﻿Fe ká tina nun ha̰ Za̰a.
7.
Falɛ ku báyḭi lɛ, mì kɔ leɗ nzaapeɗ Ŋgɛrɛwṵruri ɓa niŋ, i ɗo siya ká tḭw zaɗ ká niŋ ká tusiri; i mgba zuuri ká niŋ ɓay haŋa zuu mbḭw mini kara ka kuu ká tusiri key ya nda̰w, ká tul bawda maambii ya nda̰w, ká tul puu mbḭw mini kara ya nda̰w pi. 
Rɔɓay, mì kɔ leɗ nzaapeɗ Ŋgɛrɛwṵru kḭ uru saa fi tiya ká zaɗ tḭ́i síe na, a mgba fe téke surum Ŋgɛrɛwṵru Nzoɓ Káw Ɓáy Kumnun ɗo nduo-ɛ. Ka ɗaa fe ɓáy bawda kusol-e ɓeleŋ ha̰ leɗ nzaapeɗ Ŋgɛrɛwṵruri ká niŋ ká Ŋgɛrɛwṵru ha ri hṵrusuo pola ɓay haŋa ri ɓǐɛke tusiri, rɔɔ ɓáy bawda maambii na mii: 
«Ì ɓíɛ fe mbḭw ká tusiri ya nda̰w, ká ɓil bawda maambii ya nda̰w, puuri ya nda̰w, kpṵru ha̰ ɓuru te surum ɗo nzáa pol nzoɓ peɗ Ŋgɛrɛwṵru naari na nda̰w rɔ!» 
Báyḭi lɛ, mì laa suy ruɔ nzoɓri ká i te surum Ŋgɛrɛwṵru ɗo nzaa pol-ri na: i ɓa isɔɗ sɔɗ duɔ zaɗ isɔɗ ɓáy síŋ niŋ pa̰rɛ niŋ (144.000) ká sa̰w ka̰ni leɗ Izarayɛlri riw bele. 
Nzoɓri ká sa̰w ka̰ni Zuda ɓa isɔɗ sɔɗ duɔ zaɗ duɔ falɛ siɗi (12.000). Nzoɓri ká sa̰w ka̰ni Rubɛn ɓa isɔɗ sɔɗ duɔ zaɗ duɔ falɛ siɗi (12.000) nda̰w. Nzoɓri ká sa̰w ka̰ni Gaɗ ɓa isɔɗ sɔɗ duɔ zaɗ duɔ falɛ siɗi (12.000) nda̰w. 
Nzoɓri ká sa̰w ka̰ni Azɛr ɓa isɔɗ sɔɗ duɔ zaɗ duɔ falɛ siɗi (12.000) nda̰w. Nzoɓri ká sa̰w ka̰ni Neftali ɓa isɔɗ sɔɗ duɔ zaɗ duɔ falɛ siɗi (12.000) nda̰w. Nzoɓri ká sa̰w ka̰ni Manase ɓa isɔɗ sɔɗ duɔ zaɗ duɔ falɛ siɗi (12.000) nda̰w. 
Nzoɓri ká sa̰w ka̰ni Simeo̰n ɓa isɔɗ sɔɗ duɔ zaɗ duɔ falɛ siɗi (12.000) nda̰w. Nzoɓri ká sa̰w ka̰ni Levi ɓa isɔɗ sɔɗ duɔ zaɗ duɔ falɛ siɗi (12.000) nda̰w. Nzoɓri ká sa̰w ka̰ni Isakar ɓa isɔɗ sɔɗ duɔ zaɗ duɔ falɛ siɗi (12.000) nda̰w. 
Nzoɓri ká sa̰w ka̰ni Zabulo̰n ɓa isɔɗ sɔɗ duɔ zaɗ duɔ falɛ siɗi (12.000) nda̰w. Nzoɓri ká sa̰w ka̰ni Zezeɓ ɓa isɔɗ sɔɗ duɔ zaɗ duɔ falɛ siɗi (12.000) nda̰w. Rɔɔ, nzoɓri ká sa̰w ka̰ni Bezamɛ ɓa isɔɗ sɔɗ duɔ zaɗ duɔ falɛ siɗi (12.000) nda̰w pi. 
Falɛ ku lɛ, mì kɔ-kɔ́m na rɔɓay, lɛ, mì kɔ ruɔ nzoɓri ŋgḭi ɓamba tasiri hɔ̰ŋɔ hɔ̰ŋɔ ká nzoɓ mbḭw mini kara maa ɓay kḭiŋa ri ya. Ɓa nzoɓri ká sa̰w puo ɓari ɓoɗ ɓoɗ bele, sa̰w ka̰ni ɓari ɓoɗ ɓoɗ bele nda̰w, sa̰w ɓari ɓoɗ ɓoɗ bele nda̰w, rɔɔ nzaa ɓay ɓari ɓoɗ ɓoɗ bele nda̰w pi. Ɓari na, i ɗo pol kariŋgaw mbay nda̰w, pol Vu Baɗu nda̰w; i nduo maagari pie ká pìe yul, a í mgba vay kandaw ká i fɛɗ ɗo nduo-ri gbiri gbiri. 
I guu fe mgba mgba ɓa siya ɓeleŋ mii: «Pam na uru saa luo Ŋgɛrɛwṵru naari ká kaw tul kariŋgaw mbay, uru saa luo Vu Baɗu nda̰w!» 
Báyḭi lɛ, leɗ nzaapeɗ Ŋgɛrɛwṵruri riw bele ká i kiri kariŋgaw mbay nda̰w, *ŋgɛrɛ tul peɗri nda̰w, rɔɔ fe ɗoko ɓáy kumnunri ká niŋ nda̰w na, i huku siri í ɗaa tul-ri tuŋ ká pol kariŋgaw mbay a í ruo Ŋgɛrɛwṵru 
mii: «Amɛm! Pisi nda̰w, riŋ ɗika nda̰w, nun nzɛm nda̰w, taambɔl nda̰w, ɗáa mbay nda̰w, ŋgɔŋɔ nda̰w, rɔɔ hṵrusuo nda̰w na, ɓa taa Ŋgɛrɛwṵru naari mbiimbam ɓáy mbiimbam ɓaŋguɔ! Amɛm! Ndaɗ ɓay haŋa ni ka ɗo munu na kḭ!» 
Báyḭi lɛ, nzoɓ mbḭw ká sakra ŋgɛrɛ tul peɗri na vbi mì ɓay mii: «Nzoɓ niri key ká i nduo maagari ɓa pie, pìe yul na, i ɓa nzoɓ veri, mase i uru saa zaɗ ha̰a lɛ?» 
Lɛɛ, mì yḭiŋra ɓáy ɓay ha̰ ni mii: «Mbay ɓi, ɓa ɓo ze mù kɔ.» Lɛɛ, ka ɓaa ha̰ mì mii: «Ɓa ɓari ká i tḭi saa ɓil bawda fe ɗáa nun tuɔ síe zu. I wàa maagari ɓari ɓáy sím Vu Baɗu na ha̰ ni puu kpa̰a kpa̰a. 
Sa̰wke mini ze, i ɗo pol kariŋgaw mbay Ŋgɛrɛwṵru í ruo ni suŋ ɓáy ɓisie ká ɓil hul ka̰ni ɓe. A lɛ, ɓe ká kaw tul kariŋgaw mbay na, a puɗ ri. 
Kɔn ti sɛkɛ ri mbǎa nda̰w, kɔn mbii ti sɛkɛ ri mbǎa nda̰w, síe ti zaŋ ri mbǎa nda̰w, zaɗ zaŋa taa bilu biluke kara ti zaŋ ri mbǎa nda̰w, 
ɓay ḭi lɛ, Vu Baɗu ká ɗo sikɗa kariŋgaw mbay na, a ɓá nzoɓ kɔ́rɔ ri, a nda faa pol-ri se zaɗ luka mbiiri ká ha ri kaw ɓáy kumnun ká ɗo ɓaŋguɔ na. Lɛɛ, Ŋgɛrɛwṵru a taa mbii nun-ri riw bele.» 
