﻿Matiye.
24.
Zezu tḭi saa *hul ka̰ni Ŋgɛrɛwṵru. Zaɗkaʼa ɗo zɔ́l báyḭi lɛ, leɗ nduoɓal-ɛri soro ɓa lakun-ɛ í kiɛ ni hulri ká i mbuo ɓa gama ká ɗo ɓil mgbaŋ hul ka̰ni Ŋgɛrɛwṵru na ɓay haŋa ni ka kɔ. 
Báyḭi lɛ, Zezu mbi ɓay a ɓaa ha ri mii: «Fe niri riw bele key na wa̰a, ì kɔ-kɔ kḭ zu lɛ? Mì ɓaa ha rì ta-taŋ ɓa tusuɛ kḭ: tisaw ká i mbúoke hulri key na, ti tɔ́ŋ mbḭw ka̰y tul kḭ ká zaɗ ni key ya. Nzoɓri gá̰y ri riw bele zuɔ siri.» 
Zezu se a kaw tul kuo ká riŋ-ɛ ɓa Oliviye. Zaɗkaʼa kaw ɗi na báyḭi lɛ, leɗ nduoɓal-ɛri kḭ ro i soro ɓa lakun-ɛ í ɗo fi mbḭw í vbi ni mii: «Mu ɓaa ha̰ ɓuru laa, síe ha̰a nda̰w rɔɔ, fe niri key na a vika lɛ? Rɔɓay, fe ḭi nda̰w rɔɔ a kál a kiɛ ɓuru nam ká mù yḭ́i, mase síe ɔ́rɔ ɓie nam ká tusiri key na lɛ?» 
Lɛɛ, Zezu yḭiŋra ɓáy ɓay ha ri mii: «Ì nzɛ ɓáy sùo-rì ɓay haŋa nzoɓ mbḭw mini kara ka úla rì ya, 
ɓay ḭi lɛ, nzoɓri ví ŋgḭi ɓamba ɓáy riŋ-i í ɓaa mii: “Ɓa ɓi ze mì ɓa *Krisi, nzoɓ ká Ŋgɛrɛwṵru waa ɓay píe ni ví ya̰a nzoɓri na.” I úla nzoɓri ŋgḭi ɓamba. 
Ì láa ɓay soro ruyri ká nzoɓri ruu kḭ ká lakun-rì, a í laa soro ruyri ká nzoɓri ruu kḭ ɗi ɗi nda̰w. Roo lɛ, ì ha̰ sùo-rì ka tɔ ya, ɓay ḭi lɛ, ndaɗ ɓay haŋa fe niri key na ka tḭi pola nda̰w rɔ! Roo lɛ, ɓa síe ɔ́rɔ ɓie nam ká tusiri key na ya rɔɓay. 
Nzoɓri ká sa̰w puo ɓari mbḭw, i úru ɓay rúu ziŋ nzoɓri ká sa̰w puo kḭri ɓoɗ. Nzoɓri ká ɓil puoruo mbḭw, ì úru ɓay rúu ziŋ nzoɓ puoruo kḭri. Kɔn luye a líe ɓáy zaɗ zaɗ nda̰w, tusiri a láŋ yik yik ɓáy zaɗri nda̰w pi. 
Fe nuri riw bele ku na, a ɗoko munu ɓa tiika nduo ká sɛ má̰y nzoɓ ɓay haŋa ni ka mboŋ. 
I mgbaka rì í ɗaa nun-rì tuɔ síe a í i rì. Sa̰w nzoɓri riw bele ká tusiri key na i fṵ́y rì ɓay tul-i. 
Síeke ku na, nzoɓri ŋgḭi ɓamba i pɔ́ŋ mbika law ɓari; i mbika tul kḭ a í fṵy kḭ. 
Nzoɓri ká i ɗi sùo-ri ɓa *nzoɓ ya̰aŋa ɓayri saa nzaa Ŋgɛrɛwṵru na i ŋgḭi ɓamba, i tḭ́i í ula nzoɓri ŋgḭi ɓamba. 
Ka̰aya nzoɓri ká i ɗaa ká ya̰a zaɗ ɓa pola pola na, a ɗáa ha̰ fal ini nzoɓri ŋgḭi ɓamba a húoke ɗeŋ ɗeŋ. 
Roo lɛ, nzoɓ ká mgba ŋgɔ-ŋgɔŋ kpṵru tḭi síe ɔ́rɔ ɓie nam na, Ŋgɛrɛwṵru a ya̰aŋa ni. 
Ɓay Kere ni ká se tul Ŋgɛrɛwṵru ká re mbay ká tul nzoɓri na, i ka-káake ɓáy zaɗri riw bele ká tusiri key ɓay haŋa sa̰w nzoɓri riw bele i laa ɓayke. Falɛ ku nda̰w rɔɔ, ɔ́rɔ ɓie nam na a ví ɓáy.» 
«Ɓaarì na ì kɔ́kɔ nzoɓ ká i ɗi ɓa “Fe Ḭ̌m ká maa ɓáa ya” ká Daniyɛl, nzoɓ ya̰aŋa ɓay saa nzaa Ŋgɛrɛwṵru ɓaa ɓayke piɛɗke lew na. Fe ḭ̌mke ku na a ɗoko siya ká *zaɗ ká taŋ kaɗaŋ ká ɓil *hul ka̰ni Ŋgɛrɛwṵru. (Nzoɓ ká kḭi mbeɗe key na lɛ, ka laa sa̰wke ta-taŋ!) 
Zaɗka i kɔ munu na báyḭi lɛ, ɓari ká i kaw kuɗu zaɗ ká Zude na, ndaɗ ɓay haŋa ri ɗúu ɓa tul kuori. 
Nzoɓ káʼa mgbaka ta̰ram ká tul hul siya na, ka ti ɗí ɓay vǎa fa̰a fe ɓeri ká hula ya nda̰w, 
a nzoɓ káʼa ɗoko wáa na ti yḭ́i se puɔ ɓay mbika maagari ɓe ya nda̰w pi. 
Namkeri ku na, má̰yri ká i ɗoko ɓil, ɓáy má̰yri ká leɗri á̰w wa̰n ɓari na, i kɔ́kɔ sɛkɛ fe ŋgḭi ɓamba. 
Ì kóɗ Ŋgɛrɛwṵru ɓay haŋa ɗul ɓaarì na, ka ɗo ɓáy few lew teɗ ya nda̰w, mase ɓáy nam mgbaka ta̰ram naari Ziɓri ya nda̰w pi! 
Ká ɓil namke ku na, kɔ́kɔ sɛkɛ fe káʼa tḭ́i tul nzoɓri na, a kál tul zaɗ pavbaɗ: úru saa nam ká Ŋgɛrɛwṵru ɗáake tusiri kpṵru tḭi vuri key na, kḭri kɔ́kɔ sɛkɛ fe ká mini na nzoɓ kɔ ya rɔɓay, rɔɔ ɓil namri káʼa vi vuku hɔy kara, nzoɓ ti kɔ́kɔ kḭri sɛkɛ fe ká mini mbǎa mgbaŋ. 
Zaɗka Ŋgɛrɛwṵru mbi nzi-ɛ ɓay yḭ́iŋra namkeri ku na ɓa fal ya lɛ, nzoɓ mbḭw mini kara, ti káw ɓáy kumnun ya. Roo lɛ, namkeri ku na ka yḭiŋra ɓa fal ɓay tul nzoɓ ɓeri káʼa nan ri zuɔ ɓoɗ. 
Zaɗka nzoɓ ɓaa ha rì mii: “Ì kɔ-kɔ́m í kɔ *Krisi, nzoɓ ká Ŋgɛrɛwṵru waa ɓay píe ni ví ya̰a nzoɓri na, ka ɗo zaɗ ni key,” mase, “ka ɗo lew,” lɛ, ì ɗaa law-rì ka ɓo ɗi ya. 
Ì kɔ, nzoɓri ká i ɗi sùo-ri ɓa Krisi, ɓáy nzoɓri ká i ɗi sùo-ri ɓa *nzoɓ ya̰aŋa ɓayri saa nzaa Ŋgɛrɛwṵru na, i tḭ́i í ɗaa bawda fe saŋri ɓáy feri ká mba kɔ́kɔ ɓay úlake nzoɓri. Ze faa ɗo ɗi lɛ, nzoɓri ká Ŋgɛrɛwṵru nan ri zuɔ ɓoɗ ɓa taa ɓe na hɔy kara, i úla ri nda̰w. 
Ì laa key, mì ɓaa ɓayke ha rì ro.» 
«Munu zu lɛ, zaɗka nzoɓri ɓaa ha rì mii: “Ì kɔ, *Krisi, nzoɓ ká Ŋgɛrɛwṵru waa ɓay píe ni vi na, ɗo ɓil law kɔr,” lɛ, ì se ɗi ya. Mase, i ɓaa ha rì mii: “Krisi mṵu sùo-ɛ ɗo key,” lɛ, ì ɗaa law-rì ka ɓo tul ɓay ɓari na ku ya, 
ɓay ḭi lɛ, munu ká mbam siɛ yela ha̰ nzoɓri kɔ haraŋ saa fi tḭi síe kpṵru tḭi fi riŋ síe na, síeke ká ɓi *Vu Nzoɓ mì ví na, a ɗoko faa mbḭw munu nda̰w. 
Nzoɓri riw bele i kɔ́kɔ ni, ɓay ḭi lɛ, zaɗ ká huɗ fe ɓo ɗi na, zaɗɛ na ku ze ta̰miri mbṵ kḭ ká ɗi.» 
«Ɓa vaa hɔy ká fal kɔ́kɔ sɛkɛ fe ká ɓil namkeri ku na, síe a ɗoko guu nda̰w, few ti híe mbǎa nda̰w, mbaymawri gá̰y saa tumbam nda̰w, rɔɔ hṵrusuori ká tumbam kara i láŋ yik yik nda̰w pi. 
Ɓe nu ku báyḭi lɛ, fe káʼa kíɛ vika ɓi *Vu Nzoɓ na a tḭ́i ká tumbam. Ká síeke ku na, sa̰w nzoɓri riw bele ká tusiri key na i rɛ́kɛ sùo-ri, lɛ, í kɔ́kɔ mì ɓi Vu Nzoɓ ká mì ví saa nulue ká ɓil síi mbam ɓáy bawda hṵrusuo, ɓáy riŋ ɗika. 
Báyḭi lɛ, bawda tḭw a mgbaka ɓáy zaɗ gǔrum gǔrum, lɛ, mì píe leɗ nzaapeɗ ɓiri ká nulue ha ri se ɓáy tḭw zaɗri ká niŋ ká tusiri key, ɓay haŋa ri mbṵ nzoɓ ɓiri ka mì nan ri zuɔ ɓoɗ ɓa taa ɓi na, saa fi mbḭɛ mgba gbṵ zaɗ ká fi mbini.» 
«Ì laa má̰ra ɓay ká se tul puu nzum na, a í fére fe ká ɗi! Zaɗka ì kɔ rɔɔ nzaa tɔykeri luo vay a ɗo rék rek lɛ, ì kɔ ta-taŋ mii, nzaa bura mbam ɗo ɗi ya ro zu. 
Ɗo faa mbḭw munu nda̰w, zaɗka ì kɔ fe niri key na riw bele tḭi lɛ, ì kɔ nda̰w mii, ɓi *Vu Nzoɓ na mì ɗo ɗi ya deɓ ɓay ví; mì ɗo faa hul ro. 
Mì ɓaa ha rì ta-taŋ ɓa tusuɛ kḭ: nzoɓri ká timbɛɗɛ key na, i ti huka riw bele ya hɔy ze fe niri riw bele key na a tḭ́i. 
Tumbam ɓáy tusiri na a kál hɔ̰́n bele. A roo lɛ, ɓay ɓiri na ti kál ya mgbaŋ.» 
«Ɓay ká se tul namke mase sa̰w síeke ká ɓi *Vu Nzoɓ mì yḭ́i ɓay ví na, nzoɓ mbḭw mini kara kɔ ya. Leɗ nzaapeɗ Ŋgɛrɛwṵruri ká nulue ya nda̰w, ɓi Vu Nzoɓ kara ya nda̰w; ɓa Bǎa huo-ɛ hɔy ze kɔ. 
Fe ká kal ɓáy sewke taa *Noe na, síeke ká ɓi Vu Nzoɓ mì vika na, a ɗoko faa mbḭw munu nda̰w. 
Ì kɔ, ɓáy ɓil sewke taa Noe ká pola lew ká mbii ya̰a zaɗ ya rɔɓay na, nzoɓri sṵ fe í nzɔ fe, má̰yri ɓáy wa̰rari i ya̰a kḭ, mase i ha̰ vu ɓariri kara ya̰a kḭ kpṵru maa ɓáy nam ká Noe ndǔoke ɓil hul tumbii na. 
Nzoɓri ma̰y ɓay ká tul sùo-ri kpṵru maa ɓáy mbii ká ví ya̰a zaɗ mgbǎ̰ri, a fa̰a ri riw bele. Nam ká ɓi Vu Nzoɓ mì yḭ́i mí vi na kara, a ɗoko faa mbḭw munu nda̰w. 
Ɓe mini ze, wa̰rari siɗi ká i ɗoko wáa na, i mbika nzoɓ mbini, a í pɔŋ nzoɓ mbḭɛ mgba̰mi. 
A má̰yri siɗi ká i ɗo naŋ fe na, i mbika nzoɓ mbini, a í pɔŋ nzoɓ mbḭɛ mgba̰mi. 
Munu zu lɛ, ì káw ɓáy nzaa ɓal-rì kekeke, ɓay ḭi lɛ, nam ká Ŋgɛrɛmbay ɓaarì a víke na ì kɔ ya. 
Ì kɔ ɓáy kere nda̰w rɔ! Zaɗka nzoɓ puo kɔ sa̰w síe ká nzoɓ riiɓa a víke ɓil hul ɓe ɓa suŋ na lɛ, a káw ɓáy nzaa ɓal-ɛ kekeke ɓo, ka ti pɔ́ŋ faa ha̰ nzoɓ riiɓa haw faa hul ɓe a fa̰a fe ɓeri ya. 
Sa̰wke mini ze, ɓaarì hɔy kara ì káw ɓáy nzaa ɓal-rì kekeke, ɓay ḭi lɛ, sa̰w síe ká ì ker ya na nda̰w rɔɔ, ɓi Vu Nzoɓ na mì víke ɓáy.» 
«Munu ku wa̰a, leɗ káw ha̰a ze ɗo ɓáy nun nzɛm, a ɗo tul peɗ ɓe ɓáy zaɗɛ lɛ? Ɓe key na, bǎa káw ɓe pɔŋ peɗ zuɔ nduo-ɛ a ha̰ ni kɔ-kɔ́m ɓa tul leɗ káw ha̰wri, ɓay haŋa ni ka leke ri fe sṵm ɓari ɓáy zaɗɛ zaɗɛ ɓáy nam nam. 
Suoriya a ɓá taa leɗke ká bǎa káw ɓe yḭ̀i a ví ziŋ ni ká zaɗ ɗáa peɗ ká mini key. 
Mì ɓaa ha rì ta-taŋ ɓa tusuɛ kḭ: ɓe na, bǎa káw ɓe a pɔ́ŋ peɗ kɔ́rɔ fe ɓeri riw bele zuɔ nduo-ɛ. 
Roo lɛ, zaɗkaʼa ɓa leɗ káw ká ndaya lɛ, a kér ɓay ká ɓil law-ɛ mii: “Bǎa káw ɓi mgba roy ká ɓay vika.” 
Ro, a tii sa̰w ɓɔ́ɗ bǎw peɗ ɓeri na a sṵ a nzɔ ziŋ koy himri nda̰w. 
Báyḭi lɛ, ɓáy nam káʼa ker ya na, bǎa káw ɓe na a ví tḭ́i tul-e mbuɗa ɓáy sa̰w síe káʼa kɔ ya. 
Lɛɛ, kaʼa mgbaka ni a ɗara ni kɔ sɛkɛ fe ŋgḭi ɓamba, a ɗaa ni kaw zaɗ kɔ́kɔ sɛkɛ fe ziŋ nzoɓ ha̰wri ká i ɓa nzoɓ nzaa rúɔ ɓayri. Ɓa zaɗ ká nzoɓri rɛ́kɛ rɛw ɓáy mbii nun-ri mgboɓo mgboɓo, a í sṵ sere-ri ŋgɛ̌r ŋgɛ̌r ká ɗi.» 
