﻿1 Timote.
2.
Titire ɗɛkrɛ lɛ, mì ɓaa ha̰ nzoɓ mbika lawri ɓay haŋa ri ɗaa nzaa ɓay kere ha̰ Ŋgɛrɛwṵru ɓaŋguɔ, ɓay vbikake ni feri nda̰w, ɓay kóɗ ni ɓay tul nzoɓri nda̰w, rɔɔ ɓay haŋa ni taambɔl ɓay tul nzoɓri riw bele, 
ɓay tul mbayri nda̰w, nzoɓ rewpuori riw bele nda̰w, ɓay haŋa ɓo ɗɛkɛkɛ ka ɗo puo naari ha̰ náa káwkeri ɓáy kere, a náa ɗáakeri mbay ka ɓo tul Ŋgɛrɛwṵru ɓáy faa simseɗ kere. 
Ɓe ze ɓa fe ká ndaɗ ɓamba, a rii law Ŋgɛrɛwṵru Nzoɓ Ya̰aŋa naari na. 
Ɓe na, ka hii ɓay haŋa nzoɓri riw bele ziŋ pam, a hii ɓay haŋa ri tuu tusuɛ ɓay nda̰w. 
Ì kɔ, tusuɛke lɛ, Ŋgɛrɛwṵru na mbḭw. Nzoɓ ká ɗo sikɗa ɓe ɓáy nzoɓri kara mbḭw nda̰w; nzoɓke na ze ɓa Zezu *Krisi. 
Ɓe na ka mbi sùo-ɛ ha̰ huɗ a púoke mbɔl tul nzoɓri riw bele, a tǐnake ri saa ɓil koy feya̰a. Ka ɗaa munu ɓáy nam ká Ŋgɛrɛwṵru tuu na, a kǐɛke nzoɓri ta-taŋ mii, Ŋgɛrɛwṵru hii ɓay ya̰aŋa nzoɓri riw bele. 
Sa̰wke mini ze, Ŋgɛrɛwṵru ɗáa mì kaw ɓa nzoɓ ka-káa ɓay ɓe, a mí ɓa nzoɓ ndáy nzaapeɗ ɓe ɓay fére nzoɓri ká i ɓa Ziɓ ya na feri riw bele ká náa ɗáari law naari ɓo ɗi nda̰w, a mí fere ri tusuɛ ɓay na nda̰w pi. Ɓay ká mì ɓaa key na ɓa sùo ɓay kḭ ɓo, ɓa kúɗ ɓay ya. 
Munu zu lɛ, zaɗri riw bele ká ì mbṵ kḭ ká ɗi na, mì hii ɓay haŋa wa̰rari ɗaa nzaa ɓay kere, í ǔrake nduo-ri ɓa siya ɓáy ɓil law-ri ká *taŋ kaɗ kaɗ taŋ law fá̰a nda̰w, taŋ rɔɗi nda̰w pi. 
A má̰yri laa lɛ, mì hii ɓay haŋa ri nduo gari ká ɓáy faake, í kǔɗke nun nzoɓ ya, a í ɓa nzoɓ fe ɗáa bayluri ya nda̰w. I ti ɓá nzoɓ mgbaka tul vá̰yta̰y vá̰yta̰y ya, i ti nzáa fe gamari munu ká ɓa fe suku ɓáy zawri ká ndṵy zḭriri zḭriri ká i ɗaa ɓáy lari lɔr ya nda̰w, rɔɔ gariri ká larike ŋgɔŋ kal tul-ri ya nda̰w pi. 
Roo lɛ, ndaɗi má̰y nzoɓ na ɓa peɗ ɗáa kere ɓe. Ɓe ze ɓa peɗ ɗáa má̰yri ká i kɔ sùo-ri ɓa nzoɓ hḭ́ɛ Ŋgɛrɛwṵru. 
Má̰yri ká i ɗo fére ri fe na, ndaɗ ɓay haŋa ri káw ɗɛkɛkɛ í ɗiŋ tul-ri ká pol nzoɓ ká ɗo fére ri fe na. 
Má̰yri na, mì ha̰ faa ha ri ɓay haŋa ri fére wa̰rari fe ya, a í re mbay ká tul-ri ya nda̰w. Roo lɛ, ndaɗ ɓay haŋa ri káw ɗɛkɛkɛ. 
Tusuɛke lɛ, Ŋgɛrɛwṵru ɗaa *Adam ze pola nda̰w rɔɔ a ɗaa *Ɛv tɔŋ ɗi ɓáy. 
Rɔɓay, ɓa Adam ze ŋgɛrɛtemndaya ula ni ya, roo lɛ, ɓa Ɛv ze ya̰a nzaa úla ŋgɛrɛtemndaya na, a wǎɗke tul *bol kusol Ŋgɛrɛwṵru. 
A ze munu hɔy kara, má̰yri na, i mboŋ nzoɓ, a lɛ, i zíŋ pam ká luo Ŋgɛrɛwṵru. Roo lɛ, ndaɗ ɓay haŋa ri geɗe tul mbika law ɓari nda̰w, í hii nzoɓri nda̰w, í ɗo ɓáy zaɗɛ nzɛɗɛm ká nun Ŋgɛrɛwṵru nda̰w, a í sìi sùo-ri ya nda̰w rɔ! 
