﻿Za̰a.
19.
Ɓe nu ku báyḭi lɛ, Pilaɗ ha ri mgba Zezu í nda ni ɓáy ndoy dɔŋ raɗ raɗ. 
Ro, nzoɓ yṵmri kaŋ ŋgatukru ɓa taguɓa mbay, rɔɔ í mbi guɓa tul-e a í nduo ni maagari mbay ká sḭ̀i hola hola. 
I soro ɓa lakun-ɛ í ɓaa mii: «Soko woo, mbay Ziɓri!» Ro, í nda hala nun-ɛ kpaɗ kpaɗ. 
Báyḭi lɛ, Pilaɗ tḭi ɓa kḭ a ɓaa ha̰ Ziɓri mii: «Ì láa mì key! Mì mgbaka Zezu na ɓay víke kɛlɛ key ɓo, ɓay haŋa rì kɔ mii, mì ziŋ fe ka̰aya mbḭw ká ɓay haŋa mì ɗáake ɓay huɗ ɓo tul leɗban na ku ya.» 
Báyḭi lɛ, Zezu tḭi ɓáy taguɓa ŋgatukru, ɓáy maagari mbay ká sḭ̀i hola hola na. Lɛɛ, Pilaɗ ɓaa ha ri mii: «Ì kɔ nzoɓ na ká ɗo ku.» 
Zaɗka *ŋgɛrɛnzoɓ fe poyri ɓáy nzoɓ kɔ́rɔ zaɗri mbi nun-ri í kɔ ni munu báyḭi lɛ, i ɗaa fe ɓáy nzaa-ri gǔrum í ɓaa mii: «Ɓer ni! Ɓer ni ɓer mǎa ka ɗo tul puu say huɗ!» Báyḭi lɛ, Pilaɗ ɓaa ha ri mii: «Ì ya̰a ni sùo-rì ɓo, í ɓer ni ɗo tul puu say huɗ na, ɓay ḭi lɛ, mì kɔ fe mbḭw ká ɓay ɗáake ɓay huɗ ɓo tul-e ya.» 
Báyḭi lɛ, Ziɓri yḭiŋra ɓáy ɓay ha̰ ni mii: «Ɓuru na, ɓuru ɗo ɓáy *bol kusol mbḭw. Ɓáy faa bol kusolke ku na, ɗo nun haŋa ni ka ziŋ huɗ, ɓay ḭi lɛ, ka ɗi sùo-ɛ ɓa Vu Ŋgɛrɛwṵru.» 
Zaɗka Pilaɗ laa ɓayke na munu báyḭi lɛ, hḭɛ ɗaa ni zikiki ɓa pola pola. 
Lɛɛ, ka yḭ̀i a se hula na rɔɓay, a vbi Zezu mii: «Mù uru saa ha̰a lɛ?» Roo lɛ, Zezu yḭiŋra ɓáy ɓay mbḭw ha̰ ni ya. 
Báyḭi lɛ, Pilaɗ ɓaa ha̰ ni mii: «Wa̰a, ɓi kḭ mì ɓaa ɓay ze mù fɛrɛ nzaa-i ya ku lɛ? Mù kɔ mú ɓaa mii, mì ɗo ɓáy hṵrusuo ká ɓay tína mù saa hul sal nda̰w, ɓay haŋa ri ɓer mù ɗo tul puu say huɗ nda̰w na wa̰a, mù kɔ munu ya lɛ?» 
Lɛɛ, Zezu yḭiŋra ɓáy ɓay a ɓaa ha̰ ni mii: «Ɓa Ŋgɛrɛwṵru ze ha̰ mù hṵrusuo. Zaɗka Ŋgɛrɛwṵru ha̰ mù hṵrusuo key na ya lɛ, mù ti mbaka tul-i ɓáy hṵrusuo mbḭw ya. Sa̰wke mini ze, nzoɓ ká pɔŋ mì nduo nduo-ɔ na, ɓay mgba tul-e kal mù rɔɓay.» 
Úru saa zaɗɛ ku na, Pilaɗ nzaa faa ɓay pɔ́ŋ Zezu. Roo lɛ, Ziɓri ɓaa ɓay ɓáy nzaa-ri gǔrum mii: «Zaɗka mù tina leɗban na ku lɛ, mù ti ɓá nzoɓ taa Mbay Sezar ya. Nzoɓ ha̰a ha̰a ká ɗi sùo-ɛ ɓa mbay na, ka ɓa nzoɓ tul ŋga̰ni Mbay Sezar.» 
Zaɗka Pilaɗ laa ɓaykeri na munu báyḭi lɛ, ka mgba Zezu na a tḭ́ike ni kɛlɛ, a vǎa kaw tul kariŋgaw mbay ká zaɗ fɔ́ŋ ɓay. (Riŋ zaɗke ku na, ɓa zaɗ ɓɔ́ɗɔ tisaw, ɓáy nzaa eboro lɛ, i ɗi ɓa Gabata.) 
Namke ku na ɓa nam léke fe sṵm suoriya tḭ́i saa ɓil koy ká maa ɓáy sa̰w síe ká ɗo law tul. Báyḭi lɛ, Pilaɗ ɓaa ha̰ Ziɓri mii: «Ì kɔ mbay ɓaarì na ká ɗo ku.» 
Roo lɛ, i tii sa̰w ɓáa ɓay ɓáy nzaa-ri gǔrum gǔrum mii: «I ni! I ni ɓo í ɓer ni ɗo tul puu say huɗ!» Lɛɛ, Pilaɗ ɓaa ha ri mii: «Wa̰a, mbay ɓaarì na kḭ ze, ì hii ɓay haŋa mì ɓer ni ɗo tul puu say huɗ ku lɛ?» Báyḭi lɛ, ŋgɛrɛnzoɓ fe poyri yḭiŋra ɓáy ɓay ha̰ ni mii: «Ɓuru ɗo ɓáy mbay kḭ ɓoɗ ká nde Sezar ya.» 
Báyḭi lɛ, Pilaɗ pɔŋ Zezu nduo nduo-ri ɓay haŋa ri ɓer ni ɗo tul puu say huɗ na. Ro, í uru í lie Zezu na ruɗ í mgba ni 
í ha̰ ni soɓ puu say huɗ ɓe sùo-ɛ, a tḭ́ike saa ŋgɛrɛpuo ɓay séke ɓa zaɗ ká riŋ-ɛ ɓa Tuŋguo Tul. (Ɓáy nzaa eboro lɛ, i ɗi ɓa Gɔlgota.) 
Ká zaɗɛ ku na ze, nzoɓ yṵmri ɓer Zezu ɗo tul puu say huɗ ká ɗi, a í ɓer nzoɓ kḭri siɗi ɗo lakun-ɛ nda̰w. I ɓer nzoɓ mbḭw ɗo tul puu say huɗ ká fi hoɗo ɓe, a í ɓer nzoɓ ndeke ɗi siɗike ɗo tul puu say huɗ ká fi gel, a í ha̰ Zezu ɗo sikɗa. 
Báyḭi lɛ, Pilaɗ mbi nzi-ɛ ha ri ɗaa mbeɗe ɗo gbokro í ɓer ɗo fi tul-e ká tul puu say huɗ na. Ɓay ká i vbie ɗo gbokroke na ɓaa mii: «Zezu ká Nazarɛɗ, mbay Ziɓri.» 
Munu ká zaɗ ɓér Zezu na ɗo ɗi ya ɓáy ŋgɛrɛpuo na báyḭi lɛ, Ziɓri ŋgḭi ɓamba kḭi fe na, ɓay ḭi lɛ, fe ká i kḭi na, i ɗaa ɓáy nzaa eboro nda̰w, nzaa latɛ̰ nda̰w, rɔɔ ɓáy nzaa gɛrɛk nda̰w pi. 
Zaɗka ŋgɛrɛnzoɓ *fe poy Ziɓri ká i ɗo ɗi í kḭi fe na ku munu báyḭi lɛ, i pie ha̰ Pilaɗ mii: «Mù ti ɗáa ɓa “Mbay Ziɓri” ya. Roo lɛ, mù ɗáa mii, “Ɓe kḭ ze ka ɗi sùo-ɛ ɓa Mbay Ziɓri.”» 
Lɛɛ, Pilaɗ yḭiŋra ɓáy ɓay mii: «Fe ká mì ɗaa na, a ɗoko ɓáy zaɗɛ munu.» 
Falɛ ká nzoɓ yṵmri ɓer Zezu ɗo tul puu say na báyḭi lɛ, i fa̰a gari ɓe í leke kḭ ɓáy zaɗ ɓari niŋ bele. Roo lɛ, i mbi maagari ɓe ká taŋ sá̰ake a ɗo wuu na í ɗaa ɓo 
í ɓaa ɓay ká sakra kḭ mii: «Náa gɔ́ɗɔri maagari na key ya, roo lɛ, náa ɗáa rì dḭi dḭi ɓay kɔ́kɔ wa̰a, nzoɓ ve ze a ɓá taa ɓe lɛ.» Feri key na kal mini ɓay haŋa ɓay ká ɗo ɓil mbeɗe Ŋgɛrɛwṵru na, ka ɔ ɓáy zaɗɛ ŋgiɗ bele. Ɓayke na ɓaa mii: «I leke gari ɓiri ká sakra kḭ, a í mbi maagari ɓi í ɗáake dḭi dḭi.» Ɓe ze, ɓa fe ká nzoɓ yṵmri na i ɗaa. 
Ɗi ya ɓáy puu say huɗ Zezu na, mi-ɛ ɗo ɗi, yṵ mi-ɛ nda̰w, Mari ká ɓa má̰y Kolopas nda̰w, rɔɔ ɓáy Mari ká puo ɓe ɗo Madala nda̰w pi. 
Báyḭi lɛ, Zezu mbi nun-ɛ a kɔ mi-ɛ na, a ɗi ya ɓáy lakun mi-ɛ ku na, leɗ nduoɓal-ɛ káʼa hii ni ɓamba na ɗo ɗi nda̰w pi. Zezu na ɓaa ha̰ mi-ɛ mii: «Mgba ni ka ɓa vu-ɔ.» 
Falɛ ku lɛ, ka ɓaa ha̰ leɗ nduoɓal-ɛ na ku mii: «A ɓo laa lɛ, mu kɔ ni ɓa máa-ŋa.» Úru saa zaɗɛ na ku báyḭi lɛ, leɗ nduoɓal-ɛ na, sùu máa Zezu na a zɔ̌lke faa puɔ, a kɔrɔ ni ɓáy kere. 
Falɛ ku báyḭi lɛ, Zezu kɔ nda̰w mii, peɗ ká Ŋgɛrɛwṵru pɔŋ zuɔ nduo-ɛ ɓay haŋa ni ka ɗaa na, ka ɗaa ɔ ɓáy zaɗɛ ŋgiɗ bele ro. Ze a ɓaa mii: «Kɔn mbii í mì!» Ka ɓaa munu ɓay haŋa ɓay ká ɗo ɓil mbeɗe Ŋgɛrɛwṵru na, ka ɗo munu ɓáy zaɗɛ. 
Ká zaɗɛ ku na, i ɗaa mbii fe sṵ́uke ɗo suna sìi ɗi. Báyḭi lɛ, nzoɓ yṵmri mbi vay gari ká nzɔ mbii nzɔ, í ɗaa nduo mbii fe sṵ́uke na, a í ɗaa tuŋ nzaa puu ká i ɗi ɓa izoɓ, rɔɔ í ndaɗa ɓa nzaa Zezu ɓáy. 
Zaɗka Zezu a̰w mbii fe sṵ́uke na báyḭi lɛ, ka ɓaa mii: «Feri riw bele na ɔ ŋgiɗ bele ro!» Falɛ ku lɛ, ka ɗiŋ tul-e mgbura, lɛ, law-ɛ ví tuo. 
Namke ku na ɓa nam peɗ ndeɓe ká i lěkeke fe sṵm ɓay tul nam mgbaka ta̰ram ɓari Ziɓri. Nam mgbaka ta̰ramke ku na ɗo ɓoɗ, a ɓa bawda nam suoriya. Sa̰wke mini ze, ŋgɛrɛdɔma̰y Ziɓri hii ɓay haŋa huɗ nzoɓ ka ɗo siya ká tul puu say huɗ ká ɓil namke na ku ya. Ɓe ze, í vbi Pilaɗ ɓay haŋa ni ka gur ɓal-ri ha ri hu ɓa vaa ɓo, í ɗíra ri saa tul puu say huɗ na. 
Báyḭi lɛ, nzoɓ yṵmri na i se ɓa zaɗ ká puu say huɗ ɗo ɗi na. Lɛɛ, i gur ɓal nzoɓ titireke, rɔɔ í gur ɓal nzoɓ ndeke ɗi siɗike ká i ɓer ni ɗo lakun Zezu na. 
Zaɗka i tḭi tul Zezu na báyḭi lɛ, i kɔ ni ɓa huɗ ro. Sa̰wke mini ze i gúrke ɓal-ɛ na ya. 
Roo lɛ, nzoɓ yṵm mbḭw munu ká sakra nzoɓ ha̰wri vǎa tuŋ gar-ɛ wuɓ ɓáy nzaw ɓe. Lɛɛ, ká zaɗɛ ku hɔy sím ɓáy mbii tḭi a zuu zuɔ siri. 
Nzoɓ ká kɔ fekeri ɓáy nun-ɛ na, ɓa nzoɓke na ze ɓaa nasi ɓay fekeri; a nasi ɓay ɓe káʼa ɓaa na ɓa sùo ɓay. Ɓay káʼa ɓaa na, ka kɔ ɓa sùo ɓay, ɓay haŋa ɓo ɓaarì hɔy kara ì ɗaa law-rì ka ɓo ɗi nda̰w. 
Feri key na tḭi mini ɓay haŋa ɓay ká ɗo ɓil mbeɗe Ŋgɛrɛwṵru na, ka ɔ ɓáy zaɗɛ nzɛɗɛm. Ɓayke ɓaa mii: «Hṵrusuo-ɛ mbḭw mini kara ti háw ya.» 
Rɔɓay, i ɗaa ɗo ɓil mbeɗe Ŋgɛrɛwṵru ká zaɗ kḭ ɓoɗ mii: «Nzoɓri fɛ́rɛ kɔ́m ɓa luo nzoɓ ká i tuŋ gar-ɛ ɓáy nzaw na.» 
Fal feri na ku báyḭi lɛ, Zezeɓ ká puo ɓe ɗo Arimate na, vǎa vbi Pilaɗ faa ɓay mbika huɗ Zezu. (Ɓe na, ka ɓa leɗ nduoɓal Zezu ɓa muni, ɓay ḭi lɛ, ka ɗaa hḭɛ ŋgɛrɛdɔma̰y Ziɓri.) Lɛɛ, Pilaɗ pɔŋ faa ha̰ ni. Ro, a se a vǎa mbi huɗ Zezu na. 
Nikɔdɛm, ɓe káʼa nduo tul Zezu ɓa suŋ pola na ka vi nda̰w. Ka vi ɓáy sṵm vay fe ká ba̰rɛ fṵ bǔy bǔy ká i ɗi ɓa mir, a ha̰y ká i ɗi ɓa aluwe kara nda̰w. Híike laa lɛ, maa daŋday tom mbḭw. 
Báyḭi lɛ, ɓari siɗi bele na, i mbi huɗ Zezu, í kaari ɓáy vay gari a í ɗaa vay feri ká ba̰rɛ fṵ bǔy bǔy na tii ɗi tul tul munu ká Ziɓri ɗaa ɓaŋguɔ ɓáy huɗ nzoɓ rɔɔ í voro na. 
Ɗi ya ɓáy zaɗ ká i ɓer Zezu ɗo tul puu say huɗ na, wáa mbḭw ɗo ɗi. Ká ɓil wáake ku na, huo tisaw ká i kpɛrɛ ɓa luɔ huɗ fie ká i ɗaa huɗ ɓo ɗi ba mbḭw ya rɔɓay na, ɗo ɗi. 
Ká zaɗɛ ku ze, i ɗaa huɗ Zezu ɓo ɗi, ɓay ḭi lɛ, sa̰w síe tɔ̀ŋ ndḭi hɔy ɓay haŋa *nam mgbaka ta̰ram Ziɓri na ka tḭi. Rɔɓay, zaɗɛ ɗo ɗi ya ɓáy zaɗ puu say huɗ na. 
