MAT 1:1 Lo yetsi‑ni rigixxi'a lá ka benne ukake xutto Jesucristuha. Labie uke benne datie David lhe Abraham lhe.
MAT 1:2 Abraham‑ni bije Isaac, Isaac‑ni nna bije Jacob, Jacob‑ni nna bije Judá lhe ka betsiniha lhe.
MAT 1:3 Judá‑ni nna bije Fares lhe Zara lhe. Nan ge ka benneha uke Tamar. Fares‑ni nna bije Esrom, Esrom‑ni nna bije Aram.
MAT 1:4 Aram‑ni nna bije Aminadab, Aminadab‑ni nna bije Naasón, Naasón‑ni nna bije Salmón.
MAT 1:5 Salmón‑ni nna bije Booz. Nan ge Booz‑ni nna uke Rahab. Booz‑ni nna bije Obed. Nan ge Obed nna uke Rut. Obed‑ni nna bije Isaí.
MAT 1:6 Isaí‑ni nna bije David benne unnabie ka benne Israel‑ni. David‑ni nna bije Salomón. Nan ge Salomón‑ni nna uke nuila ge Urías.
MAT 1:7 Salomón‑ni nna bije Roboam, Roboam‑ni nna bije Abías, Abías‑ni nna bije Asa.
MAT 1:8 Asa‑ni nna bije Josafat, Josafat‑ni nna bije Joram, Joram‑ni nna bije Uzías.
MAT 1:9 Uzías‑ni nna bije Jotam, Jotam‑ni nna bije Acaz, Acaz‑ni nna bije Ezequías.
MAT 1:10 Ezequías‑ni nna bije Manasés, Manasés‑ni nna bije Amón, Amón‑ni nna bije Josías.
MAT 1:11 Josías‑ni nna bije Jeconías lhe ka betsiniha lhe. La'ania nuha bedaxxu ka nu Babilonia‑ni ka benne Israel‑ni nna dechekana ke daka lo yu gekaniha.
MAT 1:12 Iki de chi bisinke Babilonia, Jeconías‑ni nna bije Salatiel, Salatiel‑ni nna bije Zorobabel.
MAT 1:13 Zorobabel‑ni nna bije Abiud, Abiud‑ni nna bije Eliaquim, Eliaquim‑ni nna bije Azor.
MAT 1:14 Azor‑ni nna bije Sadoc, Sadoc‑ni nna bije Aquim, Aquim‑ni nna bije Eliud.
MAT 1:15 Eliud‑ni nna bije Eleazar, Eleazar‑ni nna bije Matán, Matán‑ni nna bije Jacob.
MAT 1:16 Jacob‑ni nna bije José benne uka nubiyú ge María nan ge Jesús‑ni, delába Jesús benne anke Cristuha.
MAT 1:17 Laxkala sitá (14) libixxi chi ute iki de Abraham‑ni nna atti uli David‑ni nna a sitá (14) libixxi chi ute iki de David‑ni, nianna tti dechekana ka benne Israel‑ni daka Babilonia, nna a sitá libixxi chi bedete iki de tti dechekana ka benne Israel‑ni daka Babilonia, la'anialiba tti uli Jesús benne anke Cristuha.
MAT 1:18 Aní uka tti uli Jesucristuha: María nan geeha chiba du José‑ni rinnabe benneha ki utsá náke. Ttaka lanila tse'e len luesikeha nna Espíritu ge Tata Do Yebáha chila benie ki bija xi'in María‑ni.
MAT 1:19 Ttaka José benne biyú dhi María‑ni ankabe ttu benne runi latsiru attiba ankaba geni, laxkala labí raka lebie ugwebie María‑ni elhittu lo benne. Aníha uka nna belaba le José‑ni sigába udhá ikie benneha.
MAT 1:20 Ttaka atti chi rulaba lebie unie aníha nna bitsianie ttu ela. Lhe'e ela geeha nna uka xxe ttu anjeli ge Tata Xisiha nna ree bie: ―José, benne datia David, bittu gasinlu dhilu María‑ni, kumu binto nuje‑na Espíritu ge Tata Do Yebáha‑ba benie ki nuje bi'in‑na,
MAT 1:21 nianna gali ttu nuto biyú to nna kixxalu lábi Jesús, kumu labi odilábi ka benne lhe'esi gebi lo ka tulha ruinke.
MAT 1:22 Iyá nuní uka ki gwado tisa ge nu ra Tata Xisiha profeta Isaías‑ni ki kixxi'enna ka benne. Profetaha nna utixxi'ana nuha, rana:
MAT 1:23 Ttu nuila ribani abittu bixa chi benna, nuha uja xi'inni. Nianna gali ttu nuto biyú to. Nutoha nna kixxake lábi Emanuel. (Emanuel dienna innána: Tata Do Yebáha doe len ri'i.)
MAT 1:24 Atti beben José‑ni nna benbe attiba raba anjeli udhelha Tata Xisiha, uxíbe María‑ni udo lenie.
MAT 1:25 Ttaka labí bixa bedhaka José‑ni benneha nna uli bintoha. Bintoha nna utixxa José‑ni lábi Jesús.
MAT 2:1 Atti rinnabia Herodes‑ni, la'ania uli Jesús‑ni lhe'esi Belén. Belén‑ni rena daka lo yu ge Judea. La'ania bisin ttu chupa ka nu tee elha rieni gekani, dákana daka ta riria ubisa nna bisinkana lhe'esi Jerusalén‑ni,
MAT 2:2 rinnaba tisakana, rákana: ―¿Gon‑ni tee binto si uli, delába bi'ini akabi nu innabiabi ka benne Israel‑ni? Kumu chi bilentu ttu beli runna liina gebi, biriana dana daka ta riria ubisa‑na. De nuha nna datu kini udú xibitu arlobi.
MAT 2:3 Atti biyienin Herodes‑ni lhe iyába ka benne ge Jerusalén‑ni nu ra ka nuha, nianna bechacha ikikani nna bedúna kana.
MAT 2:4 Nianna tti bottupa Herodes‑ni ka nu loni ge ka bixxudiha lhe ka nu rule'ekinna ka nu Israel‑ni nu ra lo bia bennabi bodha'an Moisés‑ni, nianna tti unnaba tisana ka nuha, rana kana: ―¿Gá daka gali benne anke Cristuha?
MAT 2:5 Ka nuha nna bekabikana geni, rákana: ―Daka lhe'esi Belén ge Judea‑ni, niha teeki gali benneha kumu aníha ra lo ka yetsi ben profeta ge Tata Do Yebáha,
MAT 2:6 tti ree: Lu, lhe'esi Belén relu daka lo yu ge Judá, delo adí ka yiesi elha se'e daka Judá‑ni abittu akinlu deki lu ankalu ttu yiesi xka'aru. Kumu lagwi gelu iria ttu benne ake nu innabia. Benneha ku'e ka benne kiaha neda, delába ka benne Israel‑ni.
MAT 2:7 Herodes‑ni nna ttúbana uxina ka nu tee elha rieni gekaniha, kini bina tsena nukaxattiga biria beliha.
MAT 2:8 Nianna udhelha ttebana ka nuha diakana Belén nna rana kana: ―Gwaltsia nna gwalinnaba tisa tsitsi ge nutoha. Ganna chi gwaxxakale bi nna etetixxi'enle neti kini anágaba neti nna tsiagabaa sadú xibia arlobi.
MAT 2:9 Ka nuha nna iki de chi biyienkinna nu ra Herodes‑ni, nianna ulu'u ttebakana neda diakana nna beli bilákinna biria daka ta riria ubisaha, daneruba nuha lokani. Bisinliba nuha ttu lii iki yo'o ata tee bintoha, la'anialiba nna gwalhedana.
MAT 2:10 Tti bilákin nu tee elha rieni gekaniha beliha, nianna yalhá itta bedúna lekani
MAT 2:11 nna tti uta'akana lhe'e yo'oha nna bilákinna bintoha len nan gebi María‑ni. Nianna bedú xibikani arlobi nna udhali ttebakana ro'o ka nu denkanaha nna begwekana bi oru lhe yala lhe seti nu rure ixixxi nu tee láni mirra lhe.
MAT 2:12 Tti chi beyeki ka nu tee elha rieni gekaniha deyyakana nna botseaba neda gekani kumu de lhe'e ela bitsiakinnaha ra Tata Do Yebáha kana: ―Bitturu eyekile etele ata do Herodes‑ni.
MAT 2:13 Iki de chi bedá ka nu tee elha rieni gekaniha, nianna bedetsiani José‑ni ela. Lhe'e elaha nna bela'anie ttu anjeli ge Tata Xisiha nna ree bie: ―Ugwadha nna uche binto‑na lhe nan gebi‑na lhe, bexunni lenke nna ugía lenke daka Egipto. Niha‑ba tse'ele axtaliba ganna chi utixxi'ania lu, kumu Herodes‑ni idhelhana egilakana binto‑ni ki uttikana bi.
MAT 2:14 Aníha uka nna ugwadha tteba José‑ni lo relaha, chebie bintoha lhe nan gebiha nna ulu'u ttebake neda diake daka Egipto.
MAT 2:15 Niha‑ba use'eke axtaliba atti chi utti Herodes‑ni. Aníha uka ki gwado tisa ge nu ra Tata Xisiha, tti benie ki unne benne uke profeta geeha, ree: “Egipto re Xi'iniaha, beyaxie.”
MAT 2:16 Herodes‑ni nna tti ute denna deki benba le ka nu tee elha rieni gekaniha, labí liikinna eyekikana ki sattixxi'akinna na. Nianna bisa'a xxattinna nna benna mandadu kini gwettikana iyába ka nuto biyú to se'e lhe'esi Belén‑ni lhe ka nuto se'e lhe'e ka yiesi se'e abi'iba niha: iyába ka nuto ankakinna chupa ida lhe ka nu gwexxaru lhe. Aníha benna kumu bedaxxu ni'ani nu utixxi'a ka nu tee elha rieni gekaniha.
MAT 2:17 Aníha uka ki gwado tisa ge nu unne Jeremías benne uke profeta ge Tata Do Yebáha, tti ree:
MAT 2:18 Lhe'esi Ramá biyien tsi'i ttu benne, rinnee lhe ribesi xxatte de releninie. Raquel‑niba nuha ribesina ge ka xi'inniha, labí rebe xen leni kumu de utti ka nuha.
MAT 2:19 Iki de tti chi utti Herodes‑ni nna bedetsien José‑ni attu ela tti doe Egipto‑ni. Lhe'e elaha nna bodola'anie ttu anjeli ge Tata Xisiha.
MAT 2:20 Anjeliha nna ree bie: ―Beyadha nna beche nuto‑na lhe nan gebi‑na lhe, nna beyya lo yu ge ka nu Israel‑ni kumu chiba utti ka nu ruinkana uttikana nuto‑na.
MAT 2:21 Aníha uka nna beyadha ttebe nna dechebie nutoha lhe nan gebiha nna deyyake besinke lo yu ge ka benne Israel‑ni.
MAT 2:22 Ttaka tti bina José‑ni deki Arquelao‑niba redennabiana itúba Judea, kumu bedína ladi tata geni Herodes, de nuha nna usibin José‑ni eyye daka Judea‑ni. Nianna tti bedetsianie attu ela. Lhe'e elaha nna utixxi'ani Tata Do Yebáha bie bixa anka nu unie. Aníha uka nna daka Galilea‑nila deyya ka José‑ni.
MAT 2:23 Tti besinke daka niha, nna gwatse'eke lhe'esi Nazaret. Aníha uka ki gwado tisa ge nu ra ka benne ukake profeta ge Tata Do Yebáha, tti ráke: “Benne anke Cristuha gatta lábie nazareno.”
MAT 3:1 Bisia sá tti ulea lo Juan benne rugadi indaha rekie rigixxi'e ka tisa ge Tata Do Yebáha daka lo yu bisi ge Judea,
MAT 3:2 ree ka benne: ―Gwalodúna le nna gwalodaxxu neda ge Tata Do Yebáha kumu chiba dabigana innabie.
MAT 3:3 Ge Juan‑niba nuha unne profeta Isaías‑ni, tti ree: Lo yu bisiha ata lanú benne se'e, niha riyien tsi'i ttu benne rinnebie idisa, ree: “Gwalegixxa tse neda ge benne anke Xxanari'iha. Gwalolixxa neda kini dhabie.”
MAT 3:4 Itsa xo camelluba uka xo Juan‑ni nna udhí lhe'eni ttu yieti, nna nu xixxi ge betsirúba lhe kutsittaba lhe utona.
MAT 3:5 Ka benne daa lhe'esi Jerusalén‑ni lhe adíru ka benne daa lhe'e ka yiesi to se'e itúba Judea‑ni lhe, anágaba ka benne se'eke gaxxaba ro'o yoo Jordán‑ni, iyábake risinke ata reki Juan‑ni.
MAT 3:6 Nianna rigixxi'ake ge ka tulha ruinkeha nna rugadi Juan‑ni ke inda lhe'e yoo Jordán‑ni.
MAT 3:7 Ttaka tti bilenna ixeru ka fariseo lhe ka saduceo lhe risinkana ata dunaha kini ugadina kana inda, nianna tti rana kana: ―¡Aalexa nu ruin satsa! ¡Lebi'i ankale ttiba ka belha‑na! ¿Nú chi rana le deki gwalábale lo elha disa tsitsi nu chi dabiga ute Tata Do Yebáha gele?
MAT 3:8 Gwaluni nu dika ixú ganna xa. Aníha kini ula'a deki gwalí chi bodúna le ge nu ruinle nna bodaxxule neda ge Tata Do Yebáha.
MAT 3:9 Abittu tse'ele ulaba lhi'u lele, akinle: “Ri'itu gwalábatu kumu de ankatu benne datiatu Abraham‑ni.” Netiru ria, Tata Do Yebáha ganna aka lebie, gwakaba gebie eyonie ka íyya du'uya nii kini eyakakana benne datia Abraham‑ni, a laa kila iyasanie le.
MAT 3:10 Anágaba nna chigaba du tse iyyatteha kini ichúna itupa lhu ka yaga. Laxkala iyába ka yaga ka nu abittu utekana nu xixxi tse, ka nuha chúbakana nna iru'unakana tsiakana lo giha. Aníha‑ba nuha satele ganna abíba uinle nu dika ixú.
MAT 3:11 Neti gwalí galá leni indaruba nuní rugadia le ki ula'a deki chi bodúna le nna bodaxxule neda ge Tata Do Yebáha, ttaka benne daa kwe'aha tsitsirula ra le benneha tti neti. Laxkala labí elha ralhaa ichea ka gwaracha geeha. Benneha ugadie le Espíritu geeha lhe ugadie le gi lhe.
MAT 3:12 Chi den tse barkilu ge benneha kini uin tsebie xuxtilaha nna ganna chi bolhube siná nna ottupe xuxtilaha nna oga'abie xuaha ata rigua tsebie benneha. Nianna tti udelhe tee ge xuaha lo gi nu satíaba rite loniha, delába nu abittu reyola loniha. Lebi'i nuha udhake aníha.
MAT 3:13 Ttu sá udá Jesús‑ni lo yu ge Galilea nna diabie bisine ata du Juan‑ni ro'o yoo Jordán‑ni kini ugadine inda.
MAT 3:14 Ttaka Juan‑ni nna ridú disabana ugadine inda, nianna rane: ―Netila dika ugadilu inda; laa netila dalu ralu: “Begadi neti inda.”
MAT 3:15 Ttaka Jesús‑ni nna bekabie, ree: ―Begwelhaba aka aní nnanna, kumu aní chi ga'anani Tata Do Yebáha uinri'i. Aníha uka nna uxielhaba Juan‑ni begadina Jesús‑ni inda.
MAT 3:16 Iki de chi udie indaha nna beria ttebe lhe'e nuha. Looraha nna biyali tteba yebáha nna bilánie Espíritu ge Tata Do Yebáha ugwadie ttiba ttu becha ata dueha.
MAT 3:17 Nianna biyien tsi'i ttu benne yebáha, unnebie ree: ―Benne‑ni nuní anke Xi'inia rakati gebie. Benne‑ni runie nu ru'u lasia.
MAT 4:1 Nianna tti che Espíritu ge Tata Do Yebáha Jesús‑ni daka lo yu bisi ata lanú benne se'e, kini uin nu xxegwiha dhi yiene.
MAT 4:2 Iki de chi bette ubina lhe'ebie abittu utoe yetta delo chua (40) ubisaha lhe chua relaha lhe, nianna tti ugwetti bitunie.
MAT 4:3 Nu xxegwiha nna ruinna dhi yiene, nianna tti ubigana, rane: ―Ganna gwalíginlu ankalu Xi'in Tata Do Yebáha, usichu ka íyya se'e‑ni kini eyakakana yettaxtila ki golu.
MAT 4:4 Ttaka lee nna bekabie geni, ree: ―Lo ka yetsi ge Tata Do Yebáha dia ra: “Laa sunruga len yettaxtila aka ben ka benne, sinuki aka bengabake len iyába ka tisa rinne Tata Do Yebáha.”
MAT 4:5 Nianna tti che nu xxegwiha bie lhe'e yiesi anka le'aha, delába Jerusalén‑ni, nna ulhapine iki yotuha gwetsáli.
MAT 4:6 Nianna rane: ―Ganna si gwalíginlu ankalu Xi'in Tata Do Yebáha, biginnichu lo yuha, kumu lo ka yetsi geeha, dia ra: Tata Do Yebáha idhelhe ka anjeli geeha ki uyúke lu. Udoni lo náke lu kini abittu tsu'u ni'alu iki ka íyya.
MAT 4:7 Jesús‑ni nna bekabie geni ree: ―Lo ka yetsi ge Tata Do Yebáha rágaba: “Bittu dhi yielu Tata Do Yebaa benne anke Xxanaluha.”
MAT 4:8 Nianna tti dedeche nu xxegwiha bie iki ttu i'iya yadha xxatta, niha bele'enne iyába ka yiesi ra xxeni lekani se'e yiesi lo yu‑ni lhe bele'ene iyá nu tse tee gekani lhe.
MAT 4:9 Nianna tti rane: ―Iyába nu chi bela'ania lu‑na utea gelu ganna lu udú xibilu arloa nna utsá lolu neti.
MAT 4:10 Jesús‑ni nna bekabie geni ree: ―Nu reha ugía xa nu xxegwi, kumu lo ka yetsi ge Tata Do Yebáha, dia ra: “Sun arlo Tata Do Yebaa benne anke Xxanaluha, sun arlo benneha‑ba udú xibilu lhe suna nu innabe uinlu lhe.”
MAT 4:11 Aníha uka nna bedhan nu xxegwiha Jesús‑ni. Nianna tti bisin ttu chupa ka anjeliha nna bete náke lenbie.
MAT 4:12 Tti chi bina Jesús‑ni tekinna Juan‑ni lisiyya, nianna tti deyye daka Galilea,
MAT 4:13 bedábie lhe'esi Nazaret nna ugíe gwadhoe lhe'esi Capernaum. Yiesiha gaxxaba rena ro'o indatooha daka lo yu ge Zabulón lhe Neftalí lhe.
MAT 4:14 Aníha uka ki gwado tisa ge nu unne Isaías benne uka profeta ge Tata Do Yebáha, tti ree:
MAT 4:15 Lebi'i, ka benne se'ele daka lo yu ge Zabulón lhe Neftalí lhe, daka attu ladu ro'o yoo Jordán‑ni, ata rite neda dia daka ro'o indatooha, lebi'i ka nu se'ele daka Galilea ata se'eru ka benne labí ankake nu Israel,
MAT 4:16 lebi'i nuná ankale attiba ka benne se'e ata anka chulha. Nnanna nna chi bilenle ttu xiani xeni. Xianiha nuha udanie ge ka benne se'e ata ruxunnina geke gattike.
MAT 4:17 Debá la'ania nna udulo Jesús‑ni rigixxi'anie ka benne, rabie ke: ―Gwalodúna le nna gwalodaxxu neda ge Tata Do Yebáha, kumu chiba dabigana innabia benneha.
MAT 4:18 Tti dia Jesús‑ni ridee saro'o indatoo ge Galilea‑ni, nianna bilánie yu'u chupa betsi ka nubiyú: ttu nuha lána Simón nu tegaba láni Pedro, attuna nna lána Andrés. Ka nubiyúha yu'ukana rudelhakana yexxa ge ka belhaha lhe'e indaha, kumu ankakana benne rudaxxu belha.
MAT 4:19 Nianna tti ree kana: ―Gwaltá gwetenalha neti. Neti unia kini akale ka nu gaxile ka benne kini udaxxuke neda ge Tata Do Yebáha.
MAT 4:20 Looraha tteba nna bese'e bixxikana ka yexxa gekaniha nna dia ttebakana danalhakane.
MAT 4:21 A lattiruba bededee, nianna bedelánie a chupa betsi ka nubiyú: ttu nuha lána Jacobo nna attuna nna lána Juan. Lakana nuha ankakana xi'in Zebedeo. Se'ekana len tata gekaniha lo barcu gekaniha reyoinkana ka yexxa ka nu rudaxxu lenkana belhaha. Jesús‑ni nna uxie kana.
MAT 4:22 Lakana nna bedhá bixxi ikikani barcuha lhe tata gekaniha nna dia ttebakana danalhakana Jesús‑ni.
MAT 4:23 Jesús‑ni ugwekie itúba daka Galilea‑ni rule'enie ka benne se'e niha ka tisa ge Tata Do Yebáha, rule'enie ke lhe'e ka yo'o ata rudhetike ka tisa ge Tata Do Yebáha. Niha rigixxi'e ka tisa tse, delába rigixxi'e gasina kini akake benne innabia Tata Do Yebáha ke, lhe anágaba reyonie ka benne yu'u iyá looba isagwe latike lhe reyoingabe iyába ata rilhen latike lhe.
MAT 4:24 Itúba daka Siria chi ugwadhi tisa ge nu runie. Nianna tti risin lenke iyába ka benne ridakake iyá looba isagwe lhe ka benne rilhen latike lhe ka benne yu'u espíritu xxegwi latike lhe anágaba ka benne rakake beora lhe ka benne daa yatti latike lhe. Labie nna gwa reyoinbe ka benneha.
MAT 4:25 Ixe juisiru ka benne danalhake bie: ka benne daba daka Galilea lhe ka benne daba lhe'esi Jerusalén lhe ka benne daba lhe'e adíru ka yiesi se'e daka Judea‑ni lhe anágaba ka benne daba daka Decápolis lhe adíru ka benne daa lhe'e ka yiesi se'e attu ladu ro'o yoo Jordán‑ni lhe.
MAT 5:1 Tti bilani Jesús‑ni ixe juisiru ka benneha, nianna ugwapie lati ttu i'iya do niha, nna udoe. Ka benne rudhetinieha nna ubigake kwe'ebie.
MAT 5:2 Labie nna uduloe rule'enie ke, nianna tti rabie ke:
MAT 5:3 ―Karubáru ka benne riyasakanie ge Tata Do Yebáha, kumu lake nuná akake ka benne innabie ke.
MAT 5:4 ’Karubáru ka benne ribesike de rateke ttu bixa, kumu Tata Do Yebáha godú ittabe leke.
MAT 5:5 ’Karubáru ka benne abittu ra xxeni leke, kumu ka benne‑na nuná ralhake ulhenke yiesi lo yu‑ni kini akana geke.
MAT 5:6 ’Karubáru ka benne raka leke uinke nu tse raka le Tata Do Yebáha, kumu gwasiaba sá gwakaba nu raka lekeha.
MAT 5:7 ’Karubáru ka benne ratua leke adí ka benne, kumu anágaba lake gwa satuagaba le Tata Do Yebáha ke.
MAT 5:8 ’Karubáru ka benne itú iki itú leke rudo leke Tata Do Yebáha, kumu lake nuná gwalákanie benneha.
MAT 5:9 ’Karubáru ka benne ruinke ki tse'e tse len luesi ka benne kini abittu itilhake, kumu lake nuná ralhake gatta láke xi'in Tata Do Yebáha.
MAT 5:10 ’Karubáru ka benne ridú nookana ke de ruinke nu dika ixú, kumu lake nuná akake ka benne innabia Tata Do Yebáha ke.
MAT 5:11 ’Karubárule ganna ttixka delo ni'a kia nna usia le ka benne le lhe dhu nookana le lhe anágaba iyá looba gwen lasi usiakana ikile lhe.
MAT 5:12 Gwaledeakinle lhe gwaltse'e itta lhe, kumu xxeni anka nu ralhale edíle yebáha. Lebi'i gwa yúbale anágaba udú nookana ka profeta ge Tata Do Yebáha, delába ka benne use'e itú nu reha atti lanila galileha.
MAT 5:13 ’Lebi'i nuná ankale ttiba ttu deti se'ele lagwi ge ka benne se'e yiesi lo yu‑ni. Ttaka ganna detiha unnitti ixe geni, la'ania nna, ¿galasina eyo nuha ixe ganna ttixka? ¿Laaba ganna tuttíru labíru ixú nuha? A sunruba kweari'i na nna ku'unari'i na, nianna tti ulea ka benne ikini.
MAT 5:14 ’Anágaba, lebi'i nuná ankale ttiba ttu xiani kini rudenna ge ka benne se'e yiesi lo yu‑ni. Ankale ttiba ttu yiesi re lo ttu lhilhi rilá saabana, labí aka igatsina.
MAT 5:15 Nigaba lanú ttu benne do rugalhe iki ttu gi nu rudani, delo nna ukatsie ikini len ttu almoti. ¿Laaba ganna udole giha gwetsá kini udenna ge iyá ka benne se'e lhe'e yo'oha?
MAT 5:16 Anágaba lebi'i latsiru gwaluni, kini elha ruin gele akana ttiba ttu xiani, kini anáchu tti iláni ka benne nu tse ruinleha, la'ania nna innáke: “Xxeniba ra le Tata gele do yebáha.”
MAT 5:17 ’Bittu akinle deki bisiaya yiesi lo yu‑ni ki kuaya bia bennabi bodha'an Tata Do Yebáha len Moisés‑ni lhe nigaba labí daya kini kuaya ka tisa bodha'an ka benne ukake profeta ge Tata Do Yebáha. ¡Ko'o! Sinuki dalaa kini unia ki sado tisa ge nu ra lo ka tisa bodha'aneha.
MAT 5:18 Netiru ria, laka nnanna re yiesi lo yu‑ni lhe yebáha lhe, iyába nu ra lo bia bennabi‑na teeba ki aka nuná, niruba ttu tisa chika'a to abittu aka itua loni axtaliba ganna chi uka iyá nu ra lo bia bennabiha.
MAT 5:19 Laxkala ttu benne ganna abittu udoe tisa ge ttu ka nu ra lo bia bennabi‑na, meskiba ankana ttu tisa xka'a, lhe ganna benneha gágabe ka benne abittu udoke tisa ge nu ra loni, benne unie aníha, arlo adí ka benne rinnabia Tata Do Yebáha labí xxeni ra lebie. Ttaka benne gudobe tisa ge nu ra lo bia bennabiha lhe gule'enie adí ka benne ki uinke nu ra loni, benne uni aníha, xxeni ra le benneha arlo adí ka benne rinnabia Tata Do Yebáha.
MAT 5:20 Kumu netiru ria, ganna lebi'i abíba uin tserule tti ka fariseo‑ni lhe ka nu rule'ekinna ka benne nu ra lo bia bennabi bodha'an Moisés‑ni, la'ania nna labí akale benne innabia Tata Do Yebáha le.
MAT 5:21 ’Lebi'i chiba biyieninle nu rákana ka benne uka xuttori'iha, tti rákana ke: “Bittu uttile ttu benne kumu benne uni elhuttiha, ibixxi iginniba benneha.”
MAT 5:22 Ttaka neti ria le: Iyába nu rise'enna len attu betsi to geri'i, urixxi ukinnigaba Tata Do Yebáha nuha, nna nu rusia leni attu betsi to geri'iha nna iso duba nuha arlo ka nu runi elhuxtisi geri'iha nna nu rigena iki attu betsi to geri'iha, nuha ralhabana tsiana lo giha.
MAT 5:23 ’Laxkala ganna lu dialu utelu úna lo bekú ge Tata Do Yebáha, ttaka tti chi dulu niha, nna tadú lelu deki ritilhaba lenlu attu betsi to geri'iha,
MAT 5:24 niha besia úna cheluha nna beyyaxa gwayoin le betsi to geri'iha. Iki deliba nuha nna beyeki nna bete úna geluha.
MAT 5:25 ’Ganna ttixka ttu nu ritilha lenlu diana taga'ana lu lo uxtisi, laka yu'u lenlu nuha neda diale isinle arlo ka nuha, jeru beyoin leni kini ka taga'ana lu lo xuedaha. Xuedaha nna utena lu lasi ná ka gwensinaha nna ka gwensinaha nna taga'akana lu lisiyya,
MAT 5:26 kumu netiru ria, labí lhaalu lhe'e lisiyyaha ganna abíba kixalu iyá xea belhiu nu innaba ka nuha. Gannaliba chi utixalu iyá nuha, la'anialiba nna chi ebeakana lu.
MAT 5:27 ’Lebi'i chiba biyieninle nu rákana ka benne uka xuttori'iha, tti rákana ke: “Abittu isále nu subi subi nu labí ankana latselale.”
MAT 5:28 Ttaka neti nna ria le: Ganna ttu benne dha lebie ttu nuila atti ilánie na, la'ania nna ttisidiba chiba bisábie nuha de belaba lhi'u lebie aníha.
MAT 5:29 Laxkala ganna si iyya lo benlu‑na uinna kini iginnilu uinlu tulha, tsa ttela ulea nuná nna uru'una na, kumu tserula saríana lu unnittilu ttu ka ni'a nálu, a laa kila ankalu ida'a tsialu lo giha,
MAT 5:30 nna ganna si ná benlu‑na abittuba daa siina nna ukinnina lu ki uinlu tulha, tsa ttela uchú nuná nna uru'una na, kumu tserula taríana lu unnittilu ttu ka ni'a nálu, a laa kila ankalu ida'a tsialu lo giha.
MAT 5:31 ’Anágaba lhe rágabakana ka benne uka xuttori'iha, tti rákana ke: “Ganna ttu nubiyú udhá ikini nuila geniha, teeki ugwena nuha ttu yetsi ata rixxi'a deki chiba besilana len nuilaha.”
MAT 5:32 Ttaka neti ria le: Ganna ttu nubiyú kwentaba udhá ikini nuila geniha, ganna abittuba de bisá nuha attu nubiyú subi, la'ania nna la nubiyúha‑ba usigana nuilaha kini iginnina uinna nu satsa, nna ganna attu nubiyú edína nuila chi bedhá ikiniha, la'ania nna axtala nubiyú edína nuilaha, satsagaba nuha chi uin nuha.
MAT 5:33 ’Anágaba lebi'i chigaba biyieninle nu rákana ka benne uka xuttori'iha: “Teeki uinle nu chi rale Tata Do Yebáha, abittu kwentaba udettile benneha.”
MAT 5:34 Ttaka neti ria le: Bittugaba udettile attu nuxa tti innále deki uinle ttu bixa, nigaba udettile yebáha, kumu niha nuha do Tata Do Yebáha rinnabie.
MAT 5:35 Bittugaba udettile yiesi lo yu‑ni, kumu yiesi lo yu‑ni ankana ata rudú ni'abie. Nigaba udettile Jerusalén‑ni, kumu niha nuha anka lasi Tata Do Yebaa benne rinnabia xeniha.
MAT 5:36 Bittugaba utesale ikile‑na tti innále deki uinle ttu bixa, kumu lebi'i niru ttú itsa ikile labí aka gele uinle kini eyakana yadhi o eyakana sitsi.
MAT 5:37 Lebi'i, ganna ttixka gwakaba gele uinle ttu bixa, la'ania nna ukare'aba gwalinná: “Gwakaba”, nna ganna ttixka abittuba aka gele uinle ttu bixa, la'ania nna ukare'aba gwalinná: “Labí aka.” Kumu ganna bixaru tisa udienle iki nu chi unneleha, la'ania nna ge nu xxegwiha‑ba chi anka nu raleha.
MAT 5:38 ’Lebi'i chiba biyieninle rákana: “Ganna nuxa utse'e loona iyya lo ttu benne, anágaba nu beniha utse'e loogabakana iyya loni; nna ganna nuxa kweana laya ttu benne, anágaba nu beniha kweagabakana layani.”
MAT 5:39 Ttaka neti ria le: Abittu edú disale lo nu udhakana le ttu bixa. Ganna nuxa kweana gi daka xxaga ben gele, gwalodekila attu lha'a xxagale kini kweana gi.
MAT 5:40 Ganna nuxa taga'ana le lo uxtisi nna uinna kuana mixa geleha, gwalugwela na itupa jabana geleha,
MAT 5:41 nna ganna nuxa udo doelhana le ujale yua geniha ttu kilómetru, lebi'i gwalujala nuha chupa kilómetru.
MAT 5:42 Ganna nuxa innabana le ttu bixa, gwalugwe na nu innabanaha lhe ganna nuxa innaba gannana le ttu bixa, bittu innále: “Labí tee.” Gwalugwe ganna na nu rinnabanaha.
MAT 5:43 ’Lebi'i chiba biyieninle rákana: “Akinle ge ka benne geri'i nna utía di lele ka nu bittu raka uyúkana le.”
MAT 5:44 Ttaka neti ria le: Akinle ge ka nu bittu raka uyúkana le [lhe innabale len Tata Do Yebáha ki aka lenie ka nu rigekana ikile lhe anágaba latsiru gwalulisa ka nu ritisikinna le] lhe gwalinnabala len Tata Do Yebáha ge ka nu rulisa xiikana le, lhe ka nu ridú nookana le lhe.
MAT 5:45 Aníha uinle ki akale xi'in Tata gele do yebáha. Kumu benneha runie kini riria tatubisa‑na rudanie ge ka nu ruin satsa lhe ge ka nu ruin tse lhe. Anágaba lhe ruingabe kini raka iyya ge ka nu runi nu dika ixú lhe ge ka nu abittu runi nu dika ixú lhe.
MAT 5:46 Kumu ganna lebi'i sunruba rakinle ge ka nu gwa rakakinna gele, la'ania nna, ¿bíla nu tse edíle ge nu ruinleha ganna? ¿Laaba ka nu rukixakana belhiu nu rigixari'i len nu rinnabia ge Roma‑ni, anágaba ruin ka nuná?
MAT 5:47 Lhe anágaba ganna sun tteruba ka benne gele gwa rale ke padiuxi, ¿bíla nu tse nuha ruinle ganna? ¿Laaba ganna anágaba ruin ka nu abittu ankabiakinna Tata Do Yebáha?
MAT 5:48 Laxkala de nuha nna lebi'i satía gwaluni nu anka tse, ttiba Tata gele do yebáha satíaba runie taga'a nu anka tse.
MAT 6:1 ’Gwaluyú gele. Ganna edá lele uinle ttu nu tse, abittu ula'a loole nu tse uinleha arlo adí ka benne. Bittu uinle aníha kiniba ilákanie deki yalhaba tse ruinle. Kumu ganna aníha uinle, Tata gele benne do yebáha labí ute benneha nu tse ralhale edíle.
MAT 6:2 Laxkala lebi'i ttixka edá lele ugwele ka benne riyasakanie ttu bixa, bittu tse'ele doba ro'ole ge nu ruteleha. Bittu uinle tti ruin ka nu delo tisaba rula'akana deki yalhaba tse ruinkana, ka nuha doba ro'okani ge nu ruinkana tti ritupakana lhe'e ka yo'o ata rudhetiri'i ka tisa ge Tata Do Yebáha lhe anágaba ruinkana tti rekikana lo ka neda‑na. Aníha ruinkana kini inne tse benne gekani. Netiru ria, ukare'aba nu chi innekana tsekikanaha, nuha‑ruba nu tse ralhakana edíkana.
MAT 6:3 Ttaka ganna lebi'i edá lele ugwele ka benne riyasakanie ttu bixa, anuttu nu kixxi'enle ge nu tse ruinleha,
MAT 6:4 kini anáchu nu uteleha akana sigá. Aníha nna Tata gele do yebáha rilánie nu ruinle gatsiha, la'ania nna gutebe nu tse ralhale dhile.
MAT 6:5 ’Lebi'i tti inne lenle Tata Do Yebáha, bittu uinle tti ruin ka nu labí liikinna. Ka nuná delo tisaba rinnekana len benneha kini ilen ka benne kana. Ka nuná yalhá ru'u lekani rise'e lii rákana tti rinne lenkana Tata Do Yebáha lhe'e ka yo'o ata rudhetiri'i ka tisa geeha lhe ata reyatsa ka neda‑na lhe. Ruinkana aná kini ilákin benne kana. Netiru ria, ukare'aba nu chi rinnekana, nuha‑ruba nu tse ralhakana dhíkana.
MAT 6:6 Ttaka lebi'i ttixka innele len Tata Do Yebáha, gwaleta'ala lhe'e yo'o geleha nna gwalodhea na, nna gwalinne len Tata gele do yebáha. Benneha ttúbe doe lenle lhe'e yo'oha nna gwa rilábanie nu ruinle gatsiha nna gutebe nu tse ralhale dhile.
MAT 6:7 ’Tti innele len Tata Do Yebáha nna bittu satti balhaba odekile tisa nu abí ixú. Bittu uinle tti ruin ka nu labí ankabiakinna Tata Do Yebáha, kumu ka nuná rakakinna de rinne xxattakana nna gwayienbanie gekani.
MAT 6:8 Bittu uinle tti ruin ka nuná, kumu Tata gele do yebáha attili lani innabale lenie, chila yu benneha bixa riyasinle.
MAT 6:9 Lebi'i aní innále atti innele len Tata Do Yebáha: Tata getu do yebaa, ri'itu rugwetu lidhakalu kumu ankalu Diosi.
MAT 6:10 Utá, unnabia ri'itu. Benchi kini yiesi lo yu‑ni aka nu redá le kwinalu, beni ttiba rakaba yebáha.
MAT 6:11 Bete benne gotu ttu ttu sá
MAT 6:12 lhe uxí elha xen lasi ge nu satsa ruintu ttiba ri'itu gwa ridíbatu elha xen lasi ge ka nu rudhaka satsakana ri'itu.
MAT 6:13 Bittu ugwelhalu ixú yietu uintu nu satsa. Bodiláttu ri'itu kini abittu iginnitu lo ná nu xxegwiha, [kumu kwinalu satíaba ankalu benne rinnabia lhe ankalu benne ra tsitsi lelu lhe ra xxeni lelu ttu dia lii lhe. Amén.]
MAT 6:14 ’Kumu ganna lebi'i gwadíbale elha xen lasi ge ka benne bixa udhakake le, anágaba Tata gele do yebáha gwadígaba benneha elha xen lasi gele.
MAT 6:15 Ttaka ganna lebi'i abíba dhile elha xen lasi ge ka benne bixa udhakake le, anágaba Tata gele do yebáha labígaba dhi benneha elha xen lasi ge nu ruinle.
MAT 6:16 ’Lebi'i tti utte ubina lhe'ele, bittu uinle tti ruin ka nu delo tisaba rudá si'i lokani ki utte daa ka benne deki rutte ubina lhe'ekani. Netiru ria, ukare'aba nu ruinkanaha. Nuha‑ruba nu tse ralhakana dhíkana.
MAT 6:17 Ttaka lebi'i tti utte ubina lhe'ele, gwalolhí te xea ikile lhe gwalikí xú lole lhe.
MAT 6:18 Aníha kini abittu tte dani ka benne deki rutte ubina lhe'ele. Sinuki sun Tata gele do yebáha‑ba due lenle, sun benneha‑ba rilánie nu gatsi ruinleha, la'ania nna gutebe nu tse ralhale dhíle.
MAT 6:19 ’Bittu udona lele uttupa xxattale elha tse gele yiesi lo yu‑ni, kumu yiesi lo yu‑ni tse'e looba ka nu uttupaleha: ga'aba belha dilha lhe'ekani lhe e'eya chenbakana lhe anágaba axtala ga'a ubana lhanana kana.
MAT 6:20 Lebi'i tserula gwaluttupa elha tse gele yebáha ata lanú belha dilha rali lhe labí re'eya chen ttu bixa kini ka utse'e loona nu uttupaleha, nigaba lanú ubana ga'a kini lhanana ka nuha.
MAT 6:21 Kumu ata gatta elha tse geleha, niha‑gaba nuha udo lele.
MAT 6:22 ’Ka iyya lolu‑na ankakana ttiba ttu xiani ge latilu. Ganna ka iyya lolu‑na ankakana tse, delába ganna tseba rilákinna, la'ania nna itúba latilu tsu'u xiani gekani.
MAT 6:23 Ttaka ganna ka iyya lolu‑na abíba anka tsekana, la'ania nna ttisidiba itúba latilu anka chulha, delába ttiba ttu nu reki lhe'e chulha, aníha‑ba ankalu. Ganna nu dika aka xianiha eyakana chulha, la'ania nna gwa re bia chulha aka latilu.
MAT 6:24 ’Lanú ttu benne do aka gebie kwenbie sina lo chupa xxane, kumu itisibanie ttu nuha nna attu nuha nna akanie geni, o udo tsitsibe tisa ge ttu nuha nna attu nuha nna ku'uba ni'e nu innána. Anágaba lebi'i labí aka gele kwenle sina lo chupa xxanale, delába labí aka udona lele kini gatta xxatta belhiu gele yiesi lo yu‑ni, lhe ixúgabale lo sina ge Tata Do Yebáha lhe.
MAT 6:25 ’De nuha nna neti ria le: Bittu tse'ele uchacha ikile ge nu gole lhe ge nu i'iyale kini aka benle. Nigaba uchacha ikile bixa ukule. ¿Laaba ganna rakarula doelha gwa anka benbale attichula nu gole? Lhe, ¿laaba ganna dakarula bela latile attichula nu ukule?
MAT 6:26 Gwaluyúruga ka nu bani to sia xxilakani reki lo be. Ka nuná labí rigu'ukana yiela, nigaba relapakana, nigaba laa rosia breta yieda gekani. Ttaka laa kiga de nuha nna Tata gele do yebáha gwa rugobe kana. Lebi'i, ¿laaba ganna adírula dakale tti ka nuná?
MAT 6:27 Anágaba nna meskiba bika ruchacha xxatta ikile, laa de nuha‑ga nna itiaruinle tse'ele attu satti.
MAT 6:28 ’Anágaba lhe, ¿beaka ruchacha ikile ge nu ukule? Gwalulanniruga ka iyya to daa lhe'exxi‑na gasina riyelhakana. Ka nuná labí ribenkana sina, nigaba ribeakana tuilu.
MAT 6:29 Neti ria le, Salomón nu unnabiaha, meskiba uka nuha nu ra xxeni leni, labí bikuna lari rula'a latsitoru tti anka ka iyya to‑na.
MAT 6:30 Ki Tata Do Yebáha aná rugukue ka ixxi daa lhe'exxiha, ka nuha nasá ankakana ya'a nna uxxe gwisá nna chiba tsiakana itekana lo gi, anágaba lebi'i, ka nu abittu ria tsitsi lele, ¿laaba ganna adírula tse ugukue le?
MAT 6:31 Laxkala bittu uchacha ikile innále: “¿Bíla gori'i?” lhe “¿bíla i'iyari'i?” lhe, o lhe “¿bíla ukuri'i lhe?”
MAT 6:32 Kumu ka nu abittu ankabiakinna Tata Do Yebáha, ge iyá nuní ruchacha ikikani, ttaka lebi'i Tata gele do yebáha gwa yube deki riyasinle iyá nuní.
MAT 6:33 Lebi'i, nu uinlale, lade'axa gwaluin doelha ki akale ka nu innabia Tata Do Yebáha lhe gwaluin nu dika ixú arloe lhe, la'ania nna gutebe iyába nu riyasinle.
MAT 6:34 Laxkala lebi'i bittu uchacha ikile ge nu aka uxxeha, kumu uxxeha gwa tebana uchacha ikile ge nuha. Ukare'aba elhaxchacha iki tee geri'i ttu ttu sá.
MAT 7:1 ’Bittu innele ge ka benne, gale ke: “¿Beaka anála ruinle?”, kini Tata Do Yebáha nna abittugaba udhake le aná.
MAT 7:2 Kumu ttiba ruinle rinnele ge ka benne, aníha‑gaba udhaka Tata Do Yebáha le. Attiba ruinle len adí ka benne, ttu luesi nuha‑gaba odekie ottebie gele.
MAT 7:3 Lu, ¿beaka ridolu rulannilu biste yu'u lhe'e iyya lo betsi to geri'i‑na, delo nna a ridoxalu ugíalu yaga yu'u lhe'e iyya lolu‑na?
MAT 7:4 ¿Gasina galu ttu betsi to geri'i: “Begwelha kweaya biste yu'u lhe'e iyya lolu‑na”? Ki lu adírula xxeni anka yaga yu'u lhe'e iyya lolu‑na.
MAT 7:5 ¡Aaluxa nu rigí xú loni! Lade'axa ulea yaga yu'u lhe'e iyya lolu‑na kini anáchu nna ilá tsenlu ki kwealu biste yu'u lhe'e iyya lo attu betsi to geri'i‑na.
MAT 7:6 ’Bittu udelhale nu anka le'a‑na lo ka beku‑na, kini ka eyekikana go ya'akana le nna uduyakana le, lhe bittugaba udelhale ka íyya raka galha, ka nu daka xxatta‑na lo ka kuchi‑na, kini ka uleakana iki ka nuná. Delába, bittu utele nu anka ge Tata Do Yebáha len ka nu abittu ugwekana lidhakani.
MAT 7:7 ’Lebi'i, gwalinnaba len Tata Do Yebáha, benneha nna gutebe nu rinnabaleha. Gwalegila nna gwataxxakabale nu regilaleha. Gwalinne ro'o yo'oha nna gwadhalibakana ki ga'ale.
MAT 7:8 Kumu nuxaba benne ganna rinnabe ttu bixa nna gwa ridíbe nu rinnabeha nna nuxaba benne ganna regilee nna gwa raxxakabe nu regileeha. Anágaba nna nuxaba benne rinnebie ro'o yo'oha nna gwa ridhalibakana kini ra'abie lhe'e yo'oha.
MAT 7:9 ’Lebi'i, ¿si gugwele ttu xi'inle ttu ka íyya du'uya lo neda ganna ttixka nuha rinnabana ttu yettaxtila ki gona?
MAT 7:10 O, si ganna nuha innabana ttu belha gona, lebi'i nna, ¿si ugwelale nuha ttu belha ra'aya lhe'eni lo yu ki gona?
MAT 7:11 Ki lebi'i ankalale nu ruin satsa nna gwa rutebale nu tse rinnaba ka xi'inleha, ¿titiala Tata gele do yebáha, guteba benneha nu tse len ka benne ganna innabake lenie?
MAT 7:12 ’Laxkala lebi'i gwaluin len ka benne ttiba raka lele uinke lenle, kumu aná ra lo bia bennabi bodha'an Tata Do Yebáha len Moisés‑ni lhe ka tisa bodha'an ka benne ukake profeta ge Tata Do Yebáha lhe.
MAT 7:13 ’Lebi'i gwaliga'a ro'o puerta nu anka suni ro'oniha. Kumu puertaha lhe neda nu rechena ka benne ata tse'e lookeha, bataru lhe xxeniru anka lo ka nuha nna ixe ka benne reta'ake niha.
MAT 7:14 Ttaka puerta ata reta'a ka benne aka benke ttu dia liiha, suniba anka ro'o nuha lhe neda nu rechena ke ata aka benke ttu dia liiha, tsitsiba anka ki eyyake lo nedaha. Laxkala ttu chuparuba ka benne gwa raxxakake puertaha lhe nedaha lhe.
MAT 7:15 ’Gwaluyú gele ge ka profeta gwen lasi reki naa, ka nu rula'akana deki ankakana benne tse ttiba ttu neru runi tana, ttaka lhi'u lhe'e lastokani nna ankabakana ttiba ttu sageo ruin satsa.
MAT 7:16 Ka nuná ukare'aba elha ruin gekani gwalugía, la'ania nna chiba yule gasina ankakana. Kumu ttibanka lo ka lha xubaaya‑na, labí dika edíri'i uva lokani; nigaba lo ka ya yietsi‑na, labí dika edíri'i higu lokani.
MAT 7:17 Aníha‑gaba yaga anka tseha, tsegaba anka nu xixxi rute nuha, ttaka yaga nu abittu anka tseha, abittugaba nu xixxi tse ute nuha.
MAT 7:18 Kumu ttu yaga tse, labí dika ute nuha nu xixxi abittu anka tse, nna yaga nu abittu anka tseha nna labí dika ute nuha nu xixxi anka tse.
MAT 7:19 Laxkala iyába ka yaga ka nu abittu rute nu xixxi tse, chuba ka nuha nna tsiakana lo giha.
MAT 7:20 De nuha nna ka nu gwen lasi reki naa ukare'aba elha ruin gekani ugíale, la'ania nna chiba yule gasina ankakana.
MAT 7:21 ’Labí iyá ka nu rákana neti: “Tata Xisi to kia”, labí iyá ka nuná eta'a ata rinnabia Tata kia do yebáha, sunruba ka nu rudokana tisa geeha, sunruba ka nuha gwa di eta'akana niha.
MAT 7:22 Ganna chi isia sá aka elhuxtisi ge ka benne se'e yiesi lo yu‑ni, la'ania ixebakana gákana neti: “Tata xisi to kia, ri'itu atti utixxi'atu ka tisa ge Tata Do Yebáha, luba bedettitu lhe lúgaba bedettitu atti bebeatu ka espíritu xxegwi lati ka benne lhe anágaba tti bentu ixe ka milagruha lhe.”
MAT 7:23 Neti nna lhixxa rába ekabia gekani, upeya kana: “¡Ni tsa lanúle chi ankabiati! ¡Gwalukwitta kwe'a xa nu ruin satsa!”
MAT 7:24 ’Laxkala iyába ka benne iyienkanie ka tisa kia‑ni nna udoke tisa gekani, ka benneha ankake ttiba ttu nubiyú rapa elha rieni nna bedona yo'o geniha iki ttu íyya.
MAT 7:25 Tti bisia iyyaha nna bisába ka yooha inda axtaba ubixxi ro'okani inda, lhe biriagaba ttu be idí nna gwatsu'una kwe'e yo'oha, ttaka yo'oha labí ubixxi nuha kumu tsitsiba do nuha iki íyyaha.
MAT 7:26 Ttaka iyába ka nu riyienkinna nu rinnea‑ni nna ganna abíba uinkana nu ria‑ni, ka nuha ankakana ttiba ttu nubiyú akaa elha rieni ikini nna bedona yo'o geniha lo yuxiha.
MAT 7:27 Laxkala tti bisia iyyaha nna ubixxiba inda ro'o ka yooha lhe biria ttu be idí nna gwatsu'ukana kwe'e yo'oha nna bitampa tteba yo'oha. ¡Ttu ttiru bise'e loo nuha!
MAT 7:28 Tti chi uluxani Jesús‑ni unnebie nuha, iyába ka benne se'e niha bebanabakanie ge nu rule'enie keha,
MAT 7:29 kumu labie rinnebe ttiba rinne ttu uxtisi rapa lo neda, labí rinnebie tti rinne ka nu rule'ekinna ka benne nu ra lo bia bennabi bodha'an Moisés‑ni.
MAT 8:1 Tti beyadi Jesús‑ni lati i'iyaha dedee, ixeru ka benne danalhake bie.
MAT 8:2 Nianna tti ubiga ttu benne raka yiesu latie. Yiesuha tee láni lepra. Benne raka yiesu latieha nna bedú xibie arlo Jesús‑ni nna ree benneha: ―¡Tata xisi to, ganna lu aka lelu, gwadaabalu eyoinlu neti!
MAT 8:3 Jesús‑ni nna belhí nábie utane lati benneha nna ree: ―Gwaka galá lasia. ¡Nnanna, chinka beyaka! Looraha tteba nna betúa yiesuha lati benneha.
MAT 8:4 Nianna ra Jesús‑nie: ―Anuttu nu galu. Sinuki ugíala nna gwatso du lo bixxudiha nna bete úna nu daa lolu utelu ge Tata Do Yebáha. Beni attiba chi ga'anna lo bia bennabi bodha'an Moisés‑ni. Aníha kini uyú lokani deki chiba betúa isagwe‑na latilu.
MAT 8:5 Tti uta'a Jesús‑ni lhe'esi Capernaum‑ni, ttu soldadu baninna ttu gayua (100) ka soldadu ge Roma‑ni, nuha bisinna nna rinnaba ditibana lo Jesús‑ni, rane:
MAT 8:6 ―Tata xisi to, nubiyú riben lo sina kiaha ttu tsaba tena lhe'e lisiaha daa yatti latini nna juisia ratena len isagwe geniha.
MAT 8:7 Jesús‑ni nna bekabie geni, ree: ―Neti gwaya'abaa eyonia nuha.
MAT 8:8 Soldaduha nna bekabina, rane: ―Tata xisi to, neti labí elha ralhaa ga'a kwinalu lhe'e lisiaha. Niiliba dulu unne nna gweyakaba nubiyú riben sina kiaha.
MAT 8:9 Kumu neti ankagabaa nu rudoa tisa ge ka nu ra xxeniru lekani tti neti lhe anágaba nna rinnabiagabaa adíru ka soldadu. Laxkala tti upeya ttu ka nuha: “Ugía niha”, nuha nna gwa riabana nna tti rodopeya attu ka nuha: “Utá nii”, nuha nna gwa ritabana nna tti odopeya benne riben lo sina kiaha: “Ben nu tee‑ni.” Benneha nna gwa ruinbe nu xpeyeha.
MAT 8:10 Tti biyienin Jesús‑ni nu ra nu banina ka soldaduha, labie nna bebanabanie. Nianna tti ree ka benne danalhake bieha: ―Netiru ria, niru ttú ka benne Israel‑ni lanú chi gwaxxakaa ria tsitsi leke tti ria le nubiyú‑ni.
MAT 8:11 Neti ria le, ixe ka benne dittu daa daka ta riria ubisa‑na lhe daa daka ata rito ubisa‑na lhe, ka benneha isiake ata rinnabia Tata Do Yebáha, tse'eke ro'o mexa goke yetta len Abraham‑ni lhe len Isaac‑ni lhe len Jacob‑ni lhe.
MAT 8:12 Ttaka ka nu Israel, ka nu chi ga'anna deki innabia Tata Do Yebáha kana, ka nuha de abittu ugía lekani, de nuha nna irialakana iru'unakana tsiakana ata anka chulhaha. Lhe'e chulhaha‑liba tse'ekana kwesikana lhe goniba lo layakani lhe.
MAT 8:13 Nianna tti ree soldadu nu baninna adí ka soldaduha: ―Chinka beyya. Gweyakaba nu kwitiha. Gwakaba attiba chi ugía lelu. Looraha tteba nna beyaka nu kwiti riben lo sina ge soldaduha.
MAT 8:14 Jesús‑ni diabie bisine lisi Pedro‑ni. Tti chi bisine niha nna gwaxxake nan ge nuila geniha teba benneha yu'e xilhaa.
MAT 8:15 Nianna tti utane kwe'e ná benneha nna beria tteba xilháha lati benneha nna ugwadha ttebe, benie nu uto Jesús‑ni.
MAT 8:16 Tti chi dia ralhaha nna bisin lenkana ixeru ka nu yu'u espíritu xxegwi latikani ata du Jesús‑ni. Labie nna ukare'aba ttu unnebie nna bebeabie ka espíritu xxegwi yu'u lati ka nuha nna beyonie iyába ka nu raniha.
MAT 8:17 Aníha uka ki gwado tisa ge nu unne Isaías benne uke profeta ge Tata Do Yebáha, tti ree: “Benneha bedelha kwe'ebie ka isagwe geri'iha lhe bedelha kwe'ebie iyába nu rateri'i lhe iyába nu ridakari'i lhe.”
MAT 8:18 Tti bilani Jesús‑ni ixe juisiru ka benne chi bebi'ike abi'iba kwe'ebie, nianna tti bedhane ree ka benne rudhetinieha: ―Tsiari'i ilhári'i lo indatoo‑ni ki iriari'i ro'oni daka nu reha.
MAT 8:19 Nianna tti ubiga ttu ka nu rule'ekinna ka benne nu ra lo bia bennabi bodha'an Moisés‑ni nna rane: ―Maestru, neti gwetenalhabaa kwinalu gaxaba tsialu.
MAT 8:20 Jesús‑ni nna bekabie geni, ree: ―Ka beda‑na siaba lisi ka nuná ata reta'akana lhe anágaba ka nu sia xxilakani reki lo be‑na, siagaba lixxu'in ka nuná ata rebiakana, ttaka neti benne daya yebáha labí do gaxa kixxa ikia.
MAT 8:21 Attu benne rudhetinieha nna redenee: ―Tata xisi to, begwelhaxa eya'aya takatsia tata kiaha. Iki deliba nuha nna tti itaa etenalhaa lu.
MAT 8:22 Ttaka Jesús‑ni nna bekabie ge benneha, ree: ―Begwelha ka nu yattiha ukatsikana ka nu yatti gekaniha. Lu nna utá betenalha neti.
MAT 8:23 Nianna ugwapi tteba Jesús‑ni lo barcuha nna aníha‑ba danalha ka benne rudhetinieha nna biriake diake.
MAT 8:24 Lo indatooha‑ba diake, ttiruba chi biria ttu iyya be idí, nna bedhú liina lo indatooha, axtaba iki barcuha ratsu'u indaha. Ttaka Jesús‑ni nna teba benneha te'adhie.
MAT 8:25 Ka benne rudhetinieha nna gwadibenke bie, ráke bie: ―¡Tata xisi to, bodiláttu ri'itu! ¡Karubá tsapiri'i inda‑ni nna gattiri'i!
MAT 8:26 Labie nna bekabie geke, ree: ―Aalexa benne abittu ria tsitsi leni, ¿beaka rasi xxattinle? Nianna tti ugwadhe nna bedhaka dise beha lhe indatooha lhe, nianna siiba beyaka lo indatooha.
MAT 8:27 Ka benneha nna bebanabakanie, ra luesike: ―¿Nú anka benne‑ni nna axtaba be‑ni lhe indatoo‑ni lhe rudokana tisa gebie?
MAT 8:28 Tti chi biria Jesús‑ni ro'o indatooha nna bisine daka lo yu ge ka benne Gadara. Niha biria chupa ka nubiyú ata se'e ka baa ge ka benne yattiha yu'u espíritu xxegwi latikani nna betetsákana Jesús‑ni. Ka nuha yalhá satsa ruinkana, laxkala lanú kwenta retena lo neda tee niha.
MAT 8:29 Nianna tti uresi'akana, rákana: ―Lu, Xi'in Tata Do Yebáha, ¿bí raka lelu udhakalu ri'itu? ¿Si dáchilu kini ugwelu ri'itu elha disa? Ki labí chi bisia ura dhitu elha disa ralhatu.
MAT 8:30 Gaxxa gaaba niha yu'u ixeru ka kuchi, ka nuha yu'ukana go.
MAT 8:31 Ka espíritu xxegwi yu'u lati ka nubiyúha nna unnabakana len Jesús‑ni rákane: ―Ganna ebealu ri'itu nna bedhelha ri'itu kini eta'atu lati ka kuchi yu'u‑na.
MAT 8:32 Labie nna ree ka espíritu xxegwiha: ―Gwaleria gwaleyya ganna. Nianna beria ttebakana lati ka nubiyúha nna gwata'akana lati ka kuchiha. Ka kuchiha nna biria resu ttebakana diakana nna bisinkana ro'o ttu íyya daa niha, nianna biginnikana lhe'e indaha nna uttibakana.
MAT 8:33 Ka nu se'e lo ka kuchiha nna boxunni ttebakana deyyakana lhe'esiha nna iyába utixxi'akana. Utixxi'agabakana nu gwate ka nubiyú uyu'u espíritu xxegwiha latikani.
MAT 8:34 Nianna iyába ka benne lhe'esiha biriake gwatsáke Jesús‑ni. Tti bilákanie bie nna unnaba ditibake lenie kini eriabie lo yu gekeha nna eyye attu ta subi.
MAT 9:1 Nianna tti beyapi Jesús‑ni lo barcuha nna deyye betebie lo indatooha nna besine lhe'esi geeha.
MAT 9:2 Niha bisin lenkana ttu benne daa yatti latie ata du Jesús‑ni, xuakinna benneha lo ttu breta. Tti bilani Jesús‑ni deki gwa riaba lekani gebie, nianna tti ree benne raniha: ―¡Xi'ini to, bodú itta lelu! Chiba uxía elha xen lasi ge ka tulha gelu‑na.
MAT 9:3 Ttu chupa ka nu rule'ekinna ka benne nu ra lo bia bennabi bodha'an Moisés‑ni nna belaba lhi'u lekani rákana: “Nubiyú du nii, Tata Do Yebáha nuná rilhida gaana tti rinnena aná.”
MAT 9:4 Ttaka kumu Jesús‑ni rite dábanie nu rulaba lhi'u lekaniha, nianna tti ree kana: ―¿Beaka rulaba lele nu anka satsa?
MAT 9:5 Gwalinnáchu, ¿bí nuha nu sattiru innári'i? ¿Si innári'i: “Chiba bixú elha xen lasi ge ka tulha gelu‑na” ak? o ¿innári'i: “Beyadha nna bedá”?
MAT 9:6 Ttaka nnanna ule'enia le kini uyú lole deki neti benne daya yebáha, yiesi lo yu‑ni gwa teeba lo neda kia ki dhia elha xen lasi ge ka tulha ruin ka benne. Nianna tti ree benne daa yatti latieha: ―Beyadha nna bodaxxu nu xualu loin‑na nna beyya lisilu.
MAT 9:7 Benne biyúha nna beyadha ttebe deyye lisieha.
MAT 9:8 Ka benne saa niha, nna uka tébakanie tti bilákanie nu ukaha, nianna tti ráke: ―Xxeniba ra le Tata Do Yebáha de betebie lo neda ge ka benne se'e yiesi lo yu‑ni kini reyoinke ka benne rani.
MAT 9:9 Tti chi bedá Jesús‑ni ata dueha, deyu'ube neda deyye. Nianna bilánie ttu nubiyú lána Mateo dona ata rukixana belhiu nu daa lo ka benne rigixake ge Roma‑ni. Nianna tti ree Mateo‑ni: ―Utá betenalha neti. Nianna tti udú liina nna gwanalhane.
MAT 9:10 Tti chi do Jesús‑ni go yetta lhe'e lisi Mateo‑ni, ixeba ka gwekixa lhe adíru ka nu tekinna lákani deki ankakana ka nu ruin satsa, bisinkana nna use'ekana ro'o mexaha ro lenkane yetta. Niha‑gaba se'e ka benne rudhetinieha lhe.
MAT 9:11 Tti bilákin fariseo‑ni doe len ka nuha, nianna tti rákana ka benne rudhetinieha: ―¿Beaka ro maestru gele‑na yetta len ka gwekixa‑na lhe len ka nu ruin satsa‑na lhe?
MAT 9:12 Ttaka labie tti biyieninie nu ra ka nuha, nianna tti bekabie gekani, ree: ―Ka nu bittu rani‑na, labí riyasakin nuná nu eyoinna kana, sinuki ka nu rani‑na nuná riyasakinna nu eyoinna kana.
MAT 9:13 Gwaleyya nna gwalutte daa bí diani nu ra lo ka yetsi ge Tata Do Yebáha tti ree: “Neti raka lasia satua lele ka benne, laa rakaga lasia uttile ttu nimala nna utele na úna kia.” Laxkala neti labí daya raxia ka nu runi nu dika ixú; neti dalaa raxia ka nu ruin satsa kini odúna kana nna odaxxukana neda ge Tata Do Yebáha.
MAT 9:14 Ka benne rudhetini Juan benne rugadi indaha, ubigake ata du Jesús‑ni nna ráke bie: ―¿Beakala ri'itu lhe ka fariseo‑na lhe rutte xxatta ubina lhe'etu a rotu, nna ka nu rudhetinlu‑na nna labí rutte ubina lhe'e ka nuná?
MAT 9:15 Jesús‑ni nna bekabie gekani, ree: ―Gwalinnáruga. ¿Laaba ganna labí dikana ka nu biyaxi dha'aha, tse'ekana ku'u elhutti ikikani laka du nubiyú rutsá nániha lenkana? Ttaka ganna chi bisia sá itua nubiyúha, anúruna dhu lenkana, la'anialigaba nna chi utte ubina lhe'ekani.
MAT 9:16 ’Anágaba nna lanú ttu benne do rotábie ttu ro'o lari kubi ro'o xo yaxxu geeha, kumu ganna otábie nuha, la'ania nna galhiba lari kubiha ro'o lari yaxxuha, la'ania nna adíla satsa ireda xoeha.
MAT 9:17 Nigaba labí riga'akana vinu kubi lhe'e ka yieti yaxxu, kumu ganna aníha uinkana, la'ania nna ganna chi gala vinu kubiha nna itsúbana ka yieti yaxxuha, nna ilaliba vinuha lhe tse'e loogaba ka yietiha lhe. Laxkala teeki ita'a vinu kubiha lhe'e ka yieti kubi, kini aníha nna abittu tse'e loo ixpakana.
MAT 9:18 Laka du Jesús‑ni rigixxi'anie ka benneha iyá nuha, nianna bisin ttu nu loni ge ka nu Israel‑ni, bedú xibini arloe nna rane: ―Xi'iniunná to kiaha si utti ttebi, ttaka ganna kwinalu italu ixxua nálu ikibi, la'ania nna gweyaka benbabi.
MAT 9:19 Jesús‑ni nna udú lii ttebe die len nubiyúha lhe diagaba ka benne rudhetinieha lhe.
MAT 9:20 Laka yu'uke neda diake nna ttu benne nuila chi uka tsi'inu (12) ida ridoe reni, nianna tti ubige daka kwe'e Jesús‑ni nna gwattáne ro'o lari nuku benneha,
MAT 9:21 kumu belaba lebie, rakanie: “Kwadiba ro'o lari nuku Jesús‑ni dhaaya sattánaa, la'ania nna gweyakabaa.”
MAT 9:22 Jesús‑ni nna bodeki loe nna ree benne nuilaha: ―Bodú itta lelu xa xi'ini to. De ugía lelu deki gwadaabaa eyonia lu, de nuha nna chiba beyakalu. Looraha tteba nna beyaka nuilaha.
MAT 9:23 Tti bisin Jesús‑ni lhe'e lisi nu ankana nu loni ge ka nu Israel‑ni, niha bilánie ka benne se'e gwekwesi lhe ka benne se'e ribesi xxattake lhe.
MAT 9:24 Nianna tti ree ka benneha: ―Gwaleria nii, kumu nuila to‑ni laa uttiga bi'in‑ni, suna te'adhiba bi'in‑ni. Ttaka ka benne se'e niha nna ruxisilake gebie.
MAT 9:25 Iki de chi bebeabie ka benne saa niha, nianna tti uta'abie nna bedaxxue ná nuila toha. Nuila toha nna beyadha tteba bi'iniha.
MAT 9:26 Nianna itúba ka daka niha ugwadhi tisa ge nu benieha.
MAT 9:27 Tti chi bedá Jesús‑ni niha, chupa ka benne a raka ilákanie danalhake bie, ribesi'abake ráke: ―¡Benne datia David, gwatuachi lelu ri'itu!
MAT 9:28 Tti chi uta'abie lhe'e yo'oha nna ubiga tteba ka benne xua lokeha ata dueha, nianna tti unnaba tise ka benneha, ree ke: ―¿Si gwa ria lele deki gwadaabaa eyonia le? Ka benneha nna bekabike ráke: ―Gwadaa galálu eyoinlu ri'itu xa tata.
MAT 9:29 Nianna tti utane ka iyya lo ka benneha nna ree ke: ―Kumu de gwa riaba lele kia nna gwakaba nu rinnabale‑na.
MAT 9:30 Nianna beyali tteba lo ka benneha. Jesús‑ni nna bodha'an tsitsie len ka benneha, ree: ―Nuttu nu kixxi'enle ge nu uka‑ni.
MAT 9:31 Ttaka ka benneha nna tti bedáke niha, nna utixxi'a ttebakanie ka benne se'e itúba ka daka niha ge nu ben Jesús‑ni.
MAT 9:32 Si bedá gaaba ka benne beyali lokeha lhe'e yo'oha, nianna tti bisin lenkana ttu benne anke biría, yu'u ttu espíritu xxegwi latie.
MAT 9:33 Tti chi bebea Jesús‑ni espíritu xxegwiha lati benne anka biríaha nna udulo tteba benneha unnee. Ka benne se'e niha, nna bebanabakanie nna ráke: ―Ni tsa labí chi bilenri'i aka ttu luesi nu uka‑ni lo yu ge Israel‑ni.
MAT 9:34 Ttaka ka fariseo‑ni nna rákana: ―Xxana ka espíritu xxegwiha‑ba rixuin nuná kini rebeana ka espíritu xxegwi lati ka benne‑na.
MAT 9:35 Lhe'e iyába ka yiesi xeni‑na lhe lhe'e iyába ka yiesi xka'a to‑na lhe, lhe'e ka nuná ata sia ka yo'o ata rudheti ka benne ka tisa ge Tata Do Yebáha reki Jesús‑ni rule'enie ka benne, lhe anágaba rigixxi'agabe ka tisa tse, delába rigixxi'e gasina innabia Tata Do Yebáha ka benne, lhe anágaba nna reyoingabe iyá looba ka isagwe lhe ata rilhen latike lhe.
MAT 9:36 Tti bilani Jesús‑ni ixe juisiru ka benne se'e niha, nianna gwatua lebie ke kumu si'iba du leke lhe sun labake se'e, lanú tee ki edí edenna ke. Ankabake attiba ka neru to anú xxanakani tee ki uyúna kana.
MAT 9:37 Nianna rabie ka benne rudhetinieha: ―Yalhá ixeni lena tee exú, ttaka ka benne edíke lena‑ni ttu chuparubake raka, kumu ixeba ka benne se'e riyasakanie iyienkanie ka tisa ge Tata Do Yebáha, ttaka ka benne rigixxi'ake ka tisa geeha, ttu chuparubake raka.
MAT 9:38 De nuha nna gwalinnaba len Tata Do Yebáha, delába benne anke Xxana ka benne riyasakanie iyienkanie ka tisaha, kini idhelharue ka benne kixxi'akanie ke.
MAT 10:1 Jesús‑ni bottupe ka benne tsi'inu (12) rudhetinieha nna begwebie ke lo neda kini ebeake ka espíritu satsa yu'u lati ka benne lhe ebeake iyá looba isagwe lhe anágaba nna eyoingabake iyába ata rilhen lati ka benne lhe.
MAT 10:2 Nii dia lá tsi'inu (12) ka benne ukake apóstol geeha: Lade'a tte Simón benne tegaba labie Pedro, lhe betsie Andrés‑ni lhe. Nianna tti dia Jacobo‑ni lhe betsie Juan‑ni lhe. Ixpa ka benne‑ni ankake xi'in Zebedeo.
MAT 10:3 Nianna tti dia Felipe‑ni lhe Bartolomé‑ni lhe. Iki de nuha nna tti dia Tomás‑ni lhe Mateo benne uka gwekixaha lhe. Nianna tti dia Jacobo xi'ini Alfeo, nianna tti dia Tadeo.
MAT 10:4 Iki de nuha nna tti dia Simón benne rákana Zelote. Nialiba nna tti dia Judas Iscariote nu betena Jesús‑ni lasi ná ka nu bettikaneha.
MAT 10:5 Jesús‑ni udhelhe iyába tsi'inu (12) ka benneha, nianna tti ree ke: ―Bittu tsiale ata se'e ka benne abittu ankake benne Israel, nigaba ga'ale lhe'e ka yiesi ata se'e ka benne Samaria.
MAT 10:6 Sinuki gwaltsiala ata se'e ka benne Israel, kumu lake ankake attiba ka neru chi biganna.
MAT 10:7 Gwaltsia nna gwalikixxi'a deki chiba dabigana innabia Tata Do Yebáha.
MAT 10:8 Gwaleyoin ka benne rani lhe ka benne raka latike yiesu lepra nna gwalikua yiesuha latike, lhe anágaba gwaluin kini eyaka ben ka benne chi uttiha lhe gwalebeagaba ka espíritu xxegwi yu'u lati ka benne lhe. Lebi'i bittu ukixale ge nu uinleha, kumu kwentaba betea lo neda gele kini uinle iyá nuní. De nuha nna kwentagaba gwalute nu chi uxíleha.
MAT 10:9 ’Bittu ichele yieti belhiu gele.
MAT 10:10 Nigaba ichele chuba gele, nigaba ichele chupa kwe xole ki otseale o ujale attu kwe gwaracha gele. Anágaba lhe bittugaba iche garroti gele. Kumu ttu nu riben sina ralhaba nuha ugokana na.
MAT 10:11 ’Gaxaba lhe'e yiesi ga'ale, gwalegila gaxa do ttu benne, ttu benne nu dika uxxen lele gebie. Lisi benneha gwaleya'ana, axtaliba ganna chi edále niha, la'anialiba nna eriale lhe'e lisi benneha.
MAT 10:12 Ganna chi ga'ale lhe'e yo'o ata isinleha, gwalinnaba ki aka len Tata Do Yebáha ka benne se'e lhe'e yo'oha.
MAT 10:13 Ganna ka benne se'e lhe'e yo'oha gulabibake le, la'ania nna gwa ralhabake aka len Tata Do Yebáha ke, ttaka ganna ka benneha abittuba ralhake dhike nu unnabale len Tata Do Yebáha, la'ania nna nu unnabaleha eyekiba nuha lenle.
MAT 10:14 Ganna se'e ka nu abittu ulabikana le o abittu udo nagakani ge nu innále, la'ania nna gwaleria lhe'e yo'o gekaniha o si lhe'e yiesiha, nna gwalukubi ni'ale biste, kini nuha unna liina deki Tata Do Yebáha labí uyu'u lebie nu benkanaha.
MAT 10:15 Netiru ria, la sá atti uin Tata Do Yebáha elhuxtisi ge ka benne se'e yiesi lo yu‑ni, la'ania gwa xea ttela elha disa tsitsi ugwebie ka benne se'e lhe'esi Sodoma lhe Gomorra lhe attichula elha disa ugwebie ka benne se'e lhe'e ka yiesi ata abittu belabike leha.
MAT 10:16 ’Neti ridhelhaa le attiba ttu nu ridhelhana ka neru to diakana lagwi ge ka sageo. De nuha nna jeru tte gwalotsi'inu lele, gwaluin tti runi ka belha‑na ankakana kedha, lhe anágaba nna bittugaba inná xxeni lele; gwaluin tana tti ruin ka becha‑na.
MAT 10:17 Gwaluyú gele len ka benne kumu udaxxukana le nna saga'akana le lo ka uxtisi. Anágaba nna ukulhakana le lhe'e ka yo'o ata rudhetiri'i ka tisa ge Tata Do Yebáha.
MAT 10:18 Kumu delo ni'a kia nna axtala taga'akana le arlo ka nu rinnabia xeni‑na. Aníha kini gapale lo neda kixxi'enle kana kia lhe anágaba kixxi'agabinle ka nu abittu ankakana nu Israel lhe.
MAT 10:19 Ttaka ganna chi taga'akana le lo iyá ka nuní, la'ania nna abittu uchacha ikile ge nu ekabile lhe ge nu innále lhe, kumu loora tti inneleha nna guteba Tata Do Yebáha ka tisa len lebi'i kini ekabile gekani.
MAT 10:20 Kumu laa lebi'iga nuha innele, sinuki Espíritu ge Tata gele do yebáha‑ba nuha innee.
MAT 10:21 ’La'ania ka nu raka betsikaniha utekana ka betsikaniha lasi ná ka nu uttikana ka nuha, lhe aníha‑gaba uin ka xxudiha len ka xi'inkaniha. Ka xi'inkaniha nna eyekikana ebi'i nookana ka xxudikaniha nna uinkana kini gatti ka benneha.
MAT 10:22 Lebi'i nna iyába ka benne utía di lekani le de ria lele neti. Ttaka benne dhaabie dhu tsitsie lo neda kia‑ni axtaliba ganna chi uluxa iyá nu akaha, benneha gwalábe.
MAT 10:23 Lebi'i tti dhu nookana le lhe'e ttu yiesi, gwaluxunni nna gwaltsia lhe'e attu yiesi. Netiru ria, lebi'i labí chi uluxinle tsekile lhe'e iyá ka yiesi se'e itúba lo yu ge Israel‑ni atti chi esiaya neti benne daya yebáha.
MAT 10:24 ’Ttibanka ttu benne rudhetie nu rule'e ttu maestru, labí rakarula ge benneha tti maestru geeha. Nigaba ttu benne riben lo xxane, labí xxenirula ra lebie tti benne anka xxaneha.
MAT 10:25 Benne rudhetiha ukare'aba isine ake attiba maestru geeha nna benne riben lo xxaneha nna ukare'agaba isine ake attiba xxaneha. Ganna neti tekinna láya nu xxegwi, ¿titiala innekana gele, lebi'i ka nu ankale kia?
MAT 10:26 ’Laxkala abittu gasinle gekani. Kumu labí tee ttu nu igatsi abittu eselana; nigaba ttu nu aka sigá nna abittu una benne geni.
MAT 10:27 Nu rigixxi'ania le sigáha, gwaliria gwalikixxi'a na lo benne nna nu rinnea ro'o nagaleha nna gwaliria gwalinne na idisa ki iyienkin benne.
MAT 10:28 Bittu gasinle ge ka nu uttikana le yiesi lo yu‑ni, kumu ka nuná, sunruba bela latile‑na gwadaakana uttikana, labí aka ge ka nuná uttikana alma gele. Gwaligasilinle ge benne gwaka gebie utse'e looe alma gele‑na lhe bela latile‑na lo giha ata uyú ka benne elha disa ttu dia lii, ge benneha‑la gwaligasini.
MAT 10:29 ’Ttibanka ka binni to‑na, ¿laaba ganna ukare'aba len ttu latti belhiu nna chiba rito'o chupakaba? Ttaka ni ttú ka bia toha, labí iginnikaba lo yu ganna Tata gele do yebáha abíba aka lebie.
MAT 10:30 Anágaba lebi'i axtala ka itsa ikile‑na babanie.
MAT 10:31 Laxkala bittu gasinle kumu lebi'i dakarulale attichula ixe ka binni to‑na.
MAT 10:32 ’Nuxaba benne ganna dhi ro'e arlo ka benne deki gwa riaba lebie neti, anágaba neti arlo Tata kia do yebáha gwadígaba ro'a deki gwalíbanie ria lebie neti,
MAT 10:33 ttaka nu abittuba dhi ro'oni arlo ka benne deki ria leni neti, anágaba neti abittugaba dhi ro'a arlo Tata kia do yebáha deki ria leni neti.
MAT 10:34 ’Laa rakaginle deki bisiaya yiesi lo yu‑ni ki tse'e tse len luesi ka benne. ¡Ko'o! Labí daya ki tse'e tse len luesike, sinuki dalaa kini delo ni'a kia nna ttilha len luesike.
MAT 10:35 Kumu neti dalaa yiesi lo yu‑ni kini uttilhaa ka benne. Nu kwitiha ebi'i noona tata geniha nna xi'iniunnáha nna ebi'i noona nan geniha. Xolisiha nna ebi'i noona nan ge nubiyú geniha.
MAT 10:36 Laxkala la ka nu se'e lhe'e yo'o geleha‑ba abittu aka uyúkana le.
MAT 10:37 ’Nuxaba ttu benne ganna rakarulanie ge tata geeha lhe ge nan geeha lhe attichula neti, benne uni aníha labí ralha benneha ake kia. Lhe ttixka ttu benne ganna rakarulanie ge xi'in biyúeha lhe ge xi'iniunneha attichula neti, benne uni aníha labí ralha benneha ake kia,
MAT 10:38 nna ganna benne abíba uje kurusi gee etenalhe neti, delába ganna abíba eria iki eria lebie, meskila bixa udhakakane de etenalhe neti, benne uni aníha labí ralhe ake benne kia;
MAT 10:39 nna benne labí raka lebie bixa satebie de etenalhe neti, benneha nnittilee, delába labí aka ben benneha arlo Tata Do Yebáha ttu dia lii. Ttaka benne eria iki eria lebie etenalhe neti meskila bixa satebie delo ni'a kia, benneha gwalálee arlo Tata Do Yebáha.
MAT 10:40 ’Nu ulabina leha, neti nuha ulabina, nna nu ulabina netiha nna benne udhelhe netiha nuha ulabina,
MAT 10:41 nna nu ulabina ttu profeta kumu de anka benne ulabinaha profeta, de nuha nna gwadíbana luesi nu tse ralha profetaha dhie nna nu ulabina ttu benne ruin latsiru, kumu de anka benne ulabinaha benne ruin latsiru, de nuha nna gwadíbana luesi nu tse ralha benneha dhie.
MAT 10:42 Lhe nuxaba benne ganna ttixka utebie kwadiba ttu xiga inda idilha i'iya ttu ka benne abittu ra xxeni leke se'e nii, kumu de ankake benne danalhake neti, de nuha nna netiru ria, benne uni aníha chiba ralha benneha dhie nu tse ute Tata Do Yebáha.
MAT 11:1 Tti chi uluxani Jesús‑ni utixxi'e bixa anka nu uin ka benne tsi'inu (12) rudhetinieha, nianna tti bedábie ata dueha, nna deyye lhe'e adíru ka yiesi se'e itúba ka daka niha. Lhe'e ka yiesiha ugwekie rule'enie ka benne lhe rigixxi'anie ke ka tisa ge Tata Do Yebáha lhe.
MAT 11:2 Atti tee Juan benne rugadi indaha lhe'e lisiyyaha, bine ge nu runi Cristuha. Nianna tti udhelhe ttu chupa ka benne rudhetinieha
MAT 11:3 kini gwannaba tisake, ráke bie: ―¿Si lu nuní Cristu benne chi ga'anna isia, o teeki kwedatu attu benne subi ak?
MAT 11:4 Jesús‑ni nna bekabie gekani, ree: ―Gwaleyya nna gwalikixxi'en Juan‑ni ge nu chi riyieninle lhe ge nu chi rilenle runia lhe.
MAT 11:5 Gwaligá na: Ka nu xua lokinna chiba relákinna lhe ka nu ridá natsa‑na chiba redá tsekana, nna ka nu raka yiesu lepra latikinna nna chigaba reyakakana, lhe anágaba ka nu anka kwechu‑na chigaba reyienkinna nna ka nu chi uttiha nna gwa reyaka bengabakana. Anágaba ka benne dii abittu geke tee chigaba riyienkanie ka tisa ge Tata Do Yebáha.
MAT 11:6 ¡Karubáru benne abittu rudú chupana lebie de rilánie nu runia‑ni!
MAT 11:7 Laka reru'una ka nu rudhetini Juan‑ni deyyakana, nianna tti udulo Jesús‑ni rigixxi'anie ka benne se'e niha, rigixxi'anie ke ge Juan‑ni, ree ke: ―¿Bí biriale gwalannile lo yu bisi ata lanú benne se'e? ¿Si gwagíale ttu yettixtila ruttá beha na ak?
MAT 11:8 Ganna abíba nna, ¿núla nuha gwagíale ganna? ¿Si ttu nubiyú nukuna xo tse raka ragalha loni ak? ¡Ko'o! Neti ria, ka nu ruku xo tsekinna, lhe'e lisi ka nu rinnabia xeni‑naliba se'e luesi ka nuná.
MAT 11:9 Ganna abíba nna, ¿núla gwagíale ganna? ¿Si ttu profeta ge Tata Do Yebáha ak? Gwalí galá, neti ria, lebi'i biriale gwagíale ttu benne xxenirula ra lebie tti ttu benne anke profeta.
MAT 11:10 Ge Juan‑ni nuha rinne Tata Do Yebáha lo ka yetsi geeha tti rulise Xi'inieha, ree benneha: Neti idhelhaa ttu benne tsie nnerue lolu kini kixxi'e ka tisa kia‑ni. Benneha idhalie neda gelu.
MAT 11:11 Netiru ria: delo iyá ka benne chi uli yiesi lo yu‑ni, labí chi biria ttu benne ra xxeniru lebie tti Juan benne rugadi indaha. Ttaka delo iyá ka benne rinnabia Tata Do Yebáha, benne ra gwexxaru leeha, xxenirula ra lebie tti Juan‑ni.
MAT 11:12 Juan‑ni, ttili uduloe rigixxi'e ka tisa ge Tata Do Yebáha nna axtaba nnanna ixeba ka benne ruinke doelha akake benne innabia Tata Do Yebáha ke meskiba ttixa rateke nna sunruba ka benne re tsitsi leke gwa ridaake rakake benne rinnabie.
MAT 11:13 Kumu iyába ka profeta ge Tata Do Yebáha lhe bia bennabi bodha'an Tata Do Yebáha len Moisés‑ni, debá nnanna do Juan‑ni gwa rigixxi'aruke ge nu aka.
MAT 11:14 Naba lebi'i ganna si gweyya lele ge nu ria‑ni, Juan‑niba nuní anke Elías benne chi ga'anna esie.
MAT 11:15 ¡Ata sia nagale, gwaludo nagale ganna gwankale nu dika iyienini!
MAT 11:16 ’¿Bí len utsania ka benne se'e nnanna? Ka benne se'e nnanna ankake attiba ka nuto rise'ekana rittakana ata raka i'iya‑na ribesi'en luesikani, rákana:
MAT 11:17 “Ri'itu gwa bekwesibatu ka iyyaxtila getu‑ni, ttaka lebi'i nna abígaba beya'ale, lhe anágaba gwa bilhagabatu le'a ge ka benne yattiha nna lebi'i nna abígaba uresile.”
MAT 11:18 ’Aná ria, kumu Juan‑ni bisiana, labí ri'a rona, lebi'i nna rálale: “Espíritu ge nu xxegwiha‑ba yu'u lati nuná.”
MAT 11:19 Nnanna nna neti benne daya yebáha bisiaya roa lhe ri'iyaa lhe, lebi'i nna redenálale: “Nuní ankana ttu nu ro xxatta lhe ankana ttu nu ri'a lhe. Rutsálana ka gwekixa lhe ka nu ruin tulha lhe.” Ttaka atti rilenri'i elha ruin ge ka xi'in Tata Do Yebáha, la'ania nna rite denri'i deki elha rieni rapa Tata Do Yebáha nuha rapa ka benneha.
MAT 11:20 Nianna tti udulo Jesús‑ni utise ka benne se'e lhe'e ka yiesi ata chi benie ixeru ka milagru. Utise kana kumu labí chi bodúna kana nna odaxxukana neda ge Tata Do Yebáha. Nianna tti ree kana:
MAT 11:21 ―¡Gwalíchi lele xa benne lhe'esi Corazín, lhe gwalíchi lele xa benne lhe'esi Betsaida! Kumu ganna ttixka lhe'esi Tiro‑ni lhe Sidón‑ni lhe, chi uka ka milagru ka nu chi uka lagwi gele‑ni, ka nuha la nukala chi bodúna kana nna bodaxxukana neda ge Tata Do Yebáha ganna ttixka. Nianna tti uku xo ttipa gekani lhe udelha tee ikikani kini ula'a loo deki chi bodúna kana.
MAT 11:22 Netiru ria: La sá atti uin Tata Do Yebáha elhuxtisi ge ka benne, la'ania adírula elha disa tsitsi ugwebie le, lebi'i ka benne lhe'esi Corazín lhe ka benne Betsaida lhe, attichula elha disa tsitsi uyú ka benne se'e lhe'e ka yiesi Tiro lhe Sidón lhe.
MAT 11:23 Lebi'i nna ka benne lhe'esi Capernaum, ¿si rakinle deki yebáha‑li eyapile? ¡Ko'o! Neti ria, lhe'e belha'a chulhaha ata uyúle elha disaha‑li iginnile. Kumu ganna lhe'esi Sodoma‑ni uka ka milagru chi uka lagwi gele‑na, la'ania nna yiesiha abittula bise'e lo nuha, sa rerula nuha axta nnanna ganna ttixka.
MAT 11:24 Netiru ria: La sá atti uin Tata Do Yebáha elhuxtisi ge ka benne, la'ania adírula elha disa tsitsi ugwebie le, lebi'i ka benne lhe'esi Capernaum attichula elha disa uyú ka benne lhe'esi Sodoma‑ni.
MAT 11:25 Nianna tti unne Jesús‑ni ree Tata Do Yebáha: ―Tata, kwinalu ankalu Xxana yebáha lhe yiesi lo yu‑ni lhe. Xxeni ra lelu kumu chi bele'elu iyá nuní len ka benne abittu tte raka geke nna bekatsilu nuní len ka nu yuu lhe len ka nu rite dárukinna lhe.
MAT 11:26 Gwalí galá xa Tata, kumu anába uka le kwinalu aka.
MAT 11:27 Nianna ree ka benne se'e niha: ―Tata kiaha iyába chi betebie lasi náya lhe anágaba lanú nu gwalíga ankabienna neti benne ankaa Xi'inieha, sunruba Tata kiaha gwankabianie neti, lhe anágaba Tata kiaha lanú nu ankabienna benneha, sunruba neti benne ankaa Xi'inieha gwankabiatie lhe sunrugaba ka benne raka lasia ule'enia ke Tata kiaha kini uinbiake bie.
MAT 11:28 ’Iyá ttele, lebi'i ata abitturu ruchíale lo nu ratele‑na lhe ata ruchacha xxatta ikile lhe, gwaltá len neti kini neti nna unia ki eyaka lele ge nu ratele‑na.
MAT 11:29 Gwaludo tisa ge nu rodha'anaa uinle lhe gwaludheti tti runia‑ni kumu neti ankaa ttu benne re besi lasia lhe labí ra xxeni lasia lhe. Ganna aníha uinle, la'ania nna xen su lasiba edú lele.
MAT 11:30 Kumu iyába nu rodha'anaa uinle, labí tsitsi anka nuní, gwadaabari'i udori'i tisa ge nuní.
MAT 12:1 La'aniagaba nuha dia Jesús‑ni ritebie lhe'e ka xuxtila se'e itúba ka daka niha la sá tti reyaka le ka benne Israel‑ni. Ka benne rudhetinieha nna chi ugwetti bituinke, nianna uduloke richekuke iki ttu chupa ka xuxtilaha nna roke benneha.
MAT 12:2 Tti bilani ka fariseo‑ni nu ruin ka benneha, nianna tti rákana Jesús‑ni: ―¡Biyúruga! Ka nu rudhetinlu‑ni ruinlakana nu labí ga'anna uinri'i lhe'e ka sá atti reyaka leri'i.
MAT 12:3 Jesús‑ni nna bekabie gekani, ree: ―¿Si labí chi belabale lo ka yetsi ge Tata Do Yebáha ata rigixxi'a bí ben David‑ni itupa lenie ka benne se'e lenieha tti bituinkeha?
MAT 12:4 Laaba ganna David‑ni gwatta'abie lhe'e yotu ge Tata Do Yebáha nna gwaxxíe ka yettaxtila sia niha, kini uto lanie ka benne se'e lenieha, delába ka yettaxtila ka nu chi riesike akake sun tteba ge Tata Do Yebáha, ka nu labí ga'anna goe lhe nigaba ka benne se'e lenieha lhe, sinuki sunruba ka bixxudiha gwa ga'anna gokana benneha.
MAT 12:5 ¿Si abittugaba chi belabale lo bia bennabi bodha'an Tata Do Yebáha len Moisés‑ni ata rigixxi'a deki labí dika kwen ka benne sina tti risia ka sá eyaka leri'i? Ttaka ka bixxudiha ribenbakana lhe'e yotuha meskiba la sáha ankana la sá reyaka leri'i nna labí rujakana yua ge nu ruinkanaha.
MAT 12:6 Ttaka neti ria le, nii du ttu benne xxenirula ra lebie tti yotuha.
MAT 12:7 Ganna ttixka lebi'i rite denle bí diani nu ra Tata Do Yebáha lo ka yetsi geeha, tti ree: “Neti raka lasia satua lele ka benne, laa rakaga lasia uttile ka nimala kini utele úna kia.” Ganna ttixka lebi'i rite denle nuní, la'ania nna abittula rusiale iki ka benne abittu ruin tulha.
MAT 12:8 Kumu neti benne daya yebáha, netiba ankaa xxana ka sá reyaka leri'i. De nuha nna gwa teeba lo neda kia innía bixa dika uinri'i lhe'e ka sá reyaka leri'i.
MAT 12:9 Bedába Jesús niha nna ute'e lhe'e yo'o ata rudheti ka benne Israel‑ni ka tisa ge Tata Do Yebáha.
MAT 12:10 Lhe'e yo'oha re ttu benne daa yatti ttu lha'a nábie. Nianna unnaba tisakana Jesús‑ni, rákane: ―¿Si gwa ga'anaba eyoinri'i ttu benne rani la sá reyaka leri'i? Aníha rákane kumu regila lekani bixa usiakana ikie.
MAT 12:11 Labie nna bekabie gekani, ree: ―Ganna ttixka ttúle du ttu neru gele nna iginni nuha lhe'e ttu yiela inda la sá tti reyaka leri'i, ¿laaba ganna teeki ebeale neruha lhe'e yielaha meskiba la sáha ankana sá tti reyaka leri'i?
MAT 12:12 ¿Laaba ganna adírula daka ttu benne attichula ttu neru? Laxkala gwa ga'anaba uinri'i ttu nu tse lhe'e ka sá tti reyaka leri'i.
MAT 12:13 Nianna tti ree benne biyú daa yatti neeha: ―¡Belhí nálu! Benneha nna belhí tteba nábie nna beyaka tteba nuha; beyakabana atti tteba anka attu lha'a neeha.
MAT 12:14 Ttaka ka fariseo‑ni tti beriakana lhe'e yo'oha nna udulo ttebakana regila lekani gaxasina uinkana kini uttikana Jesús‑ni.
MAT 12:15 Tti chi bina Jesús‑ni ge nu rulha le ka fariseo‑ni udhakakane, nianna bedá ttebe niha, nna deyye attu ta subi. Aníha‑ba danalha ixe juisiru ka benne nna reyonie iyába ka benne raniha.
MAT 12:16 Nianna bedha'an tsitsie, rabie ka benneha: ―Anuttu nu kixxi'enle kia.
MAT 12:17 Aníoka kini gwado tisa ge nu unne profeta Isaías‑ni tti utixxi'e nu ra Tata Do Yebáha, tti ree:
MAT 12:18 Nii chi du ttu benne ixúti lo sina kia. Benne‑ni nuní chi bekwea kini ixútie. Lee nuní rakati gee lhe ru'u lasia nu runie lhe. Neti ku'a Espíritu kia‑ni latie, labie nna tsekie kixxi'anie iyába ka benne se'e lhe'e ka yiesi se'e itúba yiesi lo yu‑ni, kixxi'anie ke gasina unia ki saría tsena ke.
MAT 12:19 Benneha labí uttilha ro'e len ka benne, nigaba tsekie innebie idisa. Nuttugaba nu iyieninna tsi'e lo ka neda‑na.
MAT 12:20 Benneha labí utse'e looe ka benne abittu ra tsitsi leke, lhe nigaba labí bixa udhake ka benne chi ratú leke. Aníha unie axtaliba kini dhaabie aka iyá nu anka tse itúba yiesi lo yu‑ni.
MAT 12:21 La'ania nna iyá xeaba ka benne se'e yiesi lo yu‑ni uxxen leke gebie.
MAT 12:22 Ttu chupa ka benne bisinke ata du Jesús‑ni, cheke ttu benne xua loe lhe anke biría de yu'u espíritu xxegwi latie. Lee nna gwa beyoinbe benneha, laxkala gwa belábin benneha lhe gwa bennebe lhe.
MAT 12:23 Iyába ka benne bebanabakanie tti bilákanie nu benieha, nianna tti ra luesike: ―¿Si laaba nubiyú du‑niba nuha ankana nu datiana David‑ni?
MAT 12:24 Ttaka tti biyienin ka fariseo‑ni nu ra ka benneha, nianna tti rákana: ―Nubiyú‑ni, Beelzebú nu anka xxana ka espíritu xxegwiha‑ba rixuin nuní kini ridaana rebeana ka espíritu xxegwi yu'u lati ka benne.
MAT 12:25 Ttaka kumu Jesús‑ni gwa rite dábanie nu rulaba lekaniha, nianna tti ree kana: ―Ganna ka benne se'e lhe'e ttu yiesi se'e la'ake de ritilha len luesike, la'ania nna yiesiha tse'e looba nuha lhe ganna ka benne se'e lhe'e ttu yo'o se'e la'ake de ritilha len luesike, la'ania nna labíru uchía ka benneha tse'eke lhe'e yo'oha.
MAT 12:26 Anágaba nu xxegwiha, ganna ttixka la labana ebeana ka luesi xxegwi‑niha, la'ania nna chiba tse'e la'a len luesi ka nuha. Ganna aníha uinkana, la'ania nna, ¿galasina aka ge nu xxegwiha innabiaruna ganna?
MAT 12:27 Lebi'i rale deki neti rixúti xxana ka espíritu xxegwiha ki rebeaya ka espíritu xxegwi yu'u lati ka benne, ganna aníha runia nna ka benne rudhetinle‑na nna, ¿si nu xxegwiha‑gaba rixúkinna kini rebeakana ka espíritu xxegwi yu'u lati ka benne? Ganna ka nuná innákana labí rixúkinna nu xxegwiha, la'ania nna lebi'i ruinba lele, labí lii nu rale‑na.
MAT 12:28 Ttaka kumu neti Espíritu ge Tata Do Yebáha‑ba rixúti ki rebeaya ka espíritu xxegwi yu'u lati ka benne, nuha runna liina deki chiba bisia Tata Do Yebáha len lebi'i kini innabie le.
MAT 12:29 ’Ttibanka ttu ubana, ¿gasina ga'ana lhe'e lisi ttu nubiyú ankana tipa ki lhanana ka nu se'e lhe'e lisi nuha? ¿Laaba ganna lade'axa udaxxuna nubiyú anka tipaha nna uxxikana nuha? Aníha‑ruba nna ki dhaana lhanana ka nu se'e lhe'e lisi nuha.
MAT 12:30 ’Laxkala nu abittu du lenna netiha, nuha rigu'uba ni'ani neti nna nu abittu rute náni len netiha ki ottupatu ka benne lo neda ge Tata Do Yebáha, nuha urio lálana ka benneha.
MAT 12:31 ’De nuha nna ria le: Tata Do Yebáha gwadíbe elha xen lasi ge iyába tulha ruin ka benne lhe ge iyába nu satsa rinneke lhe, ttaka ganna inne satsake ge Espíritu geeha, ka benneha labí elha xen lasi geke gatta.
MAT 12:32 Nuxaba benne ganna inneke kuake bala'ana kia, neti benne daya yebáha, ka benneha gwaxúba elha xen lasi geke, ttaka ka benne inne satsake ge Espíritu ge Tata Do Yebáha, ka benneha labí elha xen lasi geke gatta, ni yiesi lo yu ata se'eri'i nnanna, nigaba ata esinri'i nu si daa.
MAT 12:33 ’Ganna ttu ya xixxi anka tsena, la'ania nna tsegaba anka nu xixxi utena nna ganna ttu ya xixxi abíba anka tsena, la'ania nna abígaba tse anka nu xixxi utena. Kumu ka yaga‑na, ukare'aba nu xixxi ribia lokinna, runna liina gasina ankakana.
MAT 12:34 ¡Aalexa nu ruin satsa! Lebi'i ankale ttiba ka belha‑na. ¿Gasina aka gele innele nu anka tse, ki lebi'i nu ruin satsaba ankale? Kumu nu re lhe'e lastobale, nuha‑ba riria ro'ole rinnele.
MAT 12:35 Kumu benne re tse leeha rinnebe nu tse reba lhe'e lastobie, nna nu re satsa leniha nna rinnegaba nuha nu satsa reba lhe'e lastoni.
MAT 12:36 Ttaka neti ria le, ganna chi bisia sá uin Tata Do Yebáha elhuxtisi ge ka benne, la'ania ge iyába ka tisa a ixú unnekeha, kixxi'ake.
MAT 12:37 Kumu benneha‑ba unie elhuxtisi ge iyá nu unneke: ganna unneke tisa tse nna gwa saría tsegabana ke nna ganna unneke tisa satsa nna ibixxi iginnibake.
MAT 12:38 Ttu chupa ka fariseo‑ni lhe ttu chupa ka nu rule'ekinna ka benne nu ra lo bia bennabi bodha'an Moisés‑ni rákana Jesús‑ni: ―Maestru, ri'itu raka letu ilentu uinlu bixa ttu milagru kini ula'a deki gwalí Tata Do Yebáha udhelhe lu.
MAT 12:39 Lee nna bekabie gekani, ree: ―Lebi'i ka nu ruin satsa se'e nnanna lhe chi rudhá ikile Tata Do Yebáha nna riala lele attu nu subi, lebi'i rinnabale kini ula'ania le ttu bixa milagru, ttaka labíru bixa attu milagru ula'ania le, sunruba luesi nu gwate Jonás benne uke profeta ge Tata Do Yebáha, sunruba luesi nuha gula'ania le.
MAT 12:40 Kumu ttiba gwate Jonás‑ni uyu'una lhe'e belha bartoha tsunna ubisa lhe tsunna ela lhe, anágaba neti benne daya yebáha, tsunna ubisa lhe tsunna elagaba tsu'a lhi'u yuha.
MAT 12:41 Ganna chi isia sá uin Tata Do Yebáha elhuxtisi ge ka benne se'e yiesi lo yu‑ni, la'ania ka benne use'e lhe'esi Nínive‑ni eyadhake lo elhuttiha nna ukinnike ka benne se'e nnanna. Kumu ka benneha gwa bodúbana ke nna bodaxxuke neda ge Tata Do Yebáha tti biyienkanie ka tisa utixxi'a Jonás‑ni. Nnanna nna nii du ttu benne xxenirula ra lebie tti Jonás‑ni nna a ria lele gebie.
MAT 12:42 Anágaba nuila unnabiana ka yiesi se'e daka Sabá, ganna chi isia sá uin Tata Do Yebáha elhuxtisi ge ka benne se'e yiesi lo yu‑ni, nuha eyadhagabana lo elhuttiha nna ukinnigabana ka benne se'e nnanna. Kumu lana idittuli dana nna betedo nagani ge elha rieni upa Salomón‑ni. Nnanna nna nii du ttu benne xxenirula ra lebie tti Salomón‑ni.
MAT 12:43 ’Ttixka ttu espíritu satsa reriana lati ttu benne nna rekibana lo yu bisiha regilana ata eyaka leni, ttaka tti abittuba raxxakana,
MAT 12:44 nianna rana: “Eyekichilaa eya'aya lisia ata biriayaha.” Tti besinnaha nna gwaxxakana benne beriana latieha, chi doe anke attiba ttu yo'o chi luba ra lhe'eni lhe chi yapa te xea lhe'eni lhe.
MAT 12:45 Nianna tti tsiana taxxína a gasi ka espíritu xxegwi ka nu satsarula ruinkana tti lana, nianna tti ga'akana tsu'ukana lati benneha. Benneha nna adírula satsa unie attichula tti benie sisi'a tteha. Aníha‑gaba sate ka nu ruin satsa se'e nnanna.
MAT 12:46 Laka du Jesús‑ni rinnebie len ka benne saa lhe'e yo'oha, nan geeha lhe ka betsieha lhe se'eke lali'a ge yo'oha nna raka leke inne lenke bie.
MAT 12:47 Ttu benne du niha nna gwattixxi'anie Jesús‑ni, ree bie: ―Nan geluha lhe ka betsiluha lhe raka leke inne lenke lu. Neke se'e ro'o yo'o‑ni.
MAT 12:48 Lee nna bekabie ge benne gwattixxi'a, ree benneha: ―¿Núnna anka nan kia lhe núnna anka ka betsia lhe?
MAT 12:49 Nianna tti bele'e Jesús‑ni ka benne rudhetinieha nna ree: ―Ka benne se'e nii nuní ankake nan kia lhe betsia lhe,
MAT 12:50 kumu nuxaba benne ganna runie nu ru'u le Tata kia do yebáha, benneha nuha anke betsia lhe danaa lhe nan kia lhe.
MAT 13:1 La sáha‑gaba biria Jesús‑ni lhe'e yo'oha nna die gwadhoe ro'o indatooha.
MAT 13:2 Nianna tti bitupa ixe juisiru ka benne. Laxkala labie teeki ugwapie lo ttu barcu daa niha ki udoe. Ka benneha nna ata daa ro'o indatooha‑liba use'eke.
MAT 13:3 Ge ixeba nu utixxi'anie ke. Aníha runie kini utte dáke bí diani nu raka lee kixxi'anie keha, nianna tti ree: ―Ttu benne ruin sina birie die gwedelha xuxtila.
MAT 13:4 Tti dabie gwedelha xuxtilaha nna adí benneha utse ro'o nedaha, nianna tti biginni ka binniha nna bediga ttebakana benneha.
MAT 13:5 Attu chupe nna utse lo íyya atta'a ata labí gwadilo yu do. Benneha gwa be'eyu ttebe, ttaka kumu de labí rea xua yuha niha,
MAT 13:6 de nuha nna tti biria tatubisa nna bette ttebe benneha. Kumu de labí lhi'u dia lhue, de nuha nna ubisi ttebe.
MAT 13:7 Attu chupe nna utse lhe'e yietsiha, ttaka yietsiha biyelhabana nna belhiubinna benneha.
MAT 13:8 Ttaka adí ka xuaha nna gwa ubinnibake ata do yu tse nna yalhá lhe'e lena bete benneha. De gayua (100) lhe de gayuna (60) lhe de rerua (30) tteba xua bekudhi iki ttu ttu ka benneha.
MAT 13:9 ¡Ata sia nagale, gwaludo nagale ganna gwankale nu dika iyienini!
MAT 13:10 Ka benne rudhetinieha nna ubigake unnaba tisake Jesús‑ni, ráke bie: ―¿Beaka lhixxa rába a rigixxi'enlu ka benne nu raka lelu utte dáke?
MAT 13:11 Lee nna bekabie, ree: ―Lebi'i gwa ruinba Tata Do Yebáha ki tte denle nu labí yu adí ka benne, delába gwa ruinbe ki tte denle gasina innabie. Adí ka benne nna labí runie kini utte dáke.
MAT 13:12 Kumu benne gwa rite daniha, gwadírula benneha elha rieni ki tte da chiettirunie. Ttaka benne abí rite daniha nna axtala nu ttu latti chi ute danieha etua.
MAT 13:13 De nuha nna labí lhixxa rá rigixxi'ania ka benne, kumu meskiba bika rulannike nna labí rilákanie lhe meskiba bika rudo nagake nna labí riyienkanie, nigaba a rite dákanie.
MAT 13:14 Nu rate ka benne ruin aní rado tisa ge nu unne Isaías‑ni lo ka yetsi ge Tata Do Yebáha, tti ree: Meskiba bika rudo nagale nna labí tte denle; lhe meskiba bika rulannile nna labí ilenle.
MAT 13:15 Kumu ka benne‑ni tsitsiba ruin lastoke, labí raka leke tsia leke kia lhe bedheaba nagake, bittuba biyienkanie, lhe anágaba benbake ttiba ttu nu xua loni, bittuba bilákanie. Aníha benke kini abittu ilákanie lhe abittu iyienkanie nna tte dákanie, kini ka eyekike nna odaxxuke neda kia nna eyonia ke.
MAT 13:16 Ttaka lebi'i, karubárule kumu gwa rilábin le lhe gwa riyienbin nagale lhe.
MAT 13:17 Kumu netiru ria, ixeba ka profeta lhe anágaba ixegaba ka benne ben latsiru, ka benneha yalhá uka leke ilákanie nu rilenle nnanna, ttaka labí bilákanie nuha. Ukagaba leke iyienkanie ka tisa riyieninle nnanna, ttaka labí biyienkanie ka tisaha.
MAT 13:18 ’Laxkala lebi'i gwaludo nagale kixxi'aya bí diani tisa utixxi'aya ge benne dia gwedelha xuxtilaha.
MAT 13:19 Ttibanka ganna ttixka ttu benne riyieninie ka tisa rigixxi'akana gasina innabia Tata Do Yebáha, nna ganna lee abíba rite danie ka tisaha, la'ania nna daa tteba nu xxegwiha rebeana ka tisaha lhe'e lastoe. Benne runi aníha benneha raxxíne len xuxtila ubinni ro'o nedaha.
MAT 13:20 Xuxtila utsa lo íyya atta'aha nna raxxína na len benne biyieninie ka tisaha nna ittaba udú lebie lhe gwexunniba bedaxxue ka benneha.
MAT 13:21 Ttaka kumu de labí chi begwe lhu ka tisaha lhe'e lastoe, de nuha nna ttu sattiruba ugía lebie. Laxkala tti ruyúe ttu bixa elha disa o ridú nookane delo ni'a ge ka tisaha, la'ania nna reyadi gaa ttebe.
MAT 13:22 Xuxtila utsa lhe'e yietsiha nna raxxína na len benne riyieninie ka tisaha, ttaka ka elhaxchacha iki gebie tee yiesi lo yu‑ni, lhe nu ruinna kini rudorulana lebie gatta gebie, nuha runi ki rudagana ka tisaha, labí rugwelhana ki uin ka tisaha sina lhe'e lastoe.
MAT 13:23 Ttaka xuxtila ubinni lo yu reha nna raxxína na len benne biyieninie ka tisaha lhe ute danie ke lhe. De nuha nna gwa ruinbe nu ra ka tisaha. Benneha nuha anke ttiba xuxtila betebie de gayua (100) lhe de gayuna (60) lhe de rerua (30) lhe.
MAT 13:24 Jesús‑ni utixxi'agabe attu tisa. Benie aníha kini utte da ka benne bí diani nu raka lee kixxi'anie keha, nianna tti ree: ―Tata Do Yebáha, tti rinnabie ka benne, elha rinnabia geeha raxxína na len nu uka tti ugía ttu benne gwedelha xuxtila lo yu geeha.
MAT 13:25 Ttaka lo relaha, laka tee ka benne te'adhike, nianna tti bisin nu abittu raka uyúna benne bedelha xuxtilaha, nna údana ixxi lhe'e xuxtila geeha, nianna deyyana.
MAT 13:26 Tti chi biyelha xuxtilaha nna ulea ikie, la'ania nna biriagaba ixxiha lhe'e benneha.
MAT 13:27 Ka nu riben sinaha nna ugíakana gweasikana xxana yuha: “Tata, ¿laaba taga'a xuxtilaba nuha bedelhalu lo yu geluha? ¿Gála biria ixxiha ganna?”
MAT 13:28 Xxana yuha nna bekabina, rana: “Gaxa ttu nu abittu raka uyúbana neti benna nuha.” Ka nu riben sina geniha nna rákana na: “¿Si gwa raka lelu tsiatu sattupitu ixxiha?”
MAT 13:29 Lana nna rana: “Bittu. Kumu ganna sattupile ixxiha nna itupa xuxtilaha‑ba itupile.
MAT 13:30 Gwalugwelhaba ixxiha lhe xuxtilaha iyelhakana. Axtaliba ganna chi isia eyatsa xuaha, la'anialiba nna upeya ka nu tsu'u gwetselaha: Lade'axa gwalittupi ixxi‑na nna xxia xxiaba gwaloxxika lhe'eni kini itena. Iki de nuha‑liba nna tti egitsale xuxtila‑na nna oga'ale benneha ata rigua tsea lena kiaha.” Aníha‑ba raka tti rinnabia Tata Do Yebáha ka benne.
MAT 13:31 Utixxi'agabin Jesús‑ni ka benne ge ttu besi ge kuana muxtasa. Aníha benie kini utte dáke bí diani nu raka lebie kixxi'anie keha, nianna tti ree: ―Tata Do Yebáha, tti rinnabie ka benne, elha rinnabia geeha raxxína na len ttu besi ge kuana muxtasa úda ttu benne biyú lo yu geeha.
MAT 13:32 Besiha meskiba ankana ttu besi chika'a to delo iyá ka besi‑na, ttaka tti rixen yaga ge kuana muxtasaha, nuha‑la rakaruna yaga xeni delo iyá ka kuana daa lhe'e kurraliha. Laxkala axtala ka binni‑na rusia lhixxu'inkani lo ka nániha.
MAT 13:33 Utixxi'agabanie ke ge kua dii bedelha ttu nuila iki yiediha. Aníha benie ki utte dáke bí diani nu raka lebie kixxi'anie ke, nianna tti ree: ―Tata Do Yebáha, tti rinnabie ka benne, elha rinnabia geeha raxxína na len kua dii bedaxxu ttu nuila nna bedelhana iki tsunna (3) ya yiedi xuxtila kini ilhidhana lhe'e itú kuaha.
MAT 13:34 Iyába ka tisa utixxi'ani Jesús‑ni ka benne, labí unnebie ka nuha lhixxa rá, satíaba betanie ke nu unneeha. Laxkala labí rigixxi'anie ke attu bixa tisa, ganna abíba rutanie ke.
MAT 13:35 Aníha benie ki gwado tisa ge nu unne benne uke profeta ge Tata Do Yebáha, tti ree: Iyába nu kixxi'aya teeki utania na ka benne, labí innea na lhixxa rá. Kixxi'abaa nu tee gatsiha, nu labí chi yuke attili ure yiesi lo yu‑ni.
MAT 13:36 Iki de chi uchú tisa Jesús‑ni ka benne tupa niha, nianna deyye bete'e lhe'e yo'oha. Ka benne rudhetinieha nna ubigake ata due nna ráke bie: ―Utixxi'en ri'itu, ¿bí diani nu unnelu ge ixxi be'eyu lhe'e xuxtilaha?
MAT 13:37 Jesús‑ni nna bekabie, ree ke: ―Neti benne daya yebáha, netiba nuha ankaa benne ugía gwedelha xuxtilaha
MAT 13:38 nna lo yu ata ugía xuxtilaha nna ankana yiesi lo yu‑ni. Xuxtilaha nna anke ka benne rinnabia Tata Do Yebáha ke nna ixxi biria lhe'e xuxtilaha nna ankana ka nu rudokana tisa ge nu xxegwiha.
MAT 13:39 Nu abittu raka uyúna benne anka xxana yuha, lana nuha anka nu xxegwiha. Lana údana ixxiha lhe'e xuxtilaha. Gwetselaha nna ankana tti chi lhuxa yiesi lo yu‑ni. Ka benne kweni gwetselaha nna ankake ka anjeli ge Tata Do Yebáha.
MAT 13:40 Laxkala ttiba gwate ixxiha bilupina nna ugíana lo giha, aníha‑gaba sate ka benne ganna chi lhuxa yiesi lo yu‑ni.
MAT 13:41 Neti benne daya yebáha idhelhaa ka anjeli kiaha ata se'e ka benne rinnabiaya, kini kweake ka nu ridí yiekana ka benne ki ruinke tulha lhe ki kweake ka nu ruin satsa lhe.
MAT 13:42 Nianna tti udelhake kana lo giha. Niha kwesikana lhe goniba lo layakani lhe.
MAT 13:43 La'ania nna ka benne ruin tseha, ttiba tatubisa‑na rapi edha linníbe, aníha‑ba tsapi edha linníbake ata rinnabia Tata geke do yebáha. ¡Ata sia nagale, gwaludo nagale ganna gwankale nu dika iyienini!
MAT 13:44 ’Tata Do Yebáha, tti rinnabie ka benne, elha rinnabia geeha raxxína na len ttu nu daka xxatta yu'una lhi'u yu. Ttu benne biyú tti gwaxxake nuha nna bokatsi adakabe na, nianna ritta rebaaba lebie deyye nna gwatto'e iyába nu tee gebie, nianna tti ugíe uyo'e lo yu ata gatsi nu daka xxattaha.
MAT 13:45 ’Lhe anágaba tti rinnabia Tata Do Yebáha ka benne, elha rinnabia geeha raxxígabana na len ttu benne rekie gwetto'o, regile ka íyya ragalha, ka nu tse, ki utto'e kana.
MAT 13:46 Tti gwaxxake ttu íyya daka xxatta, nianna deyya ttebe gwatto'e iyába nu se'e gebie, nianna tti ugíe gwayo'e íyya ragalhaha.
MAT 13:47 ’Tata Do Yebáha, tti rinnabie ka benne, elha rinnabia geeha raxxína na len ttu yexxa nu rudaxxu belha. Tti rudelha ka benne yexxaha lhe'e indaha nna iyá looba belha rudaxxuna.
MAT 13:48 Tti chi bisá yexxaha nna ka nu rudaxxu belhaha nna bebeakana yexxaha ro'o indaha. Nianna uyu'ukana bokwekana ka belha tseha nna ulu'ukana ka nuha lhe'e ka sumi, nna ka belha ka nu abittu ixúha nna uru'unabakana ka nuha.
MAT 13:49 Aníha‑ba aka ganna chi isia sá lhuxa yiesi lo yu‑ni. Iria ka anjeli ge Tata Do Yebáha kwesike ka benne ruin satsaha lagwi ge ka benne ruin tseha
MAT 13:50 nianna tti udelhake ka nu ruin satsaha lo giha. Niha kwesikana lhe goniba lo layakani lhe.
MAT 13:51 Nianna tti unnaba tisa Jesús‑ni ka benne rudhetinieha, ree ke: ―¿Si gwa ute denle iyá nu ria‑ni? Lake nna bekabike, ráke: ―Gwa ute da galentu.
MAT 13:52 Lee nna ree ke: ―Iyába ka nu rule'ekinna ka benne nu ra lo bia bennabi bodha'an Moisés‑ni, delába ka nu chi yúkana gasina rinnabia Tata Do Yebáha ka benne, ka nuná ankabakana attiba xxana ttu yo'o. Xxana yo'oha, lhe'e iyá nu tua tsenna lhe'e yo'o geniha, ribeabana nu kubi lhe ribeabana nu yaxxu lhe.
MAT 13:53 Tti chi uluxani Jesús‑ni utixxi'abie ka tisa nu betanie ka benneha, nianna bedábie ata dueha nna deyye.
MAT 13:54 Tti besine lhe'esi Nazaret ata uka lasieha, nianna udulo ttebe bele'enie ka benne ge lhe'esiha ka tisa ge Tata Do Yebáha lhe'e yo'o ata rudhetike ka tisaha. Tti biyienkin benne se'e niha nu rigixxi'eha, nianna bebanabakanie nna ra luesike: ―¿Gá gwaxxí nuní elha rieni rapana lhe gá gwaxxína ka milagru ruinna‑ni lhe?
MAT 13:55 ¿Laaba xi'ini nu runi ka mexaha lhe ka xxilaha‑ba nuní? ¿Laaba Maríaba lá nan ge nuní, nna ka betsiniha nna tee lákani Jacobo lhe José lhe Judas lhe Simón lhe?
MAT 13:56 ¿Laaba iyába ka danniha se'ekana lhe'esi‑ni len ri'i? Lana nna, ¿gála gwaxxína iyá nu yuna‑ni ganna?
MAT 13:57 Nianna tti bituxxukinna ge Jesús‑ni, ttaka labie nna ree kana: ―Ttu benne anke profeta gaxaba die gwa rugwebakana lidhake, ttaka ka nu lhe'esi geeha labí rugwekana lidhake, nigaba ka benne se'e lhe'e yo'o geeha.
MAT 13:58 De nuha nna labí ixe ka milagru ben Jesús‑ni niha, kumu de labí ugía lekani gebie.
MAT 14:1 La'ania Herodes nu rinnabia lo yu ge Galilea‑ni binana ge nu ruin Jesús‑ni.
MAT 14:2 Nianna tti rana ka nu riben sina geniha: ―Juan nu rugadi indaha‑ba nuná chi beyaka benna lagwi ge ka benne chi uttiha. De nuha‑ba nna raka geni ruinna ka milagru‑na.
MAT 14:3 Aníha ra Herodes‑ni, kumu delo ni'a ge Herodías nu uka nuila ge betsini Felipe‑ni, de nuha‑ba nna udhelhana bedaxxukana Juan‑ni nna bexxigakane nna utixxakane lisiyya.
MAT 14:4 Aníha benna kumu de bituxxuinna de ra Juan‑ni na: “Labí ga'anna edo lenlu nuila ge betsilu‑na.”
MAT 14:5 Herodes‑ni benna uttina Juan‑ni, ttaka usibinna ge ka benne, kumu ráke: Juan‑ni anke profeta ge Tata Do Yebáha.
MAT 14:6 Ttaka la sá tti uka laní ge Herodes‑ni tti gwadoinna idaha, la'ania beya'a xi'iniunná Herodías‑ni arlo iyába ka nu se'e len Herodes‑ni. Herodes‑ni nna yalhá uyu'u leni beya'a nuila kwitiha.
MAT 14:7 Nianna tti bodha'an tsitsi tisa geni len nuilaha nna rana nuha: ―Bixaba innabalu, gutebaa na gelu.
MAT 14:8 Nuilaha nna rana Herodes‑ni: ―Raka lasia ku'ulu lhe'e ttu ye'ena bega iki Juan nu rugadi indaha nna utelu na len neti. Aníha ra nuilaha kumu de ixnániha‑ba ulu'u tisana na, kini unnabana bega iki Juan‑ni.
MAT 14:9 Nianna Herodes‑ni chi bedú si'ina leni, ttaka kumu de chila bedha'an tsitsi tisa geni len nuilaha lhe anágaba de chila unnena nuha lo ka nu se'e niha, de nuha nna benna doelha kini ugwekana nuilaha nu rinnabanaha.
MAT 14:10 Nianna tti udhelhana ki gwachúkana bega iki Juan‑ni lhe'e lisiyyaha.
MAT 14:11 Ulu'ukana iki benneha lhe'e ttu ye'ena nna gwagwekana nuila kwitiha. Nuilaha nna gwagwena nan geniha nuha.
MAT 14:12 Ka benne bedhetini Juan‑ni nna ugía ttebake gwaxíke benneha nna gwakatsike bie. Iki de nuha nna tti ugíake gwattixxi'akanie Jesús‑ni ge nu chi ukaha.
MAT 14:13 Tti chi bina Jesús‑ni nu gwate Juan‑ni, nianna beru'una ttebe deyye sun labe deyye lo ttu barcu betee lo indatooha kini isine ata lanú benne se'e. Ttaka tti chi bina ka benne niha‑la chi die, nianna biria ttebake lhe'e ka yiesi gekeha nna ni'abake diake danalhake bie.
MAT 14:14 Tti ugwadie lo barcuha nna bilánie ixe juisiru ka benne chi se'e niha. Nianna gwatua lebie ke nna beyonie ka benne rani gekeha.
MAT 14:15 Ttaka de chi galá dia ralha nuha, nianna tti ubiga ka benne rudhetinieha nna ráke bie: ―Ata se'eri'i‑ni, yu bisiba nuní, labí bixa tee nii lhe gwea chiba dia ura nuní. Bedhelhala ka benne tupa‑ni eyyake lhe'e ka yiesi to‑na kini sayo'oke nu goke.
MAT 14:16 Ttaka Jesús‑ni bekabie ree ke: ―Labí raka doelha eyya ka benne‑ni. Lebi'iba gwalugwe ke nu goke.
MAT 14:17 Ka benneha nna bekabike, ráke: ―Labí bixa nuja ri'itu. Ne sunruba gayu yettaxtila nujatu nna a chupa ka belha nna.
MAT 14:18 Jesús‑ni nna ree ke: ―Nii gwalute ka nu nujale‑na ganna.
MAT 14:19 Nianna benie ki bese'e ka benneha lo ixxi binniha, nna tti bedaxxue gayu ka yettaxtilaha nna ixpa ka belhaha, nianna tti belhidha loe yebáha nna begwebie ixkixaru len Tata Do Yebáha. Nianna tti ulha'abie lhe'e ka benneha nna begwebie ka benne rudhetinieha. Ka benneha nna utidhike benneha begweke ka benne se'e lo ixxi binniha.
MAT 14:20 Iyábake utoke nna axtaba beyielakanie. Ka benne rudhetinieha nna bottuparulake a tsi'inu (12) sumi ka ro'o salha'a bexxaha. Besá tí ka sumiha.
MAT 14:21 Ttiba ttu gayu mili ka benne biyúha utoke, sunrula ka benne biyúha bibaba, bittula bibaba ka benne nuilaha lhe ka nutoha lhe.
MAT 14:22 Iki de nuha nna ben Jesús‑ni kini beyapi ka benne rudhetinieha lo barcuha ki eneru gaake eyyake esinke daka attu ladu ro'o indatooha, laka lee nna richú tise ka benne se'e niha.
MAT 14:23 Iki de chi uchú tise ka benneha, nianna tti die ugwapie iki i'iyaha. Ttúbe ulhapie tisa len Tata Do Yebáha nna ttúgabe due niha tti chi ulha sáha.
MAT 14:24 Barcu ata deyya ka benneha nna aliba chi beru'una nuha lo indaha. Radha retinbana de ru'u indaha kwe'eni kumu de daka arlola barcuha retetsu'u beha.
MAT 14:25 Tti chi deoba tsaniha nna dia Jesús‑ni ridee lo indaha, die isine ata dia ka benne rudhetinieha.
MAT 14:26 Tti bilani ka benneha ridábie lo indaha, nianna usikanie ribesi'abake, ráke: ―¡Ne ttu nu du ela daa naa!
MAT 14:27 Ttaka Jesús‑ni nna unne ttebe, ree ke: ―Tsitsi gwalikweki lele; bittu gasinle. Netiba nuní.
MAT 14:28 Nianna ra Pedruha bie: ―Ganna lu nuná xa tata, ben kini dhaya lo inda‑ni kini isiaya ata dulu‑na.
MAT 14:29 Lee nna rabie na: ―¡Utá ganna! Pedruha nna ugwadi ttebana lo barcuha nna diana ridána lo indaha kini isinna ata du Jesús‑ni.
MAT 14:30 Ttaka tti ute denna yalhá idí daa beha nna usi ttebinna nna kumu de chi diana rixudina lhe'e indaha nna ttikala nuha uresi'ana, rana: ―¡Bodiláttu neti xa tata!
MAT 14:31 Jeru tteba gwadaxxu Jesús‑ni náni nna ree na: ―¡Aaluxa nu a ria tsitsi leni! ¿Beaka bedú chupana lelu?
MAT 14:32 Tti chi beyapike lo barcuha nna ure tteba beha.
MAT 14:33 Adí ka benne sia lo barcuha nna ubiga ttebake bedú xibike arlo Jesús‑ni nna ráke bie: ―Lúligaba gwalí ankalu Xi'in Tata Do Yebáha.
MAT 14:34 Iki de chi beteke lo indatooha nna besinke lo yu ge Genesaret.
MAT 14:35 Tti chi beyoinbia ka nu se'e daka Genesaret‑ni Jesús‑ni, nianna utixxi'a ttebakinna ka benne se'e itúba ka daka niha. Ka benneha nna cheke iyába ka benne rani ata dueha
MAT 14:36 nna ka benne raniha nna unnaba ditibake lenie, ráke bie: ―Kwadiba ro'o lari nukulu‑na begwelha udaxxutu. Nianna iyába ka benne rani, ka benne bedaxxuke ro'o xoeha gwa beyakabake.
MAT 15:1 Nianna tti ubiga ttu chupa ka nu rule'ekinna ka benne nu ra lo bia bennabi bodha'an Moisés‑ni lhe attu chupa ka fariseo‑ni lhe, ubigakana ata du Jesús‑ni. Ka nuha lhe'esi Jerusalén‑nili udákana dákana nna rákane:
MAT 15:2 ―Ka nu rudhetinlu‑na, ¿beakala a ruin ka nuná nu chi bodha'an ka benneola geri'iha uinri'i? Kumu ka nuná labí rigí nákani atti lanila gokana yetta.
MAT 15:3 Jesús‑ni nna bekabie gekani, ree: ―¿Beakala lebi'i, de rudole tisa ge nu bodha'an ka benneola geri'iha, de nuha nna rigu'ula ni'ale nu bodha'an Tata Do Yebáha uinri'i?
MAT 15:4 Kumu Tata Do Yebáha ree: “Tsia lele ka tata nan gele” nna “Nu kena iki ka tata nan geniha, nuha ralhaba nuha gattina.”
MAT 15:5 Ttaka lebi'i nna rálale: “Gwakaba geri'i gari'i ka tata nan geri'iha, labí aka utea nu tee kia len lebi'i kumu iyába nu tee kia, ge Tata Do Yebáha‑ba chi ga'anati utea nuní.”
MAT 15:6 Lebi'i ukare'aba innále: “Labí aka utea nu tee kia len lebi'i”, la'ania nna labíru daa lole utele nu tee geleha len ka tata nan geleha. ¿Laaba ganna, de rudole tisa ge nu bodda'an ka benneola geri'iha, aníha tte nuha nna chi rigu'u ni'ale nu bodda'an Tata Do Yebáha?
MAT 15:7 Lebi'i labí liinle. Delo tisaba ruinle deki ankale benne tse. Gwalíbani profeta Isaías‑ni atti utixxi'ana gele lo ka yetsi ge Tata Do Yebáha. Lo ka yetsiha unne Tata Do Yebáha, ree:
MAT 15:8 Ka nuní, len ro'oruba ka nuní rákana deki ria lekani neti, ttaka labí gwalíkinna rakakinna kia.
MAT 15:9 Kwentaruba nuná rudú xibikani arloa, kumu nu anka ge benne se'e yiesi lo yu‑niba nuná rule'ekinna ka benne; labí nu anka kia nuná rule'ekana.
MAT 15:10 Nianna tti uxi Jesús‑ni ka benne tupa niha nna ree ke: ―Gwaludo nagale kia nna gwalutte da nu innea‑ni.
MAT 15:11 Labí nu rori'i rutsigana ri'i arlo Tata Do Yebáha, sinuki nu ririala ro'ori'i rinneri'i, nunála nu rutsigana ri'i arloe.
MAT 15:12 Nianna tti ubiga ka benne rudhetinieha nna ráke bie: ―¿Si gwa yulu xa tata, ka fariseo‑ni bituxxulakinna tti biyienkinna nu ralu‑na?
MAT 15:13 Lee nna bekabie ge ka benneha, ree ke: ―Iyába ka yaga ka nu abittu beyada Tata kia do yebáha, ka nuha ilupibakana nna iru'unakana.
MAT 15:14 De nuha nna ka fariseo‑na naala se'e ka nuná. Ka nuná ankabakana ttiba ka nu xua lokani, rinnerukana arlo adí ka luesi lo xuakani. Kumu ganna ttu nu xua loni rineruna lo attu luesi lo xua‑ni, la'ania nna ixpabakana satsettikana lhe'e ttu yieru.
MAT 15:15 Pedro‑ni nna rane: ―Utixxi'en ri'itu, ¿bí diani nu ralu‑na?
MAT 15:16 Jesús‑ni nna bekabie, ree kana: ―¿Si nigaba lebi'i bittugaba rite denle nu ria‑ni?
MAT 15:17 ¿Si lagwa gwa rite denle deki iyába nu rori'i, lhe'e tu'ebari'i dia nuná? Delola nna rebeabari'i nuná.
MAT 15:18 Ttaka nu riria ro'ori'i tti rinneri'i, nuná ankana nu ririana lhe'e lastori'i, nunonna rutsigana ri'i arlo Tata Do Yebáha.
MAT 15:19 Kumu lhe'e lastori'i nuná riria iyába nu satsa rulaba leri'i, lhe nágaba nuná riria nu rixegwiri'i ki ruinri'i elhutti, lhe lhe'e lastogabari'i nuná riria tti risári'i nu labí anka latselari'i, lhe ruinri'i nu satsa leni nuxaba benne lhe. Anágaba lhe'e lastogabari'i riria nu reta leri'i rilanari'i, lhe rinneri'i gwen lasi lhe anágaba rinne satsa ge luesiri'i lhe.
MAT 15:20 Iyá ka nunonna runi kini reya'anri'i tsiga arlo Tata Do Yebáha. Laa de abíga kí nári'i tti gori'i yetta, laa de nuha‑ga nna eya'anri'i tsiga arlo benneha.
MAT 15:21 Bedába Jesús‑ni ata dueha nna die daka Tiro lhe Sidón lhe.
MAT 15:22 Niha biria ttu benne nuila anke ge Canaán nna ubige kwe'e Jesús‑ni, ribesi'abe, ree: ―¡Benne datia David, gwatuachi lelu neti xa tata! Xi'iniunnayáha yalhá elha disa ruyúbi yu'u ttu espíritu xxegwi latibi.
MAT 15:23 Ttaka Jesús‑ni nna labí bekabie ge benne nuilaha. Nianna tti ubiga ka benne rudhetinieha nna unnabake len Jesús‑ni, ráke bie: ―Bedhelha nuila‑na eyyana, kini ribesi'abana danalhana ri'i.
MAT 15:24 Lee nna bekabie, ree: ―Tata Do Yebáha labí udhelhe neti len ka nu dittu‑na; suna len ka benne Israel ka benne chi bedhanke neda gebie, suna len ka benne‑niba udhelhe neti.
MAT 15:25 Ttaka benne nuilaha nna ubige bedú xibie arlo Jesús‑ni nna ree bie: ―¡Tata xisi to, akachi lenlu neti!
MAT 15:26 Jesús‑ni nna bekabie ge benneha, ree: ―Ttaka labí anka tse udaxxua yettaxtila nu dika go ka xi'inia‑ni nna udelhaa na lo ka beku to‑na.
MAT 15:27 Benne nuilaha nna bekabie, ree: ―Gwalí galenlu xa tata; ttaka yulu axta ka beku to‑na redigakana ka yettaxtila ro'o yuya riginni xan mexa ge ka xxanakaniha.
MAT 15:28 Jesús‑ni nna bekabie, ree benne nuilaha: ―¡Ga ttiparuba tsitsi ria lelu xa nuila! Gwakaba nu rinnabalu‑na. Looraha tteba nna beyaka tteba xi'iniunná benne nuilaha.
MAT 15:29 Jesús‑ni nna bedábe daka Tiro lhe Sidón lhe nna besine gaxxaba ro'o indatoo ge Galilea‑ni. Nianna tti ugwapie iki ttu i'iya do niha nna udoe.
MAT 15:30 Nianna tti ubiga ixe juisiru ka benne ata doeha, cheke ka benne ridá natsa lhe ka benne xua loke lhe ka benne ankake biría, lhe anágaba ka benne akaa ttu lha'a ni'ake o náke lhe ixeru ka benne rani lhe. Nianna tti bese'eke ka benneha arloe, lee nna gwa beyoinbe ka benneha.
MAT 15:31 Laxkala ka benne tupa niha rebanabakanie tti rilákanie ka benne anka biríaha chi renneke, lhe ka benne riyasa ttu lha'a ni'ake o nákeha chi reyakake ida'a, lhe anágaba ka benne ridá natsaha chi redá tseke lhe ka benne xua lokeha chi relákanie lhe. Nianna tti ráke: ―¡Xxeniba ra le Diosi ge ka benne Israel‑ni!
MAT 15:32 Nianna tti uxi Jesús‑ni ka benne rudhetinieha nna ree ke: ―Neti ratua chiba lasia ka benne se'e‑ni, kumu chiba uka tsunna ubisa‑ni se'eke nii len neti nna birula bi tee bixa goke. Labí raka lasia edhelhaa ke abittu chi utoke, kumu ni kina satú leke lo neda.
MAT 15:33 Ka benne rudhetinieha nna ráke bie: ―¿Gála saxxíri'i nu go ttaníli ka benne‑ni? Ki lo yu bisiba nuní se'eri'i ata lanú benne se'e.
MAT 15:34 Jesús‑ni nna ree ke: ―¿Balha yettaxtila chele? Ka benneha nna ráke: ―Ne gasiruba ka yettaxtila chetu nna attu chupa ka belha to nna.
MAT 15:35 Nianna tti ree ka benne tupa niha: ―Gwalese'e lo yu.
MAT 15:36 Nianna tti bedaxxue gasi ka yettaxtilaha lhe ka belhaha lhe, nna iki de chi begwebie ixkixaru len Tata Do Yebáha, nianna tti ulha'abie lhe'e ka benneha nna begwebie ka benne rudhetinieha. Ka benne rudhetinieha nna begweke ka benne chi bese'e lo yuha.
MAT 15:37 Iyábake utoke nna axtaliba beyielakanie. Iki de nuha nna bottuparula ka benne rudhetinieha a gasi sumi ka benne ro'o salha'a bexxaha.
MAT 15:38 Ttiba tu ttapa mili ka benne biyúha utoke, sunrula ka benne biyúha bibaba. Bittula bibaba ka benne nuilaha lhe ka nutoha lhe.
MAT 15:39 Iki de chi uchú tisa Jesús‑ni ka benneha, nianna beyapie lo barcuha nna deyye daka Magdala.
MAT 16:1 Ka fariseo‑ni lhe ka saduceo‑ni lhe ubigakana ata du Jesús‑ni kini ku'ukane prueba. Nianna unnabakane unie ttu milagru kini ula'a deki gwalí Tata Do Yebáha udhelhe bie.
MAT 16:2 Ttaka lee nna bekabie gekani, ree: ―Ki lebi'i, ganna chi dia ralhana rale: “Tseba aka uxxeha kumu xinába anka gwetsáha.”
MAT 16:3 Ka dila‑na nna rale “Nasá iyya lhaba aka kumu xinába anka gwetsáha lhe beaba yu'u lhe.” Kaxa gwa rite dábinle bixa aka tti rilenle gwetsáha, delo nna a rite denle nu raka lagwi gele nnanna.
MAT 16:4 Lebi'i ka nu runi satsa se'e nnanna lhe chi rudhá ikile Tata Do Yebáha nna ria lele attu nu subi, lebi'i rinnabale unia ttu milagru, ttaka neti labí ula'ania le attu bixa milagru, sunruba luesi nu gwate Jonás benne uke profeta ge Tata Do Yebáha, a sunruba luesi nuha gula'ania le. Nuha‑ba ree kana nna bese'e bixxibe kana nna deyye.
MAT 16:5 Tti chi uteke lo indatooha nna ka benne rudhetini Jesús‑ni gwadú leke deki bixulhabakanie icheke yettaxtila ki goke.
MAT 16:6 Nianna tti ra Jesús‑ni ke: ―Gwaluyú gele ka iyietile kua dii ge ka fariseo‑na lhe ka saduceo‑na lhe.
MAT 16:7 Ka benne rudhetinieha nna ra luesike: ―Aná rabie kumu de abittu yettaxtila cheri'i.
MAT 16:8 Ttaka Jesús‑ni nna ute dábanie nu rákeha, nianna tti rabie ke: ―¡Aalexa nu abittu ria tsitsi leni! ¿Beaka ra luesile deki labí yettaxtila tee?
MAT 16:9 ¿Si itua ttu a rite denle nu ria‑ni? ¿Si abittugaba rexxa lele ge gayu ka yettaxtila uto gayu mili ka benneha lhe si abígaba rexxa lele a balha ka sumi yettaxtilaha bottupale ge nu bexxaha?
MAT 16:10 ¿Si nigaba a rexxa lele ge gasi ka yettaxtila uto ttapa mili ka benneha? Lhe, ¿si abígaba rexxa lele a balha ka sumi yettaxtilaha bottupale ge nu bexxaha?
MAT 16:11 ¿Si lagwa ute denle? Laa ge yettaxtilaga nuha unnea tti ria: “Gwaluyú gele len kua dii ge ka fariseo‑na lhe ka saduceo‑na lhe.”
MAT 16:12 La'anialiba nna tti ute dákanie deki labí ge kua dii ria iki yiedi raka yettaxtilaha nuha rinnebie, sinuki ge nu rule'e ka fariseo‑ni lhe ka saduceo‑niba nuha rinnebie. De nuha nna ree ke: ―¡Gwaluyú gele len ka nuná!
MAT 16:13 Tti bisin Jesús‑ni daka Cesarea ge Filipo, nianna tti unnaba tise ka benne rudhetinieha, ree ke: ―Neti benne daya yebáha, ¿nú ra ka benne deki ankaa?
MAT 16:14 Ka benneha nna bekabike, ráke: ―Ttu chupa ka benne ráke deki lu ankalu Juan benne begadi indaha. Attu chupake nna ráke deki lu ankalu Elías, nna adíke nna redenáke deki lu ankalu Jeremías o nuxaba ttu ka benne ukake profeta ge Tata Do Yebáha.
MAT 16:15 Jesús‑ni nna ree ke: ―Lebi'i nna, ¿nú rale deki ankaa?
MAT 16:16 Simón Pedruha nna bekabina, rane: ―Lu ankalu Cristu Xi'in Tata Do Yebaa benne anka baniha.
MAT 16:17 Jesús‑ni nna ree na: ―Karubárulu xa Simón xi'in Jonás, kumu laa bennega utixxi'anie lu nu ralu‑na; Tata kia do yebáha, benneha‑ba utixxi'anie lu nuná.
MAT 16:18 Lhe anágaba neti ria lu, lu ankalu Pedro. (Pedro dienna innána íyya.) Iki íyya‑ni dhuloa use'a ka benne tsia leke neti. Ni elhuttiha labí dhaana utse'e loona ke.
MAT 16:19 Len lu utea lo neda kini ulhenlu ka benne innabia Tata Do Yebáha ke. Laxkala iyába nu innálu abittu dika uin ka benne yiesi lo yu‑ni, yebáha chigaba bodha'an Tata Do Yebáha deki abittu aka nuha, nna iyába nu innálu gwa dikaba uin ka benne yiesi lo yu‑ni, yebáha chigaba bodha'an Tata Do Yebáha deki gwakaba nuha.
MAT 16:20 Nianna tti bodha'an tsitsi Jesús‑ni len ka benne rudhetinieha, ree ke: ―Anuttu nu gale deki neti ankaa Cristu.
MAT 16:21 Debá la'ania nna udulo Jesús‑ni rigixxi'anie ka benne rudhetinieha deki teeki tsiabie lhe'esi Jerusalén‑ni. Niha teeki sate xxatte uyúe elha disa lo ná ka benneola ge ka nu Israel‑ni lhe lo ná ka nu loni ge ka bixxudiha lhe lo ná ka nu rule'ekinna ka benne nu ra lo bia bennabi bodha'an Moisés‑ni lhe. Nianna rágabe deki teeki uttikane nna eyonna ubisaha nna eyaka benbe attu libe.
MAT 16:22 Pedro‑ni nna ttúbe uxina attu ta subi, nianna tti utisane, rane: ―¡Tata Do Yebáha labí ugwelhe satelu nu ralu‑na xa tata!
MAT 16:23 Jesús‑ni nna beyekie, ree na: ―¡Ubi'etta kwe'a xa nu xxegwi! Sunruba rattalu lo neda kia. Kumu lu suna nu anka ge ka benne se'e yiesi lo yu‑niba do ikilu, labí do ikilu nu anka ge Tata Do Yebáha.
MAT 16:24 Nianna ra Jesús‑ni ka benne rudhetinieha: ―Ganna nuxa ttúle raka lele etenalhale neti, teeki eria iki eria lele, meskila bixa satele nna gwaludaxxu kurusi gele nna gwaltá gwetenalha neti.
MAT 16:25 Kumu ttu benne ganna abittuba raka lebie bixa satebie de etenalhe neti, benneha nnittilee, delába labí aka ben benneha arlo Tata Do Yebáha. Ttaka benne eria iki eria lebie, meskila bixa satebie de etenalhe neti, benneha nna gwaka benlee arlo Tata Do Yebáha.
MAT 16:26 Kumu, ¿bí ixú nuha ganna ttixka ttu benne dhaabie uin gebie iyá nu se'e yiesi lo yu‑ni, ttaka arlo Tata Do Yebáha nna tsia nnittilee? Nigaba labí aka geri'i go'ori'i elha nabani geri'i kini anáchu aka benri'i ttu dia lii arloe.
MAT 16:27 Kumu neti benne daya yebáha esiaya lhe'e xiani ge Tata kia do yebáha lenia ka anjeli geeha. La'ania nna kua ttu ttu ka benne ugwea ke nu ralhake dhike ge nu benke.
MAT 16:28 Netiru ria, ttu chupale ka nu se'ele nii nnanna labí chi uttile atti esiaya innabiayaha. Sa se'e benbale axtaliba ki ilenle neti benne daya yebáha esiaya.
MAT 17:1 Iki de chi ute xxupa ubisaha nna uche Jesús‑ni Pedruha lhe Jacobuha lhe Juan betsi Jacobuha lhe, uchebie kana sun labakana iki ttu i'iya xeni do niha.
MAT 17:2 Niha besea lobie arlokani. Rapi edha linníba loe ttiba lo tatubisa‑na, ka xoeha nna sitsi túba beyakana ttiba xiani.
MAT 17:3 Nianna tti bela'akinna uka xxe Moisés‑ni lhe Elías‑ni lhe, rinne len ka benneha Jesús‑ni.
MAT 17:4 Pedro‑ni nna rana Jesús‑ni: ―Gwen tte uka se'etu nii xa tata xisi to. Ganna raka lelu, gusiabatu tsunna ka yo'o lhaga: ttu gelu nna ttu ge Moisés‑ni nna attu ge Elías‑ni nna.
MAT 17:5 Sa dúlana rinnena ttiru chi bisia ttu bea yien charába ankana urena ata se'ekeha nna lhe'e beaha nna biyien tsi'i ttu benne, rabie: ―Benne‑ni anke Xi'inia lhe rakati gebie lhe. Benne‑ni runie nu ru'u lasia. Ge benne‑ni gwaludo nagale.
MAT 17:6 Ka benne rudhetini Jesús‑ni nna tti biyienkanie unne benneha, nianna bedú xibike nna bettudhi loke lo yu de usi xxattakanie.
MAT 17:7 Jesús‑ni nna ubige nna gwadaxxue kwe'eke nna rabie ke: ―Gwaleyadha. Abittu gasinle.
MAT 17:8 Tti belhidha lokeha nna nurua nuxa bilákanie, a sunruba Jesús‑ni du niha.
MAT 17:9 Laka deyyake reyadike lati i'iyaha nna ra Jesús‑ni ke: ―Bittu kixxi'enle ka benne ge nu bilenle‑ni. Axtaliba ganna neti benne daya yebáha chi beyaka bania lagwi ge ka benne chi uttiha, la'anialiba nna kixxi'ale ge nu bilenle‑ni.
MAT 17:10 Ka benne rudhetinieha nna unnaba tisake bie, ráke: ―¿Beakala ka nu rule'ekinna ka benne nu ra lo bia bennabi bodha'an Moisés‑ni nna rálakana deki Elías‑ni teeki esie lade'a tte, niala nna tti isia Cristuha?
MAT 17:11 Jesús‑ni nna bekabie, ree: ―Gwalí galá deki Elías‑ni esiabie lade'a tte. Benneha ose'e tsebie iyá nu se'e.
MAT 17:12 Ttaka neti ria le, Elías‑ni chiba bita benneha nna ka benne labí belabike bie, nna bedhakabake bie attiba rakaba leke. Aníha‑gaba neti benne daya yebáha, aníha‑gaba satea lasi nákani.
MAT 17:13 La'anialiba nna tti ute dani ka benne rudhetinieha deki ge Juan benne begadi indaha‑ba nuha unnebie tti ree aníha.
MAT 17:14 Tti besin Jesús‑ni len iyunna ka benne rudhetinieha ata se'e ixe juisiru ka benne, nianna tti ubiga ttu benne biyú ata du Jesús‑ni nna bedú xibie arloe nna ree bie:
MAT 17:15 ―Tata xisi to, gwatuachi lelu xi'inia‑ni, kumu rakabi beora nna yalhá elha disa ruyúbi. Gwadú ribixxibi lo giha lhe gwadú ribixxibi lhe'e indaha lhe.
MAT 17:16 Chi bisiaya lenbi ata se'e ka benne rudhetinlu‑ni, ttaka ka benne‑ni labí udaake eyoinke bi.
MAT 17:17 Jesús‑ni nna ree ka benne rudhetinieha: ―¡Aalexa nu a du itá leni lhe nu a ria leni lhe! ¿Nukalila sa dhua len lebi'i? ¿Nukalila sa utto uchíaya ge nu ruinle? ¡Aní gwataxxí nu kwiti‑na!
MAT 17:18 Nianna tti bedhaka dise espíritu xxegwi yu'u lati nu kwitiha nna beria tteba nuha. Looraha tteba nna beyaka tteba nu kwitiha.
MAT 17:19 Delola nna tti ubiga ka benne rudhetinieha ata du Jesús‑ni nna sun labe unnaba tisake, ráke bie: ―¿Beakala ri'itu nna a udaatu ebeatu espíritu xxegwi‑na?
MAT 17:20 Lee nna ree ke: ―Kumu de lebi'i labí ria tsitsi lele. Netiru ria, ganna ria lele kwadiba ttuxka'a to ttiba ttu besi ge kuana muxtasa, nuná ttu nu chika'a toru ankana, aníha‑gaba lebi'i, ganna ria lele ttu latti to, la'ania nna labí tee ttu bixa abittu aka gele uinle nna gwakaba gele gale i'iya do naa: “Ugía, gwadho daka aná.” I'iyaha nna gweyyabana sa dhona niha.
MAT 17:21 [Ttaka luesi espíritu xxegwi uyu'u lati nu kwiti‑ni labí eria nuní ganna abíba ilhapiri'i tisa len Tata Do Yebáha lhe utte ubina lhe'eri'i lhe.]
MAT 17:22 Tti rekike daka Galilea‑ni nna ra Jesús‑ni ka benne rudhetinieha: ―Neti benne daya yebáha utekana neti lasi ná ka nu
MAT 17:23 uttikana neti, ttaka ganna chi beyonna ubisaha nna eyaka benbaa. Ka benne rudhetinieha, tti biyienkanie nu reeha nna yalhá bedú si'ina leke.
MAT 17:24 Tti bisin Jesús‑ni lenie ka benne rudhetinieha lhe'esi Capernaum‑ni, ka nu rukixakana ka benne belhiu, delába belhiu nu ruttupakana ge yotuha, nna ubigakana, rákana Pedruha: ―Maestru gele‑na, ¿si lagwa gwa rigixa benne‑na belhiu nu ruteri'i ge yotuha?
MAT 17:25 Pedruha nna bekabina, rana: ―Gwa rixa galee. Tti uta'ana lhe yo'oha nna lade'axala unnaba tisa Jesús‑ni na, ree na: ―Simón, ¿bí rakinlu? Ka nu rinnabia se'e yiesi lo yu‑ni, ¿si ka benne lhe'esi gekani rukixakana belhiu‑na ak? ¿Ka benne dittu ak?
MAT 17:26 Pedro‑ni nna bekabina, rana: ―Ka benne dittuba xa. Nianna ra Jesús‑ni. ―Ganna aníha nna ka benne lhe'esi gekinna labí elha ralha ka nuná kixakana.
MAT 17:27 Ttaka ki abittu ituxxukinna nna, ugía ro'o indatoo‑na nna bedelha yexxa nu rudaxxu belha‑na. Belha nu udaxxulu sisi'a tteha nna ixxálu ro'oni. Ro'o belhaha saxxakalu ttu belhiu. Bedaxxu belhuha nna ugía gwatixa gelu lhe gwatixa kia lhe.
MAT 18:1 La'aniagaba nna ubiga ka benne rudhetini Jesús‑ni nna ráke bie: ―Delo iyá ka benne rinnabia Tata Do Yebáha, ¿núke ra xxeniru leke?
MAT 18:2 Jesús‑ni nna uxie ttu nuto nna bedúbie na lagwi geke,
MAT 18:3 nianna ree: ―Netiru ria, ganna abíba otsea elha ruin gele nna uinle attiba runi ttu nuto, la'ania nna labí akale nu innabia Tata Do Yebáha.
MAT 18:4 Laxkala benne unie attiba runi nuto‑ni orexxa gaa lebie abittu unie deki ra xxeni lebie, benneha nuha ake benne inná xxeniru lebie delo adí ka benne rinnabia Tata Do Yebáha ke,
MAT 18:5 lhe anágaba nuxaba benne de ria lebie neti, ganna benneha ulabie ttu benne runi attiba runi nuto‑ni, neti nuha rulabi benneha.
MAT 18:6 Ttaka ganna nuxa ttu benne unie dhi yiebie ttu ka benne abittu ra xxeni leke, delába ttu ka benne chi ria leke neti, ganna benneha dhi yiebie ttu ka benne chi ria leke netiha ki uinke nu satsa, benne unie aníha tserula saríane uxxigakana yienie ttu íyya xeni ge ttu mulinu nna udelhakane lhi'u lhe'e indatooha.
MAT 18:7 ’¡Gwalíchiru le yiesi lo yu‑ni! Satíaba tee nu ruinna ki rinitti ka benne ki ruinke nu satsa, kumu anába teeki aka. Ttaka gwalíchiru le nu unnittina ka benneha ki uinke nu satsa.
MAT 18:8 Laxkala ganna ni'alu‑na o nálu‑na usigakana lu ki uinlu ttu bixa nu satsa, tsa ttela uchú ka nuná nna uru'una kana. Kumu tserula taríana lu esinlu ata aka benlu ttu dia liiha ganna ridá natsalu o anka choku ni'a nálu, a laa kila sia ixpa lha'a nálu lhe sia ixpa lha'a ni'alu lhe, nianna iru'unalu tsialu lo gi ata satíaba rite loniha.
MAT 18:9 Ganna iyya lolu‑na uinna ki uinlu ttu bixa nu satsa, tsa ttela ulea nuná nna uru'una na. Kumu tserula saríana lu esinlu ata aka benlu ttu dia liiha len suna ttu lha'aba iyya lolu, a laa kila esinlu len ixpa lha'a lolu ata uyúlu elha disaha nna iru'unalu tsialu lo giha.
MAT 18:10 ’Gwaluyú gele bittu ku'u ni'ale ttu ka benne abittu ra xxeni leke se'e nii, kumu neti ria, ka anjeli gekeha satíaba se'e ka benneha rinnabake geke arlo Tata kia do yebáha.
MAT 18:11 [Kumu neti benne daya yebáha daya ugila ka nu chi bigannakana lo neda ge Tata kia do yebáha, ki odiláya kana.]
MAT 18:12 ’¿Bí rakinle uni ttu benne ganna ttixka se'e ttu gayua (100) ka neru gebie, nianna igannanie ttu ka nuha? ¿Laaba ganna guse'e bixxibe a tta bixxi chennia (99) ka neruha lhe'exxiha nna tsie ugila nu bigannaha?
MAT 18:13 Ganna chi gwaxxake neruha, netiru ria, ittarula edú lebie ge nuha attichula ge a tta bixxi chennia ka neru ka nu abittu bigannaha.
MAT 18:14 Anágaba Tata gele do yebáha, labí raka le benneha nnitti niru ttú ka benne abittu ra xxeni leke se'e nii.
MAT 18:15 ’Ganna ttu betsi to geri'i udhakana lu ttu bixa, ttu nu abittu anka tse, ugía nna suna ttúbana unne lenna. Ganna si gokinniba ikini deki binittina, la'ania nna chiba udaalu beyaka tse lenlu na.
MAT 18:16 Ttaka ganna nuha abittuba etabinna gelu, la'ania nna uche attu o a chupa ka benne nna unne lenna. Aníha kini iyá nu inne lenlu naha, iyienin naga a chupa tsunna ka benneha.
MAT 18:17 Ganna si abittugaba iyieninna ge ka benneha, la'ania nna utixxi'a nuha len adíru ka benne chi ria leke Tata Do Yebáha. Ganna si abittugaba iyieninna ge ka benneha, la'ania nna gwaluyúba na attiba ttu nu abittu chi ria leni Tata Do Yebáha lhe gwaluyúba na attiba ttu gwekixa ruin satsa lhe.
MAT 18:18 ’Netiru ria, yiesi lo yu‑ni iyába nu innále abittu dika uin ka benne, yebáha chiba bodha'an Tata Do Yebáha deki abittu aka nuha nna iyába nu innále gwa dikaba uin ka benne yiesi lo yu‑ni, yebáha chigaba bodha'an Tata Do Yebáha deki gwakaba nuha.
MAT 18:19 ’Rinnea attu libe ria le, yiesi lo yu‑ni ganna chupale okinni ikile innele turo'o ttixka bixa innabale len Tata kia do yebáha, la'ania nna gutebe nu innabaleha.
MAT 18:20 Kumu ata ritupa chupa o tsunna ka benne de ria leke kia, neti niha‑gaba dua lenke.
MAT 18:21 Pedruha nna ubigana ata du Jesús‑ni nna unnaba tisane, rane: ―Tata xisi to, ¿balha lidú teeki dhia elha xen lasi ge ttu betsi to kia ttixka bixa udhake neti? ¿Si gasi (7) libeli?
MAT 18:22 Jesús‑ni nna bekabie ree: ―Laa rigaa lu gasi libe dhilu elha xen lasi gebie. Neti ria lu, balhaxaba libe.
MAT 18:23 ’De nuha nna Tata Do Yebáha, tti rinnabie ka benne, elha rinnabia geeha raxxína na len nu ben ttu nu rinnabia ge ttu yiesi. Nuha beyaxina ka nu riben sina geniha kini bennabana ka nuha ki kixxi'akana ttixa dia belhiu geniha.
MAT 18:24 Tti chi udulona bennabana ka nuha ki kixxi'akana ttixa chi dia belhuha, nianna tti bisin lenkana ttu nu riben sina geniha daana ixeni belhiu geni.
MAT 18:25 Ttaka nuha, kumu de labí dhaana kixana belhuha, de nuha nna udhelha nu rinnabiaha utto'okana na lhe utto'okana nuila geniha lhe ka xi'inniha lhe, anágaba utto'ogabakana iyá nu se'e geni. Aníha kini dhaana kixana belhiu daanaha.
MAT 18:26 Nu ren sina daa belhuha nna bedú xibini axtaba bettudhi loni lo yu arlo nu rinnabiaha nna unnaba ditibana len nuha, rana na: “Uledachi xa tata to. Neti gwagixabaa iyá belhiu geluha.”
MAT 18:27 Nu rinnabiaha nna gwatuaba leni nu ren sina geniha nna gwa uxíbana elha xen lasi ge belhiu daanaha. Nianna gwa bolhábana na.
MAT 18:28 ’Tti beriana lisi nu rinnabiaha nna beti'ana attu ka benne riben lenna turo'o sinaha. Benneha nna suna ttu lattiba belhiu daabie geni. Nianna bedaxxu ttebana benne daa belhiu geniha nna bettupana yienie nna rane: “¡Utixa belhiu kia daaluha!”
MAT 18:29 Benneha nna biyachu ttebe bedú xibie axtaba bettudhi loe lo yu nna unnabe loni ree na: “Uledachi xa tata to. Neti gwagixabaa iyá belhiu daya geluha.”
MAT 18:30 Ttaka lana nna labi uka leni. Ugíalana gwaga'ana benneha lisiyya axtaliba ki biri'a lenna utixa benneha iyá belhiu geniha.
MAT 18:31 Tti bina adí ka benne riben sina ge nu rinnabiaha ge nu chi ukaha nna yalhá bituxxukanie. Nianna tti diake gwattixxi'akanie nu rinnabiaha ge iyá nu chi ukaha.
MAT 18:32 Nu rinnabiaha nna uxina na, rana na: “¡Aaluxa nu re satsa leni! Neti gwa uxíbaa elha xen lasi gelu ge iyá nu daaluha kumu de unnaba ditilu loa.
MAT 18:33 Lu nna, ¿laa a gwatuachiba lelu nu riben lenlu turo'o lo sina kia‑ni, attiba neti gwa gwatuaba lasia lu?”
MAT 18:34 Nu rinnabiaha nna bisa'a xxattinna nna betena na lasi ná ka nu uyakana na axtaliba ki utixana iyá belhiu daanaha.
MAT 18:35 Nianna tti ra Jesús‑ni: ―Anágaba udhaka Tata kia do yebáha le ganna abíba itú iki itú lele dhile elha xen lasi ge ttu betsi to geri'i.
MAT 19:1 Tti chi uluxani Jesús‑ni unnebie nu reeha, nianna beriabie Galilea‑ni nna diabie daka Judea, daka attu ladu ge yoo Jordán‑ni.
MAT 19:2 Ixe juisiru ka benne danalhake bie, niha beyonie ka benne rani.
MAT 19:3 Ttu chupa ka fariseo‑ni nna ubigakana ata dueha, ruinkana kini ku'ukane prueba. De nuha nna unnaba tisakane, rákane: ―¿Si gwakaba udhá iki ttu nubiyú nuila geniha meskiba ttu bixaru ge?
MAT 19:4 Lee nna bekabie gekani, ree: ―¿Si lagwa chi belabale lo ka yetsi ge Tata Do Yebáha, ata dia ra deki lee, tti sisi'a tte benie ka benne, “nuila lhe nubiyúba benie ke”?
MAT 19:5 Rágabe: “De nuha nna teeki udhan nubiyúha ka tata nan geniha nna utsá náni len nuila geniha. La'ania nna ixpabakana akakana ttisidiba ttúba benne.”
MAT 19:6 Laxkala labíru anka ka nuha chupa benne, sinuki ttúba benne chi anka ka nuha. Laxkala ka nu chi beketi Tata Do Yebáha, labí dika etsila ttu benne ka nuha.
MAT 19:7 Nianna ra ka fariseo‑nie: ―¿Beakala lo bia bennabi bodha'an Moisés‑ni dia ra deki ttu nubiyú gwakaba ilhidhana ttu yetsi ata inná lo yetsiha deki gwakaba ela'ana len nuila geniha?
MAT 19:8 Jesús‑ni nna ree kana: ―Moisés‑ni begwelha galána ela'ale len ka nuila gele‑na kumu de ankale nu a riyienini. Ttaka tti sisi'a tteha, labí aná ga'anna aka.
MAT 19:9 Neti ria le, ttu nubiyú ganna kwentaba ela'ana len nuila geniha, ganna abittuba delo ni'a ge de bisá nuilaha attu nu subi, nianna ganna nubiyúha edína attu nuila subi, la'ania nna satsaba nuha chi ruin nubiyúha. Anágaba nubiyú edína nuila chi bedhá ikikaniha, satsagaba nuha chi uin nubiyúha de edína nuilaha.
MAT 19:10 Nianna tti ra ka benne rudhetinieha: ―Ganna ralu anála rate ttu nubiyú lenna nuila geni, ganna aníha nna tserula abittu utsá ná ttu benne.
MAT 19:11 Jesús‑ni nna bekabie geke, ree: ―Labí iyá ka benne ankake nu dika tte dákanie nu ria‑ni, sinuki sunruba ka benne chi begwelha Tata Do Yebáha ke ki tte dákanie, ka benneha‑ruba nuha gwate dákanie nuní.
MAT 19:12 Se'e ka nubiyú labí rutsá nákani, kumu lhe'e tata nan gelikani chi ankakana deki labí dho lenkana nuila. Se'e adí ka nubiyú nna labí rutsá nákani, kumu ka benne se'e yiesi lo yu‑niba riguake ata do ridá lekani nuila. Anágaba nna se'egaba ka benne biyú titúbake rokinni ikike ráke: “Ri'itu labí tse'etu len nuila.” Aníha ki tse'eke udo leke uinke nu raka le Tata Do Yebáha. Laxkala benne dhielhe unie nu ra ka tisa‑ni nna unie na.
MAT 19:13 Nianna bisin len ka benne ttu chupa ka nuto arlo Jesús‑ni ki ixxua nábie ikikani lhe innabe gekani len Tata Do Yebáha lhe, ttaka ka benne rudhetinieha nna rudhaka disalake ka benne cheke ka nutoha.
MAT 19:14 Nianna tti ra Jesús‑ni ke: ―Gwalugwelha ka binto‑na itakabi len neti, bittu usunale, kumu ka benne runi tti ruin ka binto‑na, luesi ka benne‑na nuná ralhake akake ka benne innabia Tata Do Yebáha ke.
MAT 19:15 Iki de chi uxxua nábie iki ka bintoha, nna bedábie ata dueha nna deyye.
MAT 19:16 Ttu nu kwiti ubigana ata du Jesús‑ni nna unnaba tisane, rana: ―Maestru, lu ankalu benne tse. Unáchu, ¿bí nu tse unia ki satíaba aka bania arlo Tata Do Yebáha?
MAT 19:17 Jesús‑ni nna bekabie geni, ree na: ―¿Beaka ralu deki ankaa benne tse? Sunruba ttu benne do anke benne tse, delába Tata Do Yebáha. Ganna raka lelu aka benlu ttu dia lii, bedo tisa ge nu bodha'ane uinri'i ganna xa.
MAT 19:18 Nubiyúha nna rana: ―¿Nú ka tisa bodha'aneha udorua tisa geni? Lee nna ree: ―Bittu akalu nu runi elhutti lhe bittu dho lenlu nu abittu anka latselalu lhe bittu lhanalu lhe bittu kwentaba usialu iki ttu benne deki benie ttu bixa.
MAT 19:19 Anágaba nna tsia lelu ka tata nan gelu, lhe akinlu ge attu benne atti tteba rakabin gelu.
MAT 19:20 Nu kwitiha nna rana: ―[Attili ankaa nutoha], chi rudoa tisa ge iyába nu bodha'an benneha. ¿Bíruala riyasaa unia ganna?
MAT 19:21 Jesús‑ni nna ree na: ―Ganna raka lelu akalu benne runi itá su, beyya nna betto'o iyá nu tee gelu nna belhiu ge nuha nna begwe ka benne abittu geke tee. Ganna aníha uinlu, la'ania nna gwattaba elha tse gelu yebáha. La'anialigaba nna chinka utá tenalha neti.
MAT 19:22 Tti biyienin nu kwitiha nu rabie naha, nianna si'iba bedúna leni deyyana kumu de tee xxatta geni.
MAT 19:23 Jesús‑ni nna ree ka benne rudhetinieha: ―Netiru ria, tsitsiba anka ki isin ttu nu tee geni akana nu innabia Tata Do Yebáha na.
MAT 19:24 Rinnea attu libe ria: adírula satti ga'a ttu camellu lhe'e yieru do xan ttu yoxa attichula ga'a ttu nu tee geni, kini akana nu innabia Tata Do Yebáha na.
MAT 19:25 Tti biyienin ka benne rudhetinieha nu reeha, yalhá bebanakanie nna ráke: ―Ganna aníha nna, ¿nú dhaana esinna len Tata Do Yebáha?
MAT 19:26 Jesús‑ni nna rugíabe loke nna rabie ke: ―Len ka benne se'e yiesi lo yu‑ni, abittu galá aka, ttaka len Tata Do Yebáha iyába gwakaba.
MAT 19:27 Nianna unnaba tisa Pedruha, rane: ―Ri'itu bedhába ikitu iyá nu tee getu nna danalhatu lu. ¿Bíla ralhatu dhitu ganna?
MAT 19:28 Jesús‑ni nna ree ke: ―Netiru ria, atti isia sá ekubi yiesi lo yu‑ni lhe iyá nu se'e loni lhe, la'ania neti benne daya yebáha dhoa lo xxila nu rapi edha linníha ata innabiaya. Anágaba lebi'i ka nu danalhale neti ebiagabale lo tsi'inu (12) ka xxila ata tse'ele innabiale kini uinle elhuxtisi ge ka benne tsi'inu (12) dhi datiake benne tee lábie Israel.
MAT 19:29 Lhe anágaba nuxaba benne ganna si de danalhe neti nna bedhá ikie lisieha lhe ka betsieha lhe ka daneha lhe ka xxudi ixnábie lhe ka xi'inie lhe o si ka lo yu geeha, la'ania nna gayua (100) libe tteba luesi nu bennittieha edíe. Anágaba nna ralhagabe aka benbie ttu dia lii.
MAT 19:30 Ttaka ixe ka nu ra xxeni lekani nnanna, eyakakana ka nu abittu ra xxeni lekani la'ania, nna ixe ka nu abittu ra xxeni lekani nnanna, ka nuha‑la eyakakana ka nu inná xxeni lekani la'ania.
MAT 20:1 ’Tata Do Yebáha, tti rinnabie ka benne, elha rinnabia geeha raxxína na len nu ben ttu nubiyú yadinna ka ya uva lo yu geniha. Nubiyúha dila tteba udána diana ugila ka nu kwenkana lo yu geni ata yadinna ka ya uvaha.
MAT 20:2 Unne lenna ka nu kwen sinaha kixana kana ttu denario nu anka lhiaxa ge ttu sá. Nianna tti udhelhana kana lhe'e ya uvaha.
MAT 20:3 Atti chi ugwena retin jaa (9) dilaha nna bederiana attu libe nna bedelenna attu chupa ka nubiyú se'e nattibakana ata raka i'iyaha.
MAT 20:4 Nianna tti rana ka nuha: “Anágaba lebi'i gwaltsiagaba kini kwenle sina lhe'e ya uva kiaha. Neti gwagixabaa le attiba ankaba geni.” Aníoka nna dia tteba ka nuha.
MAT 20:5 Aníha‑gaba bedeonna tti chi begwena retin tsi'inuha (12) lhe tti begwena retin tsunnaha lhe.
MAT 20:6 Atti chi ugwena retin gayuha nna bederiana attu libe nna bedelenna adíru ka nubiyú se'e nattibakana niha. Nianna tti redeana ka nuha: “¿Beaka kwentaba se'ele betú sába nii?”
MAT 20:7 Ka nuha nna bekabikana geni, rákana: “Kumu lanú chi bedaxxuna ri'itu ki kwentu sina.” Nubiyúha nna rana kana: “Anágaba lebi'i gwaltsiagaba lhe'e ka ya uva kiaha ki kwenle sina, neti nna gwagixabaa le attiba ankaba geni.”
MAT 20:8 Atti chi ulha sáha nna ra xxana yuha nu baninna ka nu riben sinaha: “Beyaxi ka nu yu'u sina‑na nna begwekana lhiaxakani. Dhulolu len ka nu bisia bitoha nna ulhuxalu len ka nu bisia dila tteha.”
MAT 20:9 Tti ubiga ka nu uta'a sina retin gayuha nna kua ttu ttubakana uxíkana ida'aba nu ankaba lhiaxa ge betú sá.
MAT 20:10 Laxkala atti ubiga ka nu uta'a sina dila tteha nna ukakinna deki gaxarukana xxeni, ttaka kua ttu ttukana uxígabakana nu ankaba lhiaxa ge ttu sá.
MAT 20:11 Tti chi uxíkana belhuha, nianna udulokana rinne lhákana ge xxana yuha, rákana:
MAT 20:12 “Ki ka nu se'e nii, deloliba bisia ka nuní, suna ttu uraruba urenkana. Delo nna ttúba utixalu ka nuní len ri'itu. Ri'itu betú sába bechíatu lo sina‑ni lhe uyu'utu lhe'e ubisa lhe.”
MAT 20:13 Ttaka xxana yuha nna bekabina ge ttu ka nuha, rana na: “Biyúruga xa betsi to, neti labí runia nu abittu anka tse lenlu. ¿Laaba chiba beya'anri'i deki gwagixabaa lu nu ankaba lhiaxa ge ttu sá?
MAT 20:14 Ne belhiu gelu tee nii nna beyya. Neti rakaba lasia kixaa ka nu bisia bito‑ni ttiba utixaa lu.
MAT 20:15 Kumu neti gwakaba kia unia len belhiu kia‑ni attiba rakaba lasia. Lu nna, ¿si ritisibinlu neti de ankaa benne redá lasia rutea?”
MAT 20:16 Nianna tti ra Jesús‑ni: ―Laxkala ka nu daa lo xubanaha, ka nuha‑la akakana ka nu nnerukana nna ka nu daneruha nna akakana ka nu sanalha lo xubana. Kumu ixeba ka benne raxi Tata Do Yebáha, ttaka nna ttu chuparubake rukwebie kini akake gebie.
MAT 20:17 Laka yu'u Jesús‑ni neda die lhe'esi Jerusalén‑ni, nianna uxie ka benne tsi'inu (12) rudhetinieha. Sun labake uxie attu ta subi, nianna rabie ke:
MAT 20:18 ―Gwaluyúruga, chiba diari'i isinri'i Jerusalén‑ni nna neti benne daya yebáha chiba dabigana utekana neti lasi ná ka nu loni ge ka bixxudiha lhe lasi ná ka nu rule'ekinna ka benne nu ra lo bia bennabi bodha'an Moisés‑ni lhe. Ka nuha ukinnibakana neti ki gattia.
MAT 20:19 Nianna tti utekana neti lasi ná ka nu dittu, ka nu abittu ankakana nu Israel. Ka nuha nna uxisilakana kia lhe ukulhakana neti lhe, nianna tti utákana neti lo ya kurusi. Ttaka ganna chi beyonna ubisaha nna eyaka benbaa.
MAT 20:20 Nan ge Santiago‑ni lhe Juan‑ni lhe ubige chebie ixpabakana arlo Jesús‑ni, nna bedú xibie, unnabe len benneha, ree: ―Neti innabaa lu ttu bixa xa tata.
MAT 20:21 Jesús‑ni nna ree benneha: ―¿Bí raka lelu innabalu len neti? Benne nuilaha nna bekabie ree: ―Ugwelhalu kwia ixpa ka xi'inia‑ni kwe'elu ganna chi innabialuha, ttúkana dhokana daka ná benlu, attúkana nna dhokana daka ná yattilu.
MAT 20:22 Jesús‑ni nna ree kana: ―Lebi'i labí yule nu rinnabale. ¿Si gwadaale uyúle luesi elha disa uyúa‑ni lhe si gwadaale satele nu satea‑ni lhe? Lakana nna bekabikana, rákane: ―Ila. Gwadaa galátu.
MAT 20:23 Lee nna ree kana: ―Gwalí galá, gwadaabale uyúle luesi elha disa uyúa‑ni lhe gwadaabale satele luesi nu satea‑ni, ttaka nu rale deki ugwelhaa le kwiale ttúle daka ná bania nna attule nna daka ná yattia, nuná labí neti ralhaa innía ganna gwaka. Kumu Tata kialiba chi ga'ananie ka benne kwiake niha.
MAT 20:24 Tti biyienin a tsii ka benne rudhetini Jesús‑ni nu rinnaba ka benneha, nianna bisa'a ttebakanie len ixpa betsiba ka benneha.
MAT 20:25 Jesús‑ni nna uxie iyába ka benneha nna ree ke: ―Lebi'i gwa yúbale, yiesi lo yu‑ni ka nu rinnabia‑na rinnabiabakana ka benne gekani attiba rakaba lekani. Anágaba ka nu ra xxeni lekinna, nu rábakana raka.
MAT 20:26 Ttaka lebi'i labí aná dika udhaka luesile. Lebi'i nu uinlale, ganna nuxa ttúle raka lele akale nu ra xxeni leni delo iyále, benne ra xxeni leeha, akalee benne ixúni adíle
MAT 20:27 nna benne raka lebie ake nu loni ge iyále, lalee nuha ake attiba ttu nu to'o lo sina, ixúbie kini ute nábie len adíle
MAT 20:28 ttiba neti benne daya yebáha, laa dagaa yiesi lo yu‑ni kini ixúti le uinle nu innía, sinuki dalaa ki ixúa ute náya len nuxaba benne lhe anágaba daya kini gattia kixaa ge ka tulha daa ka benne, ki odiláya ixeke.
MAT 20:29 Atti beria Jesús‑ni lenie ka benne rudhetinieha lhe'esi Jericó‑ni, ixe juisiru ka benne danalhake bie.
MAT 20:30 Chupa ka benne lo xua se'eke ro'o nedaha. Tti biyienkanie daa Jesús‑ni ritebie ata se'ekeha, nianna uresi'a ttebake, ráke: ―¡Benne datia David, gwatuachi lelu ri'itu xa Tata Xisi to!
MAT 20:31 Ka benne danalhaha nna rudhaka disalake ka benneha kini eyaka siike, ttaka ka benneha nna adíla idisa ribesi'ake, ráke: ―¡Benne datia David, gwatuachi lelu ri'itu xa Tata Xisi to!
MAT 20:32 Nianna tti gwalheda Jesús‑ni nna uxie ka benneha nna ree ke: ―¿Bí raka lele udhakaa le?
MAT 20:33 Ka benneha nna ráke: ―Raka letu edhalilu ka iyya lotu‑ni xa tata.
MAT 20:34 Nianna gwatua tteba le Jesús‑ni ke nna utane ka iyya lokeha. Looraha tteba nna belákanie. Nianna dia ttebake danalhake bie.
MAT 21:1 Tti chi dabiga Jesús‑ni len ka benne rudhetinieha lhe'esi Jerusalén‑ni, nianna bisinke lhe'esi Betfagé ata do i'iya ata daa ka ya olivuha. Nianna tti udhelhe chupa ka benne rudhetinieha,
MAT 21:2 nna ree ka benneha: ―Gwaltsia lhe'e yiesi to re arlori'i‑ni. Naa saxxakale ttu burru nalhana, na'aya xi'inni. Gwalidhasi na nna gwaltá lenkana.
MAT 21:3 Ganna nuxa gana le bixa, gwaligasi na: “Jesús benne anke Xxanari'iha‑ba riyasanie ka nuní nna gweteka'an ttebe kana.”
MAT 21:4 Aníha uka ki gwado tisa ge nu unne benne uke profeta ge Tata Do Yebáha, tti ree:
MAT 21:5 Gwaligasi ka benne lhe'esi Sión‑ni: “Gwaluyúruga. Ne benne innabie leha chi daa naa. Labí ra xxeni lebie; dabie doe kwe'e ttu burru to, ttu burru kwiti to ankana xi'in ttu burru chi ruja yua.”
MAT 21:6 Ka benne rudhetinieha nna ugíake lhe'esiha nna benbake atti tteba ra Jesús‑ni ke.
MAT 21:7 Gwaxxíbake burruha lenna xi'inniha, nianna tti uxxuake ka xokeha kwe'e ka nuha, nianna tti udoe.
MAT 21:8 Ixe juisiru ka benne ribeake ka xokeha nna ritsilake lo nedaha kini ritebie, adíke nna lo ka yaga daa niha‑ba rigitsake nna ritsilake lo nedaha.
MAT 21:9 Ka benne danalhaha lhe ka benne daneruha lhe ribesi'abake ráke: ―¡Xxeni ra lelu! ¡Lu ankalu Benne datia David! ¡Karubárulu! ¡Lu ankalu benne udhelha Tata Xisiha! ¡Xxeniba ra lelu xa Tata Do Yebaa!
MAT 21:10 Tti chi uta'a Jesús‑ni lhe'esi Jerusalén‑ni nna bisatsa tteba iyába ka benne lhe'esiha nna rinnaba tisa luesike, ráke: ―¿Nú benne nuná daa naa?
MAT 21:11 Ka benne danalhake bieha nna ráke: ―Jesús ge lhe'esi Nazaret nu rena daka Galilea‑niba benne‑ni. Benne‑ni anke profeta ge Tata Do Yebáha.
MAT 21:12 Atti uta'a Jesús‑ni lali'a yotu ge Tata Do Yebáha, bochesue ka nu se'e gwetto'o lali'a ge yotuha lhe ka nu yu'u ugo'oha lhe. Nianna berixxi loe ka mexa ge ka nu se'e gwetsea belhuha lhe ka xxila rise'e ka nu rutto'o ka bechaha lhe.
MAT 21:13 Labie nna ree kana: ―Tata Do Yebáha lo ka yetsi geeha ree: “Yo'o kia‑ni ixúe kini ilhapi ka benne tisa len neti.” Ttaka lebi'i nna ttiba belea ata yu'u ka ubanala chi reyoinle yotu‑ni.
MAT 21:14 Ro'o yotuha ubiga ka benne xua loke lhe ka benne ridá natsa lhe, ubigake ata do Jesús‑ni. Lee nna gwa beyoinbe ke.
MAT 21:15 Ttaka ka nu loni ge ka bixxudiha lhe ka nu rule'ekinna ka benne nu ra lo bia bennabi bodha'an Moisés‑ni, yalhá bisa'akinna tti bilákinna ka nu rebaninri'i geni ruin Jesús‑ni lhe tti biyienkinna ge ka nuto yu'u ro'o yotuha ribesi'akana, rákana: “¡Xxeniba ra le Benne datie David‑ni!”
MAT 21:16 Nianna tti rákane: ―¿Si gwa riyieninlu nu ra ka nuto‑na? Lee nna bekabie ree: ―Gwa rien galáti. ¿Si lagwa chi belabale lo ka yetsi ge Tata Do Yebáha ata dia ra: Ka nuto elha to‑na lhe ka nuto sa rasina lhe, ka nuná chi benlu kini ulhakana le'a gelu?
MAT 21:17 Niha‑ba bese'e Jesús‑ni kana nna bedábie lhe'esi Jerusalén‑ni nna die bisine lhe'esi Betania. Lhe'esi Betania‑ba beya'ane loolhaha.
MAT 21:18 Ugwani dilaha tti beyeki Jesús‑ni deyu'e neda deyye lhe'esi Jerusalén‑ni, nianna tti ugwetti bitunie.
MAT 21:19 Ro'o nedaha bilánie du ttu ya higu. Nianna ubige ata du nuha, ttaka labí gwaxxake higu loni, sunruba lhaga geni sia. Nianna tti belise ya higuha, ree na: ―¡Ni tsa labíru kwia nu xixxi gelu! Looraha tteba nna ubisi tteba yagaha.
MAT 21:20 Ka benne rudhetinieha nna tti bilákanie nu ukaha nna bebanabakanie. Nianna tti ráke: ―¿Gasina nna ttu nnelaba chi bibisi ya higu‑ni?
MAT 21:21 Jesús‑ni nna bekabie ree: ―Netiru ria, ganna ruxxen tsitsi lele ge Tata Do Yebáha nna abittu rudú chupana lele deki gwakaba nu innabaleha, la'ania nna alaa suna luesi nu benia len ya higu‑niruga gwaka gele uinle, gwakagaba gele gale i'iya do naa: “Ubi'etta ata dolu‑na nna ugía gwaxxudi lhe'e indatooha.” La'ania nna gwakaba nu innáleha.
MAT 21:22 Laxkala iyába nu innabale atti innele len Tata Do Yebáha, ganna gwalíga ruxxen tsitsi lele ge benneha deki gwadíbale nu rinnabaleha, la'ania nna gwadíbale nuha.
MAT 21:23 Jesús‑ni bisine ro'o yotuha nna laka due rule'enie ka benne, nianna tti bisin ka nu loni ge ka bixxudiha lhe ka benneola ge ka nu Israel‑ni lhe, nianna rákane: ―¿Bí lo neda nuná rapalu ki ruinlu ka nu ruinlu‑na? ¿Núla betena lo neda gelu kini ruinlu aná?
MAT 21:24 Jesús‑ni nna bekabie, ree kana: ―Anágaba neti innaba tisagabaa le ttu bixa. Ganna lebi'i ekabile ge nu innaba tisaa le, la'ania nna neti gwagixxi'agabania le nú betena lo neda len neti kini runia ka nu runia‑ni.
MAT 21:25 Gwalinná sanga, ¿nú iki biria ki begadi Juan‑ni ka benne inda? ¿Si iki Tata Do Yebáha ak? ¿Iki ka benne se'e yiesi lo yu‑ni ak? Nianna tti udulokana ra luesikani: ―Ganna gari'i na: Tata Do Yebáha‑ba betebie lo neda len benneha, la'ania nna innána: “¿Beakala nna a ugía lele ge benneha ganna?”
MAT 21:26 Nna ganna innári'i: Ka benne se'e yiesi lo yu‑niba udhelhake benneha, ttaka rasibinri'i ka ebi'i noo ka benne ri'i, kumu iyábake ráke deki Juan‑ni uke ttu profeta ge Tata Do Yebáha.
MAT 21:27 Nianna tti bekabikana ge Jesús‑ni, rákana: ―Labí yutu nuxa udhelhana benneha. Jesús‑ni nna ree kana: ―Anágaba neti bittugaba kixxi'ania le nú rutena lo neda len neti ki runia aní.
MAT 21:28 Rágaba Jesús‑ni ka nu loni ge ka bixxudiha lhe ka benneola ge ka nu Israel‑ni lhe: ―¿Bí rakinle ge nu kixxi'aya‑ni? Udo ttu nubiyú use'e chupa ka xi'in biyúni. Nianna rana xi'in biyú neru geniha: “Xi'ini to, ugía gwachen sina lhe'e ya uva kiaha nasá.”
MAT 21:29 Nu kwitiha nna bekabina rana: “Labí tsia neti.” Ttaka delola nna beleninna nna gwa ugíabana.
MAT 21:30 Nianna tti ubiga xxudiha nna nuha‑gaba redeana attu xi'in biyúniha. Nuha nna bekabina rana: “Gwaya'abaa xa tata.” Ttaka labí ugíana.
MAT 21:31 Nianna tti redea Jesús‑ni ka bixxudiha lhe ka benneolaha lhe: ―¿Nú ka nuha rakinle gwa benkana nu ra xxudikaniha ganna? Lakana nna rákana: ―Xi'in biyú neru geniha. Jesús‑ni nna redeabie kana: ―Netiru ria, ka gwekixa‑na lhe ka nuila rutto'o latikinna, nnelarula dhielha ka nuná akakana ka nu innabia Tata Do Yebáha kana attichula lebi'i.
MAT 21:32 Aná ria, kumu Juan benne begadi indaha gwa bitaba benneha bele'enie le ttu neda tse, ttaka lebi'i nna labí ugía lele gebie. Ka gwekixa‑na lhe ka nuila rutto'o latikinna nna gwa ugíaba lekani gebie. Lebi'i nna meskiba gwa bilenle iyá nu ben benneha nna labí bodúna le ge nu ruinle kini tsia lele gebie.
MAT 21:33 ’Gwaludoruga nagale kixxi'aya attu nu raka lasia unale ge ttu benne beyade ka ya uva lo yu geeha. Nianna bedheabie abi'iba ro'o yuha nna tti ulekie ttu xieru lagwi ge yuha ata idhie uvaha. Bedogabe ttu yo'o ttu nu yadha kini dho benne ulatsie ki anuttu nu salhidana uvaha. Nianna bete ganne yuha len ka nu kwenkana nuha, nna tti biriabie diabie idittu.
MAT 21:34 Tti chi bisia sá exú uvaha nna udhelha ttebe ka benne riben lo sina geeha, udhelhe ke ata se'e ka nu riben lo yu geeha kini utekana nu ralhe dhie ge yuha.
MAT 21:35 Ttaka ka nu riben lo yuha nna bedaxxulakana ka benne udhelheha: ttu ka benneha benkane gwe, attue nna tsa ttela bettikane nna benne beyonnaha nna besiakane íyya.
MAT 21:36 Iki de nuha nna benne anka xxana yuha udhelharue adí ka benne riben lo sina geeha. Adírula ixeke udhelhe attichula ka benne udhelhe sisi'a tteha, ttaka ka nu riben lo yuha nna aníha‑gaba bododhakakana ka benneha.
MAT 21:37 ’Iki deliba nuha nna tti udhelhe kwinaga xi'in biyúeha, kumu rakanie: “Xi'inia‑niligaba nna gweyya lekanie.”
MAT 21:38 Ttaka tti bilákin nu riben lo yuha xi'in biyúeha, nianna ra luesikani: “Lana nuná eya'anna lo yu‑ni. Uttiri'i na kini eya'anri'i len yu‑ni.”
MAT 21:39 Nianna tti bedaxxukana benne kwitiha, uleakane ro'o yuha nna bettikane.
MAT 21:40 Nianna tti ra Jesús‑ni ka nu loni ge ka bixxudiha lhe ka benneola ge ka nu Israel‑ni lhe: ―Ganna chi esia xxana yuha, ¿bí rakinle udhake ka nu urenkana lo yu geeha?
MAT 21:41 Lakana nna rákana: ―Labí satua lebie ka nu runi satsaha, uttibe ka nuha. Nianna tti utebie yu geeha len ka nu subi ki kwenkana nuha, ki ugwekane nu ralhe dhie ganna chi isia sá exú nu xixxi ge ka yagaha.
MAT 21:42 Jesús‑ni nna ree kana: ―¿Si niba tsa abittu chi belabale lo ka yetsi ge Tata Do Yebáha ata dia ra: Íyya nu ulu'u ni'a ka nu rukuakana yo'oha, íyyaha‑la nuha chi bisinna beyakana nu rixúru. Tata Xisiha‑ba benie kini uka aní nna rebanabinri'i rilenri'i nu benie?
MAT 21:43 De nuha nna neti ria le, Tata Do Yebáha kuabe lo neda gele kini abitturu akale ka nu innabie. Ka benne uinke nu tsu'u lebie, ka benneha nuha gwa ralhake akake ka benne innabie.
MAT 21:44 Laxkala nuxaba benne ganna ibixxie iki íyya nu ulu'u ni'akaniha, tuttíruba iyuya benneha lhe anágaba ganna ttixka íyyaha iginnina iki ttu benne, utsutsa tábana benneha.
MAT 21:45 Tti biyienin ka nu loni ge ka bixxudiha lhe ka fariseo‑ni lhe nu ra Jesús‑ni, nianna tti ute dákinna deki labakana nuha rutanie nu reeha.
MAT 21:46 Nianna benkana deki udaxxukane, ttaka usibakinna ge ka benne, kumu iyába ka benne rakakanie deki Jesús‑ni anke ttu profeta ge Tata Do Yebáha.
MAT 22:1 Jesús‑ni rodolise attu libe ka nu loni ge ka bixxudiha lhe ka fariseo‑ni lhe. Benie ki utte dákana bí diani nu raka lebie kixxi'anie kanaha, nianna tti ree:
MAT 22:2 ―Tata Do Yebáha, tti rinnabie ka benne, elha rinnabia geeha raxxína na len nu ben ttu nu rinnabia ge ttu yiesi tti benna dha'a ge xi'in biyúniha.
MAT 22:3 Nianna tti udhelhana ka nu riben lo sina geniha ki tsia ka nuha salisakana ka nu chi biyaxi ki tse'ekana dha'aha, ttaka ka nuha nna labí uka lekani tsiakana.
MAT 22:4 Nianna tti bededhelhana adíru ka nu riben lo sina geniha attu libe nna rana ka nuha: “Aní gwaligasi ka nu biyaxikana tse'ekana dha'aha: chiba tee tse elho lhe chiba bettia ka ku'una kia ka nu rixen xxattaha. Iyába chi tee tse. Gwaltá kini tse'eri'i dha'a.”
MAT 22:5 Ttaka ka nuha labí betabikinna ge nu rinnabiaha. Birialakana diakana: ttúna birialana diana gwelanni ka yu geniha, attuna nna birialana diana ata rutto'onaha,
MAT 22:6 adí ka nuha nna bedaxxulakana ka nu riben lo sina ge nu rinnabiaha nna uyalakana ka nuha nna axtaba bettikana kana.
MAT 22:7 Nu rinnabiaha nna yalhá bisa'a xxattinna. Nianna udhelha ttebana ka soldadu geniha ki gwatse'e lookana ka nu ben elhuttiha lhe gwadokana gi yiesi gekaniha lhe.
MAT 22:8 Nianna rana adí ka nu riben lo sina geniha: “Chiba tee tse elho ge dha'a‑ni, ttaka ka nu biyaxi ki tse'ekana dha'a‑ni, delo ni'a ge nu benkanaha nna labí elha ralhakana tse'ekana nii.
MAT 22:9 Nnanna nna gwaltsia ata raka kurusi ka neda‑na nna gwaligaxi iyába ka benne eti'ale, gwaligasi ke itake ki goke.”
MAT 22:10 Ka nu riben lo sina geniha nna biria ttebakana lo ka nedaha nna gwattupabakana iyába ka benne gwaxxakabakana: sila ka benne ruin tse lhe sila ka benne ruin satsa lhe. Aníha uka nna bisá tíba benne lhe'e yo'o ata raka dha'aha.
MAT 22:11 ’Tti uta'a nu rinnabiaha ki ilenna ka nu chi biyaxi dha'aha, niha bilenna do ttu nubiyú labí nukuna xo ge dha'a.
MAT 22:12 Nianna tti rana nuha: “Betsi to, ¿gasina uka uta'alu nii ki labí nukulu xo ge dha'a?” Ttaka nuha nna siiba ukana, labí bekabina.
MAT 22:13 Nianna rana ka nu riben sina geniha: “Gwaluxxiga ka ni'ani lhe gwaluxxiga ka náni lhe, nna gwaludelha na ro'o yo'o‑na ata anka chulha‑na. Naa kwesina lhe goniba lo layani lhe.”
MAT 22:14 Nianna tti ra Jesús‑ni: ―Kumu ixeba ka benne raxi Tata Do Yebáha, ttaka nna ttu chuparubake rukwebie ki akake gebie.
MAT 22:15 Nianna tti deyya ka fariseo‑ni nna unne len luesikani gasina uinkana ki ibixxini Jesús‑ni bixa innábie kini aníha nna dhaakana ukinnikane.
MAT 22:16 Nianna tti udhelhakana ka nu rudhetikinnaha, itupa len ka nuha ka nu tákana Herodes nu rinnabiaha. Udhelhakana ka nuha kini gákana Jesús‑ni: ―Maestru, ri'itu yutu deki lu ankalu ttu benne rinnelu nu ankaba gwalí lhe rule'ebinlu ka benne neda ge Tata Do Yebáha attiba ankaba geni. Labí retabinlu ge nu inná ka benne, kumu labí rulannilu ttixa ankake.
MAT 22:17 Nnanna nna unáchu, ¿si gwa ga'anaba kixari'i belhiu nu daa lori'i kixari'i len César nu rinnabia xeniha, o abittuba ak?
MAT 22:18 Ttaka Jesús‑ni nna ute dábanie nu rulha lekani uinkanaha, nianna tti ree kana: ―¡Aalexa ka nu delo tisaba rinnaba tisale! ¿Beaka ruinle kini ichekua nna ibixxiti bixa innía?
MAT 22:19 Gwalule'e sanga belhiu rigixari'i‑na. Nianna bele'ekinne ttu denario.
MAT 22:20 Nianna tti unnaba tise, ree kana: ―¿Nú lo nuní du lo belhiu‑ni lhe nú lá nuní dia xani'a nuní lhe?
MAT 22:21 Lakana nna bekabikana, rákana: ―Lá César nu rinnabiaha‑ba nuní. Nianna ree kana: ―Ganna aníha nna gwalugweba César‑ni nu anka geni nna Tata Do Yebáha nna gwalugwegabe nu ankaba gebie.
MAT 22:22 Tti biyienkinna nu rabie kanaha nna bebanabakinna nna niha‑ba bedúkane nna deyyakana.
MAT 22:23 La sáha‑gaba bisin ka saduceo‑ni ata du Jesús‑ni. Ka nuha rákana deki labí reyaka ben ka benne chi uttiha. Nianna rákane:
MAT 22:24 ―Maestru, Moisés‑ni bodha'ane, ree: “Ganna ttu nubiyú chi betsá náni, nianna gattina nna anúba xi'inni aka len nuila geniha, la'ania nna teeki edí betsiniha nuila bidabiha kini ka xi'inni aka len nuilaha nna eyakakana ttisidiba xi'in benne chi uttiha.”
MAT 22:25 Ganna aníha anka nna ttibanka ri'itu udo ttu benne getu use'e gasi ka betsie. Benne xxeniha betsába nee len nuila geeha, ttaka uttibe nna lanú xi'inie bodha'ane. Nuilaha nna beya'anbana kini edína attu betsieha.
MAT 22:26 Aníha‑gaba gwate betsie nu berupaha lhe nu beyonnaha lhe. Aníha‑ba gwateke nna ni beyába iyába gasi betsike utti.
MAT 22:27 Iki de nuha nna uttigaba nuilaha.
MAT 22:28 Nianna, ganna chi bisia sá eyaka ben ka benne chi uttiha, ¿núla nuila geke aka nuilaha, ki iyába gasike udo lenke nuha?
MAT 22:29 Jesús‑ni nna bekabie gekani, ree: ―Lebi'i rinittibale nu gweala rale, kumu de labí yule nu ra lo ka yetsi ge Tata Do Yebáha lhe labí yule deki tsitsiba ra lebie lhe.
MAT 22:30 Kumu tti eyaka ben ka benne chi uttiha, nuila lhe nubiyú lhe labíru dina otsá ná ka benneha, nigaba uketike ka xi'inkeha lhe. Eyakabake attiba ka anjeli se'e yebáha
MAT 22:31 nna ge nu rale ganna gwalí reyaka ben ka benne chi uttiha, neti upeya le, ¿si lagwa chi belabale nu ra lo ka yetsi ge Tata Do Yebáha, tti ree:
MAT 22:32 “Neti ankaa Diosi ge Abraham‑ni lhe ge Isaac‑ni lhe ge Jacob‑ni lhe”? Laxkala Tata Do Yebáha labí anke Diosi ge ka benne chi uttiha, labie ankalee Diosi ge ka benne anka bani.
MAT 22:33 Tti biyienin ka benne se'e niha nu ra Jesús‑ni, yalhá bebanakanie ge nu rule'enie keha.
MAT 22:34 Ka fariseo‑ni, tti binakana deki bose'e siiba Jesús‑ni ka saduceo‑ni, nianna bottupa tteba luesikani.
MAT 22:35 Ttu ka fariseo nu rule'enna ka benne nu ra lo bia bennabi bodha'an Tata Do Yebáha len Moisés‑ni, de ruinna ku'una Jesús‑ni prueba, nianna rane:
MAT 22:36 ―Maestru, ¿nú ka tisa bodha'an Tata Do Yebáha lo bia bennabi‑na rakaru doelha udori'i tisa geni?
MAT 22:37 Jesús‑ni nna ree na: ―“Akinlu ge Tata Do Yebaa benne anka Xxanaluha itú iki itú lelu.”
MAT 22:38 Nuní nu lade'a tte rakaru doelha uinri'i.
MAT 22:39 Nu berupaha nna ankagabana attiba nuní, rana: “Akinlu ge attu benne atti tteba rakabin gelu.”
MAT 22:40 Ge ixpa ka tisa‑ni rudaxxu ni'a iyá nu ra lo bia bennabi bodha'an Tata Do Yebáha len Moisés‑ni lhe rudaxxu ni'a nu ra lo ka yetsi bodha'an ka profetaha lhe.
MAT 22:41 Laka tupa ka fariseo‑ni, nna unnaba tisa Jesús‑ni kana, ree kana:
MAT 22:42 ―¿Bí rakinle ge benne anke Cristuha? ¿Nú uka xutto benneha? Lakana nna rákana: ―David‑niba xa.
MAT 22:43 Nianna ree kana: ―Ganna David‑ni ukana xutto Cristuha nna, ¿beakala tti yu'u Espíritu ge Tata Do Yebáha latini nna rálana deki Cristuha anke Xxanani? Kumu David‑ni rana:
MAT 22:44 Aní ra Tata Do Yebáha tti rulise Cristu benne runie neti mandaduha: “Utá udo daka ná ben kia. Niiba dholu axtaliba ganna chi bese'a ka nu abittu raka uyúkana lu, kini ulealu ikikani.”
MAT 22:45 Ki ganna David‑ni daneruna Cristuha, ¿galasina nna rálana benneha: “Lu ankalu benne ruinlu neti mandadu”?
MAT 22:46 Niba ttú ka fariseo‑ni a uka gekani ekabikana ge nu ra Jesús‑ni nna debá la sáha nna ni ttúkana labíru beyaxakinna innaba tisakane ge attu bixa.
MAT 23:1 Iki de nuha nna tti ra Jesús‑ni ka benne se'e niha lhe ka benne rudhetinieha lhe:
MAT 23:2 ―Ka nu rule'ekinna ka benne nu ra lo bia bennabi‑ni lhe ka fariseo‑ni lhe, lakana nuná daa lokani ula'akana nu bodha'an Moisés‑ni lo bia bennabi‑na.
MAT 23:3 Laxkala lebi'i, gwaludo tisa gekani lhe gwaluin iyá nu innákana lhe. Deba nna bittu uinle tti ruinkana, kumu lakana nu subi rákana nna nu subila ruinkana.
MAT 23:4 Ttiba ttu yua idi'i nuná rudelhakana kwe'e ka benne tti rudo doelhakana ke ki udoke tisa ge iyá nu rákana, ttaka lakana niba ttu latti a raka lekani udokana tisa ge nu rule'ekana.
MAT 23:5 Yalhá ru'u lekani rodixenkana ka yetsi ka nu ruxxika lhe'e nákani lhe rutá lo xeakani. Lo ka yetsiha dia ttu chupa ka tisa ge Tata Do Yebáha. Lhe anágaba ru'ugaba lekani ukukana ka xalho daa xxatta xuda ro'okani. Ruinkana iyá nuní uka diba ki iláni ka benne deki yalhaba tse ruinkana.
MAT 23:6 Anágaba ruinkana ata tee ttu elha go, yalhá ru'u lekani kwiakana lo ka xxila tseru. Nuha‑gaba ruinkana lhe'e ka yo'o ata rudhetiri'i ka tisa ge Tata Do Yebáha, yalhá ladeakakana kwiakana lo ka xxila tseru.
MAT 23:7 Lhe ru'u lekani tti eti'a benne kana lo ka neda‑na, latsiru inneke gake kana padiuxi lhe anágaba lhe ru'ugaba lekani gake kana: “Maestru.”
MAT 23:8 ’Ttaka lebi'i bittu dhielhale gákana le: “Maestru”, kumu sunruba ttu benne doe anke Maestru gele, [delába benne anke Cristuha]. Lebi'i turo'oba ankale, lanú benne ra xxeniru lebie do. Iyábale ttisidiba betsibale raka.
MAT 23:9 Lhe anágaba anuttu nuxa gale: “Tata” yiesi lo yu‑ni, kumu sunruba ttu Tata geri'i do, nna yebáha‑ba do benneha.
MAT 23:10 Bittugaba dhielhale gákana le: “Lebi'i ankale nu loni”, kumu sunruba ttu benne do anke nu loni gele; delába benne anke Cristuha.
MAT 23:11 Laxkala benne raka lebie inná xxeniru lebie arlo adíle, benneha‑la nuha daa loe ixúe ute nábie len lebi'i.
MAT 23:12 Kumu ganna ttixka ttu benne titúbe unie deki ra xxeni lebie, la'ania nna elhida gaala Tata Do Yebáha le benne ruin aníha, nna benne elhida gaa le titúbe, benneha‑la nuha uin Tata Do Yebáha kini inná xxeni lebie.
MAT 23:13 ’Ttaka lebi'i ka nu rule'enle ka benne nu ra lo bia bennabi bodha'an Moisés‑ni lhe lebi'i ka fariseo lhe, delo tisaba ruinle deki ankale benne tse. ¡Gwalíchiru lele, kumu lebi'i rudheale lo ka benne raka leke ga'ake udaxxuke neda ge Tata Do Yebáha ata rinnabieha! Ttaka nigaba lebi'i a ra'ale lo neda geeha, lhe nigaba a rugwelhale ga'a ka benne raka leke ga'ake lhe.
MAT 23:14 [Lebi'i, ka nu rule'enle ka benne nu ra lo bia bennabi bodha'an Moisés‑ni lhe lebi'i ka fariseo lhe, delo tisaba ruinle deki ankale benne tse. ¡Gwalíchiru lele, kumu riguale ka yo'o ge ka nuila bidabi‑na, nianna delo tisaba rise'ele isá rilhapile tisa len Tata Do Yebáha! De nu ruinleha nna lebi'i ralhabale dhírule elha disa tsitsi.]
MAT 23:15 ’¡Lebi'i ka nu rule'enle ka benne nu ra lo bia bennabi bodha'an Moisés‑ni lhe lebi'i ka fariseo lhe, delo tisaba ruinle deki ankale benne tse! ¡Gwalíchiru lele, kumu doelha tsitsiba ruinle kini riri'a lenle raxile kwadiba ttu benne ki tsia lebie tti ria lele! Nianna ganna chi biri'a lenle uxile benneha, la'ania nna lebi'i ruinle kini raka benneha nu ruin satsaru. De nuha nna adírula elha disa tsitsi ralha benneha dhie lo giha attichula lebi'i.
MAT 23:16 ’¡Aalexa nu lo xua! Gwealaba rinerule lo adí ka benne. Gwalíchiru lele rale: “Tti innári'i uinri'i ttu bixa, meskiba udettiri'i yotu‑na, labí teeki daa lori'i uinri'i nu chi rari'iha, ttaka ganna chi bedettiri'i ka oru sia lhe'e yotu‑na, la'anialigaba nna teeki uinri'i nu chi rari'iha.”
MAT 23:17 ¡Aalexa nu lo xua lhe nu akaa elha rieni ikini lhe! ¿Si lagwa gwa yule deki yotu‑nala dakaru attichula ka oru sia lhe'en‑na? Kumu yotu‑nala nuná ruinna kini ka oru sia lhe'en‑na rakakana le'a.
MAT 23:18 Anágaba lhe, rágabale: “Ganna udettiri'i bekú daa ro'o yotu‑na, la'ania nna labí teeki daa lori'i uinri'i nu chi rari'iha. Ttaka ganna udettiri'i úna sia lo bekú‑na, la'anialigaba nna teeki uinri'i nu chi rari'iha.”
MAT 23:19 ¡Aalexa nu lo xua! ¿Si lagwa gwa yule deki bekú‑nala nuná dakaru attichula úna sia loin‑na? Kumu bekú‑nala nuná ruinna kini úna sia loin‑na rakana le'a.
MAT 23:20 Laxkala benne rudettie bekú‑na tti ree unie ttu bixa, alaa sunruga bekú‑na nuná rudettie, iyágaba úna sia loin‑na nuná rudettie.
MAT 23:21 Nna benne rudettie yotu‑na tti ree unie ttu bixa, laa sunruga yotu‑na nuná rudettie, iyágaba benne do lhe'e yotu‑na nuná rudettie, delába Tata Do Yebáha.
MAT 23:22 Nna benne rudettie yebáha tti ree deki unie ttu bixa, iyágaba xxila ata rido Tata Do Yebáha nuha rudettie lhe rudettigabe Tata Do Yebáha lhe, kumu lee nuha ridoe lo xxilaha.
MAT 23:23 ’Lebi'i ka nu rule'enle ka benne nu ra lo bia bennabi bodha'an Tata Do Yebáha len Moisés‑ni lhe lebi'i ka fariseo lhe, delo tisaba ruinle deki ankale benne tse. ¡Gwalíchiru lele, kumu ruinle doelha rutele len Tata Do Yebáha ttu tsii (10) por ciento ge ka kuana rexú gele, ttibanka rutele ttu latti ge ka gwadhi bela lhe ge ka comino lhe ge ka anís lhe! Ttaka rixulhabinle ge nu ra lo bia bennabi bodha'an Moisés‑ni, nu rakarula doelha udole tisa geni, delába akale benne ratua lasi lhe uinle latsiru attiba ankaba geni, lhe anágaba udole tisa ge Tata Do Yebáha lhe. Nunonna nu rakaru doelha uinle nna bittugaba udhanle a utele nu rutele‑na.
MAT 23:24 ¡Aalexa nu lo xua! Gwealaba rinerule lo adí ka benne. Lebi'i doelhaba ruinle kini rudole tisa ge nu ra ka tisa dia lo bia bennabi‑na, meskiba ankana ttu tisa chika'a to, ttaka nna rixulhabinle udole tisa ge nu rakaru doelha. Ruinbale attiba runi ttu nu ruyú tsitsibana kini abittu gabina ttu be'eya to nna labí rite denna tti rabina ttu camellu.
MAT 23:25 ’Lebi'i ka nu rule'enle ka benne nu ra lo bia bennabi bodha'an Moisés‑ni lhe lebi'i ka fariseo lhe, delo tisaba ruinle deki ankale benne tse. ¡Gwalíchiru lele, kumu lebi'i ankabale attiba ka xiga lhe ka ye'ena rixuinle‑na! Ka nuná rigí xúbale latikani, ttaka lhi'u lhe'ekani nna tsiga ya'aba anka. Aníha‑ba nuná ankale. Lo liaruba nuná nari xúba rule'ele, ttaka lhi'u lhe'e lastole nna saa tíba nu satsa ruinle lhe nu rilanale ge ka benne lhe.
MAT 23:26 ¡Fariseo lo xua! Gwalocharixa lhi'u lhe'e xiga‑na lhe lhe'e ye'ena‑na lhe, kini anáchu nna eyarigaba latikani.
MAT 23:27 ’¡Lebi'i ka nu rule'enle ka benne nu ra lo bia bennabi bodha'an Moisés‑ni lhe lebi'i ka fariseo lhe, delo tisaba ruinle deki ankale benne tse! ¡Gwalíchiru lele, kumu lebi'i ankale ttiba ttu baa, yalhá lhe'e rula'a lo lia! Ttaka lhi'u lhe'eni nna saa tíba sitta ge ka nu yattiha lhe iyába nu yusu lhe.
MAT 23:28 Anágaba lebi'i, lo liaruba nuná rule'ele deki ankale benne ruin tse, ttaka lhi'u lhe'e lastole nna saa tíba nu satsa ruinle lhe delo tisaba ruinle deki ankale benne tse lhe.
MAT 23:29 ’Lebi'i ka nu rule'enle ka benne nu ra lo bia bennabi bodha'an Moisés‑ni lhe lebi'i ka fariseo lhe, delo tisaba ruinle deki ankale benne tse. ¡Gwalíchiru lele, kumu rusiale ka baa ge ka profeta betti ka benneola geleha lhe ruingabale latsiru ka yo'o to kini rusiale iki ka baa ge ka benne benke nu dika ixú!
MAT 23:30 Nianna tti rise'ele, rale: “Ganna ttixka ri'itu chi se'etu tti use'e ka benneola geri'iha, la'ania nna labí tulapa ugíatu ka benneha bettitu ka profetaha ganna ttixka.”
MAT 23:31 Ukare'aba nu chi rale‑na chi runna liina deki gwalíba datiale ka benneola bettikana ka profetaha.
MAT 23:32 ¡De nuha nna tsa ttela gwalulhuxa loo nu udulo ka benneola geleha benke!
MAT 23:33 ’¡Aalexa nu ruin satsa! Lebi'i ankale ttiba ka belha‑na. ¿Gasina uinle ki lhaale kini abittu tsiale lo giha?
MAT 23:34 Laxkala gwaludo nagale, neti idhelhaa ka profetaha ata se'ele‑na lhe idhelhaa ka benne yuu lhe ka benne ula'akanie le lhe. Ttaka lebi'i nna utálale ttu chupa ka benneha lo ya kurusi kini gattike, adíke nna gayalale ke lhe'e ka yo'o ata rudhetiri'i ka tisa ge Tata Do Yebáha, lhe anágaba kua suba lhe'e iyába ka yiesi‑na sanalhale ke nna urio lále ke.
MAT 23:35 Laxkala kwe'ebale tsia reni ge iyába ka benne abittu bixa benke nna kwentaba bettikana ke yiesi lo yu‑ni. Dhulo tsia kwe'ele reni ge Abel benne benie nu dika ixú arlo Tata Do Yebáha nna axtaba reni ge Zacarías xi'in Berequías, delába Zacarías benne bettile ata daa bekú lali'a ro'o yotuha.
MAT 23:36 Netiru ria, iyá nuní tsiana kwe'e ka benne se'e nnanna.
MAT 23:37 ’¡Eru geni xa benne ge Jerusalén! Lebi'i ruttile ka profeta lhe rusiale íyya ka benne ridhelha Tata Do Yebáha lhe'esi gele‑ni kini rigixxi'ake ka tisa geeha. Ixe lidú benia ottupaa le ttiba runi beraha rottupana ka xi'inniha regu'u lhe'e xxilani kana, ttaka lebi'i nna labí uka lele.
MAT 23:38 Gwaluyúruga, lhe'esi gele‑ni a suna ttúbana eya'anna, lanúru benne tse'e lhe'eni.
MAT 23:39 Neti xpeya le, debá nnanna labíru ilenle neti axtaliba ganna chi isia sá tti innále: “¡Karubárulu dedálu kwenta ge Tata Xisiha!” La'anialiba tti elenle neti attu libe.
MAT 24:1 Jesús‑ni chiba berie ro'o yotuha deyye. Nianna tti ubiga ka benne rudhetinieha bele'ekanie bie adíru ka yo'o sia ata do yotuha.
MAT 24:2 Lee nna ree ka benneha: ―¿Si gwa rilenle iyá nuní? Netiru ria: isia sá tse'e looba ka nuní. Ganna chi bise'e lookanaha, la'ania niruba ttú ka íyya kua nii a eya'anna iki luesikani.
MAT 24:3 Tti chi bisin Jesús‑ni iki i'iya ata daa ka ya olivuha, niha‑ba udoe, nianna tti ubiga ka benne rudhetinieha nna suna labe, ráke: ―Utixxi'en ri'itu, ¿nuka aka nu ralu‑na? Lhe, ¿bí aka ki unna liina deki chi dabiga esialu lhe deki chi dabigana lhuxa yiesi lo yu‑ni lhe?
MAT 24:4 Jesús‑ni nna bekabie ge ka benneha, ree: ―Gwaluyú gele, bittu tsia lele ge ka nu ruin lekani,
MAT 24:5 kumu ixe ka nu isia uinkana attisidiba netiba nuha ankakana, nianna tti innákana: “Neti ankaa Cristu.” La'ania nna ixeba ka benne dhi yiekana.
MAT 24:6 Lebi'i unagabale deki chi yu'u ka yiesi ritilha len luesikani lhe daa tisa deki ruin ka yiesi itilha len luesikani lhe, ttaka lebi'i bittu gasinle, kumu teeki aka aníha. Ttaka labí chi bisia ura lhuxa yiesi lo yu‑ni la'ania.
MAT 24:7 Kumu ka yiesi elha‑na dhulokana ebi'i noo luesikani itilhakana, lhe anágaba ka nu rinnabia‑na ebi'i noogaba luesi ka nuná. Ga'agaba [isagwe ge ka benne] lhe ga'agaba ubina, lhe anágaba yiesi lo yu‑ni gattigabinna ixú.
MAT 24:8 Tti chi aka iyá nuha, la'aniaruba nuha si dhulo uyú ka benne elha disa.
MAT 24:9 ’La'ania nuha utekana le lasi ná ka nu gayakana le lhe uttikana le lhe, nna iyá xeaba ka benne labí aka uyúkana le de ria lele neti.
MAT 24:10 La'aniagaba nuha ixeba ka nu chi ria lekani neti udhankana abitturu tsia lekani neti lhe la labakana ukinni luesikani lhe abitturu aka uyú luesikani lhe.
MAT 24:11 Ixegaba ka nu labí gwalí ankakana profeta ge Tata Do Yebáha tsekikana la'ania, nna ixeba ka benne dhi yiekana kini tsia leke ge gwen lasi innekanaha.
MAT 24:12 Kumu de tsani xxatta nu satsa raka yiesi lo yu‑ni la'ania, de nuha nna ixeba ka benne udhanke labíru akin ge luesike.
MAT 24:13 Ttaka benne dhaabie dhu tsitsie lo neda ge Tata Do Yebáha, benneha nna godilába Tata Do Yebáha bie ganna chi ute iyá nu akaha
MAT 24:14 nna ka tisa tseha, delába ka tisa rigixxi'a gasina innabia Tata Do Yebáha ka benne, teeki chadhi ka nuha itúba yiesi lo yu‑ni kini una iyá xea ka benne. Iki de nuha‑liba nna tti lhuxa yiesi lo yu‑ni.
MAT 24:15 Nu ulabana nu dia lo yetsi‑ni, teeki utte dana bixa diani nu ra Jesús‑ni, tti ree: ―Tti ilenle lhe'e yotuha aka ttu nu tuttíruga anka satsa, delába ge nu satsa utixxi'a profeta Daniel‑ni,
MAT 24:16 la'ania nna ka benne se'e daka Judea‑ni teeki uxunnike tsapike iki ka i'iya sia niha.
MAT 24:17 Benne doe iki yo'o geeha nna abittu eyadie saleabie nu se'e lhe'e yo'oha kini ichebie na.
MAT 24:18 Benne dia lhe'exxiha nna bittu eyye lhe'e yo'o geeha saxíe jabana geeha.
MAT 24:19 ¡Gwalíchiru le ka benne nuila ata nuja xi'inke la'ania lhe denke ka nuto rasi lhe!
MAT 24:20 De nuha nna gwalinnaba len Tata Do Yebáha, kini tti uxunnile lo elha disa sateleha, abittu satele nuha tti raka idilhaha lhe tti anka sá reyaka leri'iha lhe,
MAT 24:21 kumu ttu elha disa tsitsi nuha uyú ka benne la'ania, ttu elha disa nu labí chi uka itú ure yiesi lo yu‑ni axtaliba la'ania aka nuha. Anágaba lhe labíru aka nuha nu si daa.
MAT 24:22 Ganna ttixka abíba odatsi Tata Do Yebáha ka sáha, la'ania nna ni ttu benne labí lhaabie, iyábake gattike. Ttaka de ka benne chi bekwebie kini akake geeha, de ka benneha‑ruba nna godatsie ka sáha.
MAT 24:23 Ganna nuxa gana le la'ania: “Gwalulanniruga, ne benne anka Cristuha du nii”, o si innána: “Gwalugíaruga, ne bie du naa”, abittu tsia lele ge nu inná aníha.
MAT 24:24 Kumu la'ania isia ka nu labí gwalí ankakana Cristu lhe isia ka nu labí gwalí ankakana profeta ge Tata Do Yebáha nna uinkana ka milagru lhe uinkana ttu bixa nu dika ebanani ka benne ge nu uinkanaha. Uinkana nuha ki dhi yiekana ka benne. Gaxa axtala ka benne chi bekwe Tata Do Yebáha ki akake gebie, axtala ka benneha uinkana dhi yiekana ke ki tsia leke gekani.
MAT 24:25 Nnannali chi rigixxi'ania le ge nu aka la'ania.
MAT 24:26 Laxkala ganna gákana le: “Gwaltsáruga gwalulanni, ne Cristuha du lo yu bisiha”, lebi'i nna bittu iriale tsiale. O, si ganna innákana: “Gwaltáruga gwalulanni, ne bie do lhe'e yo'oha”, bittu tsia lele gekani.
MAT 24:27 Kumu attiba edha‑na tti ridú liina daka ata riria ubisa‑na, rilá saaba xiani geni axtaba ata radi ubisa‑na, aníha‑ba ilá saaba ganna chi esiaya, neti benne daya yebáha.
MAT 24:28 Attiba ruin ka chettu‑na tti rilákinna ata tee nu nimala yatti, niha ritupakana. Aníha‑gaba ilenle ganna chi esiaya.
MAT 24:29 ’Iki de chi ute ka sá tti uyú ka benne elha disaha, la'ania nna echulha tteba lo tatubisa‑na. Nanto beo‑na nna labíru xiani ku'u benne‑na. Ka beli sia gwetsáha nna iginnibakana lo yu lhe adíru ka nu ra xxeni lekani sia gwetsáha igubigabakana.
MAT 24:30 Yebáha aka ttu bixa nu unna liina deki neti benne daya yebáha, neti nuha chi dedáya. La'ania nna iyá xeaba ka benne se'e yiesi lo yu‑ni elenkanie tti ilákanie dedáya yebáha lhe'e bea, ra tsitsi lasia lhe raka lhalhaba xiani kia lhe.
MAT 24:31 Nianna tti kwesi trompetaha idisa, neti nna idhelha ttebaa ka anjeli kiaha itú tte yiesi lo yu‑ni, desdeba ata ridulo yebáha nna axtaliba ata riluxunaha. Idhelhaa ke kini tsiake ottupake ka benne chi bekwe Tata Do Yebáha.
MAT 24:32 ’Gwalutte dáruga ge ya higuha. Nuha ganna chi renettu ka lo náni lhe reria ka lhaga geni lhe, la'ania nna chiba yule deki chiba dabiga eta'a iyya.
MAT 24:33 Anágaba lebi'i, ganna chi ilenle aka iyá nu chi ria‑ni, la'ania nna chiba yule deki chi tteba dabiga esiaya.
MAT 24:34 Netiru ria, labí chi utti ka benne se'e nnanna tti aka iyá nuní.
MAT 24:35 Yebáha lhe yiesi lo yu‑ni tse'e loobakana, ttaka ka tisa chi ria‑ni tee kiba aka nu ra ka benne‑ni.
MAT 24:36 ’Ttaka la sá lhe la ura aka nuha, lanú nu yuna, ni ka anjeli ge Tata Do Yebáha yuke lhe nigaba neti benne ankaa Xi'inieha abittu yua, sunruba Tataha yue.
MAT 24:37 ’Akaba attiba uka tti udo Noé‑ni, aníha‑gaba aka ganna chi esiaya, neti benne daya yebáha.
MAT 24:38 Kumu atti lanila isá yiesi lo yu‑ni inda, ka benne use'e la'ania, utobake lhe u'uyabake, lhe anágaba nna betságaba náke lhe beketigabake ka xi'inkeha lhe. Aníha‑ba benke axtaliba tti bisia sá tti uta'a Noé‑ni lhe'e barcuha.
MAT 24:39 Labí ute dákanie bixa nuha aka axtaliba tti chi rilákanie risá indaha, nianna iyábake uchena. Aníha‑gaba nuha aka ganna chi besiaya, neti benne daya yebáha.
MAT 24:40 La'ania ata se'e chupa ka nubiyú lhe'exxiha, ttúna echea na nna, attuna nna odha'anbaa na.
MAT 24:41 Ata yu'u chupa ka nuila gwettu, ttúna echea na nna, attuna nna odha'anbaa na.
MAT 24:42 ’De nuha nna lebi'i gwaltse'e ubeda, kumu labí yule bixa sá esiaya, neti benne ankaa Xxanaleha.
MAT 24:43 Ttaka lebi'i gwalúnaruga, ganna ttixka xxana ttu yo'o yuna bí ura lo rela isin ubanaha tachadina yo'o geniha, la'ania nna dho tennálana ki uyúna yo'o geniha kini abittu ugwelhana ubanaha ga'ana lhanana.
MAT 24:44 Laxkala, anágaba lebi'i, gwaltse'e ubeda, kumu neti benne daya yebáha esiaya attila abí ribedale neti.
MAT 24:45 ’¿Laaba ganna nu rudo tsitsina tisa ge xxananiha lhe ruinna attiba ankaba geni lhe, laaba ganna lana nuha rodha'an xxananiha na kini uyúna adí ka nu riben sina lisiniha ki ugona ka nuha ura geni?
MAT 24:46 ¡Karubáru nu ren sinaha, ganna chi besia xxananiha nna etexxakana na gwa ruinbana sina nu daa loni uinnaha!
MAT 24:47 Netiru ria: xxananiha odha'anbana lasi náni kini uyúna iyá nu se'e geniha.
MAT 24:48 Ttaka ganna nu ren sinaha satsaba re leni, nianna tti ulaba lhi'u leni, akinna: “Risába xxana sina‑ni; nu nuha resia”,
MAT 24:49 nianna dhulo ttebana gayana adí ka nu riben sinaha nna tti dhona gona lhe i'iyana len ka nu dusi.
MAT 24:50 Ttaka la sá attila abittu ribedana lhe la ura attila abí rakinna deki esia xxananiha, la'aniala nna iyyaba leni esia nuha.
MAT 24:51 Nianna tti ugwena na ttu elha disa tsitsi nna tti kweana na udelhana na ata se'e ka nu labí liikinna delo tisaba ruinkana ttu bixa. Niha kwesina lhe goniba lo layani lhe.
MAT 25:1 ’Tata Do Yebáha tti rinnabie ka benne, elha rinnabia geeha raxxína na len nu gwate tsii ka nuila ribani biriakana denkana ka kinke ge seti nna gwaledakana nubiyú utsá nániha.
MAT 25:2 Gayu ka nuilaha ankakana ka nu se'e xulha nna a gayukana nna ankakana ka nu gwa se'e dhina.
MAT 25:3 Ka nu se'e xulhaha nna gwa denbakana ka kinke gekaniha, ttaka labí seti denkana kini ega'akana ge ka nuha.
MAT 25:4 Ka nu se'e dhinaha nna gwa nujaba ka nuha bega ta'a seti lhe chegabakana ka kinke gekaniha lhe.
MAT 25:5 Ttaka kumu risába nubiyú utsá nániha anúna risina, aníoka nna bedaxxuba bisielaha iyába ka nuilaha nna bixuinba lekani.
MAT 25:6 Tti chi ugwena riluelaha nna biyien tsi'i ttu benne uresi'e, ree: “¡Ne nubiyú utsá nániha chi daha! ¡Gwaliria nna gwatatsá na!”
MAT 25:7 Nianna iyába ka nuila ribaniha bebenkana nna bose'e tse ttebakana ka kinke gekaniha.
MAT 25:8 Ka nu se'e xulhaha nna rákana ka nu se'e dhinaha: “Gwalute latti seti gele‑na ki ega'atu lhe'e ka kinke getu‑ni kini reyolaba ka nuní.”
MAT 25:9 Ka nu se'e dhinaha nna rákana: “Labí ute ri'itu, gasi ni kina ebisi seti getu‑ni, la'ania nna iyasagaba getu lhe iyasagaba gele lhe. Tserula gwaltsia ata rito'o seti gwatayo'o gele.”
MAT 25:10 Ttaka laka dia ka nuha ugo'o setiha nna bisin nubiyú utsá nániha. Ka nuila se'e dhinaha nna uta'aba lenkana nubiyú utsá nániha lo dha'aha, nianna beto tteba yo'oha.
MAT 25:11 Deloliba nna tti besin adí ka nuila ribaniha nna rinnekana ro'o yo'oha, rákana: “¡Tata xisi to, udhalichi kini ga'atu!”
MAT 25:12 Ttaka nubiyúha nna bekabina, rana kana: “Labí idhalia gele kumu labí ankabiati le.”
MAT 25:13 Nianna tti ra Jesús‑ni: ―Laxkala lebi'i gwaltse'e ubeda, kumu labí yule bittiga ura lhe bittiga sá esiaya, neti benne daya yebáha.
MAT 25:14 ’Tata Do Yebáha tti rinnabie, elha rinnabia geeha raxxína na len nu ben ttu nubiyú biriana diana idittu. Nianna tti uxina ka nu ren sina geniha nna bodha'anna len ka nuha belhiu nu tee geniha.
MAT 25:15 Ttu ka nuha begwena na gayu mili, attuna nna chupa mili, nu beyonnaha nna begwena na ttu mili. Kua ttu ttubakana begwena kana attiba bedhaka leni dhaakana udhákana belhiu geniha. Nianna tti biriana diana.
MAT 25:16 Nu uxí gayu miliha nna ugweki ttebana gwerixxi len belhuha nna gwa bedienbana iki nuha a gayu mili.
MAT 25:17 Aníha‑gaba ben nu uxí chupa miliha, gwa bediengabana a chupa mili iki nuha.
MAT 25:18 Ttaka nu uxí ttu miliha nna ugíalana gwache'enna lhi'u yu nna bekatsilana belhiu ge xxananiha.
MAT 25:19 ’Isáliba uka nna tti beyeki xxanakaniha besinna. Nianna uxina kana kini kixxi'akana ttixa dia rani belhuha.
MAT 25:20 Nu uxí gayu miliha nna besia lenna a gayu mili, nianna rana: “Tata xisi to, gayu mili nuha bete kwinalu len neti. Biyúruga, ne a gayu mili tee nii chi bedienia iki nuní.”
MAT 25:21 Xxananiha nna bekabina, rana na: “Tseba anka nu benlu. Lu ankalu ttu benne ruin tse sina lhe ttu benne rudo tsitsiba tisa lhe. Kumu ttu latti belhiu betea len luha, gwa biyú tsitsibalu na, nnanna nna uxxenrula lasia lu kini udhálu ixeniru belhiu. De nuha nna utá len neti kini tse'e ittari'i.”
MAT 25:22 Bisingaba nu uxína chupa miliha nna rana: “Tata xisi to, kwinalu betelu chupa mili len neti. Nnanna nna, ne a chupa mili tee nii chi bedienia iki nuní.”
MAT 25:23 Xxananiha nna bekabina, rana na: “Tseba anka nu benlu. Lu ankalu ttu benne ruin tse sina lhe ttu benne rudo tsitsiba tisa lhe. Kumu ttu latti belhiu betea len luha, gwa biyú tsitsibalu na, nnanna nna uxxenrula lasia lu udhálu ixeniru belhiu. De nuha nna utá len neti kini tse'e ittari'i.”
MAT 25:24 Ttaka tti bisin nu uxí ttu miliha, nianna rana xxananiha: “Tata xisi to, neti yubaa deki lu ankalu ttu benne labí ratua lelu, kumu lu relapalu ata labí ulu'ulu lhe redílu ata labí bedelhalu lhe.
MAT 25:25 De nuha nna usibati lu nna ugíalaa gwakatsia belhiu gelu‑ni lhi'u yu. Nnanna nna ne belhiu geluha tee nii.”
MAT 25:26 Xxananiha nna bekabina geni, rana na: “¡Aaluxa nu ren sina re satsa leni lhe nu lea lhe! Ki ganna gwa yúbalu deki neti relapaa ata labí ulu'a lhe redía ata labí bedelhaa lhe,
MAT 25:27 ¿beakala nna a gwattixxabalu belhiu kia‑ni lhe'e banku kini nnanna besiaya nna edía belhiu‑na itupa len xi'inni?”
MAT 25:28 Nianna tti rana ka nu se'e niha: “Gwalegua belhiu‑na lo ná nuní nna gwalute belhiu‑na len nu chi den tsii mili‑na.
MAT 25:29 Kumu benne gwa ruyú tsitsie nu ridíeha, dhi chiettirula benneha nna exxa tamarula gebie nna nu abittu ruyú tsitsina nu ridínaha, nuha axtala nu ttu latti chi tee geniha etua.
MAT 25:30 Nubiyú du nii nu abittu gwakana uinna sina‑ni, gwalikwea na nna gwaludelha na ata anka chulhaha. Niha kwesina lhe goniba lo layani lhe.”
MAT 25:31 ’Atti esiaya neti benne daya yebáha, dedáya lhe'e xiani kiaha lenia ka anjeli ge Tata Do Yebáha, nianna tti dhoa lo xxila nu raka lhalha ata innabiayaha.
MAT 25:32 La'ania nna iyá xeaba ka benne se'e yiesi lo yu‑ni etupake arloa. Neti nna ebesia lhe'e luesike attiba runi nu reki lo ka neruha rebesina ka chivaha lhe'e ka neruha.
MAT 25:33 Use'a ka benne ruin tseha daka ná bania nna ka nu ruin satsaha nna use'a kana daka ná yattia.
MAT 25:34 La'ania nna neti benne ankaa nu rinnabiaha, upeya ka benne se'e daka ná baniha: “Lebi'i chiba uka len Tata kiaha le. Gwaltáxxi kini dhile nu tse chi ga'ananie dhi ka benne rinnabie; delába nu chi ga'ananie dhile attili lani kwe yiesi lo yu‑niha.
MAT 25:35 Kumu neti tti bituniaha, lebi'i nna gwa betebale nu utoa nna tti bebisia indaha, lebi'i nna gwa betebale inda u'uyaa nna tti rekia ankaa attiba ttu benne dittu, lebi'i nna gwa beyaxibale neti lisile.
MAT 25:36 Anágaba tti biyasati xoa, lebi'i nna gwa betebale nu bikua nna tti úniaha, lebi'i nna gwa biyúbale neti. Anágaba tti uttaa lisiyyaha, lebi'i nna gwa bitabale betegíale neti.”
MAT 25:37 Ka benne ruin tseha nna ekabike kia, innáke: “Tata Xisi to, ¿nuka bilentu lu rituinlu nna gwa bennabatu nu utolu lhe nuka bilentu lu rebisilu inda nna gwa betebatu inda u'uyalu?
MAT 25:38 Lhe anágaba, ¿nuka bilentu lu rekilu attiba ttu benne dittu nna gwa beyaxibatu lu lisitu? Lhe ¿nuka biyasinlu xolu nna gwa betebatu nu bikulu?
MAT 25:39 Anágaba lhe ¿nuka bilentu lu ranilu o telu lisiyya nna gwa bitabatu betegíatu lu?”
MAT 25:40 Neti benne ankaa nu rinnabiaha nna ekabia geke, upeya ke: “Netiru ria, atti bete nále len ttu ka betsi to geri'i, ka benne labí ra xxeni leke, attisidiba len netiba nuha bete nále.”
MAT 25:41 Nianna tti upeya ka nu se'e daka ná yattiha: “¡Lebi'i ka nu ralhale urixxi ukinni Tata Do Yebáha, gwalibietta kwe'a nna gwaltsia lo gi nu satíaba rite loniha, delába gi nu chi re tse kini tsia nu xxegwiha loni itupa lenna ka anjeli geniha!
MAT 25:42 Kumu neti tti bituniaha, lebi'i nna labí betele nu goa nna tti bebisia indaha, lebi'i nna labí betele inda i'iyaa.
MAT 25:43 Anágaba tti rekia ankaa attiba ttu benne dittu, lebi'i nna labí betele ata eya'anaa nna tti biyasati xoa, lebi'i nna labí betele nu ukua. Anágaba tti úniaha lhe tti uttaa lisiyyaha lhe, lebi'i nna labí betegíale neti.”
MAT 25:44 La'ania nna ekabikana kia, innákana: “Tata Xisi to, ¿nuka bilentu lu rituinlu lhe rebisilu inda lhe? ¿Nuka bilentu lu rekilu attiba ttu benne dittu o si rekilu riyasinlu xolu? Lhe anágaba, ¿nuka bilentu lu ranilu o telu lisiyya, ri'itu nna a bete nátu len kwinalu?”
MAT 25:45 La'ania nna ekabia gekani, upeya kana: “Netiru ria: tti abittu bete nále len ttu ka betsi to geri'i‑ni, ka benne abittu ra xxeni leke, len neti nuha abittu bete nále.”
MAT 25:46 Nianna tti ra Jesús‑ni: ―Luesi ka nu ruin satsa‑ni, tsiaba ka nuní ata uyúkana elha disa ttu dia liiha; ka nu ruin tseha nna eyyabakana ata aka benkana ttu dia liiha.
MAT 26:1 Atti chi uluxani Jesús‑ni unnebie iyá nu reeha, nianna tti ree ka benne rudhetinieha:
MAT 26:2 ―Lebi'i gwa yúbale, a chupa ubisaba nuní riyasa kini isia laní Pascua. La'ania neti benne daya yebáha, utekana neti lasi ná ka nu utákana neti lo ya kurusiha.
MAT 26:3 Ka nu loni ge ka bixxudiha lhe [ka nu rule'ekinna ka benne nu ra lo bia bennabi bodha'an Moisés‑ni] lhe anágaba ka benneola ge ka nu Israel‑ni bitupakana lali'a ge yo'o ata do Caifás nu anka bixxudi xeniha,
MAT 26:4 bitupakana nna botsi'inu lekani gasina udaxxukana Jesús‑ni nna uttikane.
MAT 26:5 Ttaka ra luesikani: ―Bittu uinri'i nuha tti raka laníha kini ka utsatsari'i ka benne.
MAT 26:6 Jesús‑ni doe lhe'esi Betania lhe'e lisi Simón nu uka latini yiesu nu tee láni lepra.
MAT 26:7 Nianna tti bisin ttu nuila denna ttu re'e to ankana ge íyya ragalha. Íyya ragalhaha tee láni alabastro. Lhe'e re'e toha ta'a seti nu rure ixixxi. Setiha daka xxattana. Nianna bedo ttatta nuilaha setiha iki Jesús‑ni tti doe go yettaha.
MAT 26:8 Tti bilani ka benne rudhetini Jesús‑ni nu ben nuilaha, nianna bisa'akanie nna ráke: ―¿Beaka kwentaba bedelha lattina seti‑na?
MAT 26:9 A betto'ochilana nuná yaxi; belhuha nna betena nuha len ka benne dii abittu geke tee.
MAT 26:10 Ttaka Jesús‑ni yube nu ra ka benneha, nianna tti ree ke: ―¿Beaka rinnele ge nuila‑ni? Nuní chi benna ttu nu tse len neti.
MAT 26:11 Kumu ka benne dii abittu geke tee satíaba tse'e ka benne‑na len lebi'i, neti nna labí satía dhoa len lebi'i.
MAT 26:12 Nuila‑ni begadina seti‑ni ikia. Benna kini odú tsena neti ki igatsia ganna chi uttiaha.
MAT 26:13 Netiru ria: Itúba yiesi lo yu‑ni gaxaba lhe'e ka yiesi ata kixxi'a ka benne ka tisa kia‑ni, kixxi'agabake ge nuila‑ni. Aníha ki sadú le ka benne ge nu benna‑ni.
MAT 26:14 Ttu ka benne tsi'inu (12) rudhetini Jesús‑ni nu tee láni Judas Iscariote, ugíana ata se'e ka nu loni ge ka bixxudiha
MAT 26:15 nna rana ka nuha: ―¿Tti kixale neti ki utea Jesús‑ni lasi nále? Ka nuha nna rákana na: ―Utetu rerua (30) belhiu plata lenlu.
MAT 26:16 Debá la'ania nna udulo Judas‑ni regila leni gasina utene lasi ná ka nu uttikaneha.
MAT 26:17 Sá neru ge laní Pascua tti ro ka benne Israel‑ni yettaxtila nu abittu kua dii dia ikiniha, la'ania ubiga ka benne rudhetini Jesús‑ni ata dueha nna ráke bie: ―¿Gá raka lelu sentu irse kini gori'i laní Pascua‑ni?
MAT 26:18 Lee nna ree ka benneha: ―Gwaltsia lhe'e yiesi‑na nna gwaligá ttu benne biyú do naa: “Aní ra maestruha: Chiba dabiga isia ura kia. Lhe'e lisilu‑ni raka lasia goa irse ge laní Pascua len ka benne rudhetinia‑ni.”
MAT 26:19 Aníha uka nna ka benne rudhetinieha benbake atti tteba raba Jesús‑ni, ugíabake gwenke irse ge laní Pascuaha.
MAT 26:20 Tti chi ulha sáha nna bebiga Jesús‑ni ro'o mexaha len ka benne tsi'inu (12) rudhetinieha.
MAT 26:21 Laka yu'uke go irseha nna ree ka benneha: ―Netiru ria, nuxa ttúle nuní utele neti lasi ná ka nu uttikana neti.
MAT 26:22 Ka benneha nna yalhá bedú si'i xxattana leke tti biyienkanie nu reeha, nianna tti uduloke ttu ttubake unnaba tisake bie, ráke: ―¿Si bittuba neti nuná xa tata?
MAT 26:23 Lee nna bekabie, ree ke: ―Nu ugutuna len neti lhe'e ttúba ye'ena‑ni, lana nuha utena neti lasi ná ka nuha.
MAT 26:24 Neti benne daya yebáha eya'abaa attiba chi ga'anna lo ka yetsi ge Tata Do Yebáha. Ttaka nna, ¡gwalíchiru le nu utena neti lasi ná ka nu uttikana neti! Tserula saríana na ganna abittu ulina, a laa kila ulina.
MAT 26:25 Nianna ra Judas nu utene lasi ná ka nuha: ―¿Si bittuba netiba nuná xa maestru? Lee nna bekabie ree na: ―Luba chi raxa.
MAT 26:26 Laka yu'uke goha nna tti bedaxxu Jesús‑ni yettaxtilaha nna begwebie Tata Do Yebáha ixkixaru. Nianna tti ulha'abie lhe'e benneha nna begwebie ka benne rudhetinieha nna ree ke: ―Gwaludaxxu nna gwaligo. Benne‑ni anke bela latia.
MAT 26:27 Iki de nuha nna tti bedaxxue xiga ta'a vinuha nna begwebie ixkixaru Tata Do Yebáha, nianna tti begwebie ka benneha nna ree ke: ―Gwali'iya iyále nuní,
MAT 26:28 kumu nuní ankana reni kia. Reni kia‑ni rugwena lidhaka tisa chi bodha'an Tata Do Yebáha len ka benne. Reni‑ni ilalina kini ixe ka benne ixú elha xen lasi ge ka tulha ruinke.
MAT 26:29 Neti ria le: debá nnanna labíru i'iyaa vinu‑ni, gannaliba chi bisia sá i'iyaa vinu kubi len lebi'i ata rinnabia Tata kiaha.
MAT 26:30 Iki de chi bilhake ttu le'a to, nianna tti biriake diake iki i'iya ata daa ka ya olivuha.
MAT 26:31 Tti chi se'eke iki i'iyaha, nianna ra Jesús‑ni ka benne rudhetinieha: ―Nnolha iyábale isatsale udhá ikile neti. Akaba attiba chi unne Tata Do Yebáha lo ka yetsi geeha, tti ree: “Neti uttibaa nu reki lo ka neruha nna ka neruha nna isatsa ttebakana.”
MAT 26:32 Rágaba Jesús‑ni: ―Ttaka iki de chi beyaka bania lo elhuttiha, la'ania nna eya'a gaaya enerua lole esinaa daka Galilea‑ni, delola nna esiale.
MAT 26:33 Pedro‑ni nna rane: ―Meskiba adí ka nuní udhá ikikani lu, neti labí udhá ikia lu.
MAT 26:34 Lee nna ree Pedro‑ni: ―Netiru ria: nnolha atti lanila kwesi chinkaha, lu tsunna libela chi bedhea lelu a ridí ro'olu deki ankabienlu neti.
MAT 26:35 Pedro‑ni nna rana Jesús‑ni: ―Neti meskila gattia lenlu, labí innía deki labí ankabiati lu. Aníha‑gaba ra adí ka benne rudhetinieha.
MAT 26:36 Nianna tti dia Jesús‑ni len ka benne rudhetinieha ttu latti ata tee láni Getsemaní, nianna ree ke: ―Nii gwaltse'e, laka neti tsiaya innea len Tata Do Yebáha.
MAT 26:37 Nianna chebie Pedro‑ni lhe a chupa ka xi'in biyú Zebedeo‑ni nna tti uduloe bedú si'ina lebie lhe bedú xxattane lhe.
MAT 26:38 Nianna tti ree kana: ―Neti yalhá si'i du lasia. Gwanalu chiba gattia rakati. Nii gwaltse'e nna gwaltse'e tenná len neti, bittu ga'adhile.
MAT 26:39 Nianna tti biru'une a latti daka aná nna tti bettudhi loe lo yu nna unnebie len Tata Do Yebáha, ree: ―Tata to kia, nu diru innálu benchi kini abittu uyúa elha disa satea‑ni. Ttaka labí nu innía aka, sinuki nu innába kwinalu aka.
MAT 26:40 Nianna tti beyekie ata se'e ka benne tsunna rudhetinieha nna gwaxxake ka benneha te'adhilake. Nianna tti ree Pedro‑ni: ―¿Si niba ttu ura laa udaale tse'e tennále len neti?
MAT 26:41 Gwaltse'e tenná lhe gwalinnaba len Tata Do Yebáha, kini abittu dhi yie nu xxegwiha le nna eyadi gaale. Gwalí galá lebi'i gwa rakabinle tse'e tennále, ttaka bela latile‑na labí ridaana uchíana.
MAT 26:42 Nianna tti dedheyye attu libe nna bedennee len Tata Do Yebáha nna ree: ―Tata to kia, ganna abíba aka kualu nu satea‑ni, la'ania nna nu innába kwinalu aka.
MAT 26:43 Tti bedeyekie attu libe dedheyye ata se'e ka benneha, nianna gwadixxakagabe ke dedete'adhigabake kumu de ta'a xxattake bisiela.
MAT 26:44 Niha‑ba bodose'ebie ke nna dedheyye gwenne len Tata Do Yebáha beyonna libe. Bodeki adakabe ka tisa ka nu chi ree benneha.
MAT 26:45 Tti bedeyekie attu libe ata se'e ka benne rudhetinieha nna ree ke: ―¿Si sa te'adhibale? Neti benne daya yebáha, chiba bisia ura nuní utekana neti lasi ná ka nu ruin tulha.
MAT 26:46 ¡Chinka gwaleyadha nna gwaletía! ¡Ne nu utena neti lasi ná ka nu uttikana netiha chi daa naa!
MAT 26:47 Sa dula Jesús‑ni rinnebie tti bisin Judas nu selana lhe'e ka benne tsi'inu (12) rudhetinieha. Bisin lenna ixeru ka nu denkana espada lhe yaga lhe. Ka nu loni ge ka bixxudiha lhe ka nu anka benneola ge ka nu Israel‑ni lhe, lakana udhelhakana ka nuha.
MAT 26:48 Judas nu utena Jesús‑ni lasi ná ka nuha nna chila rana ka nuha: ―Nu ibigaa goa xxaganiha, lana nuha udaxxule.
MAT 26:49 Nianna ubiga tteba Judas‑ni ata du Jesús‑ni nna rane: ―¡Padiuxi, maestru! Nianna tti utona xxage.
MAT 26:50 Labie nna ree na: ―Betsi to, tsa ttela ben nu dalu uinlu. Nianna tti ubiga ka nu daa lennaha nna bedaxxu ttebakana Jesús‑ni.
MAT 26:51 Ttaka ttu ka benne du len Jesús‑ni nna ulea ttebe espada geeha nna uchúe naga nu riben lo sina ge bixxudi xeniha.
MAT 26:52 Jesús‑ni nna ree benneha: ―¡Tasiekilu! Boga'a espada gelu‑na lhe'e xoni, kumu ka nu ruttikana len espada, len nunágaba gattikana.
MAT 26:53 ¿Si rakinlu labí aka kia innabaa len Tata kiaha kini idhelhe ixe juisiru ka anjeli ki odiláke neti loora tte nnanna?
MAT 26:54 Ttaka ganna gaxia ka benneha, la'ania nna, ¿galasina ki aka nu ra lo ka yetsi ge Tata Do Yebáha ata rigixxi'a ra deki teeki satea aní?
MAT 26:55 Looraha tteba nna ra Jesús‑ni ka nu chi bedaxxukaneha: ―¿Beaka ttiba ttu nu daa gwedaxxu ubana dale gwedaxxu neti, denle espada lhe yaga lhe? Ki ttu ttu sába ridúa ro'o yotu‑na rule'enia le nna abí chiga bedaxxule neti.
MAT 26:56 Ttaka iyá nuní raka kini rado tisa ge nu unne ka profetaha lo ka yetsi ge Tata Do Yebáha. Nianna iyába ka benne rudhetini Jesús‑ni bexunnike nna a ttúbe bedúke.
MAT 26:57 Ka nu bedaxxukana Jesús‑ni nna deche ttebakane arlo Caifás nu anka bixxudi xeniha. Niha chi tupa ka nu rule'ekinna ka benne nu ra lo bia bennabi bodha'an Moisés‑ni lhe chi tupa ka benneola ge ka nu Israel‑ni lhe.
MAT 26:58 Ttaka Pedro‑ni nna idittuliba danalhane axtaliba bisinna lali'a ge yo'o ata do bixxudi xeniha. Uta'abana nna urena len ka nu se'e gweyú ro'o yo'oha kini ilenna bixa aka.
MAT 26:59 Ka nu loni ge ka bixxudiha lhe ka benneolaha lhe adíru ka nu runi elhuxtisi ge ka nu Israel‑ni rigilakana ka nu uin lekani ki usiakana iki Jesús‑ni ttu bixa. Aníha ki tee ro'okani ukinnikane nna uttikane.
MAT 26:60 Ttaka labí udaakana, meskiba bika betso dúkana ixe ka nu ben lekani. Delola nna bisia a chupakana nna
MAT 26:61 rákana: ―Nubiyú du nii rana: “Neti gwakaba kia uttampaa yotu ge Tata Do Yebáha nna delo tsunna ubisaba nna chi elhidhaa na.”
MAT 26:62 Bixxudi xeniha nna udú liina nna rana Jesús‑ni: ―¿Bíunni rusia ka nuní ikilu? ¿Si lagwa gwekabilu ge nu rákana‑ni?
MAT 26:63 Ttaka Jesús‑ni siiba uke, labí bekabie. Bixxudi xeniha nna rane: ―Tata Do Yebaa benne anka baniha rudettia rinnabaa lenlu, utixxi'a, ¿si lu ankalu Cristu Xi'in benneha?
MAT 26:64 Jesús‑ni nna bekabie, ree: ―Luba chi raxa. Anágaba neti upegabaa le deki neti benne daya yebáha, debá nnanna chi ilenle neti dhoa daka ná ben ge Tata Do Yebaa benne ra tsitsi leeha lhe ilágabinle neti dedáya yebáha lhe'e beaha.
MAT 26:65 Nianna tti ulhi triba xo bixxudi xeniha uchedana nuha. Nianna tti rana ka nu se'e niha: ―¡Tata Do Yebáha nuná rorexxa gaana tti rana aná! Nnanna labíru riyasinri'i nuxa kixxi'enna ri'i deki bixa ben nuní, ki kwinaba lebi'i chi biyienin nagale deki rorexxa gaana Tata Do Yebáha.
MAT 26:66 Lebi'i nna, ¿bí rakinle? Ka nuha nna bekabikana, rákana: ―Ralhaba nuná gattina.
MAT 26:67 Nianna tti udulokana bettuttu xxenkani loe, attu chupakana nna bedhenkane nna attu chupakana nna uleakana gi ro'e.
MAT 26:68 Nianna tti rákane: ―Cristu, unne ya'achu, ¿núnna bedhenna lu ganna?
MAT 26:69 Laka raka nuha, Pedro‑ni nna lali'a ge yo'oha‑ba dona. Nianna tti ubiga ttu ka nuila riben sina niha, rana na: ―Lu lhe danalhagabalu Jesús ge Galilea‑ni.
MAT 26:70 Ttaka lana labí uxí ro'oni arlo iyá ka nuha deki ankabienne. Rálana: ―Bi yu neti bí ge nuná rinnelu.
MAT 26:71 Tti chi deyyana eriana ro'o yo'oha, nianna tti bedeláni attu nuila riben sinaha Pedro‑ni. Nianna ra nuha ka nu se'e niha: ―Anágaba nuní danalhagabana Jesús ge Nazaret‑ni.
MAT 26:72 Ttaka lana nna labí bededí ro'oni, axtala rana: ―¡Yuru Tata Do Yebáha, labí ankabiati nubiyú‑na!
MAT 26:73 Attu sattiruba nna chi bedebiga ka nu se'e niha ata du Pedro‑ni nna redeakana na: ―Gwalí galá, gaxa lu selagabalu len ka nu danalhakana Jesús‑ni, kumu reyakabia tteba elha rinne gelu.
MAT 26:74 Lana nna rana: ―Gwalígati xa; labí ankabiati nubiyú‑na. Tata Do Yebáha ugwebie neti elha disa ganna abíba liiti. Looraha tteba nna uresi chinkaha.
MAT 26:75 Nianna gwadú tteba le Pedro‑ni ge nu ra Jesús‑ni tti rabie na: “Lanila kwesi chinkaha, lu tsunna libela chi bedhea lelu labí ridí ro'olu deki ankabienlu neti.” Nianna beria ttebana ata du naa, nna uresibana ttibaxkaba leni de releninna.
MAT 27:1 Tti chi ugwani dilaha nna iyába ka nu loni ge ka bixxudiha lhe ka benneola ge ka nu Israel‑ni lhe, iyábakana beda'a ro'okani deki gattiba Jesús‑ni.
MAT 27:2 Nianna tti bexxikakane nna chekane gwaga'akane lo Pilato nu rinnabiaha.
MAT 27:3 Judas nu betena Jesús‑ni lasi ná ka nu loni ge ka bixxudiha lhe lasi ná ka benneola ge ka nu Israel‑ni lhe, tti bilenna deki chiba bekinnikana Jesús‑ni ki gattie, nianna chi bodúna na ge nu bennaha nna ugía ttebana bodekina rerua (30) belhiu plata nu begwekana naha,
MAT 27:4 nna rana ka nuha: ―Neti tulha xxeniba nuná benia betea lasi nále ttu benne labí bi benie. Ttaka ka nuha nna bekabilakana, rákana: ―¡Deloxa, labí yu ri'itu! ¡Naba biyú!
MAT 27:5 Nianna gwadelha ttebana ka belhuha lhe'e yotuha nna tti biriana diana gwalhu'u tuu yienni.
MAT 27:6 Ka nu loni ge ka bixxudiha nna bedigakana ka belhuha nna rákana: ―Belhiu‑ni labí ga'anna egu'uri'i nuní lhe'e ata ru'u ka úna ge yotu‑ni kumu belhiu‑ni ankana nu utixari'i kini gatti ttu benne.
MAT 27:7 Aníha uka nna beda'a ro'okani go'okana len belhuha xulali nu tee láni Ata Riria Ka Yedhu, kini xulaliha ixúna igatsi ka nu dittu.
MAT 27:8 De nuha nna axtaba nnanna beya'an lá xulaliha Xulali Nu Biyo'o Len Reni.
MAT 27:9 Aníha ki gwado tisa ge nu unne profeta Jeremías‑ni, tti ree: “Bedaxxubakana rerua (30) belhiu plataha. Ttanía nuha ulea ka nu Israel‑ni lidhaka benne gattiha.
MAT 27:10 Nianna tti betekana nuha kini biyo'o xulali ata riria ka yedhuha. Benbakana attiba raba Tata Xisiha neti”, aníha ra Jeremías‑ni.
MAT 27:11 Jesús‑ni nna bisin lenkane arlo Pilato nu rinnabiaha. Nuha nna unnaba tisane, rane: ―¿Si lu ankalu nu rinnabia ge ka benne Israel‑ni? Lee nna bekabie geni, ree: ―Luba chi ra deki nuná ankaa xa.
MAT 27:12 Ka nu loni ge ka bixxudiha lhe ka benneola ge ka nu Israel‑ni lhe, tti se'ekana rukinnikane arlo Pilato‑ni, lee nna kwachiruba bekabie gekani.
MAT 27:13 Nianna tti ra Pilato‑nie: ―¿Si gwa riyieninlu? Ttaníli nu rusiakana ikilu.
MAT 27:14 Ttaka Jesús‑ni nna niba ttu tisa laa bekabie. De nuha nna nu rinnabiaha rugía ya'abana de labí rekabie geni.
MAT 27:15 Kua risiaba laní Pascua, Pilato nu rinnabiaha labinna rodilána ttu ka nu tee lisiyya. Rebeabana nu rakaba le yiesiha eria.
MAT 27:16 La'ania nuha yaya ttu nubiyú lisiyya. Iyába ka benne yuke ge nu benna. Nubiyúha lána Barrabás.
MAT 27:17 Tti chi tupa ka benne niha, nna unnaba tisa Pilato‑ni kana, rana: ―¿Nú raka lele odiláya? ¿Si odiláya Barrabás‑ni ak? ¿Odiláya Jesús nu tee láni Cristu‑ni ak?
MAT 27:18 Aníha ra Pilato‑ni kumu chiba yuna deki de ritisibakinna Jesús‑ni nna gwaga'akane loni.
MAT 27:19 Laka do Pilato‑ni ata rinnabianaha nna udhelha nuila geniha ttu rresona geni, rana na: “Bittu uga'a nálu len nubiyú‑na. Labí bixa ben nuná. Kumu de lana nna neti yalhá elha disa biyúa bitsiati ttu ela.”
MAT 27:20 Ttaka ka nu loni ge ka bixxudiha lhe ka benneola ge ka nu Israel‑ni lhe, biri'aba lenkana uxí yiekana ka nu saa niha kini ka nuha nna unnabakana kini olhána Barrabás‑ni nna Jesús‑ni nna unnabakana kini gattie.
MAT 27:21 Nu rinnabiaha nna unnaba tisana kana attu libe, rana kana: ―Delo ixpa ka nuní, ¿nú ka nuní raka lele odiláya? Lakana nna rákana: ―Barrabás‑na bodilaa.
MAT 27:22 Pilato‑ni nna rana kana: ―Jesús nu rale Cristu‑ni nna, ¿bíla anka nu unia len nuní ganna? Iyábakana bekabikana, rákana: ―¡Betá nuná lo ya kurusi!
MAT 27:23 Nianna ra Pilato‑ni kana: ―¿Beaka? ¿Bí nu satsa ben nuní? Ttaka lakana nna adíla idisa ribesi'akana, rákana: ―¡Betá nuná lo ya kurusi!
MAT 27:24 Tti ute den Pilato‑ni deki labí dhaana lo ka nuha, kumu adíla rigiyyakana, nianna tti bedaxxuna inda nna utí náni arlokani nna rana kana: ―Labí udelhale kwe'a elhutti ge nubiyú‑ni. ¡Naba gwaluyú!
MAT 27:25 Iyábakana bekabikana, rákana: ―Kwe'ebatu lhe kwe'e ka xi'intu‑niba tsia elhutti ge nuná.
MAT 27:26 Nianna bolhába Pilato‑ni Barrabás‑ni. Jesús‑ni nna udhelhana ki bekulhakane, nianna tti botene lasi ná ka nu utákane lo ya kurusiha.
MAT 27:27 Ka soldadu ge Pilato nu rinnabiaha chekana Jesús‑ni lhe'e guskadu ata ridona ruinna elhuxtisiha. Nianna tti bottupakana adí ka soldaduha abi'iba kwe'e Jesús‑ni.
MAT 27:28 Uleakana ka xoeha nna begukukane ttu lari xiná.
MAT 27:29 Nianna tti benkana ttu corona yetsi nna ulu'ukana nuha ikie nna begwekane ttiba ttu vara ge nu rinnabia den ná benbie, nianna tti bedú xibikani arloe ruxisikana gebie, rákane: ―¡Xxeni ra lelu xa nu rinnabia ge ka nu Israel!
MAT 27:30 Nianna tti ruttuttu xxenkani loe nna rudaxxukana vara denieha nna riginkana nuha ikie.
MAT 27:31 Iki de chi bedhakakane aníha, nianna tti utuakana lari xiná nukueha nna bogukukane ka xoeha, nianna tti chekane kini utákane lo ya kurusiha.
MAT 27:32 Tti biriakana dia lenkana Jesús‑ni, nianna beti'akana ttu benne lhe'esi Cirene lábie Simón. Benneha bedo doelhakane ki bije kurusi ge Jesús‑ni.
MAT 27:33 Nianna tti bisinkana ttu latti ata tee láni Gólgota. (Gólgota dienna innána Bega Iki Nu Yatti.)
MAT 27:34 Niha begwekana Jesús‑ni vinu nu dia kuana ilhá ikini ki i'iye, ttaka iki de chi bennixxie nuha nna birua uka lebie i'iye nuha.
MAT 27:35 Iki de chi betákane lo ya kurusiha, nianna bedelhakana suerti kini elha'akana ka xoeha, kini ula'ana nupaxakana galhakana edíkana ka nuha. [Aníha ki gwado tisa ge nu unne benne uke profeta ge Tata Do Yebáha, tti ree: “Belha'abakana ka xoaha nna bedelhakana suerti ge ka nuha.”]
MAT 27:36 Nianna tti use'ekana biyú tsitsibakane.
MAT 27:37 Daka xekie betákana ttu breta dia letra loni ata rigixxi'a bí ge taabie lo ya kurusiha. Lo bretaha dia ra: “Nuní ankana Jesús nu rinnabia ge ka benne Israel‑ni.”
MAT 27:38 Betákana Jesús‑ni lhe betágabakana a chupa ka ubana lo ka ya kurusi, ttúna daka ná banie nna attúna nna daka ná yattie.
MAT 27:39 Ka nu rite ata taabieha nna ruttába ikikani rulisa xxattakane,
MAT 27:40 rákana: ―Lu ralu deki ottampalu yotu‑na nna delo tsunna ubisaba chi elhidhalu na. ¡Ganna si gwalíginlu ankalu Xi'in Tata Do Yebáha, titúbalu benchu ki lhaalu lo ya kurusi‑na nna beyadichu!
MAT 27:41 Aníha‑gaba ruin ka nu loni ge ka bixxudiha lhe ka nu rule'ekinna ka benne nu ra lo bia bennabi bodha'an Moisés‑ni lhe aníha‑gaba ruin ka fariseo‑ni lhe ka benneola ge ka nu Israel‑ni lhe; ruxisigabakana gebie, rákana:
MAT 27:42 ―¡Ka benne subi gwa bodilána, ttaka lana nna a raka geni elaa titúbana lo ya kurusi‑na! ¡Ganna gwalíginna ankana nu rinnabia ge ka nu Israel‑ni, eyadichuna lo ya kurusi‑na, la'ania nna ri'itu gweyya letu geni!
MAT 27:43 Bexxen leni ge Tata Do Yebáha, nnanna nna odiláchue na ganna gwalíga rakanie geni. Kumu rana: Neti ankaa Xi'in Tata Do Yebáha.
MAT 27:44 Anágaba ka ubanaha, ka nu taagabakana lenie lo ka ya kurusiha, rulisagabakane.
MAT 27:45 Itúba yiesi lo yu‑ni udulo bechulha, udulo bechulha retin tsi'inu (12) nna axtaliba retin tsunnaha beyani.
MAT 27:46 La uraha‑gaba nuha, uresi'a Jesús‑ni itú lebie, ree: ―Elí, Elí, ¿lama sabactani? ―Tisa‑ni dienna innána: Tata Do Yebaa kia, Tata Do Yebaa kia, ¿beaka rudhá ikilu neti?
MAT 27:47 Tti biyienini ttu chupa ka nu se'e niha nu reeha, nianna ra luesikani: ―Profeta Elías‑niba nuná raxina.
MAT 27:48 Looraha nna ttu ka soldadu du niha biresu ttebana gwaxxína ttu xunu nna bodibidhana nuha len vinu idí. Nianna tti bexxikana nuha lo ttu iyyaxtila nna bedona nuha ro'o Jesús‑ni kini i'iye nuha.
MAT 27:49 Adí ka nu se'e niha nna rákana: ―Naa la taachuna si gwetedilaa Elías‑ni na lo ya kurusi‑na.
MAT 27:50 Ttaka Jesús‑ni nna uresi'e attu libe idisa, nianna tti bechú lebie.
MAT 27:51 Looraha tteba nna bireda lari daa lhe'e yotuha, chubaa tíba ukana, udulona xekini nna axtaba xani'ani bireda. Yiesi lo yu‑ni nna bixú. Ka íyya bartoha nna bila'a lhe'ekani.
MAT 27:52 Biyaligaba ka yieru baa nna beyaka ben ixeru ka benne chi uttiha, delába ka benne chi ulesi Tata Do Yebáha ki akake gebie.
MAT 27:53 Ka benneha beriake lhe'e ka yieru baaha nna iki de chi beyaka ben Jesús‑ni lo elhuttiha, la'ania nna beta'a ka benne beyaka baniha lhe'e yiesi le'aha, delába Jerusalén‑ni, nna niha bele'e loke len ixe ka benne.
MAT 27:54 Soldadu nu baninna adí ka soldaduha, du lenna attu chupa ka soldadu ruyúkana Jesús‑ni. Ka soldaduha tti bilákinna chi rixúha lhe iyá nu chi ukaha lhe, nianna usi xxattakinna nna rákana: ―Benne‑niligaba nna gwalí anke Xi'in Tata Do Yebáha.
MAT 27:55 Ixeba ka benne nuila, delába ka benne danalhake Jesús‑ni desdeba Galilea‑ni kini bete náke lenbie, ka benneha idittuliba se'eke gwelanni.
MAT 27:56 Lhe'e ka benneha sela María Magdalena lhe María nan ge Jacobo‑ni lhe José‑ni lhe; niha‑gaba sela nan ge ka xi'in Zebedeo‑ni lhe.
MAT 27:57 Tti chi ulha sáha nna bisin ttu benne biyú tee gebie. Benneha lábie José. Lee anke benne lhe'esi Arimatea. Benneha ukagabe ttu ka benne bedhetini Jesús‑ni.
MAT 27:58 José‑ni ugíe arlo Pilato‑ni nna bennabe Jesús‑ni ki ukatsie benneha. Pilatuha nna udhelha ttebana kini botekana benneha len José‑ni.
MAT 27:59 José‑ni nna bedíbe Jesús‑ni nna tti bottesie benneha ttu lari nari xú.
MAT 27:60 Nianna bekatsie Jesús‑ni lhe'e yieru baa kubi geeha. Yieru baaha uche'enie na lhe'e ttu íyya daa niha. Nianna iki de chi bekatsie Jesús‑ni nna tti bottulhue ttu íyya xeni kini bedheabie ro'o yieru baaha, nianna tti deyye.
MAT 27:61 Ata bigatsi Jesús‑ni re María Magdalena‑ni lhe attu María‑ni lhe; se'eke daka arlo yieru baaha.
MAT 27:62 Beyeki sáha, la sá tti reyaka le ka benne Israel‑ni, ka nu loni ge ka bixxudiha lhe ka fariseo‑ni lhe bisinkana lo Pilato‑ni
MAT 27:63 rákana na: ―Tata xisi to, ri'itu rexxa letu ge nu ruin leniha tti sa anka bennaha, rana: “Ganna chi uka tsunna ubisa uttiaha, iki de nuha nna eyaka benbaa attu libe.”
MAT 27:64 De nuha nna rinnabatu len kwinalu kini idhelhalu ka nu tse'e tsitsikana ki uyúkana ro'o yieru baaha axtaliba ganna chi beyonna ubisaha, la'anialiba nna ebi'ettakana kumu ni kina tsia ka nu bedhetinaha nna salea sigákana nu yattiha. Nianna tti tsekikana gákana ka benne deki beyaka benba nuha lagwi ge ka benne chi uttiha. La'ania nna adírula xeni aka gwen lasi inne ka nuha attichula gwen lasi unne nuha sisi'a tteha.
MAT 27:65 Pilato‑ni nna rana kana: ―Naba se'e ka soldadu ka nu uyúkana ro'o yieru baaha. Gwaliche kana nna gwaludhea tsitsi ro'o yieru baaha. Gwaluinba ttiba rudhakaba lele kini tsaya tsitsi ro'oni.
MAT 27:66 Aníha uka nna diakana gwadhea tsitsikana íyya nu yaya ro'o yieru baaha nna bese'ekana ka soldaduha ki uyú tsitsikana ro'o nuha.
MAT 28:1 Iki de chi ute sá tti reyaka le ka benne Israel‑ni, tti chi ugwani dila bedú ni'a xumanuha, dia María Magdalena‑ni lenie attu María‑ni diake gwalannike ro'o yieru baaha.
MAT 28:2 Ttiruba ttu nnelaba bixú idí kumu ttu anjeli ge Tata Xisiha ugwadie dabie yebáha. Bisie nna ubige ro'o yieru baaha nna utue íyya yaya ro'o nuha nna tti udoe ikini.
MAT 28:3 Raka lhalhabe attiba raka lhalha tti rapi edha‑na lhe sitsi túba anka xobie ttiba begi.
MAT 28:4 Ka soldadu ka nu se'e ruyúkana ro'o yieru baaha, rixidinibakana de usikinna ge anjeliha, nna tuttíruba bechulhakinna ttiba ttu nu yatti ukakana.
MAT 28:5 Anjeliha nna unnebie, rabie ka benne nuilaha: ―Bittu gasinle, kumu neti gwayúbaa deki lebi'i regilale Jesús ge Nazaret benne betákana lo ya kurusiha.
MAT 28:6 Lanúru benneha tee nii kumu chiba beyaka ben benneha atti tteba chi reeha. Gwaltáruga gwalugía ata utixxakaneha.
MAT 28:7 Nnanna nna jeru tte gwaleyya gwasattixxi'ani ka benne bedhetinieha deki chiba beyaka ben benneha lagwi ge ka benne chi uttiha nna chi deyye daka Galilea‑ni daneru gaabie nna niha ilenlee. Neti nuníba daya ugixxi'en le.
MAT 28:8 Aníha‑ba uka nna jeru tteba deyya ka benne nuilaha beru'unake ro'o yieru baaha, rasibakanie lhe redeakabakanie deyyake gwattixxi'akanie ka benne bedhetinieha.
MAT 28:9 Ttiru nna ttu nnelaba uka xxe Jesús‑ni arlo ka benne nuilaha nna begwebie ke padiuxi. Lake nna ubiga ttebake gwatesike lhe'e ka ni'eha nna bedú xibike arloe.
MAT 28:10 Jesús‑ni nna ree ke: ―Bittu gasinle. Gwaltsia nna gwaligasi ka betsi to kiaha, delába ka benne bedhetiniaha, gwaligasi ke tsiake daka Galilea‑ni, niha ilákanie neti.
MAT 28:11 Laka deyu'u ka benne nuilaha neda deyyake, ttu chupa ka soldadu ka nu se'e gweyú ro'o yieru baaha deyya ttebakana lhe'esiha nna gwattixxi'akinna ka nu loni ge ka bixxudiha ge iyába nu chi ukaha.
MAT 28:12 Ka nu loni ge ka bixxudiha nna bitupa ttebakana unne lenkana ka benneola ge ka nu Israel‑ni nna beda'a ro'okani begwekana ka soldaduha ixeni belhiu.
MAT 28:13 Nianna tti rákana ka nuha: ―Aní innále: Ka nu bedhetini Jesús‑niba bitakana lo rela tti te'adhituha nna beteleabakana benne yattiha.
MAT 28:14 Ganna eyona Pilatu benne rinnabiaha ge nuní, ri'itu gwanneba lentue kini lebi'i nna abittu isela elha gaa gele.
MAT 28:15 Aníoka nna ka soldaduha uxíbakana belhuha nna benbakana ttiba raba ka bixxudiha kana. De nuha nna nu ra ka soldaduha la'ania, nuha‑ba sa ra ka nu Israel‑ni axtaba nnanna.
MAT 28:16 Iyába ka benne sinea bedhetini Jesús‑ni diake daka Galilea‑ni iki i'iya ata chi rabie keha.
MAT 28:17 Tti chi bilákanie bie, nianna bedú tteba xibike arlobie; ttaka attu chupake nna rudúbana ke, labí yuke ganna gwalíttiga lee nuha.
MAT 28:18 Jesús‑ni nna ubige ata se'ekeha nna ree ke: ―Tata Do Yebáha chiba betebie lo neda len neti kini innabiaya yebáha lhe yiesi lo yu‑ni lhe.
MAT 28:19 De nuha nna gwaltsia lhe'e iyá xea ka yiesi se'e yiesi lo yu‑ni nna gwaluse'e ka benne kini udhetike ka tisa kia‑ni nna gwalugadi ke inda lhe. Tti ugadile ke indaha nna udettile lá Tata Do Yebáha lhe lá Xi'inieha lhe lá Espíritu geeha lhe.
MAT 28:20 Anágaba nna gwalule'e kanie kini udoke tisa ge iyá nu chi bodha'anaa len lebi'i uinke. Neti nna ttu ttu sába gwadúbaa len lebi'i axtaliba ganna chi lhuxa yiesi lo yu‑ni. Amén.
MAR 1:1 Nii ridulo ka tisa ka nu rigixxi'akana ge Jesucristu benne anka Xi'in Tata Do Yebáha.
MAR 1:2 Ukaba atti tteba ra lo yetsi ben profeta Isaías‑ni. Lo yetsiha rinne Tata Do Yebáha rulise Jesús‑ni, ree: Neti idhelhaa ttu benne tsie nnerue lolu kini kixxi'e ka tisa kia‑ni. Benneha idhalie neda gelu.
MAR 1:3 Lo yu bisi ata lanú benne se'e, niha riyien tsi'i benneha rinnebie idisa, ree: “Gwalegixxa tse neda ge benne anke Xxanari'iha. Gwalolixxa neda kini dhabie.”
MAR 1:4 Aníha‑ba ben Juan benne rugadi indaha tti ugwekie lo yu bisiha, rigixxi'anie ka benne kini odúna ke nna odaxxuke neda ge Tata Do Yebáha, nianna gadike inda kini anáchu nna ixú elha xen lasi ge ka tulha ruinkeha.
MAR 1:5 Iyába ka benne se'e lhe'esi Jerusalén‑ni lhe ka benne se'e itúba daka Judea‑ni lhe, risinke ata reki Juan‑ni, rigixxi'ake ge ka tulha ruinke nna rugadie ke inda lhe'e yoo Jordán‑ni.
MAR 1:6 Juan‑ni itsa xo camellu‑ba uka xoe nna udhí lhe'ebie ttu yieti. Nu xixxi ge betsirúba lhe kutsittaba lhe utobie ugwekie
MAR 1:7 nna rigixxi'anie ka benne, ree ke: ―Iki de neti nna si dala attu benne ra tsitsiru lebie attichula neti. Neti labí elha ralhaa iyettaa idhasia lo ka gwaracha geeha.
MAR 1:8 Gwalí galá neti tti rugadia le inda, suna indaba rixúti, ttaka benneha nna ugadie le Espíritu ge Tata Do Yebáha.
MAR 1:9 Lhe'e ka sáha‑gaba udá Jesús‑ni lhe'esi Nazaret, re nuha daka Galilea. Nianna bisine nna begadi Juan‑nie inda lhe'e yoo Jordán‑ni.
MAR 1:10 Tti lo reria Jesús‑ni lhe'e indaha, nianna bilánie biyali yebáha nna Espíritu ge Tata Do Yebáha attiba ttu becha ugwadie betedhoe ikie.
MAR 1:11 Nianna tti biyien tsi'i ttu benne unnebie yebáha, ree bie: ―Lu ankalu Xi'inia rakati gelu; lu ankalu benne ru'u lasia.
MAR 1:12 Nianna che tteba Espíritu ge Tata Do Yebáha Jesús‑ni daka lo yu bisiha, ata lanú benne se'e.
MAR 1:13 Niha ugwekie chua (40) ubisa ata reki ka nimala ixxi. Niha‑gaba ben nu xxegwiha dhi yiene nna ka anjeliha‑ba bete náke lenbie.
MAR 1:14 Iki de chi utixxakana Juan‑ni lisiyya, Jesús‑ni nna deyye daka Galilea rigixxi'anie ka benne ka tisa tse, delába rigixxi'e gasina ki akake benne innabia Tata Do Yebáha ke.
MAR 1:15 Nianna ree ka benneha: ―Chiba gwa dona sá ga'anani Tata Do Yebáha lhe chigaba dabigana innabie. De nuha nna gwalodúna le nna gwaltsia lele ge ka tisa geeha.
MAR 1:16 Tti ute Jesús‑ni ro'o indatoo ge Galilea‑ni, niha bilánie Simón‑ni lenna betsini Andrés‑ni yu'ukana rudelhakana yexxa ge ka belhaha lhe'e indaha, kumu ankakana benne rudaxxu belha.
MAR 1:17 Jesús‑ni nna ree kana: ―Gwaltá gwetenalha neti. Neti nna unia kini akale ka nu gaxile ka benne ki udaxxuke neda ge Tata Do Yebáha.
MAR 1:18 Looraha tteba nna bese'e bixxibakana ka yexxa gekaniha nna diakana danalhakane.
MAR 1:19 A lattiruba bededábie nna bedelánie Jacobo‑ni lenna betsini Juan‑ni. Ka nuha ankakana xi'in Zebedeo. Se'ekana lhe'e barcu gekaniha reyoinkana ka yexxa ka nu rudaxxu lenkana belhaha.
MAR 1:20 Nianna uxi ttebe kana. Lakana nna bedhá bixxiba ikikani tata gekaniha lo barcuha lenie ka nu ren sina gekaniha, nianna dia ttebakana danalhakana Jesús‑ni.
MAR 1:21 Tti bisin Jesús‑ni lenie ka benne rudhetinieha lhe'esi Capernaum‑ni, la sá tti reyaka le ka benne Israel‑ni, uta'a ttebe lhe'e yo'o ata rudhetike ka tisa ge Tata Do Yebáha nna uduloe rule'enie ka benne se'e niha.
MAR 1:22 Ka benneha nna rebanabakanie ge nu rule'enie keha kumu rinnebie ttiba rinne ttu uxtisi rapa lo neda, labí tti rinne ka nu rule'ekinna ka benne nu ra lo bia bennabi bodha'an Moisés‑ni.
MAR 1:23 Lhe'e yo'o ata rudhetike ka tisaha, niha re ttu nubiyú yu'u latini ttu espíritu satsa.
MAR 1:24 Nubiyúha nna unnena idisa, rana: ―¡Begwelha ri'itu! ¡Bittu etega'a gelu len ri'itu, lu Jesús ge Nazaret! ¿Si dalu gwetse'e loo ri'itu? Neti gwankabiabati lu. ¡Lu ankalu benne chi ulesi Tata Do Yebáha!
MAR 1:25 Jesús‑ni nna bedhaka dise espíritu satsaha, ree nuha: ―¡Bedhea ro'olu nna beria lati nubiyú‑ni!
MAR 1:26 Espíritu satsaha nna bekubi xxattana nubiyúha nna ribesi'a layabana beriana latini.
MAR 1:27 Iyába ka benne se'e niha bebanabakanie nna rinnaba tisa luesike, ráke: ―¿Bíunni raka? ¡Nubiyú du‑ni rula'ana attu tisa kubi! ¡Xxeniba ra leni nna axtaba ka espíritu satsa‑na rudokana tisa ge nu rana!
MAR 1:28 Nianna ttu nnelaba ugwadhi tisa ge Jesús‑ni nna ka benne se'e itúba daka Galilea‑ni rinneke ge nu runieha.
MAR 1:29 Atti beriake lhe'e yo'o ata rudheti ka benne Israel‑ni ka tisa ge Tata Do Yebáha, Jesús‑ni lenie Jacobo‑ni lhe Juan‑ni lhe dia ttebake lisi Simón‑ni lhe Andrés‑ni lhe.
MAR 1:30 Nan ge nuila ge Simón‑ni teba benneha yu'u xxatte xilhaa. Nianna utixxi'akinna Jesús‑ni ge benneha.
MAR 1:31 Jesús‑ni nna ubiga ttebe bedaxxue ná benneha nna ulhidhe bie. Looraha tteba nna beria xilháha lati benneha nna udulo ttebe benie nu utoke.
MAR 1:32 Atti chi ugwadi tatubisa‑na lo'eyya‑na, tti chi daa ratti loha, la'ania nna iyába ka benne yu'u isagwe latike lhe ka benne yu'u latike espíritu xxegwi uchekana ke ata du Jesús‑ni.
MAR 1:33 Nianna itúba yiesiha bitupa ro'o yo'o ata dueha.
MAR 1:34 Jesús‑ni nna beyonie ixeba ka benne rani yu'u latike iyá looba isagwe lhe bebeabie ixeba ka espíritu xxegwi yu'u lati ka benne lhe. Labí begwelhe inne ka espírituha kumu yúbakana nú anke.
MAR 1:35 Dila tteba ugwadha Jesús‑ni. Sa rula'aruba chulhaha birie die ro'esiha nna bisine ttu latti ata lanú benne se'e. Niha ulhapie tisa len Tata Do Yebáha.
MAR 1:36 Simón‑ni lhe ka benne se'e lennaha, diake satilake bie.
MAR 1:37 Tti gwaxxakake benneha nna ráke bie: ―Iyába ka benne chi rekike ugila lu.
MAR 1:38 Lee nna ree ke: ―Tsiari'i lhe'e adí ka yiesi se'e gaxxaba nii kini lhe'e ka nuná kixxi'agabaa ka tisa ge Tata Do Yebáha, kumu de nuha‑la daya.
MAR 1:39 Itúba Galilea‑ni reki Jesús‑ni rigixxi'e ka tisa ge Tata Do Yebáha lhe'e ka yo'o ata rudheti ka benne se'e niha ka tisa geeha lhe anágaba nna rebeagabe ka espíritu xxegwi yu'u lati ka benneha lhe.
MAR 1:40 Ttu benne biyú raka latie yiesu nu tee láni lepra, bisine ata du Jesús‑ni nna bedú xibie arlo benneha nna ree bie: ―Tata to, ganna lu aka lelu, gwadaabalu eyoinlu neti.
MAR 1:41 Jesús‑ni nna gwatuaba lebie benneha nna tti belhí nábie utane lati benneha nna ree bie: ―Gwaka galá lasia. ¡Nnanna, chinka beyaka!
MAR 1:42 Looraha tteba nna betúa yiesuha lati benneha nna beyaka ttebe.
MAR 1:43 Nianna bedhelha tteba Jesús‑nie deyye nna bodha'an tsitsie, ree benneha:
MAR 1:44 ―Biyú gelu. Anuttu nu kixxi'enlu. Sun tteba nna ugía gwatso du arlo bixxudiha nna uche úna nu daa lolu utelu ge Tata Do Yebáha de chi beyarilu. Beni attiba ra lo bia bennabi bodha'an Moisés‑ni. Aníha kini uyú lo ka benne deki chiba betúa isagwe‑na latilu.
MAR 1:45 Ttaka benne biyúha nna adíla benie. Tti berie niha deyye nna iyába ka benne utixxi'anie ge nu chi ben Jesús‑ni. De nuha nna birua uka ga'a Jesús‑ni la saa lhe'e ka yiesi se'e niha. Ka ro'esiha‑liba ridúe ata lanú benne se'e. Ata dueliba risina ka benne daa lhe'e iyába ka yiesiha.
MAR 2:1 Iki de chi ute ttu chupa ubisaha nna bedesin Jesús‑ni lhe'esi Capernaum‑ni attu libe. Sun tteba bina ka benne deki chi doe lhe'e yo'oha,
MAR 2:2 nianna bitupa tteba ixeruke. Laxkala axtaba ro'o puertaha birua rakanike. Jesús‑ni nna rigixxi'anie ke ka tisa ge Tata Do Yebáha.
MAR 2:3 Nianna tti bisin ttapa ka benne biyú nujake ttu benne daa yatti latie ata dueha.
MAR 2:4 Ttaka kumu de tupa xxatta galá benne ro'o yo'oha, laxkala bi uka ga'ake len benne raniha kini isinke ata du Jesús‑ni. Nianna tti ugwapike iki yo'oha nna utuake ttu chupa ka texa ki udo belea ttu lhixxaba ata dueha. Aníha‑ruba kini uka ulhidake benne raniha xue lo ttu breta.
MAR 2:5 Tti bilani Jesús‑ni gwa riaba le ka benneha deki gwadaabe eyonie benne daa yatti latieha, nianna tti ree benneha: ―Xi'ini to kia, nnanna chiba bixú elha xen lasi ge ka tulha gelu‑na.
MAR 2:6 Niha‑gaba se'e ttu chupa ka nu rule'ekinna ka benne nu ra lo bia bennabi bodha'an Moisés‑ni. Ka nuha nna belaba lhi'u lekani, rakakinna:
MAR 2:7 “¿Beaka rinne nu du‑ni aní? Rilhida gaabana Tata Do Yebáha tti rinnena aná. Lanú nu aka geni dhina elha xen lasi ge ka tulha ruin ka benne, sunruba Tata Do Yebáha gwaka gebie dhie elha xen lasi gekani.”
MAR 2:8 Ttaka Jesús‑ni nna ute da ttebanie deki rulaba lhi'u lekani aníha. Nianna tti unnaba tise kana, ree: ―Lebi'i nna, ¿beaka rulaba lhi'u lele aná?
MAR 2:9 Gwalinnáruga, ¿bí nuha nu sattiru gari'i benne daa yatti latie‑ni? ¿Si gari'e: “Chiba bixú elha xen lasi ge ka tulha gelu‑na” ak? o ¿gari'e: “Beyadha nna bodaxxu nu xualu loin‑na nna bedá”?
MAR 2:10 Nnannaruga ula'ania le ki uyú lole deki neti benne daya yebáha, yiesi lo yu‑ni gwa teeba lo neda kia ki dhia elha xen lasi ge ka tulha ruin ka benne. Nianna tti ra Jesús‑ni benne daa yatti latieha:
MAR 2:11 ―Lu rulisaa. Beyadha nna bodaxxu nu xualu loin‑na nna beyya lisilu.
MAR 2:12 Benne daa yatti latieha nna beyadha ttebe nna bodaxxue breta xue loniha nna berie lo iyába ka nu se'e niha. Ka nuha nna iyábakana bebanakinna, rákana: ―¡Xxeniba ra le Tata Do Yebáha! ¡Niru tsa labí chi bilenri'i aka luesi nu uka‑ni!
MAR 2:13 Iki de nuha nna bederia Jesús‑ni dedheyye ro'o indatooha nna iyába ka benne risinke ata dueha. Labie nna rule'enie ke ka tisa ge Tata Do Yebáha.
MAR 2:14 Tti utebie die, nianna bilánie Levíxi'in biyú Alfeo‑ni dona ata rukixakana belhiu nu daa lo ka benne rigixake ge Roma. Nianna tti ree na: ―Utá betenalha neti. Nianna udú lii ttebana nna gwanalhane.
MAR 2:15 Uka nuha, tti chi do Jesús‑ni go yetta lhe'e lisi Leví‑ni, ixeba ka gwekixa lhe adíru ka nu tekinna lákani deki ankakana ka nu ruin satsa se'egabakana lenie go yetta. Anágaba nna se'egaba ka benne rudhetinieha. Kumu ixeba chi raka ka benne danalhake bieha.
MAR 2:16 Ka nu rule'ekinna ka benne nu ra lo bia bennabi bodha'an Moisés‑ni, delába ka nu ankakana fariseo, tti bilákinna dobie go yetta len ka gwekixaha lhe ka nu ruin satsaha lhe, nianna tti rákana ka benne rudhetinieha: ―¿Beakala maestru gele‑na nna robe yetta len ka gwekixa‑na lhe len ka nu ruin satsa‑na lhe?
MAR 2:17 Tti biyienin Jesús‑ni nu rákanaha, nianna tti ree kana: ―Ka nu abittu rani‑na, ka nuná labí riyasakin nuná nu eyoinna kana, sinuki ka nu rani‑nala nuná riyasakinna nu eyoinna kana. Neti laa dagaa raxia ka nu ruin nu dika ixú, sinuki dalaa kini raxia ka nu ruin satsa.
MAR 2:18 Atti bilani ka benne deki ka nu rudhetini Juan benne rugadi indaha lhe ka nu rudhetini ka fariseo‑ni lhe, ka nuha rutteba ubina lhe'ekani, labí rokana yetta, nianna tti ugía ka benneha nna gweasike Jesús‑ni: ―¿Beakala ka nu rudhetini Juan‑ni lhe ka nu rudhetini ka fariseo‑ni lhe rutteba ubina lhe'e ka nuná, ka nu rudhetinlu‑na nna labí rutte ubina lhe'e ka nuná?
MAR 2:19 Nianna bekabi Jesús‑ni, ree kana: ―¿Laaba ganna labí dika utte ubina lhe'e ka benne biyaxi kini tse'eke dha'aha, laka sa du nu kwiti rutsá nániha lenke? Neti ria: laka sa du nu kwitiha lenke labí dika utte ubina lhe'eke.
MAR 2:20 Ttaka ganna chi bisia sá tti itua nu kwitiha, anúruna dho lenke, la'anialigaba nna chi utte ubina lhe'eke.
MAR 2:21 ’Anágaba lanú ttu benne do rotábie ttu ro'o lari kubi ro'o xo yaxxu geeha. Kumu ganna aníha unie, la'ania nna iyalhiba ro'o lari yaxxuha, nianna adíla satsa ireda xoeha,
MAR 2:22 lhe nigaba lanú ttu benne do riga'abie vinu kubi lhe'e ka yieti yaxxu. Kumu ganna aníha unie, vinu kubiha, ganna chi úlana, la'ania nna itsúba nuha yietiha nna ilaliba vinuha lhe tse'e loogaba yietiha lhe. Laxkala vinu kubiha teeki ita'a nuha lhe'e ka yieti kubi.
MAR 2:23 La sá tti reyaka le ka benne Israel‑ni, la'ania ute Jesús‑ni lhe'e ka xuxtila se'e niha len ka benne rudhetinieha. Ka benneha nna uduloke richekuke iki ka xuxtilaha.
MAR 2:24 Ka fariseo‑ni nna rákane: ―¡Biyúruga! ¿Beaka ruin ka nu rudhetinlu‑na nu abittu ga'anna uinri'i lhe'e ka sá atti reyaka leri'i?
MAR 2:25 Lee nna bekabie, ree kana: ―¿Si ni tsa abittu chi belabale lo yetsi ge Tata Do Yebáha ata rigixxi'a bí ben David‑ni ttu libeha? Yule benneha itupa lenie ka benne ugweki lenie la'ania, tti bituinkeha nna biyasakanie nu goke.
MAR 2:26 La'ania uta'a David‑ni lhe'e yotu ge Tata Do Yebáha atti anka Abiatar‑ni bixxudi xeni. Nianna utoe ka yettaxtila ka nu chi riesike ankake sun tteba ge Tata Do Yebáha, anágaba nna begwegabe ka benne se'e lenie la'ania ki utoke benneha, delába utoke ka yettaxtila ka nu labí ga'anna go attu benne subi, sunruba ka bixxudiha gwaka gokana benneha.
MAR 2:27 Jesús‑ni nna rágabe kana: ―Ka sá tti reyaka leri'i‑na ukakana ki ri'i ixuinri'i kana, laa uligari'i kini nu innála ka sá‑na uinri'i.
MAR 2:28 De nuha nna neti benne daya yebáha, netiba ankaa xxana ka sá reyaka leri'i. De nuha nna gwa teeba lo neda kia innía bixa dika uinri'i lhe'e ka sá reyaka leri'i.
MAR 3:1 Jesús‑ni uta'abie attu libe lhe'e yo'o ata rudheti ka benne Israel‑ni ka tisa ge Tata Do Yebáha. Niha re ttu benne biyú daa yatti ttu lha'a nábie.
MAR 3:2 Ka fariseo‑ni nna rulhatsibakana ge Jesús‑ni ganna gweyonie benneha la sá tti reyaka lekaniha, kini anáchu nna tee ro'okani bixa usiakana ikie.
MAR 3:3 Nianna tti ra Jesús‑ni benne daa yatti neeha: ―Udú lii nna utá udú lagwi‑ni.
MAR 3:4 Nianna tti unnaba tise kana, ree kana: ―¿Bí ga'anna uinri'i lhe'e ka sá tti reyaka leri'i? ¿Si uinri'i latsiru ak? ¿O uinri'i nu satsa ak? ¿Si odilári'i ttu benne? ¿O ugwelhari'i gattie ak? Ttaka lakana siiba ukakana, labí bekabikana gebie.
MAR 3:5 Jesús‑ni nna risa'abanie rulannie lo ka nu se'e abi'iba kwe'eeha nna si'iba bedúna lebie kumu de ruin tsitsi lastokani, labí ria lekani. Nianna tti ree benne biyúha: ―Belhí nálu. Benneha nna belhí tteba nábie nna beyaka tteba nuha.
MAR 3:6 Tti beria ka fariseo‑ni lhe'e yo'oha nna unne tteba lenkana ka nu tákana Herodes‑ni, kumu regila lekani gaxasina uinkana kini uttikana Jesús‑ni.
MAR 3:7 Jesús‑ni nna beru'une deyye len ka benne rudhetinieha daka ro'o indatooha nna ixe juisiru ka benne ge Galilea‑ni danalhake bie.
MAR 3:8 Anágaba ka benne daa itúba daka Judea‑ni lhe Jerusalén‑ni lhe ka benne daa daka Idumea lhe ka benne se'e attu ladu yoo Jordán‑ni lhe. Anágaba nna dágaba ka benne se'e abi'iba kwe'e yiesi Tiro lhe Sidón lhe. Ixe juisiru ka benneha, tti biyienkanie iyá nu runieha nna danalhake bie.
MAR 3:9 De nuha nna ra Jesús‑ni ka benne rudhetinieha udú tseke ttu barcu kini tsapie loni ki abittu ukí ya'a ka benne bie.
MAR 3:10 Kumu de ixe galá ka benne chi beyonie, de nuha nna iyába ka benne raka latike ttu bixa, xua‑niba iki luesike diake kwe'ebie kumu de raka leke sattanke latie.
MAR 3:11 Ka espíritu satsa yu'u lati ka benne, atti rilákin nuha Jesús‑ni nna ribesi'abakana rudú xibikani arloe, rákane: ―¡Lu ankalu Xi'in Tata Do Yebáha!
MAR 3:12 Ttaka labie nna bedhaka dise ka espíritu satsaha kini abittu kixxi'akana nuxa anke.
MAR 3:13 Iki de nuha nna ugwapi Jesús‑ni iki i'iyaha, nianna uxie ka benne uka lebie gaxie. Ka benneha nna ubigake kwe'ebie.
MAR 3:14 Nianna tti bekwebie tsi'inuke (12) kini tseki lenke bie lhe kini idhelhe ke tsiake kixxi'ake ka tisa ge Tata Do Yebáha.
MAR 3:15 Anágaba nna begwegabe ka benneha lo neda ki eyoinke ka benne rani lhe ki ebeake ka espíritu xxegwi yu'u lati ka benneha lhe.
MAR 3:16 Nii dia lá tsi'inu (12) ka benne bekweeha, delába, Simón benne utixxagabe lábie Pedro,
MAR 3:17 lhe Jacobo‑ni lenie betsie Juan‑ni. Ka benne‑ni ankake xi'in Zebedeo. Lagabake nuha utixxe láke Boanerges. (“Boanerges” dienna innána ka nu ru'u be idisa.)
MAR 3:18 Bekwegabe Andrés, lhe Felipe, lhe Bartolomé, lhe Mateo, lhe Tomás, lhe Jacobo xi'in Alfeo, lhe anágaba Tadeo, lhe Simón benne rágabakana Zelote,
MAR 3:19 lhe bekwegabe Judas Iscariote nu betene lasi ná ka nu bettikaneha.
MAR 3:20 Iki de nuha nna beyeki Jesús‑ni besine lhe'e yo'oha, nianna bedetupa tteba ixeru ka benne. Laxkala niba yetta laa uka go lenie ka benne chi bekwebieha.
MAR 3:21 Tti bina ka benne raka luesieha ge nu runieha, nianna ugíake kini saxíke bie kumu ráke rakaba ikie.
MAR 3:22 Ttaka ka nu rule'ekinna ka benne nu ra lo bia bennabi bodha'an Moisés‑ni, delába ka nu daa Jerusalén‑ni, ka nuha nna rákana deki Beelzebú nu anka xxana ka espíritu xxegwiha‑ba yu'u lati Jesús‑ni, laxkala Beelzebú‑niba rixuin Jesús‑ni kini rebeabie ka espíritu xxegwi yu'u lati ka benne.
MAR 3:23 Nianna tti uxi Jesús‑ni ka nu rinne aníha nna utixxi'anie kana ttu tisa. Aníha benie kini utte dákana bí diani nu raka lebie kixxi'anie kana, nianna tti ree: ―Laa gwakaga ge nu xxegwiha ebeana ka luesi xxegwi‑niha.
MAR 3:24 Ttibanka ganna ttixka lhe'e ttu yiesi se'e la'a ka benne geni de ritilha len luesike, la'ania nna labíru uchía yiesiha lo nu ratenaha
MAR 3:25 lhe ganna ttixka ka benne se'e lhe'e ttu yo'o se'e la'ake de ritilha len luesike, la'ania nna labíru aka tse'e ka benneha tutupa.
MAR 3:26 Anágaba nu xxegwiha, ganna itilha lenna ka luesi xxegwi‑niha, la'ania nna labíru aka dhona tutupa len ka nuha. Ganna aníha uinna, la'ania nna chiba bisia sá ge nuha lhuxana.
MAR 3:27 ’Anágaba lhe lanú nu aka geni ga'ana lhe'e yo'o ge ttu nubiyú ankana tipa kini lhanana nu se'e lhe'e yo'o ge nuha, ganna ttixka abíba udaxxuna nubiyú anka tipaha lade'a tte nna uxxikana nuha. Kumu gannaliba chi xikinna nubiyúha, la'anialiba nna gwaka geni lhanana nu se'e lhe'e lisi nuha.
MAR 3:28 ’Netiru ria: gwadíba Tata Do Yebáha elha xen lasi ge iyába nu satsa uni ka benne lhe ge iyába nu satsa inneke lhe,
MAR 3:29 ttaka ganna ttu benne inne satse ge Espíritu ge Tata Do Yebáha, benneha ttu tsala labí ixú elha xen lasi gebie, sinuki ttu dia liiba uja benneha yua ge nu inneeha.
MAR 3:30 Aníha ra Jesús‑ni kumu ka nu rule'ekinna ka benne nu ra lo bia bennabiha rálakana deki espíritu satsaba yu'u latie.
MAR 3:31 Nianna tti bisin nan ge Jesús‑ni lhe ka betsieha ro'o yo'o ata do Jesús‑ni rule'enie ka benne. Ro'o yo'oha‑liba use'e ka nan geeha nna udhelhake kini belisakana Jesús‑ni.
MAR 3:32 Ka benne se'e abi'iba kwe'eeha nna unneke, ráke bie: ―Ne nan geluha lhe ka betsiluha lhe ka danluha lhe, se'eke ro'o yo'o‑ni regilake lu.
MAR 3:33 Lee nna bekabie ree: ―¿Nú rale deki anka nan kia lhe betsia lhe?
MAR 3:34 Nianna tti belannie lo ka benne se'e abi'iba kwe'eeha nna tti ree: ―Gwaluyúruga, ka benne se'e‑nila nuní ankake nan kia lhe betsia lhe.
MAR 3:35 Kumu nuxaba benne ganna runie nu ru'u le Tata Do Yebáha, benneha nuha anke betsia lhe danaa lhe nan kia lhe.
MAR 4:1 Jesús‑ni bededuloe attu libe rodole'enie ka benne ka tisa ge Tata Do Yebáha ro'o indatooha nna ixe juisiru ka benne bedetupake abi'iba kwe'ebie. Laxkala teeki ugwapie lo ttu barcu daa lo indaha nna udoe lhe'e nuha. Ka benne tupaha nna ro'o indaha‑liba se'eke rudo nagake gebie.
MAR 4:2 Ixeba nu rigixxi'anie ke. Aníha benie ki utte dáke bí diani nu raka lebie kixxi'anie keha, nianna tti ree ke:
MAR 4:3 ―¡Gwaludoruga nagale! Ttu nubiyú ruin sina biriana diana gwedelha xuxtila.
MAR 4:4 Tti dana gwedelha xuaha nna adí benneha utse ro'o nedaha, nianna tti biginni ka binniha, nna bediga ttebakana benneha.
MAR 4:5 Attu chupe nna utse lo íyya atta'a ata labí gwadilo yu do. Benneha nna gwa be'eyu ttebe kumu de labí rea xua yuha niha.
MAR 4:6 Ttaka tti biria tatubisaha nna bettebe benneha kumu de labí lhi'u dia lhue, de nuha nna ubisi tteba benneha.
MAR 4:7 Attu chupe nna utse lhe'e yietsiha, ttaka yietsiha biyelhabana nna belhiubinna benneha. Laxkala labí xua bete benneha.
MAR 4:8 Ttaka adí benneha nna gwa ubinnibe ata do yu tse. Benneha nna yalhá lhe'e be'eyue lhe biyelhe lhe. Laxkala tseba betebie lena. De rerua (30) lhe de gayuna (60) lhe de gayua (100) tteba xua bekudhi iki ttu ttu ka xuxtilaha.
MAR 4:9 Nianna tti ra Jesús‑ni ke: ―¡Ata sia nagale, gwaludo nagale ganna gwankale nu dika iyienini!
MAR 4:10 Atti chi beya'an Jesús‑ni sun ttúbe lenie ka benne tsi'inu rudhetinieha (12) lhe attu chupa ka benne se'e gaxxaba ata dueha lhe, nianna tti unnaba tisake bie, ráke bie: ―¿Bí diani nu ralu tti utixxi'alu ge benne dia gwedelha xuxtilaha?
MAR 4:11 Labie nna ree ke: ―Lebi'iligaba nna gwagixxi'abin Tata Do Yebáha le nu labí chi yu adí ka benne, delába gwa ruinba Tata Do Yebáha kini tte denle gasina innabie ka benne. Ttaka ka benne abittu chi rinnabie, neti bixxi kwe'eba rinnea tti rigixxi'ania ke nuní,
MAR 4:12 kini meskiba gwa rulannike nna labí ilákanie, lhe meskiba gwa rudo nagake nna labí tte dákanie; aníha kini ka eyekike nna odaxxuke neda ge Tata Do Yebáha, lee nna dhie elha xen lasi geke.
MAR 4:13 Nianna tti ree ka benneha: ―¿Si lagwa gwa rite denle bí diani nu utixxi'aya ge benne dia gwedelha xuxtilaha? ¿Galasina tte denle adíru ka nu kixxi'ania le ganna?
MAR 4:14 Benne rudelha xuxtilaha anke benne rigixxi'e ka tisa ge Tata Do Yebáha.
MAR 4:15 Ka xua utsa kwe'e nedaha nna ankake ka benne biyienkanie ka tisaha. Ttaka daa tteba nu xxegwiha nna rebea ttebana ka tisaha lhe'e lastoke; delába ruinna kini rexulhakanie ka tisa chi biyienkanieha.
MAR 4:16 Adíke nna ankake ttiba ka xua utsa lo íyya atta'aha. Tti biyienkanie ka tisaha nna ittaba bedúna leke nna bedaxxu ttebake ka tisaha.
MAR 4:17 Ttaka kumu de labí chi begwe lhu ka tisaha lhe'e lastoke, de nuha nna sattiruba ria leke ge Tata Do Yebáha, nna atti chi rateke ttu bixa elha disa o lhe atti chi ridú nookana ke de ria leke ka tisaha, la'ania nna reyadi gaa ttebake.
MAR 4:18 Alhe ka benneha nna ankake attiba ka xua utsa lhe'e yietsiha. Gwa riyienbakanie ka tisaha,
MAR 4:19 ttaka ka elhaxchacha iki geke tee yiesi lo yu‑ni lhe de rudo xxattana leke gatta geke, lhe anágaba lhe de ru'u xxatta leke ge adíru nu tee yiesi lo yu‑ni, nuha‑la rudoruna leke ruinke, de nuha nna richúbana lo ka tisaha. La'ania nna labí ruin ka tisaha sina lhe'e lastoke kini uin tseke.
MAR 4:20 Adíke nna ankake attiba ka xua ubinni lo yu tseha. Ka benneha nuha riyienkanie ka tisaha nna bedaxxuke ka tisaha. Laxkala gwa ruinba ka tisaha sina lhe'e lastoke. Ka benneha nuha ankake attiba ka xuxtila bete de rerua (30) lhe de gayuna (60) lhe de gayua (100) lhe.
MAR 4:21 Rágaba Jesús‑ni kana: ―Ttu gi rudenna ki ilenri'i, laa taxxígari'i nuha kini uttudhiri'i ttu almoti ikini o ukatsiri'i na xan ata rattari'iha. ¿Laaba ganna teeki udori'i nuha gwetsá ki udenna geri'i?
MAR 4:22 Anágaba labí ttu bixa tee gatsi nu abittu ilenri'i lhe labí ttu bixa raka sigá abittu iriana la loo.
MAR 4:23 ¡Ata sia nagale, gwaludo nagale ganna gwankale nu dika iyienini!
MAR 4:24 Lhe rágabe kana: ―Gwaludo tsitsi nagale gasina rutte dale nu rinnea‑ni, kumu ttu luesi nu rurixxibiale rugwele ka benne, ttu luesi nuha‑gaba orixxibia Tata Do Yebáha otebie gele. Benneha nna adírula xxeni otebie gele.
MAR 4:25 Kumu nu gwa tee geniha, gwadí chiettirula nuha nna nu abittu tee geniha nna axtala nu ttu latti chi tee geniha etua.
MAR 4:26 Jesús‑ni rágabe: ―Tata Do Yebáha atti rinnabie ka benne, elha rinnabia geeha raxxína na len nu ruin ttu benne dia gwedelha xuxtila.
MAR 4:27 Benneha rattabe ra'adhie rela nna rani nna radhabe. Xua bedelheha nna rela resába dia benneha re'eyue lhe riyelhe lhe. Benne bedelha xuaha nna labí yue gasina raka,
MAR 4:28 kumu titúba yuha re'eyu lena loni. Lade'axa riria lhaga to ge xuaha, nianna tti ribea ikie. Iki deliba nuha nna tti chi ru'u lhe'ebie.
MAR 4:29 Ganna chi bigatsi xuxtilaha, la'ania nna udaxxu tteba iyyarsela ge benne bedelha xuxtilaha kini egitse benneha kumu chiba bisia sá exú benneha. Aníha‑ba raka atti rinnabia Tata Do Yebáha ka benne.
MAR 4:30 Jesús‑ni rágabe: ―¿Gasina rule'e tti rinnabia Tata Do Yebáha ka benne? ¿Bí nuha rula'a tti rula'a elha rinnabia geeha?
MAR 4:31 Tata Do Yebáha atti rinnabie ka benne, elha rinnabia geeha ankana ttiba ttu besi ge kuana muxtasa riyada lo yu. Besiha‑la nuha ankana nuxka'a toru delo iyá ka besi re'eyu yiesi lo yu‑ni.
MAR 4:32 Ttaka iki de chi riyada besiha nna gwa re'eyubana. Nianna rixenba kuanaha nna xxenirula rakana attichula adí ka kuana ya'a. Xxeniba raka ka náni, laxkala axtaba ka binni‑na ratsiakana xula geni.
MAR 4:33 Ixeba luesi ka tisa‑ni bixúni Jesús‑ni ki unnebie. Aníha benie kini tte dani ka benne nu raka lebie kixxi'anie ke. Utixxi'abanie ke nu dika dhaake tte dákanie.
MAR 4:34 Labí lhixxa rá utixxi'anie ke sinuki utixxi'abe nu raxxíbana len nu raka lebie ule'enie ke. Ttaka ka benne rudhetinieha, tti due sun len ka benneha‑ba nna gwa rigixxi'abanie ke bí diani iyá tte nu reeha.
MAR 4:35 La sáha‑gaba nuha, atti chi dia ralhaha, nianna ra Jesús‑ni ka benne rudhetinieha: ―Eteri'i lo indatoo‑ni kini eriari'i ro'oni daka nu reha.
MAR 4:36 Niha‑ba boka'anke ka benne ixe danalhaha nna aníha‑ba dedo Jesús‑ni lo barcuha, dechekane. Danalhagaba adíru ka barcu.
MAR 4:37 Ttaka ttiruba ttu nnelaba bisia ttu be idí nna bedhú liina lo indatooha nna uta'ana lhe'e barcuha. Laxkala chi tteba ruin nuha xxudina lhi'u lhe'e indaha.
MAR 4:38 Ttaka Jesús‑ni nna tebe te'adhie daka xan barcuha kuni ikie ttu lari. Ka benne rudhetinieha nna bodibenke bie, ráke bie: ―¡Maestru! ¿Si bi gwa retabinlu ka tsapiri'i inda‑ni nna gattiri'i?
MAR 4:39 Nianna tti ugwadhe bedhaka dise beha nna ree indatooha: ―¡Siiba beyaka! La'ania nna udú sii tteba beha nna tsaba bebe sii lo indaha.
MAR 4:40 Nianna tti ra Jesús‑ni ke: ―¿Beaka rasinle? ¿Beaka a ruxxen lele kia?
MAR 4:41 Ttaka lake yalhá usikanie, nianna tti ra luesike: ―¿Nú anka benne‑ni nna axtaba be‑na lhe indatoo‑na lhe rudokana tisa gebie?
MAR 5:1 Beteba Jesús‑ni lenie ka benne rudhetinieha lo indatooha nna bisinke daka lo yu ge ka benne Gadara.
MAR 5:2 Tti ugwadie lo barcuha nna biria tteba ttu nubiyú yu'u ttu espíritu satsa latini, biriana ata se'e ka baa ge ka benne yattiha, nianna tti betetsána Jesús‑ni.
MAR 5:3 Lhe'e ka baaha‑ba reya'an nubiyúha. Nurula ridaana uxxikana na, niruba len cadena.
MAR 5:4 Ixe lidú chi bexxikake ka ni'a náni len cadena, ttaka richú ttebana ka cadenaha nna niruba ttu benne a ridee loni.
MAR 5:5 Rela resába rekina iki ka i'iyaha lhe lagwi ge ka baaha ribesi'ana lhe ruingaba gwe latini len ka íyya lhe.
MAR 5:6 Idittuli daa Jesús‑ni bilenne, nianna biresu ttebana gwatsáne nna bedú xibini arloe.
MAR 5:7 Nianna tti unnena idisa, rane: ―¡Bittu etega'a gelu len neti, Jesús Xi'in Tata Do Yebaa benne ra xxeni leeha! ¡Rinnabaa lenlu, benchi lo ni'a ge Tata Do Yebáha bittu ugwelu neti elha disa!
MAR 5:8 Aníha rana kumu Jesús‑ni chi unnebie, ree: ―¡Espíritu satsa, beria lati nubiyú‑ni!
MAR 5:9 Nianna tti unnaba tise na nna ree na: ―¿Bí lálu? Lana nna bekabina, rana: ―Legión‑ba lá neti, kumu ixe ri'itu raka.
MAR 5:10 Nianna unnaba ditiba nubiyúha len Jesús‑ni kini abittu ebeabie ka espíritu satsaha latini nna odelhe kana attu ta subi.
MAR 5:11 Gaxxaba kwe'e i'iya do niha yu'u ixeru ka kuchi, yu'ukana go.
MAR 5:12 Laxkala ka espíritu satsaha nna unnaba ditibakana lenie, rákane: ―Bedhelha ri'itu ata yu'u ka kuchi‑na, kini eta'atu latikani.
MAR 5:13 Jesús‑ni nna gwa begwelhabe kana. Nianna beria tteba ka espíritu satsaha lati nubiyúha nna gwata'akana lati ka kuchiha. Ttiba ttu chupa mili ka kuchiha raka. Ka nuha nna biria resu ttebakana gwatsettikana ro'o ttu íyya daa niha nna biginnikana lhe'e indatooha nna ugwapikana inda.
MAR 5:14 Ka nu se'e gweyú ka kuchiha nna boxunni ttebakana deyyakana gwattixxi'akana nuha lhe'esiha lhe utixxi'akinna ka benne se'e lhe'exxi itúba ka niha. Ka benneha nna biria ttebake gwalannike bixa nuha chi uka.
MAR 5:15 Tti bisinke ata du Jesús‑ni nna bilákanie nubiyú beria ka espíritu xxegwiha latini, tseba chi bedo ikini lhe chiba nuku xoni dona. Nianna yalhá usikanie.
MAR 5:16 Ka benne bilákanie nu gwate nubiyú uyu'u espíritu xxegwi latiniha lhe nu gwate ka kuchiha lhe, ka benneha nna utixxi'agabakanie adí ka benne.
MAR 5:17 Nianna tti unnaba ditibake len Jesús‑ni kini eriabie lo yu gekeha nna eyye attu ta subi.
MAR 5:18 Atti beyapi Jesús‑ni lo barcuha nna nubiyú beria espíritu xxegwiha latini nna unnaba ditibana lenie kini ugwelhe na sanalhane.
MAR 5:19 Ttaka lee nna labí uka lebie nna ralee na: ―Beyya lisiluha ata se'e ka benne geluha, nna utixxi'a kanie iyá nu chi ben Tata Xisiha lenlu lhe utixxi'a kanie gasina gwatua lebie lu.
MAR 5:20 Nubiyúha nna bedá ttebana deyyana. Nianna udulo ttebana utixxi'ana itúba daka Decápolis ge iyá nu chi ben Jesús‑ni lenna, nna iyába ka benne binake nuha nna bebanabakanie.
MAR 5:21 Iki de chi beyapi Jesús‑ni lo barcuha nna betebie lo indatooha, besine ro'oni daka nu reha. Nianna bedetupa tteba ixe juisiru ka benne kwe'ebie. Labie nna ro'o indaha‑liba udúe.
MAR 5:22 Nianna tti bisin ttu ka nu baninna yo'o ata rudheti ka benne Israel‑ni ka tisa ge Tata Do Yebáha. Nubiyúha lána Jairo. Tti bilenna Jesús‑ni due niha, nianna biyachuna nna bedú xibini arloe,
MAR 5:23 nna unnaba ditibana lenie, rane: ―Nuila to kiaha chi tteba gatti bi'iniha. Uyáchi nna ixxua nálu ikibi kini eyakabi nna abittu gattibi.
MAR 5:24 Nianna udá tteba Jesús‑ni die lenna. Ixe juisiru ka benne danalhake bie nna rukí ya'anibake bie.
MAR 5:25 Lagwi ge ka benne danalhaha sela ttu benne nuila chi anka tsi'inu (12) ida ridobie reni.
MAR 5:26 Yalhá chi gwatebie ugíe lo ixeba ka nu runi ramedi nna chiba beyá iyába nu tee gebie betse'e loobie. Ttaka labí reyake; rutse'e loo nna adíla diana rudialhana gebie.
MAR 5:27 Tti bine ge Jesús‑ni, nianna diabie sele lagwi ge ka benne danalhaha, nianna tti ubige daka kwe'e Jesús‑ni gwattáne ro'o lari nuku benneha,
MAR 5:28 kumu rakanie: “Kwadiba ro'o xoe sattánaa nna gweyakabaa.”
MAR 5:29 Laxkala atti gwattáne ro'o xo Jesús‑ni nna loora tteba udú sii reni ridoeha, nianna ute danie deki chiba beyake.
MAR 5:30 Jesús‑ni nna tti ute danie deki nu tsitsi ra leeha chi beyoinna ttu benne, nianna tti bodeki loe rulannie lo ka benne danalhaha nna ree ka benneha: ―¿Núnni chi betettanna ro'o xoa‑ni?
MAR 5:31 Ka benne rudhetinieha nna ráke bie: ―Sa ralu, ¿núnni betettanna ro'o xoa? Ki gwa yu xeabalu aníli rukí ya'a ka benne ri'i.
MAR 5:32 Ttaka Jesús‑ni nna rulannibe abi'iba kwe'ebie kini ilánie nuxa nuha gwattána na ro'o xoeha.
MAR 5:33 Benne nuilaha nna kumu yube nu chi ukaha, aníha uka nna itú rasibanie lhe itú rixidibe ubige nna bedú xibie arlo Jesús‑ni, nianna tti utixxi'anie bie iyá tte.
MAR 5:34 Labie nna ree benne nuilaha: ―Xi'ini to, de ugía lelu deki gwadaabaa eyonia lu, de nuha nna gwa beyakabalu. Nnanna nna xen su lasi beyya. Chiba betúa nu ridakalu‑na.
MAR 5:35 Sa dula Jesús‑ni rinnebie, ttiru chi bisia ka nu daa lisi Jairo‑ni, rákana Jairo‑ni: ―Chiba utti xi'iniunnáluha. Bitturu udo doelhalu maestru‑ni ki dhabie.
MAR 5:36 Ttaka Jesús‑ni labí bedo nage ge nu ra ka nuha, nianna ree Jairo‑ni: ―Bittu gasinlu; sun tteba ugía lelu.
MAR 5:37 Nianna udá ttebe die nna lanúru nu begwelhe tsia lenie. Sunruba Pedro‑ni lhe Jacobo‑ni lhe Juan betsi Jacobo‑ni chebie.
MAR 5:38 Tti bisinke ro'o yo'o ge Jairo‑ni, nianna bilánie chi risatsa ka benne lhe bilánie ka benne ribesike lhe relen xxattakanie lhe.
MAR 5:39 Atti chi ute'e lhe'e yo'oha nna ree ka benneha: ―¿Beaka análi ruinle lhe beaka ribesi xxattale lhe? Nuila to‑ni labí utti bi'in‑ni, te'adhiba bi'in‑ni.
MAR 5:40 Ttaka ka benne se'e niha, nna ruxisilake gebie. Lee nna nu benlee nna bebealee iyábake, nianna tti ute'e ata tee nuila toha. Ute'e len ka tata nan gebiha lhe len a tsunna ka benne cheeha lhe.
MAR 5:41 Nianna tti bedaxxue ná nuila toha nna unnebie, ree: ―Talita kumi. ―Talita kumi dienna innána: Nuila to, neti rulisaa lu, beyadha.
MAR 5:42 Looraha tteba beyadha nuila toha nna bedá ttebabi, kumu chiba ankinbi tsi'inu (12) ida. Ka benne se'e niha nna uka tébakanie lhe yalhá bebanakanie lhe.
MAR 5:43 Ttaka Jesús‑ni nna bodha'an tsitsibe ree ke anuttu nu kixxi'akanie ge nu chi ukaha lhe rágabe ke: ―Gwalugo nuila to‑ni yetta.
MAR 6:1 Bedába Jesús‑ni ata dueha nna deyye lhe'esi Nazaret ata uka lasieha nna deyyagaba ka benne rudhetinieha lenie.
MAR 6:2 Tti bisia sá tti reyaka le ka benne Israel‑ni, nianna uta'a Jesús‑ni lhe'e yo'o ata rudhetike ka tisa ge Tata Do Yebáha nna uduloe rule'enie ka benne. Ixeba ka benne se'e rudo nagake gebie nna bebanabakanie, nianna ra luesike: ―¿Gá gwaxxí nuní nu raka gen‑ni? Lhe, ¿bí elha rieni nuní rapa nuní? Lhe anágaba lhe, ¿gá gwaxxína ka milagru ruinna‑ni?
MAR 6:3 ¿Laaba nuníba nuha nu ruin ka mexaha lhe ka xxilaha lhe? Lana ankana xi'in biyú María‑ni, lhe anágaba lhe rakana betsi Jacobo‑ni lhe José‑ni lhe Judas‑ni lhe Simón‑ni lhe. Anágaba lhe, ¿laaba lhe'esi geri'i‑nigaba se'e ka danniha lhe? De nuha nna bituxxukinna gebie.
MAR 6:4 Nianna ra Jesús‑ni kana: ―Ttu benne anke profeta, gaxaba diabie gwa rugwebakana lidhake. Ttaka ka nu lhe'esi geeha lhe ka nu raka luesieha, lhe anágaba ka nu se'e lhe'e yo'o geeha lhe, labí rugwekana lidhaka benneha.
MAR 6:5 De nuha nna labí uka uni Jesús‑ni ni ttu milagru lhe'esi geeha, sunruba ttu chupa ka benne rani uxxua nábie ikike nna beyonie ke.
MAR 6:6 Lee nna bebanabanie gekani kumu de labí ria lekani gebie. Iki de nuha nna tti ugwekie lhe'e iyába ka yiesi se'e abi'iba niha bele'enie ka benne.
MAR 6:7 Jesús‑ni bottupe ka benne tsi'inu (12) rudhetinieha nna udhelhe chupa chupa ka benneha. Begwebie ke lo neda ki ebeake ka espíritu satsa yu'u lati ka benne.
MAR 6:8 Nianna rabie ke: ―Bittu ichele nu ixuinle neda. Suna garroti gebale ichele. Nigaba bittu uja chuba gele lhe nigaba bittu ujale nu gole lhe anágaba bittugaba iche yieti belhiu gele.
MAR 6:9 Suna gwaracha gebale gwalulea lhe bittugaba ichele chupa kwe xole lhe.
MAR 6:10 Rágabe ke: ―Gaxaba lhe'e yo'o ata isinle, niha‑ba gwaltse'e. Axtaliba ganna chi eriale lhe'esiha, la'anialiba nna edále lhe'e yo'o ata bisinleha.
MAR 6:11 Ganna lhe'e ttu yiesi abittu ulabikana le lhe abittu udo nagakani ge nu kixxi'enle kana, la'ania nna gwaleria lhe'e yiesiha nna gwalukubi biste ni'ale, kini nuha unna liina deki Tata Do Yebáha labí uyu'u lee nu benkana. [Netiru ria, ganna chi bisia sá uin Tata Do Yebáha elhuxtisi ge ka benne se'e yiesi lo yu‑ni, la'ania labí ttela elha disa tsitsi uyú ka benne ge Sodoma lhe ka benne ge Gomorra lhe, attichula elha disa uyú ka nu abittu ulabikana leha.]
MAR 6:12 Ka benne rudhetinieha nna biriabake diake nna rigixxi'akanie ka benne ráke ke deki teeki odúna ke nna odaxxuke neda ge Tata Do Yebáha.
MAR 6:13 Lhe anágaba lhe bebeagabake ixe ka espíritu xxegwi yu'u lati ka benne lhe rigabigabake seti lati ka benne rani nna gwa reyakabake.
MAR 6:14 Herodes nu rinnabiaha binana ge Jesús‑ni kumu lhe'e iyába ka yiesi chi ugwadhi tisa ge nu runieha. Ttu chupa ka benne ráke: ―Juan benne rugadi indaha‑ba nuná chi beyaka benbie lagwi ge ka benne chi uttiha. De nuha nna ridaabie runie ka milagru.
MAR 6:15 Adíkana nna rákana: ―Elías‑niba nuná. Adíkana nna redenákana: ―Ttu ka profeta use'e itú nu reha‑ba nuná.
MAR 6:16 Tti biyienin Herodes‑ni nu ra ka benneha, nianna tti rana: ―Juan nu begadi indaha‑ba nuná, delába nu udhelhaa kini uchúkana ikiniha. Labana nuná chi beyaka benna lagwi ge ka benne chi uttiha.
MAR 6:17 Kumu kwinaba Herodes‑ni udhelhana gwadaxxukana Juan‑ni nna bexxikakana na lhe'e lisiyyaha. Aníha benna de utisa Juan‑ni na delo ni'a ge de bedo lenna Herodías nu anka nuila ge betsini Felipe‑ni. Bituxxuin Herodes‑ni kumu de ra Juan‑ni na: “Labí ga'anna edo lenlu nuila ge betsilu‑na.”
MAR 6:19 De nuha nna bedo le nuilaha Juan‑ni nna benna uttina na, ttaka labí udaana,
MAR 6:20 kumu Herodes‑ni usibinna Juan‑ni, kumu yúbana deki benneha anke ttu benne runie nu dika ixú lhe ankagabe ge Tata Do Yebáha lhe. De nuha nna biyú tsitsibana Juan‑ni nna atti rudo nagani ge benneha, nna gwa ru'uba leni ge nu rigixxi'anie naha, meskiba tti riyieninna nu rinneeha nna rudú chupana leni.
MAR 6:21 Ttaka tti bisia sá gwadoni Herodes‑ni ida, la'ania nna uxina adíru ka nu yala rise'e kwe'eniha lhe ka nu loni ge ka soldaduha lhe anágaba ka nu ra xxeni lekani se'e Galilea‑ni lhe, kini i'iya gokana lenna. La'ania nna Herodías‑ni, delába nuila ge Herodes‑ni, upana lo neda benna nu rulaba leniha.
MAR 6:22 Tti lo se'e ka Herodes‑ni ro'o mexaha, la'ania nna uta'a xi'iniunná Herodías‑ni ata se'ekanaha nna udulona ruya'ana. Herodes‑ni nna uyu'uba leni lhe ka nu se'e lenna ro'o mexaha lhe. Nianna tti rana nuila kwitiha: ―Unnababa bixaba raka lelu, neti nna gutebaa nuha gelu.
MAR 6:23 Nianna tti bodha'an tsitsi tisa geni len nuilaha, rana nuha: ―Bixaba raka lelu innabalu nna gutebaa na gelu. Meskiba salhe ka lo yu ata rinnabiaya‑ni utea gelu.
MAR 6:24 Nuilaha nna beria ttebana deyyana nna rana nan geniha: ―¿Bíla innabaa ganna? Nan geniha nna rabie na: ―Bega iki Juan nu rugadi indaha unnaba.
MAR 6:25 Nianna rigába nuila kwitiha beta'ana ata re Herodes nu rinnabiaha, nianna tti rana na: ―Looraha tte nnanna raka lasia taxxílu bega iki Juan nu rugadi indaha nna ku'ulu na lhe'e ttu ye'ena nna utelu na len neti.
MAR 6:26 Meskiba bedú si'i xxattana le Herodes‑ni, ttaka de chi bodha'an tsitsi tisa geni len nuilaha lhe de chi biyienin ka nu se'e lennaha lhe, aníoka nna labí uka dhu disana utena nu rinnaba nuilaha.
MAR 6:27 Nianna tti udhelha ttebana ttu soldadu kini tsia nuha taxxína bega iki Juan‑ni.
MAR 6:28 Soldaduha nna ugía ttebana gwachúna bega iki Juan‑ni lhe'e lisiyyaha. Nianna tti begu'una bega iki benneha lhe'e ttu ye'ena nna bogwena nuila kwitiha. Nuila kwitiha nna botena nuha len nan geniha.
MAR 6:29 Atti chi bina ka benne rudhetini Juan‑ni nu chi ukaha, nianna ugía ttebake gwaxíke benne yattiha nna bekatsike benneha.
MAR 6:30 Atti besin ka apóstol‑ni ugíake gwattixxi'akanie ka benne ka tisa ge Tata Do Yebáha, nianna betupa ttebake len Jesús‑ni nna utixxi'akanie bie ge iyá nu benke lhe iyá nu bele'ekanie ka benneha lhe.
MAR 6:31 Jesús‑ni nna ree ke: ―Sun lebi'iba gwaltá tsiari'i ata anuttu benne se'e kini eyaka lele latti. Aníha ree ke kumu ata se'ekeha ixeba benne risia lhe redá lhe, laxkala niba neda a rapake goke.
MAR 6:32 Aníha uka nna bedaxxuke barcu nna sun labake diake ata lanú benne se'e.
MAR 6:33 Ttaka ixeba ka nu bilákinna ke diake nna beyoinbiabakana ke. Nianna biria ttebakana lhe'e iyába ka yiesi se'e niha, nna ni'abakani diakana bisinkana ata isinkeha. Laxkala chila se'ekana niha atti bisinke.
MAR 6:34 Tti ugwadi Jesús‑ni lo barcuha nna bilánie chi re xxatta benne niha. Nianna gwatua lebie ke kumu se'ebake attiba ka neru to anú tee tsekina lokani. Nianna tti uduloe ixeba nu bele'enie ke.
MAR 6:35 Ttaka chi galá dia ubisa‑na nuha, nianna tti ubiga ka benne rudhetinieha nna ráke bie: ―Ttiruba chi dia ura nuní lhe gwea nna ata se'eri'i‑ni yu bisiba nuní, labí bixa tee nii.
MAR 6:36 Bedhelhala ka benne‑ni kini eyyake ata sia ka yo'o lhe'exxi o si lhe'e ka yiesi to se'e abi'iba ata se'eri'i‑ni kini tayo'oke nu goke.
MAR 6:37 Ttaka labie nna bekabilee, ree ka benneha: ―Lebi'iba gwalugwe ka benne‑ni nu goke. Ka benne rudhetinieha nna bekabike, ráke: ―¿Gasina tayo'otu nu go ka benne‑ni? Ixeni belhiu iyasinri'i; ge chupa gayua (200) sá sina teeba nuha ise'e loo kini iyo'o nu go ka benne‑ni.
MAR 6:38 Jesús‑ni nna ree ke: ―¿Balha yettaxtila chele? Gwatayúchu. Atti chi gwalannikeha nna ráke bie: ―Ne gayuruba yettaxtila nna a chupa ka belha nna.
MAR 6:39 Jesús‑ni nna ree ke: ―Gwalose'e ka benne‑ni dhi dhi lo ixxi binni ya'a‑ni.
MAR 6:40 Nianna dhi dhiba bese'e ka benneha, benne bese'eba de gayua (100) lhe benne bese'eba de tsieyona (50) lhe.
MAR 6:41 Nianna tti bedaxxu Jesús‑ni gayu ka yettaxtilaha lhe a chupa ka belhaha nna tti belhidha loe yebáha nna begwebie Tata Do Yebáha ixkixaru. Nianna tti ulhe'e lhe'e ka benneha nna begwebie ka benne rudhetinieha, kini ka benneha nna utidhike benneha len ka benne se'e niha. Aníha‑gaba benie len chupa ka belhaha, ulhe'e lhe'e ka nuha nna begwebie iyá tteke.
MAR 6:42 Iyábake utoke axtaba beyielakanie.
MAR 6:43 Iki de chi utokeha nna bottuparulake a tsi'inu (12) sumi ka yettaxtila ro'o salha'a bexxaha lhe nu bexxa ge ka belhaha lhe. Besá tí ka sumiha.
MAR 6:44 Ttiba ttu gayu mili ka benne biyúha utoke.
MAR 6:45 Iki de nuha nna ben Jesús‑ni kini beyapi ka benne rudhetinieha lo barcuha ki eneru gaake eyyake nna esinke ro'o indatooha daka nu reha, daka ata re lhe'esi Betsaida, laka lee nna richú tise ka benne se'e niha.
MAR 6:46 Tti chi beyaka uchú tise ka benneha, nianna tti ugwapie iki ttu i'iya do niha kini unne lenbie Tata Do Yebáha.
MAR 6:47 Atti chi ulhaha nna lagwi indatooha‑li chi deyya barcu ata deyya ka benne rudhetinieha. Jesús‑ni nna ttúbe beya'ane yu bisi.
MAR 6:48 Tti bilánie yalhá rate xxatta ka benne rudhetinieha ki rodháke barcuha, kumu daka arlo barcuha‑la retetsu'u beha, lee nna tti chi daa tsaniha, dedábie ata dedá ka benneha, redábie lo indaha, runie etebie loke.
MAR 6:49 Tti bilákanie bie dedábie lo indaha, nianna ukakanie ganna nu du elaba nuha. Nianna uresi'ake,
MAR 6:50 kumu iyábake rilákanie nuha nna rasibakanie. Jesús‑ni nna unne ttebe, ree ke: ―¡Tsitsi gwalikweki lele! ¡Bittu gasinle! ¡Netiba nuní!
MAR 6:51 Atti chi beyapie lo barcu ata dedákeha, nianna ure tteba beha. Lake nna uka tébakanie lhe bebana xxattakanie ge nu ukaha lhe,
MAR 6:52 kumu lake ituaba a rite dákanie ge nu uka tti begobie ka benne yettaxtilaha, kumu sa yayaba ikike.
MAR 6:53 Iki de chi beteke lo indatooha nna besinke lo yu ge Genesaret. Nianna begalhake barcuha ro'o indatooha.
MAR 6:54 Sun tteba ugwadike lo barcuha nna beyoinbia tteba ka benne se'e niha Jesús‑ni.
MAR 6:55 Nianna ugweki tteba ka benne se'e niha lhe'e iyába ka yiesi se'e abi'iba niha kini raxxíke ka benne rani nna richeke ka benneha rixuakanie ke lo breta, risin lenke ka benneha ata runake du Jesús‑ni.
MAR 6:56 Gaxaba dia Jesús‑ni, sila ritebie lhe'e ka yiesi xka'a to lhe sila ritebie lhe'e ka yiesi elha lhe, o sila ritebie ka lhe'exxi ata se'e ka benne lhe, ata ritebieha niha ruse'eke ka benne raniha ro'o ka neda nna rinnabake len Jesús‑ni, kini ugwelhe kwadiba ro'o lari nukueha udaxxu ka benneha kini eyakake. Aníha‑ba ruin ka benne raniha rudaxxuke ro'o xoeha nna reyaka ttebake.
MAR 7:1 Ka fariseo‑ni lhe attu chupa ka nu rule'ekinna ka benne nu ra lo bia bennabi bodha'an Moisés‑ni, ka nuha dákana lhe'esi Jerusalén‑ni, nna ubigakana ata du Jesús‑ni.
MAR 7:2 Tti bilákinna tsigaba anka ná ttu chupa ka benne rudhetini Jesús‑ni tti roke yetta; delába labí utí náke, labí benke ttiba labini ka benneola ge ka nu Israel‑ni ruinkana, de nuha nna riguakana bala'ana ge ka benneha.
MAR 7:3 Kumu ka fariseo‑ni lhe adíru ka nu Israel‑ni, sa ruinbakana ttiba ben ka benneola gekaniha. Ka benneola gekaniha labí kwenta go ka nuha yetta ganna abíba chi utí nákani,
MAR 7:4 lhe anágaba tti resinkana riakana ugo'o lhe'eyya, labí kwenta gokana yetta ganna abíba chi utí nákani. Ixerugaba nu labikinna ruinkana: ttibanka teeki kíkana ka kanti lhe ka xiga [ka nu rixúkinna kini ri'iyakana lhe'ekani] lhe anágaba adíru ka nu anka ge bronce ka nu rixúkinna ki riga'akana elho lhe'ekani. [Lhe anágaba, aloba teeki kíkana ka nu rise'ekana loni tti rokana yetta.]
MAR 7:5 De nuha nna ka fariseo‑ni lhe ka nu rule'ekinna ka benne nu ra lo bia bennabiha, unnaba tisakana Jesús‑ni, rákane: ―¿Beakala ka nu rudhetinlu‑na labí ruinkana nu bodha'an ka benneola geri'iha uinri'i? Ka nuná itupa tsigaba anka nákani rokana.
MAR 7:6 Lee nna bekabie ree kana: ―Lebi'i xa fariseo, labí liinle. Delo tisaba ruinle deki ankale benne tse. Gwalíbani profeta Isaías‑ni tti unnena lo ka yetsi ge Tata Do Yebáha ge nu ruinle. Lo ka yetsi geeha rabie: Ka nuní len ro'oruba ka nuní rákana deki ria lekani neti, ttaka labí gwalíkinna rakakinna kia.
MAR 7:7 Kwentaruba rudú xibikani arloa, kumu nu anka ge benne se'e yiesi lo yu‑niba rule'ekana, labí nu anka kia nuná rule'ekinna ka benne.
MAR 7:8 Kumu lebi'i rudhanbale labíru ruinle nu bodha'an Tata Do Yebáha uinri'i, ge nu labin ka benne se'e yiesi lo yu‑nila rudoruna lele ruinle, [delába rudorulana lele rigíle ka kanti lhe ka xiga ka nu ri'iyale lhe'ekinna, lhe anágaba nna ixerugaba ka luesi nuná labinle ruinle].
MAR 7:9 Rágabe kana: ―¡Lebi'i, kattipa lhe'e ruinle! ¡Rigu'uba ni'ale nu bodha'an Tata Do Yebáha uinri'i nna rudorulana lele ruinle nu chi labinle ruinle!
MAR 7:10 Ki yule Moisés‑ni bodha'anna rana: “Tsia lele ka tata nan gele” lhe rágabana: “Nu rigena iki ka tata nan geniha, ralhaba nuha gattina.”
MAR 7:11 Ttaka lebi'i nna rálale: “Ttu benne gwakaba gebie gee ka tata nan geeha: Labí aka utea nu tee kia‑ni len lebi'i, kumu iyába nu dika utea len lebi'i, Tata Do Yebáha‑la chi ga'anati ugwea bie nuní.”
MAR 7:12 Aníha ruinle kini benneha nna abitturu utee nu daa loe ugwebie ka tata nan geeha.
MAR 7:13 Aná tte nuná nna rigu'u ni'ale ka tisa bodha'an Tata Do Yebáha delo ni'a ge nu rodha'an len luesile ruinle lhe anágaba nna ixeerugaba ka luesi nuní labinle ruinle.
MAR 7:14 Nianna tti bedeaxi Jesús‑ni ka benne saa niha attu libe nna redeabie ke: ―Gwaludo naga iyále kia nna gwalutte da nu innía‑ni.
MAR 7:15 Labí nu rori'i rutsigana ri'i arlo Tata Do Yebáha, sinuki nu riria lhe'e lastolari'i nuná rutsigana ri'i arlo benneha.
MAR 7:16 [¡Ata sia nagale, gwaludo nagale ganna gwankale nu dika iyienini!]
MAR 7:17 Tti bedá Jesús‑ni ata se'e ka benne tupa niha, nianna besine lhe'e yo'oha. Ka benne rudhetinieha nna unnaba tisake bie bixa diani nu utixxi'anie keha.
MAR 7:18 Nianna ree ke: ―¿Si anágaba lebi'i, si abittugaba rite denle nu ria‑ni? ¿Si lagwa gwa rite denle deki iyába nu rori'i‑na laa nunága nuná rutsigana ri'i arlo Tata Do Yebáha?
MAR 7:19 Kumu laa lhe'e lastogari'i dia nu rori'i, lhe'e tu'ebari'i dia nuná, delola nna rebeabari'i nuná. Tti ra Jesús‑ni aníha, benna liie deki iyába nu rori'i ankana nari.
MAR 7:20 Rágabe: ―Nu riria lhe'e lastolari'i nuná rutsigana ri'i arlo Tata Do Yebáha,
MAR 7:21 kumu lhe'e lastolari'i nuná riria nu satsa rulaba leri'i, lhe nágaba nuná riria nu ruinri'i ttixka rido lenri'i nu abittu anka latselari'i, lhe nágaba nuná riria nu ruinri'i tti risári'i nu subi subi, lhe anágaba lhe'e lastogabari'i riria nu rixegwiri'i ki ruinri'i elhutti,
MAR 7:22 [lhe ruinri'i ubana lhe]. Lhe anágaba lhe'e lastogabari'i nuná riria nu raka xxatta leri'i gatta geri'i, lhe nágaba nuná riria iyá nu abittu anka tse, lhe nágaba riria ka gwen lasi, lhe iyá nu satsa ridá leri'i ruinri'i, lhe anágaba, lhe'e lastogabari'i riria nu ritisin luesiri'i, lhe nágaba nuná riria nu rinne satsari'i ge ka benne, lhe nágaba nuná riria elha ttaba ruinri'i, lhe nágaba nuná riria nu ruinri'i tti a re itá ikiri'i.
MAR 7:23 Iyá nu satsa ruinri'i‑na, lhe'e lastobari'i raka xxe nuná. Iyá nuní ruinna kini rutsigana ri'i arlo Tata Do Yebáha.
MAR 7:24 Bedába Jesús‑ni ata dueha, nianna tti die daka Tiro lhe Sidón lhe. Tti chi bisine niha, nna ute'e lhe'e ttu yo'o. Labí uka lebie nuxa unana deki doe niha, ttaka labí uka dhoe gatsi,
MAR 7:25 kumu bina tteba ttu benne nuila do ttu xi'iniunne yu'u ttu espíritu satsa latini, bine deki do Jesús‑ni niha. Nianna ugía ttebe nna bedú xibie arlo Jesús‑ni.
MAR 7:26 Benne nuilaha nna unnaba ditibe len Jesús‑ni kini ebeabie espíritu satsa yu'u lati xi'iniunneha. Benne nuilaha labí anke nu Israel, sinuki benneha dabie daka Sirofenicia
MAR 7:27 Ttaka Jesús‑ni nna bekabie ge benneha, ree: ―Begwelhaxa eyielani ka xi'inia‑ni, delába ka benne Israel‑ni. Kumu labí anka tse udaxxua yettaxtila nu dika go ka xi'inia nna udelhaa na lo ka beku to‑na.
MAR 7:28 Benne nuilaha nna bekabie ree: ―Gwalí galenlu, xa tata. Ttaka yulu axtala ka beku to‑na gwa redigagaba ka bia to‑na ka yettaxtila ro'o yuya riginni xani'a mexa ge ka nuto‑na.
MAR 7:29 Jesús‑ni nna ree benneha: ―Gwalíba nu ralu‑na. De bekabilu aná, de nuha nna xen su lasi beyya, kumu chiba beria espíritu xxegwiha lati xi'iniunnáluha.
MAR 7:30 Atti besin benne nuilaha lisieha nna gwaxxake xi'iniunneha tena, chiba beria espíritu xxegwiha latini.
MAR 7:31 Tti beyeki Jesús‑ni beriabie Tiro, nianna deyye daka Sidón nna betebie daka Decápolis ki besine ro'o indatoo ge Galilea‑ni.
MAR 7:32 Nianna bisin lenkana ttu benne ata du Jesús‑ni. Benneha anke kwechu lhe labí rilí ro'e innee lhe. Nianna unnabakana len Jesús‑ni ki ixxua nábie iki benneha kini eyake.
MAR 7:33 Jesús‑ni nna bekwitta lenie benne biyúha ata se'e ka benne ixeha, nianna tti bega'a xubene lhe'e ka naga benneha. Nianna tti bettuttu xxenie lo xubene nna utane lo lhuse.
MAR 7:34 Nianna tti belhidha loe begíe gwetsáha nna benné lebie, nianna tti unnee, ree: ―¡Efata! ―Efata dienna innána: ¡Gwaleyali!
MAR 7:35 Looraha tteba beyali ka naga benneha lhe bolhána lhuseha nna tseba unnebie.
MAR 7:36 Jesús‑ni nna ree ka benne se'e niha: ―Nuttu nu kixxi'enle ge nu chi uka‑ni. Ttaka meskiba bika ree ka benneha bittu kixxi'ake ge nu benieha, ttaka ka benneha nna adíla benke utixxi'abake.
MAR 7:37 Iyábake bebana xxattakanie nna ráke: ―¡Tseba anka iyá nu runie! ¡Redhalie naga ka benne anka kwechu lhe redhalie ro'o ka benne ankake biría lhe!
MAR 8:1 Attu sá bedetupa ixe juisiru ka benne ata du Jesús‑ni, ttaka labí nu goke tee. Nianna tti uxie ka benne rudhetinieha nna ree ka benneha:
MAR 8:2 ―Ratua lasia ka benne se'e nii, kumu chiba uka tsunna ubisa se'eke len neti nna birula tee bixa goke.
MAR 8:3 Ganna suna anába ankake edhelhaa ke ki eyya lisike, la'ania nna ka satú leke, kumu adí ka benne‑ni idittuba dáke.
MAR 8:4 Ka benne rudhetinieha nna bekabike, ráke: ―¿Gála saxxíri'i nu go ka benne‑ni? Ki lo yu bisiba nuní se'eri'i.
MAR 8:5 Nianna ra Jesús‑ni ke: ―¿Balha yettaxtila chele? Lake nna bekabike ráke: ―Gasirubake chetu xa.
MAR 8:6 Nianna benie kini bese'e ka benne tupa niha lo yu nna tti bedaxxue gasi ka yettaxtilaha nna iki de chi begwebie ixkixaru len Tata Do Yebáha, nianna tti ulha'abie lhe'e ka yettaxtilaha nna begwebie ka benne rudhetinieha kini kidhike benneha ge iyá ka benne se'e niha. Ka benne rudhetinieha nna aníha‑ba benke.
MAR 8:7 Ka benneha chegabake ttu chupa ka belha to nna iki de chi begwe Jesús‑ni ixkixaru len Tata Do Yebáha, nianna tti redee ka benne rudhetinieha kidhigabake ka belhaha kini go ka benne se'e niha.
MAR 8:8 Iyába ka benneha utobake axtaba beyielakanie nna bottuparulake a gasi ka sumi ka benne ro'o salha'a bexxaha.
MAR 8:9 Tu ttu ttapa mili ka benneha utoke. Nialiba nna tti bodhíbie ka benneha deyyake.
MAR 8:10 Lee nna beyapi ttebe lo barcuha lenie ka benne rudhetinieha nna bisinke daka Dalmanuta.
MAR 8:11 Tti bisin ka fariseo‑ni ata du Jesús‑ni, nianna udulo ttebakana uxaka lenkane. Raka lekani unie ttu milagru. Aníha ruinkana kini ku'ukane prueba ki ula'a ganna gwalí Tata Do Yebáha udhelhe bie.
MAR 8:12 Jesús‑ni nna benné lebie nna ree: ―¿Beaka raka le ka benne se'e nnanna ilákanie unia ttu milagru? Netiru ria: labí unia bixa ttu milagru ki ilákanie.
MAR 8:13 Niha‑ba bese'ebie ka fariseo‑ni nna beyapie lo barcuha. Betebie lo indaha nna besine ro'oni daka nu reha.
MAR 8:14 Ka benne rudhetinieha nna bixulhabakanie icheke nu goke, sunruba ttu túbi yettaxtila cheke lo barcuha.
MAR 8:15 Nianna ra Jesús‑ni ke: ―Gwaluyú gele ka iyietile kua dii ge ka fariseo‑ni lhe kua dii ge Herodes‑ni lhe.
MAR 8:16 Nianna tti ra luesike: ―Ganna de abíba yettaxtila cheri'i, de nuha‑ba nna rabie ri'i aná.
MAR 8:17 Ttaka Jesús‑ni nna ute dábanie nu rákeha, nianna tti ree ke: ―¿Beaka ra luesile deki labí yettaxtila tee? ¿Si itua ttu a rite denle lhe a rutte dale nu ria‑ni? ¿Laa tuttíruba yaya ikile?
MAR 8:18 ¿Laaba gwa yu'uba iyya lole nna a rilenle lhe gwa siaba nagale nna a riyieninle? ¿Si lagwa gwa radú lele
MAR 8:19 tti ulha'aya lhe'e gayu ka yettaxtila uto gayu mili ka benneha? La'ania, ¿a balha sumi besá ka yettaxtila ro'o salha'a bottupaleha? Lake nna bekabike, ráke: ―A tsi'inu sumi (12).
MAR 8:20 Nianna redenee: ―Atti ulha'aya lhe'e gasi ka yettaxtila uto ttapa mili ka benneha nna, ¿a balha ka sumiha besá ka yettaxtila ro'o salha'a bottupaleha? Lake nna bekabike, ráke: ―A gasi sumi.
MAR 8:21 Nianna ree ke: ―¿Ganna aníha nna beakala a rite denle?
MAR 8:22 Tti besin ka Jesús‑ni lhe'esi Betsaida, ka benne ge niha nna bisin tteba lenke ttu benne lo xua ata du Jesús‑ni, nianna unnaba ditibake lenie kini kane ka iyya lo benneha.
MAR 8:23 Lee nna bedaxxu ttebe ná benne lo xuaha nna uleabie benneha ro'o yiesiha. Nianna tti bettuttu xxenie kini utabie ka iyya lo benneha lhe uxxua nábie ikie lhe, nianna tti unnaba tise benneha, ree: ―¿Si bi gwa chi relenlu ttuxka'a to?
MAR 8:24 Benneha nna belannie nna ree: ―Chiba reláti ka benne, ttaka rula'abati ke ttiba ttu yaga ridá.
MAR 8:25 Nianna tti bedegan Jesús‑ni ka iyya lo benneha attu libe. La'anialiba nna chi beyaka ka iyya loeha nna belá tsenie iyá tte.
MAR 8:26 Nianna tti bedhelha Jesús‑ni benneha deyye lisie nna ree bie: ―Abittu sata'alu lhe'esi‑ni [lhe abittugaba kixxi'enlu ka benne se'e lhe'esi‑ni lhe].
MAR 8:27 Delola nna bederia Jesús‑ni dia lenie ka benne rudhetinieha, diake daka ta se'e ka yiesi to se'e daka Cesarea ge Filipo. Tti yu'uke nedaha nna unnaba tise, ree ke: ―¿Nú ra ka benne deki ankaa?
MAR 8:28 Ka benneha nna bekabike, ráke: ―Ttu chupa ka benne ráke deki lu ankalu Juan benne begadi indaha nna attu a chupake nna redenáke deki lu ankalu Elías, nna adíke nna ráke: “Ttu ka benne uka profeta ge Tata Do Yebáha‑ba nuná.”
MAR 8:29 Nianna ra Jesús‑ni ke: ―Lebi'i nna, ¿núla rale deki ankaa? Pedro‑ni nna bekabina rana: ―Lu ankalu Cristu benne chi ga'anani Tata Do Yebáha idhelhe.
MAR 8:30 Jesús‑ni nna bodha'an tsitsie, ree ke: ―Anuttu nu gale deki neti ankaa Cristu.
MAR 8:31 Nianna tti udulo Jesús‑ni rabie ke: ―Neti benne daya yebáha teeki tate xxattaa uyúa elha disa. Ka benneola geri'iha lhe ka nu loni ge ka bixxudiha lhe, anágaba ka nu rule'ekinna ka benne nu ra lo bia bennabi bodha'an Moisés‑ni lhe, ka nuha ku'u ni'akani neti lhe uttikana neti lhe. Ttaka iki de chi beyonna ubisa uttiaha, la'ania nna eyaka benbaa attu libe.
MAR 8:32 Lhixxa rába utixxi'e nuha. Laxkala Pedro‑ni uxine attu ta subi nna utisane.
MAR 8:33 Ttaka lee nna bodeki loe ata se'e adí ka benne rudhetinieha nna bedhaka dise Pedro‑ni, ree na: ―¡Ubi'etta kwe'a xa nu xxegwi! Kumu lu nu anka ge ka benne se'e yiesi lo yu‑niba do ikilu; labí do ikilu nu anka ge Tata Do Yebáha.
MAR 8:34 Nianna tti uxie iyába ka benne se'e niha lhe ka benne rudhetinieha nna ree ke: ―Ganna nuxa ttúle raka lele etenalhale neti, teeki eria iki eria lele, meskila bixa satele nna gwaludaxxu kurusi gele nna gwaltá gwetenalha neti.
MAR 8:35 Kumu ttu benne ganna abittuba raka lebie bixa satebie de etenalhe neti, benneha nnittilee, delába labí aka ben benneha arlo Tata Do Yebáha. Ttaka benne eria iki eria lebie meskila bixa satebie delo ni'a kia lhe delo ni'a ge ka tisa ge Tata Do Yebáha lhe, benneha gwalálee.
MAR 8:36 Kumu, labí ixú nuha ganna ttixka ttu benne dhaabie uin gebie iyá nu se'e yiesi lo yu‑ni, ttaka arlo Tata Do Yebáha nna tsia nnittilee.
MAR 8:37 Nigaba labí aka geri'i go'ori'i elha nabani geri'i, kini anáchu aka benri'i ttu dia lii arlo Tata Do Yebáha.
MAR 8:38 Kumu ganna ttu benne ettunie kia lhe ettunie ge ka tisa kia‑ni arlo ka nu chi ruin satsa se'e nnanna, lhe chi rudhá ikikani Tata Do Yebáha, anágaba neti benne daya yebáha ettugabati gekani ganna chi dedáya lhe'e xiani ge Tata kiaha len ka anjeli geeha.
MAR 9:1 Rágaba Jesús‑ni ke: ―Netiru ria: ttu chupale se'ele nii nnanna labí chi uttile axtaliba ganna chi bilenle isia Tata Do Yebáha innabie lhe ra tsitsi lebie lhe.
MAR 9:2 Iki de chi ute xxupa ubisaha nna tti ugwapi Jesús‑ni iki ttu i'iya xeni do niha, chebie sun Pedro‑niba lhe Jacobo‑ni lhe Juan‑ni lhe. Niha besea lobie arlokani.
MAR 9:3 Ka xoeha raka lhalhabakana lhe sitsi túba beyakakana lhe. Ni ttú benne do yiesi lo yu‑ni dhaabie otsitsie ttu lari atti beyaka ka xo Jesús‑ni la'ania.
MAR 9:4 Lengwa chi bela'akinna uka xxe Elías‑ni lhe Moisés‑ni lhe, se'eke gwenne len Jesús‑ni.
MAR 9:5 Pedro‑ni nna rana Jesús‑ni: ―Maestru, ¡gwen tte uka se'etu nii! Usiatu tsunna ka yo'o lhaga gele: ttu gelu nna ttu ge Moisés‑ni nna attu ge Elías‑ni nna.
MAR 9:6 Aníha‑ba rana kumu de labí yuna bixa innána de si rasilakinna.
MAR 9:7 Nianna tti bebe tteba ttu bea ata se'ekeha. Lhe'e beaha nna biyien tsi'i ttu benne unnebie, ree: ―Benne‑ni anke Xi'inia lhe rakati gebie lhe. Ge benne‑ni gwaludo nagale.
MAR 9:8 Ttiruba nna ttu nnelaba benitti loo ka benneha, laxkala atti bodeki lokani belannikana abi'iba kwe'ekani nna nurua ka benneha bilákinna, a sunruba Jesús‑ni du niha.
MAR 9:9 Tti deyyake reyadike lati i'iyaha nna ra Jesús‑ni kana: ―Nuttu nu kixxi'enle ge nu bilenle‑ni axtaliba ganna neti benne daya yebáha chi beyaka bania attu libe lagwi ge ka benne chi uttiha, la'anialiba nna chi dina kixxi'ale.
MAR 9:10 Lake nna labí utixxi'ake, gwa ulu'uba leke nuha. Sun raba luesike: “¿Bíla dianie tti ree deki eyaka benbe attu libe?”
MAR 9:11 Nianna tti unnaba tisake Jesús‑ni, ráke bie: ―¿Beakala ka nu rule'ekinna ka benne nu ra lo bia bennabi bodha'an Moisés‑ni nna rákana deki Elías‑ni teeki esie lade'a tte, niala nna tti isia Cristuha?
MAR 9:12 Jesús‑ni nna bekabie, ree kana: ―Gwalí galá deki Elías‑ni esie lade'a tte ki ose'e tsebie iyá nu se'e. Ttaka ganna aníha aka nna, ¿beakala ra lo ka yetsi ge Tata Do Yebáha deki neti benne daya yebáha teeki sate xxattaa lhe ku'u ni'akani neti lhe?
MAR 9:13 Ttaka neti ria, Elías‑ni chiba bita benneha nna bedhakabakane attiba ukaba lekani, benbakana attiba chi ga'anna lo ka yetsi ge Tata Do Yebáha satebie.
MAR 9:14 Tti besin Jesús‑ni lenie a tsunna ka benneha ata se'e adíru ka benne rudhetinieha, nianna gwaxxakake ixe juisiru ka benne chi tupake abi'iba kwe'e ka benneha. Niha‑gaba se'e ka nu rule'ekinna ka benne nu ra lo bia bennabi bodha'an Moisés‑ni. Ka nuha ridaka lenkana ka benne rudhetinieha.
MAR 9:15 Ka benne se'e niha nna tti chi bilákanie dedá Jesús‑ni nna iyábake bebanakanie, nianna biresu ttebake gwatsáke bie ki gwagweke bie padiuxi.
MAR 9:16 Jesús‑ni nna unnaba tise ka benne rudhetinieha, ree ke: ―¿Bíunna ridaka lenle ka nuná?
MAR 9:17 Ttu benne sela lhe'e ka benne tupa niha nna bekabie ree: ―Xa tata maestru, laa chea xi'in biyúa‑ni len kwinalu. Yu'u ttu espíritu xxegwi latibi nna bodha'anna bi biría, nuní runi ki bittu raka innebi.
MAR 9:18 Gaxaba dubi rettina gebi nna tti rurixxi lona bi ribeana kuchina ro'obi, lhe raka rriba lo layabi. Nianna tti rodá yaga ttebana latibi. Chi unnabaa len ka benne rudhetinlu‑ni kini ebeake espíritu xxegwi‑ni latibi, ttaka labí udaake.
MAR 9:19 Jesús‑ni nna ree ka benneha: ―¡Aalexa nu a ria leni! ¿Nukalila sa dhua len lebi'i? ¿Nukalila sa utto uchíaya ge nu ruinle? Daka aní gwataxxí nu kwiti‑na.
MAR 9:20 Nianna tti gwaxxíke nu kwitiha, ttaka tti bilani espíritu yu'u lati nu kwitiha Jesús‑ni, nianna bexxidi ttebana nu kwitiha, nna betesina na lo yu, lhe ribeana kuchina ro'oni lhe.
MAR 9:21 Jesús‑ni nna unnaba tise tata ge nu kwitiha, ree benneha: ―¿Si isá chi ridakabi nuní? Benneha nna bekabie ree: ―Attiliba ankabi nutoha xa.
MAR 9:22 Ixe lidú chi bedelhana bi lo gi lhe bedelhana bi lhe'e inda lhe, ruinna uttina bi. Laxkala ganna gwaka gelu uinlu ttu bixa, gwatuachi lelu ri'itu lhe betechi nálu len ri'itu.
MAR 9:23 Jesús‑ni nna bekabie ge benneha, ree: ―¿Gasina nuha nna innálu: “Ganna gwaka gelu”? Neti ria, nu ria leniha gwakaba iyába nu innabana.
MAR 9:24 Tata ge nu kwitiha nna unne ttebe idisa, ree: ―¡Gwa ria galá lasia! ¡Rinnabaa len kwinalu, akachi lenlu neti kini tsia chiettiru lasia!
MAR 9:25 Tti bilani Jesús‑ni adíla chi rituparu ka benne, nianna bedhaka dise espíritu satsaha, ree nuha: ―¡Espíritu kwechu lhe biría lhe, neti rulisaa lu! ¡Beria lati nu kwiti‑ni nna bitturu eteta'alu latini!
MAR 9:26 Espíritu satsaha nna ribesi'abana, nianna tti bodoxxidi xxattana lati nu kwitiha attu libe, niala nna tti beriana. Nu kwitiha nna ttiba ttu nu yatti beya'anna, laxkala ixeba ka benne ráke deki uttibana.
MAR 9:27 Ttaka Jesús‑ni nna bedaxxue ná nu kwitiha nna bechidhe na. Nu kwitiha nna beyadha ttebana bedúna.
MAR 9:28 Iki de nuha nna uta'a Jesús‑ni lhe'e ttu yo'o. Tti chi due niha sun lenbe ka benne rudhetinieha, nianna tti unnaba tisa ka benneha, ráke bie: ―¿Beakala ri'itu nna a udaatu ebeatu espíritu satsaha?
MAR 9:29 Lee nna bekabie, ree ke: ―Luesi espíritu xxegwi‑na labí kwenta eria nuná, ganna abíba innabari'i len Tata Do Yebáha [lhe ganna abíba utte ubina lhe'eri'i lhe].
MAR 9:30 Bedábake ata se'ekeha nna beteke daka Galilea‑ni, ttaka Jesús‑ni nna labí raka lebie una ka benne deki rekike niha,
MAR 9:31 kumu lee raka lebie ule'enie ka benne rudhetinieha, nianna ree ke: ―Neti benne daya yebáha utekana neti lasi ná ka nu uttikana neti, ttaka ganna chi beyonna ubisa uttiaha, la'ania nna eyaka benbaa attu libe.
MAR 9:32 Ttaka lake nna labí rite dákanie ge nu reeha nna rasibakanie innaba tisake bie.
MAR 9:33 Tti chi besinke lhe'esi Capernaum, atti chi se'eke lhe'e yo'oha nna unnaba tisa Jesús‑ni ka benne rudhetinieha, ree ke: ―¿Bí ge nuha ridaka len luesile tti deyu'uri'i nedaha?
MAR 9:34 Ttaka lake nna siiba ukake labí bekabike, kumu atti deyu'uke nedaha ridaka len luesike ge nuxake ankake nu ra xxeniru leni.
MAR 9:35 Nianna tti urebie nna uxie ka benne tsi'inu (12) rudhetinieha nna ree ke: ―Ganna nuxa ttúle raka lele akale nu loni delo iyále, benne ake nu loniha labí unie deki ra xxeni lebie, akalee nu ixúni iyále.
MAR 9:36 Nianna tti bedaxxue ttu nuto bedúe nuha lagwi geke nna tti ulhenie bi'iniha nna ree ke:
MAR 9:37 ―Nuxaba benne de ria lebie neti, ganna ulabie ttu luesi nuto‑ni, neti nuha rulabi benneha, nna benne ulabie netiha, laa netiga nuha rulabie, Tata kia benne udhelhe netiha, benneha nuha rulabie.
MAR 9:38 Juan‑ni nna rana Jesús‑ni: ―Maestru, chi bilentu ttu nubiyú reki naa rudettina lu tti rebeana ka espíritu xxegwi yu'u lati ka benne. Ttaka ri'itu nna chi besunatu kini abitturu uinna aná, kumu de labí rekina len ri'i.
MAR 9:39 Ttaka Jesús‑ni nna ree kana: ―Bittu usunale ebeana ka espíritu‑na. Kumu lanú ttu benne do rudettie neti tti runie ttu milagru, delo nna eyekie innebie kia.
MAR 9:40 Kumu benne abittu rigu'u ni'e ri'i, benneha gwa dube len ri'i.
MAR 9:41 Netiru ria, nuxaba benne ganna utebie kwadiba ttu xiga inda i'iyale de ankale benne ria lele neti, de nu unieha nna gugweba Tata Do Yebáha benneha nu tse ralhe dhie.
MAR 9:42 ’Nuxaba benne ganna unie dhi yiebie ttu ka benne abittu ra xxeni leke; delába ttu ka benne ria leke neti, ganna benneha unie dhi yiebie ttu ka benneha ki uinke nu satsa, netiru ria, tserula taríane uxxigakana yienie ttu íyya ge mulinu nna udelhakane lhe'e indatooha.
MAR 9:43 Ganna nálu‑na abittuba daa siina, nnelaba ruinlu ttu bixa nu satsa lenna, tsa ttela uchú nuná, kumu tserula taríana lu esinlu ata aka benlu ttu dia liiha anka choku nálu, a laa kila esinlu len ixpa lha'a nálu ata uyúlu elha disa tsialu lo giha, delába gi nu abittuba reyola loniha nu satíaba rite loniha.
MAR 9:44 [Niha labí ratti ka bedua‑na, lhe nigaba labí reyola lo giha lhe.]
MAR 9:45 Lhe anágaba ni'alu‑na ganna abittuba ridú siina, nnelaba ruinlu ttu bixa nu satsa lenna, tsa ttela uchú nuná, kumu tserula saríana lu esinlu ata aka benlu ttu dia liiha anka choku ni'alu, a laa kila esinlu len ixpa lha'a ni'alu ata uyúlu elha disa nna iru'unalu tsialu lo giha, gi nu abittu reyola loniha, nu satíaba rite loniha.
MAR 9:46 [Niha labí ratti ka bedua‑na lhe nigaba labí reyola lo giha lhe.]
MAR 9:47 Anágaba ganna iyya lolu‑na rixuinlu na ki ruinlu ttu nu satsa, tsa ttela ulea nuná kumu tserula taríana lu esinlu ata rinnabia Tata Do Yebáha suna len ttu lha'aba iyya lolu, a laa kila esinlu leni ixpa lha'a lolu ata uyúlu elha disaha nna iru'unalu tsialu lo giha.
MAR 9:48 Niha labí ratti ka bedua‑na lhe nigaba labí reyola lo giha lhe.
MAR 9:49 ’Kumu iyába ka benne, giha nuha uinna ki tsettike ixe ttiba ttu deti.
MAR 9:50 Deti‑na tseba anka nuná, ttaka ganna deti‑na itua ixe geni, la'ania nna, ¿gasina uinri'i kini eyona ixe? De nuha nna latsiru gwaluni. Elha ruin gele‑na akana attiba ttu deti. Ttiba deti‑na rugwena ixí ge ttu elho, aníha‑ba lebi'i latsiru gwaltse'e, bittu ttilha len luesile.
MAR 10:1 Bedába Jesús‑ni Capernaum nna diabie daka Judea, daka attu ladu ro'o yoo Jordán‑ni. Nianna bedetupa tteba ixeru ka benne abi'iba kwe'ebie. Lee nna attiba chi labinie runie nna bededulo ttebe rodole'enie ka benneha ka tisa ge Tata Do Yebáha.
MAR 10:2 Nianna tti ubiga ttu chupa ka fariseo. Sun tteba ruinkana kini ku'ukane prueba, de nuha nna unnaba tisakane, rákane: ―¿Si gwaka udhá iki ttu nubiyú nuila geni?
MAR 10:3 Lee nna bekabie gekani ree: ―¿Bíla ra lo bia bennabi bodha'an Moisés‑ni len lebi'i?
MAR 10:4 Lakana nna bekabikana rákane: ―Lo bia bennabi bodha'an Moisés‑ni, gwa rugwelhabana deki nubiyúha gwakaba ilhidhana ttu yetsi ata inná lo nuha deki gwakaba ela'ana len nuila geniha. La'ania nna gwakaba udhá ikini nuilaha.
MAR 10:5 Jesús‑ni nna ree kana: ―Moisés‑ni bodha'an galábie aka aníha kumu de lebi'i labí rieninle.
MAR 10:6 Ttaka Tata Do Yebáha, ttili ure yiesi lo yu‑niha, nuila lhe nubiyúba lhe benie ka benne.
MAR 10:7 De nuha nna teeki udhana nubiyúha ka tata nan geniha nna utsá náni len nuila geniha
MAR 10:8 kini akakana ttisidiba ttúba benne. Laxkala labíru ankakana chupa, sinuki ttúba benne chi akakana.
MAR 10:9 Laxkala ka nu chi beketi Tata Do Yebáha, labí dika etsila ttu benne kana.
MAR 10:10 Tti chi se'eke lhe'e yo'oha nna bedennaba tisa ka benne rudhetinieha bie attu libe ge nu chi unneeha.
MAR 10:11 Jesús‑ni nna rabie ke: ―Ganna si ttu nubiyú udhá ikini nuila geniha nna edo lenna attu nu subi, la'ania nna satsaba nuha chi uin nubiyúha.
MAR 10:12 Lhe anágaba nuilaha, ganna si udhá ikini nubiyú geniha nna edína attu nubiyú subi, satsagaba nuha chi uin nuilaha.
MAR 10:13 Bisingaba ka benne len ka nuto kini uxxua ná Jesús‑ni ikikabi, ttaka ka benne rudhetinieha nna rudhaka disalake ka benne cheke ka bi'iniha.
MAR 10:14 Tti bilani Jesús‑ni ruin ka benneha aníha, nianna bituxxunie nna ree ke: ―Gwalugwelha ka binto‑na itakabi len neti nna abittu usunale. Kumu ka benne ruinke tti ruin ka binto‑na, luesi ka benne‑na ralhake akake ka benne innabia Tata Do Yebáha ke.
MAR 10:15 Netiru ria, ganna ttu benne abíba unie tti runi ttu nuto ugwelhe innabia Tata Do Yebáha bie, benneha labí ake nu innabia Tata Do Yebáha.
MAR 10:16 Nianna tti rudaxxue ka bintoha rilhenie kabi nna tti rixxua nee ikikabi, rinnabe elha nabani gekabi len Tata Do Yebáha.
MAR 10:17 Chiba dha Jesús‑ni tsie, ttiruba nna gwexunniba bisin ttu nubiyú nna bedú xibini arloe nna rane: ―Maestru, lu ankalu benne tse. Unáchu, ¿bíla anka nu unia kini satíaba aka bania arlo Tata Do Yebáha?
MAR 10:18 Jesús‑ni nna bekabie geni, ree: ―¿Beaka ralu deki ankaa benne tse? Lanú ttu benne do anke benne tse, sunruba Tata Do Yebáha gwanke benne tse.
MAR 10:19 Lu chiba yulu nu boka'an Tata Do Yebáha uinri'i, tti ree: Bittu akalu nu runi elhutti, lhe bittu dho lenlu nu abittu anka latselalu, lhe anágaba bittu lhanalu, lhe bittu kwentaba usialu iki ka benne deki benke ttu bixa, lhe anágaba bittu kualu bixa tee ge ttu benne, lhe tsiagaba lelu ka tata nan gelu lhe.
MAR 10:20 Nubiyúha nna bekabina gee, rane: ―Maestru, ttili ankaa nu kwiti toha chi rudoa tisa ge iyá nu ralu‑na.
MAR 10:21 Jesús‑ni nna begíabie loni nna besi'inie na, nianna tti rabie na: ―A sun tte attu nu riyasa uinlu: beyya nna betto'o iyá nu tee gelu nna belhiu ge nuha nna begwe ka benne abittu geke tee. Ganna lu uinlu aníha, la'ania nna gwattaba elha tse gelu yebáha. La'anialigaba nna chinka utá betenalha neti.
MAR 10:22 Ttaka nubiyúha, tti biyieninna nu rabie naha, nianna si'iba bedúna leni deyyana kumu de tee xxatta geni.
MAR 10:23 Nianna tti belanni Jesús‑ni abi'iba kwe'ebie nna ree ka benne rudhetinieha: ―Gáruba tsitsi anka ki isin ka nu tee gekinna akakana benne innabia Tata Do Yebáha.
MAR 10:24 Ka benne rudhetinieha nna bebanabakanie ge nu reeha. Jesús‑ni nna redeabie ke: ―Xi'ini to, ka benne ruxxen leke ge nu tee geke, gáruba tsitsi anka ki isinke akake benne innabia Tata Do Yebáha.
MAR 10:25 Adírula satti ga'a ttu camellu lhe'e yieru do xan ttu yoxa attichula ga'a ka benne tee geke ki akake nu innabia Tata Do Yebáha.
MAR 10:26 Ka benne rudhetinieha nna adikala rebanakanie, nianna ra luesike: ―Ganna aníha nna, ¿nú tteba dhaana esin lenna Tata Do Yebáha?
MAR 10:27 Nianna tti belanni Jesús‑ni loke nna ree ke: ―Len ka benne se'e yiesi lo yu‑ni abittu galá aka, ttaka len Tata Do Yebáha iyába gwakaba.
MAR 10:28 Pedro‑ni nna udulona rane: ―Biyúruga, ri'itu chiba bedhá ikitu iyába nu tee getu nna danalhatu lu.
MAR 10:29 Jesús‑ni nna bekabie ree: ―Netiru ria, nuxaba benne ganna bedhá ikie yo'o geeha lhe ka betsieha lhe ka daneha lhe ka tata nan geeha lhe, anágaba ganna bedhá ikie nuila geeha lhe ka xi'inieha lhe ka lo yu geeha lhe de danalhe neti, lhe de ria lebie ka tisa ge Tata Do Yebáha lhe,
MAR 10:30 benneha, nnanna doe yiesi lo yu‑ni gayua (100) libe‑la edíe nu bedhá ikieha, delába edíe ka yo'o lhe ka betsie lhe ka dane, lhe anágaba edíe ka tata nan gee lhe edíe ka xi'inie lhe ka lo yu gee lhe, anágaba meskila sanookane urio lákane, ttaka nu si daa nna satíaba aka benbie arlo Tata Do Yebáha.
MAR 10:31 Ttaka ixe ka nu ra xxeni lekani nnanna, la'ania nna eyakakana ka nu abittu ra xxeni lekani, nna ka nu abittu ra xxeni lekani nnanna, ka nuha‑la eyakakana ka nu ra xxeni lekani la'ania.
MAR 10:32 Yu'ubake neda diake Jerusalén‑ni nna daneruba Jesús‑ni lo ka benne rudhetinieha. Ka benneha nna rebanabakanie lhe itú rasibakanie danalhake bie. Nianna tti bedeaxie sun ka benne tsi'inuha‑ba (12) nna utixxi'anie ke nu satebie.
MAR 10:33 Nianna ree ke: ―Gwaluyúruga, chiba diari'i isinri'i Jerusalén‑ni. Neti benne daya yebáha nna chiba dabigana utekana neti lasi ná ka nu loni ge ka bixxudiha lhe lasi ná ka nu rule'ekinna ka benne nu ra lo bia bennabi bodha'an Moisés‑ni lhe. Ka nuha nna urixxi ukinnibakana neti kini gattia, nianna tti uttekana neti lasi ná ka nu abittu ankakana nu Israel.
MAR 10:34 Ka nuha nna uxisikana kia lhe ukulhakana neti lhe, anágaba nna uttuttugaba xxenkani loa, nianna tti uttikana neti. Ttaka ganna chi eyonna ubisaha, la'ania nna eyaka benbaa attu libe.
MAR 10:35 Jacobo‑ni lhe Juan‑ni lhe, lakana ankakana xi'in Zebedeo‑ni. Ixpabakana ubigakana ata du Jesús‑ni nna rákane: ―Maestru, raka letu uinlu nu innabatu.
MAR 10:36 Lee nna ree kana: ―¿Bí raka lele unia?
MAR 10:37 Lakana nna rákane: ―Ugwelhachilu ri'itu kwiatu gaxxa kwe'elu ganna chi esinlu yebáha ata innabialuha, ttutu dhotu daka ná benlu nna attutu nna dhotu daka ná yattilu.
MAR 10:38 Jesús‑ni nna ree kana: ―Lebi'i labí yule nu rinnabale‑na. ¿Si gwadaale uyúle luesi elha disa uyúa‑ni lhe si gwadaale satele luesi nu satea‑ni lhe?
MAR 10:39 Lakana nna rákane: ―Ila. Gwadaa galátu. Lee nna ree kana: ―Gwalí galá, gwadaabale uyúle luesi elha disa uyúa‑ni lhe satele nu satea‑ni lhe,
MAR 10:40 ttaka nu rale deki ugwelhaa le kwiale, ttúle daka ná bania lhe attule daka ná yattia lhe, labí neti ralhaa ugwelhaa le kwiale niha, sinuki nuná ankana ge ka benne chi ga'anani Tata Do Yebáha kwiake kwe'a niha.
MAR 10:41 Tti biyienini a tsii ka benne rudhetinieha nu rinnaba Jacobo‑ni lhe Juan‑ni lhe, nianna bisa'akanie len ka benneha.
MAR 10:42 Jesús‑ni nna beyaxie ke nna ree ke: ―Lebi'i gwa yúbale, ka nu rinnabia lhe'e ka yiesi dittu‑na, rinnabiabakana ka benne gekani attiba rakaba lekani lhe anágaba ka nu ra xxeni lekani se'e lhe'e ka yiesi‑na, nu rábakana raka.
MAR 10:43 Ttaka lebi'i labí aná dika udhaka luesile. Lebi'i nu uinlale, ganna nuxa ttúle raka lele akale nu ra xxeni leni delo iyále, benne inná xxeni leha, benneha‑la ake benne ixúni adíle,
MAR 10:44 lhe anágaba benne raka lebie ake nu loni gele, lalee ake attiba ttu nu to'o lo sina ixúe ute nábie len iyá ttele.
MAR 10:45 Kumu anágaba neti benne daya yebáha laa dagaa yiesi lo yu‑ni ki ixúti ka benne uinke nu innía, sinuki dalaa kini ixúa ute náya lenke lhe daya kini gattia kixaa ge ka tulha ruin ka benne, ki odiláya ixeke.
MAR 10:46 Bisinba Jesús‑ni lenie ka benne rudhetinieha lhe ixe juisiru ka benne lhe'esi Jericó. Tti chi deyyake eriake lhe'esiha, ro'o neda deyyakeha re ttu nubiyú a raka ilenna, rinnabana belhiu. Nubiyúha lána Bartimeo. Bartimeo‑ni ankana xi'in ttu benne tee lábie Timeo.
MAR 10:47 Tti ute den Bartimeo‑ni deki Jesús ge Nazaret‑niba nuha utee niha, nianna tti unnena idisa, rana: ―¡Jesús benne datia David, gwatuachi lelu neti!
MAR 10:48 Nianna ixeba ka benne bedhaka disake nubiyúha kini eyaka siina, ttaka lana nna adíla idisa uresi'ana, rana: ―¡Benne datia David, gwatuachi lelu neti!
MAR 10:49 Nianna tti uleda Jesús‑ni nna udhelhe kini gwalisake na. Ka benneha nna gwaxxíke benne lo xuaha nna ráke bie: ―Tsitsi uleki lelu nna udú lii. Chi raxie lu.
MAR 10:50 Benneha nna bedelha bixxie lari nukueha nna gintsaba udú liie, nianna tti die ata du Jesús‑ni.
MAR 10:51 Jesús‑ni nna unnaba tise benneha, ree bie: ―¿Bí raka lelu udhakaa lu? Benne xua loeha nna ree: ―Maestru, raka lasia eyali ka iyya loa‑ni.
MAR 10:52 Lee nna ree benneha: ―Chinka beyya. De ugía lelu deki gweyakabalu, de nuha nna chiba beyakalu. Looraha tteba beyali ka iyya lo benneha, nianna dia ttebe danalhe Jesús‑ni.
MAR 11:1 Tti chi isin ka Jesús‑ni lhe'esi Jerusalén‑ni, gaxxaba ata re lhe'esi Betfagé lhe Betania lhe, daka ata do i'iya ata daa ka ya olivuha, nianna tti udhelha Jesús‑ni chupa ka benne rudhetinieha,
MAR 11:2 ree ke: ―Gwaltsia lhe'e yiesi to re arlori'i‑ni. Ganna chi uta'ale lhe'e yiesi‑na nna saxxaka ttebale nalha ttu burru to, ttu nu lanú nu chi udona kwe'eni. Gwalidhasi yienni nna gwaltá lenna.
MAR 11:3 Ganna nuxa innaba tisana le, gana le: “¿Beaka ridhasile yien burru to‑na?” Aní gwaligá na: “Jesús benne anke Xxanari'iha‑ba riyasanie nuní, delola nna gwetedha'an tte gee na.”
MAR 11:4 Nianna dia ttebake nna gwaxxakabake burru toha, nalhana ro'o nedaha, gaxxaba ro'o ttu yo'o. Nianna tti udhasike yienni.
MAR 11:5 Ttu chupa ka nu se'e niha nna unnaba tisakana, rákana: ―¿Bíunna ruinle? ¿Beaka ridhasile yien burru to‑na?
MAR 11:6 Ka benneha nna bekabibake atti tteba ra Jesús‑ni ekabike. Aníha uka nna gwa begwelhabakana ke decheke bia toha.
MAR 11:7 Tti besin lenke burru toha ata du Jesús‑ni, nianna utsilake ka xokeha kwe'e bia toha nna tti udoe kwe'eba.
MAR 11:8 Ixegaba ka benne utsilake ka xokeha lo neda ata dia Jesús‑ni ritebie nna adíke nna utitsake lo ka yaga daa niha nna utsilake lo nedaha.
MAR 11:9 Ka benne daneruke arloeha lhe ka benne danalhake bieha lhe, ka benneha nna ribesi'abake ráke bie: ¡Xxeniba ra lelu! ¡Karubárulu! ¡Lu ankalu benne udhelha Tata Xisiha!
MAR 11:10 ¡Karubárulu! ¡Lu innabialu ttiba unnabia tata geri'i David‑ni! ¡Xxeniba ra le Tata Do Yebáha!
MAR 11:11 Tti uta'a Jesús‑ni lhe'esi Jerusalén‑ni nna dia ttebe ata do yotuha nna bilánie abi'iba kwe'e yotuha iyá nu raka niha, ttaka kumu chi galá diora nuha, de nuha nna bedá ttebe len ka benne tsi'inu rudhetinieha (12) deyyake daka Betania.
MAR 11:12 Beyeki sáha, tti beriake lhe'esi Betania, ugwetti bituin Jesús‑ni.
MAR 11:13 Nianna tti bilánie du ttu ya higu axtaru nu reha gwa siaba lhaga geni. Lee nna dia ttebe ata du yagaha ganna gwa sia higu loni. Ttaka bi gwaxxake ni ttu higu lo nuha, sunruba lhaga geni sia, kumu labí higu chi rebia la'ania.
MAR 11:14 Nianna tti ree yagaha: ―¡Debá nnanna niruba attu higu a kwiaru lolu, laxkala lanúru nu gona nu xixxi gelu! Ka benne rudhetinieha nna biyienbakanie nu reeha.
MAR 11:15 Tti bisinke lhe'esi Jerusalén‑ni nna uta'a tteba Jesús‑ni lali'a yotuha nna udulo ttebe bochesue iyá ka nu se'e gwetto'oha lhe ka nu yu'u ugo'oha lhe. Berixxi logabe ka mexa ge ka nu rotsea belhiha lhe ka xxila ge ka nu se'e gwetto'o ka bechaha lhe.
MAR 11:16 Anágaba labíru begwelhe ka benne tteke lali'a yotuha nujake yua.
MAR 11:17 Nianna rigixxi'anie ka benneha ree ke: ―¿Laaba ganna lo ka yetsi ge Tata Do Yebáha dia ra: “Yo'o kia‑ni ixúe kini iyá xea ka benne se'e yiesi lo yu‑ni ilhapike tisa len neti”? Ttaka lebi'i nna ttiba “belea ata yu'u ka ubanala” chi benle yotu‑ni.
MAR 11:18 Biyienbakin ka nu loni ge ka bixxudiha lhe ka nu rule'ekinna ka benne nu ra lo bia bennabi bodha'an Moisés‑ni nu ra Jesús‑ni, nianna tti begila lekani kini gaxasina uinkana uttikane, kumu rasibakinna gebie kumu de iyába ka benne rebanabakanie ge nu rule'enie keha.
MAR 11:19 Tti chi ulha sá nna beriaba Jesús‑ni Jerusalén‑ni lenie ka benne rudhetinieha deyyake.
MAR 11:20 Beyeki dilaha nna dia Jesús‑ni lenie ka benne rudhetinieha nna uteke gaxxaba ata du ya higuha. Nianna bilákanie yagaha, chi ubisi nuha itupa lhu‑ni.
MAR 11:21 Nianna tti gwadú le Pedro‑ni nna rana Jesús‑ni: ―Maestru, belanniruga ya higu utisaluha, chiba ubisina.
MAR 11:22 Jesús‑ni nna bekabie, ree kana: ―Gwaluxxen tsitsi lele ge Tata Do Yebáha.
MAR 11:23 Netiru ria, nuxaba benne ganna ttixka gabie i'iya do naa: “Ubi'etta ata dolu‑na nna ugía gwaxxudi lhe'e indatoo‑na”, benne inná aníha abittu udú chupana lebie tti innee aníha, sinuki tuttíruga tsia tsitsi lebie deki gwakaba nu reeha, la'ania nna gwakaba nu rinnabeha.
MAR 11:24 Laxkala de nuha nna ria le, iyába nu innabale len Tata Do Yebáha tti rinnele lenie, gwaltsia lele deki chiba uxíle nu unnabaleha, la'ania nna gwadíbale nuha,
MAR 11:25 lhe anágaba tti se'ele rilhapile tisa len Tata Do Yebáha, gwalidhí elha xen lasi ge ttu benne ganna ritilha lenlee, kini anágaba nna Tata gele benne do yebáha gwadígabe elha xen lasi ge ka tulha ruinle.
MAR 11:26 [Kumu ganna lebi'i abíba dhile elha xen lasi ge ttu benne, anágaba Tata gele do yebáha, labígaba dhie elha xen lasi ge ka tulha ruinle.]
MAR 11:27 Tti bedesinke Jerusalén‑ni nna laka reki Jesús‑ni ata do yotuha, nianna tti ubiga ka nu loni ge ka bixxudiha lhe ka nu rule'ekinna ka benne nu ra lo bia bennabi bodha'an Moisés‑ni lhe, anágaba ubigagaba ka benneola ge ka nu Israel‑ni,
MAR 11:28 nianna unnaba tisakana, rákane: ―¿Bí lo neda nuná rapalu kini ruinlu ka nu ruinlu‑na? ¿Núla betena lo neda gelu kini ruinlu nuná?
MAR 11:29 Jesús‑ni nna bekabie, ree kana: ―Anágaba neti innaba tisagabaa le ttu bixa. Ganna ekabile ge nu innaba tisaa le‑ni, la'ania nna neti gwagixxi'agabania le nú betena lo neda len neti kini runia ka nu runia‑ni.
MAR 11:30 Gwalinná sanga, ¿nú iki biria ki begadi Juan‑ni ka benne inda? ¿Si iki Tata Do Yebáha ak? ¿Iki ka benne se'e yiesi lo yu‑ni ak?
MAR 11:31 Lakana nna ra luesikani: ―Ganna gari'i na: “Tata Do Yebáha‑ba udhelhe benneha”, la'ania nna innána: “¿Beaka laa a ugía lele ge benneha ganna?”
MAR 11:32 Bittugaba aka geri'i gari'i na: “Ka benneba udhelhake benneha.” Aníha rákana kumu rasibakinna ge ka benne kumu iyábake ria leke deki Juan‑ni gwalíga uka benneha profeta ge Tata Do Yebáha.
MAR 11:33 Aníha uka nna bekabikana ge Jesús‑ni, rákane: ―Labí yutu nuxa udhelhana benneha. Lee nna bekabie gekani, ree: ―Anágaba neti bittugaba kixxi'ania le nú rutena lo neda len neti kini runia ka nu runia‑ni.
MAR 12:1 Nianna tti udulo Jesús‑ni utixxi'anie ka nu loni ge ka nu Israel‑ni ttu tisa. Aníha benie kini utte dákana bí diani nu raka lebie kixxi'anie kana. Nianna tti ree: ―Ttu benne biyú beyade ka ya uva lo yu geeha, nianna tti bedheabie abi'iba ro'o yuha lhe ulekie ttu xieru ata idí uvaha. Anágaba nna bengabe ttu yo'o ttu nu yadha kini dho benne ulatsie ki anuttu nu salhidana uvaha. Nianna tti bete ganne yuha len ka nu kwenkana nuha, lee nna biriabie die idittu.
MAR 12:2 Atti chi bisia sá exú uvaha nna udhelhe ttu ka benne riben lo sina geeha kini tsie ata se'e ka nu riben lo yuha ki utekana nu ralhe dhie ge lo yuha.
MAR 12:3 Ttaka ka nu riben lo yu geeha bedaxxulakana benne udhelheha nna uyalakane. Nianna suna anába anke bedhelhakane.
MAR 12:4 Nianna tti bededhelhe attu benne riben lo sina geeha, ttaka lakana nna bodosíalakana benneha íyya nna ulha'akana ikie lhe besiala lekanie lhe.
MAR 12:5 Nianna tti bededhelhe attue, ttaka benneha bettilakane. Iki de nuha nna udhelharugabe ixeeruke, ttaka ttu chupa ka benneha uyakana ke nna attu chupake nna bettibakana ke.
MAR 12:6 Nianna a sunruba xi'in biyúeha bexxa, benne rakanie geeha. Debá benneha udhelhe kumu rakanie: “Xi'inia‑niligaba nna gweyya lekanie.”
MAR 12:7 Ttaka ka nu riben lo yu geeha, tti bilákinna xi'in biyúeha, nianna ra luesikani: “Lana nuní eya'anna lo yu‑ni. Uttiri'i na kini eya'anri'i len yu‑ni.”
MAR 12:8 Nianna tti bedaxxukana benne kwitiha nna bettikane nna tti bedelhakane ro'o yu ata daa ka ya uvaha.
MAR 12:9 Nianna tti ra Jesús‑ni kana: ―¿Bí rakinle uin xxana ka ya uvaha ganna? ¿Laaba ganna tsie nna uttie ka nu riben lo yu geeha, nianna tti odotebie yuha len ka nu subi?
MAR 12:10 ¿Si lagwa chi belabale lo ka yetsi ge Tata Do Yebáha ata dia ra: Íyya nu ulu'u ni'a ka nu rukuakana yo'oha, íyyaha‑la nuha chi bisinna beyakana nu rixúru;
MAR 12:11 Tata Xisiha‑ba benie kini uka aní, nna rebanabinri'i rilenri'i nu benie?
MAR 12:12 Ka nu loni ge ka nu Israel‑ni, kumu ute dábakinna deki labakana nuha betani Jesús‑ni nu unneeha, de nuha nna ruinkana doelha udaxxukane, ttaka de rasikinna ge ka benne, de nuha nna labí beyaxakinna udaxxukane. Laxkala nna du bixxibe deyyakana.
MAR 12:13 Nianna tti udhelhakana ttu chupa ka fariseo lhe ttu chupa ka nu tákana Herodes‑ni lhe, kini tsia ka nuha ata du Jesús‑ni nna innaba tisakane ttu bixa kini ibixxinie bixa innábie kini aníha‑chu nna tee ro'okani ukinnikane.
MAR 12:14 Ka nuha nna bisinkana, rákane: ―Maestru, gwa yúbatu deki lu rinnebalu nu ankaba gwalí, labí retabinlu ge nu inná ka benne, kumu labí rulannilu ttixa anka ka benne. Lu rule'ebinlu ka benne neda ge Tata Do Yebáha attiba ankaba geni. Gwelha unáchu, ¿si gwa ga'anaba kixari'i belhiu nu daa lori'i kixari'i len César nu rinnabia xeniha, o abittuba ak? ¿Si gwagixari'i belhuha, o abittuba ak?
MAR 12:15 Ttaka lee nna ute da ttebanie nu rulha lekaniha, nianna tti ree kana: ―¿Beaka ruinle ki ichekua ki ibixxiti bixa innía? Nii gwalute ttu belhiu ki ugíaya loni.
MAR 12:16 Nianna tti begwekane belhuha. Labie nna ree kana: ―¿Nú lo nuní du lo belhiu‑ni lhe nú lá nuní dia xani'a nuní lhe? Lakana nna bekabikana, rákana: ―Lá César nu rinnabia xeniha‑ba nuní dia lo nuní.
MAR 12:17 Nianna bekabi Jesús‑ni, ree kana: ―Ganna aníha nna gwalugweba César‑ni nu anka geni. Anágaba Tata Do Yebáha nna gwalugwegabe nu anka gebie. Nianna bebanabakinna gebie.
MAR 12:18 Nianna bisin ttu chupa ka saduceo ata du Jesús‑ni. Ka nuha rákana deki labí reyaka ben ka benne chi uttiha. Nianna tti unnaba tisakane, rákane:
MAR 12:19 ―Maestru, Moisés‑ni bodha'ane lo yetsi lenri'i, ree: “Ganna ttu nubiyú chi betsá náni, nianna gattina nna anúba xi'inni aka len nuila geniha, la'ania nna teeki edí betsiniha nuila bidabiha kini anáchu nna ka xi'ini aka len nuilaha nna eyakakana ttisidiba xi'in benne chi uttiha.”
MAR 12:20 Ttu lidú use'e gasi betsi ka nubiyú. Nu xxeniha betsába náni, ttaka uttibana nna lanú xi'inni uka len nuila geniha.
MAR 12:21 Nianna bedí nu berupaha nuila bidabiha, ttaka bedeattigaba nuha nna anúgaba xi'inkani bedeaka. Aníha‑gaba gwadite nu beyonnaha.
MAR 12:22 Aníha‑ba gwate iyába gasi betsikani, lanú xi'inkani uka len nuilaha. Iki de nuha nna uttigaba nuilaha.
MAR 12:23 Nnanna nna unáchu, ganna chi bisia sá eyaka ben ka benne chi uttiha, ¿núla nuila gekani eyaka nuilaha, ki iyába gasi betsikani udo lenkana nuha?
MAR 12:24 Jesús‑ni nna bekabie, ree kana: ―Lebi'i rinittibale nu gweala rale, kumu de labí yule nu ra lo ka yetsi ge Tata Do Yebáha lhe labí yule tsitsiba ra lebie lhe.
MAR 12:25 Kumu ganna chi bisia sá eyaka ben ka benne chi uttiha, la'ania nna nuila lhe nubiyú lhe labíru dina otsá ná ka benneha, nigaba uketike ka xi'inkeha kumu eyakabake attiba ka anjeli se'e yebáha.
MAR 12:26 Nu rari'i ge ka benne chi uttiha ganna gweyaka benke, nnanna kixxi'ania le: Lebi'i, ¿si lagwa chi belabale lo yetsi ben Moisés‑ni ata rigixxi'e ge xxiti rite loniha? Lhe'e xxitiha nuha unne Tata Do Yebáha, ree Moisés‑ni: “Neti ankaa Diosi ge Abraham‑ni lhe ge Isaac‑ni lhe ge Jacob‑ni lhe.”
MAR 12:27 Laxkala Tata Do Yebáha labí anke Diosi ge ka benne chi uttiha, lee anke Diosi ge ka benne anka bani. De nuha nna lebi'i labí yule ge nu rale‑na.
MAR 12:28 Ttu ka nu rule'enna ka benne nu ra lo bia bennabi bodha'an Moisés‑ni tti biyieninna du Jesús‑ni ridaka lanie ka saduceo‑ni lhe biyieninna deki gwa bekabi tseba Jesús‑ni ge ka nuha, nianna tti ubigana nna unnaba tisane, rana: ―Delo iyá ka tisa bodha'an Tata Do Yebáha uinri'i, ¿nú ka nuha dakaru?
MAR 12:29 Jesús‑ni nna bekabie geni, ree na: ―Dakaru tisa nu ra: “Lebi'i ka benne datiale Israel, gwaludo nagale. Tata Do Yebáha, ttúba benneha anke Xxanari'i, lanúru nu attu do
MAR 12:30 lhe anágaba ra: akinle ge Tata Do Yebaa benne anka Xxanaleha itú iki itú lele.”
MAR 12:31 Tisa nu berupa bodha'an Tata Do Yebáha uinri'i, nuha nna rana: “Akinle ge attu benne atti tteba rakabin gele.” Labí attu tisa tee nu dakaru bodha'ane uinri'i tti nu ra ka tisa‑ni.
MAR 12:32 Nu rule'enna ka benne nu ra lo bia bennabiha nna rana: ―Tseba bekabilu xa maestru. Gwalíbinlu ralu deki ttúba Tata Do Yebáha do, lanú nu attu do,
MAR 12:33 lhe anágaba nu ralu akinle ge Tata Do Yebáha itú iki itú lele lhe akagabinle ge ka benne atti tteba rakabin gele. Ka tisa‑nila dakaru attichula ka úna lhe ka nimala ruttiri'i, ruteri'i len Tata Do Yebáha.
MAR 12:34 Jesús‑ni nna tti ute danie deki tseba bekabi nu rule'e lo bia bennabiha, nianna tti ree na: ―Lu chi tteba duna akalu benne innabia Tata Do Yebáha lu. Debá la'ania nna lanúru nu beyaxinna innaba tisana Jesús‑ni ge attu bixa.
MAR 12:35 Laka du Jesús‑ni lali'a yotuha rule'enie ka benne ka tisa ge Tata Do Yebáha, nianna ree ke: ―¿Galasina nna ka nu rule'ekinna ka benne nu ra lo bia bennabi bodha'an Moisés‑ni nna rálakana deki David‑ni ukana xutto Cristuha?
MAR 12:36 Ki kwinaba David‑ni tti yu'u Espíritu ge Tata Do Yebáha latini nna Espírituha beni kini unnena, rana: Tata Do Yebáha ree Cristu benne runie neti mandaduha: “Utá udo daka ná ben kia. Niiba dholu axtaliba ganna chi bese'a ka nu abittu raka uyúkana lu, kini ulealu ikikani.”
MAR 12:37 Ki ganna kwinaba David‑ni utixxana lá Cristuha benne runie na mandadu, ¿galasina nna uka David‑ni xutto Cristuha ganna? Ixeru ka benne rudo nagake ge Jesús‑ni nna ru'uba leke ge nu rigixxi'eha.
MAR 12:38 Jesús‑ni nna ree ka benne tti due rule'enie keha: ―Gwaluyú gele len ka nu rule'ekinna le nu ra lo bia bennabi bodha'an Moisés‑ni, kumu ka nuná ru'u lekani rekikana len ka xalho ttuni lhe ru'u lekani latsiru ga ka benne kana padiuxi atti reti'ake kana lo ka neda‑na,
MAR 12:39 lhe anágaba ru'ugaba lekani kwiakana lo ka xxila tseru se'e lhe'e ka yo'o ata rudhetiri'i ka tisa ge Tata Do Yebáha, lhe ru'ugaba lekani kwiakana ata anka tseru tti riakana go yetta.
MAR 12:40 Anágaba nna riguagabakana ka yo'o ge ka nuila bidabi‑na, nna ukadiba rise'ekana isá rilhapikana tisa len Tata Do Yebáha kini rudheakana lo nu ruinkanaha. Ka nuná adírula elha disa tsitsi uyúkana la'ania.
MAR 12:41 Jesús‑ni doe ttu libe lali'a yotuha gaxxaba ata sia ka nu rigu'u ka benne úna lhe'ekani nna rulannie gasina rigu'ukana belhiu. Ixe ka nu tee gekani risinkana rigu'ukana ixeni belhiu lhe'e ka nuha.
MAR 12:42 Ttaka ttu benne nuila bidabi abittu gebie tee, bisine nna ulu'e chupa ka belhiu to, ka nu lattiruba lidhakakani tee.
MAR 12:43 Jesús‑ni nna uxie ka benne rudhetinieha nna ree ke: ―Netiru ria, benne nuila bidabi‑ni anke benne abittu gebie tee nna xxenirula daka belhiu ulu'e attichula nu chi ulu'u iyá ka nu chi ulu'u belhiu,
MAR 12:44 kumu ka nuná ulu'ubakana belhiu nu rexxaba gekani, ttaka benne nuila‑ni anke benne abittu gebie tee nna ulu'ube iyába belhiu tee gebie nu dika ixúnie ki aka banie.
MAR 13:1 Tti bedá Jesús‑ni ro'o yotuha nna ttu ka benne rudhetinieha nna ree bie: ―¡Maestru, biyúruga, aníliruba anka ka íyya kua‑ni lhe aníliruba anka ka yo'o‑ni lhe!
MAR 13:2 Jesús‑ni nna bekabie geni, ree na: ―¿Si gwa rilenlu ka yo'o xeni sia nii? Ka nuní tse'e loobakana. Niruba ttu íyya gekani laa eya'anna iki luesini; iyábakana itampabakana.
MAR 13:3 Tti do Jesús‑ni iki i'iya ata daa ka ya olivuha daka ata yeki lo yotuha, la'ania nna sun labe unnaba tisa Pedro‑ni lhe Jacobo‑ni lhe Juan‑ni lhe Andrés‑ni lhe, rákane:
MAR 13:4 ―Utixxi'en ri'itu, ¿nuka aka nu ralu‑na lhe bí aka kini unna liina deki chi dabiga aka nu ralu‑na?
MAR 13:5 Jesús‑ni nna bekabie, ree kana: ―Gwaluyú gele bittu tsia lele ge ka nu ruin lekani,
MAR 13:6 kumu ixe ka nu isia uinkana ttisidiba netiba nuha ankakana, nianna tti innákana: “Neti ankaa Cristu.” La'ania nna ixeba ka benne dhi yiekana.
MAR 13:7 ’Atti unale deki chi yu'u ka yiesi ritilha len luesikani lhe daa tisa deki ruin ka yiesi itilha len luesikani lhe, bittu gasinle kumu teeki aka aníha. Ttaka labí chi bisia ura lhuxa yiesi lo yu‑ni la'ania,
MAR 13:8 kumu ka yiesi elha‑na ebi'i noo luesikani ttilhakana lhe ka nu rinnabia‑na ebi'i noogaba luesikani, lhe anágaba gattibani yiesi lo yu‑ni ixú lhe isiagaba ubina lhe. La'ania nna si dhuloruba ka benne uyúke elha disa.
MAR 13:9 ’Lebi'i nna gwaluyúla gele, kumu teeki taga'akana le lo ka uxtisi lhe ukulhagabakana le lhe'e ka yo'o ata rudhetiri'i ka tisa ge Tata Do Yebáha lhe axtala arlo ka nu rinnabia xeni tatso dúkana le delo ni'a kia, kini aníha nna lebi'i kixxi'enle kana kia.
MAR 13:10 Ttaka atti lanila lhuxa yiesi lo yu‑ni, teeki chadhi ka tisa ge Tata Do Yebáha lhe'e iyába ka yiesi se'e itúba yiesi lo yu‑ni.
MAR 13:11 Tti udaxxukana le nna saga'akana le arlo ka uxtisiha, abittu uchacha ikile bixa innále looraha. Suna gwalekabiba tisa ute Espíritu ge Tata Do Yebáha len lebi'i, kumu laa lebi'iga nuha innele, Espírituha‑ba nuha inne.
MAR 13:12 La'ania eyeki ka benne ebi'i noo luesike. Ka nu raka betsikaniha utekana ka betsikaniha lasi ná ka nu uttikana ka nuha, lhe aníha‑gaba uin ka xxudiha len ka xi'inkaniha. Ka xi'inkaniha nna eyekikana ebi'i nookana ka xxudikaniha nna uinkana kini gatti ka benneha.
MAR 13:13 Lebi'i nna iyába ka benne utía di lekani le delo ni'a ge ria lele neti. Ttaka benne dhaabie dhu tsitsie lo neda kia axtaliba ganna chi uluxa iyá nu akaha, benneha gwalábe.
MAR 13:14 ’Ttaka lebi'i isia sá ganna chi ilenle aka ttu nu tuttíruga satsa ata labí dina akana, delába ge nu satsa utixxi'a profeta Daniel‑ni. (Ata rulabale ka tisa‑ni, gwalutte da nu rákana.) Ganna chi ilenle aka nu satsaha, la'ania nna ka nu se'e daka Judea‑ni teeki uxunnikana tsapikana iki ka i'iya sia niha,
MAR 13:15 nna nu dona iki yo'o geniha abittu eyadina, lhe nigaba eta'ana lhe'e yo'oha saleana ttu bixa,
MAR 13:16 lhe nu dia lhe'exxiha bittu eyyana lhe'e yo'o geniha saxxína jabana geniha.
MAR 13:17 ¡Gwalíchiru le ka benne nuila ata nuja xi'inke la'ania, lhe denke ka nuto rasi lhe!
MAR 13:18 Gwalinnaba len Tata Do Yebáha ki abittu aka nuní tti raka idilhaha,
MAR 13:19 kumu elha disa tsitsi nuha uyú ka benne lhe'e ka sáha, ttu elha disa nu labí chi uka itú uleki Tata Do Yebáha yiesi lo yu‑ni, la'anialiba nna aka nuha lhe nigaba labíru aka luesi elha disaha nu si daa lhe.
MAR 13:20 Kumu Tata Do Yebáha, ganna ttixka abíba odatsie ka sáha, la'ania nna niru ttú benne labí lhaabie, iyábake gattike. Ttaka lee odatsie ka sáha kumu de rakanie ge ka benne chi bekwebie.
MAR 13:21 ’Ganna nuxa gana le la'ania: “Gwalulanniruga, ne benne anka Cristuha du nii”, o si innána: “Gwalugíaruga, ne bie du naa”, abittu tsia lele ge nu inná aníha.
MAR 13:22 Kumu isia ka nu labí gwalí ankakana Cristu lhe isia ka nu labí gwalí ankakana profeta ge Tata Do Yebáha nna uinkana ka milagru lhe uinkana ttu bixa nu dika ebanani ka benne geni. Aníha uinkana kini dhi yiekana ke. Gaxa axtala ka benne chi bekwe Tata Do Yebáha ki akake gebie, axtala ka benneha dhi yiekana ki tsia leke gekani.
MAR 13:23 Laxkala lebi'i gwaluyú gele. Nnannali chi rigixxi'ania le iyá nu aka la'ania.
MAR 13:24 ’Iki de chi ute ka sá tti uyú ka benne elha disaha, la'ania nna echulha lo tatubisa‑na nna nanto beo‑na nna labíru ku'ubie xiani.
MAR 13:25 Ka beli sia gwetsáha nna iginnibakana lo yu lhe adíru ka nu ra xxeni lekani se'e gwetsáha igubigabakana.
MAR 13:26 La'ania nna neti benne daya yebáha, iláni ka benne neti dedáya yebáha lhe'e beaha ra tsitsi lasia lhe raka lhalhaba xiani kia lhe.
MAR 13:27 Nianna tti idhelhaa ka anjeli kiaha itú tte yiesi lo yu‑ni, axtaba ata riluxa yebáha lhe axtaba ata riluxa yiesi lo yu‑ni lhe. Idhelhaa ke kini tsiake ottupake ka benne chi bekwe Tata Do Yebáha.
MAR 13:28 ’Gwalutte dáruga ge ya higuha. Nuha ganna chi renettu ka lo náni lhe reria ka lhaga geni lhe, la'ania nna chi yule deki chiba dabigana eta'a iyya.
MAR 13:29 Anágaba lebi'i ganna chi ilenle aka nu chi ria‑ni, la'ania nna chi yule deki chi tteba dabiga esiaya.
MAR 13:30 Netiru ria, atti isia sá aka iyá ka nuní, ka benne se'e nnanna labí chi uttike la'ania.
MAR 13:31 Yebáha lhe yiesi lo yu‑ni tse'e loobakana, ttaka ka tisa chi ria‑ni teekiba aka nu ra ka benne‑ni.
MAR 13:32 ’Ttaka la sá lhe la ura aka nuha, lanú nu yuna, ni ka anjeli ge Tata Do Yebáha yuke lhe nigaba neti benne ankaa Xi'inieha a yua, sunruba Tataha yue.
MAR 13:33 ’De nuha nna gwaltse'e tsitsi lhe gwaltse'e ubeda lhe [gwalinne len Tata Do Yebáha lhe] kumu lebi'i labí yule nukaxa aka nuha.
MAR 13:34 Gwaluni attiba beni ttu benne birie die idittu nna bedha'ane yo'o geeha len ka nu reni lo sina geeha. Ttu ttu ka nuha begwebie kana sina ralhakana uinkana, nna nu ridú ridhalina lhe rodheana ro'o yo'oha nna ree nuha: “Ulanni tsitsilu ro'o yo'o kia‑ni kini anuttu nu ga'a.”
MAR 13:35 Laxkala lebi'i gwaltse'e ubeda kumu labí yule nukaxa esia xxana yo'oha, si esie chi dia ralha o esie riluela, o esie atti chi ribesi ka chinka‑na lhe o si esie tti chi daa tsani lhe,
MAR 13:36 kini ni kina ttu nnelaba esie nna etexxake le te'adhile.
MAR 13:37 Nu xpeya le‑ni, nunígaba upeya iyá ka benne: ¡Gwaltse'e tenná!
MAR 14:1 A chupa ubisaba riyasa isia laní Pascua tti ro ka benne Israel‑ni yettaxtila nu abittu kua dii sela lhe'eni. Ka nu loni ge ka bixxudiha lhe ka nu rule'ekinna ka benne nu ra lo bia bennabi bodha'an Moisés‑ni, ka nuha regila lekani bixa ibixxini Jesús‑ni innee kini aníha‑chu nna tee ro'okani udaxxukane nna uttikane.
MAR 14:2 Ttaka lakana nna ra luesikani: ―Bittu uinri'i nuha tti raka laníha kini ka utsatsari'i ka benne.
MAR 14:3 Jesús‑ni doe lhe'esi Betania lhe'e lisi Simón nu uka latini yiesu nu tee láni lepra. Tti doe go yettaha bisin ttu nuila denna ttu re'e to ankana ge íyya ragalha. Íyya ragalhaha tee láni alabastro. Lhe'e re'e toha ta'a seti nu rure ixixxi nu raka xxatta yaxi. Setiha ankana taga'a ge ttu yaga tee láni nardo. Nuilaha nna ulha'ana re'e toha nna bedo ttattana seti ta'a lhe'e nuha iki Jesús‑ni.
MAR 14:4 Ttu chupa ka nu se'e niha, nna bisa'akinna nna ra luesikani: ―¿Beaka kwentaba bedelha lattibana seti‑na?
MAR 14:5 A bito'ochila nuná gwate tsunna gayua (300) denario. Belhuha nna dhi ka benne dii ata abittu tee geke. Nianna rinnekana ge nuilaha.
MAR 14:6 Jesús‑ni nna ree kana: ―Naa la rena. Bittu innele geni, kumu ttu nu tse nuní chi benna len neti.
MAR 14:7 Ka benne dii abittu geke tee satíaba tse'e ka benne‑na len lebi'i nna gwakaba gele ute nále len ka benne‑na tti aka lele, ttaka neti labí satía dhoa len lebi'i.
MAR 14:8 Nuila‑ni benba nuní nu ukaba geni; chi begu'u gaana seti rure ixixxi‑ni latia kini igatsia ganna chi uttiaha.
MAR 14:9 Netiru ria, itúba yiesi lo yu‑ni gaxaba lhe'e ka yiesi ata kixxi'a ka benne ka tisa kia‑ni, kixxi'agabake ge nuila‑ni. Aníha kini sadú le ka benne ge nu benna‑ni.
MAR 14:10 Judas Iscariote, ttu ka benne tsi'inu rudhetini Jesús‑ni (12), ugíana gwanne lenna ka nu loni ge ka bixxudiha kini utena Jesús‑ni lasi nákani.
MAR 14:11 Lakana nna bedeakabakinna ge nu rana kanaha, nianna bisia ro'okani ugwekana na belhiu. Lana nna udulo ttebana begila leni ki gaxasina utena Jesús‑ni lasi nákani.
MAR 14:12 Sá neru ge laní Pascua tti ro ka benne Israel‑ni yettaxtila nu abittu kua dii dia ikiniha lhe la'aniagaba nuha ruttike ka neru re'eni to roke laníha, nianna tti unnaba tisa ka benne rudhetini Jesús‑ni, ráke bie: ―¿Gá raka lelu tsiatu sentu irse ki gori'i laní Pascua‑ni?
MAR 14:13 Lee nna udhelhe chupa ka benne rudhetinieha nna ree ke: ―Gwaltsia lhe'e yiesi‑na. Naa eti'ale ttu nubiyú dedána denojana ttu re'e inda nna gwaltsia gwasanalha na.
MAR 14:14 Ata eta'anaha, niha gwaligasi xxana yo'oha: “Aní ra maestruha: ¿Gon‑na do ttu cuartu ata go irse lania ka benne rudhetinia‑ni irse ge laní Pascua?”
MAR 14:15 Xxana yo'oha nna ule'enna le yo'o nu do berupa kuaha. Niha chi do tse ttu cuartu xeni. Lhe'e nuha gwaluin irse ki gori'i.
MAR 14:16 Ka benne rudhetinieha nna dia ttebake uta'ake lhe'esiha nna gwaxxakabake iyába atti tteba chi ree keha. Niha benke irse ge laní Pascua.
MAR 14:17 Tti chi ralhaha nna bisin Jesús‑ni len ka benne tsi'inu rudhetinieha (12).
MAR 14:18 Tti chi se'eke ro'o mexaha go irse, nianna tti ree: ―Netiru ria, delo iyále se'ele go len neti ro'o mexa‑ni nuxa ttúle nuní utele neti lasi ná ka nu uttikana neti.
MAR 14:19 Lake nna bedú si'i ttebana leke nna ttu ttubake unnaba tisake Jesús‑ni, ráke: ―¿Si bittuba neti nuná xa tata?
MAR 14:20 Lee nna bekabie, ree ke: ―Delo iyá tsi'inule (12) se'ele nii, ttúle nu rugutule lhe'e ttúba ye'ena‑ni len neti, lana nuha utena neti lasi ná ka nu uttikana netiha.
MAR 14:21 Neti benne daya yebáha eya'abaa attiba chi ga'anna lo ka yetsi ge Tata Do Yebáha. Ttaka gwalíchiru le nu utena neti lasi ná ka nu uttikana neti. Tserula saríana na ganna abittu ulina, a laa kila ulina.
MAR 14:22 Laka se'eke goha nna bedaxxu Jesús‑ni yettaxtilaha nna begwebie Tata Do Yebáha ixkixaru. Nianna tti ulha'abie lhe'e benneha nna begwebie ka benne rudhetinieha nna ree ke: ―Gwaligo yettaxtila‑ni. Benne‑ni anke bela latia.
MAR 14:23 Iki de nuha nna tti bedaxxue xiga ta'a vinuha nna begwebie ixkixaru Tata Do Yebáha, nianna tti begwebie ka benneha nna iyábake u'uyake vinuha.
MAR 14:24 Nianna tti ree ke: ―Nuní ankana reni kia rugwena lidhaka tisa chi bodha'an Tata Do Yebáha len ka benne. Reni‑ni ilalina kini odilána ixe ka benne.
MAR 14:25 Netiru ria, debá nnannaba ri'iya vinu‑ni, labíru i'iyaa na, gannaliba chi besinaa ata rinnabia Tata Do Yebáha, la'anialiba nna ede'eyaa vinu kubi attu libe.
MAR 14:26 Iki de chi bilhake ttu le'a to, nianna tti biriake diake iki i'iya ata daa ka ya olivuha.
MAR 14:27 Tti chi se'eke iki i'iyaha, nianna ra Jesús‑ni ka benne rudhetinieha: ―Nnolha iyábale isatsale udhá ikile neti. Akaba attiba chi unne Tata Do Yebáha lo ka yetsi geeha, tti ree: “Neti uttibaa nu reki lo ka neruha nna ka neruha nna isatsa ttebakana.”
MAR 14:28 Rágaba Jesús‑ni: ―Ttaka iki de chi beyaka bania lo elhuttiha, la'ania nna eya'a gaaya enerua lole esinaa daka Galilea‑ni, delola nna esiale.
MAR 14:29 Pedro‑ni nna rane: ―Meskiba adí ka nuní udhá ikikani lu, neti labí udhá ikia lu.
MAR 14:30 Jesús‑ni nna rabie na: ―Netiru ria, nnolha tti lanila kwesi chinkaha chupa libe, lu tsunna libela chi bedhea lelu abittu ridí ro'olu deki ankabienlu neti.
MAR 14:31 Ttaka Pedro‑ni nna ttu dúbana rana: ―Meskiba gattia lenlu, labí innía deki labí ankabiati lu. Aníha‑gaba ra adí ka benneha.
MAR 14:32 Nianna dia Jesús‑ni len ka benne rudhetinieha ttu latti ata tee láni Getsemaní, nianna ree ka benneha: ―Nii gwaltse'e, laka neti tanne lania Tata Do Yebáha.
MAR 14:33 Chebe Pedro‑ni lhe Jacobo‑ni lhe Juan‑ni lhe, nianna tti uduloe bedú si'ina lebie lhe bedú xxattane lhe.
MAR 14:34 Nianna tti ree kana: ―Yalhá si'i du lasia. Gwanalu chiba gattia rakati. Nii gwaltse'e nna bittu ga'adhile.
MAR 14:35 Lee nna biru'une attu latti daka aná nna bedú xibie bere loe lo yu, nianna tti unnabe len Tata Do Yebáha kini gaa godilábe bie lo nu sateeha.
MAR 14:36 Nianna ree: ―Tata to kia, nu diru innálu, benchi kini abittu uyúa elha disa‑ni, kumu lu gwakaba gelu uinlu iyá. Ttaka labí nu innía aka, sinuki nu innába kwinalu aka.
MAR 14:37 Tti beyekie ata se'e ka benne tsunnaha nna gwaxxake ke te'adhilake. Nianna tti ree Pedro‑ni: ―Simón Pedro, ¿si te'adhibalu? ¿Si bi gwa udaalu dho tennálu kwadiba ttu ura?
MAR 14:38 Gwaltse'e tenná lhe gwalinnaba len Tata Do Yebáha kini abittu dhi yie nu xxegwiha le nna eyadi gaale. Gwalí galá, lebi'i gwa rakabinle tse'e tennále, ttaka bela latile‑na labí ridaana uchíana.
MAR 14:39 Nianna tti bedeyekie attu libe nna gwadinne lenbie Tata Do Yebáha, bodeki adakabe ka tisa nu chi ree benneha.
MAR 14:40 Tti bedeyekie besine ata se'e ka benneha attu libe nna gwadixxakagabe ke dedete'adhigabake kumu de ta'a xxatta loke bisiela nna abígaba yuke bixa ekabike gebie.
MAR 14:41 Tti beyekie besine ata se'e ka benneha nu beyonna libeha, nianna tti redeabie ke: ―¿Si sa tebale te'adhile? ¡Ttanába! Chinka gwaleyadha, kumu neti benne daya yebáha chiba bisia ura nuní utekana neti lasi ná ka nu runi tulha.
MAR 14:42 ¡Chinka gwaleyadha nna gwaleyaa! ¡Ne nu utena neti lasi ná ka nu uttikana netiha, chi daa naa!
MAR 14:43 Sa dula Jesús‑ni gwenne, ttiru chi bisin Judas nu selana lhe'e ka benne tsi'inu (12) rudhetinieha, dia lenna ixe ka nu denkana yaga lhe espada lhe. Ka nuha udhelha ka nu loni ge ka bixxudiha lhe ka nu rule'ekinna ka benne nu ra lo bia bennabi bodha'an Moisés‑ni lhe, anágaba diagaba ka benneola ge ka nu Israel‑ni.
MAR 14:44 Judas nu utena Jesús‑ni lasi ná ka nu udaxxukaneha nna chi rana ka nuha: ―Nu ibigaa goa xxaganiha, lana nuha. Gwaludaxxu na nna gwaluxxika na kini abittu elána.
MAR 14:45 Aníoka nna tti bisin Judas‑ni ata du Jesús‑ni nna tti ubigana nna rane: ―Maestru. Nianna tti utona xxage.
MAR 14:46 Ka nuha nna bedaxxu ttebakane nna dechekane.
MAR 14:47 Ttaka ttu ka benne du len Jesús‑ni nna ulea ttebe espada geeha nna uchúe naga nu riben lo sina ge bixxudi xeniha.
MAR 14:48 Nianna ra Jesús‑ni kana: ―¿Beaka ttiba nu daa gwedaxxu ubana dale gwedaxxu neti denle espada lhe yaga lhe?
MAR 14:49 Ki ttu ttu sába dua len lebi'i rule'enia le ka tisa ro'o yotu‑na nna abí chiga bedaxxule neti. Ttaka teeki aka aní kini saxxína nu ra lo ka yetsi ge Tata Do Yebáha.
MAR 14:50 Looraha nna iyába ka benne rudhetinieha ttúbe bedúke nna bexunnilake.
MAR 14:51 Sunruba ttu nu kwiti diana danalhana Jesús‑ni, nukuna ttu lari nna lariha‑ba biyaxxukinna.
MAR 14:52 Ttaka lana nna belhá bixxina lari nukunaha nna tuntubana bexunnina.
MAR 14:53 Nianna bisin lenkana Jesús‑ni arlo bixxudi xeniha nna betupa tteba iyába ka nu loni ge ka bixxudiha lhe ka benneola ge ka nu Israel‑ni lhe anágaba ka nu rule'ekinna ka benne nu ra lo bia bennabi bodha'an Moisés‑ni lhe.
MAR 14:54 Pedro‑ni nna idittuliba danalhana Jesús‑ni bisinna lali'a yo'o ata do bixxudi xeniha, nna niha‑ba urena len ka nu rise'e gweyú ro'o lisi bixxudi xeniha rutsa'ana ro'o tee.
MAR 14:55 Ka nu loni ge ka bixxudiha lhe iyába ka nu runi elhuxtisi ge ka nu Israel‑ni, yu'ukana regila lekani bixa usiakana iki Jesús‑ni kini anáchu tee ro'okani uttikane, ttaka labí raxxakakana ttu bixa.
MAR 14:56 Kumu ixe ka nu ruin lekani rusiakana ikie, rákana deki runie ttu bixa, ttaka labí turo'o raxxína nu rinnekanaha.
MAR 14:57 Ttu chupakana udú liikana nna rusiakana ikie nu labí lii nna rákana:
MAR 14:58 ―Ri'itu biyienintu rana: “Neti uttampaa yotu‑ni, yotu nu ben ka benne se'e yiesi lo yu‑ni. Nianna delo tsunna ubisaba nna chi elhidhaa attu yotu nu labí uin ka benne se'e yiesi lo yu‑ni.”
MAR 14:59 Ttaka nigaba aníha nna labí raxxína turo'o len nu rinnekanaha.
MAR 14:60 Nianna tti udú lii bixxudi xeniha lagwi ge ka benne tupa niha nna rana Jesús‑ni: ―¿Bíunni rusia ka nuní ikilu? ¿Si lagwa gwekabilu ge nu rákana‑ni?
MAR 14:61 Ttaka Jesús‑ni siiba uke, labí bekabie geni. Nianna tti bedennaba tisa bixxudi xeniha bie attu libe, rane: ―¿Si lu ankalu Cristu Xi'in benne anke le'aha?
MAR 14:62 Lee nna bekabie geni, ree: ―Ila, neti galá. Lebi'i gwalábinle neti benne daya yebáha dhoa daka ná bani ge benne ra tsitsi xxatta leeha lhe ilágabinle neti dedáya yebáha lhe'e bea.
MAR 14:63 Tti biyienin bixxudi xeniha nu ra Jesús‑ni nna ucheda bixxiba xoni kini ula'a deki rise'enna, nianna tti rana: ―Nuruala riyasinri'i nuxa kixxi'ana bixa ben nuní.
MAR 14:64 Ki kwinaba lebi'i chi biyienin nagale rorexxa gaalana Tata Do Yebáha. Lebi'i nna, ¿bí rakinle? Nianna iyábakana beda'a ro'okani rákana deki ralhaba Jesús‑ni gattie.
MAR 14:65 Attu chupakana nna udulokana bettuttu xxenkani lo Jesús‑ni lhe bettokana loe lhe rudhenkane lhe. Nianna tti rákane: ―Unne ya'achu, ¿núnni rudhenna lu? Lhe anágaba ka nu rise'e gweyú ro'o yotuha ribeagabakana gi ro'e.
MAR 14:66 Pedro‑ni nna duna rre lali'a yo'o ge bixxudi xeniha, nianna tti ute ttu ka nuila riben sina lhe'e yo'oha,
MAR 14:67 nna tti bilen nuha Pedro‑ni dona kwe'e giha rutsa'ana, nianna belanni tseaxabana loni nna tti rana na: ―Iyágabalu danalhalu Jesús ge Nazaret‑ni.
MAR 14:68 Pedro‑ni nna labí uxí ro'oni nna rálana nuilaha: ―Deloxa, labí yua bí ge nuná rinnelu. Nianna tti deyya Pedro‑ni eriana ro'o yo'oha [nna uresi tteba chinkaha].
MAR 14:69 Tti bedeláni nuilaha na attu libe, nianna redeana ka nu se'e niha: ―Nubiyú du nii, ttu ka nu danalhakana Jesús‑niba nuní.
MAR 14:70 Ttaka lana nna attu libe, labí bededí ro'oni. Nianna attu sattiruba nna ka nu se'e niha nna redeakana Pedro‑ni: ―Gwalíba lu ankalu ttu ka nu selalu nuná, kumu lu ankalu ge Galilea.
MAR 14:71 Lana nna rana: ―Gwalígatixa, labí ankabiati nubiyú rale‑na. Tata Do Yebáha ugwebie neti elha disa ganna abíba liiti.
MAR 14:72 Looraha nna bedebesi chinkaha attu libe. Nianna tti gwadú le Pedro‑ni nu ra Jesús‑ni na tti ree na: “Lanila kwesi chinkaha chupa libe, lu beyonna libela chi bedhea lelu abittu ridí ro'olu deki ankabienlu neti.” Nianna tti uresi tteba Pedro‑ni.
MAR 15:1 Dila tteba bitupa ka nu loni ge ka bixxudiha lhe ka benneola ge ka nu Israel‑ni lhe, anágaba ka nu rule'ekinna ka benne nu ra lo bia bennabi bodha'an Moisés‑ni lhe adíru ka nu ruinkana elhuxtisi gekaniha lhe, nianna beda'a ro'okani nna bexxigakana Jesús‑ni nna chekane gwaga'akane lo Pilato‑ni.
MAR 15:2 Pilato‑ni nna unnaba tisane, rane: ―¿Si lu nuní ankalu nu rinnabia ge ka benne Israel‑ni? Labie nna bekabie geni, ree na: ―Luba chi ra deki nuná ankaa xa.
MAR 15:3 Kumu ka nu loni ge ka bixxudiha ixeba nu rusiakana ikie,
MAR 15:4 de nuha nna bedennaba tisa Pilato‑nie attu libe, rane: ―¿Si lagwa gwekabilu? Biyúruga ixeba nu rusia ka nuní ikilu.
MAR 15:5 Ttaka Jesús‑ni nna labí bekabie geni. De nuha nna Pilato‑ni rugía ya'abana de labí rekabie.
MAR 15:6 Kua risiaba laní Pascua rodilaa Pilato‑ni ttu ka nu tee lisiyya. Nu rakaba le ka benne olhána.
MAR 15:7 La'aniagaba tee ttu nubiyú lisiyya lána Barrabás. Tena lisiyya len adí ka luesini. Lakana bese'e disakana lo ka uxtisi nna benkana elhutti.
MAR 15:8 Nianna ixeru ka benne bisinke ata do Pilato‑ni nna unnabake lenna kini odilána ttu nu tee lhe'e lisiyya attiba labinna ruinna ttu ttu ida.
MAR 15:9 Nianna tti bekabi Pilato‑ni gekani, rana kana: ―Lebi'i benne Israel, ¿si gwa raka lele odiláya nu rinnabia gele‑ni?
MAR 15:10 Aníha ra Pilato‑ni kumu rite dábinna deki ka nu loni ge ka bixxudiha, de ritisibakinna Jesús‑ni nna gwaga'akane loni.
MAR 15:11 Nianna tti redea Pilato‑ni kana attu libe: ―Nianna, ¿bí raka lele udhakaa nu tenle láni nu rinnabia gele?
MAR 15:13 Lakana nna ribesi'akana idisa, rákana: ―¡Betá nuná lo ya kurusi!
MAR 15:14 Ttaka Pilato‑ni nna rana kana: ―¿Beaka? ¿Bí nu satsa ben nuní? Ttaka lakana nna adíla idisa ribesi'akana, rákana: ―¡Betá nuná lo ya kurusi!
MAR 15:15 Ttaka Pilato‑ni, de ruinna kini eya'an tsena len ka benne, aníoka nna bolhána Barrabás‑ni beria nuha lisiyya. Nianna tti udhelha Pilato‑ni bekulhakana Jesús‑ni. Iki de nuha nna botene lasi nákani kini utákane lo ya kurusi.
MAR 15:16 Nianna che ka soldaduha bie lali'a guskadu ata do nu rinnabia ge Roma‑ni. Niha bottupakana iyá xea ka soldaduha
MAR 15:17 nna tti begukukane ttu lari xiná chulha. Nianna benkana ttu corona yetsi nna ulu'ukana ikie
MAR 15:18 nna udulo ttebakana delo tisaba rinnekana idisa, rákane: ―¡Xxeni ra lelu xa nu rinnabia ge ka nu Israel!
MAR 15:19 Nianna tti riginkana ikie len ttu vara ge nu rinnabia lhe ruttuttu xxenkani loe nna tti riyettakana rudú xibikani arloe.
MAR 15:20 Iki de chi bedhaka xiikaneha, nianna tti bebeakana latie lari xináha nna bogukukane ka xoeha, nianna tti uleakane ki utákane lo ya kurusiha.
MAR 15:21 Ka soldaduha nujakinna Jesús‑ni ya kurusiha. Lo neda dia lenkaneha, niha beti'akana Simón ge lhe'esi Cirene, xxudi ka Alejandro‑ni lhe Rufo‑ni lhe. Benneha dedábie ugíe lhe'exxi. Nianna bedo doelha ka soldaduha bie kini uje kurusi ge Jesús‑ni.
MAR 15:22 Nianna tti dia lenkana Jesús‑ni nna bisin lenkane ttu latti ata tee láni Gólgota. (“Gólgota” dienna innána: Bega Iki Nu Yatti.)
MAR 15:23 Niha begwekane vinu chixxina nu xixxi tee láni mirra, ttaka lee nna labí uka lebie i'iye vinuha.
MAR 15:24 Nianna tti betákane lo ya kurusiha. Ka soldaduha nna bedelhakana suerti kini elha'akana ka xo Jesús‑ni kini ula'ana nú ka xoeha eche ttu ttukana.
MAR 15:25 Retin jaa dila nuha betákane lo ya kurusiha.
MAR 15:26 Nianna tti betákana ttu breta xekie ata rigixxi'a bí lo ni'a ge betákane lo ya kurusiha. Lo bretaha dia ra: “Nuní ankana nu rinnabia ge ka benne Israel.”
MAR 15:27 Betágabakana a chupa ka nubiyú lo ka ya kurusi. Ka nuha benkana ubana. Ttúna betákana daka ná banie nna attuna nna betákana daka ná yattie.
MAR 15:28 [Aníha ki gwado tisa ge nu ra lo ka yetsi ge Tata Do Yebáha, ata dia ra: “Betselabakane len ka nu ruin tulhaha.”]
MAR 15:29 Ka nu rite ata taabieha nna ruttába ikikani rulisa xxattakane, rákana: ―¡Kaxa! ¡Lu ralu deki ottampalu yotu‑na nna delo tsunna ubisaba chi elhidhalu na!
MAR 15:30 ¡Ganna gwalíginlu nna titúbalu benchu ki lhaalu lo ya kurusi‑na nna beyadichu!
MAR 15:31 Aníha‑gaba ruin ka nu loni ge ka bixxudiha lhe ka nu rule'ekinna ka benne nu ra lo bia bennabi bodha'an Moisés‑ni, rulisa xiikane nna ra luesikani: ―Ki ka benne subi gwa bodilána, ttaka lana nna a raka geni lhaa titúbana lo ya kurusi‑na.
MAR 15:32 ¡Ki rana deki ankana Cristu nu rinnabia ge ka benne Israel‑ni, gwelha eyadichuna ki ilenri'i, kini anáchu nna ri'i tsia leri'i! Anágaba axtagaba ka nu taa len Jesús‑ni lo ka ya kurusiha rulisagabakane.
MAR 15:33 Tti chi begwena retin tsi'inuha (12) itúba yiesi lo yu‑ni bechulha nna axtaliba retin tsunnaha beyani.
MAR 15:34 La uraha‑gaba nna uresi'a Jesús‑ni itú lebie, ree: ―Eloi, Eloi, ¿lama sabactani? ―Tisa‑ni dienna innána: Tata Do Yebaa kia, Tata Do Yebaa kia, ¿beaka rudhá ikilu neti?
MAR 15:35 Adí ka nu se'e niha, tti biyienkinna nu unneeha, nianna ra luesikani: ―Gwaludoruga nagale, chi raxina profeta Elías‑ni.
MAR 15:36 Nianna tti biresu tteba ttu nubiyú du niha gwaxxína ttu xunu nna bodibidhana nuha len vinu idí, nna tti bexxikana nuha lo ttu iyyaxtila nna bedona nuha ro'o Jesús‑ni ki i'iye. Nianna rana: ―Naa la taana. Ulannichuri'i si gwita Elías‑ni echidana na lo ya kurusi‑na.
MAR 15:37 Jesús‑ni nna uresi'e idisa, nianna utti ttebe.
MAR 15:38 Looraha nna bireda lari daa lhe'e yotuha, chubaa tí uka nuha biredana. Udulo xekini nna axtaba xani'ani bireda.
MAR 15:39 Soldadu nu baninna ttu gayua (100) ka soldadu ge Roma‑ni, nuha duna gaxxaba arlo Jesús‑ni nna tti biyieninna uresi'e lhe tti bilenna gasina uttie, nianna tti unnena, rana: ―Nubiyú‑ni gwalíba anka nuní Xi'in Tata Do Yebáha.
MAR 15:40 Se'egaba ttu chupa ka benne nuila, idittuliba se'eke rulannike. Lhe'e ka benneha sela María Magdalena lhe Salomé lhe. Niha‑gaba du María nan ge José‑ni lhe Jacobo nu gwexxaha lhe.
MAR 15:41 Ka benne nuila‑ni nuha gwanalhake Jesús‑ni lhe bete náke lenbie tti rekie daka Galilea‑ni. Ata se'eke gwelanniha, niha‑gaba se'eru ixe ka nuila ka benne ugía lenke bie Jerusalén‑ni.
MAR 15:42 Tti chi ulha sá viarna, la sáha nuha chi rese'e tse ka benne Israel‑ni ki udaxxuke sá reyaka lekeha,
MAR 15:43 la'ania nna ugía José benne lhe'esi Arimatea, benneha labí usinie gwatte'e lo Pilato‑ni kini rennabe echide Jesús‑ni lo ya kurusiha. José‑ni anke ttu ka nu resá lagwi ge ka nu runi elhuxtisi ge ka benne Israel‑ni lhe anágaba dogabe ribede isia sá innabia Tata Do Yebáha.
MAR 15:44 Pilato‑ni uka ttebinna tti binana deki chiba utti Jesús‑ni. Nianna uxi ttebana soldadu nu baninna adí ka soldaduha ki unnaba tisana nuha ganna si gwalí chi uttie.
MAR 15:45 Tti utixxi'en soldaduha na deki gwalíba chi utti Jesús‑ni, nianna bote ttebane len José‑ni.
MAR 15:46 José‑ni nna uyo'ona ttu lari sibi nna tti bechidana Jesús‑ni nna bottesine lhe'e lariha, nianna gwakatsine lhe'e ttu baa uche'enna lhe'e ttu íyya daa niha. Nianna tti bottulhuna ttu íyya nna gwadheana ro'o yieru baaha.
MAR 15:47 María Magdalena‑ni lhe María nan ge José‑ni lhe, lake bilákanie ata bigatsi Jesús‑ni.
MAR 16:1 Tti chi ute sá tti reyaka le ka benne Israel‑ni, María Magdalena‑ni lhe Salomé‑ni lhe María nan ge Jacobo‑ni lhe uyo'oke ixe loo ka nu rure ixixxi kini sattabike lati Jesús‑ni.
MAR 16:2 La dila bedulo xumanuha nna dila tteba si dáruba riria tatubisa‑na, dia ka benne nuilaha ata bigatsi Jesús‑ni.
MAR 16:3 Laka yu'uke nedaha nna ra luesike: ―¿Núru nuha kuana íyya yaya ro'o yieru baaha ganna?
MAR 16:4 Aníha ráke kumu yalhá xeni anka íyyaha. Ttaka atti belannike ro'o yieru baaha nna bilákanie chiba bisila íyyaha.
MAR 16:5 Tti uta'ake lhe'e yieru baaha nna bilákanie do ttu nubiyú kwiti nukuna ttu xo ttuni. Sitsi túba anka xoniha nna dona daka ná bani ge yieru baaha. Ka benne nuilaha nna yalhá usikanie.
MAR 16:6 Nubiyúha nna rana ke: ―¡Bittu gasinle! Lebi'i regilale Jesús ge Nazaret benne betákana lo ya kurusiha. Benneha chiba beyaka benbie. Lanúrue tee nii. Gwalulanniruga ata utixxakaneha.
MAR 16:7 Gwaleyya nna gwaligasi ka benne rudhetinieha lhe gwaligasi Pedro‑ni lhe, daka Galilea‑nila chi deyye daneru gaabie nna niha‑liba ilenlee, attiba chi rabie le tti sa reki lenleha.
MAR 16:8 Ka benne nuilaha nna boxunni ttebake beriake ro'o yieru baaha kumu rasibakanie lhe rixidibake lhe. Lanú nu utixxi'akanie kumu de si rasilakanie.
MAR 16:9 [La sá tti bedú ni'a xumanuha, beyaka ben Jesús‑ni. Tti chi daa tsaniha, lade'a tte bele'e loe len María Magdalena‑ni, benne bebeabie gasi ka espíritu xxegwiha latie.
MAR 16:10 Benne nuilaha nna ugíe gwattixxi'anie ka benne gwanalhake Jesús‑ni tti do benbieha. Ka benneha se'eke du si'i leke lhe ribesike lhe.
MAR 16:11 Tti biyienkanie deki anka benba Jesús‑ni lhe deki chi bilen María‑nie lhe, lake nna laa ugía leke ge benneha.
MAR 16:12 Delola nna attu ya lela bodola'a lo Jesús‑ni len a chupa ka benne gwanalhake bieha. Ka benneha yu'uke neda diake lhe'exxi.
MAR 16:13 Ka benneha nna beyekike gwattixxi'akanie adí ka benneha, ttaka nigaba ge ka benne chupaha a ugía leke.
MAR 16:14 Iki deliba nuha nna tti bele'e lo Jesús‑ni len ka benne sineaha tti yu'uke go yettaha. Utise ke kumu de ttu tsaba labí ridielhake tsia leke ge ka benne chi bilákanie bie deki beyaka banie.
MAR 16:15 Nianna tti ra Jesús‑ni ke: ―Gwaltsia itú tte yiesi lo yu‑ni nna gwalikixxi'ani iyá ka benne ka tisa ge Tata Do Yebáha.
MAR 16:16 Ka benne tsia leke neti nna gadike inda, ka benneha godilába Tata Do Yebáha ke. Ttaka ka nu abittu tsia lekani neti, urixxi ukinnibe kana.
MAR 16:17 Ka nuní ka milagru uni ka nu tsia lekani neti: neti udettikana tti ebeakana ka espíritu xxegwi yu'u lati ka benne, lhe anágaba innegabakana attu tisa subi,
MAR 16:18 lhe meskiba udaxxukana ttu belha nna labí kisi'a nuha kana, lhe anágaba ganna i'iyakana bixa ttu nu dia venenu ikini labí bi dhakakana lhe ttixka ixxua nákani iki ka benne rani nna gweyakaba ka benneha.
MAR 16:19 Iki de unne Jesús benne anke Xxanari'iha len ka benne sinea bedhetinieha, nianna tti beyapie deyye yebáha nna besine udoe daka ná ben ge Tata Do Yebáha.
MAR 16:20 Ka benne bedhetinieha nna biriabake rigixxi'ake ge Jesús‑ni iyá laduba nna labe due rute nábie lenke, lhe anágaba len ka milagru ruinkeha rula'a deki nu rigixxi'akeha, nu gwalíba anka nuha. Amén]
LUK 1:1 Ixe ka benne chi benke ukuake latsiru lo yetsi ka tisa ata rigixxi'a ge nu ben Jesús‑ni lagwi geri'i.
LUK 1:2 Ukaba atti tteba chi utixxi'a ka benne sisi'a tte bilákanie nu ukaha, nianna tti bixúke lo sina ge Tata Do Yebáha utixxi'ake ka tisa geeha.
LUK 1:3 Anágaba neti xa tata Teófilo, iki de chi ugwekia ulea liia gaxattiga siná udulo desdeli sisi'a tteha, nianna ukati ukuaya ka tisa‑ni latsiru lo yetsi kini idhelhaa na len kwinalu,
LUK 1:4 kini anáchu nna lu una tselu gaxasinattiga uka iyá nu chi bele'ekanie lu.
LUK 1:5 Tti uka Herodes‑ni nu rinnabia daka Judea, la'ania udo ttu benne uke bixxudi utta lábie Zacarías. Benneha sele lhe'e ttu dhi ka bixxudi nna uke luesi bixxudi uka benne utta lábie Abías. Benne nuila ge Zacarías‑ni lábie Elisabet. Benneha datiagabe ka benne datiake Aarón‑ni; delába Aarón benne sisi'a tte uke bixxudi ge ka benne Israel‑ni.
LUK 1:6 Zacarías‑ni lhe Elisabet‑ni lhe ixpabake ankake benne ruin tse arlo Tata Xisiha. Rudo tsitsibake tisa gebie, ruinbake iyába nu rabie. Laxkala labí bixa ge ritisake.
LUK 1:7 Ttaka nna lanú xi'inke raka, kumu nan Elisabet‑ni labí uka uja xi'in benneha. Gwea nna chigaba dia raxxuke la'ania.
LUK 1:8 Ttu sá ulha ka bixxudi, ka nu selakana len Zacarías‑ni, kini uinkana sina ge Tata Do Yebáha lhe'e yotuha.
LUK 1:9 Uinkana attiba chi ga'anna runi ka bixxudiha. La'ania nna gwaxxína ulha Zacarías‑ni uta'abie lhe'e yotuha ata daa bekú ge Tata Xisiha kini ku'ubie sen yala.
LUK 1:10 Laka rite yalaha lo bekúha nna ka benne tupake lali'a ro'o yotuha nna se'ebake rilhapike tisa len Tata Xisiha.
LUK 1:11 Nuha‑ba raka nna attiruba chi uka xxe ttu anjeli ge Tata Xisiha bisie udúe daka ná ben ge bekú ata rite yalaha.
LUK 1:12 Tti bilani Zacarías‑ni anjeliha nna uka tee lanie lhe usigabanie lhe.
LUK 1:13 Ttaka anjeli ge Tata Xisiha nna rane: ―Zacarías, bittu gasinlu kumu Tata Xisiha chiba biyieninie ge nu rinnabalu lenie, de nuha nna benne nuila gelu, Elisabet‑ni, chi utebie ttu xi'inlu. Nutoha nna kixxalu lábi Juan.
LUK 1:14 Lu nna edeaka tábinlu lhe anágaba nna ixegaba ka benne tse'e ittake lenlu ganna chi uli bintoha,
LUK 1:15 kumu xi'inluha akabi benne xxeni arlo Tata Do Yebáha. Labí i'iyabi vinu, nigaba attu bixa ttu nu dika udhusinna bi. Sa nujala nan gebiha bi chi isia Espíritu ge Tata Do Yebáha tsu'e itúba latibi.
LUK 1:16 Labi odekibi ixe ka benne Israel ki odaxxuke neda ge Tata Do Yebaa benne anke Xxanakeha.
LUK 1:17 Lagababi nuha nnerubi kini idhalhibi neda ge Tata Xisiha; kweki lebi attiba uleki le Elías‑ni lhe inná tsitsi lebi attiba uná tsitsi le benneha. Aníha kini ose'e tsebi ka tataha len ka xi'inkeha lhe uinbi kini ka nu abittu rudokana tisa ulaba lekani attiba rulaba le ka nu ruin latsiru. Aníha uinbi kini ose'e tsebi ka benne kini anáchu chi se'eke ubeda Tata Xisiha ganna chi isiabie yiesi lo yu‑ni.
LUK 1:18 Zacarías‑ni nna unnaba tise anjeliha, ree benneha: ―¿Gasina ki aka xen lasia deki gwalí aka nu ralu‑na? Kumu neti chiba ankaa benneola lhe anágaba benne nuila kia‑ni lhe.
LUK 1:19 Anjeliha nna bekabie nna ree: ―Neti láya Gabriel. Doa rixúa runia nu ra Tata Do Yebáha. Labie udhelhe neti kini inne lania lu, kixxi'ania lu ka tisa tse.
LUK 1:20 Ttaka lu nna de labí ria lelu ge ka tisa kia‑ni, de nuha nna eya'anbalu biría; labí aka innelu. Axtaliba ganna chi bisia sá tti chi sadona aka nu ria‑ni, la'anialiba nna eyaka ennelu.
LUK 1:21 Laka raka nuha nna ka benne se'e lali'a ge yotuha nna se'ebake ubeda eria Zacarías‑ni. Chiba rudúna ke de anúbie reriaxxi ata daa bekúha.
LUK 1:22 Ttaka tti chi berieha nna labíru raka innebie ulise ka benne se'e niha. La'anialiba nna tti ute dákanie deki bixa bele'eni Tata Do Yebáha bie lo bekúha, laxkala gwatebie aníha. A sunruba rutá nábie rule'enie ka benneha nna aníha‑ba beya'ane biría.
LUK 1:23 Tti chi beda'a sá gebie benie sina lhe'e yotuha, la'ania nna deyye lisie.
LUK 1:24 Iki de chi ute nuha nna birua bisá nna attiruba chi bele'e nuja xi'ini nan Elisabet‑ni. Delo gayu beo labí birie yo'o. Nianna rabie:
LUK 1:25 “Aní chi ben Tata Xisiha. Gwatua lebie neti kini abitturu uxisi ka benne kia de lanú xi'inia raka.”
LUK 1:26 Tti chi uka xxupa beo nna Gabriel benne anke anjeli ge Tata Do Yebáha dedheyye bededhelha Tata Do Yebáha bie lhe'e ttu yiesi re daka Galilea‑ni. Yiesiha tee láni Nazaret.
LUK 1:27 Niha do ttu nuila ribani re'eni, chi banani ttu nubiyú‑na. Nubiyúha tee láni José. Nuha datiana David, benne unnabie ka benne Israel‑ni itú nu reha. Nuila ribaniha tee láni María.
LUK 1:28 Tti uta'a anjeli ge Tata Do Yebáha ata do María‑ni, nianna rabie na: ―¡Padiuxi, nuila! Tata Xisiha gwa duba lenie lu. [Delo iyá ka benne nuila, lu nuná akaru lenie lu.]
LUK 1:29 Ttaka María‑ni tti biyieninna ka tisa unne anjeliha nna uka télinna, nianna rakinna: “¿Bí dien benne‑ni unnee aná?”
LUK 1:30 Ttaka anjeliha nna rabie na: ―María, bittu gasinlu, kumu Tata Do Yebáha‑ba aka lenie lu.
LUK 1:31 Nnanna nna uja xi'inlu nna gali ttu nuto biyú to. Nubiyú toha nna kixxalu lábi Jesús.
LUK 1:32 Nutoha akabi benne inná xxeni lebi nna kixxakana lábi Xi'ini Benne ra xxeni lebie do yebáha. Tata Do Yebaa benne anke Xxanari'iha nna unie kini innabiabi attigaba unnabia David benne uke benneola gebiha,
LUK 1:33 lhe anágaba nna ttu dia liiba innabiabi ka benne Israel‑ni. Labí lhuxa loo elha rinnabia gebi.
LUK 1:34 María‑ni nna unnaba tisana anjeliha, rane: ―¿Gasina aka nu ralu‑na ki anúgaba nubiyú chi do lania?
LUK 1:35 Anjeliha nna bekabie geni, ree: ―Espíritu ge Tata Do Yebáha‑ba isiabie tsu'e latilu. Nianna Tata Do Yebáha, len nu ra tsitsi leeha unie kini tsu'u attiba ttu xula ge ttu bea ikilu. Laxkala binto galiha nna akabi gebie nna kixxakana lábi Xi'in Tata Do Yebáha.
LUK 1:36 Anágaba benne raka luesiluha, delába Elisabet‑ni, benneha chigaba gali xi'inie meskiba chi anke benneola. Labie rákana deki lanú xi'inie aka, ttaka nnanna nna chi aka xxupa beo‑ni du benneha nuje benne.
LUK 1:37 Aníha aka kumu Tata Do Yebáha labí tee ttu bixa abí aka ge benneha unie; iyába gwakaba ge benneha unie.
LUK 1:38 Nianna ra María‑ni: ―Neti ankabaa benne rixúni Tata Xisiha. Uinbe len neti nu chi ralu‑na. Nianna tti bedá anjeli ge Tata Xisiha, deyye.
LUK 1:39 Ttu chupa ubisaba chi ute nna bediuba tteba le María‑ni diana iki ka i'iya ata re ttu yiesi daka Judea.
LUK 1:40 Tti bisinna lhe'e yiesi toha nna uta'ana lhe'e yo'o ge Zacarías‑ni nna begwena Elisabet‑ni padiuxi.
LUK 1:41 Tti biyienin Elisabet‑ni tsi'i María‑ni begwene padiuxi, nuto nujeha nna bitá ttebabi lhe'ebie, la'ania nuha bisia Espíritu ge Tata Do Yebáha uyu'e lati Elisabet‑ni,
LUK 1:42 nianna tti unnebie idisa, ree: ―¡Tata Do Yebáha chi ukaru lenie lu tti adí ka benne nuila lhe anágaba akagaba lenie binto nujalu‑na!
LUK 1:43 Neti nna, ¿nú ankaa nna axtaba nan ge Benne runie neti mandaduha, axtaba benneha dabie gwelanni neti?
LUK 1:44 Kumu suna biyienbati tsi'ilu nna binto nujaa‑ni bitá ttebabi lhe'a de bedeakinbi.
LUK 1:45 ¡Karubárulu ugía lelu deki gwakaba iyá nu chi ra Tata Xisiha lu!
LUK 1:46 María‑ni nna rana: Itú iki itú lasia runia ki ra xxeni le Tata Xisiha
LUK 1:47 lhe anágaba yalhá itta du lasia de bodilábie neti.
LUK 1:48 Kumu Tata Do Yebáha chi bilánie neti labí ra xxeni lasia lhe anágaba ankagabaa benne rixúnie lhe. Laxkala debá nnanna nna iyába ka benne innáke: “¡Karubáru nuila‑na!”
LUK 1:49 Kumu Tata Do Yebaa benne ra tsitsi leeha, xxeniba anka nu chi benie len neti. Benneha nari xúba anke
LUK 1:50 lhe satíaba ratua lebie ka benne ria leke bie
LUK 1:51 lhe anágaba rula'abie nu xxeni ra leeha. Betse'e loogabe nu rulha le ka nu ruin ttaba
LUK 1:52 lhe riguabie ka nu ra tsitsi lekinna ata ribiakana rinnabiakana nna ka benne labí ra xxeni leke nna rugwebie lidhakake.
LUK 1:53 Ka benne rituinke abittu bi geke tee nna bete tame geke nna ka nu tee gekinna nna suna anába bese'ebie kana.
LUK 1:54 Bete nábie len ka benne Israel‑ni, delába ka benne rixúnie ruinke nu ree. Labí bexxulha lebie a satua lebie ke,
LUK 1:55 kumu aníha chi rabie ka benne uka xuttoleha. Rabie deki satíaba satua lebie Abraham‑ni lhe ka benne datiake benneha lhe.
LUK 1:56 María‑ni nna niha‑ba beya'anna udona len Elisabet‑ni ttiba tsunna beo. Deloliba nna deyyana besinna lisini.
LUK 1:57 Tti chi gwadona beo gali xi'in nan Elisabet‑ni, nianna uli ttu nuto biyú to.
LUK 1:58 Tti bina ka benne se'e gaxxaba ata doeha lhe ka benne raka luesieha lhe, tti binake deki chi gwatua le Tata Do Yebáha bie betebie ttu xi'inie, la'ania nna bedeakakin benneha lenie.
LUK 1:59 Tti chi uka xxunu ubisa uli bintoha, nianna bitupake uchúke lo bela lati bi'iniha kini unna liina deki chi ankabi ge Tata Do Yebáha. Benbake attiba chi ra lo bia bennabi ge ka benne Israel‑ni. Nianna ruinke kixxake lá bintoha Zacarías ttiba lá tata gebiha.
LUK 1:60 Ttaka nan gebiha nna rabie: ―¡Labí gatta lábi aná! Juan‑ba gatta lábi.
LUK 1:61 Ka benne tupa niha nna bekabike gebie, ráke: ―Lanú benne datialu do lábie aná.
LUK 1:62 Nianna tti betten náke tata ge bintoha, ki unnaba tisake bie bixa raka lebie gatta lá bintoha.
LUK 1:63 Benneha nna unnabe ttu breta kini unie loni. Lo nuha nna benie ree: “Juan‑ba gatta lábi.” Nianna iyábake bebanakanie.
LUK 1:64 Tti lo benie nuha nna beyali tteba ro'obie nna beyaka tteba bennebie. Nianna tti unnebie ree: ―¡Xxeniba ra le Tata Do Yebáha!
LUK 1:65 Iyába ka benne se'e gaxxa ata do yo'o gekeha nna bebanabakanie. Anágaba ka benne se'e itúba daka iki ka i'iya sia daka Judea‑ni rinnegabake ge iyá nu chi ukaha.
LUK 1:66 Iyába ka benne binake ge nuha nna rulaba leke, ráke: ―¿Nú isina binto‑na akabi ganna? Aníha ráke kumu rite dákanie deki Tata Xisiha‑ba nuha du lenie bintoha.
LUK 1:67 Zacarías tata ge bintoha, tti bisia Espíritu ge Tata Do Yebáha uyu'e itúba latie, nianna tti uduloe unnebie ka tisa bete Espírituha, nianna ree:
LUK 1:68 ¡Xxeniba ra le Tata Do Yebáha benne anka Xxana ka benne Israel‑ni, kumu chi bisiabie kini odilábie ka benne gebie!
LUK 1:69 Chi udhelhe ttu benne ra xxeni lebie ki odilábie ri'i. Benne‑ni datiabie David, delába David, benne bixúni Tata Do Yebáha kini benie nu ree.
LUK 1:70 Benbe attiba rabie itú ttuha tti bixúnie ro'o ka profeta geeha kini unneke nu unieha.
LUK 1:71 Rabie deki odilábie ri'i lo ná ka nu abittu raka uyúkana ri'iha lhe lo ná ka nu rutía di lekani ri'iha lhe.
LUK 1:72 Chi rabie deki satua lebie ka benne uka xuttori'iha; labí uxxulha lebie nu chi reeha.
LUK 1:73 Nuní unnebie len Abraham‑ni, benne uke xuttori'iha,
LUK 1:74 delába tti rabie deki odilábie ri'i lo ná ka nu abittu raka uyúkana ri'iha kini anáchu nna anutturu nu ge gasinri'i ganna chi ixúri'i uinri'i nu reeha.
LUK 1:75 Uinri'i ttiba runi ttu benne chi beyarie lhe runie nu dika ixú lhe. Aníha‑ba uinri'i itúba tse'eri'i aka benri'i.
LUK 1:76 Lu nna xa xi'ini to, kixxakana lálu profeta ge Benne ra xxeni lebie doe yebáha, kumu lu tsialu nnerulu idhalilu neda ge Tata Xisiha, use'e tselu ka benne laka isie.
LUK 1:77 Kixxi'enlu ka benne Israel‑ni deki gwadíbe elha xen lasi ge ka tulha chi benke lhe godilábe ke lhe,
LUK 1:78 kumu Tata Do Yebaa geri'iha ratua xxatta lebie ri'i. Yebáha‑li udhelhe ttu benne anka xiani dabie gwelanni ri'i
LUK 1:79 kini udanie iki ka benne se'eke ata anka chulha lhe ruxunnigabana geke gattike lhe. Aníha kini ku'ubie ri'i neda ata tse'e tseri'i lenie.
LUK 1:80 Nuto ge Zacarías‑ni nna diaba bi'iniha rixenbi lhe ribe yala lebi lhe. Itúba uka bi'iniha tania, lo yu bisi ata lanú benne se'e, niha‑ba udobi. Attiliba chi bisia sá bele'e lobi len ka benne Israel‑ni, la'anialiba nna biriabi ugwekibi.
LUK 2:1 Uka nuha tti uka César Augusto‑ni nu rinnabia itúba Roma, la'ania nuha udhelhana ttu yetsi len ka benne se'e itúba ata rinnabianaha, rinnabana eyadha láke kini yuna balhaxa ka benne chi se'e.
LUK 2:2 La'ania nuha sisi'a tte beyadha lá ka benne. La'aniagaba anka Cirenio‑ni nu rinnabiana daka Siria.
LUK 2:3 Nianna iyába ka benne teeki beyyake lhe'esi ataliba ulikeha kini gwate láke.
LUK 2:4 Laxkala de nuha nna José‑ni teeki bedábie lhe'esi Nazaret. Anka nuha ttu yiesi rena daka Galilea. Nianna deyye besine lhe'esi Belén. Yiesiha nna dedebena daka Judea ata uli David‑ni. Niha‑ba beyya José‑ni kumu anke benne datiabie David‑ni
LUK 2:5 kini gwate lábie lenie María benne nuila geeha. Chi du benneha nuje benne.
LUK 2:6 Ttaka gwaxxína, tti lo se'eke niha, chi gwadona gali xi'in María‑ni.
LUK 2:7 La'ania nna uli xi'in sisi'a tte gebie. Ulibi ata ru'u ka ku'una biaha. Iki de tti chi beyaka uli bintoha nna bottesi tteba María‑ni bi'iniha lari nna utixxe bi lhe'e ata ru'u nu ro ka nimalaha. Ata ru'u ka ku'una biaba ulibi kumu labíru ukanike eya'anke lhe'e yo'o do lhe'e yiesiha ata reya'ana ka benne yu'u neda.
LUK 2:8 Gaxxaba Belén‑ni reya'ana ka benne rekike lo ka neru to gekeha, ruyúke ka nuha lo rela lhe'exxiha.
LUK 2:9 Ttiruba nna ttu nnelaba chi uka xxe ttu anjeli ge Tata Xisiha ata se'e ka benneha. Tti uyu'u xiani ge Tata Xisiha abi'iba ata se'ekeha, nianna usi xxattakanie.
LUK 2:10 Ttaka anjeliha nna ree ke: ―Bittu gasinle, kumu neti daya ugixxi'en le ttu tisa tse, tisa nu dika odú ittana le iyába ka benne.
LUK 2:11 Lhe'esi ata uli David‑ni, nasá chi uli ttu benne ki odilábie ka benne. Labie anke Cristu lhe anke Xxanari'i lhe.
LUK 2:12 Laxkala ganna eyyale nna saxxakale bintoha rilhibi lari yu'ubi lhe'e ata ru'u nu ro ka ku'una biaha. Ganna chi gwaxxakale bi'iniha, la'ania nna chi yule deki lababi nuha tee niha.
LUK 2:13 Attiruba ttu nnelaba chi uka xxe adíru ka anjeli daa yebáha use'eke kwe'e anjeli du gwenneha nna rulhake ge Tata Do Yebáha, ráke:
LUK 2:14 ¡Xxeniba ra le Tata Xisiha doe yebáha! ¡Yiesi lo yu‑ni nna tseba tse'e ka benne uinke nu ru'u lebie!
LUK 2:15 Nuha‑ba ra ka anjeliha, nianna beyapike deyyake yebáha. Ka benne se'e lo ka neruha nna ra luesike: ―Eya'achuri'i lhe'esi Belén‑ni, salanniri'i nu chi uka niha, nu chi utixxi'ani Tata Xisiha ri'i.
LUK 2:16 Bediuba tteba leke deyyake. Tti besinke niha nna gwaxxakake María‑ni lenie José‑ni lhe bintoha lhe, yu'ubi lhe'e ata ru'u nu ro ka ku'una biaha.
LUK 2:17 Tti bilákanie bintoha, la'ania nna utixxi'ake iyá nu chi ra anjeliha ke ge bi'iniha.
LUK 2:18 Nianna iyába ka benne biyienkanie ge nu utixxi'a ka benne reki lo ka neruha nna bebanabakanie.
LUK 2:19 Ttaka María‑ni nna rudhá tsitsiba lebie iyá nuha nna ttu ttu sába rulaba lebie ge nuha.
LUK 2:20 Ka benne reki lo ka neruha nna beyekibake deyyake rulhake ge Tata Do Yebáha lhe ráke deki xxeniba ra lebie. Aníha ráke de bebanakanie ge nu biyienkanieha lhe ge nu bilákanieha lhe, kumu ukaba atti tteba chi utixxi'ani anjeliha ke.
LUK 2:21 Atti chi gwadona xxunu ubisaha nna uchúke lo bela latibi attiba ra lo bia bennabi ge ka benne Israel‑ni. La'ania nna utixxake lá bi'iniha Jesús attiba chi ra anjeliha María‑ni atti lanila uje bi'iniha.
LUK 2:22 Tti chi bisia sá eyarike arlo Tata Do Yebáha attiba chi ra lo bia bennabi bodha'an Moisés‑ni, la'ania uche María‑ni lhe José‑ni nutoha lhe'esi Jerusalén‑ni. Ucheke bi'iniha kini gwatso duke bi arlo Tata Xisiha.
LUK 2:23 Benbake attiba chi ra lo bia bennabi bodha'an Tata Xisiha ata dia ra: “Iyába ka nuto ka nu sisi'a tte galikana, ganna ankakana nubiyú to, la'ania nna teeki iriesikana ki akakana ge Tata Xisiha.”
LUK 2:24 Aníha uka nna ugíake gwateke ka nu bani to ttiba ttu úna, beteke nuha len Tata Xisiha. Benbake attiba ra lo bia bennabi geeha ata dia ra: “Utele chupa ka bexu to o chupa ka becha to.”
LUK 2:25 La'aniagaba do ttu benne biyú lhe'esi Jerusalén‑ni, labie Simeón. Anke ttu benne ruin tse lhe rudo tsitsirue tisa ge Tata Do Yebáha lhe. Benneha dobie ubeda nukaxa idhelha Tata Do Yebaa benne odú itte le ka benne Israel‑ni. Espíritu ge Tata Xisiha gwa duba lenie Simeón‑ni
LUK 2:26 nna chi rabie benneha labí gattie axtaliba ganna chi bilánie isia Cristu, benne chi ga'anani Tata Xisiha idhelhe. La'anialiba nna gattie.
LUK 2:27 Espírituha nna chebie Simeón‑ni die yotu la sáha. La'aniagaba bisin ka tata nan ge Jesús‑ni lenbi kini uinke nu ra lo bia bennabiha.
LUK 2:28 Nianna tti bedaxxu Simeón‑ni nutoha nna uxxua lo nábie bi nna ulhapie tisa len Tata Do Yebáha, ree:
LUK 2:29 Nnannaligaba xa Tata Xisi to, chi uka nu ráluha. Neti benne rixuinlu, chibanka ugwelhalu neti gattia,
LUK 2:30 kumu ixpa la'aba loa chi biláti benne udelhalu kini odilábie ri'itu.
LUK 2:31 Benneha chi ga'aninlu idhelhalu lo iyá ka benne se'e yiesi lo yu‑ni.
LUK 2:32 Anke ttiba ttu xiani udanie iki ka nu abittu ankakana nu Israel; nna ka benne gelu nna delába ka benne Israel‑ni, unie kini inná xxeni leke.
LUK 2:33 José‑ni lenie nuila geeha nna bebanabakanie tti biyienkanie nu ra Simeón‑ni ge bintoha.
LUK 2:34 La'ania nna unnaba Simeón‑ni kini aka len Tata Do Yebáha ke. Nianna tti rana María nan ge nutoha: ―Binto‑ni chi ga'anabi deki ukinnibi lhe odilábi ixe ka benne Israel‑ni lhe anágaba nna akabi ttu benne ku'u ni'akani bi,
LUK 2:35 kumu de udobi be nu satsa rulaba le ixe ka benne. Anágaba lu nna uyúlu elha disa ge nu udhakakana bi. Attiba ttu nu ga'a espada lhe'e lastoni, aníha‑ba akalu.
LUK 2:36 Ro'o yotuha‑gaba du ttu benne nuila lábie Ana. Benneha anke profeta ge Tata Do Yebáha. Anke xi'iniunná Fanuel benne datiabie ttu dhi ka benne datiake benne utta lábie Aser. Ana‑ni chi anka benneha ttu nanto to la'ania. Kwiti tte benneha betsá nábie, ttaka gasi idaruba udo lenie nubiyú geeha nna uka ttebe bidabi.
LUK 2:37 La'ania nna chi ankanie tta bixxi ttapa (84) ida nna labí rudú siie rie yotu. Rela resába rixúe runie nu ra Tata Do Yebáha, rutte ubina lhe'ebie lhe rilhapie tisa len benneha lhe.
LUK 2:38 Looraha‑gaba bisine ata do yotuha. Rugwebie ixkixaru len Tata Do Yebáha. Nianna udulobie utixxi'e ge Jesús‑ni arlo ka benne se'e ubeda odilá Tata Do Yebáha Jerusalén‑ni, delába ka benne Israel‑ni.
LUK 2:39 José‑ni lhe María‑ni lhe, iki de chi benke iyá nu chi ga'anna lo bia bennabi bodha'an Tata Xisiha, la'ania nna beyekike deyyake nna besinke lhe'esi Nazaret. Nazaret‑ni ankana yiesi geke nna rena daka Galilea.
LUK 2:40 Binto Jesús‑ni nna diaba bi'iniha rixenbi lhe ribe yala lebi lhe. Aníha‑gaba nna diagababi ridoruinbi xiani lhe raka len Tata Do Yebáha bi lhe.
LUK 2:41 Ka tata nan ge Jesús‑ni ttu ttu idaba riake lhe'esi Jerusalén‑ni tti risia laní Pascua.
LUK 2:42 Tti chi ukani Jesús‑ni tsi'inu (12) ida, la'ania nna dia lenke bi Jerusalén‑ni attiba chi labikanie riake laní.
LUK 2:43 Iki de tti chi ute laníha nna beyekike dedáke, ttaka binto Jesús‑ni nna beya'anba bi'iniha lhe'esiha. Ka tata nan gebiha nna bi ute dákanie deki niha‑ba beya'an bintoha.
LUK 2:44 Rakakanie ganna lhe'e adíru ka benne dedaaba desela bi'iniha. Laxkala nna beyu'ubake neda ttu sá, ttaka tti begilake bi'iniha ata dedá ka benne raka luesikeha lhe ka benne ankabiakanieha lhe
LUK 2:45 lanú bi'iniha gwaxxakake. Aníha uka nna beyekibake deyyake Jerusalén‑ni ugila bi.
LUK 2:46 Ukaliba tsunna ubisaha nna gwaxxakake bi dobi ro'o yotuha lagwi ge ka nu rule'ekinna ka benne nu ra lo bia bennabi bodha'an Tata Do Yebáha len Moisés‑ni. Rudo nagabi ge ka nuha lhe rinnaba tisabi kana lhe.
LUK 2:47 Iyába ka nu se'e rudo nagakani gebi rebanabakinna ge elha rieni do ikibi lhe rebanabakinna ge ka tisa rekabibi ge ka nuha lhe.
LUK 2:48 Tti bilani ka tata gebiha bi dobi len ka nuha, bebanabakanie. La'ania nna ra nan gebiha bi: ―Xi'ini to, ¿beaka bedhakalu ri'itu aná? Tata gelu‑ni lhe neti lhe yalhá chi rudúna ri'itu rekitu ugila lu.
LUK 2:49 Jesús‑ni nna bekabibi gebie, rabi: ―¿Beaka regilale neti? ¿Si bi gwa yule deki rakarula doelha udo lasia nu anka sina ge Tata kiaha?
LUK 2:50 Ttaka lake nna labí bette dáke bixa diani nu ra bi'iniha ke.
LUK 2:51 La'ania nna deyyababi len ka tata nan gebiha besinke lhe'esi Nazaret. Niha‑ba udobi bedobi tisa ge ka benneha ge iyába nu ráke bi. Nan gebiha nna rudhá tsitsiba lebie ge iyá nu ukaha.
LUK 2:52 Jesús‑ni diababi rixenbi lhe rido chiettirugabinbi xiani lhe. Anágaba Tata Do Yebáha lhe ka benne lhe, ru'ugaba leke elha ruin gebi.
LUK 3:1 Tti chi uka tsinu (15) ida rinnabia Tiberio César‑ni itúba Roma, Poncio Pilato‑ni nna rinnabiana daka Judea‑ni, Herodes‑ni nna rinnabiana daka Galilea‑ni, betsini Felipe‑ni nna rinnabiana daka Iturea lhe daka Traconite lhe. Benne tee lábie Lisanias nna rinnabie daka Abilinia.
LUK 3:2 Anás‑ni lhe Caifás‑ni nna ankakana ka bixxudi xeni. La'ania nna belisa Tata Do Yebáha Juan, xi'in Zacarías‑ni, dona lo yu bisi ata lanú benne se'e.
LUK 3:3 Nianna utena itúba daka ro'o yoo Jordán‑ni rigixxi'enna ka benne kini odúna ke ge nu ruinke nna odaxxuke neda ge Tata Do Yebáha nna gadike inda, kini anáchu dhi benneha elha xen lasi ge ka tulha ruinke.
LUK 3:4 Ukaba attiba ra profeta Isaías‑ni tti unnebie lo ka yetsi ge Tata Do Yebáha, ree: Lo yu bisi ata lanú benne se'e, niha riyieni tsi'i ttu benne rinnebie idisa, ree: “Gwalegixxa tse neda ge benne anke Xxanari'iha; gwalolixxa neda kini dhabie.
LUK 3:5 Iyába ata re ka xieru‑na nna esákana. Ka i'iya‑na lhe ka sitta xua xea‑na lhe eságabakana kini eyaka lapa. Ka neda kwalha‑na nna ese'e lhixxakana; anágaba ka neda anka satsa‑na, eyaka lapakana,
LUK 3:6 kini anáchu nna iyá ka benne ilákanie benne idhelha Tata Do Yebáha kini odilábie ke.”
LUK 3:7 Ixeru ka benne ririake ki rugadi Juan‑ni ke inda, nianna rana ke: ―¡Aalexa nu ruin satsa! ¡Lebi'i ankale ttiba ka belha‑na! ¿Nú chi rana le deki gwalále lo elha disa tsitsi nu chi dabigana ute Tata Do Yebáha gele?
LUK 3:8 Gwaluni nu dika ixú ganna xa. Aníha kini ule'e deki gwalí chi ankale benne bodúna le ge nu ruinle nna bodaxxule neda ge Tata Do Yebáha. Abittu tse'ele ulaba lhi'u lele akinle: “¡Ri'itu gwalábatu, kumu de ankatu benne datiatu Abraham‑ni!” Netiru ria, Tata Do Yebáha ganna aka lebie, gwakaba gebie eyonie ka íyya du'uya nii kini eyakakana benne datia Abraham‑ni; a laa kila iyasanie le.
LUK 3:9 Anágaba nna chigaba du tse iyyatteha kini ichúna itupa lhu ka yaga. Laxkala iyába ka yaga ka nu abittu utekana nu xixxi tse, ka nuha chúbakana nna iru'unakana tsiakana lo giha. Aníha‑ba nuha satele ganna abíba uinle nu dika ixú.
LUK 3:10 Ka benneha nna rinnaba tisake Juan‑ni, ráke: ―Ganna aníha nna, ri'itu, ¿bíla anka nu uintu ganna?
LUK 3:11 Juan‑ni nna bekabina geke, rana: ―Ganna ttu benne se'e chupa xobie, teeki utebie ttu nuha len attu benne abittu xobie tee; lhe ganna ttu benne tee lena robie, teeki kidhie nuha ugwebie benne abittu gebie tee.
LUK 3:12 Bisingaba ttu chupa ka gwekixa kini gadikana inda. Nianna rákana Juan‑ni: ―Maestru, ri'itu nna, ¿bíla anka nu uintu ganna?
LUK 3:13 Lana nna rana kana: ―Abitturu ukixale yani lo nu chi ga'anna ukixale.
LUK 3:14 Unnaba tisagaba ttu chupa ka soldadu, rákana: ―Ri'itu nna, ¿bíla anka nu uintu? Lana nna bekabina gekani, rana: ―Abittu uniasinle ka benne. Bittu uinle aníha ki kuale nu tee geke. Bittugaba kwenta usiale ikike deki benke ttu bixa. Gwaleyaka xenba lele ttixaruba gaxale.
LUK 3:15 Ka benne tupa niha nna rudo tsitsiba nagake kumu ribedake Cristu benne chi ga'anani Tata Do Yebáha idhelhe nna iyábake rulaba lhi'u leke rakakanie: “¿Si laaba Juan‑niba nuní anke Cristu?”
LUK 3:16 Ttaka Juan‑ni nna unnena rana iyába ka benne tupa niha: ―Gwalí galá neti tti rugadia ka benne inda, suna indaba rixúti, ttaka si dala attu benne tsitsirula ra lebie tti neti. Neti nna labí elha ralhaa idhasia lo ka gwaracha geeha. Benneha nuha ugadie le Espíritu ge Tata Do Yebáha lhe ugadie le gi lhe.
LUK 3:17 Chi den tse barkilu ge benneha kini uin tsebie xuxtilaha nna ganna chi bolhube sináha nna ottupe xuxtilaha nna oga'abie xuaha ata regua tsebie benneha. Nianna tti udelhe tee ge xuaha lo gi nu satíaba rite loniha, nu abittu reyola loniha. Lebi'i nuha udhake aníha.
LUK 3:18 Iyá nuní unne Juan‑ni tti belisana ka benne bele'enna ke ka tisa tse bete Tata Do Yebáha.
LUK 3:19 Anágaba nna utisagaba Juan‑ni Herodes nu rinnabiaha, kumu de bedo lenna Herodías nu anka nuila ge betsini Felipe‑ni lhe utisagabana na ge adíru ka nu satsa bennaha.
LUK 3:20 Ttaka betse'e loona, iki de iyá nu satsa chi ben Herodes‑ni nna bedienrula geni: bega'alana Juan‑ni lhe'e lisiyya de bedona na be ge nu ruinnaha.
LUK 3:21 Uka nuha tti rugadi Juan‑ni iyába ka benne inda, la'aniagaba udi Jesús‑ni inda. Laka dubie rilhapie tisa len Tata Do Yebáha, nianna biyali yebáha.
LUK 3:22 La'ania nna ugwadi Espíritu ge Tata Do Yebáha, anke attiba ttu becha nna betedhobie iki Jesús‑ni. Nianna biyien tsi'i ttu benne rinnebie yebáha, ree bie: ―Lu ankalu Xi'inia rakati gelu. Lu ankalu benne ruinlu nu ru'u lasia.
LUK 3:23 Jesús‑ni chi ankanie ttiba rerua (30) ida tti uduloe sina ge Tata Do Yebáha. Ra ka benne deki lee uke xi'in José nna datiabie Elí.
LUK 3:24 Elí nna uke xi'ini Matat, Matat nna uke xi'ini Leví, Leví nna uke xi'ini Melqui, Melqui nna uke xi'ini Jana, Jana nna uke xi'ini José,
LUK 3:25 José nna uke xi'ini Matatías, Matatías nna uke xi'ini Amós, Amós nna uke xi'ini Nahum, Nahum nna uke xi'ini Esli, Esli nna uke xi'ini Nagai,
LUK 3:26 Nagai nna uke xi'ini Maat, Maat nna uke xi'ini Matatías, Matatías nna uke xi'ini Semei, Semei nna uke xi'ini José, José nna uke xi'ini Judá,
LUK 3:27 Judá nna uke xi'ini Joana, Joana nna uke xi'ini Resa, Resa nna uke xi'ini Zorobabel, Zorobabel nna uke xi'ini Salatiel, Salatiel nna uke xi'ini Neri,
LUK 3:28 Neri nna uke xi'ini Melqui, Melqui nna uke xi'ini Adi, Adi nna uke xi'ini Cosam, Cosam nna uke xi'ini Elmodam, Elmodam nna uke xi'ini Er,
LUK 3:29 Er nna uke xi'ini Josué, Josué nna uke xi'ini Eliezer, Eliezer nna uke xi'ini Jorim, Jorim nna uke xi'ini Matat,
LUK 3:30 Matat nna uke xi'ini Leví, Leví nna uke xi'ini Simeón, Simeón nna uke xi'ini Judá, Judá nna uke xi'ini José, José nna uke xi'ini Jonán, Jonán nna uke xi'ini Eliaquim,
LUK 3:31 Eliaquim nna uke xi'ini Melea, Melea nna uke xi'ini Mainán, Mainán nna uke xi'ini Matata, Matata nna uke xi'ini Natán,
LUK 3:32 Natán nna uke xi'ini David, David nna uke xi'ini Isaí, Isaí nna uke xi'ini Obed, Obed nna uke xi'ini Booz, Booz nna uke xi'ini Salmón, Salmón nna uke xi'ini Naasón,
LUK 3:33 Naasón nna uke xi'ini Aminadab, Aminadab nna uke xi'ini Aram, Aram nna uke xi'ini Esrom, Esrom nna uke xi'ini Fares, Fares nna uke xi'ini Judá,
LUK 3:34 Judá nna uke xi'ini Jacob, Jacob nna uke xi'ini Isaac, Isaac nna uke xi'ini Abraham, Abraham nna uke xi'ini Taré, Taré nna uke xi'ini Nacor,
LUK 3:35 Nacor nna uke xi'ini Serug, Serug nna uke xi'ini Ragau, Ragau nna uke xi'ini Peleg, Peleg nna uke xi'ini Heber, Heber nna uke xi'ini Sala,
LUK 3:36 Sala nna uke xi'ini Cainán, Cainán nna uke xi'ini Arfaxad, Arfaxad nna uke xi'ini Sem, Sem nna uke xi'ini Noé, Noé nna uke xi'ini Lamec,
LUK 3:37 Lamec nna uke xi'ini Matusalén, Matusalén nna uke xi'ini Enoc, Enoc nna uke xi'ini Jared, Jared nna uke xi'ini Mahalaleel, Mahalaleel nna uke xi'ini Cainán,
LUK 3:38 Cainán nna uke xi'ini Enós, Enós nna uke xi'ini Set, Set nna uke xi'ini Adán, Adán‑ni nna uke benne ben Tata Do Yebáha.
LUK 4:1 Jesús‑ni chiba deyu'u Espíritu ge Tata Do Yebáha itúba latie bedábie ro'o yoo Jordán‑ni deyye. Nianna deche Espírituha bie lo yu bisi ata lanú benne se'e.
LUK 4:2 Delo chua (40) ubisaha ben nu xxegwiha dhi yiene. Labí utobie yetta itúba ugwekie niha. Tti chi gwadona chua ubisaha, la'ania nna tti ugwetti bitunie.
LUK 4:3 Nianna tti ra nu xxegwiha bie: ―Ganna si gwalíginlu ankalu Xi'in Tata Do Yebáha, usichu íyya re nii eyakana yettaxtila ki golu.
LUK 4:4 Jesús‑ni nna bekabie geni, ree: ―Lo ka yetsi ge Tata Do Yebáha dia ra: “Laa sunruga len yettaxtila aka ben ka benne.”
LUK 4:5 Nianna che nu xxegwiha bie iki ttu i'iya nna bele'enne ttu satti iyá ka yiesi ka nu ra tsitsi lekani se'e yiesi lo yu‑ni.
LUK 4:6 Nianna tti rane: ―Neti utea lo neda lenlu kini innabialu kana, anágaba lhe utea nu tse tee gekinna, kumu neti chi bisiakana lasi náya. Laxkala utebaa kana len benne rakaba lasia ugwea.
LUK 4:7 De nuha nna ganna si lu udú xibilu arloa nna utsá lolu neti, la'ania nna iyába ka nu chi bele'a‑na akakana gelu.
LUK 4:8 Jesús‑ni nna bekabie geni, ree: ―Lo ka yetsi ge Tata Do Yebáha dia ra: “Suna arlo Tata Do Yebaa benne anke Xxanaluha, suna arlo benneha‑ba udú xibilu lhe suna nu innabe uinlu lhe.”
LUK 4:9 Nianna deche nu xxegwiha bie lhe'esi Jerusalén‑ni nna tti ulhapine iki yotuha gwetsáli. Nianna rane: ―Ganna si gwalíginlu ankalu Xi'in Tata Do Yebáha, niili dulu nna ubinnichu lo yuha,
LUK 4:10 kumu lo ka yetsi geeha dia ra: Tata Do Yebáha idhelhe ka anjeli geeha kini uyú tsitsike lu.
LUK 4:11 Udoni lo náke lu kini abittu tsu'u ni'alu iki ka íyya.
LUK 4:12 Jesús‑ni nna ree na: ―Lo ka yetsiha‑gaba dia ra: “Bittu dhi yielu Tata Do Yebaa benne anke Xxanaluha.”
LUK 4:13 Atti abíruba udaa nu xxegwiha gaxasina dhi yiena Jesús‑ni, nianna bekwittachilana. Isá to gwadána bekwittana kwe'ebie.
LUK 4:14 Jesús‑ni nna beyekie besine daka Galilea. Tsitsiba ra lebie de yu'u Espíritu ge Tata Do Yebáha latie. Nianna lhe'e iyába ka yiesi se'e abi'iba niha, ugwadhi tisa ge nu runieha.
LUK 4:15 Labie nna lhe'e ka yo'o ata rudheti ka benne Israel‑ni ka tisa ge Tata Do Yebáha, niha‑ba rekie rule'enie ka benneha. Laxkala iyábake ráke: ―¡Xxeniba ra le benne‑ni!
LUK 4:16 Jesús‑ni beyye lhe'esi Nazaret ata bixenieha. La sá tti reyaka le ka benne Israel‑ni uta'abie lhe'e yo'o ata rudhetike ka tisa ge Tata Do Yebáha attiba labinie runie. La'ania uta'abie nna udúbie kini ulabe ka tisa ge Tata Do Yebáha.
LUK 4:17 Begwekane ka yetsi ben Isaías benne uke profeta ge Tata Do Yebáha. Tti udhalie lo ka yetsiha nna gwaxxake ata dia ra:
LUK 4:18 Espíritu ge Tata Xisiha yu'ubie latia kumu chi ulesie neti kini tsiaya kixxi'aya ka tisa tse len ka benne abittu tee geke nna udhelhe neti kini odú tsea le ka benne du si'i leke, lhe kixxi'ania ka benne tee lisiyya deki gwalábake, lhe anágaba nna edhalia iyya lo ka benne xua loke. Udhelhagabe neti kini odiláya ka benne ruyúke elha disa ttixka bixa rudhakakana ke,
LUK 4:19 lhe kixxi'aya deki isia sá Tata Xisiha aka lenie ka benne.
LUK 4:20 Nianna tti bottesie yetsiha nna bogwebie benne rigua tsebie ka yetsiha nna tti bedoe. Iyába ka benne se'e niha nna doba loke bie.
LUK 4:21 Nianna tti unnebie, ree: ―Nasá chi bilenle uka nu belabaa lo yetsi‑ni.
LUK 4:22 Iyába ka benne se'e niha rinne tseke ge Jesús‑ni lhe rebanabakanie ge ka tisa tsagwi rinneeha. Lhe anágaba nna rinnaba tisa luesike, ráke: ―¿Laaba xi'in José‑niba benne‑ni?
LUK 4:23 Jesús‑ni nna ree ke: ―Gaxa gwa rakabinle gale neti ttu tisa tee nu rinne ka benne ráke: “Lu nu reyoni ka benne rani, la lu tte beyoin latilu”, o innále: “¿Beakala lhe'esi gelu‑ni a ruinlu luesi nu chi binatu benlu lhe'esi Capernaum‑ni?”
LUK 4:24 Nianna unne chiettirue, ree: ―Netiru ria, ni ttú profeta ge Tata Do Yebáha, a rulabikane lhe'esi geeha.
LUK 4:25 Neti gwalígati xa, use'e galá ixe ka benne nuila bidabi lo yu ge Israel‑ni tti udo profeta Elías‑ni. La'ania labíru iyya uka delo tsunna ida nalhaha, nianna bisiaru ttu ubina itúba ata se'e ka benne Israel‑ni.
LUK 4:26 Ttaka Tata Do Yebáha, ni len ttú ka benne nuila bidabi ge Israel‑ni a udhelhe Elías‑ni kini ute náni len ka benneha. ¿Laaba ganna len nuila bidabi ge lhe'esi Sarepta, delába yiesi re daka Sidón, laaba ganna len nuilaha‑la udhelhe na?
LUK 4:27 Aníha‑gaba tti udo profeta Eliseo‑ni, ixegaba ka benne use'e lo yu ge Israel‑ni, uka latike yiesu nu tee láni lepra. Ttaka ni ttú ka benneha a betúa yiesuha latike. ¿Laaba ganna Naamán benne doe lo yu ge Siria, benneha‑la gwa betúa yiesuha latie?
LUK 4:28 Tti biyienin iyá ka nu se'e gwedo naga lhe'e yo'oha nu ra Jesús‑ni, nianna bisa'a xxattakinna
LUK 4:29 nna tti udú liikana uleakane ro'o yiesiha, chekane ro'o belha'a du ro'o yiesiha. Nuha rena iki ttu i'iya. Niha ruinkana uttulhukane.
LUK 4:30 Ttaka Jesús‑ni beyeki ttebe betebie lagwi gekani nna deyye.
LUK 4:31 Jesús‑ni beyadie besine lhe'esi Capernaum. Nuha rena daka Galilea nna lhe'e ka sá atti reyaka le ka benne Israel‑ni nna rule'enie ke ka tisa ge Tata Do Yebáha.
LUK 4:32 Ka benneha nna rebanabakanie ge nu rule'enie keha, kumu rinnebie ttiba ttu uxtisi rapa lo neda.
LUK 4:33 Lhe'e yo'o ata rudhetike ka tisa ge Tata Do Yebáha, niha re ttu nubiyú yu'u latini ttu espíritu satsa. Nubiyúha nna itú leni uresi'ana, rana:
LUK 4:34 ―¡Begwelha ri'itu! ¡Bittu etega'a gelu len ri'itu, lu Jesús ge Nazaret! ¿Si dalu gwetse'e loo ri'itu? Neti gwankabiabati lu. Lu ankalu benne chi ulesi Tata Do Yebáha.
LUK 4:35 Jesús‑ni nna bedhaka dise espíritu xxegwiha, ree na: ―¡Bedhea ro'olu nna beria lati nubiyú‑ni! Nianna uru'una nu xxegwiha nubiyúha lo yu arlo iyába ka benne se'e niha. Nianna tti beria ttebana latini, labíru bixa bedhakana nubiyúha.
LUK 4:36 Iyába ka benne se'e niha uka télakanie nna rinnaba tisa luesike, ra luesike: ―¿Bí anka ka tisa rinne nubiyú du nii? ¡Xxeniba ra leni rulisana ka espíritu satsa‑na kini eriakana nna gwa rudobakana tisa geni reriakana!
LUK 4:37 Iyába ka benne se'e lhe'e ka yiesi se'e itúba ka daka niha rinneke ge nu ruin Jesús‑ni.
LUK 4:38 Jesús‑ni beriabe lhe'e yo'o ata rudheti ka nu Israel‑ni ka tisa ge Tata Do Yebáha nna gwate'e lisi Simón‑ni. Nan ge nuila ge Simón‑ni nna teba benneha ranie, yu'u xxatte xilhaa. Nianna unnabakana len Jesús‑ni kini eyonie benneha.
LUK 4:39 Jesús‑ni nna biyette arlo benne nuilaha, bedhaka dise xilháha nna beria ttebana lati benneha. Looraha tteba nna beyadha benneha nna benie nu utoke.
LUK 4:40 Atti chi chadi tatubisa‑na, iyába ka benne se'e ka benne rani geke, ka benne ridakake iyá looba isagwe, cheke ka benneha ata du Jesús‑ni. Jesús‑ni nna iki ttu ttu ka benneha rixxua nábie nna reyonie ke.
LUK 4:41 Lati ixegaba ka benne raniha beria ka espíritu xxegwiha, ribesi'abakana rákana: ―¡Lu ankalu Xi'in Tata Do Yebáha! Ttaka Jesús‑ni nna rudhaka disalee ka nuha. Labí rugwelhe kana innekana, kumu yúbakana deki labie anke Cristu benne chi ga'anani Tata Do Yebáha idhelhe.
LUK 4:42 Tti ugwani dilaha, biria Jesús‑ni ro'o yiesiha ata lanú benne risatsa. Ttaka ka benne regilake bie nna gwa bisinbake ata dueha. Ruinke ukwedake bie kini abittu eyye.
LUK 4:43 Ttaka lee nna ree ka benneha: ―Rakagaba doelha kixxi'ania ka benne se'e lhe'e adíru ka yiesi ka tisa tse, delába kixxi'ania ke gasina ki akake benne innabia Tata Do Yebáha ke, kumu de nuha‑la udhelhe neti.
LUK 4:44 Aníha‑ba dia Jesús‑ni [daka Galilea‑ni] rigixxi'e ka tisa tseha lhe'e ka yo'o ata rudheti ka benne Israel‑ni ka tisa ge Tata Do Yebáha.
LUK 5:1 Ttu lidú do Jesús‑ni ro'o indatoo ge Genesaret. Yalhá ixe ka benne tupa niha, axtaba rukí ya'ake bie de raka leke iyienkanie ka tisa ge Tata Do Yebáha.
LUK 5:2 Nianna bilani Jesús‑ni chupa ka barcu dákana ro'o indaha. Lanú nu tee lhe'ekani, kumu ka benne rudaxxuke belhaha si ugwadilake rigíke ka yexxa gekeha.
LUK 5:3 Jesús‑ni nna ugwapie lhe'e ttu ka barcuha nna unnabe len Simón nu anka xxana barcuha kini usigana nuha a latti lhe'e indaha. Nianna tti udoe lhe'e nuha. Niha‑liba doe nna uduloe rule'enie ka benne tupa ro'o indaha.
LUK 5:4 Tti chi beyaka unneeha, nianna ree Simón‑ni: ―Uche barcu‑ni ata re idila inda‑na nna gwaludelha ka yexxa gele‑na kini udaxxule belha.
LUK 5:5 Simón‑ni nna bekabina, rane: ―Betuelaba uyu'utu sina xa tata, nurula biyaxxuintu. Ttaka ganna aná ra kwinalu nna udelhachua ka yexxa‑ni.
LUK 5:6 Atti beyalhikana ka yexxaha nna desá tíba belha lhe'e ka nuha. Chi tteba isúkana.
LUK 5:7 Nianna bettá nákani uxikana adíru ka nu se'e lhe'e attu barcuha kini ugía ka nuha nna bete nákani lenkana. Laxkala ixpaba ka barcuha besá tíbakana belha. Chiba ruinkana xxudikana lhe'e indaha kumu de dedá xxattakana idi'i.
LUK 5:8 Tti bilani Simón nu tegaba láni Pedro, tti chi bilenna nu chi ukaha, nianna tti bedú xibini arlo Jesús‑ni nna rane: ―¡Ubi'etta kwe'a xa tata! Kumu neti ttu nu runi tulhaba ankaa.
LUK 5:9 Aníha rana kumu lana lhe adíru ka nu se'e lennaha yalhá bebanakinna de bedaxxu xxattakana belha.
LUK 5:10 Aníha‑gaba gwate Jacobo‑ni lhe Juan‑ni lhe. Ka nuha ankakana ka xi'in Zebedeo‑ni. Lakana ribengabakana turo'o len Simón Pedro‑ni. Ttaka Jesús‑ni nna rabie Simón Pedro‑ni: ―Bittu gasinlu. Debá nnanna nna labíru udaxxulu belha; ka bennela chi dhulolu gaxilu kini udaxxuke neda ge Tata Do Yebáha.
LUK 5:11 Nianna tti bebeakana ka barcuha ro'o indaha nna bese'e bixxikana ka nuha nna dia ttebakana danalhakana Jesús‑ni.
LUK 5:12 Ttu sá do Jesús‑ni lhe'e ttu ka yiesi se'e niha. Niha bisin ttu benne biyú sia xxatta latie yiesu nu tee láni lepra. Tti bilen benneha Jesús‑ni nna bere tteba loe lo yu nna unnabe len Jesús‑ni, ree bie: ―Tata xisi to, ganna lu aka lelu, gwadaabalu eyoinlu neti.
LUK 5:13 Nianna tti belhí ná Jesús‑ni utane lati benneha nna ree: ―Gwaka galá lasia. ¡Nnanna, chinka beyaka! Loora rinne Jesús‑ni nna betúa tteba yiesuha lati benneha.
LUK 5:14 Nianna tti ra Jesús‑nie: ―Anuttu nu galu. Beyyala gwatso du arlo bixxudiha nna bete úna nu daa lolu utelu ge Tata Do Yebáha de chi beyarilu. Beni attiba raba lo bia bennabi bodha'an Moisés‑ni. Aníha kini uyú lo ka benne deki chiba betúa isagwe‑na latilu.
LUK 5:15 Ttaka meskiba besuna Jesús‑ni nna adíla ugwadhi tisa ge nu runieha. Laxkala ixe ka benne ritupake kini rudo nagake gebie lhe ki reyonie ke ge bixaba isagwe ridakake.
LUK 5:16 Jesús‑ni nna reru'une ata anuttu benne risatsa kini rilhapie tisa len Tata Do Yebáha.
LUK 5:17 Ttu sá do Jesús‑ni rule'enie ka benne ka tisa ge Tata Do Yebáha. Niha‑gaba betetse'e ttu chupa ka fariseo‑ni lhe betetse'egaba ttu chupa ka nu rule'ekinna ka benne nu ra lo bia bennabi bodha'an Tata Do Yebáha len Moisés‑ni, ka nu daba lhe'e iyába ka yiesi to se'e daka Galilea‑ni lhe daka Judea‑ni lhe ka nu daba lhe'esi Jerusalén‑ni lhe. Jesús‑ni nna, kumu de du Tata Xisiha lenbie, de nuha nna tsitsiba ra lebie reyonie ka benne rani.
LUK 5:18 Nianna bisin ttu chupa ka nubiyú chekana ttu benne daa yatti latie xuakinne lo ttu breta. Ruinkana uga'akana benneha lhe'e yo'o ata du Jesús‑ni kini sattixxakana benneha arloe.
LUK 5:19 Ttaka de abí galá anka gaxa ga'a lenkana benneha kumu de tupa xxatta ka benne ro'o yo'oha, aníoka nna ugwapi lenkana benneha iki yo'oha. Utuakana ttu chupa ka texa ki udo belea nna ulhidakana benne xua lo bretaha lagwi ge ka benne saa niha. Aníha benkana kini bisine arlo Jesús‑ni.
LUK 5:20 Tti bilani Jesús‑ni gwa riaba leke deki gwadaabe eyonie benneha, nianna ree benne raniha: ―Nnanna chiba bixú elha xen lasi ge ka tulha gelu‑na xa nubiyú.
LUK 5:21 Ka nu rule'ekinna ka benne nu ra lo bia bennabi bodha'an Moisés‑ni lhe ka fariseo‑ni lhe belaba lhi'u lekani, rakakinna: “¿Nú anka nubiyú du‑ni nna rilhida gaana Tata Do Yebáha? Sunruba benneha gwa raka gebie ridíe elha xen lasi ge ka tulha ruin ka benne.”
LUK 5:22 Ttaka Jesús‑ni nna ute dábanie nu rulaba lekaniha, nianna unnaba tise, ree kana: ―Lebi'i, ¿beaka rulaba lele aná?
LUK 5:23 Gwalinnáchu, ¿bí nuha nu sattiru innári'i? ¿Si innári'i: “Chiba bixú elha xen lasi ge ka tulha gelu‑na” ak? o ¿innári'i: “Beyadha nna bedá”?
LUK 5:24 Ttaka nnanna chi ula'ania le kini uyú lole deki neti benne daya yebáha, yiesi lo yu‑ni gwa teeba lo neda kia ki dhia elha xen lasi ge ka tulha ruin ka benne. Nianna tti ree benne daa yatti latieha: ―Lu, rulisaa lu. Beyadha nna bodaxxu breta xualu loin‑na nna beyya lisilu.
LUK 5:25 Looraha nna beyadha tteba benne biyúha arlo iyába ka benne se'e niha nna bodaxxue breta nu uxue loniha. Nianna tti deyye lisieha, rulhe ree: ―¡Xxeniba ra le Tata Do Yebáha!
LUK 5:26 Iyába ka nu se'e niha bebanabakinna nna itú rasibakinna, rákana: ―Xxeniba ra le Tata Do Yebáha. Nasá chi bilenri'i uka ka elha tsagwi.
LUK 5:27 Iki de nuha nna beria Jesús‑ni lhe'e yo'oha, nianna bilánie ttu gwekixa dona ata rukixakana belhiu nu daa lo ka benne rigixake ge Roma‑ni. Nu anka gwekixaha tee láni Leví. Nianna tti ra Jesús‑ni na: ―¡Utá, betenalha neti!
LUK 5:28 Nianna udú lii Leví‑ni nna bedhá bixxi ikini sina ruinnaha nna gwanalha ttebana Jesús‑ni.
LUK 5:29 Delola nna ben Leví‑ni ttu laní ge Jesús‑ni lhe'e lisiniha nna ixeru ka gwekixa lhe adíru ka benne lhe use'ekana lenke go yetta.
LUK 5:30 Ttaka ka fariseo‑ni lhe anágaba ka nu rule'ekinna ka benne nu ra lo bia bennabi bodha'an Moisés‑ni, udulokana rulisakana ka benne rudhetini Jesús‑ni, rákana ke: ―¿Beakala lebi'i nna ri'a robale len ka gwekixa‑na lhe len ka nu ruin satsa‑na lhe?
LUK 5:31 Ttaka Jesús‑ni nna bekabie gekani, ree: ―Ka nu abittu rani‑na, ka nuná labí riyasakinna nu eyoinna kana, sinuki ka nu rani‑na nuná riyasakinna nu eyoinna kana.
LUK 5:32 Neti laa dagaa raxia ka nu runi nu dika ixú, sinuki dalaa raxia ka nu ruin satsa, kini odúna kana nna odaxxukana neda ge Tata Do Yebáha.
LUK 5:33 Nianna rákana Jesús‑ni: ―¿Beakala ka benne rudhetini Juan benne rugadi indaha lhe ka benne rudhetini ka fariseo‑ni, rutte xxatta ubina lhe'eke, labí roke yetta lhe rilhapike tisa len Tata Do Yebáha lhe? ¿Beakala ka nu rudhetinlu‑ni nna ri'a roba ka nuní?
LUK 5:34 Jesús‑ni nna bekabie gekani, ree: ―¿Laaba ganna labí aka gele uinle ki utte ubina lhe'e ka benne biyaxike ki tse'eke dha'aha ganna ttixka sa duba nu kwiti rutsá nániha lenke?
LUK 5:35 Ttaka ganna chi bisia sá itua nu kwitiha, anutturuna dho lenke, la'anialiba nna chi utte ubina lhe'e ka benne se'e dha'aha.
LUK 5:36 Utixxi'agabanie kana ttu tisa. Aníha benie kini utte dákana bí diani nu raka lebie kixxi'anie kanaha. Nianna tti ree: ―Lanú ttu benne do richúe salha'a ro'o xo kubi geeha nna otábie na ro'o xo yaxxuha, kumu ganna aníha unie, la'ania nna utse'e loobe xo kubiha. Anágaba nna lari kubiha laa gwetogin nuha edúna ro'o lari yaxxuha.
LUK 5:37 Nigaba lanú ttu benne do rige'e vinu kubi lhe'e ka yieti yaxxu, kumu ganna aníha unie, la'ania nna vinu kubiha, ganna chi galana nna itsúba nuha yietiha. La'ania nna ilaliba vinuha lhe tse'e loogaba yietiha lhe.
LUK 5:38 Laxkala teeki ka'ake vinu kubiha lhe'e ka yieti kubi.
LUK 5:39 Nigaba lanú ttu benne do ri'e vinu yala, delo nna ede'ogaba lebie i'iye vinu kubi, kumu ree: “Vinu yala‑na nuná ri'aru ixí.”
LUK 6:1 La sá tti reyaka le ka benne Israel‑ni ute Jesús‑ni lhe'e ka xuxtila se'e niha. Ka benne rudhetinieha nna richekuke iki ka xuxtilaha nna rixubi len náke benneha nna roke ka xua toha.
LUK 6:2 Nianna tti unnaba tisa ttu chupa ka fariseo‑ni ke, rákana ke: ―¿Beaka ruinle nu abittu ga'anna uinri'i la sá reyaka leri'i?
LUK 6:3 Jesús‑ni nna bekabie gekani, ree: ―¿Si lagwa chi belabale lo yetsi ge Tata Do Yebáha bí ben David‑ni? Yule benneha lhe ka benne dia lenieha lhe, ttu lidú bituinke nna
LUK 6:4 uta'abie lhe'e yotu ge Tata Do Yebáha, nianna bedaxxue ka yettaxtila chi riesike ankake sun tteba ge Tata Do Yebáha, delába ka yettaxtila ka nu labí aka go attu benne subi, sunruba ka bixxudiha gwa ga'anna gokana benneha. ¿Laaba ganna David‑ni utobe benneha nna begwegabe ka benne dia lenieha kini utoke?
LUK 6:5 Rágaba Jesús‑ni kana: ―Neti benne daya yebáha, netiba ankaa xxana ka sá reyaka leri'i. De nuha nna gwa teeba lo neda kia innía bixa dika uinri'i lhe'e ka sá reyaka leri'i.
LUK 6:6 Uka nuha tti bisia attu sá tti reyaka le ka benne Israel‑ni, la'ania uta'a Jesús‑ni lhe'e yo'o ata rudhetike ka tisa ge Tata Do Yebáha. Nianna udulobie rule'enie ka benne se'e niha. Lhe'e yo'oha‑gaba re ttu benne biyú daa yatti ttu lha'a nábie.
LUK 6:7 Ka nu rule'ekinna ka benne nu ra lo bia bennabi bodha'an Moisés‑ni lhe ka fariseo‑ni lhe se'ekana rulatsikana ge Jesús‑ni ganna si gweyonie ttu benne rani la sáha, kini aníha‑chu nna tee ro'okani bixa usiakana ikie.
LUK 6:8 Ttaka labie nna, kumu yu galábie nu rulaba lekaniha, nianna ree benne daa yatti neeha: ―Udú lii nna utá udú lagwi‑ni. Benne biyúha nna udú lii ttebe die.
LUK 6:9 Nianna tti ra Jesús‑ni kana: ―Neti raka lasia innaba tisaa le ttu bixa. ¿Bí ga'anna uinri'i lhe'e ka sá tti reyaka leri'i? ¿Si uinri'i latsiru ak? ¿O uinri'i nu satsa ak? ¿Si odilári'i ttu benne o ugwelhari'i gattie ak?
LUK 6:10 Nianna tti bodeki loe belannie lo iyába ka benne se'e abi'iba kwe'eeha nna rabie benne biyúha: ―Belhí nálu. Aníha‑ba ben benneha nna beyaka tteba neeha.
LUK 6:11 Ttaka lakana nna yalhá bisa'a xxattakinna nna udulo ttebakana ra luesikani bixa udhakakana Jesús‑ni.
LUK 6:12 La'ania ttegaba nuha ugwapi Jesús‑ni iki ttu i'iya do niha, nianna ulhapie tisa len Tata Do Yebáha. Betuelaba udoe unnebie len benneha.
LUK 6:13 Tti chi ugwani dilaha nna uxie ka benne rudhetinieha. Nianna bekwebie tsi'inu (12) ka benneha. Ka benneha nuha utixxe láke apóstol.
LUK 6:14 Bekwebie Simón benne utixxagabe lábie Pedro lhe Andrés betsi Simón‑ni lhe Jacobo‑ni lhe. Anágaba bekwegabe Juan‑ni lhe Felipe‑ni lhe Bartolomé‑ni lhe
LUK 6:15 Bekwegabe Mateo‑ni lhe Tomás‑ni lhe Jacobo xi'ini Alfeo‑ni lhe. Anágaba bekwegabe Simón benne rákana Zelote lhe
LUK 6:16 Judas betsi Jacobo‑ni lhe. Bekwegaba Jesús‑ni Judas Iscariote nu betto'one lasi ná ka nu bettikaneha.
LUK 6:17 Tti beyadi Jesús‑ni len ka apóstol geeha iki i'iyaha, nianna tti betelede ttu latsi re niha. Niha chi tupa adíru ka benne rudhetinieha lhe ixe juisiru ka benne lhe, ka benne daba itúba ka daka Judea lhe ka benne daba lhe'esi Jerusalén‑ni lhe ka benne daba itúba ka daka ro'o indatoo ge Tiro lhe Sidón lhe. Bisia ka benneha kini udo nagake ge Jesús‑ni lhe anágaba ki eyonie ka isagwe ridakakeha lhe.
LUK 6:18 Ka benne ruyúke elha disa de yu'u ka espíritu satsa latike, ka benneha gwa reyakabake.
LUK 6:19 Aníha uka nna iyá xeaba ka benne raka leke sattanke lati Jesús‑ni, kumu de ra tsitsi lebie nna gwa ridaabe reyonie iyábake.
LUK 6:20 Jesús‑ni belannie lo ka benne rudhetinieha, nianna unnebie ree ke: ―Karubárule, lebi'i ka benne abí gele tee, kumu lebi'i nuná akale ka benne innabia Tata Do Yebáha.
LUK 6:21 ’Karubárule, lebi'i ata se'ele rituinle nnanna, kumu isia sá gobale nna eyielabinle. ’Karubárule, lebi'i ka nu ribesile nnanna, kumu isia sá nna gwedeakabinle.
LUK 6:22 ’Neti benne daya yebáha, karubárule ganna ttixka delo ni'a kia nna utía di lekani le lhe urio lákana le lhe. Karubárule ganna ttixka ulisa xxattakana le lhe anágaba nna ganna ku'u ni'akani le innákana deki satsaba ruinle.
LUK 6:23 Gwalodú itta lele la sáha lhe egitta ebaa lele lhe, kumu lebi'i xxeniba anka nu dhile yebáha. Kumu ka nu rudhaka disakana le nnanna, anágaba bedhaka disa ka benneola gekaniha ka profeta ge Tata Do Yebáha itú ttuha.
LUK 6:24 ’Ttaka lebi'i ka nu tee gele, ¡gwalíchi lele kumu sunruba yiesi lo yu‑ni se'ele xen su lasi de tee nu riyasinle!
LUK 6:25 ’¡Gwalíchi lele, lebi'i ata yiela súbinle nnanna, kumu isia sá gattibale ubina! ’¡Gwalíchi lele ata ruxisile nnanna, kumu isia sá nna kwesibale de eleninle!
LUK 6:26 ’¡Gwalíchi lele, lebi'i ttixka iyába ka benne rinne tseke gele! Kumu ttigaba ruinke rinne tseke gele nnanna, anágaba ben ka benneola gekeha len ka profeta gwen lasi ugweki itú ttuha.
LUK 6:27 ’Ttaka lebi'i ka nu riyieninle rinnea, neti ria le: Akinle ge ka nu abittu raka uyúkana le. Latsiru gwaluin len ka nu ritisikinna le.
LUK 6:28 Gwalinnaba len Tata Do Yebába kini aka lenie ka nu rigekana ikile, lhe gwalinnabagaba lenie ge ka nu rudhaka gwekana le lhe.
LUK 6:29 Ganna si nuxa kweana gi xxagalu, bodekigaba attu lha'a xxagalu kini kweana gi. Ganna si nuxa kuana jabana gelu‑na, begwegaba na mixa gelu‑na.
LUK 6:30 Ganna si nuxa innabana lu ttu bixa, begwe na nu rinnabanaha o si ganna nuxa udaxxuna nu anka gelu, abittu ennabalu nuha.
LUK 6:31 Ttiba raka lele uin ka benne len lebi'i, aníha‑gaba uinle lenke.
LUK 6:32 ’Kumu ganna suna ka nu rakakinna gele‑naruba gwa rakinle gekani, la'ania nna, ¿bíruala nu tse ruinle ganna? Ki ka nu runi tulha‑na, gwa rakagabakinna ge ka nu rakakinna gekani.
LUK 6:33 Lhe anágaba ganna suna len ka nu gwa raka uyúkana le, ganna suna len ka nunáruba gwa ruin tsele, la'ania nna, ¿bíruala nu tse ruinle ganna? Ki ka nu runi tulha‑na anágaba ruin ka nuná.
LUK 6:34 Ganna si rute gannale len ka benne rakinle deki goteke gele, la'ania nna, ¿bíruala nu tse ruinle ganna? Ki ka nu runi tulha‑na gwa ribeagaba ge luesi ka nuná, kumu ribedagabakana edíkana nu betekanaha.
LUK 6:35 Ttaka lebi'i, akinle ge ka nu abittu raka uyúkana le lhe uinle latsiru lenkana lhe. Anágaba nna ute gannale ge ka benne nna bittu tse'ele kwedale deki gwedíle ge nu beteleha. Ganna aníha uinle, la'ania nna xxeniba anka nu tse ralhale dhile, lhe anágaba nna akale xi'in Tata Do Yebaa benne ra xxeni leeha. Kumu benneha anke benne tse len ka nu abittu rugwekane ixkixaru lhe anke benne tse len ka nu runi satsa lhe.
LUK 6:36 Lebi'i nna satua lele ka benne; uinle attigaba ruin Tata geri'iha, ratua lebie ri'i.
LUK 6:37 ’Bittu innele ge ka benne innále: “¿Beaka anála ruinle?” kini Tata Do Yebáha nna abittugaba udhake le aníha. Abittu urixxi ukinnile ka benne; aníha nna kini abittugaba urixxi ukinni Tata Do Yebáha le. Gwalidhí elha xen lasi ge ka benne; aníha‑gaba Tata Do Yebáha gwadígabe elha xen lasi gele.
LUK 6:38 Gwalute nu tee gele len ka benne; aníha‑gaba Tata Do Yebáha gutegabe nu tee gebie len lebi'i. Tseba orixxibiabie otebie gele, odisá tíe lhe ukí giripie lhe'e beduti gele, lhe anágaba odo bíe tti otebie gele kumu attigaba urixxibiale utele; aníha‑gaba orixxibiabie otebie gele.
LUK 6:39 Jesús‑ni nna utixxi'anie ka benne ttu tisa. Aníha benie kini utte dáke bixa diani nu raka lebie kixxi'anie keha. Nianna tti ree: ―Ttiba anka ttu benne xua loe, ¿si gwakaba gebie nnerue arlo attu benne xua loe? ¿Laaba ganna ixpabake iginnike lhe'e ttu yieru?
LUK 6:40 Nigaba ka nu rudhetiha labí rakarula gekani tti benne rule'enie kanaha. Axtaliba ganna chi uluxakinna bedhetikana, la'anialiba nna chi isinkana aka gekani tti raka ge benneha.
LUK 6:41 ¿Beaka ridolu rulannilu biste yu'u lhe'e iyya lo betsi to geri'iha, delo nna a ridoxalu ugíalu yaga yu'u lhe'e iyya lolu‑na?
LUK 6:42 ¿Galasina tee ro'olu galu betsi to geri'iha: “Betsi to, begwelhaxa kweaya biste yu'u lhe'e iyya lolu‑na”? Ki lu a rulannixalu tsapaba anka yaga yu'u lhe'e iyya lolu. ¡Aaluxa nu rigí xú loni! Lade'axa ulea yaga yu'u lhe'e iyya lolu‑na kini anáchu nna ilá tsenlu ki kwealu biste yu'u lhe'e iyya lo betsi to geri'iha.
LUK 6:43 ’Ttu yaga ganna abittu anka tse‑na, labí di ute nuha nu xixxi tse; nigaba yaga anka tseha, labí di ute nuha nu xixxi abittu anka tse.
LUK 6:44 Kumu kua ttu ttu ka yaga‑na ankabienri'i kana gasina anka nu xixxi ribia lokani. Kumu labí dika echidari'i higu lo ka ya yietsi‑na; nigaba elhidari'i uva lo ka ya titsa.
LUK 6:45 Benne re tse leeha, nu tse re lhe'e lastoeha‑ba rinnebie nna nu re satsa leniha nna nu satsa re lhe'e lastoniha‑gaba rinnena. Kumu ri'i nu re lhe'e lastobari'i, nuha‑ba rinneri'i.
LUK 6:46 ’¿Beaka rale neti “Tata Xisi to” nna abígaba ruinle nu xpeya le?
LUK 6:47 Neti kixxi'arugania le gasina anka ttu benne dabie len neti nna riyieninie ka tisa kia‑ni, nianna rudoe tisa ge nu xpeye.
LUK 6:48 Benneha anke ttiba nubiyú bedona yo'o geniha iki ttu íyya. Uche'enna lhi'u, nianna bekuana íyya abi'iba xan nuha kini udo tsitsina. Tti ubixxi inda ro'o yoo tee niha, nianna gwatsu'una idí kwe'e yo'oha, nna niru latti a udaa indaha uttána nuha kumu tsitsiba do nuha iki íyyaha.
LUK 6:49 Ttaka benne riyieninie ka tisa rinnea‑ni nna ganna abíba rudoe tisa, benneha anke ttiba nubiyú bedona yo'o geniha nna labí uche'enna ki ukuana íyya abi'iba xan nuha nna lo liaba bedona nuha. Ttaka tti bisá yoo tee niha inda nna gwatsu'una idí kwe'e yo'oha nna ubixxi tteba nuha. Tuttíruba betse'e loo indaha yo'oha.
LUK 7:1 Iki de chi uluxani Jesús‑ni utixxi'anie ka benne se'e gwedo nagaha, nianna deyye lhe'esi Capernaum.
LUK 7:2 Lhe'esiha do ttu soldadu nu baninna ttu gayua (100) ka soldadu ge Roma‑ni. Nubiyúha do ttu nu kwiti riben lo sina geni. Yalhá raka xxattinna ge nuha. Ttaka nu kwitiha ranibana, chi tteba duna gattina.
LUK 7:3 Soldadu nu baninna adí ka soldaduha, tti binana ge Jesús‑ni, nianna udhelha ttebana ttu chupa ka benneola ge ka nu Israel‑ni, rana kana: ―Gwaltsia gwaligasi Jesús‑ni kini ite eyonie nu kwiti riben sina kia‑ni.
LUK 7:4 Ka nuha nna tti bisinkana ata du Jesús‑ni nna unnaba ditibakana loe, rákane: ―Benne rinnabie ka soldaduha gaxa gwa ralhaba benneha ute nálu lenbie,
LUK 7:5 kumu labie rakanie ge iyába ka benne geri'i lhe lagabe bedoe yo'o ata rudhetiri'i ka tisa ge Tata Do Yebáha.
LUK 7:6 Nianna dia tteba Jesús‑ni lenkana. Ttaka tti chi isinke gaxxaba ata do yo'o geniha, nianna chi udhelhana ttu chupa ka nubiyú se'e tse lennaha, kini tsiakana gákane: ―Aní ra soldadu nu bananie adí ka soldaduha: Uxí elha xen lasi xa tata xisi to, neti labí elha ralhaa ga'a kwinalu lhe'e lisia‑ni.
LUK 7:7 Kumu de nuha nna labí beyaxati ita kwinaga neti lenlu. Náliba dulu unne nna gweyakaba nu kwiti riben lo sina kia‑ni.
LUK 7:8 Kumu neti ankagabaa nu rudoa tisa ge ka nu ra xxeniru lekani tti neti. Anágaba nna rinnabiagabaa adíru ka soldadu. Laxkala tti upeya ttu ka nuha: “Ugía niha”, nuha gwa riabana nna tti rodopeya attu ka nuha: “Utá nii”, nuha nna gwa ritabana, nna tti upeya benne riben lo sina kiaha: “Ben nu tee nii.” Benneha nna gwa ruinbe nu xpeyeha.
LUK 7:9 Tti biyienin Jesús‑ni nu ra nubiyúha nna bebanabanie geni. Nianna tti bodeki loe ree ka benne danalhake bieha: ―Netiru ria, delo iyá ka benne Israel‑ni, niru ttúke labí chi gwaxxakaa ria tsitsi leke tti ria le nubiyú‑ni.
LUK 7:10 Ka nu udhelhana ki beti'akana Jesús‑ni, tti besin ka nuha lhe'e yo'oha, nna chi gwaxxakakana nu kwiti raniha, chiba beyakana.
LUK 7:11 Iki de nuha nna dia Jesús‑ni lhe'e yiesi nu tee láni Naín. Diabie len ka benne rudhetinieha lhe anágaba diagaba ixe juisiru ka benne lhe.
LUK 7:12 Tti chi bisine gaxxa ro'esiha, nianna tti bilánie chekana ttu benne yatti, diakana takatsikane. Ttúru nu kwitiha xi'in benne nuila anka bidabiha. Ixeba ka benne lhe'esiha diake len benne nuilaha, danalhake benne yattiha.
LUK 7:13 Tti bilani Jesús‑ni benne nuilaha, nianna gwatua lebie benneha nna ree bie: ―Bittu kwesilu.
LUK 7:14 Nianna tti ubige utane ro'o i'ina ge nu kwitiha nna ka benne nujake benneha nna uleda ttebake. Nianna tti unnebie ree: ―Nu kwiti, lu rulisaa, beyadha.
LUK 7:15 Benne yattiha nna beyadha ttebe bedoe nna udulo ttebe rinnebie. Nianna tti bote Jesús‑ni benneha len nan geeha.
LUK 7:16 Iyába ka benne se'e niha usibakanie nna ráke: ―¡Gáruba ttipa xxeni ra le Tata Do Yebáha! Lagwi gebari'i chi ulea lo ttu profeta ra xxeni leni. Tata Do Yebáha chi bisiabie kini aka lenie ka benne gebie.
LUK 7:17 Lhe'e iyába ka yiesi se'e daka Judea‑ni lhe lhe'e adíru ka yiesi se'e abi'iba ka daka niha ugwadhi tisa ge nu ben Jesús‑ni.
LUK 7:18 Ka benne rudhetini Juan‑ni gwattixxi'akanie bie ge iyá nu chi ben Jesús‑ni. Nianna tti uxi Juan‑ni chupa ka benneha
LUK 7:19 nna udhelhe ka benneha ata du Jesús‑ni kini tannaba tisake benneha ganna si labie nuha benne chi ga'anna idhelha Tata Do Yebáha o teeki kwedake isia attu benne subi.
LUK 7:20 Tti bisin ka benne udhelha Juan‑ni ata du Jesús‑ni, nianna unnaba tisake, ráke bie: ―Juan benne rugadie indaha, udhelhe ri'itu len kwinalu kini innaba tisatu lu ganna si lu nuná ankalu benne chi ga'anna idhelha Tata Do Yebáha o teeki kwedatu attu benne.
LUK 7:21 Tti lo se'e ka benneha niha, nna beyoin Jesús‑ni ixeru ka benne ge bixaba isagwe rateke lhe beyoingabe ka benne yu'u latike ka espíritu satsa lhe anágaba ixegaba ka benne a raka ilákanie bedhalie loke.
LUK 7:22 Nianna tti bekabie ree ka benneha: ―Gwaleyya nna gwalikixxi'en Juan‑ni nu chi biyieninle lhe nu chi bilenle runia lhe. Gwaligá na: “Ka nu xua lokaniha, chiba relákinna lhe ka nu ridá natsaha, chiba redá tsekana nna ka nu raka latikani yiesu lepra, chigaba reyakakana lhe anágaba ka nu anka kwechuha, chigaba reyienkinna nna ka nu chi uttiha nna gwa reyaka bengabakana. Anágaba ka benne dii abittu geke tee, chigaba riyienkanie ka tisa ge Tata Do Yebáha.”
LUK 7:23 Gwaligágaba na: “Karubáru benne abittu rudú chupana lebie de rilánie nu runia.”
LUK 7:24 Atti beyeki ka benne udhelha Juan‑ni deyyake, nianna tti udulo Jesús‑ni utixxi'e ge Juan‑ni, ree ka benne ixe tupa niha: ―¿Bí biriale gwalannile lo yu bisi ata lanú benne se'e? ¿Si ugíale gwalannile ttu yettixtila ruttá beha ak?
LUK 7:25 Ganna abíba nna, ¿núla nuha gwagíale ganna? ¿Si ttu nubiyú nukuna xo raka lhalha loni? Ko'o. Neti ria, ka nu rukukana ka xo tse raka lhalha loin‑na lhe redí baakana nu tse tee gekani, ka nuná lhe'e ka yo'o ge ka nu rinnabia xeni‑naliba ralha ka nuná tse'ekana.
LUK 7:26 Ganna abíba nna, ¿núla gwagíale ganna? ¿Si ttu profeta ge Tata Do Yebáha ak? Gwalí galá, neti ria, lebi'i biriale gwagíale ttu benne xxenirula ra lebie tti ttu benne anke profeta.
LUK 7:27 Ge Juan‑ni nuha rinne Tata Do Yebáha lo ka yetsi geeha tti rulise Xi'inieha, ree: Neti idhelhaa ttu benne tsie nnerue lolu kini kixxi'e ka tisa kia‑ni. Benneha idhalie neda gelu.
LUK 7:28 Netiru ria, delo iyá ka benne chi uli yiesi lo yu‑ni, lanú ttu benne do ra xxeniru lebie tti Juan‑ni. Ttaka delo iyá ka benne rinnabia Tata Do Yebáha ke, benne ra gwexxaru leeha, xxenirula ra lebie tti Juan‑ni.
LUK 7:29 Iyába ka benne lhe iyágaba ka gwekixaha lhe, tti biyienkanie nu ra Jesús‑ni, nianna tti bokinni ikike deki tseba anka nu rinnaba Tata Do Yebáha uinke. De nuha nna chi uxielhake begadi Juan‑ni ke inda.
LUK 7:30 Ttaka ka fariseo‑ni lhe ka nu rule'ekinna ka benne nu ra lo bia bennabi bodha'an Tata Do Yebáha len Moisés‑ni, labí uxielhakana ugadi Juan‑ni kana inda. Tti benkana aníha, nuha bele'e deki ulu'u ni'akani nu raka le Tata Do Yebáha unie lenkana.
LUK 7:31 Nianna redená Jesús‑ni: ―¿Nú utsania ka benne se'e nnanna ganna? ¿Nú anka tti ankake?
LUK 7:32 Ankabake ttiba ka nuto‑na rise'ekana rittakana ata raka i'iya ribesi'en luesikani, ra luesikani: “Ri'itu gwa bekwesibatu ka iyyaxtila getu‑ni, ttaka lebi'i nna abígaba beya'ale, lhe anágaba gwa bilhagabatu le'a ge benne yatti, lebi'i nna abígaba uresile.”
LUK 7:33 Kumu bisia Juan benne rugadie indaha, benneha labí utoe yettaxtila, nigaba labí u'uye vinu. Lebi'i nna rálale: “Ttu espíritu ge nu xxegwiha‑ba yu'u lati nuná.”
LUK 7:34 Nnanna nna neti benne daya yebáha, bisiaya nna roa lhe ri'iyaa lhe; lebi'i nna redenálale: “Nu du‑ni nna ankana ttu nu ro xxatta lhe ttu nu ri'a lhe. Anágaba nna rutságabana ka gwekixa‑na lhe ka nu ruin tulha‑na lhe.”
LUK 7:35 Ttaka atti rilenri'i elha ruin ge ka xi'in Tata Do Yebáha, la'ania nna rite denri'i deki elha rieni rapa Tata Do Yebáha nuha rapa ka benneha.
LUK 7:36 Ttu ka fariseo‑ni uxina Jesús‑ni lisiniha ki goe yetta lenna. Labie nna gwa ugíabe nna tti uta'abie lhe'e yo'o geniha, nna udoe ro'o mexaha.
LUK 7:37 Ttu nuila do lhe'esiha daa tisa geni deki ruinna satsa. Tti bina nuilaha deki do Jesús‑ni lhe'e lisi fariseo‑ni, nianna diana nna denna ttu re'e to ankana ge íyya ragalha. Íyya ragalhaha tee láni alabastro. Saa tíba re'e toha seti nu rure ixixxi.
LUK 7:38 Tti bisinna ata do Jesús‑ni, nianna biyachu ttebana urena kwe'ebie nna udulona ribesina, nna len inda gwina geniha‑ba bodibidhana ka ni'eha, nianna tti bodibisina ka nuha len itsa ikiniha. Betságaba loni ka ni'eha lhe utabina ka nuha seti dennaha lhe.
LUK 7:39 Fariseo nu uxina Jesús‑ni lisiniha, tti bilenna nu ruin nuilaha, nianna belaba lhi'u leni rakinna: “Ganna ttixka gwalígin nubiyú re nii deki ankana profeta ge Tata Do Yebáha, la'ania nna gwa ute dálinna nú nuila nuní rigánna latini, ki nuila ruin satsaba nuní.”
LUK 7:40 Jesús‑ni nna bekabie ge fariseo‑ni ree na: ―Simón, upeya lu ttu nu upeya lu. Simón‑ni nna bekabina gebie, rana: ―Unába xa maestru.
LUK 7:41 Nianna ree na: ―Ttu lidú use'e chupa ka benne dáke belhiu ge ttu nu ribea belhiu. Ttu benneha daabie gayu gayua (500) denario, attue nna daabie tsieyona (50).
LUK 7:42 Ttaka kumu abí galá ridaake kixake belhuha, aníha uka nna gwa uxíbana elha xen lasi ge ixpaba ka benneha; labí bekixana ke belhuha. Nnanna nna lu, unáchu, ¿nú ka benneha akarukanie ge nu uxína elha xen lasi gekeha?
LUK 7:43 Simón‑ni nna bekabina, rane: ―Neti rakati benne daabie ixenru belhuha, benneha nuha uxíruna elha xen lasi gebie. Jesús‑ni nna ree na: ―Gwalí galenlu.
LUK 7:44 Nianna tti bodeki loe belannie nuilaha nna tti ree Simón‑ni: ―¿Si gwa rilenlu nuila re nii? Neti tti uta'aya lhe'e lisilu‑ni, labí betelu inda kini ití ka ni'aya‑ni. Yúruga nuila‑ni, chi utína ka nuní len inda gwina geni lhe chi bodibisina kana len itsa ikini lhe.
LUK 7:45 Anágaba nna abígaba utolu xxagaa atti bisiayaha. A beriarugalu nuila‑ni, ttili bisiayaha, birula chi bedú siina rutsá loni ka ni'aya‑ni.
LUK 7:46 Lu nigaba a utabilu seti ikia. Yúruga nuila‑ni, chi utabina ttu nu rure ixixxi ka ni'aya‑ni.
LUK 7:47 De nuha nna ria lu, raka xxattinna kia kumu de chi bixú elha xen lasi ge ixe ka tulha chi benna. Kumu ganna ttu benne lattiruba elha xen lasi rixú gebie, la'ania nna lattirugaba raka si'in benneha attu benne.
LUK 7:48 Nianna tti ree nuilaha: ―Chiba bixú elha xen lasi ge ka tulha gelu‑na.
LUK 7:49 Atti biyienin adíru ka benne se'eke lenbie ro'o mexaha nu rabie nuilaha, nianna uduloke rinnaba tisa luesike, ráke: ―¿Nú anka nuní nna ge iyába ka tulha‑na ridína elha xen lasi?
LUK 7:50 Ttaka lee nna unnerulee, ree nuilaha: ―De ugía lelu kia nna chiba bodilaa Tata Do Yebáha lu. De nuha nna xen su lasi beyya.
LUK 8:1 Iki de nuha nna ugwekiru Jesús‑ni len iyába ka benne tsi'inu (12) rudhetinieha lhe'e iyába ka yiesi se'e niha. Rigixxi'e ka tisa tse, delába rigixxi'e gasina ki akake ka benne innabia Tata Do Yebáha ke.
LUK 8:2 Danalhagaba attu chupa ka benne nuila, ka benne beria ka espíritu satsa latike lhe beyakake ge ka isagwe ridakakeha lhe, delába danalha María benne tegaba lábie Magdalena. Benneha beria gasi (7) ka espíritu satsa latie;
LUK 8:3 lhe danalhagaba Juana nuila ge Chuza, Chuza nu baninna iyá nu tee ge Herodes‑ni. Anágaba danalhagaba Susana‑ni lhe adíru ka benne nuila lhe. Nu teeba geke rudaxxuke kini rute náke len Jesús‑ni itupa lenie ka benne rudhetinieha.
LUK 8:4 Ixe juisiru ka benne ririake lhe'e ka yiesi gekeha nna diake ata du Jesús‑ni. Tti chi tupa ixe juisiruke, nianna utixxi'anie ke ttu tisa. Aníha benie kini utte dáke bí diani nu raka lebie kixxi'anie keha. Nianna tti ree:
LUK 8:5 ―Ttu benne ruin sina birie die gwedelha xuxtila. Tti dabie rudelhe benneha nna ttu chupa ka xua toha utsake ro'o nedaha. Tti ute ka benne lo nedaha nna beleabake iki benneha, nianna tti biginni ka binniha nna bedigabakana benneha.
LUK 8:6 Attu chupake nna utsake lo íyya atta'aha; ttaka atti be'eyu ka benneha nna ubisi ttebake kumu de labí lupa tee lo íyyaha.
LUK 8:7 Adí ka benneha nna utsake lhe'e yietsiha. Ttaka tti be'eyu ka benneha nna biyelhagaba ka yietsiha nna belhiubakinna xua toha.
LUK 8:8 Ttaka adí ka benne ubinni ata do yu tseha. Ka benneha nna gwa be'eyubake nna yalhá lhe'e lena beteke. Ttu ttu gayua (100) tteba xua bekudhi iki ttu ttu ka xuaha. Nuha‑ba ra Jesús‑ni nna tti unnebie idisa, ree ka benne se'e niha: ―¡Ata sia nagale, gwaludo nagale ganna gwankale nu dika iyienini!
LUK 8:9 Ka benne rudhetinieha nna unnaba tisake bie, ráke: ―¿Bíla diani nu unnelu‑ni?
LUK 8:10 Jesús‑ni nna bekabie geke, ree: ―Lebi'iligaba nna gwagixxi'abin Tata Do Yebáha le nu labí chi yu adí ka benne, delába gwa ruinbe kini tte denle gasina innabie. Ttaka len adíru ka benne nna bixxi kwe'eba rinnea, kini meskiba bika rulannike nna labí ilákanie lhe meskiba bika riyienkanie nna labí tte dákanie.
LUK 8:11 ’Aní diani ka tisa‑ni innákana, delába xuxtilaha nuha anke ka tisa ge Tata Do Yebáha.
LUK 8:12 Ka xua utsa ro'o nedaha nna ankake ka benne riyiencanie ka tisa ge Tata Do Yebáha, ttaka daa tteba nu xxegwiha nna rebea ttebana ka tisaha lhe'e lastoke. Aníha ruinna kini abittu tsia leke lhe kini abittu odilá Tata Do Yebáha ke lhe.
LUK 8:13 Ka xua utsa lo íyya atta'aha nna ankake ka benne ittaba du leke, riyienkanie ka tisaha nna ria leke ka benneha. Ttaka kumu de abí galá chi begwe lhu ka tisaha lhe'e lastoke, laxkala gwa riaba leke ttu satti, ttaka tti risia rateke ttu bixa, la'ania nna reyadi gaa ttebake.
LUK 8:14 Ka xua utsa lhe'e yietsiha nna ankake ka benne riyienkanie ka tisaha. Ttaka tti tee ka elhaxchacha iki geke lhe tti rudona leke gatta geke, anágaba lhe tti rite leke uinke nu raka yiesi lo yu‑ni, la'ania nna iyá nuha runi kini bittu se'e tsitsike lo neda ge Tata Do Yebáha.
LUK 8:15 Ttaka ka xua ubinni ata do taga'a yuha nna ankake ka benne riyienkanie ka tisaha nna itú iki itú leke rudaxxuke ka tisaha. Anágaba nna labí rudú siike ruinke nu ra ka benneha.
LUK 8:16 ’Lanú ttu benne do rugalhe iki ttu gi nu rudani, delo nna uttudhie ttu bixa ikini kini abittu ilá o lhe ukatsie na xan ata ratteha. ¿Laaba ganna teeki udoe nuha gwetsá kini udenna ge ka benne ga'a lhe'e yo'oha?
LUK 8:17 Nigaba labí ttu bixa tee gatsi nna abí eselana; nigaba ttu bixa raka sigá nna abí una ka benne geni lhe abittu iriana la loo lhe.
LUK 8:18 Laxkala gwaludo tsitsi nagale gasina rite denle nu rinnea‑ni, kumu ganna ttu benne gwa rite dábanie ka tisa kia‑ni, la'ania nna gwate da chiettirulin benneha. Ttaka ganna ttu benne abíba rite danie, la'ania nna iyála nu rakanie deki chi rite danieha, etua.
LUK 8:19 Nan ge Jesús‑ni lhe ka betsieha lhe diake ata dueha, ttaka labí uka ibigake arloe, kumu de tupa xxatta ka benne.
LUK 8:20 Ttaka ttu benne du niha nna utixxi'anie bie, ree: ―Ne nan geluha lhe ka betsiluha lhe se'eke ro'o yo'o‑ni raka leke inne lenke lu.
LUK 8:21 Labie nna bekabilee ree: ―Ka benne gwa riyienkanie ka tisa ge Tata Do Yebáha nna rudoke tisa gebie, ka benne‑na nuná ankake nan kia lhe ka betsia lhe.
LUK 8:22 Ttu sá uta'a Jesús‑ni lenie ka benne rudhetinieha lhe'e ttu barcu. Nianna ree ka benneha: ―Tteri'i lo indatoo‑ni kini iriari'i daka ro'oni nu reha. Nianna tti uta'ake diake.
LUK 8:23 Laka yu'uke neda lo indaha nna uta'adhi Jesús‑ni nna ttiruba bisia ttu be idí lo indaha nna chi risá lhe'e barcuha inda nna chi ruxunnina geke xxudike lhi'u.
LUK 8:24 Nianna gwadiben ttebake Jesús‑ni, ráke bie: ―¡Bebaniruga xa tata! ¡Karubá tsapiri'i inda‑ni nna gattiri'i! Jesús‑ni nna ugwadha ttebe nna bedhaka dise beha lhe bedhaka dise nu ridú lii lo indaha lhe. Nianna siiba beyaka lo indatooha.
LUK 8:25 Nianna tti ree ka benne rudhetinieha: ―¿Gála gwa dule nu chi ria lele ge Tata Do Yebáha? Ttaka lake nna itú rasibakanie lhe rugía ya'abake nna rinnaba tisa luesike, ráke: ―¿Nú anka benne du nii nna axtaba be‑na lhe axtaba inda‑na rulise nna gwa rudobakana tisa gebie?
LUK 8:26 Tti biriake ro'o indaha nna bisinke lo yu ge ka benne Gadara. Gadara rena arlo Galilea‑ni daka ro'o indaha nu reha.
LUK 8:27 Tti ugwadi Jesús‑ni lo barcuha, nianna betetsá ttu nubiyú ge lhe'esiha bie, yu'u ka espíritu xxegwi latini. Chi usá labíru ruku xoni lhe labíru dona lhe'e yo'o lhe. Saná lo ka baa ge ka benne yattiha, niha‑ba reya'anna.
LUK 8:28 Atti bilen nubiyúha Jesús‑ni, nianna uresi'ana idisa nna tti bedú xibini arloe nna unnena itú leni, rane: ―¡Jesús Xi'in Tata Do Yebaa benne ra xxeni leeha, bittu etega'a gelu len neti! ¡Rinnabaa lenlu bittu ugwelu neti elha disa!
LUK 8:29 Aníha ra nubiyúha kumu Jesús‑ni chi rudhaka dise espíritu satsa yu'u latiniha kini eriana. Kumu ixe lidú resia nuha lati nubiyúha, laxkala meskiba bika ruxxikakana na len cadena lhe len ka iyya lhe, ttaka lana nna richúbana ka nuha, nianna tti ribea nu xxegwiha na lo yu bisi ata lanú benne se'e.
LUK 8:30 Jesús‑ni nna unnaba tise, ree na: ―¿Bí lálu? Lana nna bekabina, rane: ―Legión‑ba lá neti. Aníha tee láni kumu ixe ka espíritu xxegwi chi uta'a latini.
LUK 8:31 Ka nu xxegwiha nna rinnabakana len Jesús‑ni ki abittu udelhe kana lhe'e belha'a chulha ata se'e adíru ka espíritu xxegwiha.
LUK 8:32 Lati ttu i'iya do niha yu'u ixeru ka kuchi rekikana ugila go. Laxkala ka espíritu xxegwiha nna unnabakana lenie ki ugwelhe kana sata'akana lati ka kuchiha. Lee nna “O” ba ree, begwelhabe beta'akana lati ka nuha.
LUK 8:33 Ka espíritu xxegwiha nna beriabakana lati nubiyúha nna gwata'akana lati ka kuchiha. Ttaka ka kuchiha nna biria resu tteba ka nuha ugwadikana nna biriakana ro'o ttu íyya daa niha nna ubinnikana lhe'e indaha. Nianna ugwapikana indaha nna uttibakana.
LUK 8:34 Ka benne ruyúke ka kuchiha, tti bilákanie nu chi ukaha, nianna boxunni ttebake deyyake gwattixxi'ake nuha lhe'esiha lhe gwattixxi'akanie ka benne se'e lhe'exxi itúba ka niha.
LUK 8:35 Nianna biria tteba ka benne gwalannike nu chi ukaha. Tti bisinke ata du Jesús‑ni nna gwaxxakake nubiyú nu chi beria ka espíritu xxegwiha latini, dona arloe. Chi beyoku xoni lhe chi beriana ikini lhe. Nianna usilakanie.
LUK 8:36 Ka benne bilákanie nu ukaha nna utixxi'akanie ka benne gasina uka kini beyaka tse nubiyú uyu'u ka espíritu xxegwiha latini.
LUK 8:37 Nianna iyába ka benne se'e itúba daka lo yu ge Gadara, de rasi xxattakanie, de nuha nna unnabake len Jesús‑ni kini eriabie lo yu gekeha nna eyye attu ta subi. Aníha uka nna beta'a Jesús‑ni lhe'e barcuha nna deyye.
LUK 8:38 Nubiyú beria ka espíritu xxegwiha latini nna unnabana len Jesús‑ni kini ugwelhe na tanalhane. Ttaka Jesús‑ni nna bekabie geni, ree na:
LUK 8:39 ―Beyya lisilu nna utixxi'a iyá nu chi ben Tata Do Yebáha lenlu. Nubiyúha nna itúba lhe'esiha deyyana rigixxi'ana nu chi ben Jesús‑ni lenna.
LUK 8:40 Tti beyeki Jesús‑ni lo indatooha besine, ixe juisiru ka benne chi se'eke ubede. Nianna redeakabakanie tti bilákanie besine.
LUK 8:41 Nuha‑ba raka nna tti bisin ttu nubiyú tee láni Jairo. Jairo‑ni baninna yo'o ata ritupa ka nu Israel‑ni rudhetikana ka tisa ge Tata Do Yebáha. Nubiyúha tti bisinna ata du Jesús‑ni nna bedú xibini arloe nna unnabana lenie kini tsie lisiniha
LUK 8:42 kumu xi'iniunnániha chiba ratti nuha. Ttúru nuha xi'iniunnáni do nna chila ankin nuha ttiba ttu tsi'inu (12) ida. Jesús‑ni nna tti yu'e neda die, axtaba rukí ya'akane kumu ixe juisiru ka benne dia danalhake bie.
LUK 8:43 Lhe'e ka benneha sela ttu benne nuila. Chiba uka ttu tsi'inu (12) ida ridobie reni nna iyába belhiu nu tee geeha chi betse'e looe de rekie lo ka nu ruin ramedi, ttaka ni ttú ka nuha a udaakana eyoinkane.
LUK 8:44 Benne nuilaha ubige daka kwe'e Jesús‑ni nna gwattáne ro'o lari nuku benneha. Looraha tteba nna udú sii tteba reniha.
LUK 8:45 Nianna tti ra Jesús‑ni: ―¿Núle nuní chi betettanle ro'o xoa‑ni? Ttaka iyábake ráke: ―Labí chi betettan ri'itu ro'o xolu. Nianna ra Pedro‑ni: ―Ka benne danalhaniba nuní rukí ya'ake lu xa tata.
LUK 8:46 Ttaka Jesús‑ni nna rabie: ―Nuxa nuní chi betettanna ro'o xoa‑ni, kumu neti chi ute dati biria nu tsitsi ra lasia beyonia ttu benne.
LUK 8:47 Tti bilani benne nuilaha abíba aka igatsi nu benieha, nianna itú rixidibe ubige bedú xibie arlo Jesús‑ni. Utixxi'e lo iyába ka benne se'e niha bí lo ni'a ge betettane ro'o xo Jesús‑ni lhe utixxi'agabe deki tti loora bedaxxue ro'o xo benneha nna beyaka ttebe.
LUK 8:48 Jesús‑ni nna rabie benneha: ―Xi'ini to, de ugía lelu deki gwadaabaa eyonia lu, de nuha nna chiba beyakalu. Nnanna nna xen su lasiba beyya.
LUK 8:49 Sa dula Jesús‑ni rinnebie, ttiru chi bisin ttu nu udá lhe'e lisi Jairo‑ni nna utixxi'enna na, rana na: ―Chi utti xi'iniunnáluha, laxkala bitturu uinlu doelha ichelu maestru‑ni.
LUK 8:50 Tti biyienin Jesús‑ni nu ra nubiyúha, nianna tti unnebie ree Jairo‑ni: ―Bittu gasinlu. Sun tteba tsia lelu nna gweyakaba xi'iniunnáluha.
LUK 8:51 Tti uta'abie lhe'e yo'o ge Jairo‑ni nna labí begwelhe ga'a nuxa lenie lhe'e yo'oha, sunruba Pedro‑ni lhe Jacobo‑ni lhe Juan‑ni lhe ka tata nan ge nuila toha lhe.
LUK 8:52 Iyába ka benne se'e niha ribesike lhe relenkanie ge nuila toha. Ttaka Jesús‑ni nna ree ke: ―Bittu kwesile. Laa uttiga bi'in‑ni, te'adhiba bi'in‑ni.
LUK 8:53 Lakana nna bexisilakana gebie kumu yúbakana chiba utti nuila toha.
LUK 8:54 Nianna tti bedaxxue ná nuila toha nna tti unnebie idisa, ree: ―¡Nuila to, beyadha!
LUK 8:55 Nuila toha nna beyaka ben ttebabi nna beyadha ttebabi. Jesús‑ni nna rabie ka benne se'e niha ugoke bi yetta.
LUK 8:56 Ka tata nan ge nuila toha nna yalhá rebanakanie se'eke; ttaka Jesús‑ni nna ree ke: ―Anuttu nu kixxi'enle ge nu chi uka‑ni.
LUK 9:1 Jesús‑ni bottupe ka benne tsi'inu (12) rudhetinieha nna begwebie ke lo neda kini ebeake iyába ka espíritu xxegwi yu'u lati ka benne lhe ki ebeake ka isagwe yu'u latike lhe.
LUK 9:2 Nianna udhelhe ke ki tsiake kixxi'ake gasina ki akake benne innabia Tata Do Yebáha ka benne lhe kini eyoinke ka benne rani lhe.
LUK 9:3 Nianna ree ke: ―Bittu ichele bixa ixuinle neda: bittu dhen garroti gele, nigaba uja chuba gele lhe nigaba uja nu gole o dhenle belhiu lhe. Bittugaba uja chupa kwe xole.
LUK 9:4 Gaxaba lhe'e yo'o isinle, niha‑ba gwaltse'e, edálibale nna eriale niha.
LUK 9:5 Ganna lhe'e ttu yiesi abittu ulabikana le, gwaleria lhe'e yiesiha nna gwalukubi biste ni'ale kini nuha unna liina deki Tata Do Yebáha labí uyu'u lebie nu benkana.
LUK 9:6 Ka benneha nna biriake diake nna riteke lhe'e iyába ka yiesi to se'e itúba ka niha. Rigixxi'akanie ka benne ka tisa tse lhe reyoinke ka benne rani lhe.
LUK 9:7 Herodes nu rinnabiaha, tti binana ge iyá nu ruin Jesús‑ni, nigaba a yuna bixa ulaba leni, kumu adí ka benne ráke deki Juan‑niba nuha chi beyaka benna lagwi ge ka benne chi uttiha.
LUK 9:8 Attu chupake nna redenáke: “Elías‑niba nuná besia.” Adíke nna redenáke: “Ttu ka profeta use'e itú nu reha‑ba nuná chi beyaka bani.”
LUK 9:9 Ttaka Herodes‑ni nna rana: ―Ki kwinaba neti udhelhaa uchúkana iki Juan‑ni, ¿núla ge nuná riyienti rinne xxattakana ganna? De nuha nna Herodes‑ni yalhá re leni ilenna Jesús‑ni.
LUK 9:10 Tti beyeki ka apóstol udhelha Jesús‑ni, ka benneha nna utixxi'akanie bie bipaxa benke ata ugíakeha. Nianna suna labake dechebie nna beru'unake daka lo yu bisi ge lhe'esi Betsaida‑ni.
LUK 9:11 Ttaka tti bina adíru ka benne deki rebie niha, nianna dia ttebake gwanalhake bie. Labie nna gwa belabibe ka benneha, nianna rigixxi'anie ke gasina ki akake benne innabia Tata Do Yebáha lhe anágaba nna reyonie ka benne rani lhe.
LUK 9:12 Ttaka atti chi kwe ubisa‑na loeyya‑na, ubiga ka benne tsi'inu rudhetinieha (12) ata dueha nna ráke bie: ―Bedhelhala ka benne tupa nii kini eyyake lhe'e ka yiesi to‑na lhe lhe'e ka yo'o lhe'exxi ka nu sia abi'iba ka nii kini eya'anke lhe ki kilake nu goke lhe. Kumu ata se'eri'i‑ni yu bisiba nuní, labí bi tee nii.
LUK 9:13 Lee nna rabie ke: ―Lebi'iba gwalugwe ka benne‑ni nu goke. Ka benneha nna ráke: ―Bi den ri'itu. Ne sunruba gayu ka yettaxtila nna chupa ka belha dentu. Laaruba ganna tsiabatu tayo'otu nu go iyá ka benne tupa nii.
LUK 9:14 Kumu ttiba ttu gayu mili anka ka benne biyúha. Jesús‑ni nna rabie ka benne rudhetinieha: ―Tsieyona (50), tsieyona ka benne‑na gwaluse'e ttu ttu dhi.
LUK 9:15 Aníha‑ba benke nna bese'eke iyá ka benneha.
LUK 9:16 Jesús‑ni nna bedaxxue gayu ka yettaxtilaha nna a chupa ka belhaha, nianna tti belhidha lobie yebáha nna begwebie ixkixaru len Tata Do Yebáha, nianna tti ulha'abie lhe'e ka benneha. Begwebie ka benne rudhetinieha kini kidhike ugweke ka benne tupa niha.
LUK 9:17 Iyába ka benneha utoke nna beyielalibakanie. Nianna bottuparulake a tsi'inu (12) sumi ka ro'o salha'a bexxaha.
LUK 9:18 Ttu sá ttúba Jesús‑ni doe rilhapie tisa len Tata Do Yebáha. Niha‑gaba se'e ka benne rudhetinieha. Nianna tti unnaba tise ka benneha, rabie ke: ―¿Nú ra ka benne deki ankaa?
LUK 9:19 Lake nna bekabike, ráke: ―Ttu chupa ka benne ráke deki lu ankalu Juan benne begadi indaha. Attu a chupake nna ráke deki lu ankalu Elías. Adíke nna redenáke: “Ttu ka profeta use'e itú nu reha‑ba nuná, chi beyaka benna.”
LUK 9:20 Jesús‑ni nna rabie ke: ―Lebi'i nna, ¿núla rale deki ankaa? Pedro‑ni nna bekabina, rana: ―Lu ankalu Cristu benne udhelha Tata Do Yebáha.
LUK 9:21 Ttaka Jesús‑ni nna bedha'an tsitsie, ree ke: ―Anuttu nu kixxi'enle.
LUK 9:22 Nianna tti ree ke: ―Neti benne daya yebáha, teeki tate xxattaa uyúa elha disa. Ka benneola geri'i‑ni lhe ka nu loni ge ka bixxudiha, lhe anágaba ka nu rule'ekinna ka benne nu ra lo bia bennabi bodha'an Moisés‑ni, ka nuha ku'uba ni'akani neti lhe uttibakana neti lhe. Ttaka ganna chi beyonna ubisiha nna eyaka benbaa.
LUK 9:23 Nianna tti ree iyába ka benneha: ―Ganna nuxa ttúle raka lele etenalhale neti, teeki eria iki eria lele, meskila bixa satele nna udaxxu kurusi gele ttu ttu sá nna etenalhale neti.
LUK 9:24 Kumu ttu benne ganna abittuba raka lebie bixa satebie de etenalhe neti, benneha nnittilee, delába labí aka ben benneha arlo Tata Do Yebáha. Ttaka benne eria iki eria lebie etenalhe neti meskila bixa satebie de etenalhe neti, benneha gwalálee arlo Tata Do Yebáha.
LUK 9:25 Kumu, ¿bí ixú nuha ganna ttixka nuxa ttu benne dhaabie uin gebie iyá nu se'e yiesi lo yu‑ni, delo nna la labe nnittie arlo Tata Do Yebáha?
LUK 9:26 Kumu ganna ttu benne ettunie kia lhe ettunie ge ka tisa kia‑ni lhe, anágaba neti benne daya yebáha, ettugabati gebie ganna chi dedáya lhe'e xiani kiaha lhe lhe'e xiani ge Tata kia do yebáha, lhe lhe'e xiani ge ka anjeli geeha lhe.
LUK 9:27 Neti gwalígati, ttu chupale ka nu se'ele nii nnanna, axtaliba ganna chi ilenle innabia Tata Do Yebáha, la'anialiba gattile.
LUK 9:28 Iki de chi ute ttu xxunu ubisa unne Jesús‑ni nuha, nianna chebie Pedro‑ni lhe Juan‑ni lhe Jacobo‑ni lhe ugwapike iki ttu i'iya do niha kini ilhapie tisa len Tata Do Yebáha.
LUK 9:29 Laka dobie rinnebie len benneha nna besea lobie. Sitsi túba lhe rapi edha linníba lo xobie.
LUK 9:30 Nianna tti uka xxe chupa ka benne biyú unne lenke bie. Moisés‑niba nuha lenna Elías‑ni.
LUK 9:31 Ka benneha abi'iba ata se'ekeha yu'u chába xiani, nianna rinne lenke Jesús‑ni ge elhutti chi ga'anna satebie lhe'esi Jerusalén‑ni.
LUK 9:32 Pedro‑ni lhe a chupa ka benne se'e lenieha, yalhá chi daa bisiela loke, ttaka nna gwa udaabake use'e tennáke, nianna bilákanie xiani ge Jesús‑ni lhe ge a chupa ka benneha lhe.
LUK 9:33 Tti chi reru'una ka benneha ata du Jesús‑ni, nianna unne Pedro‑ni, rane: ―¡Gwen tte uka se'etu nii xa tata! Usiatu tsunna ka yo'o lhaga gele: ttu gelu nna ttu ge Moisés‑ni nna attu ge Elías‑ni nna. Ttaka Pedro‑ni nna labí yuna bixa nuha rana.
LUK 9:34 Laka duna rinnenaha, nianna tti bebe ttu bea ata se'ekeha. Tti ute dákanie se'eke lhe'e beaha, nianna tti usikanie.
LUK 9:35 Lhe'e beaha nna biyien tsi'i ttu benne, unnebie ree: ―Benne‑ni anke Xi'inia lhe rakati gebie lhe. Ge benne‑ni gwaludo nagale.
LUK 9:36 Iki de chi biyienkanie tsi'i benne unneeha, la'ania nna a sunruba Jesús‑ni bilákanie due niha. Lake nna siiba ukake; lanú nu utixxi'akanie ge nu bilákanieha.
LUK 9:37 Attu dilaha nna tti beyadike iki i'iyaha dedáke, ixe juisiru ka benne biriake gwatsáke Jesús‑ni.
LUK 9:38 Lhe'e ka benneha sela ttu benne biyú nna unnebie idisa, ree: ―Biyúruttu nu kwiti kia‑ni xa tata maestru. Bichisilá ttúru nuní doti.
LUK 9:39 Ttu espíritu ge nu xxegwiha ra'ana latini lhe rukwesi'ana na lhe rukwalhana na lhe anágaba ribeagabana inda kuchina ro'oni lhe rigin xxattana na lo yu nna labí reriaxxina latini.
LUK 9:40 Chigaba unnabaa len ka benne rudhetinlu‑ni kini ebeake espíritu yu'u latin‑ni, ttaka labí udaake.
LUK 9:41 Jesús‑ni nna bekabie, ree ka benne rudhetinieha: ―¡Aalexa lebi'i, ka nu abí ria lele lhe abí du itá lele lhe! ¿Nukalila sa dhua len lebi'i lhe sa utto uchíaya nu ruinle lhe? Aní utá len nu kwiti gelu‑na.
LUK 9:42 Tti dia nu kwitiha ribigana ata du Jesús‑ni, nianna bedegu'una espíritu xxegwiha na lo yu nna bere xxattana na íyya. Ttaka Jesús‑ni nna bedhaka dise nu xxegwi yu'u lati nu kwitiha, nianna beyonie na. Nianna tti rabie tata geniha: ―Ne nu kwiti geluha du nii.
LUK 9:43 Iyába ka benne se'e niha nna bebanabakanie ge nu xxeni ra le Tata Do Yebáha. Laka se'e iyá ka benneha rebanabakanie ge iyá nu ruin Jesús‑ni, labie nna ree ka benne rudhetinieha:
LUK 9:44 ―Gwaludo tsitsi nagale nu upeya le. Neti benne daya yebáha, teeki utekana neti lasi ná ka nu uttikana neti.
LUK 9:45 Ttaka lake nna labí rite dákanie bí ge nuha rinnebie, kumu Tata Do Yebáha labí chi begwelhe ki tte dákanie. Gwea nna rasigabakanie innaba tisake Jesús‑ni kini kixxi'e bixa diani nu reeha.
LUK 9:46 Nianna udulokana rulisa luesikani ra luesikani: ―Delo iyári'i, ¿núri'i nuní ra xxeniru leri'i?
LUK 9:47 Ttaka Jesús‑ni nna ute dábanie nu rulaba lekaniha. Nianna tti bedaxxue ttu nuto nna bedúe na daka lhitte,
LUK 9:48 nianna ree: ―Benne ulabie nuto du‑ni de ria lebie neti, neti nuha ulabie lhe nuxaba benne ganna ulabie neti, benne udhelhe netiha nuha rulabie. Laxkala delo iyá ttele, benne abittu ra xxeni leeha, benneha‑la nuha anke nu ra xxeniru lebie.
LUK 9:49 Juan‑ni nna unnena, rana: ―Maestru, ri'itu chi bilentu ttu nu reki naa, tti rudettina lálu nna rebeana ka espíritu xxegwi yu'u lati ka benne. Ri'itu chi bentu usunatu kini abittu uinna aná, kumu de labí selana ri'i.
LUK 9:50 Ttaka Jesús‑ni nna ree na: ―Bittu usunale, kumu benne abittu rigu'u ni'e nu ruinri'i, gwa duba benneha lenri'i.
LUK 9:51 Tti chi dabigana isia sá eyapi Jesús‑ni yebáha, nianna bebeki lebie tsie lhe'esi Jerusalén‑ni.
LUK 9:52 Lade'axa udhelhe ttu chupa ka benne diake nneruke. Ka benneha nna uta'ake lhe'e ttu yiesi re daka Samaria kini kilake gaxa eya'ane.
LUK 9:53 Ttaka ka benne Samaria‑ni labí uka leke ulabike bie, kumu de ute dákanie daka Jerusalén‑nila diabie.
LUK 9:54 Ka benne rudhetinieha nna, delába Jacobo‑ni lhe Juan‑ni lhe, tti bilákanie nu ukaha, nianna ráke bie: ―Tata, ¿si gwaka lelu uintu ki iginni gi daa yebáha ki utse'e loona kana?
LUK 9:55 Ttaka Jesús‑ni nna beyekie nna bedhaka dise ke.
LUK 9:56 Nianna dia ttebake lhe'e attu yiesi.
LUK 9:57 Laka yu'uke neda diake, nianna tti ra ttu benne Jesús‑ni: ―Tata, neti gwetenalhabaa kwinalu gaxaba tsialu.
LUK 9:58 Jesús‑ni nna bekabie ge benne unneeha, ree bie: ―Ka beda‑na siaba lisi ka nuná ata reta'akana lhe anágaba ka nu sia xxilakani reki lo be‑na siaba lixxu'in ka nuná ata rebiakana, ttaka neti, benne daya yebáha, labí do gaxa kixxa ikia.
LUK 9:59 Nianna tti redea Jesús‑ni attu benne: ―Utá, betenalha neti. Benneha nna bekabie gebie, ree: ―Tata, begwelhaxa eya'aya takatsia tata kiaha. Iki deliba nuha nna tti itaa etenalhaa lu.
LUK 9:60 Jesús‑ni nna bekabie ge benneha, ree: ―Begwelha ka nu yatti‑na ukatsikana ka nu yatti gekinna. Lu nna ugweki utixxi'en ka benne gasina ki akake benne innabia Tata Do Yebáha ke.
LUK 9:61 Attue nna redee Jesús‑ni: ―Neti gwetenalhabaa lu xa tata, deba nna begwelhaxa eya'aya sachú tisaha ka benne se'e lhe'e lisiaha.
LUK 9:62 Jesús‑ni nna bekabie ge benneha, ree: ―Benne rudaxxue xan belasuha, ganna sa rodekiba loe rulannie daka kwe'ebie, benneha labí nu ixú anke ata rinnabia Tata Do Yebáha.
LUK 10:1 Iki de nu chi ukaha nna tti bodokwe Jesús‑ni a gayuna bixxi tsi'inu (72) ka benne. Ka benneha nuha udhelhe chupa chupake kini uneruke loe nna tteke lhe'e iyába ka yiesi lhe ata chi ga'anna tsie lhe.
LUK 10:2 Nianna ree ka benneha: ―Yalhá ixeni lena tee exú, ttaka ka benne edíke lena‑ni ttu chuparubake raka, kumu ixeba ka benne se'e riyasakanie iyienkanie ka tisa ge Tata Do Yebáha, ttaka ka benne rigixxi'ake ka tisa geeha, ttu chuparubake raka. De nuha nna gwalinnaba len Tata Do Yebáha, delába benne anke Xxana ka benne riyasakanie iyienkanie ka tisaha, kini idhelharue ka benne kixxi'akanie ke.
LUK 10:3 Lebi'i gwaltsia nna gwaluyúruga, neti ridhelhaa le attiba ttu nu ridhelhana ka neru xka'a to diakana lagwi ge ka sageo.
LUK 10:4 Bittu dhen belhiu gele lhe nigaba uja beduti gele ata ku'ule nu ixuinle lhe nigaba uja gwaracha gele, lhe anágaba bittu kwedale lo neda gale ka benne padiuxi.
LUK 10:5 Tti ga'ale lhe'e ttu yo'o, lade'axa gwaligasi ka benne se'e lhe'e yo'oha: “Besiru gwaltse'e.”
LUK 10:6 Ganna lhe'e yo'oha se'e ka benne gwa raka leke tse'e tseke len Tata Do Yebáha, la'ania nna gwakaba nu rale ka benneha. Ttaka ganna abíba nna la'ania nna labí aka nu unnabaleha.
LUK 10:7 Lhe'e yo'o ata isinleha, niha‑ba gwaltse'e, lhe anágaba gwali'aba lhe gwaligoba nu uteke, kumu ttu benne riben sina ralhaba benneha dhibie nu goe. Aná nna bittu eriale ttu yo'o nna sadita'ale attu yo'o.
LUK 10:8 Atti isinle lhe'e ttu yiesi ata gulabibakana le, gwaligo iyába nu usigakana lole
LUK 10:9 nna gwaleyoin ka benne rani se'e lhe'e yo'oha lhe gwaligágaba ke: “Lebi'i, chiba dabiga isia sá innabia Tata Do Yebáha le.”
LUK 10:10 Ttaka ganna isinle lhe'e ttu yiesi nna abíba ulabikana le, nianna gwaleria lo ka neda ge lhe'esiha nna gwalinná:
LUK 10:11 “¡Axtaba biste ge lhe'esi gele‑ni nu utá lasi ni'atu, axtaba nuní rukubitu kini utte dale deki labí ben tsele len ri'itu! Ttaka chi rigixxi'entu le deki chiba dabigana innabia Tata Do Yebáha.”
LUK 10:12 Neti ria: Ganna chi isia sá uyú ka benne elha disaha, adírula elha disa tsitsi uyú ka benne se'e lhe'e yiesi ata labí ulabikana leha attichula elha disa uyú ka benne se'e lhe'esi Sodoma‑ni.
LUK 10:13 ’¡Gwalíchi lele xa benne lhe'esi Corazín! ¡Gwalíchi lele xa benne lhe'esi Betsaida! Ganna lhe'esi Tiro‑ni lhe lhe'esi Sidón‑ni lhe chi uka ka milagru ka nu chi uka lhe'e ka yiesi gele‑na, la nukala chi bodúna ka nuha nna bodaxxukana neda ge Tata Do Yebáha. Nianna tti uku xo ttipa gekani nna tse'ekana lo tee ge gi, kini ula'a deki gwalí chi bodúna kana.
LUK 10:14 Laxkala ganna chi isia sá tti uin Tata Do Yebáha elhuxtisi ge ka benne, la'ania adírula tsitsi anka elha disa ugwebie le attichula elha disa tsitsi uyú ka benne ge Tiro‑ni lhe ge Sidón‑ni lhe.
LUK 10:15 Lebi'i nna ka benne lhe'esi Capernaum, ¿si rakinle deki yebáha‑li eyapile? ¡Ko'o, labí! ¡Lhe'e belha'a chulhaha‑li iginnile ata uyúle elha disa! Nianna redeabie ka benne udhelheha:
LUK 10:16 ―Benne udo nage gele, kia nuha rudo naga benneha nna benne abittu ulabie le, neti nuha abittu rulabi benneha nna benne a ulabie netiha nna benne udhelhe netiha nuha abittu rulabie.
LUK 10:17 Tti besin ka benne gayuna bixxi tsi'inu (72) udhelha Jesús‑ni, yalhá itta du leke, ráke: ―Tata, axtaba ka espíritu xxegwiha rudokana tisa getu tti bedettitu lálu.
LUK 10:18 Jesús‑ni nna rabie ke: ―Gwalí galá. Neti bilábati tti biginni nu xxegwiha dana yebáha, ttiba ttu edha biginnina.
LUK 10:19 Neti chi betea lo neda gele kini uleale iki ka belha lhe iki ka ro'o chupa nna labí bi satele. Anágaba chi betea lo neda gele kini dhaale lo nu abittu raka uyúna ri'iha, delába nu xxegwi ra tsitsi leniha.
LUK 10:20 Ttaka lebi'i, labí edeakinle de chi rudo ka espíritu xxegwiha tisa gele. Lebi'i, gwaledeakalinle kumu de chi dia lále yebáha.
LUK 10:21 Nuha‑ba ra Jesús‑ni tti bodú itta Espíritu ge Tata Do Yebáha lebie, nianna bedeakanie nna ree: ―Tata, kwinalu ankalu Xxana yebáha lhe yiesi lo yu‑ni lhe. Xxeni ra lelu kumu chi bele'elu iyá nuní len ka benne abí tte raka geke nna bekatsilu nuní len ka nu yu lhe len ka nu rite dárukinna lhe. Gwalí galá xa Tata, kumu aná uka le kwinalu aka. Nianna ree kana:
LUK 10:22 ―Tata kiaha iyába chi betebie lasi náya lhe anágaba lanú nu ankabienna neti benne ankaa Xi'inieha, sunruba Tataha gwankabianie neti lhe lanú nu ankabienna Tataha, sunruba neti benne ankaa Xi'inieha ankabiati benneha, lhe anágaba sunruba ka benne raka lasia ule'enia ke benneha ki uinbiake bie.
LUK 10:23 Nianna tti bodeki loe ata se'e ka benne rudhetinieha nna suna ka benneha‑ba rabie: ―¡Karubáru ka benne rilákanie nu rilenle‑ni!
LUK 10:24 Kumu neti ria le, ixe ka profeta lhe ixe ka nu rinnabia lhe, yalhá ukakinna ilákinna nu rilenle nnanna, ttaka labí bilákinna nuní. Ukagabakinna iyienikinna ka tisa riyieninle nnanna, ttaka labí biyienkinna.
LUK 10:25 Ttu ka nu rule'ekinna ka benne nu ra lo bia bennabi bodha'an Tata Do Yebáha len Moisés‑ni ruinna ku'una Jesús‑ni prueba. Nianna udú liina unnaba tisane, rane: ―Maestru, ¿bíla teeki unia ki aka bania ttu dia lii?
LUK 10:26 Jesús‑ni nna bekabie geni, ree: ―¿Bíla ra lo bia bennabi‑na? ¿Bíla rite denlu nu ra lo nuná?
LUK 10:27 Nu rule'enna ka benne nu ra lo bia bennabiha nna bekabina, rana: ―Lo nuní dia ra: “Akinlu ge Tata Do Yebaa benne anka Xxanaluha itú iki itú lelu lhe akagabinlu ge attu benne atti tteba rakinlu gelu.”
LUK 10:28 Jesús‑ni nna rabie na: ―Tseba bekabilu. Ganna uinlu aní nna gwaka benbalu ttu dia lii.
LUK 10:29 Ttaka nu rule'enna ka benne nu ra lo bia bennabiha nna ruinna deki bittuba rite denna. Nianna rana Jesús‑ni: ―¿Núla benne nuha akati gebie ganna?
LUK 10:30 Jesús‑ni nna bekabie geni, ree: ―Ttu nubiyú biriana lhe'esi Jerusalén‑ni nna diana lhe'esi Jericó. Lo nedaha biria ka ubana ulanakana na, axtaba ka xoniha utuakana lhe uyakana na lhe, tuttíruba bechulhinna. Niha‑ba utixxakana nubiyúha nna deyyakana.
LUK 10:31 Lo nedaha‑gaba dia ttu bixxudi. Ttaka tti bilenna nubiyúha tena niha, lana nna bekwittalana nna utena diana.
LUK 10:32 Aníha‑gaba bedoin ttu levita, tti bisinna ata tee nubiyúha, tti bilenna benneha nna bodokwittagabana nna utena diana.
LUK 10:33 Ttaka ttu benne biyú ge Samaria, la lo nedaha‑gaba die. Tti bilánie nubiyúha tena niha, nianna gwatua lebie na
LUK 10:34 nna tti ubige ata tee nubiyúha, utabie seti lhe vinu lo ka gweha, nianna bechilhie lari lo ka nuha. Iki de nuha nna belhapie nubiyúha kwe'e bia geeha nna dechebie na ata do ttu yo'o reya'an ka benne yu'u neda. Niha‑ba biyúe na.
LUK 10:35 Beyeki dilaha nna ulea benne ge Samaria‑ni chupa ka belhiu nu anka lhiaxa ge chupa ubisa sina, begwebie xxana yo'oha nna ree nuha: “Biyú tsitsittu nubiyú‑ni. Ganna utse'e loorulu nna neti gwagixabaa gelu ganna chi besiayaha.”
LUK 10:36 Nianna ra Jesús‑ni nu rule'enna ka benne nu ra lo bia bennabiha: ―Nnanna nna unáchu, delo iyunna ka nubiyú ute niha, ¿nú ka nuha rakinlu deki gwa ukakinna ge benne uya ka ubanaha?
LUK 10:37 Nu rule'enna ka benne nu ra lo bia bennabiha nna bekabina, rane: ―Nubiyú nu gwatua leni benneha, lana nuha gwa ukinna gebie. Jesús‑ni nna ree na: ―Nnanna nna lu beyya nna aníha‑gaba beni.
LUK 10:38 Jesús‑ni yu'ubie neda die len ka benne rudhetinieha nna bisine lhe'e ttu yiesi to re niha. Lhe'e yiesi toha do ttu nuila lána Marta. Lana nna gwa belabibane lhe'e lisiniha.
LUK 10:39 Marta‑ni do ttu xilani lána María. María‑ni nna ure ttebana arlo Jesús‑ni kini rudo nagani ge ka tisa rigixxi'eha.
LUK 10:40 Ttaka Marta‑ni si ruchachala ikini de tee xxatta sina geni lhe'e yo'oha. Nianna tti ubigana, rana Jesús‑ni: ―Tata, ¿si abí gwa retabinlu kia? Nuila xilaa‑ni, suna netiba rodha'anna sina‑ni. Usi na ute gaa náni len neti.
LUK 10:41 Ttaka Jesús‑ni nna bekabie geni, ree na: ―Lu xa Marta, ge ixeba nu ruchacha ikilu lhe ge ixeba riuba xxattinlu lhe.
LUK 10:42 Ttaka teela ttu nu rakaru doelha. María‑ni nna chi bekwena ttu nu anka tseru, delába rudo nagani ka tisa kia‑ni nna lanú nu kuana ka tisa‑ni lo náni.
LUK 11:1 Ttu lidú do Jesús‑ni ata rilhapie tisa len Tata Do Yebáha. Tti chi uluxanie unnebie len benneha, nianna tti ra ttu ka benne rudhetinieha bie: ―Tata, bele'enttu ri'itu kini aka getu innetu len Tata Do Yebáha ttiba ben Juan‑ni bele'enie ka benne bedhetinieha.
LUK 11:2 Jesús‑ni nna ree ke: ―Tti innele len Tata Do Yebáha, aní innále: Tata, ri'itu rugwetu lidhakalu kumu ankalu Diosi. Utá, unnabia ri'itu.
LUK 11:3 Bete benne gotu ttu ttu sá.
LUK 11:4 Uxí elha xen lasi ge ka tulha ruintu ttiba ri'itu gwa ridíbatu elha xen lasi ge ka nu abittu ruin tsekana len ri'itu. Bittu ugwelhalu ixú yietu uintu nu satsa.
LUK 11:5 Nianna rágabe kana: ―Uindiri'i, ganna ttixka nuxa ttúle do ttu benne do tse lenle, nianna diale lisi benneha itú riluela ralee: “Betsi to, ulea ganna tsunna yettaxtila gelu‑na kia
LUK 11:6 kumu si bisia tte ttu benne ankabientu dabie gwelanni ri'itu, ttaka labí teeti bixa usigaa loe.”
LUK 11:7 Laaba ganna benne tee lhi'uha, lhi'uliba tebie nna ekabie innee: “Bittu utsetsinlu neti. Chiba yaya yo'o kia‑ni. Gwea nna chiba tee lania ka xi'inia‑ni. Labí aka chadhaa ki utea nu rinnabalu‑na.”
LUK 11:8 Neti ria, labí de do tse lenlu benneha nna chadhe utebie nu rinnabaluha; deruba nna ki abitturu utsetsinlu benneha, de nuha‑ruba nna gwayadhe nna utebie iyá nu rinnabaluha.
LUK 11:9 Laxkala neti ria le: gwalinnaba len Tata Do Yebáha, benneha nna gutebe nu rinnabaleha; gwalegila nna gwataxxakabale nu regilaleha. Gwalinne ro'o yo'oha nna gwadhalibakana kini ga'ale.
LUK 11:10 Kumu nuxaba benne ganna rinnabe ttu bixa nna gwa ridíbe nu rinnabeha lhe nuxaba benne ganna regilee ttu bixa nna gwa raxxakabe nu regileeha. Anágaba nna nuxaba benne ganna rinnebie ro'o yo'oha nna gwa ridhalibakana ra'abie.
LUK 11:11 ’Ganna nuxa ttúle ankale xxudi, ¿si gugwele xi'inleha gona ttu belha ra'aya lhe'eni lo yu ganna ttixka innabana gona belha?
LUK 11:12 ¿O si ganna ttixka innabana gona sitta, laa gugwegale nuha ttu ro'o chupa ki gona?
LUK 11:13 Ki lebi'i ankalale nu runi satsa nna gwa rugwebale ka xi'inle‑na nu tse rinnabakana, ¿titiala Tata geri'i do yebáha, guteba benneha Espíritu geeha len ka benne ganna innabake lenbie?
LUK 11:14 Jesús‑ni daabie rebeabie ttu espíritu xxegwi yu'u lati ttu nubiyú. Nu xxegwiha benna kini beya'an nubiyúha biría. Tti chi beriana lati nubiyúha nna benné ttebana. Ka benne se'e niha nna bebanabakanie tti bilákanie nuha.
LUK 11:15 Ttaka attu chupakana nna rálakana: ―Beelzebú nu anka xxana ka espíritu xxegwiha‑ba rixuin nuní kini rebeana ka espíritu xxegwi‑na.
LUK 11:16 Adíkana nna de ruinkana ki ku'ukane prueba kini ula'a ganna gwalí udhelha Tata Do Yebáha bie, de nuha nna unnabakana lenie unie ttu milagru.
LUK 11:17 Ttaka labie nna yuu gale nu rulaba lekaniha. Nianna tti ree kana: ―Ganna lhe'e ttu yiesi se'e la'a ka benne de ritilha len luesike, la'ania nna tse'e looba yiesiha lhe ganna ka benne se'e lhe'e ttu yo'o se'e la'ake de ritilha len luesike, la'ania nna tse'e loogabake.
LUK 11:18 Anágaba nu xxegwiha, ganna do ttilhabana len ka luesi xxegwi‑niha, la'ania nna labí aka geni innabiana ka nuha. Aní ria kumu lebi'i rale neti deki Beelzebú nu anka xxana ka espíritu xxegwiha‑ba rixúti kini rebeaya adí ka espíritu xxegwi‑na.
LUK 11:19 Ganna lebi'i rale deki neti rixúti Beelzebú‑ni ki rebeaya ka espíritu xxegwi yu'u lati ka benne, ganna rale aná nna ka benne gele‑na nna, ¿si nu xxegwiha‑gaba rixúkinna kini rebeakana ka espíritu xxegwi yu'u lati ka benne? Ko'o, labí. Gwalinnaba tisarugakana. Ka nuná innákana ganna si gwalí nu rale‑na.
LUK 11:20 Neti, Tata Do Yebáha‑ba runie kini rebeaya ka espíritu xxegwi yu'u lati ka benne. Nu runia‑ni runna liina deki chiba bisia Tata Do Yebáha len lebi'i kini innabie.
LUK 11:21 ’Ttixka ttu nubiyú ankana tipa nna duna denna espada geniha kini anuttu nu tatta'ana lhe'e yo'o geniha, la'ania nna iyába nu tua tsenna lhe'e yo'oha, lanú nu ga'a dhina nuha.
LUK 11:22 Ttaka ganna isina attu nu ankaruna tipa nna dhaana loni, nianna tti kuana lo náni espada nu dika odilána naha, nianna tti kuana iyá nu tee geniha nna kidhina nuha len ka benne.
LUK 11:23 ’Laxkala nu abittu du lenna netiha, nuha rigu'uba ni'ani neti nna nu abittu rute náni len neti ki ottupatu ka benne lo neda ge Tata Do Yebáha, nuha urio lálana ka benneha.
LUK 11:24 ’Ttixka ttu espíritu satsa reriana lati ttu benne nna rekibana lo yu bisiha regilana ata eyaka leni, ttaka tti abíba raxxakanaha, nianna rana: “Eyekichilaa eya'aya lisia ata biriayaha.”
LUK 11:25 Tti eyekina esinnaha nna la'ania nna saxxakana benne beriana latieha chi doe anke ttiba ttu yo'o chi luba ra lhe'eni lhe chi yapa te xea lhe'eni lhe.
LUK 11:26 Nianna tti tsiana taxxína a gasi ka espíritu xxegwi, ka nu adírula satsa ruinkana tti lana. Nianna ga'akana tsu'ukana lati benneha. La'ania nna adírula satsa uni benneha attichula tti benie sisi'a tteha.
LUK 11:27 Laka du Jesús‑ni ree aníha, nianna tti unne ttu benne nuila due lagwi ge ka benne tupa niha. Unnebie idisa, ree: ―¡Karubáru benne nuila bije lu lhe begasie lu lhe!
LUK 11:28 Ttaka lee nna bekabilee, ree: ―¡Karubárula ka benne ata gwa rudo nagake nu ra Tata Do Yebáha nna gwa rudoke tisa gebie lhe!
LUK 11:29 Tti chi rituparu ixe juisiru ka benne, nianna tti ra Jesús‑ni ke: ―Ka benne se'e nnanna satsaba ruinke de rinnabake unia ttu milagru xxeni kini unna liina deki Tata Do Yebáha udhelhe neti, ttaka labíru ula'ania ke bixa attu milagru, sunruba luesi nu gwate Jonás‑ni, sunruba luesi nuha gwalákanie.
LUK 11:30 Kumu nu gwate Jonás‑ni bixúna kini ugía le ka benne se'e Nínive‑ni geni. Anágaba neti benne daya yebáha nu sateaha ixúna kini tsia le ka benne se'e nnanna kia.
LUK 11:31 Nuila unnabiana ka yiesi se'e daka Sabá, ganna chi isia sá uin Tata Do Yebáha elhuxtisi ge ka benne se'e yiesi lo yu‑ni, la'ania nna eyadhana lo elhuttiha nna ukinnina ka benne se'e nnanna. Kumu lana idittuli dana nna betedo nagani ge elha rieni upa Salomón‑ni. Nnanna nna nii du ttu benne xxenirula ra lebie tti Salomón‑ni.
LUK 11:32 Anágaba ka benne use'e lhe'esi Nínive‑ni, ganna chi isia sá uin Tata Do Yebáha elhuxtisi ge ka benne se'e yiesi lo yu‑ni, la'ania nna eyadhagaba ka benneha lo elhuttiha nna ukinnike ka benne se'e nnanna. Kumu ka benneha gwa bodúbana ke ge nu benke nna bodaxxuke neda ge Tata Do Yebáha tti biyienkanie ka tisa utixxi'a Jonás‑ni. Nnanna nna nii du ttu benne xxenirula ra lebie tti Jonás‑ni nna a ria lele gebie.
LUK 11:33 ’Lanú ttu benne do rugalhe iki ttu gi nu rudani, delo nna ukatsie ikini; nigaba ruttudhie ttu almoti ikini. ¿Laaba ganna teeki udoe nuha gwetsá kini iláni ka benne ga'a lhe'e yo'oha?
LUK 11:34 Ka iyya lolu‑na ankakana ttiba ttu xiani ge latilu. Ganna ka iyya lolu‑na ankakana tse, delába ganna tseba rilákinna, la'ania nna itúba latilu tsu'u xiani; ttaka ganna ka iyya lolu‑na abíba rilá tsekinna, la'ania nna itúbalu aka chulha.
LUK 11:35 De nuha nna biyú gelu ni kina chulhaba anka xiani yu'u latilu.
LUK 11:36 Kumu ganna itúba latilu yu'u xiani, ganna abittuba chulha anka, la'anialigaba nna itúbalu aka yien chará ule'ebalu ttiba rula'a ttu nu yu'u xiani latini.
LUK 11:37 Tti chi uluxani Jesús‑ni unnebie, nianna tti uxi ttu fariseo‑nie lhe'e lisiniha kini goe yetta lenna. Tti ute'e lhe'e yo'oha, nianna udoe ro'o mexaha.
LUK 11:38 Tti bilani fariseo‑ni deki labí utí ná Jesús‑ni ki goe yetta, nianna uka tébinna.
LUK 11:39 Ttaka Jesús‑ni nna ree na: ―Lebi'i ka fariseo, rochari tte xeaba latile, ruinbale ttiba nu rocharina kwe'e xigaha lhe kwe'e ye'enaha lhe, ttaka lhi'u lhe'e lastole nna saa tíba nu satsa ruinle lhe nu riguale ge ttu benne lhe.
LUK 11:40 ¡Aalexa nu yieti, a rieninle! ¿Si bi gwa yule deki benne benie latiri'iha, lagabe nuha benie lhi'u lhe'e lastori'i?
LUK 11:41 Lebi'i nu uinlale, itú iki itú lele gwalute nu tee gele len ka benne abittu geke tee kini aníha nna itú ttele eyarile.
LUK 11:42 ’¡Gwalíchi lele xa fariseo! Lebi'i do tsitsiba lele rutele len Tata Do Yebáha tsii por ciento ge ka gwadhi bela lhe ge ka ruda lhe ge adíru ka kuana ya'a rexú gele. Ttaka nna rixxulhabinle uinle nu dika ixú lhe rixxulhabinle akinle ge Tata Do Yebáha lhe. Nuníla rakaru doelha uinle nna abittugaba udhanle utele nu chi ruteleha.
LUK 11:43 ’¡Gwalíchi lele xa fariseo! Lebi'i ru'u lele kwiale lo ka xxila tseru se'e lhe'e ka yo'o ata rudhetile ka tisa ge Tata Do Yebáha, lhe anágaba raka lele latsiru inne ka benne gake le padiuxi atti reti'ake le lo ka neda‑na.
LUK 11:44 ’¡Gwalíchi lele, lebi'i ka nu rule'enle ka benne nu ra lo bia bennabi bodha'an Moisés‑ni lhe lebi'i ka fariseo lhe! Lebi'i ankale attiba ttu baa abittu rilána tena, laxkala meskiba rite ka benne ruleake loni nna labí yuke bixa yu'u lhi'u yu.
LUK 11:45 Nianna tti bekabi ttu ka nu rule'ekinna ka benne nu ra lo bia bennabi bodha'an Tata Do Yebáha len Moisés‑ni, rane: ―Maestru, tti ralu aná iyágaba getu nuná rinnelu.
LUK 11:46 Labie nna rabie kana: ―¡Anágaba lebi'i ka nu rule'enle ka benne nu ra lo bia bennabi‑na, gwalíchi lele! Kumu lebi'i ttiba ttu yua idi'i nuná rudelhale kwe'e ka benne tti ruinle doelha deki udoke tisa ge ttu nu labí dhaake udoke tisa geni, ttaka lebi'i nna niba ttu latti a raka lele udole tisa ge nu rule'ele‑na.
LUK 11:47 ’¡Gwalíchi lele! Lebi'i rusiale ka yo'o tse iki ka baa ge ka profeta betti ka benneola geleha.
LUK 11:48 Len nuná runna liile deki gwa ru'uba lele nu ben ka benneola geleha, kumu lakana bettikana ka profetaha nna lebi'i nna rusiale ka yo'o to iki ka baa ge ka benneha.
LUK 11:49 ’Laxkala Tata Do Yebáha, kumu de anke benne yuu, de nuha nna ree: “Neti idhelhaa ka profeta lhe ka apóstol lhe kini tsiake kixxi'akanie ka benne ka tisa kia, ttaka ttu chupake uttikana ke nna attu chupake nna dhu nookana ke.”
LUK 11:50 De nuha nna kwe'e ka benne se'e nnannaba udelhe reni ge iyá ka profeta bettikana attili sisi'a tte ure yiesi lo yu‑niha.
LUK 11:51 Dhulona len Abel‑ni nna axtaba Zacarías benne bettikana ata daa bekú lali'a ro'o yotu ge Tata Do Yebáha. De nuha nna neti ria, kwe'e ka benne se'e nnannaba udelha Tata Do Yebáha reni ge ka benneha.
LUK 11:52 ’¡Gwalíchi lele xa benne rule'enle ka benne nu ra lo bia bennabiha! Lebi'i chi ben gele elha rieni rute Tata Do Yebáha; ttaka nigaba lebi'i a rite denle lhe nigaba a rugwelhale tte dani adíru ka benne raka leke tte dákanie.
LUK 11:53 Tti ra Jesús‑ni aníha, ka nu rule'ekinna ka benne nu ra lo bia bennabiha lhe ka fariseo‑ni lhe yalhá bisa'a xxattakinna. Nianna udulokana bettisikinne nna ixeba nu unnaba tisakane.
LUK 11:54 Aníha ruinkana kini inittie bixa innábie kini anáchu nna tee ro'okani usiakana ikie ge ttu bixa.
LUK 12:1 Laka du Jesús‑ni niha nna risiaru ixe juisiru ka benne nna ruleaniba luesike. Nianna tti uduloe rinnebie, lade'axa rulise ka benne rudhetinieha, rabie ke: ―Gwaluyú gele ka iyietile nu satsa ruin ka fariseo‑ni, kumu lakana rise'ekana rákana: “Aní uinle”, ttaka lakana nna nu subila ruinkana. Ruinbakana ttiba ruin kua dii ria iki yiedi raka yettaxtila. Nuha lhe'e itúba kuaha rilhidhana. Aníha‑gaba nuná ruin ka fariseo‑ni; iyába ka benne runnittikana.
LUK 12:2 Kumu labí ttu bixa tee gatsi, abí eselana; nigaba ttu bixa raka sigá nna abí una ka benne geni.
LUK 12:3 Laxkala iyába nu unnele gatsiha, unaba ka benne ge nuha lhe nu unne sigá ro'o naga luesile lhe'e yo'oha, nu unneleha, iriagaba ka nu innekana nuha idisa kini iyienkin benne.
LUK 12:4 ’Neti rulisaa le xa betsi to kia. Bittu gasinle ge ka nu uttikana le yiesi lo yu‑ni. Kumu lakana sun bela latibale dhaakana uttikana, iki de nuha nna labíru dhaa ka nuná bixa udhakakana le.
LUK 12:5 Neti kixxi'ania le nú ge gasinle: Gwaligasilinle ge benne kuabie elha nabani gele yiesi lo yu‑ni, iki de nuha nna gwaka gebie udelhe le lo gi ata uyú ka benne elha disa ttu dia lii, ge benneha nuní gasinle.
LUK 12:6 ’Ttibanka ka binni to‑na, ¿laaba ganna ukare'aba len chupa ka belhiu to chi rito'o gayukaba? Ttaka meskiba abí tte daka ka binni toha, labí rixulhin Tata Do Yebáha gekaba.
LUK 12:7 Anágaba lebi'i, axtaba ka itsa ikile‑na babani benneha. Laxkala bittu gasinle kumu lebi'i dakarulale attichula ixe ka binni to.
LUK 12:8 ’Neti ria: Nuxaba benne ganna dhi ro'e arlo ka benne deki ria lebie neti, anágaba neti benne daya yebáha, gwadígaba ro'a arlo ka anjeli ge Tata Do Yebáha deki gwalíba ria lebie neti.
LUK 12:9 Ttaka nuxaba benne ganna abíba dhi ro'e arlo ka benne deki ria lebie neti, anágaba neti arlo ka anjeliha abittugaba dhi ro'a deki ria lebie neti.
LUK 12:10 ’Neti benne daya yebáha, nuxaba benne kue bala'ana kia, gwadíba Tata Do Yebáha elha xen lasi ge benneha, ttaka nu inne satsana ge Espíritu ge Tata Do Yebáha, nuha labí dhie elha xen lasi geni.
LUK 12:11 ’Ttixka ichekana le lhe'e ka yo'o ata rudhetiri'i ka tisa ge Tata Do Yebáha, o tatso dúkana le arlo ka xueda lhe arlo ka uxtisi lhe, bittu uchacha ikile gasina ekabile gekani lhe o bí innále lhe.
LUK 12:12 Kumu ganna chi galhale inneleha, la'ania nna Espíritu ge Tata Do Yebáha gutebe tisa len lebi'i kini ekabile gekani.
LUK 12:13 Ttu ka benne sela lhe'e ka benne tupa niha, unnebie rabie Jesús‑ni: ―Maestru, usi betsiaha utena nu ralhaa dhia ge nu bodha'an tata getuha ri'itu.
LUK 12:14 Ttaka Jesús‑ni nna bekabie geni, ree: ―Xa nubiyú, lanú nu chi bedúna neti kini akaa xueda o ki akaa nu kidhia gele.
LUK 12:15 Rágabe ka benne se'e niha: ―Gwaluyú gele. Bittu udona lele gatta belhiu gele, kumu laa de gatta xxattaga gele nna aka benle.
LUK 12:16 Nianna utixxi'anie kana ttu tisa. Aníha benie kini utte dákana bixa diani nu raka lebie kixxi'anie kanaha, nianna tti ree: ―Udo ttu nubiyú utta geni. Bexú xxatta lena lo yu geniha.
LUK 12:17 Nianna belaba lhi'u leni, rana: “¿Galasina unia ganna? Labí doti gaxa oga'aya iyá lena kia‑ni.”
LUK 12:18 Nianna tti rana: “¡Aan, chi yua gasina unia! Otampaa ka ata rigua tsea ka lena kia‑ni nna odixenrua kana, kini odisáya lhe'ekani iyá lena kia rexú lhe iyá nu tee kia lhe.
LUK 12:19 Nianna tti upeya la netiba: Betsi to, ixeniba nu tua tsenlu. Ixe ida uchía nuná. Nnanna nna udoba beyaka lelu lhe uto u'uya lhe bedí baa lhe.”
LUK 12:20 Ttaka Tata Do Yebáha nna ree na: “¡Aaluxa nu akaa elha rieni ikini! Loolha‑ni tteba gattilu nna nu tua tsenlu‑na nna, ¿núla ge nuná?”
LUK 12:21 Aníha‑ba sate ka nu ruttupa xxattakana elha tse gekani yiesi lo yu‑ni, ttaka arlo Tata Do Yebáha labí gatta ge ka nuná.
LUK 12:22 Nianna tti ra Jesús‑ni ka benne rudhetinieha: ―De nuha nna neti ria le: Bittu uchacha ikile bixa gole kini aka benle lhe nigaba uchacha ikile ge nu ukule lhe,
LUK 12:23 kumu rakarula doelha aka benri'i attichula nu gori'i lhe anágaba dakarula bela latiri'i attichula nu ukuri'i.
LUK 12:24 Gwalulanniruga ge ka beki‑na. Ka nuná labí rigu'ukana yiela, nigaba relapakana, nigaba labí tee ata rigua tsekana lena gekani. Laa kiga de nuha nna Tata Do Yebáha gwa rugobe kana. ¿Laaba ganna lebi'i dakarulale tti ka nu sia xxilakinna?
LUK 12:25 Anágaba nna meskiba bika ruchacha xxatta ikile, laa de nuha‑ga nna itiaruinle attu satti.
LUK 12:26 Ki ganna ttu bixa nuxka'a to a ridaale uinle, ¿beakala ki ruchacha ikile ge adíru nu subi?
LUK 12:27 ’Gwalulanniruga, gasina riyelha ka iyya to daa ka lhe'exxi‑na. Ka nuná labí riben ka nuná sina, nigaba a ribeakana tuilu. Neti ria le: Salomón nu unnabiaha, meskiba ukana nu ra xxeni leni, labí bikuna lari rula'a latsitoru tti rula'a ka iyya to‑na.
LUK 12:28 Ki Tata Do Yebáha aná rugukue ka ixxi to daa lhe'exxi‑na, ka nuná nasá ankakana ya'a nna uxxe gwisá nna chiba tsiakana itekana lo gi, anágaba lebi'i ka nu a ria tsitsi lele, ¿laaba ganna adírula tse ugukue le?
LUK 12:29 Laxkala lebi'i bittu uchacha ikile ge bixa gole lhe bixa i'iyale lhe. Bittu udúna le ge nuná.
LUK 12:30 Kumu ge iyá nuní ruchacha iki ka benne se'e yiesi lo yu‑ni; ttaka lebi'i Tata gele do yebáha chiba yubie bí riyasinle.
LUK 12:31 Lebi'i nu uinlale gwaluinla doelha kini akale nu innabia Tata Do Yebáha, la'ania nna gutebe adí nu riyasinle.
LUK 12:32 ’Lebi'i ka benne chi ankale kia, bittu gasinle. Ttu chuparubale se'e, ttaka Tata gele do yebáha nna chi bedá lebie betebie lo neda gele kini innabie len lebi'i.
LUK 12:33 Gwalutto'o nu tee gele nna gwalugwe ka benne abittu geke tee. Aníha gwaluni kini gatta elha tse gele yebáha. Gwaluni ttiba ttu nu rigua tsena nu tee geni lhe'e ka beduti. Aníha‑ba lebi'i, gwalikua tse elha tse gele yebáha, elha tse nu abittu lhuxa loona, nigaba ga'a ubana ki lhanana na, nigaba labí tsali belha dilha ikini.
LUK 12:34 Kumu ata gatta elha tse geleha, niha‑ba udo lele.
LUK 12:35 ’Gwalese'e tse nna gwaledhí tsitsi lhe'ele lhe anágaba gwalugalha iki ka gi gele gwalidheni.
LUK 12:36 Gwaluni ttiba runi ka nubiyú riben sina se'ekana ubeda xxanakaniha tti esia nuha ugíana dha'a, kini sun tteba ganna chi besia nuha ukampana ro'o yo'oha nna chi se'e tsekana kini idhalikana eta'a nuha.
LUK 12:37 Karubáru ka benne ren lo xxanakeha ganna tti chi esianaha nna etexxakana ke se'eke ubeda na. Netiru ria: La kwinaba lana ose'ena ke ro'o mexaha nna tti dhu liina ka'ana elho goke.
LUK 12:38 Karubáru ka benneha ganna etexxakana ke se'eke ubeda na, meskiba esiana itú riluela o chi daa tsani.
LUK 12:39 Ttaka lebi'i gwalúnaruga, ganna ttixka xxana ttu yo'o chi yuna bí ura etechadi ubanaha yo'o geniha, la'ania nna dho tennálana kini abittu ugwelhana nuha lhanana nu tee lhe'e yo'o geniha.
LUK 12:40 Anágaba lebi'i, gwaltse'e ubeda, kumu neti benne daya yebáha, esiaya attila abittu ribedale neti.
LUK 12:41 Pedro‑ni nna unnaba tisane, rana: ―Tisa unnelu‑ni xa tata, ¿si suna ri'ibatu betenlu nuní aka, iyába ka benne ak?
LUK 12:42 Jesús‑ni nna ree na: ―¿Laaba ganna nu rudo tsitsina tisa ge xxananiha lhe ruinna attiba ankaba geni, laaba ganna lana nuha bodha'an xxananiha na ki uyúna adí ka nu riben sina lhe'e lisi nuha lhe kini ugona ka nuha ura geni lhe?
LUK 12:43 Karubáru benne ren sinaha ganna chi besia xxaneha nna etexxakane gwa ruinbe sina nu daa loe unie.
LUK 12:44 Neti gwalígati, xxaneha odha'anbana lasi nábie kini uyúe iyá nu se'e geniha.
LUK 12:45 Ttaka ganna nubiyú riben sinaha ulaba lhi'u leni akinna: “Risába xxana sina‑ni, nu nuha resia.” Nianna tti dhulo ttebana gayana adíru ka nubiyú lhe ka nuila yu'u sinaha lhe, nianna tti dhona gona lhe i'iyana lhe dhusinna lhe.
LUK 12:46 Ttaka la sá attila abittu ribedanaha lhe ura attila abittu rakinna deki esia xxananiha, la'aniala nna iyyaba leni esia nuha. Nianna tti ugwe xxananiha na ttu elha disa tsitsi. La'ania nna tti kweana na nna udelhana na ata se'e adíru ka nu abittu rudokana tisa.
LUK 12:47 ’Ganna ttixka nu riben sinaha gwa yúbana nu raka le xxananiha, ttaka ganna abíba rudona tisa ge nu rana na, nigaba a rudhá leni, la'ania nna yalhá igulha nuha.
LUK 12:48 Ttaka ganna nu ren sinaha abíba yuna nu raka le xxananiha, nna ganna nu subila uinna nu dika kilana elha disa geni, ttaka kumu de abittu yuna nu raka le xxananiha, de nuha nna labí tte igulhana. Kumu ttixka ttu benne ridírue ixeni, ixenirugaba dho doelha benneha otebie. Anágaba ganna ttixka ttu benne ruxxen xxatta lekani gebie deki gwaka gebie unie ttu bixa, ixenirugaba nu innabakana uin benneha.
LUK 12:49 ’Neti daya gwedo gi yiesi lo yu‑ni. Aní rakati chi itena.
LUK 12:50 Neti teeki satea uyúa ttu elha disa tsitsi. Laxkala itúba tee‑ni rudúna neti axtaliba ganna chi isia sá satea nuha, la'anialiba nna abitturu udúna neti.
LUK 12:51 Lebi'i, ¿si rakinle deki daya kini tse'e tse len luesi ka benne se'e yiesi lo yu‑ni? Neti ria le, labí. Neti dalaa kini delo ni'a kia nna lha'a lhe'e luesi ka benne.
LUK 12:52 Kumu debá nnanna lhe nu si daa lhe, delo ni'a kia nna gayu ka benne yu'u lhe'e ttu yo'o tse'e ttilha len luesike, tsunnake ebi'i nooke a chupa ka benneha nna ka benne chupaha nna edebi'i nooke ka benne tsunnaha.
LUK 12:53 Xxudiha nna abittu aka uyúna xi'in biyúniha nna xi'in biyúha nna abittu aka uyúna xxudiniha; ixná nuilaha nna abittu aka uyúna xi'iniunnániha nna xi'iniunnániha nna abittu aka uyúna ixnániha. Ixná nubiyúha nna abittu aka uyúna xolisiniha nna xolisiha nna abittu aka uyúna ixná nubiyúha.
LUK 12:54 Jesús‑ni nna rágabe ka benne ixe juisiru tupa niha: ―Lebi'i tti rilenle ganna chi reyadha ka bea daka ata rito ubisa‑na, nianna ra ttebale: “Aka iyya”, nna gwalíba nna rakaba iyya.
LUK 12:55 Anágaba tti daa be ka daka rreha nna redenále: “Ubisaba aka”, nna gwalíba nna rakaba ubisa.
LUK 12:56 ¡Aalexa nu rigí xú loni! Gwa rite dábinle nu raka yiesi lo yu‑ni lhe nu raka gwetsá lhe; delo nna a rite denle nu raka nnanna.
LUK 12:57 ’Kwinaba lebi'i gwalotte da gá tee nu dika ixú.
LUK 12:58 Kumu ttixka nu ritilha lenleha, diana taga'ana le lo uxtisi, laka yu'u lenle nuha neda diale, gwaluin doelha gwaleyoin leni kini abittu taga'ana le lo xuedaha nna xuedaha nna uttena le lo ná nu baninna lisiyyaha. Nuha nna uga'ana le lisiyya.
LUK 12:59 Neti ria: Labí lhaale lisiyyaha chiliba utixale iyá belhiu rinnabakanaha, la'anialiba nna ebeakana le niha.
LUK 13:1 La'aniagaba se'e ttu chupa ka benne ata du Jesús‑ni. Ka benneha rigixxi'akanie bie deki Pilato‑ni chi udhelhana bettikana ka benne ge Galilea‑ni. Bettikana ke tti lo se'eke ruttike ka nimala uteke úna ge Tata Do Yebáha, nianna betselakana reni geke leni reni ge ka nimalaha.
LUK 13:2 Jesús‑ni nna bekabie ge ka benneha, ree: ―¿Si rakinle deki gwate ka benne ge Galilea‑ni aníha, kumu de ankake ka nu ruinru tulha tti adíru ka nu lhe'esi gekeha?
LUK 13:3 Neti ria, labí. Anágaba lebi'i ganna abíba odúna le ge nu ruinle nna odaxxule neda ge Tata Do Yebáha, gattibale.
LUK 13:4 Anágaba ka benne sixunu (18) uttike tti ubixxi yo'o yadha xxattaha ikike, yo'o nu tee láni Siloé, ¿si rakinle tulha xxeniru ben ka benneha tti adíru ka benne se'e lhe'esi Jerusalén‑ni?
LUK 13:5 Neti ria, labí. Anágaba lebi'i ganna abíba odúna le ge nu ruinle nna odaxxule neda ge Tata Do Yebáha, gattigabale.
LUK 13:6 Jesús‑ni utixxi'anie ka benne tupa niha ttu tisa. Aníha benie kini utte dáke bí diani nu raka lebie kixxi'anie ke. Nianna tti ree ke: ―Ttu nubiyú du ttu ya higu geni lhe'e yu ata yadinna ka ya uvaha. Nianna ugíana gwalannina ganna gwasia lo nuha. Ttaka ni ttú higu bi tee lo nuha.
LUK 13:7 Aníha uka nna rana nubiyú ruyúna ka ya uvaha: “Biyúruga, chi uka tsunna ida ritaa retegiaya ganna gwasia nu xixxi lo ya higu‑ni; ttaka nna niru ttú higu a retexxakaa loni. Uchú balha nuní. ¿Beaka ki duna nna sunruba rulhenna lo yu‑ni?”
LUK 13:8 Ttaka nubiyú ruyúna yu geniha bekabina geni rana na: “Begwelhaba na dhuna attu ida xa tata. Neti gwa'ana la'abaa xanni lhe gudelhabaa bebi to lhe,
LUK 13:9 ni kina gaa gutebana nu xixxi to. Ganna siligaba abittu utena, la'anialigaba nna ichúlu na.”
LUK 13:10 La sá tti reyaka le ka benne Israel‑ni, la'ania du Jesús‑ni rule'enie ka benne lhe'e ttu ka yo'o ata rudhetike ka tisa ge Tata Do Yebáha.
LUK 13:11 Lhe'e yo'oha re ttu nuila chiba uka sixunu (18) ida ranina de yu'u ttu espíritu xxegwi latini, axtaba bedona ruba kwe'eni. De nuha nna labíru raka elína.
LUK 13:12 Atti bilen Jesús‑ni nuilaha, nianna tti uxie na nna ree na: ―Nuila, nnanna chiba beyakalu ge isagwe ridakalu‑na.
LUK 13:13 Nianna tti uxxua nábie kwe'eni, loora nna belí tteba nuilaha. Nianna tti udulona rana: ―¡Xxeniba ra le Tata Do Yebáha!
LUK 13:14 Ttaka nubiyú rinnabiana lhe'e yo'o ata se'ekanaha nna bise'enna kumu de beyoni Jesús‑ni nuilaha la sá reyaka lekaniha. Nianna rana ka benne se'e niha: ―Gwa ga'anaba kwenri'i xxupa ubisa sina. Lhe'e ka sá‑ni gwaltá ki eyakale, nna bittu itale ka sá atti reyaka leri'i ki eyakale.
LUK 13:15 Jesús‑ni nna bekabie geni, ree: ―¡Aalexa nu rigí xú loni! Lebi'i, ¿si lagwa gwa ridhasile iki ka ku'una geleha o ka burru geleha ki tagi'ale kana inda la sá tti reyaka leri'iha?
LUK 13:16 Nuila du‑ni nna ankana benne datiana Abraham‑ni. Chiba uka sixunu (18) ida den nu xxegwiha na. ¿Laaba ganna tseba anka elána lo ná nuha, meskila anka sá reyaka leri'i?
LUK 13:17 Tti ra Jesús‑ni aníha, ka nu abittu raka uyúkaneha bettubakinna; ttaka adíru ka benne se'e niha, nna iyábake redeakabakanie de rilákanie ka elha tsagwi runieha.
LUK 13:18 Jesús‑ni rágabe: ―¿Gasina rule'e tti rinnabia Tata Do Yebáha ka benne? ¿Bí nuha rula'a tti rula'ana?
LUK 13:19 Tata Do Yebáha, tti rinnabie ka benne, elha rinnabia geeha ankana attiba ttu besi ge kuana muxtasa úda ttu benne biyú lo yu geeha. Tti be'eyunaha nna, bisinbana ukana ttu yaga xeni nna axtala ka binniha rusia lhixxu'inkani lo ka náni.
LUK 13:20 Nianna tti redenee attu libe: ―¿Bí nuha raxxína len nu raka tti rinnabia Tata Do Yebáha ka benne?
LUK 13:21 Elha rinnabia geeha ankana attiba kua dii bedaxxu ttu benne nuila nna bedelhe iki tsunna ya yiedi xuxtila kini ilhidhana lhe'e itúba kuaha.
LUK 13:22 Nedaba yu'u Jesús‑ni die lhe'esi Jerusalén‑ni nna ritebie lhe'e ka yiesi elha lhe lhe'e ka yiesi xka'a to lhe rule'enie ka benne ka tisa ge Tata Do Yebáha.
LUK 13:23 Nianna unnaba tisa ttu benne bie, rane: ―Tata, ¿si sunruba ttu chupa ka benne gwaka odilá Tata Do Yebáha ke? Labie nna bekabie geke nna ree:
LUK 13:24 ―Gwaluin doelha gwaliga'a ro'o puerta suniha, kumu neti ria le, ixe ka benne raka leke ga'ake niha, ttaka labí dhaake ga'ake.
LUK 13:25 Kumu ganna chi ugwadha xxana yo'oha odheabie nuha, la'ania nna lebi'i nna eya'anbale lali'a ge yo'oha nna innále: “Tata to, udhalichi ki ga'atu.” Ttaka benneha nna ekabie gele innábie: “¡Neti labí yua gá benne le!”
LUK 13:26 Nianna tti dhulole innále: “Ki gwa utobatu lhe gwa u'uyabatu len kwinalu lhe anágaba ki gwa bele'ebinlu ri'itu ka tisa geluha lo ka neda ge lhe'esi getuha.”
LUK 13:27 Ttaka benneha nna ekabilee gele innábie: “¿Laa chi xpeya le: Labí yua gá uka lasile? ¡Gwalibietta kwe'a, lebi'i ka nu ruin satsa!”
LUK 13:28 La'aniala nna dhulole kwesile lhe gorriba lo layale tti ilenle Abraham‑ni lhe Isaac‑ni lhe Jacobo‑ni lhe iyá ka profeta ge Tata Do Yebáha lhe se'eke ata rinnabieha; ttaka lebi'i nna beya'anbale ro'o yo'oha.
LUK 13:29 Kumu la'ania isia ka nu dákana daka ata riria ubisa lhe daka ata rito ubisa lhe, ka nu dákana daka liaha lhe daka rreha lhe. Isia ka nuha ata rinnabia Tata Do Yebáha, tse'ekana ro'o mexa geeha go lenkane.
LUK 13:30 La'ania nna ka nu ra xxeni lekani nnanna, ka nuha akakana ka nu abittu ra xxeni lekani nna ka nu abittu ra xxeni lekani nnanna, la'ania nna akakana ka nu inná xxeni lekani.
LUK 13:31 Looraha‑gaba bisin ttu chupa ka fariseo nna rákana Jesús‑ni: ―Beria nii kini Herodes‑ni ruinbana uttina lu.
LUK 13:32 Labie nna bekabie gekani, ree: ―Gwaleyya nna gwaligasi bedaha: “Neti suna nasába lhe suna uxxeha‑ba rebeaya ka espíritu xxegwi yu'u lati ka benne lhe reyonia ka benne rani lhe; gwisáha nna chiba iri'a lania sina runia‑ni.”
LUK 13:33 Ttaka neti teeki tsiaya neda kia nasá lhe uxxeha lhe attu sá lhe kini isinaa lhe'esi Jerusalén‑ni. Kumu ttu benne anke profeta ge Tata Do Yebáha teeki gatti benneha lhe'esi Jerusalén‑ni, labí dika gatti benneha attu ta subi.
LUK 13:34 ’¡Eru geni xa benne ge Jerusalén! Lebi'i ruttile ka profeta ge Tata Do Yebáha lhe rusiale íyya ka benne ridhelhe ki risiake lhe'esi gele‑ni rigixxi'ake ka tisa gebie. Ixe lidú benia ottupaa le ttiba runi beraha rottupana ka xi'inniha regu'u lhe'e xxilani kana, ttaka lebi'i nna labí uka lele.
LUK 13:35 Gwaluyúruga, a sun ttúba lhe'esi gele‑na eya'anna. Neti upeya le, labíru ilenle neti axtaliba ganna chi bisia sá tti innále: “¡Karubárulu dedálu kwenta ge Tata Xisiha!” La'anialiba nna elenle neti attu libe.
LUK 14:1 Uka nuha tti bisia ttu sá tti reyaka le ka benne Israel‑ni, la'ania ugía Jesús‑ni go yetta lisi ttu nu loni ge ka fariseo‑ni. Adíru ka fariseo‑ni nna rulhatsibakana gebie.
LUK 14:2 Arlogabe du ttu benne biyú yu'u latie gi.
LUK 14:3 Nianna unnaba tise ka fariseo se'e niha lhe ka nu rule'ekinna ka benne nu ra lo bia bennabi bodha'an Tata Do Yebáha len Moisés‑ni, ree kana: ―¿Si gwa dika eyaka ttu benne rani la sá reyaka leri'i ak; o abittuba ak?
LUK 14:4 Ttaka lakana nna siiba ukakana; labí bekabikana. Nianna bedaxxue benne raniha nna beyonie bie, nianna ree bie: ―Beyya lisiluha.
LUK 14:5 Ka fariseo‑ni nna rabie kana: ―Ganna ttixka ttúle iginni ttu xi'in biyúle o ttu ku'una gele lhe'e ttu yiela inda, ¿laaba ganna meskiba anka la sáha sá reyaka leri'i, lebi'i nna tsia ttebale taleale nuha lhe'e yiela indaha?
LUK 14:6 Lakana nna labí beselakinna bixa ekabikana gebie.
LUK 14:7 Tti bilani Jesús‑ni adíru ka nu uxi fariseo‑ni lhe'e lisiniha yu'ukana rukwekana ka xxila se'e lagwiha kini tse'ekana, nianna tti utixxi'anie kana ttu tisa. Aníha benie ki utte dákana bí diani nu raka lebie kixxi'anie kana, nianna tti ree:
LUK 14:8 ―Ttixka nuxa gaxina lu tsialu dha'a, bittu tadholu lo ka xxila se'e lagwiha, kumu ni kina delola isia ttu nu ra xxeniru leni tti lu.
LUK 14:9 Nianna tti isia benne uxie ixpaleha nna gabie lu: “Begwe benne du nii xxila dolu‑na kini dhobie.” La'ania nna itú rettubinlu edú liilu nna tarelu lo ka xxila se'e axta lo xubanaha.
LUK 14:10 Lu nu uinlalu, ganna ttixka gaxikana lu, ugíala gwache lo ka xxila se'e lo xubanaha kini ganna chi etelisa benne uxie lu lisieha nna gabie lu: “Betsi to, gaxxala nii utá udo.” Aníha‑la nna gwebanala lelu lo iyá ka nu se'e lenlu ro'o mexaha.
LUK 14:11 Kumu ttu nu runi deki ra xxeni leni, nna elhida gaala Tata Do Yebáha nuha nna ttu benne rorexxa gaa lebie nna uinla Tata Do Yebáha ki inná xxeni lebie.
LUK 14:12 Rágaba Jesús‑ni nu uxine lisiniha: ―Ganna ttixka lu gaxilu ka benne ugolu xueke o irseke, bittu gaxilu ka nu do tse lenlu o ka betsilu, nigaba gaxilu ka benne raka luesilu, nigaba ka nu tee gekani se'e gaxxa ata doluha. Kumu ka nuha nna eyaxibakana lu, la'ania nna niha‑ba chi okixalu nu begolu ka nuha.
LUK 14:13 Lu, nu uinlalu, ttixka utelu ttu elho, uxila ka benne abí geke tee lhe ka benne akaa ttu lha'a ni'ake o náke lhe ka benne ridá natsa lhe anágaba ka benne xua loke lhe.
LUK 14:14 Aníha‑la nna gwa teela elha gwedeaka lasi gelu arlo Tata Do Yebáha kumu ka benneha labí aka geke egixake elho uteluha. Ttaka ganna chi bisia sá eyaka ben ka benne gwa benke nu dika ixúha, la'ania nna gwa ralhalalu edílu ge nu beteluha.
LUK 14:15 Ttu ka nu do go yetta len Jesús‑ni, tti biyieninna nu unneeha, nianna rane: ―¡Karubáru benne edí baabie elho tee ata rinnabia Tata Do Yebáha!
LUK 14:16 Jesús‑ni nna rabie na: ―Ttu nubiyú benna ttu elho tse nna uxina ixe ka benne.
LUK 14:17 Tti chi bisia ura go irsekaniha, nianna udhelhana nubiyú riben sina geniha ki tsiana talisana ka nu chi biyaxiha, gana kana: “Gwaltá. Chiba tee elho.”
LUK 14:18 Ttaka nna iyábakana udulokana bedúkana tisa. Ttúna rana: “Si uxíbaa ttu lo yu kia nna nuha‑la raka doelha tsiaya gwelanni. Usittue dhichie elha xen lasi kia.”
LUK 14:19 Attuna nna rana: “Si uxíbaa gayu neda ka ku'una kia nna si uttánalaa ka nuha. Usittue dhichie elha xen lasi kia.”
LUK 14:20 Attuna nna redenána: “Si betsába náya, de nuha nna labí aka dhaya.”
LUK 14:21 Nianna tti beyeki nu ren sinaha nna utixxi'enna xxananiha iyá nu ra ka nuha. Xxananiha nna yalhá bise'enna, nianna tti rana nubiyú ren sina geniha: “Begwe lelu ugía lo ka neda xeni‑na lhe lo ka neda xka'a se'e lhe'e yiesi‑ni. Gwaxxí ka benne abittu tee geke lhe ka benne reku ni'a náke lhe anágaba ka benne xua loke lhe ka benne ridá natsa lhe. Usi ke itake.”
LUK 14:22 Laa bikaga isá chi uka nna chi bedesia nubiyúha nna rana xxananiha: “Chiba benia nu ráluha xa tata, ttaka nna riyasaru ki isá benne lhe'e yo'o gelu‑ni.”
LUK 14:23 Nianna redea xxananiha na: “Ugía itú ro'esi‑na lhe ugía ata riria ka neda dia ka lhe'exxiha nna bedo doelha ka benne itake kini isá lhe'e yo'o kia‑ni.
LUK 14:24 Kumu neti ria, ni ttú ka nu uxia sisi'a tteha a unnixxikana elho kia‑ni.”
LUK 14:25 Ixeba ka benne danalhake Jesús‑ni, nianna bodeki loe, ree ke:
LUK 14:26 ―Ttu benne ganna raka lebie etenalhe neti teeki akarunie kia attichula ge tata geeha lhe ge nan geeha lhe. Anágaba akarulanie kia attichula ge nuila geeha lhe ge ka xi'inieha lhe ge ka betsieha lhe ge ka daneha lhe. Anágaba nna akarunie kia attichula gebie, kumu ganna abíba nna labí dika aka benneha benne udhetinia.
LUK 14:27 Anágaba benne ganna abíba uje kurusi gee etenalhe neti, delába ganna abíba eria iki eria lebie meskila bixa udhakakane de etenalhe neti, benneha labí dika ake benne udhetinia.
LUK 14:28 ’Ganna ttixka nuxa ttúle raka lele udole ttu yo'o barto, ¿laaba ganna lade'axa teeki tse'ele udhaka lele ttixa utse'e loole ge nuha, kini aníha‑chu nna aka xen lele ganna gwadaa belhiu geleha ulhuxale yo'oha?
LUK 14:29 Kumu ni kina dhulobale ukuale íyya xan nuha, delo nna abí dhaale ulhuxale na. La'ania nna iyába ka nu ilákinna nuha dhulokana uxisikana gele,
LUK 14:30 innákana: “Benne do nii uduloe rudoe yo'o ttinka, ttaka nna abígaba udaabie ulhuxe na.”
LUK 14:31 ’Anágaba nna ganna ttixka ttu nu rinnabia ge ttu yiesi tsiana ttilhana len attu nu rinnabia ge attu yiesi, ¿laaba ganna lade'axa dhona udhaka leni ganna gwadaa tsii mili ka benne chenaha itilhake len galhia (20) mili ka nu che nu ritilha lennaha?
LUK 14:32 Ganna udhaka leni deki abíba dhaana lo nuha, la'ania nna attili sa du nuha idittu len ka benne geniha nna idhelhana ka nu tsiakana tannabakana len nuha kini ese'e tsekana.
LUK 14:33 Anágaba lebi'i, ganna nuxa ttúle abittu udhá ikile iyá nu tee gele, la'ania nna labí dika akale benne udhetinia.
LUK 14:34 ’Detiha tseba anka nuha, ttaka ganna unnitti ixe geni, la'ania nna labíru go nuha ixe.
LUK 14:35 Nigaba a ixúruna tsiana lo yu lhe nigaba a ixúruna tsiana lhe'e ttu ti'a bebi, a sunruba ixúna iru'unana. ’¡Ata sia nagale, gwaludo nagale ganna gwankale nu dika iyienini!
LUK 15:1 Iyába ka gwekixa lhe ka nu daa tisa gekani deki ruin satsakana, iyábakana ribigakana ata du Jesús‑ni ki udo nagakani gebie.
LUK 15:2 Ka fariseo‑ni lhe ka nu rule'ekinna ka benne nu ra lo bia bennabi bodha'an Moisés‑ni rinnekana ge Jesús‑ni, rákana: ―Nubiyú du nii anála ruinna, rulabibana ka nu runi tulha‑na lhe rogaba lenna ka nuná yetta lhe.
LUK 15:3 Nianna utixxi'ani Jesús‑ni kana ttu tisa. Aníha benie ki utte dákana bí diani nu raka lee kixxi'anie kanaha. Nianna tti ree:
LUK 15:4 ―Ganna ttixka nuxa ttúle se'e ttu gayua (100) ka neru gele nna udelhale ttu nuha, ¿laaba ganna use'e bixxibale a tta bixxi chennia (99) ka nuha lhe'exxiha, nianna tsekile egilale neru bigannaha, axtaliba ki taxxakale na?
LUK 15:5 Ganna chi beselinle nuha, la'ania nna edeaka tenle odelha xa yienle na.
LUK 15:6 Ganna chi besinle lisileha nna ottupa ttebale ka benne se'e tse lenle lhe ka benne se'e gaxxa ata se'eleha lhe, nianna gale ke: “Gwaledeaka tenle len neti, kumu chiba gwaxxakaa neru bigannatiha.”
LUK 15:7 Nianna ra Jesús‑ni: ―Neti ria le: Gattarula elha gwedeaka lasi yebáha ganna ttixka ttu benne runi tulha odúne nna odaxxue neda ge Tata Do Yebáha, gattarula elha gwedeaka lasi ge benneha attichula ge tta bixxi chennia (99) ka benne ruinke latsiru nna labí riyasa odúna ke nna odaxxuke neda ge Tata Do Yebáha.
LUK 15:8 Nianna redenágabe: ―Uindiri'i ganna ttu benne nuila tee tsii ka belhiu dinni gebie, nianna udelhe ttu ka nuha, ¿laaba ganna teeki ugalhe iki ttu gi lhe olhuba te xeabie lhe'e yo'oha kini egile nuha, axtaliba ki eselanie na?
LUK 15:9 Ganna chi beselanie belhuha, la'ania nna tti talise adíru ka luesi nuilee lhe ka benne se'e gaxxa ata doeha lhe, nianna gabie ka benneha: “Gwaledeaka tenle len neti kumu chiba beselati belhiu bedelhaaha.”
LUK 15:10 Nianna ra Jesús‑ni: ―Neti ria le: Aníha‑gaba gatta elha gwedeaka lasi ge ka anjeli ge Tata Do Yebáha ganna ttu benne ruin tulha odúne nna odaxxue neda ge Tata Do Yebáha.
LUK 15:11 Jesús‑ni nna rágabe: ―Ttu benne biyú use'e chupa ka xi'in biyúe.
LUK 15:12 Nu gwexxaha rana tata gekaniha: “Tata, ulha'a lhe'e iyá nu tee gelu‑na nna bete nu ralhaa dhia.” Nianna ulha'abie lhe'e nu tee geeha nna begwebie kana.
LUK 15:13 Bi bisá nuha nna chi bettupa nu gwexxaha nu ulhanaha nna biriana diana lhe'e attu yiesi dittu. Niha‑ba gwatse'e loona belhiu ge nu chi uxínaha; benbana attiba rakaba leni.
LUK 15:14 Tti chi beyá nuha betse'e loona, nianna tti bisiaru ttu ubina lhe'e yiesi ata donaha, nianna chi udulo biyasa geni.
LUK 15:15 La'ania nna tti ugíana gwadhona lo sina ge ttu ka nu tee geni do lhe'e yiesiha. Nuha nna udhelhana na ata yu'u ka kuchi geniha kini uyúna ka nuha.
LUK 15:16 Ttaka lana yalhá rituinna nna ridá leni gona nu ro ka kuchiha, ttaka lanú rugwena na nu gona.
LUK 15:17 Niha‑ba dona nna tti botte dana nna rana: “Ixeba ka nu yu'u riben sina ge tata kiaha tee tamaba nu rokana. Neti nna doa nii rattia ubina.
LUK 15:18 Eya'achilaa lisi tata kiaha nna upeye: Tatoo, neti chi betsetsia len Tata Do Yebáha lhe chi betsetsia len kwinalu lhe.
LUK 15:19 Nnanna labíru elha ralhaa gatta láya xi'inlu. Biyúba neti attiba ruyúlu ka benne yu'u sina gelu‑na.”
LUK 15:20 Aníha‑ba uka nna begu'una neda deyyana lisi tata geniha. ’Attili sa dedána idittuha nna chi bilani tata geniha na nna gwatua lebie na. Nianna biresu ttebe gwatsábie na nna utesie kwe'eni lhe utoe xxagani lhe.
LUK 15:21 Nu kwitiha nna rana: “Tata to kia, neti chi betsetsia len Tata Do Yebáha lhe chi betsetsia len kwinalu lhe. Labíru elha ralha neti gatta láya xi'inlu.”
LUK 15:22 Ttaka tata geniha nna rabie ka nu riben sina geeha: “¡Gwalugwe lele gwatalhea ttu xo tse nna gwaluguku na, lhe anágaba nna gwaliku'u ttu be'e náni lhe gwaliku'u gwaracha ni'ani lhe,
LUK 15:23 anágaba nna gwataxxí ttu gwirri to, ttu ka nu gwa rixenrukana nna gwalutti na kini gori'i uinri'i laní!
LUK 15:24 Kumu neti ukati chiba utti xi'inia‑ni, ttaka nnanna nna gwa besia benbana. Chiba binittina, ttaka nnanna nna chiba beselana.” Nianna tti uduloke laníha.
LUK 15:25 ’Attu xi'in biyú xen ge uxtoha nna lhe'exxiha‑ba rekina. Tti beyekina deyyanaha nna tti besinna gaxxa kwe'e yo'oha nna biyieninna yu'u ka nu rulha lhe raka gweya'a lhe.
LUK 15:26 Nianna tti uxina ttu ka nu riben sina ge tata geniha nna unnaba tisana nuha, rana na: “¿Bíunna raka?”
LUK 15:27 Nubiyúha nna rana na: “Laa betsiluha nuná besia. Tata gelu‑na chi benie doelha kini utti ttu gwirri to ttu ka nu gwa rixenru, kumu betsiluha gwa besia tsebana.”
LUK 15:28 Ttaka nubiyú xeniha nna yalhá bisa'a xxattinna. Birula raka leni eta'ana yo'o. Aníha uka nna teeki biria tata geniha benie doelha loni ki beta'ana yo'o.
LUK 15:29 Ttaka lana nna rana tata geniha: “Lu gwa yu xeabalu, ixe ida chi rixúa lo sina gelu nna ni tsa labí chi bedú disaa lolu; ttaka nna lu niba ttu chiva to abittu chi betelu len neti ki unia laní len ka nu kwiti do tse lania.
LUK 15:30 ¡Nnanna nna besia xi'inlu‑na, chi gwatse'e loona belhiu geluha len ka nuila ruin satsa nna lu nna de elha gwedeaka lasi geni nna chi bettilu ttu gwirri rixen xxatta!”
LUK 15:31 Tata geniha nna bekabie geni, ree na: “Xi'ini to kia, lu satíaba do lenlu neti nna iyába nu tee kia‑ni, gebalu nuní.
LUK 15:32 Ttaka nnanna nna raka doelha uinri'i laní lhe edeaka tenri'i kumu betsilu‑ni chiba uttina rakati, nnanna nna gwa besia benbana. Chiba binittina, ttaka nnanna nna chiba beselana.”
LUK 16:1 Jesús‑ni nna utixxi'agabanie ka benne rudhetinieha, ree ke: ―Udo ttu nubiyú utta xxatta geni. Nianna udogaba ttu nu uren sina geni. Nuha biyúna iyába nu tee geniha. Nianna ugía ka benne gwattixxi'akanie nu anka xxana sinaha, ráke nuha: “Nu ren lo sina geluha, kwentaba rutse'e loona nu tee geluha.”
LUK 16:2 Xxana sinaha nna uxina nubiyúha, rana na: “¿Bíunna rákana ruinlu? Loora tte nnanna raka lasia kixxi'enlu neti ttixa rudhálu sina kia‑na, kumu neti labíru raka lasia kwenlu uyúlu nu tee kia.”
LUK 16:3 Nu ren sinaha nna belaba tteba leni, rana: “¿Bíla anka nu unia ganna? Nnanna abíruba sina kia ute nu anka xxanaa‑ni, neti nna labíru lheaka ankaa ki kwenia ka lo yu. Gwea nna rettulati tsekia innabaa belhiu.”
LUK 16:4 Nianna rana: “Chi yua bí unia kini ganna chi uchúna neti sina, la'ania nna chi tse'e ka benne gaxike neti lisike.”
LUK 16:5 Nianna tti udulona uxina ttu ttuba ka nu dákana ge xxananiha. Nu uxina sisi'a tteha nna unnaba tisana nuha, rana na: “¿Tti daalu ge uxto‑ni?”
LUK 16:6 Nuha nna bekabina, rana: “Laa daya ttu gayua (100) bega seti geni.” Nu reni sinaha nna rana na: “Ne yetsi ge nu daalu‑na tee nii nna begwe lelu nna udo bodo lo yetsi‑ni deki a suna tsieyonaba (50) daalu.”
LUK 16:7 Delola nna bedennaba tisana attu nuha, redeana na: “Lu nna, ¿tti daalu?” Nuha nna redenána: “Laa daya ttu gayua (100) uxtali xuxtila.” Nianna redeana nuha: “Ne yetsi ge nu daalu‑na tee nii nna udo bodo lo yetsi‑ni deki a suna a tta (80) uxtaliba daalu.”
LUK 16:8 Xxananiha nna bebanabinna ge elha si'inu ge nubiyú ren sina geniha. Kumu ka nu rudo lekani ge nu anka ge yiesi lo yu‑ni, resi'inurukana gasina uinkana tti ka benne chi ankake ge Tata Do Yebáha.
LUK 16:9 Nianna ra Jesús‑ni: ―Neti rigixxi'ania le, ixuinle nu tse tee yiesi lo yu‑ni kini tse'e tse lenle ka benne kini anáchu ganna chi beyá nu tseha, la'ania nna chi se'e ka benne edíke le tti esinle lhe'e ka yo'o sia ttu dia lii yebáha.
LUK 16:10 ’Kumu ttu benne ganna ttixka uyú tsitsibe nu ttu latti tee geeha, aníha‑gaba unie ganna ttixka tee ixeni gebie, tsitsigaba uyúe nuha nna nu abíba uyú tsitsina nu ttu latti tee geniha nna, aníha‑gaba uin nuha ganna ttixka tee ixeni geni, abígaba uyú tsitsina nuha.
LUK 16:11 Laxkala ganna lebi'i abíba uyú tsitsile elha tse tee yiesi lo yu‑ni, anágaba nu gwalíga anka elha tse tee yebáha, ¿nú uxxen leni gele deki guyúle nuha?
LUK 16:12 Ganna abíba biyú tsitsile nu anka ge attu benne subi, la'ania nna, ¿gasina uxxen lekani le deki guyú tsitsile nu dika aka gele?
LUK 16:13 ’Lanú ttu benne do aka gebie kwenie sina lo chupa ka xxane, kumu itisibanie ttu nuha, nna attu nuha nna akanie geni o udo tsitsibe tisa ge ttu nuha nna attu nuha nna ku'uba ni'e nu innána. Anágaba lebi'i labí aka gele kwenle lo sina ge chupa xxanale, delába labí aka ixúle ge Tata Do Yebáha lhe anágaba labí aka udogabana lele gatta xxatta belhiu gele.
LUK 16:14 Ttaka ka fariseo‑ni, kumu de raka galákinna ge belhiu, laxkala tti biyienkinna nu ra Jesús‑ni nna bexisilakana gebie.
LUK 16:15 Jesús‑ni nna rabie kana: ―Lebi'i lo benne rule'ele deki ankale benne ruin tse, ttaka Tata Do Yebáha gwa yube ttixa anka lhe'e lastole. Kumu ka benne se'e yiesi lo yu‑ni nu rakakanie deki dakaruna, Tata Do Yebáha ttu tsaba rigu'u ni'e nuha.
LUK 16:16 ’Ka tisa dia lo bia bennabi bodha'an Tata Do Yebáha len Moisés‑ni lhe ka tisa utixxi'a ka profeta ge Tata Do Yebáha lhe, debá tti bisia Juan‑ni gwa utixxi'aruke ka benneha. Iki de nuha nna chi uduloke rigixxi'ake gasina innabia Tata Do Yebáha ka benne. Laxkala de nuha nna iyába ka benne chi ruinke doelha ga'ake ki innabiabie ke.
LUK 16:17 ’Yebáha lhe yiesi lo yu‑ni, adírula satti tse'e loo ka nuní attichula ttu tisa chika'a to dia lo bia bennabi bodha'an Tata Do Yebáha.
LUK 16:18 ’Satsaba nuha uni ttu nubiyú ganna udhá ikini nuila geniha nna edína attu nuila subi. Anágaba nna satsagaba nuha uni ttu nubiyú ganna edína ttu nuila chi bedhá ikikani.
LUK 16:19 Jesús‑ni rabie: ―Udo ttu nubiyú utta xxatta geni. Yalhá lhe'e udú xoni nna ttu ttu sába rugo tsena ka benne.
LUK 16:20 Udogaba ttu benne utta lábie Lázaro; uke ttu benne dii nna ubia xxatta yiesu itúba latie. Benneha ridobie ro'o lisi nu tee xxatta geniha
LUK 16:21 nna raka lebie edige ka nu yuyya riginni xani'a mexa ge nuha. Anágaba nna axtaba ka bekuha risinkana rilhe'ekana lo ka yiesu geeha.
LUK 16:22 Ttu sá nna uttiba benneha nna ka anjeli ge Tata Do Yebáha nna betexíbake bie nna besine kwe'e Abraham‑ni. Nubiyú utta xxatta geniha nna uttigabana nna bigatsibana.
LUK 16:23 Tti lo ruyú nubiyú utta xxatta geniha elha disa ata se'e ka benne chi uttiha, nianna bechidha loni nna bilenna Abraham‑ni due idittu nna dúgaba Lázaro‑ni kwe'ebie.
LUK 16:24 Nianna unnena idisa, rane: “¡Tata Abraham, gwatuachi lelu neti! Udhelhachi Lázaro‑na unnucha lo xubenáni inda nna itana etedibidhana lo lhusaa kini yalhá rate xxattaa xuaya lo gi‑ni.”
LUK 16:25 Ttaka Abraham‑ni nna bekabie geni, ree na: “Xi'ini to, bodhú lelu, lu gwa bedí baabalu nu tse tti udolu yiesi lo yuha; Lázaro‑ni nna labí gwaria tsena nuní tti udona niha. Ttaka nnanna xen su lasila dona nii; lu nna elha disala ruyúlu.
LUK 16:26 Gwea nna ttu belha'a bartoba du lagwi geri'i. Laxkala ka benne se'eke daka ta se'etu‑ni ganna uinke tteke daka ta se'ele‑na, labí aka geke. Nigaba ka benne se'eke daka ta se'ele‑na, labí aka tteke daka nii.”
LUK 16:27 Nubiyú utta xxatta geniha nna rane: “Rinnabaa len kwinalu xa tata Abraham, edhelhachilu Lázaro‑na eyyana lisi tata kiaha.
LUK 16:28 Niha se'e a gayu ka betsia. Eyyana kini sattixxi'enna kana gasina uinkana kini anágaba lakana bittu esiakana nii ata ruyú ka benne elha disa.”
LUK 16:29 Ttaka Abraham‑ni nna rabie na: “Chiba denkana ka tisa bodha'an Moisés‑ni lhe ka tisa bodha'an ka profeta ge Tata Do Yebáha lhe. Niha udo nagakani ge nu ra ka tisaha.”
LUK 16:30 Nubiyúha nna bekabina, rana: “Gwalí galenlu xa tata Abraham. Ttaka ganna ttu benne yatti eyaka banie nna ule'e lobie lenkana, godúbana ka nuha nna odaxxukana neda ge Tata Do Yebáha.”
LUK 16:31 Ttaka Abraham‑ni nna rabie na: “Ki ge Moisés‑ni lhe ge ka profetaha a ria lekani, anágaba ge ka benne chi uttiha abígaba tsia lekani geke, meskiba ganna eyaka benke sattixxi'akanie kana.”
LUK 17:1 Jesús‑ni nna rabie ka benne rudhetinieha: ―Teekiba ixú yie ka benne uinke ttu bixa nu satsa, ttaka ¡karusi'iru nu dhi yiena ka benneha!
LUK 17:2 Tserula ganna uxxigakana yienni ttu íyya ge mulinu nna udelhakana na lhe'e indatooha, a laa kila dhi yiena ttu ka nu abittu ra xxeni lekani se'e nii ki uinkana nu satsa.
LUK 17:3 ¡De nuha nna gwaluyú gele! ’Ganna ttu betsi to geri'i utsetsinna lu, utisa na nna ganna ennabana elha xen lasi lenlu, uxí elha xen lasi geni.
LUK 17:4 Ganna gasi lidú utsetsinna lu lhe'e ttu sá nna ganna iyába gasi lidúha isiana gana lu: “Chiba bodúna neti nna uxíchi elha xen lasi kia, labíru unia aná”, la'ania nna lu uxíba elha xen lasi geni.
LUK 17:5 Ka benne rudhetini Jesús benne anke Xxanari'iha, ráke bie: ―Beni kini ri'itu tsia tsitsiru letu Tata Do Yebáha.
LUK 17:6 Jesús‑ni nna ree ke: ―Ttibanka ttu besi to ge kuana muxtasa, ttu nuxka'a toru anka nuha, aníha‑gaba nuná lebi'i, ganna ttuxka'a to tte tsia lele Tata Do Yebáha, la'ania nna gwakaba gele gale yaga du naa: “Belhupi ata yadalu‑na nna ugía beyada lagwi indatooha.” Yagaha nna gudobana tisa gele.
LUK 17:7 ’Ganna ttixka nuxa ttule do ttu benne lo sina gele, ribenie lo ka yu geleha o rekie lo ka ku'una bia geleha, nna ganna chi resie rie lhe'exxiha nna, ¿si gweale benneha: “Aní bete bedoni kini golu yetta”?
LUK 17:8 Laaba ganna gálale benneha: “Beni irsea nna bedú tse kini ka'alu goa. Axtaliba ganna chi bekoa, la'anialiba nna chi aka gelu dholu golu lhe i'iyalu lhe.”
LUK 17:9 Anágaba nna nigaba a rugwele benneha ixkixaru de benie nu chi raleha.
LUK 17:10 Anágaba lebi'i, ganna chi lhuxinle iyá nu chi ra Tata Do Yebáha uinle, la'ania nna innále: “Ri'itu benne abí dika ixúba ankatu, kumu benbatu nu daba lotu uintu.”
LUK 17:11 Tti yu'u Jesús‑ni neda die lhe'esi Jerusalén‑ni nna utebie ata risá debaa Samaria‑ni len Galilea‑ni.
LUK 17:12 Nianna bisine lhe'e ttu yiesi to. Lhe'e yiesi toha nna biria tsii ka benne biyú raka yiesu latike. Yiesuha tee láni lepra. Ka nubiyúha idittuliba se'eke nna
LUK 17:13 uresi'ake, ráke Jesús‑ni: ―¡Maestru Jesús, gwatuachi lelu ri'itu!
LUK 17:14 Tti bilani Jesús‑ni ka benneha, nianna ree ke: ―Gwaleyya nna gwatatso du arlo ka bixxudiha. Laka deyu'uke neda deyyakeha nna betúa yiesuha latike.
LUK 17:15 Ttu ka benneha nna tti chi bilánie betúa yiesuha latie, nianna beyekie ribesi'abie, ree: ―¡Xxeniba ra le Tata Do Yebáha!
LUK 17:16 Nianna bedú xibie arlo Jesús‑ni, tuttíruba bere lobie lo yu begwebie benneha ixkixaru. Benne beyekie betebie ixkixaruha, benneha anke benne ge Samaria.
LUK 17:17 Jesús‑ni nna rabie: ―¿Laaba tsiile nuná betúa yiesu‑na latile? ¿Nála a jaa ka nuha?
LUK 17:18 ¿Si sunruba benne abittu anke benne Israel‑ni gwa beyekie begwebie Tata Do Yebáha ixkixaru?
LUK 17:19 Nianna ree nubiyúha: ―Bedú lii nna beyya lisiluha. Kumu de ugía lelu kia, de nuha nna gwa beyakabalu.
LUK 17:20 Ka fariseo‑ni unnaba tisakana Jesús‑ni rákane: ―¿Nukala dhu lo Tata Do Yebáha innabie? Lee nna bekabie gekani, ree: ―Tti innabia Tata Do Yebáha labí ilenri'i tti innabieha.
LUK 17:21 Laxkala labí aka ge ka benne innáke: “Gwaluyúruga, nii chi rinnabie”, o innáke “Niha chi rinnabie”, kumu lebi'i labí yule. Tata Do Yebáha, lagwi gebale chi do benneha rinnabie.
LUK 17:22 Nianna ree ka benne rudhetinieha: ―Neti benne daya yebáha isia sá yalhá aka lele dhoa len lebi'i kwadiba ttu sá. Ttaka labí aka.
LUK 17:23 Nianna iria ka nu gákana le: “Niiba chi do benneha”, o “Niha‑ba chi due.” Tti gákana le aníha, bittu tsiale lhe nigaba tanalhale kana lhe.
LUK 17:24 Kumu ttiba runi edha‑na rigu'u chábana xiani itúba gwetsáha tti rapina, aníha‑gaba neti benne daya yebáha ilá saaba ganna chi isia sá esiaya.
LUK 17:25 Ttaka lade'axa teeki uyú xxattaa elha disa lhe ku'u ni'a ka benne se'e nnanna neti lhe.
LUK 17:26 Akaba attiba uka tti udo Noé‑ni, aníha‑gaba aka ganna chi isia sá esiaya, neti benne daya yebáha.
LUK 17:27 Ka benne use'e la'ania utobake lhe u'uyabake lhe, anágaba nna betsába náke lhe beketigabake ka xi'inkeha lhe axtaliba tti bisia sá uta'a Noé‑ni lhe'e barcuha, nianna bisá inda yiesi lo yu‑ni nna iyábake uttike.
LUK 17:28 Nuha‑gaba uka tti udo Lot‑ni. Ka benne use'e la'ania utobake lhe u'uyabake lhe uyo'obake lhe betto'obake lhe anágaba údagabake lena lhe besiagabake yo'o lhe.
LUK 17:29 Ttaka tti biria Lot‑ni lhe'esi Sodoma‑ni, nianna biginni gi yebáha lhe azufre lhe. La'ania nna iyá xeaba ka benne se'e lhe'esiha betse'e loona.
LUK 17:30 Aníha‑ba aka ganna chi isia sá esiaya, neti benne daya yebáha.
LUK 17:31 ’Ganna chi bisia sáha nna benne doe iki yo'oha nna ganna se'e ka lo irsine lhe'e yo'oha, bittu eyadie kweabie ka nu se'e lhe'e yo'oha nna benne die lhe'exxiha, nna bittu eyye lhe'e yo'o geeha.
LUK 17:32 Gwalodhú lele ge nu gwate nuila ge Lot‑ni.
LUK 17:33 Kumu benne rasinie ka satebie ttu bixa de etenalhe neti, benneha nnittilee, delába labí aka ben benneha arlo Tata Do Yebáha. Ttaka benne eria iki eria lebie etenalhe neti meskila bixa satebie, benneha nna gwalálee arlo Tata Do Yebáha.
LUK 17:34 ’Neti ria le, ganna loolhaha chupa ka benne teke te'adhike lo ttúba ta'a. Ttúbie echea bie nna attubie nna odha'anbe.
LUK 17:35 Ganna chupa ka benne nuila yu'uke turo'o gwettu. Ttúbie echea bie nna attubie nna odha'anbe.
LUK 17:36 [Ganna chupa ka benne biyú se'eke lhe'exxiha, ttúbie echea nna attubie nna odha'anbe.]
LUK 17:37 Nianna unnaba tisake bie, ráke: ―¿Gá aka nuní xa tata? Lee nna bekabie geke, ree: ―Ttiba ruin ka chettu‑na tti rilákinna ata tee ttu nimala yatti, niha ritupakana. Aníha‑gaba ilenle ganna chi esiayaha.
LUK 18:1 Jesús‑ni utixxi'anie ka benne rudhetinieha ttu tisa. Aníha benie kini utte dáke deki satía teeki ilhapike tisa len Tata Do Yebáha, abittu edí lireke.
LUK 18:2 Nianna tti rabie ke: ―Lhe'e ttu yiesi udo ttu xueda. Labí ria leni Tata Do Yebáha, nigaba a ria leni ka benne.
LUK 18:3 Lhe'e yiesiha‑gaba nna udo ttu benne nuila bidabi riabie lo xuedaha, ree na: “Benchi lo ni'a gelu xa tata. Beni elhuxtisi ge nu ritilha laniaha.”
LUK 18:4 Isába gwadána, labí bedo naga xuedaha ge benne nuilaha. Ttaka delola nna belaba leni, rana: “Meskiba a ria lasia Tata Do Yebáha lhe meskiba a ria lasia ka benne lhe,
LUK 18:5 ttaka nuila bidabi‑ni birula ribi'ettana, dudi dúbana. Tserula ganna udo nagaa geni. Uinlaa elhuxtisi geni kini ibi'ettana nii, kini guttisinna neti.”
LUK 18:6 Jesús benne anke Xxanari'iha nna ree: ―Gwaluyúruga bí ra xueda re satsa leniha.
LUK 18:7 Anágaba Tata Do Yebáha, ¿katte gwalu abí gwa unie elhuxtisi ge ka benne chi bekwebie ki akake gebie, ganna ttixka ka benneha rela resába se'eke rinnabake lenie? Lhe anágaba, ¿katte gwalu abí gwa udiuba lebie aka lenie ke?
LUK 18:8 Neti ria, nnela unie elhuxtisi ge ka benneha. Sun tteba nna neti benne daya yebáha ganna chi besiayaha, la'ania nna yiesi lo yu‑ni, ¿si gwetexxakarua ka benne ria leke neti?
LUK 18:9 Ka nu rákana deki ankakana ka nu ruin tseru tti adí ka benne de nuha nna rigu'u ni'akani ke, ka nuha nuní utixxi'ani Jesús‑ni kana ttu tisa, benie kini utte dákana bí diani nu raka lebie kixxi'anie kanaha. Nianna ree:
LUK 18:10 ―Chupa ka nubiyú ugíakana ata do yotu ge Tata Do Yebáha gwalhapikana tisa lenie. Ttu nuha ankana fariseo, attu nuha nna ankana gwekixa.
LUK 18:11 Fariseo‑ni nna udúna rana: “Tata Do Yebáha kia, ixkixaru rugwea kwinalu kumu neti labí ankaa tti anka adí ka benne. Ka nuná ankakana ubana lhe ankakana ka nu abittu runi nu dika ixú lhe. Anágaba nna ankakana ka nu rido lenkana ka nuila subi subi lhe nigaba labí ankaa tti anka gwekixa du naa.
LUK 18:12 Neti rutte ubina lhe'a chupa lidú lhe'e ttuxmanu lhe rutegabaa len kwinalu tsii por ciento ge iyá belhiu ridía.”
LUK 18:13 Ttaka gwekixaha nna idittuliba duna nna nigaba a reyaxinna elhidha loni gwetsá. Sunruba rudhen ro'o lastoni nna rana: “¡Tata Do Yebáha kia, gwatuachi lelu neti de ankaa benne runi nu satsa!”
LUK 18:14 Netiru ria, gwekixaha gwa bixúla elha xen lasi ge nuha deyyana besinna lisini; ttaka fariseo‑ni nna labí bixú elha xen lasi geni. Kumu ttu nu ruinna inná xxeni leni, elhida gaala Tata Do Yebáha nuha nna ttu nu rorexxa gaa leni nna uinlee kini inná xxeni leni.
LUK 18:15 Bisingaba ka benne cheke ka nuto geke kini ixxua ná Jesús‑ni ikikabi. Ttaka tti bilani ka benne rudhetinieha, nianna bedhaka disake ka benneha.
LUK 18:16 Nianna tti uxi Jesús‑ni ke, ree ke: ―Gwalugwelha ka binto‑na itakabi len neti. Bittu usunale, kumu ka benne runi tti runi ka binto‑na, luesi ka benne‑na nuná ralhake akake ka benne innabia Tata Do Yebáha ke.
LUK 18:17 Netiru ria, ganna ttu benne abíba unie tti runi ttu nuto, ugwelhe innabia Tata Do Yebáha bie, benneha labí ake nu innabia Tata Do Yebáha bie.
LUK 18:18 Ttu ka nu loni ge ka nu Israel‑ni unnaba tisana Jesús‑ni, rane: ―Maestru, lu ankalu benne tse. Utixxi'achu, ¿bí anka nu unia kini satíaba aka bania arlo Tata Do Yebáha?
LUK 18:19 Jesús‑ni nna bekabie geni, ree na: ―¿Beaka ralu deki ankaa benne tse? Lanú ttu benne do anke benne tse, sunruba Tata Do Yebáha anke benne tse.
LUK 18:20 Lu chiba yulu nu boka'an Tata Do Yebáha uinri'i tti ree: “Bittu dho lenlu nu abittu anka latselalu. Bittu akalu nu runi elhutti lhe bittu lhanalu lhe. Anágaba nna bittu kwentaba usialu iki ttu benne deki benie ttu bixa lhe anágaba nna tsia lelu ka tata nan gelu lhe.”
LUK 18:21 Nubiyúha nna rane: ―Ttili ankaa kwitiha gwa rudobaa tisa ge iyá nuná.
LUK 18:22 Tti biyieninie nu ra nuha, nianna bekabie geni, ree: ―Sa riyasabalu uinlu attu nu uinlu: betto'o iyá nu tee gelu nna utidhi belhiu ge nu betto'oluha nna begwe ka benne abittu geke tee. Ganna aníha uinlu nna gwattaba elha tse gelu yebáha. La'anialigaba nna chinka utá, tenalha neti.
LUK 18:23 Ttaka tti biyienin nubiyúha nu reeha, nianna yalhá si'i bedúna leni kumu yalhá tee xxatta geni.
LUK 18:24 Tti bilani Jesús‑ni deki si'iba udú le nubiyúha, nianna ree: ―¡Gáruba tsitsi anka ki isin ka nu tee gekinna akakana benne innabia Tata Do Yebáha!
LUK 18:25 Adírula satti ga'a ttu camellu lhe'e yieru do xan ttu yoxa attichula ttu nu tee geni ga'ana akana nu innabia Tata Do Yebáha.
LUK 18:26 Ka nu biyienkinna nu reeha nna rákana: ―Ganna aníha nna, ¿nú dhaana esin lenna Tata Do Yebáha?
LUK 18:27 Jesús‑ni nna bekabie geni, ree: ―Nu labí ridaa ka benne se'e yiesi lo yu‑ni uinke, Tata Do Yebáha nna gwa ridaabe runie nuha.
LUK 18:28 Pedro‑ni nna rane: ―Ri'itu chiba bedhá ikitu iyá nu tee getu nna danalhatu lu.
LUK 18:29 Labie nna bekabie gekani, ree: ―Netiru ria le, nuxaba benne ganna chi bedhá ikie yo'o geeha lhe nuila geeha lhe ka betsieha lhe ka tata nan geeha lhe o ka xi'inieha de anke benne rinnabia Tata Do Yebáha,
LUK 18:30 benneha xxenirula dhie yiesi lo yu‑ni nnanna, nu si daa nna satíaba aka benbie arlo Tata Do Yebáha.
LUK 18:31 Jesús‑ni uxie ka benne tsi'inu (12) rudhetinieha attu ta subi, nianna ree ke: ―Nnannaligaba nna tsiari'i lhe'esi Jerusalén‑ni ata aka iyá nu ra lo ka yetsi ben ka profeta ge Tata Do Yebáha tti utixxi'ake gasina teeki satea, neti benne daya yebáha.
LUK 18:32 Kumu teeki taga'akana neti lo ná ka nu abittu ankakana nu Israel nna udhaka xiikana neti lhe ulisakana neti lhe. Anágaba uttuttu xxenkani loa lhe
LUK 18:33 ukulhakana neti lhe uttikana neti lhe. Ttaka ganna chi beyonna ubisaha nna eyaka benbaa.
LUK 18:34 Ka benne tsi'inuha (12) nna labí yuke bixa ge nuha rinnebie, kumu tee ttu nu rusuna na kini abittu rite dákanie nu reeha.
LUK 18:35 Uka nuha, tti chi dabiga Jesús‑ni isine lhe'esi Jericó, ro'o nedaha do ttu benne anke lo xua rinnabe belhiu.
LUK 18:36 Tti biyieninie rite xxatta ka benne lo nedaha, nianna tti unnaba tise bixa nuha raka.
LUK 18:37 Ka benneha nna ráke bie: ―Jesús ge Nazaret‑niba nuná ute nii.
LUK 18:38 Benneha nna uresi'a ttebe, ree: ―¡Jesús benne datia David, gwatuachi lelu neti!
LUK 18:39 Ka benne daneruha nna rudhaka disalake benneha ki eyaka siibie, ttaka benneha nna adírula idisa uresi'e, ree: ―¡Benne datia David, gwatuachi lelu neti!
LUK 18:40 Nianna uleda Jesús‑ni nna udhelhe kini gwaxxíkana benneha. Tti chi bisine ata du Jesús‑ni, nianna unnaba tise benneha, ree bie:
LUK 18:41 ―¿Bí raka lelu udhakaa lu? Benne lo xuaha nna bekabie, ree: ―Tata to kia, raka lasia eyali ka iyya loa‑ni.
LUK 18:42 Jesús‑ni nna rabie benneha: ―¡Bedhali ka iyya lolu‑na! Kumu de ugía lelu nna gwa beyakabalu.
LUK 18:43 Looraha nna belá ttebanie nna gwanalha ttebe Jesús‑ni. Nianna rinnebie ree: ―¡Xxeniba ra le Tata Do Yebáha! Iyágaba ka benne danalhaha, tti bilákanie nu ukaha nna rágabake: ―¡Xxeniba ra le Tata Do Yebáha!
LUK 19:1 Tti uta'a Jesús‑ni lhe'esi Jericó‑ni nna yu'ubie neda ki ttebie lhe'esiha.
LUK 19:2 Niha do ttu nubiyú tee xxatta geni lána Zaqueo, ankana xxana ka gwekixa.
LUK 19:3 Nubiyúha raka leni uinbiana Jesús‑ni, ttaka labí re'eyuna ilenna, kumu de danalha xxatta ka benne. Gwea nna Zaqueo‑ni ankabana ttu benne gwexxa, labí ankana baganti.
LUK 19:4 Laxkala de nuha nna bexunnina uneruna nna ugwapina lo ttu yaga du gaxxaba ata tte Jesús‑ni kini ilenne.
LUK 19:5 Tti bisin Jesús‑ni ata donaha, nianna bechidha loe gwetsá nna rabie na: ―Zaqueo, beyadi dhuti, kumu nnolha teeki eya'anaa lisiluha.
LUK 19:6 Nianna gwexunniba beyadi Zaqueo‑ni nna ittaba du leni, belabina Jesús‑ni lisiniha.
LUK 19:7 Tti bilani ka nu danalhaha iyá nu ukaha, nianna iyábakana udulokana rinnekana ge Jesús‑ni, rákana: ―Gwaluyúruga, lisi ttu nu runi tulhaba nuná gwaya'anna.
LUK 19:8 Zaqueo‑ni nna udú liilana rana Jesús benne anke Xxanari'iha: ―Biyúruga xa tata, neti ugwea ka benne abittu geke tee salhe nu tee kia‑ni lhe anágaba lhe ganna si nuxa ttu benne chi bekixaa yani, ttapa lisiala odekia geke.
LUK 19:9 Jesús‑ni nna rabie na: ―Nasá chi bisia sá odilá Tata Do Yebáha ka benne se'e lhe'e yo'o‑ni, kumu nubiyú du nii ankagabana benne datiana tata Abraham‑ni.
LUK 19:10 Kumu neti, benne daya yebáha, daya ugila ka benne abittu chi se'eke lo neda ge Tata Do Yebáha lhe daya gwedilaa ke lhe.
LUK 19:11 Iki de chi biyienin ka benne iyá nuní, nianna unneru Jesús‑ni utixxi'anie ke ttu tisa. Aníha benie kini utte dáke bí diani nu raka lebie kixxi'anie keha. Kumu de chi dubie gaxxaba Jerusalén‑ni, de nuha nna rakakanie ganna chi tteba innabia Tata Do Yebáha.
LUK 19:12 Aníha uka nna rabie ke: ―Ttu nubiyú ra xxeni leni diana attu yiesi dittu taxxí ladini kini innabiana. Iki deliba chi taxxí ladiniha, la'anialiba nna tti eyekina esinna.
LUK 19:13 Tti lani tsianaha nna uxina tsii ka nu riben sina geniha. Tu tulapaba begwena ka nuha belhiu nna rana kana: “Gwaltseki gwalurixxi len belhiu kia‑ni laka neti esiaya.”
LUK 19:14 Ttaka ka benne lhe'esi geniha nna ritisibakanie nubiyúha. Nianna udhelhake ttu chupa ka nu ugíakana ata dia nubiyúha kini gákana ka uxtisi se'e niha: “Labí raka letu innabia nuná ri'itu.”
LUK 19:15 Tti beyeki nubiyúha besinna iki de chi gwaxxí ladiniha, nianna tti udhelhana gwalisakana ka nubiyú bodha'anna lenkana belhuha, kini uyúna ttixa belhiu chi ulhasu ttu ttukana.
LUK 19:16 Tti bisin nu uxí belhiu sisi'a tteha, nuha nna rana: “Tata xisi to, belhiu beteluha chi ugwanina a tsii libe.”
LUK 19:17 Lana nna rana nuha: “Tseba benlu. Lu ankalu ttu benne riben tselu sina. Kumu de gwa biyú tsitsibalu nu latti betea lenluha, de nuha nna utea lenlu kini innabialu tsii ka yiesi.”
LUK 19:18 Tti bedesina nu berupaha nna redenána: “Tata xisi to, belhiu beteluha chi ugwanina a gayu.”
LUK 19:19 Nubiyúha nna redeagabana nuha: “Anágabalu innabiagabalu gayu ka yiesi.”
LUK 19:20 Nu beyonnaha nna bisinna, rana: “Tata xisi to, ne belhiu beteluha tee nii. Utua tsebaa nuní. Lhe'e ttu lari toba ulu'a na,
LUK 19:21 kumu usibati gelu. Lu ankalu ttu benne ruin disalu kumu redílu nu labí betelu lhe redílu lena ata labí údalu lhe.”
LUK 19:22 Nu rinnabiaha nna rana: “¡Aaluxa nu ren sina re satsa leni! La len ka tisa gelu‑naba, kuaya bala'ana gelu. Ki ganna gwa yúbalu deki ankabaa ttu nu ruin disa, redíbaa nu labí betea lhe redíbaa lena ata labí údaa lhe,
LUK 19:23 ganna aníha nna, ¿beakala nna a gwadha'anlu belhiu kia‑na lhe'e banku kini anáchu ganna chi besiaya nna odekilu na itupa len xi'inni?”
LUK 19:24 Nianna tti rana ka nu se'e niha: “Gwalikua belhiu‑na lo náni nna gwalute nuná len nu bedienna a tsii libe iki belhiu‑na.”
LUK 19:25 Ka nuha nna rákana na: “Ttaka nuní chiba den nuní a tsii xa tata.”
LUK 19:26 Ttaka nu rinnabiaha nna rana: “¿Bíla ge ria? Benne gwa biyú tsitsie nu bete Tata Do Yebáha, dhi chiettirula benneha; ttaka nu abittu biyú tsitsina nu bete benneha nna iyála nu chi tee geniha, etua.
LUK 19:27 Ttaka ka nu ritisikinna neti, ka nu abittu raka lekani akaa nu innabia gekani, aní gwataxxí kana nna gwalutti kana arloa.”
LUK 19:28 Iki de chi beyaka unne Jesús‑ni nuha, nianna uneru ttebe arlo ka benne nna ugwapibie die lhe'esi Jerusalén‑ni.
LUK 19:29 Tti chi bisine gaxxaba ro'esi Betfagé lhe Betania lhe, gaxxaba xan i'iya ata daa ka ya olivuha, nianna udhelhe chupa ka benne rudhetinieha,
LUK 19:30 rabie ke: ―Gwaltsia lhe'e yiesi to re arlori'i‑ni. Tti ga'ale ro'esi to‑na nna taxxakale nalha ttu burru kwiti to nu labí chi udo ttu benne kwe'eni. Gwalidhasi yienni nna gwaltá lenna.
LUK 19:31 Ganna nuxa innaba tisana le innána: “¿Beaka ridhasile yien nuná?”, gwaligá na: “Jesús benne anke Xxanari'iha, benneha‑ba riyasanie nuní.”
LUK 19:32 Ka benne rudhetinieha nna dia ttebake nna gwaxxakabake atti tteba ra Jesús‑ni.
LUK 19:33 Tti chi yu'uke ridhasike yien burru toha, nianna bisin ka benne anka xxana nuha nna unnaba tisake ka benneha, ráke: ―¿Beakala ridhasile yien burru to‑na?
LUK 19:34 Lake nna bekabike ge ka benneha, ráke: ―Kumu Jesús benne anke Xxanari'iha‑ba riyasanie nuní.
LUK 19:35 Nianna decheke burru toha ata du Jesús‑ni nna tti bedelhake ka xokeha kwe'e bia toha nna bedoke Jesús‑ni kwe'eba.
LUK 19:36 Kua diaba Jesús‑ni risile nna ka benne daneruha diake ritsilake ka xokeha lo nedaha.
LUK 19:37 Tti chi isinke chadike liaxu iki i'iya ata daa ka ya olivuha, nianna iyába ka benne danalhake Jesús‑ni, de elha gwedeaka lasi nna uduloke uresi'ake idisa rinneke ge nu tse ruin Tata Do Yebáha de rilákanie iyá ka milagru chi ben Jesús‑ni.
LUK 19:38 Nianna ráke: ―¡Karubáru benne rinnabia udhelha Tata Xisiha! ¡Yebáha‑li dabie nna use'e tsebie ka benne! ¡Xxeniba ra le Tata Xisiha doe yebáha!
LUK 19:39 Ttaka ttu chupa ka fariseo, ka nu selakana lhe'e ka benne danalhaha nna rákana Jesús‑ni: ―Maestru, bedhaka disa ka nu rudhetinlu‑ni.
LUK 19:40 Ttaka Jesús‑ni nna bekabilee gekani, ree: ―Neti ria, ganna ka nuní eyaka siikana, la'ania nna ka íyya‑nala kwesi'akana.
LUK 19:41 Tti chi bisine gaxxaba Jerusalén‑ni, nianna uresie geni tti bilánie na,
LUK 19:42 nianna rabie na: ―¡Eru geni xa lhe'esi Jerusalén! Anágaba lu, kwadila nasá tte denlu gasina uinlu kini dho tselu len Tata Do Yebáha. Ttaka nnanna ttiba ttu nu yaya loni ankalu labí rite denlu.
LUK 19:43 Isia sá ka nu abittu raka uyúkana luha ebi'i nookana lu nna abi'iba kwe'elu tse'ekana. Tse'ekana daka arlolu lhe tse'ekana daka kwe'elu utiakana.
LUK 19:44 Tuttíruba kweki tinnikana lu, itupa lenlu ka benne se'e lhe'elu‑na. Niruba attu íyya laa odha'ankana iki luesini, kumu lu de labí betabinlu tti bisia Tata Do Yebáha odilábie lu.
LUK 19:45 Nianna uta'a Jesús‑ni lali'a ge yotuha nna uduloe bochesue ka nu yu'u gwetto'o niha.
LUK 19:46 Nianna ree kana: ―Tata Do Yebáha lo ka yetsi geeha ree: “Yo'o kia‑ni ixúe ki ilhapi ka benne tisa len neti”; ttaka lebi'i nna ttiba “belea ata yu'u ka ubanala” chi benle yotu‑ni.
LUK 19:47 Ttu ttu sába rule'eni Jesús‑ni ka benne ro'o yotuha, ttaka ka nu loni ge ka bixxudiha lhe ka nu rule'ekinna ka benne nu ra lo bia bennabi bodha'an Moisés‑ni lhe anágaba ka nu ra xxeni lekani ge yiesiha, rekikana regila lekani gasina uinkana kini uttikane.
LUK 19:48 Ttaka lakana labí reselakinna gasina uinkana, kumu iyába ka benne rudo tsitsiba nagake ge nu reeha.
LUK 20:1 Uka nuha, ttu sá laka du Jesús‑ni ro'o yotuha rule'enie ka benne lhe rigixxi'anie ke ka tisa tse lhe, nianna tti bisin ka nu loni ge ka bixxudiha, dia lenkana ka nu rule'ekinna ka benne nu ra lo bia bennabi bodha'an Moisés‑ni lhe ka benneola ge ka nu Israel‑ni lhe,
LUK 20:2 rákane: ―Utixxi'en ri'itu, ¿Bí lo neda nuná rapalu ki ruinlu aná? ¿Nú betena lo neda gelu ki raka gelu ruinlu aná?
LUK 20:3 Jesús‑ni nna bekabie gekani, ree: ―Anágaba neti innaba tisagabaa le ttu bixa nna gwalinná sanga:
LUK 20:4 ¿nú iki biria ki begadi Juan‑ni ka benne inda? ¿Si iki Tata Do Yebáha ak? ¿Iki ka benne se'e yiesi lo yu‑ni ak?
LUK 20:5 Lakana nna udulo ttebakana rinne len luesikani, rákana: ―Ganna ekabiri'i innári'i: “Tata Do Yebáha‑ba udhelhe benneha”, la'ania nna innána: “¿Beakala a ugía lele gebie ganna?”
LUK 20:6 Ttaka ganna innári'i: “Ka benneba udhelhake benneha”, la'ania nna ebi'i nooba ka benne ri'i nna usiake ri'i íyya, kumu iyábake chiba yuke deki Juan‑ni uke ttu profeta ge Tata Do Yebáha.
LUK 20:7 Aníha uka nna bekabikana rákana: ―Labí yutu nuxa udhelhana benneha.
LUK 20:8 Nianna ra Jesús‑ni kana: ―Anágaba neti bittugaba kixxi'ania le nú rutena lo neda kia ki runia aní.
LUK 20:9 Nianna udulo Jesús‑ni utixxi'anie ka benne se'e niha ttu tisa. Aníha benie kini utte dáke bí diani nu raka lebie kixxi'anie ke. Nianna tti ree: ―Ttu nubiyú beyadana ka ya uva lo yu geniha. Nianna bete gannana yuha len ttu chupa ka nu kwenkana sina lo nuha. Nianna tti biriana diana isá lhe'e attu yiesi dittu.
LUK 20:10 Tti chi bisia sá rexú uvaha nna udhelhana ttu nu riben lo sina geniha ki tsia nuha tannabana len ka nuha kini utekana nu ralhana dhina ge lo yuha. Ttaka ka nu riben lo yuha nna uyalakana nubiyúha nna suna anába ankana bedhelhakana na.
LUK 20:11 Nianna bededhelha xxana yuha attu nu riben sina geniha. Ttaka aníha‑gaba bododhakakana nuha, uyagabakana na lhe belisa xxattakana na lhe, nianna suna anába ankana bededhelhakana na.
LUK 20:12 Nianna tti bededhelhana nu beyonnaha, ttaka ka nu riben lo yuha nna nuha‑gaba bododhakakana nuha, bedeongabakana nuha gwe, nianna tti bebeakana nuha ro'o yuha.
LUK 20:13 ’Ukachiba nna ra xxana yuha: “¿Bíla anka nu unia ganna? Nnanna nna idhelhabaa xi'ini biyúa‑ni, benne rakati gee‑ni, ni kina gaa benne‑niligaba gweyya lekanie.”
LUK 20:14 Ttaka tti bilani ka nu riben lo yuha xi'in biyúniha, nianna ra luesikani: “Nu daa‑ni nuní eya'anna lo yu‑ni. Uttiri'i na kini eya'anri'i len yu‑ni.”
LUK 20:15 Aníha uka nna uleakana benne kwitiha ro'o yuha nna bettikane. Nianna ra Jesús‑ni: ―Nnanna nna, ¿si gwa yule bí udhaka xxana ka ya uvaha ka nu riben lo yu geniha?
LUK 20:16 ¿Laaba ganna tsiabana nna tettina ka nuha, nianna tti utena yu geniha len ka benne subi? Tti biyienin ka benne se'e niha nu reeha, nianna ráke: ―¡Gaxa laa innákaba Tata Do Yebáha!
LUK 20:17 Ttaka Jesús‑ni nna belannie loke, nianna tti ree ke: ―Ganna aníha nna, ¿bíla diani nu ra lo ka yetsi ge Tata Do Yebáha ata dia ra: Íyya nu ulu'u ni'a ka nu rukuakana yo'oha, íyyaha‑la nuha chi bisinna beyakana nu rixúru?
LUK 20:18 Laxkala nuxaba benne ganna ibixxie iki íyya nu ulu'u ni'akaniha, tuttíruba iyuya benneha lhe anágaba ganna ttixka íyyaha iginnina iki ttu benne utsutsa tána benneha.
LUK 20:19 La'ania tteba runi ka nu loni ge ka bixxudiha lhe ka nu rule'ekinna ka benne nu ra lo bia bennabi bodha'an Moisés‑ni, ruinkana udaxxukana Jesús‑ni kumu yúbakana labakana nuha betanie tisa unneeha. Ttaka labí beyaxakinna udaxxukane kumu rasibakinna ge ka benne.
LUK 20:20 Nianna tti udhelhakana ttu chupa ka nu tsiakana gwelhatsi, ukadiba uin ka nuha deki benne tseba ankakana, nianna innaba tisakane ge ttu bixa. Aníha uinkana kini ibixxinie bixa innábie, kini aníha‑chu nna tee ro'okani taga'akane lo ka uxtisi.
LUK 20:21 Ka nuha nna unnaba tisakane, rákana: ―Maestru, ri'itu yutu deki nu rinnelu‑na lhe nu rule'elu‑na lhe tseba anka nuná. Anágaba nna ttúba rulannilu iyába ka benne. Lúligaba nna rule'enlu ka benne neda ge Tata Do Yebáha attiba ankaba geni.
LUK 20:22 Nnanna nna unáchu, ¿si gwa ga'anaba kixari'i belhiu nu daa lori'i kixari'i len César nu rinnabia xeniha ak; abittuba ak?
LUK 20:23 Ttaka Jesús‑ni nna ute dábanie ge nu rulha lekani udhakakaneha, nianna tti ree kana:
LUK 20:24 ―Gwalule'echuin neti ttu belhiu. ¿Nú lo nuná du lo belhiu‑na lhe nú lá nuná dia xani'a nuná lhe? Lakana nna bekabikana, rákane: ―Lá César‑niba nuní dia lo nuní.
LUK 20:25 Nianna rabie kana: ―Ganna aníha nna, gwalugweba César‑ni nu ankaba geni. Anágaba Tata Do Yebáha, gwalugwegabe nu ankaba gebie.
LUK 20:26 Nianna siiba beyakakana kumu de labí udaakana kweakane tisa arlo ka benne se'e niha. Bebanalakinna ge nu bekabie gekaniha.
LUK 20:27 Iki de nuha nna ubiga ttu chupa ka saduceo ata du Jesús‑ni. Ka nuha labí ria lekani deki gwa reyaka benba ka benne chi uttiha.
LUK 20:28 Nianna tti unnaba tisakane, rákana: ―Maestru, Moisés‑ni bodha'ane lenri'i lo yetsi, ree: “Ganna ttu nubiyú do lenna nuila, nianna gattina nna anúba xi'inni aka len nuila geniha, la'ania nna teeki edí betsiniha nuila bidabiha kini ka xi'inni aka len nuilaha nna eyakakana ttisidiba xi'in benne chi uttiha.”
LUK 20:29 Ttu lidú use'e gasi betsi ka nubiyú. Nu xxeniha betsába náni nna, ttaka uttibana nna lanú xi'inni uka len nuila geniha.
LUK 20:30 Nianna bedí nu berupaha nuilaha, ttaka bedeattigaba nuha nna anúgaba xi'inni bodha'anna.
LUK 20:31 Nuha‑gaba bedeoni nu beyonnaha nna aníha‑gaba bedeoni adí ka nuha. Beyába iyá gasi betsikani utti nna anúgaba xi'inkani uka len nuilaha.
LUK 20:32 Iki de nuha nna uttigaba nuilaha.
LUK 20:33 Nnanna nna unáchu, ganna chi bisia sá eyaka ben ka benne chi uttiha nna, ¿núla nuila gekani eyaka nuilaha ganna, ki iyába gasikana udo lenkana nuha?
LUK 20:34 Jesús‑ni nna bekabie, ree kana: ―Ka nu se'e yiesi lo yu‑ni rutsába nákani lhe ruketibakana ka xi'inkani lhe.
LUK 20:35 Ttaka ka nu ralhakana tse'ekana attu yiesi lo yuha lhe ralhakana eyaka benkana tti eyaka ben ka benne chi uttiha, ka nuha labíru dina otsá nákani, nigaba uketikana ka xi'inkaniha.
LUK 20:36 Aní aka kumu labíru aka gattikana attu libe. Eyakabakana attiba anka ka anjeli ge Tata Do Yebáha lhe akagabakana ka xi'in Tata Do Yebáha de beyaka benkana lo elhuttiha.
LUK 20:37 Kwinagaba Moisés‑ni tti bilánie rite xxiti bisiha, la'ania benna liibie deki ka benne chi uttiha gwa reyaka benbake, kumu ree: “Tata Xisiha anke Diosi ge Abraham‑ni lhe ge Isaac‑ni lhe ge Jacob‑ni lhe.”
LUK 20:38 Laxkala Tata Xisiha labí anke Diosi ge ka benne yattiha; labie anke Diosi ge ka benne anka bani. Kumu len benneha iyába ka benne gwanka benke.
LUK 20:39 Nianna tti unne ttu chupa ka nu rule'ekinna ka benne nu ra lo bia bennabi bodha'an Moisés‑ni nna rákane: ―Tseba anka nu ralu‑na, xa maestru.
LUK 20:40 Nianna labíru beyaxakinna bixa innaba tisakane.
LUK 20:41 Jesús‑ni nna unnaba tise kana, ree: ―¿Galasina nna ra ka benne deki David‑ni ukana xutto Cristuha?
LUK 20:42 Ki kwinaba David‑ni rana lo yetsi ata dia ka Salmo‑na: Tata Do Yebáha ree Cristu benne runie neti mandaduha: “Utá udo daka ná ben kia.
LUK 20:43 Niiba dholu axtaliba ganna chi bese'a ka nu abittu raka uyúkana lu, kini ulealu ikikani.”
LUK 20:44 Ki ganna David‑ni daneruna Cristuha, ¿galasina nna rálana benneha: “Lu ankalu benne ruinlu neti mandadu”?
LUK 20:45 Iyába ka benne se'e gwedo nagaha biyienkanie ra Jesús‑ni ka benne rudhetinieha:
LUK 20:46 ―Gwaluyú gele ka uinle tti ruin ka nu rule'ekinna ka benne nu ra lo bia bennabi bodha'an Moisés‑ni, kumu lakana ru'u lekani rekikana len ka xalho ttuni. Gwea nna raka lekani latsiru inne ka benne tti gake kana padiuxi atti reti'ake kana lo ka neda‑na. Anágaba nna ru'ugaba lekani tse'ekana lo ka xxila tseru se'e lhe'e ka yo'o ata rudhetiri'i ka tisa ge Tata Do Yebáha lhe ru'ugaba lekani kwiakana ata anka tse tti riakana go yetta.
LUK 20:47 Gweala nna riguakana ka yo'o ge ka nuila bidabi‑na nna ukadiba rise'ekana isá rilhapikana tisa len Tata Do Yebáha. Aníha ruinkana ki ule'e deki gwankabakana benne tse. Ka nuná elha disa tsitsirula ugwe Tata Do Yebáha kana.
LUK 21:1 Jesús‑ni bechidha lobie nna bilánie ka nu tee gekaniha rigu'ukana belhiu lhe'e ata ru'u úna ge Tata Do Yebáha.
LUK 21:2 Bilágabanie ttu benne nuila bidabi abí gebie tee nna rigu'ubie chupa ka belhiu to, ka nu lattiruba lidhakakani tee.
LUK 21:3 Nianna ree: ―Neti gwalígati xa, benne nuila bidabi‑na ixenirula daka belhiu ulu'u benne‑na attichula nu chi ulu'u iyá ka nu chi rigu'u belhiu‑na.
LUK 21:4 Kumu iyába ka nuná nu rexxaruba nuná rigu'ukana; ttaka benne nuila‑ni, anke benne abí gebie tee nna ulu'ube iyába belhiu tee gebie nu dika ixúnie ki aka benie.
LUK 21:5 Ttu chupa ka nu se'e niha rinnekana rákana deki latsiruba rule'e ka íyya kua yotuha lhe adíru ka nu rule'e latsitoru taa latiniha lhe. Nianna ra Jesús‑ni kana:
LUK 21:6 ―Isia sá iyába nu rilenle‑ni tse'e looba nuní; niruba attu íyya laa eya'anna iki luesini. Itúbana tse'e lo.
LUK 21:7 Nianna unnaba tisakana Jesús‑ni, rákane: ―Maestru, ¿nuka aka nuní? ¿Bí aka ki unna liina deki nuní chi dabigana aka?
LUK 21:8 Jesús‑ni nna bekabie, ree kana: ―Gwaluyú gele, bittu tsia lele ge ka nu reki naa. Kumu ixe ka nu isiakana nna uinkana ttisidiba netiba nuha ankakana, nianna tti innákana: “Neti ankaa Cristu” lhe innákana: “Chiba dabigana lhuxa yiesi lo yu‑ni.” Lebi'i nna abittu tsia lele gekani tti innákana aníha.
LUK 21:9 Ganna chi tsu'u nagale deki chi yu'u ka yiesi ritilha len luesikani lhe se'e ka benne rese'e disakana lo ka uxtisi gekaniha lhe, lebi'i bittu gasinle, kumu lade'axa teeki aka aní. Ttaka nna laa la'ania ttega nuha chi isia lhuxa yiesi lo yu‑ni.
LUK 21:10 Rárugabe kana: ―Ka yiesi elha‑na ebi'i noo luesikani ttilhakana lhe ka nu rinnabia‑na ebi'i noo luesikani lhe.
LUK 21:11 Anágaba nna gattibani yiesi lo yu‑ni ixú xxatta lhe ga'a ubina lhe isagwe lhe. Anágaba nna ilágabin ka benne bixa aka yebáha, nu uinna ki gasikanie lhe ebanakanie lhe.
LUK 21:12 ’Ttaka tti lani aka iyá nuní, lebi'i chila udaxxukana le lhe chila dhu nookana le lhe anágaba lhe taga'akana le lo ka xueda se'e lhe'e ka yo'o ata rudhetiri'i ka tisa ge Tata Do Yebáha, nianna kixxakana le lhe'e lisiyya lhe anágaba utso dúkana le arlo ka nu rinnabia xeni. Aníha udhakakana le kumu de ria lele neti.
LUK 21:13 Aní satele kini lebi'i gapale lo neda kixxi'enle kana kia.
LUK 21:14 Gwaluin doelha bittu uchacha ikile bixa ekabile gekani,
LUK 21:15 kumu neti gutebaa tisa len lebi'i lhe elha rieni nu dika ose'e siina iyá ka nu ritisikinna leha ki abittu ese'e disakana lole.
LUK 21:16 Axtagaba ka xxudileha lhe ka betsileha o si ka benne raka luesileha o ka nu se'e tse lenleha taga'akana le lo ná ka uxtisi nna ttu chupale nna uttikana le.
LUK 21:17 Anágaba iyába ka benne se'e yiesi lo yu‑ni utía di lekani le de ria lele neti.
LUK 21:18 Ttaka niruba ttú itsa ikile, labí tse'e loo nuná.
LUK 21:19 ¡Ganna lebi'i tse'e tsitsile, gwa daabale odilá Tata Do Yebáha le!
LUK 21:20 ’Ganna chi ilenle ebi'i ka soldaduha abi'iba kwe'e Jerusalén‑ni, la'ania nna chi yule deki chi tteba duna tse'e loona.
LUK 21:21 La'ania nna lebi'i, ata se'ele daka Judea‑ni, gwaluxunni nna gwaltsapi iki ka i'iya sia niha. Ata se'ele Jerusalén‑ni, nna gwaliria lhe'e yiesiha nna ata se'ele lhe'exxiha nna abittu eyekile tata'ale lhe'esiha.
LUK 21:22 Kumu la'ania elha disa tsitsi nuha uyúle, ganna chi aka iyá nu chi ga'anna lo ka yetsi ge Tata Do Yebáha.
LUK 21:23 ¡Gwalíchiru le ka benne nuila ata nuja xi'inke la'ania lhe denke ka nuto rasi lhe! Kumu elha disa tsitsi nuha isia itúba lo yu geri'i‑ni. La'ania nuha Tata Do Yebáha riguabie elha rise'iki geeha len ka benneha.
LUK 21:24 Ttu chupa ke uttikana ke len espada nna adíke nna udaxxukana ke nna echekana ke lhe'e iyába ka yiesi dittu. Ka nu dittuha nna utse'e lookana Jerusalén‑ni axtaliba ganna chi gwadona sá chi ga'anani Tata Do Yebáha satekana ttu bixa.
LUK 21:25 ’La'ania nna aka ttu bixa lo tatubisa‑na lhe lo nanto beo‑na lhe anágaba lo ka beli‑na lhe. Ka benne se'e yiesi lo yu‑ni nna aka télakanie lhe gasikanie de iyienkanie tsu'u be xxatta lo indatooha de radha xxatta loni.
LUK 21:26 Axtaba echulhakanie de elha rasi ge nu aka yiesi lo yu‑ni, kumu ka beli‑na lhe adíru ka nu ra xxeni lekani se'e gwetsáha igubibakana.
LUK 21:27 La'ania nna neti benne daya yebáha, iláni ka benne neti dedáya yebáha lhe'e ttu bea ra tsitsi lasia lhe raka lhalhaba xiani kia lhe.
LUK 21:28 Ganna chi dhulo aka nuní, la'ania nna gwalelhidha ikile lhe tsitsi gwalese'e, kumu neti chi tteba esiaya kini odiláya le.
LUK 21:29 Utixxi'agabani Jesús‑ni kana ttu tisa. Aníha benie kini utte dákana bí diani nu raka lebie kixxi'anie kanaha. Nianna tti ree: ―Gwalugíaruga lo ka ya higu‑na lhe o bixaba lo attu yaga.
LUK 21:30 Ganna chi rilenle rega'a lhaga gekani, la'ania nna chi yule deki chi tteba dabigana eta'a iyya.
LUK 21:31 Anágaba la'ania ganna chi ilenle aka nu chi ria‑ni, la'ania nna chi yule deki chi tteba dabigana innabia Tata Do Yebáha.
LUK 21:32 ’Netiru ria, labí chi utti ka benne se'e nnanna tti isia sá aka iyá nuní.
LUK 21:33 Yebáha lhe yiesi lo yu‑ni lhe tse'e loobaka nuní, ttaka ka tisa ria‑ni teekiba aka nu ra ka benne‑ni.
LUK 21:34 ’Gwaluyú gele, bittu tse'ele uinle nu rakaba lele, nigaba akale nu dusi lhe, kini ni kina ge ka elhaxchacha iki tee yiesi lo yu‑nila do ikile, la'ania nna ttu iyyaba lasi isia sá aka iyá nu chi ria‑ni.
LUK 21:35 Kumu ttu nnelaba aka nuní, ttiba ttu nu iyaxxuna lhe'e yalhi, aníha‑ba aka nuha. Ttu nnelaba isia elha disa ge iyába ka benne se'e yiesi lo yu‑ni.
LUK 21:36 Gwaltse'e tsitsi lhe satía gwalulisa Tata Do Yebáha kini dhaale lhaale lo iyá nu aka la'ania lhe anágaba kini aka eso dule arloa, neti benne daya yebáha.
LUK 21:37 Jesús‑ni lo resába rule'enie ka benne ro'o yotuha, lo rela nna raya'ane iki i'iya ta daa ka ya olivuha.
LUK 21:38 Iyába ka benne dila tteba riake ro'o yotuha kini rado nagake gebie.
LUK 22:1 Chi tteba dabigana isia laní nu tee láni Pascua. La'ania nuha tti ro ka benne Israel‑ni yettaxtila nu abittu kua dii dia ikiniha.
LUK 22:2 Ka nu loni ge ka bixxudiha lhe ka nu rule'ekinna ka benne nu ra lo bia bennabi bodha'an Moisés‑ni sigába regila lekani gasina uttikana Jesús‑ni, kumu de rasikinna ge ka benne.
LUK 22:3 La'ania nna tti uta'a nu xxegwiha lhe'e lasto Judas nu tegaba láni Iscariote. Lana selana len ka benne tsi'inu (12) rudhetini Jesús‑ni.
LUK 22:4 Nianna ugíana gwanne lenna ka nu loni ge ka bixxudiha lhe ka nu loni ge ka nu rise'ekana ruyúkana ro'o yotuha, kini gaxasina uinna ki utena Jesús‑ni lasi ná ka nuha.
LUK 22:5 Ka nuha nna bedeakabakinna ge nu ranaha, nianna tti bisia ro'okani ugwekana Judas‑ni belhiu.
LUK 22:6 Lana nna gwa uxielhabana dhina belhuha. Nianna udulo ttebana begila leni gasina utena Jesús‑ni lasi ná ka nuha tti anuttu benne se'e.
LUK 22:7 Tti chi bisia laní tti ro ka benne Israel‑ni yettaxtila nu abittu kua dii dia ikiniha, la'ania teeki ruttike ka neru re'eni to ki roke tti raka laníha.
LUK 22:8 Nianna udhelha Jesús‑ni Pedro‑ni lhe Juan‑ni lhe, ree kana: ―Gwaltsia, gwaluni irseri'i kini gori'i nnanna bisia laní Pascua.
LUK 22:9 Lakana nna rákane: ―¿Gá raka lelu tsiatu sentu irseha?
LUK 22:10 Jesús‑ni nna bekabie gekani, ree: ―Ganna chi diale ga'ale ro'o yiesiha, niha eti'ale ttu nubiyú dedána denojana ttu re'e inda. Gwaltsia gwatanalha na ataliba eta'ana lhe'e yo'oha.
LUK 22:11 Nianna gwaligasi xxana yo'oha: “Maestruha rinnaba tise, ree: ¿Gon‑na do ttu cuartu ata go irse lania ka benne rudhetinia‑ni irse ge laní Pascua?”
LUK 22:12 Xxana yo'oha nna ule'enna le yo'o nu do berupa kuaha. Niha chi do tse ttu cuartu xeni. Lhe'e nuha gwaluin irse ki gori'i.
LUK 22:13 Nianna diakana nna gwaxxakabakana tti tteba ra Jesús‑ni kana. Niha benkana irse ge laní Pascua.
LUK 22:14 Tti chi bisia ura go irsekeha nna bedo Jesús‑ni lenie ka apóstol geeha ro'o mexaha.
LUK 22:15 Nianna rabie ke: ―¡Yalhá chi re lasia go irsea len lebi'i nnanna laní Pascua‑ni, tti lani uyúa elha disa gattia!
LUK 22:16 Kumu neti ria le, labíru goa luesi irse‑ni, axtaliba ganna chi go irsea attu libe len lebi'i ata rinnabia Tata Do Yebáha.
LUK 22:17 Nianna tti bedaxxue ttu xiga ta'a vinu nna iki de chi begwebie ixkixaru len Tata Do Yebáha, nianna rabie: ―Gwaludaxxu nuní nna gwali'iya iyále latti latti.
LUK 22:18 Kumu neti ria le, labíru i'iyaa vinu‑ni, axtaliba ganna chi isia sá innabia Tata Do Yebáha.
LUK 22:19 Nianna tti bedaxxue yettaxtilaha nna iki de begwebie Tata Do Yebáha ixkixaru, nianna tti ulha'abie lhe'e benneha nna begwebie ke nna ree: ―Benne‑ni anke bela latia. De lebi'i nna rutea bela latia‑ni ki gattia odiláya le. Gwaligo benne‑ni nna aní uinle kini sadú lele neti.
LUK 22:20 Aníha‑gaba benie len xiga ta'a vinuha. Iki de chi beko irsekeha, nianna tti bedaxxue xigaha nna ree: ―Vinu‑ni ankana reni kia. Rugwena lidhaka tisa kubi bodha'an Tata Do Yebáha. De lebi'i nna ulalia reni kia‑ni kini odiláya le.
LUK 22:21 Ttaka nu utena neti lasi ná ka nu uttikana netiha, niiba do nuha len neti ro'o mexa‑ni.
LUK 22:22 Gwalí galá neti benne daya yebáha, eya'abaa attiba chi ga'anna satea. Ttaka gwalíchiru le nu utena neti lasi ná ka nu uttikana netiha.
LUK 22:23 Nianna tti udulo ka benne rudhetinieha rinnaba tisa luesike nuxake nuha ruinke uteke Jesús‑ni lasi ná ka nu uttikaneha.
LUK 22:24 Ka benne rudhetini Jesús‑ni uduloke rulisa luesike ki nuxake nuha akaruke benne inná xxeniru leke tti adíke.
LUK 22:25 Jesús‑ni nna ree ke: ―Yiesi lo yu‑ni ka nu rinnabia‑na lhe ka nu ra xxeni lekinna lhe, ka nuná rinnabiabakana ka yiesi gekani attiba rakaba lekani, nianna rákana deki ankabakana ka nu ruin tse.
LUK 22:26 Ttaka lebi'i labí aná dika uinle. Lebi'i nu uinlale: nu inná xxeniru leniha, nuha‑la uinna deki labí ra xxeni leni; nna nu rinnabiana adí ka nuha, nna akalana attiba ttu benne rixúe rute nee len adí ka nuha.
LUK 22:27 Nianna, ¿núkana nuha ra xxeniru lekani ganna? ¿Si nu do lo mexaha ak? ¿Nú riga'ana elho lhe'e ye'ena ro nu do lo mexaha ak? ¿Laaba ganna nu do lo mexaha, lana nuha ra xxeniru leni? Neti nna labí runia aná, sinuki dolaa len lebi'i kini rixúa rute náya len lebi'i.
LUK 22:28 ’Lebi'i nuná gwa use'ele len neti tti biyúa iyába ka elha disa chi gwatea.
LUK 22:29 De nuha nna neti utea lo neda gele ki innabiale ttiba ben Tata kiaha len neti,
LUK 22:30 kini anáchu aka gele gole lhe i'iyale len neti ata dhoa innabiayaha. Anágaba lebi'i kwiagabale ata innabiale kini uinle elhuxtisi ge ka benne tsi'inu (12) dhi datiake benne tee lábie Israel.
LUK 22:31 Jesús benne anke Xxanari'iha rágabe Simón‑ni: ―Simón, nu xxegwiha chi unnabana len neti kini ugwelhaa na udekina ikile ttiba ttu xuxtila.
LUK 22:32 Ttaka neti nna chi unnabaa len Tata kiaha gelu kini abittu udhanlu tsia lelu neti. Lu nna ganna chi eyekilu odaxxulu neda kiaha, la'ania nna lu nuná ebeki tsitsilu le ka betsi to gelu‑ni kini ese'e tsitsike lo neda kia.
LUK 22:33 Simón‑ni nna rane: ―Neti gwadúbaa lenlu xa tata, meskila tsia lania lu lisiyya, lhe o meskila gattia len kwinalu lhe.
LUK 22:34 Jesús‑ni nna bekabie geni, ree: ―Pedro, neti ria lu, nnolha, tti lanila kwesi chinkaha, lu tsunna libela chi bedhea lelu a ridí ro'olu deki ankabienlu neti.
LUK 22:35 Nianna unnaba tisa Jesús‑ni ke, ree: ―Tti udhelhaa le tti abittu belhiu cheleha lhe tti abittu chele nu ixuinle tsu'ule nedaha lhe anágaba tti abittu che gwaracha geleha, la'ania, ¿si biyasa ttu bixa gele? Lake nna bekabike, ráke: ―Labí.
LUK 22:36 Nianna ree ke: ―Ttaka nnanna nu tee belhiu geniha nna teeki dheni belhiu geni, anágaba nna ujana nu ixuinna tsu'una neda. Nu abittu espada geni tee nna utto'ona jabana geniha kini go'ona ttu espada geni.
LUK 22:37 Kumu neti ria le, teeki satea attiba ra lo ka yetsi ge Tata Do Yebáha ata dia ra: “Bedhakabakane ttiba rudhakakana ttu nu ruin satsa.” Kumu iyába nu ra lo ka yetsi ge Tata Do Yebáha deki satea tee kiba aka nuha.
LUK 22:38 Lake nna ráke: ―Tata, ne chupa ka espada se'e nii. Lee nna bekabie, ree ke: ―Chinka, ttanába.
LUK 22:39 Nianna beria tteba Jesús‑ni lhe'e yo'oha nna diabie iki i'iya ata daa ka ya olivuha, benbe attiba chi labinie runie. Ka benne rudhetinieha nna danalhagabake bie.
LUK 22:40 Tti bisinke iki i'iyaha, nianna ree ke: ―Gwalinnaba len Tata Do Yebáha kini abittu dhi yie nu xxegwiha le nna eyadi gaale.
LUK 22:41 Lee nna biru'une ata se'ekeha, biru'unabe ttiba ata radhá ttu íyya tti rigu'unari'i na. Nianna tti bedú xibie unnebie len Tata Do Yebáha, ree:
LUK 22:42 ―Tata to, ganna kwinalu edá lelu, bodiláttu neti lo elha disa uyúa‑ni. Ttaka labí nu innía aka; nu inná kwinabalu aka.
LUK 22:43 Nuha‑ba ree nna tti uka xxe ttu anjeli ge Tata Do Yebáha bisie kini udú tsitsie bie.
LUK 22:44 Tti lo ruyú xxatta Jesús‑ni elha disaha, adikala itú lebie rilhapie tisa len Tata Do Yebáha. Indedha geeha nna tsuin tsuinba riginnina lo yu ttiba risuni reni.
LUK 22:45 Tti uluxanie unne lenie Tata Do Yebáha, nianna bedú liibie nna besine ata se'e ka benne tsunna rudhetinieha, gwaxxake ka benneha te'adhike de du si'i leke.
LUK 22:46 Nianna ree ke: ―¿Beaka te'adhile? Gwalchadha nna gwalinnaba len Tata Do Yebáha kini abittu dhi yie nu xxegwiha le nna eyadi gaale.
LUK 22:47 Sa dula Jesús‑ni rinnebie, ttiru chi bisin ixe ka benne ata dueha. Nu tee láni Judas, delába nu selagabana ka benne tsi'inu (12) rudhetinieha, lana daneruna lo ka benneha. Nianna ubigana gwattona xxaga Jesús‑ni.
LUK 22:48 Jesús‑ni nna rabie na: ―Judas, neti benne daya yebáha, ¿si de utolu xxagaa‑ni nna utelu neti lasi ná ka nu uttikana neti?
LUK 22:49 Tti chi bilani ka benne se'eke len Jesús‑ni nu raka la'ania, nianna ráke bie: ―Tata, ¿si gutíatu len ka espada‑ni?
LUK 22:50 Nianna ttu ka benneha benie gwe nubiyú riben lo sina ge bixxudi xeniha, uchúe naga ben geni.
LUK 22:51 Ttaka Jesús‑ni nna rabie: ―Chinka, ttanába. Nianna tti utane naga nubiyúha nna beyonie nagani.
LUK 22:52 Nianna rabie ka nu daa udaxxukaneha, delába ka nu loni ge ka bixxudiha lhe ka nu rise'e gweyú ro'o yotuha lhe anágaba ka nu anka benneola ge ka nu Israel‑ni lhe, rabie kana: ―¿Beaka ttiba ttu nu daa gwedaxxu ubana dale gwedaxxu neti, denle espada lhe yaga lhe?
LUK 22:53 Ki ttu ttu sába udúa len lebi'i ro'o yotuha, nna abí chiga bedaxxule neti. Ttaka nnanna anka ura gele, kumu nnanna anka chulha rinnabia nu xxegwiha.
LUK 22:54 Nianna tti bedaxxukana Jesús‑ni nna dechekane lisi bixxudi xeniha. Pedro‑ni nna idittuliba danalhana.
LUK 22:55 Nianna tti bekuakana gi lali'a ge yo'oha nna use'ekana abi'iba kwe'e nuha. Niha‑gaba beteche Pedro‑ni lagwi gekani.
LUK 22:56 Ttu nuila riben sina niha, tti bilenna Pedro‑ni dona kwe'e giha, nianna begía tsittabana loni nna rana: ―Nubiyú re nii, len Jesús‑nigaba reki nuní.
LUK 22:57 Ttaka Pedro‑ni nna labí uxí ro'oni, rálana: ―Labí ankabiati nuná xa nuila.
LUK 22:58 Ttu sattiruba chi bedete nna lengwa chi bedeláni attuna, nianna redenána: ―Lu lhe, ki luesi ka nunágabalu. Ttaka Pedro‑ni nna rana: ―Laa luesi ka nunága neti.
LUK 22:59 Ttiba ttu ura chi bedete, lengwa chi redená attuna: ―Neti rakati nu re nii len nunágaba reki nuní, kumu nu Galileagaba nuní.
LUK 22:60 Ttaka Pedro‑ni rana: ―Labí yua bí ge nuná rinnelu. A riluxala rinnenaha, ttiru chi uresi chinkaha.
LUK 22:61 Nianna tti bodeki lo Jesús benne anke Xxanari'iha belannie lo Pedro‑ni. Lana nna gwadú tteba leni tti ree: “Nnolha attila lani kwesi chinkaha, lu tsunna libela chi bedhea lelu abí ridí ro'olu deki ankabienlu neti.”
LUK 22:62 Nianna beria tteba Pedro‑ni ro'o yo'oha nna uresibana ttibaxkaba leni de releninna.
LUK 22:63 Ka nubiyú se'ekana ruyúkana Jesús‑ni nna ruxisikana gebie lhe rudhenkane lhe.
LUK 22:64 Ruttokana lobie nna tti rinnaba tisakane, rákane: ―Unne ya'achu, ¿nú nuná bedhenna lolu?
LUK 22:65 Bikala nuha rákane rulisa xxattakane.
LUK 22:66 Tti ugwani dilaha nna bitupa ka benneola ge ka nu Israel‑ni lhe ka nu loni ge ka bixxudiha lhe ka nu rule'ekinna ka benne nu ra lo bia bennabi bodha'an Moisés‑ni lhe, ka nuha uchekane ata ritupakana ruinkana elhuxtisiha. Nianna tti unnaba tisakane, rákane:
LUK 22:67 ―Utixxi'en ri'itu, ¿si lu ankalu Cristu benne chi ga'anani Tata Do Yebáha idhelhe? Labie nna bekabie gekani, ree: ―Ganna innía: “Ila”, la'ania nna laa gweyyaga lele kia
LUK 22:68 lhe anágaba ganna neti innaba tisaa le ttu bixa, la'ania nna abígaba ekabile kia.
LUK 22:69 Ttaka debá nnanna neti benne daya yebáha, esinaa dhoa daka ná ben ge Tata Do Yebaa benne ra xxeni leeha.
LUK 22:70 Nianna iyábakana unnaba tisakane, rákana: ―Ganna aníha nna, ¿si lu nuná ankalu Xi'in Tata Do Yebáha? Jesús‑ni nna bekabie gekani, ree: ―Lebi'iba chi ra deki nuná ankaa xa.
LUK 22:71 Nianna rákana: ―Nnanna labíru riyasinri'i kixxi'akinna ri'i nuxa ankana. Ki kwinabari'i chi biyieninri'i nu rana.
LUK 23:1 Nianna iyábakana bedú liikana nna uchekana Jesús‑ni gwatso dúkane arlo Pilato‑ni.
LUK 23:2 Nianna udulokana besiakana ikie, rákana: ―Nubiyú du nii gwaxxakatu na rekina ruchixxina iki ka benne getu‑ni lhe rusunana uteke belhiu nu ruteri'i len César nu rinnabia xeniha. Anágaba nna rana deki lana ankana Cristu nu rinnabia.
LUK 23:3 Nianna unnaba tisa Pilato‑nie, rane: ―¿Si lu ankalu nu rinnabia ge ka nu Israel‑ni? Lee nna bekabie geni, ree: ―Luba chi ra deki nuná ankaa xa.
LUK 23:4 Nianna ra Pilato‑ni ka nu loni ge ka bixxudiha lhe ka benne sama niha lhe, rana ke: ―Neti, labí raxxakaa bixa tulha daa nubiyú‑ni.
LUK 23:5 Ttaka lakana nna doelhaba ruinkana, rákana: ―Rekina rutsatsana ka benne. Itúba daka Judea‑ni rekina rule'enna ke nu yuna. Udulona daka Galilea‑ni nna axtaba bisiana nii.
LUK 23:6 Tti biyienin Pilato‑ni rudettikana Galilea‑ni, nianna unnaba tisana kana ganna Jesús‑ni anke nu Galilea.
LUK 23:7 Tti biyieninna rákana deki dabie daka lo yu ata rinnabia Herodes‑ni, nianna bedhelhane arlo Herodes‑ni kumu lhe'esi Jerusalén‑nigaba re nuha la'ania.
LUK 23:8 Herodes‑ni nna tti bilenna Jesús‑ni yalhá bedeakinna kumu chi usá re leni ilenne de biyieninna ge nu runieha. De nuha nna raka leni ilenna unie ttu milagru.
LUK 23:9 Laxkala ixe nu unnaba tisane, ttaka labie nna kwachiruba bekabie geni.
LUK 23:10 Ka nu loni ge ka bixxudiha lhe ka nu rule'ekinna ka benne nu ra lo bia bennabi bodha'an Moisés‑ni, se'ekana nna doelhaba ruinkana rukinnikane.
LUK 23:11 Herodes‑ni lenna ka soldadu geniha nna labí biyú tsekane, bexisilakana gebie. Nianna begukukane ttu lari raka galha loni nna tti bedhelhakane arlo Pilato‑ni.
LUK 23:12 La sáha nna Pilato‑ni lenna Herodes‑ni bese'e tse len luesikani, kumu tti lanila aka nuní, labí raka uyú tse luesikani.
LUK 23:13 Pilato‑ni nna bottupana ka nu loni ge ka bixxudiha lhe ka uxtisi ge ka nu Israel‑ni lhe, anágaba ka benne ge yiesiha lhe.
LUK 23:14 Nianna tti rana kana: ―Lebi'i betega'ale nubiyú du nii loa, rusiale ikini rale deki rekina rutsatsana ka benne lhe'esi‑ni. Ttaka neti nna arlobale chi unnaba tisaa na nna labí gwaxxakaa deki ruinna nu rusiale ikinna.
LUK 23:15 Nigaba Herodes‑ni labí gwaxxakana bixa ben nuní, ki bedhelhalana nuní len ri'i attu libe. Gwaluyúruga, labí chi ben nuní ttu bixa nu dika ralhana gattina.
LUK 23:16 Laxkala ugwebaa na ttu elha disa tsitsi, iki de nuha nna olhábaa na.
LUK 23:17 [Aníha ra Pilato‑ni kumu kua laníba teeki ebeana ttu nu tee lisiyya.]
LUK 23:18 Ttaka iyábakana tulapaba uresi'akana, rákana: ―¡Betti nuná nna Barrabás‑naba bodilaa!
LUK 23:19 Barrabás‑ni tena lisiyya kumu lhe'esiha lana lenna adíru ka nu subi, bese'e disakana arlo ka uxtisiha, anágaba nna de benna elhutti.
LUK 23:20 Pilato‑ni nna de raka leni odilána Jesús‑ni, aníoka nna belisana kana attu libe.
LUK 23:21 Ttaka lakana nna adíla idisa uresi'akana, rákana: ―¡Betá nuná lo ya kurusi! ¡Betá nuná lo ya kurusi!
LUK 23:22 Beyonna libeha nna ra Pilato‑ni kana: ―¿Bíla nu satsa ben nuní ganna xa? Neti labí raxxakaa bixa benna ttu nu dika ralhana gattina. Ugwebaa na ttu elha disa nna iki de nuha nna odilábaa na.
LUK 23:23 Ttaka lakana nna bittuba bedo nagakani, ribesi'anibakana rinnabakana utáne lo ya kurusi. De ribesi'a xxattakanaha nna aloba biri'a lenkana,
LUK 23:24 ben Pilato‑ni nu rinnabakanaha.
LUK 23:25 Aníha uka nna bodilábana nubiyú nu unnabakana odilánaha, delába nu tee lisiyyaha de bedú disana arlo ka uxtisiha lhe de benna elhutti lhe. Ttaka Jesús‑ni nna botebane lasi nákani kini udhakakane nu rakaba lekani.
LUK 23:26 Tti chi dia lenkana Jesús‑ni kini utákane lo ya kurusiha, nianna bedaxxukana Simón ge lhe'esi Cirene‑ni, dedá nuha ugíana lhe'exxi. Nuha bejuakana na ya kurusiha kini bijana nuha tanoona Jesús‑ni.
LUK 23:27 Danalhagaba ixe ka benne lhe'esiha lhe anágaba danalhagaba ka benne nuila ribesike gebie de resi'ikanie bie.
LUK 23:28 Ttaka Jesús‑ni nna bodeki loe ata se'e ka benneha nna ree ke: ―Benne nuila ge Jerusalén. Bittu kwesile kia, gelale gwalikwesi lhe ge ka xi'inle‑na lhe.
LUK 23:29 Kumu isia sá inná ka benne: “Karubáru ka nuila ka nu abittu aka uja xi'inkani lhe ka nu anuttu xi'inkani chi bija lhe, anágaba ka nu anuttu nuto chi begasikana lhe.”
LUK 23:30 Nianna dhuloke gake ka i'iya‑na: “¡Gwaloguku ikitu!”, nna ka sitta xua xea‑na nna gake kana: “¡Gwalukatsi ri'itu!”
LUK 23:31 Kumu ki neti ankalaa attiba ttu ya ya'a nna rudhakakana neti aní, adírula udhakakana lebi'i de ankale attiba ttu ya bisi.
LUK 23:32 Chegabakana a chupa ka nubiyú ben satsa kini uttikana ka nuha itupa len Jesús‑ni.
LUK 23:33 Tti chi bisinkana lo yu tee láni Bega Iki Nu Yatti, niha betákana ke lo ka ya kurusi. Ttu ka nu ben satsaha betákana na daka ná ben gebie nna attuna nna daka ná yattie.
LUK 23:34 Nianna unne Jesús‑ni, ree: ―Tata, uxíchi elha xen lasi ge ka nu se'e nii, kumu labí yu ka nuní nu ruinkana. Ka soldaduha nna bedelhakana suerti kini elha'akana ka xo Jesús‑ni.
LUK 23:35 Ka benne nna se'ebake rulannike, ka uxtisiha nna ruxisilakana gebie, rákana: ―Benne subi gwa bodilána. Nnanna nna titúbana eláchuna ganna gwalíginna ankana Cristu nu chi bekwe Tata Do Yebáha.
LUK 23:36 Anágaba ka soldaduha ruxisigabakana gebie. Ribigakana nna rugwekane vinu idí,
LUK 23:37 nianna ra kane: ―¡Ganna gwalíginlu ankalu nu rinnabia ge ka nu Israel‑ni, titúbalu beláchu lo ya kurusi‑ni!
LUK 23:38 Lo ya kurusiha daka xekie, niha taa ttu breta ra loni: “Nuní ankana nu rinnabia ge ka benne Israel.”
LUK 23:39 Ttu ka nu ben satsa taa lo ya kurusiha rulisa satsane, rane: ―¡Ganna gwalíginlu ankalu Cristu, titúbalu beláchu lo ya kurusi‑ni lhe bodiláchu ri'itu lhe!
LUK 23:40 Ttaka attu nuha nna bedhaka disalana nu rinneeha, rana na: ―Lu, ¿si bi gwa elha rasi gelu tee len Tata Do Yebáha ki luesi elha disa ruyú benne‑nigaba ruyúlu?
LUK 23:41 Ri'i ruyú galári'i elha disa lo ya kurusi‑ni, kumu ralhabari'i kixari'i ge nu benri'i, ttaka benne‑ni nna labí bixa nu satsa chi benie.
LUK 23:42 Nianna tti rana Jesús‑ni: ―Tadúttu lelu neti ganna chi dhulolu innabialuha.
LUK 23:43 Nianna ra Jesús‑ni na: ―Netiru ria, nasá tteba esin lenlu neti ata dho tselu.
LUK 23:44 Ttiba tu retin tsi'inuha (12) bechulha itúba yiesi lo yu‑ni nna retin tsunnaha‑liba beyani.
LUK 23:45 Tatubisa‑na bechulhaba lobie nna lari daa lagwi lhe'e yotuha nna chubaa tíba bireda nuha.
LUK 23:46 Jesús‑ni nna unnebie idisa, rabie: ―Tatoo, lasi nálu otea elha nabani kia‑ni. Nuha‑ba rabie nna tti uttie.
LUK 23:47 Tti chi bilani soldadu nu baninna ttu gayua (100) ka soldadu ge Roma‑ni nu chi ukaha, nianna rana: ―¡Xxeniba ra le Tata Do Yebáha! Gwalíba nna nubiyú‑ni benne tseba anka nuní.
LUK 23:48 Iyába ka benne tupake ata uka nuha, tti bilákanie iyá nu chi ukaha, nianna si'iba du leke rudhen ro'o lastoke deyyake.
LUK 23:49 Ttaka iyába ka benne ankabiakanie Jesús‑ni lhe ka benne nuila gwanalhake bie tti ugwekie daka Galilea‑ni lhe, iyába ka benneha idittuliba se'eke rulannike iyá nu rakaha.
LUK 23:50 La'ania udo ttu benne biyú lábie José, re tse lebie lhe runie nu dika ixú lhe. Benneha anke benne lhe'esi Arimatea, ttu yiesi re daka Judea‑ni. Benneha sele lhe'e ka nu ruinkana elhuxtisi ge ka nu Israel‑ni.
LUK 23:51 José‑ni dogabe ribede isia sá innabia Tata Do Yebáha ka benne lhe anágaba nna bittugaba uyu'u lebie nu ben adí ka nuha len Jesús‑ni.
LUK 23:52 Nianna ugíabie arlo Pilato‑ni nna unnabe lenna kini ugwelhane elhide Jesús‑ni lo ya kurusiha.
LUK 23:53 Iki de belhide benneha, nianna tti bottesie bie lhe'e ttu lari sibi nna gwakatsie bie lhe'e ttu baa do lhe'e ttu íyya daa niha, ata lanú benne yatti chi bigatsi niha.
LUK 23:54 La'ania anka viarna nna la sáha ankana tti rese'e tse ka benne Israel‑ni kumu chi isia sá tti reyaka leke.
LUK 23:55 Ka benne nuila daa lenke Jesús‑ni ttili dabie daka Galilea‑ni, ka benneha ugíake nna bilákanie yieru baaha lhe bilákanie gasina utixxake benne yattiha lhe.
LUK 23:56 Tti besinke lhe'e yo'o ata se'ekeha nna benke ka biste rure ixixxi lhe adíru ka nu kabike lati Jesús‑ni. Nianna beyakaba leke la sá tti reyaka le ka nu Israel‑ni. Benbake attiba chi ga'anna lo bia bennabi bodha'an Moisés‑ni.
LUK 24:1 Ugwani dila tti bedú ni'a xumanuha, dila tteba udá ka benne nuilaha diake iki baaha cheke ka nu rure ixixxi chi benkeha.
LUK 24:2 Tti bisinkeha nna bilákanie íyya yaya ro'o yieru baaha, labíru yaya nuha ro'oni.
LUK 24:3 Nianna uta'ake lhi'u, ttaka lanúru Jesús benne anke Xxanari'iha gwaxxakake niha.
LUK 24:4 Uka télakanie tti bilákanie nu chi ukaha. Ttiru nna ttu nnelaba chi uka xxe chupa ka benne biyú ata se'ekeha, nukuke xo raka lhalhaba loni.
LUK 24:5 Ka benne nuilaha nna itú rasibakanie bedetta loke lo yu. Ttaka ka benne biyúha nna ráke ke: ―¿Beaka regilale benne anka baniha lhe'e ka benne chi uttiha?
LUK 24:6 Lanúru benneha tee nii, chiba beyaka ben benneha. Gwalodhú lele ge nu rabie tti sa rekie daka Galilea‑ni.
LUK 24:7 Rabie deki lee benne daa yebáha, teeki iginnie lo ná ka nu ruin satsaha nna utákane lo ya kurusiha; eyonna ubisaha nna eyaka benbe.
LUK 24:8 La'aniala nna tti bodhú leke ge ka tisa unne Jesús‑ni.
LUK 24:9 Nianna bedáke ro'o yieru baaha nna besinke utixxi'akanie ka benne sinea (11) bedhetinieha lhe adíru ka benne se'e niha, utixxi'akanie ke iyá nu chi bilákanieha.
LUK 24:10 María Magdalena‑ni nna Juana‑ni nna María nan ge Jacobo‑ni lhe adíru ka benne nuila, ka benneha nuha besinke utixxi'ake.
LUK 24:11 Ttaka ka apóstoal nna bitti ukalakanie ge nu ra ka nuilaha nna labí ugía leke ge ka benneha.
LUK 24:12 Ttaka Pedro‑ni nna bexunni ttebana diana ro'o yieru baaha. Tti bisinna ro'o nuha nna biyettana beká loni; ttaka lanúru Jesús‑ni bilenna, a sunruba ka lari nu bitesi benneha se'e. Nianna beyekina besinna lhe'e yo'oha nna rebanabinna ge nu chi ukaha.
LUK 24:13 La sáha‑gaba, dia chupa ka benne bedhetini Jesús‑ni yu'uke neda diake lhe'e ttu yiesi tee láni Emaús. Re nuha ttiba sinea (11) kilómetru idittu len lhe'esi Jerusalén‑ni.
LUK 24:14 Diabake rinneke ge iyá nu chi ukaha.
LUK 24:15 Laka diake rinnekeha nna ttiru chi uka xxe Jesús‑ni gwaxenie ke, nianna dia lenie ke turo'o.
LUK 24:16 Ttaka ttiba ttu nu yu'u ttu bixa loni, aníha‑ba ankake, labí rugwelhana eyakabiakanie bie.
LUK 24:17 Jesús‑ni nna unnaba tise ke, ree: ―¿Bí ge nuná rinnele yu'ule neda‑ni? Lake nna paba bese'eke nna si'iba du leke.
LUK 24:18 Nianna unne ttu ka benneha, delába benne lá Cleofas, bekabie ree: ―¿Si ttúbalu nu dittu dolu lhe'esi Jerusalén‑ni nna abittu binalu nu uka lhe'esi‑ni nnaya nnadhi?
LUK 24:19 Labie nna bekabie, ree ke: ―¿Bí uka? Lake nna ráke: ―Nu gwate Jesús ge Nazaret‑niba xa. Benneha uke profeta ge Tata Do Yebáha. Yalhá lhe'e unnebie lhe xxeniba anka nu benie arlo Tata Do Yebáha lhe arlo iyába ka benne lhe.
LUK 24:20 Ttaka ka nu loni ge ka bixxudiha lhe ka uxtisi geri'i‑ni nna betelakane lasi ná ka nu uttikane. Ka nuha nna beda'a ro'okani rákana deki gattie, nianna betákane lo ya kurusiha.
LUK 24:21 Batu ri'itu xxenba letu deki labie odilábie ka benne Israel‑ni. Ttaka betse'e loona aníla uka, chi uka tsunna ubisa‑ni tti gwatebie nuha.
LUK 24:22 Ttaka anágaba nna ttu chupa ka benne nuila se'eke len ri'ituha, chi bedú téke letu kumu dila tteba ugíake ro'o yieru baaha nna
LUK 24:23 ttaka lanúru benne yattiha gwaxxakake. Nianna beyekike besiake lhe'e yo'o ata se'etuha nna rigixxi'ake ráke deki bele'e lo ka anjeli ge Tata Do Yebáha lenke. Ka anjeliha nna ráke deki Jesús‑ni anka benba benneha.
LUK 24:24 Chigaba ugía ttu chupa ka benne getu gwalannike ro'o yieru baaha nna gwaxxakabake tti tteba ra ka nuilaha, ttaka Jesús‑ni nna lanúbie bilákanie.
LUK 24:25 Nianna rabie ka benneha: ―Gattiparuba riyasale tte denle lhe gattiparuba tsitsi anka ki tsia lele iyá nu unne ka profeta ge Tata Do Yebáha.
LUK 24:26 ¿Laaba ganna teeki tate Cristuha iyá nuní atti lanila esine yebáha inná xxeni lebie?
LUK 24:27 Nianna udulobie utixxi'anie ke ata rinne gebie lo iyába ka yetsi ge Tata Do Yebáha, uduloe len ka yetsi bodha'an Moisés‑ni nna belhuxe len ka yetsi bodha'an ka profetaha.
LUK 24:28 Tti bisinke ro'o yiesi ata diakeha, Jesús‑ni nna benbe ttisidiba ttebe tsiabie.
LUK 24:29 Ttaka lake nna unnaba ditibake loe kini eya'ane lenke nna ráke bie: ―Utá, beya'ana len ri'itu, kini chiba dia tatubisaha nuní. Chi tteba galha nuní. Nianna uta'abie eya'ane lenke.
LUK 24:30 Tti chi se'eke ro'o mexaha, nianna bedaxxue yettaxtilaha nna begwebie Tata Do Yebáha ixkixaru, nianna ulha'abie lhe'e benneha, begwebie ke.
LUK 24:31 La'ania attiba ttu nu biyali loni ukake nna beyoinbia ttebake Jesús‑ni, ttaka lee nna benitti loo ttebe.
LUK 24:32 Nianna ra luesike: ―Laxkala bega'a dina lhe'e lastori'i, tti dabie rinne lenbie ri'i tti yu'uri'i nedaha, rigixxi'anie ri'i nu ra lo ka yetsi‑na.
LUK 24:33 Nianna birua uledake nna begu'u ttebake neda besinke lhe'esi Jerusalén‑ni. Niha betexxakake tupa ka benne sinea (11) anka apóstoal lhe adíru ka benne lhe.
LUK 24:34 Ka benneha nna ráke: ―Gwalíba chi beyaka ben Jesús benne anke Xxanari'iha. Chi bele'e lobie len Simón‑ni.
LUK 24:35 Ka benne besinaha utixxi'agabakanie ka benneha nu gwateke tti yu'uke nedaha lhe utixxi'agabakanie ke gasina uka beyakabiakanie Jesús‑ni tti rilha'abie lhe'e yettaxtilaha.
LUK 24:36 Sa yu'ulake rinneke ge nuha, ttiruba chi uka xxe Jesús‑ni, udúbie lagwi geke nna begwebie ke padiuxi nna ree ke: ―Bittu aka tenle, xen su lasi gwaltse'e.
LUK 24:37 Lake nna yalhá usikanie, rakakanie ganna ttu espírituba nuha rula'akanie.
LUK 24:38 Ttaka Jesús‑ni nna rabie ke: ―¿Beaka raka tenle? ¿Beaka rudú chupana lele?
LUK 24:39 Gwalulanniruga ka ni'aya‑ni lhe ka náya‑ni lhe. Netiba nuní. Gwaludaxxuruga latia kini aka xen lele. Ttu espíritu labí bela tee lati nuha, nigaba labí yu'una sitta tti rilenle yu'a sitta.
LUK 24:40 Tti rabie ke aníha, nianna tti bele'enie ke ka ni'eha lhe ka neeha lhe.
LUK 24:41 Ttaka lake nna si se'elake redeakakanie lhe rebanakanie lhe. De nuha nna labí yuke bixa ulaba leke. Nianna unnaba tisa Jesús‑ni ke, ree: ―¿Si bi gwa tee ttu bixa goa?
LUK 24:42 Lake nna begweke bie salha'a belha chi biyexxu.
LUK 24:43 Labie nna bedaxxube nuha nna utoe na arloke.
LUK 24:44 Nianna ree ke: ―Ge nu gwatea‑niba nuha chi utixxi'ania le tti sa doa len lebi'iha tti ria deki teeki satea iyá nu dia lo ka yetsi bodha'an Tata Do Yebáha len Moisés‑ni lhe nu dia lo ka yetsi bodha'an ka profeta ge Tata Do Yebáha lhe, anágaba nu ra lo ka Salmo‑na lhe.
LUK 24:45 Nianna tti udhalie ikike ki uka geke ute dákanie ka tisa dia lo ka yetsiha.
LUK 24:46 Jesús‑ni nna rabie ke: ―Lo ka yetsiha rixxi'a ra deki Cristuha teeba ki gatti benneha nna eyonna ubisaha nna eyaka benbe lagwi ge ka benne chi uttiha.
LUK 24:47 Anágaba nna rixxi'agaba ra deki teeki tsiakana innekana kwenta gebie, kixxi'akinna ka benne deki teeki odúna ke nna odaxxuke neda ge Tata Do Yebáha, kini anáchu nna ixú elha xen lasi ge ka tulha ruinke. Dhulokana kixxi'akana lhe'esi Jerusalén‑ni, nianna tti tsiakana lhe'e iyába ka yiesi se'e itúba yiesi lo yu‑ni.
LUK 24:48 Lebi'i nuná kixxi'ale iyá nuní,
LUK 24:49 neti nna idhelhaa len lebi'i benne chi ra Tata kia deki utebie gele. Ttaka nna teeki kwedale lhe'esi Jerusalén‑ni axtaliba ganna chi unie kini inná tsitsi lele. Yebáha‑li daa nu tsitsi ra leeha kini utebie na gele.
LUK 24:50 Iki de nuha nna tti che Jesús‑ni ke biriake ro'esiha nna bisinke axtaba Betania. Nianna tti ulhidha nábie gwetsá nna unnabe kini aka len Tata Do Yebáha ke.
LUK 24:51 Laka due rinnabe geke len Tata Do Yebáha, nianna beru'une ata se'ekeha nna beyapie deyye yebáha.
LUK 24:52 Lake nna iki de chi bedú xibike bilhake ge Jesús‑ni, nianna redeaka tábakanie beyekike deyyake lhe'esi Jerusalén‑ni.
LUK 24:53 Ttu ttu sába se'eke lhe'e yotuha rulhake ge Tata Do Yebáha.
JOH 1:1 Attili lani kwe yiesi lo yu‑niha, chi do benne anke tisaha nna len Tata Do Yebáha‑ba doe nna la tisaha‑ba nuha anke Diosi.
JOH 1:2 Lee nuha chi doe len Tata Do Yebáha attili lani kwe yiesi lo yu‑niha.
JOH 1:3 Labie bixuin Tata Do Yebáha kini benie iyá tte nu se'e. Ganna ttixka anúba benneha do, la'ania nna iyába nu chi ukaha, labí uka nuha ganna ttixka.
JOH 1:4 Len benne anke tisaha tee elha nabani geri'i ttu dia lii nna benne anke elha nabaniha, benneha nuha anke xiani ge ka benne.
JOH 1:5 Xianiha nuha rudanie lhe'e chulhaha nna chulhaha labí udaana loe.
JOH 1:6 Udo ttu benne biyú udhelha Tata Do Yebáha. Benneha utta lábie Juan.
JOH 1:7 Labie bisiabie kini utixxi'e ge benne anke xianiha kini anáchu de nu utixxi'a Juan‑ni nna iyába ka benne tsia leke ge benne anka xianiha.
JOH 1:8 Laa Juan‑niga nuha uke xianiha. ¡Ko'o! Suna bitaba benneha kini utixxi'e ge benne anka xianiha,
JOH 1:9 delába xiani nu gwalíga udanie ge iyá ka benne ki tte dákanie nuxa anka Tata Do Yebáha. Benne anka xianiha, benneha nuha chi bisiabie yiesi lo yu‑ni.
JOH 1:10 Chiba do benneha yiesi lo yu‑ni nna labie bixuin Tata Do Yebáha kini benie yiesi lo yu‑ni, ttaka ka benne se'e yiesi lo yu‑ni labí chi ankabiakanie benneha.
JOH 1:11 Len ka benne geeha‑ba bisiabie, ttaka ka benne geeha nna labí belabike bie.
JOH 1:12 Ttaka iyába ka benne belabike bie lhe gwa ugía leke gebie lhe, ka benneha nuha begwebie ke lo neda kini akake xi'in Tata Do Yebáha.
JOH 1:13 Ka benneha bisinke ukake xi'in Tata Do Yebáha, labí aníha chi ankake tti ulikeha, nigaba kumu de aníha uka le ka benne se'e yiesi lo yu‑ni akake, sinuki kumu Tata Do Yebáha‑ba bedá lebie ukake xi'inie.
JOH 1:14 Benne anke tisaha beyake ttu benne attiba ri'i nna udoe lenri'i. Uka xxatte benne si'i lasi lhe bele'ebie nu anka gwalí lhe. Ri'i bilenri'i nu xxeni ra leeha, delába nu xxeni ra lebie nu bete Tata geeha kumu de anke Xi'in ttu túbiru ge benneha.
JOH 1:15 Juan‑ni nna utixxi'ana ge benne anke tisaha lhe unnena idisa, rana: ―Ge benne‑ni nuha rinnea tti ria: “Benne delola dabie danalhe netiha, benneha xxenirula ra lebie tti neti, kumu benneha chila doe tti neti.”
JOH 1:16 Kumu de labie anke benne tee iyá nu tse gebie, de nuha nna iyábari'i redí baari'i nu tse geeha, nu labí rudú siie rutebie geri'i.
JOH 1:17 Kumu bia bennabi bete Tata Do Yebáha lenri'i, lasi ná Moisés‑niba bodha'ane nuha, ttaka elha si'i lasi geeha lhe nu anka gwalíha lhe, Jesucristuha‑ba bele'enie ri'i nuha.
JOH 1:18 Tata Do Yebáha lanú nu chi bilenna benneha. Sunruba benne anke ttu túbiru Xi'inieha, delába benne due lenieha, benneha‑ruba nuha chi bele'enie ri'i Tata geeha.
JOH 1:19 Aní bekabi Juan‑ni ge ka bixxudiha lhe ge ka levita‑ni lhe. Ka nuná udákana lhe'esi Jerusalén‑ni, udhelha ka nu loni ge ka nu Israel‑ni kana kini ugíakana gwannaba tisakana Juan‑ni, rákane: ―Lu nna, ¿nú ankalu?
JOH 1:20 Lee nna labí bedhea lebie, sinuki lhixxa rába utixxi'abie, ree: ―Neti labí ankaa Cristu benne chi ga'anani Tata Do Yebáha idhelhe.
JOH 1:21 Lakana nna bedennaba tisakana, rákana: ―¿Núla ankalu ganna? ¿Si lu nuná Elías ak? Lee nna bekabie, ree: ―¡Labí neti! Nianna redeakane: ―¿Si lu nuná profeta benne chi ga'anna isiaha ak? Lee nna bedekabie ree: ―¡Labí neti!
JOH 1:22 Nianna rákane: ―¿Núla nuná ankalu ganna, kini anáchu ri'itu kixxi'entu ka benne udhelhake ri'ituha? Lu nna, ¿si lagwa gwagixxi'a gelu?
JOH 1:23 Juan‑ni nna bekabie ree: ―Neti ankaa benne rekia lo yu bisiha, rinnea idisa attiba ra profeta Isaías‑ni: “Gwalolixxa neda kini dha benne anke Xxanari'iha.”
JOH 1:24 Ka nu ugía gwennaba tisaha selakana lhe'e ka nu tee lákani fariseo.
JOH 1:25 Nianna tti unnaba tisakane, rákane: ―Ki ganna labí ankalu Cristu lhe nigaba Elías lhe nigaba profeta nu chi ga'anna isiaha lhe, ¿beakala nna rugadilu ka benne inda ganna?
JOH 1:26 Juan‑ni nna bekabie gekani, ree: ―Neti tti rugadia ka benne inda, suna indaba rixúti. Ttaka lagwi gebale reki ttu benne. Benneha labí ankabienlee.
JOH 1:27 Labie nuha delola dabie danalhe neti. Benneha labí elha ralhaa idhasia lo ka gwaracha geeha.
JOH 1:28 Iyá nuní uka lhe'esi Betania daka attu ladu yoo Jordán ata reki Juan‑ni rugadie ka benne inda.
JOH 1:29 Utteyú dilaha bilani Juan‑ni Jesús‑ni dabie ata dueha, nianna tti ree: ―Ne benne anka neru to udhelha Tata Do Yebáha chi daa naa kini kuabie ka tulha ge ka benne se'e yiesi lo yu‑ni.
JOH 1:30 Ge benne‑ni nuha rinnea, tti ria: “Benne dabie delola danalhane netiha, benneha xxeniru ra lebie tti neti, kumu chila do benneha tti neti.”
JOH 1:31 Nigaba neti ttuha labí chi yua nuxa anke, ttaka daya rugadia ka benne leni inda kini anáchu ka benne Israel‑ni nna uinbiake bie.
JOH 1:32 Rigixxi'agaba Juan‑ni ree: ―Biláti Espíritu ge Tata Do Yebáha ugwadie dabie yebáha attiba radi ttu becha, bisiabie betedhobie ikie.
JOH 1:33 Neti ttuha labí chi yua nuxa anke, ttaka Tata Do Yebáha benne udhelhe neti kini ugadia ka benne leni inda, benneha ree neti: “Benne ilenlu chadi Espíritu kia‑ni nna etedhobie ikie, benneha nuha ugadie ka benne Espíritu kiaha.”
JOH 1:34 Neti chi bilátie nna rigixxi'aya deki labie anke Xi'in Tata Do Yebáha.
JOH 1:35 Beyeki sáha nna dedhú Juan‑ni niha attu libe len chupa ka benne rudhetinieha.
JOH 1:36 Tti bilánie Jesús‑ni rekie niha, nianna ree: ―¡Ne benne anke neru to udhelha Tata Do Yebáha reki naa!
JOH 1:37 Tti biyienin ixpa ka benne rudhetinieha nu reeha, nianna tti diake danalhake Jesús‑ni.
JOH 1:38 Tti bodeki lo Jesús‑ni nna bilánie danalhake bie, nianna ree ke: ―¿Bí regilale? Lake nna bekabike, ráke bie: ―Rabí, ¿gála reya'anlu? (“Rabí” dienna innána maestru.)
JOH 1:39 Labie nna ree ka benneha: ―Gwaltá gwalulanni. Nianna ugíake gwalannike ata doeha. Kumu chiba anka ttiba retin ttapa nuha, laxkala niha‑ba use'eke lenbie axtaba ulha sáha.
JOH 1:40 Benne labie Andrés betsi Simón Pedro‑ni, delo chupake biyienkanie nu ra Juan‑ni, benneha nuha ugíabie gwanalhe Jesús‑ni.
JOH 1:41 Andrés‑ni nuha lade'a tte gwatilee betsie Pedro‑ni, nna ree benneha: ―Chi gwaxxakatu Mesías‑ni. (“Mesías” dienna innána Cristu benne chi ga'anani Tata Do Yebáha idhelhe.)
JOH 1:42 Nianna tti chebie Simón‑ni ata du Jesús‑ni. Tti bilani Jesús‑ni Simón‑ni, nianna rabie na: ―Lu lálu Simón xi'in Jonás, ttaka nnanna eyatta lálu Cefas. (“Cefas” dienna innána Pedro.)
JOH 1:43 Beyeki sáha bebeki le Jesús‑ni tsiabie daka Galilea, nianna beti'e Felipe‑ni nna ree benneha: ―Utá, betenalha neti.
JOH 1:44 Felipe‑ni anke benne lhe'esi Betsaida, delába lhe'esi ge Andrés‑ni lhe ge Pedro‑ni lhe.
JOH 1:45 Felipe‑ni nna beti'ana attu benne lábie Natanael nna rana benneha: ―Chi gwaxxakatu Jesús ge Nazaret‑ni, xi'in biyú José‑ni. Ge Jesús‑ni nuha unne Moisés‑ni lo bia bennabiha lhe ge benne‑nigaba nuha unne ka profeta ge Tata Do Yebáha lhe.
JOH 1:46 Nianna ra Natanael‑ni Felipe‑ni: ―¿Lhe'esi Nazaret‑ni, si gwaria tsa ttu benne unie ttu nu tse? Nianna ra Felipe‑ni benneha: ―Utáruga, belanni.
JOH 1:47 Tti bilani Jesús‑ni Natanael‑ni chi diabie ata dueha, nianna ree: ―Ne ttu benne gwalíga anke nu Israel daa nii, Benne‑ni labí gwen lasi rinnebie.
JOH 1:48 Natanael‑ni nna ree Jesús‑ni: ―¿Gála benbialu neti xa tata? Jesús‑ni nna bekabie gebie, ree: ―Attili lani gaxi Felipe‑na lu, neti chila biláti lu tti relu xan ya higuha.
JOH 1:49 Natanael‑ni nna ree Jesús‑ni: ―Maestru, lúligaba ankalu Xi'ini Tata Do Yebáha lhe lu ankalu benne rinnabialu ka benne Israel‑ni lhe.
JOH 1:50 Jesús‑ni nna bekabie ree Natanael‑ni: ―¿Si de xpeya lu chi biláti lu relu xan ya higuha, si de nuha nna ria lelu kia? Adírula xxeni anka ka nu si ilenlu tti ka nuní.
JOH 1:51 Lhe rágaba Jesús‑ni: ―Netiru ria, debá nnanna lhe nu si daa lhe ilenle iyali yebáha nna ilágabinle ka anjeli ge Tata Do Yebáha tsapi chadike xaliekia, neti benne daya yebáha.
JOH 2:1 Beyonna ubisaha nna utta ttu dha'a lhe'esi Caná ge Galilea‑ni. Niha‑gaba du nan ge Jesús‑ni.
JOH 2:2 Biyaxigaba Jesús‑ni lenie ka benne rudhetinieha tse'eke dha'aha.
JOH 2:3 Tti chi bebisi vinuha, nianna ra nan geeha bie: ―Birua vinu tee.
JOH 2:4 Jesús‑ni nna bekabie, ree: ―Nana, ¿beaka netila ralu nuná? Neti labí chi bisia ura kia.
JOH 2:5 Nan geeha nna rabie ka nu se'e gwexxua ya kwe'eha: ―¡Gwaluni iyába nu innábi!
JOH 2:6 Niha se'e xxupa ka re'e ankakana ge íyya. Rita'a inda lhe'ekani. Lhe'e ttu ttu ka nuha rita'a ttiba ttu gayua (100) litru inda. Ka nuha rixúni ka benne Israel‑ni ki riga'ake inda lhe'ekani tti reyarike arlo Tata Do Yebáha.
JOH 2:7 Jesús‑ni nna rabie ka nu se'e gwexxua ya kwe'eha: ―Gwalodisá ka re'e‑na inda. Ka nuha nna bodisá tíbakana ka re'eha inda,
JOH 2:8 nianna tti ra Jesús‑ni kana: ―Nnanna nna gwalika'a latti nuná nna gwatagwe benne bananie dha'a‑ni. Nianna denkana nuha nna begwekana benneha.
JOH 2:9 Benne bananie dha'aha, kumu labí yue gaxa gwaxxíkana vinuha, sunruba ka nu se'e gwexxua ya kwe'eha yúkana, kumu de lakana gwattekana indaha, laxkala tti bennixxie inda chi beyaka vinuha, nianna tti uxie nubiyú rutsá nániha
JOH 2:10 nna ree na: ―Iyába ka nu runi ttu dha'a, lade'axa ruga'akana vinu tseru nna iki deliba ganna chi u'uya xxatta ka benne yu'u dha'aha nuha, la'anialiba nna chi ruga'akana vinu nu labí tte anka tse. Lu nna nnannaliba ruga'alu vinu tseru‑ni.
JOH 2:11 Nuní sisi'a tte milagru ben Jesús‑ni lhe'esi Caná ge Galilea. Len nu benieha bele'ebie nu xxeni ra lebie. Ka benne rudhetinieha nna ugía leke gebie.
JOH 2:12 Iki de nuha nna ugwadie die lhe'esi Capernaum lenie nan geeha lhe ka betsieha lhe ka benne rudhetinieha lhe. Niha use'eke sunruba ttu chupa ubisa.
JOH 2:13 Kumu de chi dabigana isia laní ge ka benne Israel‑ni nu tee láni Pascua, Jesús‑ni nna ugwapie die lhe'esi Jerusalén‑ni.
JOH 2:14 Lali'a yotuha gwaxxake ka nu rutto'okana ka ku'una lhe ka neru lhe ka becha lhe. Anágaba ka nu rotsea belhiu lhe, niha‑gaba se'ekana.
JOH 2:15 Nianna tti bilhe ttu tuu. Len nuha bochesue kana ro'o yotuha itupa lenkana ka neruha lhe ka ku'una rutto'okanaha, nna ka nu rotsea belhuha nna bedhíe belhiu gekaniha lo yu nna berixxi lobie ka mexa gekaniha.
JOH 2:16 Nianna rabie ka nu rutto'o ka bechaha: ―Gwalebea ka nuná nii nna bittu uinle lisi Tata kia‑ni yo'o ata raka i'iya.
JOH 2:17 Ka benne rudhetinieha nna gwadú tteba leke nu ra lo ka yetsi ge Tata Do Yebáha ata dia ra: “De raka xxattati ge lisilu‑ni, de nuha nna ruyú xxattaa elha disa.”
JOH 2:18 Ka nu loni ge ka benne Israel‑ni nna rákane: ―Lu, ¿bíla ttu seña ule'elu kini ula'a deki gwalí rapalu lo neda uinlu nu ruinlu‑ni?
JOH 2:19 Jesús‑ni nna bekabie gekani, ree: ―Gwaluttampa yotu‑ni nna delo tsunna ubisaba chi elhidhaa na.
JOH 2:20 Ka nu loni ge ka benne Israel‑ni nna rákane: ―Chua bixxi xxupa (46) ida bisá ka benne ulhidhake yotu‑ni, lu nna delo tsunna ubisaba ralu chi elhidhalu nuní.
JOH 2:21 Ttaka Jesús‑ni laa gwalíga ge yotuha nuha rinnebie, sinuki gebe nuha rinnebie.
JOH 2:22 Iki deliba chi beyaka benbie lagwi ge ka benne chi uttiha, la'anialiba nna gwadú le ka benne rudhetinieha deki chiba unnebie ge nuha, nianna tti ugía leke ge nu ra lo ka yetsi ge Tata Do Yebáha lhe ugíagaba leke ge nu ra Jesús‑ni lhe.
JOH 2:23 Laka reki Jesús‑ni lhe'esi Jerusalén‑ni tti raka laní Pascuaha, ixe ka benne ugía leke gebie de bilákanie ka milagru runieha.
JOH 2:24 Ttaka kwinaba Jesús‑ni labí ruxxen lebie geke, kumu chiba yue gasina ruin iyáke.
JOH 2:25 Labie labí riyasanie nuxa kixxi'ane gaxasina ruin ka benne se'e yiesi lo yu‑ni kumu chiba yue gasina anka lhe'e lastoke.
JOH 3:1 Udo ttu benne la'ania anke fariseo, lábie Nicodemo. Uke ttu nu loni ge ka benne Israel‑ni.
JOH 3:2 Benneha ugíabie ttu lo rela gwalannie Jesús‑ni nna ree benneha: ―Maestru, ri'itu yutu deki Tata Do Yebáha‑ba udhelhe lu kini ule'enlu ri'itu, kumu lanú ttu benne gwaka gebie unie ka milagru ruinlu‑na ganna abíba du Tata Do Yebáha lenbie.
JOH 3:3 Jesús‑ni nna bekabie ge benneha, ree: ―Netiru ria, benne abíba eyalie attu libe eyake benne kubi, benneha labí dhaabie isine ake benne innabia Tata Do Yebáha bie.
JOH 3:4 Nicodemo‑ni nna ree Jesús‑ni: ―¿Gasina aka ge ttu benne chi anke yaxxu eyalie attu libe? ¿Si gwakaba ge benneha eta'abie lhe'e nan geeha nna eyalie attu libe?
JOH 3:5 Jesús‑ni nna bekabie ree: ―Netiru ria, benne abíba eyalie len inda lhe eyalie len Espíritu ge Tata Do Yebáha lhe, benneha labí aka isine ake benne innabia Tata Do Yebáha bie.
JOH 3:6 Kumu ttu benne ralie lhe'e xxudi ixnábie, xi'in ka benne se'e yiesi lo yu‑niba anka benneha, nna benne ake xi'in Tata Do Yebáha nna Espíritu ge Tata Do Yebáha‑ba unie kini ake xi'inie.
JOH 3:7 Laxkala bittu aka tenlu de ria: “Raka doelha eyali ka benne attu libe.”
JOH 3:8 Ttibanka be‑na, gatti laduba dana, gwa riyienibinlu tsi'ini, ttaka labí yulu gá udána dana lhe gá diana lhe. Aníha‑gaba runi Espíritu ge Tata Do Yebáha lhe'e lasto ka benne chi beyalike attu libe.
JOH 3:9 Nicodemo‑ni nna bekabie, ree: ―¿Gasina aka nu ralu‑na?
JOH 3:10 Jesús‑ni nna bekabie ge benneha, ree: ―Ki lu ankalalu maestru ge ka nu Israel‑ni nna a rite denlu nu ria‑ni.
JOH 3:11 Netiru ria, ri'itu rinnebatu ge nu chi yutu lhe rigixxi'abatu ge nu chi bilentu lhe, ttaka lebi'i labí ria lele ge nu rigixxi'atu‑ni.
JOH 3:12 Ki nu anka ge yiesi lo yu‑ni rigixxi'aya nna a ria lele, ¿titiala ganna ttixka kixxi'ania le nu anka ge yebáha?
JOH 3:13 ’Lanú nu chi ugwapina yebáha, sunruba neti benne daya yebáha ugwadia niha nna bisiaya nii.
JOH 3:14 Ttigaba ben Moisés‑ni lo yu bisiha ulhidhana belhaha bedána nuha gwetsá, anágaba neti benne daya yebáha teeki ilhidhakana neti nna utákana gwetsá,
JOH 3:15 kini anáchu iyába ka benne tsia leke neti, [abittu tsia nnittike], sinuki satíaba aka benke arlo Tata Do Yebáha.
JOH 3:16 ’Kumu de yalhá ukani Tata Do Yebáha ge ka benne se'e yiesi lo yu‑ni, de nuha nna udhelhe neti benne ankaa Xi'in ttu túbiru geeha, kini anáchu iyába ka benne tsia leke neti nna abittu tsia nnittike, sinuki satíaba aka benke arloe.
JOH 3:17 Kumu Tata Do Yebáha laa udhelhage neti benne ankaa Xi'inie, laa udhelhage neti yiesi lo yu‑ni kini ukinnia ka benne, sinuki udhelhalee neti kini odiláya ke.
JOH 3:18 ’Laxkala benne tsia lebie kia, labí urixxi ukinni Tata Do Yebáha benneha, ttaka benne abíba tsia lebie kia, chiba ubixxi biginni benneha kumu de labí ugía lebie neti benne ankaa Xi'in ttu túbiru ge Tata Do Yebáha.
JOH 3:19 Ka nu labí ria lekaniha ibixxi iginniba ka nuha, kumu neti benne ankaa xianiha gwa bisiabaa yiesi lo yu‑ni, ttaka lakana nna adírula ute lekani chulhaha attichula xianiha kumu de satsaba anka nu ruinkana.
JOH 3:20 Kumu iyába ka nu runi nu satsa, labí raka uyúkana xianiha, labí ribigakana ata ruden nuha, kini abittu ilá nu ruinkanaha nna itisakana.
JOH 3:21 Ttaka benne gwa ruinbe nu raxxína len nu anka gwalí, gwa ribigaba benneha ata rudani xianiha, kini ilá deki nu runieha gwankaba nuha nu ru'u le Tata Do Yebáha.
JOH 3:22 Iki de nuha nna ugía Jesús‑ni lenbie ka benne rudhetinieha isá to daka Judea. Niha‑ba ugweki lenie ke nna rugadie ka benne inda.
JOH 3:23 Anágaba Juan‑ni rugadigabe ka benne inda daka Enón kumu niha yu'u idila inda. Enón rena gaxxaba Salim. Niha risin ka benne ki radike inda.
JOH 3:24 Kumu Juan‑ni labí chi tena lisiyya la'ania.
JOH 3:25 Ka benne rudhetini Juan‑ni, ttu lidú belisa luesike len ka benne Israel‑ni. Belisa luesike delo ni'a ge gasina eyari ka benne kini eyakake nari xú arlo Tata Do Yebáha.
JOH 3:26 Nianna tti bisinke ata du Juan‑ni nna ráke benneha: ―Maestru, biyúruga. Nu du lenlu daka ro'o yoo Jordán‑ni, nu utixxi'agabinlu ri'itu geniha, nnanna nuha chigaba rugadina ka benne inda nna iyábake diake danalhake na.
JOH 3:27 Juan‑ni nna bekabie ge ka benneha, ree: ―Labí aka ge ttu benne unie ttu bixa ganna abíba ute ná Tata Do Yebáha lenbie.
JOH 3:28 Ki kwinaba lebi'i biyienin nagale ge nu xpeya le deki neti labí ankaa Cristu, sinuki sun tteruba ankaa ttu benne udhelha Tata Do Yebáha kini danerua rigixxi'aya deki chi daa benneha.
JOH 3:29 Ttibanka lo ttu dha'a, nubiyú rutsá nániha, gebani anka nuila rutsá ná lennaha nna benne anka amigu ge nubiyú rutsá nániha, benneha dubie gaxxaba kwe'eni nna yalhá redeakanie tti riyieninie rinne nubiyúha. Neti nuha ankaa amigu ge nubiyú rutsá nániha, laxkala nnanna itta suba edú lasia.
JOH 3:30 Benne rutsá neeha rakaru doelha tsie ake xxeniru, neti nna exxa gaalaa.
JOH 3:31 ’Benne daa gwetsáha, benneha nuha ankarue xxeni delo iyá ka benne. Benne anka ge yiesi lo yu‑ni nna ge yiesi lo yu‑niba anka benneha nna nu anka ge yiesi lo yu‑niba rinne benneha. Benne daa yebáha nna benneha nuha ankarue xxeni delo iyá ka benne.
JOH 3:32 Ge nu bilábanie lhe ge nu biyienbanie rigixxi'abie, ttaka ni ttú ka benne a ria leke ge nu rigixxi'a benneha.
JOH 3:33 Ttaka nu gwa ria leni ge benneha, lana nuha rigixxi'iana deki Tata Do Yebáha rinne nu anka gwalí.
JOH 3:34 Kumu benne udhelha Tata Do Yebáha, ka tisa geeha‑ba rinne benneha kumu Tata Do Yebáha rute tame itú Espíritu geeha len benneha.
JOH 3:35 Tataha rakanie ge Xi'inieha, laxkala iyába chi bedha'ane lasi ná benneha.
JOH 3:36 Laxkala benne tsia lebie ge Xi'in Tata Do Yebáha, gwaka benba benneha ttu dia lii arlo Tata Do Yebáha, nna nu abittu tsia leni ge Xi'inieha labí aka ben nuha ttu dia lii, sinuki ralhaba nuha dhina elha disa ute Tata Do Yebáha.
JOH 4:1 Tti bina Jesús‑ni deki ka fariseo‑ni chi biyienkinna ra ka benne: “Jesús‑ni raxirue ixe ka benne ki sanalhake bie lhe rugadirue ixe ka benne inda tti Juan‑ni”
JOH 4:2 (meskiba laa Jesús‑ni nuha rugadie ka benneha inda, ka benne rudhetinieha‑ba rugadike ka benneha inda),
JOH 4:3 tti bina Jesús‑ni nu chi biyienkin fariseo‑ni, nianna bedábie daka Judea nna besine daka Galilea attu libe.
JOH 4:4 Tti deyyeha nna teeki betebie daka Samaria
JOH 4:5 nna besine lhe'e ttu yiesi ge niha. Yiesiha tee láni Sicar. Rena gaxxaba ata tee ttu lo yu nu boka'an Jacob‑ni xi'in biyúni José‑ni.
JOH 4:6 Niha re yiela inda tee láni Yiela Ge Jacob. Jesús‑ni nna de chi resanie deyu'e neda, de nuha nna besine ro'o yielaha nna ure ttebe. Ttiba retin tsi'inu (12) nuha chi anka la'ania.
JOH 4:7 Niha bisin ttu nuila ge Samaria daa nuha uxí inda. Jesús‑ni nna ree nuilaha: ―Betetti inda i'iyaa.
JOH 4:8 Ka benne rudhetinieha nna si diala ka benneha lhe'esiha ugo'o nu goke.
JOH 4:9 Nuila ge Samaria‑ni nna rane: ―¿Gasina nna rinnabalu neti inda, ki lu benne Israel‑ba ankalu, neti nna benne Samariaba neti? Aníha rana kumu ka benne Israel‑ni lhe ka benne Samaria‑ni lhe, labí rutsá luesi ka benneha.
JOH 4:10 Jesús‑ni nna bekabie ge nuilaha, ree: ―Ganna ttixka lu yulu nu tse rute Tata Do Yebáha lhe ganna ttixka yulu nú benne nuní rabie lu: “Betetti inda i'iyaa”, la'ania nna gwannabalalu inda lenie, labie nna gutelee inda nu unna elha nabani gelu.
JOH 4:11 Nuilaha nna rane: ―Ki bigaba bi denlu ki kwealu inda‑ni xa tata. Yiela‑ni yalhá lhi'u dia nuní. ¿Gála salhealu inda nu unnana elha nabani ganna?
JOH 4:12 ¿Si xxenirula ra lelu tti benneola geri'i Jacob‑ni? Benneha bodha'ane yiela‑ni geri'i. Lhe'e yiela‑ni u'uye inda lhe u'uya ka xi'inieha lhe u'uya ka ku'una bia geeha lhe.
JOH 4:13 Jesús‑ni nna bekabie geni, ree: ―Nuxaba benne ganna i'iye inda ge yiela‑ni ebisiba benneha inda attu libe,
JOH 4:14 ttaka benne i'iye inda utea‑ni, ni tsa labíru ebisi benneha inda attu libe; kumu inda utea‑ni akana ttiba ttu dina satíaba dhona lhe'e lastoe nna nuha uinna kini satíaba aka benbie arlo Tata Do Yebáha.
JOH 4:15 Nuilaha nna rane: ―Tata xisi to, bete luesi inda ralu‑na i'iyaa, kini abitturu ebisia inda lhe kini abitturu itaa nii ubea inda lhe.
JOH 4:16 Jesús‑ni nna rabie nuilaha: ―Beyya nna gwalisa nubiyú geluha nna utá lenna.
JOH 4:17 Nuilaha nna bekabina gebie, rane: ―Lanú nubiyú ki neti do. Jesús‑ni nna rabie na: ―Gwalíbinlu ralu: “Lanú nubiyú ki neti do.”
JOH 4:18 Kumu gayu ka nubiyú chi udo lenlu nna nu do lenlu nnanna, labí chi anka nuná nubiyú gelu. Gwalíbinlu nu ralu‑na.
JOH 4:19 Nuilaha nna rane: ―Neti rakati profetaba ankalu xa tata.
JOH 4:20 Ka benne uka xuttotuha, iki i'iya‑niba bitake bedú xibike arlo Tata Do Yebáha. Lebi'i ka benne Israel nna rale lhe'esi Jerusalén‑niliba teeki udú xibi ka benne arlo Tata Do Yebáha.
JOH 4:21 Jesús‑ni nna bekabie geni, ree: ―Ugía lelu kia xa nuila. Isia sá gaxaba se'ele udú xibile arlo Tataha. Labíru raka doelha itale iki i'iya‑ni, nigaba tsiale Jerusalén‑ni ki udú xibile arloe.
JOH 4:22 Lebi'i labí yule núnna rudú xibile arloni, ri'itu nna gwa yutu nú arlo rudú xibitu. Kumu ri'itu ka benne Israel‑ni, lagwi getu iria benne odilábie ka benne ki esinke len Tata Do Yebáha.
JOH 4:23 Ttaka gwasia ura, nnanna nuha chi bisia uraha, ka benne ka nu gwalíga ankake ka nu rudú xibike arlo Tataha, ka benneha nuha gwalíga udú xibike arloe tti tte ra Espíritu geeha, kumu Tataha luesi ka benneha rigile ki udú xibike arloe.
JOH 4:24 Tata Do Yebáha anke Espíritu, delába anke benne labí rilenri'e, laxkala ka benne rudú xibike arlobie, teeki uinke nuha gwalíga tti tte ra Espíritu geeha.
JOH 4:25 Nianna ra nuilaha Jesús‑ni: ―Neti gwa yubaa deki isia Mesías, delába benne anke Cristuha. Ganna chi isia benneha, la'ania nna kixxi'anie ri'i iyá tte.
JOH 4:26 Jesús‑ni nna rabie na: ―Neti nuní ankaa benneha xa, delába benne rinne lenlu‑ni.
JOH 4:27 Nuha‑ba raka nna chi besia ka benne rudhetinieha nna bebanabakanie tti bilákanie rinne lanie nuilaha; ttaka nna ni ttúke labí unnaba tisake innáke: “¿Bíunna rinnaba tisalu nuila‑na?” o, “¿bí ge nuná rinne lenlu nuná?”
JOH 4:28 Nuilaha nna bedú bixxibana re'e geniha nna deyyana lhe'esiha, gwagunana ka benne, rana ke:
JOH 4:29 ―¡Gwaltáruga, gwalulanni ttu nubiyú chi utixxi'ana ge iyába nu chi benia! ¿Si laaba nubiyúha‑ba nuha anka Cristu benne chi ga'anani Tata Do Yebáha idhelhe?
JOH 4:30 Nianna tti biria tteba ka benne lhe'esiha nna bisinke ata du Jesús‑ni.
JOH 4:31 Laka raka nuha nna ka benne rudhetini Jesús‑ni nna ráke bie: ―Uto yetta xa maestru.
JOH 4:32 Ttaka labie nna rabie ke: ―Neti teela ttu elho kia goa, lebi'i labí yule bixa elho nuha.
JOH 4:33 Nianna tti ra luesi ka benne rudhetinieha: ―¿Si nuxa chi betedha'ana nu gobie ak?
JOH 4:34 Jesús‑ni nna rabie ka benneha: ―Elho kia ankana, unia nu raka le benne udhelhe netiha nna ulhuxaa sina geeha.
JOH 4:35 ¿Laaba lebi'i rale: “Sa riyasaba ttapa beo tti isia gwetselaha”? Neti ria le: Gwalodeki lole nna gwalulanni ka xuxtila se'e naa. Chiba rigatsi ka nuná ki eyatsakana.
JOH 4:36 Ttu benne riben gwetsela ridíba lhiaxa benneha, nna lena ruttupeha nna ankana ka benne raxie lo neda ge Tata Do Yebáha kini satíaba aka benke, kini anáchu benne rudelhe xuaha lhe benne rottupe benneha lhe, ixpabake tse'e ittake ge sina benkeha.
JOH 4:37 Nii rado tisa ge nu rari'i: Ttu benne subi rudelhe xuaha nna attu benne subila redíe benneha.
JOH 4:38 Neti ridhelhaa le kini egitsale xua bedelha ka benne subi, nu labí gwatele bedelhale. Nnanna nna lebi'ila chi redí baale ge sina ben ka benneha.
JOH 4:39 Ixe ka benne lhe'esi Sicar, (Sicar babana Samaria), ixe ka benneha ugía leke ge Jesús‑ni de nu utixxi'en nuilaha ke tti rana: “Benne‑ni chi utixxi'e ge iyá nu chi benia.”
JOH 4:40 Laxkala tti chi bisin ka benneha ata du Jesús‑ni nna unnabake lenie, ráke bie: ―¡Ga innálu beya'anchi len ri'itu! Nianna beya'ane udoe lenke chupa ubisa
JOH 4:41 nna adírula ixe ka benne ugía leke tti biyienkanie nu ra kwinaga labie.
JOH 4:42 Nianna tti ráke nuilaha: ―A laa suna ge nu utixxi'enlu ri'ituha‑ruga ria letu, nnanna chi ria letu kumu kwinaga ri'itu chi biyienintu nu rinne benne‑ni. De nuha nna chi yutu deki gwalíga benne‑ni anke Cristu; labie odilábie ka benne se'e yiesi lo yu‑ni.
JOH 4:43 Iki de chi gwadona chupa ubisaha, biria Jesús‑ni lo yu ge Samaria‑ni nna die daka Galilea,
JOH 4:44 kumu kwinaba labie ree deki ttu benne anke profeta, labí rugwekana lidhaka benneha lhe'esi gebie.
JOH 4:45 Tti besine daka Galilea, tseba belabi ka benne Galilea‑nie kumu de chiba bilákanie iyá nu benie lhe'esi Jerusalén‑ni tti raka laní Pascuaha, kumu ka benneha ugíagabake laníha.
JOH 4:46 Nianna beyeki Jesús‑ni attu libe lhe'esi Caná. Yiesiha rena daka Galilea ata beyonie indaha vinu. Lhe'esi Capernaum‑ni do ttu nu rinnabia nu duna kwe'e nu rinnabia xeniha. Nuha do ttu xi'in biyúni ranina.
JOH 4:47 Tti bina nuha deki chi bedá Jesús‑ni daka Judea‑ni nna besiabie daka Galilea, nianna tti ugíana nna gwannabana lenie, rane: ―¡Utáchi xa tata, ki eyoinlu nu kwiti kiaha. Bichisilá chi tteba gattibi!
JOH 4:48 Jesús‑ni nna bekabie geni, ree: ―Lebi'i labí tsia lele ganna abíba ilenle aka ka milagru lhe ka nu dika ebaninle geni lhe.
JOH 4:49 Ttaka nubiyúha nna rane: ―Tata xisi to, uyáxxiruga ttiru lani gatti nu kwiti kiaha.
JOH 4:50 Jesús‑ni nna ree na: ―Beyya lisiluha. Xi'in biyúluha chiba beyaka nuha. Nubiyúha nna gwa ugíaba leni ge nu ra Jesús‑ni na, nianna deyya ttebana.
JOH 4:51 Tti chi deyyana esinna lisiniha nna biria ka nu riben sina lhe'e yo'o geniha nna gwatsákana na, nianna rákana na: ―Gwanka benba nu kwiti geluha.
JOH 4:52 Nianna tti unnaba tisana ka nuha, rana kana: ―¿Bí ura beyaka nu kwiti kiaha? Ka nuha nna rákana na: ―Nnayaha ttiba retin ttú beria xilháha latibi.
JOH 4:53 Niala nna tti gwadú le xxudi nu kwitiha deki uraha‑gaba nuha tti ra Jesús‑ni na: “Chiba beyaka xi'in biyúluha”, nianna tti ugía leni ge Jesús‑ni lhe ugíagaba le iyába ka benne se'e lhe'e lisiniha lhe.
JOH 4:54 Nuní berupa milagru ben Jesús‑ni iki de chi bedábie daka Judea‑ni nna besine daka Galilea‑ni.
JOH 5:1 Iki de nuha nna bisia ttu laní ge ka benne Israel‑ni. Jesús‑ni nna ugwapie die lhe'esi Jerusalén‑ni.
JOH 5:2 Lhe'esi Jerusalén‑ni, niha du puerta nu tee láni Puerta Ge Ka Neru. Gaxxaba niha re ttu yiela inda. Len tisa hebreo tee láni Betesda. Abi'iba ro'o yielaha rilhi ttu kweredori sia gayu ro'oni ata ra'a ka benne.
JOH 5:3 Lhe'e kweredoriha ratta ixeru ka benne rani, ka benne lo xua lhe ka benne ridá natsa lhe ka benne daa yatti latike lhe, [ribedake kini itá lo yiela indaha,
JOH 5:4 kumu ttu anjeli ge Tata Do Yebáha, gwadú gwadú riginnie lhe'e yielaha nna ruttábie lo indaha, nna benne gwa riyúbanie riginnie lhe'e indaha, iki de chi reyaka ritá lo nuha, benneha nna reyaka ttebe ge bixaba isagwe ridake.]
JOH 5:5 Niha‑gaba tee ttu benne biyú ranie. Chiba uka rerua bixxi xxunu (38) ida ranie.
JOH 5:6 Tti bilani Jesús‑ni benneha tebie niha lhe bine deki isába chi ridake nuha, nianna tti rabie benneha: ―¿Si raka lelu eyakalu?
JOH 5:7 Benne raniha nna bekabie ge Jesús‑ni, ree: ―Lanú tee uga'ana neti lhe'e yiela‑ni tti ritá loni xa tata. Kua ruinbaa ga'aya nna attu benne subila chi riyúbanie rixudie lade'a tte tti neti.
JOH 5:8 Jesús‑ni nna rabie benneha: ―Beyadha nna belhidha nu xualu loin‑na nna udá.
JOH 5:9 Looraha nna beyaka tteba benne raniha. Nianna bodaxxu ttebe nu xue loniha nna uduloe udee. La sáha anka sá tti reyaka le ka benne Israel‑ni.
JOH 5:10 Ka nu loni ge ka benne Israel‑ni nna rákana benne beyakaha: ―Ki gwa yúbalu nasá anka sá reyaka leri'i. Labí aka eyojalu nu uttalu loin‑na.
JOH 5:11 Benne biyúha nna bekabie gekani, ree: ―Benne beyonie netiha, kwinaba benneha rabie neti: “Belhidha nu xualu loin‑na nna udá.”
JOH 5:12 Nianna unnaba tisakana benneha, rákane: ―¿Núnna rana lu: “Belhidha nu xualu loin‑na nna udá”?
JOH 5:13 Ttaka benne beyakaha nna labí yue nuxa benne nuha rabie bie aníha, kumu Jesús‑ni chiba biganna lokanie lagwi ge ka benne saa niha.
JOH 5:14 Delola nna beti'a Jesús‑ni benne beyakaha ro'o yotuha nna ree bie: ―Biyúruga chiba beyakalu. Bitturu uinlu tulha kini ka satelu ttu nu satsarula tti nu gwatelu‑na.
JOH 5:15 Benne biyúha nna ugíe gwattixxi'anie ka nu loni ge ka benne Israel‑ni deki Jesús‑niba nuha beyonie bie.
JOH 5:16 De nuha nna ka nu loni ge ka benne Israel‑ni ridú nookana Jesús‑ni, ruinkana uttikane, kumu de runie ka milagru lhe'e ka sá reyaka lekaniha.
JOH 5:17 Ttaka Jesús‑ni nna ree: ―Tata kiaha satíaba riben benneha, de nuha nna neti ribengabaa.
JOH 5:18 De rabie aníha nna ka nu loni ge ka benne Israel‑ni adírula ruinkana uttikane, kumu laa sunruga rigu'u ni'e ka sá reyaka lekaniha, sinuki de rágabe deki Tata Do Yebáha‑ba anke Xxudie. Tti rabie aníha, runie deki turo'oba anke len Tata Do Yebáha. De nuha nna ruinkana uttikane.
JOH 5:19 Nianna bekabi Jesús‑ni ge ka nu loni ge ka benne Israel‑ni, rabie kana: ―Netiru ria, neti benne ankaa Xi'in Tata Do Yebáha labí aka unia nu yu'u ikia, sinuki ruinbaa nu rilábati ruin Tata kiaha. Kumu iyába nu ruin Tataha, aníha‑gaba neti benne ankaa Xi'inieha, aníha‑gaba runia.
JOH 5:20 Kumu Tataha rakanie kia, de nuha nna iyába nu runieha rule'enie neti nna adírula xxeni anka nu si ule'enie neti. Ule'ebie ttu nu dika ebaninle tti ilenle na.
JOH 5:21 Kumu ttiba ruin Tataha relhidhe ka benne chi uttiha nna runie kini reyaka benke arloe, anágaba neti benne ankaa Xi'inieha, ka benne aka lasia unia kini aka benke nna gwaka benbake.
JOH 5:22 Kumu Tataha lanú nu ruin benneha elhuxtisi geni, sinuki len neti benne ankaa Xi'inieha chi bodha'ane iyába lasi náya kini unia elhuxtisi ge ka benne,
JOH 5:23 kini anáchu nna neti benne ankaa Xi'inieha, iyába ka benne ugweke lidhakaa ttigaba rugweke lidhaka Tataha nna nu abíba rugwena lidhakaa, labígaba rugwe nuha lidhaka Tataha benne udhelhe netiha.
JOH 5:24 ’Netiru ria: Nu gwa rudo nagani ge nu rinnea‑ni lhe gwa ria leni Tata Do Yebaa benne udhelhe netiha, nuha satíaba aka benna arloe; labí ibixxi iginni nuha dhina elha disa, sinuki chiba ulhá nuha lo elhutti tee arlo Tata Do Yebáha nna isinna aka benna ttu dia lii.
JOH 5:25 Netiru ria, chi isia ura, nnanna nuha chi bisia uraha, la'ania ka nu ankakana yatti arlo Tata Do Yebáha iyienkinna tsi'a, neti benne ankaa Xi'inieha nna ka benne gudo nagake kia, ka benneha nuha gwaka benke.
JOH 5:26 Kumu ttiba Tataha anke benne bani nna runie ki raka ben ka benne, anágaba neti benne ankaa Xi'inieha ankaa benne bani nna chi betebie lo neda kia kini unia ki aka ben ka benne,
JOH 5:27 lhe chigaba betebie lo neda len neti kini unia elhuxtisi ge ka benne kumu de ankaa benne daya yebáha.
JOH 5:28 Bittu aka tenle ge nu ria‑ni, kumu isiaba ura atti iyába ka benne tee lhe'e yieru baa iyienkanie tsi'a.
JOH 5:29 Ka benne ben tseha, eyadhake kini aka benke ttu dia lii nna ka nu ben nu satsaha nna eyadhakana kini iginnikana uyúkana elha disa.
JOH 5:30 ’Neti labí aka kia unia nu yu'u ikia. Ruinbaa elhuxtisi ttiba ra Tataha unia nna elhuxtisi runia‑ni, ruinbaa na attiba ankaba geni, kumu labí runia nu raka lasia, sinuki ruinbaa nu raka le benne udhelhe netiha.
JOH 5:31 ’Ganna si la netiba rigixxi'aya kia ge nuxa ankaa, la'ania nna nu rigixxi'ayaha labí daka nuha.
JOH 5:32 Ttaka kumu attu benne subiba rigixxi'e nuxa ankaa, de nuha nna chi yua deki nu rigixxi'a benneha kia, nu gwalíba anka nuha.
JOH 5:33 Lebi'i tti udhelhale ka nu gwannaba tisakana kia len Juan‑ni, benneha nna gwa utixxi'abe ge nu ankaba gwalí.
JOH 5:34 Neti laa de riyasagati nuxa attu benne kixxi'abie kia. ¡Ko'o! Suna rodhúbaa lele ge nu utixxi'a benneha kia kini anáchu nna lebi'i tsia lele nna odilá Tata Do Yebáha le.
JOH 5:35 Juan‑ni uke ttiba ttu xiani bedenie gele. Lebi'i nna benle tse'e ittale lhe'e xiani geeha ttu satti to, delába bedeakinle ttu satti ge nu utixxi'eha.
JOH 5:36 Ttaka neti teela ttu nu rigixxi'a tseruna kia tti nu utixxi'a Juan‑ni, delába ka milagru bedha'an Tataha len neti ki unia. La ka nuha‑ba rigixxi'akana deki gwalíba labe udhelhe neti.
JOH 5:37 Anágaba Tataha benne udhelhe netiha, chigaba utixxi'e nuxa ankaa, meskiba lebi'i labí chi biyieninle tsi'e lhe labí chi bilenlee lhe.
JOH 5:38 Nigaba a rulabile ka tisa geeha, kumu neti benne udhelheha labí ria lele kia.
JOH 5:39 Lebi'i rudheti tsitsibale ka tisa dia lo ka yetsi ge Tata Do Yebáha kumu rakinle lo ka nuha saxxakale gasina aka benle ttu dia lii arloe. Gwalí galá lo ka yetsi geeha rigixxi'a kia,
JOH 5:40 ttaka lebi'i nna labí raka lele ibigale len neti kini aka benle ttu dia lii.
JOH 5:41 ’Neti labí runia kini inne tse ka benne kia.
JOH 5:42 Anágaba nna chigaba ankabiati le deki labí rakinle ge Tata Do Yebáha.
JOH 5:43 Neti daya kwenta ge Tata kiaha; lebi'i nna a rulabile neti. Lala ganna attu nu subi dana kwenta geni, lala nuha nna gwa rulabibale na.
JOH 5:44 ¿Gágalo tsia lele kia? Kumu ki la lebi'iba rinne tse ge luesile nna labí ruinle ki Tata Do Yebaa benne anke ttu túbiru Diosiha, labí ruinle kini benneha inne tsebie gele.
JOH 5:45 ’Labí akinle deki neti ukinnia le arlo Tata Do Yebáha. Moisés benne ruxxen lele geeha, benneha‑ba ukinnie le arloe.
JOH 5:46 Kumu gannala ttixka gwalíginle ria lele ge Moisés‑ni, la'ania nna gweyyala lele kia, kumu kia nuha utixxi'a Moisés‑ni lo ka yetsi benieha.
JOH 5:47 Ttaka ganna lebi'i abíba ria lele ge nu ben benneha lo ka yetsiha, ¿gasina tsia lele ge ka tisa rinnea‑ni?
JOH 6:1 Iki de nuha nna tti dia Jesús‑ni daka attu ladu ro'o indatoo ge Galilea‑ni nu tegaba láni indatoo ge Tiberias,
JOH 6:2 ixe ka benne danalhake bie kumu de chi bilákanie ixe ka milagru runie tti reyonie ka benne rani.
JOH 6:3 Nianna tti ugwapie iki ttu i'iya nna niha udobie lenie ka benne rudhetinieha.
JOH 6:4 La'ania nuha chi dabigana isia laní ge ka benne Israel‑ni nu tekanie láni Pascua.
JOH 6:5 Tti belhidha lo Jesús‑ni nna bilánie yalhá ixe ka benne chi danalhake bie, nianna rabie Felipe‑ni: ―¿Gála sayo'ori'i yettaxtila ki go iyá ka benne‑ni?
JOH 6:6 De lo tisaba unnebie aníha, kini lana nna bixa ekabina, kumu labie chiba yue bí unie.
JOH 6:7 Felipe‑ni nna bekabina gebie, rana: ―Ni len belhiu nu kixakana ri'i ge chupa gayua (200) ubisa sina, ni len nuha a dhaari'i go'ori'i yettaxtila ki go ka benne‑ni ttu ttuxka'a.
JOH 6:8 Ttu ka benne rudhetinieha, benne tee lábie Andrés betsi Simón‑ni, benneha rabie Jesús‑ni:
JOH 6:9 ―Ne ttu nu kwiti du nii denna gayu yettaxtila ge xua cebada nna a chupa ka belha nna, ttaka bi ixú nuní ki go iyá ka benne tupa‑ni.
JOH 6:10 Nianna tti ra Jesús‑ni ke: ―Gwaligasi ka benne‑na ese'eke. Nianna bese'e tteba ka benneha kumu yalhá ixxi binni tee niha. Sunrula ka benne biyúha ankake ttiba tu gayu mili.
JOH 6:11 Nianna tti bedaxxu Jesús‑ni ka yettaxtilaha nna iki de chi begwebie Tata Do Yebáha ixkixaru, nianna tti begwebie ka benne rudhetinieha yettaxtilaha, ka benneha nna utidhike benneha len iyá ka benne se'e niha. Aníha‑gaba benie len a chupa ka belhaha. Utobake nna axtaliba beyielakanie.
JOH 6:12 Tti chi beyielakin benneha, nianna ra Jesús‑ni ka benne rudhetinieha: ―Gwalottupa ka ro'o salha'a bexxa‑na kini abittu tsia lattike.
JOH 6:13 Ka benneha nna bottupake ka ro'o salha'a bexxa ge gayu ka yettaxtila ge xua cebadaha. A tsi'inu (12) sumi besá benne bottupakeha.
JOH 6:14 Ka benneha tti bilákanie milagru ben Jesús‑ni, nianna ráke: ―Benne‑niligaba gwalí anke profeta chi ga'anna isia yiesi lo yu‑ni.
JOH 6:15 Ttaka Jesús‑ni nna tti ute danie deki doelhaba ruinkana echekane kini ake nu rinnabia gekani, nianna ttúbe beru'une dedheyye attu libe iki i'iyaha.
JOH 6:16 Tti chi uka relaha nna beyadi ka benne rudhetini Jesús‑ni ata re indatooha
JOH 6:17 nna beta'ake lhe'e ttu barcu daa niha, deyyake belháke lo indatooha kini esinke lhe'esi Capernaum. Chiba uka rela nuha nna Jesús‑ni nna labí chi besine lenke.
JOH 6:18 Indatooha nna ridú lii loni de raka xxatta ttu be idí.
JOH 6:19 Tti chi bedáke lo indatooha ttiba gayu o xxupa kilómetru, nianna tti bilákanie Jesús‑ni redábie dedee lo indaha, rebige kwe'e barcuha, nianna tti usikanie.
JOH 6:20 Labie nna unnebie, ree ke: ―Netiba nuní. Bittu gasinle.
JOH 6:21 Nianna redeakabakanie belhapike bie lo barcuha nna besin ttebake len barcuha ata deyyakeha.
JOH 6:22 Beyeki sáha nna ka benne tupa ro'o indatooha binake deki sun ka benne rudhetini Jesús‑niba beyapike lhe'e barcuha. Kumu barcu deyya ka benneha, sunruba nuha udána ro'o indatooha nna lanú Jesús‑ni bilákanie eyapi len ka benneha lhe'e barcuha.
JOH 6:23 Nianna besia adíru ka barcu dedákana daka lhe'esi Tiberias. Besia ka nuha gaxxaba ata uto ka benne yettaxtilaha ata use'eke iki de chi begwe Jesús benne anke Xxanari'iha ixkixaru len Tata Do Yebáha.
JOH 6:24 Tti lanú Jesús‑ni bilani ka benne tupa niha, nigaba a bilákanie ka benne rudhetinieha, nianna tti uta'ake lhe'e ka barcuha nna diake ugilee daka lhe'esi Capernaum‑ni.
JOH 6:25 Tti gwaxxakake bie attu ladu ro'o indatooha, nianna tti unnaba tisake, ráke bie: ―Maestru, ¿nukala bisialu nii?
JOH 6:26 Jesús‑ni nna bekabie geke, ree: ―Netiru ria, labí rekile ugila neti de rilenle ka milagru runia‑ni, sinuki rekile ugila neti kumu de begoa le yettaxtila nna axtaba beyielinle.
JOH 6:27 Bittu udona lele kilale elho nu abittu ruchíana isá, sinuki gwaludola lele gwalegila elho nu uinna kini satíaba aka benle. Neti benne daya yebáha, neti unia ki satíaba aka benle arlo Tata Do Yebáha, kumu neti chi bedha'ane ki unia aní.
JOH 6:28 Nianna tti ráke bie: ―¿Bíla teeki uintu kini dhaatu uintu nu raka le Tata Do Yebáha?
JOH 6:29 Jesús‑ni nna bekabie geke, ree: ―Tsia lele Tata Do Yebaa benne udhelhe netiha. Nuní raka lebie uinle.
JOH 6:30 Nianna tti ráke bie: ―¿Bí milagru uinlu kini ri'itu ganna chi bilentu ka milagruha nna tsia letu gelu? ¿Bí ttu nu tse uinlu?
JOH 6:31 Kumu ka benne uka xuttori'iha utoke nu udhelha Tata Do Yebáha nu tee láni maná, tti rekike lo yu bisiha. Ukaba attiba ra lo ka yetsi ge Tata Do Yebáha ata dia ra: “Yettaxtila daa yebáha, udhelhe ki utoke.”
JOH 6:32 Jesús‑ni nna rabie ke: ―Netiru ria: Labí Moisés‑ni nuha betena yettaxtila daa yebáha; sinuki Tata kiaha‑ba betebie nuha. Labie nuha rutebie nu gwalíga anka yettaxtila daa yebáha.
JOH 6:33 Kumu yettaxtila rute Tata Do Yebáha, benneha anke benne daa yebáha nna runie kini satíaba aka ben ka benne.
JOH 6:34 Nianna ráke bie: ―Satía bete luesi yettaxtila‑na gotu xa tata.
JOH 6:35 Jesús‑ni nna rabie ke: ―Netiba nuní ankaa yettaxtila rutea elha nabani ge ka benne. Benne ite len neti labíru ituin benneha lhe benne tsia lebie neti ni tsa labíru ebisi benneha inda.
JOH 6:36 Ttaka ttiba chi xpeya le, meskiba chi bilenle neti nna labí ria lele kia.
JOH 6:37 Iyába ka benne ruin Tataha ki itake len neti, gwadábake len neti nna ka benne gwadáke len netiha nna labí odekia ka benneha.
JOH 6:38 Kumu neti laa ugwadigaa yebáha kini unia nu rakaba lasia, sinuki unia nu ra benne udhelhe netiha.
JOH 6:39 Nuní raka le benne udhelhe netiha unia, delába delo iyá tte ka benne uin Tataha ki itake len neti bittu unnittia ni ttúke, sinuki elhidha bania ke ganna chi bisia sá daluxaha.
JOH 6:40 Nunígaba raka le Tataha aka, delába iyába ka benne ilákanie neti benne ankaa Xi'inie lhe tsia leke kia lhe, ka benneha nuha satíaba aka benke arloe. Neti nna gwelhidha benbaa ke ganna chi bisia sá daluxaha.
JOH 6:41 Ka nu Israel‑ni nna udulokana rinnekana ge Jesús‑ni kumu de rabie: “Neti ankaa yettaxtila nu daa yebáha.”
JOH 6:42 Lhe rágabakana: ―¿Laaba nuníba nuha Jesús xi'in biyú José‑ni? Ki gwankabiabinri'i xxudini lhe ixnáni lhe. ¿Galasina nna rana: “Yebáha‑ba daya”?
JOH 6:43 Jesús‑ni nna bekabie, ree: ―Bittu innele kia.
JOH 6:44 Lanú ttu benne lhaxxaba isiabie len neti ganna Tata kia benne udhelhe netiha abíba idhelhe benneha len neti. Neti nna gwelhidha benbaa benneha lo elhuttiha ganna chi bisia sá daluxaha.
JOH 6:45 Lo ka yetsi bodha'an ka profeta ge Tata Do Yebáha dia ra: “Iyábakana udhetini Tata Do Yebáha.” Laxkala iyába ka benne riyienkanie ge Tataha lhe ridetike gebie lhe, ka benneha nuha gwadáke len neti.
JOH 6:46 Tataha lanú nu chi bilenna benneha; sunruba neti benne udáya ata doeha, sunruba neti chi biláti Tataha.
JOH 6:47 Netiru ria, benne gwa ria lebie netiha, benneha satíaba aka benbie arlo Tata Do Yebáha.
JOH 6:48 Neti ankaa yettaxtila rutea elha nabani ge ka benne.
JOH 6:49 Ka benne uka xuttoleha utoke maná lo yu bisiha, laa kiga de utoke nuha nna abittu uttike, aloba uttigabake.
JOH 6:50 Ttaka nii chi du yettaxtila daa yebáha. Benne gobie yettaxtila‑ni, benneha labí gattie, satíaba aka benbie arlo Tata Do Yebáha.
JOH 6:51 Neti nuní ankaa yettaxtila bani daa yebáha. Ganna nuxa benne gobie benne‑ni, benneha satíaba aka benbie. Yettaxtila nu utea‑ni ankana kwinaga bela latia. Utea na kini odiláya ka benne se'e yiesi lo yu‑ni kini satíaba aka benke arlo Tata Do Yebáha.
JOH 6:52 Ka nu Israel‑ni nna udulokana ritilha tisakana, ra luesikani: ―¿Gasina ute nuní bela latin‑na gori'i?
JOH 6:53 Jesús‑ni nna bekabie gekani, ree: ―Neti benne daya yebáha, netiru ria, ganna lebi'i abíba gole bela latia‑ni lhe ganna abíba i'iyale reni kia‑ni lhe, labí aka benle ttu dia lii arlo Tata Do Yebáha.
JOH 6:54 Nu gona bela kia‑ni lhe i'iyana reni kia‑ni lhe, nuha satíaba aka benna arlo Tata Do Yebáha. Neti nna gwechidhabaa na lo elhuttiha ganna chi bisia sá daluxaha.
JOH 6:55 Kumu bela latia‑ni ankana gwalíga elho go ka benne nna reni kia‑ni nna ankana nu gwalíga i'iya ka benne.
JOH 6:56 Benne gobie bela kia‑ni lhe i'iye reni kia‑ni lhe, benneha nuha gwa due len neti, neti nna gwa dúgabaa lenbie.
JOH 6:57 Ttiba Tata kiaha benne udhelhe netiha anke benne bani, de benneha nna neti anka bengabaa. Anágaba benne gobie bela kia‑ni, de neti nna gwaka bengabe.
JOH 6:58 Neti labí ankaa tti anka yettaxtila uto ka benne uka xuttoleha. Ka benneha laa kiga de utoke maná lo yu bisiha nna abittu uttike, aloba uttibake. Neti ankaa yettaxtila daa yebáha. Benne goe yettaxtila‑ni gwaka benbe ttu dia lii arlo Tata Do Yebáha.
JOH 6:59 Iyá nuní utixxi'a Jesús‑ni lhe'esi Capernaum‑ni. Utixxi'e nuha lhe'e yo'o ata ritupa ka benne Israel‑ni rudhetike ka tisa ge Tata Do Yebáha.
JOH 6:60 Tti biyienkin benne se'e niha nu rinne Jesús‑ni, ixe ka benne chi danalhake bie, ráke: ―Tsitsiba anka nu rinne benne‑ni. ¿Nú dhaana udo nagani ge benne‑ni?
JOH 6:61 Ttaka Jesús‑ni ute dábanie rinne lha ka benne danalhake bieha ge nu reeha, nianna tti rabie ke: ―¿Si rutsetsibin nu rigixxi'ania le‑ni?
JOH 6:62 ¿Titiala ganna ttixka neti benne daya yebáha ilenle eyapia ata doa ttuha?
JOH 6:63 Espíritu ge Tata Do Yebáha nuha runie kini raka benri'i. Bela latiri'i‑ni labí rixú nuní uinna kini aka benri'i. Ka tisa rinnea‑ni ankake ge Espírituha lhe ruteke elha nabani lhe.
JOH 6:64 Ttaka sa se'e attu chupale labí ria lele. Aníha ra Jesús‑ni kumu attili sisi'a tteha chi yue nupaxake nuha abittu ria leke gebie lhe chigaba yue núke nuha uteke bie lasi ná ka nu uttikaneha.
JOH 6:65 Lhe rágabe ke: ―De nuha nna ria le, ni ttu benne labí aka gebie ite len neti ganna abíba Tata kiaha idhelhe bie.
JOH 6:66 Debá la'ania ixe ka benne rudhetinieha, bedhanke labíru ugweki lenke bie.
JOH 6:67 Nianna tti ra Jesús‑ni ka benne tsi'inuha (12): ―Lebi'i ¿si rakagaba lele eyyale?
JOH 6:68 Simón Pedro‑ni nna bekabina gebie, rana: ―Tata Xisi to, ¿núruala sanalhatu ganna? Ki lula nuná rinnelu ka tisa ka nu ruinkana kini satíaba aka bentu arlo Tata Do Yebáha.
JOH 6:69 Ri'itu chiba ria letu gelu lhe chigaba yutu deki kwinalu ankalu Cristu Xi'in Tata Do Yebáha benne anka banieha.
JOH 6:70 Jesús‑ni nna bekabie geke, ree: ―¿Laaba ganna tsi'inule (12) nuná chi bekwea? Ttaka ttúle nna nu xxegwiba ankale.
JOH 6:71 Ge Judas Iscariote xi'in biyú Simón‑niba nuha rinnebie tti ree aníha, kumu lana nuha selana ka benne tsi'inuha (12), lhe lana nuha utene lasi ná ka nu uttikaneha lhe.
JOH 7:1 Iki de nuha nna Jesús‑ni daka Galilea‑niba rekie. Labí raka lebie tsekie daka Judea, kumu ka nu loni ge ka benne Israel‑ni ruinkana uttikane.
JOH 7:2 Ttaka kumu de chi dabiga isia laní ge ka benne Israel‑ni nu tee láni Laní Ge Ka Yo'o Lhaga,
JOH 7:3 nianna tti ra ka betsieha bie: ―Bittu eya'anlu nii. Biria nna ugía daka Judea‑ni kini anágaba ka nu rudhetinlu se'e niha ilákinna ka nu xxeni ruinlu.
JOH 7:4 Kumu ttu nu raka leni iláni ka benne nu ruinna, labí gatsila tsekina uinna nuha. Laxkala lu ganna nuná ruinlu, bela'a nuná arlo ka benne.
JOH 7:5 Aníha ra ka betsieha bie kumu nigaba lakana a ria lekani gebie.
JOH 7:6 Jesús‑ni nna bekabie gekani, ree: ―Neti labí chi bisia ura kia tsiaya. Lebi'i bixaba ura aka lele tsiale.
JOH 7:7 Kumu ka benne labí tee ttu bixa ge itisikanie le. Netiligaba ritisikanie kumu de rigixxi'aya deki satsaba anka nu ruinke.
JOH 7:8 Lebi'i gwaltsia laní, neti labí dhaya kumu labí chi bisia ura kia.
JOH 7:9 Aníha‑ba rabie kana nna beya'anbe Galilea.
JOH 7:10 Ttaka iki de tti chi ugwapi ka betsieha diakana laní, nianna ugwapigabe diabie, ttaka labí die la loo, ttisidiba gatsiba die.
JOH 7:11 Ka nu loni ge ka benne Israel‑ni nna ugilabe rekikana lo laníha nna ra luesikani: ―¿Gála rekina ganna?
JOH 7:12 Gebe rinne iyába ka benne reki niha, nu raba: “Benne tseba ankana.” Adíkana nna rákana: “Labí ankana benne tse. Ruinba leni ki ridí yienna ka benne.”
JOH 7:13 Ttaka ni ttú ka benne rinneha labí reyaxakanie inneke gebie idisa, kumu rasibakanie ge ka nu loni gekeha.
JOH 7:14 Ttiba salhe chi dia laníha, nianna tti ugwapi Jesús‑ni die ro'o yotuha nna uduloe rule'enie ka benne.
JOH 7:15 Ka nu loni ge ka benne Israel‑ni nna rebanabakinna, rákana: ―¿Gasina nna raka xxatta ge nuní, ki abígaba bedhetina?
JOH 7:16 Jesús‑ni nna bekabie gekani, ree: ―Laa nu anka kigaa nuní rule'a; nu anka ge benne udhelhe netiha‑ba nuní rule'a.
JOH 7:17 Benne raka lebie unie nu ru'u le Tata Do Yebáha, benneha nuha gwate danie ganna nu rule'a‑ni gwankana ge Tata Do Yebáha o nu anka kibaa nuní rule'a.
JOH 7:18 Nu rinnena nu anka gebani, ruinba nuha kini inná xxeni leni arlo ka benne; ttaka neti rinnea nu anka ge Tata Do Yebaa benne udhelhe netiha, benneha nuha runia kini ra xxeni lebie. Neti nuha rinnea nu anka gwalí, labí gwen lasi rinnea.
JOH 7:19 ¿Laaba ganna Moisés‑ni boka'ane bia bennabi ge Tata Do Yebáha len lebi'i? Ttaka nna niba ttúle a ruinle nu ra loni. ¿Beakala nna ruinlale uttile neti ganna?
JOH 7:20 Ka nu se'e niha nna bekabikana, rákane: ―Nu xxegwiha‑ba yu'u latilu. ¿Nú ruinna uttina lu?
JOH 7:21 Jesús‑ni nna bekabie gekani, ree: ―Iyábale uka tenle tti bilenle benia ttu milagru la sá tti reyaka leri'i.
JOH 7:22 Ki anágaba lebi'i meskiba raxxína sá reyaka leri'i, sinagaba nuha ruinle tti richúle lo bela lati ka nubiyú to gele; ruinbale nu bodha'an Moisés‑ni, meskiba laa kwinaga Moisés‑ni biria ikie ki uinle aní, sinuki ka xuttoleha‑liba chi dáke ruinke aní.
JOH 7:23 Ki lebi'i gwadú richúle lo bela lati ka nubiyú to gele tti risia ka sá reyaka leri'i. Ruinle aníha kini abittu rigu'u ni'ale bia bennabi bodha'an Moisés‑ni. Ki lebi'i ruinle aná, ¿beakala rise'enle len neti de chi beyonia ttu benne rani la sá tti reyaka leri'i, benneha nna chiba beyaka chábie?
JOH 7:24 Bittu iyubinle kuale bala'ana ge nu rilenle, sinuki gwalinneba attiba ankaba geni.
JOH 7:25 Nianna ra ttu chupa ka nu Jerusalén‑ni: ―¿Si laaba nuníba nuha ruinkana uttikana?
JOH 7:26 Gwaluyúruga la looba du nuní rinnena nna labí bixa rákana na. Laaruba ganna ka nu loni geri'i‑na chiba ridielhakana deki gwalíba nuní ankana Cristu nu chi ga'anani Tata Do Yebáha idhelhe.
JOH 7:27 Ttaka nuní gwa yúbari'i gá dana. Cristuha nna atti isie yiesi lo yu‑ni nna labí yuri'i gá daa benneha.
JOH 7:28 Jesús‑ni nna ro'o yotuha‑ba doe gwele'eni ka benne nna tti biyieninie nu rákanaha, nianna unnebie idisa, ree: ―Lebi'i gwankabiabinle neti lhe gwa yúbale gaxa anka lasia lhe, ttaka labí nu yu'u ikia benia kini daya. Benne udhelhe netiha, benneha anke benne gwalíga udhelhe neti. Lebi'i labí ankabienle benneha.
JOH 7:29 Neti nna gwankabiabatie kumu ata doeha‑ba biriaya daya lhe labe udhelhe neti lhe.
JOH 7:30 Nianna benkana udaxxukane, ttaka ni ttúkana a bedaxxukane kumu labí chi bisia ura gebie iyaxxue.
JOH 7:31 Laa kiga de nuha nna ixeba ka benne se'e niha ugía leke gebie, nianna ráke: ―Cristuha, tti isie, ¿si ixerula ka milagru uin benneha ttichula nu ruin benne‑ni?
JOH 7:32 Ka fariseo‑ni biyienbakinna nu rinne ka benne se'e niha ge Jesús‑ni, nianna lakana lhe ka nu loni ge ka bixxudiha lhe udhelhakana ka gwen sina ge yotuha kini sadaxxukane.
JOH 7:33 Jesús‑ni nna rabie kana: ―Attu sattiruba dhoa len lebi'i, iki de nuha nna eya'abaa ata do benne udhelhe netiha.
JOH 7:34 Nianna tti egilale neti, ttaka labí eselinle neti kumu ata esinaaha, lebi'i labí aka esiale niha.
JOH 7:35 Ka nu loni ge ka benne Israel‑ni nna rinnaba tisa luesikani, rákana: ―¿Gá ruin nuní eyyana nna abí saxxakari'i na? ¿Si tsiachuna ata se'eru ka benne geri'i lhe'e ka yiesi dittu‑na nna ule'egabinna ka nu dittu‑na ak?
JOH 7:36 ¿Bíla dienna innána tti rana: “Meskiba egilale neti nna labí eselinle neti” lhe tti rana: “Ata esinaaha, lebi'i labí aka esiale niha”?
JOH 7:37 Tti chi bisia sá lhuxa laníha, la sáha nuha anka laní xxeniru. La'ania udú lii Jesús‑ni nna unnebie idisa, ree: ―Ganna nuxa ttu le rebisile inda, teeki itale len neti kini i'iyale inda.
JOH 7:38 Attiba ra lo ka yetsi ge Tata Do Yebáha benne tsia lebie neti, lhe'e lastobie uxunni liiba inda nu rute elha nabani ttu dia lii gebie.
JOH 7:39 Ge Espíritu dhi ka benne tsia leke ge Tata Do Yebáha, ge benneha nuha rinne Jesús‑ni tti rabie aníha. Kumu axta la'ania labí chi uxí ka benne Espírituha kumu Jesús‑ni labí chi beyapie yebáha kini inná xxeni lebie.
JOH 7:40 Tti biyienin ka benne se'e niha nu ra Jesús‑ni, nianna ra ttu chupake: ―Benne‑niligaba nna gwalí anke profeta benne chi ga'anna isiaha.
JOH 7:41 Adí ka benne nna ráke: ―¡Ko'o! Benne‑ni anke Cristu. Ttaka adíke nna ráke: ―Galo iria benne anke Cristuha daka Galilea.
JOH 7:42 ¿Laaba lo ka yetsi ge Tata Do Yebáha rixxi'a ra deki benne anke Cristuha teeki aka benneha benne datiabie David‑ni nna teeki gali benneha lhe'esi Belén, daka ata uka lasi David‑ni?
JOH 7:43 Aníha uka nna delo ni'a ge Jesús‑ni nna ya yaba le rulaba le ka benne, labí turo'o rinneke.
JOH 7:44 Ttu chupakana nna ruinkana udaxxukane, ttaka ni ttúkana a beyaxakinna udaxxukane.
JOH 7:45 Ka nu rise'e gweyú ro'o yotuha, ka nu dia tadaxxukana Jesús‑ni, ka nuha beyekikana besinkana ata se'e ka fariseo‑ni lhe ka nu loni ge ka bixxudiha lhe. Ka fariseo‑ni nna rákana ka nuha: ―¿Beakala a dechele nuha?
JOH 7:46 Ka nuha nna bekabikana, rákana: ―Labí chetu na kumu lanú ttu benne chi biyienintu innebie tti rinnena.
JOH 7:47 Nianna tti bekabi ka fariseo‑ni gekani, rákana kana: ―Lebi'i, ¿si chigaba uxí yiena le?
JOH 7:48 Gwalinnáchu, ¿si nuxa ttu ka nu rinnabia geri'i‑na o nuxatu ttu ka fariseo chi ugía letu geni?
JOH 7:49 ¡Ko'o, labí! Ttaka ka nu rudo nagakani ge nuha, ka nuná labí yúkana nu ra lo bia bennabi bodha'an Moisés‑ni. Ka nuná ukinniba Tata Do Yebáha kana.
JOH 7:50 Nianna Nicodemo nu ankagabana fariseo, nu ugíana gwanne lena Jesús‑ni ttu lo rela, lana nuha rana adí ka fariseo‑ni:
JOH 7:51 ―Ki yule lo bia bennabi geri'i‑na rixxi'a ra deki labí aka geri'i ukinniri'i ttu benne ganna abíba lade'axa chi biyienin nagari'i bixa benie.
JOH 7:52 Nianna bekabikana geni, rákana: ―Lu nna, ¿si nu Galileagabalu? Begilaruga lo ka yetsi ge Tata Do Yebáha. Lo ka nuná labí rigixxi'a ra deki daka Galilea teeki iria ttu profeta ge Tata Do Yebáha.
JOH 7:53 [Nuha‑ba rákana nna kua ttu ttubakana bodaxxu neda gekani deyya lisikani.
JOH 8:1 Jesús‑ni nna diabie daka iki i'iya ata daa ka ya olivuha.
JOH 8:2 Attu dilaha nna beyekie besinbie ro'o yotuha nna iyába ka benne bedetupake kwe'ebie. Lee nna ure ttebe nna rule'enie ke.
JOH 8:3 Ka nu rule'ekinna ka benne nu ra lo bia bennabi boka'an Moisés‑ni, lenkana ka fariseo‑ni bisinkana chekana ttu nuila beyaxxukinna na len ttu nubiyú. Nianna bedúkana nuilaha lagwi ge ka benne se'e niha,
JOH 8:4 nna rákane: ―Maestru, nuila du‑ni bexuintu na len ttu nubiyú. Lo dana ruinna nuha bexuintu na.
JOH 8:5 Lo bia bennabi bodha'an Tata Do Yebáha len Moisés‑ni ra deki ka nuila ruinkana aní teeki usiari'i kana íyya kini gattikana. Lu nna, ¿bíla ralu?
JOH 8:6 Rákane aníha kumu de ruinkana ibixxinie bixa innábie, kini aníha‑chu nna tee ro'okani bixa usiakana ikie. Ttaka Jesús‑ni biyettalee nna len xubenábe runie letra lo yu.
JOH 8:7 Ttaka kumu de doelhaba ruinkana rinnaba tisakane, nianna tti bedú liie nna ree kana: ―Nuxa ttúle abittu bi tulha chi benle, lebi'i nuha lade'a tte udaxxule íyya use'ele nuila‑ni.
JOH 8:8 Nianna tti bedeyetta adakabe attu libe nna redeonie letra lo yu.
JOH 8:9 Lakana nna tti biyienkinna nu reeha, ttu ttubakana udulokana bedákana. Lade'axa bedá ka benneolaha, nianna tti bedá ka nu kwitiha, axtaliba ki beya'an a sun Jesús‑niba, nuilaha nna duna arloe.
JOH 8:10 Nianna tti beyadhe nna rabie nuilaha: ―Xa nuila, ¿nála ka nu rusiakana ikiluha? ¿Si niba ttúkana a beyaxakinna ukinnikana lu?
JOH 8:11 Nuilaha nna bekabina, rana: ―Niba ttúkana xa tata. Nianna ra Jesús‑ni nuilaha: ―Anágaba neti labí ukinnia lu. Beyya lisiluha nna debá nnanna bitturu uinlu tulha.]
JOH 8:12 Jesús‑ni nna rodolise ka benne attu libe nna redeabie ke: ―Neti ankaa xiani ge ka benne se'e yiesi lo yu‑ni. Benne etenalhe neti, labí tseki benneha lhe'e chulha, sinuki tsekilee lhe'e xianiha, xiani nu uinna kini satíaba aka benbie arlo Tata Do Yebáha.
JOH 8:13 Tti biyienkin fariseo‑ni nu reeha, nianna rákane: ―La kwinabalu rigixxi'alu nuxa ankalu. Lanú attu nuxa benne rigixxi'ana gelu. De nuha nna labí daka nu rigixxi'alu‑na.
JOH 8:14 Jesús‑ni nna bekabie gekani, ree: ―Meskiba kwinaba neti rigixxi'aya kia, ttaka gwa dakaba nu rinnea‑ni kumu neti gwa yubaa gaxa biriaya daya lhe gaxa daka diaya lhe, ttaka lebi'i labí yule gá biriaya daya lhe gá daka diaya lhe.
JOH 8:15 Lebi'i ruinbale elhuxtisi ge ttu benne attiba ruinba ka benne se'e yiesi lo yu‑ni. Neti labí runia elhuxtisi ge nuxa benne.
JOH 8:16 Ganna unia elhuxtisi nna uinbaa na attiba ankaba geni, kumu labí ttú neti nuha unia elhuxtisiha, uingaba Tata kia benne udhelhe netiha.
JOH 8:17 Lo bia bennabi gele‑na dia ra deki ganna chupa ka benne rinneke turo'o rigixxi'ake ge nu bilákanie, la'ania nna gwa dakaba nu rinne ka benneha.
JOH 8:18 Anágaba neti, la kwinaba neti rigixxi'aya kia lhe Tata kia benne udhelhe netiha, benneha nuha ankagabe attu benne rigixxi'abie kia.
JOH 8:19 Lakana nna unnaba tisakane, rákana: ―¿Ná tata gelu? Jesús‑ni nna bekabie gekani, ree: ―Lebi'i labí gwalí ankabienle neti, nigaba ankabienle Tata kiaha. Gannala ttixka ankabienle neti, la'ania nna gwankabialinle Tata kiaha.
JOH 8:20 Iyá nuní ra Jesús‑ni tti doe rule'enie ka benne ro'o yotuha gaxxaba ata sia ka nu rigu'uke belhiu lhe'ekaniha nna ni ttúkana labí bedaxxukane kumu labí chi bisia ura gebie.
JOH 8:21 Nianna redea Jesús‑ni ka benneha attu libe: ―Neti eya'abaa, lebi'i nna egilale neti. Ttaka ata eya'ayaha, lebi'i labí aka esiale niha, nna lo ka tulha gele‑naba gattile.
JOH 8:22 Nianna ra ka nu loni ge ka benne Israel‑ni: ―¿Si la labana uin geni ki gattina, de nuha nna rana: “Ata eya'ayaha, lebi'i labí aka esiale niha”?
JOH 8:23 Jesús‑ni nna ree kana: ―Lebi'i ankabale ge yiesi lo yu‑ni, neti nna ankabaa ge yebáha. Labí ankaa ge yiesi lo yu‑ni.
JOH 8:24 De nuha nna ria le: “Gattibale lo ka tulha gele‑na.” Kumu ganna abíba ria lele deki neti ankaa nu chi ria le deki ankaa, la'ania nna gattibale lo ka tulha gele‑na.
JOH 8:25 Nianna unnaba tisakane, rákane: ―Lu nna, ¿nú ankalu? Lee nna ree kana: ―Neti ankabaa benne chi xpeya le sisi'a tteha xa.
JOH 8:26 Ixeba nu teeti upeya le lhe ge ixeba nu ukinnia le lhe, ttaka labí unia aníha. Kumu sunruba rigixxi'ania ka benne se'e yiesi lo yu‑ni nu biyienti ra benne udhelhe netiha. Benneha rinnebe nu ankaba gwalí.
JOH 8:27 Ttaka lakana nna labí ute dákinna deki ge Tata geeha‑ba nuha rinnebie, delába benne do yebáha.
JOH 8:28 De nuha nna ra Jesús‑ni kana: ―Neti benne daya yebáha, gannaliba chi ulhidhale neti betále lo ya kurusiha, la'anialiba nna tte denle deki neti nuha ankaa nu chi ria le deki ankaa lhe anágaba tte dágabinle deki labí runia nu anka kia, sinuki attiba bele'eni Tata kiaha neti, aníha‑ba rinnea.
JOH 8:29 Tata kia benne udhelhe netiha gwa duba benneha len neti. Labí chi bedú benneha neti suna ttúbaa, kumu satíaba runia nu ru'u lebie.
JOH 8:30 Tti ra Jesús‑ni aníha, ixeba ka benne ugía leke gebie.
JOH 8:31 Nianna tti ra Jesús‑ni ka benne Israel, ka benne chi ugía leke geeha: ―Ganna lebi'i udole tisa ge nu rinnea‑ni, la'anialigaba nna chi akale benne gwalíga rudhetinia.
JOH 8:32 La'anialigaba nna chi tte denle nu anka gwalí nna nu anka gwalíha nna uinna ki ese'e lhaale.
JOH 8:33 Ka benneha nna bekabike, ráke: ―Ri'itu ankatu benne datiatu Abraham‑ni nna ni tsa labí chi bito'o ri'itu lo sina ge attu benne subi. ¿Gasina nuha nna innálu deki nu anka gwalíha uinna kini ese'e lhaatu?
JOH 8:34 Jesús‑ni nna bekabie ge ka benneha, ree: ―Netiru ria, iyába ka nu ruin tulha, to'obakana lo tulha ruinkanaha.
JOH 8:35 Kumu ttu nu to'ona lo sinaha labí aka dho nuha satía lisi xxananiha; xi'in biyú xxana nu to'o lo sinaha‑ligaba nna gwa ralhana dhona satía lisi xxudiniha kumu de ankana xi'in biyúni.
JOH 8:36 Laxkala ganna neti benne ankaa Xi'in Tata Do Yebáha odiláya le lo ka tulha ruinle‑na, la'anialigaba nna gwalíga chi ese'e lhaale.
JOH 8:37 Neti yua deki lebi'i ankale benne datiale Abraham‑ni, ttaka ruinlale uttile neti kumu de labí rulabile ka tisa rule'a‑ni.
JOH 8:38 Neti rinnebaa ge nu bilábati tti doa len Tata kia do yebáha; lebi'i nna ruinbale nu rule'ebin xxudileha le.
JOH 8:39 Lake nna bekabike ráke: ―Abraham‑niba anka xxudi ri'itu. Ttaka Jesús‑ni nna rabie ke: ―Gannala ttixka gwalíga datiale Abraham‑ni, la'ania nna gwa ruinlale nu ben benneha.
JOH 8:40 Ttaka de rigixxi'aya nu ankaba gwalí nu biyienbati ge Tata Do Yebáha, lebi'i nna ruinlale uttile neti. Abraham‑ni labí ben benneha tti ruinle‑na.
JOH 8:41 Lebi'i ruinbale nu ruin xxudileha. Lake nna ráke bie: ―Ri'itu labí uka ri'itu lo neda; doba ttu xxudi ri'itu, delába Tata Do Yebáha.
JOH 8:42 Jesús‑ni nna rabie ke: ―Gannala gwalíga Tata Do Yebáha anke xxudile, la'ania nna lebi'i gwa rakalinle kia, kumu neti ata do Tata Do Yebáha‑ba biriaya daya nna dua nii. Labí nu yu'u iki neti benia ki daya; labe udhelhe neti.
JOH 8:43 ¿Beaka a rite denle ge nu rinnea‑ni? Labí rite denle kumu labí raka lele iyieninle nu ria‑ni.
JOH 8:44 Nu xxegwiha‑ba anka xxudile nna nu raka le nuha‑ba ruinle. Nuha attili sisi'a tteha ankana ttu nu runi elhutti lhe labí ridú tsitsina lo nu anka gwalíha lhe, kumu labí rinnena nu anka gwalí. Tti rinnena nna rinnebana nu ankabana, kumu ruinba leni lhe ankabana xxudi ka nu ruin lekani lhe.
JOH 8:45 Neti nna de rinnea nu anka gwalí, de nuha nna lebi'i labí ria lele kia.
JOH 8:46 Ni ttúle labí aka gele usiale ikia deki ankaa benne ruin tulha. Kumu ganna neti rinnebaa nu ankaba gwalí, ¿beakala nna a ria lele kia ganna?
JOH 8:47 Benne anke ge Tata Do Yebáha, ka tisa ge Tata Do Yebáha‑ba rudo naga benneha. Ttaka lebi'i, kumu de labí ankale ge Tata Do Yebáha, de nuha nna labí rudo nagale gebie.
JOH 8:48 Ka nu Israel‑ni nna bekabikana, rákana Jesús‑ni: ―Gwalíbintu ratu nu Samariaba ankalu nna nu xxegwiba yu'u latilu.
JOH 8:49 Jesús‑ni nna bekabie gekani, ree: ―Lanú nu xxegwi yu'u lati neti. Neti gwa rugwebaa lidhaka Tata kiaha, ttaka lebi'i labí rugwele lidhakaa.
JOH 8:50 Neti labí runia kini akaa benne ra xxeni lasia. Ttaka Tata Do Yebáha‑ba raka lebie akaa benne ra xxeni lasia nna labe inná nú ri'i gwalínri'i.
JOH 8:51 Netiru ria, benne rudobie tisa ge nu ria‑ni, labí gatti benneha.
JOH 8:52 Ka nu Israel‑ni nna rákane: ―Nnannaligaba chi yutu deki nu xxegwiha‑ba yu'u latilu. Abraham‑ni lhe ka profetaha lhe, uttiba ka benneha. Lu nna ralu: “Nu udona tisa ge nu rinnea‑ni, labí gattina.”
JOH 8:53 Lu, ¿si xxenirula ra lelu atti tata getu Abraham‑ni? Benneha uttibe, anágaba ka profeta ge Tata Do Yebáha uttigaba ka benneha. Lu nna, ¿nú rakinlu deki ankalu?
JOH 8:54 Jesús‑ni nna bekabie, ree kana: ―Ganna kwinaba neti runia ki ra xxeni lasia, la'ania nna nu ra xxeni lasiaha labí daka nuha; sinuki Tata kiaha nuha runie kini ra xxeni lasia. Benneha‑gaba nuha rale deki anke Diosi gele.
JOH 8:55 Ttaka lebi'i labí ankabienle benneha; neti nna gwankabiabatie. Kumu ganna innía labí ankabiatie, la'ania nna ruingaba lasia attiba ruinle. Ttaka neti gwankabiabati benneha lhe gwa rudobaa tisa ge nu rabie neti lhe.
JOH 8:56 Abraham benne uka xuttoleha bedeakanie kumu chiba yue ilánie la sá isiayaha nna gwa bilábanie la sáha nna yalhá bedeakanie.
JOH 8:57 Nianna ra ka nu Israel‑nie: ―Ki nila tsieyona (50) ida abí chi ankinlu, delo nna ralu deki chi bilenlu Abraham‑ni.
JOH 8:58 Lee nna ree kana: ―Netiru ria, attili lani gali Abraham‑ni, neti chila doa la'ania.
JOH 8:59 Nianna tti bedaxxukana íyya ruinkana use'ekane, ttaka Jesús‑ni bekatsi tteba loe lagwi ge ka benne saa niha nna beriabie ro'o yotuha deyye.
JOH 9:1 Tti deyu'u Jesús‑ni neda deyye nna bilánie ttu benne lo xua. Aníha‑ba anka benneha attili ulieha.
JOH 9:2 Ka benne rudhetinieha nna unnaba tisake Jesús‑ni, ráke bie: ―Maestru, ¿núke ben ttu bixa tulha de nuha nna anka nu kwiti‑ni aní? ¿Si lana ak? ¿Ka tata nan geniha ak?
JOH 9:3 Jesús‑ni nna bekabie ree: ―Labí ankana nu lo xua de bixa tulha benna, nigaba de bixa tulha ben ka tata nan geniha. Ankana aní kini eyoin Tata Do Yebáha na nna len nu unieha nna ule'e nu xxeni ra leeha.
JOH 9:4 Ttiru nnanna sa anka resá, uin‑xxiri'i sina ge benne udhelhe netiha; kumu ganna chi uka rela, la'ania nna lanúru aka geni kwenna sina.
JOH 9:5 Laka nnanna doa yiesi lo yu‑ni, netiba ankaa xiani ge iyá ka benne se'e yiesi lo yu‑ni.
JOH 9:6 Nuha‑ba ree nna tti bettuttu xxenie lo yu nna len xxenieha benie yuna, nianna tti utabie nuha ka iyya lo benne lo xuaha.
JOH 9:7 Nianna tti ree benneha: ―Ugía gwattí lolu ro'o yiela nu tee láni Siloé. (“Siloé” dienna innána Nu Ria Mandadu.) Benneha nna ugía ttebe gwattí lobie nna tti beyekieha nna chiba relánie.
JOH 9:8 Ka benne se'e gaxxaba ata do benne uka lo xuaha lhe ka benne chi bilákanie ridoe rinnabe belhiu, ka benneha ra luesike: ―¿Laaba nuníba nuha ridona rinnabana belhiu?
JOH 9:9 Ttu chupake nna ráke: ―Ila, labana nuha ridona niha. Adíke nna ráke: ―Laa lagana nuha. De rugíaba nuní tti rugía nuha. Nubiyúha nna rana: ―Ila, netiba nuha.
JOH 9:10 Nianna tti ráke na: ―¿Galasina uka nna chi belenlu?
JOH 9:11 Lana nna bekabina, rana: ―Benne tee lábie Jesús‑niba benie latti yuna nna utabie ka iyya loa‑ni, nianna tti ree neti: “Ugía gwattí lolu ro'o yiela nu tee láni Siloé.” Nianna ugíaya gwattí loa nna belá ttebati.
JOH 9:12 Nianna tti ráke nubiyú chi beyali loniha: ―¿Gon‑na du nubiyú ralu‑na? Lana nna rana: ―Nú yu.
JOH 9:13 Nianna tti chekana benne uka lo xuaha arlo ka fariseo‑ni,
JOH 9:14 kumu tti ben Jesús‑ni yuna len xxenieha tti bedhalie lo nubiyúha, la sáha ukana sá tti reyaka le ka benne Israel‑ni.
JOH 9:15 Nianna bedennaba tisagaba ka fariseo‑ni nubiyúha attu libe, rákana na: ―¿Gasina uka nna belenlu? Lana nna bekabina, rana kana: ―Yunaba utabina ka iyya loa‑ni, nianna tti gwattí loa nna belá ttebati.
JOH 9:16 Ttu chupa ka fariseo‑ni nna rákana: ―Nubiyú benna nuní labí anka nuha ge Tata Do Yebáha, kumu ribenlana sina tti risia ka sá reyaka leri'i. Adíkana nna rákana: ―¿Gasina aka ge ttu benne unie luesi ka milagru‑ni ganna anke nu runi tulha? Ya yaba le rinnekana, labí turo'o rinnekana.
JOH 9:17 Nianna tti bedennaba tisakana nubiyú uka lo xuaha attu libe, rákana na: ―Lu nna, ¿bíla ralu ge nu bedhalina lolu‑na? Lana nna bekabina, rana: ―Neti ria, ankabana ttu profeta ge Tata Do Yebáha xa.
JOH 9:18 Ttaka ka nu loni ge ka benne Israel‑ni nna labí ria lekani deki uka nubiyúha benne lo xua, nnanna nna chiba relánie. Uxilibakana ka tata nan ge benneha
JOH 9:19 nna unnaba tisakana ka benneha, rákana ke: ―¿Si xi'in biyúle nu du‑ni, nu rale deki ttili ulinaha xua loni? ¿Galasina nna chiba relenna nnanna?
JOH 9:20 Ka xxudi ixná nubiyúha nna bekabike, ráke: ―Ri'itu yúbatu deki xi'inbatu nuní lhe yúgabatu deki nu lo xuaba anka nuní ttili ulinaha.
JOH 9:21 Ttaka labí yutu gaxasina uka nna chi relenna lhe nigaba a yutu nú bedhalina loni lhe. Gwalinnaba tisa na. Chiba anka nuná nu xxeni. Kwinaba lana kixxi'ana nú bedhalina loni.
JOH 9:22 Aníha‑ba ra ka tata nan ge nubiyúha kumu rasikanie ge ka nu loni ge ka benne Israel‑ni kumu chi unnekana rákana, ganna ttu benne inne deki Jesús‑ni anke Cristu, la'ania nna ebea ttebakana benneha lhe'e yo'o ata rudheti ka benne Israel‑ni ka tisa ge Tata Do Yebáha.
JOH 9:23 De nuha nna ra ka tata nan geniha: “Naba gwalinnaba tisa na. Chiba anka nuná nu xxeni.”
JOH 9:24 Nianna tti bedeaxi ka nu loni ge ka benne Israel‑ni benne uka lo xuaha attu libe nna redeakane: ―Arlo Tata Do Yebáha unne nu anka gwalí. Ri'itu yutu deki nu beyoinna luha, nu ruin tulhaba anka nuha.
JOH 9:25 Nubiyúha nna bekabina gekani, rana: ―Neti bittuba yua si ankana nu ruin tulha. Neti nu yúrubaa, ukaa benne lo xua, nnanna nna chiba reláti.
JOH 9:26 Lakana nna bedennaba tisakana nubiyúha attu libe, rákana na: ―¿Bí bedhakana lu ki belenlu? ¿Gasina bedhalina ka iyya lolu‑na?
JOH 9:27 Lana nna bedekabina gekani, rana kana: ―Ki chiba xpeya le nna lebi'i nna bittuba ria lele. ¿Beaka raka lele kixxi'ania le attu libe? ¿Si rakagaba lele akale benne sanalhale na ak?
JOH 9:28 Nianna tti belisa satsakana nubiyúha, rákana na: ―Luba ankalu nu danalhalu na xa. Ri'itu Moisés‑niba danalha ri'itu.
JOH 9:29 Ri'itu yúbatu deki Tata Do Yebáha unne lenie Moisés‑ni, ttaka nubiyú ralu‑na labí yutu gaxa biria nuná dana.
JOH 9:30 Nubiyúha nna bekabina gekani, rana: ―¿Galabasina anka nuní? Lebi'i abígaba yule gaxa biriana dana. Neti nna gwa bedhalibana loa.
JOH 9:31 Ri'i gwa yu xeabari'i deki Tata Do Yebáha labí rudo naga benneha ge ka nu ruin tulha. Sunruba rudo nage ge ka nu gwaria lekanie lhe ruinkana nu ru'u lebie lhe.
JOH 9:32 Ni tsa labí chi biyieninri'i innekana ge ttu benne innákana deki bedhalie lo ttu benne ulie anke lo xua.
JOH 9:33 Ganna ttixka nu bedhalina ka iyya loa‑ni abittuba ankana nu udhelha Tata Do Yebáha, la'ania nna labí aka ge nuná uinna ttu bixa.
JOH 9:34 Nianna rákana nubiyúha: ―Ki lu nu ruin tulhaba ankalu attili uliluha, ¿gá lolu nna lula dalu gwele'en ri'itu? Nianna tti bebeakana nubiyúha lhe'e yo'o ata rudhetikana ka tisa ge Tata Do Yebáha.
JOH 9:35 Tti chi bina Jesús‑ni deki chi bebeakana nubiyúha niha, nna tti beti'abie naha nna ree na: ―¿Si gwa ria lelu benne daa yebáha?
JOH 9:36 Nubiyúha nna bekabina, rana: ―¿Núke nuná xa tata? Utixxi'a kini neti nna tsia lasia gebie.
JOH 9:37 Jesús‑ni nna rabie na: ―Chiba bilenlu benneha nna labie nuní rinne lenlu.
JOH 9:38 Nubiyúha nna rana: ―Gwa riaba lasia lu xa tata. Nianna tti bedú xibini arloe.
JOH 9:39 Jesús‑ni nna ree na: ―Neti bisiaya yiesi lo yu‑ni kini unia elhuxtisi ge ka benne kini ka nu lo xua‑na nna elákinna, ka nu gwa rilálakinna nna eyakakana ka nu lo xua.
JOH 9:40 Ttu chupa ka fariseo‑ni ka nu se'ekana lenie niha, tti biyienkinna nu reeha, nianna unnaba tisakane, rákane: ―Ganna niha nna ri'itu, ¿si ankagabatu benne lo xua?
JOH 9:41 Jesús‑ni nna bekabie gekani, ree: ―Gannala ankale nu lo xua, la'ania nna abittula ujale yua ge ka tulha ruinle‑na. Ttaka kumu rale: “Gwa rilábintu”, de nuha nna nujabale yua ge ka tulha ruinle‑na.
JOH 10:1 ’Netiru ria, nu abíba ra'ana ro'o puerta du ro'o lisi ka neruha, sinuki ata subila ribixxina ra'ana, nu runi aníha ubanaba anka nuha.
JOH 10:2 Ttaka nu gwa ra'ana ata do ro'o lisi ka neruha, nuha‑ligaba nna gwalí gwankana nu rekina lo ka nuha
JOH 10:3 nna nu ridú ki ruyúna ro'o lisi ka neruha gwa ridhaliba nuha kini ra'a nu reki lo ka neruha. Ka neruha nna reyoinbia ttebakana tsi'i nu rekina lokaniha. Lana nna kua ttu ttuba ka neruha raxina rudettina lákani, nianna tti ribeana kana.
JOH 10:4 Ganna chi uleana iyá ka neru ka nu anka geniha, nianna tti rineruna lo ka nuha. Ka nuha nna gwa ranalhabakana na kumu gwa reyoinbiabakana tsi'ini.
JOH 10:5 Ttaka nu abittu ankabiakinnaha, labí sanalhakana nuha; uxunnilakana geni kumu de labí ankabiakinna tsi'ini.
JOH 10:6 Nuní unne Jesús‑ni betanie ka benne se'e niha, ttaka lake nna labí ute dákanie bixa diani nu raka lebie kixxi'anie keha.
JOH 10:7 Nianna redea Jesús‑ni ka benneha attu libe: ―Netiru ria: Neti nuha ankaa puerta du ro'o lisi ka neruha.
JOH 10:8 Iyába ka nu abittu biyú tsekana ka neruha, ka nu chi bitakana tti lanila isiaya yiesi lo yu‑ni, ka nuha ubanaba ukakana. Ka neruha nna labí bedo nagakani gekani.
JOH 10:9 Neti ankaa puerta du ro'o lisi ka neruha. Benne ga'abie ro'o puertaha, godilába Tata Do Yebáha bie. La'ania nna uinbe ttiba runi ttu neru to. Neru toha reria reta'abana, rigilana nu gona.
JOH 10:10 ’Ubanaha suna daba nuha kini lhanana lhe uttina lhe utse'e loona lhe; ttaka neti daya kini odiláya le kini satíaba aka benle arlo Tata Do Yebáha, kini anáchu nna gwasipa edí baale tse'ele.
JOH 10:11 Neti nuha ankaa benne ruyú tse ka neruha. Benne ruyú tse ka neruha nna reria iki reria lebie meskila gattie kini odilábie ka neruha.
JOH 10:12 Ttaka ttu nu ridí lhiaxani ki rekina lo ka neruha, tti rilenna daa sageeha nna ruse'e bixxibana ka neruha nna ruxunnina kumu laaga geni ka nuha. Sageeha nna ruinna udaxxuna ka neruha, nianna rutsatsana kana.
JOH 10:13 Nu rekina lo ka neruha ruxunnilana nna labí retabinna ge ka nuha, kumu nu naxaba ankana.
JOH 10:14 ’Neti ankaa benne ruyú tsea ka neruha. Neti ankabiabati ka neru ka nu ankakana kia. Anágaba ka nu chi ankakana kiaha nna gwankabiagabakinna neti.
JOH 10:15 Ttiba Tata kiaha chi ankabianie neti, anágaba neti chigaba ankabiatie lhe rutea elha nabani kia‑ni kini gattia ki odiláya ka neruha.
JOH 10:16 Se'erugabati adí ka neru ka nu labí chi selakana ka nu se'e nii. Anágaba ka nuha rakagaba doelha taxía kana nna gwayienbakinna tsi'a. Gwanka suna ttu dhiba eyakakana lhe ttúba benne tsekie lokani lhe.
JOH 10:17 ’De nuha nna Tata kiaha rakanie kia, kumu rutea elha nabani kia‑ni ki gattia, kini delo nna eyaka benbaa attu libe.
JOH 10:18 Lanú nu uttina neti, sinuki kwinaba neti redá lasia gattia kwenta ge ka benne, kumu neti gwa teeba lo neda kia utea elha nabani kia‑ni ki gattia. Anágaba nna gwakagaba kia eyaka bania attu libe. Nuní chi bodha'an Tata kia ki unia.
JOH 10:19 Tti biyienin ka nu Israel‑ni nu reeha, nianna bedela'a lhe'e luesikani kumu de labí riyien ten ge luesikani.
JOH 10:20 Ixebakana rákana: ―¿Beaka rudo nagakani ge nuní, ki espíritu xxegwiha‑ba yu'u lati nuní? Lhe rágabakana: ―Rakaba iki nuní.
JOH 10:21 Adíkana nna rákana: ―Lanú ttu benne yu'u espíritu xxegwi latie gwaka gebie innee tti rinne nuní. Laa gwakaga ge espíritu xxegwiha edhalina lo ttu benne lo xua.
JOH 10:22 Tti chi bisia ka beo raka idilhaha, la'ania nuha ka benne Israel‑ni ruinke laní Jerusalén‑ni tti rexxa leke la sá bocharike yotuha nna boteke benneha len Tata Do Yebáha.
JOH 10:23 Jesús‑ni nna rekie ro'o yotuha ata daa kweredori ge Salomón‑ni.
JOH 10:24 Ka benne Israel‑ni bitupake abi'iba kwe'ebie nna ráke bie: ―¿Nukalila kixxi'alu nuxa ankalu? Ganna lu ankalu Cristu, tsa ttela utixxi'en ri'itu kini aka xen letu.
JOH 10:25 Jesús‑ni nna bekabie geke, ree: ―Ki chiba utixxi'ania le nna abígaba ria lele. Ka milagru rute Tata kiaha ki runia, ka nuha rigixxi'akana nuxa ankaa.
JOH 10:26 Ttaka lebi'i nna labí ria lele, kumu de labí ankale neru kia.
JOH 10:27 Ka benne ankake neru kiaha, gwa riyienbakanie tsi'a tti rinnea. Neti nna gwankabiabati ke, lake nna gwa retenalhabake neti.
JOH 10:28 Neti runia kini raka benke ttu dia lii nna ttu tsaba labí tse'e looke. Anágaba nna lanú nu aka geni eguana ke lo náya.
JOH 10:29 Tata kiaha betebie ke lasi náya. Benneha xxenirula ra lebie tti attu benne, laxkala lanú dhaana eguana ka benne ankake neru kiaha lo ná Tata kiaha.
JOH 10:30 Neti lhe Tata kiaha lhe, ttúba benne anka ri'itu.
JOH 10:31 Nianna tti bododaxxu ka nu Israel‑ni íyya nna ruinkana odose'ekane.
JOH 10:32 Jesús‑ni nna ree kana: ―Ixeba ka milagru chi benia arlole, delába ka milagru bete Tata kiaha kini unia. ¿Nú ge ka milagru beniaha ruinle usiale neti íyya?
JOH 10:33 Lakana nna bekabikana, rákana: ―Laa ruingatu usiatu lu íyya de ruinlu ka milagru. Ruintu usiatu lu íyya kumu Tata Do Yebáha nuná rorexxa gaalu tti ralu aná. Kumu lu ki benneba ankalu nna ruinlu deki ankalu Diosi.
JOH 10:34 Jesús‑ni nna bekabie ree kana: ―Ri'i gwa yúbari'i deki labí aka ku'u ni'ari'i nu ra lo ka yetsi ge Tata Do Yebáha. ¿Laaba lo ka yetsi denle‑na ra Tata Do Yebáha: “Lebi'i diosiba ankale”? Ki ganna diosi utixxa Tata Do Yebáha lá ka benne begwebie ke ka tisa geeha,
JOH 10:36 ¿beakala netila ulesie nna udhelhe yiesi lo yu‑ni, beakala rálale neti deki rorexxa gaaya Tata Do Yebáha de ria, “Neti ankaa Xi'inie”?
JOH 10:37 Ganna neti abíba runia nu ruin Tata kiaha, bittugaba tsia lele kia,
JOH 10:38 ttaka ganna gwa ruinbaa nu runie, meskila a ria lele kia, gwaltsia lele ge nu rilenle runia, kini tsala unale deki Tata kiaha ttúba benne anke len neti nna neti nna ttúba benne ankaa lenie.
JOH 10:39 Nianna tti redeonkana ododaxxukane attu libe, ttaka lee nna ulábe lo nákani.
JOH 10:40 Nianna tti dedheyye daka attu ladu ro'o yoo Jordán‑ni, daka ata begadi Juan‑ni ka benne inda ttuha nna niha‑ba ugwekie.
JOH 10:41 Ixe ka benne risinke ata dueha nna ráke: ―Gwalí galá Juan‑ni labí bixa ttu milagru ben benneha, ttaka iyába nu utixxi'anie ri'i ge nubiyú du nii, gwalíba nu ra benneha.
JOH 10:42 Nianna ixeba ka benne ugía leke ge Jesús‑ni tti rekie daka ro'o yoo Jordán‑ni.
JOH 11:1 La'ania do ttu benne rani lábie Lázaro. Anke benne lhe'esi Betania, lhe'esi ge María‑ni lhe ge xilani Marta‑ni lhe.
JOH 11:2 María‑ni raka danni Lázaro‑ni. María‑ni nuha bedona seti rure ixixxi ka ni'a Jesús‑ni nna bodibisina ka nuha len itsa ikiniha.
JOH 11:3 Ixpa xilabakani udhelhakana, rákana Jesús‑ni: ―Tata, benne raka xxattinlu geeha, raniba benneha.
JOH 11:4 Jesús‑ni tti bine nuha nna ree: ―Isagwe ridaka nu kwitiha labí anka nuha nu uttina na, sinuki isagweha ixúlana kini ula'a nu xxeni ra le Tata Do Yebáha lhe anágaba neti benne ankaa Xi'inieha, ula'agaba nu xxeni ra lasia.
JOH 11:5 Jesús‑ni meskiba gwa rakanie ge Marta‑ni lhe ge xilaniha lhe ge Lázaro‑ni lhe,
JOH 11:6 ttaka labie atti bine deki raniba Lázaro‑ni, beya'anlee ata rekieha a chupa ubisa.
JOH 11:7 Delola nna ree ka benne rudhetinieha: ―Eya'alari'i daka Judea‑ni attu libe.
JOH 11:8 Ka benne rudhetinieha nna ráke bie: ―Maestru, ki si ukaba ttu chupa ubisa‑ni nuha tti ruin ka nu Israel‑ni usiakana lu íyya. ¿Si edeya'abari'i niha attu libe?
JOH 11:9 Jesús‑ni nna bekabie gekani, ree: ―¿Laaba ganna tsi'inu (12) ura yu'u lhe'e ttu sá? Nu reki resáha labí riyu'una nuha, kumu gwa rilábinna xiani ru'u yiesi lo yu‑ni,
JOH 11:10 ttaka nu reki relaha iyu'unaba nuha, kumu labí xiani ru'u geni kini ilenna.
JOH 11:11 Iki de nuha nna ree: ―Amigu geri'i Lázaruha chiba uta'adhi benneha, ttaka chi tsiaya kini odibánie.
JOH 11:12 Ka benne rudhetinieha nna ráke bie: ―Tata, ganna chiba utta'adhie, nuha runna liina deki gweyakaba benneha.
JOH 11:13 Ttaka Jesús‑ni ge elhutti ge Lázaro‑niba nuha rinnebie. Lake nna ukakanie ganna ge bisiela ra'adhibari'i nuha rinnebie.
JOH 11:14 Niala nna tti utixxi'a tsenie ke, rabie ke: ―Lázaro‑ni chiba utti nuha.
JOH 11:15 De lebi'i nna redeakati kumu de labí dua niha tti utti benneha. Nnanna nna tsiarugari'i kini ilenle nu unia, kini aníha nna tsia lele kia.
JOH 11:16 Tomás benne tekanie lábie Kwachi, benneha ree adí ka benne rudheti lenieha: ―Anágaba ri'i tsiagabari'i kini gattigabari'i len benneha.
JOH 11:17 Tti bisin Jesús‑ni lhe'esi Betania bine deki chi uka ttapa ubisa bigatsi Lázaro‑ni.
JOH 11:18 Betania‑ni rena gaxxaba kwe'e Jerusalén‑ni, rena ttiba tsunna kilómetru
JOH 11:19 nna ixe ka benne Israel chi ugíake gwalannike Marta‑ni lhe María‑ni lhe, ki gwadú ittake le ka benneha de du si'i leke utti dankeha.
JOH 11:20 Tti bina Marta‑ni deki chi isin Jesús‑ni lhe'esiha, nianna biria ttebana gwaledane, ttaka María‑ni nna beya'anbana lhe'e yo'oha.
JOH 11:21 Marta‑ni nna rana Jesús‑ni: ―Gannaru dolu nii xa tata, labíga utti benne danaaha ganna ttixka.
JOH 11:22 Ttaka neti yubaa meskiba nnanna iyába nu innabalu len Tata Do Yebáha, gutebe nuha lenlu xa tata.
JOH 11:23 Jesús‑ni nna bekabie, ree na: ―Gweyaka benba danluha.
JOH 11:24 Marta‑ni nna bekabina, rane: ―Neti yubaa deki gweyaka benba benneha tti eyadha ka benne chi uttiha eyaka benke ganna chi isia sá daluxaha.
JOH 11:25 Jesús‑ni nna rabie na: ―Neti runia ki reyaka ben ka benne chi uttiha lhe runia kini raka ben ka benne ttu dia lii lhe. Benne tsia lebie neti, meskiba chi uttie nna gweyaka benbe ttu dia lii,
JOH 11:26 nna iyába ka benne sa se'e benke, ganna tsia leke neti, ka benneha nna satíaba aka benke, labí gattike. ¿Si gwa ria lelu ge nu ria‑ni?
JOH 11:27 Marta‑ni nna rane: ―Ila xa tata, gwa ria galá lasia deki lu ankalu Cristu Xi'in Tata Do Yebaa benne chi ga'anna isia yiesi lo yu‑ni.
JOH 11:28 Iki de tti chi rana Jesús‑ni aníha, nianna deyyana gwalisana xilani María‑ni nna sigába rana nuha: ―Naa chi du maestruha raxie lu.
JOH 11:29 María‑ni nna sun tteba biyieninna nuha nna bexunni ttebana diana ata du Jesús‑ni.
JOH 11:30 Jesús‑ni labí chi uta'abie lhe'esiha, sa dube ata beti'a Marta‑nieha.
JOH 11:31 Ka benne Israel, ka benne se'e lenke María‑ni lhe'e yo'oha ki rodú ittake leni, ka benneha tti bilákanie ruxunnibana biriana diana, nianna danalha ttebake na ukakanie ganna iki baaba diana ubesi.
JOH 11:32 Tti bisin María‑ni ata du Jesús‑ni, tti bilenna benneha nna bedú tteba xibini arloe nna rane: ―Tata xisi to, gannaru do kwinalu nii, labíga utti benne danaaha ganna ttixka.
JOH 11:33 Jesús‑ni tti bilánie ribesi María‑ni lhe ribesi ka benne Israel dia lennaha lhe, axtaba bega'a dina lhe'e lastoe nna bedú si'ina lebie,
JOH 11:34 nianna tti unnaba tise, ree na: ―¿Gáli gwakatsile na? Lana nna rane: ―Utáruga belanni xa tata.
JOH 11:35 Nianna tti uresi Jesús‑ni.
JOH 11:36 Ka benne Israel‑ni nna ráke: ―¡Gwaluyúruga, kattiparuba rakanie ge benneha!
JOH 11:37 Adíke nna ráke: ―Nuní gwa uka geni bedhalina ka iyya lo benne lo xuaha, ¿beakala Lázaro‑ni nna a benna kini abittu uttina?
JOH 11:38 Jesús‑ni nna bododú si'i xxattana lebie attu libe, nianna tti die ata bekatsikana benneha. Yieru baa ata bigatsi benneha ttu beleaba anka nuha nna yaya ttu íyya bata ro'oni.
JOH 11:39 Nianna tti ree: ―Gwalikua íyya yaya ro'o yieru baa‑na. Marta dan benne chi uttiha nna rane: ―Gaxa chiba rure benne‑na xa tata. Chiba uka ttapa ubisa bigatsie.
JOH 11:40 Jesús‑ni nna bekabie, ree na: ―¿Laaba chiba ria lu ganna lu tsia lelu, la'ania nna gwalábinlu nu xxeni ra le Tata Do Yebáha?
JOH 11:41 Nianna tti utuakana íyya yaya ro'o yieru baaha. Jesús‑ni nna belhidha loe gwetsáha nna ree: ―Ixkixaru rugwea lu xa Tata, kumu gwa biyienbinlu kia.
JOH 11:42 Neti yubaa deki satíaba gwa riyienibinlu kia, ttaka de ka benne se'e nii nna unnea ria aná, kini tsia leke deki lu udhelhalu neti.
JOH 11:43 Iki de chi rabie aníha, nianna tti unnebie idisa, nna ree: ―¡Lázaro, beria naa nna betá!
JOH 11:44 Benne chi uttiha nna beriabie derilhi ka ni'eha lhe ka neeha lari. Anágaba loeha derilhigabana lari. Nianna tti ra Jesús‑ni ka benne se'e niha: ―Gwaledhasi ka lari‑na latini kini aka edána.
JOH 11:45 Ixe ka benne Israel ka benne dia lenke María‑ni, tti bilákanie nu ben Jesús‑ni, nianna ugía leke gebie.
JOH 11:46 Ttaka attu chupa ka nuha nna ugía ttebakana gwattixxi'akinna ka fariseo‑ni nu chi benieha.
JOH 11:47 Ka fariseo‑ni lhe ka nu loni ge ka bixxudiha lhe, bottupa ttebakana ka nu runi elhuxtisi ge ka benne Israel‑ni nna ra luesikani: ―¿Bíla anka nu uinri'i ganna? Nubiyú reki nii ixeba ka milagru ruinna.
JOH 11:48 Ganna anába la rugwelhabari'i na ruinna ka milagru ruinna‑na, la'ania nna iyába ka benne tsia leke geni, nianna tti ita ka nu rinnabia ge Roma‑ni etetse'e lookana yotu le'a geri'i‑ni lhe ka benne geri'i‑ni lhe.
JOH 11:49 Ttaka ttu ka nuha, delába nu tee láni Caifás nu anka bixxudi xeni lhe'e idaha, nuha nna rana kana: ―Lebi'iligaba birula yule.
JOH 11:50 Nigaba a rite denle deki tserula saríana ri'i ganna sun ttúba benne gattie kwenta ge ka benne geri'i, alaa kila iyábake tse'e looke.
JOH 11:51 Ttaka Caifás‑ni labí nu anka geni nuha unnena tti rana aníha, sinuki kumu de ankabana bixxudi xeni lhe'e idaha, de nuha nna unnena nu chi ga'anani Tata Do Yebáha aka, unnena deki Jesús‑ni gattie kini kixe ge ka benne Israel‑ni.
JOH 11:52 Anna laa sun ge ka benneha‑ga kixe, anágaba kixagabe ge iyá ka benne chi ankake xi'in Tata Do Yebáha, delába ka benne se'e gatti gattiba, ki ottupe ke nna eyakake ttúba.
JOH 11:53 Laxkala debá la sáha nna beda'a ro'okani uttikana Jesús‑ni.
JOH 11:54 De nuha nna labíru ugweki Jesús‑ni la saa lagwi ge ka benne Israel‑ni. Berialee ata rekieha nna deyye gaxxaba lo yu bisi ata re ttu yiesi tee láni Efraín. Niha‑ba ugweki lenie ka benne rudhetinieha.
JOH 11:55 Tti chi dabigana isia laní Pascua, delába laní ge ka benne Israel‑ni, ixe ka benne se'e lhe'e adí yiesi diake lhe'esi Jerusalén‑ni atti lani isia laníha kini eyarike arlo Tata Do Yebáha.
JOH 11:56 Niha rekike regilake Jesús‑ni nna rinnaba tisa luesike ro'o yotuha, ra luesike: ―¿Bí rakinle? ¿Si bi gwa itana laní ganna?
JOH 11:57 Ka nu loni ge ka bixxudiha lhe ka fariseo‑ni lhe, ka nuha chi bedhankana tisa rákana, ganna nuxa ttu benne une gaxa reki Jesús‑ni teeki kixxi'anie kana kini anáchu aka gekani udaxxukana Jesús‑ni.
JOH 12:1 Xxupa ubisa atti lanila isia laní Pascuaha, ugía Jesús‑ni lhe'esi Betania ata do Lázaro benne belhidha benbie lo elhuttiha.
JOH 12:2 Ka Lázaro‑ni benke ttu irse ki goke lenbie. Marta‑ni daabie riga'abie lhe'e ka ye'enaha, Lázaro‑ni nna labie nuha anke ttu ka nu do len Jesús‑ni ro'o mexaha.
JOH 12:3 María‑ni nna bedaxxue ttiba medi litru seti rure ixixxi. Setiha ankana taga'a ge ttu iyya to tee láni nardo. Setiha raka xxattana yaxi nna utabi María‑ni nuha ka ni'a Jesús‑ni. Nianna tti bodibisie ka ni'eha len itsa ikieha. Itúba lhe'e yo'oha ure tsi'i setiha.
JOH 12:4 Ttaka Judas Iscariote, ttu ka nu rudhetinieha nu utene lasi ná ka nu uttikaneha, lana rana:
JOH 12:5 ―¿Beaka a bito'ochila seti rure ixixxi‑ni ki utekana geni tsunna gayua (300) denario, kini belhuha nna dhi ka benne dii abittu geke tee?
JOH 12:6 Judas‑ni rana aníha, labí kumu de retabinna ge ka benne abittu geke tee, sinuki rana aníha kumu de ankana ubana lhe kumu lana denna beduti to yu'u belhiu gekeha nna chi labinna rudaxxu sigána belhiu rigu'uke lhe'e nuha.
JOH 12:7 Nianna tti ra Jesús‑ni na: ―Begwelha na egu'una seti‑ni ka ni'aya‑ni. Ruinna nuní kumu chi rodú tse gaana neti ganna chi isia sá igatsiaha.
JOH 12:8 Ka benne dii abittu geke tee satíaba tse'e ka benne‑na len lebi'i, ttaka neti labí satía dhoa len lebi'i.
JOH 12:9 Ixe ka nu Israel‑ni tti binakana deki do Jesús‑ni Betania, nianna ugíakana gwalannikane. Ttaka labí sun labie ugíakana gwelanni, sinuki ugíagabakana kini ilákinna Lázaro benne beyadha benbie lo elhuttiha.
JOH 12:10 De nuha nna ka nu loni ge ka bixxudiha chi beda'a ro'okani uttigabakana Lázaro‑ni,
JOH 12:11 kumu de lana nna ixe ka benne Israel chi bekwittake lenkana nna ge Jesús‑nila chi ria leke.
JOH 12:12 Beyeki sáha ixe ka benne dia laní Pascuaha, tti bina ka benneha deki chi daa Jesús‑ni ga'abie lhe'esi Jerusalén‑ni,
JOH 12:13 nianna ugíake gwaledake bie nna bedaxxuke dina denke nna ribesi'abake, ráke: ―¡Xxeniba ra lelu! ¡Lu ankalu benne udhelha Tata Xisiha! ¡Karubárulu! ¡Lu ankalu benne innabialu ka benne Israel‑ni!
JOH 12:14 Nianna tti gwaxxaka Jesús‑ni ttu burru kwiti to nna udobie kwe'eni. Ukaba attiba chi ga'anna lo ka yetsi ge Tata Do Yebáha ata dia ra:
JOH 12:15 ¡Bittu gasinle, lebi'i ka benne ge lhe'esi Sión! ¡Gwalulanniruga! Ne benne rinnabia geleha chi daa naa doe kwe'e ttu burru kwiti to.
JOH 12:16 Tti sisi'a tteha, ka benne rudhetini Jesús‑ni labí ute dákanie iyá nu rakaha. Iki deliba chi uttieha nna beyapie yebáha ata ra xxeni leeha, la'anialiba nna tti gwadú leke deki iyába nu benke len benneha chiba ga'anna nuha lo ka yetsi ge Tata Do Yebáha deki aníha aka.
JOH 12:17 Ka benne se'e len Jesús‑ni tti beyaxie Lázaro‑ni lhe'e yieru baaha, tti belhidha benbie benneha lo elhuttiha, ka benneha rigixxi'ake ge nu bilákanie la'ania.
JOH 12:18 De nuha nna biria ka benne gwaledake bie kumu de binake ge milagru benieha.
JOH 12:19 Ka fariseo‑ni nna ra luesikani: ―Gwaluyúruga, ri'i labí dhaari'i. Gwalugíaruga, iyába ka benne danalhake nuná.
JOH 12:20 Lagwi ge ka benne dia laníha, delába ka benne dia ki sadú xibike arlo Tata Do Yebáha, lhe'e ka benneha sela ttu chupa ka benne griegu.
JOH 12:21 Ka benneha ubigake ata du Felipe‑ni. Felipe‑ni ankana benne lhe'esi Betsaida. Yiesiha rena daka Galilea. Nianna unnabake lenna, ráke na: ―Raka letu ilentu Jesús‑ni, xa tata.
JOH 12:22 Felipe‑ni nna ugíana utixxi'enna Andrés‑ni. Nianna ixpabakana diakana gwatixxi'akinna Jesús‑ni nu ra ka benneha.
JOH 12:23 Jesús‑ni nna bekabie gekani, ree: ―Benne daa yebáha chiba bisia ura gatti benneha nna eyapie yebáha kini inná xxeni lebie.
JOH 12:24 Netiru ria, ttiba xua xuxtilaha, ganna abíba igatsi yu ikie ki e'eyue, la'ania nna labí tsani benneha, ttúbe eya'anna. Ttaka ganna xuaha gattibe, delába egelhaba xoe nna e'eyue, la'ania nna ixeni lena ute benneha.
JOH 12:25 Benne abittuba raka lebie bixa satebie de etenalhe neti, benneha nnittilee arlo Tata Do Yebáha nna benne eria iki eria lebie etenalhe neti meskila bixa satebie yiesi lo yu‑ni, benneha gwaka benlee ttu dia lii arlo Tata Do Yebáha.
JOH 12:26 Ganna nuxa ttu benne raka lebie ixúe kini unie nu raka lasia, teeki itee etenalhe neti nna ata esina dhoaha, niha‑gaba dhoe, nna ganna nuxa ttu benne chi rixúe runie nu raka lasia, Tata kiaha gugwebe lidhaka benneha.
JOH 12:27 ’Loora nnanna yalhá rudú xxattana neti. Nianna, ¿si gwannílaa, “Tata, bodiláchittu neti lo elha disa uyúa‑ni”? Ttaka ki de uyúlaa elha disa‑ni, de nuha nna daya yiesi lo yu‑ni.
JOH 12:28 Tata, bele'e nu xxeni ra lelu arlo ka benne. Nuha‑ba rabie, nianna biyien tsi'i ttu benne unnebie yebáha, ree: ―Chiba bele'a nu xxeni ra lasia, nnanna nna odole'a na attu libe.
JOH 12:29 Ka benne se'e niha, tti biyienkanie tsi'i benne unneeha, ttu chupake ráke: ―Uyu'u beba nuná. Adíke nna ráke: ―Ttu anjeli daa yebáha‑ba nuná belise benne‑ni.
JOH 12:30 Jesús‑ni nna rabie kana: ―Laa de netiga nna biyien tsi'i benneha, de lebi'ila nuná nna biyien tsi'ibie.
JOH 12:31 Nnanna nuha chi bisia sá uin Tata Do Yebáha elhuxtisi ge ka benne se'e yiesi lo yu‑ni lhe nnanna nuha chi bisia sá kweabie nu rinnabiana yiesi lo yu‑ni, delába nu xxegwiha.
JOH 12:32 Neti nna ganna chi ulhidhakana neti betákana neti lo ya kurusiha, la'ania nna unia kini iyába ka benne ibigake len neti.
JOH 12:33 Aníha rinnebie ki benna liie gaxasina gattie.
JOH 12:34 Ka benneha nna bekabike gebie, ráke: ―Ri'itu yutu deki lo ka yetsi ge Tata Do Yebáha rigixxi'a ra deki benne anke Cristuha satíaba aka ben benneha. Lu nna, ¿galasina nna rálalu deki teeki ilhidhakana benne daa yebáha? ¿Núla nuha anka benne daa yebáha ganna?
JOH 12:35 Jesús‑ni nna rabie kana: ―Attu sattiruba do benne anke xiani‑ni lagwi gele. De nuha nna laka sa ruden xiani‑ni gele, gwalugwela lele kini abittu udaxxu elaha le, kumu nu reki lhe'e chulhaha, labí yu nuha gaxa diana.
JOH 12:36 Laxkala gwaltsia lele ge benne anke xiani‑ni laka sa doe len lebi'i, kini anáchu nna akale gebie. Nuha‑ba ra Jesús‑ni nna deyye bekatsi lobie gekani.
JOH 12:37 Meskiba chi ben Jesús‑ni ixe ka milagru arlo ka benne, ttaka labí ria leke gebie.
JOH 12:38 Aníha uka ki gwado tisa ge nu unne profeta Isaías‑ni tti ree Tata Xisiha: Nurula chi ugía leni ge nu rigixxi'atu‑ni xa tata, lhe nurula nu chi bele'enlu nu xxeni ra lelu lhe.
JOH 12:39 Labí uka tsia lekani ge Tata Xisiha, kumu attiba ra Isaías‑ni attu lisia lo ka yetsi ge Tata Do Yebáha, tti rana:
JOH 12:40 Bechulhaba Tata Do Yebáha lokani lhe ben tsitsibe lastokani, kini meskiba yu'u lokani, abittu bilákinna, lhe meskiba tee elha rieni gekani nna abittu utte dákinna. Aníha benkana kini ka eyekikana odaxxukana neda kia nna eyonia kana, ra Tata Do Yebáha.
JOH 12:41 Isaías‑ni unnena aníha kumu chiba bilenna nu xxeni inná le Jesús‑ni ganna chi bisie. De nuha nna utixxi'ana gebie.
JOH 12:42 Laa kiga de nuha nna ixeba ka nu Israel‑ni ugía lekani ge Jesús‑ni, axtala ka nu rinnabia gekaniha ugía lekani. Ttaka kumu de rasikinna ge ka fariseo‑ni, de nuha nna labí rigixxi'akana kini ka kweakana kana lhe'e ka yo'o ata rudhetikana ka tisa ge Tata Do Yebáha.
JOH 12:43 Kumu ru'urula lekani eya'an tsekana arlo ka benne attichula arlo Tata Do Yebáha.
JOH 12:44 Jesús‑ni nna unnebie idisa, ree: ―Benne ria lebie netiha, labí sun neti nuha ria le benneha, sinuki riagaba lebie benne udhelhe netiha,
JOH 12:45 nna benne rilánie netiha, benne udhelhe netiha nuha rilen benneha.
JOH 12:46 Neti ankaa xiani bisiaya yiesi lo yu‑ni kini iyába ka benne tsia leke neti abittu tse'eke ata anka chulhaha.
JOH 12:47 Nu iyieninna ka tisa kia‑ni nna abittu uinna nu rákana, labí neti ukinnia nuha, kumu neti laa dagaa gwerixxi gwekinni ka benne, sinuki dalaa kini odiláya ke.
JOH 12:48 Nu rigu'u ni'ani netiha lhe abittu rulabina ka tisa kia‑ni, chiba do nu ukinnina nuha, delába ka tisa chi unnea‑ni, ka tisa‑niba urixxi ukinnikana nuha ganna chi isia sá daluxaha.
JOH 12:49 Kumu neti labí rinnea nu anka kia. Tata kia benne udhelhe netiha, benneha‑ba chi rabie neti bixa innía lhe gasina innea lhe.
JOH 12:50 Neti yúgabaa deki nu ra benneha uinri'i, nuha uinna kini satíaba aka ben ka benne. Laxkala nu rinnea‑ni, rinnebaa na attiba chi ra Tata kiaha.
JOH 13:1 Atti lani isia laní Pascuaha, yuba Jesús‑ni deki chiba bisia ura edábie yiesi lo yu‑ni nna esine ata do Tataha. Aníha‑ba ttiba ukanie ge ka benne gebie se'e yiesi lo yu‑ni, aníha‑ba sa ukanie geke axtaba tti chi uttieha.
JOH 13:2 Tti chi se'eke go irseha, chi galá uxí yie nu xxegwiha Judas Iscariote xi'in Simón‑ni, ki utene lasi ná ka nu uttikaneha.
JOH 13:3 Jesús‑ni, kumu chiba yubie deki Tata Do Yebáha, iyába chi betebie lasi nábie lhe yube deki ata do Tataha‑ba birie nna bisie yiesi lo yu‑ni lhe ata do benneha‑gaba esine lhe,
JOH 13:4 de nuha nna loora se'eke go irseha, udú liie nna utuabie lari nukueha, nianna tti bedaxxue ttu lari bexxika lhe'ebie.
JOH 13:5 Nianna tti uta'abie inda lhe'e ttu xiga nna uduloe utíe ni'a ka benne rudhetinieha nna bodibisie ka nuha len lari xika lhe'eeha.
JOH 13:6 Tti chi diabie kíe ni'a Simón Pedro‑ni, lana nna rane: ―Labí dika lula kílu ni'aya xa tata.
JOH 13:7 Jesús‑ni nna bekabie geni, ree: ―Labí tte denlu bixa nuní runia nnanna, ttaka deloliba nna tte denlu nuní.
JOH 13:8 Pedro‑ni nna rane: ―¡Netiligaba nna labí dhielhaa kílu ni'aya! Jesús‑ni nna ree na: ―Ganna abíba dhielhalu kía ni'alu, labíru akalu kia.
JOH 13:9 Nianna ra Pedro‑nie: ―Ganna niha, nna labí sun ka ni'aya‑ni kílu, kígabalu ikia‑ni lhe ka náya‑ni lhe.
JOH 13:10 Jesús‑ni nna ree na: ―Ttu benne chi udi labíru riyasin benneha gadie attu libe, a sun ka ni'abe ití, kumu itúba benneha chi anke nari xú nna lebi'i chiba beyarile arlo Tata Do Yebáha, meskiba laa iyále chi beyari.
JOH 13:11 Kumu yube nuxakana nuha utekane lasi ná ka nu uttikaneha, de nuha nna rabie kana: “Labí iyále chi beyari.”
JOH 13:12 Iki de chi utíbie ni'a ka benneha, nianna tti beyokue lari nukueha nna bedobie ro'o mexaha nna ree ke: ―¿Si gwa rite denle bixa nuní bedhakaa le?
JOH 13:13 Lebi'i tenle láya Maestru lhe rale deki ankaa Xxanale lhe. Gwalíbinle kumu neti gwalíba ankaa nu rale‑na.
JOH 13:14 Ki neti ankalaa Xxanale lhe Maestru gele nna chi utía ka ni'ale‑na, anágaba lebi'i teeki kí ni'a luesile.
JOH 13:15 Neti chi bele'enia le nuní, kini attiba benia utía ni'ale, anágaba uinle.
JOH 13:16 Netiru ria, nu ren sina lo xxananiha labí xxenirula ra le nuha attichula xxananiha. Nigaba nu reki mandaduha, labí xxenirula ra le nuha attichila nu ruinna na mandaduha.
JOH 13:17 Lebi'i ganna rite denle nu ria‑ni, karubárule ganna tse'ele uinle aní.
JOH 13:18 Labí iyále nuní xpeya aní; kumu neti yu xeabaa gá se'e ka benne chi ulesia ke ki akake kia. Ttaka teeki sado tisa ge nu ra lo ka yetsi ge Tata Do Yebáha, ata dia ra: “Nu dona go yetta turo'o len netiha, la labana beyekina bebi'i noona neti.”
JOH 13:19 Nnannali chi rigixxi'ania le nuní tti lanila akana, kini ganna chi ukanaha, la'ania nna tsia lele deki neti nuha ankaa Cristu.
JOH 13:20 Netiru ria, nu ulabina benne idhelhaaha, neti nuha ulabi nuha nna nu ulabina netiha nna benne udhelhe netiha nuha ulabina.
JOH 13:21 Iki de ra Jesús‑ni aníha, nianna tti bedú si'i xxattana lebie nna ree: ―Netiru ria, nuxa ttúle nuní utele neti lasi ná ka nu uttikana neti.
JOH 13:22 Ka benne rudhetinieha nna udulo ttebake rugía lo luesike, kumu labí yuke nuxa geke nuha rinnebie.
JOH 13:23 Ttu ka benneha, benne raka xxattani Jesús‑ni geeha, doe gaxxaba kwe'ebie tti yu'uke go irseha.
JOH 13:24 Benneha nuha betten ná Simón Pedro‑ni kini innaba tise Jesús‑ni nuxa geke nuha rinnebie.
JOH 13:25 Benneha nna ubigarue gaxxa kwe'e Jesús‑ni nna unnaba tise bie, ree: ―¿Núlatu nuní xa tata?
JOH 13:26 Jesús‑ni nna bekabie ree: ―Nu ugwea na yettaxtila odibidhaa ikini, lana nuha utena neti lasi ná ka nu uttikana netiha. Nianna tti bodibidhe iki yettaxtilaha nna begwebie Judas Iscariote xi'in Simón‑ni.
JOH 13:27 Tti chi utona yettaxtilaha nna uta'a tteba nu xxegwiha lhe'e lastoni, nianna tti ra Jesús‑ni na: ―Tsa ttela beni nu chi re lelu uinlu.
JOH 13:28 Ttaka ni ttú ka benne se'e lenie ro'o mexaha, a ute dákanie beaka rabie na aníha.
JOH 13:29 Kumu de Judas‑ni denna beduti to yu'u belhiu gekeha, laxkala ttu chupake rakakanie ganna raba Jesús‑ni na: “Ugía gwayo'o nu ixuinri'i laní‑ni” o ree na: “Begwe ka benne dii abittu geke tee latti belhiu.”
JOH 13:30 Iki de chi beyaka uto Judas‑ni yettaxtilaha, nianna tti biria ttebana diana. Chiba anka rela nuha la'ania.
JOH 13:31 Nianna iki de chi biria Judas‑ni diana, nianna ra Jesús‑ni: ―Neti benne daya yebáha nnanna chi ula'a nu xxeni ra lasia, lhe de neti nna ula'a nu xxeni ra le Tata Do Yebáha.
JOH 13:32 Ganna neti ule'a nu xxeni ra le Tata Do Yebáha, anágaba Tata Do Yebáha nna ule'egabe nu xxeni ra lasia nna chi tte duna ule'ebie nu xxeni ra lasia.
JOH 13:33 Xi'ini to kia, attu satti toruba gwadoa len lebi'i, nianna tti egilale neti. Nnanna upeya le nu chigaba xpeya ka nu loni ge ka benne Israel‑ni: Ata eya'ayaha, lebi'i labí aka esiale niha.
JOH 13:34 Ttu tisa kubi rodha'anaa len lebi'i ki uinle nu rana, delába akin ge luesile. Lebi'i teeki akin ge luesile attiba neti rakati gele.
JOH 13:35 Ganna rakani ge luesile, la'ania nna iyába ka benne tte dákanie deki lebi'i chiba ankale benne rudhetinia.
JOH 13:36 Simón Pedro‑ni nna unnaba tisana Jesús‑ni, rane: ―¿Gála tsialu xa tata? Jesús‑ni nna bekabie geni, ree: ―Ata eya'ayaha, lu labí aka etenalhalu neti nnanna, ttaka delola nna gwetabalu len neti.
JOH 13:37 Pedro‑ni nna rane: ―¿Beakala labí aka etanalhaa kwinalu nnanna xa tata? ¡Neti chiba beria iki beria lasia gattia kwenta gelu!
JOH 13:38 Jesús‑ni nna bekabie geni, ree: ―¿Si gattilu kwenta kia? Netiru ria, lanila kwesi chinkaha, lu tsunna libela chi bedhea lelu abittu ridí ro'olu deki ankabienlu neti.
JOH 14:1 ’Bittu udú xxattana le, gwaluxxen lele ge Tata Do Yebáha lhe gwaluxxengaba lele kia lhe.
JOH 14:2 Lhe'e lisi Tata kiaha ixe ka yo'o sia ata tse'e ka benne. Ganna ttixka abíba sia, la'ania nna abittula xpeya le ten tsea ata tse'ele.
JOH 14:3 Ganna chi eya'aya ten tsea ata tse'ele, la'ania nna dedáya attu libe nna echea le len neti kini ata dhoaha, niha‑gaba tse'ele.
JOH 14:4 Lebi'i chiba ankabienle neda deyya ata eya'ayaha.
JOH 14:5 Tomás‑ni nna rane: ―Labí yutu gá eyyalu xa tata. Laxkala, ¿gasina uinbiatu nedaha?
JOH 14:6 Jesús‑ni nna bekabie, ree na: ―Netiba nuha ankaa nedaha lhe netiba nuha ankaa benne rigixxi'aya ge nu anka gwalí lhe ankaa benne runia ki satíaba raka ben ka benne lhe. Lanú nu aka geni tsiana ata do Tataha ganna abíba neti echea na.
JOH 14:7 Ganna ttixka lebi'i chi yule nuxa gwalíga ankaa, la'ania nna chigaba yule nuxa anka Tata kiaha nna nnannali chi ankabienle benneha lhe chi bilenlee lhe.
JOH 14:8 Nianna tti unne Felipe‑ni, rana: ―Tata Xisi to, bele'en ri'itu Tataha nna ukare'aba ilentue nna eyaka xen letu.
JOH 14:9 Jesús‑ni nna bekabie, ree: ―Ki isába chi reki lenia le xa Felipe, ¿si itua ttu nna a ruinbiale neti? Benne chi bilánie neti, chigaba bilen benneha Tataha. ¿Gasina nuha nna rálalu: “Bele'en ri'itu Tataha”?
JOH 14:10 ¿Si lagwa gwa ria lelu deki neti ttúba benne ankaa len Tataha nna Tataha nna ttúba benne anke len neti? Ka tisa rinnea‑ni nna labí nu anka kia ka nuní rinnea; sinuki nu anka ge Tataha benne doe lhe'e lastoa‑niba nuní rinnea. Labe runie iyá nu runia‑ni.
JOH 14:11 Gwaltsia lele deki neti ttúba benne ankaa len Tataha nna Tataha ttúba benne anke len neti. Ganna abíba ria lele kia, kwadi ge ka nu rilenle runia‑ni gwaltsia lele.
JOH 14:12 Netiru ria, nu gweyya leni netiha gwingaba nuha ka nu runia‑ni nna xxenirula anka ka nu uin nuha, kumu neti eya'abaa ata do Tataha.
JOH 14:13 Lhe anágaba iyába nu innabale len Tataha tti udettile neti, neti nna gwinbaa nu innabaleha kini anáchu de neti benne ankaa Xi'inieha, de neti nna inná xxeni le Tataha.
JOH 14:14 Bixaba innabale ganna udettile neti, neti nna gwinbaa nu innabaleha.
JOH 14:15 ’Ganna lebi'i rakinle kia, la'ania nna gudobale tisa ge nu runia mandadu.
JOH 14:16 Neti nna innabaa len Tataha ki idhelhe attu benne aka lenie le kini benneha nna dhoe lenle ttu dia lii,
JOH 14:17 delába idhelhe Espíritu benne kixxi'abie ge nu anka gwalí. Ka nu labí ria lekani, labí ulabikana Espírituha, kumu de labí chi bilákinne, nigaba a yúkana nuxa anke. Ttaka lebi'i chiba yule nuxa anka benneha kumu labie nuní doe len lebi'i lhe dhobie lhe'e lastole lhe.
JOH 14:18 ’Labí odha'anaa le ttiba ttu bidabi, gwesiaba neti dhoa len lebi'i attu libe.
JOH 14:19 Ka benne abí ria leke kia, attu sattitoruba ilákanie neti, lengwa nna labíru edelákanie neti, ttaka lebi'i nna gwalábinle neti. Kumu neti anka benbaa, anágaba lebi'i gwaka bengabale.
JOH 14:20 Tti isia sá esiayaha, la'ania nna tte denle deki neti ankaa ttúba benne lenia Tata kiaha; lebi'i nna akale ttúba benne len neti, neti nna akaa ttúba benne len lebi'i.
JOH 14:21 Benne chi biyieninie nu runia mandadu nna rudoe tisa geni, benneha nuha gwalíganie rakanie kia nna benne rakanie kia nna gwakagabani Tata kiaha gebie. Anágaba neti akagabati gebie lhe ule'egabanie nu gwalíga ankaa lhe.
JOH 14:22 Nianna tti ra Judas‑ni (labí Judas nu rákana Iscariote) rane: ―Tata Xisi to, ¿beakala len ri'itu ule'elu nu ankalu nna a ule'elu nu ankalu‑na len adíru ka benne?
JOH 14:23 Jesús‑ni nna bekabie geni, ree: ―Benne akanie kia, gudoba benneha tisa ge nu chi rigixxi'anie. Tata kiaha nna gwakagabanie ge benneha, la'ania nna ri'itu isiatu ki tse'etu lhe'e lastoe.
JOH 14:24 Nu abí rakinna kiaha, nuha labí rudona tisa ge nu rigixxi'ania na. Ka tisa chi riyieninle‑ni nna labí nu anka kia ka nuní rinnea, sinuki ankaba ka nuní ge Tataha, benne udhelhe netiha.
JOH 14:25 ’Iyá nuní rinnea rigixxi'ania le nnanna laka sadoa len lebi'i,
JOH 14:26 ttaka Espíritu benne ite ki aka lenie leha, benneha idhelha Tataha bie kini innebie kwenta kia. Labie ule'enie le iyá tte lhe odhúbie lele iyá nu chi utixxi'ania le lhe.
JOH 14:27 ’Neti unia kini tse'ele xen su lasi. Elha xen lasi nu rutea len lebi'i labí anka nuná luesi nu rute ka benne se'e yiesi lo yu‑ni. Bittu udúna le lhe nigaba a gasinle lhe.
JOH 14:28 Lebi'i chiba biyieninle ria: “Eya'abaa, delola nna gwedesiabaa len lebi'i.” Ganna si gwalíginle rakinle kia, la'ania nna gwedeakabinle de eya'aya ata do Tataha, kumu Tataha xxenirula ra le benneha tti neti.
JOH 14:29 Nnannali chi rigixxi'ania le nuní, kini ganna chi deya'ayaha, la'ania nna tsia lele kia.
JOH 14:30 ’Labíru isá innea len lebi'i, kumu chiba daa nu xxegwi rinnabiana yiesi lo yu‑ni, neti niru latti labí dhaa nuha innabiana neti.
JOH 14:31 Ttaka aní teeki aka kini tte dani ka benne deki neti gwa rakabati ge Tataha, lhe gwa ruinbaa nu chi bedha'ane unia lhe. ’Nnanna nna gwaledú lii kini chi diari'i.
JOH 15:1 ’Neti nuní ankaa ya uva nu gwalíga anka tse. Tata kiaha nna anke benne rugwe lebie ya uvaha.
JOH 15:2 Iyába ka ná ya uvaha ka nu abittu runna nu xixxi, richúbe kana, ttaka iyába ka náni ka nu gwa rutekana nu xixxi, richúbe lokani lhe ruxíbe nu bisi gekani kini ute chiettirukana nu xixxi.
JOH 15:3 Ttiba ka ná ya uvaha chi biria nu bisi gekani, aníha‑gaba nuná lebi'i, de ka tisa chi utixxi'ania leha, de ka nuha nna chiba beyarile.
JOH 15:4 Lebi'i, gwaltse'e len neti nna anágaba neti gwadúgabaa len lebi'i. Ttiba ka ná ya uvaha, ganna abíba yietikana lati yagaha, labí aka ute ka nuha nu xixxi, anágaba lebi'i, ganna abíba se'ele len neti, labí aka gele uinle nu anka tse.
JOH 15:5 ’Neti nuní ankaa ya uvaha, lebi'i nna ankale ka náya. Benne gwa du lenie netiha, neti nna gwa dúgabaa lenie nna ixeba nu tse unie, kumu ganna lebi'i abíba du lenle neti, labí aka gele bixa uinle.
JOH 15:6 Nu abíba du lenna neti, nuha iru'unabana. Satebana attiba ka ná yagaha; ka nuha rirúbakana nna ribisibakana, nianna tti ritupakana nna riakana lo giha.
JOH 15:7 ’Ganna lebi'i gwa se'ebale len neti lhe gwa ruinbale nu ra ka tisa kia‑ni, la'ania nna gwalinnababa bixaba raka lele nna gwadíbale nu rinnabaleha.
JOH 15:8 Tata kiaha nuha inná xxeni lebie ganna lebi'i uinle ixe nu anka tse. Aníha nuha nna gwasinle akale benne gwalíga rudhetinia.
JOH 15:9 Attiba rakani Tataha kia, anágaba rakati gele. Laxkala gwaltse'e len neti bittu udhanle neti kini edí baale elha si'i lasi kia.
JOH 15:10 Ganna udole tisa ge nu odha'anaa uinle, la'ania nna gwedí baabale elha si'i lasi kia, attiba neti gwa redí baaba elha si'i lasi ge Tata kiaha kumu gwa rudobaa tisa ge nu bodha'ane unia.
JOH 15:11 ’Ria aní kini lebi'i edú itta lele len neti, aná nna itta suba edú lele.
JOH 15:12 Akani ge luesile attiba neti rakati gele. Nuní rodha'anaa uinle.
JOH 15:13 Benne gwa reria lebie gattie kwenta ge ka benne se'e tse lenie, benneha nuha gwa rakarunie ge ka benneha.
JOH 15:14 Lebi'i nuha ankale benne do tse lania ganna ttixka uinle nu ria.
JOH 15:15 Labíru kixxaa lále nu reni lo sina kia, kumu nu reni lo sinaha, labí yu nuha bixa ruin xxananiha. Neti chi teeti lále benne do tse lania kumu iyába nu chi ra Tata kiaha neti, chiba utixxi'ania le nuha.
JOH 15:16 Laa lebi'iga bekwele neti; netila bekwea le nna chi beka'anaa le ki tsiale uinle nu anka tse nna nu tse uinleha nna uchíana isá. Aníha kini iyába nu innabale len Tataha tti udettile neti, benneha nna gutebe nu innabaleha.
JOH 15:17 Akin ge luesile. Nuní rodha'anaa uinle.
JOH 15:18 ’Ganna ka nu abittu ria lekani neti ritisikinna le, gwaludhá lele ki netila bitisikinna lade'a tte.
JOH 15:19 Ganna lebi'i ankale ge ka nu abittu ria lekani neti, la'ania nna gwakalakinna gele attiba rakakinna ge ka benne gekani, ttaka lebi'i labí ankale gekani; neti chi bekwea le lagwi gekani, de nuha nna ritisikinna le.
JOH 15:20 Gwalodhú lele ge nu chi xpeya leha. Nu ren sina lo xxananiha labí xxenirula ra le nuha tti xxananiha. Ki neti chi udú nookana, anágaba lebi'i dhu noogabakana le, lhe gannala ttixka bedo nagakani kia, la'ania nna lebi'i gudogaba nagakani gele.
JOH 15:21 Iyá nuní udhakakana le de ria lele neti, kumu lakana labí ankabiakinna benne udhelhe netiha.
JOH 15:22 ’Ganna neti abíba bisiaya yiesi lo yu‑ni lhe ganna abíba utixxi'ania kana ka tisa ge Tata Do Yebáha, la'ania nna abittula nujakana yua ge ka tulha ruinkana ganna ttixka. Ttaka de chi utixxi'ania kana, de nuha nna labí tee ro'okani innákana: “Labí yutu ge ka tulha ruintu.”
JOH 15:23 Nu ritisinna netiha, ritisigabin nuha Tata kiaha.
JOH 15:24 Ganna ttixka neti abíba chi benia ka milagru lagwi gekani, ka milagru ka nu abittu chi ben nuxa attu benne, la'ania nna abittula nujakana yua ge ka tulha ruinkanaha ganna ttixka. Ttaka chiba bilákinna; laa kiga de chi bilákinna benia ka milagruha nna sa ritisibakinna neti lhe ritisigabakinna Tata kiaha lhe.
JOH 15:25 Ttaka teeki raka aní kini rado tisa ge nu ra lo bia bennabi gekaniha ata dia ra: “Labí bixa ge nna kwentaba bitisikinna neti.”
JOH 15:26 ’Ttaka neti nna idhelhaa benne aka lenie le, delába Espíritu benne rigixxi'abie ge nu anka gwalíga. Ata do benneha‑li iria Espírituha dabie, nna kixxi'abie kia.
JOH 15:27 Anágaba lebi'i kixxi'agabale kia, kumu lebi'i attili sisi'a tte uduloa rule'enia ka benne, la'aniali chi se'ele len neti.
JOH 16:1 ’Rigixxi'ania le nuní kini abittu eyadi gaale nna a tsiaru lele kia.
JOH 16:2 Tse'e ka nu ebeakana le lhe'e ka yo'o ata rudhetile ka tisa ge Tata Do Yebáha, labíru ugwelhakana le ga'ale niha. Axtala isia sáha ka nu uttikana leha akakinna deki gwa ruinbakana nu ru'u le Tata Do Yebáha.
JOH 16:3 Aníha uinkana kumu de labí chi anka biakinna Tataha, lhe nigaba labí chi ankabiakinna neti lhe.
JOH 16:4 Rigixxi'ania le nuní kini ganna chi bisia sá satele aní, la'ania nna sadú lele deki chiba utixxi'ania le nuní. ’Labí utixxi'ania le nuní sisi'a tteha, kumu len lebi'iba doa.
JOH 16:5 Ttaka nnanna chi eya'aya ata do benne udhelhe netiha nna niba ttúle a rinnaba tisale neti, innále: “¿Gá eyyalu?”
JOH 16:6 Rutse'e loona rudú si'ilana lele de rigixxi'ania le nuní.
JOH 16:7 Ttaka netiru ria: tserula saríana le ganna eya'aya. Kumu ganna abíba eya'aya, Espíritu benne aka lenie leha labí isia benneha len lebi'i. Ttaka ganna eya'aya, la'ania nna neti idhelhe ki ite.
JOH 16:8 Tti isia benneha nna unie ki okinni iki ka benne deki ankabake benne ruin tulha lhe deki labí ruinke attiba ankaba geni lhe. Anágaba unie ki utte dáke deki ukinniba Tata Do Yebáha ke.
JOH 16:9 Unie kini utte dáke deki ruinke tulha de labí ria leke kia
JOH 16:10 lhe unie kini utte dáke deki neti nuha ankaa benne runi nu dika ixú nna chiba eya'aya ata do Tataha nna labíru ilenle neti,
JOH 16:11 lhe anágaba unie kini utte dáke deki ibixxi iginniba ka nu ruin tulha‑na, kumu nu xxegwi nu rinnabia yiesi lo yu‑ni chiba berixxi bekinni Tataha nuha.
JOH 16:12 ’Ixeru nu teti upeya le, ttaka nnanna labí dhaale tte denle iyá nu rigixxi'ania le.
JOH 16:13 Ttaka atti isia Espíritu benne kixxi'abie ge nu anka gwalíga, Espírituha ule'enie le iyá nu anka gwalí, kumu labí inne benneha nu anka gebie, sinuki innebe nu iyienibanie ra Tataha lhe kixxi'agabanie le iyá nu aka nu si daa lhe.
JOH 16:14 Benneha unie kini inná xxeni lasia, kumu udaxxu ni'e nu rule'a‑ni nna kixxi'anie le.
JOH 16:15 Iyába nu anka ge Tataha, kígabaa anka nuha. De nuha nna xpeya le: “Espírituha udaxxu ni'abie nu rule'a‑ni nna kixxi'anie le.”
JOH 16:16 ’Attu sattitoruba nna labíru ilenle neti. Iki de nuha nna attu sattitoruba nna chi edelenle neti.
JOH 16:17 Ttu chupa ka benne rudhetinieha nna ra luesike: ―¿Bí dianie tti ree: “Attu sattitoruba nna labíru ilenle neti”; delo nna redenee: “Iki de nuha nna attu sattitoruba nna chi edelenle neti”? Lhe anágaba, ¿bí dianie tti ree: “Chiba eya'aya ata do Tataha”?
JOH 16:18 Lhe rágaba luesike, ¿bí dianie tti ree: “Attu sattitoruba”? Kwachiruba rite denri'i nu rinnee‑na xa.
JOH 16:19 Jesús‑ni nna ute dábanie deki raka le ka benneha innaba tisake bie ge nu chi reeha, nianna tti rabie ke: ―¿Si rinnaba tisa luesile, rale: “Bí diani nu ria‑ni tti ria: Attu sattitoruba nna labíru ilenle neti; iki de nuha nna attu sattitoruba nna chi edelenle neti”?
JOH 16:20 Netiru ria, lebi'i kwesibale lhe elenibinle ge nu satea, ttaka ka nu se'e yiesi lo yu‑ni edeakalakinna. Lebi'i nna udú si'ilana lele, ttaka delola nna gwedú ittaba lele.
JOH 16:21 Ttiba nuila gali xi'inniha ruyúbana elha disa kumu chiba bisia ura gali nutoha, ttaka iki de chi uli nutoha, la'ania nna labíru radú leni ge elha disa biyúnaha, kumu si redeakalinna de chi bisia attu benne yiesi lo yu‑ni.
JOH 16:22 Anágaba lebi'i du si'iba lele nnanna, ttaka neti gwetabaa etelannia le, la'ania nna edú itta lele nna lanú nu dhaana kuana elha gwedeaka lasi geleha.
JOH 16:23 La sáha labíru bi innaba tisale neti. Netiru ria, iyába nu innabale len Tataha ganna udettile neti, benneha nna gutebe nu rinnabaleha.
JOH 16:24 Axta nnanna labí chi unnabale udettile neti. Gwalinnaba nna gwadíbale, kini anáchu nna itta suba edú lele.
JOH 16:25 ’Nnanna ttiba bixxi kwe'eba nuní rinnea, ttaka isia sá labíru innea aní, sinuki lhixxa rába chi innea kixxi'ania le ge Tataha.
JOH 16:26 La sáha lebi'iba chi innabale len Tataha udettile neti, labíru neti teeki innabaa gele arlo benneha.
JOH 16:27 Kumu kwinaba Tataha rakanie gele. Rakanie gele kumu lebi'i chi rakinle kia lhe anágaba kumu chi ugía lele deki gwalí ata do Tataha‑ba biriaya daya.
JOH 16:28 Ata do Tataha‑ba biriaya daya nna bisiaya yiesi lo yu‑ni, nnanna nna udha'anaa yiesi lo yu‑ni nna eya'aya ata do Tataha.
JOH 16:29 Ka benne rudhetinieha nna ráke bie: ―Nnannaligaba lhixxa rába chi rinnelu, labíru rinnelu bixxi kwe'e.
JOH 16:30 Nnanna chi rite dentu deki labí riyasinlu nuxa innaba tisana lu kumu iyába yulu. De nuha nna chi ria letu deki ata do Tata Do Yebáha‑ba birialu dalu.
JOH 16:31 Jesús‑ni nna bekabie geke, ree: ―¿Si nnannaliba chi ria lele?
JOH 16:32 Ttaka chiba isia ura nuní, nnanna nuha chi bisia uraha, lebi'i nna gatti chadhibale kua ttu ttubale udaxxu neda gele. La'ania nna ttu túbibaa udúle, ttaka labí ttú neti dua; Tataha gwa duba benneha len neti.
JOH 16:33 Rigixxi'ania le nuní kini xen su lasiba tse'ele de du lenle neti. Yiesi lo yu‑ni satebale uyúle elha disa, ttaka tsitsi gwalikweki lele, kumu neti chiba udaaya lo iyá nu satsa raka yiesi lo yu‑ni.
JOH 17:1 Iki de chi unne Jesús‑ni nuha, nianna tti belhidha loe yebáha nna ree: ―Tata, chiba bisia ura nuní. Neti benne ankaa Xi'inlu, bele'e nu xxeni ra lasia, kini anágaba neti ule'a nu xxeni ra lelu,
JOH 17:2 kumu lu chi betelu lo neda kia kini innabiaya iyá ka benne, kini anáchu unia ki satíaba aka ben iyá ka benne chi betelu lasi náya.
JOH 17:3 Ganna ka benne chi benbiake lu deki ankalu gwalíga ttu túbiru Diosi lhe ganna chi benbiake neti Jesucristu benne udhelhalu yiesi lo yu‑ni, la'ania nna ka benneha satíaba aka benke arlolu.
JOH 17:4 Neti chiba bele'a nu xxeni ra lelu yiesi lo yu‑ni, chiba uluxati sina nu bedha'anlu unia.
JOH 17:5 Nnanna nna xa Tata, ben kini neti eyakaa benne ra xxeni lasia arlolu, ben ki eyakaa atti tteba ankaa tti doa lenluha atti lanila kwe yiesi lo yu‑niha.
JOH 17:6 ’Ka benne chi bekwelu lagwi ge ka benne se'e yiesi lo yu‑ni nna betelu ke len neti, ka benne‑ni chiba bele'enia ke nuxa ankalu. Gebalu ankake nna betelu ke len neti. Lake nna gwa rudobake tisa ge nu ralu.
JOH 17:7 Nnanna chiba yuke deki iyába nu betelu len neti, luba betelu nuha,
JOH 17:8 kumu ka tisa betelu len netiha chiba utixxi'ania ke ka nuha nna gwa belabibake ka tisaha. Nnanna nna chiba yuke deki gwalíba ata dolu‑naba biriaya daya lhe chigaba ugía leke deki luba udhelhalu neti.
JOH 17:9 ’Ge ka benne‑ni rinnabaa lenlu xa tata. Labí rinnabaa ge ka nu abittu ria lekani neti, sinuki rinnabaa ge ka benne betelu len neti, kumu gebalu ankake.
JOH 17:10 Iyába ka benne ankake kia, gegabalu anka ka benneha lhe iyába ka benne ankake gelu, kígabaa anka ka benneha. De ka benneha nna rule'e nu xxeni ra lasia.
JOH 17:11 ’Neti labíru dhoa yiesi lo yu‑ni, ttaka lake tse'erubake. Neti nna esiabaa ata dolu‑na xa Tata. Lu ankalu nari xú, labí tulha ruinlu. De nuha nna ka benne chi betelu len neti, biyú ke len nu ra tsitsi lelu‑na kini anáchu akake ttúba benne attiba ri'i ankari'i ttúba benne.
JOH 17:12 Tti doa lenke yiesi lo yu‑niha, gwa biyúbaa ke len nu ra tsitsi lelu. Ka benne betelu len netiha, gwa biyúbaa ke nna ni ttúke labí binittike, sun ttúba nu chi ga'anna inittiha, binittina. Aníha uka kini gwado tisa ge nu ra lo ka yetsi geluha.
JOH 17:13 ’Nnanna chiba esiaya ata dolu‑na, ttaka laka sa doa yiesi lo yu‑ni rigixxi'aya nuní kini lake nna itta suba dhu leke attiba neti itta suba du lasia.
JOH 17:14 Neti chiba utixxi'ania ke ka tisa gelu‑ni, ttaka ka nu se'e yiesi lo yu‑ni ritisilakinna ke kumu de labí ankake ge yiesi lo yu‑ni, attigaba neti labí ankaa ge yiesi lo yu‑ni.
JOH 17:15 Labí rinnabaa kwealu ke lagwi ge ka benne se'e yiesi lo yu‑ni, sinuki odilálalu ke lo ná nu xxegwiha.
JOH 17:16 Lake labí ankake ge yiesi lo yu‑ni, attigaba neti labí ankaa ge yiesi lo yu‑ni.
JOH 17:17 Ka tisa gelu‑ni ankake nu gwalí. Beni kini, tti iyienkanie ka tisa‑ni nna iriesike akake gelu.
JOH 17:18 Attiba kwinalu udhelhalu neti yiesi lo yu‑ni, anágaba neti ridhelhaa ke yiesi lo yu‑ni ki kixxi'ake ka tisa gelu.
JOH 17:19 De lake nna neti biriesia ki ixúa lo sina gelu, kini anágaba lake iriesigabake ki ixúke lo sina gelu de ria leke ge nu anka gwalí.
JOH 17:20 ’Labí sun ge ka benne‑ni rinnabaa len kwina lu. Anágaba rinnabagabaa ge ka nu tsia lekani kia tti iyienkinna ka tisa kixxi'a ka benne‑ni,
JOH 17:21 kini anáchu nna iyába ka nu tsia lekani kia ttisidiba ttúba benne eyakakana, attiba lu xa Tata, ttúba benne ankalu len neti, neti nna ttúba benne ankaa lenlu. Anágaba ka nu tsia lekaniha, ttúba benne eyakakana len ri'i, kini anáchu adí ka nu a ria lekani nna tsia lekani deki luba udhelhalu neti.
JOH 17:22 Neti chiba benia kini inná xxeni le ka nu tsia lekani kia attiba lu chi benlu ki uná xxeni lasia, kini akakana ttúba benne attiba lu len neti ttúba benne ankari'i.
JOH 17:23 Lu dulu len neti; neti nna dhua lenkana, kini lakana nna gwalíga isinkana eyakakana attisidiba ttúba benne, kini anáchu adíru ka benne se'e yiesi lo yu‑ni tte dákanie deki luba udhelhalu neti lhe gwa rakabinlu ge ka nu tsia lekani kia attiba rakabinlu kia.
JOH 17:24 ’Ka nu chi betelu len neti xa Tata, raka lasia ata dhoaha, niha‑gaba tse'ekana, ki ilákinna nu xxeni ra lasia nu chi betelu len neti, kumu lu rakinlu kia attili lani kwe yiesi lo yu‑niha.
JOH 17:25 Tata, lu ankalu benne runi attiba ankaba geni. Ka nu se'e yiesi lo yu‑ni labí chi ankabiakinna lu, ttaka neti chiba ankabiati lu. Ka nu chi betelu len neti chiba yúkana deki luba udhelhalu neti.
JOH 17:26 Chiba utixxi'ania kana nuxa ankalu, anába sa kixxi'ania kana, kini anáchu attiba rakinlu kia, anágaba lakana akin ge luesikani. Neti nna dhoa lhe'e lastokani.
JOH 18:1 Iki de chi unne Jesús‑ni iyá nuha, nianna tti biriabie dia lenie ka benne rudhetinieha uteke attu ladu ge yoo bisi nu tee láni Cedrón. Niha tee ttu yu daa ka ya olivu loni. Lhe'e yu ata daa ka yagaha uta'a lenie ka benne rudhetinieha.
JOH 18:2 Judas nu utena Jesús‑ni lasi ná ka nu uttikaneha chigaba ankabienna niha, kumu ixe lidúba chi ugía Jesús‑ni len ka benne rudhetinieha lhe'e yuha.
JOH 18:3 Aníha uka nna bisin len Judas‑ni ka soldadu lhe ka nu rise'e gweyú ro'o yotuha lhe. Ka nuha udhelha ka nu loni ge ka bixxudiha kana lhe udhelha ka fariseo‑ni kana. Diakana denkana espada lhe yaga lhe dengabakana ka lámpara lhe ya nalha gi lhe.
JOH 18:4 Ttaka kumu Jesús‑ni chiba yubie iyá nu satebie, nianna biriabie gwatsee kana nna ree: ―¿Nú regilale?
JOH 18:5 Lakana nna bekabikana, rákana: ―Jesús ge Nazaret‑niba regilatu xa. Jesús‑ni nna ree kana: ―Netiba nuní regilale. (Judas nu utene lasi ná ka nu uttikaneha, niha‑gaba dana len ka nuha.)
JOH 18:6 Tti ra Jesús‑ni kana: “Netiba nuní”, nianna tti beyadi gaakana nna ubixxi lokana lo yu.
JOH 18:7 Nianna tti bedennaba tise kana attu libe, ree: ―¿Nú regilale? Lakana nna redenákana: ―Jesús ge Nazaret‑niba xa.
JOH 18:8 Jesús‑ni nna bedekabie gekani, ree: ―Ki chiba ria le: “Netiba nuní.” Ganna neti regilale, gwalugwelhaxa ka nu rudhetinia‑ni eyyakana.
JOH 18:9 Aníha uka kini gwado tisa ge nu chi unnebie, tti ree: “Tata, ka benne chi betelu len neti, ni ttú ka benneha labí bennittia.”
JOH 18:10 Nianna tti ulea Simón Pedro‑ni espada dennaha nna uchúna naga ben ge Malco‑ni. Malco‑ni ribenna lo sina ge nu anka bixxudi xeniha.
JOH 18:11 Jesús‑ni nna rabie Pedro‑ni: ―Boga'a espada gelu‑na lhe'e xoni. Neti, ¿katte si abí gwa dhielhaa uyúa elha disa nu ute Tata kiaha?
JOH 18:12 Ka soldaduha lhe nu loni gekaniha lhe ka nu rise'e gweyú ro'o yotuha lhe, ka nuha bedaxxukana Jesús‑ni nna bexxigakane.
JOH 18:13 Nianna tti dechekane lade'a tte arlo Anás‑ni, kumu lana ankana xxudi nuila ge Caifás. Caifás‑ni nuha anka bixxudi xeni lhe'e idaha.
JOH 18:14 Caifás‑ni nuha rana ka nu loni ge ka nu Israel‑ni: “Tserula saríana ri'i ganna sun ttúba benne gattie kwenta ge iyá ka benne.”
JOH 18:15 Simón Pedro‑ni lhe attu ka benne rudhetinieha lhe danalhabake Jesús‑ni. Kumu ttu benneha, de ankabianie bixxudi xeniha, de nuha nna uta'abe len Jesús‑ni lali'a yo'o ge bixxudiha.
JOH 18:16 Ttaka Pedro‑ni nna beya'anbana ro'o yo'oha, labí uta'ana. Benne ankabianie bixxudi xeniha nna beriabie nna unne lenie nuila nu ruyúna ro'o yo'oha, kini begwelha nuha uta'a Pedro‑ni.
JOH 18:17 Nuilaha nna unnaba tisana Pedro‑ni, rana na: ―¿Laaba lu ankagabalu ttu ka nu rudhetini nubiyú‑na? Lana nna bekabina, rana: ―¡Ko'o! Labí.
JOH 18:18 Ka nu riben sina ge bixxudi xeniha lhe ka nu rise'e gweyú ro'o yotuha lhe, ka nuha bebekikana gi nna se'ekana gwetsa'a ro'o giha kumu yalhá idilha raka. Niha‑gaba du Pedro‑ni len ka nuha gwetsa'a ro'o giha.
JOH 18:19 Bixxudi xeniha nna unnaba tisana Jesús‑ni ge ka benne rudhetinieha lhe ge ka tisa rekie rule'enie ka benne lhe.
JOH 18:20 Jesús‑ni nna bekabie geni, ree na: ―Neti la looba rinnea arlo ka benne. Satíaba udúa rule'enia ka benne lhe'e yotuha lhe lhe'e ka yo'o ata ritupa iyári'i ka benne Israel rudhetiri'i ka tisa ge Tata Do Yebáha. Labí bixa unnea gatsi.
JOH 18:21 ¿Beaka netila rinnaba tisalu? Unnaba tisa ka nu chi biyienkinna ge nu rinnea‑ni. Ka nuná gwa yúkana bixa chi ria.
JOH 18:22 Tti ra Jesús‑ni aníha, ttu ka nu rise'e gweyú ro'o yotuha, nuha duna gaxxaba ata dueha nna uleana gi ro'e nna rane: ―¿Si aná dika ekabilu ge benne anke bixxudi xeni‑na?
JOH 18:23 Jesús‑ni nna bekabie geni, ree: ―Ganna abíba unne tsea, utixxi'achu biunna a unne tsea. Ganna gwa unne tsebaa nna, ¿beakala bedhenlalu neti?
JOH 18:24 Nianna aníha‑ba xika Jesús‑ni udhelha Anás‑nie arlo Caifás nu anka bixxudi xeniha.
JOH 18:25 Pedro‑ni nna niha‑ba sa duna ro'o giha rutsa'ana, nianna tti ra ka nu se'e niha na: ―¿Laaba luba nuha ttu ka nu danalhalu nubiyú‑na? Lana nna labí uxí ro'oni, rálana: ―¡Ko'o! Laa netiga nuha.
JOH 18:26 Ttu ka nu riben sina ge bixxudi xeniha, delába ttu nu datiana nu uchú Pedro‑ni naganiha, nuha rana na: ―¿Laaba ata daa ka ya olivuha‑ba biláti lu, du lenlu nubiyú‑na?
JOH 18:27 Pedro‑ni nna labí bededí ro'oni attu libe. Looraha tteba nna uresi chinkaha.
JOH 18:28 Chebakana Jesús‑ni udá lenkane lhe'e lisi Caifás‑ni nna bisin lenkane lhe'e guskadu ata do nu rinnabia ge Roma‑ni. Ttaka kumu chiba daa tsani nuha, laxkala ka nu lo ge ka benne Israel‑ni labí uta'akana lhe'e guskaduha kini ka itsigakana arlo Tata Do Yebáha ganna ga'akana ata se'e ka nu labí ankakana benne Israel. Kumu ganna itsigakana, la'ania nna labíru aka gokana irse nu tekinna láni irse ge laní Pascua.
JOH 18:29 Nianna tti biria Pilato‑ni ata se'ekanaha nna rana kana: ―¿Bí ge nuní rusiale iki nubiyú‑ni?
JOH 18:30 Lakana nna bekabikana geni, rákana na: ―Gannala ttixka abittuba ankana ttu nu ruin satsa, la'ania nna abittula bisia lentu na arlolu ganna ttixka.
JOH 18:31 Pilato‑ni nna rana kana: ―Lebi'iba gwaleche na nna gwaluinba elhuxtisi geni attiba ra lo bia bennabi gele‑na. Ka nu loni ge ka benne Israel‑ni nna rákana: ―Ri'itu labí ga'anna uttitu ttu benne.
JOH 18:32 Aníha uka kini gwado tisa ge nu unne Jesús‑ni tti utixxi'abie gaxasina gattie.
JOH 18:33 Nianna tti bedeta'a Pilato‑ni attu libe lhe'e guskaduha nna uxina Jesús‑ni nna rane: ―¿Si lu ankalu nu rinnabia ge ka benne Israel‑ni?
JOH 18:34 Jesús‑ni nna bekabie geni ree: ―¿Si nu anka gelu nuná ralu aná ak? O, ¿nu subiba utixxi'enna lu kia ak?
JOH 18:35 Pilato‑ni nna bekabina gee, rana: ―Ki gwa yúbalu laa benne Israel‑ga neti nna ralu aná. Ka benne lhe'esi gelu‑naba lhe ka nu loni ge ka bixxudi‑naba betega'akana lu lasi náya. ¿Bí benlu?
JOH 18:36 Jesús‑ni nna bekabie ree: ―Yiesi lo yu‑ni labí ankana ata innabiaya. Gannala ttixka innabiaya yiesi lo yu‑ni, la'ania nna ka benne danalhake netiha gwa bitilhalake kini abittu bedaxxu ka nu Israel‑ni neti, ttaka labí yiesi lo yu‑ni innabiaya.
JOH 18:37 Nianna ra Pilato‑nie: ―Nianna, ¿si lu ankalu nu rinnabia? Jesús‑ni nna bekabie, ree: ―Luba ra deki neti ankaa nu rinnabia xa. Neti ki de nuha‑la ulia lhe de nuha‑la daya yiesi lo yu‑ni kini kixxi'aya ge nu anka gwalí. Iyába ka nu gwa ria lekani ge nu anka gwalí, gwa rudoba nagakani ge nu rinnea.
JOH 18:38 Pilato‑ni nna rane: ―¿Bí nuha nu anka gwalí? Nuha‑ba ra Pilato‑ni nna tti bederiana attu libe ata se'e ka nu Israel‑ni nna rana kana: ―Labí raxxakaa bixa tulha ben nuní.
JOH 18:39 Ttaka kumu lebi'i chi labinle kua risiaba laní Pascua teeki odiláya ttu nu tee lisiyya, nnanna gwalinná: ¿si gwa raka lele odiláya nu anka nu rinnabia gele‑ni?
JOH 18:40 Ttaka iyábakana bedebesi'akana attu libe, rákana: ―¡Ko'o! ¡Labí olhálu nuná! ¡Barrabás‑nala bolhá! Barrabás‑ni ukana ttu nu runi ubana.
JOH 19:1 Nianna ben Pilato‑ni mandadu bedaxxukana Jesús‑ni ki bekulhakane.
JOH 19:2 Ka soldaduha nna benkana ttu corona yetsi nna ulu'ukana nuha ikie lhe begukukane ttu lari xiná chulha,
JOH 19:3 nianna tti ribigakana arloe nna rákane: ―¡Xxeni ra lelu xa nu rinnabia ge ka nu Israel! Nianna ribeakana gi ro'e,
JOH 19:4 nianna tti bederia Pilato‑ni attu libe, rana ka nu Israel‑ni: ―Gwaluyúruga. Nena chi kweaya‑ni kini uyú lole deki neti labí raxxakaa bixa tulha benna.
JOH 19:5 Tti biria Jesús‑ni nna chi yu'u ikie corona yetsiha lhe chi nukue lari xináha lhe. Nianna ra Pilato‑ni kana: ―Ne nubiyúha du nii.
JOH 19:6 Ka nu loni ge ka bixxudiha lhe ka nu rise'e gweyú ro'o yotuha lhe, tti bilákinna Jesús‑ni, nianna tti unnekana idisa rákana: ―¡Betá nuná lo ya kurusi! ¡Betá nuná lo ya kurusi! Pilato‑ni nna bekabina gekani, rana kana: ―Lebi'iba gwaleche na nna gwalutá na lo ya kurusi, kumu neti labí raxxakaa bixa tulha ben nuní.
JOH 19:7 Ka nu Israel‑ni nna bekabikana geni, rákana: ―Ri'itu tee ttu bia bennabi getu ata gwa rugwelhabana deki gattiba nuná kumu de rana ankana Xi'in Tata Do Yebáha.
JOH 19:8 Tti biyienini Pilato‑ni nu ra ka nuha, nianna adíla usi chiettiruinna,
JOH 19:9 nianna tti bedeta'ana lhe'e guskaduha nna redeana Jesús‑ni: ―¿Gá benne lu? Jesús‑ni nna labí bekabie geni.
JOH 19:10 Nianna rane: ―Neti rinnea nna abígaba rekabilu kia. ¿Si bi gwa yulu deki neti gwa tee lo neda kia odiláya lu o utáya lu lo ya kurusi lhe?
JOH 19:11 Jesús‑ni nna bekabie geni ree: ―Labí aka gelu innabialu neti ganna abíba bete Tata Do Yebáha lo neda lenlu kini inná xxeni lelu. Laxkala nu betena neti lasi nálu, adírula tulha xxeni daa nuha tti lu.
JOH 19:12 Debá la'ania ruin Pilato‑ni odilána Jesús‑ni, ttaka ka nu Israel‑ni ribesi'abakana, rákana: ―Ganna odilálu nuná, la'ania nna labí gwalí do tse lenlu César benne rinnabia xeniha, kumu iyába ka nu uinkana deki xxenirula ra lekani tti César‑ni, tti uinkana aníha, rigu'uba ni'akani benneha.
JOH 19:13 Tti biyienin Pilato‑ni nu ra ka nuha, nianna uleana Jesús‑ni nna lana nna bedona lo xxila ata ridona ruinna elhuxtisiha. Ata ridonaha, len tisa hebreo tee láni Gabata. (“Gabata” dienna innána Ata Yu'u Ka Íyya.)
JOH 19:14 La sáha nuha chi rese'e tse ka nu Israel‑ni kini attu sáha nna chi ga'akana laní Pascua. Ttiba retin tsi'inu (12) nuha nna ra Pilato‑ni ka nu Israel‑ni: ―¡Ne nu rinnabia geleha du nii!
JOH 19:15 Ttaka lakana nna uresi'alakana, rákana: ―¡Ttu tsa utua nuná! ¡Betá nuná lo ya kurusi! Pilato‑ni nna bekabina, rana kana: ―¿Si utáya nu rinnabia gele‑ni lo ya kurusi? Ka nu loni ge ka bixxudiha nna bekabikana geni, rákana: ―Ri'itu lanúru attu nu rinnabia ge ri'itu do, sunruba César‑ni dointu.
JOH 19:16 Aníha uka nna bote Pilato‑nie lasi nákani kini utákane lo ya kurusi. Lakana nna dechekana Jesús‑ni.
JOH 19:17 Jesús‑ni nna nuje kurusi geeha birie die ttu latti ata tee láni Gólgota len tisa hebreo. (“Gólgota” dienna innána bega iki nu yatti.)
JOH 19:18 Niha betákane lo ya kurusiha. Betágabakana a chupa ka nubiyú lo ka ya kurusi, ttu ttukana utákana daka lhitte, labie nna betákane lagwi ge ka nuha.
JOH 19:19 Pilato‑ni benna lo ttu breta betákana lo ya kurusiha daka xaliekie. Lo bretaha dia ra: “Jesús ge Nazaret, nu rinnabia ge ka benne Israel.”
JOH 19:20 Ixe ka nu Israel‑ni belabakana nu dia lo bretaha, kumu ata betákana Jesús‑ni lo ya kurusiha gaxxaba re nuha ro'o yiesiha lhe kumu ka letraha ankakana len tisa hebreo lhe latín lhe griegu lhe.
JOH 19:21 Laxkala ka nu loni ge ka bixxudi ge ka nu Israel‑ni, rákana Pilato‑ni: ―Bittuba a bedelhalu lo breta‑na: “Nu rinnabia ge ka benne Israel.” A bedelhabalu loni: “Nu rana: Neti ankaa nu rinnabia ge ka benne Israel.”
JOH 19:22 Ttaka Pilato‑ni nna rana kana: ―Neti nu chiga benia, benia.
JOH 19:23 Iki de chi betá ka soldaduha Jesús‑ni lo ya kurusiha, nianna tti bedaxxukana ka xoeha nna benkana ka nuha ttapa lha'a. Ttu ttu lha'a ka nuha ulha ttu ttu ka soldaduha. Bedaxxugabakana lari nu nukue lo liaha, ttaka kumu labí tiyya nuha, suna ttu lhaaba anka itú nuha,
JOH 19:24 de nuha nna ka soldaduha ra luesikani: ―Labí itsúri'i nuní. Suertiba udelhari'i geni, kini nuxari'i eya'an lenri'i lari‑ni. Aníha uka kini gwado tisa ge nu dia lo ka yetsi ge Tata Do Yebáha ata ra: “Belha'abakana ka xoaha lhe bedelhabakana suerti gekani lhe.” Aníha‑ba ben ka soldaduha.
JOH 19:25 Gaxxaba ata taa Jesús‑ni lo ya kurusiha du nan geeha lhe xila nan geeha lhe María nuila ge Cleofas‑ni lhe María Magdalena‑ni lhe.
JOH 19:26 Tti bilani Jesús‑ni nan geeha due niha, kwe'e benneha nna dúgaba ttu ka benne rudhetinieha, delába benne rakarunie geeha, nianna tti ree nan geeha: ―Nana, ne xi'inluha du naa.
JOH 19:27 Nianna tti redeabie benne rudhetinieha: ―Ne nan gelu du naa. Debá la'ania nna deche benne rudhetinieha nan ge Jesús‑ni lisieha.
JOH 19:28 Iki de nuha nna kumu chiba yu Jesús‑ni deki iyába nu chi ga'anna akaha, chiba benie nuha, de nuha nna kini sado tisa ge nu ra lo ka yetsi ge Tata Do Yebáha, nianna ree: ―Rebisia inda.
JOH 19:29 Niha du ttu kanti ta'a vinu idí lhe'eni. Bedokana ttu xunu lo ttu iyyaxtila, nianna begi'akana xunuha vinuha nna tti besigakana nuha ro'e.
JOH 19:30 Tti chi u'uye vinu idíha, nianna ree: ―Chi uluxa iyá nu chi ga'anna unia. Nianna tti bodetta ikie nna bechú lebie.
JOH 19:31 Kumu chi galá bisia sá tti rese'e tse ka nu Israel‑ni kini attu sáha‑ba nuha chi ga'akana laní Pascua, de nuha nna ka nu loni gekaniha labí raka lekani eya'an ka benne yattiha lo ka ya kurusiha la sá reyaka lekaniha kumu la sáha anka sá laní xxeniru. Aníha uka nna ugíakana unnabakana len Pilato‑ni kini kinkana yaga lhe'e ni'a ka benneha kini ila'a lhe'e ka sitta ni'akeha nna echidakana ke lo ka ya kurusiha.
JOH 19:32 Ka soldaduha nna ugíakana ulha'akana lhe'e ka sitta ni'a ttu ka nu taa len Jesús‑ni lo ka ya kurusiha, nianna tti bedeyekikana bedelha'akana lhe'e ka sitta ni'a attu nuha.
JOH 19:33 Ttaka tti ubigakana ata taa Jesús‑ni nna bilákinna chiba utti benneha. De nuha nna labíru ulha'akana lhe'e ka ni'eha.
JOH 19:34 Ttaka ttu ka soldaduha nna bega'ana iyya tutsa dennaha lhitte, nianna biria tteba reni lhe inda lhe.
JOH 19:35 Benne rigixxi'abie nuní anke benne bilánie nu ukaha nna rigixxi'abe nu ankaba gwalí. Benneha yube deki nu gwalíba anka nu rinneeha kini anágaba lebi'i tsia lele ge nu rigixxi'eha.
JOH 19:36 Kumu aníha uka ki gwado tisa ge nu ra lo ka yetsi ge Tata Do Yebáha ata dia ra: “Ni ttú sitta lati benneha labí ilha'akana.”
JOH 19:37 Rágaba attu lisia lo ka yetsi ge Tata Do Yebáha: “Tse'ebakana ugíakana benne utitikana lhitteha.”
JOH 19:38 Iki de nuha nna José benne lhe'esi Arimatea ugíe gwannabe len Pilato‑ni kini ugwelhane elhide Jesús‑ni lo ya kurusiha kini ukatsie benneha. José‑ni uke ttu ka benne bedhetini Jesús‑ni, meskiba labí bele'e looe deki uke ttu ka nu bedhetini benneha kumu de rasinie ge ka nu loni ge ka nu Israel‑ni. Pilato‑ni nna gwa begwelhabana José‑ni kini dechebie benne yattiha.
JOH 19:39 Anágaba Nicodemo‑ni, delába benne ugíe ttu lo rela gwanne lenie Jesús‑ni, bisingaba benneha denie ttiba rerua (30) kilu seti nu rure ixixxi.
JOH 19:40 Laxkala José‑ni lhe Nicodemo‑ni lhe bottesike Jesús‑ni lhe'e ttu lari nu chi ulu'u taake seti nu rure ixixxiha. Benbake attiba chi labini ka benne Israel‑ni ruinke tti rukatsike ka benne yatti geke.
JOH 19:41 Ata betákana Jesús‑ni lo ya kurusiha, niha tee ttu yu yadakinna ka ya xixxi loni. Lhe'e yuha do ttu baa kubi, ttu baa lanú nu chi bigatsi lhe'eni.
JOH 19:42 Niha‑ruba bekatsikana Jesús‑ni, kumu de chi ga'a sá tti reyaka le ka benne Israel‑ni lhe kumu yieru baaha‑ruba nuha do gaxxa ata uttieha.
JOH 20:1 La sá tti bedú ni'a xumanuha, delába duminku, dila tteba gwankaru chulha ugía María Magdalena‑ni gwalannina lo baaha. Tti bilenna chi bitua íyya yaya ro'o yieru baaha,
JOH 20:2 nianna ruxunnibana beyekina besinna ata do Simón Pedro‑ni lhe attu ka benne bedhetini Jesús‑ni, delába benne ukarunie geha, nianna tti utixxi'enna ka benneha, rana ke: ―Chiba bebeakana Tata Xisiha lhe'e yieru baaha nna labí yutu gá gwattixxakane.
JOH 20:3 Pedro‑ni lhe attu benneha nna bexunni ttebake diake ata do yieru baaha.
JOH 20:4 Tu tulapaba diake ruxunnike, ttaka attu benneha nna unerube lo Pedro‑ni, laxkala benneha bisine lade'a tte ro'o yieru baaha.
JOH 20:5 Tti bisine ro'o yieru baaha nna biyette beká loe lhi'u, niha‑ba bilánie ka lari bitesi benneha, ttaka labí uta'abie lhi'u.
JOH 20:6 Tti chi bisin Simón Pedro‑ni nna uta'a ttebe lhe'e yieru baaha nna bilánie ka lari bitesi benneha se'ekana niha.
JOH 20:7 Lari nu bitesi iki Jesús‑ni nna labí re nuha ata se'e adí ka lariha, ta subila tesi nuha rena.
JOH 20:8 Nianna tti uta'agaba benne bisin lade'a tte ro'o yieru baaha. Tti ute'eha nna bilánie iyá nu chi ukaha, nianna tti ugía lebie.
JOH 20:9 Kumu lake labí chi ute dákanie nu dia lo ka yetsi ge Tata Do Yebáha ata ra deki teeki eyadha ben benneha lagwi ge ka benne chi uttiha.
JOH 20:10 Nianna tti beyekike besinke lhe'e yo'o ata reya'ankeha.
JOH 20:11 María‑ni nna sa dube ro'o yieru baaha ribesie. Laka due ribesie nna biyette beká loe lhe'e yieru baaha.
JOH 20:12 Nianna bilánie chupa ka anjeli ge Tata Do Yebáha se'eke ata utta Jesús‑ni, nukuke xo sitsi. Ttúbie re daka ata utta ikieha nna attubie re daka ata use'e ka ni'eha.
JOH 20:13 Nianna tti belisake María‑ni, ráke bie: ―¿Beaka ribesilu xa nuila? Lee nna ree ka benneha: ―Ribesia kumu bebeabakana Tata Xisi to kia nna labí yua gá gwattixxakane.
JOH 20:14 Nuha‑ba ree nna tti bodeki loe daka kwe'ebie, nianna bilánie Jesús‑ni due niha, ttaka labí yue deki Jesús‑niba nuha.
JOH 20:15 Jesús‑ni nna ree bie: ―¿Beaka ribesilu xa nuila? ¿Nú regilalu? María‑ni nna ukanie ganna nu ruyúna lo yu ata yada ka ya xixxiha‑ba nuha. De nuha nna ree nuha: ―Ganna luba dechelu benneha xa tata, utixxi'a gá gwattixxalue kini echea bie.
JOH 20:16 Jesús‑ni nna ree: ―María. María‑ni nna bodeki loe unnebie tisa arameo, ree: ―¡Raboni! (“Raboni” dienna innána maestru.)
JOH 20:17 Jesús‑ni nna rabie María‑ni: ―Bittu udaxxulu neti kumu labí chi beyapia ata do Tata kiaha. Beyyala nna usi ka betsi to kiaha, delába ka benne bedhetiniaha, usi ke: “Chiba eya'aya ata do Tata kiaha, benne ankagabe Tata geleha. Benneha anke Diosi kia nna ankagabe Diosi gele.”
JOH 20:18 Nianna tti deyya María Magdalena‑ni kini kixxi'anie ka benne bedhetini Tata Xisiha deki chi bilánie benneha lhe utixxi'agabanie ka benneha iyá nu ra Tata Xisiha bie lhe.
JOH 20:19 Tti chi ulha sá bedú ni'a xumanuha, ka benne rudhetini Jesús‑ni yayabakanie yo'o ata tupakeha de rasikanie ge ka nu loni ge ka nu Israel‑ni. Nianna tti uka xxe Jesús‑ni nna udúbie lagwi geke nna rabie ke: ―¡Bittu gasinle! ¡Xen su lasi gwaltse'e!
JOH 20:20 Nuha‑ba ree nna tti bele'enie ke ka neeha lhe bele'enie ke lhitteha lhe. Ka benne rudhetinieha nna ittaba bedú leke tti bilákanie Tata Xisiha.
JOH 20:21 Nianna tti redea Jesús‑ni ke attu libe: ―¡Xen su lasi gwaltse'e! Kumu anába attiba udhelha Tataha neti, anágaba neti idhelhaa le kini kixxi'ale ka tisa kia‑ni.
JOH 20:22 Nuha‑ba rabie nna tti belubie ikike nna rabie ke: ―Gwalidhí Espíritu ge Tata Do Yebáha.
JOH 20:23 Ka benne dhile elha xen lasi ge ka tulha ruinke, gwadígaba Tata Do Yebáha elha xen lasi ge ka benneha nna ka benne abittu dhile elha xen lasi geke, anágaba Tata Do Yebáha labígaba dhibie elha xen lasi ge ka benneha.
JOH 20:24 Ttu ka benne tsi'inu (12) rudhetini Jesús‑ni, benne tee lábie Tomás, benne rágabake Kwachi, benneha lanúbie tee tti bele'e lo Jesús‑ni len adí ka benneha.
JOH 20:25 Delola nna adí ka benneha utixxi'akanie Tomás‑ni, ráke bie: ―Chi bilentu Tata Xisiha. Ttaka Tomás‑ni nna bekabie geke, ree: ―Ganna abíba iláti ka lasi nábie ata biyada ka clavuha lhe ganna abíba uga'a xubenáya ata biyada ka nuha lhe anágaba ganna abíba uga'a xubenáya lhe'e yieru do lhitteha, la'ania nna labí tsia lasia gele.
JOH 20:26 Xxunu (8) ubisa chi ute tti uka nuha, nianna dedetupa ka benne rudhetini Jesús‑ni lhe'e yo'oha. La'ania nna gwa duba Tomás‑ni lenke. Dedeyayabakanie yo'oha, ttaka Jesús‑ni uka xxebie nna udúbie lagwi geke nna begwebie ke padiuxi nna ree ke: ―¡Xen su lasi gwaltse'e!
JOH 20:27 Nianna tti rabie Tomás‑ni: ―Belanni ka lasi náya‑ni lhe kwittaa‑ni lhe. Belhí nálu nna bega'a xubenálu lo ka gwe kia‑ni nna ugía lelu, bittu akalu nu a ria leni.
JOH 20:28 Tomás‑ni nna bekabie ge Jesús‑ni, ree bie: ―Lu baninlu neti lhe ankalu Diosi kia lhe.
JOH 20:29 Jesús‑ni nna ree Tomás‑ni: ―Ria lelu kumu de chi bilenlu neti, ttaka karubáru ka benne bittu chi bilákanie neti nna gwa riaba leke.
JOH 20:30 Ixeeru ka milagru ben Jesús‑ni arlo ka benne rudhetinieha, ka nu labí diakana lo yetsi‑ni,
JOH 20:31 ttaka ka nu chi dia lo yetsi‑ni, ukakana lo yetsi‑ni kini lebi'i tsia lele deki Jesús Xi'in Tata Do Yebáha anke Cristu lhe kini de tsia lele ge benneha nna gwaka benbale ttu dia lii arlo Tata Do Yebáha.
JOH 21:1 Iki de nuha nna bodole'e lo Jesús‑ni attu libe len ka benne rudhetinieha ro'o indatoo tee láni Tiberias. Aní uka nuha:
JOH 21:2 du Simón Pedro‑ni lhe Tomás benne rágabakana Kwachi lhe Natanael ge lhe'esi Caná nu re daka Galilea lhe se'egaba ka xi'in Zebedeo‑ni lhe a chupa ka benne rudhetini Jesús‑ni. Turo'oba se'e iyábake niha.
JOH 21:3 Simón Pedro‑ni nna ree ka benneha: ―Tsiaya sadaxxua belha. Ka benneha nna ráke bie: ―Ri'itu dhágabatu. Nianna diake ugwapike lo barcu daa niha, ttaka loolhaha nna birula belha biyaxxukanie.
JOH 21:4 Tti chi daa tsaniha nna uka xxe Jesús‑ni ro'o indatooha, ttaka ka benne rudhetinieha nna labí yuke deki labie nuha.
JOH 21:5 Jesús‑ni nna unnaba tise, rabie ke: ―Xi'ini to, ¿si bi gwa bedaxxule belha ki gori'i? Lake nna bekabike gebie, ráke: ―¡Birula xa tata!
JOH 21:6 Jesús‑ni nna ree ke: ―Gwaludelharuga yexxa gele‑na daka lhitta ben ge barcu‑na nna uyúrugale gudaxxubale belha. Aníha‑ba benke bedelhake yexxaha, ttaka tti chi ebeake nuha, bi reyadhakanie yexxaha de chi desá xxatta belha lhe'eni.
JOH 21:7 Nianna ttu ka benne rudhetini Jesús‑ni, benne rakarunie geeha, benneha ree Simón Pedro‑ni: ―¡Jesús benne anke Xxanari'iha‑ba nuná rinne! Suna biyienbin Simón Pedro‑ni deki Benneha‑ba nuha, beyoku tteba xoe kumu uleabe ka nuha ki renie sina. Nianna uta'a ttebe lhe'e indaha.
JOH 21:8 Adí ka benne rudhetinieha nna dedá lenke barcuha dena'ayake yexxaha desá tíbana nuha belha, kumu ttiba ttu gayua (100) metru riyasa eriake ro'o indaha.
JOH 21:9 Tti beyadike lo barcuha dedáke, nianna betexxakake chi re gi. Lo giha chi xua ttu belha lhe chigaba tee yettaxtila lhe.
JOH 21:10 Jesús‑ni nna rabie ke: ―Gwataxxí ttu chupa ka belha ka nu si bedaxxule‑na.
JOH 21:11 Ugwapi tteba Simón Pedro‑ni lo barcuha nna gwaleabie yexxaha ro'o indaha desá tí nuha ka belha xeni. Ttu gayua tsieyona bixxi tsunna (153) ka belhaha deyu'u lhe'e nuha. Meskiba ixe ka belhaha deyu'u, labí bisú yexxaha.
JOH 21:12 Jesús‑ni nna rabie ka benneha: ―Gwalibiga gwaligo ixtíle. Ni ttú ka benne rudhetinieha a reyaxakanie innaba tisake bie, gake bie: “Lu nna, ¿nú ankalu?” Kumu yúbake deki Jesús benne anka Xxanari'iha‑ba benneha.
JOH 21:13 Nianna tti ubiga Jesús‑ni bedaxxue yettaxtilaha nna utidhie benneha geke. Aníha‑gaba benie len ka belhaha.
JOH 21:14 Nuha beyonna lidú rule'e loe len ka benne rudhetinieha iki de chi beyaka banie lagwi ge ka benne chi uttiha.
JOH 21:15 Iki de chi beyaka uto ixtíkeha nna ra Jesús‑ni Simón Pedro‑ni: ―Simón xi'in Jonás, ¿si rakaruinlu kia tti ka nu se'e‑ni? Lana nna bekabina, rana: ―Ila xa tata. Lu gwa yúbalu gwa rakabati gelu. Jesús‑ni nna ree na: ―Biyú ka neru to kia‑ni ganna.
JOH 21:16 Nianna redeabie na attu libe: ―Simón xi'in Jonás, ¿si gwa rakinlu kia? Lana nna bekabina, rana: ―Ila xa tata. Lu gwa yúbalu gwa rakabati gelu. Lee nna redeabie na: ―Biyú ka neru to kia‑ni ganna.
JOH 21:17 Beyonna libeha redea Jesús‑ni na: ―Simón xi'in Jonás, ¿si gwa rakinlu kia? La'ania nna chi bedú si'ina le Pedro‑ni kumu de beyonna libela rinnaba tise, ree na: “Si gwa rakinlu kia?” Lana nna rane: ―Lu iyába gwa yúbalu xa tata. Lu yúbalu, gwa rakabati gelu. Jesús‑ni nna ree na: ―Biyú ka neru to kia‑ni ganna.
JOH 21:18 Netiru ria, tti ankalu kwitiha titúbalu redú tselu nna riabalu ataba rakaba lelu, ttaka ganna chi uxxuluha, la'ania nna udábalu ka nálu‑na nna attu benne subila odú tsebie lu nna ichebe lu ata labí ru'u lelu tsialu.
JOH 21:19 Tti unne Jesús‑ni aníha benna liibie gaxasina gatti Pedro‑ni. Len elhutti sate Pedro‑ni inná xxeni le Tata Do Yebáha. Nuha‑ba unnebie, nianna tti ree na: ―Utá tenalha neti.
JOH 21:20 Tti bodeki lo Pedro‑ni nna bilenna danalha ttu ka benne rudhetini Jesús‑ni, delába benne rakarunie geeha. Benneha‑gaba nuha udobie daka litta Jesús‑ni tti yu'uke go irseha nna unnaba tise Jesús‑ni, ree bie: ¿Nútu nuní utetu lu lasi ná ka nu uttikana luha, xa tata?
JOH 21:21 Tti bilani Pedro‑ni danalha benneha, nianna unnaba tisana Jesús‑ni, rane: ―Tata, nuní nna, ¿bíla sate nuní ganna?
JOH 21:22 Jesús‑ni nna bekabie geni, ree: ―Neti ganna rakaba lasia anába dhona aka benna axtaliba ganna chi esiayaha, lu nna bila elha ralhalu nna rinnaba tisalu. Utá tenalha neti.
JOH 21:23 Nuní uyu'u naga adí ka betsi to geri'iha nna ráke deki benneha labí gattie, ttaka Jesús‑ni laa rage Pedro‑ni deki benneha labí gattie, sinuki sun rabe na: “Ganna neti aka lasia anába dhona aka benna axtaliba ganna chi esiayaha, lu nna bila elha ralhalu nna rinnaba tisalu.”
JOH 21:24 Benne‑niba nuha bedhetini Jesús‑ni nna kwinaba labie rigixxi'e iyá nuní lhe benie na lo yetsi lhe. Ri'itu gwa yúbatu deki nu rigixxi'e‑ni ankaba nuní nu gwalí, labí ruin lebie.
JOH 21:25 Jesús‑ni ixeeru nu ben benneha. Ganna kua ttu ttu ka nu benieha tsiakana lo yetsi, neti rakati labí akani yiesi lo yu‑ni tsu'u ka yetsi ka nu tsia lokani iyá nu benieha. Amén.
ACT 1:1 Lo yetsi nu sisi'a tte benia ttuha xa tata Teófilo, lo nuha utixxi'aya ge iyá tte nu udulo Jesús‑ni benie lhe iyá tte nu bele'enie ka benne lhe
ACT 1:2 axtaliba tti chi bisia sá beyapie deyye yebáha. Attili lani eyapie eyye, la'aniali chi bixúnie Espíritu ge Tata Do Yebáha kini bodha'ane bixa anka nu uin ka apóstoal, delába ka benne chi bekweeha.
ACT 1:3 Len ka apóstoal‑gaba nuha bele'e lo Jesús‑ni ixe lidú iki de tti chi uttieha. Aníha benie kini bela'a deki gwalí reki benbe. Delo chua (40) ubisaha bele'e lobie lenke lhe utixxi'agabanie ke gasina ki akake benne innabia Tata Do Yebáha ke.
ACT 1:4 Attili sa doe len ka benneha chi utixxi'e rabie ke: ―Labí eriaxxile lhe'esi Jerusalén‑ni. Kwedabale axtaliba ganna chi udhelha Tataha benne chi rabie deki idhelheha. Neti chiba utixxi'ania le ge benne idhelheha.
ACT 1:5 Gwalí galá Juan‑ni suna len indaruba begadie ka benne; ttaka lebi'i nna chi tte dabigana ugadi Tata Do Yebáha le Espíritu geeha.
ACT 1:6 Ka benne tupa niha unnaba tisake Jesús‑ni, ráke bie: ―Tata Xisi to, ¿si nnanna chi uinlu kini ri'i ka benne Israel edulori'i innabiari'i attu libe?
ACT 1:7 Labie nna bekabie geke ree: ―Lebi'i labí elha ralhale unale bí sá lhe bí ura aka nuní, kumu sunruba Tataha chi ga'ananie nukaxa aka nuní.
ACT 1:8 Ttaka ganna chi bisia Espíritu ge Tata Do Yebáha latile, la'ania nna inná tsitsi lele. Nianna tti iriale tsiale kixxi'ale kia lhe'esi Jerusalén‑ni lhe lhe'e adíru ka yiesi se'e itúba daka Judea‑ni lhe daka Samaria‑ni lhe. Axtaba ata riluxa yiesi lo yu‑ni tsiale kixxi'ale kia.
ACT 1:9 Iki de chi rabie iyá nuha, nianna tti beyapie deyye yebáha. Lake nna rulannibake se'eke. Nianna tti bebe ttu bea, bebena ata deyyeha nna lanúrue bilákanie.
ACT 1:10 Sa se'elake rugíake deyya Jesús‑ni gwetsáha, nianna ttiruba chi uka xxe chupa ka benne biyú ata se'ekeha, nukuke ka xo sitsi.
ACT 1:11 Nianna tti ra ka benneha ke: ―Lebi'i benne ge Galilea, ¿beaka se'ele gwelanni gwetsáha? Ki yule la kwinaba Jesús benne ugwekie lagwi gele nna beyapie deyye yebáha, la benneha‑gaba nuha esiabie attu sá. Ttiba bilenle beyapie deyye, aníha‑gaba esiabie.
ACT 1:12 Nianna beyadi tteba ka apóstol ge Jesús‑ni iki I'iya Ata Daa Ka Ya Olivuha nna deyyake besinke lhe'esi Jerusalén‑ni. Jerusalén‑ni rena gaxxaba niha. Laxkala lattiba bedáke. Raxxíbana nu bedábakeha attiba chi ga'anna dháke lhe'e ka sá atti reyaka leke.
ACT 1:13 Tti besinke lhe'esiha, nianna beyapike lhe'e yo'o do gwetsá ata reya'an Pedruha lhe Juan‑ni lhe Jacobuha lhe Andrés‑ni lhe anágaba Felipe‑ni lhe Tomás‑ni lhe Bartolomé‑ni lhe Mateo‑ni lhe, anágaba Jacobo xi'in Alfeo‑ni lhe Simón, benne rágabakana Zelote lhe anágaba Judas xi'in benne tegaba lábie Jacobo.
ACT 1:14 Iyábake labí rudú siike, turo'oba rilhapike tisa rulisake Tata Do Yebáha, itupa lenke adíru ka benne nuilaha lhe anágaba María nan ge Jesús‑ni lhe ka betsieha lhe.
ACT 1:15 Ttu sá tupa ttiba ttu gayua galhia (120) ka betsi to geri'i, delába ka benne chi ria leke ge Jesús‑ni. Nianna tti udú lii Pedruha lagwi geke nna rabie ke:
ACT 1:16 ―Xa betsi to, teeba ki gwado tisa ge nu unne Espíritu ge Tata Do Yebáha lo ka yetsi geeha, tti bixúnie David‑ni kini unnena ge nu uni Judas‑ni, delába Judas nu uchena ka nu bedaxxukana Jesús‑ni.
ACT 1:17 Kumu lana ukana benne biselana ri'i. De nuha nna selagabana uinna sina nu chi ga'anna uinri'i.
ACT 1:18 ’Ttaka Judas‑ni len belhiu uxína ge nu satsa bennaha, len nuha uyo'ona ttu lo yu ata ugíana úda ikini lo yu nna bisú lhe'eni, nianna tti ure tinni ka tu'eniha.
ACT 1:19 Iyába ka nu lhe'esi Jerusalén‑ni binakana ge nu ukaha. Nianna utixxakana lá yu ata uttinaha Acéldama. Len tisa gekani dienna innána: Yu Ata Bilali Reni.
ACT 1:20 ’Ge Judas‑ni nuha rinne lo ka Salmo‑na ata dia ra: Lhe'e lisiniha sii siibaniba eyaka; lanú benne tse'e lhe'e nuha. Lhe rágaba lo ka Salmo‑na: Attu benne subila odaxxue sina geniha.
ACT 1:21 De nuha nna raka doelha odúri'i attu benne subi kini odaxxue ladi Judas‑ni, kini tsekie lenri'i kixxi'ari'i deki beyaka benba Jesús‑ni lo elhuttiha. Odúri'i ttu ka benne betenalhake ri'i itúba tti ugweki Jesús benne anke Xxanari'iha lenri'i, desdeba tti begadi Juan‑nie inda nna axtaliba tti beyapie deyye yebáha.
ACT 1:23 Nianna tti bekwekana chupa ka benneha: bekwekana José benne tegaba lábie Barsabás, benne rágabakana Justo. Bekwegabakana attu benne tee lábie Matías.
ACT 1:24 Nianna tti ulhapikana tisa len Tata Do Yebáha, rákane: ―Tata Xisi to, luba yulu ttixa anka lhe'e lasto ttu ttutu. Nnanna rinnabatu len kwinalu, delo chupa ka benne biyú se'e nii, ule'elu nú ka benne‑ni chi bekwelu
ACT 1:25 kini akake apóstol kixxi'ake ka tisa ge Jesús‑ni, uinke sina nu ralha Judas‑ni uinna. Kumu lana, de benna tulhaha, de nuha nna bennittiba sina geni. Laxkala diabana ataba ralhana tsiana.
ACT 1:26 Nianna tti bedelhake suerti kini ula'ana nuxa ka benneha saxxína. Nianna gwaxxíbana Matías‑ni. Laxkala la'ania tteba bisela Matías‑ni len ka benne sinea (11) anka apóstoal.
ACT 2:1 Tti bisia sá tti raka laní nu tee láni Pentecostés, la'ania iyába ka benne ria leke ge Jesús‑ni ttu sade'eba ta tupake.
ACT 2:2 Attiruba nna iyya suba leke uyu'u be gwetsáha ttiba ata daa ttu be idí. Aníha‑ba betá tsi'ini itúba lhe'e yo'o ata se'ekeha.
ACT 2:3 Nianna tti uka xxe ttiba ka belha ge gi nna ugwadhikana iki ttu ttuke.
ACT 2:4 La'ania nuha bisia Espíritu ge Tata Do Yebáha nna uyu'e lati iyábake. Nianna tti udulo ttebake unneke ka tisa subi; unneke kua beteba Espírituha inneke.
ACT 2:5 Lhe'esi Jerusalén‑nigaba se'e ttu chupa ka nu ankakana nu Israel, delába ka nu rudo tsitsirukana tisa ge Tata Do Yebáha. Ka nuha dákana lhe'e iyába ka yiesi se'e yiesi lo yu‑ni.
ACT 2:6 Tti biyienkinna uyu'u beha, nianna betupa ttebakana ata raka nuha, nna uka tébakinna kumu ttu ttukana biyienkinna rinne ka benneha ka tisa rinnekana lhe'e ka yiesi ata udákanaha.
ACT 2:7 Rugía ya'abakana lhe bebanabakinna tti biyienkinna nu rakaha, nianna rinnaba tisa luesikani, rákana: ―¿Laaba ka nu Galileaba iyá ka nu se'e gwenne nii?
ACT 2:8 ¿Galasina nna gwa riyienbinri'i rinnekana ka tisa rinneri'i lhe'e ka yiesi ata dari'iha?
ACT 2:9 Ri'i ankari'i ka benne dari'i daka Partia lhe daka Media lhe daka Elam lhe dari'i daka Mesopotamia lhe daka Judea lhe anágaba daka Capadocia lhe daka Ponto lhe anágaba ka benne se'e daka Asia lhe.
ACT 2:10 Dágaba ka benne se'e daka Frigia lhe ka benne se'e daka Panfilia lhe daka Egipto lhe ka benne daa daka Libia nu re gaxxaba ata re lhe'esi Cirene. Se'egaba ttu chupa ka benne dáke lhe'esi Roma, se'eke ttu satti nii. Ttu chupake ankake benne Israel nna attu chupake nna labí ankake benne Israel, ttaka nna beyakake nu Israel nna riagaba leke attiba ria le ka benne Israel‑ni.
ACT 2:11 Se'egaba ka benne daa daka Creta lhe daka Arabia lhe. ¡Iyábari'i ka benne dari'i ka daka niha, gwa riyienbinri'i rinne ka benne‑ni ka tisa rinneri'i, rigixxi'ake ge nu xxeni ruin Tata Do Yebáha!
ACT 2:12 Iyába ka benne se'e niha bebanabakanie, nigaba a yuke bixa ulaba leke. Nianna tti rinnaba tisa luesike, ráke: ―¿Bí diani iyá nu raka nii?
ACT 2:13 Ttaka adí ka nu se'e niha nna ruxisilakana, rákana: ―¡Dusibakin nuná!
ACT 2:14 Nianna tti udú lii Pedruha len a sinea (11) ka apóstol ge Jesús‑ni nna unnena idisa rana ka benne se'e niha: ―Lebi'i ka benne Israel lhe iyábale ka nu se'ele lhe'esi Jerusalén‑ni, gwaludoruga nagale nu innea kini unale bixa nuní raka nii.
ACT 2:15 Ka nu se'e‑ni laa dusigakin nuní, lebi'i nna rale deki dusikinna, ki si ankaruba retin jaa dila nuní.
ACT 2:16 Nnanna, nii chi rilenle raka nu utixxi'a Joel benne uke profeta ge Tata Do Yebáha itú nu reha, tti rabie:
ACT 2:17 Aní ra Tata Do Yebáha: “Ganna chi dabigana isia ka sá daluxaha, la'ania ugadia Espíritu kia‑ni lati iyábale ka benne se'ele yiesi lo yu‑ni. La'ania ka xi'in biyúleha lhe ka xi'iniunnáleha kixxi'akinna le nu raka lasia unale. Ka nu kwiti geleha nna unia kini ula'akinna ttu bixa. Anágaba ka tatuxtoo to geleha uingabaa kini itsiakanie ka ela.
ACT 2:18 La'ania ugadia Espíritu kia‑ni lati ka benne biyú lhe lati ka benne nuila lhe, delába ka benne ixúti ke kini kixxi'ake nu raka lasia una adí ka benne.
ACT 2:19 Yebáha unia kini aka ttu bixa, kini iláni ka benne nna ebanakanie geni: Yiesi lo yu‑ni nna unia kini ilali reni lhe iria gi lhe chadha seni lhe.
ACT 2:20 Tatubisa‑na nna echulha lobie, nanto beo‑na nna eyake xiná attiba reni. Iyá nuní aka atti lanila isia sá esia Tata Xisiha. Ttu sá xxeni nuha aka la'ania lhe ttu sá nu dika ebanani ka benne geni lhe,
ACT 2:21 nna iyába ka benne ganna innabake len Tata Xisiha, labie nna godilábe ke.”
ACT 2:22 ’Lebi'i xa benne Israel, ―ra Pedruha― gwaludoruga nagale nu upeya le: Lebi'i gwa yúbale, Tata Do Yebáha benie kini Jesús ge Nazaret‑ni benie ka milagru lhe benie adíru ka nu bebaninle geni lagwi gele. Iyá nuní benie kini bele'ebie deki lee udhelhe Jesús‑ni.
ACT 2:23 Benneha nuha betelee lasi ná ka nu ruin satsaha kini bettikane lo ya kurusiha. Ukaba attiba chi ga'anani Tata Do Yebáha aka.
ACT 2:24 Jesús‑ni nuha belhidha ben Tata Do Yebáha lo elhuttiha, bodilee bie lo elha disa biyúe ge elhuttiha, kumu elhuttiha labí udaana uin genie.
ACT 2:25 Ge Jesús‑ni nuha unne David‑ni lo ka yetsi ge Tata Do Yebáha, tti rana: Satíaba riláti Tata Xisiha danerue arloa. Labí ruxunnina kia bixa satea, kumu benneha daka ná benbaa due.
ACT 2:26 De nuha nna ittaba du lasia lhe de elha gwedeaka lasi nna rulhaa gebie lhe anágaba xen su lasiba dhoa lhe;
ACT 2:27 kumu lu xa Tata Xisi to kia, de chi ankaa benne chi ulesilu kini akaa gelu de nuha nna labí odha'anlu neti lhe'e yieru baaha, nigaba a ugwelhalu usu bela latia‑ni lhe.
ACT 2:28 Kwinabalu bele'enlu neti gasina aka bania ttu dia lii, lhe anágaba nna udú ittagabalu lasia de dulu len neti.
ACT 2:29 ’Betsi to, gwalugwelharuga kixxi'aya ge David benne uka xuttori'iha. Yule benneha uttibe nna bigatsibe. Loora nnanna sa rilábinri'i teeba baa ge benneha.
ACT 2:30 Ttaka David‑ni uka galána profeta lhe anágaba nna chigaba yuna deki Tata Do Yebáha chi bodha'an tsitsi tisa gebie, ree deki ttu ka benne datiake naha, ttu ka benneha akake nu innabia, attiba lana ukana nu unnabia.
ACT 2:31 Laxkala David‑ni la'aniali attisidiba chiba rilenna deki eyaka benba Cristuha lo elhuttiha. De nuha nna unnena rana, labí eya'an benneha yiesi elhuttiha lhe nigaba labí usu bela lati benneha lhe.
ACT 2:32 Gwalíba nna Jesús‑niba nuha belhidha ben Tata Do Yebáha lo elhuttiha nna iyábatu biyú lotu aníha‑ba uka.
ACT 2:33 Aníoka nna uxí lidhaka Jesús‑ni nna bisine udoe daka ná ben ge Tata Do Yebáha, nianna tti begwebie benneha Espíritu geeha, delába Espíritu nu chi rabie deki ugwebie Jesús‑ni. Espírituha nuní chi begadi Jesús‑ni latitu, de nuha nna riyieninle lhe rilenle nu raka nnanna.
ACT 2:34 Lebi'i gwa yúbale laa David‑niga nuha beyapi yebáha, kumu kwinaba lana unnena rana: Tata Do Yebáha ree Cristu benne runie neti mandaduha: “Utá udo daka ná bania.
ACT 2:35 Niiba dholu axtaliba ganna chi bese'a ka nu abittu raka uyúkana lu, kini lu nna ulealu ikikani.”
ACT 2:36 ’De nuha nna iyá ttele ka benne Israel, teeki una tsele deki Jesús benne betále lo ya kurusiha, benneha chi ben Tata Do Yebáha bie kini ake Xxanari'i lhe ake Cristu lhe.
ACT 2:37 Tti biyienkinna nu ra Pedruha nna ttiruba bega'a dina lhe'e lastokani, nianna tti unnaba tisakana benneha lhe adí ka apóstoal lhe, rákana ke: ―Betsi to, ¿bíla anka nu uintu ganna?
ACT 2:38 Pedruha nna bekabina gekani, rana kana: ―Gwalodúna le ge nu ruinle nna gwalodaxxu neda ge Tata Do Yebáha nna kua ttu ttule gwaligadi inda nna udettile lá Jesucristuha atti gadile indaha. Aníha kini dhi Tata Do Yebáha elha xen lasi ge ka tulha chi benle. Nianna tti utebie Espíritu geeha len lebi'i.
ACT 2:39 Espírituha nuha chi ra Tata Do Yebáha deki utebie gele lhe utebie ge ka xi'inle ka nu si daa lhe, anágaba nna utegabe Espírituha ge iyába ka benne se'e idittu, delába iyába ka benne gaxi Tata Do Yebaa benne anka Xxanari'iha.
ACT 2:40 Ixeba nu unne Pedruha rulisana ka benne se'e niha lhe rágabana ke: ―Gwalukwitta kwe'e ka nu ruin satsa se'e nnanna.
ACT 2:41 Aníoka nna ka benne ugía leke ge ka tisa unne Pedruha, ka benneha udibake inda nna la sáha tteba nna bisela ttiba a tsunna mili ka benne kubi. Biselake len ka benne chi ria leke ge Jesús‑ni.
ACT 2:42 Iyába ka benne chi ria lekeha gwa ruinbake nu rule'eni ka apóstoal ke. Ttu tsapaba se'e len luesike lhe turo'oba roke yetta lhe ttúba rinneke tti rilhapike tisa len Tata Do Yebáha lhe.
ACT 2:43 Iyába ka benne rasibakanie de rilákanie ixeba ka milagru lhe adíru ka nu rebanakanie geni ruin ka apóstol ge Jesús‑ni.
ACT 2:44 Iyába ka benne chi ria leke ge Jesús‑ni ttu tsapaba se'e len luesike lhe anágaba bixaba tee geke nna ge iyábake reyaka nuha.
ACT 2:45 Rutto'obake ka lo yu gekeha lhe adíru nu tee geke lhe, belhuha nna ritidhina geke kua riyasabani ttu ttuke.
ACT 2:46 Labí rudhanke, ttu ttu sába ritupake ata do yotuha lhe anágaba lhe'e ka yo'o gekeha itú iki itú leke ro len luesike yetta de elha gwedeaka lasi
ACT 2:47 lhe anágaba rulhagabake ge Tata Do Yebáha. Laxkala iyába ka nu lhe'esi Jerusalén‑ni rakakinna geke, lhe ttu ttu ságaba rutselaru Tata Xisiha adíru ka benne chi ga'ananie odilábie ke, rutsele ke len ka benne chi ria leke gebie.
ACT 3:1 Ttu sá ugwapi Pedruha dia lenna Juan‑ni ttiba tu retin tsunna nuha diakana ata do yotuha, kumu uraha rilhapi ka benne tisa len Tata Do Yebáha.
ACT 3:2 Ro'o yotuha do ttu nubiyú anka xii ka ni'ani. Aníha‑ba ankana attili ulinaha nna ttu ttu sába radokana na daka ata du puerta nu tee láni Puerta Nu Anka Latsiru. Radokana nuha niha kini rinnabana belhiu len ka benne ra'a lali'a ge yotuha.
ACT 3:3 Tti bilen nubiyúha Pedruha lhe Juan‑ni lhe diakana ga'akana lali'a ge yotuha, nianna tti unnena rinnabana kana belhiu.
ACT 3:4 Lakana nna belanni tsittabakana loni, nianna tti unne Pedruha, rana nubiyúha: ―¡Begía lotu!
ACT 3:5 Lana nna “O” ba rana begíana lokani nna ubedaba dona kini ugwekana na belhiu.
ACT 3:6 Ttaka Pedruha nna rana na: ―Neti labí belhiu kia tee kini utea gelu. Gutebaa len lu nu téruba kia. ¡Jesucristu ge Nazaret‑ni rudettia, udú lii nna udá!
ACT 3:7 Nianna tti bedaxxu Pedruha ná ben‑ni nna tti bedhú liina na. Looraha tteba nna bedá rea tteba lhe'e ka ni'aniha lhe bedá rea tteba lhe'e ka sitta dheti geniha lhe.
ACT 3:8 Nianna gintsaba udú liina nna udulo ttebana udána. Nianna tti uta'ana len ka Pedruha lali'a ge yotuha, ridábana lhe rigintsa ladhibana rulhana ge Tata Do Yebáha
ACT 3:9 nna iyába ka benne rilákanie chi redána lhe rulhana ge Tata Do Yebáha lhe,
ACT 3:10 bebanabakanie lhe uka tébakanie tti bilákanie nu ukaha, kumu beyakabiabakanie na. Labana nuha ridona ro'o yotuha rinnabana belhiu daka ata du puerta nu tee láni Puerta Nu Anka Latsiru.
ACT 3:11 Nubiyú chi beyakaha labí rudhanna Pedruha lhe Juan‑ni lhe danalhabana kana. Ka benne se'e niha nna iyábake rebanabakanie ge nu ukaha nna bigaa ttebake diake ata se'ekanaha ata daa kweredori nu tee láni Kweredori ge Salomón.
ACT 3:12 Tti bilani Pedruha chi tupa xxatta ka benne, nianna tti rana ke: ―Lebi'i benne Israel, ¿beaka rebana xxattinle ge nu rilenle‑ni? Lhe ¿beaka doba lole ri'itu lhe? ¿Si rakinle deki ri'ibatu beyointu nubiyú‑ni de ra xxeni letu lhe o de ankatu benne rudo tsitsirutu tisa ge Tata Do Yebáha?
ACT 3:13 Ko'o labí ri'itu, sinuki Tata Do Yebaa benne anke Diosi ge Abraham‑ni lhe ge Isaac‑ni lhe ge Jacob‑ni, lhe ge adíru ka benne ukake xuttori'iha lhe, benneha‑ba benie kini uná xxeni le Jesús benne anke Xi'inieha, delába Jesús benne bedaxxuleha nna gwaga'alee lo ná ka uxtisiha, nianna labí uxielhale kini olhaa Pilato‑nie, tti rana deki olhábane.
ACT 3:14 Ttaka lebi'i nna ulu'ula ni'ale benne runie nu dika ixúha lhe anke ge Tata Do Yebáha lhe. Betse'e loona, lebi'i, nu ben elhuttiha‑la unnabale kini bodilaa Pilato‑ni
ACT 3:15 nna benne runie kini aka benri'i ttu dia liiha‑la bettile, ttaka Tata Do Yebáha belhidha benbe benneha lagwi ge ka benne chi uttiha. Ri'itu biyú lotu iyá nu ukaha.
ACT 3:16 Laxkala nubiyú du nii, nu ankabienle‑ni lhe rilenle‑ni lhe, de ugía leni ge Jesús‑ni, de nuha nna benie kini bedú tsitsina. De ugía leni gebie, de nuha nna chi beyaka chána. Lebi'i gwa ruyúba lole deki chi beyakana.
ACT 3:17 ’Neti yu xeabaa xa betsi to, lebi'i lhe ka nu rinnabia gele‑na lhe, de abíba yule nna bedhakale Jesús‑ni aníha.
ACT 3:18 Ttaka Tata Do Yebáha aníha benie kini uka nu chi unnebie itú ttuha. Bixúnie iyá ka profeta geeha kini ka benneha unneke, ráke deki Cristu idhelheha teeki gatti benneha.
ACT 3:19 Laxkala lebi'i gwalodúna le ge nu ruinle nna gwalodaxxu neda ge Tata Xisiha kini oxíe ka tulha gele‑na. La'ania nna unie kini lebi'i saría tsena le
ACT 3:20 nna idhelhe Cristuha gele, delába Jesús benne chi ga'ananie idhelheha.
ACT 3:21 Ttaka teeki dho Cristuha kwede yebáha axtaliba ganna chi bisia sá ose'e tse Tata Do Yebáha iyá tte nu se'e. Akaba atti tteba chi ree akaha. Ka profeta geeha, ka benne use'e itú nu reha, ka benneha bixúnie kini utixxi'ake ge nu akaha,
ACT 3:22 attiba Moisés‑ni rana ka benne uka xuttori'iha: “Tata Do Yebaa benne anke Xxanari'iha, labie unie kini lagwi gebale kweabie ttu benne ake profeta attiba neti. Udole tisa ge iyá tte nu inná benneha.
ACT 3:23 Ttaka nu abittu udona tisa ge benneha, ttu tsaba chadi gaa nuha, labíru aka iselana ka benne chi ankake ge Tata Do Yebáha.”
ACT 3:24 ’Debá Samuel‑ni nna, iyába ka profetaha unneke ge nu chi raka nnanna.
ACT 3:25 Lebi'i dhile nu chi ra ka benneha lhe anágaba ralhagabale dhile nu chi ra Tata Do Yebáha Abraham‑ni ugwebie ka xuttori'iha. Tti bodha'an tsitsi tisa gebie len Abraham‑ni, la'ania rabie na: “Ka benne datialuha, ka benneha ixúti kini unia ki saría tsena iyá ka benne se'e yiesi lo yu‑ni.”
ACT 3:26 Laxkala tti belhidha benbie Xi'inieha lo elhuttiha, len lebi'i nuha lade'a tte udhelhe benneha kini aka lenie le, kini anáchu nna ttu ttule udhanle nu satsa ruinle‑na.
ACT 4:1 Sa dula Pedruha lhe Juan‑ni lhe rinne lenke ka benne tupa ro'o yotuha, ttiruba chi bisin ka bixxudiha, dia lenkana nu baninna ka nu rise'e ruyúkana ro'o yotuha. Chegabakana ka nu tee lákani saduceo.
ACT 4:2 Risa'akinna kumu de Pedruha lhe Juan‑ni lhe rule'ekanie ka benne lhe rágabake ka benneha deki tti beyaka ben Jesús‑ni lo elhuttiha, nuha benna liina deki ka benne chi uttiha gweyaka benbake.
ACT 4:3 Nianna tti bedaxxu ttebakana ka Pedruha nna bega'akana ke lisiyya, ttaka kumu de chi galá dia ralha nuha, de nuha nna attu sáliba bebeakana ke.
ACT 4:4 Ttaka ixe ka benne biyienkanie nu rigixxi'a ka benneha ge Jesús‑ni, nianna ugía tteba leke gebie nna biselarula ttiba a gayu mili ka benne subi. Sun tterula ka benne biyúha nuha bibaba.
ACT 4:5 Beyeki sáha nna betupa ka nu rinnabia ge ka nu Israel‑ni lhe'esi Jerusalén‑ni, lenkana ka benneola gekaniha lhe ka nu rule'ekinna ka benne nu ra lo bia bennabi bodha'an Moisés‑ni lhe.
ACT 4:6 Iyágaba Anás nu anka bixxudi xeniha lhe Caifás‑ni lhe Juan‑ni lhe Alejandro‑ni lhe adíru ka nu raka luesi bixxudi xeniha lhe, iyábakana bitupakana niha.
ACT 4:7 Nianna udhelhakana ka nu gwaleakana Pedruha lhe Juan‑ni lhe, gwaleakana ke lhe'e lisiyyaha, nianna tti bese'ekana ke lagwi gekani. Nianna tti unnaba tisakana ke, rákana ke: ―Lebi'i nna, ¿núla betena lo neda gele kini ruinle nuní lhe núla udelhana le lhe?
ACT 4:8 Pedruha nna yu'u galába Espíritu ge Tata Do Yebáha itúba latie, nianna tti unnebie ree: ―Gwaluyúruga xa benne rinnabia ge Israel lhe lebi'i ka tata benneola lhe,
ACT 4:9 lebi'i rinnaba tisale ri'itu ge nu tse bentu len benne rani‑ni. Rinnaba tisale gasina uka kini beyaka benne‑ni.
ACT 4:10 Nnanna nna raka letu unale lhe unagaba iyá tte ka benne Israel‑ni lhe, Jesucristu ge Nazaret, benne betále lo ya kurusiha, delába benne belhidha ben Tata Do Yebáha lagwi ge ka benne chi uttiha, benneha nuha betebie lo neda getu kini bentu ki beyaka nubiyú du arlole‑ni.
ACT 4:11 Jesucristuha‑gaba nuha anke attiba íyya nu rikua ttu yo'o. Lebi'i nna ankale attiba ka nu rukuakana íyya ge yo'oha nna ulu'u ni'ale Jesús benne anke íyyaha. Ttaka nnanna benneha‑la nuha chi bisine uke íyya nu rixúru.
ACT 4:12 Lhe anágaba lanú attu nuxa gwaka geni odilána ri'i, kumu lanú attu benne chi udhelha Tata Do Yebáha yiesi lo yu‑ni kini odilábie ri'i, sunruba Jesús‑ni.
ACT 4:13 Tti bilani ka nu rinnabiaha deki labí rasin Pedruha lhe Juan‑ni lhe, anágaba nna yúgabakana deki labí yetsi raka geke lhe labí tte detike lhe, nianna bebanabakinna nna tti ute dákinna deki gwalíba ugweki ka benneha len Jesús‑ni.
ACT 4:14 Gwea nna ata se'ekanaha‑gaba du nubiyú chi beyakaha, laxkala labí tee ro'okani bixa innákana.
ACT 4:15 Nianna tti bebeakana ka Pedruha ata se'ekanaha nna suna labakana beya'ankana rinne len luesikani,
ACT 4:16 rákana: ―¿Bíla anka nu uinri'i len ka nuní ganna? Kumu iyába ka benne se'e Jerusalén‑ni chi yuke deki gwalíba chi ben ka nuní ttu milagru nu dika ebaninri'i geni. Ri'i nna labí dika innári'i deki labí lii ben ka nuní milagruha.
ACT 4:17 Sun tteruba ttu nu uinri'i, uniasibinri'i kana kini udhankana abitturu kixxi'akana ge Jesús‑ni len adíru ka benne. Aníha kini abitturu chadhi ka tisa ge Jesús‑ni.
ACT 4:18 Aníoka nna beyaxikana ka Pedruha nna ttu tsaba besunakana rákana ke: ―Abitturu kixxi'ale ge Jesús‑ni lhe abittugaba ula'aruinle ka benne ge nuná lhe.
ACT 4:19 Ttaka Pedruha lhe Juan‑ni lhe bekabilake gekani ráke kana: ―Naba se'ele, gwalinnáchu, ¿si tseba anka ganna ttixka gelale udotu tisa attichula ge Tata Do Yebáha?
ACT 4:20 Kumu ri'itu labí aka getu udhantu a kixxi'atu ge nu chi biyienintu lhe ge nu chi bilentu lhe.
ACT 4:21 Ka nu rinnabiaha nna bedhaka disakana ka Pedruha, nialiba nna tti bolhákana ke. Bolhákana ke kumu de labí gwaxxakakana bixa ge ugwekana ke elha disa lhe anágaba de rixxusagabakinna ge ka benne, kumu iyábake rebanabakanie ge Tata Do Yebáha de nu chi ukaha, nianna tti ráke: ―¡Xxeniba ra le Tata Do Yebáha!
ACT 4:22 Aníha ráke kumu nubiyú beyaka len milagruha chiba du nuha gwa tee chua (40) ida.
ACT 4:23 Iki de chi begwelha ka nu rinnabia ge ka nu Israel‑ni deyya Pedruha lhe Juan‑ni lhe, nianna tti besinke ata se'e adí ka benne chi ria leke ge Jesús‑ni nna utixxi'akanie ka benneha ge iyá nu ra ka nu loni ge ka bixxudiha lhe nu ra ka benneola gekaniha lhe.
ACT 4:24 Ka benneha nna, iki de chi binake iyá nuha, nianna turo'oba unneke len Tata Do Yebáha, ráke: ―Tata Xisi to, kwinalu benlu yebáha lhe yiesi lo yu‑ni lhe indatooha lhe. Anágaba bengabalu iyá tte ka nu rapa ka nuní lhe.
ACT 4:25 Lu bixuinlu ro'o David benne bixúe lo sina geluha, kini unnebie ree: ¿Beaka risa'a xxattakin nu dittu‑na, lhe beaka rulaba lekani nu abittu dika ixú lhe?
ACT 4:26 Ka nu rinnabia‑na lhe ka nu ankakana ka nu loni se'e yiesi lo yu‑ni lhe, ka nuná turo'oba riakana redú disakana lo Tata Xisiha, lhe lo Cristu benne udhelheha lhe.
ACT 4:27 ’Gwalí galá, ki nuha ben Herodes‑ni lhe Poncio Pilato‑ni lhe, lakana lenkana ka nu dittuha lhe iyágaba ka nu Israel‑ni lhe, bitupakana lhe'esi‑ni kini bebi'i nookana Xi'inlu Jesús‑ni, delába benne chi ulesilu kini ake Cristu.
ACT 4:28 Aníha benkana kini uka iyá nu chi bodha'anlu lhe iyá chi ralu aka lhe.
ACT 4:29 Nnanna xa Tata Xisi to, biyúruga bí ruinkana rudhaka disakana ri'itu. De nuha nna rinnabatu len kwinalu, aka lenlu ri'itu, ri'itu ka benne ruintu sina gelu, rinnabatu lenlu kini abittu gasintu tti kixxi'atu ka tisa gelu‑ni.
ACT 4:30 Lu nna bele'e nu xxeni ra lelu kini eyaka ka benne rani lhe kini aka ka milagru lhe adíru ka nu ebanintu geni lhe. Iyá nuní aka kumu Xi'inlu Jesús, benne chi ulesiluha, benneha unie kini aka iyá nuní.
ACT 4:31 Tti chi uluxa ulhapike tisa len Tata Do Yebáha, nianna tti bixú ata tupakeha. La'ania nuha bisia Espíritu ge Tata Do Yebáha uyu'e itúba latike nna labí rasikanie tti rigixxi'ake ka tisa ge Tata Do Yebáha.
ACT 4:32 Iyába ka benne chi ria leke ge Jesús‑ni, ttúba du leke lhe ttúba rulaba leke lhe. Ni ttúke labí innáke: “Suna kibaa anka nu tee‑ni.” Sinuki iyába nu tee geke, ge iyábake reyakana.
ACT 4:33 Ka apóstoal nna tsitsiba ra leke rigixxi'ake ráke: ―Beyaka benba Jesús benne anke Xxanari'iha lo elhuttiha. Anágaba lhe yalhá redá le Tata Do Yebáha raka lenie iyába ka benne chi ria leke Jesús‑ni.
ACT 4:34 Laxkala ni ttú ka benne selake ka benneha, labí riyasakanie ttu bixa kumu ata se'e lo yu geke lhe o ata sia lisike lhe, ka benneha rutto'oke ka nuha nna belhiu ge nu rutto'okeha nna
ACT 4:35 ruteke nuha len ka apóstoal, kini ka benneha nna rigidhike nuha ge ka benne kua riyasabani ttu ttuke.
ACT 4:36 Aníha‑ba ben ttu benne tee lábie José. Benneha datiabie Leví. Labie dabie daka lo yu nu tee láni Chipre. Nuha rena lagwi indatooha. Benneha nuha utixxa ka apóstoal lábie Bernabé. Bernabé dienna innána benne rodú tsebie le ka benne.
ACT 4:37 Benneha tee ttu lo yu gebie nna betto'obie nuha. Belhiu ge yuha nna betebie na len ka apóstoal.
ACT 5:1 Ttaka udogaba attu benne biyú utta lábie Ananías lenie benne nuila geeha. Benne nuilaha utta lábie Safira. Ka benneha betto'oke ttu lo yu geke
ACT 5:2 nna beteke belhiu ge yuha len ka apóstol ge Jesús‑ni. Ttaka benne nuilaha yube deki utuaba benne biyúha iki belhuha; labí iyá nuha betebie len ka apóstoal.
ACT 5:3 Pedruha nna rabie benne biyúha: ―Ananías, ¿beaka uxielhalu ge nu xxegwiha nna ruinlu dhi yielu Espíritu ge Tata Do Yebáha, delo nna utualu iki belhiu ge yu betto'oluha?
ACT 5:4 ¿Laaba ganna gebalu yuha nna ganna betto'olu nuha nna gwa ukaba gelu bixaba ben lenlu belhuha? ¿Beaka besi'inulu nna benlu aní? Laa rakaginlu len ka benne nuní ben lelu; len Tata Do Yebáha nuní ben lelu.
ACT 5:5 Tti biyienin Ananías‑ni nu ra Pedruha, nianna ubixxie nna utti ttebe. Iyába ka benne binake ge nu ukuha, yalhá usi xxattakanie.
ACT 5:6 Nianna tti ubiga ttu chupa ka nu kwiti nna bottesikana benneha lari nna gwakatsikane.
ACT 5:7 Atti chi ute ttiba tsunna uraha nna lengwa chi bisin Safira, benne nuila ge Ananías‑ni. Labí yu benneha bixa chi uka.
ACT 5:8 Pedruha nna unnaba tise benne nuilaha, ree bie: ―Utixxi'a, ¿si ttanába betto'ole yuha? Benne nuilaha nna bekabie ree: ―¡Ttaná galá!
ACT 5:9 Pedruha nna rabie benneha: ―¿Beaka turo'oba ugíalu nubiyú geluha benle ku'ule prueba Espíritu ge Tata Xisiha? Biyúruga, ne ka nu gwakatsikana nubiyú geluha chi dedá eta'a ro'o yo'o‑ni. Anágaba lu ichegabakana lu takatsigabakana lu.
ACT 5:10 Looraha tteba nna bedebixxi lo Safiraha arlo Pedruha nna bedeatti ttebe. Atti chi beta'a ka nu kwiti gwakatsikana benne nubiyú geeha, nianna bedelákinna chi dedete benne nuilaha bedeattie. Nianna dedeche ttebakane nna gwadikatsikane ata bigatsi nubiyú geeha.
ACT 5:11 Iyába ka benne chi ria leke ge Jesús‑ni lhe iyába ka nu binakana ge nu ukaha, yalhá usi xxattakinna.
ACT 5:12 Ixeeru ka milagru lhe ixeeru ka nu rebaninri'i geni ben ka apóstol ge Jesús‑ni lhe'esi Jerusalén‑ni nna iyába ka benne chi ria leke ge Jesús‑ni nna ttúba ritupake ro'o yotuha ata daa kweredori nu tee láni Kweredori ge Salomón.
ACT 5:13 Ttaka adíke nna labí reyaxakanie tatselake ka benneha, meskiba iyábake gwa ru'uba leke nu ruin ka apóstoal.
ACT 5:14 Laa kiga de nuha nna adikala dia raniru ka benne biyú lhe ka benne nuila ria leke ge Jesús benne anke Xxanari'iha.
ACT 5:15 Axtaba ro'o ka nedaha ribeake ka benne raniha, rigixxake ka benneha lo ka ta'a kini ganna chi tte Pedruha nna kwadiba lixxínani tsu'u lo ttu chupake kini eyakake.
ACT 5:16 Anágaba ka benne ge adí ka yiesi se'e gaxxaba ka niha, ixe juisiru ka benneha riake lhe'esi Jerusalén‑ni, richeke ka benne rani gekeha lhe ka benne yu'u espíritu satsa latikeha lhe, iyába ka benneha gwa reyakabake.
ACT 5:17 De nuha nna bixxudi xeniha lhe iyába ka nu gwa se'ekana lennaha lhe, delába ka nu tee lákani saduceo, ka nuha juisia betía di lekani ka apóstol ge Jesús‑ni.
ACT 5:18 Nianna tti bedaxxukana ke nna bedheakana ke lisiyya.
ACT 5:19 Ttaka ttu anjeli ge Tata Xisiha lo relaha gwadhalie lisiyyaha kini bebeabie ka benneha, nianna tti ree ke:
ACT 5:20 ―Gwaleyya nna gwaltsia ro'o yotuha nna gwalikixxi'en ka benne se'e niha gasina udaxxuke neda ge Jesús‑ni kini gatta elha nabani geke ttu dia lii.
ACT 5:21 Lake nna bedoba nagake ge nu ra benneha. Laxkala ugwani dilaha nna dila tteba chi uta'ake lali'a ge yotuha nna udulo ttebake rule'ekanie ka benne tupa niha. Bixxudi xeniha lenna ka nu gwa se'ekana lennaha, bottupa ttebakana ka nu ruin elhuxtisi ge ka nu Israel‑ni lhe iyába ka benneola gekaniha lhe, nianna tti udhelhakana ka nu tsiakana kini saleakana Pedruha lhe Juan‑ni lhe'e lisiyyaha.
ACT 5:22 Ttaka tti bisin ka nu diakana ubea ka benneha, nurua ka benneha gwaxxakakana niha. Nianna tti beyeki ttebakana gwattixxi'akana rákana:
ACT 5:23 ―Tsitsiba yaya lisiyyaha tti bisintuha nna ka nu se'e ruyúkana ro'o nuha, niha‑ba se'ekana, ttaka tti udhalitu uta'atuha, nurua ka nu tee lisiyyaha gwaxxakatu.
ACT 5:24 Bixxudi xeniha lhe nu baninna ka nu rise'e gweyú ro'o yotuha lhe anágaba adíru ka nu loni ge ka bixxudiha lhe, tti biyienkinna nu ra ka nuha, nianna rugía ya'abakana, rákana: ―¿Galabasina lhuxa loo nuní?
ACT 5:25 Nuha‑ba rákana se'ekana, ttiruba chi uka xxe ttu benne bisine, ree kana: ―Nela ka nu utixxale lisiyyaha chi se'e ro'o yotuha rule'ekinna ka benne ka tisa ge Jesús‑ni.
ACT 5:26 Nianna dia tteba nu baninna ka nu rise'e gweyú ro'o yotuha itupa lenna ka gwensina geniha gwaxxíkana ka benne utta lisiyyaha. Labí bedhaka disakana ke, kumu rasibakinna kini ka usia ka benne tupa niha kana íyya.
ACT 5:27 Tti chi besin lenkana ka benneha arlo ka nu runi elhuxtisiha, nianna tti unne bixxudi xeniha rana ke:
ACT 5:28 ―¿Laaba ttu tsa chi ratu le deki labíru kixxi'ale ge nubiyú rekile rigixxi'ale‑na? Ttaka lebi'i nna adíla ruinle. Gwaluyúruga iyába ka nu se'e Jerusalén‑ni chi bega'ale tisa gele‑na ikikani. Gwea nna ruinle udelhale kwe'etu deki ri'ibatu bettitu nubiyú nu rekile rigixxi'ale gen‑na.
ACT 5:29 Pedruha lenie adí ka apóstoal nna bekabike geni, ráke: ―Ri'itu rakarula doelha udotu tisa ge Tata Do Yebáha attichula ge ka benne se'e yiesi lo yu‑ni.
ACT 5:30 Tata Do Yebaa benne anka Diosi ge ka benne uka xuttori'iha, benneha belhidhe Jesús‑ni lo elhuttiha, delába Jesús benne bettileha nna betálee lo ya kurusiha.
ACT 5:31 Benneha nuha ulhapi Tata Do Yebáha lebie nna bedoe bie daka ná benbie kini ake nu loni ge ka benne lhe odilábie ke lhe. Aníha kini ri'i ka benne Israel odúna ri'i nna odaxxuri'i neda ge Tata Do Yebáha, kini anáchu nna ixú elha xen lasi ge ka tulha ruinri'i.
ACT 5:32 Ri'itu lhe Espíritu bete Tata Do Yebáha ge ka benne gwa rudobake tisa gebie, iyábatu biyú lotu ge iyá nu ukaha.
ACT 5:33 Tti biyienkinna nu ra ka benneha, nianna bituxxu xxattakinna nna ruinkana uttikana ke.
ACT 5:34 Ttaka ttu fariseo nu tee láni Gamaliel selana lhe'e ka nu runi elhuxtisiha, lana ankana ttu ka nu rule'ekinna ka benne nu ra lo bia bennabi bodha'an Moisés‑ni nna iyába ka nu lhe'esiha ria lekani na. Nuha udú liina nna rana ka nu se'e niha ebeakana ka apóstoal satti ata se'ekanaha.
ACT 5:35 Nianna tti unnena, rana: ―Xa benne Israel, gwaluyú gele ganna bixa udhakale ka nubiyú‑na.
ACT 5:36 Yule itú ttuha uleagaba lo nu utta láni Teudas. Nuha la'ania rana deki lana ankana ttu nu ra xxeni leni. Laxkala ttiba ttu ttapa gayua (400) ka nubiyú gwanalhakana na. Ttaka bettibakana Teudas‑ni nna iyába ka nu gwanalhakana naha nna ugwadhibakana nna siiba beyaka.
ACT 5:37 Iki de nuha nna bedebeagaba lo Judas ge Galilea‑ni tti reyadha lá ka benne geri'i. La'ania Judas‑ni udaagabana benoo xanni ixeru ka benne. Ttaka bedeottigabakana na nna iyába ka nu gwanalhakana naha nna bedeadhigaba ka nuha.
ACT 5:38 De nuha nna raka lasia upeya le: ka nubiyú se'e naa, gwalolhaa ka nuná. Bittu bi udhakale kana, kumu ganna tisa nu rigixxi'a ka nuná, gwa ankabana ge ka benne se'e yiesi lo yu‑ni, la'ania nna gwese'e looba ka tisa‑na.
ACT 5:39 Ttaka ganna ankaba ka tisa‑na ge Tata Do Yebáha, la'ania nna lebi'i labí dhaale utse'e loole kana. Gwaluyú gele, ni kina len Tata Do Yebáha‑la nuní yu'ule utilha.
ACT 5:40 Lakana nna gwa bedoba nagakani ge nu ra Gamaliel‑ni kana. Niala nna tti beyaxikana ka apóstoal nna uyakana ke. Iki de chi uyakana keha nna tti besunakana rákana ke: ―Bitturu kixxi'ale ge Jesús‑ni. Iki deliba chi rákana ke aníha, nianna tti bolhákana ke.
ACT 5:41 Lake nna redeakabakanie beriake arlo ka nu runi elhuxtisiha. Redeakakanie kumu Tata Do Yebáha rugwelhe ki rudhaka disakana ke de rigixxi'ake ge Jesús‑ni
ACT 5:42 nna ttu ttu sába se'eke lhe'e yotuha lhe ttu ttu sába ritupake lhe'e ka yo'o geke lhe, labí rudú siike rule'eke lhe a rigixxi'ake deki Jesús‑ni anke Cristu.
ACT 6:1 La'ania, kumu de chi dia rani ka benne ria leke ge Jesús‑ni, de nuha nna ka benne rinneke tisa griegu chi uduloke rinne bexeake ge ka benne rinne tisa hebreo. Ráke deki ka nuila bidabi geke, delába ka benne rinneke tisa griegu, labí ridí ka benneha ixeni nu ritidhi roke ttu ttu sá.
ACT 6:2 Aníha uka nna bottupa ka benne tsi'inu (12) anka apóstoal iyába ka benne chi ria leke ge Jesús‑ni. Nianna ráke ka benneha: ―Labí aka ganna ri'itu udú siitu a kixxi'arutu ka tisa ge Tata Do Yebáha nna sunruba ugidhi nu go ka benne nuila bidabi‑ni tsekitu.
ACT 6:3 De nuha nna xa betsi to, gwalukwe a gasi ka benne biyú ka benne selake len lebi'i, ka benne gwa dika uxxen leri'i geke lhe rapa elha rieni lhe, anágaba nna ankagabake benne yu'u Espíritu ge Tata Do Yebáha itú latike. Gwalukwe ke kini use'eri'i ke ki kidhike nu go ka benne nuila bidabi‑ni,
ACT 6:4 kini ri'itu nna udoruna letu ilhapitu tisa len Tata Do Yebáha lhe kixxi'arutu ka tisa geeha lhe.
ACT 6:5 Iyába ka benneha gwa bokinniba ikike ge nu ra ka apóstol‑ni ke, nianna tti bodúke Esteban benne chi ria tsitsi lebie ge Tata Do Yebáha lhe chi yu'u Espíritu geeha itúba latie lhe, anágaba bodúgabake Felipe lhe Prócoro lhe Nicanor lhe Timón lhe Pármenas lhe Nicolás benne anke ge lhe'esi Antioquía‑ni, benne beyakagabe nu Israel lhe riagaba lebie attigaba ria le ka benneha lhe.
ACT 6:6 Nianna tti betso duke ka benneha arlo ka apóstoal. Ka apóstoal nna ulhapike tisa len Tata Do Yebáha nna uxxua náke iki ka benneha.
ACT 6:7 Ka tisa ge Tata Do Yebáha nna adíla diaru ka benneha radhike. Anágaba ka benne chi ria leke ge Jesús‑ni yalhá chi rani xxattake lhe'esi Jerusalén‑ni. Anágaba ka bixxudiha, ixegabakana ugía lekani ge Jesús‑ni.
ACT 6:8 Esteban‑ni nna tsitsiba ra leni lhe bete tamaba Tata Do Yebáha elha tse geni kini ruinna ka milagru lagwi ge ka benne lhe adíru ka nu rebanakanie geni lhe.
ACT 6:9 Ttaka ttu chupa ka nu Israel ka nu dákana lhe'e yo'o ata rudhetikana ka tisa ge Tata Do Yebáha, delába ka nu tee lákani Ka Benne Chi Reyeki Lhaa, ka nuha itupa lenkana ka nu dákana daka Cirene lhe daka Alejandría lhe, anágaba ka nu dákana daka Cilicia lhe daka Asia lhe, iyábakana bese'e disakana lo Esteban‑ni.
ACT 6:10 Ttaka labí udúkana loni kumu Espíritu ge Tata Do Yebáha‑ba rugwebie na elha rieni kini rinnena.
ACT 6:11 Ka nuha ulu'ukana belhiu lasi ná ttu chupa ka nu innákana deki chi biyienkinna rigua Esteban‑ni bala'ana ge Moisés‑ni lhe ge Tata Do Yebáha lhe.
ACT 6:12 Aníoka nna betsatsakana ka benne lhe ka benneola gekaniha lhe, anágaba ka nu rule'ekinna ka benne nu ra lo bia bennabi bodha'an Moisés‑ni lhe. Nianna tti ugíakana gwadaxxukana Esteban‑ni nna chekana na gwaga'akana na lo ná ka nu runi elhuxtisi ge ka nu Israel‑ni.
ACT 6:13 Utilagabakana ka nu ben lekani kini besiakana ikini rákana: ―Nubiyú du nii birula rudú siina riguana bala'ana ge yotu le'a geri'i‑ni lhe ge bia bennabi geri'i‑ni lhe.
ACT 6:14 Kumu chi biyienintu rana: “Jesús ge Nazaret‑ni utse'e loobana yotu‑ni lhe otseabana ka nu labinri'i ruinri'i, delába ka nu bodha'an Moisés‑ni uinri'i.”
ACT 6:15 Ka nu runi elhuxtisiha nna, iyábakana belannikana lo Esteban‑ni, nianna tti bela'akinna loni ttiba lo ttu anjeli ge Tata Do Yebáha.
ACT 7:1 Nianna tti unnaba tisa bixxudi xeniha Esteban‑ni, rana na: ―¿Si gwalí nu ra ka nuní?
ACT 7:2 Lana nna bekabina, rana: ―Xa betsi to lhe xa tata benneola lhe, gwaludoruga nagale kia. Tata Do Yebáha benne ra xxeni leeha, labie bele'e lobie lani xxudiri'i Abraham‑ni atti sa do benneha Mesopotamia atti lanila isiabie dhoe lhe'esi Harán‑ni.
ACT 7:3 La'ania unnebie ree Abraham‑ni: “Bedhá ikilu lhe'esi gelu‑na lhe ka benne raka luesilu‑na lhe, biria nna ugía lo yu ata ule'enia lu.”
ACT 7:4 Aníha uka nna biria Abraham‑ni lo yu ge ka nu Caldea‑ni nna die gwadhoe daka Harán. Iki de chi utti tata geeha, nianna che Tata Do Yebáha bie kini bisiabie nna udoe lo yu ata se'ele nnanna.
ACT 7:5 La'ania labí begwe tte Tata Do Yebáha bie niru latti lo yu ata dhobie. Ttaka bodha'an tsitsi tisa gebie len benneha, ree bie: “Gutebaa lo yu‑ni gelu lhe ge ka xi'inlu lhe ge ka xidholu ka nu si daa.” Aníha ra Tata Do Yebáha Abraham‑ni la'ania, meskiba tti ree benneha aníha lanú xi'in Abraham‑ni chi tee.
ACT 7:6 Anágaba lhe rágabe Abraham‑ni deki ka xi'inie lhe ka xidhoe lhe, delába ka benne datiake bie, ka benneha akake benne dittu tse'eke lo yu ge ka nu dittu. Ka nuha nna urenkana ke sina lhe uyú satsakana ke delo ttapa gayua (400) ida.
ACT 7:7 Ttaka rágaba Tata Do Yebáha bie: “Neti utea elha disa ge yiesi nu urenna ka benne geluha sina. Iki de nuha‑liba nna tti eriake niha, nianna tti esiake nii nna uinke le'a kia.”
ACT 7:8 Bodha'angaba Tata Do Yebáha len Abraham‑ni kini ichúe lo bela lati ka benne biyú. Aníha kini eya'an tsitsi tisa nu begwekeha. Laxkala atti chi uli xi'in biyú Abraham‑ni, delába Isaac‑ni, atti chi ankinna xxunu ubisaha, la'ania nna uchú Abraham‑ni lo bela latibi. Aníha‑gaba bedhaka Isaac‑ni xi'inni Jacob‑ni. Jacob‑ni nna aníha‑gaba bedeonna len ka xi'inniha, delába ka benne tsi'inu (12) ukake xxudi ka benne uka xuttori'iha.
ACT 7:9 ’Ka xi'in Jacob‑ni, delába ka benne uka xuttori'iha, ka benneha betía di leke betsike José‑ni, nna betto'oke benneha len ka nu chekane daka Egipto. Ttaka Tata Do Yebáha nna gwa udúbe len José‑ni
ACT 7:10 lhe gwa bodilágabe benneha lo iyába nu gwateeha lhe begwegabe bie elha rieni lhe. Bengabe kini Faraón nu unnabiana Egipto‑ni uyu'u leni nu ben José‑ni. De nuha nna Faraón‑ni bedúna José‑ni kini innabie ka yiesi se'e daka Egipto‑ni lhe innabiagabe ka nu riben sina lhe'e yo'o ge Faraón‑ni lhe.
ACT 7:11 ’La'ania nuha bisia ttu ubina itúba lo yu ge Egipto‑ni lhe ge Canaán‑ni lhe. Ttu elha disa tsitsi nuha biyú ka benne la'ania. Laxkala ka benne uka xuttori'iha labíru nu goke tee.
ACT 7:12 Tti bina Jacob‑ni deki daka Egipto, niha tee xuxtila, nianna udhelhe ka xi'in biyúeha kini ugíake niha, delába ka benne ukake xuttori'iha.
ACT 7:13 Ka benneha ttiliba chi diake Egipto‑ni nu berupa libeha, la'anialiba nna chi utixxi'en José‑ni ke deki labana nuha anka betsike. La'anialiba nna tti ubina Faraón‑ni gá daka daa José‑ni lhe nú benne raka luesini lhe.
ACT 7:14 Iki de nuha nna tti ben José‑ni doelha gwaxí ka betsiniha tata gekeha, delába Jacob‑ni, itupa lenie iyá ka benne raka luesieha. Gayuna bixxi tsinu (75) anka de iyáke.
ACT 7:15 Aníoka nna bisin Jacob‑ni daka Egipto nna niha‑ba uttie, lhe niha‑gaba utti ka xuttori'iha lhe.
ACT 7:16 Nianna dechekana ka sitta gekeha nna besin lenkana ka sittaha daka Siquem. Niha‑ba bigatsike lhe'e baa ata uyo'o Abraham‑ni, delába baa nu betto'o ka xi'in benne tee lábie Hamor.
ACT 7:17 ’Atti chi dabigana aka nu chi ra Tata Do Yebáha Abraham‑ni, la'ania yalhá chi ugwani ka benne geri'i se'e Egipto‑ni. Ixebake chi raka.
ACT 7:18 Tti chi uta'a attu nu unnabiana Egipto‑ni, nuha labíru benbiana José‑ni.
ACT 7:19 Nu rinnabiaha besi'inuna nna bedhaka xiina ka benne uka xuttori'iha, bedo doelhana ke kini udhá ikike ka nuto chichi to gekeha kini gattikabi.
ACT 7:20 La'ania nuha uli Moisés‑ni. Labi ukabi ttu binto nu uyu'u le Tata Do Yebáha. Ka tata nan gebiha gatsiba biyúke bi lhe'e yo'o gekeha delo tsunna beaha.
ACT 7:21 Ttaka tti abitturu uka igatsibi lhe'e yo'o gekeha, nianna bedhába ikike bi. Nianna tti bedí xi'iniunná Faraón‑ni bi kini bodixenna bi attisidiba xi'inbani ukabi.
ACT 7:22 Aníha uka nna bideti Moisés‑ni nna uxína elha rieni ge ka nu Egipto‑ni. De nuha nna tsitsiba unnena lhe tsitsiba uka elha ruin geni lhe.
ACT 7:23 ’Tti chi ukinna chua (40) idaha, la'ania bebeki leni salannina ka benne geniha, delába ka benne Israel‑ni.
ACT 7:24 Ttaka tti bilenna daa ttu nu Egipto rayana ttu ka benne geniha, nianna diana gwadilána benneha nna bettibana nu Egiptoha.
ACT 7:25 Aníha benna kumu rakinna kini ka benne Israel‑ni tte dákanie deki lana ixúni Tata Do Yebáha kini odilána ke. Ttaka lake nna labí belaba leke aníha.
ACT 7:26 Beyeki sáha nna gwadixxakagaba Moisés‑ni a chupa ka benne Israel yu'uke utilha. Lana nna latsiruba betsilana ke. Nianna tti rana ke: “Ki betsi to gebale raka, ¿beaka yu'ule ritilhale?”
ACT 7:27 Ttaka nu rayana attu benneha nna besigalana Moisés‑ni nna rana na: “Ttinka lu, ¿nú bedúna lu kini innabialu lhe uinlu elhuxtisi getu lhe?
ACT 7:28 ¿Si redeongabalu edeottilu neti attigaba benlu len nu Egipto bettilu nnayaha?”
ACT 7:29 Tti biyienin Moisés‑ni nu ra nuha, nianna bexunni ttebana diana lo yu tee láni Madián, ttiba ttu nu dittu ukana udona niha. Niha uka chupa xi'inni.
ACT 7:30 ’Iki de tti chi bedeaka chua (40) idaha, la'ania nna bele'e lo ttu anjeli ge Tata Do Yebáha len Moisés‑ni lo yu bisi ata do i'iya Sinaí‑ni. Bele'e loe lhe'e ttu belha ge gi riria lhe'e ttu xxiti re niha.
ACT 7:31 Moisés‑ni nna bebanabinna tti bilenna belhaha. Nianna tti ubigana kini ilá tsenna nu raka niha. Nianna tti biyieninna tsi'i Tata Xisiha rabie na:
ACT 7:32 “Neti ankaa Diosi ge ka benne ukake xuttoluha. Neti ankaa Diosi ge Abraham‑ni lhe ge Isaac‑ni lhe ge Jacob‑ni lhe.” Moisés‑ni nna bixidi ttebana kumu de usi xxattinna nna birua beyaxinna ulannina lhe'e xxitiha.
ACT 7:33 Nianna ra Tata Xisiha na: “Ulea ni'alu ka gwaracha gelu‑na, kumu ata dulu‑ni, yu le'aba anka benne‑ni.
ACT 7:34 Neti chi biláti elha disa nu ruyú ka benne kia se'e Egiptoha lhe chi biyienti ribesi gweke lhe. Nnanna nna chi ugwadia kini odiláya ke. De nuha nna utá kini idhelhaa lu kini tsialu Egipto‑ni.”
ACT 7:35 ’La Moisés‑nigaba nuha bedú disakana loni tti rákana na: “Ttinka lu, ¿nú bodúna lu kini innabialu ri'itu lhe uinlu elhuxtisi getu lhe?” La lagabana nuha udhelha Tata Do Yebáha kini akana nu innabiana ka benne Israel‑ni lhe odilána ke lhe. Anjeli bele'e loe lhe'e xxitiha, benneha nuha bixúni Tata Do Yebáha kini uka Moisés‑ni nu innabia lhe nu odilána ka benne lhe.
ACT 7:36 Lana nuha benna ka milagru lhe adíru ka nu rebaninri'i geni tti bebeana ke lo yu ge Egipto‑ni lhe tti beteke lo indatoo nu tee láni Indatoo Xiná lhe tti ugwekike lo yu bisiha delo chua (40) idaha lhe.
ACT 7:37 ’Moisés‑nigaba nuha rana ka benne Israel‑ni: “Tata Do Yebaa benne anke Xxanari'iha, benneha unie kini iria ttu profeta lagwi gele attiba neti. [Ge benneha udo nagale.]”
ACT 7:38 La Moisés‑nigaba nuha udúna len ka benne ukake xuttori'iha tti bitupake kwe'e i'iya Sinaí‑ni lo yu bisiha, delába tti unne len anjeli ge Tata Do Yebáha na iki i'iyaha nna begwebie na ka tisa ka nu dika uinke kini aka benri'i ttu dia lii. Lana nna bettena ka tisaha lenri'i.
ACT 7:39 ’Ttaka ka xuttori'iha labí uka leke udoke tisa ge Moisés‑ni, sinuki ulu'ula ni'ake na nna ukala leke eyekike Egiptoha.
ACT 7:40 Nianna tti ráke Aarón‑ni: “Beni ka diosi geri'i kini enerukana lori'i eya'ari'i, kumu Moisés nu bebeana ri'i Egiptoha, labí yuri'i bí gwatena.”
ACT 7:41 Nianna ben ttebakana ttu gwirri ge oru nna bettikana ka nimala kini betekana úna ge gwirriha. Ttu laní xxeniba benkana de elha gwedeaka lasi ge gwirri nu ben labakanaha.
ACT 7:42 De nuha nna bedhába iki Tata Do Yebáha kana lhe begwelhabe kana benkana le'a ge ka beli sia gwetsá. Benbakana attiba ra lo ka yetsi bodha'ana ka profetaha. Lo ka yetsiha bodha'an ka benneha ka tisa unne Tata Do Yebáha, tti ree: Lebi'i benne Israel, delo chua (40) ida tti ugwekile lo yu bisiha, la'ania labí bettile ka nimala kini utele úna kia.
ACT 7:43 Betse'e loona, yo'o lari ge diosi nu tee láni Moloc, nuha‑la dechele, anágaba lhe dechegabale beli ge diosi nu tee láni Refán. Ka diosi decheleha kwinaba lebi'i benle kana kini bedú xibile arlokani. Laxkala de nuha nna neti kweabaa le ata se'ele‑na nna nu reha udelhaa le, adírula idittu udelhaa le attichula ata re Babilonia‑ni.
ACT 7:44 ’Ka benne uka xuttori'iha tti ugwekike lo yu bisiha gwa udoba yotu nu ukana ge lariha lenke. Nuha benna liina deki gwa udoba Tata Do Yebáha lenke la'ania. Yotu nu ukana ge lariha, ukabana atti tteba ra Tata Do Yebáha Moisés‑ni tti rabie na deki teeki uinna nuha atti tteba anka nu chi bilennaha.
ACT 7:45 La yotu lariha‑gaba nuha deche ka benne uka xuttori'iha tti deyyake len Josué‑ni nna beta'ake lo yu ge ka nu abittu ankakana nu Israel. Ka nuha‑gaba nuha bebea Tata Do Yebáha arlo ka benne ukake xuttori'iha. Yotu lariha debá atti udo David‑ni gwa udoruna.
ACT 7:46 Kumu David‑ni de ukana benne uyu'u le Tata Do Yebáha, de nuha nna unnabana lenie kini ugwelhe na udona ttu lisie ata dika uin ka benne datiake Jacob‑ni le'a gebie, ttaka labí benna yotuha.
ACT 7:47 Salomón‑niliba bedona lisieha.
ACT 7:48 Meskigaba udo yotuha, ttaka Tata Do Yebaa benne ra xxeni leeha, labí dika dho benneha lhe'e yo'o nu runi ka benne len ni'a náke, ttiba ra profeta geeha:
ACT 7:49 Yebáha ankana ata doa rinnabiaya, ra Tata Xisiha, yiesi lo yu‑ni nna ankana ata rudú ni'aya. Nianna, ¿gasina nuha nna rálale deki udole ttu yo'o kia? Gwalinnáruga, ¿si gwaka tsa ttu lisia ata dhoa eyaka lasia?
ACT 7:50 Ki kwinaba neti benia iyá nu se'e yiesi lo yu‑ni.
ACT 7:51 ’Ttaka lebi'i nna labí rieninle ―ra Esteban‑ni―. Yietiba ruinle abittuba ria lele. Lebi'i ruinbale attiba ben ka xuttoleha, rese'e disalale lo Espíritu ge Tata Do Yebáha.
ACT 7:52 Ttiba ben ka xuttoleha, iyába ka benne uka profetaha gwanalhakana ke berio lákana ke lhe bettibakana ka profeta ka benne utixxi'ake deki isia ttu benne unie attiba ankaba geni. Nnanna nna benne utixxi'ake geeha, chiba bita benneha yiesi lo yu‑ni, lebi'i nna betelalee lasi ná ka nu bedaxxukaneha lhe benlale kini bettikane lhe.
ACT 7:53 Lebi'igaba nuha uxíle bia bennabi ge Tata Do Yebáha nu bete ka anjeli geeha len lebi'i, ttaka nna abígaba rudole tisa geni.
ACT 7:54 Tti biyienkin nu ruin elhuxtisiha iyá nu ra Esteban‑ni, nianna bisa'a xxattakinna, roniba lo layakani.
ACT 7:55 Ttaka Esteban‑ni yu'u galába Espíritu ge Tata Do Yebáha itúba latini. Nianna tti belhidha loni belannina yebáha nna bilenna xiani ge Tata Do Yebáha lhe bilágabinna Jesús‑ni due daka ná ben ge Tata Do Yebáha.
ACT 7:56 Nianna tti unnena, rana: ―¡Gwalugíaruga! Neti riláti du yali yebáha lhe rilágabati Jesús‑ni, due daka ná ben ge Tata Do Yebáha.
ACT 7:57 Ttaka lakana nna bettola nagakani, nianna tti uresi'akana idisa nna bebi'i noo iyábakana Esteban‑ni.
ACT 7:58 Uleakana Esteban‑ni ro'esiha nna besiakana na íyya, nna ka nu rusiakana ikini deki bixa bennaha, ka nuha uleaniba xokani nna bese'ekana ka xokaniha arlo ttu nu kwiti tee láni Saulo,
ACT 7:59 nianna tti besiakana Esteban‑ni íyya. Laka yu'ukana rusiakana na íyyaha, lana nna duna rinnena, rana: ―¡Tata Jesús to kia, chi dedáya len kwinalu! ¡Bedíttu neti!
ACT 7:60 Nianna tti bedú xibini nna unnena idisa, rana: ―¡Tata xisi to kia, bittu ku'inlu tulha nu ruin ka nuní! Nuha‑ba rana nna uttina.
ACT 8:1 Saulo‑ni nna uyu'uba leni bettikana Esteban‑ni. La sá tti bettikana Esteban‑ni, la'ania udulokana berio lákana ka benne chi ria leke ge Jesús‑ni se'eke lhe'esi Jerusalén‑ni. Ttu elha disa xxeni nuha uka la'ania. Iyábake ugwadhike diake itúba daka Judea‑ni lhe daka Samaria‑ni lhe. A sunruba ka apóstol ge Jesús‑ni beya'an lhe'esi Jerusalén‑ni, labí biriake.
ACT 8:2 La'ania ttu chupa ka benne biyú, ka benne gwa rudo tsitsiruke tisa ge Tata Do Yebáha, ka benneha gwalhidhake Esteban‑ni nna uresi xxattake geni tti gwakatsike naha.
ACT 8:3 Sauloha nna danalhabana ruinna utse'e loona ka benne chi ria leke ge Jesús‑ni. Kua suba ra'ana lhe'e ka yo'o, kini rache na'ayana ka benne nuila lhe ka benne biyú lhe, nianna tti radheana ke lisiyya.
ACT 8:4 Ttaka ka benne biriake lhe'esi Jerusalén‑ni, delába ka benne ugwadhiha, ka benneha ataba diake rigixxi'ake ka tisa ge Jesús‑ni.
ACT 8:5 Felipe‑ni nna diana bisinna lhe'e ttu ka yiesi xeni ge Samaria‑ni. Niha udulona rigixxi'enna ka benne se'e niha ge Cristuha.
ACT 8:6 Ka benneha nna, tti riyienkanie nu ra Felipe‑ni lhe tti rilákanie ka milagru ka nu rebaninri'i geni ruinnaha, nianna iyábake ritupake rudo tsitsiba nagake ge nu rigixxi'anaha.
ACT 8:7 Ixeba ka benne yu'u espíritu satsa latike, gwa reyakabake nna ka espíritu satsaha nna ribesi'abakana tti reriakana latike. Anágaba nna ixegaba ka benne daa yatti latike lhe ka benne ridá natsa lhe gwa reyakagabake.
ACT 8:8 Laxkala ttu elha gwedeaka lasi xxeni nuha uka lhe'esi Samaria‑ni la'ania.
ACT 8:9 Ttaka lhe'esiha‑gaba do ttu nubiyú tee láni Simón. Ttuha‑li chi ruin nuha ge elha gwesá nna gwa udaabana uxí yiena ka benne ge Samaria‑ni, kini ugía leke geni. Ruinna deki ankana ttu nu ra xxeni leni.
ACT 8:10 Gebani rudo naga iyá xeabake, ka benne elha lhe ka binto lhe, nianna ráke: ―Benne‑ni nuní rape nu xxeni ra le Tata Do Yebáha.
ACT 8:11 Rudo tsitsiba nagake geni kumu isába chi ridí yiena ke kini ria leke ge ka elha gwesá ruinnaha.
ACT 8:12 Ttaka tti biyienkanie rigixxi'a Felipe‑ni gasina akake benne innabia Tata Do Yebáha ke lhe rigixxi'agabana ge Jesucristuha lhe, la'ania nuila lhe nubiyú ka benneha ugía leke geni, nianna tti udike inda.
ACT 8:13 Iyágaba Simón‑ni ugía leni ge nu ra Felipe‑ni nna udigabana inda. Iki de tti chi udina indaha nna udulona gwanalhana benneha. Ataba diabie diana nna rugía ya'abana tti rilenna ka milagru lhe adíru ka nu rebaninri'i geni ruin benneha lhe.
ACT 8:14 Tti bina ka apóstol se'e Jerusalén‑ni deki chi bedaxxu ka benne ge Samaria‑ni tisa ge Tata Do Yebáha, nianna udhelhake Pedruha lhe Juan‑ni lhe kini ugíakana niha.
ACT 8:15 Tti bisinkana Samaria‑ni nna udulo ttebakana unnabakana len Tata Do Yebáha kini benneha nna utebie Espíritu geeha len ka benne chi ria leke gebie se'e Samaria‑ni,
ACT 8:16 kumu ni ttú ka benneha labí chi bisia Espírituha tsu'e latike. Sunruba lá Jesús benne anke Xxanari'iha, sunruba lá benneha bedettike tti udi ka benneha inda.
ACT 8:17 Niala nna tti uxxua ná Pedruha lhe Juan‑ni iki ka benneha kini uxíke Espíritu ge Tata Do Yebáha.
ACT 8:18 Tti bilani Simón‑ni rixxua ná ka apóstoal iki ka benneha, la'ania nuha ridíke Espíritu ge Tata Do Yebáha, nianna tti betesana belhiu len ka benneha,
ACT 8:19 nna rana ke: ―Anágaba neti gwalutegaba nu tsitsi ra lele‑na len neti kini ganna chi ixxua náya iki nuxaba benne, la'ania nna dhígaba benneha Espíritu ge Tata Do Yebáha.
ACT 8:20 Pedruha nna bekabina geni, rana na: ―¡Nu reha ugía len belhiu gelu‑na kumu lu rakinlu deki ukare'aba len belhiu nna chiba go'olu elha tse nu rute Tata Do Yebáha!
ACT 8:21 Lu labí elha ralhalu uinlu luesi sina ruintu‑ni kumu labí du itá lelu arlo Tata Do Yebáha.
ACT 8:22 De nuha nna bodúna lu ge nu satsa belaba lelu‑na nna unnaba len Tata Xisiha kini ni kina gaa gwadíbe elha xen lasi gelu de belaba lelu aná,
ACT 8:23 kumu neti rite dati lu yalhá ritisinlu nna labí raka lelu udhanlu nu satsa ruinlu‑na, kumu attisidiba xigabalu lo nuná.
ACT 8:24 Simón‑ni nna bekabina rana: ―¿Si bi gwa innále gwalinnabachi kia len Tata Xisiha kini abittu satea, ni ttú ka nu chi rale satea‑ni?
ACT 8:25 Pedruha lhe Juan‑ni lhe, iki de chi utixxi'ake lhe bele'eke ka tisa ge Tata Xisiha, nianna tti beyekike deyyake lhe'esi Jerusalén‑ni nna laka deyu'uke neda deyyakeha nna reteke lhe'e ixe ka yiesi to ge Samaria‑ni rigixxi'akanie ka benneha ge Jesús‑ni.
ACT 8:26 Iki de nuha nna tti bodole'e lo ttu anjeli ge Tata Xisiha, rabie Felipe‑ni: ―Bedú tse nna ugía daka rreha, daka lo neda nu radi Jerusalén‑ni nna risinna lhe'esi Gaza, delába lo neda nu rite lo yu bisiha.
ACT 8:27 Felipe‑ni nna udá ttebana diana. Lo nedaha beti'ana ttu nubiyú ge Etiopía. Nuha ankana ttu nu tee ttu ladi xxeni geni, lana ridona gaxxaba kwe'e Candace, delába nuila nu rinnabiana ka nu Etiopía‑ni. Nubiyúha ankana nu denna belhiu ge yiesiha. Nuha dedána ugíana Jerusalén‑ni gwadú xibini arlo Tata Do Yebáha.
ACT 8:28 Deyu'ubana neda dedona lo carreta geniha nna rulabana lo ka yetsi ben Isaías benne uke profeta ge Tata Do Yebáha.
ACT 8:29 Nianna tti ra Espíritu ge Tata Do Yebáha Felipe‑ni: ―Ugía nna ubiga kwe'e carreta deyya naa.
ACT 8:30 Tti chi bisin Felipe‑ni gaxxa kwe'e carretaha, nianna biyieninna rulaba nubiyúha lo ka yetsi ben profeta Isaías‑ni. Nianna tti rana nubiyúha: ―¿Si gwa rite denlu nu rulabalu‑na?
ACT 8:31 Nubiyúha nna bekabina, rana: ―¿Bi rite dati nuní kumu lanú tee kixxi'enna neti bixa nuní ra lo yetsi‑ni? Aníoka nna unnaba nubiyúha len Felipe‑ni kini tsapina lo carretaha nna dhona gaxxa kwe'eni.
ACT 8:32 Lo ka yetsi ge Tata Do Yebáha ata rulaba nubiyúha, niha dia ra: Ttiba ttu neru, aníha‑ba chekana benneha die ata gattieha lhe ttiba ttu neru re'eni to, siiba ridúna arlo ka nu richúkana xoniha, aníha‑ba ben benneha, niruba ttu tisa a unnebie.
ACT 8:33 Tti lo ruyúe elha disaha, nurula bedíne; bettibakane yiesi lo yu‑ni. De nuha nna lanú nu aka geni kixxi'ana ge ka benne datiake benneha.
ACT 8:34 Nubiyú Etiopía‑ni nna unnaba tisana Felipe‑ni, rana na: ―Utixxi'entu neti, ¿nú ge nuní rinne profetaha tti rana aní? ¿Si la gebani nuní rigixxi'ana ak? ¿Ge attu benne subiba nuní rigixxi'ana ak?
ACT 8:35 Felipe‑ni nna udulona lo yetsi ata rulaba nubiyúha nna udulona rigixxi'enna na ge Jesús‑ni.
ACT 8:36 Laka deyu'ukana neda deyyakanaha, nianna tti betekana ata sia ttu inda nna ra nu Etiopía‑ni Felipe‑ni: ―Ne inda sia naa. ¿Si nuxa usuna ganna neti gadia inda?
ACT 8:37 [Felipe‑ni nna rana na: ―Ganna si lu itú iki itú lelu ria lelu, gwaka galá. Nubiyúha nna bekabina rana: ―Ila, gwa riaba lasia deki Jesucristuha anke Xi'in Tata Do Yebáha.]
ACT 8:38 Nianna tti ben nubiyúha mandadu kini bekwedakana carreta geniha, nianna tti diakana ugwadi ixpabakana lhe'e indaha. Niha begadi Felipe‑ni nubiyúha inda.
ACT 8:39 Tti chi beriakana lhe'e indaha nna Espíritu ge Tata Do Yebáha beyalhi ttebe Felipe‑ni dechebie na attu ata subi. Nurua na bilani nu Etiopía‑ni. Ttaka nu Etiopía‑ni nna itta suba chi du leni deyyana.
ACT 8:40 Felipe‑ni nna lhe'esi Azoto‑niliba bedeaka xxena nna lhe'e iyába ka yiesi se'e niha ritena rigixxi'ana ge Jesús‑ni, axtaliba bisinna lhe'esi Cesarea.
ACT 9:1 Sauloha nna birula rudú siina rudhaka disana ka benne chi ria leke ge Jesús benne anke Xxanari'iha, rana ke deki uttibana ke. De nuha nna ugíana lo bixxudi xeniha
ACT 9:2 gwannabana kini ute nuha yetsi dhenna ki tsiana daka Damasco‑ni kini aníha nna gapana lo neda satta'ana lhe'e ka yo'o ata rudheti ka nu Israel‑ni ka tisa ge Tata Do Yebáha kini sadaxxuna ka benne chi bedaxxuke neda ge Jesús‑ni, nuxaba ankake, si ankake nuila lhe si ankake nubiyú lhe. Udaxxuna ke nna uxxigana ke, nianna echena ke lhe'esi Jerusalén‑ni.
ACT 9:3 Ttaka tti chi diana isinna lhe'esi Damasco‑ni, ttiruba ttu nnelaba biria ttu xiani dana yebáha uyu'una abi'iba kwe'eni.
ACT 9:4 Lana nna ubixxi lo ttebana lo yu, nianna tti biyieninna tsi'i ttu benne rabie na: ―¡Saulo! ¡Saulo! ¿Beaka neti danalhalu rudhaka disalu?
ACT 9:5 Sauloha nna unnaba tisana, rana: ―¿Núle nuná xa tata? Benneha nna bekabie rabie na: ―Netiba nuní Jesús benne danalhalu rudhaka disalu. [Tsitsiba anka kini dhaalu edúlu lo nu ruttisinna lu‑na.]
ACT 9:6 Lana nna itú rixidibana de rasi xxattinna, nianna tti unnena rana: ―Tata Xisi to, ¿bí raka lelu unia? Labie nna ree na: ―Beyadha nna uta'a lhe'e yiesi‑na. Lhe'e yiesi‑na kixxi'akinna lu bixa anka nu uinlu.
ACT 9:7 Ka nubiyú dia len Sauloha nna paba use'ekana, uka télakinna tti biyienkinna tsi'i benne unneeha, ttaka nna lanúbie bilákinna.
ACT 9:8 Sauloha nna beyadha ttebana lo yu, ttaka tti chi bedhalina ka iyya loniha nna birua uka ilenna. Laxkala itú nalhibakana náni chibuka bisin lenkana na lhe'esi Damasco‑ni.
ACT 9:9 Niha‑ba udona tsunna ubisa, labí uka ilenna, lhe labí utona yetta lhe nigaba a u'uyana inda lhe.
ACT 9:10 Lhe'esi Damasco‑ni, niha do ttu nubiyú ria leni ge Jesús‑ni. Nuha tee láni Ananías. Nubiyúha bele'enna Jesús benne anke Xxanari'iha. Tti bele'enna benneha nna rabie na: ―¡Ananías! Lana nna bekabina, rana: ―Nii doa xa tata.
ACT 9:11 Jesús benne anke Xxanari'iha nna rabie Ananías‑ni: ―Udú lii nna ugía ata tee neda nu tee láni Neda Lhixxa. Lhe'e lisi Judas‑ni, niha innaba tisalu ge ttu nubiyú tee láni Saulo. Nuha ankana ge lhe'esi Tarso nna dona rinnena len Tata Do Yebáha lhe'e lisi Judas‑ni.
ACT 9:12 Nianna chi bele'enna ttu nubiyú tee láni Ananías, nuha uta'ana uxxua náni ikini kini beyali ka iyya loniha.
ACT 9:13 Ananías‑ni nna bekabina gebie rana: ―Tata Xisi to, ixe ka benne chi utixxi'akanie neti ge nu ruin nubiyú ralu‑na. Yalhá nu chi bedhakana ka benne gelu se'e Jerusalén‑ni.
ACT 9:14 Nnanna nna chi dana nii kumu de chi begwe ka bixxudi xeniha na lo neda kini udaxxuna ka benne chi ria leke gelu.
ACT 9:15 Ttaka Jesús benne anke Xxanari'iha nna rabie na: ―Ugía, kumu neti chi bekwea nubiyúha kini idhelhaa na tsiana kixxi'ana kia len ka nu dittu lhe len ka nu rinnabia gekani lhe, anágaba kixxi'agabinna ka nu Israel‑ni lhe,
ACT 9:16 kumu neti ule'enia na xxeniba anka elha disa uyúna delo ni'a kia.
ACT 9:17 Nianna dia tteba Ananías‑ni. Tti bisinnaha nna uta'ana lhe'e yo'o ata do Saulo‑ni. Nianna tti uxxua náni ikini nna rana na: ―Betsi to, Jesús benne anke Xxanari'iha, labe nuha bele'e loe len lu tti yu'ulu neda dalu nii. Lagabe udhelhe neti kini eyali ka iyya lolu‑na lhe kini isia Espíritu ge Tata Do Yebáha tsu'e itúba latilu lhe.
ACT 9:18 Looraha tteba nna ttiba ttu nu betúa bea loni nna belá ttebinna. Nianna tti udú liina nna udi ttebana inda.
ACT 9:19 Iki de nuha nna utona yetta nna bedú tsitsi ttebana. Sauloha ttu chupa ubisaruba udona len ka benne chi ria leke ge Jesús‑ni se'e lhe'esi Damasco‑ni.
ACT 9:20 Nianna udulo ttebana riana lhe'e ka yo'o ata rudheti ka nu Israel‑ni ka tisa ge Tata Do Yebáha, niha rigixxi'ana ge Jesús‑ni. Rana kana deki benneha anke Xi'in Tata Do Yebáha.
ACT 9:21 Iyába ka nu riyienkinna nu rigixxi'anaha, rugía ya'abakana rákana: ―¿Laaba nuníba nuha rekina ruinna utse'e loona ka nu chi ria lekani ge Jesús‑ni lhe'esi Jerusalén‑ni lhe dágabana nii kini udaxxuna ka nu se'e nii nna taga'ana kana lo ná ka bixxudi xeniha?
ACT 9:22 Ttaka Sauloha nna adíla itú iki itú leni rigixxi'ana axtaba ruchixxina iki ka nu Israel se'e lhe'esi Damasco‑ni kumu rigixxi'ana deki Jesús‑ni nuha anke Cristu.
ACT 9:23 Isába gwadána, nianna tti unne len luesi ka nu loni ge ka nu Israel‑ni, rákana deki uttikana Sauloha.
ACT 9:24 Ttaka Sauloha nna ute dábinna nu re lekani udhakakana naha, lhe binana deki rela resába se'ekana ruyú tsitsibakana ro'o yiesiha kini ganna chi eriana niha nna uttikana na.
ACT 9:25 Ttaka ka benne chi rudhetinna ka tisa ge Jesús‑ni nna begu'uke na lhe'e ttu sumi nna bechidake na lati de'e rilhi abi'iba kwe'e yiesiha ttu lo rela. Aníoka nna ulána, abittu bettikana na.
ACT 9:26 Tti besin Sauloha lhe'esi Jerusalén‑ni, nianna benna tatsána ka benne chi ria leke ge Jesús‑ni se'e niha. Ttaka iyába ka benneha rasibakanie na kumu labí ria leke deki lana chigaba ria leni ge Jesús‑ni.
ACT 9:27 Nianna tti che Bernabé‑ni na gwatso duna na arlo ka apóstol ge Jesús‑ni nna utixxi'enna ke gasina bilen Sauloha Jesús benne anke Xxanari'iha tti yu'una neda diana lhe'esi Damasco‑ni lhe utixxi'agabin Bernabé‑ni ke gasina unne len Jesús‑ni Sauloha. Anágaba nna utixxi'agabinna ke gasina unne Sauloha itú iki itú leni tti utixxi'ana ge Jesús‑ni lhe'esi Damasco‑ni.
ACT 9:28 Lhe'esi Jerusalén‑niba beya'an Sauloha udona ttu satti. Niha ugweki lenna ka apóstoal nna lanú nu besuna, beria beta'abana lhe'esiha,
ACT 9:29 labí usinna rigixxi'ana ge Jesús benne anke Xxanari'iha lhe anágaba nna ridakagaba lenna ka nu Israel‑ni, ka nu rinnekana tisa griegu. Ttaka ka nuha nna rulha lekani uttikana na.
ACT 9:30 Tti chi bina adí ka benne chi ria leke ge Jesús‑ni ge nu rulha le ka nuha uinkana, nianna bebeake Sauloha nna decheke na lhe'esi Cesarea. Debá niha nna bedhelhake na lhe'esi Tarso.
ACT 9:31 Ka benne chi ria leke ge Jesús‑ni se'e itúba daka Judea lhe daka Galilea lhe daka Samaria lhe, ka benneha xen su lasiba se'eke lhe gwa diabake rise'e tsitsiruke lo neda ge Tata Do Yebáha lhe rudo tsitsibake tisa gebie lhe, anágaba Espíritu geeha gwa rakagaba lanie ke kini raniruke.
ACT 9:32 Tti reki Pedruha itúba ka daka niha, la'ania ugíagabana gwalannina ka benne chi ankake ge Tata Xisiha se'e lhe'esi Lida.
ACT 9:33 Niha gwaxxakana ttu benne tee lábie Eneas. Benneha chi uka ttu xxunu ida yu'e lo ta'a daa yatti latie.
ACT 9:34 Pedruha nna rana benneha: ―¡Eneas, beyadha! Jesucristuha chiba beyonie lu. ¡Beyadha nna bodapa ta'a gelu‑na! Eneas‑ni nna beyadha ttebe.
ACT 9:35 Nianna iyába ka nu se'e lhe'esi Lida lhe ka nu se'e daka Sarón, tti bilákinna chiba beyaka benneha, la'ania nna bedaxxukana neda ge Jesús benne anke Xxanari'iha.
ACT 9:36 Lhe'esi Jope do ttu benne nuila ria lebie ge Jesús‑ni. Benneha tee lábie Tabita. Len tisa griegu nna tee lábie Dorcas. Benne nuilaha yalhá rudo lebie runie iyába nu anka tse lhe rute nábie len ka benne abittu geke tee lhe.
ACT 9:37 La'ania uni Tabita‑ni nna uttibe. Iki de chi bogadikaneha nna tti belhapikane lhe'e attu yo'o do gwetsá.
ACT 9:38 Kumu de gaxxa galá re lhe'esi Jope len Lida, de nuha nna ka benne chi ria leke ge Jesús‑ni, tti binake deki lhe'esi Lida‑niba re Pedruha, nianna udhelhake chupa ka benne biyú kini ugíake gwannabake lenna, ráke na: ―Bediuba lelu utá lhe'esi Jope‑ni.
ACT 9:39 Pedruha nna dia tteba lenna ka benneha. Tti chi bisinna lhe'esiha nna ulhapi ttebake na lhe'e yo'o do gwetsá ata tee benne yattiha. Nianna bitupa tteba ka benne nuila bidabiha abi'iba kwe'e Pedruha, ribesike nna rula'akanie na ka xalho lhe ka tulhá utiyya Tabita‑ni tti sa doe anka banieha.
ACT 9:40 Pedruha nna bebea ttebana iyába ka benne se'e lhe'e yo'o ata tee benne yattiha, nianna tti bedú xibini nna unnabana len Tata Do Yebáha nna tti bodetta loni ata tee benne yattiha nna rane: ―¡Tabita, beyadha! Benne nuilaha nna begiti tteba lobie. Tti bilánie Pedruha nna beyadha ttebe bedoe.
ACT 9:41 Pedruha nna bodaxxu ttebana nábie nna bodhú liine. Nianna tti beyaxina ka benne nuila bidabiha lhe adíru ka benne chi ankake ge Jesús‑ni lhe, nianna tti bodúna Tabita‑ni arloke.
ACT 9:42 Ka nu se'e lhe'esi Jope‑ni tti chi binakana nu chi ukaha, la'ania nna ixebakana ugía lekani ge Jesús benne anke Xxanari'iha.
ACT 9:43 Pedruha nna isáruba udona lhe'esi Jope‑ni, udona lhe'e lisi ttu benne rukusie ka yieti, tee lábie Simón.
ACT 10:1 Udo ttu nubiyú lhe'esi Cesarea tee láni Cornelio. Nuha ankana nu baninna ttu gayua (100) ka soldadu ka nu tee lákani Italiano.
ACT 10:2 Nubiyúha lhe iyába ka benne se'e lhe'e lisiniha ankake ka benne rudoruna leke ria leke Tata Do Yebáha lhe rudo tsitsibake tisa gebie lhe. Anágaba Cornelio‑ni yalhá redá leni rutena nu teeba geni len ka benne Israel‑ni, ka benne abittu geke tee lhe anágaba satíaba rilhapina tisa len Tata Do Yebáha lhe.
ACT 10:3 Ttu sá do Cornelio‑ni ttiba ttu retin tsunna, nianna tti bele'enna ttu anjeli ge Tata Do Yebáha, bilá saabinna benneha ute'e lhe'e yo'o ata donaha, nianna tti rabie na: ―¡Cornelio!
ACT 10:4 Cornelio‑ni nna rulanni tsittabana lo anjeliha nna itú rasibinna, rana benneha: ―¿Bí raka lelu xa tata? Anjeliha nna rabie na: ―Tata Do Yebáha chiba biyieninie ge ka tisa rilhapilu lenbie lhe anágaba nna gwa rapabe kwenta ge nu tse ruinlu de redá lelu rutelu nu teeba gelu len ka benne abittu geke tee.
ACT 10:5 Nnanna nna udhelha ttu chupa ka nubiyú kini tsiakana lhe'esi Jope taxxíkana Simón nu tegaba láni Pedro.
ACT 10:6 Lana dona lhe'e lisi benne tegaba lábie Simón, delába benne rukusie ka yieti. Benneha doe gaxxaba ro'o indatooha. Labie innábie bixa anka nu uinlu.
ACT 10:7 Iki de chi deyya anjeli unne len Cornelio‑ni, lana nna uxi ttebana chupa ka nu riben sina geniha lhe attu soldadu nu satíaba rixuinna lhe'e lisiniha, nu gwa rudo tsitsiruna tisa ge Tata Do Yebáha.
ACT 10:8 Uxina ka nuha nna iki de chi utixxi'enna ka nuha iyá nu gwatenaha, nianna tti udhelhana ka nuha diakana lhe'esi Jope.
ACT 10:9 Beyeki sáha laka yu'u ka nu udhelha Cornelio‑ni neda diakana nna chiba isinkana lhe'esi Jope‑ni. Pedruha nna ttiba tu retin tsi'inu (12) ugwapina gwetsá iki yo'o ata donaha, kini rilhapina tisa len Tata Do Yebáha.
ACT 10:10 Nianna tti bituinna nna raka leni gona, ttaka laka raka elho gonaha, lana nna bele'enna
ACT 10:11 biyali yebáha, nianna ugwadi ttiba ttu lari xeni xiga itapaba ka ro'oni, dana radina lo yu.
ACT 10:12 Lhe'e lariha yu'u iyá looba ka nimala: yu'u ka nu ra'aya lhe'ekani lo yu lhe ka nu ridá len ni'a nákani lhe ka nu sia xxilakani lhe.
ACT 10:13 Nianna tti biyieninna tsi'i ttu benne unnebie, rabie na: ―Pedro, udú lii, betti ka nuná nna uto kana.
ACT 10:14 Ttaka Pedruha nna bekabina, rana: ―Labí xa tata. Neti ni tsa labí chi uto neti nu abittu ga'anna gotu lhe nigaba labí chi utoa ttu bixa nu anka tsiga arlo Tata Do Yebáha.
ACT 10:15 Benne rinneha nna bedennebie attu libe, rabie na: ―Nu chi bochari Tata Do Yebáha bittu kixxalu lá nuha nu tsiga.
ACT 10:16 Tsunna libeba unne benneha, nianna tti beyapi lariha, deyyana yebáha.
ACT 10:17 Pedruha nna si dolana rulaba leni ge bí diani nu bele'ennaha, nianna tti chi bisin ka nubiyú udhelha Cornelio‑ni ro'o lisi Simón benne rukusie ka yietiha, kumu chiba gwaxxakana ata do yo'o ge benneha.
ACT 10:18 Nianna tti unnaba tisakana, rákana: “¿Si níunni do Simón, benne tegaba lábie Pedro?”
ACT 10:19 Pedruha nna sa dolana rulaba leni ge nu bele'ennaha, nianna tti ra Espíritu ge Tata Do Yebáha na: ―Ne tsunna ka nubiyú se'e ro'o yo'o‑ni regilakana lu.
ACT 10:20 Bedú lii nna beyadi ugía lenkana. Abittu udúna lu kumu netiba udhelhaa ka nuní.
ACT 10:21 Pedruha nna beyadi ttebana ata se'e ka nubiyúha nna rana kana: ―Neti nuní benne regilale. ¿Bí ge dale nii?
ACT 10:22 Ka nuha nna bekabikana geni rákana na: ―Ri'itu datu kumu Cornelio benne bananie ttu gayua (100) ka soldaduha, benneha udhelhe ri'itu. Labie anke ttu benne runi attiba ankaba geni lhe rudo tsitsibe tisa ge Tata Do Yebáha lhe. Iyába ka benne Israel‑ni ráke deki tseba runie, nna ttu anjeli ge Tata Do Yebáha ree bie deki gaxie kwinalu lhe'e lisieha, kini udo nage ge nu kixxi'enlue.
ACT 10:23 Niala nna tti bega'a Pedruha ka nuha lhe'e yo'o ata donaha. Niha‑ba beya'ankana loolhaha. Attu dilaha‑liba nna dia lenna ka nuha. Diagaba lenna attu chupa ka betsi to geri'i se'e lhe'esi Jope‑ni.
ACT 10:24 Beyeki sáha nna bisinkana lhe'esi Cesarea. Niha‑ba chi du Cornelio‑ni ribedana kana itupa lenna ka nu chi uxinaha, delába ka benne raka luesiniha lhe ka benne se'e tse lennaha lhe.
ACT 10:25 Tti chi bisin Pedruha ro'o yo'o ge Cornelio‑ni, lana nna biria ttebana gwatsána Pedruha nna bedú tteba xibini arloni kini utsá loni na.
ACT 10:26 Ttaka Pedruha bodhú lii ttebana Cornelio‑ni, nianna tti rana na: ―¡Bedú lii! Yuu neti lanú nu ankaa, kumu ttigabalu ankalu benne, anágaba neti bennegaba ankaa.
ACT 10:27 Laka rinne lenna Cornelio‑ni nna uta'ana lhe'e yo'oha, niha bilenna ixeru ka benne chi tupake.
ACT 10:28 Nianna tti rana ka benneha: ―Lebi'i gwa yu xeabale, bia bennabi getu‑ni labí rugwelhana ri'itu, ka benne Israel, utsátu ka benne abittu ankake benne Israel, nigaba ga'atu lhe'e lisike lhe. Ttaka Tata Do Yebáha chi bela'anie neti deki labí dika upeya ttu benne: “Lu tsigaba ankalu arlo Tata Do Yebáha o satsaba ankalu lhe.”
ACT 10:29 Laxkala tti bisia ka benne‑ni nna ráke neti: “Dhalu len ri'itu”, neti nna labí bedúa tisa nna daa tteba lania ke. Nnanna nna raka lasia kixxi'ale, ¿bí lo ni'a ge nna uxile neti?
ACT 10:30 Cornelio‑ni nna bekabina ge Pedruha, rana na: ―Chi ute ttapa ubisa, ttiba ura‑ni rea lhe'e yo'o kia‑ni [rutte ubina lhe'a], ttiba tu retin tsunna doa rilhapia tisa len Tata Do Yebáha. Nianna ttiruba chi uka xxe ttu benne biyú udúe arloa nukue ttu xo raka ragalhaba loni,
ACT 10:31 nianna tti rabie neti: “Cornelio, Tata Do Yebáha chiba biyieninie ge ka tisa rinnelu lenbie lhe chigaba upe kwenta ge nu tse ruinlu de rutelu nu tee gelu len ka benne abittu geke tee.
ACT 10:32 Nnanna nna udhelha ttu chupa ka benne kini tsiake lhe'esi Jope‑ni taxxíke Simón nu tegaba láni Pedro. Nuha dona lhe'e yo'o ge ttu benne tegaba labie Simón benne rukusie ka yieti. Benneha dobie gaxxaba ro'o indatooha. [Tti isia Pedruha nna kixxi'enna lu bixa anka nu uinlu.]”
ACT 10:33 Aníha uka nna udhelha ttebaa ka benne‑ni kini betetilake kwinalu. Lu nna tseba benlu dalu. Nnanna nna niiba chi se'e iyábatu arlo Tata Do Yebáha, kini udo nagatu ge iyá nu chi rabie lu kixxi'enlu ri'itu.
ACT 10:34 Nianna tti unne Pedruha, rana: ―Nnannaligaba lhixxa rába chi rite dati deki Tata Do Yebáha ttúba rulanni benneha ri'i, labí rugwerue lidhaka ttu benne tti attu benne,
ACT 10:35 sinuki gwa rulabibe ka benne rudoke tisa gebie lhe ruinke nu dika ixú lhe, meskiba se'eke lhe'e gaxaba yiesi.
ACT 10:36 Tata Do Yebáha unnebie len ri'itu ka benne Israel, utixxi'anie ri'itu ka tisa tse, delába ka tisa rigixxi'akana gasina ese'e tse ka benne lenie de tsia leke Jesucristuha. Jesucristuha nuha anke Xxana iyá tteri'i.
ACT 10:37 Lebi'i gwa yúbale nu uka itúba Judea‑ni, udulona daka Galilea‑ni iki de tti chi ugweki Juan‑ni rana ka benne deki raka doelha gadike inda
ACT 10:38 lhe anágaba gwa yúbale gasina bete Tata Do Yebáha Espíritu geeha len Jesús ge Nazaret‑ni, lhe bengabe kini ra tsitsi le benneha lhe anágaba gwa yúgabale gasina ugweki Jesús‑ni benie nu tse lhe beyonie iyába ka benne rugwe nu xxegwiha ke elha disa. Benie iyá nuní kumu Tata Do Yebáha gwa udúba lenie bie.
ACT 10:39 Ri'itu biyú lotu iyá nu benie tti ugwekie daka Jerusalén‑ni lhe itúba daka Judea‑ni lhe. Iki de nuha nna tti bettikane betákane lo ttu ya kurusi.
ACT 10:40 Ttaka Tata Do Yebáha belhidha benbe benneha tti chi uka tsunna ubisaha, nianna benie kini benneha bele'e lobie.
ACT 10:41 Labí len iyá ka benne bele'e lo benneha, suna len ri'ituruba ka benne chi bekwe Tata Do Yebáha, suna len ri'ituruba bele'e lobie kini bilentu, delába ri'itu ka nu utotu lhe u'uyatu lenie tti chi beyadhe lagwi ge ka benne chi uttiha.
ACT 10:42 Nianna tti udhelhe ri'itu kini tsekitu kixxi'entu ka benne lhe innátu deki gwalí labie chi bedú Tata Do Yebáha kini ake xueda unie elhuxtisi ge ka benne anka bani lhe ka benne chi utti lhe.
ACT 10:43 Ge Jesús‑ni nuha utixxi'a iyába ka benne ukake profetaha, ráke deki iyába ka benne tsia leke gebie, de tsiaba leke gebie nna gwadíba Tata Do Yebáha elha xen lasi ge ka tulha ruinke.
ACT 10:44 Sa dula Pedruha rigixxi'ana nuha, ttiruba chi bisia Espíritu ge Tata Do Yebáha uyu'e lati iyába ka benne se'e gwedo nagaha.
ACT 10:45 Ka benne Israel‑ni, ka benne chi ria leke ge Jesús‑ni, delába ka benne daa lenke Pedruha, rugía ya'abake tti bilákanie deki gwa rutegaba Tata Do Yebáha Espíritu geeha len ka benne abittu ankake nu Israel,
ACT 10:46 kumu de riyienkanie rinne ka benne tupa niha ka tisa subi lhe ráke: “¡Xxeniba ra le Tata Do Yebáha!”
ACT 10:47 Nianna tti ra Pedruha ka benne daa lennaha: ―¿Katte ra nuxa ttúri'i usunari'i a gadi ka benne‑ni inda, kumu ka benne‑ni chigaba uxíke Espíritu ge Tata Do Yebáha ttiba ri'i?
ACT 10:48 Nianna tti ben Pedruha mandadu kini ugadikana ka benneha inda nna udettikana lá Jesús benne anke Xxanari'iha tti gadike indaha. Iki de nuha nna tti unnaba ka benneha len Pedruha kini eya'anruna lenke attu chupa ubisa.
ACT 11:1 Ka apóstol ge Jesús‑ni lhe adíru ka betsi to geri'i se'e daka Judea‑ni, binake deki ka benne abittu ankake benne Israel chigaba bedaxxu ka benneha tisa ge Tata Do Yebáha.
ACT 11:2 Ttaka tti beyapi Pedruha besinna lhe'esi Jerusalén‑ni nna ka nu Israel, ka nu chi ria lekani ge Jesús‑ni se'e lhe'esiha, yalhá uxaka lenkana na,
ACT 11:3 rákana na: ―¿Beaka gwatta'alu lhe'e lisi ka nu abittu ankakana nu Israel lhe beaka utolu yetta lenkana lhe?
ACT 11:4 Pedruha nna kua suba udulona utixxi'enna kana tti tteba ukaha, nianna tti rana kana:
ACT 11:5 ―Doba neti lhe'esi Jope‑ni rilhapia tisa len Tata Do Yebáha nna ttiruba bela'ati ttiba ttu lari xeni xiga itapaba ka ro'oni dana gwetsáha. Lhixxaraba dana ata doaha.
ACT 11:6 Begía tsitsibaa bixa nuha yu'u lhe'e lariha. Lhe'e lariha biláti iyá looba ka nimala to: yu'u ka nu ridá len ni'a nákani lhe ka nimala ixxi lhe yu'u ka nu ra'aya lhe'ekani lo yu lhe anágaba yu'ugaba ka nu sia xxilakani lhe.
ACT 11:7 Nianna tti biyienti tsi'i ttu benne rabie neti: “Pedro, udú lii, betti ka nuná nna uto kana.”
ACT 11:8 Neti nna bekabia xpeye: “Labí xa tata, kumu neti ni tsa labí chi uto neti ttu nu abittu ga'anna goa lhe nigaba ttu nu anka tsiga arlo Tata Do Yebáha lhe.”
ACT 11:9 Nianna tti bedeyienti tsi'i benneha yebáha, bedennebie attu libe redenee: “Nu chi bochari Tata Do Yebáha abittu kixxalu lá nuha nu anka tsiga.”
ACT 11:10 Tsunna libeba unnebie, nianna tti beyapi adakaba lariha deyyana yebáha.
ACT 11:11 Si beyaka tte uka nuha, nianna ttiruba chi uka xxe tsunna ka nubiyú udhelha ttu benne ge Cesarea‑ni, dákana regilakana neti nna bisiakana ro'o yo'o ata doaha.
ACT 11:12 Nianna tti ra Espíritu ge Tata Do Yebáha neti: “Bittu udú chupana lelu, ugía len ka benne‑na.” Udágaba a xxupa (6) ka betsi to geri'i se'e‑ni len neti. Laxkala iyábatu uta'atu lhe'e yo'o ge nubiyú uxina netiha.
ACT 11:13 Nubiyúha nna utixxi'enna ri'itu gasina bilenna anjeli ge Tata Do Yebáha uka xxebie lhe'e lisiniha nna rabie na: “Udhelha ka nu tsiakana lhe'esi Jope‑ni saxxíkana Simón nu tegaba láni Pedro.
ACT 11:14 Nuha kixxi'enna lu gaxasina uinlu kini odilá Tata Do Yebáha lu itupa lenlu iyá ka benne se'e lhe'e lisilu‑ni.”
ACT 11:15 Neti nna tti uduloa unnea lenkanaha, bisia tteba Espíritu ge Tata Do Yebáha uyu'e latikani attigaba bisie uyu'e latiri'i sisi'a tteha.
ACT 11:16 La'ania nna gwadú lasia nu unne Jesús benne anke Xxanari'iha, tti rabie: “Gwalí galá Juan‑ni sunruba len inda begadie ka benne, ttaka lebi'i nna ugadi Tata Do Yebáha le Espíritu geeha.”
ACT 11:17 Kumu ki Tata Do Yebáha chi begwebie ka benneha Espíritu geeha attigaba betebie benneha lenri'i, ri'i ka benne chi ria leri'i ge Jesucristu benne anke Xxanari'iha, de nuha nna neti nna, ¿núla ankaa nna gattaa lo neda ge Tata Do Yebáha kini abittu unie nu raka lebie aka?
ACT 11:18 Tti chi biyienkin benne Israel‑ni nu ra Pedruha, nianna siiba beyakake nna tti ráke: ―¡Xxeniba ra le Tata Do Yebáha! ¡Ganna aníha nna iyágaba ka benne abittu ankake nu Israel chi benie kini gapake lo neda odúna ke nna odaxxuke neda gebie kini aka benke ttu dia lii!
ACT 11:19 Ka benne ugwadhike tti berio lákana keha, delába tti bettikana Esteban‑ni, ka benneha bisinke daka Fenicia lhe daka Chipre lhe daka Antioquía lhe. Lanú nu utixxi'akanie ge Jesús‑ni, sunruba ka nu Israel, ka nu se'e ka daka niha, sunruba ka nuha utixxi'akanie.
ACT 11:20 Ttaka sela lenke ttu chupa ka benne biyú ge Chipre lhe ge Cirene lhe. Ka benneha‑la nuha tti uta'ake lhe'esi Antioquía‑ni nna utixxi'agabakanie ka nu abittu ankakana nu Israel ka tisa ge Jesús benne anke Xxanari'iha.
ACT 11:21 Tata Xisiha nna gwa ukaba lenie ke, laxkala ixeba ka benne bedaxxuke neda ge Jesús‑ni de ugía leke ge nu rigixxi'a ka benneha.
ACT 11:22 Ka benne chi ria leke ge Jesús‑ni se'e lhe'esi Jerusalén‑ni, tti binake ge nu raka Antioquía‑ni, nianna tti udhelhake Bernabé‑ni kini ugíana niha.
ACT 11:23 Bernabé‑ni nna atti bisinna niha nna ute denna deki tseba ruin Tata Do Yebáha len ka benneha, nianna bedeakinna nna belisana ke kini bodú ittana le iyábake, rana: ―Ttu tsa gwalebeki lele tse'ele udole tisa ge Jesús benne anke Xxanari'iha.
ACT 11:24 Kumu Bernabé‑ni ankana ttu benne re tse leni lhe ria tsitsi leni ge Jesús‑ni lhe anágaba yu'u Espíritu ge Tata Do Yebáha itúba latini lhe. De nuha nna ixe juisiru ka benne ugía leke ge Jesús benne anke Xxanari'iha.
ACT 11:25 Iki de nuha nna tti ugía Bernabé‑ni lhe'esi Tarso‑ni gwatilana Sauloha.
ACT 11:26 Tti gwaxxakana Sauloha nna dechena na besin lenna na lhe'esi Antioquía‑ni. Niha‑ba biselakana ka benne chi ria leke ge Jesús‑ni itúba ttu idaha nna ixeba ka benne lhe'esiha bele'ekinna. Lhe'esi Antioquía‑ni, niha nuha sisi'a tte utta lá ka benne chi ria leke ge Jesús‑ni Ka Benne Ge Cristu.
ACT 11:27 La'aniagaba udá ttu chupa ka profeta lhe'esi Jerusalén‑ni nna bisinke lhe'esi Antioquía‑ni.
ACT 11:28 Ttu ka benneha, benne tee lábie Agabo, benneha udú liie nna unnebie ka tisa ka nu bete Espíritu ge Tata Do Yebáha lenbie nna rabie, isia ttu ubina tsitsi yiesi lo yu‑ni. Ubina nu ra benneha bisiana atti anka Claudio‑ni nu rinnabia xeni ge Roma‑ni.
ACT 11:29 La'ania ka benne chi ria leke ge Jesús‑ni se'e lhe'esi Antioquía‑ni, kua ttu ttuke lhe kua teeba geke bokinni ikike kini ute náke len ka betsi to geri'i se'e daka Judea‑ni.
ACT 11:30 Aníha benke nna udhelhake belhiu bitupaha len Bernabé‑ni lhe len Saulo‑ni lhe kini gwadha'ankana nuha len ka benneola rise'e arlo ka benne chi ria leke ge Jesús‑ni.
ACT 12:1 La'aniagaba nuha ben Herodes nu rinnabiaha mandadu kini bedaxxukana ttu chupa ka benne chi ria leke ge Jesús‑ni kini gayakana ke,
ACT 12:2 nna benna mandadu kini bettikana Jacobo betsi Juan‑ni, len espada.
ACT 12:3 Tti bilani Herodes‑ni deki gwa uyu'uba le ka nu Israel‑ni nu bennaha, nianna bedaxxugabana Pedruha bedheana na lisiyya. Nuní uka tti bisia laní nu tee láni Pascua, delába tti ro ka benne Israel‑ni yettaxtila nu abittu kua dii dia ikini.
ACT 12:4 Tti bedaxxukana Pedruha nna bedheakana na lisiyya, nianna bodha'ankana na lasi ná ttapa kwe ka soldadu kini ka nuha nna uyú tsitsikana na. Ttapa ttapa ka soldaduha se'e lhe'e ttu ttu kweha. Aníha ben Herodes‑ni kumu rakinna ebeana Pedruha lo benne ganna chi ute laníha.
ACT 12:5 Laxkala ruyú tsitsibakana Pedruha lhe'e lisiyyaha kini abittu eriana, ttaka ka benne chi ria leke ge Jesús‑ni labí rudú siike rinnabake geni len Tata Do Yebáha.
ACT 12:6 Loolha atti chi tsani dila ebea Herodes‑ni Pedruha lhe'e lisiyyaha, loolha tebana te'adhina lagwi ge chupa ka soldaduha xigana chupa ka cadena. Adí ka soldaduha nna se'ebakana gweyú ro'o lisiyyaha.
ACT 12:7 Ttiruba chi uka xxe ttu anjeli ge Tata Xisiha lhe'e lisiyyaha nna uyu'u chába xiani lhe'e nuha. Anjeliha nna begalhe kwitta Pedruha bodibenie na nna ree na: ―¡Jeru tte beyadha! Nianna beyasi tteba ka nániha ka cadena xikanaha.
ACT 12:8 Anjeliha nna ree na: ―¡Bedhí lhe'elu lhe bolea ka gwaracha gelu‑na lhe! Pedruha nna rana: ―¡O! Nianna tti redea anjeliha na: ―Betubi lari gelu‑na nna betá betenalha neti.
ACT 12:9 Pedruha nna danalhabana anjeliha beriana, ttaka labí yu tsena si gwalíttiga rebea anjeliha na lhe'e lisiyyaha, kumu rakinna ganna rula'abinna nuha.
ACT 12:10 Betebake lo soldadu nu du gweyú ro'o lisiyyaha lhe betegabake lo nu berupaha lhe. Nianna tti besinke ata du puerta iyya nu du ro'o nedaha nna titúba nuha biyalina. Iki de tti chi beriakeha nna deyyake belháke lo ttu neda tee niha. Niha‑liba nna tti chi bekwitta anjeliha len Pedruha.
ACT 12:11 La'anialiba nna tti bete da tsenna nna rana: ―Nnannaligaba chi rite da tseti deki gwalíba udhelha Tata Xisiha anjeli geeha kini betedilábie neti lo ná Herodes‑ni lhe bodilágabe neti lo iyába nu ribeda ka nu Israel‑ni udhakana neti.
ACT 12:12 Tti ute den Pedruha nu gwatenaha, nianna tti deyyana besinna lisi María nan ge Juan nu tegaba láni Marcos. Niha se'e ixeru ka benne rilhapike tisa len Tata Do Yebáha.
ACT 12:13 Tti unnena ro'o puerta nu du ro'o nedaha, nianna biria ttu nuila riben sina lhe'e yo'o ge María‑ni, kini ugía nuha gwado nagani nuxa nuha rinnee ro'o yo'oha. Nuilaha tee láni Rode.
ACT 12:14 Tti beyakabienna tsi'i Pedruha nna, de elha gwedeaka lasi nna labí udhali ttena puertaha. Lade'axala beyekina nna gwexunniba gwattixxi'ana deki Pedruha‑ba nuha rinne ro'o yo'oha.
ACT 12:15 Ttaka ka benneha nna ráke na: ―¡Rakaba ikilu! Ttaka nuilaha nna ttu duba nuha, rana: ―¡Ki ria, Pedruha‑ba nuná! Ka benneha nna ráke: ―Gaxa anjeli geniha‑ba benne‑na.
ACT 12:16 Ttaka Pedruha nna ttu dúbana rinnena ro'o yo'oha. Tti udhalikeha nna bilákanie na nna rugía ya'abake.
ACT 12:17 Lana nna bettá ttebin náni ke kini eyaka siike, nianna tti utixxi'enna ke gasina uka bebea Tata Xisiha na lhe'e lisiyyaha. Iki de nuha nna tti rana ke: ―Gwalikixxi'en Jacobuha lhe adíru ka betsi to geri'iha lhe ge nu gwatea‑ni. Nianna tti biriana diana attu ta subi.
ACT 12:18 Tti chi ugwani dilaha nna bisatsa tteruba ka soldaduha, kumu de labí yúkana bí uka len Pedruha.
ACT 12:19 Herodes‑ni nna iki de chi begilakana Pedruha nna tti anúbana gwaxxakakana, nianna benna mandadu kini biso du ka soldadu use'e gweyú ro'o lisiyyaha arloni, ttaka kumu labí biria ni'akinna bixa uka len Pedruha, nianna tti udhelhana kini bettikana ka soldaduha. Iki de nuha nna tti bedá Herodes‑ni Judea‑ni nna beyadina besinna lhe'esi Cesarea‑ni nna niha‑ba udona.
ACT 12:20 Herodes‑ni yalhá rise'enna len ka benne ge Tiro‑ni lhe ge Sidón‑ni lhe. Ttaka ka benneha nna ttúba belaba leke kini tsiake sanne lenke na. Blasto nu rido gaxxaba kwe'eniha, nuha‑ruba nuha gwa udaake bixú yiekanie na kini utso duna ke arlo Herodes‑ni. Laxkala de Blastoha‑ruba nuha nna gwa biri'a lenke unnabake kini bese'e tse lenke Herodes‑ni kumu lo ka yu se'e daka ata rinnabianaha, niha‑ruba nuha gwa rixú lena kini roke.
ACT 12:21 Tti chi gwadona sá inne len Herodes‑ni ka benneha, nianna biku xo tseni nna udona lo ata rinnabianaha. Nianna tti udulona ulu'una libana arlo ka benneha.
ACT 12:22 Ka benne saa niha nna ribesi'abake, ráke: ―¡Benne rinne‑ni, diosiba anka benne‑ni! ¡Labí anka benne‑ni, benne!
ACT 12:23 Looraha tteba nna ben ttu anjeli ge Tata Xisiha kini uyu'u Herodes‑ni ttu isagwe, kumu de labí begwena lidhaka Tata Do Yebáha, sinuki la labana benna kini uná xxeni leni. De nuha nna uttina uto ka beduha latini.
ACT 12:24 Ka tisa ge Tata Do Yebáha nna ttu diaba ka benneha radhike nna ka benne chi ria leke ge Jesús‑ni nna diarugabake ranike.
ACT 12:25 Sauloha lhe Bernabé‑ni lhe, tti chi uluxakinna sina nu daa lokani uinkanaha, nianna bedákana Jerusalén‑ni nna deyyakana Antioquía‑ni, dechegabakana Juan nu tegaba láni Marcos.
ACT 13:1 Lhe'e ka benne chi ria leke ge Jesús‑ni se'e lhe'esi Antioquía, niha sela ka benne ankake profeta lhe ka benne rula'ake ka tisa ge Tata Do Yebáha lhe. Ka benneha nuha tee láke Bernabé lhe Simón benne tegaba lábie Benne Yadhi lhe Lucio benne lhe'esi Cirene lhe Manaen benne bixenie turo'o len Herodes nu unnabiana daka Galilea lhe niha‑gaba sela Sauloha lhe.
ACT 13:2 Ttu sá nna yu'uke rulhake ge Tata Xisiha lhe rutte ubina lhe'eke lhe, nianna tti unne Espíritu geeha, rabie ke: ―Kwesile Bernabé‑na lhe Saulo‑na lhe kini uinkana sina nu chi ga'anati uinkana.
ACT 13:3 Aníha uka nna, iki de tti chi uluxakanie ulhapike tisa len Tata Do Yebáha lhe bette ubina lhe'eke lhe, nianna tti uxxua náke iki Bernabé‑ni lhe iki Saulo‑ni lhe, nianna tti uchú tisake kana nna biria ttebakana diakana.
ACT 13:4 Espíritu ge Tata Do Yebáha‑ba udhelhe Bernabé‑ni lhe Saulo‑ni lhe diakana. Nianna tti ugwadikana bisinkana lhe'esi Seleucia. Niha bedaxxukana barcu kini diakana daka lo yu re lagwi indatooha nu tee láni Chipre.
ACT 13:5 Tti chi bisinkana lhe'esi Salamina, niha udulokana utixxi'akana ka tisa ge Tata Do Yebáha lhe'e ka yo'o ata rudheti ka benne Israel‑ni ka tisa geeha. Chegabakana Juan nu tegaba láni Marcos kini ute náni lenkana.
ACT 13:6 Utebakana itúba lo yu re lagwi indatooha axtaliba biriakana ro'o nuha ata re yiesi nu tee láni Pafos. Niha gwaxxakakana ttu nu Israel ruinna elha gwesá. Nuha tee láni Barjesús. Lana ankana ttu profeta gwen lasi.
ACT 13:7 Barjesús‑ni tseba do lenna Sergio Paulo nu rinnabiana iyába ka yiesi se'e daka Chipre‑ni. Sergio Paulo‑ni ankana ttu nu rapa elha rieni. Nianna uxina Bernabé‑ni lhe Saulo‑ni lhe kumu de raka leni udo nagani ge ka tisa ge Tata Do Yebáha.
ACT 13:8 Ttaka Barjesús‑ni, nu tegaba láni Elimas, lana richúbana lokani ruinna kini abittu tsia le Sergio Paulo‑ni gekani.
ACT 13:9 Ttaka Sauloha nu tegaba láni Pablo, yu'u galába itú latini Espíritu ge Tata Do Yebáha, nianna tti belanni tsittabana lo Barjesús‑ni
ACT 13:10 nna rana na: ―¡Aaluxa nu gwen lasi lhe nu ruin iyá looba nu satsa lhe! ¡Lu ankalu xi'ini nu xxegwiha lhe abittuba ru'u lelu uinlu nu dika ixú lhe! ¿Nukala udú siilu abitturu unnittilu neda ge Tata Xisiha?
ACT 13:11 Loora nnanna ugwebie lu ttu elha disa. Labíru aka ilenlu, isá tadána abitturu ilenlu xiani ge tatubisa‑na. Tti lo rinne Pabluha nna beya'an tteba Elimas‑ni lo xua. Nianna binchitoriba rekina, regilana nuxa eyalhina náni kumu de labíru rilenna.
ACT 13:12 Tti bilani nu rinnabiaha nu chi ukaha, nianna ugía tteba leni ge Jesús benne anke Xxanari'iha de bebaninna ge ka tisa geeha, delába ka tisa bele'ekin Pabluha na.
ACT 13:13 Pabluha lhe ka benne dia lennaha lhe, bedaxxuke barcu ro'o indatoo ge Pafos nna bisinke lhe'esi Perge. Nuha rena daka Panfilia. Ttaka debá niha‑ba bedha'an Juan Marcos‑ni ke nna beyekina deyyana lhe'esi Jerusalén‑ni.
ACT 13:14 Lake nna bedáke Perge nna bisinke lhe'e yiesi nu tegaba láni Antioquía. Nuha rena daka Pisidia. Tti bisia sá reyaka le ka nu Israel‑ni, la'ania uta'a ka Pabluha lhe'e yo'o ata rudhetikana ka tisa ge Tata Do Yebáha nna use'e ttebake.
ACT 13:15 Iki de chi bibaba ka tisa dia lo bia bennabi bodha'an Moisés‑ni lhe ka tisa dia lo ka yetsi bodha'an ka profetaha lhe, nianna tti udhelha ka nu rinnabia lhe'e yo'o ata rudheti ka benne ka tisaha, kini ugía ka nu gweasikana ka Pabluha: ―Xa betsi to, ganna si tee ttu bixa innele nu dika odú ittale le ka benne, gwalte nna gwalinne.
ACT 13:16 Nianna tti udú lii Pabluha nna bettá náni kini beyaka sii ka benne se'e niha, nianna tti unnena rana: ―Lebi'i ka benne Israel lhe iyá ttele ka benne dittu ka benne gwa rudole tisa ge Tata Do Yebáha, gwaludoruga nagale innea.
ACT 13:17 Ri'i ka benne Israel, Tata Do Yebaa geri'iha bekwebie ka benne uka xuttori'iha lhe bedien xxatte ke atti use'eke ukake benne dittu lo yu ge Egiptoha. Anágaba nna tsitsigaba uná lebie tti bebeabie ke lo yu ge ka nuha.
ACT 13:18 Delo chua (40) idaha biyúbie ke tti deyu'uke neda deyyake lo yu bisiha.
ACT 13:19 Nianna iki de chi betse'e loobie gasi ka yiesi xeni, ka nu se'e daka lo yu ge Canaán‑ni, nianna tti betebie ka yuha lenke.
ACT 13:20 Iyá nuní uka delo ttapa gayua bixxi tsieyona (450) idaha. ’Delola nna tti bese'e Tata Do Yebáha ka nu uka xueda kini unnabiakana ke. Debá tti udo Samuel benne uke profeta ge Tata Do Yebáha, debá la'ania gwa use'eru ka xuedaha.
ACT 13:21 Iki de nuha nna tti unnabake len Tata Do Yebáha kini odúe ttu nu innabia xeni geke. Tata Do Yebáha nna bodúe Saúl xi'in biyú benne tee lábie Cis. Saúl‑ni ukana benne datiana Benjamín‑ni, delába ttu ka benne uka xuttori'iha. Saúl‑ni unnabiana chua (40) ida.
ACT 13:22 Tti chi ulhida gaa Tata Do Yebáha Saúl‑ni, nianna bodúbie David‑ni kini akana nu innabiana ke. Ge David‑ni nuha unne Tata Do Yebáha tti ree: “Neti chi gwaxxakaa David xi'in benne tee lábie Isaí, lana ankana ttu benne ru'u lasia lhe lana uinna iyá nu raka lasia lhe.”
ACT 13:23 Ttu ka benne datiake David‑ni, delába Jesús‑ni, labie nuha udhelha Tata Do Yebáha bie kini odilábie ri'i ka benne Israel. Benba Tata Do Yebáha attiba chi rabie unie.
ACT 13:24 Atti lanila isia Jesús‑ni yiesi lo yu‑ni, Juan‑ni chila ugwekina utixxi'enna iyá ka benne Israel‑ni rana ke teeki odúna ke nna odaxxuke neda ge Tata Do Yebáha, nianna gadike inda.
ACT 13:25 Tti chi deoba lhuxin Juan‑ni sina nu bodha'an Tata Do Yebáha uinna, la'ania nna rana: “Laa netiga nuha benne rakinle chi ga'anani Tata Do Yebáha isia, sinuki iki dela neti nna si isiala benneha. Benneha labí elha ralhaa idhasia lo ka gwaracha geeha.”
ACT 13:26 ’Betsi to, lebi'i ka benne datiale Abraham‑ni lhe anágaba lebi'i ka benne dittu ka nu gwa rudole tisa ge Tata Do Yebáha, len iyá tteri'i nuní chi bisia ka tisa ka nu rigixxi'akana gasina odilá Tata Do Yebáha ri'i.
ACT 13:27 Ka nu se'e Jerusalén‑ni lhe ka nu rinnabia gekaniha lhe, labí yúkana nuxa uka Jesús‑ni, nigaba a rite dákinna ata rinne ge benneha lo ka yetsi bodha'an ka profeta ge Tata Do Yebáha, delába ka yetsi ka nu ribaba tti risia ka sá reyaka leri'i. Ttaka tti bettikana Jesús‑ni, la'ania nna gwado tisa ge nu ra lo ka yetsiha.
ACT 13:28 Meskiba labí gwaxxakakana bí lo ni'a ge uttikane la'ania, ttaka unnaba lo xuabakana len Pilato‑ni kini ugwelhana kana uttikane,
ACT 13:29 nna iki de chi benkana iyá nu rigixxi'a gebie lo ka yetsi ge Tata Do Yebáha, nianna tti bechidakane lo ya kurusiha nna bekatsikane.
ACT 13:30 Ttaka Tata Do Yebáha belhidhabe benneha lagwi ge ka benne chi uttiha
ACT 13:31 nna ixeru ubisa bele'e loe len ka benne ugwekike lenie atti birie lo yu ge Galilea‑ni nna bisine lhe'esi Jerusalén‑ni. Nnanna nna ka benne ugwekike lenbie la'ania, ka benneha nuní rekike rigixxi'ake gebie len ka benne
ACT 13:32 lhe anágaba ri'itu rigixxi'agabintu le ge benneha. Rigixxi'entu le ge nu chi ra Tata Do Yebáha ka benne ukake xuttori'iha deki unie ttu bixa len lebi'i.
ACT 13:33 Laxkala tti belhidhe Jesús‑ni lo elhuttiha, len ri'i ka benne datiari'i ka benneha, len ri'i nuha betto lonie nu chi ree ka benneha. Benbe ttiba ra lo Salmo nu berupaha. Lo Salmoha rinnebie, ree: “Lu ankalu xi'inia, neti bijaa lu nasá.”
ACT 13:34 Rágaba lo ka yetsi ge Tata Do Yebáha deki elhidhabe benneha lagwi ge ka benne chi uttiha, aníha kini abittu usu bela latie, kumu aníha unnebie ree: “Gutebaa len lebi'i nu tse chi xpeya David‑ni utea.”
ACT 13:35 Laxkala lo attu Salmo rinnegaba David‑ni rana Tata Do Yebáha: “Abittu ugwelhalu initti bela lati benne chi ulesilu ki ake geluha.”
ACT 13:36 Ttaka nna laa gwalíga geni nuha rinnena tti rana aníha, kumu David‑ni, tti udona yiesi lo yu‑niha, iki de chi benna nu redá le Tata Do Yebáha uinna, nianna uttibana nna bigatsibana attiba bigatsi ka benneola geniha. Laxkala usuba bela latini.
ACT 13:37 Ttaka benne belhidha ben Tata Do Yebáha lo elhuttiha, benneha labí usu bela latie.
ACT 13:38 Laxkala xa betsi to, teeki unale deki Jesús benne labí usu bela latieha, de nu gwate benneha nna rigixxi'entu le gwa teeba elha xen lasi ge ka tulha geri'i.
ACT 13:39 Kumu bia bennabi bodha'an Moisés‑ni labí udaa nuha kuana yua nujari'i ge ka tulha ruinri'i, ttaka ka benne chi ria leke ge Jesús‑ni, de labie nna iyábake labíru yua nujake ge ka tulha ruinke.
ACT 13:40 Laxkala lebi'i, gwaluyú gele kini ka satele luesi nu ra lo ka yetsi ben ka profeta ge Tata Do Yebáha, ata dia ra:
ACT 13:41 Lebi'i ka nu rigu'u ni'ale neti, enitti loobale lhe ugía ya'abale lhe, kumu lhe'e ka sá se'ele nnanna, unia ttu nu labí tsia lele geni, meskiba ganna nuxa kixxi'enna le geni nna labí tsia lele geni.
ACT 13:42 Tti beria ka Pabluha lhe'e yo'o ata rudheti ka benne Israel‑ni ka tisa ge Tata Do Yebáha, nianna tti unnaba ka benne lenkana kini kixxi'arukinna ke ge nu chi unnekanaha ganna chi bedesia attu sá tti reyaka lekeha.
ACT 13:43 Tti chi besatsakeha, nianna ixeru ka benne Israel lhe adíru ka benne dittu ka benne chi ria leke ge Tata Do Yebáha ttiba chi ria le ka benne Israel‑ni, iyábake danalhake Pabluha lhe Bernabé‑ni lhe. Lakana nna rákana ke: ―Bittu udhanle a tsiale lo neda tse chi bedá le Tata Do Yebáha betebie gele.
ACT 13:44 Tti gwadona xumanuha atti chi bedesia sá tti reyaka le ka benne Israel‑ni, la'ania nna a lattiba a bitupa iyá ka benne ge yiesiha kini bedo nagake ge ka tisa ge Tata Do Yebáha.
ACT 13:45 Ttaka tti bilani adíru ka nu Israel‑ni deki ixeba ka benne bitupake niha, nianna ttiba ttu nu upa yie ukakana nna tti udulokana rusia lekani Pabluha nna rákana: “Labí lii nu rinne nuní.”
ACT 13:46 Ttaka Pabluha lhe Bernabé‑ni lhe labí rasikinna rinnekana, rákana: ―Lebi'i ka benne Israel, lade'axa len lebi'i raka doelha kixxi'entu le ka tisa ge Tata Do Yebáha. Ttaka lebi'i rigu'ula ni'ale ka tisa‑ni lhe anágaba lhe ruinbale attisidiba labí elha ralhale aka benle ttu dia lii. De nuha nna ka benne abittu ankake ka benne Israel, ka benneha‑la tsiatu kixxi'entu ke ka tisa‑ni.
ACT 13:47 Kumu aníha chi bodha'an Tata Xisiha len ri'itu tti ree: Lu chi bedúa kini akalu attiba ttu xiani ge ka benne abittu ankake nu Israel kini ixúlu kixxi'alu gasina odiláya ka benne se'e axtaba ka xi'a besi ge yiesi lo yu‑ni.
ACT 13:48 Ka benne abittu ankake nu Israel nna, tti biyienkanie nu ra ka Pabluha, nianna tti bedú ittana leke nna ráke: ―¡Yalháruba tse anka ka tisa ge Tata Xisiha! La'ania nna iyába ka benne chi ga'anna deki aka benke ttu dia lii, iyába ka benneha ugía leke
ACT 13:49 nna lhe'e iyába ka yiesi to se'e itúba ka daka niha chi radhi ka tisa ge Tata Xisiha.
ACT 13:50 Ttaka ka nu loni ge ka nu Israel‑ni nna ulu'u tisakana ka nuila ka nu gwa riarukana yotu lhe ankakana ka nu ra xxeni lekani lo yiesiha lhe, anágaba lhe unnegaba lenkana ka nubiyú ka nu ankakana ka nu loni ge yiesiha, kini ka nuha nna betsatsakana ka benne, nianna tti bochesukana ka Pabluha bebeakana kana lo yu gekaniha.
ACT 13:51 Ka Pabluha nna tti beriakana lhe'esiha nna bekubi ni'akani biste arlo ka nu lhe'esiha. Aníha benkana kini benna liikana deki Tata Do Yebáha labí uyu'u lebie nu ben ka nuha de bebeakana kana lhe'esi gekaniha. Nianna tti bedá ka Pabluha nna bisinkana lhe'esi Iconio.
ACT 13:52 Ttaka ka benne beya'anke lhe'esiha, delába ka benne chi ria leke ge Jesús‑ni, yalhá itta du leke lhe anágaba lhe yu'ugaba Espíritu ge Tata Do Yebáha itúba latike lhe.
ACT 14:1 Uka nuha tti bisin Pabluha lenna Bernabé‑ni lhe'esi Iconio‑ni, ixpabakana uta'akana lhe'e yo'o ata rudheti ka benne Israel‑ni ka tisa ge Tata Do Yebáha. Niha utixxi'akana ge Jesús‑ni itú iki itú lekani. Laxkala ixeru ka benne Israel lhe ka benne abittu ankake nu Israel lhe, ugía leke ge nu rigixxi'akanaha.
ACT 14:2 Ttaka ka nu Israel ka nu abittu ugía lekaniha nna ulu'u tisa ttebakana ka nu dittuha kini ka nuha bebi'i nookana ka benne chi ria leke ge Jesús‑ni.
ACT 14:3 Laa kiga de nuha nna ka Pabluha isáru beya'ankana lhe'esiha kumu de gwa ruxxenba lekani ge Tata Xisiha, laxkala labí rasikinna rigixxi'akana ge nu tse redá lebie rutebie lhe anágaba nna rugwegabe kana lo neda kini ruinkana ka milagru lhe ruinkana adíru ka nu rebaninri'i geni lhe. Ka milagru ruinkanaha, ka nuha runna liikana deki ka tisa rigixxi'akanaha, gwalíba anka ka nuha ge Tata Xisiha.
ACT 14:4 Ka benne ge yiesiha nna la'aba lhe'e luesike: salheke taake ka nu Israel‑ni, nna a salheke nna taake ka apóstoal, delába Pabluha lhe Bernabé‑ni lhe.
ACT 14:5 Ttaka ka nu Israel ka nu abittu ugía lekaniha lhe adíru ka nu abittu ankakana nu Israel lhe, itupa lenkana ka nu rinnabia gekaniha, benkana udhaka disakana ka Pabluha lhe anágaba bengabakana usiakana kana íyya lhe.
ACT 14:6 Tti bina ka Pabluha ge nu rulha le ka nuha uinkana, nianna boxunni ttebakana nna diakana daka Licaonia nna bisinkana lhe'esi Listra lhe bisinkana lhe'esi Derbe lhe. Niha‑ba ugwekikana lhe'e ka yiesi se'e abi'iba ka niha,
ACT 14:7 rigixxi'akana ge Jesús‑ni.
ACT 14:8 Lhe'esi Listra‑ni, niha do ttu benne biyú anka xii ka ni'abie, labí raka dhabie. Labí chi udá benneha itúba anke ttanía, kumu aníha‑ba anke attili ulieha. Benne biyúha dobe
ACT 14:9 rudo nage ge nu ra Pabluha. Nianna tti belanni tsittaba Pabluha loe nna ute denna deki benneha gwa riaba lebie deki gweyakabe.
ACT 14:10 Nianna tti unnena idisa rana benneha: ―¡Udú lii nna udú lhixxa rá! Benne biyúha nna gintsaba udú liie nna udulo ttebe udee.
ACT 14:11 Ka benne se'e niha nna tti bilákanie nu ben Pabluha, nianna unneke idisa len tisa Licaonia. Nuha ankana tisa geke. Nianna ráke: ―¡Len ri'i chi bisia ka diosi ankake benne attiba ankari'i!
ACT 14:12 Nianna tti utixxakana lá Bernabé‑ni diosi Zeus. Pabluha nna utixxakana láni diosi Hermes, kumu de lana nuha rinnena.
ACT 14:13 Ro'o yiesiha do yotu ge diosi nu tee láni Zeus. Bixxudi ridú lhe'e yotuha bisinna nna chena ka ku'una lhe ttu chupa xxia iyya to lhe. Lana itupa lenna ka benne ge yiesiha ruinkana uttikana ka ku'unaha kini utekana ka nuha úna ge Bernabé‑ni lhe ge Pabluha lhe.
ACT 14:14 Ttaka tti ute dani ka apóstoal, delába Bernabé‑ni lhe Pabluha lhe, tti ute dákinna nu ruin ka nuha uinkana, nianna ulhi triba xokani de bituxxukinna nna uta'a ttebakana lagwi ge ka benne tupa niha nna ribesi'abakana, rákana ke:
ACT 14:15 ―¡Xa benne tupa nii, bittu uinle aná! Ki yule bennegaba anka ri'itu, ttigaba ankale anka ri'itu. Ri'itu datu kini rigixxi'entu le ge Jesús‑ni kini udhanle nu abittu dika ixú ruinle‑na nna udaxxule neda ge Tata Do Yebáha benne anka baniha, delába benne benie yebáha lhe yiesi lo yu‑ni lhe indatooha lhe, anágaba bengabe iyába ka nu se'e lokani lhe.
ACT 14:16 Benneha itú nu reha begwelhabe iyába ka benne benbake nu rakaba leke.
ACT 14:17 Laa kiga de nuha nna labí bedú siibie unie nu tse, delába nu runna liina deki gwalíba doe; gwa rutebe inda daa yebáha lhe gwa ruinbe kini rexú tama lena geri'i kini tee tama nu gori'i lhe anágaba gwa rutegabe elha gwedeaka lasi geri'i lhe.
ACT 14:18 Iyába nuha ra ka Pabluha ka nu lhe'esi Listra‑ni, chibuka nisibaaba biri'a lenkana kini abittu betti ka nuha ka ku'unaha kini utekana úna gekani.
ACT 14:19 Tti bisin ttu chupa ka nu Israel ka nu dákana daka Antioquía lhe daka Iconio lhe, nianna ulu'u tisakana ka benne lhe'esiha kini ka benneha besiake Pabluha íyya, nianna tti u'uyake na lo yu nna uleake na ro'esiha, rakakanie ganna chiba uttina.
ACT 14:20 Ttaka tti bitupa ka benne chi ria leke ge Jesús‑ni abi'iba ata tenaha, nianna beyadha ttebana nna beta'a adakabana lhe'esiha. Beyeki sáha nna beria tteba lenna Bernabé‑ni niha nna diakana daka lhe'esi Derbe.
ACT 14:21 Iki de chi utixxi'akana ge Jesús‑ni lhe'esi Derbe‑ni lhe bese'ekana ixe ka benne chi ugía leke ge Jesús‑ni, nianna tti beyekikana besinkana lhe'esi Listra attu libe nna betegabakana lhe'esi Iconio, nialiba nna tti besinkana Antioquía nu re daka Pisidia.
ACT 14:22 Betekana ka niha kini bese'e tsitsikana ka benne chi ria leke ge Jesús‑ni, rákana ke: “Abittu udhanle a tsia lele ge benneha.” Rágabakana ke: “Anába teeki sateri'i uyúri'i elha disa kini anáchu esinri'i ata do Tata Do Yebáha rinnabie.”
ACT 14:23 Lhe'e ttu ttu ka yiesi ata chi se'e ka benne chi ria leke ge Jesús‑ni, lhe'e ttu ttu ka nuha bose'ekana ka benneola kini tse'eke arlo ka benne chi ria leke ge Jesús‑ni. Nianna iki de tti chi bette ubina lhe'e ka Pabluha lhe ulhapikana tisa len Tata Do Yebáha lhe, nianna tti boka'ankana ka benneha lasi ná Jesús benne anke Xxanari'iha, delába benne chi ria leke geeha.
ACT 14:24 Pabluha lhe Bernabé‑ni lhe, iki de chi betekana itúba daka Pisidia, nianna tti bisinkana lo yu ge Panfilia.
ACT 14:25 Lhe'esi Perge, niha utixxi'akana ge Jesús‑ni. Iki de nuha‑liba nna tti ugwadikana diakana lhe'esi Atalia.
ACT 14:26 Niha bodaxxukana barcu kini besinkana lhe'esi Antioquía nu re daka Siria ata biriakana tti bodha'an ka benne se'e niha kana lasi ná Tata Do Yebáha kini aka lenie kana tsiakana kixxi'akana ka tisa geeha, delába ka tisa nu chi uluxakinna utixxi'akanaha.
ACT 14:27 Tti chi besinkana Antioquía‑ni, nianna bottupa ttebakana ka benne chi ria leke ge Jesús‑ni nna utixxi'akinna ke ge iyába nu ben Tata Do Yebáha lenkana lhe utixxi'agabakana gasina udhalie neda gekani kini ka benne abittu ankake nu Israel ugíagaba leke.
ACT 14:28 Lhe'esi Antioquía‑ni isá beya'an Pabluha lhe Bernabé‑ni lhe, use'ekana len ka benne chi ria leke ge Jesús‑ni se'e niha.
ACT 15:1 La'aniagaba nuha bisin ttu chupa ka nu daa daka Judea, bisinkana lhe'esi Antioquía‑ni nna udulokana rule'ekinna ka benne chi ria leke ge Jesús‑ni, delába ka benne abittu ankake nu Israel, bele'ekinna ke rákana ke: ―Labí odilá Tata Do Yebáha le ganna abíba ichú lo bela latile tti ra lo bia bennabi bodha'an Moisés‑ni.
ACT 15:2 De lo ni'a ge nu ra ka nuha nna uxaka xxatta len Pabluha lhe Bernabé‑ni kana. Nianna tti beda'a ro'o ka benne chi ria leke ge Jesús‑ni idhelhake ka Pabluha len attu chupa ka benne geke, kini tsiake Jerusalén‑ni tanneke ge nu rakaha len ka apóstoal lhe len adíru ka benneola se'e niha lhe.
ACT 15:3 Tti udhelha ka benneha ke diake, la'ania uteke daka Fenicia lhe daka Samaria lhe, utixxi'akanie ka betsi to geri'i se'e niha, ráke ka benneha: ―Ka benne abittu ankake nu Israel chigaba bedaxxuke neda ge Tata Do Yebáha. Ka benne biyienkanie nu rigixxi'akeha, iyábake yalhá bedeakanie tti binake nuha.
ACT 15:4 Tti chi bisin ka Pabluha lhe'esi Jerusalén‑ni, ka benne chi ria leke ge Jesús‑ni se'e niha, chi se'e tseke lenke ka benneola gekeha lhe ka apóstoal lhe, iyábake chi se'eke ubeda ka benneha. Nianna utixxi'ani ka Pabluha ke iyá nu chi ben Tata Do Yebáha lenkana.
ACT 15:5 Ttaka ttu chupa ka fariseo ka nu chi ria lekani ge Jesús‑ni se'e niha, udú liikana nna rákana: ―Ka nu dittu ka nu chi ria lekani ge Jesús‑ni, raka doelha ichú lo bela latikani lhe gari'i kana raka doelha udokana tisa ge nu ra lo bia bennabi bodha'an Moisés‑ni lhe.
ACT 15:6 Nianna bitupa ka apóstoal lhe ka benneolaha lhe, kini unneke ge nu ra ka fariseo‑ni.
ACT 15:7 Iki de chi rinne xxattake ge nuha, nianna tti udú lii Pedruha nna rana ke: ―Xa betsi to, lebi'i gwa yúbale, ttuha‑li chi bekwe Tata Do Yebáha neti lagwi gele kini tsiaya len ka benne abittu ankake nu Israel, kixxi'ania ke ge Jesús‑ni kini tsia leke gebie.
ACT 15:8 Kumu Tata Do Yebaa benne rilánie ttixa anka lhe'e lasto ttu tturi'i, benneha tti betebie Espíritu geeha len ka benne abittu ankake benne Israel, la'ania nuha benna liibie deki gulabibe ke. Laxkala ttigaba ri'i chi betebie Espíritu geeha lenri'i, aníha‑gaba ka benneha betegabe Espírituha lenke.
ACT 15:9 Tata Do Yebáha turo'oba runie lenri'i lhe len ka benneha lhe, kumu labie benie kini beyari lhe'e lastoke de ugía leke gebie.
ACT 15:10 De nuha nna, ¿beaka ruinle utse'enle Tata Do Yebáha rudelhale yua di'i kwe'e ka benne abittu ankake nu Israel, ki nila ka benne ukake xuttori'iha lhe nila ri'i a udári'i udori'i tisa ge iyá nu ra lo bia bennabi geri'i‑ni?
ACT 15:11 ¿Laaba ganna ri'i de ria leri'i deki de bedába le Jesús benne anke Xxanari'iha, de nuha‑ba nna kwentaba bodilábie ri'i, anágaba ka benne abittu ankake nu Israel chigaba bodilábie ke?
ACT 15:12 Tti chi uluxa unne Pedruha nna siiba beyaka iyába ka benne tupa niha. Nianna tti uduloke rudo nagake ge Bernabé‑ni lhe ge Pabluha lhe, rigixxi'akana gasina bixúni Tata Do Yebáha kana kini benkana ka milagru lhe benkana adíru ka nu rebaninri'i geni arlo ka nu abittu ankakana nu Israel.
ACT 15:13 Iki de chi uluxakinna unnekanaha, nianna tti unne Jacobuha, rana: ―Xa betsi to, gwaludoru nagale kia.
ACT 15:14 Simón Pedro‑ni chiba utixxi'enna ri'i gasina bele'e Tata Do Yebáha elha si'i lasi geeha sisi'a tte len ka benne abittu ankake nu Israel, bekwebie ke kini akake gebie.
ACT 15:15 Nu benieha raxxína na len nu ra lo ka yetsi bodha'an ka profeta geeha, ata ree:
ACT 15:16 Isia sá eyekia elhidhaa yo'o ge David‑ni nu chi ubixxiha; eyoin tsea ka de'e geniha, nianna tti odo tsea na,
ACT 15:17 kini anáchu egila adíru ka benne neti nna iyába ka benne abittu ankake nu Israel gatta láke benne kia.
ACT 15:18 Aníha ra Tata Xisiha benne utixxi'abie ka tisa‑ni axtali ttuha.
ACT 15:19 ’De nuha nna ―ra Jacobuha― neti rakati labí dika udo doelhari'i ka nu dittu ka nu chi bedaxxukana neda ge Tata Do Yebáha ki uinkana nu ra lo bia bennabi bodha'an Moisés‑ni.
ACT 15:20 Nu uinlari'i idhelhabari'i yetsi gekani gari'i kana, abitturu gokana bela ge ka nimala ka nu ruttikana, delába ka nu rutekana úna ge ka nu labí gwalíga ankakana diosi lhe anágaba, abittu isákana nu subi subi lhe bittu gokana bela ge ttu nimala ganna nuha uttina de bidí yienni, lhe anágaba abittugaba gokana reni ge ka nuha. Suna ge nuníba gari'i kana udokana tisa
ACT 15:21 kumu nu reha‑li chi se'e ka benne lhe'e ttu ttu ka yiesi‑na rigixxi'ake ge nu ra lo bia bennabi bodha'an Moisés‑ni. Nuha ribabana lhe'e ka yo'o ata rudhetiri'i ka tisa ge Tata Do Yebáha tti risia ka sá reyaka leri'i.
ACT 15:22 Ka apóstoal lhe iyába ka benne chi ria leke ge Jesús‑ni lhe ka benneola rise'e arlokeha lhe, iyábake gwa uyu'uba leke nu ra Jacobuha. Nianna tti bekweke ttu chupa ka benne sela lenkeha, kini idhelhake ka benneha len Pabluha lhe len Bernabé‑ni lhe, kini tsiake lhe'esi Antioquía. Silas‑ni lhe Judas‑ni benne rágabake Barsabás, ka benneha nuha bekweke. Lagabake nuha ankake nu loni ge adíru ka betsi to geri'i se'e Jerusalén‑ni.
ACT 15:23 Len ka benneha udhelhake yetsiha. Lo nuha rinneke ráke: “Ri'itu ka apóstol lhe ka benneola se'etu arlo ka benne chi ria leke ge Jesús‑ni ridhelhatu ttu padiuxi gele xa betsi to, lebi'i ka benne abittu ankale nu Israel se'ele lhe'esi Antioquía‑na lhe se'ele daka Siria lhe daka Cilicia lhe.
ACT 15:24 Ri'itu binatu deki chi bita ttu chupa ka nu selakana len ri'itu, labí ri'itu udhelhatu kana. Titúnibakana bisiakana betettisikinna le. Nu utixxi'akinna leha, nuha beni kini bechixxikana ikile. [Rákana le deki teeki ichú lo bela latile lhe teeki uinle nu ra lo bia bennabi bodha'an Moisés‑ni lhe. Aníha kini gwalíga isinle akale ge Tata Do Yebáha.]
ACT 15:25 De nuha nna chi unne iyábatu nna beda'a ro'otu bekwetu ttu chupa ka benne selake len ri'itu kini idhelhatu ke ata se'ele‑na, lenke ka betsi to geri'i Pablu‑ni lhe Bernabé‑ni lhe.
ACT 15:26 Ka benne‑ni chi beria iki beria leke, meskila bixa sateke de rekike rigixxi'ake ge Jesucristu benne anke Xxanari'iha.
ACT 15:27 De nuha nna udhelhatu Judas‑na lhe Silas‑na lhe kini ka benne‑na kixxi'a tsekanie le nu dia lo yetsi ridhelhatu‑ni.
ACT 15:28 Espíritu ge Tata Do Yebáha lhe ri'itu lhe chi bokinni ikitu labíru attu bixa yua udelhatu kwe'ele, suna nu ratu lo yetsi‑niba raka doelha uinle,
ACT 15:29 delába bitturu gole bela ge ka nimala ka nu ruttikana rutekana úna ge ka nu labí gwalíga ankakana diosi, nigaba bittu gole reni gekani lhe abittugaba gole bela ge ttu nimala ganna uttina de bidí yienni. Anágaba lhe bittugaba isále nu subi subi. Ganna lebi'i uinle nu ratu‑ni, la'ania nna tseba nuha uinle. Besiru gwaltse'e.”
ACT 15:30 Nianna iki de chi uchú tisa ka Pabluha ka benne se'e Jerusalén‑ni, nianna tti beyadike deyyake lhe'esi Antioquía‑ni. Tti chi besinke lhe'esiha nna bottupa ttebake ka benne chi ria leke ge Jesús‑ni se'e niha nna begweke ka benneha yetsi dechekeha.
ACT 15:31 Tti chi belaba ka benneha yetsiha nna bodú itta ttebana leke tti binake ge elha xen lasi rute ka benne rinne lo yetsiha.
ACT 15:32 Anágaba Judas‑ni lenna Silas‑ni, kumu de ankagabake profeta ge Tata Do Yebáha, de nuha nna ixeba nu unneke kini bodú ittaruke le ka betsi to geri'i se'e niha lhe bose'e tsitsigabake ka benneha lhe.
ACT 15:33 Iki de chi ute isá to, la'ania nna latsiruba uchú tisa ka betsi to geri'i se'e niha Judas‑ni lhe Silas‑ni lhe, kini eyekike eyyake Jerusalén ata se'e ka benne udhelhake keha.
ACT 15:34 [Ttaka Silas‑ni rakaba leni eya'anruna Antioquía‑ni.]
ACT 15:35 Pabluha lhe Bernabé‑ni nna beya'anbake Antioquía‑ni, nna lenke adíru ka benne utixxi'ake lhe bele'eke ka tisa ge Jesús benne anke Xxanari'iha.
ACT 15:36 Isá to gwadána, nianna tti ra Pabluha Bernabé‑ni: ―Tsiari'i attu libe lhe'e iyá ka yiesi ata chi gwattixxi'ari'i ka tisa ge Jesús benne anke Xxanari'iha, kini salanniri'i ka betsi to geri'iha ttixa se'eke.
ACT 15:37 Bernabé‑ni nna rakaba leni ichekana Juan nu tegaba láni Marcos.
ACT 15:38 Ttaka Pabluha labíru uka leni ichekana nuha, kumu tti uchekana na ttuha, bedálana tti se'ekana Panfilia‑ni nna labíru gwanalhana kana kini kixxi'akana ka tisa ge Jesús‑ni.
ACT 15:39 Tsitsiba uxaka len luesikani ge nuha. Laxkala axtaba ulha'a lhe'e luesikani. Bernabé‑ni che ttebana Marcos‑ni uta'akana lhe'e barcu nna diakana daka Chipre.
ACT 15:40 Pabluha nna bekwena Silas‑ni nna ka betsi to geri'i se'e niha nna bedha'anbake kana lasi ná Tata Xisiha kini aka lenie kana. Nianna tti biria ttebakana diakana.
ACT 15:41 Utekana daka Siria lhe daka Cilicia lhe ruse'e tsitsikana ka benne chi ria leke ge Jesús‑ni se'e ka daka niha.
ACT 16:1 Pabluha lhe Silas‑ni lhe bisinkana lhe'esi Derbe lhe Listra lhe. Lhe'esi Listra do ttu nubiyú ria leni ge Jesús‑ni. Nuha tee láni Timoteo, ankana xi'ini ttu benne nuila anke nu Israel. Benneha riagaba lebie ge Jesús‑ni. Tata ge Timoteo‑ni anke benne griegu.
ACT 16:2 Ka betsi to geri'i se'e lhe'esi Listra lhe Iconio lhe ka benneha ráke tseba ruin Timoteo‑ni.
ACT 16:3 Laxkala Pabluha raka leni ichena Timoteo‑ni, ttaka kumu de se'e ka nu Israel itúba ka daka niha, de nuha nna teeki uchúna lo bela lati Timoteo‑ni, kumu iyába ka nuha yúkana deki nu grieguba anka xxudini.
ACT 16:4 Kua riteba ka Pabluha lhe'e ka yiesi ata risinkanaha rigixxi'akana nu ra lo yetsi udhelha ka apóstoal lhe udhelha ka benneola se'e Jerusalén‑ni lhe. Rákana ka benne ge ka yiesiha deki teeki udoke tisa ge nu ra lo yetsi udhelha ka benneha.
ACT 16:5 Laxkala ka benne chi ria leke ge Jesús‑ni se'e itúba ka daka niha gwa diabake ria tsitsiru leke ge Jesús‑ni lhe anágaba lhe ttu ttu ságaba diake raniruke lhe.
ACT 16:6 Kumu de labí uka le Espíritu ge Tata Do Yebáha kixxi'a ka Pabluha ka tisa ge Jesús‑ni daka Asia, de nuha nna utelakana diakana daka Frigia lhe daka Galacia lhe.
ACT 16:7 Tti bisinkana lo debaa ge Misia, nianna benkana ga'akana daka Bitinia. Ttaka Espírituha labí begwelhe kana ga'akana niha.
ACT 16:8 De nuha nna utebakana lo yu ge Misia nna ugwadikana bisinkana lhe'esi Troas.
ACT 16:9 Lo relaha nna bela'ani Pabluha ttu nubiyú ge Macedonia, nuha duna rinnaba ditina len Pabluha, rana na: “Utáchi daka Macedonia‑ni kini ute nálu len ri'itu.”
ACT 16:10 Iki de tti chi bela'ani Pabluha nubiyúha, nianna bediuba tteba letu kini tsiatu daka Macedonia‑ni, kumu yu xeabatu deki Tata Do Yebáha‑ba nuha raxie ri'itu kini tsiatu tattixxi'entu ka benne se'e niha ka tisa ge Jesús‑ni.
ACT 16:11 Udátu lhe'esi Troas bedaxxutu barcu nna lii raba bisintu lo ttu yu re lagwi indatooha. Nuha tee láni Samotracia. Beyeki sáha nna bisintu lhe'esi Neápolis.
ACT 16:12 Bededátu niha nna bisintu lhe'esi Filipos. Nuha ankana ttu yiesi ra xxeni leni rena lo yu ge Macedonia. Yiesiha babana Roma. Niha bisátu ttu chupa ubisa.
ACT 16:13 Tti bisia sá tti reyaka le ka benne Israel‑ni nna biriatu ro'o yiesiha nna bisintu ro'o ttu yoo tee niha ata ritupa ka benne Israel‑ni kini rilhapike tisa len Tata Do Yebáha. Bisintu niha nna use'etu lo yu, nianna udulo ttebatu utixxi'entu ka nuila tupa niha ka tisa ge Jesús‑ni.
ACT 16:14 Niha sela ttu nuila tee láni Lidia. Nuha ankana nu lhe'esi Tiatira. Rutto'ona ka lari xiná ka nu raka xxatta yaxi. Nuilaha ankagabana benne rudú xibini arlo Tata Do Yebáha. Lana rebana gwedo naga. Nianna tti begalha Tata Xisiha lhe'e lastoni kini ugía leni ge nu rigixxi'a Pabluha.
ACT 16:15 Tti chi ugía leniha nna udi ttebana inda lenna iyába ka benne geniha. Nianna tti unnabana lentu, rana: ―Ganna rale deki gwalíga chi ria lasia ge Jesús benne anke Xxanari'iha, nnanna nna gwaletá gwaleya'ana lhe'e lisia ganna xa. Nianna doelhaba benna kini beya'antu lhe'e lisiniha.
ACT 16:16 Ttu lidú diatu isintu ata ritupa ka benne rilhapike tisa len Tata Do Yebáha. Lo neda diatuha, niha betetsá ttu nuila kwiti ri'itu. Nuilaha yu'u ttu espíritu xxegwi latini, espíritu xxegwiha ruinna kini rinne ya'ana. Ixeni belhiu ribea ka xxananiha len nuilaha de rinne ya'ana.
ACT 16:17 Nuilaha nna udulo ttebana danalhana ri'itu lentu Pabluha, nianna rinnena idisa rana: ―Ka nubiyú reki nii ankakana ka benne rixúni Tata Do Yebaa benne ra xxeni xxatta leeha. Rixúnie kana kini rigixxi'akana gasina odilábie ka benne.
ACT 16:18 Ixe ubisa gwadána, aníha‑ba ruin nuilaha rekina. Nianna tti bitisin Pabluha nna bedhaka disana espíritu xxegwi yu'u lati nuilaha nna rana espírituha: ―¡Jesucristuha rudettia rulisaa lu, beria lati nuila‑ni! Loora tteba nna beria tteba espírituha lati nuilaha.
ACT 16:19 Ttaka ka xxananiha, tti ute dákinna deki labíru dhaakana kweakana belhiu len nuilaha, nianna tti bedaxxukana Pabluha lhe Silas‑ni nna ure na'ayakana ke nna chekana ke ro'o yo'o lagwiha. Nianna tti gwaga'akana ke lo ka uxtisiha.
ACT 16:20 Tti chi se'eke arlo ka nu runi elhuxtisiha, nianna ra ka nu chekana keha ka uxtisiha: ―Ka nubiyú se'e nii ankakana ka nu Israel nna rekikana rutsatsakana ka benne lhe'esi geri'i‑ni
ACT 16:21 lhe rule'ekinna ri'i nu labikinna ruinkana nu abittu dika uinri'i, nigaba ulabiri'i nu rákana lhe, kumu ri'i benne Romaba ankari'i.
ACT 16:22 Nianna bebi'i noo tteba yiesiha Pabluha lhe Silas‑ni lhe. Ka uxtisiha nna benkana mandadu kini galhi tribakana xo ka Pabluha kini ukulhakana ke len ya diti.
ACT 16:23 Iki de chi uya xxattakana ka Pabluha, nianna tti bedheakana ke lisiyya, nna tti rákana nu ruyúna ro'o lisiyyaha: “Uyú tsitsilu ka nuní.”
ACT 16:24 Nubiyú ruyúna ro'o lisiyyaha nna, tti rákana na aníha, la'aniala nna bega'aruna ka Pabluha lhe'e lisiyya nu do axtaru lhi'uha, nianna tti bega'ana yien ni'ake lhe'e ka yieru sia lhe'e ttu yaga tee niha.
ACT 16:25 Ttaka ttiba tu riluela nuha udulo Pabluha lenna Silas‑ni rilhapikana tisa len Tata Do Yebáha lhe rulhakana gebie lhe. Adíru ka nu tee lhe'e lisiyyaha nna gwedo nagaba tekana.
ACT 16:26 Ttiruba ttu nnelaba bixú idí nna ttiruba bitá itúba lisiyyaha. Nianna biyali tteba iyába ka puerta ge lisiyyaha lhe beyasigaba ka cadena xika iyá ka nu tee lisiyyaha lhe.
ACT 16:27 Tti chi beben nu ruyúna ro'o lisiyyaha nna bilenna chi du yali ka puertaha. Nianna tti uleana espada geniha nna la labana ruinna uin geni kumu ukinna ganna chiba boxunni ka nu tee lisiyyaha.
ACT 16:28 Ttaka Pabluha nna unnena idisa, rana nuha: ―¡Bittu uinlu aná! ¡Niiba tee iyába ri'itu!
ACT 16:29 Nu ruyú ro'o lisiyyaha nna unnaba ttebana ttu gi kini ilenna, nianna riresubana uta'ana. Itú rixidibana bedú xibini arlo Pabluha lhe Silas‑ni lhe.
ACT 16:30 Nianna tti bebeana ka Pabluha nna unnaba tisana rana kana: ―Tata to, ¿bíla anka nu unia kini odilá Tata Do Yebáha neti ganna?
ACT 16:31 Lakana nna bekabikana geni, rákana na: ―Ugía lelu ge Jesucristu benne anke Xxanari'iha. La'ania nna gwalábalu lhe gwalágaba iyá ka benne gelu se'e lhe'e lisiluha lhe.
ACT 16:32 Nianna tti utixxi'akinna na ge Jesús benne anke Xxanari'iha lhe iyába ka benne se'e lhe'e lisiniha lhe.
ACT 16:33 Lo relaha tteba nna utína lo gwe ge ka Pabluha, anágaba nna udi ttegabana inda itupa lenna iyá ka benne se'e lhe'e yo'o geniha.
ACT 16:34 Nianna tti dechena ka Pabluha lisiniha begona kana yetta nna yalhá itta bedú leni itupa lenna iyába ka benne se'e lhe'e yo'o geniha de chi ugía lekani ge Tata Do Yebáha.
ACT 16:35 Tti chi ugwani dilaha nna udhelha tteba ka xuedaha ka gwensinaha kini ugía ka nuha gweasikana nu ruyúna ro'o lisiyyaha: ―Chinka olhálu ka nuná.
ACT 16:36 Nu ruyúna ro'o lisiyyaha nna utixxi'enna Pabluha, rana na: ―Ka xuedaha chi udhelhakana rákana chinka olháya le. Laxkala chinka gwaleria nna besiru gwaleyya.
ACT 16:37 Ttaka Pabluha nna rana ka gwensinaha: ―Ri'itu ankatu benne Roma nna kwentaba uyakana ri'itu arlo benne. Nigaba a ulea liikana bixa bentu nna ladiba bega'akana ri'itu lisiyya. Nnanna nna, ¿si ruinbakana sigába ebeakana ri'itu? ¡Labí eria ri'itu! Labakana itakana kini ebeakana ri'itu.
ACT 16:38 Ka gwensinaha nna besinkana utixxi'akinna ka xuedaha nu ra Pabluha. Ka xuedaha nna usibakinna tti binakana deki ka Pabluha ankakana benne Roma.
ACT 16:39 Nianna tti ugíakana gwannaba ditibakana len Pabluha lhe Silas‑ni lhe kini dhike elha xen lasi gekani. Nianna tti bebeakana ke lisiyya nna unnabakana lenke kini eriake lhe'esiha.
ACT 16:40 Tti beria Pabluha lenna Silas‑ni lhe'e lisiyyaha, nianna deyya ttebake besinke lisi Lidia‑ni. Iki de chi unne lenke ka betsi to geri'i se'e niha lhe bodú ittake le ka benneha lhe, nianna tti bedáke deyyake.
ACT 17:1 Iki de chi ute ka Pabluha lhe'e ka yiesi Anfípolis lhe Apolonia lhe, nianna bisinkana lhe'esi Tesalónica. Niha do ttu yo'o ata rudheti ka nu Israel‑ni ka tisa ge Tata Do Yebáha.
ACT 17:2 Pabluha nna ttiba chi labinna ruinna, ugía ttebana lhe'e yo'o ata rudheti ka nuha ka tisa ge Tata Do Yebáha nna delo tsunna xumanuha nna kua risiaba ka sá tti reyaka le ka nuha, ridaka lenna kana.
ACT 17:3 Rudaxxu ni'ani nu ra lo ka yetsi ge Tata Do Yebáha, kini rule'enna ka nu Israel‑ni, rana kana deki benne anke Cristuha teeba ki utti benneha, iki de nuha nna tti beyadhe lagwi ge ka benne chi uttiha lhe rágabana kana: ―La Jesús benne rigixxi'ania le gee‑ni, la benne‑nigaba nuha anke Cristu.
ACT 17:4 Ttu chupa ka nu Israel‑ni nna gwa ugíaba lekani, nianna gwatselakana Pabluha lhe Silas‑ni lhe. Anágaba ka nu griegu ka nu gwa rudo tsitsikana tisa ge Tata Do Yebáha, ixegabakana ugía lekani ge Jesús‑ni lhe ixegaba ka nuila ka nu ra xxeni lekani lo yiesiha, ugíagaba lekani.
ACT 17:5 Nuha‑ba biyú adí ka nu Israel‑ni nna bitisikinna ka Pabluha. Nianna tti ugíakana gwattupakana ka nu ruin satsa reki lo ka neda, ka nu labí bixa tee uinkana. Atti chi gwattupakana ixe ka nuha, nianna betsatsakana yiesiha nna tti ugíakana gwatta'akana lhe'e lisi benne tee lábie Jasón, ruinkana salheakana Pabluha lhe Silas‑ni lhe kini taga'akana ke lo benne.
ACT 17:6 Ttaka kumu anúba ka Pabluha gwaxxakakana niha, nianna Jasón‑niba lhe attu chupa ka betsi to geri'iha, ka benneha‑ba ure na'ayakana nna gwaga'akana ke lo ka uxtisi ge yiesiha. Nianna ribesi'abakana, rákana: ―Ka nu reki ruchixxikana iki ka benne se'e itúba yiesi lo yu‑ni, nnanna chigaba bisia ka nuha nii,
ACT 17:7 ttaka Jasón‑ni nna belabilana ka nuha lhe'e lisiniha. ¡Ka nuní, iyábakana rigu'ula ni'akani ka tisa bodha'an César benne rinnabia xeniha! ¡Rálakana deki dola attu nu rinnabia xxeniru, nuha tee láni Jesús!
ACT 17:8 Tti biyienini ka benne ge yiesiha lhe ka uxtisiha nu ra ka nuha, nianna bituxxukinna.
ACT 17:9 Ttaka unnababakana belhiu len Jasón‑ni lhe len adí ka betsi to geri'iha. Aníha‑ruba kini bolhákana ke.
ACT 17:10 Tti chi ulha sáha nna udhelha tteba ka betsi to geri'iha Pabluha lhe Silas‑ni diakana daka lhe'esi Berea. Tti bisinkana niha, nna ugía ttebakana lhe'e yo'o ata rudheti ka nu Israel se'e niha ka tisa ge Tata Do Yebáha.
ACT 17:11 Ka nuha gwa rokinnirula ikikani rudo nagakani ge ka Pabluha attichula ka nu Tesalónica‑ni. Laxkala itú iki itú lekani belabikana ka tisa ge Jesús‑ni nna ttu ttu sába rise'ekana rulaba tsitsikana nu ra lo ka yetsi ge Tata Do Yebáha kini yúkana ganna si gwalí gwa raxxína nu rigixxi'en Pabluha kana len nu ra lo ka yetsiha.
ACT 17:12 Aníha uka nna ixebakana ugía lekani ge Jesús‑ni. Anágaba nna ixegaba ka nu abittu ankakana nu Israel ugíagaba lekani gebie, axtala ka nuila ka nu ra xxeni lekani lo yiesiha lhe ka nubiyúha lhe, axtala ka nuha ugía lekani.
ACT 17:13 Ttaka tti bina ka nu Israel se'e Tesalónica‑ni deki Pabluha rula'agabana ka tisa ge Tata Do Yebáha lhe'esi Berea‑ni, nianna ugíakana niha, nna betsatsakana yiesiha.
ACT 17:14 Ttaka ka betsi to geri'i se'e Berea‑ni bebea ttebake Pabluha bedhelhake na daka ro'o indatooha nna a sunruba Silas‑ni lenna Timoteo‑ni beya'ankana lhe'esi Berea‑ni.
ACT 17:15 Ka benne deyya lenke Pabluha, axtaba lhe'esi Atenas gwadha'anke na. Tti chi eyekikeha nna ra Pabluha ke: ―Gale Silas‑ni lhe Timoteo‑ni lhe ugwe gaaba lekani esiakana ata rea‑ni.
ACT 17:16 Laka do Pabluha lhe'esi Atenas‑ni ribedana ka Silas‑ni kini esinkana niha, labí bedú tsena leni de bilenna itúba lhe'e yiesiha sia ka nu labí gwalíga ankakana diosi.
ACT 17:17 Laxkala lhe'e yo'o ata rudheti ka nu Israel‑ni ka tisa ge Tata Do Yebáha, niha ridaka lenna ka nuha lhe ridakagaba lenna adíru ka nu rulhakana le'a ge Tata Do Yebáha. Aníha‑gaba ruinna ttu ttu sá ata ritupa ka benne lagwi yiesiha.
ACT 17:18 Uxakagaba lenna ttu chupa ka nu yuu, delába ka nu tee lákani Epicúreo lhe Estoico lhe. Ka nuha attu elha rieni subila chekana. Ttu chupa ka nuha rákana: ―¿Bí ge nuní rinne nu ro'o yayya reki nii? Adíkana nna rákana: ―Gaxa ge ka diosi subiba rigixxi'a nuní. Aníha rákana kumu de rigixxi'a Pabluha ge Jesús‑ni lhe de rana deki ka benne chi uttiha gweyaka benba ka benneha.
ACT 17:19 Nianna tti chekana Pabluha lo ttu lhilhi ata tee láni Areópago. Niha nuha ritupa ka nu runi elhuxtisi ge yiesiha. Nianna tti unnaba tisakana Pabluha, rákana na: ―Utixxi'en ri'itu, ¿bí attu tisa kubi nuní rule'enlu ri'itu?
ACT 17:20 Kumu lu rinnelu ge nu labí yutu. Nnanna nna raka letu kixxi'enlu ri'itu, ¿bí ge nuní rinnelu?
ACT 17:21 Kumu iyába ka nu Atenas‑ni lhe adíru ka nu dittu se'e niha, ttixka riyienkinna bixa attu nu subi nna yalhá rudona lekani rudo nagakani lhe rinnekana ge nuha lhe.
ACT 17:22 Nianna tti udú lii Pabluha nna udúna lagwi ge ka benne tupa lhe'e ata tee láni Areópago‑ni nna unnena rana: ―Lebi'i benne Atenas, neti riláti deki lebi'i yalhá rudona lele ria lele ka diosi gele‑na,
ACT 17:23 kumu nnanna rekia lhe'esi‑ni nna ritea ata daa ka bekú ata rudú xibile lo ka diosi gele‑na. Naa biláti ttu bekú dia ka letra loni ata ra: “Bekú ge diosi nu labí ankabienri'i.” Laxkala diosi benne rudú xibile arloe meskiba abittu ankabienlee, ge benneha nuní rigixxi'ania le.
ACT 17:24 Benneha benie yiesi lo yu‑ni lhe iyá tte nu se'e loni lhe. Lagabe anke xxana yebáha lhe xxana yiesi lo yu‑ni lhe, de nuha nna benneha labí ridoe lhe'e yotu nu runi ka benne len ni'a náke.
ACT 17:25 Nigaba labí riyasanie uin ka benne ttu bixa gebie, kumu ki lalee nuha runie kini raka benri'i lhe anágaba rutegabe be kini ralhiri'i se'eri'i yiesi lo yu‑ni lhe rutegabe adíru nu rixuinri'i lhe.
ACT 17:26 Benneha ttúba benne bixúnie kini se'e iyá tte ka benne yiesi lo yu‑ni kini tse'eke itú loni lhe anágaba bodha'angabe nukaxa tse'eke lhe gá daka tse'eke lhe.
ACT 17:27 Aníha benie kini odeki loke egilake bie, kini ni kina gaa itú rigan ridenbake nna gwasaxxakabake bie, meskiba Tata Do Yebáha labí idittu reki benneha ata se'e ttu tturi'i.
ACT 17:28 Kumu de labie nna gwa anka benri'i lhe gwa ritári'i lhe gwa se'eri'i yiesi lo yu‑ni lhe, ttigaba ra ttu benne gele, benne rinnebie ka tisa tsagwiha, tti ree: “Ri'i ankari'i xi'in Tata Do Yebáha.”
ACT 17:29 Laxkala ri'i de ankari'i xi'in Tata Do Yebáha, de nuha nna labí dika ulaba leri'i deki benneha gwaka geri'i eyoinri'e ge oru lhe ge plata lhe o ge íyya lhe, luesi nu rotsi'inu le ka benne ruin len náke.
ACT 17:30 Tata Do Yebáha bexxulhaba lebie nu ben ka benne tti abittu chi yukeha. Ttaka nnanna runie doelha kini iyá tte ka benne, gaxaba se'eke nna teeki odúna ke nna odaxxuke neda gebie.
ACT 17:31 Kumu labie chi ga'ananie ttu sá unie elhuxtisi ge ka benne se'e yiesi lo yu‑ni attiba ankaba geni. Ixúnie ttu benne chi bekwebie kini benneha unie nuha. Tti belhidhe benneha lagwi ge ka benne chi uttiha, la'ania bele'enie iyá ka benne deki gwalí benne chi bekweeha nuha unie elhuxtisi.
ACT 17:32 Tti biyienkinna deki gweyaka benba ka benne chi uttiha, la'ania nna adíkana bexisilakana nna adíkana nna rálakana: ―Attu sá chiga udo nagatu ge nu rigixxi'alu‑ni.
ACT 17:33 Aníha‑ba uka na beria Pabluha lagwi gekani.
ACT 17:34 Ttaka ttu chupa ka benne ugía leke ge nu rigixxi'a Pabluha, ka benneha gwa biselabake lenna. Biselagaba ttu benne tee lábie Dionisio. Benneha anke ttu benne sele ka nu runi elhuxtisi ge yiesiha, delába ka nu ritupakana lhe'e Areópago‑ni. Biselagaba lenke ttu nuila tee láni Dámaris lhe adíru ka benne lhe.
ACT 18:1 Iki de nuha nna bedá Pabluha lhe'esi Atenas‑ni nna besinna lhe'esi Corinto.
ACT 18:2 Niha beti'ana ttu benne Israel tee lábie Aquila, ulie daka Ponto. Benneha si bisin gaabe lenie benne nuila geeha lhe'esi Corinto‑ni. Benne nuilaha tee lábie Priscila. Bedáke daka Italia kumu Claudio nu rinnabia xeniha benna doelha kini beria iyá ka benne Israel ka benne se'e lhe'esi Roma. Pabluha nna ugíana gwalannina ka Aquila‑ni,
ACT 18:3 kumu lana ruingabana sina luesi nu ruin ka benneha, delába ruinke ka yo'o lari. Aníha uka nna beya'anna udona len ka benneha nna ttúba urenke sina.
ACT 18:4 Kua risiaba ka sá tti reyaka le ka nu Israel‑ni, ria Pabluha ata rudheti ka nuha ka tisa ge Tata Do Yebáha ridaka lenna kana, ruinna kini okinni ikikani ge nu rana kanaha lhe okinnigaba iki ka nu abittu ankakana nu Israel lhe.
ACT 18:5 Tti bedá Silas‑ni lhe Timoteo‑ni daka Macedonia‑ni nna bisinkana ata re Pabluha, lana nna sun ge ka tisaha‑ba rudo leni rigixxi'ana, rana ka nu Israel‑ni deki Jesús‑ni nuha anke Cristu.
ACT 18:6 Ttaka lakana nna redú disalakana loni lhe rigelakana ikini lhe. Tti bilenna nu ruin ka nuha, nianna bekubina ka xoniha. Aníha benna liina deki labí anka tse nu ben ka nuha. Nianna tti rana kana: ―Tulha gebale ganna nnittile. Neti chiba betto lonia utixxi'ania le. Labíru tulha kia ganna lebi'i bixa satele. Debá nnanna nna len ka nu abittu ankakana nu Israel, len ka nuha‑la tsiaya kixxi'ania kana.
ACT 18:7 Iki de chi beriana ata se'e ka nuha, nianna gwata'ana lhe'e lisi ttu benne dittu tee lábie Justo. Benneha rulhagabe le'a ge Tata Do Yebáha. Yo'o geeha dona gaxxaba kwe'e yo'o ata rudheti ka nu Israel‑ni ka tisa ge Tata Do Yebáha.
ACT 18:8 Crispo nu rinnabiana lhe'e yo'o ata rudhetikana ka tisaha ugíagaba leni ge Jesús benne anke Xxanari'iha, itupa lenna iyába ka benne se'e lhe'e lisiniha. Anágaba lhe ixegaba ka nu Corinto‑ni, ugíagaba lekani tti biyienkinna nu ra Pabluha, nianna tti udikana inda.
ACT 18:9 Ttu lo rela Pabluha bele'enna Jesús benne anke Xxanari'iha, rabie na: ―Bittu gasinlu. Bedoba lelu utixxi'a ka tisa‑na. Bittu aka siilu,
ACT 18:10 kumu neti gwa dubaa lenlu. Laxkala lanú nu bixa udhakana lu, kumu lhe'e yiesi‑ni ixeba ka benne chi ga'anati akake kia.
ACT 18:11 Aníha uka nna beya'anba Pabluha lhe'esi Corinto‑ni ttu ida nalha rule'enna ka benne se'e niha ka tisa ge Tata Do Yebáha.
ACT 18:12 Ttaka tti anka Galión‑ni nu rinnabia ge Acaya‑ni, ka nu Israel‑ni ttúba bese'ekana bebi'i nookana Pabluha, bedaxxukana na nna gwaga'akana na lo ka nu ruin elhuxtisiha,
ACT 18:13 nianna tti rákana Galión‑ni: ―Nubiyú du‑ni rekina ridí yiena ka benne kini udú xibike lhe ulhake le'a ge Tata Do Yebáha attu ya le; rule'enna ke nu labí raxxína len nu ra lo bia bennabi getu nu bodha'an Moisés‑ni.
ACT 18:14 Pabluha chiba daa ro'oni innena bixa innána, tti ra Galión‑ni ka nu Israel‑ni: ―Lebi'i benne Israel, ganna nuní benna elhutti o bixa ttu nu gwalíga anka satsa, la'anialigaba nna gudoba nagaa gele.
ACT 18:15 Ttaka kumu suna tisaba nuná lhe suna ge ka benne rudettile‑naba nuná, anágaba lhe suna ge ka bia bennabi gele‑naba nuná rinnele, ge nuníligaba nna labí raka lasia uga'a kia. Kwinaba lebi'i gwaluni elhuxtisi geni.
ACT 18:16 Nianna tti bebea Galión‑ni kana ata donaha.
ACT 18:17 Nianna bebi'i noo tteba iyákana Sóstenes nu rinnabia lhe'e yo'o ata rudhetikana ka tisa ge Tata Do Yebáha, bedaxxukana na nna uyakana na arlo ka nu runi elhuxtisiha. Ttaka Galión‑ni nna labí betabinna ge nu benkanaha.
ACT 18:18 Pabluha isáru beya'anna lhe'esi Corinto‑ni. Delola nna uchú tisana ka betsi to geri'i se'e niha nna bedána deyyana daka Siria lenna Priscila‑ni lhe Aquila‑ni lhe. Tti deyu'ukana neda deyyakanaha, betekana lhe'esi Cencrea. Niha uchú iki Pabluha ben xiga ikini, kumu chiba ulhuxinna nu chi rana Tata Do Yebáha uinna. Nialiba nna tti bodaxxukana barcu kini esinkana daka Siria.
ACT 18:19 Tti besinkana lhe'esi Éfeso, niha‑ba bese'e Pabluha ka Priscila‑ni lhe Aquila‑ni lhe. Lana nna uta'a ttebana lhe'e yo'o ata rudheti ka benne Israel‑ni ka tisa ge Tata Do Yebáha, nianna udulona rinne lenna ka benneha.
ACT 18:20 Ka benneha nna unnabake lenna kini eya'anruna attu chupa ubisa lenke, ttaka lana nna labíru uka leni eya'anna.
ACT 18:21 Nianna uchú tisana ka benneha nna rana ke: ―[Teeki eya'aya Jerusalén‑ni. Niha‑ba uttea laní nu chi dabiga isia], ttaka ganna Tata Do Yebáha aka lebie, la'ania nna gwedesiabaa len lebi'i attu libe. Iki de nuha nna tti bodaxxu Pabluha barcu lhe'esi Éfeso‑ni nna deyyana.
ACT 18:22 Tti besinna lhe'esi Cesarea‑ni, nianna tti ugwapina diana Jerusalén‑ni gwagwena padiuxi ka benne chi ria leke ge Jesús‑ni se'e niha. Niala nna tti deyyana besinna lhe'esi Antioquía.
ACT 18:23 Isá to gwadána udona lhe'esi Antioquía‑ni. Niala nna tti bederiana dedheyyana attu libe, kua suba diana ritena lhe'e ka yiesi ge Galacia lhe ge Frigia lhe, rose'e tsitsina ka benne chi ria leke ge Jesús‑ni se'e ka daka niha.
ACT 18:24 Lhe'esi Éfeso‑ni, niha bisin ttu nubiyú tee láni Apolos. Nuha ankana benne Israel, ulina lhe'esi Alejandría. Lana ankana ttu benne yuna rinnena lhe anágaba lhe tseba yuna nu ra lo ka yetsi ge Tata Do Yebáha lhe.
ACT 18:25 Nubiyúha chiba utixxi'akinna na gasina anka neda ge Jesús benne anke Xxanari'iha nna yalhá itta du leni lhe lhixxa rába rigixxi'ana nu chi yuna ge Jesús‑ni, meskiba labí iyá tte chi yuna, sunruba yuna bí ge begadi Juan‑ni ka benne inda.
ACT 18:26 Apolos‑ni labí rasinna, itú iki itú leni rinnena arlo ka benne se'e gwedo naga lhe'e yo'o ata rudheti ka nu Israel‑ni ka tisa ge Tata Do Yebáha. Ttaka tti biyienin Priscila‑ni lhe Aquila‑ni geni, nianna tti uxikana na attu ta subi kini utixxi'a tsekinna na gasinattiga anka neda ge Tata Do Yebáha.
ACT 18:27 Apolos‑ni ruinna tsiana daka Acaya. Ka betsi to geri'i se'e Éfeso‑ni nna gwa uyu'uba leke nu ranaha, nianna tti benke ttu yetsi ata rulisake ka benne chi ria leke ge Jesús‑ni se'e Acaya‑ni kini ulabike Apolos‑ni ganna chi bisinna niha. Tti chi bisinna Acaya‑ni nna yalhá bixúna bete náni len ka benne chi bedá le Tata Do Yebáha uxie ke kini ria leke gebie,
ACT 18:28 kumu lana ridaka lenna ka nu Israel‑ni arlo benne. Labí retabinna tti rigu'u ni'ani ge nu ra ka nuha kumu nu ra lo ka yetsi ge Tata Do Yebáha‑ba rudaxxu ni'ani kini rigixxi'ana deki Jesús‑niba nuha anka Cristu.
ACT 19:1 Laka re Apolos‑ni lhe'esi Corinto‑ni, Pabluha nna iki de chi utena lhe'e ka yiesi se'e daka ata sia ka i'iyaha, nianna tti ugwadina bisinna lhe'esi Éfeso. Niha gwaxxakana ttu chupa ka benne chi ria leke ge Jesús‑ni.
ACT 19:2 Unnaba tisana ka benneha, rana ke: ―¿Si gwa uxíle Espíritu ge Tata Do Yebáha tti ugía lele ge Jesús‑ni? Ka benneha nna bekabike, ráke na: ―Niru tsa labí chi biyienintu ge Espíritu ge Tata Do Yebáha.
ACT 19:3 Nianna tti unnaba tisa Pabluha ke, rana ke: ―Tti udile indaha, ¿bí ge udile nuha? Ka benneha nna bekabike, ráke: ―Uditu inda de ka tisa utixxi'en Juan‑ni ri'itu.
ACT 19:4 Pabluha nna rana ke: ―Juan‑ni begadina ka benne inda de bodúna ke ge nu ruinkeha nna bodaxxuke neda ge Tata Do Yebáha. La'ania rana ke deki teeki tsia leke ge benne si isiaha, delába Jesús benne anke Cristuha.
ACT 19:5 Tti biyienkanie nu ra Pabluha, nianna begadi ttebakana ke inda bedettikana lá Jesús benne anke Xxanari'iha.
ACT 19:6 Tti uxxua ná Pabluha iki ka benneha, la'ania bisia Espíritu ge Tata Do Yebáha uyu'e latike nna uduloke unneke attu tisa subi lhe utixxi'ake nu raka le Tata Do Yebáha una ka benne lhe.
ACT 19:7 Ttiba tsi'inu (12) anka de iyá tte ka benne biyú udi indaha.
ACT 19:8 Pabluha, delo tsunna beaha, riana lhe'e yo'o ata rudheti ka nu Israel‑ni ka tisa ge Tata Do Yebáha. Labí rasinna ridaka lenna kana lhe ruinna kini okinni ikikani deki Tata Do Yebáha raka lebie innabie kana.
ACT 19:9 Ttaka adíkana nna ben tsitsiba lastokani labí uka lekani tsia lekani ge nu ra Pabluha. Betse'e loona neda ge Jesús‑ni rigualakana bala'ana geni arlo ka benne. Nianna bekwittala Pabluha arlo ka nu rigu'u ni'akani nu ranaha, nna ulesilana ka benne chi ria leke ge Jesús‑ni nna dia lenna ke lhe'e iscuela banani ttu nubiyú nu tee láni Tirano. Niha‑ba rule'enna ke ttu ttu sába.
ACT 19:10 Aníha‑ba benna delo chupa idaha. Laxkala iyába ka nu se'e daka Asia‑ni, ka nu Israel lhe ka nu abittu ankakana nu Israel lhe, iyábakana biyienkinna ka tisa ge Jesús benne anke Xxanari'iha.
ACT 19:11 Tata Do Yebáha nna xxeniba anka ka milagru runie. Rixúnie Pabluha kini ruinna ka nuha.
ACT 19:12 Laxkala axtaba ka lari ruxí loniha lhe ka lari rutá arloniha recheke ka nuha ata tee ka benne rani gekeha. Ka isagwe yu'u ka benneha nna gwa reria ttebana latike. Anágaba lhe ata yu'u espíritu satsa latike, gwa reria ttegaba nuha lati ka benneha.
ACT 19:13 Ttaka ttu chupa ka nu Israel ka nu reki rebeakana ka espíritu satsa yu'u lati ka benne, ka nuha bengabakana deki udettikana lá Jesús benne anke Xxanari'iha kini eria ka espíritu satsaha lati ka benneha, nianna tti rákana ka espíritu satsaha: ―Jesús benne rigixxi'a Pabluha gebie, benneha rudettitu rulisatu le, gwaleria lati ka benne‑ni.
ACT 19:14 Lhe'e ka nu ruin luesi nuní selagaba gasi ka xi'in biyú ttu nu Israel tee láni Esceva. Esceva ankana ttu ka nu loni ge adí ka bixxudiha.
ACT 19:15 Ttaka ttu lidú nna bekabi espíritu satsaha ge ka nu kwitiha, rana kana: ―Neti gwankabiabati Jesús‑ni lhe yúgabaa nuxa nuha Pablo lhe, ttaka lebi'i nna, ¿nú ankale?
ACT 19:16 Nianna bebi'i noo tteba nubiyú yu'u latini espíritu satsaha ka nu kwitiha, uya xxattana kana nna udaabana lokani, itú detuntubakana lhe tee gwebakana boxunnikana lo nubiyúha lhe'e yo'o ata se'ekanaha.
ACT 19:17 Iyába ka nu se'e lhe'esi Éfeso‑ni, ka nu Israel lhe ka nu abittu ankakana nu Israel lhe, tti binakana ge nu ukaha nna yalhá usi xxattakinna. Aníha uka nna bokinni ikikani nna rákana: ―¡Xxeniba ra le Jesús benne anke Xxanari'iha!
ACT 19:18 Ixeba ka nu ugía lekani ge Jesús‑ni risiakana nna rigixxi'akana lo benne ge nu satsa chi benkanaha.
ACT 19:19 Ixegaba ka nu benkana ge elha gwesá, ka nuha bottupakana ka libru ka nu bedhetikanaha nna bettekana ka nuha lo gi arlo iyába ka benne tupa niha. Tti uleakana lidhaka ka libruha nna gwalhenna ge ka nuha ttiba tsieyona (50) mili belhiu plata.
ACT 19:20 Ka tisa rigixxi'ake ge Jesús benne anke Xxanari'iha, ka tisaha tsitsiba ra leke lhe ttu diabake radhi chiettiruke lhe.
ACT 19:21 Iki de chi uka iyá nuní, nianna tti bebeki le Pabluha tsiana daka Macedonia lhe daka Acaya lhe, nialiba nna tti tsiana Jerusalén‑ni, lhe rágabana: ―Iki de chi ugíaya Jerusalén‑ni, nianna teeki tsiaya Roma‑ni.
ACT 19:22 Nianna tti udhelhana chupa ka benne rute náke lennaha, kini diake daka Macedonia, delába udhelhana Timoteo‑ni lhe Erasto‑ni lhe. Lana nna isá toruba beya'anna daka Asia.
ACT 19:23 La'ania nuha uka ttu elha utilha xxeni lhe'esi Éfeso‑ni de chi rudaxxu ka benne lhe'esiha neda ge Jesús‑ni.
ACT 19:24 Udulo nuha delo ni'a ge ttu nubiyú tee láni Demetrio. Nuha ruinna ka yo'o to ata rudo ka benne diosi nu tee láni Artemisa. Ka yo'o toha ankakana ge plata. Yalhá ixeni belhiu rodha'anna ge ka nu ruinkana luesi ka yo'o toha.
ACT 19:25 Demetrio‑ni nna bottupana ka nu riben sina geniha lhe adíru ka nu ruinkana luesi sinaha lhe, nianna tti rana ka nuha: ―Tata to, lebi'i gwa yu xeabale, len sina ruinri'i‑ni yalhá lhe'e belhiu ribeari'i.
ACT 19:26 Ttaka nnanna gwa riyienbinle lhe gwa rilábinle lhe reki ttu nubiyú tee láni Pablo ridí yiena ka benne rana ke deki laa diosiga anka ka nu ruinri'i len ni'a nári'i. Laxkala ixeba ka benne chi uxí yiena ke. Gwea nna laa suna lhe'esi Éfeso‑niga ridí yiena ka benne, anágaba ruinna lhe'e adíru ka yiesi se'e itúba daka lo yu ge Asia‑ni.
ACT 19:27 Labí suna ri'i ruxunnina geri'i unnittiri'i sina geri'i‑ni, anágaba ruxunnigabana ku'u ni'a ka benne yotu ge nan Artemisa geri'i‑ni, delába diosi benne ra xxeni lee‑ni lhe anágaba lhe dhulogaba ka benne ilhida gaake bie lhe. Lebi'i gwa yúbale iyába ka benne se'e lo yu ge Asia‑ni lhe ka benne se'e itúba yiesi lo yu‑ni lhe, iyábake rudú xibike arlo benne‑ni.
ACT 19:28 Tti biyienkin nuha nu ranaha, nianna bisa'a xxattakinna nna ribesi'abakana, rákana: ―¡Xxeniba ra le nan Artemisa ge ka nu Éfeso‑ni!
ACT 19:29 Ttu gayya xxeniba uka itúba lhe'esiha la'ania. Nianna iyábakana bebi'i nookana chupa ka benne biyú, ttúbie tee lábie Gayo, attubie nna tee lábie Aristarco. Ka benneha ankake benne ge Macedonia lhe lake nuha reki lenke Pabluha. Ka benneha nuha na'ayakana ke bisin lenkana ke lhe'e ata retupa ka benne ge yiesiha tti rugíake ttu bixa elhatsa.
ACT 19:30 Pabluha nna ruinna ga'ana niha kini inne lenna ka benne saa niha, ttaka ka benne chi ria leke ge Jesús‑ni labí begwelhake na ga'ana.
ACT 19:31 Anágaba ttu chupa ka nu ankakana ge Asia anka ladikani. Ka nuha se'e tsekana len Pabluha. Lakana udhelhakana ka nu ugíakana gweasikana Pabluha abittu satta'ana lo ka benne saa niha.
ACT 19:32 Ka nu saa niha nna raka gayyaba yu'ukana, a riria ni'akinna bixa uinkana. Nu subi subiba rákana, adíkana nna nigaba a yúkana bí ge tupakana niha.
ACT 19:33 Ttu chupa ka nu Israel selakana lhe'e ka benne saa niha, ka nuha besigakana ttu nubiyú tee láni Alejandro kini innena lo ka benne saa niha, kini edína ka Aristarco‑ni. Nianna tti bettá náni kini beyaka sii ka benne yu'u rigiyyaha kini aka innena.
ACT 19:34 Ttaka tti ute dákin benneha deki nu Israel‑ba anka Alejandro‑ni, nianna iyábake tulapaba uresi'ake. Ttiba chupa ura gwadána uresi'ake, ráke: ―¡Xxeniba ra le nan Artemisa ge ka nu Éfeso‑ni!
ACT 19:35 Nu anka escribanu ge lhe'esiha nna atti chi biri'a lenna beyaka sii ka nu yu'u ubesi'aha, nianna tti unnena, rana: ―Benne ge Éfeso, lebi'i gwa yu xeabale, iyába ka benne yuke deki ri'i, ka benne lhe'esi‑ni, ankari'i ka benne ruyú tsitsiri'i yotu ge diosi Artemisa geri'i‑ni, benne ra xxeni lee‑ni lhe ruyú tsitsigabari'i retratu gee‑ni, nu dana yebáha nna biginnina yiesi lo yu‑ni.
ACT 19:36 Laxkala iyába ka benne labí dika nna innáke labí lii nuní. De nuha nna lebi'i siiba gwaleyaka, abittuba udiubaxxi lele uinle ttu bixa.
ACT 19:37 Kumu ka nubiyú ka nu gwadaxxule se'e nii, labí chi uta'a ka nuní bixa lhanakana lhe'e yotu ge nana xunaxi geri'i‑ni, nigaba labí rigua ka nuní bala'ana gebie lhe.
ACT 19:38 Ganna si Demetrio‑ni lenna ka nu riben sina gen‑na, ganna lakana tee elha gaa gekani len nuxa benne, gwa se'eba ka uxtisi geri'i lhe gwa siaba ka yo'o ata raka elhuxtisi lhe. Arlo ka nuná tsiakana saga'a luesikani ganna bixa ge ritilhakana
ACT 19:39 nna ganna lebi'i rinnabale aka attu nu subi, gwa dikabana etupari'i ro'o yo'o lagwi nna inneri'i ge nuha.
ACT 19:40 Kumu nu ruinri'i nasá, ruxunnibana geri'i usiakana ikiri'i deki rutsatsari'i ka benne. Ganna ttixka innaba tisakana ri'i innákana: ¿Bí lo ni'a ge nna rutsatsale ka benne? La'ania nna, ¿bíla ekabiri'i gekani ganna?
ACT 19:41 Nuha‑ba rana nna bedhelhana ka benne tupa niha deyyake.
ACT 20:1 Iki de chi ute nu raka gayyaha, nianna tti uxi Pabluha ka benne chi ria leke ge Jesús‑ni nna bodú ittana leke. Nianna tti uchú tisana ka benneha nna udána diana daka Macedonia.
ACT 20:2 Utebana itúba ka daka niha. Xxeniba rinnena rose'e tsitsina ka benne chi ria leke ge Jesús‑ni, niala nna tti bisinna daka Grecia.
ACT 20:3 Niha urena tsunna beo. Atti chi odaxxuna barcu ki eyyana daka Siria, nianna tti ute denna deki ka nu Israel‑ni ruinkana udaxxukana na kini uttikana na. Aníha uka nna botsea neda geni. Daka Macedonia‑nila beyeki deyyana, ni'abani deyyana.
ACT 20:4 Deyyagaba lenna benne tee lábie Sópater [xi'in Pirro]. Benneha anke benne lhe'esi Berea. Deyyagaba benne tee lábie Aristarco lhe benne tee lábie Segundo lhe. Ka benneha ankake benne lhe'esi Tesalónica. Deyyagaba attu benne ge lhe'esi Derbe tee lábie Gayo lhe Timoteo‑ni lhe. Deyyagaba a chupa ka benne ge Asia, delába Tíquico lhe Trófimo lhe.
ACT 20:5 Iyá ka benneha beneruke deyyake, nna lhe'esi Troas‑niliba uledake ri'itu.
ACT 20:6 Ri'itu nna iki deliba chi ute laní tti ro ka nu Israel‑ni yettaxtila nu abittu kua dii dia ikiniha, la'anialiba beriatu lhe'esi Filipos‑ni nna bodaxxutu barcu deyyatu. Ttiliba chi gwadona gayu ubisaha, la'anialiba nna besintu lhe'esi Troas ata se'e ka benneha. Niha‑ba use'etu gasi ubisa.
ACT 20:7 La sá tti bedú ni'a xumanuha, la'ania betupatu kini go len luesitu yetta. Pabluha rule'enna ka benne chi ria leke ge Jesús‑ni kumu attu dilaha‑ba nuha chi edána niha. Laxkala bisábana unne lenna ka benneha axtaba riluela.
ACT 20:8 Iyábatu tupatu lhe'e yo'o do gwetsáha ata ralha ixe ka gi.
ACT 20:9 Niha re ttu nubiyú kwiti tee láni Eutico dona ro'o ventana ge yo'oha. Kumu isá galá bisá Pabluha unnena, laxkala bitaba bisiela lo nu kwitiha nna utta'adhina. Ttaka kumu bedaxxu tsitsi galá bisielaha na, de nuha nna ubinnina ro'o ventana ge nu beyonna kuaha nna biginnina axtaba lo yu. Laxkala nu yattiba anka nu kwitiha gwalhidhake na.
ACT 20:10 Nianna beyadi tteba Pabluha nna biyettana begesina lhe'e nu kwitiha. Nianna tti rana ka benne se'e niha: ―Bittu gasinle, gwanka benba nu kwiti‑ni.
ACT 20:11 Iki dela nuha nna beyapi Pabluha nna utotu yetta. Atti chi beyaka utotu yettaha nna isáru bedenne lenna ka benneha. Ugwani dilaha‑liba nna bedána deyyana.
ACT 20:12 Nu kwiti biginniha nna gwa beyaka benbana nna yalhá itta bedú leke decheke na.
ACT 20:13 Ri'itu beneru gaatu deyyatu nna bodaxxutu barcu besintu lhe'esi Asón kini niha kwedatu Pabluha, kumu aníha chi rana. Lana nna ni'abani etana kini esiana niha.
ACT 20:14 Tti chi beti'atu na lhe'esi Asón‑ni, nianna belhapitu na lo barcuha nna besintu lhe'esi Mitilene.
ACT 20:15 Biriatu lhe'esi Mitilene nna beyeki sáha nna betetu gaxxaba ro'o yu re lagwi indatooha nu tee lani Quio. Bedeyeki sáha nna bedesintu ro'o attu yu re lagwi indatooha nu tee lani Samos. [Niha beriatu nna betetu ttu satti lhe'esi Trogilio.] Beyeki sáha nna chi besintu lhe'esi Mileto.
ACT 20:16 Aníha bentu kumu Pabluha labí uka leni etena lhe'esi Éfeso kini abitturu isátu lo yu ge Asia‑ni kumu rudiuba leni kini gaa gwesinxxibana Jerusalén‑ni tti isia laní nu tee lani Pentecostés.
ACT 20:17 Tti chi se'etu lhe'esi Mileto‑ni, nianna tti udhelha Pabluha kini biyaxi ka benneola se'e lhe'esi Éfeso, delába ka benne rise'e arlo ka benne chi ria leke ge Jesús‑ni.
ACT 20:18 Tti bisia ka benneha nna rana ke: ―Lebi'i gwa yu xeabale gasina uka elha ruin kia desdeli sisi'a tte bisiaya lo yu ge Asia‑ni.
ACT 20:19 Itúba tti udoa len lebi'iha, labí bedúa tisa, jeru tteba benia nu ra Jesús benne anke Xxanari'iha lhe itú ribesibaa lhe itú ruxunnibana kia bixa satea kumu de ka nu Israel‑ni rulha lekani bixa udhakakana neti.
ACT 20:20 Meskiba gwatea aníha, labí bedhea lasia a kixxi'ania le ka tisa ka nu dika ixúkana len lebi'i. Nu benlaa, bele'ebania le arlo ka benne lhe lhe'e lisile lhe.
ACT 20:21 Gwa utixxi'abania ka nu Israel lhe ka nu abittu ankakana nu Israel lhe, xpeya kana uinkana doelha odúna kana nna odaxxukana neda ge Tata Do Yebáha lhe tsia lekani ge Jesucristu benne anke Xxanari'iha lhe.
ACT 20:22 Nnanna nna chiba deya'aya lhe'esi Jerusalén‑ni kumu Espíritu ge Tata Do Yebáha runie doelha kini eya'aya niha. Labí yua bí satea niha.
ACT 20:23 Sunruba ttu nu chi yua, Espíritu ge Tata Do Yebáha rabie neti: “Lhe'e iyába ka yiesi‑na ata tsialu, niha uyúlu elha disa lhe uga'agabakana lu lisiyya lhe.”
ACT 20:24 Ttaka neti labí ratua lasia kia akati ni kinaruba bi satea. Nu ruinlaa, runia doelha regu'elhala lasia kini e'eyua ulhuxaa sina nu bete Jesús benne anke Xxanari'iha len neti, delába kixxi'aya ka tisa tse ge nu redá le Tata Do Yebáha rutebie lenri'i.
ACT 20:25 ’Nnanna nna neti yu xeabaa, ni ttúle ka nu chi bele'enia le gasina kini akale benne innabia Tata Do Yebáha le, ni ttúle labíru ilenle neti.
ACT 20:26 De nuha nna nasá rigixxi'ania le, labí tulha kia nuha ganna lebi'i nnittile nna abittu exúle arlo Tata Do Yebáha,
ACT 20:27 kumu labí bedhea lasia a kixxi'ania le ge iyá nu chi ga'anani Tata Do Yebáha unie.
ACT 20:28 Laxkala nnanna rulisaa le, gwaluyú gele lhe gwaluyú iyá ka benne chi bodha'an Espíritu geeha lasi nále. Attiba ttu benne ruyúe ka neru, aníha‑ba uyúle ka benne chi ankake ge Jesús benne anke Xxanari'iha, delába ka benne uyo'e len kwinaga reni geeha.
ACT 20:29 Kumu neti yu xeabaa ganna chi deya'aya, la'ania nna ga'a ka nu subi lagwi gele nna udhaka disakana ka benne ruyúleha, uinkana attiba ruin ka sageo ka nu rituin xxatta, aníha‑ba uin ka nuha utse'e lookana ka benneha.
ACT 20:30 Anágaba nna lagwi gegabale iria ka nu abí kixxi'akana nu anka gwalí. Aníha uinkana kini ka benne chi ria leke ge Jesús‑ni tanalhake kana.
ACT 20:31 De nuha nna gwaluyú gele. Gwalodhú lele deki neti delo tsunna idaha rela lhe resá lhe rulisaa ttu ttule, axtaba ribesia.
ACT 20:32 ’Nnanna xa betsi to, lasi ná Tata Do Yebáha‑ba rodha'anaa le lhe rodha'angabaa le len ka tisa geeha, delába ka tisa ka nu rigixxi'ake ge nu tse redá le Tata Do Yebáha rutebie ge ka benne, kumu ka tisa‑ni nuní gwaka geke use'e tsitsike le lo neda geeha lhe anágaba lhe uingabake kini lebi'i isinle dhile nu utebie gele, itupa lenle adíru ka benne chi ulesie ke kini akake gebie.
ACT 20:33 ’Neti labí udá lasia belhiu gele, nigaba udá lasia xo nuxa ttúle kini ukua.
ACT 20:34 Lebi'i gwa yu xeabale len ni'a nába neti urenia sina kini uyo'a nu bixúti lhe nu bixúni ka benne rekike len neti lhe.
ACT 20:35 Bixaba sina benia, bele'enia le ria deki aníha teeki kwenri'i sina kini ute nári'i len ka benne riyasakanie ttu bixa lhe anágaba lhe odhúgaba leri'i ka tisa ka nu unne Jesús benne anke Xxanari'iha, tti ree: “Adírula lhe'e nuha ganna ri'i edá leri'i ugweri'i ka benne attichula dhiri'i nu uteke.”
ACT 20:36 Iki de chi unne Pabluha iyá nuní, nianna tti bedú xibini len iyába ka benneha nna unneke len Tata Do Yebáha.
ACT 20:37 Nianna iyábake uresike lhe utesike yien Pabluha nna utoke ttu xxagani.
ACT 20:38 Bedú si'iruna leke, tti biyienkanie rana deki labíru ilákanie na. Nianna tti deyya lenke na nna gwadha'anke na axtaliba ata du barcuha.
ACT 21:1 Iki de chi uchú tisatu ka benneola rise'e arlo ka benne chi ria leke ge Jesús‑ni se'e lhe'esi Éfeso‑ni, nianna bodaxxutu barcu nna lii raba deyyatu besintu lo yu nu tee láni Cos. Nuha rena lagwi indatooha. Beyeki sáha nna besintu Rodas. Bedátu Rodas nna bedesintu lhe'esi Pátara.
ACT 21:2 Lhe'esiha gwadixxakatu attu barcu nu deyya daka Fenicia. Lo nuha beyapitu deyyatu.
ACT 21:3 Atti deyu'utu neda deyyatuha, bilentu yu ge Chipre rena lagwi indatooha daka ná yattiri'i. Nianna tti deyyatu daka Siria nna besintu lhe'esi Tiro, kumu barcu deyyatuha niha‑ba oka'anna yua dechenaha.
ACT 21:4 Lhe'esi Tiro gwaxxakatu ka benne chi ria leke ge Jesús‑ni nna niha‑ba bisátu use'etu ttu gasi ubisa lenke. Ka benneha nna, de utixxi'ani Espíritu ge Tata Do Yebáha ke bittu eyya Pabluha Jerusalén‑ni, de nuha nna ráke na: ―Abittu eyyalu Jerusalén‑ni.
ACT 21:5 Tti chi uka gasi ubisa se'etu niha nna tti chi edátuha nna iyába ka benneha, itupa lenke ka nuila gekeha lhe ka nuto gekeha lhe, dedáke len ri'itu, betese'eke ri'itu ro'o yiesiha. Niha bedú xibitu ro'o indatooha nna ulhapitu tisa len Tata Do Yebáha.
ACT 21:6 Iki de nuha nna tti uchú tisa luesitu, nianna beyapitu lo barcuha. Ka benneha nna beyekibake deyya lisike.
ACT 21:7 Ri'itu nna beriatu Tiro nna besintu lhe'esi Tolemaida. Debá niha‑ba uluxa bedátu lo indatooha. Nianna tti betetu begwetu ka betsi to geri'i se'e niha ttu padiuxi nna niha‑ba beya'antu lenke ttu sá.
ACT 21:8 Beyeki sáha nna beriatu niha nna besintu lhe'esi Cesarea. Tti besintu niha nna ugíatu lisi Felipe benne rekie rigixxi'e ka tisa ge Jesús‑ni. Benneha anke ttu ka benne gasi bekwe ka apóstoal lhe'esi Jerusalén‑ni. Lhe'e lisieha‑ba beya'antu.
ACT 21:9 Felipe‑ni nna se'e ttapa ka xi'iniunnábie ankakana nuila ribani. Ka nuilaha rigixxi'akinna ka benne nu raka le Tata Do Yebáha unake.
ACT 21:10 Ttu gayu xxupa ubisa chi uka se'etu niha, nianna bisia ttu benne dabie daka Judea tee lábie Agabo. Benneha anke profeta, rigixxi'e nu raka le Tata Do Yebáha una ka benne.
ACT 21:11 Benneha tti bisiabie ata se'etuha nna bedaxxue lari ruxxiga lhe'e Pabluha, nianna tti bexxiga ka ni'a nábie nuha nna tti ree ri'itu: ―Espíritu ge Tata Do Yebáha rigixxi'abie, ree: “Aní uxxiga ka nu Israel‑ni benne anke xxana lari‑ni lhe'esi Jerusalén‑ni. Nianna tti taga'akane lo ná ka nu abittu ankakana nu Israel.”
ACT 21:12 Ri'itu lhe ka benne ge Cesarea‑ni lhe, tti biyienintu nu ra benneha, nianna unnabatu ratu Pabluha: ―Bittu eyyalu Jerusalén‑ni.
ACT 21:13 Ttaka lana nna bekabilana, rana: ―¿Beaka ribesile, delo nna rudú si'ile lasia? Kumu neti chiba bebeki lasia dhúbana ttixaba dhuna, meskila laa suna uxxigakana neti, meskila utti ttekana neti lhe'esi Jerusalén‑ni delo ni'a ge Jesús benne anke Xxanari'iha.
ACT 21:14 Ttaka kumu de abittu udaatu ixú yientu na, nianna bedhanchibatu, ratu: ―Nu innaba Tata Xisiha aka ganna.
ACT 21:15 Iki de nuha nna tti bese'e tsetu nna ugwapitu diatu Jerusalén‑ni.
ACT 21:16 Ttu chupa ka benne chi ria leke ge Jesús‑ni se'e Cesarea‑ni, dágabake len ri'itu nna cheke ri'itu lisi ttu benne tee lábie Mnasón. Benneha anke benne ge Chipre nna isá chi ria le benneha ge Jesús‑ni. Lisi benneha‑ba beya'antu.
ACT 21:17 Tti besintu lhe'esi Jerusalén‑ni nna ka betsi to geri'i se'e niha yalhá redeakakanie ribedake ri'itu.
ACT 21:18 Beyeki dilaha nna ugíatu len Pabluha lisi Jacobuha. Niha tupa iyába ka benneola rise'e arlo ka benne chi ria leke ge Jesús‑ni.
ACT 21:19 Iki de tti chi begwe Pabluha ka benneha padiuxi, nianna tti udulona kua suba utixxi'enna ke ge iyába nu ben Tata Do Yebáha lenna tti rekina rigixxi'enna ka nu abittu ankakana nu Israel ka tisa ge Jesús‑ni.
ACT 21:20 Ka benneha nna tti biyienkanie nu ranaha, nianna tti ráke: ―¡Xxeniba ra le Tata Do Yebáha! Nianna tti ráke na: ―Yúruga xa betsi to, ixe juisiru ka nu Israel chi ria lekani ge Jesús‑ni, ttaka iyábakana rákana deki teeki udo tsitsiri'i tisa ge bia bennabi bodha'an Tata Do Yebáha len Moisés‑ni.
ACT 21:21 Ttaka chi binakana, iyába ka benne Israel se'e lhe'e ka yiesi dittu‑na, iyábake rule'enlu ke abitturu uinke nu ra lo bia bennabi‑na. Rágabakana deki ralu ka benneha abitturu ichúke lo bela lati ka nuto biyú to geke lhe abitturugaba uinke iyá nu labinri'i ruinri'i lhe.
ACT 21:22 Nianna, ¿bíla anka nu uinri'i ganna? Nnannaruga gwatupa ka benne kumu de chi binake deki chiba besialu Jerusalén‑ni.
ACT 21:23 De nuha nna tserula ganna uinlu nu innátu: len ri'itu sela ttapa ka nubiyú, ka nu chi bodha'an tsitsi tisa gekani len Tata Do Yebáha nna teeki ulhuxa lokana nu chi rákana benneha uinkana.
ACT 21:24 Ichelu ka nuní tsialu lenkana sattí latile kini eyarile arlo Tata Do Yebáha nna lu kixalu gekani kini uin xiga ikikani. Aníha uinlu kini iláni iyá ka benne deki labí lii nu chi binakana ruinlu, sinuki ula'ala deki lu gwa rudobalu tisa ge bia bennabi bodha'an Tata Do Yebáha len Moisés‑ni.
ACT 21:25 Ka benne abittu ankake nu Israel, delába ka benne chi ria leke ge Jesús‑ni, ka benneha chiba ratu ke lo yetsi udhelhatuha: abittu uchacha ikike ge nu dia lo bia bennabi geri'i‑ni. Sunruba nna abittu aka goke bela ge ka nimala, ka nu rutti ka benne ki ruteke úna ge ka nu labí gwalíga ankakana diosi. Abittugaba goke bela ge ttu nimala ganna uttina de bidí yienni lhe anágaba lhe abittugaba goke reni ge ka nuha lhe, abittugaba isáke nu subi subi lhe.
ACT 21:26 Aníoka nna beyeki sáha nna che Pabluha itapaba ka nubiyúha dia lenna kana kini lana lhe ka nuha lhe eyarikana arlo Tata Do Yebáha. Nianna tti uta'ana lali'a yotuha kini sattixxi'ana nukaxa chi tadona gasi ubisa eyarikana arlo Tata Do Yebáha kini kua ttu ttukana utekana úna lenbie.
ACT 21:27 Atti chi tadona gasi ubisaha, la'ania ttu chupa ka nu Israel ka nu dákana daka Asia bilákinna Pabluha lali'a yotuha. Nianna betsatsa ttebakana ka benne saa niha nna bedaxxukana Pabluha.
ACT 21:28 Ribesi'abakana, rákana: ―¡Benne Israel, gwaltá gwalute nále len ri'itu kini udaxxuri'i nubiyú du‑ni! Lana nuní rekina lhe'e iyába ka yiesi‑na rigu'u tisana ka benne kini ku'u ni'ake ka benne geri'i lhe ku'u ni'ake bia bennabi bodha'an Tata Do Yebáha len Moisés‑ni, lhe anágaba lhe rágabana ke ku'u ni'ake yotu geri'i‑ni lhe. Gwea lhe chi bega'ana ka nu abittu ankakana nu Israel lali'a yotu le'a geri'i‑ni, laxkala chiba betsigakana benne‑ni.
ACT 21:29 Aníha rákana kumu de chi bilákinna reki len Pabluha Trófimo‑ni lhe'esiha. Trófimo‑ni anka benne lhe'esi Éfeso nna rakakinna ganna chiba bega'ana nuha lali'a yotuha.
ACT 21:30 Aníoka nna itúba yiesiha bisatsa nna bitupa ttebakana bedaxxukana Pabluha, dena'ayakana na nna bebeakana na ata do yotuha. Nianna botto ttebakana ka puerta ge de'e rilhi abi'iba kwe'e yotuha.
ACT 21:31 Chiba se'ekana deki uttibakana Pabluha, nianna tti bina nu loni ge ka soldadu ge Roma‑ni, binana deki itúba lhe'esi Jerusalén‑ni tee ttu elha gaa xxeni.
ACT 21:32 Nuha nna bottupa ttebana ka soldadu geniha lhe ka soldadu banakinna adí ka nuha lhe. Nianna bexunni tteba lenna ka nuha nna bisinkana ata tupa ka benneha. Tti bilani ka benneha ka soldaduha lhe nu loni gekaniha lhe, nianna bedú sii ttebakana labíru uyakana Pabluha.
ACT 21:33 Tti bisin nu loni ge ka soldaduha nna bedaxxu ttebana Pabluha nna ben ttebana mandadu kini bexxigakana Pabluha len chupa ka cadena. Nianna tti unnaba tisana na, rana na: ―¿Nú ankalu lhe bí benlu lhe?
ACT 21:34 Ttaka ka nu saa niha ribesi'abakana, nu subi subiba rákana. Laxkala de rigiyya xxattakanaha nna labí biria ni'en nu loni ge ka soldaduha bixa ben Pabluha. Nianna benna mandadu kini eche ka soldaduha Pabluha lhe'e yo'o ata ru'ukanaha.
ACT 21:35 Tti chi besin lenkana Pabluha lo ka napi se'e ro'o yo'o ata ru'ukanaha, lo beba dedákinna na kumu de ruin ka nu danalhaha gayakana na
ACT 21:36 kumu iyábakana ribesi'abakana, rákana: ―¡Gwalutti nuná!
ACT 21:37 Tti chi uga'a ka soldaduha Pabluha lhe'e yo'o ata ru'ukanaha, nianna tti ra Pabluha nu loni ge ka soldaduha: ―¿Si gwaka inne lania lu ttu satti to? Nuha nna bekabina rana na: ―¿Si gwa rakaba gelu rinnelu tisa griegu?
ACT 21:38 Ganna niha nna, ¿si laaba luba nuha ankalu nu Egipto? Nuha ttuha gaaba bedú disana lo ka nu rinnabia ge Roma‑ni nna biriana diana, na'aya xanni ttapa mili ka nubiyú nna dia lenna ka nuha daka lo yu bisiha.
ACT 21:39 Pabluha nna bekabina, rana: ―¡Ko'o, laa netiga nuha! Neti ankalaa benne Israel nna ankaa benne lhe'esi Tarso. Tarso rena daka lo yu ge Cilicia. Ankana ttu yiesi xxeni. De nuha nna begwelhachi neti innea arlo ka benne tupa nii.
ACT 21:40 Nuha nna “O” ba rana na. Gwa begwelhabana. Nianna tti udú Pabluha lo ka napiha nna ruttá náni kini eyaka sii ka nu tupa niha. Tti chi beyaka sii ka nuha nna belisana kana len tisa hebreo rana kana:
ACT 22:1 ―Xa betsi to lhe xa tata benneola lhe, gwaludoruga nagale nu ekabia gele ge nu rusiale ikia‑ni.
ACT 22:2 Tti chi biyienkinna rinne Pabluha tisa hebreo, la'aniala nna beyaka siirukana, nianna tti rana kana:
ACT 22:3 ―Neti ankaa benne Israel nna ulia lhe'esi Tarso. Yiesiha rena lo yu ge Cilicia. Ttaka lhe'esi Jerusalén‑niba bixenia nna Gamaliel‑ni bedhetinna neti tti tteba ra lo bia bennabi ge ka benne uka xuttori'iha. Neti bedo xxattana lasia bedoa tisa ge Tata Do Yebaa geri'iha ttiba ruin iyábale nnanna.
ACT 22:4 Itú ttuha udú nooa ka benne chi bedaxxuke neda ge Jesús‑ni, benia uttia ke. Nuila lhe nubiyú ka benneha rudaxxua ruxxigaa ke nna raga'aya ke lhe'e lisiyya.
ACT 22:5 Bixxudi xeniha lhe iyába ka benneola geri'iha gwa biyúbake nu benia. Lagabake beteke yetsi denia diaya kini ule'enia ka benne geri'i se'e lhe'esi Damasco‑ni, kini sadaxxua ka nu chi bedaxxukana neda ge Jesús‑ni nna esia lania kana Jerusalén‑ni kini iyayakana.
ACT 22:6 ’Ttaka laka yu'a neda diaya, tti chi isinaa lhe'esi Damasco‑ni, gaxa ttiba tu retin tsi'inu (12) resá nuha chi anka, ttiruba ttu nnelaba chi uyu'u ttu xiani xeni dana yebáha uyu'una abi'iba kwe'a.
ACT 22:7 Nianna tti ubixxi lo ttebaa lo yu nna tti biyienti tsi'i ttu benne unnebie, ree neti: “¡Saulo! ¡Saulo! ¿Beaka neti danalhalu rudhaka disalu?”
ACT 22:8 Neti nna bekabia, ria: “¿Núle nuná xa tata?” Benneha nna bekabie ree: “Netiba nuní Jesús ge Nazaret benne danalhalu rudhaka disalu.”
ACT 22:9 Ka nu dia lania nna bilábakinna xianiha, ttaka labí biyienkinna tsi'i benne rulise netiha.
ACT 22:10 Neti nna xpeya benneha: “¿Bí raka lelu unia xa tata?” Labie nna bekabie, ree neti: “Beyadha nna uta'a lhe'esi Damasco‑na. Naa kixxi'akana iyá nu chi ga'anati uinlu.”
ACT 22:11 Ttaka kumu de uyu'u xianiha loa, de nuha nna lo xuaba beya'anaa. Laxkala ka nu dia laniaha itú nalhibakana náya chibuka bisinaa lhe'esi Damasco‑ni.
ACT 22:12 ’Niha do ttu benne biyú tee lábie Ananías. Benneha anke ttu benne rudo tsitsie tisa ge nu ra lo bia bennabi bodha'an Tata Do Yebáha len Moisés‑ni nna iyába ka benne Israel se'e niha ráke tseba runie.
ACT 22:13 Benneha bitee ata doaha. Tti bisie niha nna rabie neti: “¡Saulo, betsi to, chinka bedhali ka iyya lolu‑na, chiba aka elenlu!” Neti nna la'ania tteba beyali ka iyya loa‑ni nna bilá ttebati benneha.
ACT 22:14 Nianna unnebie, ree: “Tata Do Yebaa benne anke Diosi ge ka benne ukake xuttori'iha, benneha chi bekwebie lu kini unalu bí raka lebie uinlu lhe anágaba kini ilenlu Jesús benne runie attiba ankaba geniha lhe kini iyieninlu ka tisa ka nu inne kwinaga benneha.
ACT 22:15 Kumu lu akalu nu kixxi'alu gebie arlo iyába ka benne, kixxi'alu ge nu chi bilenlu lhe ge nu chi biyieninlu rabie lhe.
ACT 22:16 De nuha nna, ¿bíla ribedalu? Kanna udú lii nna udi inda nna unnaba len Tata Do Yebáha kini ocharie yua ge ka tulha gelu‑na.”
ACT 22:17 ’Atti chi beyekia besiaya Jerusalén‑ni nna bita ttebaa lhe'e yotu‑ni. Dubaa gwelhapi tisa len Tata Do Yebáha nna ttiruba ttu nnelaba chi bela'ati
ACT 22:18 Jesús benne anke Xxanari'iha, rabie neti: “Jeru tte begwe lelu beria lhe'esi Jerusalén‑ni kumu ka nu se'e nii labí ulabikana nu kixxi'alu kia.”
ACT 22:19 Neti nna xpeye: “Tata xisi to, ka nuní yúbakana deki neti lhe'e iyába ka yo'o ata rudhetiri'i ka tisa ge Tata Do Yebáha rata'aya nna raayaa ka benne chi ria leke gelu lhe rudheaya ke lisiyya lhe.
ACT 22:20 Anágaba lhe tti bettikana Esteban benne utixxi'e ka tisa gelu‑na, neti la'ania niha‑gaba dua nna gwa uyu'ugaba lasia nu bedhakana benneha. Axtala udúa biyúa ka xo ka nu bettikana benneha.”
ACT 22:21 Ttaka benne bela'atiha nna rabie neti: “Ugía, kumu neti idhelhaa lu lhe'e ka yiesi dittu‑na ata se'e ka nu abittu ankakana nu Israel.”
ACT 22:22 Debá ttaníaruba gwa bedo nagakani ge Pabluha. Nianna tti chi unnekana idisa, rákana: ―¡Gwalutti nuná! ¡Labí ralha nuná aka benna!
ACT 22:23 Ttaka kumu de ribesi'a xxattakana lhe de ribeaniba xokani rigu'una kana lhe de rudaxxukana yu rudelhakana lo be lhe,
ACT 22:24 de nuha nna ben nu loni ge ka soldaduha mandadu kini uga'akana Pabluha lhi'u ata ru'ukanaha nna gayakana na, kini ixxe'e ro'oni beaka ribesi'a ka nuha rebi'i nookana na.
ACT 22:25 Ttaka tti chi xigakinna Pabluha kini gayakana na, nianna unnaba tisana nu du niha, delába soldadu nu baninna ttu gayua (100) ka soldaduha, rana nuha: ―¿Si gwa ga'anaba deki gayale ttu benne romanu ganna abíba chi ulea liile deki gwalíga tee tulha gebie?
ACT 22:26 Tti biyienin soldaduha nu ra Pabluha, nianna tti ugíana gwattixxi'enna nu loni ge ka soldaduha, rana nuha: ―¿Bíla anka nu uin kwinalu ganna? Nubiyú bedaxxuri'i‑ni rana ankana benne romanu.
ACT 22:27 Nianna tti dia nu loni ge ka soldaduha ata du Pabluha nna unnaba tisana na, rana na: ―Utixxi'a, ¿si gwalí ankalu benne romanu? Pabluha nna bekabina geni, rana na: ―Gwalí galá.
ACT 22:28 Nu loni ge ka soldaduha nna rana na: ―Neti yalhá ixeni belhiu gwaduloti kini ukaa benne romanu. Pabluha nna bekabina ge nuha rana na: ―Neti attili uliaha chi ankaa benne romanu.
ACT 22:29 Nuha‑ba biyienin ka nu chi se'ekana kini gayakana Pabluha, nianna bebi'etta ttebakana kwe'eni. Anágaba nna nu loni ge ka soldaduha, tti chi binana deki Pabluha ankana benne romanu, usigabinna kumu de chi xikakinna Pabluha cadena.
ACT 22:30 Beyeki sáha nna nu loni ge ka soldaduha, de raka leni una tsena bí lo ni'a ge nna rebi'i noo ka nu Israel‑ni Pabluha, de nuha nna bedhasina Pabluha nna benna mandadu kini bottupakana ka nu loni ge ka bixxudiha lhe adíru ka nu ruin elhuxtisi ge ka nu Israel‑ni lhe, nianna tti betso duna Pabluha arlo ka nuha.
ACT 23:1 Pabluha nna belanni tsitsibana lo ka nu runi elhuxtisiha, nianna tti rana kana: ―Xa betsi to, neti yu xeabaa itúkiba doa yiesi lo yu‑ni latsiruba doa len Tata Do Yebáha.
ACT 23:2 Tti biyienin Ananías nu anka bixxudi xeniha, tti biyieninna nu ra Pabluha, nianna tti rana ka nu se'e gaxxaba ata du Pabluha kweakana gi ro'oni.
ACT 23:3 Ttaka Pabluha nna bekabina geni, rana na: ―¡Aaluxa nu regí xú loni! ¡Tata Do Yebáha kweabie gi ro'olu! Lu dolu kini uinlu elhuxtisi kia tti tte ra lo bia bennabi geri'i‑na, ttaka rutse'e loona lu rigu'ula ni'alu nu ra lo nuná tti ralu ka nuná: Gwalikwea gi ro'oni.
ACT 23:4 Ka nu se'e niha nna rákana Pabluha: ―¿Si aná dika ulisalu benne anke bixxudi xeni ge Tata Do Yebáha?
ACT 23:5 Ttaka Pabluha nna rana ka nuha: ―Xa betsi to, labí yua ganna benne‑na anke bixxudi xeni, de nuha gwalidhíchi elha xen lasi, labí dika innea aná, kumu lo ka yetsi ge Tata Do Yebáha ra: “Abittu inne satsalu ge benne rinnabie lhe'esi geluha.”
ACT 23:6 Kumu Pabluha yúbana deki salhe ka nu se'e niha ankakana saduceo nna a salhe ka nuha nna ankakana fariseo, nianna tti unnena idisa, rana kana: ―Betsi to, neti ankaa fariseo, xi'in ka fariseo. Ruinle elhuxtisi kia kumu de ruxxen lasia deki gwa reyaka benba ka benne chi uttiha.
ACT 23:7 Tti rana aníha nna ka fariseo‑ni lhe ka saduceo‑ni lhe udulo ttebakana rulisa luesikani. Nianna ulha'a tteba lhe'e luesikani,
ACT 23:8 kumu ka saduceo‑ni rákana labí reyaka ben ka benne chi uttiha lhe nigaba lanú ka anjeli se'e lhe nigaba lanú ka espíritu se'e lhe. Ka fariseo‑ni nna gwa redeyyaba lekani ge iyá nuní.
ACT 23:9 Nianna bigiyya tterubakana nna ttu chupa ka fariseo ka nu rule'ekinna ka benne nu ra lo bia bennabi bodha'an Moisés‑ni nna udú lii ttebakana unnekana, rákana: ―Nubiyú‑ni labí raxxakatu bixa nu satsa chi benna. Gaxa ttu espíritu o ttu anjeliba nuná chi unnebie lenna. Ganna aníha nna ri'i labí dikana edú disari'i arlo Tata Do Yebáha.
ACT 23:10 Ttaka nna adíla chi rigiyya xxattakana. Nianna chi usini nu loni ge ka soldaduha kini ka gayakana Pabluha nna uduyakana na. Aníha uka nna uxina ttu chupa ka soldaduha kini ebeakana Pabluha lagwi ge ka nu tupa niha nna eche adakabakana na lhe'e yo'o ata ru'ukanaha.
ACT 23:11 Beyeki ulhaha nna bodole'e lo Jesús benne anke Xxanari'iha len Pabluha, ree na: ―Tsitsi udú, Pablo, kumu ttiba chi benlu utixxi'alu kia lhe'esi Jerusalén‑ni, anágaba teeki kixxi'alu kia lhe'esi Romaha.
ACT 23:12 Tti ugwani dilaha nna bottupa tteba luesi ttu chupa ka nu Israel‑ni nna uyu'ukana unnekana kumu rulha lekani uttikana Pabluha. Nianna begwekana tisa deki labí gokana yetta, nigaba i'iyakana inda axtaliba ganna chi bettikana Pabluha.
ACT 23:13 Gwate chua (40) ka nubiyúha begwekana tisa deki uinkana aníha.
ACT 23:14 Nianna tti ugíakana arlo ka nu loni ge ka bixxudiha lhe arlo ka benneola ge ka nu Israel‑ni lhe, rákana ka nuha: ―Ri'itu chi begwetu tisa ratu labí gotu yetta axtaliba ganna chi bettitu Pabluha.
ACT 23:15 Nnanna nna kwinale xa tata lhe adíle ka benne runi elhuxtisi, gwaligasi nu loni ge ka soldadu‑na saleana Pabluha nna udúna na arlole. Uka diba uinle deki kwea lii tsele bixa benna. Ri'itu nna chi se'e tsetu ro'o nedaha, kini lanila isiana arlole nna chila uttitu na.
ACT 23:16 Ttaka xi'in biyú nuila dan Pabluha biyienbinna nu rulha le ka nuha uinkana, nianna tti ugía ttebana lhe'e ata yu'u ka soldaduha kini gwattixxi'enna Pabluha.
ACT 23:17 Pabluha nna uxi ttebana ttu ka nu banakinna ka soldaduha nna rana nuha: ―Uche nu kwiti du‑ni arlo benne anke nu loni geleha kumu lana raka leni kixxi'enne ttu tisa chi binana.
ACT 23:18 Nuha nna che ttebana nu kwitiha nna gwaga'ana na arlo nu loni gekaniha nna rana nuha: ―Pablo nu yaya lisiyyaha uxina neti nna unnabana len neti kini etedha'anaa nu kwiti du‑ni arlo kwinalu kumu nuní raka leni kixxi'enna lu ge ttu bixa.
ACT 23:19 Nu loni ge ka soldaduha nna ulhi ttebana ná nu kwitiha nna chena na attu ata subi. Nianna tti unnaba tisana nu kwitiha, rana na: ―¿Bí raka lelu kixxi'enlu neti?
ACT 23:20 Nu kwitiha nna bekabina rana: ―Ka nu Israel‑ni chi unne len luesikani rákana deki innabakana len kwinalu kini ichelu Pabluha uxxeha nna utso dulu na arlo ka nu runi elhuxtisi gekaniha. Uka diba uinkana deki kwea lii tsekana bixa benna.
ACT 23:21 Kwinalu nna bittu tsia lelu gekani kumu ttiba gwate chua (40) ka nubiyú ukatsi lokani tse'ekana ro'o nedaha nna dhu nookana Pablu‑na, kumu chi begwekana tisa rákana labí gokana yetta, nigaba i'iyakana inda axtaliba ganna chi bettikana Pablu‑ni. Nnanna nna sun tteba se'ekana ubeda bixa inná kwinalu.
ACT 23:22 Nu loni ge ka soldaduha nna bedhelhana nu kwitiha nna rana nuha: ―Anuttu nu galu deki chi betettixxi'enlu neti ge nuní.
ACT 23:23 Nianna tti uxi nu loni ge ka soldaduha chupa ka nu se'e kwe'eni, ka nu banakinna adí ka soldaduha. Nianna tti rana ka nuha: ―Gwaluse'e tse chupa gayua (200) ka soldadu ka nu dha ni'akani nna a gayuna bixxi tsii (70) ka soldadu ka nu kwiakana kwe'e ka kwayu nna a chupa gayua ka nu ddenkana ka iyya lo tutsa, kini tsiakana retin jaa rela lhe'esi Cesarea‑ni
ACT 23:24 lhe gwaluse'e tsegaba ka kwayu kini dho Pablu‑ni kwe'e ttu ka nuná. Aníha uinle kini abittu bi satena chibuka isin lenle na lo Félix nu rinnabiaha.
ACT 23:25 Nianna tti ben nu loni ge ka soldaduha ttu yetsi. Lo yetsiha rana:
ACT 23:26 “Neti Claudio Lisias ridhelhaa ttu padiuxi ge kwinalu xa tata Félix benne ra xxeni lebie.
ACT 23:27 Nubiyú ridhelhaa naa, ka nu Israel‑ni bedaxxukana na, chiba se'ekana deki uttikana na, ttaka neti, tti binaa deki ankana benne romanu, nianna ugía ttebaa len ka soldadu kia‑ni kini gwadiláya na.
ACT 23:28 Nianna tti chea na nna bedúa na arlo ka nu runi elhuxtisi gekaniha kini aníha nna unaa bí ge bedaxxukana na
ACT 23:29 nna tti biyienti rusiakana ikini deki rigu'u ni'ani bia bennabi gekaniha, ttaka labí benna ttu bixa nu dika ralhana gattina o ralhana gattana lisiyya.
ACT 23:30 Ttaka tti chi binaa deki ka nu Israel‑ni rulhaba lekani uttikana na, de nuha nna labí uledaa nna udhelha ttebaa na len kwinalu. Anágaba nna chigaba xpeya ka nu rusiakana ikini deki bixa benna, xpeya kana etetso dúkana arlo kwinalu innákana bixa ge do lekani nuná. Gwedesábari'i attu sá.”
ACT 23:31 Ka soldaduha nna benbakana attiba chi ra nu loni gekaniha, uchebakana Pabluha lo relaha nna bisin lenkana na lhe'e ttu yiesi nu tee láni Antipatris.
ACT 23:32 Ugwani dilaha nna a suna ka nu sia kwe'e ka kwayuha‑ba bederia lenkana Pabluha dedheyyakana, adí ka nuha nna beyekibakana besinkana lhe'e yo'o ata ru'ukanaha.
ACT 23:33 Ka nu dia lenkana Pabluha, tti chi bisinkana lhe'esi Cesarea‑ni nna begwe ttebakana Félix nu rinnabiaha yetsi denkanaha lhe bedúgabakana Pabluha arloni lhe.
ACT 23:34 Atti chi belaba Félix‑ni yetsiha, nianna tti unnaba tisana Pabluha gaxa daka dana. Pabluha nna rana dana daka lo yu ge Cilicia.
ACT 23:35 Nianna tti ra Félix‑ni na: ―Gudoba nagaa gelu ganna chi bisia ka nu rusiakana ikilu bixa benlu. Nianna tti benna mandadu kini bedheakana Pabluha lhe'e guskadu ata udo Herodes‑ni kini uyú tsitsikana na.
ACT 24:1 Ukaliba gayu ubisaha nna tti bisin Ananías nu anka bixxudi xeniha lhe'esi Cesarea‑ni, bisinna len attu chupa ka benneola ge ka nu Israel‑ni. Chegabakana ttu nubiyú tee láni Tértulo. Nuha innena kwenta gekani kini udú tsitsina kana arlo nu rinnabiaha kixxi'ana bí ge rebi'i nookana Pabluha.
ACT 24:2 Tti chi du Pabluha arlokani nna udulo tteba Tértulo‑ni bedúna tisa arlo Félix nu rinnabiaha, rana nuha: ―Xa tata Félix benne ra xxeni lelu, de kwinalu nna xen su lasiba se'etu, lhe de rinnabia tselu nna ixeba nu tse chi raka lhe'esi geri'i‑ni.
ACT 24:3 Gaxaba se'etu lhe gaxaba rekitu lhe satíaba redí baatu nu tse ruinlu. De nuha nna rugwetu kwinalu ixkixaru.
ACT 24:4 Ttaka kini abitturu uttisinia lu nna rinnabaa len kwinalu edá lelu udo nagalu getu satti to.
ACT 24:5 Ri'itu gwaxxakatu nubiyú du nii rekina rutsetsinna ka benne nna iyába ata rekina rilha'ana lhe'e luesi ka benne Israel‑ni. Lana ankana nu loni ge ttu dhi ka nu tee lákani nazareno.
ACT 24:6 Gwea nna bengabana ku'u ni'ani yotu getuha. De nuha nna bedaxxutu na, [bentu uintu elhuxtisi geni attiba raba lo bia bennabi getuha.
ACT 24:7 Ttaka tti bisia tata Lisias, benne anke nu loni ge ka soldaduha nna idisaba runie betetuabie Pablu‑ni lo nátu.
ACT 24:8 Nianna udhelha tteba Lisias‑ni ka benne se'e nii kini etetso duke arlolu, kumu ka benne‑ni nuní rusiake iki Pablu‑ni deki bixa benna.] Laxkala kwinabalu, tti innaba tisalu na, la'ania nna tte denlu iyá nu rusiatu ikini.
ACT 24:9 Ka nu Israel, ka nu daa lenkana Tértulo‑ni, rágabakana gwalíba aníha‑ba uka.
ACT 24:10 Nianna tti betten ná Félix nu rinnabiaha Pabluha kini innena. Pabluha nna udulona rana: ―Neti xen su lasiba ekabia ge nu rusiakana ikia arlo kwinalu, kumu yu xeabaa ixe ida chi ankalu xueda getu.
ACT 24:11 Kwinabalu gwa dikaba innaba tisalu adí ka benne ge nu rigixxi'aya‑ni. Neti si ukaruba tu tsi'inu (12) ubisa‑ni ugwapia lhe'esi Jerusalén‑ni diaya gwedú xibi lhe'e yotu ge Tata Do Yebáha.
ACT 24:12 Labí betexxakakana neti ridaka lenia nuxa benne o rutsatsaa ke, ni ro'o yotuha lhe nigaba lhe'e ka yo'o ata rudhetitu ka tisa ge Tata Do Yebáha lhe nigaba lhe'e yiesiha lhe.
ACT 24:13 Anágaba lhe labí tee bixa ule'ekana deki gwalí benia nu rusiakana ikia‑ni.
ACT 24:14 Nu kixxi'aligabania lu, neti runia sina ge Tata Do Yebaa benne anke Diosi ge ka xuttotuha, diaya lo neda ge Jesús‑ni, delába neda nu rákana deki ankana attu neda subi. Neti gwa riaba lasia iyába nu ra lo bia bennabi bodha'an Tata Do Yebáha len Moisés‑ni lhe nu ra ka tisa dia lo ka yetsi ka nu bodha'an ka profeta ge Tata Do Yebáha lhe.
ACT 24:15 Ruxxengaba lasia ge Tata Do Yebáha attigaba lakana ruxxen lekani gebie. Ruxxengaba lasia deki gwelhidha benbe ka benne chi uttiha, sila benke latsiru o sila benke nu satsa lhe.
ACT 24:16 De nuha nna neti satíaba runia doelha dhoa unia latsiru arlo Tata Do Yebáha lhe unia latsiru arlo ka benne lhe.
ACT 24:17 ’Neti ixe ida chi rekia attu ta subi; nnannaliba nna besinaa lhe'esi Jerusalén‑ni kini dedáya gweka'ana latti belhiu ge ka benne kia, delába ka benne Israel, ka benne abittu geke tee lhe anágaba dedágabaa kini utea úna len Tata Do Yebáha lhe.
ACT 24:18 De nuha‑ba nna dua ro'o yotuha; chiba bexí beyaria attiba chi ga'anna lo bia bennabi getuha nna ttiruba bilani ttu chupa ka benne Israel‑ni neti. Ka benneha dedáke daka Asia. La'ania labí du lania ixe ka benne, nigaba labí daya rutsatsaa ka benne.
ACT 24:19 Ka benneha‑la dika tse'eke nii kini ukinnike neti ganna bixa ge do leke neti.
ACT 24:20 Ganna abíba nna ka benne se'e niiba innáchuke, ¿si gwaxxakake bixa nu satsa benia tti biso dua arlo ka nu ruin elhuxtisi ge ka benne Israel‑ni?
ACT 24:21 O, ganna abittuba de unnebaa idisa, xpeya ke: “Nnanna ruinle elhuxtisi kia, kumu de ruxxen lasia deki gwa reyaka benba ka benne chi uttiha.”
ACT 24:22 Félix‑ni, kumu chi galá yuna gasina anka neda ge Jesús‑ni, nianna tti uchú lona, rana: ―Ttiliba ita Lisias benne anke nu loni ge ka soldaduha, la'anialiba ulhuxa looa gele.
ACT 24:23 Nianna tti ra Félix‑ni soldadu nu baninna ttu gayua (100) ka soldaduha eche adakabakana Pabluha lhe'e lisiyya ata ruyúkana naha. Sun tteba nna abittuba uxxikakana na, tseki lhaabana lhe abittugaba usunakana ga'a ka benne geni ki tagíake na lhe tadha'anke nu riyasinna lhe.
ACT 24:24 Iki de chi ute ttu chupa ubisaha, nianna tti bisin Félix‑ni lenna nuila geniha. Nuilaha tee láni Drusila, ankana benne Israel. Nianna udhelha Félix‑ni kini gwaxxíkana Pabluha kini udo nagani gasina ria le Pabluha ge Jesucristuha.
ACT 24:25 Ttaka tti biyienin Félix‑ni nu ra Pabluha, rana deki teeki akari'i benne runi attiba ankaba geni lhe innabiari'i elha ruin geri'i lhe. Anágaba utixxi'agabana rana deki isia sá aka elhuxtisi geri'i arlo Tata Do Yebáha. Tti biyienin Félix‑ni nu ra Pabluha, nianna usibinna nna rana na: ―Ttanába. Chinka beyya. Gwedeaxibaa lu ganna nukaxa nattiti.
ACT 24:26 Kumu rakin Félix‑ni gaa guteba Pabluha belhiu lenna kini odilána na. De nuha nna satti balhaba raxina na kini rinne lenna na.
ACT 24:27 Tti chi uka chupa idaha, Félix‑ni nna bedhanbana ladiniha, nianna uta'a attu nu tee láni Porcio Festo. Ttaka kumu Félix‑ni de raka leni eya'an tsena len ka nu Israel‑ni, de nuha nna bodha'anbana Pabluha lhe'e lisiyyaha.
ACT 25:1 Festuha bisinna lhe'esi Cesarea‑ni edí ladini kini innabiana ka yiesi se'e itúba ka daka niha. Iki de chi uka tsunna ubisa bedí ladini lhe'esi Cesarea‑ni, nianna tti biriana diana lhe'esi Jerusalén‑ni.
ACT 25:2 Tti chi rena niha nna ka nu loni ge ka bixxudiha lhe ka nu loni ge ka nu Israel‑ni lhe ugíakana gwattixxi'akinna na ge nu rusiakana iki Pabluha.
ACT 25:3 Rinnabakana kini uinna ttu elha tsagwi edhelhana Pabluha kini esiana Jerusalén‑ni. Aníha rákana kumu de rulha lekani tse'ekana ukatsi lokani kwe'e nedaha kini uttikana Pabluha ganna chi deyu'una neda dedána.
ACT 25:4 Festuha nna bekabina rana kana: ―Lhe'esi Cesarea‑niliba tee Pabluha lisiyya. Neti chigaba eyya'aya niha.
ACT 25:5 Rágabana kana: ―Lebi'i ka nu ankale nu loni, gwaltsá len neti kini ganna si bixa nu abittu anka tse ben nubiyúha, niha‑liba usiale ikini ge iyá nu rale neti nii.
ACT 25:6 Ttiba xxunu o tsii ubisa udo Festuha lhe'esi Jerusalén‑ni, niala nna tti deyyana besinna lhe'esi Cesarea. Beyeki dilaha nna bedona ro'o mexa geniha ata ruinna elhuxtisiha, nianna tti udhelhana kini gwaxxíkana Pabluha kini iso duna arloni.
ACT 25:7 Tti uta'a Pabluha ata do Festuha nna ka nu Israel ka nu daa Jerusalén‑ni ubiga ttebakana use'ekana abi'iba kwe'e Pabluha. Nianna ixeba nu rusiakana ikini lhe xxeniba anka nu rákana deki benna, ttaka labí biria lii deki gwalí benna nu rusiakana ikiniha.
ACT 25:8 Pabluha nna bekabina, rana: ―Neti labí chi binittia abittu udoa tisa ge nu ra lo bia bennabi getuha, delába ri'itu ka benne Israel, nigaba labí bixa chi bedhakaa yotuha, nigaba labí bixa chi benia ge César benne rinnabia xeniha.
ACT 25:9 Ttaka kumu Festuha de raka leni eya'an tsena len ka nu Israel‑ni, aníoka nna unnaba tisana Pabluha, rana na: ―¿Si gweyyalu Jerusalén‑ni kini niha‑liba unia elhuxtisi gelu?
ACT 25:10 Pabluha nna bekabina, rana: ―Ki arlo ttu ka nu rinnabia bose'e César‑ni nuní dua ata dika aka elhuxtisi kia. Ka benne Israel‑ni gwa yu xeaba kwinalu labí bixa benia geke.
ACT 25:11 Ganna bixa tulha xxeni daya o benia ttu bixa nu dika ralhaa gattia, la'ania nna labí dhu disa neti gattia. Ttaka ganna si abíba lii nu rusiake ikia‑ni, la'ania nna lanú nu aka geni kwenta otena neti lasi ná ka benne‑ni. Nnanna nna rinnabaa len kwinalu, arlo César benne rinnabia xeniha‑liba, niha‑liba tsiaya kini benneha unie elhuxtisi kia.
ACT 25:12 Festuha nna iki de chi unne lenna adíru ka nu se'e kwe'eniha, nianna tti rana Pabluha: ―Luba chi unnabalu tatso dulu arlo César‑ni. ¡De nuha nna tsiabalu ganna!
ACT 25:13 Uteba ttu chupa ubisa, nianna tti dia Agripa nu rinnabiaha lenna Berenice, diakana lhe'esi Cesarea‑ni kini tagwekana Festuha ttu padiuxi.
ACT 25:14 Isá toba use'ekana lhe'esi Cesarea‑ni, de nuha nna Festuha utixxi'enna Agripa‑ni ge Pabluha, rana na: ―Nii tee ttu nubiyú lisiyya bodha'an Félix‑ni na tti beria ladiniha.
ACT 25:15 Ge nuní unne ka nu loni ge ka bixxudiha lhe ka benneola ge ka nu Israel‑ni tti ugíaya lhe'esi Jerusalén‑ni. Unnabakana len neti kini ukinnia nuní.
ACT 25:16 Ttaka neti nna bekabia gekani, xpeya kana: “Ri'itu ka nu ruin elhuxtisi ge Roma‑ni labí labintu urixxi ukinnitu ttu benne ganna abíba chi biso due len ka nu rusiakana ikieha arlo ttu xueda lhe anágaba lhe teeki dhi benneha lo neda kini ekabie ge nu rusiakana ikieha, kini aníha nna ule'e ganna si gwalí nu rusiakana ikieha.”
ACT 25:17 Laxkala tti bisiakana nii, neti labí uledaa. Beyeki dilaha nna bedo ttebaa ro'o mexa kia‑ni nna udhelhaa kini gwaleakana Pablu‑ni.
ACT 25:18 Ka nu rusiakana ikiniha, ttu se'ebakana rukinnikana na, ttaka labí rusiakana ikini ttu tulha xxeni nu rakati benna.
ACT 25:19 Beta rusiakana ikini de labí rudona tisa ge nu ria lekani lhe anágaba lhe rusiagabakana ikini ge ttu nubiyú tee láni Jesús. Nuha chiba uttina, ttaka Pablu‑ni nna rana deki anka benba nuha.
ACT 25:20 Ttaka neti kumu de labí yua ge nu rinnekanaha, de nuha nna unnaba tisaa Pablu‑ni, xpeya na: “Si gwa raka lelu eyyalu Jerusalén‑ni kini niha‑liba aka elhuxtisi gelu.”
ACT 25:21 Ttaka lana nna labí uka leni. Unnabalana tsiana kini iso duna arlo César benne rinnabia xeniha. Aníha uka nna xpeya nu baninna ka soldaduha uyú tsitsikana na axtaliba ganna chi idhelhaa na tsiana Roma.
ACT 25:22 Nianna tti ra Agripa‑ni Festuha: ―Neti rakagaba lasia iyienti ge nubiyú‑na. Festuha nna rana na: ―Uxxe dilaha iyieninlu geni ganna.
ACT 25:23 Beyeki dilaha nna Agripa‑ni lenna Berenice‑ni yalhá xxeni ra lekani uta'akana lhe'e yo'o lagwiha itupa lenkana ka nu ruinkana mandadu ka soldaduha lhe adíru ka nu loni ge yiesiha lhe. Festuha nna udhelha ttebana kini gwaleakana Pabluha kini iso duna arloni.
ACT 25:24 Nianna ra Festuha: ―Kwinalu xa tata Agripa lhe iyále ka benne se'ele len ri'itu nasá, ne nubiyú nu rusia iyá ka nu Israel‑ni ikini deki benna ttu bixa. Chi bitakana lhe'esi‑ni lhe bitagabakana tti ugíaya Jerusalén‑ni nna ribesi'anibakana rinnabakana len neti rákana: Labíru ralha nubiyú‑ni aka benna.
ACT 25:25 Ttaka neti rakati labí benna nu dika ralhana gattina. Anágaba nna la labana unnabana tsiana kini iso duna arlo César benne rinnabia xeniha. De nuha nna neti chiba bokinni ikia idhelhabaa na arlo benneha.
ACT 25:26 Ttaka kumu neti de labí yua bixattiga benna kini aníha‑chu nna udoa lo yetsi idhelhaa len benneha, de nuha nna rutso dua na arlole, lade'a tte arlo kwinalu xa tata Agripa, kini iki de chi biyienin nagari'i bixa innána, la'ania nna chi tee ro'a bixa udoa lo yetsiha.
ACT 25:27 Kumu neti rakati satsaba nuha idhelhaa ttu nu tee lisiyya attu ta subi nna abígaba kixxi'aya bixattiga ge rusiakana ikini.
ACT 26:1 Nianna tti ra Agripa‑ni Pabluha: ―Gwakaba innelu ge nu rusiakana ikilu. Pabluha nna ulhidha náni nna tti udulona rinnena, rana:
ACT 26:2 ―Yalhá itta du lasia nasá de rinnea arlo kwinalu xa tata Agripa. Rinnea kini rigixxi'iaya ge iyá tte nu rusia ka benne Israel‑ni ikia.
ACT 26:3 Kumu ri'itu ka benne Israel, gwa yu xeaba kwinalu iyába nu labintu ruintu lhe nu ridaka len luesitu lhe. De nuní nna rinnabaa len kwinalu bedochi nagalu kia.
ACT 26:4 ’Iyába ka nu Israel‑ni, ttili ankaa nu kwitiha, gwa yú xeabakana gasina uka elha ruin kia tti ugwekia lagwi gekaniha lhe tti udoa lhe'esi Jerusalén‑ni lhe.
ACT 26:5 Anágaba lhe nu reha‑li chi ankabiakinna neti. Laxkala ganna raka lekani kixxi'akana nuxa ankaa, gwakaba kixxi'akana. Neti ankaa fariseo, delába selaa lhe'e ttu dhi ka benne gwa rudo tsitsiruke tisa ge nu ria letu lhe ge nu ruintu lhe.
ACT 26:6 Ttaka nnanna de ruxxenba lasia ge nu chi ra Tata Do Yebáha ka benne uka xuttotuha utebie getu, de nuha‑ba nna riso dua arlo kwinalu.
ACT 26:7 De nu chi ra Tata Do Yebáha utebie getu, de nuha nna iyábatu ka benne tsi'inu (12) dhi datiatu benne tee lábie Israel, rela lhe resá lhe rulhatu le'a ge Tata Do Yebáha lhe rudú xibitu arloe lhe, kumu ruxxenba letu deki gwinbe nu chi rabie. Neti nna de ge nuníba ruxxen lasia, de nuníba nna adí ka benne Israel‑ni rebi'i noolake neti xa tata Agripa.
ACT 26:8 Lebi'i nna, ¿beaka a ria lele deki gwa daaba Tata Do Yebáha elhidhe ka benne chi uttiha?
ACT 26:9 ’Anágaba neti sisi'a tteha ukati bikalaba unia kini dhaaya utse'e looa ka benne chi ria leke ge Jesús ge Nazaret‑ni.
ACT 26:10 Aníha‑ba benia lhe'esi Jerusalén‑ni. Ka bixxudi ka nu loniha betekana lo neda kia kini ugwekia bedaxxua ixe ka benne chi ria leke ge Jesús‑ni, nianna bedheaya ke lisiyya. Anágaba tti chi ralha ka benneha uttikana ke, iyágaba neti beda'a ro'a deki gattiba ka benneha.
ACT 26:11 Ixe lidú gwatta'aya lhe'e iyába ka yo'o ata rudhetitu ka tisa ge Tata Do Yebáha, kini raayaa ka benne chi ria leke ge Jesús‑ni. Aníha benia kini bedo doelhaa ke ki innáke deki labíru ria leke gebie. Kumu yalhá bilá xxatta lasia, de nuha nna axtaba lhe'e ka yiesi dittu gwanalhaa ka benneha.
ACT 26:12 ’De nuha‑ba nna diaya lhe'esi Damasco‑ni. Udhelha ka nu loni ge ka bixxudiha neti lhe betegabakana lo neda kia kini sadaxxua ke.
ACT 26:13 Ttiba retin tsi'inu (12) resá nuha yu'a neda diaya xa tata, ttiruba nna ttu nnelaba biláti ttu xiani dana yebáha. Raka lhalhabana, adírula yien chará ankana attichula xiani ge tatubisa‑na. Xianiha uyu'una abi'iba neti lhe abi'iba ka benne dia lania lhe.
ACT 26:14 Nianna iyábatu ubixxitu lo yu nna tti biyienti tsi'i ttu benne unnebie tisa hebreo, ree neti: “¡Saulo! ¡Saulo! ¿Beaka neti danalhalu rudhaka disalu? Tsitsiba anka kini dhaalu edúlu lo nu ruttisinna lu‑na.”
ACT 26:15 ’Neti nna xpeye: “¿Núle nuná xa tata?” Labie nna bekabie ree: “Netiba nuní Jesús benne danalhalu rudhaka disalu.
ACT 26:16 Nnanna nna beyadha nna bedú. Kumu dela nuha chi bele'e loa lenlu kini udúa lu akalu benne uinlu sina kia lhe kixxi'alu nu bilenlu nasá lhe anágaba kixxi'agabalu nu si ule'erunia lu.
ACT 26:17 Neti godilábaa lu lo ná ka nu Israel‑ni lhe lo ná ka nu abittu ankakana nu Israel lhe. Idhelhaa lu ata se'ekana,
ACT 26:18 kini idhalilu lokani ki tte dákinna kini abitturu tsekikana uinkana nu satsa. Nu uinlakana, uinkana latsiru lhe eriakana lo ná nu xxegwiha nna odaxxukana neda ge Tata Do Yebáha, kini de tsia lekani kia nna ixú elha xen lasi ge ka tulha ruinkana lhe anágaba lhe galhagabakana dhíkana nu dhi ka benne chi ankake gebie.”
ACT 26:19 ’Laxkala de nuha nna xa tata Agripa, bedobaa tisa ge benne bela'ati yebáha, delába benne belise netiha.
ACT 26:20 De nuha nna lade'a tte utea utixxi'ania ka benne se'e Damasco‑ni. Iki dela nuha nna tti diaya Jerusalén‑ni lhe lhe'e adíru ka yiesi se'e lo yu ge Judea‑ni lhe. Nialiba nna tti diaya ata se'e ka benne abittu ankake nu Israel. Iyábake utixxi'ania ke kini odúna ke nna odaxxuke neda ge Tata Do Yebáha nna uinke latsiru kini aníha nna ule'e deki gwalí chi bodúna ke ge nu ruinkeha.
ACT 26:21 De nuníba nna bedaxxu ka benne Israel‑ni neti ro'o yotuha nna benke uttike neti.
ACT 26:22 Ttaka Tata Do Yebáha gwa rakaba lenie neti. Laxkala axtaba nasá sa rekibaa rigixxi'ania ka benne, delába ka benne ra xxeni leke lhe ka benne abittu ra xxeni leke lhe. Labí rigixxi'aya nu abittu raxxína len nu unne ka profetaha lhe len nu unne Moisés‑ni lhe. Ka benneha rigixxi'ake ge nu aka,
ACT 26:23 delába unneke ráke deki benne anke Cristuha teeki gatti benneha nna labe lade'a tte eyadhe lagwi ge ka benne chi uttiha, kini kixxi'anie ka benne Israel lhe ka benne abittu ankake nu Israel lhe, kixxi'anie ke ka tisa ka nu anka attiba xiani kini tte dákanie gasina odilábie ke.
ACT 26:24 Nuha‑ba bekabi Pabluha ge nu rusiakana ikiniha. Nianna tti unne Festuha idisa, rana na: ―¡Rakaba ikilu xa Pablo! ¡De rudheti xxattalu nna chiba richixxi ikilu!
ACT 26:25 Ttaka Pabluha nna bekabina rana: ―Labí raka iki neti xa tata Festo. Ilába rinne neti lhe anágaba nu rigixxi'aya‑ni ankaba nuní nu gwalí.
ACT 26:26 Naba do tata Agripa‑na, gwa yu xeabe ge nu rigixxi'aya‑ni. De nuha nna xen su lasiba rinnea arloe. Kumu neti yu xeabaa deki labie gwa yube ge iyá nu rigixxi'iaya‑ni, kumu labí gatsi uka nuní.
ACT 26:27 Naba dolu xa tata Agripa, ¿si gwa ria le kwinalu ge nu unne ka profeta ge Tata Do Yebáha? Neti yua deki gwa riaba lelu.
ACT 26:28 Agripa‑ni nna bekabina ge Pabluha, rana: ―Ganna a latti tte nna udaabalu uxí yielu neti kini tsia lasia Cristuha.
ACT 26:29 Pabluha nna rana na: ―Meskiba latti lhe o ixeni lhe, neti rinnabaa len Tata Do Yebáha laa suna kwinagalu tsia lelu; iyágaba ka benne riyienkanie nu rinnea‑ni tsiagaba leke, aníha kini akale attiba neti, ttaka labí aní ixika ni'a nále attiba xika ka ni'a náya‑ni.
ACT 26:30 Iki de chi ra Pabluha aníha, nianna tti bedú lii Agripa‑ni lenna Festuha lhe Berenice‑ni lhe adíru ka nu se'e lenkanaha lhe.
ACT 26:31 Tti beriakana niha nna ra luesikani: ―Nubiyú‑na labí ben nuná ttu nu dika ralhana gattina, nigaba ralhana gattana lisiyya.
ACT 26:32 Agripa‑ni nna rana Festuha: ―Gwalába nubiyú‑na ganna ttixka laa chi unnabana tsiana iso duna arlo César benne rinnabia xeniha.
ACT 27:1 Tti chi beda'a ro'okani deki idhelhakana ri'itu daka Italia, nianna betekana Pabluha lhe adíru ka nu tee lisiyyaha lasi ná ttu soldadu nu baninna ttu gayua (100) ka soldadu. Nu baninna ka nuha tee láni Julio. Ka soldaduha babakana César nu rinnabia xeniha.
ACT 27:2 Nianna tti ugwapitu lo ttu barcu nu dana lhe'esi Adramitio. Nuha chi duna iriana tsiana lhe'e ka yiesi se'e daka ro'o indatoo ge Asia. Dágaba Aristarco‑ni len ri'itu. Lana ankana benne lhe'esi Tesalónica. Tesalónica‑ni rena daka lo yu ge Macedonia.
ACT 27:3 Beyeki sáha nna bisintu lhe'esi Sidón. Nuha rena ro'o indatooha. Julio‑ni nna gwa ukabana benne tse len Pabluha. Laxkala gwa begwelhabane gwalannie ka benne ankabianie se'e lhe'esiha kini ka benneha nna begweke bie nu riyasanie.
ACT 27:4 Bederiabatu lhe'esiha dedheyatu. Ttaka kumu daka arlo barcu diatuha‑la ruse'ena beha, aníha uka nna saro'o yu ge Chipre‑niba diatu kumu niha‑ruba nuha gwa re be.
ACT 27:5 Diabatu lo indatooha nna utetu gaxxaba daka ro'o yu ge Cilicia lhe ge Panfilia lhe. Nianna bisintu Mira. Mira ankana ttu yiesi rena daka lo yu ge Licia.
ACT 27:6 Lhe'esi Licia gwaxxaka soldadu nu dia lentuha attu barcu. Nuha dana daka lhe'esi Alejandría nna diana daka Italia. Nianna bedelhapi soldadu nu dia lentuha ri'itu lo barcuha nna diatu.
ACT 27:7 Ixe ubisa uyu'utu neda dia besibatu lo indatooha. Chibuka utetu ro'o yiesi nu tee láni Gnido. Kumu de abí galá rugwelha beha, laxkala ulu'ula lotu diatu daka ata ree Creta. Nuha rena lagwi indatooha. Saro'o nuha‑ba diatu kumu niha‑ruba nuha gwa re be. Nianna utetu arlo Salmona.
ACT 27:8 Saro'o indatoo ge Creta‑niba diatu. Chibuka bisintu ata risin ka barcuha. Ta risin ka barcuha tee láni Ka Puertu Tse. Gaxxaba niha re yiesi nu tee láni Lasea.
ACT 27:9 Kumu yalhá bisá xxattatu yu'utu neda, de nuha nna ttu niha‑ruba rekitu chi ute sá tti rutte ubina lhe'e ka benne Israel‑ni abittu roke yetta, lhe la'ania chigaba isia ka beo tti reta'a iyya beha. Laxkala yalhá chi ruxunnina getu ganna tsiarutu len barcuha lo indatooha. Nianna tti ra Pabluha adí ka benne daa lhe'e barcuha:
ACT 27:10 ―Tata xisi to, neti rakati yalhá sateri'i ganna ttu aníba la diari'i. Anágaba nna laa suna barcu‑niga lhe laa suna ka yua chena‑niga ruxunnina gekani tse'e lookana. Anágaba ri'i ruxunnigabana geri'i gattiri'i.
ACT 27:11 Ttaka soldadu nu baninna ttu gayua ka soldaduha bedorula nagani ge nu rudhá barcuha lhe ge xxana barcuha lhe attichula ge Pabluha.
ACT 27:12 Lhe anágaba kumu ata se'etu len barcuha labí tte tse anka niha kini eya'an nuha axtaliba ganna chi tte iyya beha, aníha uka nna ixebakana beda'a ro'okani, rákana: ―Tserula ganna ttixka iriari'i ata se'eri'i‑ni, kini ni kina gaa gwadaabari'i isinri'i ro'esi Fenice‑ni. Aníha rákana kumu ro'esi Fenice, niha‑ruba nuha gwanka rise'e ka barcu. Fenice rena lo yu ge Creta‑ni, rulannina daka ata radi ubisa. Niha tse'etu laka tte ka beo raka xxatta iyya beha.
ACT 27:13 Atti chi ugwadi gaatti be daa daka rreha, nianna rakin ka nu rudhá barcuha gwakaba tsiatu. Aníha uka nna biriatu diatu, saro'o indatoo ge Creta‑niba diatu.
ACT 27:14 Ttaka labí isá chi yu'utu neda, ttiruba chi biria ttu be raka xxatta idí dana daka ata riria ubisa‑na nna uyu'una lo barcu diatuha,
ACT 27:15 nianna benneru loni nuha. Ttaka kumu de abí galá udaa barcuha tsiana daka ata daa beha, aníha uka nna begwelhachilatu che beha barcuha.
ACT 27:16 Aníha‑ba che beha barcuha, ute lenna ri'itu ro'o ttu yu xka'a to tee láni Clauda. Nuha rena lagwi indatooha. Niha‑ruba nuha gwa re latti be. De nuha nna chibuka udaa ka nu ribenkana lhe'e barcuha belhapikana chalupa nu na'aya barcuha.
ACT 27:17 Tti chi belhapikana chalupaha lo barcuha, nianna tti boxxiga tsitsikana lhe'e barcuha len tuu, kumu rasikinna ni kinaruba tsaga nuha lo ka belhuku yuxi ka nu tee lákani Sirte sia lhe'e indatooha. Aníha uka nna belhidakana ka lari daa iki barcuha nna begwelhabakana che beha barcuha.
ACT 27:18 Ttaka kumu de adíla idí chi rukubi iyya beha barcuha, laxkala beyeki sáha nna udulokana bedelhakana ka yua che barcuha lhe'e indatooha.
ACT 27:19 Beyonna ubisaha nna kwinaba ka nu ribenkana lhe'e barcuha bedaxxukana ka lo irsina barcuha nna uru'unagabakana ka nuha.
ACT 27:20 Ixe ubisa labíru bilentu tatubisa‑na, nigaba ka beli‑na. Gwea iyya beha nna yalhá idí raka nuha. Laxkala la'ania labíru ruxxen letu deki gwalátu.
ACT 27:21 Kumu de ixe ubisa chi ute labíru chi utotu yetta, de nuha nna udú lii Pabluha lagwi ge iyábatu nna rana: ―Náruga gwaluyú xa tata. Ganna bedochiga nagale kia abittuba biriari'i lo yu ge Creta‑ni, la'ania nna labíga elha disa ruyúri'i lhe labíga bennittiri'i ka yua che barcu‑ni ganna ttixka.
ACT 27:22 Nnanna nna rulisaa le, tsitsi gwalikweki lele abittu gasinle, kumu ni ttúle labí gattile. Suna barcu‑niba tse'e loona.
ACT 27:23 Kumu neti naseha bela'ati ttu anjeli udhelha Tata Do Yebáha, delába Tata Do Yebaa benne ankaa gebie lhe rixúnie neti lhe.
ACT 27:24 Benneha rabie neti: “Pablo, bittu gasinlu, kumu teeki iso dulu arlo César nu rinnabia xeniha. Kumu de lu nna edá le Tata Do Yebáha odilábie iyába ka benne daa lenlu lhe'e barcu‑ni.”
ACT 27:25 De nuha nna tsitsi gwalebeki lele xa tata. Bittu udúna le, kumu neti ruxxen lasia ge Tata Do Yebáha deki gwakaba atti tteba chi ra anjeli geeha neti.
ACT 27:26 Ttaka nna teeki satságari'i len barcu‑ni ro'o ttu yu re lagwi indatoo‑ni.
ACT 27:27 Loolha tti chi uka sitá (14) ubisa rekitu lo indatoo nu tee láni Adriático, naa lhe niiba rekitu che iyya beha barcu diatuha. Tti chi anka ttiba retin tsi'inu (12) relaha, ka nu riben sina lhe'e barcuha, chi ute dákinna deki chi tteba isintu yu bisi.
ACT 27:28 Nianna tti berixxibiakana a ttixa lhi'u re indatooha. Debá a galhia (20) edha re indaha lhi'u. Attu lattitoruba bededátu len barcuha, nianna tti bodorixxibiakana attu libe. La'ania nna a tsinu (15) edhaba re indaha lhi'u.
ACT 27:29 Ttaka kumu de rasikinna kini ka sannipa barcuha idí iki ka íyya sia lhe'e indatooha, de nuha nna ulhida ttebakana ttapa ka iyya idi'i ka nu tee lákani ancla, ulhidakana ka nuha daka xan barcuha kini ka nuha ukwedakana barcuha lo indaha lhe anágaba lhe rágabakana: ―¡Kwadila tsanixxi!
ACT 27:30 Ttaka ka nu riben lhe'e barcuha chi ruinkana oxunnikana. Laxkala chi rilhidakana chalupaha kini eyyakana loni oxunnikana, De nuha nna uka diba ruinkana deki adíru ka iyya idi'iha‑ba ilhidakana daka arlo barcuha.
ACT 27:31 Ttaka Pabluha, tti ute denna nu ruin ka nuha, nianna tti rana ka soldaduha lhe nu baninna ka nuha lhe: ―Ganna ka nuní oxunnibakana abíba eya'ankana lo barcu‑ni, lebi'i labí lhaale.
ACT 27:32 Nianna ka soldaduha uchúkana ka tuu xiga chalupaha nna ubinni nuha lhi'u lhe'e indaha.
ACT 27:33 Tti chi daa tsaniha nna ra Pabluha iyá ka nu daa lhe'e barcuha: ―Chinka gwaligo yetta. Nasá chi uka sitá (14) ubisa rutte ubina lhe'ele labí chi utole kumu de si ruchachala ikile ttixa aka.
ACT 27:34 Nnanna rinnabaa len lebi'i, gwaligo yetta kini aka benle, kumu niru ttúle labí gattile.
ACT 27:35 Iki de ra Pabluha aníha, nianna tti bedaxxuna ttu yettaxtila nna begwena ixkixaru len Tata Do Yebáha arlo iyábakani. Nianna tti ulha'ana lhe'e benneha nna udulona rona.
ACT 27:36 La'aniala nna chi bodú ittana le iyábakana nna utogabakana yettaxtila.
ACT 27:37 Chupa gayua gayuna bixxi sixupa (276), ttanía anka de iyá ttetu diatu lhe'e barcuha.
ACT 27:38 Iki de chi beyielintu utotu yettaxtilaha, nianna tti bododelhakana ka kutensi xuxtilaha lhe'e indaha kini abittu tteru idi'i aka barcuha.
ACT 27:39 Tti chi ugwani dilaha nna ka nu reben lhe'e barcuha labí reyakabiakinna gaxa nuha se'etu, ttaka bilákinna do ttu latti ata gwanka lapa. Nianna tti bokinni ikikani usigakana barcuha ata anka lapaha, ganna si gwaka ibigana.
ACT 27:40 Nianna tti uchúkana ka tuu xika iki ka iyya idi'i ka nu ulhidakana daka xan barcuha kini biginni ka nuha lhe'e indatooha nna udhasigabakana yaga nu rixúkinna kini rodekikana lo barcuha. Nianna tti ulhidhakana ka lari daa iki barcuha kini ru'u beha lhe'e ka lariha. Aníha kini ulu'u beha lo barcuha diana ubigana ro'o yu bisi re lagwi indatooha.
ACT 27:41 Ttaka tti gwannipa barcuha iki ttu xxuku yuxi xua lhe'e indaha, ttu tsaba gweada xinni lhe'e yuxiha nna daka xanniha nna beduyaba indaha nuha kumu de retetsu'una idí.
ACT 27:42 Nianna ka soldaduha nna chi ruinkana uttikana ka nu chekanaha, delába ka nu uleakana lisiyyaha, ruinkana uttikana ka nuha kini abittu oxunnikana lo indaha.
ACT 27:43 Ttaka soldadu nu baninna adí ka soldaduha, de raka leni odilána Pabluha, de nuha nna labí begwelhana uttikana ka nuha. Nianna tti rana iyába ka benne dia lhe'e barcuha: ―Ata gwa raka gele lo inda, lade'a tte lebi'i gwalegintsa lo inda‑na kini eriale yu bisi.
ACT 27:44 Adíle nna lo ka yaga o lo ka breta salha'a ge barcu‑niba gwalexua kini eriale. Aníha‑ba bentu chibuka ulaa iyábatu nna beriatu yu bisi.
ACT 28:1 Iki de chi ulaa iyábatu lo indatooha, nianna tti binatu deki lo yu nu re lagwi indatooha ata bisintuha, nuha tee láni Malta.
ACT 28:2 Ka benne se'e niha yalhá tse biyúke ri'itu. Bebekike gi nna uxike iyábatu kini betsa'atu ro'o teha kumu de raka xxatta idilha lhe de rodána iyya lhe.
ACT 28:3 Pabluha nna bettupa ttebana ttu xxia xidhi bisi. Lhe'e xidhiha re ttu belha. Tti dia Pabluha udelhana xidhiha lo giha, de biyú belhaha xisa'a ge giha, de nuha nna beriana nna uto ya'ana ná Pabluha.
ACT 28:4 Tti bilani ka benne ge Malta‑ni nalha belhaha ná Pabluha, nianna tti ra luesike: ―Gaxa elhuttiba ben nubiyú‑ni, kumu meskiba abittu uttina lo indatoo‑na, ttaka diosi geri'i‑ni benne runie elhuxtisi geri'i labíru rugwelhe na aka benruna.
ACT 28:5 Ttaka Pabluha nna bekubi tteba náni nna ubinni tteba belhaha lo giha nna labí bi ukinna.
ACT 28:6 Ka benneha nna ubedaba se'eke ganna abittuba gi ku'una lati Pabluha o ttu nnelaba gattina. Ttaka kumu risába labí bi ruinna geni, nianna tti bodolaba leke ráke: “Gaxa diosiba anka benne‑ni.”
ACT 28:7 Gaxxaba niha se'e ka yu ge ttu benne anke nu loni ge Malta‑ni. Benneha tee lábie Publio. Labie uxie ri'itu lisieha nna tseba biyúe ri'itu tsunna ubisa.
ACT 28:8 La'ania tata ge Publio‑ni tebe ranie yu'e xilhaa lhe richú ya'ana gebie lhe. Pabluha nna uta'ana ata tee benneha kini belannine nna iki de chi unnabana ge benneha len Tata Do Yebáha, nianna tti uxxua náni ikie nna beyaka ttebe.
ACT 28:9 Tti chi bina adí ka benne rani se'e Malta‑ni nu chi ukaha, nianna ugíagabake ata do Pabluha nna gwa beyakagabake.
ACT 28:10 Yalhá tse biyú ka benneha ri'itu. Laxkala tti chi edátuha nna gwa botebake iyába nu iyasintu neda.
ACT 28:11 Tti chi uka tsunna beo se'etu lo yu ge Malta‑ni, nianna tti beyapitu lo ttu barcu. Barcu nu beyapitu loniha, Malta‑niba udú nuha kini bettena iyya beha. Barcuha dana daka Alejandría. Daka arloni taa lo ka diosi tee lákani Cástor lhe Pólux lhe.
ACT 28:12 Nianna tti diatu lo barcuha nna bisintu lhe'esi Siracusa. Nuha rena ro'o indatooha. Niha bisátu tsunna ubisa.
ACT 28:13 Nianna saro'o indatooha‑ba diatu nna bisintu ro'o yiesi nu tee láni Regio. Attu dilaha nna bedo beha daka rreha, nianna biriatu len barcuha diatu. Berupa ubisaha nna bisintu ro'o yiesi nu tee láni Puteoli.
ACT 28:14 Niha beti'atu ttu chupa ka betsi to geri'i nna uxike ri'itu lisike kini use'etu lenke ttu gasi (7) ubisa. Niala nna tti biriatu diatu lhe'esi Roma‑ni.
ACT 28:15 Ka betsi to geri'i se'e lhe'esi Roma‑ni tti chi binake getu, nianna bita ttebake beteledake ri'itu lhe'esi nu tee láni Apio Foro lhe adíke beteledake ri'itu lhe'esi nu tee láni Tsunna Ka Taverna. Tti bilani Pabluha ka benneha, nianna bedú itta tteba leni nna begwena Tata Do Yebáha ixkixaru.
ACT 28:16 Tti chi bisintu Roma‑ni [soldadu nu baninna ttu gayua (100) ka soldaduha bote ttebana ka nu chena uleakana lisiyyaha, botena kana lasi ná soldadu do Roma‑ni. Nuha ankana nu loni ge adí ka soldadu se'e niha. Ttaka] Pabluha nna gwa begwelhaba soldadu do Roma‑ni na kini udona lhe'e attu yo'o subi nna ttúba ttu soldadu beya'anna kini biyúna na.
ACT 28:17 Tti chi uka tsunna ubisa do Pabluha Romaha, uxi ttebana ka nu loni ge ka benne Israel se'e niha. Tti bitupa ka benneha nna rana ke: ―Xa betsi to, neti labí bi chi bedhakaa ka benne geri'i, nigaba labí rigu'u ni'aya elha ruin ge ka benne uka xuttori'iha. Ttaka laa kiga de abittu bi chi benia, laa kiga de nuha nna Jerusalén‑nili bedaxxukana neti nna betekana neti lasi ná ka nu Roma se'e niha.
ACT 28:18 Ka nuha ixeba nu unnaba tisakana neti. Tti abí gwaxxakana bixa benia nu dika ralhaa gattia, nianna gwa benbakana olhákana neti.
ACT 28:19 Ttaka ka benne Israel‑ni nna labí uka leke olhaa ka nuha neti. Aníha uka nna udo doelhaa unnabaa kini etetso dua arlo César benne rinnabia xeni‑ni. Bittu akinle deki daya arlo benne‑ni kini ukinnia ka benne geri'i.
ACT 28:20 Laxkala de nuní nna uxia kwinale kini iláti le lhe kini inne lania le lhe. Kumu neti de ruxxenba lasia ge nu ruxxen leri'i, ri'i ka benne Israel, de nuha‑ba nna xigakinna neti cadena‑ni.
ACT 28:21 Ka benneha nna bekabike ráke: ―Ri'itu labí yetsi ge ka benne se'e Judea‑ni chi uxítu ata kixxi'ake gelu, nigaba labí chi bita nuxa ttu ka betsi to geri'iha kini kixxi'ake o innáke bixa nu satsa chi benlu.
ACT 28:22 Ri'itu nna rakala letu udo nagatu bixa innálu, kumu lhe'e iyába ka yiesi se'e ka nu rinnekana lhe rigu'u ni'akani ka benne chi selake lenlu.
ACT 28:23 Aníha uka nna ka benne unne lenke Pabluha bedúke attu sá kini ugía ixeke lhe'e yo'o ata donaha. Pabluha nna udulona dilaha nna axtaba chi ulhaha dona rigixxi'enna ke gasina uinke kini akake benne innabia Tata Do Yebáha ke. Rudaxxu ni'ani nu ra lo bia bennabi bodha'an Moisés‑ni lhe nu ra lo ka yetsi bodha'an ka profetaha lhe, ruinna kini okinni ikike kini tsia leke ge Jesús‑ni. Rudaxxu ni'ani nu ra lo ka yetsiha kini rigixxi'ana ge Jesús‑ni.
ACT 28:24 Alhe ka benneha gwa ugíaba leke ge nu ra Pabluha, ttaka adíke nna labí ugía leke.
ACT 28:25 Ttaka kumu de labí riyien ten ge luesike, aníha uka nna uduloke bedáke. Nianna ra Pabluha ke: ―Gwalíbani Espíritu ge Tata Do Yebáha tti bixúnie profeta Isaías‑ni kini unne lenna ka benne uka xuttori'iha, tti ra Espírituha na:
ACT 28:26 Ugía nna aní usi kana: Lebi'i, meskiba bika rudo nagale kia, labí tte denle lhe meskiba bika rulannile nna labí ilenle.
ACT 28:27 Kumu ra Tata Do Yebáha: Ka nuná tsitsiba ruin lastokani, labí raka lekani tsia lekani kia, lhe bedheaba nagakani, bittuba biyienikinna, lhe anágaba benbakana attiba ttu nu xua loni, bittuba bilákinna. Aníha benkana kini abittu ilákinna lhe abittu iyienkinna lhe kini abittu tte dákinna. Ruinkana aní kini ka eyekikana odaxxukana neda kia nna eyonia kana.
ACT 28:28 De nuha nna raka lasia unale ―ra Pabluha―, nnanna len ka benne abittu ankake nu Israel, len ka benneha‑la chi tsiatu kixxi'entu ke gasina odilá Tata Do Yebáha ke, kumu ka benneha gudola nagake ge nu kixxi'entu ke.
ACT 28:29 [Tti ra Pabluha aníha, ka benne Israel‑ni yalhá rulisa luesike deyyake.]
ACT 28:30 Gwa do xeana chupa ida udo Pabluha lhe'e yo'o nu unnabanaha. Niha risina iyába ka benne riake ralannike na
ACT 28:31 nna rigixxi'enna ke gasina kini akake benne innabia Tata Do Yebáha ke lhe rigixxi'agabinna ke ge Jesucristu benne anke Xxanari'iha. Labí rasinna tti rinnena, nigaba lanú nu riria usuna na tti rinnena.
ROM 1:1 Neti Pablo ankaa benne rixúni Jesucristuha. Tata Do Yebáha uxie neti ki akaa apóstol gebie. Ulesie neti kini tsekia kixxi'aya ka tisa geeha,
ROM 1:2 delába ka tisa chi utixxi'anie ka profeta geeha axtali ttuha, ka benneha nna bodha'anke ka tisaha lo ka yetsi geeha.
ROM 1:3 Ka tisaha rigixxi'ake ge Xi'inie Jesucristu benne anke Xxanari'iha. Jesucristuha, tti bitee yiesi lo yu‑ni uke benne attiba ankari'i, datiabie David‑ni,
ROM 1:4 ttaka tti beyaka benbie lo elhuttiha, Espíritu ge Tata Do Yebáha ree deki Jesucristuha nuha gwalíga anke Xi'in Tata Do Yebáha lhe anágaba ankagabe benne ra tsitsi lebie lhe.
ROM 1:5 De Jesucristuha nna bedá le Tata Do Yebáha betebie elha tse getu kini akatu apóstol, ki kixxi'entu iyá xea ka benne abittu ankake nu Israel ka tisa geeha, kini anáchu de tsia leke bie nna udoke tisa gebie. Anágaba lebi'i, lhe'e ka benneha‑gaba selale, biyaxile kini akale ge Jesucristuha. Iyá nuní ruintu kini inná xxeni lebie.
ROM 1:7 Ridhelhaa yetsi‑ni len iyá ttele, lebi'i ka benne rakani Tata Do Yebáha gele se'ele lhe'esi Roma‑na. Labie uxie le kini akale gebie. Xxudiri'i do yebáha lhe Jesucristu benne anke Xxanari'iha lhe, lake edá leke aka lenke le lhe use'eke le xen su lasi lhe.
ROM 1:8 Neti nu lade'a tte runia, rugwea Tata Do Yebaa kiaha ixkixaru ge iyá ttele de nu ben Jesucristuha, kumu iyába ka benne gaxaba se'eke rigixxi'ake deki lebi'i tseba chi ria lele ge Jesucristuha.
ROM 1:9 Tata Do Yebaa benne itú iki itú lasia rixúa lo sina geeha kini rigixxi'aya ka tisa ge Xi'inieha, labie gwa yu xeabe labí rudú siia rudettia le tti rilhapia tisa lenie.
ROM 1:10 Rinnabaa lenie kini ni kina gaa nnannaligaba gugwelhe neti itaa ata se'ele‑na kini etelannia le,
ROM 1:11 kumu yalhá re lasia iláti le kini utea len lebi'i ttu bixa elha tse nu ute Espíritu ge Tata Do Yebáha gele, aníha kini tse'e tsitsirule lo neda gebie,
ROM 1:12 kini aníha nna turo'oba use'e tsitsi luesiri'i, kumu neti lhe lebi'i lhe turo'oba ria leri'e.
ROM 1:13 Raka lasia unale xa betsi to, ixe lidú chi benia itaa ata se'ele‑na, ttaka ixeba nu bedheana loa. Laxkala axtaba nnanna labí chi uka itaa ata se'ele‑na. Re lasia itaa kini anágaba ata se'ele‑na gaxigabaa ka benne ki tsia leke ge Cristuha attigaba runia tti rekia ata se'e adíru ka benne abittu ankake nu Israel.
ROM 1:14 Kumu neti daa loa kixxi'ania iyába ka benne ka tisa ge Jesucristuha, daa loa kixxi'ania ka nu griegu lhe ka nu abittu ankakana nu griegu lhe, ka nu yuu lhe ka nu abittu yuu lhe.
ROM 1:15 De nuha nna lebi'i ka benne se'ele lhe'esi Roma‑na, yalhá re lasia kixxi'agabania le ka tisa ge Jesucristuha.
ROM 1:16 Kumu neti labí rettuti ge ka tisa ge Jesucristuha, kumu ka tisa‑na nuná ankake nu ra tsitsi le Tata Do Yebáha. Rixúnie ke kini rodilábie iyába ka benne ria leke gebie. Lade'a tte rodilábie ka benne Israel, anágaba nna rodilágabe ka benne abittu ankake nu Israel.
ROM 1:17 Kumu ka tisa‑ni nuní rigixxi'ake ráke: de tsiaba leri'i Tata Do Yebáha, de nuha‑ba nna unie kini abitturu yua ujari'i ge nu ruinri'i. Akaba attiba chi dia lo ka yetsi geeha, ata dia ra: “Benne runie nu dika ixúha, de tsiaba le benneha Tata Do Yebáha, de nuha‑ba nna gwaka benbe ttu dia lii arloe.”
ROM 1:18 Tata Do Yebáha, yebáha‑li do benneha nna ugwebie elha disa tsitsi ka nu runi iyá looba nu satsa lhe iyá looba nu abittu dika ixú lhe. Ka nu ruinkana aní, nu satsa ruinkanaha, nuha rusuna na kini abittu ria lekani ge nu anka gwalí.
ROM 1:19 Lakana chiba bilákinna ttu nu runna liina deki do Tata Do Yebáha, kumu kwinaba labie chi bela'anie kana deki doe.
ROM 1:20 Kumu nu labí rilenri'iha, delába labí rilenri'i deki anke Diosi lhe satíaba ra tsitsi lebie lhe, nuha attili ure yiesi lo yu‑niha chi rilá saana. Kumu atti rilenri'i iyá tte nu benie yiesi lo yu‑ni, la'ania nuha chi rite denri'i deki gwalí do benne anke Diosi. Laxkala ka nu runi satsa‑na labí tee ro'o ka nuná innákana deki labí yúkana ge Tata Do Yebáha.
ROM 1:21 Lakana, meskiba chi yúkana deki doe, ttaka labí begwekana lidhake attiba dika ugwekana lidhake de anke Diosi, nigaba a begwekane ixkixaru. Betse'e loona, nu labí dika ixúla belaba lekani. De ben ditikana abittu biyienkinna, de nuha nna bechulhe lekani.
ROM 1:22 Rakakinna deki ankakana nu yuu ttinka, ttaka delo nna ge nu abí yula ruinkana.
ROM 1:23 Betse'e loona benlakana ka diosi ka nu ankakana attiba ankari'i, ri'i ka benne re elhutti geri'i yiesi lo yu‑ni, lhe benlakana ka diosi sia xxilakani lhe ka nu ridá len ni'a nákani lhe, anágaba ka nu ra'aya lhe'ekani lo yu lhe. Arlo ka nuha‑la bedú xibikani nna labí benkana deki Tata Do Yebaa benne labí rattieha, benneha‑la nuha ra xxeni lebie.
ROM 1:24 De nuha nna bedhába iki Tata Do Yebáha kana nna begwelhabe kana benkana nu satsa retaba lekani. Bixúbakinna latikani kini benkana nu dika dhíkana elhittu ge nu benkanaha.
ROM 1:25 Bedhanbakana ria lekani nu anka gwalíga ge Tata Do Yebáha nna ge gwen lasiha‑la ugía lekani. Kumu arlo ka nu benie yiesi lo yu‑nila udulokana bedú xibikani lhe ruinkana le'a gekani lhe, nna labí bedú xibikani arlo Tata Do Yebaa benne benie iyá tte nu se'e. ¡Benneha‑la nuha ralhe inná xxeni lebie ttu dia lii! Amén.
ROM 1:26 De nuha nna bedhába iki Tata Do Yebáha kana, begwelhabe kana benkana nu satsa retaba lekani, delába benkana nu dika ugwena kana elhittu. Axtaba ka nuila‑na chi bedhankana nu ruinkana len ka nubiyú gekinna nna la len luesi nuilabakani chi reyo'o kwe'e luesikani.
ROM 1:27 Nuha‑gaba ben ka nubiyú‑na, chigaba bedhankana nu labikinna ruinkana len ka nuila gekinna nna la len luesi nubiyúbakani chi reyo'o kwe'e luesikani. Kumu de udá xxatta le luesikani, de nuha nna benbakana nu dika ugwena kana elhittu nna la labakana biyúkana elha disa ge nu benkanaha.
ROM 1:28 Kumu lakana rakakinna deki labí raka doelha uinbiakana Tata Do Yebáha, de nuha nna begwelhabe kana belaba lekani nu satsa rakaba lekani, kini benkana nu abittu dika uinkana.
ROM 1:29 Benbakana iyá looba nu abittu ixú lhe iyá looba nu satsa lhe. Anágaba nna rudogabana lekani gatta xxatta belhiu gekani lhe rudhaka xiikana ka benne lhe risi xxattakinna ke lhe. Anágaba ankagabakana ka nu runi elhutti lhe ka nu rigila elha utilha lhe. Anágaba len gwen lasiba ridí yiekana ka benne lhe ankakana ka nu re satsa lekani lhe ankakana ka nu reki gwelhidha tisa a ixú lhe.
ROM 1:30 Anágaba lhe rinne satsakana ge ka benne lhe ankakana ka nu abittu raka uyúkana Tata Do Yebáha lhe bittuba ria lekani ka benne lhe ruinkana deki ra xxeni lekani lhe ruinkana ttaba lhe. Anágaba lhe rotsi'inu lekani ruinkana bixaba nu satsa lhe bittuba rudokana tisa ge ka tata nan gekani,
ROM 1:31 lhe ankakana yieti, abittuba riyienkinna lhe. Anágaba ankagabakana ka nu labí gwalíkinna ruinkana nu chi rákana lhe labí elha si'i lasi gekani tee lhe ankakana ka nu abittu ratua lasi lhe.
ROM 1:32 Ka nu ruin aní, chiba yúkana deki Tata Do Yebáha chiba bodha'ane ree deki ka nu ruin luesi nu satsa‑ni, ralhaba ka nuná gattikana. Ttaka meskiba chi yúkana deki aná satekana, sa ruinbakana nu satsa. Anágaba lhe ru'ugaba lekani ge ka nu ruinkana luesi nu satsa ruinkana.
ROM 2:1 De nuha nna lu, meskiba nuxa ankalu, labí elha xen lasi gelu tee, kumu tti rigualu bala'ana ge adí ka benne, la luba nuha chi ribixxi riginnilu. ¿Beaka ki rigualu bala'ana ge ka benne, ki lu nuha‑gaba ruinlu?
ROM 2:2 Ttaka gwa yúbari'i deki ka nu riguakana bala'ana ge adí ka benne, ruinba Tata Do Yebáha elhuxtisi ge ka nuná attiba ankaba geni.
ROM 2:3 De nuha nna lu xa lena kia, lu rinnelu ge ka nu runi aná, ¿si rakinlu gwalálu lo elha disa ute Tata Do Yebáha, delo nna sa rinnelu ge ka benne, ki lu nuha‑gaba ruinlu?
ROM 2:4 Tti ruinlu aná, ¿laaba ganna rigu'uba ni'alu nu tse anka Tata Do Yebáha? Benneha re tse lebie lhe re besi lebie lhe, anágaba labí risa'axxinie len lu. Delo nna a rite denlu deki nu tse runieha, nuha‑la rixúna kini lu odúna lu ge nu ruinlu nna odaxxulu neda gebie.
ROM 2:5 Ttaka lu de ruin tsitsi lastolu, labí raka lelu odúna lu ge nu satsa ruinlu. De nuha nna la luba rudienlu elha disa gelu. Kumu ganna chi bisia sá tti uin Tata Do Yebáha elhuxtisi ge ka benne attiba ankaba geni, la'ania nuha dhilu elha disa ge nu ruinlu.
ROM 2:6 Kumu benneha ugwebe ka benne nu ralhabake dhike kua nu benba ttu ttuke.
ROM 2:7 Labie unie kini ka benne rudona leke ruinke latsiru, ka benneha aka benke ttu dia lii. Ruinke latsiru kumu de raka leke inná xxeni leke arlobie lhe raka leke ugwebie lidhakake lhe. Anágaba nna rakagaba leke aka benke ttu dia lii lhe.
ROM 2:8 Ttaka ka nu rese'e disakana loe, delába ka nu abittu rudokana tisa ge nu anka gwalí nna ge nu abí dika ixúla rudokana tisa, ka nu ruin aná ugwebe kana elha disa tsitsi.
ROM 2:9 Elha disa tsitsiba uyú iyába ka nu ruin satsa, lade'a tte ka benne Israel‑ni, lhe anágaba ka benne abittu ankake nu Israel lhe.
ROM 2:10 Ka benne ruin tseha nna iyábake unie kini inná xxeni leke lhe ugwebie lidhakake lhe. Anágaba use'egabe ke latsiru, lade'a tte ka benne Israel‑ni, lhe anágaba ka benne abittu ankake nu Israel lhe.
ROM 2:11 Kumu arlo Tata Do Yebáha ttúba daka iyári'i.
ROM 2:12 Iyába ka nu abittu tee bia bennabi bodha'an Tata Do Yebáha len Moisés‑ni gekani, ka nuná ganna rinittikana ruinkana tulha, meskiba abí yúkana bixa ra lo bia bennabi‑na, ka nuná tsia nnittibakana, nna iyába ka nu tee bia bennabi gekani, ganna rinittikana ruinkana tulha, ka nuná kwinaba bia bennabi‑na uinna elhuxtisi gekani.
ROM 2:13 Kumu laa ka nu rudo nagakani ge nu ra lo bia bennabi‑na, laa ka nunága nuná gwa rigua Tata Do Yebáha yua kwe'ekani ge nu ruinkana, sinuki ka nu gwa rudokana tisa ge nu ra lo bia bennabi‑na, ka nuha ka nu gwa riguabie yua kwe'ekani ge nu ruinkana.
ROM 2:14 Kumu ka nu abittu ankakana nu Israel, meskiba abí bia bennabi gekani tee, ttaka attisidiba gwa yúbakana nu dia lo bia bennabi‑na kumu titúbakana chi rudokana tisa ge nu ra loni. Ka nuná, meskiba labí yúkana bixa ra loni, titúbakana chi rite dákinna gá tee nu anka tse lhe gá tee nu abittu anka tse lhe.
ROM 2:15 Ka nuná, tti ruinkana aná, nu ruinkana‑na runna liina attisidiba chiba ga'anna nu ra lo bia bennabi‑na lhe'e lastokani, kumu titúbakana chi rite dákinna nuka ruinkana nu tse lhe nuka ruinkana nu satsa lhe. Kumu ttixka rinittikana, abittu ruin tsekana, la'ania nna rudú leni ttebana lekani nna ttixka tseba ruinkana nna la'ania nna tsegaba rudúna lekani.
ROM 2:16 Aní aka ganna chi isia sá ute Tata Do Yebáha lasi ná Jesucristuha kini benneha unie elhuxtisi ge nu ruin ka benne gatsi, uinbe attiba raba ka tisa ka nu rekia rigixxi'aya‑ni.
ROM 2:17 Lu ralu ankalu nu Israel lhe ruxxen tsitsi lelu ge nu ra lo bia bennabi bodha'an Tata Do Yebáha len Moisés‑ni. Anágaba rapigabalu de ankalu ge Tata Do Yebáha.
ROM 2:18 Lu yulu nu raka lebie uinlu, lhe de detilu nu ra lo bia bennabi‑na, de nuha nna gwa yulu nu anka tse.
ROM 2:19 Anágaba chiba xen suba lelu deki lu ankalu nu rinnerulu lo ka nu lo xua‑na, lhe ankalu attiba ttu xiani ge ka nu reki ata anka chulha‑na lhe, delába ka nu abittu ankabiakinna Tata Do Yebáha,
ROM 2:20 lhe anágaba rakinlu deki ankalu nu rudhetinlu ka nu abí yu lhe ka nu abittu tte chi yu lhe. Kumu de tee bia bennabi‑na gelu, de nuha nna rakinlu deki iyába yulu lhe rakinlu deki rinnebalu nu ankaba gwalí lhe.
ROM 2:21 Ganna lu rule'enlu adí ka benne, ¿beakala nna lade'axa la lu a rudhetilu nu rule'elu‑na? Lu ridúlu rigixxi'alu ralu: “Abittu lhanari'i”, ¿beakala lu rilanalalu ganna?
ROM 2:22 Ganna lu ralu: “Abittu isári'i attu nu subi”, ¿beakala lu risálalu attu nu subi ganna? Lhe anágaba ganna labí raka uyúlu ka nu labí gwalí ankakana diosi, ¿beakala nna rilanalalu nu tee lhe'e yotu ata sia ka nuná ganna?
ROM 2:23 Lu rapilu de tee bia bennabi bodha'an Tata Do Yebáha gelu, ttaka de abittu rudolu tisa ge nu ra loni, tti ruinlu aníha, Tata Do Yebáha nuha runnittilu.
ROM 2:24 Gwalíbani lo ka yetsi geeha ra: “Delo ni'a gele nna ka nu abittu ankakana nu Israel rigualakana bala'ana ge Tata Do Yebáha.”
ROM 2:25 Gwalí galá, lu ruu lo bela latilu, aníha kini rula'a deki gwankalu ge Tata Do Yebáha. Ganna ttixka gwa rudobalu tisa ge nu ra lo bia bennabi‑na, la'ania nna gwaxúba nu anka lo bela latilu‑na, ttaka ganna abíba rudolu tisa geni, la'ania nna ttiba ttu nu abittu ruu lo bela latini, aníha‑ba ankalu.
ROM 2:26 Nu abittu ruu lo bela latiniha, ganna gwa rudobana tisa ge nu ra lo bia bennabi‑na, la'ania nna meskiba abittu ruu lo bela latini, ttaka de gwa rudobana tisa ge bia bennabi‑na, tti ruinna aníha, attisidiba gwa rúba lo bela latini.
ROM 2:27 Laxkala nu abittu ruu lo bela latiniha, ganna gwa ruinbana nu ra lo bia bennabi‑na, nuha ukinnibana lu, lu nu Israel, meskiba gwa denlu bia bennabi‑na lhe meskiba gwa ruu lo bela latilu lhe, ttaka abígaba rudolu tisa ge nuná.
ROM 2:28 Kumu laa ukare'aga lo lia ule'e deki gwankalu nu Israel, nigaba laa de rúga lo bela latilu nna ule'e deki gwalíga ankalu ge Tata Do Yebáha.
ROM 2:29 Ko'o, sinuki ttu nu gwalíga ankana nu Israel teeki ankana nuha lhi'u. Anágaba nu ruu lo bela latiniha, labí lo bela latini aka nuha, sinuki lhi'u lhe'e lastolani aka nuha; labí de udori'i tisa ge nu ra lo ttu yetsi nna aka nuha, sinuki Espíritu ge Tata Do Yebáha‑la unie nuha. Nu ankana nuha lhi'u lhe'e lastoni, labí arlo ka benne se'e yiesi lo yu‑ni nuha iria tsena, sinuki arlo Tata Do Yebáha‑la nuha iria tsena.
ROM 3:1 Nianna, ¿bí nu tse dhi ttu benne de anke nu Israel ganna? Lhe, ¿bí nu tse dhie de ruu lo bela latie ganna?
ROM 3:2 Ixeba nu tse dhibie xa. Kumu lade'a tte, len ka benne Israel‑ni bodha'an Tata Do Yebáha ka tisa utixxi'a kwinaga labie.
ROM 3:3 Nianna, ganna ttu chupake abittu bedoke tisa ge nu reeha, ¿si de abittu bedo ka benneha tisa ge nuha, si de nuha nna abitturu uin Tata Do Yebáha nu chi rabie ke deki unie?
ROM 3:4 ¡Ko'o, labí de nuha! Kumu meskiba iyá ka benne ankake nu gwen lasi, ttaka Tata Do Yebáha labí anka benneha nu gwen lasi; gwa ruinba benneha nu chi rabie unie. Ruinbe attiba ra lo ka yetsi geeha ata dia ra: Lu ankalu benne rinnelu nu anka gwalí, de nuha nna gwadaabalu edúlu lo ka nu rinnekana gelu.
ROM 3:5 Ttaka ri'i ganna nu satsa ruinri'iha, rixúna kini rula'a deki Tata Do Yebáha anke benne runi attiba ankaba geni, ganna aníha rula'a, ¿si innári'i deki satsaba nuha runie de rugwebie ri'i elha disa? ¡Ko'o, labí! Neti nu rinnea‑ni rinnebaa na attiba rinneba adí ka benne.
ROM 3:6 Neti ria, ganna Tata Do Yebáha abíba runie attiba ankaba geni, la'ania nna labí aka ge benneha innábie gá se'e ka nu ruin satsa lhe gá se'e ka nu ruin tse lhe.
ROM 3:7 Ttaka ganna ri'i de ankari'i nu gwen lasi, ganna de ankari'i nuha nna rula'a deki Tata Do Yebáha anke benne rinnebie nu anka gwalí lhe rula'a deki ra xxeni lebie lhe, ganna aníha nna, ¿beakala sa rábakana deki ankari'i benne runi tulha?
ROM 3:8 Ganna aníha anka nna, ¿beakala a innálari'i: “Uinlari'i nu satsa kini iria ttu nu tse”? Ria aní, kumu se'e ka nu rusiakana ikitu rákana deki aní rekitu rinnetu. Ka nu rusiakana ikitu deki ratu aní, ka nuná ralhabakana dhíkana elha disa ute Tata Do Yebáha.
ROM 3:9 Nianna, ¿si innári'i deki ri'itu ka nu Israel ankatu benne ruin tserutu tti adí ka benne? ¡Ko'o, labí! Neti chiba ria deki ka nu Israel lhe ka nu abittu ankakana nu Israel lhe, iyá tteri'i ankari'i nu ruin tulha,
ROM 3:10 kumu lo ka yetsi ge Tata Do Yebáha dia ra: Niruba ttu benne do runie nu dika ixú, kwachiruba ttu benne xa.
ROM 3:11 Niruba ttu benne a rite danie ge Tata Do Yebáha, lhe anágaba niruba ttu benne do a runie egile benneha.
ROM 3:12 Betse'e loona iyábakana bekwittalakana lo neda geeha. Turo'oba benkana, iyábakana ankakana nu abittu ixú. ¡Niruba ttu benne do a runie latsiru, kwachiruba ttu benne xa!
ROM 3:13 Ttiba ttu yieru baa du yali ro'oni, aníha‑ba ankakana, abittuba raga tisa satsa ro'okani. Lhusakani gwexunniba rinnena gwen lasi tti ridí yiena ka benne. Ttiba inda dhua belha, aníha‑ba anka ka tisa riria ro'okani tti rinnekana.
ROM 3:14 Satíaba rigekana lhe rinne díkana lhe.
ROM 3:15 Gwexunniba riakana rettikana ttu benne
ROM 3:16 lhe gaxaba diakana rutse'e lookana ka benne lhe rugwekana ke elha disa lhe.
ROM 3:17 Ka nuná abittuba yúkana gasina tse'ekana latsiru len ka benne,
ROM 3:18 lhe abittugaba elha rasi gekani tee len Tata Do Yebáha lhe.
ROM 3:19 Ttaka ri'i gwa yúbari'i deki iyába nu ra lo bia bennabi bodha'an Tata Do Yebáha, ka nu rudokana tisa ge nuná, sun ka nunába rulisa nuná. Aníha kini abittu bi tee ro'okani innákana deki labí yúkana nu ra lo nuná lhe anágaba kini iyá xeaba ka benne okinni ikike deki gwalíba tee tulha geke arlo Tata Do Yebáha.
ROM 3:20 Laxkala niruba ttu benne do, de rudobie tisa ge nu ra lo bia bennabi‑na, de nuha nna gapa Tata Do Yebáha bie kwenta deki chiba anke nu abitturu yua nuje ge nu runie. Kumu bia bennabi‑na sunruba rixú nuná kini yuri'i deki ankari'i benne runi tulha.
ROM 3:21 Ttaka nnanna chi rule'en Tata Do Yebáha ri'i nu dia lo bia bennabi bodha'aneha lhe nu ra lo ka yetsi bodha'an ka profeta geeha lhe, delába rule'enie ri'i gasina runie kini ri'i abitturu yua ujari'i ge nu ruinri'i. Nnanna labíru rixúnie bia bennabi‑na kini kuabie yua kwe'eri'i.
ROM 3:22 Nnanna chi runie kini iyába ka benne, de tsiaba leke ge Jesucristuha, de nuha‑ba nna abitturu yua ujake ge nu ruinke. Kumu Tata Do Yebáha ttúba ruin benneha len iyábari'i,
ROM 3:23 kumu iyábari'i ruinri'i tulha, de nuha nna labí ralhari'i edí baari'i xiani ge Tata Do Yebáha.
ROM 3:24 Ttaka labie, de anke benne tse, de nuha nna kwentaba redá lebie runie kini abitturu yua rujari'i ge nu ruinri'i de utti Jesucristuha utixe geri'i.
ROM 3:25 Jesucristuha nuha chi ga'anani Tata Do Yebáha idhelhe kini len reni belali benneha tti uttie lo ya kurusiha, len reniha uxí Tata Do Yebáha elha xen lasi ge ka benne de ria leke ge Jesucristuha. Aníha ben Tata Do Yebáha kini bela'a deki anke benne runi attiba ankaba geni. Kumu de anke benne re besi lebie, de nuha nna gwa uxíbe elha xen lasi ge ka tulha ben ka benne ttuha.
ROM 3:26 Ttaka nnanna chi rule'enie ri'i deki lee anke benne runi attiba ankaba geni lhe anke benne runie kini abitturu yua ujari'i ge nu ruinri'i de chi ria leri'i ge Jesucristuha.
ROM 3:27 Nianna, ¿gála gwaga'ari'i elha ttaba ruinri'iha ganna? Chiba bituana xa. ¿Bí lo ni'a ge bituana ganna? ¿Si de rudori'i tisa ge nu ra lo bia bennabi‑na ak? ¡Ko'o, labí! Sinuki de ria leri'i ge Jesucristuha, de nuha nna chiba bitua elha ttabaha.
ROM 3:28 Laxkala rudhaka leri'i deki de tsiaba leri'i ge Jesucristuha, de nuha‑ba nna abitturu yua ujari'i ge nu ruinri'i; labí de udori'i tisa ge nu ra lo bia bennabi bodha'an Tata Do Yebáha nna abitturu yua ujari'i ge nu ruinri'i.
ROM 3:29 Nianna, ¿si suna Diosi ge ka nu Israel‑niba anka Tata Do Yebáha ak? ¿Laaba ganna ankagabe Diosi ge ka benne abittu ankake nu Israel? Ila, ankagalee Diosi ge ka benneha,
ROM 3:30 kumu ttúba Tata Do Yebáha do. Benneha unie kini ka nu Israel‑ni, de tsiaba lekanie, de nuha‑ba nna abitturu yua ujakana ge nu ruinkana. Anágaba ka nu abittu ankakana nu Israel, de tsiagaba lekanie, de nuha nna unie kini abitturu yua ujakana ge nu ruinkana.
ROM 3:31 Nianna, ¿si kuabari'i lidhaka bia bennabi‑na de chi ria leri'i ge Jesucristuha? ¡Ko'o, labí! Sinuki ugwerulari'i lidhakani de chi ria leri'i ge benneha.
ROM 4:1 Nianna Abraham benne uke xuttotuha, ¿bíla biselanie de ugía lebie Tata Do Yebáha ganna?
ROM 4:2 Kumu ganna ttixka Abraham‑ni bisine uke ttu benne abitturu yua nuje de ben tsebie, la'ania nna gwa teela ro'e unie ttaba ganna ttixka, ttaka arlo Tata Do Yebáha labí aka gebie unie ttaba.
ROM 4:3 Kumu lo ka yetsi ge Tata Do Yebáha dia ra: “Abraham‑ni de ugíaba leni ge Tata Do Yebáha, de nuha‑ba nna upe na kwenta deki ankana nu abitturu yua nujana ge nu ruinna.”
ROM 4:4 Ttibanka ttu nu riben sina, ridíba nuha lhiaxani ge sina ruinnaha, labí kwentaba ridína nuha. Ridíba lhiaxani kumu daba lo xxananiha kixana nuha.
ROM 4:5 Ttaka nu tsia leni Tata Do Yebáha, meskiba abittu chi benna ttu nu tse, de tsiaba leni benneha nna chiba gape na kwenta deki chiba ankana nu abitturu yua nujana ge nu ruinna.
ROM 4:6 Anágaba David‑ni unnegabana ge elha gwedeaka lasi ge ka benne, delába ka benne abitturu yua nujake de upa Tata Do Yebáha ke kwenta de ugía leke gebie, labí de benke ttu nu tse.
ROM 4:7 Aní ra David‑ni tti unnena lo yetsi ge Tata Do Yebáha: ¡Karubáru ka benne uxí Tata Do Yebáha elha xen lasi ge nu satsa ruinke, lhe boxíbie ka tulha gekeha lhe!
ROM 4:8 ¡Karubáru ka benne abittu kwenta rapa Tata Do Yebáha ge ka tulha ruinke!
ROM 4:9 Nianna, ¿si suna ka nu Israel‑niba, delába ka nu ruu lo bela latikani, si suna ka nuha‑ba gwa tee elha gwedeaka lasi gekani ak? ¿Anágaba ka nu abittu ruu lo bela latikani ak? Kumu ttiba rari'i, Abraham‑ni, de ugíaba leni Tata Do Yebáha, de nuha‑ba nna upe na kwenta deki abitturu yua nujana ge nu ruinna.
ROM 4:10 Nianna, ¿nuka upe na kwenta deki abitturu yua nujana ge nu ruinnaha? ¿Si atti abittu chi ruu lo bela latiniha ak? O, ¿atti chi anka nuha latini ak? Ko'o, labí upe na kwenta tti chi ruu lo bela latiniha, sinuki attili lani aka nuha latini, la'aniali chi upe na kwenta deki abitturu yua nujana ge nu ruinna.
ROM 4:11 Iki de nuha‑liba nna tti urú lo bela latini, nuha ukana ttu seña beya'ana latini kini nuha runna liina deki labíru yua nujana ge nu ruinna de ugía leni ge Tata Do Yebáha. Aníoka nna bisinna ukana xxudi iyá ka nu ria lekani ge Tata Do Yebáha, meskiba abittu ruu lo bela latikani. Aníha kini Tata Do Yebáha reyoinbiagabe kana deki chi ankakana ka nu abitturu yua nujakana ge nu ruinkana.
ROM 4:12 Ttaka Abraham‑ni ankagabana xxudi ka benne ruu lo bela latike. Laa ankagana xxudike de ruu lo bela latike, sinuki de riagaba leke Tata Do Yebáha attigaba ugía le Abraham‑ni atti lanila chu lo bela latiniha.
ROM 4:13 Kumu Abraham‑ni laa de bedogana tisa ge nu ra lo bia bennabi bodha'an Tata Do Yebáha len Moisés‑ni, laa de nuha‑ga nna ra Tata Do Yebáha na: “Lu lhe ka benne datialu‑na lhe, len lebi'i utea yiesi lo yu‑ni.” ¡Ko'o! Sinuki rabie na aníha kumu de ugía leni gebie, de nuha nna benie kini abitturu yua ujana ge nu ruinna.
ROM 4:14 Kumu ganna sunruba ka nu rudokana tisa ge bia bennabi‑na gwa ralhakana dhíkana nu chi ra Tata Do Yebáha utebie, la'ania nna kwentaruba nuha ria leri'i benneha ganna ttixka, lhe anágaba nna abígaba ixú nu chi rabie Abraham‑ni ganna ttixka.
ROM 4:15 Kumu bia bennabi‑na, tti abíba rudori'i tisa geni, la'ania nna nuná runi kini rugwe Tata Do Yebáha ri'i elha disa. Ttaka ata abí bia bennabi‑na tee, labí tee ttu bixa nu ukinnina ri'i de a rudori'i tisa geni.
ROM 4:16 Laxkala de tsiaba le ka benne ge Tata Do Yebáha, de nuha‑ba nna gutebe nu chi rabie deki utebie. Aníha kini ule'e deki kwentaba edá lebie utebie nu chi reeha, lhe anágaba kini gwalíga aka nu chi rabie utebie ge iyá tte ka benne datiake Abraham‑ni. Aníha kini abittu aka nuha suna ge ka nu chi tee bia bennabi‑na gekani, sinuki ixúgabana ge adíru ka nu chi ria lekani attigaba ugía le Abraham‑ni, delába benne anke xxudi iyá tteri'i.
ROM 4:17 Anke xxudiri'i attiba chi dia lo ka yetsi ge Tata Do Yebáha ata rabie Abraham‑ni: “Neti chi bedúa lu kini akalu xxudi ixe ka benne se'e itúba yiesi lo yu‑ni.” De nuha nna Abraham‑ni ankana xxudiri'i arlo Tata Do Yebáha. Ge Tata Do Yebáha nuha ugía leni. Labie nuha runie kini reyaka ben ka benne chi uttiha lhe anágaba labie nuha runie kini raka ka nu abittu chi se'e lhe.
ROM 4:18 Lagabe nuha ree Abraham‑ni isia ttu xi'inni, meskiba la'ania labíru elha xen lasi tee deki gwakaru xi'inni. Ttaka lana gwa ugíaba leni ge nu rebie naha. Aníoka nna ukana xxudi ixe ka benne se'e itúba yiesi lo yu‑ni. Ukaba attiba chi ra Tata Do Yebáha, tti ree na: “Lu akalu xxudi ixe ka benne.”
ROM 4:19 Abraham‑ni nna labí bedí lirena, gwa ugíaba leni, meskiba yuna deki labíru gwakana aka xi'inni kumu la'ania chiba ankinna ttiba ttu gayua ida (100). Anágaba benne nuila geni Sara‑ni, labí aka uja xi'in benneha.
ROM 4:20 Abittugaba bedú chupana le Abraham‑ni a tsia leni ge nu chi ra Tata Do Yebáha na; sinuki ugía tsitsila leni. Aníha benna kini uná xxeni le Tata Do Yebáha.
ROM 4:21 Lana chiba yu xeabana deki Tata Do Yebáha, xxeniba ra le benneha nna gwadaabe unie nu chi rabie naha.
ROM 4:22 De nuha nna upe na kwenta deki gwa ankabana benne abitturu yua nujana ge nu ruinna.
ROM 4:23 Lo ka yetsi ge Tata Do Yebáha dia ra: “Upe na kwenta deki abitturu yua nujana ge nu ruinna.” Tti ree aníha, laa suna ge Abraham‑niruga ixú nu reeha.
ROM 4:24 Sinuki ixúgabana geri'i, ri'i ka nu gapa Tata Do Yebáha ri'i kwenta deki abitturu yua nujari'i ge nu ruinri'i de chi ria leri'e. Labie belhidhe Jesús benne anke Xxanari'iha lo elhuttiha.
ROM 4:25 Lagabe nuha betebie benneha kini uttie utixe ge ka tulha geri'i lhe belhidhagabe benneha lo elhuttiha lhe. Aníha kini ri'i abitturu yua ujari'i ge nu ruinri'i.
ROM 5:1 Laxkala nnanna chi ben Tata Do Yebáha kini abitturu yua ujari'i ge nu ruinri'i kumu de chi ria leri'e. De nuha nna chi se'e tseri'i lenie de nu gwate Jesucristu benne anke Xxanari'iha.
ROM 5:2 De Jesucristuha‑gaba nna chi yali lo neda geri'i kini de ria leri'e nna edí baari'i nu tse redá le Tata Do Yebáha rutebie geri'i, delába nu tse chi redí baari'i nnanna lhe anágaba nna redú ittagaba leri'i de ribedari'i dhiri'i nu xxeni ra leeha.
ROM 5:3 Laa suna ge nuníruga redú itta leri'i, anágaba redú ittagaba leri'i tti ruyúri'i ttu bixa elha disa, kumu gwa yúbari'i deki elha disa ruyúri'iha, nuha uni kini kweki tsitsiru leri'i,
ROM 5:4 nna ganna chi ure tsitsi leri'i, nuha uni kini iria tseri'i arlo Tata Do Yebáha, nna iki de chi biria tseri'i arlobie, la'ania nna chi uxxenru leri'i gebie,
ROM 5:5 nna ganna chi bexxenru leri'i gebie, nuha uni kini abittu udú chupana leri'i, kumu Espíritu ge Tata Do Yebáha benne betebie len ri'iha, benneha nuha rute tame elha si'i lasi ge Tata Do Yebáha lhe'e lastori'i.
ROM 5:6 Kumu ri'i, atti sa ankari'i benne abittu gwakari'i uinri'i ttu bixa kini lhaari'i, la'ania nuha bisia Cristuha uttie ki utixe geri'i, delába ri'i ka nu runi satsa.
ROM 5:7 Kumu lanú ttu benne do kwenta eria lebie gattie kwenta ge attu benne ruin tse, laaruba ganna ttixka do ttu benne gwalíga ruin tse xxatte, la'aniaruba nna gaxa gweyaxani ttu benne gattie kwenta ge benneha.
ROM 5:8 Ttaka Tata Do Yebáha bele'ebie elha si'i lasi geeha lenri'i, kumu atti sa ankari'i benne ruinri'i tulhaha, la'ania nuha utti Cristuha utixe geri'i.
ROM 5:9 Nnanna xenrula leri'i deki godilábe ri'i lo elha disa ute Tata Do Yebáha, kumu de labíru yua nujari'i ge nu ruinri'i de chi utti Cristuha belalie reni geeha kwenta geri'i.
ROM 5:10 Kumu, ki attila abittu raka uyúri'i Tata Do Yebáha, la'aniala nuha bese'e tseri'i lenie de utti Xi'inieha utixe geri'i, adírula nnanna, de chi se'e tseri'i lenie, godilábe ri'i de chi beyaka ben Xi'inieha lo elhuttiha.
ROM 5:11 Laa sunruga odilábie ri'i, anágaba nna redú ittagaba leri'i ge Tata Do Yebáha de nu ben Jesucristu benne anke Xxanari'iha. De benneha nna chiba bese'e tseri'i len Tata Do Yebáha nnanna.
ROM 5:12 Laxkala tulha raka yiesi lo yu‑ni, ttúba benne benie nuní sisi'a tteha. De nuha nna udulona rakana yiesi lo yu‑ni. De lo ni'a ge tulha ben benneha, de nuha nna udulo elhutti ge ka benne yiesi lo yu‑ni. Aníoka nna iyába ka benne rattike kumu iyábake ruinke tulha.
ROM 5:13 Attili lani isia bia bennabi bodha'an Tata Do Yebáha len Moisés‑ni, la'ania tulha‑na chiba raka nuná yiesi lo yu‑ni, ttaka labí rapa Tata Do Yebáha kwenta deki ankana tulha kumu labí bia bennabi chi tee la'ania ata kixxi'a deki satsaba nuha anka nu ruin ka benne.
ROM 5:14 Ttaka laa kiga de nuha nna ka benne use'e atti udo Adán‑ni axtaba atti bisia Moisés‑ni, teeki uttike kumu de benke tulha. Meskiba tulha benkeha, labí uka nuha tti anka tulha nu ben Adán‑ni, kumu lana ulu'u ni'ani nu chi ra Tata Do Yebáha na. Adán‑ni ukana attiba lixxína benne chi ga'anna isiaha, delába Cristuha.
ROM 5:15 Ttaka tulha ben Adán‑ni labí raxxína nuha len nu tse bedá le Tata Do Yebáha betebie kwentaba ge ka benne. Kumu delo ni'a ge tulha ben ttúba benne, de nuha nna ixeba ka benne rattike, ttaka Tata Do Yebáha adírula tse anka nu bedá lebie benie kumu de ttúba Jesucristuha beria iki beria lebie uttie kini utixe ge ixe ka benne.
ROM 5:16 Anágaba nna abittugaba raxxína nu satsa ben Adán‑ni len nu tse bedá le Tata Do Yebába betebie len ka benne. Kumu delo ni'a ge ttúba tulha ben Adán‑ni nna bibixxi biginni ka benne, ttaka Tata Do Yebáha, ge ixeba ka tulha gwa bedába lebie utuabie yua kwe'e ka benne ge nu ruinke.
ROM 5:17 Kumu, ki ganna delo ni'a ge tulha ben ttúba benne, ganna de nuha nna udulo ratti ka benne se'e yiesi lo yu‑ni, anágaba nna de nu gwate attu benne, delába Jesucristuha, de nu gwate benneha nna adírula elha xen lasi tee deki gwaka ben ka benne arlo Tata Do Yebáha, delába ka benne redá lebie ugwe tame ke nu tse, lhe kwentaba unie kini akake ka benne abitturu yua ujake ge nu ruinke lhe.
ROM 5:18 Laxkala de ttúba benne binittie, de nuha nna bibixxi biginni iyába ka benne. Anágaba nna de nu tse ben attu benne, nu tse benieha bixúna kini iyába ka benne beyakake ka nu abitturu yua nujake ge nu ruinke lhe anágaba kini aka benke ttu dia lii.
ROM 5:19 Kumu anágaba de ttúba benne, de abittu bedobie tisa ge Tata Do Yebáha, de nuha nna ixeba ka benne ankake ka nu ruin tulha. Anágaba nna de attu benne gwa bedoe tisa ge Tata Do Yebáha, de nuha nna ixegaba ka benne beyakake ka nu abitturu yua nujake ge nu ruinke.
ROM 5:20 Bia bennabi nu bodha'an Tata Do Yebáha len Moisés‑ni, nuha beni kini benruri'i tulha, ttaka atti chi ugwaniru tulha ruinri'iha, la'ania nna adírula bedá le Tata Do Yebáha gwatua lebie ri'i ge nu ruinri'iha.
ROM 5:21 Aníha benie kini attiba ben tulhaha biri'aba lenna utilana elhutti geri'i yiesi lo yu‑ni, aníha‑gaba Tata Do Yebáha bedárugaba lebie benie kini abitturu yua ujari'i ge nu ruinri'i. Aníha kini tse'eri'i aka benri'i ttu dia lii de nu tse ben Jesucristu benne anke Xxanari'iha.
ROM 6:1 Nianna, ¿bíla anka nu innári'i ganna? ¿Sila diarubari'i ruinri'i tulha kini Tata Do Yebáha edáru lebie satua lebie ri'i?
ROM 6:2 ¡Ko'o, labí! Kumu ri'i, chiba ankari'i attiba ttu nu yatti, attisidiba lanúruri'i se'e kini uinri'i tulha. Ganna aníha nna, ¿galasina sa tse'eruri'i uinri'i tulha ganna?
ROM 6:3 Lebi'i gwa yu xeabale, iyábari'i ka nu chi udiri'i inda de babari'i Jesucristuha, attisidiba chiba selari'i benneha tti uttieha.
ROM 6:4 Kumu tti udiri'i indaha, attisidiba uttibari'i nna bigatsigabari'i turo'o lenbie, kini anáchu Xxudiri'i do yebáha, benne ra xxeni leeha, anába attiba benie belhidhe Cristuha lo elhuttiha, anágaba unie lenri'i, kini tse'eri'i eyakari'i attiba ttu benne kubi, abitturu uinri'i nu benri'i itú ttuha.
ROM 6:5 Kumu ganna ri'i biselari'i len Cristuha atti uttieha, anágaba nna selagabari'e atti beyaka benbieha.
ROM 6:6 Ri'i gwa yúbari'i deki nu ankari'i ttuha, attisidiba utába nuha lenie lo ya kurusiha. Aníha kini itua nu reta le latiri'i‑ni ruinna, kini abitturu tse'eri'i uinri'i nu innaba tulha‑na.
ROM 6:7 Kumu ttu nu chi uttina len Cristuha, chiba ulaa nuha lo ná tulha‑na, attisidiba lanúruna do kini uinna nu reta le latini.
ROM 6:8 Laxkala ganna ri'i chi uttiri'i len Cristuha, anágaba nna tegaba ki uxxen leri'i deki gwaka bengabari'i lenie.
ROM 6:9 Ri'i gwa yúbari'i deki Cristuha beyadhe lo elhuttiha nna labíru gatti benneha attu libe, kumu elhuttiha labíru dhaa nuha uttine attu libe.
ROM 6:10 Kumu tti uttieha, suna ttu libeba uttie kini utixe ge tulha raka yiesi lo yu‑ni. Nnanna do benbie nna chi doe kini ixúe ge Tata Do Yebáha.
ROM 6:11 Anágaba lebi'i, gwaluin attisidiba lanúrule se'e kini abitturu uinle tulha, gwaluin attisidiba chiba uttile ge tulha‑na. Ttaka len Tata Do Yebáha, gwaluinla deki gwanka benbale kini anáchu ixúle gebie de chi babale len Jesucristuha.
ROM 6:12 Laxkala lebi'i, abitturu ugwelhale innabia tulha‑na latile, delába latiri'i nu rise'e loona yiesi lo yu‑ni, abitturu uinle nu raka leni.
ROM 6:13 Abitturu ixuinle latile‑na kini uinle nu satsa. Nu uinlale, gwalutso dula arlo Tata Do Yebáha atti galába ttu benne chi beyaka benbie lo elhuttiha lhe anágaba gwalute itú tte nu ankale lenbie kini ixúle uinle nu dika ixú.
ROM 6:14 Kumu tulha‑na labíru dhaa nuná innabiana le kini uinle nu rakaba leni, kumu labíru xigale lo bia bennabi bodha'an Moisés‑ni, nnanna lebi'i chi se'e lhaale redí baale nu tse redá le Tata Do Yebáha rutebie gele.
ROM 6:15 Gwalinnáruga, nnanna labíru xigari'i lo bia bennabi‑na, sinuki chi se'e lhaari'i redí baari'i nu tse redá le Tata Do Yebáha rutebie geri'i. ¿Si de nuha nna gwaka geri'i uinruri'i tulha ak? ¡Ko'o, labí!
ROM 6:16 ¿Si lagwa gwa yule ttixka satta'ale lo ttu xxanale kini uinle nu innána, laaba ganna reyakabale nu to'ole lo sina ge nuha kumu de ruinle nu rana? Aníha‑ba nuná lebi'i ganna uinle nu inná nu satsa‑na, la'ania nna elhutti gebale kilale ganna uinle na, nna ganna uinle nu ra Tata Do Yebáha, la'ania nna gwinbale nu dika ixú.
ROM 6:17 Ttaka ixkixaru Tata Do Yebáha, kumu meskiba ttuha benbale nu unába tulha‑na, ttaka nnanna itú iki itú lele chi ruinle nu ra ka tisa chi bela'akanie le ge Cristuha.
ROM 6:18 Nnanna chiba beriale lo ná tulha‑na, labíru rinnabiana le; nnanna chi daa lole uinle nu dika ixú.
ROM 6:19 Ria aní, kumu lebi'i de labí rite da tsenle ge nu rinnea‑ni, de nuha nna rudettia ka benne to'oke lo sina kini anáchu tte denle nu rigixxi'aya‑ni. Laxkala, lebi'i attiba ttuha bixúle benle nu satsa lhe iyá looba nu abittu dika ixú lhe, anágaba nnanna gwalute itú tte nu ankale len Tata Do Yebáha kini ixúle uinle nu dika ixú, kini anáchu iriesile akale gebie.
ROM 6:20 Kumu lebi'i itú ttuha tti benle nu raba tulha‑na, la'ania labí teeki daa lole uinle nu dika ixú.
ROM 6:21 Ttaka, ¿bíla nu tse uxíle ge nu satsa benleha ganna, delába ge nu satsa rettuinle geni nnanna? ¿Laaba ganna nu satsa benleha sunruba elhutti gele utila nuha arlo Tata Do Yebáha?
ROM 6:22 Ttaka nnanna de chi bebea Tata Do Yebáha le lo tulha‑na, lhe de chi ankale ka nu rixúle lo sina gebie lhe, de nuha nna chi ulesie le kini akale gebie lhe aka benle ttu dia lii arloe lhe.
ROM 6:23 Kumu tulha ruinri'i‑na, elhuttiba rigila nuná geri'i. Ttaka Tata Do Yebáha runie kini aka ben ri'i ttu dia lii arloe de chi babari'i len Jesucristu benne anke Xxanari'iha. Nuní nu tse redá lebie kwentaba rutebie geri'i.
ROM 7:1 Xa betsi to, rulisaa le atti galába rulisaa ka benne chi yuke nu ra lo bia bennabi bodha'an Tata Do Yebáha len Moisés‑ni. Lebi'i gwa yúbale, sunruba atti sa se'e benri'i yiesi lo yu‑ni, gwa daa bia bennabi‑na innabiana ri'i.
ROM 7:2 Kumu ttibanka ttu nuila do lenna nubiyú, laka sa do ben nubiyú geniha, bia bennabi‑na ruxxigabana na len nubiyú geniha. Ttaka ganna chi utti nubiyúha, la'anialigaba nna labíru xiga nuilaha len nubiyúha.
ROM 7:3 Laxkala laka sa do ben nubiyúha, ganna nuilaha otsá náni len attu nubiyú subi, la'ania nna satsaba nuha chi uin nuilaha. Ttaka ganna chi utti nubiyú geniha, la'anialigaba nna chiba ulána lo bia bennabi‑na, labíru xigana len nubiyúha. Laxkala ganna otsá náni len attu nubiyú subi, labí satsa nuha uinna.
ROM 7:4 Anágaba lebi'i xa betsi to kia, de chi utti Cristuha utixe gele, de nuha nna labíru ankale ge bia bennabi‑na, kumu attisidiba chiba uttile geni. Aníha kini isinle akale ge attu benne, delába ge Cristu benne beyaka benbie lo elhuttiha, lhe aníha kini lebi'i tse'ele ixúle ge Tata Do Yebáha uinle nu tse.
ROM 7:5 Kumu ri'i ttuha, atti sa ruinbari'i nu satsa retaba le latiri'i ruinna, la'ania bia bennabi‑na benbana kini udá chiettiru leri'i benri'i nu satsa. De nuha nna utilana elhutti geri'i.
ROM 7:6 Ttaka nnanna chiba ulári'i lo bia bennabi‑na, labíru tse'eri'i uinri'i nu innána kumu attisidiba chiba uttiri'i geni. Aníha kini nnanna tse'eri'i ixúri'i ge Tata Do Yebáha. Tse'eri'i lo neda kubi, uinri'i nu inná Espíritu geeha, labíru tse'eri'i lo neda yaxxu ata rinnabia bia bennabi‑na.
ROM 7:7 Nianna, ¿bíla anka nu innári'i ganna? ¿Si innábari'i deki satsaba anka nu dia lo bia bennabi bodha'an Tata Do Yebáha len Moisés‑ni? ¡Ko'o, labí! ¡Labí satsa anka nu dia lo nuná! Ttaka neti labí ute dati deki tulhaba anka nu runiaha ganna ttixka abíba utixxi'ani bia bennabi‑na neti. Ttibanka, labí yua deki tulhaba nuha ganna dha leri'i nu tee ge attu benne subi, ganna ttixka abíba ra bia bennabi‑na neti: “Bittu dha lelu nu tee ge attu benne subi.”
ROM 7:8 Ttaka nu satsa runiaha, tti biyúna deki rusunaba bia bennabi‑na abitturu unia nu satsaha, la'aniala benna kini udá chiettiru lasia benia iyá looba nu satsa. Kumu ganna ttixka abíba bia bennabi‑na tee, la'ania nna nu ruinri'iha labí satsa anka nuha, delába labí tulha anka nu ruinri'iha ganna ttixka.
ROM 7:9 Neti itú ttuha sun tteba aná udoa, labí unnabia bia bennabi‑na neti la'ania, ttaka atti chi ute dati nu ra loni, nuha beni ki udá chiettiru lasia benia tulha. Tulha beniaha, attisidiba bettibana neti.
ROM 7:10 Aníoka nna ute dati deki bia bennabi nu dika uinna ki aka bania arlo Tata Do Yebáha, betse'e loona utilala nuná elhutti kia.
ROM 7:11 Kumu nu satsa runiaha, tti biyúna nu ra bia bennabi‑na, la'aniala uxí yiena neti kini benrua tulha. De nuha nna nu satsaha bixuinna bia bennabi‑na kini bettina neti.
ROM 7:12 Laxkala bia bennabi‑na, ge Tata Do Yebáha‑ba anka nuná lhe anágaba ka tisa dia loni lhe. Ankabake nu dika ixú lhe nu tse lhe.
ROM 7:13 Nianna, ¿si innári'i deki nu anka tseha bixúlana kini utilana elhutti kia? ¡Ko'o, labí! Sinuki nu satsa runiaha‑la nuha utilana elhutti kia. Benna kini bele'e deki ankana tulha. De nuha nna bixuinna nu anka tseha, delába bixuinna bia bennabiha, kini len nuha bettina neti. Aníoka nna nu ra lo bia bennabiha, nuha bele'ena deki yalhá satsa anka tulha daa yiesi lo yu‑ni.
ROM 7:14 Gwa yúbari'i deki bia bennabi‑na, ge Tata Do Yebáha‑ba anka nuná, ttaka neti, ge yiesi lo yu‑niba ankaa. Ankabaa nu runi tulha; ttiba nu to'o lo tulha, aníha‑ba ankaa.
ROM 7:15 Neti bittuba rite dati biunni ratea, kumu labí runia nu raka lasia, rutse'e loona nu abittu ru'u lasia unia, nuha‑la runia.
ROM 7:16 Kumu de labí ru'u lasia nu runiaha, de nuha nna rokinni ikia deki tseba anka bia bennabi ge Tata Do Yebáha.
ROM 7:17 De nuha nna laa netiga nuní runia nu satsa; sinuki nu reta lasia‑niba nuní rusigana neti kini runia nu satsa.
ROM 7:18 Kumu yubaa deki labí bixa nu tse yu'u lhe'e lastoa, sunruba nu satsa reta lasia runia, sunruba nuha yu'u lhe'e lastoa, kumu kaga a re lasia unia latsitoru, ttaka labí ridaaya.
ROM 7:19 Kumu labí runia nu tse ru'u lasia, sinuki nu satsa abittu ru'u lasiaha‑la, nuha‑la runia.
ROM 7:20 Ganna runia nu abittu ru'u lasia, la'ania nna laa netiga nuha runia aníha; sinuki nu satsa reta lasiaha‑ba nuha rusigana neti kini runia aníha.
ROM 7:21 Laxkala nnanna chi rite dati deki tti raka lasia unia latsiru, la'ania nna nu satsa‑ni du ttebana kini runnittina neti.
ROM 7:22 Neti lhi'u lhe'e lastoa gwa ru'uba lasia bia bennabi ge Tata Do Yebáha.
ROM 7:23 Ttaka nianna tti rite dati deki bela latia‑ni attu nu subila rinnabiana na; delába rinnabia nu satsaha na kini runia attu nu subi, kumu nu satsaha labí ridielhana unia nu tse rulaba lasia, kumu tsitsiba denna neti kini runia tulha, ttiba ttu nu tee lisiyya, aníha‑ba ankaa.
ROM 7:24 ¡Gwalíchiru neti! ¿Núla odilána neti lo nu satsa reta le bela latia‑ni ruinna, delába nu rigilana elhutti kia arlo Tata Do Yebáha?
ROM 7:25 Ixkixaru Tata Do Yebáha, kumu de nu ben Jesucristu benne anke Xxanari'iha, de nuha nna godilábe neti. Laxkala neti kaga a raka lasia unia nu ra lo bia bennabi ge Tata Do Yebáha, ttaka bela latia‑ni nna nu ra nu satsaha‑la ruinna.
ROM 8:1 Laxkala nnanna labíru urixxi ukinni Tata Do Yebáha ka benne chi babake len Jesucristuha, delába ka benne abitturu ruinke nu satsa retaba leke, sinuki se'eke ruinke nu ru'u le Espíritu ge Tata Do Yebáha.
ROM 8:2 Kumu Espíritu benne runie kini raka benri'i arlo Tata Do Yebáha de babari'i len Jesucristuha, benneha chi bodilábie neti lo tulha‑na lhe lo elhuttiha lhe, ka nuní labíru rinnabiakana neti.
ROM 8:3 Kumu Tata Do Yebáha benie nu labí udaa bia bennabi‑na uinna. Kumu de ri'i ankari'i benne runi tulha, de nuha nna labí udári'i udori'i tisa ge bia bennabi‑na. Ttaka Tata Do Yebáha udhelhe Xi'inieha. Benneha bisiabie uke benne attiba ankari'i. Laxkala delo ni'a ge ka tulha geri'iha nna utti benneha utixe geri'i kini anáchu nna de benneha nna betse'e lo Tata Do Yebáha nu tsitsi ra le tulhaha.
ROM 8:4 Aníha benie kini ri'i ridaari'i ruinri'i nu tse ra lo bia bennabi‑na, kumu labíru ruinri'i nu satsa reta leri'i ruinri'i, sinuki ruinlari'i nu ra Espírituha.
ROM 8:5 Kumu ka nu ruinkana nu retaba lekani, ka nuná suna ge nu satsaba do ikikani; ttaka ka benne ruinke nu ra Espíritu ge Tata Do Yebáha, suna nu anka ge Espírituha‑ba do ikike.
ROM 8:6 Kumu ganna suna ge nu satsaba do ikiri'i, la'ania nna elhuttiba isela geri'i arlo Tata Do Yebáha; ttaka ganna do ikiri'i nu ra Espíritu geeha, la'ania nna gwaka benbari'i arlo Tata Do Yebáha ttu dia lii, lhe anágaba nna gwase'egabari'i xen su lasi lhe.
ROM 8:7 Kumu ka nu ruinkana nu satsa retaba lekani, labí se'e tsekana len Tata Do Yebáha, kumu labí ruinkana nu ra lo bia bennabi geeha, nigaba a dhaakana uinkana nu ra loni.
ROM 8:8 Laxkala ka nu ruinkana nu satsa retaba lekani, ka nuná labí aka gekani uinkana nu ru'u le Tata Do Yebáha.
ROM 8:9 Ttaka lebi'i labí ruinle nu satsa retaba lele. Lebi'i ruinlale nu ra Espíritu ge Tata Do Yebáha, kumu de do benneha lhe'e lastole, nna nu abittu do Espíritu ge Cristuha lhe'e lastoni, nuha labí ankana ge Cristuha.
ROM 8:10 Ttaka ganna gwa doba Cristuha lhe'e lastole, la'ania nna meskiba bela latile‑na gattina delo ni'a ge ka tulha ruinle‑na, ttaka espíritu gele‑na gwaka benba benne‑na, kumu de Tata Do Yebáha chi benie kini abitturu yua ujale ge nu ruinle.
ROM 8:11 Kumu ganna Espíritu ge Tata Do Yebaa benne belhidha benbie Jesús‑ni lo elhuttiha, ganna benneha doe lhe'e lastole, la'ania nna benne belhidha benbie Jesucristuha lo elhuttiha, benneha‑gaba nuha utebie elha nabani ge latile‑na, delába latile nu rattina yiesi lo yu‑ni. Aníha unie kumu de do Espíritu geeha lhe'e lastole.
ROM 8:12 Laxkala xa betsi to, ri'i daa lori'i uinri'i latsiru, labí daa lori'i uinri'i nu satsa retaba leri'i.
ROM 8:13 Kumu ganna lebi'i ruinbale nu satsa retaba lele, la'ania nna tsia nnittibale arlo Tata Do Yebáha; ttaka ganna lebi'i gwa rixúbinle Espíritu ge Tata Do Yebáha kini rudhanle abitturu ruinle nu satsa ruinle‑na, la'anialigaba nna gwaka benbale arlobie.
ROM 8:14 Kumu iyába ka benne ata gwa ruinbake nu ra Espírituha, ka benneha nuha gwankake xi'in Tata Do Yebáha.
ROM 8:15 Kumu Espíritu bete Tata Do Yebáha gele, benneha labí uxílee kini oga'abie le lo elha rasi‑na attu libe, sinuki uxílale benneha kini akale xi'in Tata Do Yebáha, kumu de Espírituha nna rinneri'i rulisari'i Tata Do Yebáha, rari'e: “¡Tatoo!”
ROM 8:16 La kwinaba Espírituha rigixxi'anie ri'i ree deki ri'i ankari'i xi'in Tata Do Yebáha.
ROM 8:17 Kumu de chi ankari'i xi'inie, de nuha nna ralhagabari'i dhiri'i nu tse utebie. Itupa lenri'i Cristuha dhiri'i nu tseha kumu de rateri'i ttiba gwate benneha. Aníha kini itupa lenri'i benneha inná xxeni leri'i.
ROM 8:18 Neti rudhaka lasia deki nu rateri'i nnanna, latti toba nuní ganna utsenri'i na len nu tse ute Tata Do Yebáha geri'i nu si daa.
ROM 8:19 Kumu iyá tte ka nu benie se'e yiesi lo yu‑ni ubedaba chi se'ekana kumu ladeakakana ule'eni Tata Do Yebáha kana ka benne chi ankake xi'inie.
ROM 8:20 Kumu iyába ka nu benie yiesi lo yu‑ni chiba binitti nu tse ankakana. Labí ka nu benie yiesi lo yu‑ni uka lekani binittikana, sinuki Tata Do Yebáha‑ba uka lebie kini binittikana. Ttaka gwa téruba elha xen lasi
ROM 8:21 deki godilábe kana lo nu runnittina kanaha kini anáchu nna edí baakana nu tse tee ge ka benne chi ankake xi'inie.
ROM 8:22 Kumu gwa yúbari'i axtaba nnanna iyába ka nu ben Tata Do Yebáha se'e yiesi lo yu‑ni, turo'oba ribesi gwekana tti ruyúkana elha disa. Ratebakana atti tteba rate ttu nuila tti retti lhe'eni gali xi'inni.
ROM 8:23 Anágaba nna laa suna ka nu benie yiesi lo yu‑niga ribesi gwekana, anágaba ri'i ka nu chi uxí gaari'i Espíritu ge Tata Do Yebáha, ribesigaba lhi'u leri'i, kumu de se'eri'i ribedari'i ganna chi isia sá edí Tata Do Yebáha ri'i kini akari'i xi'inie. La'ania odilábie bela latiri'i‑ni kini abittu tse'e loona.
ROM 8:24 Kumu ri'i de ruxxen leri'i ge Tata Do Yebáha, de nuha nna bodilábie ri'i. Ttaka ganna chiba uxíri'i nu se'eri'i ribedari'iha, la'ania nna labíru teeki tse'eri'i kwedari'i nuha.
ROM 8:25 Ttaka ganna sa se'ebari'i ribedari'i nu abittu chi uxíri'iha, la'ania nna kweda besibari'i kini dhiri'i na.
ROM 8:26 Anágaba Espíritu ge Tata Do Yebáha akagaba lenie ri'i tti abittu gwakari'i innabari'i len Tata Do Yebáha kumu de labí yuri'i innabari'i attiba ankaba geni. Ttaka kwinaba Espírituha rinnabe geri'i. Tti rinnabe geri'i nna lhi'u lebe ribesi gwebie.
ROM 8:27 Tata Do Yebáha yu xea benneha gasina anka lhe'e lasto ka benne chi ankake gebie. De nuha nna gwa rite dábanie bixa nuha raka le Espírituha, kumu Espírituha rinnababe ge ka benne chi ankake ge Tata Do Yebáha attiba raka lebie.
ROM 8:28 Anágaba nna gwa yúgabari'i deki Tata Do Yebáha, bixaba sate ka benne rakakanie gebie, labie nna gwinbe kini saría tsena ke, delába ka benne chi uxie lo neda geeha ttiba chi ga'ananie aka.
ROM 8:29 Kumu ttuha‑li chi yubie deki tse'e ka benne akake gebie, ka benneha‑gaba nuha chi bedha'ane kini akake tti anka Xi'inieha, kini anáchu Xi'inieha ake nu loni ge ixe ka betsi to geri'i.
ROM 8:30 Anágaba nna ka benne chi bedha'ane kini akake xi'inie, la ka benneha‑gaba nuha uxie lo neda geeha nna ka benne chi uxie lo neda geeha, la ka benneha‑gaba nuha benie kini akake ka nu abitturu yua ujake ge nu ruinke nna ka benne benie kini abitturu yua ujake ge nu ruinkeha, la ka benneha‑gaba nuha benie kini inná xxeni leke.
ROM 8:31 Nianna, ¿bíla anka nu innári'i ganna? Ganna Tata Do Yebáha gwa dube lenri'i, la'ania nna lanú nu dhaana bixa udhakana ri'i.
ROM 8:32 Benneha labí a beria lebie utebie kwinaga Xi'inieha, sinuki betelee benneha kini uttie utixe ge iyári'i. Gwalinnáruga, ganna aníha benie, ¿laaba ganna, itupa len Xi'inieha, gutegabe iyá tte nu tee gebie len ri'i?
ROM 8:33 La'ania nna ka benne chi bekwebie kini akake gebie, lanú nu usiana iki ka benneha gana ke: “Nuní nu satsa chi benle”, kumu ki kwinaba labie nuha runie kini abitturu yua ujari'i ge nu satsa ruinri'i.
ROM 8:34 Nianna, ¿núla eyaxinna urixxi ukinnina ka benneha ganna? ¿Si Jesucristuha ak? ¡Ko'o, labí! Ki kwinala Jesucristuha uttie kini utixe ge ka benneha lhe anágaba beyaka bengabe lo elhuttiha lhe. Nnanna nna chi doe daka ná ben ge Tata Do Yebáha nna rinnabe geri'i len benneha.
ROM 8:35 Anágaba nna lanú nu dhaana usunana kini abittu akin Cristuha geri'i. Meskiba sateri'i uyúri'i ttu bixa elha disa o tti udúna ri'i ge ttu bixa o lhe tti etenalhakana udhaka disakana ri'i o tti iyasa nu gori'i lhe xori'i lhe o tti uxunnina geri'i bixa sateri'i o tti uinkana uttikana ri'i. Meskiba sateri'i iyá nuní, Cristuha labí udhane abittu akanie geri'i.
ROM 8:36 Akaba tti tteba ra lo ka yetsi ge Tata Do Yebáha ata dia ra: De lu nna ttu ttu sába ruxunnina getu gattitu. Ttiba ttu neru chi ga'anna gattina, aníha‑ba ruinkana uttikana ri'itu.
ROM 8:37 Ttaka de Jesucristu benne rakanie geri'iha, de benneha nna lo iyába nu rateri'i, gwa ridaabari'i loni.
ROM 8:38 Kumu neti yu xeabaa, lanú nu dhaana usunana kini abittu akin Tata Do Yebáha geri'i, meskiba ganna gattiri'i lhe meskiba ganna aka benri'i lhe, nigaba ka anjeliha lhe nigaba ka espíritu ka nu rinnabiaha lhe ka nu ra tsitsi lekaniha lhe, labí dhaa ka nuha usunakana. Nigaba nu rateri'i nnanna lhe nigaba nu sateri'i nu si daa lhe.
ROM 8:39 Nigaba gwetsá lhe nigaba lhi'u yuha lhe nigaba attu bixaru nu se'e ben Tata Do Yebáha, ni ttú ka nuní labí dhaakana usunakana kini abittu akin Tata Do Yebáha geri'i de nu gwate Jesucristu benne anke Xxanari'iha.
ROM 9:1 Neti kumu de ria lasia Cristuha, de nuha nna rinnebaa nu ankaba gwalí; labí ruin lasia. Anágaba Espíritu ge Tata Do Yebáha rágabe neti deki gwa rinnebaa nu ankaba gwalí.
ROM 9:2 Neti yalhá si'i du lasia lhe satíaba rudúna neti
ROM 9:3 ge ka benne kia, delába ka benne Israel‑ni, axtala rakati meskila neti ibixxi iginnia arlo Tata Do Yebáha lhe meskila iriesia Cristuha ganna ttixka, kini aníha nna ni kina gaa gwalába ka benne kia.
ROM 9:4 Kumu lake nuha bedí Tata Do Yebáha ke kini akake xi'inie lhe lake nuha bela'anie nu xxeni ra leeha lhe. Anágaba len lagabake nuha bodha'ane tisa rabie ke deki unie kini saría tsena ke, lhe lagabake nuha begwebie ke bia bennabi geeha lhe. Anágaba len lagabake nuha bodha'ane kini ulhake gebie, lhe lagabake nuha ree ke deki ugwebie ke ttu nu tse.
ROM 9:5 Anágaba lagabake nuha datiake ka benneola getu use'e itú ttuha, delába ka benne ukake xuttotuha lhe anágaba Cristuha, atti ulie yiesi lo yu‑ni, ka nu Israel‑nigaba nuha datiabie. Cristuha ankagabe Diosi rinnabie iyá tte nu se'e lhe satíaba ra xxeni lebie lhe. Amén.
ROM 9:6 Nianna, ¿si innári'i deki labíru uin Tata Do Yebáha nu chi rabie ka nu Israel‑ni deki unie? ¡Ko'o! Gwin galábie nu chi reeha. Deba nna labí iyá ka benne datiake benne uka xuttotuha, delába benne utta lábie Israel, labí gwalíga iyá ka benneha ankake nu Israel, delába labí iyáke ankake ge Tata Do Yebáha.
ROM 9:7 Nigaba laa de datiagake Abraham‑ni nna innári'i deki iyáke gwankake xi'ini Abraham‑ni, sinuki sunruba ka benne bija Isaac‑ni nuha gwankake xi'inie. Kumu Tata Do Yebáha ree Abraham‑ni: “Isaac‑ni ujana ka benne udaxxuke tialu.”
ROM 9:8 Laxkala ka benne datiake Abraham‑ni, labí de datiake benneha nna innári'i deki chi ankake xi'in Tata Do Yebáha. ¡Ko'o! Sunruba ka benne selake lhe'e nu chi ra Tata Do Yebáha deki utebie ge Abraham‑ni, sunruba ka benneha gwakake xi'inie.
ROM 9:9 Kumu Tata Do Yebáha tti bodha'an tsitsi tisa gebie len Abraham‑ni, la'ania rabie na: “Attu ida ttinná edetaa attu libe, la'ania nna Sara‑na chi tee xi'inni.”
ROM 9:10 Anágaba laa sunruga nuha uka, sinuki anágaba Rebeca‑ni bijagabana kwachi, delába ka xi'in Isaac benne uka xuttotuha.
ROM 9:11 La'ania atti lanila gali ka nutoha lhe atti lanila uin ka nuha nu tse lhe nu satsa lhe, la'aniali chi unne Tata Do Yebáha rabie Rebeca‑ni: “Nu xxeni‑na ixúna lo sina ge nu gwexxa‑na.” Ukaba attiba raba lo ka yetsi ge Tata Do Yebáha tti ree: “Jacob‑ni ukati geni nna Esaú‑ni nna labí ukati geni.” Aníha uka ki gwado tisa deki Tata Do Yebáha raxie lo neda gebie ka benne rakaba lebie gaxie. Labí raxie ke de chi benke bixa nu tse, sinuki de redába lebie nna raxie ke.
ROM 9:14 Nianna, ¿bíla anka nu innári'i ganna? ¿Si innábari'i deki labí nu dika ixú anka nu ruin Tata Do Yebáha? ¡Ko'o! Labí dika innári'i aná.
ROM 9:15 Kumu Tata Do Yebáha rabie Moisés‑ni: “Neti satuaba lasia benne rakaba lasia satua lasia lhe esi'ibati benne rakaba lasia esi'iti lhe.”
ROM 9:16 De nuha nna labí de ri'i raka leri'i nna gwa ratua le Tata Do Yebáha ri'i, nigaba labí de ri'i ruinri'i doelha nna gwa ratua lebie ri'i, sinuki labe redá lebie kini ratua lebie ri'i.
ROM 9:17 Kumu Tata Do Yebáha lo ka yetsi geeha unnebie ree Faraón‑ni, delába Faraón nu unnabiana Egipto‑ni ttuha. La'ania rabie na: “Neti bodúa lu kini akalu nu rinnabia. Ixúti lu kini ule'elu nu xxeni ra lasia. Aníha kini iyá ka benne se'e yiesi lo yu‑ni uinbiake nuxa ankaa.”
ROM 9:18 De nuha nna Tata Do Yebáha ratuaba lebie ka benne rakaba lebie satua lebie nna ka nu raka lebie uin tsitsie lastokani kini abittu tsia lekanie, ka nuha nna ruin tsitsibe lastokani.
ROM 9:19 Ttaka lebi'i nna innaba tisale neti, innále: “Ki ganna abittuba bixa aka geri'i gari'i Tata Do Yebáha, ganna aníha nna, ¿beakala sa rudelhabe yua kwe'eri'i ge nu ruinri'i ganna?”
ROM 9:20 Neti nna upeya le xa lena kia, ¿nú ankale nna lebi'ila gale Tata Do Yebáha bixa anka nu unie? Kumu ttibanka yedhu yuha, laa gwakaga geni gana nu benna naha: “¿Beaka aníla benlu neti?”
ROM 9:21 Kumu nu ruin yedhuha, gwakaba geni uinna len yunaha nu rakaba leni. Gwakaba geni la len yunaha‑ba uinna ttu lo irsina nu ule'e latsitoru, anágaba nna gwakagaba geni uinna attu nu abittu anka latsitoru.
ROM 9:22 Anágaba Tata Do Yebáha, ganna ttixka uka lebie gwa ukaba gebie bele'enie ka benne elha rise'iki geeha lhe gwa ukagaba gebie bele'enie ke nu tsitsi ra leeha lhe. De nuha nna gwa betto bechíabe abittu bi bedhake ka nu ralhakana tse'e lookana
ROM 9:23 nna ka benne chi gwatua leeha, delába ka benne chi ga'ananie deki edí baake nu tse uteeha, ka benneha nna gwa bela'abanie ke nu xxeni ra leeha,
ROM 9:24 delába ka benneha nuní ankari'i, kumu laa suna ka nu Israel‑niga uxie, anágaba uxigabe ka benne abittu ankake nu Israel.
ROM 9:25 Benbe attiba rabie lo yetsi bodha'ana profeta Oseas‑ni. Lo yetsiha ree: Ka nu abittula ankakana nu lhe'esi kiaha, ka nuha‑la upeya kana: “Lebi'i ankale nu lhe'esi kia” nna ka nu abittula rakati gekaniha nna ka nuha‑la upeya kana: “Lebi'i rakati gele”
ROM 9:26 nna ka nu se'e lo yu ata rabie kana: “Lebi'i labí ankale nu lhe'esi kia”, niha‑gaba nuha gabie kana: “Lebi'ila gatta lále xi'ini Tata Do Yebaa benne anka baniha.”
ROM 9:27 Ka nu Israel‑ni nna utixxi'agaba Isaías‑ni gekani, rana: “Meskiba ixe juisiru ka nu Israel‑ni raka, meskiba rakakana ixe juisiru ttiba yuxi re ro'o indatoo, ttaka sunruba ttu chupakana godilaa Tata Xisiha,
ROM 9:28 kumu benneha labíru kwede, chi tteba unie elhuxtisi ge ka nu se'e yiesi lo yu‑ni.”
ROM 9:29 Aníha‑gaba unne Isaías‑ni ttuha, rana: Ganna ttixka Tata Xisiha benne ra tsitsi leeha, ganna ttixka benneha abíba bodha'ane ttu chupa ka benneola geri'i, la'ania nna bise'e loobari'i ttiba bise'e loo lhe'esi Sodoma‑ni lhe Gomorra‑ni lhe.
ROM 9:30 Nianna, ¿bíla anka nu innári'i ganna? ¿Laaba ganna ka nu abittu ankakana nu Israel, delába ka nu labí regu'elha lekani uinkana kini abitturu yua ujakana ge nu ruinkana, laaba ganna ka nuha‑la nuha de ugíaba lekani ge Tata Do Yebáha, de nuha‑ba nna benie kini abitturu yua ujakana ge nu ruinkana?
ROM 9:31 Ttaka ka nu Israel‑ni nna ukalakinna deki de udobakana tisa ge bia bennabi bodha'an Tata Do Yebáha len Moisés‑ni, de nuha‑ba nna abitturu yua ujakana ge nu ruinkana, ttaka nna labí udaakana.
ROM 9:32 Nianna, ¿beakala a udaakana ganna? Labí udaakana kumu de labí bexxen lekani deki Tata Do Yebáha kuabie yua kwe'ekani, sinuki bexxenla lekani deki de uinbakana latsiru, de nuha‑ba nna gwadaakana abitturu yua ujakana ge nu ruinkana. De nuha nna bichekubakana iki íyya nu berixxina kanaha.
ROM 9:33 Gwatebakana attiba raba lo ka yetsi ge Tata Do Yebáha tti ugwettinie unnebie ge Cristuha ree: Lhe'esi Sión‑ni udoa ttu íyya. Nuha uinna kini icheku ka benne ikini nna urixxina ke. Ttaka benne guxxenba lebie ge íyyaha, benneha labí elhittu ugwe íyyaha bie.
ROM 10:1 Betsi to kia, neti yalhá re lasia odilá Tata Do Yebáha ka nu Israel‑ni. Nuní rinnabaa lenie unie,
ROM 10:2 kumu neti yu xeabaa, lakana yalhá rudona lekani ge Tata Do Yebáha, ttaka labí rite da tsekinna.
ROM 10:3 Kumu de labí ute dákinna deki Tata Do Yebáha‑ba riguabie yua kwe'e ka benne ge ka tulha ruinke, de nuha nna la labakana benkana kua yua kwe'ekani ge nu ruinkana nna labí uxielhakana kua Tata Do Yebáha yua kwe'ekani.
ROM 10:4 Kumu bia bennabi bodha'an Tata Do Yebáha len Moisés‑ni, debá len Cristuha uluxa loo nuha. Nnanna nna iyába ka benne tsia leke ge benneha, de tsiaba leke bie nna chiba unie kini abitturu yua ujake ge nu ruinke.
ROM 10:5 Kumu Moisés‑ni benna lo yetsi, rana: “Ttu benne, kini abitturu yua uje ge nu runie, teeki udobie tisa ge iyá nu ra lo bia bennabi‑na. Aníha‑ruba nna gwaka benbie arlo Tata Do Yebáha.”
ROM 10:6 Ttaka benne tsia lebie Cristuha, ukare'aba tsia lebie benneha nna chiba itua yua nuje ge nu runie. Benneha labí dika innábie: Teeki tsapia yebáha kini salhidaa Cristuha.
ROM 10:7 Nigaba labí dika innábie: Teeki chadia lhi'u yuha kini salhidhaa Cristuha lagwi ge ka benne chi uttiha.
ROM 10:8 Sinuki Moisés‑ni rálana: “Gaxxaba ata rekilu se'e ka tisa ge Tata Do Yebáha. Ro'obalu lhe lhe'e lastobalu yu'u ka tisa‑na.” Ri'itu nna ka tisa‑na nuná rekitu rigixxi'atu. Ge ka tisa‑na nuná teeki tsia leri'i.
ROM 10:9 Kumu ganna lu innelu innálu deki Jesús‑ni anke Xxanalu lhe ganna itú iki itú lelu tsia lelu deki Tata Do Yebáha belhidha benbie benneha lo elhuttiha, la'ania nna godilábe lu.
ROM 10:10 Kumu len lastori'i tsia leri'e kini abitturu yua ujari'i ge nu ruinri'i nna len ro'ori'i nna kixxi'ari'i deki ria leri'i benneha. Aníha uinri'i kini odilábie ri'i.
ROM 10:11 Lo ka yetsi ge Tata Do Yebáha rágaba: “Iyába ka nu tsia lekani Cristuha, labí dhi ka nuha elhittu.”
ROM 10:12 Kumu arlo Tata Do Yebáha turo'oba dakari'i, meskiba ankari'i benne Israel lhe meskiba abittu ankari'i benne Israel lhe. Kumu labie nuha anke Xxana iyá tteri'i nna rute tame ge iyába ka benne ttixka rinnabake ttu bixa lenie.
ROM 10:13 Kumu iyába ka benne ganna innabake ki odilá Tata Xisiha ke, labie nna godilábe ke.
ROM 10:14 Deba nna, ¿gasina innabake len benneha, ganna abíba chi ria leke gebie? Lhe, ¿gasina tsia leke ge benneha, ganna abíba chi biyienkanie gebie? Lhe anágaba, ¿gasina unake ge benneha, ganna anúba tee kixxi'enna ke?
ROM 10:15 Lhe, ¿gasina tsiake ugixxi'a ka tisa ge Tata Xisiha, ganna anúba tee idhelhana ke? Akaba attiba raba lo ka yetsi ge Tata Xisiha ata dia ra: “¡Gáruba lhe'e ule'e ganna chi isia ka benne rekike ugixxi'a ka tisa ge Tata Xisiha!”
ROM 10:16 Ttaka neti ria, nnanna labí iyá ka benne ria leke ge ka tisaha. Rakaba attiba raba Isaías‑ni lo yetsi bennaha ata ra: “Nurula nu chi ugía leni ge ka tisa rigixxi'atu‑ni xa Tata Xisi to.”
ROM 10:17 Ttaka neti ria, iyába ka benne tsia leke ge Tata Do Yebáha, de udoba nagake ka tisa geeha, de nuha‑ba nna tsia leke gebie.
ROM 10:18 Nianna rinnaba tisaa ria: Ka nu Israel‑ni, ¿si abí gwa chi biyienkinna ka tisaha ganna? ¡Chi galá biyienkinna ke! Kumu lo ka yetsi ge Tata Do Yebáha dia ra: Itúba yiesi lo yu‑ni biyien tsi'i ka nu rekikana ugixxi'a ka tisaha, axtaba lhe'e ka yiesi to se'e ata abittu rilá, axtaba niha chi bisin ka tisa rigixxi'akanaha.
ROM 10:19 Ttaka neti redennaba tisaa attu libe, redenía: ¿Si abí gwa ute dákin nu Israel‑ni nu utixxi'a ka benneha ganna? ¡Gwa ute da galákinna! Ki lade'a ttela Moisés‑ni benna lo yetsi, utixxi'ana nu ra Tata Do Yebáha, tti ree: Neti unia kini gapa yiele ka nu abittu ankakana benne Israel, lhe unia kini lebi'i ise'enle tti ilenle ute náya len ka nu rale deki labí elha rieni rapakana.
ROM 10:20 Isaías‑ni lhixxa rába utixxi'ana nu ra Tata Do Yebáha, tti ree: Ka nu labí regilakana netiha‑la, ka nuha‑la betexxakakana neti, nna ka nu abíla rinnaba tisakana kiaha, len ka nuha‑la bele'e loa.
ROM 10:21 Ge ka nu Israel‑ni nna ra Tata Do Yebáha: Ka nu rese'e disakana abittu rudokana tisa kia, ka nuha detú sába daa náya raxia kana.
ROM 11:1 De nuha nna rinnaba tisaa, ria: ¿Si bedhába iki Tata Do Yebáha ka benne geeha ganna? ¡Ko'o, labí! Kumu neti ankagabaa benne Israel, datiaya Abraham‑ni nna Benjamín‑ni uke xuttoa.
ROM 11:2 Tata Do Yebáha labí chi bedhá iki benneha ka benne gebie, delába ka benne bekwebie ttuha‑li kini akake gebie. Lebi'i gwa yu xeabale ge nu ra lo ka yetsi ge Tata Do Yebáha ata rinne Elías‑ni rulisane tti rinne lhana ge nu ruin ka nu Israel‑ni, rana:
ROM 11:3 “¡Tata Xisi to, biyúruga! Chiba bettikana adí ka profeta geluha lhe chigaba betse'e lookana ka bekú geluha lhe. A sunruba neti chi beya'anaa. Anágaba nna ruingabakana uttikana neti.”
ROM 11:4 Ttaka Tata Do Yebáha bekabie ge Elías‑ni ree na: “Neti chiba ulesia gasi mili ka benne kia, ka benne labí chi bedú xibike arlo Baal‑ni, delába nu ra adíkana deki ankana diosi gekani.”
ROM 11:5 Aníha‑gaba raka nnanna, gwa se'erugaba attu chupa ka benne chi bedá le Tata Do Yebáha bekwebie.
ROM 11:6 Kumu ganna ttixka rukwebe ka benne de ruin tseke, ganna runie aníha, la'ania nna labíru rukwebie ka benneha de redá lebie.
ROM 11:7 Nianna, ¿bíla uka len ka nu Israel‑ni ganna? Ka nu Israel‑ni benbakana deki itua yua ge ka tulha ruinkanaha kwe'ekani, ttaka labí udaakana. Ka benne bekwe Tata Do Yebáha nna gwa bituaba yuaha kwe'eke. Adíkana nna ben tsitsibe lastokani, abittuba ugía lekanie.
ROM 11:8 Ukaba attiba raba lo ka yetsi geeha ata dia ra: “Tata Do Yebáha bechulhabe lekani lhe bechulhabe lokani kini abittu bilákinna, lhe anágaba attisidiba bedheabe nagakani kini abittu biyienkinna. Aníha‑ba sa ankakana axtaba nnanna.”
ROM 11:9 Anágaba David‑ni unnegabana rana: Ka laní ruinkana, ka nuná rixúlakana kini rukinnina kana arlo Tata Do Yebáha, kumu labí rexxa lekani gebie tti ruinkana ka laníha. Laxkala ka laní gekaniha reyakabakana ttiba ttu yalhi lhe ttiba ttu yexxa kini riginnikana loni. De ruinkana aníha nna ugwebe kana elha disa.
ROM 11:10 Anágaba nna attisidiba echulhaba ka iyya lokani kini abittu ilákinna, lhe satíaba edo ruba kwe'ekani lhe.
ROM 11:11 Nianna redennaba tisaa, ria: Ka nu Israel‑ni, ¿si tsaba chi binittikana lo neda ge Tata Do Yebáha? ¿Si abíruga eyekikana ganna? ¡Ko'o! Gweyeki galákana lo neda geeha! Ttaka lakana de binittikana, de nuha nna odilá Tata Do Yebáha ka benne abittu ankake nu Israel. Aníha kini utía di le ka nu Israel‑ni ka benneha nna eyekikana lo neda geeha.
ROM 11:12 Nianna, ganna de binittikana abittu ben tsekana, ganna de nuha beni kini bisia elha tse ge yiesi lo yu‑ni, delába elha tse ge ka benne abittu ankake nu Israel, ¿laaba ganna adírula tse aka ganna ttixka iyába ka nu Israel‑ni eyekikana lo neda ge Tata Do Yebáha?
ROM 11:13 Lebi'i ka nu abittu ankale nu Israel, lebi'i nuná rulisaa le. Neti de ankaa apóstol udhelha Tata Do Yebáha ge ka benne abittu ankake nu Israel, de nuha nna rugwea lidhaka sina runia‑ni.
ROM 11:14 Rugwea lidhakani kumu de rakati ni kina gaa gutía diiba le ka benne kiaha le, delába ka nu Israel‑ni, nna ebigakana lo neda ge Tata Do Yebáha kini aníha nna kwadiba ttu chupakana odilábie.
ROM 11:15 Kumu ganna de ulhida gaa Tata Do Yebáha ka nu Israel‑ni, ganna nuha bixúna kini bese'e tse lenie adí ka benne se'e yiesi lo yu‑ni, adírula tse aka ganna chi olábie ka nu Israel‑ni attu libe. La'ania nna ttiba ttu nu kubi chi eyakakana, attisidiba eyaka benbakana lo elhuttiha.
ROM 11:16 Kumu ganna kua nu raka ka yettaxtila ruinke sisi'a tteha, ganna kuaha chi ankana ge Tata Do Yebáha, anágaba kua nu rexxaha chigaba anka nuha gebie lhe ganna chunku ge ttu yaga chi ankana ge Tata Do Yebáha, anágaba ka nániha chigaba anka ka nuha gebie. Aníha‑gaba nuha ka benne chi bekwe Tata Do Yebáha sisi'a tteha, ganna ka benneha chi ankake gebie, aníha‑gaba adí ka benne datiake ka benneha chigaba ankake gebie.
ROM 11:17 Anágaba ka nu Israel‑ni, lakana nuha ankakana attisiba kwinaga ka ná ya olivu tseha. Attisidiba birekubakana lo ná ya olivuha, kini lebi'i ka nu abittu ankale nu Israel, meskiba ankale ka ná ya olivu nu anka ge lhe'exxiha, ttaka benoole lo ná ya olivu tseha ata bitua ka nu Israel‑ni. La'ania nna lebi'i chiba bisinle ukale ge kwinaga yaga ata benooleha lhe anágaba nna edí baagabale elha tse nu ute yagaha.
ROM 11:18 Lebi'i bittu uxisile ge ka nu birekukana lo ná yagaha, abittu akinle deki lebi'i dakarulale tti ka nuha. Kumu ganna aníha rakinle, gwaludhá lele laa lebi'iga nuha rugole chunku ge yagaha, chunkuha‑la nuha rugona le.
ROM 11:19 Ttaka ganna lebi'i innále: “¿Laaba ganna de nuha‑la birekukana kini ri'itu benootu lo ná yaga‑ni?”
ROM 11:20 Neti nna ekabia gele innía: Gwalí galá, lakana bituakana lo ná yagaha de abittu ugía lekani Tata Do Yebáha, lebi'i nna de ria lele gebie, de nuha nna gwa benoobale lo ná yaga tseha. Laxkala abittu uxisile ge ka nuná, sinuki gelale gwalugía.
ROM 11:21 Kumu ganna Tata Do Yebáha abittu uxíe elha xen lasi ge ka nu gwalíga ukakana ná yaga tseha de abittu ugía lekani, anágaba lebi'i abittugaba dhie elha xen lasi gele ganna udhanle abitturu tsia lele gebie.
ROM 11:22 Gwaluyúruga, Tata Do Yebáha benne tseba anka benneha, ttaka anágaba nna idisagaba runie. Idisa runie len ka nu chi binittikana lo neda geeha, ttaka len lebi'i, benne tseba anke ganna si anába tse'ele ugwele lidhaka nu tse runieha, kumu ganna abíba ugwele lidhaka nu tse runieha nna kuagabe le lo yaga ata sialeha.
ROM 11:23 Ganna ka nu Israel‑ni edulokana eyya lekani gebie, la'ania nna godo adakabe kana ata bituakanaha, kumu tsitsi ra le benneha gwa daabe odobie kana lo ná yagaha attu libe.
ROM 11:24 Kumu lebi'i ka nu abittu ankale nu Israel, ankabale ka ná ya olivu ge lhe'exxiha, nianna birekule ata sialeha nna benoole lo ná ya olivu tseha ata labí dika kwialeha, ¿titiala ka nu Israel‑ni, lakana ukakana kwinaga ná ya olivu tseha, gwebiaba ka nuha attu libe ata bituakanaha?
ROM 11:25 Betsi to kia, raka lasia unale ttu nu labí chi yule, delába labí chi yule deki Tata Do Yebáha chiba ga'ananie deki ttu chupa ka nu Israel‑ni uin tsitsi lastokani labí tsia lekanie axtaliba ganna chi beda'a ka nu abittu ankakana nu Israel ibigakana udaxxukana neda gebie, la'anialiba nna edulo ka nu Israel‑ni eyya lekani. Raka lasia unale nuní kini abittu tse'ele akinle deki yalhaba chi yule.
ROM 11:26 Iki deliba nuha nna iyába ka nu Israel‑ni odilá Tata Do Yebáha kana, uinbe attiba raba lo ka yetsi geeha ata dia ra: Lhe'esi Sión‑ni iria benne odilábie ka benne datiake Jacob‑ni kini kuabie nu satsa ruinkana.
ROM 11:27 Lhe rágabe: Nuní tisa chi bodha'anaa unia, delába kuaya ka tulha ruinkanaha kwe'ekani.
ROM 11:28 Ka nu Israel‑ni, de labí ugía lekani ka tisa tse ka nu rigixxi'a ge Jesucristuha, de nuha nna labí se'e tsekana len Tata Do Yebáha. Uka aníha kini lebi'i ka nu abittu ankale nu Israel saría tsena le. Ttaka Tata Do Yebáha gwa rakabanie gekani de chi bekwebie ka benne uka xuttokaniha.
ROM 11:29 Kumu benneha tsaba rinnebie. Ganna chi raxie ttu benne lo neda gebie, tsaba raxie benneha lhe ganna chi redá lebie rutebie bixaba nu tse len ttu benne, tsagaba rutebie nuha.
ROM 11:30 Lebi'i ka nu abittu ankale nu Israel, itú ttuha labí bedole tisa ge Tata Do Yebáha, ttaka nnanna de ka nu Israel‑ni abittu rudokana tisa gebie, de nuha nna lebi'ila chi ratua lebie.
ROM 11:31 Nnanna ka nu Israel‑ni labí rudokana tisa gebie kini aníha nna lebi'i gwatua le Tata Do Yebáha le. Anágaba attiba gwatua lebie le, anágaba lakana gwasatuagaba lebie kana.
ROM 11:32 Kumu iyábari'i begwelhaba Tata Do Yebáha ri'i kini abittu bedori'i tisa gebie. Aníha benie kini delo nna iyágabari'i satua lebie.
ROM 11:33 ¡Ka tiparuba xxeni anka ka elha tse ge Tata Do Yebáha lhe ka tiparuba xxeni anka elha yuu geeha lhe elha rieni geeha lhe! Lanú nu dhaana kixxi'ana bixa re le benneha unie lhe lanú nu dhaana tte denna bixa runie lhe.
ROM 11:34 Kumu “¡lanú nu rite denna bixa rulaba le Tata Xisiha lhe lanú aka geni gana benneha gasina unie!”
ROM 11:35 Lhe anágaba, “¡lanú nu chi begwena benneha ttu bixa kini delo nna odo doelhane odekie nu chi begweneha!”
ROM 11:36 Kumu Tata Do Yebáha‑ba benie iyá tte nu se'e lhe de labie nna gwa se'e ka nu benieha, lhe anágaba nna gegabe ankakana. ¡Benneha ra xxeni lebie ttu dia lii! Amén.
ROM 12:1 Laxkala xa betsi to, rinnabaa len lebi'i gwaluin chi lo ni'a ge Tata Do Yebáha, gwalute itú tte nu ankale attiba ttu úna bani arloe, delába gwaltse'e gwaludo lele gwaluin nu tsu'u lebie de chi ankale gebie. Kumu aná dika uinle arlo Tata Do Yebáha.
ROM 12:2 Abitturu uinle tti runi ka benne se'e yiesi lo yu‑ni. Lebi'i nu uinlale: gwalotseala elha rulaba le gele, aníha kini esea elha ruin gele. La'ania nna chi tte denle gasina anka nu raka le Tata Do Yebáha uinle, delába uinle nu anka tse lhe nu dika tsu'u lebie lhe nu anka itá su lhe.
ROM 12:3 Kumu de Tata Do Yebáha chi bedá lebie betebie lo neda len neti, de nuha nna rulisaa le. Kua ttu ttule abittu tse'ele ulaba lele akinle deki rakarula gele tti adí ka benne. Abittu ulaba lele nu labí gwalí raka gele. Lebi'i nu uinlale, gwalulabala lele attiba ankaba geni. Kua ttu ttule gwaluinba kua riaba lele, delába elha ria le gele nu bete Tata Do Yebáha.
ROM 12:4 Kumu attiba latiri'i, ttúba ankana. Ttaka ixe looba ka nu rapana nna labí turo'o anka sina ruin ttu ttu ka nu rapana.
ROM 12:5 Anágaba ri'i, ixebari'i raka, ttaka suna ttúba benne ankari'i de chi babari'i len Cristuha, kumu kua ttu tturi'i baba len luesiri'i. Aníha kini ttu tsapaba tse'e len luesiri'i.
ROM 12:6 Ri'i ya yaba le anka elha tse ge ttu tturi'i kua bedába le Tata Do Yebáha betebie geri'i. Ganna len ttúri'i betebie elha tse geri'i kini kixxi'ari'i nu raka lebie una ka benne, la'ania nna innebari'i kua riaba leri'i ge Tata Do Yebáha
ROM 12:7 nna ganna len atturi'i betebie elha tse geri'i kini ute nári'i len adí ka benne, la'ania nna latsiru ute nári'i lenke. Anágaba nna ganna len attúri'i chi betebie elha tse geri'i kini ule'enri'i ka benne ka tisa ge Tata Do Yebáha, la'ania nna nuha‑ba udo leri'i uinri'i
ROM 12:8 nna ganna len attúri'i chi betebie elha tse geri'i kini odú ittari'i le ka benne, la'ania nna nuha‑gaba udo leri'i uinri'i. Anágaba nna ganna len attúri'i betebie elha tse geri'i kini edá leri'i uteri'i nu tee geri'i len ka benne, la'ania nna eria iki eria leri'i uteri'i nuha lenke. Anágaba nna ganna len attúri'i chi betebie elha tse geri'i kini akari'i nu loni ge adí ka benne, la'ania nna teeki uinri'i nuha latsiru nna ganna len attúri'i chi betebie elha tse geri'i kini satua leri'i ka benne riyasakanie ttu bixa, la'ania nna ittaba udúna leri'i tti uinri'i nuha.
ROM 12:9 Itú iki itú lele akinle ge ka benne, abittu delo tisaba akinle geke. Bitturu aka uyúle nu satsa‑na, bitturu ulabile na. Lebi'i gwaludola lele, gwaluni nu anka tse.
ROM 12:10 Akin ge luesile attiba rakabinle ge ttu betsile lhe gwaltsia le luesile lhe gwalugwe lidhaka luesile lhe.
ROM 12:11 Gwaludo lele gwaluin nu daa lole uinle, abittu akale nu lea. Itú iki itú lele ixúle lo sina ge Tata Xisiha.
ROM 12:12 Gwaludú itta lele de chi ruxxen lele ge Tata Do Yebáha lhe gwalutto gwaluchía ttixka ratele ttu bixa elha disa. Anágaba abittu udú siile a ilhapile tisa lenie.
ROM 12:13 Gwalute nu tee gele len ka benne ttixka riyasakanie, delába ka benne chi ankake ge Tata Do Yebáha, anágaba lhe jeru tte gaxile ka benne lhe'e lisile lhe.
ROM 12:14 Gwalinnaba len Tata Do Yebáha kini lee unie ki saría tsena ka nu ridú nookana le. Bittu kele ikikani; gwalinnabala kini aka lenie kana.
ROM 12:15 Gwaltse'e itta len ka benne se'e itta, anágaba len ka benne du si'i leke, gwaludú si'igaba lele lenke.
ROM 12:16 Latsiru gwaltse'e len luesile. Abittu uinle ttaba. Gwaluinla tti runi ka benne abittu ra xxeni leke lhe anágaba bittu uinle deki lebi'iba ankale nu yuu xxatta.
ROM 12:17 Ttixka nuxa bixa udhakana le, abittu aníha‑gaba udhakale na. Arlo nuxaba benne gwaluinla doelha gwaluni nu anka tse.
ROM 12:18 Gwaluin doelha gwaltse'e latsiru len iyába ka benne.
ROM 12:19 Xa betsi to kia, ganna bixa chi bedhakakana le, abittu udo lele ge nuha. Gwalugwelhala Tata Do Yebáha ugwebie kana elha disa, kumu aná rabie lo ka yetsi geeha, tti ree: “Netiba ralhaa ugwea kana elha disa; ugwebaa kana elha disa nu ralhabakana dhíkana.”
ROM 12:20 Lu nna nu uinlalu: “Ganna nu abittu raka uyúna luha dana rituinna, begwela na nu gona lhe ganna rebisina inda, begwela na inda i'iyana, kumu ganna aníha uinlu, la'ania nna nuha ettulinna ge nu chi bedhakana luha.”
ROM 12:21 Bittu ixú yielu uinlu nu satsa. Nu uinlalu, benla nu anka tse. Aníha kini dhaalu edúlu lo nu satsaha, ki abitturu uinlu na.
ROM 13:1 Iyá tteri'i teeki udori'i tisa ge ka nu rinnabia‑na, kumu lanú ttu nu rinnabia do, abittu rodú Tata Do Yebáha na. Iyábakana Tata Do Yebáha‑ba rose'ebie kana.
ROM 13:2 Laxkala ka benne ganna abittu udoke tisa ge ka nu rinnabia‑na, arlo Tata Do Yebáha nuha rese'e disake kumu labie bose'ebie ka nu rinnabia‑na nna ka benne abittu rudoke tisa ge ka nuná, elha disa gebake rigilake.
ROM 13:3 Kumu ka nu rinnabia‑na labí se'e ka nuná kini uniasikinna ka benne ruin latsiru, sinuki se'elakana kini uniasikinna ka nu ruin satsa. Ganna lu abittuba raka lelu gasinlu ge ka nu rinnabia‑na, latsiru beni ganna xa, kini aníha nna ka nuná innákana deki lu tseba ruinlu.
ROM 13:4 Kumu ka nu rinnabia‑na ankakana ka benne rixúni Tata Do Yebáha, ka nuná uinkana kini lu saría tsena lu. Ttaka ganna lu abíba ruin tselu, la'ania nna gasi galenlu gekani, kumu lakana chi begwe Tata Do Yebáha kana lo neda kini ugwekana elha disa ka nu ruin satsa.
ROM 13:5 Laxkala teeki udori'i tisa gekani, abittu sun tteba de kini ka ugwekana ri'i elha disa nna udori'i tisa gekani. ¡Ko'o! Sinuki teeki udori'i tisa gekani kumu yúbari'i deki anába dika uinri'i.
ROM 13:6 Kumu ka nu rinnabia‑na, Tata Do Yebáha‑ba runie kini rinnabiakana nna nunába rudo lekani ruinkana. De nuha nna lebi'i rigixale belhiu nu rinnaba ka nuná.
ROM 13:7 Gwalikixa iyá nu daa lole kixale len ka nu rinnabia‑na: ganna daa lole kixale belhiu nu riden nári'i ge yiesi, gwalikixa nuná nna ganna se'e ka nu ralhakana tsia lele kana, gwaltsia lele kana nna ganna se'e ka nu ralhakana ugwele lidhakakani, gwalugwe lidhakakani.
ROM 13:8 Gwalikixa iyá nu dale ge ttu benne, abittu a kixale. Sun tteba nna teeki akin ge luesile, kumu ttu benne rakanie ge nuxaba benne, ge nu ra lo bia bennabi ge Tata Do Yebáha nuha chi rudoe tisa.
ROM 13:9 Kumu benneha bodha'ane ree: “Abittu dho lenlu attu nu subi lhe abittu uinlu elhutti lhe, anágaba abittu lhanalu lhe abittu innelu gwen lasi lhe abittu dha lelu nu tee ge attu benne subi lhe.” Iyá nuní lhe adíru ka nu ruin Tata Do Yebáha mandadu uinri'i, ttúba tisa reyakakana, delába tisa nu ra: “Akinlu ge attu benne attiba rakabani gelu.”
ROM 13:10 Kumu ri'i labí rudhaka xiiri'i ttu benne ganna rakinri'i gebie. Laxkala benne rakanie ge nuxaba benne, ge nu ra lo bia bennabiha nuha rudobie tisa.
ROM 13:11 Lebi'i gwa yúbale sá bedúba nuní chi se'eri'i. Chinka elhidha ikiri'i, kumu chi tteba dabigana isia sá odilá Cristuha ri'i. Labíru isá riyasa tti riyasa atti udulori'i ugía leri'i benneha.
ROM 13:12 Kumu chiba diana ruxunnina sá, chiba dabigana isia sá tti odilábie ri'i. De nuha nna chinka udhanri'i nu satsa ruinri'i, abitturu uinri'i tti runi ka nu se'e ata anka chulha, sinuki tse'e tselari'i uinri'i nu anka tse ttiba runi ka benne se'e ata anka yani.
ROM 13:13 Latsiruba tsekiri'i, uinbari'i attiba ankaba geni: abittu akari'i nu ro xxatta lhe nu dusi lhe, anágaba lhe abittu isári'i nu subi subi lhe abittu uinri'i bixaba nu satsa rakaba leri'i lhe anágaba nna abittu tsu'uri'i utilha lhe abittugaba utía di le luesiri'i lhe.
ROM 13:14 Lebi'i nu uinlale: gwaluinla tti ruin Jesucristu benne anke Xxanari'iha nna gwaluin doelha abittu uinle nu satsa etaba lele uinle.
ROM 14:1 Ganna ttu benne selee len lebi'i nna abíba chi ria tsitsi lebie ge Tata Do Yebáha, gwalulabibe attiba ankabe nna abittu dhaka lenlee ge nu robie.
ROM 14:2 Kumu se'e ka benne rakakanie deki gwakaba goke iyába, ttaka se'e ka benne de labí chi ria tsitsi leke ge Tata Do Yebáha, de nuha nna suna kuana ya'aba roke.
ROM 14:3 Benne roe iyá tteha, abittugaba ku'u ni'e benne abittu roe iyá tteha nna benne abittu roe iyá tteha nna abittugaba kuabie bala'ana ge benne roe iyá tteha, kumu Tata Do Yebáha chiba belabie benneha attiba ankeha.
ROM 14:4 Lu nna, ¿núla ankalu nna rigualu bala'ana ge benne rixúbie lo sina ge attu benne? Si ruin tsebie o abittu ruin tsebie, xxaneha‑ba inná. Ttaka benneha gwa du tsitsibe, kumu xxeniba ra le Tata Xisiha nna gudú tsitsibe benneha.
ROM 14:5 Anágaba nna se'egaba ka benne rakakanie deki se'e ka sá dakarukana atti adíru ka sá nna se'e adíke nna rakakanie deki tu tulapaba anka iyába ka sá‑na. Ttaka neti ria, kua ttu ttule teeki yu tsitsile deki gwalí nu rulaba leleha ankana tse.
ROM 14:6 Nu rana deki tee ttu sá dakaru atti adí ka sá, nu ra aníha, Tata Xisiha nuha rugwena lidhake, nna nu rona iyá tteha, Tata Xisiha‑gaba nuha rugwena lidhake kumu gwa rugwebana benneha ixkixaru tti rona elhoha. Anágaba nu abittu rona iyá tteha, rugwegabana lidhaka Tata Xisiha tti abittu rona iyá tee. Anágaba nna gwa rugwegabana benneha ixkixaru.
ROM 14:7 Kumu elha nabani geri'i lhe elhutti geri'i lhe, labí ankakana geri'i, ge Tata Xisiha‑ba ankakana.
ROM 14:8 Laxkala laka se'eri'i anka benri'i nna ge Tata Xisiha‑ba ixúri'i nna ganna gattiri'i nna gegabe ixúri'i. Laxkala sila sa se'eri'i anka benri'i o sila chi uttiri'i, ge Tata Xisiha‑ba ankari'i.
ROM 14:9 Kumu de nuha‑la utti Cristuha nna beyaka benbie attu libe kini anáchu ake Xxana ka benne chi uttiha lhe ake Xxana ka benne anka bani lhe.
ROM 14:10 Lu nna, ¿beaka rigualalu bala'ana ge nu ruin attu betsi to geri'i? Lhe, ¿beaka rigu'ula ni'alue lhe? Ki yulu iyábari'i eso duri'i arlo Cristuha kini aka elhuxtisi geri'i.
ROM 14:11 Kumu lo ka yetsi ge Tata Xisiha rabie: Netiru ria, iyába ka benne udú xibike arloa lhe iyábake innáke deki neti ankaa Diosi.
ROM 14:12 Laxkala kua ttu tturi'i, arlo Tata Do Yebáha otso duri'i nu benri'i.
ROM 14:13 De nuha nna abitturu kua bala'ana ge luesiri'i. Lebi'i nu uinlale, gwaluinla doelha abittu uinle ttu bixa nu uinna ki icheku ttu betsi to geri'i lo neda ge Tata Do Yebáha.
ROM 14:14 Neti yu xeabaa lhe ruxxen tsitsiba lasia ge Jesús benne anke Xxanari'iha deki labí tee ttu elho titúbana akana tsiga. Ttaka ganna se'e ka benne rakakanie deki tsigaba anka elhoha, tsiga galá chi ankana len lake kumu aníha rulaba leke.
ROM 14:15 Ttaka ganna delo ni'a ge elho roluha ruinlu kini rudú chupana le attu betsi to geri'i, ganna aníha ruinlu, la'ania nna labíru rakinlu ge benneha. Kumu Cristuha chi uttie utixe ge betsi to geri'iha, de nuha nna abittu unnittilu benneha len nu rolu.
ROM 14:16 Laxkala meskiba lu rakinlu deki tseba anka nu ruinluha, ttaka ganna se'e ka nu riguakana bala'ana ge nu ruinluha, la'ania nna tserula abittu uinlu aníha.
ROM 14:17 Kumu tti rinnabia Tata Do Yebáha ri'i, labí raka doelha bí rori'i lhe bí ri'iyari'i lhe. Nu rakarula doelha tse'eri'i uinri'i nu dika ixú lhe tse'eri'i latsiru len ka benne lhe udú itta leri'i lhe. Iyá nuní ruin Espíritu ge Tata Do Yebáha.
ROM 14:18 Ganna aní ruinri'i tti rudori'i tisa ge Cristuha, la'ania nna nu dika ru'u le Tata Do Yebáha nuha chi ruinri'i. Anágaba nna adí ka benne tsu'ugaba leke nu ruinri'i.
ROM 14:19 De nuha nna uinri'i doelha latsiru tse'e len luesiri'i lhe use'e tsitsi luesiri'i lo neda ge Tata Do Yebáha lhe.
ROM 14:20 Bittu utse'e loolu sina chi ben Tata Do Yebáha lhe'e lasto adí ka benne delo ni'a ge nu roluha. Gwalí galá, iyába elho nariba ankana, ttaka labí tse anka ganna delo ni'a ge nu roluha nna ruinlu kini runnittilu adí ka benne.
ROM 14:21 De nuha nna tserula abittu golu bela, nigaba i'iyalu vinu, nigaba uinlu attu bixa nu uinna kini icheku betsi to geluha lo neda ge Tata Do Yebáha.
ROM 14:22 Ganna lu rakinlu tseba anka nu ruinlu, nu rakinlu anka tseha, sun tteba lu yulu nna Tata Do Yebáha‑ba nna, abittu utselalu attu benne subi. ¡Karubáru ka benne abittu rudúna ke ttixka rudhaka leke deki tseba anka nu ruinkeha!
ROM 14:23 Ttaka benne rudú chupana lebie si golee ttu bixa elho o abittu goe na, benneha tti robie elhoha, la labe nuha rigila gebie de labí chi ria tsitsi lebie ge nu roeha, kumu iyába nu ruinri'i ganna abíba uxxen leri'i ge Tata Do Yebáha deki gwanka tsebana, la'ania nna tulhaba nuha chi ruinri'i.
ROM 15:1 Ri'i ata chi ruxxen tsitsi leri'i ge Tata Xisiha, teeki ute nári'i len ka benne abittu chi se'e tsitsike lo neda gebie. Abittu suna nu tsu'uba leri'i uinri'i.
ROM 15:2 Kua ttu tturi'i uinri'i nu dika tsu'u le ka betsi to geri'i, uinri'i nu dika ixú kini lake tse'e tsitsike lo neda gebie.
ROM 15:3 Kumu nigaba Cristuha labí udo benneha benie nu rakaba lebie, sinuki gwatebe attiba raba lo ka yetsi ge Tata Do Yebáha ata dia ra: “Kwe'elaa gware iyá nu satsa unnekana geluha.”
ROM 15:4 Kumu ka tisa‑ni ttuha‑li uka ka benne‑ni. Ukake kini udhetikanie ri'i kini anáchu nna de elha xen lasi rute ka tisa‑ni nna kweki tsitsi leri'i. De nuha nna gwa ruxxen leri'i ge Tata Do Yebáha.
ROM 15:5 Anágaba nna Tata Do Yebaa benne ribeki tsitsie leri'i lhe rutebie elha xen lasi geri'i lhe, benneha unie kini lebi'i latsiru tse'e len luesile. Uinle attiba ben Jesucristuha,
ROM 15:6 kini iyá ttele turo'oba uinle. Aníha uinle kini anáchu inná xxeni le Tata Do Yebáha, delába Xxudi Jesucristu benne anke Xxanari'iha.
ROM 15:7 Laxkala latsiru gwalulabi luesile attiba belabi Cristuha le. Aníha uinle kini inná xxeni le Tata Do Yebáha.
ROM 15:8 Neti kixxi'ania le: Cristuha bitee yiesi lo yu‑ni kini bixúbie ge ka benne Israel‑ni, benie nu chi ra Tata Do Yebáha ka benne uka xuttokeha. Aníha kini bela'a deki Tata Do Yebáha labí runnitti tisa gebie, gwa ruinbe nu chi rabie unie.
ROM 15:9 Lhe anágaba bitagaba Cristuha yiesi lo yu‑ni kini ka nu abittu ankakana nu Israel innákana deki xxeniba ra le Tata Do Yebáha de anke benne ratua lasi. Akaba attiba chi ra lo ka yetsi geeha ata dia ra: De nuha nna unia kini inná xxeni lelu, lhe ulhaa gelu lagwi ge ka nu abittu ankakana nu Israel lhe.
ROM 15:10 Anágaba nna redenágaba lo ka yetsi geeha: Lebi'i ka nu labí ankale nu Israel, gwaledeakani itupa lenle ka benne Israel, delába ka benne ankake ge Tata Do Yebáha.
ROM 15:11 Nianna redenágaba: Iyá ttele lebi'i ka nu abittu ankale nu Israel, gwalulha ge Tata Xisiha. Iyá ttele gwalinná deki xxeniba ra lebie.
ROM 15:12 Attu lisia lo ka yetsi ge Tata Do Yebáha rigixxi'agaba Isaías‑ni rana: Isia ttu benne datiabie Isaí‑ni. Benneha kwea loe innabie ka nu abittu ankakana nu Israel; ka nuha nna uxxen lekani gebie.
ROM 15:13 Anágaba nna Tata Do Yebaa benne rutebie elha xen lasi geri'i, labie ute tame elha gwedeaka lasi gele lhe use'ebie le latsiru de ria lele gebie. Aníha kini uxxen chiettiru lele gebie de rudú tsitsi Espíritu geeha le.
ROM 15:14 Betsi to kia, neti yu xeabaa deki lebi'i yalhá tse chi re lele lhe yalhá elha rieni gele chi tee lhe. Anágaba chigaba ankale benne dika ule'en luesile.
ROM 15:15 Ttaka neti lo yetsi‑ni ttu nnelaba rinnea. Runia aní kini rodhua lele ge nu chi yule, kumu de Tata Do Yebáha chi bedá lebie betebie len neti
ROM 15:16 kini akaa benne ixúa lo sina ge Jesucristuha. Runia attiba runi ttu bixxudi, rigixxi'ania ka nu abittu ankakana nu Israel ka tisa ge Tata Do Yebáha, kini anáchu otso dua kana arlobie chi ankakana attiba ttu úna nu dika tsu'u lebie, delába ka benne chi bochari Espíritu geeha.
ROM 15:17 Laxkala de nuní nna gwa tee ro'a inná xxeni lasia ge sina runia ge Tata Do Yebáha de babaa len Jesucristuha.
ROM 15:18 Kumu neti labí rinnea ge attu bixa nu subi, suna ge nu ben Cristuha len netiba, suna ge nuha‑ba rinnea. Benneha rixúnie neti kini rigixxi'ania ka nu abittu ankakana nu Israel ka tisa ge Tata Do Yebáha kini lakana nna rudokana tisa gebie. Rudokana tisa gebie kumu de biyienkinna ka tisa unneaha lhe de bilákinna nu beniaha lhe,
ROM 15:19 kumu xxeniba ra le Espíritu ge Tata Do Yebáha. Benneha benie kini benia ka milagru lhe adíru nu benna kini bebanani ka benne geni lhe. Uduloa lhe'esi Jerusalén‑ni nna axtaba bisinaa daka Iliria. Itúba daka niha chi utixxi'aya ka tisa ge Cristuha.
ROM 15:20 Aná nna runia doelha rigixxi'aya ka tisa‑ni ata abittu chi biyienkinna ge Cristuha. Runia aní kini abittu rigixxi'aya ata chi udulo attu benne rigixxi'e ka tisa ge Cristuha.
ROM 15:21 Ruinbaa attiba raba lo ka yetsi ge Tata Do Yebáha ata dia ra: Ka nu labí chi binakana lhe labí chi biyienkinna lhe ka nuha ilákinne lhe tte dákinna gebie lhe.
ROM 15:22 De rekia rigixxi'aya ka tisa ge Cristuha, de nuha nna labí chi uka itaa ata se'ele‑na. Ixe lidúba chi benia itaa, ttaka ugwayaba loa, de nuha nna abittu uka itaa.
ROM 15:23 Ttaka nnanna ata rekia‑ni labíru riyasa kixxi'aya ka tisa‑ni. De nuha nna chi rulaba lasia itaa ata se'ele‑na kumu ttuha‑li chi re lasia itaa etelannia le.
ROM 15:24 Laxkala atti tsiaya Españaha, la'ania ttea ulannia le nna iki de chi beyaka xen lasia dhoa len lebi'i ttu satti to, la'ania nna ruxxen lasia deki lebi'i gutebale ge neda kia kini isinaa España.
ROM 15:25 Ttaka nnanna lade'axa teeki eya'aya Jerusalén‑ni kini ute náya len ka benne chi ankake ge Tata Do Yebáha se'e niha,
ROM 15:26 kumu ka benne chi ria leke Cristuha se'e daka Macedonia‑ni lhe daka Acaya‑ni lhe, ka benneha bedá leke bettupake belhiu kini eyya ge ka benne abittu geke tee se'e Jerusalén‑ni, delába ka benne chi ankake ge Tata Do Yebáha.
ROM 15:27 Ka benne se'e daka Macedonia‑ni lhe daka Acaya‑ni lhe, ka benneha belaba leke deki tseba anka uttupake belhuha. Aníha benke kumu dágaba loke uteke belhiu len ka benne abittu geke tee se'e Jerusalén‑ni, kumu ganna ka benne abittu ankake nu Israel chi redí baake elha tse tee yebáha, delába nu bete Tata Do Yebáha len ka nu Israel‑ni, la'ania nna ka benne chi redí baake nuha tegaba ki uteke ttu latti nu tee geke yiesi lo yu‑ni len ka benne Israel‑ni.
ROM 15:28 Laxkala ganna chi gwadha'anaa belhuha lhe chi bedíke nuha lhe, la'ania nna tti iriaya tsiaya España. Tti chi yu'a neda diayaha nna ttea ata se'ele‑na.
ROM 15:29 Neti yu xeaya ganna chi bisiaya ata se'ele‑na, la'ania nna che tamaa elha gwedeaka lasi rute Cristuha geri'i.
ROM 15:30 Rinnabaa lenle xa betsi to, gwaluinchi lo ni'a ge Jesucristu benne anke Xxanari'iha lhe de elha si'i lasi rute Espíritu ge Tata Do Yebáha, de nuha nna rinnabaa len lebi'i ute nále len neti kini innabari'i kia len Tata Do Yebáha,
ROM 15:31 ki odilábie neti kini ka nu se'e daka Judea‑ni, ka nu abittu ria lekani Cristuha, abittu bi udhakakana neti. Lhe anágaba innabagabale lenie kini ka betsi to geri'i se'e lhe'esi Jerusalén‑ni ulabike nu esin lania.
ROM 15:32 Aníha kini dhu itta lasia ganna chi bisiaya len lebi'i lhe ganna Tata Do Yebáha aka lebie nna xen su lasiba dhoa len lebi'i lhe eyaka lasia lhe.
ROM 15:33 Tata Do Yebáha, benne ruse'ebie ri'i xen su lasi, benneha aka lenie iyá ttele. Amén.
ROM 16:1 Rinnabaa lenle latsiru ulabile nan Febe‑na. Labie nuná anke betsi to geri'i rute nábie len ka benne chi ria leke Cristuha se'e lhe'esi Cencrea‑ni.
ROM 16:2 De chi anke ge Tata Xisiha, de nuha nna gwalulabie. Gwaluni atti galába runi ka benne chi ria leke ge Tata Xisiha lhe anágaba ute nále lenie ttixka bixa iyasanie, kumu anágaba labie yalhá chi bete nábie len ixe ka benne attigaba chi benie len neti.
ROM 16:3 Gwalugwe Priscila‑na lhe Aquila‑na ttu padiuxi kia. Ka benne‑na nuná riben lenia ke lo sina ge Jesucristuha.
ROM 16:4 Lake axtaba bexunnina geke gattike de bodiláke neti. De nuha nna laa sunruga neti rugwea ke ixkixaru, anágaba iyágaba ka benne abittu ankake nu Israel, delába ka benne chi ria leke Cristuha, ka benneha rugwegabake ka Priscila‑na ixkixaru.
ROM 16:5 Gwalugwegaba ttu padiuxi kia ka benne chi ria leke Cristuha ritupake lhe'e yo'o ge ka benne‑na. Anágaba betsi to kia Epéneto‑na, gwalugwegabe ttu padiuxi kia. Labie nuná uke benne sisi'a tte ugía lebie Cristuha daka Asia‑ni.
ROM 16:6 Gwalugwegaba María‑na ttu padiuxi kia. Benne‑na yalhá chi bete nábie len lebi'i.
ROM 16:7 Gwalugwegaba Andrónico‑na lhe Junias‑na ttu padiuxi kia. Ka benne‑na ankagabake nu Israel attiba neti, lhe anágaba chigaba uttake lisiyya len neti lhe. Lake nuná ankake apóstol ka benne riaru le ka benne. Anágaba nna lagabake nuná lade'a tte ugía leke Cristuha tti neti.
ROM 16:8 Amplias‑na, gwalugwegabe ttu padiuxi kia. Benne‑na rakati gebie de chi anke ge Tata Xisiha.
ROM 16:9 Gwalugwegaba Urbano‑na ttu padiuxi kia. Benne‑na nuná riben lenri'e lo sina ge Jesucristuha lhe anágaba gwalugwegaba betsi to kia Estaquis‑na, ttu padiuxi kia.
ROM 16:10 Apeles‑na, gwalugwegabe ttu padiuxi kia. Benne‑na labí reyadi gaabie lo neda ge Cristuha, tsitsiba due lhe anágaba ka benne ge Aristóbulo‑na, gwalugwegaba ke ttu padiuxi kia.
ROM 16:11 Herodión‑na, gwalugwegabe ttu padiuxi kia. Benne‑na anke nu Israel attiba neti, lhe anágaba gwalugwegaba ka benne ge Narciso‑na ttu padiuxi kia, delába ka benne chi ria leke Tata Xisiha.
ROM 16:12 Trifena‑na lhe Trifosa‑na lhe, gwalugwegaba ke ttu padiuxi kia. Ka benne‑na nuná ribenke lo sina ge Tata Xisiha. Anágaba Pérsida benne raka si'itie na, gwalugwegabe ttu padiuxi kia. Benne‑na yalhá chi urenie lo sina ge Tata Xisiha.
ROM 16:13 Rufo‑na, gwalugwegabe ttu padiuxi kia. Benne‑na tseba rixúbie lo sina ge Tata Xisiha lhe anágaba nan gee‑na gwalugwegabe ttu padiuxi kia. Benne‑na rakatie attiba nan kia.
ROM 16:14 Lhe anágaba Asíncrito‑na lhe Flegonte‑na lhe Hermas‑na lhe Patrobas‑na lhe Hermes‑na lhe adíru ka betsi to geri'i se'e turo'o len ka benne‑na lhe, gwalugwegaba ke ttu padiuxi kia.
ROM 16:15 Gwalugwegaba ttu padiuxi kia Filólogo‑na lhe Julia‑na lhe Nereo‑na lhe anágaba nuila danni‑na lhe Olimpas‑na lhe adíru ka benne chi ankake ge Tata Do Yebáha se'eke turo'o len ka benne‑na lhe.
ROM 16:16 Lhe anágaba lebi'i gwalugwegaba luesile ttu padiuxi lhe gwaligo ttu xxaga luesile lhe. Iyába ka benne ria leke Cristuha se'e nii ridhelhake ttu padiuxi gele.
ROM 16:17 Betsi to, rinnabaa len lebi'i uyú gele len ka nu reki naa, ka nu rilha'akana lhe'e luesile lhe runnittikana le de rule'ekinna le nu abittu raxxína len ka tisa ka nu chi bidetile. Abittu utsále ka nuná.
ROM 16:18 Kumu ka nuná labí rixúkana lo sina ge Cristu benne anke Xxanari'iha. Suna geba ka nuná rulaba lekani. Len elha ro'o lhe'e gekani ridí yiekana ka benne abittu tte yuke nna ria tteba leke gekani.
ROM 16:19 Iyába ka benne chi yuke deki lebi'i ankale nu gwedo tisa. De nuha nna du itta lasia gele, deba nna raka lasia ixuinle elha rieni gele‑na kini uinle nu tse, abittu ixuinle na kini uinle nu satsa,
ROM 16:20 nna Tata Do Yebaa benne ruse'ebie ri'i xen su lasi, benneha chi tte dabigana unie kini lebi'i dhaale lo nu xxegwiha. Anágaba nna Jesucristu benne anke Xxanari'iha edá lebie aka lenie le.
ROM 16:21 Timoteo benne riben lania lo sina ge Cristuha, ridhelhagabe ttu padiuxi gele. Anágaba Lucio lhe Jasón lhe Sosipater, ka benne‑ni ankake nu Israel attiba neti nna ridhelhagabake ttu padiuxi gele.
ROM 16:22 Neti Tercio, rukuaya yetsi ridhelha Pablu‑ni gele. Anágaba neti, de selaa len Tata Xisiha nna ridhelhagabaa ttu padiuxi gele.
ROM 16:23 Gayo benne rutebie lisie‑ni kini reya'anaa lhe anágaba rutebie na kini ritupa ka benne ria leke Cristuha, benne‑ni ridhelhagabe ttu padiuxi gele. Anágaba Erasto benne anke tesoreru ge yiesi‑ni, ridhelhagabe ttu padiuxi gele itupa lenie betsi to geri'i, benne tee lábie Cuarto.
ROM 16:24 [Jesucristu benne anke Xxanari'iha, edá lebie aka lenie iyá ttele. Amén.]
ROM 16:25 Xxeniba ra le Tata Do Yebaa benne gwa raka gebie ruse'e tsitsie le lo neda geeha attiba raba ka tisa ge Jesucristuha, delába ka tisa rigixxi'aya‑ni. Nu rigixxi'aya‑ni raxxína na len nu rule'eni Tata Do Yebáha ri'i nu labí chi yu ka benne ttuha, delába nu tenie gatsi attili lani kwe yiesi lo yu‑niha.
ROM 16:26 Ttaka nnanna chiba yuri'i nu tenie gatsiha. Kumu lo ka yetsi bodha'an ka profeta ge Tata Do Yebáha, niha chi rigixxi'ake ge nuha. Tata Do Yebaa benne doe ttu dia liiha, labe bedha'ane deki iyába ka benne unake ge nu tenie gatsi ttuha. Aníha kini iyábake tsia leke bie lhe udoke tisa gebie lhe.
ROM 16:27 Tata Do Yebaa benne sunruba labie anke benne yuu, labie inná xxeni lebie ttu dia lii de nu gwate Jesucristuha. Amén.
1CO 1:1 Neti Pablo bedá le Tata Do Yebáha uxie neti kini akaa apóstol ge Jesucristuha. Neti lenia betsi to geri'i Sóstenes‑ni
1CO 1:2 ridhelhatu yetsi‑ni gele, lebi'i ka benne chi ria lele ge Tata Do Yebáha se'ele lhe'esi Corinto‑na. Lebi'i nuná chi ulesie kini akale gebie de babale len Jesucristuha. Biyaxile ki akale gebie itupa lenle iyá ka benne gaxaba se'eke ria leke ge Jesucristu benne anke Xxanari'iha. Benneha anke Xxanake lhe Xxanari'i lhe.
1CO 1:3 Xxudiri'i do yebáha lhe Jesucristu benne anke Xxanari'iha lhe, lake edá leke aka lenke le lhe use'eke le xen su lasi lhe.
1CO 1:4 Satíaba rugwea Tata Do Yebaa kiaha ixkixaru gele de redá lebie raka lenie le, de babale len Jesucristuha.
1CO 1:5 Kumu de babale len benneha, de nuha nna chi bete tama Tata Do Yebáha elha tse gele, kini rakaru gele rinnele lhe kini yúrule gebie lhe.
1CO 1:6 Nuní runna liina deki nu chi utixxi'entu le ge Cristuha, ankaba nuha nu gwalí.
1CO 1:7 De nuní nna lebi'i labíru riyasinle attu elha tse ute Tata Do Yebáha laka se'ele ribedale ganna chi isia sá esia Jesucristu benne anke Xxanari'iha yiesi lo yu‑ni.
1CO 1:8 Tata Do Yebáha‑gaba use'e tsitsie le axtaliba ganna chi bisia sá esia Jesucristuha, kini abittu bi ge itisale la'ania.
1CO 1:9 Tata Do Yebáha labí rotsea tisa ge benneha, gwa ruinba benneha nu chi rabie. Labie uxie le kini tse'ele len Xi'inie Jesucristu benne anke Xxanari'iha.
1CO 1:10 Xa betsi to, rinnaba ditia len lebi'i, gwaluinchi lo ni'a ge Jesucristu benne anke Xxanari'iha, ttúba inne iyále lhe ttúba nu udo ikile lhe turo'ogaba gwalulaba lele lhe. Abittu ilha'a lhe'e luesile.
1CO 1:11 Xpeya le aní xa betsi to kia, kumu ka benne se'e lhe'e lisi Cloé‑ni chi utixxi'akanie neti deki lebi'i se'e tilhabale.
1CO 1:12 Ráke deki lebi'i nu gwea gweaba rale. Ttu chupale rale deki lebi'i taale neti, attu chupale nna redenále deki lebi'i taale Apolos‑ni nna attu chupale nna redenále deki lebi'i taale Pedro‑ni nna adíle nna redenále deki lebi'i taale Cristuha.
1CO 1:13 Ttu nu innaba tisaa le, ¿si la'aba lhe'e Cristuha? Lhe, ¿si netila nuha utáya lo ya kurusi utixaa ge ka tulha gele‑na ak? O, ¿si láya bedettikana tti begadikana le indaha? ¡Ko'o, labí!
1CO 1:14 Ixkixaru rugwea Tata Do Yebáha, kumu ni ttúle labí begadia le inda, sunruba Gayo‑ni lhe Crispo‑ni lhe begadia inda.
1CO 1:15 De nuha nna ni ttúle labí aka gele innále deki láya ugwetti tti udile indaha.
1CO 1:16 Ai, rexxagaba lasia deki begadigabaa inda ka benne se'e lhe'e lisi Estéfanas‑ni. Iki de ka benneha nna lanúru nu radú lasia begadia inda.
1CO 1:17 Kumu Cristuha laa udhelhaga benneha neti kini ugadia ka benne inda; udhelhalee neti kini kixxi'aya ka tisa geeha. Aná nna labí rinnea tisa elha, luesi nu rinne ttu nu yuu. Aníha runia kini abittu kuaya lidhaka nu gwate Cristuha lo ya kurusiha.
1CO 1:18 Ka nu chi diakana ata tse'e lookana, ka nuná tti ratu deki Cristuha uttie lo ya kurusiha, rálakana deki tisa ge nu raka ikibani nuní rinnetu. Ttaka lenri'i ka benne rodilaa Tata Do Yebáha, lenri'i ka tisa rigixxi'iatu‑ni, ka benne‑ni rule'eke nu tsitsi ra le Tata Do Yebáha.
1CO 1:19 Kumu lo ka yetsi ata dia ka tisa geeha, ree: Neti utse'e loobaa elha yuu ge ka nu yuu xxatta‑na, lhe ku'uba ni'aya elha rieni ge ka nu raka gekinna lhe.
1CO 1:20 Ganna aníha aka, ¿gála eya'an ka nu yuu xxattana ganna? Lhe, ¿gála eya'an ka nu tee elha rieni gekinna ganna? Lhe anágaba, ¿gála eya'an ka nu rotsi'inu lekani tti rinnekana ge nu yúkana ge yiesi lo yu‑ni ganna? ¿Laaba ganna Tata Do Yebáha chiba beyonie elha yuu ge ka nu se'e yiesi lo yu‑ni attiba ttu nu raka ikini?
1CO 1:21 Gwalí galá, kumu Tata Do Yebáha anke benne yuu nna labí begwelhe kini uinbia ka benne se'e yiesi lo yu‑nie len elha yuu gekeha, sinuki bedála lebie bodilábie ka benne ria leke ge ka tisa rigixxi'atu‑ni, delába ka tisa ka nu rákana deki ankakana ge ka nu raka ikikani.
1CO 1:22 Kumu ka nu Israel‑ni milagrula raka lekani ilákinna nna ka nu abittu ankakana nu Israel nna rakala lekani iyienkinna ka tisa ka nu chekana elha yuu,
1CO 1:23 ttaka ri'itu, ge Cristu benne utábie lo ya kurusiha‑ba rigixxi'atu. Nu rigixxi'atu‑ni rutsetsinna ka nu Israel‑ni nna ka nu abittu ankakana ka nu Israel nna rákana deki ge nu raka ikibani anka nu rigixxi'atu‑ni.
1CO 1:24 Ttaka ka benne chi uxi Tata Do Yebáha kini ria leke gebie, sila ankake nu Israel o abittu, len ka benne‑ni Cristu benne rigixxi'atu geeha, labie rule'ebie nu tsitsi ra le Tata Do Yebáha lhe rule'ebie elha yuu ge benneha lhe.
1CO 1:25 Kumu nu ben Tata Do Yebáha nu rákana deki ankana ge nu raka ikini, nuha ankarulana ge nu yuu attichula nu anka elha yuu ge ka benne se'e yiesi lo yu‑ni lhe anágaba nu rákana deki labí ra tsitsi le Tata Do Yebáha, nuha‑la ra tsitsiru leni attichula nu tsitsi ra le ka benne se'e yiesi lo yu‑ni.
1CO 1:26 Gwalodhú lele xa betsi to, gasina ankale tti uxi Tata Do Yebáha le lo neda geeha. La'ania ttu chuparubale ra ka benne deki ankale nu yuu lhe anágaba labí ixele chi ankale nu ra xxeni leni lhe lanú tte ixele chi ankale nu loni la'ania.
1CO 1:27 Ttaka Tata Do Yebáha bekwelee ka nu ra adí ka benne deki rakaba ikikani kini aníha nna ugwebie elhittu ka nu yuu‑na lhe anágaba nna bekwelee ka nu abittu ra tsitsi lekani kini ugwebie elhittu ka nu ra tsitsi lekinna.
1CO 1:28 Tata Do Yebáha, ka nu abíla ru'u le ka benne se'e yiesi lo yu‑ni lhe ka nu rigu'ula ni'ake lhe, delába ka nu lanú nu ankakana, ka nuha‑la bekwebie kini borexxa gaabie le ka nu ra xxeni lekinna.
1CO 1:29 Aníha kini anuttu nu inná xxeni leni arlo Tata Do Yebáha.
1CO 1:30 Lagabe benie kini lebi'i ibabale len Jesucristuha lhe anágaba bixúnie benneha ki betebie elha yuu geeha lenri'i lhe benie kini Jesucristuha kuabie yua kwe'eri'i ge nu ruinri'i lhe anágaba ulesie ri'i kini akari'i gebie lhe bodilábie ri'i lo ka tulha geri'i lhe.
1CO 1:31 Aníha benie kini raxxína nu ra lo ka yetsi geeha ata dia ra: “Ganna ttu benne raka lebie inná xxeni lebie, benneha uinlee kini inná xxeni le Tata Xisiha.”
1CO 2:1 Xa betsi to, tti bitaa ata se'ele‑na, tti utixxi'ania le ge nu ruin Tata Do Yebáha, laa bisiagaa rinnea ka tisa elha o rinnea ka tisa ge nu yuu xxatta.
1CO 2:2 ¡Ko'o! Neti tti udoa len lebi'iha, benbaa deki labí yua ge attu bixa nu subi, sinuki sunruba ge Jesucristuha yua nna utixxi'aya deki benneha utábie lo ya kurusi.
1CO 2:3 Tti bisiaya len lebi'iha, itú rasibati lhe itú rixidibaa la'ania, labí tsitsi re lasia.
1CO 2:4 Tti unnea utixxi'ania le ge Jesucristuha, labí unnea tisa ge nu yuu kini lebi'i nna ugía lele kia, sinuki Espíritu ge Tata Do Yebáha‑ba uka lenie neti ki bele'enia le nu tsitsi ra leeha.
1CO 2:5 Aníha benia kini lebi'i nnanna chi ruxxen lele ge Cristuha de bilenle nu tsitsi ra le Tata Do Yebáha, labí ruxxen lele gebie de biyieninle nu rinne ka nu yuu‑na.
1CO 2:6 Gwalí galá, ri'itu rigixxi'entu ka benne chi se'e tsitsike lo neda ge Tata Do Yebáha ka tisa ka nu chekana elha yuu, ttaka labí nu anka elha yuu ge yiesi lo yu‑ni nuní rigixxi'atu, nigaba labí nu anka elha yuu ge ka nu rinnabia se'e nnanna, kumu ka nu rinnabia‑na tse'e loobakana.
1CO 2:7 Ri'itu rigixxi'abatu nu anka elha yuu ge Tata Do Yebáha, delába nu tenie gatsiha nu labí yu ka benne, nu chila bedha'ane attili lani kwe yiesi lo yu‑niha kini ixúna lenri'i, kini anáchu nna saría tsena ri'i.
1CO 2:8 Iyá nuní labí ute dani ka nu rinnabia se'e yiesi lo yu‑ni, kumu gannala ttixka ute dákinna, la'ania nna abittula betákana Cristu benne ra xxeni leeha lo ya kurusiha ganna ttixka.
1CO 2:9 Ttaka attiba ra lo ka yetsi ge Tata Do Yebáha ata dia ra: Ka benne rakakanie ge Tata Do Yebáha chiba ga'ananie ugwebie ke ttu nu labí chi bilákanie lhe nigaba labí chi biyienkanie geni lhe nigaba labí chi belaba leke deki dhike na lhe.
1CO 2:10 Ttaka Tata Do Yebáha bixúnie Espíritu geeha kini utixxi'anie ri'i iyá nuní, kumu Espíritu geeha iyába rutte da benneha, axtaba nu rulaba lhi'u le Tata Do Yebáha rutte dabie.
1CO 2:11 Kumu ttibanka nuxa ttu benne lanú nu yuna nu rulaba lhi'u le benneha, sunruba espíritu geeha gwa yue nu rulaba lebie. Anágaba Tata Do Yebáha, lanú attu benne yue bixa rulaba le benneha, sunruba Espíritu geeha gwa yubie nu rulaba le benneha.
1CO 2:12 Ri'i laa nu anka elha rieni ge ka benne se'e yiesi lo yu‑niga uxíri'i. Ri'i uxílari'i Espíritu nu bete Tata Do Yebáha kini ute denri'i nu tse bedá lebie betebie geri'i.
1CO 2:13 Ri'itu nuníba rigixxi'atu, labí rinnetu len tisa nu yu'uba ikitu. Ri'itu rinnebatu nu rule'eba Espírituha, rigixxi'abatu gebie len ka benne chi doe lhe'e lastoke.
1CO 2:14 Ttu nu abíba chi do Espíritu ge Tata Do Yebáha lhe'e lastoni, labí rite den nuha nu rule'e Espírituha, kumu nuha rakalinna deki nu rule'e Espírituha, ge nu raka ikibani anka nuha. Labí aka ge nuha tte denna nu rule'e Espírituha, kumu sunruba Espírituha unie kini utte dana.
1CO 2:15 Ttaka benne chi do Espírituha lhe'e lastobie, ge iyába rite den benneha, ttaka lee nna lanú nu rite denna ge nu rulaba lebie,
1CO 2:16 kumu attiba ra lo ka yetsi ge Tata Do Yebáha: “Lanú nu rite denna bixa rulaba le Tata Xisiha, nigaba lanú nu aka geni ule'enna benneha.” Ttaka ri'i gwa rite dábinri'i nuní kumu rulaba leri'i ttiba rulaba le Cristuha.
1CO 3:1 Betsi to, neti tti udoa len lebi'iha labí uka kixxi'ania le attiba rigixxi'ania ka benne chi rudoruke tisa ge Espíritu ge Tata Do Yebáha. Bele'ebania le attiba rule'enia ka nu labí chi rudokana tisa ge Espírituha, sinuki sa ruinbakana nu yu'uba ikikani, ruinbakana atti galába runi ka nu si bedaxxukana tisa ge Cristuha.
1CO 3:2 Utixxi'abania le ka tisa ka nu dika utte dáxxile. Tti benia aníha ttisidiba xisiba nuha begi'aya le, labí nu ro iria nuha begoa le, kumu la'ania lebi'i labí chi dhaale tte denle nu rigixxi'aya la'ania. Axtaba nnanna labí ridaale tte denle nuha,
1CO 3:3 kumu lebi'i nu yu'uba ikile sa ruinle. Sa rutía diiba le luesile lhe sa ru'ubale gwelisa luesile lhe. Tti ruinle aní, ¿laaba ganna nu yu'uba ikile nuha sa ruinle, ruinbale attiba ruin ka benne se'e yiesi lo yu‑ni?
1CO 3:4 Kumu tti rale: “Neti dua len Pablu‑ni”, adíle nna redenále: “Neti dua len Apolos‑ni”, tti rale aní, ¿laaba ganna ruinbale attiba runi adí ka benne se'e yiesi lo yu‑ni?
1CO 3:5 Nianna, ¿núla nuha anka Apolos‑ni lhe núla nuha anka Pablu‑ni ganna? Ri'itu ankabatu benne rixútu lo sina ge Cristuha xa. Bixúnie ri'itu kini uxitu le kini ugía lele gebie nna kua ttu ttutu ruinbatu sina nu betebe lentu ki uintu.
1CO 3:6 Neti Pablo, neti sisi'a tte utixxi'ania le ka tisa geeha, benia attiba runi ttu nu rada xua. Apolos‑ni nna bele'e chiettirunie le, benie attiba runi ttu nu regilana nu chi údaha. Ttaka Tata Do Yebáha‑ba runie kini riyelha nu chi údatuha.
1CO 3:7 Laxkala nigaba benne radaha lhe nigaba benne regilaha lhe labí daka ka benneha, sinuki Tata Do Yebaa benne runie ki riyelha nu chi údatuha, benneha nuha daka.
1CO 3:8 Benne radaha lhe benne regilaha lhe turo'oba daka ka benneha. Laa kiga de nuha nna Tata Do Yebáha ugwebe ke nu ralhake dhike kua sina benbake.
1CO 3:9 Neti Pablo lhe Apolos lhe, ri'itu ankatu benne rixútu lo sina ge Tata Do Yebáha. Lebi'i nna ankale ttiba ttu yu gebie kini ribenie sina loni lhe ankabale ttiba ttu yo'o gebie nu diabie rudobie.
1CO 3:10 Tata Do Yebáha bedá lebie betebie len neti kini kixxi'aya ka tisa geeha. Neti ankaa attiba ttu benne raka gebie runie ka yo'o. Neti ulekia xilatti yo'oha, attu benne subi nna diabie rilhidhe ka de'e ge yo'oha nna kua ttu ttu ka benne rukuake yo'oha teeki ulannike ganna gwa diake rukua tseke nuha.
1CO 3:11 Kumu lanú nu aka geni kwekina xilatti attu yo'o nu abittu taxxína na len nu chi reha, delába Jesucristuha nuha anke xilatti yo'oha.
1CO 3:12 Iki xilatti yo'oha gwakaba ge ka benne ukuake oru lhe plata lhe íyya ragalha lhe o si ukuake breta lhe ixxi lhe ixi yetti lhe.
1CO 3:13 Ttaka ganna chi bisia sá aka elhuxtisi ge ka benne, la'ania nna ule'e ttixa anka sina ben ttu ttu ka benne bekuake yo'oha, kumu teeki tte nu benkeha lo giha nna giha‑liba unna liina ganna guchía nu benkeha.
1CO 3:14 Ganna si nu benkeha gwa bechíabana atti uxuana lo giha, la'anialigaba nna gwadíba ka benneha nu tse ralhake dhike.
1CO 3:15 Ttaka ganna sina benkeha itebana tti xxuana lo giha, la'ania nna unnittibake elha tse ralhake dhikeha, lake nna gwalábake, tiski ttiba ttu nu uxunni lo gi, aníha‑ba sateke.
1CO 3:16 ¿Si lagwa gwa yule deki lebi'i nuná ankale yotu ge Tata Do Yebáha, Espíritu geeha nna doe lhe'e lastole?
1CO 3:17 Ganna ttu benne utse'e looe yotu ge Tata Do Yebáha, Tata Do Yebáha nna utse'e loogabe benne uni aníha, kumu yotu geeha anke le'a nna lebi'i nuná ankale yotu geeha.
1CO 3:18 Abittu uin lele innále: “Ri'itu ankatu nu yuu”, delába nu anka elha yuu ge ka benne se'e yiesi lo yu‑ni, delo nna abígaba raka gele. Lebi'i gwaluinla ge nu abittu yuu kini arlo Tata Do Yebáha isinle akale gwalíga nu yuu.
1CO 3:19 Kumu nu anka elha yuu ge ka benne se'e yiesi lo yu‑ni, nu abí ixúba anka nuná len Tata Do Yebáha. Kumu lo ka yetsi geeha dia ra: “Ka nu yuu‑na la lo elha si'inu gekinnaba rukinni Tata Do Yebáha kana.”
1CO 3:20 Lhe rágaba lo ka yetsi geeha: “Tata Xisiha gwa yube deki nu rulaba le ka nu yuu‑na, labí ixú nuná.”
1CO 3:21 Laxkala lebi'i ni ttúle abittu uinle deki ra xxeni lele de babale len ttu benne; kumu iyába nu raka lhe iyába nu se'e yiesi lo yu‑ni gebale anka ka nuní:
1CO 3:22 sila neti Pablo lhe sila Apolos‑ni lhe sila Pedro‑ni lhe sila yiesi lo yu‑ni lhe o sila elha nabani geri'i lhe sila elhuttiha lhe sila nu se'eri'i nnanna lhe sila nu si daa lhe, iyába nuní ankana gele.
1CO 3:23 Lebi'i nna ankale ge Cristuha, Cristuha nna anke ge Tata Do Yebáha.
1CO 4:1 Laxkala iyále teeki gapale ri'itu kwenta deki ankatu benne rixútu lo sina ge Cristuha lhe ankatu benne chi ga'anatu ki ule'etu ka tisa ka nu teni Tata Do Yebáha gatsi ttuha.
1CO 4:2 Aná nna ri'itu ka benne rule'etu ka tisa ge Tata Do Yebáha teeki akatu ka nu rudotu tisa.
1CO 4:3 Neti labí retabiti ganna innele kia bixa runia, nigaba retabiti ganna ttu nu runi elhuxtisi innena kia bixa runia, nigaba neti labí inne kia ge nu runia.
1CO 4:4 Kumu neti yu xeabaa labí bixa nu satsa runia, ttaka laa kiga de nuha nna innía deki tseba runia. Tata Xisiha‑ba innábie ganna si ruin tsea o abittu.
1CO 4:5 Laxkala abittu iyubaxxinle innele. Axtaliba ganna chi esia Jesús benne anke Xxanari'iha yiesi lo yu‑ni, la'anialiba nna unie kini ilá nu raka gatsiha lhe kixxi'e nu rulaba le ka benne lhe. La'aniagaba nuha kua ttu ttu ka benne kwea tse Tata Do Yebáha ke ge nu tse benke.
1CO 4:6 Betsi to, rigixxi'ania le ge nu runia‑ni lhe ge nu runi Apolos‑ni lhe kini ixúna len lebi'i. Aníha ki tte denle nu ra ttu tisa nu rinne ka benne, delába tisa nu ra: “Gwaluinba nu raba lo ka yetsi ge Tata Do Yebáha, abittu ttebiale.” Aníha kini abittu uinle ttaba de babale ttu benne nna ilhida gaale attu benneha.
1CO 4:7 Kumu lebi'i, ¿núla chi rana le deki dakarulale attichula adí ka benne? ¿Si tee ttu nu abittu chi bete Tata Do Yebáha gele? Ganna chiba betebie ttu bixa gele, ¿beakala nna ruinle ttaba, sa ruinbale deki titúbale biselinle nu tee geleha?
1CO 4:8 ¡Karubárule, chiba uxíle iyá nu raka lele dhile! ¡Nnanna chiba ankale nu tee xxatta geni! ¡Attiba ttu nu rinnabia chi ra lele nnanna, labíru riyasinle getu! ¡Kwadila gwalíginle innabiale, kini anágaba ri'itu innabiagabatu len lebi'i!
1CO 4:9 Neti rakati ri'itu ka apóstol ge Jesucristuha tuttíruba lo xubana chi bese'e Tata Do Yebáha ri'itu. Attiba ttu nu chi biginnina lo ka uxtisi ki gattina, aníha‑ba chi ankatu. Chiba beyakatu ttiba ttu gwegía ge ka benne se'e yiesi lo yu‑ni lhe ge ka anjeliha lhe.
1CO 4:10 ¡Ri'itu rákana nu raka ikibani ankatu de danalhatu Cristuha, lebi'i nna de du lenle Cristuha nna yalháruba yule! ¡Ri'itu labí tsitsi re letu, lebi'i nna yalhá tsitsi re lele! ¡Ri'itu ankatu ka nu abittu ru'u le ka benne, lebi'i nna ankale ka nu ria xxatta le ka benne!
1CO 4:11 Loora nnanna sa rattibatu ubina lhe ratú rebisiba letu lhe, itú tee xunuba latitu rekitu, lhe anágaba nna gwadú riyayatu, lhe naa lhe niiba rekitu de labí lisitu tee,
1CO 4:12 lhe anágaba ratettibatu ribentu sina kini risela nu rotu. Tti rigekana ikitu, ri'itu nna latsiruba rulisatu kana; atti ridú nookana ri'itu, ri'itu nna gwa rutto ruchíabatu lokani;
1CO 4:13 atti rinne satsakana getu, ri'itu nna latsiruba rekabitu gekani. Ttiba ttu nu abí ixú ankatu yiesi lo yu‑ni lhe ttiba ttu ixi nu chi rigu'una kana, aníha‑ba ankatu axtaba nnanna.
1CO 4:14 Laa rinnegaa lo yetsi‑ni aní ki ugwea le elhittu. ¡Ko'o! Sinuki rulisaa le aní ki otte dale ge nu ruinle. Rulisabaa le atti galába rulisaa ttu xi'inia rakati geni.
1CO 4:15 Kumu meskiba ganna se'e ttu tsii mili ka nu rule'ekinna le ge Cristuha, ttaka xxudile nna lanú ixe se'e, kumu ttúruba neti ankaa xxudile de utixxi'ania le ka tisa tse kini bisinle ukale ge Jesucristuha.
1CO 4:16 De nuha nna rinnaba ditia len lebi'i ki uinle atti tte runia‑ni.
1CO 4:17 Delo ni'a ge nuní nna udhelhaa Timoteo‑na ata se'ele‑na. Lana ankana attiba ttu xi'inia rakati geni lhe ankana ttu benne rudo tsitsina tisa ge Tata Xisiha lhe. Lana nuná odhúna lele gasina anka elha ruin kia de dua lo neda ge Cristuha. Ruinbaa atti tteba chi rule'enia iyá ka benne chi ria leke ge Cristuha se'eke lhe'e iyába ka yiesi ata rekia rigixxi'aya.
1CO 4:18 Lebi'i se'e ttu chupale ruinle deki ra xxeni lele kumu de rakinle labíru itaa etelannia le.
1CO 4:19 Ttaka gwadá ttegaa etelannia le ganna Tata Xisiha aka lebie. Labí itaa suna gwelanni ttixa rinne ka nu ruinkana deki ra xxeni lekinna, sinuki itaa ki ulannia bixa nu xxeni raka gekani ruinkana.
1CO 4:20 Kumu ka benne chi rinnabia Tata Do Yebáha ke labí sun tteruba inneke ge bixa raka geke ruinke, sinuki len elha ruin geke ule'e looke nu raka geke ruinke.
1CO 4:21 Nianna, ¿gasina raka lele isiaya ata se'ele‑na? ¿Si itaa len ya diti ak? O, ¿si isiaya ulisaa le latsitoru len elha si'i lasi ak?
1CO 5:1 Lebi'i chi daa tisa gele rákana deki nuxa ttúle nuná bedo lenle nuila nu berupa ge xxudile‑na. Luesi nu satsa raka lagwi gele‑na, nila ka nu abittu chi ria lekani ge Tata Do Yebáha, nila ka nuha a ruinkana aná.
1CO 5:2 ¡Lebi'i nna bittuba retabinle ge nu ruinle‑na, xxeniba sa ra lele! Gwarrana du satsa lele lhe releninle ge nubiyú ben aná lhe gwarrana bebeale nuná lagwi gele lhe.
1CO 5:3 Neti meskiba labí dua ata se'ele‑na, ttaka ttisidiba gwa dubaa len lebi'i kumu satíaba rexxa lasia le. Laxkala ttisidiba netiba nuha dua naa. De nuha nna Jesús benne anke Xxanari'iha rutebie lo neda kia ki ria: “Nu beni aná ralhaba nuná dhina elha disa.” Laxkala lebi'i atti etupale innele ge nu ben aná, neti gwa dúgaba espíritu kia‑ni len lebi'i la'ania, lhe anágaba Jesús benne ra xxeni leha gwa dúgabe len lebi'i la'ania.
1CO 5:5 Atti etupaleha utele nubiyú ben satsa‑na lasi ná nu xxegwiha, kini tse'e loo bela latini. Aníha kini ganna chi bisia sá esia Jesús benne anke Xxanari'iha, la'ania nna gwalaa espíritu geniha.
1CO 5:6 Laxkala labí tse nuná ruinle deki ra xxeni lele. Lebi'i chiba yule deki kua dii nu ria lhe'e yiediha, ttuxka'aru nuha ria lhe'e nuha nna chi rilhidhana lhe'e itú yiediha.
1CO 5:7 Laxkala gwaluni attiba ruin ka nu Israel‑ni, ka nuha rigu'una kana ka kua dii yaxxu tee lhe'e lisikaniha atti lanila isia laní Pascua. Anágaba lebi'i gwalikwea nu ben satsa‑na lagwi gele kini eyakale benne kubi arlo Tata Do Yebáha, kumu lebi'i anába kubi chi benie le attili ugía lele geeha. Kumu Cristu benne anke neru ge laní Pascuaha, chiba bettikana benneha kini utixe geri'i.
1CO 5:8 Laxkala ri'i uinri'i laní, ttaka bittu udelhari'i kua dii iki yettaxtila uinri'i la'ania, delába abitturu itisin luesiri'i lhe abitturu uinri'i nu satsa lhe, sinuki uinlari'i laní len yettaxtila nu abittu kua dii dia ikini, delába itú iki itú leri'i uinri'i nu anka gwalí.
1CO 5:9 Lo yetsi udhelhaa len lebi'i ttuha, lo nuha utixxi'ania le ria: “Abitturu utsále ka nu risákana nu subi subi.”
1CO 5:10 Lo yetsiha laa rigaa deki abitturu utsále ka nu abittu ria lekani Cristuha nna risákana nu subi subi lhe raka lekani gatta xxatta gekani lhe ruinkana ubana lhe ria lekani ge ka nu labí gwalíga ankakana diosi lhe. Kumu gannala ttixka xpeya le abittu utsále ka nu abittu ria lekani Cristuha, la'ania nna teeki iriale yiesi lo yu‑ni kini abitturu utsále kana.
1CO 5:11 ¡Ko'o! Sinuki xpeya le lo yetsiha abitturu utsále ka nu rákana: “Ri'itu chi ria letu Cristuha”, ttaka nna sa risábakana nu subi subi, o sa rakaba lekani gatta xxatta gekani, lhe sa riaba lekani ge ka nu labí gwalí ankakana diosi, lhe sa ankabakana ka nu rinne satsa ge ka benne lhe sa ankabakana ka nu dusi lhe sa ruinbakana ubana lhe. Ka nu ruin aní, abitturu utsále kana, ni yetta a goru lenle kana.
1CO 5:12 Kumu neti labí elha ralhaa unia elhuxtisi ge ka nu abittu chi ria lekani Cristuha. Tata Do Yebáha‑ba ralhe unie elhuxtisi ge ka nuná. ¿Laaba ganna ka nu chi ria lekani Cristuha, ka nunonna ralhale uinle elhuxtisi gekani? Laxkala gwalikwea nu ben satsa‑na lagwi gele.
1CO 6:1 Ganna nuxa ttúle ritilha lenle attu betsi to geri'i, ¿si gwa retobinle nna arlo ka uxtisi ka nu abittu ria lekani Cristuha‑la, raga'a luesile nna labí riale arlo ka benne chi ankake ge Tata Do Yebáha?
1CO 6:2 ¿Si lagwa gwa yule deki ka benne chi ankake ge Tata Do Yebáha, ka benneha‑la nuha uinke elhuxtisi ge ka benne se'e yiesi lo yu‑ni? Laxkala lebi'i ka nu chi ankale ge Tata Do Yebáha, ki ganna lebi'i uinle elhuxtisi ge ka benne se'e yiesi lo yu‑ni, ¿si ge ttu nuxka'a tte nna a dhaale uinle elhuxtisi geni?
1CO 6:3 Lebi'i gwa yúbale ri'i iyála ka anjeli ge Tata Do Yebáha uinri'i elhuxtisi geke, si nu rateri'i yiesi lo yu‑ni chiga a dhaari'i uinri'i elhuxtisi geni.
1CO 6:4 Laxkala ganna ttixka lebi'i ritilhale ge ttu bixa ratele yiesi lo yu‑ni, ¿beaka lo ka nu abittu selakana len ka benne chi ria leke Cristuha, beaka lo ka nuha‑la diale raga'a luesile ki ruinkana elhuxtisi gele?
1CO 6:5 Ria aní kini ettu lole. Katte, ¿si anúga ttu benne sela len lebi'i, ttu benne raparue elha rieni ki unie elhuxtisi ge ka betsi to geri'i?
1CO 6:6 Ttaka lebi'i, tti ritilha lenle attu betsi to geri'i, raga'a tteba luesile lo ka uxtisi. Gwea nna rutse'e loona lo ka nu abittu ria lekani Cristuha‑la nuná raga'a luesile.
1CO 6:7 Kumu tti ru'ule ritilha len luesile, bala'anaba nuná chi riguale. ¿Beaka a rutto ruchíabale ge nu rudhaka luesile lhe a ridí xenbale tti riguakana nu anka gele?
1CO 6:8 Ttaka rutse'e loona, lebi'ila nuná rudhaka satsale ka benne lhe riguale nu tee geke lhe. Gwea nna ka nu raka betsi to geri'i‑nala nuná rudhakale aná.
1CO 6:9 ¿Si lagwa gwa yule deki ka nu ruin nu abittu dika ixú, ka nuná labí ralhakana dhíkana nu tse dhi ka benne chi rinnabia Tata Do Yebáha ke? Abittu akinle deki ka nu risákana nu subi subi lhe ka nu ria lekani ge ka nu abittu gwalíga ankakana diosi, lhe ka nu rido lenkana ka nu abittu anka latselakani, anágaba ka nu ankakana xanna,
1CO 6:10 lhe ka nu ruinkana ubana lhe, anágaba ka nu raka lekani gatta xxatta gekani lhe ka nu dusi lhe, anágaba ka nu rinne satsakana ge ka benne, lhe ka nu resi'inukana riguakana ttu bixa ge ka benne lhe, abittu akinle deki ka nuná gwadíkana nu tse rute Tata Do Yebáha ge ka benne chi rinnabie ke.
1CO 6:11 Lebi'i anágaba satsa ben ttu chupale itú ttuha, ttaka nnanna chi bochari Tata Do Yebáha le ge ka tulha benle la'ania lhe chi ulesie le ki akale gebie lhe anágaba chigaba utuabie kwe'ele yua ge ka tulha ruinle. Tata Do Yebaa geri'iha benie iyá nuní de nu ben Jesucristu benne anke Xxanari'iha lhe de nu ben Espíritu geeha lhe.
1CO 6:12 Lebi'i rale: “Iyába gwakaba getu uintu”, ttaka neti ria le labí iyá nu uinleha akana nu dika ixú. Gwalí galá, kumu ttiba neti iyába gwakaba kia unia, ttaka labí dhielhaa nu uniaha‑la innabiana neti.
1CO 6:13 Ttibanka elho rori'i, elho‑na ankaba nuná ge tu'eri'i; anágaba tu'eri'i‑ni ankagabana ge elho rori'i. Ttaka Tata Do Yebáha ixpaba ka nuní utse'e loobie. Anágaba bela latiri'i‑ni, labí ixuinri'i nuní kini isári'i nu subi subi. Nuní ixúlana ge Tata Xisiha, nna labie ake Xxanani.
1CO 6:14 Attiba ben Tata Do Yebáha belhidha benbie Jesús benne anke Xxanari'iha lo elhuttiha, aníha‑gaba unie len ri'i, ixúgabanie nu tsitsi ra leeha ki elhidha benbie ri'i lo elhuttiha.
1CO 6:15 Lebi'i gwa yu xeabale, bela latile‑na ankana attisidiba bela lati Cristuha. Ttibanka neti, ¿si ixúbati nu anka bela lati Cristuha kini eyonia na lati ttu nuila rutto'o latini? ¡Ko'o, labí!
1CO 6:16 Lebi'i gwa yu xeabale, ttu nubiyú risána ttu nuila rutto'o latini, ttúba benne reyakana len nuilaha, kumu lo ka yetsi ge Tata Do Yebáha dia ra: “Ttúba benne reyaka ixpakana.”
1CO 6:17 Ttaka benne chi babe len Tata Xisiha, espíritu geeha ttúba reyaka benneha len Tata Xisiha.
1CO 6:18 Gwaludhana nu satsa ruinle risále nu subi subi. Ttixka ttu benne runie attu bixa tulha, nu runieha labí reya'ana latie; ttaka ganna risábie nu subi subi, latieha nuha reya'ana nu satsa runieha.
1CO 6:19 ¿Si lagwa gwa yule deki lebi'i nuná ankale yotu ge Espíritu ge Tata Do Yebáha lhe dobie lhe'e lastole lhe, delába Espíritu nu uxígabale bete Tata Do Yebáha? De nuha nna bela latile‑na labíru anka nuná gele,
1CO 6:20 kumu Tata Do Yebáha yaxi bedhake le tti uyo'obie leha. De nuha nna latsiru gwaluin len bela latile‑na, kumu ganna uinle latsiru, Tata Do Yebáha nuha ruinle kini ra xxeni lebie.
1CO 7:1 Nnanna ekabia ge nu rinnaba tisale neti lo yetsi udhelhaleha. Neti ria, tseba anka ganna ttixka ttu nubiyú abittuba utsá náni.
1CO 7:2 Ttaka de nnelaba risári'i nu subi subi, de nuha nna tserula kua ttu ttu ka nubiyú‑na dho len nuila gekani lhe kua ttu ttu ka nuila‑na dho len nubiyú gekani lhe.
1CO 7:3 Nubiyúha teeki uin nuha nu daa loni uinna len nuila geniha, anágaba nuilaha teeki uin nuha nu daa loni uinna len nubiyú geniha.
1CO 7:4 Nuilaha labíru suna geni anka latiniha, chigaba anka nuha ge nubiyú geniha. Anágaba nubiyúha labíru suna geni anka latiniha, chigaba anka nuha ge nuila geniha.
1CO 7:5 Bittu a dhielha ge luesi ttu ttule. Sunruba ganna ttixka ixpa daka lole okinni ikile udú siile nu labinle ruinle, aná nna ttu sattiba sadána a tsu'uru kwe'e luesile. Aníha uinle ki udo lele ilhapile tisa len Tata Do Yebáha. Iki de nuha nna gwaleyo'o kwe'e luesile attu libe kini ni kina de abittu dhaale uchíale, la'ania nna dhi yie nu xxegwiha le nna uinle nu satsa len attu nu subi.
1CO 7:6 Nu rinnea‑ni nu anka kibaa nuní. Laa rigaa deki aní teeki uinle.
1CO 7:7 Neti aní rakati neti, iyába ka benne ttu ttubake eya'ana attiba neti ttúba doa. Ttaka kumu kua ttu tturi'i chi bete Tata Do Yebáha elha tse geri'i, adíri'i betebie elha tse geri'i eya'ana ttúbari'i, adíri'i nna betebie elha tse geri'i kini utsá nári'i.
1CO 7:8 Lebi'i ka nubiyú bidabi lhe lebi'i ka nuila bidabi lhe, rulisaa le, tserula anka ganna ttu ttubale eya'ana attiba neti.
1CO 7:9 Ttaka ganna abíba uchíale tse'e ttúle, gwalotsála nále kini abittu tse'ele uyúle elha disa.
1CO 7:10 Nna lebi'i ata se'e len luesile upeya le, lebi'i ka nuila abittu esilale len ka nubiyú gele‑na. Labí neti rodha'anaa ki uinle aní, Tata Xisiha‑ba rodha'ane ki uinle aní.
1CO 7:11 Ganna esilale len ka nubiyú gele‑na, abitturu otsá nále len attu nu subi; ganna abíba nna gwaleyoinla le luesile. Anágaba lebi'i nubiyú, abittu udhá ikile ka nuila gele‑na.
1CO 7:12 Adíle nna nu anka kibaa nuní upeya le, labí nu anka ge Tata Xisiha: Ganna ttixka ttu benne biyú ria lebie Cristuha nna do lenie ttu nuila abittu chi ria leni, ttaka ganna nuila geeha gwa rokinniba ikini dhoru lenne, abittu udhá ikie nuha.
1CO 7:13 Anágaba ganna ttu benne nuila ria lebie Cristuha nna do lenie ttu nubiyú abittu chi ria leni, ttaka ganna nubiyú geeha gwa rokinniba ikini dhoru lenne, abittugaba udhá ikie nuha.
1CO 7:14 Kumu nubiyú abittu chi ria leniha chiba beyaka nuha nari xú arlo Tata Do Yebáha de chi ria le nuila geniha. Anágaba nuila abittu chi ria leniha, chigaba beyaka nuha nari xú arlo Tata Do Yebáha de chi ria le nubiyú geniha. Kumu ganna abíba chi beyakakana nari xú, la'ania nna ka xi'inkaniha attisidiba tsigaba anka ka nuha arlo Tata Do Yebáha, ttaka nnanna ka xi'inkaniha chiba biriesi ka nuha ki akakana ge Tata Do Yebáha.
1CO 7:15 Ttaka ganna ttu nu abittu chi ria leni ge Cristuha rakaba leni ela'ana len benne chi ria leeha, meski ela'a nuha lenie. Kumu ttixka raka aní, benne biyú o benne nuila chi ria leeha, labíru daa loke tse'eru len luesike, ela'alake kumu Tata Do Yebáha chi uxie ri'i kini tse'eri'i latsiru len adí ka benne.
1CO 7:16 Kumu lu xa nuila, ¿gasina yulu deki gwadaalu odilálu nubiyú gelu‑na kini abittu tsia nnittina arlo Tata Do Yebáha ganna sa dhoruna lenlu? Lhe anágaba lu xa nubiyú, ¿gasina yulu deki gwadaalu odilálu nuila gelu‑na ki abittu tsia nnittina arlo Tata Do Yebáha ganna sa dhoruna lenlu?
1CO 7:17 Gaxabasina uinle, ttaka kua ttu ttule gwaltse'eba attiba chi bodha'an Cristuha tse'ele lhe gwaltse'eba attiba ankale tti uxi Tata Do Yebáha le. Neti nuníba rodha'anaa uin iyá ka benne chi ria leke Cristuha.
1CO 7:18 Ganna si lu nubiyú, chi ruu lo bela latilu atti biyaxilu ki tsia lelu Cristuha, anába la ruu lo bela latilu. Abittu ukatsilu nu anka latilu nna ganna abittuba chi ruu lo bela latilu tti biyaxilu ki ugía lelu Cristuha, anágaba la ankalu. Abittu ichú lo bela latilu.
1CO 7:19 Kumu labí raka doelha si gwa ruu lo bela latilu o abittu. Nu rakarula doelha udolu tisa ge nu bodha'an Tata Do Yebáha uinlu.
1CO 7:20 Laxkala kua ttu ttule eya'anle attiba ankale tti uxi Tata Do Yebáha le lo neda geeha.
1CO 7:21 Ganna lu ankalu nu to'olu lo xxanalu tti biyaxilu ki ugía lelu ge Cristuha, abittu uchacha ikilu ge de to'olu lo sina. Ttaka ganna si gwa ruteba xxanaluha lo neda ki erialu lo náni, ben doelha beria lo náni.
1CO 7:22 Kumu ganna ttu benne to'e lo sina atti uxi Tata Xisiha bie ki ugía lebie, nnanna attisidiba chiba reki lhaa benneha kini rixúbie lo sina ge Tata Xisiha. Anágaba ganna ttu benne reki lhaabie atti biyaxie ki ugía lebie ge Tata Xisiha, nnanna benneha anke attiba ttu benne to'obie lo sina ge Cristuha ki unie nu inná benneha.
1CO 7:23 Lebi'i yaxi bedhake le tti uyo'obie leha. De nuha nna abittu dhielhale akale ttiba ttu nu to'o lo sina ge ka nu se'e yiesi lo yu‑ni ki uinle nu innabakana.
1CO 7:24 Laxkala xa betsi to, kua ttu ttule attiba ankale tti uxi Tata Do Yebáha leha, anába la ankale.
1CO 7:25 Ge ka nuila ribani‑na nna labí tisa bodha'an Tata Xisiha gasina uinkana. Neti innebaa nu anka kibaa. Kumu de chi gwatua le Tata Xisiha neti, de nuha nna gwankaa nu dika tsia le ka benne ge nu innea‑ni.
1CO 7:26 Neti rakati de nu ratebari'i yiesi lo yu‑ni, de nuha nna tserula anka ganna ttixka ka benne ttúbake eya'anna, abittuba utsá náke.
1CO 7:27 Lu nubiyú, ganna chi do lenlu nuila, abittu uinlu esilalu len nuila geluha. Ganna si abittuba chi do lenlu nuila nna abittu kila nuila gelu.
1CO 7:28 Ganna utsá nálu, labí tulha nuha uinlu. Ganna nuila ribaniha utsá náni, labí tulha nuha uin nuha. Deba nna ka nu rutsá nákinna elhaxchacha ikiba tee ge ka nuná yiesi lo yu‑ni. Neti nna labí raka lasia satele aná.
1CO 7:29 Nu rakala lasia upeya le xa betsi to, chiba dabigana nuní geri'i, labíru isá riyasa. De nuha nna gwaludorula lele Tata Do Yebáha. Lebi'i ka nu se'e lenle nuila, gwaluni attisidiba lanú nuila gele tee
1CO 7:30 nna ata se'ele gwexxua le, gwaluni attisidiba labí se'ele gwexxua le; nna lebi'i ata se'ele redeakinle, gwaluni attisidiba labí redeakinle, nna lebi'i ata yu'ule ugo'o, gwaluni attisidiba nu uyo'oleha labí anka nuha gele.
1CO 7:31 Anágaba lebi'i ata se'ele redí baale nu tee yiesi lo yu‑ni, gwaluni attisidiba labí redí baale geni, kumu iyá nu rilenri'i yiesi lo yu‑ni tse'e looba nuní.
1CO 7:32 Neti rakati abittu gapale elhaxchacha iki tee yiesi lo yu‑ni. Kumu nubiyú nu do ttúbanaha, udorulana le nuha nu anka ge Tata Xisiha, delába udona leni gasina uinna ki tsu'u lebie.
1CO 7:33 Ttaka nu do len nuilaha, si rudolana le nuha ge nu raka yiesi lo yu‑ni, delába si rudolana leni gasina uinna ki tsu'u le nuila geniha nu ruinna.
1CO 7:34 De nuha nna ixeba nu do ikini. Nuila nu anutturu nubiyú do lennaha lhe nuila ribaniha lhe, ka nuha rudorulana lekani nu anka ge Tata Do Yebáha, delába latikani lhe espíritu gekani lhe ankakana nari xú arloe. Ttaka nu do len nubiyúha, si rudolana le nuha nu raka yiesi lo yu‑ni, delába rudona leni gasina uinna ki tsu'u le nubiyú geniha nu ruinna.
1CO 7:35 Ria aní, labí de rusunaa utsá nále. ¡Ko'o! Ruinlaa kini lebi'i saría tsena le lhe kini tse'ele uinle attiba ankaba geni, lhe itú iki itú lele udo lele Tata Xisiha.
1CO 7:36 Ttaka ganna ttu benne biyú rudúne de chi diani xi'iniunneha ida nna rakanie deki daba loe utebie nuha ki utsá náni, ganna aníha rakanie, la'ania nna uinbe attiba rudhakaba lebie anka tse. Labí tulha nuha unie de utebie nuha len nubiyú.
1CO 7:37 Ttaka ganna attu benne chiba belaba tse lebie deki labí raka doelha utebie xi'iniunneha len nubiyú, uinbe nu rudhakaba lebie anka tse. Benne uin aní tseba nuha unie ganna abittuba utebie nuilaha len nubiyú.
1CO 7:38 Laxkala ganna ttu benne utebie xi'iniunneha len nubiyú, tseba nuha uin benneha nna benne abittu utebie xi'iniunneha len nubiyú, tserula nuha uin benneha.
1CO 7:39 Nuila chi betsá nániha, laka sa do ben nubiyú geniha, xigabana len nuha. Gannaliba chi utti nubiyúha, la'anialiba nna gwakaba ge nuilaha otsá náni len nuxaba raka leni, ladiba ganna nubiyú edínaha gwankana nu ria leni Tata Xisiha.
1CO 7:40 Ttaka neti rakati tserula dhona ganna eya'an ttúna. Ria aní, kumu neti rakati gwa dogaba Espíritu ge Tata Do Yebáha lhe'e lastoa, de nuha nna ria aní.
1CO 8:1 Nnanna innea ge nu unnaba tisale neti rale: “¿Si gwaka gori'i bela ge ka nimala rutti ka benne ki ruteke úna lo bekú ge ka nu labí gwalí ankakana diosi?” Gwalí galá iyábari'i chi yuri'i deki ka nuná labí gwalí ankakana diosi, ttaka nu chi yuri'i‑na ruinba nuná ki ruinri'i ttaba. Ttaka ganna gwa rakabin ge luesiri'i, nuná runi kini ruse'e tsitsi luesiri'i.
1CO 8:2 Kumu ganna ttu benne rakanie deki gwa yube ttu latti to, benne rakanie aníha labí chi yuga benneha attiga ankaga geni.
1CO 8:3 Ttaka benne gwa rakanie ge Tata Do Yebáha, Tata Do Yebáha chiba ankabianie benneha.
1CO 8:4 Nnanna kixxi'aya ganna gwaka gori'i bela ge ka nimala rutti ka benne, ki ruteke úna lo bekú ge ka nu labí gwalí ankakana diosi. Ri'i chiba yuri'i deki ka nu labí gwalí ankakana diosi, ka nuná lanú nuxa anka ka nuná yiesi lo yu‑ni, kumu lanú attu diosi do, sunruba ttú benne do anke gwalíga Diosi.
1CO 8:5 Meskiba ganna se'e ka nu tee lákani diosi, si yebáha o si yiesi lo yu‑ni, kumu gwalí galá ixeba ka nu tee lákani diosi se'e lhe ixeba ka nu ra ka benne deki ankakana xxanake lhe.
1CO 8:6 Ttaka lenri'i, sunruba ttu Diosi do, delába Xxudiri'i do yebáha. Benneha benie iyá tte nu se'e lhe ge benneha‑gaba se'eri'i kini ixúri'i. Anágaba nna ttúrugaba benne anke Xxanari'i do, delába Jesucristuha. De benneha nna uka iyá tte nu se'e lhe de benneha‑gaba nna anka benri'i lhe.
1CO 8:7 Ttaka labí iyá ka benne chi ria leke ge Cristuha yuke nuní. Kumu adíke sa labibakanie roke bela ge ka nimala rute ka benne úna lo bekú ge ka nu labí gwalíga ankakana diosi, nna tti roke belaha nna sa rakabakanie deki gwalíba reyaka belaha ge ka nu labí gwalí ankakana diosiha. Ttaka kumu de labí chi se'e tsitsike lo neda ge Tata Do Yebáha, de nuha nna tti roke belaha nna rudú leni ttebana leke kumu rakakanie deki chiba bitsigake arlo Tata Do Yebáha.
1CO 8:8 Ttaka laa de nu rogari'i ruinna kini akari'i benne tsu'u le Tata Do Yebáha. ¡Ko'o, labí! Kumu laa de nu rori'i‑naga uinna ki akaruri'i benne tsu'u lebie, nigaba laa de abíga gori'i nna akari'i benne abittu tsu'u lebie.
1CO 8:9 Ttaka lebi'i ata chi se'e tsitsile lo neda ge Tata Do Yebáha, gwaluyú gele, bittu akinle deki de gwakaba gole iyá, de nuha nna ukinnile ka benne abittu chi se'e tsitsike lo neda geeha.
1CO 8:10 Kumu ganna nuxa ttúle chi yule deki gwakaba gori'i iyá nna ganna ttu benne ilánie le se'ele go yetta ro'o mexa lhe'e yotu ge ka nu labí gwalí ankakana diosi, ¿laaba ganna de labí chi re tsitsi le benne ilánie le siale goha, laaba ganna de nuha nna dhágaba lebie goe bela nu rutekana úna ge ka nu labí gwalí ankakana diosiha?
1CO 8:11 Lebi'i de chi yule nna, delo ni'a gele nna initti betsi to geri'i benne abittu chi du tsitsie lo neda ge Tata Do Yebáha, delába benne chi utti Cristuha kwenta gebie.
1CO 8:12 Arlo Cristuha nuha rinittile tti rudú chupale le ka betsi to geri'i ka benne abittu chi re tsitsi leke.
1CO 8:13 Laxkala neti, ganna de nu roa‑ni ruinna ki rinitti ttu betsi to geri'i, tserula ttu tsala abitturula goa bela kini abittu unnittia ttu betsi to geri'i.
1CO 9:1 Neti, ¿laaba ganna gwa rapabaa lo neda ki unia nu rudhaka lasia anka tse? ¿Laaba ganna apóstol ge Jesús‑ni ankaa lhe neti chi biláti Jesús benne anke Xxanari'iha? Lhe anágaba, ¿laaba lebi'i nuná ankale benne chi uxia ki tsia lele ge benne anke Xxanari'iha, delába benne runia sina gebie?
1CO 9:2 Ganna len adí ka benne abittu ankaa apóstol, ttaka len lebi'i gwalíba ankaa apóstol, kumu de lebi'i chi babale len Jesús benne anke Xxanari'iha, de nuha nna rula'a deki gwalí ankaa benne chea ka tisa geeha.
1CO 9:3 Neti aníba rekabia ge ka nu rákana: “Nú yu ganna gwalí ankalu apóstol ge Jesús‑ni.”
1CO 9:4 Ri'itu ka apóstol, ¿si abí gwa aka getu gotu lhe i'iyatu ge sina ruintu‑ni?
1CO 9:5 Lhe, ¿si abí gwa lo neda getu tee kini ichetu ka nuila getu ata diabatu, attiba runi adí ka apóstol ge Jesús‑ni lhe attiba runi ka betsieha lhe attigaba runi Cefas benne tegaba lábie Pedro? Ka nuila ge ka benne‑ni ria leke Cristuha nna ata diabake richeke ka benne‑ni.
1CO 9:6 ¿Si suna netiba lenia Bernabé‑ni daa lotu uintu sina len ni'a nátu kini aka bentu?
1CO 9:7 Lebi'i gwa yúbale lanú ttu soldadu do, la belhiu gebani rutse'e loona ki riana utilha lhe lanú ttu benne do iki de ratebie reyade ka ya uva, delo nna abígaba goe nu xixxi ute ka nuha lhe anágaba lanú ttu benne do reki lo ka neru nna abígaba edíbe xisi nu rute ka nuha.
1CO 9:8 ¿Si rakinle nu anka ge ka benne se'e yiesi lo yu‑niba nuní rinnea tti ria aní? ¿Laaba anígaba ra lo bia bennabi bodha'an Tata Do Yebáha len Moisés‑ni?
1CO 9:9 Kumu lo bia bennabiha dia ra: “Abittu ku'ulu yexxa ro'o bia rulea iki xuxtilaha.” Tata Do Yebáha tti ree aní, laa suna ge ka bia rulea iki xuxtilaha‑ga nuha ruchacha ikie.
1CO 9:10 ¿Laaba ganna gelari'i nuha ruchacha ikie? ¡Ge galári'i, de nuha nna rabie aníha lo bia bennabiha! Kumu nu ribenna lo yuha, ruxxenba le nuha edí baana ge sina bennaha lhe nu rigu'una ka biaha iki xuxtilaha ruxxengaba le nuha edí baana ge sina bennaha.
1CO 9:11 Ri'itu chi údatu ka tisa ge Tata Do Yebáha lhe'e lastole. De bentu aní nna, ¿si yalhaba nuha ganna edí baatu ttu latti ge nu utele len ri'itu?
1CO 9:12 Ki adí ka benne reki ugixxi'a ge Cristuha gwa rapana ke ridíke nu rutele, ri'itu gwa raparulana ri'itu kini dhitu nu utele. Ttaka ri'itu labí chi unnabatu nu ralhatu dhitu. Ratettibatu rigila getu. Lo iyába gwa rutto ruchíabatu. Ruintu aná kini abittu rudheatu lo ka tisa ge Cristuha.
1CO 9:13 Lebi'i gwa yu xeabale: ka nu rixúkana lhe'e yotuha, ge ka úna risina lhe'e yotuha‑ba ro ka nuha, nna ka nu rixúkana lo bekú ge yotuha, ge ka úna risina lo bekúha‑gaba ro ka nuha.
1CO 9:14 Anágaba bodha'angaba Jesús benne anke Xxanari'iha ree deki ka benne reki ugixxi'a ka tisa geeha, ge sina ruinkeha‑gaba goke.
1CO 9:15 Ttaka neti ni tsa labí chi bedí baaya ge nu ralhaa dhia. Nigaba labí akinle deki runia nuní lo yetsi‑ni kini utele latti nu riyasati. Kumu tserula du lasia gattia abittu innabaa le, a laa kila innabaa le nna unnittia elha gwedeaka lasi kia de kwentaba rigixxi'ania le ka tisa‑ni.
1CO 9:16 Neti labí dika unia ttaba de rekia ugixxi'a ka tisa ge Cristuha, kumu neti daba loa kixxi'aya ka benne‑ni. Karusi'iru neti ganna abíba tsekia kixxi'aya ke.
1CO 9:17 Kumu ganna neti redába lasia rekia ugixxi'a, la'ania nna gwadíbaa nu ralhaa dhia ge sina runiaha. Ttaka ganna de rido doelhabaa ki rekia ugixxi'a, la'ania nna labí runia nuha de redá lasia, sinuki sunruba runia nuha de aníha chi ga'anani Tata Do Yebáha deki unia.
1CO 9:18 Nianna, ¿nála lhiaxaa ganna? Delába kwentaba rekia ugixxi'a ka tisa ge Cristuha xa, abittuba innabaa nu ralhaa dhia de rekia rigixxi'aya.
1CO 9:19 Kumu neti meskiba ankaa benne reki lhaaya, labí xigaa lo ná ka benne, laa kiga de nuha nna reyakabaa attiba ttu benne xige lo sina ge iyába ka benne. Aníha runia kini ridaaya ralhia ixeeru ka benne lo neda ge Cristuha.
1CO 9:20 Neti tti doa len ka nu Israel‑ni, ruinbaa attiba labikinna ruinkana. Aníha runia kini ridaaya ralhia kana lo neda geeha. Len ka nu rudokana tisa ge nu ra lo bia bennabi bodha'an Moisés‑ni, ruinbaa attisidiba sa xigabaa lo bia bennabiha. Aníha kini ridaaya raxia kana, meskiba neti labíru xigaa lo bia bennabi bodha'an Moisés‑ni.
1CO 9:21 Tti doa len ka nu labí bia bennabi gekani tee, ruinbaa attisidiba labí bia bennabi kia tee. Aníha runia kini ridaaya raxia kana lo neda ge Cristuha. Meskiba neti gwa teeba bia bennabi ge Tata Do Yebáha kia, kumu xigabaa lo bia bennabi ge Cristuha
1CO 9:22 nna tti doa len ka nu labí chi se'e tsitsikana lo neda ge Tata Do Yebáha, reyakabaa ttu benne yusi lenkana, aníha kini ridaaya ruse'e tsitsia kana. Reyakabaa attiba ruin iyába ka benne kini aníha nna dhaaya odiláya kwadiba ttu chupakana.
1CO 9:23 Iyá nuní runia de ka tisa tse rigixxi'aya ge Cristuha, kini anágaba neti iselagabaa edí baaya nu ra ka tisa geeha.
1CO 9:24 Lebi'i gwa yu xeabale, ka nu kwiti ruxunni‑na, ixebakana riria ruxunnikana, ttaka ttúrubana gwa ridaana ridína ttu bixa. Anágaba lebi'i gwaludo lele gwaltsia lo neda ge Tata Do Yebáha kini dhile nu tse utebie.
1CO 9:25 Iyába ka nu rudhetikana ge bixaba gwitta, tsitsiba rudhetini latikani, labí ruinkana ttu nu unnittina kana. Aníha ruinkana kini ridaakana ridíkana ttu bixa ttu nu labí ruchíana isá, ttaka ri'i ruinri'i doelha diari'i lo neda ge Tata Do Yebáha kini dhiri'i ttu nu uchíana ttu dia lii.
1CO 9:26 Laxkala neti anába diaya ruxunnia, labí kwentaba ruxunnia nna abígaba yua gaxa isinaa. Anába diaya ritilhaa, labí runia attiba ttu nu rudhen lo be,
1CO 9:27 sinuki rugwelaa elha disa latia‑ni kini rudona tisa kia, kini ni kina netila, iki de chi ugwekia utixxi'ania ka benne ka tisa ge Tata Do Yebáha, delo nna abígaba iria tsea arlobie.
1CO 10:1 Betsi to, neti raka lasia abittu ixulhinle ge nu gwate ka benne uka xuttori'iha tti beriake lo yu ge Egiptoha. Ka benneha iyábake bedáke danalhake beaha lhe iyágabake beteke lo neda udhali Tata Do Yebáha lhe'e indatooha.
1CO 10:2 Iyábake beyakake ge Moisés‑ni tti dedáke danalhake beaha lhe tti beteke lhe'e indatooha lhe.
1CO 10:3 Anágaba iyágabake utoke elho daa yebáha, delába elho nu udhelha Tata Do Yebáha,
1CO 10:4 lhe iyágabake u'uyake inda beteeha lhe. Inda nu u'uyakeha biriana lhe'e íyya nu labí ankana ge yiesi lo yu‑ni. Íyyaha nuha anka Cristuha nna danalhe ke ata diabake.
1CO 10:5 Ttaka labí ixeke benke nu uyu'u le Tata Do Yebáha. De nuha nna uttibake lo yu bisiha.
1CO 10:6 Ttaka iyába nu ukaha, beya'anna kini ri'i ilenri'i kini abittu dha leri'i uinri'i nu satsa attiba ka benneha udá leke benke nu satsa.
1CO 10:7 De nuha nna ri'i abittu udú xibiri'i arlo ka nu labí gwalí ankakana diosi, tti ben ttu chupa ka benneha bedú xibike arlo ka nuha. Kumu lo ka yetsi ge Tata Do Yebáha dia ra: “Yiesiha urebana utona lhe u'uyana lhe, iki de nuha nna tti udú liina benna nu rakaba leni.”
1CO 10:8 Lhe anágaba abittu isári'i nu subi subi tti ben adí ka benneha, de nuha nna suna lhe'e ttu sáha‑ruba utti tsunnerua mili (23,000) ke.
1CO 10:9 Nigaba bittu uttisinri'i Tata Xisiha tti ben ixe ka benneha bettisikanie bie. De benke aníha nna begwe ka belhaha ke nna uttike.
1CO 10:10 Anágaba nna abittu inne lhale usiale iki Tata Do Yebáha ge nu ratele, tti ben ttu chupa ka benneha unne lhake besiake ikie. De nuha nna udhelha Tata Do Yebáha anjeli geeha kini betse'e loobie ke.
1CO 10:11 Iyá nu gwate ka benneha rixúna kini ri'i ilenri'i nna beya'angabana lo yetsi kini ri'i ka benne se'eri'i ka sá chi daluxa‑ni, abittu uinri'i luesi nu ben ka benneha.
1CO 10:12 Laxkala benne rakanie deki chiba du tsitsie, uyú gebie kini ka ibixxie.
1CO 10:13 Lebi'i labí chi gwatele ttu prueba tsitsiru, lebi'i ratebale luesi nu rateba adí ka benne. Kumu Tata Do Yebáha anke benne labí runnitti tisa gebie, gwa ruinba benneha nu chi rabie unie. Laxkala labí ugwelha benneha satele ttu prueba tsitsi, ttu nu labí dhaale uchíale loni. Labe gwinbe kini lebi'i tse'e tsitsile. Ttaka ganna chi satele ttu prueba tsitsi, benneha gwakaba lenie le kini anáchu dhaale uchíale lo nu sateleha.
1CO 10:14 Laxkala xa betsi to kia, gwalukwitta kwe'e ka nu labí gwalí ankakana diosi, bittu udú xibile arlo ka nuná.
1CO 10:15 Rulisaa le atti galába rulisaa ka nu yuu. Kwinaba lebi'i gwalinná ganna gwanka nu rinnea‑ni nu anka gwalí.
1CO 10:16 Tti rori'i irse ge Cristuha, la'ania rugweri'e ixkixaru ge vinu ri'iyari'iha. Tti ri'iyari'i nuha, ¿laaba ganna reni belalie tti uttieha nuha chi riselari'i? Lhe yettaxtila rori'i la'ania, ¿laaba ganna latieha nuha chi riselari'i tti rori'i yettaxtilaha?
1CO 10:17 Ri'i meskiba ixeri'i raka, ttaka ttúba benne reyakari'i kumu ttúba yettaxtila rori'i.
1CO 10:18 Gwalulanniruga ge ka benne Israel‑ni, tti roke bela ge ka nimala ruteke úna lo bekú ge Tata Do Yebáha, ¿laaba ganna labie nuha chi risela ka benneha tti ruinke aníha?
1CO 10:19 Nianna, ¿bíunni ria ganna? ¿Si ria deki ka nu labí gwalí ankakana diosiha tee lidhakakani? O, ¿si ria deki bela ribia lo bekú gekaniha, gwa tegaba lidhakani?
1CO 10:20 ¡Ko'o, labí! Neti ria, ka nimala rutti ka nu abí ria lekani Tata Do Yebáha, ka nu rutekana úna lo bekú ge ka nu labí gwalí ankakana diosi, ka nuha len ka espíritu xxegwiha‑ba nuha rutekana belaha; labí rutekana nuha len Tata Do Yebáha. Neti labí raka lasia iselale ka espíritu xxegwiha.
1CO 10:21 Anágaba labí aka i'iyale vinu nu anka ge Jesús benne anke Xxanari'iha, delo nna ede'eyagabale vinu nu rutekana len ka espíritu xxegwiha. Anágaba labí dika gogabale irse ge benne anke Xxanari'iha, delo nna edeogabale elho nu rutekana len ka espíritu xxegwiha.
1CO 10:22 O lhe, ¿si rakaba leri'i uinri'i aná kini utse'enri'i Tata Do Yebáha? ¿Si tsitsirula ra leri'i tti benneha?
1CO 10:23 Lebi'i rale: “Iyába gwakaba getu uintu”, ttaka neti ria, labí iyá nu uinleha akana nu dika ixú. Gwalí galá iyába gwakaba geri'i uinri'i, ttaka labí iyá nu uinri'iha akana nu use'e tsitsina ri'i lo neda ge Tata Do Yebáha.
1CO 10:24 Kua ttu ttule abittu uinle suna nu saría tsebana le. Lebi'i gwaluinla nu dika saría tsena iyále.
1CO 10:25 Gwaligo iyába bela rutto'okana lhe'e ka i'iya‑na, nna abittu gwennaba tisaba tse'ele gaxa daa belaha kini ka udú chupana lele.
1CO 10:26 Kumu “Ge Tata Xisiha‑ba anka yiesi lo yu‑ni lhe iyába nu se'e loni lhe.”
1CO 10:27 Ganna ttixka ttu nu abittu chi ria leni ge Cristuha gaxina le ki gole yetta lisini, lebi'i nna ganna gwa rakaba lele tsiale, gwaltsia nna gwaligoba iyába nu kwekina lole. Abittu gwennaba tisaba tse'ele gaxa daa nu roleha. Aníha kini abittu udú chupana lele.
1CO 10:28 Ttaka ganna ttu benne innábie: “Bela role‑ni ankana ge nu betekana úna ge ka nu labí gwalí ankakana diosi”, la'ania nna bittu gole belaha. Bittu ulaba lele ge nu chi yuleha, sinuki gwalulaba lele ge benne utixxi'anie leha kini abittu udú chupana lebie.
1CO 10:29 Ria aní de ruinlaa kini abittu udú chupana le benneha, laa ttela runia de lebi'i. Kumu, ¿beaka netila itua bala'ana kia ge nu runia de nu ra attu benne subi?
1CO 10:30 Ki ganna neti gwa rugwebaa Tata Do Yebáha ixkixaru tti roa elhoha, ¿beakala nna sa ituaba bala'ana kia de roa nuha?
1CO 10:31 Laxkala sila gole lhe sila i'iyale lhe o sila uinle attu bixa, iyá nu uinleha, uinle na kini inná xxeni le Tata Do Yebáha.
1CO 10:32 Abittu uinle ttu bixa nu uinna ki ituxxuni ka nu Israel‑ni lhe ka nu abittu ankakana nu Israel lhe. Abittugaba uinle ttu nu uinna ki ituxxuni ka benne chi ria leke Tata Do Yebáha.
1CO 10:33 Ttiba neti bixaba runia, runia na kini ru'u le iyá ka benne. Labí runia ttu bixa kini suna netiba saría tsena, sinuki ruinlaa kini saría tsena adí ka benne, kini anáchu odilá Tata Do Yebáha ke.
1CO 11:1 Gwaluni attiba runia, attiba neti ruinbaa attiba ben Cristuha.
1CO 11:2 Ru'u lasia gele xa betsi to, kumu satíaba rexxa lele neti lhe kumu gwa ruinbale nu chi utixxi'ania le uinle, gwa ruinbale atti tteba chi bela'ania le.
1CO 11:3 Ttaka raka lasia utte dale deki Cristuha nuha due iki nubiyúha, delába lee nuha rinnabie nubiyúha. Nubiyúha nna duna iki nuilaha nna Tata Do Yebáha nna due iki Cristuha.
1CO 11:4 Ganna ttu nubiyú yu'uba ikini xumpre duna atti rilhapina tisa len Tata Do Yebáha o si tti duna rigixxi'ana nu raka lebie una ka benne, tti ruinna aníha, rilhida gaabana benne due ikiniha, delába Cristuha.
1CO 11:5 Ttaka ttu nuila ganna do tuntuba ikini duna tti rilhapina tisa len Tata Do Yebáha o si tti duna rigixxi'ana nu raka lebie una ka benne, tti ruinna aníha, rilhida gaaba nuha benne du ikiniha, delába nubiyú geniha. Nuila ruin aníha, ankaba nuha ttiba ttu nu iki xiga.
1CO 11:6 Kumu ganna nuilaha abíba udhea ikini ttu bixa, tsa ttela ichú itsa ikini ganna. Ttaka ganna si rettubinna ichú itsa ikini o uin ikini xiga, la'ania nna ixxua lari ikini ganna xa.
1CO 11:7 Nubiyúha labí aka udhea iki nuha dhuna, kumu lana nuha ankana attiba anka Tata Do Yebáha lhe rule'ena nu xxeni ra lebie lhe. Nuilaha nna rule'ena nu xxeni ra le nubiyúha.
1CO 11:8 Kumu benne biyú udo sisi'a tte yiesi lo yu‑niha, labí benneha nuha biriabie lati nuilaha, sinuki nuilaha‑la nuha biriana lati benne biyúha.
1CO 11:9 Anágaba laa benga Tata Do Yebaa benne biyúha kini ixúe len nuilaha. ¡Ko'o! Nuilaha‑la nuha benie na kini ixúna len benneha.
1CO 11:10 Laxkala nuilaha, kumu de rulanni ka anjeli ge Tata Do Yebáha na, de nuha nna teeki ixxua ikini lari kini lariha unna liina deki gwa riaba leni nubiyú geniha.
1CO 11:11 Laa kiga de nuní nna ka benne chi ria leke ge Tata Xisiha, benne biyúha, lanú benneha do yiesi lo yu‑ni ganna anúba nuila tee. Anágaba benne nuilaha lanú benneha do yiesi lo yu‑ni ganna anúba nubiyú tee.
1CO 11:12 Kumu ttiba nuilaha lati nubiyúha‑ba biriana, anágaba nubiyúha lhe'e nuilaha‑ba raka xxena. Ttaka Tata Do Yebáha‑ba runie iyá nuní.
1CO 11:13 Kwinaba lebi'i gwalinná, ¿si tseba anka ganna ttu nuila duna rinnena len Tata Do Yebáha nna abittu xua ikini lari?
1CO 11:14 ¿Laaba ganna la kwinabari'i rutte dari'i deki ttu nubiyú ganna rittunna ikini, satsaba nuha rule'e nuha?
1CO 11:15 Ttaka nuilaha, nuila nuila raka nuha ganna rittunna ikini. Kumu de nuha‑la ben Tata Do Yebáha ki ittunna ikini kini itsa ikiniha ixúna attiba ttu lari udheana ikini.
1CO 11:16 Ttaka ganna ttu benne raka lebie uttilha ro'obie ge nuní, neti upeya le, ri'itu aníba labintu ruintu. Labí ruintu attu nu subi, nigaba adí ka benne ria leke Tata Do Yebáha labí ruin ka benneha attu nu subi.
1CO 11:17 Ttaka ge nu innea‑ni, ge nuníligaba nna labí upeya le deki tseba ruinle. Kumu tti ritupale ki rulhale ge Tata Xisiha, labí nu dika ixú ruinle, nu ruinleha runnittila nuha le.
1CO 11:18 Lade'a tte chi binaa deki lebi'i tti ritupale ki rulhale ge Tata Xisiha labí se'ele tutupa, lha'aba lhe'e luesile. Neti rakati gaxa gwalí galá aná ruinle.
1CO 11:19 Kumu gwalí nna aná teeki lha'a lhe'e luesile kini ule'e gá se'e ka nu gwalíga ruinkana nu ru'u le Tata Do Yebáha.
1CO 11:20 Niha galá lebi'i tti ritupale role irse ge Jesús benne anke Xxanari'iha, labí gwalíga irse ge benneha nuha role tti ruinle aníha.
1CO 11:21 Kumu ganna chi gole irse ge benneha, ttu ttubale role, labí ribeda luesile. Adíle nna rituinbale rise'ele, adíle nna chiba dusi tábinle se'ele.
1CO 11:22 ¿Laaba ganna gwa doba lisile ata gole lhe i'iyale lhe, kini abittu uinle aná ata ritupaleha? Tti ruinle aná, ¿laaba ganna ka benne chi ria leke Tata Do Yebáha nuná rigu'u ni'ale? Lhe, ¿laaba ganna elhittu nuná rugwele ka benne abittu geke tee? ¿Bíla anka nu innía ganna? ¿Si innía deki tseba nuná ruinle? ¡Ko'o! Ge nuníligaba nna labí.
1CO 11:23 Kumu neti nu bele'ebani Tata Xisiha neti, nuha‑ba utixxi'ania le: loolha tti bete Judas‑ni Jesús benne anke Xxanari'iha lasi ná ka nu uttikaneha, la'ania nuha bedaxxu Jesús‑ni yettaxtilaha
1CO 11:24 nna iki de chi begwebie ixkixaru Tata Do Yebáha, nianna tti ulha'abie lhe'e benneha nna ree: “Benne‑ni nuní anke latia. De lebi'i nna utea latia‑ni kini gattia. Tti gole yettaxtila‑ni nna exxa lele neti.”
1CO 11:25 Anágaba nna iki de chi beko irsekeha nna bedaxxue xiga ta'a vinuha, nianna tti ree: “Vinu‑ni ankana tisa kubi bodha'an Tata Do Yebáha nna reni kia‑ni ilalina kini ugwena lidhaka tisa‑ni. Aní uinle, kua i'iyale vinu‑ni nna exxa lele neti.”
1CO 11:26 Kumu kua gobale yettaxtilaha lhe i'iyale vinuha lhe, elhutti nu gwate Jesús benne anke Xxanari'iha, elhutti ge benneha nuha rigixxi'ale tti ruinle aníha. Aníba uinle axtaliba ganna chi besia benneha.
1CO 11:27 De nuha nna nuxaba benne ganna tti roe irse ge Jesús benne anke Xxanari'iha nna abíba runie latsiru tti roe yettaxtilaha lhe tti ri'iye vinuha lhe, benneha kwe'ebe sare nu runie de rigu'u ni'abie lati Jesús‑ni lhe de rigu'u ni'abie reni belali benneha lhe.
1CO 11:28 De nuha nna kua ttu ttule atti lanila gole yettaxtilaha lhe i'iyale vinuha lhe, gwalulabaxa lele ganna gwa ruin tsele o abittu.
1CO 11:29 Kumu ttu benne ganna ladiba roe yettaxtilaha lhe ri'iye vinuha lhe, nna ganna abíba rite danie deki nu roeha rigu'inna nuha lati Jesús benne anke Xxanari'iha, benne runi aníha, la elha disa gebe nuha rigile tti roe lhe tti ri'iye lhe.
1CO 11:30 De nuha nna ixebale ranile lhe ttíruba ankale lhe. Anágaba nna ixegabale chi utti.
1CO 11:31 Ttaka ganna ri'i atti lanila gori'i yettaxtilaha ulabaxa leri'i ganna gwa ruin tseri'i o abittu, la'ania nna labí uyúri'i elha disa.
1CO 11:32 Ganna ri'i ruyúri'i elha disaha, Tata Xisiha‑ba nuha rutebie nuha kini ri'i iyieninri'i. Aníha kini abittu ibixxi iginniri'i itupa len ri'i ka nu labí ria lekani Jesús‑ni se'e yiesi lo yu‑ni.
1CO 11:33 Laxkala xa betsi to kia, tti itupale gole irse ge Jesús benne anke Xxanari'iha, gwalikweda luesile.
1CO 11:34 Ganna nuxale chi rituinle atti lanila itupale niha, gwaligo ttela irsele lhe'e lisile, kini abittu suna ugila elha disa gebale diale. Ge adíru nu rinnaba tisale neti, gwagixxi'abania le ge nuha ganna chi itaa ata se'ele‑na.
1CO 12:1 Betsi to, nnanna raka lasia unale gasina anka ka elha tse rute Espíritu ge Tata Do Yebáha len ttu tturi'i.
1CO 12:2 Lebi'i gwa yúbale atti labí chi ria lele ge Jesús‑ni, gwanalha lo xuabale ka nu labí gwalíga ankakana diosi. Ka nuná biríaba anka ka nuná.
1CO 12:3 De nuha nna nnanna kixxi'ania le kini unale deki niru ttú benne labí aka kebie iki Jesús‑ni ganna chi yu'u Espíritu ge Tata Do Yebáha latie. Lhe anágaba lanú ttu benne do innábie deki Jesús‑ni anke Xxane ganna abíba chi yu'u Espíritu ge Tata Do Yebáha latie.
1CO 12:4 Ixe looba ka elha tse se'e, ttaka ttúba Espíritu ge Tata Do Yebáha rutebie ka elha tseha lenri'i.
1CO 12:5 Lhe ixe loogaba sina ge Tata Do Yebáha tee uinri'i, ttaka ttúba benneha anke Xxanari'i.
1CO 12:6 Anágaba ixe looba nu ruinri'i, ttaka ttúba Tata Do Yebáha raka lenie iyári'i kini raka geri'i ruinri'i nuha.
1CO 12:7 Kua ttu tturi'i rute Espírituha elha tse geri'i kini elha tseha ixuinri'i na len adí ka benne.
1CO 12:8 Kumu ttibanka len ttu benne rute Espírituha elha tse gebie kini rinnebie tisa nu rutena elha rieni ge ka benne, attue nna la Espírituha‑gaba rutebie elha tse gebie kini rigixxi'anie ka benne ge nu rite danieha.
1CO 12:9 Attue nna la Espírituha‑gaba runi kini ruxxen tsitsi lebie ge Tata Do Yebáha; attue nna la Espírituha‑gaba rutebie elha tse gebie kini reyonie ka benne rani.
1CO 12:10 Len adíke nna rute Espírituha elha tse geke kini ruinke ka milagru, adíke nna rute Espírituha elha tse geke kini raka geke rigixxi'ake nu raka le Tata Do Yebáha una ka benne, adíke nna la Espírituha‑gaba runi kini rite dákanie bí espíritu yu'u lati ka benne, nna len adí ka benne nna rute Espírituha elha tse geke kini raka geke rinneke ka tisa subi ka nu labí rite dani ka benne; adíke nna raka geke rigixxi'ake bixa diani ka tisa subiha.
1CO 12:11 Iyá nuní runi ttúba benne, delába Espíritu ge Tata Do Yebáha. Benneha nuha rigidhie elha tse len ttu ttu ka benne attiba rakaba lebie.
1CO 12:12 Attiba latiri'i‑ni, meskiba ttúba ankana, ttaka ixe looba ka nu rapana, nna iyába ka nu rapanaha, meskiba raka ixekana, ttúba benne reyaka iyákana. Anágaba ka benne babake len Cristuha, meskiba ixeke raka, ttaka ttúba benne reyaka iyáke.
1CO 12:13 Kumu ri'i, sila ankari'i benne Israel o abittu, lhe sila ankari'i benne to'ori'i lo xxanari'i o sila reki lhaari'i lhe, iyábari'i ttúba Espíritu begadi Tata Do Yebáha ri'i kini bisinri'i ukari'i ttúba benne lhe ge ttúgaba Espírituha redí baari'i lhe.
1CO 12:14 Kumu latiri'i‑ni labí ttu looru anka nuní, ixeba nu rapana.
1CO 12:15 Laxkala ganna ni'aya‑ni gana xubenáya‑ni: “Neti de labí ankaa xubená, de nuha nna labí ankaa ge lati benne rape ri'i”, labí de innána aníha nna abitturu ankana ge lati benne rape naha.
1CO 12:16 Lhe ganna nagaa‑ni gana ka iyya loa‑ni: “Neti de labí ankaa iyya lo, de nuha nna labí ankaa ge lati benne rape ri'i”, labí de innána aníha nna abitturu ankana ge lati benne rape naha.
1CO 12:17 Ganna ttixka itúba latiri'i‑ni akana iyya lori'i, la'ania nna, ¿galasina iyieninri'i ganna ttixka? Lhe ganna itúba latiri'i‑ni akana nagari'i, la'ania nna, ¿galasina urenri'i len xinri'i ganna ttixka?
1CO 12:18 Ttaka Tata Do Yebáha kua ttu ttu ka nu sia latiri'i‑ni besiabe kana ataba ukaba lebie kwiakana.
1CO 12:19 Ganna ttu looba anka iyákana, ganna ttixka aníha nna abígaba latiri'i tee ganna ttixka.
1CO 12:20 Gwalí galá ixeba nu rapari'i, ttaka latiri'i‑ni ttu túbiba nuní raka.
1CO 12:21 Iyya lori'i‑ni labí aka gana ka nári'i‑ni: “Labí ixúti le.” Nigaba ikiri'i‑ni labí aka gana ka ni'ari'i‑ni: “Labí ixúti le.”
1CO 12:22 Gwanka ganna, ka nu sia latiri'i‑ni, ka nu rakinri'i deki labí tte rixuinri'i kana, ka nuníla ka nu rixúruinri'i
1CO 12:23 nna ka nu sia latiri'i‑ni, ka nu labí tte rugweri'i lidhakakani, ka nuníla ka nu ruyú tsitsiruri'i nna ka nu labí dika iláni ka benne, ka nuníla ka nu ruguku tseruri'i,
1CO 12:24 ttaka adí ka nu sia latiri'i‑ni, ka nuní labí riyasa uyú tsitsiri'i kana. Kumu Tata Do Yebáha anába chi benie latiri'i, ruyú tserue ka nu rakinri'i labí tte dakakana.
1CO 12:25 Aníha kini abittu lha'a lhe'e luesi ka nu sia latiri'i‑ni, sinuki uyú tsitsirula luesikani.
1CO 12:26 Ganna ttu ka nuní bixa satekana, la'ania nna iyágabakana uyúkana elha disa, lhe ganna ttu ka nuní ugweri'i lidhakakani, la'ania nna iyágabakana edú itta lekani.
1CO 12:27 Lebi'i nuná ankale lati Cristuha nna kua ttu ttule ankale benne chi babale latie.
1CO 12:28 Arlo iyále ka benne ria lele Cristuha chi bose'e Tata Do Yebáha ka benne kini uinke sina gebie. Lade'a tte bose'ebie ka benne ankake apóstol. Berupa nna bose'ebie ka benne ankake profeta. Beyonna nna bose'ebie ka benne ki ule'ekanie adí ka benne. Iki de nuha nna bose'ebie ka benne uinke ka milagru. Delola nna danalha ka benne betebie elha tse geke kini eyoinke ka benne rani. Nianna tti daa ka benne betebie elha tse geke ki ute náke len adí ka benne. Nianna dedhá ka benne bete Tata Do Yebáha elha tse geke kini rixú liikanie rise'eke arlo adí ka benne chi ria leke Cristuha. Iki deliba nuha nna tti daa ka benne raka geke rinneke ka tisa subi ka tisa ka nu labí rite dani adí ka benne.
1CO 12:29 Nianna laa innágari'i iyále ankale apóstol, lhe laa iyágale ankale profeta lhe. Anágaba laa iyágale raka gele rule'enle ka benne, lhe laa iyágale raka gele ruinle ka milagru lhe.
1CO 12:30 Anágaba laa iyágale reyoinle ka benne rani, lhe laa iyágale rinnele ka tisa subi ka nu labí rite dani ka benne. Anágaba nna laa iyágale raka gele rigixxi'ale bixa diani nu ra ka benne rinneke ka tisa subiha.
1CO 12:31 Ttaka lebi'i gwaluinrula doelha ki dhile ka elha tse ka nu anka tseru. Neti nna ule'enia le attu neda tseru.
1CO 13:1 Neti meskiba ganna innea ixe loo ka tisa rinne ka benne se'e yiesi lo yu‑ni lhe meskiba ganna innea tisa ge ka anjeli se'e yebáha, ttaka ganna abíba rakati ge ka benne, la'ania nna ankabaa attiba ttu iyya abígaba tsi'ini yu'u, kwentaba ridesina.
1CO 13:2 Lhe meskiba ganna gwa tee elha tse kia kini rigixxi'aya nu raka le Tata Do Yebáha una ka benne, lhe meskiba ganna gwa rite dati iyá nu tenie gatsi, delába nu labí yu ka benne, anágaba lhe meskiba ganna gwa tee elha rieni kia ki rite dati iyá, lhe meskiba ganna gwa ria tsitsi lasia deki tti innea nna gwa silaba ka i'iya‑na kini tsiakana tadhokana attu ta subi, ttaka ganna abíba rakati ge ka benne, la'ania nna kwachiruba bi daka nu runia ganna ttixka.
1CO 13:3 Lhe anágaba meskiba ganna kidhia len ka benne dii iyá nu tee kia, lhe meskiba ganna dhielhaa uttikana neti ki itea lo giha, ttaka ganna abíba rakati ge ka benne, la'ania nna labí ixú nu runiaha len neti.
1CO 13:4 Kumu ttu benne si'i lasi, benneha anke benne re besi lebie, lhe anke benne re tse lebie lhe, anágaba labí ritisinie adí ka benne, lhe labí runie deki raka xxatta gebie, lhe labí runie ttaba lhe.
1CO 13:5 Anágaba labí ladi rulise adí ka benne, lhe labí suna ge nu anka gebe rulaba lebie, lhe anágaba labí nnelaba risa'anie, lhe labí rudo lebie ge nu rudhakakane lhe.
1CO 13:6 Anágaba labí ru'u lebie tti rilánie raka ttu nu abittu anka tse; benneha ru'ula lebie tti rilánie raka ttu nu anka tse.
1CO 13:7 Benne si'i lasiha ridíbe elha xen lasi ge iyába, lhe ge iyába ria lebie lhe. Anágaba ge iyába ruxxen lebie, lhe ge iyába rutto ruchíabie lhe.
1CO 13:8 Isia sá lhuxa looba iyá ka elha tse rute Tata Do Yebáha geri'i, ttaka elha si'i lasi‑na ttu tsaba gatta nuná geri'i, labí lhuxa loo nuná. Isia sá labíru kixxi'ake ka tisa nu raka le Tata Do Yebáha una ka benne. Anágaba ka tisa subi ka nu labí rite dani ka benne, isiagaba sá labíru inne ka benne ka nuná lhe anágaba elha rieni rute Tata Do Yebáha geri'i isiagaba sá lhuxa loo nuná.
1CO 13:9 Kumu nnanna nu yuri'i‑ni ttu lattiruba nuní yuri'i lhe ttu lattiruba rigixxi'ari'i nu raka le Tata Do Yebáha una ka benne.
1CO 13:10 Ttaka ganna chi bisia sá isia nu anka ida'aha, la'ania nna iyába nu labí anka ida'aha lhuxa looba nuha.
1CO 13:11 Neti tti ankaa nutoha, rinnebaa attiba rinne ttu nuto lhe rulababa lasia ttiba rulaba le ttu nuto. Anágaba nna rutte dágabaa attiba rutte daa ttu nuto. Ttaka atti chi ankaa benne xeniha, la'ania nna chi bedhanaa, labíru runia ge nuto.
1CO 13:12 Nnanna ttiba ttu nu rulanni lo ttu iyya gwana nu labí rilá tse loni, aníha‑ba rateri'i. Ttaka ganna chi bisia sáha, la'ania nna ilá tsenri'i. Neti nnanna lattiruba chi yua, ttaka la'ania isinaa uinbiaya iyá tte attiba Tata Do Yebáha chi ankabianie neti.
1CO 13:13 Nnanna ria leri'i Tata Do Yebáha lhe ruxxen leri'i gebie lhe raka si'in luesiri'i lhe. Ttaka delo iyunna ka nuní, elha si'i lasi‑na nuná anka tseru.
1CO 14:1 Lebi'i gwaluin doelha kini akale benne si'i lasi lhe gwalebeki lele ki dhile ka elha tse rute Espíritu ge Tata Do Yebáha. Ttaka gwaludorula lele ki utebie elha tse gele kini aka gele kixxi'ale nu raka le Tata Do Yebáha una ka benne.
1CO 14:2 Kumu ttu nu rinnena attu tisa subi nu labí rite dani ka benne, laa len ka bennega nuha rinne nuha, sinuki len Tata Do Yebáha‑ba nuha rinnena, kumu ni ttu benne a rite danie nu rinnenaha, kumu Espíritu ge Tata Do Yebáha‑ba runie kini rinnena nu labí yu ka benne.
1CO 14:3 Ttaka ttu nu rigixxi'ana nu raka le Tata Do Yebáha una ka benne, len ka benne se'e yiesi lo yu‑ni nuha rinnena kini ruse'e tsitsina ke lhe kini redú itta leke lhe anágaba kini reyaka xen leke lhe.
1CO 14:4 Nu rinne tisa subi nu labí rite dani ka benne, suna larubana nuha gwa ridú tsitsina, ttaka benne rigixxi'e nu raka le Tata Do Yebáha una ka benne, ka benne ria leke ge Jesús‑ni nuha rudú tsitsi benneha.
1CO 14:5 Aní rakati neti, iyále innele tisa subi nu labí rite dani ka benne, ttaka rakarula lasia kixxi'ale nu raka le Tata Do Yebáha una ka benne. Kumu ttu nu rigixxi'ana nu raka le Tata Do Yebáha una ka benne, dakarula nu ruin nuha attichula nu rinne attu tisa subiha, laruba ganna, iki de chi unnena tisaha nna kixxi'agabana bí diani nu ranaha kini anáchu use'e tsitsina adí ka benne chi ria leke ge Jesús‑ni.
1CO 14:6 Xa betsi to, ganna neti itaa ata se'ele‑na nna innea attu tisa subi, labí ixú nu innea len lebi'i ganna abíba kixxi'aya nu bele'en Tata Do Yebáha neti o ganna abíba kixxi'aya nu chi yua lhe ganna abíba kixxi'aya nu raka le Tata Do Yebáha una ka benne lhe, anágaba ganna abíba ule'enia le ttu bixa.
1CO 14:7 Kumu ttiba ka nu rulha lenri'i, delába ka flauta rukwesiri'i o ka arpa rudá nári'i lokani, ganna ka nuha abíba do tse tsi'ikani, ¿gasina tte denri'i bixa nuha rulha lenri'i ka nuha ganna ttixka?
1CO 14:8 Anágaba lo ttu guerra, ganna trompetaha abíba kwesi'a tsena, ¿gasina tte dani ka nu dia utilhaha deki chi ese'e tsekana kini dhulokana ttilhakana?
1CO 14:9 Anágaba lebi'i ttixka innele, ganna abíba innele tisa nu dika tte dani ttu benne, ¿gasina yu benneha bixa nuha rinnele, kumu attisidiba lo beba nuha rinnele?
1CO 14:10 Gwalí galá, ixe looba ka tisa rinne ka benne se'e yiesi lo yu‑ni nna kua ttu ttu ka nuná gwa rite dábinri'i bixa diakinna innákana.
1CO 14:11 Ttaka ganna neti abíba rite dati bixa diani nu ra benne rinneha, la'ania nna ttiba ttu nu dittu anka benneha len neti, anágaba neti attiba ttu nu dittu ankaa len benneha.
1CO 14:12 Anágaba lebi'i ka benne rudoruna lele dhile ka elha tse rute Espíritu ge Tata Do Yebáha, gwaluin doelha kini dhi tamale nu dika ixuinle ki use'e tsitsile adí ka benne chi ria leke ge Jesús‑ni.
1CO 14:13 Laxkala nu rinnena attu tisa subi nu labí rite dani ka benne, nuha teeki innabana len Tata Do Yebáha kini anáchu aka geni kixxi'ana bixa diani nu rinnenaha.
1CO 14:14 Kumu ganna ttixka neti rinnea attu tisa subi tti rilhapia tisa len Tata Do Yebáha, espíritu kia‑niba nuha rinne, ttaka neti labí rite dati bí nuha ria.
1CO 14:15 Nianna, ¿bíla anka nu unia ganna? Ixúbati espíritu kia‑ni tti innea len Tata Do Yebáha xa, ttaka anágaba nna tti innea nna tte dágabati bixa diani nu rinneaha. Tti ulhaa nna ulhagabaa gebie len espíritu kia‑ni, ttaka anágaba nna tti ulhaa nna tte dágabati bixa diani nu rulhaaha.
1CO 14:16 Kumu ttibanka lu, tti rugwelu Tata Do Yebáha ixkixaru, ganna suna espíritu gelu‑naba rinne lenna benneha, la'ania nna benne rudo nage ge nu rinneluha, ¿gasina inná benneha “Amén” tti rugwelu ixkixaruha, ki abígaba rite den benneha nu ráluha?
1CO 14:17 Gwalí galá, lu gaxa tseba rinnelu tti rugwelu Tata Do Yebáha ixkixaru, ttaka benne rudo nage ge nu ráluha, labí rixú nuha lenie.
1CO 14:18 Neti ixkixaru rugwea Tata Do Yebáha kumu delo iyá ttele, netiba nu rinnerua attu tisa subi nu labí rite dani ka benne.
1CO 14:19 Ttaka arlo ka benne chi ria leke Cristuha, len neti tserula nuha ganna innea gayu ka tisa ka nu tte dani ka benne kini aníha nna udhetinia adíke, a laa kila innea tsii mili ka tisa subi ka nu labí tte dákanie.
1CO 14:20 Betsi to, gwaluni tti ruin ka nuto‑na. Ka nuto‑na labí yu ka nuná uinkana nu satsa. Ttaka tti ulaba lele, abittu ulaba lele tti rulaba le ttu nuto; gwalulabala lele tti rulaba le ttu benne xeni.
1CO 14:21 Lo ka yetsi ata dia ka tisa ge Tata Xisiha rinnebie ree: Ka benne dittu, ka benne rinneke attu tisa, ka benneha nuha ixúti ke ki ulisaa ka benne kia, ttaka nigaba aníha labí udo nagakani kia.
1CO 14:22 Laxkala ka tisa subi‑na rixúkana ttiba ttu señal len ka nu abittu chi ria lekani ge Jesús‑ni, labí rixú nuná len ka benne chi ria leke gebie. Ttaka ka tisa rinne ttu benne rigixxi'e nu raka le Tata Do Yebáha una ka benne, ka tisaha nuha rixúkana len ka benne chi ria leke ge Jesús‑ni, labí rixúkana len ka nu abittu chi ria lekanie.
1CO 14:23 Kumu ganna ttixka iyábale ka benne ria lele Jesús‑ni tupale rinnele len Tata Do Yebáha nna iyábale rinnele attu tisa subi nu labí rite dani ka benne, nianna tti ga'a ka nu saleaka abittu chi yúkana o si abittu chi ria lekani ge Jesús‑ni, ¿laaba ganna ka nuha innálakana rakaba iki ka nuná?
1CO 14:24 Ttaka ganna iyábale se'ele rigixxi'ale nu raka le Tata Do Yebáha una ka benne, nianna tti ga'a ttu nu labí chi ria leni ge Jesús‑ni o ttu nu saleaka abittu chi yuna, nna tti iyieninna nu rinneleha, la'ania nna otte dana deki ankana nu ruin satsa nna la labana okinni ikini deki ralhabana ugwe Tata Do Yebáha na elha disa ge nu ruinnaha.
1CO 14:25 Tti chi ilá loo nu gatsi ruinnaha, la'ania nna tti ibigana udú xibini arlo Tata Do Yebáha, nna innána deki gwalíba du Tata Do Yebáha len lebi'i.
1CO 14:26 Betsi to, ¿bíla anka nu uinri'i ganna? Lebi'i, atti ritupale, kua ttu ttule ganna chele ttu le'a ki ulhale o raka lele ule'enle ka benne ttu bixa, o si kixxi'ale nu raka le Tata Do Yebáha una ka benne lhe o raka lele innele attu tisa subi nu labí rite dani ka benne o si kixxi'ale bixa diani nu ra benne rinne tisa subiha, iyá nuná uinle kini ixúna use'e tsitsi luesile.
1CO 14:27 Ganna raka lele innele attu tisa subi, inneba suna chupabale o yalhá ttela tsunnale. Aná nna kua ttu ttubale innele lhe anágaba nna teeki du ttu benne raka gebie kixxi'abie bixa nuha ra benne du rinne attu tisa subiha.
1CO 14:28 Ttaka ganna anúba benne se'e raka geke kixxi'ake bixa diani nu ra benne rinneha, tserula siiba aka benne rinneha, abittula innebie tisa subi arlo ka benne tupaha, sinuki lhi'u lebe innebie len Tata Do Yebáha.
1CO 14:29 Anágaba ka benne kixxi'ake nu raka le Tata Do Yebáha una ka benne, suna chupabake o tsunnabake inne. Adíke nna tse'ebake utte liike ganna gwalí nu anka ge Tata Do Yebáha nuha rinne ka benneha,
1CO 14:30 nna ganna ttu benne re niha, ttu nnelaba kixxi'ani Tata Do Yebáha bie ttu bixa raka lebie una ka benne, benne du gwenneha teeki eyaka siibie kini aka inne benne reha.
1CO 14:31 Kumu aníha nna kua ttu ttule gwakaba gele kixxi'ale nu raka le Tata Do Yebáha una ka benne, kini aníha nna iyábale idetile lhe iyábale tse'e ittale lhe.
1CO 14:32 Kumu ka benne rigixxi'ake nu raka le Tata Do Yebáha una ka benne, la labake inná nuka inneke lhe nuka abittu inneke lhe.
1CO 14:33 Kumu Tata Do Yebáha labí raka le benneha ladiba uinri'i, sinuki raka lebie uinri'i latsiru. Ttiba runi iyába ka benne chi ankake ge Jesús‑ni atti ritupake ki rulhake gebie,
1CO 14:34 ka benne nuila‑na siiba akake lo benne, labí dika inneke, sinuki udába ikike attiba chi ga'anna lo ka tisa ge Tata Do Yebáha.
1CO 14:35 Ganna raka leke una tseke ge ttu bixa, lhe'e lisilibake innaba tisake ka nubiyú geke‑na ge nu raka leke unake. Kumu labí rule'e tse ganna ttixka ttu nuila duna rinnena rinnaba tisana lo ka benne tti tupake.
1CO 14:36 Lebi'i, ¿si rakinle deki ikibale biria ka tisa ge Tata Do Yebáha? O, ¿si rakinle deki suna len lebi'iba chi bisia ka tisa geeha?
1CO 14:37 Ganna nuxa ttúle rakinle deki ankale benne rigixxi'ale nu raka le Tata Do Yebáha una ka benne o chi rudorule tisa ge Espíritu geeha, ganna aníha ankale, teeki okinni ikile deki nu runia lo yetsi‑ni ankana nu bodha'an Tata Xisiha kini udori'i tisa geni.
1CO 14:38 Ganna ttu benne abíba okinni ikie deki nu rinnea‑ni ankana ge Tata Do Yebáha, anágaba benneha abittugaba etabini Tata Do Yebáha gebie.
1CO 14:39 Laxkala xa betsi to kia, gwaluin doelha kini akale benne kixxi'ale nu raka le Tata Do Yebáha una ka benne nna abittu usunale tti inne ka benne attu tisa subi nu labí rite dani ka benne.
1CO 14:40 Ttaka iyá nuní gwaluin na latsiru lhe attiba ankaba geni lhe.
1CO 15:1 Betsi to, nnanna rodhua lele ka tisa ge Cristuha, delába ka tisa tse chi utixxi'ania leha, ka tisa ugíagaba lele gekeha lhe den tsitsile ke nnanna lhe.
1CO 15:2 De ka tisa‑nigaba nna gwalále, ganna si gwa ria lele geke atti ttega utixxi'ania leha. Ganna abíba nna kwentaruba nuha ugía lele.
1CO 15:3 Kumu neti lade'a tte utixxi'ania le nu bela'abakanie neti. Bela'akanie neti deki Cristuha uttie utixe ge ka tulha geri'i atti tteba chi ga'anna lo ka yetsi ge Tata Do Yebáha,
1CO 15:4 nianna tti bigatsie. Iki de chi beyonna ubisa bigatsieha nna beyadha benbe lo elhuttiha attigaba chi ra lo ka yetsi geeha.
1CO 15:5 Nianna tti bele'e lobie len Pedro‑ni. Iki de nuha nna tti bodole'e lobie len iyába ka benne tsi'inu (12) rudhetinieha.
1CO 15:6 Delo nna ttu tsa tteba bele'e lobie len gwate gayu gayua (500) ka betsi to geri'i. Nnanna ixe ka benneha sa se'e benbake, adíke nna chiba uttike.
1CO 15:7 Nianna bele'egaba loe len Jacobo‑ni, delola nna tti bele'e loe len iyába ka benne ankake apóstol geeha.
1CO 15:8 Iki de chi bele'e loe len iyá ka benneha nna debá len netiba bele'e loe. Ankabaa attiba ttu nuto uli ya'abana, aníha‑ba bele'e loe len neti.
1CO 15:9 Kumu delo iyá ka benne ankake apóstol ge Jesús‑ni netiba labí dakaa. Labí elha ralhaa gatta láya apóstol gebie kumu de gwanalhalaa ka benne ria leke Tata Do Yebáha bedhaka xiia ke.
1CO 15:10 Ttaka Tata Do Yebáha bedá lebie betebie elha tse kia, de nuha nna ankaa apóstol. Elha tse beteeha gwa bixúba nuha len neti, labí kwentaba betebie na len neti. Kumu netila nuní rekirua rigixxi'aya ge Jesús‑ni attichula iyá ka benne ankake apóstol gebie. Meskiba laa netiga runia nuní, sinuki Tata Do Yebáha‑ba redá lebie raka lenie neti ki runia nuní.
1CO 15:11 Ttaka, ¿bí de ruinna? Sila neti utixxi'ania le ge Cristuha o sila adí ka apóstol geeha, ri'itu ttúba rigixxi'atu, lebi'i nna gwa ugíaba lele ge nu utixxi'entu leha.
1CO 15:12 Nianna, ganna ri'itu rigixxi'atu deki Cristuha beyadha benbie lagwi ge ka benne chi uttiha, ¿beakala nna sa raba ttu chupale deki ka benne chi uttiha labí eyaka ben ka benneha?
1CO 15:13 Ki ganna abígaba eyaka ben ka benne chi uttiha, anágaba Cristuha abittugaba beyaka ben benneha lo elhuttiha ganna ttixka.
1CO 15:14 Ganna Cristuha abíba beyaka benbie lo elhuttiha, la'ania nna abígaba ixú nu rekitu rigixxi'atu gebie. Anágaba lhe, kwentarugaba nuha ria lele gebie.
1CO 15:15 Ganna si gwalíbinle deki abíba eyaka ben ka benne chi uttiha, la'ania nna labí lii nu rigixxi'atu ge Tata Do Yebáha ganna ttixka, kumu ri'itu ratu: “Tata Do Yebáha belhidha benbe Cristuha lo elhuttiha.”
1CO 15:16 Kumu ganna ka benne chi uttiha abíba eyaka benke, la'ania nna Cristuha abígaba beyaka ben benneha ganna ttixka.
1CO 15:17 Ganna si gwalíba deki Cristuha abittuba beyaka benbie, la'ania nna abígaba ixú nu ria lele gebie lhe anágaba nna sa nujagabale yua ge ka tulha gele‑na ganna ttixka.
1CO 15:18 Lhe anágaba ka benne chi utti ria leke Cristuha, abittugaba exúkin benneha lo Tata Do Yebáha ganna ttixka.
1CO 15:19 Ganna sunruba nnanna se'eri'i yiesi lo yu‑ni gwa rixú nu ruxxen leri'i ge Cristuha, la'ania nna delo iyá ka benne se'e yiesi lo yu‑ni, ri'ila nuha ralhari'i gákana ri'i: “¡Karusi'irukana, kwentaruba nuná ria lekani!”
1CO 15:20 Ttaka kumu de gwalíba beyaka ben Cristuha lagwi ge ka benne chi uttiha, laxkala nna labie nuha lade'a tte beyadhe lo elhuttiha. De nuha nna rutebie elha xen lasi deki gweyaka bengaba ka benne chi utti ugía leke gebie.
1CO 15:21 Kumu attiba elhutti geri'i re yiesi lo yu‑ni udulona delo ni'a ge tulha ben ttu benne, anágaba nna de nu tse ben attu benne, de nuha nna gwaka eyadha ben ka benne lo elhuttiha.
1CO 15:22 Kumu ttiba ri'i de datiari'i Adán‑ni nna iyábari'i rattiri'i, anágaba nna de ria leri'i ge Cristuha nna iyágabari'i eyaka benri'i lo elhuttiha.
1CO 15:23 Ttaka kua ttu tturi'i eyadhari'i lo elhuttiha kua galhabari'i: lade'a tte Cristuha beyadha benbie lo elhuttiha. Iki de nuha nna tti esiabie yiesi lo yu‑ni, la'ania nna eyadha ben ka benne chi ankake gebie.
1CO 15:24 Nianna ganna chi betse'e loobie iyá nu rinnabia lhe iyá nu rapa lo neda lhe iyá nu ra tsitsi leni lhe, nianna tti otebie iyá nu unnabieha lasi ná Tata Do Yebaa benne anke Xxudieha. Iki deliba nuha nna tti lhuxa loo yiesi lo yu‑ni.
1CO 15:25 Kumu Cristuha innabie axtaliba ganna chi udaabie lo iyá ka nu abittu raka uyúkane.
1CO 15:26 Iki deliba nuha nna utse'e looe attu nu labí raka uyúne, delába elhuttiha.
1CO 15:27 Kumu lo ka yetsi ge Tata Do Yebáha dia ra: “Iyá tteba nu se'e chi beka'an Tata Do Yebáha lasi ná Cristuha kini labie nna innabie kana.” Gwalí galá tti ra, iyába beka'ane lasi ná Cristuha, Tata Do Yebáha labí sele lhe'e nuha, kumu ki lalee nuha beka'ane iyá nuha lasi ná Cristuha.
1CO 15:28 Nianna ganna chi unnabia Cristuha iyá tte nu se'e, la'ania nna la Cristu benne anka Xi'in Tata Do Yebáha, la labe etebie lasi ná Tata Do Yebáha kini benneha nna innabie Cristuha. Aníha kini Tata Do Yebaa benne boka'ane lasi ná Cristuha iyá tte nu se'e, benneha ake benne xxeniru lo iyá tte nu se'e.
1CO 15:29 Ganna gwalíga deki abittuba eyaka ben ka benne chi uttiha, ganna aníha nna, ¿bíla anka nu uin ka benne radike inda kwenta ge ka benne chi uttiha ganna? Ki ganna abígaba lii deki reyadha ben ka benne lo elhuttiha, ¿beakala ki sa radike inda kwenta ge ka benneha ganna?
1CO 15:30 Anágaba ri'itu, ¿beakala ki ttu ttu sába ruxunnina getu bixa satetu de rekitu ugixxi'a ge Cristuha ki ganna abígaba eyaka ben ka benne chi uttiha?
1CO 15:31 Gwalígati xa betsi to, anába attiba tee elha gwedeaka lasi kia de chi ria lele ge Jesucristu benne anke Xxanari'iha, anágaba nna ttu ttu sába ruxunnina kia gattia.
1CO 15:32 Lhe'esi Éfeso‑ni betilha ro'a len ka nu ruin satsa se'e niha. ¿Beakala ki betilha ro'a len ka nuha, ki ganna abíba lii eyaka ben ka benne chi uttiha? Ganna aníha aka: “Gochilari'i lhe i'iyachilari'i ki uxxeha‑ba gattiri'i.”
1CO 15:33 Bittu tsia lele ge ka nu ruin lekinna, kumu ganna: “Utsári'i ka nu runi satsa‑na, unnittiba ka nuná nu tse ruinri'i.”
1CO 15:34 Gwalotte da ge nu ruinle‑na; abitturu uinle tulha. Kumu ttu chupale labí ankabienle Tata Do Yebáha. Ria aní kini lebi'i dhile elhittu.
1CO 15:35 Ttaka gaxa gwa raba ttu chupale: “¿Gasina eyaka ben ka benne chi uttiha? ¿Gasina eyaka bela latike ganna chi eyadhake lo elhuttiha ganna?”
1CO 15:36 ¡Aaluxa nu akaa yubi ikini! Lu tti radalu ttu besi, laa besiha‑ga nuha re'eyuna. ¿Laaba ganna lade'axa rusu lati besiha, nialiba nna tti re'eyu ikini?
1CO 15:37 Nna nu radaluha, laa lhaga ge besiha‑ga nuha reyadalu. ¿Laaba ganna besiha nuha radalu? Sila radalu xua xuxtila o bixaru attu besi.
1CO 15:38 Ttaka Tata Do Yebáha runie lati besiha attiba rudhakaba lebie akana, kua ttu ttu ka besiha ya yaba le runie latikani.
1CO 15:39 Anágaba ri'i ka benne se'eri'i yiesi lo yu‑ni, bela latiri'i‑ni len bela lati ka nimala reki yiesi lo yu‑ni, ya yaba le ankakana. Anágaba yágaba le anka bela lati ka nu sia xxilakani lhe yágaba le anka bela lati ka belha reki lhe'e inda‑na lhe.
1CO 15:40 Anágaba se'egaba ka lati ka nu anka ge yebáha lhe se'egaba ka lati ka nu anka ge yiesi lo yu‑ni lhe. Iyábakana tseba rule'ekana, ttaka ka nu anka ge yebáha, ya le anka ka nuha nna ka nu anka ge yiesi lo yu‑ni nna yágaba le ankakana.
1CO 15:41 Ttibanka tatubisa‑na, ya le anka xiani ge benne‑na. Nanto beo‑na nna yágaba le anka xiani gebie. Anágaba ka beli‑na yágaba le anka xiani gekani. Kua ttu ttu ka nuná ya yaba le anka xiani gekani.
1CO 15:42 Anágaba aka ganna chi beyadha ka benne chi uttiha. Bela latike nu rigatsiha, rusuba nuha, nna bela latike nu eyadha lo elhuttiha, labíru usu nuha.
1CO 15:43 Bela latiri'i nu abittu ra xxeni leniha rigatsiba nuha nna reyadha nu ra xxeni leniha. Rigatsiba nu chi gwatú leniha nna reyadha nu ra tsitsi leniha.
1CO 15:44 Rigatsiba latiri'i nu anka ge yiesi lo yu‑ni nna reyadha latiri'i nu anka ge yebáha. Kumu attigaba se'e latiri'i nu anka ge yiesi lo yu‑ni, anágaba nna se'egaba latiri'i nu anka ge yebáha.
1CO 15:45 Lo ka yetsi ge Tata Do Yebáha dia ra: “Adán benne biyú udo sisi'a tteha, uyu'u elha nabani gebie yiesi lo yu‑ni.” Ttaka Adán benne bisia lo xubanaha, delába Cristuha, benneha nna anke espíritu rutebie elha nabani geri'i arlo Tata Do Yebáha.
1CO 15:46 Ttaka laa nu anka ge yebáha‑ga nuha bisia lade'a tte, sinuki nu anka ge yiesi lo yu‑nila nuha bisia lade'a tte. Iki deliba nuha nna tti bisia nu anka ge yebáha.
1CO 15:47 Adán benne udo sisi'a tteha uke ge yiesi lo yu‑ni nna len yuba ben Tata Do Yebáha bie. Ttaka benne bisia berupaha, delába Cristuha, benneha uke benne dabie yebáha.
1CO 15:48 Ka benne se'e yiesi lo yu‑ni anka latike attiba lati benne ben Tata Do Yebáha len yu nna ka benne ankake ge yebáha nna anka latike attiba anka lati benne daa yebáha.
1CO 15:49 Anába attiba nnanna rule'eri'i atti tteba uka benne ben Tata Do Yebáha len yu, anágaba isia sá ule'egabari'i tti tteba anka benne daa yebáha.
1CO 15:50 Nu raka lasia upeya le xa betsi to, bela latiri'i‑ni nu anka ge yiesi lo yu‑ni, labí aka eta'a nuní ata rinnabia Tata Do Yebáha; nigaba bela latiri'i nu rusuha, labí aka eta'a nuha ata tee nu labí rusuha.
1CO 15:51 Nnanna kixxi'ania le ttu nu labí chi yule, nu chi ga'anani Tata Do Yebáha unale, delába labí iyári'i gattiri'i, ttaka iyábari'i esea latiri'i.
1CO 15:52 Nuní ttu nnelaba akana. Akana attiba tti rigin rixxua lori'i. La'ania kwesi trompeta nu dalhuxaha. Kumu ganna chi uresi trompetaha, la'ania nna ka benne chi utti ugía leke ge Cristuha eyaka benba ka benneha len latike nu labíru usuha. Nianna ri'i ka benne ata sa se'e benri'i la'ania, eseagaba bela latiri'i.
1CO 15:53 Kumu bela latiri'i nu rusuha teeki eyaka nuha nu abitturu usuna, lhe anágaba bela latiri'i nu ratti yiesi lo yu‑ni eyakagabana nu abitturu gattina.
1CO 15:54 Ki ganna latiri'i nu rusuha chi beyakana nu abitturu usu, lhe ki ganna latiri'i nu ratti yiesi lo yu‑ni chi beyakana nu abitturu gatti, la'ania nuha chi gwado tisa ge nu ra lo ka yetsi ge Tata Do Yebáha ata dia ra: Tata Do Yebáha betse'e loe elhuttiha; de nuha nna labíru dhaana uttina ka benne.
1CO 15:55 Eru geni xa elhutti, ¿gála gwaga'alu nu xxeni ra leluha ganna? Lhe, ¿gála gwaga'alu gwe nu ruinluha lhe?
1CO 15:56 Kumu tulha ruinri'iha, nuha rixúni elhuttiha kini ruttina ri'i. Bia bennabiha nna redexuin tulhaha na kini ridaana rukinnina ri'i.
1CO 15:57 Ttaka ixkixaru Tata Do Yebáha, de utti Jesucristu benne anke Xxanari'iha utixe geri'i, de nuha nna Tata Do Yebáha rodilábie ri'i lo ka tulha ruinri'i lhe rodilábie ri'i lo elhuttiha lhe.
1CO 15:58 Laxkala xa betsi to kia, gwaltse'e tsitsi, bittu udhanle a tsia lele ge Jesús benne anke Xxanari'iha. Satía gwaludo lele lo sina gebie. Gwa yúbale deki sina ruinle de babale lenie labí kwentaba ruinle nuná, gwedí baabale ge sina‑na.
1CO 16:1 Nnanna nna raka lasia innea ge belhiu nu uttupale ki dhi adí ka benne chi ankake ge Tata Do Yebáha. Lebi'i gwaluinba attiba chi bedha'anaa uin adí ka benne chi ria leke ge Jesús‑ni, delába ka benne se'e itúba daka Galacia‑na.
1CO 16:2 Ttu ttu duminku kua ttu ttule gwalikwesi latti iki belhiu nu roga'ale yo'o kua ruteba Tata Do Yebáha gele. Gwalikua tse na kini ganna chi isiaya ata se'ele‑na abittu la'aniala si tsu'ule uttupale belhuha.
1CO 16:3 Gwanka ganna chi bisiayaha, la'ania nna idhelhaa ka benne chi bekweleha ki tsiake lhe'esi Jerusalén‑ni. Ka benneha utselaa ke yetsi kini sadha'anke belhiu nu chi bedá lele beteleha.
1CO 16:4 Ganna si rakaba doelha tsiaya, la'ania nna tsa'aba lania ka benneha.
1CO 16:5 Gwasiabaa ata se'ele‑na gannaliba chi utea lo yu ge Macedonia‑na, kumu teeki ttea naa.
1CO 16:6 Ganna chi bisiaya ata se'ele‑na, la'ania ni kina gaa gwasábaa dhoa len lebi'i, lhe ni kina gaa gwabedabaa ata se'ele‑na axtaliba ganna chi ute idilhaha, kini ganna chi iriaya tsiaya attu ta subi, lebi'i nna utele ge neda kia.
1CO 16:7 Kumu labí raka lasia yu'u nedaba ttea ata se'ele‑na, sinuki rulaba lasia isáya len lebi'i ganna Tata Xisiha aka lebie.
1CO 16:8 Ttaka nnanna sa eya'anbaa dhoa lhe'esi Éfeso‑ni axtaliba ganna chi ute laní Pentecostés‑ni,
1CO 16:9 kumu nnannala chi biyali tá lo neda kia kini kixxi'aya ka tisa ge Cristuha. Ttaka anágaba nna ixegaba ka nu rese'e disakana loa.
1CO 16:10 Ganna si isia Timoteo‑na ata se'ele‑na, gwaluni kini dho tsena len lebi'i, kumu lana ankana ttu nu riben lo sina ge Tata Xisiha ttiba neti.
1CO 16:11 Laxkala ni ttúle abittu ku'u ni'ale na, sinuki gwalugwela na ge neda geni kini isiana latsiru ata doa‑ni, kumu neti lhe ka betsi to geri'i se'e nii ribedatu na.
1CO 16:12 Betsi to geri'i Apolos‑ni ixe lidú chi unnaba ditia loni kini ita lenna ka betsi to geri'i se'e nii ata se'ele‑na. Ttaka birula uka leni itana nnanna. Gwitabana nukaxa gapana neda.
1CO 16:13 Gwaltse'e ubeda, abittu udhanle a tsia lele Tata Xisiha lhe tsitsi gwaltse'e lo neda gebie lhe. Gwaluni tti runi ttu nubiyú re tsitsi leni.
1CO 16:14 Iyába nu uinle gwaluin na len elha si'i lasi.
1CO 16:15 Lebi'i gwa yúbale xa betsi to, Estéfanas‑na lenna ka benne se'e lisin‑na, lake nuná sisi'a tte bedaxxuke neda ge Cristuha lo yu ge Acaya‑na lhe lake nuná redá leke rute náke len ka benne chi riesike ki akake ge Tata Do Yebáha.
1CO 16:16 Rinnaba ditia len lebi'i: tse'ele uinle nu inná ka benne‑na lhe uinle nu inná iyá ka benne rute náke len ka benne ribenke sina ge Tata Do Yebáha.
1CO 16:17 Yalhá itta bedú lasia tti bita Estéfanas‑na lhe Fortunato‑na lhe Acaico‑na lhe ata doa‑ni, kumu de lanúle se'e nii, de nuha nna lakana benkana kwenta gele,
1CO 16:18 bodú ittakana lasia lhe bodú ittakana lele lhe. De nuha nna gwaltsia lele kana lhe gwaltsiagaba lele ka benne runi tti ruinkana.
1CO 16:19 Ka benne ria leke ge Jesús‑ni se'e daka Asia‑ni, ridhelhake ttu padiuxi gele. Aquila‑ni lhe Priscila‑ni lhe, anágaba ka benne ritupake lhe'e yo'o ge ka benne‑ni, de se'e lenke Tata Xisiha nna itú iki itú leke redhelhagabake ttu padiuxi gele.
1CO 16:20 Iyába ka betsi to geri'i se'e len neti nii redhelhagabake ttu padiuxi gele. Anágaba lebi'i gwalugwegaba luesile ttu padiuxi lhe gwaligo ttu xxaga luesi le lhe.
1CO 16:21 Kwinaga neti Pablo, len letra kia runia lo yetsi‑ni redhelhaa padiuxi gele.
1CO 16:22 Ttu nu abittu rakinna ge Jesús benne anke Xxanari'iha, nuha urixxi ukinniba Tata Do Yebáha na, tsaba tsia nnittina. Jesús benne anke Xxanari'iha chi tteba esia benneha.
1CO 16:23 Labie edá lebie aka lenie le.
1CO 16:24 Neti de chi babaa len Jesucristuha, de nuha nna rakati ge iyá ttele. Amén.
2CO 1:1 Neti Pablo ankaa apóstol ge Jesucristuha kumu de Tata Do Yebáha chi bedá lebie ki akaa nuní. Neti lenia betsi to geri'i Timoteo‑ni ridhelhatu yetsi‑ni gele, lebi'i ka benne ritupale lhe'esi Corinto‑na ki rulhale ge Tata Do Yebáha lhe anágaba ridhelhagabatu yetsi‑ni len adíle ka benne chi ankale gebie se'ele itúba daka Acaya‑na.
2CO 1:2 Xxudiri'i do yebáha lhe Jesucristu benne anke Xxanari'iha lhe, lake edá leke aka lenke le lhe use'eke le xen su lasi lhe.
2CO 1:3 Xxeniba ra le Tata Do Yebáha, delába Xxudi Jesucristu benne anke Xxanari'iha. Labie anke ttu xxudi ratua lasi lhe anke ttu Diosi satíaba rodú tsebie leri'i lhe.
2CO 1:4 Labie nuha rodú tsebie letu lo iyába ka elha disa ruyútu, kini anáchu ri'itu akagaba getu odú tsetu le ka benne rateke ttu bixa elha disa. Attiba ben Tata Do Yebáha bodú tsebie letu, aníha‑gaba uintu.
2CO 1:5 Kumu anába attigaba gwate Cristuha biyúe elha disa, anágaba ri'itu de rekitu rigixxi'atu gebie, de nuha nna ruyú xxattatu elha disa, anágaba nna de babatu lenie nna yalhá tse rodúbie letu.
2CO 1:6 Ganna ri'itu ruyútu elha disa, ratetu aní kini lebi'i lhaale lo ka tulha gele‑na lhe kini edú tse lele lhe. Kumu ganna rodú tse Tata Do Yebáha letu, rodú tsebie letu kini anágaba ri'itu odú tsegabatu lele. Aníha kini lebi'i dhaale utto uchíale tti ratele luesi elha disa ratetu‑ni.
2CO 1:7 Ruxxen tsitsiba letu gele, kumu yúbatu attiba lebi'i riselale len ri'itu tti ratetu ttu bixa, anágaba nna tti redú tse letu nna riselagabale len ri'itu redú tse lele.
2CO 1:8 Betsi to, raka letu unale ge elha disa biyútu daka Asia‑ni. Tsitsiba gwatetu nuha la'ania. Chi tteba abí gwa dhaatu uchíatu lo nu ratetuha, abitturuba ruxxen letu eria bentu.
2CO 1:9 Chiba rakintu laa debániba chiba bisia sá getu gattitu. Aníha gwatetu kini abitturu uxxen letu ge la kwinaba ri'itu, sinuki uxxenla letu ge Tata Do Yebaa benne elhidha benbie ka benne chi uttiha.
2CO 1:10 Benneha bodilábie ri'itu lo elha disa xxeni gwatetu la'ania, axtaba bexunnina getu gattitu. Anágaba nna godilárugabe ri'itu lhe gegabe ruxxen letu deki godilaa chiettirugabe ri'itu lo nu si daa.
2CO 1:11 Lebi'i utegaba nále len ri'itu innabale getu len Tata Do Yebáha, kini anáchu de ixe ka benne innabake getu lenie, de nuha nna ixegaba ka benne ugweke Tata Do Yebáha ixkixaru de unie nu tse len ri'itu.
2CO 1:12 Kumu ri'itu yu xeabatu, latsiruba ruintu arlo nuxaba benne, ttaka len lebi'i nuná ruinrutu latsiru. Labí ruintu ttu bixa nu udheana lotu. Lhixxa rába rinnetu, labí rukatsitu ttu bixa. Labí ruintu nu yu'uba ikitu, sinuki Tata Do Yebáha‑ba raka lenie ri'itu. De nuha nna redeakintu ge nu ruintu.
2CO 1:13 Lo ka yetsi ridhelhatu len lebi'i, labí ruintu lokani ttu bixa nu abittu rite denle o abittu aka gele ulabale. Neti ruxxenba lasia gwate dábinle nu ra lokani.
2CO 1:14 Ttiba chi rite denle ttu latti ge nu rigixxi'atu, anágaba isia sá gwate dábinle iyá tte, kini ganna chi bisia sá esia Jesús benne anke Xxanari'iha, la'ania nna ri'itu utetu elha gwedaka lasi gele, anágaba lebi'i utegabale elha gwedaka lasi getu.
2CO 1:15 Ge nuníba bexxen lasia. Laxkala ukati, tti tsiaya daka Macedonia‑na, lade'axala ttea ata se'ele‑na. Iki de chi bedáya Macedonia‑na nna edete adakabaa ata se'ele‑na attu libe kini edú itta lele chupa libe, kini anáchu ganna chi eya'aya daka Judea‑ni, la'ania nna lebi'i utele ge neda kia.
2CO 1:17 Tti bebeki lasia unia aní, bittu akinle deki ttu nnelaba botsea elha rulaba le kia o benia attiba ruin adí ka benne, lade'axa ria: “Gwakaba unia ttu bixa”, delo nna edenía: “Labíru aka.” ¡Ko'o! ¡Labí ruin neti aníha!
2CO 1:18 Kumu attiba Tata Do Yebáha anke ttu benne ruinbe nu chi rabie, anágaba ri'itu labí lade'axa ratu le: “O”, delo nna edenátu: “Labí.”
2CO 1:19 Kumu Jesucristu Xi'in Tata Do Yebaa benne rigixxi'atu gebie, neti lhe Timoteo‑ni lhe Silvano‑ni lhe, benne rigixxi'atu geeha labí anke benne lade'axa innábie: “O”, delo nna edennábie: “Labí.” Benneha labí rotsea elha rinne gebie, satíaba ree: “Gwakaba.”
2CO 1:20 Kumu de Jesucristuha nna iyába nu ra Tata Do Yebáha unie, gwa rakaba nuha. Laxkala de Jesucristuha‑gaba nna tti rari'i: “Amén”, Tata Do Yebáha nuha ruinri'i kini ra xxeni lebie.
2CO 1:21 Tata Do Yebáha‑gaba nuha ruse'e tsitsie ri'itu lhe ruse'e tsitsigabe le de chi babari'i len Cristuha. Lagabe nuha chi bodha'ane kini uintu sina gebie.
2CO 1:22 Anágaba chigaba bodha'ane ttu seña lhe'e lastotu kini ule'e deki chi ankatu gebie, delába ulu'ubie Espíritu geeha lhe'e lastotu kini benneha runna liibie deki guteba Tata Do Yebáha nu chi rabie utebie getu.
2CO 1:23 Tata Do Yebáha yu xeabe, de gwatuaba lasia le nna labí chi bitaa lhe'esi Corinto‑na kini ka kisaa le.
2CO 1:24 Kumu ri'itu labí raka letu innabiatu le ki gatu le: “Aní teeki tsia lele”, kumu lebi'i tseba chi ria lele. Ri'itu nu rakala letu, ute nátu len lebi'i kini tse'e ittarule.
2CO 2:1 De nuha nna belaba lasia, labí itaa attu libe kini etedidú si'a lele.
2CO 2:2 Kumu ganna ttixka neti udú si'a lele, nianna, ¿núla anka nu odú ittana lasia ganna? ¿Laaba ganna lebi'i ka nu udú si'a lele, lebi'i nuná odú ittale lasia?
2CO 2:3 De nuha nna benia yetsi nu udhelhaa len lebi'iha, kini ganna chi isiaya ata se'ele‑na lebi'i ka nu ralhale odú ittale lasia, abittu udú si'ile lasia la'ania. Kumu neti yu xeabaa deki tti edú itta lasia, anágaba lebi'i iyágabale edú itta lele.
2CO 2:4 Tti benia yetsi nu udhelhaa len lebi'i la'ania, yalhá bedúna neti lhe biyú xxattaa elha disa lhe axtaba ribesia. Labí benia yetsiha kini udú si'a lele. ¡Ko'o! Benlaa yetsiha kini anáchu lebi'i yule deki raka xxattati gele.
2CO 2:5 Ganna nuxa ttúle nuná chi betsetsile, neti labí ritebiaya tti ria, nu betsetsi‑na, labí suna neti nuná bedú si'ina lasia, sinuki iyágaba lebi'i nuná bedú si'ina lele.
2CO 2:6 Kumu ixebale chi begwele nu betsetsi‑na elha disa. Elha disa nu chi begwele na, ukare'a nuná.
2CO 2:7 Nu uinlale, gwalidhíla elha xen lasi geni lhe gwalodúla itta leni lhe kini abittu udú si'i xxattana leni.
2CO 2:8 De nuha nna rinnaba ditia len lebi'i gwaluni kini lana tte denna deki gwa rakabinle geni.
2CO 2:9 Kumu neti benia yetsiha, kini unaa ganna gwa rudole tisa ge iyá tte nu chi ria uinle.
2CO 2:10 Laxkala nu dhile elha xen lasi geni ge ttu bixa rutsetsina, neti gwadígabaa elha xen lasi ge nuha. Ganna tee ttu bixa teeki dhia elha xen lasi geni, de lebi'i nna chi uxía elha xen lasi ge nuha arlo Cristuha.
2CO 2:11 Aníha kini abittu dhaa nu xxegwiha dhi yiena ri'i, kumu chiba yuri'i nu rulha le nuha uinna.
2CO 2:12 Neti tti bisinaa lhe'esi Troas‑ni kini kixxi'aya ka tisa ge Cristuha, Tata Xisiha gwa udhalibe neda kia kini kixxi'aya ka tisa geeha.
2CO 2:13 Ttaka labí udú tse lasia, kumu lanú betsi to geri'i Tito‑ni gwaxxakaa niha. Aníha uka nna uchú tisaa ka benne se'e niha nna udáya diaya daka Macedonia‑ni.
2CO 2:14 Ttaka ixkixaru Tata Do Yebáha, kumu de babatu len Cristuha, de nuha nna runie kini ri'itu satíaba ridaatu lo nu xxegwiha. Ri'itu rixúnie kini gaxaba diatu rigixxi'entu ka benne ka tisa geeha, kini uinbiake bie. Nu rigixxi'atuha ankana attiba ttu nu rure ixixxi, gaxaba diatu radhina.
2CO 2:15 De nuha nna ri'itu ankatu ttiba ttu nu rure ixixxi rutso du Cristuha arlo Tata Do Yebáha. Ankagabatu ttiba ttu nu rure ixixxi arlo ka nu gwalákana lhe arlo ka nu tsia nnittikana lhe.
2CO 2:16 Arlo ka nu tsia nnittikanaha, ri'itu ankatu ttiba ttu nu rure ixixxi nu kilana elhutti gekani, nna arlo ka nu gwalákanaha nna ankagabatu ttiba ttu nu rure ixixxi nu uinna kini aka benkana ttu dia lii. Ttaka luesi sina ruintu‑ni lanú nu dhaana uinna nuní ganna abíba du lenna Cristuha.
2CO 2:17 Kumu ri'itu labí ruintu tti runi ixe ka nu reki naa. Ka nuná rekikana rigixxi'akana ge Cristuha kini ridíkana belhiu. Ttaka ri'itu Tata Do Yebáha gwa yu xeabe labí danalhatu belhiu; lhixxa rába rekitu rigixxi'atu ka tisa geeha, ruintu atti galába ka benne chi udhelhe lhe atti galába runi ka benne chi babake len Cristuha lhe.
2CO 3:1 Gwa rakabinle la labakana chi bededulokana redene tsekana ge nu ruinkana kini eya'an tsekana arlotu. ¡Ko'o, labí! Lebi'i gwalinnáruga, ri'itu, ¿si riyasintu dhentu ttu yetsi ki utso dutu arlole ata rigixxi'a loni deki benne tseba ankatu kini lebi'i nna tsia lele getu? O, ¿si riyasintu uinle ttu yetsi dhentu ata rigixxi'a loni deki gwa ankabatu benne tse? ¿O, si riyasintu uintu tti runi adí ka benne rinnabake yetsi? ¡Ko'o, labí!
2CO 3:2 Kwinaba lebi'i nuná ankale ttiba ttu yetsi rutso dutu arlo ka benne. Ka benne rutso dutu le arloke, ka benneha tti rilákanie tseba anka elha ruin gele, la'ania nuha rokinni ikike deki ri'itu tseba bele'entu le ge Cristuha.
2CO 3:3 Lebi'i rilá saaba deki ankale ttiba ttu yetsi ben Cristuha nu rutso dutu arlo ka benne ki rule'e loo sina bentu len lebi'i. Labí benie na len letra nu dia lo yetsi, sinuki bixúlanie Espíritu ge Tata Do Yebaa benne anka baniha. Labí bodha'ane na lo ka íyya, sinuki bodha'ane na lhe'e lasto ka benne.
2CO 3:4 De nuha nna ruxxen letu Tata Do Yebáha‑ba runie nuní de babatu len Cristuha.
2CO 3:5 Labí ri'itu ruintu aní, gwanka innátu deki nu anka gebatu nuní ruintu. ¡Ko'o, labí! Sinuki iyába nu raka getu ruintu, Tata Do Yebáha‑ba runie ki raka nuní.
2CO 3:6 Labe benie ri'itu ki akatu nu dika kixxi'atu ka tisa kubi ka nu chi bodha'an tsitsie len ka benne. Tisa kubi nu rigixxi'atu‑ni, nuní labí diana lo ttu bia bennabi, sinuki Espíritu ge Tata Do Yebáha‑ba rutebie na. Kumu ka tisa dia lo bia bennabiha rukinniba ka nuha ri'i kini gattiri'i, ttaka Espíritu ge Tata Do Yebáha ruinlee kini aka benri'i arloe.
2CO 3:7 Ka tisa ka nu dia lo ka íyya bodha'an Tata Do Yebáha len Moisés‑ni, delába ka nu rukinnikana ri'i kini gattiri'i, ka nuha ukakana nu ra xxeni lekani. Laxkala tti besin Moisés‑ni len ka íyyaha, ka nu Israel‑ni labí uka ugíakana lo Moisés‑ni de raka galha xxatta loni, meskiba nu raka galha loniha, sattiruba bechía nuha nna benitti loobana.
2CO 3:8 Ganna ka tisa dia lo ka íyyaha uná xxeni lekani, ¿laaba ganna adírula xxeni ra le nu ruin Espíritu ge Tata Do Yebáha lenri'i?
2CO 3:9 Kumu ki ganna ka tisa ka nu dia lo ka íyyaha, ka nuha rukinnikana ka benne arlo Tata Do Yebáha, ki ganna ka nuha ra xxeni lekani, adírula xxeni ra le tisa kubi nu rigixxi'ana deki Tata Do Yebáha riguabie yua kwe'eri'i ge ka tulha ruinri'i.
2CO 3:10 Ka tisa ka nu ra xxeni lekani la'ania, nnanna labíru xxeni ra le ka nuha ganna rutsenri'i kana len tisa kubi nu tuttíruga ra xxeni leniha.
2CO 3:11 Ki ganna ka tisa ka nu bechía ttu sattirubaha gwa ukakana nu ra xxeni lekani, adírula xxeni ra le ka tisa ka nu uchíakana ttu dia liiha.
2CO 3:12 Ri'tu de ruxxen letu ge ka tisa‑ni, de nuha nna labí rasintu rinnetu.
2CO 3:13 Labí ruintu tti ben Moisés‑ni. Nuha bedhea loni len ttu lari kini ka nu Israel‑ni abittu bilákinna tti deyya renitti loo nu raka galha loniha.
2CO 3:14 Ttaka lakana yayaba ikikani labí ute dákinna, kumu axtaba nnanna tti rulabakana ka tisa ka nu bodha'an Tata Do Yebáha lenkana ttuha, tti rulabakana ka tisaha ttisidiba lariha‑ba nuha rudheana lokani. Kumu sunruba ganna chi ibabakana len Cristuha nna gwatua lariha lokani.
2CO 3:15 Axtaba nnanna tti rulabakana ka tisaha, delába ka tisa bodha'an Tata Do Yebáha len Moisés‑ni, attisidiba lariha‑ba nuha abittu rugwelhana tte dákinna.
2CO 3:16 Ttaka ganna chi rudaxxuri'i neda ge Tata Xisiha, la'ania nuha chi ritua nu abittu rugwelhana utte dari'i.
2CO 3:17 Kumu Tata Xisiha anke Espíritu nna ata chi do Espíritu ge Tata Xisiha lhe'e lastori'i, nna chiba bese'e lhaari'i, labíru xigari'i lo ttu bixa.
2CO 3:18 De nuha nna iyábari'i labíru ankari'i ttiba ttu benne yaya loe ttu lari. Attiba lo ttu iyya gwana chiba rilá saabinri'i nu xxeni ra le Tata Xisiha. Kwa kwaba diari'i rule'e loori'i nu xxeni ra leeha nna kwa kwagaba risinri'i rakari'i attiba labie. Tata Xisiha benne anke Espírituha, benneha runie kini raka aní.
2CO 4:1 Tata Do Yebáha gwatua lebie ri'itu nna bedha'ane ri'itu kini tsekitu kixxi'atu ka tisa geeha. De nuha nna labí redí liretu.
2CO 4:2 Labí ruintu nu raka gatsi nu dika ugwena ri'itu elhittu lo ka benne. Anágaba labí rotsi'inu letu tti rinnetu kini tsia le ka benne getu lhe nigaba labí rotseatu nu ra ka tisa ge Tata Do Yebáha. Nu ruinlatu, arloe rinnebatu nu ankaba gwalí. Aníha ruintu ki rodha'antu lasi ná ka benne kini iyábake okinni ikike deki tseba anka nu ruintu.
2CO 4:3 Ttaka ganna tee ttu bixa nu rudheana ki abittu rite dani ka benne ka tisa tse rigixxi'atu‑ni, suna ka nu tsia nnittibakana, sunruba ka nuha abittu rite dákinna.
2CO 4:4 Kumu nu xxegwiha, delába nu anka diosi rinnabiana yiesi lo yu‑ni, lana nuha bedheana elha rieni ge ka nu abittu ria lekinna kini abittu ute dákinna xiani nu runna ka tisa tseha, delába ka tisa ka nu rigixxi'ake ge nu xxeni ra le Cristuha. Labie nuní anke atti tteba Tata Do Yebáha.
2CO 4:5 Ri'itu labí getu rekitu rigixxi'atu. ¡Ko'o! Ri'itu rekilatu rigixxi'atu ge Jesucristuha. Rigixxi'atu deki labie anke Xxanari'i. Ri'itu sunruba rixútu ki rigixxi'entu le ge Jesús‑ni de rakintu gebie.
2CO 4:6 Kumu Tata Do Yebáha, delába benne rabie: “Galha xiani ata anka chulhaha”, lagabe nuha chi rudenie lhe'e lastotu kini tte dentu nu xxeni ra lebie. Nu xxeni ra leeha nuha rilenri'i lo Jesucristuha.
2CO 4:7 Ttaka ka tisa tse rigixxi'atuha ankake attiba ttu nu daka xxatta nna ri'itu ka benne rigixxi'atu ka tisaha ankatu attiba ttu yedhu yu nu abittu ruchíana isá. Aníha kini ule'e deki Tata Do Yebáha‑ba nuha ra tsitsi xxatta lebie, labí ri'itu nuní ra tsitsi letu.
2CO 4:8 Laxkala meskiba bika ratetu tti ruyútu ttu bixa elha disa, labí reyadi gaatu lhe meskiba labí yutu bí uintu tti ratetu elha disaha, ttaka labí rudú xxattana ri'itu,
2CO 4:9 lhe meskiba ridú nookana ri'itu, ttaka Tata Do Yebáha labí rudhá ikie ri'itu. Meskiba ridaakana lotu, ttaka labí tuttíru rutse'e lookana ri'itu.
2CO 4:10 Gaxaba diatu ruxunnina getu uttikana ri'itu attiba bettikana Jesús‑ni, kini aníha nna ule'egaba elha nabani geeha lentu.
2CO 4:11 Kumu nnanna laka sa se'e bentu, satíaba daa elhutti lotu de rekitu rigixxi'atu ge Jesús‑ni, kini anágaba len latitu‑ni rule'e lootu elha nabani gebie tti ratetu ruyútu ttu bixa elha disa, delába latiri'i nu rattina yiesi lo yu‑ni.
2CO 4:12 Laxkala ri'itu elhuttiha‑ba danalhana ri'itu de rekitu ugixxi'a gebie, lebi'i nna elha nabanila ridíle arlo Tata Do Yebáha.
2CO 4:13 Lo ka yetsi ge Tata Do Yebáha dia ra: “Neti de ugía lasia Tata Do Yebáha, de nuha nna unnea.” Anágaba ri'itu de ugía letu benneha, de nuha‑gaba nna rinnetu.
2CO 4:14 Kumu yúbatu deki Tata Do Yebáha belhidhe Jesús benne anke Xxanari'iha lo elhuttiha. Benneha‑gaba nuha elhidhe ri'itu lo elhuttiha attiba belhidhe Jesús‑ni lo elhuttiha. Nianna echebie ri'itu itupa len lebi'i ata doeha.
2CO 4:15 Iyába nu ratetu‑ni rixúna len lebi'i kini tsaniru ka benne edí baake nu tse redá le Tata Do Yebáha rutebie lenke, kini anáchu ixeerugabake ugweke bie ixkixaru, kini inná xxeni lebie.
2CO 4:16 Laxkala labí redí liretu. Meskiba bela latitu‑ni diana raxxuna, ttaka espíritu getu‑ni, ttu ttu sába diabie rekubie.
2CO 4:17 Kumu nnanna nu ratetu yiesi lo yu‑ni, lattiba nuní lhe sattiba ratetu nuní lhe, ttaka nu dhitu ge nu ratetu‑ni xxenirula anka nuha lhe ttu dia liiba edí baatu geni yebáha lhe.
2CO 4:18 Ri'itu labí rudo lotu ugíatu nu rilá, sinuki rudola lotu ugíatu nu abittu rilá. Kumu nu rilenri'i yiesi lo yu‑ni, nu tse'e looba anka nuní, ttaka ka nu abittu rilá, delába ka nu ankakana ge yebáha, ka nuha satíaba uchíakana.
2CO 5:1 Kumu yúbari'i bela latiri'i nu se'eri'i lhe'eni satti yiesi lo yu‑ni, nuní ankana attiba ttu yo'o geri'i nu labí ruchíana isá. Ganna nuní tse'e loona, Tata Do Yebáha gweyonnabe attu yo'o tse geri'i nu labí ruin ttu benne len nábie, delába eyonie attu lati kubi geri'i nu uchíana ttu dia lii yebáha.
2CO 5:2 De nuha nna nnanna laka sa se'eri'i lhe'e bela latiri'i‑ni, ribesi gweri'i, kumu raka leri'i eta'ari'i lhe'e attu lati kubi geri'i nu tse'eri'i lhe'eni yebáha.
2CO 5:3 Kumu la'ania teeki nuku lati kubi geri'i se'eri'i, labí suna anába ankari'i se'eri'i.
2CO 5:4 Laka nnanna sa se'eri'i anka benri'i lhe'e bela latiri'i‑ni, ribesi gweri'i ruyúri'i elha disa. Laa ribesi gwegari'i de raka leri'i eriari'i lhe'e bela latiri'i‑ni. ¡Ko'o! Sinuki nu rakala leri'i eyokuri'i attu lati kubi geri'i nu anka ge yebáha, kini latiri'i nu rattina yiesi lo yu‑ni eseana nna eyakana ttu nu uchíana ttu dia lii yebáha.
2CO 5:5 Tata Do Yebáha‑ba chi benie ri'i kini eyakari'i aní. De nuha‑la chi betebie Espíritu geeha lenri'i kini benneha unna liibie deki gwalíba aka nu chi rabie unie lenri'i.
2CO 5:6 De nuha nna satíaba xen leri'i lhe anágaba gwa yúgabari'i deki nnanna laka sa se'eri'i lhe'e bela latiri'i‑ni, idittuba sa se'eri'i kwe'e Tata Xisiha.
2CO 5:7 Kumu ri'i de gwa riaba leri'i deki gwalíba doe, de nuha nna ruxxen leri'i gebie, labí ruxxen leri'i gebie de chi rilenri'e.
2CO 5:8 Ttaka xen su lasiba se'eri'i nna yalhá ladeakari'i eriari'i lhe'e bela latiri'i‑ni kini esinri'i tse'eri'i kwe'e Tata Xisiha.
2CO 5:9 Laxkala nnanna sila sa se'eri'i lhe'e bela latiri'i‑ni o sila abitturu, nnanna ruinrulari'i doelha uinri'i nu tsu'u lebie.
2CO 5:10 Kumu iyábari'i teeki eso duri'i arlo Cristuha kini unie elhuxtisi geri'i nna kua ttu tturi'i dhiri'i nu ralhari'i ge nu benbari'i tti use'eri'i yiesi lo yu‑ni, sila benri'i nu tse o sila benri'i nu satsa.
2CO 5:11 Ri'itu de tee elha rasi ge Tata Do Yebáha lhe'e lastotu, de nuha nna ruintu doelha rigixxi'atu gebie kini tsia le ka benne gebie. Labie gwa yube gasina ankatu, neti nna ruxxenba lasia lebi'i gwinbiagabale gasina ankatu.
2CO 5:12 Bittu akinle deki chiba rededulotu redene tsetu ge nu ruintu kini eya'an tsetu arlole. ¡Ko'o! Suna rinnebatu aní kini lebi'i inná xxeni lele ge nu ruintu, kini aníha nna gwa tee ro'ole ekabile ge ka nu ruinkana ttaba, rule'ekana deki raka gekani nna labí rulannikana ttixa anka lhe'e lastokani arlo Tata Do Yebáha.
2CO 5:13 Ganna rale deki ri'itu ruintu attiba ttu nu raka ikini, nu rale raka ikituha, ge Tata Do Yebáha‑ba rixú nuha nna ganna ruinbatu ge nu gwa do tseba ikini, nu ruintuha ixúna len lebi'i.
2CO 5:14 Iyába nu ruintu, ruintu na kumu de rakin Cristuha geri'i. Kumu yu xeabatu deki Cristuha uttie kini utixe ge iyába ka benne. De nuha nna attisidiba iyábari'i nuha uttiri'i lenbie.
2CO 5:15 Labie uttie ki utixe ge iyába ka benne, kini anáchu ka benne chi uxíke elha nabani rutebie lenkeha abitturu tse'eke uinke nu rakaba leke, sinuki tse'elake uinke nu ru'u le benne utti ki utixe geke, iki de nuha nna tti beyadhe lo elhuttiha.
2CO 5:16 Laxkala debá nnanna labíru tse'etu ulannitu ttu benne tti rulanni luesi ka benne se'e yiesi lo yu‑ni. Meskiba ganna Cristuha, tti udoe yiesi lo yu‑ni, belannitue ttiba rulannitu ttu benne, ttaka nnanna labíru rulannitu benneha aníha.
2CO 5:17 Laxkala ttu benne chi babe len Cristuha, ttu benne kubiba chi beyaka benneha. Nu anke ttuha chiba bitua nuha, nnanna len benneha iyába chi beyaka kubi.
2CO 5:18 Iyá nuní ben Tata Do Yebáha. Benneha bose'e tsebie ri'i lenie de nu ben Cristuha tti uttie utixe geri'iha, nna ri'itu chi bodha'ane kini kixxi'atu gasina ese'e tse ka benne lenie.
2CO 5:19 Kumu Cristuha nuha bixúni Tata Do Yebáha kini benneha botse'e tsebie ka benne len Tata Do Yebáha. Labíru bejuabie ke yua ge ka tulha ruinke nna ri'itu nuní bodha'ane kini kixxi'atu gasina ese'e tse ka benne lenbie.
2CO 5:20 Laxkala ri'itu ankatu benne udhelha Cristuha kini rutso dutu gebie. Tti rinnetu rulisatu le, la'ania nuha attisidiba kwinaba Tata Do Yebáha nuha raxie le. Rinnetu kwenta ge Cristuha tti ratu le: “Gwalese'e tse len Tata Do Yebáha.”
2CO 5:21 Cristuha labí tulha ben benneha, ttaka de ri'i nna bejua Tata Do Yebáha bie tulha geri'i kini de nu gwateeha nna utua Tata Do Yebáha yua kwe'eri'i ge ka tulha ruinri'i.
2CO 6:1 Ri'itu ankatu benne ribentu len Tata Do Yebáha lo sina gebie. De nuha nna rulisatu le abittu udelha lattile nu tse redá le Tata Do Yebáha rutebie gele.
2CO 6:2 Kumu lo ka yetsi geeha rinnebie ree: Neti gwa bedoba nagaa gelu la sá tti chi ga'anati udo nagaa gelu, lhe gwa beteba náya lenlu, la sá atti chi ga'anati odiláya ka benne. Gwaluyúruga, nnanna chi bisia sáha. Nnanna nuha chi bisia sá atti chi ga'anani Tata Do Yebáha odilábie ka benne.
2CO 6:3 Ri'itu labí ruintu ttu bixa nu utsetsinna ka benne. Labí rutsetsintu ke ki abittu itua bala'ana ge sina ruintu ge Tata Do Yebáha.
2CO 6:4 Nu ruinlatu, bixaba ruintu latsiruba ruintu na. Ruinbatu atti galába ttu benne rixú lo sina ge Tata Do Yebáha. Gwa rutto ruchíabatu ttixka ratetu ttu bixa, lhe tti riyasintu ttu bixa lhe, anágaba tti ruyútu ttu bixa elha disa,
2CO 6:5 lhe rutto ruchíagabatu tti raya ka benne ri'itu, lhe tti rattatu lisiyya lhe, anágaba tti rebi'i nookana ri'itu, lhe tti ratú rebisiba letu de ribentu sina, lhe anágaba tti rebeatu bisiela, lhe tti rattitu ubina abí tee gotu lhe.
2CO 6:6 Ruinbatu nu anka taga'a tse atti galába runi ttu benne rixú lo sina ge Tata Do Yebáha. Rule'e loobatu nu yutu gebie. Anágaba ankagabatu benne re besi letu, lhe re tse letu, lhe rule'etu deki gwalí yu'u Espíritu ge Tata Do Yebáha latitu. Anágaba nna ankagabatu ka nu gwalígintu rakintu ge ka benne
2CO 6:7 lhe rinnegabatu nu ankaba gwalí, lhe rixúgabintu nu tsitsi ra le Tata Do Yebáha. Ruinbatu attiba runi ttu soldadu diana ritilhana denna iyába nu ixuinna. Aníha‑gaba ri'itu tti rinnetu lhe tti rekabitu ge ka benne, rigixxi'abatu ge nu dika ose'e tsena ke arlo Tata Do Yebáha.
2CO 6:8 Gwadú gwa ria lekani ri'itu, gwadú nna rigu'uba ni'akani ri'itu. Gwadú nna rinnekana rákana deki tseba ruintu, gwadú nna rigualakana bala'ana getu. Ri'itu rinnebatu nu ankaba gwalí, ttaka lakana rálakana deki nu gwen lasiba ankatu.
2CO 6:9 Gwadú meskiba gwa ankabiakinna ri'itu nna rálakana deki labí ankabiakinna ri'itu. Gwadú nna rugwekana ri'itu ttu bixa elha disa, ttaka labí ridaakana uttikana ri'itu. Ttiba ttu nu yatti rakakinna chi ankatu, ttaka sa reki benbatu.
2CO 6:10 Rákana deki ri'itu ankatu benne du si'i letu, ttaka satíaba du itta letu. Rákana deki ankatu benne dii, ttaka ri'itu ruinlatu kini ixeba ka benne gatta elha tse geke arlo Tata Do Yebáha. Rágabakana deki ri'itu labí bi tee getu, ttaka arlo Tata Do Yebáha iyába gwa teeba getu.
2CO 6:11 Lhixxa rába rigixxi'entu le xa benne Corinto, labí bixa rudhea letu.
2CO 6:12 Len lebi'i labí rudhea letu ttu bixa; lebi'ila nuná rudhea lele.
2CO 6:13 Rulisaa le attiba ttu xi'inia. Gwaluni attiba ruintu, abittu ku'u lele ttu bixa, gwalinneba na len ri'itu.
2CO 6:14 Abittu iyietile uinle tti runi ka nu abittu ria lekani Cristuha. Kumu lebi'i gwa yu xeabale, nu anka tseha labí raxxína nuha len nu anka satsaha lhe anágaba chulhaha labí raxxína nuha len xianiha.
2CO 6:15 Anágaba Cristuha labí raxxína benneha len nu xxegwiha, lhe ttu benne ganna ria lebie Cristuha, labígaba raxxína benneha len nu abittu ria leni Cristuha,
2CO 6:16 lhe anágaba labí raxxína yotu ge Tata Do Yebáha len ka nu labí gwalí ankakana diosi. Kumu ri'i nuní chi do Tata Do Yebaa benne anka baniha lhe'e lastori'i, delába ankari'i attiba yotu gebie attiba chi ree lo ka yetsi geeha: Neti dhoa lhe tsekia lagwi ge ka benne. Akaa Diosi geke, lake nna akake benne kia.
2CO 6:17 Laxkala de nuha nna ra Tata Xisiha: Gwaliria lagwi ge ka nu abittu ria lekinna, gwalukwitta kwe'e ka nuná, lhe abittu kanle nu anka tsiga lhe. Neti nna gulabibaa le.
2CO 6:18 Neti akaa xxudile nna, lebi'i nna akale xi'in biyúa lhe xi'iniunnáya lhe. Aníha ra Tata Xisiha benne ra tsitsi xxatta leeha.
2CO 7:1 Laxkala xa betsi to kia, ri'i chi yuri'i deki Tata Do Yebáha chiba begwebie tisa unie iyá nuní. De nuha nna chinka kuari'i abitturu uinri'i nu rutsigana ri'i lhe nu rodha'an satsana ri'i arlobie lhe. Nu uinlari'i tsiarulari'i akari'i nari xú arloe de tee elha rasi geri'i lenbie.
2CO 7:2 Gwalugwelha eta'atu lhe'e lastole attu libe. Lebi'i gwa yu xeabale, ni ttúle labí bixa chi bedhakatu le lhe labí chi bennittitu le lhe, anágaba labí chi utebiatu bixa bedhakatu le.
2CO 7:3 Laa rigisagaa le tti ria aní, kumu chiba xpeya le, gwa rakabati gele meskiba bixa aka, sila gattia len lebi'i o sila sa dhoa aka bania len lebi'i.
2CO 7:4 Neti rinnebaa attiba ankaba geni len lebi'i. De lebi'i nna ra xxeni lasia. Yalhá elha xen lasi redía gele. Meskiba ruyútu iyá looba elha disa, kumu de lebi'i nna yalháruba itta du lasia.
2CO 7:5 Kumu tti bisiatu Macedonia‑ni birula bedí letu. Gaxaba diatu biyútu elha disa, delába biyayatu lhe uxítu elha rasi lhe.
2CO 7:6 Ttaka Tata Do Yebaa benne rodú tsebie le ka benne abittu du tse leke, lagabe nuha bodú tsebie letu tti chi besia Tito‑ni.
2CO 7:7 Laa sunruga de besianaha nna bedú tse letu, sinuki bedú ittagaba letu kumu lana yalhá itta bedú leni gele, lhe rágabana deki lebi'i yalhá re lele ilenle neti, lhe yalhá ribesile de releninle ge nu ukaha lhe, anágaba yalhá ruchacha ikile kia. Tti binaa iyá nuní adírula itta bedú lasia.
2CO 7:8 Meskiba bedú si'a lele delo ni'a ge yetsi udhelhaa len lebi'i la'ania, nnanna labíru rudúna neti ge nuha. Gwalí galá bedúna neti la'ania, kumu neti yua deki yetsiha bedú si'ina lele ttu satti to.
2CO 7:9 Nnanna yalhá itta du lasia. Laa du ittaga lasia de udú si'i lele ge yetsi udhelhaaha. ¡Ko'o! Sinuki dula itta lasia kumu de nu gwateleha bixúna kini bodúna le nna bedhan le nu ruinleha. Lebi'i Tata Do Yebáha‑ba bedú si'e lele, de nuha nna labí gwatele ttu bixa delo ni'a ge nu bentuha.
2CO 7:10 Kumu ganna ri'i rudú si'i Tata Do Yebáha leri'i, nu rudú si'ina leri'iha rixúlana kini rodúna ri'i ge nu abittu anka tse ruinri'i nna rudhanri'i abitturu ruinri'i na. Aníha kini odilábie ri'i nna esinri'i arloe. Laxkala labí teeki eleninri'i tti rudú si'i Tata Do Yebáha leri'i. Ttaka ganna rudú si'ina leri'i tti rudú si'ina le ka benne se'e yiesi lo yu‑ni, tti rateri'i aníha, elhuttila rigila nuha geri'i arlo Tata Do Yebáha.
2CO 7:11 ¡Gwaluyúruga! De bedú si'i Tata Do Yebáha lele, de bedú si'e lele nuha bixúna kini nnanna gwalíga chi betabinle ge nu benleha, lhe jeru tte chi utixxi'ale bí lo ni'a ge benle aníha, lhe anágaba yalhá bise'enle ge nu ukaha, lhe yalhá elha rasi chi tee gele nnanna, lhe yalhá chi re lele ilenle neti lhe, anágaba jeru tte chi rudona lele ruinle nu anka tse, lhe jeru tte chi begwele nu betsetsiha elha disa lhe. Iyá nu ruinle‑ni runna liina deki lebi'i labí bixa tulha daale ge nu ukaha.
2CO 7:12 Laxkala yetsi nu benia udhelhaa len lebi'i la'ania, laa bengaa nuha delo ni'a ge nu betsetsiha, nigaba laa bengaa nuha ge benne bisetsinie ge nu ben nuha. Benlaa yetsiha kini lebi'i ute denle deki gwa retabibinle getu arlo Tata Do Yebáha.
2CO 7:13 De nuha nna beyaka xen letu. Laa sunruga de nuha beyaka xen letu, sinuki adírula itta bedú letu tti bilentu du itta le Tito‑ni tti besiana ata se'etu‑ni kumu de iyábale bodú tsele leni.
2CO 7:14 Neti yalhá xxeni ra lasia gele arlo Tito‑ni. Labí retutti ge nu chi xpeya na gele deki lebi'i tseba anka nu ruinle. Kumu ttiba len lebi'i nu gwalíba anka iyá nu chi ratu leha, anágaba len Tito‑ni nu gwalíba anka iyá nu chi utixxi'entu na gele. De nuha nna tee ro'otu ra xxeni letu gele.
2CO 7:15 Laxkala nnanna rakarulinna gele tti radú leni gasina biyúle na la'ania, iyábale gwa bedobale tisa geni lhe jeru tteba uxile na tti bisiana len lebi'iha.
2CO 7:16 De nuha nna nnanna yalhá itta du lasia kumu de ruxxen lasia gele.
2CO 8:1 Anágaba xa betsi to, rakagaba letu kixxi'entu le ge nu tse ruin Tata Do Yebáha len ka benne chi ria leke Cristuha, delába ka benne ritupake lhe'e ka yiesi se'e daka Macedonia‑ni.
2CO 8:2 Ka benneha tti rateke ruyú xxattake elha disa, la'aniala bedúru itta leke lhe meskiba ankake tuttíru benne dii, la'aniala bedáru leke bete chiettiruke nu tee geke.
2CO 8:3 Kwinaba neti biyú loa betebake kua nu udaabake beteke, tiski bedárula leke beteke tti nu dika uteke.
2CO 8:4 Ka benneha birula bedú siike unnaba ditibake lentu kini ugwelhatu ke iselake uteke belhiu ki dhi ka benne chi ankake ge Tata Do Yebáha se'e lhe'esi Jerusalén‑ni.
2CO 8:5 Ri'itu ukintu ganna suna belhuha‑ba uteke, ttaka la kwinaba lake lade'axa ráke: “Uinbatu nu innaba Jesús benne anke Xxanari'iha. Nianna tti redenáke: Uingabatu nu innábale. Lake nna benbake attiba ru'u le Tata Do Yebáha.”
2CO 8:6 De nuha nna unnaba dititu len Tito‑ni ki uinna attiba chi udulona ruinna ttuha, anágaba uinna nnanna ulhuxa loona uttupana belhiu nu edá lele utele.
2CO 8:7 Lebi'i nuná ankale ka nu rakaru gele ruinle iyá tti adí ka benne, delába gwa ria tsitisiru lele ge Tata Do Yebáha, lhe gwa rakaru gele rinnele, lhe gwankarule benne yuu, lhe anágaba gwankale benne jeru tte ruinle ttu bixa, lhe gwankale benne rakaruinle getu lhe. Ttiba ruinle‑na, anágaba nnanna gwaledáru lele gwalute belhiu nu ruttupatu‑ni.
2CO 8:8 Laa rigaa deki teeki ute chiettirule. Suna rigixxi'abaa ge nu riláti ruin adí ka benne, jeru tte redá leke ruteke. Rigixxi'aya nuní kini anágaba lebi'i ule'e ganna si gwalíginle rakinle ge ka benne.
2CO 8:9 Lebi'i gwa yu xeabale, Jesucristu benne anke Xxanari'iha bedába lebie ben tsebie len lebi'i. Benneha meskiba uke benne tee xxatta elha tse gebie yebáha, ttaka de ukanie gele, de nuha nna bisiabie yiesi lo yu‑ni nna beyake ttu benne abittu gebie tee. Benneha beyake nu labí tee geni, kini lebi'i, de benneha nna chi bisinle ukale benne tee elha tse gele yebáha.
2CO 8:10 Neti utea ttu elha rieni len lebi'i: tserula saríana le ganna uinle attiba chi udulole benle usedaha. La'ania bebeki lele utele belhiu nna udulo ttebale bettupale na.
2CO 8:11 Aníha‑gaba gwaluin nnanna. Gwalulhuxa gwaluttupa nu chi udulole ruttupale la'ania, kini anáchu attichuba uleki lele utele belhuha, anágaba gwaluin nnanna. Gwalute kua dhaabale utele.
2CO 8:12 Kumu ttixka ttu benne jeru tteba redá lebie rutebie, Tata Do Yebáha gwa ridíbe nu rute benneha, labí rinnabe nu labí dhaa benneha utebie.
2CO 8:13 Laa rinnabagaa nuní kini ka nu subila exxa tama gekani nna lebi'i nna iyasa gele. ¡Ko'o! Runia kini tu tulapaba tse'e iyári'i.
2CO 8:14 Lebi'i, nnanna tee tama gele nna utele na ge ka nu riyasakinna, kini anágaba lakana, tti gatta tama gekani, la'ania nna utegabakana gele tti iyasinle. Aníha kini anuttu nu iyasa geni,
2CO 8:15 attiba ra lo ka yetsi ge Tata Do Yebáha ata dia ra: “Nu bediga ixeniha, labí bexxaru ge nuha, nigaba nu bediga ttu lattiha, labí biyasa ge nuha.”
2CO 8:16 Ttaka ixkixaru rugwea Tata Do Yebáha, kumu labie benie kini Tito‑ni ruchacha ikini gele attiba neti ruchacha ikia gele.
2CO 8:17 Kumu lana, tti unnabaa lenna kini itana ata se'ele‑na, labí tisa bedúna; daa ttebana, kumu chigaba re leni itana. De nuha nna kwinaba lana bedá leni dana gwelanni le.
2CO 8:18 Ridhelhagabatu attu betsi to geri'i lenna. Benne‑ni, iyába ka benne ria leke Cristuha ritupake lhe'e adí ka yiesi‑na, rinne tseke gebie de rigixxi'a tsebie ka tisa ge Jesús‑ni.
2CO 8:19 Gwea nna la benne‑nigaba chi bekweke kini tsiabie len ri'itu kini sadha'antu belhiu ruttupatu‑ni. Nu ruintu‑ni uinna kini inná xxeni le Tata Xisiha lhe kini ule'e deki redába letu ruintu nuní.
2CO 8:20 Benne‑ni dhabie len ri'itu ganna chi diatu kini anuttu nu innena getu ttixa uintu len ixeni belhiu ruttupatu‑ni.
2CO 8:21 Kumu ri'itu ruintu doelha uintu latsiru, laa sunruga arlo Tata Do Yebáha uintu latsiru, anágaba ruingabatu doelha uintu latsiru arlo ka benne.
2CO 8:22 Ridhelhagabatu lenke attu betsi to geri'i. Benne‑ni ixe lidú chi bilentue jeru tteba rute nábie len ka benne, gwexunniba runie ttu bixa, adírula nnanna ruxxenrula lebie deki lebi'i gutebale belhiu.
2CO 8:23 Tito‑ni nna ankana benne reki lenia turo'o rixúna len neti kini rute nátu len lebi'i. A chupa ka betsi to geri'i‑ni nna ankake ka benne udhelha ka benne chi ria leke ge Cristuha, delába ka benne ritupake lhe'e adí ka yiesi‑na. Ka benne chupa‑ni ruinke nu dika inná xxeni le Cristuha.
2CO 8:24 De nuha nna gwaledá lele gwalute belhiu. Gwalule'e gasina ruinle kini iláni ka benne udhelhake ka benne‑ni deki lebi'i gwa rakabinle ge adí ka benne lhe anágaba kini ule'e deki neti labí kwentaba rinne tsea gele.
2CO 9:1 Neti labíru riyasati unia lo yetsi upeya le: “Gwalute nále len ka benne chi ankake ge Tata Do Yebáha”,
2CO 9:2 kumu chiba yua lebi'i gwa redába lele rutele. Laxkala arlo ka benne ge Macedonia‑ni xxeniba ra lasia tti xpeya ke deki lebi'i ka benne se'ele daka Acaya‑na, usedali chi se'e tsele ki utele belhiu. De nuní biyienikin benne‑ni nna ixeke ulekigaba leke uteke.
2CO 9:3 Ttaka neti ridhelha gaaya ka betsi to geri'i‑ni ata se'ele‑na kini abittu unnitti tisa kia de chi ria deki chiba se'e tsele utele belhiu. Aníha kini attiba chi unneaha, aníha‑gaba lebi'i chi se'e tsele utele,
2CO 9:4 kini ni kina dha ttu chupa ka nu Macedonia‑ni len neti tti itaa ata se'ele‑na, la'ania nna etexxakakana le abí chi se'e tsele kini utele belhiu. Kumu ttu elhittuba nuha dhitu ganna abíba chi se'e tsele ki utele. Ria deki ri'itu dhitu elhittu, kiniba abittu innía deki lebi'ila nuná dhile elhittu ge nu chi ratu ka benne‑ni.
2CO 9:5 De nuha nna uka doelha unnabaa len ka betsi to geri'i‑ni nneru gaake itake ata se'ele‑na kini kixxi'akanie le ki uttupa gaale nu chi rale uteleha, kini chi tee tse nuha ganna chi isiatuha. Aníha kini ule'e deki gwalí redá lele rutele belhiu kini abittu ute ditibale na.
2CO 9:6 Neti ttu nu upeya le: Nu rada ttu lattiha, lattirugaba relapa nuha, nu rada ixeniha nna ixenigaba relapa nuha.
2CO 9:7 Kua ttu ttule gwaluteba nu chiba uleki lele utele. Abittu itú elenibinle tti utele na o lhe itú dho doelhabale ki utele na, kumu Tata Do Yebáha rakanie ge ka benne du itta leke tti ruteke ttu bixa.
2CO 9:8 Benneha xxeni ra lebie gute tamabe elha tse gele, kini satíaba gatta iyá nu iyasinle. Aníha kini edáru lele uinle bixaba nu anka tse len adí ka benne.
2CO 9:9 Kumu attiba ra lo ka tisa geeha ata dia ra: Benneha utidhi tame begwebie ka benne abittu geke tee; nu tse benieha, ttu tsaba labí ixulhinri'i ge nuha.
2CO 9:10 Tata Do Yebaa benne rutebie ninni lhe rugoe benne rigu'ubie lo yuha lhe, benneha‑gaba nuha uterue yani gele kini uinrule nu anka tse.
2CO 9:11 Aníha ki gatta iyá gele nna edáru lele ute chiettirule, kini anáchu ganna chi sadha'antu belhiu uteleha nna ka benne dhike nuha nna ugweke Tata Do Yebáha ixkixaru.
2CO 9:12 Nu edá lele uteleha laa sunruga ixúna kini odilána ka benne chi ankake ge Tata Do Yebáha lo nu riyasakanie, sinuki ixúgabana kini ugweruke Tata Do Yebáha ixkixaru.
2CO 9:13 Ganna chi uxíke nu edá lele uteleha, la'ania nna uinke ki inná xxeni le Tata Do Yebáha de ilákanie gwa ruinbale nu ra ka tisa ria lele ge Cristuha lhe gwa redába lele rutele nu riyasakanie lhe rutele nu riyasani iyá ka benne lhe.
2CO 9:14 Anágaba innabagabake gele len Tata Do Yebáha de raka xxattakanie gele de elha tse chi bete tama Tata Do Yebáha gele.
2CO 9:15 Ixkixaru Tata Do Yebáha de nu tse redá lebie rutebie geri'i, delába nu tse labí raka geri'i kixxi'ari'i geni.
2CO 10:1 Kwinaga neti Pablo, ttiba ben Cristuha, len tisa besiba lhe len elha si'i lasiba aníha‑ba rulisaa le, meskiba ganna rákana deki neti ttu nu rasibani ankaa tti dua arlole, ttaka tti rea idittu nna rákana deki yalhá idisa rinnea.
2CO 10:2 Rinnabaa lole bittu uinle kini ka inne disaa ganna chi bisiaya ata se'ele‑na, kini abittu unia attiba chi rulaba lasia udhakaa ka nu rákana deki ri'itu ruinbatu attiba ruin ka benne se'e yiesi lo yu‑ni.
2CO 10:3 Gwalí galá, meskiba ankatu ge yiesi lo yu‑ni, ttaka labí ruintu tti ruin ka nu se'e yiesi lo yu‑ni.
2CO 10:4 Ri'itu tti ritilhatu len nu xxegwiha, labí rixuintu luesi nu rixúni ka soldadu se'e yiesi lo yu‑ni tti ritilhakana, sinuki ri'itu rixúlintu nu tsitsi ra le Tata Do Yebáha kini rutse'e lootu iyába nu ra tsitsi leni,
2CO 10:5 delába rutse'e lootu iyába ka tisa rotsi'inu le ka benne tti rinneke lhe anágaba rutse'e loogabatu elha ttaba ruin ka nu rusunakana ki abittu uinbia ka benne Tata Do Yebáha lhe ruintu kini otsea ka benne nu rulaba leke nna udoke tisa ge Cristuha.
2CO 10:6 Lebi'i ganna chi rudole tisa ge iyá tte, la'ania nna ri'itu chigaba se'e tsetu kini ugwetu elha disa iyá ka nu abittu rudokana tisa gebie.
2CO 10:7 Lebi'i bittu ulannile ttixa anka ka benne lo lia, gwalulannila ke attiba ankaba geni. Ganna nuxa ttúle chi xen tsitsi lele deki chi ankale ge Cristuha, anágaba nna tegaba ki okinni ikile deki ri'itu chigaba ankatu ge benneha.
2CO 10:8 Neti labí rettuti meskiba ganna ritebiaya de ra xxeni lasia tti ria: “Tata Xisiha‑ba betebie lo neda getu ki use'e tsitsitu le lo neda gebie, laa betege lo neda getu kini unnittitu le.”
2CO 10:9 Bittu akinle deki runia uniasinia le len nu rinnea lo ka yetsi ridhelhaa ata se'ele‑na.
2CO 10:10 Kumu se'e ka nu rákana: “Yalhá idisa rinnena lo ka yetsi ridhelhana, ttaka atti duna arlori'i, ttu benne terissiba ankana lhe labí ru'u leri'i tti anka ixtisa‑ni.”
2CO 10:11 Ka nu rinne aní, raka letu kixxi'entu kana deki atti tteba rinnetu lo yetsi‑ni se'etu idittu, anágaba innetu ganna chi se'etu len lebi'i.
2CO 10:12 Ri'itu labí eyaxintu ku'u luesitu prueba len ttu chupa ka nu se'e naa, ka nu rákana deki yalhaba tse ruinkana. Bi ge ka nuná. Runi nu a re itá lebani ruin ka nuná, kumu la labakana rigu'u luesikani prueba kini rule'e nuxakana rakaru gekani.
2CO 10:13 Ri'itu labí ritebiatu inná xxeni letu ge nu ruintu, sinuki rekibatu rigixxi'atu ka tisa ge Tata Do Yebáha debá ataba chi bedha'ane tsekitu kixxi'atu ke, de nuha nna bisiatu ata se'ele‑na.
2CO 10:14 Ri'itu labí ritebiatu tti ratu: “Chiba bitatu ata se'ele‑na”, kumu gwalíba ri'ilatu lade'a tte bisiatu ata se'ele‑na ki utixxi'entu le ge Cristuha. Ttebia galátu innetu ganna ttixka abíba chi bitatu ata se'ele‑na.
2CO 10:15 Ri'itu labí ra xxeni letu ge sina ben attu benne subi, labí innátu deki ri'ilatu bentu sinaha. Ri'itu nu ruinlatu, xenba letu gele kua tsiaba lele ge Cristuha, aníha‑gaba nna tsani chiettirugaba sina getu daka ata se'ele‑na,
2CO 10:16 kini isilarutu tsiatu kixxi'atu ka tisa geeha len ka benne se'e iditturu. Aníha uintu ki abittu satta'atu lo yu ata chi utixxi'a attu benne subi nna inná xxeni letu ge sina nu ben benneha.
2CO 10:17 Laxkala nu raka leni inná xxeni leni ge nu ruinna, inná xxenila leni ge Tata Xisiha, kumu benneha nuha raka lenie na.
2CO 10:18 Kumu nu titúbana ra xxeni leni ge nu ruinnaha, labí lana nuha eya'an tsena arlo Tata Xisiha. ¡Ko'o! Sinuki benne innála Tata Xisiha deki tseba runie, benneha‑la nuha eya'an tsebie arlo Tata Xisiha.
2CO 11:1 Gwalidhí elha xen lasi kia ge nu innea‑ni, neti bittiba ria. Runia attiba ttu nu raka ikini. Gwalutto gwaluchíaba a latti ge nu innea‑ni.
2CO 11:2 Kumu Tata Do Yebáha‑ba runie kini rapa yiea le. Rapaa le yie kumu de chi nabati le kini akale ge ttúba nubiyú, delába ge Cristuha. Aníha kini neti gwaka kia utso dua le arloe attiba ttu nu rutso du ttu nuila ribani ankana nari xú, abittu bi chi benna.
2CO 11:3 Ttaka neti rixxusati kini ka ixú yiele satele attiba gwate Eva‑ni. Nuha‑ruga bixú yiena bedo nagani ge nu botsi'inu le belhaha. Anágaba lebi'i ni kina ixú yiegabale nna udhanle abitturu itú iki itú lele udo lele Cristuha.
2CO 11:4 Kumu lebi'i ttixka daa ttu nu rigixxi'enna le ge attu Jesús subi, nu labí raxxína na len Jesús benne chi utixxi'entu le geeha, lebi'i nna gwexxunniba rudo nagale ge nuha, lhe gwexxunnigaba rulabile attu espíritu subi, nu labí raxxína na len Espíritu ge Tata Do Yebáha, delába Espíritu nu chi uxíleha, lhe anágaba ttixka daa attu nu rigixxi'enna le attu tisa subi, nu labí raxxína na len ka tisa chi utixxi'entu le ge Cristuha, lebi'i nna gwexxunnigaba rulabile tisa ge nuha.
2CO 11:5 Neti rakati labí rexxa gaaya arlo ka nu rudo nagale gekinna, ka nu rale deki ankakana ka apóstol ra xxeni xxatta lekani.
2CO 11:6 Kumu meskiba neti labí tte tse rinnea tti rinne ka nuná, ttaka netila ankaa nu yurua. Ixe looba lhe ixe libeba chi bele'enia le nu yua.
2CO 11:7 Neti, ¿si satsaba nuha benia borexxa gaa lasia kini lebi'i uná xxeni lele tti labí bekixaa le tti utixxi'ania le ka tisa ge Tata Do Yebáha?
2CO 11:8 Ka benne ritupake ria leke ge Jesús‑ni se'eke lhe'e adí ka yiesi‑na, ka benneha‑ba bedhaka si'a ulhia belhiu lenke kini bixúti tti ugwekia utixxi'ania le ka tisaha.
2CO 11:9 Atti udoa len lebi'iha, tti biyasati ttu bixa, ni ttúle labí betsetsinia le. Ka betsi to geri'i, ka benne daa daka Macedonia‑niba beteke nu biyasati. Doelha tsitsiba benia kini abittu betsetsinia le nna anába sa tsiaya unia.
2CO 11:10 Cristuha gwa yu xeabe deki gwalíbati. Ni ttú benne do lo yu ge Acaya‑na labí aka gebie usune kini abittu inná xxeni lasia de abittu unnabaa belhiu tti ugwekia naa.
2CO 11:11 ¿Beaka runia aní ganna? ¿Si de labí rakati gele? ¡Ko'o! Tata Do Yebáha gwa yu xeabe gwa rakabati gele.
2CO 11:12 Ttaka neti sa tsiabaa unia aní, labí innabaa belhiu len lebi'i. Aníha unia kini udheaya ro'o ka nu ra xxeni lekani ka nu rákana deki ruingabakana sina attigaba ruintu.
2CO 11:13 Ka nuná ruinkana deki ankakana apóstol ge Cristuha, ttaka labí gwalíkinna. Nu gwen lasiba ankakana.
2CO 11:14 Labí dika ebaninri'i ge nu ruin ka nuná kumu kila kwinaba nu xxegwiha ruinna deki ankana attiba ttu anjeli do lhe'e xiani.
2CO 11:15 Laxkala labí dika ebaninle ganna ka nu rixúkana lo sina ge nu xxegwiha, ruingabakana deki ankakana ka nu rigixxi'akinna ka benne nu anka tse. Ttaka ganna chi bisia sáha, dhiba ka nuná nu ralhakana ge nu ruinkana.
2CO 11:16 Rinnea rulisaa le attu libe: Ni ttúle abittu akinle deki rakaba ikia tti rinnea aní. Ttaka ganna si anába rulaba lele, gwalugwelhaba neti unia ge nu raka ikini kini aka kia inná xxeni lasia ttu latti ge nu runia.
2CO 11:17 Laa Tata Do Yebáha‑ga ree neti aní beni. ¡Ko'o! Nu anka kibaa nuní ra xxeni lasia, ruinbaa attiba nu raka ikini.
2CO 11:18 Kumu ki ixeba ka nu ra xxeni lekani ge nu ruinkana, anágaba neti inná xxenigaba lasia ge nu runia.
2CO 11:19 ¡Lebi'i rule'ele deki ankale nu yuu ttinka, ttaka delo nna gwexxunniba rudo nagale ge ka nu raka ikikinna!
2CO 11:20 Lebi'i axtala ridielhale ge ka nu rudhakakana le attiba ttu nu to'o lo sina gekani, lhe axtala ridielhale riguakana lo nále nu tee gele, lhe rudhakakana le attiba rakaba lekani. Anágaba nna ruchíagabale lo ka nu ra xxeni lekani, ka nu labí ria lekani le. Ka nuná, atti rudhakakana le aní, ttisidiba rigapabakana ro'ole.
2CO 11:21 Elhittu‑ba nuní ridía tti ria yalhá ttela yusi ukatu len lebi'i, labí bedhakatu le tti rudhaka ka nuná le. Ttaka ganna ka nuná ra xxeni lekani ge attu bixa, neti gwakagaba kia inná xxeni lasia. Rinnebaa attiba ttu nu raka ikini.
2CO 11:22 Ganna ka nuná rákana ankakana ka nu rinne tisa hebreo, anágaba neti rinnegabaa tisa hebreo, nna ganna rákana ankakana nu Israel, anágaba neti ankagabaa nu Israel, lhe ganna rákana datiakana Abraham‑ni, anágaba neti datiagabaa benneha.
2CO 11:23 Ganna rákana ankakana ka nu rixúkana lo sina ge Cristuha, neti rixúrulaa lo sina ge benneha tti lakana. Rinnebaa attiba ttu nu gwalíba raka ikini. Kumu netila nu chi urenrua sina ge benneha attichula lakana, lhe ixe lidúrula chi uttaa lisiyya, lhe ixe lidúrula chi biyayaa, lhe ixe lidúgaba chi uláya lo elhuttiha lhe.
2CO 11:24 Ka nu lhe'esi kiaha, delába ka nu Israel‑ni, gayu lidú chi bekulhakana neti len yieti. Lhe'e ttu ttu libeha rerua bixxi jaa (39) uxxuakana neti yietiha.
2CO 11:25 Tsunna lidú chi uxxuakana neti yaga, lhe ttu lidú chi besiakana neti íyya lhe. Anágaba tsunna lidúgaba chi bexunnina kia gannala uttia tti rixudi ka barcu diayaha lhe'e indatooha. Ttu ela ttu ságaba udaaya lo indatooha lhe.
2CO 11:26 Ixe lidú tti yu'a neda bexunnina kia tti rilháya lo ka yoo‑na, lhe bexunnina kia ge ka ubana lhe. Anágaba bexunnigabana kia ge ka nu lhe'esi kiaha, delába ka nu Israel‑ni; bexunnigabana kia ge ka nu abittu ankakana nu Israel. Anágaba nna bexunnigabana kia uttikana neti lhe'e ka yiesi‑na, lhe bexunnigabana kia satea ttu bixa tti ritea ata lanú benne se'e, lhe bexunnigabana kia lo indatooha lhe. Anágaba bexunnigabana kia ge ka nu rákana deki ria lekani Tata Do Yebáha, ttaka labí liikinna.
2CO 11:27 Anágaba betú besábati uren xxattaa sina, lhe ixe lidúgaba bebeaya bisiela, labí uta'adhia, lhe gwadú uttia ubina lhe bebisia inda lhe. Ixe lidú chi bette ubina lhe'a, abittu roa, lhe gwadú beyasaa idilha de labí gwadilo xoa tee.
2CO 11:28 Anna laa suna nuníruga ratea, anágaba ttu ttu ságaba ruchacha ikia ge iyá ka benne chi ria leke Cristuha gaxaba se'eke.
2CO 11:29 Kumu ttixka nuxa ttúle ridakale ttu bixa, anágaba neti ruyúgabaa elha disa ge nu rateleha, lhe ttixka nuxa ttúle ridí yiekana le ki ruinle ttu bixa nu abittu anka tse, anágaba neti risa'agabati tti rudhakakana le aníha.
2CO 11:30 Ganna tee ttu bixa inná xxeni lasia geni, ge nu labí gwakaa unia, ge nuha‑ruba gwaná xxeni lasia.
2CO 11:31 Tata Do Yebáha Xxudi Jesucristu benne anke Xxanari'iha, benneha satía uinri'i kini inná xxeni lebie. Benneha gwa yu xeabe, neti labí ruin lasia.
2CO 11:32 Tti rinnabia Aretas‑ni ka yiesi se'e itúba daka Damasco‑ni, la'ania rea lhe'esi Damasco. Nu rinnabiana lhe'esiha bese'ena ka nu biyúkana ro'o yiesiha kini udaxxukana neti ganna chi eriaya niha.
2CO 11:33 Ttaka lhe'e ttu sumiba begu'uke neti belhidake neti ro'o ttu ventana do lhe'e de'e rilhi abi'iba yiesiha. Aníha‑ruba nna chi uka uláya lokani kini abittu bedaxxukana neti.
2CO 12:1 Gwalí galá, bi teeki iri'enri'i inná xxeni leri'i ge nu ruinri'i, ttaka neti teeki kixxi'aya ge nu bela'ati yebáha, delába nu ben Tata Xisiha kini neti biláti.
2CO 12:2 Neti ankabiati ttu nubiyú ria leni Cristuha. Chi uka sitá ida nuha atti ttu nnelaba biyalhina kini ugíana nu beyonna yebáha. Bittuba yua si itupa len bela latini ugíana, o abittu. Sunruba Tata Do Yebáha gwa yubie.
2CO 12:3 Nu yúrubaa, netiba nuha biyalhia kini ugíaya ata chi ga'anani Tata Do Yebáha tse'e tse ka benne, si itupa len bela latia ugíaya, o abittu. Sunruba Tata Do Yebáha gwa yubie.
2CO 12:4 Iyába tsagwi anka ka tisa biyienti yebáha, ka tisa ka nu ni ttu benne dika innebie kana.
2CO 12:5 Ge nu gwatealigaba nna gwaná xxeni lasia geni, ttaka ge nu ruin kwinaga neti labí inná xxeni lasia geni. Laruba ge nu abittu gwakaa unia, ge nuha‑ruba gwaná xxeni lasia.
2CO 12:6 Ganna aka lasia inná xxeni lasia ge nu runia, labí ge nu raka ikini nuha unia, kumu inneba neti ge nu gwalíba runia. Ttaka labí raka lasia inná xxeni lasia kini aníha nna anuttu nu akinna deki neti xxenirula ra lasia attichula nu rilenna runia lhe attichula nu riyieninna rinnea lhe.
2CO 12:7 Anágaba kini abittu inná xxeni lasia ge nu tse lhe ge nu xxeni bela'ati yebáha, de nuha nna bete Tata Do Yebáha ttu nu rutsetsinna neti. Nu rutsetinna netiha attiba ttu yetsi ankana yadana latia. Nuní rixúni nu xxegwiha kini rugwena neti elha disa. Aníha kini abittu ttebiaya inná xxeni lasia ge nu bela'atiha.
2CO 12:8 Tsunna lidú chi unnaba ditia lo Tata Xisiha kini kuabie nuní latia.
2CO 12:9 Ttaka labie bekabilee kia ree: “Beyaka xen lelu, ukare'aba gwa rakaba lania lu, kumu len ka nu abittu re tsitsi lekinna, neti rule'e loorulaa nu tsitsi ra lasia.” De nuha nna neti Pablo itú iki itú lasia inná xxeni lasia ge nu abittu gwakaa unia. Aníha kini satíaba ule'e looa nu xxeni ra le Cristuha.
2CO 12:10 Laxkala neti ittala redú lasia atti labí gwakaa unia ttu bixa, lhe tti rinnekana kia lhe tti riyasa kia lhe. Anágaba ittagaba redú lasia tti ridú nookana rudhaka disakana neti, lhe ttixka bixa ratea lhe. Iyá nuní ratea de rekia rigixxi'aya ge Cristuha. Kumu neti attila labí re tsitsi lasia, la'aniala ribeki tsitsi Cristuha lasia.
2CO 12:11 Neti ge nu raka ikibani runia tti ra xxeni lasia, ttaka lebi'iba nuná rudo doelhale neti ki runia aní; gwarrana lebi'ila nuná inne tsele kia. Kumu meskiba neti lanú nu ankaa, ttaka labí rexxa gaaya arlo ka nu rale deki ankakana ka apóstol ra xxeni xxatta lekani.
2CO 12:12 Tti udoa len lebi'iha, labí bedú siia a benia ka nu xxeni lagwi gele, delába ka milagru lhe ka nu bebaninle gekani lhe. Iyá nuní benia bele'e deki gwalí ankaa apóstol ge Jesús‑ni.
2CO 12:13 Lebi'i, ¿si chi berexxa gaaya le arlo adí ka benne ria leke Cristuha, delába ka benne ritupa lhe'e adí ka yiesi‑na? ¿Si laaba ga de abíba betsetsinia le innabaa le nu biyasati atti udoa len lebi'iha, si laaba ga de nuha‑ba nna risetsinle neti? ¡Gwalidhíchi elha xen lasi kia ge nu rose'a lole‑ni!
2CO 12:14 Nnanna chi du tsea ki itaa etelannia le. Nuní chi aka beyonna libe ritaa. Anágaba unia ganna chi bisiaya ata se'ele‑na, labí raka lasia utsetsinia le ge nu iyasati, kumu laa nu tee gegale rulha lasia dhia, sinuki lebi'ila nuná. Kumu attiba ttu xxudi len ka xi'inni, laa ka nuha‑ga nuha uchacha ikikani ge nu go xxudiha, ¿laaba ganna xxudiha‑la nuha uchacha ikini ge nu go ka xi'inniha?
2CO 12:15 Laxkala neti de lebi'i nna eria iki eria lasia utea nu tee kia, meskila tuttíru etua de rula'ania le kini lebi'i nna saría tsena le. Meskila neti rakaruti gele, lebi'i nna lattiruba rakinle kia.
2CO 12:16 Ttu chupale rale: “Gwalí galá, la'ania lana labí betsetsinna ri'i ge nu biyasinna, ttaka ankana ttu nu rotsi'inu leni nna len gwen lasiba bedaxxuna ikiri'i.”
2CO 12:17 Gwalinnáruga, ¿si ka benne ridhelhaa ata se'ele‑na, si ka benne‑na nuná rixúti ke ki ralhia belhiu gele?
2CO 12:18 ¡Ko'o, labí! Neti, tti unnaba lo Tito‑na ki itana ata se'ele‑na, udhelhagabaa attu betsi to geri'i lenna. Gwalinnáruga, ¿si utua Tito‑na gele tti bitana ata se'ele‑na? ¡Ko'o, labí! Ri'itu labí ruin ri'itu aná. Ri'itu turo'oba rulaba letu lhe turo'ogaba ruintu lhe.
2CO 12:19 Xa betsi to kia, ¿si rakinle deki rigí xúba nátu tti ratu le deki labí bi ruintu? ¡Ko'o, labí! Ri'itu rinnebatu arlo Tata Do Yebáha atti galába benne due len Cristuha. Iyába nu ruintu, ruinbatu na kini lebi'i tse'e tsitsirule lo neda geeha.
2CO 12:20 Kumu neti rixxusati gele ni kina tti isiaya ata se'ele‑na abíba etexxakaa le ruinle tti tte raka lasia uinle, anágaba neti ni kina abíba unia nu tsu'u lele tti isiaya naa. Kumu rixxusati ni kina etexxakaa le se'e tilhale, lhe rutía di le luesile lhe. Anágaba ni kina se'ele risa'ani len luesile, lhe ni kina yu'ule rigu'u ni'a ge luesile lhe. Anágaba ni kina se'ele rinne ge luesile, lhe rinne kwe'e luesile lhe. Anágaba ni kina etexxakaa adíle se'ele ruinle deki ankale nu ra xxeni lele, lhe ni kina nu subi subiba ruinle yu'ule lhe.
2CO 12:21 Anágaba rixxusagabati ni kina tti isiaya naa, ugwe Tata Do Yebaa kia neti elhittu tti dua lagwi gele. La'ania nna kwesia de elenti kumu de ixele axta ttuha dale ruinle tulha nna labí chi bodúna le ki udhanle iyá nu satsa ruinle, lhe labí chi bedhanle risále nu subi subi, lhe anágaba labí chi bedhanle ruinle nu retaba le latile ruinle lhe.
2CO 13:1 Nuní aka tsunna libe itaa ata se'ele‑na nna iyába nu riyasa aka elhuxtisi geni teeki se'e chupa o tsunna ka benne biyú loke bixa uka. Aníha kini aka elhuxtisi ge nu ukaha.
2CO 13:2 Chiba xpeya le tti bitaa ata se'ele‑na nu berupa libeha, nnanna rea idittu redennea attu libe ria, ganna chi isiaya attuha ni ttúle labí satua lasia le: ni ka nu benkana tulha ttuha lhe nigaba nuxaru attu benne lhe.
2CO 13:3 Aníha kini lebi'i ilenle deki Cristuha‑ba nuha rinnee tti rinnea. Benneha labí a eyaxanie bixa udhake le, sinuki tsitsi udhaka benneha le.
2CO 13:4 Gwalí galá benneha beyake ttu benne labí tsitsi uná lebie tti utábie lo ya kurusiha, ttaka de Tata Do Yebáha ra tsitsi lebie, nu ra tsitsi leeha beni kini nnanna anka ben Cristuha. Anágaba ri'itu nnanna ratetu ttiba gwate benneha, labí tsitsi re letu, ttaka de Tata Do Yebáha ra tsitsi lebie, de nuha nna runie kini ri'itu tse'etu aka bentu de se'e lentu Cristuha. Aníha kini ixútu ki ute nátu len lebi'i.
2CO 13:5 La lebi'iba gwaltse'e gwalulanni gele ganna gwalínle ria lele Cristuha. Lebi'i gwa yúbale, benneha doe lhe'e lastole. Ganna abíba doe lhe'e lastole, la'ania nna chiba binittile arlo Tata Do Yebáha.
2CO 13:6 Neti ruxxenba lasia deki lebi'i gokinniba ikile deki ri'itu labí binittitu arloe.
2CO 13:7 Ri'itu rinnabatu len Tata Do Yebáha kini lebi'i abittu uinle nu satsa. Laa ruingatu kini ule'e deki ri'itu iria tsetu arlo Tata Do Yebáha. ¡Ko'o! Sinuki ruinlatu kini lebi'i tse'ele uinle latsiru, meskila ri'itu ule'e deki rinittitu arloe.
2CO 13:8 Kumu ri'itu ruintu nu raxxína len nu gwalíga anka tisa ge Tata Do Yebáha, labí ruintu nu abittu raxxína len tisa geeha.
2CO 13:9 Laxkala ittaba du letu de labí tsitsi re letu, lebi'i nna kwe tsitsila lele. Nuní rinnabatu gele len Tata Do Yebáha kini isinle akale benne tse'e tsitsirule lo neda geeha.
2CO 13:10 De nuha nna nnanna rea idittu runia yetsi‑ni nna ridhelhaa na len lebi'i, kini ganna chi bisiaya ata se'ele‑na abittu udhaka disaa le. Kumu Tata Xisiha labí betebie lo neda len neti kini utse'e looa le, sinuki betelee lo neda kia ki use'e tsitsia le.
2CO 13:11 Debá nuníba rigixxi'ania le xa betsi to, gwaltse'e itta, lhe gwaluin doelha kini isinle akale benne tse'e tsitsile lo neda ge Tata Do Yebáha, lhe anágaba gwaluse'e tsitsi luesile, lhe ttúba gwalulaba lele, lhe latsiru gwaltse'e len luesile lhe. Aná nna Tata Do Yebáha gwadúgabe len lebi'i. Benneha rakanie geri'i lhe ruse'e tsebie ri'i lhe.
2CO 13:12 Gwalugwe luesile ttu padiuxi lhe gwaligo ttu xxaga luesile lhe.
2CO 13:13 Iyába ka benne se'e nii ka benne chi riesini Tata Do Yebáha ki akake gebie ridhelhake ttu padiuxi gele.
2CO 13:14 Jesucristu benne anke Xxanari'iha edá lebie aka lenie le lhe anágaba edí baale elha si'i lasi ge Tata Do Yebáha, lhe Espíritu geeha satía dhoe len lebi'i. Amén.
GAL 1:1 Neti Pablo ankaa apóstol. Laa ankagaa apóstol nu bodú ka benne se'e yiesi lo yu‑ni, nigaba laa lagake udhelhake neti kini akaa apóstol. Neti ankaa apóstol udhelha Jesucristuha lhe udhelha Xxudiri'i do yebáha lhe, delába benne belhidhe Cristuha lo elhuttiha.
GAL 1:2 Neti lenia iyá ka betsi to geri'i se'e nii, ridhelhatu yetsi‑ni gele, lebi'i ka benne chi ria lele Jesús‑ni se'ele itúba daka Galacia‑na.
GAL 1:3 Xxudiri'i do yebáha lhe Jesucristu benne anke Xxanari'iha lhe, lake edá leke aka lenke le lhe use'eke le xen su lasi lhe.
GAL 1:4 Jesucristuha betebie elha nabani geeha, kini uttie utixe ge ka tulha nujari'i. Aníha kini bodilábie ri'i lo nu satsa raka yiesi lo yu‑ni. Benbe attiba ukaba le Tata Do Yebáha, delába benne anke Xxudiri'iha.
GAL 1:5 ¡Benneha uinri'i kini inná xxeni lebie ttu dia lii! Amén.
GAL 1:6 Raka télati binaa gele rudháchi ikile Tata Do Yebaa benne bedá lebie kwentaba uxie le lo neda geeha de nu gwate Cristuha, delo nna ge attu tisa subila chi rudo nagale, labíru rudo nagale ge ka tisa tse ka nu rigixxi'a ge Cristuha.
GAL 1:7 Laa gwalíga deki tee attu tisa subi. Sun tteba nna de reki ttu chupa ka nu ruchixxikana ikile ata se'ele‑na, raka lekani otseakana ka tisa tse, delába otseakana ka tisa tse ka nu rigixxi'a ge Cristuha.
GAL 1:8 Meskila ganna si ri'itu o ttu anjeli daa yebáha isiatu kixxi'entu le attu tisa subi nu abittu raxxína na len ka tisa chi utixxi'entu le ge Cristuha, Tata Do Yebáha urixxi ukinnie ri'itu ganna aníha uintu.
GAL 1:9 Chiba ratu le ttuha, nnanna nna rodopeya le attu libe: Tata Do Yebáha urixxi ukinnie nuxaba isiana kixxi'enna le attu tisa subi nu abittu raxxína na len ka tisa tse chi biyieninle ge Cristuha.
GAL 1:10 Nianna, ¿si rakinle rinnea aní kini eya'an tsea arlo ka benne ak? ¿Runia kini eya'an tsea arlo Tata Do Yebáha ak? Gwalinnáchu. O, ¿si rekia runia nu dika tsu'u le ka benne ak? Ganna ttixka neti sa rekibaa runia nu ru'u le ka benne, la'ania nna labíru ankaa nu rixúa lo sina ge Cristuha ganna ttixka.
GAL 1:11 Xa betsi to, nnanna raka lasia unale deki ka tisa tse rigixxi'aya ge Jesucristuha, labí ankake tisa botsi'inu le ka benne se'e yiesi lo yu‑ni,
GAL 1:12 kumu laa nuxaga benne bele'enie neti ka tisa‑ni, nigaba laa nuxaga benne bedhetinie neti ka benne‑ni. ¡Ko'o! Jesucristuha‑ba bele'enie neti ka tisa‑ni.
GAL 1:13 Lebi'i gwa uyu'uba nagale gasina uka elha ruin kia itú ttuha atti sa riaba lasia ttigaba ria le adí ka benne Israel‑ni. La'ania yalhá gwanalhaa bedhaka disaa ka benne chi ria leke ge Jesús‑ni, benia utse'e looa ke
GAL 1:14 lhe anágaba, netiba nu bedorua tisa ge nu ugía lasia la'ania tti adíru ka nu Israel‑ni, delába ka nu uka lenia turo'o nu kwiti la'ania. Bedo tsitsiruna lasia benia nu labini ka benneola kiaha ruinke.
GAL 1:15 Ttaka Tata Do Yebáha, attili sa yu'a lhe'e nan kiaha chi ulesie neti nna bedá lebie uxie neti lo neda geeha. Labe bedá lebie uxie neti kini benbiaya Xi'inieha, kini anáchu tsiaya kixxi'aya ge benneha len ka nu abittu ankakana nu Israel. La'ania laa ugíagaa gwennaba tisa nuxa attu benne,
GAL 1:17 nigaba laa ugwapigaa ugíaya lhe'esi Jerusalén‑ni gwennaba tisa ka benne chi ankake apóstol lade'a tte tti neti, sinuki daka lo yu ge Arabia‑nila ugíaya. Iki deliba nuha nna tti beyekia besina adakabaa lhe'esi Damasco‑ni.
GAL 1:18 Ukaliba tsunna idaha nna tti ugwapia lhe'esi Jerusalén‑ni gwalannia Pedruha. Niha udoa lenbie tsinu (15) ubisa.
GAL 1:19 Lanúru nu attu nuxa benne anka apóstol biláti la'ania, sunruba Jacobo betsi Jesús benne anke Xxanari'iha, sunruba benneha biláti.
GAL 1:20 Tata Do Yebáha yu xeabe nu rigixxi'aya lo yetsi‑ni nu gwalíba anka nuní, labí ruin lasia.
GAL 1:21 Iki de chi udoa len Pedruha lhe'esi Jerusalén‑ni, nianna tti beriaya lhe'esiha nna dedáya daka lo yu ge Siria‑ni lhe Cilicia‑ni lhe.
GAL 1:22 Ka benne chi ria leke Cristuha, ka benne se'eke daka lo yu ge Judea‑ni labí chi ankabiakanie neti la'ania.
GAL 1:23 Sunruba riyienkanie ra ka benne: “Nu danalhana rudhaka disana ri'i ttuha, nnanna nuha chi rekina rigixxi'ana ka tisa ria leri'i ge Cristuha, delába ka tisa ka nu ruinna utse'e loona la'ania.”
GAL 1:24 Laxkala de neti nna ráke: “¡Xxeniba ra le Tata Do Yebáha!”
GAL 2:1 Iki deliba chi ute sitá (14) idaha, la'anialiba nna dedhe'aya attu libe lhe'esi Jerusalén‑ni lenia Bernabé‑ni lhe chegabaa Tito‑ni lhe.
GAL 2:2 Ugíaya kumu bela'ati ra Tata Do Yebáha neti deki teeki tsiaya niha. La'ania suna len ka benne ankake nu loni ge ka benne ria leke ge Jesús‑ni se'e lhe'esi Jerusalén‑ni, suna len ka benneha‑ba unnea. Len ka benneha betso dua ka tisa ge Cristuha, ka nu rigixxi'ania ka benne abittu ankake nu Israel. Aníha benia kini uka xen lasia kini ni kina kwentaruba rekia rigixxi'aya lhe ni kina kwentaruba chi ugwekia utixxi'aya, delo nna abígaba ixú nu runia.
GAL 2:3 La'ania, ki nila Tito‑ni, meskiba ankana nu griegu dana len neti, ka benne ankake nu loniha labí bedo doelhake na ichú lo bela latini tti runi ka nu Israel‑ni.
GAL 2:4 Ttaka uka nuha, kumu de use'e ttu chupa ka nu rákana deki chi ria lekani Jesús‑ni, ttaka labí liikinna. Ka nuha uta'akana len ri'itu kini rulhatsikana ge nu ruintu de chi reki lhaatu kumu de chi babatu len Jesucristuha, delába labíru xigatu lo bia bennabi bodha'an Moisés‑ni. Lakana ruinkana oga'akana ri'itu kini odotu tisa ge bia bennabiha.
GAL 2:5 Ka nu uta'akana rulhatsikana getuha, niru latti labí uxielhatu gekani uintu nu rákana. Aníha kini ka tisa tse rigixxi'atu ge Cristuha abittu iseake, kini eya'anke len lebi'i atti tteba chi ankakeha.
GAL 2:6 Ka benne ankake nu loniha, ka benne ra xxeniru lekeha, labíru attu bixa nu kubi bele'ekanie neti kini kixxi'ania ka benne. Meskiba nuxa ankake la'ania, len neti labí raka doelha nuxa ankake kumu arlo Tata Do Yebáha ttúba anka iyábari'i.
GAL 2:7 Nu benlake, bokinnila ikike deki len netiba chi bodha'an Tata Do Yebáha kini kixxi'ania ka nu abittu ankakana nu Israel ka tisa ge Cristuha, attigaba benie len Pedruha bodha'ane len benneha kini kixxi'agabanie ka benne Israel‑ni ka tisa ge Cristuha.
GAL 2:8 Kumu Tata Do Yebaa benne benie ki anka Pedruha apóstol ge ka benne Israel‑ni, lagabe nuha benie kini neti ankaa apóstol ge ka nu abittu ankakana nu Israel.
GAL 2:9 Ka benne se'eke arlo ka benne chi ria leke ge Cristuha, delába Jacobuha lhe Pedruha lhe Juan‑ni lhe, tti ute dákanie deki Tata Do Yebáha‑ba bedá lebie betebie elha tse kia kini kixxi'aya ka tisaha, la'ania nna bedaxxuke náya lhe ná Bernabé‑ni lhe. Aníha benke kini bela'a deki gwa se'ebake len ri'itu kini tsiatu kixxi'entu ka benne abittu ankake nu Israel ka tisaha. Lake nna la diabake rigixxi'akanie ka benne Israel‑ni ka tisa ge Cristuha.
GAL 2:10 Suna unnababake len ri'itu ráke: “Odhú lele ge ka benne dii, ka benne abittu geke tee, uttupale latti nu tee gele ki utele lenke.” Neti nna nuníba runia doelha ruttupaa.
GAL 2:11 Tti bita Pedro‑ni lhe'esi Antioquía‑ni, la'ania bose'a loni, kumu labí nu dika ixú ruinna la'ania.
GAL 2:12 Kumu atti lanila isia ttu chupa ka benne udhelha Jacobuha, la'ania gwa robana yetta len ka nu abittu ankakana nu Israel. Ttaka atti chi bisia ka benne udhelha Jacobuha, la'ania nna chi udulona labíru reyaxinna satsána ka nu abittu ankakana nu Israel nna chi udulona rukwittana. Aníha benna kumu de rasinna ka kisa ka nu Israel‑ni na, delába ka nu rákana deki teeki ichú lo bela lati ka nu abittu ankakana nu Israel, kini aníha nna akakana gwalíga ge Tata Do Yebáha.
GAL 2:13 Adí ka nu Israel ka nu chi ria lekani ge Jesús‑ni se'e niha, tti bilákinna nu gatsi ruinnaha, gwanalhagabakana na, bengabakana tti ruinnaha, axtaba Bernabé‑ni biyietigabana benna tti ruin ka nuha.
GAL 2:14 Ttaka tti biláti deki labí ruinkana atti ttega ra ka tisa tse ka nu rigixxi'a ge Cristuha, nianna tti xpeya Pedruha arlo iyába ka benne se'e niha: “Ki lu ankalalu nu Israel nna abígaba ruinlu tti runi ttu nu Israel, delo nna attiba runi ttu nu dittu ruinlu, ¿beakala nna rudo doelhalu ttu nu dittu uinna tti runi ka nu Israel, ki lu ankalalu nu Israel nna a ruinlu tti ruin ka nuná?”
GAL 2:15 Ki yulu, ri'i attili uliri'iha chi ankari'i nu Israel, labí ankari'i nu dittu, delába ka nu dittu ka nu rari'i deki ankakana ka nu runi tulha kumu de labí bia bennabi bodha'an Tata Do Yebáha gekani.
GAL 2:16 Ri'i gwa yúbari'i deki ttu benne labí de rudobie tisa ge nu ra lo bia bennabi‑na nna abitturu yua nuje ge nu runie. ¡Ko'o, labí! Ttu benne labíru yua nuje ge nu runie kumu de ria lebie ge Jesucristuha. Ri'i chigaba ria leri'i ge benneha, kini de chi ria leri'i gebie, de nuha nna abitturu yua ujari'i ge nu ruinri'i, labí kumu de rudori'i tisa ge nu ra lo bia bennabi bodha'an Tata Do Yebáha. Kumu ni ttu benne a dhaabie ake nu abitturu yua uje ge nu runie de udobie tisa ge nu ra lo bia bennabi‑na.
GAL 2:17 Ganna ri'i raka leri'i akari'i benne abittu yua ujari'i ge nu ruinri'i de chi ria leri'i Cristuha, ttaka delo nna rite denri'i ankabari'i benne runi tulha attiba ruin ka nu abittu ankakana nu Israel, ganna ankabari'i benne ruin tulha, la'ania nna, ¿si innári'i deki Cristuha‑la runie ki ruinri'i tulha attiba lakana? ¡Ko'o, labí!
GAL 2:18 Kumu ganna neti chi ulu'u ni'aya nu ria lasia ttuha, ganna la nuha‑ba redelhidha adakabaa nna rodoa tisa geni attu libe, ganna aníha runia, la'anialigaba nna la netiba nuha rila tulha kia.
GAL 2:19 Kumu bia bennabi bodha'an Tata Do Yebáha len Moisés‑ni ttisidiba bettiba nuha neti, laxkala attisidiba lanúrua doa ki udoa tisa ge nu ra loni. Aníha kini nnanna dhoa aka bania kini ixúa ge Tata Do Yebáha.
GAL 2:20 Neti ttisidiba utábaa len Cristuha lo ya kurusiha, de nuha nna ttisidiba lanúru neti doa, Cristuha‑ba nuní doe lhe'e lastoa. Nnanna doa anka bania lhe'e bela latia‑ni, dobaa ria lasia ge Xi'in Tata Do Yebáha. Benneha ukanie kia nna betebie elha nabani geeha kini uttie utixe kia.
GAL 2:21 Neti labí rigu'u ni'aya nu tse bedá le Tata Do Yebáha, delába nu tse betebie kwentaba len ri'i, kumu ganna ri'i de udobari'i tisa ge nu ra lo bia bennabi‑na nna gwakari'i benne abitturu yua nujari'i ge nu ruinri'i, ganna ttixka aníha uinri'i, la'ania nna kwentaruba nuha utti Cristuha ganna ttixka.
GAL 3:1 ¡Aalexa Gálatas nu akaa elha rieni ikini! ¿Núchiala utánna ikile nna a riaru lele ge nu anka gwalí? Ki lhixxa rába utixxi'entu le ge Jesucristuha deki utábie lo ya kurusiha.
GAL 3:2 Sun tte nu raka lasia kixxi'ale: ¿Si uxíle Espíritu ge Tata Do Yebáha de ruinle nu ra lo bia bennabi bodha'aneha ak? ¿O, uxíle Espírutuha de ugía lele ge nu chi biyieninle ge Cristuha ak?
GAL 3:3 ¡Ga ttiparuba abí gwa rieninle! Lebi'i lade'a tte uxíle Espíritu ge Tata Do Yebáha de ugía lele ge Cristuha, nnanna nna, ¿gá lole nna titúbale ruinle isinle kini akale itá su arlo Tata Do Yebáha?
GAL 3:4 Iyá nu chi gwatele, ¿si kwentaruba gwatele nuná? Neti rakati labí kwentaba gwatele nuná.
GAL 3:5 Tata Do Yebaa benne rutebie Espíritu geeha len lebi'i lhe runie ka milagru arlole lhe, ¿si runie ka nuha de rudole tisa ge nu ra lo bia bennabi‑na ak? ¿O runie ka nuha de ugía lele ge nu chi biyieninle ge Cristuha ak?
GAL 3:6 Gwalulanniruga ge Abraham‑ni. Lana de ugía leni Tata Do Yebáha, de nuha nna upe na kwenta deki ankana nu abitturu yua nujana ge nu ruinna.
GAL 3:7 Laxkala lebi'i teeki unale deki ka nu ria lekani Tata Do Yebáha, ka nuha gwankakana xi'in Abraham‑ni de ria lekani attiba ugía le benneha.
GAL 3:8 Lo ka yetsi ge Tata Do Yebáha ttuha‑li chi dia ra: Ka nu abittu ankakana nu Israel, de tsiaba lekani Tata Do Yebáha, de nuha‑ba nna unie kini akakana ka nu abitturu yua nujakana ge nu ruinkana. Tata Do Yebáha ttu utixxi'alanie Abraham‑ni, ree na: “De lu nna unia kini saría tsena ka benne se'e lhe'e iyába ka yiesi se'e itúba yiesi lo yu‑ni.”
GAL 3:9 Laxkala ka nu ria lekani Tata Do Yebáha, labie unie kini saría tsena kana itupa lenkana Abraham‑ni, delába Abraham benne ugía lebie ge Tata Do Yebáha.
GAL 3:10 Kumu iyába ka nu rakakinna deki tee kiba uinkana nu ra lo bia bennabi bodha'an Moisés‑ni kini isinkana akakana benne abitturu ujakana yua ge nu ruinkana, ka nuná urixxi ukinniba Tata Do Yebáha kana, kumu lo yetsi geeha dia ra: “Ibixxi iginniba ka nu abittu dhaakana udokana tisa ge iyá nu ra lo bia bennabiha.”
GAL 3:11 Nnanna ri'i chiba yu xeabari'i deki arlo Tata Do Yebáha lanú nu dhaana isinna akana benne abitturu ujana yua ge nu ruinna de rudona tisa ge nu ra lo bia bennabiha; kumu lo ka yetsi ge Tata Do Yebáha dia ra: “Benne runie nu dika ixúha, de tsiaba lebie Tata Do Yebáha, de nuha nna gwaka benbe arlo Tata Do Yebáha.”
GAL 3:12 Bia bennabi‑na labí rinnaba nuná tsia leri'i ge Tata Do Yebáha; rutse'e loona, rala nuná: “Nu dhaana uinna iyá nu ra loni, nuha gwaka benbana.”
GAL 3:13 Ri'i nna Cristuha‑ba utixe geri'i kini bodilábie ri'i lo bia bennabi‑na kini abittu ibixxi iginniri'i de abittu udori'i tisa geni. Cristuha bibixxi biginnie kini bodilábie ri'i, kumu lo ka yetsi ge Tata Do Yebáha dia ra: “Iyába ka nu ritákana lo ya kurusi, rurixxi rukinniba Tata Do Yebáha ka nuha.”
GAL 3:14 Aníha uka kini ka nu abittu ankakana nu Israel, de nu gwate Jesucristuha nna gwa ralhakana dhíkana nu tse begwebie Abraham‑ni, kini anáchu ri'i de tsia leri'i gebie nna dhiri'i Espíritu geeha, delába Espíritu nu chi ree utebie geri'i.
GAL 3:15 Betsi to, innebaa ge nu ruinba ka benne se'e yiesi lo yu‑ni: Ganna chi rugweke tisa uinke ttu bixa, ganna chi bodha'an tsitsike nu unnekeha, la'ania nna lanú nu aka geni ku'u ni'ani nuha, nigaba udienna ikini lhe.
GAL 3:16 Aníha‑gaba uka len Abraham‑ni. Len lana begwe Tata Do Yebáha tisa lhe len benne datiabie naha lhe. La'ania labí bedettie ixe ka benne, suna ttúba benne bedettie tti ree Abraham‑ni: “Benne datialuha”, delába Cristuha‑ba nuha bedettie tti ree: “Benne datialuha.”
GAL 3:17 Nu raka lasia kixxi'ania le: Tata Do Yebáha ree Abraham‑ni: “Neti unia kini saría tsena lu.” Nianna bodha'an tsitsie deki gwalíba unie nu chi reeha. Iki deliba chi ute ttapa gayua rerua (430) idaha la'anialiba nna tti bisia bia bennabi bodha'ane len Moisés‑ni. Bia bennabiha labí dhaa nuha kuana lidhaka ka tisa chi bodha'an tsitsie len Abraham‑ni.
GAL 3:18 Nu chi ra Tata Do Yebáha utebie geri'i, labí dhiri'i nuha de rudori'i tisa ge nu ra lo bia bennabi‑na. Kumu Abraham‑ni kwentaba bedá le Tata Do Yebáha begwebie na nu tse ralhana dhinaha kumu aníha chi ree unie lenna. Aníha‑gaba unie lenri'i.
GAL 3:19 Ganna aníha nna, ¿beakala bisia bia bennabi‑na ganna? Delába, bisiana delo ni'a ge ka tulha ruinri'i, de nuha nna bete Tata Do Yebáha na. Bia bennabi‑na bixúna laka bisia benne datiabie Abraham‑ni. Benneha nuha chi begwe Tata Do Yebáha tisa deki idhelhe bie yiesi lo yu‑ni. Ka anjeli geeha bixúnie ki beteke bia bennabi‑na len Moisés‑ni nna Moisés‑ni nna utixxi'anie nuha ka benne.
GAL 3:20 Ttaka ttixka ttu benne, ttúbe do, la'ania nna labí riyasin benneha attu benne dhue lagwi ki uttebie tisa gebie len attu benne. Aníha‑gaba Tata Do Yebáha ttúba benneha do.
GAL 3:21 Ganna aníha nna, ¿si innári'i deki bia bennabi bodha'an Moisés‑ni rigu'uba ni'ani nu chi ra Tata Do Yebáha utebie? ¡Ko'o, labí! Kumu ganna ttixka uxíri'i ttu bia bennabi nu gwadaana uinna kini aka benri'i ttu dia lii, la'ania nna gwakalari'i benne abitturu yua nujari'i ge nu ruinri'i de udori'i tisa ge nu ra loni ganna ttixka.
GAL 3:22 Ttaka lo ka yetsi ge Tata Do Yebáha rigixxi'a ra, iyába ka benne se'e yiesi lo yu‑ni den tulha‑na ke, labí rulhána ke. Raka aní kini anáchu ka benne chi ria leke Jesucristuha dhike nu chi ra Tata Do Yebáha kwentaba utebie geke.
GAL 3:23 Attili lani isia sá tsia leri'iha, la'ania denba bia bennabi‑na ri'i, attiba ttu nu yaya lisiyya ankari'i. Ruyúbana ri'i attiliba chi bisia sá ugía leri'i ge Jesucristuha, la'anialiba nna chi bedhanna ri'i.
GAL 3:24 Laxkala bia bennabi‑na ukana attiba ttu benne biyúe ri'i nna uchena ri'i kini benbiari'i Cristuha, kini de tsia leri'i ge benneha nna gwakari'i benne abitturu yua nujari'i ge nu ruinri'i.
GAL 3:25 Nnanna de chi bisia Jesucristu benne ria leri'i geeha, de nuha nna labíru ruyú bia bennabi‑na ri'i,
GAL 3:26 kumu lebi'i iyábale chi ankale xi'in Tata Do Yebáha de chi ria lele Jesucristuha.
GAL 3:27 Kumu iyábale, ka nu chi udile inda de babale len Cristuha, nu anka Cristuha nuha chi beyakale.
GAL 3:28 Nnanna labíru raka doelha nuxa ankale, sila ankale nu Israel o abittu; sila ankale benne to'ole lo sina o abittu, lhe sila ankale nuila o sila ankale nubiyú lhe, kumu nnanna iyábale ttúba chi beyakale de chi babale len Jesucristuha.
GAL 3:29 Ganna lebi'i chi ankale ge Jesucristuha, la'ania nna chigaba ankale nu datiale Abraham‑ni lhe anágaba nna de chi begwe Tata Do Yebáha tisa len benneha, de nuha nna lebi'i chigaba ralhale dhile nu ute Tata Do Yebáha.
GAL 4:1 Neti ria: Ganna ttixka nutoba sa anka nu ralhana dhina nu rodha'an xxudiniha na, meskiba nutoha chi ankana xxana iyá nu dhinaha, ttaka ttiba ttu nu to'o lo sina ge benne, aníha‑ba sa ankana.
GAL 4:2 Sa rudobana tisa ge ka nu ruyúkana naha lhe ruyúgabakana nu chi ga'anna dhinaha lhe, axtaliba ganna chi gwadona sá chi ga'anani xxudiniha dhina nu ralhana dhinaha.
GAL 4:3 Anágaba ri'i, atti sa ankari'i attiba ttu nuto, delába atti labí chi ria leri'i Cristuha, la'ania ttiba ttu nu to'o lo sina ankari'i, rido doelhabari'i ruinri'i nu rotsi'inu le ka nu se'e yiesi lo yu‑ni.
GAL 4:4 Ttaka tti chi gwadona sá atti chi ga'anani Tata Do Yebáha idhelhe Xi'inieha, la'ania udhelhe benneha. Benneha bija ttu benne nuilee nna udoe yiesi lo yu‑ni bedobie tisa ge nu ra lo bia bennabi bodha'an Tata Do Yebáha.
GAL 4:5 Benneha bisiabie utixe geri'i kini bodilábie ri'i, delába ri'i ka nu se'eri'i rudori'i tisa ge nu ra lo bia bennabi‑na. Aníha benie kini bedí Tata Do Yebáha ri'i kini anáchu nna bisinri'i ukari'i xi'inie.
GAL 4:6 Nnanna kumu de chi ankari'i xi'inie, de nuha nna udhelha Tata Do Yebáha Espíritu ge Xi'inieha lhe'e lastori'i. Espírituha nuní rinnebie tti rulisari'i Tata Do Yebáha, rari'e: “¡Tatoo!”
GAL 4:7 Laxkala lebi'i nnanna labíru ankale nu to'ole lo bia bennabi‑na, sinuki xi'in Tata Do Yebáha‑ba chi ankale. Kumu de chi ankale xi'inie, de nuha nna chigaba ralhale dhile nu bodha'aneha de nu gwate Jesucristuha.
GAL 4:8 Lebi'i itú ttuha atti labí chi ankabienle Tata Do Yebáha, la'ania ka nu labí gwalí ankakana diosi, ka nuha‑ba bedo lele ugía lele gekani, attisidiba bito'obale lokani.
GAL 4:9 Ttaka nnanna de chi ankabienle benneha, delába labie nuha chi ankabianie le, ki ganna lebi'i chi ankabienlee, ¿beakala nna sa ruinbale nu rotsi'inu le ka benne se'e yiesi lo yu‑ni?
GAL 4:10 ¿Beakala nna sa rapabale kwenta ge ka sá laní‑na lhe ge ka beo kubi‑na lhe anágaba ka ida‑na lhe?
GAL 4:11 Kumu neti rixxusati gele, ni kina kwentaruba urenia nna abíba bixú nu bele'enia leha.
GAL 4:12 Betsi to, rinnaba ditia len lebi'i, gwaluni attiba runia, kumu neti atti udoa len lebi'iha benbaa attiba labibinle ruinle, beyakabaa attiba lebi'i. La'ania latsiruba biyúle neti.
GAL 4:13 Gwa yu xeabale, delo ni'a ge isagwe yu'u latia‑ni nna uledaa ata se'ele‑na utixxi'ania le sisi'a tte ka tisa ge Jesucristuha.
GAL 4:14 Nu bilenle raka latia la'ania, nuha labí benna kini ulu'u ni'ale neti o lhe bodekile neti. Nu benlale, ttiba ttu nu belabi ttu anjeli ge Tata Do Yebáha, aníha‑ba belabile neti, benbale attisidiba kwinaba Jesucristuha nuha bisiabie len lebi'i la'ania.
GAL 4:15 ¿Gála gwaga'ale elha gwedeaka lasi gele tee la'ania ganna? Neti yu xeabaa, ganna ttixka uka gele, tatisale uleale ka iyya lole‑na nna betele kana len neti la'ania.
GAL 4:16 Nnanna nna, ¿si chiba beyakaa ttu nu abitturu aka uyúle de utixxi'ania le nu anka gwalí?
GAL 4:17 Ka nu reki naa ruchixxiba ka nuná ikile, ruinkana deki yalhaba retabikinna gele, ttaka labí elha tsekin nuná ruinkana aná. Sunruba ruinkana ukwittakana le len neti, kini delo nna suna gebakani etabinle.
GAL 4:18 Tseba anka ganna etabinri'i ge ttu benne. Aná nna elha tsenri'i lhe satía xa, abittu sun tteruba atti doa len lebi'i ruyú loa nna gwa ruinle aní.
GAL 4:19 Xi'ini to kia, gele nuní raditea rodoyúa elha disa attu libe, ratea attiba rate ttu nuila tti retti lhe'eni gali xi'inni. Ratea aní axtaliba ganna chi innabia Cristuha lhe'e lastole.
GAL 4:20 Aní rakati neti chi dua len lebi'i loora tte nnanna kini otsea elha rinne kia, abitturu udo rea tsi'a; kumu labí yua bí unia len lebi'i.
GAL 4:21 Lebi'i ka nu raka lele tse'ele udole tisa ge nu ra lo bia bennabi bodha'an Tata Do Yebáha len Moisés‑ni, gwalikixxi'en neti, ¿si lagwa chi biyieninle nu ra lo bia bennabi‑na?
GAL 4:22 Kumu lo ka yetsi ge Tata Do Yebáha dia ra: Abraham‑ni use'e chupa ka xi'in biyúni: ttúna len nuila utta láni Agar, delába nuila bito'o lo sina geniha, attuna nna len nuila nu abittu to'ona lo sina geniha, delába Sara nu uka kwinaga nuila geniha.
GAL 4:23 Deba nna xi'in biyúni nu uli len nuila nu to'o lo sina geniha, bijaba nuha nutoha kumu aníha‑ba uka lekani aka, ttaka xi'in biyúni nu uli len nu anka kwinaga nuila geniha, uliba nutoha kumu aníha‑ba chi ra Tata Do Yebáha Abraham‑ni deki utebie ttu xi'inni len nuila geniha.
GAL 4:24 Nu gwate ka nuilaha, nuha raxxína na len chupa loo ka tisa bodha'an Tata Do Yebáha. Ttu tisaha raxxína na len Agar nuila nu bito'o lo sinaha. Tisaha nuha ankana bia bennabi betebie len Moisés‑ni iki i'iya Sinaí‑ni. Agar‑ni nuha ankana ttiba ixná ka nu to'okana lo sina, delába ka nu daa lokani udokana tisa ge nu ra lo bia bennabi‑na.
GAL 4:25 Agar‑ni ankana attisidiba i'iya Sinaí nu do daka Arabia‑ni nna raxxína na len Jerusalén nu re yiesi lo yu‑ni. Lana itupa lenna ka xi'inniha, delába iyába ka nu rudokana tisa ge bia bennabiha, lakana ankakana attiba ttu nu to'o lo sina kumu de rido doelhakana ruinkana iyá nu ra lo bia bennabiha.
GAL 4:26 Ttaka Jerusalén nu anka ge yebáha, nuha ankana attiba Sara nuila nu abittu to'o lo sinaha. Lana nuha ankana attiba ixnári'i, delába ri'i ka nu abittu to'ori'i lo bia bennabi‑na.
GAL 4:27 Kumu lo ka yetsi ge Tata Do Yebáha dia ra: Lu nuila nu anuttu xi'inlu raka, bodú itta lelu lhe lu nuila nu abittu chi yulu gasina retti lhe'e ttu nuila ruja xi'inni, uresi'a de du itta xxatta lelu, kumu nuila bedhá ikikaniha, adíla ixe xi'in nuha raka attichula nuila nu do nubiyú geniha.
GAL 4:28 De nuha nna xa betsi to, lebi'i ankale attiba Isaac‑ni, kumu Tata Do Yebáha bodha'an tsitsi tisa gebie ree Abraham‑ni deki utebie ttu xi'inni. Anágaba lebi'i, de bodha'an tsitsi tisa gebie len Abraham‑ni, de nuha nna ankale xi'in Abraham‑ni.
GAL 4:29 Ttaka la'ania nuto nu ulina attiba ukaba le ka Abraham‑ni, nuha udú noona Isaac nu ulina attiba ukaba le Espíritu ge Tata Do Yebáha. Attiba uka la'ania, aníha‑gaba nuní raka nnanna.
GAL 4:30 Ttaka gwaluyúruga, ¿bí ra lo ka yetsi ge Tata Do Yebáha? Lo ka yetsiha dia ra: “Ulea nuila nu to'ona lo sina gelu‑na itupa lenna xi'inni nna, ulea nuná lhe'e yo'o gelu‑na, kumu niru latti a ralha xi'ini nuila nu to'ona lo sina‑na dhina nu ralha xi'ini nuila nu abittu to'ona lo sinaha.”
GAL 4:31 Laxkala ri'i xa betsi to, labí ankari'i attiba xi'in nuila nu to'o lo sinaha; ri'i ankalari'i attiba xi'in nuila nu abittu to'o lo sinaha.
GAL 5:1 Cristuha chi bodilábie ri'i kini tseki lhaari'i. De nuha nna gwaltse'e tsitsi de chi reki lhaale nna abitturu eyekile eta'ale lo bia bennabi bodha'an Tata Do Yebáha len Moisés‑ni, abitturu eyakale ttiba ttu nu to'ole loni.
GAL 5:2 Gwaludo nagale kia, neti Pablo rinnea rulisaa le. Ganna lebi'i richúba lo bela latile attiba runi ka nu Israel‑ni, la'ania nna nu ben Cristuha, niru latti a ixú nuha len lebi'i.
GAL 5:3 Redennea attu libe ria: Iyába ka nubiyú ganna ichú lo bela latikani teeki udokana tisa ge iyá recha nu ra lo bia bennabi bodha'an Tata Do Yebáha.
GAL 5:4 Lebi'i ka nu rakinle deki de udolibale tisa ge nu ra lo bia bennabi‑na nna gwasinle akale ka nu abitturu yua nujale ge nu ruinle, lebi'i chiba rukwittale kwe'e Cristuha, chiba bennittile nu tse redá le Tata Do Yebáha kwentaba utebie gele.
GAL 5:5 Kumu ri'i de Espíritu ge Tata Do Yebáha lhe de ria leri'i Jesucristuha lhe, de nuha nna gwa se'eri'i ruxxen leri'i kini akari'i benne abitturu yua nujari'i ge nu ruinri'i.
GAL 5:6 Kumu ri'i ata gwa se'eri'i len Jesucristuha, labíru raka doelha si gwa ruu lo bela latiri'i o abittu. Nu rakarula doelha ria leri'i gebie nna nu ria leri'iha runi kini rakani ge luesiri'i.
GAL 5:7 Lebi'i ki latsiruba chi diale lo neda ge Tata Do Yebáha, ¿núla uttana lo neda gele nna abitturu rudole tisa ge nu anka gwalí?
GAL 5:8 Tata Do Yebaa benne uxie le lo neda geeha, laa benneha‑ga nuha benie kini lebi'i botsea elha rulaba le gele.
GAL 5:9 Gwaluyú gele. Lebi'i gwa yúbale, ttu lattiru kua dii‑na ria iki yiedi‑na nna chi rilhidhana lhe'e itúba kua‑na. Aníha‑ba nuná rateri'i, ttu chuparuba tisa subi ra'a ikiri'i nna chi rotseana elha rulaba le ge iyári'i.
GAL 5:10 Neti ruxxenba lasia ge benne anke Xxanari'iha, lebi'i labí otseale elha rulaba le gele. Nu reki rukannana ikile‑na, meskiba nuxa ankana, dhiba nuná elha disa.
GAL 5:11 Neti xa betsi to, ganna ttixka sa rekibaa rigixxi'aya deki teeba ki ichú lo bela lati ka benne biyú‑na kini akake ge Tata Do Yebáha, ganna ttixka aníha‑ba sa runia rekia, ¿beakala nna sa rekibakana ridú nookana neti ganna? Ganna ttixka sa rekibaa rigixxi'aya deki teeba ki ichú lo bela lati ka benne biyú‑na, la'ania nna chila bitua nu rutisinna kana de riyienkinna ria: Chiba utixa Cristuha gekani lo ya kurusiha.
GAL 5:12 Nna ka nu rekikana rukannakana ikile, rákana le deki teeki ichú lo bela latile, ka nuná, ¡kwadila ttu tsa ttela ichú xankani ganna!
GAL 5:13 Kumu lebi'i xa betsi to, chi uxi Tata Do Yebáha le lo neda geeha kini tseki lhaale, delába abitturu innabia nu ra lo bia bennabi‑na le. Sun tteba nna abittu akinle de chi reki lhaale nna uinbale nu satsa rakaba lele. Nu uinlale, de rakin ge luesile nna latsiru gwaluyú luesile.
GAL 5:14 Kumu iyába nu ra lo bia bennabi bodha'an Tata Do Yebáha len Moisés‑ni, suna len tisa nu ra: “Akinlu ge attu benne attiba rakabani gelu”, suna len ttúba tisa‑ni ttisidiba ge iyába nu ra lo bia bennabiha chi rudori'i tisa.
GAL 5:15 Ttaka ganna lebi'i go ya'a lhe go luesiba yu'ule lhe, gwaluyú gele kini ka ulhuxa luesile.
GAL 5:16 De nuha nna ria: Nu inná Espíritu ge Tata Do Yebáha, nuha gwaltse'e gwaluni nna abittu uinle nu satsa retaba le bela latile ruinna.
GAL 5:17 Kumu nu satsa reta le ttu benne runie, labí ru'u le Espíritu ge Tata Do Yebáha unie aníha nna nu raka le Espírituha uin benneha nna abígaba rede'o le bela latieha uinna nu raka le Espírituha. Ixpabake labí rugwelha luesike. De nuha nna lebi'i labí raka gele uinle nu rakaba lele.
GAL 5:18 Ttaka ganna tse'ele uinle nu ra Espíritu ge Tata Do Yebáha, la'ania nna labíru innabia bia bennabi‑na le.
GAL 5:19 Lebi'i gwa yúbale, nuní nu satsa reta le ka benne ruinke, delába: risáke nu subi subi, lhe ruinke iyá looba nu satsa, lhe ritebiabake nu ruinke lhe.
GAL 5:20 Anágaba rudú xibike arlo ka nu labí gwalí ankakana diosi, lhe ruinke ge gwesá, lhe ritisin luesike lhe. Anágaba ritilha len luesike, lhe rapa yie luesike lhe. Anágaba nna ankagabake ka nu risa'a xxattani, lhe sun tteba geke ruchacha ikike lhe. Anágaba rila'a lhe'e luesike, ixe dhiba reyakake,
GAL 5:21 lhe rutía di le luesike, lhe ankake ka nu runi elhutti lhe anágaba ankake nu dusi, lhe ritebiabake roke lhe ri'ake lo ttu laní, lhe ruinke adíru ka nu satsa luesi nuní lhe. Ge iyá nuní rulisaa le attigaba chi xpeya le ttuha, ka nu ruinkana aní labí ralha ka nuná dhíkana nu tse dhi ka benne chi rinnabia Tata Do Yebáha ke.
GAL 5:22 Ttaka nu tse runi Espíritu ge Tata Do Yebáha lenri'i, runie kini ri'i rakin ge luesiri'i, lhe runie kini redú itta leri'i, lhe ruse'ebie ri'i xen su lasi, lhe anágaba besiba ribekie leri'i, lhe runie kini rakari'i benne re tse leri'i, lhe anágaba runie kini ruinri'i latsiru, lhe runie kini rakari'i nu abittu runnitti tisa geni, gwa ruinbari'i nu chi rari'i uinri'i,
GAL 5:23 lhe ruingabe kini rakari'i nu abittu ruin disa. Anágaba ruingabe kini rakari'i nu rinnabia elha ruin geri'i. Ka luesi nu tse‑ni labí bia bennabi tee nu usunana uinri'i kana.
GAL 5:24 Ka benne chi ankake ge Cristuha chiba bedhanke iyába nu satsa ruinkeha lhe iyába nu satsa reta lekeha lhe, attisidiba chiba betáke iyá nuha lo ya kurusiha.
GAL 5:25 Ganna Espírituha rutebie elha nabani geri'i arlo Tata Do Yebáha, anágaba nna tegaba ki tse'eri'i uinri'i nu inná benneha.
GAL 5:26 Bittu uinri'i ttaba lhe bittu utse'en luesiri'i lhe, anágaba abittugaba utía di le luesiri'i lhe.
GAL 6:1 Betsi to, ttixka nuxa ttúle chi biginnile benle tulha, lebi'i ka nu chi rudorule tisa ge nu ra Espíritu ge Tata Do Yebáha, gwalute nále len benne chi biginniha kini edú tsitsie. Aná nna len tisa besiba gwalulise. Gwaludhakagaba lele ge nu ruinle ni kina lebi'i isiagaba ixú yiele uinle tulha.
GAL 6:2 Gwalute ná len luesile ttixka bixa ratele. Ganna aníha uinle, la'ania nna gwa rudobale tisa ge nu bodha'an Cristuha uinri'i.
GAL 6:3 Kumu ganna nuxa ttúle rakinle deki gwankale nu gwa redeonru, ttaka delo nna abígaba riria ni'enle uinle ttu bixa, benne runi aníha, la labe nuha rake ingaña.
GAL 6:4 Kua ttu ttule gwalulannixa ge nu ruinle. Ganna tseba ruinle, la'anialigaba nna gwa tee ro'ole edeakinle ge nu ruinleha, ttaka abittu ku'ubiale nu ruinleha len nu runi adí ka benne,
GAL 6:5 kumu kua ttu ttubari'i tee nu daa lori'i uinri'i.
GAL 6:6 Nu rudheti ka tisa ge Tata Do Yebáha, nuha daa loni utena bixaba nu tee geni len benne rule'enie na ka tisaha.
GAL 6:7 Bittu akale ingaña, kumu Tata Do Yebáha lanú kwenta kitta lenna benneha. Lebi'i gwa yúbale, ttu benne ge nu radabe, ge nuha‑ba redíbie.
GAL 6:8 Nu ruinna nu satsa retaba leniha, de nu ruinnaha nna tsia nnittibana arlo Tata Do Yebáha, ttaka nu runi nu ru'u le Espíritu ge Tata Do Yebáha, Espírituha unie kini gwaka benna ttu dia lii.
GAL 6:9 De nuha nna bittu udhanri'i a uinri'i latsiru, kumu ganna abittuba edí lireri'i, la'ania nna gwasiaba sá edí baari'i ge nu tse ruinri'iha.
GAL 6:10 Laxkala nnanna laka rapari'i lo neda, uinri'i latsiru len iyá ka benne; lade'a tte uinri'i latsiru len ka betsi to geri'i, delába ka benne chi ria leke Jesucristuha.
GAL 6:11 Gwaluyúruga, aníli xxeni anka ka letra ruin kwinaga neti lo yetsi‑ni, ridhelhaa na gele, ria:
GAL 6:12 Ka nu rudo doelhakana le kini ichú lo bela latile, ka nuná ruinkana aná kini tsu'u le adí ka benne nu ruinkana lhe kini abittu urio láke kana ganna innákana suna Cristuha‑ba chi utixe geri'i lo ya kurusiha,
GAL 6:13 ki nigaba ka nu chi ruu lo bela latikinna, a rudokana tisa ge nu ra lo bia bennabi bodha'an Tata Do Yebáha len Moisés‑ni, ttaka nna lakana raka lekani ichú lo bela latile, kini aníha nna inná xxeni lekani de rudo doelhakana le richú lo bela latile.
GAL 6:14 Neti niru latti labí ra xxeni lasia ge attu bixa, suna ge nu gwate Jesucristu benne anke Xxanari'iha lo ya kurusiha, suna ge nuha‑ba inná xxeni lasia. Kumu de benneha nna nu raka yiesi lo yu‑ni, len neti ttisidiba chiba utti nuní; anágaba neti ttisidigaba chigaba uttia ge nu raka yiesi lo yu‑ni.
GAL 6:15 Kumu labí raka doelha si gwa ruu lo bela latiri'i o abittu, sinuki nu rakaru doelha eyakari'i ttiba ttu benne kubi arlo Tata Do Yebáha,
GAL 6:16 nna iyába ka benne tse'eke uinke nu chi bodha'anaa‑ni, Tata Do Yebáha use'ebie ke xen su lasi lhe satua lebie ke lhe. Aníha‑gaba unie len ka benne Israel‑ni, delába ka benne gwalíga chi ankake ge Tata Do Yebáha.
GAL 6:17 Debá nnanna, labíru raka lasia nuxa uttisinna neti, kumu neti chiba ren latia ka berusi ge nu ratea de rekia rigixxi'aya ge Jesucristuha.
GAL 6:18 Jesucristu benne anke Xxanari'iha edá lebie aka lenie le xa betsi to. Amén.
EPH 1:1 Neti Pablo ankaa apóstol ge Jesucristuha. Tata Do Yebáha‑ba bedá lebie kini akaa apóstol. Naa ridhelhaa yetsi‑ni gele, lebi'i ka benne chi ankale ge Tata Do Yebáha lhe anágaba chi rudo tsitsile tisa ge Jesucristuha, delába lebi'i ka benne se'ele lhe'esi Éfeso‑na.
EPH 1:2 Xxudiri'i do yebáha lhe Jesucristu benne anke Xxanari'iha lhe, lake edá leke aka lenke le lhe use'eke le xen su lasi lhe.
EPH 1:3 Xxeniba ra le Tata Do Yebáha Xxudi Jesucristu benne anke Xxanari'iha. Benneha chi benie kini saría tsena ri'i, betebie iyába elha tse daa yebáha geri'i de chi babari'i len Jesucristuha.
EPH 1:4 De chi babari'i len benneha, de nuha nna attili lani kwe yiesi lo yu‑niha chi bekwe Tata Do Yebáha ri'i kini akari'i nari xú lhe itá su arlobie lhe.
EPH 1:5 De ukanie geri'i, de nuha nna ttuha‑li chi ga'ananie edíbie ri'i kini eyakari'i xi'inie de nu gwate Jesucristuha, kumu aníha‑ba chi bedá lebie unie.
EPH 1:6 Aníha ben Tata Do Yebáha kini ri'i uinri'i ki inná xxeni lebie de nu tse bedá lebie betebie geri'i de chi babari'i len Xi'inieha, delába benne raka xxattanie geeha.
EPH 1:7 Kumu reni belali benneha utixe geri'i kini bese'e lhaari'i lhe bixú elha xen lasi ge ka tulha geri'i lhe. ¡Gwaluyúruga, análi xxeni anka elha tse bete Tata Do Yebáha geri'i,
EPH 1:8 bete tame iyá looba elha yuu lhe elha rieni geri'i lhe!
EPH 1:9 Aníha benie kini tte denri'i nu chi ga'ananie unie, delába nu labí chi yuri'i ttuha, benbe attiba chi bedá lebie unie.
EPH 1:10 Nu chi ga'ananie unie, uinbe nuha atti chi tadona sá akana. La'ania nna ottupe iyá tteba nu se'e yebáha lhe nu se'e yiesi lo yu‑ni lhe, nianna utebie kana lasi ná Cristuha kini benneha nna innabie kana.
EPH 1:11 Ri'i de babari'i len Cristuha nna ralhari'i dhiri'i nu ute Tata Do Yebaa benne runie iyá tte attiba rakaba lebie, kumu ttu ga'analanie gaxie ri'i kini akari'i gebie.
EPH 1:12 Aní ben Tata Do Yebáha kini ri'itu, ka nu sisi'a tte bexxen letu ge Cristuha, uintu kini inná xxeni lebie.
EPH 1:13 Anágaba lebi'i chi biyieninle ge nu anka gwalí, delába biyieninle ka tisa tse, ka nu rigixxi'akana gasina uinle kini lhaale. Nianna lebi'i ugía lele ge Cristuha. De nu gwate benneha nna bisia Espíritu ge Tata Do Yebáha latile, delába Espíritu chi ree utebie gele. Benneha bisiabie beya'ane latile kini aníha nna ule'e deki chi ankale ge Tata Do Yebáha.
EPH 1:14 Espírituha nuha runna liibie deki gwalíba dhiri'i nu tse chi ralhari'i dhiri'i. Dhiri'i nuha ganna chi bisia sá ulhuxa Tata Do Yebáha odilábie ri'i, delába ri'i ka benne chi ankari'i gebie. Aníha kini ri'i uinri'i ki inná xxeni lebie.
EPH 1:15 De nuha nna neti tti binaa deki chi ria lele ge Jesús benne anke Xxanari'iha lhe binaa deki gwa rakabinle ge iyá tte ka benne chi ankake ge Tata Do Yebáha,
EPH 1:16 debá la'ania nna kua rexxaba lasia le, labí rudú siia rugwea bie ixkixaru gele atti rilhapia tisa lenie.
EPH 1:17 Rinnabaa kini Diosi ge Jesucristu benne anke Xxanari'iha, delába Xxudiri'i benne ra xxeni leeha, rinnabaa lenie ki utebie Espíritu geeha lenle kini benneha nna utebie elha yuu gele lhe unie kini tte denle lhe. Aníha kini lebi'i uinbia tselee.
EPH 1:18 Rinnabagabaa lenie idhalie ikile kini tte denle ge nu chi xen lele dhile de uxie le lo neda geeha, lhe anágaba kini tte denle deki yalhá xxeni anka nu tse utebie len ka benne chi ankake gebie.
EPH 1:19 Anágaba rinnabagabaa lenie kini tte denle gasina ra tsitsi xxatta lebie lhe gasina rixúnie nu ra tsitsi leeha kini raka lenie ri'i, delába ri'i ka benne chi ria leri'e. Nu ra tsitsi xxatta leha‑gaba nuha,
EPH 1:20 bele'ebie lhe bixúnie tti belhidhe Cristuha lo elhuttiha, nna bedobie benneha daka ná banie ata doe yebáha.
EPH 1:21 Bedúbie benneha kini innabie iyá xea ka nu ra xxeni lekani lhe ka nu ra tsitsi lekani lhe. Anágaba innabiagabe iyá ka nu loni lhe iyá ka nu rapakana lo neda lhe nuxaba attu nu ra xxeni leni lhe, sila se'ekana gwetsáha lhe sila se'ekana yiesi lo yu‑ni lhe. Laa suna ka nu se'e nnannaga innabie, anágaba innabiagabe ka nu si daa lhe.
EPH 1:22 Iyába nu se'e betebie kana lasi ná Cristuha kini benneha innabie kana lhe bedúgabe benneha kini ake nu loni ge ka benne chi ria leke bie. Attiba ikiri'i‑ni rinnabiana itúba latiri'i, aníha‑gaba ruin Cristuha.
EPH 1:23 Cristuha anke iki ka benne ria leke bie; ka benneha nna ankake attiba latie. Labie nuha runie kini ka benneha rakake ida'a kumu labie runie kini iyá tte nu se'e rakana ida'a.
EPH 2:1 Lebi'i ttiba ttu nu yatti ankale tti rekile ruinle tulha lhe tti rekile ruinle iyába nu satsa lhe.
EPH 2:2 Nuníba benle ugwekile itú ttuha. Benbale attiba ruin ka benne se'e yiesi lo yu‑ni. Benbale nu raba nu xxegwi rinnabiana adí ka espíritu satsa, ka nu labí rilenri'i rekikana lo be, delába nu xxegwi ruinna sina lhe'e lasto ka nu abittu rudokana tisa ge Tata Do Yebáha.
EPH 2:3 Aníha‑gaba ben iyári'i itú ttuha; benbari'i nu satsa retaba leri'i. Bedobari'i tisa ge nu rakaba le bela latiri'i‑ni uinna lhe nu resiaba lhe'e ikiri'i lhe. De nuha nna la'ania chiba ga'anani Tata Do Yebáha dhiri'i elha disa tsitsi utebie attigaba luesi elha disa dhi adí ka benne se'e yiesi lo yu‑ni.
EPH 2:4 Ttaka Tata Do Yebáha anke benne ratua xxatta lebie nna yalhá ukanie geri'i.
EPH 2:5 Laxkala atti sa rekiri'i ankari'i attiba ttu nu yatti de ruinri'i tulha, la'ania nuha beyoin banie ri'i itupa len Cristuha, tti beyaka ben benneha lo elhuttiha. Laxkala lebi'i de bedába le Tata Do Yebáha nna gwa bodilábie le.
EPH 2:6 Anágaba atti belhidha Tata Do Yebáha Cristuha lo elhuttiha, attisidigaba itupa lenri'i benneha nuha beyadhari'i lo elhuttiha nna benie kini tse'eri'i len benneha yebáha.
EPH 2:7 Aní benie kini ule'enie ka nu si daa nu tse redá lebie rute tame geri'i de chi babari'i len Cristuha.
EPH 2:8 Kumu lebi'i, de bedába le Tata Do Yebáha nna gwa bodilábie le. Bodilábie le de ugía lele gebie, laa kwinaga lebi'i benle ttu bixa ki lhaale. ¡Ko'o! Tata Do Yebáha kwentaba bodilábie le.
EPH 2:9 Laa de ruingari'i bixa ttu nu tse nna rodilábie ri'i. ¡Ko'o! Sinuki de redába lebie nna rodilábie ri'i. Aníha kini abittu tse'eri'i innári'i deki de ruin tsebari'i nna gwa rodilábie ri'i.
EPH 2:10 Kumu labe benie ri'i lhe chiba ankanie ri'i ki uinri'i nu anka tse de babari'i len Jesucristuha, delába nu tse chi bedha'ane ttuha uinri'i.
EPH 2:11 De nuha nna lebi'i ka benne dittu, gwalodhú lele attili ulileha labí ruu lo bela latile. Ka nu Israel‑ni nna de ruu lo bela latikani, de nuha nna tekinna lále ka nu labí ruu lo bela latikani, kumu de lakana richú lo bela latikani.
EPH 2:12 Lebi'i labí ankabienle Cristuha la'ania lhe labí babale len ka nu Israel‑ni lhe. Anágaba labí len lebi'i bodha'an Tata Do Yebáha tisa deki unie kini saría tsena le. La'ania sun tteba aná se'ele yiesi lo yu‑ni, labí bixa ge ruxxen lele, nigaba lanú Diosi gele do la'ania.
EPH 2:13 Ttaka nnanna de chi babale Jesucristuha, de nuha nna lebi'i ka nu se'ele idittu len Tata Do Yebáha la'ania, nnanna chiba bibigale gaxxa lenie de reni belali Jesucristuha tti uttieha.
EPH 2:14 Cristuha benie kini bese'e tse len luesiri'i. Benie kini ri'itu ka nu Israel lhe lebi'i ka nu abittu ankale ka nu Israel, benie kini beyakari'i attisidiba ttúba benne. Utuabie nu risin luesiri'iha kumu nuha rilha'ana lhe'e luesiri'i.
EPH 2:15 Len elhutti gwate benneha lo ya kurusiha, len nuha ulhida gaabie bia bennabi bodha'an Moisés‑ni, delába nu ra loni bipaxa daa lo ka benne uinke. Aníha benie ki bose'e tsebie len luesiri'i, kini delo chupa dhi nna suna ttu dhiba benne kubi beyonie ri'i de chi babari'i lenie,
EPH 2:16 lhe lo ya kurusiha bose'e tsebie ixpa dhiri'i len Tata Do Yebáha nna beyonie ri'i attisidiba ttúba benne, nna lo ya kurusiha belhuxa loe nu se'e tilhari'iha.
EPH 2:17 Bitee utixxi'anie le lebi'i ka nu abittu use'ele gaxxa len Tata Do Yebáha la'ania lhe anágaba len ri'itu ka nu use'etu gaxxa lenie, utixxi'agabanie ri'itu gaxasina ese'e tse len luesiri'i.
EPH 2:18 Kumu de Cristuha nna lebi'i lhe ri'itu lhe chiba yali lo neda geri'i ki ibigari'i len Tataha, kumu de ttúba Espíritu geeha chi do lhe'e lastori'i.
EPH 2:19 Laxkala lebi'i, arlo Tata Do Yebáha labíru ankale benne dittu, nigaba benne subi. Lebi'i nnanna chi ankale benne babale len ka benne chi ankake ge Tata Do Yebáha lhe anágaba chigaba ankale benne gebie lhe, ttiba benne lhe'e yo'o chi ankale lenie.
EPH 2:20 Attiba ttu yo'o diana rikuana iki íyya cimientu, aníha‑gaba lebi'i diale rideti chiettirule nu bodha'an ka apóstoal lhe ka profetaha lhe. La kwinaba Jesucristuha nuha anke attiba íyya cimientu nu rugwena xilatti yo'oha, delába ge benneha nuha bele'eni ka apóstoal le.
EPH 2:21 De Cristuha nna itúba yo'oha tseba rikuana nna diana radhana axtaliba isinna akana ttu yotu le'a ge Benne anke Xxanari'iha.
EPH 2:22 Anágaba lebi'i, de benneha nna itupa lenle ka nu Israel‑ni, chiba bisinle akale attiba lisi Tata Do Yebáha ata dho Espíritu geeha.
EPH 3:1 Delo ni'a ge nuní nna neti Pablo tea lisiyya de rekia rigixxi'ania le ka tisa ge Jesucristuha, delába lebi'i ka benne abittu ankale nu Israel.
EPH 3:2 Rudhaka lasia chiba yule, Tata Do Yebáha‑ba bedá lebie bedha'ane sina‑ni len neti, kini anáchu kixxi'ania le ka tisa geeha.
EPH 3:3 Labe bele'enie neti nu chi ga'ananie unie, nu labí chi yuri'i ttuha, delába nu chi daya rigixxi'ania le ttu latti lo yetsi‑ni.
EPH 3:4 Atti ulabale nu dia lo nuní, la'ania nna tte denle deki neti chiba yua nu chi ga'anani Cristuha unie, delába ge nu labí chi yu ka benne itú ttuha.
EPH 3:5 Nuní labí chi utixxi'ani Tata Do Yebáha ka benne use'e itú ttuha. Labí utixxi'anie ke attiba runie nnanna rixúnie Espíritu geeha kini rigixxi'anie ka benne ankake apóstol lhe ka profeta lhe, delába ka benne chi ulesie ki uinke sina gebie.
EPH 3:6 Utixxi'e ree deki ka nu labí ankakana ka nu Israel, de ibababakana len Jesucristuha lhe de tsiaba lekani ge ka tisa geeha lhe, de nuha nna chiba iselakana dhíkana nu ralha ka benne Israel‑ni dhike lhe chigaba ankakana attisidiba ttúba benne len ka benne Israel‑ni, lhe anágaba chigaba selakana kini edí baakana nu chi ra Tata Do Yebáha utebie ge ka benneha.
EPH 3:7 De ka tisa ge Jesucristuha nna Tata Do Yebáha bedá lebie betebie len neti kini tsekia kixxi'aya ka tisa‑ni. Aní benie kini bele'ebie nu tsitsi ra leeha.
EPH 3:8 Meskila neti labí dakaa, tuttíruba gwexxa dua delo iyá ka benne chi biriesike ki akake ge Tata Do Yebáha, ttaka len netila bedá lebie betebie elha tse kia kini kixxi'ania ka benne abittu ankake nu Israel, delába kixxi'ania ke ge nu anka xxatta tse rute Cristuha geri'i,
EPH 3:9 lhe anágaba iyá tte ka benne kixxi'ania ke ge Tata Do Yebáha, delába benne benie iyá tte nu se'e. Kixxi'ania ke gasina anka nu chi ga'ananie unie nu labí chi yu ka benne geni, delába nu tenie gatsi attili lani kwe yiesi lo yu‑niha,
EPH 3:10 kini anáchu ka benne ria leke Cristuha uinke ki iláni ka nu rinnabia lhe ka nu ra tsitsi lekani se'e gwetsáha deki xxeniba anka elha yuu ge Tata Do Yebáha.
EPH 3:11 Atti lanila kwe yiesi lo yu‑ni chila ga'anani Tata Do Yebáha aka nuní, nna Jesucristu benne anke Xxanari'iha, benneha bixúnie kini uka nuní.
EPH 3:12 De benneha nna labí rasinri'i, xen suba leri'i deki gwa yaliba lo neda geri'i kini ibigari'i arlo Tata Do Yebáha de ria leri'i Cristuha.
EPH 3:13 De nuha nna rinnabaa len lebi'i abittu eyadi gaale lo neda ge Tata Do Yebáha de ratea ruyúa elha disa de lebi'i, kumu elha disa ratea‑ni ixúlana kini saría tsena le.
EPH 3:14 De nuha nna neti rudachu xibia arlo Tata Do Yebáha, delába Xxudi Jesucristu benne anke Xxanari'iha.
EPH 3:15 Labie nuha benie iyá tte nu se'e yebáha lhe nu se'e yiesi lo yu‑ni lhe.
EPH 3:16 Rinnabaa lenie kini attiba ra xxeni xxatta lebie, aníha‑gaba unie kini Espíritu geeha kweki tsitsie lele,
EPH 3:17 kini dho Cristuha lhe'e lastole de tsia lele gebie. Rinnabagabaa lenie kini lebi'i, de chi se'e tsitsile rakin ge luesile,
EPH 3:18 de nuha nna, itupa lenle adí ka benne chi ankake ge Tata Do Yebáha, dhaale tte denle deki yalhá raka xxattani Cristuha gele.
EPH 3:19 Rinnabaa lenie kini tte denle elha si'i lasi geeha, delába elha si'i lasi nu labí ridaari'i tte denri'i gasina ankana. Ganna chi ute denle elha si'i lasi geeha, la'ania nna iyába nu anka elha ruin ge Tata Do Yebáha chi dho lhe'e lastole.
EPH 3:20 Tata Do Yebáha ra tsitsi lebie runie sina lhe'e lastori'i. Benneha xxenirula anka nu raka gebie runie attichula nu rinnabari'i lenie, lhe attichula nu rulaba leri'i aka lhe.
EPH 3:21 De babari'i len Jesucristuha, de nuha nna iyábari'i ka benne chi ria leri'e, satíaba uinri'i kini inná xxeni le Tata Do Yebáha ttu dia lii. Amén.
EPH 4:1 De rekia rigixxi'aya ka tisa ge Jesús benne anke Xxanari'iha, de nuha nna tea lisiyya nna rinnaba ditia len lebi'i gwaltse'e gwaluni attiba dika uinle de chi biyaxile ki akale ge Tata Do Yebáha.
EPH 4:2 Gwaluni ge benne abittu ra xxeni lebie lhe latsiru gwalikweki lele, lhe anágaba gwalikweki besi lele lhe. Len elha si'i lasi gwalutto gwaluchía ge luesile.
EPH 4:3 Espíritu ge Tata Do Yebáha unie kini ttúba dhu lele. De nuha nna abittu lha'a lhe'e luesile. Latsiru tse'e len luesile abittu ttilhale.
EPH 4:4 Kumu suna ttu dhiba ankale lhe ttúba Espíritu ge Tata Do Yebáha do lhe'e lastole lhe. Anágaba biyaxile kini ge ttúba nu uxxen lele geni
EPH 4:5 lhe ttúba benne anke Xxanale lhe ttúba ria lele, lhe anágaba ttúgaba radile inda lhe.
EPH 4:6 Anágaba ttúgaba Diosi do anke Xxudi iyá tteri'i lhe. Benneha due iki iyá tteri'i, nu rabe raka lhe anágaba rixúnie iyá tteri'i kini uinri'i sina gebie, lhe dogabe lhe'e lasto iyá tteri'i lhe.
EPH 4:7 Ttaka ttu tturi'i, kua bedába le Cristuha betebie elha tse geri'i ki aka geri'i uinri'i sina gebie.
EPH 4:8 De nuha nna lo ka yetsi ge Tata Do Yebáha rigixxi'a ge nu ben Cristuha, lo ka nuha dia ra: Tti beyapie gwetsáha dechebie ka benne bedaxxueha lhe anágaba betebie elha tse ge adí ka benne lhe.
EPH 4:9 (Nianna, ¿bí diani tti ra: “beyapie gwetsáha”? ¿Laaba ganna dienna innána, lade'axa ugwadi Cristuha axtaru lhi'u yuha, nianna tti beyapie gwetsáha‑li?
EPH 4:10 Benne ugwadie axtaru lhi'u yuha, benneha‑gaba nuha beyapie axtaru gwetsáha kini labie unie ki aka iyá tte ka nu se'e ida'a.)
EPH 4:11 Lagabe nuha betebie elha tse ge ttu chupa ka benne kini akake apóstol, adíke nna akake profeta, adíke nna akake ka benne tsekike kixxi'ake ka tisa geeha, lhe anágaba betegabe elha tse ge ka benne kini akake ka nu uyú tsitsike ka benne chi ria leke gebie, lhe udhetikanie ka benneha ka tisa geeha lhe,
EPH 4:12 kini ka benne chi ankake geeha akake nu ixú ki uinke sina gebie, kini anáchu nna use'e tsitsike iyá ka benne chi ria leke Cristuha.
EPH 4:13 Aníha kini isin iyá tteri'i akari'i attisidiba ttúba benne de ttúba ria leri'i lhe anágaba kini isinri'i uinbiari'i Xi'in Tata Do Yebáha. Aníha kini akari'i itá su attiba anka Cristuha.
EPH 4:14 Kini abitturu akari'i attiba ka nuto‑na. Ka nuná, naa lhe niiba radhákana de abittu chi rise'e tsitsikana. Aníha‑gaba ri'i, abittu jeru tteba tsia leri'i ge ka nu nnelaba rotsi'inu lekani ge bixaba elha rieni nu abittu ixú ruga'akana ikiri'i. Ka nuná, naa lhe niiba rukannakana ikiri'i len nu rule'ekinna ri'iha.
EPH 4:15 Ttaka ri'i nu uinlari'i, len elha si'i lasila tse'eri'i udori'i tisa ge nu anka gwalí, kini anáchu nna delo iyá nu uinri'iha tse'e tsitsiruri'i kini isinri'i akari'i attiba Cristuha. Benneha anke ttiba ikiri'i, delába lee nuha due lori'i.
EPH 4:16 Ttiba ka sitta latiri'i, ganna iyábakana tseba yieti ro'o luesikani, la'ania nna tsitsiba anka itúba latiri'i. Aníha‑ba nuha Cristuha, benneha runie kini tseba se'e len luesiri'i lhe tutupaba ankari'i lhe rute ná len luesiri'i lhe. Kua ttu tturi'i ruinbari'i nu rakaba geri'i. Aníha nuha nna diari'i rise'e tsitsiruri'i lo neda geeha de rakin ge luesiri'i.
EPH 4:17 Neti de babaa len Jesús benne anke Xxanari'iha, de nuha nna rulisaa le lhe rinnabaa len lebi'i, abitturu tsekile uinle tti runi ka nu labí ankabiakinna Tata Do Yebáha. Ka nuná rekibakana ruinkana nu abittu dika ixú, nu resiaba lhe'e ikikani ruinkana.
EPH 4:18 Ttiba nu chulha ikini anka ka nuná, labí redí baakana elha nabani rute Tata Do Yebáha, de labí elha rieni do ikikani lhe de ruin tsitsi lastokani labí ria lekani.
EPH 4:19 Ka nuná labí elhittu yu'u lokani. Gwexunniba ruinkana iyá looba nu satsa; suna nunába do lekani ruinkana.
EPH 4:20 Ttaka lebi'i laa anága bidetile ge Cristuha,
EPH 4:21 ganna ttixka gwalíginle chi biyieninle gebie lhe chi bidetile ka tisa ka nu anka gwalí, delába ka tisa ka nu rigixxi'akana ge Jesús‑ni.
EPH 4:22 De nuha nna nu uka elha ruin gele ttuha, chinka gwalikua nuha, kumu nu satsa udá lele benle ttuha, bennittiba nuha le.
EPH 4:23 Gwalotsea elha rulaba lee gele.
EPH 4:24 Gwaleyaka attiba ttu benne kubi. Gwaluni deki lebi'i ben Tata Do Yebáha le atti tteba ankeha. Aníha ki akale benne gwalíga uinle nu dika ixú lhe uinle latsiru attiba ttu benne chi biriesie kini ake gebie.
EPH 4:25 De nuha nna abitturu uin lele. Kua ttu ttule gwalinneba nu ankaba gwalí len ka betsi to geri'i, kumu iyábari'i ttú dhiba chi ankari'i, de chi baba len luesiri'i.
EPH 4:26 Ttixka rise'enle, abittu ixegwile uinle ttu bixa nu satsa; abittu ni galhaba sá sa risa'abinle.
EPH 4:27 Abittu dhielhale ge nu xxegwiha.
EPH 4:28 Nu runi ubanaha, bitturu lhanana; kwenlana sina len ni'a náni. Uinna ttu nu dika ixú kini anáchu tee nu utena len ka benne riyasakanie.
EPH 4:29 Abittu innele tisa satsa. Gwalinneba suna nu dika ixúba kini use'e tsitsile ka benne lhe kini udú tsena le ke tti iyienkanie nu inneleha.
EPH 4:30 Abittu udú si'ile le Espíritu ge Tata Do Yebáha. Benneha bisiabie latile nna beya'ane kini ule'e deki chi ankale gebie ganna chi bisia sá ulhuxa loo Tata Do Yebáha odilábie ri'i.
EPH 4:31 Gwalikua nu satsa re lele lhe gwalikua iyá elha rise'iki gele lhe. Anágaba bittu rila'aba tsu'ule ttixka ridaka len luesile lhe bitturu inne satsa ge luesile lhe, gwalikua iyá nu satsa rulha lele lhe.
EPH 4:32 Latsirula gwaluyú luesile. Gwasatua le luesile lhe gwalidhí elha xen lasi ge luesile lhe. Gwaluni attigaba ben Tata Do Yebáha, benneha, de nu gwate Cristuha nna uxíe elha xen lasi gele.
EPH 5:1 De nuha nna gwaluni atti tte ruin Tata Do Yebáha, kumu lebi'i ankale xi'inie nna rakanie gele,
EPH 5:2 lhe anágaba akinle ge ka benne attiba ukani Cristuha geri'i nna bedá lebie betebie elha nabani geeha kini uttie utixe geri'i. Benneha uke attiba ttu nimala ruttikana ki rutekana úna, delába úna nu rure tsena tti risinna arlo Tata Do Yebáha.
EPH 5:3 Gwaluni atti galába ka benne chi ankake ge Tata Do Yebáha. Abittu dhaa tisa gele innákana deki nu subi subiba reki lenle, lhe innákana deki ruinle iyába nu satsa o si innákana deki rudona lele gatta xxatta belhiu gele.
EPH 5:4 Anágaba bittu innele tisa satsa o tisa abittu ixú, kumu labí anka tse innele aní. Lebi'i gwalugwela Tata Do Yebáha ixkixaru.
EPH 5:5 Kumu lebi'i gwa yu xeabale, niru ttú ka nu risákana nu subi subi lhe ka nu ruinkana nu satsa lhe, ka nuná labí ralhakana dhíkana nu tse dhi ka benne chi rinnabia Cristuha ke lhe chi rinnabia Tata Do Yebáha lhe, nigaba ka nu raka xxatta lekani gatta belhiu gekani lhe. Kumu ka nuná de rudo xxattana lekani belhiu, de nuha nna ttiba ttu diosi reyaka belhuha gekani.
EPH 5:6 Bittu ixú yiele tsia lele ge ka nu rinnekana ka tisa abittu ixú. Kumu iyá nuní ruinna ki rise'iki Tata Do Yebáha nna ridhelhe elha disa ge ka nu abittu rudokana tisa gebie.
EPH 5:7 De nuha nna abittu iyietile uinle tti ruin ka nuná.
EPH 5:8 Kumu lebi'i itú ttuha attiba nu reki ata chulha ankale de benle nu satsa, ttaka nnanna de chi babale len Jesús benne anke Xxanari'iha, de nuha nna chiba rekile lhe'e xiani. Laxkala gwaltse'e gwaluni latsiru atti galába runi ttu benne chi due lhe'e xiani.
EPH 5:9 Gwalutte daa gasina anka nu ru'u le Jesús benne anke Xxanari'iha. Kumu ka benne rekike lhe'e xianiha, ankake benne tse lhe ankake benne runi attiba ankaba geni lhe. Anágaba rinnegabake nu ankaba gwalí.
EPH 5:11 Abittu iyietile uinle nu abittu dika ixú, bittu uinle luesi nu ruin ka nu reki ata anka chulha. Ka nuná, gwaligála kana deki satsaba anka nu ruinkana.
EPH 5:12 Kumu nu satsa ruinkana gatsiha, axtaba rettuinri'i kixxi'ari'i geni.
EPH 5:13 Ttaka iyába nu raka gatsiha, ganna chi rilá loo geni, la'ania nna runaba benne geni, kumu xianiha nuha ruinna kini rilá iyá nu raka.
EPH 5:14 De nuha nna ra ka benne: Lu nu ankalu ttiba ttu nu te'adhi, bebani, lhe beyadha lagwi ge ka nu ankakana ttiba nu yatti, nna Cristuha udanie gelu.
EPH 5:15 De nuha nna gwaluyú tsitsi gasina anka elha ruin gele. Bittu uinle tti runi ttu nu abí yuu, gwaluinla tti runi ttu nu yuu.
EPH 5:16 Ttiru nnanna tee lo neda gele, gwaltse'e gwaluni nu anka tse, kumu ka sá chi se'eri'i nnanna, satsaba chi anka ka nuní.
EPH 5:17 De nuha nna bittu uinle tti ruin ka nu akaa elha rieni ikikani. Gwalutte dala nu raka le Jesús benne anke Xxanari'iha uinle.
EPH 5:18 Bittu dhusinle kumu elha ri'a‑na runnittiba nuná le, ruinbale nu rakaba leni. Lebi'i gwalugwelhala tsu'u Espíritu ge Tata Do Yebáha itú latile kini uinle nu raka lebie.
EPH 5:19 Len tisa tsagwi gwalulisa luesile lhe gwalulha ka le'a to lhe. Itú iki itú lele gwalulha ge Jesús benne anke Xxanari'iha,
EPH 5:20 lhe satía gwalugwe Tata Do Yebaa benne anke Xxudiri'iha ixkixaru ge iyá tte, de nu ben Jesús benne anke Xxanari'iha.
EPH 5:21 Lebi'i de tee elha rasi ge Tata Do Yebáha lhe'e lastole, de nuha nna gwaludo tisa ge luesile.
EPH 5:22 Lebi'i ka benne nuila, udole tisa ge nu inná ka benne biyú gele‑na attiba rudole tisa ge Jesús benne anke Xxanari'iha,
EPH 5:23 kumu ka benne biyú‑na nuná se'eke iki ka benne nuila‑na, delába lake nuná rinnabiake ka benne‑na attiba Cristuha, labie nuha anke ttiba iki ka benne ria leke bie, lake nna ankake ttiba latie. Kumu ttiba ikiri'i‑ni, lana rinnabiana itúba latiri'i, aníha‑gaba benneha, lee nuha rinnabie ke lhe rodilábie ke lhe.
EPH 5:24 De nuha nna attiba ka benne ria leke Cristuha rudoke tisa ge nu rabie, anágaba ka benne nuila‑na, ge iyába nu inná ka benne biyú geke‑na, udoke tisa geni.
EPH 5:25 Lebi'i nna ka benne biyú, akinle ge ka benne nuila gele‑na attiba Cristuha ukanie ge ka benne ria leke bie, nna de lake nna betebie elha nabani geeha kini uttie utixe geke.
EPH 5:26 Aníha benie kini ulesie ke ki ukake gebie de bocharie ke len indaha lhe len ka tisa geeha lhe,
EPH 5:27 kini anáchu rapi edha linníbake otso dubie ke arlo la kwinaba labie, abittu tsiga akake arloe lhe bittu ruinke nu satsa lhe, sinuki akalake nari xú lhe itá su lhe.
EPH 5:28 Aníha‑gaba nuha ka benne biyú‑na teeki akakanie ge ka benne nuila geke‑na attiba rakabakanie ge latike, kumu ttu nu rakinna ge nuila geni, la gebani nuha rakinna.
EPH 5:29 Kumu lanú ttu benne do abittu rakanie ge latie, sinuki rugo tselee na lhe ruyú tsitsilee na lhe, ruinbe attiba ruin Cristuha ruyú tsitsie ka benne chi ria leke bie,
EPH 5:30 kumu ri'i chi ankari'i benne selari'e, ankabari'i attiba sitta latie lhe bela latie lhe.
EPH 5:31 “De nuha nna nubiyúha udhanbana ka xxudi ixnániha nna utsá náni len nuila geniha nna eyakakana attisidiba ttúba benne.”
EPH 5:32 Xxeniba anka nu rigixxi'aya‑ni, labí rite daa tsenri'i nuní, delába rigixxi'aya ge Cristuha lhe ge ka benne ria leke bie lhe.
EPH 5:33 Laxkala lebi'i ka benne biyú, kua ttu ttule akinle ge ka benne nuila gele‑na attiba rakabin gele. Lebi'i nna ka benne nuila tsia lele ka benne biyú gele‑na.
EPH 6:1 Lebi'i nna xa xi'ini to, de chi babale len Jesús benne anke Xxanari'iha, de nuha nna gwaludo tisa ge ka xxudi ixnále‑na, kumu aná dika uinle.
EPH 6:2 Kumu lo ka yetsi ge Tata Do Yebáha ree: “Tsia lelu ka xxudi ixnálu kini saría tsena lu lhe kini itienlu dholu yiesi lo yu‑ni lhe.” Tisa nu ra: “Tsia lelu ka xxudi ixnálu”, tisa‑ni nuha nu sisi'a tte bodha'ane ree deki tseba saríana ri'i ganna uinri'i nu ra tisa‑ni.
EPH 6:4 Lebi'i nna ka xxudi ixná, bittu utse'enle ka xi'inle‑na. Gwaluyúla kana lhe gwaludhetila kinna, lhe gwalule'ela kinna uinkana tti raka le Jesús benne anke Xxanari'iha.
EPH 6:5 Lebi'i ka nu to'ole lo sina ge ka nu ankakana xxanale yiesi lo yu‑ni, bittu a udole tisa gekani; len elha rasi gwaluin nu innákana. Itú iki itú lele gwaludo tisa gekani, bittu delo tisaba uinle ttu bixa. Gwaluni attisidiba ge Cristuha‑ba nuha rudole tisa.
EPH 6:6 Abittu suna ttiruba du xxanaleha rulannina gele nna jeru tteba ribenle sina kini eya'an tsele lenna. Ko'o. Lebi'i gwaluinla attisidiba to'obale lo sina ge Cristuha. Itú iki itú lele uinle nu raka le Tata Do Yebáha.
EPH 6:7 Itú lele gwalikwen sina. Gwaluni attisidiba lo sina ge Jesús benne anke Xxanari'iha‑ba nuha renle, bittu akinle deki lo sina ge ka benne se'e yiesi lo yu‑niba nuha renle.
EPH 6:8 Lebi'i gwa yúbale, sila ankari'i nu to'ori'i lo sina ge ka xxanari'i o sila ankari'i nu abittu to'ori'i lo sina gekani, bixaba nu tse ruinri'i, Jesús benne anke Xxanari'iha gotebe geri'i kua nu tse benba ttu tturi'i.
EPH 6:9 Lebi'i ata ankale xxana ka sina, anágaba gwaluin len ka nu to'okana lo sina gele‑na; latsiru gwaluyú kana. Abittu gwedhaka disabakana uinle. Lebi'i gwa yu xeabale, ka nuná lhe lebi'i lhe, yebáha‑la do benne anke Xxanale. Arlo benneha turo'oba daka iyári'i.
EPH 6:10 Nnanna xa betsi to, gwaltse'e tsitsi lo neda ge Tata Do Yebáha de chi babale len Jesús benne anke Xxanari'iha. Gwaludaxxu nu ra tsitsi leeha.
EPH 6:11 Gwaluni attiba ttu soldadu duna nukuna xo iyya geni kini abittu aka gwe latini tti ritilhana, aníha‑gaba lebi'i gwaludaxxu itú nu ra tsitsi le Tata Do Yebáha kini anáchu dhaale ese'ele lo nu satsa rulha le nu xxegwiha udhakana le.
EPH 6:12 Kumu laa len ka bennega nuní ritilhari'i. Ri'i ritilhari'i len ka espíritu xxegwi reki lo be, delába ka nu rinnabiakana ata anka chulhaha lhe ra tsitsi lekani lhe nu rábakana raka lhe, len ka nuha‑la nuní ritilhari'i.
EPH 6:13 De nuha nna gwaludaxxu itú nu tsitsi ra le Tata Do Yebáha kini dhaale tse'e tsitsile ganna chi bisia sá satele ttu bixa nu satsa nna ganna chi udaale lo iyá nu sateleha, la'ania nna tse'e tsitsirule.
EPH 6:14 Tsitsi gwaltse'e, gwalinneba nu ankaba gwalí. Gwaluni attiba runi soldaduha chi duna di tsitsi lhe'eni ki tsiana itilhana. Anágaba lebi'i gwaltse'e gwaluni latsiru attiba ankaba geni, gwaluni attiba runi soldaduha duna taa iyya itúba ro'o lastoni kini abittu akana gwe tti itilhana.
EPH 6:15 Gaxaba diale gwaludo lele gwalikixxi'a ka tisa ge Jesucristuha, delába ka tisa runi kini ri'i rise'e tse lenri'i Tata Do Yebáha.
EPH 6:16 Aná nna tsitsi gwaltsia lele ge Tata Do Yebáha, kini abittu ixú yiele ge nu rulha le nu xxegwiha udhakana le. Gwaluni attiba ruin soldaduha taa xitsini ttu iyya bata kini nuha rudagana espada ge nu ritilha lennaha,
EPH 6:17 lhe anágaba gwaludo ikile deki Tata Do Yebáha‑ba odilábie le. Gwaluni ttiba soldaduha duna yu'u cascu ikini kini abittu aka gwe ikini tti itilhana lhe anágaba, tti uin nu xxegwiha dhi yiena le, la'ania ixuinle ka tisa ge Tata Do Yebáha ki ekabile geni, kumu ka tisaha ankake ttiba espada ge Espírituha.
EPH 6:18 Satía gwalilhapi tisa len Tata Do Yebáha. Espíritu geeha‑ba aka lenie le tti innabale lhe tti utso dule iyá tte arloe. Gwaltse'e ubeda lhe bittu udú siile a innabale len Tata Do Yebáha ge iyá ka benne chi ankake gebie.
EPH 6:19 Anágaba neti gwalinnaba kia len Tata Do Yebáha kini lee utebie tisa kia, kini tti innea nna abittu gasiti kixxi'aya nu labí chi yu ka benne geni itú ttuha, delába kixxi'aya ka tisa tse ka nu rigixxi'a ge Jesucristuha.
EPH 6:20 Kumu Tata Do Yebáha udhelhe neti kini kixxi'aya ka tisaha, de nuha nna tea lisiyya. Laxkala gwalinnaba kia arloe kini abittu gasiti tti kixxi'aya ka tisaha, gwanka aníha nna innebaa attiba chi daa loa innea.
EPH 6:21 Betsi to geri'i Tíquico‑ni, benne‑ni rakinri'i gebie. Labie nuní anke ttu nu rudo tisa rixúe lo sina ge Jesús benne anke Xxanari'iha. Labie kixxi'anie le iyá nu ratea lhe iyá nu runia lhe.
EPH 6:22 De nuha nna bedhelhe kini kixxi'anie le bixa ratetu lhe kini odú itte lele lhe.
EPH 6:23 Xa betsi to kia, Xxudiri'i do yebáha lhe Jesucristu benne anke Xxanari'iha lhe, lake use'eke le xen su lasi lhe uinke kini akin ge luesile lhe anágaba uinke kini tsia tsitsi lele ke lhe.
EPH 6:24 Lake edá leke aka lenke iyá ka benne, delába ka benne satía rakakanie ge Jesucristu benne anke Xxanari'iha. Amén.
PHI 1:1 Neti Pablo lenia Timoteo‑ni ankatu benne rixúni Jesucristuha. Ridhelhatu yetsi‑ni ge iyá ttele, lebi'i ka benne se'ele lhe'esi Filipos‑na, delába lebi'i ka benne chi ankale ge Tata Do Yebáha de babale len Jesucristuha. Lhe anágaba ridhelhagabatu yetsi‑ni len lebi'i ka benne rise'ele arlo adí ka benne chi ankake ge Tata Do Yebáha ki rule'enle ke, lhe anágaba ridhelhatu yetsi‑ni len adíle ka benne rute nále lenke.
PHI 1:2 Xxudiri'i do yebáha lhe Jesucristu benne anke Xxanari'iha, lake edá leke aka lenke le lhe use'eke le xen su lasi lhe.
PHI 1:3 Kua rexxaba lasia le rugwea Tata Do Yebaa kiaha ixkixaru gele,
PHI 1:4 lhe satíaba ttixka rilhapia tisa lenie yalhá itta redú lasia tti rinnabaa lenie ge iyá ttele,
PHI 1:5 kumu lebi'i attili sisi'a tte biyieninle ka tisa tseha, delába ka tisa rigixxi'ake ge Cristuha lhe axtaba nnanna sa ruteba nále len neti ki radhi ka tisa geeha.
PHI 1:6 Neti xenba lasia deki Tata Do Yebaa benne uduloe runie sina tse lhe'e lastole‑na, la benneha‑ba ulhuxa looe na ganna chi bisia sá esia Jesucristuha yiesi lo yu‑ni.
PHI 1:7 Tseba nuní runia tti rulaba lasia ge iyá ttele aní, kumu satíaba yu'ule lhe'e lastoa, labí rixulhati le kumu redí baale len neti elha tse runna Tata Do Yebáha lenri'i, meskiba tea lisiyya lhe meskiba atti ririaya riso dua arlo ka uxtisi kini rekabia gekani, rigixxi'abaa deki ka tisa ge Cristuha ankake gwalí.
PHI 1:8 Tata Do Yebáha yu xeabe attiba rakani Jesucristuha gele, aníha‑gaba neti yalhá rakati gele.
PHI 1:9 Rinnabaa lenie ki aka chiettiruni ge luesile, lhe rinnabagabaa lenie ki utebie elha rieni gele lhe elha yuu gele lhe.
PHI 1:10 Aníha ki tte denle gá tee nu anka tse kini ganna chi isia sá esia Cristuha, la'ania nna chi se'ele ruinle nu anka taga'a tse nna abittu bi ge itisale.
PHI 1:11 La'aniagaba otso dule iyá nu tse benle, de ben Jesucristuha le ayuda. Aníha nuha ki ugwele lidhaka Tata Do Yebáha lhe kini inná xxeni lebie lhe.
PHI 1:12 Xa betsi to, raka lasia unale deki iyába nu ratea‑ni rixúna kini radhi chiettiru ka tisa tse rigixxi'aya ge Cristuha,
PHI 1:13 kumu iyába ka soldadu ka nu ruyúkana ro'o guskadu ata do nu rinnabia‑ni, iyába ka nuní chi binakana de rekibaa rigixxi'aya ge Cristuha nna tea lisiyya, anágaba nna chigaba bina adíru ka benne.
PHI 1:14 Ixe ka betsi to geri'i de ruyúke tea lisiyya‑ni, de nuha nna ruxxenrula leke ge benne anke Xxanari'iha, nna reyaxarukanie rigixxi'ake ka tisa ge Tata Do Yebáha nna labí rasikanie.
PHI 1:15 Gwalí galá ttu chupakana, de ritisibakinna neti lhe de ruinbakana ichúkana loa nna rekikana rigixxi'akana ge Cristuha; ttaka attu chupake nna elha tsebakanie rekike rigixxi'ake ge benneha.
PHI 1:16 Ka benne‑ni elha tsebakanie rekike ugixxi'a, kumu de rakakanie kia lhe kumu yúbake deki Tata Do Yebáha‑ba bedha'ane neti lhe'e lisiyya‑ni, kini odiláya ka tisa tse geeha ki abittu chu loke.
PHI 1:17 Ttaka ka nu rutía di lekani neti, ka nuná labí ilaakinna rekikana ugixxi'a. Sunruba ruinkana aná kumu rakakinna de nu ruinkanaha nna uyúrua elha disa lhe'e lisiyya‑ni.
PHI 1:18 Ttaka, ¿bí de ruinna? Gaxabasina, meskiba elha tsekinna lhe meskiba abittu lhe, nu rakarula doelha chadhi ka tisa ge Cristuha. De nuha nna du itta lasia nna si edúrula itta lasia,
PHI 1:19 kumu yua de rinnabale kia len Tata Do Yebáha lhe de raka len Espíritu ge Jesucristuha neti, de nuha nna lhaaya lhe'e lisiyya‑ni.
PHI 1:20 Neti raka lasia lhe rulheda lasia abittu bixa ge dhia elhittu. Nu ruinlaa ruxxen tsitsirula lasia attiba satía chi labiti runia, anágaba nnanna len nu ratea‑ni ule'e Cristuha nu xxeni ra lebie, sila sa doa anka bania lhe sila chi uttia lhe.
PHI 1:21 Kumu neti nnanna laka sa doa anka bania, Cristuha‑ba rudo lasia; ganna chi uttiaha nna tserula chi saríana neti.
PHI 1:22 Ttaka ganna dhorua aka bania, ganna de dhorua aka bania, nuha gwaxúruna kini kwenia lo sina ge Tata Do Yebáha, la'anialigaba nna labí yua gá tee nu ukwea.
PHI 1:23 Ttiba ttu nu du ro'o belha'a ankaa. Lade'a tte, aní chi rakati neti gattia kini eya'aya dhoa len Cristuha, kumu adírula tse nuha.
PHI 1:24 Ttaka de lebi'i nna rakarula doelha eya'anaa aka bania ki use'e tsitsirua le.
PHI 1:25 Ge nuníba ruxxen lasia, de nuha nna yua deki gweya'anrubaa dhoa len lebi'i kini tse'e tsitsirule lhe tse'e ittarule de ria lele Jesucristuha,
PHI 1:26 kini ganna chi beriaya lisiyya‑ni nna esiaya len lebi'i attu libe, la'ania nna adírula itta edú lele de ilenle nu tse ben Jesucristuha len neti.
PHI 1:27 Sun tte nu raka lasia: gwaltse'e gwaluni tti tte raxxína len ka tisa tse, delába ka tisa rigixxi'ake ge Cristuha, kini anáchu sila itaa etelannia le o sila rea idittu, raka lasia iyienti gele deki gwa se'e tsitsibale lhe ttúba du lele lhe. Anágaba nna rakagaba lasia iyienti deki iyábale ttúba regu'elha lele ki rigixxi'ale ka tisa ria leri'i ge Cristuha.
PHI 1:28 Abittu gasinle arlo ka nu rese'e disakana lole, kumu nu ruin ka nuná runna liina deki tsiabakana ata tse'e lookana, lebi'i nna gwalábale, kumu Tata Do Yebáha‑ba unie ki lhaale.
PHI 1:29 Kumu Tata Do Yebáha laa sunruga bedá lebie tsia lele ge Cristuha, anágaba nna bedágaba lebie kini lebi'i satele uyúle elha disa de ria lele gebie.
PHI 1:30 Ratebale luesi nu chi bilenle gwatea ttuha lhe luesi nu runale ratea nnanna lhe.
PHI 2:1 Laxkala ganna lebi'i gwa re tsitsi lele de babale len Cristuha, lhe ganna gwa se'ele xen su lasi de rakanie gele, lhe anágaba ganna gwa du lenle Espíritu ge Tata Do Yebáha, lhe ganna gwa raka si'in luesile, lhe anágaba ganna gwa ratua le luesile lhe,
PHI 2:2 ganna aníha ruinle, la'ania nna ittaru odúle lasia ganna ttixka ttúba udú lele, lhe ganna ttixka turo'oba akin ge luesile lhe, anágaba nna ganna turo'oba kweki lele, lhe ganna ttúba nu udo ikile uinle.
PHI 2:3 Abittu uinle ttaba ttixka bixa ttu uinle, nigaba tsu'ule nu rito rineruba. Lebi'i gwaluinla ge benne abí ra xxeni lebie; gwaluin deki dakarula adí ka benne tti lebi'i.
PHI 2:4 Kua ttu ttule abittu suna nu saría tsebana le uinle; gwaluinla nu dika saría tsena iyále.
PHI 2:5 Gwaludola ikile tti bedo iki Jesucristuha.
PHI 2:6 Benneha, meskiba anke Diosi, labí benie deki lee anke turo'o len Tata Do Yebáha.
PHI 2:7 Nu benlee: daka anála bedúe nu ra xxeni leeha nna la kwinabe borexxa gaa lebie nna benie ttiba ttu benne to'o lo sina; beyake attiba nuxaba benne.
PHI 2:8 Tti ugwekie yiesi lo yu‑niha, tti uke benne attiba ankari'i, la'ania la labe bedaa ikie benie nu ra Tata Do Yebáha nna uxielhe uttie. Aná nna laa latsiruga uttie, lo ya kurusi nuha uttie.
PHI 2:9 De nuha nna Tata Do Yebáha benie bie benne ra xxeniru lebie, lhe begwegabe bie ttu ladie kini uke benne rinnabia xxeniru delo iyá tte ka nu rinnabia se'e yiesi lo yu‑ni.
PHI 2:10 Aníha kini de ra xxeni le Jesús‑ni nna iyá tte ka benne se'e yebáha lhe ka benne se'e yiesi lo yu‑ni lhe ka benne se'e lhi'u yuha, udú xibike arloe,
PHI 2:11 lhe iyá rechake innáke deki Jesucristuha anke Xxanari'i. Aníha kini inná xxeni le Tata Do Yebaa benne anke Xxudiri'iha.
PHI 2:12 Lebi'i xa betsi to kia, attiba benle tti udoa len lebi'iha, satíaba bedole tisa kia, adírula nnanna doa idittu, gwaludorula tisa kia. Len elha rasi gwaltse'e gwaluin kini ule'e deki chi bodilaa Tata Do Yebáha le lo ka tulha gele‑na,
PHI 2:13 kumu Tata Do Yebáha‑ba runie ki rokinni ikile rudole tisa gebie, lhe lagabe raka lenie le kini gwa ridaale ruinle nu rabie.
PHI 2:14 Bixaba uinle, abittu itú inne lhábale tti uinle nuha o itú itilha tisabale.
PHI 2:15 Aníha kini abittu bi ge inittile, lhe abittu bi ge itisale lhe, sinuki tse'elale akale atti galába xi'in Tata Do Yebáha, ruinle taga'a nu anka tse lagwi ge ka nu ruin satsa lhe ka nu a du itá lekani se'e yiesi lo yu‑ni lhe. Lagwi ge ka nuná ilá nu tse ruinle, akale attiba ka beli‑na rigu'ukana xiani yiesi lo yu‑ni.
PHI 2:16 Se'ele den tsitsile ka tisa ge Tata Do Yebáha ruinle nu ráke, delába ka tisa ruinke ki aka ben ka benne ttu dia lii, kini ganna chi bisia sá esia Cristuha, la'ania nna inná xxeni lasia tti iláti deki labí kwentaba ugwekia betú besábati de bele'enia le.
PHI 2:17 Kumu nu tse ruinle de ria lele Tata Do Yebáha, nuná ankana attiba ttu úna rutele lenie. Anágaba neti, meskila uttikana neti, elhutti kiaha akagabana attiba ttu úna utea lenie itupa len nu tse rutele‑na. De nuha nna ittaba redú lasia lhe redeaka tábati len lebi'i.
PHI 2:18 Anágaba lebi'i gwalodú itta lele lhe gwaledeaka tenle len neti lhe.
PHI 2:19 Ruxxen lasia ge Jesús benne anke Xxanari'iha deki gwadhelha tte gaabaa Timoteo‑ni kini itana ata se'ele‑na, ki anágaba neti eyaka xen lasia ganna chi binaa bixa ratele,
PHI 2:20 kumu lanú attu benne doti runie tti ruin Timoteo‑ni, ttu benne gwalíga uchacha ikie gele tti ruchacha iki benne‑ni.
PHI 2:21 Kumu adíkana suna nu anka gebakani ruchacha ikikani nna labí ruchacha ikikani nu anka ge Jesucristuha.
PHI 2:22 Lebi'i chiba yule nu tse ruin Timoteo‑ni. Lana rixúna len neti ttiba ttu xi'ini len ttu xxudi kini rigixxi'atu ka tisa ge Cristuha.
PHI 2:23 Laxkala lana ruxxen lasia edhelhaa na ki etelannina le, sun tteba ganna chi uka xen lasia bixa satea, si eriaya lisiyya o abittu.
PHI 2:24 Anágaba neti, ruxxengaba lasia ge Tata Xisiha gwita tte gaabaa etelannia le.
PHI 2:25 Ttaka nnanna rulaba lasia raka doelha edhelhaa betsi to kia‑ni ata se'ele‑na, delába Epafrodito‑ni. Benne‑ni nuní riben lania lhe turo'oba rutto ruchíatu ratetu lo sina ge Tata Do Yebáha. Benne‑nigaba nuha udhelhale kini rixútie tti rikinati ttu bixa.
PHI 2:26 Labie nuní edhelhaa kumu yalhá re lebie ilánie iyále lhe yalhá rudúne de binale deki unibe.
PHI 2:27 Gwalí galá unibe, chi tteba gattie. Ttaka Tata Do Yebáha gwa gwatuaba lebie bie kini abittu uttie. Anna laa suna labie gwatua lebie, iyágaba neti gwatua lebie. Aníha ben Tata Do Yebáha kini abitturu dhu chietti si'i lasia.
PHI 2:28 De nuha nna chi rudiuba lasia edhelhaa bie kini lebi'i edú itta lele tti ilenlee, kini anágaba neti abittu tteru uchacha ikia.
PHI 2:29 Gwalodú itta lele gwalolabie tti esie. Gwalolabie atti galába rolabiri'i ttu benne chi babe len Tata Xisiha, lhe anágaba gwalugwe lidhaka ka benne ankake attiba labie,
PHI 2:30 kumu delo sina ge Cristuha nna bexunnina gebie gattie. Bexunnina gebie gattie de bixúe len neti, benie sina nu labí aka gele uinle de se'ele idittu.
PHI 3:1 Nnanna xa betsi to kia, gwaledeaka tenle de babale len Tata Xisiha. Neti labí ritisiti de rigixxi'ania le satti balha nu runia lo yetsi‑ni, kumu ankaba nuní nu dika ixú len lebi'i.
PHI 3:2 Gwaluyú gele len ka nu ruin satsa reki naa, ka nu labí rigixxi'a tsekana ka tisa ge Tata Do Yebáha. Ka nuná rálakana deki ichúliba lo bela lati ka benne biyú‑na, la'anialiba nna gwakake ge Tata Do Yebáha.
PHI 3:3 Ka nuná labí liikinna. Ri'ila nuní gwalíga ankari'i ge Tata Do Yebáha, kumu Espíritu geeha runie kini rudú xibiri'i arlo Tata Do Yebáha, lhe runie ki ridú itta leri'i de babari'i len Jesucristuha nna labí ruxxen leri'i ge nu anka lo bela latiri'i.
PHI 3:4 Neti gwa tegaba ro'a uxxen lasia ge nu anka lo bela latia. Ganna ttu benne ruxxen lebie ge nu anka lo bela latie, neti térula ro'a uxxen lasia ge nuná,
PHI 3:5 kumu neti xxunu ubisaruba chi ankati tti urú lo bela latia, lhe ankaa benne datiaya Israel‑ni, delába benne uka xuttori'iha, lhe ankagabaa xi'in ka benne uka xxudike Benjamín‑ni, lhe anágaba ankagabaa nu hebreo xi'ini ka benne hebreo, lhe ukagabaa benne biselaa ka fariseo‑ni, delába ka nu rudaxxu tsitsikana nu ra lo bia bennabi bodha'an Moisés‑ni,
PHI 3:6 lhe anágaba ukagabaa ttu benne bedo xxattana lasia, delába upa sunaa nu anka ge Tata Do Yebáha. De nuha nna betía di lasia ka benne ria leke Jesús‑ni nna gwanalhaa ke bedhaka disaa ke. Anágaba nna ge iyába nu ra lo bia bennabi bodha'an Moisés‑ni, bedo tsitsibaa tisa geni; niruba latti a binittia.
PHI 3:7 Ttaka iyába nu begwea lidhakani la'ania, nnanna labíru daka nuha len neti kumu de chi ria lasia Cristuha.
PHI 3:8 Nnanna iyába nuha labíru rugwea lidhakani kumu dakarula len neti de chi ankabiati Jesucristu benne runie neti mandaduha. De rakati ge benneha nna bedhá ikia iyá nu begwea lidhakani la'ania. Nnanna ttiba ttu nu abíru ixú chi anka nuha len neti. Nu ruinlaa isinaa ki uin kia Jesucristuha
PHI 3:9 lhe kini akaa ttu benne dhua lenbie lhe. Labí de rudoa tisa ge nu ra lo bia bennabi bodha'an Moisés‑ni nna ankaa benne ruin tse. ¡Ko'o! Ankaa benne ruin tse de ria lasia Cristuha. Tata Do Yebáha runie neti benne tse de ria lasia bie.
PHI 3:10 Aníha kini isinaa uinbia tsegaa Cristuha, lhe dhia nu tsitsi ra lebie de beyadhe lo elhuttiha, lhe anágaba satea uyúa elha disa luesi elha disa biyú benneha, lhe dhielhaa uttikana neti ttiba benneha uxielhe bettikane.
PHI 3:11 Aníha kini ni kina gaa gweyaka benbaa ganna chi beyaka ben ka benne chi uttiha.
PHI 3:12 Laa rigaa deki chi udaaya benbia tsea Cristuha, lhe nigaba laa chiga bisinaa akaa benne ruin taga'a nu anka tse. ¡Ko'o! Sinuki nu ruinlaa, runia doelha diaya, kini ni kina gaa gwadaabaa akaa nu raka le Jesucristuha akaa, kumu ki de nuha‑la uxie neti.
PHI 3:13 Xa betsi to, neti labí ria deki chi udaaya ukaa nu raka le benneha akaa; ttaka ttu nu runia, ruxxulhala lasia ge nu benia ttuha nna diaya rudo ikia ge nu si daa.
PHI 3:14 Neti yu'ubaa neda diaya ttiba ttu benne dia riresu; ruttipaba lasia diaya ki isinaa ata chi ga'anna isinaa, kini dhia nu tse ralhaa dhia yebáha. Tata Do Yebáha uxie neti ki dhia nu tse de babaa len Jesucristuha.
PHI 3:15 Laxkala iyábari'i ka benne chi se'e tsitsiri'i lo neda ge Jesucristuha, aní teeki ulaba leri'i. Ganna si lebi'i rulaba lele attu nu subi, Tata Do Yebáha gwagixxi'agabanie le deki labí tse anka nu rulaba leleha.
PHI 3:16 Ttaka ri'i teeki tse'eri'i uinri'i nu raxxína len nu bele'en Tata Do Yebáha ri'i.
PHI 3:17 Betsi to, gwaluni tti runia‑ni lhe gwalulanni ge ka benne ruinke tti tteba chi bele'entu leha,
PHI 3:18 kumu naa reki ixe ka nu rigu'u ni'akani nu gwate Cristuha lo ya kurusiha, delába ka nu chigaba utixxi'ania le gekani ixe lidú, nnanna nna itú ribesibaa redegixxi'aya gekani attu libe.
PHI 3:19 Ka nuná tsiabakana ata tse'e lookana, kumu nu satsa reta lekani ruinkana, ttiba ttu diosi gekani reyaka nuná, kumu suna nunába rudo lekani ruinkana, lhe anágaba nna nu dika ettukinna geniha, rapilakana de ruinkana nuha. Ka nuná suna ge nu raka yiesi lo yu‑niba do ikikani.
PHI 3:20 Ttaka ri'i ankari'i benne chi babari'i yebáha ata dedá benne odilábie ri'iha, delába Jesucristu benne anke Xxanari'iha. Benneha nuha se'eri'i ubeda.
PHI 3:21 Labie otseabie latiri'i, delába latiri'i nu rise'e loo reyakana yu, nna eyonie na atti anka latie nu ra xxeni leni. Nuní unie len nu ra tsitsi leeha, delába nu rixúnie kini iyá tte nu se'e yiesi lo yu‑ni rudokana tisa gebie.
PHI 4:1 Xa betsi to kia, lebi'i nuná raka xxattati gele lhe re xxatta lasia iláti le lhe. Lebi'i nuná ankale elha gwedeaka lasi kia, lhe ankale nu runi ki ra xxeni lasia lhe. Rulisaa le, tsitsi gwaltse'e de chi babale len Tata Xisiha.
PHI 4:2 Evodia‑na lhe Síntique‑na lhe, rinnabaa lenkana ese'e tse len luesikani, lhe ttúba ulaba lekani de chi babakana len Tata Xisiha.
PHI 4:3 Anágaba lu xa Sísigo benne abittuba rudhanlu neti, rinnabaa lenlu aka lenlu ka nuila‑na kini ese'e tsekana, kumu lakana lenkana Clemente‑na lhe adíru ka benne ribenke len neti, lake nuná begu'elha leke ki ugwadhi ka tisa ge Cristuha. Ka benne‑na nuná chi dia láke lo yetsi ata dia lá ka benne aka benke ttu dia lii yebáha.
PHI 4:4 Satía gwaludú itta lele de chi babale len Tata Xisiha. Rulisaa le attu libe: gwalodú itta lele,
PHI 4:5 lhe gwaluni kini iyá ka benne ilákanie deki lebi'i ankale benne re tse lele. Tata Xisiha chi tteba dabigana esie.
PHI 4:6 Abittu uchacha ikile ge ttu bixa. Nu uinlale, gwalutso dula iyá nu ruchacha ikile geni arlo Tata Do Yebáha, gwalinnaba lenie lhe gwalugwe bie ixkixaru lhe.
PHI 4:7 Aníha nna Tata Do Yebáha unie kini tse'ele xen su lasi. Ganna chi bese'ebie le xen su lasi, la'ania nna chi edú tse lele lhe ulaba tse lele de babale len Jesucristuha. Ri'i labí rite denri'i gasina ruin Tata Do Yebáha ki rise'eri'i xen su lasi.
PHI 4:8 Nnanna xa betsi to, gwaludo ikile ge iyá nu anka gwalí, lhe ge iyá nu dika tsia le ka benne geni lhe. Gwaludo ikile gwaluni iyá nu dika ixú, lhe iyá nu abittu anka satsa arlo Tata Do Yebáha lhe. Gwaludo ikile gwaluni iyá nu dika tsu'u le ka benne, lhe iyá nu dika ebanani ka benne geni lhe. Ge iyá nu anka tse, lhe ge iyá nu dika inne tse ka benne geni lhe, ge iyá nuná gwaludo ikile gwaluni.
PHI 4:9 Gwaluni iyá nu chi bedhetinia le lhe iyá nu chi bodha'anaa uinle lhe. Anágaba gwaluingaba iyá nu chi biyieninle xpeya le lhe iyá nu chi bilenle runia lhe. Nuní gwaltse'e gwaluni nna Tata Do Yebaa benne runie ki rise'eri'i xen su lasiha, benneha gwadúbe len lebi'i.
PHI 4:10 Yalhá itta bedú lasia rugwea Tata Xisiha ixkixaru, kumu de nnannaliba bedulole ruchacha ikile kia attu libe. Neti yubaa gwa ruchachaba ikile kia, deba nna labí chi upale lo neda ki idhelhale nu riyasati.
PHI 4:11 Bittu akinle rinnea aní de riyasati. ¡Ko'o! Neti chiba detia gwa raka xenruba lasia ttixaruba tee kia.
PHI 4:12 Chiba yu neti ttixa anka elha dii lhe chiba yu neti tti tee tama lhe. Ge iyába deti neti ttixaba ratea: sila yiela súti lhe sila rattia ubina lhe, sila tee tama kia lhe sila riyasa kia lhe.
PHI 4:13 Lo iyába nu ratea, gwa ridaabaa ridúa loni de babaa len Cristuha. Benneha rudú tsitsie neti.
PHI 4:14 Laa kiga de nuha nna lebi'i tseba benle udhelhale kia ki bodilále neti lo nu ratea.
PHI 4:15 Lebi'i gwa yúgabale xa benne ge Filipos, tti sisi'a tte utea utixxi'ania le ka tisa ge Cristuha nna tti bedáya ata se'ele‑na, delába daka Macedonia‑na, niruba ttu dhi ka benne ria leke Jesús‑ni a boteke ttu latti nu edenia ge neda kia de utixxi'ania ke ka tisa geeha. Sunruba lebi'i gwa udhelhale kia la'ania.
PHI 4:16 Axtala tti rea lhe'esi Tesalónica‑na gwa udhelharugabale attu chupa libe to kia kini bixúti.
PHI 4:17 Laa rinnegaa aní de rakaru lasia utele nu riyasati. Nu rakala lasia, lebi'i gattaru elha tse gele arlo Tata Do Yebáha.
PHI 4:18 Nnanna yalhá ttela chi uxía, tee tamala kia. Len nu udhelhale che Epafrodito‑ni rexxa tama kia. Nu udhelhale‑ni ankana attiba ttu úna rure ixixxi ru'u le Tata Do Yebáha lhe rulabie na tti risinna arloe.
PHI 4:19 Tata Do Yebaa kiaha xxeni anka elha tse ge benneha tee. Gutebe len lebi'i iyá nu riyasinle de babale len Jesucristuha.
PHI 4:20 Tata Do Yebaa benne anke Xxudiri'iha, benneha inná xxeni lebie ttu dia lii. Amén.
PHI 4:21 Gwalugwe ttu padiuxi kia iyá tte ka benne se'e naa, delába ka benne chi ankake ge Tata Do Yebáha de babake len Jesucristuha. Ka betsi to geri'i se'e len neti nii, ridhelhake ttu padiuxi gele.
PHI 4:22 Anágaba iyába ka benne chi ankake ge Tata Do Yebáha se'e lhe'esi‑ni, ridhelhagabake ttu padiuxi gele, lenke ka benne riben lhe'e yo'o ge César nu rinnabia xeniha. Ka benne‑ni nuní ka benne ridhelharuke ttu padiuxi gele.
PHI 4:23 Jesucristu benne anke Xxanari'iha edá lebie aka lenie le. Amén.
COL 1:1 Neti Pablo ankaa apóstol ge Jesucristuha. Tata Do Yebáha‑ba bedá lebie kini akaa apóstol. Neti lenia betsi to geri'i Timoteo‑ni
COL 1:2 ridhelhatu yetsi‑ni gele, lebi'i xa betsi to kia se'ele lhe'esi Colosas‑na. Lebi'i nuná chi ulesi Tata Do Yebáha le kini akale gebie lhe anágaba rudo tsitsibale tisa gebie de chi babale len Cristuha. Xxudiri'i do yebáha lhe Jesucristu benne anke Xxanari'iha lhe, lake edá leke aka lenke le lhe use'eke le xen su lasi lhe.
COL 1:3 Tti rinnabatu gele len Tata Do Yebáha, delába Xxudi Jesucristu benne anke Xxanari'iha, satíaba rugwetue ixkixaru gele,
COL 1:4 kumu de binatu lebi'i chiba ria lele ge Jesucristuha, lhe anágaba binatu deki gwa rakabinle ge iyá ka benne chi ankake gebie.
COL 1:5 Ruinle aná kumu de chi xen lele dhile elha tse nu chi tua tse gele yebáha. Tti biyieninle ka tisa ka nu ankake nu gwalí, delába ka tisa tse rigixxi'a ge Jesucristuha, la'ania nuha binale deki dhile elha tseha.
COL 1:6 Ka tisa‑ni nuní bisiake len lebi'i lhe anágaba chigaba radhike itúba yiesi lo yu‑ni lhe. Ka benne‑ni nuní rotseake elha ruin ge ka benne. Aníha‑gaba benke len lebi'i, nna debá tti biyieninle ka tisa‑ni nna ute denle deki gwalíga rakani Tata Do Yebáha gele.
COL 1:7 Ka tisa‑ni nuní bele'eni Epafras‑ni le. Benne‑ni rakintu gebie lhe rixúbie len ri'itu lo sina ge Cristuha. Labie anke ttu benne rudo tsitsibe tisa ge Cristuha kini rute nábie len lebi'i.
COL 1:8 Lagabe utixxi'anie ri'itu deki Espíritu ge Tata Do Yebáha‑ba runie kini lebi'i rakinle ge adí ka benne.
COL 1:9 De nuha nna ri'itu, debá la sá tti binatu geleha, labí rudú siitu a ilhapitu tisa len Tata Do Yebáha. Rinnabatu gele kini labie unie ki tte daa tsenle nu raka lebie uinle, lhe anágaba utebie len lebi'i iyá elha yuu lhe elha rieni ge Espíritu geeha lhe.
COL 1:10 Aníha kini tse'ele uinle atti galába runi ka benne chi ankake ge Jesús benne anke Xxanari'iha, tse'ele uinle iyá nu dika tsu'u lebie, delába uinle iyá nu anka tse lhe isinle uinbia tserule Tata Do Yebáha lhe.
COL 1:11 Benneha ra xxeni lebie nna unie, kini kweki tsitsi lele kini anáchu utto uchíale lo iyá nu ratele.
COL 1:12 Aníha nna len elha gwedeaka lasi ugwele Tataha ixkixaru, kumu lee chi benie kini akari'i benne dika dhiri'i nu chi ga'ananie utebie lenri'i, delába ri'i ka benne chi se'eri'i lhe'e xiani geeha lhe ankari'i gebie lhe.
COL 1:13 Labie bebeabie ri'i lhe'e chulha nu ra tsitsi leniha nna bottebie ri'i ata rinnabia Xi'inie Jesucristu benne rakanie geeha.
COL 1:14 Xi'inieha, de reni belalieha nna utixe geri'i. Aníha kini bese'e lhaari'i lhe bixú elha xen lasi ge ka tulha geri'i lhe.
COL 1:15 Tata Do Yebáha labí rilenri'i benneha, ttaka tti benbiari'i Cristuha, Tata Do Yebáha nuha benbiari'i la'ania, kumu Cristuha anke atti tteba anka benneha. Lee nuha chila doe attili lani kwe yiesi lo yu‑ni lhe anágaba ankagabe nu ra xxeniru leni delo iyá tte nu ben Tata Do Yebáha.
COL 1:16 Labie nuha bixúni Tata Do Yebáha kini benie iyá tte nu se'e yebáha lhe iyá tte nu se'e yiesi lo yu‑ni lhe, ka nu rilenri'i lhe ka nu abittu rilenri'i lhe. Gaxabasina ankakana, sila ankakana ka nu rinnabia lhe sila ankakana ka nu ra tsitsi lekani lhe, sila ankakana ka nu loni lhe o sila ankakana ka nu rapa lo neda lhe, iyába ka nu se'e, len Cristuha‑ba benie kana lhe anágaba ge Cristuha‑gaba ankakana lhe.
COL 1:17 Cristuha chila do benneha attili lani aka iyá tte nu se'e, lhe anágaba de labie nna iyá tteba nu se'e, se'ebakana attiba ankaba geni.
COL 1:18 Lagabe nuha anke nu loni ge ka benne ria leke bie. Labie nuha anke attisidiba iki ka benneha; ka benneha nna ankake attisidiba latie. Lhe anágaba, lagabe nuha anke benne sisi'a tte beyadha benbie lo elhuttiha. Aníha kini delo iyá tte nu se'e, labie nuha ake nu ra xxeniru leni.
COL 1:19 Kumu Tata Do Yebáha uka lebie eya'anna itú tte nu ankeha len Cristuha
COL 1:20 lhe Cristuha‑gaba nuha bixúni Tata Do Yebáha kini bedo tse lenie iyá tte nu se'e yiesi lo yu‑ni lhe nu se'e yebáha lhe. Bedo tse lenie ka nuha de reni belali Cristuha lo ya kurusiha.
COL 1:21 Lebi'i itú ttuha, attiba nu dittu ukale len Tata Do Yebáha lhe labí uka uyúle benneha lhe. La'ania belababa lele nu satsa lhe benbale nu satsa rakaba lele lhe.
COL 1:22 Ttaka len elhutti gwate Cristuha tti bitee yiesi lo yu‑ni, len elhuttiha chi bose'e tsebie le len Tata Do Yebáha nnanna, kini anáchu utso dubie le arlo Tata Do Yebáha, chi ankale nari xú lhe abitturu tulha gele tee lhe anágaba abittugaba bixa ge itisale.
COL 1:23 Aní aka ganna lebi'i tsia tsitsi lele lhe tse'e tsitsile lo neda gebie lhe, anágaba uxxen lele ge nu ra ka tisa tse biyieninle ge Cristuha, abittu udhanle ke. Ka tisa‑ni nuní chi ugwadhi itúba yiesi lo yu‑ni nna neti Pablo ankaa benne rigixxi'aya ke.
COL 1:24 Nnanna du itta lasia kumu de lebi'i nna ratea ruyúa elha disa. Len elha disa ratea‑ni, len nuní rodha'aya nu riyasa sate Cristuha kwenta ge ka benne chi ria leke bie, kumu lake nuha ankake ttiba latie.
COL 1:25 De ka benneha nna ankaa benne rixúa lo sina ge Tata Do Yebáha. Ruinbaa nu chiba bedha'ane unia, delába ida'aba kixxi'ania le ka tisa geeha kini lebi'i saría tsena le.
COL 1:26 Ka tisa‑ni nuní tenie gatsi itú nu reha, ttaka nnanna chi bele'ebie ka tisa‑ni len ka benne chi ankake gebie.
COL 1:27 Ka benne chi ankake geeha, ka benneha nuha uka lebie ule'enie ke deki lebi'i ka benne dittu abittu ankale nu Israel, ralhagabale edí baale ge elha tse nu tenie gatsi, delába nu tenie gatsiha ankana deki Cristuha nuha chi doe lhe'e lastole. De nuha nna ruxxen lele dhile nu xxeni ra le Tata Do Yebáha.
COL 1:28 Ge Cristuha nuha rekitu rigixxi'entu iyá xea ka benne, ratu ke gasina dika uinke lhe rugwegabatu ke elha rieni lhe. Aníha ruintu kini itá suba akake tti otso dutu iyáke arlo Tata Do Yebáha de babake len Cristuha.
COL 1:29 De nuha nna neti runia doelha rekia rigixxi'aya ge Cristuha, kumu lee nuha ribeki tsitsie lasia.
COL 2:1 Neti raka lasia unale, tsitsiba ratea rekia rigixxi'aya ka tisa‑ni de lebi'i lhe de ka benne se'e lhe'esi Laodicea‑ni, lhe de iyá tte ka benne abittu chi ankabiakanie neti lhe.
COL 2:2 Ratea aní kini lebi'i dhu itta lele lhe tse'e tsitsile lhe. Aníha kini tse'e tutupale de rakin ge luesile axtaliba ganna chi bisinle tte da tsenle gasina anka nu teni Tata Do Yebáha gatsi ttuha, delába nu tenie gatsi ttuha ankana labí chi yu ka benne ge Cristuha.
COL 2:3 Len Cristuha nuha saxxakari'i iyá looba elha rieni lhe elha yuu lhe.
COL 2:4 Rigixxi'ania le nuní, kini abittu tsia lele ge ka nu rotsi'inu lekani rinnekana nu anka gwen lasi, kini aníha nna dhi yiekana le.
COL 2:5 Neti, meskiba doa idittu, ttaka ttisidiba gwa dubaa len lebi'i kumu satíaba rexxa lasia le. Redeakati de riláti latsiruba ruinle lhe gwa ria tsitsiba lele ge Cristuha lhe.
COL 2:6 Laxkala attiba chi ria lele deki Jesucristuha nuha anke Xxanari'i, anágaba nna gwaltse'e gwaluni attiba rakaba lebie.
COL 2:7 Gwaludaxxu tsitsi neda gebie lhe gwaltsia tsitsi lele gebie lhe. Gwaluni atti tteba chi bidetile lhe anágaba satíagaba gwalugwe Tata Do Yebáha ixkixaru lhe.
COL 2:8 Gwaluyú gele abittu tsia lele ge ka nu daa lenkana elha rieni nu abittu ixú lhe nu abittu daka lhe, kumu luesi elha rieni‑na ankaba nuná nu rotsi'inu le ka benne. Ankaba nuná ge yiesi lo yu‑ni, labí anka nuná elha rieni nu rute Cristuha.
COL 2:9 Kumu Cristuha, tti bitee yiesi lo yu‑ni, itúba nu anka Tata Do Yebáha nuha uke.
COL 2:10 Anágaba lebi'i chigaba ankale ida'a de babale len Cristu benne anke nu loni ge iyá tte ka espíritu ka nu rinnabia lhe ka nu ra xxeni lekani lhe.
COL 2:11 De Cristuha‑gaba nna lebi'i attisidiba rúba lo bela latile, aníha kini rula'a deki gwalí ankale ge Tata Do Yebáha. Sun tteba nna labí gwalí ruu lo bela latile tti runi ka benne Israel‑ni, kumu ka benneha richú lo bela latike. Ttaka lebi'i de chi babale Cristuha, de nuha nna attisidiba chiba uchúbie lo bela latile tti utuabie nu satsa reta lele ruinleha.
COL 2:12 Atti udile indaha, la'ania nuha attisidiba bigatsibale len Cristuha, lhe anágaba nna beyaka bengabale len benneha de ugía lele deki Tata Do Yebáha tsitsi ra lebie belhidhe benneha lo elhuttiha.
COL 2:13 Lebi'i la'ania attiba ttu nu yatti ankale arlo Tata Do Yebáha de ka tulha ruinleha lhe de abittu ruu lo bela latile lhe, ttaka Tata Do Yebáha benie kini beyaka benle itupa lenle Cristuha tti uxíe elha xen lasi ge iyá ka tulha geleha.
COL 2:14 La'ania nuha utuabie yetsi ata dia bipaxa nu satsa benri'i. Yetsiha nuha rukina geri'i nna utuabie na tti utá Cristuha lo ya kurusiha.
COL 2:15 Lo ya kurusiha‑gaba utuabie nu tsitsi ra le ka espíritu satsa, delába ka espíritu ka nu rinnabia lhe ka espíritu ra xxeni lekani lhe. Tti chi udaabie lo ka espírituha, elhittu nuha begwebie kana arlo ka benne se'e yiesi lo yu‑ni.
COL 2:16 Laxkala abittu dhielhale kua ka benne bala'ana gele ge nu role lhe ge nu ri'ale lhe, nigaba kuakana bala'ana gele de abittu retabinle ge ka sá tti raka ka laní‑na lhe tti redá ka beo kubi‑na lhe tti risia ka sá reyaka leri'i lhe,
COL 2:17 kumu iyá nuní sunruba ukana ttiba lixxína benne chi ga'anna isiaha. Ttaka benne chi ga'anna isiaha, benneha nuha gwalíga anke kwinaga Cristuha.
COL 2:18 De nuha nna ka nu runi deki yalhaba ria lekani Tata Do Yebáha rudú xibikani arlo ka anjeli geeha lhe anágaba ruinkana ttaba rákana deki rula'akinna ttu bixa, ka nuná bittu dhielhale gekani tti rákana deki teeki uinle nu ruinkana, kumu ka nuná nu anka gebakani rinnekana.
COL 2:19 Ka nuná labí se'ekana len Cristu benne anke nu loni ge ka benne ria leke bie. Ttiba ikiri'i‑ni yietina latiri'i lhe denna itúba ka bini latiri'i lhe, anágaba ka benne ria leke Cristuha yietigabake bie. Benneha runie kini rise'e tsitsike lo neda geeha attiba rakaba le Tata Do Yebáha.
COL 2:20 Kumu lebi'i attisidiba chiba uttile len Cristuha. De nuha nna ttisidiba lanúrule se'e ki uinle nu rotsi'inu le ka nu se'e yiesi lo yu‑ni. Ganna aníha chi ankale nna, ¿beakala nna sa rudobale tisa ge ka nu rákana:
COL 2:21 “Bittu udaxxulu nuná, lhe bittu golu nuná lhe o bittu kanlu nuná lhe.”
COL 2:22 Kumu iyá nu ra ka nuná ankabana nu riria iki ka benne. Ankaba nuná nu kwa kwaba rise'e loona de rixuinri'i na.
COL 2:23 Gwalí galá, labí dika innári'i deki labí anka nu rinne ka nuná nu dika ixú kumu gwa rule'ebakana gasina teeki udú xibiri'i arlo Tata Do Yebáha lhe gwa rule'ebakinna ri'i abittu uinri'i ttaba lhe anágaba gwa rule'egabakana gasina ugwe latiri'i elha disa, ttaka iyá nuná labí ixúna kini kuana nu satsa reta leri'i ruinri'i.
COL 3:1 Laxkala lebi'i ganna gwalíga chi beyaka benle len Cristuha, gwaludo lele nu anka ge yebáha ata do Cristuha, delába daka ná ben ge Tata Do Yebáha.
COL 3:2 Gwaludo ikile nu anka ge yebáha, abittu udo ikile nu anka ge yiesi lo yu‑ni,
COL 3:3 kumu lebi'i attisidiba chiba uttile, labíru se'ele ki uinle nu satsa ruinle ttuha, ttaka nnanna de chi babale len Tata Do Yebáha, len Cristuha nuha chi tua tse elha nabani gele.
COL 3:4 Tti esia Cristu benne rutebie elha nabani geri'iha, tti esie dedábie yebáha, anágaba lebi'i la'ania tse'egabale lenbie lhe'e xiani geeha.
COL 3:5 De nuha nna chinka gwalikua iyá nu satsa ruinle, delába bittu isále nu subi subi lhe bittu uinle iyá nu utsigana le arlo Tata Do Yebáha lhe. Anágaba bittu uinle iyá nu satsa rulaba lele lhe iyá nu reta lele ruinle lhe. Abittugaba udona lele gatta xxatta belhiu gele, kumu belhiu‑na attiba ttu diosi reyaka nuná gele.
COL 3:6 Kumu delo ni'a ge nuná nna rise'iki Tata Do Yebáha nna rugwebie elha disa ka nu abittu rudokana tisa gebie.
COL 3:7 Lebi'i anágaba benle atti sa rekibale ruinle nu anka satsaha,
COL 3:8 ttaka nnanna chinka gwalikua iyá elha rise'iki gele lhe iyá nu satsa rulha lele lhe. Anágaba gwalikuagaba iyá nu rinne satsa ge luesile lhe iyá tisa satsa yu'u ro'ole lhe.
COL 3:9 Nu anka gwalí gwalinne, abittu la len luesibale uin lele, kumu lebi'i chiba bedhanle nu ankale ttuha, delába chiba bedhanle nu satsa benle ttuha,
COL 3:10 nnanna nna chiba beyakale benne kubi; ttu ttu sába diale axtaliba ki isinle akale atti ttega anka Tata Do Yebáha, delába benne benie leha. Aníha kini isinle uinbia tsegalee.
COL 3:11 Ganna chi beyakale benne kubiha, la'ania nna labíru raka doelha si ankale benne Israel o abittu, lhe anágaba labíru raka doelha si gwa ruu lo bela latile o abittu, lhe nigaba si ankale benne yuu o abittu. Anágaba labíru raka doelha si ankale benne to'ole lo sina o abittu, sinuki Cristuha‑la nuha rakaru doelha lhe lagabe nuha doe lhe'e lasto iyá tteri'i lhe.
COL 3:12 Laxkala de rakani Tata Do Yebáha gele lhe de chi bekwebie le kini akale gebie, de nuha nna gwaluin ge benne ratua lasi lhe ge benne re tse lebie lhe. Anágaba gwaluin ge benne abittu runi ttaba lhe ge benne abittu ruin disa lhe. Anágaba gwaluni ge benne re besi lebie lhe.
COL 3:13 Gwalutto gwaluchíaba ge nu rudhaka luesile lhe gwalidhíba elha xen lasi ge luesile ttixka nuxa ttúle bixa ruinle. Gwaluni attiba ben Cristuha, benneha gwa uxíbe elha xen lasi gele.
COL 3:14 Iki de iyá tte nuní nna nu rakarula doelha akin ge luesile. Kumu elha si'i lasi‑na nuná ruse'ena ri'i tutupa, ruse'ena ri'i attiba ankaba geni.
COL 3:15 Cristuha xen su lasiba udúbie lele, kumu de nuha‑la uxie le kini akale attisidiba ttúba benne lenie. Anágaba nna ugwegabalee ixkixaru.
COL 3:16 Ka tisa ge Cristuha tsu'u tamake lhe'e lastole. Len elha rieni rute Tata Do Yebáha gwalule'en luesile lhe gwalodú itta le luesile lhe. Itú iki itú lele gwalugwe bie ixkixaru tti ulhale ka le'a gebie,
COL 3:17 lhe anágaba bixaba innele lhe bixaba uinle lhe, tti uinle aníha exxa lele Jesús benne anke Xxanari'iha. Kumu de benneha nna ugwele Xxudiri'i do yebáha ixkixaru.
COL 3:18 Lebi'i ka benne nuila ata se'e latselale, gwaludo tisa ge ka benne biyú gele‑na, kumu aná dika uinle de chi ankale ge Jesús benne anke Xxanari'iha.
COL 3:19 Lebi'i nna ka benne biyú ata se'e latselale, akinle ge ka benne nuila gele‑na nna abittu uyú satsale ke.
COL 3:20 Lebi'i nna ka nu kwiti, gwaludo tisa ge ka tata nan gele‑na ge iyába nu innáke kumu aná ru'u le Jesús benne anke Xxanari'iha.
COL 3:21 Lebi'i nna ka tata, abittu utse'enle ka xi'inle‑na kini abittu udú chupana lekani.
COL 3:22 Lebi'i nna ka benne ata to'ole lo sina, ge iyá tte gwaludo tisa ge ka benne ankake xxanale yiesi lo yu‑ni. Bittu suna attiruba du xxanaleha rulannina gele nna jeru tteba ribenle sina sunruba ki eya'an tsele arloni, sinuki itú iki itú lele gwalikwen sina de tee elha rasi gele len Jesús benne anke Xxanari'iha.
COL 3:23 Bixaba sina uinle, gwaluin na itú iki itú lele. Bittu akinle deki sina ge ka benne se'e yiesi lo yu‑niba nuha ruinle, gwaluni attisidiba sina ge Jesús benne anke Xxanari'iha‑ba nuha ruinle.
COL 3:24 Lebi'i gwa yúbale deki Jesús‑ni gutebe nu ralhale dhile ge nu ruinle, kumu lo sina gebie nuha rixúle.
COL 3:25 Ttaka nu ruin satsaha dhiba nuha elha disa ge nu satsa ruinnaha, kumu Tata Do Yebáha rutebe nu tse len ka benne ruin latsiru lhe rutegabe elha disa ge ka nu ruin satsa lhe. Ruinba benneha elhuxtisi attiba ankaba geni.
COL 4:1 Lebi'i nna ata ankale xxana ka sina, latsiru gwaluin len ka benne riben lo sina gele‑na lhe gwaluyú ke attiba ankaba geni lhe. Gwaludhá lele deki anágaba lebi'i dogaba ttu Xxanale yebáha.
COL 4:2 Gwaludo lele gwalilhapi tisa len Tata Do Yebáha. Bittu udú siile a innele lenie lhe gwalugwe bie ixkixaru lhe.
COL 4:3 Anágaba gwalinnabagaba getu lenie kini idhalie neda getu ki kixxi'atu nu tenie gatsi ttuha, delába kixxi'atu ge Cristuha. Kumu de rigixxi'iatu ge benneha, de nuha nna xigaa tea lisiyya.
COL 4:4 Gwalinnaba kia kini ganna chi kixxi'aya gebie, lhixxa rába kixxi'aya attiba ankaba geni.
COL 4:5 Lebi'i gwaluin doelha ixuinle ka sá se'ele‑na kini uinle latsiru len ka nu abittu chi ria lekani Cristuha.
COL 4:6 Tisa nu inneleha satía akana latsiru lhe nu dika tsu'u le ka benne lhe. Aníha kini yule gasina ekabile ge nuxaba benne innaba tise le.
COL 4:7 Betsi to geri'i Tíquico‑ni, delába benne rakati gebie‑ni, benne‑ni anke ttu benne rudoe tisa rute nábie len neti lo sina ge Jesús benne anke Xxanari'iha. Labie kixxi'anie le bixa ratea.
COL 4:8 De nuha‑la nna ridhelhee ata se'ele‑na kini kixxi'anie le bixa ratetu lhe anágaba kini odú itte lele lhe.
COL 4:9 Dedágaba Onésimo benne lhe'esi gele‑na lenbie. Benne‑na ankagabe betsi to geri'i lhe rakinri'i gebie lhe ankagabe nu gwedo tisa lhe. Lake kixxi'akanie le iyá nu raka nii.
COL 4:10 Aristarco benne tee lania lisiyya‑ni, benne‑ni ridhelhe ttu padiuxi gele lhe anágaba Marcos primu ge Bernabé‑ni ridhelhagabe ttu padiuxi gele. Ge Marcos‑ni chiba utixxi'ania le, ria: “Ganna ite ata se'ele‑na latsiru ulabilee.”
COL 4:11 Anágaba Jesús benne tegaba lábie Justo, ridhelhagabe ttu padiuxi gele. Delo iyá ka benne Israel chi ria leke Cristuha, sunruba tsunna ka benne‑ni ribenke len neti kini rigixxi'atu gasina rinnabia Tata Do Yebáha ka benne lhe anágaba rixúgabake kini rodú tseke lasia lhe.
COL 4:12 Epafras‑ni ridhelhagabe ttu padiuxi gele. Benne‑ni ankagabe ttu ka benne gele, rixúbie lo sina ge Cristuha. Labie satíaba rinnabe gele tti rilhapie tisa len Tata Do Yebáha. Rinnabe kini lebi'i tse'e tsitsile lo neda ge Tata Do Yebáha lhe akale benne runi itá su, lhe anágaba kini tte da tsenle iyá nu raka lebie.
COL 4:13 Kumu neti yu xeabaa yalhá ruchacha ikie gele lhe ge ka benne se'e lhe'esi Laodicea‑na lhe, anágaba ruchachagaba ikie ge ka benne se'e lhe'esi Hierápoles‑na lhe.
COL 4:14 Lucas benne runie ramedi‑ni, delába benne rakagabinri'i gebie, benne‑ni ridhelhagabe ttu padiuxi gele. Anágaba Demas‑ni ridhelhagabe ttu padiuxi gele.
COL 4:15 Ka betsi to geri'i se'e lhe'esi Laodicea‑na, gwalugwe ke ttu padiuxi getu lhe anágaba Ninfas‑na lhe adíru ka benne chi ria leke Cristuha, delába ka benne ritupake lhe'e lisie‑na, gwalugwegaba ka benne‑na ttu padiuxi getu.
COL 4:16 Iki de chi bibaba yetsi ridhelhatu‑ni arlole, gwalidhelhagaba na lhe'esi Laodicea‑na kini ibabagabana arlo ka benne chi ria leke Cristuha se'eke naa. Anágaba yetsi udhelhaa len ka benne se'e lhe'esi Laodicea‑na, edhelagabake nuná kini lebi'i ulabagabale na.
COL 4:17 Gwaligasi Arquipo‑na udo leni uinna sina nu chi bodha'ana Jesús benne anke Xxanari'iha lasi náni.
COL 4:18 Padiuxi nu ridhelhaa gele‑ni, kwinaga neti Pablo runia nuní lo yetsi‑ni. Gwalodhú lele deki tea lisiyya. Tata Do Yebáha edá lebie aka lenie le. Amén.
1TH 1:1 Neti Pablo, lenia Timoteo‑ni lhe Silvano‑ni lhe, ridhelhatu yetsi‑ni gele, lebi'i ka benne ritupale lhe'esi Tesalónica‑na de chi ankale ge Xxudiri'i do yebáha lhe ge Jesucristu benne anke Xxanari'iha lhe. Lake edá leke aka lenke le lhe use'eke le xen su lasi lhe.
1TH 1:2 Tti rilhapitu tisa len Tata Do Yebáha, satíaba rugwetue ixkixaru ge iyá ttele tti radú letu gele.
1TH 1:3 Arlo Tata geri'i do yebáha satíagaba rexxa letu ge iyá tte nu ruinle de chi ria lele ge Jesucristuha. Rexxagaba letu ge nu tse ruinle de rakinle ge ka benne, lhe anágaba de labí rudhanle satíaba ruxxen lele ge Jesucristu benne anke Xxanari'iha.
1TH 1:4 Lebi'i xa betsi to rakin Tata Do Yebáha gele, ri'itu yu xeabatu deki labe chi bekwebie le kini akale gebie.
1TH 1:5 Kumu ka tisa tse utixxi'entu le ge Jesucristuha, laa sun tisaruga anka ka benneha, sinuki tsitsi ra le ka tisaha, kumu Espíritu ge Tata Do Yebáha‑ba benie kini ra tsitsi le ka tisaha, lhe anágaba benie kini lebi'i ugía tsitsi lele ka benneha. Anágaba lhe gwa yu xeagabale tseba uka elha ruin getu tti use'etu len lebi'iha. Aníha bentu kini lebi'i gwaria tsena le.
1TH 1:6 Lebi'i nna bedaxxule elha ruin getuha lhe elha ruin ge Jesús benne anke Xxanari'iha lhe. Kumu meskiba gwatele biyúle elha disa tsitsi tti bedaxxule ka tisa geeha, ttaka Espíritu ge Tata Do Yebáha nna betelee elha gwedeaka lasi gele.
1TH 1:7 Aníha uka nna elha gwedeaka lasi geleha bixúna kini bilani iyá ka benne se'e daka Macedonia‑ni lhe daka Acaya‑ni lhe, delába ka benne chi ria leke ge Jesús‑ni.
1TH 1:8 Kumu de lebi'i nna udulo ugwadhi ka tisa ge Jesús benne anke Xxanari'iha. Anna laa suna daka Macedonia‑niga lhe laa suna daka Acaya‑niga ugwadhi ka tisaha, anágaba nna lhe'e iyágaba ka yiesi‑na chi nuna ka benne deki lebi'i tseba ria lele ge Tata Do Yebáha. Laxkala ri'itu labíru uka doelha kixxi'atu gele len ka benneha.
1TH 1:9 Kumu kwinaba lake rigixxi'ake ráke deki lebi'i tseba belabile ri'itu tti bisiatu len lebi'iha, lhe rigixxi'agabake ráke gasina bedhanle abitturu ria lele ge ka nu labí gwalí ankakana diosi, lhe gasina udulole rudole tisa ge benne gwalíga anke Diosiha lhe gwalíga anke benne bani lhe.
1TH 1:10 Anágaba nna se'egabale ubeda Xi'inieha, delába Jesús benne belhidha ben Tata Do Yebáha lo elhuttiha lhe dedábie yebáha kini odilábie ri'i lo elha disa nu si daa; delába elha disa ute Tata Do Yebáha geri'i.
1TH 2:1 Lebi'i gwa yu xeabale xa betsi to kia, gwa bixúba nu bentu, labí kwentaba bitatu ata se'ele‑na.
1TH 2:2 Gwa yúgabale attili lani isiatu ata se'ele‑na, chila biyayatu lhe chila belisa xxattakana ri'itu tti se'etu lhe'esi Filipos‑ni, ttaka Tata Do Yebáha gwa uleki tsitsibe letu ki utixxi'entu le ka tisa tse betebie lentu, meskiba bika se'e ka nu rese'e disakana lotu lhe rusunakana lhe.
1TH 2:3 Kumu ka tisa utixxi'entu leha, nu gwalíba anka ka benneha, labí bixa nu satsa rulha letu tti utixxi'atu ka tisaha lhe nigaba labí len gwen lasi uxí yietu le kini ugía lele,
1TH 2:4 sinuki Tata Do Yebáha‑ba bexxen lebie ri'itu deki gwankabatu nu dika kixxi'atu ka tisa tse betebie lentu. Laxkala nna aníha‑ba ruintu, labí ruintu ki tsu'u le ka benne se'e yiesi lo yu‑ni nu rinnetu, sinuki ruinlatu ki tsu'u le Tata Do Yebáha nu rinnetu, kumu benneha gwa yube ttixa anka lhe'e lastotu.
1TH 2:5 Lebi'i gwa yúbale ri'itu labí bisiatu len elha ro'o lhe'e getu. Tata Do Yebáha gwa yu xeabe. Nigaba labí botsi'inu letu ttu bixa ki galhitu belhiu gele.
1TH 2:6 Nigaba labí bentu ki inne tsele ge nu ruintu, nigaba ki inne tse adíru ka benne ge nu ruintu.
1TH 2:7 Meskiba ri'itu gwa upabatu lo neda la'ania ki unnabatu lenle ki uinle nu raka letu de ankatu apóstol ge Cristuha, ttaka tti ugwekitu lagwi geleha ukalatu benne si'i lasi. Ttiba runi ttu ixná ruyú tsena ka xi'inniha, aníha‑ba biyútu le.
1TH 2:8 Yalhá raka xxattintu gele. Laxkala la'ania, laa sunruga ka tisa ge Tata Do Yebáha uka letu kixxi'entu le, sinuki tatisa ri'itu axtala elha nabani getu betetu len lebi'i kumu de raka si'i xxattintu le.
1TH 2:9 Lebi'i gwa rexxaba lele xa betsi to, atti utixxi'entu le ka tisa ge Tata Do Yebáha, tsitsiba urentu sina rela lhe resá lhe. Bentu aníha ki abittu betsetsintu le innabatu le nu riyasintu.
1TH 2:10 Lebi'i ka benne chi ria lele Jesús‑ni gwa yu xeabale lhe gwa yu xeagaba Tata Do Yebáha deki ri'itu benne tseba ankatu lhe ankagabatu benne ruintu nu dika ixú lhe, anágaba, labí bixa bala'ana getu bitua. Latsiruba biyútu le.
1TH 2:11 Anágaba nna gwa yúgabale gasina biyútu le la'ania; biyútu le attiba ruyú ttu xxudi ka xi'inniha.
1TH 2:12 Aníha‑ba belisatu le lhe bese'e tsitsitu le lhe anágaba bedú ittatu lele kini tse'ele uinle atti galába runi ka benne chi ankake ge Tata Do Yebáha, kumu labie chi uxie le kini akale benne edí baale elha tse tee ata rinnabieha.
1TH 2:13 De nuha nna satíaba rugwetu Tata Do Yebáha ixkixaru, kumu lebi'i ka benne chi ria lele gebie, tti biyieninle ka tisa rigixxi'atu geeha, labí ukinle deki ka tisa utixxi'entu leha, nu anka gebatu ka benneha rinnetu, sinuki bedaxxubale ke atti galába tisa ge Tata Do Yebáha, kumu de gwalíba ankake tisa gebie. Ka tisa geeha nuha rotseake elha ruin gele.
1TH 2:14 Lebi'i xa betsi to, gwatebale attiba gwate ka benne chi ankake ge Tata Do Yebáha de ria leke Jesucristuha, delába ka benne se'e daka Judea. Ka benneha udú noo ka nu Israel‑ni ke. Aníha‑ba nuná gwatele udú noo ka nu lhe'esi geleha le.
1TH 2:15 Ka nu Israel‑ni bettibakana Jesús benne anke Xxanari'iha lhe ka profeta use'e itú nu reha lhe; ri'itu nna uleabakana ri'itu. Ka nu ben aníha niru latti a ru'u le Tata Do Yebáha nu benkana. Arlo iyába ka benne rese'e disakana.
1TH 2:16 Rusunagabakana kixxi'entu ka benne abittu ankake nu Israel ka tisa ge Jesús‑ni, ruinkana kini abittu odilá Tata Do Yebáha ka benneha. Tti ruinkana aníha rudien chiettirula tulha gekani, ttaka Tata Do Yebáha ugwebe kana elha disa tsitsi.
1TH 2:17 Betsi to, isá to chi biriesi luesiri'i, labíru chi bilen luesiri'i, ttaka satíaba yu'ule lhe'e lastotu lhe anágaba yalhá re letu edelentu le attu libe.
1TH 2:18 De nuha nna chi bentu itatu ata se'ele‑na. Netiba Pablo ixe lidúru chi benia itaa, ttaka nu xxegwiha uttabana lo neda getu.
1TH 2:19 Bentu itatu kumu, ¿laaba ganna lebi'i nuná utele elha gwedeaka lasi getu arlo Jesucristu benne anke Xxanari'iha, lhe lebi'i nuná ankale attiba ttu corona ebana letu ku'u ikitu‑na de ben tsetu? Anágaba lebi'i nuná ruxxen letu utso dutu le arlo Jesucristuha ganna chi besiabie yiesi lo yu‑ni attu libe.
1TH 2:20 Gwalí galá, lebi'i nuná ankale elha gwedeaka lasi getu lhe anágaba lebi'i nuná ankale nu dika ebana letu gele lhe.
1TH 3:1 De nuha nna de abitturu betto bechíatu abí unatu gele, aníha uka nna bokinni ikitu a suna a chupabatu beya'antu lhe'esi Atenas‑ni,
1TH 3:2 nianna bedhelhatu betsi to geri'i Timoteo‑ni, delába benne rixúgabe lo sina ge Tata Do Yebáha lhe rutegaba nábie len ri'itu kini radhiru ka tisa ge Cristuha. Bedhelhatue ki use'e tsitsie le lhe odú itte lele kini lebi'i tsia tsitsiru lele ge Cristuha.
1TH 3:3 Aníha kini abittu udú chupana lele de ratele ruyúle elha disa. Lebi'i chiba yule deki tee kiba sateri'i uyúri'i elha disa,
1TH 3:4 kumu attili sa se'etu len lebi'iha, chi ratu le deki teeki sateri'i uyúri'i elha disa. Nnanna nna attiba chi ratu leha, aníha‑ba chi raka.
1TH 3:5 Laxkala neti labí uledarua, bedhelha ttebaa Timoteo‑ni kini unaa ganna gwa riaru lele ge Jesús‑ni, kumu ni kina chi uxí yie nu xxegwiha le, la'ania nna abígaba ixú nu bentu tti use'etu len lebi'iha ganna ttixka.
1TH 3:6 Ttaka nnanna tti besia Timoteo‑ni ata se'etu‑ni, tseba rigixxi'ana gele, rana deki gwa riaruba lele Jesús‑ni lhe anágaba gwa ankagabale benne si'i lasi lhe. Utixxi'agabana rana deki satíaba rexxa lele ri'itu lhe anágaba yalhá ladeakale ilenle ri'itu, attigaba ri'itu yalhá ladeakatu ilentu le.
1TH 3:7 Laxkala xa betsi to, meskiba rate xxattatu ruyútu elha disa, ttaka tti binatu gele deki gwa ria tsitsiba lele, nianna beyaka xen letu.
1TH 3:8 Nnanna de chi yutu deki gwa se'e tsitsibale lo neda ge Jesús benne anke Xxanari'iha, de nuha nna bedú itta xxatta letu.
1TH 3:9 Laxkala, de elha gwedeaka lasi xxeni tee getu arlo Tata Do Yebaa geri'iha, de nuha nna niba a reselintu tisa gaxasina ugwetue ixkixaru gele.
1TH 3:10 Rela resába rinnabatu lenie kini ugwelhe ilentu le, aníha ki ri'itu ule'e chiettintu le nu riyasaru kini tsia tsitsiru lele gebie.
1TH 3:11 Kwinaba Xxudiri'i do yebáha lhe Jesús benne anke Xxanari'iha egu'uke ri'itu neda ki esiatu ata se'ele‑na,
1TH 3:12 lhe anágaba benne anke Xxanari'iha‑gaba unie ki akaruin ge luesile lhe akaruinle ge adíru ka benne lhe, ttiba ri'itu rakintu gele.
1TH 3:13 Aníha kini kweki tsitsi lele lhe akale gebie lhe, kini abittu bixa ge itisale arlo Xxudiri'i do yebáha ganna chi dedá Jesús benne anke Xxanari'iha len iyá ka benne chi ankake gebie.
1TH 4:1 Nnanna xa betsi to, rinnabatu len lebi'i lhe rulisatu le lhe, gwaluinchi lo ni'a ge Jesús benne anke Xxanari'iha, tse'ele uinle nu tsu'u le Tata Do Yebáha, uinle attiba chi bele'entu leha. Attigaba chi ruinle nnanna, anába sa tsiarule uinle.
1TH 4:2 Lebi'i gwa yúbale nu chi utixxi'entu le uinle. Jesús benne anke Xxanari'iha‑ba betebie lo neda getu kini gatu le: “Nuní gwaluni.”
1TH 4:3 Kumu Tata Do Yebáha raka lebie iriesile ki akale gebie. De nuha nna abittu isále nu subi subi.
1TH 4:4 Kua ttu ttule dho len nuila gele latsiru, attiba ru'u le Tata Do Yebáha lhe anágaba tsiagaba lele kana lhe.
1TH 4:5 Abittu ttebiale udhaka xiile kana, bittu uinle tti ruin ka nu abittu ankabiakinna Tata Do Yebáha.
1TH 4:6 Bittu udhaka xiile ttu betsi to geri'i, abittu udaxxule nuila ge benneha. Chiba utixxi'entu le lhe chiba ratu le, Tata Do Yebáha ugwebie elha disa tsitsi ka nu uinkana aní.
1TH 4:7 Kumu Tata Do Yebáha laa uxige ri'i lo neda geeha kini uinri'i nu satsa, sinuki uxilee ri'i kini akari'i nari xú arloe.
1TH 4:8 Laxkala ttu benne ganna abíba udo nage ge ka tisa‑ni, laa ka benne se'e yiesi lo yu‑niga nuha ku'u ni'e, Tata Do Yebaa benne betebie Espíritu geeha len ri'i, benneha nuha ku'u ni'e.
1TH 4:9 Lebi'i labí riyasinle upeya le akinle ge ka betsi to geri'i, kumu kwinaba Tata Do Yebáha chi bedhetinie le kini akin ge luesile.
1TH 4:10 Kumu anába chi ruinle len iyába ka betsi to geri'i se'e itúba daka Macedonia‑ni, ttaka rinnabatu len lebi'i xa betsi to, aka chiettiruin ge luesile.
1TH 4:11 Gwaluin doelha latsiru gwaltse'e len adí ka benne. Nu anka gele gwaludo lele, lhe len nu anka ni'a nále gwalikwen sina ttiba chi ratu le.
1TH 4:12 Aníha uinle kini ka nu abittu chi ria lekani Tata Do Yebáha tsia lekani le, lhe aníha kini abittu bi iyasa gele lhe.
1TH 4:13 Anágaba xa betsi to, raka letu unale, gasina sate ka benne chi uttiha, kini lebi'i abittu udú si'ina lele tti rudú si'ina le ka nu abittu ruxxen lekani deki gweyaka benkana lo elhuttiha.
1TH 4:14 Kumu ri'i ria leri'i deki Jesús‑ni uttie nna beyaka benbe lo elhuttiha, anágaba uin Tata Do Yebáha len ka benne chi uttike ria leke ge Jesús‑ni, unie kini Jesús‑ni, itupa lenie ka benneha, esinke ata doeha.
1TH 4:15 De nuha nna ri'itu rigixxi'entu le nu bele'e Jesús benne anke Xxanari'iha tti ree deki ri'i ata sa se'eri'i anka benri'i atti chi esieha, labí ri'ila lade'a tte eneruri'i tti ka benne chi uttiha.
1TH 4:16 Kumu la kwinaba Jesús benne anke Xxanari'iha eyadie dedee yebáha, tsitsiba dedo tsi'ibie runie mandadu, lhe iyiengaba tsi'i ttu ka anjeli ra xxeniru lekeha. Anágaba nna kwesigaba trompeta ge Tata Do Yebáha. La'ania nna lade'axa ka benne chi uttiha, eyaka benke, delába ka benne chi ugía leke Cristuha.
1TH 4:17 Iki de chi uka aníha, la'anialiba nna ri'i ata sa se'eri'i anka benri'i yiesi lo yu‑ni, itupa lenri'i ka benne chi uttiha, eyalhi Tata Do Yebáha ri'i lo bea‑na kini eti'ari'i benne anke Xxanari'iha lo be. Aníha kini esinri'i tse'eri'i lenie ttu dia lii.
1TH 4:18 Laxkala lebi'i len ka tisa‑ni gwalodú itta le luesile.
1TH 5:1 Ttaka la sá atti aka nuní xa betsi to, lebi'i labí riyasinle kixxi'ania le.
1TH 5:2 Kumu lebi'i gwa yu xeabale, benne anke Xxanari'iha, iyyaba lasi esiabie. Esiabe la sá attila labí ribedari'ie, unie ttiba runi ttu ubana iyyaba lasi rachadina yo'oha ttu lo rela.
1TH 5:3 Aníha‑ba sate ka benne. Ttila innáke: “Tseba se'eri'i, labí bixa aka”, la'aniala nna ttu nnelaba isia elha disa tsitsi geke, satebake attiba rate ttu nuila nuja xi'inni, ttu nnelaba chi retti lhe'eni gali xi'inni. Aníha‑ba sate ka benne, ttu nnelaba isia elha disa geke nna labí lhaake lo nuha.
1TH 5:4 Ttaka lebi'i xa betsi to, bittu tse'e xulhale. Aníha kini lebi'i abittu aka tenle tti isia sá aka nuha, kini abittu satele tti rate ttu benne ttixka iyyaba lebie riginni ttu ubana lisie.
1TH 5:5 Kumu lebi'i iyábale chi ankale ge xiani lhe ge resá lhe; ri'i labí ankari'i ge chulha, nigaba ge rela.
1TH 5:6 Laxkala ri'i abittu ga'adhiri'i tti runi adí ka benne; tse'e tennálari'i, delába tse'elari'i ubeda lhe abittu bitti uinri'i lhe.
1TH 5:7 Kumu ka nu ra'adhi‑na, relaba ra'adhi ka nuná nna ka nu dusi‑na nna relagaba ri'a ka nuná.
1TH 5:8 Ttaka ri'i ka nu chi ankari'i ge resá, abittu bitti uinri'i. Uinlari'i attiba runi ttu soldadu chi duna nuku xoni, xoni nu anka taga'a ge iyya kini abittu aka gwe latini ganna chi itilhana. Aníha‑gaba ri'i tsia tsitsi leri'i ge Tata Do Yebáha lhe akin ge luesiri'i kini abittu dhaa nu xxegwiha lori'i. Lhe anágaba uingabari'i attiba runi ttu soldadu chi duna yu'u tsitsi cascu ikini kini abittu aka gwe ikini ganna chi itilhana. Aníha‑gaba ri'i uxxen tsitsi leri'i deki godilába Tata Do Yebáha ri'i.
1TH 5:9 Kumu Tata Do Yebáha laa uxige ri'i lo neda geeha kini dhiri'i elha disa ge ka tulha ruinri'i; uxile ri'i kini len nu gwate Jesús benne anke Xxanari'iha lo ya kurusiha, len nuha odilábie ri'i.
1TH 5:10 Benneha uttie utixe geri'i kini ri'i, sila sa anka benri'i o chi uttiri'i ganna chi besieha, la'ania nna turo'oba tse'e lenri'e.
1TH 5:11 Laxkala attiba chi ruinle‑na, anába gwaltse'e gwaluni, gwalodú itta le luesile lhe gwalose'e tsitsi luesile lhe.
1TH 5:12 Betsi to, rinnabatu len lebi'i, tsia lele ka benne rixúke lo sina ge Jesús benne anke Xxanari'iha, kumu ka benne‑na nuná rise'eke arlole lhe rule'ekanie le gasina tse'ele.
1TH 5:13 Anágaba ugwele lidhakake lhe akinle geke de ruinke sina ge Jesús‑ni. Anágaba lebi'i latsiru gwaltse'e len luesile.
1TH 5:14 Rinnabagabatu len lebi'i xa betsi to kia, ulisale ka nu abittu riben sina kini kwenkana sina, lhe anágaba kweki tsitsile le ka nu chi reyadi gaakana lo neda ge Tata Do Yebáha, lhe use'e tsitsile ka nu abittu chi se'e tsitsikana lo neda geeha lhe gwalikweki besi lele len iyába ka benne.
1TH 5:15 Gwaluyú gele bittu odekile ge ka nu udhakakana le ttu bixa. Nu uinlale, satía gwaluyú tse luesile lhe anágaba gwaluin len iyá ka benne lhe.
1TH 5:16 Satía gwaludú itta lele
1TH 5:17 lhe bittu udú siile a ilhapile tisa len Tata Do Yebáha.
1TH 5:18 Ge iyá tte gwalugwe bie ixkixaru kumu aná raka lebie uinle de chi babale len Jesucristuha.
1TH 5:19 Bittu a dhielhale uin Espíritu ge Tata Do Yebáha sina lhe'e lastole
1TH 5:20 lhe bittu ku'u ni'ale tisa ge ka benne rigixxi'ake nu raka le Tata Do Yebáha unale.
1TH 5:21 Nu uinlale, iyába nu iyieninle inneke, gwalokwe lhe'eni nna suna ge nu dika ixúba gwaludo tisa
1TH 5:22 lhe anágaba bittu uinle bixaba nu satsa.
1TH 5:23 Tata Do Yebaa benne runie ki rise'eri'i xen su lasi, kwinaba benneha ocharie le ki akale nari xú, kini anáchu itúbale lhe iyába nu ruinle lhe nu rulaba lele eyakana tse. Aníha kini abittu bi ge itisale ganna chi besia Jesucristu benne anke Xxanari'iha.
1TH 5:24 Kumu Tata Do Yebaa benne uxie leha, benneha gwinbe iyá nu chi rabie, labí runnitti tisa ge benneha.
1TH 5:25 Betsi to, gwalinnabagaba getu len Tata Do Yebáha.
1TH 5:26 Gwalugwe iyá ka betsi to geri'i se'e naa ttu padiuxi getu lhe gwaligo ttu xxaga luesile lhe.
1TH 5:27 Gwaluinchi lo ni'a ge Jesús benne anke Xxanari'iha gwalulaba yetsi‑ni arlo iyá ka betsi to geri'i‑na.
1TH 5:28 Jesucristu benne anke Xxanari'iha edá lebie aka lenie le. Amén.
2TH 1:1 Neti Pablo, lenia Timoteo‑ni lhe Silvano‑ni lhe, ridhelhatu yetsi‑ni gele. Ridhelhatu na len lebi'i ka benne ritupale lhe'esi Tesalónica‑na de ankale ge Xxudiri'i do yebáha lhe ge Jesucristu benne anke Xxanari'iha lhe.
2TH 1:2 Lake edá leke aka lenke le lhe use'eke le xen su lasi lhe.
2TH 1:3 Xa betsi to, ri'itu satíaba daa lotu ugwetu Tata Do Yebáha ixkixaru gele, kumu aná dika uintu, kumu lebi'i chi diale ria tsitsiru lele ge Jesús‑ni, lhe anágaba nna kua ttu ttule chirugaba diale raka chiettiruin ge luesile.
2TH 1:4 Laxkala ri'itu rebanaba letu gele arlo adí ka benne chi ria leke Tata Do Yebáha, kumu de lebi'i chi ria tsitsi lele gebie lhe de rutto ruchíale meskiba bika ridú nookana le lhe meskiba bika ruyúle elha disa lhe.
2TH 1:5 Nu ratele‑na runna liina deki Tata Do Yebáha ruinbe attiba ankaba geni. Rugwelhabe ratele aná kini anáchu nna akale nu dika innabia Tata Do Yebáha, kumu delo ni'a ge nuná nna ratele aná.
2TH 1:6 Tata Do Yebáha, nu dika ixúba nuha unie atti ugwebie elha disa ka nu rudhaka xiikana le.
2TH 1:7 Lebi'i ka nu rudhaka xiikana nna kuabe elha disa gele, attigaba unie len ri'itu ganna chi uka xxe Jesús benne anke Xxanari'iha, dedábie yebáha lenbie ka anjeli geeha, delába ka anjeli ra tsitsi lekeha.
2TH 1:8 Dedábie lhe'e belha ge giha, kini ugwebie elha disa ka nu abittu ria lekani Tata Do Yebáha, lhe abittugaba bedokana tisa ge nu ra ka tisa ge Jesús benne anke Xxanari'iha lhe.
2TH 1:9 Ka nuná ttu dia liiba tsiakana ata tse'e lookana, iru'unabakana idittu, labí esinkana arlo Jesús‑ni lhe labí esinkana lhe'e xiani geeha lhe, delába xiani geeha nu ra tsitsi leniha.
2TH 1:10 Iyá nuní aka la sá atti esieha, kini anáchu nna iyába ka benne chi ulesie ki akake gebie, delába ka benne chi ria leke gebie, ka benneha nuha uinke kini inná xxeni lebie lhe ebanakanie gebie lhe. Anágaba lebi'i selagabale len ka benneha, kumu de gwa ugíagaba lele ge nu chi utixxi'entu leha.
2TH 1:11 De nuha nna satíaba rinnabatu gele len Tata Do Yebáha, kumu labie uxie le lo neda geeha, kini de ra tsitsi lebie nna aka lenie le, kini anáchu dhaale uinle iyába nu tse raka lele de chi ria lele gebie.
2TH 1:12 Aníha kini de lebi'i nna inná xxeni le Jesús benne anke Xxanari'iha, lhe anágaba lebi'i, de benneha nna inná xxeni lele, kumu aníha redá lebie runie, lhe aníha‑gaba redá le Tata Do Yebaa geri'iha runie lhe.
2TH 2:1 Nnanna xa betsi to, raka letu kixxi'entu le ge la sáha atti chi esia Jesucristu benne anke Xxanari'iha, delába atti etupari'i eti'ari'e gwetsáha. Rinnabatu len lebi'i,
2TH 2:2 bittu ttu nnelaba otsea elha rulaba le gele, lhe bittu gasinle ganna chi iyieninle innákana: “Aní ra Espíritu ge Tata Do Yebáha, chiba bisia sá esia benne anke Xxanari'iha” o sila innákana: “Aní chi biyienintu ra ka benne”, lhe o innákana: “Aní ra lo yetsi udhelha ka Pabluha.” Ka nu inná aníha, ukadiba innákana deki ri'ibatu udhelhatu yetsiha.
2TH 2:3 Ka nuha, ttu tsa bittu tsia lele gekani, kumu benneha labí esiaxxie axtaliba ganna chi iria ka nu ese'e disakana lo Tata Do Yebáha, la'anialiba nna tti aka xxe nubiyú ruin satsaha, delába nu tsiana ata tse'e loonaha. Iki deliba nuha nna tti esia benne anke Xxanari'iha.
2TH 2:4 Nubiyú ruin satsaha, edú disana lhe uinna deki lana ra xxeniru leni arlo iyába ka nu tee lákani diosi, lhe arlo iyába ka nu ruin ka benne le'a gekani lhe. Axtaba lhe'e yotu ge Tata Do Yebáha ga'anna dhona nna uinna deki labana nuha ankana Tata Do Yebáha.
2TH 2:5 Lebi'i gwa rexxaba lele attili sa doa len lebi'iha, gwa utixxi'abania le ge iyá nuní.
2TH 2:6 Nnanna chigaba yule bí nuha rukwedana nubiyú ruin satsaha kini abittu isiaxxina, kumu gannaliba chi gwadona la sá isianaha, la'anialiba nna isiana.
2TH 2:7 Kumu nu satsaha, sigába chi udulo nuha rakana. Nnanna nna sun tteba riyasa itua nu rukwedana nubiyú ruin satsaha,
2TH 2:8 iki deliba nuha nna tti aka xxena. Lana nuha utse'e loo Jesús benne anke Xxanari'iha na, sunruba len be iria ro'eha, lhe anágaba sun tteruba len xiani geeha utse'e looe na ganna chi besieha.
2TH 2:9 Nubiyú ruin satsaha isiana ule'ena nu xxeni ra le nu xxegwiha, delo tisaba uinna ka milagru lhe adíru ka nu dika ebaninri'i geni lhe.
2TH 2:10 Len iyá nu satsa uinnaha dhi yiena ka nu tsia nnittikana arlo Tata Do Yebáha. Lakana nuha labí begwekana lidhaka tisa nu anka gwalíha, labí benkana ki odilá Tata Do Yebáha kana.
2TH 2:11 De nuha nna rugwelhabe kana kini rixú yiekana ria lekani ge gwen lasiha.
2TH 2:12 Aníha kini ibixxi iginni iyába ka nu abittu ugía lekani ge nu anka gwalíha, sinuki uyu'urula lekani benkana nu satsaha.
2TH 2:13 Ttaka lebi'i xa betsi to, ka benne rakani Tata Do Yebáha gele, ri'itu satíaba teeki ugwetue ixkixaru gele. Ugwetue ixkixaru, kumu ttili sisi'a tteha chi bekwebie le ki odilábie le, kumu Espíritu geeha ulesie le kini akale gebie lhe anágaba kumu de gwa ugíaba lele ge nu anka gwalí.
2TH 2:14 Tata Do Yebáha nuha uxie le tti biyieninle ka tisa tse utixxi'entu leha, kini anáchu nna inná xxeni lele attiba ra xxeni le Jesucristu benne anke Xxanari'iha.
2TH 2:15 Laxkala xa betsi to, gwaltse'e tsitsi lo neda gebie lhe bittu ixulhinle a udole tisa ge nu chi bele'entu leha, sila nu bele'entu le len tisa ro'otu, lhe sila nu utixxi'entu le lo yetsi lhe.
2TH 2:16 Xxudiri'i do yebáha bedá lebie ukanie geri'i lhe ttu tsaba uleki tsitsie leri'i lhe, anágaba runie kini ruxxen leri'i deki gwadíbari'i nu tse utebie.
2TH 2:17 Labie lhe kwinaba Jesucristu benne anke Xxanari'iha udú ittake lele, lhe anágaba use'e tsitsike le kini anáchu nna uinle lhe innele iyá nu anka tse lhe.
2TH 3:1 Nnanna xa betsi to, rinnabaa len lebi'i, innabale getu len Tata Do Yebáha kini yuba chadhi ka tisa rigixxi'atu‑ni, delába ka tisa ge Jesucristu benne anke Xxanari'iha, lhe innabagabale lenie kini ka benne ugweke lidhaka ka tisa‑ni, attiba lebi'i chi begwele lidhakake.
2TH 3:2 Innabagabale lenie kini odilábie ri'itu lo ná ka nu re satsa lekani lhe lo ná ka nu ruin satsa lhe, kumu lebi'i gwa yu xeabale labí iyá ka benne chi ria leke ka tisa‑ni.
2TH 3:3 Ttaka Jesús benne anke Xxanari'iha labí runnitti tisa gebie. Benneha guse'e tsitsibe le lhe godilábe le lo ná nu xxegwiha lhe.
2TH 3:4 Ruxxen letu gebie deki lebi'i, attiba chi diale rudole tisa ge nu chi bodha'antu uinle, anába sa tsiale uinle.
2TH 3:5 Benneha gwakaba lenie le ki akale benne si'i lasi attiba Tata Do Yebáha anke benne si'i lasi, lhe uingabe kini lebi'i utto uchíale attiba labie betto bechíabie lo nu gwateeha.
2TH 3:6 Betsi to kia, Jesucristu benne anke Xxanari'iha rutebie lo neda getu ki ratu le: “Gwalukwitta kwe'e ka nu chi ria lekani Jesucristuha, delába ka nu ankakana nu lea, bittuba raka lekani bixa uinkana, lhe nigaba a ruinkana nu chi bedhetintu leha.”
2TH 3:7 Lebi'i chiba yule gasina uinle ki taxxína tti tte ruintu, kumu ri'itu tti use'etu len lebi'iha labí ukatu benne lea.
2TH 3:8 Labí kwentaba utotu yetta gele, sinuki betú besába letu urentu sina rela lhe resá lhe. Aníha bentu kini abittu unnabatu lenle nu biyasintu.
2TH 3:9 Laa innágari'i deki labí uka getu innabatu len lebi'i ki ugole ri'itu. ¡Ko'o! Gwa ukaba getu, deba nna labí uka letu innabatu lenle, kumu de raka letu ule'entu le gasina anka elha ruin getu, kini aníha‑gaba lebi'i nna uinle atti tte ruintu.
2TH 3:10 Tti sa se'etu len lebi'iha bodha'angabatu ratu le: “Ttu nu abittuba raka leni kwenna sina, abittugaba gona.”
2TH 3:11 Ratu aní kumu chi binatu ge ttu chupale bittiba ruinle rekile, labí bixa sina ruinle, sun tteruba rekile ruga'a ro'ole ata labí ralhale innele.
2TH 3:12 Jesucristu benne anke Xxanari'iha rutebie lo neda getu ki rulisatu le. Lebi'i ka nu ruinle aná gwalikwen sina ki aka gole nna abitturu utsetsinle adí ka benne.
2TH 3:13 Adíle nna xa betsi to, abittu udhanle uinle nu anka tse.
2TH 3:14 Ganna nuxa benne abittu udoe tisa ge nu ratu lo yetsi‑ni, benneha gwaludo xubenále ge nu runie nna abitturu utsálee. Aníha kini ettunie.
2TH 3:15 Deba nna bittu ise'enle lenie, latsiruba gwalulise, len tisa besiba gwalikise, gwalulise atti galába rulisari'i ttu betsi to geri'i.
2TH 3:16 Jesucristu benne anke Xxanari'iha, benneha ruse'ebie ri'i latsiru. Kwinaba labie, meskiba bixa satele nna satíaba use'ebie le xen su lasi, lhe akagaba lenie iyá ttele lhe.
2TH 3:17 Padiuxi ridhelhaa gele lo yetsi‑ni. Kwinaga neti Pablo runia nuní len letra kia, kumu aníba labiti runia xani'a iyába ka yetsi ridhelhaa. Aníba runia letra kia.
2TH 3:18 Jesucristu benne anke Xxanari'iha edá lebie aka lenie iyá ttele. Amén.
1TI 1:1 Neti Pablo ankaa apóstol ge Jesucristuha. Tata Do Yebaa benne rodilábie ri'iha lhe Jesucristu benne ruxxen leri'i geeha lhe, lake bedha'anke neti kini akaa apóstol.
1TI 1:2 Ridhelhaa yetsi‑ni gelu xa Timoteo. Lu ankalu gwalíga ttiba xi'inia, kumu de bele'enia lu ria lelu ge Jesucristuha attiba neti ria lasia gebie. Xxudiri'i do yebáha lhe Jesucristu benne anke Xxanari'iha lhe, lake edá leke aka lenke lu lhe satua leke lu, lhe anágaba uinke kini dholu xen su lasi lhe.
1TI 1:3 Tti udáya daya daka Macedonia‑ni, la'ania unnaba ditia lenlu ria, eya'anlu lhe'esi Éfeso‑na ki ulisalu ttu chupa ka nu se'e naa, kini abittu ule'ekana attu nu subi, nu abittu raxxína len ka tisa ge Tata Do Yebáha.
1TI 1:4 Ulisalu kana ki abittu tse'ekana udo nagakani ge ka cuentu ka nu abittu dika ixú o tse'ekana innekana ge nupaxa uka xuttokani itú nu reha. Ge nuná labí lhuxa loo innekana. Kumu luesi ka tisa‑na sun tteruba ruttilha ka nuná ka benne, attichula ixúkana ki use'e tsitsikana ka benne ruinke sina ge Tata Do Yebáha de chi ria leke gebie.
1TI 1:5 De nuha nna bodha'anaa lenlu kini ule'enlu ka benne akin ge luesike, kumu aná runi ttu benne rulaba lebie latsiru lhe yue deki runie nu anka tse, lhe ria lebie itú iki itú lebie ka tisa ka nu anka gwalí.
1TI 1:6 Kumu ttu chupakana chi bedhankana abitturu ruinkana aní nna ge nu abí ixúla rise'ekana rinnekana.
1TI 1:7 Ka nuná raka lekani akakana ka nu rule'e nu ra lo bia bennabi bodha'an Tata Do Yebáha, ttaka nigaba lakana a rite dákinna ge nu rinnekana lhe ge nu rigixxi'a itú iki itú lekani lhe.
1TI 1:8 Ttaka ri'i gwa yúbari'i deki tseba anka bia bennabi bodha'an Tata Do Yebáha ganna ttixka ri'i ixuinri'i na attiga anka geni
1TI 1:9 lhe anágaba tegaba ki udhá leri'i deki bia bennabi‑na laa ukaga nuná ki ukinnina ka benne runi nu dika ixú. Ko'o. Ukalana kini ukinnina ka nu rigu'u ni'akani ka tisa ge Tata Do Yebáha, lhe ka nu abittu rudokana tisa gebie lhe ka nu abittugaba ria lekanie lhe. Anágaba nna ixúgabana kini ukinnina ka nu runi tulha lhe ka nu abittu rudú xibikani arlo Tata Do Yebáha lhe ka nu riguakana bala'ana gebie lhe. Anágaba ixúgaba bia bennabi‑na ki ukinnina ka nu ruttikana ka xxudi ixnákani lhe ka nu runi elhutti lhe
1TI 1:10 ka nu rigu'u ixtúkani lhe. Anágaba nna ixúgabana ki ukinnina ka nu ankakana xanna lhe ka nu rudaxxukana ka benne nna rutto'okana ke lhe ka nu ankakana gwen lasi lhe. Anágaba nna ixúgabana ki ukinnina ka nu rákana deki nu rinnekanaha ankabana nu gwalí, ttaka nna ruinba lekani lhe ukinnigabana iyába ka nu ruinkana nu abittu raxxína len nu tse rule'eri'i,
1TI 1:11 delába rule'eri'i nu tse dia lo ka tisa bodha'an Tata Do Yebaa benne ra xxeni leha lhe anke le'a lhe. Benneha nuha bodha'ane lasi náya kini kixxi'aya ka tisa‑ni.
1TI 1:12 Ixkixaru rugwea Jesucristu benne anke Xxanari'iha. Labie bedú tsitsie neti kumu de bexxen lebie neti ki akaa benne ixúnie lo sina gebie,
1TI 1:13 meskiba ttuha ukaa benne unne satsaa gebie lhe anágaba udú nooa ka benne chi bedaxxuke neda gebie lhe bedhakaa ke attiba rakaba lasia. Ttaka Tata Do Yebáha gwa gwatuaba lebie neti kumu de labí chi ria lasia la'ania, nigaba a yua bixa nuha runia.
1TI 1:14 De nuha nna Tata Xisiha bedá lebie uka lenie neti ki ria lasia gebie lhe kini rakati ge ka benne de chi dua len Jesucristuha.
1TI 1:15 Tisa nu gwalíba nuní rinnea lhe tisa nu dika tsia le ka benne geni lhe, delába Jesucristuha bisiabie yiesi lo yu‑ni kini odilábie ka benne ruin tulha. Delo iyá ka benne ruin tulha, netiba nu ben satsaru.
1TI 1:16 De nuha nna Tata Do Yebáha gwatua lebie neti kini Jesucristuha bele'ebie nu re besi leeha len neti, kini anáchu nna iláni adíru ka nu ruin tulha nna tsia lekani gebie. Aníha kini de tsia lekanie nna aka benkana ttu dia lii.
1TI 1:17 Laxkala satía uinri'i kini inná xxeni le Tata Do Yebaa benne rinnabie ttu dia liiha. Benneha labí rattie lhe nigaba labí rilenri'e lhe. Anágaba nna ankagabe ttu túbiru diosi, lhe yue iyá tte lhe. Amén.
1TI 1:18 Timoteo, xi'ini to, nnanna rodha'anaa lenlu ki uinlu doelha abittu gasinlu tti uinlu sina ge Tata Do Yebáha. Beni nu chi ga'ananie uinlu, benba attiba chi utixxi'a ka betsi to geri'iha, delába nu ra Tata Do Yebáha uinlu.
1TI 1:19 Ugía tsitsi lelu, beni nu rudhaka lelu deki anka tse, kumu se'e ttu chupa ka nu labí betabikinna ge nu anka tse, de nuha nna binittikana a ugíaru lekani.
1TI 1:20 Aníha‑ba ben Himeneo‑ni lenna Alejandro‑ni. Lakana chi betea kana lasi ná nu xxegwiha. Aníha kini udhetikana abitturu kuakana bala'ana ge Tata Do Yebáha.
1TI 2:1 Lade'a tte rinnabaa lenlu, galu ka benne ria leke Jesucristuha ilhapike tisa len Tata Do Yebáha, innabake lenie ge iyá tte ka benne lhe ugweke bie ixkixaru lhe.
1TI 2:2 Innabake ge ka nu rinnabia‑na lhe ge adíru ka nu nalha ladikinna lhe, kini anáchu tse'eri'i latsiru abittu tse'e tilhari'i, udola leri'i nu anka ge Tata Do Yebáha lhe tsia le luesiri'i lhe,
1TI 2:3 kumu nuní ankana ttu nu tse lhe ankana ttu nu ru'u le Tata Do Yebaa benne rodilábie ri'iha, kini abittu tsia nnittiri'i.
1TI 2:4 Benneha raka lebie lhaa iyá ka benne se'e yiesi lo yu‑ni lhe isinke uinbiake nu anka gwalí lhe.
1TI 2:5 Kumu ttúruba Tata Do Yebáha do lhe ttúrugaba benne do ki rose'e tsebie ri'i len Tata Do Yebáha, delába Jesucristuha. Lee nuha uke benne attiba ankari'i.
1TI 2:6 Benneha betebie elha nabani gebie, uttie ki utixe ge ka tulha ge iyábari'i. Labie bisie la sá atti chi ga'anani Tata Do Yebáha, kini len nu gwateeha bele'e Tata Do Yebáha nu raka lebie unie lenri'i.
1TI 2:7 De lo ni'a ge nuní nna biyaxia ki akaa apóstol, kini kixxi'aya ge Jesucristuha, lhe anágaba akagabaa benne ule'enia ka nu abittu ankakana nu Israel, kini tsia lekani ge Tata Do Yebáha lhe tsia lekani ge nu anka gwalí lhe. Gwalígati xa, labí ruin lasia.
1TI 2:8 Laxkala nu raka lasia uin ka benne biyú‑na, gaxaba se'eke inneke ulisake Tata Do Yebáha. Aná nna akake benne ruin latsiru lhe abittu elha rise'iki geke gatta, nigaba elha utilha lhe.
1TI 2:9 Anágaba ka benne nuila‑na, latsiru tse'e xoke, ukuba xoke attiba ankaba geni; bittu uinke ttaba, nigaba ttebiake olhí ikike lhe abittugaba ixúkanie oru lhe perla lhe, nigaba ukuke ka xoke ka nu daka xxatta.
1TI 2:10 Sinuki uinlake nu anka tse nu raxxína len nu ruin ka benne nuila rudo leke nu anka ge Tata Do Yebáha.
1TI 2:11 Ka benne nuila‑na siiba akake, udoba nagake tti lo rigixxi'a ka benne ka tisa ge Tata Do Yebáha lhe bittugaba ekabike ge ka benneha lhe.
1TI 2:12 Labí raka lasia ka benne nuila‑nala tse'eke ule'eke, nigaba innabiake ka benne biyú‑na, sinuki siiba akake,
1TI 2:13 kumu Tata Do Yebáha benie Adán‑ni lade'a tte, delola nna benie Eva‑ni.
1TI 2:14 Nigaba laa Adán‑niga nuha uxí yie nu xxegwiha, sinuki nuilaha‑la nuha uxí yiena kini benna tulha.
1TI 2:15 Ttaka nuilaha gwalábana de tse'e xi'inni, aná nna dhona tsia leni ge Jesús‑ni lhe akana ttu benne si'i lasi lhe. Anágaba nna dhona akana ttu benne nari xú arlo Tata Do Yebáha lhe uinna attiba ankaba geni lhe.
1TI 3:1 Nu rinnea‑ni nu gwalíba anka nuní: ganna nuxa ttu benne raka lebie dhue arlo ka benne chi ria leke ge Cristuha ki ule'enie ke, tseba anka sina re le benneha unie.
1TI 3:2 Ttaka tee ki ake ttu benne abittu runie ttu nu dika itise geni, lhe ake nu do leni ttúba nuila, lhe anágaba ake nu du itá leni, lhe ake ttu benne lade'axa ulaba lebie tti unie ttu bixa, lhe anágaba nna ake ttu nu runi sipa, lhe ake ttu benne jeru tte raxie ka benne lisie, lhe ake benne gwaka gebie ule'enie adí ka benne,
1TI 3:3 lhe anágaba nna abittu ake ttu nu ri'a, lhe bittu ake nu rigila elha utilha lhe. Anágaba nna abittu ake nu ru'u xxatta leni belhiu. Nu uinlee, akalee ttu benne si'i lasi, lhe ttu benne re besi lebie.
1TI 3:4 Lhe akagabe ttu benne rinnabia lhe'e lisie latsiru, lhe anágaba ka xi'inieha akagabakana ka nu rudokana tisa gebie lhe tsia lekanie lhe.
1TI 3:5 Kumu ttu benne ganna abíba raka gebie innabie lhe'e lisie, ¿gasina aka ge benneha ulhenie ka benne chi ria leke Tata Do Yebáha?
1TI 3:6 Anágaba nna abittu ake ttu nu si bedaxxube neda ge Tata Do Yebáha, kini ka ake ttu nu uin ttaba nna ibixxi iginnie attiba ubixxi biginni nu xxegwiha.
1TI 3:7 Anágaba nna teeki aka benneha ttu nu ruin latsiru, kini anáchu, tti iláni ka nu abí ria lekani Cristuha nna abittu tee ro'okani kuakana bala'ana gebie nna iginnie lo yalhi ge nu xxegwiha.
1TI 3:8 Anágaba adí ka benne galha ladike ki ute náke len ka benne chi ria leke ge Cristuha, ka benneha tee ki akake ka nu dika tsia le ka benne ke, lhe akake ka nu abittu rigitta náke, lhe anágaba teeki akake ka nu abittu ri'iya xxatta, lhe abittugaba akake ka nu rotsi'inu leke gaxasina uinke ki galhike belhiu ge ka benne.
1TI 3:9 Anágaba nna teeki akake ka benne abittu udhanke a tsia leke nu chi bela'ani Tata Do Yebáha ke ge Cristuha, kumu lake yuke deki nu ruinkeha gwa ankabana tse, abittu rudheana loke.
1TI 3:10 Aná nna lade'axa tsu'uke prueba. Ganna si abittuba tee ttu bixa itisake geni, la'anialiba nna chi dhi ladike ki ute náke len ka benne chi ria leke Cristuha.
1TI 3:11 Anágaba ka benne nuila‑na tee ki akake ka nu dika tsia le ka benne ke, lhe akagabake ka nu abittu rilhidha tisa a ixú, lhe akake ka nu du itá leke lhe. Anágaba nna akake ka nu gwa ruinbake iyá nu rákeha.
1TI 3:12 Ka benne biyú galha ladikeha tee ki akake benne do len ttúba nuila, lhe innabia tseke ka xi'inke lhe adíru ka benne se'e lhe'e lisike lhe.
1TI 3:13 Kumu ka benne nalha ladike ki rute náke len ka benne chi ria leke Cristuha, ka benneha ganna ruin tseke nu daa loke uinke, la'ania nna gweyyaba le ka benne ke lhe anágaba nna isinke tsia tsitsiru leke ge Jesucristuha.
1TI 3:14 Lu nna Timoteo, ruxxen lasia deki chi tteba itaa etelannia lu, ttaka runia nuní lo yetsi‑ni nna ridhelhaa na lenlu,
1TI 3:15 kini ni kina isábaa abíba isia xxia, la'ania nna chi yulu gasina teeki uinlu len ka xi'in Tata Do Yebáha, delába ka benne chi ria leke bie. Ka benneha ankake attiba ttu betubi se'e tsitsike, denke ka tisa ka nu gwalíga ankake ge Tata Do Yebaa benne anka baniha.
1TI 3:16 Gwalí galá, itú ttuha xxeniba anka nu labí yu ka benne ge Cristuha, delába labí yuke deki benneha bisiabie yiesi lo yu‑ni uke benne attiba ankari'i, nna Espíritu ge Tata Do Yebáha bele'enie ri'i deki benneha uke benne tse. Anágaba nna bilágabin ka anjeli ge Tata Do Yebáha bie, lhe biyiengabani ka nu abittu ankakana ka nu Israel ka tisa geeha, lhe anágaba nna ugíagaba le ka benne se'e yiesi lo yu‑nie. Iki deliba nuha nna tti bedí Tata Do Yebáha bie kini besine yebáha.
1TI 4:1 Espíritu ge Tata Do Yebáha lhixxa rába rigixxi'e ree, atti chi dabiga isia ka sá daluxaha, la'ania ttu chupa ka nu chi ria lekani ge Cristuha, udhanlakana labíru tsia lekanie. Udola nagakani ge ka nu ruin lekani lhe udola nagakani ge ka nu rule'ekana nu ra ka espíritu xxegwiha.
1TI 4:2 Ka nuha labíru raka tékinna ge nu ruinkanaha. Delo tisaba ruinkana deki tseba rigixxi'akana, ttaka ruinba lekani.
1TI 4:3 Usunagabakana utsá ná ka benne lhe usunagabakana gori'i iyá nu chi ga'anani Tata Do Yebáha gori'i. Kumu labie chi benie nuha ki akana nu dika gori'i, kini anáchu nna ka benne ria leke Cristuha lhe ka benne chi yuke ka tisa ka nu anka gwalí, tti goke nu chi ga'ananie gori'iha nna ugweke bie ixkixaru.
1TI 4:4 Kumu tseba anka iyába nu ben Tata Do Yebáha. Laxkala labí dika udelha lattiri'i nu benieha, ladiba ganna ugweri'e ixkixaru tti gori'i benneha.
1TI 4:5 Kumu len ka tisa ge Tata Do Yebáha lhe len ka tisa rinneri'i tti rinnabari'i lenie, len ka benneha rocharie benne rori'i.
1TI 4:6 Ganna iyá nuní ule'enlu ka betsi to geri'i‑na, la'anialigaba nna gwankalu ttu benne ruin tselu sina ge Jesucristuha, kumu de deti tsitsilu ka tisa ria leri'i‑na, ka nu chi bela'akanie lu, delába ka tisa ka nu rudogabalu tisa gekani.
1TI 4:7 Abittu udo nagalu ge ka cuentu a ixú, ka nu bittu dika tsia leri'i gekani. Lu benla doelha bedo lelu nu anka ge Tata Do Yebáha.
1TI 4:8 Kumu ttu nu rudhetina ruxunnina kini aka tsitsi latini, ttu sattiruba ixú nu ruinnaha lenna, ttaka ri'i ka benne rudo leri'i nu anka ge Tata Do Yebáha, ge iyá tte ixú nu ruinri'iha: ixúna lenri'i nnanna se'eri'i anka benri'i yiesi lo yu‑ni lhe ixúgabana lenri'i ganna chi se'eri'i yebáha.
1TI 4:9 Tisa rinnea‑ni ankabana nu gwalí lhe nu dika tsia le iyá ka benne lhe.
1TI 4:10 De nuha nna rateri'i lhe ruinri'i doelha kumu ruxxen leri'i ge Tata Do Yebaa benne anka baniha. Benneha anke benne rodilábie iyá tte ka benne. Ka benne ria leke ge Cristuha, ka benneha nuha lade'a tte rodilábie ke.
1TI 4:11 Ge iyá nu rigixxi'aya‑ni, bele'ekin benne lhe usi ke udoke tisa geni lhe.
1TI 4:12 Ben kini abittu ku'u ni'ake lu de ankalu nu kwiti. Ben latsiru kini ka benne ria leke ge Cristuha, tti ilákanie elha ruin gelu‑na, la'ania nna aníha‑gaba uinke. Latsiru unne lhe latsiru beni. Anágaba nna akagabinlu ge ka benne lhe beni kini ule'e deki gwalínlu ria lelu Cristuha, lhe ben taga'a nu anka tse lhe.
1TI 4:13 Laka neti esiaya nna lu belaba ka tisa ge Tata Do Yebáha arlo ka benne lhe belisa ke lhe bele'e kanie gaxasina tse'eke.
1TI 4:14 Abittu uxxulha lelu a ixuinlu elha tse rapalu‑na. Nuná bete Tata Do Yebáha lenlu tti uxxua ná ka benneola geri'iha ikilu nna utixxi'akanie lu nu ra Tata Do Yebáha deki uinlu.
1TI 4:15 Nuní bedo lelu lhe nuní beni lhe, kini anáchu iláni iyá ka benne deki gwa diabalu rakaru gelu.
1TI 4:16 Biyú gelu, latsiru beni lhe latsiru bele'eni ka benne lhe. Nuná bedo lelu beni, kumu ganna aná uinlu, la'ania nna gwalábalu abittu tsia nnittilu lhe gwalágaba ka benne udo nagake gelu lhe.
1TI 5:1 Abittu ulisa disalu ttu benne biyú chi diarunie ida. Belisalee attiba rulisalu ttu xxudilu. Ka nu kwiti‑na nna belisa kana attiba ttu betsilu.
1TI 5:2 Ka benne nuila chi diarukanie ida‑na nna belisa ke attiba rulisalu ttu ixnálu, nna ka nuila kwiti‑na nna belisa kana attiba ttu danlu, abittu bixa ulaba lelu gekani.
1TI 5:3 Ka benne nuila bidabi‑na aka lenlu ke ata anutturu nu banikanie.
1TI 5:4 Ttaka ganna ttu benne nuila bidabi gwa se'eba xi'inie o xidhoe, ka nuha xa lade'a udhetikana uyúkane. Aníha kini odekikana ge nu chi biyúe kanaha, kumu aníha anka tse lhe aníha ru'u le Tata Do Yebáha lhe.
1TI 5:5 Benne nuila bidabi chi beya'an ttu túbibeha, benneha nna ge Tata Do Yebáha‑ba ruxxen lebie nna labí rudú siie rilhapie tisa, rela resába rinnabe gebie len benneha.
1TI 5:6 Ttaka ganna ttu nuila bidabi rekina ruinna nu rakaba leni, sa do benla nuha yiesi lo yu‑ni, chi ankana yatti arlo Tata Do Yebáha.
1TI 5:7 Iyá nuní bele'ekin benne kini abittu bi ge itisake.
1TI 5:8 Kumu ttu nu abíba ruchacha ikini ge ka benne geni, nuha ganna abíba lade'axa uchacha ikini ge ka benne se'e lhe'e lisini, nu runi aní chiba bedhan nuha a riaru leni Cristuha nna adírula satsa nuha chi ruin nuha attichula ttu benne abittu chi ria lebie.
1TI 5:9 Debá ka benne nuila bidabi chi ankakanie gayuna (60) ida, debá ka benne‑na nuná chi ralhake ibabake len ka nan to bidabi to‑na, ki ute nále lenke. Aná nna teeki ukake nuila udo len ttúba nubiyú,
1TI 5:10 lhe daa tisa deki gwa ruinbake iyá nu anka tse lhe; delába gwa biyú tseba xi'inke, lhe karrila tte raxike ka benne lisike, lhe gwankake ka benne rigíke ni'a ka benne chi ankake ge Tata Do Yebáha, lhe rute náke len ka benne ruyúke ttu bixa elha disa, lhe gwa rudona leke ruinke iyá nu anka tse lhe.
1TI 5:11 Ttaka ka nuila bidabi ka nu ankaru kwiti‑na, labí chi ibaba ka nuná len ka nan to bidabi to‑na, delába ka benne chi ralhake ute nále lenke. Kumu ka nuná, tti reta le latikani bixa uinkana, la'ania nna raka lekani otsá nákani nna labíru rudo lekani nu anka ge Cristuha.
1TI 5:12 Tti ruinkana aníha, tulhaba nuha chi dákana, kumu labíru ruinkana nu chi rákana Tata Do Yebáha deki uinkana, delába ixúkana lo sina geeha.
1TI 5:13 Anágaba nna ridetigabakana rakakana nu lea lhe rakakana nu dataa lhe reriakana ttu yo'o nna radita'akana attu yo'o. Anna laa suna nu learuga reyakakana, anágaba nna rekigabakana gwette tisa a ixú lhe ruga'a ro'okani ata labí ralhakana innekana lhe anágaba rinnegabakana nu labí dika innekana.
1TI 5:14 Laxkala raka lasia, ka nuila bidabi kwiti‑na otsála nákani, lhe uyúlakana ka xi'inkani lhe ulhíla lekani lhe'e lisikani lhe. Aníha uinkana kini ka nu abittu raka uyúkana kanaha, abittu tee ro'okani bixa innekana gekani,
1TI 5:15 kumu ttu chupa ka nuila‑na chi bekwittakana lo neda ge Tata Do Yebáha nna nu xxegwiha‑la chi danalhakana.
1TI 5:16 Ganna ttu benne nuila ria lebie Cristuha se'e ka nuila bidabi raka luesie, benneha teeki ute nee len ka nuila bidabi raka luesieha, kini adí ka benne ria leke Cristuha nna abittu uchacha ikike ge ka nuha, sinuki utela náke len ka nuila bidabi ka nu gwalíga anutturu nu banikanie.
1TI 5:17 Ka benneola ka benne rinnabiake le latsiru, ka benne‑na nuná ralhake uyú tsele ke lhe tsia lele ke lhe. Ttaka ka benneola ka benne rigixxi'ake lhe rule'eke ka tisa ge Tata Do Yebáha, ka benne‑na nuná rakarula doelha uyú tserule ke lhe tsia tsitsiru lele ke,
1TI 5:18 kumu lo ka yetsi ge Tata Do Yebáha dia ra: “Abittu ku'ulu yexxa ro'o ka ku'una rulea iki xuxtilaha.” Lhe anágaba diagaba ra: “Nu riben sinaha ralhaba nuha dhi lhiaxani.”
1TI 5:19 Ganna nuxa ukinnina ttu ka benneola ridú arlo ka benne chi ria leke Cristuha, abittu tsiaxxi lelu ge nu inná nu ukinnina benneha. Axtaliba ganna se'e chupa o tsunna ka benne bilákanie bixa ben benneha, la'anialiba nna tsia lelu ge nu rukinnina benneha.
1TI 5:20 Ka nu abittu rudhankana ruinkana tulha, ka nuná utisa kana arlo iyá ka benne, kini adíkana gasikinna nna abittu uinkana aná.
1TI 5:21 Arlo Tata Do Yebáha lhe arlo Jesucristuha lhe arlo ka anjeli chi ulesie ki akake gebie, arlo ka benne‑ni rodha'anaa lenlu ki uinlu nu rinnea‑ni. Bittu tserula uinlu len ttu benne tti len adí ka benne; tu tulapaba uinlu len iyábake.
1TI 5:22 Abittu iyubaxxinlu ixxua nálu iki ttu benne raka lebie ixúe lo sina ge Tata Do Yebáha. Kumu ganna benneha runie bixa ttu nu satsa, la'ania nna iyágabalu tsia kwe'elu nu ruin benneha. Lu udola, beni nu anka tse.
1TI 5:23 Lu Timoteo, de satti balhaba rulhabina gelu lhe ranilu lhe, abittu suna indaba i'iyalu, u'uyala latti vinu.
1TI 5:24 Se'e ka benne rilá loo tteba tulha ruinke atti lanila iso duke aka elhuxtisi geke. Ttaka se'e adíke nna deloliba rilá loo ge nu ruinkeha,
1TI 5:25 nna ka benne ruin tseke, rilá tteba nu tse ruinkeha nna ka benne abíba rilá nu tse ruinkeha nna gwasiaba sá tti ilá nuha.
1TI 6:1 Iyá ka benne selake len lebi'i, ka benne to'oke lo sina ge ka xxanake, teeki tsia leke ka xxanake‑na, abittu elhapi ro'oke ka benne‑na, kini abittu itua bala'ana ge Tata Do Yebáha lhe abittu itua bala'ana ge ka tisa rule'eri'i‑ni lhe.
1TI 6:2 Ka benne se'e ka xxanake chi ria leke Cristuha, abittu de chi ria le ka benneha nna udhanke a tsiaru leke ke. Ko'o. Nu uinlake kwen tserulake lo sina ge ka benneha, kumu de chi yuke ka benne ruteke sina gekeha chi ankake betsike lhe rakani Tata Do Yebáha geke lhe. Timoteo, nuní bele'eni ka benne lhe nuní usi ke udo leke lhe.
1TI 6:3 Ganna ttu benne rule'ebie attu tisa subi, nu abittu raxxína na len ka tisa tse bele'e Jesucristu benne anke Xxanari'iha, lhe nigaba a raxxína na len ka tisa ka nu rule'ekinna ri'i gasina uinri'i nu dika tsu'u le Tata Do Yebáha,
1TI 6:4 nu rule'e aníha ttababa nuha chi ruin nuha, lhe nigaba labí raka geni lhe. Chiba labin nuha ruttilha ro'oni ge ka tisa a ixú. Delo ni'a ge nu ruinnaha nna ritisin luesi ka benne, lhe ritilha len luesike lhe. Anágaba nna riguagaba bala'ana ge luesike, lhe labíru ria le luesike lhe.
1TI 6:5 Satíaba ritilha tisake. Ka nu rule'ekana aní chiba riganna iki ka nuná, labíru yani do ikikani ki tte dákinna ge nu anka gwalí. Lakana rakakinna de udo lekani nu anka ge Tata Do Yebáha, de uinkana aníha nna kweakana belhiu len ka benne. Ka nu ruin aná, lu Timoteo, bekwitta kwe'e ka nuná.
1TI 6:6 Gwalí galá, ri'i xxeniba anka elha tse tee geri'i de rudo leri'i nu anka ge Tata Do Yebáha, ladiba ganna gwa reyaka xenruba leri'i ttixaruba tee geri'i.
1TI 6:7 Kumu tti bisiari'i yiesi lo yu‑ni labí bi cheri'i, anágaba ganna chi eya'ari'iha labí bi echeri'i.
1TI 6:8 Laxkala ganna gwa teeba nu rori'i lhe gwa teeba nu rukuri'i lhe, ukare'aba len nuha eyaka xen leri'i.
1TI 6:9 Kumu ka nu raka lekani gatta xxatta gekani, nnela rixú yie ka nuná ruinkana nu abittu dika ixú lhe ridá lekani ruinkana nu abittu anka tse lhe. Nu ruinkanaha, ttu tsaba runnitti nuha kana.
1TI 6:10 Kumu ka nu ridá lekani belhiu, de ruinkana aníha nna raka xxe iyá looba nu satsa. Aní ria kumu se'e ttu chupa ka benne ria leke Cristuha nna chi bedhanke a riaru leke ge benneha, de ridá leke gatta belhiu geke. De lo ni'a ge nuha nna ixeba nu rateke.
1TI 6:11 Ttaka lu xa Timoteo, lu ankalu benne rixúni Tata Do Yebáha. De nuha nna abittu uinlu tti ruin ka nuná. Bedola lelu ben nu dika ixú arloe, lhe bedola lelu nu anka gebie lhe. Anágaba nna bedogaba lelu ki tsiaru lelu ge Cristuha, lhe bedola lelu akinlu ge ka benne, lhe bechía lo nu ratelu‑na lhe. Anágaba nna akalu benne re tse lelu.
1TI 6:12 Kumu de ria lelu ge Cristuha, de nuha nna ben doelha ugía ben sina gebie. Beni kini gatta elha nabani gelu ttu dia lii, kumu de nuha‑la uxi Tata Do Yebáha lu lhe de nuha‑la latsiruba unnelu tti utixxi'alu arlo ixe ka benne ralu ke deki chi ria lelu ge Cristuha.
1TI 6:13 Nnanna nna arlo Tata Do Yebaa benne rutebie elha nabani ge iyá tte nu benie, delába iyá nu se'e yiesi lo yu‑ni, lhe arlo Jesucristu benne unnebie nu anka gwalí tti biso due arlo Poncio Pilato‑ni, arlo ka benne‑ni rodha'anaa lenlu
1TI 6:14 udolu tisa ge iyá nu chi xpeya lu. Abittu utsealu nu chi ria‑ni. Aníha kini abittu bi ge itisalu ganna chi besia Jesucristu benne anke Xxanari'iha.
1TI 6:15 Benneha esiabie la sá tti chi ga'anani Tata Do Yebáha esiabie. Tata Do Yebáha anke le'aha lhe sunruba labie ra xxeni lebie lhe. Labie anke Xxana ka nu ra xxeni lekani lhe anke Nu Loni ge iyá ka nu rinnabia lhe.
1TI 6:16 Sunruba labie anke benne labí rattie, lhe sunruba labie doe lhe'e xiani ata lanú nu aka geni isinna ata doeha, lhe ni ttu benne labí chi bilánie benneha, nigaba labí aka geri'i ilenri'e. Benneha nuha ralhe inná xxeni lebie lhe ralhe ake benne rinnabie ttu dia lii lhe. Amén.
1TI 6:17 Ka nu tee gekani se'e yiesi lo yu‑ni usi kana abittu uinkana ttaba, nigaba uxxen lekani ge elha tse tee gekani, kumu elha tse tee gekinna eyába nuná. Ge Tata Do Yebaa benne anka baniha‑la uxxen lekani. Benneha rutebie iyá tte nu riyasinri'i lhe rute tame geri'i kini ri'i edí baari'i nu ruteeha.
1TI 6:18 Usi kana uinkana latsiru, uinkana iyá nu anka tse, lhe edá lekani itú iki itú lekani utekana nu tee gekani len ka benne.
1TI 6:19 Ganna aníha uinkana, la'ania nna gudienrula elha tse gekani nu si daa, kini aníha‑chu nna esinkana aka benkana ttu dia lii.
1TI 6:20 Xa Timoteo, ben nu chi bodha'an Tata Do Yebáha uinlu. Bittu udo nagalu ge ka tisa abittu ixú lhe ge ka tisa ka nu abittu daka lhe. Nigaba udo nagalu ge ka tisa nu ra ka benne deki rutekana elha yuu geri'i, ttaka labí lii deki rutekana elha yuu geri'i.
1TI 6:21 Kumu ttu chupakana, ge ka tisa‑nala bedo nagakani nna biriesikana lo neda ge Tata Do Yebáha, labíru ria lekani attiga ankaga geni. Tata Do Yebáha aka lenie lu xa Timoteo. Amén.
2TI 1:1 Neti Pablo ankaa apóstol ge Jesucristuha. Tata Do Yebáha bedá lebie kini akaa apóstol kini kixxi'ania ka benne nu chi rabie unie, delába unie ki aka benri'i ttu dia lii de babari'i len Jesucristuha.
2TI 1:2 Ridhelhaa yetsi‑ni gelu xa Timoteo, xi'ini to kia. Xxudi do yebaa geri'iha lhe Jesucristu benne anke Xxanari'iha edá leke aka lenke lu lhe satua leke lu lhe, anágaba uinke kini dholu xen su lasi lhe.
2TI 1:3 Satíaba rugwea Tata Do Yebáha ixkixaru tti rexxa lasia lu. Rela lhe resá lhe rudettia lu tti rilhapia tisa lenie. Itú iki itú lasia runia sina gebie attiba ben ka benneola kiaha, kumu neti yu xeabaa labí runia ttu bixa nu udheana loa.
2TI 1:4 Tti radú lasia gasina ribesiluha, la'ania nuha yalhá raka lasia iláti lu kini edú itta lasia.
2TI 1:5 Lhe radúgaba lasia gasina ria lelu ge Cristuha itú iki itú lelu. Riaba lelu attiba ugía le nan xxen gelu Loida‑ni. Lade'a tte benneha ugía lebie, delola nna tti ugía le nan gelu Eunice‑ni. Neti yu xeabaa anágaba lu riagaba lelu.
2TI 1:6 De nuha nna rodhua lelu, bedulo bodo lelu elha tse bete Tata Do Yebáha gelu, delába elha tse betebie gelu atti uxxua náya ikiluha.
2TI 1:7 Kumu Tata Do Yebáha laa benge ri'i kini akari'i benne gasinri'i, sinuki benlee ri'i kini akari'i nu kweki tsitsi leni lhe akari'i benne si'i lasi, lhe anágaba akari'i benne innabiari'i elha ruin geri'i lhe.
2TI 1:8 Laxkala abittu ettuinlu tti kixxi'alu ka tisa ge benne anke Xxanari'iha, nigaba ettuinlu kia de tea lisiyya de runia sina gebie. Nu uinlalu betto bechíala lo elha disa ratelu de rekilu ugixxi'a ka tisa ge Jesucristuha, ttiba neti gwa rutto ruchíabaa. Tata Do Yebaa benne ra tsitsi leeha, benneha unie ki dhaalu utto uchíalu lo nu ratelu‑na.
2TI 1:9 Benneha bodilábie ri'i kini abittu tsia nnittiri'i lhe anágaba uxie ri'i kini akari'i gebie. Laa uxige ri'i de ruin tse xxattari'i. ¡Ko'o! Uxie ri'i kumu aníha‑ba chi ga'ananie unie lenri'i attili lani kwe yiesi lo yu‑ni. La'aniali chi bedá lebie uxie ri'i de chi babari'i len Jesucristuha.
2TI 1:10 Ttaka nnanna chi rule'e Tata Do Yebáha nu tse redá lebie unie lenri'i de chi bita Jesucristuha yiesi lo yu‑ni, delába Jesucristu benne rodilábie ri'i. Benneha utuabie elhutti geri'i lhe anágaba bele'enie ri'i, ganna tsia leri'i ka tisa tse, delába ka tisa rigixxi'a geeha, la'ania nna gwaka benbari'i ttu dia lii, labí gattiri'i arloe.
2TI 1:11 Tata Do Yebáha bedha'ane ka tisa‑ni len neti ki akaa benne ichea ke lhe kixxi'aya ke lhe ule'a ke lhe.
2TI 1:12 De rigixxi'aya ka tisa‑ni nna ratea iyá nu ratea‑ni, ttaka labí rettuti, kumu gwa yubaa nú ge ria lasia lhe yu xeabaa deki benne ria lasiaha, tsitsi ra le benneha nna guyúbe iyá nu bodha'ane lasi náya axtaliba ganna chi bisia sá esia Jesucristuha.
2TI 1:13 Beni nu ra ka tisa tse utixxi'ania luha. Bele'e deki gwa ria lelu Jesucristuha lhe bele'e deki gwa rakinlu ge ka benne de babalu len benneha.
2TI 1:14 Espíritu ge Tata Do Yebaa benne doe lhe'e lastori'i, benneha unie kini kixxi'alu tti ttega ra ka tisa bodha'an Tata Do Yebáha lasi nálu.
2TI 1:15 Lu chiba yulu, iyába ka nu ria lekani Cristuha ka nu se'e daka Asia‑na bedhába ikikani neti, lenkana Figelo‑ni lhe Hermógenes‑ni lhe.
2TI 1:16 Ka benne se'e lisi Onesíforo‑ni nna satuachi le Tata Do Yebáha ke, kumu Onesíforo‑ni labí bettuinna kia de yayaa lisiyya. Ixe lidú bitana betedú ittana lasia.
2TI 1:17 Tti bisiana Roma‑ni ugweki ttebana begilana neti nna betexxakalibana neti nna beyaka xen leni.
2TI 1:18 Tata Xisiha satuachi lebie na ganna chi bisia sá eso duri'i arloe. Lu gwa yu xeabalu yalhá bixúna len neti tti udoa lhe'esi Éfeso‑na.
2TI 2:1 Lu xa Timoteo, xi'ini to kia, tsitsi udú lo neda ge Tata Do Yebáha kumu lee redá lebie raka lenie lu de babalu len Jesucristuha.
2TI 2:2 Nu chi biyieninlu unnea arlo ixe ka benne, nuha bela'ani ka nubiyú ka nu dika uxxen leri'i gekani lhe anágaba gwaka gekani ule'ekinna adí ka benne lhe.
2TI 2:3 Lu Timoteo, attiba ruin ttu soldadu rutto ruchíana lo nu ratenaha, aníha‑ba lu betto bechía lo nu ratelu‑na de babalu len Jesucristuha.
2TI 2:4 Kumu ttu benne biyaxie kini ake soldadu, labí dika attu sina subila unie. ¿Laaba ganna teeki unie nu ru'u le nu uxineha kini ake soldadu?
2TI 2:5 Anágaba ganna ttu nubiyú selana gwitta, ganna nuha abíba udona tisa ge iyá nu ga'anna uinna tti diana ruxunninaha, la'ania nna labí dhi nuha nu ralhana dhina
2TI 2:6 lhe anágaba ganna ttu nubiyú regu'elha leni ribenna sina lo ka yuha, lana nuha lade'a tte edína lena exú lo ka nuha.
2TI 2:7 Belaba lelu ge nu xpeya lu‑ni, nna Tata Xisiha gutebe elha rieni gelu ki tte denlu iyá tte.
2TI 2:8 Bodhú lelu ge Jesucristu benne datiabie David‑ni. Benneha beyaka benbe lo elhuttiha ttiba ra ka tisa tse, delába ka tisa rigixxi'aya gebie.
2TI 2:9 De ka tisa‑ni nna rate xxattaa tea lisiyya‑ni, axtaba xigaa cadena ttiba ttu nu ben elhutti; ttaka ka tisa ge Tata Do Yebáha gwakaba ge ka benne kixxi'ake ka benneha, kumu labí xika ka tisaha.
2TI 2:10 Neti lo iyába nu ratea‑ni rutto ruchíaya; runia kini ka benne chi bekwe Tata Do Yebáha saría tsena ke, kini anágaba ka benneha nna gwaláke de babake len Jesucristuha lhe edí baake nu tse tee ttu dia lii yebáha lhe.
2TI 2:11 Tisa nu gwalíba nuní rinnea. Kumu ganna ri'i chi uttiri'i len Cristuha, la'ania nna gwesingabari'i tse'e lenri'e,
2TI 2:12 lhe ganna uchíari'i lo elha disa rateri'i, la'ania nna gwannabiagabari'i lenie, lhe ganna ri'i abíba dhi ro'ori'i deki ankabienri'e, anágaba lee nna innágabe labí ankabianie ri'i,
2TI 2:13 lhe ganna ttixka ri'i abíba ruinri'i nu chi rari'i deki uinri'i, ttaka benneha nna gwa ruinbe nu chi rabie unie, kumu benneha ttu tsa labí runnitti tisa gebie.
2TI 2:14 Nuní usi ka betsi to geri'i‑na udhá leke geni, lhe anágaba arlo Tata Do Yebáha bodha'an tsitsi usi ke abitturu tsu'uke itilhake ulisa luesike delo ni'a ge ka tisa ka nu abí dika ixú, kumu nu ruinke‑na labí ixú nuná. Sun tteruba rixú nuná kini runnittina adí ka benne, delába ka benne riyienkanie nu ra ka benne ritilha‑na.
2TI 2:15 Ben doelha beni nu tsu'u le Tata Do Yebáha. Beni atti galába runi ttu benne riben tsebie sina nna abittu bi ge ettunie, kumu gwa rula'a tsebe ka tisa ka nu rigixxi'akana ge nu anka gwalí.
2TI 2:16 Abittu udo nagalu ge ka tisa satsa lhe ge ka tisa abí ixú lhe, kumu ka nuná sun tteruba rixúkana ki rusigakana ka benne kini ruin chiettiruke nu labí ru'u le Tata Do Yebáha.
2TI 2:17 Ka tisa luesi nuní diabakana rutse'e lookana ka benne, ruinbakana attiba ruin ttu gwe diana rudusuna lati ttu benne. Himeneo‑na lhe Fileto‑na lhe, lakana selakana len ka nu rinne luesi ka tisa‑ni.
2TI 2:18 Lakana chiba binittikana, labíru rigixxi'akana ge nu anka gwalí. Rálakana deki ka benne chi uttiha chiba beyaka ben ka benneha, ttaka de nuha nna ruchixxikana iki ttu chupa ka benne, nigaba a yúruke gasina dika tsia leke Cristuha.
2TI 2:19 Ttaka Tata Do Yebáha chi bodha'ane ka tisa ka nu rigixxi'akana ge nu anka gwalí. Ka nuní ruse'e tsitsikana ri'i. Ka tisa ka nu bodha'aneha, rákana: “Tata Xisiha gwankabiabanie ka benne chi ankake gebie”; lhe anágaba rágaba ka tisaha: “Iyába ka benne ráke: Ri'itu chi ankatu ge Tata Xisiha, ka benne ra aníha abitturu uinke nu satsa.”
2TI 2:20 Ttibanka lhe'e ttu yo'o yala, laa sunruga ka ye'ena ka nu ankakana ge oru lhe ge plata lhe se'e lhe'e nuha, se'egaba ka nu ankakana ge yaga lhe ge yuna lhe. Ka nu ankakana ge oru lhe ge plata lhe, ka nuha rixúkana ki rita'a elho lhe'ekani atti raka ka laní‑na nna ka nu ankakana ge yaga lhe ge yuna lhe, ka nuha nna rixúkana adí ka sá.
2TI 2:21 Laxkala ganna ttixka ttu benne abitturu runie nu satsa, benneha chi anke attiba ttu ye'ena ge oru lhe ge plata lhe. Chi biriesie ki ixúe len Tata Do Yebáha lhe chi du tsebie kini unie iyá nu anka tse lhe.
2TI 2:22 De nuha nna lu bexunni lo nu satsa reta le ka nu kwiti‑na ruinkana. Lu bedola lelu ben nu dika ixú arlo Tata Do Yebáha lhe bedola lelu ugía lelu ge Cristuha lhe anágaba bedola lelu akinlu ge ka benne lhe latsiru udo lenke lhe. Aní dika uinlu itupa lenlu ka benne chi rulisake Tata Xisiha, delába ka benne chi ankake nari xú arloe.
2TI 2:23 Bekwitta abittu utsá tsi'ilu len ka nu rinne ka tisa ka nu abittu dika ixú. Chiba yulu ka tisa luesi nuná sunruba ruttilha ka nuná ri'i.
2TI 2:24 Kumu ttu benne ganna rixúe lo sina ge Tata Xisiha, labí dika aka benneha ttu nu gwettilha ro'o. Nu uinlee akalee ttu benne tse len iyá ka benne lhe ake benne chi du tsebie ki ule'enie ka benne, lhe anágaba akalee benne kweki besi lebie,
2TI 2:25 lhe anágaba len tisa besiba ulise ka nu rese'e disakana loe, kini ni kina gaa gokinniba Tata Do Yebáha ikikani ki odúna kana nna tte dákinna nu anka gwalí.
2TI 2:26 Aníha kini otte dákana ge nu ruinkanaha nna eriakana lo ná nu xxegwiha, kumu nu xxegwiha‑ba denna kana kini ruinkana nu rábana.
2TI 3:1 Timoteo, tegaba ki unalu nu kixxi'aya‑ni: ganna chi dabiga isia ka sá daluxaha, la'ania yalhá tsitsi sate ka benne,
2TI 3:2 kumu la'ania tse'e ka nu sun tteruba gekani uchacha ikikani, lhe tsu'u xxatta lekani belhiu lhe. Anágaba uinkana ttaba lhe uinkana deki ankakana ka nu ra xxeni lekani lhe. Anágaba akakana ka nu kuakana bala'ana ge ka benne, lhe labíru udokana tisa ge ka xxudikani lhe. Nigaba ixkixaru a ugwekana ka benne, lhe anágaba akagabakana ka nu abittu tsia lekani Tata Do Yebáha,
2TI 3:3 lhe labí aka si'ikinna ka benne lhe, nigaba a satua lekani ke lhe. Anágaba akagabakana ka nu ujuakinna ka benne ka tisa a ixú, lhe ttixka uinkana ttu bixa, ttebia ttelakana tti uinkana nuha. Lhe anágaba akakana ka nu utía xxatta, lhe akagabakana ka nu labí tsu'u lekani bixaba nu tse ruin ka benne,
2TI 3:4 lhe utekana ka benne se'e tse lenkana lasi ná ka nu udhaka xiikana ke. Lhe anágaba akakana ka nu nnelaba uinkana ttu bixa, labí lade'axa ulaba lekani tti uinkana nuha, lhe akakana ka nu tsapi xxattakana ge nu uinkana. Lhe anágaba tsu'urula lekani uinkana nu raka yiesi lo yu‑ni attichula akakinna ge Tata Do Yebáha.
2TI 3:5 Ule'ekana deki rudo lekani nu anka ge Tata Do Yebáha, ttaka len elha ruin gekani rula'a deki labí liikinna ria lekanie. Lu bekwitta kwe'e ka nu ruin aná.
2TI 3:6 Kumu luesi ka nu ruin aná, ka nuná ratta'akana lhe'e ka yo'o nna ridí yiekana ka nuila ka nu nnelaba ridielhakana ruinkana nu abittu anka tse. Ka luesi nuila ruin aná ruinbakana iyá looba nu satsa rakaba lekani
2TI 3:7 nna satíaba raka lekani udo nagakani ge ka tisa kubi, ttaka ni tsa labí isinkana tte dákinna nu anka gwalí.
2TI 3:8 Ttiba Janes‑ni lhe Jambres‑ni lhe ulu'u ni'akani nu ra Moisés‑ni, aníha‑gaba ka nu ridí yiekana ka nuila‑na, rigu'ugaba ni'akani nu anka gwalí. Ka nuná labí rulaba lekani nu anka tse, chiba binitti ka nuná, labíru ria lekani Tata Do Yebáha attiba ankaba geni.
2TI 3:9 Ka nuná labí isá lenkana nu ruinkana‑na, kumu isiaba sá ilá looba deki ankakana ka nu abittu yuu, attiba bilá loo ge ka nu ulu'u ni'akani nu ra Moisés‑ni.
2TI 3:10 Ttaka lu chiba yulu gasina rule'a ka tisa ge Cristuha lhe gasina re lasia lhe. Anágaba chigaba yulu bixa raka lasia unia lhe chigaba yulu gasina ria lasia ge Cristuha, lhe gwa yúgabalu deki neti ankaa ttu benne re besi lasia lhe ankaa benne si'i lasi lhe. Anágaba nna gwa yúgabalu gasina rutto ruchíaya lo iyá nu ratea,
2TI 3:11 lhe gasina ridú nookana neti lhe. Anágaba nna gwa yúgabalu gasina ratea tti ruyúa elha disa, attiba luesi ka elha disa gwatea lhe'esi Antioquía‑ni lhe lhe'esi Iconio‑ni lhe lhe'esi Listra‑ni lhe. Iyába lo ka elha disa‑ni bodilaa Tata Xisiha neti.
2TI 3:12 Anágaba iyába ka benne raka leke udo leke nu anka ge Tata Do Yebáha de babake len Jesucristuha, ka benneha anágaba sateke, dhu noogabakana ke.
2TI 3:13 Ttaka ka nu ruin satsa lhe ka nu ruin lekani lhe, adírula satsa uinkana. Uin lekani len ka benne, anágaba ka benneha aníha‑gaba uinke lenkana.
2TI 3:14 Ttaka lu udola ben nu chi detilu lhe nu chi xen tsitsi lelu geni lhe, kumu lu gwa yúbalu nú bedhetinna lu ki ria lelu ge Cristuha,
2TI 3:15 lhe anágaba ttili ankalu nubiyú toha chi yulu ka tisa dia lo ka yetsi ge Tata Do Yebáha. Ka tisa dia lo ka yetsiha nuha ula'akanie lu, kini yulu gasina odilá Tata Do Yebáha lu de ria lelu ge Jesucristuha.
2TI 3:16 Iyába ka tisa dia lo ka yetsi ge Tata Do Yebáha ankake ka tisa biria ikie, lhe ankagabake ka tisa ka nu ixú ki ula'akanie ri'i lhe ki kisake ri'i tti rinittiri'i lhe. Anágaba odú lhixxake ri'i tti chi rikwadhari'i lo neda gebie lhe udhetigabakanie ri'i kini uinri'i nu dika ixú,
2TI 3:17 kini anáchu ttu benne ganna chi anke ge Tata Do Yebáha, benneha chi du sipe lhe chi du tsebie kini unie iyába nu anka tse.
2TI 4:1 Jesucristu benne esiabie innabie lhe unie elhuxtisi ge ka benne chi uttiha lhe ge ka benne anka bani lhe, arlo benneha lhe arlo Tata Do Yebáha rinnabaa lenlu
2TI 4:2 kixxi'alu ka tisa ge Cristuha. Kixxi'alu ke sea siba udo naga ka benne lhe sea siba abittu udo nagake lhe. Besiba kweki lelu tti ule'enlu ke, lhe len tisa besiba kisalu ke lhe uinlu ki ese'e tsitsike tti rinittike,
2TI 4:3 kumu isia sá labíru aka le ka benne udo nagake ge ka tisa tse ka nu rule'eri'i ge Cristuha, sinuki sattupalake ka nu ula'akinna ke nu ru'u leke iyienkanie.
2TI 4:4 Labíru udo nagake ge nu anka gwalí. Ge ka cuentu ka nu abittu ixú, ge ka nuha‑la udo nagake.
2TI 4:5 Ttaka lu satía bedú itá lelu, abittu bitti uinlu, betto bechíala lo nu ratelu‑na, bedo lelu utixxi'a ka tisa tse‑na. Ben iyá nu bodha'an Tata Do Yebáha uinlu.
2TI 4:6 Neti chiba dabiga uttikana neti nna elhutti kiaha ixúna ki akana attiba ttu úna dhi Tata Do Yebáha.
2TI 4:7 Neti chiba benia doelha benia sina ge Tata Do Yebáha. Chiba uluxati sina nu chi ga'anna unia, labí bedhanaa a ugía lasia ge Cristuha.
2TI 4:8 De nuha nna chiba tua tse nu tse ralhaa dhia de benia nu dika ixú arlo Tata Do Yebáha. Jesucristu benne runie elhuxtisi attiba ankaba geniha, benneha utebie nuha kia ganna chi bisia sá esiabie. Anna laa sun tteruga neti dhia nuha, dhígaba iyá ka benne itú iki itú leke chi se'eke ubede ganna chi esieha.
2TI 4:9 Uinlu doelha etelanni tte gaabalu neti,
2TI 4:10 kumu Demas‑ni bedhába ikini neti de rudorula leni nu tee yiesi lo yu‑ni nna lhe'esi Tesalónica‑nila chi deyyana. Crescente‑ni nna deyyana daka Galacia. Tito‑ni nna deyyana daka Dalmacia.
2TI 4:11 A sunruba Lucas‑ni gwa doruna len neti. Lu nna uche Marcos‑na utá lenna nii, kumu lana gwankana nu dika ixúti na ki uinna sina ge Tata Do Yebáha.
2TI 4:12 Tíquico‑ni nna bedhelhabaa na dedána lhe'esi Éfeso‑na.
2TI 4:13 Ganna chi dalu nii, ttelu lhe'esi Troas‑na ichelu jabana kia nu bodha'anaa lisi Carpo‑na. Ichegabalu ka yetsi dia ka tisa ge Tata Do Yebáha lokani. Ka yieti ka nu dia ka tisa geeha lokani, ka nuha rakaru doelha ichelu.
2TI 4:14 Alejandro nu ruinna ka lo irsinari'i ka nu ankakana ge iyya, lana yalhá chi betsetsinna neti. Tata Xisiha ugwebie na nu ralhana dhina de rudhakana neti aní.
2TI 4:15 Anágaba lu biyú gelu lenna, kumu nuná yalhá chi bedú disana lo ka tisa rigixxi'ari'i‑ni.
2TI 4:16 Tti sisi'a biso dua ki uka elhuxtisi kia, niruba ttu benne a udúe len neti, iyábake bedhá ikike neti. Tata Do Yebáha bittu gape kwenta ge nu bedhakake neti.
2TI 4:17 Ttaka benneha gwa udúbe len neti lhe gwa bedú tsitsibe neti ki utixxi'aya ka tisa ge Cristuha, kini biyienin iyá ka benne abittu ankake ka nu Israel. Aníha benie ki bodilábie neti lo elhuttiha kini abittu bettikana neti.
2TI 4:18 Tata Xisiha godilábe neti lo iyá nu satsa satea nna gwechebe neti yebáha ata rinnabieha. Benneha inná xxeni lebie ttu dia lii. Amén.
2TI 4:19 Begwe Priscila‑na lhe Aquila‑na ttu padiuxi kia, anágaba ka benne se'e lisi Onesíforo‑na lhe.
2TI 4:20 Erasto‑ni nna beya'anba nuha lhe'esi Corinto‑ni, Trófimo‑ni nna raniba nuha tti bodha'anaa na lhe'esi Mileto‑ni.
2TI 4:21 Lu nna ugwe gaaba lelu italu atti lanila eta'a idilhaha. Eubulo‑ni lhe Pudente‑ni lhe Lino‑ni lhe anágaba Claudia‑ni lhe adíru ka benne ria leke ge Cristuha se'e nii redhelhagabake ttu padiuxi gelu.
2TI 4:22 Jesucristu benne anke Xxanari'iha dhue len lebi'i lhe Tata Do Yebáha edá lebie aka lenie le. Amén.
TIT 1:1 Neti Pablo ankaa benne rixúni Tata Do Yebáha lhe ankaa apóstol ge Jesucristuha lhe. Tata Do Yebáha udhelhe neti kini ka benne chi bekwebieha ule'enia ke kini tsia leke gebie lhe tte dákanie nu anka gwalí lhe. Nu anka gwalíha ixúna ki ule'enna ri'i gasina uinri'i nu dika tsu'u le Tata Do Yebáha.
TIT 1:2 Ri'i ruxxen leri'i deki gwaka benbari'i ttu dia lii, kumu attili lani kwe yiesi lo yu‑niha Tata Do Yebaa benne labí ruin leeha, chila rabie utebie elha nabani geri'i ttu dia lii.
TIT 1:3 Benneha bele'enie ri'i ka tisa geeha la sá atti chi ga'anie ule'enie ri'i ka benneha nna neti Pablo bedha'ane lasi náya kini kixxi'aya ka tisa‑ni, delába ka tisa ge Tata Do Yebaa benne rodilábie ri'iha.
TIT 1:4 Len lu ridhelhaa yetsi‑ni xa Tito. Lu nuná gwalíga ankalu ttiba ttu xi'inia, kumu de bele'enia lu ria lelu ge Cristuha attiba neti ria lasia gebie. Xxudi do yebaa ge ri'iha lhe Jesucristu benne rodilábie ri'iha, lake edá leke aka lenke lu lhe satua leke lu lhe anágaba uinke kini dholu xen su lasi lhe.
TIT 1:5 Bodha'anaa lu daka Creta‑na kini ulhuxalu sina nu riyasa aka naa, lhe lhe'e ttu ttu ka yiesi‑na ose'elu ka benneola galha ladike, kini tse'eke arlo ka benne ria leke Cristuha. Benba attiba chi utixxi'ania lu uinlu.
TIT 1:6 Ttu benneola ganna galha ladie teeki ake ttu benne abittu bi ge itise lhe ttu benne do len ttúba nuila lhe. Anágaba nna ka xi'inieha teeki akakana ka nu ria lekani Cristuha lhe abittu daa tisa gekani deki ankakana ka nu ruin satsa lhe abittu rudo tisa lhe.
TIT 1:7 Kumu ttu benne ganna ake nu dhu arlo ka benne chi ria leke ge Cristuha, kini ule'enie ke, benneha de ixúbie lo sina ge Tata Do Yebáha, de nuha nna teeki aka benneha ttu benne abittu bi ge itise, lhe abittu unie ttaba lhe abittu ake nu iki risa'a, lhe abittu ake nu dusi lhe anágaba abittu ake nu rigila elha utilha lhe, nigaba ake nu rotsi'inu lebie gasina unie ki galhie belhiu len ka benne.
TIT 1:8 Benneha akalee ttu benne jeru tte gaxie ka benne lisie, lhe ake ttu benne ru'u lebie runie nu anka tse lhe. Anágaba akagabe nu re itá leni, lhe nu runi attiba ankaba geni, lhe ake ttu benne chi biriesie ki ake ge Tata Do Yebáha, lhe anágaba akagabe ttu benne la labe innabia latie,
TIT 1:9 lhe ake ttu benne ria tsitsi lebie ka tisa ka nu anka gwalí, delába ka tisa ka nu chi bidetie, kini aníha‑chu aka gebie ule'enie adí ka benne lhe okinnie iki ka nu rigu'u ni'akani ka tisa tse rigixxi'ari'i.
TIT 1:10 Kumu se'e ixe ka nu labí rudokana tisa lhe rinnekana ka tisa a ixú lhe, anágaba ruin lekani lhe. Ka nu Israel ka nu chi bedaxxukana neda ge Cristuha, ka nunonna ka nu ruinrukana aná.
TIT 1:11 Ka nuná raka doelha udheari'i ro'okani kini re yo'oba ka benne chi ruchixxikana ikike de rule'ekinna ke nu abittu ixú. Ruinkana aná ki ralhikana belhiu len ka benne.
TIT 1:12 Gwalíbani ttu profeta gekani nu udo daka Creta‑na, nuha unnena rana: “Ka nu se'e Creta‑ni, satíaba ankakana ka nu gwen lasi lhe ruinkana satsa, lhe anágaba ankakana ka nu ro xxatta lhe ka nu lea lhe.”
TIT 1:13 Gwalíbin nuha. Laxkala lu Tito, gwadilo utisa kana, kini latsiru tsia lekani ge Cristuha,
TIT 1:14 lhe abittu udo nagakani ge ka cuentu a ixú ka nu ria le ka nu Israel‑na, nigaba udokana tisa ge nu ra ka nu rigu'u ni'akani nu anka gwalí.
TIT 1:15 Len ka benne ankake nari xú arlo Tata Do Yebáha, len ka benneha iyába anka tse. Ttaka len ka nu labí ria lekanie lhe ka nu ruin satsa lhe, len ka nuná iyába labí anka tse, kumu axtaba nu rulaba lekani labí anka tse lhe labíru raka tékinna tti ruinkana nu anka satsa.
TIT 1:16 Rákana deki gwankabiabakinna Tata Do Yebáha, ttaka len elha ruin gekani rule'e loo deki labí gwalíkinna ria lekanie, kumu lakana labí rudokana tisa gebie lhe labí gwakakana uinkana nu anka tse, de nuha nna ritisibanie kana.
TIT 2:1 Lu xa Tito, latsiru bele'eni ka benne, bele'e kanie atti ttega ra ka tisa tse rule'eri'i ge Cristuha.
TIT 2:2 Ka tatuxtoo to‑na usi ke kweki itá leke, abittu bitti uinke, lhe akake ka benne dika tsia leri'i ke, lhe anágaba akake ka benne lade'axa ulaba leke tti uinke ttu bixa, lhe tsia leke ge Cristuha attiba ankaba geni, lhe anágaba akakanie ge ka benne, lhe akake ka benne kweki besi leke lhe.
TIT 2:3 Ka nan to to‑na nna usi ke, uinke attiba dika ruin ttu benne chi anke ge Tata Do Yebáha, lhe abittu tsekike gwelhidha tisa a ixú, lhe abittu akake ka nu dusi lhe. Nu uinlake, ule'eke nu dika anka tse,
TIT 2:4 kini udhetikanie ka nuila kwiti‑na akakinna ge ka nubiyú gekani lhe akakinna ge ka xi'inkani lhe.
TIT 2:5 Anágaba akake ka benne lade'axa ulaba leke tti uinke ttu bixa, lhe akagabake ka benne uin taga'a nu anka tse, lhe anágaba akake ka benne udo leke lhe'e lisike, lhe akake ka benne kwe tse leke lhe. Anágaba akagabake ka benne udo nagake ge ka benne biyú geke‑na uinke nu inná ka benne‑na. Aníha uinke kini abittu itua bala'ana ge ka tisa ge Tata Do Yebáha.
TIT 2:6 Anágaba ka nu kwiti‑na bele'e kinna akakana ka nu lade'axa ulaba lekani tti uinkana ttu bixa.
TIT 2:7 Lu nuná dhulu ugwelu xilattini, kini ilákin benne nu tse ruinlu. Tti ule'elu ka tisa ge Tata Do Yebáha bittu bixa udhea lelu lhe nu inneluha akana nu dika tsia le ka benne.
TIT 2:8 Tisa nu dika ixú unne, kini anáchu nna nu rigu'u ni'ani nu rule'eri'iha, ettuinna de abíru eselinna bixa innena geri'i.
TIT 2:9 Usi ka nu to'o lo sina ge ka xxanakinna, uinkana nu inná ka nuná, uinkana iyá nu dika tsu'u le ka xxanakinna lhe bittu elhapi ro'okani ka nuná lhe.
TIT 2:10 Abittu udaxxu sigákana nu tee ge ka nuná. Ule'e loola kana deki gwa ankakana benne nu dika uxxen leri'i gekani. Aníha kini len elha ruin gekaniha ule'e lookana nu tse ruin ka tisa rule'eri'i ge Tata Do Yebaa benne rodilábie ri'iha.
TIT 2:11 Kumu Tata Do Yebáha chi bele'ebie elha tse geeha lenri'i, delába chi benie kini iyába ka benne se'e yiesi lo yu‑ni gwalábake kini abittu tsia nnittike,
TIT 2:12 lhe anágaba rule'enie ri'i kini udhanri'i nu abittu ru'u le Tata Do Yebáha, lhe kini udhanri'i nu satsa reta leri'i ruinri'i yiesi lo yu‑ni lhe. Aníha kini tse'eri'i kweki itá leri'i nnanna lhe uinri'i attiba ankaba geni lhe, anágaba udo leri'i nu anka ge Tata Do Yebáha,
TIT 2:13 lhe len elha gwedeaka lasi tse'eri'i kwedari'i la sá tti esia Jesucristuha dedábie lhe'e xiani geeha. Labie anke Diosi geri'i ra xxeni lebie lhe anke benne rodilábie ri'i lhe.
TIT 2:14 Labie betebie elha nabani gebie ki uttie utixe geri'i, kini odilábie ri'i lo iyá nu satsa ruinri'i lhe kini ocharie ri'i ki akari'i gebie. Aníha kini udo leri'i uinri'i iyá nu anka tse.
TIT 2:15 Nuní bele'e kanie lhe usi ke uinke lhe. Tti bixa uinke nna utisa ke kumu lu gwa rapalu lo neda ki uinlu nuní, laxkala abittu dhielhalu nuxa ku'u ni'ani lu.
TIT 3:1 Ka betsi to geri'i‑na, bodhú leke ki udoke tisa ge ka nu rinnabia se'e yiesi lo yu‑ni lhe ge adíru ka uxtisi lhe, uinke nu inná ka nuná lhe tse'e tsegabake ki uinke iyá nu anka tse,
TIT 3:2 lhe bittu inneke ge benne lhe nigaba uttilha ro'oke. Akalake benne re tse leke lhe uinke latsiru len iyá ka benne lhe.
TIT 3:3 Kumu ri'i itú ttuha ukagabari'i benne abittu ute denri'i, lhe abittuba bedori'i tisa lhe. Labí ugwekiri'i lo neda ge Tata Do Yebáha. La'ania bixikabari'i lo iyába nu satsa raka yiesi lo yu‑ni, lhe use'ebari'i benri'i nu abittu anka tse lhe bitisibin luesiri'i, lhe betía diba le luesiri'i lhe, anágaba betía dígaba leri'i adí ka benne lhe.
TIT 3:4 Ttaka bisia sá, Tata Do Yebaa benne rodilábie ri'iha bele'enie ri'i elha tse geeha lhe ukanie geri'i lhe.
TIT 3:5 Labie bodilábie ri'i, labí de benri'i ttu bixa nu anka tse. ¡Ko'o! Bodilábie ri'i de gwatua lebie ri'i nna bocharie ri'i ki beyakari'i nari xú arloe; beyakari'i attisidiba ttu nu beyali attu libe nna Espíritu geeha beyonie ri'i benne kubi.
TIT 3:6 De ugía leri'i Jesucristu benne rodilábie ri'iha, de nuha nna Tata Do Yebáha bete tame Espíritu geeha lenri'i,
TIT 3:7 kini iki de chi bedá lebie utuabie kwe'eri'i yua ge ka tulha ruinri'i, la'ania nna chiba dika uxxen leri'i deki gwa ralhabari'i aka benri'i ttu dia lii arloe.
TIT 3:8 Tisa nu anka gwalíba nuní rinnea. Tisa‑ni nuní raka lasia satti balha ule'enlu ka benne chi ria leke ge Tata Do Yebáha kini anáchu udhá leke uinke nu anka tse, kumu nu ra ka tisa‑ni ankana nu dika ixú len iyá ka benne lhe ankana nu tse lhe.
TIT 3:9 Ttaka abittu udo nagalu ge ka tisa a ixú, lhe ge ka nu rigixxi'akana nupaxa uka xuttokani itú nu reha, lhe abittu udo nagalu ge ka nu ruttilha ro'okani ge nu ra lo bia bennabi bodha'an Moisés‑ni, kumu iyá nuná labí ixúna lhe labí ankana nu raka doelha lhe.
TIT 3:10 Ganna ttu benne unie ilha'abie lhe'e luesi ka benne ria leke ge Cristuha, latsiruba unne len benneha ttu libe lhe attu libe lhe. Ganna si abíba iyieninie, la'ania nna daka naa bedelha benneha.
TIT 3:11 Lu gwa yúbalu, benne uni aníha chiba biriesi benneha lo neda ge Tata Do Yebáha nna tulhaba nuha chi runie. La'ania nna la tulha runieha‑ba urixxi ukinnine arlo Tata Do Yebáha.
TIT 3:12 Ganna chi bedhelhaa Artemas‑ni o Tíquico‑ni ata relu‑na, la'ania nna ugwe lelu italu ata kwea lhe'esi Nicópolis, kumu niha chi belaba lasia dhoa atti chi eta'a idilhaha.
TIT 3:13 Zenas benne rite danie nu dia lo ka bia bennabi ge ka uxtisi‑na lhe Apolos‑na lhe, ka benne‑na jeru tte begwe ke nu riyasakanie ge neda geke.
TIT 3:14 Anágaba ka betsi to geri'i se'e‑na, udhetinlu ke ki edá leke uinke ttu nu tse, delába uteke tti riyasani ka benne, kini anáchu akake nu dika ixú.
TIT 3:15 Iyába ka benne se'e nii len neti, redhelhake ttu padiuxi gelu xa Tito. Begwegaba ka benne se'e naa ttu padiuxi kia, delába ka benne rakakanie geri'i lhe ria leke Cristuha lhe. Tata Do Yebáha aka lenie iyá ttele. Amén.
PHM 1:1 Neti Pablo, tea lisiyya de rekia ugixxi'a ka tisa ge Jesucristuha. Neti lenia betsi to geri'i Timoteo‑ni ridhelhatu yetsi‑ni gelu xa Filemón. Lu rakati gelu lhe ankalu benne rute nálu len ri'itu lo sina ge Tata Do Yebáha lhe.
PHM 1:2 Ridhelhagabatu yetsi‑ni ge adí ka benne chi ria leke Cristuha; delába ka benne ritupake lhe'e yo'o gelu‑na lhe anágaba ridhelhagabatu yetsi‑ni ge nan Apia‑na. Labie anke attiba ttu danri'i. Anágaba ridhelhagabatu yetsi‑ni ge Arquipo‑na. Arquipo‑na rategabana attigaba ratetu de rekitu ugixxi'a ka tisa ge Cristuha.
PHM 1:3 Xxudiri'i do yebáha lhe Jesucristu benne anke Xxanari'iha lhe, lake edá leke aka lenke le lhe use'eke le xen su lasi lhe.
PHM 1:4 Tti rilhapia tisa len Tata Do Yebaa kiaha, satíaba rugwea bie ixkixaru gelu xa Filemón, tti rexxa lasia lu,
PHM 1:5 kumu chi binaa deki tsitsiba ria lelu lhe yalhá rakinlu ge Jesús benne anke Xxanari'iha lhe anágaba rakagabinlu ge iyába ka benne chi ulesi Tata Do Yebáha ke ki akake gebie.
PHM 1:6 Rinnabaa len Tata Do Yebáha gelu, kini lu de ria lelu attiba ria letu, nuha ixúna kini tte denlu gasina anka nu tse redí baari'i de babari'i len Jesucristuha.
PHM 1:7 Yalhá itta du lasia lhe yalhá elha xen lasi redía gelu kumu de ankalu benne si'i lasi. Kumu de nu ruinlu‑na xa betsi to kia, de nuná nna gwa rodú tselu le ka benne ankake ge Tata Do Yebáha.
PHM 1:8 Lu de ankalu benne si'i lasi, de nuha nna neti, meskiba gwa rute Cristuha lo neda kia ki innabaa uinlu nu rakaba lasia,
PHM 1:9 ttaka de rakati gelu, de nuha nna rakati latsirula innabaa lenlu ki uinlu nu raka lasia. Neti Pablo, chi ankaa tatuxtoo to. Anágaba nna tea lisiyya nnanna de rekia ugixxi'a ka tisa ge Jesucristuha,
PHM 1:10 rinnabaa lenlu xa Filemón, olabichilu Onésimo‑ni, kumu nnanna tea lisiyya‑ni utixxi'ania na ka tisa ge Jesucristuha nna gwa ugíaba leni. De nuha nna ttiba ttu xi'inia rakati na.
PHM 1:11 Itú ttuha ukana ttu nu labí bixúna lenlu, ttaka nnanna ankana ttu nu dika ixúna len lu lhe ixúna len neti lhe.
PHM 1:12 Nnanna nna redhelhaa na len lu, bolabichi na, ben attisidiba netiba nuná rolabilu.
PHM 1:13 Neti aní rakati ukwedarua na ki eya'anna len neti kini ixúti na nnanna tea lisiyya delo ni'a ge ka tisa ge Jesucristuha, delába ixúti na uinna sina nu labí aka gelu uinlu de relu idittu.
PHM 1:14 Ttaka labí raka lasia uni nu yu'u ikia kumu teeki nu innálu aka, kumu labí raka lasia udo doelhaa lu kini eya'anna len neti, sinuki luba edá lelu ganna oka'anlu na.
PHM 1:15 Kumu ni kina gaa ttu sattiba bekwittana lenlu, kini ganna chi besiana nna ttu tsaba esiana lenlu.
PHM 1:16 Ganna chi esiana len luha, bitturu udhakalu na attiba ttu nu to'o lo sina gelu, sinuki ugwerulalu lidhakani, biyú na atti galába ttu betsilu rakinlu geni. Neti yalhá rakati geni, ttaka lu akarulinlu geni de ankana benne rixú lo sina gelu lhe de chi babana len Jesús benne anke Xxanari'iha lhe.
PHM 1:17 Laxkala ganna si lu gwa du len lu neti, olabichilu na tti esianaha. Tti olabilu naha, ben ttisidiba netiba nuha rolabilu.
PHM 1:18 Ganna si lana bixa benna gelu o bixa daana gelu, kwe'a bedelha nu bennaha.
PHM 1:19 Neti Pablo, kwinaga neti len letra kia runia lo yetsi‑ni rinnea ria: “Neti gwagixabaa gelu.” Ria aní, kini abittu upeya lu deki lu dágabalu kia de ulu'a lu lo neda ki ugía lele ge Cristuha.
PHM 1:20 Gwalígati xa betsi to kia, benchi nu rinnabaa lenlu. De babari'i len Jesús benne anke Xxanari'iha, de nuha nna rulisaa lu, ben ttu nu dika edeakati geni. Bodú tse lasia de se'e lenri'i benneha.
PHM 1:21 Runia yetsi‑ni kumu ruxxen lasia deki gudobalu tisa kia lhe kumu yu xeabaa laa sunruga nu rinnabaa len lu‑ni uinlu, sinuki tserula uinlu.
PHM 1:22 Rinnabagabaa len lu uin lheakalu ata eya'anaa kumu neti ruxxen lasia, de rinnabale kia len Tata Do Yebáha, de nuha nna aka lenie neti ki lhaaya lhe'e lisiyya‑ni nna esiaya len lebi'i.
PHM 1:23 Epafras‑ni ridhelhe ttu padiuxi gelu. Benne‑ni tebie len neti lisiyya de rekitu ugixxi'a ka tisa ge Jesucristuha.
PHM 1:24 Anágaba Marcos‑ni lhe Aristarco‑ni lhe anágaba Demas‑ni lhe Lucas‑ni lhe, ka benne‑ni rute náke len neti lo sina ge Jesucristuha, nna redhelhagabake ttu padiuxi gelu.
PHM 1:25 Jesucristu benne anke Xxanari'iha edá lebie aka lenie le. Amén.
HEB 1:1 Tata Do Yebáha itú ttuha ixe looba lhe ixe lidúba unnebie, bixúnie ka profeta geeha kini utixxi'akanie ka benne uka xuttori'iha nu raka lebie unake.
HEB 1:2 Ttaka nnanna chi dia lhuxa ka sá se'eri'i‑ni nna rixúnie Xi'inieha kini rulise ri'i. Xi'inieha‑gaba bixúnie kini benie yiesi lo yu‑ni lhe yebáha lhe. Anágaba lasi ná benneha‑gaba bodha'ane iyá tte nu se'e.
HEB 1:3 Xi'inieha‑gaba nuha ra xxeni lebie, rule'ebie nu xxeni ra le Tata Do Yebáha lhe anágaba nna ankagabe atti tteba anka benneha. Lagabe nuha ra tsitsi lebie. De nuha nna tti rinnebie nna runie kini ruchía iyá tte nu se'e yiesi lo yu‑ni. Lagabe nuha, iki de chi bocharie ka tulha ruinri'iha, nianna tti besine gwetsáha nna doe daka ná ben ge Tata Do Yebáha, delába benne ra xxeni leha.
HEB 1:4 Aníha uka nna bisin Xi'in Tata Do Yebáha uke benne ra xxeniru lebie tti ka anjeli geeha. Anágaba nna begwegaba Tata Do Yebáha bie ttu ladi tseru tti ka anjeli geeha.
HEB 1:5 Kumu Tata Do Yebáha ni ttu lidú labí chi rabie ttu ka anjeli geeha tti rabie Xi'inieha: Lu ankalu Xi'inia; neti bijaa lu nasá. Nigaba labí rabie ttu ka anjeli geeha: Neti akaa xxudilu; lu nna akalu xi'inia.
HEB 1:6 Anágaba nna tti chi udhelhe Xi'inieha yiesi lo yu‑ni, rágabe ka anjeli geeha: Iyá ttele, lebi'i ka anjeli kia, gwaludú xibile arlo benne‑ni.
HEB 1:7 Ttaka lo ka yetsi geeha ata rigixxi'a ge ka anjeliha nna ra: Tata Do Yebáha runie kini ka anjeli rixúnie lo sina geeha akake ttiba ttu be lhe ttiba belha ge gi lhe.
HEB 1:8 Ttaka ge Xi'inieha nna rigixxi'agaba lo ka yetsiha ata dia ra: Lu ankalu Diosi. Ttu dia liiba innabialu. Lu innabiabalu attiba ankaba geni.
HEB 1:9 Lu ru'u lelu nu anka tse; nu abittu anka tse nna labí ru'u lelu. De nuha nna Tata Do Yebaa benne anke Diosi geluha tti bekwebie luha, beterue elha gwedeaka lasi gelu tti adí ka benne.
HEB 1:10 Nianna redennerugaba lo yetsiha ata rigixxi'a ge Xi'inieha ata dia ra: Tata Xisi to kia, tti sisi'a tteha luba benlu yiesi lo yu‑ni lhe yebáha lhe, ankakana sina ge ni'a nálu.
HEB 1:11 Ka nuní tse'e loobakana, lu nna satíaba aka benlu. Iyába ka nuní gaxxubakana attiba raxxu ttu xori'i,
HEB 1:12 lhe attiba ttu lari, aníha‑ba kualu kana nna odachulu kana. Ttaka lu labí isealu, satíaba dholu, labí lhuxalu.
HEB 1:13 Tata Do Yebáha ni ttú lidú labí chi rabie ttu ka anjeli geeha tti rabie Xi'inieha: Utá udo daka ná ben kia. Niiba dholu axtaliba ganna chi bese'a ka nu abittu raka uyúkana lu, kini ulealu ikikani.
HEB 1:14 Kumu iyába ka anjeli ka benne ruinke sina ge Tata Do Yebáha, iyába ka benneha ankake ka benne ridhelhe, kini ute náke len ka benne chi ga'ananie odilábie.
HEB 2:1 De nuha nna raka doelha etabinri'i ge ka tisa ka nu chi biyieninri'iha, kini abittu ukwittari'i lo neda ge Tata Do Yebáha.
HEB 2:2 Kumu ki ka tisa bodha'an Tata Do Yebáha uinri'i, delába nu utixxi'a ka anjeli geeha, ki ka tisaha gwa bixú nu ráke nna iyába ka benne abittu bedoke tisa ge nu ra ka tisaha uxíbake elha disa ralhabake dhike,
HEB 2:3 ganna aníha nna ri'i adírula labí lhaari'i lo elha disaha ganna abíba etabinri'i ge nu tse chi ra Tata Do Yebáha utebie geri'i, delába odilábie ri'i kini esinri'i lenie, nuha nu tse utebie geri'i. Lade'axa Jesús benne anke Xxanari'iha utixxi'e deki odilábie ri'i, delola nna ka benne biyienkanie nu unneeha, aníha‑gaba bedoin ka benneha bedegixxi'agabakanie ri'i.
HEB 2:4 Anágaba Tata Do Yebáha tti bedá lebie betebie Espíritu geeha lenri'i lhe benie ka milagru lhe adíru ka nu xxeni ka nu dika ebaninri'i geni, la'ania nuha benna liibie deki gwalíba unie nu chi reeha.
HEB 2:5 Tata Do Yebáha labí chi bodha'an benneha lasi ná ka anjeli geeha kini innabiake yiesi lo yu kubi ata tse'eri'i nu si daa; delába yiesi lo yu kubi nu rinneri'i geni nnanna.
HEB 2:6 Ttaka lo ka yetsi ge Tata Do Yebáha unne ttu benne rabie: Tata Do Yebáha kia, ¿nú anka ka benne se'e yiesi lo yu‑ni nna rudhá lelu geke lhe retabinlu geke lhe?
HEB 2:7 Ki a lattirula gwexxa bese'elu ke tti ka anjeliha. Ttaka lu benlu kini inná xxeni leke lhe anágaba begwegabalu lidhakake lhe. Bese'elu ke kini innabiake iyá nu benlu.
HEB 2:8 Lu iyába betelu lasi náke. Ganna iyába chi bedha'an Tata Do Yebáha lasi ná ka benneha, la'ania nna nuha runna liina deki iyába nu se'e chi innabiake, meskila nnanna labí chi rilenri'i deki iyá ka nuha chi rudokana tisa geke.
HEB 2:9 Ttaka nnanna chi rilenri'i deki Jesús benne bedú Tata Do Yebáha a lattirula gwexxa tti ka anjeli geeha, nnanna benneha‑la chi ra xxeniru lebie lhe teeru lidhake delo ni'a ge nu gwatebie tti uttieha. Tata Do Yebáha‑ba bedá lebie udhelhe benneha, kini uttie utixe ge iyá tte ka benne.
HEB 2:10 Labie benie kini uka iyá tte nu se'e lhe anágaba nna de lagabe nna gwa se'ekana. De nuha nna tseba benie udhelhe Jesús‑ni kini benneha biyúe elha disa kini aníha nna belhuxe iyá nu chi ga'ananie unie. Aníha ben Tata Do Yebáha kini Jesús‑ni odilábie ka benne ki akake xi'in Tata Do Yebáha, kini anáchu ixeke edí baake nu xxeni ra lebie.
HEB 2:11 Kumu Jesús benne rocharie ka tulha lhe ka benne chi reyariha lhe, ttúba benne anka Xxudi ka benneha. De nuha nna labí rettuni Jesús‑ni ree ka benneha: “Betsi to kia.”
HEB 2:12 Kumu tti unne lenie Tata Do Yebáha ree benneha: Neti kixxi'ania ka betsi to kiaha kini ka benneha unake nuxa ankalu; lagwi ge ka benneha ulhaa gelu.
HEB 2:13 Lhe rágabe: Neti uxxenba lasia ge Tata Do Yebáha. Lhe anágaba nna redenágabe: Neti niiba dua lhe niigaba se'e ka xi'in Tata Do Yebáha ka benne chi bedha'ane lasi náya.
HEB 2:14 Laxkala attiba ka xi'in Tata Do Yebáha se'eke yiesi lo yu‑ni ankake benne, aníha‑gaba Jesús‑ni bisie yiesi lo yu‑ni ukagabe benne attiba ankari'i. Aníha kini len elhutti gwatebie lo ya kurusiha, len nuha udaabie betse'e looe nu rinnabiana elhuttiha, delába nu xxegwiha.
HEB 2:15 Aníha benie kini bodilábie iyá ka benne se'eke rasikanie ge elhutti geke kumu itúba se'eke yu'uke lasi ná nu xxegwiha.
HEB 2:16 Kumu ri'i gwa yúbari'i laa ka anjeliha‑ga nuha betedilaa Jesús‑ni. ¡Ko'o! Ka benne datiake Abraham‑nila nuha betedilábie.
HEB 2:17 De nuha nna teeki uke benne atti tteba ankari'i, delába ri'i ka benne ankari'i betsi to gebie. Aníha kini bisine uke bixxudi xeni, rixúe lo sina ge Tata Do Yebáha. Uke bixxudi ratua lasi lhe bixxudi rudo tsitsi tisa lhe. Uke bixxudi xeni kini utixe ge ka tulha ge ka benne.
HEB 2:18 Kumu anágaba labie biyúe elha disa tti bexunnina gebie ka ixú yiebie unie tulha. De nu gwateeha nna gwakagaba gebie odilábie ka benne kini ka ixú yieke uinke tulha.
HEB 3:1 Xa betsi to, lebi'i chi uxi benne do yebáha le kini akale gebie. De nuha nna gwaleyoinbia Jesús‑ni deki labie anke bixxudi xeni lhe anke apóstol ge ka tisa chi ria leri'i lhe.
HEB 3:2 Labie bedo tsitsibe tisa ge Tata Do Yebáha, delába benne bodúgabe bie kini rixúe lo sina gebie. Benba Jesús‑ni attiba ben Moisés‑ni. Moisés‑ni bedo tsitsibana tisa kini biyúna ka benne chi ankake ge Tata Do Yebáha.
HEB 3:3 Ttaka Jesús‑ni térula lidhake tti Moisés‑ni, attiba benne rudoe ttu yo'o dakarula benneha attichula yo'o rudoeha.
HEB 3:4 Kumu iyába ka yo'o se'eba nu ruinna ka nuná, ttaka Tata Do Yebáha iyá tteba nu se'e, labe benie kana.
HEB 3:5 Moisés‑ni, atti galába nu do lo sina, bedo tsitsibana tisa biyúna ka benne chi ankake ge Tata Do Yebáha kini kixxi'enna ke nu inná Tata Do Yebáha.
HEB 3:6 Ttaka Cristuha anka galábe Xi'in Tata Do Yebáha. Labie nuha anke nu rinnabie ka benne, delába ri'i ka benne chi ankari'i gebie, ladiba ganna gwa ruxxen tsitsi leri'i deki gwadíbari'i nu se'eri'i ribedari'iha lhe anágaba lhe ganna gwa du itta leri'i de dhiri'i na lhe.
HEB 3:7 De nuha nna Espíritu ge Tata Do Yebáha rabie: Ganna nasá iyieninle inne Tata Do Yebáha,
HEB 3:8 bittu uin tsitsi lastole a tsia lele gebie. Abittu uinle tti ben ka xuttoleha. Ka nuha bese'e disalakana loe nna bettisikinne lo yu bisiha.
HEB 3:9 Niha betsa'akinna neti, ra Tata Do Yebáha. Meskiba gwa bilákinna nu tse benia delo chua (40) idaha, ttaka benlakana ku'ukana neti prueba.
HEB 3:10 De nuha nna bisa'ati lenkana, nianna tti ria: “Ka nuní satíaba nu subila rulaba lekani; labí rite dákinna gasina tsiakana lo neda kia.”
HEB 3:11 De nuha nna tti loora risa'atiha nna bodha'anaa tisa ria: “Ttu tsa ttela abittula ga'akana ata chi ga'anati eyaka lekaniha.”
HEB 3:12 Lebi'i xa betsi to, gwaluyú gele, bittu akale nu re satsa leni lhe bittu a tsia lele ge Tata Do Yebaa benne anka baniha lhe, kini ka ukwittale nna abitturu sanalhalee.
HEB 3:13 Lebi'i nu uinlale, ttiru nasá gwa teeru lo neda gele, gwaluse'e tsitsi luesile ttu ttu sá. Aníha uinle kini abittu ixú yiele uinle tulha, kini ka uin tsitsi lastole nna abitturu etabinle gebie.
HEB 3:14 Kumu chiba selari'i len Cristuha, ladiba ganna tti chi isia sá daluxaha abittu udhanri'i a tsiaru leri'i attiba ugía leri'i tti udulori'iha.
HEB 3:15 Attiba chi ra lo ka yetsi ge Tata Do Yebáha: Ganna nasá iyieninle inne Tata Do Yebáha, bittu uin tsitsi lastole a tsia lele gebie. Abittu uinle tti ben ka xuttoleha. Ka nuha bese'e disalakana loe nna betsa'akinne.
HEB 3:16 Kumu, ¿laaba ganna iyába ka benne bebea Moisés‑ni daka Egipto‑ni, lake nuha, iki de chi biyienkanie nu ra Tata Do Yebáha, nna bese'e disalake loe?
HEB 3:17 Lhe, ¿laaba ganna len lagabake nuha bisa'ani Tata Do Yebáha delo chua (40) idaha de benke tulha, de nuha nna lo yu bisiha‑ba uttike?
HEB 3:18 Lhe anágaba, ¿laaba ganna lake nuha, de abittu bedoke tisa gebie, de nuha nna bodha'ane ree labíru eta'ake ata chi ga'ananie eyaka lekeha?
HEB 3:19 De benke aníha nna chi rite denri'i deki labí beta'ake niha kumu de labí ugía leke gebie.
HEB 4:1 Laxkala ttiru nnanna gwa teeru lo neda eta'ari'i ata chi ga'anani Tata Do Yebáha tse'eri'i eyaka leri'i, teeki uyú tsitsi geri'i kini ka eya'ana nuxa tturi'i nna abittu eta'ari'i ata eyaka leri'iha.
HEB 4:2 Kumu ri'i chigaba biyieninri'i ka tisa tseha attigaba biyienin ka benne beria Egipto‑ni, deba nna ka benneha labí bixú ka tisaha lenke kumu de abittu ugía leke atti ugía le ka benne gwa bedoke tisa ge nu biyienkanieha.
HEB 4:3 Ri'i ka benne chi ria leri'i nna gweta'abari'i ata eyaka leri'iha, ttaka ge ka nu abittu ugía lekani la'ania, ge ka nuha nna ra Tata Do Yebáha lo ka yetsi geeha: Tti loora risa'atiha bodha'anaa tisa ria: Ttu tsa ttela abittu ga'akana ata chi ga'anati eyaka lekani. Gwalí galá ttili uluxani Tata Do Yebáha ulekie yiesi lo yu‑ni, la'aniali chi bedha'ane ata tse'eri'i eyaka leri'i.
HEB 4:4 Kumu lo ka yetsi geeha rigixxi'agaba bixa benie atti chi uka gasi ubisaha. Lo ka yetsiha ra: Atti chi uka gasi ubisaha nna beyaka le Tata Do Yebáha ge iyá tte nu benie.
HEB 4:5 Lhe rágabe lo ka yetsiha: Ttu tsa ttela abittu ga'akana ata chi ga'anati eyaka lekani.
HEB 4:6 Laxkala ka nu sisi'a tte biyienkinna ka tisa ge Tata Do Yebáha, de abittu bedokana tisa gebie, de nuha nna labí uka ga'akana ki eyaka lekani. Ttaka nnanna se'e adí ka benne riyasa ga'ake ata tse'eke eyaka leke.
HEB 4:7 De nuha nna Tata Do Yebáha bedha'ane attu sá kini ri'i ga'ari'i eyaka leri'i, delába nasá nuha. David‑ni ttuha‑li utixxi'ana ge nuní lo ka yetsi ge Tata Do Yebáha, tti rana: Ganna nasá iyieninle inne Tata Do Yebáha, abittu uin tsitsi lastole a tsia lele gebie.
HEB 4:8 Kumu ganna ttixka Josué‑ni gwa benna kini ka benne beria Egipto‑ni gweta'abake ata eyaka leke, la'ania nna abittula unne Tata Do Yebáha deki utebie attu sá kini eyaka leke.
HEB 4:9 De nuha nna ka benne chi ankake ge Tata Do Yebáha, nnanna gwa ga'anarubanie kini eyaka leke.
HEB 4:10 Kumu ttibanka ttu benne ganna ttixka chi uta'abie ata chi ga'anani Tata Do Yebáha eyaka lebie, la'ania nna chiba reyaka le benneha ge iyába nu benie attigaba Tata Do Yebáha chi reyaka lebie ge iyá nu benie.
HEB 4:11 De nuha nna ri'i uinri'i doelha kini ga'ari'i ata chi ga'ananie eyaka leri'iha. Aníha kini ni ttúri'i abittu sateri'i tti gwate ka nu abittu bedokana tisa gebie.
HEB 4:12 Kumu ka tisa ge Tata Do Yebáha ankake bani lhe ra tsitsi leke lhe. Ttiba ttu espada ria tutsa lo kwe'eni, aníha‑ba anka ka tisa geeha. Ra'ake lhe'e lastori'i lhe ata yieti ro'o ka sitta latiri'i, lhe axtaba lhe'e ka xinni sitta latiri'i ra'ake. Anágaba nna rutte dágabake nu rulaba leri'i lhe nu raka leri'i uinri'i.
HEB 4:13 Kumu Tata Do Yebáha, delába benne otso duri'i arloe ge iyá tte nu benri'i, benneha iyába rilánie, labí tee ttu bixa nu abittu rilánie.
HEB 4:14 De nuha nna ri'i chi do ttu benne ra xxeni lebie anke bixxudi xeni geri'i, delába Jesús Xi'in Tata Do Yebáha. Benneha beta'abie yebáha. De nuha nna ri'i uinri'i doelha abittu udhanri'i a tsia leri'i gebie.
HEB 4:15 Kumu Jesús benne anke bixxudi xeni geri'iha gwa yube deki labí tsitsi ankari'i, nnelaba rixú yieri'i ruinri'i tulha. De nuha nna gwa ratuaba lebie ri'i, kumu anágaba labie, tti udoe yiesi lo yu‑niha, tti tteba rateri'i nnanna, aníha‑gaba gwatebie, bexunnigabana gebie unie tulha, deba nna labí bixú yiebie unie tulha.
HEB 4:16 De nuha nna ri'i xen su lasiba chi ibigari'i ata do Tata Do Yebaa benne rakanie geri'iha. Ibigari'i ata rinnabieha kini satua lebie ri'i lhe kini edá lebie aka lenie ri'i atti iyasinri'i gebie.
HEB 5:1 Kumu ttu nu rakana bixxudi xeni, lhe'e ka benne se'e yiesi lo yu‑niba rire nuha kini rakana bixxudi. Aníha kini rutso duna ge ka benne arlo Tata Do Yebáha. Rutena ka úna lhe rutena ka nimala nu rute ka benne kini ka nuha rattikana nna rutena kana len Tata Do Yebáha, kini nu rutekeha rigixana ge ka tulha geke.
HEB 5:2 Lhe anágaba nu anka bixxudi xeniha dogabana kini ratua leni ka benne, delába ka benne de abittu chi yuke nna ruinke tulha, kumu anágaba lana rategabana attigaba rate ka benneha.
HEB 5:3 De nuha nna attigaba ruinna rutena úna ge ka benne arlo Tata Do Yebáha kini raxa ge ka tulha geke, aníha‑gaba lana tegaba ki utena úna geni kini úna utenaha kixana ge ka tulha geni.
HEB 5:4 Ttaka ni ttú benne labí titúbe ake bixxudi xeni, sinuki Tata Do Yebáha‑ba odúe bie ttiba benie len Aarón‑ni, labie bodúe benneha kini uke bixxudi.
HEB 5:5 Anágaba Cristuha labí titú benneha anke bixxudi xeni, sinuki Tata Do Yebáha‑ba bodúe bie, kumu Tata Do Yebáha ree bie: Lu ankalu Xi'inia; neti bijaa lu nasá.
HEB 5:6 Attigaba rabie attu lisia lo ka yetsi geeha ata dia ra: Lu satíaba ankalu bixxudi ttiba luesi bixxudi nu uka Melquisedec‑ni.
HEB 5:7 Cristuha, tti udoe yiesi lo yu‑niha, itú ribesibe unnabe len Tata Do Yebáha kini odilábie bie lo elhuttiha, kumu Tata Do Yebáha‑ruba gwaka gebie odilábie bie. Tata Do Yebáha nna gwa bedoba nage ge Cristuha kumu gwa bedába ikie ge nu ra Tata Do Yebáha bie.
HEB 5:8 Ttaka meskiba ki unnabe len Tata Do Yebáha lhe meskiba anke Xi'in benneha lhe, teekiba gwatebie biyúe elha disa. Aníha nuha nna bidetie gasina udoe tisa ge benneha
HEB 5:9 nna iki de chi uluxani Cristuha iyá nu chi ga'anna unieha, nianna tti bisine uke benne godilábie ttu dia lii ka benne, delába ka benne gudoke tisa gebie.
HEB 5:10 Anágaba nna bodúgaba Tata Do Yebáha bie kini uke bixxudi xeni ttiba luesi bixxudi uka Melquisedec‑ni.
HEB 5:11 Ge nuní ixeeru nu teeki kixxi'atu, ttaka tsitsiba anka kini kixxi'a tsetu ge iyá nuní kumu lebi'i labí rite dáxxinle.
HEB 5:12 Lebi'i isá chi se'ele lo neda ge Tata Do Yebáha, gwarrana chi rule'enle adí ka benne. Ttaka rutse'e loona, lebi'i sa riyasabinle edulotu ole'entu le ka tisa geeha, delába ole'entu le ka tisa ka nu ridetiri'i sisi'a tte. Ruinbale attiba runi ttu nuto xka'a sa riyasabinna gasina xisi. Labí chi dhaana gona yetta.
HEB 5:13 Aníha‑ba anka iyába ka nu labí rite dákinna gasina uinkana nu dika ixú, kumu lo neda ge Tata Do Yebáha attiba ttu nuto sa rasi xisi, aníha‑ba sa ankakana.
HEB 5:14 Ttaka ka nu chi se'e tsitsikana lo neda geeha, ttisidiba yettaba chi ralha ka nuha gokana, kumu de chiba rite dákinna, de nuha nna chi yúkana gá tee nu anka tse lhe gá tee nu anka satsa lhe.
HEB 6:1 Laxkala nna chinka udhanri'i, abittu suna ka tisa ka nu udulori'i bidetiri'i ge Cristuha, abittu suna len ka tisaha‑ba sa tsu'uri'i, sinuki tsiarulari'i tse'e tsitsiruri'i lo neda geeha. Abittu si ededulolari'i edegixxi'en luesiri'i ka tisa ka nu sisi'a tte bela'akanie ri'i ttuha. Ttibanka la'ania bela'akanie ri'i deki teeki odúna ri'i ge iyába nu abí dika ixú benri'iha lhe uxxengaba leri'i ge Tata Do Yebáha lhe.
HEB 6:2 Bela'agabakanie ri'i deki teeki gadiri'i inda lhe ixxua nári'i iki ka benne kini dhike Espíritu geeha. Utixxi'agabakanie ri'i deki eyaka benba ka benne chi uttiha lhe anágaba utixxi'agabake ráke: “Ganna chi dia lhuxa ka sá se'eri'i‑ni, la'ania uin Tata Do Yebáha elhuxtisi ge iyá tte ka benne.”
HEB 6:3 Ri'itu aníba sa tsiatu ule'e chiettintu le ganna Tata Do Yebáha aka lebie.
HEB 6:4 Kumu ka nu chi bedani Tata Do Yebáha lhe'e lastokani lhe chi bedí baakana nu tse beteeha lhe chigaba uxíkana Espíritu geeha lhe,
HEB 6:5 anágaba nna uyu'ugaba lekani ka tisa tse geeha lhe chigaba yúkana gasina innabie len nu tsitsi raleeha nu si daa,
HEB 6:6 ttaka delo nna bedhanlakana neda geeha. Ka nu ben aníha labíru aka eyekikana odaxxukana neda geeha attu libe, kumu kwinaba lakana attisidiba botábakana Xi'in Tata Do Yebáha lo ya kurusiha attu libe lhe anágaba begwegabakane elhittu arlo ka benne lhe.
HEB 6:7 Kumu ttibanka ttu lo yu ganna satíaba raka iyya loni, tseba lena rutena ge ka nu ribenkana sina loniha. La'ania nna yuha gwa redí baaba nuha nu tse rute Tata Do Yebáha.
HEB 6:8 Ttaka yu nu re'eyu yetsi lhe xxiti loniha, labí ixú nuha. Chi tteba duna ttu tsaba iru'una nuha nna tsiana lo giha.
HEB 6:9 Ttaka lebi'i xa betsi to kia, meskiba ratu le aní, lebi'i labí satele luesi nuní kumu gwa yu xeabatu lebi'i gwasaria tsebana le lhe gwankabale nu dika odilá Tata Do Yebáha lhe.
HEB 6:10 Kumu benneha anke nu runi nu dika ixú. De nuha nna labí rixulhanie ge nu tse chi benle lhe anágaba labí rixulhanie tti bete nále len ka benne chi ankake gebie. Tti benle aníha, elha si'i lasi geeha nuha bele'ele nna aníha‑ba sa diale ruinle nnanna.
HEB 6:11 Ttaka ri'itu raka letu, kua ttu ttule anába sa tsiale uinle, abittu udhanle uinle nu chi ruinle‑na; anába uinle axtaliba ki isinle dhile iyá tte nu chi se'ele ribedaleha.
HEB 6:12 Abittu uinle ge nu a retabini. Gwaluinla tti beni ka benne bexxen leke ge Tata Do Yebáha. Ka benneha labí bedí lireke, gwa uledabake kini uxíke nu chi ra Tata Do Yebáha utebie geke.
HEB 6:13 Tata Do Yebáha tti bodha'an tsitsi tisa gebie len Abraham‑ni, la'ania rabie na: “Neti gwalígati aka lenia lu lhe unia kini tsani xxatta ka xi'inlu lhe ka xidholu lhe adíru ka benne si daa lhe.” Tti rabie aníha nna la labe bedetti lábie kini bodha'an tsitsi tisa gebie, kumu lanú attu benne ra xxeniru lebie do kini udettie.
HEB 6:15 De nuha nna Abraham‑ni labí bedí lirebie, gwa uledabe axtaliba kini uxíe nu chi ra Tata Do Yebáha utebie gebie.
HEB 6:16 Kumu ka benne se'e yiesi lo yu‑ni tti rugweke tisa deki uinke ttu bixa, teeki rudettike lá ttu benne ra xxeniru lebie. Aníha kini gatta lidhaka tisa rugwekeha. Aníha nna labí tee ro'oke bixa innáke.
HEB 6:17 Laxkala Tata Do Yebáha teeki bedetti lábie kini bodha'an tsitsie tisa unneeha. Aníha benie kini bele'e deki ka benne gwadíbake nu chi rabie dhikeha, benneha niru latti labí runnitti tisa gebie.
HEB 6:18 Kumu labí ruin lebie, gwa ruinbe nu chi rabie unie. Laxkala tti bodha'an tsitsi tisa geeha lhe tti bedetti lábieha lhe, ixpaba ka nuha begwekana lidhaka nu chi reeha. De nuha nna ri'i ka benne chi ubigari'i kwe'ebie kini edíe ri'i, ruxxen tsitsiba leri'i deki gwadíbari'i nu ribedari'i dhiri'iha.
HEB 6:19 Kumu de gwa ruxxenba leri'i ge Tata Do Yebáha, de nuha nna tsitsiba se'eri'i lo neda geeha. Nu ruxxen leri'i geeha ankana attiba ancla ge ttu barcu. Ancla ge barcuha tsitsiba riyadana lhi'u yu kini abittu rugwelhana ritá barcuha. Aníha‑gaba ri'i tsitsiba ruxxen leri'i ge benne doe daka kwe'e lariha, delába lari nu daa lhe'e yotu do yebáha.
HEB 6:20 Kwe'e lariha uta'a Jesús‑ni udhalie neda geri'i. Aníha nna bisine uke bixxudi do ttu dia lii, ttiba luesi bixxudi uka Melquisedec‑ni.
HEB 7:1 Melquisedec‑ni uke nu rinnabia ge lhe'esi Salem lhe anágaba ukagabe bixxudi ge Tata Do Yebaa benne ra xxeni leeha. Melquisedec‑ni nuha birie gwalede Abraham‑ni tti dedána iki de tti chi udaana lo ka nu rinnabia bitilha lennaha. Nianna unnaba Melquisedec‑ni len Tata Do Yebáha kini aka lenie Abraham‑ni.
HEB 7:2 Abraham‑ni nna begwena Melquisedec‑ni tsii por ciento iki iyá nu utuana ge ka nu bitilha lennaha. Melquisedec dienna innána “Nu rinnabia runi nu dika ixú”, lhe anágaba de uke nu rinnabia ge Salem, de nuha nna uttagaba lábie “Nu rinnabia ruse'ena ka benne xen su lasi.”
HEB 7:3 Melquisedec‑ni labí rigixxi'a nuxa uka xxudie lhe ixne lhe, nigaba a rigixxi'a nuxa uka ka benneola gebie lhe. Anágaba labí yuri'i nukaxa ulie lhe si uttie lhe. Ankabe bixxudi do ttu dia lii attiba Xi'in Tata Do Yebáha.
HEB 7:4 ¡Gwaluyúruga! ¡Aníli xxeni uná le Melquisedec‑ni! Axtaba tata geri'i Abraham‑ni begwebie benneha tsii por ciento iki nu utuabie ge ka nu bitilha lenieha.
HEB 7:5 Gwalí galá ka nu datiakana Leví‑ni, delába ka nu rakakana bixxudi, ka nuha lo bia bennabi bodha'an Moisés‑ni, niha chi ga'anna ra deki teeki dhíkana tsii por ciento ge lena rexú lo ka yu ge adí ka nu Israel‑ni. Meskiba raka betsi to gekani ka nu Israel‑ni, lhe meskiba iyábakana datiakana Abraham‑ni, meskiba aníha nna teekiba dhíkana nu rexú lo ka yu ge adí ka nu Israel‑ni.
HEB 7:6 Ttaka Melquisedec‑ni, meskiba abittu datiabie Leví‑ni nna uxígabe tsii por ciento nu bete Abraham‑ni nna unnabe kini aka len Tata Do Yebáha Abraham‑ni. Abraham‑ni nuha ra Tata Do Yebáha na ugwebie na elha tse.
HEB 7:7 Lebi'i gwa yúbale, nu ra xxeniru leniha, lana nuha innabana kini aka len Tata Do Yebáha nu abittu tte ra xxeni leniha.
HEB 7:8 Gwalí galá ka nu datiakana Leví‑ni, delába ka nu ridíkana tsii por cientoha, nu re elhutti gebani anka ka nuha. Ttaka Melquisedec‑ni, lo ka yetsi ge Tata Do Yebáha rigixxi'a ge benneha ra deki sa do benbe.
HEB 7:9 Laxkala gwa innári'i deki ka nu datiakana Leví‑ni, delába ka nu ridíkana tsii por cientoha, ka nuha, kumu de raka xuttokani Abraham‑ni, de nuha nna tti utixa benneha tsii por cientoha, ttisidiba iyágaba lakana nuha utixakana tsii por cientoha.
HEB 7:10 Kumu la'ania lhe'e reni gebe sa yu'ukana, labí chi ulikana atti biria Melquisedec‑ni gwalede Abraham‑ni.
HEB 7:11 Kumu ka bixxudi ka nu datiakana Leví‑ni lasi nábakani bodha'an Tata Do Yebáha bia bennabi begwebie ka benne Israel‑ni. Laxkala ganna ttixka ka bixxudi datiakana Leví‑ni, gwa udaabakana bocharikana ka tulha ruin ka benne, la'ania nna ukare'aba luesi bixxudi uka Aarón‑ni use'e ganna ttixka. La'ania nna abittula uka doelha bisia attu bixxudi subi, delába luesi bixxudi uka Melquisedec‑ni.
HEB 7:12 Kumu ttixka esea attu loo ka bixxudi, la'ania nna teekigaba esea bia bennabiha ganna ttixka.
HEB 7:13 Laxkala lo ka yetsi ge Tata Do Yebáha, niha rigixxi'a ge benne ake attu loo bixxudi, delába rigixxi'a ge Jesús benne anke Xxanari'iha. Benneha labí datiabie Leví‑ni, sinuki attu benne subila datiabie nna ka benne datiake benne subiha, ni ttú ka benneha labí chi benke sina lhe'e yotu ge Tata Do Yebáha.
HEB 7:14 Kumu gwa yúbari'i deki Jesús‑ni, labie Judába datiabie. Ka benne datiake Judá‑ni nna labí ra Moisés‑ni deki aka ka benneha bixxudi.
HEB 7:15 Nnanna lhixxa rárula chi rite denri'i ge nuní, kumu de chi bisia attu loo bixxudi ttiba luesi bixxudi uka Melquisedec‑ni.
HEB 7:16 Benne bisiaha bisine uke bixxudi, labí de ra lo bia bennabiha teeki datiabie Leví‑ni, sinuki uke bixxudi de anke ttu benne doe ttu dia lii.
HEB 7:17 Kumu lo ka yetsi ge Tata Do Yebáha dia ra: Lu satíaba ankalu bixxudi, ttiba luesi bixxudi uka Melquisedec‑ni.
HEB 7:18 Aníha uka nna ugwadi gaa nu ra lo bia bennabi tee ttuha de labíru bixú nu rana,
HEB 7:19 kumu de abittu udaana ocharina ri'i arlo Tata Do Yebáha. De nuha nna chi biyali ttu neda tseru geri'i kini nnanna xxen su lasiba ibigari'i arlo Tata Do Yebáha.
HEB 7:20 Kumu adí ka bixxudi‑na sun tteba aná redí ladikani, labí rakakana bixxudi kumu de Tata Do Yebáha rodha'ane tisa innábie deki akakana bixxudi. Ttaka Jesús‑ni, kwinaga Tata Do Yebáha bodha'ane ree deki ake bixxudi. Ukaba attiba ra benne unne lo ka yetsi geeha, tti ree: Tata Xisiha chi begwebie tisa ree: “Lu satíaba akalu bixxudi ttiba luesi bixxudi uka Melquisedec‑ni.” Tti ree aníha tsaba unnebie, labí botsea tisa gebie.
HEB 7:22 De nuha nna Jesús‑ni runna liibie deki tisa nu bodha'an tsitsi Tata Do Yebáha lenri'i, tisaha nuha anka tseru attichula bia bennabi bodha'ane len Moisés‑ni.
HEB 7:23 Adí ka bixxudiha, ixebakana uka kumu risiaba rattibakana, de nuha nna labí uka tse'ekana ttu dia lii, teeba ki beseakana.
HEB 7:24 Ttaka Jesús‑ni, kumu de satíaba anka banie, de nuha nna satíagaba anke bixxudi.
HEB 7:25 Laxkala gwakaba ge Jesús‑ni odilábie ka benne ttu dia lii, delába ka benne, de ria leke bie nna chi ribigake kwe'e Tata Do Yebáha, kumu de satíaba doe rinnabe geke arlo Tata Do Yebáha.
HEB 7:26 Kumu luesi bixxudi xeni‑ni riyasinri'i. Benne‑ni chi biriesie kini ake ge Tata Do Yebáha lhe chi anke nari xú, lhe abittu tulha gebie tee lhe. Anágaba nna abittu runie luesi nu satsa runi ka nu ruin tulha. Labie ra xxeniru lebie doe yebáha.
HEB 7:27 Labie labí runie tti ruin adí ka bixxudi xeniha. Ka nuha raka doelha ruttikana ka nimala ttu ttu sá kini rutekana úna lo bekú ge Tata Do Yebáha, kumu ka nuha lade'axa rutekana úna nu anka gekani kini rigixakana ge ka tulha gekani, iki deliba nuha nna tti rugwekana Tata Do Yebáha úna nu rute adí ka benne. Ttaka Jesús‑ni suna ttu libeba bete kwinaga elha nabani gebie kini uttie nna ttu tsaba utixe ge ka tulha ruin ka benne.
HEB 7:28 Kumu bia bennabi bodha'an Moisés‑ni, lo nuha ra: “Ka benne re elhutti geke yiesi lo yu‑niba ese'e kini akake bixxudi xeni.” Ttaka iki de chi bete Tata Do Yebáha bia bennabiha, nianna tti bodha'ane tisa ree deki Xi'inieha nuha ake bixxudi xeni ttu dia lii kumu de gwa benbe iyába nu chi ga'anna unie.
HEB 8:1 Laxkala nnanna, delo iyá nu datu rigixxi'atu‑ni, nu rakarula doelha unale deki chi do ttu bixxudi xeni geri'i. Ge benneha nuní rigixxi'atu. Labie doe yebáha daka ná ben ge Tata Do Yebaa benne ra xxeni leeha.
HEB 8:2 Benne anke bixxudiha, benneha nuha runie sina lhe'e nu anka gwalíga yotu do yebáha, delába yotu nu bedo Tata Do Yebáha; labí yotu nu bedo ka benne se'e yiesi lo yu‑ni.
HEB 8:3 Kumu iyába ka nu rakakana bixxudi xeni chiba ga'anna ka nuná kini utekana úna lhe ka nimala ruttikana kini uttekana ka nuha lo bekú ge Tata Do Yebáha. De nuha nna Jesús‑ni tegaba ki utebie úna.
HEB 8:4 Ganna ttixka sa dobe yiesi lo yu‑ni, la'ania nna labí aka gebie ake bixxudi, kumu gwa se'eba ka bixxudi yiesi lo yu‑ni ka nu rutekana úna len Tata Do Yebáha. Ka nuha ruinbakana attiba chi ga'anna lo bia bennabi bodha'ane len Moisés‑ni.
HEB 8:5 Ka bixxudiha ruinbakana sina lhe'e yotu do yiesi lo yu‑ni. Yotu‑ni ankana ttiba lixxína yotu nu do yebáha. Kumu tti bedo Moisés‑ni yotu do yiesi lo yu‑ni, la'ania ra Tata Do Yebáha na: “Biyúxa, iyába nu uinlu, uinlu na atti tteba bela'ania lu iki i'iyaha.”
HEB 8:6 Ttaka Jesús‑ni nnanna tserula anka sina nu ga'anna unie tti nu runi adí ka bixxudi kumu labie ribea lobie ge attu tisa tseru, delába tisa nu bodha'an Tata Do Yebáha len ka benne, kumu bodha'ane ree deki utebie ttu nu anka tseru geri'i.
HEB 8:7 Kumu ganna ttixka tisa nu bodha'an Tata Do Yebáha len ka nu Israel‑ni sisi'a tteha, ganna ttixka tisaha abittuba bi biyasa geni, la'ania nna labíru uka doelha bodha'ane attu tisa subi.
HEB 8:8 Ttaka kumu de biyasaba ge tisaha, de nuha nna unnebie ree: Isia sá odha'anaa attu tisa kubi len ka benne datiake Israel‑ni lhe len ka benne datiake Judá‑ni lhe,
HEB 8:9 labí odha'anaa luesi tisa bodha'anaa len ka xuttokaniha tti bodaxxua nákani bebeaya kana lo ná ka nu Egipto‑ni. Ttaka de abittu bedokana tisa ge nu xpeya kanaha, de nuha nna bedhába ikia kana.
HEB 8:10 Rágaba Tata Xisiha: Isia sá unia kini eya'an ka tisa kia‑ni lhe'e ikikani lhe unia kini tsia ka tisa‑ni lhe'e lastokani lhe. Neti akaa Diosi gekani lakana nna akakana benne kia. La'ania nna ni ttú benne labíru teeki ule'enie ka betsieha lhe ka benne lhe'esi geeha lhe; labíru raka doelha gabie ka benneha: “Lebi'i teeki uinbiale Tata Xisiha”, kumu iyábake chiba uinbiake neti la'ania desdeba ka nuto xka'a axtaba ka benne xeni. Neti gwadíbaa elha xen lasi ge nu satsa ruin ka benneha lhe ttu tsaba labíru odhú lasia ge ka tulha geke lhe. Isia sá, nuní tisa odha'an tsitsia len ka nu Israel‑ni, ra Tata Xisiha.
HEB 8:13 Tata Xisiha tti rabie odha'ane attu tisa kubi, la'ania ruinbe deki tisa nu chi tee ttuha labíru ixúna, kumu ttu tisa nu chi anka yaxxu, chi tteba duna itua nuha.
HEB 9:1 Tisa nu lade'a tte bodha'an Tata Do Yebáha, tisaha nuha rigixxi'ana ge yotu do yiesi lo yu‑ni lhe rigixxi'agabana gasina teeki uin ka benne le'a gebie lhe'e nuha.
HEB 9:2 Lagwi lhe'e yotuha daa ttu lari kini nuha rilha'ana lhe'e yotuha, ruinna lhe'eni chupa lisia. Lhe'e nu do lade'a tteha, niha du ttu candeleru lhe dúgaba mexa sia ka yettaxtila loni, delába ka yettaxtila ka nu chi biriesike kini akake ge Tata Do Yebáha. Ata se'e ka nuha, niha tee láni Ata Anka Le'a.
HEB 9:3 Kwe'e lariha nna dedhanka attu lisia. Niha dedetee láni Ata Ttu Ttíruga Anka Le'a.
HEB 9:4 Lhe'e nuha daa ttu bekú ankana taga'a ge oru. Lo bekúha rite yalaha. Niha‑gaba tee i'ina nu tee láni I'ina Ata Yu'u Ka Tisa Bodha'an Tata Do Yebáha. Itúba i'inaha nukuna oru. Lhe'e i'inaha yu'u ttu yedhu to ankana taga'a ge oru. Lhe'e yedhu toha yu'u nu tee láni maná. Lhe'e i'inaha‑gaba yu'u yaga nu uxeni Aarón‑ni, delába yaga nu be'eyu lhaga latiniha, lhe anágaba, lhe'e i'inaha‑gaba yu'u ka íyya bata ka nu dia ka tisa bodha'an Tata Do Yebáha lokani.
HEB 9:5 Iki i'inaha nna sia chupa ka nu sia xxilakani. Ka nuha tee lákani querubín. Lakana runna liikana deki niha do Tata Do Yebáha. Len xxilakaniha rugukukana breta yaya ro'o i'inaha. Lo breta yaya ro'o i'inaha, niha nuha rixú elha xen lasi ge ka tulha ruin ka benne. Ge iyá nuní labí raka doelha kua su kixxi'ania le geni nnanna.
HEB 9:6 Tti chi se'e tse iyá ka nuní lhe'e yotuha, nianna ka bixxudiha satíaba ra'akana lhe'e nu do lade'a tteha, kini ruinkana iyába sina nu daa lokani uinkana.
HEB 9:7 Ttaka lhe'e attu lisiaha nna sunruba bixxudi xeniha gwa ra'ana niha ttu libe lhe'e ttu ida. Aná nna laa kwenta ankagana ra'ana, teeki chena reni ge ka nimala kini rutena nuha len Tata Do Yebáha. Aníha ruinna kini rigixana ge ka tulha geni lhe rigixagabana ge ka tulha ruin adí ka benne lhe, delába tulha nu labí rite dákanie tti ruinke na.
HEB 9:8 Iyá nu raka lhe'e yotuha rixúna kini ruin Espíritu ge Tata Do Yebáha ki rite denri'i deki lhe'e ttu lisia Ata Anka Le'aha, laka sa dona, labí chi yali lo neda geri'i kini isinri'i ga'ari'i lhi'u lhe'e Ata Ttu Ttíruga Anka Le'aha.
HEB 9:9 Iyá nuní ruinna kini rite denri'i deki nnanna ka benne ruteke ka úna lhe ka nimala ruttike kini ridí Tata Do Yebáha, labí akakanie deki ka úna rutekeha gwalíga ocharikana ke ge ka tulha ruinke.
HEB 9:10 Kumu iyába nu rutekeha, sun tteruba ge nu rori'i lhe ge nu ri'iyari'i, lhe ge gasina ki eyariri'i arlo Tata Do Yebáha, sun tteruba ge ka nuha rixúna. Iyá nuní sun tteruba ge nu anka ge lo lia rixúna, axtaliba ganna chi okubi Tata Do Yebáha iyá tte nu se'e.
HEB 9:11 Ttaka nnanna chi bisia Cristuha nna anke bixxudi xeni. Labie chebie nu tse dhiri'i nu si daa. Benneha anke bixxudi ge yotu tseru lhe itá súru lhe, labí anke bixxudi ge yotu nu bedo ka benne, delába labí yotu nu anka ge yiesi lo yu‑ni
HEB 9:12 lhe anágaba laa uta'age lhi'u lhe'e yotu Ata Ttu Ttíruga Anka Le'aha chebie reni ge ka chiva to lhe ge ka gwirri to lhe, sinuki uta'abie niha kini betebie kwinaga reni geeha. Aná nna suna ttu libeba lhe tsaba uta'abie kini bodilábie ri'i ttu dia lii lo ka tulha ruinri'i.
HEB 9:13 Kumu ki ganna reni ge ka ku'unaha lhe ge ka chivaha lhe, anágaba lhe ki ganna tee ge ka vaca to ka nu rite lo bekú ge Tata Do Yebáha, ki ganna teeha lhe reniha ridhedhikana iki ka benne ankake tsiga arlo Tata Do Yebáha, ganna ka nuha gwa ridaakana rocharikana ke,
HEB 9:14 adírula tse ochari reni belali Cristuha. Kumu Espíritu benne doe ttu dia liiha, benneha gwa ukaba lenie Cristuha. De nuha nna bedá le Cristuha betebie elha nabani geeha len Tata Do Yebáha. Lee nuha abittu tsiga anke nna uttie kini utixe geri'i, kini anáchu nna chi yu xeari'i deki chiba bocharie ri'i ge ka tulha abittu ixú ruinri'iha. Bocharie ri'i kini aka geri'i uinri'i le'a ge Tata Do Yebaa benne anka baniha.
HEB 9:15 Laxkala Cristuha nuha due lagwi geri'i len Tata Do Yebáha kini ribea loe ge tisa kubi bodha'an Tata Do Yebáha lenri'i. Cristuha nuha uttie kini bodilábie ri'i lo nu satsa ruinri'i tti sa se'eri'i xani'a tisa nu bodha'an Tata Do Yebáha sisi'a tteha, kini anáchu nnanna ka benne chi uxie ke lo neda geeha, gwakaba geke dhike ttu dia lii nu chi rabie utebie geke.
HEB 9:16 Kumu ttibanka ttu benne ttixka runie yetsi kini rodha'ane ka xi'inie nu tee gebie, gattiliba benneha, la'anialiba nna chi dhulo yetsiha ixúna.
HEB 9:17 Kumu ganna ttixka sa do benbe, la'ania nna labí lidhaka yetsiha chi gatta. Axtaliba ganna chi uttieha, la'anialiba nna chi ixú nu ra lo nuha.
HEB 9:18 Laxkala atti sisi'a tte bodha'an Tata Do Yebáha tisa len ka benne Israel‑ni, la'ania teeki utti ttu nimala to kini nuha betena reni geni, kini reniha nna begwena lidhaka tisaha.
HEB 9:19 Kumu la'ania iki de chi beyaka belaba Moisés‑ni arlo ka benne iyá nu ra lo bia bennabi bodha'an Tata Do Yebáha, nianna tti bedaxxuna ttu ti'a itsa xiná nna ttu xxia lhaga nu tee láni hisopo. Nianna uxxudina iki ka nuha lhe'e reni ge ka gwirriha lhe ge ka chivaha lhe. Reniha chi chixxina inda. Nianna bedhedhina reniha iki libru ata dia ka bia bennabiha lhe bedhedhigabana nuha iki iyá ka benne tupa niha lhe.
HEB 9:20 Nianna tti rana: “Reni‑ni rugwena lidhaka tisa nu bodha'an Tata Do Yebáha len lebi'i kini lebi'i udole tisa ge nu rabie.”
HEB 9:21 Aníha‑gaba benna bododhedhigabana reniha iki yotuha lhe iki iyá ka lo irsina ka nu rixú lhe'e yotuha lhe.
HEB 9:22 Kumu lo bia bennabiha chi ga'anna ra deki reniha ixeba nu ocharina, kumu ganna abittuba reni ilali, la'ania nna labí dhi Tata Do Yebáha elha xen lasi geri'i.
HEB 9:23 De nuha nna yotu do yiesi lo yu‑ni lhe iyá tte nu se'e lhe'eni lhe ankabakana attiba lixxína yotu do yebáha. Ka nu se'e lhe'e yotu do yiesi lo yu‑ni teeki beyarikana len reni ge ka nimalaha, ttaka ka nu se'e kwinaga yebáha teeki eyari ka nuha len attu reni tseru.
HEB 9:24 Kumu Cristuha labí lhe'e yotu nu ben ka benne se'e yiesi lo yu‑ni nuha uta'abie. Kumu yotu nu do yiesi lo yu‑ni sunruba rixúna kini yuri'i gasina anka yotu do yebáha. Labí uta'abie lhe'e yotu nu ben ka benne, sinuki kwinaga yebáha nuha uta'abie. Niha nuha doe nnanna rinnabe geri'i arlo Tata Do Yebáha.
HEB 9:25 Anágaba nna laa uta'age yebáha kini utebie reni geeha ixe libe. Laa benge tti runi bixxudi xeniha. Nuha daa idaba ra'ana lhi'u lhe'e yotuha Ata Ttu Ttíruga Anka Le'aha, richena reni ge nu subi.
HEB 9:26 Kumu ganna ttixka luesi nu ruin bixxudi xeniha‑gaba ruin Cristuha, la'ania nna attili ure yiesi lo yu‑niha, la'aniali chi uduloe rattie ixe libe ganna ttixka, ttaka labí runie aníha. Benneha nnanna chiliba daluxa ka sá se'eri'i‑ni nna ulea lobie. Aná nna suna ttu libeba uttie betebie elha nabani gebie kini ttu tsaba utuabie yua kwe'eri'i ge ka tulha ruinri'i.
HEB 9:27 Anágaba, attigabari'i ka benne se'eri'i yiesi lo yu‑ni, chiba ga'anna deki suna ttu libeba gattiri'i nna iki de nuha nna tti uin Tata Do Yebáha elhuxtisi geri'i,
HEB 9:28 aníha‑gaba nuha Cristuha, suna ttu libeba uttie kini betebie elha nabani gebie kini utuabie yua kwe'e ixeba ka benne ge ka tulha ruinke, iki deliba nuha nna atti esiabie yiesi lo yu‑ni attu libe. Ttaka labíru esiabie kini kixe ge ka tulha geri'i, sinuki esialee kini odilábie ka benne se'eke ubede.
HEB 10:1 Kumu lo bia bennabi bodha'an Moisés‑ni labí rinne loni ge ka nu tse edí baari'i nu si daa, sinuki sunruba ge lixxína ka nuha rinne loni. De nuha nna bia bennabiha labí dhaana ocharina ka benne chi ribigake len Tata Do Yebáha, meskiba abittu rudú siike ttu ttu idaba ruttike ka nimala ruteke úna ge Tata Do Yebáha.
HEB 10:2 Kumu gannala ttixka gwa ridaaba bia bennabiha tsaba rocharina ka benne ruteke ka únaha, la'ania nna abitturula akakanie deki sa nujabake yua ge nu ruinkeha, anágaba nna chigaba bedú siike ruteke ka nimalaha ganna ttixka.
HEB 10:3 Ttaka rutse'e loona, sunruba rixú úna rutekeha kini ttu ttu idaba rodhúna leke ge ka tulha ruinkeha.
HEB 10:4 Kumu reni ge ka ku'unaha lhe reni ge ka chivaha lhe labí ridaa nuha kuana yua kwe'e ka benne ge ka tulha ruinke.
HEB 10:5 Laxkala tti bisia Cristuha yiesi lo yu‑ni, la'ania unnebie rabie Tata Do Yebáha: Lu labí uyu'u lelu ka úna lhe ka nimala lhe, delába ka nu bettikana betekana geluha, ttaka neti chi betelu bela latia‑ni kini gattia nna utea na lenlu.
HEB 10:6 Nigaba labí uyu'u lelu adí ka úna ka nu bettekana lo bekú geluha kini ka nuha nna utixakana ge ka tulha ruinkanaha.
HEB 10:7 Nianna tti unnea ria: “Niiba dua xa Tata Do Yebáha kia, kini unia nu redá lelu aka. Uinbaa attiba chi ra lo ka yetsi gelu‑na.”
HEB 10:8 Cristuha lade'axa udulobie ree deki labí uyu'u le Tata Do Yebáha ka úna lhe ka nimala ka nu bettikana betekana gebie. Nigaba a uyu'u lebie adíru ka úna ka nu bettekana lo bekú geeha kini ka nuha nna utixakana ge ka tulha ruinkana, meskiba lo bia bennabiha chi rigixxi'a deki teeki utekana ka únaha.
HEB 10:9 Nianna tti redenee: “Niiba dua xa Tata Do Yebaa, kini unia nu redá lelu aka.” Debá la'ania utuabie labíru ruttike ka nimala kini uteke kana úna gebie; nnanna Cristuha‑ba chi anke ttiba ttu úna kubi de uttie kini utixe geri'i.
HEB 10:10 De nuha nna Tata Do Yebáha chiba ulesie ri'i kini akari'i gebie kumu de ben Jesucristuha nu redá lebie. Benbe nu uka le Tata Do Yebáha tti betebie elha nabani geeha kini uttie suna ttu libeba lhe anágaba satíaba rixú nu benieha lhe.
HEB 10:11 Gwalí galá iyába ka bixxudi‑na ttu ttu sába rise'ekana ruinkana sina nu daa lokani uinkana. Satíaba rutekana úna la luesi ka nimala ruttikana ttu ttu sá, la luesi ka nuha‑ba ruttikana, ttaka ka nimala ka nu ruttikanaha, ni tsa labí ridaa ka nuha kuakana yua kwe'e ka benne ge ka tulha ruinke.
HEB 10:12 Ttaka Cristuha suna ttu libeba betebie elha nabani gebie kini uttie lhe anágaba nna ttu tsaba utixe ge ka tulha geri'i. Iki de nuha nna udoe daka ná ben ge Tata Do Yebáha.
HEB 10:13 Debá la'ania nna chi doe ubeda axtaliba ganna chi uin Tata Do Yebáha kini uleabie iki ka nu abittu raka uyúkane.
HEB 10:14 Kumu suna ttu libeba betebie elha nabani gebie kini uttie bocharie ttu dia lii ka benne kini ka benneha nna akake ge Tata Do Yebáha.
HEB 10:15 Anágaba nna Espíritu ge Tata Do Yebáha rigixxi'agabanie ri'i ge nuní, tti unnebie ree:
HEB 10:16 Aní ra Tata Xisiha: Isia sá, nuní tisa odha'an tsitsia len ka benne kia. Unia kini tsia ka tisa kia‑ni lhe'e lastoke lhe unia kini eya'ankana lhe'e ikike lhe.
HEB 10:17 Nianna unnerue ree: Tsaba labíru odhú lasia ge ka tulha ruinke, nigaba ge nu satsa ruinke lhe.
HEB 10:18 Laxkala ganna chi uxí Tata Do Yebáha elha xen lasi ge ka benne, la'ania nna labíru raka doelha uttike ka nimala uteke úna, kini kixake ge ka tulha ruinke.
HEB 10:19 Laxkala xa betsi to, de reni belali Jesucristuha, de nuha nna lanúru nu usunana, chiba yali lo neda geri'i kini ga'ari'i lhe'e yotu do yebáha Ata Ttu Ttíruga Anka Le'aha.
HEB 10:20 Lo neda kubiha lhe lo neda anka baniha lhe, niha nuha tsiari'i. Nedaha nuha udhali Jesucristuha tti utebie lhe'e lari nu daa lhe'e yotuha kini bisine Ata Ttu Ttíruga Anka Le'aha. Nedaha nuha udhalie tti betebie elha nabani gebie kini uttie kwenta geri'i.
HEB 10:21 Anágaba nna labie nuha chi anke bixxudi xeni geri'i, due arlo ka benne chi ankake ge Tata Do Yebáha.
HEB 10:22 De nuha nna itú iki itú leri'i ibigari'i len Tata Do Yebáha kumu de chi ria tsitsi leri'i gebie lhe anágaba kumu de abitturu nujari'i yua ge ka tulha ruinri'i lhe de chi se'eri'i ankari'i nari xú ttiba ttu nu chi beyari latini len inda tse, aníha‑ba chi ankari'i.
HEB 10:23 Laxkala tsitsi tse'eri'i, abittu udhanri'i a uxxen leri'i ge nu ute Tata Do Yebáha geri'i, kumu benneha labí runnitti tisa gebie, gwa rutebe nu chi rabie utebie.
HEB 10:24 Anágaba nna uinri'i doelha udú itta le luesiri'i kini akin ge luesiri'i lhe kini uinri'i nu anka tse lhe.
HEB 10:25 Lhe anágaba nna abittu udhanri'i a ituparuri'i ulhari'i ge Tata Do Yebáha tti ruin adí ka benne, sinuki nu uinlari'i udú ittarula le luesiri'i de chi rilenri'i chiba dabiga sá esia Jesucristuha.
HEB 10:26 Kumu ganna ttixka ri'i, iki de chi ugía leri'i ka tisa ge Tata Do Yebáha, delába ka tisa rigixxi'ake ge nu anka gwalí, nianna ganna ttixka elhaxka le gebari'i sa uinri'i tulha, la'anialigaba nna labíru aka uteri'i ttu úna kini nuha kuana yua kwe'eri'i ge ka tulha ruinri'i.
HEB 10:27 A sunruba tse'eri'i len elha rasi tsitsi kwedari'i elha disa nu ute Tata Do Yebáha geri'i lhe tse'eri'i ubeda ganna chi isia sá tuttíru utse'e loo belha ge giha ka nu abittu raka uyúkane.
HEB 10:28 Ganna ttu benne rigu'u ni'abie abittu runie nu ra lo bia bennabi bodha'an Moisés‑ni, nianna ganna ttixka se'e chupa o tsunna ka benne rusiake ikie deki gwalí bilákanie benie ttu bixa nu satsa, la'ania nna labí lhaa benneha, teeba ki gatti benneha.
HEB 10:29 Nianna, ¿bí rakinle? ¿Laaba ganna adírula satsa sate ka nu ku'u ni'akani Xi'in Tata Do Yebáha lhe ganna ttixka innákana deki labí rixú reni belalie tti uttieha, delába reni nu bodha'an tsitsina tisa nu unne Tata Do Yebáha lhe bixúna kini bocharina ka tulha gekani lhe? Anágaba nna adírula satekana ganna kuakana bala'ana ge Espírituha, delába benne gwa raka lenie kanaha.
HEB 10:30 Kumu ri'i gwankabiabinri'i benne ree: “Netiba ralhaa ugwea ka benne elha disa; netiba ugweake nu ralhake dhike.” Lhe anágaba nna attu lisia lo ka yetsi ge Tata Do Yebáha redenágaba: “Tata Xisiha‑ba unie elhuxtisi ge ka benne gebie.”
HEB 10:31 Gwaluyúruga. ¡Yalhá satsa nuná ganna dhiri'i elha disa nu ute Tata Do Yebaa benne anka baniha!
HEB 10:32 Gwalodhú lele ge nu gwatele ttuha atti si bedaxxubale tisa ge Tata Do Yebáha. La'ania gwa betto bechíabale lo elha disa tsitsi gwateleha.
HEB 10:33 Gwadú belisa xxattakana le lhe uyakana le lo benne lhe. Anágaba nna gwadú bete nále len ka benne gwateke luesi nu gwateleha,
HEB 10:34 lhe gwatuagaba lele ka benne uttake lisiyya la'ania lhe axtala redeakinle tti utuakana nu tee geleha lhe, kumu de chiba yule deki tserula anka nu ribedale dhile nu si daa lhe ruchíana isá lhe.
HEB 10:35 De nuha nna abittu udhanle a uxxenru lele ge Tata Do Yebáha, kumu ganna guxxenba lele gebie, la'ania nna gwa ralhabale dhile nu tseru.
HEB 10:36 Bittu edí lirele, sinuki gwaludola lele gwaluin nu raka le Tata Do Yebáha uinle, kini aníha nna gwadíbale nu chi rabie utebie gele.
HEB 10:37 Kumu Tata Do Yebáha ree: Chi teeba dabigana esia benne chi ga'anna esiaha; labíru isá riyasa esia benneha.
HEB 10:38 Ttaka benne runie nu dika ixúha, de tsiaba le benneha neti, de nuha‑ba nna gwaka benba benneha arloa. Ttaka ganna eyadi gaabie lo neda kia, la'anialigaba nna labíru dho tse lania benneha.
HEB 10:39 Ka nu reyadi gaakana lo neda ge Tata Do Yebáha, tsiabakana ata tse'e lookana. Ttaka ri'i labí ankari'i luesi ka nu reyadi gaakana lo neda geeha, ri'i ankalari'i ka nu lhaari'i kumu de ria leri'e.
HEB 11:1 Nianna, ¿bí dienri'i tti rari'i: “Neti gwa ruxxenba lasia ge Tata Do Yebáha”? Laaba ganna dienri'i innári'i deki chiba yu xeabari'i deki gwadíbari'i nu se'eri'i ribedari'iha, meskiba labí chi rilenri'i nu dhiri'iha.
HEB 11:2 Laxkala ka benneola geri'iha, de gwa bexxenba leke ge Tata Do Yebáha, de nuha nna gwa uyu'uba lebie nu benke.
HEB 11:3 Anágaba ri'i, de gwa ruxxengaba leri'i gebie, de nuha nna chi yuri'i deki yiesi lo yu‑ni lhe yebáha lhe, len tisa nu unne Tata Do Yebáha‑ba ukakana. Labí bixúnie nu rilenri'i lhe nu riganri'i lhe, kini benie kana.
HEB 11:4 Abel‑ni, de gwa bexxenba leni ge Tata Do Yebáha, de nuha nna begwene ttu úna tseru tti úna bete Caín‑ni. Aníha uka nna tti uxí Tata Do Yebáha úna nu bete Abel‑ni, la'ania rabie na deki lana ankana ttu benne runi nu dika ixú. Laxkala nnanna meskiba chi uttina, ttaka kumu de gwa bexxen tsitsiba leni ge Tata Do Yebáha, de nuha nna beya'anba nu tse bennaha, kini ri'i nna ulanniri'i nu bennaha nna uxxen tsitsigaba leri'i gebie.
HEB 11:5 Enoc‑ni, de gwa bexxenba leni ge Tata Do Yebáha, de nuha nna labí uttina, deche benba Tata Do Yebáha na, laxkala lanúruna besela. Atti sa dona yiesi lo yu‑niha nna ra ka benne: “Enoc‑ni gwa ruinbana nu ru'u le Tata Do Yebáha.”
HEB 11:6 Ttaka ri'i ganna abíba uxxen leri'i ge Tata Do Yebáha, la'ania nna labí dhaari'i uinri'i nu ru'u lebie. Kumu ttu benne ganna ibige len Tata Do Yebáha, teeki tsia lebie deki gwalíba do benneha lhe anágaba nna tsiagaba lebie deki guteba benneha nu dhi ka benne egilake bie.
HEB 11:7 Noé‑ni, de gwa bexxenba leni ge nu ra Tata Do Yebáha, de nuha nna tti rabie na deki aka ttu nu aka, meskiba labí chi rilenna bixa nuha aka la'ania, lana nna gwa bedoba nagani nna ben ttebana barcuha, kini aníha nna bodilána ka benne geni se'e lhe'e lisiniha. Laxkala de gwa ugíaba leni nu ra Tata Do Yebáha, de gwa ugía leniha nna benna kini biginni iyá ka benne abittu ugía lekeha. Aníha uka nna utua Tata Do Yebáha yua kwe'e Noé‑ni ge nu ruinnaha kumu de gwa ugíaba leni gebie.
HEB 11:8 Anágaba Abraham‑ni, de gwa bexxenba leni ge Tata Do Yebáha, de nuha nna tti uxie naha nna gwa bedobana tisa gebie, nianna biria ttebana diana ata dhina lo yu nu ugwe Tata Do Yebáha na. Biriabana diana, nigaba a yuna gaxa isinna.
HEB 11:9 De bexxen leni ge nu ra Tata Do Yebáha, de nuha nna meskiba chi ga'anna dhina yu nu ugwebie naha, ttaka lana nna ttiba ttu nu dittu udona lo yuha. Udona lhe'e yo'o lari ttigaba udo Isaac‑ni lhe Jacob‑ni lhe, kumu anágaba ka nuha selagabakana dhíkana yu nu chi ra Tata Do Yebáha utebie gekani.
HEB 11:10 Abraham‑ni labí ben geni yuha, kumu de ribedana dhona lhe'e ttu yiesi re tsitsi, delába dhona lhe'e yiesi re yebáha nu biria iki Tata Do Yebáha benie.
HEB 11:11 Anágaba de bexxen leni ge Tata Do Yebáha, de nuha nna meskiba chi ankana benneola lhe anágaba nuila geni Sara‑ni labí aka uja xi'in nuha, ttaka Abraham‑ni, de gwa ugíaba leni deki Tata Do Yebáha gwinbe nu chi rabie naha, aníoka nna benie kini bisia ttu xi'inni.
HEB 11:12 Laxkala meskiba chi ankana tuttíru tatuxtoo to nna si bisiala ttu xi'inni. Xi'inniha nna ugwani xxattana. Ka benneha ixe juisiruke uka ttiba ka beli‑na lhe ttiba yuxi re ro'o indatoo‑na lhe, aníha‑ba ukake. Labí ribabinri'i ke.
HEB 11:13 Iyába ka benne chi bedettia lo yetsi‑ni use'ebake bexxen leke ge nu ra Tata Do Yebáha nna tti uttikeha nna labí chi uxíke nu chi rabie deki utebie gekeha. Ttaka tti sa se'e benkeha nna idittuliba bilákanie nu dhikeha nna bedeakakanie, nianna tti bokinni ikike nna ráke deki yiesi lo yu‑ni labí ankana geke, kumu ttiba ttu nu dittu ankake lhe ttiba ttu nu yu'u neda ankake lhe.
HEB 11:14 Ka benneha tti unneke aní, lhixxa rába benna liike deki sa rekibake ugila ttu lasike ata tse'eke.
HEB 11:15 Kumu ganna ttixka abittuba bidankanie lasike ata biriakeha, la'ania nna gwa ukala geke beyekike ganna ttixka.
HEB 11:16 Ttaka kumu de raka leke ttu yiesi tseru, delába yiesi nu anka ge yebáha, de nuha nna Tata Do Yebáha labí rettunie de tee lábie Diosi geke kumu de chi ulekie ttu lasike.
HEB 11:17 Abraham‑ni, de gwa bexxenba leni ge Tata Do Yebáha, de nuha nna tti ulu'ubie na pruebaha, tti ree na deki teeki uttina xi'inni Isaac‑ni kini utena nuha úna gebie, la'ania labí udú disana, gwa beriaba leni utena ttu túbiru xi'inniha len benneha,
HEB 11:18 meskiba ttuha chi ra Tata Do Yebáha na deki Isaac‑ni ujana ka benne akake ka xi'inni lhe ka xidhoni lhe, delába ka benne udaxxuke tia Abraham‑ni.
HEB 11:19 Abraham‑ni gwa beriaba leni betena Isaac‑ni kumu ukinna, meskiba ganna gatti nuha, Tata Do Yebáha tsitsiba ra lebie nna gwelhidhabe Isaac‑ni lo elhuttiha. Laxkala atti chi ulaa Isaac‑ni abittu uxuana lo giha, la'ania nuha attisidiba beyadhabana lo elhuttiha kumu de gwa bedí adakaba Abraham‑ni na.
HEB 11:20 Anágaba Isaac‑ni, de gwa bexxenba leni ge Tata Do Yebáha, de nuha nna unnabana kini aka lenie Jacob‑ni lhe kini aka lenie Esaú‑ni lhe, aka lenie ka benne‑ni nu si daa.
HEB 11:21 Jacob‑ni, de gwa bexxenba leni ge Tata Do Yebáha, de nuha nna atti chi gattinaha nna unnabana aka len Tata Do Yebáha ka xi'in José‑ni. Nianna tti uxuana iki garroti geniha nna bedú xibini arloe.
HEB 11:22 Anágaba José‑ni, de gwa bexxenba leni ge Tata Do Yebáha, de nuha nna atti chi gattinaha nna unnena rana deki isia sá teeba ki eria ka nu Israel‑ni lo yu ge Egipto‑ni lhe anágaba nna utixxi'agabana gasina uinkana len ka sitta geniha ganna chi isia sá eriakana Egipto‑ni.
HEB 11:23 Aníha‑gaba ka tata nan ge Moisés‑ni, de gwa bexxenba leke ge Tata Do Yebáha, de nuha nna tti uli Moisés‑ni, labí usikanie tti bedhan nu rinnabia ge Egipto‑ni tisa rana deki teeki gatti iyá ka nuto biyú to. Moisés‑ni nna kumu de biyú ka tata nan geniha ankana ttu nuto latsi tte, de nuha nna bekatsibake na lhe'e yo'o gekeha tsunna beo.
HEB 11:24 Anágaba Moisés‑ni, de gwa bexxenba leni ge Tata Do Yebáha, de nuha nna iki de tti chi ukana xxeniha, labí uxielhana gatta láni xi'ini xi'iniunná Faraón, delába xi'iniunná nu rinnabiana Egipto‑ni,
HEB 11:25 sinuki tserula du leni dhi geni udhakakana na attiba rudhakakana ka benne chi ankake ge Tata Do Yebáha, a laa kila edí baana nu satsa raka yiesi lo yu‑ni ttu satti,
HEB 11:26 kumu la'ania bedhaka leni deki tserula anka ganna satena luesi nu sate Cristuha, a laa kila edí baana nu tse tee Egipto‑ni. Aníha benna kumu de ruxxen leni dhina ttu nu tse ute Tata Do Yebáha.
HEB 11:27 De bexxen leni gebie, de nuha nna labí usinna beriana lo yu ge Egipto‑ni tti risa'ani nu rinnabia ge niha. Tsitsila uleki leni kumu attisidiba rilábinna Tata Do Yebaa benne abittu rilenri'iha.
HEB 11:28 Anágaba de gwa bexxenba leni ge Tata Do Yebáha, de nuha nna benna mandadu kini aka laní Pascua lhe bengabana kini ka nu Israel‑ni utabikana reni ge ka nimala lo puerta ge ka yo'o gekaniha. Aníha benna kini anjeli nu chi ga'anna uttina ka xi'in biyú ka nu Egipto‑ni, delába ka nu sisi'a tte uliha, nna abittu uttina ka xi'in biyú ka nu Israel‑ni.
HEB 11:29 Ka nu Israel‑ni nna de gwa bexxenba lekani ge Tata Do Yebáha, de nuha nna ttiba ttu nu bete lo yu bisi betekana lhe'e Indatoo Xináha, ttaka ka nu Egipto‑ni, tti benkana etekana lhe'e indatooha nna ugwapilakana indaha.
HEB 11:30 Lhe anágaba, de gwa bexxenba le ka nu Israel‑ni ge Tata Do Yebáha, de nuha nna tti ugwekikana abi'iba kwe'e yiesi Jericó‑ni gasi ubisaha, de'e nu rilhi kwe'e yiesiha, ure tinni ttebana.
HEB 11:31 Nuila nu tee láni Rahab nu ugwekina betto'o latini len ka nubiyú, nuha de gwa bexxenba leni ge Tata Do Yebáha, de nuha nna labí uttina tti utti adí ka nu se'e lhe'e yiesiha, delába ka nu abittu bedokana tisa ge Tata Do Yebáha. Nuilaha labí uttina kumu de tseba belabina ka benne diake gwelhatsi lhe'e yiesiha.
HEB 11:32 Si riyasala kixxi'aya ge Gedeón‑ni lhe ge Barac‑ni lhe ge Sansón‑ni lhe. Anágaba riyasagaba kixxi'aya ge Jefté‑ni lhe ge David‑ni lhe ge Samuel‑ni lhe, anágaba ge ka profeta ge Tata Do Yebáha lhe. Ttaka nna abíla nattiti kixxi'aya ge ka benne‑ni.
HEB 11:33 Ka benne‑ni, de gwa bexxenba leke ge Tata Do Yebáha, de nuha nna ttu chupake gwa udaabake lo ka yiesi bitilha lenkeha nna attu chupake nna unnabiabake attiba ankaba geni. Anágaba lhe gwa uxíbake nu chi ra Tata Do Yebáha utebie geke lhe bengabake kini ka beesi bitilha lenkeha abittu utokana ke.
HEB 11:34 Lhe anágaba ttu chupake gwa udaabake bodholake belha ge gi bartoha lhe gwa ulábake abittu uttike lo espadaha lhe. Anágaba nna meskiba abittu tsitsi re leke nna gwa uleki tsitsiba leke tti bitilhake len ka soldadu dittuha nna aloba gwa biri'aba lenke gwa bochesubake ka nuha.
HEB 11:35 La'ania use'egaba ka nuila, de gwa bexxenba lekani ge Tata Do Yebáha, de nuha nna gwa benbe kini beyaka ben ka benne chi utti gekaniha lhe anágaba use'egaba ka benne meskiba bika begwekana ke elha disa tsitsi nna labí bedhanke neda ge Tata Do Yebáha. Meskiba gwateke aníha, labí uxielhake odilá ka benne ke lo nu ratekeha. Benke aníha kumu de raka leke saría tseruna ke ganna chi beyadha benke lo elhuttiha.
HEB 11:36 Adí ka benne nna bexisi xiilakana geke lhe anágaba nna uyalakana ke, axtaba bexxigakana ke lhe axtala utixxakana ke lisiyya lhe.
HEB 11:37 Anágaba nna besiagabakana ke íyya kini uttike lhe uchúkana chubaa lhe'eke len siarra lhe, anágaba ulu'ugabakana ke prueba kini bela'ana ganna si gwalíkanie ria tsitsi leke ge Tata Do Yebáha lhe bettigabakana ke len espada lhe, anágaba lhe, gattiba ugwekike suna xo ka neru toruba lhe xo ka chiva toruba bikuke, lhe anágaba ukagabake benne abittu geke tee lhe bedhaka disagabakana ke lhe bedhaka xiigabakana ke lhe.
HEB 11:38 Anágaba lhe ugwekigabake lo yu bisiha lhe ugwekigabake iki ka i'iya lhe bekatsiba loke lhe'e ka belea daa lhe'e ka íyya lhe lhe'e ka belea sia lhi'u yu lhe. De ankake benne ruin tse, de nuha nna adí ka benne se'e yiesi lo yu‑ni niru latti a ralhake tse'e lenke ka benneha.
HEB 11:39 Iyába ka benneha, meskiba gwa uyu'u le Tata Do Yebáha nu benke de bexxen leke gebie, meskiba gwa bexxen leke gebie nna labí uxíke nu chi rabie utebie gekeha,
HEB 11:40 kumu Tata Do Yebáha iyábari'i chi upe kwenta, de nuha nna chi ga'ananie utebie ttu nu tseru geri'i, kini anáchu nna itupa lenri'i ka benneha e'eyuri'i dhiri'i nu chi ga'ananie utebie geri'i.
HEB 12:1 Gwaluyúruga, ttaníli ka benne se'e abi'iba kwe'eri'i. Leni elha ruin geke rula'akanie ri'i gasina bexxen leke ge Tata Do Yebáha. De nuha nna ri'i chinka kuari'i iyá nu rukina geri'i lhe chinka kuari'i iyá tulha nu runnittina ri'i lhe. Abittu satú leri'i tsiari'i lo neda nu chi bedha'an Tata Do Yebáha geri'i,
HEB 12:2 sinuki udolana leri'i sanalhari'i Jesús‑ni. Benneha benie kini ri'i ruxxen leri'i ge Tata Do Yebáha lhe runie kini tsiari'i uxxen tsitsiru leri'i gebie lhe. Labie beria iki beria lebie meskila utábie lo ya kurusiha kumu gwa yube deki iki de nuha nna gatta elha gwedeaka lasi gebie. Aníha uka nna besine doe daka ná ben ge Tata Do Yebáha ata doe rinnabie nnanna.
HEB 12:3 Gwaluyúruga gasina betto bechía Jesús‑ni lo elha disa begwe ka nu ruin satsaha bie, kini lebi'i ganna chi satele ttu luesi elha disaha nna uchíagabale loni. Aníha kini abittu odúna le nna eyadi gaale lo neda gebie.
HEB 12:4 Kumu lebi'i labí chi bexunnina gele axta gattile de ruinle doelha abittu ruinle nu satsa.
HEB 12:5 Lebi'i chiba rixulhinle nu ra benne rinne lo ka yetsi ge Tata Do Yebáha. Benneha ttiba rinne ttu xxudi rulisana ttu xi'inni, aníha‑ba rulise le tti ree: Xi'ini to kia, tti rutsetsilu, abittu ku'u ni'alu nu inná Tata Xisiha ganna ttixka rigise lu, lhe anágaba abittugaba udú si'ina lelu tti ugwebie lu elha disa.
HEB 12:6 Kumu Tata Xisiha rigise ka benne rakanie geke nna rugwebie elha disa ka benne rakanie ke ttiba xi'inie.
HEB 12:7 Lebi'i ratele ruyúle elha disa kini iyieninle, kumu Tata Do Yebáha ruyúbe le atti galába xi'inie. Lebi'i gwa yu xeabale, lanú ttu xxudi do abittu rigisana ttu xi'inni,
HEB 12:8 kumu Tata Do Yebáha, iyába ka benne ankake xi'inie rigise. Laxkala ganna lebi'i abíba ritisale, la'ania nna labí gwalíga ankale xi'in Tataha; attiba ttu penchi, aníha‑ba ankale.
HEB 12:9 Ki yiesi lo yu‑ni ka xxudiri'iha, tti utisake ri'i, gwa ugíaba leri'i ke, ¿laaba ganna adírula tse nuha udori'i tisa ge Tata geri'i do yebáha kini anáchu aka benri'i ttu dia lii arloe?
HEB 12:10 Ka xxudiri'iha, ttu sattiruba nuha utisake ri'i attiruba ankari'i nutoha lhe anágaba nna utisagabake ri'i attiba bedhaka leke deki anka tse, ttaka Tata geri'iha rigise ri'i kini saría tsena ri'i kini anáchu isinri'i akari'i benne nari xú attiba anke.
HEB 12:11 Gwalí galá tti lo ruyúri'i ttu bixa elha disa, labí redeakinri'i la'ania, sinuki rudú si'ilana leri'i. Ttaka ganna gwa rudába ikiri'i tti ruyúri'i elha disaha, iki de chi rateri'i aníha nna xen su lasiba chi redú leri'i lhe chigaba ruinri'i attiba ankaba geni lhe.
HEB 12:12 De nuha nna gwalese'e tsitsi lo neda ge Tata Do Yebáha; abittu ulhá nále. Bittu uinle tti runi ttu nu chi raa náni lhe abitturu ridá rea lhe'e ka xibini lhe.
HEB 12:13 Gwalolixxa neda gele kini edá tsele kini ka ni'ale ka nu natsa‑na abittu ikwalhakana, sinuki eyaka tselakana.
HEB 12:14 Gwaluin doelha latsiru gwaltse'e len iyá ka benne lhe gwaluin doelha akale nari xú atti galába ka benne chi biriesike ki akake ge Tata Do Yebáha, kumu ganna abíba ankari'i nari xú, la'ania nna labí aka ilenri'i benneha.
HEB 12:15 Gwaluyú gele ni kina nuxa ttúle a dhaale dhile nu tse redá le Tata Do Yebáha utebie gele lhe anágaba ni kina nuxa ttúle dhulole uinle nu satsa nna uketile adí ka benne
HEB 12:16 lhe ni ttúle abittu isále attu nu subi lhe abittu ku'u ni'ale nu anka ge Tata Do Yebáha lhe. Bittu uinle tti ben Esaú‑ni. Nuha ukana nu ulina lade'a tte tti betsiniha. De nuha nna ralhana dhina ttu nu tse de ulina sisi'a tte, ttaka lana labí begwena lidhaka nu tseha, suna len ttu ye'ena elhoruba betsána nu tse ralhana dhinaha.
HEB 12:17 Lebi'i gwa yúbale, iki de nuha nna gwa unnaba ditiruna len tata geniha kini otebie nu tseha geni, ttaka labíru udaana edína nuha. Meskiba bika runa ribesina rennabana nuha, ttaka birua anka nu uinna, chila uka nuha.
HEB 12:18 Lebi'i labí bibigale kwe'e ttu i'iya nu rilenri'i lhe nu dika kanri'i lhe, labí benle tti ben ka nu Israel‑ni. Ka nuha ubigakana kwe'e i'iya Sinaí‑ni ata rite xxattaha lhe ata anka chulha eru loha lhe, anágaba ata raka xxatta betunuha lhe.
HEB 12:19 Anágaba nna biyiengabakinna tsi'i trompetaha lhe biyiengabakinna tsi'i Tata Do Yebáha lhe. Ka nu biyienkinna tsi'i benneha, unnaba ditikana lenie kini abitturu innebie.
HEB 12:20 Unnabakana abitturu innebie kumu de labí dhaakana udokana tisa ge nu unneeha tti ree: “Nuxaba udú ni'ani lati i'iya‑ni, teeki usiakana nuha íyya kini gattina lhe o uttikana na len ka iyya lo tutsa lhe, meskiba ganna ankana ttu nimala.”
HEB 12:21 Ttu elha rasi barto nuha uxíkana tti bilákinna nu uka iki i'iyaha, laxkala axtaba Moisés‑ni unnena rana: “Rixidinibaa de rasiti.”
HEB 12:22 Ka nu Israel‑ni kwe'e i'iya Sinaí‑niba ubigakana, ttaka lebi'i nnanna chi ubigale kwe'e i'iya nu tee láni Sión ata re yiesi ge Tata Do Yebaa benne anka baniha, delába ubigale kwe'e Jerusalén nu re yebáha ata tupa ixe juisiru ka anjeliha rulhake gebie.
HEB 12:23 Niha‑gaba tupa ka benne sisi'a tte ukake xi'in Tata Do Yebáha, delába ka benne chi dia láke yebáha ata do Tata Do Yebaa benne anke xueda ge iyá tteri'i lhe niha‑gaba se'e ka benne chi uttiha lhe, delába ka benne chi beyakake itá su arlo Tata Do Yebáha de chi benke nu dika ixú.
HEB 12:24 Anágaba chigaba ubigale kwe'e Jesús benne ribea loe ge attu tisa kubi nu chi bodha'an Tata Do Yebáha lenri'i lhe anágaba chigaba rixú reni belalieha kini rocharie ka tulha geri'i. Reni geeha tserula rixúna attichula reni belali Abel‑ni.
HEB 12:25 Gwaluyú gele, bittu ku'u ni'ale Tata Do Yebaa benne rulise leha. Kumu ki ganna ka nu Israel‑ni, delába ka nu ulu'u ni'akanie tti belise kana yiesi lo yu‑niha, ki ganna ka nuha abittu ulákana, aloba uxíkana elha disa, adírula ri'i labí lhaari'i ganna ku'u ni'ari'i benneha, nnanna doe axtali yebáha rulise ri'i.
HEB 12:26 Tti belise ka nu Israel‑ni, tti biyienkinna tsi'ibie tti unnebie kwe'e i'iya Sinaí‑ni, tti unneeha, tsi'eha nuha beni kini bitá yiesi lo yu‑ni, ttaka nnanna chi unnebie ree: “Neti ganna chi unia kini edetá attu libe, la'ania labí suna yiesi lo yu‑ni itá, sinuki uingabaa kini itá gwetsáha.”
HEB 12:27 Tti rabie: “Ganna chi unia kini edetá attu libe”, tti rabie aníha dianie innábie deki kuabe iyá ka nu benie yiesi lo yu‑ni ka nu ritákana nna eya'ana ka nu abittu ritá, delába ka nu eya'ana ttu dia lii.
HEB 12:28 Laxkala nnanna de chi ridíri'i ttu yiesi abittu ritána, delába yiesi ata rinnabia Tata Do Yebáha, de nuha nna ugweri'e ixkixaru lhe uinri'i le'a gebie attiba ru'u lebie. Aní uinri'i kumu de ria leri'e lhe de tee elha rasi geri'i lenie lhe.
HEB 12:29 Kumu Tata Do Yebaa geri'iha attiba ttu gi nu rutse'e loona, aníha‑ba anka benneha.
HEB 13:1 Tse'ele akin ge luesile atti galába rakinle ge ka betsi to gele.
HEB 13:2 Abittu udhanle a ulabile ka benne dittu tti risiake lhe'e lisile, kumu ttu chupa ka benne use'e itú ttuha tti belabike ka benne dittuha lhe'e lisikeha, la'ania labí ute dákanie deki ka anjeli ge Tata Do Yebáha‑ba nuha belabike lhe'e lisikeha.
HEB 13:3 Gwalodhú lele ge ka benne tee lisiyya. Akinle attisidigaba itupa lebi'i nuná tele len ka benneha lisiyya lhe anágaba gwalodhú lele ge ka benne riyayake lhe. Akinle attisidiba iyágaba lebi'i nuha riyayale.
HEB 13:4 Iyále ata se'e latselale, abittu udhanle a ugwele lidhaka tisa nu begwele tti betsá náleha. Bittu otsea latselale, kumu Tata Do Yebáha urixxi ukinniba benneha ka nu risákana nu subi subi lhe ka nu rudhá ikikani latselakani nna redo lenkana attu nu subi.
HEB 13:5 Abittu dhaa xxatta lele gatta gele. Gwaleyaka xenruba lele ttixaruba tee gele. Kumu Tata Do Yebáha chiba rabie: “Niru latti a udhá ikia le lhe nigaba a use'a sun lebi'i lhe.”
HEB 13:6 Laxkala ri'i xen su lasiba innári'i: Tata Xisiha‑ba raka lenie neti, de nuha nna labí rasiti bixa udhaka ka benne neti.
HEB 13:7 Gwalodhú lele gasina uka elha ruin ge ka benne use'eke arlole ttuha, delába ka benne bele'ekanie le ka tisa ge Tata Do Yebáha. Gwaluyúruga nu tse ben ka benneha lhe anágaba gwaluxxen lele ge Tata Do Yebáha attiba ben ka benneha bexxen leke gebie.
HEB 13:8 Jesucristuha ttúba benne anka benneha, labí reseabie. Labe nuha doe nnayaha lhe lagabe nuha doe nasá lhe lagabe nuha doe ttu dia lii lhe.
HEB 13:9 Abittu tsia lele ge ka nu rule'ekana adíru ka elha rieni subi, delába ka nu rákana bí elho gwaka gori'i lhe bí elho abittu aka gori'i lhe. Kumu ka nu ra aní, nu rákanaha labí ixú nuha kini tse'e tsitsiruri'i lo neda ge Tata Do Yebáha. Ri'i tse'e tsitsirula ri'i lo neda geeha kumu de gwa rakaba lenie ri'i, alaa kila tse'eri'i inneri'i ge nu gori'i.
HEB 13:10 Jesús‑ni tti uttie utixe geri'iha, uke attiba ttu úna nu redí baari'i geni nnanna. Únaha nuha labí uka ge ka bixxudi uren lhe'e yotu nu uka ge lariha edí baakana.
HEB 13:11 Bixxudi xxeniha ra'abana lhi'u lhe'e yotuha rutena reni ge ka nimalaha. Rutena reniha len Tata Do Yebáha, kini reniha rigixana ge ka tulha ruin ka benne, ttaka ka nimalaha ro'o yiesiha‑liba ribeakana ka nuha ki ritekana lo gi.
HEB 13:12 Aníha‑gaba Jesús‑ni, ro'o yiesiha‑ligaba uleakane kini uttie betebie reni geeha ki bocharie ka tulha ruinri'i.
HEB 13:13 De nuha nna ri'i teeki iriari'i sanalhari'i Jesús‑ni, anágaba nna dhígabari'i elhittu attigaba labie uxíbie elhittu.
HEB 13:14 Kumu yiesi lo yu‑ni labí ankana lasiri'i ata tse'eri'i ttu dia lii, sinuki dialari'i rigilari'i ttu lasiri'i ata tse'eri'i ttu dia lii nu si daa.
HEB 13:15 Laxkala de Cristuha nna satíaba ulhari'i ge Tata Do Yebáha. Len ka tisa ulhari'i geeha kixxi'ari'i nu xxeni ra lebie. Nu ulhari'iha akana attiba ttu úna nu utso duri'i arlobie.
HEB 13:16 Lebi'i abittu ixulhinle a uin tsele len ka benne lhe a utele nu tee gele lenke lhe, kumu ganna aní uinle, la'ania nna iyába nu uinleha akana attiba ttu úna nu ru'u le Tata Do Yebáha utele lenbie.
HEB 13:17 Gwaludo tisa ge ka benne rise'eke arlole rigixxi'akanie le ka tisa ge Tata Do Yebáha, lhe gwaluni nu innáke kumu lake nuná ruyú tsitsike le lo neda ge Tata Do Yebáha. Ruinke atti galába runi ttu benne otebie kwenta ge nu runie arlo Tata Do Yebáha. Gwaludo tisa geke kini udú ittana leke tti uyúke le, kini aníha nna abittu udú si'ina leke, kumu ganna lebi'i udú si'ile leke, la'ania nna labí ixú nu ruin ka benneha len lebi'i.
HEB 13:18 Gwalinnaba getu len Tata Do Yebáha; kumu ri'itu gwa yu xeabatu latsiruba ruintu, labí tee ttu bixa rudheana lotu kumu iyába nu uintu raka letu uintu na latsiru.
HEB 13:19 Anágaba nna rinnabagabaa len lebi'i gwalinnabachi len Tata Do Yebáha kini yuba esiaya ata se'ele‑na.
HEB 13:20 Tata Do Yebaa benne ruse'ebie ri'i xen su lasiha, benneha nuha belhidhe Jesucristu benne anke Xxanari'iha lo elhuttiha, delába Jesucristu benne ra xxeni leha. Benneha nuha ruyúe ri'i attiba ttu nu ruyú ka neru to lhe anágaba len reni belalie lo ya kurusiha, len reniha nuha, bodha'an tsitsi Tata Do Yebáha tisa lenri'i. Tisa nu bodha'aneha ixúna ttu dia lii lenri'i.
HEB 13:21 Tata Do Yebáha unie kini lebi'i akale benne runi iyá nu anka tse kini aníha nna dhaale uinle nu raka lebie uinle. Jesucristuha nuha ixúni Tata Do Yebáha kini unie le benne tsu'u lebie. Benneha nuha uinri'i kini inná xxeni lebie ttu dia lii. Amén.
HEB 13:22 Betsi to kia, rinnabaa len lebi'i utto uchíale tti udo nagale ttu chupa ka tisa rulisaa le lo yetsi‑ni.
HEB 13:23 Rigixxi'agabaa deki betsi to geri'i Timoteo‑ni chiba beria benneha lisiyya. Ganna benneha esiaxxie ata rea‑ni, la'ania nna gwita ttega lanie etelannitu le.
HEB 13:24 Gwalugwe ttu padiuxi kia iyá tte ka benne rise'eke arlole‑na lhe iyá tte ka benne chi ankake ge Tata Do Yebáha lhe. Ka betsi to geri'i se'e nii, ka benne daa Italia, ridhelhagabake ttu padiuxi gele.
HEB 13:25 Tata Do Yebáha edá lebie aka lenie iyá ttele. Amén.
JAM 1:1 Neti Santiago, ankaa benne rixúni Tata Do Yebáha lhe rixúni Jesucristu benne anke Xxanari'iha lhe. Naa ridhelhaa ttu padiuxi gele, lebi'i ka benne tsi'inu (12) dhi ata se'ele gattiba lhe'e ka yiesi dittu‑na. Lebi'i nuná datiale benneola geri'i, benne utta lábie Israel.
JAM 1:2 Xa betsi to kia, lebi'i tti ruyúle ttu bixa elha disa, adírula itta gwaludú lele.
JAM 1:3 Lebi'i gwa yúbale, tti uyúle elha disaha, la'ania nuha rule'e ganna gwalíga ria lele Tata Do Yebáha nna ganna chi se'e tsitsirule lo neda geeha, la'ania nna gwadaale uchíale lo nu rateleha.
JAM 1:4 De nuha nna teeki uchíale lo elha disa ruyúleha. Aníha kini dhaale akale benne runi latsiru lhe benne runi taga'a nu anka tse lhe. Aníha kini abittu bi iyasa gele, la'ania nna gwadaabale uinle iyába nu ru'u le Tata Do Yebáha.
JAM 1:5 Ganna nuxa ttúle riyasa elha yuu gele, gwalinnaba len Tata Do Yebáha. Labie nna gutebe elha yuu gele, kumu benneha labí itisinie le, gute tamabe ge iyábale.
JAM 1:6 Deba nna atti innabale len benneha nna bittu udú chupana lele, teeki tsia lele deki gwadíbale nu rinnabaleha, kumu nu rudú chupana leniha, ankaba nuha ttiba inda ridú lii lo indatooha, naa lhe niiba diana riche beha na.
JAM 1:7 Nu runi aníha labí akinna deki gute Tata Xisiha nu rinnabanaha,
JAM 1:8 kumu nu rudú chupana leniha, bitti bittiba uin nuha. Satíaba aníha aka elha ruin ge nuha.
JAM 1:9 Ganna ttu betsi to geri'i abittu tee gebie, bittu ettunie, ebanala lebie kumu arlo Tata Do Yebáha chiba dake,
JAM 1:10 nna nu tee geniha nna ittala udúna leni de elhida gaa Tata Do Yebáha leni. Kumu nu tee geniha ankaba nuha ttiba ka iyya to‑na ttu sattiruba ralikana nna ratti tteba ikikani. Aníha‑ba nuha sate nu tee geniha, sattiruba uchía nuha.
JAM 1:11 Ka iyya to‑na, tti riria tatubisa‑na, len gi lha ge benne‑naba ribisi tteba ka lhaga to gekani nna rigudhi tteba ka iyya toha. La'ania nna chiba rinitti nu tse to rula'a ka iyya toha. Aníha‑gaba sate ka nu tee gekinna, meskiba bika ribenkana ki gatta gekani, isiaba sá gattibakana.
JAM 1:12 Karubáru benne dhaabie utto uchíabie abittu ixú yiee unie ttu bixa nu satsa, kumu ganna abittuba ixú yiee unie nu satsaha, la'ania nna gwaka benbe ttu dia lii. Nuní nu tse chi ra Tata Do Yebáha utebie len ka benne rakakanie gebie.
JAM 1:13 Ttixka nuxa ttúle ixú yiele uinle ttu bixa nu satsa, abittu tse'ele innále deki Tata Do Yebáha‑ba ridí yiebie le ki ruinle nuha, kumu benneha labí rixú yie benneha unie ttu bixa nu satsa, nigaba labí ridí yie benneha ka benne ki uinke nu satsa,
JAM 1:14 sinuki ttu ttubari'i lhe titúbari'i ridá leri'i ruinri'i nu satsa, nianna tti rixú yieri'i ruinri'i na.
JAM 1:15 Kumu ganna chi belaba leri'i uinri'i nu satsaha, la'ania nna teekiba isinri'i uinri'i nuha. Ganna chi benri'i nu satsaha, la'ania nna ttu tsaba gattiri'i, delába ttu tsaba labí esinri'i len Tata Do Yebáha.
JAM 1:16 Betsi to kia, bittu akinle deki Tata Do Yebáha‑ba ridí yiebie ri'i ki ruinri'i nu satsa,
JAM 1:17 kumu iyába nu anka tse lhe iyába nu anka ida'a, delába nu labí riyasa ttu bixa geni, iyá nuní gwetsába dana udhelha Tata Do Yebáha. Labie benie ka xiani sia yebáha. Ka nuha rotseaba xiani gekani, ttaka benneha labí rutsea elha ruin gebie.
JAM 1:18 Ri'i de ria leri'i ka tisa geeha, delába ka tisa rigixxi'a nu anka gwalí, de nuha nna bedá lebie beyonie ri'i attiba ttu benne kubi. Aníha benie kini anáchu nna delo iyá nu benie yiesi lo yu‑ni nna ri'i akari'i benne ulesie lade'a tte kini akari'i gebie.
JAM 1:19 Betsi to kia, ttixka gwadú bittu unneruxxi ro'ole innele, lade'axa gwaludo nagale ge benne lhe anágaba bittu ttu nnelaba ise'enle.
JAM 1:20 Kumu nu risa'aniha, labí ruin nuha nu dika ru'u le Tata Do Yebáha.
JAM 1:21 De nuha nna gwaludhana iyá nu satsa lhe iyá nu abittu anka tse ruinle‑na. Nu uinlale, gwaludaala ikile, gwalulabila ka tisa chi úda Tata Do Yebáha lhe'e lastole, kumu ka tisa‑na gwaka geke odiláke le.
JAM 1:22 Deba nna gwaluin nu ra ka tisa‑na, bittu sun tteruba udo nagale ke, bittu akinle deki ukare'aba chi riyieninle ke nna chibanka, kumu ganna aníha nna labí lii nu rulaba leleha.
JAM 1:23 Kumu ttu benne, ganna sunruba rudo nage tisaha nna ganna abíba runie nu ra benneha, benne runi aníha ankaba benneha attiba ttu nubiyú rulaninna lo ttu iyya gwana ttixa rugíana.
JAM 1:24 Iki de chi belannina lo iyya gwanaha, nianna deyyana. Atti deyu'una neda deyyanaha nna bexulha ttebinna gasina rugíana.
JAM 1:25 Ttaka benne abittuba rixulhanie ge nu dia lo ka tisa ge Tata Do Yebáha, sinuki rudo tsitsibe tisa geke, benne runi aníha, tseba saríane, kumu ka tisaha, ida'a suba ankake lhe gwa rakaba geke rodiláke ka benne lhe.
JAM 1:26 Ttixka nuxa ttúle rakinle deki gwa ruinbale nu ru'u le Tata Do Yebáha, ttaka ganna abittuba rukweda ro'ole rinnele, la'ania nna labí lii nu rulaba leleha. Kwentaruba nuha rinnele rale deki gwa ruinbale nu ru'u le Tata Do Yebáha.
JAM 1:27 Ttaka ganna ute nári'i len ka nuto bidabi to lhe len ka benne nuila bidabi ttixka ruyúke ttu bixa elha disa lhe anágaba ganna abitturu uinri'i nu satsa raka yiesi lo yu‑ni, nu uinri'iha nuha nu gwalíga anka tse lhe nu gwalíga ru'u le Xxudiri'i do yebáha lhe.
JAM 2:1 Xa betsi to kia, lebi'i chi ria lele Jesucristu benne anke Xxanari'i lhe ra xxeni lebie lhe. Bittu ugwerule lidhaka ttu benne atti attu benne.
JAM 2:2 Kumu ganna ttixka ata ritupale rulhale ge Tata Do Yebáha, ganna niha ga'a ttu nubiyú yu'u náni ttu be'e ge oru lhe nukuna ttu xo tse, nianna tti ga'agaba attu benne abittu tee gebie lhe nukue ttu xo tsuya to,
JAM 2:3 la'ania nna lebi'i uyú tserulale nu nuku xo tseniha, nianna tti gale nuha: “Ata anka tse‑nila, ute udo xa tata.” Nianna tti gale benne abí tee geeha: “Lu nna naa tte udú o si lo yu‑ni tte udo.”
JAM 2:4 Tti ruinle aníha, satsaba nuha ruinle kumu rugwerulale lidhaka ttu benneha nna rilhida gaale attue.
JAM 2:5 Betsi to kia, gwaludo nagale nu innía. ¿Laaba ganna Tata Do Yebáha chi bekwebie ka benne abittu tee geke kini tsia tsitsi leke bie lhe anágaba ka benneha nuha ralhake innabia Tata Do Yebáha ke, kumu nuha nu tse ugwebie ka benne rakakanie gebie? Uinbe attiba chi rabie.
JAM 2:6 Ttaka lebi'i nna rigu'ula ni'ale ka benne abittu geke tee. ¿Laaba ganna ka nu tee gekinna, lakana nuná rudhaka disakana le lhe raga'akana le lo uxtisi lhe?
JAM 2:7 Yule lakana nuná riguakana bala'ana ge benne uxie le kini akale gebie, delába Jesucristu benne re tse leha.
JAM 2:8 Tseba nuha uinle ganna si gwalíga udole tisa ge nu ra lo bia bennabi bodha'an benne rinnabiaha, delába Tata Do Yebáha. Lo ka yetsi geeha, dia ra: “Akinlu ge ttu benne attiba rakabin gelu”, ganna aníha uinlu, la'ania nna tseba nuha ruinlu.
JAM 2:9 Ttaka ganna lebi'i rugwerulale lidhaka ttu benne atti attu benne, la'ania nna tulhaba nuha chi ruinle lhe anágaba nna chiba rinittile de abittu rudole tisa ge nu ra lo bia bennabi bodha'an Tata Do Yebáha.
JAM 2:10 Kumu nuxaba benne ganna rudobie tisa ge iyá nu bodha'aneha, ttaka ganna ttu tte nu ra lo ka tisaha abittu unie, la'ania nna ttisidiba ge iyába nu ra lo nuha abitturu rudoe tisa.
JAM 2:11 Kumu Tata Do Yebáha, delába benne rabie: “Bittu isálu nu labí anka latselalu”, benneha‑gaba nuha ree: “Bittu uinlu elhutti.” Ganna lu abittuba risálu attu nu subi, ttaka ganna ruinbalu elhutti, la'ania nna labí rudolu tisa ge nu ra lo bia bennabiha.
JAM 2:12 Latsiru gwaluni lhe latsiru gwalinne lhe. Gwaluni atti galába ttu benne ruin Tata Do Yebáha elhuxtisi gebie. Lee rixúnie bia bennabi bodha'aneha kini rodilábie ri'i.
JAM 2:13 Kumu ka nu abittu ratua lekani ka benne, bittugaba satua le Tata Do Yebáha kana tti unie elhuxtisi gekani. Ttaka ka benne satua leke nuxaba benne, tseba saríana ka benneha tti aka elhuxtisi geke.
JAM 2:14 Betsi to kia, ganna ttixka ttu benne innee: “Neti gwa riaba lasia ge Jesús‑ni”, ttaka ganna benne rinneha abíba runie latsiru, la'ania nna labí ixú nu rinneeha. Lebi'i nna, ¿bí rale? ¿Si gwa rudhaka lele deki ukare'aba chi ra benneha: “Neti gwa riaba lasia”, la'ania nna chiba odilá Tata Do Yebáha benneha?
JAM 2:15 Ganna ttixka ttu benne ria lebie ge Jesús‑ni, sila anke nuila o nubiyú, benneha ganna abíba xo to gebie tee, o sila riyasanie nu goe ttu ttu sá,
JAM 2:16 nianna ganna ttixka nuxa ttúle gale benneha: “Besiru beyya lhe bikutti xo to gelu lhe jeru golu lhe”, ttaka ganna lebi'i abígaba rugwele benneha nu riyasanie goe lhe ukue lhe, la'ania nna labí ixú nu rinneleha.
JAM 2:17 Aníha‑gaba ganna ttixka rari'i deki gwa riaba leri'i ge Jesús‑ni, ttaka ganna abíba ruinri'i ttu bixa nu tse, la'ania nna labí ixú nu rinneri'iha.
JAM 2:18 Ttaka ganna ttu benne innee: “Se'e ka benne gwa ria leke Tata Do Yebáha, nna se'egaba ka benne ruinke nu tse lhe”, ttaka neti ria: “¿Gasina yua deki gwalí ria le ttu benne ganna ttixka abíba rule'e looe nu tse runieha? Neti nna de ruin tsea, de nuha nna rula'a deki gwalíti ria lasia bie.
JAM 2:19 Ttibanka lu tseba nuha ruinlu de ria lelu deki ttúba Tata Do Yebáha do, ki ka espíritu xxegwiha anágaba ruin ka nuha, gwa riagaba lekani deki ttúba Tata Do Yebáha do, de nuha nna rasikinna axtaba rixidikana.”
JAM 2:20 ¡Aaluxa nu akaa elha rieni ikini! ¿Si bi gwa yulu deki labí ixú nu rari'i: “Gwa riaba leri'i Tata Do Yebáha” ganna abíba ruinri'i ttu nu tse?
JAM 2:21 ¿Laaba ganna Abraham benne uke xuttori'iha, tti benie utebie xi'in biyúe Isaac‑ni úna lo bekú ge Tata Do Yebáha, laaba ganna de nu benieha nna ulea tse Tata Do Yebáha bie?
JAM 2:22 Biyúruga, Abraham‑ni de ugía lebie Tata Do Yebáha, de nuha nna gwa bedo Abraham‑ni tisa gebie, nna tti benie nu ra Tata Do Yebáha, la'ania nuha nna bele'e deki gwalínie ria lebie benneha.
JAM 2:23 Ukaba attiba ra lo ka yetsi ge Tata Do Yebáha ata dia ra: “Abraham‑ni, de ugía lebie ge Tata Do Yebáha, de nuha nna upe bie kwenta deki anke benne runi nu dika ixú.” Aníha uka nna utta lábie benne do tse len Tata Do Yebáha.
JAM 2:24 Gwaluyúruga, Tata Do Yebáha ribea tsebie benne de runie nu tse, labí ukare'aba de chi ria lebie.
JAM 2:25 Aníha‑gaba gwate Rahab nuila betto'o latiniha. Ulea tsegaba Tata Do Yebáha na kumu de bekatsina lhe'e lisiniha ka benne dia gwelhatsiha lhe de bedhelhana ka benneha lo attu neda subi ki abittu biyaxxuke.
JAM 2:26 Kumu ttiba anka lhe'e bela latiri'i‑ni, ganna nuní anúba espíritu do lhe'eni, la'ania nna yattiba ankana, labíru ixúna. Aníha‑gaba nuha anka tti rari'i deki gwa riaba leri'i Tata Do Yebáha, ttaka labí ixú nuha ganna abíba uinri'i ttu nu tse.
JAM 3:1 Betsi to kia, bittu iyále uinle ge maestru, kumu gwa yúbari'i deki ri'i ka nu rule'eri'i ka tisa ge Tata Do Yebáha, tsitsiru udhake ri'i ganna ttixka abíba ule'enri'i ka benne nu dika ixú.
JAM 3:2 Kumu iyábari'i satti balhaba rinittiri'i. Ganna ttixka ttu benne abittuba rinittie bitti innábie, benneha‑ligaba nna gwanke ttu benne runi itá su lhe gwakagaba gebie innabie itú latie lhe.
JAM 3:3 Ttiba ttu kwayu, tti rigu'uri'i frenu ro'oni ki udona tisa geri'i, la'ania nna len frenuha gwa ridábari'i rodekiri'i kwayuha.
JAM 3:4 Gwalulanniruga ka barcu‑na. Ka nuná meskiba ankakana elha lhe meskiba bikaxa tipa anka be ru'una kwe'ekani, ttaka nu rudhána barcuha, suna len ttu yaga chika'a to nu tee láni timón, suna len nuha‑ba nna gwa ridábana rodekina lo barcuha.
JAM 3:5 Anágaba lhusari'i‑ni, ttu nuxka'a toru anka nuní rapari'i, ttaka tti rinnena nna xxeniba anka elha gaa rigilana. Gwaluyúruga attiba ttu gi chika'a to, gwa ridaana ruttena ttu i'iyatoo xeni, aníha‑gaba anka lhusari'i‑ni.
JAM 3:6 Lhusari'i‑ni ankabana ttiba ttu gi. Ankabana ttu nu rapari'i nna ruinna nu satsa; tti rinnena nna rutsigabana ri'i arlo Tata Do Yebáha. Itúba se'eri'i anka benri'i yiesi lo yu‑ni runnittibana ri'i. Ttiba gi ge nu xxegwiha ankana.
JAM 3:7 Kumu iyába ka nimala ka nu sia ttapa ni'akinna lhe ka nu sia xxilakinna lhe ka nu ra'aya lhe'ekani lo yu lhe anágaba ka nu reki lhe'e indatooha lhe, iyába ka nuná gwa ruttanaba ka benne se'e yiesi lo yu‑ni kana.
JAM 3:8 Ttaka lhusari'i‑ni, ni ttúri'i labí dhaari'i uttánari'i na. Ankabana ttu nu satsa labí dhaari'i ukwedari'i na. Ttiba ttu belha ta'a inda dhua‑ni, aníha‑ba anka lhusari'i‑ni rutse'e loobana tti rinnena,
JAM 3:9 kumu len lhusari'i‑ni rulhari'i ge Tata Do Yebáha benne anke Xxudiri'iha lhe len lhusari'i‑nigaba rigeri'i iki ka benne se'e yiesi lo yu‑ni lhe, delába ri'i ka benne ben Tata Do Yebáha attiba anke.
JAM 3:10 Betsi to kia, labí dika uinri'i aná kumu, ¿gasina nuha nna la len ro'obari'i rulhari'i ge Tata Do Yebáha nna la len ro'ogabari'i rigeri'i iki ka benne?
JAM 3:11 ¿Laaba ganna labí dikana ttúba ro'o dinaha iria inda tseha lhe iriagaba inda ilháha lhe?
JAM 3:12 Xa betsi to kia, ¿laaba ganna labí aka kwia olivu lo ttu ya higu, nigaba labí aka kwia higu lo ttu ya uva? Anágaba ro'o ttu dina labí aka unna nuha inda tse, nianna edeonnagabana inda ixe.
JAM 3:13 Ganna nuxa ttúle ankale nu yuu lhe ankale nu rapa elha rieni lhe, teeki uinle latsiru, bittu uinle ttaba. Aníha kini ule'e deki gwankale nu gwa rapa elha rieni.
JAM 3:14 Ttaka ganna risi xxattinle ttu benne o ritilha len luesile lhe, la'ania nna labí teeki tse'ele innále deki ankale nu yuu, kumu ganna ritisibinle ka benne o ritilha len luesile, la'ania nna ruinba lele.
JAM 3:15 Kumu luesi elha rieni rapale‑na, labí anka nuná nu rute Tata Do Yebáha, ankaba nuná ge yiesi lo yu‑ni. Ankaba nuná nu riria iki ka benne lhe anágaba ankagaba nuná ge nu xxegwiha.
JAM 3:16 Kumu ata ritisin luesi ka benne lhe ata ritilhake lhe, niha nuha tee elha gaa lhe niha nuha raka iyá looba nu satsa lhe.
JAM 3:17 Ttaka benne rape elha rieni rute Tata Do Yebáha, benneha labí anke nu ruin satsa. Ankalee ttu benne rukenie lhe anke ttu benne re tse lebie lhe anágaba ankagabe ttu benne re yusi lebie lhe satíaba ratua lebie ka benne lhe anágaba ankagabe benne runi latsiru lhe benne runi tu tulapa len ka benne lhe anágaba ankagabe benne itú iki itú lebie runie ttu bixa, labí delo tisaba runie nuha.
JAM 3:18 Kumu ka benne ruinke kini tse'e tse len luesi adí ka benne, ka benneha, de ruinke latsiru nna saría tsena ke arlo Tata Do Yebáha.
JAM 4:1 ¿Gá riria ka elha utilha lhe ka elha gaa tee gele‑na ganna? ¿Laaba ganna lhe'e lastole‑naba riria ka nuná kumu ru'u lele ruinle nu satsa?
JAM 4:2 Kumu lebi'i ridá lele nu tee ge attu benne subi, ttaka abígaba riselinle. Nianna tti ridulole ruttile ka benne lhe rutía di lele ka benne lhe, ttaka nna abígaba riri'a lenle dhile nu raka leleha. Nianna tti redetilhale lhe rulisa luesile lhe, ttaka nna abittugaba ridíle nu raka leleha. Abittu galá ridíle nuha, kumu labí rinnabale len Tata Do Yebáha.
JAM 4:3 Tti rinnabale nna abí galá ridíle. Bittu galá ridíle, kumu de labí rinnaba tsele, kumu rinnababale nuha ki ixuinle na attiba rakaba lele.
JAM 4:4 Aalexa ka nu chi rudhá ikile Tata Do Yebáha. ¿Si lagwa gwa yule deki ganna ttixka ri'i ru'u leri'i nu satsa raka yiesi lo yu‑ni, len Tata Do Yebáha nuha abittu se'e tseri'i? Laxkala ganna ttixka ttu benne ru'u lebie runie nu satsa, len Tata Do Yebáha nuha abittu do tsebie.
JAM 4:5 Bittu akinle deki kwentaba ra lo ka yetsi ge Tata Do Yebáha ata dia ra: “Espíritu bete Tata Do Yebáha do lhe'e lastori'i, yalhá rakin benneha geri'i lhe rapa sune ri'i lhe.”
JAM 4:6 Ttaka Tata Do Yebáha redárula lebie rakanie geri'i. De nuha nna ra lo ka yetsi geeha: “Tata Do Yebáha redú dise lo ka nu ruinkana ttaba nna ka benne abittu ruinke ttaba nna gwa rakaba lanie ke.”
JAM 4:7 De nuha nna gwaludo tisa ge Tata Do Yebáha nna nu xxegwiha nna gwaledú disa loni. La'ania nna gudhanba nuha le.
JAM 4:8 Gwalebigala len Tata Do Yebáha, benneha nna gwebigagabe lenle nna lebi'i ka nu ruin tulha, gwaludhan nu satsa ruinle‑na, nna lebi'i ka nu rudú chupana lele nna gwalodola lele Tata Do Yebáha.
JAM 4:9 Gwalodúna le ge nu ruinle lhe gwalikwesila lhe, anágaba gwalelenilinle lhe. Nu uka gwitta gwexisi gele ttuha, labíru aka nuha aníha. Nnanna nna gwalikwesila lhe gwaludú si'ila lele lhe.
JAM 4:10 Arlo Tata Do Yebáha bittu uinle deki ra xxeni lele, benneha nna gugwebe lidhakale.
JAM 4:11 Betsi to, bittu inne ge luesile, kumu nu rinnena ge betsi to geri'iha, ge bia bennabi bodha'an Tata Do Yebáha nuha riguana bala'ana. Ganna lu rigualu bala'ana ge bia bennabiha, la'ania nna labíru ankalu nu rudo tisa ge nu reeha, sinuki ttiba ttu xueda runi elhuxtisi, aníha‑ba chi rakalu kumu de rapalu lo neda rinnelu.
JAM 4:12 Kumu sunruba ttu benne do anke xueda, delába Tata Do Yebaa benne bodha'ane nu dika uinri'i. Benneha nuha gwaka gebie odilábie ri'i o urixxi ukinnie ri'i. Lu nna, ¿núla ankalu nna rigualu bala'ana ge attu benne?
JAM 4:13 Nnanna nna gwaludo nagale, lebi'i ka nu rale: “Nasá o uxxeha tsiari'i lhe'e attu yiesi subi nna lhe'e yiesiha tse'eri'i delo ttu ida. Niha tsekiri'i gwerixxi nna tseba belhiu dhiri'i.”
JAM 4:14 Ttaka labí yule bí aka uxxeha kumu ri'i labí isá dari'i yiesi lo yu‑ni. Ankabari'i attiba bea tseni, ttu sattiruba ribena nna ttu nnelaba retuana.
JAM 4:15 Lebi'i nu innálale: “Ganna Tata Xisiha aka lebie aka benruri'i, la'ania nna gwakaba uinri'i nuní o lhe uinri'i nuná lhe.”
JAM 4:16 Ttaka lebi'i rise'elale elha ro'o lhe'e gele lhe ruinle ttaba lhe. Neti ria: “Iyába luesi elha ttaba ruinle‑na, labí anka tse nuná.”
JAM 4:17 Laxkala ttu benne ganna chi yue deki teeki unie nu anka tse, ttaka ganna benneha abíba ruin tsebie, la'ania nna tulhaba nuha chi daabie.
JAM 5:1 Gwaludo nagale, lebi'i ka nu tee xxatta gele. Gwalikwesi lhe gwaleleninle lhe de chi dabiga uyúle elha disa.
JAM 5:2 Nu tse tee geleha, delába nu tua tsenleha, chiba rusu nuha lhe anágaba ka xole‑na chiba ru'una ka nuná.
JAM 5:3 Oru gele‑na lhe plata gele‑na chiba ritube ka nuná. De ritubekana de nuha nna runna liina deki labí ben tsele kumu bedorulana lele utua tsele oru‑na lhe plata‑na lhe, nna labí bixuinle na ki uinle nu dika ixú. De lo ni'a ge nuná nna utse'e loobana le ttiba runi giha rutse'e loona, kumu chiba dabiga isia sá uin Tata Do Yebáha elhuxtisi ge ka benne, lebi'i nna si yu'ulale gwedien elha tse gele.
JAM 5:4 Gwaluyúruga, ka nu ureni gwetselaha bedíkana lena lo ka yu geleha. De abittu utixale kana, de nuha nna chi rinne lhákana arlo Tata Do Yebáha benne ra xxeni leha. Benneha nna chiba bedo nage ge nu rinnabakanaha.
JAM 5:5 Lebi'i chiba bedí baale nu tee yiesi lo yu‑ni attiba rakaba lele. Ankabale attiba ttu ku'una rodixen latini kini chi du tsena ganna chi isia sá gattina. Aníha‑ba satele tti isia sá ugwe Tata Do Yebáha le elha disa.
JAM 5:6 Lebi'i biri'aba lenle berixxi bekinnile benne runi nu dika ixúha lhe bettilee lhe. Benneha nna labí benie edú dise lole.
JAM 5:7 Ttaka lebi'i xa betsi to, gwaltse'e ubeda axtaliba ganna chi esia benne anke Xxanari'iha. Gwalulanniruga ge nu ra'ana lo yuha. Nuha besiba ribeki leni, ridobana ubeda iyya neru lhe iyya bito lhe. Aníha nna gwa redíbana lena lo yuha.
JAM 5:8 Anágaba lebi'i, tsitsi gwaltse'e lhe besiba gwalikweki lele kumu chi tteba dabigana esia Benne anke Xxanari'iha.
JAM 5:9 Betsi to, bittu inne lha ge luesile kini abittu ibixxi iginnile. Benne unie elhuxtisi geri'iha chi tteba esia Benneha.
JAM 5:10 Gwaluni tti ben ka profeta ugwekike utixxi'ake nu ra Tata Xisiha. Yule ka benneha betto bechíabake atti biyúke elha disaha.
JAM 5:11 Ri'i rari'i: “Karubáru ka benne bechíake lo elha disaha.” Lebi'i gwa biyienibinle ge nu gwate Job‑ni. Benneha besiba uleki lebie, bechíabe lo nu gwateeha lhe anágaba chigaba yule nu tse ben Tata Xisiha len benneha iki de tti chi gwatebie aníha. Kumu Tata Xisiha yalhá benne si'i lasi lhe yalhá benne ratua lasi anka benneha.
JAM 5:12 Betsi to kia, attu nu raka doelha uinle: ttixka innále uinle ttu bixa, abittu udettile Tata Do Yebáha, nigaba a udettile yiesi lo yu‑ni o bixaru attu. Lebi'i, ganna ttixka rudhaka lele gwadaabale uinle nu raleha, ukare'aba gwalinná: “O” nna ganna ttixka rudhaka lele abittuba dhaale, la'ania nna ukare'aba gwalinná: “Bittu aka.” Aníha kini abittu urixxi ukinni Tata Do Yebáha le.
JAM 5:13 Ganna nuxa ttúle ruyúle elha disa ge ttu bixa, gwalinnaba len Tata Xisiha nna ganna nuxa ttúle du itta lele nna gwalulhala le'a gebie.
JAM 5:14 Ganna nuxa ttúle ranile nna gwaligaxi ka benneola rise'e arlole lhe'e yotuha kini innaba ditike len Tata Xisiha ge benne raniha, nianna tti kabike latti seti iki benneha nna tti udettike Jesús benne anke Xxanari'iha.
JAM 5:15 Kumu ri'i tti rinnabari'i len Tata Xisiha, ganna ruxxen tsitsi leri'i deki gweyakaba benne raniha, la'ania nna gwelhidhaba Tata Xisiha benneha nna ganna benne raniha chi binittie benie tulha, la'ania nna gwadíbe elha xen lasi ge benneha.
JAM 5:16 De nuha nna gwalikixxi'en luesile ge ka tulha chi benle lhe anágaba nna gwalinnaba ge luesile arlo Tata Xisiha kini eyakale. Kumu benne runi nu anka tseha, tisa rinnebie atti rinnabe len Tata Xisiha, tsitsi ra le tisaha lhe anágaba nna gwa rakaba nu rinnabeha.
JAM 5:17 Ttibanka profeta Elías‑ni, benneha ukabe benne attiba ri'i. Itú iki itú lebie unnebie len Tata Do Yebáha unnabe ki abittu aka iyya delo tsunna ida nalhaha. La'ania nna labí iyya uka.
JAM 5:18 Iki de nuha nna bedennabe kini aka iyya. La'ania nna gwa bedeakaba iyya yiesi lo yu‑ni, nianna gwa bexúba lena lo ka yuha.
JAM 5:19 Betsi to kia, ganna nuxa ttúle chi rudhanle abitturu ria lele ge ka tisa rigixxi'a nu anka gwalí, ttaka ganna nuxa ttúle odekile benne abitturu ria leeha ki eyya lebie attu libe,
JAM 5:20 netiru ria, ganna lebi'i dhaale odekile benneha, ttu benne ruin tulha nuha chi odilále kini abittu gattie, delába ki aka gebie esine len Tata Do Yebáha. Lhe anágaba ge ixeba ka tulha chi ben benneha, ge iyába ka nuha dhi Tata Do Yebáha elha xen lasi gekani.
1PE 1:1 Neti Pedro ankaa apóstol ge Jesucristuha. Ridhelhaa yetsi‑ni gele, lebi'i ka benne biriale nna chi se'ele lhe'e ka yiesi dittu‑na; delába se'ele itúba daka Ponto lhe daka Galacia lhe daka Capadocia lhe daka Asia lhe daka Bitinia lhe.
1PE 1:2 Lebi'i ttuha‑li chi ga'anani Xxudiri'i do yebáha gaxie le lhe chi bekwebie le kini akale gebie. Bixúnie Espíritu geeha kini ulesie le ki udole tisa gebie lhe anágaba kini eyarile len reni ge Jesucristuha. Lake edá leke aka lenke le lhe use'eruke le xen su lasi lhe.
1PE 1:3 ¡Xxeniba ra le Tata Do Yebáha Xxudi Jesucristu benne anke Xxanari'iha! Kumu de ratua xxatta lebie ri'i, de nuha nna beyonie ri'i benne kubi tti belhidha benbie Jesucristuha lo elhuttiha. Aníha benie kini ri'i gwalíga uxxen leri'i deki
1PE 1:4 gwadíri'i nu abittu tse'e loo lhe abittu ankana tsiga lhe abittu ratti ikini lhe. Nuní chi tua tse gele yebáha kini dhile.
1PE 1:5 Lebi'i de chi ria lele ge Tata Do Yebáha, de nuha nna len nu ra tsitsi leeha, len nuha ruyú tsitsie le kini odilábie le attiba chi ga'ananie aka ganna chi bisia sá daluxaha.
1PE 1:6 De nuha nna gwaludú itta lele, meskila nnanna laka se'ele yiesi lo yu‑ni, ixeba elha disa teeki satele ttu satti.
1PE 1:7 Kumu ttiba ttu oru, meskiba ankana nu rise'e loo, teeki tte nuha lo giha kini ula'a ganna gwalí ankana taga'a oru, aníha‑gaba nuná lebi'i, de elha disa ruyúleha, len nuha ula'a ganna gwa ria tsitsi lele ge Tata Do Yebáha. De nuha nna lebi'i dakarula de chi ria lele gebie attichula ttu oru. Laxkala ganna chi esia Jesucristuha, la'ania dhi lidhakale lhe inná xxeni lele lhe ebana lele ge nu ankale lhe.
1PE 1:8 Benneha, meskiba abittu chi bilenlee, ttaka nna gwa rakabinle gebie lhe anágaba nnanna meskiba abittu rilenlee nna gwa riaba lele gebie. De nuha nna tee ttu elha gwedeaka lasi xeni gele, ttu elha gwedeaka lasi nu labí yule kixxi'ale gasina ankana.
1PE 1:9 Tee elha gwedeaka lasi gele kumu chi diale e'eyule kini dhile nu ruxxen lele geniha, delába ruxxen lele deki gwalíba odilá Tata Do Yebáha le.
1PE 1:10 Ka profeta use'e itú nu reha, tsitsiba benke kini bebea ni'ake kini yuke gasina edá le Tata Do Yebáha odilábie le, nianna tti ugwekike utixxi'ake ge nu chi bebea ni'akeha.
1PE 1:11 Bebea ni'ake kumu de raka leke unake bí aka lhe nuka aka nu ra Espíritu ge Cristuha, delába Espíritu do lhe'e lastokeha. Espírituha chila utixxi'e bipaxa elha disa sate Cristuha lhe anágaba utixxi'agabe bí nu tse aka iki de chi gwate benneha aníha.
1PE 1:12 Utixxi'anie ke deki iyába nu sate Cristuha lhe iyába nu tse aka iki de chi gwate benneha aníha, nuha labí akana tti sa se'eke anka benke, sinuki len lebi'ila ixú nu unnekeha. Ka benne rekike rigixxi'ake ka tisa ge Cristuha nnanna, ka benneha nuha chi utixxi'akanie le nu ra ka profetaha. Espíritu daa yebáha, labie benie kini utixxi'a ka benneha nu ra ka profetaha. ¿Laaba ganna axtala ka anjeli ge Tata Do Yebáha raka leke ilákanie nu si akaha?
1PE 1:13 De nuha nna gwalulaba tse lele lhe abittu bitti uinle lhe. Anágaba lhe, tsa gwaluxxen lele deki gwadíbale nu tse redá le Tata Do Yebáha utebie gele ganna chi besia Jesucristuha attu libe.
1PE 1:14 Gwaluni atti galába ruin ttu xi'ini rudona tisa ge xxudiniha, abitturu uinle luesi nu satsa rulaba lele ttuha atti labí chi yule ge Tata Do Yebáha.
1PE 1:15 Lebi'i gwaltse'ela gwaluin latsiru, abittu bi nu satsa uinle, ttiba Tata Do Yebaa benne uxie leha. Benneha anke benne abittu nu satsa runie.
1PE 1:16 Kumu lo ka yetsi geeha ree: “Latsiru gwaluni, abittu bi nu satsa uinle, kumu neti ankaa benne abittu nu satsa runia.”
1PE 1:17 Tata Do Yebáha ttúba ruin benneha len iyábari'i. Ruinbe elhuxtisi geri'i kua nu ruinba ttu tturi'i. Laxkala ganna lebi'i rale Tata Do Yebáha anke Tata gele, laka se'ele yiesi lo yu‑ni gatta elha rasi gele lenbie ganna xa.
1PE 1:18 Lebi'i gwa yúbale, labie nuha bebeabie le lo nu abittu dika ixú ruinle ttuha, delába nu abittu dika ixú bedaxxule ge ka xxudileha. Labí len oru lhe labí len plata nu rise'e loo yiesi lo yu‑ni, labí len nuha uxa gele kini bebea Tata Do Yebáha le lo nu abittu dika ixú ruinleha,
1PE 1:19 sinuki len reni ge Cristuha‑la uxa gele kini bodilaa Tata Do Yebáha le. Nu gwate Cristuha lo ya kurusiha nuha nu daka. Benneha uke attiba ttu neru to nu rutekana úna lo bekú ge Tata Do Yebáha. Neru toha labí tsiga ankana lhe labí bixa ankinna lhe. Aníha‑ba nuha uka Cristuha tti uttie utixe geri'i.
1PE 1:20 Benneha, attili lani kwe yiesi lo yu‑ni, chila ga'anani Tata Do Yebáha bie kini odilábie le, ttaka nnanna lhe'e ka sá se'eri'i‑niliba chi bisiabie kini lebi'i saría tsena le.
1PE 1:21 De Cristuha nna lebi'i chi ria lele Tata Do Yebáha. Benneha nuha bechidha Tata Do Yebáha lo elhuttiha lhe anágaba bengabe kini inná xxeni le Cristuha, kini anáchu lebi'i uxxen lele ge Tata Do Yebáha lhe tse'ele kwedale nu chi rabie unie.
1PE 1:22 Lebi'i, de rudole tisa ge nu ra ka tisa ka nu anka gwalí, de nuha nna chi bochari Espíritu ge Tata Do Yebáha le. Aníha kini gwalíga isinle akinle ge adí ka betsi to gele. De nuha nna itú iki itú lele akin ge luesile.
1PE 1:23 Nnanna chi beyakale benne kubi, attiba ttu nu beyali attu libe, aníha‑ba chi ankale. Labí beyalile lhe'e ka tata nan gele, delába ka benne ankake ge yiesi lo yu‑ni lhe ankake ka benne rattibake lhe, sinuki lebi'i beyalile attu libe de chi ria lele ka tisa ge Tata Do Yebáha. De nuha nna chi beyakale benne kubi, kumu ka tisa geeha ankake bani lhe ruchíake ttu dia lii lhe.
1PE 1:24 Kumu: Iyába ka benne se'e yiesi lo yu‑ni ankabake attiba ttu ixxi, nu ra xxeni lekeha ankabana attiba ttu iyya to daa lhe'exxi. Ixxiha ribisibana nna iyya toha nna rigudhibana,
1PE 1:25 ttaka ka tisa ge Tata Xisiha ttu dia liiba ruchía ka benneha. Ka benneha nuha ka tisa tse utixxi'entu le.
1PE 2:1 De nuha nna lebi'i chinka gwalikua iyá nu satsa ruinle lhe iyá gwen lasi rinnele lhe. Anágaba chinka gwalikua iyá nu delo tisaba ruinle deki ankale benne tse lhe anágaba gwalikuagaba nu risin luesile lhe iyá nu rinne ge luesile lhe.
1PE 2:2 Gwaluni attiba runi ttu nuto si uli. Nutoha raka leni gasina xisi. Aníha‑gaba lebi'i gwaludo lele ka tisa ge Tata Do Yebáha. Ka tisaha nuha ankake taga'a. Ka benneha uinke kini lebi'i tsiale tse'e tsitsirule lo neda ge Tata Do Yebáha, kini aníha nna ulhuxa loe odilábie le,
1PE 2:3 kumu lebi'i chiba ute denle deki Cristu benne anke Xxanari'iha, benneha anke benne tse.
1PE 2:4 Gwalibiga kwe'e Cristu benne anke attiba ttu íyya bani. Benneha nuha ulu'u ni'a ka benne, ttaka len Tata Do Yebáha anke benne daka xxatta lhe bekwegabe bie lhe.
1PE 2:5 Anágaba lebi'i ankagabale ttiba ka íyya, diale rikuale rakale attiba ttu yotu ata dho Espíritu ge Tata Do Yebáha lhe anágaba ankagabale attiba ttu bixxudi chi ulesie kini utele úna nu dika tsu'u le Tata Do Yebáha, delába uinle nu dika tsu'u lebie de chi ria lele Jesucristuha.
1PE 2:6 Ge Cristuha nuha rinne Tata Do Yebáha lo ka yetsi geeha, tti rabie: Neti udoa ttu íyya lhe'esi Sión‑ni nu ugwena xilatti yo'oha. Benne anke íyyaha, benneha nuha chi bekwea lhe anke ttu íyya daka xxatta lhe. Benne uxxen lebie ge benneha, labí ettunie gebie.
1PE 2:7 Lebi'i ka benne chi ria lele Tata Do Yebáha, len lebi'i benne anke íyyaha benneha tee lidhake, ttaka len ka nu abittu ria lekanie, len ka nuha nna reyakabe nu rigu'u ni'akani, attiba ra lo ka yetsi ge Tata Do Yebáha ata dia ra: Íyya ulu'u ni'a ka nu rukuakana yo'oha, nuha‑la bisinna ukana íyya nu begwena xilatti yo'oha.
1PE 2:8 Lhe anágaba: Ankagabana ttu íyya richeku ka benne ikini nna ribixxike. Richekuke ikini de labí bedoke tisa ge nu ra Tata Do Yebáha, kumu aníha‑ba chi ga'ana sateke.
1PE 2:9 Ttaka lebi'i ankale ka nu chi bekwe Tata Do Yebáha lhe ankagabale bixxudi gebie de rinnabie le. Lebi'i nuná chi ulesie le kini akale gebie kini anáchu kixxi'ale ge nu rebaninri'i runie. Labie uxie le kini beriale lhe'e chulhaha nna beta'ale lhe'e xiani geeha, delába xiani nu rapi edha linníha.
1PE 2:10 Lebi'i itú ttuha labí chi ankale ge Tata Do Yebáha, ttaka nnanna chi ankale gebie. Itú ttuha labí gwatua lebie le, ttaka nnanna chi ratua lebie le.
1PE 2:11 Betsi to kia, ttiba ttu benne dittu lhe ttiba ttu benne yu'u neda, aníha‑ba ankari'i yiesi lo yu‑ni. De nuha nna rinnabaa len lebi'i abittu uinle nu satsa retaba lele uinle, kumu nu satsa‑na runnittiba nuná ri'i.
1PE 2:12 Latsiru gwaluni lagwi ge ka nu abittu chi ankabiakinna Tata Do Yebáha, kini meskiba rinnekana gele rákana deki ankale nu ruin satsa, nna tti ilákinna deki tseba ruinle, la'ania nna innákana deki xxeniba ra le Tata Do Yebáha ganna chi isia sá unie elhuxtisi ge ka benne.
1PE 2:13 Lebi'i de abittu itua bala'ana ge Tata Xisiha, de nuha nna gwaludo tisa ge iyá ka nu rinnabia se'e yiesi lo yu‑ni, sila nu rinnabia xeniha kumu de ankana nu ra xxeni leni
1PE 2:14 o sila ka nu rinnabia gwexxaru kumu de rose'e nu rinnabia xeniha kana kini ugwekana ka nu ruin satsa‑na elha disa. Anágaba nna ugwegabakana lidhaka ka benne ruin latsiru.
1PE 2:15 Kumu Tata Do Yebáha raka lebie uinle latsiru. Aníha kini udheale ro'o ka nu akaa elha rieni ikikani kini abitturu innekana gele.
1PE 2:16 Gwaluni atti galába benne chi bese'e lhaa, deba nna abittu akinle de chi bese'e lhaale nna uinbale nu satsa rakaba lele, sinuki gwaluinla atti galába benne rixúe lo sina ge Tata Do Yebáha.
1PE 2:17 Gwaltsia lele iyá ka benne lhe akinle ge ka betsi to geri'i lhe, anágaba gattagaba elha rasi gele len Tata Do Yebáha lhe gwaltsia lele nu rinnabia xxeni do Roma‑ni lhe.
1PE 2:18 Lebi'i ka benne to'ole lo sina, latsiru gwaludo tisa ge ka xxanale‑na, gwaltsia lele kana. Abittu suna ka nu re tse lekinnaba o ka nu re besi lekinnaba tsia lele, sinuki gwaltsiagaba lele ka nu re satsa lekinna lhe,
1PE 2:19 kumu tserula anka ganna ttixka ttu benne, de rudobie tisa ge Tata Do Yebáha nna gwa ruchíabie lo elha disa ruyúbie, meskiba abittu bixa nu satsa runie.
1PE 2:20 Kumu ganna ttixka lebi'i ridí gele de rutsetsile, meskiba gwa ruchíale lo elha disa rateleha, labí ixú nuha kumu ralhabale dhile elha disaha. Ttaka ganna gwa ruchíabale lo nu rateleha de ruin tsele, la'ania nna nuha gwa ru'u le Tata Do Yebáha.
1PE 2:21 Kumu dela nuha uxie le lo neda geeha, kumu anágaba Cristuha, de lebi'i nna gwatebie biyúe elha disa. Nu gwate benneha ixúna kini ulannile nna anágaba lebi'i uchíagabale lo nu rateleha.
1PE 2:22 Benneha labí nu satsa benie lhe labí gwen lasi unnebie lhe.
1PE 2:23 Atti belisa xxattakaneha, labie labí bekabi satse gekani lhe atti rudhaka xiikaneha, labí benie edú dise lokani, sinuki bedha'anlee nu rudhakakaneha lasi ná Tata Do Yebaa benne runie elhuxtisi attiba ankaba geniha.
1PE 2:24 Kwinaba Cristuha bedelha kwe'ebie yua ge ka tulha geri'iha tti uttie lo ya kurusiha kini ri'i attisidiba chiba uttiri'i, lanúruri'i se'e kini uinri'i tulha. Aníha kini tse'eri'i uinri'i nu dika ixú, kumu de ka gwe uka latieha, de nuha nna lebi'i chi bese'e tsele arlo Tata Do Yebáha.
1PE 2:25 Kumu lebi'i ttuha, attiba ttu neru biganna ukale, ttaka nnanna chi beyekile len Cristuha. Benneha ruyúbie le attiba ttu nu ruyú ka neru to.
1PE 3:1 Lebi'i ka nuila, gwaludo tisa ge ka nubiyú gele‑na kini ganna se'e ka nubiyú gele ka nu abittu chi ria lekani ka tisa ge Tata Do Yebáha, ganna rudole tisa gekani, la'ania nna labí raka doelha kixxi'enle kana, ukare'aba ilákinna elha ruin gele nna chi tsia lekani
1PE 3:2 tti ilákinna deki gwa riaba lele kana lhe gwa ruinbale latsiru lhe.
1PE 3:3 Abittu akinle de ese'e tse xxattabale, delába bittu akinle de eyoin tse xxatta ikile lhe de ku'u nále lhe ku'u yienle ka oru o lhe de ukule ka xalho ka nu daka xxatta lhe, abittu akinle de uinle aníha nna dakarule arlo Tata Do Yebáha.
1PE 3:4 ¡Ko'o! Sinuki lhi'u lhe'e lastolale nuná uinle kini akale benne tse lhe benne re besi lele lhe, kumu nunonna abittu rise'e loo lhe nunonna nu dakaru arlo Tata Do Yebáha lhe.
1PE 3:5 Kumu ka benne nuila use'e itú ttuha, ka benne ukake ge Tata Do Yebáha, ka benneha aní benke. Ge benneha‑ba bexxen leke nna gwa bedobake tisa ge ka nubiyú gekeha
1PE 3:6 ttiba ben Sara‑ni bedoe tisa ge Abraham‑ni, axtala ree benneha: “Tata xisi to kia.” Anágaba lebi'i gwasingabale akale xi'iniunná Sara‑ni, ganna uinle latsiru lhe abittu bi ge gasinle lhe.
1PE 3:7 Anágaba lebi'i ka nubiyú, latsiru gwaluyú ka nuila gele‑na. Lebi'i gwa yúbale lakana labí tte tsitsi ankakana. Gwalugwe lidhakakani atti galába ka benne chi selake len lebi'i kumu de turo'oba dhile elha nabani redá le Tata Do Yebáha rutebie len iyári'i. Aníha kini lebi'i atti innabale len Tata Do Yebáha, labie nna gudoba nage gele.
1PE 3:8 Nnanna nna latsiru gwaltse'e, turo'o gwaludú lele lhe turo'o uchacha iki ge luesile lhe. Anágaba lhe akin ge luesile attiba rakinle ge ttu betsi to gele lhe akale benne ratua lasi lhe abittu uinle ttaba lhe.
1PE 3:9 Ganna nuxa udhakana le ttu bixa, abittu aníha‑gaba udhakale na lhe ganna nuxa usia leni le, abittu aníha‑gaba ekabile geni. Nu uinlale, gwalinnabala len Tata Do Yebáha kini aka lenie na, kumu labie uxie le kini aka lenie le.
1PE 3:10 Kumu: Ttu nu gwalíga ru'u leni dhona yiesi lo yu‑ni lhe raka leni saría tsena na, teeki udá sii lhusani abittu inne satsana lhe abittu uin leni lhe.
1PE 3:11 Anágaba nna udhangabana nu satsa ruinnaha nna uinna latsiru lhe uinna doelha dho tsena len adí ka benne lhe.
1PE 3:12 Kumu Tata Xisiha gwa ruyúbe ka benne ruin tse lhe gwa rudoba nage ge ka tisa rilhapike lenie lhe, ttaka ka nu ruin satsa‑na, labie gwa redúbe lo ka nuná.
1PE 3:13 Laxkala lebi'i, lanú dhana bixa udhakana le ganna gwa ruinbale doelha ruinle latsiru.
1PE 3:14 Ttaka ganna ratele ttu bixa de ruinle latsiru, karubárule kumu adírula tse anka gele. De nuha nna abittu gasinle lhe abittu udúna le lhe.
1PE 3:15 Nu uinlale, itú iki itú lele gwalinná: “Xxeniba ra le Cristu benne anke Xxanari'iha” lhe anágaba satía gwaltse'e tsitsi kini ekabile ge iyá ka benne innaba tisake le ge nu ruxxen lele ge Cristuha.
1PE 3:16 Deba nna latsiru innele lhe anágaba len tisa besiba ekabile gekani. Latsiru gwaluni kini abittu tsaya lole kini anáchu nna ka nu rinnekana geleha, ettukinna tti ilákinna tseba ruinle de chi babale len Cristuha.
1PE 3:17 Kumu ganna Tata Do Yebáha aka lebie uyúle elha disa, la'ania nna adírula lhe'e nuha ganna uyúle elha disa de ruinle latsiru, a laa kila satele de ruinle nu anka satsa.
1PE 3:18 Kumu anágaba gwate Cristuha. Benneha suna ttu lidúba uttie utixe ge ka tulha geri'i. Labie nuha anke nu ruin tse nna uttie utixe ge ka nu ruin satsa. Aníha benie kini echebie ri'i kwe'e Tata Do Yebáha. Uttie len bela latieha nna atti beyaka banieha nna espírituba beyake.
1PE 3:19 Tti anke espírituha nna ugíabie gwattixxi'anie ka espíritu yaya lisiyyaha,
1PE 3:20 delába ka espíritu labí bedokana tisa ttuha tti udo Noé‑ni, tti bisá inda yiesi lo yu‑niha. La'ania labí besáni Tata Do Yebáha gwa uledabe kana laka ruin Noé‑ni barcuha. Ttaka ttu chuparuba ka benne uláke abittu uttike, delába xxunurubake uláke lo inda bisá yiesi lo yu‑niha.
1PE 3:21 Nu ben inda bisá yiesi lo yu‑niha raxxína na len nu runi inda radiri'i nnanna; indaha rodilána ri'i de beyaka ben Jesucristuha lo elhuttiha. Tti radiri'i inda, labí nu tsiga anka latiri'i nuha rocharina, sinuki rixúlana ki rinnabari'i len Tata Do Yebáha kini ocharie lhe'e lastori'i.
1PE 3:22 Benneha beyapie yebáha nna doe daka ná ben ge Tata Do Yebáha rinnabie, nna ka anjeli geeha lhe adíru ka espíritu rapakana lo neda kini innabiakana lhe anágaba ka nu ra tsitsi lekani lhe, iyábakana gwa rudobakana tisa gebie.
1PE 4:1 Laxkala attiba gwate Cristuha len bela latieha biyúe elha disa tti uxí gebie, anágaba lebi'i, gwaludogaba ikile deki aníha‑gaba satele, kumu ttibanka ttu benne chi gwatebie biyúbie ttu bixa elha disa, benneha chiba bedhane abitturu runie tulha,
1PE 4:2 kini nnanna laka sa dhorue aka banie yiesi lo yu‑ni, abitturu dhoe unie nu satsa retaba lebie runie, sinuki uinlee nu ru'u le Tata Do Yebáha.
1PE 4:3 Anágaba lebi'i, ukare'aba nu chi benle ttuha, delába benbale attiba ruin ka nu abittu ria lekani ge Tata Do Yebáha. Utebiabale benle nu ukaba lele lhe bixaba nu satsa betá lele benle lhe. Anágaba nna ukagabale nu dusi lhe ttixka ritupale ttu gaxa, ritebiabale role lhe ri'iyale lhe. Anágaba bedúgaba xibile arlo ka nu labí gwalí ankakana diosi, ka nu tuttíru labí raka uyú Tata Do Yebáha kana.
1PE 4:4 Nnanna ka nu abittu ria lekani Tata Do Yebáha rulanni ya'abakana tti rilákinna labíru tulapa riale kana ki uinle nu satsa ritebiakana ruinkana. De nuha nna risa'akinna rinnekana gele.
1PE 4:5 Ttaka ka nuná teeki otso dúkana nu ruinkana arlo Tata Do Yebáha. Benneha chi do tsebie kini unie elhuxtisi ge ka nu chi uttiha lhe unie elhuxtisi ge ka nu sa se'e bani lhe.
1PE 4:6 De nuha‑la nna ka nu yattiha biyienbakinna ka tisa ge Cristuha, kumu meskiba chi uttikana len bela latikaniha, delába uttibakana attiba rattiba iyába ka benne, ttaka len espíritu gekaniha nna gwaka benbakana arlo Tata Do Yebáha.
1PE 4:7 Chiba dabiga lhuxa iyá tte nu se'e yiesi lo yu‑ni. De nuha nna abittu bitti uinle, gwaludola lele gwalilhapi tisa len Tata Do Yebáha.
1PE 4:8 Nu rakarula doelha itú iki itú lele akin ge luesile, kumu ganna ttixka ri'i rakin ge luesiri'i, la'ania nna ixeba tulha ridíri'i elha xen lasi geni ganna ttixka.
1PE 4:9 Itú iki itú lele gwaligaxi luesile lhe'e lisile, abittu usuna lisile.
1PE 4:10 Kua ttu ttule ixuinle elha tse rutebie gele kini ute nále len adíru ka benne kumu Tata Do Yebáha ixe looba elha tse redá lebie rutebie geri'i. Ganna aníha uinle, la'ania nna gwa rixú tsebinle nu betebie gele.
1PE 4:11 Ganna nuxa ttúle betebie elha tse gele kini kixxi'ale ka tisa geeha, gwalinneba ka tisa ka nu rutebe len lebi'i nna ganna nuxa ttúle edá lele ute nále len adí ka benne, nu edá lele uinleha, gwaluin na len nu tsitsi ra le Tata Do Yebáha kini anáchu de Jesucristuha nna iyába nu uinleha, nuha uinna kini inná xxeni le Tata Do Yebáha. Benneha ra tsitsi lebie lhe rinnabie ttu dia lii lhe. Amén.
1PE 4:12 Betsi to kia, tti ratele ruyúle ttu bixa elha disa kini ule'e ganna gwase'e tsitsile lo neda ge Tata Do Yebáha, tti ratele aníha abittu aka tenle akinle: “¿Beaka ratetu aní?”
1PE 4:13 Lebi'i, gwaludúla itta lele de ratele attiba gwate Cristuha, kini anágaba edeaka tenle ganna chi ilenle dedábie lhe'e xiani geeha.
1PE 4:14 Karubárule ganna rinnekana gele de ria lele gebie kumu Espíritu ge Tata Do Yebáha gwa duba benneha len lebi'i. Benneha xxeni ra lebie. [Gwalí galá ka nu rinnekana gele rigela ka nuná iki Espírituha, ttaka lebi'i nna ruinlale kini ra xxeni lebie.]
1PE 4:15 Ttaka ganna ttixka ankale nu runi elhutti o ankale ubana o ruinle satsa, anágaba ganna de ratsela gele ata labí dika utsela gele, la'ania nna meskiba ruyúle elha disa kumu ralhabale nuha.
1PE 4:16 Ttaka ganna si nuxa ttúle ratele de ria lele ge Cristuha, abittu ettuinle; gwalugwela Tata Do Yebáha ixkixaru de ria lele gebie.
1PE 4:17 Kumu chiba bisia sá dhulo aka elhuxtisi geri'i, dhulona lenri'i ka benne chi ankari'i ge Tata Do Yebáha, nna ganna lade'axa dhulona lenri'i, ¿laaba ganna adírula sate ka nu rigu'u ni'akani ka tisa ge Tata Do Yebáha?
1PE 4:18 Ki nu runi nu dika ixúha‑la chiluka lhaa nuha lo elha disaha, ¿titiala sate nu abittu ria leniha lhe nu runi tulhaha lhe?
1PE 4:19 Laxkala ganna Tata Do Yebaa benne benie leha, ganna benneha raka lebie uyúle elha disa, lasi nábie gwalodha'an elha nabani gele, lhe anágaba nna abittu udhanle a uinle latsiru, kumu benneha gwakaba lenie le; labí runnitti tisa gebie, gwa ruinbe nu chi rabie unie.
1PE 5:1 Rulisaa le ka benneola, lebi'i ka benne rise'ele arlo ka benne chi ria leke Cristuha. Neti attigaba lebi'i, ankagabaa nu ridúa arlo ka benne chi ria leke benneha lhe biyúgaba loa nu gwatebie lo ya kurusiha, lhe anágaba ganna chi besieha, iselagabaa edí baaya nu xxeni ra leeha.
1PE 5:2 Rinnabaa len lebi'i, uinle attiba runi ttu nu reki lo ka neru to. Aníha‑ba uyú tsitsile ka benne chi bodha'an Tata Do Yebáha lasi nále. Itú iki itú lele gwaluyú ke. Gwaluyú ke attiba raka le Tata Do Yebáha. Abittu uyúle ke de rido doelhabale, sinuki gwaluyúla ke kumu de redá lele ruyúle ke. Abittugaba uinle na de rulha lele dhile belhiu, sinuki gwaluinla na de ru'u lele uyúle ke.
1PE 5:3 Ka benne ruyúle‑na, abittu innabiale ke attiba rakaba lele, sinuki gwaluinla latsiru kini ilákanie elha ruin gele nna aníha‑gaba uinke.
1PE 5:4 Aníha kini lebi'i, ka benne ankale attiba ka nu reki lo ka neru to, tti esia benne anke Xxanari'iha, la'ania edí baale nu xxeni ra leeha de dhile ttu nu tse, delába nu abittu rise'e loona.
1PE 5:5 Anágaba rulisagabaa le, lebi'i ka benne kwiti. Gwaludo tisa ge ka benneola‑na lhe iyá ttele jeru ute ná len luesile, abittu uinle ttaba, kumu: Tata Do Yebáha redúbe lo ka nu ruin ttaba‑na, ttaka ka nu abittu ruinkana ttaba, gwa rakaba lenie kana.
1PE 5:6 Laxkala gwalorexxa gaa lele arlo Tata Do Yebaa benne ra xxeni leeha, kini ganna chi bisia sá ga'ananieha, la'ania unie kini lebi'i ebana lele.
1PE 5:7 Gwalodha'an iyá elhaxchacha iki gele lasi nábie, kumu benneha guyúbe le.
1PE 5:8 Abittu bitti uinle lhe gwaltse'e ubeda lhe, kumu nu abittu raka uyúna leha, delába nu xxegwiha, nuha ruinbana attiba runi ttu beesi rekina ruttuxxuna rigilana nu gona.
1PE 5:9 Tsitsi gwaledú loni lhe gwaluxxen tsitsi lele ge Tata Do Yebáha. Lebi'i gwa yúbale, luesi elha disa ratele‑nagaba rate ka betsi to geri'i se'e itúba yiesi lo yu‑ni.
1PE 5:10 Ttaka iki de chi gwatele biyúle elha disa ttu satti, la'ania nna Tata Do Yebaa benne redá lebie rutebie iyá nu tse lenri'i, benneha unie kini lebi'i ese'e tsele lo neda gebie lhe ose'e tsitsie le lhe. Anágaba uingabe kini lebi'i ttu tsaba tse'ele lo neda geeha, abittu eyadi gaale. Lagabe nuha uxie le kini edí baale nu xxeni ra leeha, delába nu xxeni tee ttu dia liiha. Edí baale nuha de chi babale len Cristuha.
1PE 5:11 Benneha ra xxeni lebie lhe rinnabiagabe ttu dia lii lhe. Amén.
1PE 5:12 Betsi to geri'i Silvano‑ni, benne‑ni du tsitsie lo neda ge Tata Do Yebáha. Labie benie yetsi ridhelhaa‑ni. Lo nuní rinnea ttu chupa rulisaa le lhe rigixxi'ania le deki meskiba bixa ratele, Tata Do Yebáha gwa redába lebie raka lenie le. De nuha nna gwaltse'e tsitsi.
1PE 5:13 Ka benne ria leke Jesús‑ni se'e Babilonia‑ni, delába ka benne chi bekwe Tata Do Yebáha attigaba bekwebie lebi'i, ka benne‑ni ridhelhake ttu padiuxi gele, lhe anágaba xi'inia Marcos‑ni ridhelhagabe ttu padiuxi gele.
1PE 5:14 Gwalugwe luesile ttu padiuxi lhe gwaligo ttu xxaga luesile lhe. Anágaba xen su lasiba tse'e iyá ttele de babale len Jesucristuha.
2PE 1:1 Neti Simón Pedro, ankaa benne rixúni Jesucristuha lhe ankagabaa apóstol gebie lhe. Naa ridhelhaa yetsi‑ni gele, lebi'i ka benne chi ria lele attiba ri'itu. Ria leri'i kumu Jesucristu benne rodilábie ri'iha lhe anke Diosi geri'i lhe, benneha runie nu dika ixú.
2PE 1:2 Tata Do Yebáha lhe Jesucristu benne anke Xxanari'iha, lake de chi ankabienle ke, de nuha nna edáru leke aka lenke le lhe use'eke le xen su lasi lhe.
2PE 1:3 Tata Do Yebáha, len nu ra tsitsi leeha chi betebie iyá nu riyasinri'i kini tse'eri'i uinri'i nu ru'u lebie. Iyá nu beteeha uxíri'i na de chi ankabienri'i Jesucristuha. Benneha uxie ri'i lo neda geeha kumu de ra xxeni lebie lhe de re tse lebie lhe.
2PE 1:4 De nuha nna yalhá xxeni anka nu chi rabie utebie geri'i lhe yalhá lhe'e ankana lhe. Aníha unie kini lebi'i udhanle nu satsa reta lele ruinle yiesi lo yu‑ni, kini abitturu unnittina le, nna ganna chi bedhanle nu satsaha, la'ania nna isinle akale benne runi nu anka tse attiba Tata Do Yebáha anke benne runi nu anka tse.
2PE 1:5 De nuha nna uinle doelha uxxenru lele ge Tata Do Yebáha. Kumu ganna chi uxxenru lele ge benneha, la'ania nna nu uxxenru leleha, nuha uinna kini isinle akale nu runi nu anka tse, nna iki de chi ruinle nu anka tseha nna nuha uinna kini lebi'i isinle akale benne gwa rite dani,
2PE 1:6 nna ganna chi rite denleha, la'ania nna nuha uinna kini lebi'i dhaale innabiale elha ruin gele, nna ganna chi dhaale innabiale elha ruin geleha, la'ania nna nuha uinna kini isinle akale benne kweki besi lele, nna ganna chi re besi leleha, la'ania nna nuha uinna kini udo lele Tata Do Yebáha,
2PE 1:7 nna iki de chi rudo lele benneha, la'ania nna nuha uinna kini isinle aka si'in luesile attiba raka si'inle ttu betsi to gele, nna iki de chi raka si'in luesileha, la'ania nna nuha uinna kini isinle akin ge luesile.
2PE 1:8 Kumu ganna lebi'i uinle aní, lhe ganna udoruna lele uinle na, la'ania nna gwakabale benne dika ixú, lhe anágaba nna labí kwentaba benbiale Jesucristu benne anke Xxanari'iha.
2PE 1:9 Ttaka nu abittu uinna nu ria‑ni, nuha ttiba ttu nu lo xua ankana o ttiba ttu nu abittu rilá tseni, aníha‑ba ankana, kumu chiba bixulhinna deki Tata Do Yebáha chi bocharie ka tulha benna ttuha.
2PE 1:10 De nuha nna xa betsi to, lebi'i gwaluin doelha kini ule'e deki chiba ankale benne chi bekwebie lhe chi ankale benne chi uxie lo neda geeha lhe. Kumu ganna aníha uinle, la'ania nna niruba latti a ukwittale lo neda geeha.
2PE 1:11 Aníha nna yali tá lo neda gele ga'ale ata rinnabia Jesucristuha ttu dia lii. Benneha anke Xxanari'i lhe rodilábie ri'i lhe.
2PE 1:12 De nuha nna neti labí udú siia a kixxi'ania le ge nu nuní, satíaba odhúa lele geni, meskiba chi yule lhe meskiba chi bedaxxu tsitsile ka tisa ka nu ankakana nu gwalíga.
2PE 1:13 Neti rakati, nnanna laka doa anka bania, tseba anka ganna odhúa lele ge nuní kini uinle na,
2PE 1:14 kumu Jesucristu benne anke Xxanari'iha chila rabie neti deki chi tteba dabigana gattia.
2PE 1:15 De nuha nna runia doelha rigixxi'ania le kini ganna chi uttiaha, la'ania nna satíaba odhú lele ge nu rinnea‑ni.
2PE 1:16 Kumu ri'itu tti utixxi'atu ratu le deki tsitsiba ra le Jesucristu benne anke Xxanari'iha lhe ratu le deki esiabie yiesi lo yu‑ni attu libe lhe, tti utixxi'entu le nuní, labí tisa botsi'inu letu nuha utixxi'atu o tisa bexxe letu, sinuki kwinaga ri'itu biyú lotu xxeniba ra lebie.
2PE 1:17 Kumu ri'itu se'etu len Jesucristuha iki i'iya le'aha tti begwe Xxudiri'i do yebáha lidhake lhe benie kini uná xxeni lebie lhe. La'aniagaba nuha biyienintu tsi'i Xxudiri'i do yebáha benne rapi edha linníha, unnebie ree: “Benne‑ni anke Xi'inia lhe rakati gebie lhe. Benne‑ni runie nu ru'u lasia.”
2PE 1:19 De nu uka iki i'iyaha, de nuha nna uxxen tsitsiru leri'i ge ka tisa utixxi'a ka profeta ge Tata Do Yebáha itú nu reha. Laxkala tseba anka ganna lebi'i etabinle ge nu ra ka tisa‑ni, kumu ka benne‑ni ankake attiba ttu xiani rudenke ata anka chulha axtaliba ganna chi bisia sá esia Jesucristu benne anke ttiba beli riria ka dila‑na kini rudanie lhe'e lastole.
2PE 1:20 Deba nna lade'axa tte denle deki ni ttú ka tisa unne Tata Do Yebáha, delába ka tisa dia lo ka yetsi geeha, ni ttú ka benneha labí ankake tisa nu kixxi'ari'i attiba rakaba leri'i,
2PE 1:21 kumu ka profetaha utixxi'abake nu raba Tata Do Yebáha, labí nu anka geke nuha utixxi'ake, sinuki utixxi'abake nu raba Espíritu geeha.
2PE 2:1 Ttaka ttuha lagwi ge ka benne Israel‑ni use'egaba ka nu labí gwalí ukakana profeta ge Tata Do Yebáha. Anágaba nnanna lagwi gele tse'egaba ka nu labí gwalí akakana ka nu ule'ekana ka tisa geeha. Lebi'i labí tte denle ganna chi ule'ekinna le ka tisa ka nu unnittikana le. Axtala ku'u ni'akani Benne bodilábie kanaha, delába Benne anke Xxanari'iha. Tti uinkana aníha, ttu nnelaba nnittikana arlo Tata Do Yebáha.
2PE 2:2 Ixeba ka benne sanalhake kana uinke nu satsa ruinkanaha nna delo ni'a gekani nna itua bala'ana ge ka benne chi diake lo neda ge Tata Do Yebáha, delába neda nu anka gwalíha.
2PE 2:3 Lakana de raka xxatta lekani gatta gekani, de nuha nna otsi'inu lekani innekana nu abittu ankana nu gwalí. Aníha uinkana kini galhikana belhiu len lebi'i. Ka nu ruin aní, ttuha‑li chi ga'anani Tata Do Yebáha ukinnie kana, laxkala teeba ki tse'e lookana, de ttena abittu ttena.
2PE 2:4 Kumu ki ka anjeli, ka nu binittikana abittu ben tsekanaha, ki ka nuha abittu uxíe elha xen lasi gekani, sinuki udhelhalee kana ata re giha nna bedheabie kana ata anka chulhaha. Niha chi tua tsekana axtaliba ganna chi isia sá unie elhuxtisi gekani.
2PE 2:5 Anágaba abittugaba uxíe elha xen lasi ge ka nu use'e itú ttuha ka nu abittu ugía lekanieha, delába ka nu se'e tti benie kini bisá inda yiesi lo yu‑ni. Sunruba Noé benne utixxi'anie kana deki teeki uin tsekana, sunruba benneha lenie a gasi ka benne gwa uláke abittu uttike.
2PE 2:6 Aníha‑gaba ben Tata Do Yebáha betse'e loogabe ka yiesi Sodoma lhe Gomorra lhe. Bettebie kana len gi, tuttíruba tee beyonie kana. Aníha bedhake kana kini adí ka nu ruin satsa ilákinna deki aníha‑gaba satekana.
2PE 2:7 Ttaka Lot benne runi latsiru attiba ankaba geniha, gwa bodilábe benneha. Benneha udoe biyúe elha disa tti rilánie nu abittu ixú ruin ka nu ruin satsaha.
2PE 2:8 Kumu de anke benne ruin latsiru, de nuha nna tti udoe lagwi gekani, ttu ttu sába biyúe elha disa de riyieninie lhe de rilánie nu satsa ruinkanaha.
2PE 2:9 De nuha nna Tata Do Yebáha, ka benne gwa rudoruke tisa gebie, ka benneha gwa yube gasina odilábie ke lo nu ratekeha nna ka nu runi satsaha nna odha'anbe kana kini dhíkana elha disa ganna chi bisia sá unie elhuxtisi ge ka benne se'e yiesi lo yu‑ni.
2PE 2:10 Lade'a tte ugwebie elha disa ka nu ruinkana nu satsa retaba le latikani lhe rigu'u ni'akani nu xxeni ra le Tata Xisiha lhe. Anágaba nna ruingabakana ttaba lhe ruingabakana yieti lhe. Labí rasikinna tti rinnekana ge ka nu ra xxeni lekani se'e yebáha,
2PE 2:11 ki ka anjeli ge Tata Do Yebáha, meskila tsitsiru ra leke, arlo Tata Do Yebáha labí reyaxakanie inne gweke ge ka nu ra xxeni lekaniha.
2PE 2:12 Ttaka ka nu labí gwalí rule'ekana ka tisa ge Tata Do Yebáha, ka nuná ladiba rinnekana riguakana bala'ana ge nu labí yúkana. Ttiba ttu nimala akaa elha rieni ikini, labí yuna bixa ruinna, aníha‑ba anka ka nuná lhe anágaba attigaba ka nimala‑na, ka nuná ralibakana yiesi lo yu‑ni kini ttu sá nna iyaxxukana gattikana. Aníha‑ba sate ka nu labí gwalí rule'ekana ka tisa ge Tata Do Yebáha, tse'e looba ka nuná.
2PE 2:13 Dhiba ka nuná elha disa ge nu satsa ruinkana, kumu de ru'u lekani lo resába ruinkana bixaba nu satsa retaba lekani ruinkana. Ka nuná elhittula rutekana, kumu axtaba tti rise'ekana go yetta len lebi'i, ittaba du lekani tti ruinkana nu satsa.
2PE 2:14 Ka nuná nuxaba nuila rilákinna nna ridá lekani. Bittuba rudú siikana a ruinkana nu satsa lhe anágaba ridí yiegabakana ka nu labí chi se'e tsitsikana lo neda ge Tata Do Yebáha lhe anágaba chigaba labikinna gasina uinkana kini gatta gekani. ¡Ka nuná urixxi ukinniba Tata Do Yebáha kana!
2PE 2:15 Chiba bedhan ka nuná neda tseha nna bedaxxukana neda nu bedaxxu Balaam nu uka xi'in biyú Besor‑ni. Balaam‑ni uyu'u xxatta leni dhina belhiu, de nuha nna benna nu satsa.
2PE 2:16 Ttaka bitisabana ge nu satsa bennaha kumu burruha utisana na. Ka burru‑na meskiba abittu rinnekana, ttaka la'ania nna unne burruha attiba rinne ttu benne nna utisana na. Aníha uka kini abittu ben Balaam‑ni nu abittu ixú rulaba leniha.
2PE 2:17 Ka nu labí gwalí rule'ekana ka tisa ge Tata Do Yebáha, ttiba ttu yiela abittu inda ta'a lhe'eni, aníha‑ba ankakana lhe ttiba ttu bea rurio lá be richena na attu ta subi, aníha‑ba ankakana. Chiba ga'anna esinkana ttu dia lii ata anka chulha raha.
2PE 2:18 Lakana rise'ekana regu'ukana gu, kwentaba rinnekana. Labí rixú nu rinnekanaha. Ridí yiekana ka benne si udulorubake rukwittake ki abitturu rutsáke ka nu ruin satsa se'e yiesi lo yu‑ni. Rudo doelhakana ke kini eyekike uinke luesi nu satsa reta le latikani ruinkana.
2PE 2:19 Rákana ke deki gwalábake, ttaka ki nigaba lakana a ridaakana udhankana nu satsa ruinkanaha. Kumu ttu nu abittu ridaana udhanna nu satsa ruinnaha, eyakaba nuha ttu nu labí aka geni eriana lo nu satsa ruinnaha.
2PE 2:20 Kumu lakana, ganna iki de chi bedhankana nu satsa raka yiesi lo yu‑ni de chi benbiakana Jesucristu benne rodilábie ri'i lhe anke Xxanari'i lhe, ganna iki de chi benbiakana benneha nna sadita'akana lo nu satsaha nna odaxxu tsitsikana nuha attu libe, la'ania nna adírula satsa chi uinkana attichula tti benkana sisi'a tteha.
2PE 2:21 Tserula anka ganna ttixka abittu benbiakana neda tseha, a laa kila benbiakana nedaha, delo nna bedhankana abitturu rudokana tisa ge nu bodha'an Tata Do Yebáha uinkana.
2PE 2:22 Benbakana attiba ra ttu tisa tee nu rinne ka benne ráke: “Beku reyabiha reyeki adakabana reyona nu chi beyabinaha lhe anágaba kuchi nu chi udiha retulhu adakabana lo yunaha.”
2PE 3:1 Betsi to kia, nuní nu berupa yetsi ridhelhaa gele. Lo ixpaba ka yetsi‑ni rodhua lele ge nu chi yule, kini anáchu lebi'i ulaba lele latsiru.
2PE 3:2 Raka lasia odhú lele ge nu ra ka profeta ge Tata Do Yebáha itú nu reha lhe anágaba odhúgaba lele ge nu ra ka apóstol‑ni uinri'i, delába udori'i tisa ge nu ra Jesús benne rodilábie ri'i lhe anke Xxanari'i lhe.
2PE 3:3 Deba nna lade'axa unale, ganna chi isia ka sá daluxaha, la'ania tseki ka nu uinkana nu satsa retaba lekani lhe uxisilakana
2PE 3:4 innákana: “Cristu nu rana deki esianaha, ¿nálana ganna? Chiba utti ka benneola geri'iha nna yiesi lo yu‑ni nna labí chi biseana, sa ankabana atti tteba ankana atti urena sisi'a tteha.”
2PE 3:5 Ka nu ra aní ruinnibakana kini ixulhakinna deki yebáha lhe yiesi lo yu‑ni lhe, nu reha‑li ukakana. Ukabakana len tisa unne Tata Do Yebáha. Yiesi lo yu‑ni lhe'e indaha‑ba biriana lhe lagwi indaha‑ba rena lhe.
2PE 3:6 Anágaba nna de indaha‑gaba bisá yiesi lo yu‑ni nna use'e loo ka benne use'e la'ania.
2PE 3:7 Ttaka yebáha lhe yiesi lo yu nu re nnanna, la len tisa unne Tata Do Yebáha, la len tisaha‑gaba chi tua tsekana kini tsiakana lo giha ganna chi isia sá tti unie elhuxtisiha, lhe anágaba ka nu abittuba ria lekanie, utse'e loogabe kana.
2PE 3:8 Ttaka lebi'i xa betsi to kia, bittu ixulhinle deki Tata Do Yebáha labíru isá riyasa unie nu chi rabie unie, labí tti ra ttu chupakana deki isáruba tti unie nuha. Kumu len benneha ttu sá ankana attiba ttu mili ida, nna ttu mili ida nna ankana ttiba ttu sá. De nuha nna ribedabe kumu de ratua lebie le lhe de rakaba lebie odúna iyá tte ka benne nna odaxxuke neda gebie kini abittu tsia nnittike.
2PE 3:10 La sá atti chi esia Jesús benne anke Xxanari'iha yiesi lo yu‑ni, labí yuri'i bí sá aka nuha. Uinbe attiba runi ttu ubana iyyaba lasi rachadina ttu yo'o. Aníha‑ba aka atti isia sá esia benneha. La'ania nna yebáha tsapaba tsu'u be tti enitti loona nna ka beli‑na lhe adíru ka nu sia gwetsáha lhe, giha‑ba utse'e loona kana. Anágaba yiesi lo yu‑ni lhe iyába ka nu se'e loni lhe itegabakana.
2PE 3:11 Kumu iyába nu se'e, tse'e loobakana. De nuha nna, ¿laaba ganna tserula saríana le ganna udo lele Tata Do Yebáha lhe uinle nu ru'u lebie lhe?
2PE 3:12 Anágaba saría tsegabana le ganna itú iki itú lele kwedale la sá chi ga'ananie unie nu chi reeha. La'ania nna yebáha utse'e looba giha nuha nna ka beli lhe adíru ka nu sia gwetsáha nna enunnibakana tti itekana.
2PE 3:13 Ttaka ri'i ribedari'i attu yiesi lo yu kubi lhe attu yebaa kubi lhe, delába nu chi ra Tata Do Yebáha utebie geri'i. Yebáha lhe yiesi lo yu kubiha lhe, niha iyába aka latsiru lhe iyába aka attiba ankaba geni lhe.
2PE 3:14 De nuha nna xa betsi to kia, laka se'ele ribedale aka nuní, gwaluin doelha kini atti chi esieha, la'ania nna etexxake le se'ele xen su lasi lhe anágaba se'ele ankale nari xú lhe abittu bi ge itisale lhe.
2PE 3:15 Gwalodhú lele deki Tata Do Yebaa geri'iha gwa ribedaba benneha abittu ruinxxie ttu bixa. Aníha runie kini ri'i lhaari'i abittu tsia nnittiri'i, attiba raba betsi to geri'i Pabluha lo yetsi udhelhe geleha. Benneha, Tata Do Yebáha‑ba betebie elha rieni gebie kini unnebie aní lo yetsi udhelheha.
2PE 3:16 Lo iyába ka yetsi runieha rinnebie ge nuní. Lo ka yetsiha rinnebie ge adíru nu abittu rite dáxxinri'i. De nuha nna ka nu abittu yuu lhe ka nu labí chi se'e tsitsikana lo neda ge Tata Do Yebáha, rudaxxu ni'akani nu rabie lo ka yetsiha nna rotseakana nu ra ka tisaha. Anágaba ruinkana len adíru ka tisa dia lo ka yetsi ge Tata Do Yebáha. Ka nu ruin aní, la labakana rigila gekani kini tsiakana ata tse'e lookana.
2PE 3:17 De nuha nna xa betsi to, lebi'i chiba yule ge nu rigixxi'aya‑ni. Laxkala gwaluyú gele ge ka nu ruin satsa‑na kini ka dhi yiekana le nna abitturu tse'e tsitsile nna ikwadhale lo neda ge Tata Do Yebáha.
2PE 3:18 Lebi'i nu uinlale, gwaltse'e tsitsirula lo neda geeha, abittu udhanle nu tse redá lebie rutebie gele lhe anágaba gwaluinbia chiettiru Jesucristu benne anke Xxanari'iha lhe anke benne rodilábie ri'i lhe. Benneha uinri'i kini inná xxeni lebie ttu dia lii. Amén.
1JO 1:1 Lo yetsi‑ni rigixxi'aya ge benne chi doe sisi'a tteha attili lani kwe yiesi lo yu‑niha; delába kixxi'aya ge benne biyienintu unnebie lhe bilen kwinaga ri'itue lhe. Anágaba benbiatue lhe bedaxxutu nábie lhe. Benneha nuha anke tisa, delába tisa nu runi ki aka benri'i ttu dia lii.
1JO 1:2 Benne runie ki aka benri'i ttu dia liiha, benneha nuha bisiabie yiesi lo yu‑ni nna uke benne attiba ankari'i. Ri'itu bilentue nna rigixxi'atu deki ttu dia liiba doe. Ata do Tataha‑ba udoe, delola nna bisiabie yiesi lo yu‑ni nna bilentue.
1JO 1:3 Ri'itu rigixxi'abatu ge nu biyienibintu lhe ge nu bilábintu lhe, kini anágaba lebi'i iselagabale len ri'itu kini tse'e ttu tsapa len luesiri'i attiba ri'itu len Tataha se'e ttu tsapatu lenie lhe len Xi'inie Jesucristuha lhe.
1JO 1:4 Nuní rigixxi'entu le lo yetsi‑ni kini lebi'i nna itta suba edú lele.
1JO 1:5 Tata Do Yebáha anke xiani. Niruba latti a raxxína chulhaha len benneha. Ka tisa‑ni nuní biyienintu unne Jesucristuha nna rigixxi'entu le kana.
1JO 1:6 Ttibanka ganna innári'i deki gwa se'ebari'i len Tata Do Yebáha, delo nna sa rekibari'i lhe'e chulhaha, la'ania nna ruinba leri'i; labí ruinri'i nu raxxína len nu anka gwalí.
1JO 1:7 Ttaka ganna ri'i gwa rekibari'i lhe'e xianiha attiba labie doe lhe'e xianiha, la'ania nna gwa se'eba ttu tsapa len luesiri'i, nna reni nu belali Xi'inie Jesucristuha tti uttieha, reniha nuha rocharina iyá tte ka tulha ruinri'i.
1JO 1:8 Ganna ri'i innári'i labí tulha ruinri'i, la'ania nna la len ri'iba nuha ruin leri'i nna labí ruinri'i nu raxxína len nu anka gwalí.
1JO 1:9 Ttaka ganna gwa ridíba ro'ori'i arlo Tata Do Yebáha deki gwalíba ankari'i nu ruin tulha, benneha nna gwadíbe elha xen lasi ge ka tulha ruinri'i lhe gocharibe ri'i ge iyá nu satsa ruinri'i lhe, kumu labie anke benne labí runnitti tisa gebie lhe anke benne runi attiba ankaba geni lhe.
1JO 1:10 Ganna innári'i: “Neti ttu tsaba labí tulha chi benia”, la'ania nna ruinbari'i deki Tata Do Yebáha nu gwen lasiba anka benneha nna labí gwalíginri'i chi rulabiri'i ka tisa geeha.
1JO 2:1 Xa xi'ini to kia, runia nuní lo yetsi‑ni kini lebi'i bittu uinle tulha. Ganna nuxa ttúle uinle tulha, gwa doba benne edíbie ri'i arlo Tataha, delába Jesucristu benne runi attiba ankaba geni.
1JO 2:2 Lee nuha bedá lebie uttie kini de uttieha nna borexxa gaabie elha rise'iki ge Tata Do Yebáha. Aníha kini benneha nna aka gebie dhie elha xen lasi ge ka tulha ruinri'i nna laa sunruga ka tulha ruinri'i aka gebie dhie elha xen lasi gekani, anágaba gwakagaba gebie die elha xen lasi ge ka tulha ruin iyába ka benne se'e yiesi lo yu‑ni.
1JO 2:3 Ganna gwa rudobari'i tisa ge nu bodha'an Tata Do Yebáha uinri'i, la'ania nna gwalínri'i deki chi ankabienri'e.
1JO 2:4 Nu rana: “Neti gwa ankabiabati Tata Do Yebáha”, ttaka ganna abígaba rudona tisa ge nu chi rabie na uinnaha, nuha ttu nu gwen lasiba ankana, nna labí ruinna nu raxxína len nu anka gwalí.
1JO 2:5 Ttaka benne gudobie tisa ge nu ra Tata Do Yebáha, benneha‑ligaba nna gwalínie rakanie ge Tata Do Yebáha. Ganna aníha uinri'i, la'ania nna chi yuri'i deki gwa duba lenri'e.
1JO 2:6 Benne ra deki gwa dube len Tata Do Yebáha teeki unie tti uka elha ruin ge Jesucristuha tti ugwekie yiesi lo yu‑ni.
1JO 2:7 Lebi'i xa betsi to kia, nu runia lo yetsi‑ni labí anka nuní ttu tisa kubi rodha'anaa ki uinle, sinuki chiba tee tisa‑ni len lebi'i axtali ttuha. La tisa‑niba nuha chi biyieninle sisi'a tteha.
1JO 2:8 Ttaka laa kiga de chi tee tisa‑ni axtali ttuha, nnanna nna reyonia na attiba ttu mandadu kubi. Jesucristuha len elha ruin geeha gwalíga beyonie tisa‑ni ttu mandadu kubi, nnanna nna lebi'i chigaba rule'e loole nu beyaka mandadu kubiha len elha ruin gele. Kumu nu anka chulhaha chiba dia nuha ritena nna nu anka gwalíga xianiha nna chi rudenna lhe'e lastole nnanna.
1JO 2:9 Nu rana deki gwa dúbana lhe'e xianiha, ttaka nna sa ritisibinna attu betsi to geri'i, nu ruin aníha sa rekiba nuha lo neda chulhaha.
1JO 2:10 Benne gwa rakanie ge betsi to geri'iha, benneha nuha gwa due lhe'e xianiha nna labí tee ttu bixa nu uinna ki ichekue nna unie tulha.
1JO 2:11 Ttaka nu ritisinna ttu betsi to geri'i, lhe'e chulhaba du nuha nna lhe'e chulhaha‑ba rekina. Labí yuna gaxa diana kumu chulhaha rudheabana loni.
1JO 2:12 Lebi'i xa xi'ini to, gele nuní runia lo yetsi‑ni, kumu de nu ben Jesucristuha nna chiba bixú elha xen lasi ge ka tulha gele‑na.
1JO 2:13 Lebi'i ka xxudi, len lebi'i ridhelhaa yetsi‑ni, kumu lebi'i chi ankabienle benne chi do sisi'a tteha attili lani kwe yiesi lo yu‑niha. Ridhelhagabaa yetsi‑ni len lebi'i nu kwiti, kumu lebi'i chi udaale lo nu xxegwiha abittu ruinle nu satsa raka leni, lhe anágaba ridhelhaa yetsi‑ni len lebi'i xa xi'ini to, kumu lebi'i nuná chi ankabienle Tataha.
1JO 2:14 Ridhelhaa yetsi‑ni len lebi'i ka xxudi, kumu lebi'i chi ankabienle benne chi do sisi'a tteha attili lani kwe yiesi lo yu‑niha. Ridhelhagabaa yetsi‑ni len lebi'i ka nu kwiti, kumu lebi'i re tsitsi lele lhe gwa rudhába lele ruinle nu ra Tata Do Yebáha, lhe anágaba kumu de chi udaale lo nu xxegwiha abittu ruinle nu satsa raka leni.
1JO 2:15 Abittu akinle ge yiesi lo yu‑ni, nigaba akinle ge nu satsa raka loni. Nuxaba benne ganna rakanie ge yiesi lo yu‑ni, benneha labí rakanie ge Tataha.
1JO 2:16 Kumu iyába nu anka ge yiesi lo yu‑ni, delába nu reta le latiri'i ruinna lhe nu ridá le ka iyya lori'i‑ni rulannikana lhe, anágaba nu ruinna kini ruinri'i ttaba de tee geri'i, iyá nuní labí ankana ge Tataha; ge benne se'e yiesi lo yu‑niba ankana.
1JO 2:17 Nu anka ge yiesi lo yu‑ni lhe iyába nu satsa raka loni lhe, diaba nuní tse'e loona; ttaka benne runie nu ru'u le Tata Do Yebáha gwaka benba benneha ttu dia lii.
1JO 2:18 Xa xi'ini to, sá bedúba nuní chi se'eri'i. Lebi'i chiba biyieninle deki isia sá isia nu abittu aka uyúna Cristuha, nnanna ixeba ka nu a raka uyúkana Cristuha chi reki. De nuha nna chi yuri'i deki sá bedúba nuní chi se'eri'i.
1JO 2:19 Lagwi gebari'i biriakana, ttaka labí gwalí ukakana geri'i. Kumu gannala ukakana geri'i, la'ania nna gwa beya'anlakana lenri'i. Ttaka aná benkana kini bele'e deki labí iyá ka nu selakana ri'iha ukakana geri'i.
1JO 2:20 Ttaka lebi'i chiba uxíle Espíritu ge Tata Do Yebaa benne bete Cristuha len lebi'i. De nuha nna iyábale chi yule nu anka gwalí.
1JO 2:21 Bittu akinle deki runia nuní lo yetsi‑ni de abittu yule nu anka gwalí. ¡Ko'o! Runia nuní lo yetsi‑ni kumu de chila yule lhe anágaba chigaba yule ni ttu tisa gwen lasi labí riria lhe'e nu anka gwalíha.
1JO 2:22 Nianna, ¿núla nuha anka nu ruin leni ganna? ¿Laaba ganna nu rana deki Jesús‑ni labí lii anke Cristu? Lana nuha ankana nu labí raka uyúna Cristuha, kumu rigu'uba ni'ani Tataha lhe rigu'ugaba ni'ani Xi'inieha lhe.
1JO 2:23 Nu rigu'u ni'ani Xi'in Tataha, labí du nuha len Tataha nna nu rana deki gwa riaba leni ge Xi'inieha, nuha gwa dúbana len Tataha.
1JO 2:24 Lebi'i satía gwaludhá lele ge nu chi biyieninle sisi'a tteha. Ganna gwa rudhába lele ge nu biyieninleha, la'ania nna gwa se'ebale len Tataha lhe len Xi'inieha lhe.
1JO 2:25 Nuní tisa chi begwe Cristuha len ri'i, delába unie kini satíaba aka benri'i.
1JO 2:26 Runia nuní lo yetsi‑ni kini rigixxi'ania le ge ka nu ruin lekani reki naa, kini abittu dhi yiekana le.
1JO 2:27 Ttaka lebi'i gwa doba Espíritu bete Jesucristuha lhe'e lastole. De nuha nna labí riyasinle nuxa ule'enna le, kumu kwinaba Espírituha rule'enie le iyá tte. Benneha rigixxi'e nu ankaba gwalí, labí ruin lebie. Laxkala ttiba chi bele'enie leha, aníha‑ba gwaltse'e len Cristuha, bittu udhanle benneha.
1JO 2:28 Laxkala nnanna xa xi'ini to, gwaltse'e len Cristuha, kini ganna chi besieha, la'ania nna xen su lasiba tse'eri'i abittu ettuinri'i arloe.
1JO 2:29 Ganna lebi'i chi yule deki benneha anke benne runi attiba ankaba geni, la'ania nna gwa yúgabale deki nuxaba benne unie attiba ankaba geni, benne unie aníha, benneha nuha gwalíga chi anke xi'in Tata Do Yebáha.
1JO 3:1 ¡Gwaluyúruga! ¡Kattiparuba rakani Tata Do Yebáha geri'i, axtaba xi'inie chi tee lári'i! Aná nna laa suna teega lári'i xi'inie, sinuki gwalíga ankari'i xi'inie. Ttaka ka nu abí ria lekani se'e yiesi lo yu‑ni labí yúkana nuxa ankari'i, kumu anágaba Tata Do Yebáha labígaba ankabiakinna benneha.
1JO 3:2 Betsi to kia, nnanna ri'i chi ankari'i xi'in Tata Do Yebáha, ttaka labí chi bele'ena gaxattiga siná eyakari'i. Ttaka chiba yuri'i ganna chi esia Cristuha, la'ania nna eyakari'i ttiba ankeha, kumu la'ania ilenri'e gasinattiga anke.
1JO 3:3 Laxkala iyába ka benne ruxxen leke gebie, ka benneha nuha gwa regu'elha leke akake benne nari xú arloe attiba labie anke nari xú.
1JO 3:4 Iyába ka nu ruin tulha, rigu'uba ni'a ka nuná ka tisa bodha'an Tata Do Yebáha uinri'i, kumu tti rigu'u ni'ari'i nu bodha'an Tata Do Yebáha, tulhaba nuha chi ruinri'i.
1JO 3:5 Ttaka lebi'i chiba yule deki Jesús‑ni bite yiesi lo yu‑ni kini boxíbie ka tulha geri'i. Benneha labí tulha runie.
1JO 3:6 Laxkala iyába ka benne gwa se'eke len Cristuha labíru rudona le ka benneha uinke tulha. Ttaka iyába ka nu ruin tulha labí rite dákinna nuxa anka benneha lhe nigaba a ankabiakinne lhe.
1JO 3:7 Xi'ini to kia, abittu dhielhale tsia lele ge ka nu ruin lekani reki naa, kumu gwa yúbari'i ganna ttu benne runie nu dika ixú, benneha ruinbe attiba ankaba geni attiba Cristuha ruinbe attiba ankaba geni.
1JO 3:8 Ttaka nu ruin tulhaha, ge nu xxegwiha‑ba anka nuha, kumu nu xxegwiha attili sisi'a tteha udulona ruinna tulha. De nuha nna bisia Xi'in Tata Do Yebáha yiesi lo yu‑ni kini betse'e loobie nu ruinnaha.
1JO 3:9 Ka benne chi anka xi'in Tata Do Yebáha labíru rudona le ka benneha uinke tulha, kumu elha nabani rute Tata Do Yebáha, gwa doba benneha lhe'e lastoke nna labíru aka uinke tulha, kumu Tata Do Yebáha anke tata geke.
1JO 3:10 Laxkala iyába ka nu abittu ruinkana attiba ankaba geni lhe abittu rakakinna ge attu betsi to geri'i lhe, ka nuná labí ankakana ge Tata Do Yebáha. Aní nna rule'e gá se'e ka nu ankakana xi'in nu xxegwiha lhe gá se'e ka nu gwalíga ankakana xi'in Tata Do Yebáha lhe.
1JO 3:11 Tisa nu ra: “Akin ge luesi ttu tturi'i”, tisa‑ni nuha chi biyieninle sisi'a tteha.
1JO 3:12 Bittu uinle tti ben nubiyú utta láni Caín. Nuha‑ruga ukana ge nu xxegwiha nna bettina betsiniha. Nianna, ¿bí lo ni'a ge bettina nuha ganna? Bettina nuha kumu lana satsaba anka nu ruinna; betsiniha nna ruinba nuha attiba ankaba geni. De nuha nna bettina betsiniha.
1JO 3:13 Betsi to kia, bittu aka tenle ttixka ka benne se'e yiesi lo yu‑ni itisikanie le.
1JO 3:14 Ri'i chi yuri'i deki chiba ulári'i lo elhutti nu tee arlo Tata Do Yebáha nna chi bisinri'i aka benri'i ttu dia lii arloe. Chi yuri'i nuní kumu de rakinri'i ge ka betsi to geri'i. Iyába ka nu labí rakakinna ge attu betsi to geri'i, ka nuha ttisidiba sa se'ebakana lo elhuttiha.
1JO 3:15 Iyába ka nu ritisikinna attu betsi to geri'i, attisidiba nu runi elhuttiba anka ka nuha. Lebi'i gwa yu xeabale ni ttu nu runi elhutti gwaka benna ttu dia lii arlo Tata Do Yebáha.
1JO 3:16 Jesucristuha betebie elha nabani geeha kini uttie kwenta geri'i. Aníha nuha nna chi yuri'i gasina dika akin ge luesiri'i. Anágaba ri'i teeki edí edenri'i ka betsi to geri'i, meskila gattiri'i kwenta geke ganna ttixka.
1JO 3:17 Ganna nuxa ttu benne tee gebie nna riláxanie attu betsi to geri'i risá lo xxatte, benne tee geeha nna labí ratua lebie benneha kini utebie nu riyasanie, benne runi aníha labí do elha si'i lasi ge Tata Do Yebáha lhe'e lasto benneha.
1JO 3:18 Xi'ini to kia, bittu suna len tisaba innári'i deki gwa rakabin ge luesiri'i. ¡Ko'o! Sinuki len elha ruin geri'i ule'e loori'i deki gwalíga rakin ge luesiri'i.
1JO 3:19 Ganna aníha rakin ge luesiri'i, la'ania nna chi yuri'i deki chiba selari'i lhe'e nu anka gwalí nna xen su lasiba dhu leri'i arlo Tata Do Yebáha;
1JO 3:20 meskiba ganna ri'i rakinri'i deki labí ruin tseri'i len ka benne, Tata Do Yebáha xxenirula ra le benneha attichula nu rulaba leri'i, kumu benneha iyába yue.
1JO 3:21 Betsi to kia, ganna ri'i rakinri'i abittuba rinittiri'i, la'ania nna xen su lasiba dhu leri'i arlo Tata Do Yebáha
1JO 3:22 nna bixaba innabari'i lenie, benneha nna gutebe nuha len ri'i kumu de gwa rudobari'i tisa ge nu chi bodha'ane uinri'i lhe kumu de gwa ruinbari'i nu ru'u lebie lhe.
1JO 3:23 Tisa nu chi bodha'ane uinri'i, delába tsia leri'i ge Jesucristu benne anke Xi'inieha lhe akin ge luesi ttu tturi'i lhe, nuní tisa bodha'ane uinri'i. Uinbari'i atti tteba chi rabie uinri'i.
1JO 3:24 Ganna gwa rudobari'i tisa ge nu bodha'ane uinri'iha, la'ania nna gwa se'ebari'i lenie, lee nna gwa dúgabe lenri'i. Aníha nuha nna chi yuri'i deki gwa dube len ri'i kumu de do Espíritu chi beteeha lhe'e lastori'i.
1JO 4:1 Betsi to kia, bittu tsia lele ge iyá ka nu rigixxi'akana ka tisa ge Tata Do Yebáha. Gwaliku'uxa kana prueba ttixa rinnekana, kini aníha nna yule ganna gwalí gwankakana ge Tata Do Yebáha, kumu ixeba ka nu ruin lekani chi reki yiesi lo yu‑ni rákana deki ankakana ka nu rigixxi'akana ka tisa chi begwe Tata Do Yebáha kana.
1JO 4:2 Lebi'i kini utte dale gá se'e ka nu gwankakana ge Tata Do Yebáha: ka nu gwankakana ge Tata Do Yebáha, aní teeki inná ka nuha, innákana deki gwa riaba lekani bisia Jesucristuha yiesi lo yu‑ni nna uke benne attibari'i. Ka nu inná aníha, lakana nuha gwalíga ankakana ge Tata Do Yebáha
1JO 4:3 nna iyába ka nu innákana deki labí lii bisia Jesucristuha yiesi lo yu‑ni uke benne attiba ankari'i, ka nu inná aníha labí anka ka nuha ge Tata Do Yebáha, ankalakana ge nu abittu raka uyúna Cristuha, delába nu chi biyieninle deki isiana, nnanna nna chiba reki nuha yiesi lo yu‑ni.
1JO 4:4 Lebi'i xa xi'ini to, chiba ankale ge Tata Do Yebáha nna chiba udaale bedúle lo ka nu ruin lekani reki naa, kumu benne do lhe'e lastole‑na xxenirula ra le benne‑na tti nu xxegwi reki yiesi lo yu‑ni.
1JO 4:5 Ka nu ruin lekani reki naa ankabakana ge yiesi lo yu‑ni, laxkala rinnebakana attiba ankaba elha rulaba le ge ka benne se'e yiesi lo yu‑ni. Ka benne se'e yiesi lo yu‑ni nna gwa rudoba nagake gekani.
1JO 4:6 Ri'i ankari'i ge Tata Do Yebáha nna iyába ka nu ankabiakinna Tata Do Yebáha gwa rudoba nagakani geri'i nna ka nu abittu ankakana ge Tata Do Yebáha labí rudo naga ka nuha geri'i. Aníha kini yuri'i gá se'e ka nu rinnekana nu anka gwalí lhe gá se'e ka nu rinnekana gwen lasi lhe.
1JO 4:7 Betsi to kia, akin ge luesi ttu tturi'i, kumu Tata Do Yebáha runie kini rakin ge luesiri'i nna iyába ka nu gwa rakakinna ge ka benne, lakana nuha gwankakana xi'inie lhe gwankabiagabakinne lhe.
1JO 4:8 Ka nu abí rakakinna ge nuxaba benne, ka nuha labí liikinna deki gwankabiakinna Tata Do Yebáha, kumu Tata Do Yebáha anke benne si'i lasi.
1JO 4:9 Labie udhelhe Xi'in ttu túbiru geeha yiesi lo yu‑ni. Xi'inieha uttie kini ri'i, de utti benneha nna gwaka benri'i ttu dia lii. Aníha ben Tata Do Yebáha kini bele'e looe deki rakanie geri'i.
1JO 4:10 Labí de ri'i udulori'i rakinri'i ge Tata Do Yebáha. ¡Ko'o! Lalee lade'a tte ukanie geri'i. De nuha nna udhelhe Xi'inieha yiesi lo yu‑ni kini uttie. Nu gwate Xi'inieha bixúna kini borexxa gaana elha rise'iki ge Tata Do Yebáha kini aníha nna uxíbie elha xen lasi ge ka tulha geri'i. Aníha nuha nna rula'a deki gwa rakanie geri'i.
1JO 4:11 Betsi to kia, ki Tata Do Yebáha aníha‑li ukanie geri'i, anágaba ri'i teeki akin ge luesiri'i.
1JO 4:12 Tata Do Yebáha, ni tsa lanú chi bilenna benneha. Ttaka ganna ri'i rakin ge luesi ttu tturi'i, nu rakin ge luesiri'iha runna liina deki lee nuha doe lenri'i nna elha si'i lasi geeha nuha, gwalíga chi dona lhe'e lastori'i.
1JO 4:13 Labie de chi betebie Espíritu geeha lenri'i, de nuha nna chi yuri'i deki gwa duba lenri'e nna labie nna gwa dúgabe lenri'i.
1JO 4:14 Ri'itu biyú lotu lhe rigixxi'atu deki Tataha udhelhe Xi'inieha kini odilábie ka benne se'e yiesi lo yu‑ni.
1JO 4:15 Nuxaba benne ganna okinni ikie deki Jesús‑ni anke Xi'in Tata Do Yebáha, benneha nuha gwa due len Tata Do Yebáha, Tata Do Yebáha nna gwa dúgabe lenie.
1JO 4:16 Ri'i chi yuri'i lhe ria leri'i deki Tata Do Yebáha rakanie geri'i. Benneha anke benne si'i lasi, laxkala benne gwa rakanie ge adí ka benne, benneha nuha gwa du lenie Tata Do Yebáha nna Tata Do Yebáha nna gwa dúgabe lenie.
1JO 4:17 Aníha nuha nna rule'e deki gwalíga chi bisinri'i rakinri'i ge ka benne, kini anáchu nna xen su lasiba dhu leri'i, abittu gasinri'i ganna chi bisia sá eso duri'i arlo Tata Do Yebáha ki aka elhuxtisi geri'i, kumu ri'i se'eri'i yiesi lo yu‑ni ruinri'i tti tteba ben Cristuha.
1JO 4:18 Ttu benne ganna anke benne si'i lasi, benneha labí elha rasi tee gebie, kumu ttu benne gwalíga chi bisine anke benne si'i lasi, elha si'i lasi rapeha riguabana elha rasi gebie. Kumu ttu benne ganna rape elha rasi, rasibanie kumu yube elha disaba ralhe dhie ge nu runieha. Laxkala ganna ttu benne tee elha rasi gebie, benneha labí gwalíga chi bisine ki ake benne si'i lasi.
1JO 4:19 Ri'i rakinri'i ge Tata Do Yebáha kumu lee ukanie geri'i lade'a tte.
1JO 4:20 Ganna nuxa ttu benne innábie: “Neti gwa rakabati ge Tata Do Yebáha”, ttaka ganna sa ritisibanie attu benne, la'ania nna ruinba le benneha. Kumu, ¿gasina akanie ge Tata Do Yebaa benne abí rilánieha, ki benne du kwe'eha gwa rilálanie benneha nna a rakanie gebie?
1JO 4:21 Kumu Cristuha ree: “Benne akanie ge Tata Do Yebáha, akagabanie ge attu betsi to geri'i.” Nuní tisa bodha'ane lenri'i kini uinri'i nu rana.
1JO 5:1 Iyába ka benne ganna ria leke deki Jesús‑ni anke Cristu, ka benneha nuha gwankake xi'in Tata Do Yebáha nna iyába ka benne rakakanie ge Tataha, rakagabakanie ge ka benne chi ankake xi'in Tataha.
1JO 5:2 Ganna rakinri'i ge Tata Do Yebáha lhe ganna gwa rudobari'i tisa ge nu chi bodha'ane uinri'i, la'ania nna chi yuri'i deki gwa rakagabinri'i ge ka xi'inieha.
1JO 5:3 Kumu ganna gwa rudobari'i tisa ge nu benie mandadu uinri'iha, ganna gwa ruinbari'i nuha, la'ania nna nuha runna liina deki gwa rakabinri'i gebie nna nu rabie uinri'iha, labí disa ule'enri'i ganna chi uinri'i nuha.
1JO 5:4 Kumu iyába ka benne chi anka xi'in Tata Do Yebáha chiba udaa ka benneha use'e tsitsike, abittu rixú yieke uinke nu satsa raka yiesi lo yu‑ni. Kumu ri'i, de ruxxen leri'i ge Cristuha, de nuha nna gwa ridaabari'i abittu ruinri'i nu satsa raka yiesi lo yu‑ni.
1JO 5:5 Nianna, ¿núla nuha gwa ridaana abittu ruinna nu satsa raka yiesi lo yu‑ni ganna? ¿Laaba ganna benne ria lebie deki Jesús‑ni anke Xi'in Tata Do Yebáha? Benneha nuha gwa ridaabie abittu runie nu satsa.
1JO 5:6 Jesucristuha nuha bisiabie yiesi lo yu‑ni nna len inda udieha lhe len reni belalie tti uttieha, len nuha bele'e nuxa anke. Labí suna len inda udieha, sinuki len indaha lhe len reniha bele'e nuxa anke. Espíritu ge Tata Do Yebáha rigixxi'e nuní, kumu benneha rinnebie nu anka gwalí.
1JO 5:7 Tsunna loo ka benne runna liike nuxa anka Cristuha,
1JO 5:8 delába Espírituha lhe indaha lhe reniha lhe. Iyunnaba ka benne‑ni ttúba rigixxi'ake ge Cristuha.
1JO 5:9 Gwalinnáruga, ki nu rigixxi'a ka benne se'e yiesi lo yu‑ni gwa rudo nagari'i geni, adírula nu utixxi'a Tata Do Yebáha dakarula nuha kumu utixxi'e ge Xi'inieha.
1JO 5:10 Laxkala benne gwa ria lebie ge Xi'inieha, benneha gwa yue deki nu utixxi'a Tata Do Yebáha ge Xi'inieha nu gwalíba anka nuha nna nu abíba ria leni ge nu ra Tata Do Yebáha, nuha nna rálana deki Tata Do Yebáha ruinba le benneha kumu de labí ria leni ge nu utixxi'e ge Xi'inieha.
1JO 5:11 Tisa‑ni nuní utixxi'e, delába utixxi'e unie ki aka benri'i ttu dia lii nna elha nabani gatta geri'iha, Xi'inieha‑ba utebie nuha geri'i.
1JO 5:12 Ganna ri'i du lenri'i Xi'in Tata Do Yebáha, la'ania nna gwa teeba elha nabani geri'i ttu dia lii nna ganna ri'i abíba du lenri'i Xi'in Tata Do Yebáha, la'ania nna labí gatta elha nabani geri'i ttu dia lii.
1JO 5:13 Iyá nuní benia lo yetsi‑ni nna ridhelhaa na gele, lebi'i ka benne chi ria lele ge Xi'in Tata Do Yebáha, kini anáchu nna yule deki gwa tee elha nabani gele ttu dia lii.
1JO 5:14 Ri'i ruxxen leri'i ge Tata Do Yebáha, kumu gwa yúbari'i ttixka rinnabari'i lenie atti ttega ru'u lebie, labie nna gwa riyienbanie geri'i.
1JO 5:15 Kumu de chi yuri'i deki gwa rudoba nage geri'i ttixka bixa rinnabari'i lenie, anágaba nna chigaba yuri'i deki nu unnabari'iha chiba anka nuha geri'i.
1JO 5:16 Ganna ttu benne rilánie ttu betsi to geri'i rekina ruinna ttu bixa tulha, ganna ruinna tulha nu abittu kilana elhutti geni arlo Tata Do Yebáha, benne ilánie tulha ruinnaha, benneha teeki innabe geni len Tata Do Yebáha. Tata Do Yebáha nna gwinbe ki aka benna ttu dia lii. Rinnea ge ka nu ruinkana tulha, delába tulha nu abittu rigilana elhutti ge ka benne, kumu se'e ka tulha ka nu rigilakana elhutti ge ka benne. Labí ria deki ge ka nu ruinkana luesi tulha‑ni innabale len Tata Do Yebáha.
1JO 5:17 Iyába nu satsa ruinri'i, tulhaba anka nuha, ttaka se'e ka tulha ka nu labí rigilakana elhutti geri'i.
1JO 5:18 Gwa yúbari'i deki iyába ka benne, delába ka benne chi ankake xi'in Tata Do Yebáha, labíru rudona leke uinke tulha, kumu Jesús benne anka Xi'in Tata Do Yebáha, labie ruyú tsitsie ke kini abittu ridí yie nu xxegwiha ke.
1JO 5:19 Anágaba chigaba yuri'i deki ri'i chi ankari'i ge Tata Do Yebáha nna iyába ka benne se'e yiesi lo yu‑ni ka nu labí chi ankakana gebie, nu ra nu xxegwiha‑ba ruinkana,
1JO 5:20 lhe gwa yúgabari'i deki Xi'in Tata Do Yebáha bisiabie yiesi lo yu‑ni nna udhalie ikiri'i kini uinbiari'i benne gwalíga anka Diosiha. Nnanna chi se'eri'i len benneha de du lenri'i Xi'inie Jesucristuha. Tata Do Yebáha nuha anke gwalíga Diosi lhe anke benne rutebie elha nabani geri'i ttu dia lii lhe.
1JO 5:21 Xi'ini to kia, gwaluyú gele, bittu tsia lele ge ka nu labí gwalíga ankakana diosi.
2JO 1:1 Neti Juan chi ankaa benneola. Ridhelhaa yetsi‑ni gelu xa benne nuila. Lu nuná chi bekwe Tata Do Yebáha itupa lenlu ka xi'inlu‑na. Lebi'i nuná gwalíga rakati gele. Anna laa suna netiga rakati gele, anágaba ka benne chi ria leke ka tisa ka nu ankakana gwalíga ge Tata Do Yebáha, iyágaba ka benneha rakakanie gele.
2JO 1:2 Neti rakati gele kumu de chi yu'u ka tisa ka nu anka gwalíga ge Tata Do Yebáha lhe'e lastori'i nna anába satíaba tsu'u ka tisa‑na lhe'e lastori'i.
2JO 1:3 Xxudiri'i do yebáha lhe Jesucristu benne anke Xi'inieha, lake edá leke aka lenke le lhe satua leke le lhe. Anágaba nna use'eke le latsiru. Lake nuha gwalíga rakakanie gele.
2JO 1:4 Neti yalhá itta bedú lasia tti gwaxxakaa ttu chupa ka xi'inlu‑na gwa se'ebakana ruinkana nu raxxína len nu anka gwalí, ruinbakana attiba chi bodha'an Tataha uinri'i.
2JO 1:5 Laxkala nnanna rinnabaa lenlu xa benne nuila, iyári'i akin ge luesiri'i. Nu runia lo yetsi‑ni labí anka nuní ttu tisa kubi rodha'anaa len lebi'i, sinuki ankaba nuní tisa chi uxíri'i sisi'a tteha.
2JO 1:6 Kumu ganna gwa rakabin ge luesiri'i, la'ania nna gwa ruinbari'i nu bodha'an Tata Do Yebáha uinri'i, delába tisa nu bodha'ane nu ra: “Akin ge luesiri'i.” Nuníunni tisa chi biyieninle sisi'a tteha.
2JO 1:7 Ixe ka nu ruin lekani chi reki yiesi lo yu‑ni, rákana: “Labí lii deki Jesucristuha bisiabie yiesi lo yu‑ni nna uke benne attiba ankari'i.” Ka nu ra aní, ruinba lekani lhe ankabakana ka nu labí raka uyúkana Cristuha.
2JO 1:8 Laxkala gwaluyú gele kini ka unnittile nu tse ralhale dhile ge sina chi benle ge Tata Do Yebáha, sinuki dhílale iyá nu ralhale dhile.
2JO 1:9 Iyába ka nu labí rudokana tisa ge nu bele'e Cristuha, sinuki attu nu subila ruinkana, ka nuha labí du lenkana Tata Do Yebáha nna ka nu gwa rudokana tisa ge nu bele'e Cristuha, ka nuha‑ligaba nna gwa du lenkana Tataha lhe gwa du lenkana Xi'inieha lhe.
2JO 1:10 Ganna ttixka nuxa ita ro'o lisile nna abíba rigixxi'ana nu bele'e Cristuha, bittu ulabile na lhe nigaba gale na: “Lhe'e yo'ola ute.”
2JO 1:11 Kumu benne gabie nuha: “Aníla ute”, benneha ttisidiba selagabe lhe'e nu satsa ruin nuha.
2JO 1:12 Ixeeru nu teti upeya le, ttaka labí raka lasia unia na lo yetsi, kumu chi xen lasia itaa ata se'ele‑na kini inne lania kwinaga lebi'i. Aníha kini itta suba edú leri'i.
2JO 1:13 Xa benne nuila, ka xi'in benne xilalu‑ni, delába ka benne chi bekwe Tata Do Yebáha, ka benne‑ni ridhelhake ttu padiuxi gelu. Amén.
3JO 1:1 Neti Juan chi ankaa benneola; ridhelhaa yetsi‑ni lenlu xa Gayo. Lu ankalu benne gwalíga rakati gelu.
3JO 1:2 Betsi to, rinnabaa gelu arlo Tata Do Yebáha kini attiba chi do tselu lenbie, anágaba saría tsena lu ge iyá nu ruinlu lhe dho tselu abittu bi dhakalu lhe.
3JO 1:3 Yalhá itta bedú lasia tti bisia ttu chupa ka betsi to geri'i ata doa‑ni rigixxi'ake gelu, ráke deki lu gwa ruinbalu nu raxxína len nu anka gwalí, delába gwa rudo tsitsibalu tisa ge nu ra Tata Do Yebáha.
3JO 1:4 Labí bixa ge redeakaruti, sinuki redeakaruti tti runaa ge ka benne rakati ke ttiba xi'inia, runaa deki gwa rudobake tisa ge nu anka gwalí.
3JO 1:5 Betsi to kia, yalhá tse nuná ruinlu rute nálu len ka betsi to geri'i, delába ka benne rekike ugixxi'a ka tisa ge Tata Do Yebáha, meskiba ankake benne dittu abittu ankabienlu ke.
3JO 1:6 Ka benne‑na nuná utixxi'ake arlo iyá ka benne chi ria leke Jesucristuha se'e‑ni, ráke deki lu ankalu benne si'i lasi. Tseba nuná ute chiettiru nálu len ka benne‑na, utelu nu iyasakanie ge neda geke. Uinlu atti galába ru'u le Tata Do Yebáha.
3JO 1:7 Kumu ka benne‑na biriake de rekike rigixxi'ake ka tisa ge Jesucristuha. Labí ridíke nu rute ka nu labí ria lekani Tata Do Yebáha.
3JO 1:8 De nuha nna ri'i teeki ute nári'i lenke. Aníha kini iselari'i lhe'e sina ruinkeha, delába rekike ugixxi'a ge nu anka gwalí.
3JO 1:9 Neti chi udhelhaa ttu yetsi len ka benne ria leke Cristuha ritupake naa; ttaka Diótrefes‑na labí ria leni ri'itu kumu lana ru'u leni akana nu ra xxeni leni arlo ka benne.
3JO 1:10 Laxkala ganna itaa ata se'ele‑na, la'ania nna inne lania na ge nu ruinna‑na, kumu lana rekina rinne satsana getu, nna labí suna nunáru ruinna, abittugaba rulabina ka betsi to geri'i daa idittu tti risinke lisini nna ka benne raka leke gaxike ka benne dittuha lisike, lana nna rodosuna ttebana, nianna rebea ttebana ka benne rulabike ka benne dittuha lisike, labíru raka leni iselake adí ka benne chi ria leke ge Cristuha.
3JO 1:11 Betsi to kia, lu bittu uinlu nu satsa; lu benla nu anka tse. Kumu nu runi nu anka tseha, nuha gwankana ge Tata Do Yebáha, nna nu runi nu satsaha, labí chi ankabien nuha Tata Do Yebáha.
3JO 1:12 Demetrio‑ni nna iyába ka benne rinne tseke ge nu ruinna. De nu tse ruinnaha nuha runna liina deki gwankabana benne tse. Anágaba ri'itu ratu tseba anka nu ruinna, lu gwa yúbalu ri'itu nu anka gwalíba rinnetu.
3JO 1:13 Ixeeru nu teti upeya lu xa Gayo, ttaka labí raka lasia unia na lo yetsi,
3JO 1:14 kumu chi tteba xxen lasia iláti lu kini inne lania kwinaga lu.
3JO 1:15 Ka benne ankabienlu se'e nii ridhelhake ttu padiuxi gelu. Anágaba lu begwe ttu ttu ka benne se'e naa ttu padiuxi getu. Tata Do Yebáha unie kini dholu xen su lasi.
JUD 1:1 Neti Judas betsi Jacobo, neti ankaa benne rixúni Jesucristuha. Ridhelhaa yetsi‑ni gele, lebi'i ka benne chi uxi Xxudiri'i do yebáha le lo neda geeha lhe rakanie gele lhe. Anágaba Jesucristuha ruyúgabe le lhe.
JUD 1:2 Lake satuaru leke le lhe akarukanie gele lhe anágaba use'eruke le xen su lasi lhe.
JUD 1:3 Betsi to kia, neti yalhá re lasia unia ttu yetsi ata kixxi'ania le gasina bodilaa Tata Do Yebáha iyá tteri'i. Ttaka nnanna rido doelhaa ridhelhaa yetsi‑ni rulisaa le ria: “Gwaluin doelha kini abittu nnitti ka tisa ka nu chi ria leri'i, delába ka tisa ka nu rigu'u ni'akani. Ka tisaha nuní ttu tsaba chi bodha'an Tata Do Yebáha ke lenri'i, delába ri'i ka benne chi ankari'i gebie.”
JUD 1:4 Ria aní kumu lagwi gele sii siiba chi uta'a ttu chupa ka nu labí rugwekana lidhaka Tata Do Yebáha. Ka nuná nu reha‑li chi ga'anna deki ibixxi iginnibakana kumu de ruinkana nu satsa rakaba lekani ruinkana. Rigittabakana len nu tse redá le Tata Do Yebáha runie lhe anágaba rigu'ugaba ni'akani Jesucristu benne anke ttu túbiru Xxanari'iha.
JUD 1:5 Neti raka lasia odhúa lele, meskiba lebi'i chi yule deki Tata Do Yebáha, iki de chi bebeabie ka nu Israel‑ni lo yu ge Egipto‑ni, nianna tti betse'e loobie ka nu abittu ugía lekani gebie la'ania.
JUD 1:6 Aníha‑gaba gwate ka anjeli ka nu abittu begwekana lidhaka ladikani nu begwe Tata Do Yebáha kana, bedhála ikikani ata se'ekanaha. De nuha nna bedheabie kana ttu dia lii lhe'e lisiyya ata anka chulhaha. Niha‑ba tua tsekana axtaliba ganna chi bisia sá aka elhuxtisi ge ka benne se'e yiesi lo yu‑ni.
JUD 1:7 Aníha‑gaba nuha gwate ka benne use'e lhe'e ka yiesi Sodoma lhe Gomorra lhe, anágaba lhe'e adíru ka yiesi se'e gaxxaba ka niha lhe. Ka benneha uduloke bisáke nu subi subi lhe benke adíru nu satsa nu abittu dika uin ka benne. De nuha nna biyúke elha disa ugíake lo gi, delába nu satíaba rite loniha. Nu gwate ka benneha bixúna kini ilenri'i nna abittu uinri'i luesi nu ben ka benneha.
JUD 1:8 Anágaba ruin ka nu uta'akana sii siiba lagwi geleha. Bitti bittiba rákana, ttiba ttu nu ritsiani ela, aníha‑ba ankakana. Runnittiba latikani len nu satsa ruinkanaha lhe labí ridielhakana innabia Tata Do Yebáha kana lhe anágaba rigegabakana iki ka nu ra xxeni lekani se'e yebáha lhe.
JUD 1:9 Kinila Miguel benne anke nu loni ge adí ka anjeli se'e yebáha, kinila benneha, tti bitilha lenie nu xxegwiha kini nuxake eya'an lenke bela lati Moisés‑ni, nila benneha labí beyaxanie kebie iki nu xxegwiha; sunruba rabie na: “Tata Do Yebáha kise lu.”
JUD 1:10 Ttaka ka nu uta'a sii siibaha, ge iyába nu abittu rite dákinna rinne satsakana geni. Ttaka nu ttu latti chi rite dákinnaha, sunruba rixú nuha kini runnittina kana. Ruinbakana ttiba ruin ttu nimala nu akaa elha rieni ikini. Nuha suna nu rannibin latini ruinna.
JUD 1:11 ¡Karusi'irukana! Ruinbakana attiba ben Caín‑ni lhe anágaba kumu de raka lekani dhíkana belhiu, de nuha nna ruinkana nu abittu anka tse ttiba ben Balaam‑ni, lhe anágaba kumu de rese'e disakana, de nuha nna gattibakana ttiba gwate Coré‑ni. Nuha‑ruga use'e loobana de bedú disana lo Tata Do Yebáha.
JUD 1:12 Ka nuná elhittula rutekana ata ritupale ttixka tee ttu elha go gele; robakana attiba rakaba lekani. Ka nuná sun gebakani ruchacha ikikani. Ankabakana ttiba ttu bea abittu iyya chena, naa lhe niiba riche beha na, lhe anágaba ankagabakana ttiba ttu yaga nu abittu rute nu xixxi attiga anka geni. Yagaha lanila ituana itupa lhu‑ni chila ubisina.
JUD 1:13 Anágaba lhe ankagabakana attiba kuchina tsiga nu retelhekina ro'o indatooha tti radha loni, aníha‑ba anka nu satsa ruinkana, lhe anágaba ttiba ka beli ka nu ridá, ka nu labí siakana ttu sade'e, aníha‑ba anka ka nuná. Naa lhe niiba rekikana, ttu dia liiba rekikana ata anka chulha.
JUD 1:14 Ge ka nunígaba nuha ugwettini Enoc‑ni unnebie, delába Enoc benne uli gasi libixxi iki de Adán‑ni. Benneha unnebie ree: “Gwalulanniruga, nii chi daa Tata Xisiha len ixe miliru ka anjeli gebie,
JUD 1:15 kini unie elhuxtisi ge iyába ka benne nna ukinnie ka nu labí rugwekana lidhake, ugwebie kana elha disa ge iyába nu satsa benkana lhe ge iyába nu unnekana tti utuakana bala'ana geeha lhe.”
JUD 1:16 Aníha‑ba ka nuná rinne lhákana lhe riguakana bala'ana ge ka benne lhe, ruinbakana nu rakaba lekani lhe rinnegabakana rákana deki yalhaba raka gekani, lhe anágaba ankagabakana ka nu ro'o lhe'e, ukadiba rinne tsekana ge ka benne. Aní ruinkana kini dhíkana nu rulha lekani dhíkana.
JUD 1:17 Ttaka lebi'i xa betsi to kia, gwalodhú lele ge nu chi utixxi'a ka apóstol ge Jesucristu benne anke Xxanari'iha.
JUD 1:18 Ka benneha ráke: “Ganna chi isia sá daluxaha, la'ania tse'e ka nu uxisilakana ge Tata Do Yebáha lhe ge ka benne chi ria leke bie lhe, uingabakana nu satsa retaba lekani lhe.”
JUD 1:19 Ka nuha uttilhabakana ka benne lhe ilha'abakana lhe'e luesike lhe. Suna nu anka ge yiesi lo yu‑niba udo ikikani, kumu de labí do Espíritu ge Tata Do Yebáha lhe'e lastokani.
JUD 1:20 Ttaka lebi'i xa betsi to, gwaltsia tsitsiru lele ge nu chi ria lele ge Tata Do Yebáha. Tti innele lenie, Espíritu geeha kixxi'anie le bixa dika innále.
JUD 1:21 Satía gwaluxxen lele deki gwa rakabin Tata Do Yebáha gele lhe gwaltse'e ubeda ganna chi isia sá ute Jesucristu benne anke Xxanari'iha elha nabani ttu dia lii gele; utebie na gele de ratua lebie le.
JUD 1:22 Gwalikweki tsitsi le ka nu rudú chupana lekani,
JUD 1:23 adíkana nna gwalodilaa kana kini abittu tsiakana lo giha, adíkana nna satua lele kana, sun tteba nna gwaluyú gele niru latti abittu uinle nu satsa ruinkana, gannala gwaxka axtala ka xokani ka nu rukukana abittu kanle.
JUD 1:24 Tata Do Yebaa benne ra tsitsi leha, benneha uyúbie le kini abittu iginnile uinle tulha nna ittaba du lele tti otso dubie le arloe abittu tsiga ankale.
JUD 1:25 Labie anke ttu túbiru Diosi lhe bodilábie ri'i de nu ben Jesucristu benne anke Xxanari'iha. Lee ra xxeni lebie lhe rinnabie attili lani kwe yiesi lo yu‑ni, lhe anágaba rinnabiagabe nnanna lhe innabiagabe ttu dia lii lhe. Amén.
REV 1:1 Lo yetsi‑ni dia nu ben Tata Do Yebáha kini Jesucristuha bela'anie nu chi tte dabiga aka. Jesucristuha nna bedonie kini ka benne rixúke lo sina geeha bodola'agabakanie nu chi dabiga akaha nna udhelhe anjeli geeha len neti Juan benne rixúa lo sina geeha kini anjeliha nna benie kini bela'ati iyá nuní.
REV 1:2 Neti nna rigixxi'abaa ge iyába nu bela'ati; delába nu utixxi'en Jesucristuha neti lhe nu unne Tata Do Yebáha lhe.
REV 1:3 Karubáru ka benne ulabake ka tisa dia lo yetsi‑ni, delába ka tisa ka nu chila rigixxi'akana ge nu chi dabiga aka lhe karubáru ka benne gudo nagake ge ka tisa‑ni lhe uinke nu rákana lhe, kumu chi tteba dabigana aka nu ra ka tisa‑ni.
REV 1:4 Neti Juan ridhelhaa yetsi‑ni len lebi'i, ka benne ankale gasi dhi se'ele daka Asia‑na. Lebi'i nuná chi ria lele Jesucristuha. Tata Do Yebáha doe ttuha‑li lhe doe nnanna lhe dhoe nu si daa lhe. Benneha lenie gasi ka espíritu, ka benne se'eke arlo ata du xxila doe rinnabieha lhe anágaba Jesucristuha lhe, ka benne‑ni nuní edá leke aka lenke le lhe use'eke le xen su lasi lhe. Jesucristuha anke benne rigixxi'e nu dika tsia leri'i lhe anke benne sisi'a tte beyadhe lagwi ge ka benne chi uttiha, lhe anágaba anke xxeniru arlo ka nu rinnabia se'e yiesi lo yu‑ni. Benneha rakanie geri'i lhe len reni geeha bodilábie ri'i lo ka tulha ruinri'i.
REV 1:6 Jesucristuha benie kini akari'i ka nu innabia, lhe anágaba ki akari'i ka bixxudi kini ixúri'i len Tata Do Yebáha, delába benne anke Tata geeha. Benneha inná xxeni lebie lhe inná tsitsi lebie ttu dia lii. Amén.
REV 1:7 ¡Cristuha dedábie lhe'e beaha! Iyá xeaba ka benne ilákanie bie. Anágaba ka nu bettikaneha ilágabakinne nna iyába ka benne se'e yiesi lo yu‑ni kwesike de elenkanie gebie. Aníha teeki aka. Amén.
REV 1:8 Tata Do Yebaa benne anke Xxanari'iha lhe ra tsitsi xxatta lebie lhe, benneha ree: “Neti ankaa benne riduloa lhe ankaa benne rulhuxa looa lhe. Neti doa ttuha‑li lhe doa nnanna lhe dhoa nu si daa lhe.”
REV 1:9 Neti Juan, ankaa betsi to gele. Neti de ria lasia Jesús‑ni, de nuha nna neti lhe lebi'i lhe turo'oba rutto ruchíari'i elha disa lhe anágaba turo'ogaba ribedari'i isia sá tti innabia Tata Do Yebáha. Neti doa lo yu tee láni Patmos, nuní rena lagwi indatoo‑ni. Niba doa uleakana neti de rekia ugixxi'a ka tisa ge Tata Do Yebáha lhe de rigixxi'aya ge nu ben Jesucristuha lhe.
REV 1:10 Tti bedú ni'a xumanuha, tti anka sá ge Tata Xisiha, la'ania bisia Espíritu ge Tata Do Yebáha latia. Tti chi yu'u benneha latia nna biyienti tsi'i ttu benne daka kwe'a unnebie idisa ttiba riyieni idisa ge ttu trompeta.
REV 1:11 Benne unneeha, ree: ―[Neti ankaa benne riduloa lhe ankaa benne rulhuxa looa lhe.] Nnanna ben lo yetsi iyá nu rilenlu‑ni nna udhelha na len gasi dhi ka benne chi ria leke Jesucristuha se'e lhe'e ka yiesi se'e daka Asia‑na, delába ka benne se'e lhe'esi Éfeso lhe ka benne se'e lhe'esi Esmirna lhe anágaba ka benne se'e lhe'esi Pérgamo lhe Tiatira lhe Sardis lhe anágaba ka benne se'e lhe'esi Filadelfia lhe Laodicea lhe.
REV 1:12 Neti tti bodeki loa kini iláti nú benne nuha rinnebie len neti, nianna tti bela'ati gasi ka candeleru ge oru ralha gi lokani.
REV 1:13 Lagwi ge ka candeleruha bela'ati ttu benne rule'ebie attiba rula'a benne daa yebáha, nukue ttu xalho risinna axtaba yien ni'e nna xika ro'o lastoe ttu yieti ankana ge oru.
REV 1:14 Itsa ikieha nna sitsi túba ankana, ankana ttiba itsa xo ttu neru sitsi lhe ankana sitsi ttiba begi. Ka iyya loeha nna xiná túba ankakana ttiba anka belha ge gi.
REV 1:15 Ka ni'eha nna raka lhalhabakana attiba raka lhalha iyya nu tee láni bronce tti reriana lhe'e ornu. Tsi'ibie nna riyienna attiba riyieni tti riginni idila inda lo ttu benunni.
REV 1:16 Daka ná benbie nna denie gasi ka beli, ro'obie nna riria ttu espada tutsa gwi nna lo kwe'eba espadaha ria. Lobie nna raka lhalhaba attiba raka lo tatubisa‑na tti do dia lobie.
REV 1:17 Atti bela'ati benneha, bere tteba loa arloe, ttiba ttu nu yatti ukaa. Labie nna uxxua ná banie ikia nna ree: ―Bittu gasinlu, kumu neti ankaa benne doa sisi'a tteha lhe ankaa benne doa ttu dia lii lhe,
REV 1:18 anka bania nnanna lhe. Uttibaa, ttaka nnanna ttu dia liiba doa anka bania. Netiba denia yagwi ge elhuttiha lhe yagwi ge belha'a chulhaha lhe.
REV 1:19 Ben lo yetsi‑na nu chi bilenlu uka lhe nu rilenlu raka nnanna lhe nu si ilenlu aka nu si daa lhe.
REV 1:20 Aní diani gasi ka beli den ná bania‑ni lhe aní diani gasi ka candeleru ge oru‑ni lhe. Gasi ka beli‑ni ankakana gasi ka anjeli ruyúkana gasi dhi ka benne ria leke neti nna gasi ka candeleru ge oru‑ni nna ankakana ka benne chi ria leke neti selake lhe'e gasi dhi ka benneha.
REV 2:1 ’Ben yetsi‑ni nna udhelha na ge anjeli ruyúe ka benne chi ria leke neti se'eke lhe'esi Éfeso. Usi ke: “Aní ra Jesús benne den ná banie gasi ka beliha lhe rekie lagwi ge gasi ka candeleru ge oruha:
REV 2:2 Neti chiba yua iyá nu ruinle lhe yúgabaa yalhá tsitsi ribenle lo sina ge Tata Do Yebáha lhe anágaba gwa ruchíagabale lo nu ratele. Yúgabaa labí raka uyúle ka nu ruin satsa lhe anágaba nna chigaba ulu'ule prueba ka nu rákana deki ankakana apóstol ge Tata Do Yebáha, ttaka delola nna tti ute denle deki labí liikinna, ruinba lekani.
REV 2:3 Lebi'i yalhá chi bechíale lhe yalhá chi gwatele de ria lele neti, labí bedhanle a ugía lele neti.
REV 2:4 Ttaka ttu nu labí ru'u lasia ruinle: labíru rakinle kia atti ukinle kia sisi'a tte tti udulole ugía lele kiaha.
REV 2:5 Gwalodhúruga lele gáli se'ele ttuha, nnanna nna naali nuná chi ubinnile de labíru rakinle kia tti ukinle kia la'ania. Gwalodúna le ge nu ruinle‑na nna gwaleyoin tti benle sisi'a tteha, kini ka itaa etettuaya candeleru gele‑na ata dona‑na, ganna lebi'i abíba odúna le.
REV 2:6 Ttaka ttu nu gwa ru'u lasia ruinle: lebi'i labí ru'u lele nu ruin ka nu tee lákani nicolaita. Neti labígaba ru'u lasia nu ruin ka nuná.
REV 2:7 Nu gwa sia nagani, udo nagani ge nu rigixxi'ani Espírituha ka benne ria leke neti nna benne dhaabie dhu tsitsie lo neda kia, benneha nuha gugoa bie nu xixxi ge yaga nu rute elha nabani ge ka benne ttu dia lii; delába yaga nu du ata chi ga'anani Tata Do Yebáha tse'e tse ka benne.”
REV 2:8 ’Bengaba yetsi‑ni nna udhelha na ge anjeli ruyúe ka benne chi ria leke neti se'eke lhe'esi Esmirna. Usi ke: “Aní ra Jesús benne do sisi'a tteha lhe benne do ttu dia liiha lhe; delába benne uttieha, nianna beyaka benbe attu libe:
REV 2:9 Neti gwa yubaa elha disa ratele‑na lhe gwa yúgabaa deki ankale benne dii, ttaka arlo Tata Do Yebáha ankalale benne tee gele. Lhe gwa yúgabaa deki ka nu rákana: Ankatu nu Israel, ka nuná yalhá satsa rinnekana gele. Lakana rákana deki ankakana ka nu chi bekwe Tata Do Yebáha, ttaka labí liikinna. Ka nuná ankalakana ge nu xxegwiha, delába nu tee láni Satanás.
REV 2:10 Bittu gasinle ge nu satele, kumu nu xxegwiha uga'abana ttu chupale lisiyya kini ku'una le prueba nna teeki satele elha disa delo tsii ubisa. Tsitsi gwaltse'e meskiba uttikana le, neti nna gwinbaa ki aka benle ttu dia lii. Elha nabani utea geleha ankana attiba ttu corona dhile.
REV 2:11 Nu gwa sia nagani, udo nagani ge nu rigixxi'ani Espírituha ka benne chi ria leke neti. Benne dhaabie dhu tsitsie lo neda kia, benneha labí uyúe elhutti nu berupaha.”
REV 2:12 ’Bengaba yetsi‑ni nna udhelha na ge anjeli ruyúe ka benne chi ria leke neti se'eke lhe'esi Pérgamo. Usi ke: “Aní ra Jesús benne denie espada tutsa gwiha, espada nu ria lo kwe'eniha:
REV 2:13 Neti gwa yubaa gaxa nuná se'ele. Lebi'i se'ele ata du xxila rido nu xxegwiha rinnabiana, delába nu tee láni Satanás. Ttaka meskiba se'ele naa, lebi'i gwa se'ebale len neti. Labí rudhanle a ria lele neti, meskiba bettikana Antipas‑ni lagwi gele, delába bettikana na ata rinnabia nu xxegwiha. Antipas‑ni nuha bedona lebie utixxi'abie kia.
REV 2:14 Ttaka se'e ttu chupa nu abittu ru'u lasia ruinle. Lebi'i sa rugwelhabale sela lenle ttu chupa ka nu rudokana tisa ge nu bele'e Balaam‑ni. Balaam‑ni ulu'u tisana Balac‑ni. Balac‑ni nna benna kini ka nu Israel‑ni binittikana benkana tulha de utokana bela ge ka nimala ruttikana ki rutekana úna lo bekú ge ka nu labí gwalíga ankakana diosi lhe anágaba uxí yiena kana kini bisákana nu subi subi.
REV 2:15 Anágaba ka nu ria lekani ge nu rula'a ka nu tee lákani nicolaita, lebi'i rugwelhagabale selakana len lebi'i.
REV 2:16 De nuha nna gwalodúna le ge nu ruinle‑na nna gwaleyeki len Tata Do Yebáha. Ganna abíba eyekile len benneha, la'ania nna neti ita ttebaa ata se'ele‑na ki ttilha lania ka nicolaita‑na len espada riria ro'a‑ni.
REV 2:17 Nu gwa sia nagani, udo nagani ge nu rigixxi'ani Espírituha ka benne ria leke neti nna benne dhaabie dhu tsitsie lo neda kia, neti nna gugobaa benneha elho nu tee láni maná, delába nu teeti gatsiha lhe ugwegabe ttu íyya sitsi nu dia ttu lá kubi loni. Lanú nu yuna bixa dia lo íyyaha, sunruba benne dhie nuha gwa yubie bixa dia loni.”
REV 2:18 ’Bengaba yetsi‑ni nna udhelha na ge anjeli ruyúe ka benne chi ria leke neti se'eke lhe'esi Tiatira. Usi ke: “Aní ra Xi'in Tata Do Yebaa benne anka ka iyya loeha xiná tú attiba belha ge gi, ka ni'eha nna raka lhalhabakana attiba raka lhalha iyya nu tee láni bronce:
REV 2:19 Neti gwa yubaa iyá nu ruinle lhe gwa yúgabaa deki ankale benne si'i lasi lhe gwa ankabale benne gwa ria tsitsi lele neti lhe anágaba gwa ruteba nále len ka benne lhe gwa ruchíabale lo nu ratele lhe. Yúgabaa deki tseru ruinle nnanna atti sisi'a tteha.
REV 2:20 Ttaka ttu nu labí ru'u lasia ruinle: lebi'i rugwelhabale sela lenle nuila nu tee láni Jezabel nu rana deki ankana profeta ge Tata Do Yebáha. Ttaka len nu rule'enaha runnittilana ka benne rixúke lo sina kia, ridí yiena ke ki risáke nu subi subi lhe ridí yiegabana ke ki roke bela ge ka nimala rutti ka benne ruteke úna lo bekú ge ka nu labí gwalíga ankakana diosi.
REV 2:21 Neti chiba begwea na lo neda kini odúna na ge nu ruinna‑na nna odaxxuna neda ge Tata Do Yebáha, ttaka lana nna labí uka leni udhanna nu risána nu subi subi.
REV 2:22 De nuha nna neti unia kini tsu'una lo ta'a nna ka nu bisá naha nna ugwegabaa kana ttu elha disa tsitsi ganna abíba udhankana nu ruinkanaha.
REV 2:23 Ka xi'in Jezabel‑ni, delába ka nu rudokana tisa geni, ka nuná uttibaa kana. Aníha kini iyá ka benne chi ria leke neti tte dákanie deki neti ankaa ttu benne rite dati gasina rulaba le ka benne lhe bí ru'u leke lhe. Lebi'i nna kua ttu ttule utea nu ralhale dhile ge nu benle.
REV 2:24 Adíle ka benne se'ele lhe'esi Tiatira, lebi'i ka nu abittu rudole tisa ge nu rule'e Jezabel‑ni, delába nu rákana deki ankana elha rieni ge nu xxegwiha, lebi'i labí bixa rinnabaa uinle:
REV 2:25 sun tteba nna gwaltse'e tsitsi lo neda kia attiba diale ruinle‑na, anágaba gwaluni axtaliba ganna chi besiayaha.
REV 2:26 Nu dhaana dhu tsitsina lo neda kia lhe udona tisa kia axtaliba ganna chi uluxaha, nuha gugwebaa na lo neda ki innabiana iyá ka benne se'e lhe'e ka yiesi se'e yiesi lo yu‑ni,
REV 2:27 innabia tsitsina ke nna uduyana ke attiba riyuya ka yedhu yu.
REV 2:28 Ugwea na lo neda ki innabiana attigaba neti bete Tata kia lo neda len neti ki innabiaya lhe anágaba nna ugwegabaa na beli riria chi daa tsanina.
REV 2:29 Nu gwa sia nagani, udo nagani ge nu rigixxi'ani Espírituha ka benne ria leke neti.”
REV 3:1 ’Bengaba yetsi‑ni nna udhelha na ge anjeli ruyúe ka benne chi ria leke neti se'eke lhe'esi Sardis. Usi ke: “Aní ra Jesús benne denie gasi ka beliha lhe bananie gasi ka espíritu rixú lo sina ge Tata Do Yebáha lhe, benneha ree: Neti gwa yubaa nu ruinle. Ka benne ráke deki lebi'i anka benbale, ttaka len neti ttiba ttu nu yatti ankale.
REV 3:2 Gwalebani nna gwalese'e tsitsi. Nu tse ruinleha nu chi diale rudhanleha, gweledulo gwaleyoin na latsiru, kumu neti chiba biláti nu ruinle, labí ruinle atti ttega ru'u le Tata Do Yebáha.
REV 3:3 Gwalodhú lele ge nu chi biyieninle lhe ge nu chi ugía lele lhe. Gwalodo tisa ge ka nuní lhe gwalodúna le ge nu ruinle‑na nna gwaleyeki lo neda ge Tata Do Yebáha. Ganna abíba se'e tennále, la'ania nna iyyaba lele isiaya gele attiba ttu ubana labí yule nukaxa isiana.
REV 3:4 Ttaka lhe'esi Sardis‑na gwa se'eruba attu chupa ka benne labí chi bitsigake uinke nu satsa. Ka benne‑na nuná gwetenalhake neti ukuke xo sitsi, kumu lake nuná gwa ralhake tsekike len neti.
REV 3:5 Ka nu dhaakana tse'e tsitsikana lo neda kia, ka nuha gugukugabaa kana xo sitsi nna labí oxía lákani lo libru ata dia lá ka benne aka benke ttu dia lii arlo Tata kiaha. Anágaba neti, arlo Tata kiaha lhe arlo ka anjeli geeha lhe gwadígaba ro'a deki gwa ankabiabati kana.
REV 3:6 Nu gwa sia nagani, udo nagani ge nu rigixxi'ani Espírituha ka benne ria leke neti.”
REV 3:7 ’Bengaba yetsi‑ni nna udhelha na ge anjeli ruyúe ka benne chi ria leke neti se'eke lhe'esi Filadelfia. Usi ke: “Aní ra Jesús benne gwalíga anke Cristuha lhe benne chi riesini Tata Do Yebáha kini ake gebie. Benneha denie yagwi ge David benne unnabiaha. Benneha tti ridhalie, lanú nu aka geni ottona, tti rodheabie nna lanú nu aka geni idhalina.
REV 3:8 Neti gwa yubaa iyá nu ruinle. Gwaluyúruga. Neti chi udhalia neda gele, lanú nu aka geni ichúna lole. Meskiba labí ixele raka, ttaka gwa bedobale tisa ge nu xpeya le lhe labí chi bedhanle a ria lele neti lhe.
REV 3:9 De nuha nna ka nu ankakana ge Satanás; delába nu xxegwiha, ka nuha rákana: ‘Ri'itu ankatu nu Israel’, ttaka labí liikinna deki chi ankakana benne chi bekwe Tata Do Yebáha, ruinba lekani, ka nuná neti unia ki itakana udú xibikani arlole. Aníha kini tte dákinna deki gwa rakabati gele.
REV 3:10 Kumu gwa bedobale tisa kia tti xpeya le: Gwalutto gwaluchía, bittu udhanle neti, de nuha nna neti guyúbaa le tti isia sá uyú iyá ka benne se'e yiesi lo yu‑ni elha disa ganna chi ku'a ke prueba.
REV 3:11 Neti chi tte esiaya. Gwaltse'e tsitsi lo neda kia kini anuttu nu kuana nu ralhale dhile.
REV 3:12 Nu dhaana dhu tsitsina lo neda kia, neti nna gwinbaa kini akana ttiba ttu betubi ge yotu ge Tata Do Yebaa benne anke Diosi kiaha. Ttu tsaba labíru eriana lhe'e yotuha lhe anágaba udelhagabaa lá Tata Diosi kiaha lhe'e lastoni lhe lá yiesi geeha lhe, delába Jerusalén kubiha, yiesi nu iriana dana yebáha lhe anágaba neti udelhagabaa lá kubi kia lhe'e lastoni.
REV 3:13 Nu gwa sia nagani, udo nagani ge nu rigixxi'ani Espírituha ka benne ria leke neti.”
REV 3:14 ’Bengaba yetsi‑ni nna udhelha na ge anjeli ruyúe ka benne chi ria leke neti se'eke lhe'esi Laodicea. Usi ke: “Aní ra Jesús benne tee lábie Amén, benne rigixxi'abie ge Tata Do Yebáha attiba ankaba geni lhe rinnebie nu ankaba gwalí lhe, benne bengabe len Tata Do Yebáha iyá tte nu se'e yiesi lo yu‑ni lhe iyá tte ka nu sia yebáha lhe,
REV 3:15 benneha ree: Neti gwa yubaa nu ruinle. Yubaa labí ankale idilha, nigaba sa'a tú, labí tuttíru chi bedhanle a ria lele neti lhe nigaba a riaru lele neti itú iki itú lele. ¡Kwadila tuttíru udhanle a tsiaru lele neti o kwadila itú iki itú lele tsia lele neti!
REV 3:16 Ttaka kumu yu'u ttu akába lele ria lele neti, de nuha nna ebeaba ro'a le nna ku'unabaa le.
REV 3:17 Lebi'i rale: ‘Ri'itu ankatu nu tee getu. Yalhá lhe'e rariana ri'itu; labí bi riyasintu’. Ttaka labí rite denle deki arlo Tata Do Yebáha ankabale benne dii lhe benne lo xua lhe benne tuntu lhe labí elha gwedeaka lasi gele tee. Tti ilákin benne le, la'ania nna innáke: ‘Karusi'ile.’
REV 3:18 Laxkala rigixxi'ania le, len neti gwaltá gwaligo'o oru taga'a nu chi beyarina de chi beriana lo gi. Aníha kini akale nu gwalíga tee gele. Lhe anágaba len neti gwaltá gwaligo'o xo sitsi ki ukule. Aníha ki udheana lo elhittu gele de tuntule. Lhe len neti gwaltá gwaligo'o ramedi ki ka'a lole ki ilenle.
REV 3:19 Iyába ka nu rakati gekani rigisaa kana lhe rulisaa kana kini uinkana latsiru. De nuha nna lebi'i gwaleyeki gwalodo lele Tata Do Yebáha lhe gwalodúna le ge nu ruinle lhe.
REV 3:20 Gwaluyúruga. Ne neti dua ro'o puerta‑ni rinnea. Ganna nuxa iyieninna kia nna idhalina, neti nna ga'aya ata donaha ki go irse lenia na.
REV 3:21 Nu dhaana dhu tsitsina lo neda kia, nuha gugwebaa na lo neda ki dhona len neti lo xxila ata rinnabiayaha ttiba neti chi udáya nna chi doa len Tata kiaha lo xxila ata rinnabieha.
REV 3:22 Nu gwa sia nagani, udo nagani ge nu rigixxi'ani Espírituha ka benne ria leke neti.”
REV 4:1 Iki de nuha nna tti bela'ati ttu puerta yebáha du yali‑na lhe biyienti tsi'i benne unnebie len neti sisi'a tteha. Idisaba biyienti tsi'e attiba riyieni ge ttu trompeta, benneha rabie neti: ―Ugwapi nii kini neti nna ule'enia lu iyá nu chi dabiga aka.
REV 4:2 Looraha tteba nna bisia Espíritu ge Tata Do Yebáha latia. Tti yu'u Espírituha latia nna bela'ati xxila du yebáha do ttu benne rinnabie loni.
REV 4:3 Benne dobie lo xxilaha raka galhabe ttiba raka íyya ragalha nu tee láni jaspe o nu tee láni cornalina, nna abi'iba ata doeha yeki ttu yetti lhaa raka galhabana ttiba íyya nu tee láni esmeralda.
REV 4:4 Abi'iba ata do benne rinnabiaha se'e a ttaperua (24) ka xxila. Lo ka xxilaha nna sia ttaperua (24) ka benne benneola rinnabiagabake. Ka benneha nukuke xo sitsi nna yu'u ikike ka corona ge oru.
REV 4:5 Ata du xxila do benne rinnabiaha, rapi edha lhe ru'u be lhe ratsa lhe. Arlo xxila ata doeha nna ralha iki gasi ka ya nalha gi. Ka ya nalha giha ankakana gasi ka espíritu rixúke lo sina ge Tata Do Yebáha.
REV 4:6 Arlo ata doeha re ttiba ttu indatoo, iyya gwanaba raka loni de anka xxattana yaa. Chubaa ata du xxila do benne rinnabiaha, abi'iba kwe'e xxilaha se'e ttapa ka nu anka bani. Lo kwe'ebakani sia xxatta iyya lokani.
REV 4:7 Nu du sisi'a tteha ankana ttiba ttu beesi, nu berupaha nna ankana ttiba ttu gwirri, nu beyonnaha nna anka loni ttiba lo ttu benne, nu betapaha nna ankana attiba ttu bedhía diana lo be.
REV 4:8 Iyába ttapa ka nuha, ttu ttukana sia xxupa xxupa xxilakani. Lo kwe'eba ka xxilakaniha sia xxatta iyya lokani nna bittuba rudú siikana, rela resába rinnekana rákana: Tata Do Yebaa benne ankalu Xxanatu lhe benne ra tsitsi xxatta lelu lhe, lu ankalu benne le'a lhe benne nari xú, labí tulha ruinlu lhe ankalu benne chi riesi lhe. Lu ankalu benne dolu ttuha‑li lhe benne dolu nnanna lhe. Anágaba ankagabalu benne dholu nu si daa lhe.
REV 4:9 Ka nu anka bani ka nu rula'a ttiba rule'e ka nimalaha nna rugwekana ixkixaru benne doe lo xxila ata rinnabieha, delába benne dobie ttu dia liiha, nianna rákane: “¡Xxeniba ra lelu!”
REV 4:10 Kua rábakana aníha, ttaperua (24) ka benneolaha nna riyetta ttebake rudú xibike arlo benne do ttu dia liiha nna rutsá loke bie. Nianna tti ribeake ka corona gekeha nna rudelhake ka nuha arlo benneha nna ráke bie:
REV 4:11 Tata, benne ankalu Xxanatu lhe ankalu Xxudi do yebáha getu lhe, lu ralhalu inná xxeni lelu, lhe udú xibi ka benne arlolu lhe. Anágaba ralhalu akalu benne inná tsitsi lelu lhe, kumu kwinalu benlu iyá tte nu se'e, lhe kwinalu uka lelu kini se'ekana lhe uka xxekana lhe.
REV 5:1 Nianna tti bela'ati benne doe lo xxila ata rinnabieha, daka ná benbie denie ttu yetsi tubi‑na. Lo kwe'eba yetsiha dia letra. Ro'o yetsiha ata riluxa retubinaha, niha taa gasi ka sellu kini abittu rugwelhakana iyali loni.
REV 5:2 Bela'agabati ttu anjeli ra xxeni lebie, unnebie idisa, ree: ―¿Nú benne ralhe kuabie ka sellu taa ro'o yetsi‑ni lhe idhalie loni lhe?
REV 5:3 Ttaka ni yebáha lhe ni yiesi lo yu‑ni lhe nigaba lhi'u yuha, labí bisela ttu benne dika idhalie lo yetsiha lhe nigaba ulabe nu dia loni lhe.
REV 5:4 Neti nna yalhá ribesia dua kumu benne dika ralhe idhalie lo yetsiha lhe ulabe nu dia loni lhe, lanú bisela.
REV 5:5 Ttaka ttu ka benneola sela lhe'e ka benne ttaperuaha, (24) rabie neti: ―Bittu kwesilu. Biyúruga, benne rákana Beesi, delába benne anke xi'in ttu ka benne datiake Judá lhe datiagabe David‑ni lhe, benneha chi udaabie lo ka nu a raka uyúkane nna labie ralhe kuabie gasi ka sellu taa ro'o yetsi‑na lhe idhalie loni lhe.
REV 5:6 Nianna tti bela'ati lagwi ata du xxila do benne rinnabieha lhe lagwi ge ttapa ka nu anka baniha, delába ka nu rula'a attiba rule'e ka nimala lhe lagwi ge ka benneolaha, niha du ttu Neru to. Neru toha rule'ena attiba ttu neru chi bettikana nna sia gasi sitta ikini lhe sia gasi ka iyya loni lhe. Ka nuní ankakana gasi ka espíritu rixú lo sina ge Tata Do Yebáha. Ka espíritu‑ni nuha udhelhe itú tte yiesi lo yu‑ni.
REV 5:7 Nianna tti ubiga benne anke Neru toha bedaxxue yetsi den ná ben benne doe lo xxila ata rinnabieha.
REV 5:8 Tti bedaxxue yetsiha, itapaba ka nu anka baniha lhe iyába ttaperua (24) ka benneolaha, biyettake bedú xibike arlo benne anka Neru toha. Ka benneha denke ttu ttu ka arpa rudhesike lokani lhe denke ka copa ankakana ge oru, saa tíba lhe'ekani yala. Yala denkeha nuha rigu'inna ka tisa rilhapi ka benne chi ankake ge Tata Do Yebáha,
REV 5:9 nna rulhake ttu le'a kubi, ráke: Benne ankalu Neru to, lu ralhalu udaxxulu yetsi‑ni nna itsúlu ka sellu taa ro'in‑ni, kumu lu bettikana lu nna len reni gelu‑na chi uyo'olu iyá looba ka benne se'e lhe'e iyába ka yiesi se'e yiesi lo yuha, lhe ka benne rinne iyá looba tisa, kini akake ge Tata Do Yebáha.
REV 5:10 Lu benlu ki akake ka nu rinnabia lhe akake ka bixxudi lhe, kini ixúke len Tata Do Yebaa geri'iha, lhe innabiake yiesi lo yuha lhe.
REV 5:11 Nianna tti bela'ati nna biyienti tsi'i ixe juisiru ka anjeli se'eke abi'iba kwe'e xxila ata do benne rinnabiaha lhe kwe'e ttapa ka nu anka baniha lhe kwe'e ka benneolaha lhe,
REV 5:12 rinneke idisa ráke: ¡Neru to bettikanaha, benneha ralhe inná tsitsi lebie lhe dhie elha tse rute Tata Do Yebáha lhe anágaba ralhe ake benne yuu lhe ake benne ruin tsitsi lhe ake benne udú xibiri'i arloe lhe anágaba ralhe inná xxeni lebie lhe ilhapiri'i tisa lenbie lhe!
REV 5:13 Nianna tti biyienti rinne iyá xea ka nu ben Tata Do Yebáha se'e yiesi lo yu‑ni lhe ka nu se'e lhi'u yuha lhe ka nu reki lhi'u lhe'e indatooha lhe anágaba ka nu se'e yebáha lhe, iyába ka nuní rákana: Benne doe lo xxila ata rinnabie‑na lhe benne anke Neru to‑na lhe, ka benne‑na nuná ralhake inne tseri'i geke lhe udú xibiri'i arloke. Lhe anágaba lake nuná akake ka benne dika inná xxeni leke lhe inná tsitsi leke ttu dia lii lhe.
REV 5:14 Ttapa ka nu anka baniha, delába ka nu rula'a ttiba rule'e ka nimalaha nna rákana: ―Amén. Ka benneolaha nna bedú xibike nna rutsá loke benne anke Neru toha lhe benne doe lo xxilaha lhe.
REV 6:1 Nianna bela'ati utsú benne anke Neru toha ttu ka sellu taa ro'o yetsiha. Nianna tti biyienti unne ttu ka nu ttapa anka baniha; delába ka nu rula'a ttiba rule'e ka nimalaha, nuha rana: ―Utá belanni. Tti unne nuha, tuttíruba uyu'u be.
REV 6:2 Nianna tti bela'ati ttu kwayu sitsi. Nu dona kwe'e nuha denna ttu badi nna begwekana na ttu corona nna rigitta rebaaba leni biriana diana ki dhaana lo ka nu itilha lennaha.
REV 6:3 Tti utsú benne anka Neru toha sellu nu berupa taa ro'o yetsiha, nianna biyienti unne attu ka nu anka baniha, unne nu berupaha, rana: ―Utá, belanni.
REV 6:4 Nianna tti bela'ati biria ttu kwayu xiná tú. Nu dona kwe'e nuha nna begwekana na ttu espada xeni lhe begwegabakana na lo neda kini lana uinna kini abittu aka uyú luesi ka benne se'e yiesi lo yu‑ni lhe uinna ki utti luesike lhe.
REV 6:5 Tti utsú benne anke Neru toha sellu nu beyonna taa ro'o yetsiha, nianna biyienti unne ttu ka nu anka baniha, unne nu beyonnaha, rana: ―Utá, belanni. Nianna tti bela'ati ttu kwayu yadhi. Nu dona kwe'e nuha denna ttu xia libra.
REV 6:6 Lagwi ge ttapa ka nu anka baniha nna biyieni tsi'i ttu benne rabie nu do kwe'e kwayuha: ―Ttu kiluruba xuxtila o tsunna kiluruba xua cebada dhi ka benne ge ttu sá sina, ttaka seti‑na lhe vinu‑na lhe bittu ugalhalu ka nuná.
REV 6:7 Tti utsú benne anke Neru toha sellu nu betapa taa ro'o yetsiha, nianna biyienti tsi'i ttu ka nu anka baniha, unne nu betapaha, rana: ―Utá, belanni.
REV 6:8 Nianna tti bela'ati ttu kwayu kuchuchi. Nu dona kwe'e nuha tee láni Elhutti. Kwe'e Elhuttiha nna danalha tteba nu tee láni Belha'a Chulha. Ka nuní uxíkana lo neda kini uttikana ttu lisia ka benne se'e yiesi lo yu‑ni len espada lhe uinkana kini gattike ubina lhe anágaba uttikana ke len isagwe lhe len ka nimala ruin satsa reki yiesi lo yu‑ni lhe.
REV 6:9 Tti utsú benne anke Neru toha sellu nu gayu taa ro'o yetsiha, nianna tti bela'ati daa ttu bekú yebáha. Xani'a bekúha nna bela'ati du'uya ka benne bettikana ke de rekike ugixxi'a ka tisa ge Tata Do Yebáha lhe de labí bedhanke utixxi'ake ge Jesucristuha.
REV 6:10 Ka benneha rinneke idisa ráke: ―Tata Xisi to, lu ankalu benne le'a lhe benne ruinlu nu anka gwalí lhe. ¿Nukala uinlu elha uxtisi ge ka nu se'e yiesi lo yuha kini okixalu kana ge elhutti getu‑ni?
REV 6:11 Nianna begwe Tata Do Yebáha ttu ttu ka benneha xo sitsi geke ki ukuke, nianna tti ree ke: ―Kwedale attu satti to axtaliba ganna chi beda'a ka betsi to geleha gattike attiba bettikana le. Ka benneha ankagabake ka benne rixúke lo sina kia attigaba lebi'i.
REV 6:12 Tti utsú benne anke Neru toha sellu nu xxupa taa ro'o yetsiha, nianna tti bela'ati bixú idí. Tatubisa‑na nna yadhi teaba beyake ttiba ttu lari yadhi eruloo. Nanto beo‑na nna xiná reniba beyake.
REV 6:13 Ka beli sia yebáha nna ubinnikana lo yu ttiba riginni ka higu sia lo ttu yaga tti rukubi ttu be idí yagaha.
REV 6:14 Yebáha nna betesina attiba retesi ttu yieti, aníha‑ba betesina nna iyába ka i'iya lhe ka yu se'e lagwi indatooha beseabakana ata siakanaha.
REV 6:15 Ka nu rinnabia se'e yiesi lo yu‑ni nna bekatsiba lokani lhe'e ka belea lhe lhe'e ka íyya sia iki ka i'iya‑na, itupa lenkana ka nu ra xxeni lekani lhe anágaba ka nu loni ge ka soldaduha lhe iyágaba ka nu tee xxatta gekani, lhe anágaba ka nu ra tsitsi lekani lhe iyá ka nu to'okana lo sina ge ka xxanakani lhe anágaba ka nu abittu to'okana lo xxanakani lhe. Iyába ka nuní bekatsi lokani.
REV 6:16 Nianna rinnekana rulisakana ka i'iya‑na lhe ka íyya‑na lhe, rákana ka nuha: ―¡Gwaliginni ikitu! ¡Gwalukatsi ri'itu kini abittu ilen benne doe lo xxila ata rinnabieha ri'itu lhe kini lhaatu lo elha disa tsitsi ute benne anke Neru toha de risa'a xxattanie!
REV 6:17 Kumu chiba bisia sá ute benneha elha disa ge ka benne de risa'a xxattanie nna lanú nu dhaana uchíana lo elha disaha.
REV 7:1 Iki de nuha nna bela'ati ttapa ka anjeli se'eke itapa laduba ge yiesi lo yu‑ni. Se'eke ki udheake be daa itapa laduba geni kini abittu uxunni be yiesi lo yu‑ni lhe kini abittu uxunni be lo indatooha lhe. Anágaba lo ka yaga‑na, bittugaba uxunni be lokani.
REV 7:2 Nianna bela'agabati attu anjeli ugwapie daka ata riria tatubisa‑na denie sellu ge Tata Do Yebaa benne anka baniha nna uresi'anie idisa adí ka anjeliha, delába ka benne ttapaha, ka benne chi uxíke lo neda kini uinke leeni yiesi lo yu‑ni lhe uinke leeni lo indatooha lhe. Nianna rabie ka benneha:
REV 7:3 ―Bittu bi udhakaxxile indatoo‑na lhe yiesi lo yu‑na lhe ka yaga daa loin‑na lhe axtaliba ganna chi ulekiri'i sellu lo xea ka benne rixúke lo sina ge Tata Do Yebaa geri'iha.
REV 7:4 Nianna tti biyienti balhaxa ka benneha uren sellu lo xeake: ttu gayua chua bixxi ttapa mili (144,000) ka benneha uren sellu lo xeake. Iyába tsi'inu (12) kwe ka benne datiake benne tee lábie Israel, iyába ka benneha nuha uren sellu lo xeake,
REV 7:5 delába tsi'inu (12) mili ka benne datiake Judá, nna tsi'inu mili ka benne datiake Rubén, nna tsi'inu mili ka benne datiake Gad.
REV 7:6 Anágaba tsi'inu mili ka benne datiake Aser, nna tsi'inu mili ka benne datiake Neftalí, nna tsi'inu mili ka benne datiake Manasés,
REV 7:7 nna tsi'inu mili ka benne datiake Simeón. Anágaba tsi'inu mili ka benne datiake Leví, nna tsi'inu mili ka benne datiake Isacar,
REV 7:8 nna tsi'inu mili ka benne datiake Zabulón, nna tsi'inu mili ka benne datiake José. Anágaba tsi'inu mili ka benne datiake Benjamín.
REV 7:9 Iki de nuha nna tti bela'ati ixe juisiru ka benne. Ka benneha labí dhaari'i ibabinri'i ke. Ankake iyá loo lhe dáke lhe'e iyába ka yiesi se'e yiesi lo yu‑ni, lhe rinneke iyá looba tisa lhe. Ka benneha se'eke arlo xxila ata do Tata Do Yebáha rinnabie lhe arlo benne anke Neru toha lhe. Nukuke xo sitsi nna se'eke denke dina
REV 7:10 nna rinneke idisa ráke: ¡Tata Do Yebaa getu, benne dolu lo xxila ata rinnabialu‑na, lhe lu benne ankalu Neru to lhe, lebi'i nuná bodilále ri'itu lo elha disa gwatetuha!
REV 7:11 Iyába ka anjeli se'e abi'iba ata du xxila do benne rinnabiaha lhe abi'iba kwe'e ka benneolaha lhe abi'iba kwe'e ttapa ka nu anka baniha lhe, delába ka nu rula'a ttiba rule'e ka nimalaha, ka benneha bettudhi loke axtaba lo yu arlo xxila ata do Tata Do Yebáha rinnabie, nianna betsá loke bie.
REV 7:12 Nianna tti ráke: ¡Amén! Tata Do Yebaa getu, kwinalu nuná ralhalu inne tsetu gelu lhe ra xxeni lelu lhe kwinalu ankalu benne yuu lhe ankalu benne dika ugwetu lu ixkixaru lhe anágaba kwinalu nuná ralhalu udú xibitu arlolu lhe lu ankalu benne ra tsitsi lelu lhe ruin tsitsilu lhe. Ttu dia liiba ankalu aná xa Tata Do Yebaa getu. Amén.
REV 7:13 Ttu ka benneolaha nna unnaba tise neti, ree: ―Ka benne nukuke xo sitsi se'e nii, ¿nú benne ka benne‑ni lhe gá dáke lhe?
REV 7:14 Neti nna bekabia gebie, xpeye: ―Lu gwa yúbalu xa tata. Benneha nna bekabie kia ree: ―Ka benne‑ni nuní chi uláke lo elha disa tsitsiha nna chi utí xoke, botsitsike kana len reni ge benne anke Neru to‑ni.
REV 7:15 De nuha nna se'eke arlo xxila ata do Tata Do Yebaa‑ni rinnabie nna rela resába rixúnie ke lhe'e yotu gebie‑ni. Tata Do Yebaa‑ni, benne doe lo xxila ata rinnabie‑ni, benne‑ni doe lenke ruyúe ke.
REV 7:16 Labíru ituin ka benne‑ni, nigaba ebisike inda, lhe nigaba goru ubisa latike, lhe nigaba akarukanie ubisa lhe.
REV 7:17 Kumu benne anke Neru to du lagwi ata du xxila do benne rinnabia‑ni, labie nuní tsekie loke uyúe ke ttiba ka neru to‑na. Labie ichebie ke ata sia inda nu utena elha nabani geke ttu dia lii nna Tata Do Yebaa‑ni unie kini abitturu kwesike.
REV 8:1 Tti utsú benne anke Neru toha sellu nu gasi taa ro'o yetsiha, siiba beyaka yebáha ttiba ttu medi ura.
REV 8:2 Nianna tti bela'ati gasi ka anjeli se'eke arlo Tata Do Yebáha nna begwekana ke gasi ka trompeta.
REV 8:3 Iki de nuha nna bisia attu anjeli nna udúe ata daa bekú ge oruha. Bekúha daana arlo xxila ata do Tata Do Yebáha rinnabie. Anjeliha denie ttu besí ankana ge oru nna begwekane ixeniru yala ki ku'ubie lo bekúha. Aníha kini isela yalaha ka tisa rilhapi iyá ka benne chi ankake ge Tata Do Yebáha.
REV 8:4 Anjeliha denie besíha nna riria seni ge yalaha lhe'eni nna rapi seniha risinna arlo Tata Do Yebáha itupa len ka tisa rilhapi ka benne chi ankake gebie.
REV 8:5 Nianna tti bedaxxu anjeliha besíha nna ulu'e bexura gi sia lo bekúha lhe'eni nna bedelhe na yiesi lo yu‑ni. Nianna udulo tteba utsa yiesi lo yu‑ni lhe uyu'u be lhe ugwapi edha lhe bixú lhe.
REV 8:6 Gasi ka anjeliha, delába ka benne denke gasi ka trompetaha, ka benneha bese'e tse ttebake kini ukwesike ka nuha.
REV 8:7 Anjeli du sisi'a tteha bekwesie trompeta geeha, nianna biginni tteba gi yiesi lo yu‑ni lhe ure iyya lhe. Ka nuha chixxikana reni. Nianna tti bite yiesi lo yu‑ni, a lattiba a uka salhena bite, itupa ka yaga lhe ka ixxi lhe iyá ka nu ya'a daa loni lhe.
REV 8:8 Anjeli berupaha nna bekwesie trompeta geeha. Nianna lhe'e indatooha biginni ttiba ttu i'iya barto ritena ralha lhalhabana nna a lattiba a uka salhe indatooha beyaka reni
REV 8:9 lhe a lattiba a uka salhe ka nu reki lhe'e indatooha uttikana lhe a lattigaba a uka salhe ka barcu reki lo indatooha bise'e lookana.
REV 8:10 Anjeli beyonnaha nna bekwesie trompeta geeha. Nianna yebáha‑li biria ttu beli xeni biginnina yiesi lo yu‑ni ritena nna ralhana ttiba ralha iki ttu ya nalha gi. Ubinnina lo ka yoo lhe lo ka dina lhe, a lattiba a uka salhe ka nuha ubinni beliha lokani.
REV 8:11 Beliha tee láni Nu Anka Ilhá nna a lattiba a uka salhe ka indaha beyakakana ilhá. De beyaka ka indaha ilhá nna ixeba ka benne uttike de u'uyake nuha.
REV 8:12 Anjeli betapaha nna bekwesie trompeta geeha. Nianna tatubisa‑na lhe nanto beo‑na lhe ka beli‑na lhe, a lattiba a uka salheke uxí xueke. De nuha nna a lattiba a uka sa salha'a loke bechulha. Laxkala resáha a lattiba a uka salhena beyaka chulha lhe aníha‑gaba beyaka relaha lhe.
REV 8:13 Nianna tti bela'ati ttu bedhía diana ridúna gwetsáli nna biyienti idisaru rinnena, rana: ―¡Gwalíchiru le ka benne se'e yiesi lo yu‑na! ¡Karusi'iruke! ¿Bí sateke ganna chi uresi'a ka trompeta riyasa ukwesi a tsunna ka anjeliha?
REV 9:1 Anjeli gayuha bekwesie trompeta geeha. Nianna tti bela'ati ttu beli do yebáha ubinnina yiesi lo yu‑ni nna uxína yagwi ki idhalina ro'o belha'a chulhaha.
REV 9:2 Tti udhalina ro'o belha'a chulhaha, ro'o nuha biria seni ttiba seni riria iki ttu ornu barto. Tatubisa‑na nna tuttíruba bechulha loe lhe tuttíruba bechulha lo bea‑na de ure xxatta seni riria lhe'e belha'aha.
REV 9:3 Lhe'e seniha nna chixxi ttiba ka uxxaru. Ka nuha ugwadhikana yiesi lo yu‑ni nna uxíkana lo neda kini kisi'akana ttiba rigisi'a ka ro'o chupa‑na tti rugwekana ttu benne.
REV 9:4 Ka uxxaruha ukakana mandadu kini abittu bi udhakakana ka ixxi binni lhe ka yaga lhe iyá nu ya'a tee yiesi lo yu‑ni lhe, sinuki suna ka benne abittuba chi reni sellu ge Tata Do Yebáha lo xeake, suna ka benneha‑ba kisi'akana.
REV 9:5 Labí uxíkana lo neda kini tuttíru uttikana ka benneha, suna ugwebakana ke elha disa tsitsi delo gayu beo, nna elha disa uyúke ge ka nuha, akana attiba elha disa ruyú ttu benne ttixka rugwe ttu ro'o chupa bie.
REV 9:6 La'ania nna ka benne kisi'a ka uxxaruha ke, yalhá uinke egila leke ki gaxasina gattike, ttaka labí aka gattike, lhe yalhá aka leke gattike, ttaka labí isia elhutti geke.
REV 9:7 Ka uxxaruha rule'ekana ttiba rule'e ka kwayu chi se'e tsekana kini tsiakana utilha. Iki ka uxxaruha yu'u ttiba ka corona ge oru. Lokani nna anka ttiba lo ka benne.
REV 9:8 Itsa ikikani nna ankana ttunna ttiba itsa iki ka nuila‑na, nna ka layakani nna ankakana tutsa ttiba laya ka beesi‑na.
REV 9:9 Ro'o lastokani nna taa ttiba ttu iyya bata ankana tsitsi. Lhe'e xxilakani nna ru'u be ttiba ru'u be ge ka carreta na'aya ixe ka kwayu dia utilha.
REV 9:10 Sia xubankani lhe sia lhiatsakani ttiba sia lhiatsa ka ro'o chupa‑na. Lo xubankaniha do gwetía gekani nna len ka nuha ugwekana ka benne elha disa tsitsi delo gayu beo
REV 9:11 nna do ttu nu rinnabiana kana, delába nu anka xxana belha'a chulhaha. Len tisa hebreo tee láni Abadón nna len tisa griegu nna tee láni Apolión. Tisa‑ni dienna innána nu rutse'e loo.
REV 9:12 Chiba ute elha disa nu sisi'a tteha, ttaka si dala a chupa ka elha disa.
REV 9:13 Anjeli xxupaha bekwesie trompeta geeha. Nianna biyienti tsi'i ttu benne biriana itapaba ka isquina ge bekú ge oruha, delába bekú nu daa arlo Tata Do Yebáha.
REV 9:14 Tsi'i benne unneeha ree anjeli den trompetaha: ―Udhasi itapa ka anjeli xika ro'o yoo xeni nu tee láni Eufrates.
REV 9:15 Nianna tti bedhasi benneha itapaba ka anjeliha kini ka anjeliha nna uttike ka benne se'e yiesi lo yu‑ni, a lattiba a uka salhe ka benneha uttike. Kumu ka anjeliha chi se'e tseke kini uinke nuní ganna chi bisia ura lhe ganna chi bisia sá lhe ganna chi bisia beo lhe ida lhe.
REV 9:16 Chupa gayua millón ka soldaduha biyienti raka. Ka nuha siakana kwe'e ka kwayu.
REV 9:17 Bela'ati ka kwayu lhe bela'ati ka soldadu sia kwe'e ka nuha. Ka soldaduha taa ro'o lastokani ka iyya bata ankakana xiná tú ttiba belha ge gi lhe ankakana azul ttiba íyya nu tee láni jacinto lhe ankakana yatsi ttiba azufre. Iki ka kwayuha nna anka ttiba iki ka beesi nna ro'okani nna riria gi lhe seni lhe azufre lhe.
REV 9:18 Nu riria ro'o ka nuha, delába giha lhe seniha lhe azufreha lhe, ka nuha ankakana ka elha disa nu uyú ka benne se'e yiesi lo yu‑ni. A lattiba a uka salhe ka benneha betse'e loo ka nuha,
REV 9:19 kumu gwetía ge ka kwayuha dona daka ro'okani lhe anágaba dona daka lo xubankani lhe. Kumu ka xubankaniha ankakana ttiba ka belha‑na nna len ikikaniha rigisi'akana ka benne.
REV 9:20 Ka benne bexxaha, ka benne labí uttike len ka elha disa chi uteha, ka benneha labí bedhanke, sa ruinbake nu abittu anka tse lhe labí bedhanke, sa rudúba xibike arlo ka espíritu xxegwiha lhe arlo ka nu labí gwalíga ankakana diosi lhe, delába ka nu ankakana ge oru lhe ge plata lhe ge bronce lhe ge íyya lhe ge yaga lhe. Ka diosiha labí rilákinna, nigaba a riyienkinna, nigaba a ridákana.
REV 9:21 Ka benne bexxaha bittugaba bedhanke ruinke elhutti, nigaba a bedhanke ruinke elha gwesá, anágaba nigaba a bedhanke risáke nu subi subi, lhe nigaba a bedhanke rilanake lhe.
REV 10:1 Nianna bela'ati attu anjeli ra xxeni lebie ugwadie dabie yebáha. Abi'ibe rilhi bea nna daa ttu yetti lhaa ikie. Lobie nna raka galhaba ttiba raka lo tatubisa‑na nna ka ni'abie nna ankakana ttiba belha ge gi.
REV 10:2 Den nábie ttu yetsi chika'a to du yali loni. Benneha bedú ni'a benbie lo indatooha nna ni'a yattie nna bedúe na lo yu bisiha.
REV 10:3 Nianna tti uresi'abie idisa, betuxxue ttiba rutuxxu ttu beesi. Tti uresi'eha nna biyieni utsa gasi libe.
REV 10:4 Iki de chi beyaka utsa gasi libeha, neti nna chi bedo tsea kini unia lo yetsi nu ra nu uyu'u beha. Nianna biyienti tsi'i ttu benne yebáha, ree: ―Ulu'uba lelu nu biyieninlu‑na, bittu udolu na lo yetsi.
REV 10:5 Anjeli benne bela'ati du ttu lha'a ni'abie lo yuha lhe lo indatooha lhe, benneha ulhidha ná benbie yebáha
REV 10:6 nna bedettie lá benne do ttu dia liiha, delába benne benie yiesi lo yu‑ni lhe yebáha lhe indatooha lhe iyá tte nu se'e lokani lhe. Benne do ttu dia liiha nuha bedetti anjeliha, tti ree: ―Eru Tata Do Yebáha, labíru isá riyasa chi tte aka nu teeki aka.
REV 10:7 Ganna chi bisia sá iyieni tsi'i trompeta ukwesi anjeli benne gasiha, la'ania nna uin Tata Do Yebáha nu chi ga'ananie aka nu labí yu ka benne. Uinbe ttiba chi utixxi'anie ka benne bixúke lo sina geeha, delába ka profetaha.
REV 10:8 Nianna tti bedeyienti tsi'i benne unne yebáha attu libe, rabie neti: ―Ugía nna bedaxxu yetsi yali loni nu den anjeli du ni'e lo indatooha lhe lo yu bisiha lhe.
REV 10:9 Neti nna ugía ttebaa ata du anjeliha nna xpeye: ―Bete yetsi to‑na len neti. Benneha nna rabie: ―Bedaxxu na nna uto na. Lhe'e tu'elu‑na tsanninlu sachena ilhá, ttaka ro'olu nna eyo'ona ixixxi tú ttiba nu xixxi ge biasera.
REV 10:10 Nianna bedaxxua yetsi to yu'u lasi ná anjeliha nna tti utoa na, ixixxi túba beyo'ona ro'a ttiba nu xixxi ge biasera, ttaka iki de chi utoa nuha, ilhá túba gwachena lhe'e tu'ea.
REV 10:11 Nianna rabie neti: ―Teeki kixxi'alu attu libe nu chi ga'anna sate ixe ka benne, delába nu sate iyá loo ka benne se'e lhe'e iyába ka yiesi se'e yiesi lo yu‑ni lhe ka benne rinneke iyá looba tisa lhe ka nu rinnabia ge yiesi lo yu‑ni lhe.
REV 11:1 Iki de nuha nna betekana ttu iyyaxtila len neti. Iyyaxtilaha rixúna kini rurixxibiari'i lenna. Nianna tti ra Tata Do Yebáha neti: ―Ugía gwarixxibia yotu kiaha lhe berixxibia bekúha lhe. Belabagaba balhaxa ka benne yu'uke rudú xibike lhe'e yotuha lhe.
REV 11:2 Lali'a yotuha labí urixxibialu kumu chiba betea nuha len ka nu abittu ria lekani kia. Ka nuha tsekikana niha nna udhakabakana yiesi le'a kiaha attiba rakaba lekani delo chua bixxi chupa (42) beo.
REV 11:3 Neti nna idhelhagabaa chupa ka benne kini kixxi'ake ka tisa kiaha delo ttu mili chupa gayua bixxi gayuna (1,260) ubisa, delába chua bixxi chupa (42) beo. Ka benneha nna ukuke xo ttipa geke nu unna liina deki du si'i leke.
REV 11:4 Ka benne chupa kixxi'ake ka tisa ge Tata Do Yebáha, ka benneha nuha raxxína ke len chupa ka ya olivu lhe chupa ka candeleru ka nu sia arlo Tata Do Yebaa benne anke Xxana yiesi lo yu‑ni.
REV 11:5 Ganna nuxa bixa udhakana ka benne chupaha, ka benneha nna kwea tteba ro'oke belha ge gi kini belha ge giha uttena ka nu abittu raka uyúkana ke, kumu aní teeki gatti nuxa bixa udhakana ka benneha.
REV 11:6 Ka benne chupaha gwa teeba lo neda geke udheake yebáha kini abitturu iyya aka, laka rekike ugixxi'a nu raka le Tata Do Yebáha una ka benne lhe gwa tegaba lo neda geke ki eyoinke iyá ka indaha reni lhe gwa tegaba lo neda geke ki ugweke iyába nu se'e yiesi lo yu‑ni bixaba elha disa lhe balhaxaba lidú aka leke lhe.
REV 11:7 Ganna chi uluxakanie utixxi'ake ka tisaha, la'ania nna nimala bartoha nu iria lhe'e belha'a chulhaha, itilha lenna ke nna dhaaba nuha loke, nianna tti uttina ke.
REV 11:8 Tsunna ubisa nalha dhu'uya ka benne yattiha lagwi ge yiesi ra xxeni leniha, yiesi ata betákana Jesús benne anke Xxanakeha lo ya kurusiha. Yiesiha raxxína na len Sodoma o Egipto
REV 11:9 nna ka benne anka iyá looba se'e lhe'e iyába ka yiesi se'e yiesi lo yu‑ni lhe ka benne rinneke iyá looba tisa lhe, ka benneha ilákanie ka benne yattiha dhu'uyake niha, nna labí dhielhake igatsi ka benneha.
REV 11:10 Ka nu se'e yiesi lo yu‑ni nna edeakalakinna de chi utti ka benne chupaha. De elha gwedeaka lasi nna kwentaba ugwe luesikani bixaba nu tse, kumu de chi utti ka benne betsetsi xxattakanie lekaniha.
REV 11:11 Ttaka iki de chi gwa dona tsunna ubisa nalhaha, Tata Do Yebáha nna belhidha benbe ka benne chupaha nna beyaka benbake attu libe. Iyába ka nu use'ekana begíakana ka benneha usi xxattakinna.
REV 11:12 Nianna tti biyienkin benne chupaha tsi'i ttu benne unne idisa yebáha, ree: ―Gwaltsapi nii. Ka benneha nna beyapi ttebake deyyake yebáha lhe'e ttu bea. Ka nu ritisikinna keha nna se'ebakana gwelanni.
REV 11:13 Looraha nna bixú idí nna bise'e looba ttu latti yiesiha, delába delo ttu ttu gayua (100) ka yo'oha, tsii tsiikana bise'e lo. Gasi mili ka benne uttike loora rixúha, ka benne bexxaha nna usi xxattakanie de elha rasiha nna ráke: ―¡Xxeniba ra lelu, xa Tata Diosi benne dolu yebáha!
REV 11:14 Elha disa nu berupaha chiba ute nuha. Nnanna nna chi tteba dabiga elha disa nu beyonnaha.
REV 11:15 Anjeli gasiha nna bekwesie trompeta geeha. Nianna tti biyieni tsi'i ka benne yebáha rinneke idisa, ráke: Yiesi lo yuha chiba aka nuha yiesi innabia Tata Do Yebaa benne anke Xxanari'iha lhe ankana yiesi innabia Cristu benne chi ga'anani Tata Do Yebáha kini odilábie ka benne. Lee innabie ttu dia lii.
REV 11:16 Ttaperua (24) ka benneola se'e arlo Tata Do Yebáha, ka benne siake lo ka xxila ata rinnabiakeha, ka benneha bettudhi loke lo yu nna betsá loke bie
REV 11:17 nna ráke: Ixkixaru rugwetu lu xa Tata Do Yebáha getu, benne ankalu Xxanatu lhe lu ra tsitsi xxatta lelu lhe. Lu dolu nnanna lhe dolu ttuha lii lhe. Rugwetu lu ixkixaru kumu nnanna chi rule'elu nu ra xxeni lelu‑na nna chi udulolu rinnabialu.
REV 11:18 Ka nu abí ria lekani luha bisa'abakinna lenlu, ttaka nnanna chi bisia sá ule'elu elha rise'iki gelu‑na lenkana, chiba bisia sá uinlu elhuxtisi ge ka nu yattiha nna ka profeta bixuinlu ki utixxi'ake ka tisa gelu‑na lhe ka benne chi riesinlu ki akake gelu lhe iyába ka nu tee elha rasi gekani lenlu ugwebalu kana nu tse ralhakana dhíkana, meskiba ankakana nuxka'a lhe meskiba ankakana nu ra xxeni lekani lhe. Anágaba utse'e lolu ka nu rutse'e lookana ka benne se'e yiesi lo yuha.
REV 11:19 Nianna tti biyali yotu ge Tata Do Yebáha, delába nu do yebáha. Lhe'e yotuha bilá xua i'ina ata yu'u ka tisa bodha'an tsitsie len ka nu Israel‑ni. Nianna ugwapigaba edha lhe uyu'u be lhe bixú lhe ure xxatta iyya lhe.
REV 12:1 Nianna tti bela'ati uka xxe ttu seña xxeni yebáha. Lhe'e nu bela'atiha biria ttu nuila, abi'iba kwe'eni rilhi tatubisa‑na, xani'ani nna do nanto beo‑na, ikini nna yu'u ttu corona sia tsi'inu (12) ka beli iki coronaha.
REV 12:2 Nuilaha nuja xi'inni nna ribesi'abana de rutía lhe'eni, ruyúna elha disa tsitsi de chi gali xi'inni.
REV 12:3 Uka xxegaba attu seña xxeni yebáha. Niha biria ttu nimala xxegwi, ttu nu barto. Ankana xiná. Sia gasi ikini nna tsii ka sitta ikini. Kua ttu ttu ka ikiniha, tudhi ttu ttu ka corona.
REV 12:4 Len xubanniha bekudhina ka beli sia yebáha, a lattiba a uka salhe ka nuha bekinnina lo yu. Nimala xxegwiha nna bisiana udúna arlo nuila chi gali xi'inniha. Chi du tsitsina kini sun tteba ganna chi uli bintoha nna gabi ttebana bi.
REV 12:5 Nuilaha uliba xi'inni nna nubiyú to anka nutoha. Nubiyú toha tsitsiba innabiabi ka benne se'e lhe'e iyába ka yiesi se'e yiesi lo yu‑ni, ttaka sun tteba ulibi nna beyalhi tteba Tata Do Yebáha bi kini besinbi arlo xxila ata doe rinnabieha.
REV 12:6 Nuilaha nna bexunni ttebana diana lo yu bisi ata chi ga'anani Tata Do Yebáha isinna. Ata isinnaha, niha uyúke na lhe ugoke na delo tsunna ida nalha, delába ttu mili chupa gayua bixxi gayuna (1,260) ubisa.
REV 12:7 Nianna tti udulo ttu elha utilha xxeni yebáha. Miguel benne anke anjeli ge Tata Do Yebáha, benneha lenie ka anjeli geeha bitilhake len nimala xxegwiha itupa lenna ka anjeli geniha.
REV 12:8 Ttaka labí udaakana loke nna bennittibakana. Debá la'ania nna labíru uka tse'ekana yebáha.
REV 12:9 Biru'unaba nimala xxegwiha lo yu‑ni. Lana nuha ukana belha ugweki ttuha, nu tee láni Satanás lhe nu tegaba láni nu xxegwi lhe; delába nu reki ridí yiena iyá ka benne se'e yiesi lo yu‑ni. Lana lhe ka anjeli geniha biriakana yebáha nna biru'unakana yiesi lo yu‑ni.
REV 12:10 Nianna tti biyienti tsi'i ttu benne unnebie idisa yebáha, ree: Nnanna chiba bisia sá odilá Tata Do Yebaa geri'iha ka benne lhe chigaba bisia sá inná xxeni lebie lhe innabie lhe. Anágaba Cristu benne chi ga'ananie idhelheha chigaba bisia sá gapa benneha lo neda kini nu innábe aka kumu nimala xxegwi nu rukinnina ka betsi to geri'iha, rela resába rukinnina ke arlo Tata Do Yebaa geri'iha, nuha chiba biru'unana yiesi lo yuha.
REV 12:11 Ka betsi to geri'iha chiba udaake loni kumu de bixúkanie reni belali benne anke Neru toha lhe de utixxi'ake ka tisa geeha lhe. Labí gwatua leke latike, beria iki beria leke utixxi'ake gebie, meskila uttike.
REV 12:12 Laxkala lebi'i ata se'ele yebaa‑ni, gwalodú itta lele. Ttaka lebi'i ata se'ele yiesi lo yuha lhe ata se'ele lhe'e indatooha lhe, gwalíchiru lele, kumu nu xxegwiha yúbana labíru isá tsekina, de nuha nna yalhá rise'enna ugwadina bisiana ata se'ele‑na.
REV 12:13 Tti chi ute den nimala xxegwiha deki chi ubinnina yiesi lo yu‑ni, nianna gwanalha ttebana nuila bija nubiyú toha.
REV 12:14 Ttaka nuilaha begwe ttebakana na chupa ka xxilani ttiba ka xxila bedhía xeni. Aníha ki uka geni udúna lo be kini bexunnina lo nimala xxegwiha nna diana lo yu bisi ata chi ga'anna dhona. Niha uyúke na lhe ugoke na delo tsunna ida nalha.
REV 12:15 Nimalaha nna ulea ro'oni idila inda, ttu yoo xeni uka inda ulea ro'oniha kini indaha nna ga'ayana nuilaha.
REV 12:16 Ttaka yiesi lo yu‑ni bodilábana nuilaha, kumu u'uyaba yuha inda biria ro'o nimala xxegwiha.
REV 12:17 Iki de nuha nna bisa'a xxattin nimala xxegwiha len nuilaha. Nianna tti ugíana bitilha lenna adí ka benne datiake nuilaha, delába ka benne gwa rudoke tisa ge nu ra Tata Do Yebáha lhe gwa rudaxxu tsitsike tisa nu unne Jesús‑ni lhe.
REV 13:1 Nianna tti bodola'ati ttu nimala barto biriana lhe'e indatooha, sia gasi ikini lhe tsii ka sitta ikini lhe. Lo ttu ttu ka sitta ikiniha tudhi ttu ttu ka corona nna ka lo xeaniha nna dia ka tisa rinne satsakana ge Tata Do Yebáha.
REV 13:2 Nimala barto bela'atiha ankana ttiba ttu beesi bintu nna ka ni'a náni nna ankakana ttiba ka ni'a ná osu. Ro'oni nna ankana ttiba ro'o beesi. Nimala xxegwi nu biria yebáha begwena nimala biria lhe'e indatooha nu ra tsitsi leniha lhe begwena nuha xxila ata ridona rinnabianaha. Anágaba begwe xxattana nuha lo neda kini iyába nu inná nuha aka.
REV 13:3 Ttu ka iki nimala biria lhe'e indatooha rule'e uka ttu gwe xeni. Laxkala ruxunnibana geni gattina. Ttaka gwa beyakaba gwe geniha nna iyába ka benne se'e yiesi lo yu‑ni bebanabakanie ge nu ukaha. De nuha nna gwanalhake na.
REV 13:4 Nianna tti bedú xibike arlo nimala xxegwi biria yebáha, kumu de begwena nimala biria lhe'e indatooha lo neda kini nu innaba nuha aka; bedúgaba xibike arlo nimala biria lhe'e indatooha nna ráke: ―Ni ttu benne do ra xxeni lebie tti ra xxeni le nimala biria lhe'e indatoo‑ni lhe nigaba lanú ttu benne do eyaxanie ttilha lenie benne‑ni lhe.
REV 13:5 Begwelhaba Tata Do Yebáha nimala biria lhe'e indatooha kini benna ttaba lhe unne satsana gebie lhe, anágaba uxígabana lo neda ki uinna bixaba raka leni delo chua bixxi chupa (42) beo.
REV 13:6 Aníha‑ba benna, unne satsana ge Tata Do Yebáha, utuana bala'ana gee lhe ge ata doeha lhe. Ge iyába ka nu se'e yebáha, utuagabana bala'ana.
REV 13:7 Anágaba nna uxígabana lo neda kini itilha lenna ka benne chi ankake ge Tata Do Yebáha nna gwa udaabana loke lhe anágaba uxígabana lo neda kini innabiana iyá loo ka benne se'e lhe'e iyába ka yiesi se'e yiesi lo yu‑ni lhe ka benne rinneke iyá looba tisa lhe.
REV 13:8 Iyába ka benneha udú xibike arlo nimala biria lhe'e indatooha, delába ka benne attili ure yiesi lo yu‑niha labí dia láke lo libru ata dia lá ka benne aka benke ttu dia lii arlo Tata Do Yebáha. Libruha ankana ge benne anke Neru to bettikanaha.
REV 13:9 Nu gwa sia nagani udo nagani ganna gwankana nu dika iyienini.
REV 13:10 Nu ga'anna tsiana lisiyya, lisiyyaba tsia nuha nna nu ga'anna uttikana na, gattiba nuha. Laxkala ka benne chi ankake ge Tata Do Yebáha teeki tse'e tsitsike lhe abittu udhanke a tsia leke gebie lhe.
REV 13:11 Iki de nuha nna tti bela'ati attu nimala barto biriana lhi'u yuha. Sia chupa sitta ikini ttiba sitta iki ttu neru to, ttaka rinnena ttiba rinne ttu nimala xxegwi.
REV 13:12 Nimala barto biria lhe'e indatooha begwena nimala biria lhi'u yuha lo neda kini nuha nna uinna ki yiesi lo yu‑ni lhe iyába ka benne se'e loni udú xibike arlo nimala biria lhe'e indatooha, delába nimala nu beyaka gwe xxeni geniha.
REV 13:13 Ruingaba nimala biria lhi'u yuha ka milagru xxeni arlo ka benne, axtaba ruinna kini iginni gi yiesi lo yu‑ni.
REV 13:14 Len ka milagru ruin nimala biria lhi'u yuha; delába ka milagru ka nu rugwelha nimala biria lhe'e indatooha kini ruinna, len ka nuha ridí yiena ka benne se'e yiesi lo yu‑ni ki ria leke geni. Bengabana mandadu udoke ttu mentu ge nimala biria lhe'e indatooha, delába nimala nu chi ukana gwe len espadaha nna gwa beyaka benbana.
REV 13:15 Uxígabana lo neda ki uinna kini aka ben mentu ge nimala biria lhe'e indatooha lhe uinna ki inne nuha lhe. Anágaba nna bengabana kini ka benne abí udú xibike arlo mentuha, ka benneha gattibake.
REV 13:16 Bengabana mandadu ki ku'ukana seña daka ná ben iyába ka benne se'e yiesi lo yu‑ni o si lo xeake lhe, sila ka benne abittu ra xxeni leke lhe sila ka benne ra xxeni leke lhe, anágaba sila ka benne tee geke lhe sila ka benne dii lhe, sila ka benne reki lhaake lhe sila ka benne to'oke lo sina ge xxanakeha lhe.
REV 13:17 Aníha benna kini ni ttu benne labí aka gebie go'e, nigaba utto'e. Sunruba benne yu'u seña ata dia lá nimala biria lhe'e indatooha o si númeru ge lániha, benneha‑ruba gwaka gebie go'e lhe utto'obie lhe.
REV 13:18 Nii riyasa elha yuu. Nu tee elha rieni geni teeki ebea liina númeru ge nimala biria lhe'e indatooha, kumu númeru ge nimalaha raxxína na len númeru ge ttu benne. Nuní anka númeru geni, delába xxupa gayua gayuna bixxi xxupa (666).
REV 14:1 Nianna tti bela'ati benne anke Neru toha due iki i'iya nu tee láni Sión. Du lenie ttu gayua chua bixxi ttapa mili ka benne, delába ka benne dia lábie lo xeake lhe dia lá Tata geeha lhe.
REV 14:2 Nianna tti biyienti tsi'i ttu benne unnebie yebáha, riyien tsi'e ttiba riyieni tti riginni idila inda lo ttu benunni lhe ttiba riyieni ata ru'u be tti ratsa idisa. Tsi'i biyientiha ankana ttiba riyien tsi'i ka arpa tti rudhesi ka benne loni.
REV 14:3 Ka benneha rulhake ttu le'a kubi arlo xxila ata do benne rinnabieha lhe arlo ttapa ka nu anka baniha, delába ka nu rula'a ttiba rule'e ka nimalaha lhe arlo ka benneolaha lhe. Le'a rulhakeha, ni ttú benne labí aka gebie udhetie ulhe nuha, sunruba ka benne ttu gayua chua bixxi ttapa miliha (144,000), sunruba ka benneha gwaka geke ulhake le'aha, delába ka benne chi bodilaa Tata Do Yebáha lagwi ge ka benne se'e yiesi lo yu‑ni.
REV 14:4 Ka benneha nuha lanú nuila use'e lenke. De nuha nna ankake nari xú. Lake nuha danalhake benne anke Neru toha gaxaba die. Ka benne‑ni nuha chi uláke lagwi ge ka benne se'e yiesi lo yu‑ni. Lake ankake attiba ttu úna sisi'a tte uxí Tata Do Yebáha lhe uxí benne anke Neru toha lhe.
REV 14:5 Labí gwen lasi unneke lhe labí tulha dáke arlo Tata Do Yebáha lhe.
REV 14:6 Nianna tti bela'ati attu anjeli diabie ridúe gwetsáli, chebie ka tisa tse, delába ka tisa ka nu ttu dia liiba ixú nu ráke. Chebie ka tisaha kini kixxi'anie iyá looba ka benne se'e lhe'e iyába ka yiesi se'e yiesi lo yu‑ni lhe ka benne rinneke iyá looba tisa lhe.
REV 14:7 Anjeliha rinnebie idisa, ree: ―Gwaltsia lele Tata Do Yebáha lhe gwaluni kini inná xxeni lebie kumu nnanna chiba bisia sá unie elhuxtisi. Gwaludú xibile arloe. Benneha benie yebáha lhe yiesi lo yu‑ni lhe, bengabe indatooha lhe ka dina ata sia ka inda‑na lhe.
REV 14:8 Nianna danalha anjeli berupaha nna ree: ―Chiba use'e loo Babilonia nu ra xxeni leniha, kumu lana nuha beketina nu satsa ruinnaha ka benne se'e lhe'e iyába ka yiesi se'e yiesi lo yu‑ni, delába bele'enna ke bedhá ikike Tata Do Yebáha nna bedú xibike arlo ka diosi, ka nu subi subi.
REV 14:9 Nianna danalha anjeli beyonnaha nna unnebie idisa, ree: ―Ganna nuxa udú xibini arlo nimala biria lhe'e indatooha lhe arlo mentu geniha lhe, anágaba nna ganna dhielhana tsu'u seña ge nuha lo xeani o si náni,
REV 14:10 nuha dhígabana elha disa tsitsi ugwe Tata Do Yebáha na kumu de risa'a xxattanie, delába sate xxattana xxuana lo giha lhe xxuana lo azufreha itena arlo ka anjeli banani Tata Do Yebáha lhe arlo benne anke Neru toha lhe.
REV 14:11 Ka nu udú xibikani arlo nimalaha lhe arlo mentu geniha lhe iyába ka nu tsu'u seña ge lániha latikani, ka nuha ttu dia liiba tsapi seni gekani de ritekana. Labí edí lekani, rela resába uyúkana elha disa tsitsi.
REV 14:12 Laxkala ka benne chi ankake ge Tata Do Yebáha; delába ka benne rudoke tisa ge nu rabie ke uinke lhe abittu rudhanke ria leke Jesús‑ni lhe, ka benneha teeki tse'e tsitsike lo neda geeha.
REV 14:13 Nianna tti biyienti tsi'i ttu benne unnebie yebáha, ree: ―Ben lo yetsi‑na: “Debá nnanna lhe nu si daa lhe, karubáru ka benne se'e lenke Jesucristuha ganna chi uttikeha.” Espíritu ge Tata Do Yebáha nna bekabie ree: ―Gwalí galá karubáruke, kini eyaka leke ge sina chi benke kumu nu tse benkeha nuha runna liina gasina uka elha ruin geke.
REV 14:14 Nianna tti bela'ati ttu bea sitsi túba ankana. Iki beaha nna do ttu benne rule'ebie ttiba rule'e benne daa yebáha, yu'u ttu corona ge oru ikie lhe denie ttu iyyarsela ria tutsa ro'oni.
REV 14:15 Lhe'e yotu do yebáha nna biria ttu anjeli unnebie idisa ree benne do iki beaha: ―Bedaxxu iyyarsela gelu‑na nna uta'a gwetsela kumu chiba bisia ura eyatsa xuaha, kumu lena tee yiesi lo yuha chiba anka ge benneha exúe.
REV 14:16 Benne dobie iki beaha nna bega'abie iyyarsela geeha yiesi lo yuha nna bedíbie lena tee loni.
REV 14:17 Nianna tti bederia attu anjeli lhe'e yotu do yebáha, dengabe ttu iyyarsela ria tutsa ro'oni
REV 14:18 nna biriagaba attu anjeli lo bekúha, delába benne bananie gi re lo bekuha. Benneha unnebie idisa ree benne den iyyarsela ro'o tutsaha: ―Bedaxxu iyyarsela tutsa gelu‑na nna uchú nu xixxi ge ka ya uva daa yiesi lo yuha kumu ka uvaha chiba raa ka nuha.
REV 14:19 Nianna bega'a anjeliha iyyarsela geeha yiesi lo yu‑ni nna uchúbie nu xixxi ge ka ya uva daa loniha. Nianna tti bedelhe ka nuha lhe'e ttu xieru xeni ata idí ka uvaha. Nu benieha raxxína na len elha disa tsitsi ugwe Tata Do Yebáha ka benne ben satsa.
REV 14:20 Ka uvaha bidíkana ro'o yiesiha nna lhe'e xieru ata bidíkanaha nna biria reni axtaba ttu yoo xeni ukana. Debá ata ru'u frenu ro'o ka kwayu‑na risia reni ge yooha nna de biria idila reniha nna axtaba tsunna gayua (300) kilómetru bexunnina.
REV 15:1 Nianna tti bela'ati attu seña xxeni yebáha, ttu seña nu rebanabinri'i tti rilenri'i na. Lhe'e señaha bela'ati biria gasi ka anjeli denke gasi loo ka elha disa. Ka nuní ankakana elha disa ka nu chi daluxa ugwe Tata Do Yebáha ka benne, kumu len ka nuní chi ulhuxa loe elha rise'iki geeha.
REV 15:2 Anágaba nna bela'ati ttiba ttu indatoo, iyya gwanaba raka loni chixxina gi nna bela'agabati ka benne udaake bese'eke lo nimala biria lhe'e indatooha lhe lo mentu geniha lhe. Ka benneha nuha abittu uxielhake tsia númeru ge lániha latike. Ka benneha se'eke ro'o indatooha denke ka arpa begwe Tata Do Yebáha ke
REV 15:3 nna rulhake le'a bilha Moisés benne bixúe lo sina ge Tata Do Yebáha lhe rulhake le'a bilha benne anke Neru toha lhe, rulhake ráke: ¡Xxeniba anka ka nu ruinlu, lhe rebanabintu tti rilentu kana xa Tata Do Yebaa benne ankalu Xxanatu! ¡Lu ankalu benne ra tsitsi xxatta lelu! Nu dika ixúba ruinlu lhe ruinbalu nu ankaba gwalí lhe. Lu ankalu benne rinnabialu ka yiesi se'e yiesi lo yu‑ni.
REV 15:4 Iyá xeaba ka benne gatta elha rasi geke len lu xa Tata lhe iyábake innáke: “Xxeniba ra lelu.” Kumu sunruba lu ankalu benne nari xú, labí tulha ruinlu. Ka benne se'e lhe'e iyába ka yiesi se'e yiesi lo yu‑ni, itake nna udú xibike arlolu, kumu chiba bilákanie ruinbalu attiba ankaba geni.
REV 15:5 Iki de nuha nna bela'ati biyali yotu do yebáha, delába ata xua i'ina yu'u ka tisa bodha'an Tata Do Yebáha len ka benne Israel‑ni.
REV 15:6 Lhe'e yotuha biria gasi ka anjeli denke gasi loo ka elha disa, delába ka elha disa uyú ka benne. Ka anjeliha nna nukuke ka lari sibi ankakana nari xú lhe raka lhalhaba lokani lhe. Ro'o lastoke nna di ka yieti ankakana taga'a ge oru.
REV 15:7 Ttu ka nu ttapa anka baniha, delába ka nu rula'a ttiba rule'e ka nimalaha, ttu ka nuha begwena ka anjeliha ttu ttu ka copa ge oru saa tíbakana elha rise'iki ge Tata Do Yebaa benne anka banie ttu dia liiha.
REV 15:8 Lhe'e yotuha bisá tí seni ge nu xxeni ra le Tata Do Yebáha lhe nu tsitsi ra leeha lhe. Laxkala lanú aka geni ga'ana lhe'e yotuha axtaliba ganna chi gwate ka benne iyába gasi loo ka elha disa ka nu ugwe gasi ka anjeliha ke.
REV 16:1 Nianna tti biyienti tsi'i ttu benne unnebie idisa lhe'e yotuha, ree gasi ka anjeliha: ―Gwaltsia nna gwasalali elha rise'iki ge Tata Do Yebáha, ka nu ta'a lhe'e gasi ka copa denle‑na, yiesi lo yuha.
REV 16:2 Anjeli du sisi'a tteha nna birie belalie elha rise'iki ta'a lhe'e copa denieha yiesi lo yuha. Nianna tti biria tteba yiesu satsa lati ka benne. Ka yiesuha raka xxattakana. Ka nuha biriakana lati ka benne yu'u seña ge nimala biria lhe'e indatooha lhe lati ka benne rudú xibike arlo mentu geniha lhe.
REV 16:3 Anjeli berupaha nna belalie elha rise'iki ta'a lhe'e copa denieha lo indatooha. Indatooha nna beyakana ttiba reni ge ttu benne tti ruttikane nna iyába ka nu bani reki lhe'e indatooha uttikana.
REV 16:4 Anjeli beyonnaha nna belalie elha rise'iki ta'a lhe'e copa denieha lo ka yoo‑na lhe ata sia ka dina‑na lhe. Ka indaha nna beyakakana reni.
REV 16:5 Nianna tti biyienti unne anjeli bananie ka indaha, ree Tata Do Yebáha: ―Kwinalu tti ridhelhalu elha disa‑ni, ruinbalu attiba ankaba geni xa Tata. Lu ankalu nari xú labí tulha ruinlu. Lu ankalu benne dolu nnanna lhe benne dolu ttuha‑li lhe.
REV 16:6 Kumu ka nu ruin satsaha belalikana reni, delába bettikana ka benne chi ankake gelu lhe bettikana ka profeta geluha lhe. De nuha nna nnanna lu rugi'alu kana reni ge nu benkanaha, kumu nunába ralhakana.
REV 16:7 Nianna biyiengabati tsi'i ttu benne unnebie lo bekúha, ree: ―Gwalí galá xa Tata Do Yebaa getu, benne ankalu Xxanatu lhe ra tsitsi xxatta lelu lhe, elha disa nu rugwelu ka benne, ankaba nuná nu gwalíba ralhake dhike lhe tti rugwelu ke elha disa‑na, ruinbalu attiba ankaba geni.
REV 16:8 Anjeli betapaha nna belalie elha rise'iki ta'a lhe'e copa denieha lo tatubisa‑na nna Tata Do Yebáha begwelhe kini tatubisa‑na bettebie ka benne.
REV 16:9 Ka benneha biteke len gi lha ge tatubisa‑na, nianna tti uduloke rigeke iki Tata Do Yebaa benne udhelhe ka elha disaha. Ttaka lake nna labí bodúna ke lhe nigaba a unáke deki xxeniba ra le Tata Do Yebáha.
REV 16:10 Anjeli gayuha nna belalie elha rise'iki ta'a lhe'e copa denieha lo xxila ata rido nimala rinnabiaha, delába nimala biria lhe'e indatooha. Nianna bechulha tteba ata rinnabianaha. Ka benne se'e yiesi lo yu‑ni nna ro ya'aniba lhusake de ruyú xxattake elha disa.
REV 16:11 Nianna tti uteke iki Tata Diosi benne do yebáha, de rilá latike lhe de rakake yiesuha lhe. Ttaka lake nna labí bodúna ke ge nu ruinkeha.
REV 16:12 Anjeli xxupaha nna belalie elha rise'iki ta'a lhe'e copa denieha lo yoo xeni nu tee láni yoo Eufrates. Inda tee lhe'e yooha bebisi'ana kini ka nu rinnabia se'e daka ata riria ubisa‑na iyali neda gekani kini ttekana.
REV 16:13 Nianna tti bela'ati tsunna ka espíritu satsa, bela'ati kana attiba rule'e ka bexxa'agwa‑na, beriakana ro'o nimala xxegwiha lhe ro'o nimala biria lhe'e indatooha, lhe ro'o attu nimala biria lhi'u yuha nu labí liina deki ankana profeta ge Tata Do Yebáha.
REV 16:14 Kumu lakana ankakana ka espíritu xxegwi ruinkana ka milagru lhe riakana ata se'e ka nu rinnabia ge iyába ka yiesi se'e itúba yiesi lo yu‑ni kini ottupakana ka nuha kini itilhakana ganna chi bisia sá tti uin Tata Do Yebaa benne ra tsitsi xxatta leha elhuxtisi ge ka benne.
REV 16:15 Cristuha ree: “Gwaluyú gele, kumu neti esiaya attiba ttu ubana iyyaba lasi risiana. Karubáru ka benne se'eke ubeda neti ki abittu iyaxxu ya'ake. Se'eke ttiba ttu nu se'e tenná gwa nukuba xoke, kini abittu tuntuke nna ettukanie.”
REV 16:16 Ka espíritu satsaha nna bottupa ttebakana ka nu rinnabiaha, bottupakana ka nuha daka lo yu tee láni Armagedón. Armagedón ankana tisa hebreo.
REV 16:17 Anjeli gasiha nna belalie elha rise'iki ta'a lhe'e copa denieha, bedelhe nuha lo be. Nianna tti biyieni tsi'i ttu benne unnebie idisa lhe'e yotu do yebáha ata do Benne rinnabiaha, ree: “Chiba uluxa cha.”
REV 16:18 Nianna ugwapi tteba edha lhe utsa lhe uyu'u be lhe bixú xxatta idí lhe. Itúba se'e ka benne yiesi lo yu‑ni labí chi bixú tti bixú aníha.
REV 16:19 Babilonia yiesi nu ra xxeni leniha tsunna lha'ala uka nuha de bila'a lhe'eni lhe adí ka yiesi se'e yiesi lo yu‑ni nna ure tinnibakana. Tata Do Yebáha labí bixulhanie Babilonia yiesi ra xxeni leniha, sinuki begwebe na elha disa tsitsi de risa'a xxattanie.
REV 16:20 Nianna tti benitti loo ka yu se'e lagwi indatooha lhe benitti loogaba ka i'iya‑na lhe.
REV 16:21 Anágaba ure xxattagaba iyya biginnina iki ka benne. Ka iyya ureha ttu ttukana ankakana idi'i attiba chua (40) kilu. Ka benne biginni nuha ikike nna uteke iki Tata Do Yebáha de ure xxatta iyyaha, kumu ttu elha disa xxeni nuha biyúke.
REV 17:1 Ttu ka anjeliha, delába ttu ka benne gasi denke ka copaha, bisiabie ata duaha nna rabie neti: ―Utá, kini ule'enia lu elha disa dhi nuila rutto'o latiniha, delába nu anka yiesi ra xxeni leniha, nu re ata tee idila indaha.
REV 17:2 Lana nuha bisá ka nu rinnabia se'e yiesi lo yu‑ni nna ka benne se'e yiesi lo yu‑ni nna biyietike luesi nu satsa ruinnaha, delába bedhá ikike Tata Do Yebáha nna bedú xibike arlo ka diosi, ka nu subi subi.
REV 17:3 Nianna tti bisia Espíritu ge Tata Do Yebáha latia nna bela'ati deche anjeliha neti daka lo yu bisiha. Niha biláti ttu nuila dona kwe'e ttu nimala xiná, sia gasi ikini nna sia tsii ka sitta ikini nna itúba latini dia ka tisa, ka tisa ka nu riguakana bala'ana ge Tata Do Yebáha.
REV 17:4 Nuilaha nukuna ttu xo xiná chulha lhe ttu xo xiná tú lhe. Lati nuilaha raka galhaba ka oru lhe ka íyya ragalha to lhe ka perla lhe. Ka nuní daka xxattakana. Anágaba denna ttu copa ge oru saa tíba lhe'e nuha nu satsa nu abittu raka uyú ka benne lhe saa tíba nuha nu satsa ruinna de risána nu subi subi.
REV 17:5 Lo xeani nna dia ttu láni, ttu lá nu labí yu ka benne bixa dienna innána. Aní ra nu dia lo xeaniha: “Babilonia nuila ra xxeni leni, lana nuní ankana ixná ka nuila rutto'o latikani lhe len lana nuní udulo iyá nu satsa raka yiesi lo yu‑ni.”
REV 17:6 Bela'ati nuilaha dusinna de u'uyana reni ge ka benne chi ankake ge Tata Do Yebáha lhe ge ka benne bettikana de utixxi'ake ka tisa ge Jesús‑ni lhe. Tti bela'ati nu rakaha, yalhá bebanati.
REV 17:7 Nianna tti ra anjeliha neti: ―¿Beaka bebana xxattinlu? Neti kixxi'ania lu bixa diani nu labí yu ka benne ge nuila‑na lhe ge nimala do nuila‑na kwe'en‑na lhe, delába nimala nu sia gasi ikin‑na lhe sia tsii ka sitta ikin‑na lhe.
REV 17:8 Nimala bele'enlu‑na, lana nuná udona ttuha, ttaka nnanna lanúruna do; chi tte duna eriana lhe'e belha'a chulhaha kini tsiana ata tse'e loona. Ka benne se'e yiesi lo yu‑ni, delába ka benne attili ure yiesi lo yu‑niha labí dia láke lo libru ata dia lá ka benne aka benke ttu dia lii arlo Tata Do Yebáha, ka benneha ebanabakanie tti ilákanie nimalaha ganna chi edeaka xxena attu libe, delába nimala nu udo ttuha, ttaka nnanna nna lanúruna do.
REV 17:9 ’Nii riyasa elha rieni kini tte denri'i nuní. Gasi ka bega iki nimalaha ankakana gasi ka i'iya. Iki ka nuha do nuilaha.
REV 17:10 Anágaba nna ankagabakana gasi ka nu rinnabia. Gayu ka nuha labíru rinnabiakana nnanna. Nu xxupaha nuha rinnabiana nnanna. Attu nuha nna si isialana innabiana, ttaka ganna chi bisia nuha, ttu sattitoruba innabiana.
REV 17:11 Nimala nu udo ttuha, nnanna nna lanúruna do, nuha akana nu xxunu innabia. Lana selana len ka nu gasiha. Iki de chi unnabianaha nna tsiana ata tse'e loona.
REV 17:12 ’Tsii ka sitta iki nimala bilenlu‑na, ka nuná ankakana tsii ka nu innabia, ka nu labí chi udulokana innabiakana, ttaka ttu sattitoruba dhíkana lo neda ki innabiakana len nimalaha.
REV 17:13 Tsii ka nu innabiaha chi bokinni ikikani utekana len nimalaha lo neda rapakanaha lhe nu tsitsi ra lekaniha lhe.
REV 17:14 Ttilha lenkana benne anke Neru toha, ttaka benne anke Neru toha dhaabe lokani kumu anke Xxana ka nu ra xxeni lekani lhe anke Nu Loni ge iyá ka nu rinnabia lhe. Dhaabe lokani itupa lenie ka benne gebie, delába ka benne chi biyaxike lhe chi biriesike lhe labí rudhanke a ria leke benne anke Neru toha.
REV 17:15 Nianna raru anjeliha neti: ―Inda bilenlu‑na, delába inda nu do nuila rutto'o latin‑na loin‑na, nuná ankana ka benne se'e yiesi lo yu‑ni, delába iyá loo ka benne se'e lhe'e iyába ka yiesi se'e yiesi lo yu‑ni lhe ka benne rinneke iyá looba tisa lhe.
REV 17:16 Tsii ka sitta iki bilenlu‑na lhe nimala‑na lhe, labí aka uyúkana nuila rutto'o latin‑na, sun labana udúkana, uttuntubakana na nna gobakana bela geni lhe uttebakana na lo gi lhe.
REV 17:17 Tata Do Yebáha‑ba chi benie ki uinkana nu rabie, benie ki bokinni ikikani nna utekana lo neda rapakanaha len nimalaha ki innabiana axtaliba ganna chi gwado tisa ge nu ra Tata Do Yebáha.
REV 17:18 Nuila bilenlu‑na nna ankana yiesi nu ra xxeni leni, delába ankana yiesi nu rinnabiana ka nu rinnabia se'e lhe'e adí ka yiesi se'e yiesi lo yu‑ni.
REV 18:1 Iki de nuha nna tti bela'ati attu anjeli re tsitsi lebie ugwadie yebáha dabie nna xien charába bele'e bedani nu xxeni ra leeha yiesi lo yu‑ni
REV 18:2 nna unnebie idisa, ree: ―¡Chiba biginni Babiloniaha, delába yiesi nu ra xxeni leniha! Nnanna nna chiba beyakana lisi ka nu xxegwiha lhe chiba beyakana ata reta'a ka espíritu satsaha lhe ata reta'a iyába ka nu sia xxilakani, delába ka nu ankakana tsiga arlo Tata Do Yebáha lhe anágaba rixxini ka benne kana.
REV 18:3 Kumu ka benne se'e lhe'e iyába ka yiesi se'e yiesi lo yu‑ni, chiba biyietike ruinke nu satsa ruin yiesi ra xxeni leniha, delába chi bedhá ikike Tata Do Yebáha nna bedú xibike arlo ka diosi ka nu subi subi. Lhe anágaba ka nu rinnabia se'e yiesi lo yu‑ni bengabakana nu satsa len yiesiha nna ka nu reki gwetto'oha nna chi utta xxatta gekani de rutto'okana len yiesi Babiloniaha iyába nu raka leni.
REV 18:4 Delola nna biyienti tsi'i attu benne yebáha unnebie, ree: ―Gwaliria lhe'e yiesi‑na, lebi'i ka benne chi ankale kia, kini abittu iselale uinle nu satsa ruin yiesi‑na nna satele ka elha disa ka nu satena‑na.
REV 18:5 Kumu chiba ugwani xxatta tulha ruin yiesi‑na nna nu ruinnaha chiba bisinna axta yebáha. Tata Do Yebáha nna chi bebeki lebie ugwebie na elha disa ge nu satsa ruinnaha.
REV 18:6 Gwalodeki geni, gwaludhaka na attiba bedhakana leha. Chupa‑la luesi nuha, gwalodeki geni. Nu ilhá uta'ana begi'ana leha, adírula ilhá gwaleyoin nuha gwalogi'a na.
REV 18:7 Ttiba benna ttaba lhe utitta tábana nu tee geniha, aníha‑gaba gwalugwe na elha disa tsitsi lhe gwaluni kini eleni xxattinna. Kumu yiesiha lhi'u leni rulaba leni rakinna: “Neti ttiba ttu nuila rinnabia ankaa doa. Labí ankaa nuila bidabi lhe nigaba kwesia de elenti.”
REV 18:8 De nuha nna sun lhe'e ttu sába isia elha disa ge yiesiha: isia elhutti geni lhe eleninna lhe gattina ubina lhe itena lo giha lhe, kumu Tata Do Yebaa benne anke Xxanari'iha unie elhuxtisi geni kumu tsitsi ra le benneha.
REV 18:9 Ka nu rinnabia se'e yiesi lo yu‑ni, ka nu bisákana naha lhe bedí baakana lenna iyába nu uka lekani, ka nuha kwesikana lhe elenkinna tti ilákinna seni geni itena lo giha.
REV 18:10 Idittuliba tse'ekana de elha rasi ge nu sate yiesiha, nianna tti innákana: ―¡Gwalíchiru lelu xa Babilonia nu ra xxeni lelu, lhe ra tsitsi lelu lhe! ¡Karusi'irulu! Ttu nnelaba bisia elha disa tsitsi gelu.
REV 18:11 Ka nu reki gwerixxi se'e yiesi lo yu‑ni nna kwesigabakana lhe elenigabakinna ge yiesiha kumu lanúru go'ona nu rutto'okanaha.
REV 18:12 Rutto'okana oru lhe plata lhe ka íyya ragalha ka nu daka xxatta lhe ka perla lhe. Anágaba rutto'ogabakana ka lari tse ka nu tee lákani lino lhe seda lhe ka lari xiná chulha lhe ka nu xiná tú lhe. Rutto'ogabakana iyá looba ka yaga rure ixixxi lhe iyába nu anka ge marfíl lhe nu anka ge yaga lhe nu anka ge bronce lhe mármol lhe.
REV 18:13 Anágaba nna rutto'ogabakana canela lhe yala lhe iyá looba nu rure ixixxi lhe vinu lhe seti lhe yiedi lhe xua lhe ka ku'una lhe ka neru lhe ka kwayu lhe ka carreta, lhe anágaba axtala ka benne rutto'okana.
REV 18:14 Nianna tti gákana yiesiha: ―¡Iyába nu tse ridá leluha, garua daa nuha! ¡Ttu tsaba chi bennittilu ka nuha lhe iyába ka nu daka xxatta ru'u leluha, ttu tsaba labíru dhilu ka nuha!
REV 18:15 Ka nu rutto'oha, ka nu chi tee xxatta gekaniha de rutto'okana lhe de ro'okana len yiesiha, idittuliba tse'ekana de gasikinna ge elha disa tsitsi sate yiesiha nna kwesikana lhe elenkinna lhe.
REV 18:16 Nianna tti innákana: ―¡Gwalíchiru le yiesi ra xxeni len‑na, yiesi nu rukuna ka lari tse, lhe ka lari xiná chulha lhe ka lari xiná tú lhe! ¡Lana raka galhaba latini ka oru, ka íyya ragalha ka nu daka xxatta lhe ka perla lhe! ¡Karusi'iruna!
REV 18:17 ¡Ttu nnelaba bise'e lo iyá elha tse tee geniha! Ka nu rinnabia lhe'e ka barcuha lhe ka nu riben sina lhe'e ka nuha lhe, anágaba ka nu redá lhe'e ka barcuha lhe iyába ka nu riben sina lo indatooha lhe, iyába ka nuha idittuliba tse'ekana
REV 18:18 ilákinna tsapi seni ge yiesiha ritena. Nianna innekana idisa, innákana: ―¡Lanúru attu yiesi xxeni luesi nuná re!
REV 18:19 Nianna tti begadi tee ikikani nna ribesikana idisa lhe relenkinna, rákana: ―¡Gwalíchiru le yiesi ra xxeni len‑na! ¡Karusi'iruna! De tee geni nna iyába ka nu se'e barcu gekinna, utta gekani de ugwekikana gwerixxi lenna. Nnanna nna ttu nnelaba chi bise'e loona.
REV 18:20 ’Gwaledeakinle geni, lebi'i ka nu se'ele yebáha, lhe gwaladeakinle, lebi'i ka nu chi ankale ge Tata Do Yebáha, lhe anágaba lebi'i ka apóstol lhe ka profeta lhe gwaledeakinle kumu gele nuná chi bokixa Tata Do Yebáha yiesi‑na tti begwebie na elha disa‑na.
REV 18:21 Nianna ttu anjeli ra xxeni lebie bedaxxue ttu íyya. Ankana ttiba ttu íyya xxeni ge mulinu nna bekinnie nuha lhe'e indatooha nna rabie: ―Aníba iginni Babilonia yiesi nu ra xxeni leniha, nna ttu tsaba tse'e loona labíru eselana.
REV 18:22 Xa Babilonia, lo ka neda gelu‑na labíru iyieni ulha ka benne lhe nigaba udhesike lo ka arpa, nigaba ukwesike ka flauta lhe nigaba ka trompeta lhe. Lanúrugaba ka nu runi iyá looba sina tse'eru, lhe nigaba iyieniru tsi'i ka mulinu kwenkana gwesi'i xuxtila lhe.
REV 18:23 Ka rela‑na labíru uden xiani ge ka gi lo ka neda gelu‑na, lhe nigaba iyienru elha gwedeaka lasi ge ka dha'a raka lagwi gelu‑na. Aníha aka kumu ka nu lhe'esi geluha ka nu reki gwetto'oha, ka nuha ukakana nu uná xxeni lekani yiesi lo yu‑ni nna bixúkinna elha gwesá gelu‑na ki uxí yiekana ka benne se'e lhe'e iyába ka yiesi se'e yiesi lo yu‑ni.
REV 18:24 Lo ka neda gelu‑na bitabi reni ge ka profeta ge Tata Do Yebáha lhe bitabi reni ge ka benne chi ankake gebie lhe anágaba bitabigaba reni ge iyába ka benne chi bettikana yiesi lo yu‑ni.
REV 19:1 Iki de nuha nna tti biyienti tsi'i ixe juisiru ka benne se'eke yebáha, rinneke idisa, ráke: ¡Aleluya! Tata Do Yebaa getu, kwinalu rodilálu ri'itu lhe ra xxeni lelu lhe, anágaba ankalu benne ra tsitsi lelu lhe.
REV 19:2 Lu ruinlu elhuxtisi ttiba ankaba geni lhe nu ankaba gwalí lhe, kumu chiba berixxi bekinnilu nuila ra xxeni leni nu rutto'o latiniha, delába yiesi Babiloniaha. Lana len nu satsa bennaha bennittina ka benne se'e yiesi lo yuha, delába bele'enna ke ki bedhá ikike lu nna bedú xibike arlo ka diosi ka nu subi subi, lhe chigaba bokixalu na reni ge ka benne bixúke lo sina geluha, delába ka benne bettinaha.
REV 19:3 Nianna tti bedennee ka benne se'e yebáha attu libe, ráke: ―¡Aleluya! Yiesiha ttu dia liiba dho seni geni itena.
REV 19:4 Ttaperua ka benneolaha lhe ttapa ka nu anka baniha, delába ka nu rula'a ttiba rule'e ka nimalaha, ka benneha lhe ka nuha lhe bettudhi loke lo yu nna betsá loke arlo Tata Do Yebaa benne dobie lo xxila ata rinnabieha, nianna ráke: ―¡Amén! ¡Aleluya!
REV 19:5 Nianna ata du xxila rido Tata Do Yebáha rinnabie, niha biria tsi'i ttu benne rinnebie ree: Iyále ka benne rixúle lo sina ge Tata Do Yebaa geri'i‑ni, lhe iyále ka nu tee elha rasi gele lenie lhe, sila ankale nu ra xxeni leni lhe sila ankale nu abittu ra xxeni leni lhe, gwalinne gwalinná: ¡Xxeni ra le Tata Do Yebaa geri'i‑ni!
REV 19:6 Biyiengabati tsi'i attu benne unnebie. Riyien tsi'ibie attiba riyieni tti rinne ixe juisiru ka benne lhe ttiba riyieni tti riginni idila inda lo ttu benunni lhe. Anágaba riyiengaba tsi'e ttiba riyieni tti ru'u be tti ratsa xxatta. Benne unneeha, ree: ¡Aleluya! Kumu Tata Do Yebaa geri'i‑ni, benne‑ni ra tsitsi xxatta lebie lhe benne‑ni anke Xxanari'i lhe, benne‑ni chi rinnabie.
REV 19:7 Odú itta leri'i lhe edeakinri'i lhe, anágaba innágabari'i: “Xxeni ra le Tata Do Yebaa geri'i‑ni”, kumu chiba bisia sá utsá ná benne anke Neru to‑ni. Nuila dhieha chiba du tse nuha.
REV 19:8 Chiba uxí nuha lo neda kini ukuna ttu xo tseru, lhe ttu nu raka galha loni lhe ttu nu nari xú lhe. Xo sibi uku nuilaha raxxína na len nu tse ruin ka benne chi ankake ge Tata Do Yebaa geri'i‑ni.
REV 19:9 Nianna tti ra anjeliha neti: ―Ben lo yetsi uná: “Karubáru ka benne biyaxike ki goke elho tse tee lo dha'a ge benne anke Neru to‑ni.” Nianna raru anjeliha neti: ―Ka tisa rigixxi'iaya‑ni gwalíga ankake ge Tata Do Yebáha.
REV 19:10 Nianna tti bedú xibia arloe ki utsá loa bie, ttaka benneha nna ree neti: ―¡Bittu uinlu aná! Arlo Tata Do Yebáha‑la bedú xibilu, kumu neti ankagabaa benne rixúa lo sina ge Tata Do Yebáha ttiba lu lhe ttiba adíru ka benne raka betsi to geluha lhe, delába ka benne rudaxxu tsitsike nu utixxi'a Jesús‑ni. Kumu ka tisa utixxi'a Jesús‑ni, ka benneha nuha rudaxxu ni'a ka benne kini rigixxi'ake nu ra Tata Do Yebáha.
REV 19:11 Nianna tti biláti du yali yebáha nna bela'ati uka xxe du ttu kwayu sitsi. Benne doe kwe'e nuha tee lábie Benne Abittu Runnitti Tisa Gebie lhe Benne Runi Nu Anka Gwalí lhe. Benneha ritilhe attiba ankaba geni lhe runie elhuxtisi attiba ankaba geni lhe.
REV 19:12 Ka iyya loeha ankakana ttiba belha ge gi nna ikie nna yu'u ixe ka corona. Lo xeabie nna dia lá ttu benne, ttu lá nu lanú nu yuna bixa dien nuha innána, sunruba labie gwa yue.
REV 19:13 Ka xo nuku benneha anka xxattakana reni nna tee lábie Tisa Ge Tata Do Yebáha.
REV 19:14 Ka benne se'e yebáha nna danalhake benneha siake kwe'e ka kwayu sitsi, diake ttiba ka nu dia utilha. Ka lari nuku ka benneha ankakana tseru lhe sitsi tú lhe nari xú lhe.
REV 19:15 Ro'o benne do kwe'e kwayuha riria ttu espada ria tutsa ro'oni, kini len nuha unie gwe ka benne se'e lhe'e ka yiesi se'e itúba yiesi lo yu‑ni nna tsitsiba innabie kana. Benneha udhake kana attiba ttu nu ridhí uva lhe'e xieru ata ridí ka uva, delába ugwebie kana elha disa tsitsi. Elha disa ugwebie kanaha ankana elha rise'iki ge Tata Do Yebaa benne ra tsitsi xxatta leha.
REV 19:16 Lo lari nukueha nna daka lo xiche dia ra: “Nu Loni Ge Iyá Ka Nu Rinnabia lhe Xxana Ka Nu Ra Xxeni Lekani lhe.” Ka tisa‑ni nuní anka lábie.
REV 19:17 Nianna tti bela'ati ttu anjeli dubie lo tatubisa‑na nna unnebie idisa uxie iyába ka nu sia xxilakani reki gwetsá ka nu rokana bela. Ree ka nuha: ―¡Gwaltá, gwalitupa ki gole elho tse rute Tata Do Yebáha!
REV 19:18 Gwaltá kini gole bela ge ka nu rinnabia‑na lhe bela ge ka nu rineru arlo adí ka soldadu‑na lhe. Gwaltá ki gole bela ge ka nu ra tsitsi lekinna lhe bela ge ka kwayu‑na lhe anágaba bela ge ka nu ribiakana kwe'e ka nuná lhe. Gwaltá kini gole bela ge iyába ka benne: sila ka benne to'oke lo sina ge ka xxanake o sila ankake benne reki lhaa lhe sila ankake ka nu abittu ra xxeni lekani lhe sila ankake ka nu ra xxeni lekani lhe.
REV 19:19 Nianna tti bela'ati nimala biria lhe'e indatooha lhe ka nu rinnabia se'e yiesi lo yu‑ni se'ekana len ka soldadu gekaniha. Ka nuha chi tupakana ki itilha lenkana benne doe kwe'e kwayuha lhe ka benne geeha lhe.
REV 19:20 Ttaka nimala biria lhe'e indatooha biyaxxubana itupa lenna nimala biria lhi'u yuha, delába nimala nu labí liinna ankana profeta ge Tata Do Yebáha, nu bengabana ixe loo ka milagru arlo nimala biria lhe'e indatooha. Len ka milagru ben nimala biria lhi'u yuha uxí yiena ka benne ki uxielhake uyu'u lo xeake seña ge nimala biria lhe'e indatooha lhe uxí yiena ke kini bedú xibike arlo mentu ge nimala biria lhe'e indatooha lhe. Ixpaba ka nimalaha anka benbakana biru'unakana lo gi bartoha ata rite azufreha.
REV 19:21 Adí ka benne danalhake nimala biria lhe'e indatooha uttibake len espada riria ro'o benne doe kwe'e kwayuha nna ka nu sia xxilakani reki gwetsáha nna beyiela súbakinna utokana bela ge ka benne betti benneha len espada geeha.
REV 20:1 Nianna tti bela'ati ttu anjeli ugwadie dabie yebáha denie yagwi ge belha'a chulhaha lhe denie ttu cadena xeni.
REV 20:2 Bedaxxue nimala xxegwiha, delába belha ugweki ttuha nu tee láni Satanás lhe nu tee láni nu xxegwi lhe, nianna bexxike na ttu mili ida.
REV 20:3 Bedelhe na lhe'e belha'a chulhaha nna bedheabie ro'o nuha, nianna tti bedeki tsitsie nuha kini abitturu tseki nimalaha dhi yiena ka benne se'e lhe'e ka yiesi se'e yiesi lo yu‑ni. Axtaliba ganna chi gwadona ttu mili idaha, la'anialiba nna teeki eriana eyeki lhaana attu satti to.
REV 20:4 Nianna tti bela'ati ka xxila ata rise'e ka benne rinnabiake. Lo ka nuha se'e ka benne chi uxíke lo neda kini uinke elhuxtisi. Bilágabati ka benne urú bega ikike de utixxi'ake ge Jesús‑ni lhe de utixxi'ake ka tisa ge Tata Do Yebáha lhe. Ka benneha nuha labí bedú xibike arlo nimala biria lhe'e indatooha lhe nigaba arlo mentu geniha lhe, nigaba a uxielhake tsu'u seña ge nuha lo xeake lhe nigaba náke lhe. Ka benneha nuha bela'ati beyaka benke nna unnabiake len Cristuha lo ttu mili ida.
REV 20:5 Lake nuha beyaka benke sisi'a tte lo elhuttiha. Adí ka benne chi uttiha nna labí beyaka ben tteke. Gwadolibana ttu mili idaha nna tti beyaka benke.
REV 20:6 Karubáru ka benne eyadha benke sisi'a tte lo elhuttiha, kumu lake nuha ankake ka benne chi riesini Tata Do Yebáha ki akake gebie. Ka benneha labíru gattike nu berupa libeha, sinuki akalake bixxudi kini ixúke arlo Tata Do Yebáha lhe arlo Cristuha lhe. Anágaba innabiagabake len Cristuha ttu mili ida.
REV 20:7 Ganna chi gwadona ttu mili idaha, nu xxegwiha eyeki lhaana nna eriana lhe'e belha'a ata yayanaha,
REV 20:8 nianna tsekina dhi yiena ka benne se'e lhe'e ka yiesi se'e itúba yiesi lo yu‑ni. Iyába ka yiesiha tee lákani Gog lhe Magog lhe. Lana ottupana ka benne ge ka yiesiha ki itilhake. Ixe juisiru ka benneha raka. Rakake ixe attiba yuxi re ro'o indatoo, labí aka geri'i ibabinri'i ke.
REV 20:9 Ka benneha biriake itúba yiesi lo yu‑ni nna bebi'ike abi'iba kwe'e ata se'e ka benne chi ankake ge Tata Do Yebáha lhe bebi'ike kwe'e yiesi nu rakanie geniha lhe. Ttaka tti ugwadi gi daa yebáha nna bettebana ka benneha.
REV 20:10 Nianna nu xxegwiha, delába nu uxí yiena ka benneha len gwen lasi geniha, biru'unabana lo gi bartoha ata rite azufreha, atagaba biru'una nimala biria lhe'e indatooha lhe nimala biria lhi'u yuha, delába nimala nu labí liinna ankana profeta ge Tata Do Yebáha. Niha satíaba uyúkana elha disa tsitsi rela lhe resá lhe.
REV 20:11 Iki de nuha nna bela'ati ttu xxila sitsi xeni. Lo nuha do ttu benne rinnabie. Yiesi lo yu‑ni lhe yebáha lhe lanúrukana bilá, benitti loobakana arloe.
REV 20:12 Bilágabati ka benne chi uttiha, ka benne ra xxeni leke lhe ka benne abittu ra xxeni leke lhe, se'eke arlo xxila ata do Tata Do Yebáha rinnabie. Nianna tti biyali lo ka libru se'e ata doeha nna biyaligaba lo attu libru, delába libru ata dia lá ka benne aka benke ttu dia lii arlo Tata Do Yebáha. Ka benne yattiha nna ukaba elhuxtisi geke attiba raba lo ka libruha kua nu benba ttu ttuke.
REV 20:13 Indatooha botebana ka benne yatti utti lhe'eniha. Elhuttiha lhe belha'a chulhaha lhe botegabakana ka benne yatti gekaniha nna ttu ttu ka benne yattiha ukaba elhuxtisi geke kua nu benbake.
REV 20:14 Nianna elhuttiha lhe belha'a chulhaha lhe biru'unabakana diakana lo gi bartoha. Elha disa nu uyúkana lo giha, nuha ankana elhutti berupa.
REV 20:15 Iyába ka benne ata abittu besela láke lo libru ata dia lá ka benne aka benke ttu dia lii arlo Tata Do Yebáha, ka benneha biru'unagabake diake lo gi bartoha.
REV 21:1 Iki de nuha nna tti bela'ati attu yebaa kubi lhe attu yiesi lo yu kubi lhe. Kumu yebaa nu ure sisi'a tteha lhe yiesi lo yu nu ure sisi'a tteha lhe, chiba benitti loo ka nuha lhe anágaba indatooha, labíru nuha re.
REV 21:2 Bilágabati Jerusalén kubiha, delába yiesi le'a ge Tata Do Yebáha, biriana yebáha ata doeha nna ugwadina dana. Yiesiha chi bedú tsena ttiba ttu nuila chi bedú tsena kini dhina nubiyú.
REV 21:3 Nianna tti biyienti biria tsi'i ttu benne ata du xxila ata rido benne rinnabiaha. Benne biyien tsi'eha, unnebie idisa, ree: ―Gwalulanniruga. Ne Tata Do Yebáha doe lagwi ge ka benne. Labie dhoe lenke nna lake nna akake gebie nna kwinaba labie dhue lenke ake Diosi geke.
REV 21:4 Labie unie ki abitturu kwesike lhe abitturu gattike lhe, nigaba elenkanie lhe nigaba uyúruke elha disa ge nu ratekeha. Kumu nu gwateke ttuha chiba ute nuha.
REV 21:5 Benne doe lo xxila ata rinnabieha nna ree: ―Neti kubiba chi reyonia iyá tte nu se'e. Lhe rágabe: ―Ben lo yetsi nu rinnea‑ni, kumu ka tisa‑ni ankakana nu gwa dika uxxen le ka benne ge nu rákana lhe ankakana ka tisa rinne nu anka gwalí lhe.
REV 21:6 Iki de nuha nna rabie neti: ―Chiba uluxa chá. Neti ankaa benne riduloa lhe ankaa benne rulhuxa looa lhe. Nu ebisina inda, neti kwentaba ugwea na inda i'iyana. Inda nu ugwea na i'iyanaha, nuha uinna kini aka benna ttu dia lii.
REV 21:7 Nu dhaana dhu tsitsina lo neda kia, nuha ralhana edí baana iyá nu tse. Neti nna akaa Diosi geni, lana nna akana xi'inia.
REV 21:8 Ttaka ka nu reyadi gaa a reyaxakinna lhe ka nu labí ria lekani neti, lhe anágaba ka nu ruin xxatta satsa lhe ka nu ruin elhutti lhe, anágaba ka nu risákana nu subi subi lhe ka nu ruin elha gwesá lhe, anágaba ka nu rudú xibikani arlo ka nu labí gwalí ankakana diosi lhe iyá ka nu gwen lasi lhe, iyá ka nuní ralhakana tsiakana lo gi bartoha ata rite azufreha. Elha disa uyúkanaha ankana elhutti berupa.
REV 21:9 Nianna tti ubiga ttu ka anjeliha, delába ttu ka benne gasiha, ttu ka benne denke gasi ka copa ta'a gasi ka elha disa lhe'ekani. Ka elha disa denkeha, ankakana ka elha disa chi daluxa ugweke ka benne. Anjeliha bisiabie ata dua nna rabie neti: ―Utá ki ule'enia lu nuila utsá nániha, nuila ge benne anke Neru toha.
REV 21:10 Nianna tti bisia Espíritu ge Tata Do Yebáha latia nna bela'ati dechebie neti iki ttu i'iya xeni. Niha bele'enie neti yiesi le'a ge Tata Do Yebáha, delába Jerusalén nu biria yebáha ata do Tata Do Yebáha nna ugwadina dana.
REV 21:11 Yiesiha raka galhabana chena nu xxeni ra le Tata Do Yebáha. Raka galhabana ttiba ttu íyya daka xxatta. Rilá saaba lhe'eni ttiba rilá lhe'e íyya ragalha nu tee láni jaspe.
REV 21:12 Yiesiha abi'iba kwe'eni rilhi ttu de'e xeni, ttu de'e yadha xxatta. De'eha sia tsi'inu (12) ka puerta geni. Ro'o ttu ttu ka puertaha se'e ttu ttu ka anjeli. Lo ttu ttu ka puertaha dia lá ttu ttu kwe ka benne datiake benne tee lábie Israel.
REV 21:13 Daka ata riria ubisa‑na se'e tsunna ka puertaha, daka lia nna se'e a tsunnakana, daka rre nna dedese'e a tsunnakana, daka ata radi ubisa‑na nna dedese'e a tsunnakana.
REV 21:14 Xan de'e yeki abi'iba kwe'e yiesiha yu'u tsi'inu (12) ka íyya cimientu. Lo ttu ttu ka íyyaha dia lá ttu ttu ka benne tsi'inu ukake apóstol, delába ka benne utixxi'ake ka tisa ge benne anke Neru toha.
REV 21:15 Anjeli rinne len netiha denie ttu yaga nu rixúnie ki rurixxibie. Yagaha ankana ge oru. Nuha ixúnie ki urixxibiabie yiesiha lhe ka puerta geniha lhe urixxibiagabe de'e rilhi kwe'eniha lhe.
REV 21:16 Yiesiha ankana cuadradu tí, turo'oba ankana de littuni lhe turo'oba ankana de lilhaga lhe. Anjeliha berixxibiabie yiesiha len yaga denieha. Yiesiha yu'una chupa mili bixxi chupa gayua (2,200) kilómetru, ttúba re nuha de littuni lhe de lilhaga lhe de lidhú‑ni lhe.
REV 21:17 Delola nna tti berixxibiabie ttixa yadha de'e rilhi kwe'e yiesiha. Nuha nna yadhana ttiba gayuna bixxi gayu (65) metru. Medida nu rixúni ka benne se'e yiesi lo yu‑niba bixúni anjeliha kini berixxibiabie de'eha.
REV 21:18 De'e rilhi kwe'e yiesiha ankana ge íyya ragalha nu tee láni jaspe. Yiesiha nna ankana taga'a ge oru, rilá saaba lhe'eni ttiba rilá lhe'e ttu iyya gwana.
REV 21:19 Ka íyya yu'u xan de'e rilhi kwe'e yiesiha iyá looba ankakana: Íyya nu yu'u sisi'a tteha ankana íyya ragalha yadi xiná lhe'eni nna tee láni jaspe. Nu berupaha nna ankana azul ragalha tú nna tee láni zafiro. Nu beyonnaha nna ankana ttu íyya kuchuchi nna tee láni ágata. Nu betapaha nna ankana ttu íyya ya'a nu tee láni esmeralda.
REV 21:20 Íyya nu gayuha nna ankana ttu íyya yatsi tee yadhi latini nna tee láni ónice. Nu xxupaha nna ankakana ttu íyya xiná lii nna tee láni cornalina. Nu gasiha nna ankana íyya yatsi selana ya'a nna tee láni crisólito. Nu xxunuha nna ankana íyya ya'a chulha nna tee láni berilo. Nu jaaha nna tee láni topacio nna ankakana ttu íyya ragalha bede. Nu tsiiha nna ankana ttu íyya ya'a sitsi tá nna tee láni crisópaso. Nu sineaha (11) nna ankana ttu íyya bede xiná nna tee láni jacinto. Nu tsi'inuha (12) nna ankana muradu nna tee láni amatista.
REV 21:21 Iyába tsi'inu (12) ka puertaha ankakana tsi'inu ka perla. Kua ttu ttu ka puertaha ankakana ttu ttu perla nna neda tee lhe'e yiesiha nna ankana taga'a ge oru, ttiba ttu iyya gwana rilá saaba lhe'eni.
REV 21:22 Niru ttu yotu labí bela'ati lhe'e yiesiha kumu Tata Do Yebaa benne anke Xxanari'iha lhe ra tsitsi xxatta lebie lhe, labe lhe benne anke Neru toha lhe labake ankake yotu ge yiesiha.
REV 21:23 Yiesiha labí riyasinna xiani ge tatubisa‑na, nigaba ge nanto beo‑na, kumu nu xxeni ra le Tata Do Yebáha, nuha‑ba rudenna ge yiesiha. Anágaba benne anke Neru toha, labe anke xiani geni.
REV 21:24 Ka benne se'e lhe'e ka yiesi se'e yiesi lo yu‑ni tsekike lhe'e xiani ru'u lhe'e yiesiha nna ka nu rinnabia se'e yiesi lo yu‑ni sadha'ankana nu xxeni ra lekaniha len yiesiha.
REV 21:25 Ka puerta ge yiesiha labíru tsaya ka nuha resá, kumu niha labíru rela aka
REV 21:26 nna ka benne se'e lhe'e ka yiesi se'e yiesi lo yu‑ni sadha'anke nu tse tee gekeha lhe sadha'anke iyába nu daka tee gekeha len yiesiha.
REV 21:27 Lhe'e yiesiha labí aka ga'a nu anka tsiga, nigaba aka ga'a ka nu ruin xxattakana satsa lhe nigaba aka ga'a ka nu ruin lekani lhe, sinuki sunruba ka benne dia láke lo libru ge benne anke Neru toha, delába ata dia lá ka benne aka benke ttu dia lii arloe, ka benneha‑ruba gwaka ga'ake lhe'e yiesiha.
REV 22:1 Nianna tti bele'en anjeliha neti ttu yoo ridá inda lhe'eni. Inda ridá lhe'e yooha ruinna kini aka ben ka benne ttu dia lii. Iyya gwanaba raka loni de ankana yaa xú. Ririana ata du xxila ata do Tata Do Yebáha rinnabie lhe ata do benne anke Neru toha lhe.
REV 22:2 Yooha tena lagwi neda xeni tee lhe'e yiesiha nna abi'iba ro'o yooha daa ka yaga ka nu rutekana elha nabani ge ka benne ttu dia lii. Tsi'inu (12) lidú runna ka yagaha nu xixxi lhe'e ttu ida, daa beoba ribia gekani. Lhaga ge ka yagaha ixúna kini aka ramedi ka benne se'e lhe'e ka yiesi se'e yiesi lo yu‑ni.
REV 22:3 Lhe'e yiesiha labíru aka nu satsa nu abittu ru'u le Tata Do Yebáha, kumu niha du xxila ata do Tata Do Yebáha rinnabie lhe niha do benne anke Neru toha lhe, nna ka benne rixúke lo sina ge Tata Do Yebáha, ka benneha‑ba udú xibike arloe.
REV 22:4 Niha ilákanie kwinaga Tata Do Yebáha nna tsia lábie lo xeake.
REV 22:5 Niha labíru aka rela lhe labíru iyasa gi lhe, nigaba xiani ge tatubisa‑na, kumu Tata Do Yebaa benne anke Xxanari'iha, labe udenie geke. Ka benne udenie gekeha, ka benneha nuha innabiake ttu dia lii.
REV 22:6 Nianna tti ra anjeliha neti: ―Ka tisa‑ni ankake nu gwalí lhe ankake nu dika uxxen leri'i geke lhe. Tata Do Yebaa benne anke Xxanari'iha, delába benne runie ki rinne ka profeta geeha nu raka lebie una ka benne. Neti benne ankaa anjeli geeha udhelhe neti kini ule'enia ka benne rixúke lo sina geeha nu chi tte dabiga aka.
REV 22:7 Jesús‑ni ree: ―¡Chi tte esiaya! Karubáru ka benne udoke tisa ge nu dia lo yetsi‑ni, delába ka tisa chi rigixxi'ake ge nu si aka.
REV 22:8 Neti Juan, ankaa benne biyienti lhe bela'ati iyá nuní nna tti bela'ati lhe tti biyienti iyá nuní, nianna bedú tteba xibia arlo anjeliha, runia utsá loa bie.
REV 22:9 Ttaka benneha nna ree neti: ―¡Bittu uinlu aná! Kumu neti ankagabaa benne rixúni Tata Do Yebáha ttiba lu lhe ttiba ka betsi to geluha lhe, delába ka benne ankake profeta geeha lhe anágaba neti ankagabaa ttiba ka benne rudoke tisa ge nu dia lo yetsi‑ni. Lu arlo Tata Do Yebáha‑la bedú xibilu nna betsá lolue.
REV 22:10 Nianna tti rabie neti: ―Bittu ukatsilu ka tisa dia lo yetsi‑ni, delába ka tisa rigixxi'akana ge nu si aka, kumu chi tteba aka nu ra ka tisa‑ni.
REV 22:11 Begwelha nu ruin tulhaha, uinruna tulha nna nu ruin nu satsaha, uinruna nu satsa lhe begwelha nu ruin nu dika ixúha, uinruna nu dika ixú nna nu chi biriesina ki akana ge Tata Do Yebáha, aníha‑bala riesina ki satíaba akana gebie.
REV 22:12 Jesús‑ni ree: ―Chi tte esiaya. Neti dechea nu ralha ttu ttule dhile kua nu benbale.
REV 22:13 Neti ankaa benne riduloa lhe ankaa benne rulhuxa looa lhe.
REV 22:14 Karubáru ka benne rigí xoke ki akake nari xú arlo Tata Do Yebáha kini tee lo neda geke esinke goke nu xixxi ge yagaha, delába yaga nu rutena elha nabani geke ttu dia lii lhe kini aka eta'ake ro'o ka puerta ge yiesiha lhe.
REV 22:15 Ttaka ka nu ruinkana nu anka tsiga lhe ka nu ruin elha gwesá lhe ka nu risákana nu subi subi lhe anágaba ka nu runi elhutti lhe ka nu rudú xibikani arlo ka nu labí gwalí ankakana diosi lhe anágaba ka nu ru'u lekani rinnekana gwen lasi lhe, iyá ka nuná labí eta'akana lhe'e yiesiha.
REV 22:16 ―Neti Jesús, udhelhaa anjeli kia‑ni kini kixxi'anie le nuní, lebi'i ka benne chi ria lele neti. Neti ankaa benne datiaya David lhe ankaa beli riria ka dila‑na lhe.
REV 22:17 Espíritu ge Tata Do Yebáha lhe nuila ge benne anke Neru toha, ráke bie: ―¡Utá! Anágaba ka benne iyienkanie nu ra ka benne‑ni, innágabake: ―¡Utá! Nna iyába ka benne ebisike inda lhe aka leke i'iyake indaha lhe, itake nna kwentaba i'iyake indaha, delába inda nu uinna kini aka benke ttu dia lii.
REV 22:18 Iyábale ka benne riyieninle ka tisa dia lo yetsi‑ni, delába ka tisa rigixxi'akana ge nu si aka, neti upeya le: ganna nuxa ttúle udienle iki ka tisa‑ni, Tata Do Yebáha ugwebie le ka elha disa ka nu dia lo yetsi‑ni
REV 22:19 nna ganna nuxa ttúle kuale iki ka tisa dia lo yetsi‑ni, anágaba Tata Do Yebáha labí ugwelhe le gole nu xixxi ralhale gole ge yaga nu utena elha nabani gele ttu dia lii lhe labí ugwelhe le eta'ale lhe'e yiesi le'a geeha lhe. Lo yetsi‑ni rigixxi'a iyá nuní.
REV 22:20 Jesús benne rigixxi'e nuní rabie: ―¡Netiru ria, chi tte esiaya! Amén. ¡Betá, tata Jesús benne ankalu Xxanatu!
REV 22:21 Jesús benne anke Xxanari'iha edá lebie aka lenie iyá ttele. Amén.
