﻿Mbeɗe ká i ɗaa ha̰ Eborori.
1.
Pola lew na, Ŋgɛrɛwṵru ɓaa ɓay ha̰ bulu naari faa ɓal ŋgḭ-ŋgḭi ɓáy gosikeri ɓoɗ ɓoɗ ɓáy faa nzoɓ ya̰aŋa ɓayri saa nzi-ɛ. 
Roo lɛ, ɓáy ɓil sewri ká náa káwri ɗi timbɛɗɛ key na, ka ɓaa ɓay ha̰ naari ɓáy faa Vi-e. Ɓáy faa Vi-e na ze ka ɗáake feri riw bele, a ɗaa ni kaw ɓa nzoɓ ká feri riw bele a zúɔ nduo-ɛ. 
Vi-eke ku na, ɗaa ha̰ náa kɔ́keri hṵrusuo riŋ ɗika Ŋgɛrɛwṵru ká ɓa hḭɛ zikiki. Ka ya̰a fe ɗáa Bi-ɛ Ŋgɛrɛwṵru na ɓáy zaɗɛ ŋgiɗ bele, a mgba sa̰w feri riw bele ha ri se-seɗ ɓáy faa hṵrusuo ɓay ká tḭi ká nzi-ɛ. Falɛ káʼa ɗaa ha̰ Ŋgɛrɛwṵru naa ɓay feya̰a ká tul nzoɓri ha ri *taŋ kaɗ kaɗ na, ka zɔl a vǎa kaw zaɗ káw riŋ ɗika ká nulue ká tunduo hoɗo Ŋgɛrɛwṵru, Nzoɓ Bawda Hṵrusuo. 
Ɓe ze, Ŋgɛrɛwṵru kǐɛke Vi-e ká vi ɓa bawda nzoɓ ká kal tul leɗ nzaapeɗri ká nulue ká riŋ-ɛ kara mba tul riŋ-ri pavbaɗ na. 
Tusuɛke lɛ, leɗ nzaapeɗ Ŋgɛrɛwṵru káʼa ɓaa ha̰ ni mii: «Ɓo na mù ɓa Vu-i; úru saa vuri key na mì ɓa Bǎa-ka» na, mbḭw tiya. A leɗ nzaapeɗ Ŋgɛrɛwṵru mbḭw káʼa ɓaa ɓay se tul-e mii: «Mì ɓá Bi-ɛ, a ɓe laa lɛ, a ɓá Vu-i» na, mbḭw tiya nda̰w. 
Roo lɛ, ɓáy nam ká Ŋgɛrɛwṵru ɗo píe titire leɗ ká keklek vi tusiri key na, ka ɓaa mii: «Ɓaarì leɗ nzaapeɗ ɓiri riw bele na, ì húku pol-e í pisi ni.» 
Ɓay ká Ŋgɛrɛwṵru ɓaa se tul leɗ nzaapeɗri ká nulue na ze ɗo key: «I ɓa nzoɓ peɗ ɓiri; mì píe ri munu ká zuu kuu, í ɗo munu ɓa rḭm huu ká sɛ.» 
A ɓay káʼa ɓaa ha̰ Vi-e na laa lɛ, ka ɓaa mii: «Ɓo na, mù ɓa Ŋgɛrɛwṵru. Réke mbay ɓo na ɗo mbiimbam ɓáy mbiimbam ɓaŋguɔ, mù re tul nzoɓ ɓori ɓáy zaɗɛ. 
Ɓo na, mù hii fe ɗáa ká ɗo ɓáy zaɗɛ, a mú tuŋ fe ɗáa ka̰aya ŋgereŋ. Sa̰wke mini ze, Ŋgɛrɛwṵru, Ŋgɛrɛwṵru ɓo na náa mù ɗo ɓoɗ, a ɗaa num suoriya zuɔ tul-a, a kɔ mù rii nun-ɛ mba tul bǎw seɗ ɓori.» 
Ka ɓaa ha̰ ni na rɔɓay mii: «Ŋgɛrɛmbay, zaɗka zaɗ ɗo hɔy raŋ raŋ ɓáy na, ɓa ɓo ze mù ɗaa tusiri, a mú ɗaa nulue ɓáy nduo-ɔ. 
Fekeri riw bele ku na, a ɓíɛ kpukɗu kpukɗu, i ɗi tá̰w riw bele munu ká gariri ɗǐke tá̰w. Roo lɛ, ɓo na, mù káw ɓaŋguɔ. 
Mù gḭm ri munu ká i gḭ̌mke maagari, a mú suo ri munu ká i súoke gari. Roo lɛ, ɓo na, mù ɗo munu ɓaŋguɔ; Nam ɓori ti ɔ́kɔ ya mgbaŋ.» 
Ka ɓaa ha̰ ni rɔɓay mii. «Mu ví káw tunduo hoɗo ɓi kpṵru maa ɓáy haŋa mì haw yṵm ká tul nzoɓ tul ŋga̰ni ɓori ha ri vi ɓa fe ɗáa ɓal-a zuɔ ɗi.» Ɓa ɓay káʼa ɓaa ha̰ leɗ nzaapeɗ Ŋgɛrɛwṵru mbḭw ya. 
A wa̰a, leɗ nzaapeɗ Ŋgɛrɛwṵruri na, i ɓa nzoɓ veri lɛ? Ɓari riw bele na, i ɓa temri ká i ɗaa peɗ ha̰ Ŋgɛrɛwṵru. Ka pie ri ɓay haŋa ri sɔ nzoɓri ká pam a ɗoko ɓay tul-ri. 
