﻿MADIU.
21.
Iesu ma yana tovetutuyamavo i nunagoi Ielusalema i le'wai 'atamana Bedifegi, 'Oya Olive 'waineye. 'Atamananina kebu 'ani'iega Ielusalema 'wainega. Bei Iesu tovetutuyamavo 'adi 'ailuga i vonedi i na kumeta wata i vo, 'Atamana debanagomiega 'waineye 'wa na nagoi, tutuyanina 'wa na le'wa 'wa na lukuluku doniki ma natudi 'wa na 'isedi i luifwedi i tovotovoi. 'Wa na yavudi 'wa na miedi 'waikuye. 
'Ai'edi tamu aitoi i na vo, Awale 'wa yavuyavudi?’ 'Wa na vo, 'Auvea nuanuana,’ nika i na tauyedi.” 
Iesu nuanuana doniki ma natudi i na miedi 'waineye nika tamu Yaubada yana tolu'ivona yana vona-samula 'ana mogitana i na souyeni. Basenadiotoga i kilumi Yaubada 'ana Venua'ivina faifaina i vo, 
Ielusalema 'ana tomotoga 'wa na vonedi 'wa na vo, 'Wa na 'iseni, yami Kini i viwai 'waimie, kumanina tonuaobu, doniki kwavuneye i laka, we'e mogitana doniki tubuvauvauna.’” 
Bega tovetutuyamavo 'adi 'ailuga i kumeta Iesu yana nuanua i 'idewai, doniki ma natudi i miedi 'adi talaumayega doniki tubuvauvauna kwavuneye i ta'uli bega Iesu i laka tabwaneye. 
'Aila'a bwaikina ma yadi ve'ililibu yana 'eda i 'ivivigavuya 'adi talaumayega wata welavi lukudiega. 
Tokumeta wata tovemuli i toke i vegolegole Iesu faifaina i vo, Kaiwa, kaiwa. 'Omu Kini Devida tubuna. Taunina 'Auvea 'ana wagavayega i mimai, Yaubada i da vevesauluva 'atumaina 'waineye. Kaiwa, kaiwa, kumanina tabwaotogineye ta na subisubiai.” 
Tutuyanina Iesu i luku Ielusalema fuedi i gagali i vo, Aitoi tomotogaga?” 
Ediavo 'ifwaidi i vo, Taunina tamu Yaubada yana tolu'ivona 'ana wagava Iesu, Nasalediega 'awalawa Galili 'wainega.” 
Iesu i luku Vanuga 'Eba Velu'ui nageneye i 'isedi tokimwane wata tovekimwane matatabudi i sogiedi i obu, mani tulina tulina 'adi tosivedavedamana yadi talalia i tutuviladi we'e bunebune 'eba velomu faifaidi 'adi tovekimwane yadi 'eba miabui i tutufelefeledi. 
I vonedi i vo, Basenadiotoga i kilumi Yaubada yana Buki nageneye, Yaubada i vo, Yaku vanuga 'ana wagava Vanuga 'Eba Velu'ui.’ Siwe 'omi 'wa vesivilai, tovainago yadi 'eba giva.” 
I 'a'avana, mulieta tomatasako wata 'agedi sinunumidi i maia Vanuga 'Eba Velu'ui nageneye, Iesu i 'ive'atumaidi. 
Tovelomu yadi to'edakumetavo wata ve'etoboda 'adi tovevo 'eba nua'ewa toketokedi Iesu i 'i'idewadi i 'isedi, wata i nogai Vanuga 'Eba Velu'ui nageneye yavayavava i vegolegole i vo, Yaubada 'ana Venua'ivina, Kini Devida tubuna ta na subiai.” Naninidi i 'isedi wata i nogaidi begaidi ma yadi kamogala i velutolieni i vo, Yavayavavanidi bonadi 'u nogai?” Iesu i vo, E'e, mogitana a nogai. We'e 'omi Yaubada yana Buki nageneye vona de'e 'wa da vo kebu 'wa da lu'iawawaiga i vona Yaubada 'waineye i vo, Yavayavava wata mwedamwedalidi 'u 'alaveleveledi, 'waidiega 'amu subia 'u veveluagai.’” 
Iesu i vona'a'ava, i 'iawedi i nago 'atamana Bedani, bei i 'eno. 
I 'atai Iesu Bedaniega i vilai i mimai Ielusalema nika i lase. 
'Ala'ai i 'isanaweni 'eda lilivaneye i vo 'ako ma vuagina, siwe i nago lilivaneye i 'iseni kebu vuaginaga luku'avana. Welavinina 'waineye i vona i vo, 'Omu 'asa'aiana, kebu wata 'u na vuavuaga,” nika 'ala'ai i bwavu-matayo'o. 
Tovetutuyamavo i 'iseni nuadi i voganidi i vo, Bani'odi i munega i bwavu-matayo'o?” 
Iesu yadi velutoli i tutuli i vo, A vona mogitana 'waimie, 'ai'edi kebu ma yami venuanaluga 'wa na vetumaganamo, yau 'ala'ai 'waineye a 'idewaiga, 'omi wata bani'odi 'wa na 'idewai. Kebu de'e bani'odi 'aisena, siwe wata 'ami fata de'e 'Oya Olive 'wa na voneni 'wa na vo, 'U tovoi, 'u obu eyage,’ nika i na obu. 
'Ai'edi ma yami vetumagana 'wa na vevelu'uiga, 'ana fata naninidi nuanuami 'wa na veluagadi.” 
Iesu i le'wa Ielusalema, i luku Vanuga 'Eba Velu'ui nageneye, tomotoga 'waidie i ve. Tovelomu yadi to'edakumetavo wata me Diu to'edakumeta 'au'auveadi i maia Iesu i velutolieni i vo, Nuanuama 'a na 'asetai aitoi i vetunemu bega naninidi 'u 'i'idewadi 'alo aitoi veimea i velemu?” 
Iesu i vo, We'e tamu velutoli yau a na velemi, 'ai'edi yaku velutoli 'wa na tutula-'atumaiaga a na vonemi aitoi veimea i veleku bega nani de'e a 'i'idewadi. 
'Wa da nuani, Ioni Tobafitaiso aitoi veimea i veleni bega tomotoga i bafitaisodi? Yaubada 'alo tomotoga?” To'edakumetanidi 'aise'avadi i veifufu i vo, Bani'odi ta na voneyedi? 'Ai'edi ta na vo, Yaubada veimea Ioni i veleni,’ 'ako i na vo, Vetuma awale kebu Ioni yana vona 'wa da vetumaganeni?’ 
Wata 'ai'edi ta na vo, Tomotoga veimea Ioni i veleni,’ bola vita ta na veluagai 'aila'a 'waidiega fai i nuani Ioni tamu Yaubada yana tolu'ivona.” 
Begaidi Iesu yana velutoli i tutuli i vo, 'Ima kebu 'a da 'asetaiga aitoi veimea Ioni i veleni.” Iesu i vonedi i vo, Vetuma yau wata kebu a na vonemiga aitoi veimea i veleku bega folovanidi a 'i'idewadi.” 
Wata to'edakumetanidi i vonedi i vo, 'Wa na nuani, tamu tomogo natunavo iavetadi 'adi 'ailuga. Tulaina i voneni i vo, Natuku, nuanuaku 'asiau bakule 'u na folova.’ 
Siwe natuna i vo, Yau 'asa'aiana,’ mulieta i nuanua kebu'egana i nago i folova. 
Wata tamadi i nago natuna bwasiona i voneni i vo, 'Omu nuanuaku 'u na nago bakule 'u na folova.’ Natunanina i nogayeni i vo, 'Atumaina 'auvea, a na nago,’ siwe kebu i da nagoga.” 
Bega Iesu to'edakumetanidi i velutoliedi i vo, Aitoi mogitana tamadi yana nuanua i 'idewai?” Yana velutoli i tutuli i vo, Tulaina.” Iesu i vonedi i vo, A vona mogitana 'waimie, takesi tolaugogona vivinagodi wata vevine toalagogona ma'itufa i lukuluku Yaubada yana 'Aila'a 'waineye we'e 'omi voke kebu. 
Tomotoganidi nagami tosakona siwe i nuaviladi kwamananina tulaina bani'odi, Tamada yana nuanua i 'idewadi, we'e 'omi kwamana bwasiona yana sauluva 'wa salai. Ioni Tobafitaiso i mai Yaubada yana 'eda'eda tonovidi i vemiga, 'wa nogayenimo siwe kebu 'wa da 'idewadi. Tomotoganidi yadi sauluva sakoidi ma yadi vetumagana i nuaviladi Yaubada yana nuanua i 'i'idewadi, we'e 'omi yadi nuavilana 'wa 'iseni siwe kebu 'wa da vo 'a na nuavilama.” 
Wata to'edakumetanidi 'waidie Iesu i vona i vo, De'e tamu vona-awatabai. Tamu tomogo kalefa talagina i bakuli wata i kalieni. Vuagina 'ana 'eba vatanitani i 'idewai wata kileu i didigi, tabwaneye 'eba lu'atu'ai i yogoni. Mulieta tomotoga 'ifwaidi nimadie i yatoi i na 'isave'avini, nika i tauya i nago mali 'awalaweye. 
Kalefa yana kumaga 'ana tutuya i le'wa, tonibakula yana tofolovavo i vonedi i nago yana bakula 'ana to'isave'avinavo 'waidie, vuaga 'ifwaidi i na miedi faifaina. 
Siwe to'isave'avinanidi tofolovavo i 'ive'avinidi, tamu i nikeimo, tamu i nikei i wafa wata tamu i lukileuya i wafa. 
Mulieta tonibakulanina tofolovavo fuedi i vetunedi wata bani'odi i munegidi. 
'Eba ve'a'avaotoga taunina natuna i vetunei i vona i vo, De'e natuku, i na ve'ililibuyeni.’ 
Siwe tutuyanina to'isave'avinanidi i 'iseni i mimai 'aise'avadi i vo, No'o tonibakula natuna, bola nani matatabuna i na 'ewadi i na veimeyedi. 'Wa maia ta na luvewafai bega naninidi ta na 'ewadi.’ 
Bega i 'ive'avini i taweni i obu kalimulie, bei i luvewafai.” 
Iesu me Diu to'edakumetavo i velutoliedi i vo, 'Wa da nuani, tutuyanina tonibakula i na maiga, to'isave'avinanidi bani'odi i na munegidi?” 
Yana velutoli i tutuli i vo, 'A nuani tosakonanidi i na nikedi i na wafa, mulieta tomotoga 'ifwaidi i na vonedi i na veto'isave'avina bega tutuyanina vuaga i na kumakumaga i na 'a'anivelenedi 'waineye.” 
Nika Iesu tamu vona-samula Yaubada yana Buki 'wainega i veifufuyeni 'waidie, tomotoga Yaubada 'ana Venua'ivina i na baileniga faifaina. I vo, 'Omi 'wa da vo de'e vonanina kebu 'wa da lu'iawawaiga i vo, To'aiyogonavo folova tamu i 'iseni siwe i baileni, tutuya de'e i ve'unututuyeni. 'Auvea taunina i 'idewai, 'ana 'isa 'waideye 'eba nua'ewa.’” 
Wata Iesu i vonedi i vo, 'Omi me Diu 'wa miamia Yaubada yana 'Aila'a nageneye siwe 'awaie i na bailemi, yana vetoveimea i na 'ewai 'waimiega ma'itufa mali tomotoga 'asa'aiana yana 'Aila'a i na veveimeyedi, kumanidiavo yana nuanua i na veve'ililibuyeni 'wa da vo i da vuavuaga-dewa. 
Egavo i na tayaidi i na be'u folovanina tabwaneye i na tudabedabedi, wata 'ai'edi folovanina i na 'anifoia tomotoga tabwadie i na tukudakudadi.” 
Tovelomu yadi to'edakumetavo wata Diu totafalolo Falisi Iesu yana vona i nogai i 'asetai 'adi vona-awatabai, taunidi bani'odi to'aiyogonanidi wata to'isave'avinavo sakoidi. 
Igodi nuanuadi i da 'ive'avini siwe tomotoga i kololoyedi fai i vo, Taunina tamu Yaubada yana tolu'ivona.” 
