﻿1 Timote.
3.
Zaɗka nzoɓ hii ɓay ndáka faa pol nzoɓ mbika lawri lɛ, ɓa peɗ kere kḭ ze law-ɛ mgba ɗi ku. Ɓay ká mì ɓaa key na, ɓa sùo ɓay. 
Nzoɓ ndáka faa pol nzoɓ mbika lawri na, a ɓá nzoɓ ká ɓay ti tul-e ya, a ɗaa feri riw bele ɓáy zaɗɛ. Káʼa ɓá nzoɓ ká ɗaa law-ɛ ɓo tul má̰y ɓe kḭ mbḭw hɔy taŋ nzáa má̰y kḭ nda̰w, a ɓa nzoɓ nzɛ́kɛ ɓáy sùo-ɛ, a ɗo tul ɓal-ɛ kekeke nda̰w, a ɓá nzoɓ ká ker fe rɔɔ a ɗaa nda̰w, a ɓá nzoɓ mgbaka varuri ɓáy kere, rɔɔ a maa ɓay fére nzoɓri fe nda̰w pi. 
Ka ti ɗáa koy him ya nda̰w, a ɓa nzoɓ tuɗ ɓay ya nda̰w, roo lɛ, a ɓá nzoɓ ká se lɔm nda̰w, a ɓa nzoɓ ɗáa nzoɓri zuɔ kḭ nda̰w, a ɓa nzoɓ taka kɔn lari ya nda̰w pi. 
Nzoɓ ndáka faa pol nzoɓ mbika lawri na, a máa ɓay mgbaka sa̰w nzoɓ ɓil hul ɓeri ɓáy kere nda̰w, rɔɔ vi-eri hɔy kara, i láa nzi-ɛ í ɗaa vu mbom ɓo tul-e ɓáy zaɗɛ nda̰w, 
ɓay ḭi lɛ, zaɗka nzoɓ kɔ faa mgbaka sa̰w nzoɓ ɓil hul ɓeri ya na wa̰a, a ɗáa mina nda̰w rɔɔ, a kɔ faa ndáka faa pol nzoɓ mbika lawri na lɛ woo? 
Ɓe na, ka ti ɓá nzoɓ mbika law fie ya nda̰w, ɓo munu ya lɛ, a úru a hew sùo-ɛ dukuku dukuku ha̰ Ŋgɛrɛwṵru kuŋ ɓay ɓo tul-e munu káʼa ɗáake ziŋ ŋgɛrɛtemndaya na. 
Ɓe na, nzoɓri ká i mbi law-ri ya hɔy kara, i ɓáa ɓay ɓe ɓáy kere. Ɓe nda̰w rɔɔ, nzoɓri ti ḭ́m ni ha̰ sahoy mgba ni ha̰ ni tǎake ndaw ŋgɛrɛtemndaya ya. 
Ɗo faa mbḭw munu nda̰w, nzoɓ sɔkɔ peɗ Ŋgɛrɛwṵruri na kara, i ɓá nzoɓri ká ɓay ti ɗoko tul-ri ya, a í ɗaa fe ɓáy zaɗɛ. I ɓá nzoɓ nzaa rúɔ ɓayri ya nda̰w, i ɗáa koy him ya nda̰w, rɔɔ í ɓa nzoɓ fe ɗáa rɔɗ rɔɗri ya nda̰w pi. 
I ɓá nzoɓri ká i ɗoko tul tusuɛ ɓayri ká se tul feri ká náa ɗáari law naari ɓo ɗi, ɓáy kér ɓay ká *taŋ kaɗ kaɗ ká uru saa ɓil wa̰ra law-ri. 
Nzoɓkeri ku na, ì bɛ́klɛ ri pola ta-taŋ í kɔ nda̰w rɔɔ, zaɗka ɓay ti tul-ri ya lɛ, ɓe rɔɔ ì ɗaa peɗke na ka zúɔ nduo-ri ɓáy. 
Ɓari nzoɓ sɔkɔ peɗ Ŋgɛrɛwṵruri ká i ɓa má̰yri na kara, i máa ɓay haŋa nzoɓri ɗaa vu mbom ɓo tul-ri nda̰w, í ɓa má̰y rá̰aŋa ra̰mri ya nda̰w, í ɓa nzoɓ nzɛ́kɛ ɓáy sùo-ri, a í ɗo tul ɓal-ri ká tul feri riw bele nda̰w pi. 
Nzoɓ sɔkɔ peɗ Ŋgɛrɛwṵruri na, i ɓá nzoɓri ká i ɗáa law-ri ɓo tul má̰y ɓari kḭ hɔy taŋ nzáa má̰y kḭ nda̰w, í maa ɓay mgbaka sa̰w vu ɓari ɓáy nzoɓ ɓil hul ɓari ɓáy kere nda̰w pi. 
Nzoɓ sɔkɔ peɗ Ŋgɛrɛwṵruri ká i ɗaa peɗ ɓari ɓáy faake na, nzoɓri ɗáa mbay ɓo tul-ri nda̰w, a mbika law ká ha̰ náa zǔɔkeri ziŋ Zezu *Krisi na, i ɓáa ɓayke ɓáy nun wa̰ra nzoɓ taŋ law tɔ́kɔke nda̰w pi. 
Ɓi na, mì ɗaa mbeɗe key na ha̰ mù, a mí ker mii ndḭi lɛ, mì séke vǎw ɓay vǎa zíŋ mù ɓáy. 
A ze, zaɗka mì se mí ziŋ mù vaa ya kara, mbeɗe key na a kíɛ mù faa séke simseɗ kere ká sakra nzoɓ mbika lawri. Ɓari riw bele na, i ɓa nzoɓ taa Ŋgɛrɛwṵru Nzoɓ Káw Ɓáy Kumnun. I ɗo munu ɓa tigba̰a hul ká tusuɛ ɓay ɓar sa̰w ká ɗi, a í ɓa gasay ká sɔ tusuɛ ɓay na. 
Ì kɔ, Zezu Krisi na ví ya̰a sùo ziŋ nzoɓ; Tem Law Pie kiɛ ni ɓa nzoɓ ká ɗo ɓáy zaɗɛ nzɛɗɛm; Leɗ nzaapeɗri ká nulue kɔ ni; Sa̰w nzoɓri riw bele laa ɓay ɓe; Nzoɓri ká tusiri key ɗaa law-ri ɓo tul-e; Ŋgɛrɛwṵru ha̰ ni kaw zaɗ káw riŋ ɗika. Ɓe ze ɓa tusuɛ ɓay ká ɗo zaɗ muni ká Ŋgɛrɛwṵru tina ha̰ ni ɗo zaɗ hie, ká náa ɗáari law naari ɓo ɗi. Tusuɛ ɓay key na ɓa bawda fe na kḭ! 
