﻿PSALMS.
139.
SOMOL, ga be guy lanin’ug, ma ga manangeg. 
Ga manang urngin e tin ni gu ma rin’; ra mpar u urel ma ba tamilangan’um u urngin e tin ni gu be leamnag. 
Ra gu be maruwel ara gu be toffan, ma ga be guyeg; ga manang urngin e ngongol rog. 
Ni mus nra dawor gog ban’en ma ga manang e tin bay gog. 
Ya ka mon’eg nga longob; ga be yoror rog. 
Rogon nib tamilangan’um rog e dabiyag ni nge taw lanin’ug ngay; kayigi to’ar u puluwog ndabiyag ni nge tamilangan’ug riy. 
Uw e rayag ni gu wan ngay nge yog ni gu mil rom? U uw e rayag ni gu wan ngay nda mmoy riy? 
Ra gu wan nga tharmiy, ma ga bay riy; ma ra gu wan gu pageg nga but’ u lan e fayleng ko pi’in karm’ad, ma ga bay u rom. 
Fa’anra gu changeg nggu wan nga wuru’ i lan e ngek, ara gu wan gu par ko gin nth’abi orel ni bay u lan e ngal, 
ma ga bay u rom ni ngam pow’iyeg, ma ga bay u rom ni ngam ayuwegneg. 
Ra gu non ngak e lumor ni nge mithegeg, ara pig e tamilang nib cholngobiyeg nge ngal’ ni nep’, 
ma mus ko lumor ni gathi lumor u puluwom, ma nep’ e ba tamilang u puluwom ni bod e rran. Lumor nge tamilang e ta’reb rogon u puluwom. 
Gubin yang rog ni gur e msunumiy; i gur e mu chamiyeg u yal rok e chitinag. 
Gu be pining e sorok ngom, ya gur e ngan rus ngom; urngin e tin ga ma rin’ e dabiyag ni nge tamilangan’uy riy, ma rib fel’. Gu manang u lan ngorongoreg ni polo’. 
Um guy e yil rog ni be sum, nge rogon ni un chamey ni bfel’ rogon u yal rok e chitinag nnap’an ni gu be ilal u rom ndariy be’ ni be guyeg. ma gur e gamanang ni gu bay u rom — 
dawor ni gargelegeg ma ga be guyeg. Pi rran ni kam sunumiy ni fan ngog e gubin ni go’ bay u lan e birom e babyor u m’on ndawori tabab reb e pi rran nem. 
A Got, rib mo’maw’ ni nggu nang fan e leam rom; ya pire’ ni bay! 
Ra nggu the’eg ma pire’ ko yan’. Ra gu od, ma ku gu bay rom. 
A Got, kari gum’ ni bochan ni manga yugu mu thang e pogofan rok e pi’in kireb! Ku gum’ ni bochan ni manga yigi pageg e pi girdi’ nma mathang pogofan! 
Yad be yog bogi n’en nib kireb nib togopluw ngom; ma yad be yog e thin nib kireb nib togopluw nga fithingam. 
A SOMOL, ri gub fanenikay e pi’in yad be fanenikayem! Rib m’ay fan u wun’ug e pi’in yad be togopluw ngom! 
Fanenikan rog ngorad e ke yan i mus nga rogon; gu be tayrad ni yad e pi to’ogor rog. 
Got, mu guy lanin’ug ngam nang; mu sikeng nigeg ngam nang e leam rog. 
Ma gguy ko bay e sabanban riy fa dariy, ma ga pow’iyeg u daken fa bin dabi m’ay e kanawo’. 
