﻿1 Kronicles.
6.
Dalip e pumo’on ni fak Levi: Gershon, Kohath, nge Merari. 
Ma aningeg e pumo’on ni fak Kohath: Amram, Izhar, Hebron, nge Uzziel. 
L’agruw e pumo’on ni fak Amram: Aron nge Moses, nge ta’reb e bpin ni Miriam. Aningeg e pumo’on ni fak Aron: Nadab, Abihu, Eleazar, nge Ithamar. 
Ba’aray e pi’in owchen Eleazar u reb e mfen ngu reb: Finehas, Abishua, 
Bukki, Uzzi, 
Zerahiah, Merayoth, 
Amariah, Ahitub, 
Zadok, Ahimaaz, 
Azariah, Johanan, 
Azariah (facha’ ni i pigpig u lan fare Tempel nu Jerusalem ni toy Solomon ni Pilung), 
Amariah, Ahitub, 
Zadok, Shallum, 
Hilkiah, Azariah, 
Serayah, Jehozadak. 
I Nebukadnezzar ni Pilung e pi’ Jehozadak ni nge kalbus u reb e nam, nib mu’un boch e girdi’ nu Judah ngu Jerusalem ngak nike pi’rad SOMOL ni ngar kalbusgad u reb e nam. 
Dalip e pumo’on ni fak Levi ni aram Gershon, Kohath, nge Merari. 
Ma ku ra bagyad miki immoy pifak ni pumo’on. I Gershon e ir e chitamngin Libni nge Shimei; 
me Kohath e chitamngin Amram, Izhar, Hebron, nge Uzziel; 
me Merari e chitamngin Mahli nge Mushi. 
Ba’aray e pi’in owchen Gershon u reb e mfen ngu reb: Libni, Jahath, Zimmah, 
Joah, Iddo, Zerah, Jeatherai. 
Ba’aray e pi’in owchen Kohath u reb e mfen ngu reb: Amminadab, Korah, Assir, 
Elkanah, Ebiasaf, Assir, 
Tahath, Uriel, Uzziah, Shaul. 
Me Elkanah e l’agruw e pumo’on ni fak, i Amasai nge Ahimoth. 
Ba’aray e pi’in owchen Ahimoth u reb e mfen ngu reb: Elkanah, Zofai, Nahath, 
Eliab, Jeroham, Elkanah. 
Me Samuel e l’agruw e pumo’on ni fak, i Joel e ba nganni’, me Abijah e bbitir. 
Ba’aray e pi’in owchen Merari u reb e mfen ngu reb: Mahli, Libni, Shimei, Uzzah, 
Shimea, Haggiah, Asayah. 
Ba’aray e pi pumo’on ni tayrad David ni Pilung ni nge milfan e musik ngorad u Jerusalem ko fa gin tagil’ e liyor u tomuren ni kan fek fare Kahol ko M’ag e ngaram. 
U ra thilthilgad ko tang ni yad ma yin’ u mit fare Tent u p’eowchen SOMOL, u m’on ndawori toy Solomon ni Pilung fare Tempel. 
Ba’aray e pi’in owchen e pi tabnaw ni ur manged ga’ ko tang: Fare ke girdi’ rok Kohath: I Heman nib mo’on ni fak Joel e ir e i gafaliy e bin m’on e ulung ko tang. Gathon e tabnaw rok Heman ni tabab rok nge yan nga tomur nge mada’ ngak Jakob ni bod ni ba’aray: Heman, Joel, Samuel, 
Elkanah, Jeroham, Eliel, Toah, 
Zuf, Elkanah, Mahath, Amasai, 
Elkanah, Joel, Azariah, Zefaniah, 
Tahath, Assir, Ebiasaf, Korah, 
Izhar, Kohath, Levi, Jakob. 
Asaf e gafaliy e bin l’agruw e ulung ko tang. Gathon e tabnaw rok Asaf ni tabab rok me yan nga tomur nge mada’ ngak Levi e bod ni ba’aray: Asaf, Berekiah, Shimea, 
Maikal, Baaseyiah, Malkijah, 
Ethni, Zerah, Adaiah, 
Ethan, Zimmah, Shimei, 
Jahath, Gershon, Levi. 
I Ethan ni be’ ko fare ke girdi’ rok Merari e ir e i gafaliy e bin dalip e ulung ko tang. Gathon e tabnaw rok Ethan ni tabab rok nge yan nga tomur nge mada’ ngak Levi e bod ni ba’aray: Ethan, Kishi, Abdi, Malluk, 
Hashabiah, Amaziah, Hilkiah, 
Amzi, Bani, Shemer, 
Mahli, Mushi, Merari, Levi. 
Boch piyu Levi e ni pi’ ngorad urngin e tin kabay e maruwel u tagil’ e liyor. 
I Aron nge pi’in owchen e ur pi’ed fapi maligach ni incense nge pi maligach ni yibe urfiy u daken e altar. Yad e ba milfan ngorad urngin e liyor ni yima rin’ u langgin fa Gin Th’abi Thothup, nge fapi maligach ni man’ag Got fan e denen rok yu Israel riy. Ur rin’ed urngin e pin’ey ni bod rogon ni motochiyelnag Moses ni fare tapigpig rok Got. 
Ba’aray e pi’in owchen Aron: Eleazar, Finehas, Abishua, 
Bukki, Uzzi, Zerahiah, 
Meraioth, Amariah, Ahitub, 
Zadok, Ahimaaz. 
Ba’aray e re gi binaw nni pi’ ngak e pi’in owchen Aron ko fare ke girdi’ rok Kohath. Yad e som’on nni pi’ taferad ko fa gi but’ nni pi’ ko ganong rok Levi. 
Aram e ba mu’un yu Hebron ngay ni bay u lan e nug nu Judah nge yungi binaw nib liyeg ntagil’ e chugol gamanman. 
Machane fa yungi flang nge fa yochi binaw nib mu’un ko fare binaw e ni pi’ ngak Kaleb, nib mo’on ni fak Jefunneh. 
Ma yochin ba’aray e binaw e ni pi’ ngak e pi’in owchen Aron: Hebron e bbinaw ni tagil’ e ayuw ko mathliyab, nge Jattir, nge yochi binaw nu Libnah, Eshtemoa, Hilen, Debir, Ashan, nge Beth Shemesh, nib mu’un e yungi binaw ngay ntagil’ e chugol gamanman. 
Mu lan fa gin tafen e Benjamin e ni pi’ e tin ba’aray e binaw riy ngorad nib mu’un yungi flang ngay ntagil’ e chugol gamanman: Geba, Alemeth, ngu Anathoth. Ma aram me yan i gaman e ragag nge dalip e yochi binaw ni fan ngak urngin e pi tabnaw rorad ni ngar pired riy. 
Pow nra girngiyed e duwgil riy, ni ngan pi’ ragag e yochi binaw ni bay u lan e gin tafen e Ba’ ni Ngal e Manasseh ngak fare ke girdi’ rok Kohath, ni reb e tabnaw nge reb. 
Fare ke girdi’ rok Gershon, nreb e tabnaw nge reb e ni pi’ ragag nge dalip e yochi binaw nu lan fa yungin tafen Issakar, Asher, Naftali, nge Ba’ ni Ngek e Manasseh u lan yu Bashan. 
Ma ku aram rogon nni pi’ ragag nge l’agruw e yochi binaw nu lan e yungin tafen Ruben, Gad, nge Zebulun ngak fare ke girdi’ rok Merari, nreb e tabnaw nge reb. 
Aray rogon ni pi’ e girdi’ nu Israel e yochi binaw ko Levi ni ngar pired riy, nib mu’un yungi binaw ngay ntagil’ e chugol gamanman nib liyeg e pi yochi binaw nem. ( 
Pi yochi binaw nu lan e yungin tafen Judah, Simeon, nge Benjamin, ni kafin ni mu’ i yog fithingarad e kun pi’ ni rogon ni duwgil ko pow nni girengiy.) 
Boch fapi tabnaw ko fare ke girdi’ rok Kahath e kan pi’ ngay e yochi binaw nge yungin tagil’ e chugol gamanman u lan fa gin tafen Efraim: 
Shekem, e reb e binaw ntagil’ e ayuw ko mathliyab ni bay u fithik’ e burey nu Efraim, Gezer, 
Jokmeam, Beth Horon, 
Aijalon, nge Gath Rimmon. 
Mu lan fare gin nib milsuwon ko Ba’ ni Ngal e Manasseh e ni pi’ e gali binaw ni ba’aray riy ngorad, yu Aner ngu Bileam nib mu’un ngay e yungi binaw riy ntagil’ e chugol gamanman. 
Pi tabnaw ko fare ke girdi’ rok Gershon e ni pi’ e yochi binaw ni ba’aray ngorad, nib mu’un ngay e yungi binaw riy ntagil’ e chugol gamanman: U lan fa gin tafen e Ba’ ni Ngek e Manasseh: Golan u lan yu Bashan, ngu Ashtaroth. 
U lan fa gin tafen Issachar: yu Kedesh, Daberath, 
Ramoth, ngu Anem. 
U lan fa gin tafen Asher: yu Mashal, Abdon, 
Hukok, ngu Rehob. 
U lan fa gin tafen Naftali: yu Kedesh u lan yu Galilee, Hammon, ngu Kiriathaim. 
Ma tin kabay e tabnaw ko fare ke girdi’ rok Merari e ni pi’ e tin ba’aray e binaw ngorad nib mu’un ngay e yungi binaw riy ntagil e chugol gamanman: U lan e gin tafen Zebulun: yu Rimmono ngu Tabor. 
U lan fa gin tafen Ruben, nge ba’ ni ngek ko fare lul’ nu Jordan u ba’nem e Jeriko: yu Bezer u daken e flang, Jahzah, 
Kedemoth, ngu Mefaath. 
U lan e gin tafen Gad: yu Ramoth u lan yu Gilead, Mahanaim, 
Heshbon, ngu Jazer. 
