﻿MASMUR.
101.
Masmur Daud po ratoe. Sya AMISY, rikinyo Nya muinyo no tawan muno Nya patimu moyare rai, weti rikinyo ransyerano kangkamane raijo Winai. 
Syo sya unanui syanya rai rakarae mavabe ramu ngkakainoanive nora yara nsarokir. Nanduija Winde no rinui indamu Nyo rinasopan? Syare rino irati inanuga nsarokire rai no sya yavaruga. 
Ayao kakainoanive mamo syonaeyo raugavere no rinamune raiji. Risyamo syonaeyo vatano usarirae ti makirive akato irati Amisye Aije mai, muno indati ritavondi awa ana udave raije ramu. 
Risyamo syare vatano awa ana udave ngkakai musyo marambe nanawamo ugwaravainyo rinai, muno syonae tavobombe ana rave ti ngkakai raiji. 
Vatano nanawirati wo awa arakove awa tamo ngkov raura tantunawi maninimbe nawamo indati syo maupaeta ti makanive. Vatano mararin muno wo taune maijaseo vombe onawamo indati syo mavakano marambe. 
Vatano matawandi utavondi Amisye Ai no munije so nanawamo indati syo mawainde utantuna rinatavon no sya yavar. Vatano nanawirati ugwambe ayao kakaije rai jewene nanawamo indati syo mawain ude wanapatambe wo anakero akari raijaro rinatavon. 
Vatano wo anapamponae rave nanawamo syo mansamayaro ude sisa una no sya yavare rai ramu, vatano wo aarurijate ratore nanawamo vemo ude usayae no inamune rai jinya. 
Arono awatane anteter, vatano mamun una no munije so rai nanawamo syo maupaeta ti makanive tenambe. Vatano awa ana udave mamun tenambe, indati syo maotar ti makanive AMISY Apa munijo Yerusalem so rai. 
