﻿LUKA.
3.
Yákala mvula ya kumi yi tanu, ya luyalu lwa Khayisala Tibela. Hana Phosi Philatu kákala muyadi wa kinzunga kya Yuteya. Eloti yandi káyala ku Ngadidi, amana phangi wandi wa yakala Fidiphu ha kinzunga kya Kitudi yi Talakonititi. Lusanyasi kakala tala kinzunga kya Abileni. 
Ana yi Khayifu bákala bambuta ba banganga Nzambi. Ndinga ya Nzambi yáyukalakana kwena Yowani, mwana wa yakala wa Zakadiya, muna nganga. 
Yowani wáyandika kukangala kinzunga kina kyosu kyatalana yi nzadi Yolutani. Weka longa mbotika ya kusoba bikalulu kikuma kya ndoluka ya masumu. 
Bwosu buna bwásonama mu mukanda wa ndinga za mbikudi Yesaya: «Ndinga mutu wubati bekitila muna nganga: Yidikenu nzila ya Pfumu, musungikilenu tuma twa nzila bukheti! 
Beti dyosu dyazíkama yi mongu yi matunda byosu byasíkunuka; nzila zina za khonda zasúngama, nzila za mabulu baséngwadilaza. 
Amana mutu wosu kamóna luhulusu kahána Nzambi.» 
Mulumba-lumba wa batu bakala kwisa kwena Yowani ndangu kababotika. Kakala bazimbwala: «Mbandu ya masawa! Nati wulusongidi ni lwatina khabu za Nzambi zina zibati kwisa? 
Salenu mambu ma bukheti, hanga miti wuna wisi ha bibundu bya bukheti, mu kusongila ni benu, lusobini bikalulu byenu amana ludizonzilaku: "Betu, khaka wetu Bulahami." Mukuma, yiluzimbwadibwa ni Nzambi kalenda kitula matadi mama, bana ba Bulahami! 
Amana kisoka bela-bela kyenina mu kukwanga miti tuka ku misodi: miti wosu wuna wisiku buta bibundu bya bukheti bakwángawa, balosiwa phi ku mbawu.» 
Kibuka kimuhyudi: «Amana biki fwani twahanga?» 
Wubavutwadi: «Wuna wenina yi miledi myodi, kakabisa yi wuna kondi muledi, mutindu mosi phi yi mutu wuna wenina yi bima bya kudya, kahanga bwabuna.» 
Bakalaki ba phaku bísa ndangu babotama amana bahyudi kwena Yowani: «Mulongi, biki fwani twahanga?» 
Yowani wubavutwadini: «Lulutulaku thalu yina bázenga kikuma kya phaku.» 
Baphumbulu, bawu phi bamuhyudini: «Amana betu, biki twahánga?» Wubavutwadi mvutu: «Lubwotulaku mbongu kwena mutu, keti kumuhunina musamu, kaasi tambwasenu yi kyesi lufutu lwenu.» 
Batu boosu bakala hingila yi kivuvu kyosu, bekadihyula kuna mbundu ni ngatu Yowani, fwani kakala Masiya. 
Hanga Yowani wubazimbwadi bawu boosu: «Meni, yibati lubotika mu mamba; kaasi wuna wisi kwisa, wuphiti meni mu ngolu: yeku walunga mu kukutumuna misinga mya tsabatu zandi. Kalubotika mu Kitembu Kyatoma yi mu mbawu. 
Wusimbi muyungulu muna moku mandi ndangu kasola ngenza za bukheti yi tswala. Kawóngika ngenza za bukheti, wuswekiza muna khila, kaasi, tswala, kayókaza mu mbawu yina yisiku zima.» 
Yowani kakala basidingisa batu yi milongi mya hika mya lawu. 
Kaasi Yowani kakala mukaya Eloti, wuna wakala yala ku Ngadidi, kikuma wákwela Elodyadi, mukhetu wa phangi wandi wa yakala; mambu mambi ma lawu hika káhanga. 
Hanga Eloti wuyiki hika dyambu dimosi dya mbi lawu: wumukwatisi, mu boloku, Yowani. 
Batu ba lawu bakala botama, Yesu phi wábotama. Muna tangwa medina kakala lombila, zilu dyákanguka, 
amana Kitembu Kyatoma wákulumuka kwena yandi mu kimwesa mutu kya Phombu. Amana ndinga yimosi yituki ku zilu, yizonzi: «Ngeyi wenina Mwana wama watondama; mwena ngeyi mwena kyesi kyama.» 
Bela-bela yi mvula makumatatu Yesu káyandika kisalu kyandi. Bwosu bakala mubanzila, batu, ni mwana Yozefu; tala mulonga wa butuka dya bakhaka bandi: Hedi; 
Mathata, Lefi, Meleki, Yanayi, Yozefu, 
Matatyasi, Amosi, Nawumi, Esidi, Nakhayi, 
Mati, Matatyasi, Semeyini, Yoseki, Yota, 
Yowana, Lesa, Zolubabedi, Salasyedi, Nedi, 
Mediki, Adi, Kosami, Edimatami, Elu, 
Yesu, Edyezedi, Yodimi, Mathata, Lefi, 
Simeyoni, Yuta, Yozefu, Yonami, Edyakimi 
Meleya, Mena, Mathata, Natani, Tavidi, 
Yese, Obedi, Bozi, Sala, Nasoni, 
Aminatabi, Adimini, Adini, Hesiloni, Phelesi, Yuta, 
Yakobi, Kizaki, Bulahami, Tela, Nahodi, 
Seluki, Lewu, Pheleki, Hebedi, Syela, 
Kayinami, Alipakisati, Semi, Nowa, Lameki, 
Matusalemi, Enoki, Yaleti, Maleleyedi, Kayinami, 
Enosi, Seti, Atamu wuna kahanga Nzambi. 
