﻿Eborori.
6.
Munu zu lɛ, náa séri nun naari ɓa pola, náa féreri fe a náa víri ɓa nzoɓri ká i ŋgɔŋ ká ɓil mbika law, ɓo náa káwri tul titire fe fére mbḭɛ ká se tul mbika law na ɓaŋguɔ ya. Fekeri na ɓa súo kér ɓay ká se tul peɗ ká mbi huɗ ha̰ nzoɓri ɓáy ɗáa law ɓo tul Ŋgɛrɛwṵru nda̰w, ɗáa tul nzoɓ nduo mbiiri ká ɓoɗ ɓoɗ ɓáy ɗáa nduo ɓo tul nzoɓ nda̰w, tḭ́i nzoɓri saa luɔ huɗ rɔɔ ɓáy kúŋ sal ɓay ká mgbaɗa na nda̰w pi. Náa ká̰yri fal-ɛ mbǎa, ɓo náa séri nun naari ɓa pola! 
Zaɗka Ŋgɛrɛwṵru ha̰ naari faa lɛ, ɓe ze ɓa fe ká náa ɗáari na zu. 
Ɓari nzoɓri ká Ŋgɛrɛwṵru ha̰ nun-ri taŋ ká tul ɓay ɓe nda̰w, í lie fe kere ká uru saa luo-ɛ nda̰w, í ya̰a Tem Law Pie ɓo ɓil law-ri nda̰w, í kɔ ndaɗi Ɓay Kere Ŋgɛrɛwṵru nda̰w, í kɔ hṵrusuo ká ɓil sew ká Ŋgɛrɛmbay a réke mbay nda̰w, rɔɔ í yḭ̀i í ɗo ɓil fe ɗáa ka̰aya ɓa kḭ taŋ kér se tul Ŋgɛrɛwṵru na, faa ká ɓay yḭ́iŋra ri ɓa kḭ ha ri suo kér ɓay ɓari na ti mbǎa, ɓay ḭi lɛ, ɓáy fe ɗáa ɓari na, rìi fe ká ɓari kḭ sùo-ri ze i ɓer Vu Ŋgɛrɛwṵru ɗo tul puu say huɗ ɓa kḭ, í tḭiri ni í ɗaa sahoy ɓo nun-ɛ ká nun ruɔ nzoɓri. 
Ì kɔ, wáa ká ya̰a mbiimbam ɓaŋguɔ, a lie lerekeri ɓay tul nzoɓ paa wáake na, Ŋgɛrɛwṵru sa̰m fe zuɔ ɗi. 
A roo lɛ, zaɗkaʼa lie ɓa ŋgatukru báwri ɓáy kurikuŋri hɔy lɛ, ɗo ɓa fe ká gɔr hɔy. Waka ya hɔy lɛ, ɓeɓi Ŋgɛrɛwṵru ɓo ɗi, a ɔ́rɔ ɓie lɛ, huu a sɛkɛ ɗi. 
Ɓaarì yṵ-iri ká mì kɔ rì ɓa nzoɓ nun-i, ze ɓuru ɓaa munu hɔy kara, ɓuru kɔ ta-taŋ mii, ì ɗo faa kere ká se ɓa zaɗ pam. 
Ŋgɛrɛwṵru na ɓa nzoɓ ká fe ɗáa ɓe ɗo ɓáy zaɗɛ ya na ya. Fe ɗáa ɓaarì ɓáy law ini ká ì kiɛ ɓay tul-e ɓáy peɗri ká ì ɗaa pola a í ɗaa rɔɓay ɓay tul yṵ ɓaarì na, ka ti yḭiŋra ya. 
Roo lɛ, ɓuru hii ɓay haŋa nzoɓ ha̰a ha̰a ká sakra ɓaarì na, ka nduɔ munu kpṵru tḭi ɔ́rɔ ɓie nam ɓay haŋa fe ká ì ɗaa law-rì te ɗi nzokɗo na, ka tḭi a ɗo pol-rì gbari gbari. 
Ɓuru hii ɓay haŋa rì vi ɓa nzoɓ layri ya, roo lɛ, ì ɗo munu ɓa nzoɓri ká i ɗaa law-ri te tul Ŋgɛrɛwṵru nzokɗo í íki law-rì ká ɗi, ɓo í zíŋke fe káʼa waa na. 
Pola lew na, zaɗka Ŋgɛrɛwṵru waa ɓay ziŋ bulu naari *Abaraham na, ka haa huɗ. Munu ká nzoɓ ká mba tul-e mba ɓay haŋa ni ka haa huɗ ɓáy riŋ-ɛ tiya na, ka haa huɗ ɓáy riŋ-ɛ ɓe kḭ sùo-ɛ. 
Ka ɓaa mii: «Ɓa tusuɛ kḭ, mì sá̰m fe zuɔ tul-a, a mí ha̰ vu bul-ari sìe ɓa pola pola.» 
Abaraham ɗaa law-ɛ ɓo tul ɓayke, a giyaŋ kekeke ɓáy íki law, ze a ziŋ fe ká Ŋgɛrɛwṵru waa ziŋ ni na. 
Zaɗka nzoɓri haa huɗ na, i haa ɓáy riŋ nzoɓ ká mba tul-ri ɓay kíɛke ɓay ɓáa ɓari na ɓa tusuɛ. A lɛ, huɗ ká i haa na, gbṵ nzaa má̰y ɓay ká ɗo sakra ɓari na. 
Ŋgɛrɛwṵru kara ɗaa faa mbḭw munu nda̰w ɓay tul nzoɓri káʼa waa ɓay haŋa ri fe kere na. Ka hii ɓay haŋa ri kɔ ta-taŋ mii, ka ti súo nzi-ɛ ya. Sa̰wke mini ze, ka haa huɗ ɓay tul fe káʼa waa ɓayke na. 
Ɓe ze, feri ɓa siɗi ɗo ɗi ku ká ti súo ya, ká Ŋgɛrɛwṵru kara ti kúŋ ɓay ká ɗi ya nda̰w. Ɓe ze, naari ká náa ziŋri zaɗ kɔ́rɔ sùo ká luo-ɛ na, náa ziŋri hṵrusuo ŋgḭ-ŋgḭi ɓay mgbaka ɗáa law nzokɗo te tul fe ká Ŋgɛrɛwṵru waa ɓay tul naari na ŋgɔ-ŋgɔŋ. 
Ɗáa law nzokɗo te tul fe ká Ŋgɛrɛwṵru waa na, kɔrɔ naari ɗo sikɗa ŋgɔ-ŋgɔŋ munu ɓa gasay puu ká sɔ hul ɗo sikɗa a ha̰ ni ŋgɔŋ kpaŋ kpaŋ. Ɗáa law te ɗi nzokɗoke ku na, ɗo munu rìi fe ká náa ɗori ɓil hul ka̰ni Ŋgɛrɛwṵru ká nulue a náa kalri gari ká kuŋ zaɗ na, a náa séri kpṵru tḭi luo-ɛ. 
Ɓa zaɗ ká Zezu rìi ɗi pola ha̰ naari ɓay tul naari. Ɓe na, ka vi ɓa *ŋgɛrɛnzoɓ fe poy luye ɓaŋguɔ faa mbḭw munu ká Mɛlkisedɛk. 
