﻿PSALMS.
2.
Mangfan nike puruy’ e pi nam ni ngar togopluwgad? Mangfan ni yad be makath nib m’ay fan? 
Pi pilung rorad e kar togopluwgad, ma pi’in yad be gagiyeg nagrad e kar mu’ulunggad yad be makath nib togopluw ngak SOMOL nge fare pilung ni Got e mel’eg. 
Be lungurad, “Marod, ngad chuwgad u tan e gagiyeg rorow, marod, ngad pithiged gadad u tan pa’ row.” 
I SOMOL e bay u tagil’ u tharmiy ni be minmin ngorad ma be moningnag e yochi makath rorad. 
Ra damumuw nge ginangrad, me k’aring e marus ngorad ko damumuw rok. 
Ke ga’ar, “Kug tay e pilung rog nga daken yu Zion, ni aram fare burey rog nib thothup.” 
Me ga’ar fare pilung, “Nggu weliy ngan nang e tin keyog SOMOL. Ke ga’ar SOMOL ngog, ‘I gur fakag, daba’ e kug mang chitamam. 
Mu ning ngog, mu gu pi’ urngin e nam ngom; ma re fayleng ney ni polo’ e bayi mil suwon ngom. 
Bay mu gagiyeg nagrad nga pa’am nib wasey; bay mu bilbiligrad nnochiyang ni bod ba th’ib ni but’.’” 
Gimed e pi pilung, mmotoyilgad ko re thin ni ba’aray nib ginaeng ngomed, gimed pi tagagiyeg ko fayleng, thingar mu nanged e pi thin ni ba’aray: 
Mu pigpiggad ngak SOMOL u fithik’ e marus; mu t’on gad, 
mi gimed siro’ ngak; ya ra danga’ ma ra puw e damumuw rok, mi gimed yim’ nib tomgin. Ba felan’ urngin e pi’in yad ma yan ngak SOMOL ni nge yororiyrad! 
