﻿Mbeɗe ká Pol ɗaa ha̰ nzoɓ mbika lawri ká Kolos.
1.
Ɓi Pol ká Ŋgɛrɛwṵru ha̰ mì ɓa nzoɓ ndáy nzaapeɗ Zezu *Krisi ɓáy law hiiya ɓe na, ɓúru yṵ-i Timote, 
ɓuru ɗaa mbeɗe key ha rì ɓaarì nzoɓ taa Ŋgɛrɛwṵruri ká ì kaw Kolos ká í ɓa yṵ ɓuru a í ɗo tul ɓay Zezu Krisi. Ndaɗ ɓay haŋa law huoke ɓáy ɗɛkɛkɛ taa Ŋgɛrɛwṵru, Bǎa naari ka sáɗ ziŋ rì. 
Ká ɓil nzaa ɓay kere ká ɓuru ɗaa ɓay tul-rì na, ɓuru ɗaa taambɔl ɓaŋguɔ ha̰ Ŋgɛrɛwṵru, Bǎa Ŋgɛrɛmbay naari Zezu *Krisi, 
ɓay ḭi lɛ, ɓuru laa soro ɓay law-rì ká ì ɗaa ɓo tul Zezu Krisi, ɓáy ini ká ì mgba ziŋ nzoɓ Ŋgɛrɛwṵruri riw bele na. 
Zaɗka tusuɛ ɓay ká ɓa Ɓay Kere tḭi luo-rì na, ɗaa ha rì tuu fe ká ì ɗaa law-rì te ɗi ká Ŋgɛrɛwṵru ɗaa ɗo nulue ɓay tul nzoɓ ɓeri na. Ɓe ze, mbika law ɓáy law ini ɓaarì na, ɓar sa̰w ká ɗi. 
Ɓa Ɓay Kereke ku na ze ya̰a zaɗ kpol kpol ká tusiri key, a lie lereke ɓáy zaɗ zaɗ riw bele munu káʼa ɗáake ká sakra ɓaarì ɓa ɗḭ̌ɛ hɔy ɓáy nam ká ì láake ɓay law kere Ŋgɛrɛwṵru ɓa titire ɗɛkrɛ a í tuu law kereke ta-taŋ na. 
Epafaras ká ɓa bǎw peɗ ɓuru ká ɓuru kɔ ni ɓa nzoɓ nun ɓuru na ze fere rì feke na ku. Ka ɗaa peɗ ɓay tul-rì munu ɓa nzoɓ peɗ Krisi ká ɗaa peɗ ɓe ɓáy zaɗɛ nzɛɗɛm. 
Ɓe na, ka ví lo soro ɓay ini ká Tem Law Pie ha rì na ha̰ ɓuru laa. 
Sa̰wke mini ze, ɓáy nam ká ɓuru láake soro ɓay ɓaarì na, ɓuru ɗaa nzaa ɓay kere ɓay tul-rì ɓúru ta̰a ya. Ɓuru koɗ Ŋgɛrɛwṵru ɓay haŋa ni ka ha rì nun nzɛm ɓáy fe kɔ́kɔ ɓáy faa Tem Law Pie, ɓo ha rì kɔ́ke law hiiya ɓe na ka táŋ kaɗ kaɗ. 
Ɓe nda̰w rɔɔ, ì máa ɓay séke simseɗ munu ká Ŋgɛrɛmbay hii í ɗáake feri ká rii law-ɛ ɓaŋguɔ. Ì líe lereke ɓáy kere ká ɓil feri riw bele ká ì ɗaa, a í tǔuke Ŋgɛrɛwṵru ɓa pola pola nda̰w. 
Ɓuru koɗ Ŋgɛrɛwṵru ɓay haŋa ni ka sɔ rì ɓáy hṵrusuo riŋ ɗika ɓe, ɓay haŋa ɓo ì sṵ̌uke law-rì ká ɓil feri riw bele, a í íkike law-rì. 
Ì ɗaa taambɔl ɓáy suoriya ha̰ Bǎa Ŋgɛrɛwṵru ká ɗaa ha rì ziŋ fe kereri káʼa ɗaa ɗo ɓil zaɗ taŋa ɓay tul nzoɓ ɓeri na mbḭw hɔy ziŋ ri. 
Ɓe na, ka tina naari saa ɓil hṵrusuo suŋ tilo, a ha̰ Vi-e káʼa kɔ ni ɓa nzoɓ nun-ɛ na re mbay ká tul naari. 
Ɓáy faa Vi-e na ze, ka tǐnake naari saa ɓil hṵrusuo feya̰a ká mgba naari ɓa koy, a nda buma ká tul feya̰a naari. 
Ŋgɛrɛwṵru ká nzoɓ kɔ ni ɓáy nun ya na, *Krisi ya̰a fe ɗáa ɓe ha̰ nzoɓ kɔ́ke ni. Krisi na ɓa titire nzoɓ ká ɗo pola ɗɛkrɛ rɔɔ, feri riw bele ɗo ɓáy, 
ɓay ḭi lɛ, ɓáy faa ɓe na ze, Ŋgɛrɛwṵru ɗáake feri riw bele ká nulue nda̰w, tusiri key nda̰w, feri ká nun kɔ nda̰w, feri ká nun kɔ ya hɔy kara nda̰w pi. Ka ɗaa wṵruri ká i kaw tul kariŋgaw mbay ɓari nda̰w, hṵrusuo ká kal tul hṵrusuo ha̰wri nda̰w, temri ká re mbay nda̰w, rɔɔ hṵrusuo ká re tul nzoɓri nda̰w pi. Ɓa tusuɛ kḭ, feri riw bele na ɗo ɓáy faa ɓe, a ɗo ɓa fe riŋ ɗika ɓe. 
Ɓe kḭ ze ka ɓa titire nzoɓ ká ɗo pola ɗɛkrɛ ká tul feri riw bele; taambɔl ɓe na ze feri ɗǒke ɓáy zaɗɛ zaɗɛ. 
Ɓe na, ka ɓa mbay tul nzoɓ mbika lawri ká i mbṵ tul kḭ riw bele, a ɓari laa lɛ, i ɗo munu ɓa sùo-ɛ. Ka ɓa sa̰w káw ɓáy kumnun; a ɓa titire nzoɓ ká tḭi saa sakra nzoɓ huɗeri, ɓay haŋa ɓo ka ɗo pola ɓa ŋgɛrɛ tul feri riw bele, 
ɓay ḭi lɛ, Ŋgɛrɛwṵru hii ɓay haŋa fe ɗáa ɓeri riw bele ká ɗo ɓil law-ɛ na, ka ɗaa puo ká ɓil law Vi-e. 
Rɔɓay, ɓáy faa ɓe na, ka hii ɓay haŋa feri riw bele na i zúɔ ziŋ ni. Ɓáy faa sím Vi-e ká uo ká tul puu say huɗ na, ka ɗaa ha̰ ɗɛkɛkɛ ɗǒke sakra ɓe ɓáy feri riw bele ká tusiri key nda̰w, nulue nda̰w pi. 
Ɓaarì hɔy kara, pola lew na ì ɗo fal kpaŋ Ŋgɛrɛwṵru. Ì ɓa nzoɓ tul ŋga̰ni ɓeri ɓay tul kér ɓay ɓaarì ká ndaya ká ha rì ɗáake feri ká ndaya na. 
A lɛ, timbɛɗɛ key na, ɓáy faa Vi-e ká pɔŋ sùo-ɛ ha̰ huɗ na, ka ɗaa ha rì zuɔ ziŋ ni, a ha rì ɗo pol-e ɓáy law ká *taŋ kaɗ kaɗ, taŋ ɛm nda̰w, rɔɔ ɓay kara ti tul-rì mbǎa nda̰w pi. 
A roo lɛ, ɗo ndaɗ ɓamba ɓay haŋa rì ɗo tul tusuɛ ɓay ká ɗo ɓil Ɓay Kere na, a í ɓár sa̰w ká ɗi. Fe ká ì ɗaa law-rì te ɗi nzokɗo ɓa ɗḭ̌ɛ ɓáy nam ká ì láake Ɓay Kereke na, ì ha̰ nzoɓ mbḭw mini kara ka ɗaa ha rì ɗo ɗi ɗi ká ɗi ya. Ɓay Kereke ku na, i ka-káake ha̰ nzoɓri riw bele ká tusiri key. Ɓe ze ɓi Pol, mì víke ɓa nzoɓ peɗke. 
Timbɛɗɛ key na, mì ɗaa suoriya ɓay tul sɛkɛ feri ká mì kɔ ɓay tul-rì. Munu ká *Krisi kɔ sɛkɛ fe na, ɓi sùo-i hɔy kara mì kɔ sɛkɛ fe ɓay tul nzoɓ mbika lawri ká i mbṵ tul kḭ riw bele ká í ɗo munu ɓa sùo Krisi na. Mì kɔ sɛkɛ fe ɓay tul-rì ɓay ɔ́rɔke ɓie sɛkɛ fe ká tɔ̀ŋ ká ɓil peɗ ɓe ká tusiri key. 
Ŋgɛrɛwṵru ha̰ mì vi ɓa koy peɗ nzoɓ mbika lawri maa ɓáy peɗ káʼa pɔŋ zuɔ nduo-i ɓay haŋa mì ɗaa ɓay tul ɓaarì ká ì ɓa Ziɓ ya na. Ka ha̰ mì ka-káa ɓay ká se tul Krisi na ɓáy zaɗɛ ŋgiɗ bele. 
Ɓayke ku na, ɗo zaɗ muni ɓa ɗḭ̌ɛ lew hɔy ha̰ nzoɓri kɔ ya wṵ̌m, a roo lɛ, timbɛɗɛ key na ka tina sa̰wke ɗo zaɗ hie ha̰ nzoɓ ɓeri kɔ *taŋ kaɗ kaɗ. 
Ŋgɛrɛwṵru hii ɓay ɗáa ha ri kɔ wa̰a, mina ze fe káʼa ɗaa ɗo zaɗ muni na ɓa bawda fe, a ndaɗ ɓamba ɓay tul sa̰w nzoɓri riw bele lɛ! Feke na ze ɗo key: Krisi ɗaa puo ká ɓil law-rì ha rì kɔ mii, riŋ ɗika ká Ŋgɛrɛwṵru ɗaa ɗo ɓay tul nzoɓ ɓeri na, ɓaarì ká ì ɓa Ziɓ ya na hɔy kara ì zíŋ nda̰w pi. 
Ɓe ze, ɓuru ka-káa Krisi na ha̰ nzoɓri riw bele; ɓuru baka ri a ɓúru fere ri mbḭw mbḭw ɓáy nun nzɛmri riw bele ká Ŋgɛrɛwṵru ha̰ ɓuru, ɓay haŋa nzoɓri mbḭw mbḭw riw bele na i ɗǒke pol Ŋgɛrɛwṵru munu ɓa nzoɓri ká i ŋgɔŋ ɓáy faa zúɔ ziŋ Krisi. 
Sa̰wke mini ze, mì ɗaa sùo-i taa tom, mí ru-ruy ɓáy bawda hṵrusuo ká Krisi ha̰ ni ɗaa peɗ ká ɓil naysuo-i. 
