﻿JOB.
19.
Mang ni gimed be gafgow nigeg ko thin ni gimed be yog ngog? 
Dawor mtalgad i yog e thin nib kireb ngog, ma damur tamra’gad ni gimed be kirebnag lanin’ug. 
Fa’an gomanga riyul’ ni kug ngongliy e kireb, ma be mang e ra rin’ ngomed? 
Gimed be finey ni gimed bfel’ ngog, ma kam fineyed ni gafgow nike yib ngog e be micheg nriyul’ ni kug ngongliy e kireb. 
Damur guyed ni Got e ir e ke rin’ e ren’ey ngog? Ke tay e wup ni nggu aw ngay nge koleg. 
Ku gu tolulnag nike gafgow nigeg, ma dariy be’ ni fulweg lungug; ku gu tolul ngalang, machane dariy ban’en nike yal’uw. 
Ke ning Got e kanawo’, ndabkiyag ni nggu thumur riy; ke mithag e birog e kanawo’ u fithik’ e lumor. 
Tirog ban’en ni immoy ni pire’ e ke fek rog ni gubin, ma ke kirebnag thig. 
Ke pirdi’iy gubin yang u dowag. Ma pagan’ rog e ke pug lik’ngin ngalang ke pageg ni nggu mororoy nggum’. 
Got e ke damumuw ngog ke togopluw ngog nib gel merin; ke teg ni gowa gag e bin th’abi ga’ e to’ogor rok. 
Ke l’oeg e pi salthaw rok ni ngar chamgad ngog; kar kired luwrad nib liyeg e tent rog ni ngar koled gag. 
Got e ke pingeg gathon e tabnaw rog ka ra dabuyedgag; pi’in yad manangeg e ke par ni gowa der nanged gag; 
girdi’ rog nge pi tafager rog e dakurmoyed. 
Ma pi’in urbad nga tafnag e kar paged talig; ma pi ppin nma ayuweg e maruwel u tabinaw rog e kar pired ni susun e dar nanged gag ni gowa gu be’ u bang. 
Ra gu pining reb e tapigpig rog ni pumo’on ma dabi non, ni mus ko ngiyal’ ni gu be wenig ngak ni nge ayuwegneg. 
Le’engig e dabkiyag ni par nga bon langag, ma pi walageg ni pumo’on e der chugur bagayad ngog. 
Pi’in bitir e yad be darifan nigeg ma yad ra guyeg miyad minmin. 
Pi’in nri gamad ba pach e yad be changar ngog ni kar sonogorgad; pi’in nri yad ba t’uf rog e kar togopluwgad ngog. 
Kug par ni go’ yil nge biyach; be chugur ni nggum’. 
Gimed e tafager rog! Mu runguyed gag! Ya ke gad Got pa’ ngog kug aw nga but’. 
Mang ni ngar mu gafgow niged gag ni bod nike rin’ Got ngog? Dawori gaman e gafgow ni kam ted ngog? 
Ku gum’ ni bochan ni yigi par u wan’ be’ e pi thin rog ney, nge yoloy ngalan ba kaen e babyor! 
Ara ker nga daken e malang, nge yoloy nge par ndabki chuw. 
Machane gu manang ni bay be’ u tharmiy ni bay yib u tomur nge ayuwegneg. 
Yugu ra longuy e liliy e ren’en ndowag ney nge mogothgoth, ma ri gu ra guy Got ni ku gu bay u lan e re dogur ney. 
Nap’an ni gu ra guy nga owcheg, ma be’ ni gamow manangmow. Ke mulan’ug ya ke lungumed, 
“Urrogon ma gadad gafgownag?” Ka mu gayed e tawey riy ni ngam gafgow niged gag. 
Machane chiney e ngam tamdaggad ko saydon, ni saydon nma fek fare damumuw rok Got i yib ni gechig ko denen, ni fan e ngam nanged ni bay be’ nma pufthin. 
