﻿Eborori.
5.
Ŋgɛrɛnzoɓ *fe poy luye ha̰a ha̰a lɛ, i naa ni ká sakra nzoɓri ha̰ ni ɗo pol Ŋgɛrɛwṵru, ɓay ɗáa peɗ ɓay tul nzoɓri. Peɗ ɗáa ɓe ɓa mbika fe haŋa hɔy ɓáy fe poyri ká nzoɓri víke na ha̰ Ŋgɛrɛwṵru ɓay tul feya̰a nzoɓri. 
Ɓe na, ka maa ɓay kɔ́kɔ kér ɓay nzoɓri ká i ɗaa fe ka̰aya taŋ kɔ́kɔ sa̰wke, ɓáy ɓari ká i wṵru faa, ɓay ḭi lɛ, ka ɓa nzoɓ naysuo nda̰w. 
Munu káʼa ɗaa ka̰aya nda̰w na, ɗo nun haŋa ni ka ha̰ fe poy ha̰ Ŋgɛrɛwṵru ɓay tul feya̰a nzoɓri hɔy ya, roo lɛ, ɓay tul feya̰a ɓe kḭ sùo-ɛ nda̰w. 
Nzoɓ mbḭw mini ká mbi sùo-ɛ a ɗaa mbay ɓo tul-e sùo-ɛ ɓa ŋgɛrɛnzoɓ fe poy luye na tiya. Roo lɛ, nzoɓ vi ɓa ŋgɛrɛnzoɓ fe poy luye ɓáy faa ɗiw ká Ŋgɛrɛwṵru ɗi ni munu káʼa ɗíke *Aro̰n pola lew hɔy ɓa titire ŋgɛrɛnzoɓ fe poy. 
Ɗo faa mbḭw munu nda̰w, *Krisi na mbi sùo-ɛ, a ɗaa mbay ɓo tul-e sùo-ɛ ɓa ŋgɛrɛnzoɓ fe poy luye ya. Ɓa Ŋgɛrɛwṵru ze ɗi ni a ɓaa ta-taŋ ha̰ ni mii: «Ɓo na mù ɓa Vu-i; úru saa vuri key na mì ɓa Bǎa-ka.» 
Ká ɓil mbeɗe ká zaɗ kḭ kara, ka ɓaa ká ɗi nda̰w mii: «Ɓo na, mù ɓá nzoɓ fe poy ɓaŋguɔ kpaɗara faa mbḭw munu ká Mɛlkisedɛk.» 
Zaɗka Zezu ɗo tusiri key ɓáy na, ka ɗaa nzaa ɓay kere a ɗáake fe ɓeleŋ ɓáy mbii nun ha̰ Ŋgɛrɛwṵru a koɗ ni, ɓe káʼa maa ya̰aŋa ni ká ɓil huɗ. A lɛ, Ŋgɛrɛwṵru laa ɓay ɓe a hii ɗo ɗi, ɓay ḭi lɛ, ka ɗiŋ tul-e ká pol-e. 
Ze ka ɓa na Vu Ŋgɛrɛwṵru hɔy kara, ka fere ɗáa vu mbom ɓo tul Ŋgɛrɛwṵru ɓáy faa kɔ́kɔ sɛkɛ feri riw bele káʼa kɔ na. 
Falɛ káʼa maa, a ɗaa peɗ ɓe ɔ ɓáy zaɗɛ na, ka vi ɓa sa̰w pam ká ɗo ɓaŋguɔ ɓay tul nzoɓri riw bele ká i ɗaa vu mbom ɓo tul-e. 
A lɛ, Ŋgɛrɛwṵru ɗaa ni kaw ɓa ŋgɛrɛnzoɓ fe poy luye faa mbḭw munu ká Mɛlkisedɛk na. 
Ɓuru ɗo ɓáy ɓay ŋgḭ-ŋgḭi ká ɓay ɓáa se tul feri ká ɓuru ɓaa na ku. Roo lɛ, ɗo ŋgɔŋ ɓamba ɓay haŋa ɓuru tina sa̰wke ha rì laa, ɓay ḭi lɛ, ì vi ɓa nzoɓri ká láa ɓay ɓaarì sɛ ɓamba. 
Ɓaarì na, ì ví ɓa nzoɓ fére nzoɓri fe ɓa ɗḭ̌ɛ kḭ hɔy zu ze, ì yḭ̀i í se síe haŋa nzoɓ fere rì titire ɓay Ŋgɛrɛwṵru ká se tul mbika law ɓa kḭ rɔɓay ku. Ká ɓay haŋa rì re ŋgaw ká ŋgɔ-ŋgɔŋ ro zu lɛ, ì yḭ̀i í se síe á̰w wa̰n ɓa leɗ tul piyɛŋ ɓaŋguɔ kpaɗara ɓáy. 
Nzoɓ ká tɔŋ ɓa á̰w wa̰n ɓaŋguɔ na, ka ɓa leɗ ɓaŋguɔ; fe ká ɗo ɓáy zaɗɛ mase ɓáy zaɗɛ ya na, ka kɔ faa kɛ́lɛke ya. 
A nzoɓri ká i ŋgɔ-ŋgɔŋ laa lɛ, ŋgaw ŋgɔ́ŋke ze ɗo ɓay tul-ri. Ɓari na, ɓáy faa peɗ ɗáa ɓari ká tii ri ti ro na, i kɔ́ke faa kɛlɛ fe kere ɓáy fe ká ndaya. 
