﻿2 Kɔrɛ̰teri.
3.
A ku na wa̰a, ɓuru tii sa̰w ndáka giri sùo ɓuru ɓa kḭ nda̰w rɔɔ, ha rì kɔ́ke ɓuru ɓa tusuɛ *nzoɓ ndáy nzaapeɗri na lɛ woo? Mase, ndaɗ ɓay haŋa ɓuru ɗaa munu ká nzoɓ ha̰nɛri, a ɓúru séke luo-rì ɓáy mbeɗe ɓay nasi ɓuru, mase ɓuru ya̰a mbeɗe saa nduo-rì rɔɔ, ɓúru séke luo nzoɓ mbika law ha̰wri na lɛ woo? 
Ì kɔ, ɓaarì kḭ ze ì ɓa mbeɗe ɓay nasi ɓuru ká *Krisi vbie ɗo wa̰ra law ɓuru, ha̰ nzoɓri riw bele i kɔ, a í kḭi. 
Ɓa fe ká ɗo ta-taŋ. Ɓaarì na, ì ɓa mbeɗe ká Krisi kḭ sùo-ɛ vbie ɓáy faa peɗ káʼa ha̰ ɓuru ɗaa ká sakra ɓaarì. Ka vbie mbeɗeke ɓáy mbii vbie mbeɗe hɔy ya, roo lɛ, ka vbie ɓáy Tem Ŋgɛrɛwṵru, Nzoɓ Káw ɓáy Kumnun. Rɔɓay, ka vbie mbeɗeke na ɗo tḭ́i tisaw ya, roo lɛ, ka vbie ɗo ɓil law nzoɓ. 
Ɓuru na, ɓuru maa ɓay ɗáa peɗke na ku, ɓay ḭi lɛ, ɓuru ɗaa law ɓuru nzokɗo ɓo tul Ŋgɛrɛwṵru ɓáy faa Krisi. 
Peɗ ká ɓuru ɗaa na, ɓa peɗ ká ɓuru maa ɓay ɗáa ɓáy tul gaŋ sùo ɓuru ya, roo lɛ, hṵrusuo ɓuru uru saa luo Ŋgɛrɛwṵru. 
Ɓa ɓe kḭ ze, ka ɗaa ha̰ hṵrusuo ɓuru maa, a ha̰ ɓuru vi ɓa nzoɓ peɗ kuni fie káʼa saa ziŋ naari na. Kuni fie key na ɓa fe ká ɗo tul *bol kusol ká i vbie na hɔy ya, roo lɛ, ɓa fe ká ɗo tul Tem Ŋgɛrɛwṵru. Ì kɔ, bol kusol ká i vbie na hɔy kara vi ɓáy huɗ ha̰ nzoɓ, a Tem Ŋgɛrɛwṵru laa lɛ, ha̰ nzoɓ kaw ɓáy kumnun. 
Bol kusol ká Ŋgɛrɛwṵru kḭ sùo-ɛ vbie pola lew ɗo tḭ́i tisaw ha̰ *Moyze na, vi ɓáy riŋ ɗika a ndṵy zḭriri zḭriri. Ze riŋ ɗikake ti ɗoko ɓaŋguɔ ya hɔy kara, ɗaa ha̰ nzaa pol Moyze ndṵy ɓamba tasiri, a ha̰ leɗ Izarayɛlri maa ɓay geɗe kɔ́m kà̰a ɓa ɓaɗi ya. A bol kusol ká vi ɓáy huɗ ha̰ nzoɓri kḭ lɛ, ɗo ɓáy bawda riŋ ɗika ku ya rɔɔ, 
maa ɓay peɗ ɗáa Tem ká ha̰ nzoɓri kaw ɓáy kumnun ze, riŋ ɗikake a kál tul-e pavbaɗ ya lɛ woo? 
Peɗ ɗáa bol kusol ká ɗaa ɓay huɗ ɓo tul nzoɓri kḭ lɛ, ɗo ɓáy riŋ ɗika ku ya rɔɔ, maa ɓay peɗ ɗáa Tem ká ha̰ Ŋgɛrɛwṵru ndǎke buma ziŋ nzoɓri ha ri vi ɓa nzoɓri ká i ɗo ɓáy zaɗɛ nzɛɗɛm na, riŋ ɗikake a kál tul zaɗ pavbaɗ ya lɛ woo? 
Tusuɛke lɛ, kuni fie ká Ŋgɛrɛwṵru saa ziŋ nzoɓri na, riŋ ɗikake ɓa hḭɛ zikiki ha̰ kuni ká piɛɗke na yḭ̀i a ɓa fe mbǎa hɔy ro. 
Ì kɔ, bol kusol ká ti ɗoko ɓaŋguɔ ya kḭ lɛ, ɗo ɓáy riŋ ɗika ku ya rɔɔ, maa ɓay Tem Ŋgɛrɛwṵru ká ɗo ɓaŋguɔ ze, riŋ ɗikake a ŋgḭiŋa ɓamba ya lɛ woo? 
Munu ká ɓuru ɗaa law ɓuru nzokɗo te tul feri key na, ɓuru ɓaa ɓayke ɓáy nun wa̰ra nzoɓ ɓa kɛlɛ ha̰ nzoɓri. 
Ɓuru na, ɓuru ɗaa munu ká Moyze puɗ nun-ɛ puɗ ɓáy vay gari ɓay haŋa leɗ Izarayɛlri kɔ riŋ ɗika ká ndṵy ká ɗo kali ká nzaa pol-e na ku ya. 
Kér ɓay ɓari ɗo tiɗi. Ze kpṵru tḭi timbɛɗɛ key hɔy kara, zaɗka i kḭi Mbeɗe *sáka kuni ká piɛɗke ká Ŋgɛrɛwṵru ha̰ Moyze na lɛ, vay gari na puɗ nun-ri ha̰ law-ri vuo ya. Kér ɓay ɓari ɗo tiɗi kɔɓ, ɓay ḭi lɛ, nzoɓ ká zuɔ ziŋ Krisi nda̰w rɔɔ, Ŋgɛrɛwṵru a nzúo vay gari na ha̰ nun-ɛ mgbuɗa ɓáy. 
Ɓa tusuɛ, kpṵru tḭi vuri key kara, zaɗka leɗ Izarayɛlri kḭi *mbeɗe bol kusol ká Ŋgɛrɛwṵru ha̰ Moyze na lɛ, vay gari na puɗ nun-ri ɓaŋguɔ kɔɓ rɔɓay. 
A ze ɓo, zaɗka nzoɓ ɗaa law-ɛ ɓo tul Ŋgɛrɛmbay lɛ, Ŋgɛrɛwṵru nzuo vay gari na ká nun-ɛ a ha̰ nun-ɛ mgbuɗa. 
Ì kɔ, Ŋgɛrɛmbay na ze ɓa Tem, a ze zaɗ ká Tem Ŋgɛrɛmbay ɗo ɗi na, zaɗɛ na ku ze ɓa zaɗ hina sùo nzoɓri. 
Naari riw bele ká vay gari nzuo ká nun naari ha̰ náa kɔ́ri riŋ ɗika Ŋgɛrɛmbay na, náa ya̰ari sùo ziŋ ni. Ka fɛrɛ naari a ha̰ náa rìiri ni ɓáy riŋ ɗika ká se nun-ɛ ɓa pola nam ɓáy nam. Ɓe ze ɓa peɗ ɗáa Tem Ŋgɛrɛmbay. 
