﻿Eborori.
8.
Ì kɔ, má̰ra ɓayri riw bele ká ɓuru ɗo ɓáa ha rì na ze ɗo key: náa ɗori ɓáy kḭri *ŋgɛrɛnzoɓ fe poy luye mbḭw ká kaw nulue ká tunduo hoɗo Ŋgɛrɛwṵru, Nzoɓ Bawda Hṵrusuo ká kal tul feri riw Bele. 
Ká zaɗɛ ku na, ka ɓa ŋgɛrɛnzoɓ *fe poy a ɗaa peɗ ká ɓil hul ka̰ni taa tusuɛke ká Ŋgɛrɛwṵru ze ɗaa, ɓo ɓa nzoɓ ze ɗaa ya. 
Ŋgɛrɛnzoɓ fe poy luye ha̰a ha̰a lɛ, i ɗaa ni kaw ɓay haŋa ni ka mbi fe haŋa hɔyri ɓáy fe poyri ká nzoɓri víke na ha̰ Ŋgɛrɛwṵru. Ɓe mini ze, ŋgɛrɛnzoɓ fe poy naari na, ɗo nun haŋa ni ka ɗo ɓáy fe ká ɓay mbika a ha̰ nda̰w. 
Zaɗkaʼa ɗo tusiri key lɛ, ka ti ɓá *nzoɓ fe poy mbḭw ya, ɓay ḭi lɛ, nzoɓ fe poy ha̰wri ká tusiri key na, i ɗo ɗi ɗɔɗ ro, í mbi fe í ha̰ Ŋgɛrɛwṵru faa mbḭw munu ká *bol kusol *Moyze ɓaa. 
Peɗ ká nzoɓ fe poykeri ɗaa na, i ɗaa ká ɓil hul ka̰ni ká i ɗaa ɓáy huɔ; ɓa tem fe hɔy ká kiɛ hul ka̰ni taa tusuɛke ká ɗo nulue. Sa̰wke mini ze, zaɗka Moyze ɗo ɗi ya ɓay ɗáa hul ka̰nike na, Ŋgɛrɛwṵru baka ni mii: «Mu kɔ ɓáy kere nda̰w rɔ! Mu ɗaa ɓáy zaɗɛ ha̰ ni ka rìi kḭ ɓáy taa ha̰y ká mì kiɛ mù ɓáy lɔm ká tul kuo na ku.» 
Roo lɛ, timbɛɗɛ key na, peɗ ká Ŋgɛrɛwṵru ɗaa zuɔ nduo Zezu ɓa ŋgɛrɛnzoɓ fe poy na, mba peɗ ɗáa nzoɓ fe poyri ká pola na pavbaɗ. Ɓe Zezu na, ka ɓa nzoɓ káʼa ɗo sikɗa nzoɓri ɓáy Ŋgɛrɛwṵru, a ɗaa ha̰ kuni fie ká Ŋgɛrɛwṵru saa ziŋ nzoɓri na ndaɗ kal taa ha̰y káʼa saa ziŋ Moyze ká pola lew, ɓay ḭi lɛ, kuni fieke ku na, sa̰wke uru saa wáa ɓay Ŋgɛrɛwṵru ká ndaɗ kal taa pola. 
Titire kuni ká Ŋgɛrɛwṵru saa na, zaɗkaʼa maa ɔ́rɔ ɓie fe riw bele káʼa hii ɓay ɗáa na lɛ, Ŋgɛrɛwṵru se síe *sáka kuni kḭ mbǎa. 
Roo lɛ, ka kɔ fe ɗáa ka̰aya nzoɓ ɓeri na a yḭw ri mii: «Namri káʼa ví vuku na, mì sáka kuni fie ziŋ sa̰w ka̰ni Izarayɛl ɓáy sa̰w ka̰ni Zuda. 
Sáka kuni fieke ku na, ti ɗoko munu ká kuni ká mì saa ziŋ bulu ɓari ɓáy nam ká mì nda faa pol-ri mí tḭ́ike ri saa tusiri Eziɓte na ya. Ɓari na, i ɗo tul kuni ká mì saa ziŋ ri na ya, ɓe ze mì pɔ̌ŋke fal-ri giyak. 
Ì kɔ, kuni ká mì sáka ziŋ leɗ Izarayɛlri ɓáy namri káʼa ví vuku na ze ɗo key: Mì ɗáa bol kusol-iri ɗo ɓil kér ɓay ɓari, a mí vbie ɗo ɓil law-ri. Mì ɓá Ŋgɛrɛwṵru ɓari, a ɓari laa lɛ, i ɓá nzoɓ ɓiri. 
Nzoɓ mbḭw ká sakra ɓari ku na, ti fére kṵ-ɛ fe ká se tul-i ya; a nzoɓ mbḭw mini ti séke síe ɓáa ha̰ yṵ-ɛ mii, mu tuu Ŋgɛrɛmbay na, tiya, ɓay ḭi lɛ, tii saa tul vu leɗri kpṵru tḭi tul ŋgɛrɛri na, i tuuka mì riw bele ta-taŋ. 
Mì ndáka buma ká tul fe ka̰aya ɓari na ziŋ ri, a mí ker se tul feya̰a ɓari na mbǎa.» 
Ɓe ze, zaɗka Ŋgɛrɛwṵru ɓaa ɓay se tul sáka kuni fie na, ka ha̰ sáka kuni ká pola na vi ɓa tá̰w fe, a fe ká ɗi tá̰w ro na sɔ nzoɓ ya, a ɗo ɗi ya ɓay zékre. 
