrá', na' che xelexú'u benne' quebe zaj nazé̱dene̱', u benne' quebe dxeléajle̱'e̱ chee̱ Dios, ¿quebe xelenné̱' zaj nadá xichaj lázrdaule?
1CO 14:24 Na'a che dxuchalaj xúgute̱le waláz chee̱ Dios, na' che chu'u tu benne' quebe dxéajle̱'e̱ chee̱ Dios, u tu benne' quebe nazé̱dene̱', na' guéquene̱' nabague̱' dul-la, na' lé̱queze̱' guchi'a cuine̱' gate xenne̱' da dxennale xúgute̱le.
1CO 14:25 Ca' gaca na, da zaj nagache xichaj lázrdawe̱' xululé'e lau na, na' guzúa zribe̱', ne güe lá'ane̱' Dios, na' nne̱' da li zúale̱ Dios le'e.
1CO 14:26 Ca' naca na, bi bícha'dau', gate dxezrágale, bál-lale le'e nápale salmo ca', ne xebál-lale nápale da gusé̱dele ljwézrele, ne xebál-lale nápale tu da ble'e Dios le'e, ne xebál-lale nápale tu dizra' nazrá' da guchálajle, ne xebál-lale nápale xel-la waca xuzájla'ale dizra' nazrá' na'. Cháwe'dau' naca na, san xúgute̱ da ca' dxal-la' xulusegula na bi ca' chee̱ Cristo lu da naca chee̱ Dios.
1CO 14:27 Gate guchálajle dizra' nazrá', waca xuluchalaj chupa benne', u chunna benne', ne tuwéaj tuwéajle, na' tu benne' dxal-la' xuzájle̱'e̱ da dxennale.
1CO 14:28 Na'a che quebe nu chilá' benne' xuzájle̱'e̱ dizra' nazrá' na', gácadxa chawe' quebe bi da nne̱' naga nazrágale. Tu tule dxal-la' nnale lé'equezle, ne nen Dios.
1CO 14:29 Cá'anqueze benne' dxuluchálaje̱' waláz chee̱ Dios waca xelenné̱' chupa chúnnaze̱', na' xezícadxale dxal-la' guchí'ale da na' dxenné̱'.
1CO 14:30 Che dxulé'e Dios xetú benne' dxe'e̱ na' tu dizra', na' bénnea' dxuchálaje̱' dxal-la' gusane̱' ca da dxuchálaje̱'.
1CO 14:31 Xúgute̱le le'e waca guchálajle waláz chee̱ Dios tuwéaj tuwéajle chee̱ chéajni'i xúgute̱le, ne sile da gun chacha na le'e.
1CO 14:32 Benne' ca' dxuluchálaje̱' waláz chee̱ Dios dxun na ba xen nna bé'ene̱' be' nácaqueze̱',
1CO 14:33 lawe' da naca Dios Bénnea' dxunne̱' dxi'u xel-la dxebeza zri lazre', ne quebe dxun zréajene̱' bénneache. Ca zaj xu'u lau xúgute̱ cue' bi bíchedxu, bi chee̱ Dios,
1CO 14:34 dxal-la' xelezúa zrize nu'ula ca' naga nazrágale, lawe' da quebe naca chee̱' xuluchálaje̱'. Dxal-la' xuluzúe̱' dizra' ca naxúaj na lu da nadxixruj bea Dios.
1CO 14:35 Che dxelaca lazre̱' bi xeléajni'ine̱', dxal-la' xuluche̱be̱' benne' cha chee̱' lizre tu tue̱' lawe' da quebe dxulé'e na chawe' tu nu'ula guchálaje̱' naga nazrágale.
1CO 14:36 Dxal-la' gueque be'ele quebe guzú lau xrtizra Dios sua na ládujla le'e, ne quegá le'eze nazí' lu na'le na.
1CO 14:37 Che nu benne' dxéquene̱' naque̱' benne' dxuchálaje̱' waláz chee̱ Dios, u zúale̱ Be' Lá'azxa le̱', dxal-la' gueque bé'ene̱' da nigá dxuzúaja' chee̱le naca na tu da gunná be'e Xránadxu.
1CO 14:38 Che quebe dxaca lazre̱' gueque bé'ene̱' da nigá, quebe dxal-la' si' lu na'le bénnea'.
1CO 14:39 Ca' naca na, bi bícha'dau', le gun ba xuzre guchálajle waláz chee̱ Dios, ne quebe guzágale bénnea' dxuchálaje̱' dizra' nazrá'la.
1CO 14:40 Xúgute̱ da caní dxal-la' gunle dute̱ ba lá'ana, ne ca dxal-la' gaca na.
1CO 15:1 Na'a, bi bícha'dau', dxuzenda' le'e dizra' chawe' da ba bzenda' le'e, da na' guzí' lu na'le, ne da da'le le'e.
1CO 15:2 Ne̱ chee̱ dizra' chawe' nigá nalale che dxéajle̱le chee̱ da bzenda' le'e, ne che quebe guca dácheze xel-la dxeajlí lazre' chee̱le.
1CO 15:3 Da naca blaudxa, bzéajni'ida' le'e da guzí' lu na'a, gute Cristo ne̱ chee̱ dul-la da nabágadxu ca naxúaj na lu dizra' lá'azxa,
1CO 15:4 na' bulucache̱' Le̱', na' bebane̱' zra guxunne' zra ca naxúajqueze na lu dizra' lá'azxa,
1CO 15:5 na' ble'e lawe̱' lau Pedro, na' gudé na' ble'e lawe̱' lau benne' gubáz chee̱' ca'.
1CO 15:6 Gudé na' ble'e lawe̱' lau bi bíchedxu zaj nácadxe̱' ca gazxu' gaxúa benne' zaj nazrague̱' tu zren, na' benne' zan, benne' ca' ne zaj naca bane̱', láqueze benne' zan, benne' ca' ba gulatie̱'.
1CO 15:7 Gudé na' ble'e lawe̱' lau Jacobo, na' gudé na' ble'e lawe̱' lau xúgute̱ benne' gubáz chee̱' ca'.
1CO 15:8 Bzé̱bedxa, ca gudé chee̱ xúgute̱ da na', ble'e lawe̱' lawa' neda', lácala neda' naca' ca tu bidau', bi gúlajbe' ba gudé beu' chee̱be'.
1CO 15:9 Neda' naca' benne' bzé̱bedxa chee̱ xúgute̱ benne' gubáz chee̱ Cristo, ne quebe naca chia' si' la' gubáz chee̱ Cristo lawe' da gudáu zi' xuzra' bi ca' chee̱ Dios.
1CO 15:10 Naca' da naca' lawe' da guca Dios zri'i lazre' nen neda', na' quebe guca dácheze xel-la zri'i lazre' chee̱' nen neda', lawe' da ba nundxa' zrin ca xúgute̱ benne' gubáz ca', láqueze quegá neda' nuna' na, san Dios bchínene̱' neda'.
1CO 15:11 Quebe zácadxa na che naca neda', u che naca benne' ca', da nigá naca na dizra' bzénentu' bénneache, ne naca na da guxéajle̱le.
1CO 15:12 Che da dxuzénentu' bénneache dxenná na bebán Cristo ládujla benne' gate, ¿ájazra naca na bál-lale le'e dxennale quebe xelexebán benne' gate?
1CO 15:13 Che quebe xelexebán benne' gate, Crístoqueze quebe bebane̱' ládujla benne' gate,
1CO 15:14 na' che quebe bebán Cristo ládujla benne' gate, dácheze naca da dxuzénentu' bénneache, ne dácheze naca da dxeajlí lázrele chee̱ Cristo.
1CO 15:15 Che caní naca na dxexeché̱bentu' chee̱ Dios da we̱n lazre' lawe' da dxennantu' bsebán Dios Cristo, na' che quebe xelexebán benne' gate, quebe bsebán Dios Cristo.
1CO 15:16 Che quebe xelexebán benne' gate, Crístoqueze quebe bebane̱',
1CO 15:17 na' che quebe bebán Cristo, dácheze naca da dxeajlí lázrele chee̱', na' ne nabágale dul-la.
1CO 15:18 Che caní naca na, cá'anqueze benne' zaj nate, benne' ca' guleajlí lazre̱' Cristo zaj nanítequeze̱'.
1CO 15:19 Che da dxebeza lázrentu' da naca chee̱ Cristo naca na chee̱ze xe̱zr la xu nigá, nácadxu baxáchedxa ca xúgute̱ bénneache.
1CO 15:20 Na'a da li bebán Cristo ládujla benne' gate. Le̱' naque̱' benne' nedxu bebane̱' ládujla benne' gate quézcala xúgute̱ benne' ca' dxal-la' xelexebane̱'.
1CO 15:21 Ca guca, bla' xel-la gute lu xe̱zr la xu nigá ne̱ chee̱ tuze benne', cá'anqueze ne̱ chee̱ tuze benne' bla' xel-la dxexebán chee̱ benne' gate.
1CO 15:22 Ca naca dxelate xúgute̱ bénneache lawe' da zaj naque̱' tuze nen Adán, cá'anqueze xúgute̱ benne' zaj naca tuze nen Cristo xelape̱' xel-la nabán li lazre'.
1CO 15:23 Xelexebán tu tue̱' gate xelexexale̱', nédxula bebán Cristo ca tu lina nedxu, na' gudé na', gate xelá' Cristo xelexebán benne' zaj naque̱' bi chee̱' ca'.
1CO 15:24 Nadxa cheajsé̱ chee̱ xe̱zr la xu nigá gate guzría xi' Cristo xúgute̱ da dxelenná bea, ne xúgute̱ da dxelixruj bea na, ne xúgute̱ da zaj napa xel-la waca, na' gudée̱' xel-la dxenná bea chee̱' lu na' Xradxu Dios.
1CO 15:25 Dxun na ba xen nna bea Cristo ca zrin zra ba nuzúa Dios zran ni'e̱ xúgute̱ benne' guledábague̱' Le̱',
1CO 15:26 na' da bzé̱bedxa da cuía xi' naca na xel-la gute.
1CO 15:27 Ba nuzúa Dios xúgute̱ zran ni'a Cristo, san gate dxenná na nuzúe̱' xúgute̱ zran ni'e̱, dxaca bea na quebe zua Dios ládujla da ca', lawe' da Lé̱queze̱' naque̱' Bénnea' bzue̱' xúgute̱ zran ni'a Cristo.
1CO 15:28 Gate ba zua xúgute̱ lu na' Cristo, nadxa Crístoqueze, Bénnea' naque̱' Zrí'inequeze Dios guzúa cuine̱' lu na' Dios, Bénnea' bdee̱' xúgute̱ lu na' Le̱'. Ca' naca na, Dios gaque̱' blau lawe' xúgute̱ da de̱.
1CO 15:29 Xetú da dxaca, zaj zua benne' dxeledxúe̱' nisa waláz chee̱ benne' zaj nate. ¿Bizr chee̱ na' dxelune̱' caní che quebe xelexebán benne' gate? ¿Bizr chee̱ na' dxeledxúe̱' nisa waláz chee̱ benne' gate?
1CO 15:30 Cá'anqueze, ¿bizr chee̱ na' zúatequezdxu dxi'u lu da ste̱be?
1CO 15:31 Xúgute̱ zra zua' lu da ste̱be chee̱ xel-la gute. Dxapa' le'e, bi bicha', da li naca da nigá ne̱ chee̱ da ba neza da napa' ne̱ chee̱le lu da nácadxu nen Xránadxu Jesucristo.
1CO 15:32 Che ca tu bénneacheze gudíl-lale̱na' benne' zaj naca ca be̱ snia ca' lu xe̱zre Efeso ¿bizra da ba neza naca na chia'? Che quebe xelexebán benne' gate dxal-la' gundxu ca dxelenná bénneache, dxelenné̱': “Xi'aj gágudxu lawe' da wxre gátedxu.”
1CO 15:33 Quebe güele lataj nu si xe̱ le'e. Naca cáte̱ze dxenná na: Che gácadxu tuze benne' ca' dxelune̱' da cale̱la, tu zrénqueze gundxu da cale̱la.
1CO 15:34 Le guxúe xanne' cuínale, ne quebe gunle dul-la, lawe' da bál-lale le'e quebe núnbea xánnele Dios. Da nigá dxapa' le'e chee̱ gápale xel-la stu'.
1CO 15:35 Guche̱be nu benne' neda': Ájazra xelexebán benne' gate? ¿Ájazra gaca be̱la' dxen chee̱'?
1CO 15:36 Da nigá naca na tu da xálaze, lawe' da gate dxázadxu tu binne, dxun na ba xen cuía xi' bínnedu na' chee̱ gaca na tu xágadau'.
1CO 15:37 Da na' dxázadxu quebe naca na da xelá', san tu bínnedauze naca na, che naca na zrua' xtila u xetú bínnedau'.
1CO 15:38 Te na' gun Dios chee̱ bínnedu na' tu xágadau' cáte̱ze dxaca lázrequeze̱', na' chee̱ tu tu bínnedau' dxune̱' tu tu xágadau' cáte̱ze zaj naca bínnedu ca'.
1CO 15:39 Quegá xúgute̱ be̱la' dxen tuz ca zaj naca na. Tuze ca naca be̱la' dxen chee̱ bénneache, ne xetuze ca naca be̱la' dxen chee̱ be̱ xixre' ca', na' xetuze ca naca be̱la' dxen chee̱ bxínnedu ca', ne xetuze be̱la' dxen chee̱ bela ca'.
1CO 15:40 Cá'anqueze zaj naca be̱la' dxen chee̱ xabáa, ne be̱la' dxen da zaj naca na chee̱ xe̱zr la xu nigá. Xel-la xrtan chee̱ da zaj naca chee̱ xabáa nazrá' ca xel-la xrtan chee̱ da zaj naca chee̱ xe̱zr la xu.
1CO 15:41 Xel-la naxaní' chee̱ gubizra nazrá' ca xel-la naxaní' chee̱ beu', ne cá'anqueze nazrá' ca xel-la naxaní' chee̱ belaj ca', na' ládujla belaj ca', xel-la naxaní' chee̱ tu belaj nazrá' ca xel-la naxaní' chee̱ xetú belaj.
1CO 15:42 Cá'anqueze dxaca chee̱ benne' ca' xelexebane̱' ládujla benne' gate. Dxucáchedxu lu ba tu da guzru', na' xebán tu da québedxa gate.
1CO 15:43 Dxucáchedxu tu da xálaze, na' xebán tu da xabáa. Dxucáchedxu tu da nate ni'a na', na' xebán tu da wál-lale̱'e̱.
1CO 15:44 Dxucáchedxu tu be̱la' dxen chee̱ beniácheze, na' xebán tu be̱la' dxen da naca na chee̱ be' nácaquezdxu. Che zua tu be̱la' dxen da naca na bénneacheze, cá'anqueze zua tu be̱la' dxen da naca na chee̱ be' nácaquezdxu.
1CO 15:45 Cá'anqueze caní naxúaj lu dizra' lá'azxa da dxenná na: Benne' nedxu Adán guque̱' bénneache ban, na' Adán, benne' bze̱be, naque̱' Be' da dxunna xel-la nabán.
1CO 15:46 Bénnea' naque̱' Be' quebe ble̱'e̱ nedxu, san bénnea' naque̱' bénneacheze. Gudé na' bla' Bénnea' naque̱' Be'.
1CO 15:47 Benne' nedxu guque̱' xu bxrte, ne guque̱' chee̱ xe̱zr la xu nigá, na' Benne' gudxupe' naque̱' Xránadxu, Benne' chee̱ xabáa.
1CO 15:48 Be̱la' dxen ca' chee̱ xe̱zr la xu nigá zaj naca na ca guca bénnea' guque̱' xu bxrte, na' be̱la' dxen ca' da zaj naca na chee̱ xabáa zaj naca na ca Bénnea' naque̱' chee̱ xabáa.
1CO 15:49 Ca naca, nácadxu ca bénnea' guque̱' xu bxrte, cá'anqueze gácadxu ca Bénnea' naque̱' chee̱ xabáa.
1CO 15:50 Dxaca lazra' xapa' le'e, bi bícha'dau', be̱la' dxen chee̱dxu da naca na xu bxrte quebe gaca chu'u na naga dxenná bea Dios lawe' da na' guzru quebe gaca zraga na da na' si bea chadía chacanna.
1CO 15:51 Dxapa' le'e tu da nagache nédxute: Quegá xúgute̱dxu gátedxu, san xúgute̱dxu sidxu tu be̱la' dxen cube.
1CO 15:52 Chadite̱ gaca na, ca dxun benne' guchudie̱' xexrate̱ lawe̱', gate xendxu chi'i luzu da dxulucuezre̱' da bze̱be. Cuézrequeze luzu da dxulucuezre̱', na' xelexebán benne' gate naga cabátadxa xelatie̱', na' dxi'u sidxu tu be̱la' dxen cube.
1CO 15:53 Be̱la' dxen chee̱dxu da guzru dxal-la' xexaca na tu da québedxa guzru, na' be̱la' dxen chee̱dxu da gate dxal-la' xexaca na tu be̱la' dxen da québedxa gate.
1CO 15:54 Gate be̱la' dxen chee̱dxu da guzru ba bexaca na da québedxa guzru, ne be̱la' dxen chee̱dxu da gate ba bexaca na tu da québedxa gate, nadxa gaca li da naxúaj na lu dizra' lá'azxa, da dxenná na: Ba beladxu lu na' xel-la gute.
1CO 15:55 Lue', xel-la gute, ¿ga na' xel-la waca chiu' chee̱ gunu' netu' we̱'? Lue', xel-la gute, ¿ga na' da zrué'enu'?
1CO 15:56 Da dxunna xel-la gute xel-la waca chee̱ gun na dxi'u we̱' naca na dul-la, na' da nadxixruj bea da gula na' naca na da dxunna na dul-la xel-la waca chee̱ gudé na dxi'u lu xel-la gute.
1CO 15:57 Na'a, xcalén Dios, Bénnea' dxunne̱' dxi'u xel-la waca chee̱ zrué'edxu lu dul-la, ne lu xel-la gute ne̱ chee̱ Xránadxu Jesucristo.
1CO 15:58 Chee̱ le̱ na', bi bicha' nazri'ite̱ lazra', le se̱ chacha, ne le súate̱ze lu zrin dxúndxale chee̱ Xránadxu lawe' da nézele quebe naca dácheze zrin dxunle tu zren nen Xránadxu.
1CO 16:1 Ca naca chee̱ dumí gutúpale chee̱ gácale̱le bi bíchedxu ca', le gun na cáte̱ze bzéajni'ida' xúgute̱ cue' bi chee̱ Cristo zaj zra' xe̱zre ca' zaj nababa Galacia.
1CO 16:2 Tu tu zra nedxu chee̱ da gazre zra tu tule le'e dxal-la' gúnnale late' weaj ca da dxezile, na' cu'u cháwele na chee̱ quebe gun na ba xen gúnnale dumí gate xida'.
1CO 16:3 Gate na' xelá'a, sel-la' xe̱zre Jerusalén benne' ca' cuele, na' gunézruja' le̱' tu xiche chee̱ xelu'e̱ dumí na' chee̱ bi bíchedxu zaj zre̱'e̱ na'.
1CO 16:4 Che gata' lataj cha'a, na' sá'acale̱queze̱' neda'.
1CO 16:5 Lu neza chia' dxun na ba xen tea' naga nababa xe̱zr la xu Macedonia, na' xelá'a xe̱zre Corinto ca te na'.
1CO 16:6 Wegá'analja' nen le'e tu chi'i, u che ba guca, na' sua' nen le'e dute̱ beu' zaga ca', na' le'e waca gácale̱le neda' lu neza chia' naga dxal-la' cha'a.
1CO 16:7 Quebe dxaca lazra' xedajnná'a le'e ca teza', san dxebeza lazra' súaqueza' tu chi'i nen le'e, che gunna Xránadxu lataj.
1CO 16:8 Na'a xegá'ana' lu xe̱zre Efeso nigá ca zrin zra Pentecostés,
1CO 16:9 lawe' da napa' lataj guna' tu zrin zren chee̱ Xránadxu da gulé'ete̱ lawe na, lácala naxán benne' ca' dxeledábague̱'.
1CO 16:10 Che ba bla' Timoteo, le gun ba xuzre suabe' xel-la dxebé nen le'e, ne quebe bi cué'ebe' gunne xue, lawe' da dxunbe' zrin chee̱ Xránadxu cáte̱ze dxun neda'.
1CO 16:11 Chee̱ le̱ na' netule le'e quebe guzúale-be' chalá'ala, san le gácale̱-be' chee̱ xexu'ube' neza lu xel-la dxebeza zri lazre' chee̱ xedajnná'abe' neda', lawe' da dxebeza'-be' tu zren nen bi bíchedxu caní.
1CO 16:12 Ca naca chee̱ bíchedxu Apolos, guta' xúele̱'e̱da' le̱' chee̱ chéajle̱ne̱' bi bíchedxu ca' xedajlenné̱'e̱ le'e, san quebe guca lazre̱' se̱'e̱ na'a. Wide̱' gate gape̱' lataj.
1CO 16:13 Le sua ban lazre'. Le se̱ chacha lu xel-la dxeajlí lazre' chee̱le. Le se̱ ca ze̱ benne' biu. Le gaca benne' wal-la.
1CO 16:14 Dute̱ xel-la zri'i lazre' le gun xúgute̱ da dxunle.
1CO 16:15 Na'a, bi bícha'dau', ba nézquezle gulaca xrtía Estéfanas benne' nedxu naga nababa Acaya gulezí' lu ne̱'e̱ dizra' chawe' chee̱ Cristo, na' buluzúa cuine̱' chee̱ xelácale̱ne̱' bi bíchedxu ca', bi chee̱ Cristo.
1CO 16:16 Dxaca lazra' guzúa cuínale lu na' benne' caní, ne lu na' xúgute̱ benne' dxelácale̱ ljwézredxu, ne dxelún zrin chee̱ Cristo.
1CO 16:17 Zua' xel-la dxebé lawe' da belelá' Estéfanas, ne Fortunato, ne Acaico, lawe' da belune̱' chia' da quebe guzéquele gunle le'e lawe' da zrale zitu'.
1CO 16:18 Belún chúchue̱' be' nácaqueza', ne be' nácaquezle le'e. Dxun na ba xen si' lu na'le benne' caní.
1CO 16:19 Xúgute̱ cue' bi chee̱ Cristo naga nababa xe̱zr la xu Asia dxulugapa le'e diuzre. Aquilo ne Priscila, ne bi bíchedxu ca' dxelezraga lu xu'u lizre̱' dxulugápale̱'e̱ le'e diuzre lu La Xránadxu.
1CO 16:20 Xúgute̱ bíchedxu nigá dxulugape̱' le'e diuzre. Le gugapa diuzre ljwézrele tule xetule, ne le gunida ljwézrele.
1CO 16:21 Neda', Pablo, dxuzúaja' da dxugapa' le'e diuzre nen ná'aqueza'.
1CO 16:22 Che nu benne' quebe nazrí'ine̱' Xránadxu Jesucristo, cuía xi' bénnea'. ¡Gudá Xránantu'!
1CO 16:23 Dxenaba' Xránadxu Jesucristo gun cháwe'e̱ le'e.
1CO 16:24 Dxusel-la' chee̱ xúgute̱le xel-la nazrí'i chia' lu La Jesucristo. ¡Ca'an gaca na!
2CO 1:1 Neda', Pablo, naca' gubáz chee̱ Jesucristo lawe' da naca na da dxaca lazre' Dios. Tu zren nen bíchedxu Timoteo dxuzúaja' da nigá chee̱le le'e, bi bícha'dau', zrágale chee̱ Dios lu xe̱zre Corinto. Cá'anqueze dxuzúaja' da nigá chee̱ xúgute̱ bi chee̱ Dios zaj zre̱'e̱ xe̱zre ca' zaj nababa xe̱zr la xu Acaya.
2CO 1:2 Dxenaba' Xradxu Dios, ne Xránadxu Jesucristo gun chawe̱'e̱ le'e, ne gunne̱' le'e xel-la dxebeza zri lazre'.
2CO 1:3 Dxue lá'anantu' Dios, Xra Xránadxu Jesucristo, lawe' da naque̱' Xradxu dxexache lazre̱' dxi'u, ne Dios dxexúe zrene̱' dxi'u.
2CO 1:4 Dios dxexúe zrénqueze̱' dxi'u ca naca xúgute̱ xel-la zi' da dxededxu, chee̱ cá'anqueze dxi'u gaca xexúe zrendxu benne' ca' dxeledée̱' xel-la zi', na' xue zrendxu le̱' cáte̱ze da ba nun Dios chee̱dxu dxi'u.
2CO 1:5 Lawe' da dxededxu xel-la zi' zren ca da gudé Cristo, cá'anqueze ne̱ chee̱ Cristo zua Nu dxexúe zrénqueze dxi'u, Lé̱queze Dios.
2CO 1:6 Chee̱ le̱ na', che dxedentu' netu' xel-la zi', naca na chee̱ sua Nu xexúe zren le'e, ne chee̱ lale, na' caní gaca guchaga laule lu dute̱ xel-la zren lazre' chee̱le xel-la zi' ca' da dxededxu dxi'u.
2CO 1:7 Dxuxrén lázrele̱'e̱ntu' le'e, lawe' da nézentu' ca dxedele xel-la zi' tu zren nen netu', cá'anqueze sua Nu xexúe zren le'e tu zren nen netu', Lé̱queze Dios.
2CO 1:8 Bi bicha', dxaca lázrentu' nézele ca naca xel-la zi' zren da gudentu' naga nababa Asia. Guca na tu xel-la zi' zrendxa ca da gaca guchaga launtu', na' québedxa guleza lázrentu' lantu'.
2CO 1:9 Gúquentu' ba zua gagu xelute benne' ca' netu'. Guca chee̱ntu' da nigá chee̱ bzéajni'i na netu' guxrén lázrentu' Dios, ne quegá guxrén lazre' cuínantu'.
2CO 1:10 Dios bselé̱' netu', na' ne dxuselé̱' netu' lu da ste̱be zren nigá chee̱ xel-la gute, na' dxebeza lázrentu' Le̱' guseláqueze̱' netu'
2CO 1:11 che le'e gácale̱le netu', nábadxu Dios gácale̱ne̱' netu'. Che benne' zan xelenabe̱' Dios gácale̱ne̱' netu', na' benne' zan xelé̱'e̱ Dios: Xcalenu', chee̱ da chawe' ca' da gun Dios chee̱ntu'.
2CO 1:12 Naca tu da ba neza da nápantu' da zua na lawe' da dxe̱ xichaj lázrdauntu' netu' ba gudantu' lu da lá'azxa, ne du lázrentu', lu xe̱zr la xu nigá, ne ládujla le'e. Dios lu xel-la zri'i lazre' chee̱' gúcale̱ne̱' netu' chee̱ be̱ntu' caní, ne quebe be̱ntu' na lu xel-la sina cheé̱zquezentu'.
2CO 1:13 Lu da dxuzúajntu' chee̱le quebe bi de̱ da quebe gaca gulábale, ne chéajni'ile, na' dxaca lazra' chéajni'i xánnele
2CO 1:14 ca ba guxéajni'ile late', chee̱ lu zra xelá' Xránadxu Jesús, gácantu' netu' tu da ba neza chee̱le le'e, ca le'e gácale tu da ba neza chee̱ntu'.
2CO 1:15 Lawe' da dxuxrén lazra' gaca caní, bechugu lazra' xida' nédxula xedajnná'a le'e chee̱ gaca tu da ba neza chee̱le, na' xedajnná'a le'e chupa lasa,
2CO 1:16 lawe' da bechugu lazra' xedajnná'a le'e gate tea' cha'a xe̱zre ca' zaj nababa Macedonia, na' te na', gate zezá'a lu xe̱zre ca' zaj nababa Macedonia, xedajnná'a le'e xetú. Ca' gaca na, le'e gaca gácale̱le neda' cha'a xe̱zre ca' zaj nababa Judea.
2CO 1:17 ¿Quebe naca' du lazra' gate dxechugu lazra' caní? ¿Dxéquele le'e naca' ca tu benne' chee̱ xe̱zr la xu nigá, na' dxennía': Awe', cabí, gate dxechugu lazra' da guna'?
2CO 1:18 Dios nézquezne̱' neda', ne Silvano, ne Timoteo, quebe dxe̱ntu' le'e: Awe', cabí.
2CO 1:19 Naca na caní lawe' da Jesucristo, Zri'ine Dios, Bénnea' bzénentu' le'e ca naca chee̱', cabata' gunné̱': Awe', cabí. Nen Cristo nácaqueze da li xrtizra Dios,
2CO 1:20 lawe' da ne̱ chee̱ Le̱' dxelaca li xúgute̱ da guche̱be lazre' Dios. Chee̱ le̱ na', gate dxue lá'anantu' Dios, dxennantu': ¡Ca'an naca na! ne̱ chee̱ Jesucristo.
2CO 1:21 Dios naque̱' Bénnea' ba nuzé̱ chúchue̱' netu', ne le'e lu da naca chee̱ Cristo, ne ba guqué̱'e̱ dxi'u,
2CO 1:22 ne ba nuzúe̱' chee̱dxu tu da dxulé'e na nácadxu bi chee̱ Le̱', lawe' da ba nuzúe̱' Be' Lá'azxa lu xichaj lázrdaudxu, da dxunna bea na sidxu da naca chee̱'.
2CO 1:23 Che quebe ne xida' Corinto ca bechugu lazra', neze Dios naca na chee̱ gaca' zren lazre' nen le'e, ne che quebe naca caní, dxenaba' Dios xequé̱'e̱ xel-la nabán chia'.
2CO 1:24 Quebe naca na lawe' da dxaca lázrentu' nna bé'entu' le'e da dxal-la' chéajle̱le, lawe' da ba ze̱ cháchale lu da dxéajle̱le. Dxaca lázrentu' bédxale lu da naca chee̱ Cristo.
2CO 2:1 Chee̱ le̱ na' bechugu lazra' quebe xida' xedajnná'a le'e lu da baxache'.
2CO 2:2 Che neda' guzúa' le'e lu da baxache', ¿núzraqueze guzúa neda' lu xel-la dxebé? Tuze le'e, benne' ca' ba bzua' lu da baxache'.
2CO 2:3 Chee̱ le̱ na' bzuaja' chee̱le ca da be̱na' lawe' da quebe guca lazra' xida' chee̱ guzúale neda' lu da baxache', le'e na' dxal-la' guzúale neda' lu xel-la dxebé. Bxren lazra' che neda' zua' lu xel-la dxebé, cá'anqueze le'e súale lu xel-la dxebé.
2CO 2:4 Gate bzuaja' chee̱le da na' guzé̱le̱'e̱da' gunne xue, ne guzúa' lu da zi' da xa', ne cá'anqueze gudxézrele̱'e̱queza', san quebe bzuaja' da na' chee̱ guzúa' le'e lu da baxache', san chee̱ nézele nazrí'ile̱'e̱da' le'e.
2CO 2:5 Che nu benne' ba bzue̱' neda' lu da baxache', quegá chia' néda'ze be̱ne̱' na, san cá'anqueze waca nnadxu, bzue̱' xúgute̱le lu da baxache'. Dxennía': Waca nnadxu, chee̱ quebe gácate̱ca' snia.
2CO 2:6 Ca xel-la zi' da bdele bénnea' gate na' bzrágale, ba nácale̱'e̱queze da na'.
2CO 2:7 Ca' naca na, na'a dxal-la' gunite laule chee̱ bénnea', ne xue zrenle le̱', chee̱ quebe gunitie̱' xel-la dxebeza lazre' chee̱' ne̱ chee̱ da baxache' zren da dxedée̱'.
2CO 2:8 Chee̱ le̱ na' dxata' xueda' le'e gulé'ele le̱' xecha lasa ca nazrí'ile̱'e̱le le̱'.
2CO 2:9 Bzuaja' nédxula chee̱le ca naca da nigá chee̱ gulé'e lawe' che nácale wezúe dizra' lu xúgute̱ da dxaca.
2CO 2:10 Na'a, nu benne' dxunite laule chee̱', cá'anqueze neda' dxunite lawa' chee̱'. Ca da bnite lawa' neda', che naca na tu da dxal-la' gunite lawa', ba bnite lawa' na ne̱ chee̱le le'e lau Cristo
2CO 2:11 chee̱ quebe seque' Satanás nna be'e na dxi'u, na' ba nézquezdxu ca da dxun na.
2CO 2:12 Gate bzrina' xe̱zre Troas chee̱ guzenda' bénneache dizra' chawe' chee̱ Cristo, gutá'le̱'e̱ lataj chia' guna' zrin chee̱ Xránadxu.
2CO 2:13 Guzúale̱'a gunne xue lawe' da quebe bezrelda' bi bíchedxu Tito ga na'. Chee̱ le̱ na' bzea' dizra' benne' ca' zaj zre̱'e̱ na', na' guxá'a xe̱zr la xu Macedonia.
2CO 2:14 Xcalén Dios, Bénnea' dxeché̱'tequeze̱' dxi'u lu neza guxú'u Jesucristo lu da bzrué'ene̱', ne dxulé'e lawe̱' ne̱ chee̱dxu dxi'u dizra' chee̱' ca tu da dxelá zixre da dxezriluj gátete̱ze na.
2CO 2:15 Dxi'u nácadxu ca da dxelá zixre da dxuzúa Cristo lau Dios, ne dxezriluj na ládujla benne' ca' xelelé̱', ne ládujla benne' ca' xelebía xi'e̱.
2CO 2:16 Lau benne' ca' xelebía xi'e̱ da dxelá nigá naca na ca tu da dxute bénneache, san lau benne' ca' xelelé̱ naca na tu da dxunezruj na bénneache xel-la nabán. ¿Nu benne' naca chee̱' gaque̱' caní?
2CO 2:17 Netu' quebe dxedantu' dxútentu' dizra' chee̱ Dios, ne quebe dxuchantu' na ca dxelún benne' zante̱. Lawe' da dxen Dios, dxuchálajntu' du lázrentu', ca benne' nasel-la Dios, ne ca we̱n zrin chee̱ Cristo.
2CO 3:1 Gate dxennantu' da nigá, ¿dxéquele dxezú launtu' xecha lasa dxenne̱ntu' chawe' da naca cheé̱zquezentu'? ¿Dxun na ba xen gulé'entu' le'e tu xiche da dxulé'e na nácantu' xrlátaje, u nábantu' chee̱le tu xiche caní, ca dxelún bal-la benne'?
2CO 3:2 ¡Cabí! Lawe' da nácaquezle le'e ca tu xiche da dxulé'e na nácantu' xrlátaje, da naxúaj na lu xichaj lázrdauntu', na' xúgute̱ bénneache gaca xelexúnbe'e̱ na, ne xululabe̱' na.
2CO 3:3 Le'e nácale ca tu xiche da nuzúaj Cristo, ne da dxulé'e launtu' netu'. Nácale ca tu da naxúaj na da quebe naca na tu lu xiche, san ne̱ chee̱ Be' Lá'azxa chee̱ Dios ban, tu da quebe naxúaj na lu blaga xiaj, san lu lázrdaudxu.
2CO 3:4 Ne̱ chee̱ Cristo dxuxrén lázrentu' Dios,
2CO 3:5 quegá chee̱ bi gaca guntu' da naca cheé̱zquezentu', san, ca naca da gaca guntu' naca na chee̱ Dios.
2CO 3:6 Le̱' ba nunne̱' netu' guntu' zrin chee̱' ne̱ chee̱ tu xel-la wezría cube da quebe naca na ne̱ chee̱ tu da naxúaj na, san da naca na ne̱ chee̱ Be' Lá'azxa chee̱'. Da nadxixruj bea na da naxúaj na dxuzría xi na dxi'u, san Be' Lá'azxa na' dxunna dxi'u xel-la nabán.
2CO 3:7 Da bdxixruj be'e Moisés na' bxuaj na le̱'e̱ xiaj blaga', ne bla' nen tu da bsení'le̱'e̱, na' québedxa belezúe benne' Israel ca' xelené̱'e̱ lau Moisés, lawe' da gúcatite legala le̱'e̱ dxu'a lawe̱', na' xel-la naxaní' na' bexul-la na chawe lazre'. Che lu xel-la naxaní' zren bla' da nadxixruj bea na, da dxuzría xi na dxi'u,
2CO 3:8 da zrénle̱'e̱dxa naca xel-la naxaní' chee̱ dizra' chawe' na' da nusá Be' Lá'azxa chee̱dxu.
2CO 3:9 Che da nadxixruj bea na da dxuzría xi na dxi'u guca na tu da xabáa zrente̱, na' tu da xabáa zrénle̱'e̱dxa naca dizra' chawe' na' da dxucá'ana na dxi'u xrlátaje lau Dios.
2CO 3:10 Lácala che da nadxixruj bea na nédxula guca na tu da xabáa, na'a quebe bi naca xabáa chee̱ na lau dizra' chawe' nigá da naca na tu da xabáa zrénle̱'e̱dxa.
2CO 3:11 Che guca tu da xabáa chee̱ da na' guzí bea na tu chí'idauze, napa na tu da xabáa zrénle̱'e̱dxa da na' si bea na chadía chacanna.
2CO 3:12 Lawe' da dxuxrén lázrentu' naca na caní, du lázrentu' dxuchálajntu' dizra' chawe' na'.
2CO 3:13 Quebe dxuntu' ca be̱n Moisés, bgacu lawe̱' tu ladxe' chee̱ quebe xelelé'e benne' Israel ca' xexul-la xel-la naxaní' na' da quebe guzí bea na.
2CO 3:14 Benne' Israel ca' quebe guléajni'ine̱'. Ne na'a zra, gate dxululabe̱' xel-la wezría gula na', ladxe' ná'queze quebe dxue na le̱' lataj xeléajni'ine̱', lawe' da quebe ne xedúa na, na' gaca xedúa na tuze ne̱ chee̱ Cristo.
2CO 3:15 Na'a zra, gate dxululabe̱' dizra' chee̱ Moisés, zua ca tu ladxe' da dxucache na xichaj lázrdawe̱'.
2CO 3:16 Gate tu benne' xexaque̱' chee̱ Xránadxu, xedúa ladxe' na' lu xichaj lázrdawe̱',
2CO 3:17 lawe' da naca Xránadxu Be' na', na' naga zua Be' chee̱ Xránadxu, na' de̱ xel-la weselá lu na' da nadxixruj bea na chee̱ Moisés na'.
2CO 3:18 Chee̱ le̱ na' xúgute̱dxu dxi'u, lawe' da quebe da' laudxu tu ladxe', nácadxu ca tu wana' da dxulé'e na da xabáa chee̱ Xránadxu, na' dxí'uqueze, tu tu lasa gate dxelé'edxu da xabáa chee̱' dxexácadxadxu ca naca Cristo, lawe' da tu tu lasa na' nápadxadxu da xabáa chee̱'. Da nigá dxun Be' chee̱ Xránadxu, na dxuché̱'e̱ dxi'u lu xichaj lázrdaudxu.
2CO 4:1 Ca' naca na, cabata' dxate ni'a nantu' lawe' da lu xel-la dxexache lazre' chee̱', Dios ba nusebague̱' netu' zrin nigá chee̱ Cristo da dxuntu'.
2CO 4:2 Ba nuzúantu' chalá'ala da dxelún bénneache bagácheze, ne da dxedué'entu' ca zaj naca na. Quebe bi dxuntu' da we̱n lazre', ne quebe dxuchantu' dizra' chee̱ Dios, san dxenne̱ntu' tuze da li, na' caní dxuzúa cuínantu' lu na' xichaj lázrdau xúgute̱ bénneache lau Dios.
2CO 4:3 Che dizra' chawe' da dxuzénentu' bénneache ne nagache na, naca na caní tuze lau benne' ca' xelebía xi'e̱.
2CO 4:4 Lawe' da quebe dxeléajle̱'e̱ chee̱ Cristo, na' da xriwe̱', da na' naca na dios chee̱ xe̱zr la xu nigá ba nun chul-la na xichaj lázrdawe̱' chee̱ quebe xelelé'ene̱' xel-la naxaní' chee̱ dizra' chawe' chee̱ xabáa chee̱ Cristo, Bénnea' naque̱' lu'a lesaca Dios.
2CO 4:5 Quebe dxuzénentu' bénneache ca naca cheé̱zquezentu', san ca naca chee̱ Jesucristo. Dxennantu' naque̱' Xránadxu, na' ca naca chee̱ntu' dxennantu' nácantu' we̱n zrin chee̱le lawe' da nazrí'intu' Jesús.
2CO 4:6 Dios ná'queze, Bénnea' gunná be'e̱ guxaní' xi' na' lu da chul-la, naque̱' Benne' ba be̱ne̱' guxaní' xi' chee̱' lu xichaj lázrdaudxu, chee̱ gaca gúnbeadxu da xabáa chee̱ Dios da dxácatite legala na dxu'a lau Jesucristo.
2CO 4:7 Da xabáa nigá nápantu' lu be̱la' dxen chee̱ntu', da naca na ca tu xesu' xu, chee̱ gaca bea za xel-la waca zren nigá lu na' Dios, ne quegá cheé̱zquezentu'.
2CO 4:8 Chee̱ le̱ na': Láqueze zúantu' lu da sté̱bele̱'e̱, quebe dxeze̱ntu' gunne xue. Láqueze dxeze̱ntu' gunne xue, tu dxebeza lázrezquezentu' gácale̱ Dios netu'.
2CO 4:9 Láqueze zaj nau zi' xuzre̱' netu', quebe dxusán Dios netu'. Láqueze dxeline̱' netu' xu, quebe dxebía xintu'.
2CO 4:10 Gátete̱ze dxéajntu' naca tuze be̱la' dxen chee̱ntu' nen xel-la gute chee̱ Jesús chee̱ gulé'e lau lu be̱la' dxen chee̱ntu' xel-la nabán chee̱ Jesús.
2CO 4:11 Dxácate̱ naca bantu' zúantu' chee̱ gátentu' xúgute̱ zra ne̱ chee̱ Jesús, chee̱ gulé'e lau xel-la nabán chee̱ Jesús lu be̱la' dxen chee̱ntu' da gate.
2CO 4:12 Ca' naca na, lácala tu zúazquezentu' lu da ste̱be chee̱ xel-la gute da nigá, dxun na sua tu xel-la nabán cube chee̱le.
2CO 4:13 Naxúaj lu dizra' lá'azxa da dxenná na: Guxéajle̱'a, na' chee̱ le̱ na' bchálaja', na' cá'anqueze netu', lu xel-la dxeajlí lazre' caníqueze, dxéajle̱'e̱ntu', ne dxuchálajntu',
2CO 4:14 lawe' da nézentu' Dios, Bénnea' bsebane̱' Xránadxu Jesús ládujla benne' gate, cá'anqueze gusebane̱' dxi'u tu zren nen Jesús, na' tu zren nen le'e, xeché̱'e̱ dxi'u lau Le̱'.
2CO 4:15 Xúgute̱ da nigá guzaca zintu' chee̱ gaca tu da ba neza chee̱le, chee̱ gaca na, gate xelezí' benne' zante̱ xel-la xrlátaje chee̱ Dios, cá'anqueze benne' zante̱ xelé̱'e̱ Le̱': Xcalenu', chee̱ gaca ba chee̱ Dios.
2CO 4:16 Chee̱ le̱ na', cabata' dxate ni'a nadxu. Láqueze dxe̱xru be̱la' dxen chee̱dxu, Dios dxuxucube̱' be' nácaquezdxu tu zra tu zra.
2CO 4:17 Da dxezácadxu lu xe̱zr la xu nigá naca na tu da dauze, da teze chee̱ na, na' nusá na chee̱dxu tu xabáa chadía chacanna da szrente̱, ne da cháwedxa.
2CO 4:18 Quebe nná'adxu ca da dxelé'edxu, san nná'adxu da quebe nalá', lawe' da quebe dxelezí bea da ca' dxelé'edxu, san da ca' quebe dxelé'edxu dxelezí bea na chadía chacanna.
2CO 5:1 Be̱la' dxen chee̱dxu naca na ca tu xu'u lizre be' nácaquezdxu. Be̱la' dxen chee̱dxu naca na ca tu xu'u da quebe si bea na, na' gate gátedxu Dios ba nucueze̱' chee̱dxu xabáa tu xu'u da zea jlí canna, da nun Diósqueze, ne quegá bénneache.
2CO 5:2 Da li dxácate̱ naca bandxu lu be̱la' dxen nigá dxebezre we̱'dxu lawe' da dxaca lázredxu cheajchú'udxu be̱la' dxen cube na' da gunna Dios dxi'u xabáa.
2CO 5:3 Quebe xegá'ana cá'aze be' nácaquezdxu xabáa. Cheajchú'u na be̱la' dxen cube na'.
2CO 5:4 Dxácate̱ ne naca bandxu lu xu'u nigá da naca na be̱la' dxen chee̱dxu, dxebezre we̱'dxu, ne dxededxu xel-la zi'. Quebe nácaze na lawe' da dxaca lázredxu gusandxu be̱la' dxen gula chee̱dxu nigá. Dxaca lázredxu cheajchú'udxu be̱la' dxen cube, na' ca'an gaca xenite be̱la' dxen chee̱dxu da dxal-la' gate, na' la' be̱la' dxen cube chee̱dxu da gaca ban na chadía chacanna.
2CO 5:5 Bénnea' ba nune̱' dxi'u chee̱ gaca chee̱dxu caní naque̱' Dios, Bénnea' ba nunne̱' dxi'u Be' Lá'azxa ca tu da dxunna bea na dxal-la' sidxu tu be̱la' dxen cube xabáa.
2CO 5:6 Ca' naca na, dxuxrén lázretequezdxu Dios. Ba nezdxu dxácate̱ naca bandxu lu be̱la' dxen nigá zúadxu zítu'la naga zua lízredxu, da naca na, quebe zúale̱dxu Xránadxu,
2CO 5:7 na' dxedadxu ne̱ chee̱ xel-la dxeajlí lazre' chee̱dxu, quegá ne̱ chee̱ da dxelé'edxu.
2CO 5:8 Dxuxrén lázredxu Dios, ne dxaca lázredxadxu gusandxu xel-la nabán chee̱dxu lu be̱la' dxen nigá chee̱ chéajdxu cheajsúale̱dxu Xránadxu.
2CO 5:9 Chee̱ le̱ na' dxundxu ba xuzre gúnte̱quezdxu da xezaca ba lazre' Xránadxu, che nagá'anadxu lu be̱la' dxen chee̱dxu nigá, u che cheajchú'udxu be̱la' dxen cube, da zua na xabáa,
2CO 5:10 lawe' da xúgute̱dxu dxun na ba xen xezrindxu lau Cristo chee̱ guchi'e̱ ca da nundxu tu tudxu, chee̱ si' lu nadxu ca da xáladxu, cáte̱ze naca da xrlátaje, u da cale̱la da ba be̱ndxu gate ne zúadxu lu be̱la' dxen chee̱dxu nigá.
2CO 5:11 Chee̱ le̱ na', lawe' da núnbeantu' ca dxal-la' zrébedxu Xránadxu, dxuntu' ba xuzre guntu' xelelá bénneache. Dios ba nézene̱' da nácantu', na' dxebeza lazra' cá'anqueze le'e nézele na.
2CO 5:12 Quegá dxenne̱ntu' xrlátaje cheé̱zquezentu', san dxúnnantu' le'e lataj gápale netu' ba lá'ana, chee̱ gaca xeché̱bele chee̱ benne' ca' dxulucá'ana szren cuine̱' ca naca da zaj naque̱' cúzreze, ne quegá ca naca da zaj naque̱' lu xichaj lázrdawe̱'.
2CO 5:13 Che dxeleque bénneache nadá xichaj lázrdauntu' naca na chee̱ guntu' zrin chee̱ Dios, na' che quebe nadá xichaj lázrdauntu' naca na chee̱ gaca tu da ba neza chee̱le le'e.
2CO 5:14 Xel-la zri'i lazre' chee̱ Cristo dxusebaga na netu' lawe' da nézentu' che tu benne' gutie̱' waláz chee̱ xúgute̱ bénneache, na' ba gulate xúgute̱'.
2CO 5:15 Cristo gutie̱' waláz chee̱ xúgute̱ bénneache, chee̱ benne' ca' zaj naca bane̱' québedxa xelaca bane̱' cheé̱zqueze̱', san chee̱ Le̱', Bénnea' gutie̱', ne bebane̱' waláz chee̱ benne' ca'.
2CO 5:16 Chee̱ le̱ na', québedxa nna'ntu' ca naca da nácaqueze tu benne' lu xe̱zr la xu nigá, na' láqueze nédxula gunna'ntu' Cristo cáte̱ze gúcaqueze̱' lu xe̱zr la xu nigá, na'a québedxa nna'ntu' Le̱' caní.
2CO 5:17 Ca' naca, che tu benne' naque̱' tuze nen Cristo, naque̱' tu benne' cube. Da gula ca' chee̱ benne' nigá ba guledé chee̱ na, na' xúgute̱ na zaj naca na cube.
2CO 5:18 Xúgute̱ da caní dxun Dios, Bénnea' bexune̱' dxi'u tuze nen Lé̱queze̱' ne̱ chee̱ Cristo, na' bsebague̱' dxi'u guzendxu bénneache ca gaca xelexaque̱' tuze nen Dios.
2CO 5:19 Gate gute Cristo, Dios guzúale̱queze̱' Le̱', ne bexune̱' bénneache chee̱ xe̱zr la xu nigá tuze nen Le̱', ne quebe gunné̱'e̱ ca zaj naca dul-la zaj nabaga bénneache ca', na' bsebague̱' dxi'u guzendxu bénneache dizra' da dxexún dxi'u tuze nen Dios.
2CO 5:20 Ca' naca na, nácantu' gubáz chee̱ Dios ne̱ chee̱ Cristo, na' naca na cáte̱ze Diósqueze dxata' xuene̱' le'e lu dxúa'antu', na' dxata' xuentu' le'e lu La Cristo, le xexaca tuze nen Dios.
2CO 5:21 Cristo netú dul-la ca be̱ne̱', san ne̱ chee̱dxu dxi'u, Dios bdee̱' Le̱' chee̱ gutie̱' le̱'e̱ xaga béguaj ca tu benne' dul-la, chee̱ xexácadxu benne' xrlátaje lau Dios ne̱ chee̱ da be̱n Cristo.
2CO 6:1 Ca' naca na, ca we̱n zrin tu zren nen Dios dxata' xuentu' le'e chee̱ quebe guzúale chalá'ala xel-la zri'i lazre' chee̱ Dios,
2CO 6:2 lawe' da lu dizra' lá'azxa dxenné̱': Tu zra dxezaca ba lazra' benda' chiu', na' lu zra chee̱ xel-la weselá gúcale̱na' lue'. Na'a naca na zra dxezaca ba lazre̱' xenne̱' chee̱le, ne guselé̱' le'e.
2CO 6:3 Quebe bi dxuntu' da gun na quebe xeléajle̱ bénneache chee̱ Cristo, chee̱ quebe nu nne̱ cale̱la chee̱ zrin dxuntu'.
2CO 6:4 Ca naca xúgute̱ da dxuntu', dxaca lázrentu' gulé'entu' bénneache nácantu' we̱n zrin chee̱ Dios, ne̱ chee̱ xel-la dxebeza zren lazre' chee̱ntu' gate dxuchaga launtu' da dxezácantu', ne da dxexázrjentu', ne da zaj naca ste̱be chee̱ntu',
2CO 6:5 ca buluzálaje̱' netu', ne gulegu'e̱ netu' lizre xia. Guledábague̱' netu' san bé̱nle̱'e̱ntu' zrin. Zane' lasa quebe gúsentu', ne quebe bi gudáguntu'.
2CO 6:6 Cá'anqueze blé'entu' da nácantu' ne̱ chee̱ tu xel-la nabán li lazre' chee̱ntu', ne ne̱ chee̱ da li da núnbeantu', ne ne̱ chee̱ xel-la zren lazre' chee̱ntu', ne xel-la zri'i lazre' chee̱ntu', ne ne̱ chee̱ Be' Lá'azxa, Bénnea' zúale̱ne̱' netu', ne ne̱ chee̱ xel-la nazrí'i chee̱ntu' da naca na du lazre',
2CO 6:7 ne ne̱ chee̱ dizra' li da dxuzénentu' bénneache, ne ne̱ chee̱ xel-la waca chee̱ Dios da zúale̱ na netu'. Bchínentu' da zaj naca ca xia chee̱ wedil-la chee̱ da xrlátaje chee̱ gudíl-lantu', ne chee̱ gudentu' chalá'ala da zaj naca ca xia chee̱ wedil-la chee̱ benne' ca' dxeledábague' netu'.
2CO 6:8 Zua gate dxelape̱' netu' ba lá'ana', ne zua gate dxuluzúe̱' netu' chalá'ala. Zua gate dxelenné̱' chee̱ntu' da xrlátaje, ne zua gate dxelenné̱' chee̱ntu' da cale̱la. Zua gate dxelenné̱' nácantu' we̱n lazre', ne zua gate dxelenné̱' dxenne̱ntu' da li.
2CO 6:9 Zua gate quebe nu dxuzé̱ naga netu', ne zua gate dxuluzé̱ naga xánnie̱' netu'. Zua gate zúantu' lu da ste̱be chee̱ xel-la gute, san ne naca bantu'. Zua gate dxuludée̱' netu' xel-la zi', san quebe ne xelutie̱' netu'.
2CO 6:10 Láqueze zúantu' lu da baxache', zúate̱quezentu' lu xel-la dxebé. Lácala nácantu' benne' xache', ba nuntu' benne' zan benne' gunní'a. Láqueze quebe bi núantu', xúgute̱ nápantu'.
2CO 6:11 Bi bíchentu', benne' Corinto, ba bchálajntu' du lázrentu'. Ba blé'entu' le'e ca nazrí'i lázrentu' le'e.
2CO 6:12 Tu zúazqueze xel-la zri'i lazre' chee̱ntu', na' le'e na' quebe nazri'ile netu' du lázrele.
2CO 6:13 Dxata' xueda' le'e ca dxun tu benne' dxata' xuene̱' bi cheé̱queze̱' chee̱ gulé'ele neda' du lázrele xel-la nazrí'i da zua na lu xichaj lázrdaule cáte̱ze be̱na' neda'.
2CO 6:14 Quebe gunle tuze nen benne' quebe dxeléajle̱'e̱ chee̱ Cristo, da gaca na ca chacué' be̱zre gu'una, be̱ quebe zaj nadíl-leba'. ¿Ájazra gun da xrlátaje gaca na tuze nen da cale̱la? ¿Ájazra gun xel-la naxaní' gaca na tuze nen da chul-la?
2CO 6:15 ¿Ájazra gun Cristo gaque̱' tuze nen Satanás? ¿Ájazra gun benne' dxéajle̱'e̱ chee̱ Cristo gaque̱' tuze nen benne' quebe dxéajle̱'e̱ chee̱'?
2CO 6:16 ¿Ájazra gun xudau' chee̱ Dios gaca na tuze nen bedáu' xiaj xaga? Lé'equeze nácale xudau' chee̱ Dios ban cáte̱ze gunná Diósqueze: Súale̱na' le̱', ne tále̱na' benne' ca'. Gaca' Dios chee̱ benne' ca', na' le̱' xelaque̱' benne' xe̱zre chia'.
2CO 6:17 Chee̱ le̱ na', cá'anqueze gunné̱': Le xedxúaj ládujla benne' ca', ne le cuasa na', dxenná Xránadxu. Quebe gutale da sban. Nadxa si' lu na'a le'e
2CO 6:18 ne gaca' Xrale le'e, na' le'e gácale zri'ina' bi biu, ne zri'ina' bi nu'ula. Caní dxenná Xránadxu, Bénnea' nape̱' dute̱ xel-la waca.
2CO 7:1 Ca' naca na, bi bícha'dau' nazri'ite̱ lazra', da caní zaj naca na da guche̱be lazre' Dios chee̱dxu. Chee̱ le̱ na' dxal-la' guxúe xanne' cuínadxu chee̱ quebe güedxu lataj netú da sban gudxén na dxi'u lu be̱la' dxen chee̱dxu, ne lu be' nácaquezdxu, na' lawe' da dxezrébedxu Dios dxal-la' guzúa cuínadxu lu na' Dios dute̱ ca nácadxu.
2CO 7:2 Le si' lu na'le netu'. Quebe bi da cale̱la ne guntu' chee̱ nu benne' ládujla le'e, ne quebe nu ne guchántu', ne quebe nu ne si xe̱ntu'.
2CO 7:3 Quebe dxennía' da nigá chee̱ gusebaga' le'e zria, san naca na ca ba gucha' le'e nédxula, le'e zúale lu lázrdawa' che gaca bana', u che gatia' tu zrente̱ nen le'e.
2CO 7:4 Du lazra' dxuchálajle̱na' le'e, ne zua' lu da ba neza ne̱ chee̱le le'e. Lu xúgute̱ da dxezácantu' zua da dxexúe zrénle̱'e̱ neda', na' dxebéle̱'e̱da'.
2CO 7:5 Da li, gate bzrintu' naga nababa Macedonia, quebe bezí' lázrentu'. Guzúantu' lu da ste̱be gátete̱ze, lawe' da gátete̱ze gudentu' guledábaga bénneache netu', na' lu lázrdauntu' bezrébentu'.
2CO 7:6 Nadxa Dios, Bénnea' dxexúe zrene̱' benne' zaj nate ni'a ne̱'e̱, bexúe zrene̱' netu' ne̱ chee̱ Tito lawe' da bezrinbe' naga zúantu',
2CO 7:7 ne quegá tuze lawe' da bla'be', san cá'anqueze lawe' da bexúe zrenle le̱be'. Gúzrebe' netu' ca dxezá lázrele lé'ele netu', ne bzenbe' netu' ca lu da baxache' zúale, ne ca gunne xue dxeze̱le neda', na' chee̱ le̱ na' gubéle̱'e̱dxeda'.
2CO 7:8 Láqueze da bzuaja' chee̱le bzua na le'e lu da baxache', quebe dxebezre lazra' chee̱ da na'. Láqueze gudxezre lazra' nédxula gate guque be'eda' bzua na le'e lu da baxache' tu chí'idau',
2CO 7:9 na'a dxebeda', quegá lawe' da guzúale lu da baxache', san lawe' da be̱n da baxache' na' bexíaje lázrele. Le'e bchaga laule da baxache' na' ca da bezaca ba lazre' Dios, na' da bzuaja' chee̱le quebe bi da cale̱la be̱n na chee̱le.
2CO 7:10 Da baxache' da dxuchaga laudxu ca da dxezaca ba lazre' Dios dxun na dxexebí'i lázredxu chee̱ ladxu, na' quebe dxal-la' cuezre lázredxu chee̱ na. Che xegá'anadxu lu da baxache' ca dxelún bénneache chee̱ xe̱zr la xu nigá, na' tu chi'ize gátedxu.
2CO 7:11 Le'e bchaga laule da baxache' da guca na chee̱le ne̱ chee̱ da bzuaja', ne be̱nle ca da dxezaca ba lazre' Dios, na' le nna'xque na'a: Bzua na le'e gunne xue ca naca da guca, ne be̱n na ble'ele ca da be̱nle. Bcha'a na le'e, ne bchebe na le'e. Nadxa guzé̱ lázrele lé'ele neda', ne guzúale gudele xel-la zi' bénnea' be̱n da cale̱la na'. Ca naca xúgute̱ da nigá ble'ele quebe nabágale zria chee̱ dul-la nigá.
2CO 7:12 Ca' naca na, gate bzuaja' chee̱le da na', quebe guca na lawe' da gudxe'a gunne xue chee̱ bénnea' be̱ne̱' da cale̱la na', ne quegá lawe' da gudxe'a gunne xue chee̱ bénnea' guca na chee̱', san be̱na' na chee̱ gueque be'ele lau Dios ca dxele gunne xue chee̱ntu'.
2CO 7:13 Chee̱ le̱ na' guca da bexúe zren na netu'. Da naca tu da zrendxa, gubéle̱'e̱ntu' gate blé'entu' zúale̱ Tito xel-la dxebé, lawe' da xúgute̱le le'e bexúe zrenle-be'.
2CO 7:14 Láqueze bca'ana szrena' le'e lau Tito, quebe dxedué'eda', lawe' da cáte̱ze naca da li ca naca xúgute̱ da bchálajle̱na' le'e, cá'anqueze guca da li da be̱na' gate bca'ana szrena' le'e lau Tito.
2CO 7:15 Nazrí'idxabe' le'e gate dxajsá lázrebe' ca be̱nle xúgute̱le le'e, be̱nle cáte̱ze gunábabe' le'e, ne ca guzí' lu na'le le̱be' lu dute̱ xel-la dxexruj lazre', ne lu xel-la dxezrebe.
2CO 7:16 Dxebeda' lawe' da dxuxrén lazre' xánnia' le'e.
2CO 8:1 Na'a, bi bicha', dxaca lazra' guzenda' le'e ca ble'e lau xel-la zri'i lazre' chee̱ Dios ne̱ chee̱ xúgute̱ cue' bi chee̱ Cristo zaj nnita' lu xe̱zr la xu Macedonia.
2CO 8:2 Láqueze guledée̱' tu xel-la zi' zren gulebéle̱'e̱quezne̱', na' láqueze zaj nácale̱'e̱ benne' xache', du lazre̱' bulunézruje̱' da zaj de̱ chee̱', na' belune̱' ca benne' gunní'a ca'.
2CO 8:3 Dxexeche̱ba' du lazre̱' bulunézruje̱' xúgute̱ da gulezéquene̱', ne da zrendxa ca da gulezéquene̱'.
2CO 8:4 Gulata' xuene̱' netu' güentu' le̱' lataj xelune̱' tu zren bénneache dxelácale̱ne̱' bi bíchedxu ca' dxelexázrjene̱'.
2CO 8:5 Belundxe̱' ca da guleza lázrentu', lawe' da belunna cuínaqueze̱', nédxula chee̱ Xránadxu, na' gudé na' chee̱ntu' netu', cáte̱ze dxaca lazre' Dios.
2CO 8:6 Ca' naca na, guta' xúentu' Tito gusexuzre̱' gutupe̱' da gunézrujle le'e, da na' guzú lawe̱' dxutupe̱' gate nate.
2CO 8:7 Le'e dxúnle̱'e̱le ca naca da dxunle, ca dxeajlí lázrele Dios, ne ca dxusé̱dele bi chee̱ Cristo, ne ca naca da naxéajni'ile, ne ca du lázrele dxunle xúgute̱, ne ca nazri'ile netu'. Ca' naca na, cá'anqueze dxal-la' gúnle̱'e̱le ca gunle zrin chawe' nigá.
2CO 8:8 Quebe dxapa' le'e da nigá ca tu da dxenná be'eda' le'e. Dxaca lazra' nézele ca du lazre' dxelún xezícadxa bénneache zrin nigá, dxulunézruje̱' dumí, chee̱ gueque be'ele che naca li lazre' xel-la zri'i lazre' chee̱le.
2CO 8:9 Ba nézquezle ca naca xel-la zri'i lazre' chee̱ Xránadxu Jesucristo. Naque̱' benne' gunní'a, san be̱n cuine̱' benne' xache' lawe' da bzri'ine̱' le'e, chee̱ gácale le'e benne' gunní'a lu da naca chee̱ Cristo lawe' da gudé Le̱' lu xel-la xache'.
2CO 8:10 Chee̱ gaca da ba neza chee̱le dxapa' le'e da dxéqueda' ca naca da nigá. Gudú iza guzú laule, quegá dxúnzele, san du lázrele dxunle da nigá, dxunézrujle dumí.
2CO 8:11 Na'a, le gúnte̱ze na chee̱ xexuzrte̱ gunle na, gunle na du lázrele cáte̱ze guzú laule dxunle nédxute̱, gunézrujle ca da du de̱ chee̱le.
2CO 8:12 Che da li dxaca lazre' tu benne' gunézruje̱', Dios xezaca ba lazre̱' na che gunézruje̱' ca da nape̱', ne quegá dxenabe̱' da quebe napa bénnea'.
2CO 8:13 Quebe dxennía' da nigá chee̱ xexácale le'e xache' chee̱ gácale̱le benne' xula.
2CO 8:14 Naca na chee̱ gápale lé̱bete̱. Na'a nápale chee̱ gunézrujle ca da dxelexazrje benne' xula ca', na' xetú lasa xelapa benne' ca' da xelunne̱' chee̱le gate bi xázrjele le'e. Caní gápale lé̱bete̱
2CO 8:15 cáte̱ze naxúaj na lu dizra' lá'azxa, dxenná na: Bénnea' nápale̱'e̱ quebe bi begá'ana chee̱', na' bénnea' nape̱' láteze quebe bi bexázrjene̱'.
2CO 8:16 Xcalén Dios, Bénnea' bzue̱' lu lázrdau Tito sue̱' gunne xue chee̱le le'e ca zua' neda'.
2CO 8:17 Guzí' lu ne̱'e̱ da bsebaga' le̱', na' lawe' da zúaqueze̱' gunne xue chee̱le le'e, ba bezé̱'e̱ chee̱ xide̱' xedajnné̱'e̱ le'e lawe' da dxaca lázrequeze le̱'.
2CO 8:18 Tu zren nen Tito nasél-lantu' tu bi bíchedxu, tu benne' dxelenné̱ chawe' chee̱' xúgute̱ cue' bi chee̱ Cristo, ca naca zrin xrlátaje da nune̱' chee̱ dizra' chawe' chee̱ Cristo.
2CO 8:19 Quegá tuze da nigá, san xúgute̱ cue' bi chee̱ Cristo gulequé̱'e̱ bi bíchedxu níqueze chee̱ sále̱ne̱' netu' chee̱ gácale̱ne̱' netu' lu zrin nigá da dxuntu' dxutúbentu' dumí da gácale̱ na benne' xache' ca' chee̱ gaca ba Xránadxu, ne chee̱ gulé'e lau du lázrele dxunle zrin chawe' nigá.
2CO 8:20 Caní dxuntu' chee̱ quebe nu benne' si tizre̱' netu' ca dxuchínentu' dumí zrente̱ nigá da dxulunezruj bi bíchedxu ca'.
2CO 8:21 Dxuntu' ba xuzre guntu' zrin nigá lu dute̱ xel-la li lazre' chee̱ntu', quegá tuze lau Xránadxu, san cá'anqueze lau xúgute̱ bénneache.
2CO 8:22 Tu zren nen benne' caní nasél-lantu' xetú bi bíchedxu, tu benne' da zánete̱ lasa ba blé'ene̱' netu' du lazre̱' dxune̱' zrin chee̱ Cristo, na' na'a du lázredxe̱' dxune̱' zrin nigá lawe' da dxuxrén lazre̱' le'e.
2CO 8:23 Che nu benne' guche̱be le'e ca naca chee̱ Tito, le xe̱'e̱ nácabe' bi ljwezra', ne dxunbe' zrin tu zren nen neda' chee̱ gunbe' zrin chee̱le. Che nu guche̱be le'e ca naca chee̱ xezícadxa bi bíchedxu ca' zeajzrague̱' Tito, le xe̱'e̱ zaj naque̱' benne' gulesel-la xúgute̱ cue' bi chee̱ Cristo, ne dxelape̱' ba lá'ana Cristo.
2CO 8:24 Chee̱ le̱ na', chee̱ xeleneze xúgute̱ cue' bi chee̱ Cristo, le gulé'e le̱' nazri'ile le̱', na' naca chee̱ntu' xucá'ana szrentu' le'e.
2CO 9:1 Ca naca chee̱ dumí da gunézrujle chee̱ bi ca' chee̱ Cristo, quebe dxun na ba xen guzúaja' chee̱le,
2CO 9:2 lawe' da ba nezda' ca dxaca lázrele gunle na. Dxezaca ba lazra' dxapa' bi bíchedxu zaj zre̱'e̱ xe̱zre ca' zaj nababa xe̱zr la xu Macedonia, le'e zrale xe̱zre ca' zaj nababa Acaya, gudú iza ba zúate̱quezle bi gunézrujle, na' benne' zante̱ benne' Macedonia du lazre̱' dxulunézruje̱' lawe' da dxunézrujle le'e du lázrele.
2CO 9:3 Dxusel-la' bi bíchedxu caní chee̱ quebe gaca tu da we̱n lazre' ca da chawe' da ba gunnía' ca dxunle le'e da nigá, ne chee̱ súate̱zle bi gunézrujle, ca ba gucha' benne' caní,
2CO 9:4 ne che sa'aca bal-la benne' Macedonia tu zren nen neda' chee̱ quebe xelelé'ene̱' quebe zúate̱quezle le'e bi gunézrujle. Chela gaca na caní xedué'entu' lawe' da bxren lázrentu' le'e caní, na' da zrendxa ca dxal-la' xedué'ele le'e.
2CO 9:5 Chee̱ le̱ na' gúqueda' dxun na ba xen naba' bi bíchedxu ca' xelide̱' xedajlennabe̱' le'e nédxula, ne chee̱ xelácale̱ne̱' le'e gutúpale da guche̱be lázrele nédxula gunézrujle. Ca' gaca na, dumí da gutúpale watá'queze na chee̱ gulé'e na naca tu da dxaca lázrele gunle, ne quegá tu da gunne xúentu' le'e.
2CO 9:6 Le nna'xque da nigá: Bénnea' dxaze̱' láteze, cá'anqueze láteze xezi'e̱, na' bénnea' dxázale̱'e̱, cá'anqueze xezí'ile̱'e̱.
2CO 9:7 Tu tu benne' dxal-la' gunézruje̱' cáte̱ze da ba nune̱' lu lázrdawe̱', quegá ca tu benne' quebe dxezaca ba lazre', u xadíaze, lawe' da nazrí'i Dios benne' dxunézruje̱' dute̱ xel-la dxebé.
2CO 9:8 Wazeque' Dios gúnnale̱'e̱ le'e ca naca xúgute̱ da chawe', chee̱ gata' chee̱le xúgute̱ da nachínele, ne gápale bi gunézrujle chee̱ gunle xúgute̱ zrin xrlátaje.
2CO 9:9 Naxúaj lu dizra' lá'azxa da dxenná na: Du lazre̱' bnézruje̱' chee̱ benne' xache' ca'. Ca zaj naca zrin xrlátaje nune̱' xelegá'anatequeze na.
2CO 9:10 Dios, Bénnea' dxunézruje̱' bínnedu ca' da dxázadxu, ne dxunne̱' da dxi'aj dxágudxu, gunne̱' le'e xúgute̱ da nachínele chee̱ gázale, na' gusegule̱' na chee̱ gúnnale̱'e̱queze na lina chee̱ zrin chawe' da gunle.
2CO 9:11 Ca' gaca na, gáta'le̱'e̱ chee̱le xel-la gunní'a ca' chee̱ séquele gunézrujle du lázrele, na' dumí na' sél-lale lu na'ntu' netu' gun na xelé̱ bi bíchedxu ca' Dios: Xcalenu'.
2CO 9:12 Ca' naca na, gate gunézrujdxu bi bíchedxu ca' dumí nigá da gácale̱ na le̱', quegá tuze dxunézrujdxu tu da dxelechínnene̱' san cá'anqueze dxundxu xelé̱'e̱ Dios: Xcalenu'.
2CO 9:13 Xelúe lá'ane̱' Dios lawe' da da nigá dxunézrujle gulé'e na dxuzúale dizra' chee̱ dizra' chawe' chee̱ Cristo. Cá'anqueze xelúe lá'ane̱' Dios ne̱ chee̱ da gunézrujle du lázrele da gácale̱ na le̱', ne xúgute̱ cue' bi chee̱ Cristo.
2CO 9:14 Chee̱ le̱ na' benne' ca' xelenabe̱' chee̱le lau Dios, ne xelezrí'ile̱'e̱ne̱' le'e ne̱ chee̱ xel-la zri'i lazre' zren da gulé'e lau Dios ne̱ chee̱le le'e.
2CO 9:15 Xcalén Dios lawe' da nunne̱' dxi'u tu da zrente̱ da quebe séquedxu xuzájla'adxu.
2CO 10:1 Neda', Pablo, dxuzenda' le'e da nigá ne̱ chee̱ xel-la dxexruj lazre', ne xel-la zri'i lazre' chee̱ Cristo. Dxelenné̱' naca' benne' zren lazre' gate zúale̱na' le'e, na' gate zua' zitu' nácale̱'a benne' snia.
2CO 10:2 Dxata' xueda' le'e quebe gunle, gate xida' xedajnná'a le'e, gaca' benne' snia nen bal-la benne' ládujla le'e, benne' ca' dxelenné̱' dxuntu' zrin chee̱ Cristo lu be̱la' dxenze chee̱ntu', na' zúaqueza' tíl-laqueza' benne' ca'.
2CO 10:3 Láqueze nácantu' be̱la' dxen quebe dxedíl-lantu' lu be̱la' dxenze chee̱ntu',
2CO 10:4 lawe' da quebe zaj naca chee̱ be̱la' dxenze da dxuchínentu' lu wedil-la chee̱ntu', san zaj napa na xel-la waca chee̱ Dios chee̱ séquentu' guzría xintu' da wal-la ca' chee̱ nu na' dxedábaga' netu'.
2CO 10:5 Ca'an naca, dxuzría xintu' da dxusebaga bénnea' dxi'u, ne da dxuzúe̱' lu xel-la dxucá'ana szren cuina chee̱ quebe xelúnbea bénneache Dios. Xúgute̱ da zaj xu'u lu xichaj bénneache dxuzúantu' lu na' Cristo chee̱ xuluzúe̱' dizra' chee̱'.
2CO 10:6 Zuáte̱quezentu' gudentu' xel-la zi' xúgute̱ benne' ca' quebe dxuluzúe̱' dizra' chee̱' gate na' ba dxuzúale dizra' chee̱' du lázrele.
2CO 10:7 Le'e dxenna'le benne' ca' cáte̱ze da zaj naque̱' cúzreze. Che nu benne' dxéquene̱' da li naque̱' bi chee̱ Cristo, dxal-la' gueque bé'ene̱' cáte̱ze na' naca le̱' bi chee̱ Cristo, cá'anqueze nácantu' netu' bi chee̱ Cristo.
2CO 10:8 Láqueze dxuchínedxeda' ca dxal-la' guna' xel-la dxenná bea chee̱ntu', quebe dxedué'eda' lawe' da nunna Cristo netu' xel-la dxenná bea na' chee̱ séquentu' gusegúlantu' le'e lu da naca chee̱ Dios, ne quegá chee̱ guzría xintu' le'e.
2CO 10:9 Quebe dxaca lazra' guéquele le'e dxaca lazra' gucheba' le'e ne̱ chee̱ da dxuzúaja' chee̱le.
2CO 10:10 Dxelenné̱' xiche ca' da dxusél-la' zaj naca na snia, ne wal-la, san néda'queza' naca' benne' nate ni'a na', ne ca dxuchálaja' quebe zácateca.
2CO 10:11 Bénnea' dxenné̱' da nigá dxal-la' gueque bé'ene̱' cáte̱ze naca' lu dizra' dxuzúaja' gate ne zua' zitu', cá'anqueze gaca' lu da guna' gate na' súale̱na' le'e.
2CO 10:12 Quebe dxexázrentu' gutil-le lé̱bentu', u gulé'e cuínantu' ca zaj naca bal-la benne' ca' dxulucá'ana szren cuine̱'. Dxelune̱' tu da xálaze gate dxelenné̱'e̱ ca da zaj nácaqueze̱', ne dxulutil-le le̱be ljwezre̱'.
2CO 10:13 Quebe gucá'ana szren cuínantu' lu da quebe naca chee̱ntu'. Dios naque̱' Bénnea' gulé'ene̱' netu' naga ze lau guntu' zrin, na' Le̱' be̱nne̱' netu' lataj blantu' naga zrale le'e lu xe̱zre Corinto.
2CO 10:14 Chee̱ le̱ na' quebe dxedxúajntu' naga ze lau chee̱ntu', cáte̱ze gaca na che quebe ne zrintu' naga zrale le'e nédxute̱. Netu' nácantu' benne' nedxu blantu' naga zrale le'e núantu' dizra' chawe' chee̱ Cristo.
2CO 10:15 Quebe dxucá'ana szren cuínantu' lu zrin da zaj nun benne' xula, san dxebeza lázrentu' cáte̱ze gula xel-la dxeajlí lazre' chee̱le, waca gúndxantu' zrin ládujla le'e gusegúlantu' xel-la dxeajlí lazre' chee̱le, san guntu' na lu'ule da naca chee̱ntu'.
2CO 10:16 Te na' dxebeza lázrentu' tédxantu' ca naga zrale chee̱ guzénentu' bénneache zaj zre̱'e̱ ga na' dizra' chawe' chee̱ Cristo, ne quebe chú'untu' naga ba zaj nun zrin xezícadxa benne' ca', chee̱ quebe gucá'ana szren cuínantu' lu da ba zaj nune̱'.
2CO 10:17 Che nu benne' dxaca lazre̱' nu gucá'ana szrene̱', dxal-la' gucá'ana szrene̱' Xránadxu.
2CO 10:18 Bénnea' dxexedxúaj xrlátaje, quebe naque̱' benne' dxucá'ana szren cuine̱', san naque̱' bénnea' dxucá'ana szren Xránadxu le̱'.
2CO 11:1 Le guchaga lau neda' chee̱ nnia' late' da ca zeaje na. Ájate̱ze naca na, le guchaga lau neda',
2CO 11:2 lawe' da dxé'le̱'a gunne xue chee̱le le'e lu da nusebaga Dios neda', ne lawe' da ba nache̱be lazra' chee̱le gácale zru'ula Cristo, dxaca lazra' gudéa' le'e lau Le̱' ca tu nu'ula cuíde'dau' du lazre' súale̱be' benne' chee̱be'.
2CO 11:3 Ca be̱n be̱la' gula na' guzí xe̱ba' Eva nen xel-la neze chee̱ba', dxezreba' güele lataj nu si xe̱ le'e, na' cuásale lu xichaj lázrdaule chee̱ québedxa gácale du lázrele chee̱ Cristo.
2CO 11:4 Le'e dxuchaga laule benne' ca' zá'aque̱' dxuluchálaje̱' chee̱ tu Jesús, benne' nazrá' ca Bénnea' bzénentu' le'e chee̱ Le̱', ne du lázrele dxezí' lu na'le tu be' da nazrá' ca Be' na' da ba guzí' lu na'le, ne dxezí' lu na'le tu dizra' da nazrá' ca naca dizra' chawe' da ba guzí' lu na'le.
2CO 11:5 Dxéqueda' quebe zaca' neda' látezdxa ca benne' gubáz zren ca', benne' ca' zéajle̱le le'e.
2CO 11:6 Láqueze quebe gaca guchálaja' xrtándau', dxéajni'ida' da na' dxuchálaja' chee̱ na, na' blé'entu' caní naca na lu xúgute̱ da ba be̱ntu'.
2CO 11:7 ¿Be̱na' tu da cale̱la gate bzenda' le'e dizra' chawe' chee̱ Cristo, ne quebe bi bchízruja' le'e, na' be̱n cuina' dxexruj lazre' chee̱ xegá'ana szrenle le'e?
2CO 11:8 Guca na ca gudawa' dumí chee̱ xezícadxa cue' bi chee̱ Cristo gate guzi'a da belunne̱' neda' chee̱ be̱na' zrin ga zúale le'e.
2CO 11:9 Gate na' guzúale̱na' le'e, ne bxázrjeda', quebe bi guzí' lu na'a da naca chee̱le, san bi bíchedxu zá'aque̱' xe̱zr la xu Macedonia belunne̱' neda' ca da guchínneda'. Be̱na' ba xuzre quebe bi gunábeda' le'e, na' cá'anqueze guna'.
2CO 11:10 Lawe' da núnbe'a da li chee̱ Cristo, quebe zua nu benne' naga nababa xe̱zr la xu Acaya gaca guzague̱' neda' chee̱ québedxa gucá'ana szren cuina' chee̱ da nigá dxuna'.
2CO 11:11 ¿Bizr chee̱ na' dxennía' caní? ¿Naca na lawe' da quebe nazrí'ida' le'e? Nézqueze Dios nazrí'ida' le'e.
2CO 11:12 Gúnqueza' ca dxuna' chee̱ quebe gata' lataj chee̱ benne' ca' dxelaca lazre̱' xulucá'ana szren cuine̱' lawe' da dxeléquene̱' dxelune̱' zrin cáte̱ze dxuntu' netu'.
2CO 11:13 Benne' caní zaj naque̱' gubáz quebe nasel-la Cristo. Dxelezí xe̱'e̱ bénneache, ne dxululé'e cuine̱' ca gubáz chee̱ Cristo.
2CO 11:14 Quebe naca da nigá da xebánedxu lawe' da Satanásqueze dxulé'e cuina na ca tu gubáz chee̱ xabáa zue̱' lu xel-la naxaní' chee̱ Dios,
2CO 11:15 na' chee̱ le̱ na' dxululé'e cuine̱' ca benne' dxelún da xrlátaje. Benne' caní xelebía xi'e̱ ca ba naca chee̱ benne' dxelún da caní.
2CO 11:16 Xecha lasa dxapa' le'e, quebe nu benne' dxal-la' guéquene̱' nadá xichaj lázrdawa'. Che ca'an dxéquele le'e, le gunna neda' lataj guchálajle̱na' le'e ca tu benne' nadá xichaj lázrdawe̱', chee̱ gaca gucá'ana szren cuina'.
2CO 11:17 Quebe dxapa' le'e da nigá lu xel-la dxenná bea chee̱ Xránadxu. Guchálaja' ca tu benne' nadá xichaj lázrdawe̱', nnia' tu da gucá'ana szren cuina'.
2CO 11:18 Lawe' da zaj zra' benne' zante̱ dxulucá'ana szren cuine̱' lu da zaj naque̱' chee̱ xe̱zr la xu nigá, cá'anqueze neda' gucá'ana szren cuina'.
2CO 11:19 Lawe' da nácale̱'e̱le benne' sina dxuchaga laule du lázrele benne' zaj nadá xichaj lázrdawe̱'.
2CO 11:20 Dxuchaga laule benne' ca' dxelexune̱' le'e ca benne' zaj nada'u, ne benne' ca' dxuluchínene̱' le'e, ne benne' ca' dxelenná bé'ene̱' le'e, ne benne' ca' dxuluzúe̱' le'e chalá'ala, ne benne' ca' dxelegape̱' xraga laule.
2CO 11:21 Láqueze dxedué'eda' dxennía' da nigá, quebe guca' benne' dxechugu lazre' chee̱ guna' ca dxelún xezícadxa benne'. Na'a gaca' lazre' dxugu guna' caní. Ba dxelechugu lazre' benne' xezícadxa dxulucá'ana szren cuine̱'. Cá'anqueze neda' xechugu lazra' guna' na, láqueze naca tu da ca zeaje da dxennía'.
2CO 11:22 ¿Zaj naque̱' benne' hebreo? Cá'anqueze neda' naca' benne' hebreo. ¿Zaj naque̱' benne' Israel? Cá'anqueze neda'. ¿Zaj naque̱' zri'ine zre sua Abraham? Cá'anqueze naca' neda'.
2CO 11:23 ¿Zaj naque̱' we̱n zrin chee̱ Cristo? Nácadxa' neda' we̱n zrin chee̱' ca benne' ca', lácala dxuchálaja' ca tu benne' nadá xichaj lázrdawe̱' gate dxennía' da nigá. Ba be̱ndxa' zrin ca benne' ca'. Ba buluzálajdxa bénneache neda' ca nu bzálaj benne' ca'. Ba gulegu'udxa bénneache neda' lizre xia ca belune̱' chee̱ benne' ca', na' zane' lásate̱ ba guzúa' lu da ste̱be chee̱ xel-la gute.
2CO 11:24 Gazxu' lasa ba belúe benne' judío ca' neda' xide che̱nnu dxua weaj.
2CO 11:25 Chunna lasa beline̱' neda' xaga. Tu lasa belú'e̱ neda' xiaj. Chunna lasa guxaze da dxedá lawe' nísadau' da xu'a lu nisa. Tu lasa, tu zra tu xe̱la guxu'a lu nísadau'.
2CO 11:26 Zane' lásate̱ guxu'a neza, ne guzúa' lu da ste̱be: Chee̱ xe̱gu ca', ne chee̱ gubán ca'. Chee̱ benne' walázr chia' ca', ne chee̱ benne' zitu' ca'. Guzúa' lu da ste̱be lu xe̱zre, ne le̱'e̱ xixre', ne lu nísadau', ne ládujla benne' we̱n lazre' dxelenné̱' zaj naque̱' bi bíchedxu.
2CO 11:27 Be̱nle̱'a zrin, ne guzúa' lu da zi' da xa'. Zane' lásate̱ quebe gusia' dxe̱la. Gudúnle̱'a, ne gubílele̱'e̱da', na' zane' lásate̱ be̱na' gubasa. Catite̱ bexaga', ne bexázrjeda' zra lana' gacua'.
2CO 11:28 Da zrendxa ca da caní, ne xezícadxa da guzraca'. Xúgute̱ zra dxéqueda' zi' lawe' da zua' gunne xue chee̱ xúgute̱ cue' bi chee̱ Cristo.
2CO 11:29 Che nu benne' nate ni'a ne̱'e̱ lu xel-la dxeajlí lazre' chee̱', cá'anqueze neda' dxéqueda' nate ni'a ná'aqueza'. Che nu benne' dxelune̱' dxeajchaze̱', néda'queze dxaca' tul-la.
2CO 11:30 Che dxun na ba xen gucá'ana szren cuina', gucá'ana szren cuina' chee̱ da ca' dxululé'e na nate ni'a na'a.
2CO 11:31 Dios, Xra Xránadxu Jesucristo, Bénnea' naca chee̱' güe lá'anatequezdxu Le̱', nézene̱' dxennía' da li.
2CO 11:32 Gate guzúa' xe̱zre Damasco, benne' wnná bea na' dxune' zrin chee̱ wenná bea Aretas bzre̱'e̱ benne' dxuluxúe̱' dxa xu'u chee̱ xe̱zre na', chee̱ xele̱l-le̱' neda'.
2CO 11:33 Na' bi bíchedxu ca' bululetje̱' neda' tu lu xcuite xia ga dxu'u lení' chee̱ xu'u lu ze'e da naxechaj na xe̱zre na'. Ca' guca na, gulá' lu na' benne' ca'.
2CO 12:1 Da li quebe dxal-la' gucá'ana szren cuina', san guchálaja' chee̱ da ca' ble'e Xránadxu neda', ne da ca' ble'eda' ca naca chee̱'.
2CO 12:2 Neda', ca tu benne' dxéajle̱ chee̱ Cristo, ba zeaj chidá' iza guché̱ Dios neda' xabáa guxunne'. Quebe nezda' che guxá'a na' dute̱ be̱la' dxen chia', u che cabí. Dios nézene̱'.
2CO 12:3 Nezda' néda'queza', che zua' lu be̱la' dxen chia', u che cabí, quebe nezda', tuze Dios nézene̱'.
2CO 12:4 Guché̱ Dios neda' tu xabáa chee̱', naga benda' dizra' bagache da quebe naca chee̱ bénneache xelenné̱' ca zaj naca na.
2CO 12:5 Waca gucá'ana szrena' tu benne' caní, san quebe gucá'ana szren cuínaqueza', che quebe naca na chee̱ xel-la nate ni'a na' chia'.
2CO 12:6 Láqueze che gaca lazra' gucá'ana szren cuina' quebe gaca na tu da xálaze, lawe' da gaca na tu da li. Quebe guna' na chee̱ quebe nu guéquene̱' nácadxa' ca da gaca lé'ene̱' naca', u ca da gaca xenne̱' da dxennía'.
2CO 12:7 Da caní ble'e Xránadxu neda' gulaca na da xebánele̱'e̱dxu, na' chee̱ quebe gucá'ana szren cuina', guca chia' ca tu xeche' naxaze lu be̱la' dxen chia' da dxuchine Satanás chee̱ guzalaj na neda'.
2CO 12:8 Chunna lasa guta' xueda' Xránadxu gucuase̱' da dxezaca'.
2CO 12:9 Xránadxu guzre̱' neda': “Xela zri'i lazre' chia' naca na dute̱ da dxechínenu' lawe' da dxulé'edxa lau xel-la waca chia' nen benne' nate ni'a ne̱'e̱.” Ca' naca, dxebeda' lawe' da nate ni'a na'a chee̱ gulé'e lau lu be̱la' dxen chia' xel-la waca chee̱ Cristo.
2CO 12:10 Chee̱ le̱ na' dxebeda' ca naca xel-la nate ni'a na' chia', ne ca naca dizra' schanni' ca' dxelenná bénneache chia', ne ca naca da ca' dxexázrjeda', ne gate zaj nau zi' xuzre' bénneache neda', ne ca naca da ba xa' ca' da dxedéa' ne̱ chee̱ Cristo, lawe' da gate nátedxa ni'a na'a, dxéqueda' nácadxa' benne' wal-la.
2CO 12:11 Guca' ca tu benne' nadá xichaj lázrdawe' gate bca'ana szren cuina' caní, san le'e be̱nle be̱na' na. Le'e na' dxal-la' gucá'anale neda' szren lawe' da quebe zaca' látezdxa ca benne' gubáz zren ca', benne' ca' dxéajle̱le, láqueze quebe bi zaca' neda'.
2CO 12:12 Zrin be̱na' ládujla le'e lu dute̱ xel-la zren lazre' chia' ble'e na da li naca' gubáz chee̱ Cristo ne̱ chee̱ da dxelunna bea na, ne xel-la waca ca' chee̱ xabáa, ne da ca' dxexebánedxu.
2CO 12:13 ¿Dxéquele le'e nácale látezdxa blau ca xezícadxa cue' bi chee̱ Cristo lawe' da guzí' lu na'a da belunne̱' chia', na' quebe guzí' lu na'a da zaj naca chee̱le? Le gunite lau neda' che naca tu da cale̱la quebe be̱nna' le'e lataj bi gúnnale chia'.
2CO 12:14 Na'a ba zua' xida' xedajnná'a le'e da guxunne' lasa, ne quebe si' lu na'a da zaj naca na chee̱le. Quebe dxexílaja' da nápale, san lé'equeze, lawe' da dxal-la' xulucude xruze xrna' dumí da xulunézruje̱' zrí'ine̱', ne quegá xulucude zrí'ine̱' da xulunézrujbe' xra xrnabe'.
2CO 12:15 Du lazra' guchíneda' dumí chia' chee̱ gaca chawe' chee̱ bénne'du xu'ule, láqueze dxéqueda' gate nazrí'idxeda' le'e, látezdxa nazri'ile le'e neda'.
2CO 12:16 Bal-la benne', láqueze zaj nézene̱' quebe bi guzí' lu na'a da zaj naca na chee̱le, dxelenné̱' gude̱l-la' le'e lu da we̱n lazre'.
2CO 12:17 ¿Guzí xe̱'a le'e lu na' tu benne' gusel-la' chee̱le?
2CO 12:18 Guta' xueda' Tito xídabe' xedajnná'abe' le'e, ne gusel-la' nen le̱be' xetú bi bíchedxu. ¿Guzí xe̱ Tito le'e? ¿Quebe be̱ntu' tuze ca be̱ntu' ládujla le'e neda', ne Tito, na' nen tuze Be' Lá'azxa?
2CO 12:19 Bi bicha' nazri'ite̱ lazra', ¿dxéquele dxucá'ana cuínantu' xrlátaje laule le'e? Dxuchálajle̱ntu' le'e lau Dios, ne lu La Xránadxu Jesucristo. Xúgute̱ da caní dxennantu' chee̱ gúlale lu da naca chee̱ Dios.
2CO 12:20 Dxezreba' gate xida' xedajnná'a le'e, walé'eda' le'e quebe nácale cáte̱ze dxaca lazra' gácale, na' le'e walé'ele neda' quebe naca' da dxaca lázrele gaca'. Dxezreba' dxedíl-lale̱le ljwézrele, ne nácale xa lazre', ne dxezrá'ale ljwézrele, ne nácale zide lazre', ne nácale wetupa dizra' bizruj, ne dxezí tízrale ljwézrele, ne dxucá'ana szren cuínale, ne dxunle da cale̱la.
2CO 12:21 Dxezreba' gate xida' xedajnná'a le'e, Dios gune̱' xedué'eda' ne̱ chee̱le le'e, da gucuezre na neda' ne̱ chee̱ zánele le'e, benne' ca' dxelúntequeze̱' dul-la, ne quebe dxulusane̱' dxelune̱' da sban, ne da dxulucá'ana sban ljwezre̱', ne da cale̱la da tu dxelúnzqueze̱'.
2CO 13:1 Da nigá naca na da guxunne' lasa xida' xedajnná'a le'e. Xúgute̱ dxulé'e lawe na naca na da li ne̱ chee̱ dizra' chee̱ chupa u chunna benne' xelexeche̱be̱'.
2CO 13:2 Benne' ca' belune̱' dul-la nédxula, ne xúgute̱le le'e, dxácate̱ ne zua' zitu' naga zrale, dxuzenda' le'e da xula ca da gucha' le'e gate bedajnná'a le'e da gudxupe' lasa, che xida' xedajnná'a le'e da xula quebe gudéa' cá'aze ca da ba nunle.
2CO 13:3 Nadxa lé'ele da gulé'e na dxenné̱ Cristo lu dxu'a neda', na' Le̱' quebe nate ni'a ne̱'e̱ lu da gune̱' chee̱le, san naque̱' benne' wal-la ládujla le'e.
2CO 13:4 Da li gudé̱'e̱ xaga béguaj ca tu benne' nate ni'a ne̱'e̱, san naca bane̱' ne̱ chee̱ xel-la waca chee̱ Dios. Cá'anqueze netu' nate ni'a nantu' ca da guca chee̱', san lawe' da nácantu' tuze nen Le̱' gaca bantu' ne̱ chee̱ xel-la waca chee̱ Dios chee̱ guntu' zrin chee̱le le'e.
2CO 13:5 Le guxúe xanne' cuínale chee̱ gueque be'ele che da li dxeajlí lázrele Cristo. Le guxúequeze cuínale. ¿Quebe dxeque be'ele zua Jesucristo xichaj lázrdaule, che da li dxeajlí lázrele Le̱'?
2CO 13:6 Dxebeza lazra' gueque be'ele quebe naca' neda' benne' we̱n lazre' lu da naca' chee̱ Cristo.
2CO 13:7 Dxenábantu' lau Dios chee̱ quebe bi da cale̱la gunle, quegá chee̱ gulé'entu' dxennantu' da li, san chee̱ gunle le'e da xrlátaje, láqueze dxéquele le'e quebe dxennantu' da li.
2CO 13:8 Quebe bi gaca guntu' da dxedábaga na da li, san tuze da dxácale̱ na da li.
2CO 13:9 Chee̱ le̱ na' dxebentu' gate nate ni'a nantu', che le'e nácale benne' wal-la, na' nábaquezentu' Dios chee̱ gácale dute̱ da dxal-la' xelaca bi chee̱ Dios.
2CO 13:10 Dxuzúaja' chee̱le da nigá nédxula ca xida' xedajnná'a le'e, chee̱ quebe gun na ba xen gate xida', gácale̱'a benne' snia ca guchíneda' xel-la dxenná bea chia', da be̱nna Xránadxu neda' chee̱ séqueda' gusegula' le'e lu da naca chee̱ Dios, ne quegá chee̱ guzría xi'a le'e.
2CO 13:11 Na'a, bi bicha', le sua xel-la dxebé. Le gaca dute̱ da dxal-la' xelaca bi chee̱ Dios. Le xue zren ljwézrele. Le gaca tuze tule xetule, ne le sua xel-la dxebeza zri lazre', na' Dios, Bénnea' dxunne̱' dxi'u xel-la dxebeza zri lazre', ne nazrí'ine̱' dxi'u súale̱ne̱' le'e.
2CO 13:12 Le gugapa diuzre ljwézrele tule xetule, ne le gunida ljwézrele.
2CO 13:13 Xúgute̱ bi bíchedxu, bi chee̱ Cristo dxulugape̱' le'e diuzre.
2CO 13:14 Dxaca lazra' gucá'ana Xránadxu Jesucristo le'e chawe', ne zri'i Dios le'e, ne sua tuze Be' Lá'azxa nen le'e. ¡Ca'an gaca na!
GAL 1:1 Neda', Pablo, naca' gubáz chee̱ Cristo. Quebe gulesel-la bénneache neda', ne quegá buluzúa bénneache neda' gaca' gubáz. Caní bé̱nqueze Jesucristo chia', ne Xradxu Dios, Bénnea' bsebane̱' Jesús ládujla benne' gate.
GAL 1:2 Xúgute̱ benne' bíchedxu zrále̱ne̱' neda' zaj naque̱' neda' tuze. Neda' dxuzúaja' dizra' nigá chee̱ xúgute̱ cue' benne' bíchedxu zaj zre̱'e̱ xe̱zre ca' zaj nnita' xe̱zr la xu Galacia.
GAL 1:3 Dxenaba' lau Xradxu Dios, ne lau Xránadxu Jesucristo gun chawe̱'e̱ le'e, ne gunne̱' le'e xel-la dxebeza zri lazre'.
GAL 1:4 Jesucristo bzane cuine̱' chee̱ gutie̱' ne̱ chee̱ dul-la da nabágadxu, chee̱ bselé̱' dxi'u lu da naca chee̱ xe̱zr la xu nigá da naca na da cale̱la. Be̱ne̱' da guca lazre' Xradxu Dios.
GAL 1:5 ¡Gaca báqueze Dios chadía chacanna! ¡Ca'an gaca na!
GAL 1:6 Dxexebánele̱'e̱da' chee̱le le'e lawe' da dxebéaj xíchajte̱le Dios, Bénnea' gunné̱' le'e chee̱ si' lu na'le da dxunna Cristo, na' dxezí' lu na'le tu dizra' nazrala ca naca dizra' chawe' chee̱ Cristo.
GAL 1:7 Da li quebe bi de̱ xetú dizra' chawe', san zaj zra' bal-la benne' dxelún zréajene̱' le'e, ne dxelaca lazre̱' xuluchuque̱' dizra' chawe' chee̱ Cristo.
GAL 1:8 Che nu benne' dxuzenne̱' le'e xetú dizra' da nazrala ca naca dizra' chawe' da ba bzénentu' le'e, dxenaba' lau Dios cue̱'e̱ bénnea' de', lácala naca neda', u naca tu gubáz chee̱ xabáa.
GAL 1:9 Báchequeze bzenda' le'e, ne dxuzenda' le'e da xula, che nu benne' guzenne̱' le'e tu dizra' da nazrala ca naca dizra' chawe' da ba guzí' lu na'le, dxenaba' lau Dios cue̱'e̱ bénnea' de'.
GAL 1:10 Gate dxennia' da nigá, ¿Dxaca lazra' xegá'ana' xrlátaje lau bénneache, u che lau Dios? ¿Dxaca lazra' guna' da xelezaca ba lazre' bénneache? Che ca'an dxaca lazra' guna' da dxelezaca ba lazre' bénneache, quebe naca' we̱n zrin chee̱ Cristo.
GAL 1:11 Dxuzéajni'ida' le'e, bi bicha', dizra' chawe' da dxuzenda' bénneache, na' quebe naca na tu da gulaj na lu xichaj lázrdau bénneache.
GAL 1:12 Quebe nu benne' be̱nne̱' na neda', ne quegá nu benne' bsé̱dene̱' neda' le̱ na, san Lé̱queze Jesucristo bzenne̱' na neda'.
GAL 1:13 Ba bénquezle ca be̱na' neda' nédxula gate na' nazí' lu na'a xel-la benne' xudau' chee̱ judío ca', ca gudáu zi' xuzra' bi chee̱ Dios zaj nácabe' bi chee̱ Cristo, ne be̱n zi' lazra' guzría xi'a-be'.
GAL 1:14 Lu xel-la benne' xudau' chee̱ judío ca', neda' ba bzrué'edxeda' ca xúgute̱ bi walázr chia', bi ljwezra' ca', lawe' da be̱ lázredxa' gapa' ca da xjácale̱ xra xrtawa' ca'.
GAL 1:15 Dios guqué̱'e̱ neda' nédxula gate za gálaja', na' lu xel-la zri'i lazre' chee̱' gunné̱' neda'. Nadxa gate guca lazre' Le̱',
GAL 1:16 blé'ene̱' neda' Zrí'ine̱', chee̱ guzenda' benne' ca' quebe zaj naque̱' judío ca naca chee̱ Zrí'ine̱'. Gate guca da nigá, quebe nu benne' gunábeda',
GAL 1:17 ne quebe guxá'a Jerusalén cheajnábeda' benne' zaj naque̱' gubáz chee̱ Cristo nédxudxa ca neda'. Guxá'a naga nababa xe̱zr la xu Arabia, na' gudé na' bezrina' xe̱zre Damasco.
GAL 1:18 Gudé chun iza guxá'a Jerusalén, chee̱ xeajchálajle̱na' Pedro, na' begá'anale̱na' le̱' xta' gubizra.
GAL 1:19 Quebe nu ble'eda' xetú benne' gubáz chee̱ Cristo, san tuze Jacobo, bi biche Xránadxu.
GAL 1:20 Ne̱ chee̱ La Dios dxapa' le'e, da li naca da nigá dxuzúaja' chee̱le le'e.
GAL 1:21 Ca gudé na' guxá'a xe̱zre ca' zaj nababa xe̱zr la xu Siria, ne xe̱zre ca' zaj nababa xe̱zr la xu Cilicia.
GAL 1:22 Benne' bíchedxu ca', bi chee̱ Cristo zaj zre̱'e̱ xe̱zr la xu Judea quebe zaj nunbe'e̱ neda'.
GAL 1:23 Belénzene̱' nu dxenná: “Bénnea' nédxula gudáu zi' xuzre̱' dxi'u, na'a dxuchálaje̱' dizra' chawe' chee̱ xel-la dxeajlí lazre' Cristo, da na' guca lazre̱' guzría xi'e̱ nédxute̱.”
GAL 1:24 Na'a dxelúe lá'ane̱' Dios ca da belenne̱' ca naca chia'.
GAL 2:1 Ca gudé chidá' iza guxá'a xecha lasa Jerusalén nen Bernabé, na' be̱n bi Tito neda' tu zren.
GAL 2:2 Guxá'a na' lawe' da ble'e Dios neda' dxal-la' cha'a na'. Na' cheé̱zela bchálajle̱na' benne' ca' zaj naque̱' blau ládujla bi chee̱ Cristo, ne bzenda' le̱' dizra' chawe' da dxuchálaja' ládujla benne' ca' quebe zaj naque̱' judío. Be̱na' caní chee̱ nezda' quebe guca dácheze zrin da ba be̱na', ne da dxuna'.
GAL 2:3 Gulezí' lu ne̱'e̱ zrin nuna', na' quebe nu gunná be'e Tito, bi zále̱be' neda', chugu lu be̱la' chee̱be' da gulé'e na nácabe' bi chee̱ Dios, lácala quebe nácabe' judío.
GAL 2:4 Bal-la benne' quebe zaj naque̱' du lazre' benne' bíchedxu, benne' gulu'e̱ ládujla dxi'u lu da we̱n lazre', gulaca lazre̱' chugu da gulé'e na lu be̱la' chee̱ Tito. Benne' caní gulu'e̱ ládujla dxi'u chee̱ xelenézene̱' ájala xelegúe̱' lataj da nazidxu lu na' Jesucristo, chee̱ xuluxuzúe̱' dxi'u ca benne' zaj nada'u lu da bdxixruj bea Moisés.
GAL 2:5 Ne chite̱ze quebe be̱ntu' le̱' lataj xelegú'u xel-le̱' netu' lawe' da guca lázrentu' xegá'anale̱ le'e da li dizra' chawe' chee̱ Cristo.
GAL 2:6 Benne' ca' zaj naque̱' blau quebe bi da cube bulusebague̱' netu'. Da zaj naque̱' quebe bi naca na chia' lawe' da quebe xuchí'a Dios ca da nalá' láweze chee̱ bénneache.
GAL 2:7 Quebe bi bulusebague̱' neda', lawe' da belexúnbe'e̱ Diósqueze bsebague̱' neda' guzenda' benne' ca' quebe zaj naque̱' judío dizra' chawe', cáte̱ze bsebague̱' Pedro guzenne̱' benne' judío ca' dizra' chawe'.
GAL 2:8 Lé̱queze Dios na', Bénnea' bzue̱' Pedro gubáz chee̱' ládujla benne' judío ca', cá'anqueze bzue̱' neda' gaca' gubáz chee̱' ládujla benne' quebe zaj naque̱' judío.
GAL 2:9 Chee̱ le̱ na', Jacobo, ne Pedro, ne Juan, benne' zaj naque̱' blaudxa, belexúnbe'e̱ be̱n Dios neda' culuén nigá, na' gulezí' lu ne̱'e̱ neda', ne Bernabé, na' belune̱' tuze dizra' cheajzentu' netu' benne' ca' quebe zaj naque̱' judío dizra' chawe', dxácate̱ na' le̱' xuluzenne̱' na benne' judío ca'.
GAL 2:10 Túte̱ze da gulenábene̱' netu' xexache lázrentu' benne' xache' ca', da na' dxue lazra' dxuna'.
GAL 2:11 Gate bla' Pedro xe̱zre Antioquía gudil-la' le̱' caníqueze lawe' da gunegue lazre̱'.
GAL 2:12 Nédxute̱ gudágule̱ne̱' benne' ca' quebe zaj naque̱' judío cadxa belelá' bal-la benne' gusel-la Jacobo. Nadxa bebigue̱'e̱ chalá'ala, ne bsane̱' québedxa gudágule̱ne̱' benne' ca' lawe' da bzrebe̱' judió ca', benne' ca' zaj nadxugu lu be̱la' chee̱' da dxulé'e na.
GAL 2:13 Nadxa xezícadxa judío ca' zaj naque̱' bi chee̱ Cristo belune̱' tu zren Pedro lu da dxune̱' láweze. Caní belune̱', na' ca' be̱nte̱ Bernabé tu zren benne' ca' lu da na' dxelune̱' láweze.
GAL 2:14 Gate ble'eda' neda' quebe dxelune̱' cáte̱ze naca chee̱ da li chee̱ dizra' chawe' chee̱ Cristo, na' gucha' Pedro lau xúgute̱ benne' ca': Lue' nacu' judío, na' benu' ca tu benne' quebe naque̱' judío, ne quebe be̱nu' ca tu benne' judío. ¿Bizr chee̱ na' dxenná be'enu' benne' quebe zaj naque̱' judío xelune̱' ca dxelún benne' judío?
GAL 2:15 Cá'anqueze gucha'-ne̱': Dxi'u nácadxu benne' judío lawe' da nálajdxu ca', ne quebe nácadxu benne' dul-la ca benne' zaj nababa xezícadxa xe̱zr la xu ca'.
GAL 2:16 Nézedxu netú benne' quebe xegá'ane̱' xrlátaje lau Dios lawe' da nune̱' da bdxixruj be'e Moisés, san tuze che dxeajlí lazre̱' Jesucristo. Chee̱ le̱ na' cá'anqueze dxi'u dxeajlí lázredxu Cristo chee̱ xegá'anadxu xrlátaje lau Dios ne̱ chee̱ xel-la dxeajlí lazre' chee̱dxu Cristo, ne quegá lawe' da be̱ndxu ca nadxixruj bea na. Netú benne' quebe xegá'ane̱' xrlátaje lau Dios lawe' da nune̱' da nadxixruj bea na.
GAL 2:17 Na'a, che dxi'u dxuxrén lázredxu nagá'anadxu xrlátaje lau Dios ne̱ chee̱ Cristo, ne che zua da dxulé'e na ne nácadxu benne' dul-la, ¿nnadxu Cristo dxunne̱' dxi'u lataj gundxu dul-la lawe' da québedxa dxenná be'e da bdxixruj be'e Moisés dxi'u? ¡Cabata'!
GAL 2:18 Che dxuchínnaja' tu, na' che te na' xexuna' na, na' nabaga' zria.
GAL 2:19 Ba naca' ca tu benne' gate lu da naca chee̱ da nadxixruj bea na. Da nadxixruj béaqueze ble'e na neda' naca' ca tu benne' gate, chee̱ gaca bana' ne̱ chee̱ da nun Dios.
GAL 2:20 Ba naca' ca tu benne' gate lawe' da naca chia' ca naca chee̱ tu benne' gudá' xaga béguaj tu zren nen Cristo. Chee̱ le̱ na', québedxa naca bana' neda'. Cristo naca bane̱' lu xichaj lázrdawa'. Xel-la nabán da napa' lu be̱la' dxen chia', napa' na ne̱ chee̱ xel-la dxeajlí lazre' chia' Zri'ine Dios, Bénnea' bzri'ine̱' neda', ne bzane cuine̱', gutie̱' waláz chia' neda'.
GAL 2:21 Quebe dxaca lazra' guzúa' chalá'ala xel-la zri'i lazre' chee̱ Dios. Che nu benne' gaca xegá'ane̱' xrlátaje lau Dios lawe' da nune̱' da nadxixruj bea na, na' dácheze guca da be̱n Cristo gate gutie̱'.
GAL 3:1 Bi bicha', zrale Galacia, nácale le'e benne' xala ca'. ¿Zua nu benne' dxezí xe̱'e̱ le'e chee̱ québedxa guzúale dizra' chee̱ da li? Ba blé'entu' le'e caníqueze Jesucristo, ca gudé̱'e̱ le̱'e̱ xaga béguaj.
GAL 3:2 Le xe̱xque neda': ¿Guzile Be' Lá'azxa lawe' da be̱nle da bdxixruj be'e Moisés, u lawe' da guxéajle̱le chee̱ da bénnele?
GAL 3:3 ¿Ájala chee̱ na' nácale benne' xala? ¿Dxéquele gunle gácale dute̱ da na' guzú laule gácale ne̱ chee̱ Be' Lá'azxa?
GAL 3:4 ¿Dácheze gudele zánete̱ xel-la zi' ca'? Dxaca lazra' quebe guca na níteze.
GAL 3:5 Gate Dios dxunne̱' le'e Be' Lá'azxa chee̱', ne dxune̱' xel-la waca ca' chee̱ xabáa ládujla le'e, ¿dxune̱' na lawe' da dxunle ca nadxixruj bea na, u lawe' da guxéajle̱le chee̱ dizra' chawe' da bénnele?
GAL 3:6 Abraham guxeajlí lazre̱' Dios, na' Dios guzí' lu ne̱'e̱ da nigá ca tu da bca'ana le̱' xlátaje̱.
GAL 3:7 Chee̱ le̱ na' dxal-la' nézele, benne' ca' da li zaj naque̱' zri'ine zre sua Abraham zaj naque̱' benne' dxeleajlí lazre̱' Dios.
GAL 3:8 Naxúaj na lu dizra' lá'azxa ca naca da nigá. Lawe' da neze Dios nédxute̱ gucá'ane̱' xlátaje̱ benne' quebe zaj naque̱' judío, benne' xeleajlí lazre̱' Le̱', na' guzre̱' Abraham nédxute̱ dizra' chawe' nigá, gunné̱': “Gaca chawe' chee̱ benne' dute̱ xe̱zr la xu ne̱ chiu' lue'.”
GAL 3:9 Ca'an naca, dxaca chawe' chee̱ benne' dxeleajlí lazre̱' Dios tu zren nen Abraham, bénnea' guxeajlí lazre̱' Dios.
GAL 3:10 Benne' ca' dxuluxrén lazre̱' zaj nagá'ane̱' xrlátaje lau Dios lawe' da zaj nune̱' ca da nadxixruj be'e Moisés zaj xu'e̱ de' lawe' da naxúaj lu dizra' lá'azxa da dxenná na: Zaj xu'u de' xúgute̱ benne' quebe dxelúnqueze̱' xúgute̱ da nadxixruj bea na, da na' naxúaj na lu xiche lá'azxa.
GAL 3:11 Dxunna bea na netú benne' quebe xegá'ane̱' xrlátaje lau Dios lawe' da nune̱' da nadxixruj bea na lawe' da naxúaj lu xiche lá'azxa da dxenná na: Bénnea' nagá'ane̱' xrlátaje lau Dios gata' chee̱' xel-la nabán li lazre' che dxeajlí lazre̱' Dios.
GAL 3:12 Bénnea' dxune̱' ca bdxixruj be'e Moisés quebe dxune̱' na ne̱ chee̱ xel-la dxeajlí lazre' chee̱' lawe' da naxúaj da dxenná na: Benne' dxune̱' xúgute̱ da caní gaca bane̱' ne̱ chee̱ le̱ na.
GAL 3:13 Cristo bselé̱' dxi'u lu de' da xu'u nu quebe dxun da nadxixruj bea na lawe' da guxú'uqueze̱' de' waláz chee̱dxu cáte̱ze naxúaj lu dizra' lá'azxa da dxenná na: Xu'u de' bénnea' de̱'e̱ le̱'e̱ xaga.
GAL 3:14 Da nigá guca na chee̱ gaca gun Dios xrlátaje benne' ca' quebe zaj naque̱' benne' judío, da na' guche̱be lazre̱' gune̱' lau Abraham ne̱ chee̱ Jesucristo, na' chee̱ si' lu nnadxu xúgute̱dxu Be' Lá'azxa ne̱ chee̱ xel-la dxeajlí lazre' chee̱dxu ca da guche̱be lazre' Dios.
GAL 3:15 Bi bicha', dxulé'eda' le'e ca da dxaca chee̱ bénneache. Gate tu benne' dxune̱' tu xel-la wezría, ne ba bzuajte̱' láqueze̱' lawe na, netú benne' quebe gaca guchínnaje̱' na, ne quebe bi gaca gudé̱'e̱ chee̱ na.
GAL 3:16 Dios guche̱be lazre̱' da gune̱' chee̱ Abraham, ne chee̱ zri'ine zre sue̱'. Quebe dxenná na: Chee̱ zri'ine zre sue̱' ca', da naca na chee̱ benne' zan, san dxenná na: Chee̱ zri'ine zre su', da naca na chee̱ tuze benne', bénnea' naque̱' Cristo.
GAL 3:17 Da dxennia' naca na da nigá: Dios be̱ne̱' tu xel-la wezría nen Abraham, ne bca'ana chawe̱' na. Chee̱ le̱ na', da bdxixruj be'e Moisés da bla' na ca gudé tapa gaxúa chi dxua iza quebe gaca guchinnaj na xel-la wezría na', u xucá'ana na dácheze da guche̱be lazre' Dios.
GAL 3:18 Che dxezidxu da dxunna Dios che dxundxu ca da bdxixruj be'e Moisés, quebe naca na tu da nache̱be lazre' Dios, san da li Dios guche̱be lazre̱' gunézruje̱' na cá'aze chee̱ Abraham.
GAL 3:19 Na'a xca', ¿bizra dxun da bdxixruj be'e Moisés? Dios bnézruje̱' da na' gudé na' chee̱ gulé'e na ca naca xtul-la bénneache cadxa xelá' zri'ine zre sua Abraham na', Bénnea' guche̱be lazre' Dios gune̱' da xrlátaje chee̱'. Dios gusel-le̱' da gunná bé'ene̱' lu na' gubáz chee̱ xabáa chee̱', na' Moisés guque̱' benne' dxudé dizra' chee̱n.
GAL 3:20 Quebe dxun na ba xen nu benne' gudé dizra' gate naca na chee̱ tuze benne', na' Dios naque̱' tuze, Bénnea' guche̱be lazre̱' chee̱ Abraham ca da gune̱'.
GAL 3:21 ¿Nnadxu dxedábaga da bdxixruj be'e Moisés da na' guche̱be lazre' Dios? ¡Cabata'! Che da nadxixruj bea na da bnezruj Dios gaca gunna na xel-la nabán chee̱ bénneache, na' gaca xegá'ana xrlátaje lau Dios tu benne' che gune̱' ca da nadxixruj bea na na'.
GAL 3:22 Dxenná na lu dizra' lá'azxa, xúgute̱ bénneache zaj nabague̱' dul-la chee̱ gaca xelezí' lu ne̱'e̱ da guche̱be lazre' Dios gunne̱' benne' ca' xeleajlí lazre̱' Jesucristo.
GAL 3:23 Nédxudxa ca bzrin zra gaca nu cheajlí lazre̱' Cristo, ne̱ chee̱ da nadxixruj bea na, xúgute̱dxu, benne' judío, gúcadxu ca benne' zaj xu'e̱ lizre xia, lawe' da xadíaze be̱ndxu ca dxenná da nadxixruj bea na, na' gulézadxu ca bzrin zra guca cheajlí lázredxu Cristo.
GAL 3:24 Da nadxixruj bea na gunná be'e na dxi'u, ca dxun tu benne' dxusegule̱' bidau' chee̱ benne' xula cadxa bzrin zra bla' Cristo, chee̱ xegá'anadxu xrlátaje lau Dios gate guxeajlí lázredxu Cristo.
GAL 3:25 Na'a lawe' da ba bzrin zra gaca cheajlí lázredxu Cristo, québedxa xú'udxu lu na' da nadxixruj bea na da naca na chee̱dxu ca tu benne' dxusegule̱' bidau'.
GAL 3:26 Xúgute̱le na' dxeajlí lázrele Jesucristo nácale tuze nen Le̱'. Chee̱ le̱ na' nácale bi chee̱ Dios.
GAL 3:27 Xúgute̱le le'e na' gudxúale nisa chee̱ gácale tuze nen Cristo, Le̱' naque̱' chee̱le ca tu ladxe' nácule.
GAL 3:28 Québedxa dxelé'e Dios le'e ca benne' judío, u benne' quebe naque̱' judío, u ca benne' nada'u, u benne' quebe nada'u, u ca benne' biu, u nu'ula. Dxelé'ene̱' le'e, naca xúgute̱le ca tuze be̱l-la' dxen lawe' da nácale tuze nen Jesucristo.
GAL 3:29 Che nácale bi chee̱ Cristo, da li nácale zre sua Abraham, na' gaca chee̱le da guche̱be lazre' Dios gune̱'.
GAL 4:1 Da dxaca lazra' nnia' naca na da nigá: Dxácate̱ ne naca bidau' bi na' gaca chee̱be' da naca chee̱ xrabe', nácabe' ca bi nada'u xu'ube' lu na' xránabe', lácala da li gácabe' xrane xúgute̱ da de̱ lizre xrabe'.
GAL 4:2 Xu'ube' lu na' benne' dxulusé̱dene̱'-be', ne lu na' benne' ca' xu'u lu ne̱'e̱ da naca chee̱be', cadxa zrin zra gulé'e xrabe' da li nácabe' zrí'ine̱'.
GAL 4:3 Cá'anqueze dxaca chee̱dxu. Gate ne nácadxu ca bidau', xú'udxu lu na' xúgute̱ da dxelenná bea na lu xe̱zr la xu nigá.
GAL 4:4 Gate bzrin zra ba ble'e lau Dios, na' gusel-le̱' Zrí'ine̱', gúlajbe' ne̱ chee̱ tu nu'ula, na' guxú'e̱ lu na' da bdxixruj be'e Moisés.
GAL 4:5 Ble̱'e̱ bselé̱' benne' zaj xu'e̱ lu na' da nadxixruj bea na, chee̱ gaca si' lu na' Dios dxi'u ca zrí'inequeze̱'.
GAL 4:6 Lawe' da ba nácale bi chee̱ Dios, Le̱' gusel-le̱' Be' Lá'azxa chee̱ Zrí'ine̱' lu xichaj lázrdaule, na' dxenná Be' na': “Abba”, da zéaje̱ na: Xrae.
GAL 4:7 Ca'an naca, ba nácadxu bi chee̱ Dios, ne québedxa nácadxu ca benne' zaj nada'u lu na' da bdxixruj be'e Moisés. Na' lawe' da nácadxu bi chee̱', Dios gunne̱' dxi'u da de̱ chee̱n'. Caní naca lawe' da nácadxu Cristo tuze.
GAL 4:8 Da líqueze, gate quebe ne gúnbeale Dios, gúcale benne' zaj nada'u chee̱ dios ca', da' quebe zaj nácaqueze dios.
GAL 4:9 Na'a gate ba núnbeale Dios, u nnadxu, Dios na' núnbe'e̱ le'e, ¿ájazra gunle xexú'ule xecha lasa lu na' da dxelenná bea na lu xe̱zr la xu nigá, da ca' quebe zaj zaca?
GAL 4:10 Le'e ne dxapa ba lá'anale bal-la zra ca', ne bal-la beu' ca', ne tu tu iza ca'.
GAL 4:11 Dxezrébele̱'a be̱na' zrin níteze ládujla le'e gate bzenda' le'e dizra' chawe' chee̱ Cristo.
GAL 4:12 Bi bícha'dau', dxata' xúeda' le'e gácale ca naca' neda', québedxa xu'a lu na' da nadxixruj bea na, lawe' da gúcaqueza' neda' ca nácale le'e. Quegá bi da cale̱la be̱nle chia' neda'.
GAL 4:13 Ba nézquezle gate nédxudau' bzenda' le'e dizra' chawe' chee̱ Cristo. Guca na gate na' guxu'a tu xízrawe̱'.
GAL 4:14 Xízrawe̱' na' guca na da gusegute na le'e, san le'e quebe begútele neda', ne quebe bzúale neda' chalá'ala, san guzí' lu na'le neda' ca tu gubáz chee̱ xabáa chee̱ Dios, u ca nácqueza' Jesucristo.
GAL 4:15 ¿Bizra guca chee̱ xel-la dxebé da guzúale? Waca nnia' tu da xecá'ana le'e chawe', la naca da guzéquele gunle, bebéajte̱le xiaj láuquezle, chee̱ gúnnale na neda'.
GAL 4:16 Na'a, ¿bexaca' ca tu benne' dxecuídene̱' le'e lawe' da gucha' le'e da li?
GAL 4:17 Benne' ca' dxelaca lazre̱' chugu lu be̱la' chee̱le da na' dxulé'e na, dxe'e̱ gunne xue chee̱le le'e, san quegá chee̱ xegá'anale chawe'. Da dxelaca lazre̱' naca na xulucuase̱' le'e nen netu' chee̱ cuele gunne xue chee̱ le̱'.
GAL 4:18 Naca chawe' cuedxu gunne xue chee̱ benne' xula chee̱ xegá'ane̱' chawe', ne quegaze gate zúale̱na' le'e.
GAL 4:19 Zrí'ina'dau', naca chia' ca zua' lu xel-la dxudía ne̱ chee̱le ca dxaca chee̱ tu nu'ula ba zua sane̱' bidau', ne wabédxequeza' gunne xue chee̱le cadxa gulé'e lau da li dxenná bea Cristo lu xichaj lázrdaule.
GAL 4:20 Dxezé̱ lazra' súale̱na' le'e ná'aqueze chee̱ gaca guchálajle̱na' le'e xezícadxa dizra' lawe' da dxezí'ale̱'a gunne xue.
GAL 4:21 Le'e na', dxaca lázrele chu'ule lu na' da bdxixruj be'e Moisés, le xeché̱bexque da nigá: ¿Quebe ne xénnele ca dxenná da nadxixruj bea na?
GAL 4:22 Dxenná na gulezrá' chupa zri'ine Abraham. Tube' gúcabe' zri'ine zrú'ulaqueze̱', nu'ula quebe nada'u.
GAL 4:23 Zri'ine nu'ula nada'u gúlajbe' cáte̱ze dxelalaj xúgute̱ bidau', na' zri'ine nu'ula quebe nada'u gúlajbe' chee̱ guca li ca da guche̱be lazre' Dios.
GAL 4:24 Da nigá naca na ca tu da dxulé'e na. Dxúpate̱ nu'ula caní dxululé'ene̱' ca zaj naca chupa xel-la wezría. Tu xel-la wezría nigá naca na da bnezruj Dios Moisés lu xi'a Sinaí, da na' dxulé'e Agar. Benne' ca' zaj xu'e̱ lu na' xel-la wezría nigá dxelálaje̱' ca benne' zaj nada'u.
GAL 4:25 Cá'anqueze dxulé'e Agar da naca chee̱ xi'a Sinaí da zua na ga nababa Arabia, Cá'anqueze xi'a nigá dxulé'e na ca naca Jerusalén lu zra na'a zra lawe' da zaj naca benne' chee̱ xe̱zre nigá ca benne' zaj nada'u tu zren nen zrí'ine̱' ca'.
GAL 4:26 Benne' zaj nababe̱' Jerusalén chee̱ xabáa quebe zaj naque̱' benne' zaj nada'u, na' dxi'u nácadxu ca zri'ine benne' ca'.
GAL 4:27 Lu dizra' lá'azxa, naxúaj na ca naca chee̱ benne' zaj nababa Jerusalén chee̱ xabáa na', da dxenná na: Gubé lue', nu'ula wizre, lue' quebe nu chilá' zri'inu'. Gudxezre xa'a lu xel-la dxebé, lue' quebe núnbe'u xel-la dxudía chee̱ xel-la dxezán bidau'. Nu'ula quebe guzán bidau' gate guque̱' cuide' waxandxa zrí'ine̱' quézcala zri'ine nu'ula zúale̱ne̱' benne' chee̱'.
GAL 4:28 Le'e, bi bícha'dau', nácadxu ca Isaac. Nácadxu zri'ine Abraham, bi ca' guche̱be lazre' Dios gunézruje̱' le̱'.
GAL 4:29 Na'a ca guca lu zra na', Ismael, zri'ine Abraham na', bi gúlajbe' ca dxelalaj xúgute̱ bidau', gudáu zi' xúzrebe' Isaac, zri'ine Abraham na', bi gúlajbe' ne̱ chee̱ Be' chee̱ Dios, cá'anqueze dxaca na na'a.
GAL 4:30 Na'a ¿bizra dxenná dizra' lá'azxa? Dxenná na: Bebéaj chalá'ala nu'ula nada'u tu zren nen zrí'ine̱' lawe' da quebe gaca chee̱ zri'ine nu'ula nada'u sibe' da dxal-la' si' zri'ine nu'ula quebe nada'u.
GAL 4:31 Ca' naca na, bi bicha', quebe nácadxu ca Ismael, zri'ine nu'ula nada'u, san nácadxu ca Isaac, zri'ine zru'ula Abraham, nu'ula quebe nada'u.
GAL 5:1 Cristo bselé̱' dxi'u lu na' da nadxixruj bea na chee̱ gácadxu ca benne' quebe zaj nada'u. Le sua chuchu lu xel-la weselá da ba guzile, ne québedxa xexú'ule lu na' da na' dxun na le'e benne' zaj nada'u.
GAL 5:2 Le xene da dxapa' le'e. Neda', Pablo, dxapa' le'e, che güele lataj chugu lu be̱la' chee̱le da na' dxulé'e na, quebe bi da ba neza gaca chee̱le da naca chee̱ Cristo.
GAL 5:3 Dxaca lazra' xapa' le'e xecha lasa, che nu benne' chugu lu be̱la' chee̱' da na' dxulé'e na, dxun na ba xen gun bénnea' xúgute̱ da bdxixruj be'e Moisés.
GAL 5:4 Le'e na' dxéquele nagá'anale xrlátaje lau Dios lawe' da nunle ca nadxixruj bea na, ba bcá'anale da naca chee̱ Cristo, ne dxexebéaj cuínale lu xel-la zri'i lazre' chee̱ Dios.
GAL 5:5 Dxi'u, ne̱ chee̱ Be' Lá'azxa, ne lawe' da dxeajlí lázredxu Cristo, dxuxrén lázredxu nagá'anadxu xrlátaje lau Dios.
GAL 5:6 Che nácadxu tuze nen Cristo, quebe bi da ba neza gaca na chee̱dxu che chugu lu be̱la' chee̱dxu da na' dxulé'e na, u che quebe chugu na. Da ba neza naca na chee̱dxu che dxeajlí lázredxu Cristo, na' xel-la dxeajlí lazre' chee̱dxu dxuzúa na dxi'u lu xel-la zri'i lazre'.
GAL 5:7 Da xrlátaje bé̱nquezle. ¿Nuzra gulú'u xel-la le'e chee̱ québedxa guzúale dizra' da li?
GAL 5:8 Quegá Dios be̱ne̱' da na'. Nácaqueze Le̱' Bénnea' bláwizre̱' le'e.
GAL 5:9 Quebe gal-la lázrele da dxenná na: Láteze cua zichaj dxuchazra na ca naca cua.
GAL 5:10 Dxuxrén lazra' Xránadxu ca naca chee̱le le'e, quebe guzúale chalá'ala da nigá dxuchálaja'. Dios gudée̱' lu da ba xa' bénnea' dxun zréajene̱' le'e, nútete̱ze naque̱'.
GAL 5:11 Da naca chia', bi bicha', la xapa' neda' bénneache dxal-la' chugu lu be̱la' chee̱' da na' dxulé'e na, quegá weláu zi' xuzre benne' judío neda' lawe' da che dxuna' da caní quebe xelaque̱' tula che cu'a lban chee̱ xaga béguaj chee̱ Cristo.
GAL 5:12 Na'a ca naca chee̱ benne' ca', benne' dxelún zréajene̱' le'e, ne dxelenné̱' dxal-la' chugu lu be̱la' chee̱le da na' dxulé'e na, dxaca lazra' chugu ca da zaj naca benne' ca' chee̱ québedxa xelún zréajene̱' le'e.
GAL 5:13 Bi bícha'dau', Dios bláwizre̱' le'e chee̱ gácale benne' quebe zaj nada'u, ne québedxa xu'ule lu na' da bdxixruj be'e Moisés. Quebe guchínele da nácale chee̱ gunle ca da dxezá lázrele. Le gun cuínale ca benne' zaj nada'u, chee̱ gunle zrin chee̱ le sa' ljwézrele tule xetule lu xel-la zri'i lazre' chee̱le.
GAL 5:14 Xúgute̱ da nadxixruj bea na dxun bénnea' dxuzúe̱' dizra' da na' dxenná na: Bzri'i le sa' ljwezru' cáte̱ze nazrí'i cuinu'.
GAL 5:15 Che dxunle ca dxelún be̱ xixre' ca', ne dxun zi' ljwézrele, ne dxasa ljwézrele tule xetule, le guxúe ga guzría xi' cuínale.
GAL 5:16 Da nigá dxapa' le'e: Le gun cáte̱ze dxulé'e Be' Lá'azxa le'e, na' quebe gunle cáte̱ze dxezá lazre' be̱la' dxen chee̱le.
GAL 5:17 Da dxezá lazre' be̱la' dxen chee̱dxu dxedíl-lale̱ na da dxezá lazre' Be' Lá'azxa, na' da dxezá lazre' Be' Lá'azxa dxedíl-lale̱ na da dxezá lazre' be̱la' dxen chee̱dxu. Dxúpate̱ da caní dxeledíl-lale̱ ljwezre na, na' chee̱ le̱ na' quebe gaca gunle da dxaca lázrele gunle.
GAL 5:18 Che dxunle ca da dxulé'e Be' Lá'azxa le'e, québedxa xu'ule lu na' da nadxixruj bea na.
GAL 5:19 Zaj nulé'e láuqueze da dxelún benne' ca' dxelune̱' cáte̱ze da dxezá lazre' be̱la' dxen chee̱': Deledále̱ne̱' nu'ula xula. Dulucá'ana dítaje̱' le sa' ljwezre̱' Dxelune̱' da sban, ne da schanni'.
GAL 5:20 Dxelúe szrene̱' bedau' xiaj xaga, ne dxelune̱' xel-la wazrá'. Dxelecuídene̱' le sa' ljwezre̱', ne dxelezré̱'e̱. Dxelaque̱' wide', ne dxelezrá'a xíchaje̱'. Dxelenné̱' chee̱ ljwezre̱'. Dxelebéaj xichaj ljwezre̱' tue̱' xetue̱', ne dxelaque̱' chupa la'a.
GAL 5:21 Dxelaque̱' xa lazre', ne dxelutie̱' benne'. Dxelezúzrene̱', ne dxeledanne̱' da cale̱la da dxelune̱' lu laní ca'. Zánete̱ da dxelundxe̱' bi chee̱ da caní. Che le̱ na' dxapa' le'e ca bé̱nqueza' nédxute̱, benne' dxelune̱' da caní quebe xelexú'e̱ naga dxenná bea Dios.
GAL 5:22 Da dxelún benne' ca' dxelune̱' cáte̱ze da dxulé'e Be' Lá'azxa le̱' zaj naca na caní: Zaj nazri'ine̱' le sa' ljwezre̱', ne zaj nape̱' xel-la dxebé. Dxelebeza zri lazre̱', ne zaj naque̱' zren lazre'. Zaj naque̱' zri'i lazre', ne dxelune̱' da zri'a chawe'. Zaj naque̱' li lazre'.
GAL 5:23 Zaj naque̱' dxexruj lazre', ne dxelenná be'e cuine̱'. Quebe de̱ da nadxixruj bea na da dxe̱ na dxi'u quebe gundxu da caní.
GAL 5:24 Benne' ca' zaj naque̱' bi chee̱ Cristo ba buludé̱'e̱ le̱'e̱ xaga béguaj be̱la' dxen chee̱' nen xúgute̱ da dxezá lazre na.
GAL 5:25 Che naca bandxu ne̱ chee̱ Be' Lá'azxa, dxal-la' gundxu ca da dxulé'e Be' Lá'azxa dxi'u.
GAL 5:26 Quebe dxal-la' gucá'ana szren cuínadxu, ne quebe gácadxu wide' tudxu xetudxu, ne quebe sua da xa lazre' ládujla dxi'u.
GAL 6:1 Bi bícha'dau', che nu benne' ládujla le'e nune̱' dul-la, le'e na' dxedále̱le Be' Lá'azxa dxal-la' gácale̱le bénnea' chee̱ xezé̱ chúchue̱'. Dxal-la' gácale dxexruj lazre' gunle da nigá chee̱ quebe güele lataj da xriwe̱' cu'u xel-la na le'e.
GAL 6:2 Le gácale̱ le sa' ljwézrele tule xetule lu da naca xua chee̱le, na' caní gunle ca nadxixruj be'e Cristo.
GAL 6:3 Che nu benne' dxéquene̱' naque̱' benne' blau, ne quebe nu naque̱', dxezí xé̱zqueze cuine̱'.
GAL 6:4 Tu tu benne' dxal-la' na' xánnie̱' da dxúnqueze̱', na' che nagá'ana xrlátaje da dxune̱', waca xape̱' ba lá'ana da dxúnqueze̱', ne quegá da be̱n xetú benne'.
GAL 6:5 De̱ tu xua da nabágadxu chee̱ Cristo, da dxal-la' gua tu tu benne'.
GAL 6:6 Benne' zua nu dxuse̱de le̱' ca naca xrtizra Dios dxal-la' gunézruje̱' late' da naca chee̱' chee̱ bénnea'.
GAL 6:7 Quebe si xe̱ cuínale: Netú benne' gaca quítajle̱ne̱' Dios. Da dxaza bénneache, lé̱queze na xelape̱'.
GAL 6:8 Che dxune̱' da dxezá lazre' be̱la' dxen chee̱', da xezi'e̱ naca na xel-la gute, na' che dxune̱' da dxezá lazre' Be' Lá'azxa, da xezi'e̱ naca na xel-la nabán zeajlí canna.
GAL 6:9 Ca' nacan xca', quebe gusandxu gundxu da xrlátaje lawe' da che quebe gate lazrdxu, lu zra na' quizruj Dios dxi'u, na' xezidxu lazruj chee̱dxu.
GAL 6:10 Chee̱ le̱ na', gate nazidxu lataj, dxal-la' gundxu da xrlátaje chee̱ le sa' ljwézredxu, ne da dxundxa na ba xen, gundxu da xrlátaje chee̱ le sa' ljwézredxu dxeleajlí lazre̱' Cristo.
GAL 6:11 Le nna'xque cadite da zri'a naca da nigá dxuzúaja' chee̱le nen ná'queza'.
GAL 6:12 Benne' ca' dxelaca lazre̱' chugu lu be̱la' chee̱le da na' dxulé'e na, dxelune̱' na chee̱ xelexegá'ane̱' chawe' lau bénneache, ne chee̱ quebe xeláu zi' xuzre̱' le̱' lawe' da dxuluchálaje̱' dizra' chee̱ da be̱n Cristo le̱'e̱ xaga béguaj.
GAL 6:13 Benne' caní, benne' zaj nadxugu lu be̱la' chee̱' da na' dxulé'e na quebe dxelune̱' xúgute̱ ca da nadxixruj bea na. Dxelaca lazre̱' chugu lu be̱la' chee̱le da na' dxulé'e na chee̱ gaca xulucá'ana szren cuine̱' ca naca da belune̱' chee̱le.
GAL 6:14 Quebe dxaca lazra' xucá'ana szren cuina' chee̱ tu da be̱na', san tuze chee̱ da be̱n Xránadxu Jesucristo le̱'e̱ xaga béguaj. Ne̱ chee̱ Le̱' naca xe̱zr la xu nigá ca tu da gate chia' neda', na' neda' naca' ca tu benne' gate. Québedxa dxezá lazra' da naca chee̱ xe̱zr la xu.
GAL 6:15 Che nácadxu tuze nen Cristo, quebe bi da ba neza gaca na chee̱dxu che nadxugu lu be̱la' chee̱dxu da na' dxulé'e na, u che quebe nadxugu na. Da ba neza naca na chee̱dxu che nácadxu benne' cube lu xichaj lázrdaudxu.
GAL 6:16 Dxenaba' lau Dios gunézruje̱' xel-la dxebeza zri lazre' chee̱ xúgute̱ benne' ca' zaj naque̱' benne' cube caní, ne xexache lazre̱' benne' ca' da li zaj naque̱' bi chee̱'.
GAL 6:17 Lawe' da zaj zria lu be̱l-la' dxen chia' xizra' da dxululé'e na naca' we̱n zrin chee̱ Cristo quebe nu benne' dxal-la' gulálene̱' neda' na'a, ne lu da za za'.
GAL 6:18 Le'e, bi bícha'dau', dxenaba' lau Xránadxu Jesucristo gune̱' chawe' chee̱ xúgute̱le. Ca'an gaca na.
EPH 1:1 Neda', Pablo, naca' gubáz chee̱ Jesucristo lawe' da guca lazre' Dios gaca' caní. Dxuzúaja' da nigá chee̱le le'e, nácale bi chee̱ Dios, ne dxeajlí lázrele Jesucristo, na' zrale xe̱zre Éfeso.
EPH 1:2 Dxenaba' lau Xradxu Dios, ne lau Xránadxu Jesucristo gun chawe̱'e̱ le'e, ne gunne̱' le'e xel-la dxebeza zri lazre'.
EPH 1:3 Dxue lá'anadxu Dios, Xra Xránadxu Jesucristo lawe' da ba be̱ne̱' chee̱dxu ca naca xúgute̱ da chawe' chee̱ Be' Lá'azxa da zá'aca xabáa lawe' da nácadxu bi chee̱ Cristo.
EPH 1:4 Dios guqué̱'e̱ dxi'u chee̱ gácadxu bi chee̱ Cristo gate quebe ne gunte̱' xe̱zr la xu, chee̱ gácadxu benne' lá'azxa, ne du lazre' lau Le̱'.
EPH 1:5 Lawe' da bzri'ine̱' dxi'u, be̱ne̱' chee̱dxu gate nate si' lu ne̱'e̱ dxi'u ca bi cheé̱queze̱' ne̱ chee̱ Jesucristo, cáte̱ze da guca lazre̱' gune̱'.
EPH 1:6 Chee̱ le̱ na', tu dxue lá'anazquezdxu Dios ne̱ chee̱ xel-la xrlátaje chee̱' da naca na szrente̱. Lu xel-la xrlátaje chee̱' na' gúcale̱ne̱' dxi'u lawe' da nácadxu tuze nen Zrí'ine̱', bi nazri'ite̱ lazre̱'.
EPH 1:7 Ne̱ chee̱ Zrí'ine̱' na' naxá'awene̱' dxi'u nen dxen cheé̱queze̱', na' lu xel-la zri'i lazre' zren chee̱' bnite lawe̱' chee̱dxu dxi'u ca naca dul-la da nabágadxu.
EPH 1:8 Dios nazrí'ile̱'e̱ne̱' dxi'u, ne dxunne̱' dxi'u xel-la sina, ne xel-la dxéajni'i,
EPH 1:9 na' bzéajni'ine̱' dxi'u ca naca da dxaca lazre̱' da bgache na, da na' lu xel-la zri'i lazre' chee̱' ba núnqueze̱' gune̱' ne̱ chee̱ Cristo.
EPH 1:10 Nuchague̱' xúgute̱ da zaj zua na xabáa, ne xe̱zr la xu, chee̱ xelú'u na lu na' Cristo, da gusexúzre̱' gune̱' gate zrin zra chee̱ na.
EPH 1:11 Ne̱ chee̱ Cristo Dios guqué̱'e̱ dxi'u chee̱' gate nate, chee̱ si' lu nnadxu da xáladxu da gunna Le̱', ca da ba núnqueze Dios, Bénnea' dxune̱' xúgute̱ da dxeque Le̱' xrlátaje.
EPH 1:12 Caní be̱ne̱' chee̱ gácadxu tu da gucá'ana szren na xel-la szren chee̱', nácadxu dxi'u benne' nedxu dxebeza lázredxu Cristo.
EPH 1:13 Cá'anqueze le'e, gate benle dizra' li, da naca na dizra' chawe' chee̱ da be̱n Cristo, bselé̱' le'e. Guxeajlí lázrele Le̱', na' Dios bzue̱' Be' Lá'azxa lu xichaj lázrdaule ca tu da dxunna bea na nácale bi chee̱', ca guche̱be lazre̱' gune̱'.
EPH 1:14 Be' Lá'azxa na' naque̱' da dxunna bea na sidxu da xáladxu da gunna Dios dxi'u, gate zrin zra da ba nune̱' guselé̱' bi chee̱' ca', chee̱ güe lá'anaquezdxu Le̱' ca naca xel-la szren chee̱'.
EPH 1:15 Chee̱ le̱ na' gate benda' ca dxeajlí lázrele Cristo, ne ca nazri'ile xúgute̱ bi ca' chee̱ Dios,
EPH 1:16 dxápaqueza' Dios; Xcalenu', ca naca chee̱le le'e gate dxuchálajle̱na' Dios, ne dxeajsá lázrqueza' le'e.
EPH 1:17 Dxenaba' Dios chee̱ Xránadxu Jesucristo, naque̱' Xradxu zue̱' xabáa, gunne̱' le'e xel-la sina lu be' nácaquezle da gulé'e na le'e gúnbea xánnele Le̱'.
EPH 1:18 Dxenaba' lau Dios guzéajni'ine̱ xichaj lázrdaule le'e chee̱ nézele ca naca da dxebeza lázredxu da bláwizre̱' dxi'u sidxu, ne ca naca xel-la gunní'a chee̱ xel-la szren da gunezruj Dios bi chee̱ ca',
EPH 1:19 ne ca naca xel-la waca zrente̱ chee̱' da dxun na zrin lu xichaj lázrdaudxu dxi'u dxeajlí lázredxu Le̱'. Xel-la waca nigá bchine Dios lu dute̱ xel-la dxenná bea zren chee̱'
EPH 1:20 gate bsebane̱' Cristo ládujla benne' gate ca', ne guleche̱' Le̱' chalá'a xabe̱la chee̱' xabáa,
EPH 1:21 ne bzue̱' Le̱' chee̱ nna bé'ene̱' xúgute̱ benne' blau xabáa, ne xúgute̱ benne' dxelenná bea xabáa, ne xúgute̱ benne' zaj napa xel-la waca, ne xúgute̱ benne' zaj naca xrane, ne xúgute̱ da dxelenná bea na lu zra na'a zra, ne lu da za za'.
EPH 1:22 Bzue̱' xúgute̱ da zaj zua lu na' Cristo, ne bzue̱' Le̱' gaque̱' benne' xíchaje̱ chee̱ bi chee̱ ca' ca naca xúgute̱ da dxelune̱'.
EPH 1:23 Benne' caní zaj naque̱' ca be̱la' dxen chee̱ Cristo, da dxulé'e na dute̱ ca nácaqueze Le̱', Bénnea' dxusexuzre̱' dxucá'ana chawe̱' ca naca xúgute̱ da zaj zua.
EPH 2:1 Gate nate gúcale ca benne' gate lu xichaj lázrdaule ne̱ chee̱ da cale̱la ca', ne dul-la ca'
EPH 2:2 da be̱nle gate ne dxunle ca dxelún bénneache zaj zre̱'e xe̱zr la xu nigá, benne' dxelune̱' ca dxenná da xriwe̱', be' na' da dxenná bea na lu be', ne dxun na zrin lu xichaj lázrdau benne' ca' quebe dxuluzúe̱' dizra' chee̱ Dios.
EPH 2:3 Cá'anqueze dxi'u, xúgute̱dxu be̱ndxu caní gate nate, gate be̱ndxu cáte̱ze da guzá lázredxu, ne be̱ndxu ca da gunná be̱la' dxen chee̱dxu, ne ca da gunná xichaj lázrdaudxu. Chee̱ le̱ na' guca na chee̱dxu sidxu da zi' da xa' chee̱ Dios ca gune̱' chee̱ xezícadxa benne' ca',
EPH 2:4 san Dios bexache lázrele̱'e̱ dxi'u, ne bzrí'ile̱'e̱ne̱' dxi'u,
EPH 2:5 na' be̱nne̱' dxi'u xel-la nabán tu zren nen Cristo gate ne nátedxu lu xichaj lázrdaudxu ne̱ chee̱ dul-la da nabágadxu. Naladxu ne̱ chee̱ xel-la xrlátaje chee̱ Dios.
EPH 2:6 Cá'anqueze bsebán Dios dxi'u tu zren nen Jesucristo, ne guleche̱' dxi'u tu zren nen Le̱' xabáa.
EPH 2:7 Be̱ne̱' caní chee̱ gulé'ene̱' lu zra da za za' ca nazrí'ile̱'e̱ne̱' dxi'u, ne ca naca da cháwele̱'e̱ be̱ne̱' chee̱dxu ne̱ chee̱ Jesucristo.
EPH 2:8 Lu xel-la xrlátaje chee̱ Dios bselé̱' le'e lawe' da guxeajlí lázrele Cristo. Quebe naca na ne̱ chee̱ bi da be̱nle le'e, san naca na tu da be̱n Dios cá'aze ne̱ chee̱le.
EPH 2:9 Quebe nalá nu benne' ne̱ chee̱ bi da dxúnqueze̱', chee̱ quebe nu benne' gucá'ana szren cuine̱'.
EPH 2:10 Dios be̱ne̱' dxi'u, na' bexune̱' dxi'u tuze nen Jesucristo chee̱ gundxu da xrlátaje ca' da ba nun Le̱' gundxu gate nate.
EPH 2:11 Le gusá lázrele ca gúcale le'e gate nate. Quebe nácale benne' judío, benne' ca' dxelechugue̱' lu be̱l-la' dxen chee̱' da na' dxulé'e na zaj nababe̱' chee̱ Dios, ne zaj nazí le̱' benne' zaj nadxugu, na' dxelenné̱' chee̱le nácale benne' quebe zaj nadxugu.
EPH 2:12 Lu zra ca' quebe guzúale̱ Cristo le'e. Quebe be̱nle tuze benne' Israel ca', ne quebe bé̱nbeale ca naca xel-la wezría da be̱n Dios, ne ca naca da guche̱be lazre' Dios. Guzúale lu xe̱zr la xu nigá, ne quebe bi guleza lázrele, ne quebe bé̱nbeale Dios. Gate nate guzrale zítu'la naga zua Dios.
EPH 2:13 Na'a ne̱ chee̱ Cristo Dios ba bzue̱' le'e gágute̱ lawe' da gute Cristo waláz chee̱le.
EPH 2:14 Lé̱queze Cristo be̱nne̱' dxi'u xel-la dxebeza zri lazre', ne bexune̱' dxi'u tuze, netu', benne' judío ca', ne le'e, benne' quebe zaj naque̱' judío, ne bzria xi'e̱ xel-la dxezrá'a da be̱n na dxi'u chupa la'a, da guca na ca tu ze'e.
EPH 2:15 Gate gute Jesús waláz chee̱dxu guchugue̱' da nadxixruj bea na da naca na da gunná Dios gundxu, ne da ca' dxelenná bea na, na' bexune̱' dxúpate̱ xe̱zre ca' tuze xe̱zre cube da nababa na chee̱'. Caní gudíxruje̱' xel-la dxebeza zri lazre' chee̱dxu.
EPH 2:16 Caní guca ne̱ chee̱ xel-la gute chee̱ Cristo le̱'e̱ xaga béguaj, guchugue̱' naze xel-la dxezrá'a ljwezre chee̱ dxúpate̱ xe̱zr ca', na' bexune̱' dxúpate̱ tuze be̱l-la' dxen, ne bexune̱' le̱' tuze nen Dios.
EPH 2:17 Bla' Cristo, ne bzenne̱' le'e dizra' chawe' chee̱', le'e quebe nácale judío, na' guzrale zitu' naga zua Dios, ne le'e nácale judío, na' guzrale gagu naga zua Dios,
EPH 2:18 na' ne̱ chee̱ Cristo, xúgute̱dxu, benne' judío ca', ne benne' quebe zaj naque̱' judío, dxebígadxu lau Xradxu Dios ne̱ chee̱ Be' Lá'azxa.
EPH 2:19 Chee̱ le̱ na' le'e, benne' quebe nácale judío, québedxa nácale ca benne' zitu' tu lu xe̱zr la xu da quebe naca na chee̱le, san nácale benne' walazre' ca xúgute̱ benne' ca' zaj nababa chee̱ Dios. Nabábale Zri'ine Dios.
EPH 2:20 Nácale ca tu xu'u zren da zria na lawe' lane da gulixruj benne' gubáz ca' chee̱ Cristo, ne benne' ca' buluchálaje̱' waláz chee̱ Dios, na' Jesucristo nácaqueze̱' xiaj blau chee̱ lane xu'u na'.
EPH 2:21 Lawe' lane nigá da naca Cristo, dute̱ xu'u na' dxegula na tu li chee̱ gaca na tu xudau' lá'azxa chee̱ Xránadxu.
EPH 2:22 Cá'anqueze le'e, lawe' da nácale Cristo tuze, xu'ule lu xu'u na' naga zua Dios ne̱ chee̱ Be' Lá'azxa chee̱'.
EPH 3:1 Chee̱ le̱ na' neda', Pablo, dxuzú zriba' lau Dios. Xu'a lizre xia lawe' da dxuna' zrin chee̱ Jesucristo chee̱ gaca chawe' chee̱le le'e, quebe nácale judío.
EPH 3:2 Ba nézele ca be̱n Dios lu xel-la xrlátaje chee̱', bsebague̱' neda' guchálaja' dizra' chawe' chee̱ Cristo ládujla le'e.
EPH 3:3 Lu da ble'e Dios neda' bzéajni'ine̱' neda' tu da nagache chee̱' ca da bzuaja' chee̱le nedxu.
EPH 3:4 Gate gulábale na weque bé'equezle núnbe'a da nagache ca naca chee̱ Cristo.
EPH 3:5 Guca na tu da nagache gate nate. Dios quebe bzéajni'ine̱' na bénneache, san na'a ne̱ chee̱ Be' Lá'azxa chee̱' ba blé'ene̱' na benne' gubáz lá'azxa ca', na' benne' ca' dxuluchálaje̱' waláz chee̱'.
EPH 3:6 Caní naca da nagache na': Ne̱ chee̱ dizra' chawe' chee̱ Cristo benne' quebe zaj naque̱' judío welezí'queze̱' da gunezruj Dios le̱' ca da xelezí' benne' judío ca', ne zaj naque̱' tuze be̱l-la' dxen, ne xelezí'queze̱' tu zren da nache̱be lazre' Dios ne̱ chee̱ Jesucristo.
EPH 3:7 Dios be̱ne̱' neda' we̱n zrin chee̱ dizra' chawe' na' ne̱ chee̱ tu da bé̱nnaze̱' neda', bchínene̱' xel-la waca zren chee̱'.
EPH 3:8 Neda' nácadxa' benne' baxáche ca xúgute̱ benne' zaj naca bi chee̱ Dios. Be̱ne̱' neda' tu culuén zren chee̱ guzenda' benne' quebe zaj naque̱' judío dizra' chawe' ca naca xel-la gunní'a zrente̱ chee̱ Cristo.
EPH 3:9 Bsebague̱' neda' guzéajni'ida' xúgute̱ bénneache ca da nun Dios gune̱' da bgache gate nate, na' naca Dios Bénnea' be̱ne̱' xúgute̱ da zaj zua,
EPH 3:10 chee̱ xelúnbea na'a benne' dxelenná be'e̱, ne zaj nape̱' xel-la szren xabáa ca naca xel-la sina zrente̱ chee̱ Dios. Xelúnbe'e̱ na ne̱ chee̱ benne' ca' zaj naca bi chee̱ Cristo.
EPH 3:11 Da nigá be̱n Dios ca da nune̱' gate nate gusexuzre̱' ne̱ chee̱ Xránadxu Jesucristo.
EPH 3:12 Ne̱ chee̱ Cristo waca bígadxu lau Dios du lázredxu, ne dute̱ xel-la dxuxrén lazre' chee̱dxu lawe' da dxeajlí lázredxu Le̱'.
EPH 3:13 Chee̱ le̱ na' dxata' xúeda' le'e quebe gate ni'a na'le lawe' da dxedéa' xel-la zi' ne̱ chee̱le le'e. Xel-la zi' da dxedéa' neda' gaca na chee̱le tu da ba neza.
EPH 3:14 Chee̱ le̱ na' dxuzú zriba' lau Xra Xránadxu Jesucristo,
EPH 3:15 Bénnea' dxuzúe̱' la cha chee̱ benne' zaj zre̱'e̱ xabáa, ne xe̱zr la xu.
EPH 3:16 Dxenaba' lau Xradxu, ca naca xel-la gunní'a zrente̱ chee̱' guzé̱ tipe̱' le'e nen xel-la waca chee̱' lu xichaj lázrdaule ne̱ chee̱ Be' Lá'azxa chee̱',
EPH 3:17 chee̱ sua Cristo lázrdaule ne̱ chee̱ xel-la dxeajlí lazre' chee̱le, ne se̱ cháchale lu xel-la zri'i lazre', ca tu xaga da nudé lue na sítujla,
EPH 3:18 chee̱ seque' chéajni'ile tu zren nen xúgute̱ bi chee̱' ca nazriluj, ne ca natunna, ne ca nasituj, ne ca nasibe xel-la zri'i lazre' chee̱ Cristo.
EPH 3:19 Dxenaba' lau Dios gúnbeale xel-la zri'i lazre' na', lácala cabata' séquedxu gúnbeadxu dute̱ ca naca na. Caní dxenaba' Le̱' chee̱ suale̱ le'e dute̱ da nácaqueze Dios.
EPH 3:20 Na'a, gaca báqueze Dios, Bénnea' nape̱' xel-la waca gúnle̱'e̱queze̱' da zrendxa ca da dxenábadxu, u ca da dxéquedxu, ne̱ chee̱ xel-la waca chee̱' da dxun na zrin lu xichaj lázrdaudxu.
EPH 3:21 Gaca ba Dios ládujla benne' zaj naque̱' bi chee̱ Cristo ne̱ chee̱ Jesucristo xúgute̱ iza chadía chacanna. ¡Ca'an gaca na!
EPH 4:1 Chee̱ le̱ na' dxata' xúeda' le'e, neda', xu'a lizre xia lawe' da dxuna' zrin chee̱ Xránadxu, chee̱ gunle da xrlátaje ca dxal-la' xelún bénneache ba gucá'a Dios le̱', ca gucá'aqueze̱' le'e.
EPH 4:2 Le gaca dxexruj lazre', ne zri'i lazre'. Le cueza lazre', ne le cue' gunne xue chee̱ tule xetule lu xel-la zri'i lazre' chee̱le.
EPH 4:3 Le gun ba xuzre gácaquezle tuze, guchínele xel-la waca chee̱ Be' Lá'azxa lu xel-la dxebeza zri lazre' da na' dxun na le'e tuze.
EPH 4:4 Tuze naca be̱la' dxen chee̱ Cristo da nácadxu. Tuze naca Be' Lá'azxa, Nu na' zúale̱ne' tu tudxu. Tuze da dxuxrén lázredxu, da na' sidxu lu na' Dios.
EPH 4:5 Tuze Bénnea' naque̱' Xránadxu. Tuze da dxeajlí lázredxu. Tuze ca dxedxúadxu nisa.
EPH 4:6 Tuze Bénnea' naque̱' Dios, ne Xra xúgute̱dxu. Le̱' naque̱' Benne' xíchaje̱ xúgute̱dxu. Dxulé'e cuine̱' lu da dxundxu xúgute̱dxu. Zúaqueze̱' lu xichaj lázrdau xúgute̱dxu.
EPH 4:7 Tu tudxu nasidxu tu xel-la waca cha chee̱dxu ca da nunna Cristo dxi'u.
EPH 4:8 Naca na ca naxúaj na lu dizra' lá'azxa, dxenná na: Begüéne̱' xabáa, gate gudé bzétaje̱' benne' guledábague̱' Le̱'. Na' bnézruje̱' bénneache xel-la waca ca'.
EPH 4:9 ¿Bi zéaje̱ na, dxenná na: Begüene̱'? Zéaje̱ na nédxula bétaje̱' lu xe̱zr la xu nigá.
EPH 4:10 Bénnea' bétaje̱' nácaqueze̱' Bénnea' begüéne̱' lu da blaudxa lu xabáa chee̱ gaca bea na xu'u lu ne̱'e̱ xúgute̱ da de̱,
EPH 4:11 na' be̱nne̱' cha chee̱dxu xel-la waca chee̱: Gaca bál-ladxu benne' gubáz chee̱'. Gaca guzendxu xezícadxu bénneache dizra' chawe' chee̱'. Gácadxu xezícadxu benne' dxuxúedxu bi chee̱' ca'. Na' gusé̱dedxu-be' xezícadxu.
EPH 4:12 Ca'an be̱ne̱' chee̱ bpa'adxe̱' bi chee̱' ca' chee̱ xelunbe' zrin xulucá'anabe' xrlátaje bénneache ca' zaj naque̱' zruza ni'a na' Cristo:
EPH 4:13 Chee̱ gácadxu tuze ca dxéajle̱dxu, ne ca núnbeadxu Zri'ine Dios, chee̱ gácadxu benne' du lazre', chee̱ gácadxu cáte̱ze nácaqueze Cristo.
EPH 4:14 Caní nacan chee̱ québedxa gácadxu ca bidu ca', bi ca' dxelezibe' bítete̱ze dizra' da zaj naca na ca tu be' da zeaj na nila na'la, ne québedxa güedxu lataj xelún zréaje benne' we̱n da zrinnaj ca' dxi'u, chee̱ quebe xelezí xe̱'e̱ dxi'u chee̱ gundxu da cale̱la.
EPH 4:15 Lu xel-la zri'i lazre' dxal-la' guchálajdxu da li chee̱ gácadxu cáte̱ze nácaqueze Cristo, Bénnea' naque̱' xichaj be̱l-la' dxen da nácadxu dxi'u.
EPH 4:16 Le̱' dxune̱' tuze xúgute̱ ni'a na' zaj zria be̱l-la' dxen chee̱' chee̱ gaca na tu be̱l-la' dxen nazá'ate̱ chee̱ na, ne chee̱ xelún zrin xúgute̱ ni'a na' ca' chee̱ gula be̱l-la' dxen na', ne gaca na chawe' lu xel-la zri'i lazre'.
EPH 4:17 Da nigá dxapa' le'e, ne dxusebaga' le'e waláz chee̱ Xránadxu chee̱ québedxa gunle ca dxelún bénneache quebe zaj núnbe'e̱ Dios, benne' ca' dxelune̱' cáte̱ze dxeléquene̱' xrlátaje,
EPH 4:18 benne' ca' zaj nachul-la xichaj lázrdawe̱'. Benne' caní quebe zaj nape̱' xel-la nabán li lazre' da dxunna Dios bénneache: Zaj nachul-la nanítene̱', ne zaj naca zide' lázrdawe̱'.
EPH 4:19 Québedxa dxelexedué'ene̱'. Belezanne cuine̱' dxelune̱' da schanni'. Du lazre̱' dxelune̱' xúgute̱ da sban.
EPH 4:20 Quegá caní nazé̱dele le'e chee̱ Cristo,
EPH 4:21 che da li xca' bénnele da dxuchalaj Le̱', ne nusé̱dene̱' le'e ca naca da li da zúale̱ Jesús.
EPH 4:22 Ca naca da be̱nle nédxula, le guzúa chalá'ala da gúcale lawe' da guzrínnajle lu da sban da guzá lázrele.
EPH 4:23 Dxal-la' gácale benne' cube lu xichaj lázrdaule.
EPH 4:24 Dxal-la' gunle da naca chee̱ benne' cube na' da be̱n Dios le'e chee̱ gunle da naca na xlátaje̱, ne da li da naca na lá'azxa.
EPH 4:25 Chee̱ le̱ na' québedxa gun lázrele. Le nne̱ da li tule xetule lawe' da nácadxu ni'a na' tuze be̱l-la' dxen chee̱ Cristo.
EPH 4:26 Che dxezrá'ale, quebe dxal-la' gunle dul-la, ne quebe zrá'ale scha'.
EPH 4:27 Quebe güele da xriwe̱' lataj guchixre chee̱ na le'e.
EPH 4:28 Bénnea' guque̱' gubán québedxa dxal-la' cuane̱'. Dxal-la' gune̱' tu zrin chawe' nen ni'a ná'queze̱' chee̱ gape̱' da gunézruje̱' benne' dxelexázrjene̱'.
EPH 4:29 Quebe nne̱le dizra' cale̱la. Le guchalaj da naca na xrlátaje chee̱ xelezé̱ tipa benne' xelenne̱', ne xelezí'e̱ na ba neza.
EPH 4:30 Quebe guzúa xáchele Be' Lá'azxa chee̱ Dios, lawe' da zúale̱ Be' le'e chee̱ gaca bea na nácale bi chee̱ Dios ca zrindxa zra xezí' lu ne̱'e̱ dxi'u.
EPH 4:31 Le guzúa chalá'ala: Xel-la dxecuide', ne xel-la dxezrá'a, ne xel-la xichaj zra'a, ne xel-la wetil-la dizra', ne xel-la wechacha, ne xúgute̱ da zrinnaj.
EPH 4:32 Dxal-la' gácale du lazre', ne xache lázrele tule xetule, ne gunite laule chee̱ tule xetule ca be̱n Dios, bnite lawe̱' chee̱le le'e lawe' da nácale bi chee̱ Cristo.
EPH 5:1 Lawe' da nácale bi cheé̱queze Dios, bi nazri'ine̱', le gun ba xuzre gácale cáte̱ze nácaqueze Le̱'.
EPH 5:2 Le zri'i le sa' ljwézrele tule xetule cáte̱ze be̱n Cristo, bzri'ine̱' dxi'u, ne bzanne cuine̱' waláz chee̱dxu ca tu zríla'dau', béadu dxelute benne' lau Dios chee̱ xedúa xtul-le'. Gate gute Cristo le̱'e̱ xaga béguaj, guca ca tu da dxelá zixre lau Dios da dxelegú'u bénneache lau Le̱'.
EPH 5:3 Lawe' da nácale bi chee̱ Dios, québedxa dxal-la' guchálajle chee̱ da dxucá'ana ditaj na bénneache, ne chee̱ da sban ca', ne chee̱ xel-la wecude' da de̱.
EPH 5:4 Quebe guchálajle dizra' schanni', ne dizra' bize, ne dizra' cale̱la, da quebe dxulucá'ana na chawe' bénneache, san dxal-la' xé̱quezle Dios: “Xcalenu'.”
EPH 5:5 Ba nézquezle quebe chu'u naga dxenná bea Cristo nen Dios netú benne' dxucá'ana dítaje̱' bénneache, u tu benne' dxune̱' da sban, u tu benne' dxucúdie̱' da de̱, da naca na ca dxucá'ana szrene̱' bedau' xiaj xaga.
EPH 5:6 Quebe güele lataj nu si xe̱ le'e nen dizra' xala, lawe' da ne̱ chee̱ da nigá dxesel-la Dios da dxusaca zi na benne' ca' quebe dxuluzúe̱' dizra' chee̱'.
EPH 5:7 Quebe gunle tu zren benne' dxelune̱' da caní.
EPH 5:8 Nédxute̱ guzúale lu da chul-la, na' na'a zrágale xel-la naxaní' lawe' da nácale bi chee̱ Xránadxu. Chee̱ le̱ na', le gun da naca na chee̱ xel-la naxaní',
EPH 5:9 da na' naca xel-la dxucá'ana chawe' ljwézredxu, ne da xlátaje̱, ne da li.
EPH 5:10 Le gun zi' lázrele nézele gunle da dxezaca ba lazre' Xránadxu.
EPH 5:11 Quebe gunle tu zren benne' dxelune̱' da cale̱la, da ca' naca chee̱ da chul-la, san le til-la da ca'
EPH 5:12 lawe' da naca na tu da xedué'edxu guchálajzedxu chee̱ da dxelún benne' ca' bagácheze.
EPH 5:13 Gate dxeledxúaj da caní lu da chul-la, ne zaj xu'u na lu xel-la naxaní', gulé'e lawe' ca zaj naca xúgute̱ da caní, lawe' da dxulé'e lawe' xel-la naxaní' xúgute̱.
EPH 5:14 Ca naca da caní dxenná na: Bebán, lue' dxásiu'. Bexasa ládujla benne' gate, na' gusení' Cristo lu xichaj lazrda'u.
EPH 5:15 Chee̱ le̱ na', le guxúe xanne' ca da dxunle. Quebe gunle ca dxelún benne' zaj nachul-la nanítene̱', san le gun ca dxelún benne' zaj naxéajni'ine̱'.
EPH 5:16 Le guchine chawe' zra caní lawe' da dxácale̱'e̱ da zrinnaj lu zra na'a zra.
EPH 5:17 Quebe gácale benne' xala, san le gun zi' lázrele chéajni'ile da dxaca lazre' Xránadxu gundxu.
EPH 5:18 Quebe súzrele, da na' dxuxrinnaj na bénneache, san du lázrele le si' Be' Lá'azxa.
EPH 5:19 Le guchálajle̱ le sa' ljwézrele tule xetule nen Salmo ca', ne nen da dxúl-lale, ne nen da du dxúl-lale da dxunna Be' Lá'azxa le'e. Du lázrele le gul-la, ne le güe lá'ana Xránadxu.
EPH 5:20 Le xé̱queze Xradxu Dios: “Xcalenu'”, chee̱ xúgute̱ lu La Xránadxu Jesucristo.
EPH 5:21 Le gaca dxexruj lazre' tule xetule, ne le gapa ba lá'ana Dios.
EPH 5:22 Nu'ula dxal-la' gaque̱' dxexruj lazre' lau benne' chee̱', cáte̱ze dxal-la' gaque̱' lau Xránadxu,
EPH 5:23 lawe' da naca benne' biu xíchaje̱ chee̱ zru'ule̱', cáte̱ze naca Cristo xíchaje̱ chee̱ bi chee̱' ca'. Cristo naque̱' Benne' weselá chee̱ bi chee̱' ca', bi zaj naca be̱' ca be̱l-la' dxen cheé̱queze̱'.
EPH 5:24 Cáte̱ze zaj naca dxexruj lazre' bi chee̱' ca' lau Cristo, cá'anqueze nu'ula dxal-la' gaque̱' dxexruj lazre' lau benne' chee̱' lu xúgute̱.
EPH 5:25 Benne' biu dxal-la' zrí'ine̱' zru'ule̱' cáte̱ze be̱n Cristo, bzri'ine̱' bi chee̱' ca', ne bzánene̱' xel-la nabán chee̱' ne̱ chee̱be'.
EPH 5:26 Caní be̱ne̱' chee̱ bebéaje̱'-be' cheé̱queze̱', ne be̱n chi'e̱-be' ne̱ chee̱ dizra' chee̱', da guca na ca dxun benne' dxexibe̱' bi chee̱' nen nisa,
EPH 5:27 chee̱ guzúe̱'-be' lau Le̱', xelácabe' bi xabáa, ne quebe bi da sban zaj nápabe', ne netú da zrinnaj, ne netú da naca na ca da ca', san xelácabe' lá'azxa, ne du lazre'.
EPH 5:28 Cá'anqueze benne' biu dxal-la' zrí'ine̱' zru'ule̱' cáte̱ze nazri'ine̱' be̱l-la' dxen cheé̱queze̱'. Benne' nazri'ine̱' zru'ule̱' nazrí'i cuine̱'.
EPH 5:29 Netú benne' quebe dxecuídene̱' be̱l-la' dxen cheé̱queze̱', san dxugawe̱' na, ne dxuxúe̱' na, ca dxúnqueze Cristo chee̱ bi chee̱' ca'
EPH 5:30 lawe' da zaj nácabe' ca be̱l-la' dxen cheé̱queze̱', na' dxi'u nácadxu ca ni'a na' be̱l-la' dxen chee̱', ne nácadxu ca be̱la' dxen chee̱', ne zrita chee̱'.
EPH 5:31 Chee̱ le̱ na' tu benne' biu dxal-la' gusane̱' xra xrne̱'e̱ chee̱ gaque̱' tuze nen zru'ule̱', na' dxúpate̱' xelaque̱' ca tuze benne'.
EPH 5:32 Da nigá naca na tu da zren da nagache, na' dxennía' da caní ca naca chee̱ Cristo nen bi chee̱' ca'.
EPH 5:33 Cá'anqueze tu tule le'e dxal-la' zri'ile zrú'ulale cáte̱ze nazrí'i cuínale, na' nu'ula dxal-la' gape̱' ba lá'ana benne' chee̱'.
EPH 6:1 Le'e, bi cuide', lawe' da nácale bi chee̱ Xránadxu, dxal-la' guzúale dizra' xruze xrna chee̱le, da naca na xlátaje̱.
EPH 6:2 Da nadxixruj bea nedxu da zraga na tu da guche̱be lazre' Dios naca na da dxenná na: Gudapa ba lá'ana xra xrna'u,
EPH 6:3 chee̱ gaca chawe' chiu', ne chee̱ su' scha' lu xe̱zr la xu.
EPH 6:4 Le'e, xruze xrna', quebe guchá'ale zrí'inele. Le gusegula-be' lu xel-la dxenná bea chee̱ Xránadxu, ne le gusina-be' da naca chee̱ Le̱'.
EPH 6:5 Le'e, benne' nada'u, le guzúa dizra' chee̱ benne' zaj naque̱' xránale lu xe̱zr la xu nigá, ne le gapa le̱' ba lá'ana, ne le zrebe le̱', ne du lázrele le gaca chee̱', cáte̱ze dxuzúale dizra' chee̱ Cristo.
EPH 6:6 Le gun zrin chee̱ xránale ca', quegaze gate dxelenná'te̱' le'e, ca dxelún benne' ca' dxelaca lazre̱' xelezaca ba lazre' bénneache chee̱'. Le gun zrin na' cáte̱ze dxunle zrin chee̱ Cristo, gunle du lázrele da dxaca lazre' Dios.
EPH 6:7 Le gun zrin chee̱ xránale du lázrele, cáte̱ze dxunle zrin chee̱ Xránadxu, ne quegaze chee̱ bénneache.
EPH 6:8 Ba nézquezle tu tu benne', benne' nada'u, ne benne' quebe nada'u, wazi'e̱ lu na' Xránadxu ca naca da xrlátaje da nune̱'.
EPH 6:9 Le'e, xrana benne' ca', cá'anqueze le gun le'e nen benne' we̱n zrin chee̱le ca', ne quebe guzálajle le̱' lawe' da nézele zua Bénnea' xabáa naque̱' Xrana benne' ca', ne Xránale le'e, na' Le̱' quebe dxebéaje̱' cha chee̱ bénneache.
EPH 6:10 Na'a, bi bícha'dau', le gaca chuchu ne̱ chee̱ Xránadxu nen xel-la wala zren chee̱'.
EPH 6:11 Le gaca ca benne' zjaque̱' wedil-la zaj nácue̱' zra lane̱' xia da na' dxunna Dios le'e, chee̱ gaca se̱ chúchule lau xúgute̱ da dxuzé̱ da xriwe̱' laule chee̱ si xe̱ na le'e.
EPH 6:12 Quegá dxedíl-lale̱dxu bénneache zaj naque̱' be̱la' dxen. Dxedíl-lale̱dxu xel-la dxenná bea chee̱ da xriwe̱' da dxeledá na lu be', ne dxedíl-lale̱dxu be' xriwe̱' ca', da dxelenná bea na, ne be' xriwe̱' ca' dxe̱ na ljwezre ca' da xelún na, ne be' xriwe̱' ca' xu'u lu na' na xe̱zr la xu chul-la nigá.
EPH 6:13 Chee̱ le̱ na', le gaca ca benne' zjaque̱' wedil-la zaj nacue̱' zra lane̱' xia da dxunna Dios le'e, chee̱ séquele súale wedil-la lu zra che da xriwe', na' ca te na' xegá'ana chúchule.
EPH 6:14 Le se̱ chuchu xca', suale̱ le'e da li ca tu bazxu da nacá'a na le̱'e̱le, ne suale̱ le'e da xlátaje̱ ca tu xia da da' lachu'le.
EPH 6:15 Le gaca sina chee̱ guchálajle dizra' chawe' chee̱ xel-la dxebeza zri lazre', da gaca na chee̱le ca tu cue' zrélale.
EPH 6:16 Da dxun na ba xen, le gapa xel-la dxeajlí lazre', da gaca na chee̱le ca tu da xegapa na, da xusula na xúgute̱ da zaj nalá na zaj zua na xi' da dxuzala da xriwe̱'.
EPH 6:17 Xel-la weselá gaca na chee̱le ca tu lapa xia da gucache xíchajle, na' xrtizra Dios gaca na chee̱le ca tu xia da gunna Be' Lá'azxa le'e.
EPH 6:18 Gate ne dxunle da caní dxal-la' guchálajle̱le Dios, gata' xúele, ne nábale lau Le̱' ne̱ chee̱ Be' Lá'azxa. Chee̱ gaca gunle da caní dxal-la' súale ban lazre', ne quebe gate ni'a na'le, na' nábale Dios chee̱ gácale̱ne̱' xúgute̱ bi chee̱' ca'.
EPH 6:19 Cá'anqueze le naba Le̱' waláz chia' neda' chee̱ gunne̱' neda' dizra' da guchálaja', chee̱ xazrda' guzenda' bénneache dizra' chawe' chee̱'.
EPH 6:20 Dios be̱ne̱' neda' gubáz chee̱ dizra' chawe' chee̱', na' chee̱ le̱ na' xu'a lizre xia na'a. Le naba Le̱' gácale̱ne̱' neda' chee̱ xazrda' guchálaja' dizra' chawe' chee̱' ca dxal-la' guna'.
EPH 6:21 Tíquico, bi bíchedxu nazri'ite̱ lazrdxu, bi li lazre' lu zrin chee̱ Xránadxu, guzenbe' le'e da dxaca chia' nigá, ne da dxuna'.
EPH 6:22 Chee̱ le̱ na' dxusel-la'-be' lau le'e chee̱ guzenbe' le'e ca zúantu', ne chee̱ gutípabe' lázrele.
EPH 6:23 Dxenaba' lau Xradxu Dios, ne lau Xránadxu Jesucristo gunézruje̱' bi bíchedxu ca' zaj zre̱'e̱ na' xel-la dxebeza zri lazre', ne xel-la zri'i lazre', ne xel-la dxeajlí lazre',
EPH 6:24 na' gune̱' chawe' xúgute̱ benne' ca' du lazre̱' zaj nazri'ine̱' Xránadxu Jesucristo. Ca'an gaca na.
PHI 1:1 Neda' Pablo, ne Timoteo nácantu' we̱n zrin chee̱ Jesucristo. Dxuzúaja' da nigá chee̱le le'e, bi bíchentu', ne chee̱le le'e, dxuxúele bi chee̱ Cristo, ne le'e, zaj xu'u lu na'le bi chee̱ Cristo, ne zrale xe̱zre Filipos. Nabábale chee̱ Dios, ne nácale tuze nen Jesucristo.
PHI 1:2 Dxenábantu' lau Xradxu Dios, ne lau Xránadxu Jesucristo gune̱' chee̱le da xrlátaje, ne gunne̱' le'e xel-la dxebeza zri lazre'.
PHI 1:3 Tu tu lasa dxajsá lazra' le'e dxapa' Dios chia': Xcalenu'.
PHI 1:4 Gate dxuchálajle̱na' Dios, dute̱ xel-la dxebé dxenábaqueza' bi gun Le̱' chee̱ xúgute̱le le'e.
PHI 1:5 Caní dxuna' lawe' da dxundxu zrin tu zren chee̱ dizra' chawe' chee̱ Cristo gate guzú lau núnbe̱'tu' na bzrinte̱ lu zra na'a zra.
PHI 1:6 Dxuxrén lazra' Dios, Bénnea' guzú lawe̱' dxune̱' tu zrin chawe' lu xichaj lázrdaule le'e, gúnqueze̱' na ca zrinte̱ zra xelá' Jesucristo.
PHI 1:7 Naca xrlátaje dxéqueda' neda' caní chee̱ xúgute̱le le'e, lawe' da nazrí'ile̱'e̱da' le'e, ne dxezidxu tu zren da chawe' ca' dxunna Dios dxi'u. Dxácate̱ ne xu'a lizre xia nigá, ne gate na' gudíl-lale̱na' bénneache ca' dizra', benne' ca' guledábague̱' dizra' chawe' chee̱ Cristo, ba ble'eda' benne' ca' naca na da li.
PHI 1:8 Dios nézquezene̱' nazrí'ile̱'e̱da' le'e, lu dute̱ xel-la zri'i lazre' da dxunna Jesucristo neda'.
PHI 1:9 Dxenaba' lau Dios gune̱' zrí'idxa ljwézrele, ne gápale̱'e̱quezle xel-la sina, ne xel-la dxéajni'i lu xúgute̱ da dxunle,
PHI 1:10 chee̱ nézele cuele da cháwedxa, chee̱ gácale du lazre', ne quebe bi gata' da gagu na zria chee̱le lu zra na' xelá' Cristo.
PHI 1:11 Caní gaca, da ca' dxunle xululé'e na da xrlátaje da dxun Jesucristo lu xichaj lázrdaule, chee̱ gaca ba lá'ana Dios, ne xegá'ana szrénqueze̱'.
PHI 1:12 Le'e, bi bícha'dau', dxaca lazra' nézele ca da ca' guzraca' gulácale̱ na neda' chee̱ bchálaja' dizra' chawe' chee̱ Cristo.
PHI 1:13 Caní guca, xúgute̱ benne' xra'aga xu'u lawe', ne xezícadxa benne' ca' zaj zre̱'e̱ xu'u lawe' na' zaj nézene̱' xu'a lizre xia lawe' da dxuna' zrin chee̱ Cristo.
PHI 1:14 Lawe' da xu'a neda' lizre xia nigá, chaze xúgute̱ bi bíchedxu ca' dxuluxrén lázredxe̱' Xránadxu, na' dxuluchálaje̱' du lazre̱' dizra' chee̱ Dios, ne quebe dxelezrebe̱'.
PHI 1:15 Da li bal-la benne' ca' dxuluchálaje̱' ca naca chee̱ Cristo lawe' da zaj naque̱' zre'e lazre', ne zaj naque̱' wil-la dizra'. Xezícadxa benne' caní dxuluchálaje̱' na dute̱ xel-la li lazre' chee̱'.
PHI 1:16 Benne' nedxu ca' dxuluchálaje̱' da naca chee̱ Cristo chee̱ xulucá'ana szren cuine̱', ne quegá du lazre̱', lawe' da dxelaca lazre̱' súadxa da guzúa na neda' ste̱be dxácate̱ xu'a lizre xia nigá.
PHI 1:17 Xezícadxa benne' ca' dxelune̱' na dute̱ xel-la zri'i lazre' chee̱', lawe' da zaj nézene̱' nuzúa cuina' guzéajni'ida' benne' ca' dxeledábague̱' dizra' chawe' chee̱ Cristo.
PHI 1:18 ¿Bizra xca'? Ájate̱zla dxelune̱', che dxuluchálaje̱' du lazre̱', u quebe dxuluchálaje̱' du lazre̱', dxuluchálaje̱' chee̱ Cristo, na' dxebeda', ne wabéquezda'
PHI 1:19 lawe' da nezda' lu xúgute̱ da caní wedxúaj na chawe' chia' neda', lawe' da dxenábale le'e lau Dios chia' neda', na' gácale̱ Be' Lá'azxa neda', Bénnea' gusel-le̱' Jesucristo chee̱dxu.
PHI 1:20 Dxaca lazra', ne dxuxrén lazra' quebe xedué'eda' neda', séqueda' guchálaja' du lazra' chee̱ xelelé'e bénneache zúale̱dxa xel-la szren chee̱ Cristo neda' na'a, ca zúale̱queze na neda', che gaca bana', u che gatia'.
PHI 1:21 Chia' neda', che naca bana', Cristo dxuchínene̱' neda', ne che gatia' wazrue'eda' da cháwedxa.
PHI 1:22 Che xedxúaj na chawe' chee̱ zrin chee̱ Xránadxu che naca bana', quebe nezda' bila na ca'a.
PHI 1:23 Naca na ste̱be chia' neda' bila da caní ca'a. Dxaca lazra' gatia' chee̱ cheajsúale̱na' Cristo, da gácadxa chawe' chia' neda',
PHI 1:24 san che naca bana' nácadxa chawe' chee̱le le'e.
PHI 1:25 Lawe' da nuxrén lazra' naca caní, nezda' wazúale̱dxa' le'e chee̱ se̱ cháchadxale lu da naca chee̱ Cristo, ne chee̱ béquezdxale.
PHI 1:26 Chee̱ le̱ na' bédxale lu da naca chee̱ Cristo ne̱ chia' neda' gate súale̱na' le'e.
PHI 1:27 Dxun na ba xen gunle da dxuzéajni'i dizra' chawe' chee̱ Cristo le'e, na' che xedajnná'a le'e, u che sua' zitu', wenda' ze̱ cháchale, ne nácale tuze, dxunle tu zren zrin chee̱ Cristo chee̱ xeleajlí lazre' bénneache dizra' chawe' chee̱'.
PHI 1:28 Quebe zrébele benne' ca' dxeledábague̱' le'e. Ca dxunle gulé'e na le̱' xelebía xi'e̱, na' nalale le'e lawe' da bselá Dios le'e.
PHI 1:29 Tu da zrente̱ naca da dxunna Dios le'e gate gunle zrin chee̱ Cristo, quegaze chéajle̱le chee̱', na' cá'anqueze che tele xel-la zi' ne̱ chee̱ Le̱'.
PHI 1:30 Le'e dxunle neda' tu zren dxedíl-lale̱dxu da zaj naca da cale̱la. Blé'equezle gate nate ca gudíl-lale̱na' na, na' na'a dxenle ca dxedíl-lale̱na' na.
PHI 2:1 Cristo dxutipe̱' lázrele, na' xel-la zri'i lazre' chee̱' dxuzúa na le'e lu da ba neza, na' Be' Lá'azxa chee̱' zúale̱ne̱' le'e, na' nápale xel-la zri'i lazre', ne xel-la dxexache lazre' chee̱'.
PHI 2:2 Chee̱ le̱ na' le gun ga béle̱'e̱da', gaca tuze ca da dxéquele, ne gácale tuze lu xel-la zri'i lazre' chee̱le, ne gunle tuze lu xichaj lázrdaule.
PHI 2:3 Quebe bi gunle chee̱ xulucá'ana szren bénneache le'e, ne chee̱ gaca gucá'ana szren cuínale, san dute̱ xel-la dxexruj lazre' chee̱le dxal-la' guéquele nácadxa blau le sa' ljwézrele ca le'e.
PHI 2:4 Netule le'e quebe dxal-la' gunle ca da gácale̱n le'eze. Le gun da gácale̱n na xezícadxa bénneache.
PHI 2:5 Dxal-la' si' lu na'le da gaca na chee̱le ca be̱n Jesucristo.
PHI 2:6 Lácala naque̱' ca nácaqueze Dios, quebe gúquene̱' dxal-la' gune̱' ba xuzre xegá'anaqueze̱' ca Dios.
PHI 2:7 Bzue̱' chalá'ala da nápaqueze̱', ne be̱n cuine̱' ca tu benne' nada'u, guque̱' bénneache.
PHI 2:8 Gate ba naque̱' bénneache, guque̱' dxexruj lazre', na' bzue̱' dizra' chee̱ Dios ca bzrinte̱ gutie̱', lácala gutie̱' ca tu benne' we̱n da cale̱la le̱'e̱ xaga béguaj.
PHI 2:9 Chee̱ le̱ na' Dios bca'ana szrénle̱'e̱ Le̱', ne bzue̱' tu Le̱' da naca szrendxa ca xúgute̱ la xezícadxa,
PHI 2:10 chee̱ gate xelenne̱' La Jesús, na' xuluzú zribe lau Le̱' xúgute̱ benne' zaj zre̱'e̱ xabáa, ne xe̱zr la xu nigá, ne zran xe̱zr la xu nigá,
PHI 2:11 ne chee̱ xelexeche̱be xúgute̱' naca Jesucristo Xránadxu, chee̱ gaca ba lá'ana Xradxu Dios.
PHI 2:12 Chee̱ le̱ na', le'e, bi bicha' nazri'ite̱ lazra', ca na' be̱nle le'e, bzúaquezle dizra' chee̱ Dios gate na' zúale̱na' le'e, le guzúadxa dizra' chee̱ Dios na'a gate zua' zitu'. Dute̱ xel-la dxexruj lazre', ne dute̱ xel-la dxezrebe le gun zrin chee̱ zrué'ele dute̱ ca naca xel-la weselá chee̱le,
PHI 2:13 lawe' da dxun Dios zrin lu xichaj lázrdaule chee̱ sa lázrele gunle da xrlátaje da dxaca lazre' Le̱', ne chee̱ séquele gunle na.
PHI 2:14 Le gun xúgute̱ da dxunle, ne quebe gáchajele, ne quebe gutil-la dizra' ljwézrele
PHI 2:15 chee̱ gácale li lazre', ne quebe nu nne̱ chee̱le. Gácale bi chee̱ Dios du lazre' ládujla bénneache zaj naque̱' benne' dxelún da cale̱la, ne gácale ca belaj ca' dxulusení na lu xe̱zr la xu naga nachul-la na,
PHI 2:16 ne guchálajle̱le benne' ca' dizra' da nua na xel-la nabán. Che gunle caní, neda' wezaca ba lazra' chee̱le gate xelá' Cristo, lawe' da wanezda' quebe be̱n zi' lazra' dácheze, ne quebe be̱na' zrin níteze.
PHI 2:17 Béle̱'e̱da' lácala gun na ba xen gatia' chee̱ gaca li lazre' xel-la dxeajlí lazre' chee̱le lau Dios. Bzua cuínale lu na' Dios ca tu guna' da gúnnale chee̱', na' chee̱ le̱ na' béle̱'e̱quezda' tu zren nen xúgute̱le le'e.
PHI 2:18 Le béquezle le'e, ne le gun tuze neda' lu xel-la dxebé chia'.
PHI 2:19 Che naca da dxaca lazre' Xránadxu Jesús, dxebeza lazra' sél-laze̱queza' Timoteo xedajnná'abe' le'e, chee̱ beda' gate xelabe', ne guzenbe' neda' chee̱le le'e.
PHI 2:20 Quebe nu chilá' xetú benne' guéquene̱' chee̱le ca da dxéqueda' neda'. Tuze Timoteo dxe'ebe' gunne xue chee̱ gaca chawe' chee̱le le'e.
PHI 2:21 Xúgute̱ benne' ca' xezícala zaj dxe'e̱ gunne xue da zaj naca chee̱ze̱', ne quebe zaj dxe'e̱ gunne xue da naca chee̱ Jesucristo.
PHI 2:22 Le'e nézquezle ca da xrlátaje dxun Timoteo, ne ca be̱nbe' zrin tu zren nen neda'. Dxuchálajntu' dizra' chawe' chee̱ Cristo, na' dxunbe' ca dxun tu bi dxácale̱be' xrabe'.
PHI 2:23 Caní naca, dxebeza lazra' sel-la'-be' gate nezda' ca gaca chia'.
PHI 2:24 Dxuxrén lazra' Xránadxu, néda'queza' xida' xedajnná'a le'e.
PHI 2:25 Cá'anqueze dxéqueda' dxun na ba xen sel-la' Epafrodito, bi bíchedxu. Dxunbe' zrin tu zren nen neda', dxedíl-lale̱ntu' da cale̱la. Lé'equezle gusél-lale bi nigá chee̱ gácale̱nbe' neda', ne xu'a lizre xia nigá.
PHI 2:26 Dxezá lázrele̱'e̱be' xedajnna'abe' le'e, ne zúale̱'e̱be' ste̱be lawe' da nézebe' bénele quebe chawe' guzúabe'.
PHI 2:27 Da li quebe chawe' guzúabe', ne bache gátebe', san Dios bexache lazre̱' le̱be', ne quegá tuze le̱be', cá'anqueze neda' chee̱ quebe xewine lázredxa' ca da dxaca chia' na'a.
PHI 2:28 Chee̱ le̱ na' dxezá lázredxa' sel-la' le̱be' chee̱ bele le'e gate xelé'ele le̱be', ne chee̱ québedxa xewine lazra' neda'.
PHI 2:29 Le xezí' lu na'le le̱be' dute̱ xel-la dxebé, ca bi bíchele lu da naca chee̱ Xránadxu, ne le gápaqueze ba lá'ana benne' ca' zaj naque̱' ca le̱be',
PHI 2:30 lawe' da guzúa gátebe' dxunbe' zrin chee̱ Cristo. Bzuabe' lu da ste̱be xel-la nabán chee̱be' chee̱ gunbe' zrin chia' da quebe guzéquele le'e gunle.
PHI 3:1 Na'a, bi bicha', le be lu da naca chee̱ Xránadxu. Quebe naca na ze̱de chia' neda' guzúaja' chee̱le xecha lasa ca da ba bzúajqueza', lawe' da dxun na ba xen guna' da nigá chee̱le.
PHI 3:2 Le guxúe cuínale chee̱ benne' ca' dxelune̱' da cale̱la, ne zaj naque̱' ca becu', benne' ca' dxelechugue̱' lu be̱l-la' dxen da na' naca bea na benne' zaj naque̱' chee̱ Dios.
PHI 3:3 Dxi'u nácadxu benne' nápaquezdxu da dxunna bea na nácadxu chee̱ Dios, ne dxue lá'anadxu Dios ne̱ chee̱ Be' Lá'azxa, ne dxebedxu lawe' da nácadxu bi chee̱ Jesucristo. Quebe dxuxrén lázredxu da dxundxu,
PHI 3:4 lácala neda' wazéqueda' guxrén lazra' da ca' nuna'. Che nu benne' dxéquene̱' waca guxrén lazre̱' ca da ba nune̱', wazéquedxeda' neda'.
PHI 3:5 Gate gúqueda' xrunu' zra gulechugue̱' lu be̱l-la' dxen chia' da na' dxulé'e na naca' chee̱ Dios lawe' da naca' benne' Israel, ne xrtia Benjamín. Naca' da li benne' hebreo. Guca' benne' fariseo ca buzájla'a da bdxixruj be'e Moisés.
PHI 3:6 Gudxéle̱'a gunne xue da naca chee̱ Dios ca bzrinte̱ gudáu zi' xuzra' benne' ca' zaj nácabe̱' bi chee̱ Jesús. Ca naca da xlátaje̱ da napa tu benne' dxune̱' ca dxenná da nadxixruj bea na, quebe nu benne' guzéquene̱' bi nnie̱' chia'.
PHI 3:7 Xúgute̱ da ca' gúqueda' gate nate zaj zácale̱'e̱ na, na'a dxéqueda' da ca' quebe bi zaj zaca na, lawe' da nazrí'idxeda' Cristo.
PHI 3:8 Da li dxéqueda' xúgute̱ da ca' ca tu da nite lawe' da zácadxa Xrana' Jesucristo. Lawe' da nazrí'ida' Le̱' ba bzua' chalá'ala xúgute̱ da gudapa', ne dxéqueda' da ca' ca tu da níteze chee̱ si'a da ba neza da dxunna Cristo,
PHI 3:9 chee̱ gaca' tuze nen Le̱', quegá lawe' da guca' xlátaje̱ ne̱ chee̱ da nadxixruj bea na na', san lawe' da ble'e Dios neda' xlátaje̱ lawe' da dxeajlí lazra' Cristo, na' Dios dxelé'ene̱' xlátaje̱ xúgute̱ benne' dxeleajlí lazre̱' Cristo.
PHI 3:10 Da dxaca lazra' naca na gúnbeadxa' Cristo, ne súale̱ xel-la waca neda' da bsebán na Le̱', ne tea' xel-la zi' ca da gudée̱' Le̱', ne gudé cuina' lu na' Dios lácala dxal-la' gatia' ca gute Cristo,
PHI 3:11 na' dxebeza lazra' xebana' ládujla benne' gate ca'.
PHI 3:12 Quebe dxennía' ba bzrué'eda' xúgute̱ da caní, u ba naca' dute̱ xlátaje̱, san dxun zi' lazra' chee̱ zrué'eda' da na' bláwizra Jesucristo neda' chee̱ zrué'eda'.
PHI 3:13 Le'e, bi bicha', quebe dxennía' ba bzrué'eda' da nigá, san tuze da dxuna', dxuzúa' chalá'ala da ba gudé, ne dxun zi' lazra' chee̱ zrué'eda' da za za',
PHI 3:14 chee̱ gusexuzra' guna' zrin da dxuna', chee̱ zrué'eda' da na' bláwizra Dios dxi'u sidxu lu xabáa chee̱' lawe' da nácadxu bi chee̱ Jesucristo.
PHI 3:15 Caní dxal-la' guéquedxu dxi'u, ze̱ cháchadxu ca naca da dxeajlí lázredxu. Che quebe dxéquele caní chee̱ bítete̱ze da caní, Dios guzéajni'ine̱' le'e ca naca chee̱ na.
PHI 3:16 Tuze ca dxal-la' guéquedxu, ne tuze ca dxal-la' gundxu lu da ca' ba bzrué'edxu.
PHI 3:17 Le'e, bi bícha'dau', le gun ca dxuna' neda', ne le nna' ca dxelún benne' ca', dxelune̱' ca da blé'entu' le'e.
PHI 3:18 Zane' lasa ba gucha' le'e, ne na'a dxebézrtea' dxapa' le'e, zrále̱'e̱ bi bíchedxu dxelune̱' ca dxelún benne' dxuluzúe̱' chalá'ala da be̱n Cristo le̱'e̱ xaga béguaj.
PHI 3:19 Ca gaca chee̱ benne' ca' lu zra bze̱be, xelebía xi'e̱. Zaj nune̱' dios chee̱ da dxelé'aj dxelawe̱', ne dxulucá'ana szren cuine̱' chee̱ da na' dxal-la' xelapa stu'e̱. Zaj dxe'e̱ gunne xue da naca chee̱ xe̱zr la xu nigaze.
PHI 3:20 Dxi'u nácadxu benne' zaj nababe̱' xabáa, ne dxebézadxu zra xelá' benne' weselá chee̱dxu, Xránadxu Jesucristo, ze̱'e̱ xabáa.
PHI 3:21 Le̱' xegüe̱' be̱l-la' dxen chee̱dxu da dxeledé chee̱ na, ne gune̱' na ca naca be̱l-la' dxen xabáa chee̱', guchínene̱' xel-la waca chee̱' da nape̱' chee̱ nna bé'ene̱' xúgute̱ da zaj zua.
PHI 4:1 Chee̱ le̱ na' le'e, bi nazri'ite̱ lazra', le se̱ chacha lu da naca chee̱ Xránadxu. Le'e, bi bícha'dau' nazrí'ite lazra', dxezá lázrele̱'a le'eda' le'e, lawe' da dxebeda' ca nácale le'e, na' lawe' da be̱na' neda' nácale bi chee̱ Cristo dxal-la' si'a tu da gunna Dios neda'.
PHI 4:2 Dxata' xueda' Evodia, ne Síntique xelaque̱' tuze, lawe' da zaj naque̱' bila ne̱ chee̱ Xránadxu.
PHI 4:3 Na'a lue', bi ljwezra' li lazre', dxata' xueda' lue' gácale̱nu' nu'ula zandxu caní, nu'ula belúnle̱ne̱' neda' zrin chee̱ dizra' chawe' chee̱ Cristo. Belune̱' zrin na' tu zren nen Clemente, ne xezícadxa benne' ca' belúnle̱ne̱' neda' zrin. La benne' caní zaj naxúaj na lu xiche chee̱ xel-la nabán zeajlí canna.
PHI 4:4 Le béqueze lu da naca chee̱ Xránadxu. Xecha lasa dxennía': Le be.
PHI 4:5 Dxaca lazra' xeleque be'e xúgute̱ bénneache nácale zren lazre'. Ba zua bagu zra xelá' Xránadxu.
PHI 4:6 Quebe bi cuele gunne xue, san le guchálajle̱queze Dios ca naca chee̱ da ca'. Le naba na lau Dios, na' le xe̱'e̱: Xcalenu'.
PHI 4:7 Nadxa gunna Dios le'e xel-la dxebeza zri lazre', da naca na szrendxa ca da seque' gúnbea bénneache, na' guzúa chuchu na xichaj lázrdaule ne̱ chee̱ Jesucristo.
PHI 4:8 Na'a, bi bicha', le gulaba lazre' ca naca xúgute̱ da zaj naca li, ne xúgute̱ da zaj napa na ba lá'ana, ne xúgute̱ da zaj naca na li lazre', ne xúgute̱ da zaj naca na du lazre', ne xúgute̱ da dxezaca ba lazre' Dios, ne xúgute̱ da dxulucá'ana na bénneache xrlátaje. Che zua tu da naca xrlátaje, u da dxal-la' gucá'ana szrendxu, le gulaba lazre' da caní.
PHI 4:9 Le gun ca naca da bsé̱deda' le'e, ne da bzéajni'ida' le'e, ne da bzenda' le'e, ne da ble'eda' le'e, na' súale̱ Dios le'e, Bénnea' dxunne̱' dxi'u xel-la dxebeza zri lazre'.
PHI 4:10 Dxebéle̱'e̱da' ne̱ chee̱ Xránadxu, lawe' da dxajsá lázrele neda'. Quebe dxennía' ba gul-la lázrele neda', san quebe guta' lataj gácale̱le neda'.
PHI 4:11 Quebe dxennía' da nigá lawe' da bi dxexázrjeda', lawe' da ba bse̱de Xránadxu neda' sua' xel-la dxebé ájate̱ze dxaca chia'.
PHI 4:12 Ba gudéa' xel-la xache', ne cá'anqueze xel-la gunní'a. Nazé̱dia' dxuchaga lawa' xúgute̱ da dxaca chia', che néljada', u che dxeduna', che nápale̱'a, u che quebe bi napa'.
PHI 4:13 Xúgute̱ wazéqueda' guchaga lawa' lawe' da dxuzé̱ tipa Cristo neda'.
PHI 4:14 Be̱nle da xrlátaje, gúcale̱le neda' ne̱ chee̱ da gusél-lale chia'.
PHI 4:15 Ba nézquezle le'e, benne' Filipos, ca guca gate guzú lawa' dxuchálaja' dizra' chawe' chee̱ Cristo nigá. Gate bezá'a xe̱zre ca' zaj nababa xe̱zr la xu Macedonia, le'eze gusél-lale chia' dumí chee̱ da guzí' lu na'le.
PHI 4:16 Gate guzúa' xe̱zre Tesalónica, chupa chunna lasa gusél-lale dumí chia' chee̱ quebe bi xázrjeda'.
PHI 4:17 Quebe dxennía' da nigá lawe' da dxaca lazra' bi gúnnale chia', san dxaca lazra' gácadxa da ba neza chee̱le le'e lau Dios.
PHI 4:18 Ba guzi'a xúgute̱ da gusél-lale, na' de̱le̱'e̱ chia'. Ca naca da gusélal-le chia' lu na' Epafrodito, da zrendxa guca na ca da bexázrjeda'. Da na' gusél-lale naca na ca tu guna' da dxelá zixre na lau Dios, u tu da bzúale lau Dios da dxezaca ba lazre̱'.
PHI 4:19 Dios chia' gunne̱' le'e xúgute̱ da dxexázrjele, chee̱ xel-la gunní'a chee̱ xabáa chee̱' ne̱ chee̱ Jesucristo.
PHI 4:20 Gaca ba Xradxu Dios chadía chacanna. ¡Ca'an gaca na!
PHI 4:21 Waláz chia' neda' le gugapa diuzre lu La Jesucristo xúgute̱ benne' zaj nababe̱' chee̱ Dios. Bi bíchedxu ca' zaj zúale̱ neda' dxulugape̱' le'e diuzre.
PHI 4:22 Xúgute̱ bi bíchedxu zaj zre'e nigá, benne' zaj nababe̱' chee̱ Dios, ne bi bíchedxu zaj zre̱'e̱ lizre bénnea' dxenná bé'ene̱' xe̱zr la xu Roma, dxulugape̱' le'e diuzre.
PHI 4:23 Dxenaba' lau Xránadxu Jesucristo gune̱' da chawe' chee̱ xúgute̱le le'e. Ca'an gaca na.
COL 1:1 Neda', Pablo, naca' gubáz chee̱ Jesucristo lawe' da naca da dxaca lazre Dios, na' zúale̱ bi bíchedxu Timoteo neda'.
COL 1:2 Dxuzúaja' da nigá chee̱le le'e zrale xe̱zre Colosas, ne nabábale chee̱ Dios, ne dxeajlí lázrele Cristo. Dxenaba' Xradxu Dios gune̱' da chawe' chee̱le le'e, ne gunne̱' le'e xel-la dxebeza zri lazre'.
COL 1:3 Dxé̱quezentu' Dios, Xra Xránadxu Jesucristo: Xcalenu' ca naca chee̱le gate dxuchálajle̱ntu' Le̱'.
COL 1:4 Ba bénentu' ca dxeajlí lázrele Cristo, ne ca nazri'ile xúgute̱ bi ca' chee̱ Dios.
COL 1:5 Caní dxunle lawe' da dxebeza lázrele da nucueza Dios chee̱le xabáa, na' guzú laule dxunle ca naca da nigá gate guzile dizra' chawe' da naca na da li.
COL 1:6 Dizra' chawe' nigá bla na ládujla le'e ca bla na dute̱ xe̱zr la xu nigá, na' dxezriluj na, ne dxun na zrin dute̱ xe̱zr la xu ca dxun na ládujla le'e, gate bénte̱le ca nazrí'i Dios bénneache, ne gunézele naca na da li.
COL 1:7 Da nigá ble'e Epafras le'e. Naque̱' bi bíchedxu nazrí'i lázredxu, ne ba bé̱nqueze̱' zrin nen netu', ne naque̱' chee̱le le'e tu benne' we̱n zrin li lazre' chee̱ Cristo.
COL 1:8 Epafras nigá bzenne̱' netu' ca dxaca chee̱le le'e, ne ca nazrí'i ljwézrele ne̱ chee̱ Be' Lá'azxa.
COL 1:9 Chee̱ le̱ na', zra gunézentu' da nigá, dxuchálajle̱quezentu' Dios chee̱le le'e, ne dxenábantu' Le̱' guzéajni'ine̱' le'e ca naca da dxaca lazre̱', ne gunne̱' le'e dute̱ xel-la sina, ne dute̱ xel-la dxéajni'i da dxunna Be' Lá'azxa dxi'u.
COL 1:10 Caní dxenábantu' Le̱' chee̱ gaca gunle ca dxal-la' xelún bi ca' chee̱ Xránadxu, ne gunle ca da dxezaca ba lazre' Le̱', gunle xúgute̱ da naca da xrlátaje, ne gúnbeadxaquezle Dios.
COL 1:11 Dxenábantu' Le̱' guzúa chache̱' le'e lu xel-la waca da naca chee̱ xel-la szren chee̱' chee̱ séquele guchaga laule xúgute̱ da dxaca chee̱le lu dute̱ xel-la zren lazre' chee̱le, ne dute̱ xel-la dxebé.
COL 1:12 Dxal-la' xe̱le Dios: Xcalenu', lawe' da bzua Dios dxi'u chee̱ sidxu da nucueze̱' chee̱dxu, chee̱ súadxu lu xel-la naxaní' chee̱', lawe' da nácadxu bi chee̱ Le̱'.
COL 1:13 Dios bselé̱' dxi'u lu xel-la dxenná bea chee̱ da chul-la, na' bzue̱' dxi'u naga dxenná bea Zrí'ine̱' nazri'ite̱ lazre̱'.
COL 1:14 Zrí'ine̱' nácaqueze̱' Bénnea' bselé̱' dxi'u gate gutie̱' waláz chee̱dxu, chee̱ bnite lau Dios dul-la gubágadxu.
COL 1:15 Ca naca Jesús, dxulé'e na dxi'u ca nácaqueze Dios, Bénnea' quebe gaca lé'edxu, ne naque̱' chee̱ Dios ca tu bi nedxu chee̱ bénneache, bi nácadxabe' blau ca xúgute̱ da be̱n Dios.
COL 1:16 Ne̱ chee̱ Le̱' be̱n Dios xúgute̱ da zaj zua xabáa, ne da zaj zua xe̱zr la xu nigá, da ca' dxelé'edxu, ne da ca' quebe gaca lé'edxu, che zaj naca na be' ca' zaj naca na blau, u be' ca' dxelenná bea na, u be' ca' zaj napa na xel-la szren, u be' ca' zaj napa na xel-la waca, xúgute̱ na be̱n Dios ne̱ chee̱ Le̱', na' chee̱ Le̱' zaj naca na.
COL 1:17 Cristo ba zúaqueze̱' nédxute̱ ca xúgute̱ da zaj zua, na' ne̱ chee̱ Le̱' xúgute̱ da ca' dxelún na ca zaj naca chee̱ na.
COL 1:18 Xúgute̱ benne' zaj naque̱' bi chee̱ Cristo zaj naque̱' ca tuze be̱l-la' dxen, na' Crístoqueze naque̱' xichaj be̱l-la' dxen na' da nácadxu. Le̱' bzue̱' be̱l-la' dxen na', ne Le̱' naque̱' Benne' bebán nédxute̱ ládujla benne' gate ca' chee̱ gaque̱' Benne' blau lu xúgute̱ da zaj zua.
COL 1:19 Caní naca na lawe' da guca lazre' Dios súale̱ Cristo dute̱ da nácaqueze Dios.
COL 1:20 Cá'anqueze guca lazre' Dios ne̱ chee̱ Cristo xexune̱' tuze nen Le̱' xúgute̱ da zaj zua, ca da zaj zua na lu xe̱zr la xu, ne da zaj zua na xabáa. Bexune̱' dxi'u tuze nen Le̱' ne̱ chee̱ xel-la gute chee̱ Cristo le̱'e̱ xaga béguaj.
COL 1:21 Nédxute̱ le'e gúcale ca benne' zitu' lau Dios, ne bzrá'ale Dios lu xichaj lázrdaule, ne be̱nle xúgute̱ da cale̱la, san na'a Dios ba bexune̱' le'e tuze nen Le̱',
COL 1:22 ne̱ chee̱ da be̱n Cristo gate gutie̱' le̱'e̱ xaga béguaj lu be̱la' dxen chee̱'. Da nigá be̱n Le̱' chee̱ gaca guzúe̱' le'e lau Le̱', gácale benne' lá'azxa, ne du lazre', ne quebe bi nabágale da cale̱la.
COL 1:23 Chee̱ gaca caní dxal-la' se̱ cháchale, ne sua típale ca dxeajlí lázrele Cristo, ne quebe gusanle ca da dxebeza lázrele, da na' nápale lawe' da dxéajle̱le dizra' chawe' chee̱ Cristo. Dizra' chawe' nigá nene na dute̱ xe̱zr la xu, na' nuzúa Dios neda', Pablo, benne' we̱n zrin chee̱', chee̱ guchálaja' dizra' chawe' nigá.
COL 1:24 Na'a dxebeda' lu xel-la zi' da dxedéa' ne̱ chee̱le le'e, lawe' da dxuzá lawa' lu be̱l-la' dxen chia' ca da dxezaca Cristo ne̱ chee̱ bi chee̱' ca', benne' ca' zaj naque̱' ca be̱l-la' dxen cheé̱queze̱'.
COL 1:25 Bzua Cristo neda' ca benne' we̱n zrin chee̱ bi chee̱' ca', ne̱ chee̱ da bláwizra Dios neda' guna', gácale̱na' le'e, na' guchálaja' dúte̱queze da naca dizra' chee̱ Dios,
COL 1:26 ne chee̱ guzéajni'ida' bénneache ca da nagache, da na' nagache nédxute̱, san na'a Dios ba blé'ene̱' bi chee̱' ca' ca naca na.
COL 1:27 Guca lazre' Dios gulé'ene̱' benne' ca' ca naca xel-la gunní'a zren chee̱ da na' nagache nédxute̱, da gunézruje̱' benne' ca' quebe zaj naque̱' judío. Da na' nagache nédxute̱ naca na caní: Cristo zue̱' xichaj lázrdaule, na' chee̱ le̱ na' dxebeza lázredxu súadxu xabáa chee̱'.
COL 1:28 Netu' dxuchálajntu' ca naca chee̱ Cristo. Dxuzéajni'intu' xúgute̱ bénneache, ne dxusé̱dentu' xúgute̱', chee̱ xeleajni'i xánnene̱' chee̱ xelaca xúgute̱ bénneache du lazre' lau Dios ne̱ chee̱ Jesucristo.
COL 1:29 Chee̱ gaca caní dxuna' neda' zrin, dxuchíneda' dute̱ xel-la waca chee̱ Cristo, da dxun na zrin lu xichaj lázrdawa'.
COL 2:1 Dxaca lazra' nézele le'e dxúnle̱'a zrin, dxe'a gunne xue le̱n Dios da naca chee̱le le'e, ne da naca chee̱ bi bíchedxu ca' ca' zaj zre̱'e̱ Laodicea, ne da naca chee̱ xúgute̱ bi bíchedxu ca' quebe ne xelelé'ene̱' neda' caníqueze.
COL 2:2 Dxaca lazra' xeledipa lazre̱', ne xelaque̱' tuze lu xel-la zri'i lazre', ne xelaque̱' benne' gunní'a lu xichaj lázrdawe̱', chee̱ xelúnbe'e̱ da nagache chee̱ Xradxu Dios da nácaqueze Cristo.
COL 2:3 Lu na' Le̱' zaj de̱ ca naca xel-la gunní'a chee̱ xel-la sina, ne xel-la dxéajni'i.
COL 2:4 Dxapa' le'e da nigá chee̱ quebe xelezí xe̱ le'e benne' ca' zaj neze xrgúe̱' ca dxuluchálaje̱'.
COL 2:5 Lácala quebe zúale̱tea' le'e caníqueze, naca na cáte̱ze zúale̱na' le'e lu be' nácaqueza', na' dxebéle̱'e̱da' dxenda' dxunle da xlátaje̱, ne ze̱ cháchale ca dxeajlí lázrele Cristo.
COL 2:6 Chee̱ le̱ na', ca be̱nle, guzí' lu na'le Xránadxu Jesucristo, cá'anqueze dxal-la' gunle súale̱le Le̱'.
COL 2:7 Dxal-la' gácale ca tu xaga da dxudé lue na sítujla lu da naca chee̱ Cristo. Cá'anqueze dxal-la' gácale ca tu xu'u da dxe' lane lu da naca chee̱' Le̱', chee̱ se̱ cháchale ca dxeajlí lázrele Le̱', ca blé'entu' le'e, na' dxál-la'queze xe̱le Dios: Xcalenu'.
COL 2:8 Le guxúe cuínale. Quebe güele lataj xelezí xe̱ benne' ca' le'e, xuluchínene̱' xel-la sina chee̱ bénneache, ne dizra' cale̱la, ca naca da dxulusé̱dequeze bénneache, ne ca zaj naca da ca' dxácaqueze lu xe̱zr la xu nigá, ne quegá ca naca chee̱ Cristo.
COL 2:9 Dute̱ ca naca Dios nácaqueze Cristo.
COL 2:10 Nápale le'e xúgute̱ da naca chee̱' lawe' da nácaquezle be̱l-la' dxen chee̱ Le̱'. Le̱' dxenná be'ene̱' xúgute̱ be' da dxelenná bea na, ne xúgute̱ be' da zaj napa na xel-la waca.
COL 2:11 Cá'anqueze, lawe' da nácale tuze nen Cristo nácale bi chee̱ Dios. Quebe guca chee̱le ca da na' belúnqueze benne' judío ca', gulechugue̱' late' be̱l-la' dxen chee̱ bi biu chee̱' ca', da na' dxulé'e na zaj nácabe' chee̱ Dios. Bedúa dute̱ da naca chee̱ be̱la' dxen chee̱le da naca sban, da guca na ne̱ chee̱ da be̱n Cristo lu xichaj lázrdaule. Be̱ne̱' nácale bi chee̱ Dios.
COL 2:12 Gate gudxúale nisa guca chee̱le ca guca chee̱ Cristo gate bgache̱' lu xe̱dxu ba, na' cá'anqueze guca chee̱le ca guca chee̱ Le̱' gate bebane̱' ládujla benne' gate. Caní guca chee̱le lawe' da guxeajlí lázrele xel-la waca chee̱ Dios, Bénnea' bsebane̱' Cristo ládujla benne' gate ca'.
COL 2:13 Gate nate gúcale le'e ca benne' gate lu dul-la da gubágale, ne lu be̱la' dxen sban chee̱le da quebe ne xedúa na. Na'a Dios ba nunne̱' le'e xel-la nabán tu zren nen Cristo, ne ba bnite lawe̱' xúgute̱ dul-la da gubágale.
COL 2:14 Dios bzria xi'e̱ ca naca da nabágadxu chee̱ xúgute̱ da nadxixruj bea na da gula da buluzría xi na dxi'u. Bebéaje̱' na chalá'ala, ne bde̱'e̱ na le̱'e̱ xaga béguaj ca tu da gubaga' Cristo.
COL 2:15 Gate gute Cristo le̱'e̱ xaga béguaj begüe̱' ca naca xel-la dxenná bea, ne xel-la waca chee̱ be' xriwe̱' ca', na' blé'ene̱' da ca' láwela gubáz chee̱ xabáa ca' lawe' da gunná bé'ene̱' na.
COL 2:16 Chee̱ le̱ na', quebe nu dxal-la' si tizra' le'e ca naca da dxe'aj da dxágule, ne ca zaj naca zra laní, ne ca naca laní chee̱ beu' dxe'ene, ne ca zaj naca zra dxupá'anale.
COL 2:17 Xúgute̱ da caní zaj naca na ca tu zrúl-laze chee̱ da zaj zéaje̱ da ca'.
COL 2:18 Quebe güele lataj nu cua da nucueza Dios chee̱le le'e, ne̱ chee̱ da dxululé'e benne' ca', benne' dxeléquene̱' zaj naque̱' dxexruj lazre' lawe' da dxulucá'ana szrene̱' gubáz chee̱ xabáa ca', ne dxuluchálaje̱' chee̱ da quebe ne xelelé'ene̱', ne dxulucá'ana szren cuine̱' ca naca xel-la sina chee̱ bénneacheze da zaj nape̱'.
COL 2:19 Quebe zaj de̱'e̱ Cristo, Bénnea' naque̱' xichaj be̱l-la' dxen da nácadxu dxi'u, na' Le̱' dxusegule̱' dute̱ be̱l-la' dxen na', ne dxugawe̱' na, ne dxune̱' na tuze du ca naca na, chee̱ gaca na ca dxaca lazre' Dios.
COL 2:20 Naca chee̱le ca naca chee̱ tu benne' ba nate lawe' da nácale be̱l-la' dxen chee̱ Cristo, chee̱ québedxa gunle ca zaj naca da ca' dxácaqueze lu xe̱zr la xu nigá. Na'a, ¿bizr chee̱ na' dxedale ca benne' ne zaj nácaqueze̱' chee̱ xe̱zr la xu nigá, ne dxunle ca da dxelenná bea bénneache.
COL 2:21 Dxelenné̱': Quebe guchínenu' da nigá. Quebe gagu' da ca'. Quebe chajtáu' da na'.
COL 2:22 Xúgute̱ da nadxixruj bea caní dxuluchalaj na chee̱ da ca' dxeledé chee̱ na gate dxuchínedxu na, ne zaj nácaze na da dxelenná bea bénneache, ne da dxuluse̱de bénneache.
COL 2:23 Da li dxeleque bénneache zaj naca na sina da nadxixruj bea caní, lawe' da dxuluse̱de na bénneache xelúe lá'ane̱' Dios, ne xelaque̱' dxexruj lazre', ne xelenná be'ene̱' be̱l-la' dxen chee̱'. Quebe bi culuén zaj napa na chee̱ xelenná be'e na xel-la dxezá lazre' sban ca' chee̱ bénneache.
COL 3:1 Le'e nácale ca benne' ba belexebán tu zren nen Cristo. Chee̱ le̱ na' le sa lazre' da zaj zua xabáa, naga dxe' Cristo chalá'a xabe̱la chee̱ Dios.
COL 3:2 Le gulaba lazre' chee̱ da zaj de̱ xabáa, quegá chee̱ da zaj de̱ lu xe̱zr la xu.
COL 3:3 Nácale ca benne' ba zaj nate, na' xel-la nabán chee̱le nuzúa chawe' Dios naga zua Cristo.
COL 3:4 Cristo nácaqueze xel-la nabán chee̱dxu, na' gate xelá' Le̱', cá'anqueze le'e gunle tu zren Le̱' lu xel-la szren chee̱'.
COL 3:5 Chee̱ le̱ na', le xebéaj ca tu da nate xúgute̱ da zaj zua lu xichaj lázrdaule da zaj naca na chee̱ xe̱zr la xu nigá, ca naca xel-la dxichaj na xrba chee̱ xel-la nuchaga na', ne da sban, ne xel-la dxezá lazre' da sban ne da cale̱la ca', ne xel-la dxucude', lawe' da naca da dxucude bénneache ca dios chee̱queze̱'.
COL 3:6 Xúgute̱ da caní dxelún benne' quebe dxuluzúe̱' dizra' chee̱ Dios, na' chee̱ le̱ na' gudé Dios benne' ca' lu da ba xa'.
COL 3:7 Cá'anqueze le'e be̱nle xúgute̱ da caní gate nate.
COL 3:8 Na'a, québedxa gunle xúgute̱ da caní: Xel-la dxezrá'a, ne xel-la xichaj zra'a, ne xel-la dxecuide ljwezre. Québedxa nne̱le dizra' schanni'. Québedxa gucháchale ljwézrele.
COL 3:9 Quebe si xe̱ ljwézrele tule xetule, lawe' da ba bzúale chalá'ala da gúcale nédxute̱, ne ca naca da be̱nle.
COL 3:10 Nácale ca benne' cube, lawe' da dxuxucube Dios le'e chee̱ gácale ca nácaqueze Dios, Bénnea' be̱ne̱' le'e, ca zrindxa gúnbea xánnele Le̱'.
COL 3:11 Lau Dios québedxa bi zaca che nácadxu benne' griego, che benne' judío, u che nácadxu benne' zaj nadxugu lu be̱l-la' dxen chee̱' da dxulé'e na zaj nababe̱' chee̱ Dios, che benne' quebe zaj nape̱' da na' dxulé'e na, u che nácadxu benne' zitu', che benne' ca' zaj zre̱'e̱ xi'a xe̱gu ca', u che nácadxu benne' zaj nada'u, che benne' quebe zaj nada'u. Da zaca na naca na che naca Cristo benne' xíchajdxu, ne che zue̱' lu xichaj lázrdaudxu.
COL 3:12 Dios nazri'ine̱' le'e, ne guqué̱'e̱ le'e chee̱ gácale bi chee̱' ca'. Chee̱ le̱ na' le gaca: Benne' dxexache lazre', ne benne' zri'i lazre', ne benne' dxexruj lazre', ne benne' chawe' lazre', ne benne' zren lazre'.
COL 3:13 Le gácale̱ ljwézrele tule xetule, ne le gunite lau chee̱le tule xetule, che núlale dxezrá'a ljwézrele. Ca be̱n Cristo, bnite lawe̱' chee̱le, cá'anqueze le gun le'e chee̱ ljwézrele.
COL 3:14 Da dxundxa na ba xen, le zri'i ljwézrele lawe' da naca xel-la zri'i lazre' da dxun na dxi'u tuze, ne li lazre'.
COL 3:15 Xel-la dxebeza zri lazre' da dxunna Dios dxi'u dxal-la' nna bea na lu xichaj lázrdaudxu, lawe' da bláwizra Dios le'e chee̱ súale lu xel-la dxebeza zri lazre' chee̱', ne gácale ca tuze be̱l-la' dxen. Cá'anqueze dxal-la' xe̱le Dios: Xcalenu'.
COL 3:16 Dizra' chee̱ Cristo dxal-la' guzúa xánnele lu xichaj lázrdaule chee̱ séquele guzéajni'ile, ne gusízre ljwézrele nen dute̱ xel-la sina chee̱ Dios. Lu dute̱ xel-la dxezaca ba lazre' le gul-la lau Dios salmo ca', ne da dxue lá'anale Dios, ne da ca' dxuzúa Be' Lá'azxa xichaj lázrdaule.
COL 3:17 Bítete̱ze da gunle, u da nnale, le gun xúgute̱ na lu La Xránadxu Jesús, ne xe̱le Xradxu Dios: Xcalenu', ne̱ chee̱ Le̱'.
COL 3:18 Le'e, nu'ula, le guzúa dizra' chee̱ benne' chee̱ chee̱le, lawe' da naca na da dxal-la' xelún benne' dxeajlí lazre̱' Xránadxu.
COL 3:19 Le'e, benne' biu, le zri'i zrú'ulale, ne quebe xexitaj lázrele le̱'.
COL 3:20 Le'e, bi cuide', le guzúa dizra' chee̱ xra xrnale lu xúgute̱ da dxelenné̱', chee̱ gunle da dxezaca ba lazre' Xránadxu.
COL 3:21 Le'e, xruze xrna', quebe téte̱lale xel-la snia nen zrí'inele, chee̱ quebe xelate ni'a na'be'.
COL 3:22 Le'e, benne' zaj nada'u, le guzúa dizra' xúgute̱ da xelenná xránale lu xe̱zr la xu nigá, quegaze gate dxelenná'tee̱', chee̱ xeléquene̱' le'e xrlátaje, san le gun da ca' du lázrele, ne le zrebe Dios.
COL 3:23 Bítete̱ze da gunle, le gun na du lázrele, ca nu benne' dxune̱' zrin chee̱ Xránadxu, ne quegá zrin chee̱ beniácheze.
COL 3:24 Lácala dxunle zrin nigá chee̱ bénneache, nézele gunna Xránadxu lazruj chee̱le da dxal-la' sile lu zra na', lawe' da dxunle zrin chee̱ Cristo, Bénnea' nácaqueze̱' Xránale.
COL 3:25 Nu benne' dxune̱' da cale̱la, wazi'e̱ lazruj chee̱ da cale̱la nune̱' lawe' da quebe dxuchá Dios ca da dxune̱' chee̱ tu xetú benne'.
COL 4:1 Le'e, benne' nácale xrane bénneache, dxal-la' gácale xlátaje̱, ne li lazre' ca dxuchínele benne' ca' ná'ule. Le gusá lázrele, cá'anqueze le'e, zua Xránale xabáa.
COL 4:2 Le'e, bi bícha'dau', le guchálajle̱queze Dios, súale ban lazre', ne xe̱le Dios: Xcalenu'.
COL 4:3 Cá'anqueze, le naba lau Dios waláz chee̱ntu', chee̱ gácale̱ Xránadxu netu' chee̱ séquentu' guchálajntu' xrtizre̱', ne guzéajni'intu' bénneache ca naca da nagache ca naca chee̱ Cristo. Lawe' da dxuna' da caní ne xu'a lizre xia nigá.
COL 4:4 Le naba lau Dios chee̱ séqueda' guzéajni'i xánneda' bénneache ca dxal-la' guna'.
COL 4:5 Le gaca sina ca dxunle chee̱ benne' ca' quebe dxeleajlí lazre̱' Cristo, guchine xánnele zra ca' dxunna Dios le'e.
COL 4:6 Dizra' dxuchálajle dxal-la' gaca na xrlátaje, ne da xelexezaca ba lazre' bénneache, na' dxal-la' nézele ca xeché̱bele chee̱ tu tu benne' ca' gate bi dxelenábene̱' le'e.
COL 4:7 Tíquico, bi bíchedxu nazrí'i lázredxu guzenbe' le'e ca naca da dxaca chia'. Nácabe' tu bi li lazre' dxácale̱nbe' neda', ne dxunbe' zrin chee̱ Xránadxu tu zren nen neda'.
COL 4:8 Chee̱ le̱ na', dxusel-la'-be' naga zúale, chee̱ guzenbe' le'e ca dxaca chee̱ntu', ne chee̱ gutípabe' lázrele.
COL 4:9 Cá'anqueze zéajle̱ Onésimo le̱be', naque̱' bíchedxu li lazre', benne' nazrí'i lázredxu, ne naque̱' benne' walázr chee̱le. Benne' caní xuluzenne̱' le'e ca naca da dxaca nigá.
COL 4:10 Aristarco, benne' xú'ule̱ne̱' neda' lizre xia, dxugape̱' le'e diuzre, ne cá'anqueze dxun Marcos, bi xrtia Bernabé. Ba bzéajni'ida' le'e ca dxun Marcos. Che waza'be' xedajnná'abe' le'e, le si' lu na'le le̱be' cháwe'dau'.
COL 4:11 Cá'anqueze bénnea' le̱' Jesús dxugape̱' le'e diuzre, bénnea' lé̱queze̱' Justo. Benne' zan benne' judío dxeleajlí lazre̱' Cristo, san benne' canize ládujla benne' judío ca' dxelune̱' zrin tu zren nen neda', na' dxuzénentu' bénneache ca xelezéquene̱' xelu'e̱ naga dxenná bea Dios, na' dxuluzúe̱' neda' tu lu da ba neza zrente̱.
COL 4:12 Dxugapa Epafras le'e diuzre. Naque̱' we̱n zrin chee̱ Cristo, ne benne' walázr chee̱quezle. Dxenábaqueze̱' lau Dios chee̱le le'e chee̱ se̱ cháchale, ne guzúa cuínale du lázrele chee̱ gunle da dxaca lazre' Dios.
COL 4:13 Neda' dxexeche̱ba' chee̱ Epafras, dxe'e̱ gunne xue chee̱le le'e, ne chee̱ bi bíchedxu zaj zre̱'e̱ xe̱zre Laodicea, ne xe̱zre Hierápolis.
COL 4:14 Dxugapa le'e diuzre Lucas, bénnea' dxexune̱' benne' we̱' ca', ne naque̱' benne' nazrí'i lazra'. Cá'anqueze dxugapa Demas le'e diuzre.
COL 4:15 Le gugapa diuzre bi bíchedxu zaj zre̱'e̱ xe̱zre Laodicea. Cá'anqueze le gugapa diuzre Ninfas, ne bi bíchedxu ca' dxelezrague̱' lizre̱'.
COL 4:16 Ca te gulábale le'e xiche nigá, le sel-la na chee̱ xululaba bi bíchedxu ca' zaj zre̱'e̱ Laodicea na. Cá'anqueze le gulaba le'e xiche da ze za na Laodicea.
COL 4:17 Le xe̱ Arquipo da nigá: Bxue xanne' gunu' cháwe'dau' ca naca zrin chee̱ Xránadxu da bzue̱' lu na'u.
COL 4:18 Neda' Pablo dxuzúaja' da nigá nen ná'aqueza'. Dxugapa' le'e diuzre. Le gusá lázrele xu'a lizre xia. Dxenaba' lau Dios gune̱' chee̱le da chawe'. ¡Ca'an gaca na!
1TH 1:1 Neda', Pablo, ne Silvano, ne Timoteo dxugápantu' le'e diuzre. Dxuzúaja' da nigá chee̱le le'e, bi bicha', nazrágale chee̱ Cristo lu xe̱zre Tesalónica, ne nabábale chee̱ Xradxu Dios, ne chee̱ Xránadxu Jesucristo. Dxenaba' lau Xradxu Dios ne lau Xránadxu Jesucristo gune̱' chee̱le da xrlátaje, ne gunne̱' le'e xel-la dxebeza zri lazre'.
1TH 1:2 Dxe̱quezentu' Dios xcalenu' ca naca chee̱ xúgute̱le le'e, ne dxenábantu' gaca da chawe' chee̱le le'e gate dxuchálajle̱ntu' Le̱'.
1TH 1:3 Lau Xradxu Dios dxeajsá lázrentu' ca be̱nle zrin dute̱ lu xel-la dxeajlí lazre' chee̱le, ne ca be̱nle zrin chee̱ Cristo lu dute̱ xel-la zri'i lazre' chee̱le, ne ca ze̱ cháchale ca dxebeza lázrele súale̱le Xránadxu Jesucristo.
1TH 1:4 Le'e, bi bicha', Dios nazri'ine̱' le'e, na' nézentu' gucá'a Le̱' le'e.
1TH 1:5 Gate bchálajntu' dizra' chawe' chee̱ Cristo naga zúale, quebe be̱ntu' na nen dízra'ze, san nen dute̱ xel-la waca chee̱ Be' Lá'azxa bchálajntu', ne lu dute̱ xel-la dxuxrén lazre' chee̱ntu'. Nézquezle ca be̱ntu' zrin nigá ládujla le'e lawe' da nazrí'ile̱'e̱ntu' le'e.
1TH 1:6 Le'e bé̱nquezle ca be̱ntu' netu', ne ca be̱n Xránadxu, na' guzile dizra' na' lu dute̱ xel-la dxebé chee̱le da be̱nna Be' Lá'azxa le'e, lácala gudéle̱'e̱le xel-la zi'.
1TH 1:7 Caní guca, nácale tu da dxulé'e na ca dxal-la' xelaca xúgute̱ benne' dxeleajlí lazre̱' Cristo naga nababa Macedonia, ne naga nababa Acaya.
1TH 1:8 Caní guca, bzenle le'e benne' ca' dizra' chee̱ Xránadxu. Na'a quegá tuze benne' zaj zre̱'e̱ Macedonia, ne Acaya, san cá'anqueze benne' ca' zaj zre̱'e̱ xúgute̱ xe̱zre zaj nézene̱' ca dxeajlí lázrele Dios, na' québedxa dxun na ba xen guzénentu' le̱'.
1TH 1:9 Benne' caníqueze dxuluchálaje̱' ca guca gate bedajnná'antu' le'e ne ca guzí' lu na'le netu', ne ca bsanle bedau' xiaj xaga ca' chee̱ bábale chee̱ Dios, na' guzú laule dxunle zrin chee̱ Dios ban, Benne' li.
1TH 1:10 Cá'anqueze dxuluchálaje̱' ca dxebézale zra xelá' Jesús, ze̱'e̱ xabáa. Le̱' naque̱' Zri'ine Dios, na' Dios bsebane̱' Le̱' ládujla benne' gate ca'. Lé̱queze̱' guselé̱' dxi'u lu da ba xa' zrente̱ da za za' da sel-la Dios lu dute̱ xel-la dxezrá'a chee̱'.
1TH 2:1 Le'e, bi bicha', ba nézquezle le'e da be̱ntu' gate na' bedajnná'antu' le'e quebe guca na zrin nite.
1TH 2:2 Nézquezle ca belún benne' zaj zre̱'e̱ xe̱zre Filipos, bulucháchale̱ne̱' netu', ne buluzalje̱' netu' gate na' za xedajnná'antu' le'e, na' Dios be̱xru chache̱' netu' chee̱ bchálajntu' dizra' chawe' chee̱ Cristo naga zúale, lácala buluzaga benne' zan netu'.
1TH 2:3 Quebe guque zréajentu' ca bchálajntu', ne quegá bi da cale̱la guca lázrentu' guntu', ne quegá guca lázrentu' si xe̱ntu' le'e.
1TH 2:4 Dxuchálajquezentu' ca dxaca lazre' Dios lawe' da bxren lazre̱' netu', ne bsebague̱' netu' guchálajntu' dizra' chawe' chee̱ Cristo. Caní dxuchálajntu', quegá chee̱ xelexezaca ba lazre' bénneache san chee̱ xezaca ba lazre' Dios, Bénnea' dxenná'tee̱ da zua xichaj lázrdaudxu.
1TH 2:5 Nézquezle le'e cabata' ne xe̱ntu' le'e dizra' gúladau' da gucá'ana szren na le'e, ne quegá bi gunnantu' chee̱ bi gúnnale netu'. Dios nézquezene̱' naca na da li.
1TH 2:6 Cabata' ne gaca lázrentu' xelapa bénneache netu' ba lá'ana, le'e u benne' xula, lácala wazéquentu' nna bé'entu' le'e bi gúnnale netu' lawe' da nácantu' gubáz chee̱ Cristo.
1TH 2:7 Be̱ntu' le'e xrtandau' ca dxun tu nu'ula dxusegule̱' zrí'ine̱'.
1TH 2:8 Nazrí'ile̱'e̱ntu' le'e, la guzrénentu' gúnnate̱ntu' le'e, quegaze dizra' chee̱ Dios, san cá'anqueze xel-la nabán chee̱ntu'. Caní nazrí'ile̱'e̱ntu' le'e.
1TH 2:9 Le'e, bi bicha', nézquezle ca be̱ntu' zrin du lázrentu' chee̱ gata' da xe'aj gáguntu'. Be̱ntu' zrin te zra ne chizrela chee̱ quebe bi gusaca zi'ntu' le'e dxácate̱ bchálajle̱ntu' le'e dizra' chee̱ Dios.
1TH 2:10 Le'e dxexeché̱bequezle, ne cá'anqueze Dios nézene̱' ca be̱ntu' gate na' zúale̱ntu' le'e, gúcantu' li lazre', ne xlátaje̱, na' quebe nu guzeque' nu nne̱ chee̱ntu'.
1TH 2:11 Cá'anqueze nézquezle ca be̱ntu', bsízrentu' tu tule le'e, ne btípantu' lázrele ca dxun tu xra bidau' chee̱ zrí'ine̱'.
1TH 2:12 Gunná bé'entu' le'e gunle ca dxal-la' xelún benne' zaj naque̱' bi chee̱ Dios, Bénnea' dxuláwizre̱' le'e chee̱ chu'ule naga dxenná be'e̱ lu dute̱ xel-la szren chee̱'.
1TH 2:13 Chee̱ le̱ na' dxé̱quezentu' Dios xcalenu' lawe' da be̱nle ca naca dizra' chee̱ Dios da bchálajntu', ne guzile na ca dizra' chee̱ Dios, ne quegá ca dizra' chee̱ benneácheze. Da li naca na dizra' chee̱ Dios, ne dxun na zrin lu xichaj lázrdaule le'e, na' dxeajlí lázrele Le̱' chee̱ gácale chee̱ Dios dute̱ ca nácale.
1TH 2:14 Le'e, bi bicha', gate gudele xel-la zi' chee̱ da belún benne' walázr chee̱le, guca chee̱le ca guca chee̱ benne' zaj nababa chee̱ Dios naga nababa Judea, benne' ca' zaj naque̱' bi chee̱ Cristo, lawe' da cá'anqueze guledée̱' xel-la zi' chee̱ da belún benne' walázr chee̱' ca', benne' judío.
1TH 2:15 Benne' judío caní belutie̱' Xránadxu Jesús, ca belún benne' judío ca' gate nate, belutie̱' benne' ca' gulenné̱' waláz chee̱ Dios, na' benne' caní gulebeaje̱' netu' lázrentu'. Quebe dxelune̱' da dxezaca ba lazre' Dios, ne dxeledábague̱' xúgute̱ bénneache,
1TH 2:16 na' gate dxaca lázrentu' guchálajle̱ntu' benne' quebe zaj naque̱' judío chee̱ xelelé̱', quebe dxelunne̱' netu' lataj. Caní dxelune̱', dxuluzandxe̱' dul-la da zaj nabague̱'. Na'a, ba be̱' Dios lataj dxaca da ba xa' zrente̱ chee̱ benne' ca'.
1TH 2:17 Le'e, bi bicha', gate becuásentu' naga zúale tu chi'i, lácala québedxa blé'entu' le'e, nuzúaquezentu' le'e lu lázrdauntu', ne guzá lázrele̱'e̱ntu' xedajnná'antu' le'e.
1TH 2:18 Guca lázrentu' xídantu', na' neda', Pablo, guca lazra' xida' tu chupa lasa, na' bzaga Satanás neda'.
1TH 2:19 ¿Bizra da na' dxunna na netu' xel-la dxebeza lazre', ne xel-la dxebé, ne da dxuzúa na netu' lu da ba neza, ne da dxunna bea na zua da si'ntu' lu na' Dios? Lé'equeze gácale da caní lu zra xelá' Xránadxu Jesucristo.
1TH 2:20 Awe'. Da nácale le'e gun na si'ntu' da xabáa lau Dios, ne súantu' lu da ba neza.
1TH 3:1 Nadxa gate québedxa guca guchaga launtu' lawe' da quebe bi bénentu' ca dxaca chee̱le, na' gúquentu' xegá'ana chúpantu' lu xe̱zre Atenas,
1TH 3:2 na' sél-lantu' bi bíchedxu Timoteo xedajnná'abe' le'e, lawe' da naca le̱be' tu bi we̱n zrin chee̱ Dios, ne ba be̱nbe' zrin tu zren nen netu', bchálajntu' dizra' chawe' chee̱ Cristo, na' wazéquebe' guzé̱ cháchabe' le'e, ne gutípabe' lázrele ca dxeajlí lázrele Cristo,
1TH 3:3 chee̱ quebe gate ni'a na'le lawe' da dxedentu' lu da ste̱be caní. Le'e nézquezle dxal-la' tedxu xel-la zi' caní.
1TH 3:4 Gate ne zúale̱ntu' le'e bzéajni'intu' le'e wadéquezdxu lu da zi' da xa', na' ca'an guca, ca ba nézquezle.
1TH 3:5 Chee̱ le̱ na', gate québedxa bzúeda' guchaga lawa' lawe' da quebe bi benda' chee̱le, na' gusel-la' nu bedajnaba le'e ájala dxaca chee̱le lu xel-la dxeajlí lazre' chee̱le Cristo, lawe' da bzreba' ga gaze xucuasa da xriwe̱' le'e lu neza chee̱ Dios, na' gaca níteze zrin be̱ntu' ga na'.
1TH 3:6 Na'a ba belá' Timoteo ga ni zúantu', ze zabe' Tesalónica, ne ze núabe' dizra' chawe' ca naca xel-la dxeajlí lazre', ne xel-la zri'i lazre' chee̱le. Dxe̱be' netu' dxeajsá lázrquezle le'e netu' nen dute̱ xel-la zri'i lazre', ne dxezá lázrele̱'e̱le lé'ele netu', ca netu' dxaca lázrentu' le'entu' le'e.
1TH 3:7 Chee̱ le̱ na', bi bicha', dxácate̱ dxedentu' lu da ste̱be caní, ne lu da zi' da xa', zúantu' xel-la dxebé lawe' da nézentu' ze̱ cháchale ca dxeajlí lázrele Cristo.
1TH 3:8 Na'a naca chee̱ntu' ca naca chee̱ tu benne' bezúatee̱' chawe' lawe' da nézentu' ze̱ cháchale lu da naca chee̱ Xránadxu.
1TH 3:9 ¿Ájazra guntu' xé̱le̱'e̱ntu' Dios: Xcalenu' ca dxal-la' guntu' waláz chee̱le le'e, ne ca naca xel-la dxebé nápantu' lau Dios ne̱ chee̱le le'e?
1TH 3:10 Te zra, ne chizrela dxata' xúentu' Dios gunne̱' netu' lataj xedajnná'quezentu' le'e, chee̱ gácadxale li lazre' ca dxeajlí lázrele Cristo.
1TH 3:11 Dxenábantu' lau Xradxu Dios, ne lau Xránadxu Jesucristo gácale̱ne̱' netu' chee̱ séquentu' xedajnná'antu' le'e.
1TH 3:12 Dxenábantu' Le̱' chee̱ zrí'idxa ljwézrele tule xetule, ne chee̱ zrí'idxale xúgute̱ bénneache ca nazrí'intu' netu' le'e.
1TH 3:13 Dxenábantu' Le̱' guzúa chúchue̱' lázrdaule, chee̱ gácale benne' li lazre', ne benne' lá'azxa lau Xradxu Dios lu zra na' gate xelá' Xránadxu Jesús nen xúgute̱ bi chee̱ Le̱'.
1TH 4:1 Le'e, bi bicha', dxata' xúentu' le'e, ne dxusebágantu' le'e da nigá lu La Xránadxu Jesús. Le gúndxaqueze da blé'entu' le'e gunle, da na' dxezaca ba lazre' Dios.
1TH 4:2 Nézquezle le'e da bzéajni'intu' le'e ne̱ chee̱ Xránadxu Jesús.
1TH 4:3 Da dxaca lazre' Dios naca na guzúa cuínale lu na' Le̱', ne québedxa gunle da sban,
1TH 4:4 na' súale̱le zrú'ulaquezle tu tule le'e lu xel-la lá'azxa chee̱ Xránadxu, ne gápale le̱' ba lá'ana,
1TH 4:5 ne quebe súale lu xel-la dxezá lazre' chee̱ da sban ca dxelún benne' quebe zaj nunbe'e̱ Dios.
1TH 4:6 Ca naca chee̱ da nigá, netule le'e quebe dxal-la' si xe̱le bi bíchele, quebe gunle da sban chee̱', lawe' da xebéaj lazre' Xránadxu chee̱ xúgute̱ benne' dxelune̱' da caní, ca ba bzéajni'intu' le'e.
1TH 4:7 Dios bláwizre̱' dxi'u chee̱ gundxu da xrlátaje, ne quegá gundxu da sban.
1TH 4:8 Caní naca, che nu benne' dxuzúe̱' chalá'ala ca naca da nigá, quegá tuze bénneache dxuzúe̱' chalá'ala, san Diósqueze dxuzúe̱' chalá'ala, Bénnea' nunne̱' dxi'u Be' Lá'azxa.
1TH 4:9 Ca dxal-la' zri'i ljwézrele quebe dxun na ba xen guzúaja' chee̱le, lawe' da ba blé'equeze Dios le'e chee̱ zri'i ljwézrele tule xetule.
1TH 4:10 Caníqueze dxal-la' zri'ile xúgute̱ bi bíchedxu zaj zre̱'e̱ xe̱zre ca' zaj nababa xe̱zr la xu Macedonia. Dxata' xuentu' le'e, bi bicha', chee̱ zrí'idxa ljwézrele.
1TH 4:11 Le gun ba xuzre súale lu xel-la dxebeza zri lazre', ne gunle da naca cheé̱zquezle, ne gunle zrin nen ni'a na'le ca ba guzrentu' le'e,
1TH 4:12 chee̱ xelapa benne' xula le'e ba lá'ana, ne chee̱ quebe bi xázrjele le'e.
1TH 4:13 Le'e, bi bicha', dxaca lázrentu' nézele ca naca chee̱ bi bíchele zaj nate, chee̱ quebe xewine lázrele ca dxelún xezícadxa benne' ca' quebe bi dxelebeza lazre̱'.
1TH 4:14 Dxéajle̱dxu gute Jesús, ne bebane̱' ládujla benne' gate, ne cá'anqueze dxéajle̱dxu Dios gusebane̱' benne' gate ca' guleajlí lazre̱' Jesús, chee̱ xelezúale̱ne̱' Le̱'.
1TH 4:15 Chee̱ le̱ na' dxe̱ntu' le'e da na' ble'e Xránadxu, gunné̱': Dxi'u naca bandxu gate xelá' Xránadxu, quebe cheajsúale̱dxu Le̱' nédxula ca benne' ca' zaj nate.
1TH 4:16 Xránaquezdxu ze̱'e̱ xabáa, na' cuezre xe̱'e̱ nen dute̱ xel-la dxenná bea chee̱', na' xendxu chi'i gubáz blau chee̱ xabáa, ne chi'i luzu da dxulucuezre̱' waláz chee̱ Dios. Nadxa benne' gate ca', benne' guléajle̱'e̱ chee̱ Cristo xelexebánqueze̱' za'a le̱'.
1TH 4:17 Te na', dxi'u na' naca bandxu xeché̱'e̱ dxi'u tu zren nen benne' ca' ládujla beuj chee̱ xezrágadxu Xránadxu lu be'. Ca'an gaca súale̱dxu Xránadxu chadía chacanna.
1TH 4:18 Chee̱ le̱ na' le gutipa lázrele tule xetule nen dizra' caní.
1TH 5:1 Na'a, ca naca chee̱ bi zra, u bi iza xelá' Xránadxu, quebe dxun na ba xen guzúaja' chee̱le, bi bicha'.
1TH 5:2 Ba nézquezle le'e zrin zra xelá' Xránadxu gate québela nu dxebeza Le̱', ca za tu benne' gubán chizrela.
1TH 5:3 Gate dxelenná bénneache: Cháwele̱'e̱ dxaca chee̱dxu, ne quebe bi dxuchixre chee̱, nadxa za da guzría xi na benne' ca', ca za xel-la dxudía chee̱ tu nu'ula gate zue̱' zi'i, ne quebe xelelé̱' lu da na'.
1TH 5:4 Le'e, bi bicha', quebe zúale lu da chul-la, chee̱ quebe gaca chee̱le lu zra na' xelá' Xránadxu ca dxaca chee̱ tu benne' dxu'u gubán lizre̱'.
1TH 5:5 Xúgute̱le le'e dxunle xrlátaje, da naca chee̱ xel-la naxaní', ne chee̱ te zra. Quebe dxundxu da cale̱la, da naca chee̱ chizrela, ne chee̱ da chul-la.
1TH 5:6 Chee̱ le̱ na' quebe dxal-la' gácadxu ca benne' la wase' ca dxelún benne' xula, san dxal-la' gácadxu ban lazre', ne guzéajni'i cuínadxu.
1TH 5:7 Benne' dxelase, chizrela dxelásie̱', ne benne' dxelezuzre, chizrela dxelezúzrequeze̱'.
1TH 5:8 Nácadxu dxi'u chee̱ te zra, na' dxal-la' guzéajni'i cuínaquezdxu. Che dxeajlí lázredxu Xránadxu, ne zri'idxu Le̱', da nigá gaca na chee̱dxu ca tu zra lana benne' zeje̱' wedil-la da naca na xia. Cá'anqueze che dxebeza lázredxu ladxu, da nigá gaca na chee̱dxu ca tu lapa xia ca da dxuzúa tu benne' zeje̱' wedil-la xíchaje̱'.
1TH 5:9 Dios quebe be̱ne̱' chee̱dxu tedxu lu da ba xa' da sel-le̱' lu xel-la dxezrá'a chee̱. Be̱ne̱' chee̱dxu zrué'edxu xel-la weselá ne̱ chee̱ Xránadxu Jesucristo.
1TH 5:10 Jesucristo gutie̱' waláz chee̱dxu chee̱ gaca bandxu tu zren nen Le̱', che naca bandxu, u che ba nátedxu gate zrin zra na'.
1TH 5:11 Chee̱ le̱ na' le gutipa lázrele, ne le guzé̱ chacha ljwézrele tule xetule, ca ba dxúnquezle.
1TH 5:12 Le'e, bi bicha', dxata' xúentu' le'e gápale ba lá'ana benne' dxelune̱' zrin ládujla le'e, benne' ca' gucá'a Xránadxu chee̱ xelenná be'ene̱' le'e, ne xulusé̱dene̱' le'e.
1TH 5:13 Dxal-la' gápale benne' ca' ba lá'ana, ne zri'ile le̱' lawe' da dxelune̱' zrin chee̱ Dios. Le sua lu xel-la dxebeza zri lazre' tule xetule.
1TH 5:14 Cá'anqueze dxusebágantu' le'e, bi bicha', gusízrele benne' ca' quebe dxelaca lazre̱' xelune̱' zrin, ne gutipa lázrele benne' ca' dxelate ni'a ne̱'e̱, ne gácale̱le benne' quebe zaj ze̱' chacha, ne gácale zren lazre' nen xúgute̱ bénneache.
1TH 5:15 Le guxúe xanne' cuínale chee̱ quebe gunle da cale̱la chee̱ nu benne' dxune̱' chee̱le da cale̱la, san le gun ba xuzre gúnquezle da xrlátaje, tule xetule, ne chee̱ xúgute̱ bénneache.
1TH 5:16 Le béquezle.
1TH 5:17 Le guchálajle̱quezle Dios.
1TH 5:18 Le xe̱ Dios: Xcalenu' ca naca xúgute̱ da dxaca chee̱le. Dxal-la' gunle da nigá lawe' da naca na da dxaca lázrqueze Dios gunle le'e, lawe' da nácale bi chee̱ Jesucristo.
1TH 5:19 Quebe guzágale da dxun Be' Lá'azxa.
1TH 5:20 Quebe guzúale chalá'ala dizra' da nunezruj Be' Lá'azxa nu bi bíchedxu ca'.
1TH 5:21 Le guchi'a xanne' xúgute̱ da ca', na' le si' da naca na xrlátaje.
1TH 5:22 Le cuasa lu xúgute̱ da quebe naca na xrlátaje.
1TH 5:23 Dios dxunne̱' dxi'u xel-la dxebeza zri lazre'. Dxenaba' lau Le̱' gune̱' le'e benne' lá'azxaqueze, ne guxúe̱' be' nácaquezle, ne bénne'du xu'ule, ne be̱l-la' dxen chee̱le chee̱ gácale du lazre' lu zra na' xelá' Xránadxu Jesucristo.
1TH 5:24 Bénnea' bláwizre̱' le'e naque̱' li lazre', na' Le̱' gune̱' xúgute̱ da caní.
1TH 5:25 Le'e, bi bicha', le naba lau Dios gácal-lene' netu'.
1TH 5:26 Le gugapa diuzre xúgute̱ bi bíchedxu ca', ne gunídale le̱'.
1TH 5:27 Lau Xránadxu dxusebaga' le'e gulábale xiche nigá láwela xúgute̱ bi bíchedxu ca'.
1TH 5:28 Dxenaba' lau Xránadxu Jesucristo gune̱' chee̱le da chawe'. ¡Ca'an gaca na!
2TH 1:1 Neda', Pablo, nen Silvano, ne Timoteo, dxugápantu' le'e diuzre. Dxuzúaja' da nigá chee̱le le'e, bi bícha'dau', nazrágale chee̱ Cristo lu xe̱zre Tesalónica, ne nácale bi chee̱ Xradxu Dios, ne chee̱ Xránadxu Jesucristo.
2TH 1:2 Dxenaba' lau Xradxu Dios, ne lau Xránadxu Jesucristo gune̱' chee̱le da chawe', ne gunne̱' le'e xel-la dxebeza zri lazre'.
2TH 1:3 Le'e, bi bícha'dau', dxal-la' xé̱quezentu' Dios: Xcalenu' ca naca chee̱le, da dxal-la' guntu' lawe' da ba dxegula xel-la dxeajlí lazre' chee̱le, ne ba zúadxa xel-la nazrí'i lazre' le̱n ljwézrele tule xetule.
2TH 1:4 Chee̱ le̱ na' dxuchálajntu' ca naca chee̱le le'e láwela bi ca' chee̱ Cristo. Dxuchálajntu' ca dxuchaga laule da dxelún benne' ca' zaj nau zi' xuzre̱' le'e, ne ca naca xel-la zi' da dxedele, san nácale zren lazre', ne dxeajlí lázrele Dios.
2TH 1:5 Da nigá dxulé'e na xlátaje̱ naca Dios ca dxuchi'e̱ da dxelún bénneache, dxenné̱' naca chee̱le chu'ule naga dxenná bea Le̱' lawe' da dxedele xel-la zi' chee̱ la' xel-la dxenná bea chee̱'.
2TH 1:6 Xlátaje̱ naca gudé Dios benne' ca' xel-la zi', benne' ca' dxuludée̱' le'e xel-la zi' na'a,
2TH 1:7 na' guzúe̱' le'e naga xezí' lázrele chee̱ xel-la zi' da dxedele na'a. Xezí lázrele tu zren nen netu' gate xelá' Xránadxu Jesús, ze̱'e̱ xabáa nen gubáz blau ca' chee̱ xabáa chee̱'.
2TH 1:8 Ze̱'e̱ nu'e̱ xi' chee̱ gudée̱' lu da ba xa' benne' ca' quebe dxelexúnbe'e̱ Dios, ne quebe dxuluzúe̱' dizra' ca dxenná dizra' chawe' chee̱ Xránadxu Jesucristo.
2TH 1:9 Benne' caní xelecuase̱' naga zua Xránadxu lu xel-la szren chee̱', ne xel-la dxenná bea chee̱', na' xeledée̱' xel-la zi' chee̱ da ba xa' chadía chacanna.
2TH 1:10 Caní gaca gate xelá' Xránadxu lu zra na' chee̱ xulucá'ana szren benne' chee̱' ca' Le̱', na' benne' ca' dxeajlí lazre̱' Le̱' xelape̱' Le̱' ba lá'ana. Le'e gunle benne' ca' tu zren lawe' da guxéajle̱le chee̱ da beché̱bentu'.
2TH 1:11 Chee̱ le̱ na' tu dxuchálajle̱quezentu' Dios ca naca chee̱le, ne dxenábantu' Le̱' gaca chee̱le sile da na' bláwizre̱' le'e sile. Cá'anqueze dxenábantu' lau Dios guchínene̱' xel-la waca chee̱' chee̱ gaca gunle ca naca xúgute̱ da xrlátaje da dxezá lázrele, ne xúgute̱ zrin dxunle ne̱ chee̱ xel-la dxeajlí lazre' chee̱le.
2TH 1:12 Caní gunle, gucá'ana szrenle La Xránadxu Jesucristo, na' Le̱' gape̱' le'e ba lá'ana ne̱ chee̱ xel-la xrlátaje chee̱ Dios chee̱dxu, ne chee̱ Xránadxu Jesucristo.
2TH 2:1 Le'e, bi bicha', ca naca chee̱ zra xelá' Xránadxu Jesucristo chee̱ xutupe̱' dxi'u chee̱ Le̱', dxata' xúentu' le'e
2TH 2:2 chee̱ quebe guchale ca dxéquele, ne quebe súale ste̱be chee̱ bi dizra' xuluchalaj bénneache lácala xelenné̱' naca na da dxunezruj Be' Lá'azxa le̱', u chee̱ xetú bila dizra' xénele, u chee̱ bi xiche xelenné̱' naca na da gusél-lantu' netu', che dxenná na ba belá' Xránadxu.
2TH 2:3 Quebe güele lataj nu si xe̱ le'e, lawe' da xelelá' bénneache xelebéaj xíchaje̱' Dios, ne la' bénnea' dxedábague̱' Dios nédxula gate zrin zra xelá' Xránadxu. Bénnea' dxedábague̱' Dios, na' ba naca chee̱' cuía xíqueze̱',
2TH 2:4 na' tábague̱' xúgute̱ da naca chee̱ Dios, ne xúgute̱ da dxulucá'ana szren bénneache. Gucá'ana szren cuine̱' ca zrinte̱ cheajché'e̱ lu xudau' chee̱ Dios, ne gun cuine̱' ca Diósqueze.
2TH 2:5 ¿Quebe dxeajsá lázrele gúchequeza' le'e da nigá gate na' zúale̱na' le'e?
2TH 2:6 Le'e ba nézele Nu Benne' nuzague̱' bénnea' dxedábague̱' Dios chee̱ quebe le̱'e̱ gate quebe ne zrin zra le̱'e̱.
2TH 2:7 Ba dxun zrin xel-la waca da nagache chee̱ da cale̱la, san zua Nu Benne' nuzague̱' le̱ na na'a, ca zrin zra xecuasa Bénnea' nuzague̱' le̱ na.
2TH 2:8 Nadxa la' bénnea' dxedábague̱' Dios, na' Xránadxu Jesús gutie̱' le̱', guchínene̱' be' da dxuaj na dxu'e̱, ne guzría xi'e̱ le̱', guchínene̱' xel-la naxaní' chee̱ zra ze̱'e̱.
2TH 2:9 Benne' xriwe̱' na' ze̱'e̱ ne̱ chee̱ xel-la dxenná bea chee̱ Satanás, na' lu dute̱ xel-la waca chee̱ na gune̱' da ca' xelunna bea na, ne xel-la waca ca' da zaj naca na we̱n lazre',
2TH 2:10 ne guchínene̱' xúgute̱ da cale̱la ca' chee̱ si xe̱'e̱ benne' ca' xelebía xi'e̱, benne' ca' quebe gulaca lazre̱' xelezí'e̱ da li chee̱ xelelé̱'.
2TH 2:11 Chee̱ le̱ na' Dios dxu'e̱ lataj si xe̱ da cale̱la benne' ca' chee̱ xeléajle̱'e̱ chee̱ da we̱n lazre',
2TH 2:12 chee̱ xelebía xi' xúgute̱ benne' ca' quebe gulaca lazre̱' xeléajle̱'e̱ chee̱ da li, san dxeledánedxene̱' da naca da cale̱la.
2TH 2:13 Netu' tu dxál-la'queze xe̱ntu' Dios: Xcalenu' ca naca chee̱le le'e, bi bícha'dau', nazrí'i Xránadxu le'e, lawe' da gucá'a Dios le'e nédxute̱ chee̱ lale. Be' Lá'azxa ba nune̱' le'e chee̱ Dios lawe' da dxéajle̱le chee̱ da li.
2TH 2:14 Chee̱ gaca chee̱le da nigá Dios ba bláwizre̱' le'e ne̱ chee̱ dizra' chawe' da dxuchálajntu', chee̱ zrué'ele xel-la szren chee̱ Xránadxu Jesucristo.
2TH 2:15 Chee̱ le̱ na', bi bícha'dau', le se̱ chacha, ne quebe gal-la lázrele da ca' bzéajni'intu' le'e caníqueze, ne cá'anqueze lu xiche.
2TH 2:16 Dxenaba' lau Xránadxu Jesucristo, ne lau Xradxu Dios, Bénnea' lu dute̱ xel-la xrlátaje chee̱' bzri'ine̱' dxi'u, ne ba be̱nne̱' dxi'u xel-la dxexúe zren chee̱' tu chi'i gaze, ne tu xel-la dxebeza lazre' li.
2TH 2:17 Dxenaba' Le̱' gutipe̱' lázrele, ne guzé̱ chúchue̱' le'e chee̱ nnale, ne gunle xúgute̱ da xrlátaje.
2TH 3:1 Na'a, bi bícha'dau', le naba Dios gácale̱ne̱' netu', chee̱ zrínzega dizra' chee̱ Xránadxu xúgute̱ xe̱zre ca', ne chee̱ xelezí'e̱ na dute̱ lu xel-la ba lá'ana, ca guca ládujla le'e.
2TH 3:2 Le nábaquezle chee̱ ladxu lu na' benne' ca' dxelune̱' da cale̱la, ne lu na' benne' sban ca', lawe' da quegá xúgute̱ benne' dxeleajlí lazre̱' Cristo.
2TH 3:3 Xránadxu naque̱' li lazre', na' Le̱' guzé̱ chache̱' le'e, ne guxúe̱' le'e chee̱ quebe bi da cale̱la gaca na chee̱le.
2TH 3:4 Dxuxrén lázrentu' Xránadxu gácale̱ne̱' le'e chee̱ gunle ca da dxé̱nentu' le'e, ca ba dxúnquezle.
2TH 3:5 Dxenábantu' lau Xránadxu gácale̱ne̱' le'e chee̱ gápale xel-la zri'i lazre' da gunna Dios le'e, ne gápale xel-la zren lazre' da gunna Cristo le'e.
2TH 3:6 Le'e, bi bícha'dau', lu La Xránadxu Jesucristo dxé̱nentu' le'e quebe gunle tuze nútete̱ze bi bíchedxu quebe dxaca lazre̱' gune̱' zrin, ne quebe dxune̱' ca da bsé̱dentu' le'e.
2TH 3:7 Ba nézele dxal-la' gunle zrin ca be̱ntu' netu' gate na' zúale̱ntu' le'e.
2TH 3:8 Quebe nu chee̱ gudáguntu' cá'aze che nadxu quebe gudízrujntu' na. Bé̱nle̱'e̱quezentu' zrin te zra, ne chizrela chee̱ quebe bsaca zi'ntu' le'e da gáguntu'.
2TH 3:9 Nácaqueze chee̱ntu' nábantu' le'e da gáguntu', san be̱ntu' zrin chee̱ blé'entu' le'e dxal-la' gunle ca bé̱nquezentu' netu'.
2TH 3:10 Gate na' zúale̱ntu' le'e, bdentu' lu na'le da nadxixruj bea nigá: Benne' quebe dxaca lazre̱' gune̱' zrin ca'an gune̱' quebe gawe̱'.
2TH 3:11 Ba bénentu' bál-lale le'e quebe dxunle zrin, na' dxedázele dxuchixre chee̱le da dxaca chee̱ benne' xula.
2TH 3:12 Benne' caní dxixruj be'entu', ne dxusebágantu' le̱' lau Xránadxu Jesucristo chee̱ xelune̱' zrin du lazre̱' chee̱ gata' da xele'aj xelawe̱'.
2TH 3:13 Le'e, bi bicha', le gun da xrlátaje, ne quebe cheajtá lázrele.
2TH 3:14 Che nu benne' quebe dxuzúe̱' dizra' ca da dxennantu' lu xiche nigá, le nna' nu bénnea', ne quebe gunle le̱' tuze, chee̱ gapa stue̱'.
2TH 3:15 Quebe zrá'ale le̱', san le guzéajni'i le̱' ca bi bíchele.
2TH 3:16 Xránadxu naque̱' Bénnea' dxunne̱' dxi'u xel-la dxebeza zri lazre'. Dxenaba' lau Le̱' gúnnaqueze̱' le'e xel-la dxebeza zri lazre' lu xúgute̱ da dxunle, ne súale̱ne̱' xúgute̱le le'e.
2TH 3:17 Neda', Pablo nen ná'aqueza' dxuzúaja' chee̱le da nigá. Da nigá dxunna bea na xúgute̱ xiche da dxuzúajqueza' neda'. Caní dxuzúaja'.
2TH 3:18 Dxenaba' lau Xránadxu Jesucristo gune̱' da chawe' chee̱ xúgute̱le le'e. Ca'an gaca na.
1TI 1:1 Neda', Pablo, naca' gubáz chee̱ Jesucristo lawe' da caní bdxixruj bea Dios, Xra Xránadxu Jesucristo, weselá chee̱dxu, Bénnea' dxebeza lázredxu xelá'tee̱'.
1TI 1:2 Dxuzúaja' da nigá chiu' lue', Timoteo, nacu' ca zrí'inequeza' lawe' da dxeajlí lazru' Cristo. Dxenaba' Xradxu Dios, ne Xránadxu Jesucristo gune̱' chiu' da chawe', ne xexache lazre̱' lue', ne gunne̱' lue' xel-la dxebeza zri lazre'.
1TI 1:3 Ca ba guta' xúeda' lue' gate na' bezá'a naga zu', ne bexá'a naga nababa xe̱zr la xu Macedonia, begá'ana lu xe̱zre Efeso chee̱ nne̱ xúenu' benne' ca' zaj zre̱'e̱ na' québedxa xulusé̱dene̱' da we̱n lazre',
1TI 1:4 ne québedxa xululapa ne̱'e̱ dizra' dxuluzaze benne' ca' ca zaj naca zánete̱ xra xrtawe̱' ca'. Dizra' caní dxulutil-la na bénneache. Quebe naca na da xelácale̱ na bénneache chee̱ xelezé̱ chache̱' ca dxeleajlí lazre̱' Dios. Caní dxenné̱ xúeda' lue' xecha lasa.
1TI 1:5 Dxenné̱ xúeda' lue' gunu' caní chee̱ xelezrí'i ljwezre̱' dute̱ lázrdawe̱', chee̱ quebe bi sua da gagu na zria lázrdawe̱' ca', ne gaca du lazre' ca dxeleajlí lazre̱' Cristo.
1TI 1:6 Bal-la benne' ca' belexecuase̱' lu da caní, na' ba zaj nazi'e̱ dizra' xálaze.
1TI 1:7 Dxelaca lazre̱' xuluxuzájle̱'e̱ da nadxixruj bea Dios, ne quebe dxeléajni'ine̱' da dxuluchálajqueze̱', ne ca naca da ca' dxuluxrén lazre̱'.
1TI 1:8 Nezdxu da nadxixruj bea na naca na xrlátaje che nu benne' dxuchínene̱' na ca naca chee̱ na.
1TI 1:9 Dxal-la' gusá lázredxu quebe bzua Dios da nadxixruj bea na chee̱ nna be'e na benne' xrlátaje ca', san chee̱ nna be'e na benne' ca' dxelune̱' da cale̱la, ne benne' ca' quebe dxuluzúe̱' xrtizre̱'e̱, ne benne' ca' dxelune̱' da zrinnaj, ne benne' we̱n dul-la ca', ne benne' ca' quebe dxelape̱' Dios ba lá'ana, ne quebe dxelapa ba lá'ana da naca chee̱ Dios, ne benne' ca' dxelute xra xrna', ne benne' ca' dxelutie̱' benne',
1TI 1:10 ne benne' ca' dxelune̱' da sban, ne benne' biu ca', benne' dxulugune̱' ljwezre biue̱' ca nu'ula, ne benne' dxelebane̱' benne' ca' chee̱ xelutie̱' le̱' lu na' benne' xula, ne benne' ca' dxelún lazre̱', ne benne' ca' dxelexeche̱be̱' da we̱n lazre', ne benne' ca' dxuluchuque̱' da li.
1TI 1:11 Caní naca da dxulé'e dizra' chawe' da bsebaga Dios neda'. Naque̱' Dios xabáa, Benne' szrente̱.
1TI 1:12 Dxapa' Xránadxu Jesucristo: Xcalenu'. Naque̱' Bénnea' be̱nne̱' neda' xel-la waca chee̱ guna' da nigá, lawe' da dxelé'ene̱' neda' xlátaje̱, na' nuzúe̱' neda' lu zrin chee̱'.
1TI 1:13 Xúgute̱ da caní ba be̱ne̱' chia' lácala gunnía' schanni' chee̱ Cristo gate nate, ne gudáu zi' xuzra' bi chee̱' ca', ne be̱n la' chee̱ benne' ca'. Dios bexache lazre̱' neda' lawe' da quebe ne cheajlí lazra' Cristo, ne quebe guxéajni'ida' da na' be̱na'.
1TI 1:14 Chee̱ le̱ na' Xránadxu, dute̱ lu xel-la zri'i lazre' zren chee̱' bnite lawe̱' chia', ne be̱nne̱' neda' xel-la dxeajlí lazre', ne xel-la zri'i lazre' da nápadxu lawe' da nácadxu bi chee̱ Jesucristo.
1TI 1:15 Da nigá naca na da li, na' xúgute̱ bénneache dxal-la' xeléajle̱'e̱ chee̱ na. Caní dxenná na: Jesucristo ble̱'e̱ lu xe̱zr la xu nigá chee̱ guselé̱' benne' dul-la ca', na' neda' nácadxa' benne' dul-la ca xúgute̱ benne' ca'.
1TI 1:16 Chee̱ le̱ na' Dios bexache lazre̱' neda' chee̱ gulé'e Cristo ca szren naca xel-la zren lazre' chee̱' nen neda', nácale̱'a benne' dul-la, chee̱ gaca' neda' tu da gulé'e na lau xúgute̱ benne' ca' xeleajlí lazre̱' Cristo, na' xelape̱' xel-la nabán chadía chacanna.
1TI 1:17 Chee̱ le̱ na' dxal-la' gápadxu ba lá'ana, ne güe lá'anadxu Bénnea' nna béaqueze̱' chadía chacanna. ¡Cabata' gatie̱', ne quebe gaca lé'edxu Le̱', ne naque̱' Dios tu licha', ne sina! ¡Gaca ba Le̱' chadía chacanna! ¡Ca'an gaca na!
1TI 1:18 Lue', bi chia', Timoteo, dxusebaga' lue' su' wedil-la chee̱ tíl-lale̱nu' da naca chee̱ da cale̱la, ca da buluchalaj nédxute̱ benne' ca', benne' gulenné̱' waláz chee̱ Dios ca dxal-la' gunu' lue'.
1TI 1:19 Be̱xru tipa xel-la dxeajlí lazre' chiu', chee̱ quebe bi sua da gulale na lu xichaj lazrda'u. Bal-la benne' ca' quebe belune̱' caní, na' buluzúe̱' chalá'ala xel-la dxeajlí lazre' chee̱'.
1TI 1:20 Caní guca chee̱ Himeneo, ne chee̱ Alejandro, benne' ca' bdea' neda' lu na' Satanás chee̱ xulusé̱die̱' quebe xelenné̱' schanni' chee̱ Dios.
1TI 2:1 Da dxundxa na ba xen dxenné̱ xúeda' lue', dxal-la' nábale lau Dios gácale̱ne̱' bénneache, ne guchálajle̱le Dios, ne gucá'ana szrenle Le̱', ne nábale Dios gunne̱' le'e da dxexázrjele, ne xe̱le Dios: Xcalenu'. Dxal-la' gunle caní, guchálajle̱le Dios da naca na chee̱ xúgute̱ bénneache.
1TI 2:2 Cá'anqueze dxal-la' nábale Le̱' gácale̱ne̱' benne' xichje ca', benne' dxelenná be'ene̱' bénneache, ne benne' xu'u lawe' ca' chee̱ chadxu chawe', ne súadxu lu xel-la dxebeza zri lazre', ne guzúa cuínadxu lu na' Dios du lázredxu, ne gápadxu ba lá'ana bénneache.
1TI 2:3 Da nigá naca na xrlátaje, ne da dxezaca ba lazre' Dios, weselá chee̱dxu,
1TI 2:4 lawe' da dxaca lazre' Le̱' xelelá xúgute̱ bénneache, ne xelúnbe'e̱ da li.
1TI 2:5 Zua tuze Dios, ne zua tuze wenaba chee̱ bénneache lau Dios, Bénnea' naque̱' Jesucristo, ne cá'anqueze be̱n cuine̱' bénneache.
1TI 2:6 Jesucristo bzua cuine̱' lu xel-la gute chee̱ bexá'awe̱' xúgute̱ bénneache, na' blé'ene̱' da na' ca bzrin zra chee̱ na.
1TI 2:7 Chee̱ le̱ na' bzue̱' neda' gubáz chee̱' chee̱ cu'a lban, ne gulé'eda' benne' ca' quebe zaj naque̱' judío dxal-la' xeleajlí lazre̱' Cristo, ne xelune̱' ca naca da li. Lau Cristo dxexeche̱ba', ne quebe dxun lazra'.
1TI 2:8 Chee̱ le̱ na' dxaca lazra' xuluchálajle̱ xúgute̱ bénneache Dios gátete̱ze na', ne xelechisa ne̱'e̱ dute̱ xel-la li lazre' chee̱' lau Dios, ne quebe xelezré̱'e̱ ljwezre̱', ne quebe xeledíl-lale̱ne̱' ljwezre' ca'.
1TI 2:9 Nu'ula ca' dxal-la' xelácue̱' da naca xlátaje̱, ne ca naca chee̱ da dxelúe lechítaje̱ cuine̱' dxal-la' gaca na xel-la dxexruj lazre', ne xel-la du lazre', ne quegá ca dxulupá'a xíchaje̱', ne quegá lechítaje̱ da naca na oro, ne quegá bga ca', ne quegá zra lane̱' da zácale̱'e̱ na.
1TI 2:10 Dxal-la' xelune̱' da gácale̱ na bénneache, ca dxal-la' xelún nu'ula ca' ba zaj nuzúa cuine̱' lu na' Dios.
1TI 2:11 Nu'ula ca' dute̱ lu xel-la dxexruj lazre' chee̱' dxal-la' xuluzé̱ nague̱' gate nu dxuse̱de xrtizra Dios, ne quebe xelenné̱' chee̱ na.
1TI 2:12 Quebe dxunna' lataj nu'ula gusé̱dene̱' benne' biu ca', ne quebe nna be'ene̱' le̱', san dxal-la' sue' zrize.
1TI 2:13 Caní naca na lawe' da be̱n Dios teca Adán, na' gudé na' be̱ne̱' Eva, nu'ula chee̱ Adán na'.
1TI 2:14 Adán, quebe guzí xe̱ da xriwe̱' le̱', san guzí xe̱ na Eva, nu'ula na', na' gudé guzí xe̱ na le̱', na' be̱ne̱' dul-la.
1TI 2:15 Tu nu'ula gape̱' xel-la weselá che dxezane̱' bidu ca', ne cheajlí lazre̱' Dios, ne nazri'ine̱' Le̱', ne nuzúa cuine̱' lu na' Dios, ne gaque̱' dxexruj lazre'.
1TI 3:1 Da líqueze naca da nigá: Che nu benne' dxezá lazre̱' gaque̱' benne' gusé̱dene̱' bi ca' chee̱ Cristo, tu zrin xrlátaje dxaca lazre̱' gune̱'.
1TI 3:2 Tu benne' dxusé̱dene̱' bi ca' chee̱ Cristo: Dxal-la' gaque̱' benne' quebe bi zua da dxunite na le̱'. Dxal-la' súale̱ne̱' tuze nu'ula. Dxal-la' gaque̱' benne' dxuzéajni'i cuine̱', ne benne' dxenná be'e cuine̱', ne benne' nape̱' ba lá'ana. Dxal-la' si' lu ne̱'e̱ benne' xelezrine̱' lizre̱'. Dxal-la' gaque̱' benne' dxaca dxusé̱dene̱' bénneache.
1TI 3:3 Quebe dxal-la' xé'aje̱' da guzuzre na le̱', ne quebe gutil-le̱' nu benne', ne quebe sa lazre̱' dumí. Dxal-la' gaque̱' benne' dxexruj lazre', ne zren lazre'.
1TI 3:4 Dxal-la' nézene̱' nna be'ene̱' benne' zaj zre̱'e̱ lizre̱', ne gulé'ene̱' zrí'ine̱' ca' xelácabe' wezúa dizra', ne xelápabe' ba lá'ana xra xrnabe'.
1TI 3:5 Che nu benne' quebe nézene̱' ájala nna be'ene̱' benne' zaj zre̱'e̱ lizre̱', ¿ájazra gune̱' gusé̱dene̱' bi ca' chee̱ Dios?
1TI 3:6 Benne' dxusé̱dene̱' bi ca' chee̱ Cristo quebe dxal-la' gaque̱' benne' za dxúnbeate̱ dizra' chee̱ Cristo, chee̱ quebe gucá'ana szren cuine̱', chee̱ quebe cuía xi'e̱ ca guzría xi' da xriwe̱'.
1TI 3:7 Cá'anqueze dxal-la' gaque̱' benne' nape̱' ba lá'ana láwela benne' quebe zaj naque̱' chee̱ Cristo, chee̱ quebe gata' lataj nu guzúa le̱' chalá'ala, na' chee̱ quebe chu'e̱ lu na' da xriwe̱'.
1TI 3:8 Cá'anqueze benne' ca' dxelácale̱ne̱' bi ca' chee̱ Cristo: Dxal-la' xelaque̱' benne' zaj nape̱' ba lá'ana, ne benne' li lazre'. Quebe dxal-la' xelé'aje̱' da guzuzre na le̱', ne quebe xelaque̱' benne' dxulucudee̱'.
1TI 3:9 Dxal-la' xelapa xánnie̱' da zácale̱'e̱ chee̱ da dxeajlí lázredxu, ne quebe bi sua da gagu na zría chee̱' lu xichaj lázrdawe̱'.
1TI 3:10 Dxal-la' guxúe xánnele ca dxeledé̱'. Te na', che quebe bi zua da dxagu na zria chee̱', waca xelácale̱ne̱' bi ca' chee̱ Cristo.
1TI 3:11 Zru'ula benne' caní: Dxal-la' xelaque̱' benne' zaj nape̱' ba lá'ana, ne quebe xelaque̱' wetupa dizra' bizruj. Dxal-la' xelaque̱' du lazre', ne li lazre' ca naca xúgute̱ da dxelune̱'.
1TI 3:12 Tu benne' dxácale̱ne̱' bi ca' chee̱ Cristo dxal-la' súale̱ne̱' tuze nu'ula, ne dxal-la' nézene̱' nna be'ene̱' zrí'ine̱' ca', ne benne' zaj zre̱'e̱ lizre̱'.
1TI 3:13 Benne' ca' dxelácale̱ne̱' bi ca' chee̱ Cristo, che dxelune̱' cháwedau' zrin chee̱', welezrué'ene̱' xel-la ba lá'ana, na' xelezéquedxene̱' xuluchálaje̱' du lazre̱' ca dxeajlí lázredxu Jesucristo.
1TI 3:14 Dxebeza lazra' xídazequeza' xedajnná'a lue', na' dxuzúaja' chiu' da nigá
1TI 3:15 chee̱ chéajni'inu' che dxezreda', ca dxal-la' gunu' ládujla benne' ca' zaj nababe̱' chee̱ Dios, benne' ca' ba bláwizra Dios ban, ne zaj nuxru chache̱' da li, ne dxuluxúe xánnie̱' na.
1TI 3:16 Da li tu da zrente̱ naca da nigá ble'e Dios dxi'u ca naca da zéajle̱dxu: Dios ble̱'e̱ nigá, ne guque̱' bénneache. Be' Lá'azxa blé'ene̱' naque̱' xlátaje̱. Belelé'e gubáz chee̱ xabáa ca' Le̱'. Benne' dute̱ xe̱zr la xu belenne̱' ca naca chee̱'. Guleajlí lazre' benne' zaj zre̱'e̱ dute̱ xe̱zr la xu nigá Le̱'. Dios bezi'e̱ Le̱' xabáa.
1TI 4:1 Be' Lá'azxa ba bdxixruj lie̱' wazrín zra xulusán bal-la benne' xel-la dxeajlí lazre' chee̱', na' chjácale̱ne̱' be' ca' xelezí xe̱ na le̱', ne xelezí'e̱ ca da xululé'e be' xriwe̱' ca'.
1TI 4:2 Xuluzé̱ nague̱' ca da xuluse̱de benne' we̱n lazre' ca', benne' dxelún láweze da xrlátaje, ne québedxa zaj zua xel-la dxeléquebe'e xichaj lázrdawe̱', ne zaj naque̱' lázrdau zizraj, na' quebe zaj nape' xel-la stu' gate dxelún lazre̱'.
1TI 4:3 Benne' caní quebe dxelu'e̱ latja nu guchaga na', ne cá'anqueze nu xe'aj gagu bal-la da dxágudxu, lácala be̱n Dios da ca' chee̱ xelagu benne' ca' dxeleajlí lazre̱' Le̱', ne benne' ca' zaj núnbe'e̱ da li, ne xelé̱'e̱ Le̱'; Xcalenu'.
1TI 4:4 Xúgute̱ da be̱n Dios naca na chawe', ne quebe dxal-la' bi guzúadxu chalá'ala, san dxal-la' sidxu na, ne xe̱dxu Dios; Xcalenu',
1TI 4:5 lawe' da naca chawe' lau Dios bítete̱ze da dxágudxu che dxundxu ca dxenná xrtizre̱', ne che nábadxu Le̱' gune̱' gaca na da chawe'.
1TI 4:6 Che dxusé̱denu' bi bíchedxu ca' da caní, nacu' bi we̱n zrin chawe' chee̱ Jesucristo, na' nazí lu na'u dizra' chee̱ Dios, ne ca naca da dxusé̱dedxu, da na' zéajle̱nu'.
1TI 4:7 Quebe gulapa na'u da dxuluzaze bénneache, ne dizra' xálaze. Bzazraj cuinu' lu da naca chee̱ Dios.
1TI 4:8 Che dxuzazraj cuinu' ca naca lu be̱l-la' dxen chiu' wácale̱queze na lue' late', san che dxuzazraj cuinu' lu da naca chee̱ Dios, wácale̱ na lue' lu xúgute̱ da dxunu', na' naca na da sidxu ba neza lu xe̱zr la xu nigá, ne cá'anqueze lu xe̱zr la xu da za za'.
1TI 4:9 Da li naca da nigá, na' xúgute̱ bénneache dxal-la' xeléajle̱'e̱ chee̱ na.
1TI 4:10 Chee̱ le̱ na' dxudé xel-la zi' cuínadxu dxundxu zrin lawe' da dxebeza lázredxu Dios ban, Bénnea' naque̱' weselá chee̱ xúgute̱ bénneache, na' dxuselé̱' benne' ca' dxeajlí lazre̱' Le̱'.
1TI 4:11 Da caní dxal-la' gusé̱denu' bénneache, ne nne̱ xuenu' le̱' xelune̱' na.
1TI 4:12 Quebe gu'u lataj nu guzúa lue' chalá'ala lawe' da nacu' benne' cuide', san dxal-la' gacu' tu da gulé'e na benne' ca' dxeleajlí lazre̱' Cristo ca dxal-la' xelune̱'. Gulé'e na le̱': Ne̱ chee̱ da dxuchálaju', ne ne̱ chee̱ da dxunu', ne ca nazri'inu' le sa' ljwezru', ne ca naca Be' Lá'azxa zúale̱ne̱' lue', ne ca dxeajlí lazru' Cristo, ne ca nacu' du lazre'.
1TI 4:13 Dxácate̱ xida' neda', be̱n zi' lazru' gulabu' xiche lá'azxa láwela bénneache, ne gutipu' lazre' bi bíchedxu ca', ne guzéajni'inu' le̱'.
1TI 4:14 Quebe gusanu' xel-la waca da be̱nna Dios lue' gate buluzé̱ na' benne' gula ca' xichju', ne gulenné̱' ca da ble'e Be' Lá'azxa le̱' ca naca zrin chee̱ Xránadxu da dxal-la' gunu'.
1TI 4:15 Be̱n da caní du lazru' chee̱ xelelé'e xúgute̱ bénneache nápaquezu' da naca chee̱ Dios.
1TI 4:16 Bxue xanne' cuinu', ne ca da dxusé̱denu', ne guzé̱ chacha lu zrin chiu'. Che gunu' da caní, na' guseláqueze cuinu', ne guseláquezu' benne' ca' xelenne̱' da guchálaju'.
1TI 5:1 Quebe cun til-lu' tu benne' gula, san bzéajni'i le̱' ca xráquezu'. Gúcale̱ benne' cuide' ca' ca bi bíchequezu'.
1TI 5:2 Gúcale̱ nu'ula gula ca' ca xrnáquezu'. Gúcale̱ nu'ula cuide' ca' ca bi zánquezu', dute̱ lu xel-la dxapa ba lá'ana chiu'.
1TI 5:3 Gúcale̱ nu'ula ba nate benne' chee̱', nu'ula' quebe nu xrtie̱' zradxa.
1TI 5:4 Che tu nu'ula ba gute benne' chee̱' ne zaj zra' zrí'ine̱', u zre sue̱', le̱be' dxal-la' xelunbe' ca da zaj nabágabe' chee̱ xelácale̱be' benne' zaj naca xrtíaquezbe', ne xelunbe' ca da zaj nabágabe' chee̱ xra xrnabe', lawe' da naca na xrlátaje, ne da dxezaca ba lazre' Dios.
1TI 5:5 Nu'ula da li québedxa nu chilá' chee̱' dxebeza lazre̱' Dios, ne dxuchálajle̱ne̱' Dios te zra, ne chizrela.
1TI 5:6 Nu'ula caní, che dxune̱' ca da dxezaca ba lazre' lé̱queze̱', naque̱' ca benne' ba nate.
1TI 5:7 Bdxixruj be'e benne' ca' xelune̱' caní, chee̱ quebe gun na ba xen nu til-la le̱'.
1TI 5:8 Che nu benne' quebe dxebé'e̱ gunne xue chee̱ benne' ca' zaj naque̱' tuze, ne da dxun na ba xen che quebe dxácale̱ne̱' xrtíaqueze̱', ba bsane̱' xel-la dxeajlí lazre' chee̱', ne nácadxe̱' benne' we̱n da zrinnaj ca tu benne' quebe ne chéajle̱'e̱ chee̱ Dios.
1TI 5:9 Lu xiche naga zria la nu'ula ca' quebe nu chilá' chee̱', benne' dxácale̱le, dxal-la' guzúajle la nu'ula caní, nu'ula na' ba gudée̱' ga xun iza, ne guzúa tuze benne' chee̱'.
1TI 5:10 Dxal-la' gaque̱' nu'ula ba bé̱nle̱'e̱ da xrlátaje ca da caní: Che ba bsegule̱' zrí'ine̱' ca'. Che ba guzí' lu ne̱'e̱ benne' bíchedxu belezrín lizre̱'. Che ba gúcale̱ne̱' benne' caní dute̱ lu xel-la dxexruj lazre' chee̱'. Che ba gúcale̱ne̱' benne' dxedée̱' xel-la zi'. Che bi xetú da xrlátaje ba be̱ne̱'.
1TI 5:11 Quebe guzríale lu xiche na' nu'ula caní che quebe ne xelezríe̱' ga xun iza lawe' da gagaze xucuasa xel-la dxelezá lazre' chee̱' le̱' lu da naca chee̱ Cristo, na' xelaca lazre̱' xuluchaga ne̱'e̱ xecha lasa,
1TI 5:12 na' xelebague̱' zria lawe' da bulusane̱' ca da guleche̱be lazre̱' chee̱ Cristo.
1TI 5:13 Cá'anqueze che dxeledé̱' tu tu xu'u, xelaque̱' zrawe̱de, ne quegaze zrawe̱de, san cá'anqueze xelaque̱' wetupa dizra' bizruj, na' xuluchixre chee̱' lu xúgute̱ da xelenne̱', ne xelenné̱' da quebe dxal-la' xelenné̱'.
1TI 5:14 Chee̱ le̱ na' dxaca lazra' xuluxuchaga ne̱'e̱ che ne zaj naque' nu'ula cuide', ne xelezrá zrí'ine̱', ne xuluxúe̱' lizre̱', chee̱ quebe xelezí lataj xelezí tizra benne' ca' dxelezre̱'e̱ dxi'u.
1TI 5:15 Bal-la nu'ula caní ba belexecuase̱' chee̱ Cristo, ne zjácale̱ne̱' da xriwe̱'.
1TI 5:16 Che nu benne' dxeajlí lazre̱' Cristo, benne' biu, u nu'ula, che zua xrtie̱' naque̱' nu'ula ba gute benne' chee̱', dxal-la' gácale̱ne̱' le̱' chee̱ quebe xelebaga bi ca' chee̱ Cristo da nigá, na' benne' caní welezeque' xelácale̱ne̱' nu'ula caní québedxa nu chilá' chee̱'.
1TI 5:17 Che zaj zra' benne' gula ca' dxulusédene̱' cháwedau' bi ca' chee̱ Cristo, dxal-la' gápale̱'e̱le benne' ca' ba lá'ana, na' dxundxa na ba xen gápale ba lá'ana benne' gula ca' dxuluchálajle̱queze̱' le'e dizra' chee̱ Dios, ne dxulusé̱dene̱' le'e.
1TI 5:18 Lu xiche lá'azxa dxenná na: Quebe cu'ule xixruj dxu'a be̱zre, be̱ dxíchujba' zrua' xtila. Cá'anqueze dxenná na: Benne' we̱n zrin dxal-la' si'e̱ xrlázruje̱'.
1TI 5:19 Quebe guzé̱ nagu' che nu gagu zria chee̱ tu benne' gula chee̱ xudau' che quebe xelelá' chupa u chunna benne' xelexeche̱be̱'.
1TI 5:20 Benne' ca' dxelúnqueze̱' dul-la, dxal-la' til-lu' benne' ca' láwela xúgute̱ bi ca' chee̱ Cristo, chee̱ xelezrebe xezícadxa benne' ca'.
1TI 5:21 Lau Dios, ne lau Xránadxu Jesucristo, ne lau gubáz blau ca' chee̱ xabáa chee̱', dxusebaga' lue' chee̱ gunu' da caní. Dxenné̱ xueda' lue' quebe cueu' ca zaj naca benne', ne quebe gucha'u ca gunu' chee̱ tu tu benne'.
1TI 5:22 Quebe xexúbenu' nu la guzúateu' lu zrin chee̱ Cristo chee̱ quebe bagu' dul-la chee̱ benne' xula. Quebe gulapa na'u ne tu da cale̱la.
1TI 5:23 Lawe' da quebe chawe' zua le̱'u, ne tu lize dxaca na, québedxa xé'aju' nísaze, san güe'e late' xrise uva wal-la.
1TI 5:24 Zaj nalá' dul-la chee̱ bal-la benne' gate quebe nu ne guchi'a ca da zaj nune̱', san dul-la da zaj nun xezícadxa benne' ca' xululé'e lawe na te na'.
1TI 5:25 Cá'anqueze zaj nalá' da xrlátaje da zaj nun bal-la benne', ne che zra da xrlátaje da quebe zaj nalá', quebe gaca tu xelegáchequeze na.
1TI 6:1 Benne' zaj nada'u dxal-la' xelápale̱'e̱ ba lá'ana xrane̱' ca' chee̱ quebe nu nne̱ schanni' chee̱ Dios, ne chee̱ da dxusé̱dedxu.
1TI 6:2 Che benne' zaj nada'u, zaj zra' xrane̱' ca' dxeleajlí lazre̱' Cristo, quebe dxal-la' xuluzúe̱' le̱' chalá'ala lawe' da zaj naque̱' benne' biche̱', san dxal-la' xelune̱' zrin da nácadxa xrlátaje chee̱ xrane̱' ca' dxelezi'e̱ ba neza zrin na', lawe' da dxeleajlí lazre̱' Cristo, ne zaj naque̱' benne' biche̱' zaj nazri'ine̱'. Bzéajni'i benne' ca' da nigá ne bsizre le̱'.
1TI 6:3 Che nu benne' dxusé̱dene̱' da zaj naca cale̱la da quebe zaj naca na tuze ca da bse̱de Xránadxu Jesucristo, ne ca da dxuse̱de da dxéajle̱dxu chee̱ Dios,
1TI 6:4 benne' nigá dxucá'ana szren cuine̱', ne quebe bi nézene̱'. Dxezá lázrele̱'e̱ gutil-le̱' benne' dizra' ca naca chee̱ tu tu dizra' ca'. Benne' dxelún caní: Dxelaque̱' benne' xre lazre', ne dxeledil-le̱', ne dxulucháchale̱ ljwezre̱', ne dxeléquene̱' dxun le sa' ljwezre̱' da cale̱la,
1TI 6:5 ne tu lize dxulutil-la dizra' ljwezre̱', ne zaj naque̱' benne' zaj nazrinnaj lu xichaj lázrdawe̱', ne quebe zaj nunbe'e̱ da li. Dxeléquene̱' zrin dxundxu chee̱ Cristo naca na tu da waca xuluchínene̱' chee̱ xelaque̱' benne' gunní'a. Quebe gunu' tuze benne' caní.
1TI 6:6 Da li da zéajle̱dxu chee̱ Cristo naca na tu da gunní'a zren, na' caní nácaqueze chee̱ tuze bénnea' dxezaca ba lazre̱' ca da nape̱'.
1TI 6:7 Quebe bi núadxu gate gúlajdxu lu xe̱zr la xu nigá, ne quebe bi xexúadxu gate xezá'adxu nigá,
1TI 6:8 san che de̱ da gágudxu, ne zra lánadxu, dxal-la' xezaca ba lázredxu nen da ca'.
1TI 6:9 Benne' ca' dxelaca lazre̱' xelaque̱' gunní'a, cheajlecházie̱' lu na' da xriwe̱', na' cheajlechu'e̱ lu xralaj chee̱ le̱ na, chee̱ xelezá lazre̱' da xálaze, da dxulucá'ana ditaj na bénneache, ne dxelegú'u na bénneache lu da ba xa' naga xelebía xi'e̱.
1TI 6:10 Benne' nazri'ine̱' dumí dxune̱' xúgute̱ da cale̱la, na' zaj zra' bal-la benne' gulezá lazre̱' na, na' bulusane̱' xel-la dxeleajlí lazre' chee̱', na' ba gulezí' lataj xel-la dxudía lu lázrdawe̱'.
1TI 6:11 Lue', we̱n zrin chee̱ Dios, gucuasa lu da caní. Be̱n da naca xlátaje̱, ne bzua cuinu' lu na' Dios, ne guxeajlí lazre' Cristo, ne bzri'i Le̱', ne guca zren lazre', ne dxexruj lazre'.
1TI 6:12 Gudíl-lale̱ da xriwe̱', guchínenu' xel-la dxeajlí lazre' chiu'. Be̱xru tipa xel-la nabán da chadía chacanna lawe' da bláwizra Dios lue' chee̱ gapu' da nigá, na' ba blé'enu' ca dxeajlí lazru' Cristo láwela zane' benne' dxelexeche̱be̱' chee̱ na.
1TI 6:13 Na'a, lau Dios, Bénnea' nuzúe̱' xel-la nabán chee̱ xúgute̱ da naca ban, ne lau Jesucristo, Bénnea' cá'anqueze blé'ene̱' da naque̱', ne beche̱be̱' chee̱ na lau Poncio Pilato, dxenné̱ xueda' lue'.
1TI 6:14 Guzú' dizra' ca da dxapa' lue', ne quebe gucha'u na. Dxal-la' gunu' na chee̱ quebe nu seque' bi nne̱ chiu' ca zrin zra xelá' Xránadxu Jesucristo.
1TI 6:15 Ca zrin zra chee̱ na Dios sel-le̱' Le̱'. Naque̱' Dios tu licha', na' Benne' Lá'azxa dxenná be'e̱. Naque̱' Wenná bea, Benne' dxenná be'ene̱' wenná bea ca', ne naque̱' Xrana xúgute̱ benne' zaj naque̱' xrana bénneache.
1TI 6:16 Tuze Dios quebe gatie̱', ne zue̱' lu xel-la naxaní' naga quebe nu seque' cheaj. Netú bénneache quebe ne lé'ene̱' Le̱', ne quebe nu gaca le'e Le̱'. Chee̱ Le̱' naca xel-la ba lá'ana, ne xel-la dxenná bea chadía chacanna. ¡Ca'an gaca na!
1TI 6:17 Gunné̱ xue benne' zaj naque̱' gunní'a lu xe̱zr la xu nigá chee̱ quebe xulucá'ana szren cuine̱', ne quebe xuluxrén lazre̱' xel-la gunní'a chee̱', lawe' da quebe naca na da chadía chacanna. Dxal-la' xuluxrén lazre̱' Dios ban, Bénnea' dxúnnale̱'e̱ dxi'u xúgute̱ da dxechínedxu chee̱ sidxu da ba neza.
1TI 6:18 Gunné̱ xue benne' caní xelune̱' da xrlátaje, ne xelaque̱' benne' gunní'a lu da xrlátaje da xelune̱', ne bi xulunézruje̱' benne' xache' ca', ne xulunézrujle̱'e̱ na.
1TI 6:19 Caní gaca, xelezrué'ene̱' xel-la gunní'a da gaca na tu da guzúa chacha na le̱' lu zra da za za', ne xelape̱' xel-la nabán da zeajlí canna.
1TI 6:20 Lue', Timoteo, bxue xanne da nuzúa Dios lu na'u. Quebe guzé̱ nagu' dizra' xálaze chee̱ xe̱zr la xu nigá, da na' dxelenná bal-la benne' naca na xel-la sina. Da nigá naca na da we̱n lazre'.
1TI 6:21 Bal-la benne' gulezí'e̱ na, na' bulusane̱' xel-la dxeleajlí lazre' chee̱'. Dxenábeda' Dios gune̱' da chawe' chiu'. ¡Ca'an gaca na!
2TI 1:1 Neda', Pablo, naca' gubáz chee̱ Jesucristo lawe' da guca lazre' Dios gaca' caní, chee̱ cu'a lban ca naca xel-la nabán da guche̱be lazre' Dios gunne̱' chee̱ benne' ca' zaj naque̱' bi chee̱ Jesucristo.
2TI 1:2 Dxuzúaja' da nigá chiu' lue' Timoteo, bi chia' nazrí'i lazra', na' dxenaba' Xradxu Dios, ne Xránadxu Jesucristo gune̱' da chawe' chiu', ne xexache lazre̱' lue', ne gunne̱' chiu' xel-la dxebeza zri lazre'.
2TI 1:3 Te zra ne chizrela gate dxuchálajle̱na' Dios, ne dxeajsá lazra' lue', dxápequeza' Dios: Xcalenu', Bénnea' dxuna' zrin chee̱', ne quebe bi zua da dxagu na zria lu xichaj lázrdawa'. Dxuna' zrin na' ca belúnqueze xra xrtawa' ca'.
2TI 1:4 Dxeajsá lázrqueza' ca gudxezru' gate na' bezá'a naga zu', ne dxaca lázrele̱'a xelé'eda' lue' chee̱ gápale̱'a xel-la dxebé.
2TI 1:5 Cá'anqueze dxeajsá lazra' xel-la dxeajlí lazre' li da napu'. Xrna'u gula, Loida, ne xrna'u, Eunice gulape̱' xel-la dxeajlí lazre' caní, na' nuxrén lazra' lue' nápaquezu' na.
2TI 1:6 Chee̱ le̱ na' dxuzéajni'ida' lue' guchínenu' ca da be̱nna Dios lue' gate na' bzea' na'a xichju', ne gunaba' gun Dios da chawe' chiu'.
2TI 1:7 Be' Lá'azxa be̱nna Dios dxi'u quebe dxune̱' dxi'u bi zra chebe, san dxunne̱' dxi'u xel-la wal-la, ne xel-la zri'i lazre', ne dxune̱' dxi'u benne' dxenná be'e cuina.
2TI 1:8 Chee̱ le̱ na' quebe gapa stu' ca naca chee̱ Xránadxu, ne cá'anqueze ca naca chia' neda', xu'a lizre xia nigá lawe' da dxuna' zrin chee̱ Cristo, san bchaga lau lue' xel-la zi' da dxeledé benne' ca' dxuluchálaje̱' dizra' chawe' chee̱ Jesús, na' Dios gutípaqueze̱' lazru'.
2TI 1:9 Dios bselé̱' dxi'u, ne bláwizre̱' dxi'u chee̱ guzúa cuínadxu lu na' Le̱', quegá lawe' da be̱ndxu tu da xrlátaje, san lawe' da guca lázrequeze Le̱' gaca na caní, ne lawe' da bzri'ine̱' dxi'u, nazrágadxu chee̱ Cristo. Dios bzri'ine̱' dxi'u gate quebe ne gunte̱' xe̱zr la xu nigá,
2TI 1:10 na' blé'ene̱' xel-la zri'i lazre' nigá na'a, lawe' da gusel-le̱' Jesucristo, weselá chee̱dxu, na' bzria xi'e̱ xel-la dxenná bea chee̱ xel-la gute, ne blé'ene̱' bénneache ca gaca xelezí' lu ne̱'e̱ xel-la nabán chadía chacanna, ca dxennáqueze dizra' chawe' da dxuchálajdxu.
2TI 1:11 Dios bzue̱' neda' chee̱ guchálaja' ca naca dizra' chawe' nigá, ne be̱ne̱' neda' benne' gubáz chee̱' chee̱ gusé̱deda' benne' quebe zaj naque̱' judío.
2TI 1:12 Chee̱ le̱ na' dxedéa' xel-la zi' caní. Quebe dxapa stu'a ne̱ chee̱ da nigá, lawe' da núnbe'a Bénnea' nuxrén lazra', ne nezda' nape̱' xel-la waca cu'u chawe̱' da nuzúa' lu ne̱'e̱ ca zrindxa zra na'.
2TI 1:13 Be̱xru tipa ca naca dizra' da bsé̱deda' lue', ne quebe gusanu' xel-la dxeajlí lazre', ne xel-la zri'i lazre' da nápadxu lawe' da nácadxu bi chee̱ Jesucristo.
2TI 1:14 Ne̱ chee̱ xel-la waca chee̱ Be' Lá'azxa, Bénnea' zue̱' xichaj lázrdaudxu, be̱xru tipa da na' nuzúa Dios lu na'u.
2TI 1:15 Ba nézenu' ca belún xúgute̱ bi bíchedxu zaj zre̱'e̱ naga nababa Asia. Gulebéaj xíchaje̱' neda'. Cá'anqueze Figelo, ne Hermógenes belune̱' tu zren benne' ca'.
2TI 1:16 Dxenaba' Xránadxu xexache lazre̱' benne' zaj zre̱'e̱ lizre Onesíforo. Gúcale̱ le̱' neda' zane' lásaqueze, ne quebe gudapa stue̱' chia' neda', xu'a lizre xia.
2TI 1:17 Gate ble̱'e̱ xe̱zre Roma, bexílaje̱' neda', na' bezrélene̱' neda'.
2TI 1:18 Dxenaba' Xránadxu xexache lazre̱' le̱' lu zra ná' gate xelá' Le̱'. Ba nézenu' ca gúcale̱le̱'e̱ne̱' dxi'u lu xe̱zre Efeso.
2TI 2:1 Lue', zri'ina', guzé̱ tipa ne̱ chee̱ da xrlátaje da nápadxu lawe' da nácadxu bi chee̱ Jesucristo.
2TI 2:2 Ca da bennu' bchálaja' láwela benne' zan, benne' belexeche̱be̱' naca na da li, bzua na lu na' benne' zaj naque̱' li lazre', benne' xelezéquene̱' xulusé̱dene̱' na benne' xula.
2TI 2:3 Lue' dxal-la' gacu' benne' we̱n zrin du lazre' chee̱ Jesucristo, guchaga lau' xel-la zi' ca tu benne' zeje̱' wedil-la.
2TI 2:4 Netú benne' zeje̱' wedil-la, benne' xu'e̱ lu zrin chee̱ xrane̱', quebe dxune̱' zrin xula, lawe' da dxaca lazre̱' xezaca ba lazre' xrane̱' chie̱'.
2TI 2:5 Cá'anqueze, benne' xu'e̱ lu witaj quebe zrue'ene̱' da xexale̱' che quebe quítaje̱' ca naca chee̱ na.
2TI 2:6 Cá'anqueze benne' dxaza dxa'ana, benne' dxúnle̱'e̱ zrin, dxal-la' xezí' lu ne̱'e̱ lina chee̱'.
2TI 2:7 Blaba lazre' ca da dxapa' lue', na' Xránadxu guzéajni'ine̱' lue' xúgute̱ na.
2TI 2:8 Bsa lazre' ca naca chee̱ Jesucristo, guque̱' xrtia David, ne bebane̱' ládujla benne' gate, ca dxenná dizra' chawe' da dxuchálaja' neda'.
2TI 2:9 Ne̱ chee̱ dizra' chawe' nigá dxedéa' xel-la zi', ne xu'a lizre xia nigá ca tu benne' we̱n da zrinnaj, san dizra' chee̱ Dios quebe nu seque' cu'u le̱ na lizre xia.
2TI 2:10 Chee̱ le̱ na' xúgute̱ da ca' dxuchaga lawa' ne̱ chee̱ benne' ca' ba gucá'a Dios le̱', chee̱ cá'anqueze benne' ca' xelelé̱' ne̱ chee̱ Jesucristo, ne xelexexú'e̱ lu xabáa chadía chacanna.
2TI 2:11 Da nigá naca na da li: Che nuzúa cuínadxu gátedxu ca bzua cuina Le̱', cá'anqueze waca bandxu nen Le̱'.
2TI 2:12 Che dxededxu xel-la zi', na' nna béaquezdxu tu zren nen Le̱'. Che quebe xeché̱bedxu nácadxu bi chee̱ Le̱', cá'anqueze Le̱' quebe xeche̱be̱' nácadxu bi chee̱'.
2TI 2:13 Che dxi'u quebe nácadxu li lazre', Le̱' nácaqueze̱' li lazre'. Dios québequeze guché̱'e̱ ca naque̱'.
2TI 2:14 Bsa lazre' bi bíchedxu ca', ne bsizre le̱' lu La Xránadxu québedxa xulutil-la dizra' ljwezre̱'. Xel-la dxutil-la dizra ljwezre quebe bi culuén napa na, san dxuxrinnaj na xichaj lázrdau benne' ca' dxelénne̱' na.
2TI 2:15 Be̱n ba xuzre gacu' we̱n zrin du lazre' lau Dios, na' quebe gaca xel-la stu' chiu', lawe' da dxuchínenu' xrlátaje dizra' li.
2TI 2:16 Quebe gulapa na'u dizra' xálaze, ne dizra' sban da dxuluchálajze bénneache, da ca' dxulucuasa na bénneache lu da naca chee̱ Dios.
2TI 2:17 Dizra' sban caní dxuluxrinnaj na xichaj lázrdau bénneache ca dxun tu we̱' da dxuzru na lu be̱l-la' dxen chee̱dxu. Caní guca chee̱ Himeneo, ne Fileto,
2TI 2:18 benne' ca' gulecuase̱' lu xel-la li, na' dxelenné̱' ba belexebán benne' gate, na' dxuluxrínnaje̱' xel-la dxeajlí lazre' chee̱ bal-la benne'.
2TI 2:19 Dios ba gudixruj bi'e̱ xrtizre̱' da naca na ca tu lane xu'u chee̱ xel-la dxeajlí lazre' chee̱dxu, da dxenná caní: Xránadxu núnbe'e̱ bi chie̱' ca' Cá'anqueze dxenná na: Xúgute̱ bi ca' chee̱ Cristo québedxa dxal-la' xelune̱' da cale̱la.
2TI 2:20 Tu lu xu'u zaca, quegá zra' tuze zriga xé'ena da zaj naca na oro ne plata, san cá'anqueze zaj zra' da zaj naca na xiaj ne xu. Dxuluchínene̱' da ca' zaj zácadxa lu da zaca, na' xezícadxa da ca' dxuluchínene̱' ájate̱ze.
2TI 2:21 Nácadxu ca zriga xé'ena ca'. Che nu benne' dxaca lazre̱' gaque̱' ca tu da zaca, chee̱ gaque̱' benne' guchine Xránadxu lu zrin xrlátaje chee̱', dxal-la' xexadxe̱' ca naca da cale̱la ca'.
2TI 2:22 Bxue xanne' cuinu' ca zaj naca da ca' dxelezá lazre' benne' cuide' ca', ne quebe gusanu' da xrlátaje da dxunu', ne ca dxeajlí lazru' Cristo, ne ca nazri'inu' Le̱', ne ca dxebeza zri lazru', da ca' dxunu' tu zren nen xúgute̱ benne' ca' du lazre̱' dxululáwizre̱' Xránadxu.
2TI 2:23 Quebe gulapa na'u dizra' xálaze, ne dizra' quebe zeaj xrlátaje, lawe' da nézenu' dxuluzúa na bénneache lu da ba xa'.
2TI 2:24 Benne' we̱n zrin chee̱ Xránadxu: Quebe dxal-la' tíl-lale̱ne̱' benne'. Dxal-la' gaque̱' zri'i lazre' nen xúgute̱ bénneache. Dxal-la' gaque̱' benne' dxezeque̱' gusé̱dene̱' bénneache. Dxal-la' gaque̱' zren lazre',
2TI 2:25 ne dute̱ xel-la dxexruj lazre' gusízrene̱' benne' dxelune̱' da cale̱la. Caní dxal-la' gune̱' che ba benla Dios xelexexéaje lazre̱' benne' ca chee̱ xelúnbe'e̱ da li,
2TI 2:26 na' xelelé̱' lu xralaj chee̱ da xriwe̱', naga nuzrá na le̱', na' dxelune̱' ca da dxenná le̱ na.
2TI 3:1 Cá'anqueze dxal-la' nézele lu zra bze̱be ni' gaca na ste̱be chee̱ bénneache.
2TI 3:2 Bénneache ca' xelaque̱': Benne' xelezrí'ize cuina, ne xelezrí'ine̱' dumí. Xulucá'ana szren cuine̱', ne xulucá'ana cuine̱' ca benne' blau ca'. Xelenné̱' schanni' chee̱ Dios, ne quebe xuluzúe̱' dizra' chee̱ xra xrne̱'e̱. Xelaque̱' benne' quebe dxelezí le̱, ne benne' quebe dxelapa ba lá'ana Dios.
2TI 3:3 Quebe xelaque̱' zri'i lazre', ne quebe xelexexache lazre̱' ljwezre̱'. Xelenné̱' chee̱ ljwezre̱', ne quebe xelenná be'e cuine̱'. Xelaque̱' benne' snia ca', ne xuluzúe̱' chalá'ala da naca xrlátaje.
2TI 3:4 Quebe xelaque̱' li lazre' nen ljwezre̱'. Xelaque̱' benne' dxelexube. Xeléquene̱' zaj naque̱' benne' szrente̱. Xelexezaca ba lázredxene̱' da ca' dxeledánene̱' quézcala da naca chee̱ Dios.
2TI 3:5 Lácala xululé'e cuine̱' ca benne' zaj naque̱' chee̱ Dios, quebe súale̱ le̱' xel-la waca chee̱ Dios. Quebe gunu' tu zrén benne' ca'.
2TI 3:6 Ca zaj naca benne' caní zaj naca benne' ca' zjaque̱' tu tu xu'u, ne dxelezí xe̱'e̱ nu'ula quebe zaj zie̱' du lazre', ne zaj zua da dxagu na zria lázrdawe̱' da naca chee̱ xtul-le'. Xel-la dxelezá lazre' chee̱ nu'ula caní nazrube xu na le̱'.
2TI 3:7 Lácala tu dxulusé̱dezqueze̱' chee̱ xel-la li, cabata' dxeléajni'iquezne̱' na.
2TI 3:8 Ca belún Janes ne Jambres, benne' wazrá' ca', benne' ca' guledábague̱' Moisés, cá'anqueze dxelún benne' caní, dxeledábague̱' xel-la li. Zaj nazrinnaj xichaj lázrdawe̱', ne belexecuase̱' lu xel-la dxeajlí lazre' chee̱ Dios.
2TI 3:9 Quebe bi xelezrué'e benne' caní, lawe' da xeleque bé'equeze xúgute̱ bénneache zaj naque̱' benne' xálaze, ca gulaca benne' chupa ca' guledábague̱' Moisés.
2TI 3:10 Ba benu': Ca da bzéajni'ida' bénneache, ne blé'equeznu' ca bé̱nqueza'. Nézenu' da dxaca lazra' guna', ne ca dxeajlí lazra' Cristo. Bchaga lawa' da guzxaca', ne nazrí'ida' xúgute̱ bénneache. Nézenu' ca naca xel-la zren lazre' chia'.
2TI 3:11 Blé'enu' ca guláu zi' xuzre̱' neda', ne ca gudéa' xel-la zi'. Nézenu' xúgute̱ da guzraca' lu xe̱zre Antioquía, ne xe̱zre Iconio, ne xe̱zre Listra. Guláu zi' xuzre benne' ca' neda', na' Xránadxu bselé̱' neda' lu xúgute̱ da ca'.
2TI 3:12 Xúgute̱ benne' ca', benne' dxelaca lazre̱' xelúnqueze̱' ca da dxenná Jesucristo, weláu zi' xúzrequeze bénneache le̱'.
2TI 3:13 Benne' ca' dxelune̱' da cale̱la, ne benne' dxelezí xe̱'e̱ welúndxaqueze̱' da cale̱la. Xelezí xe̱'e̱ bénneache, na' benne' xula xelezí xe̱'e̱ benne' caní.
2TI 3:14 Lue', guzé̱ chacha ca da ba naxéajni'inu', da na' nuxrén lazru'. Nézqueznu' nu bse̱de lue',
2TI 3:15 na' ne nácateu' bídau'te̱ ba núnbe'u da dxenná lu xiche lá'azxa, da dxezeque na guzéajni'i na lue', chee̱ lau' lawe' da dxeajlí lazru' Jesucristo.
2TI 3:16 Xúgute̱ da naxúaj na lu xiche lá'azxa naca na da bzéajni'i Dios benne' ca' zaj naque̱' bi chee̱ Le̱', ne naca na da dxuzéajni'i na dxi'u, ne da dxedil-la na benne' dxelune̱' da cale̱la, ne da dxusizre na dxi'u, ne da dxulé'e na dxi'u ca dxal-la' gundxu da xrlátaje,
2TI 3:17 chee̱ gaca du lazre' bi chee̱ Dios, na' gácabe' bi naze̱de xanne chee̱ gunbe' xúgute̱ da xrlátaje.
2TI 4:1 Lau Dios, ne lau Xránadxu Jesucristo, Bénnea' guchi'e̱ chee̱ benne' ban ca', ne chee̱ benne' gate ca' gate ze̱'e̱ xedajnná be'e̱, dxusebaga' lue'
2TI 4:2 guchálaju' dizra' chee̱ Dios, ne gunu' ba xuzre guchálaju' che xuluzé̱ naga bénneache, ca xuluzé̱ nague̱'. Bzéajni'i benne' ca' dute̱ xel-la zren lazre' chiu', ne ble'e le̱' ca da zaj nabague̱'. Gudil-la, ne bsizre benne' ca'.
2TI 4:3 Caní dxal-la' gunu' lawe' da wazrín zra québedxa xuluzé̱ naga bénneache chee̱ xel-la li da dxusé̱dedxu. Ca dxelezá lázrqueze le̱', xulunné̱' zane' benne' xulusé̱dene̱' le̱' ca da dxelaca lázreze le̱' xelenne̱'.
2TI 4:4 Québedxa xuluzé̱ nague̱' da li. Wuluzé̱ nague̱' dizra' da dxuluzaze bénneache.
2TI 4:5 Na' lue', bzéajni'i cuinu' lu xúgute̱ da caní. Bchaga lau xel-la zi' da teu'. Bzua cuinu' chee̱ guchálaju' dizra' chawe' chee̱ Cristo, ne be̱n zrin da nabagu' chee̱ Cristo.
2TI 4:6 Ba bzrin zra guzúa' xel-la nabán chia' lu na' Dios, lawe' da ba zua bagu xelutie̱' neda'.
2TI 4:7 Du lazra' gudábaga' benne' ca' guledábague̱' da naca chee̱ Cristo. Tu bé̱nzqueza' ca naca da li chee̱', ne ba bexuzre be̱na' da bsebaga Cristo neda' guna'.
2TI 4:8 Lawe' da be̱na' da xrlátaje, na'a ba dxebeza da dxexala' neda', da na' gunna Xránadxu neda' lu zra na', ne quegá tuza' neda' gunne̱' na. Cá'anqueze gunézruje̱' na chee̱ benne' ca' dute̱ xel-la zri'i lazre' chee̱' dxelebeze̱' zra xelé̱'e̱.
2TI 4:9 Be̱n ba xuzre xídazeu' xedajnná'u neda'.
2TI 4:10 Ba guleaj xichaj Demas neda' lawe' da dxedánedxabe' da naca chee̱ xe̱zr la xu nigá, ne ba zexíajbe' Tesalónica. Crescente ba gusel-la'-be' zexíajbe' naga nababa Galacia, na' Tito gusel-la'-be' naga nababa Dalmacia.
2TI 4:11 Tuze Lucas zúale̱be' neda'. Bexilaj Marcos, na' guché̱'-be' tu zrén le̱n lue', lawe' da wazéquebe' gácale̱be' neda' lu zrin chee̱ Cristo.
2TI 4:12 Tíquico gusel-la'-be' lu xe̱zre Efeso.
2TI 4:13 Gate xidu', gúagu' gabán chia' da nucá'ana' xe̱zre Troas lizre Carpo. Cá'anqueze gu'u xiche ca' bcá'ana' ga na', ne da dxunte̱ na ba xen gu'u xiche ca' zaj naca na xide.
2TI 4:14 Alejandro, benne' gubizre xia bsaca' zí'le̱'e̱ neda'. Xránadxu gunézruje̱' lazruj chee̱' ca da be̱ne̱'.
2TI 4:15 Bxue xanne cuinu' chee̱ benne' nigá lawe' da ba gudábagale̱'e̱ dizra' da dxuchálajdxu.
2TI 4:16 Da nedxu lasa gate beche̱ba' ca naca chia' lau benne' xu'u lawe' ca', netú benne' quebe gúcale̱ne̱' neda'. Xúgute̱' buluzá' xíchaje̱' neda'.
2TI 4:17 Gúcale̱ Xránadxu neda', ne btipe̱' lazra' chee̱ guzéqueda' bchálaja' dizra' chawe' lau xúgute̱ benne' ca' quebe zaj naque̱' judío. Ca'an guca bselá Xránadxu neda' lu na' benne' ca', ca dxun benne' dxuselé̱' béadu ca' lu dxu'a be̱zre xixre',
2TI 4:18 na' guseláqueze̱' neda' lu xúgute̱ da cale̱la, ne guxúequeze̱' neda' ca zrin zra xezrina' xabáa naga dxenná bea Le̱'. ¡Gaca báqueze Le̱'! ¡Ca'an gaca na!
2TI 4:19 Dxugapa' diuzre Priscila, ne Aquilo, ne benne' zaj zra' lizre Onesíforo.
2TI 4:20 Erasto begá'anabe' xe̱zre Corinto, na' bcá'ana' Trófimo lu xe̱zre Mileto lawe' da quebe chawe' zúabe'.
2TI 4:21 Be̱n ba xuzre xidu' nigá dxácate̱ quebe ne chú'udxu beu' zaga. Eubulo, ne Pudente, ne Lino, ne Claudia, ne xúgute̱ bi bíchedxu zaj zre̱'e̱ nigá dxulugape̱' lue' diuzre.
2TI 4:22 Dxenaba' Xránadxu Jesucristo súale̱ne̱' lue', ne dxenaba' Dios gune̱' da chawe' chee̱ xúgute̱le le'e. ¡Ca'an gaca na!
TIT 1:1 Neda', Pablo, naca' we̱n zrin chee̱ Dios, ne gubáz chee̱ Jesucristo chee̱ guzéajni'ida' benne' ca' ba gucá'a Dios chee̱ xeleajlí lazre̱' Cristo, ne xelúnbe'e̱ da naca li lazre' chee̱ da naca chee̱ Dios,
TIT 1:2 ne chee̱ xelebeza lazre̱' xel-la nabán chadía chacanna, da guche̱be lazre' Dios gunne̱' chee̱dxu gate za gunte̱' xe̱zr la xu nigá. Dios quebe dxun lazre̱',
TIT 1:3 na' na'a, ca ba bzrin zra chee̱ na, ba bzéajni'ine̱' dxi'u ca naca xrtizre̱' ne̱ chee̱ da bxrize' Dios neda' cu'a lban chee̱ na. Dios nácaqueze̱' weselá chee̱dxu.
TIT 1:4 Dxuzúaja' da nigá chiu', Tito. Nacu' ca zrí'inequeza' lawe' da dxeajlí lázredxu Cristo. Dxenaba' lau Xradxu Dios, ne lau Xránadxu Jesucristo, Benne' weselá chee̱dxu, gune̱' chiu' da cháwedau', ne xexache lazre̱' lue', ne gunne̱' lue' xel-la dxebeza zri lazre'.
TIT 1:5 Bcá'ana' lue' lu xe̱zr la xu Creta da naxechaj nisa chee̱ gucá'ana chawu' da quebe begá'ana chawe' ládujla bíchedu ca', ne chee̱ gunnitu' benne' gula chee̱ xudau' tu tu xé̱zredu ca', cáte̱ze bxríseda' lue' gunu'.
TIT 1:6 Tu benne' gula chee̱ xudau': Dxal-la' gaque' benne' quebe bi zua da gagu na chie̱'. Dxal-la' súale̱ne̱' tuze nu'ula. Zrí'ine̱' dxal-la' xelácabe' bi ba dxéajlí lázrebe' Cristo. Quebe bi da zrinnaj dxelún zrí'ine̱' ca', ne quebe gaca nu gagu zria chee̱ da dxelunbe'.
TIT 1:7 Lawe' da xu'u lu ne̱'e̱ zrin chee̱ Dios, tu benne' dxuxúe̱' benne' zaj nababe̱' chee̱ Cristo: Dxal-la' gaque̱' benne' quebe bi zua da gagu na zria chee̱'. Quebe dxal-la' gaque̱' benne' dxucá'ana szren cuine̱'. Quebe dxal-la' gaque̱' benne' xichaj zra'a. Quebe dxal-la' gaque̱' benne' dxé'aje̱' da dxuzuzre na le̱'. Quebe dxal-la' gaque̱' benne' dxedíl-lale̱ne̱' bénneache. Quebe dxal-la' gaque̱' benne' dxucúdee̱'.
TIT 1:8 Dxal-la' súate̱ze̱' si' lu ne̱'e̱ benne' zjaque̱' lizre̱'. Dxal-la' gune̱' da naca cháwedau'. Dxal-la' gaque̱' benne' nna be'e cuine̱'. Dxal-la' gaque̱' benne' xrlátaje. Dxal-la' gaque̱' benne' nuzúa cuine̱' chee̱ Dios. Dxal-la' gaque̱' benne' dxuzéajni'i cuine̱'.
TIT 1:9 Dxal-la' gaque̱' benne' nuzúa cuine̱' chee̱ dizra' li. Dizra' li naca na da bse̱de nu benne' le̱' chee̱ séquene̱' gusízrene̱' benne' xubla ne̱ chee̱ da li da dxusé̱dene̱', ne chee̱ séquene̱' guzexruje̱' lazre' benne' ca' dxelenné̱' chee̱ da li na'.
TIT 1:10 Caní dxal-la' gune̱' lawe' da zrále̱'e̱ benne' dxelenné̱' chee̱ dizra' li, benne' dxelezí xe̱'e̱ benne' xubla lu da xala da dxlenné̱'. Zane' benne' Israel dxelune̱' caní.
TIT 1:11 Dxal-la' guzúa zriu' benne' dxelune̱' da caní lawe' da dxuluxrínnaje̱' xichaj lázxdau xúgute̱ benne' zaj zra' tu tu xu'u naga dxelú'e̱ chee̱ xulusé̱dene̱' da quebe naca xrlátaje. Dxelune̱' caní chee̱ xelezí' lu ne̱'e̱ dumí. Da nigá da dxelune̱' naca na da cale̱la.
TIT 1:12 Tu benne' Creta naga zu', benne' gunné̱' waláz chee̱ xudau' chee̱ benne' ca', gunné̱': “Benne' Creta zaj nácaqueze̱' we̱n lazre', ne zaj naque̱' ca be̱ snia ca', ne zaj naque̱' benne' wagu xrata', ne zrawe̱de.”
TIT 1:13 Da li gunné̱'. Chee̱ le̱ na' gudíl-laqueze benne' ca' chee̱ xelaque̱' li lazre' ca dxeleajlí lazre̱' Cristo,
TIT 1:14 ne chee̱ quebe xuluzé̱ nague̱' dizra' da dxuluzaze benne' Israel ca', ne ca naca da nadxixruj bea ca' da dxelún benne' ca' dxuluzúe̱' chalá'ala dizra' li.
TIT 1:15 Xúgute̱ naca na xrlátaje chee̱ benne' ca' zaj naca xrlátaje xichaj lázrdawe̱', san chee̱ benne' ca' dxelune̱' da sban, ne québedxa dxeléajle̱'e̱ chee̱ Cristo, quebe bi de̱ da naca xrlátaje. Zaj nazrinnaj xichaj lázrdawe̱'.
TIT 1:16 Benne' caní dxelenné̱' zaj núnbe'ene̱' Dios, san da dxelune̱' dxulé'e na quebe naca da li da dxelenné̱'. Zaj naque̱' benne' we̱n da sban, ne benne' we̱n da cale̱la, ne quebe xelezéquene̱' xelune̱' tu da xrlátaje.
TIT 2:1 Dxal-la' guchálaju' da ca' dxuse̱de na dxi'u da naca li.
TIT 2:2 Benne' gula chee̱ xudau': Dxal-la' xelaque̱' benne' dxelenná bé'e cuine̱'. Dxal-la' xelaque̱' benne' du lazre'. Dxal-la' xelaque̱' benne' dxuluzéajni'i cuine̱'. Dxal-la' xelaque̱' li lazre' ca dxleajlí lazre̱' Cristo, ne ca zaj nazrí'ine̱' Le̱', ne ca naca xel-la zren lazre' chee̱'.
TIT 2:3 Cá'anqueze nu'ula gula ca' chee̱ xudau': Dxal-la' dxelapa ba lá'ana Dios ca naca xúgute̱ da dxelune̱'. Quebe dxal-la' xelaque̱' benne' dxulutupe̱' dizra' bizruj. Quebe dxal-la' xelaque̱' benne' dxelé'aje̱' da xuzuzre na le̱'. Dxal-la' xulusé̱dene̱' da naca xrlataje̱
TIT 2:4 chee̱ gaca xulusé̱dene̱' nu'ula cuide' ca' chee̱ xelezrí'ine̱' benne' chee̱' ca', ne zrí'ine̱' ca',
TIT 2:5 ne chee̱ xelenná be'e cuine̱', ne xelaque' du lazre', ne xulupe̱'e̱ lizre̱', ne xuluzúe̱' dizra' chee̱ benne' chee̱'. Caní dxal-la' xelune̱' chee̱ quebe nu nne̱' schanní' chee̱ xrtizra' Dios.
TIT 2:6 Cá'anqueze bsizre bi cuide' ca' chee̱ xelenná be'e cuínabe'.
TIT 2:7 Ca naca da xrlátaje dxunu' lue' dxal-la' gulé'e na benne' ca' ca dxal-la' xelune̱'. Gate dxusé̱denu' benne' ca' dxal-la' gacu' li lazre', ne du lazre'.
TIT 2:8 Dxal-la' guchálaju' da naca li lazre' chee̱ quebe nu seque' si tizra le̱ na. Che gunu' caní, na' che nu benne' nnie̱' chee̱le, wedué'equezne̱', lawe' da quebe sua tu da cale̱la da dxunle.
TIT 2:9 Bzéajni'i benne' ca' zaj nada'u chee̱ xuluzúe̱' dizra' chee̱ xrane̱' ca naca xúgute̱ da xelé̱ xrane̱' le̱'. Dxal-la' xelune̱' da xelexezaca ba lazre' xrane̱', ne quebe xelexenné̱' lau xrane̱'.
TIT 2:10 Quebe dxal-la' xelebane̱' da naca chee̱ xrane̱', san dxal-la' xelaque̱' li lazre', chee̱ xelelé'e benne' ca da dxelún benne' caní, na' xelenné̱' chawe' chee̱ xrtizra' Dios, Benne' weselá chee̱dxu.
TIT 2:11 Dios ba blé'ene̱' ca naca da chawe' chee̱' chee̱ xelelá xúgute̱ bénneache.
TIT 2:12 Da xrlátaje chee̱ Dios dxuse̱de na dxi'u chee̱ québedxa gundxu da cale̱la, ne ca naca xel-la dxezá lazre' da cale̱la, san chee̱ nna be'e cuínadxu, ne gácadxu du lazre', ne gápadxu ba lá'ana Dios lu xe̱zr la xu nigá
TIT 2:13 dxácate̱ ne dxebézadxu zra xelá' Dios szren, ne weselá chee̱dxu Jesucristo nen xel-la szren chee̱', da na' dxebeza lázredxu.
TIT 2:14 Le̱' bzua cuine̱' lu na' benne' ca' belútie̱' Le̱' waláz chee̱dxu dxi'u chee̱ bselé̱' dxi'u lu xúgute̱ da zrinnaj, na' bca'ana chawe̱' dxi'u chee̱ gácadxu bi cheé̱queze̱', ne chee̱ gundxu da xrlátaje du lázredxu.
TIT 2:15 Da caní dxal-la' gusé̱denu' benne' ca'. Gudil-la benne' ca', ne bsizre-ne̱' dute̱ xel-la dxenná bea chiu'. Quebe bi da cale̱la gunu' chee̱ quebe nu si tizra lue'.
TIT 3:1 Bsa lazre' benne' bíchedxu ca' chee̱ xelune̱' ca dxuluchixruj benne' ca' dxelenná bé'ene̱', ne benne' xu'u lawe', ne chee̱ xuluzúe̱' dizra' chee̱ benne' ca', ne chee̱ xelezúe̱' xelune̱' xúgute̱ da xrlátaje.
TIT 3:2 Quebe dxal-la' xelenné̱ chee̱ nu benne', san dxal-la' xelaque̱' zren lazre', ne zri'i lazre', ne dxexruj lazre' lau xúgute̱ bénneache.
TIT 3:3 Cá'anqueze dxi'u gate nate gúcadxu benne' xala, ne quebe bzúadxu dizra' chee̱ Dios. Gudadxu cale̱la, na' gunná be'e be̱la' dxen chee̱dxu dxi'u, chee̱ be̱ndxu ca naca xúgute̱ da guzá lázredxu, ne da bezaca ba lázredxu. Be̱ndxu da zrinnaj, ne gúcadxu xa lazre'. Belecuide bénneache dxi'u, na' bzrá'adxu ljwézredxu tudxu xetudxu.
TIT 3:4 Gate Dios, weselá chee̱dxu, blé'ene̱' da naca chawe' chee̱', ne xel-la zri'i lazre' chee̱',
TIT 3:5 na' bselé̱' dxi'u, quegá lawe' da be̱ndxu dxi'u tu da xrlátaje, san lawe' da bexache lazre̱' dxi'u. Bselé̱' dxi'u ne̱ chee̱ da gudibe na dxi'u gate na' bexálajdxu, na' bucube Be' Lá'azxa chee̱' dxi'u.
TIT 3:6 Ne̱ chee̱ Jesucristo, weselá chee̱dxu, Dios ba núnnale̱'e̱ dxi'u Be' Lá'azxa chee̱',
TIT 3:7 chee̱ ne̱ chee̱ da naca chawe' chee̱' gácadxu xrlátaje lau Le̱', ne zrué'edxu xel-la nabán chadía chacanna da dxebeza lázredxu.
TIT 3:8 Da caní zaj naca na da li. Dxaca lazra' gusízrequeznu' benne' ca' ca naca da caní chee̱ xelebé' gunne xue xelún benne' ca' da chawe', benne' ca' dxeléajle̱'e̱ chee̱ Dios. Da caní zaj naca na da xrlátaje, ne da gaca xuluchine xúgute̱ bénneache.
TIT 3:9 Quebe gulapa na'u dizra' xala ca', ne dizra' dxuluzaze bénneache ca naca chee̱ zra xrtawe̱', ne dizra' da dxun na bénneache chupa la'a, ne da dxulutil-la bénneache da naca chee̱ da bchixruj be'e Moisés. Da caní quebe culuén zaj napa na. Dácheze naca na.
TIT 3:10 Che nu benne' dxune̱' le'e chupa la'a, bsizre-ne̱' tu chupa lasa, ne che quebe dxenne̱' ca dxu'u le̱', bebéaje̱' ládujla le'e
TIT 3:11 lawe' da nézenu' nazrinnaj xichaj lázxdau benne' caní, na' dul-la dxelúnqueze̱' ba nuzría xi na le̱'.
TIT 3:12 Gate sel-la' Artemas u Tíquico naga zu', be̱n baxuzre xidu' xedajnna'u neda' lu xe̱zre Nicopolis lawe' da bache nuna' sua' nigá beu' zaga ca'.
TIT 3:13 Gúcale̱ Zenas, benne' wedé dizra', ne Apolos, ca da séquenu'. Bnezruj benne' ca' ca da zaj nachínene̱' chee̱ chjaque̱' lu neza chee̱', na' quebe bi xelexázrjene̱'.
TIT 3:14 Cá'anqueze benne' zaj nabábale̱ne̱' dxi'u dxal-la' xulusé̱die̱' xelune̱' da chawe', chee̱ xelácale̱ne̱' benne' dxelexázrjene̱', chee̱ xelaque̱' benne' guchine Cristo.
TIT 3:15 Xúgute̱ benne' zrále̱ne̱' neda' dxulugape̱' lue' diuzre. Bgape diuzre benne' ca' zaj nazrí'ine̱' dxi'u lu da naca chee̱ Cristo. Dxenaba' Dios gun chawe̱'e̱ xúgute̱le le'e. ¡Ca'an gaca na!
PHM 1:1 Neda', Pablo, xu'a lizre xia lawe' da dxuna' zrin chee̱ Jesucristo, nen bi bíchedxu Timoteo. Dxugápantu' lue' diuzre, Filemón, benne' nazrí'ite̱ lázrentu'. Nacu' bi ljwézrentu' lu zrin chee̱ Cristo.
PHM 1:2 Dxugapa' diuzre benne' bíchedxu ca' dxelezrague̱' lizru', ne nu'ula zandxu Apia, ne Arquipo, bi ljwézredxu nácabe' benne' zeje̱' wedil-la chee̱ Cristo.
PHM 1:3 Dxenaba' Xradxu Dios ne Xránadxu Jesucristo gune̱' da chawe' chee̱le, ne gunne̱' le'e xel-la' dxebeza zri lazre'.
PHM 1:4 Dxápequeza' Dios xcalenu' gate dxuchálajle̱na' Le̱' ne dxeajsá lázrqueza' lue',
PHM 1:5 lawe' da ba benda' ca nazri'inu' Xránadxu Jesucristo ne ca dxeajlí lazru' Le̱', ne ca nazri'inu' xúgute̱ bi ca' chee̱ Dios.
PHM 1:6 Dxenaba' lau Dios guzéajni'ine̱' benne' ca' dxeleajlí lazre̱' Le̱' ne̱ chee̱ xel-la' dxeajlí lazre' chiu', ca naca xúgute̱ da chawe' ca' da nápadxu ne̱ chee̱ Jesucristo.
PHM 1:7 Xel-la' zri'i lazre' chiu', bi bicha', dxúnnale̱'e̱ na neda' xel-la' dxebé, ne dxutipa na lazra', ca dxutipa na lazre' xúgute̱ bi chee̱ Dios.
PHM 1:8 Chee̱ le̱ na', lácala xu'u lu na'a nna be'eda' lue' ca dxal-la' gunu' lawe' da naca' gubáz chee̱ Cristo,
PHM 1:9 dxata' xúeda' lue' lu xel-la' zri'i lazre' chee̱dxu, neda', Pablo, benne' gula, ne xu'a lizre xia lawe' da dxuna' zrin chee̱ Cristo.
PHM 1:10 Dxata' xúeda' lue' tu da gunu' chee̱ Onésimo, bi nácabe' ca zrí'inequeza' lu da naca chee̱ Cristo, neda', xu'a lizre xia nigá.
PHM 1:11 Gate nate Onésimo, bi na'u lue' gúcabe' tu bi we̱n da cale̱la, san na'a nácabe' we̱n zrin li lazre' chiu' lue', ne chia' neda'.
PHM 1:12 Dxesel-la'-be' naga zu'. Bezí' lu na'u-be', nácabe' bi nazrí'ite̱ lazra'.
PHM 1:13 Guzá lazra' neda' xegá'anale̱be' neda' nigá chee̱ gunbe' zrin chia' neda' waláz chiu' lue' dxácate̱ ne xu'a lizre xia lawe' da dxuna' zrin chee̱ dizra' chawe'.
PHM 1:14 Quebe dxaca lazra' bi guna' che quebe naca na da nnau' lue', chee̱ gácale̱nu' neda' lawe' da naca na ca dxaca lazru' lue', ne quegá lawe' da dxenná be'eda' lue'.
PHM 1:15 Becuasa Onésimo nen lue' tu chí'idau', san na'a súale̱tequezebe' lue',
PHM 1:16 quegá ca tu bi na'u lue', san gácabe' tu bi cháwedxa ca tu bi na'u lue', da zéaje̱ na, gácabe' tu bi bichu' nazri'ite̱ lazru'. Neda' nazrí'ile̱'e̱da'-be', san lue' dxal-la' zrí'idxenu'-be', quegaze ca bénneacheze, san cá'anqueze ca bi bíchedxu, bi chee̱ Cristo.
PHM 1:17 Chee̱ le̱ na', che dxéquenu' neda' ca bi ljwezru', bezí' lu na'u-be' ca dxezí' lu na'u neda'.
PHM 1:18 Che bi da cale̱la ba be̱nbe' chiu', u che bi dxál-labe' chiu', neda' quízruja' na.
PHM 1:19 Neda', Pablo, dxuzúaja' da nigá nen ná'aqueza': Neda' quízruja' na, lácala neda' la gusá'a lazru' lue' dxál-laquezu' chia' cuínquezu'.
PHM 1:20 Lue', bi bicha', dxata' xúeda' lue' lu La Xránadxu, be̱n da guzúa na neda' lu da ba neza.
PHM 1:21 Dxuzúaja' chiu' lawe' da nuxrén lazra' gunu' ca da dxapa' lue', ne nezda' gundxu' ca da dxenaba' lue'.
PHM 1:22 Cá'anqueze bcueza latja naga sua' neda' lawe' da dxebeza lazra' gun Dios da dxenábale Le̱', gunne̱' neda' lataj xida' xedajnná'a le'e.
PHM 1:23 Epafras, bi ljwezra', xú'ule̱be' neda' lizre xia lawe' da dxunbe' zrin chee̱ Jesucristo,
PHM 1:24 ne Marcos, ne Aristarco, ne Demas, ne Lucas, bi ca' dxelácale̱be' neda' lu zrin chee̱ Cristo dxulugápabe' lue' diuzre.
PHM 1:25 Dxenaba' lau Xránadxu Jesucristo gune̱' da chawe' chee̱le le'e. Ca'an gaca na.
HEB 1:1 Dios bchálajle̱ne̱' xra xrtáudxu ca' gate nate zane' lasa, ne zane' ca bchálaje̱' lu dxu'a benne' ca' buluchálaje̱' waláz chee̱'.
HEB 1:2 Na'a, lu zra caní, Dios ba bchálajle̱ne̱' dxi'u lu dxu'a Zrí'inequeze̱'. Dios be̱ne̱' xe̱zr la xu nigá lu na' Zrí'ine̱' nigá, ne ba be̱ne̱' naca chee̱' xúgute̱ da ca' be̱ne̱'.
HEB 1:3 Zri'ine Dios nigá naque̱' Benne' dxulé'ene̱' ca naca xel-la' szren chee̱ Dios, ne naque̱' ca da nácaqueze Dios, na' nuxre̱' xúgute̱ da ca' nune̱', dxuchínene̱' dizra' chee̱' da nápale̱'e̱ na xel-la' waca. Gate ba gudúe̱' dul-la da nabágadxu xeajxedxé'e̱ chalá'a xabe̱la chee̱ lataj blau chee̱ Dios xabáa.
HEB 1:4 Zri'ine Dios nácadxe̱' blau ca gubáz chee̱ xabáa ca' chee̱ Dios, ca naca La Cristo da bzua Dios, nácadxa na blau ca la gubáz chee̱ xabáa ca'.
HEB 1:5 Dios cabata' guzre̱' tu gubáz chee̱ xabáa ca guzre̱' Cristo, gunné̱': Lue' nacu' Zri'ina'. Neda' nácaqueza' Xrau' na'a zra. Cá'anqueze cabata' guzre̱' tu gubáz chee̱ xabáa ca gunné̱' chee̱ Cristo: Neda' gaca' Xre̱', na' Le̱' gaque̱' Zri'ina'.
HEB 1:6 Gate bzue̱' Zrí'ine̱' lu xe̱zr la xu nigá, gunné̱': Xúgute̱ gubáz chee̱ xabáa ca' xelue lá'ane̱' Le̱'.
HEB 1:7 Ca naca chee̱ gubáz chee̱ xabáa ca', Dios gunné̱': Dsesel-le̱' gubáz chee̱' ca' ca tu be' da dxaca, ne dxuchínene̱' gubáz we̱n zrin chee̱' ca' ca tu xi'.
HEB 1:8 Ca naca chee̱ Zrí'ine̱', gunná Dios: Lataj blau chiu' lue', Dios, zúate̱queze. Xel-la' dxenná bea chiu' naca na xlátaje̱.
HEB 1:9 Nazri'inu' da xlátaje̱, ne dxezra'u da cale̱la. Chee̱ le̱ na' Dios chiu' ba bé̱nnadxe̱' Lue' xel-la dxebé ca da bnézruje̱' bi ljwezru' ca'.
HEB 1:10 Cá'anqueze guzre̱' Le̱': Lue', Xran, nédxudaute̱ be̱nu' xe̱zr la xu. Nen xel-la' waca chiu' be̱nu' xabáa.
HEB 1:11 Da caní weledé chee̱ na, san Lue' súate̱quezu'. Xúgute̱ da caní welaca gula ca zra lana bénneache.
HEB 1:12 Na' xutubu' na ca tu ladxe', ne gucha'u na ca dxun tu benne' dxuché̱'e̱ zra lane̱'. Lue' zúaquezu' chadía chacanna, na' xel-la' nabán chiu' quebe téqueze chee̱ na.
HEB 1:13 Dios cabata' guzre̱' tu gubáz chee̱ xabáa ca guzre̱' Zrí'ine̱', gunné̱': Gudxe'e chalá'a xabe̱la chia', cadxa guzúa' benne' ca' dxeledábague̱' Lue' zran ni'u.
HEB 1:14 Xúgute̱ gubáz chee̱ xabáa ca' zaj naque̱' be' ca' dxelún zrin chee̱ Dios, na' dxesel-le̱' gubáz chee̱ xabáa ca' chee̱ xelácale̱ne̱' benne' ca' dxelezi'e̱ xel-la' weselá.
HEB 2:1 Chee̱ le̱ na' dxal-la' nna' xánnedxu dizra' da ba bendxu chee̱ quebe cuásadxu lu neza chee̱ xel-la' li.
HEB 2:2 Dizra' da gusel-la Dios gate nate lu na' gubáz chee̱ xabáa ca' guca na li lazre', na' xúgute̱ benne' ca' buluzúe̱' na chalá'ala, ne quebe buluzúe̱' dizra' ca da gunná Dios, Dios bdee̱' le̱' xel-la' zi' ca da dxal-la' xelezí'e̱.
HEB 2:3 ¿Ájazra gaca ladxu che guzúadxu chalá'ala tu xel-la' weselá zren caní? Xránaquezdxu bchálaje̱' chee̱ xel-la' weselá nigá nédxute̱, na' gudé na' buluchálaj benne' ca' belenne̱' na, na' gulenné̱' naca na da li laudxu dxi'u.
HEB 2:4 Cá'anqueze ba bzua chacha Dios na ne̱ chee̱ da dxelunna bea na, ne ne̱ chee̱ da zren ca' be̱n Dios, ne ne̱ chee̱ xel-la' waca zan ca', ne ne̱ chee̱ Be' Lá'azxa, Bénnea' be̱nne̱' dxi'u xel-la' waca ca', ca da guca lázrequeze Le̱'.
HEB 2:5 Dios quebe bzue̱' lu na' gubáz chee̱ xabáa ca' xe̱zr la xu da za za', chee̱ da na' dxuchálajdxu na'a.
HEB 2:6 Naca na ca naxúaj na lu xiche lá'azxa, ca da gunná tu benne': ¿Ájazra naca bénneache che Lue', Dios, dxeajsá lazru' chee̱'? ¿Ájazra naca bénneache, che Lue' dxe'u gunne xue chee̱ le̱'?
HEB 2:7 Tu chí'idau'ze bzu' bénneache látezdxa ca gubáz chee̱ xabáa ca'. Nunu' chee̱' si'e̱ xel-la' szren, ne xel-la' ba lá'ana, ne bzu' lu ne̱'e̱ xúgute̱ da be̱nu'.
HEB 2:8 Xúgute̱ ba bzu' na zran ni'a le̱'. Caní naca, gate Dios bzue̱' xúgute̱ zran ni'a bénneache, quebe bi de̱ da quebe guzúa na dizra' chee̱ bénneache, na' quebe ne xuluzúa ca naca da ca' dizra' chee̱'.
HEB 2:9 Na'a dxelé'edxu Jesús, Bénnea' bzua Dios guque̱' tu chí'idau' látezdxa ca gubáz chee̱ xabáa ca'. Dios gúnene̱' gate Jesús waláz chee̱ xúgute̱ bénneache lawe' da nazri'ine̱' bénneache, na' na'a nunézruje̱' Le̱' xel-la' szren, ne xel-la' ba lá'ana lawe' da gudée̱' lu xel-la' gute zi xa'.
HEB 2:10 Dios be̱ne̱' xúgute̱ da zaj zua, na' zaj zua na chee̱ gaca ba Le̱'. Le̱' dxaca lazre̱' xelezí' xúgute̱ bi chee̱' ca naca xel-la' szren chee̱'. Chee̱ le̱ na' be̱n na ba xen be̱n Dios naca Jesucristo dute̱ weselá chee̱dxu, ne̱ chee̱ da zi' da xa' da gudée̱' chee̱ séquene̱' guselé̱' bénneache chadía chacanna.
HEB 2:11 Benne' caní dxegúa Jesús dul-la da zaj nabague̱', na' be̱nne' caní, ne Lé̱queze̱' zaj naque̱' bi ca' chee̱ tuze Xradxu. Chee̱ le̱ na' quebe dxedué'e Jesús nne̱' chee̱ benne' ca', zaj naque̱' bi biche̱'.
HEB 2:12 Naca na ca dxenná lu xiche lá'azxa: Guchálajqueza' da naca chiu' Lue' láwela bicha' ca', na' gúl-laqueza' da güe lá'ana' Lue' ládujla benne' ca' zaj nazrague̱' lau Lue'.
HEB 2:13 Cá'anqueze dxenná xiche lá'azxa: Neda' guxrén lazra' Dios. Cá'anqueze dxenná na: Nigá zua' nen bi chia' ca', bi ca' be̱nna Dios neda'.
HEB 2:14 Lawe' da zaj naca be̱la' dxen benne' ca' zaj naque̱' bi chee̱', Le̱' be̱n cuine̱' be̱la' dxen chee̱ guzéquene̱' gutie̱', ne caní be̱ne̱' chee̱ séquene̱' guzría xi'e̱ da xriwe̱', da na' napa na xel-la' dxenná bea gute na bénneache.
HEB 2:15 Caní guca bselé̱' xúgute̱ benne' gulaque̱' ca benne' zaj nada'u xúgute̱ iza zaj naca bane̱' lawe' da belezrebe̱' xel-la' gute.
HEB 2:16 Da li quebe ble̱'e̱ nigá chee̱ gácale̱ne̱' gubáz chee̱ xabáa ca', san naca na ca dxenná xiche lá'azxa: Ble̱'e̱ chee̱ gácale̱ne̱' benne' zaj naque̱' zri'ine zre sua Abraham.
HEB 2:17 Chee̱ le̱ na' be̱n na ba xen guque̱' dute̱ ca zaj naca bi biche̱' ca', chee̱ séquene̱' gaque̱' lau Dios tu bxruze blau naque̱' li lazre', ne dxexache lazre̱' bénneache, ne chee̱ séquene̱' gun cuine̱' tu da dxegúa na dul-la zaj nabaga bénneache.
HEB 2:18 Lawe' da gudéqueze Le̱' xel-la' zi' gate guca lazre Satanás gun zréaje Le̱', dxezéquene̱' na'a gácale̱ne̱' benne' ca' dxun zréaje da xriwe̱' le̱'.
HEB 3:1 Le'e, benne' bícha'dau', nácale bi chee̱ Dios, lawe' da nácale benne' ca' ba gunné̱ Dios, le nna' xanne' Jesucristo, Bénnea' gusel-la Dios chee̱ gaque̱' bxruze blau chee̱ da dxéajle̱dxu.
HEB 3:2 Jesús nigá guque̱' li lazre' lau Dios, Bénnea' bzue̱' Le̱' lu zrin na' da ba be̱ne̱', ca guca Moisés, guque̱' li lazre' lu zrin na' be̱ne̱' lau benne' ca' gulaque̱' bi chee̱ Dios.
HEB 3:3 Jesús dxal-la' sidxe̱' xel-la' ba lá'ana ca da si' Moisés, ca dxaca chee̱ benne' dxune̱' tu xu'u, dxezidxe̱' xel-la' ba lá'ana ca da dxezí' xu'u ná'queze.
HEB 3:4 Tu tu xu'u naca na da be̱n benne', san Dios nune̱' xúgute̱ da zaj zua.
HEB 3:5 Ca we̱n zrin chee̱ Dios guca Moisés li lazre' lu zrin na' be̱ne̱' lau benne' ca' gulaque̱' bi chee̱ Dios, na' bchálaje̱' ca naca da nne̱ Dios ca te na'.
HEB 3:6 Cristo naque̱' li lazre' ca Zrí'inequeze Dios laudxu dxi'u. Nácadxu ca lizre Dios che se̱ cháchadxu lu da dxuxrén lázredxu ca zrindxa zra cheajsé̱ chee̱dxu, ne dxebéle̱'e̱dxu lu da dxebeza lázredxu.
HEB 3:7 Caní naca, naca na ca da dxenná Be' Lá'azxa lu xiche lá'azxa, dxenné̱': Na'a, che le'e dxenle ca da dxenná Dios,
HEB 3:8 quebe gácale lázrdau zide' ca gulaca benne' ca' guledábague̱' Dios, na' belune̱' Dios ze̱de le̱'e̱ xixre' lawe' lataj.
HEB 3:9 Belún xra xrtaule ca' neda' ze̱de chee̱ guna' ca gunnía', lácala belelé'ene̱' da be̱na' láwela chua iza.
HEB 3:10 Chee̱ le̱ na' bzra'a xichja' benne' ca', na' gunnía': Tu dxelebéaj xíchajzqueze benne' caní neda', ne dxeledábague̱' ca naca da bdxíxruja'.
HEB 3:11 Chee̱ le̱ na' bzra'a xichja' benne' ca', ne bzua chúchua' da gucha' benne' ca', gunnía' quebe xelexú'e̱ naga xelexezí' lazre̱' naga zúaqueza' neda'.
HEB 3:12 Le'e, benne' bícha'dau', le guxúe cuínale chee̱ quebe gaca lázrdau zide' netule le'e, quebe cuásale lau Dios ban lawe' da quebe dxéajle̱le chee̱ Le̱'.
HEB 3:13 Le gutipa lázrele tule xetule tu zra tu zra, dxácate̱ ne zúadxu lu zra da nunna Dios dxi'u, chee̱ quebe si xe̱ dul-la netule le'e, na' gácale lázrdau zide'.
HEB 3:14 Che se̱ cháchadxu ca zrin zra cheajsé̱ chee̱dxu ca naca da dxuxrén lázrequezdxu nédxute̱, na'a nácadxu bi chee̱ Cristo.
HEB 3:15 Naca na ca dxenná na lu xiche lá'azxa: Na'a, che le'e dxenle ca da dxenná Dios, quebe gácale lázrdau zide' ca gulaca benne' ca' guledábague̱' Dios.
HEB 3:16 ¿Nuzra benne' ca' belenne̱' dizra' chee̱ Dios, na' ca gudé na' guledábague̱' Dios? Zaj naca xúgute̱ benne' ca' bebéaj Moisés lu xe̱zr la xu Egipto.
HEB 3:17 ¿Nuzra benne' ca' bzra'a Dios le̱' láwela chua iza? Zaj naca benne' ca' belún dul-la, na' gulátie̱' le̱'e̱ xixre' lawe' lataj.
HEB 3:18 ¿Nuzra benne' ca' bzua chuchu Dios xrtizre̱' gate guzre̱' le̱' quebe xelexú'e̱ naga xelexezí' lazre̱' naga zua Le̱'? Zaj naca benne' ca' guledábague̱' xrtizra Dios.
HEB 3:19 Na'a dxelé'edxu quebe guca xelexú'e̱ lawe' da quebe guléajle̱'e̱ chee̱ Le̱'.
HEB 4:1 Caní naca, dxácate̱ ne zua chee̱dxu da nache̱be lazre' Dios chee̱ xexú'udxu naga xezí' lázredxu naga zua Dios, dxal-la' guxúe cuínadxu gagáze nule le'e quebe xexú'ule.
HEB 4:2 Cá'anqueze dxi'u ba bendxu dizra' chawe' chee̱ Dios ca da belén benne' ca', san benne' ca' quebe bi da ba neza gulezí'e̱ chee̱ dizra' da belenne̱' lawe' da quebe guléajle̱'e̱ chee̱ na.
HEB 4:3 Dxi'u ba guxéajle̱dxu, na' chú'udxu naga xezí' lázredxu, ca da gunná Dios gate gunné̱': Chee̱ le̱ na' bzra'a xichja' benne' ca', na' bzua chúchua' da gucha' benne' ca', gunnía': Quebe xelexú'e̱ naga xelexezí' lazre̱' naga zua neda'. Caní gunná Dios lácala ba bsexuzre̱' zrin chee̱' gate na' be̱nte̱' xe̱zr la xu,
HEB 4:4 lawe' da naxúaj na lu xiche lá'azxa ca naca chee̱ zra gazre', dxenná na: Lu zra gazre bezí' lazre' Dios lu zrin da be̱ne̱'.
HEB 4:5 Xetú dizra' da naxúaj na lu xiche lá'azxa dxenná na: Quebe xelexú'e̱ naga xelexezí' lazre̱' naga zua neda'.
HEB 4:6 Benne' ca' belenne̱' dizra' chawe' nigá chee̱ Dios nédxute̱ quebe belexú'e̱ lawe' da quebe buluzúe̱' dizra' ca naca da gunná Dios. Na'a ne zaj zra' benne' dxal-la' xelexú'uqueze̱' naga xelexezí' lazre̱'.
HEB 4:7 Chee̱ le̱ na' Dios ba guléaje̱' xetú zra, gunné̱': Na'a zra. Caní naca lawe' da dxuchálajle̱ Dios dxi'u dxuchínene̱' dizra' da gunná David gudé na', da naxúaj na lu xiche lá'azxa naga dxenná na: Na'a, che le'e dxenle ca da dxenná Dios, quebe gácale lázrdau zide'.
HEB 4:8 Chela belexezí' lazre' benne' ca' be̱ Josué lataj gulu'e̱ xe̱zr la xu na', quegá guchálajdxa Dios chee̱ xetú zra.
HEB 4:9 Caní naca na, de̱ lataj xelú'u bi ca' chee̱ Dios naga xelexezí' lazre̱' naga zua Dios,
HEB 4:10 lawe' da xezí' lazre' lu zrin dxun nu benne' chu'e̱ naga xezí' lazre̱' naga zua Dios, ca be̱n Dios, bezí' lazre̱' lu zrin be̱n Le̱'.
HEB 4:11 Dxal-la' gun zi lázredxu séquedxu chú'udxu naga xezí' lázredxu gagáze nu benne' gune̱' ca belún benne' ca' quebe guléajle̱'e̱.
HEB 4:12 Dizra' chee̱ Dios naca na da bane, ne napa na xel-la' waca. Naládxa na ca tu xia da nalá na dxupa la'ate̱, ne dxaze na naga dxelezraga bénne'du xú'udxu, ne be' nácaquezdxu, ne dxaze na lu xichaj lázrdau bénneache, na' dxuchi'a na ca naca da dxugú'u bea bénneache ne ca da dxéquene̱' gune̱'.
HEB 4:13 Quebe bi de̱ da be̱n Dios da seque' gucache cuina na lau Dios. Xúgute̱ zaj nalá' na, ne zaj naxalaj na lau Bénnea' dxal-la' xulé'edxu Le̱' ca da be̱ndxu.
HEB 4:14 Jesús, Zri'ine Dios naque̱' bxruze blau zrente̱ chee̱dxu, Bénnea' ba bexu'e̱ lau Dios. Chee̱ le̱ na' dxal-la' se̱ típadxu lu da dxéajle̱dxu chee̱ Dios.
HEB 4:15 Bxruze blau chee̱dxu wazéquene̱' xexache lazre̱' dxi'u che dxi'u dxate ni'a nadxu lu xel-la' dxeajlí lazre' chee̱dxu, lawe' da gudéqueze Le̱' lu xel-la' zi' ca' gate guca lazre da xriwe̱' gun zréaje na Le̱', ca da dxededxu dxi'u na'a, na' Le̱' quebe be̱ne̱' dul-la.
HEB 4:16 Chee̱ le̱ na' dxal-la' bígadxu du lázredxu lu lataj blau chee̱ Dios chee̱dxu, Bénnea' nazri'ine̱' dxi'u, chee̱ xexache lazre̱' dxi'u, ne dute̱ xel-la' xrlátaje chee̱' gácale̱ne̱' dxi'u gate nachínedxu nu gácale̱ dxi'u.
HEB 5:1 Tu tu bxruze blau dxecá'a Dios ládujla bénneache, ne dxuzúe̱' le̱' chee̱ gune̱' zrin lau Dios waláz chee̱ bénneache ca', ne cu'e̱ guna' lau Dios, ne gutie̱' béadu ca' ne̱ chee̱ dul-la zaj nabaga' bénneache.
HEB 5:2 Cá'anqueze bxruze blau nigá dxate ni'a ne̱'e̱ lu da ca' dxune̱' ca da dxaca chee̱dxu dxi'u. Chee̱ le̱ na' wape̱' xel-la' zren lazre' chee̱ benne' ca' quebe dxeléajni'ine̱', ne dxelune̱' da cale̱la,
HEB 5:3 na' lawe' da dxate ni'a ne̱'e̱, dxal-la' gutie̱' béadu ca' ne̱ chee̱ dul-la da nabágaqueze̱', cáte̱ze dxune̱' ne̱ chee̱ dul-la da zaj nabaga xezícadxa bénneache.
HEB 5:4 Quebe nu gaca gun cuina bxruze blau, san Diósqueze dxenné̱' bénnea', ne dxunézruje̱' le̱' xel-la' szren na', ca be̱ne̱' chee̱ Aarón.
HEB 5:5 Cá'anqueze naca na chee̱ Cristo, quebe bzua cuine̱' bxruze blau, san Dios be̱'e̱ Le̱' xel-la' szren na' ca da guzre̱' Le̱': Lue' nacu' Zri'ina'. Neda' nácaqueza' Xrau' na'a.
HEB 5:6 Cá'anqueze naxúaj na lu xiche lá'azxa ca guzre̱' Le̱': Lue' nacu' bxruze blau chadía chacanna ca gúcaqueze Melquisedec.
HEB 5:7 Gate zua Cristo lu xe̱zr la xu nigá, bchálajle̱ne̱' Dios, ne guta' xuene̱' Dios nen chi'e̱ zizraj, ne gudxézrele̱'e̱, lawe' da napa Dios xel-la' waca guselé̱' Le̱' lu xel-la' gute, na' Dios benne̱' chee̱' lawe' da gudape̱' Xre̱' ba lá'ana.
HEB 5:8 Ca'an guca, lácala naca Cristo Zri'ine Dios, bsé̱die̱' guque̱' wezúa dizra' ne̱ chee̱ xel-la' zi' da gudée̱',
HEB 5:9 na' gate guque̱' dute̱ Weselá chee̱dxu ne̱ chee̱ da caní, nadxa guzéquene̱' bselé̱' bénneache chadía chacanna, benne' ca' dxuluzúe̱' dizra' chee̱',
HEB 5:10 na' Dios bzue̱' Le̱' bxruze blau ca gúcaqueze Melquisedec.
HEB 5:11 Dé̱le̱'e̱ da dxal-la' guchálaja' ca naca chee̱ da nigá, san naca na ste̱be guzéajni'ida' le'e na'a, lawe' da quebe ne gaca chéajni'ile na.
HEB 5:12 Zane' iza ba guca dxéajle̱le chee̱ Cristo, na' ba gul-la' gusé̱dele benne' xula ca naca chee̱ Le̱', san dxun na ba xen nu guzéajni'i le'e da xula da quebe nácate̱ca ste̱be ca naca dizra' chee̱ Dios. Ne nácale ca bidau' ne dxázrebe' nizre'. Quebe ne gaca gágule xel-la' wagu chee̱ benne' waca.
HEB 5:13 Benne' ca' zaj naca ca bidau' ne dxázrebe' nizre' zaj naque̱' benne' ca' quebe ne xuluchínene̱' dizra' chee̱ xel-la' li.
HEB 5:14 Xel-la' wagu chee̱ benne' waca naca na chee̱ benne' ca' ba zaj nézene̱' xelexúnbe'e̱ da naca da xrlátaje, ne da naca da cale̱la.
HEB 6:1 Chee̱ le̱ na' québedxa dxal-la' gusé̱dedxu ca da bsé̱dedxu nédxute̱ ca naca chee̱ Cristo, san chéajte̱zedxu gusé̱dedxu da naca chee̱' chee̱ gácadxu benne' waca. Québedxa bi dxal-la' guchálajdxu chee̱ da du ca' da bsé̱dedxu nédxute̱, ca dxal-la' xexéaje lázredxu chee̱ da ca' be̱ndxu da zaj nua na xel-la' gute, ne ca dxal-la' chéajle̱dxu chee̱ Dios,
HEB 6:2 ne ca dxal-la' xedxúadxu nisa, ne ca dxal-la' xuluzé̱ ne̱'e̱ xíchajdxu, ne ca xelexebán benne' gate, ne ca gun Dios, guchi'e̱ da nun tu tu bénneache chee̱ gudée̱' benne' ca' dxelune̱' da cale̱la lu lataj ba xa' chadía chacanna.
HEB 6:3 Chee̱ le̱ na' chéajte̱dxu lu da naca chee̱ Cristo, che Dios gunne̱' dxi'u lataj.
HEB 6:4 Benne' ca' ba gulezí'e̱ ca naca xel-la' naxaní' chee̱ Dios, ne ba gulezú lawe' xelúnbe'e̱ da dxunna Dios, ne ba gulezí'e̱ Be' Lá'azxa,
HEB 6:5 ne ba gulezú lawe' xelúnbe'e̱ da xrlátaje ca' chee̱ Dios ca naca da xelezí'e̱ lu xe̱zr la xu da za za',
HEB 6:6 na' te na' che xuluzúe̱' Dios chalá'ala, québedxa gaca xelexexéaje lazre̱' lawe' da gaca na ca xuludé̱'e̱ Cristo le̱'e̱ xaga begúaj da xula, ne dxelún le̱' chee̱' láwela xúgute̱ bénneache.
HEB 6:7 Zaj naque̱' ca xe̱zr la xu da dxezí na nisa xiuj. Che xe̱zr la xu na' dxunna lina chawe' chee̱ benne' dxelune̱' na zrin, naca na da dxun chawe' Dios,
HEB 6:8 san che dxachuj na xeche', ne xixre' da quebe bi culuén napa na, quebe bi zaca xe̱zr la xu na', san naca na tu da xu'u de', na' naga chéajse̱te̱ chezxe na.
HEB 6:9 Le'e, benne' bícha'dau', lácala dxuchálajntu' caní, dxuxrén lázrentu' ca naca chee̱le le'e wazile le'e da chawe' chee̱ xel-la' weselá.
HEB 6:10 Dios dxune̱' da xlátaje̱, ne quebe gal-la lazre̱' ca naca zrin da ba be̱nle, ne ca bzri'ile Le̱' gate gúcale̱le benne' bíchedxu ca', ne ca da tu dxúnzquezle.
HEB 6:11 Dxaca lázrentu' chéajte̱ze tu tule gunle da caní dute̱ lázrdaule ca zrin zra cheajsé̱ chee̱le, chee̱ zrué'ele da dxebeza lázrele.
HEB 6:12 Quebe dxaca lázrentu' xewé̱dele. Dxaca lázrentu' gunle le'e ca belún benne' ca' guleajlí lazre̱' Dios, ne gulaque̱' zren lazre', na' gulezí'e̱ ca da guche̱be lazre' Dios gunézruje̱' chee̱'.
HEB 6:13 Gate guche̱be lazre' Dios bi gunézruje̱' chee̱ Abraham, na' bzétajqueze cuine̱' lawe' da québedxa nu zua nácadxa szren ca Le̱', nu guzétaje̱',
HEB 6:14 gunné̱': “Da li gúnqueza' da chawe' chiu' lue', ne guzánqueza' zri'ine zre su'.”
HEB 6:15 Abraham guleze̱' dute̱ xel-la' zren lazre', na' chee̱ le̱ na' guzi'e̱ da guche̱be lazre' Dios gunézruje̱' chee̱'.
HEB 6:16 Gate nu dxuluzetaj bénneache, dxuluzétaje̱' benne' nácadxe̱' szren ca lé̱queze̱', ne gate bi dxuluzúa chúchue̱', ne dxuluzétaje̱' Dios, québedxa bi de̱ da bi xelenné̱'.
HEB 6:17 Chee̱ le̱ na' Dios bzua chúchue̱' da guche̱be lazre̱', ne bzetaj cuine̱', lawe' da guca lazre̱' gulé'ene̱' benne' ca' xelezí'e̱ da guche̱be lazre̱', Le̱' gune̱' ca naca da guche̱be lazre̱', ne quebe guché̱'e̱ ca gune̱'.
HEB 6:18 Caní naca, da chupa caní quebe gaca cha na, na' lu da caní Dios quebe gaca gun lazre̱', ne ne̱ chee̱ da ca' Dios ba nunne̱' dxi'u tu da gun na dxi'u dipa lazre', dxi'u na' ba nézedxu dxuxúe Le̱' dxi'u, ne nuxrén lázredxu si' lu nnadxu da dxebeza lázredxu ca naca da gunne̱' dxi'u.
HEB 6:19 Da nigá dxebeza lázredxu nuxru chacha na bénne'du xú'udxu ca dxun tu xia da dxuxru chacha na tu da dxedá lawe' nísadau' gate zria na lawe' nísadau'. Da na' dxebeza lázredxu zúale̱ na Cristo cuzru ladxe' da ze̱ lu xudau' da zua xabáa,
HEB 6:20 naga guxú'u Jesús waláz chee̱dxu chee̱ gusálaje̱' neza naga tedxu, na' Le̱' naque̱' tu bxruze blau chadía chacanna ca guca Melquisedec.
HEB 7:1 Melquisedec nigá guque̱' wenná bea chee̱ xe̱zre Salem, ne bxruze chee̱ Dios szrente̱. Gate ze za' Abraham lu wedil-la gate bzétaje̱' benne' wenná bea ca', na' Melquisedec nigá xeajchague̱' le̱', ne gunabe̱' lau Dios gune̱' da chawe' chee̱ Abraham,
HEB 7:2 na' Abraham bnézruje̱' chee̱ le̱' tu cue' chee̱ da chi cue' ca' ca naca da bzrué'ene̱' lu wedil-la na'. La Melquisedec zéaje̱ na wenná bea xlátaje̱, ne lawe' da guque̱' benne' wenná bea chee̱ xe̱zre Salem, da zéaje̱ na xel-la' dxebeza zri lazre', le̱' zéaje̱queze na wenná bea chee̱ xel-la' dxebeza zri lazre'.
HEB 7:3 Quebe naxúaj na zua xre̱', ne xrne̱'e̱, ne xra xrtawe̱', ne quebe naxúaj na che gúlaje̱', ne che gutie̱'. Caní naca na, da guca Melquisedec dxulé'e na ca naca chee̱ Zri'ine Dios, naque̱' bxruze blau chadía chacanna.
HEB 7:4 Le na' xque na'a ca szren guca Melquisedec, che bnezruj xra xrtáudxu Abraham chee̱ le̱' tu cue' chee̱ da chi cue' chee̱ da guqué̱'e̱ lu na' wenná bea ca' lu wedil-la na'.
HEB 7:5 Ca naca da bdxixruj bea Moisés, bxruze ca', benne' ca' zaj naque̱' xrtia Leví dxal-la' xelezí'e̱ tu cue' chee̱ da chi cue' ca' da xelizruj benne' Israel ca', benne' zaj naque̱' xrtia ljwezre̱', lácala zaj naque̱' zri'ine zre sua Abraham ca zaj nácaqueze benne' ca'.
HEB 7:6 Melquisedec, benne' quebe naque̱' xrtia Leví guzi'e̱ tu cue' chee̱ da chi cue' ca' da gudizruj Abraham, bénnea' dxal-la' si'e̱ da guche̱be lazre' Dios. Cá'anqueze Melquisedec gunabe̱' lau Dios gune̱' da chawe' chee̱ Abraham,
HEB 7:7 na' dxelenná xúgute̱ bénneache nácadxa blau bénnea' dxenabe̱' lau Dios gune̱' chawe' chee̱ benne' xula ca' quézcala bénnea' si'e̱ da chawe' na' dxenabe̱'.
HEB 7:8 Na'a benne' ca' dxelezi'e̱ tu cue' chee̱ da chi cue' ca' zaj naque̱' benne' dxelate, san ca naca chee̱ Melquisedec, naque̱' ca tu benne' naca bánqueze̱' lawe' da quebe naxúaj na lu xiche lá'azxa che gutie̱'.
HEB 7:9 Ca naca chee̱ Leví, ne ca naca chee̱ xúgute̱ bxruze ca' zaj naque̱' zri'ine zre sua Leví na', benne' ca' dxelezí'e̱ na'a tu cue' chee̱ da chi cue' ca', wácaqueze nnadxu cá'anqueze benne' caní gulízruje̱' chee̱ Melquisedec tu cue' chee̱ da chi cue' gate na' bezrague̱' Abraham,
HEB 7:10 lawe' da wazeque' nnadxu ne zaj zua zri'ine zre sua Abraham lu be̱l-la' dxen chee̱', benne' quebe ne xelalaj gate na' bdxuaj Melquisedec xeajchague̱' Abraham na'.
HEB 7:11 Benne' Israel ca' gulezí' lu ne̱'e̱ da bdxixruj bea Dios lu na' bxruze ca' zaj naque̱' xrtia Leví. Chela guzeque' da belún bxruze ca' gun na li lazre' benne' ca' buluzúe̱' dizra' chee̱ da bdxixruj bea Dios na', na' quebe be̱n na ba xen la' xetú bxruze ca guca Melquisedec, ne quegá ca guca Aarón.
HEB 7:12 Che xezrá' ca dxal-la' gaca bxruze na', na' dxál-la'queze xezrá' da nadxixruj bea na'.
HEB 7:13 Xránadxu, Bénnea' naxúaj na chee̱' gaque̱' bxruze ca guca Melquisedec, nababe̱' xetú cue' xrtia Israel ca', benne' ca' netue̱' quebe ne gaque̱' bxruze.
HEB 7:14 Naca bea na nababa Xránadxu xrtia Judá, na' Moisés quebe gunné̱' xelaca benne' caní bxruze.
HEB 7:15 Da nigá naca béadxa na che bxruze cube na' dxal-la' gaque̱' ca guca Melquisedec,
HEB 7:16 ne bxruze cube nigá quebe gaque̱' bxruze ne̱ chee̱ tu da nadxixruj bea da dxenná na nu xrtia dxal-la' gaque̱'. Gaque̱' bxruze lawe' da nape̱' xel-la' waca chee̱ tu xel-la' nabán da quebe te chee̱ na.
HEB 7:17 Naca chee̱' ca da dxenná Dios: Lue' nacu' bxruze chadía chacanna ca da guca Melquisedec.
HEB 7:18 Caní guca, bedxúaj chalá'ala da bdxixruj bea Dios gate nate lawe' da quebe guzeque' bi gun na, ne quebe bi culuén gudapa na,
HEB 7:19 lawe' da quebe guca da gunná bea Moisés gun na bénneache li lazre'. Na'a nápadxu tu xel-la' dxebeza lazre' da cháwedxa, na' ne̱ chee̱ na dxebígadxu lau Dios.
HEB 7:20 Gate Dios be̱ne̱' Jesús bxruze, bzetaj cuine̱'.
HEB 7:21 Quebe bzetaj cuine̱' gate bzue̱' xezícadxa bxruze ca'. Gate be̱ne̱' Jesús bxruze bzetaj cuine̱' ca da naxúaj na lu xiche lá'azxa, dxenná na: Xránadxu Dios bzetaj cuine̱', ne quebe guché̱'e̱ xrtizre̱'. Gunné̱': “Lue' nacu' bxruze chadía chacanna ca da guca Melquisedec.”
HEB 7:22 Chee̱ le̱ na' Jesús dxun chúchue̱' tu xel-la' wezría da nácadxa chawe' ca da nedxu.
HEB 7:23 Xezícadxa bxruze ca', benne' gulezrá' nédxula be̱n na ba xen gulaque̱' benne' zan lawe' da gulate tu tue̱', na' quebe guca xeledíe̱'.
HEB 7:24 Jesús naque̱' tu bxruze chadía chacanna lawe' da quebe gatie̱'.
HEB 7:25 Chee̱ le̱ na' dxezéquene̱' guselé̱' chadía chacanna benne' ca' xelebigue̱' lau Dios ne̱ chee̱ Le̱', lawe' da naca ban Le̱' chadía chacanna chee̱ gudée̱' dizra' chee̱ benne' ca' lau Dios.
HEB 7:26 Jesús naque̱' bxruze blau, bxruze na' dxechínedxu. Naque̱' lá'azxa, ne quebe bi da cale̱la be̱ne̱', ne quebe nabague̱' dul-la. Quebe naque̱' tuze ca zaj naca benne' dul-la, na' Dios nucá'ana szrendxe̱' Le̱' ca xúgute̱ da zaj zua xabáa.
HEB 7:27 Quebe naque̱' ca xezícadxa bxruze ca', benne' ca' be̱n na ba xen belutie̱' béadu ca' tu zra tu zra, béadu ca' buluzúe̱' nedxu ne̱ chee̱ xtúl-laqueze̱', na' ca gudé na' buluzúe̱' béadu xula ca' ne̱ chee̱ xtul-la bénneache. Jesús tu lásaze bzua cuine̱' ne̱ chee̱ dul-la zaj nabaga xúgute̱ bénneache.
HEB 7:28 Da bdxixruj bea Moisés dxuzúa na bxruze blau ca' zaj naque̱' benne' quebe zaj naque̱' li lazre'. Gate Dios bzetaj cuine̱' ca gudé bla' da nadxixruj bea na', bzue̱' tu bxruze blau naque̱' Zrí'inequeze̱', Bénnea' be̱n Dios naque̱' tu bxruze blau li lazre' chadía chacanna.
HEB 8:1 Da naca blaudxa chee̱ da caní dxennantu' naca na da nigá: Zua tu bxruze blau chee̱dxu caní, Bénnea' dxe'e̱ chalá'a xabe̱la chee̱ lataj blau chee̱ Dios xabáa,
HEB 8:2 ne naque̱' bxruze blau dxune̱' zrin lu lataj lá'azxa li, da be̱n Xránadxu, quegá bénneache.
HEB 8:3 Xúgute̱ bxruze blau nuzúa Dios le̱' chee̱ xelegú'e̱ guna' lau Dios, ne xelútie̱' béadu ca' lau Dios. Chee̱ le̱ na' dxun na ba xen bi guzúa Cristo lau Dios.
HEB 8:4 La zua Cristo xe̱zr la xu nigá, quebe gaque̱' bxruze lawe' da ne zaj zra' bxruze ca' dxelegú'e̱ guna' ca nadxixruj bea da bde Moisés.
HEB 8:5 Zrin dxelún bxruze caní naca na ca tu da dxulé'eze na, ne ca tu zrúlaze chee̱ da na' zua xabáa. Nezdxu naca na tu da dxulé'eze lawe' da gunná Dios, guzre̱' Moisés gate ba zue̱' gune̱' lataj lá'azxa: “Bxue xanne' gunu' xúgute̱ na cáte̱ze naca da ble'eda' lue' lu xi'a na'.”
HEB 8:6 Na'a bxruze blau chee̱dxu nigá dxune̱' tu zrin zácadxa lawe' da naque̱' wedé dizra' chee̱ tu xel-la' wezría cháwedxa, da nun Dios ne̱ chee̱ da ca' guche̱be lazre̱' da zaj naca na cháwedxa.
HEB 8:7 La guca li lazre' xel-la' wezría da be̱ne̱' nedxu, quebe be̱n na ba xen gune̱' xel-la' wezría gudxupe' na'.
HEB 8:8 Gate Dios gudil-le̱' benne' ca' zaj naque̱' bi che, gunné̱': Dxenná Xránale: Wazrín zra gate guna' tu xel-la' wezría cube nen benne' Israel ca', ne benne' Judá ca'.
HEB 8:9 Quebe gaca na ca guca xel-la' wezría da be̱na' nen xra xrtaule ca' gate becá'a ne̱'e̱, ne bebéaja' benne' ca' lu xe̱zr la xu Egipto. Caní guna' lawe' da quebe buluzúe̱' dizra' xel-la' wezría da nuna', na' chee̱ le̱ na' guleaj xichja' benne' ca'. Da ni dxenná Xránale.
HEB 8:10 Xel-la' wezría guna' nen benne' Israel ca' ca te chee̱ lu zra caní gaca na caní, dxenná Xránale: Guzúa' da gudxixruj be'a lu xichaj lázrdau benne' ca', ne guzúaja' na lu lázrdawe̱'. Nadxa gaca' neda' Dios chee̱ benne' ca', na' le̱' xelaque̱' bi chia' ca'.
HEB 8:11 Quebe gun na ba xen xuluse̱de ljwezre̱', ne quegá nu benne' xe̱'e̱ bi biche̱': Be̱nbea Xránadxu. Xúgute̱' xelúnbe'e̱ neda', benne' cá'aze, ne benne' blau.
HEB 8:12 Gunite lawa' chee̱ benne' ca' ca naca da cale̱la da zaj nune̱', ne québedxa cheajsá lazra' chee̱ dul-la da zaj nune̱'.
HEB 8:13 Gate dxuchalaj Dios chee̱ tu xel-la' wezría cube, naca na lawe' da ba gunné̱' chee̱ da nedxu naca na da gula, na' da ba dxaca na da gula, ne da gulasa la xenítete̱ na.
HEB 9:1 Gate ne zua xel-la' wezría nedxu, zaj de̱ da nadxixruj bea ca dxal-la' xelún bxruze ca' tu lu xudau' da zua xe̱zr la xu nigá.
HEB 9:2 Xudau' nedxu caní guca na tu xu'u xide zren. Lu lataj nedxu chee̱ xudau' na' da nazí le na Lataj Lá'azxa zaj zua da dxusa'ní', ne tu ta'a naga zria xeta xtila lá'azxa.
HEB 9:3 Cuzre naga ze̱ ladxe' gudxupe' zua xetú lataj da nazí le na Lataj Lá'azxa Blau.
HEB 9:4 Lu lataj nigá zaj zua tu tá'adau' naga xezxe xala, ne tu xi'ina chee̱ xel-la' wezría da nun Dios, da nacu na oro du ca nácaqueze na. Lu'ule xi'ina na' xu'u tu zruágadau' xu'u na xeta maná. Cá'anqueze lu'ule na xu'u xágadau' da be̱xru Aarón da na' bezría na, ne zaj xu'u na xiaj ca' naga zaj naxúaj dizra' chee̱ xel-la' wezría.
HEB 9:5 Lawe' xi'ina nigá zaj zua gubáz chee̱ xabáa ca' zaj naca na oro, da dxululé'e na zua Dios na', na' zaj nugacu xrile na naga dxuluzríe̱' dxen ne̱ chee̱ dul-la zaj nabaga bénneache. Québedxa séquentu' guchálajntu' ca naca chee̱ da caní na'a.
HEB 9:6 Gate ba nagá'ana chawe' da caní, na' bxruze ca' dxelú'uqueze̱' lu lataj nedxu chee̱ lataj lá'azxa chee̱ xelune̱' zrin chee̱ xel-la' bxruze chee̱'.
HEB 9:7 Lu lataj gudxupe' dxu'u tuze bxruze blau tu lásaze tu tu iza, na' gate dxu'e̱ na' dxun na ba xen gu'e̱ dxen chee̱ béadu ca' da guzríe̱' ne̱ chee̱ dul-la nabágaqueze̱', ne ne̱ chee̱ dul-la zaj nabaga bénneache ca'.
HEB 9:8 Be' Lá'azxa dxuzéajni'ine̱' dxi'u quebe naxalaj neza chee̱ chú'udxu Lataj Lá'azxa Blau na' dxácate̱ dxelune̱' zrin chee̱ xel-la' bxruze chee̱' lu lataj nedxu chee̱ lataj lá'azxa na'.
HEB 9:9 Xúgute̱ da caní zaj naca na da dxululé'eze, da dxaca lu zra na'a zra, lawe' da guna' ca', ne dxen chee̱ béadu ca' da dxuluzúa bxruze ca' lau Dios quebe gaca xelún na bénneache dute̱ li lazre'.
HEB 9:10 Da caní zaj naca na chee̱ da dxelé'aj dxelawe̱', ne chee̱ da dxulucá'ana chawe' cuine̱', ne chee̱ da nadxixruj bea ca naca chee̱ be̱la' dxen chee̱ bénneache, da ca' bzua Dios ca zrindxa zra guché̱'e̱ da ca'.
HEB 9:11 Na'a ba bla' Cristo, ne naca Le̱' bxruze blau chee̱ da xrlátaje ca' da ba belelá'. Lataj Lá'azxa naga dxun Le̱' zrin ca bxruze blau naca na blaudxa, ne da li lázredxa. Quebe naca na tu da zaj nun bénneache, da zéaje̱ na, quebe naca na chee̱ xe̱zr la xu nigá.
HEB 9:12 Cristo ba guxú'e̱ Lataj Lá'azxa Blau, quegá chee̱ guzúe̱' dxen chee̱ béadu ca', ne chee̱ me̱du ca', san chee̱ guzúe̱' dxen cheé̱queze̱', na' guxú'e̱ ga na' tu lásaze lawe' da ba be̱ne̱' xel-la' weselá chadía chacanna chee̱dxu dxi'u.
HEB 9:13 Da li dxen chee̱ be̱zre, ne chee̱ béadu ca', ne de chee̱ bé̱zredu ca', bea ca' dxuluzezxe̱' lu ta'a chee̱ Dios, da ca' dxuluzré̱'e̱ xichaj benne' ca' zaj naque̱' sban, zaj napa na xel-la' waca xelibe na benne' ca' cúzreze, ne chee̱ xulucá'ana chawe na le̱' lau Dios.
HEB 9:14 Che caní naca na, wazéquedxa dxen chee̱ Cristo, Bénnea' bzua cuine̱' lau Dios ne̱ chee̱ Be' Lá'azxa dute̱ xel-la' li lazre' chee̱', na' dxen chee̱' na' dxibe na xichaj lázrdaudxu chee̱ da be̱ndxu da nua na xel-la' gute, chee̱ séquedxu gundxu zrin chee̱ Dios ban.
HEB 9:15 Chee̱ le̱ na' naca Jesucristo wedé dizra' chee̱ tu xel-la' wezría cube. Xel-la' gute chee̱ Cristo dxun na zrin chee̱ gaca gunite lau Dios chee̱dxu ca naca dul-la da be̱ndxu gate ne zúadxu lu xel-la' wezría nedxu, na' na'a benne' ca' ba gunné̱ Dios waca xelezí'e̱ ca naca da ca' guche̱be lazre' Dios, da zaj naca na chadía chacanna.
HEB 9:16 Gate tu benne' dxune̱' tu xiche da dxelá'a na da de̱ chee̱', dxun na ba xen gulé'edxu ba nate bénnea' chee̱ gundxu ca dxenná xiche na'.
HEB 9:17 Xiche na' quebe bi seque na dxácate̱ ne naca ban benne' be̱ne̱' na, san gate ba gute bénnea', na' seque na.
HEB 9:18 Chee̱ le̱ na', xel-la' wezría nedxu na' guzúa chuchu na ne̱ chee̱ dxen da buluzríe̱' na.
HEB 9:19 Moisés blabe̱' xúgute̱ da nadxixruj bea da zaj naxúaj na lu dizra' chee̱ Dios lau xúgute̱ bénneache, na' ca gudé na' guqué̱'e̱ zrila' da nadxé na da xrna, ne tu zruze xaga hisopo, na' gusebise̱' na dxen chee̱ me̱du ca', ne dxen chee̱ béadu ca', ne nisa, na' bzre̱'e̱ na lawe' xiche naga naxúaj xtizra Dios, ne bzre̱'e̱ na bénneache ca'.
HEB 9:20 Nadxa guzre̱' benne' ca': “Dxen nigá naca na da dxuzúa chuchu na xel-la' wezría da nun Dios nen le'e.”
HEB 9:21 Cá'anqueze bzra Moisés dxen lu lataj lá'azxa, ne lu xúgute̱ da dxuluchínene̱' lu zrin da dxelún bxruze ca'.
HEB 9:22 Ca naca da bdxixruj bea Dios, dxal-la' xulucá'ana chawe̱' xúgute̱ da ca' nen dxen, na' che quebe nu gulalaj dxen, Dios quebe gunite lawe̱' chee̱ bénneache ca naca dul-la da zaj nabague̱'.
HEB 9:23 Caní be̱n na ba xen xulucá'ana chawe̱' da ca' zaj naca na da dxululé'eze na ca zaj naca da zaj zua xabáa, na' da ca' zaj zua xabáa dxun na ba xen xulucá'ana chawe̱' na nen tu da zácadxa.
HEB 9:24 Cristo quebe guxú'e̱ lu lataj lá'azxa da zaj nun bénneache, da na' naca na tu da dxulé'eze ca naca lataj lá'azxa li da zua xabáa, san guxú'e̱ xabáqueze, naga zue̱' na'a lau Dios, dxudée̱' dizra' chee̱dxu dxi'u.
HEB 9:25 Bxruze blau chee̱ benne' judío ca' dxu'e̱ lu lataj lá'azxa blau tu iza tu iza chee̱ guzúe̱' ga na' dxen da quebe naca cheé̱queze̱'. Na'a Cristo quebe dxuzúa cuine̱' zane' lasa.
HEB 9:26 La be̱n na ba xen guzúa cuine̱' zane' lasa, cá'anqueze zane' lasa gatie̱' ca gudé be̱ne̱' xe̱zr la xu nigá. Na'a, gate ba bzrin zra dxaca li ca da guche̱be lazre' Dios, Cristo ba ble̱'e̱ tu lásaze, na' bzua cuine̱' chee̱ cue̱' dul-la zaj nabaga bénneache.
HEB 9:27 Ca dxun na ba xen xelate xúgute̱ bénneache tu lásaze, na' te na' Dios guchi'e̱ da zaj nun tu tue̱',
HEB 9:28 cá'anqueze Cristo bzua cuine̱' chee̱ gutie̱' tu lásaze chee̱ gudúe̱' dul-la zaj nabaga' benne' zante̱. Te nigá xelé̱'e̱ da gudxupe', quegádxa chee̱ cue̱' dul-la, san chee̱ xedajselé̱' xúgute̱ benne' dxelebeze̱' Le̱'.
HEB 10:1 Da nadxixruj bea da bde Moisés guca na ca tu zrúl-laze chee̱ da chawe' ca' da dxal-la' xelelá', ne quegá naca na lé̱queze na. Chee̱ le̱ na' da ca' buluzúa bxruze ca' lau Dios ca nadxixruj bea na', da ca' buluzúe̱' tu iza tu iza, quebe gulezeque na xelún na benne' ca' li lazre', benne' ca' gulebigue̱' lau Dios.
HEB 10:2 La guzeque' da nadxixruj bea na' gun na benne' ca' li lazre', québedxa nu guzúa da ca' lau Dios lawe' da la guladxe benne' ca' lu dul-la zaj nabague̱', québedxa zaj nabague̱' dul-la.
HEB 10:3 Na'a da ca' buluzúe̱' lau Dios tu iza tu iza bulusá na lazre̱' chee̱ dul-la da zaj nabague̱',
HEB 10:4 lawe' da quebe guzeque' dxen chee̱ be̱zre ca', ne dxen chee̱ béadu ca' cua na dul-la zaj nabaga bénneache.
HEB 10:5 Chee̱ le̱ na', gate bla' Cristo lu xe̱zr la xu nigá, guzre̱' Dios: Quebe dxaca lazru' guna', ne béadu ca' nu gute le̱ba' lau'. Na'a ba be̱nu' be̱l-la' dxen chia' nigá.
HEB 10:6 Quebe dxezaca ba lazru' béadu ca' dxuluzezxe̱' lau', ne béadu ca' dxelutie̱' lau' chee̱ cua na dul-la zaj nabague̱'.
HEB 10:7 Nadxa gunnía': “Nigá za'a neda' chee̱ guna' ca da nnau' Lue', Dios, ca naxúaj na chia' neda' lu xiche lá'azxa.”
HEB 10:8 Nédxula gunné̱': “Quebe dxaca lazru', ne quebe dxezaca ba lazru' guna', ne béadu ca' nu gute le̱ba' lau', ne béadu ca' dxuluzezxe̱' lau', ne béadu ca' dxelutie̱' lau' chee̱ cua na dul-la zaj nabaga bénneache.” Caní gunné̱' lácala zaj naca na da nadxixruj bea na xuluzúe̱' na lau Dios.
HEB 10:9 Ca gudé na' gunné̱': “Nigá za'a neda' chee̱ guna' ca da nnau' Lue', Dios.” Da nigá zéaje̱ na gudée̱' lu waláz chee̱ da ca' buluzúa bxruze ca' lau Dios, gate bzua cuine̱' lau Dios ne̱ chee̱ dul-la zaj nabaga bénneache.
HEB 10:10 Dios ba bca'ana chawe̱' dxi'u lu dul-la nabágadxu lawe' da be̱n Cristo ca da gunná Dios gate bde cuine̱' lau Dios tu lásaze gate gutie̱' le̱'e̱ xaga begúaj.
HEB 10:11 Xúgute̱ bxruze judío dxelune̱' zrin lau Dios tu zra tu zra, ne zane' lasa dxuluzríe̱' lau Dios da cá'anqueze lácala da ca' cabata' xelezeque na xelegúa na dul-la chee̱ bénneache.
HEB 10:12 Jesucristo bzrie̱' lau Dios tuze da dxugúa na dul-la, na' gudé na' gudxé'e̱ chalá'a xabe̱la chee̱ Dios.
HEB 10:13 Zue̱' na'a dxebeze̱' zra gate guzúa Dios benne' ca' dxeledábague̱' chee̱' zran ni'e̱.
HEB 10:14 Caní dxune̱' lawe' da bca'ana chawe̱' chadía chacanna benne' ca' zaj naque̱' bi chee̱ Dios. Caní be̱ne̱' gate bzua cuine̱' lau Dios tu lásaze.
HEB 10:15 Caníqueze dxenná Be' Lá'azxa lawe' da gunné̱' nédxula:
HEB 10:16 Caní naca xel-la' wezría guna' nen benne' Israel ca' ca te chee̱ lu zra caní, dxenná Xránale: Guzúa' da nadxixruj bea na' lu xichaj lázrdau benne' ca', ne guzúaja' na lu lázrdawe̱'.
HEB 10:17 Ca gudé na' dxenné̱': Cabátadxa cheajsá lazra' chee̱ dul-la da zaj nabague̱', ne chee̱ da cale̱la ca' da zaj nune̱'.
HEB 10:18 Ca'an naca, gate Dios ba bnite lawe̱' chee̱ bénneache ca naca dul-la da zaj nabague̱', québedxa dxun na ba xen bi xuluzúe̱' lau Dios chee̱ cua na dul-la ca'.
HEB 10:19 Chee̱ le̱ na', benne' bícha'dau', waca chú'udxu lu lataj lá'azxa blau dute̱ lázrdaudxu ne̱ chee̱ dxen chee̱ Jesucristo da blalje̱'.
HEB 10:20 Dxezrindxu lau Dios, dxededxu tu neza cube, da quebe naca na ca da xjácale̱ bxruze ca' lu lataj lá'azxa. Dxededxu neza da naca Crístoqueze, Bénnea' zúale̱ Dios xabáa.
HEB 10:21 Jesús naque̱' bxruze blau chee̱dxu, ne zaj xu'u lu ne̱'e̱ bénneache chee̱ Dios.
HEB 10:22 Chee̱ le̱ na' dxal-la' bígadxu lau Dios dute̱ lázrdaudxu ne dute̱ xel-la' dxeajlí lazre' li, lawe' da bca'ana chawe' Le̱' lázrdaudxu chee̱ québedxa sua da ste̱be lu xichaj lázrdaudxu ca naca chee̱ dul-la, ne naca chee̱dxu cáte̱ze ba gudibe̱' be̱l-la' dxen chee̱dxu nen da naca ca tu nisa chawe'.
HEB 10:23 Dxal-la' sua cháchadxu ca naca da dxebeza lázredxu chee̱ da dxéajle̱dxu, ne quebe guchadxu ca dxundxu, lawe' da gun Dios ca da guche̱be lazre̱' gune̱' chee̱dxu.
HEB 10:24 Dxal-la' quilaj lázredxu ca gundxu gácale̱ ljwézredxu tudxu xetudxu chee̱ zri'i ljwézredxu, ne gundxu da xrlátaje.
HEB 10:25 Quebe dxal-la' gusandxu xezrágadxu lau Dios ca dxelún bal-la benne'. Dxal-la' gutipa lazre' ljwézredxu tudxu xetudxu, na' gúndxadxu caní na'a lawe' da dxelé'edxu ba za bagu zra xelá' Xránadxu.
HEB 10:26 Che núnbeadxu ca naca xel-la' li chee̱ Dios, ne chéajdxadxu gundxu dul-la, québedxa bi de̱ da cua na dul-la bágadxu.
HEB 10:27 Lu xel-la' dxezrebe súadxu da naca chee̱ zra guchi'a Dios, ne chee̱ xi' da guzría xi na benne' ca' dxeledábague̱' chee̱ Dios.
HEB 10:28 Gate nu benne' bzue̱' chalá'ala da gunná bea Mnoisés, ne gulezrá' chupa u chunna benne' belexeche̱be̱' chee̱ da be̱n bénnea', na' belutie̱' bénnea', ne quebe belexache lazre̱' le̱'.
HEB 10:29 Tu da ste̱be zrendxa dxal-la' xelezí' benne' ca' dxuluzúe̱' chalá'ala Zri'ine Dios, ne dxulucá'ana dítaje̱' dxen chee̱', da blalje̱', dxen na' dxuzúa chuchu na xel-la' wezría chee̱ Dios, ne dxucá'ana chawe na benne' ca', na' dxelenné̱' schanni' chee̱ Be' Lá'azxa chee̱ Dios, Bénnea' nazri'ine̱' le̱'.
HEB 10:30 Ba núnbeadxu Xránadxu, Bénnea' gunnáqueze̱': “Neda' xebéaj lazra' bénneache. Neda' gunézruja' lazruj chee̱ benne' ca'.” Cá'anqueze gunné̱': “Xránale guchi'e̱ chee̱ bénneache chee̱'.”
HEB 10:31 Da dxal-la' xelezrebe bénneache naca da ste̱be da gun Dios benne' ca'.
HEB 10:32 Le gusá lázrele le'e iza da ba guledé, gate za guzíte̱le xel-la' naxaní' chee̱ Dios, na' dute̱ xel-la' zren lazre' bchaga laule xel-la' zi' da gudele.
HEB 10:33 Bál-lale le'e bulucháchale̱ne̱', ne belú'e̱ le'e láwela bénneache, na' xebál-lale le'e guzáca'le gate guná'ale benne' ca' guledée̱' xel-la' zi' caní.
HEB 10:34 Bexache lázrele benne' gulezrá' lizre xia, ne dute̱ xel-la' dxebé bchaga laule da belune̱' gate gulequé̱'e̱ ca da nápale, lawe' da nézele nápale xabáa da zácadxa na, ne da naca na da chadía chacanna.
HEB 10:35 Quebe gusanle ca da dxuxrén lázrele, lawe' da nusá xel-la' dxuxrén lazre' chee̱le tu da zren da si'le.
HEB 10:36 Le'e dxal-la' gácale zren lazre' chee̱ gunle ca da nna Dios, na' sile ca da guche̱be lazre' Dios gunne̱' chee̱le.
HEB 10:37 Naca na ca dxenná xiche lá'azxa: Xátedauze de̱, na' xelá' Bénnea' dxal-la' xelá', ne quebe chene̱'.
HEB 10:38 Benne' naque̱' xlátaje̱ lawa' neda', gata' chee̱' xel-la' nabán li lazre' lawe' da dxéajle̱'e̱ chia', na' che cueaj xíchaje̱' neda' quebe xezaca ba lazra' nen bénnea'.
HEB 10:39 Na'a dxi'u quebe nácadxu tuze nen benne' ca' dxelebéaj xíchaje̱' Dios, ne xelebía xi'e̱. Nácadxu tuze nen benne' dxeléajle̱'e̱ chee̱ Dios, na' xelelá bénne'du zaj xu'e̱.
HEB 11:1 Che nápadxu xel-la' dxeajlí lazre' dxuxrén lazrdxu sidxu da dxebézadxu, ne nézquezdxu naca da li da quebe dxelé'edxu.
HEB 11:2 Xra xrtáudxu ca' belexegá'ane̱' xrlátaje lau Dios lawe' da guléajle̱'e̱ chee̱'.
HEB 11:3 Lu xel-la' dxeajlí lazre' chee̱dxu nezdxu be̱n Dios xe̱zr la xu nigá, bchínene̱' dizra' chee̱', na' ca naca da dxelé'edxu na'a be̱n Dios le̱ na nen da quebe nalá' gate nate.
HEB 11:4 Abel, lu xel-la' dxeajlí lazre' chee̱', bzue̱' lau Dios tu guna' da zácadxa na ca da bzua Caín, na' chee̱ le̱ na' Dios gunné̱' naca xlátaje̱ Abel, ne guzi'e̱ guna' chee̱'. Ca'an naca, lácala ba gute Abel, ne dxusé̱dene̱' dxi'u ne̱ chee̱ da be̱ne̱' lawe' da gudape̱' xel-la' dxeajlí lazre'.
HEB 11:5 Enoc, lu xel-la' dxeajlí lazre' chee̱', Dios beche̱'e̱ le̱'. Quebe gutie̱', na' québedxa nu ble'e le̱' lawe' da beché̱ Dios le̱'. Naxúaj na lu xiche lá'azxa da dxenná na, gate quebe ne xeché̱ Dios le̱', be̱n Enoc ca da bezaca ba lazre' Dios.
HEB 11:6 Quebe gaca nu gun da xezaca ba lazre' Dios che quebe dxeajlí lazre̱' Le̱'. Bénnea' dxebigue̱' lau Dios, dxun na ba xen chéajle̱'e̱ zua Dios, ne xunézruje̱' chee̱ benne' ca' dxelexílaje̱' Le̱'.
HEB 11:7 Noé, lu xel-la' dxeajlí lazre' chee̱', gate Dios guzre̱' le̱' nédxula ca da dxal-la' gaca, bzue̱' dizra' chee̱ Dios, ne be̱ne̱' tu da zren da dxedá lawe' nísadau' chee̱ xelelá xrtie̱' ca'. Guxeajlí lazre' Noé Dios, san gulebía xi' bénneache zaj zre̱'e̱ xe̱zr la xu na', lawe' da quebe guleajlí lazre̱' Dios. Dios bca'ane̱' Noé xrlátaje lawe' da guxeajlí lazre̱' Le̱'.
HEB 11:8 Abraham, lu xel-la' dxeajlí lazre' chee̱', gate Dios gunné̱' le̱', bzue̱' dizra', ne guzé̱'e̱ zéaje̱' tu lu xe̱zr la xu da guchebe lazre' Dios gunézruje̱' chee̱'. Bdxuaje̱' lázrie̱', ne quebe nézene̱' naga zéaje̱'.
HEB 11:9 Lawe' da guxeajlí lazre̱' Dios, guzúa Abraham lu xe̱zr la xu na' da guche̱be lazre' Dios gunézruje̱' chee̱', naga naca xe̱zr la xu chee̱ benne' zitu' ca'. Guzúe̱' tu lu xu'u ladxe', ne cá'anqueze be̱n Isaac, ne Jacob, benne' ca', cá'anqueze Dios guche̱be lazre̱' xelezí'e̱ da na' gunezruj Dios le̱'.
HEB 11:10 Caní be̱n Abraham lawe' da guleza lazre̱' chu'e̱ lu xe̱zre na' da quebe te chee̱ na, da na' guleche Dios, ne da be̱n Lé̱queze̱'.
HEB 11:11 Cá'anqueze Sara, lácala ba nácale̱'e̱ benne' gula, ne quebe nu bi chee̱' dxalaj, san xel-la' dxeajlí lazre' chee̱' guque̱' xrna bidau'. Guzúa tu bi biu chee̱' lawe' da guxeajlí lazre̱' Dios gune̱' ca da guche̱be lazre̱'.
HEB 11:12 Caní guca, Abraham, lácala ba gúxrule̱'e̱, guxánle̱'e̱ zri'ine zre sue̱' ca naxán xuzre' da zaj dxe' dxu'a tu yegu zren, da quebe nazeque' gulábadxu.
HEB 11:13 Xúgute̱ benne' caní gulatie̱', ne quebe ne xelezí'e̱ da ca' nache̱be lazre' Dios, san lawe' da guleajlí lazre̱' Dios, belelé'ene̱' na zítu'la, na' belexezaca ba lázrele̱ne̱' na. Caní bululé'ene̱' gulaque̱' ca benne' zitu', benne' guledeze lu xe̱zr la xu nigá.
HEB 11:14 Benne' dxuluchálaje̱' caní dxululé'ene̱' dxeledé̱' dxelexílaje̱' tu lazrie̱'.
HEB 11:15 La buluwía lazre̱' ca naca xe̱zr la xu naga gusá'aque̱', na' waca xelexezrine̱' na'.
HEB 11:16 Gulaca lazre̱' tu lazrie̱' da naca na cháwe'dxa, da na' naca na lazrie̱' da zua xabáa. Chee̱ le̱ na' Dios quebe dxexedué'ene̱' gate dxelenná benne' ca' naque̱' Dios chee̱', na' nucueze̱' tu xe̱zre naga xelezúa benne' ca'.
HEB 11:17 Gate guca lazre' Dios nézene̱' ca naca xel-la' dxeajlí lazre' chee̱ Abraham, na' lu xel-la' dxeajlí lazre' chee̱' guché̱'e̱ Isaac chee̱ gutie̱'-be' lau Dios. Ba zue̱' gutie̱' bi tu licha' chee̱' lácala ba nache̱be lazre' Dios, gunné̱':
HEB 11:18 “Ne̱ chee̱ Isaac wazrále̱'e̱ zri'ine zre su'.”
HEB 11:19 Abraham bxren lazre̱' Dios wazéquene̱' gusebane̱' benne' gate, na' waca nnadxu bezí' lu ne̱'e̱ zrí'ine̱' Isaac ládujla benne' gate.
HEB 11:20 Isaac, lu xel-la' dxeajlí lazre' chee̱', guche̱be lazre̱' xelezí' zrí'ine̱' Jacob, ne Esaú da xrlátaje ca'.
HEB 11:21 Jacob, lu xel-la' dxeajlí lazre' chee̱', gate zua gatie̱', guche̱be lazre̱' xelezí' tu tu zri'ine José da xrlátaje ca', ne be̱ lá'ane̱' Dios, nuchiche tipe̱' xágadu nuxre̱'.
HEB 11:22 José, lu xel-la' dxeajlí lazre' chee̱', gate ba zua gatie̱' gunné̱' welexedxúaj benne' Israel ca' lu xe̱zr la xu Egipto, ne bdxixruj be'e̱ ca dxal-la' xelune̱' chee̱ zrita xu'e̱.
HEB 11:23 Gate gulaj Moisés, xra xrne̱'e̱, lu xel-la' dxeleajlí lazre' chee̱' bulucache̱' le̱be' lawe' chunna beu', lawe' da belelé'ene̱' naca bidu na' xrtanle̱'e̱, ne quebe belezrebe̱' benne' wenná bea, bénnea' bdxixruj be'e̱ xelate bidu ca'.
HEB 11:24 Moisés, lu xel-la' dxeajlí lazre' chee̱', gate guque̱' benne' waca, quebe guca lazre̱' gaque̱' zri'ine nu'ula zri'ine benne' wenná bea chee̱ xe̱zr la xu Egipto,
HEB 11:25 san guca lázredxe̱' tée̱' xel-la' zi' nen bi ca' chee̱ Dios quézcala sue̱' tu chí'idau' lu da ba neza chee̱ da naca dul-la.
HEB 11:26 Gúquene̱' nácadxa chawe' gate belún lala bénneache chee̱' ca da guca chee̱ Cristo, quézcala gape̱' ca naca da gunní'a chee̱ xe̱zr la xu Egipto, lawe' da dxenné̱'e̱ da gunezruj Dios le̱'.
HEB 11:27 Moisés, lu xel-la' dxeajlí lazre' chee̱', bedxúaje̱' lu xe̱zr la xu Egipto, ne quebe bezrebe̱' xel-la' dxezrá'a chee̱ benne' wenná bea, na' guzúa chúchue̱' ca tu benne' dxelé'ene̱' Dios, Bénnea' quebe gaca nu le'e.
HEB 11:28 Moisés, lu xel-la' dxeajlí lazre' chee̱', be̱ne̱' Laní Pascua gate na' bdxixruj be'e̱ xuluzrá benne' Israel ca' dxen le̱'e̱ xaga dxa xu'u chee̱ quebe gute gubáz chee̱ xabáa chee̱ xel-la' gute netú zri'ine benne' Israel ca', bi biu nedxu.
HEB 11:29 Benne' Israel ca', lu xel-la' dxeleajlí lazre' chee̱', beledée̱' lu Nísadau' Xrna ca benne' dxeledé lu xu bizre, san gate gulú'u benne' Egipto ca' naga ba guledé benne' ca', na' bezraga nisa na', na' gulebé' chi'i benne' Egipto ca', na' gulatie̱'.
HEB 11:30 Benne' Israel ca', lu xel-la' dxeleajlí lazre' chee̱', guzré'e ze'e da naxechaj na xe̱zre Jericó ca gudé guledé benne' Israel ca' bezúate̱ xe̱zre na' tu tu lasa du gazre zra.
HEB 11:31 Rahab, nu'ula dxezí' lu ne̱'e̱ benne' zaj xu'e̱ neza, lu xel-la' dxeajlí lazre' chee̱', quebe gutie̱' tu zren nen benne' Jericó ca', benne' quebe buluzúa dizra' chee̱ Dios, lawe' da gudapa le̱' ba lá'ana benne' Israel ca', benne' xeajlenná' lane̱' xe̱zre na'.
HEB 11:32 ¿Bízradxa nnia'? Québedxa bi lataj napa' guchálaja' ca be̱n Gedeón, ne ca be̱n Barac, ne ca be̱n Sansón, ne ca be̱n Jefté, ne ca be̱n David, ne ca be̱n Samuel, ne ca belún benne' ca' gulenné̱' waláz chee̱ Dios.
HEB 11:33 Benne' ca' lu xel-la' dxeleajlí lazre' chee̱' gulezí'e̱ xe̱zr la xu ca' chee̱ benne' xula, ne gulenná be'ene̱' cháwe'dau' benne' walázr chee̱' ca', na' gulezí'e̱ da guche̱be lazre' Dios, lawe' da gúcale̱ne̱' le̱'. Belelé̱' lu dxu'a be̱zre xixre' ca'.
HEB 11:34 Buluxusule̱' xi' da dxéneaca. Belelé̱' lu xia nalá. Benne' ca' zaj nate ni'a na' belexaque̱' dipa lazre'. Gulaque̱' benne' wala lu wedil-la, ne gulaca lu ne̱'e da guta' chee̱ benne' ca' guledábague̱' le̱'.
HEB 11:35 Nu'ula ca' belezí' lu ne̱'e̱ benne' gate chee̱' ca', benne' belexebáne̱'. Xebal-le̱' gulátie̱' gate buludée̱' le̱' ba xa', lawe' da quebe belú'e̱ lataj nu gusán le̱', chee̱ xelezrué'ene̱' xel-la' dxexebán chee̱ xelezi'e̱ xetú xel-la' nabán da naca na da li.
HEB 11:36 Xebal-le̱' belún le̱' chee̱', na' xebal-le̱' belú'e̱ le̱', na' xebal-le̱' buluchéaje̱' le̱' du xia ne gulegu'e̱ le̱' lizre xia.
HEB 11:37 Belutie̱' xebal-le̱' nen xiaj, na' xebal-le̱' gulecheze̱' le̱' nen xia. Xebal-le̱' buludée̱' le̱' lu da ste̱be ca', na' xebal-le̱' belutie̱' nen xia nalá. Xebal-le̱' guledée̱' nila na'la, zaj nacue̱' zra zrila' ne zra béadu ca'. Baxache' gulaque̱', na' guledée̱' lu da zi' da xa', na' buluzalje̱' le̱'.
HEB 11:38 Bénneache zaj zra' lu xe̱zr la xu nigá quebe zaj naca chee̱' xelezí'e̱ ba neza chee̱ benne' caní. Tu guledázqueze̱' le̱'e̱ xixre', ne lu xi'a ca', ne lu bluaj ca', ne lu bluaj xu ca'.
HEB 11:39 Xúgute̱ benne' ca' bca'ana chawe' Dios le̱' lawe' da guleajlí lazre̱' Le̱', san quebe ne xelezí'e̱ ca naca da guche̱be lazre' Dios,
HEB 11:40 lawe' da nucueza Dios tu da nácadxa chawe' chee̱dxu dxi'u, chee̱ xelexaca benne' ca' li lazre' tu zren nen dxi'u.
HEB 12:1 Lawe' da zaj naxéchaj benne' zante̱ dxi'u, benne' ca' ba bululé'ene̱' ca guléajle̱'e̱ chee̱ Dios, dxal-la' guzúadxu chalá'ala xúgute̱ da dxululale na dxi'u, ne dul-la da naxe̱l-la na dxi'u, na' lu dute̱ xel-la' zren lazre' chee̱dxu gundxu zrin chee̱ Dios, da naca na ca dxezá' chégudxu chee̱ zrué'eledxu da dxelé'edxu tu chi na'.
HEB 12:2 Dxal-la' nna'dxu Jesús, Bénnea' dxune̱' nápadxu xel-la' dxeajlí lazre', ne dxune̱' li lazre' xel-la' dxeajlí lazre' na'. Jesús gudée̱' xel-la' zi' le̱'e̱ xaga begúaj, ne quebe bedué'ene̱' lawe' da guné̱'e̱ xel-la' dxebé na' da dxebeza na Le̱', na' gudxé'e̱ chalá'a xabe̱la chee̱ lataj blau chee̱ Dios.
HEB 12:3 Le nna' xanne' ca da be̱n Jesús, gudéle̱'e̱ xel-la' zi' da bulusaca benne' dul-la ca' Le̱'. Chee̱ le̱ na' quebe chajxréquele gunle zrin chee̱', ne quebe gute lázrele.
HEB 12:4 Ba gudíl-lale̱le dul-la, na' quebe ne gátele lu wedil-la na'.
HEB 12:5 Quebe gal-la lázrele le'e ca dxun Dios, dxuzéajni'ine̱' le'e ca zrí'inequeze̱', gate dxenné̱': Zri'ina', quebe guzú' chalá'ala da dxun Xranu' gate dxusízrene̱' lue', ne quebe gate lazru' gate dxedil-le̱' lue'.
HEB 12:6 Xránadxu dxusízrene̱' bi ca' nazri'ine̱', na' xúgute̱ bi dxezí' lu ne̱'e̱ ca zrí'inequeze̱' dxudée̱'-be' xel-la' zi'.
HEB 12:7 Le guchaga lau le'e xel-la' zi' da dxedele, lawe' da dxuxúe Dios le'e ca zrí'inequeze̱'. ¿Zra bi quebe dxusizre xrabe' le̱be'?
HEB 12:8 Che Dios quebe dxusízrene̱' le'e ca dxusízrene̱' xúgute̱ bi chee̱' ca', quebe nácale zrí'inequeze Le̱'. Nácale ca bi lan ca'.
HEB 12:9 Gate ne nácadxu bidau', bulusizre xra xrnadxu dxi'u, na' gudápadxu le̱' ba lá'ana. Dxal-la' guzúadxadxu dizra' Xradxu zue̱' xabáa, na' gaca bandxu.
HEB 12:10 Xra xrnadxu bulusízrene̱' dxi'u tu chí'idauze ca da guléquene̱' chawe', san Dios dxusízrene̱' dxi'u chee̱ gaca tu da ba neza chee̱dxu da naca na li lazre', chee̱ gácadxu lá'azxa ca naca lá'azxa Lé̱queze̱'.
HEB 12:11 Da li quebe dxedánnedxu da dxusizre xradxu dxi'u, san dxéquedxu zi', na' dxedé na', che dxéajni'idxu ca da dxusízrene̱' dxi'u, na' gundxu da xrlátaje ca', ne cueza zri lázredxu lau Dios.
HEB 12:12 Chee̱ le̱ na' le guzazraj na'le, ne zríbele da ba dxelate ni'a na',
HEB 12:13 ne le sa' lu neza da zaj naca na li, chee̱ quebe chegu ní'ale da quebe zaj zua chacha, ne chee̱ xelexaca chacha na.
HEB 12:14 Le gun ba xuzre suale lu xel-la' dxebeza zri lazre' nen xúgute̱ bénneache, ne le gaca li lazre' lau Dios. Che quebe gunle caní, quebe gaca lé'elele Xránadxu.
HEB 12:15 Le guxúe xanne' chee̱ quebe gusanle da chawe' ca' dxunna Dios le'e, ne̱ chee̱ quebe gaca netule le'e ca tu xixre' sla' da dxulala na, ne dxuxrinnaj na da xezícala.
HEB 12:16 Le guxúe xanne' chee̱ quebe gunle da sban, ne quebe guzúale chalá'ala ca da dxunna Dios, ca be̱n Esaú, bénnea' bsane̱' xúgute̱ da gunezruj xre̱' le̱' chee̱ guzi'e̱ tu cueze xel-la' wagu.
HEB 12:17 Ba nézele ca da guca gudé na', gate guca lazre' Esaú na' si'e̱ da chawe' da naba xre̱' lau Dios, na' xre̱' bzue̱' le̱' chalá'ala, ne lácala gudxézrele̱'e̱, quebe guca xuché̱'e̱ ca da ba be̱ne̱'.
HEB 12:18 Quebe dxaca chee̱le ca da guca chee̱ benne' Israel ca', gulebigue̱' naga zua tu xi'a, da na' wazeque' nu guchiche, ne naga dxala na xi', naga zua da chul-la, ne dxe' zren, ne dxaca be' bdunu'.
HEB 12:19 Belenne̱' gudxezre luzu da dxulucuezre̱', ne chi'i Dios bchálajle̱ne̱' le̱'. Benne' ca' belenne̱' chi'i Dios na' gulata' xúene̱' québedxa guchálajle̱ne̱' le̱'.
HEB 12:20 Ca'an guca lawe' da quebe gulezéquene̱' xuluchaga lawe̱' ca naca da bdxixruj be'e Dios, gunné̱': “Che tu béadauze guléajba' lu xi'a na', dxal-la' xelútie̱'-ba' nen xiaj u nen tu xia nalá xéche'ze.”
HEB 12:21 Da na' belelé'ene̱' bchébele̱'e̱ na le̱', na' Moisés gunné̱': “Dxezrízetea' xel-la' dxezrebe.”
HEB 12:22 Na'a le'e ba nabígale naga zua xi'a lá'azxa da nazí le na Sión, ne lu xe̱zre chee̱ Dios ban, da naca na Jerusalén da zua xabáa, ne naga zaj zra' gázxue gázxue gubáz chee̱ xabáa,
HEB 12:23 ne naga zaj nazraga benne' ca' gulaca bi chee̱ Dios nédxute̱, benne' ca' ba zaj naxúaj le̱' xabáa, ne lau Dios, Bénnea' guchi'e̱ chee̱ xúgute̱ bénneache, ne naga zaj zra' be' gulácaqueze benne' ca' ba nun Dios le̱' li lazre',
HEB 12:24 ne lau Jesús, Benne' wedé dizra' chee̱ xel-la' wezría cube, ne naga bzre̱'e̱ dxen da dxuchalaj na da cháwedxa ca da bchalaj dxen chee̱ Abel.
HEB 12:25 Chee̱ le̱ na', le guxúe xanne' cuínale chee̱ quebe guzúale chalá'ala Bénnea' dxuchálajle̱ne̱' dxi'u. Quebe belegache benne' ca' buluzúe̱' chalá'ala Dios gate na' bchálajle̱ne̱' le̱' lu xe̱zr la xu nigá, ne quebe gáchedxu dxi'u che guzúadxu chalá'ala Bénnea' dxuchálajle̱ne̱' dxi'u, zue̱' xabáa.
HEB 12:26 Lu zra na' gate gunná Dios, na' guzrú' xe̱zr la xu nigá. Na'a dxenné̱': “Xetú lásaze guniba' quegaze xe̱zr la xu nigá, san cá'anqueze xabáa.”
HEB 12:27 Gate gunné̱': “Xetú lásaze”, zéaje̱ na xecá'a Dios ca naca da dxeledá, da ca' be̱ne̱', na' xegá'ana da quebe seque' nu gutá.
HEB 12:28 Dxal-la' xe̱dxu Dios: Xcalenu' lawe' da gunne̱' dxi'u tu lataj naga dxenná bea Le̱' da quebe seque' nu gutá. Dxal-la' güe lá'anadxu Dios du lázredxu ne dute̱ xel-la' ba lá'ana, ca da dxezaca ba lazre̱',
HEB 12:29 lawe' da naca Dios chee̱dxu ca tu xi' da guzría xi na da sban.
HEB 13:1 Quebe gusanle ca nazrí'i ljwézrele tule xetule ca bíchequezle.
HEB 13:2 Le gusá lázrele dxal-la' si' lu na'le benne' zá'aque̱' lízrele, lawe' da gate belún caní bal-la benne', gulezí' lu ne̱'e̱ gubáz chee̱ xabáa ca', ne quebe guleque be'ene̱'.
HEB 13:3 Le gusá lázrele gácale̱le benne' zaj xu'e̱ lizre xia, gun cuínale ca benne' xú'uqueze lizre xia nen benne' ca'. Le gusá lázrele gácale̱le benne' ca' dxeledée̱' xel-la' zi', gun cuínale ca benne' dxeledéqueze̱' xel-la' zi'.
HEB 13:4 Xúgute̱le dxal-la' gápale ba lá'ana xel-la' wechaga na', ne gunle da xlátaje̱ lu xel-la' wechaga na' chee̱le, lawe' da guchi'a Dios chee̱ benne' ca' dxuluzúe̱' chalá'ala xel-la' wechaga na' chee̱', ne chee̱ benne' ca' dxelune̱' da sban.
HEB 13:5 Quebe sa lázrele xel-la' gunní'a. Le xezaca ba lázrele ca da nápale lawe' da ba gunná Dios: “Cabata' gusana' lue', ne quebe cueaj xíchajqueza' lue'.”
HEB 13:6 Caní naca, du lázredxu waca nnadxu: Xrana' Dios dxácale̱ne̱' neda'. Quebe zreba' bi da gusaca bénneache neda'.
HEB 13:7 Le gusá lázrele gácale̱le benne' ca' dxuluxúe̱' le'e, ne dxuluchálajle̱ne̱' le'e dizra' chee̱ Dios. Le na' xque ca da dxelúne̱', ne le chéajle̱ chee̱ Dios ca dxelún benne' ca'.
HEB 13:8 Túzqueze ca naca Jesucristo neaje, ne na'a zra, ne chadía chacanna.
HEB 13:9 Quebe sile ca da dxuluchalaj benne' dxulusé̱dene̱' da quebe naca na ca da naxúaj na lu xiche lá'azxa chee̱ Dios. Cháwedxa naca guzúa chuchu lázrdaudxu lu xel-la' zri'i lazre' chee̱ Dios, ne quebe chéajle̱dxu da dxeledxixruj bea benne' ca naca da dxal-la' xi'aj gágudxu, lawe' da benne' ca' zjácale̱ne̱' da ca' cabata' ne xelezí' ba neza ne̱ chee̱ da ca'.
HEB 13:10 Bxruze judío ca' gulawe̱' béadu ca' belutie̱' lataj lá'azxa. Quebe zaj naca chee̱' xelawe̱' guna' da dxugú'udxu dxi'u chee̱ Dios.
HEB 13:11 Bxruze blau judío bzrie̱' dxen chee̱ béadu ca' lu lataj lá'azxa blau ca tu guna' da dxegúa na dul-la. Buluzezxe̱' da nagá'ana chee̱ béadu ca' cúzrela xe̱zre.
HEB 13:12 Cá'anqueze gute Jesús cúzrela xe̱zre na' chee̱ bca'ana chawe̱' bénneache ne̱ chee̱ dxen cheé̱queze̱'.
HEB 13:13 Le dxuaj, gundxu tu zren Cristo, lácala xuluzúa bénneache dxi'u chalá'ala ca belune̱' chee̱ Le̱'.
HEB 13:14 Lu xe̱zr la xu nigá quebe de̱ chee̱dxu tu xe̱zre da súate̱queze. Dxebézadxu tu da za za'.
HEB 13:15 Chee̱ le̱ na' tu dxál-lazqueze güe lá'anadxu Dios nen dxú'aquezdxu ne̱ chee̱ Jesucristo, da naca na ca tu guna' da dxugú'udxu chee̱ Dios.
HEB 13:16 Dxal-la' gusá lázredxu gundxu da xrlátaje, ne bi gunézrujdxu chee̱ benne' ca' quebe bi zaj nape̱', lawe' da dxezaca ba lazre' Dios le̱ na.
HEB 13:17 Le guzúa dizra' chee̱ benne' ca' dxuluxúe̱' le'e, ne le gun ca da dxelenné̱'. Benne' caní dxuluxúe̱' bénne'du xu'ule, ne xuluxudée̱' lau Dios ca da zaj nune̱'. Che gunle caní, na' benne' caní welune̱' zrin chee̱' du lazre̱', ne quebe xelezúa xache̱', lawe' da che quebe gunle caní, quebe bi da ba neza gaca na chee̱le.
HEB 13:18 Le naba lau Dios gaca chawe' chee̱ntu'. Quebe bi zua lu lázrdauntu' da dxagu na zria netu' lawe' da dxun zi' lázrentu' guntu' da xrlátaje ca naca xúgute̱ da dxuntu'.
HEB 13:19 Dxenaba' le'e nábale lau Dios gunne̱' neda' lataj xídazega' súale̱na' le'e naga zúale.
HEB 13:20 Dxenaba' lau Dios, Bénnea' dxunne̱' dxi'u xel-la' dxebeza zri lazre', ne bsebane̱' Xránadxu Jesucristo ládujla benne' gate. Lé̱queze̱' naque̱' Benne' Blau Dxuxúe̱' Dxi'u, nácadxu zrila' chee̱', na' caní naque̱' lawe' da blalje̱' dxen chee̱' da bzua chuchu na xel-la' wezría chadía chacanna da be̱ne̱'.
HEB 13:21 Dxenaba' Dios gune̱' le'e li lazre' chee̱ séquele gunle da xrlátaje ca da dxaca lazre' Le̱', ne gune̱' chee̱ntu' ca da dxaca lazre̱' ne̱ chee̱ Jesucristo. ¡Gaca ba Cristo chadía chacanna! ¡Ca'an gaca na!
HEB 13:22 Le'e, benne' bícha'dau', dxata' xueda' le'e gácale zren lazre' ca naca dizra' caní, da dxulusizre na le'e, na' látega da du nigá dxuzúaja' chee̱le.
HEB 13:23 Dxuzenda' le'e ba bedxúaj bi bíchedxu Timoteo lizre xia, ne che xelá' zé̱'e̱be', na' che̱'a-be' gate xedajnná'a le'e.
HEB 13:24 Le gugapa diuzre xúgute̱ benne' ca' dxuluchálajle̱ne̱' le'e dizra' chee̱ Dios, ne le gugapa diuzre xúgute̱ benne' bíchedxu ca'. Benne' zaj zre̱'e̱ xe̱zr la xu Italia nigá dxulugape̱' le'e diuzre.
HEB 13:25 Dxenaba' lau Dios gune̱' da chawe' chee̱ xúgute̱le le'e. ¡Ca'an gaca na!
JAM 1:1 Neda', Jacobo, naca' we̱n zrin chee̱ Dios, ne chee̱ Xránadxu Jesucristo. Dxugapa' le'e diuzre. Nácale chazrinnu cue' zri'ine zre sua Israel, ne nase dínnajle du gabí'i xe̱zr la xu nigá.
JAM 1:2 Benne' bícha'dau', dxal-la' béle̱'e̱le gate dxedele zane cue' da ste̱be ca',
JAM 1:3 lawe' da nézele gate dxedé xel-la' dxeajlí lazre' chee̱le lu da ste̱be, da nigá dxundxa na le'e zren lazre'.
JAM 1:4 Le gun ba xuzre gaca li lazre' xel-la' zren lazre' chee̱le chee̱ gácale benne' xrlátaje̱ ne li lazre', ne quebe bi xázrjele.
JAM 1:5 Che núlale le'e dxexázrjele xel-la' sina, le naba na lau Dios, na' Le̱' gunne̱' na le'e, lawe' da dxunézrujle̱'e̱ Dios chee̱ xúgute̱ bénneache, ne quebe dxexezúene̱' zi'.
JAM 1:6 Dxal-la' nábale nen dute̱ xel-la' dxeajlí lazre' chee̱le, ne quebe gun chupa lázrele. Benne' dxun chupa lazre̱' naque̱' ca xeajxruza chee̱ nísadau' da dxua be' nila na'la.
JAM 1:7 Benne' dxune̱' caní, ne quebe zrize dxezúa lázrdawe̱', ne quebe tuz ca dxun xichaj lázrdawe̱' quebe dxal-la' guéquene̱' bi da xunezruj Xránadxu chee̱'.
JAM 1:9 Tu benne' bíchedxu naque̱' baxache' dxal-la' bene̱' lawe' da guzúa Dios le̱' ca tu benne' zaca.
JAM 1:10 Benne' nape̱' xel-la' gunní'a dxal-la' bene̱' gate gun Dios le̱' dxexruj lazre' lawe' da naca benne' gunní'a ca tu xiaj xixre' da quebe dxezí béateca na.
JAM 1:11 Gate dxalaj gubizra, ne dxennále̱'e̱ na, na' dxebizre xixre' na', na' dxexruj xiaj chee̱ na, na' dxedé xel-la' xrtan chee̱ na. Cá'anqueze gaca chee̱ benne' gunní'a, xenitie̱' dxácate̱ na' dxezí' lu ne̱'e̱ xel-la' gunní'a.
JAM 1:12 Ba neza naca na chee̱ benne' dxuchaga lawe̱' da ste̱be ca' dute̱ xel-la' zren lazre' chee̱', lawe' da che ba bedxúaje̱' chawe' lu da ste̱be da dxedée̱', na' si' lu ne̱'e̱ da nache̱be lazre' Dios gunézruje̱' chee̱ benne' ca' zaj nazri'ine̱' Le̱'.
JAM 1:13 Gate nu benne' zua da dxegú'u xel-la' na le̱' chee̱ gune̱' da cale̱la, quebe dxal-la' guéquene̱' dxuzúa Dios da na' dxegú'u xel-la' na le̱', lawe' da quebe bi de̱ da seque' xegú'u xel-la' na Dios chee̱ gune̱' da cale̱la, ne quebe bi guzúa Dios da xegú'u xel-la' na dxi'u chee̱ gundxu da cale̱la.
JAM 1:14 Tu benne' zua da dxegú'u xel-la' na le̱' chee̱ gune̱' da cale̱la gate xel-la' dxezá lazre' da cale̱la chee̱' dxecá'a na le̱', ne dxenná be'e na le̱'.
JAM 1:15 Nadxa ca naca xel-la' dxezá lazre' da cale̱la caní dxuluzán na dul-la, na' gate ba guzeque' zua dul-la na', na' dxute na bénnea'.
JAM 1:16 Benne' bícha'dau' nazri'ite̱ lazra', quebe güele lataj nu si xe̱ le'e.
JAM 1:17 Xúgute̱ da zaj naca xrlátaje ne da zaj naca li lazre' da dxezidxu zá'aca na xabáa lu na' Dios, Bénnea' be̱ne̱' da ca' dxulusení na zran xabáa. Dios quegá dxuchá cuine̱', ne quebe dxuché̱'e̱ ca dxune̱'.
JAM 1:18 Ca naca da guca lazre' Dios, ba be̱nne̱' dxi'u xel-la' nabán. Bchínene̱' dizra' li chee̱', chee̱ gácadxu ca tu lina nedxu chee̱', chee̱ da ba be̱n Le̱'.
JAM 1:19 Chee̱ le̱ na', benne' bícha'dau' nazri'ite̱ lazra', tu tule le'e dxal-la' gácale ban lazre' chee̱ xénele, san dxal-la' cueza lázrele ca da nne̱le ne quebe la' zrá'ate̱le.
JAM 1:20 Tu benne' xichaj zra'a quebe dxune̱' da dxezaca ba lazre' Dios.
JAM 1:21 Chee̱ le̱ na', le gusán xúgute̱ da sban ne ca naca da cale̱la da dxanle̱'e̱ na, na' dute̱ xel-la' dxexruj lazre' chee̱le le si' ca naca dizra' chee̱ Dios da ba naxaza na lu xichaj lázrdaule, lawe' da wazeque' dizra' na' guselá na bénne'du xu'ule.
JAM 1:22 Le gun ca da dxulé'e dizra' na' le'e, ne quegá xénezele na. Benne' dxénzene̱' na dxezí xe̱ze cuine̱'.
JAM 1:23 Bénnea' dxénzene̱' dizra' na', ne quebe dxune̱' ca dxenná na, naque̱' ca tu benne' dxenné̱'e̱ lawe̱' tu lu wana'.
JAM 1:24 Dxenné̱'e̱ ca naque̱', na' gate ze xeajze̱' na', na' dxal-la lazre̱' ca naque̱'.
JAM 1:25 Benne' dxenná' xánnie̱' ca da bdxixruj be'e Dios da naca na li lazre', ne da dxuselá na dxi'u, ne dxusé̱die̱' ca naca na, ne quegá dxénzene̱' na, quebe dxal-la lazrte̱' na. Che dxune̱' ca naca na, benne' nigá gaca tu da ba neza chee̱' lu xúgute̱ da dxune̱'.
JAM 1:26 Che nu benne' dxéquene̱' naque̱' benne' dxucá'ana szren Dios, ne quebe dxezéquene̱' nna be'ene̱' luzre̱', benne' nigá dxezí xe̱ze cuine̱', na' ca naca xel-la' dxucá'ana szren Dios chee̱' dácheze naca na.
JAM 1:27 Xel-la' dxucá'ana szren Dios da naca na du lazre', ne da naca na da dxezaca ba lazre' Xradxu Dios naca na caní: Gácale̱dxu bidu ca' zaj naze̱be, ne nu'ula ca' ba zaj nate benne' biu chee̱' gate zaj zue̱' lu da zi' da xa', ne quebe gundxu ca naca da sban chee̱ xe̱zr la xu nigá.
JAM 2:1 Benne' bícha'dau', le'e dxéajle̱le chee̱ Xránadxu, Benne' xabáa Jesucristo, quebe dxal-la' guchale ca gunle chee̱ tu tu benne'.
JAM 2:2 Che chu'u tu benne' naga nazrágale, ne nácue̱' zra lane̱' da zaca, ne xu'u da naca na oro lu xrube ne̱'e̱, na' cá'anqueze che chu'u tu benne' xache', ne nácue̱' zra lane̱' tuzruj,
JAM 2:3 na' che dxelé'ele cháwedau' bénnea' nácue̱' zra lane̱' da zaca, ne dxe̱le le̱': “Gudxe'e nigala naga nácadxa na chawe'”, na' dxe̱le benne' xache' na': “Xeajsé̱ na'la, u gudxe'e lu xu ná'te̱ze.”
JAM 2:4 Che dxunle caní, dxuchale ca dxunle chee̱ tu tu benne', ne dxuchí'ale ca zaj naca bénneache, quebe naca xrlátaje xichaj lázrdaule.
JAM 2:5 Benne' bícha'dau' nazri'ite̱ lazra', le xen da nigá: Dios ba guqué̱'e̱ benne' ca' zaj naque̱' benne' xache' lu xe̱zr la xu nigá chee̱ xelaque̱' benne' gunní'a lu xel-la' dxeajlí lazre', ne chee̱ xelezí' lu ne̱'e̱ da nucueza Dios naga dxenná bea Le̱', da na' guche̱be lazre' Le̱' gunézruje̱' chee̱ benne' ca' zaj nazri'ine̱' Le̱'.
JAM 2:6 Le'e dxuzúale chalá'ala benne' xache' ca'. ¿Quegá benne' gunní'a ca' benne' dxuluchínene̱' le'e, ne dxeleché̱'e̱ le'e lau benne' xulawe' ca'?
JAM 2:7 ¿Quegá benne' gunní'a ca' benne' dxelenné̱' schanni' chee̱ da xrlátaje ca nazí' lale, dxennale nácale bi chee̱ Cristo?
JAM 2:8 Che da li dxunle ca dxenná da nadxixruj be'e Dios, da nácadxa blau ca da naxúaj na lu xiche lá'azxa, dxenná na: Bzri'i biche ljwezru' ca nazrí'i cuinu', xrlátaje dxunle.
JAM 2:9 Na'a che dxuchale ca dxunle chee̱ tu tu benne', dul-la dxunle, ne nabágale zria lawe' da quebe dxunle du ca bdxixruj be'e Dios.
JAM 2:10 Che tu benne' dxune̱' ca zaj naca da nadxixruj be'e Dios, san che dxenéguene̱' ca naca tuze da nadxixruj be'ene̱', naca na cáte̱ze nabague̱' zria ca zaj naca xúgute̱ da nadxixruj be'e Dios.
JAM 2:11 Lé̱queze Dios gunné̱': “Quebe gunle dul-la da dxichaj na xrba chee̱ xel-la' wechaga na'”, cá'anqueze gunné̱': “Quebe gútele benne'.” Caní naca, che tu benne' quebe dxune̱' dul-la da dxichaj na xrba chee̱ xel-la' wechaga na', san che dxutie̱' benne', ba gunéguene̱' ca da nadxixruj be'e Dios.
JAM 2:12 Le'e dxal-la' guchálajle, ne gunle ca dxal-la' xelún benne' ca' guchi'a Dios ca da dxelune̱', benne' ca' zaj nalá lu na' da gunná bea Le̱'.
JAM 2:13 Benne' ca' quebe dxelexexache lazre̱' chee̱ benne' xula, Dios guchi'e̱ ca da dxelún benne' ca', ne quebe xexache lazre̱' chee̱ benne' ca', san benne' ca' dxelexexache lazre̱' chee̱ benne' xula quebe bi zria xelebague̱' gate Dios guchi'e̱ ca da zaj nun benne' caní.
JAM 2:14 Le'e, benne' bícha'dau', ¿bizra culuén gapa na che tu benne' dxenné̱' dxeajlí lazre̱' Cristo, na' quebe bi dxune̱' da dxácale̱n nu benne' dxexázrjene̱'? ¿Wazeque' xel-la' dxeajlí lazre' na' guselá na le̱'?
JAM 2:15 Che zra' benne' bíchedxu u nu'ula zandxu, benne' quebe bi zaj de̱ zra lane̱' u da xelawe̱',
JAM 2:16 na' che núlale le'e xe̱le benne' ca': “Bexiajzé̱ cháwedau'. Nazré'enu', ne gágugu' szri'”, san che quebe bi gunézrujle ca da dxexázrjene̱', ¿bizra culuén gapa da na' gunnále?
JAM 2:17 Caní naca na chee̱ xel-la' dxeajlí lazre'. Che quebe bi zaj de̱ da chawe' da xululé'e na che dxeajlí lazre' bénnea' Cristo, xel-la' dxeajlí lazre' chee̱' naca na ca tu da gate.
JAM 2:18 Wannalja nu benne': Lue' dxennáu' dxéajle̱'u chee̱ Cristo, na' neda' dxuna' da chawe' ca'. Ble'e neda' dxéajle̱'u chee̱ Cristo ne quebe dxunu' da chawe' ca', na' neda' gulé'eda' lue' dxeajlí lazra' Cristo ne̱ chee̱ da chawe' ca' da dxuna'.
JAM 2:19 Dxéajle̱'u lue' zua tuze Dios. Nácaqueze na ca'. Cá'anqueze da xriwe̱' ca' dxeléajle̱ na, ne dxelezrize na lu xel-la' dxelezrebe.
JAM 2:20 Lue', benne' xala, ¿dxaca lazru' gulé'eda' lue' naca xel-la' dxeajlí lazre' ca tu da gate che nu benne' dxeajlí lazre̱' Cristo na' quebe bi zaj de̱ da chawe' da xelunna bea na?
JAM 2:21 ¿Ájazra guca chee̱ xra xrtáudxu Abraham guque̱' benne' xrlátaje̱ lau Dios? Guca na ne̱ chee̱ da be̱ne̱' gate guxúe̱' zrí'ine̱' Isaac lu bdupa xiaj chee̱ guzezxe̱'-be'.
JAM 2:22 ¿Quebe dxele'enu'? Ca da be̱n Abraham dxulé'e na guxeajlí lazre̱' Dios, na' xel-la' dxeajlí lazre' chee̱' guca na du lazre' ne̱ chee̱ da be̱ne̱'.
JAM 2:23 Caní guca li ca da dxenná na lu xiche lá'azxa: Abraham guxéajle̱'e̱ chee̱ Dios, na' Dios blé'ene̱' le̱' benne' xrlátaje̱. Na' bchálaje̱' ca naca chee̱ Abraham, gunné̱': “Bi zrágaqueza', Abraham.”
JAM 2:24 Na'a dxelé'ele Dios dxezí' lu ne̱'e̱ tu benne' ne̱ chee̱ da chawe' da dxune̱', ne quegá tuze lawe' da dxeajlí lazre̱' Le̱'.
JAM 2:25 Cá'anqueze guca chee̱ Rahab, nu'ula we̱n da sban. Nu'ula nigá gulu'e̱ lizre̱' benne' ca' gusel-la Josué, na' bsi'e̱ benne' ca' neza xula chee̱ belelé̱' lu na' benne' ca' dxjaque̱' wedil-la, na' ne̱ chee̱ da be̱ne̱', Dios guzí' lu ne̱'e̱ nu'ula na'.
JAM 2:26 Ca naca chee̱ be̱la' dxen chee̱dxu, che ba bedxúaj be' chee̱ na, ba nate na, cá'anqueze naca chee̱ xel-la' dxeajlí lazre' chee̱dxu. Che quebe bi zaj de̱ da chawe' da xululé'e na dxeajlí lazrdxu Cristo, naca na ca tu da gate.
JAM 3:1 Benne' bícha'dau', quebe dxal-la' gun cuínale benne' dxuluse̱de dizra' chee̱ Dios, lawe' da nézele ca gun Dios, guchi'a xánnedxe̱' chee̱ da dxundxu dxi'u, dxuchálajdxu xrtizre̱'.
JAM 3:2 Xúgute̱dxu dxúnle̱'e̱dxu da cale̱la. Che nu benne' quebe bi da cale̱la dxune̱' ca naca da dxuchálaje̱', naque̱' benne' li lazre', na' wazéquene̱' nna be'ene̱' ca nácaqueze be̱la' dxen chee̱'.
JAM 3:3 Gate dxugú'udxu xia dxu'a bzrina' chee̱ gunba' da dxaca lazrdxu, wazéquedxu nna be'edxu dute̱ba'.
JAM 3:4 Le na' xque ca naca chee̱ da ca' dxeledán lawe' nísadau'. Lácala zaj naca na da zri'a, na' be' da dxuzriga na le̱ na dxácale̱'e̱ na, benne' dxusé̱'e̱ na dxuchínene̱' tu xágadauze, na' dxenná be'ene̱' na chee̱ cheaj na naga dxaca lazre' le̱'.
JAM 3:5 Cá'anqueze naca chee̱ lúzredxu. Naca na tu da dauze da naca chee̱ be̱la' dxen chee̱dxu, na' da zrente̱ da dxenná na. Tu xí'dauze waca guzezxe na tu xi'a zren.
JAM 3:6 Lúzredxu naca na ca tu xi'. Lúzredxu naca na ca tu xe̱zr la xu sban da zua lu be̱la' dxen chee̱dxu, ne dxuxrinnaj na du ca nácadxu. Zúale̱ ca tu xi' lúzredxu da za' lataj ba xa', ne naca na ca tu da dxegú'u na xi' ca naca xúgute̱ da dxundxu.
JAM 3:7 Wazeque' nu benne' nna bé'ene̱' xúgute̱ be̱ xixre' ca', ne be̱ zaj zua xrila, ne be̱ snia ca', ne be̱ zaj zra' lu nísadau', ne ba gunná bé'ene̱'-ba'.
JAM 3:8 Quebe nu benne' dxezéquene̱' nna bé'ene̱' dute̱ da dxenná luzre̱'. Naca na tu da cale̱la da quebe dxue na lataj nu nna be'e le̱ na, ne naca na ca tu be̱ snia, be̱ dxúteba' bénneache ca'.
JAM 3:9 Nen lúzredxu níqueze dxue lá'anadxu Xradxu Dios, ne nen le̱ na dxenné̱quezdxu da cale̱la chee̱ bénneache, benne' ca' nun Dios na' lu'a le saca Lé̱queze̱'.
JAM 3:10 Lu dxú'adxu ná'queze dxeledxúaj da xrlátaje ne da cale̱la. Benne' bícha'dau', da nigá quebe dxal-la' gaca na ca'.
JAM 3:11 ¿Waca galaj nisa chawe' ne nisa sla' lu tuze beaj?
JAM 3:12 Benne' bícha'dau', ¿waca tu xaga higo cuía na da zixre chee̱ xaga olivo? ¿Waca tu lba uva cuía na da zixre chee̱ xaga higo? Cá'anqueze, tu beaj quebe gaca gunna na nisa xene', ne nisa zri lazre'.
JAM 3:13 Che zua tu benne' ládujla le'e naque̱' benne' sina, ne dxéajni'ine̱', dxal-la' gulé'ene̱' na ne̱ chee̱ da chawe' da dxune̱' dute̱ xel-la' dxexruj lazre' chee̱' da dxunezruj xel-la' sina le̱'.
JAM 3:14 Che zua lu lázrdaule xel-la' zre'e lazre' ne xel-la' xa lazre', quebe dxal-la' gucá'ana szren cuínale ca naca xel-la' sina chee̱le lawe' da caní nne̱le da we̱n lazre' chee̱ da naca da li.
JAM 3:15 Xel-la' sina caní quebe naca na chee̱ Dios. Naca na chee̱ xe̱zr la xu nigá, ne chee̱ bénneache, ne za na lu na' da xriwe̱'.
JAM 3:16 Naga zua xel-la' zre'e lazre' ne xel-la' xa lazre', na' zaj zra' benne' wechacha ca', ne dxelune̱' xúgute̱ da cale̱la.
JAM 3:17 Benne' zaj nape̱' xel-la' sina da dxunna Dios zaj naque̱' du lazre', ne zren lazre', ne dxe'ene lazre', ne dxexruj lazre'. Dxelexache lazre' ljwezre̱', ne dxelune̱' da chawe'. Zaj naque̱' li lazre' ne quebe dxelune̱' cúzreze da chawe'.
JAM 3:18 Benne' dxelebeche zrie̱' da ba xa' dxelune̱' tu zrin da naca ca tu binne da dxunna na da chawe'.
JAM 4:1 ¿Bizr chee̱ na' dxedíl-lale ne dxe' da ba xa' ládujla le'e? Dxaca caní lawe' da dxezá lázrele da zaj naca chee̱ da cale̱la, da dxuluzúa na le'e lu da ba xa'.
JAM 4:2 Le'e dxaca lázrele bi gápale, na' lawe' da quebe dxezrué'ele na, na' dxútele benne'. Dxezá lázrele tu da sile, na' lawe' da quebe dxezéquele sile na, na' dxedíl-lale̱ ljwézrele, ne dxebéquele da ba xa'. Quebe dxezile ca da dxezá lázrele lawe' da quebe dxenábale na lau Dios.
JAM 4:3 Che dxenábale na, quebe dxezile na lawe' da dxenábale na cale̱la, lawe' da dxedánele na chee̱ guchínele na ca da dxaca lázrele.
JAM 4:4 Le'e, benne' quebe nácale li lazre', ¿quebe nézele che nu benne' dxedánnene̱' da cale̱la da de̱ lu xe̱zr la xu nigá, benne' nigá dxecuídene̱' Dios? Nútete̱ze benne' dxaca lazre̱' si'e̱ ba neza ca da dxaca lu xe̱zr la xu nigá naque̱' benne' dxecuídene̱' Dios.
JAM 4:5 Chee̱ le̱ na' dxenná xiche lá'azxa: Be' da nuzúa Dios lázrdaudxu cadite dxe'e̱ gunne xue chee̱dxu.
JAM 4:6 Dios dxácale̱dxene̱' dxi'u lu xel-la' xrlátaje chee̱', ca dxenná xiche lá'azxa: Dios dxezré̱'e̱ benne' ca' dxulucá'ana szren cuina, na' dute̱ xel-la' xrlátaje chee̱' dxácale̱ne̱' benne' dxexruj lazre' ca'.
JAM 4:7 Le guzúa dizra' chee̱ Dios. Le til-la da xriwe̱', na' le̱ na xuzrunnuj na naga zrale.
JAM 4:8 Le biga lau Dios, na' Le̱' bigue̱' naga zúale le'e. Le'e, benne' dul-la, le gupá'a cuínale chee̱ dul-la da nabágale. Le'e, benne' quebe nazri'ile Dios du lázrele, le gaca benne' du lazre'.
JAM 4:9 Le guzua ba xa' lázre'le. Le cuezre, ne le gaca xache' lazre'. Québedxa guzrízrele, na' le cuezre. Québedxa bele, ne le xewine lazre'.
JAM 4:10 Le gaca dxexruj lazre' lau Xránadxu, na' Le̱' gucá'ana szrene̱' le'e.
JAM 4:11 Le'e, benne' bícha'dau', quebe nne̱le chee̱ ljwézrele tule xetule. Benne' dxenné̱' chee̱ tu benne' bíchedxu, u dxuchi'e̱ ca da dxun bénnea', naque̱' benne' dxenné̱' cale̱la chee̱ da bdxixruj be'e Dios, ne dxebée̱' ca zaj naca da bdxixruj be'e Dios. Che dxebéu' ca zaj naca da bdxixruj be'e Dios, dxun cuinu' ca benne' dxuchi'e̱ da dxaca, ne quebe dxuzú' dizra' da bdxixruj be'e̱.
JAM 4:12 Zua tuze Dios, Bénnea' bdxixruj be'e̱ da ca', ne dxuchi'e̱ da dxaca, na' Lé̱queze̱' wazéquene̱' guselé̱' dxi'u, ne guzría xi'e̱ dxi'u. Lue', ¿núzraqueze nacu', dxuchi'u da dxun benne' xula?
JAM 4:13 Na'a, le xene da nigá, le'e dxennale: Na'a u wxre chéajdxu tu xe̱zre ne cheajsúadxu na' tu iza. Gá'udxu, ne gútedxu chee̱ gucúdedxu dumí.
JAM 4:14 Quebe nézele ca da gaca wxre. ¿Ájazra naca chee̱ xel-la' nabán chee̱dxu? Naca na ca tu beuj da dxebé' tu chi'i, na' chadí dxenite na.
JAM 4:15 Da dxal-la' guchálajle naca caní: Che Xránadxu dxaca lazre̱', gaca bandxu ne gundxu da nigá u da na'.
JAM 4:16 Le'e dxucá'ana szren cuínale ca da dxuchálajle. Xel-la' dxucá'ana szren cuina caní naca na da cale̱la.
JAM 4:17 Che nu benne' ba nézene̱' ca da chawe' da dxal-la' gune̱', na' quebe dxune̱' na, na' bágale̱'e̱ dul-la.
JAM 5:1 Le xene da nigá, le'e, benne' gunní'a. Le cuezre ne le xewine lazre' ca naca da zi' da xa' da lé'ele.
JAM 5:2 Ca naca xel-la' gunní'a chee̱le ba zaj nuzru na, na' zra lánale zaca ba zaj nagu béadu ca' le̱ na.
JAM 5:3 Ca naca oro chee̱le ne plata chee̱le, ba gulezén xrche̱'e̱ na, na' lawe' da quebe bchínele da gunní'a chee̱le lu da xrlátaje, da caní dxululé'e na nabágale zria lau Dios, na' Le̱' gudée̱' le'e lu da ba xa'. Caní gaca chee̱le lawe' da btúbele xel-la' gunní'a chee̱ gápale na gate ba dxéxrule.
JAM 5:4 Quebe gudízrujle ca naca chee̱ na benne' ca' belexelape̱' lina chee̱le, na' dxelawe̱' zria chee̱ da quebe gudízrujle, na' Xránadxu, Bénnea' nape̱' dute̱ xel-la' dxenná bea, ba benne̱' ca naca zria da dxelagu benne' ca' chee̱le le'e.
JAM 5:5 Lu xe̱zr la xu nigá ba guzile ba neza xel-la' gunní'a chee̱le ne xúgute̱ da zaca ca', ne guzrenle ca tu be̱zre dxánnele̱'e̱, na' ba dxezrín zra xelútie̱'-ba'.
JAM 5:6 Le'e ba bzria xile, ne ba bé̱tele benne' quebe bi da cale̱la zaj nune̱', na' benne' ca' quebe guledábague̱' le'e.
JAM 5:7 Chee̱ le̱ na', benne' bícha'dau', le gaca zren lazre' ca zrindxa zra xelá' Xránadxu. Benne' dxaza dxa'ana dxal-la' cueze̱' dute̱ xel-la' zren lazre' chee̱' ca zrindxa zra xelá' xiuj ba ne xiuj lina, chee̱ xezí' lu ne̱'e̱ lina chawe' chee̱'.
JAM 5:8 Cá'anqueze le gaca zren lazre', ne quebe gute lázrele, lawe' da ba zua gagu zra xelá' Xránadxu.
JAM 5:9 Le'e, benne' bícha'dau', quebe gágule zria chee̱ ljwézrele, chee̱ quebe guchi'a Dios chee̱ da dxunle, lawe' da zua gágute̱ zra xelá' Dios, Bénnea' dxuchi'e̱ da dxaca.
JAM 5:10 Le'e, benne' bícha'dau', le gusá lázrele ca guca chee̱ benne' ca' gulenné̱' waláz chee̱ Dios, gulaque̱' zren lazre' lácala guledée' xel-la' zi'.
JAM 5:11 Dxennadxu guca da ba neza zren chee̱ benne' ca' buluchaga lawe̱' xel-la' zi' ca'. Le'e ba benle ca benne' zren lazre' guca Job, ne ba nézele ca da chawe' be̱n Dios chee̱' ca gudé na'. Xránadxu naque̱' zri'i lazre', ne dxexache lazre̱' dxi'u.
JAM 5:12 Da dxundxa na ba xen, benne' bícha'dau', quebe guzétajle xabáa, ne quebe guzétajle da zua xe̱zr la xu nigá, ne quebe bi da xula guzétajle. Gate nnale: Awe', le nnaze: Awe', ne gate nnale: Cabí, le nnaze: Cabí, chee̱ quebe guzría xi' Dios le'e.
JAM 5:13 Che núlale dxedele lu da zi' da xa', dxal-la' guchálajle̱nle Dios. Che nu benne' zue̱' xel-la' dxebé, dxal-la' gul-le̱' da güe lá'ane̱' Dios.
JAM 5:14 Che nu benne' quebe chawe' zue̱', dxal-la' nne̱' benne' gula ca' dxuluxúe̱' bi chee̱ Cristo, chee̱ xelenabe̱' lau Dios xexune̱' benne' we̱' na', ne xelegú'e̱ le̱' da za lu La Xránadxu.
JAM 5:15 Gate dxuluchálajle̱ne̱' Dios dute̱ xel-la' dxeleajlí lazre' chee̱', na' xexaca benne' we̱' na', na' Xránadxu xechise̱' le̱', ne che bi dul-la nune̱', na' gunite lau Dios chee̱ bénnea'.
JAM 5:16 Chee̱ le̱ na', le xrúale̱pe lau ljwézrele tule xetule dul-la da nunle, ne le guchálajle̱ Dios chee̱ tule xetule, chee̱ xexune̱' le'e. Da dxenaba benne' xrlátaje̱ du lazre̱' lau Dios wazrué'ene̱' na.
JAM 5:17 Elías, bénnea' gunné̱' waláz chee̱ Dios, guque̱' tu bénneache ca dxi'u, na' gate gunabe̱' lau Dios chee̱ quebe gaca xiuj, na' quebe guca xiuj lu xe̱zr la xu dute̱ chun iza xugachaj.
JAM 5:18 Gudé na', gate gunabe̱' lau Dios da xula, na' belá' xiuj, na' xe̱zr la xu na' be̱nna na lina.
JAM 5:19 Le'e, benne' bícha'dau', che nu benne' ládujla le'e dxecuase̱' lu da li, na' che núlale le'e xegu'ule le̱' lu xel-la' li,
JAM 5:20 dxal-la' nézele, nútete̱ze benne' xucuase̱' tu benne' dul-la lu neza cale̱la da zeajle̱ne̱', guselé̱' bénne'du xu'u benne' dul-la na' lu xel-la' gute, na' xunite lau Dios dul-la zan da nabaga bénnea'.
1PE 1:1 Neda', Pedro, naca' benne' gubáz chee̱ Jesucristo. Dxuzúaja' da nigá chee̱le le'e nadxúajle lázrele, ne zrale xe̱zre ca' zaj nababa Ponto, ne xe̱zre ca' zaj nababa Galacia, ne xe̱zre ca' zaj nababa Capadocia, ne xe̱zre ca' zaj nababa Asia, ne xe̱zre ca' zaj nababa Bitinia.
1PE 1:2 Xradxu Dios ba guqué̱'e̱ le'e ca da gunné̱' gate nate. Ne̱ chee̱ Be' Lá'azxa ba gucá'a Dios le'e chee̱ guzúale dizra' chee̱', ne chee̱ chádxele lu dxen chee̱ Jesucristo. Dxenaba' lau Dios gúnnale̱'e̱ le'e da chawe', ne xel-la' dxebeza zri lazre'.
1PE 1:3 Dxue lá'anadxu Dios, Xra Xránadxu Jesucristo. Lawe' da dxexache lázrele̱'e̱ dxi'u ba be̱ne̱' chee̱dxu bexálajdxu lawe' da bebán Jesucristo ládujla benne' gate. Da nigá nuzaga na dxi'u chee̱ cueza lázredxu,
1PE 1:4 ne gun na sile ca da nucueza Dios chee̱le xabáa, da na' quebe cuia xi na, ne quebe xexúe na, ne quebe te chee̱ na.
1PE 1:5 Lawe' da dxéajle̱le chee̱ Dios, Le̱' guxre̱' le'e nen xel-la' waca chee̱' ca zrindxa zra na' sile du ca naca xel-la' weselá da nucueze̱' chee̱dxu, na' gulé'ene̱' na lu zra bze̱be ni'.
1PE 1:6 Chee̱ le̱ na' dxebéle̱'e̱le lácala dxun na ba xen tele xel-la' zi' tu chí'idau'.
1PE 1:7 Xel-la' dxeajlí lazre' chee̱le gaca chee̱ na ca dxaca chee̱ oro da dxedé na lu xi' chee̱ xegá'ana chawe' na. Caní naca chee̱ xel-la' dxeajlí lazre' chee̱le, gate ba gudé na lu xel-la' zi', na' xegá'ana na da zácadxa chee̱ sile xel-la' szren, ne xel-la' ba lá'ana lu zra na' gate xelá' Jesucristo.
1PE 1:8 Le'e nazri'ile Jesucristo lácala quebe ne lé'ele Le̱', na' lawe' da nuxrén lázrele Le̱' lácala quebe ne xelé'ele Le̱', dxebéle̱'e̱le. Ca naca xel-la' dxebé chee̱le naca na da zrente̱ da quebe séquentu' xuzájla'antu'
1PE 1:9 lawe' da nalá bénne'du xu'ule lawe' da dxéajle̱le chee̱ Dios.
1PE 1:10 Lu iza da ba guledé gate nate, benne' ca' gulenné̱' waláz chee̱ Dios buluxúe xánnie̱', ne belexebéajni'e̱ ca naca chee̱ xel-la' weselá nigá, na' buluchálaje̱' ca naca xel-la' chawe' chee̱ Dios da gunne̱' le'e.
1PE 1:11 Be' Lá'azxa, Bénnea' gusel-la Cristo, bzéajni'ine̱' benne' ca' buluchálaje̱' waláz chee̱ Dios gate nate ca da saca Cristo, ne ca naca xel-la' szren da si'e̱ te na', na' benne' ca' belexexílaje̱' nuzra benne' nigá, ne bátala gaca da dxenná Be' Lá'azxa, Bénnea' zúale̱ le̱'.
1PE 1:12 Dios bzéajni'ine̱' benne' ca' ca naca chee̱ da na' dxuluchálaje̱', gunné̱' quebe naca na chee̱ lé̱queze̱', san naca na chee̱dxu dxi'u. Na'a, da nigá naca dizra' chawe' da ba bénquezle, da buluchalaj benne' ca' ne̱ chee̱ Be' Lá'azxa, Bénnea' ze̱'e̱ xabáa. Da caní gulaca lazre' gubáz chee̱ xabáa xeléajni'ine̱'.
1PE 1:13 Chee̱ le̱ na', le guxúe xanne' ca da gunle. Tu dxál-lazqueze gunle da xrlátaje. Dute̱ lázrdaule le guxrén lazre' xel-la' chawe' chee̱ Dios, ne le cueza da gunne̱' le'e lu zra na' gate xelá' Jesucristo.
1PE 1:14 Lawe' da nácale bi chee̱ Dios, le guzúa dizra' chee̱', ne québedxa gunle ca da guzá lázrele gate quebe ne gúnbeale Dios.
1PE 1:15 Na'a, le ta lu xel-la' lá'azxa chee̱' lawe' da naca Dios lá'azxa, Bénnea' gunné̱' le'e.
1PE 1:16 Cá'anqueze naxúajqueze na lu xiche lá'azxa chee̱', dxenné̱': “Le gaca lá'azxa, lawe' da naca' neda' lá'azxa.”
1PE 1:17 Che dxennale le'e naca Dios Xrale, na' Le̱' dxuchi'e̱ ca da dxelún bénneache, dxal-la' zrébele Le̱' dxácate̱ ne zúale lu xe̱zr la xu nigá.
1PE 1:18 Dios ba bselé̱' le'e lu da benle gate na' guxíajle̱le ca da belún xra xrtaule, da cale̱la, na' ba nézquezle quebe guca na ne̱ chee̱ tu da dxuzru na ca oro, ne plata.
1PE 1:19 Bselé̱' le'e ne̱ chee̱ dxen zácale̱'e̱ chee̱ Cristo, Bénnea' bzua cuine̱' lau Dios ca tu zríla'dau' du lazre', ne quebe nadxenba', be̱ dxelutie̱' chee̱ xunite lau Dios dul-la zaj nabague̱'.
1PE 1:20 Cristo ba nácaqueze chee̱' gate nate saque̱' da nigá, na' ble̱'e̱ lu zra caní chee̱ gaca chawe' chee̱le.
1PE 1:21 Ne̱ chee̱ Cristo dxéajle̱le chee̱ Dios, Bénnea' bsebane̱' Le̱' ládujla benne' gate, ne bca'ane̱' Le̱' szren. Chee̱ le̱ na' dxéajle̱le chee̱ Dios, ne dxuxrén lázrele Le̱'.
1PE 1:22 Na'a, ba bzúale dizra' chee̱ xel-la' li ne̱ chee̱ Be' Lá'azxa, chee̱ zri'ile dute̱ lázrdaule benne' zaj nababe̱' dxi'u. Chee̱ le̱ na' dxal-la' zri'ile ljwézrele tule xetule dute̱ lázrdaule, ne dute̱ xel-la' wala chee̱le.
1PE 1:23 Caní naca na lawe' da ba bexálajle, quegá chee̱ bénneache, benne' dxelate. Nálajle ne̱ chee̱ dizra' chee̱ Dios, da naca ban na, ne da zua na chadía chacanna.
1PE 1:24 Caní naca na lawe' da naxúaj na lu xiche lá'azxa, da dxenná na: Xúgute̱ bénneache zaj naque̱' ca xixre', na' xel-la' szren chee̱' naca na ca xiaj chee̱ xíxre'du ca'. Xixre' na' dxebizre na, na' xiaj chee̱ na dxexruj na.
1PE 1:25 Dizra' chee̱ Xránadxu zúatequeze na chadía chacanna. Dizra' nigá ba benle le'e ne̱ chee̱ dizra' chawe' da dxuchálajntu'.
1PE 2:1 Chee̱ le̱ na', québedxa gunle da cale̱la. Québedxa nu si xe̱le, ne quebe gunle láweze da xrlátaje. Québedxa gácale xa lazre', ne quebe bi nne̱le chee̱ ljwézrele.
1PE 2:2 Cáte̱ze dxeledane bidu dxe'ene ca' nizre', ca' le gane xrtizra Dios, da naca na du lazre', chee̱ gun na se̱ cháchale, ne lale lu na' dul-la.
1PE 2:3 Che da li ba guzú laule nézele naca Xránadxu chawe', na' gaca lázrele sídxale xrtizre̱'.
1PE 2:4 Le biga lau Xránadxu, Bénnea' naque̱' ca xiaj xre ban. Bénneache buluzúe̱' Le̱' chalá'ala, san lau Dios naque̱' tu xiaj chawe' da zácale̱'e̱ na.
1PE 2:5 Cá'anqueze le'e nácale ca xiaj ban ca'. Le güe Dios lataj guchínene̱' le'e chee̱ gune̱' tu xudau' chee̱ Be' Lá'azxa chee̱', gácale bxruze chee̱ Dios chee̱ guzúale lau Dios ca da dxunna Be' Lá'azxa le'e. Da nigá waca gunle ne̱ chee̱ Jesucristo, da xezaca ba lazre' Dios.
1PE 2:6 Chee̱ le̱ na' lu xiche lá'azxa dxenná Dios: Neda' nuzúa' lu xe̱zre lá'azxa tu benne' naque̱' ca tu xiaj blau chee̱ xu'u, da naca na tu xiaj du lazre', ne da zácale̱'e̱ na, na' nu benne' chéajle̱'e̱ chee̱ Le̱' quebe gaca xel-la' stu chee̱'.
1PE 2:7 Chee̱le le'e dxéajle̱le chee̱', xiaj nigá zácale̱'e̱ na, san chee̱ benne' ca' quebe dxéajle̱'e̱ naca na ca da dxenná xiche lá'azxa: Xiaj na' buluzúa benne' we̱n xu'u ca' chalá'ala, le̱ na' naca na xiaj blau.
1PE 2:8 Cá'anqueze naca na ca dxenná xiche lá'azxa: Naque̱' tu xiaj da dxechegu bénneache, na' lawe' le̱ na' dxeajlecházie̱'. Caní naca na, dxeajlecházie̱' lawe' da quebe dxelezi'e̱ dizra' chee̱ Dios. Dios ba núnqueze̱' gaca caní chee̱ benne' ca'.
1PE 2:9 Le'e nácale benne' ba gucá'a Dios. Nácale bxuze lu zrin chee̱ Benne' Wenná Bea, Jesús. Nácale tu xe̱zre lá'azxa chee̱ Dios, na' Le̱' naxá'awene̱' le'e chee̱ guzenle bénneache ca naca xel-la' szren chee̱ Dios. Le̱' gunné̱' le'e chee̱ xedxúajle lu da chul-la, na' súale lu xel-la' naxaní' li lazre' chee̱'.
1PE 2:10 Gate nate quebe nu bexache lazre' le'e, san na'a Diósqueze̱' dxexache lazre̱' le'e.
1PE 2:11 Bi bicha' nazri'ite̱ lazra', dxata' xueda' le'e, nácale ca benne' zaj zre̱'e̱ zitu' naga zua lazre̱', chee̱ quebe gunle ca da dxenná be̱la' dxen chee̱le, da dxedíl-lale̱ na bénne'du xu'ule.
1PE 2:12 Ca da dxunle, dxal-la' gaca na xrlátaje lau bénneache quebe zaj núnbe'e̱ Dios. Caní gaca na, lácala na'a dxelenné̱' chee̱le, dxelenné' nácale benne' ca' dxelune̱' da zrinnaj, na' welelé'equezne̱' da xrlátaje da dxunle, na' xelúe lá'anaqueze̱' Dios gate zrin zra xenaba Dios da be̱n tu tu bénneache.
1PE 2:13 Lawe' da nácale bi chee̱ Xránadxu, le guzúa dizra' ca da dxenná benne' xu'u lawe', bénnea' buluzúa benne' xe̱zre ca'. Le guzúa dizra' chee̱ benne' nape̱' xel-la' dxenná bea zren,
1PE 2:14 ne chee̱ benne' dxelenná bea, benne' ca' nasel-la le̱' chee̱ xuludée̱' xel-la' zi' benne' ca' dxelune̱' da zrinnaj, ne xelu'e̱ ba lá'ana benne' ca' dxelune̱' da xrlátaje.
1PE 2:15 Dios dxaca lazre̱' gunle le'e da xrlátaje chee̱ guzúa zrile benne' ca' quebe zaj naxéajni'ine̱', gate dxelenné̱' cale̱la chee̱ dizra' chawe' da nazile.
1PE 2:16 Le gaca ca benne' quebe zaj nada'u, san quebe guchínele da na' nazile, quebe gunle da cale̱la. Le gaca ca benne' ca' dxenná be'e Dios.
1PE 2:17 Le gapa ba lá'ana xúgute̱ bénneache. Le zri'i bi bíchedxu ca'. Le zrebe Dios, ne le gapa ba lá'ana benne' dxenná be'e̱.
1PE 2:18 Le'e, bi we̱n zrin, le guzúa dizra' chee̱ xránale dute̱ xel-la' ba lá'ana, quegaze chee̱ benne' zaj naque̱' zri'i lazre', ne dxelebé'e̱ gunne xue chee̱le, san cá'anqueze gunle chee̱ benne' snia ca' zaj naque̱' xránale.
1PE 2:19 Naca na tu da xrlátaje che guchaga laudxu xel-la' zi' da dxulusaca bénneache dxi'u gate dxundxu da nezdxu naca na da dxezaca ba lazre' Dios.
1PE 2:20 Che dxunle tu da cale̱la, na' dxulusaca zi'e̱ le'e, ¿bizra da ba neza gaca na chee̱le? Na'a, che dxedele xel-la' zi' lawe' da dxunle da xrlátaje, ne dxuchaga laule na dute̱ xel-la' zren lazre' chee̱le, da nigá naca na xrlátaje lau Dios.
1PE 2:21 Dios gunné' le'e chee̱ tele xel-la' zi' caní, lawe' da gudé Cristo xel-la' zi' waláz chee̱le le'e, da dxuzéajni'i na le'e gunle ca da be̱n Le̱'.
1PE 2:22 Le̱' quebe be̱ne' dul-la, ne quebe nu guzí xe̱'e̱.
1PE 2:23 Gate bulucháchale̱ne̱' Le̱', quebe bi dizra' schanni' beche̱be̱'. Gate buludée̱' Le̱' xel-la' zi', Le̱' quebe bexéchaje̱'. Bzua cuine̱' lu na' Dios, Bénnea' dxuchi'e̱ ca da naca na.
1PE 2:24 Biá'queze Cristo na' lu be̱la' dxen chee̱' ca naca dul-la chee̱dxu gate gude̱'e̱ le̱'e̱ xaga begúaj, chee̱ gácadxu ca benne' gate, québedxa gundxu dul-la, na' gaca bandxu chee̱ gundxu da xrlátaje. Le̱' guzríe̱' we̱' chee̱ xexácale le'e chawe'.
1PE 2:25 Le'e gudale gate nate ca zrila' zaj naníteba'. Na'a ba bela'le lau Cristo, Bénnea' dxuxúe̱' le'e ca dxun tu benne' dxuxúe̱' zríla'du ca', ne dxe'e̱ gunne xue chee̱ bénne'du xú'ule.
1PE 3:1 Cá'anqueze le'e, nu'ula nuchaga na'le, le guzúa dizra' chee̱ benne' chee̱le, na' che núlale zua benne' biu chee̱le quebe dxéajle̱'e̱ xrtizra Dios, xexúnbe'e̱ naca na da li gate lé'ene̱' da xrlátaje da dxun zru'ule̱', ne quebe gun na ba xen bi guchalaj zru'ule̱',
1PE 3:2 lawe' da lé'ezene̱' da xrlátaje dxune̱' lawe' da naque̱' xrlátaje, ne dxape̱' le̱' ba lá'ana.
1PE 3:3 Ca lechítaje̱ chee̱ tu nu'ula quebe dxal-la' gaca na cúzreze ca xel-la' dxupá'a xicha xíchaje̱', ne lechítaje̱ da naca na oro, ne zra lane̱' da zácale̱'e̱.
1PE 3:4 Lechítaje̱ chee̱' dxal-la' gaca na lu xichaj lázrdawe', da naca na tu da xrtan da quebe te chee̱ na. Da xrtan nigá naca na tu be' dxexruj lazre', ne zren lazre', da na' zácale̱'e̱ na lau Dios.
1PE 3:5 Cá'anqueze guca lechítaje̱ chee̱ nu'ula ca' gulaque̱' bi chee̱ Dios gate nate. Nu'ula ca' buluxrén lazre̱' Dios, ne buluzúe̱' dizra' chee̱ benne' chee̱'.
1PE 3:6 Cá'anqueze guca Sara, bzue̱' dizra' chee̱ Abraham, na' guzre̱' le̱': “Xran.” Le'e wácaquezle ca guca Sara na' che gunle da xrlátaje, ne quebe bi guchebe lázrele.
1PE 3:7 Cá'anqueze le'e, benne' biu, zúale̱le nu'ula, le gaca dxexruj lazre' nen zrú'ulale. Le gapa ba lá'ana zrú'ulale lawe' da quebe zaj naque̱' benne' wal-la ca le'e, ne cá'anqueze zaj nape̱' xel-la' nabán ca da nunna Dios le'e dute̱ xel-la' chawe' chee̱'. Dxal-la' gunle caní chee̱ quebe bi guzaga na le'e gate guchálajle̱le Dios.
1PE 3:8 Na'a: Le gaca tuze Le xexache lazre' ljwézrele, ne le zri'i ljwézrele. Le gaca benne' zri'i lazre', ne zren lazre'.
1PE 3:9 Quebe gunle da cale̱la chee̱ benne' dxune̱' chee̱le da cale̱la, ne quebe gucháchale̱le benne' dxulucháchale̱ne̱' le'e. Le gun da chawe' chee̱ benne' ca' lawe' da gunné̱' Dios le'e chee̱ sile da chawe'.
1PE 3:10 Caní naca na lawe' da dxenná xiche lá'azxa: Benne' dxaca lazre̱' gaca tu da ba neza chee̱', ne sue̱' xel-la' dxebé dxal-la' guxúe̱' luzre' chee̱ quebe nne̱' dizra' schanni', ne guxúe̱' dxu'e̱ chee̱ quebe nne̱ na da we̱n lazre'.
1PE 3:11 Dxal-la' gusane̱' ca da cale̱la be̱ne̱', ne québedxa gune̱' na, chee̱ gune̱' da chawe'. Dxal-la' cueche zrie̱' da ba xa', ne gaque̱' benne' zren lazre'.
1PE 3:12 Xránadxu dxuxúe̱' benne' chawe' ca', ne dxenne̱' ca da dxelenaba benne' ca'. Dxuzúe̱' chalá'ala benne' we̱n da zrinnaj ca'.
1PE 3:13 ¿Núzraqueze benne' gune̱' chee̱le da zrinnaj che le'e cuele gunne xue gunle da chawe'?
1PE 3:14 Lácala tele xel-la' zi' lawe' da dxunle da chawe', gaca na da ba neza chee̱le. Quebe nu zrébele, ne quebe xrúsale.
1PE 3:15 Le gapa ba lá'ana Cristo ca Xránale lu xichaj lázrdaule. Le súateze ban lazre' xeché̱bele lau benne' ca' dxelenabe̱' le'e bizr chee̱ na' dxuxrén lázrele Le̱'. Le gun na lu xel-la' dxexruj lazre', ne le gapa ba lá'ana benne' ca'.
1PE 3:16 Le gun da chawe' chee̱ quebe bi sua da gagu na zria lu xichaj lázrdaule, na' benne' ca' dxelenné̱' schanni' chee̱ da chawe' da dxunle lawe' da dxéajle̱l-le chee̱ Cristo, xelapa stu'e̱ ca dizra' da dxelenné'.
1PE 3:17 Zácadxa tele xel-la' zi' lawe' da dxunle da chawe' cáte̱ze dxaca lazre Dios, ne quegá tele xel-la' zi' lawe' da dxunle da cale̱la.
1PE 3:18 Caní naca na lawe' da gudé Cristo tu lásaze lu xel-la' gute zi xa' ne̱ chee̱ dul-la da nabágadxu. Le̱' guque̱' benne' xrlátaje, na' gudée̱' xel-la' zi' waláz chee̱dxu dxi'u, benne' we̱n da zrinnaj, chee̱ gaca xeché̱'e̱ dxi'u lau Dios. Gute Cristo lu be̱l-la' dxen chee̱', san bebánqueze̱' lu be' nácaqueze̱'.
1PE 3:19 Cá'anqueze lu be' nácaqueze̱' guxíaje̱' lataj chul-la naga xeajchálajle̱ne̱' be' zaj nácaqueze benne' ca' nuzaga xel-la' gute lu lataj na'.
1PE 3:20 Benne' caní quebe buluzúe̱' dizra' ca da bchalaj Noé gate nate, gate na' guleza Dios dute̱ xel-la' zren lazre' chee̱' dxácate̱ na' be̱n Noé da zren na' da dxedá lawe' nísadau'. Lu da dxedá lawe' nísadau' gulelá xrúnuze benne' ne̱ chee̱ nisa xiuj da na' bzria xi na ca naca bénneache.
1PE 3:21 Nisa xiuj na' dxulé'e na ca naca nisa naga dxelexedxúa benne' nisa, na' lu le̱ na' naladxu na'a. Nisa nigá quegá le̱ na' quibe na dxi'u, san dxulé'e na dxaca lázredxu chádxedxu lau Dios, na' ladxu lawe' da bebán Jesucristo ládujla benne' gate,
1PE 3:22 ne begüene̱' xabáa, ne zue̱' chalá'a xabe̱la chee̱ Dios, na' dizra' chee̱ Le̱' dxuluzúa gubáz chee̱ xabáa, gubáz ca' zaj nape' xel-la' dxenná bea, ne gubáz blau ca'.
1PE 4:1 Chee̱ le̱ na', ca be̱n Cristo, gudée̱' xel-la' zi' lu be̱la' dxen chee̱', cá'anqueze le'e dxal-la' si lu nale tele xel-la' zi' lawe' da che tu benne' ba gudée̱' xel-la' zi' lu be̱la' dxen chee̱', ba bzua bénnea' chalá'ala da naca dul-la,
1PE 4:2 chee̱ gune̱' ca da dxaca lazre' Dios dxácate̱ naca bane̱', ne quebe gune̱' ca da dxenná be̱la' dxen chee̱'.
1PE 4:3 Naze cátite da ba be̱nle gate nate da dxeledanne benne' quebe zaj núnbe'e̱ Dios. Ca lu iza da ba guledé be̱nle da sban ca', ne da zrinnaj ca' da guzá lázrele, ne guzúzrele, ne be̱nle laní sban ca'. Güé'ele̱'e̱le, ne bca'ana szrenle bedau' xiaj xaga ca' da na' dxecuide Dios.
1PE 4:4 Benne' ca' quebe zaj núnbe'e̱ Dios dxelexebánene̱' lawe' da québedxa dxunle le̱' tuze ca naca da sban da dxelune̱', na' chee̱ le̱ na' dxelenné̱' schanni' chee̱le.
1PE 4:5 Benne' ca', dxun na ba xen xululé'ene̱' ca da zaj nune̱' lau Bénnea' naca chee̱' guchi'e̱ chee̱ benne' ban ca', ne chee̱ benne' gate ca'.
1PE 4:6 Benne' ca' zaj nate belenne̱' ca naca dizra' chee̱ Dios chee̱ xelexaca bane̱' lu be' zaj nácaqueze' ca naca ban Dios, lácala lu xe̱zr la xu nigá Dios bchi'e̱ ca da belune̱' ca guchi'e̱ chee̱ xúgute̱ bénneache.
1PE 4:7 Ba za cheajsé̱ chee̱ xúgute̱ da dxelé'edxu. Chee̱ le̱ na', le sua ban lazre', ne le guchálajle̱queze Dios.
1PE 4:8 Da nácadxa blau, le zrí'ile̱'e̱ ljwézrele. Che nazrí'idxu benne' bíchedxu ca', na' gunite laudxu da calela da belune̱' chee̱dxu.
1PE 4:9 Le guzúa lízrele ljwézrele tule xetule, ne quebe nne̱le chee̱ ljwézrele.
1PE 4:10 Tu tule le'e dxal-la' gunle zrin chee̱ ljwézrele ca da nunna Dios chee̱le, ca benne' dxuluchínene̱' chawe' ca da chawe' da dxunezruj Dios chee̱'.
1PE 4:11 Che nu benne' dxuchálaje̱', dxal-la' guchálaje̱' da gunezruj Dios le̱'. Che nu benne' gune̱' zrin chee̱le, dxal-la' gune̱' na guchínene̱' xel-la' waca chee̱' da nunezruj Dios le̱'. Ca naca xúgute̱ da dxunle, dxal-la' gaca ba Dios lawe' da nácale bi chee̱ Jesucristo, na' chee̱ Le̱' gaca xel-la' szren, ne xel-la' dxenná bea chadía chacanna. ¡Ca'an gaca na!
1PE 4:12 Benne' bícha'dau' nazri'ite̱ lazra', quebe xebánele ca naca xel-la' zi' zren da tele, quebe guéquele naca na tu da quebe dxal-la' gaca.
1PE 4:13 Le be lawe' da tele xel-la' zi' ca xel-la' zi' da gudé Cristo chee̱ cá'anqueze béle̱'e̱le gate lé'ele xel-la' szren chee̱ Cristo gate zezé̱'e̱.
1PE 4:14 Che dxulugazja' benne' le'e dizra' lawe' da nácale bi chee̱ Cristo, ba neza zren naca na chee̱le, lawe' da zúale̱ Be' Lá'azxa chee̱ Dios le'e, Bénnea' ze̱'e̱ xabáa. Dxelenné̱ bénneache schanni' chee̱ Le̱', san le'e dxápale Le̱' ba lá'ana.
1PE 4:15 Che núlale le'e dxedele xel-la' zi', quebe dxal-la' gaca na lawe' da bé̱tele benne', u bi gulanle chee̱ benne', u bi da zrinnaj be̱nle, u lawe' da guchixre chee̱le da naca chee̱ benne' xula.
1PE 4:16 Che nu benne' dxedée̱' xel-la' zi' lawe' da naque̱' bi chee̱ Cristo, quebe dxal-la' xedué'ene̱', san dxal-la' güe lá'ane̱' Dios lawe' da nazí le̱' bi chee̱ Cristo.
1PE 4:17 Ba bzrin zra su lau Dios guchi'e̱ ca da zaj nun tu tu bi nácabe' chee̱ Le̱'. Che Dios su lawe̱' guchi'e̱ ca da nundxu dxi'u, ¿ájala gaca chee̱ benne' ca' quebe dxelune̱' ca dxenná dizra' chawe' chee̱ Dios?
1PE 4:18 Che benne' xrlátaje ca' cánnaze xelelé̱' ¿ájazraqueze gaca chee̱ benne' we̱n da zrinnaj ca', ne chee̱ benne' we̱n dul-la ca'?
1PE 4:19 Caní naca, benne' dxeledée̱' xel-la' zi' lawe' da dxelune̱' da xrlátaje da dxaca lazre' Dios, dxal-la' xelúnqueze̱' da xrlátaje, ne xuluzúe̱' bénne'du zaj xu'e̱ lu na' Dios, Bénnea' be̱ne̱' le', lawe' da naca Le̱' li lazre'.
1PE 5:1 Dxuzéajni'ida' le'e, benne' gula dxuxúele tu tu cue' bi ca' chee̱ Cristo lawe' da naca' neda' benne' gula ca le'e, ne dxexeche̱ba' ca xel-la' zi' da gudé Cristo, ne cá'anqueze lawe' da gúnnaqueze̱' neda', ne le'e, chee̱ sidxu da xabáa chee̱' da gulé'ene̱' te chee̱ zra caní.
1PE 5:2 Ca dxelún benne' dxuluxúe̱' zrila' ca', le guxúe bidu ca' chee̱ Dios, bénne'du ca' nabágale. Le gun na dute̱ lázrdaule ca dxaca lazre' Dios, quebe gun na ba xen nu benne' nna bé'ene̱' le'e, ne quebe gunle ba chee̱ dumí. Le gun zrin du lázrele,
1PE 5:3 ne quebe gun cuínale ca xrane bénne'du ca' nabágale. Le gun ba xuzre gácale tu da gulé'e na ca dxal-la' xelún bénne'du ca'.
1PE 5:4 Caní gaca, gate xelá' Xránadxu, Benne' Blau dxuxúe̱' zrila' ca', sile tu lazruj da naca na chee̱ xabáa, da quebe te chee̱ na.
1PE 5:5 Cá'anqueze le'e, benne' cuide', le gun ca da dxelenná benne' gula ca'. Xúgute̱le dxal-la' guzúale dizra' chee̱ ljwézrele tule xetule lu xel-la' dxexruj lazre' chee̱le lawe' da dxenná xiche lá'azxa: Dios dxezré̱'e̱ benne' ca' dxulucá'ana szren cuine̱'. Dute̱ xel-la' chawe' chee̱' dxácale̱ne̱' benne' dxexruj lazre' ca'.
1PE 5:6 Le guzexruj lázrele lu xel-la' dxenná bea zren chee̱ Dios, na' xechisa Le̱' le'e ca zrin zra chee̱ na.
1PE 5:7 Le guzúa lu na' Dios xúgute̱ da dxele gunne xue, lawe' da dxe' Le̱' gunne xue da naca chee̱le.
1PE 5:8 Le gaca benne' li lazre', ne le sua ban lazre' lawe' da dxedá da xriwe', da na' dxezrá'a na le'e, ne naca na ca tu be̱zre xixre', dxebezre xa'aba', dxíljaba' nu gué̱beba'.
1PE 5:9 Le tíl-lale̱ da xriwe', ne le se̱ chacha lu xel-la' dxeajlí lazre' chee̱le, lawe' da nézquezle dxeledéqueze xúgute̱ bíchele zaj zre̱'e̱ lu xe̱zr la xu nigá xel-la' zi' ca da dxedele le'e.
1PE 5:10 Gate bache gudele xel-la' zi' tu chi'i, Dios gune̱' le'e li lazre', ne guzúa chawe̱'e̱ le'e. Dios ná'queze dxunne̱' dxi'u xúgute̱ da chawe' chee̱', ne ba gunné̱' dxi'u chee̱ gápadxu da naca chee̱ xabáa chee̱' lawe' da nácadxu bi chee̱ Jesucristo.
1PE 5:11 Gaca ba Le̱', ne chee̱' Le̱' gaca xel-la' dxenná bea chadía chacanna. ¡Ca'an gaca na!
1PE 5:12 Silvano, benne' nigá dxéqueda' naque' tu bi bíchedxu li lazre', ba bzuaje̱' dizra' caní chee̱le le'e cáte̱ze neda', Pedro, ba gucha' le̱' guzúaje̱'. Dxuzéajni'ida' le'e, ne dxapa' le'e ca naca da xrlátaje da ba guzile da dxululé'e na Dios nazri'ine̱' le'e. Le se̱ chacha ca zaj naca da caní.
1PE 5:13 Bi chee̱ Cristo zaj zre̱'e̱ Babilonia nigá, benne' ca' gucá'a Dios ca guqué̱'e̱ le'e, dxulugape̱' le'e diuzre. Cá'anqueze Marcos, bi na' nácabe' ca bi cheé̱queza' dxugápabe' le'e diuzre.
1PE 5:14 Le gugapa diuzre ljwézrele tule xetule, ne le gunida' ljwézrele lu xel-la' zri'i lazre'. Dxenaba' lau Dios gunne̱' le'e xel-la' dxebeza zri lazre', le'e nácale bi ca' chee̱ Jesucristo. ¡Ca'an gaca na!
2PE 1:1 Neda', Simón Pedro, naca' we̱n zrin chee̱ Jesucristo, ne benne' gubáz chee̱'. Dxuzúaja' da nigá chee̱le le'e, ba nápale xel-la' dxeajlí lazre' da zácale̱'e̱, ne naca tuze ca da nápantu' netu'. Caní naca lawe' da naca li lazre' Dios chee̱dxu, ne Benne' Weselá chee̱dxu Jesucristo.
2PE 1:2 Dxenaba' lau Dios gúnnale̱'e̱ le'e da chawe' chee̱', ne xel-la' dxebeza zri lazre', lawe' da núnbeale Dios, ne Xránadxu Jesús.
2PE 1:3 Dios lu xel-la' waca chee̱' ba nunne̱' dxi'u xúgute̱ da nachínedxu chee̱ gápadxu xel-la' nabán chee̱ Le̱', ne chee̱ gaca gundxu zrin chee̱', lawe' da núnbeadxu Bénnea' gunné̱' dxi'u chee̱ gápadxu da xabáa chee̱ Le̱', ne xel-la' szren chee̱'.
2PE 1:4 Caní naca na, ba nunne̱' dxi'u ca da nache̱be lazre̱', da zaj naca na szrénle̱'e̱, ne da zaj zácale̱'e̱ na, chee̱ ne̱ chee̱ da guche̱be lazre̱' wazrué'ele le'e gácale ca nácaqueze Dios, ne chee̱ lale lu da sban da dxaca lu xe̱zr la xu nigá ne̱ chee̱ da dxezá lazre' be̱la' dxen chee̱ bénneache.
2PE 1:5 Chee̱ le̱ na' dxal-la' cue'le gunne xue gun xel-la' dxeajlí lazre' chee̱le gunle da xrlátaje, ne chee̱ gun da xrlátaje da dxunle gácale benne' sina.
2PE 1:6 Xel-la' sina chee̱le dxal-la' gun na nna be'e cuínale, na' xel-la' dxenná be'e cuina chee̱le dxal-la' gun na gácale benne' zren lazre', na' xel-la' zren lazre' chee̱le dxal-la' gun na zri'ile Dios.
2PE 1:7 Xel-la' zri'i lazre' chee̱le nen Dios dxal-la' gun na zri'ile benne' bíchedxu ca', na' xel-la' zri'i lazre' chee̱le nen bíchele ca' dxal-la' gun na gácale zri'i lazre'.
2PE 1:8 Che le'e dxunle da caní, ne dxele̱pe ban na, quebe xegá'ana cá'aze xel-la' nabán chee̱le, ne quebe naca na níteze núnbeale Xránadxu Jesucristo.
2PE 1:9 Benne' quebe dxune̱' da caní naque̱' ca benne' la chul-la, u ca benne' quebe dxenné̱'e̱ ca da za za'. Ba gul-la lazre̱' guxádxie̱' ca naca chee̱ dul-la ca' da be̱ne̱' gate nate.
2PE 1:10 Chee̱ le̱ na', benne' bícha'dau', le gun ba xuzre nézele Dios gunné̱' le'e, ne ba guqué̱'e̱ le'e, na' che gunle da nigá, cabata' cheajcházele.
2PE 1:11 Caní gun Dios, gúnnale̱'e̱ le'e lataj chu'ule naga nna bea Xránadxu, ne weselá chee̱dxu Jesucristo chadía chacanna.
2PE 1:12 Chee̱ le̱ na' tu dxusá'azqueza' lázrele da caní, lácala ba nézele na, ne ba ze̱ cháchale lu xel-la' li da ba nápale.
2PE 1:13 Dxácate̱ naca bana' dxéqueda' dxun na ba xen gusá'a lázrele chee̱ da caní
2PE 1:14 lawe' da ba nezda' wátezea' ca ba gunná Xránadxu Jesucristo, guzre̱' neda'.
2PE 1:15 Na'a guna' ca da séqueda' chee̱ gate te gatia' neda', cheajsá lázrquezle chee̱ da caní.
2PE 1:16 Da bsé̱dentu' le'e ca naca chee̱ xel-la' szren chee̱ Xránadxu Jesucristo, ne ca xelé̱'e̱ xecha lasa quebe naca na ca da dxenná xichaj lázrdau bénneache. Netu' blé'equezentu' ca naca xel-la' szren chee̱ Xránadxu.
2PE 1:17 Blé'entu' Le̱' gate Xradxu Dios be̱'e̱ Le̱' xel-la' ba lá'ana, ne xel-la' szren, na' Dios gúzrequeze̱' Le̱' lu da xabáa chee̱': “Benne' nigá naque̱' Zri'ina' nazri'ite̱ lazra', ne dxezaca ba lazra' nen Le̱'.”
2PE 1:18 Nétu'queze bénentu' chi'i na' da za na xabáa gate zúantu' nen Xránadxu lu xi'a lá'azxa na'.
2PE 1:19 Chee̱ le̱ na' dxuxrén lázredxantu' dizra' da buluzúaj benne' ca' gulenné̱' waláz chee̱ Dios. Da xrlátaje dxunle le'e lawe' da dxenle ca naca dizra' nigá. Naca na ca tu xi' da dxusení na tu lataj naga naca chul-la ca zrin zra chaní', na' Cristo, Bénnea' naque̱' ca belaj zila súale̱ne̱' le'e chee̱ gusení'e̱ lu xichaj lázrdaule.
2PE 1:20 Le guxúe xanne' ca naca da nigá. Netú da naxúaj na lu xiche lá'azxa quebe nu benne' seque' xuzájle̱'e̱ na lu xel-la' dxéajni'i chee̱ze̱'.
2PE 1:21 Benne' ca' buluchálaje̱' waláz chee̱ Dios quebe buluchálaje̱' ca da gulaca lázrequeze le̱'. Gulaque̱' benne' chee̱ Dios, na' gulenné̱' waláz chee̱' ca da bnezruj Be' Lá'azxa le̱'.
2PE 2:1 Cá'anqueze gulezrá' ládujla benne' Israel benne' we̱n lazre' ca', benne' belún cuine̱' ca benne' dxelenné̱' waláz chee̱ Dios. Cá'anqueze welezrá' ládujla le'e benne' we̱n lazre', benne' xelún cuine̱' ca benne' dxulusé̱dene̱' bénneache dizra' chee̱ Dios. Benne' caní wuluzéajni'ine̱' bénneache bagácheze ca naca dizra' we̱n lazre' da guxrinnaj na, na' caní xeledábague̱' Xránadxu, Bénnea' bselé̱' dxi'u, na' lawe' da dxulusé̱dene̱' da caní xelebía xi' zé̱queze̱'.
2PE 2:2 Benne' zan chjácale̱ne̱' ca da sban dxulusé̱de benne' ca', na' ne̱ chee̱ benne' caní xelenné̱ bénneache schanni' chee̱ dizra' li chee̱ xel-la' weselá.
2PE 2:3 Lawe' da dxelezá lazre̱' xelezí'e̱ dumí, xelebéaje̱' le'e dumí ne̱ chee̱ da we̱n lazre' da dxuluzéajni'ine̱' le'e. Dios ba nucueze̱' da guzría xi na benne' caní, lawe' da ba guchugue̱' gate nate ca da gaca chee̱ benne' ca'.
2PE 2:4 Dios quebe bnite lawe̱' chee̱ gubáz chee̱ xabáa ca' belún dul-la. Bdee̱' gubáz chee̱ xabáa ca' lu lataj ba xa', ne bzre̱'e̱ le̱' lu da chul-la, ne bcheaje̱' le̱' du xia naga zaj nadxéaje̱' ca zrin zra chugu Dios ca da gaca chee̱ gubáz chee̱ xabáa ca'.
2PE 2:5 Cá'anqueze Dios quebe bnite lawe̱' chee̱ benne' ca' gulezrá' gate nate. Gusel-le̱' nisa xiuj da bzria xi na benne' ca' belune̱' da cale̱la. Bselé̱' Noé, bénnea' bchálaje̱' ca naca da xrlátaje da dxal-la' xelún bénneache. Bselé̱' gázreze benne'.
2PE 2:6 Cá'anqueze guchugu Dios chee̱ xe̱zre Sodoma, ne xe̱zre Gomorra chee̱ xelebía xi na. Bzézxie̱' dxúpate̱ xe̱zre ca', na' belexegá'anate̱ na de. Caní dxuluzéajni'i na benne' ca' xelune̱' da cale̱la, benne' xelezré̱'e̱ te na'.
2PE 2:7 Dios bselé̱' Lot lu xe̱zre Sodoma na' lawe' da guque̱' tu benne' xrlátaje, ne bexíajele̱'e̱ne̱' gate blé'ene̱' ca naca da sban da dxelún benne' ca' dxelune̱' da cale̱la.
2PE 2:8 Benne' xrlátaje nigá guzúe̱' ládujla benne' ca', na' tu zra tu zra guzúa ba xa' lázrdawe̱' ca dxenné̱'e̱, ne dxenne̱' ca da cale̱la da dxelún benne' ca'.
2PE 2:9 Nézqueze Xránadxu guselé̱' benne' zaj naca bi chee̱' che bi da dxusaca zi na le̱', na' guzráqueze̱' benne' ca' dxelune̱' da cale̱la, ca tu lizre xia, ca zrin zra chugue̱' chee̱' chjaque̱' lataj ba xa'.
2PE 2:10 Dios xudée̱' xel-la' zi' zrendxa benne' ca' dxelune̱' cáte̱ze da sban da dxelezá lazre̱', ne dxuluzúe̱' chalá'ala xel-la' dxenná bea chee̱ Xránadxu. Benne' caní zaj naque̱' lazre' dxugu dxelune̱' da sban, ne dxulucá'ana szren cuine̱'. Quebe dxelezrebe̱' dxelenné̱' schanni' chee̱ gubáz chee̱ xabáa ca'.
2PE 2:11 Gubáz ca' zaj nápadxe̱' xel-la' dxenná bea, ne xel-la' szren ca benne' caní, quebe dxelenné̱' da cale̱la chee̱ benne' ca' gate dxelawe̱' zria chee̱' lau Xránadxu.
2PE 2:12 Benne' caní zaj naque̱' ca bea ca' quebe zaj naxéajni'iba', be̱ dxelunba' ca da zaj nézezeba', ne zraba' chee̱ xelé̱l-le̱'-ba', ne xelutie̱'-ba'. Benne' caní dxelenné̱' schanni' chee̱ da quebe dxeléajni'ine̱', na' xelátequeze̱' ca dxelate bea ca',
2PE 2:13 ne xeledée̱' xel-la' zi' ca xel-la' zi' buludée̱' benne' xula. Dxeléquene̱' zaj zre̱'e̱ lu da ba neza gate dxelebene̱' ca da dxaca tu zra tu zra. Zaj naque̱' ca tu da sban da dxusí'i na le'e xel-la' stu' gate zaj zre̱'e̱ nen le'e lu laní chee̱le, dxácate̱ ne dxelezúe̱' lu xel-la' dxebé lu da cale̱la da dxelune̱'.
2PE 2:14 Dxelezá lazre̱' xúgute̱ nu'ula dxelelé'ene̱', ne quebe dxelálene̱' dxelune̱' dul-la. Dxulusi'e̱ neza xula benne' bíchedxu quebe zaj ze̱ chache̱'. Dxulucúdequeze̱', ne zaj naque̱' benne' zaj xu'e̱ de'.
2PE 2:15 Zaj nanítie̱' lawe' da gulecuase̱' lu neza li chee̱ Dios. Dxelune̱' ca da be̱n Balaam, zri'ine Beor. Balaam nigá be̱ne̱' ba chee̱ dumí, ne gudé̱' dxune̱' da cale̱la,
2PE 2:16 na' bea na', be̱ dxua xua', gunne̱ba' ca benne', ne gudíl-laba' Balaam ca naca dul-la da dxune̱', na' guchúguba' da xala da dxun Balaam.
2PE 2:17 Benne' caní zaj naque̱' ca tu beaj bizre, ne ca tu beuj da dxua be' bdunu'. Ba zaj naca chee̱ benne' ca' xelexegá'ane̱' chadía chacanna lu da chul-la.
2PE 2:18 Dxelenné̱' dizra' da dxulucá'ana szren na le̱', ne da zaj naca na dácheze. Dxuluchínene̱' da sban ca', ne da dxezá lazre' be̱la' dxen chee̱ bénneache chee̱ dxulusi'e̱ chalá'ala benne' ca' za dxelexedxúajteque̱' ládujla benne' ca' dxelune̱' da cale̱la.
2PE 2:19 Dxeleche̱be lazre̱' xulunézruje̱' benne' ca' tu xel-la' weselá, san lé̱queze benne' ca' zaj naque̱' we̱n zrin chee̱ da sban. Tu tu bénneache naque̱' benne' nada'u chee̱ da dxenná be'e na le̱'.
2PE 2:20 Benne' ba zaj núnbe'e̱ Xránadxu, ne Weselá chee̱dxu Jesucristo, ne ba gulelé̱' lu da sban chee̱ xe̱zr la xu nigá, na' te na' che xelexexu'e̱ xecha lasa lu da sban na', ne xelu'e̱ lataj xenná be'e na le̱', na' gácadxa da ba xa' chee̱ benne' ca' ca da guca chee̱' gate nate.
2PE 2:21 Cháwe'dxela gaca na chee̱ benne' caní la quebe zaj núnbe'e̱ Cristo, quegala gate ba belúnbe'e̱ Le̱', na' xelexecuase̱' ca naca xel-la' dxixruj bea lá'azxa da guzre Dios le̱' xelune̱'.
2PE 2:22 Ca da guca chee̱ benne' caní dxulé'e na naca da li dizra' nigá da dxenná na: Becu' dxexáguba' ca da ba bexé̱beba', na' cuche za bexíbeba' bexú'uba' xecha lasa lu guzra' chee̱ba'.
2PE 3:1 Benne' bícha'dau' nazri'ite̱ lazra', da nigá naca na dizra' gudxupe' da dxuzúaja' chee̱le. Lu dxúpate̱ xiche caní guca lazra' guzéajni'ida' le'e chee̱ gulaba lázrele chee̱ da caní.
2PE 3:2 Le gusá lazre' ca da gulenná benne' lá'azxa ca', benne' buluchálaje' waláz chee̱ Dios, ne ca naca da gudixruj be'e Xránadxu, Benne' Weselá chee̱dxu, da na' buluse̱de benne' gubáz chee̱' ca' le'e.
2PE 3:3 Dxunna ba xen gúnbeale, lu zra da za zá'aca welelá' benne' xelún le̱' chee̱ da zaj naca na da lá'azxa, ne xelune̱' cáte̱ze da dxelezá lazre̱',
2PE 3:4 ne xuluche̱be̱' bénneache: ¿Bizra guca chee̱ da guche̱be lazre' Cristo, gunné̱': Welá'a? Xra xrtáudxu ca' ba gulatie̱', na' túzqueze ca guca, gaca na gate guzrete̱ xe̱zr la xu.
2PE 3:5 Benne' caní quebe dxeleque be'ene̱' gulezúa xabáa, ne xe̱zr la xu gate nate, Dios gunné̱' bedxúaj na lu nisa, na' guzúa chacha na lu nisa,
2PE 3:6 na' xe̱zr la xu da zua gate nate guzría xi na ne̱ chee̱ nisa xiuj,
2PE 3:7 na' xabáa, ne xe̱zr la xu da zaj zua na na'a, ba naca chee̱ na xelezxe na ca ba núnqueze Dios chee̱ na. Xi' na' guzezxe na da caní lu zra guchi'a Dios, gate xelebía xi' benne' ca' dxelune̱' da cale̱la.
2PE 3:8 Benne' bícha'dau' nazri'ite̱ lazra', quebe gal-la lázrele da nigá: Lau Xránadxu tu zraze naca na ca chi gaxúa iza, na' chi gaxúa iza zaj naca na ca tu zraze.
2PE 3:9 Quebe dxezré Xránadxu gune̱' da nache̱be lazre̱' ca dxeleque bénneache. Naque̱' zren lazre' nen dxi'u lawe' da quebe dxaca lazre̱' nu cuía xi'. Dxaca lazre̱' xelexexíaje lazre' xúgute̱ bénneache.
2PE 3:10 Zra xelá' Xránadxu zrin na gate quebe nu dxeque ca', ca za' tu gubán chizrela. Lu zra na' cuía xi' xabáa da dxelé'edxu, na' gunle̱'e̱ na schaga, ne ca naca da dxelé'edxu zran xabáa xelebía xi na lu xi', na' xe̱zr la xu nigá chezxe na tu zren nen da de̱ lawe na.
2PE 3:11 Che ba nézele xelebía xi' xúgute̱ da caní, ¿ájala dxal-la' gunle? Dxal-la' gácale li lazre' ne guzúa cuínale lu na' Dios
2PE 3:12 dxácate̱ ne dxebézale zra na', ne dxal-la' gunle ca da séquele zrinte̱ zra na'. Lu zra na' cuia xi' xabáa lu xi', na' da zaj zria zran xabáa xelexuna na lu xi' na'.
2PE 3:13 Dxi'u dxebézadxu tu xabáa cube, ne tu xe̱zr la xu cube da ba guche̱be lazre' Dios naga gaca xlátaje̱ xúgute̱.
2PE 3:14 Chee̱ le̱ na', benne' bícha'dau' nazri'ite̱ lazra', dxácate̱ dxebézale da caní, le gun ca da séquele chee̱ quebe bi bágale, ne quebe bi nadxenle chee̱ dul-la lau Dios, ne suale lu xel-la' dxebeza zri lazre'.
2PE 3:15 Le gusá lázrele naca Xránadxu zren lazre' nen dxi'u chee̱ ladxu. Cá'anqueze Pablo, benne' bíchedxu nazri'ite̱ lázredxu, bzuaje̱' chee̱le, bchínene̱' ca naca xel-la' sina da bnezruj Dios le̱'.
2PE 3:16 Lu xúgute̱ xiche da ba bzuaje̱', ba bchálajle̱ne̱' le'e ca naca chee̱ da caní, lácala bal-la na nácale̱'e̱ na ste̱be chéajni'idxu na, na' benne' ca' quebe dxeléajni'ine̱' na, ne benne' ca' quebe zaj zua chache̱' dxuluchuque̱' na, ca dxuluchuque̱' xezícala xrtizra Dios, na' chee̱ le̱ na' Dios guzría xi'e̱ benne' ca'.
2PE 3:17 Chee̱ le̱ na', benne' bícha'dau' nazri'ite̱ lazra', che le'e ba nézele da nigá nédxula, le guxúe cuínale chee̱ da we̱n lazre' chee̱ benne' ca' dxelune̱' da cale̱la chee̱ quebe xeleché̱ le'e chalá'ala, ne quebe nite xel-la' li lazre' chee̱le lau Dios.
2PE 3:18 Le gúnbea xanne' Xránadxu, Benne' Weselá chee̱dxu, Jesucristo, ne le gula lu xel-la' zri'i lazre' chee̱'. ¡Gaca ba Le̱' na'a, ne chadía chacanna! ¡Ca'an gaca na!
1JO 1:1 Dxuzúaja' chee̱le da nigá ca naca chee̱ Bénnea' zúaqueze̱' gate guzú lau zua xúgute̱ da dxelé'edxu. Dxuzúaja' ca naca chee̱ Bénnea' ba bénentu' chee̱', ne ca naca da ba blé'equezentu' be̱ne̱', neda' ne xezícadxa benne' ca' bse̱de Jesús. Ca naca chee̱ Benne' nigá guzúantu' dxennantu', ne btantu' Le̱' nen na'ntu'. Dxuchálajntu' ca naca chee̱ Bénnea' naque̱' Dizra' da dxunna na xel-la' nabán li lazre'.
1JO 1:2 Bénnea' dxunne̱' xel-la' nabán zeajlí canna ba ble̱'e̱, na' netu' blé'entu' Le̱'. Dxixruj béantu' da naca chee̱', ne dxuzentu' le'e ca naca chee̱'. Lé̱queze̱' zúale̱ne̱' Xradxu Dios, na' ble̱'e̱ naga zúadxu.
1JO 1:3 Da blé'entu', ne da bénentu' dxuzentu' le'e chee̱ gácale tuze nen netu'. Da lítegaze, nácadxu tuze nen Xradxu Dios, ne nen Jesucristo, Zri'ine Dios.
1JO 1:4 Ca naca da caní dxuzúaja' chee̱le chee̱ gaca du lazre' xel-la' dxebé chee̱le.
1JO 1:5 Da nigá naca dizra' da bchálajle̱ Jesús netu', ne da dxuzentu' le'e. Gunné̱': Dios naque̱' lení', ne quebe bi zúale̱ Le̱' da naca chee̱ da chul-la.
1JO 1:6 Che dxennadxu nácadxu tuze nen Le̱', na' che dxundxu da naca na chee̱ da chul-la, dxun lázredxu ca naca da dxennadxu, na' ca naca da dxundxu quebe dxundxu da li.
1JO 1:7 Che dxundxu da li da naca chee̱ xel-la' naxaní', ca naca Dios, Bénnea' naque̱' li lazre', ne zue̱' lu xel-la' naxaní', nadxa zúadxu tuze tudxu xetudxu, na' dxen chee̱ Jesús, Zri'ine Dios, dxibe na dxi'u ca naca xúgute̱ dul-la nabágadxu.
1JO 1:8 Che dxennadxu quebe nabágadxu dul-la, dxezí xé̱queze cuínadxu, na' da li quebe zúale̱ na dxi'u.
1JO 1:9 Che xrúale̱pedxu ca naca dul-la da nabágadxu, Dios naque̱' li lazre', ne xlátaje̱, na' chee̱ le̱ na' Le̱' gunite lawe̱' chee̱dxu ca naca dul-la da nabágadxu, ne quibe̱' dxi'u ca naca xúgute̱ da sban da ba be̱ndxu.
1JO 1:10 Che dxennadxu quebe nundxu dul-la, dxucá'anadxu Dios ca we̱n lazre', ne quebe ne sidxu du lázredxu ca naca dizra' chee̱'.
1JO 2:1 Le'e, bi nazri'ite̱ lazra', dxuzúaja' da nigá chee̱le chee̱ quebe gunle dul-la. Che nu benne' gune̱' dul-la, zua wenaba chee̱dxu lau Dios, Jesucristo, Benne' xlátaje̱.
1JO 2:2 Le̱' gutie̱' waláz chee̱dxu chee̱ gudúe̱' da nabágadxu lau Dios ca naca dul-la chee̱dxu, ne quegaze da nabágadxu dxi'u, san gudúe̱' da zaj nabaga xúgute̱ bénneache.
1JO 2:3 Che dxuzúadxu dizra' ca naca da bdxixruj be'e Dios, nezdxu ba núnbeadxu Le̱'.
1JO 2:4 Che nu dxenná: Neda' núnbe'a Le̱', ne che quebe dxuzúe̱' dizra' ca naca da bdxixruj be'e Dios, benne' nigá naque̱' we̱n lazre', ne quebe dxenné̱' da li.
1JO 2:5 Che nu benne' dxuzúe̱' dizra' ca naca da bdxixruj be'e Dios, benne' nigá nazri'ine̱' Dios du lazre̱'. Che dxundxu caní nezdxu ba zúadxu tuze nen Le̱'.
1JO 2:6 Bénnea' dxenné̱' naque̱' tuze nen Dios dxal-la' gaque̱' ca guca Jesús.
1JO 2:7 Le'e, bi nazrí'ite̱ lazra', dxuzúaja' chee̱le ca naca da dxenná na dxal-la' zri'idxu le sa' ljwézredxu. Quebe naca na tu da cube da bdxixruj bea Dios. Naca na da gula na' da ba guzile nédxudaute̱. Da gula da bdxixruj bea Dios naca na dizra' da ba bénequezle.
1JO 2:8 Naca na ca dxuzúaja' chee̱le tu da cube da dxixruj bea Dios, da naca béaqueze na naca da li lawe' da be̱n Jesús ca naca na, ne lawe' da dxunle le'e ca naca na. Caní naca na lawe' da ba dxusení' xel-la' naxaní' li chee̱ xel-la' zri'i lazre' lu xichaj lázrdaudxu, da dxegúa na da naca na chee̱ da chul-la.
1JO 2:9 Che nu benne' dxenné̱' dxune̱' da naca na chee̱ xel-la' naxaní', ne che dxecuídene̱' le sa' ljwezre̱', benne' nigá ne dxedé̱' lu da naca na chee̱ da chul-la.
1JO 2:10 Benne' nazri'ine̱' le sa' ljwezre̱' dxune̱' da naca chee̱ xel-la' naxaní', ne quebe dxune̱' da guzría xi na le sa' ljwezre̱'.
1JO 2:11 Bénnea' quebe chawe' dxelé'ene̱' le sa' ljwezre̱', lu da naca na chee̱ da chul-la zua bénnea', ne lu da na' dxedé̱', ne quebe nézene̱' ga zéaje̱' lawe' da dxucá'ana da chul-la le̱' ca tu benne' la chul-la.
1JO 2:12 Le'e, bi nazri'ite̱ lazra', dxuzúaja' chee̱le lawe' da ba bnite lau Dios chee̱le ca naca dul-la chee̱le, lawe' da gute Jesucristo waláz chee̱dxu.
1JO 2:13 Le'e, benne' nazri'ite̱ lazra', dxuzúaja' chee̱le lawe' da ba núnbeale Bénnea' zúaqueze̱' nédxudaute̱. Le'e, benne' cuide', dxuzúaja' chee̱le lawe' da ba bsanle da dxenná da xriwe̱'. Le'e, bi nazri'ite̱ lazra', dxuzúaja' chee̱le lawe' da ba núnbeale Xradxu Dios.
1JO 2:14 Le'e, xruze xrna', dxuzúaja' chee̱le lawe' da ba núnbeale Bénnea' zúaqueze̱' nédxudaute̱. Le'e, benne' cuide', dxuzúaja' chee̱le lawe' da nácale benne' wal-la, ne dizra' chee̱ Dios nápale, ne bsanle da dxenná da xriwe̱'.
1JO 2:15 Quebe sa lázrele da cale̱la ca' da zaj naca na chee̱ xe̱zr la xu nigá, ne quegá da zaj de̱ lu xe̱zr la xu nigá. Che nu benne' dxezá lazre̱' da zaj de̱ lu xe̱zr la xu nigá, quebe nazri'ine̱' Xradxu Dios.
1JO 2:16 Da caní zaj naca na chee̱ xe̱zr la xu nigá, da dxezá lázredxu da dxezaca ba lazre' be̱la' dxen chee̱dxu, ne da dxezaca ba lazre' xiaj laudxu, ne ca naca xel-la' dxucá'ana szren cuina chee̱ da nápadxu. Xúgute̱ da caní quebe zaj naca na da dxunna Dios, san zaj naca na chee̱ xe̱zr la xu nigá.
1JO 2:17 Ba za zra xuzre lazre' xe̱zr la xu nigá, ne ca naca da dxezá lázredxu da naca na chee̱ xe̱zr la xu nigá. Bénnea' dxune̱' da dxaca lazre' Dios wazúatecaze̱'.
1JO 2:18 Le'e, bi nazri'ite̱ lazra', zra caní zaj naca na zra bze̱be. Ba bénele gulé'e lawe̱' benne' tábague̱' Cristo. Neda' dxapa' le'e na'a, bache belelá' benne' zante̱ benne' dxeledábague̱' Cristo. Chee̱ le̱ na' nezdxu ba zúadxu zra bze̱be.
1JO 2:19 Benne' caní belexedxúajqueze̱' ládujla dxi'u. Da líqueze quebe gulaque̱' tuze nen dxi'u. La gulaque̱' tuze nen dxi'u, na' belexegá'anale̱queze̱' dxi'u. Caní guca chee̱ nezdxu quebe zaj naca xúgute̱' tuze nen dxi'u.
1JO 2:20 Ca naca chee̱le le'e, ba zúale̱ Be' Lá'azxa le'e, Bénnea' gusel-la Xradxu Lá'azxa. Chee̱ le̱ na' ba nézele xúgute̱ da caní.
1JO 2:21 Dxuzúaja' chee̱le da nigá lawe' da ba nézele da li, ne quegá dxennia' quebe nézele da li. Ba nézquezle le'e quebe dxun lazre' Bénnea' naque̱' da li.
1JO 2:22 ¿Nuzra' naca benne' we̱n lazre'? Naca bénnea' dxenné̱' Jesús quebe naque̱' Cristo, Benne' nasel-la Dios. Benne' we̱n lazre' nigá dxenné̱' Dios quebe naque̱' Xra Jesús, ne Jesús quebe naque̱' Zri'ine Dios.
1JO 2:23 Xúgute̱ benne' dxelenné̱' Jesús quebe naque̱' Zri'ine Dios, Dios quebe zúale̱ne̱' benne' ca'. Bénnea' dxexeche̱be̱' Jesús naque̱' Zri'ine Dios, Dios zúale̱queze̱' bénnea'.
1JO 2:24 Chee̱ le̱ na', le cu'u lu xichaj lázrdaule dizra' da ba bénele nédxudaute̱. Che da ba bénele nédxudaute̱ zua na lu xichaj lázrdaule, le'e súatequezle tuze nen Zri'ine Dios, ne nen Xradxu Dios.
1JO 2:25 Da nigá naca na da nache̱be lazre' Dios, gunne̱' dxi'u xel-la' nabán zeajlí canna.
1JO 2:26 Ba bzuaja' chee̱le da nigá ca naca chee̱ benne' ca' dxelezí xe̱'e̱ le'e.
1JO 2:27 Na'a zúale̱ Be' Lá'azxa le'e, Bénnea' gusel-la Jesucristo chee̱le, na' Be' Lá'azxa nigá zue̱' xichaj lázrdaule. Chee̱ le̱ na' quebe nachínele nu guse̱de le'e lawe' da dxuse̱de Be' Lá'azxa le'e ca naca xúgute̱ da caní, na' da dxusé̱dene̱' le'e naca na da li, ne quebe naca na da we̱n lazre'. Chee̱ le̱ na', le súatequeze tuze nen Cristo ca naca da ba bse̱de Be' Lá'azxa le'e.
1JO 2:28 Na'a, bi nazri'ite̱ lazra', le súatequeze tuze nen Cristo, chee̱ súadxu li lazre' gate xelá' Le̱', ne quebe xedué'edxu lau Le̱' gate xelé̱'e̱.
1JO 2:29 Ba nézele naca xlátaje̱ Dios. Chee̱ le̱ na' dxal-la' nézele xúgute̱ benne' ca' dxelúnqueze̱' da naca na xlátaje̱ zaj naque̱' zri'ine Dios.
1JO 3:1 Le nna' xque ca nazrí'ile̱'e̱ Dios dxi'u lawe' da nazí ladxu bi chee̱ Dios, ne caní nácadxu. Chee̱ le̱ na' quebe zaj neze bénneache lu xe̱zr la xu nigá da nácadxu lawe' da quebe belúnbe'e̱ Jesús.
1JO 3:2 Le'e, bi nazrí'ite̱ lazra', na'a nácadxu bi chee̱ Dios. Quebe ne gulé'e lawe' da gácadxu. Nezdxu gate xelá' Le̱', gácadxu ca naca Le̱' lawe' da lé'edxu Le̱' ca nácaqueze Le̱'.
1JO 3:3 Nu benne' dxebeza lazre̱' gaque̱' ca naca Jesús dxue lazre̱' gaque̱' du lazre' ca naca Jesús, naque̱' du lazre'.
1JO 3:4 Nu benne' dxune̱' dul-la quebe dxuzúe̱' dizra' ca naca da bdxixruj be'e Dios lawe' da naca dul-la da dxedábaga da bdxixruj be'e Dios.
1JO 3:5 Ba nézele bla' Jesucristo chee̱ gudúe̱' dul-la nabágadxu, ne Le̱' quebe bi dul-la be̱ne̱'.
1JO 3:6 Xúgute̱ benne' zaj zúatequeze̱' tuze nen Jesús quebe dxelune̱' dul-la, na' xúgute̱ benne' dxelune̱' dul-la quebe ne xelelé'ene̱' Cristo, ne quebe ne xelúnbe'e̱ Le̱'.
1JO 3:7 Le'e, zrí'ina'dau', quebe güele lataj nu si xe̱ le'e. Bénnea' dxune̱' da xlátaje̱, xlátaje̱ naque̱', ca naca Dios, naque̱' xlátaje̱.
1JO 3:8 Benne' dxune̱' dul-la naque̱' chee̱ da xriwe̱' lawe' da dxun da xriwe̱' dul-la nédxudaute̱. Chee̱ le̱ na' bla' Zri'ine Dios, chee̱ bzria xi'e̱ xúgute̱ da nun da xriwe̱' lu xe̱zr la xu nigá.
1JO 3:9 Xúgute̱ benne' zaj naca bi chee̱ Dios quebe dxelune̱' dul-la lawe' da zúale̱tequeze Be' chee̱ Dios benne' ca'. Chee̱ le̱ na' québedxa gaca xelezúe̱' xelune̱' dul-la lawe' da zaj naque̱' bi chee̱ Dios.
1JO 3:10 Naca bea nu naca bi chee̱ Dios ne nu naca bi chee̱ da xriwe̱'. Bénnea' quebe dxune̱' da xrlátaje ne quebe nazri'ine̱' le sa' ljwezre̱' quebe naque̱' bi chee̱ Dios.
1JO 3:11 Da nigá naca na dizra' da ba bénequezle nédxudaute̱, da dxenná na: Dxal-la' zri'idxu tudxu xetudxu.
1JO 3:12 Quebe gundxu ca be̱n Caín, bi na' gúcabe' chee̱ da xriwe̱', na' bé̱tebe' bi bíchebe'. ¿Bizr chee̱ na' bé̱tebe' le̱be'? Bé̱tebe' le̱be' lawe' da naca da zrinnaj da be̱n Caín, na' da be̱n bi bíchebe' naca na da xrlátaje.
1JO 3:13 Le'e, benne' bícha'dau', quebe xebánele che bénneache lu xe̱zr la xu nigá dxuluzúe̱' le'e chalá'ala.
1JO 3:14 Nezdxu ba bdxúajdxu lu na' xel-la' gute, ne ba guxú'udxu lu xel-la' nabán lawe' da nazri'idxu bíchedxu ca'. Bénnea' quebe nazri'ine̱' bíchedxu ca' zúaqueze̱' lu xel-la' gute.
1JO 3:15 Bénnea' dxuzúe̱' chalá'ala bíchedxu ca' naque̱' ca tu benne' dxute benne', na' ba nézquezle le'e nu benne' dxute benne' quebe nape̱' xel-la' nabán zeajlí canna.
1JO 3:16 Ba nezdxu da naca xel-la' zri'i lazre' lawe' da bzanne Jesucristo xel-la' nabán chee̱', na' gutie̱' waláz chee̱dxu. Cá'anqueze dxi'u dxal-la' guzúadxu xel-la' nabán chee̱dxu chee̱ gácale̱dxu bíchedxu ca'.
1JO 3:17 Che tu benne' nape̱' xel-la' gunní'a da naca na chee̱ xe̱zr la xu nigá, ne che dxelé'ene̱' le sa' ljwezre̱' dxexázrjene̱', na' che quebe xexache lazre̱' le̱', benne' nigá quebe nazri'ine̱' Dios.
1JO 3:18 Le'e, zrí'ina'dau', dxal-la' zri'idxu tudxu xetudxu, quegá nen dízra'ze, ne quegá nen da nné̱zedxu. Dxal-la' gúntequezdxu na, na' gaca bea na da li nazrí'idxu bíchedxu ca'.
1JO 3:19 Che gundxu caní ba nezdxu nácadxu chee̱ da li, na' sua zri lázrdaudxu lau Dios,
1JO 3:20 gate zua tu da dxagu na zria lu lázrdaudxu, lawe' da nezdxu naca Dios zrendxa ca lázrdaudxu. Le̱' nézquezne̱' ca naca da dxundxu.
1JO 3:21 Ca'an naca, bi nazrí'ite̱ lazra', che quebe zua tu da dxagu na zria lu lázrdaudxu, waca sua zrize lázrdaudxu lau Dios,
1JO 3:22 na' Le̱' gunne̱' dxi'u xúgute̱ da nábadxu lawe̱'. Ca'an gaca lawe' da dxuzúadxu dizra' da bdxixruj be'e Dios, ne dxundxu da dxezaca ba lazre' Le̱'.
1JO 3:23 Da bdxixruj be'ene̱' dxi'u naca na chéajle̱dxu chee̱ Jesucristo, Zri'ine Dios, ne zri'idxu tudxu xetudxu ca bdxixruj be'e Le̱'.
1JO 3:24 Bénnea' dxuzúe̱' dizra' da bdxixruj be'e Le̱' zúale̱queze̱' Dios, na' Dios zúale̱queze̱' bénnea'. Ba nezdxu Le̱' zúale̱queze̱' dxi'u lawe' da bache be̱nne̱' dxi'u Be' chee̱'.
1JO 4:1 Le'e, bi nazrí'ite̱ lazra', quebe chéajle̱le chee̱ xúgute̱ benne' dxelenné̱' zúale̱ Be' chee̱ Dios le̱'. Le nna' xque ca naca da dxulusé̱dene̱' chee̱ nézele che zúale̱' Be' chee̱ Dios le̱'. Caní dxal-la' gunle lawe' da ba belelá' benne' zante̱, benne' we̱n lazre', dxelenné̱' dxuluchálaje̱' waláz chee̱ Dios.
1JO 4:2 Caní gaca nézele che zúale̱ Be' chee̱ Dios tu benne'. Xúgute̱ benne' dxelexeche̱be̱' ba bla' Jesucristo, ne guque̱' bénneache, benne' caní zaj naque̱' chee̱ Dios.
1JO 4:3 Xúgute̱ benne' quebe dxelexeche̱be̱' ca guca Jesucristo quebe zaj naque̱' chee̱ Dios. Zaj naque̱' chee̱ bénnea' dxedábague̱' Jesucristo. Ba bénele gulé'e lawe̱' bénnea', na' na'a ba zue̱' lu xe̱zr la xu nigá.
1JO 4:4 Le'e, bi nazri'ite̱ lazra', nácale chee̱ Dios, ne bache bzúale chalá'ala benne' ca' dxelezí xe̱'e̱ lawe' da szrendxa naca Be' zúale̱ na le'e ca be' zua na lu xe̱zr la xu nigá.
1JO 4:5 Benne' ca' zaj naque̱' chee̱ xe̱zr la xu nigá. Chee̱ le̱ na' dxuluchálaje̱' chee̱ da naca na chee̱ xe̱zr la xu nigá, na' benne' zaj zre̱'e̱ xe̱zr la xu nigá dxelenne̱' da dxuluchalaj benne' ca'.
1JO 4:6 Dxi'u nácadxu chee̱ Dios. Benne' zaj núnbe'e̱ Dios dxuluzé̱ nague̱' chee̱dxu. Benne' quebe zaj naque̱' chee̱ Dios quebe dxuluzé̱ nague̱' chee̱dxu. Chee̱ le̱ na' nezdxu nu benne' zúale̱ Be' chee̱ xel-la' li le̱', ne nu benne' zúale̱ be' chee̱ da dxezí xe̱ na le̱'.
1JO 4:7 Le'e, bi nazrí'ite̱ lazra', dxal-la' zri'idxu tudxu xetudxu lawe' da dxunna Dios dxi'u xel-la' nazrí'i lazre' na'. Xúgute̱ benne' zaj naque̱' zri'i lazre' caní zaj naque̱' zri'ine Dios ne zaj núnbe'e̱ Dios.
1JO 4:8 Bénnea' quebe naque̱' zri'i lazre' caní quebe núnbe'e̱ Dios lawe' da tu dxúnzqueze Dios da naca chee̱ xel-la nazrí'i lázre'.
1JO 4:9 Naca béaqueze Dios nazrí'ile̱'e̱ne̱' dxi'u lawe' da gusel-le̱' Zrí'ine̱' tu licha' lu xe̱zr la xu nigá chee̱ zrué'edxu xel-la' nabán da naca na chee̱ Zrí'ine̱' na'.
1JO 4:10 Xel-la' zri'i lazre' li naca na caní: Quegá dxi'u na' bzri'idxu Dios. Le̱' bzri'ine̱' dxi'u, ne gusel-le̱' Zrí'ine̱' chee̱ guque̱' da gudúa na da nabágadxu lau Dios lawe' da nabágadxu dul-la.
1JO 4:11 Le'e, bi nazrí'ite̱ lazra', che Dios bzri'ine̱' dxi'u caní, dxi'u dxal-la' zri'idxu tudxu xetudxu.
1JO 4:12 Quebe nu ne le'e Dios, san che zri'idxu tudxu xetudxu, Dios zúaqueze̱' lu xichaj lázrdaudxu, na' xel-la' zri'i lazre' chee̱' dxun na li lazre' xel-la' zri'i lazre' chee̱dxu.
1JO 4:13 Nezdxu nácadxu tuze nen Dios, na' Dios naque̱' tuze nen dxi'u lawe' da bzue̱' Be' chee̱' lu lázrdaudxu.
1JO 4:14 Ba blé'entu', ne dxuzentu' le'e ca naca da be̱n Xradxu Dios, gusel-le̱' Zrí'ine̱' chee̱ bedajselé̱' bénneache chee̱ xe̱zr la xu nigá.
1JO 4:15 Bénnea' dxexeche̱be̱' naca Jesús Zri'ine Dios, Dios zúale̱queze̱' bénnea', na' le̱' zúale̱queze̱' Dios.
1JO 4:16 Ba núnbeadxu ca nazrí'i Dios dxi'u, ne ba guxéajle̱dxu nazri'ine̱' dxi'u. Tu dxúnzqueze Dios da naca chee̱ xel-la nazrí'i lazre', na' bénnea' naque̱' zri'i lazre' caní zúale̱queze̱' Dios, na' Dios zúale̱queze̱' le̱'.
1JO 4:17 Caní dxaca li xel-la' zri'i lazre' chee̱dxu, chee̱ sua zrize lázrdaudxu lu zra guzría xi' Dios bénneache, benne' ca' dxelune̱' da cale̱la, lawe' da nácadxu lu xe̱zr la xu nigá ca nácaqueze Jesucristo.
1JO 4:18 Bénnea' naque̱' zri'i lazre' caní quebe dxezrebe̱' da gaca na lu zra na'. Xel-la' zri'i lazre' li dxebéaj na chalá'ala xel-la' dxezrebe na'. Nu benne' dxezrebe' dxebeze̱' bi da saque̱', na' bénnea' dxezrebe̱' quebe dxaca li xel-la' zri'i lazre' chee̱'.
1JO 4:19 Dxi'u nazri'idxu Dios lawe' da bzri'i Dios dxi'u nédxudaute̱.
1JO 4:20 Che nu benne' dxenné̱': Nazri'ida' Dios, ne che benne' nigá dxuzúe̱' chalá'ala le sa' ljwezre̱', dxun lazre̱'. Che quebe nazri'ine̱' le sa' ljwezre̱', bi dxelé'ete̱ne̱', ¿ájazra gune̱', zrí'ine̱' Dios, ne quebe dxelé'ene̱' Le̱'?
1JO 4:21 Dios ba bdxixruj be'ene̱' dxi'u caní, gunné̱': Bénnea' nazri'ine̱' Dios, zrí'iquezne̱' le sa' ljwezre̱'.
1JO 5:1 Xúgute̱ benne' dxeléajle̱'e̱ Jesús naque̱' Cristo, Benne' nasel-la Dios, benne' caní zaj naque̱' bi chee̱ Dios, na' che zaj nazri'ine̱' Xradxu Dios, dxal-la' xelezrí'iquezne̱' xúgute̱ benne' zaj naque̱' bi chee̱ Dios.
1JO 5:2 Nezdxu nazri'idxu benne' zaj naque̱' bi chee̱ Dios chete nazri'idxu Dios, ne dxundxu ca naca da dxi'e̱ dxi'u.
1JO 5:3 Che da li nazri'idxu Dios, dxundxu da dxi'e̱ dxi'u. Da dxi'e̱ dxi'u quebe naca na ste̱be.
1JO 5:4 Xúgute̱ benne' zaj naque̱' bi chee̱ Dios dxedxúaje̱' chawe' lau da cale̱la da dxaca na lu xe̱zr la xu nigá. Dxedxúajdxu chawe' lau da cale̱la da dxaca na lu xe̱zr la xu nigá lawe' da dxéajle̱dxu da naca na chee̱ Jesucristo.
1JO 5:5 Benne' dxedxuaje' chawe' lau da cale̱la da dxaca na lu xe̱zr la xu nigá naque̱' bénnea' dxéajle̱'e̱ naca Jesús Zri'ine Dios.
1JO 5:6 Guca bea Jesús naque̱' Cristo gate gudxúe̱' nisa, ne gate gulalaj dxen chee̱'. Quegá gudxúaze̱' nisa san cá'anqueze gulalaj dxen chee̱'. Be' chee̱ Dios gudxixruj lie̱' da nigá, na' Le̱' dxuchálaje̱' da li.
1JO 5:7 Chunne̱' dxelixruj lie̱' chee̱ da nigá xabáa, Xradxu Dios, ne Zrí'ine̱', ne Be' Lá'azxa, na' chunne̱' caní zaj naque̱' tuze.
1JO 5:8 Cá'anqueze chunna da dxelixruj li na chee̱ da nigá lu xe̱zr la xu nigá, Be' Lá'azxa, ne da guca gate gudxúa Jesús nisa, ne da guca gate gulalaj dxen chee̱', na' da chunna caní, túzqueze da dxelixruj li na.
1JO 5:9 Dxéajle̱dxu da dxelixruj li bénneache, san da nadxixruj li Dios zácadxa na, na' Le̱' nadxixruj lie̱' naca Jesús Zrí'inequeze̱'.
1JO 5:10 Bénnea' dxéajle̱'e̱ naca Jesús Zri'ine Dios ba guzi'e̱ xichaj lázrdawe̱' da ba gudxixruj li Dios, san bénnea' quebe dxéajle̱'e̱ chee̱ Dios dxucá'ane̱' Dios ca tu benne' we̱n lazre', lawe' da quebe guxéajle̱'e̱ chee̱ da ba gudxixruj li Dios ca naca chee̱ Zrí'ine̱'.
1JO 5:11 Da nigá naca na da nadxixruj li Dios, dxenné̱' ba be̱nne̱' dxi'u xel-la' nabán zeajlí canna, na' xel-la' nabán nigá za na lu na' Zrí'ine̱', Jesucristo.
1JO 5:12 Bénnea' zua Zri'ine Dios na' lu xichaj lázrdawe̱' zúale̱ xel-la nabán nigá le̱', san bénnea' quebe zua Zrí'ine̱' lu xichaj lázrdawe̱' quebe zúale̱ xel-la' nabán nigá le̱'.
1JO 5:13 Da nigá dxuzúaja' chee̱le dxéajle̱le chee̱ Zri'ine Dios chee̱ nézele zúale̱ xel-la' nabán zeajlí canna le'e.
1JO 5:14 Dxuxrén lázredxu Dios lawe' da nezdxu che bi nábadxu lau Le̱' ca naca da dxaca lazre' Le̱', Lé̱queze̱' wenne̱' chee̱dxu.
1JO 5:15 Lawe' da nezdxu Dios dxenne̱' chee̱dxu, cá'anqueze ba nezdxu gunna Le̱' da ba gunábadxu lau Le̱'.
1JO 5:16 Che tu benne' dxelé'ene̱' dxun bíchedxu dul-la da quebe nua na xel-la' gute, dxal-la' nabe̱' lau Dios ne̱ chee̱ bíchedxu na', na' Dios gunézruje̱' xel-la' nabán chee̱', che naca na tu dul-la da quebe nua na xel-la' gute. De̱ dul-la da nua na xel-la' gute, na' quebe dxennía' nábale lau Dios ne̱ chee̱ bénnea' dxune̱' dul-la nigá.
1JO 5:17 Xúgute̱ da cale̱la naca na dul-la, na' de̱ dul-la da quebe nua na xel-la' gute.
1JO 5:18 Nezdxu nu benne' naca bi chee̱ Dios québedxa dxúnqueze̱' dul-la lawe' da dxuwía dxuxúe Zri'ine Dios le̱', na' da xriwe̱' quebe bi dxezeque gune na le̱'.
1JO 5:19 Nezdxu nácadxu bi chee̱ Dios, na' xúgute̱ benne' zaj naca chee̱ xe̱zr la xu nigá zaj xu'e̱ lu na' da xriwe̱'.
1JO 5:20 Nezdxu ba bla' Zri'ine Dios, ne ba bzéajni'ine̱' dxi'u chee̱ gúnbeadxu Dios li. Nácadxu tuze nen Bénnea' naque̱' li lazre', Jesucristo, Zri'ine Dios. Benne' nigá naque̱' Dios li, ne Lé̱queze̱' naque̱' xel-la' nabán zeajlí canna da zúale̱ na dxi'u.
1JO 5:21 Le'e, zrí'ina'dau', le guxúe xanne' cuínale chee̱ quebe gucá'ana szrenle bedau' xiaj xaga ca'.
2JO 1:1 Neda', benne' gula we̱n zrin chee̱ Cristo, dxuzúaja' da nigá chiu' lue', nu'ula zana', ba gucá'a Dios lue'. Dxuzúaja' chee̱ zri'inu' ca'. Da li nazrí'ida' le'e, ne quegá tuze neda', san cá'anqueze benne' ca' zaj núnbe'e̱ da li zaj nazrí'iquezne̱' le'e.
2JO 1:2 Nazrí'ida' le'e lawe' da ba núnbeadxu da li, da súatequeze na xichaj lázrdaudxu.
2JO 1:3 Dxenaba' lau Xradxu Dios, ne lau Xránadxu Jesucristo, Zri'ine Dios, xezá' lazre̱' chee̱le da xrlátaje, ne xache lazre̱' le'e, ne gunne̱' le'e xel-la' dxebeza zri lazre', chee̱ gúnbeale da li, ne chee̱ gácale zri'i lazre'.
2JO 1:4 Dxebéle̱'e̱da' lawe' da ba benda' zri'inu' ca' dxelunbe' ca naca da li, ca naca da bdxixruj be'e Xradxu Dios.
2JO 1:5 Na'a, nu'ula zána'dau', dxata' xúeda' lue' zri'idxu tudxu xetudxu. Da nigá dxuzúaja' chiu' quebe naca na tu da cube da nadxixruj bea Dios, san naca na da ba bendxu nédxudaute̱.
2JO 1:6 Xel-la' zri'i lazre' li naca bea na che dxundxu ca da nadxixruj bea Dios, na' da nadxixruj be'e̱ naca na da ba bénele nédxudaute̱, chee̱ zri'idxu tudxu xetudxu.
2JO 1:7 Ba belelá' benne' zante̱, benne' dxelezí xe̱'e̱. Benne' caní quebe dxelexeche̱be̱' guca Jesús be̱la' dxen. Benne' caní zaj naque̱' benne' dxelezí xe̱'e̱, ne dxeledábague̱' Cristo.
2JO 1:8 Le guxúe xanne' cuínale chee̱ quebe gunítele da dxal-la sile du naxá'.
2JO 1:9 Nu benne' dxedé̱' nagá xula chee̱ da nigá quebe dxezíle̱ne̱' ca naca da bse̱de Cristo, ne quebe zúale̱ Dios le̱'. Bénnea' dxezíle̱ne̱' ca naca da bse̱de Cristo, da li Dios zúale̱ne̱' Le̱', na' cá'anquez zúale̱ Cristo Le̱'.
2JO 1:10 Che nu benne' xide̱' naga zúale le'e, ne quebe dxusé̱dene̱' le'e ca naca da bse̱de Cristo, quebe nne̱le bénnea' lízrele, ne quebe gápale le̱' ba lá'ana.
2JO 1:11 Nu benne' gape̱' bénnea' ba lá'ana, dxun benne' nigá tuze ca da cale̱la da dxun bénnea'.
2JO 1:12 Da zante̱ dxal-la' xapa' le'e, san quebe dxaca lazra' guzúaja' na lu xícheze. Dxebeza lazra' xida' xedajná'a le'e, na' guchálajle̱queza' le'e, chee̱ gaca béle̱'e̱dxu.
2JO 1:13 Bidu ca' chee̱ bi bilu', nu'ula ba gucá'a Dios le̱', dxulugápabe' lue' diuzre. Ca'an gaca na.
3JO 1:1 Neda', benne' gula we̱n zrin chee̱ Cristo, dxuzúaja' da nigá chiu' lue', Gayo, bi nazrí'ite̱ lazra'. Da líqueze nazrí'ida' lue'.
3JO 1:2 Lue', bi nazrí'ite̱ lazra', dxenaba' lau Dios gaca da chawe' chiu', ne su' chawe', ca dxaca chee̱ bénne'du xu'u.
3JO 1:3 Gubéle̱'e̱da' gate belelá' tu chupa benne' bíchedxu, ne gulé̱'e̱ neda' ca dxéajle̱'u chee̱ Xránadxu, ne ca dxunu' ca naca da li.
3JO 1:4 Québequeze bi de̱ da gundxa na neda' súale̱'a xel-la' dxebé, ca xel-la' dxebé da zua' gate dxenda' dxelún benne' zaj naque̱' ca zrí'inequeza' ca naca da li.
3JO 1:5 Lue', bi nazrí'ite̱ lazra', nacu' benne' li lazre' ca naca da dxunu' dxácale̱nu' bi bíchedxu ca', ne da naca blaudxa dxácale̱nu' bi bíchedxu za'aque̱' xe̱zre xula.
3JO 1:6 Lau benne' zaj nazrague̱' chee̱ Dios nigá dxuluchalaj bi bíchedxu caní ca nazri'inu' bi bíchedxu ca'. Da cháwedau' dxunu' gate dxugú'u benne' caní neza, dxácale̱nu' le̱' ca naca da dxezaca ba lazre' Dios.
3JO 1:7 Benne' caní zjaque̱' dxelune̱' zrin nigá lawe' da zaj nazri'ine̱' Cristo, ne quebe bi dxelezi'e̱ da xelunna benne' quebe zaj núnbe'e̱ Dios.
3JO 1:8 Chee̱ le̱ na' dxal-la' gápadxu ba lá'ana benne' caní chee̱ gúnle̱dxu le̱' zrin chee̱ da li.
3JO 1:9 Ba bzuaja' chee̱ benne' zaj nazrague̱' chee̱ Dios naga zu', na' bénnea' le̱' Diótrefes quebe dxape̱' netu' ba lá'ana lawe' da dxaca lazre̱' gaque̱' blau láwela benne' ca'.
3JO 1:10 Chee̱ le̱ na', che xida' naga zu', guzéajni'ida' benne' ca' ca naca da dxun bénnea', dxezí tizre̱' netu', ne dxenné̱le̱'e̱ chee̱ntu'. Quegá da nigáze dxune̱', san cá'anqueze quebe dxezí' lu ne̱'e̱ benne' bíchedxu zá'aque̱' ga na', ne quebe dxu'e̱ lataj benne' ca' dxelaca lazre̱' xelezí' lu ne̱'e̱ benne' caní, ne dxexebéaje̱' le̱' ládujla benne' ca' zaj nazrague̱' chee̱ Dios.
3JO 1:11 Lue', bi nazrí'ite̱ lazra', quebe gunu' lue' ca naca da cale̱la da dxelún benne' caní. Be̱n ca naca da xrlátaje. Bénnea' dxune̱' da xrlátaje naque̱' chee̱ Dios, san nu benne' dxune̱' da cale̱la, quebe ne gúnbeaqueze̱' Dios.
3JO 1:12 Xúgute̱ benne' dxelenné̱' da chawe' ca naca da dxun Demetrio, na' da líqueze naca bea na ca dxune̱'. Cá'anqueze netu' dxixruj beantu' ca naca da dxune̱', na' lue' nézqueznu' dxuchálajntu' da li.
3JO 1:13 Dé̱le̱'e̱ da dxal-la' guchálajle̱na' lue', san quebe dxaca lazra' guzúaja' na lu xícheze,
3JO 1:14 lawe' da dxebeza lazra' lé'ete̱quezda' lue'. Nadxa guchálajdxu caníqueze.
3JO 1:15 Dxenaba' lau Dios sua zrize lazrda'u. Bi bíchedxu zaj zra' nigá dxulugape̱' lue' diuzre. Bgapa lue' diuzre tu tu benne' bíchedxu zaj zre̱'e̱ naga zu'. Ca'an gaca na.
JUD 1:1 Neda', Judas, we̱n zrin chee̱ Jesucristo, naca' benne' biche Jacobo, na' dxesel-la' dizra' nigá chee̱le le'e, nácale benne' ca' ba gunné̱ Xradxu Dios, ne ba guqué̱'e̱ le'e chee̱ gácale bi chee̱', ne dxuxúe̱' le'e lawe' da nácale tuze nen Jesucristo.
JUD 1:2 Dxenaba' lau Dios xache lázrele̱'e̱ le'e, ne gúnnale̱'e̱ chee̱le xel-la' dxebeza zri lazre', ne xel-la' zri'i lazre'.
JUD 1:3 Benne' bícha'dau' nazri'ite̱ lazra', ba guca lázreli'a guchálajle̱na' le'e ca naca chee̱ xel-la' weselá da ba nazile le'e, ne cá'anqueze neda', san na'a dxun na ba xen guchálajle̱na' le'e, ne gata' xueda' le'e gapa típale da naca chee̱ xel-la' dxeajlí lazre' da ba be̱nna Dios chalásaze chee̱ bi chee̱' ca'.
JUD 1:4 Caní naca lawe' da ba gulú'u benne' we̱n lazre' ca' ládujla dxi'u, benne' ca' ba gunná Dios gate nate dxal-la' xelebía xi'e̱. Zaj naque̱' benne' dxelune̱' da sban, na' lawe' da dxunite lau Dios chee̱ benne' dul-la, dxeléquene̱' zaj nápaqueze̱' lataj xelune̱' cáte̱ze da dxelaca lazre̱', ne dxuluzúe̱' chalá'ala Dios tu licha', Bénnea' dxenná bea, ne Xránadxu Jesucristo.
JUD 1:5 Lácala ba nézquezle le'e da nigá, dxaca lazra' gusá'a lázrele ca be̱n Xradxu Dios gate bebéaje̱' benne' Israel ca' ládujla benne' Egipto, na' gudé na' bzria xi'e̱ benne' Israel ca', benne' quebe guléajle̱'e̱ chee̱'.
JUD 1:6 Cá'anqueze gubáz chee̱ xabáa, gubáz ca' chee̱ Dios, quebe belune̱' ca da guzre Dios le̱', san bulucá'ane̱' lataj chee̱'. Dios nuzague̱' le̱' lu da chul-la, ne nuchéaje̱' gubáz ca' chalásaze nen du xia, chee̱ guzría xi'e̱ le̱' lu zra bze̱be ni'.
JUD 1:7 Cá'anqueze guca chee̱ xe̱zre Sodoma, ne xe̱zre Gomorra ne chee̱ xe̱zre walízredu ca'. Ca belún gubáz chee̱ xabáa ca', cá'anqueze belún bénneache chee̱ xe̱zre caní. Buluzúa cuine̱' lu da sban, ne belune̱' cáte̱ze da gulaca lazre̱', ne buluzúe̱' chalá'ala ca da bdxixruj bea Dios chee̱ xel-la' zúale̱ nu'ula. Na'a, lawe' da bzria xi' Dios benne' ca', bdee̱' le̱' tu lu xi' da québedxa xexula na, na' da na' guca chee̱ benne' caní dxuzéajni'i na dxi'u chee̱ quebe gúnquezdxu ca'.
JUD 1:8 Láqueze gulaca caní chee̱ benne' ca', cá'anqueze dxelún benne' caní, zjácale̱ne̱' xel-la' bchigala, ne dxuluca'ane̱' sban be̱la' dxen chee̱', ne dxuluzúe̱' chalá'ala xel-la' dxenná bea chee̱ Xránadxu, ne dxelenné̱' schanni' chee̱ gubáz chee̱ xabáa, gubáz ca' chee̱ Dios.
JUD 1:9 Lé̱queze Miguel, gubáz blau chee̱ xabáa chee̱ Dios gate gudíl-lale̱ne̱' da xriwe̱', ne btil-le̱' dizra' nen le̱ na chee̱ guca bexu'e̱ be̱l-la' dxen chee̱ Moisés, quebe bexázrjene̱' nnabe̱' da ba xa', san guzre̱' na: “Xránadxu Dios tíl-laqueze̱' lue'.”
JUD 1:10 Na'a benne' caní dxelenné̱' schanni' chee̱ da quebe zaj núnbe'e̱, na' da ba zaj núnbeaqueze̱', ca da zaj neze be̱ xixre', be̱ quebe zaj naxéajni'iba', da caní dxuluchínene̱' chee̱ xuluzría xi' cuine̱'.
JUD 1:11 Edxugua benne' caní lawe' da dxelune̱' ca da be̱n Caín, chee̱ gulezí' lu ne̱'e̱ dumí, buluzúe̱' chalá'ala da dxenná Dios ca be̱n Balaam, na' welexenite̱' ca guca chee̱ Coré, bénnea' bzria xi' Dios lawe' da gudábague̱' xrtizra Dios.
JUD 1:12 Benne' caní, gate dxelágule̱ne̱' le'e lu laní chee̱le dxelune̱' cheajlechaze bénneache. Dxelé'aj dxelawe̱' nen le'e, ne quebe dxelape̱' ba lá'ana Dios. Dxelún cuine̱' ca benne' dxuluxúe̱' zrila', san dxuluxúeze cuine̱'. Zaj naque̱' ca beuj ca' quebe zaj xuzru nisa, beuj ca' da dxua be'. Zaj naque̱' ca xaga ca' quebe dxelebía na da zixre chee̱ na, ne zaj nabizre na du lue na, ne ba zaj zua na chee̱ le̱pe na.
JUD 1:13 Zaj naque̱' ca xeajxruza chee̱ nísadau' da dxedxú'u na bzrina' sgute, da dxulé'e na ca da sban da dxelune̱'. Zaj naque̱' ca belaj ca' dxelecuasa na lu xrneze na, ne zaj nabía xi na chee̱ cheajsúa na chadía chacanna lu da chul-la.
JUD 1:14 Cá'anqueze Enoc, benne' chee̱ gazre cue' zre sua Adán gunné̱' waláz chee̱ Dios ca naca chee̱ benne' caní, gunné̱': “Ble'eda' Xránadxu ze̱'e̱ nen gaxúane gaxúane bi chee̱ ca'
JUD 1:15 chee̱ guchi'e̱ ca da zaj nun xúgute̱ bénneache. Gulezría xi' xúgute̱ benne' we̱n da sban ne̱ chee̱ da cale̱la da belune̱' lu xel-la' cale̱la chee̱', nen benne' dul-la ca' ne̱ chee̱ xúgute̱ dizra' schanni' da gulenné̱ chee̱ Dios.”
JUD 1:16 Zaj naque̱' benne' wagu zria, ne benne' wezí tizra', benne' dxelunze̱' cáte̱ze dxelezaca ba lazre̱'. Dxuluchálaje̱' dizra' da dxucá'ana szren na le̱', ne dxelennáze̱' da chawe' chee̱ bénneache chee̱ xelezí'e̱ da zaj de̱ chee̱ benne' ca'.
JUD 1:17 Le'e, benne' bícha'dau' nazri'ite̱ lazra', le gusá lázrele ca zánete̱ iza gulenná benne' gubáz chee̱ Xránadxu Jesucristo,
JUD 1:18 gulé̱'e̱ le'e: Lu zra bze̱be welezrá' benne' xelún le̱' chee̱ da ca' zaj naca lá'azxa, ne xelune̱' cáte̱ze zaj naca da sban da dxelezá lazre̱'.
JUD 1:19 Benne' caní dxelune̱' chupa la'a bénneache. Zaj naque̱' benne' chee̱ xe̱zr la xu nigá, ne quebe zúale̱ Be' Lá'azxa chee̱ Dios le̱'.
JUD 1:20 Le'e, benne' nazri'ite̱ lazra', le se̱ chacha ca naca lu xel-la' dxeajlí lazre' lá'azxa da nápale. Le guchálajle̱ Dios, zúale̱ xel-la' waca chee̱ Be' Lá'azxa le'e.
JUD 1:21 Le cha' lu xel-la' zri'i lazre' chee̱ Dios, ne le cueza zra gate gunna Xránadxu Jesucristo dxi'u xel-la' nabán da zeajlí canna lu xel-la' zri'i lazre' chee̱'.
JUD 1:22 Le gácale̱ benne' ca' dxelaca chupa lazre̱' ca naca chee̱ Cristo.
JUD 1:23 Le gun xelelá benne' xula chee̱ quebe chjaque̱' lu xi' chee̱ lataj ba xa', ne le xexache lazre' xezícala bénneache. Le guxúe xanne' ca naca da sban da dxelún benne' ca' chee̱ quebe ca'a le̱ na le'e.
JUD 1:24 Dios tu licha', Benne' naque̱' sina, ne naque̱' Weselá chee̱dxu, wazéquene̱' guxúe̱' le'e chee̱ quebe cuásale Le̱', ne chee̱ guzúe̱' le'e lau Le̱' lu xel-la' szren chee̱', ne chee̱ quebe dxenle da naca chee̱ dul-la, ne chee̱ súale̱queze xel-la' dxebé le'e. ¡Gaca ba Le̱', ne gaca chee̱' xel-la' szren, ne xel-la' waca, ne xel-la' dxenná bea, ne̱ chee̱ Xránadxu Jesucristo, na'a zra, ne chadía chacanna! ¡Ca'an gaca na!
REV 1:1 Da nigá naca tu da bnezruj Dios Jesucristo da gulé'ene̱' we̱n zrin chee̱' ca' ca naca da dxal-la' gácate̱. Jesucristo gusel-le̱' gubáz chee̱ xabáa chee̱', na' le̱' bzéajni'ine̱' neda', Juan, naca' we̱n zrin chee̱ Jesús.
REV 1:2 Neda' dxulé'eda' le'e da li ca naca xúgute̱ da ble'eda', ne dxexeche̱ba' ca naca dizra' chee̱ Dios, ne ca naca da gunná Jesucristo.
REV 1:3 Ba neza zrente̱ naca na chee̱ benne' gulabe̱', ne cá'anqueze ba neza zrente̱ naca na chee̱ benne' ca' dxuluzé̱ nague̱' chee̱ bénnea' gulabe̱' dizra' nigá da be̱nna Dios, ne xelune̱' ca naca da naxúaj nigá, lawe' da ba za gáguze zra gaca na.
REV 1:4 Neda', Juan, dxuzúaja' chee̱ gazre cue' benne' dxeléajle̱'e̱ chee̱ Jesús, zaj zre̱'e̱ naga nababa Asia. Dxenaba' lau Dios gaca chawe' chee̱le, ne gunne̱' le'e xel-la' dxebeza zri lazre'. Le̱' guzúaqueze̱' nédxudaute̱, ne zúaqueze̱' na'a, ne tu súazqueze̱' chadía chacanna. Gazre Be' ca' zaj zra' ca li naga dxe' Dios zaj naca Le̱' tuze,
REV 1:5 ne cá'anqueze Jesucristo naque̱' Le̱' tuze ca naca da chawe' da dxun Dios chee̱le. Jesucristo naque̱' benne' li lazre' dxexeche̱be̱' ca da zaj naca chee̱ Dios, ne naque̱' benne' nedxu bebane̱' chalásaze ládujla benne' gate ca', ne nape̱' xel-la' dxenná bea láwela xúgute̱ wenná bea zaj zre̱'e̱ xe̱zr la xu nigá. Cristo nazri'ine̱' dxi'u, ne ba gudibe̱' xichaj lázrdaudxu. Begüe̱' dul-la chee̱dxu gate blálaje̱' dxen cheé̱queze̱' le̱'e̱ xaga begúaj.
REV 1:6 Be̱ne̱' dxi'u ca benne' wenná bea ca', ne bxruze ca' chee̱ gundxu zrin chee̱ Dios chee̱', Bénnea' naque̱' Xre̱'. ¡Gaca ba Le̱', ne gape̱' xel-la' dxenná bea chadía chacanna! ¡Ca'an gaca na!
REV 1:7 Le na' xque. Cristo ze̱'e̱ lu beuj bza. Xúgute̱ bénneache xelelé'ene̱' Le̱', ne cá'anqueze benne' ca' belune̱' Le̱' we̱', na' ca naca bénneache zaj zra' lu xe̱zr la xu xelebezre xache̱'e̱ ca xelelé'ene̱' Le̱'. ¡Awe', ca'an gaca na!
REV 1:8 Le̱' dxenné̱': “Neda' zúaqueza' nédxudaute̱, ne zúaqueza' bzé̱bedxa. Dxuna' su lau sua xúgute̱ ne guna' xexuzre na.” Caní dxenná Xránadxu, nape̱' dute̱ xel-la' dxenná bea, naque̱' Bénnea' guzúaqueze̱', ne zúaqueze̱', ne tu súazqueze̱'.
REV 1:9 Neda', Juan, naca' benne' bíchele le'e, ne naca' tuze nen le'e lu xel-la' zi', ne lu xel-la' dxenná bea, ne lu xel-la' dxuchaga lau da dxunna Jesucristo dxi'u. Ca tu benne' xu'e̱ lizre xia guzúa' lu xe̱zr la xu Patmos da naxechaj nísadau', lawe' da bchálaja' dizra' chee̱ Dios ne dxuna' ba nalí ca naca chee̱ Jesucristo.
REV 1:10 Guzúale̱ Be' Lá'azxa neda' lu zra chee̱ Xránadxu, na' benda' cúzrula' chi'i tu benne' dxenné̱' zizraj ca chi'i luzu da dxulucuezre̱'.
REV 1:11 Gunné̱': ―Neda' naca' nedxu, ne bze̱be ca naca da dxezú lau, ne da dxexuzre na. Bzuaj tu lu xiche da dxelé'enu', na' gusel-la na chee̱ gazre cue' bénneache dxeléajle̱'e̱ chia', zaj zre̱'e̱ naga nababa Asia, benne' ca' zaj zre̱'e̱ xe̱zre Efeso, ne xe̱zre Esmirna, ne xe̱zre Pérgamo, ne xe̱zre Tiatira, ne xe̱zre Sardis, ne xe̱zre Filadelfia, ne xe̱zre Laodicea.
REV 1:12 Bexéchaja' chee̱ le'eda' nu chi'i na' gunné̱ neda', na' ca bexéchaja' na', ble'eda' gazre da zua na xi' da' zaj naca na oro.
REV 1:13 Laduj da zaj zua na xi' ca' ble'eda' tu benne' naque̱' ca Bénnea' gulje̱' bénneache, nácue̱' zra lane̱' da dxezrinte̱ lu ni'e̱ dxe'ela, na' xu'u tu bazxu oro lachu'e̱.
REV 1:14 Xicha xíchaje̱' zaj naca na chiche ca zrila' chiche, u ca bezxe', na' xiaj lawe̱' dxelácatite legala na ca xi'.
REV 1:15 Ni'e̱ dxelácatite na ca xia da gudete̱ bea guxú'u na lu xi', na' chi'e̱ naca na zizraj ca naca chi'i zane' xe̱gu zri'a ca'.
REV 1:16 Lu ne̱'e̱ da zua xabe̱la nuxre̱' da ca' zaj naca ca gazre belaj xabáa, na' dxu'e̱ dxedxuaj da naca na ca tu xia da nalá dxupa la'ate̱. Dxu'a lawe̱' dxácatite na ca gubizra gate dxennále̱'e̱ na.
REV 1:17 Ca ble'eda' Le̱', xeajchazia' zran ni'e̱ ca tu benne' gate. Na' Le̱' guxrúa ne̱'e̱ xabe̱la neda', na' gunné̱': ―Quebe zrebu'. Neda' zúaqueza' nédxudaute̱, ne zúaqueza' bzé̱bedxa.
REV 1:18 Naca bánqueza'. Gutia', na' na'a nabánqueza' chadía chacanna. Neda' nuxra' zren xia chee̱ xel-la' gute, ne chee̱ lataj ba xa'.
REV 1:19 Bzuaj da ba blé'enu' ne da dxaca na'a, ne da gaca te nigá.
REV 1:20 Caní naca da zéaje̱ ca gazre belaj ca' blé'enu' nuxra' na'a xabe̱la, ne ca naca chee̱ gazre da zua na xi' da' zaj naca na oro. Gazre da zaj naca ca belaj ca' zéaje̱ na gubáz ca' nasel-la' chee̱ gazre cue' bénneache chia' ca', na' gazre da zua na xi' zéaje̱ na gazre cue' bénneache chia' ca'.
REV 2:1 Guzre Jesús neda': ―Bzuaj chee̱ gubáz chia' zúale̱ne̱' bi chia' zaj zre̱'e̱ xe̱zre Efeso. Bzuaj da nigá: Caní dxenná Jesús, Bénnea' nuxre̱' gazre belaj ne̱'e̱ xabe̱la, ne dxedé̱' laduj gazre da zua na xi' da zaj naca na oro.
REV 2:2 Neda' nezda' xúgute̱ da dxunle. Nezda' dxúnle̱'e̱le zrin ne nácale zren lazre', ne quebe dxuele lataj benne' we̱n da zrinnaj ca'. Neda' nezda' ba bxue xánnele benne' ca' dxelenné̱' zaj naque̱' gubáz chia' ne quebe zaj naque̱', na' ba ble'ele zaj naque̱' benne' we̱n lazre'.
REV 2:3 Gúcale zren lazre', ne gudele xel-la' zi', na' bé̱nle̱'e̱le zrin chia', ne quebe gute ni'a na'le.
REV 2:4 Na'a zua tu da dxagu na zria chee̱le, québedxa nazri'ile neda' ca bzri'ile neda' nédxute̱.
REV 2:5 Chee̱ le̱ na', le gusá lazre' ca bzri'ile neda' nédxute̱, ne le xexíaje lazre', na' le gun ca da be̱nle nédxute̱. Che quebe gunle caní xídaqueza' naga zúale, na' xecá'a xrlátajle lu da naca chia' chee̱ québedxa gácale ca da zua na xi' chia'. Caní guna' che quebe xexíaje lázrele.
REV 2:6 Zua tu da dxexecá'a na le'e, dxecuídele da dxelún benne' ca' zaj nazí le̱' nicolaíta ca', benne' ca' dxulucá'ana szrene̱' bedau' xiaj xaga ca', da na' dxecuídequeza' neda'.
REV 2:7 Benne' zua nague̱' dxal-la' xenne̱' da nigá dxe̱ Be' Lá'azxa bi chia' ca'. Benne' ca' xeledxúaje̱' xrlátaje lawe' da zrinnaj, neda' gunézruja' da xelawe̱' da dxebía xaga da dxunna na xel-la' nabán, ne zua na lu lataj xrlátaje chee̱ Dios.
REV 2:8 Guzre Jesús neda': ―Bzuaj chee̱ gubáz chia' zúale̱ne̱' bi chia' zaj zre̱'e̱ xe̱zre Esmirna. Bzuaj da nigá: Caní dxenná Jesús, Bénnea' zúaqueze̱' nédxudaute̱, ne zúaqueze̱' bzé̱bedxa, Bénnea' gutie̱', ne bebánqueze̱'.
REV 2:9 Neda' nezda' xúgute̱ da dxunu'. Nezda' gudele xel-la' zi', ne nácale benne' xache'. Da li nácale benne' gunní'a. Nezda' ca dxelenné̱ schanni' chee̱le benne' ca' dxelenné̱' zaj naque̱' judío, san zaj naque̱' tu cue' benne' dxulucá'ana szrene̱' da xriwe̱'.
REV 2:10 Quebe zrébele ca naca xel-l a' zi' da tele, lawe' da guzrá' da xriwe̱' bál-lale le'e lizre xia chee̱ gulé'e lau da nácale, na' tele xel-la' zi' lawe' chi zra. Le gaca li lazre' lácala xelutie̱' le'e, na' neda' gunna' le'e xel-la' nabán ca tu da dxunna bea na be̱dxuajle chawe'.
REV 2:11 Benne' zua nague̱' dxal-la' xenne̱' da nigá dxe̱ Be' Lá'azxa bi chia' ca'. Benne' ca' xeledxúaje̱' chawe' lawe' da zrinnaj, quebe bi gune da zi' da xa' da zeajlí canna chee̱ benne' ca'.
REV 2:12 Guzre Jesús neda': ―Bzuaj chee̱ gubáz chia' zúale̱ne̱' bi chia' zaj zre̱'e̱ xe̱zre Pérgamo. Bzuaj da nigá: Caní dxenná Jesús, Bénnea' nuxre̱' xia da nalá dxupa la'a.
REV 2:13 Neda' nezda' xúgute̱ da dxunle. Nezda' zúale naga dxenná bea da xriwe̱'. Quebe nusanle da naca chia'. Quebe bsanle dxexeché̱bele chia', ne lu zra ca' gate belutie̱' Antipas, benne' beche̱be̱' du lazre̱' da naca chia' ládujla le'e, naga zua da xriwe̱'.
REV 2:14 Na'a, zua tu da dxagu na zria chee̱le, dxuele lataj zaj zra' ládujla le'e benne' ca' ne zjácale̱ne̱' da bse̱de Balaam, bénnea' gulú'u xel-le̱' Balac, bennen' be̱ne̱' belún benne' Israel ca' dul-la, na' gulawe̱' da buluzríe̱' lau bedau' xiaj xaga ca', ne belune̱' da sban.
REV 2:15 Cá'anqueze zaj zra' ládujla le'e bal-la benne' ne zjácale̱ne̱' da dxuluse̱de benne' zaj nazí le̱' nicolaíta, da na' dxecuídequeza' neda'.
REV 2:16 Chee̱ le̱ na' le xexíaje lázrele lawe' da che quebe xexíaje lázrele xida' naga zúale, na' tíl-lale̱na' benne' ca' nen xia nalá da dxedxuaj na dxu'a.
REV 2:17 Benne' zua nague̱' dxal-la' xenne̱' da nigá dxe̱ Be' Lá'azxa bi chia' ca'. Benne' xedxuaje̱' chawe' lawe' da zrinnaj, neda' gunézruja' da gawe̱' da naca na xeta maná da nagache na xabáa, ne gunézruja' le̱' tu xiaj chiche, na' le̱'e̱ xiaj na' naxúaj tu la cube chee̱ bénnea', da quebe nu neze, san tuze bénnea' si'e̱ na.
REV 2:18 Guzre Jesús neda': ―Bzuaj chee̱ gubáz chia' zúale̱ne̱' bi chia' zaj zre̱'e̱ xe̱zre Tiatira. Bzuaj da nigá: Caní dxenná Jesús, Bénnea' zaj zra xiaj lawe̱' da dxelácatite na ca xi', na' ni'e̱ zaj naca na ca xia gache da nabá'ale̱'e̱ na.
REV 2:19 Neda' nezda' xúgute̱ da dxunle. Nezda' ca nazri'ile neda', ne ca dxéajle̱le chia', ne ca dxunle zrin chia', ne ca nácale zren lazre', na' dxúndxale na'a da zrendxa ca da be̱nle nédxute̱.
REV 2:20 Na'a, zua tu da dxagu na zria chee̱le, dxuele lataj nu'ula na' le̱' Jezabel, nu'ula na' dxenné̱' dxuchálaje̱' waláz chee̱ Dios, na' dxezí xe̱'e̱ benne' we̱n zrin chia' ca' ca naca da dxusé̱dene̱' chee̱ xelune̱' da sban, ne xelawe̱' da dxuluzríe̱' lau bedau' xiaj xaga ca'.
REV 2:21 Neda' ba be'a nu'ula na' lataj xexíaje lazre̱', na' quebe guca lazre̱'. Quebe dxusane̱' ca naca da sban da dxune̱'.
REV 2:22 Na'a, che benne' ca' quebe xulusane̱' ca da dxelune̱' ca dxun nu'ula na', neda' cu'a le̱' xel-la' we̱' da quixruj na le̱', na' weledéle̱'e̱ xel-la' zi' benne' ca' dxelune̱' dul-la nen nu'ula na',
REV 2:23 na' gútequeza' benne' ca' zaj de̱'e̱ nu'ula na'. Caní gaca, xúgute̱ cue' bi chia' ca' xeleque be'ene̱' neda' nezda' ca naca dute̱ da zua lu xichaj lázrdau bénneache, na' tu tule le'e gunna' le'e cáte̱ze naca da be̱nle.
REV 2:24 Xezícadxale le'e zrale xe̱zre Tiatira, quebe zéajle̱le da na' dxuse̱de nu'ula na', ne quebe ne sile da dxenné̱' naca na da nagache chee̱ da xriwe̱', neda' dxapa' le'e, quebe bi xetú da gucha' le'e gunle.
REV 2:25 Le gapa chi'i xel-la' dxixruj be'e da ba gucha' le'e gunle ca zrindxa zra xelá'a neda'.
REV 2:26 Benne' ca' xeledxúaje̱' chawe' lawe' da zrinnaj, ne xelune̱' ca dxaca lazra' neda' ca zrindxa zra bze̱be ni', neda' gunézruja' chee̱ benne' ca' xel-la' dxenná bea lawe' xe̱zre ca',
REV 2:27 ca be̱n Xra', be̱nne̱' neda' xel-la' dxenná bea, na' xelenná be'ene̱' benne' xe̱zre ca' nen tu var xia, na' xuluzría xi'e̱ xe̱zre ca' ca dxun tu benne' dxelé̱'e̱ tu xesu' xu.
REV 2:28 Cá'anqueze gu'a benne' ca' lataj xelezúale̱ne̱' neda', naca' ca belaj zila.
REV 2:29 Benne' zua nague̱' dxal-la' xenne̱' da nigá dxe̱ Be' Lá'azxa bi chia' ca'.
REV 3:1 Guzre Jesús neda': ―Bzuaj chee̱ gubáz chia' zúale̱ne̱' bi chia' zaj zre̱'e̱ xe̱zre Sardis. Bzuaj da nigá: Caní dxenná Jesús, Bénnea' zaj zúale̱ gazre Be' chee̱ Dios Le̱', ne nuxre̱' da gazre ca' zaj naca ca belaj ca'. Neda' nezda' xúgute̱ da dxunle. Nezda' ba nácale ca benne' gate ca' lau Dios lácala dxeleque bénneache naca banle.
REV 3:2 Le guxúe, ne le sua chacha chee̱ québedxa gácale ca benne' ca' ba zúate̱ xelátie̱'. Dxele'eda' da dxunle, quebe naca na li lazre' lau Dios chia'.
REV 3:3 Le gusá lazre' ca naca da ba nazé̱dele. Le chéajle̱ na, ne le xexíaje lazre'. Che quebe guxúe cuínale wida' naga zúale ca za tu gubán, ne quebe nézele bi zra xida'.
REV 3:4 Zaj zra' ládujla le'e bábaze benne' quebe ne xelune̱' da sban, na' benne' caní xeledále̱ne̱' neda', ne xelácue̱' zra lane̱' chiche lawe' da caní dxal-la' gaca chee̱'.
REV 3:5 Benne' ca' xeledxúaje̱' chawe' lawe' da zrinnaj xelácue̱' zra lane̱' chiche ne quebe xusula' la benne' ca' lu xiche naga zaj naxúaj la benne' ca' zúale̱ xel-la' nabán le̱', na' xeche̱ba' chee̱ benne' ca' lau Xra' ne lau gubáz chee̱ xabáa chee̱' ca'.
REV 3:6 Benne' zua nague̱' dxal-la' xenne̱' da nigá dxe̱ Be' Lá'azxa bi chia' ca'.
REV 3:7 Guzre Jesús neda': ―Bzuaj chee̱ gubáz chia' zúale̱ne̱' bi chia' zaj zre̱'e̱ xe̱zre Filadelfia. Bzuaj da nigá: Caní dxenná Jesús, Bénnea' naque̱' lá'azxa ne li lazre', Bénnea' nuxre̱' zren xia da dxunna bea na nape̱' xel-la' dxenná bea ca da gudapa wenná bea David, na' gate salje̱', netú quebe nu gaca xusezxuj, na' gate xusézxuje̱' netú quebe nu gaca salaj.
REV 3:8 Neda' nezda' xúgute̱ da dxunle. Nuzúa' laule le'e tu dxa xu'u da naxalaj, da quebe nu gaca xusezxuj. Lácala quebe nadípate̱cale, zéajle̱le dizra' chia', ne quebe ne gusán lázrele da naca chia'.
REV 3:9 Benne' ca' dxulucá'ana szrene̱' da xriwe̱', benne' we̱n lazre' ca', benne' dxelenné̱' zaj naque̱' judío ne quebe zaj naque̱', neda' guna' xuluzú zribe̱' zran ní'ale chee̱ xelenézene̱' neda' nazrí'ida' le'e.
REV 3:10 Ba be̱nle ca da gucha' le'e gunle chee̱ gácale zren lazre', na' chee̱ le̱ na' guxúequeza' le'e lawe' xel-la' zi' da xeledé xúgute̱ bénneache zaj zre̱'e̱ lu xe̱zr la xu, chee̱ gulé'e lau da zaj naque̱'.
REV 3:11 Wídaze̱queza'. Le gapa chi'i da nápale chee̱ quebe nu ca'a ca da dxal-la' si'le.
REV 3:12 Benne' ca' xeledxúaje̱' chawe' lawe' da zrinnaj, neda' gun chacha' benne' ca', na' xelaque̱' ca ze'e xiaj ca' zaj zua na lizre Xra', ne cabátaquezdxa xelexedxúaje̱' na', na' lu lázrdawe̱' guzúaja' La Xra', ne la xe̱zre chee̱ Dios chia' da naca na Jerusalén cube da za' xabáa, ne La' cube.
REV 3:13 Benne' zua nague̱' dxal-la' xenne̱' da nigá dxe̱ Be' Lá'azxa bi chia' ca'.
REV 3:14 Guzre Jesús neda': ―Bzuaj chee̱ gubáz chia' zúale̱ne̱' bi chia' zaj zre̱'e̱ xe̱zre Laodicea. Bzuaj da nigá: Caní dxenná Jesús, Bénnea' naque̱' li lazre', Bénnea' dxexeche̱be̱' da li, Bénnea' naque̱' naga guzú lau xúgute̱ da be̱n Dios.
REV 3:15 Neda' nezda' xúgute̱ da dxunle. Nezda' quebe nácale zaga ca dxunle da naca chia', ne quebe nácale láte̱la. Dxaca lazra' la gácale zaga u la.
REV 3:16 Nácale ca nisa bate, ne quebe nácale zaga, ne quebe nácale la, na' chu'una' le'e ca tu benne' dxexe̱be̱' nisa bate.
REV 3:17 Le'e dxennale nácale gunní'a, ne dxaca chawe' chee̱le ne quebe bi dxexázrjele, na' quebe dxéquebe'ele' dxaca ba xa' chee̱le ne dxezaca zi'le, ne nácale xache', ne nácale la chul-la, ne nácale gala xide.
REV 3:18 Chee̱ le̱ na' dxuzéajni'ida' le'e si'le lu na' neda' da naca ca oro da nabá'a na lu xi', chee̱ gápale xel-la' gunní'a li lazre', ne si'le zra lánale chiche chee̱ gácule, da gunna' le'e, na' xenite xel-la' stu' chee̱ da gúcale gala xide, ne si'le da cu'ule xiaj laule chee̱ xelé'ele.
REV 3:19 Neda' dxusízreda', ne dxudéa' xel-la' zi' xúgute̱ benne' ca' nazrí'ida'. Chee̱ le̱ na' dxal-la' xexíaje lázrele ne gunle zrin chia' du lázrele.
REV 3:20 Le na' xque. Neda' zea' dxa xu'u dxennia'. Che nu benne' xenne̱' chi'a, ne salje̱' xu'u, na' chu'a gágule̱na' le̱', na' le̱' gágule̱ne̱' neda'.
REV 3:21 Benne' ca' xeledxúaje̱' chawe' lawe' da zrinnaj, neda' gunézruja' le̱' lataj xelebé'le̱ne̱' neda' naga dxenná be'a, ca neda' bedxúaja' chawe', ne dxé'le̱na' Xra' naga dxenná bea Le̱'.
REV 3:22 Benne' zua nague̱' dxal-la' xenne̱' da nigá dxe̱ Be' Lá'azxa bi chia' ca'.
REV 4:1 Ca gudé na' gunná'a, na' ble'eda' tu dxa xu'u da naxalaj na xabáa, na' benda' chi'i Bénnea' benda' chee̱' nédxute̱ da naca na ca chi'i luzu da dxulucuezre̱', na' guzre̱' neda': ―Guluén nigá, na' gulé'eda' lue' da ca' dxal-la' gaca ca te chee̱ da nigá.
REV 4:2 Ca gunné̱' ca' guzúale̱ Be' Lá'azxa neda', na' ble'eda' tu lataj blau xabáa, ne ble'eda' tu Benne' zaca dxe'e̱ lataj blau na'.
REV 4:3 Bénnea' dxe'e̱ lu lataj blau na' nalé̱' ca tu xiaj jaspe da dxácatite na, u ca tu xiaj cornalina, na' dxu'a lataj blau na' naxechaj ca tu bchita' da dxácatite na ca tu xiaj esmeralda.
REV 4:4 Dxu'a lataj blau na' zaj zua tape dxua lataj naga zaj dxe' tape dxua benne' gula ca', zaj nacue̱' zra lane̱' chiche, ne zaj zria xíchaje̱' da zaj naca na oro.
REV 4:5 Lu lataj blau na' dxeledxúaj xesa, ne dxaca nine, ne dxelenné̱ guziu', na' lau lataj blau na' zaj zua gazre xi' dxelala na, da zaj naca na gazre Be' chee̱ Dios.
REV 4:6 Le na' lau lataj blau na' de̱ ca tu nísadau' da naca na ca xiaj esa' xaní'le̱'e̱. Laduj na' dxu'a lataj blau na' zaj zra' xetapa da zaj naca ban, zaj zua xiaj lau cuzre̱', ne laule̱'.
REV 4:7 Benne' nedxu nalé̱'e̱ ca tu be̱zre xixre', na' benne' gudxupe' nalé̱'e̱ ca tu be̱zre, na' benne' guxunne' naca lawe̱' ca lau bénneache, na' benne' gudape' nalé̱'e̱ ca tu bsia nachiluj xílaba'.
REV 4:8 Dápate̱ benne' caní zaj zua xrupa xrile̱' tu tue̱', na' dxupa la'a le̱'e̱ xrila benne' caní zaj zria zane' xiaj lawe̱'. Te zra ne chizrela quebe dxulusane̱' dxelenné̱': Lá'azxa, lá'azxa, lá'azxa naca Xránadxu Dios nape̱' dute̱ xel-la' dxenná bea, Bénnea' guzúaqueze̱', ne zúaqueze̱', ne tu súazqueze̱'.
REV 4:9 Tu tu lasa gate dápate̱ benne' ban caní dxelegú'e̱ ba Dios, ne dxulucá'ana szrene̱' Le̱', ne dxelé̱'e̱ Le̱': Xcalenu', Bénnea' zúaqueze̱' chadía chacanna,
REV 4:10 na' dape dxuate̱ benne' gula ca' dxuluzú zribe̱' lau Le̱', ne dxulucá'ana szrene̱' Bénnea' zúaqueze̱' chadía chacanna, ne dxuluzúe̱' da ca' zaj zría xíchaje̱' ca' lau lataj blau na', dxelenné̱':
REV 4:11 Xránantu' Dios, Lue' naca chiu' si' lu na'u xel-la' szren, ne xel-la' ba lá'ana, ne xel-la' dxenná bea, lawe' da be̱nu' Lue' xúgute̱ da de̱, na' ca dxaca lazru' Lue' zaj zua na, ne gulá gulebinna na.
REV 5:1 Lu na' xabe̱la chee̱ Dios, Bénnea' dxe'e̱ lataj blau na', ble'eda' tu xiche nadube, da naxúaj dxupa la'ate̱ na, na' nazriche na gazre da dxelunna bea na.
REV 5:2 Ble'eda' tu gubáz chee̱ xabáa nápale̱'e̱ xel-la' waca, na' gunné̱' zizraj: ―¿Nuzra naca chee̱' chíluje̱' xiche na', ne cheze̱' da ca' dxelunna bea na?
REV 5:3 Queba nu chilá' xabáa, ne lu xe̱zr la xu, ne zranla xe̱zr la xu naca chee̱' chíluje' xiche na', ne quebe nu gaca nne̱'e̱ na chee̱ lé'ene̱' ca naca na.
REV 5:4 Neda' gudxézreli'a lawe' da quebe nu chilá' benne' naca chee̱' chíluje̱' xiche na', ne gulabe̱' na, ne quebe gaca nne̱'e̱ na.
REV 5:5 Nadxa tu benne' ládujla benne' gula ca' guzre̱' neda': ―Québedxa cuezru' lawe' da ba bzrué'e Jesús, Bénnea' nazi'i le̱' Be̱zre Xixre' chee̱ xrtia Judá lawe' da nape̱' xel-la' dxenná bea zrente̱, ne naque̱' zri'ine zre sua David, na' Le̱' naca chee̱' chíluje̱' xiche na', ne cheze̱' da gazre ca' dxelunna bea na.
REV 5:6 Nadxa ládujla naga zua lataj blau na', ládujla tapa benne' ban ca', ne ládujla tape dxua benne' gula ca', ble'eda' Jesús, Bénnea' naque̱' Zríla'dau' chee̱ Dios. Ze̱'e̱ na', lácala zrie̱' we̱' lawe' da belutie̱' Le̱'. Zria gazre lúzuba' ne gazre xiaj lauba', na' xiaj lauba' ca' zaj naca na gazre Be' chee̱ Dios da ca' nasel-la Dios du ca naca xe̱zr la xu.
REV 5:7 Bénnea' naque̱' Zríla'dau' guxíaje̱' guqué̱'e̱ xiche na' lu na' xabe̱la Bénnea' dxe'e̱ lataj blau na'.
REV 5:8 Ca guqué̱'e̱ xiche na', na' tapa benne' ban ca', ne tape dxua benne' gula ca' buluzú zribe̱' lau Bénnea' naque̱' Zríla'dau'. Tu tu benne' gula ca' zaj nuxre̱' tu da dxelúl-lale̱ne̱' da can zríadi'i na du, nazí le na árpa, ne zaj nu'e̱ xé'ena bzri da naca na oro zaj xu'u na xala zixre, da zéaje̱ na xel-la' dxuláwizra Dios da dxelún bi ca' chee̱ Dios.
REV 5:9 Dxelul-le̱' tu da cube caní: Lue' naca chiu' ca'u xiche na', ne chezu' da ca' dxelunna bea na, lawe' da belutie̱' Lue', na' nen dxen chiu' bexa'u bénneache chee̱ xelaque̱' chee̱ Dios, Zaj naque̱' benne' xúgute̱ cue' bénneache, ne dxelenné̱' xúgute̱ dizra' walazre', ne zaj naque̱' benne' xúgute̱ xe̱zre ne xúgute̱ cue' xe̱zr la xu.
REV 5:10 Be̱nu' le̱' benne' wenná bea ca', ne bxruze ca' lau Dios chee̱dxu, na' xelenná be'e̱ lu xe̱zr la xu.
REV 5:11 Nadxa gunná'a, na' benda' chi'i zane' gubáz ca' chee̱ xabáa zaj naxéchaje̱' lataj blau na', ne tapa benne' ban ca', ne tape dxua benne' gula ca'. Zaj zra' benne' zantau' gubáz ca',
REV 5:12 na' dxelenné̱' zizraj: Bénnea' naque̱' Zríla'dau' belutie̱', naca chee̱' si'e̱ xel-la' dxenná bea, ne xel-la' gunní'a, ne xel-la' sina, ne xel-la' waca, ne xel-la' ba lá'ana, ne xel-la' szren, ne xel-la' dxue lá'ana.
REV 5:13 Cá'anqueze benda' dxelenná xúgute̱ da ca' be̱n Dios, da ca' zaj zra' xabáa, ne da ca' zaj zra' xe̱zr la xu, ne da ca' zaj zra' lu nísadau', ne xúgute̱ da ca' zaj nita xúgute̱ lataj ca', dxelenná na: Xel-la' dxue lá'ana, ne xel-la' ba lá'ana, ne xel-la' szren, ne xel-la' dxenná bea zaj naca na chee̱ Bénnea' dxe'e̱ lataj blau na', ne chee̱ bénnea' naque̱' Zríla'dau', gaxúane gaxúane iza.
REV 5:14 Dápate̱ benne' ban ca' gulenné̱': ―¡Ca'an gaca na! Na' dape dxuate̱ benne' gula ca' buluzú zribe̱', ne bulucá'ana szrene̱' Bénnea' naca bane̱' gaxúane gaxúane iza.
REV 6:1 Nadxa ble'eda' gate Bénnea' naque̱' Zríla'dau' gucheze̱' da nedxu da gazre ca' dxelunna bea na. Na' benda' dxenná tu benne' tapa ca' zaj naca bane̱', na' chi'e̱ ben na ca guziu', dxenné̱': ―Gudá, le'enu'.
REV 6:2 Gunná'a, na' ble'eda' tu bzrina' chiche, na' benne' zrie̱'-ba' nuxre̱' tu da dxedxú'una na xágadau' nalá xéche'ze. Bulunézruje̱' le̱' tu da naquen oro da guzúe' xíchaje̱', na' nen dute̱ xel-la' dxenná bea bdxuaje̱' chee̱ zrué'ene̱' lu wedil-la.
REV 6:3 Gate Bénnea' naque̱' Zríla'dau' gucheze̱' da gudxupe' da dxunna bea na, na' benda' benne' gudxupe' chee̱ benne' tapa ca' zaj naca bane', dxenné̱': ―Gudá, le'enu'.
REV 6:4 Na' bdxuaj xetú bzrina', nácaba' be̱ xrna, na' bénnea' zrie̱'-ba' guzi'e̱ xel-la' dxenná bea chee̱ cue̱' xel-la' dxebeza zri lazre' lu xe̱zr la xu, ne chee̱ gune̱' xelute bénneache ljwezre' ca', na' bulunézruje̱' le̱' tu xia tunna da nalá.
REV 6:5 Gate Bénnea' naque̱' Zríla'dau' gucheze̱' da guxunne' da dxunna bea na, na' benda' benne' guxunne' chee̱ benne' tapa ca' zaj naca bane', gunné̱': ―Gudá, le'enu'. Gunná'a, ne ble'eda' tu bzrina' gasaj, na' benne' zrie̱'-ba' nuxre̱' zrgú'unsa.
REV 6:6 Benda' tu chi'i dxenné̱ na ládujla tapa benne' ban ca', gunná na: ―Chupa xia zrua' xtila saca na lazruj chee̱ tu zra, ne xrupa xia zrua' cebada saca na lazruj chee̱ tu zra, san quebe cu' za xel-la' wagu, ne quebe cu' xrise uva wal-la.
REV 6:7 Gate Bénnea' naque̱' Zríla'dau' gucheze̱' da gudape' da dxunna bea na, na' benda' benne' gudape' chee̱ benne' ban ca', gunné̱': ―Gudá, le'enu'.
REV 6:8 Gunná'a, ne ble'eda' tu bzrina' gache, na' benne' zrie̱'-ba' le̱' Xel-la' Gute, na' cuzru bénnea' za tu benne' ze̱'e̱ waláz chee̱ lataj chul-la ga nnita benne' gate ca'. Bénnea' le̱' Xel-la' Gute guzi'e̱ xel-la' dxenná bea chee̱ gutie̱' tu cue' chee̱ tapa cue' ca naca bénneache zaj zre̱'e̱ xe̱zr la xu. Gutie̱' benne' ca' lu wedil-la, ne lu xel-la' dxedún, ne lu xízrawe̱' ca', ne lu na' be̱ snia zaj zraba' lu xe̱zr la xu.
REV 6:9 Gate Bénnea' naque̱' Zríla'dau' gucheze̱' da gázxue da dxunna bea na, na' ble'eda' zran cugu bénne'du ca' gulú'u benne' ca' belute bénneache le̱' lawe' da buluchálaje̱' dizra' chee̱ Dios, ne belexeche̱be̱' ca naca chee̱'.
REV 6:10 Bénne'du ca' gulú'u benne' ca' gulenné̱' zizraj: ―Xran lá'azxa, ne li lazre', ¿xeajáte̱ chenu' chee̱ guchi'u chee̱ntu', ne xebéaj lazru' benne' ca' belutie̱' netu', benne' ca' zaj zre̱'e̱ lu xe̱zr la xu?
REV 6:11 Nadxa bénne'du ca' gulú'u benne' ca' gulezí'e zra lane̱' chiche, na' guzre̱' le̱' xelebeze̱' xetú chí'idau', cadxa cha benne' biche̱' ca' dxelune̱' zrin chee̱ Cristo, xelute bénneache le̱' ca belutie̱' benne' ca'.
REV 6:12 Gate Bénnea' naque̱' Zríla'dau' gucheze̱' da xrupe da dxunna bea na, na' guná'a, na' guzrú'le̱'e̱ lu xe̱zr la xu. Gubizra bexaca na da chul-la ca ladxe' gasaj, na' beu' bexaca na xrna ca dxen,
REV 6:13 na' belaj zaj zria xabáa belexruj na lu xe̱zr la xu, ca dxelexruj higo dxe'ene ca' gate dxácale̱'e̱ be' dxunibe na xaga higo na'.
REV 6:14 Xabáa benite na ca tu xiche da dxexedube, na' xúgute̱ xi'a ca', ne xe̱zr la xu ca' da zaj naxechaj nísadau' gulecuasa na naga zaj zua na.
REV 6:15 Benne' wenná bea ca' zaj zre̱'e̱ lu xe̱zr la xu bulucache cuine̱' lu bluaj ca' ne ládujla xiaj ca' zaj nita lu xi'a ca', na' tuze gulaca benne' blau ca' ne benne' gunní'a ca', ne benne' xíchaje̱ ca' chee̱ benne' dxjaca wedil-la, ne benne' ca' dxelenná bea, ne benne' zaj nada'u, ne benne' zaj nadxúaje̱' lu na' xrane̱' ca',
REV 6:16 na' benne' caní gulé̱'e̱ xi'a ca', ne xiaj xre ca': ―Le quia cha netu', ne le gucache netu' lau Dios, Bénnea' dxe'e̱ lataj blau, ne lu xel-la' zi' zren da gunna Bénnea' naque̱' Zríla'dau'.
REV 6:17 Ba bzrin zra chee̱ xel-la' zi' zren. ¿Núzraqueze sue le̱ na?
REV 7:1 Ca gudé chee̱ da nigá, ble'eda' tapa gubáz chee̱ xabáa zaj ze̱' dapa saca chee̱ xe̱zr la xu, na' zaj nuzague̱' be' da zá'aca na dapa saca, chee̱ quebe bi be' gaca lu xe̱zr la xu, ne lawe' nísadau', ne lawe' xaga ca'.
REV 7:2 Cá'anqueze ble'eda' xetú gubáz chee̱ xabáa ze̱'e̱ naga dxalaj gubizra, na' nuxre̱' da gunna bea na nu benne' naque̱' che̱ Dios ban. Gubáz nigá gunné̱' zizraj, dxe̱'e̱ dápate̱ gubáz chee̱ xabáa ca' bache zaj nazi'e̱ xel-la' dxenná bea xuluzría xi'e̱ xe̱zr la xu, ne nísadau', gunné̱':
REV 7:3 ―Quebe guzría xile xe̱zr la xu, ne nísadau', ne xaga ca', dxácate̱ quebe ne guchíchentu' luzrgá benne' ca' tu da gunna bea na zaj naque̱' chee̱ Dios chee̱dxu.
REV 7:4 Benda' cátite zaj naca benne' ca' gulezriche luzrgue̱' da na' dxunna bea na. Zaj naque̱' tu gaxúe tape xun cue' da zaj naca na chi gaxúa weaj láwela xúgute̱ cue' benne' Israel.
REV 7:5 Gulezriche luzrgue̱' da na': Chazrinnu cue' benne' xrtia Judá, ne chazrinnu cue' benne' xrtia Rubén, ne chazrinnu cue' benne' xrtia Gad, ne
REV 7:6 chazrinnu cue' benne' xrtia Aser, ne chazrinnu cue' benne' xrtia Neftalí, ne chazrinnu cue' benne' xrtia Manasés, ne
REV 7:7 chazrinnu cue' benne' xrtia Simeón, ne chazrinnu cue' benne' xrtia Leví, ne chazrinnu cue' benne' xrtia Isacar, ne
REV 7:8 chazrinnu cue' benne' xrtia Zabulón, ne chazrinnu cue' benne' xrtia José, ne chazrinnu cue' benne' xrtia Benjamín.
REV 7:9 Gudé na' gunná'a ne ble'eda' benne' zan chee̱ xúgute̱ cue' bénneache: Benne' xúgute̱ cue' xe̱zr la xu, ne benne' dxelenné̱' xúgute̱ dizra' walazre' cha chee̱', ne benne' xúgute̱ xe̱zre ca'. Zaj ze̱' le na' naga zua lataj blau na', ne naga ze̱ Bénnea' naque̱' Zríla'dau'. Benne' caní zaj nacue̱' zra lane̱' chiche, ne zaj nuxre̱' zina'.
REV 7:10 Xúgute̱' dxelenné̱' zizraj: Xel-la' weselá za na lu na' Dios chee̱dxu, Bénnea' dxe'e̱ lataj blau, ne lu na' Bénnea' naque̱' Zríla'dau'.
REV 7:11 Xúgute̱ gubáz chee̱ xabáa ca' zaj ze̱' zaj naxéchaje̱' lataj blau na', ne naga zaj zra' benne' gula ca', ne tapa benne' ban ca', na' buluzú zribe̱' belíxrujte̱ lawe̱' zran ni'e̱, na' bulucá'ana szrene̱' Dios.
REV 7:12 Dxelenné̱': ¡Ca'an gaca na! ¡Xel-la' dxue lá'ana, ne da xabáa, ne xel-la' sina, ne xel-la' dxezaca ba lazre', ne xel-la' ba lá'ana, ne xel-la' dxenná bea, ne xel-la' szren, zaj naca na chee̱ Dios chee̱dxu chadía chacanna! ¡Ca'an gaca na!
REV 7:13 Nadxa tu benne' gula ca' bche̱be̱' neda': ―¿Nuzra benne' caní zaj nacue̱' zra lane̱' chiche, ne gazra zesí'aque̱'?
REV 7:14 Neda' gucha' le̱': ―Xran, lue' nézqueznu'. Le̱' guzre̱' neda': ―Benne' caní ba guledée̱' lu xel-la' zi' zren na', na' benne' caní ba zaj nacue̱' zra lane̱' chiche lawe' da Bénnea' naque̱' Zríla'dau' ba gudibe̱' xichaj lázrdawe̱' nen dxen chee̱'.
REV 7:15 Chee̱ le̱ na' zaj zre̱'e̱ dxu'a lataj blau naga dxe' Dios, ne dxelúe lá'ane̱' Le̱' te zra ne chizrela lu xudau' chee̱', na' Bénnea' dxe'e̱ lataj blau na' guxúequeze̱' benne' ca', ne súale̱tecaze̱' le̱'.
REV 7:16 Québedxa xeledune̱' ne québedxa xelebílene̱', ne québedxa guzezxe gubizra benne' ca', ne québedxa xeléquene̱' da la,
REV 7:17 lawe' da zua Bénnea' naque̱' Zríla'dau' cuita lataj blau na', na' guxúe̱' benne' ca' ca dxun benne' dxuxúe̱' zrila' ca', ne che̱'e̱ benne' ca' naga dxelalaj nisa da dxunna na xel-la' nabán, na' Diósqueze tu súale̱zqueze̱' benne' ca' chee̱ québedxa xelebezre̱'.
REV 8:1 Gate Bénnea' naque̱' Zríla'dau' gucheze̱' da gazre da ca' dxelunna bea na, da ca' zaj nuchiche na xiche na', na' gudxé' zri xabáa tu chi'i zrénqueze.
REV 8:2 Nadxa ble'eda' gazre gubáz chee̱ xabáa ca' zaj ze̱' lau Dios, na' bulunézruje̱' gubáz chee̱ xabáa ca' gazre luzu da xulucuezre̱'.
REV 8:3 Gudé na' bla' xetú gubáz chee̱ xabáa nuxre̱' tu xé'ena bzri da naca na oro ne guzé̱' dxu'a cugu, na' bulunézrujle̱'e̱ le̱' xala zixre chee̱ guzúe̱' na lau Dios tu zren nen xel-la' dxuláwizra Dios ca' da belún benne' ca' zaj naque̱' chee̱ Dios. Bzue̱' na lu cugu naca na oro, da zua na lau lataj blau na'.
REV 8:4 Zren chee̱ xala na' guluén na lau Dios tu zren nen xel-la' dxuláwizra Dios ca' belún benne' ca' zaj naque̱' chee̱ Dios.
REV 8:5 Nadxa tu gubáz chee̱ xabáa guqué̱'e̱ xé'ena bzri na', na' bzre̱'e̱ na xi' da guqué̱'e̱ lu cugu na', na' gudxú'une̱' xi' na' lu xe̱zr la xu, na' gulenné̱ guziu', ne gulenínnele̱'e̱, ne gulé̱pele̱'e̱ xesa, ne guzrú' xe̱zr la xu.
REV 8:6 Nadxa gázrete̱ gubáz chee̱ xabáa ca' zaj nuxre̱' gazre luzu da dxulucuezre̱' gulezé̱ chawe̱' xuluchínene̱' na.
REV 8:7 Gubáz nedxu na' bchínene̱' da dxucuezre̱', na' gulinnaj xiaj bezxe', ne xi' da zaj nachixre na dxen da belexruj na lu xe̱zr la xu. Xáteze quebe bedú gachaj xe̱zr la xu guzezxe na late weaj du ca naca lu xe̱zr la xu. Xáteze quebe gudache gáchajte̱ xaga ca' zaj ze̱ lu xe̱zr la xu gulezxe na, ne cá'anqueze guca chee̱ xixre' xa'a ca'.
REV 8:8 Gubáz chee̱ xabáa gudxupe' bchínene̱' da dxucuezre̱', na' bexruj da naca na ca tu xi'a zren da dxala na xi' lu nísadau', na' xáteze quebe guca gáchajte̱ nísadau' na' bexaca na dxen.
REV 8:9 Xáteze quebe guca gáchajte̱ bea zaj zraba' lu nísadau' guláteba', na' xáteze quebe guca gáchajte̱ da ca' dxeledán lawe' nísadau' gulebía xi na.
REV 8:10 Gubáz chee̱ xabáa guxunne' bchínene̱' da dxucuezre̱', na' bexruj tu belaj zrente̱ zran xabáa, da dxala na ca tu xi' xedxe. Naga bexruj na, xáteze quebe gudache gáchajte̱ xe̱gu ca', ne beaj ca' gulebía xi na.
REV 8:11 Belaj na' le̱ na Ajenjo, da zéaje̱ na da naca na sla', na' xáteze quebe guca gáchajte̱ nisa da de̱ lu xe̱zr la xu bexaca na ajenjo, na' benne' zante̱ gulatie̱' ne̱ chee̱ nisa na' lawe' da bexaca na sla'.
REV 8:12 Gubáz chee̱ xabáa gudape' bchínene̱' da dxucuezre̱', na' xáteze quebe bedú gachaj xel-la' naxaní' chee̱ gubizra, ne xel-la' naxaní' chee̱ beu', ne xel-la' naxaní' chee̱ belaj ca' belexaca na chul-la, na' quebe bulusení na du lazre' xáteze quebe guca gachaj zra, ne cá'anqueze che zrela.
REV 8:13 Nadxa gunná'a, ne benda' chi'i tu gubáz chee̱ xabáa dxedé̱' lu be', dxenné̱' zizraj: ―Edxugua bénneache zaj zra' xe̱zr la xu gate xelebezre luzu da xuluchine xechunna gubáz chee̱ xabáa ca'.
REV 9:1 Gubáz chee̱ xabáa gázxue bchínene̱' da dxucuezre̱', na' ble'eda' tu benne' naque̱' ca tu belaj bexruj na lu xe̱zr la xu, na' bulunézruje̱' le̱' zren xia chee̱ lataj chul-la chee̱ benne' gate ca'.
REV 9:2 Gusálaje̱' lataj chul-la na', na' lu'ule na' bdxuaj zren ca naca da dxedxuaj na naga dxeluzre̱' bla'dau', na' zren na' bchul-la na lau gubizra, ne lu be'.
REV 9:3 Lu zren na' beledxúaj biche zu. Guledaba' du ca naca xe̱zr la xu, na' biche zu ca' guleziba' lataj xeláduba' bénneache ca da dxelún bé̱xrujni.
REV 9:4 Dios guzre̱' biche zu ca' quebe xuluzría xiba' xixre' xa'a ca', ne netú xaga, san xeláduzeba' bénneache quebe nazriche luzrgue̱' da dxunna bea na benne' ca' zaj naque̱' chee̱ Dios.
REV 9:5 Quebe zaj naziba' lataj xelúteba' bénneache, san xuludézeba' bénneache ba xa' lawe' gazxu' beu', na' xel-la' dxelá chee̱ naga dxeláduba' naca na ca naca da dxun bé̱xrujni, be̱ dxelúteba' bénneache.
REV 9:6 Lu zra ca' xelaca lazre' bénneache xelexute cuine̱', ne quebe xelezéquene̱'. Xelaca lazre̱' xelatie̱' ne quebe xelatie̱'.
REV 9:7 Biche zu ca' zaj nácaba' ca bzrina' ca' ba zaj nabézaba' chjácaba' lu wedil-la. Xíchajba' zaj zria na ca tu da naca na oro, na' dxu'a lau biche zu ca' naca na ca lau bénneache.
REV 9:8 Xicha xíchajba' zaj naca na ca xicha xichaj nu'ula ca', na' lázxaba' zaj naca na ca lazxa be̱zre xixre'.
REV 9:9 Lachu'uba' xu'u na ca zraba' xia, na' xrílaba' dxeleninne na ca dxeleninne da dxelecá'a bzrina' ca' zjaca chéguba' lu wedil-la.
REV 9:10 Zaj zua xrbanba' ca xrban bé̱xrujni, zaj zua na liba'. Zaj nazi'ba' lataj xeláduba' bénneache lawe' gazxu' beu'.
REV 9:11 Zua tu xrane biche zu ca' naca gubáz chee̱ lataj chul-la, ne le̱ na Abadón nen dizra' hebreo, ne nen dizra' griego le̱ na Apolión, da zéaje̱ na da dxuzría xi na.
REV 9:12 Caní guca da nedxu da ba xa' da xeledé bénneache, na' da' zí'aca xechupan ca'.
REV 9:13 Nadxa gubáz chee̱ xabáa xrupe bchínene̱' da dxucuezre̱', na' benda' tu chi'i da gunná ládujla tapa luzu cugu lá'azxa na' naca na oro da zua na lau Dios.
REV 9:14 Chi'i na' guzre na gubáz chee̱ xabáa xrupe na' nuxre̱' luzu da dxucuezre̱': ―Bsan dápate̱ gubáz ca' zaj nadxéaje̱' dxu'a xe̱gu zren le̱ na Eufrates.
REV 9:15 Ca' guca na, na' gulelá gubáz ca' chee̱ xelutie̱' xáteze ca gaca gáchajte̱ bénneache lawe' da ba zaj nabeza gubáz ca' chee̱ zra na', ne beu' na', ne iza na'.
REV 9:16 Benda' cátite zaj naca benne' dxjaca wedil-la ca' zaj zrie̱' bzrina' zrále̱ne̱' gubáz ca'. Zaj naque̱' chupa cue' gaxua da zaj naca gaxúane gaxúane.
REV 9:17 Lu da ble'e Dios neda' ble'eda' ca zaj naca bzrina' ca', ne ca zaj naca benne' dxjaca wedil-la ca' zaj zrie̱'-ba'. Zaj xu'u lachu'e̱ zre̱' xrna da naca na xia, ne da nalá' ca zran xabáa, ne da gache. Xichaj bzrina' ca' zaj naca na ca xichaj be̱zre xixre', na' dxú'aba' ca' beledxúaj xi', ne zren, ne tu da gache da dxuzézxele̱'e̱ na.
REV 9:18 Xáteze quebe gudache gáchajte̱ bénneache gulatie̱' lu da ca' beledxúaj na dxu'a bzrina' ca', xi', ne zren, ne da gache na'.
REV 9:19 Xel-la' snia chee̱ bzrina' ca' zua na dxú'aba', ne xrbanba' lawe' da zaj naca xrbanba' ca be̱la' ca' zaj zua xíchajba', na' nen da ca' dxuluzría xiba' bénneache.
REV 9:20 Benne' ca' xezica, benne' quebe belúteba', belúnqueze̱' da zrinnaj ca da dxelúnqueze̱', ne bulucá'ana szrénqueze̱' be' xriwe̱' ca', ne bedau' oro ca', ne bedau' plata ca', ne bedau' xia gache ca', ne bedau' xiaj ca', ne bedau' xaga ca', da ca' quebe dxaca xelelé'e na, ne quebe dxaca xelén na, ne quebe dxaca si'aca na.
REV 9:21 Cá'anqueze belútequeze̱' benne' ca', ne belúnqueze̱' xel-la' wazrá', ne belúnqueze̱' da sban, ne gulebánqueze̱'.
REV 10:1 Nadxa ble'eda' xetú gubáz chee̱ xabáa nápale̱'e̱ xel-la' dxenná bea. Bétaje̱' xabáa, xu'e̱ tu lu beuj, ne zua tu bchita' xíchaje̱'. Dxu'a lawe̱' dxácatite na ca gubizra, na' ni'e̱ zaj naca na ca xi'.
REV 10:2 Nuxre̱' tu xíchedau' da nazriluj na, na' bzue̱' ni'e̱ zua xabe̱la lawe' nísadau', ne ni'e̱ zua xéglala lawe' xe̱zr la xu bizre.
REV 10:3 Nadxa gudxezre xe̱'e̱ ca dxun be̱zre xixre' dxebezre xa'aba', na' ca gudxezre xe̱'e̱ gulenné̱ gazre guziu'.
REV 10:4 Ca gudé gulenné̱ gazre guziu' ca', ba zúate̱ guzúaja', na' benda' tu chi'e̱ za xabáa, guzre neda': ―Bcache naze da gulenná gazre guziu' ca'. Quebe guzúaju' na.
REV 10:5 Nadxa gubáz chee̱ xabáa na' ble'eda' ze̱' lawe' nísadau', ne lawe' xe̱zr la xu bizre guchisa ne̱'e̱ da zua xabe̱la zran xabáa,
REV 10:6 na' bzétaje̱' La Bénnea' zue̱' chadía chacanna, ne be̱ne̱' xabáa, ne xe̱zr la xu, ne nísadau', ne xúgute̱ da zaj de̱ lawe' da ca' be̱ne̱', na' gunné̱': ―Québedxa che na,
REV 10:7 lawe' da gate su lau gubáz chee̱ xabáa gazre guchínene̱' luzu da xulucuezre̱', ba guca li ca naca da nun Dios dxal-la' gaca ca bzenne̱' benne' we̱n zrin chee̱' ca', benne' gulenné̱' waláz chee̱'.
REV 10:8 Ca naca chi'e̱ da benda', da za xabáa, bchálajle̱ne̱' neda' xetú, gunné̱': ―Guxíaj xeajcá'a xíchedu na' nuxru gubáz chee̱ xabáa na' ze̱' lawe' nísadau', ne lawe' xe̱zr la xu bizre.
REV 10:9 Nadxa guxá'a lau gubáz chee̱ xabáa na', na' gunaba' gunne̱' neda' xíchedu na', na' guzre̱' neda': ―Gucá'a na. Gudagu na. Lu dxu'u gaca na zixre ca bzrína'dau', na' lu le̱'u xexaca na da sla'.
REV 10:10 Nadxa gucá'a xíchedu na' lu na' gubáz chee̱ xabáa na', na' gudawa' na, na' lu dxu'a guca na zixre ca bzrína'dau'. Ca gudé gudawa' na, bexaca na sla' lu le̱'a.
REV 10:11 Nadxa gulé̱'e̱ neda': ―Dxun na ba xen guchálaju' waláz chee̱ Dios lau benne' zaj zre̱'e̱ zane cue' xe̱zr la xu, ne lau benne' zaj zre̱'e̱ xe̱zre zan ca', ne lau benne' dxelenné̱' dizra' walazre' cha chee̱' ca', ne lau benne' wenná bea ca'.
REV 11:1 Nadxa belunne̱' neda' tu xia xtíladau' da naca na ca tu xaga da dxudxíxredxu, na' gulé̱'e̱ neda': ―Guxasa, bdxixre' xudau' chee̱ Dios ne lu cugu, na' blaba bal-la benne' zaj zre̱'e̱ na' dxulucá'ana szrene̱' Dios.
REV 11:2 Quebe gudxixru' chale'aj chee̱ xudau' na' lawe' da ba gudé na lu na' benne' zitu' ca', na' benne' ca' xululéaje̱' xe̱zre lá'azxa lawe' chupe xun beu'.
REV 11:3 Neda' sel-la' chupa benne' zaj nacue̱' ladxe' tuzruj, na' xelenné̱' waláz chia' lawe' chazrinnu gaxúa ga xun zra.
REV 11:4 Benne' chupa caní zaj naque̱' ca chupa xaga olivo ca', ne ca zaj naca chupa da zaj zuan xi', da ca' zaj zua na lau Dios, Xrane xe̱zr la xu.
REV 11:5 Che nu benne' dxaca lazre̱' guzría xi'e̱ benne' caní, na' le̱' xululube̱' xi' da dxuaj lu dxu'e̱ ca', na' guzézxete̱ na benne' ca' dxeledábague̱' le̱'. Caní gate nútete̱ze benne' tábague̱' benne' chupa caní.
REV 11:6 Benne' chupa caní zaj nape̱' xel-la' dxenná bea xelune̱' ga quebe gaca xiuj dxácate̱ na' dxelenné̱' waláz chee̱ Dios. Cá'anqueze zaj nape̱' xel-la' dxenná bea xelune̱' xaca nisa dxen, ne chee̱ xulusaca zi'e̱ bénneache nen xúgute̱ xízrawe̱' ca', bátate̱zla dxelaca lazre̱'.
REV 11:7 Gate bache belexuzre belune̱' zrin chee̱', na' be̱ xixre' snia, be̱ dxedxúajba' lataj chul-la, tíl-lale̱ba' benne' chupa ca', na' qué̱l-laba' le̱', ne gúteba' le̱'.
REV 11:8 Be̱la' dxen gate chee̱ benne' caní xelexegá'ana na la neza chee̱ xe̱zre zrentau' naga gudá' Xránadxu xaga begúaj, ne ca dxutil-la Dios le̱be, le̱ na Sodoma, ne Egipto.
REV 11:9 Lawe' chunna zra xugachaj, bénneache chee̱ xúgute̱ cue' benne', ne benne' xe̱zre ca', ne benne' zra du gabí'i xe̱zr la xu, ne benne' dxelenné̱' dizra' walazre' cha chee̱' xelelé'ene̱' be̱la' dxen gate chee̱ benne' caní, ne quebe xelu'e̱ lataj nu benne' gucache' le̱'.
REV 11:10 Benne' zaj zre̱'e̱ lu xe̱zr la xu xelebene̱' lawe' da zaj nate benne' caní, na' xelexezaca ba lázrele̱'e̱, ne xelesel-le̱' da xulunezruj ljwezre̱' tue̱' xetue̱' lawe' da bulusaca zi' benne' caní gulenné̱' waláz chee̱ Dios bénneache ca'.
REV 11:11 Gate guca chunna zra xugachaj, na' Dios bsebane̱' benne' caní, na' belexase̱', na' xúgute̱ benne' ca' belelé'ene̱' le̱' belezrébele̱'e̱.
REV 11:12 Nadxa dxúpate̱ benne' ca' dxelexeche̱be belenne̱' chi'i tu benne' dxenné̱' zizraj xabáa, dxe̱'e̱ benne' ca': ―Le xegüén nigá. Na' belexegüene̱', na' belelé'e benne' ca' dxeledábague̱' le̱' ca guca.
REV 11:13 Ca'an gúcate̱ guzrú'le̱'e̱ xe̱zr la xu, na' xu'u zaj nita na lu xe̱zre na' gulebía xi na, na' gulate gazre cue' da nacan chi gaxúa bénneache weaj ne̱ chee̱ da guzrú'. Benne' ca', benne' quebe gulate lu xe̱zre na', nen dute̱ xel-la' dxelezrebe belúe lá'ane̱' Dios zue̱' xabáa.
REV 11:14 Ba gudé da gudxupe' da ba xa' da xeledé bénneache, na' la za'te̱ da guxunne'.
REV 11:15 Gubáz gazre bchínene̱' da dxucuezre̱', na' ben chi'i benne' zan xabáa dxelenné̱' zizraj: Naga dxelenná bea bénneache lu xe̱zr la xu ba guledé na lu na' Xránadxu Dios, ne lu na' Cristo chee̱', na' Le̱' nna be'ene̱' lataj ca' chadía chacanna.
REV 11:16 Nadxa tape dxua benne' gula ca' zaj dxe'e̱ dxu'a lataj blau naga dxe' Dios buluzú zribe̱' zaj nuzuate̱ lawe̱' zran ni'e̱, dxulucá'ana szrene̱' Dios,
REV 11:17 dxelenné̱': Xcalenu', Xran. Dios, napu' dute̱ xel-la' dxenná bea. Guzúaquezu', ne zúaquezu', ne tu súazquezu', lawe' da ba guzi'u xel-la' dxenná bea zrente̱ chiu', ne ba guzú lau' dxenná be'u.
REV 11:18 Bénneache xúgute̱ xe̱zre ca' dxelezré̱'e̱ san ba bzrin zra gudéu' benne' ca' ba xa', zra na' guchi'u chee̱ benne' gate ca'. Xunézruju' da naca chee̱ benne' ca' gulenné̱' waláz chiu', ne da naca chee̱ benne' ca' zaj naque̱' chiu', ne da naca chee̱ benne' ca' belune̱' Lue' ba lá'ana, benne' blau ca', ne benne' quebe nu zaj naca. Ba bzrin zra guzría xi'u benne' ca' buluzría xi'e̱ xe̱zr la xu.
REV 11:19 Nadxa bxalaj xudau' chee̱ Dios da zua xabáa, na' ble'e lau xi'ina naga xu'u xel-la' wezría xrlátaje chee̱', da zua na lu xudau' na'. Gule̱pe xesa, ne guleninne na, ne gulenné̱ guziu', ne guzrú' xe̱zr la xu, na' bxínnajle̱'e̱ xiaj bezxe'.
REV 12:1 Nadxa ble'e lau tu da zrente̱ xabáa. Zua tu nu'ula naca zra lane̱' ca gubizra, na' zran ni'e̱ zua da naca ca beu', na' xíchaje̱' zria tu da zaca zaj zria na chazrinnu belaj.
REV 12:2 Nu'ula nigá zue̱' zi'i, ne dxebezre xe̱'e̱ xel-la' dxudi'a sane̱' tu bidau', dxedéle̱'e̱ xel-la' zi' chee̱ galaj bidu na'.
REV 12:3 Nadxa ble'e lau xabáa xetú da zrente̱, zua tu be̱ snia schanni', be̱ xrna, zua gazre xíchajba' ne chi lúzuba', na' zria tu da zaca tu tu xíchajba' ca'.
REV 12:4 Nen xrbanba' gucá'a dxé̱guba' xáteze quebe guca gáchajte̱ belaj zaj zria zran xabáa, na' bzálaba' na lu xe̱zr la xu. Be̱ snia schanni' na' guze̱ba' lau nu'ula na' sane̱' bidau' chee̱ gáguba' bidu na' gate ze gálajbe'.
REV 12:5 Nu'ula na' guzane̱' tu bi biudau', bi na' nna be'ebe' dute̱ xe̱zr la xu nen tu var xia. Nadxa bi biu chee̱ nu'ula na' gucá'a Dios le̱be', na' bexu'e̱-be' lataj blau chee̱' naga dxe'e̱.
REV 12:6 Na' nu'ula na' bzrúnnuje̱' zéaje̱' le̱'e̱ xixre' lawe' lataj naga nucueza Dios tu lataj naga sua nu'ula na', naga xulugawe̱' le̱' lawe' chazrinnu gaxúa ga xun zra.
REV 12:7 Gudé na' guxú'u wedil-la xabáa gate gubáz chee̱ xabáa blau le̱' Miguel nen gubáz chee̱ xabáa zaj da' le̱' guledíl-lalene̱' be̱ snia schanni' zrente̱. Be̱ snia schanni' na', ne gubáz zaj de̱'e̱-ba' belune̱' wedil-la.
REV 12:8 Quebe bi gulezéquene̱' lu wedil-la na', na' québedxa guta' lataj chee̱ gubáz ca' lu xabáa.
REV 12:9 Ca'an guca gulebéaje̱' be̱ snia schanni' na' xabáa, be̱ snia na' zúaba' nédxute̱, na' nazí laba' da xriwe̱', ne Satanás, da na' dxezí xe̱ na xúgute̱ bénneache. Da xriwe̱' na', ne gubáz ca' zaj de̱'e̱ na guledxú'une̱' na lu xe̱zr la xu.
REV 12:10 Nadxa benda' tu chi'i benne' gunné̱' zizraj xabáa: ―Ba bla' xel-la' weselá, ne xel-la' szren, ne xel-la' dxenná bea chee̱ Dios chee̱dxu, ne xel-la' dxenná bea chee̱ Cristo chee̱', lawe' da ba guledxú'une̱' da na' gudagu zria na chee̱ benne' bíchedxu, da na' dxagu zria na chee̱ benne' ca' te zra, ne chizrela lau Dios chee̱dxu.
REV 12:11 Benne' bíchedxu ca' beledxúaje̱' chawe' ne̱ chee̱ dxen chee̱ Bénnea' naque̱' Zríla'dau', ne ne̱ chee̱ da belexeche̱be̱' ca naca chee̱ dizra' chee̱ Cristo, ne quebe belezrebe̱' nu benne' gutie̱' le̱'.
REV 12:12 Chee̱ le̱ na' gata' xel-la' dxebé xabáa. ¡Le be le'e zrale xabáa! ¡Edxugua benne' ca' zaj zre̱'e̱ xe̱zr la xu, ne lawe' nísadau' lawe' da ba bla' da xriwe̱' naga zúale, dute̱ xel-la' dxezrá'a chee̱ na, lawe' da neze na xáte'ga ne de̱ chee̱ na!
REV 12:13 Gate guque be'e da xriwe̱' ba buluzale̱' na lu xe̱zr la xu, na' gudxé' nau na nu'ula na' guzane̱' bi biudu na'.
REV 12:14 Nu'ula na' bulunézruje̱' le̱' chupa xrile̱' zren ca xrila bsia chee̱ gaca xexiaje̱' xezue̱' le̱'e̱ xixre' lawe' lataj, zitu' naga zua be̱ snia schanni' na', na' bulugawe̱' le̱' lawe' chun iza xugachaj.
REV 12:15 Be̱ snia schanni' na' bexé̱beba' nisa chee̱ be̱nba' tu xe̱gu chee̱ gua na nu'ula na'.
REV 12:16 Gúcale̱ xe̱zr la xu nu'ula na'. Bzra xe̱zr la xu, na' gude̱be na xe̱gu na' bexe̱be be̱ snia schanni' na'.
REV 12:17 Chee̱ le̱ na' bzrá'le̱'e̱ da xriwe̱' nu'ula na', na' guxíaj na xeajtíl-lale̱ na xrtia nu'ula na' zaj zre̱'e̱ xe̱zr la xu, benne' ca' dxuluzúe̱' dizra' da bdxixruj be'e Dios, ne dxelexeche̱be̱' ca naca chee̱ Jesucristo.
REV 13:1 Nadxa guzéa' dxu'a nísadau', ne ble'eda' bdxuaj tu be̱ xixre' snia lu nísadau' na', zua gazre xíchajba', ne chi lúzuba'. Zria tu tu lúzuba' na' tu da zaca, na' da' tu laba' xíchajba' ca' da dxecuide Dios.
REV 13:2 Be̱ xixre' snia nigá nácaba' ca tu be̱zrtau', na' ní'aba' zaj naca na wal-la ca ni'a oso, na' dxú'aba' naca na ca dxu'a be̱zre xixre'. Be̱ snia schanni' bnézrujba' xel-la' dxenná bea chee̱ba', ne lataj blau chee̱ba', ne xel-la' waca chee̱ba' lu na' be̱ snia na' nácaba' ca be̱zrtau'.
REV 13:3 Zua tu we̱' tu xichaj be̱ xixre' snia na' nácaba' ca be̱zrtau' da gute na le̱ba', na' we̱' na' bexaca na, na' ca naca bénneache ca' zaj zre̱'e̱ lu xe̱zr la xu belexebánele̱'e̱ne̱', ne zjácale̱ne̱' be̱ xixre' snia na'.
REV 13:4 Bulucá'ana szrene̱' be̱ snia schanni' na' lawe' da bnézrujba' xel-la' dxenná bea chee̱ be̱ xixre' na' nácaba' ca be̱zrtau', ne cá'anqueze bulucá'ana szrene̱' be̱ xixre' snia na', dxelenné̱': ―¿Núzraqueze naca ca be̱ xixre' nigá, ne nu seque' tíl-lale̱ le̱ba'?
REV 13:5 Nadxa da xriwe̱' be̱ na le̱ba' lataj gunne̱ba' dizra' zri'a, na' gunne̱ba' da cale̱la chee̱ Dios, ne gudápaba' xel-la' dxenná bea lawe' chupe xun beu'.
REV 13:6 Gunne̱ba' da cale̱la chee̱ Dios, ne chee̱ La Dios, ne chee̱ lataj lá'azxa chee̱', ne chee̱ benne' ca' zaj zre̱'e̱ xabáa.
REV 13:7 Cá'anqueze guziba' xel-la' dxenná bea tíl-lale̱ba' benne' ca' zaj naque̱' chee̱ Dios, ne gútete̱ba' benne' ca', na' guziba' xel-la' dxenná bea lu xúgute̱ cue' bénneache, ne benne' zaj zre̱'e̱ xúgute̱ xe̱zre ca', ne xúgute̱ cue' xe̱zr la xu ca', ne benne' dxelenné̱' dizra' walazre' cha chee̱'.
REV 13:8 Xúgute̱ benne' zaj zre̱'e̱ xe̱zr la xu bulucá'ana szrene̱' be̱ xixre' snia na', benne' ca' quebe zaj naxúaj le̱' lu xiche naga zaj naxúaj la benne' ca' zaj nape̱' xel-la' nabán, xiche na' bzuaj Bénnea' naque̱' Zríla'dau' belutie̱'-ba'.
REV 13:9 Che nu benne' zua nague̱', dxal-la' xenne̱' dizra' nigá.
REV 13:10 Benne' ca' dxelegú'e̱ bénneache lizre xia, cá'anqueze xelú'u benne' ca' lizre xia, na' benne' ca' dxelutie̱' benne' nen xia nalá, cá'anqueze xelatie̱' lu xia nalá. Chee̱ le̱ na' benne' zaj naque̱' chee̱ Dios dxal-la' xelaque̱' zren lazre', ne xeléajle̱'e̱ chee̱ Dios.
REV 13:11 Gudé na' ble'eda' xetú be̱ xixre' snia bdxúajba' lu xe̱zr la xu. Bea nigá zua chupa lúzuba' zaj naca na ca luzu zrila'. Bea nigá gunne̱ba' ca be̱ snia schanni' na'.
REV 13:12 Bea nigá nápaba' dute̱ xel-la' dxenná bea da napa be̱ nedxu na', gate zúaba' lau be̱ nedxu na', na' gunná be'eba' ca naca bénneache zaj zre̱'e̱ dute̱ xe̱zr la xu xulucá'ana szrene̱' be̱ nedxu na', bea na' bexaca we̱' chee̱ba' da na' naca gute le̱ba'.
REV 13:13 Be̱ gudxupe' na' be̱nba' xel-la' waca zri'a ca', ne be̱nba' bexruj xi' zran xabáa lu xe̱zr la xu lau bénneache ca'.
REV 13:14 Ne̱ chee̱ xel-la' waca ca' da be̱nba' lau be̱ nedxu na', guzí xe̱ba' benne' zaj zre̱'e̱ xe̱zr la xu, na' gunná be'eba' benne' ca' xelune̱' tu bedau' ca naca be̱ nedxu na', bea na' guzúa we̱' chee̱ xia nalá, na' naca bánquezeba'.
REV 13:15 Be̱ gudxupe' na' guziba' xel-la' dxenná bea gunézrujba' xel-la' nabán bedau' na' naca na ca be̱ nedxu na', chee̱ nne̱ bedau' na', ne gute na xúgute̱ benne' quebe xulucá'ana szrene̱' na.
REV 13:16 Cá'anqueze bedau' na' gunná be'e na zriche tu da gunna bea na luzrgá u lu na' zua xabe̱la chee̱ xúgute̱ bénneache, benne' blau, ne benne' quebe nu naca, ne benne' gunní'a, ne benne' xache', ne benne' zaj nada'u, ne benne' zaj zre̱'e̱ cá'aze.
REV 13:17 Netú benne' quebe gaca ga'uwe̱' ne gutie̱' che quebe zriche da na' dxunna bea na le̱', u la be̱ xixre' snia na', u xrbaba ca naca laba'.
REV 13:18 Nu benne' gulabe̱' da nigá dxal-la' gaque̱' sina. Benne' dxéajni'ine̱' waca gulabe̱' ca naca xrbaba chee̱ laba'. Naca na tuze ca naca xrbaba chee̱ bénneache, na' xrbaba nigá naca na xrupa gaxúa ga xun xrupa.
REV 14:1 Gudé na' gunná'a, na' ble'eda' Bénnea' naque̱' Zríla'dau' ze̱' lu xi'a Sión. Tu zren nen Le̱' zaj zra' tu gaxúa tape xun cue' chi gaxúa weaj benne', zaj zriche luzrgue̱' La Bénnea' naque̱' Zríla'dau', ne La Xre̱'.
REV 14:2 Nadxa benda' tu da dxeninne na da za' xabáa, da dxeninne na ca schaga' da dxelún zánete̱ xe̱gu ca', ne ca schaga' da dxun guziu' gate dxenné̱le̱'e̱ na, ne ca dxeninne naga zaj zra' zánete̱ benne' dxelínnie̱' da ca' cun zríadi'i na du.
REV 14:3 Belul-le̱' tu da cube dxu'a lataj blau naga dxe' Dios, ne lau tapa benne' ca' zaj zua nabancze', ne lau tape dxua benne' gula ca'. Netú benne' xezica quebe guca gul-le̱' ca naca da na' belul-le̱'. Dxaca dxelul-le na benne' tu gaxúa tape xun cue' chi gaxúa weaj, benne' ca' gulelé̱' láwela benne' zaj zre̱'e̱ xe̱zr la xu.
REV 14:4 Benne' caní quebe gulezúale̱ne̱' nu'ula chee̱ benne' xula, san belexegá'ana chawe̱', na' zjácale̱ne̱' Bénnea' naque̱' Zríla'dau' gátete̱ze zéaje̱'. Benne' caní gulelé̱' láwela bénneache, ne zaj naque̱' lau Dios ca tu da blaudxa chee̱ da dxezidxu, da dxuzúadxu lau Dios, ne lau Bénnea' naque̱' Zríla'dau'.
REV 14:5 Cabata' dxelún lazre̱', na' zaj naque̱' du lazre' dxu'a lataj blau naga dxe' Dios.
REV 14:6 Nadxa ble'eda' xetú gubáz chee̱ xabáa dxedé̱' lu be' zran xabáa, nape̱' dizra' chawe' da chadía chacanna, chee̱ guzenne̱' na benne' ca' zaj zre̱'e̱ xe̱zr la xu, benne' xúgute̱ cue' bénneache, ne benne' xúgute̱ cue' xe̱zr la xu, ne xúgute̱ xe̱zre, ne benne' dxelenné̱' dizra' walazre' cha chee̱'.
REV 14:7 Gubáz na' gunné̱' zizraj: ―Le zrebe Dios, ne le güe lá'ana Le̱' lawe' da ba bzrin zra guchi'a Le̱' chee̱ bénneache. Le gucá'ana szren Bénnea' be̱ne̱' xabáa, ne xe̱zr la xu, ne nísadau', ne beaj ca'.
REV 14:8 Xetú gubáz chee̱ xabáa zéaje̱' cuzru gubáz chee̱ xabáa nedxu na', dxenné̱': ―¡Ba guzría xi'! ¡Ba guzría xi' xe̱zre Babilonia, xe̱zre zren na', lawe' da bulusuzre' benne' xe̱zre ca', ne benne' dute̱ xe̱zr la xu nen da naca ca xrise uva wal-la chee̱ da sban da dxelune̱'!
REV 14:9 Xetú gubáz chee̱ xabáa zéaje̱' cuzru gubáz chupa ca', dxenné̱' zizraj: ―¡Che nu benne' dxucá'ana szrene̱' be̱ snia na', ne bedau' chee̱ba', ne gu'e̱ lataj zriche luzrgue̱' u ne̱'e̱ laba',
REV 14:10 benne' nigá tée̱' lu da ba xa' da nucueza Dios lu xel-la' dxezrá'a chee̱', na' saca zi'e̱ lu xi' chee̱ da dxuzézxele̱'e̱ na lau gubáz chee̱ xabáa ca' chee̱ Dios, ne lau Bénnea' naque̱' Zríla'dau'!
REV 14:11 ¡Zren chee̱ xi', naga saca zi'e̱, cuen na chadía chacanna, na' xelezaca zi' te zra ne chizrela benne' ca' dxulucá'ana szrene̱' be̱ snia na', ne bedau' chee̱ba', ne dxelu'e̱ lataj zriche laba' luzrgue̱'!
REV 14:12 ¡Chee̱ le̱ na', benne' ca' zaj naque̱' chee̱ Dios, ne dxuluzúe̱' dizra' ca nadxixruj be'ene̱', ne zjácale̱ne̱' da naca chee̱ Jesús, dxal-la' xelaque̱' zren lazre'!
REV 14:13 Nadxa benda' chi'i tu benne' da za xabáa. Dxe̱'e̱ neda': ―Bzuaj da nigá: Na'a, ne lu da za za' ba neza zrente̱ naca na chee̱ benne' gate ca' xelute bénneache le̱' lawe' da dxeléajle̱'e̱ chee̱ Xránadxu. Be' Lá'azxa dxenné̱': “¡Ca' naca na, lawe' da xelexezí' lazre̱' ca naca lu zrin da belune̱', na' da xrlátaje da belune̱' zeajle̱ na benne' ca'!”
REV 14:14 Nadxa guná'a, na' ble'eda' tu beuj chiche, na' lawe' beuj na' dxe' tu benne' naque̱' ca Bénnea' gulje̱' bénneache. Zria tu da naca na oro xíchaje̱', ne nuxre̱' tu xia nalá.
REV 14:15 Bdxuaj tu gubáz chee̱ xabáa lu xudau' da zua xabáa, na' gunné̱' zizraj. Dxe̱'e̱ bénnea' dxe'e̱ lawe' beuj: ―¡Bchine xia nalá chiu', ne becá'a lina, lawe' da ba bzrin zra, na' lina chee̱ xe̱zr la xu ba guca na!
REV 14:16 Nadxa bénnea' dxe'e̱ lawe' beuj na' gudine̱' xia nalá chee̱' na', na' bequé̱'e̱ lina chee̱ xe̱zr la xu.
REV 14:17 Nadxa xetú gubáz chee̱ xabáa bdxuaje̱' xudau' da zua xabáa, nuxre̱' tu xia nalá.
REV 14:18 Xetú gubáz chee̱ xabáa bdxuaje̱' lu cugu, gubáz chee̱ xabáa na' nape̱' xel-la' dxenná bea lu xi', na' gunné̱' zizraj. Dxe̱'e̱ gubáz chee̱ xabáa na' nuxre̱' xia nalá: ―¡Bchine xia nalá chiu' na', ne becá'a uva ca' da zaj de̱n lu xe̱zr la xu lawe' da ba güé na!
REV 14:19 Na' gubáz chee̱ xabáa na' gudine̱' xia nalá chee̱' lawe' xe̱zr la xu, ne bequé̱'e̱ uva ca' da zaj de̱ lu xe̱zr la xu da zéaje̱ na benne' ca' dxelune̱' da zrinnaj, na' bzre̱'e̱ na naga xelesíe̱' na, da na' zéaje̱ na da ba xa' da nucueza Dios chee̱ benne' ca' dxelune̱' da zrinnaj.
REV 14:20 Uva ca' gulesíe̱' na naga dxedxuaj xe̱zre, na' naga dxelesíe̱' na bdxuaj dxen chee̱ benne' ca' dxelune̱' da zrinnaj da gulén na cátite sibe zua dxu'a bzrina', na' guzá' dxen na' cátite sadxu du gazre zra.
REV 15:1 Ble'eda' xabáa xetú da zrente̱ da xebánedxu, belelá' gazre gubáz chee̱ xabáa zaj nuxre̱' gazre da ba xa' bze̱be, da zaj naca na naga cheajse̱te̱ xel-la' dxezrá'a chee̱ Dios.
REV 15:2 Cá'anqueze ble'eda' tu da naca na ca nísadau' da naca na ca xiaj esa', ne nachixre na xi', na' benne' ca' quebe gulezí lu ne̱'e̱ da naca na chee̱ be̱ snia na', ne da nacan chee̱ bedau' chee̱ba', ne xrbaba chee̱ laba', zaj ze̱' lu nísadau' na' da naca na ca xiaj esa', zaj nuxre̱' da ca' con zríadi'i na du da ba bnezruj Dios le̱'.
REV 15:3 Dxelul-le̱' da bil-la Moisés, benne' we̱n zrin chee̱ Dios, ne da dxul-la Bénnea' naque̱' Zríla'dau', da dxenná na: Da zrente̱, ne da dxebánedxu zaj naca xúgute̱ da ba be̱nu' Lue'. Xran, nacu' Dios napu' dute̱ xel-la' dxenná bea. Xrlátaje̱, ne li lazre' zaj naca xrba chiu' Lue'. Nacu' Wenná Bea chee̱ dute̱ xe̱zr la xu.
REV 15:4 ¿Núzraqueze quebe zrebe Lue', Xran? ¿Núzraqueze quebe güe lá'ana Lue'? Tuze Lue' nacu' lá'azxa. Xelelá' benne' dute̱ xe̱zr la xu, na' xulucá'ana szrene̱' Lue', lawe' da ba belelé'ene̱' da xrlátaje̱ da nunu'.
REV 15:5 Gudé na' gunná'a ne ble'eda' bxalaj xudau' da zua na xabáa, naga zua lataj naga zaj naxúaj da ca' bdxixruj be'e Dios.
REV 15:6 Lu xudau' na' beledxúaj gazre gubáz chee̱ xabáa ca' zaj nuxre̱' gazre da ba xa'. Zra lane̱' zaj nacue̱' naca na ladxe' zaca, da naca na ba'a, ne dxelácatite na, na' zaj nasíe̱' lachu'e̱ bazxu da naca na oro.
REV 15:7 Nadxa tu benne' laduj tapa benne' zaj naca bánqueze̱' bnézruje̱' tu tu gubáz gazre ca' tu xé'ena bzri da naca na oro, ne zaj nazrate̱ na da ba xa' da nucueza Dios, Bénnea' zue̱' chadía chacanna.
REV 15:8 Guzrate̱ xudau' na' nen zren chee̱ xi' da dxulé'e na ca zaj naca xel-la' szren, ne xel-la' dxenná bea chee̱ Dios, na' netú benne' quebe guca chu'e̱ ga na' cadxa gudé chee̱ da gazre da ba xa' ca' da zaj nuxru gazre gubáz chee̱ xabáa ca'.
REV 16:1 Nadxa benda' chi'i tu benne' gunné̱' zizraj lu xudau'. Dxe̱'e̱ gazre gubáz chee̱ xabáa ca': ―Le chjaca, le cheajzala da ba xa' ca' lu xe̱zr la xu, da ca' nucueza Dios.
REV 16:2 Na' guxéaj gubáz chee̱ xabáa nedxu, xeajlatje̱' xé'ena bzri chee̱' lawe' xe̱zr la xu, na' xúgute̱ bénneache, benne' zaj nazriche luzrgue̱' la be̱ snia na', ne dxulucá'ana szrene̱' bedau' chee̱ba', gulebía we̱' lu be̱la' dxen chee̱ benne' ca' da gulále̱'e̱ na.
REV 16:3 Gubáz gudxupe' xeajlatje̱' xé'ena bzri chee̱' lu nísadau', na' nísadau' na' bexaca na dxen ca dxen chee̱ benne' gate, na' gulate xúgute̱ bea zaj naca banba' lu nísadau' na'.
REV 16:4 Gubáz guxunne' xeajlatje̱' xé'ena bzri chee̱' lu xe̱gu nisa ca', ne lu beaj ca', na' belexaca na dxen.
REV 16:5 Na' benda' chi'i tu gubáz chee̱ xabáa dxenná be'ene̱' nisa caní, gunné̱': ―Xran, Dios Lá'azxa, zúaquezu', ne guzúaquezu'. Xrlátaje̱ nacu' lawe' da guchugu' chee̱ benne' ca' guca caní,
REV 16:6 lawe' da bululalje̱' dxen chee̱ benne' chiu' ca', ne chee̱ benne' ca' gulenné̱' waláz chiu', na' na'a dxuxí'aju' benne' caní dxen lawe' da caní zaj naca chee̱' xelé'aje̱'.
REV 16:7 Cá'anqueze benda' chi'i tu benne' zue̱' lu cugu, dxenné̱': ―Ca' naca na, Xran. Nacu' Dios napu' dute̱ xel-la' dxenná bea. Ba bchi'u chee̱ bénneache ca' ca naca da li, ne da xrlátaje̱.
REV 16:8 Gubáz gudape' xeajlatje̱' xé'ena bzri chee̱' lau gubizra, na' gubizra guzí na lataj guzezxe na bénneache ca' nen xi' chee̱ na.
REV 16:9 Xúgute̱ bénneache gulézxele̱'e̱, ne quebe belexebí'i lazre̱', ne quebe belúe lá'ane̱' Dios, san gulenné̱' da cale̱la chee̱ Bénnea' nucueze̱' da ba xa' na'.
REV 16:10 Gubáz gázxue xeajlatje̱' xé'ena bzri chee̱' lawe' lataj naga dxe' be̱ xixre' snia, na' naga dxenná beaba' guchul-la na. Bénneache ca' gulagu xa'a luzre̱' lu xel-la' dxudía chee̱',
REV 16:11 ne quebe bulusane̱' da zrinnaj da dxelune̱'. Gulenné̱' da cale̱la chee̱ Dios zue̱' xabáa, lawe' da dxelezaque̱' caní ne̱ chee̱ we̱' da zaj zria be̱la' dxen chee̱' ca'.
REV 16:12 Gubáz xrupe xeajlatje̱' xé'ena bzri chee̱' lawe' xe̱gu zren le̱ na Eufrates, na' nisa xe̱gu na' bebizre na, chee̱ xalaj tu neza naga xeledé benne' dxjaca wedil-la chee̱ benne' wenná bea ca' zá'aque̱' naga dxalaj gubizra.
REV 16:13 Nadxa ble'eda' beledxúaj chunna be' xriwe̱' dxu'a be̱ snia schanni', ne dxu'a be̱ xixre' snia na', ne dxu'a benne' dxenné̱' waláz chee̱ba'. Be' xriwe̱' ca' zaj naca na ca bluzru ca'.
REV 16:14 Be' xriwe̱' caní belún na xel-la' waca zri'a ca', na' beledxúaj na chee̱ xulutupa na xúgute̱ benne' wenná bea chee̱ xe̱zr la xu, chee̱ chjaque̱' lu wedil-la chee̱ zra zren chee̱ Dios, Bénnea' nape̱' dute̱ xel-la' dxenná bea.
REV 16:15 Dxenná Xránadxu: ―Le na' xque, neda' xida' gate quebe dxebézale neda', ca za' tu benne' gubán. Ba neza zrente̱ naca na chee̱ bénnea' zue̱' ban lazre' ne nupé̱'e̱ lázrdawe̱' ca tu benne' dxuxúe̱' zra lane̱' chee̱ quebe te̱' gala xídeze, ne quebe xedué'ene̱' lau bénneache.
REV 16:16 Nadxa beledube̱' benne' wenná bea ca' lu lataj naga le̱ na Armagedón nen dizra' hebreo.
REV 16:17 Gubáz gazre na' xeajlatje̱' xé'ena bzri chee̱' lu be', na' lu xudau' da zua xabáa ben tu chi'i benne' dxenné̱' zizraj, da za na lataj blau naga dxe' Dios, dxenné̱': ―Bache naca na.
REV 16:18 Nadxa gule̱pe xesa, ne guleninne na, ne gulenné̱ guziu', na' lu xe̱zr la xu guzrú'le̱'e̱ ca netú lasa quebe ne xru', na' gulálate̱ zaj zra' bénneache lu xe̱zr la xu.
REV 16:19 Xe̱zre zrentau' na' guzrá na chunna cue', na' xe̱zre ca' zaj nita lu xe̱zr la xu gulebía xi na, na' xeajsá lazre' Dios benne' ca' chee̱ xe̱zre zrentau' na' le̱ na Babilonia chee̱ xeledée̱' lu da ba xa' zren da nucueza Dios lu xel-la' dxezrá'a chee̱'.
REV 16:20 Xúgute̱ xe̱zr la xu ca' da naxechaj nísadau', ne xúgute̱ xi'a ca' belexenite na.
REV 16:21 Cá'anqueze belexruj zran xabáa xiaj bezxe' zri'a lawe' bénneache ca', da dxelá'a na ca tu gaxúa xia weaj, na' bénneache ca' gulenné̱' da cale̱la chee̱ Dios ne̱ chee̱ da ba xa' da gulezaque̱', lawe' da guca na tu da ba xa' zrente̱.
REV 17:1 Nadxa bla' tu gubáz chee̱ gazre gubáz chee̱ xabáa ca', gubáz ca' bululátaje̱' xé'ena bzri ca', na' guzre̱' neda': ―Gudá, na' gulé'eda' lue' ca naca da ba xa' da saca' nu'ula na' dxúnle̱'e̱ da sban, nu'ula na' dxe'e̱ lawe' nísadau' ca'.
REV 17:2 Benne' wenná bea ca' zaj zre̱'e̱ xe̱zr la xu dxelune̱' da sban nen nu'ula na', na' benne' zaj zre̱'e̱ xe̱zr la xu zaj naque̱' ca benne' dxelezuzre' lawe' da dxelune̱' da sban nen nu'ula na'.
REV 17:3 Nadxa, lu da ble'e Be' Lá'azxa neda', gubáz chee̱ xabáa na' guché̱'e̱ neda' le̱'e̱ xixre' lawe' lataj, na' lataj na' ble'eda' tu nu'ula zrie̱' cuzru tu be̱ xixre' schanni' xrna, na' zaj naxúaj lu be̱la' dxen chee̱ba' laba' schanni' ca', da ca' dxecuide Dios, na' zaj naca gazre xíchajba', ne chi lúzuba'.
REV 17:4 Nu'ula nigá nacue̱' zra lane̱' bzawe, ne da xrna, na' lechítaje̱ chee̱' zaj naca na oro, ne xiaj xrtante̱, ne bga ca'. Nuxre̱' tu xé'ena bzri da naca na oro da nazrate̱ na da sgute ca', ne da sban da dxune̱'.
REV 17:5 Naxúaj luzrgue̱' ca le̱', da dxenná na: Babilonia, Xe̱zre Szrentau', Xrna' Xúgute̱ Nu'ula Ca' Dxelune̱' Da Sban, ne Xúgute̱ Da Sgute Da De̱ Xe̱zr La Xu.
REV 17:6 Nadxa ble'eda' nu'ula na' dxezúzrene̱' nen dxen chee̱ benne' ca' zaj naque̱' chee̱ Dios, ne chee̱ benne' ca' belute bénneache le̱' lawe' da belexeche̱be̱' chee̱ Jesús. Gate ble'eda' da na', bebánele̱'e̱da'.
REV 17:7 Nadxa gubáz chee̱ xabáa na' guzre̱' neda': ―¿Bizr chee̱ na' dxebánenu'? Gulé'eda' lue' ca naca da nagache chee̱ nu'ula nigá, ne chee̱ be̱ xixre' schanni' na' núaba' le̱', bea na' zaj napa gazre xíchajba', ne chi lúzuba'.
REV 17:8 Be̱ xixre' schanni' na' blé'enu', nácaba' tu be̱ zúaba' nédxute̱, na na'a québedxa zúaba'. Wagüenba' lu lataj chul-la nédxudxa ca za gáteba' tu chí'izqueze. Benne' zaj zra' xe̱zr la xu, ne quebe zaj naxúaj le̱' lu xiche chee̱ xel-la' nabán ca be̱nte̱ Dios xe̱zr la xu, xelexebánele̱'e̱ne̱' gate xelelé'ene̱' bea nigá, be̱ zúaqueze nédxute̱, na' na'a québedxa zúaba', na' wela'ba'.
REV 17:9 ’Nigá de̱ late' da gulé'eda' benne' xeléajni'ine̱' na. Gazre xíchajba' caní zaj zéaje̱ na gazre xi'a naga dxenná bea nu'ula na'.
REV 17:10 Cá'anqueze xíchajba' ca' zaj zéaje̱ na gazre benne' wenná bea. Gazxu' benne' wenná bea caní ba gulatie̱'. Tu benne' ca' dxenná be'e̱ na'a, na' xetue̱' quebe ne xide̱'. Gate la' benne' bze̱be nigá, québedxa súateque̱' scha'.
REV 17:11 Be̱ xixre' schanni' na', be̱ zúaba' nédxute̱, na' na'a québedxa zúaba', zéaje̱ na benne' xrunu' naque̱' benne' wenná bea. Naque̱' tu benne' ládujla benne' gazre ca', na' te na' gatie̱' tu chí'izqueze.
REV 17:12 ’Chi lúzu be̱ xixre' snia na' da blé'enu' zaj naca na chi benne' wenná bea ca', benne' quebe ne xelezú lawe̱' xelenná be'e̱, na' xelezí'e̱ xel-la' dxenná bea xelaque̱' wenná bea tu chí'idau'ze tu zren nen be̱ xixre' schanni' na'.
REV 17:13 Benne' chi wenná bea caní zaj nune̱' tuze dizra', na' xulunézruje̱' xel-la' szren chee̱', ne xel-la' dxenná bea chee̱' lu na' bénnea' naque̱' be̱ xixre' schanni' na'.
REV 17:14 Benne' caní xeledíl-lale̱ne' Bénnea' naque̱' Zríla'dau', na' Benne' nigá guzría xi'e̱ benne' wenná bea ca', lawe' da naca Le̱' Benne' Wenná Bea chee̱ benne' wenná bea ca', ne Xrane benne' zaj naque̱' xrane bénneache, na' benne' ca' zrále̱ne̱' Le̱', gunné̱ Dios le̱', ne guqué̱'e̱ le̱', na' zaj naque̱' li lazre'.
REV 17:15 Cá'anqueze gubáz chee̱ xabáa na' guzre̱' neda': ―Nísadau' ca' blé'enu', naga dxe' nu'ula na' dxúnle̱'e̱ da sban, zaj naca na xe̱zre bénneache ca', ne benne' dxelenné̱' dizra' walazre' cha chee̱', ne benne' zane cue' xe̱zr la xu.
REV 17:16 Chi lúzuba' na' blé'enu' xichaj be̱ xixre' schanni' na', da zaj naca na chi benne' wenná bea ca', xelecuídene̱' nu'ula na' dxúnle̱'e̱ da sban, na' xelebéaj xíchaje̱' le̱', ne xulucá'ane̱' le̱' gala xídeze. Xelawe̱' be̱la' dxen chee̱', ne xuluzezxe̱' le̱' lu xi'.
REV 17:17 Dios bzue̱' lu lázrdau benne' wenná bea ca' xelune̱' ca da dxaca lazre' Le̱', gate belune̱' tuze dizra', ne bulunézruje̱' xel-la' dxenná bea chee̱' lu na' bénnea' naque̱' be̱ xixre' schanni' na', cadxa gaca ca da ba gunná Dios.
REV 17:18 Nu'ula na' blé'enu' naque̱' Babilonia, xe̱zre zrentau' na' dxenná be'e na benne' wenná bea ca' zaj zre̱'e̱ xe̱zr la xu.
REV 18:1 Gudé na' ble'eda' betaj xetú gubáz chee̱ xabáa, nápale̱'e̱ xel-la' dxenná bea, na' bsení' xel-la' szren chee̱' lu xe̱zr la xu.
REV 18:2 Na' gunné̱' zizraj: ―Ba guzría xi'. Ba guzría xi' Babilonia, xe̱zre zrentau' na', ne ba bexaca na lataj naga zaj zra' da xriwe̱' ca', ne lataj naga zaj zra' xúgute̱ cue' be' xriwe̱' ca', ne lataj naga zaj zra' be̱ zua xrila, be̱ schanni' ca', ne be̱ sgute ca'.
REV 18:3 Xúgute̱ bénneache zaj zre̱'e̱ tu tu cue' xe̱zr la xu zaj naque̱' ca benne' dxelezuzre', lawe' da dxelune̱' da sban da dxaca xe̱zre na', na' benne' wenná bea ca' zaj zre̱'e̱ xe̱zr la xu belune̱' da sban da dxaca xe̱zre na', na' benne' ca' dxelúti'e gulaque̱' benne' gunní'a ne̱ chee̱ da zante̱ da gulezá lazre' benne' ca' zaj zre̱'e̱ xe̱zre na'.
REV 18:4 Nadxa benda' chi'i xetú benne' da za xabáa, dxenné̱': ―Le dxuaj xe̱zre na', le'e, nácale chia', chee̱ quebe gácale benne' ca' tuze lu dul-la da dxelune̱', ne chee̱ quebe tele lu da ba xa' da xelezaca benne' ca'.
REV 18:5 Dul-la chee̱ benne' ca' ba guxán na, na' zaj naca na ca tu da ba bgula, da ba bzrinte̱ na zran xabáa, na' Dios ba xeajsá lazre̱' ca naca da zrinnaj da dxelún benne' ca'.
REV 18:6 Dios gunézruje̱' chee̱ benne' ca' cáte̱ze da bulunézruje̱' chee̱ benne' xula, ne xunézruje̱' le̱' chupa cuenla ca da zrinnaj da belune̱'. Ba nucueze̱' da xelezaque̱' da nácale̱'e̱dxa zi' ca da bulusaque̱' benne' xula.
REV 18:7 Gudée̱' benne' ca' lu da ba xa', ne gudée̱' le̱' xel-la' zi' cáte̱ze na' belune̱'. Buluzúa cuine̱' lu xel-la' szren, ne gulezúe̱' lu xel-la' dxelexezaca ba lazre' chee̱', lawe' da dxelenné̱' lu lázrdawe̱': Dxé'entu' nigá dxenná béantu'. Quebe nácantu' we̱ze̱be, ne quebe bi sácantu'.
REV 18:8 Chee̱ le̱ na', tuze zra xelezrín da ba xa' ca' da xelezaque̱', xel-la' gute, ne xel-la' zi', ne xel-la' dxedún, na' xelezxe̱' lu xi', lawe' da napa Xránadxu Dios dute̱ xel-la' dxenná bea, na' naque̱' Bénnea' guchugue̱' chee̱ benne' ca' xelezaque̱' caní.
REV 18:9 Benne' wenná bea ca' zaj zre̱'e̱ xe̱zr la xu, ne belúnle̱ne̱' benne' ca' da sban ne da belexezaca ba lazre̱', xelebezre xache̱' gate xelelé'ene̱' ca naca zren chee̱ xe̱zre na', da dxezxe na.
REV 18:10 Welezé̱' zítu'la lawe' da xelezrebe̱' xelezaque̱' ca da dxelezaca benne' ca', na' xelenné̱': ―Baxache' nácale le'e, benne' zaj zre̱'e̱ xe̱zre zrentau', Babilonia, lawe' da chadite̱ bla' da ba xa' da dxezácale.
REV 18:11 Cá'anqueze benne' ca' dxelúti'e, benne' zaj zre̱'e̱ xe̱zr la xu, welebezre̱', ne welebezre xáchequeze̱' ca naca da dxaca chee̱ xe̱zre na', lawe' da québedxa nu chilá' benne' si'e̱ da dxeluti'e̱,
REV 18:12 da zaj naca oro, ne plata, ne xiaj xrtante̱ ca', ne bga ca', ne ladxe' zaca ca', ne ladxe' bzawe ne da xrna, ne xúgute̱ cue' xaga ca' dxelelále̱'e̱ na zixre, ne zrita xrtante̱, ne xaga xrtante̱, ne xia gache, ne xia, ne xiaj esa',
REV 18:13 ne lacu zixre, ne xíxre'dau' dxelále̱'e̱ na zixre, ne xala, ne da ca' dxelelále̱'e̱ na zixre, ne xrise uva wala, ne za xel-la' wagu, ne xrte xezaj, ne zrua' xtila, ne be̱ xixre', be̱ dxelúa xua', ne zrila' ca', ne bzrina' ca', ne da ca' dxudé xua, ne benne' ca' dxelúti'e̱ le̱' lu na' benne' gunní'a ca'.
REV 18:14 Benne' caní xelé̱'e̱ benne' zaj zre̱'e̱ xe̱zre na': ―Na'a québedxa gápale da zixre ca' da zácale̱'e̱ na da bdánnele̱'e̱le, ne ba bnítele tu chí'izqueze xúgute̱ xel-la' gunní'a chee̱le, ne da xrtante̱ chee̱le.
REV 18:15 Benne' ca' belúti'e̱ da ca' xelezé̱' zítu'la lawe' da dxelezrebe̱' xelezaque̱' ca da dxelezaca benne' zaj zre̱'e̱ xe̱zre na', na' xelebezre̱', ne xelebezre xáchequeze̱',
REV 18:16 na' xelenné̱': ―Baxache' zaj naca benne' ca' zaj zre̱'e̱ xe̱zre zrentau' na'. Gulaque̱' ca tu nu'ula nacue̱' ladxe' zácale̱'e̱ da bzawe, ne da xrna, ne nazí'e̱ lechítaje̱ da naca na oro, ne xiaj xrtante̱, ne bga ca'.
REV 18:17 Chadite̱ benite xel-la' gunní'a na', ne guxezxe na. Xúgute̱ benne' xrane da ca' dxeledán lawe' nísadau', ne benne' zaj zre̱'e̱ lu'ule na, ne benne' dxulusé̱'e̱ da ca' dxeledán lawe' nísadau', ne benne' dxelune̱' zrin lu nísadau' belezé̱' zítu'la,
REV 18:18 na' gate belelé'ene̱' zren chee̱ xe̱zre na' dxezxe na, na' gulenné̱' zizraj: ―¿Bízraqueze xetú xe̱zre naca na da zren ca xe̱zre zrentau' nigá?
REV 18:19 Dute̱ xel-la' dxelexewí'ine lazre' xuluzré̱'e̱ xu xíchaje̱' ca', ne xelebezre̱', ne xelebezre xáchequeze̱', xelenné̱': ―Baxache' zaj naca benne' ca' zaj zre̱'e̱ xe̱zre zrentau' na'. Nen xel-la' gunní'a chee̱ benne' ca' gulenni'a xúgute̱ benne' ca' zaj nape̱' da ca' dxeledán lawe' nísadau'. Chadite̱ guzría xi' xe̱zre zrentau' na'.
REV 18:20 Ca guca chee̱ xe̱zre na', le be, le'e zrale xabáa, ne le'e, gubáz chee̱ Cristo, ne le'e bchálajle waláz chee̱ Dios, ne xúgute̱le le'e nácale bi chee̱ Dios, lawe' da gate bzria xi' Dios xe̱zre na', bebéaj lazre̱' da naca chee̱le le'e.
REV 18:21 Nadxa tu gubáz chee̱ xabáa, gubáz nápale̱'e̱ xel-la' dxenná bea guchise̱' tu xiaj zren da naca na ca xiaj xiche, na' bzale̱' na lu nísadau', gunné̱': ―Cá'ante cuía xi' Babilonia, xe̱zre zrentau' na', na' québedxa nu lé'equezdxa le̱ na,
REV 18:22 ne québedxa nu xen la neza chee̱ xe̱zre na' da ca' dxulugul-la bénneache, da can zríadi'i na du, ne bchiuj, ne luzu da dxulucuezre̱', ne québedxa nu chilá' gun zrin lu xe̱zre na', ne québedxa xen schaga da dxun da dxutu na.
REV 18:23 Québedxa gusení' netú xi' lu xe̱zre na', ne québedxa xen laní chee̱ wechaga na' ga na', lácala benne' ca' belúti'e̱ lu xe̱zre na' gulenná be'e̱ lawe' xúgute̱ benne' zaj zre̱'e̱ xe̱zr la xu, ne gulezí xe̱'e̱ xúgute̱ cue' xe̱zr la xu nen xel-la' wazrá' chee̱'.
REV 18:24 Caní guca lawe' da lu xe̱zre na' gulalaj dxen chee̱ benne' ca' gulenné̱' waláz chee̱ Dios, ne dxen chee̱ benne' ca' zaj naque̱' bi chee̱ Dios, ne dxen chee̱ benne' ca' belute bénneache le̱' du ca naca xe̱zr la xu.
REV 19:1 Gudé na' benda' chi'i benne' zan zaj zre̱'e̱ xabáa, dxelenné̱' zizraj: ¡Gaca ba Dios! ¡Xel-la' weselá, ne xel-la' szren, ne xel-la' dxenná bea zaj naca na chee̱ Dios chee̱dxu.
REV 19:2 Ca dxuchi'a Le̱', xrlátaje̱, ne li lazre' naca na! ¡Ba bzria xi'e̱ xe̱zre na' dxulé'e na nu'ula na' núnle̱'e̱ da sban, nu'ula na' bxrínnaje̱' bénneache zaj zre̱'e̱ dute̱ xe̱zr la xu lu da sban da be̱ne̱'! ¡Dios ba bebéaj lazre̱' nu'ula na' lawe' da be̱tie̱' we̱n zrin ca' chee̱ Dios!
REV 19:3 Nadxa gulenné̱' da xula: ―¡Gaca ba Dios lawe' da tu cuénzqueze zren chee̱ xe̱zre na' dxezxe na!
REV 19:4 Nadxa tape dxua benne' gula ca' ne tapa benne' ban ca' buluzú zribe̱', na' bulucá'ana szrene̱' Dios, Bénnea' dxe'e̱ lataj blau na', dxelenné̱': ―¡Ca' naca na! ¡Gaca ba Dios!
REV 19:5 Nadxa ben tu chi'i benne' lu lataj blau na', dxenné̱': ¡Le güe lá'ana Dios chee̱dxu, xúgute̱le le'e dxunle zrin chee̱', ne dxezrébele Le̱', le'e benne' blau, ne benne' quebe nu nácale!
REV 19:6 Cá'anqueze benda' tu da naca ca chi'i benne' zan, ca dxeleninne zánete̱ xe̱gu, ne ca dxelenné̱le̱'e̱ guziu' ca', dxelenné̱': ¡Gaca ba Dios lawe' da ba guzú lau dxenná bea Xránadxu Dios, Benne' nape̱' dute̱ xel-la' dxenná bea!
REV 19:7 ¡Du be! ¡Béle̱'e̱quezdxu, ne güe lá'anadxu Le̱'! ¡Ba bzrin zra chee̱ laní wechaga na' chee̱ Bénnea' naque̱' Zríla'dau'! Nu'ula na' si'e̱ ba nupá'a cuínabe',
REV 19:8 nu'ula na' nazi'ibe' lataj nácube' ladxe' zaca, da quebe nadxén na, ne dxácatite na. Ladxe' zaca na' zéaje̱ na da xrlátaje̱ da zaj nun benne' ca' zaj naque̱' bi chee̱ Dios.
REV 19:9 Nadxa guzre gubáz chee̱ xabáa neda': ―Bzuaj caní: Ba neza zren naca na chee̱ benne' ca' gunné̱ Dios xelelé̱'e̱ laní wechaga na' chee̱ Bénnea' naque̱' Zríla'dau'. Nadxa guzre̱' neda': ―Da caní zaj naca na dizra' li chee̱ Dios.
REV 19:10 Nadxa bzu zriba' lau gubáz chee̱ xabáa na' chee̱ gucá'ana szrena' le̱', na' le̱' guzre̱' neda': ―Quebe gunu' caní lawe' da nácaqueza' neda' we̱n zrin chee̱ Dios ca lue', ne ca benne' bichu' ca' zéajle̱le da li na' da ble'e Jesús le'e. Bca'ana szren Dios. Da li na' da ble'e Jesús le'e naca na da dxelenná benne' ca' dxuluchálaje̱' waláz chee̱ Dios.
REV 19:11 Nadxa ble'eda' ba naxalaj xabáa, na' ble'e lau tu bzrina' chiche, na' Benne' zrie̱'-ba' le̱' Du Lazre', ne Li Lazre', lawe' da dxenná be'e̱, ne dxune̱' wedil-la lu da xrlátaje̱.
REV 19:12 Xiaj lawe̱' dxelácatite na ca xi' ca, na' xíchaje̱' zaj zria zánete̱ da zaca ca', na' naxúaj tu le̱' lawe̱', da nézene̱' tuze Le̱'.
REV 19:13 Nacue̱' tu zre̱' da nazaj na dxen, na' La Le̱' naca na Xrtizra Dios.
REV 19:14 Xúgute̱ benne' ca' zaj zre̱'e̱ xabáa zjácale̱ne̱' Le̱', zaj nacue̱' ladxe' zaca ca', ladxe' chiche zríladau', ne zaj zrie̱' bzrina' chiche ca'.
REV 19:15 Dxu'a Bénnea' zua tu da naca na ca tu xia nalále̱'e̱ da quine̱' benne' xe̱zre ca', na' nna be'ene̱' benne' ca' nen tu bar xia. Le̱' guzría xi'e̱ benne' ca' ca tu benne' dxesíe̱' uva ca', ne dxuléaje̱' na, da zéaje̱ na da ba xa' da nucueza Dios lu xel-la' dxezrá'a chee̱', ca da xelezaca bénneache ca'.
REV 19:16 Naxúaj le̱'e̱ zre̱', ne zríchuje̱' da nazí Le̱' caní: Benne' Dxenná Be'ene̱' Benne' Wenná Bea Ca', ne Xrane Benne' Ca' Zaj Naque̱' Xrane Bénneache.
REV 19:17 Nadxa ble'eda' tu gubáz chee̱ xabáa ze̱' lu gubizra, na' gunné̱' zizraj xúgute̱ be̱ zua xrila, be̱ dxeledá zran xabáa, dxenné̱': ―Le da. Le zraga gágule da dxúnnale̱'e̱ Dios le'e,
REV 19:18 chee̱ gágule be̱la dxen chee̱ benne' wenná bea ca', ne chee̱ benne' dxelenná be'e̱ lu wedil-la, ne chee̱ benne' wal-la ca', ne chee̱ bzrina' ca', ne chee̱ benne' zaj zrie̱'-ba', ne chee̱ xúgute̱ bénneache, benne' ca' zaj nadá'ue̱', ne benne' ca' quebe zaj nadá'ue̱', benne' blau ca' ne benne' quebe nu zaj naque̱'.
REV 19:19 Nadxa ble'eda' be̱ xixre' schanni', ne ca naca benne' wenná bea zaj zre̱'e̱ xe̱zr la xu nen benne' dxjaca wedil-la chee̱ ' ca', ba nazrague̱' chee̱ xeledíl-lale̱ne' Bénnea' zrie̱' bzrina' chiche na', ne nen benne' ca' zaj de̱'e̱ Le̱'.
REV 19:20 Gule̱l-le̱' be̱ xixre' schanni' na' tu zren nen bénnea' gunné̱' waláz chee̱ba', bénnea' bé̱nle̱'e̱ xel-la' waca zren lauba'. Ne̱ chee̱ xel-la' waca caní da be̱ne̱', benne' nigá guzí xe̱'e̱ benne' ca' belú'e̱ lataj guzriche luzrgue̱' laba', ne bulucá'ana szrene̱' bedau' chee̱ba'. Nadxa beleché̱'e̱ be̱ xixre' schanni' na', ne bénnea' gunné̱' waláz chee̱ba', na' belegu'e̱ le̱' zaj nabante̱' lu xi' chee̱ da dxuzézxele̱'e̱ na da dxe' ca tu nísadau'.
REV 19:21 Nadxa Bénnea' zrie̱' bzrina' chiche be̱tie̱' benne' ca' xezícala nen xia nalá na' zua dxu'e, na' xúgute̱ bea ca' zaj zua xrila gulélajba' be̱la dxen chee̱ benne' ca'.
REV 20:1 Gudé na' ble'eda' betaj tu gubáz chee̱ xabáa, nuxre̱' zren xia chee̱ lataj chul-la, ne nuxre̱' tu du xia zren.
REV 20:2 Gubáz nigá gude̱l-le̱' be̱ snia schanni', nácaba' be̱la' zua nédxute̱, ne nácaba' da xriwe̱', ne Satanás, na' bcheaje̱'-ba' du xia lawe' chi gaxúa iza.
REV 20:3 Na' gudxú'une̱'-ba' lataj chul-la na' naga bsézxuje̱'-ba', na' bde̱'e̱ le̱'e dxa xu'u na' tu da gunna bea na, chee̱ québedxa si xe̱ na bénneache chee̱ xe̱zr la xu ca' cadxa te chi gaxúa iza. Te chee̱ chi gaxúa iza, dxal-la' xelá' na tu chí'idau'.
REV 20:4 Nadxa ble'eda' lataj blau ca', naga zaj dxe' benne' ca' ba zaj nazi'e̱ xel-la' dxenná bea chee̱ xuluchi'e̱ ca da zaj nun bénneache. Cá'anqueze ble'eda' bénne'du ca' gulexú'u bénneache ca' gulechugu bénneache xíchaje̱' lawe' da belexeche̱be̱' chee̱ Jesús, ne buluchálaje̱' xrtizra Dios. Benne' caní quebe bulucá'ana szrene̱' be̱ xixre' schanni' na', ne bedau' chee̱ba', ne quebe belú'e̱ lataj zriche laba' luzrgue̱', u ne̱'e̱.
REV 20:5 Benne' gate ca' xezícala quebe xelexebane̱' ca tedxa chee̱ chi gaxúa iza ca'. Da nigá guca naca na xel-la' dxexebán nedxu.
REV 20:6 Ba neza zrente̱ naca na chee̱ benne' ca' zaj naque̱' bi chee̱ Dios, benne' ca' xelexebane̱' nedxu. Da zi' da xa' da zeajlí canna quebe seque' bi gune na benne' ca'. Xelaque̱' bxruze chee̱ Dios, ne chee̱ Cristo, na' xelenná be'e̱ tu zren nen Le̱' chi gaxúa iza.
REV 20:7 Ca te chee̱ chi gaxúa iza ca', na' la' Satanás naga nadxéaj na,
REV 20:8 na' xedxúaj na chee̱ cheajxrí xe̱ na bénneache zaj zre̱'e̱ xúgute̱ cue' xe̱zr la xu ca'. Si xe̱ na bénneache xe̱zre Gog, ne xe̱zre Magog, na' guchaga na benne' dxjaque̱' wedil-la chee̱ xúgute̱ cue' xe̱zr la xu lu wedil-la, na' benne' dxjaque̱' wedil-la zaj naque̱' benne' zan ca naxán xuzre' da dxe' dxu'a tu xe̱gu zren.
REV 20:9 Ca' guca, beledxúaje̱' du ca naca lu xe̱zr la xu, na' guléchaje̱' naga zaj zra' benne' zaj naque̱' chee̱ Dios, ne xe̱zre na' da nazrí'i Dios. Nadxa Dios gusel-le̱' xi' da za' xabáa, na' bzezxe xi' na' ca naca benne' ca'.
REV 20:10 Nadxa gule̱l-le̱' da xriwe̱', da guzí xe̱ na bénneache ca', na' guledxú'une̱' na lu xi' chee̱ da dxuzézrele̱'e na da dxe' ca tu nísadau', naga zaj zra' be̱ xixre' schanni', ne bénnea' gunné̱' waláz chee̱ba'. Lu xi' na' xeledée̱' lu da ba xa' te zra, ne chizrela chadía chacanna.
REV 20:11 Nadxa ble'eda' tu lataj blau chiche, ne Bénnea' dxe'e̱ lataj na'. Lau Le̱' belexenite xe̱zr la xu, ne xabáa, na' québedxa nu benne' lé'ene̱' da ca'.
REV 20:12 Nadxa ble'eda' benne' gate ca', benne' blau, ne benne' quebe nu zaj naque̱', zaj ze̱' lau Dios, na' belexalaj xiche ca', ne cá'anqueze xetú xiche naga zaj naxúaj la benne' ca' zaj nape̱' xel-la' nabán. Dios bchi'e̱ chee̱ benne' ca' cáte̱ze da belún tu tue̱', da ca' zaj naxúaj na lu xiche ca'.
REV 20:13 Belexedxúaj benne' gate ca' zaj nagache̱' lu nísadau', ne belexedxúaj benne' gate ca' zaj nagache̱' lataj chul-la chee̱ benne' gate, na' Dios bchi'e̱ chee̱ xúgute̱' cáte̱ze da belún tu tue̱'.
REV 20:14 Nadxa guledxú'une̱' benne' gate ca' gulezúe̱' lataj chul-la naga zra' benne' gate lu xi' chee̱ da dxuzézrele̱'e na da dxe' ca tu nísadau'. Xi' nigá naca na da zi' da xa' da zeajlí canna,
REV 20:15 na' lu xi' nigá guledxú'une̱' xúgute̱ benne' ca' quebe zaj naxúaj le̱' lu xiche chee̱ xel-la' nabán.
REV 21:1 Ca gudé na' ble'eda' tu xabáa cube, ne tu xe̱zr la xu cube, lawe' da belexenite xabáa nedxu, ne xe̱zr la xu nedxu, na' québedxa de̱ nísadau'.
REV 21:2 Neda', Juan, ble'eda' xe̱zre lá'azxa, da naca na Jerusalén cube, dxetaj na xabáa, za na naga zua Dios. Xe̱zre na' nabeza na ca tu nu'ula wechaga na' nupá'a cuínabe' chee̱ gácabe' tuze nen benne' chee̱be'.
REV 21:3 Benda' chi'i tu benne' da za' xabáa, dxenné̱': ―Gunná'xque, Dios zue̱' ládujla bénneache, na' xelaque̱' xe̱zre chee̱', na' Dios súaqueze̱' nen benne' ca', ne gaque̱' Dios chee̱'.
REV 21:4 Dios tu súale̱zqueze̱' benne' ca' chee̱ québedxa xelebezre̱', na' québedxa gata' xel-la' gute, ne xel-la' gubezre, ne xel-la' dxebezre xache', ne xel-la' dxudía, lawe' da ba gudé chee̱ xúgute̱ da gulaca nédxute̱.
REV 21:5 Nadxa Dios, Bénnea' dxe'e̱ lataj blau na' gunné̱': ―Gunná'xque, neda' dxuna' cube xúgute̱ da ca'. Cá'anqueze gunné̱': ―Bzuaj dizra' caní lawe' da naca li lazre', na' waca guxrén lázrele le̱ na.
REV 21:6 Gudé na' guzre̱' neda': ―Ba be̱na' xúgute̱ da ba gunnía' guna'. Neda' naca' Benne' zúaqueze̱' nédxudaute̱, ne Benne' zúaqueze̱' bzé̱bedxa. Naca' Bénnea' dxuna' su lau sua xúgute̱, ne dxuna' xexuzre na. Nu benne' dxebílene̱', neda' gunézruja' nisa beaj xí'aje̱' da gunezruj na le̱' xel-la' nabán, ne quebe bi quízruje̱'.
REV 21:7 Nu benne' zrue'ene̱' si'e̱ xúgute̱ da caní, neda' gaca' Dios chee̱', na' le̱' gaque̱' zri'ina'.
REV 21:8 Benne' ca' zaj naque̱' zra' chebe, ne benne' ca' quebe dxeléajle̱'e̱ chia', ne benne' ca' dxelune̱' da zrinnaj, ne benne' ca' dxelutie̱' benne', ne benne' dxelune̱' da sban, ne benne' wazrá' ca', ne benne' dxulucá'ana szrene̱' bedau' xiaj xaga ca', ne xúgute̱ benne' dxelún lazre̱', gudéa' le̱' lu xi' chee̱ da dxuzézrele̱'e na da dxe' ca nísadau', da naca na da zi' da xa' da zeajlí canna.
REV 21:9 Nadxa bla' tu gubáz chee̱ gazre gubáz chee̱ xabáa ca' belúxrue̱' gazre xé'ena bzri ca' naga zaj xu'u da gazre da ba xa' bze̱be ca', na' guzre̱' neda': ―Gudá. Gulé'eda' lue' nu'ula wechaga na', zru'ula Bénnea' naque̱' Zríla'dau'.
REV 21:10 Lu da ble'e Be' Lá'azxa neda', gubáz chee̱ xabáa na' guché̱'e̱ neda' tu xi'a zren, ne sibe, na' blé'ene̱' neda' ca naca xe̱zre lá'azxa zren na', Jerusalén cube. Dxetaj na xabáa naga zua Dios.
REV 21:11 Xe̱zre nigá dxácatite na nen da xabáa chee̱ Dios, na' xel-la' dxácatite chee̱ na naca na ca dxácatite tu xiaj xrtante̱, ca tu xiaj jaspe, da naca na ca xiaj esa' xrtante̱.
REV 21:12 Dxu'a xe̱zre na' naxechaj na tu ze'e sibe, na' napa na chazrinnu dxa xu'u, na' tu tu dxa xu'u ca' zaj ze̱ tu weaj gubáz chee̱ xabáa, na' le̱'e̱ dxa xu'u ca' zaj naxúaj la chazrinnu cue' benne' Israel.
REV 21:13 Zaj zua chunna dxa xu'u weaj dapa sácate̱.
REV 21:14 Lu lane ze'e da naxechaj na xe̱zre na' zaj zra' chazrinnu xiaj, na' zaj naxúaj lu xiaj ca' la chazrinnu benne' gubáz chee̱ Bénnea' naque̱' Zríla'dau'.
REV 21:15 Gubáz chee̱ xabáa na' dxuchálajle̱ne̱' neda' nuxre̱' tu da naca na ca tu xia xtila da naca na oro chee̱ gudxixre̱' xe̱zre na', ne dxa xu'u chee̱ na ca', ne ze'e da naxechaj na.
REV 21:16 Xe̱zre na' naca na lé̱bete̱ dapa saca. Lé̱bete̱ naca na xel-la' tunna, ne xel-la' laga chee̱ na. Gubáz na' bdxixre̱' xe̱zre na' nen da nuxre̱', na' naca na laga catite̱ sadxu tapa gaxúa zra, na' xel-la' laga, ne xel-la' tunna, ne xel-la' sibe chee̱ na zaj naca na lé̱bete̱.
REV 21:17 Gudé na' bdxixre̱' xel-la' sibe chee̱ ze'e na' naxechaj na. Naca na tu gaxúa tape xun zrita, na' chazrita chee̱ gubáz chee̱ xabáa na' naca na lé̱bete̱ ca chee̱ bénneache.
REV 21:18 Ze'e na' da naxechaj na xe̱zre na' naca na xiaj jaspe, na' xe̱zre na' naca na oro du lazre', da naca na ca xiaj esa' du lazre'.
REV 21:19 Xiaj lane ze'e na' zaj naca na xiaj xrtante̱ ca': Xiaj nedxu naca na xiaj jaspe, na' xiaj gudxupe' naca na xiaj zafiro, na' xiaj guxunne' naca na xiaj ágata, na' xiaj gudape' naca na xiaj esmeralda,
REV 21:20 na' xiaj gázxue naca na xiaj ónice, na' xiaj xrupe naca na xiaj cornalina, na' xiaj gazre naca na xiaj crisólito, na' xiaj xrunu' naca na xiaj berilo, na' xiaj ga naca na xiaj topacio, na' xiaj chi naca na xiaj crisoprasa, na' xiaj chinéaj naca na xiaj jacinto, na' xiaj chazrinnu naca na xiaj amatista.
REV 21:21 Chazrinnu da dxusezxuj na dxa xu'u ca' zaj naca na chazrinnu bga ca'. Tu tu na naca na tuze bga. Neza blau chee̱ xe̱zre na' naca na oro du lazre', ca xiaj esa' du lazre'.
REV 21:22 Quebe ble'eda' netú xudau' xe̱zre na', lawe' da Xránadxu Dios, Bénnea' nape̱' dute̱ xel-la' dxenná bea, nácaqueze̱' xudau' chee̱ xe̱zre na', ne cá'anqueze naca Bénnea' naque̱' Zríla'dau'.
REV 21:23 Xe̱zre na' quebe nachine na gusení' gubizra na', ne beu', lawe' da dxusení'queze da xabáa chee̱ Dios ga na', na' Bénnea' naque̱' Zríla'dau' naque̱' xel-la' naxaní' chee̱ na.
REV 21:24 Bénneache chee̱ xúgute̱ cue' xe̱zr la xu, bénneache gulelé̱', xeledé̱' lu xel-la' naxaní' chee̱ xe̱zre na', na' benne' wenná bea ca' chee̱ xe̱zr la xu xelu'e̱ da gunni'a chee̱' lu xe̱zre na'.
REV 21:25 Dxa xu'u chee̱ xe̱zre na' quebe xelezxuj na te zra, na' québedxa gata' chizrela.
REV 21:26 Xelu'e̱ xel-la' szren, ne xel-la' ba lá'ana chee̱ xúgute̱ cue' xe̱zr la xu lu xe̱zre na'.
REV 21:27 Cabata' chu'u da sban ga na', ne netú benne' dxune̱' da zrinnaj, ne netú benne' dxun lazre'. Xelú'uze benne' ca' zaj naxúaj le̱' lu xiche chee̱ xel-la' nabán da napa Bénnea' naque̱' Zríla'dau'.
REV 22:1 Nadxa gubáz chee̱ xabáa na' blé'ene̱' neda' tu xe̱gu nisa da dxunna na xel-la' nabán. Naca na xaní' ca xiaj esa', na' dxedxuaj na lataj blau naga zaj dxe' Dios, ne Bénnea' naque̱' Zríla'dau'.
REV 22:2 Laduj neza blau chee̱ xe̱zre na' zaj naxaza xaga dxupa la'a dxu'a xe̱gu na', na' da zixre chee̱ xaga caní zaj naca na da dxunna na xel-la' nabán, ne dxebía na da zixre chazrinnu lasa tu tu iza. Dxebía na da zixre chee̱ na tu tu beu', na' xrlegue xaga na' naca na da dxexún na benne' zaj zre̱'e̱ du gabí'i xe̱zr la xu.
REV 22:3 Québedxa bi gata' da xu'u de'. Lataj blau naga zaj dxe' Dios, ne Bénnea' naque̱' Zríla'dau' sua na lu xe̱zre na', na' benne' we̱n zrin chee̱' ca' xulucá'ana szrene̱' Le̱'.
REV 22:4 Xelelé'ene̱' Le̱' caníqueze, na' La Dios zriche na luzrgá benne' ca'.
REV 22:5 Québedxa gata' chizrela ga na', na' benne' zaj zre̱'e̱ na' quebe xelechinne̱' xi', ne xel-la' naxaní' chee̱ gubizra, lawe' da Xránadxu Dios guseni'e̱ benne' ca', na' benne' ca' xelenná be'e̱ chadía chacanna.
REV 22:6 Nadxa gubáz chee̱ xabáa na' guzre̱' neda': ―Dizra' caní zaj naca na li lazre', ne waca guxrén lázrele le̱ na. Xránadxu Dios, Bénnea' dxuzúe̱' Be' chee̱' xichaj lázrdau benne' ca' dxelenné̱' waláz chee̱' ba gusel-le̱' gubáz chee̱ xabáa chee̱' chee̱ gulé'ene̱' benne' we̱n zrin chee̱' da ba zua gaca,
REV 22:7 dxenné̱': “La zátequeza'. Ba neza zrente̱ naca na chee̱ benne' zéajle̱ne̱' dizra' chee̱ Dios da naxúaj na lu xiche nigá.”
REV 22:8 Neda', Juan, benda', ne ble'eda' da caní. Ca gudé benda' na, na' bzu zriba' zran ni'a gubáz chee̱ xabáa na', gubáz blé'ene̱' neda' da caní chee̱ gucá'ana szrena' le̱'.
REV 22:9 Na' le̱' guzre̱' neda': ―Quebe gunu' ca' lawe' da naca' we̱n zrin chee̱ Dios ca nacu' lue', ne ca zaj naca benne' bichu' ca' dxelenné̱' waláz chee̱ Dios, ne ca zaj naca xúgute̱ benne' ca' zjácale̱ne̱' ca da naxúaj na lu xiche nigá. Bca'ana szren Dios.
REV 22:10 Cá'anqueze guzre̱' neda': ―Quebe gucachu' ca naca dizra' chee̱ Dios da naxúaj na lu xiche nigá lawe' da ba zua gaca da naxúaj na.
REV 22:11 Dxácate̱ na', be̱' lataj benne' dxelune̱' da zrinnaj xelúnqueze̱' da zrinnaj dxelune̱', ne benne' ca' dxelune̱' da sban xelúnqueze̱' da sban na', san benne' xrlátaje ca' xelúnqueze̱' da xrlátaje, na' benne' zaj naque̱' bi chee̱ Dios chjácale̱queze̱' da naca na chee̱'.
REV 22:12 Dxenné̱': ―Ca' naca. La zátequeza', ne nu'a ca naca da gunézruja' tu tu benne' ca', cáte̱ze da zaj nun tu tue̱'.
REV 22:13 Neda' naca' benne' zúaqueza' nédxudaute̱, ne benne' zúaqueza' bzé̱bedxa, bénnea' dxuna' su lau sua xúgute̱, ne dxuna' xexuzre na.
REV 22:14 Ba neza zrente̱ naca na chee̱ benne' ca' dxulupé̱'e̱ xichaj lázrdawe̱' ca tu benne' dxibe̱' zra lane̱', chee̱ xelape̱' lataj xelawe̱' da zixre chee̱ xaga da dxunna na xel-la' nabán, na' caní xelezéquene̱' xelu'e̱ lu dxa xu'u chee̱ xe̱zre na'.
REV 22:15 Benne' ca' dxelune̱' da zrinnaj quebe xelu'e̱ ga na', ne québequeze xelú'u benne' wazrá' ca', ne benne' dxelune̱' da sban ca', ne benne' we̱te benne', ne benne' dxulucá'ana szrene̱' bedau' xiaj xaga ca', ne benne' zaj nazri'ine̱' da we̱n lazre', ne benne' dxelún lazre̱'.
REV 22:16 Neda', Jesús, ba gusel-la' gubáz chee̱ xabáa chia' chee̱ xuluzenne̱' tu tu cue' bénneache chia' ca naca da nigá. Neda' naca' ca xra xrtau David, benne' wenná bea, ne naca' zri'ine zre sua David na'. Neda' naca' ca belaj zila da dxácatitele̱'e̱ na.
REV 22:17 Be' Lá'azxa, ne benne' ca' zaj naca ca zru'ula Bénnea' naque̱' Zríla'dau', dxelenné̱': ―Gudá, Xran. Nu benne' xenne̱' da nigá dxal-la' nne̱': ―Gudá, Xran. Benne' dxebílene̱', ne dxaca lazre̱' dxal-la' xide̱', na' xí'aje̱' nisa da dxunna na xel-la' nabán, na' quebe bi quízruje̱'.
REV 22:18 Xúgute̱le le'e dxulábale dizra' chee̱ Dios da naxúaj na lu xiche nigá, neda' dxuzéajni'ida' le'e da nigá: Che nu benne' bi gudé̱'e̱ chee̱ da caní, Dios gudé̱'e̱ chee̱ bénnea' da ba xa' ca' da zaj naxúaj na lu xiche nigá.
REV 22:19 Cá'anqueze che nu benne' bi xequé̱'e̱ chee̱ da zaj naxúaj na lu xiche nigá, Dios wecá'aqueze̱' da naca chee̱ bénnea' lu xiche chee̱ xel-la' nabán, ne lu xe̱zre lá'azxa chee̱', cáte̱ze naxúaj na lu xiche nigá.
REV 22:20 Xránadxu, Bénnea' dxulé'ene̱' da nigá, dxenné̱': ―Ca' naca na. La záte̱queza'. ¡Ca' gaca na! ¡Gudá, Xrana' Jesús!
REV 22:21 Dxenaba' Xránadxu Jesucristo gune̱' da chawe' chee̱le le'e, xúgute̱le. ¡Ca'an gaca na!
