﻿Titire mbeɗe ká Pol ɗaa ha̰ nzoɓ mbika lawri ká Tesalonik.
1.
Ɓi Pol, rɔɔ Silas ɓáy Timote nda̰w na, ɓuru ɗaa mbeɗe key na ha rì ɓaarì nzoɓ mbika lawri ká ì mbṵ tul kḭ ká Tesalonik, ɓaarì ká ì zuɔ ziŋ Bǎa naari Ŋgɛrɛwṵru ɓáy Ŋgɛrɛmbay Zezu *Krisi. 
Ndaɗ ɓay haŋa law huoke ɓáy ɗɛkɛkɛ Ŋgɛrɛwṵru ɓáy Ŋgɛrɛmbay Zezu Krisi ka sáɗ zíŋ rì. 
Yṵ ɓururi, ɓuru ɗaa taambɔl ha̰ Ŋgɛrɛwṵru. Ɓa fe ká ɗo nun haŋa ɓuru ɗaa ɓay tul-rì ɓaŋguɔ a ɗo ɓáy zaɗɛ, ɓay ḭi lɛ, ì ɗaa law-rì ɓo tul Ŋgɛrɛwṵru ɓa pola pola, a ini ká ɓaarì mbḭw mbḭw ì mgba ziŋ nzoɓ ha̰wri na se ɓa pola pola. 
Sa̰wke mini ze, ɓuru kara ɓuru nda giri sùo ɓuru ɓay tul-rì ká sakra nzoɓ mbika law ha̰wri ká i mbṵ tul kḭ, a ɓúru ɓaa ha ri mii, ì mgba ŋgɔ-ŋgɔŋ í ɗaa law-rì ɓo tul Ŋgɛrɛwṵru ɓaŋguɔ ká ɓil fe ɗáa nun tuɔ síeri, ɓáy kɔ́kɔ sɛkɛ feri riw bele ká tḭi tul-rì na. 
Fe niri key na kiɛ ta-taŋ mii, fe ká Ŋgɛrɛwṵru mbi nzi-ɛ ká ɗi na ɗo ɓáy zaɗɛ, ɓay ḭi lɛ, fekeri ká ì sṵu law-rì ká ɗi na, ɗaa ha rì víke ɓa nzoɓri ká ì maa haŋa ni ka re mbay ká tul-rì. Ɓe ze ɓa fe ká ì kɔ sɛkɛ fe ɓayke. 
Ɓa tusuɛ, Ŋgɛrɛwṵru na a ɗáa fe ɓáy zaɗɛ: nzoɓri ká i ha rì kɔ sɛkɛ fe na, a yḭ́iŋra sɛkɛ feke ɗaa ri. 
A ɓaarì ká ì kɔ sɛkɛ fe na, kaʼa haŋa law-rì nda siri fṵɔ, ɓuru kara nda̰w, ɓáy nam ká Ŋgɛrɛmbay Zezu a yḭ́i saa nulue ɓáy leɗ nzaapeɗ ɓeri ká i ɓa nzoɓ hṵrusuo na. 
Kaʼa yḭ́i ká ɓil rḭm huu ká sɛ bilam bilam ɓay haŋa nzoɓri ká i tuu Ŋgɛrɛwṵru ya, ká i ɗaa vu mbom ɓo tul káa Ɓay Kere ká se tul Ŋgɛrɛmbay naari Zezu ya na, ha ri kɔ sɛkɛ fe maa ɓáy zaɗ fe ɗáa ɓari. 
Fe sɛkɛ káʼa tḭ́i tul-ri na, a ɓá ɓíɛ káʼa ɔ́-ɔkɔ ya ɓaŋguɔ. I ɗoko ɗi ɗi ziŋ Ŋgɛrɛmbay nda̰w, ziŋ hṵrusuo riŋ ɗika ɓe nda̰w 
ɓáy nam káʼa yḭ́i a vi ɓay haŋa ɓari riw bele ká i ɗaa law-ri ɓo tul-e a í ɓa taa ɓe na, i pisi ni a í gɔl riŋ mbay ɓe. Ɓaarì sùo-rì kḭ kara, ì ɗoko sakra nzoɓkeri ku na nda̰w, ɓay ḭi lɛ, káa ɓay ká ɓuru kaa ha rì na, ì ɗaa law-rì ɓo ɗi. 
Sa̰wke mini ze, ɓuru ɗaa nzaa ɓay kere ɓaŋguɔ ɓay tul-rì. Ɓuru vbi Ŋgɛrɛwṵru naari ɓay haŋa ni ka ha rì ma-maa ɓáy simseɗ káʼa ɗíke rì ɓay haŋa rì se na. Ɓuru vbi ni mii, ɓáy faa hṵrusuo-ɛ na, ka ha rì maa ɗáa fe kereri riw bele ká law-rì hii, ha̰ peɗri ká ì ɗaa ɓáy faa mbika law-rì na ka ɗo ɓáy zaɗɛ nzɛɗɛm. 
Ɓe nda̰w rɔɔ, ɓáy faa fe ɗáa ɓaarì na, ì ɗáake mbay ɓo tul Ŋgɛrɛmbay naari Zezu, a ɓe laa lɛ, a ɗáa mbay ɓo tul ɓaarì ká ì zuɔ ziŋ ni na. Fe niri key na, ɓa lere peɗ law kere Ŋgɛrɛwṵru naari ɓáy Ŋgɛrɛmbay Zezu *Krisi. 
