MAT 1:1 येशू ख्रीष्‍ट ति अब्राहाम ताङ ग्‍येल्‍वु दाऊदकी गिपा यिन। दिवा ति अब्राहाम ताङ ग्‍येल्‍वु दाऊदकी गिपा येशू ख्रीष्‍टकी पगावा हङ्‍गावातिवा यिन।
MAT 1:2 अब्राहामकी पुज्‍युङ ति इसहाक, इसहाककी पुज्‍युङ ति याकूब, याकूबकी पुज्‍युङतिवा ति यहूदा ताङ तीकी उज्‍युनुपतिवा नोक।
MAT 1:3 यहूदाकी पुज्‍युङतिवा ति फारेस ताङ जाहेर नोक, तिवी आमा ति तामार नोक। फारेसकी पुज्‍युङ ति हेस्रोन, हेस्रोनकी पुज्‍युङ ति आराम नोक।
MAT 1:4 आरामकी पुज्‍युङ ति अम्‍मीनादाब, अम्‍मीनादाबकी पुज्‍युङ ति नहशोन, नहशोनकी पुज्‍युङ ति सल्‍मोन,
MAT 1:5 सल्‍मोन ताङ राहाबकी पुज्‍युङ ति बोअज नोक। बोअज ताङ रुथकी पुज्‍युङ ति ओबेद नोक। ओबेदकी पुज्‍युङ ति यिशै,
MAT 1:6 यिशैकी पुज्‍युङ ति ग्‍येल्‍वु दाऊद नोक। दाऊदकी पुज्‍युङ ति सोलोमन नोक। सोलोमनकी आमा ति गोमाला उरियाहकी पेर्मी यिनोक।
MAT 1:7 सोलोमनकी पुज्‍युङ ति रहबाम, रहबामकी पुज्‍युङ ति अबिया, अबियाकी पुज्‍युङ ति आसा,
MAT 1:8 आसाकी पुज्‍युङ ति यहोशापात, यहोशापातकी पुज्‍युङ ति यहोराम, यहोरामकी पुज्‍युङ ति उज्‍जियाह,
MAT 1:9 उज्‍जियाहकी पुज्‍युङ ति योताम, योतामकी पुज्‍युङ ति आहाज, आहाजकी पुज्‍युङ ति हिजकिया,
MAT 1:10 हिजकियाकी पुज्‍युङ ति मनश्‍शे, मनश्‍शेकी पुज्‍युङ ति अमोन, अमोनकी पुज्‍युङ ति योशियाह नोक।
MAT 1:11 योशियाहकी पुज्‍युङतिवा ति यकोनियास ताङ तीकी नुपतिवा नोक। तिवा ति यहूदीतिवाला जिम्‍नी बेबिलोनला टि गल्‍सिमा क्‍येवु यिन।
MAT 1:12 बेबिलोनला जिम्‍नी टि गलुप ज्‍युक्‍ला यकोनियासकी पुज्‍युङ ति शालतिएल, शालतिएलकी पुज्‍युङ ति यरुबाबेल,
MAT 1:13 यरुबाबेलकी पुज्‍युङ ति अबिउद, अबिउदकी पुज्‍युङ ति एल्‍याकीम, एल्‍याकीमकी पुज्‍युङ ति आजोर,
MAT 1:14 आजोरकी पुज्‍युङ ति सादोक, सादोककी पुज्‍युङ ति आखिम, आखिमकी पुज्‍युङ ति एलिउद,
MAT 1:15 एलिउदकी पुज्‍युङ ति एलाजार, एलाजारकी पुज्‍युङ ति मत्तान, मत्तानकी पुज्‍युङ ति याकूब,
MAT 1:16 याकूबकी पुज्‍युङ ति योसेफ नोक। योसेफकी पेर्मी ति मरियम नोक। तमा ती मरियम नेमा येशू क्‍येवु यिन। ती येशूला ख्रीष्‍ट सिनी सिवी।
MAT 1:17 तुक क्‍यानी अब्राहामकी पुस्‍तातिवा ति अब्राहामकी ङो नेज्‍युन दाऊद सेक पुस्‍ता च्‍युप्‍ज्‍यी, दाऊदकी ङो नेज्‍युन बेबिलोनला जिम्‍नी टि गलुप पेला सेक पुस्‍ता च्‍युप्‍ज्‍यी ताङ बेबिलोनला जिम्‍नी टि गलुप पे नेज्‍युन ख्रीष्‍ट सेक पुस्‍ता च्‍युप्‍ज्‍यी च्‍युङ्‍गुप नोक।
MAT 1:18 येशू ख्रीष्‍ट ति दुक क्‍यानी क्‍येवु यिन। खोकी आमा मरियमला योसेफकी लाङ्‍नी जेन्‍दी कितुपला थाक्‍छ्‍येनोक। यिने तिवी जेन्‍दी कितुप सिनाङ गोमाला के मरियम ति कोन्‍छ्‍योककी थु चाङ्‍मा नेमा राङ जु च्‍येन्‍दी गलुप हाक्‍कोनोक।
MAT 1:19 यिने मरियमला लोङ्‍गुप योसेफ ति सेम टेङ्‍बु वोतुप मी यिन्‍दुप तप्‍की तीकी मरियमला मी मिङ्‍गाला ङोछा लोङ्‍गुप नो माक्‍यानी छ्‍याकला तीला क्‍युर्नी ज्‍योकुप नो क्‍यानोक।
MAT 1:20 तुका नासाम तोङ्‍यिन वोतुप पेला योसेफकी मिलामला देवाच्‍येनकी लेन क्‍योलुप थु यी थोङ्‍सुङ। तमा तीकी योसेफला दुक सिक्‍यासुङ, “ओ, दाऊदकी गिपा योसेफ, ख्‍युरुङ मरियम ताङ मुला जेन्‍दी कितुपला ज्‍यिवा माकी। च्‍यिलासिसिन तीकी खोकला वोतुप आङा ति कोन्‍छ्‍योककी थु चाङ्‍मा नेमा च्‍युङ्‍गुप यिन।
MAT 1:21 मरियमला पुज्‍युङ यी क्‍येकितो, ख्‍योरो तीकी मिङ ति येशू सिनी तोसा। च्‍यिलासिसिन खोकी खोरो मीतिवाला दिक्‍पा ने थर ज्‍यिकितो।”
MAT 1:22 दी तेरी ताम्‍ङे च्‍युङ्‍गुप ति चोवो कोन्‍छ्‍योककी खोरे लुङ्‍तेम्‍बातिवा नेसुर दुक सुङ्‍गुप सुङ ति छेवुला यिन,
MAT 1:23 “ल्‍होसा, जेन्‍दी माक्‍यावु पुम्‍पेजा यीला पुज्‍युङ यी क्‍येकितो, तमा मीतिवी खोला इम्‍मानुएल सिनी सिवितो।” दी इम्‍मानुएलकी तेन्‍दोक ति ‘कोन्‍छ्‍योक दाक्‍पी मुला ज्‍यु वे।’ सिक्‍यावु यिन।
MAT 1:24 योसेफ ङ्‍यी छेसिमा देवाच्‍येनकी लेन क्‍योलुप थुकी तीला सिक्‍यावु दोके मरियम ति खोरो पेर्मीला टि वासुङ।
MAT 1:25 यिने मरियमला पुज्‍युङ माक्‍येवा सेक योसेफ तीकी मुला ङ्‍यिमालोक, तमा पुज्‍युङ क्‍येसिमा योसेफकी ती पुज्‍युङकी मिङ ति येशू सिनी तासुङ।
MAT 2:1 ग्‍येल्‍वु हेरोदकी ग्‍येला कितुप पेला येशू यहूदिया लुङ्‍बाकी बेथलेहेम युलला क्‍येनोक। ती पेला शरकी थाका नेमा कर्मा ल्‍हानी ची कोरुपतिवा यरूशलेमला वानी मीतिवाला दुक सिनी टिसुङ,
MAT 2:2 “यहूदीतिवी ग्‍येल्‍वु क्‍येवु ति कनी वे? ङ्‍यिरा खो क्‍येकिवी सिनी छ्‍या देन्‍दुप कर्मा ति शरकी थाकाला थोङ्‍नी खोला शावा कितुपला वायिन।”
MAT 2:3 ती ताम्‍ङे थोसिमा ग्‍येल्‍वु हेरोदकी सेम ति छासे सरङ सिरिङ गाल, तमा यरूशलेमकी तेरी मीतिवा साङ दुकै राङ गाल्‍नोक।
MAT 2:4 तमा ग्‍येल्‍वु हेरोदकी कोङ्‍यार छ्‍येतिवा ताङ यहूदी छ्‍योकी गेकेनतिवा तेरीला मुला राङ जोम च्‍यिनी, “कोन्‍छ्‍योककी तोङ्‍गिवी सिनी थाक्‍छ्‍येन नङ्‍गुप ख्रीष्‍ट ति कनी क्‍येकिवी?” सिनी टिसुङ।
MAT 2:5 तमा तिवी हेरोदला दुक सिक्‍यासुङ, “ख्रीष्‍ट ति यहूदिया लुङ्‍बाकी बेथलेहेम युलला क्‍येकिवी, च्‍यिलासिसिन तोङ्‍ला के दीकी कोर्ला कोन्‍छ्‍योककी लुङ्‍तेम्‍बाकी दुक सिनी टि वे,
MAT 2:6 ‘ओ, यहूदिया लुङ्‍बाकी बेथलेहेम! ख्‍युरुङ यहूदिया लुङ्‍बी पर ने काङ छ्‍युङा मे, च्‍यिलासिसिन ख्‍योरो नाङ ने ग्‍येल्‍वु यी क्‍येकितो, तीकी ङे इस्राएलकी मीतिवाला ग्‍येला कितो।’”
MAT 2:7 ती थोसिमा हेरोदकी ती कर्मा ल्‍हानी ची कोरुपतिवाला छ्‍याकला कताङ्‍नी ती कर्मा ति चो पेला थोङ्‍सुङ सिनी टिसुङ।
MAT 2:8 तमा हेरोदकी तिवाला दुक सिनी बेथलेहेमला ताङ्‍सुङ, “ख्‍यिराङ गल्‍नी ती आङा ति ल्‍यामो क्‍यानी छोल। तीला ङ्‍येसिमा ङला लेन खुर शोक। ङ साङ गल्‍नी तीला शावा कितिन।”
MAT 2:9 तमा तिवा ग्‍येल्‍वी ताम्‍ङे थोनी गाल। तिवा डोयी कितुप पेला शरकी थाकाला थोङ्‍गुप ती कर्मा ति तिवी येलुङ थोङ्‍सुङ। ती कर्मा ति तिवी गोमा गोमाला गल्‍नी आङा क्‍येवु दासाला लेप्‍सिमा ते राङ देसुङ।
MAT 2:10 ती थोङ्‍सिमा तिवी सेमला छासे गा लानोक।
MAT 2:11 तिवा ती खाङ्‍बी नाङ्‍ला शुनी आङा ति आमा मरियम ताङ मुला वोतुप थोङ्‍सुङ, तमा ती आङाला शावा क्‍यासुङ। तमा खोप्‍रे लोला खुरुप तेर्गाम ख पेनी सेर ताङ टि जङ्‍बु खाप पो ताङ मुर्र ति आङाला पुल्‍सुङ।
MAT 2:12 तमा तिवी मिलामला ग्‍येल्‍वु हेरोदकी चाला लोक्‍नी माडोवा सिरुप कोन्‍छ्‍योककी क ङ्‍येसिमा तिवा लाम यम्‍बा नेसुर राङ रङगी लुङ्‍बाला लोक्‍सुङ।
MAT 2:13 कर्मा ल्‍हानी ची कोरुपतिवा लोक्‍नी गल्‍सिमा चोवोकी लेन क्‍योलुप थु यीकी योसेफकी मिलामला छ्‍यर्नी दुक सिक्‍यासुङ, “खोक लो, आङा ताङ आङी आमाला टिनी ख्‍युरुङ मिश्र लुङ्‍बाला टोन ग्‍युक। ङे सिमाक्‍यावा सेक्‍ला ख्‍यिराङ ते राङ दे, च्‍यिलासिसिन हेरोदकी ती आङाला सेतुपला छोलिन वे।”
MAT 2:14 तमा योसेफ लानी ती नुपला राङ आङा ताङ आङी आमाला टिनी मिश्र लुङ्‍बाला टोनी गाल।
MAT 2:15 गल्‍सिमा हेरोद माशिवा सेक तिवा ते राङ देसुङ। दी ति “ङे पुज्‍युङला मिश्र लुङ्‍बा नेसुर कताङ्‍यिन।” सिनी कोन्‍छ्‍योककी खोरे लुङ्‍तेम्‍बा नेसुर सुङ्‍गुप ति छेवुला यिन।
MAT 2:16 कर्मा ल्‍हानी ची कोरुपतिवी खोरुङला गो कोरुप हाक्‍कोनी ग्‍येल्‍वु हेरोद छासे ङ्‍यिर्मु क्‍यासुङ। तमा तीकी कर्मा ल्‍हानी ची कोरुपतिवी नेमा हाक्‍कोवु तुजे नेसुर बेथलेहेम ताङ ती गारी गुरी युलला वोतुप लो ङ्‍यी ताङ ती सिनाङ टिक्‍पे वोतुप पुज्‍युङतिवा तेरी से च्‍यिसुङ।
MAT 2:17 तुक क्‍यानी कोन्‍छ्‍योककी लुङ्‍तेम्‍बा यर्मिया नेसुर दुक सिनी सुङ्‍गुप सुङ ति छेसुङ,
MAT 2:18 “रामाला ङुप्‍राङ ताङ सेम्‍दुक लावु वोरु थोसुङ। ते राहेल खोरो आङातिवी थोक्‍ला ङुसुङ, तमा तीकी टोङ्‍गु साङ माङ्‍येन, च्‍यिलासिसिन तिवी आङातिवा ति मालुनोक।”
MAT 2:19 तमा हेरोद शिसिमा योसेफकी मिलामला चोवोकी लेन क्‍योलुप थु यी छ्‍यर्नी दुक सिक्‍यासुङ,
MAT 2:20 “खोक लो। तमा आङा ताङ आङी आमाला टिनी इस्राएल लुङ्‍बाला लोङ ग्‍युक, च्‍यिलासिसिन आङाला सेतुप छोलुपतिवा शिन सिन्‍सुङ।”
MAT 2:21 ती थोसिमा योसेफ लानी आङा ताङ आङी आमाला टिनी इस्राएल लुङ्‍बा लोक्‍सुङ।
MAT 2:22 यिने हेरोदकी दासाला तीकी पुज्‍युङ अर्खिलाउसकी यहूदिया लुङ्‍बाला ग्‍येला किनोक सिरुप ताम्‍ङे थोनी योसेफ ते डोपला ज्‍यिवा क्‍यासुङ। तमा यम्‍बा मिलामला कोन्‍छ्‍योककी सुङ्‍गुप ति ङ्‍येन्‍नी गालील लुङ्‍बाला गाल्‍सुङ।
MAT 2:23 तेसुर तिवा नासरत सिरुप ग्‍येसाला गल्‍नी ते देसुङ। तुक क्‍यानी कोन्‍छ्‍योककी लुङ्‍तेम्‍बा नेसुर “खोला नासरतकी मी सिवी।” सिनी सुङ्‍गुप सुङ ति छेसुङ।
MAT 3:1 ती पेला बप्‍तिस्‍मा तेरुप यूहन्‍ना ति यहूदियाकी दासा पाङ्‍थेरीला वानी दुक सियी मीतिवाला ख्‍याप्‍टाक क्‍यासुङ,
MAT 3:2 “ख्‍यिराङ दिक्‍पा ने सेम ग्‍युर, च्‍यिलासिसिन कोन्‍छ्‍योककी ग्‍येल्‍खाप चिप्‍ला राङ वा वे।”
MAT 3:3 दी मी तीकी कोर्ला गोमाला के कोन्‍छ्‍योककी लुङ्‍तेम्‍बा यशैयाकी दुक सिक्‍या वे, “दासा पाङ्‍थेरीला मी मिरा च्‍यिककी दुक सिनी वोरु देन्‍गिवी। ‘चोवो कोन्‍छ्‍योककी लाम टडिक की। खो फेपुप लाम थेकाङ जो।’”
MAT 3:4 यूहन्‍नाकी सेम्‍ज्‍येन वोङ्‍मी पु नेसुर जोवु मज्‍या कोन्‍गिनोक, केल्‍दाङला ति क्‍वाकी करा च्‍यिङ्‍गिनोक। तीकी च्‍युच्‍यु पे ताङ टाराङ सेनोक।
MAT 3:5 तमा मीतिवा यरूशलेम ताङ यहूदियाकी तेरी दासा ताङ यर्दन चङ्‍बी गारी गुरी नेमा यूहन्‍नाकी चिप्‍ला वानोक।
MAT 3:6 ते तिवी खोप्‍राङ दिक्छेन यिन सिनी सेम ग्‍युर्सालेन्‍सिन यूहन्‍नाकी तिवाला यर्दन चङ्‍बी नाङ्‍ला बप्‍तिस्‍मा बिन्‍सुङ।
MAT 3:7 ते फरिसी छोक्‍पा ताङ सदुकी छोक्‍पाकी मीतिवा बङी बप्‍तिस्‍मा लङ्‍गुपला वुङ्‍यिन कितुप थोङ्‍नी यूहन्‍नाकी तिवाला दुक सिनी वोरु तेन्‍सुङ, “ओ, रुल कुपेङकी च्‍यप्‍रुक दोके दुक्‍टा वोतुपतिवा! वुङ्‍गुप छलुप कोन्‍छ्‍योककी पर्च्या ने टो सिनी ख्‍यिराङला सी सिक्‍यासुङ?
MAT 3:8 ख्‍यिराङ ‘दाक दाक्‍पु दिक्‍छेन यिन।’ सिनी सेम ग्‍युर्नी कोन्‍छ्‍योकला वावु यिन्‍सिन तीकी पङ्‍बु ति छ्‍या तेन।
MAT 3:9 तमा ख्‍यिरा सेमला ‘अब्राहाम ति दाक्‍पी पगावा हङ्‍गावा यिन।’ सिनी नासाम मातोङ, च्‍यिलासिसिन कोन्‍छ्‍योककी दी दोतिवाला साङ अब्राहामकी गिपा जो थुप्‍किवी।
MAT 3:10 तन्‍दा राङ दोङ्‍बी शापला तरी ख्‍येल्‍नी सिन वे, तमा डेलु ल्‍यामु मोगोरुप दोङ्‍बुतिवा रे रे च्‍येनी मे नाङ्‍ला क्‍युर्कितो।
MAT 3:11 ङ याङ ख्‍यिराङला दिक्‍पा ने सेम ग्‍युरुपकी थोक्‍ला छ्‍यु थ्‍वोनी बप्‍तिस्‍मा तेरिन, यिने ङे तिङ्‍ला फेपुप ति ङ सिनाङ ओङ छ्‍येवु वे। तुक क्‍यानी ङ याङ खोकी शप्‍चे साङ खुर छ्‍योवु मे। खोकी ख्‍यिराङला चाङ्‍मा जोपला कोन्‍छ्‍योककी थु चाङ्‍मा ताङ मे थ्‍वोनी बप्‍तिस्‍मा नङ्‍गिवी।
MAT 3:12 खोकी छ्‍याकला ग्‍यालुक वे, तमा खोकी लेङाङ चेङ्‍गा जोनी टतिवा टाप्‍नी डुमातिवा ति पङाङ नाङ्‍ला लुकिवी, फुङ्‍मातिवा ति नाम्‍साङ मिशिवु मे नाङ्‍ला र्‍हेकिवी।”
MAT 3:13 ती पेला येशू यूहन्‍ना नेमा बप्‍तिस्‍मा लङ्‍गुपला गालील नेसुर यर्दन चङ्‍बुला फेप्‍सुङ।
MAT 3:14 यिने यूहन्‍नाकी येशूला क्‍येक्‍नी, “गेकेनकी ङला बप्‍तिस्‍मा तेर गोकिवी, च्‍यिला गेकेनकी ङे नेसुर बप्‍तिस्‍मा लङ्‍गुपला फेवु यिन?” सिनी सिक्‍यासुङ।
MAT 3:15 यिने येशूकी “तन्‍दा ति दुकै राङ कि च्‍यी। दाक्‍पी दुक राङ क्‍यानी कोन्‍छ्‍योककी नोवा तेरी कितुप ति ल्‍यामु यिन।” सिनी सुङ्‍सुङ। तुक क्‍यानी यूहन्‍नाकी येशूला बप्‍तिस्‍मा तेरुप ङ्‍येन्‍सुङ।
MAT 3:16 येशू बप्‍तिस्‍मा लानी चङ्‍बी नाङ ने थेन्‍सिमा देवाच्‍येन पेसुङ, तमा कोन्‍छ्‍योककी थु चाङ्‍मा ति गम्‍देर दोके क्‍यानी खोरे खला पापुप ति खोकी थोङ्‍सुङ।
MAT 3:17 ती पेला देवाच्‍येन नेमा “दी ति ङे ङ्‍यिङ्‍ज्‍येवु पुज्‍युङ यिनो। ङ दीकी मुला छासे गा लानी वे।” सिरुप वोरु यी ग्‍यप्‍सुङ।
MAT 4:1 तमा ती ज्‍युक्‍ला कोन्‍छ्‍योककी थु चाङ्‍माकी येशूला शैतान नेमा खोक्‍पा ल्‍हापला ख्‍येल ज्‍यितुपला दासा पाङ्‍थेरीला टिनी गाल।
MAT 4:2 ते येशू ङ्‍यिमा खल ङ्‍यी सेक ङ्‍यी ताङ नुप्‍ज्‍या ङ्‍युङ्‍ने ज्‍युसिमा खोला ल्‍होवा लानोक।
MAT 4:3 ती पेला खोक्‍पा ल्‍हाप शैतान ति खोकी चाला वानी, “दोजो ख्‍युरुङ कोन्‍छ्‍योककी सेवु यिन्‍सिन दी दोतिवाला शुब्‍ज्‍याङला डोशी सिनी सी।” सिनी सिक्‍यासुङ।
MAT 4:4 यिने येशूकी तीला “‘मीतिवा शुब्‍ज्‍याङकी तिराङ सेन्‍बु मुलुवी, यिने कोन्‍छ्‍योककी सुङ्‍गुप तेरी सुङला ङ्‍येन्‍नी सेन्‍बु लुकिवी।’ सिनी कोन्‍छ्‍योककी सुङला टि वे।” सिनी सुङ्‍सुङ।
MAT 4:5 येलुङ शैतानकी खोला यरूशलेमला टि गल्‍नी तेकी ल्‍हङाङकी चेला लानी दे च्‍यिनी दुक सिक्‍यासुङ,
MAT 4:6 “दोजो ख्‍युरुङ कोन्‍छ्‍योककी सेवु यिन्‍सिन देमा थुला छ्‍योङ्‍बाल ग्‍योप। कोन्‍छ्‍योककी सुङला दुक सिनी टि वे, ‘कोन्‍छ्‍योककी ख्‍योरो थोक्‍ला देवाच्‍येनकी लेन क्‍योलुप थुतिवाला क नङ्‍गिवी, तमा तिवी ख्‍युरुङला खोप्‍रे लाक्‍पाला जेनी ख्‍योरो काङ्‍बा दे खला दप मिज्‍यिवी।’”
MAT 4:7 तमा येशूकी तीला सुङ्‍सुङ, “कोन्‍छ्‍योककी सुङला दुकै साङ टि वे, ‘ख्‍योरो चोवो कोन्‍छ्‍योकला खोक्‍पा माल्‍हा।’”
MAT 4:8 येलुङ शैतानकी खोला री थेन्‍बो यीला टि गल्‍नी जम्‍बुलिङकी तेरी ग्‍येल्‍खापतिवा ताङ ती ग्‍येल्‍खापतिवाला वोतुप डछ्‍यावुतिवा छ्‍या तेन्‍नी,
MAT 4:9 “ख्‍योरो ङला शावा क्‍यासिन ङ दी तेरी ख्‍युरुङला तेरिन।” सिनी सिक्‍यासुङ।
MAT 4:10 तमा येशूकी तीला “शैतान, ख्‍युरुङ ग्‍युक! च्‍यिलासिसिन कोन्‍छ्‍योककी सुङला दुक सिनी टि वे, ‘ख्‍योरो चोवो कोन्‍छ्‍योकला तिराङ सोवा तेक, खोला तिराङ शब्‍ज्‍यी पुल।’” सिनी सुङ्‍सुङ।
MAT 4:11 तमा शैतानकी येशूला क्‍युर ज्‍याक्‍नी गाल्‍सुङ। गल्‍सिमा देवाच्‍येनकी लेन क्‍योलुप थुतिवा वानी येशूला शब्‍ज्‍यी पुल्‍सुङ।
MAT 4:12 यूहन्‍ना चोन्‍खाङला शोर्नोक सिरुप थोनी येशू गालील लुङ्‍बाला लोक्‍नी फेप्‍सुङ।
MAT 4:13 तमा खो नासरतला क्‍युर ज्‍याक्‍नी कफर्नहुमला फेप्‍नी ते राङ ज्‍युसुङ। ती कफर्नहुम ति जब्‍लुन ताङ नप्‍ताली लुङ्‍बाला वोतुप गालील ग्‍येम्‍छो चाला ख्‍येल्‍गिनोक।
MAT 4:14 दी ति गोमाला कोन्‍छ्‍योककी लुङ्‍तेम्‍बा यशैयाकी तुक सिक्‍यावु ताम्‍ङे छेवुला यिन,
MAT 4:15 “जब्‍लुन लुङ्‍बा ताङ नप्‍ताली लुङ्‍बा ताङ ग्‍येम्‍छोला डोप लाम ताङ यर्दन चङ्‍बी फर्केन ताङ मिरिक यम्‍बातिवा देतुप गालील,
MAT 4:16 कोन्‍छ्‍योकला ङो माशेनी दिक्‍पी ओङला देतुपतिवी वोसिर ग्‍येर्पु यी थोङ्‍सुङ। तमा कोन्‍छ्‍योकला ङो माशेनी शेपकी र्‍हिपला देतुपतिवी खला दिक्‍पा ने थर ज्‍यितुप वोसिर यी ग्‍यप्‍सुङ।”
MAT 4:17 ती पेला नेज्‍युनी येशूकी “ख्‍यिराङ दिक्‍पा ने सेम ग्‍युर! च्‍यिलासिसिन देवाच्‍येनकी ग्‍येल्‍खाप चिप्‍ला राङ वा वे।” सिनी मीतिवाला सुङ ख्‍याप्‍टाक कितुप गो चुसुङ।
MAT 4:18 ङ्‍यिम्‍ज्‍यिक येशू गालीलकी ग्‍येम्‍छो गारी नेमा फेपिन वोतुप पेला पत्रुस सिरुप सिमोन ताङ तीकी नुप अन्‍द्रियास ति ग्‍येम्‍छो नाङ्‍ला जाल क्‍युरिन वोतुप थोङ्‍सुङ। तिवा ति ङ्‍या जिम्‍बुप मीतिवा यिनोक।
MAT 4:19 तमा खोकी तिवाला “ख्‍यिराङ ङे तिङ्‍ला तिङ्‍यो। तमा ङ ख्‍यिराङला ङ्‍या जिम्‍बुप मिन, मीतिवा जिम्‍बुप मी जोयिनो।” सिनी सुङ्‍सुङ।
MAT 4:20 खोकी तुक सुङ्‍सिमा तिवा पिन ङ्‍यिकर ङ्‍या जिम्‍बुप जालतिवा क्‍युर ज्‍याक्‍नी खोकी तिङ्‍ला तिङ्‍यासुङ।
MAT 4:21 खो तेसुर फेपिन वोतुप पेला येलुङ जब्‍दियाकी पुज्‍युङ याकूब ताङ तीकी नुप यूहन्‍ना पिन ङ्‍यी खोप्‍रे पपा जब्‍दियाकी मुला टी नाङ्‍ला देनी जाल ल्‍हेन्‍दा ग्‍यकिन वोतुप थोङ्‍सुङ। तमा खोकी तिवाला साङ कताङ्‍सुङ।
MAT 4:22 तमा तिवा खोप्‍रे पपा ताङ टु ति ग्‍यङ क्‍युर ज्‍याक्‍नी येशूकी तिङ्‍ला तिङ्‍यासुङ।
MAT 4:23 येशू गालील लुङ्‍बा तेरी कोरा ग्‍यकिन सिरा यहूदी छ्‍योखाङला सुङ लाप नङ्‍गुप ताङ कोन्‍छ्‍योककी ग्‍येल्‍खापकी कोर्ला लेन ल्‍यामु ख्‍याप्‍टाक कियी नम्‍बा बङीकी नेर्पुतिवा ताङ अमोछ्‍योवुतिवा तेरीला टेक च्‍यिसुङ।
MAT 4:24 तुक क्‍यानी सिरियाकी लुङ्‍बा तेरीला येशूकी कोर्ला ताम्‍ङे टाम्‍सुङ। तमा मीतिवी नेर्पु नम्‍बा बङीतिवा ताङ छासे सुक कितुपतिवा ताङ डे ग्‍यपुपतिवा ताङ जा लावुतिवा ताङ काङ्‍बा लाक्‍पा शोरुपतिवा तेरीला खोकी चाला टि वासुङ। तमा खोकी तिवा तेरीला टेक च्‍यिसुङ।
MAT 4:25 तुक क्‍यानी गालील लुङ्‍बा ताङ डेकोपोलिस ग्‍येसा ताङ यरूशलेम ग्‍येसा ताङ यहूदिया लुङ्‍बा ताङ यर्दन चङ्‍बु फर्केन नेज्‍युन मी मङ्‍मु खोकी तिङ्‍ला तिङ्‍यासुङ।
MAT 5:1 येशू मी माङ्‍छ्‍योकला थोङ्‍नी येचेक पम्‍दोकला फेप्‍नी ज्‍युसुङ। तमा खोकी लोमातिवा खोकी चाला लेसुङ।
MAT 5:2 तमा खोकी तिवाला दुक सिनी सुङ्‍सुङ,
MAT 5:3 “मोलाम थोपुप यिनो, सेमला नरी कोन्‍छ्‍योकला छोलुपतिवा, च्‍यिलासिसिन देवाच्‍येनकी ग्‍येल्‍खाप ति तिवी ति यिनो।
MAT 5:4 मोलाम थोपुप यिनो, दुङल क्‍यानी ङुप्‍राङ कितुपतिवा, च्‍यिलासिसिन कोन्‍छ्‍योककी तिवाला टोङ्‍गु नङ्‍गितो।
MAT 5:5 मोलाम थोपुप यिनो, सेम बोल्‍मु वोतुपतिवा, च्‍यिलासिसिन कोन्‍छ्‍योककी तिवाला जम्‍बुलिङ ति तिवी ति यिन सिनी नङ्‍गितो।
MAT 5:6 मोलाम थोपुप यिनो, टेङ्‍बु छोलुपला सेमगी दिङ नेज्‍युन छासे नो कितुपतिवा, च्‍यिलासिसिन तिवी सेमला गोवुतिवा तेरी ङ्‍येकितो।
MAT 5:7 मोलाम थोपुप यिनो, मी यम्‍बाला च्‍यम्‍बा कितुपतिवा, च्‍यिलासिसिन कोन्‍छ्‍योककी तिवाला च्‍यम्‍बा क्‍या नङ्‍गितो।
MAT 5:8 मोलाम थोपुप यिनो, सेम टेङ्‍बु वोतुपतिवा, च्‍यिलासिसिन तिवी कोन्‍छ्‍योकला थोङ्‍गितो।
MAT 5:9 मोलाम थोपुप यिनो, क्‍येङ्‍सु गलुपतिवी पर्ला थिन ज्‍यितुपतिवा, च्‍यिलासिसिन कोन्‍छ्‍योककी तिवाला खोकी पेजा सिनी सुङ्‍गितो।
MAT 5:10 मोलाम थोपुप यिनो, कोन्‍छ्‍योककी कला ङ्‍येन्‍दुप तप्‍की छेटाङ दुङल ख्‍येलुपतिवा, च्‍यिलासिसिन देवाच्‍येनकी ग्‍येल्‍खाप ति तिवी ति यिनो।
MAT 5:11 ख्‍यिराङला मोलाम थोपुप यिनो। चो पेला मीतिवी ङे थोक्‍ला ख्‍यिराङला मर्च्या कितुप ताङ छेटाङ तेरुप ताङ टेङ्‍बु मेतुप ताम्‍ङे बङी लाप्‍नी मेलोवा किवी,
MAT 5:12 ती पेला ख्‍यिराङ गा किसा, च्‍यिलासिसिन देवाच्‍येनला ख्‍यिराङला छ्‍यक्‍तक ग्‍येर्पु थोप्‍कितो। ख्‍यिराङ सिनाङ गोमाला वावु कोन्‍छ्‍योककी लुङ्‍तेम्‍बातिवाला साङ मीतिवी तुक राङ क्‍यानी छेटाङ बिन्‍सुङ।”
MAT 5:13 “ख्‍यिराङ ति जम्‍बुलिङकी छ यिन। दोजो छकी छेटोक तोर्सुङ सिसिन चुक क्‍यानी येलुङ छेटोक जो थुप्‍किवी रो? ती याङ काङ साङ फेन मोथोवु गल्‍नी पाङ्‍ला क्‍युर्नी मी काङ्‍बी वोक्‍ला लेपुप तिराङ यिन।
MAT 5:14 ख्‍यिराङ ति जम्‍बुलिङकी वोसिर यिन। पम्‍दोकला वोतुप ग्‍येसा ति बानी ज्‍योक मुथुपी।
MAT 5:15 सी साङ दिप्‍ली च्‍येनी शोमकी वोक्‍ला मोज्‍योकिवी, यिने खाङ्‍बी नाङ्‍ला वोतुप मीतिवा तेरीकी थोङ्‍गुप दासाला ज्‍योकिवी। तुक क्‍यासिन खाङ्‍बी नाङ्‍ला वोतुपतिवा तेरीकी ठछ्‍येली थोङ्‍गिवी।
MAT 5:16 ती दोके ख्‍यिरा वोसिर ति मीतिवी चिप्‍ला ग्‍यक च्‍यिनी तिवी ख्‍यिरा क्‍यावु लाका ल्‍यामु थोङ्‍नी देवाच्‍येनला ज्‍यु वोतुप ख्‍यिरा पपा कोन्‍छ्‍योकला सोवा देक च्‍यी।”
MAT 5:17 “ख्‍यिरा ङला मोशाकी ठिमतिवा ताङ कोन्‍छ्‍योककी लुङ्‍तेम्‍बातिवी लापुप ताम्‍ङेतिवा ना तोङ्‍गुपला वावु यिन सिनी नासाम मातोङ। ङ याङ ना तोङ्‍गुपला वावु मिन, यिने तिवा तेरी छे ज्‍यितुपला वावु यिन।
MAT 5:18 वुतुङ के ङ ख्‍यिराङला सिरिन, देवाच्‍येन ताङ जम्‍बुलिङ तोर्नी मागल्‍वा सेक्‍ला ती ठिमला वोतुप छिक च्‍यिक साङ मातोर्नी तेरी छेकिवी।
MAT 5:19 ती तप्‍की सी खोरुङ साङ दी ठिमला वोतुप क टिक्‍पे यीला माङ्‍येन्‍नी मी यम्‍बातिवाला साङ तुकै राङ कितुप लोप्‍किवे, तीला देवाच्‍येनकी ग्‍येल्‍खापला तेरी सिनाङ छ्‍युङा सिनी सिवी। सी खोरुङ साङ दी कतिवाला ङ्‍येन्‍नी मी यम्‍बातिवाला साङ तुकै राङ कितुप लोप्‍किवे, तीला देवाच्‍येनकी ग्‍येल्‍खापला छ्‍ये सिनी सिवी।
MAT 5:20 तुक क्‍यानी ङ ख्‍यिराङला सिरिन, ख्‍यिराङ ति फरिसी छोक्‍पाकी मीतिवा ताङ यहूदी छ्‍योकी गेकेनतिवी सिनाङ मङ टेङ्‍बु मेसुङ सिसिन देवाच्‍येनकी ग्‍येल्‍खापला शुकुप मेङ्‍येवी।”
MAT 5:21 “तोङ्‍ला कोन्‍छ्‍योककी ख्यिरा हङ्‍गावातिवाला ‘मी मासे। सी मी सेकिवे, तीला ठिम फोकिवी।’ सिनी सुङ्‍गुप ति ख्‍यिरा थोनी वोच्‍यु।
MAT 5:22 यिने ङ ख्‍यिराङला सिरिन, चुका मी तीकी अच्‍युनुपतिवाला ङ्‍यिर्मु किवे, तीला कोन्‍छ्‍योककी पर्च्या फोकिवी। तमा चुका मी तीकी अच्‍युनुपतिवाला ताम्‍ङे मेलोक्‍पा सिवे, तीला ठिम्‍खाङला क्‍योल्‍गिवी। तुक राङ क्‍यानी चुका मी तीकी अच्‍युनुपतिवाला अम्‍बारङ्‍शिङ सिवे, ती ति ङ्‍येलाकी मे नाङ्‍ला ख्‍येल्‍गिवी।
MAT 5:23 ती तप्‍की दोजो ख्‍युरुङ कोन्‍छ्‍योकला बुल्‍वा बुलुप पेला ख्‍योरो तेन्‍दोकला अच्‍युनुपतिवाला ङ्‍यिर्मु लङ्‍गुप ताम्‍ङे नासाम शार्सुङ सिसिन
MAT 5:24 ख्‍योरो बुल्‍वा ति बुल्‍वा बुलुप दासाला राङ ज्‍याक्‍नी गोमाला ती अच्‍युनुपतिवाला गल्‍नी तिवी मुला थिन। ती ज्‍युक्‍ला लोङ वानी कोन्‍छ्‍योकला बुल्‍वा पुल।
MAT 5:25 ख्‍युरुङला क्‍येन तेरुप मी ताङ मुला ठिम्‍खाङला डोप पेला लामला राङ तीकी मुला थिन। मिसियाङ तीकी ख्‍युरुङला ठिम तोङ्‍गुप तीला चेक तेकिवी। तमा ती ठिम तोङ्‍गुप तीकी ख्‍युरुङला मक्‍मीकी लकला चेक तेनी चोन्‍खाङला उप ज्‍यिकिवी।
MAT 5:26 वुतुङ के ङ ख्‍युरुङला सिरिन, ख्‍योरो डेवा च्‍यिक साङ मालुवा क्‍यानी तेरी मातेवा सेक्‍ला ख्‍युरुङ ती चोन्‍खाङ नेसुर थेन मुथुप्‍तो।”
MAT 5:27 “कोन्‍छ्‍योककी मोशाला नङ्‍गुप ठिमला ‘शम्‍डेन माकी।’ सिक्‍यावु ति ख्‍यिरा थो वोच्‍यु।
MAT 5:28 यिने ङ ख्‍यिराङला सिरिन। सी पुम्‍पेजाला शम्‍डेन कितुप नोनी ल्‍हेवे, तीकी गोमाला के खोरो सेमला शम्‍डेन क्‍यावु यिन।
MAT 5:29 दोजो ख्‍योरो यावी थाकाकी मिककी ख्‍युरुङला दिक्‍पा कि ज्‍यिकिवी सिसिन ती मिक ति थेन्‍नी क्‍युर। ख्‍योरो तेरी जु ङ्‍येलाला लुम्‍बुप सिनाङ जुकी येन्‍लक च्‍यिक मेतुप ति ल्‍यामु यिन।
MAT 5:30 येलुङ ख्‍योरो लाक्‍पा यावी ख्‍युरुङला दिक्‍पा कि ज्‍यिकिवी सिसिन तीला च्‍येनी क्‍युर। ख्‍योरो जु तेरी ङ्‍येलाला लुम्‍बुप सिनाङ जुकी येन्‍लक च्‍यिक मेतुप ति ल्‍यामु यिन।”
MAT 5:31 “येलुङ मोशाकी ठिमला ‘सी खोरो पेर्मीला क्‍युर्नी ज्‍योकिवे, तीकी ती पेर्मीला टलुप यिकी टिनी तेर गोकिवी।’ सिनी टि वे।
MAT 5:32 यिने ङ ख्‍यिराङला सिरिन, सी शम्‍डेन क्‍यावु तप्‍की मिसिन खोरो पेर्मीला क्‍युर्नी ज्‍योकिवे, तीकी ती पेर्मीला शम्‍डेन कि च्‍यितुप यिन। तमा सी क्‍युर्नी ज्‍यकुप पुम्‍पेजाला जेन्‍दी किवे, तीकी साङ शम्‍डेन क्‍यावु राङ यिन।”
MAT 5:33 “तोङ्ला मोशाकी ठिमला ख्यिरा हङ्‍गावातिवाला ‘ख्‍योरो जिनोक जोनी न माक्‍योल, तमा कोन्‍छ्‍योकला न क्‍यलुप ति तेरी की।’ सिनी सिक्‍यावु ति ख्‍यिरा थोनी वोच्‍यु।
MAT 5:34 यिने ङ ख्‍यिराङला सिरिन, न क्‍योलुप तिरुङ माक्‍योल। देवाच्‍येनकी मिङला साङ न माक्‍योल, च्‍यिलासिसिन ती ति कोन्‍छ्‍योककी ग्‍येल्‍ठिक यिन।
MAT 5:35 तमा जम्‍बुलिङकी मिङला साङ न माक्‍योल, च्‍यिलासिसिन ती ति कोन्‍छ्‍योककी खोरे शाप ज्‍योकुप दासा यिन। यरूशलेमकी मिङला साङ न माक्‍योल, च्‍यिलासिसिन ती ति चोछ्‍येवु ग्‍येल्‍वु कोन्‍छ्‍योककी ग्‍येसा यिन।
MAT 5:36 ख्‍योरो गोला साङ न माक्‍योल, च्‍यिलासिसिन ख्‍यिराङ रङगी र्‍हे ङ्‍येङ्‍मा यी साङ कर्मु याङ्‍ना नक्‍पु जो मुथुपी।
MAT 5:37 ख्‍यिरा ताम्‍ङे ति यिन्‍सिन यिन, मिन्‍सिन मिन, तोजोयी तिराङ सी। ती सिनाङ ल्‍हक्‍पा लापुप ति दुक्‍टा नेमा वावु यिन।”
MAT 5:38 “येलुङ मोशाकी ठिमला ‘मिककी थोक्‍ला मिक ङ्‍येन लङ्‍गुप, से थोक्‍ला स ङ्‍येन लङ्‍गुप।’ सिक्‍यावु ति ख्‍यिरा थोनी वोच्‍यु।
MAT 5:39 यिने ङ ख्‍यिराङला सिरिन, ख्‍यिराङला मेलोक्‍पा कितुपतिवाला काङ साङ ङ्‍येन मालाङ। सी ख्‍योरो डम्‍बा यावाला बेप्‍किवे, तीला यम्‍बा थाकाकी डम्‍बा साङ जेनी बिन।
MAT 5:40 दोजो मी ललाइकी ख्‍योरो तेन्‍दोकला लानी ठिम्‍खाङला शुवा ग्‍यप्‍नी ख्‍योरो तेतुङ ठोकुप छोल्‍सिन तीला ख्‍योरो छ्‍योवा साङ बिन।
MAT 5:41 येलुङ मी ललाइकी ख्‍युरुङला तीकी मुला किलोमिटर च्‍यिक डोप सिनी वुर्च्युम ग्‍यप्‍सिन तीकी मुला किलोमिटर ङ्‍यी सेक ग्‍युक।
MAT 5:42 ख्‍योरो मुला लोङ्‍गुपतिवाला बिन, तमा ख्‍योरो मुला छ्‍यावा किन्‍दुपतिवाला छ्‍यावा मेतेर सिनी मासिर।”
MAT 5:43 “तमा येलुङ ‘ख्‍योरो युल्‍वातिवाला ङ्‍यिङ्‍ज्‍ये की, डतिवाला ति ङ्‍यिङ्‍मर की।’ सिक्‍यावु ति ख्‍यिरा थोनी वोच्‍यु।
MAT 5:44 यिने ङ ख्‍यिराङला सिरिन, ख्‍यिरा डतिवाला ङ्‍यिङ्‍ज्‍ये की, ख्‍यिराङला छेटाङ तेरुपतिवी थोक्‍ला मोपोर की।
MAT 5:45 तुक क्‍यासिन ख्‍यिराङ ति देवाच्‍येनला ज्‍यु वोतुप पपा कोन्‍छ्‍योककी पेजातिवा च्‍युङ्‍गिवी, च्‍यिलासिसिन कोन्‍छ्‍योककी मी ल्‍यामु ताङ मेलोवा ङ्‍यिकरला ङ्‍यिमी वोसिर ग्‍यक ज्‍यिकिवी, तमा मी टेङ्‍बु ताङ मेटेङ्‍बु ङ्‍यिकरला छ्‍यर्वा ग्‍यक ज्‍यिकिवी।
MAT 5:46 दोजो ख्‍यिराङला ङ्‍यिङ्‍ज्‍ये कितुपतिवाला तिराङ ख्‍यिरा ङ्‍यिङ्‍ज्‍ये किवी सिसिन ख्‍यिराङला काङ छ्‍यक्‍तक थोप्‍किवी रो? काङ से दुतुपतिवी साङ तुकै राङ मिकिवी रो?
MAT 5:47 ख्‍यिरा रङगी अच्‍युनुपतिवाला तिराङ ताङ्‍देन किवी सिसिन ख्‍यिराङ मी यम्‍बा सिनाङ मङ काङ ल्‍यामु वे रो? काङ यहूदी मिन्‍दुप मिरिक यम्‍बातिवी साङ तुकै राङ मिकिवी रो?
MAT 5:48 तुक क्‍यानी देवाच्‍येनला ज्‍यु वोतुप ख्‍यिरा पपा कोन्‍छ्‍योक तेरी ताम्‍ङेला टेके वोतुप दोके ख्‍यिराङ साङ तेरी ताम्‍ङेला टेके वुङ गोकिवी।”
MAT 6:1 “च्‍याङ्‍से देता। कोन्‍छ्‍योककी ख्‍यिराङला किशी सिनी नो क्‍यावु लाका ल्‍यामुतिवा कितुप पेला ख्‍यिराङ मीतिवी मिङ्‍गाला छ्‍या देन्‍दुपला माकी। मिसियाङ देवाच्‍येनला ज्‍यु वोतुप ख्‍योरो पपा कोन्‍छ्‍योक नेमा ख्‍युरुङला काङ साङ छ्‍यक्‍तक मोथोपिवी।
MAT 6:2 ती तप्‍की ख्‍यिराङ कतुकारला ख्‍येलुपतिवाला काङ रे च्‍यिक रे तेरुप पेला खोनक्‍पुतिवी मी नेमा ताङ्‍देन ङ्‍येतुपला यहूदी छ्‍योखाङ ताङ लामला कितुप दोके मी मिङ्‍गाला छ्‍या मादेन। वुतुङ के ङ ख्‍यिराङला सिरिन, तिवाला थोप गोवु छ्‍यक्‍तक ति गोमाला राङ तेरी थोम सिन्‍नी वे।
MAT 6:3 तुक क्‍यानी ख्‍युरुङ कतुकारला ख्‍येलुपतिवाला काङ रे च्‍यिक रे तेरुप पेला ख्‍योरो लाक्‍पा यावी क्‍यावु ति लाक्‍पा येन्‍बी हाक्‍को माच्‍यिनी
MAT 6:4 ख्‍योरो कतुकारला तेरुप ति छ्‍याकला ज्‍योक। तमा छ्‍याकला ख्‍योरे क्‍यावु लाका थोङ्‍गुप ख्‍योरो पपा कोन्‍छ्‍योककी ख्‍युरुङला छ्‍यक्‍तक नङ्‍गिवी।”
MAT 6:5 “ख्‍यिराङ मोपोर कितुप पेला खोनक्‍पुतिवी दोके माकी, तिवा मीतिवी थोङ्‍शी नोनी यहूदी छ्‍योखाङला ताङ मीतिवा बङी युकुप लामकी गारीला लानी मोपोर कितुप गा किवी। तुक क्‍यानी तिवाला थोप गोवु छ्‍यक्‍तक ति गोमाला राङ थोम सिन्‍नी वे।
MAT 6:6 ख्‍युरुङ मोपोर कितुप पेला खाङ्‍बी नाङ्‍ला गल्‍नी गो च्‍येनी छ्‍याकला ज्‍यु वोतुप ख्‍योरे पपा कोन्‍छ्‍योकला मोपोर की। तुक क्‍यासिन छ्‍याकला ख्‍योरो क्‍यावु लाका थोङ्‍गुप ख्‍योरो पपा कोन्‍छ्‍योककी ख्‍युरुङला छ्‍यक्‍तक नङ्‍गिवी।
MAT 6:7 तमा मोपोर कितुप पेला यहूदी मिन्‍दुप मिरिक यम्‍बातिवी दोके पेतेक पेतेक सिनी मोपोर माकी, च्‍यिलासिसिन तिवी मोपोर बङी ताङ रिङ्‍बु क्‍यासिन खोप्‍रे क्‍यावु मोपोर ति कोन्‍छ्‍योककी सेन्‍गिवी सिनी नासाम तोङ्‍गिनोक।
MAT 6:8 ती तप्‍की ख्‍यिराङ तिवी दोके माकी, च्‍यिलासिसिन ख्‍यिरा कोन्‍छ्‍योकला लोङ्‍गुप सिनाङ गोमाला के ख्‍यिराङला काङ गोकिवी सिनी ख्‍यिरा पपा कोन्‍छ्‍योकला छ्‍या वे।
MAT 6:9 तुक क्‍यानी ख्‍यिराङ दुक सिनी मोपोर की, ‘ओ, देवाच्‍येनला ज्‍यु वोतुप ङ्‍यिरा पपा कोन्‍छ्‍योक, कोन्‍छ्‍योककी मिङ ति चाङ्‍मा वुङ च्‍यी।
MAT 6:10 कोन्‍छ्‍योककी ग्‍येल्‍खाप वुङ्‍शी। कोन्‍छ्‍योककी नोवा देवाच्‍येनला छेवु दोके दी जम्‍बुलिङला साङ छेशी।
MAT 6:11 हारिङ ङ्‍यिराङला ङ्‍यिमी टेङ साप समा नङ्‍डे की।
MAT 6:12 ङ्‍यिराङला मेलोक्‍पा कितुपतिवाला ङ्‍यिरा माफ बिन्‍दुप दोके ङ्‍यिरा क्‍यावु लाका मेलोक्‍पातिवाला माफ नङ्‍डे की।
MAT 6:13 ङ्‍यिराङला शैतानकी खोक्‍पा ल्‍हापला ख्‍येल माज्‍यी, यिने दुक्‍टा नेसुर र्‍होक्‍टे की। ग्‍येल्‍खाप ताङ ङार ताङ मोवा ति नरी पपा कोन्‍छ्‍योककी ति यिन। आमिन।’
MAT 6:14 दोजो ख्‍यिराङला मेलोवा कितुपतिवाला ख्‍यिरा माफ बिन्‍सुङ सिसिन देवाच्‍येनला ज्‍यु वोतुप ख्‍यिरा पपा कोन्‍छ्‍योककी साङ ख्‍यिराङला माफ नङ्‍गिवी।
MAT 6:15 यिने ख्‍यिराङला मेलोवा कितुपतिवाला ख्‍यिरा माफ माबिन्‍सुङ सिसिन ख्‍यिरा पपा कोन्‍छ्‍योककी साङ ख्‍यिरा क्‍यावु मेलोवाला माफ मनङ्‍गिवी।”
MAT 6:16 “ख्‍यिराङ ङ्‍युङ्‍ने र्‍हुङ्‍गुप पेला खोनक्‍पुतिवा दोके ङो नक्‍पु जोनी मादे। तिवा मीतिवाला ङ्‍युङ्‍ने र्‍हुङ्‍गुप छ्‍या देन्‍दुपला ङो नक्‍पु जोनी देकिवी। ङ ख्‍यिराङला सिरिन, तिवी थोप गोवु छ्‍यक्‍तक ति गोमाला के थोम सिन्‍नी वे।
MAT 6:17 यिने ख्‍यिराङ ति ङ्‍युङ्‍ने र्‍हुङ्‍गुप पेला खलक शल्‍नी गोला नुम कुनी दे।
MAT 6:18 तुक क्‍यानी ख्‍योरो ङ्‍युङ्‍ने र्‍हुङ्‍गुप ति मीतिवाला थोङ माच्‍यिनी छ्‍याकला ज्‍यु वोतुप ख्‍यिरा पपा कोन्‍छ्‍योकला थोङ च्‍यी। तमा ती छ्‍याकला ज्‍यु वोतुप ख्‍यिरा पपा कोन्‍छ्‍योककी ख्‍यिराङला छ्‍यक्‍तक नङ्‍गिवी।”
MAT 6:19 “ख्‍यिरा थोक्‍ला जम्‍बुलिङला टोङ्‍बा माशोम। जम्‍बुलिङला याङ मुक्‍पा ग्‍यकिवी, च छ्‍यानी ना डिवी, कुर्मेनकी कुनी डिवी।
MAT 6:20 बोरु ख्‍यिरा टोङ्‍बा ति ख्‍यिरा थोक्‍ला देवाच्‍येनला शोम। ते मुक्‍पा साङ मग्‍यकिवी, च छ्‍यानी ना साङ मोडोवी, कुर्मेनकी साङ कुनी मोडोवी।
MAT 6:21 कनी ख्‍योरो टोङ्‍बा नोके, ते ख्‍योरो सेम साङ गिवी।”
MAT 6:22 “मिक ति जुकी दिप्‍ली यिन। दोजो ख्‍योरो मिक ल्‍यामु थोङ्‍सुङ सिसिन ख्‍योरो तेरी जु ठछ्‍येली डिवी।
MAT 6:23 यिने ख्‍योरो मिक ल्‍यामु माथोङ्‍सुङ सिसिन ख्‍योरो तेरी जु नक्‍तोमी डिवी। तुक क्‍यानी ख्‍योरो सेमला वोतुप ठछ्‍येली ति नक्‍तोमी गाल्‍सुङ सिसिन ती नक्‍तोमी ति चो नक्‍तोमी डि ताङ?”
MAT 6:24 “सी साङ ज्‍यिन्‍दाक ङ्‍यीला शब्‍ज्‍यी कि मुथुपी। च्‍यिलासिसिन तीकी ज्‍यिन्‍दाक च्‍यिकला ति ङ्‍यिङ्‍मर किवी, च्‍यिकला ति ङ्‍यिङ्‍ज्‍ये किवी। याङ्‍ना च्‍यिकला ति ताङ्‍देन किवी, च्‍यिकला ति मो बेप्‍किवी। ती दोके ख्‍यिराङ कोन्‍छ्‍योक ताङ टोङ्‍बा ङ्‍यिकरला शब्‍ज्‍यी कि मुथुपी।”
MAT 6:25 “ती तप्‍की ङ ख्‍यिराङला सिरिन, ख्‍यिरा मिजीकी थोक्‍ला काङ साप ताङ काङ थुङ्‍गुप ताङ जुकी थोक्‍ला काङ कोन्‍दुप सिनी पप माकी। मिजी ति साप समा सिनाङ खक्‍छ्‍येवु मिन रो? तमा जु ति कोन्‍दुप मज्‍या सिनाङ खक्‍छ्‍येवु मिन रो?
MAT 6:26 नामगी च्‍यच्‍युमतिवाला ल्हो। तिवी सेन साङ मेदेपी, सप्‍ले साङ मुदुवी, तमा पङाङ नाङ्‍ला दुम्‍बुप साङ मुदुम्बिवी। यिने देवाच्‍येनला ज्‍यु वोतुप ख्‍यिरा पपा कोन्‍छ्‍योककी राङ तिवाला ल्‍हेवी। काङ ख्‍यिराङ याङ ती च्‍यच्‍युमतिवा सिनाङ मङ खक्‍छ्‍येवु मिन रो?
MAT 6:27 ख्‍यिरा पर ने सी पप क्‍यानी रङगी छे चेयी साङ रिङ्‍बु जो थुप्‍किवी रो?
MAT 6:28 ख्‍यिराङ च्‍यिला कोन्‍दुप मज्‍यी थोक्‍ला पप किवी? सकी पाके मेन्‍दोकतिवा चुक क्‍यानी ग्‍याकिवे ल्हो। तीकी हुर्ताक साङ मिकिवी, क्‍येलुप साङ मेक्‍येल्‍वी।
MAT 6:29 यिने ङ ख्‍यिराङला सिरिन, छासे ल्‍यामु ल्‍यामु मज्‍या कोन्‍दुप ग्‍येल्‍वु सोलोमनकी साङ ती मेन्‍दोकतिवी नाङ ने च्‍यिक दोके साङ ल्‍यामु कोन मुथुप्‍नोक।
MAT 6:30 हारिङ वोतुप ताङ सला मेला र्‍हेकुप सकी चला साङ कोन्‍छ्‍योककी तुक क्‍यानी छ्‍या नाङ्‍सुङ सिसिन, ओ तेपा अला मेतुपतिवा, ख्‍यिराङला याङ खोकी मङ छ्‍यानी मनङ्‍गिवी रो?
MAT 6:31 तुक क्‍यानी ख्‍यिराङ काङ साप ताङ काङ थुङ्‍गुप ताङ काङ कोन्‍दुप सिनी पप माकी।
MAT 6:32 दिवा तेरी ति कोन्‍छ्‍योकला ङो माशेवु मिरिक यम्‍बातिवी छोल्‍गिवी। यिने देवाच्‍येनला ज्‍यु वोतुप पपा कोन्‍छ्‍योककी ख्‍यिराङला ती तेरी गोकिवी सिनी छ्‍या वे।
MAT 6:33 गोमाला ख्‍यिराङ कोन्‍छ्‍योककी ग्‍येल्‍खाप ताङ खोकी टेङ्‍बुला छोल, तुक क्‍यासिन खोकी ती तेरी ख्‍यिराङला ग्‍यप्‍नी नङ्‍गिवी।
MAT 6:34 तुक क्‍यानी सली थोक्‍ला पप माकी। सली पप ति सला राङ क्‍योङ्‍गिवी। हारिङ खुर गोवु दुक्‍पा हारिङ राङ लङ्‍गिवी।”
MAT 7:1 “मी यम्‍बाला ठिम माकी, तमा कोन्‍छ्‍योककी साङ ख्‍यिराङला ठिम मिकितो।
MAT 7:2 ख्‍यिरा चुक क्यानी यम्‍बाला ठिम किवे, तुक राङ क्‍यानी कोन्‍छ्‍योककी साङ ख्‍यिराङला ठिम किवितो। ख्‍यिरा मी यम्‍बाला चो बिन वे, कोन्‍छ्‍योककी साङ ख्‍यिराङला दोजोयी राङ नङ्‍गितो।
MAT 7:3 ख्‍योरो मी यम्‍बी मिकला वोतुप बोप ति थोङ्‍गिवी, यिने च्‍यिला ख्‍योरो मिकला वोतुप दुङ्‍मा ति मोथोङ्‍नोक?
MAT 7:4 ख्‍योरो मिकला दुङ्‍मा वोसिन चुक क्‍यानी मी यम्‍बाला ‘ख्‍योरो मिकला वोतुप बोप ति ङे थेन तेरुप।’ सिनी सि थुप्‍किवी?
MAT 7:5 ओ, खोनक्‍पु! गोमाला ख्‍योरो मिकला वोतुप दुङ्‍मा ति थेन, तमा ख्‍योरे मिक ति ल्‍यामु थोङ्‍नी मी यम्‍बी मिकला वोतुप बोप ति थेन थुप्‍कितो।
MAT 7:6 चाङ्‍मा वोतुप ति कीला मातेर, तमा ख्‍यिरा मुतीतिवा फक्‍पी दोङ्‍ला माक्‍युर। तुक क्‍यासिन तिवी तिवाला काङ्‍बी वोक्‍ला लेप्‍किवी, तमा ग्‍युर्नी ख्‍यिराङला फेकिवी।”
MAT 7:7 “लोङ, तमा कोन्‍छ्‍योककी ख्‍यिराङला नङ्‍गितो। छोल, तमा ख्‍यिराङला ङ्‍येकितो। गोला डक डक ग्‍योप, तमा कोन्‍छ्‍योककी ख्‍यिरा थोक्‍ला गो बेकितो।
MAT 7:8 च्‍यिलासिसिन लोङ्‍गुपतिवाला नङ्‍गितो, छोलुपतिवाला ङ्‍येकितो, गोला डक डक ग्‍यकुपतिवाला गो बेकितो।
MAT 7:9 ख्‍यिरा पर्ला सी खोरो पुज्‍युङकी शुब्‍ज्‍याङ लाङ्‍सिन तीला दो तेर्किवी रो?
MAT 7:10 याङ्‍ना ङ्‍या लाङ्‍सिन तीला रुल तेर्किवी रो?
MAT 7:11 ख्‍यिराङ दुक्‍टा वोनी साङ रङगी पेजातिवाला च्‍यालक ल्‍यामु तेर शेकिवी सिसिन देवाच्‍येनला ज्‍यु वोतुप ख्‍यिरा पपा कोन्‍छ्‍योककी याङ खोला लोङ्‍गुपतिवाला मङ च्‍यालक ल्‍यामु मनङ्‍गिवी रो?
MAT 7:12 मी यम्‍बी ख्‍यिराङला चुकै किशी सिरुप नो किवे, तुकै राङ ख्‍यिरा तिवाला की। दी ति मोशाकी ठिम ताङ कोन्‍छ्‍योककी लुङ्‍तेम्‍बातिवी बिन्‍दुप खक्‍छ्‍येवु येन्‍देन यिन।”
MAT 7:13 “गो गच्‍चा नाङ्‍ला शु। ङ्‍येलाला क्‍योलुप गो ति ठोल्‍मु वे, तमा ते डोप लाम ति जोल्‍हमु वे। ती तप्‍की ती नाङ्‍ला शुकुप मीतिवा बङी वे।
MAT 7:14 यिने नाम्‍साङ मिशिवु मिजीला क्‍योलुप गो ति गच्‍चा ताङ ते डोप लाम ति कले वे। ती तप्‍की ती नाङ्‍ला शुकुप मीतिवा ङ्‍युङ्‍मु वे।”
MAT 7:15 “लुङ्‍तेम्‍बा मेटेङ्‍बुतिवा नेसुर च्‍याङ्‍से देता। तिवा फिला ल्‍हासिन लुक दोके ल्‍यामु थोङ्‍गिवी, यिने सेम ति ज्‍यिवा लङ्‍गुप खटमु दोके गिवी।
MAT 7:16 डेलु ल्‍हानी तीकी दोङ्‍बु हाक्‍कोवु दोके मीतिवी कितुप लाका ल्‍हानी तिवा चुकै वे सिनी हाक्‍कोकिवी। चुक क्‍यानी छेर्माङ दोङ्‍बी गोला गुन्‍डुम, याङ्‍ना छेर्क्योक दोङ्‍बी गोला अन्‍जीर थिवी रो?
MAT 7:17 तुक राङ क्‍यानी दोङ्‍बु ल्‍यामुला डेलु ल्‍यामु गोर्किवी, तमा दोङ्‍बु मेलोवाला डेलु मेलोवा गोर्किवी।
MAT 7:18 दोङ्‍बु ल्‍यामुला डेलु मेलोवा गोर मुथुपी, तमा दोङ्‍बु मेलोवाला डेलु ल्‍यामु गोर मुथुपी।
MAT 7:19 चुका दोङ्‍बुला डेलु ल्‍यामु मोगोर्वे, ती दोङ्‍बु ति च्‍येनी मे नाङ्‍ला क्‍युर्किवी।
MAT 7:20 तुक क्‍यानी ख्‍यिराङ लुङ्‍तेम्‍बा मेटेङ्‍बुतिवाला तिवी कितुप लाका ल्‍हानी राङ तिवा चुका मी यिन सिनी ङो शेकिवी।”
MAT 7:21 “ङला ‘चोवो, चोवो!’ सिरुपतिवा तेरी कोन्‍छ्‍योककी ग्‍येल्‍खापला शुक मोछ्‍योकिवी, यिने देवाच्‍येनला ज्‍यु वोतुप ङे पपा कोन्‍छ्‍योककी नोवाला युकुपतिवा तिराङ कोन्‍छ्‍योककी ग्‍येल्‍खापला शुक छ्‍योकिवी।
MAT 7:22 कोन्‍छ्‍योककी ठिम तोङ्‍गुप तिङ्‍मी तुजेला मीतिवी ‘ओ, चोवो! ओ, चोवो! काङ चोवोकी मिङला ङ्‍यिरा नम्‍दर माशे रो? काङ चोवोकी मिङला ङ्‍यिरा र्‍हेन्‍डीतिवा माशर रो? तमा चोवोकी मिङला काङ ङ्‍यिरा हलेवु लाकातिवा बङी माक्‍यावु यिन रो?’ सिनी सिवी।
MAT 7:23 ती पेला ङ वुतुङ के ख्‍यिराङला ‘ओ, ख्‍यिराङ दुक्‍टा कितुपतिवा! ङे ख्‍यिराङला ङो राङ माशे। ख्‍यिराङ ङे चा नेमा ग्‍युक!’ सिनी सिरिन।”
MAT 7:24 “सी ङे ताम्‍ङे थोनी ती दोके किवे, ती ति दो ग्‍येर्पु थ्‍वोनी डम्‍ज्‍यी रम्‍बु तिङ्‍नी ती खला खोरो खाङ्‍बा जोप रिक्‍पा वोतुप मी दोके यिन।
MAT 7:25 तमा छ्‍यर्वा टेमु ग्‍यप्‍नी टोक्‍पा ग्‍यम वानी कशेन लुङ ग्‍येर्पु ग्‍यप्‍नी ती खाङ्‍बाला फोक्‍सिनाङ ती खाङ्‍बा ति मरम्‍नोक, च्‍यिलासिसिन ती खाङ्‍बा ति दो ग्‍येर्पु तिङ्‍नी ती खला जोवु तप्‍की यिन।
MAT 7:26 यिने सी ङे ताम्‍ङे थोनी साङ ती दोके मिकिवे, ती ति पेमी खला खोरो खाङ्‍बा जोप मी अम्‍बारङ्‍शिङ दोके यिन।
MAT 7:27 तमा छ्‍यर्वा टेमु ग्‍यप्‍नी टोक्‍पा ग्‍यम वानी कशेन लुङ ग्‍येर्पु ग्‍यप्‍नी ती खाङ्‍बाला फोक्‍सिमा ती खाङ्‍बा ति रम्‍नी छासे ना गाल्‍सुङ।”
MAT 7:28 येशूकी ती तेरी सुङ्सिमा ते वोतुप मी माङ्छ्‍योक खोकी सुङला हलेवा क्‍यासुङ।
MAT 7:29 च्‍यिलासिसिन खोकी यहूदी छ्‍योकी गेकेनतिवा दोके माक्‍यानी कोन्‍छ्‍योककी नङ्‍गुप ओङ्‍ज्‍येन नेमा राङ सुङ लाप नाङ्‍सुङ।
MAT 8:1 तमा येशू पम्‍दोक नेमा मर फेप्‍सिमा मी माङ्‍छ्‍योक खोकी तिङ्‍ला तिङ्‍यासुङ।
MAT 8:2 ती पेला ते जे ग्‍यपुप मी यी खोकी चाला वानी पुमुङ सला चुनी, “ओ चोवो, चोवोकी नोवा वोसिन ङला टेक ज्‍यि थुप्‍किवी।” सिनी सिक्‍यासुङ।
MAT 8:3 तमा खोकी तीला खोरे छ्‍याक ज्‍याक्‍नी दुक सुङ्‍सुङ, “ङला नो वे, ख्‍युरुङ टेक्‍शी!” खोकी तुक सुङ्‍लुङ्‍मे तीकी नेजु ति टेक्‍सुङ।
MAT 8:4 तमा येशूकी तीला सुङ्‍सुङ, “दी ताम्‍ङे ति सुला साङ मालाप, तमा ख्‍युरुङ कोङ्‍यारकी चाला गल्‍नी ख्‍योरो जु छ्‍या तेन। तमा मोशाकी ठिमला वोतुप दोके बुल्‍वा पुल्‍नी ख्‍युरुङ टेकुप ति मीतिवाला हाक्‍को च्‍यी।”
MAT 8:5 येशू कफर्नहुमला फेपुप पेला ते रोमी मक्‍मी सयी च्‍यिककी खकी छ्‍ये यी खोकी चाला वानी दुक सिनी गोङ्‍बा शुसुङ,
MAT 8:6 “ओ चोवो! ङे लावा यी काङ्‍बा लाक्‍पा शोरुप नेजु ग्‍यप्‍नी छासे दुक्‍पा ङ्‍येनी ङ्‍यासाला राङ ङ्‍यिलोङ वे।”
MAT 8:7 तमा येशूकी तीला “ङ गल्‍नी तीला टेक ज्‍यितिन।” सिनी सुङ्‍सुङ।
MAT 8:8 यिने मक्‍मी छ्‍ये तीकी दुक सिक्‍यासुङ, “ओ चोवो! चोवोला ङे खाङ्‍बी नाङ्‍ला फेप शु छ्‍योवु ति ङ मे। चोवोकी सुङ तिराङ सुङ्‍सिनाङ ङे लावा ति टेकिवी।
MAT 8:9 च्‍यिलासिसिन ङ साङ ङ सिनाङ मी छ्‍येकी ओङला देनी वे, तमा ङे ओङला साङ मक्‍मीतिवा वे। ङे तिवा च्‍यिकला ग्‍युक सिक्‍यासिन ती डिवी, च्‍यिकला शोक सिक्‍यासिन ती गिवी। तमा ङे लावा यीला दी की सिक्‍यासिन तीकी तुकै राङ किवी।”
MAT 8:10 ती थोनी येशू छासे हलेवा क्‍यासुङ। तमा खोकी तिङ्‍ला तिङ्‍योकुप मीतिवी थाकाला ग्‍युर्नी दुक सुङ्‍सुङ, “वुतुङ के ङ ख्‍यिराङला सिरिन, इस्राएलकी मीतिवी पर्ला साङ दुका तेपा रम्‍बु याङ तन्‍दा सेक ङे माथोङ वे।
MAT 8:11 तुक क्‍यानी ङ ख्‍यिराङला टेङ्‍बो सिरिन, तेरी जम्‍बुलिङकी मीतिवा शरकी थाका नेसुर ताङ नुपकी थाका नेसुर वानी अब्राहाम ताङ इसहाक ताङ याकूबकी मुला देवाच्‍येनकी ग्‍येल्‍खापकी डेनला देतुप ङ्‍येकितो।
MAT 8:12 यिने ते ग्‍येल्‍खापला दे गोवु गिपातिवा ति ङ्‍येलाला क्‍युर्कितो, तमा तिवा ते ङुप्‍राङ कियी स मुर्कितो।”
MAT 8:13 मीतिवाला तुक सुङ्‍सिमा येशूकी ती मक्‍मी छ्‍ये तीला “त याङ ख्‍युरुङ खाङ्‍बाला ग्‍युक! ख्‍योरो तेपा क्‍यावु दोके च्‍युङ्‍गितो।” सिनी सुङ्‍सुङ। ती पेला राङ तीकी लावा ति टेक्‍नोक।
MAT 8:14 तेसुर येशू पत्रुसकी खाङ्‍बा फेप्‍सुङ। ते पत्रुसकी यिवी ति छा ग्‍यप्‍नी ङ्‍यासाला ङ्‍यिलोङ वोतुप थोङ्‍सुङ।
MAT 8:15 तमा खोकी छ्‍याक ति तीकी लाक्‍पाला रेक्‍सुङ, रेक्‍सिमा शार्क्येक तीकी छा ग्‍यपुप ति तोर्सुङ। ती ज्‍युक्‍ला ती ति लानी खोला शब्‍ज्‍यी पुल्‍सुङ।
MAT 8:16 ती छेर्मु सोर्‍हिपला मीतिवी डेकी कुलुप मी बङीला खोकी चाला टिनी लेसुङ। तमा खोकी सुङ नेसुर राङ डेतिवाला थेन्‍नी तिवा तेरीला टेक च्‍यिसुङ।
MAT 8:17 ती ति कोन्‍छ्‍योककी लुङ्‍तेम्‍बा यशैया नेसुर “खोकी दाक्‍पी जुकी अमोछ्‍योवु खोरे राङ लासुङ, तमा दाक्‍पी नेजुतिवा खोरे राङ खुर्सुङ।” सिनी सुङ्‍गुप सुङ ति तेरी छेवुला राङ दुकै च्‍युङ्‍गुप यिन।
MAT 8:18 येशूकी खोरो गारी गुरीला मी माङ्‍छ्‍योक जोम्‍बुप थोङ्‍सिमा लोमातिवाला ग्‍येम्‍छो फर्केन डोप सिनी सुङ्‍सुङ।
MAT 8:19 तमा यहूदी छ्‍योकी गेकेन मिरा च्‍यिक खोकी चाला वानी “गेकेन, गेकेन कनी फेप्‍किवे, ङ ते राङ तिङ्‍योकिन।” सिनी सिक्‍यासुङ।
MAT 8:20 ती थोसिमा येशूकी तीला “च्‍यिप्‍च्‍याङतिवी ति देतुप फुक वे, नामगी च्‍यच्‍युमतिवी ति देतुप छाङ वे। यिने ङ मी पुज्‍युङला याङ कनी साङ देसा मिन्‍दुक।” सिनी सुङ्‍सुङ।
MAT 8:21 तमा ते वोतुप लोमातिवी पर ने मिरा च्‍यिककी “चोवो, गोमाला गल्‍नी ङे पपा कल्‍दोक कि च्‍यी।” सिनी सिक्‍यासुङ।
MAT 8:22 यिने येशूकी तीला सुङ्‍सुङ, “शेप मीकी शेपतिवाला कल्‍दोक कि च्‍यी, तमा ख्‍युरुङ ति ङे तिङ्‍ला तिङ्‍यो।”
MAT 8:23 तमा येशू टुला जेनी खोकी लोमातिवा ताङ मुला ग्‍येम्‍छो शानी फेपुप छाल्‍सुङ।
MAT 8:24 ती पेला ते ग्‍येम्‍छोला शार्क्येक कशेन लुङ छ्‍यर्वा ग्‍यप्नी तिवा जेवु टु ति छ्‍यी बालापला नुम डोप छाल्‍सुङ। यिने ती पेला येशू ति ङ्‍यी गाल्‍नोक।
MAT 8:25 तमा लोमातिवा येशूकी चिप्‍ला वानी खोला लोङ्‍यिन सिरा “ओ चोवो, ङ्‍यिराङला र्‍होक्‍टे की! ङ्‍यिराङ नुम्‍नी शेप छाल्‍सुङ।” सिनी च्‍यार ग्‍यप्‍सुङ।
MAT 8:26 तमा येशू शेङ्‍नी तिवाला “ओ तेपा अला मेतुप टेङ! ख्‍यिराङ च्‍यिला ज्‍यिवा किवी?” सिनी सुङ्‍नी ती लुङ छ्‍यर्वा ताङ छ्‍यी बालापला वोरु तेन्‍सिमा ती ग्‍येम्‍छो ति छासे कुसुमी गाल्‍सुङ।
MAT 8:27 ती थोङ्‍नी लोमातिवा ति छासे हलेवा लानी, “ओए, दी याङ चुका परकी मी यिन? लुङ छ्‍यर्वा ताङ ग्‍येम्‍छोकी साङ खोकी कला ङ्‍येन्‍गिनोक।” सिनी सिक्‍यासुङ।
MAT 8:28 तमा येशू ग्‍येम्‍छो फर्केन गदरिनीकी मीतिवी लुङ्‍बाला लेप्‍सुङ। ती पेला डेकी कुलुप मी मिरा ङ्‍यी शेप मीला ज्‍योकुप टककी फुक नेमा वुङ्‍यिन कितुप ति येशूकी ठेसुङ। तिवा मीतिवाला छासे ज्‍यिवा लङ्‍गुप तप्‍की सु साङ ती लामला डो मुथुप्‍नोक।
MAT 8:29 येशूला थोङ्‍सिमा तिवा च्‍यार ग्‍यकिन सिरा “ओ कोन्‍छ्‍योककी सेवु, ख्‍योरे ति ङ्‍यिरा मुला काङ तम्‍जी वे? ठिमकी तुजे माछेवाला राङ ख्‍युरुङ ङ्‍यिराङला दुक्‍पा तेरुपला फेवु यिन?” सिनी सिक्‍यासुङ।
MAT 8:30 ती पेला ते फेचेक ग्‍यक्‍ला फाक्‍पातिवा बङी चोयिन नोक।
MAT 8:31 ती डेतिवी येशूला गोङ्‍बा शुनी, “ख्‍योरे ङ्‍यिराङला तेन तोङ्‍गुप राङ यिन्‍सिन ङ्‍यिराङला ती फाक्‍पातिवी नाङ्‍ला शुक च्‍यी।” सिनी सिक्‍यासुङ।
MAT 8:32 तमा खोकी तिवाला “ग्‍युक!” सिनी क नङ्‍सिमा ती डेतिवा थेन्‍नी फाक्‍पातिवी नाङ्‍ला शुसुङ। शुसिमा ती फाक्‍पातिवा तेरी चे थाकाला छ्‍योङ्‍बाल गल्‍नी ती चे नाङ्‍ला नुम्‍नी शिसुङ।
MAT 8:33 तमा फाक्‍पा चोपतिवा टोन गल्‍नी ग्‍येसाकी मीतिवाला ती तेरी ताम्‍ङे ताङ डेकी कुलुप मीतिवाला च्‍युङ्‍गुप ताम्‍ङे शेसुङ।
MAT 8:34 ती थोनी ग्‍येसाकी मीतिवा तेरी थेन्‍नी येशूला ठेतुपला वासुङ। येशूला ठेसिमा तिवी खोला खोप्‍रे लुङ्‍बा नेसुर फेप सिनी गोङ्‍बा शुसुङ।
MAT 9:1 तेसुर येशू टुला जेनी ग्‍येम्‍छो फर्केन फेप्‍नी खोरो युलला लोक्‍सुङ।
MAT 9:2 ते मीतिवी सप्‍तेन खला ङ्‍यिलोकुप लाक्‍पा काङ्‍बा शोरुप मी यीला खोकी चाला खुर्नी वासुङ। तिवी तेपा थोङ्‍नी येशूकी ती लाक्‍पा काङ्‍बा शोरुप तीला “ओ पुज्‍यो, ङाडेङ की। ख्‍योरो दिक्‍पा तानी वे।” सिनी सुङ्‍सुङ।
MAT 9:3 तमा यहूदी छ्‍योकी गेकेनतिवी खोप्‍रे सेमला “दीकी याङ कोन्‍छ्‍योकला के मारे तोङ्‍गिनोक।” सिनी नासाम ताङ्‍नोक।
MAT 9:4 तिवी तुका नासाम तङ्‍गुप ति येशूकी हाक्‍कोनी तिवाला दुक सुङ्‍सुङ, “ख्‍यिराङ च्‍यिला दुका नासाम मेलोवा तोङ्‍गिवी?
MAT 9:5 ‘ख्‍योरो दिक्‍पा तासुङ।’ सिरुप ताम्‍ङे ताङ ‘ख्‍युरुङ लानी यु।’ सिरुप ताम्‍ङे नाङ्‍ला चुका ति मङ जोल्‍हमु यिन?
MAT 9:6 यिने ङ मी पुज्‍युङला दी जम्‍बुलिङला दिक्‍पा ता ज्‍यितुप ओङ वे सिरुप ति ख्‍यिराङला हाक्‍को ज्‍यितिन।” तमा खोकी ती लाक्‍पा काङ्‍बा शोरुप तीला “ख्‍युरुङ खोक लो। तमा ख्‍योरो सप्‍तेनतिवा खुर्नी ख्‍योरो खाङ्‍बा ग्‍युक।” सिनी सुङ्‍सुङ।
MAT 9:7 खोकी तुक सुङ्‍सिमा ती मी ति खोक लानी खोरो खाङ्‍बा गाल्‍सुङ।
MAT 9:8 ती थोङ्‍सिमा मी माङ्‍छ्‍योक ज्‍यिवा क्‍यानी मीतिवाला दुका ओङ नङ्‍गुप कोन्‍छ्‍योकला सोवा तेक्‍सुङ।
MAT 9:9 तेसुर येशू फेपिन कितुप पेला मत्ती सिरुप से दुतुप मी यी से दुतुप लेखुङला देन वोतुप थोङ्‍सुङ। तमा खोकी तीला “ङे तिङ्‍ला तिङ्‍यो।” सिनी सुङ्‍सुङ। खोकी तुक सुङ्‍सिमा ती खोक लानी खोकी तिङ्‍ला तिङ्‍यासुङ।
MAT 9:10 ती ज्‍युक्‍ला येशू ताङ खोकी लोमातिवा मत्तीकी खाङ्‍बाला सोल शेवुला ज्‍युसुङ। ते से दुतुपतिवा ताङ यम्‍बा दिक्‍छेनतिवा साङ बङी वानी खोतिवी मुला देसुङ।
MAT 9:11 ती थोङ्‍नी फरिसीतिवी येशूकी लोमातिवाला “ख्‍यिरा गेकेनकी च्‍यिला से दुतुपतिवा ताङ दिक्‍छेनतिवी मुला देनी सोल शेवु यिन?” सिनी टिसुङ।
MAT 9:12 ती थोनी येशूकी तिवाला सुङ्‍सुङ, “नेजु मेतुपतिवाला याङ आम्‍ज्‍यी मोगोवी, यिने नेर्पुतिवाला याङ गोकिवी।
MAT 9:13 ख्‍यिराङ गल्‍नी ‘ङला गोवु ति बुल्‍वा मिन, यिने च्‍यम्‍बा यिन।’ सिरुप सुङगी तेन्‍दोक ति काङ यिन सिनी ल्‍यामो लोप। ङ ति खुरुङ राङ मी टेङ्‍बु यिन सिरुपतिवी थोक्‍ला मिन, यिने खुरुङ दिक्‍छेन यिन सिरुपतिवाला कतोङ्‍गुपला वावु यिन।”
MAT 9:14 ङ्‍यिम्‍ज्‍यिक बप्‍तिस्‍मा तेरुप यूहन्‍नाकी लोमातिवा येशूकी चाला वानी दुक सिक्‍यासुङ, “ङ्‍यिराङ ताङ फरिसीतिवा नरी नरी ङ्‍युङ्‍ने र्‍हुङ्‍गिवी, यिने ख्‍योरे लोमातिवा ति च्‍यिला ङ्‍युङ्‍ने मुर्‍हुङ्‍गिवी?”
MAT 9:15 येशूकी तिवाला सुङ्‍सुङ, “माक्‍पा खोप्‍रे मुला वोतुप पेला सेक याङ जेन्‍दीकी डेन्‍बुतिवा दुङल किवी रो? यिने माक्‍पाला ठोनी डोप तुजे यी गिवी, ती तुजेला ति तिवी ङ्‍युङ्‍ने र्‍हुङ्‍गिवी।
MAT 9:16 सी साङ मज्‍या ङ्‍यिङ्‍बाला ल्‍हेन्‍दा सम्‍बा मग्‍यकिवी। ग्‍यप्‍सिन ल्‍हेन्‍दा सम्‍बा ति कुम्‍नी मज्‍या ङि्‍यङ्‍बा ति मङ रल्‍गिवी।
MAT 9:17 तुक राङ क्‍यानी सी साङ क्‍वा ग्‍यिवु ङ्‍यिङ्‍बी नाङ्‍ला गुन्‍डुम छ्‍याङ सम्‍बा मुलुकी। लुक्‍सिन क्‍वा ग्‍यिवु फेक रल्‍नी गुन्‍डुम छ्‍याङ पेकिवी, तमा क्‍वा ग्‍यिवु साङ ना डिवी। गुन्‍डुम छ्‍याङ सम्‍बा ति क्‍वा ग्‍यिवु सम्‍बी नाङ्‍ला लुक्‍सिमा तिराङ ती ङ्‍यिकर लुकिवी।”
MAT 9:18 येशूकी ती ताम्‍ङे सुङ्‍यिन कितुप पेला यहूदी छ्‍योखाङकी मी छ्‍ये यी खोकी चाला वानी पुमुङ सला चुनी, “ओ गेकेन, ङे पुम मलोक शिसुङ। यिने गेकेन फेप्‍नी तीकी जुला छ्‍याक ज्‍याक नङ्‍सिन ती ति सेन्‍बु लङ्‍गिवी।” सिनी सिक्‍यासुङ।
MAT 9:19 ती थोसिमा येशू शेङ्‍नी तीकी तिङ्‍ला फेप्‍सुङ, तमा खोकी लोमातिवा साङ खोकी मुला गाल।
MAT 9:20 खोतिवा फेपिन कितुप पेला लो च्‍यिङ्‍ङी नेज्‍युन ठक थेन्‍दुप नेजु वोतुप पुम्‍पेजा यी येशूकी तिङ नेसुर वानी खोकी नम्‍साकी गारीला रेक्‍सुङ।
MAT 9:21 च्‍यिलासिसिन तीकी सेमला खोकी नम्‍साला तिराङ रेक्‍सिनाङ खोरो नेजु ति टेकिवी सिनी नासाम ताङ्‍नोक।
MAT 9:22 तमा येशू ख्‍युर ग्‍युर्नी ती पुम्‍पेजा तीला ल्‍हानी, “ओ पुमो, ख्‍युरुङ ङाडेङ की। ख्‍योरो तेपा क्‍यावु तप्‍की ख्‍युरुङ टेक्‍सुङ।” सिनी सुङ्‍सुङ। खोकी तुक सुङ्‍लुङ्‍मे ती पुम्‍पेजा ति टेक्‍सुङ।
MAT 9:23 तेसुर येशू ती यहूदी छ्‍योखाङकी मी छ्‍येकी खाङ्‍बी नाङ्‍ला शुनी ल्‍हासालेन्‍सिन ते ग्‍येलिङ पुतुप मीतिवा ताङ मी माङ्‍छ्‍योक ङुप्‍राङ ताङ हराङ हुरुङ कियी वोतुप थोङ्‍सुङ।
MAT 9:24 ती थोङ्‍सिमा खोकी तिवाला “ख्‍यिराङ तेरी पाङ्‍ला ग्‍युक। दी पुम याङ शेप मिन, ङ्‍यिलोकुप तिराङ यिन।” सिनी सुङ्‍सुङ। ती थोसिमा मीतिवी खोला मर्च्या क्‍यानी गोटे क्‍यासुङ।
MAT 9:25 तमा मी माङ्‍छ्‍योकला पाङ्‍ला तेन ताङ्‍सिमा येशू नाङ्‍ला शुनी ती पुमकी लाक्‍पाला जिम्‍सिमा ती पुम ति खोक लासुङ।
MAT 9:26 तमा ती ताम्‍ङे ति लुङ्‍बाकी तेरी दासाला टाम्‍सुङ।
MAT 9:27 तेसुर येशू फेपिन कितुप पेला मिक मोथोङ्‍गुप मी मिरा ङ्‍यीकी “ओ दाऊदकी गिपा येशू! ङ्‍यिराङला च्‍यम्‍बा की।” सिनी वोरु देनिन सिरा खोकी तिङ्‍ला तिङ्‍यासुङ।
MAT 9:28 येशू खाङ्‍बी नाङ्‍ला फेप्‍सिमा ती मिक मोथोङ्‍गुपतिवा साङ खोकी चाला वासुङ। तमा येशूकी तिवाला “काङ ङे दी कि थुप्‍किवी सिनी ख्‍यिराङ तेपा किवी?” सिनी टिसुङ। तमा तिवी “लसे चोवो, ङि्‍यराङ तेपा कितिन।” सिनी सिक्‍यासुङ।
MAT 9:29 तमा खोकी तिवी मिकला रेक्‍नी, “ख्‍यिरा तेपा क्‍यावु दोके राङ डोशी।” सिनी सुङ्‍सुङ।
MAT 9:30 खोकी तुक सुङ्‍लुङ्‍मे तिवी मिक ति शार्क्येक पेसुङ। तमा येशूकी तिवाला दी ताम्‍ङे ति सुला साङ मासिर सिनी क नाङ्‍सुङ।
MAT 9:31 यिने तिवा गल्‍नी येशूकी क्‍या नङ्‍गुप हलेवु लाकाकी कोर्ला लुङ्‍बा तेरीला टाम्‍सुङ।
MAT 9:32 तमा तिवा तेसुर थेन्‍नी गल्‍सिमा मीतिवी डेकी कुल्‍नी कुवा गलुप मी यीला येशूकी चाला टिनी लेसुङ।
MAT 9:33 तमा येशूकी ती डे तीला तेन्‍सिमा ती मी कुवा ति ताम्‍ङे लप थुपुप गाल्‍सुङ। ती थोङ्‍सिमा मी माङ्‍छ्‍योक छासे हलेवा क्‍यानी, “इस्राएल लुङ्‍बाला दुका लाका याङ नाम्‍साङ माथोङ।” सिनी सिक्‍यासुङ।
MAT 9:34 यिने फरिसीतिवी “तीकी डेकी ग्‍येल्‍वु शैतानकी ओङ नेमा राङ डेतिवाला देन्‍गिनोक।” सिनी सिक्‍यासुङ।
MAT 9:35 तमा येशू तेरी ग्‍येसा ग्‍येसा ताङ युल युलला फेप्‍नी यहूदी छ्‍योखाङतिवाला येन्‍देन नङ्‍नी कोन्‍छ्‍योककी सुङ ख्‍याप्‍टाक कियी सिरा नेजु नम्‍बा बङी वोतुप तेरी नेर्पुतिवा ताङ अमोछ्‍योवुतिवा तेरीला टेक च्‍यिसुङ।
MAT 9:36 मी माङ्‍छ्‍योक थोङ्‍सिमा येशूकी सेमला छासे ङ्‍यिङ्‍ज्‍ये लानोक, च्‍यिलासिसिन तिवा गोठाला मेतुप लुक दोके दुक्‍पा ङ्‍येन्‍नी यर्मिन मर्मिन गाल्‍नोक।
MAT 9:37 ती तप्‍की खोकी खोरे लोमातिवाला दुक सुङ्‍सुङ, “सप्‍ले दु गोवु ति बङी वे, यिने सप्‍ले दुतुप मीतिवा ङ्‍युङ्‍मु वे।
MAT 9:38 तुक क्‍यानी सप्‍लेकी ज्‍यिन्‍दाक कोन्‍छ्‍योकला सप्‍ले दुतुप मीतिवा तोङ सिनी गोङ्‍बा शु।”
MAT 10:1 येशूकी खोरो लोमा च्‍यिङ्‍ङीतिवाला कताङ्‍नी डेतिवा थेन्‍दुप ओङ ताङ नेजु नम्‍बा बङी ताङ अमोछ्‍योवु तेरीला टेक ज्‍यितुप ओङ नाङ्‍सुङ।
MAT 10:2 ती लोमा च्‍यिङ्‍ङीतिवी मिङ ति दिवा राङ यिन। गोमाला पत्रुस सिरुप सिमोन ताङ तीकी नुप अन्‍द्रियास, जब्‍दियाकी पुज्‍युङ याकूब ताङ तीकी नुप यूहन्‍ना,
MAT 10:3 फिलिप ताङ बारथोलोमाइ, थोमा ताङ से दुतुप मत्ती, तमा अल्‍फयसकी पुज्‍युङ याकूब ताङ थेदियस,
MAT 10:4 लुङ्‍बाकी थोक्‍ला टेमु कितुप छ्‍योक्‍पाकी मी सिमोन ताङ यहूदा इस्‍करियोत यिन। ती यहूदा इस्‍करियोत ति ज्‍युक्‍ला येशूला जिम्‍नी तेरुप मी यिन।
MAT 10:5 येशूकी लोमा च्‍यिङ्‍ङीतिवाला दुक सिनी क नङ्‍नी ताङ्‍सुङ, “ख्‍यिराङ यहूदी मिन्‍दुप मिरिक यम्‍बाकी मीतिवी पर्ला माडो, तमा सामरीतिवी ग्‍येसाला साङ माडो।
MAT 10:6 बोरु तोरुप लुकतिवा दोके गलुप इस्राएलकी मीतिवी पर्ला गल्‍नी
MAT 10:7 ‘कोन्‍छ्‍योककी ग्‍येल्‍खाप चिप्‍ला राङ वा वे।’ सिनी ख्‍याप्‍टाक की।
MAT 10:8 नेर्पुतिवाला टेक च्‍यी, शेपतिवाला सेन्‍बु लोङ, जे ग्‍यपुप नेजु वोतुपतिवाला टेक च्‍यी, तमा डेतिवाला थेन। दी लाका कितुप ओङ ख्‍यिराङला तुक राङ ङ्‍येतुप यिन, तुक क्‍यानी ख्‍यिराङ साङ तिवाला तुक राङ किसा।
MAT 10:9 ख्‍यिराङ छयी नाङ्‍ला सेरकी डेवा, ङुलकी डेवा ताङ सा डेवा काङ साङ माखुर।
MAT 10:10 ख्‍यिराङ डोप पेला झोला साङ पोयप कितुप मज्‍या साङ काचा साङ पेर्का साङ माखुर। च्‍यिलासिसिन लाका कितुपतिवाला गोवु च्‍यालकतिवा ङ्‍येकितो।
MAT 10:11 ख्‍यिराङ चुका ग्‍येसा याङ्‍ना युलला डिवे, ते ख्‍यिराङला ल्‍यामु क्‍यानी गासो शोप मी छोल। तमा तेसुर मागल्‍वा सेक ती मी तीकी खाङ्‍बाला दे।
MAT 10:12 ख्‍यिराङ ती खाङ्‍बी नाङ्‍ला शुकुप पेला ती खाङ्‍बी मीतिवाला ‘ख्‍यिराङला कोन्‍छ्‍योककी लोदिमु नङ्‍शी।’ सिनी सी।
MAT 10:13 दोजो ती खाङ्‍बी मीतिवी ती लोदिमु ङ्‍ये छ्‍योवु वोसिन ती लोदिमु ति ती खाङ्‍बाला लु च्‍यी, यिने तिवी ती लोदिमु ङे छ्‍योवु मेसिन ती लोदिमु ति ख्‍यिराङला राङ लोक्‍नी वुङ च्‍यी।
MAT 10:14 सी ख्‍यिराङला गासो मुशुवे याङ्‍ना ख्‍यिरा ख्‍याप्‍टाक क्‍यावु सुङ मेङ्‍येन्‍वे, ख्‍यिराङ ती खाङ्‍बा नेवा थेन डोप पेला ख्‍यिरा काङ्‍बाला कोवु थल्‍दुक ति र्‍हुनी ज्‍योक।
MAT 10:15 ङ ख्‍यिराङला टेङ्‍बो सिरिन, कोन्‍छ्‍योककी ठिम तोङ्‍गुप तिङ्‍मी तुजेला ती ग्‍येसाला सदोम ताङ गमोरा ग्‍येसाला ख्‍येलुप सिनाङ मङ कोन्‍छ्‍योक नेमा पर्च्या ख्‍येल्‍गितो।”
MAT 10:16 “ल्‍होसा, खटमुतिवी पर्ला लुकतिवा तङ्‍गुप दोके ङ ख्‍यिराङला तोङ्‍यिनो। तुक क्‍यानी ख्‍यिराङ रुल दोके च्‍यङ्‍बु ताङ गम्‍देर दोके क्‍येन मेतुप वुङ गोकितो।
MAT 10:17 ख्‍यिराङ मीतिवा नेसुर च्‍याङ्‍से देता। च्‍यिलासिसिन तिवी ख्‍यिराङला ठिम्‍खाङला क्‍योल्‍गितो, तमा यहूदी छ्‍योखाङला टिनी पाङ्‍शर तोङ्‍गितो।
MAT 10:18 तमा ङला तेपा क्‍यावु तप्‍की तिवी ख्‍यिराङला मी छ्‍येतिवा ताङ ग्‍येल्‍वुतिवी चिप्‍ला लङ ज्‍यिकितो, तमा तिवा ताङ यहूदी मिन्‍दुप मिरिक यम्‍बाकी मीतिवी दोङ्‍ला ख्‍यिरा ङे थोक्‍ला पङ्‍बु तेर्कितो।
MAT 10:19 मीतिवी ख्‍यिराङला जिम्‍नी ठिम्‍खाङला क्‍योलुप पेला ख्‍यिराङ चुक सि गोकिवी याङ्‍ना काङ सि गोकिवी सिनी पप माकी, च्‍यिलासिसिन ख्‍यिरा काङ सि गोवु ति ती पेला राङ ख्‍यिराङला लप्‍कितो।
MAT 10:20 ती पेला लपुप ति ख्‍यिराङ मिन, यिने ख्‍यिराङ नेसुर सुङ्‍गुप ख्‍यिरा पपा कोन्‍छ्‍योककी थु चाङ्‍मा यिन।
MAT 10:21 मीतिवी खोरो अच्‍युनुपला सेतुपला चेक तेकितो, तमा पपी खोरो पेजातिवाला ताङ पेजातिवी खोरो पपाआमी तेन्‍दोकला लानी तिवाला से ज्‍यिकितो।
MAT 10:22 ख्‍यिरा ङला तेपा क्‍यावु तप्‍की मी तेरीकी ख्‍यिराङला ङ्‍यिङ्‍मर कितो। यिने सु ज्‍युक्‍ला सेक तेपा क्‍यानी हम क्‍यान देकिवे, तीला र्‍होकितो।
MAT 10:23 तिवी ख्‍यिराङला ग्‍येसा च्‍यिकला छेटाङ बिन्‍सिन ग्‍येसा यम्‍बाला टोनी ग्‍युक। वुतुङ के ङ ख्‍यिराङला सिरिन, ख्‍यिराङ इस्राएलकी ग्‍येसा तेरीला लेपुप सिनाङ गोमाला ङ मी पुज्‍युङ वुङ्‍गितो।
MAT 10:24 लोमा खोरो गेकेन सिनाङ छ्‍ये मेवी, तमा लावा खोरो ज्‍यिन्‍दाक सिनाङ छ्‍ये मेवी।
MAT 10:25 लोमा खोरो गेकेन दोके ताङ लावा खोरो ज्‍यिन्‍दाक दोके च्‍युङ्‍सिन टेके गिवी। तिवी खाङ्‍बी ज्‍यिन्‍दाकला बालजिबुल सिनी सिसिन ती खाङ्‍बी मीतिवाला याङ मङ चुका मेलोक्‍पा मिसिर्वी रो?”
MAT 10:26 “तुक क्‍यानी तिवाला ज्‍यिवा माकी, च्‍यिलासिसिन उप ज्‍याक्‍नी ज्‍युक्‍ला मोथोङ्‍गुप ताङ बान ज्‍याक्‍नी ज्‍युक्‍ला हाक्‍मोकोवु ति काङ साङ मे।
MAT 10:27 ङे ख्‍यिराङला नक्‍तोमीला काङ सिक्‍यावे, ती ति ख्‍यिरा ठछ्‍येलीला सी। तमा ङे ख्‍यिराङला सताम नाङ्‍ला क्‍यावु ताम्‍ङे ति खाङ्‍बी ख नेमा ख्‍याप्‍टाक की।
MAT 10:28 ख्‍यिरा जु सेसिनाङ नम्‍शिङ ति से मुथुपुप तीला ज्‍यिवा माकी। यिने जु ताङ नम्‍शिङ ङ्‍यिकरला ङ्‍येलाला क्‍युरुप कोन्‍छ्‍योकला ति ज्‍यिवा की।
MAT 10:29 डेवा च्‍यिकला बन्‍गिरी ङ्‍यी मिटिन्‍वी रो? यिने पपा कोन्‍छ्‍योककी नोवा मेसिन बन्‍गिरी च्‍यिक साङ सला मुलुम्‍वी।
MAT 10:30 ख्‍यिरा ति याङ गोकी र्‍हे ङ्‍येङ्‍मातिवा साङ कोन्‍छ्‍योककी तेरी ङोनी ज्‍याङ वे।
MAT 10:31 तुक क्‍यानी ख्‍यिराङ ज्‍यिवा माकी, च्‍यिलासिसिन ख्‍यिराङ याङ बङी वोतुप बन्‍गिरीतिवा सिनाङ मङ खक्‍छ्‍येवु वे।”
MAT 10:32 “सी मीतिवी मिङ्‍गाला ङला तेपा किवी सिनी सिवे, ङ साङ देवाच्‍येनला ज्‍यु वोतुप ङे पपी मिङ्‍गाला तीला ङे मी यिन सिनी सिरिन।
MAT 10:33 यिने सी मीतिवी मिङ्‍गाला ङला ङो मेशेवी सिनी सिवे, ङ साङ देवाच्‍येनला ज्‍यु वोतुप ङे पपी मिङ्‍गाला तीला ङो मेशेवी सिनी सिरिन।”
MAT 10:34 “ङ जम्‍बुलिङकी मीतिवाला डिक च्‍यिनी लोदिमु तेरुपला वावु यिन सिनी ख्‍यिराङ नासाम मातोङ। ङ याङ लोदिमु तेरुपला मिन, यिने तिवाला ख्‍ये बेतुपला वावु यिन।
MAT 10:35 ङ याङ ङला तेपा कितुपतिवा खोरो पपी मुला, पुम खोरो आमी मुला, तमा नमा खोरो यिवी मुला उटक लोङ्‍गुपला वावु यिन।
MAT 10:36 तुक क्‍यानी ख्‍यिरा डतिवा ति रङगी मीतिवा राङ गिवी।
MAT 10:37 सी ङला सिनाङ खोरो पपाआमाला मङ ङ्‍यिङ्‍ज्‍ये किवे, ती ति ङे तिङ्‍ला तिङ्‍योक मोछ्‍योवी। सी ङला सिनाङ खोरो पुज्‍युङपुमला मङ ङ्‍यिङ्‍ज्‍ये किवे, ती साङ ङे तिङ्‍ला तिङ्‍योक मोछ्‍योवी।
MAT 10:38 तमा सु खोरो ग्‍यङ्‍शिङ खुर्नी ङे तिङ्‍ला तिङ मोङ्‍योक वे, ती साङ ङे लोमा वुङ मोछ्‍योवी।
MAT 10:39 सी खोरो मिजी र्‍होकुप छोल्‍गिवे, तीकी मिजी ति तोर्नी डिवितो। यिने सी ङे थोक्‍ला खोरो मिजी तोर ज्‍यिकिवे, तीला नाम्‍साङ मिशिवु मिजी थोप्‍कितो।”
MAT 10:40 “सी ख्‍यिराङला सेमला लिङ्‍गिवे, तीकी ङला खोरो सेमला लावु यिन। सी ङला सेमला लिङ्‍गिवे, तीकी ङला तोङ्‍गुप तीला खोरो सेमला लावु यिन।
MAT 10:41 कोन्‍छ्‍योककी लुङ्‍तेम्‍बाला कोन्‍छ्‍योककी लुङ्‍तेम्‍बा सिनी सेमला लिङ्‍गुप तीला कोन्‍छ्‍योककी लुङ्‍तेम्‍बाला थोपुप छ्‍यक्‍तक थोप्‍किवी। टेङ्‍बु वोतुप मीला टेङ्‍बु वोतुप मी सिनी सेमला लिङ्‍गुप तीला टेङ्‍बु वोतुप मीला थोपुप छ्‍यक्‍तक थोप्‍किवी।
MAT 10:42 सी दी छ्‍युङातिवी पर्ला मिरा च्‍यिकला ङे लोमा यिन सिनी छ्‍यु टङ्‍गा फर्वा काङ यिन्‍सिनाङ तेर्किवे, तीला थोपुप छ्‍यक्‍तक ति वुतुङ के तोर्नी मोडोवी।”
MAT 11:1 येशूकी खोरो लोमा च्‍यिङ्‍ङीतिवाला ती तेरी ताम्‍ङेतिवा सुङ्‍सिमा तेसुर चाला वोतुप ग्‍येसा ग्‍येसाला फेप्‍नी तेकी मीतिवाला लोपुप ताङ लेन ल्‍यामु ख्‍याप्‍टाक क्‍यासुङ।
MAT 11:2 ती पेला यूहन्‍नाकी येशू ख्रीष्‍टकी क्‍या नङ्‍गुप तेरी लाकातिवी कोर्ला चोन्‍खाङला थोनोक। तमा तीकी खोरो लोमातिवाला खोकी चाला दुक सिनी टि ताङ्‍सुङ,
MAT 11:3 “कोन्‍छ्‍योककी तङ्‍गुप ख्रीष्‍ट ति ख्‍युरुङ राङ यिनाङ की, ङ्‍यिराङ मी यम्‍बाला गुनी दे गोकिवी?”
MAT 11:4 तमा येशूकी तिवाला सुङ्‍सुङ, “त ख्‍यिराङ लोक गल्‍नी ख्‍यिरा काङ थोवु ताङ काङ थोङ्‍गुप ति तीला दुक सिनी सी,
MAT 11:5 ‘मिक मोथोङ्‍गुपतिवा मिक थोङ थुप्‍किवी, थेङ्‍बातिवा युक थुप्किवी, जे ग्‍यपुप नेजु वोतुपतिवा टेक ज्‍यिकिवी, वोन्‍बातिवा थो थुप्‍किवी, शेपतिवा सेन्‍बु लोङ्‍गिवी, तमा पेराङ्‍बुतिवाला लेन ल्‍यामु ख्‍याप्‍टाक कियी वे।’
MAT 11:6 ङला तेपा कितुप क्‍युर्नी मोज्‍योकुप ति मोलाम थोपुप यिनो।”
MAT 11:7 तमा यूहन्‍नाकी लोमातिवा लोक्‍नी गल्‍सिमा येशूकी मी माङ्‍छ्‍योकला यूहन्‍नाकी कोर्ला दुक सिनी सुङ्‍सुङ, “ख्‍यिराङ दासा पाङ्‍थेरीला काङ ल्‍हापला गलुप? काङ वुर्तुककी योकुप ङ्‍युङ्‍मातिवा ल्‍हापला गलुप यिन?
MAT 11:8 मिसिन ख्‍यिराङ काङ ल्‍हापला थेन्‍दुप? मज्‍या ल्‍यामु ल्‍यामु कोन्‍दुप मी ल्‍हापला यिन? मज्‍या ल्‍यामु ल्‍यामु कोन्‍दुपतिवा याङ ग्‍येल्‍खाङ नाङ्‍ला राङ देकिवी।
MAT 11:9 मिसिन ख्‍यिराङ काङ ल्‍हापला थेन्‍दुप? कोन्‍छ्‍योककी लुङ्‍तेम्‍बातिवाला ल्‍हापला यिन? यिन, ङ ख्‍यिराङला सिरिन, ती ति कोन्‍छ्‍योककी लुङ्‍तेम्‍बा सिनाङ छ्‍ये यिन।
MAT 11:10 तीकी कोर्ला कोन्‍छ्‍योककी सुङगी नाङ्‍ला दुक सिनी टि वे, ‘ल्‍होसा, ङ ङे लेन क्‍योलुप मीला ख्‍योरो गोमाला तोङ्‍यिनो, तीकी ख्‍योरो थोक्‍ला लाम टडिक कितो।’
MAT 11:11 वुतुङ के ङ ख्‍यिराङला सिरिन, आम्‍पुमकी खोक नेमा क्‍येवुतिवी पर्ला यूहन्‍ना सिनाङ छ्‍ये ति यम्‍बा सु साङ मे। यिन्‍सिनाङ कोन्‍छ्‍योककी ग्येल्‍खापला याङ सु तेरी सिनाङ छ्‍युङा नोके, ती ति यूहन्‍ना सिनाङ छ्‍ये यिन।
MAT 11:12 बप्‍तिस्‍मा तेरुप यूहन्‍नाकी ख्‍याप्‍टाक कितुप पे नेज्‍युनी तन्‍दा सेक कोन्‍छ्‍योककी ग्‍येल्‍खापला उर्च्युम ग्‍यकिन वे, तमा कशेन उर्च्युम ग्‍यकुपतिवाला ती ति ङ्‍येकिवी।
MAT 11:13 यूहन्‍ना वुङ्‍गुप सिनाङ गोमाला के तेरी कोन्‍छ्‍योककी लुङ्‍तेम्‍बातिवा ताङ मोशाकी ठिमला कोन्‍छ्‍योककी ग्‍येल्‍खाप वुङ्‍गुपकी कोर्ला नम्‍दर शेनी वे।
MAT 11:14 तिवी नम्‍दर शेतुप ति ख्‍यिरा सेमला लिङ्‍गुप राङ यिन्‍सिन वुतुङ के ती ति वुङ्‍गिवी सिनी सिक्‍यावु एलिया यिन।
MAT 11:15 सी ति ङ्‍येन्‍दुप नम्‍ज्‍योक नोके, तीकी ङ्‍येन्‍शी।
MAT 11:16 दी गिपाला ङ काङ ताङ क्‍यानी डिङ ल्‍हाप? दी गिपा याङ हाला देनी खोप्‍राङ दाल्‍जातिवी मुला दुका ताम्‍ङे कियी वोतुप आङ टिक्‍पेतिवा दोके यिन,
MAT 11:17 ‘ङ्‍यिरा ख्‍यिरा थोक्‍ला लुमु पुयिन, यिने ख्‍यिराङ माछ्‍याम। ङ्‍यिराङ ङुप्‍राङ क्‍यायिन, यिने ख्‍यिराङ माङु।’
MAT 11:18 यूहन्‍नाकी साप साङ मासो, तमा थुङ्‍गुप साङ माथुनी ङ्‍युङ्‍ने देसुङ। ती पेला मीतिवी तीला डे ग्‍यप्‍नोक सिनी सिक्‍यासुङ।
MAT 11:19 ङ मी पुज्‍युङ वानी साप ताङ थुङ्‍गुप ति मीतिवी ल्‍हानी ‘ती ति सज्‍युरे ताङ छ्‍याङ्‍गेले यिन, तमा से दुतुप ताङ दिक्‍छेनतिवी दाल्‍जा यिन।’ सिनी सिवी। यिने कोन्‍छ्‍योककी रिक्‍पा ति ती रिक्‍पा वोतुप मीकी क्‍यावु लाका नेसुर राङ हाक्‍कोकिवी।”
MAT 11:20 चुका ग्‍येसाला येशूकी हलेवु लाकातिवा बङी क्‍यावे, ती ग्‍येसाकी मीतिवा दिक्‍पा ने सेम माग्‍युरुप तप्‍की खोकी तिवाला दुक सिनी वोरु तेन्‍सुङ,
MAT 11:21 “ओ, खोराजीनकी मीतिवा, ख्‍यिराङला मोताप सुकितो! ओ बेथसेदाकी मीतिवा, ख्‍यिराङला मोताप सुकितो! ख्‍यिरा पर्ला क्‍यावु हलेवु लाकातिवा टुरोस ताङ सीदोनला क्‍यावु यिन्‍सिन तेकी मीतिवा गोमाला के रा र्‍होक्‍पुकी मज्‍या कोन्‍नी खोरो गोला थल्‍जाम लुक्‍नी दिक्‍पा ने सेम ग्‍युरुप्‍जा।
MAT 11:22 यिने ङ ख्‍यिराङला सिरिन, कोन्‍छ्‍योककी ठिम तोङ्‍गुप तिङ्‍मी तुजेला टुरोस ताङ सीदोन ग्‍येसाकी मीतिवा ख्‍यिराङ सिनाङ मङ हम क्‍यानी दे थुप्‍किवी।
MAT 11:23 ओ कफर्नहुम ग्‍येसाकी मीतिवा, ख्‍यिराङ येर देवाच्‍येनला के देकिवी? मिन, ख्‍यिराङ याङ मर ङ्‍येलाला के लुम्‍गिवी। च्‍यिलासिसिन ख्‍यिरा पर्ला क्‍यावु हलेवु लाकातिवा सदोम ग्‍येसाला क्‍यावु यिन्‍सिन ती ग्‍येसा ति हारिङ सेक लुवुजा।
MAT 11:24 यिने ङ ख्‍यिराङला सिरिन, ठिम कितुप तिङ्‍मी तुजेला सदोम ग्‍येसाकी मीतिवाला सिनाङ ख्‍यिराङला मङ कोन्‍छ्‍योक नेमा पर्च्या ख्‍येल्‍गितो।”
MAT 11:25 ती पेला येशूकी दुक सुङ्‍नी मोपोर क्‍या नाङ्‍सुङ, “ओ पपा, देवाच्‍येन ताङ जम्‍बुलिङकी चोवो, ङ पपाला थुचिछे बुलिन। च्‍यिलासिसिन पपी दी ताम्‍ङे ति रिक्‍पा वोतुप ताङ लापुप मीतिवाला छ्‍याकला ज्‍याक्‍नी आङा टिक्‍पे दोके मालापुप मीतिवाला छ्‍या तेन्‍सुङ।
MAT 11:26 यिन, पपा, ती ति पपाला गा लङ्‍गुप नोवा यिन।
MAT 11:27 पपी ङला तेरी चेक तेन नाङ्‍सुङ। पपी तिराङ पुज्‍युङला ङो शेकिवी। तमा पुज्‍युङ ताङ पुज्‍युङकी खुरुङ सु यिन सिनी छ्‍या देन्‍दुपला पेतुपतिवी मिसिन यम्‍बा सी साङ पपाला ङो मेशेवी।
MAT 11:28 ओ दुक्‍पा ताङ दुङल खुर्नी सेमला येन छ्‍येतुपतिवा, ख्‍यिराङ तेरी ङे ते शोक। तमा ङ ख्‍यिराङला ङप्‍सु तेरिन।
MAT 11:29 ङ सेम वोल्‍मु ताङ कुसु ज्‍यम्‍बु वे, ख्‍यिराङ ङे ङ्‍याशिङ खुर्नी ङे नेसुर लोप। तुक क्‍यासिन ख्‍यिरा सेमला ङप्‍सु ङ्‍येकिवी।
MAT 11:30 च्‍यिलासिसिन ङे ङ्‍याशिङ ति जोल्‍हमु ताङ ङे खुरु ति येङ्‍गा वे।”
MAT 12:1 चेयी ज्‍युक्‍ला ङासोप ङ्‍यिमाला येशू ताङ खोकी लोमातिवा टे शिङ ख नेवा क्‍यानी फेपिन कितुप पेला लोमातिवा ल्‍होवा लानी टे ङ्‍यिमा थुनी सोनोक।
MAT 12:2 ती थोङ्‍सिमा फरिसीतिवी येशूला “ल्‍हो ताङ! ख्‍योरे लोमातिवी ङासोप ङ्‍यिमाला कितुप मेङ्‍गुप लाका किनोक।” सिनी सिक्‍यासुङ।
MAT 12:3 येशूकी तिवाला सुङ्‍सुङ, “ग्‍येल्‍वु दाऊदकी खुरुङ ताङ खोरो मुला वोतुपतिवा ल्‍होवा लावु पेला काङ क्‍यासुङ सिनी कोन्‍छ्‍योककी सुङला ख्‍यिरा मारा?
MAT 12:4 दाऊद कोन्‍छ्‍योकला सोवा देकुप खाङ्‍बी नाङ्‍ला शुनी कोन्‍छ्‍योकला पुलुप शुब्‍ज्‍याङ ति लानी खुरुङ ताङ खोरो मुला वोतुपतिवी मासो रो? ती शुब्‍ज्‍याङ ति कोङ्‍यारतिवी मिसिन मी यम्‍बी साप मेङ्‍नोक।
MAT 12:5 येलुङ ङासोप ङ्‍यिमाला कोङ्‍यारतिवी यहूदी ल्‍हङाङ नाङ्‍ला ङासोप ङ्‍यिमाला कितुप मेङ्‍गुप लाका क्‍यासिनाङ तिवाला क्‍येन मोफोकिवी सिनी कोन्‍छ्‍योककी मोशाला नङ्‍गुप ठिमला ख्‍यिरा मारा?
MAT 12:6 ङ ख्‍यिराङला सिरिन, यहूदी ल्‍हङाङ सिनाङ छ्‍ये वोतुप ति दे वे।
MAT 12:7 ‘ङला बुल्‍वा मोगोवी, यिने ख्‍यिरा च्‍यम्‍बा कितुप गोकिवी।’ सिनी टि वोतुप कोन्‍छ्‍योककी सुङगी तेन्‍दोक ति वुतुङ ख्‍यिरा हाक्‍कोवु यिन्‍सिन क्‍येन तेर मोगोवु मीला ख्‍यिरा क्‍येन मेतेरुप्‍जा।
MAT 12:8 च्‍यिलासिसिन ङ मी पुज्‍युङ ति ङासोप ङ्‍यिमाकी चोवो यिन।”
MAT 12:9 ती ज्‍युक्‍ला येशू तेसुर यहूदी छ्‍योखाङ नाङ्‍ला फेप्‍सुङ।
MAT 12:10 तमा ते लाक्‍पा च्‍यिक कम्‍बु ठोक गलुप मी यी नोक। ते वोतुप ललाइ मीतिवी येशूला क्‍येन तेरुप नोनी दुक सिनी खोला टिसुङ, “काङ ङासोप ङ्‍यिमाला नेर्पु टेक ज्‍यितुप गिवी ताङ मेङ्‍गिवी?”
MAT 12:11 तमा येशूकी तिवाला सुङ्‍सुङ, “दोजो ख्‍यिरा पर्ला ललाइकी ति लुक च्‍यिक वे, ती ति ङासोप ङ्‍यिमाला मुक्‍तुम नाङ्‍ला लुम्‍सिन ख्‍यिरा तीला पाङ्‍ला मेदेन्‍वी रो?
MAT 12:12 लुक सिनाङ मी ति मङ खक्‍छ्‍येवु मिन रो? तुक क्‍यानी ङासोप ङ्‍यिमाला लाका ल्‍यामु कितुप गिवी।”
MAT 12:13 तमा येशूकी ती लाक्‍पा कम्‍बु ठोक गलुप मी तीला “ख्‍योरो लाक्‍पा क्‍योङ।” सिनी सुङ्‍सुङ। तीकी लाक्‍पा क्‍याङ्‍सिमा ती लाक्‍पा टेक्नी यम्‍बा लाक्‍पा दोके ल्‍यामु गाल्‍सुङ।
MAT 12:14 ती थोङ्‍सिमा फरिसीतिवा तेसुर थेन गल्‍नी येशूला सेतुपला केवुल क्‍यासुङ।
MAT 12:15 तिवी खोरो तेन्‍दोकला केवुल क्‍यावु ति येशूकी हाक्‍कोनी खो तेसुर फेप्‍सुङ। यिने मी माङ्‍छ्‍योक खोकी तिङ्‍ला तिङ्‍यासुङ। तमा खोकी तिवी पर्ला वोतुप नेर्पुतिवा तेरीला टेक च्‍यिसुङ।
MAT 12:16 तमा खोकी खोरो कोर्ला सुला साङ मासिर सिनी तिवाला क नाङ्‍सुङ।
MAT 12:17 दी ति कोन्‍छ्‍योककी लुङ्‍तेम्‍बा यशैया नेसुर दुक सुङ्‍गुप कोन्‍छ्‍योककी सुङ ति तेरी छेवुला यिन,
MAT 12:18 “ङे थोक्‍ला पेतुप लावा ति दी राङ यिन। दी ति ङे ङ्‍यिङ्‍ज्‍येवु यिन। दीकी मुला ङ छासे गा लानी वे। ङ ङे थु चाङ्‍मा ति दीला तेरिन। तमा दीकी तेरी मिरिककी मीतिवाला ङे ठिम टेङ्‍बुकी थोक्‍ला ख्‍याप्‍टाक किवी।
MAT 12:19 ती ति सु ताङ क्‍यानी साङ खाँदा मिकिवी, च्‍यार साङ मग्‍यकिवी। लाम नेवा सी साङ तीकी वोरु मोथोवी।
MAT 12:20 ङे ठिम टेङ्‍बुकी ग्‍येला कितुप तुजे मालेपा सेक तीकी ककुप ङ्‍युङ्‍माला मोच्‍योकिवी, शितुछ्‍येप सलोक्‍टी मेसेवी।
MAT 12:21 तमा तेरी मिरिककी मीतिवा तीकी मिङला रेवा किवी।”
MAT 12:22 तमा मीतिवी डेकी कुल्‍नी मिक साङ मोथोङ्‍गुप, ताम्‍ङे साङ लप मुथुवु मी यीला येशूकी चाला टिनी लेसुङ। तमा खोकी तीला टेक च्‍यिसिमा ती मी ति ताम्‍ङे लप थुपुप ताङ मिक थोङ थुपुप गाल्‍सुङ।
MAT 12:23 ती थोङ्‍सिमा मी माङ्‍छ्‍योक हलेवा लानी, “काङ दी याङ ग्‍येल्वु दाऊदकी गिपा यिन्‍दे की?” सिनी सिक्‍यासुङ।
MAT 12:24 तमा ती थोनी फरिसी छ्‍योक्‍पाकी मीतिवी “दी मी तीकी याङ डेकी ग्‍येल्‍वु बालजिबुलकी ओङ नेमा डेतिवा देन्‍गिनोक।” सिनी सिक्‍यासुङ।
MAT 12:25 तिवी तुका नासाम तङ्‍गुप ति येशूकी हाक्‍कोनी तिवाला सुङ्‍सुङ, “चुका ग्‍येल्‍खाप साङ खोप्‍राङ पर्ला ख्‍ये पेसिन तिवा ना डिवी। तमा चुका ग्‍येसा याङ्‍ना मिछाङ साङ खोप्‍राङ पर्ला ख्‍ये पेसिन तिवा अला मुलुवी।
MAT 12:26 शैतानकी शैतानला तेन्‍सुङ सिसिन तिवी पर्ला ख्‍ये पेकिवी। तुक क्‍यासिन तिवी ग्‍येल्‍खाप ति चुक क्‍यानी लु थुप्‍किवी रो?
MAT 12:27 दोजो बालजिबुलकी ङार नेमा राङ ङे डेतिवा देन्‍गिवी सिसिन ख्‍यिरा लोमातिवी सी ङार नेमा डेतिवा देन्‍गिवी रो? तुक क्‍यासिन ख्‍यिरा लोमातिवी ख्‍यिराङला क्‍येन तेर्किवी।
MAT 12:28 यिने ङे कोन्‍छ्‍योककी थु चाङ्‍मा नेमा डेतिवा देन्‍गिवी सिसिन ती ति कोन्‍छ्‍योककी ग्‍येल्‍खाप ख्‍यिरा पर्ला वा वे सिरुप ति छ्‍या तेन्‍दुप यिन।
MAT 12:29 चुका मी तीकी साङ गोमाला मी रम्‍बुला कोङ माकिन्‍दा सेक्‍ला ती मी तीकी खाङ्‍बा शुनी तीकी नोर टोङ्‍बातिवा कुनी डो थुप्‍किवी रो? यिने ती खाङ्‍बी मीला कोङ किन्‍सिमा तिराङ तीकी खाङ्‍बा कुनी डो थुप्‍किवी।
MAT 12:30 सु ङे छ्‍योला मेवे, ती ति ङला क्‍येन तेरुप मी यिन। सी ङ ताङ मुला मीतिवा कोन्‍छ्‍योकला टि मेङ्‍गिवे, ती ति मीतिवाला कोन्‍छ्‍योक नेसुर थरा थुरा तोङ्‍गुप मी यिन।
MAT 12:31 तुक क्‍यानी ङ ख्‍यिराङला सिरिन, मीतिवी क्‍यावु चुका दिक्‍पा ताङ कोन्‍छ्‍योककी तेन्‍दोकला ताम्‍ङे मेलोवा क्‍यावु ति माफ ङ्‍येकिवी, यिने कोन्‍छ्‍योककी थु चाङ्‍माला मारे तङ्‍गुप ति माफ मेङ्‍येवी।
MAT 12:32 तमा चुका मी तीकी ङ मी पुज्‍युङला ताम्‍ङे मेलोवा सिवे, तीकी दिक्‍पा माफ ङ्‍येकिवी, यिने कोन्‍छ्‍योककी थु चाङ्‍माला ताम्‍ङे मेलोवा सिरुप तीला दी कल्‍वाला ताङ वुङ्‍गुप कल्‍वाला साङ तीकी दिक्‍पा माफ मेङ्‍येवी।”
MAT 12:33 “दोङ्‍बु ल्‍यामु वोसिन डेलु साङ ल्‍यामु राङ गोर्किवी। दोङ्‍बु मेलोवा वोसिन डेलु साङ मेलोवा राङ गोर्किवी। डेलु ल्‍हानी तीकी दोङ्‍बु चुकै वे सिरुप ति हाक्‍कोकिवी।
MAT 12:34 ओ दुक्‍टाकी गिपातिवा! ख्‍यिराङ सेम दुक्‍टा वे, चुक क्‍यानी ताम्‍ङे ल्‍यामु कि थुप्‍किवी? च्‍यिलासिसिन सेमला काङ क्‍येङ नोके, ती ति ख नेमा लप्‍किवी।
MAT 12:35 सेम जङ्‍बु वोतुप तीकी खोरो सेमला काङ ल्‍यामु ज्‍याक्‍वे, ती ल्‍यामु ति देन्‍गिवी। तमा सेम दुक्‍टा वोतुप तीकी खोरो सेमला काङ दुक्‍टा ज्‍याक्‍वे, ती दुक्‍टा राङ देन्‍गिवी।
MAT 12:36 ङ ख्‍यिराङला सिरिन, मीतिवी काङ ताम्‍ङे तेर्मे क्‍यावे, ती ताम्‍ङे तेर्मेकी तेन्‍दोक ति कोन्‍छ्‍योककी ठिम तोङ्‍गुप तुजेला खोकी दोङ्‍ला खोरो राङ लप गोकिवी।
MAT 12:37 ती तुजेला ख्‍योरो क्‍यावु ताम्‍ङे नेमा राङ कोन्‍छ्‍योककी ख्‍युरुङ क्‍येन मेतुप याङ्‍ना क्‍येन वोतुप सिनी ठिम क्‍या नङ्‍गिवी।”
MAT 12:38 तमा यहूदी छ्‍योकी गेकेनतिवा ताङ फरिसी छ्‍योक्‍पाकी मीतिवा ललाइ ललाइकी येशूला दुक सिक्‍यासुङ, “ओ गेकेन, गेकेनकी ङि्‍यराङला त च्‍यिक छ्‍या तेन्‍दुप ति ल्‍हाप नो वे।”
MAT 12:39 तमा खोकी तिवाला सुङ्‍सुङ, “दुक्‍टा ताङ शम्‍डेनकी गिपाकी तिराङ त छोल्‍गिवी, यिने दी गिपाकी मीतिवी कोन्‍छ्‍योककी लुङ्‍तेम्‍बा योनाकी त मिसिन यम्‍बा त थोङ्‍गुप मेङ्‍येवी।
MAT 12:40 च्‍यिलासिसिन योना ङ्‍याकी खोक्‍पी नाङ्‍ला ङ्‍यिमा सुम ताङ नुप सुम लुवु दोके ङ मी पुज्‍युङ साङ ङ्‍यिमा सुम ताङ नुप सुम से दिङ्‍ला लुकिवी।
MAT 12:41 कोन्‍छ्‍योककी ठिम तोङ्‍गुप तुजेला निनवेकी मीतिवा लानी दी गिपाकी मीतिवाला क्‍येन तेर्किवी, च्‍यिलासिसिन योनाकी ख्‍याप्‍टाक क्‍यावु थोसिमा निनवेकी मीतिवा दिक्‍पा ने सेम ग्‍युर्सुङ। यिने ल्‍होसा, योना सिनाङ मङ छ्‍ये वोतुप ति दे वे।
MAT 12:42 कोन्‍छ्‍योककी ठिम तोङ्‍गुप तुजेला ल्‍होकी थाकाकी लुङ्‍बा नेसुर वावु ग्‍येल्‍मी साङ दी गिपाकी मीतिवी तेन्‍दोकला क्‍येन तेर्किवी, च्‍यिलासिसिन ती ति ग्‍येल्‍वु सोलोमनकी रिक्‍पा ङ्‍येन्‍दुपला जम्‍बुलिङकी तिङ्‍मा नेसुर वासुङ। यिने ल्‍होसा, सोलोमन सिनाङ मङ छ्‍ये वोतुप ति दे वे।”
MAT 12:43 “डे च्‍यिक मी ललाइ नेमा थेन्‍सिमा ङासोप दासा छोलिन सिरा दासा पाङ्‍थेरी नेवा युकिवी, यिने तीला मेङ्‍येवी।
MAT 12:44 तमा तीकी ‘ङ कनी नेसुर थेन वावे, ते राङ लोक्‍नी डोयी।’ सिनी सिवी। लोक्‍नी वासिमा ती दासा ति तोङ्‍बा वोतुप ताङ चेङ्‍गा जोनी रिनी ज्‍यकुप ति तीकी थोङ्‍गिवी।
MAT 12:45 तमा ती ति गल्‍नी खुरुङ सिनाङ मङ दुक्‍टा वोतुप डे दिनतिवा टिनी वानी ती दासाला शुनी ते राङ देकिवी। तुक क्‍यानी ती मी ति गोमाला सिनाङ ज्‍युक्‍ला मङ मेलोक्‍पा डिवी। ती दोके दुक्‍टा वोतुप दी गिपाकी मीतिवा साङ तुकै राङ डिवी।”
MAT 12:46 येशूकी मी माङ्‍छ्‍योकला येन्‍देन नङ्‍यिन वोतुप पेला खोकी आमा ताङ नुपतिवा खो ताङ मुला ताम्‍ङे कितुप नोनी पाङ्‍ला लानी देनोक।
MAT 12:47 ती पेला मी यी येशूकी चाला वानी, “गेकेन, गेकेनकी आमा ताङ नुपतिवा गेकेन ताङ मुला ताम्‍ङे कितुपला पाङ्‍ला लानी देन्‍नोक।” सिनी सिक्‍यासुङ।
MAT 12:48 तमा येशूकी तीला “सु ङे आमा यिन? सु ङे नुपतिवा यिन?” सिनी टि नाङ्‍सुङ।
MAT 12:49 तमा खोकी लोमातिवी थाकाला छ्‍या देनिन सिरा सुङ्‍सुङ, “ल्‍हो ताङ, ङे आमा ताङ नुपतिवा दिवा राङ यिन।
MAT 12:50 सु देवाच्‍येनला ज्‍यु वोतुप ङे पपी नोवाला युकिवे, तिवा राङ ङे नुप ताङ नुम ताङ आमा यिन।”
MAT 13:1 ती छेर्मु येशू खो ज्‍युवु खाङ्‍बा नेमा थेन्‍नी ग्‍येम्‍छो गारीला फेप्‍नी ते ज्‍युसुङ।
MAT 13:2 ती पेला ते मी माङ्‍छ्‍योक खोकी चिप्‍ला जोम्‍सालेन्‍सिन येशू टुला जेनी टी नाङ्‍ला ज्‍युसुङ। तमा मी माङ्‍छ्‍योक तेरी ग्‍येम्‍छो गारीला लानी देसुङ।
MAT 13:3 खोकी तिवाला पे नेसुर ताम्‍ङे बङी शेन नाङ्‍सुङ, “ङ्‍येना, ङ्‍यिम्‍ज्‍यिक सेन देपुप मी यी सेन देपुपला शिङ खला थेन्‍सुङ।
MAT 13:4 तमा सेन देप्‍सालेन्‍सिन ललाइ सेन ति लामला ख्‍येल्‍सुङ, तमा च्‍यच्‍युमतिवा वानी ती सेन ति थुनी सोसुङ।
MAT 13:5 ललाइ ति दोप्‍रोक खला ख्‍येल्‍सुङ, तमा ते थला अला मेतुप तप्‍की ती ति ङमु राङ क्‍येसुङ।
MAT 13:6 यिने ङ्‍यिमा शर्सिमा ती ति ङ्‍यिमी छिक्सुङ, तीकी मर माक्‍यङ्‍गुप तप्‍की रेर्पा गल्‍नी शिसुङ।
MAT 13:7 ललाइ ति छेर्माङ दोङ्‍बी पर्ला ख्‍येल्‍सुङ, तमा छेर्माङ दोङ्‍बु ग्‍यानी वानी तीला सेप्‍सुङ।
MAT 13:8 यिने ललाइ ति स ल्‍यामुला ख्‍येल्‍सुङ। ती स ल्‍यामुला ख्‍येलुप तीकी ललाइला डुमा दोम्‍बा सयी ताङ ललाइला डुमा दोम्‍बा खाल टुक ताङ ललाइला डुमा दोम्‍बा खल सुम ग्‍यप्‍सुङ।
MAT 13:9 सी ति ङ्‍येन्‍दुप नम्‍ज्‍योक नोके, तीकी ङ्‍येन्‍शी।”
MAT 13:10 तमा लोमातिवा खोकी चिप्‍ला वानी खोला “गेकेन, च्‍यिला गेकेनकी मीतिवाला पे नेसुर शेतुप यिन?” सिनी टिसुङ।
MAT 13:11 तमा खोकी तिवाला सुङ्‍सुङ, “ख्‍यिराङला याङ कोन्‍छ्‍योककी ग्‍येल्‍खापकी छ्‍याककी ताम्‍ङे हाक्‍कोवु रिक्‍पा बिन वे, यिने मी यम्‍बातिवाला ति माबिन वे।
MAT 13:12 सी लोला नोके, तीला मङ ल्‍हक्‍पा थोप्‍नी बङी डिवी। यिने सी लोला मेवे, तीकी लोला वोतुप ति साङ ठोकिवी।
MAT 13:13 तिवाला ङे पे नेसुर शेतुप तेन्‍दोक ति तिवी ल्‍हासिनाङ मोथोङ्‍गिवी, ङ्‍येन्‍सिनाङ मोथोवी, तमा हाक साङ मोकोवी।
MAT 13:14 तुक क्‍यानी कोन्‍छ्‍योककी लुङ्‍तेम्‍बा यशैयाकी दुक सिनी नम्‍दर शेतुप ति तिवाला छेसुङ, ‘ख्‍यिरा ङ्‍येन्‍दुप याङ ङ्‍येन्‍गिवी, यिने हाक्‍मोकोवी। ल्‍हाप याङ ल्‍हेवी, यिने मोथोङ्‍गिवी।
MAT 13:15 च्‍यिलासिसिन दी मीतिवी सेम क्‍योङ्‍बु गल वे, नम्‍ज्‍योक मोथोवु गल वे, मिक साङ चुम वे। मिसियाङ तिवी मिककी थोङ्‍गुप ताङ नम्‍ज्‍योककी थोवु गल्‍नी हाक्‍कोवु ताङ दिक्‍पा ने सेम ग्‍युर्नी वुङ्‍गुप्‍जा। तमा ङे तिवाला टेक ज्‍यितुप्‍जा।’
MAT 13:16 यिने ख्‍यिराङ ति मिक थोङ्‍गुप ताङ नम्‍ज्‍योक थोवु तप्‍की मोलाम थोपुप यिनो।
MAT 13:17 वुतुङ के ङ ख्‍यिराङला सिरिन, कोन्‍छ्‍योककी लुङ्‍तेम्‍बातिवा ताङ खोकी कला ङ्‍येन्‍दुपतिवा बङीकी ख्‍यिरा ल्‍हावु खोकी ग्‍येल्‍खाप ल्‍हाप याङ नो क्‍यासुङ, यिने माथोङ। खोकी ग्‍येल्‍खापकी कोर्ला ङ्‍येन्‍दुप नो क्‍यासुङ, यिने माथो।”
MAT 13:18 “त ख्‍यिराङ सेन देपुप मीकी पेकी तेन्‍दोक ति ङ्‍येन।
MAT 13:19 सी कोन्‍छ्‍योककी ग्‍येल्‍खापकी सुङ थोसिनाङ हाक्‍माकोसिन तीकी सेमला ख्‍येलुप सुङ ति शैतान वानी ठोनी डिवी। लामकी गारीला ख्‍येलुप सेनकी तेन्‍दोक ति दी राङ यिन।
MAT 13:20 तमा दोप्‍रोक खला ख्‍येलुप सेन ति दुका मी दोके यिन। तीकी सुङ थोनी ती सुङ गा क्‍यानी शार्क्येक सेमला लिङ्‍गिवी।
MAT 13:21 यिने तीकी लोला मर मेतुप तप्‍की चेयी पर सेक तिराङ लुकिवी। तमा सुङगी तेन्‍दोकला छेटाङ याङ्‍ना दुङल ख्‍येल वासिन तीकी ङ्‍येन्‍दुप सुङ ति शार्क्येक क्‍युर्नी ज्‍योकिवी।
MAT 13:22 तमा छेर्माङ दोङ्‍बी पर्ला ख्‍येलुप सेन ति दी मी दोके यिन। तीकी सुङ ङ्‍येन्‍गिवी, यिने दी जम्‍बुलिङकी पप ताङ टोङ्‍बाकी नासामकी ती सुङला क्‍येक्‍नी डेलु मोगोर्वी।
MAT 13:23 यिने स ल्‍यामुला ख्‍येलुप सेन ति कोन्‍छ्‍योककी सुङ ङ्‍येन्‍नी ती सुङ ति ल्‍यामो क्‍यानी हाक्‍कोवु मी दोके यिन। ती ति डेलु ल्‍यामु गोरुप दोङ्‍बु दोके क्‍यानी ललाइला दोम्‍बा सयी, ललाइला दोम्‍बा खल टुक ताङ ललाइला दोम्‍बा खल सुम डुमा ग्‍यकिवी।”
MAT 13:24 येलुङ येशूकी मीतिवाला दुका पे यम्‍बा यी शेन नाङ्‍सुङ। “कोन्‍छ्‍योककी ग्‍येल्‍खाप ति खोरो शिङ खला सेन ल्‍यामु देपुप मी दोके यिन।
MAT 13:25 यिने मीतिवा ङ्‍यी गलुप पेला ती मी तीकी ड वानी टेकी पर्ला ठिमा तम ज्‍याक्‍नी गाल।
MAT 13:26 तमा ट क्‍येनी ग्‍यानी डुमा ग्‍यकुप छोलुप पेला ठिमा साङ ग्‍यानी वानोक।
MAT 13:27 तमा ती मी तीकी लावातिवा तीकी चाला वानी, ‘ज्‍यिन्‍दाक, ज्‍यिन्‍दाककी याङ सेन ल्‍यामु राङ तपुप मिन? चुक क्‍यानी ठिमातिवा क्‍येवु यिनाङ?’ सिनी टिसुङ।
MAT 13:28 तमा ज्‍यिन्‍दाक तीकी ‘दी लाका ति डकी क्‍यावु यिन।’ सिनी सिक्‍यासुङ। तमा लावातिवी ज्‍यिन्‍दाकला ‘तुकै यिन्‍सिन ङ्‍यिराङ गल्‍नी ठिमातिवा पल्‍नी क्‍युरुप?’ सिनी टिसुङ।
MAT 13:29 यिने ज्‍यिन्‍दाक तीकी तिवाला सिक्‍यासुङ, ‘तुक माकी, ख्‍यिरा ठिमा पलुप पेला ट साङ मुला राङ पल थुप्‍किवी।
MAT 13:30 डुमा छोता सेक ङ्‍यिकर मुला राङ छर्शी। तमा ट ङकुप पेला ङ खेतालातिवाला गोमाला ठिमातिवा पल्‍नी कली जोनी मेला र्‍हे, तमा टे डुमातिवा ति ङे पङाङ नाङ्‍ला ज्‍योक सिनी सिरिन।’”
MAT 13:31 येलुङ येशूकी तिवाला यम्‍बा पे यी शेन नाङ्‍सुङ। “कोन्‍छ्‍योककी ग्‍येल्‍खाप ति मी मिरा च्‍यिककी खोरो शिङ खला तपुप राय छेर्माङकी सेन दोके यिन।
MAT 13:32 ती राय छेर्माङकी सेन ति यम्‍बा तेरी सेन सिनाङ ठेमे वोसिनाङ क्‍येनी ग्‍यासिमा तेरी ङोछेलतिवा सिनाङ दोङ्‍बु ग्‍येर्पु डिवी, तमा नामगी च्‍यच्‍युमतिवा वानी ती दोङ्‍बी गोला छाङ जेवी।”
MAT 13:33 येलुङ खोकी तिवाला यम्‍बा दुका पे यी साङ शेन नाङ्‍सुङ, “कोन्‍छ्‍योककी ग्‍येल्‍खाप ति खमीर दोके यिन। पुम्‍पेजा यीकी फे किलो खल्‍ज्‍यिक ताङ ङ चोयीकी नाङ्‍ला ती खमीर लुक्‍नी वोल्‍सिमा टम्‍दोक तेरीला बोसुङ।”
MAT 13:34 येशूकी ती तेरी ताम्‍ङेतिवा पे नेसुर राङ मीतिवाला शेन नाङ्‍सुङ। पे नेसुर मिसिन ताम्‍ङे काङ साङ तिवाला मासुङ।
MAT 13:35 ती ति कोन्‍छ्‍योककी लुङ्‍तेम्‍बा नेसुर दुक सुङ्‍गुप ति तेरी छेवुला यिन, “ङ ताम्‍ङे लपुप पेला पे नेसुर शेतिन। ङ जम्‍बुलिङ ज्‍येङ्‍गुप पेला नेज्‍युनी बानी ज्‍यकुप ति सिरिन।”
MAT 13:36 ती ज्‍युक्‍ला येशू मी माङ्‍छ्‍योकला क्‍युर ज्‍याक्‍नी खाङ्‍बा फेप्‍सुङ। लोमातिवा ति खोकी चाला वानी, “गेकेन, गेकेनकी सुङ्‍गुप शिङ खकी ठिमाकी पेकी तेन्‍दोक ति ङ्‍यिराङला सुङ्‍नी।” सिनी सिक्‍यासुङ।
MAT 13:37 तमा खोकी तिवाला सुङ्‍सुङ, “सेन ल्‍यामु देपुप मी ति ङ मी पुज्युङ यिन।
MAT 13:38 स ति जम्‍बुलिङ यिन। सेन ल्‍यामु ति कोन्‍छ्‍योककी ग्‍येल्‍खापकी मीतिवा यिन। ठिमा ति शैतानकी ओङला शोरुप मी दुक्‍टातिवा यिन।
MAT 13:39 ठिमा देपुप ड ति शैतान यिन। सप्‍ले दुतुप तुजे ति जम्‍बुलिङ ना डोप तिङ्‍मी तुजे यिन। सप्‍ले दुतुपतिवा ति देवाच्‍येनकी लेन क्‍योलुप थुतिवा यिन।
MAT 13:40 ठिमातिवा पल्‍नी कली जोनी मेला र्‍हेकुप दोके जम्‍बुलिङ तिङ्‍मी तुजेला साङ तुकै राङ किवी।
MAT 13:41 ती पेला ङ मी पुज्युङकी देवाच्‍येनकी लेन क्‍योलुप थुतिवा तोङ्‍गिवी, तमा तिवी मी यम्‍बाला दिक्‍पा कि ज्‍यितुप ताङ दुक्‍टा कितुपतिवा तेरीला खोरो ग्‍येल्‍खाप नेसुर पेनी दुम्‍गिवी।
MAT 13:42 तमा तिवाला मे बरुप ङ्‍येलाला क्‍युर्किवी। ते तिवा स मुरिन सिरा ङुप्‍राङ किवी।
MAT 13:43 तमा ती पेला कोन्‍छ्‍योककी कला ङ्‍येन्‍दुपतिवा ति खोप्‍रे पपी ग्‍येल्‍खापला ङ्‍यिमा दोके शर्किवी। सी ति ङ्‍येन्‍दुप नम्‍ज्‍योक नोके, तीकी ङ्‍येन्‍शी।”
MAT 13:44 “कोन्‍छ्‍योककी ग्‍येल्‍खाप ति शिङ खला बानी ज्‍यकुप क्‍येङ्‍येन दोके यिन। मी च्‍यिककी ती ङ्‍येनी ते राङ बानी ज्‍योकिवी, तमा गा लानी खोरो खाङ्‍बा गल्‍नी खोरो मुला वोतुप टोङ्‍बातिवा तेरी चोनी ती शिङ ति ङ्‍येवी।
MAT 13:45 येलुङ कोन्‍छ्‍योककी ग्‍येल्‍खाप ति मुती ल्‍यामु छोलुप छोङ्‍मेन दोके यिन।
MAT 13:46 तीकी ती गोङ नावु मुती च्‍यिक ङ्‍येसिमा गल्‍नी खोरो लोला वोतुप टोङ्‍बातिवा तेरी चोनी ती मुती ति ङ्‍येवी।”
MAT 13:47 “लोङ कोन्‍छ्‍योककी ग्‍येल्‍खाप ति ग्‍येम्‍छो नाङ्‍ला क्‍युर्नी ङ्‍या नम्‍बा बङी जिम्‍बुप जाल दोके यिन।
MAT 13:48 तमा जाल क्‍येङ्‍सिमा ती जाल ति ग्‍येम्‍छो गारीला थेन्‍नी सला देनी साप वुङ्‍गुप ङ्‍या ल्‍यामु ल्‍यामुतिवा नेक्‍योक नाङ्‍ला दुम्‍गिवी, साप मेङ्‍गुप ङ्‍या मेलोक्‍पातिवा ति थेन्‍नी क्‍युर्किवी।
MAT 13:49 ती दोके जम्‍बुलिङ तिङ्‍मी तुजेला देवाच्‍येनकी लेन क्‍योलुप थुतिवा वानी मी दुक्‍टातिवाला ति मी टेङ्‍बुतिवी पर नेसुर बेकिवी,
MAT 13:50 तमा तिवाला बरुप मे नाङ्‍ला क्‍युर्किवी। ते तिवा ङुयी सिरा स मुर्किवी।”
MAT 13:51 तोजोयी सुङ्‍सिमा येशूकी तिवाला “ख्‍यिरा दी तेरी ताम्‍ङे हाक्‍कोसुङ?” सिनी टि नाङ्‍सुङ। तमा तिवी खोला “लसे, ङ्‍यिरा हाक्‍कोसुङ।” सिनी सिक्‍यासुङ।
MAT 13:52 तमा खोकी तिवाला सुङ्‍सुङ, “कोन्‍छ्‍योककी ग्‍येल्‍खापकी कोर्ला लापुप तेरी यहूदी छ्‍योकी गेकेनतिवा ति समा च्‍यालक ज्‍यकुप दासा नाङ ने नागुङ छ्‍येर्मु वोतुप च्‍यालक सम्‍बातिवा ताङ ङ्‍यिङ्‍बातिवा पाङ्‍ला थेन्‍दुप खाङ्‍बी ज्‍यिन्‍दाक दोके यिन।”
MAT 13:53 ती पेतिवा शेन सिन्‍सिमा येशू तेसुर फेप्‍सुङ।
MAT 13:54 तमा रङगी ग्‍येसा नासरतला राङ फेप्‍नी तेकी यहूदी छ्‍योखाङला येन्‍देन नाङ्‍सुङ। खोकी येन्‍देन नङ्‍गुप थोङ्‍सिमा मीतिवा हलेवा क्‍यानी दुक सिनी टिसुङ, “दी मी तीला दुका रिक्‍पा ताङ हलेवु लाका कितुप ओङ ति कनी नेसुर थोप ताङ?
MAT 13:55 काङ दी मी याङ शिङ्‍जोकी पुज्‍युङ मिन? दीकी आमा याङ मरियम मिन? दीकी नुपतिवा याकूब ताङ योसेफ ताङ सिमोन ताङ यहूदा मिन रो?
MAT 13:56 दीकी नुमतिवा तेरी दाक्‍पी मुला राङ मे रो? दी मी तीला दी तेरी कितुप रिक्‍पा ताङ ओङ ति कनी नेसुर थोप ताङ?”
MAT 13:57 तुक सिनी तिवी खोला सेमला लिङ्‍गुप नो माक्‍या। तमा येशूकी तिवाला “कोन्‍छ्‍योककी लुङ्‍तेम्‍बातिवाला ति खोरो केसा ताङ खोरो खाङ्‍बा मिसिन यम्‍बा दासा तेरी नेमा ताङ्‍देन ङ्‍येकिवी।” सिनी सुङ्‍सुङ।
MAT 13:58 तेकी मीतिवी खोला तेपा माक्‍यावु तप्‍की येशूकी ते हलेवु लाका अला माक्‍या।
MAT 14:1 ती पेला गालीलला ग्‍येला कितुप हेरोदकी येशूकी कोर्ला ताम्‍ङे थोनोक।
MAT 14:2 तमा हेरोदकी खुरुङला शब्‍ज्‍यी कितुपतिवाला “ती मी ति बप्‍तिस्‍मा तेरुप यूहन्‍ना यिन। ती ति शेप ने सेन्‍बु लानोक। तुक क्‍यानी तीकी मुला दुका हलेवु लाकातिवा कितुप ओङ वे।” सिनी सिक्‍यासुङ।
MAT 14:3 गोमाला हेरोदकी खोरो नुप फिलिपकी पेर्मी हेरोदियासकी थोक्‍ला यूहन्‍नाला जिम्‍नी चोन्‍खाङला उप्‍नोक।
MAT 14:4 च्‍यिलासिसिन यूहन्‍नाकी हेरोदला “ख्‍योरो छाम ति खोरो पेर्मीला ज्‍योकुप मेङ्‍गिवी।” सिनी सिक्‍यानोक।
MAT 14:5 ती तप्‍की हेरोदकी यूहन्‍नाला सेतुप नो क्‍यानोक। यिने ती ति मीतिवाला ज्‍यिवा क्‍यानोक, च्‍यिलासिसिन तिवी यूहन्‍ना ति कोन्‍छ्‍योककी लुङ्‍तेम्‍बा यिन सिनी नो किनोक।
MAT 14:6 तमा हेरोद क्‍येवु तुछ्‍येनला हेरोदियासकी पुम तीकी डेन्‍बुतिवी दोङ्‍ला छ्‍यम्‍नी हेरोदला छासे गा लाङ्‍नोक।
MAT 14:7 ती तप्‍की हेरोदकी ती पुम्‍पेजाला “ख्‍योरो ङला काङ लङ्‍सिनाङ ङ ख्‍युरुङला तेरिन।” सिनी न क्‍यल्‍नी थाक्‍छ्‍येसुङ।
MAT 14:8 तमा तीकी खोरो आमी लापुप दोके “बप्‍तिस्‍मा तेरुप यूहन्‍नाकी गो ति देर्माङ नाङ्‍ला ज्‍याक्‍नी दे राङ ङला नङ।” सिनी सिक्‍यासुङ।
MAT 14:9 तमा ग्‍येल्‍वुला सेम्‍दुक लासुङ, यिन्‍सिनाङ गोमाला के न क्‍यल्‍नी थाक्‍छ्‍येतुप ताङ डेन्‍बुतिवी मिङ्‍गाला वोतुप तप्‍की तीकी ती पुम्‍पेजाकी गोङ्‍बा शुवु दोके की सिनी क बिन्‍सुङ।
MAT 14:10 तमा तीकी मीतिवा चोन्‍खाङला ताङ्‍नी यूहन्‍नाकी गो ति च्‍ये च्‍यिसुङ।
MAT 14:11 च्‍येसिमा ती गो ति देर्माङ नाङ्‍ला ज्‍याक्‍नी ती पुम्‍पेजा तीला बिन्‍सुङ। तमा तीकी ती गो ति खोरो आमी चाला खुर्नी गाल्‍सुङ।
MAT 14:12 ती ज्‍युक्‍ला यूहन्‍नाकी लोमातिवा वानी यूहन्‍नाकी फुङ्‍बु ति खुर्नी कल्‍दोक क्‍यासुङ। तमा तिवा येशूकी चाला गल्‍नी ते च्‍युङ्‍गुप ताम्‍ङेतिवा खोला लाप्‍सुङ।
MAT 14:13 ती थोसिमा येशू टुला जेनी तेसुर दासा कुसुमीला फेप्‍सुङ। खो ते फेवु थोसिमा मी माङ्‍छ्‍योक ग्‍येसा ग्‍येसा नेसुर युनी खोकी तिङ्‍ला तिङ्‍यासुङ।
MAT 14:14 येशू ग्‍येम्‍छो गारीला लेप्‍नी टु नेसुर थेन्‍सुङ। तमा मी माङ्‍छ्‍योकला थोङ्‍नी खोकी सेमला छासे च्‍यम्‍बा लानी तिवी पर्ला वोतुप नेर्पुतिवाला टेक च्‍यिसुङ।
MAT 14:15 तमा सोर्‍हिप गल्‍सिमा लोमातिवा खोकी चाला वानी, “दी ति काङ मेङ्‍येवु दासा पाङ्‍थेरी यिन, नाम साङ ल्‍होसुङ। तुक क्‍यानी दी मी माङ्‍छ्‍योकला युल युलला गल्‍नी खोप्‍रे थोक्‍ला साप समा ङ्‍योपला डो च्‍यी।” सिनी सिक्‍यासुङ।
MAT 14:16 यिने येशूकी लोमातिवाला “तिवा डो मोगोवी। ख्‍यिरा राङ तिवाला साप समा बिन।” सिनी सुङ्‍सुङ।
MAT 14:17 तमा लोमातिवी खोला “ङ्‍यिरा मुला याङ शुब्‍ज्‍याङ ङ ताङ ङ्‍या ङ्‍यी तिराङ वे।” सिनी सिक्‍यासुङ।
MAT 14:18 तमा येशूकी “तिवा ङे चाला खुर्नी शोक।” सिनी सुङ्‍सुङ।
MAT 14:19 तमा खोकी मी माङ्‍छ्‍योकला च वोतुप दिङ्‍माला दे च्‍यिसिमा ती शुब्‍ज्‍याङ ङ ताङ ङ्‍या ङ्‍यी ति लानी देवाच्‍येन ने केला ल्‍हानी कोन्‍छ्‍योकला थुचिछे पुल्‍नी तिवा च्‍याक्‍नी लोमातिवाला नाङ्‍सुङ, तमा लोमातिवी ती ति मीतिवाला गोनी बिन्‍सुङ।
MAT 14:20 तमा तेरी मीतिवी डाता सेक सोसिमा साङ ल्‍हकुप पुर्मातिवा रुनी शोम च्‍यिङ्‍ङी नाङ्‍ला क्‍येङ्‍सुङ।
MAT 14:21 ती पेला ते सापतिवा ति पुम्‍पेजा ताङ पेजा टिक्‍पेतिवा पेसिनाङ ख्‍योक्‍पेजा नाज्‍युङतिवा तिराङ तोङ्‍डा ङ चोयी नोक।
MAT 14:22 ती ज्‍युक्‍ला येशूकी मी माङ्‍छ्‍योकला तेसुर तोङ्‍गुप पेला खोकी लोमातिवाला शार्क्येक टुला जेनी खो सिनाङ गोमाला ग्‍येम्‍छो फर्केन ग्‍युक सिनी ताङ्‍सुङ।
MAT 14:23 मी माङ्‍छ्‍योकला ताङ्‍सिमा खो च्‍यिक राङ मोपोर कितुपला पम्‍दोकला फेप्सुङ। तमा नाम ल्‍होसिमा खो च्‍यिक राङ ते ज्‍युसुङ।
MAT 14:24 तोजो पेला लोमातिवा जेवु टु ति ग्‍येम्‍छो गारी नेवा थाक्‍रिङ्‍बु लेप्‍नी सिन्‍नोक। तमा वुर्तुक ठेक्‍योक्‍पा ग्‍यपुप तप्‍की टु ति छ्‍यी बालापकी पर्ला ख्‍येल्‍नी तिवाला छासे दुक्‍पा च्‍युङ्‍सुङ।
MAT 14:25 नुपला छ्‍युजी सुम चोयीला येशू ग्‍येम्‍छो खला युकिन सिरा लोमातिवी चाला फेप्‍सुङ।
MAT 14:26 खो ग्‍येम्‍छो खला फेपुप थोङ्‍सिमा लोमातिवी दी याङ र्‍हेन्‍डी के यिन्‍दे सिनी ज्‍यिवा कियी सिरा च्‍यार ग्‍यप्‍सुङ।
MAT 14:27 येशूकी शार्क्येक तिवाला “ङ्‍यिङ रम्‍बु की, ङ राङ यिन। ज्‍यिवा माकी।” सिनी सुङ्‍सुङ।
MAT 14:28 तमा पत्रुसकी येशूला “ओ चोवो, ख्‍युरुङ चोवो राङ यिन्‍सिन ङला छ्‍यी खला युनी चोवोकी चाला वुङ्‍गुपला क नाङ्‍डे की।” सिनी सिक्‍यासुङ।
MAT 14:29 खोकी पत्रुसला “शोक!” सिनी सुङ्‍सुङ। तमा पत्रुस टु नेसुर पाप्‍नी छ्‍यी खला युनी येशूकी चिप्‍ला गाल्‍सुङ।
MAT 14:30 यिने लुङ कशेन ग्‍यपुप थोङ्‍नी पत्रुस ज्‍यिवा लानी छ्‍यी नाङ्‍ला नुम डोप छाल्सुङ, ती पेला तीकी “ओ चोवो, ङला र्‍होक्‍टे की!” सिनी च्‍यार ग्‍यप्‍सुङ।
MAT 14:31 तमा येशूकी शार्क्येक छ्‍याक क्‍याङ्‍नी पत्रुसला जिम्‍नी, “ओ तेपा मेतुप, ख्‍युरुङ च्‍यिला तेपा माक्‍यानी यिन्‍दे मिन्‍दे नो किवी?” सिनी सुङ्‍सुङ।
MAT 14:32 तमा तिवा मुला राङ टी नाङ्‍ला शुसिमा लुङ ति कुसुमी देसुङ।
MAT 14:33 ती थोङ्‍सिमा टुला वोतुप लोमातिवी खोला शावा कियी सिरा “वुतुङ के गेकेन याङ कोन्‍छ्‍योककी सेवु राङ यिनोक।” सिनी सिक्‍यासुङ।
MAT 14:34 ती ज्‍युक्‍ला येशूतिवा ग्‍येम्‍छो शानी फर्केन गनेसरेत युलला लेप्‍सुङ।
MAT 14:35 खो ते फेप्‍सिमा ती दासाकी मीतिवी खो येशू यिन सिनी ङो शेनी गारी गुरीला वोतुप दासा तेरीला मीतिवा ताङ्‍नी नेर्पुतिवा तेरीला खोकी चाला टिनी लेसुङ।
MAT 14:36 तिवी येशूकी नम्‍साकी गारीला तिराङ यिन्‍सिनाङ रेकुप ङ्‍ये च्‍यी सिनी खोला गोङ्‍बा शुसुङ। तमा सी खोकी नम्‍साला रेक्‍वे, तिवा तेरी टेक्‍सुङ।
MAT 15:1 तमा फरिसीतिवा ताङ यहूदी छ्‍योकी गेकेनतिवा यरूशलेम नेसुर येशूकी चाला वानी खोला
MAT 15:2 “च्‍यिला ख्‍योरे लोमातिवी दाक्‍पी हङ्‍गावातिवी तोङ नेज्‍युनी तेन्‍दुप लुक्‍सु मातेन्‍दुप यिन? तिवा याङ समा साप गोमाला लाक्‍पा मुटुनोक।” सिनी सिक्‍यासुङ।
MAT 15:3 तमा येशूकी तिवाला सुङ्‍सुङ, “तुकै यिन्‍सिन ख्‍यिराङ च्‍यिला रङगी लुक्‍सु तेन्‍दुपकी थोक्‍ला कोन्‍छ्‍योककी क मेङ्‍येन्‍दिवी?
MAT 15:4 च्‍यिलासिसिन कोन्‍छ्‍योककी ‘रङगी पपाआमाला ताङ्‍देन की। सी खोरो पपाआमी तेन्‍दोकला ताम्‍ङे दुक्‍टा लप्‍किवे, ती ति से राङ गोकिवी।’ सिनी सुङ्‍सुङ।
MAT 15:5 यिने ख्‍यिरा याङ मी ललाइकी खोरो पपाआमाला ‘ङे ख्‍यिराङला शब्‍ज्‍यी कि गोवु ति कोन्‍छ्‍योकला बुल्‍वा पुलिन।’ सिसिन
MAT 15:6 ती मी तीकी खोरो पपाआमाला शब्‍ज्‍यी कि मोगोवी सिनी सिवी। तुक क्‍यानी ख्‍यिरा रङगी लुक्‍सु तेन्‍दुपकी थोक्‍ला कोन्‍छ्‍योककी सुङ ति मेतेन्‍वी।
MAT 15:7 ओ खोनक्‍पुतिवा, कोन्‍छ्‍योककी लुङ्‍तेम्‍बा यशैयाकी ख्‍यिरा थोक्‍ला दुक सिनी नम्‍दर शेतुप ति टेके यिन,
MAT 15:8 ‘दी मीतिवी ख नेमा तिराङ ङला ताङ्‍देन किवी, यिने तिवी सेमला ति ङला ङ्‍याम मिकिनोक।
MAT 15:9 तिवी ङला सोवा देकुप ति तेर्मे यिन, च्‍यिलासिसिन तिवी लापुप येन्‍देन ति मी जोवु ठिम तिराङ यिन।’”
MAT 15:10 ती ज्‍युक्‍ला येशूकी मी माङ्‍छ्‍योकला खोरे चाला कताङ्‍नी दुक सुङ्‍सुङ, “ख्‍यिराङ ङे ताम्‍ङे ङ्‍येना, तमा ल्‍यामो क्‍यानी हाक्‍कोवा किसा।
MAT 15:11 ख नेमा शुकुप तीकी मीला मेचेङ्‍गा मोजोवी, यिने ख नेमा थेन्‍दुप तीकी मीला मेचेङ्‍गा जेवी।”
MAT 15:12 तमा येशूकी लोमातिवा खोकी चिप्‍ला वानी, “चोवोकी दुक सुङ्‍गुप ताम्‍ङे थोसिमा फरिसीतिवा ङ्‍यिर्मु लावु ति चोवोला छ्‍या वे?” सिनी खोला टिसुङ।
MAT 15:13 यिने खोकी सुङ्‍सुङ, “देवाच्‍येनला ज्‍यु वोतुप ङे पपी माचुवु दोङ्‍बुतिवा तेरी पल्‍नी क्‍युर्किवी।
MAT 15:14 तुक क्‍यानी तिवाला ङ्‍याम माकी। तिवा खोरुङ मिक शर्वा यिन्‍सिनाङ यम्‍बा मिक शर्वाला गोमा कितुप मी यिन। मिक शर्वाकी मिक शर्वाला टिसिन ङ्‍यिकर मुक्‍तुमला ख्‍येल्‍गिवी।”
MAT 15:15 ती थोसिमा पत्रुसकी येशूला “दी पेकी तेन्‍दोक ति ङ्‍यिराङला सुङ्‍नी।” सिनी गोङ्‍बा शुसुङ।
MAT 15:16 तमा खोकी सुङ्‍सुङ, “ख्‍यिरा तरोङ साङ दीकी तेन्‍दोक ति हाक्‍माको?
MAT 15:17 मी ख नेमा शुवु काङ साङ खोकला लेप्‍सिमा जु नेमा थेन्‍नी डिवी सिरुप ति ख्‍यिराङला छ्‍या मे?
MAT 15:18 यिने ख नेमा थेन्‍दुप ति सेम नेमा थेन्‍गिवी, तीकी राङ मीला मेलोवा जेवी।
MAT 15:19 च्‍यिलासिसिन सेम नेमा नासाम दुक्‍टा थेन्‍गिवी। तिवा ति मी सेतुप ताङ शम्‍डेन कितुप ताङ छ्‍येवु छ्‍येमु कितुप ताङ कुन कितुप ताङ पङ्‍बु मेटेङ्‍बु तेरुप ताङ मीला मारे तोङ्‍गुप यिन।
MAT 15:20 ती ताम्‍ङेतिवी राङ मीला मेचेङ्‍गा जेवी, यिने लाक्‍पा माटुवा क्‍यानी समा सोनी मीला मेचेङ्‍गा मोजोवी।”
MAT 15:21 तमा येशू ते नेसुर थेन्‍नी टुरोस ताङ सीदोनकी लुङ्‍बा नेवा फेप्‍सुङ।
MAT 15:22 ती लुङ्‍बाला राङ कनानी पुम्‍पेजा यी येशूकी चाला वानी च्‍यार ग्‍यकिन सिरा “ओ चोवो, दाऊदकी गिपा, ङला च्‍यम्‍बा किटे की। ङे पुमला डे ग्‍यप्‍नी छासे छेटाङ ख्‍येल्‍नी वे।” सिनी सिक्‍यासुङ।
MAT 15:23 यिने येशूकी तीला काङ साङ टिलेन मानाङ। तमा खोकी लोमातिवा खोकी चाला वानी खोला “दी पुम्‍पेजा याङ दाक्‍पी तिङ्‍ला च्‍यार ग्‍यकिन सिरा गिनोक। तीला डो च्‍यी।” सिनी गोङ्‍बा शुसुङ।
MAT 15:24 तमा खोकी “ङ याङ तोरुप लुक दोके गलुप इस्राएल लुङ्‍बी मीतिवाला छोलुपला तिराङ तङ्‍गुप यिन।” सिनी सुङ्‍सुङ।
MAT 15:25 यिने ती पुम्‍पेजा ति येशूकी दोङ्‍ला वानी खवुतुङ्‍मा देनी, “ओ चोवो, ङला दाल्‍जा किटे की।” सिनी खोला गोङ्‍बा शुसुङ।
MAT 15:26 खोकी तीला “पेजातिवी साप शुब्‍ज्‍याङ लानी कीतिवाला तेरुप ल्‍यामु मिन।” सिनी सुङ्‍सुङ।
MAT 15:27 यिने ती पुम्‍पेजा तीकी “चोवो, चोवोकी सुङ्‍गुप ति टेके राङ यिन। यिने कीतिवी साङ खोरो ज्‍यिन्‍दाककी च्‍योक्‍ची ख नेमा लुम्‍बुप पुर्मातिवा सेवी।” सिनी सिक्‍यासुङ।
MAT 15:28 तीकी तुक सिक्‍यासिमा येशूकी तीला “ओ पुमो, ख्‍योरो ङला तेपा रम्‍बु क्‍यानोक। ख्‍योरो नो क्‍यावु दोके च्‍युङ्‍शी।” सिनी सुङ्‍सुङ। ती पेला राङ तीकी पुम ति टेक्‍नोक।
MAT 15:29 येलुङ येशू तेसुर थेन्‍नी गालील ग्‍येम्‍छोकी गारीला फेप्‍सुङ, तमा येर पम्‍दोकला फेप्‍नी ते राङ ज्‍युसुङ।
MAT 15:30 ते मी माङ्‍छ्‍योककी थेङ्‍बा ताङ मिक मोथोङ्‍गुप ताङ काङ्‍बा लाक्‍पा शोरुप ताङ वोन्‍बातिवा ताङ यम्‍बा नेजु वोतुपतिवा बङीला खोकी दोङ्‍ला टि वासुङ, तमा खोकी तिवा तेरीला टेक च्‍यिसुङ।
MAT 15:31 ते कुवातिवी ताम्‍ङे लप थुपुप ताङ काङ्‍बा लाक्‍पा शोरुपतिवा टेकुप ताङ थेङ्‍बा युक थुपुप ताङ मिक मोथोङ्‍गुपतिवा मिक थोङ थुपुप थोङ्‍सालेन्‍सिन मी माङ्‍छ्‍योक छासे हलेवा कियी सिरा इस्राएलकी कोन्‍छ्‍योकला सोवा तेक्‍सुङ।
MAT 15:32 ती ज्‍युक्‍ला येशूकी खोरो लोमातिवाला चाला कताङ्‍नी, “दी मी माङ्‍छ्‍योकला ङ छासे ङ्‍यिङ्‍ज्‍ये लासुङ। च्‍यिलासिसिन दिवा ङे मुला देतुप ति ङ्‍यिमा सुम गाल। यिने दिवी मुला साप समा काङ साङ मे। दिवाला ल्‍होतुङ्‍बा राङ तोङ्‍गुप ङला सेम मे। ल्‍होतुङ्‍बा राङ ताङ्सिन दिवा लामला टेन्‍बा तोर्किते यिन्‍दे।” सिनी सुङ्‍सुङ।
MAT 15:33 तमा लोमातिवी खोला “दी दासा ति काङ साङ मेङ्‍येवु दासा पाङ्‍थेरी यिन। दोजो मी माङ्‍छ्‍योकला लङ्‍गुप समा ङ्‍यिरा कनी नेसुर ङ्‍येतुप्‍जा?” सिनी सिक्‍यासुङ।
MAT 15:34 यिने येशूकी तिवाला “ख्‍यिरा मुला शुब्‍ज्‍याङ चो वे?” सिनी टि नाङ्‍सुङ। तमा तिवी “ङ्‍यिरा मुला याङ शुब्‍ज्‍याङ दिन ताङ ङ्‍या ठेमे ठेमे चेयी तिराङ वे।” सिनी सिक्‍यासुङ।
MAT 15:35 तमा येशूकी मी तेरीला क नाङ्‍नी सला दे च्‍यिसुङ।
MAT 15:36 ती ज्‍युक्‍ला खोकी ती शुब्‍ज्‍याङ दिन ताङ ङ्‍यातिवा लानी कोन्‍छ्‍योकला थुचिछे पुल्‍सिमा च्‍याक्‍नी लोमातिवाला नाङ्‍सुङ, तमा लोमातिवी ती ति मीतिवाला गोनी बिन्‍सुङ।
MAT 15:37 मीतिवा तेरीकी डाता सेक सोसुङ, तमा लोमातिवी ल्‍हकुप पुर्मातिवा रुक्‍सालेन्‍सिन तोलुम दिन क्‍येङ्‍सुङ।
MAT 15:38 ते सापतिवा ति पुम्‍पेजा ताङ पेजा टिक्‍पेतिवा माङोवा क्‍यानी साङ ख्‍योक्‍पेजा नाज्‍युङतिवा तिराङ तोङ्‍डा ज्‍यी चोयी नोक।
MAT 15:39 तमा ती मी माङ्‍छ्‍योकला ताङ्‍सिमा येशू टुला जेनी मगादान लुङ्‍बा नेवा फेप्‍सुङ।
MAT 16:1 ती ज्‍युक्‍ला फरिसीतिवा ताङ सदुकीतिवा येशूला खोक्‍पा ल्‍हापला खोकी चाला वानी, “दोजो ख्‍युरुङ कोन्‍छ्‍योक नेमा वावु यिन्‍सिन ङ्‍यिराङला त च्‍यिक छ्‍या तेन।” सिनी सिक्‍यासुङ।
MAT 16:2 तमा येशूकी तिवाला सुङ्‍सुङ, “गोसेला ‘नाम मर्वु गलुप थोङ्‍सिमा सला याङ नाम सेङ्‍गिवी।’ सिनी ख्‍यिरा सिवी।
MAT 16:3 तमा टोपला ‘नाम मर्वु गलुप ताङ र्‍हिमार खुरुप थोङ्‍सिमा हारिङ याङ लुङ छ्‍यर्वा ग्‍यकिवी।’ सिनी ख्‍यिरा सिवी। ख्‍यिरा नामला ल्‍हानी नाम चुकै डिवी सिरुप ति हाक्‍को थुप्‍किवी, यिने दी तुजेला च्‍युङ्‍गुप ताम्‍ङेतिवा ति ख्‍यिरा हाक्‍को मुथुपी।
MAT 16:4 दुक्‍टा ताङ शम्‍डेनकी गिपाकी त छोल्‍गिवी, यिने तिवाला योनाकी त मिसिन यम्‍बा त थोङ मुथुपी।” सिनी सुङ्‍सुङ। तोजोयी सुङ्‍सिमा येशू तिवाला ते राङ क्‍युर ज्‍याक्‍नी तेसुर फेप्‍सुङ।
MAT 16:5 तमा येशू लोमातिवी मुला ग्‍येम्‍छो शानी फर्केन फेपुप पेला लोमातिवी शुब्‍ज्‍याङ खुरुप टोक ज्‍येनोक।
MAT 16:6 तमा येशूकी तिवाला “ख्‍यिराङ फरिसी ताङ सदुकीतिवी खमीर नेसुर च्‍याङ्‍से देता।” सिनी सुङ्‍सुङ।
MAT 16:7 खोकी तुक सुङ्‍सिमा लोमातिवी खोप्‍रे पर्ला “दाक्‍पी मुला शुब्‍ज्‍याङ खुर माङुवु तप्‍की खोकी तुक सुङ्‍गुप यिन्‍दे।” सिनी मुक्‍तम तेन्‍सुङ।
MAT 16:8 यिने येशूकी ती ताम्‍ङे ति हाक्‍कोनी तिवाला सुङ्‍सुङ, “ओ तेपा अला मेतुप टेङ! ख्‍यिरा मुला शुब्‍ज्‍याङ मे सिनी च्‍यिला च्‍यिककी च्‍यिकला मुक्‍तम देन्‍गिवी?
MAT 16:9 ख्‍यिराङला तरोङ साङ हाक्‍माको? मी तोङ्‍डा ङला शुब्‍ज्‍याङ ङ चोके स च्‍यितुप पेला तीकी पुर्मातिवा तोलुम चो रुवु ख्‍यिराङला टासा मे?
MAT 16:10 तमा येलुङ मी तोङ्‍डा ज्‍यीकी पर्ला शुब्‍ज्‍याङ दिन चोके गोनी तेरुप पेला तीकी पुर्मातिवा तोलुम चो रुवु?
MAT 16:11 ख्‍यिराङ च्‍यिला ङे सिक्‍यावु ति शुब्‍ज्‍याङकी कोर्ला मिन सिनी हाक्‍मोकोवी? ख्‍यिराङ फरिसी ताङ सदुकीतिवी खमीर ने च्‍याङ्‍से देता।”
MAT 16:12 खोकी तुक सुङ्‍सिमा ती ताम्‍ङे ति शुब्‍ज्‍याङला लुकुप खमीरकी कोर्ला मिनोक, यिने फरिसी ताङ सदुकीतिवी येन्‍देन नेसुर च्‍याङ्‍से दे सिनी सुङ्‍गुप नोक सिरुप ति लोमातिवी हाक्‍कोसुङ।
MAT 16:13 तमा येशू कैसरिया फिलिप्‍पी लुङ्‍बाला फेप्‍सिमा लोमातिवाला “मीतिवी ङ मी पुज्‍युङला सु यिन सिनी सिनोक?” सिनी टि नाङ्‍सुङ।
MAT 16:14 तमा लोमातिवी दुक सिक्‍यासुङ, “ललाइकी बप्‍तिस्‍मा तेरुप यूहन्‍ना यिन सिनोक, ललाइकी कोन्‍छ्‍योककी लुङ्‍तेम्‍बा एलिया यिन सिनोक, तमा ललाइकी कोन्‍छ्‍योककी लुङ्‍तेम्‍बा यर्मिया याङ्‍ना कोन्‍छ्‍योककी लुङ्‍तेम्‍बातिवी पर्ला मिरा च्‍यिक यिन सिनी सिनोक।”
MAT 16:15 तमा खोकी तिवाला “तुकै यिन्‍सिन ख्‍यिराङ ति ङला सु यिन सिनी सिवी?” सिनी टि नाङ्‍सुङ।
MAT 16:16 तमा सिमोन पत्रुसकी “गेकेन याङ ङोसु वोतुप कोन्‍छ्‍योककी सेवु ख्रीष्‍ट यिन।” सिनी सिक्‍यासुङ।
MAT 16:17 तमा येशूकी तीला सुङ्‍सुङ, “योनाकी पुज्‍युङ सिमोन, ख्‍युरुङला मोलाम थोपुप यिनो। दी ताम्‍ङे ख्‍युरुङला हाक्‍को च्‍यितुप ति मीकी क्‍यावु मिन, यिने देवाच्‍येनला ज्‍यु वोतुप ङे पपी क्‍यावु यिन।
MAT 16:18 त ङ ख्‍युरुङला सिरिन, ख्‍युरुङ पत्रुस यिन। तीकी तेन्‍दोक ति दो यिन। ङ ती दोकी खला ङे चर्च जोयिनो, तमा शैतानला वोतुप शेप ओङकी तीला ग्‍येल मुथुप्‍तो।
MAT 16:19 ङ ख्‍युरुङला देवाच्‍येनकी ग्‍येल्‍खापकी लिमीतिवा तेरिन। दोजो ख्‍योरो जम्‍बुलिङला काङ कि मिज्‍यिवे, देवाच्‍येनला साङ कि मिज्‍यिवी। ख्‍योरो जम्‍बुलिङला काङ कि ज्‍यिकिवे, देवाच्‍येनला साङ कि ज्‍यिकिवी।” सिनी सुङ्‍सुङ।
MAT 16:20 तुक सुङ्‍सिमा खोकी लोमातिवाला “ङ ख्रीष्‍ट यिन सिरुप ताम्‍ङे ति सुला साङ मालापा।” सिनी क छ्‍येम्‍बु नाङ्‍सुङ।
MAT 16:21 ती पेला नेज्‍युनी येशूकी लोमातिवाला “ङ वुतुङ के यरूशलेमला डो गोकिवी, तमा यहूदी गोमा कितुपतिवा ताङ कोङ्‍यार छ्‍येतिवा ताङ यहूदी छ्‍योकी गेकेनतिवी ङला छेटाङ बङी बिन्‍नी सेकिवी, तमा शेप ङ्‍यिमा सुमला कोन्‍छ्‍योककी ङला सेन्‍बु लोङ्‍गिवी।” सिनी सुङ्‍गुप छाल्‍सुङ।
MAT 16:22 ती थोसिमा पत्रुसकी येशूला फेचेक दासाला टि गल्‍नी, “मेवी, चोवो। दुका ताम्‍ङे याङ चोवोकी खला नाम्‍साङ ख्‍येलुप मेङ्‍गिवी।” सिनी वुर्तम क्‍यानी सिक्‍यासुङ।
MAT 16:23 यिने येशू पत्रुसकी थाकाला ग्‍युर्नी तीला “ओ शैतान, ख्‍युरुङ ङे चा नेवा ग्‍युक! ख्‍युरुङ ङे कि गोवु कोन्‍छ्‍योककी लाका कि मिज्‍यिवु छोल्‍गिनोक। ख्‍युरुङ कोन्‍छ्‍योककी ताम्‍ङेला मिन, यिने मी ताम्‍ङेला तिराङ नासाम तोङ्‍गिनोक।” सिनी सुङ्‍सुङ।
MAT 16:24 ती ज्‍युक्‍ला येलुङ येशूकी लोमातिवाला सुङ्‍सुङ, “सु ङे तिङ्‍ला तिङ्‍योकुप नो किवे, तीकी खोरो नोवातिवा क्‍युर ज्‍याक्‍नी खोरो ग्‍यङ्‍शिङ खुर्नी ङे तिङ्‍ला तिङ्‍योक गोकिवी।
MAT 16:25 सी खोरो मिजी र्‍होकुप नो किवे, ती ति तोर्नी डिवी। तमा सी ङे थोक्‍ला खोरो मिजी तोर ज्‍यिकिवे, तीला नाम्‍साङ मिशिवु मिजी थोप्‍किवी।
MAT 16:26 मीला जम्‍बुलिङ तेरी ङ्‍येनी साङ नाम्‍साङ मिशिवु मिजी माङ्‍येसुङ सिसिन तीला काङ ख्‍येप्‍साङ वे रो? मीकी खोरो तोरुप मिजी येलुङ ङ्‍येतुपला काङ तेर थुप्‍किवी रो?
MAT 16:27 ङ मी पुज्‍युङ ङे पपी मोवा थोप्‍नी देवाच्‍येनकी लेन क्‍योलुप थुतिवी मुला लोक्‍नी वुङ्‍गिवी, ती पेला तेरी मीतिवा रे रेकी काङ क्‍यावे, तीकी क्‍यावु दोके राङ ङ छ्‍यक्‍तक तेर्किवी।
MAT 16:28 वुतुङ के ङ ख्‍यिराङला सिरिन, दे लानी वोतुपतिवी पर्ला ललाइकी ङ मी पुज्‍युङ खोरो ग्‍येल्‍खापला ग्‍येला कितुपला वुङ्‍गुप माथोङ्‍वा सेक्‍ला मिशिवी।”
MAT 17:1 तेमी ङ्‍यिमा टुककी तिङ्‍ला येशूकी पत्रुस ताङ याकूब ताङ तीकी नुप यूहन्‍नाला खोरो मुला टिनी री थेन्‍बो यी ने केला फेप्‍सुङ।
MAT 17:2 ते लोमातिवी दोङ्‍ला येशूकी जुजम ग्‍युर्सुङ। तमा खोकी शाल ति ङ्‍यिमा शरुप दोके वो ग्‍यप्‍सुङ, खोकी नुम्‍बुप नम्‍सा ति वो ग्‍यकुप दोके छासे कर्मु गाल्‍सुङ।
MAT 17:3 ती पेला शार्क्येक मोशा ताङ एलिया छ्‍यर्नी येशूकी मुला अरा उरा सिक्‍यावु ति लोमातिवी थोङ्‍सुङ।
MAT 17:4 ती थोङ्‍सिमा पत्रुसकी येशूला “ओ चोवो, दाक्‍पु दे देतुप ति ल्‍यामु च्‍युङ्‍सुङ। चोवोकी नोवा वोसिन ङ दे बर्केङ सुम जोयिन। च्‍यिक ति चोवोकी थोक्‍ला, च्‍यिक ति मोशाकी थोक्‍ला, तमा च्‍यिक ति एलियाकी थोक्‍ला।” सिनी सिक्‍यासुङ।
MAT 17:5 पत्रुसकी तुक सियी वोतुप पेला छासे वो ग्‍यकुप मुक्‍पाकी छुप्‍नी तिवाला उप्‍सुङ। तमा मुक्‍पी पर नेमा “दी ङे ङ्‍यिङ्‍ज्‍येवु पुज्‍युङ यिनो, दीकी मुला ङ छासे गा लानी वे। ख्‍यिराङ दीकी ताम्‍ङे ङ्‍येना।” सिरुप वोरु यी ग्‍यप्‍सुङ।
MAT 17:6 ती थोसिमा लोमातिवा कशेन ज्‍यिवा लानी खवुतुङ्‍मा देसुङ।
MAT 17:7 ती पेला येशू तिवी चाला फेप्‍नी तिवाला रेक्‍नी, “खोक लो, ज्‍यिवा माकी।” सिनी सुङ्‍सुङ।
MAT 17:8 खोकी तुक सुङ्‍सिमा तिवी येर केला ल्‍हासालेन्‍सिन ते येशू मिसिन यम्‍बा सु साङ मिन्‍दुक।
MAT 17:9 खोतिवा री नेमा मर पपिन कितुप पेला येशूकी लोमातिवाला “ङ मी पुज्‍युङ शेप ने सेन्‍बु मालावा सेक्‍ला ख्‍यिरा थोङ्‍गुप ति सुला साङ मालापा।” सिनी क नाङ्‍सुङ।
MAT 17:10 तमा लोमातिवी खोला “च्‍यिला यहूदी छ्‍योकी गेकेनतिवी एलिया ति गोमाला वुङ गोकिवी सिनी सिक्‍यावु यिन?” सिनी टिसुङ।
MAT 17:11 तमा येशूकी तिवाला “वुतुङ के एलिया ति वानी तेरी ताम्‍ङेतिवा टडिक किवी।
MAT 17:12 ङ ख्‍यिराङला सिरिन, एलिया गोमाला के वानी वे। यिने मीतिवी तीला ङो माशेनी खोप्‍रे तीला काङ कितुप नो क्‍यावे, तुकै राङ क्‍यासुङ। तुक राङ क्‍यानी ङ मी पुज्‍युङकी साङ मीतिवा नेसुर छेटाङ खुर गोकिवी।” सिनी सुङ्‍सुङ।
MAT 17:13 खोकी तुक सुङ्‍सिमा ती ताम्‍ङे ति बप्‍तिस्‍मा तेरुप यूहन्‍नाकी कोर्ला सुङ्‍गुप यिनोक सिनी लोमातिवी हाक्‍कोसुङ।
MAT 17:14 ती ज्‍युक्‍ला खोतिवा मी माङ्‍छ्‍योक जोम्‍बुप दासाला लोक्‍नी फेप्‍सुङ। ते मी मिरा च्‍यिक येशूकी चाला वानी पुमुङ सला चुनी दुक सिनी गोङ्‍बा शुसुङ,
MAT 17:15 “ओ चोवो, ङे पुज्‍युङला च्‍यम्‍बा नाङ्‍डे की। ङे पुज्‍युङ ति जा लङ्‍गुप नेजु ग्‍यप्‍नी छासे छेटाङ खुरिन वे। ती ति पर्सा मे नाङ्‍ला तला ग्‍यकिनोक, पर्सा छ्‍यी नाङ्‍ला तला ग्‍यकिनोक।
MAT 17:16 तीला ङे चोवोकी लोमातिवी चाला टिनी वायी, यिने तिवी याङ तीला टेक ज्‍यि माथुप।” सिनी सिक्‍यासुङ।
MAT 17:17 तमा येशूकी “ओ तेपा माक्‍यानी सेम दुक्‍टा गलुप मीतिवा! ङ नम सेक ख्‍यिरा मुला देतुप्‍जा? नम सेक ङ ख्‍यिराङला हम क्‍यानी देतुप्‍जा? ती पेजाला दे टिनी शोक।” सिनी सुङ्‍सुङ।
MAT 17:18 तमा येशूकी ती पेजाला ग्‍यपुप डे तीला वोरु तेन्‍सुङ। खोकी वोरु तेन्‍सिमा डे ति ती पेजी नाङ नेमा थेन गाल्‍सुङ, तमा ती पेजा ति शार्क्येक टेक्‍सुङ।
MAT 17:19 ती ज्‍युक्‍ला लोमातिवा छ्‍याकला येशूकी चाला वानी, “ङ्‍यिरा च्‍यिला ती डे ति थेन माथुपुप यिनाङ?” सिनी खोला टिसुङ।
MAT 17:20 तमा खोकी तिवाला सुङ्‍सुङ, “ती ति ख्‍यिराङला तेपा अला मेतुप तप्‍की यिन। वुतुङ के ङ ख्‍यिराङला सिरिन, ख्‍यिराङला राय छेर्माङ डुमा च्‍यिक चोयी तेपा वोसिन ख्‍यिरा दी री तीला ‘दे नेसुर फर पोक्‍नी ग्‍युक!’ सिक्‍यासिन ती ति पोक्‍नी डिवी। तमा ख्‍यिरा कि मुथुपुप ति काङ साङ मेवी।
MAT 17:21 यिने मोपोर कितुप ताङ ङ्‍युङ्‍ने मादेसिन दुका डे ति थेन मुथुपी।”
MAT 17:22 तमा येशू लोमातिवी मुला गालीलला जोम्‍बुप पेला खोकी तिवाला “ङ मी पुज्‍युङ मीतिवी लकला चेक तेकिवी,
MAT 17:23 तमा तिवी ङला सेकिवी, यिने ङ्‍यिमा सुमकी छेर्मु ङ सेन्‍बु लङ्‍गिवी।” सिनी सुङ्‍सुङ। खोकी तुक सुङ्‍सिमा लोमातिवा छासे सेम्‍दुक क्‍यासुङ।
MAT 17:24 येशू ताङ खोकी लोमातिवा कफर्नहुमला फेप्‍सिमा ल्‍हङाङकी से दुतुप मीतिवा पत्रुसकी चाला वानी, “ख्‍योरो गेकेनकी ल्‍हङाङला ते गोवु से ति मेतेवी?” सिनी टिसुङ।
MAT 17:25 तमा पत्रुसकी “यिन, खोकी तेकिवी।” सिनी सिक्‍यासुङ। पत्रुस खाङ्‍बा शुनी ती ताम्‍ङे कितुप सिनाङ गोमाला राङ येशूकी तीला “सिमोन, ख्‍योरो नासामला चुकै वे? जम्‍बुलिङकी ग्‍येल्‍वुतिवी सु नेसुर से दुकिवी? खोरो पुज्‍युङतिवा नेसुर दुकिवी ताङ की, मी यम्‍बातिवा नेसुर दुकिवी?” सिनी सुङ्‍सुङ।
MAT 17:26 तमा पत्रुसकी “मी यम्‍बातिवा नेसुर दुकिवी।” सिनी सिक्‍यासुङ। ती थोसिमा येशूकी “तुकै यिन्‍सिन पुज्‍युङतिवी याङ से ते मोगोनोक।
MAT 17:27 यिन्‍सिनाङ दाक्‍पी तिवाला दुक्‍पाला मेख्‍येल्‍शी सिनी ख्‍युरुङ ग्‍येम्‍छोला गल्‍नी जाल ग्‍योप, तमा गोमाला ख्‍येलुप ङ्‍याकी ख पेनी ल्हो। तमा ती ङ्‍याकी खे नाङ्‍ला ङुलकी डप्‍बु च्‍यिक ङ्‍येकिवी, ती ति खुर गल्‍नी ख्‍युरुङ ताङ ङे ते गोवु से ति तिवाला ते।” सिनी सुङ्‍सुङ।
MAT 18:1 ती पेला लोमातिवा येशूकी चाला वानी, “देवाच्‍येनकी ग्‍येल्‍खापला तेरी सिनाङ छ्‍ये ति सु यिनाङ?” सिनी टिसुङ।
MAT 18:2 तमा खोकी ते वोतुप आङा टिक्‍पे यीला खोरो चाला कताङ्‍नी तिवी पर्ला ज्‍याक्‍नी
MAT 18:3 तिवाला दुक सुङ्‍सुङ, “ङ ख्‍यिराङला टेङ्‍बो सिरिन, ख्‍यिराङ सेम ग्‍युर्नी आङा टिक्‍पेतिवा दोके माच्‍युङ्‍सुङ सिसिन देवाच्‍येनकी ग्‍येल्‍खापला नाम्‍साङ शुक मुथुपी।
MAT 18:4 तुक क्‍यानी चुका मी तीकी दी आङा टिक्‍पे दोके खुरुङला मो बेप्‍किवे, ती ति देवाच्‍येनकी ग्‍येल्‍खापला तेरी सिनाङ छ्‍ये यिन।
MAT 18:5 चुका मी तीकी ङे मिङला दुका आङा टिक्‍पे च्‍यिकला गासो शिवे, तीकी ङला राङ गासो शुवु यिन।”
MAT 18:6 “यिने चुका मी तीकी ङला तेपा कितुप दी छ्‍युङातिवी पर्ला मिरा च्‍यिकला दिक्‍पा कि ज्‍यिकिवे, तीकी ज्‍यिङ्‍बी लोला लाकुर ग्‍येर्पु रानी ग्‍येम्‍छो तिङ्‍मुला क्‍युरुप ति तीकी थोक्‍ला बोरु मङ ल्‍यामु यिन।
MAT 18:7 मीतिवाला दिक्‍पा कि ज्‍यितुप ताम्‍ङे वोतुप तप्‍की दी जम्‍बुलिङला मोताप सुकिवी। तुका दिक्‍पा कि ज्‍यितुप ताम्‍ङे याङ नरी च्‍युङ्‍गिवी, यिन्‍सिनाङ मीतिवाला दिक्‍पा कि ज्‍यितुप तीला ति कोन्‍छ्‍योककी पर्च्या ख्‍येल्‍गिवी।
MAT 18:8 दोजो ख्‍योरो काङ्‍बी याङ्‍ना लाक्‍पी ख्‍युरुङला दिक्‍पा कि ज्‍यिकिवी सिसिन तीला च्‍येनी क्‍युर। काङ्‍बा लाक्‍पा ङ्‍यिकर वोनी नरी बरुप ङ्‍येलाकी मे नाङ्‍ला ख्‍येलुप सिनाङ बोरु काङ्‍बा लाक्‍पा मेनी नाम्‍साङ मिशिवु मिजी थोपुप ति ख्‍योरो थोक्‍ला ल्‍यामु यिन।
MAT 18:9 तुक राङ क्‍यानी ख्‍योरो मिककी ख्‍युरुङला दिक्‍पा कि ज्‍यिकिवी सिसिन ती मिक ति थेन्‍नी क्‍युर। मिक ङ्‍यी वोनी मे बरुप ङ्‍येलाला ख्‍येलुप सिनाङ बोरु मिक च्‍यिक राङ वोनी नाम्‍साङ मिशिवु मिजी थोपुप ति ख्‍योरो थोक्‍ला ल्‍यामु यिन।”
MAT 18:10 “ख्‍यिरा दी छ्‍युङातिवी पर्ला च्‍यिकला साङ ङ्‍यप्‍च्‍ये माकिता। ङ ख्‍यिराङला सिरिन, तिवाला ल्‍हाटे कितुप देवाच्‍येनकी लेन क्‍योलुप थुतिवा देवाच्‍येनला ज्‍युनी वोतुप ङे पपी चिप्‍ला देनी खोकी शालला नरी ल्‍हेवी।
MAT 18:11 (ङ मी पुज्‍युङ ति तोरुपतिवाला र्‍होकुपला वावु यिन।)
MAT 18:12 ख्‍यिरा नासामला चुकै वे? दोजो मी ललाइकी ति लुक सयी च्‍यिक वे, ती नाङ्‍ला च्‍यिक ति पेनी गाल्‍सुङ सिसिन ती मी तीकी लुक खल गु ताङ गु तीला रीला राङ क्‍युर ज्‍याक्‍नी काङ ती पेनी गलुप लुक च्‍यिक ति छोल मोडोवी रो?
MAT 18:13 वुतुङ के ङ ख्‍यिराङला सिरिन, तीकी ती तोरुप लुक च्‍यिक ति ङ्‍येसुङ सिसिन मातोरुप लुक खल गु ताङ गु ति सिनाङ ती च्‍यिककी थोक्‍ला मङ गा किवी।
MAT 18:14 तुक राङ क्‍यानी दी छ्‍युङातिवी पर्ला मिरा च्‍यिक साङ ङ्‍येलाला मोडोशी सिरुप ति देवाच्‍येनला ज्‍यु वोतुप ख्‍यिरा पपा कोन्‍छ्‍योककी नोवा वे।”
MAT 18:15 “दोजो तेपा कितुप अच्‍युनुपतिवी पर्ला ललाइकी ख्‍योरो तेन्‍दोकला लाका मेलोवा क्‍यासिन तीला गल्‍नी ख्‍यिराङ ङ्‍यी तिराङ देनी तीकी क्‍यावु मेलोवाकी कोर्ला तीला सी। तीकी ख्‍योरो ताम्‍ङे ङ्‍येन्‍सिन ती ति येलुङ तेपा कितुप ख्‍योरो अच्‍युनुप च्‍युङ्‍गिवी।
MAT 18:16 यिने तीकी ख्‍योरो ताम्‍ङे माङ्‍येन्‍सिन मी यम्‍बा मिरा च्‍यिक चो ङ्‍यी चो टिनी तीकी ते ग्‍युक। तुक क्‍यानी कोन्‍छ्‍योककी सुङला टिवु दोके तीकी सिक्‍यावु तेरी ताम्‍ङे ति मिरा ङ्‍यी सुमकी पङ्‍बु नेमा तेन्‍तेन च्‍युङ्‍गिवी।
MAT 18:17 यिने तीकी तिवी ताम्‍ङे साङ माङ्‍येन्‍सिन ती ताम्‍ङे ति चर्चला सी। चर्चकी ताम्‍ङे साङ तीकी माङ्‍येन्‍सिन तीला कोन्‍छ्‍योकला ङा माशेवु मिरिक यम्‍बाकी मी याङ्‍ना से दुतुप मी दोके नासाम तोङ।
MAT 18:18 वुतुङ के ङ ख्‍यिराङला सिरिन, ख्‍यिरा जम्‍बुलिङला काङ कि ज्‍यिकिवे, देवाच्‍येनला साङ कि ज्‍यिकिवी। ख्‍यिरा जम्‍बुलिङला काङ कि मिज्‍यिवे, देवाच्‍येनला साङ कि मिज्‍यिवी।
MAT 18:19 येलुङ ङ ख्‍यिराङला सिरिन, जम्‍बुलिङला ख्‍यिराङ मिरा ङ्‍यी सेम थिन्‍नी काङ लाङ्‍सिनाङ देवाच्‍येनला ज्‍यु वोतुप ङे पपी ख्‍यिरा थोक्‍ला च्‍युङ ज्‍यिकिवी।
MAT 18:20 कनी ख्‍यिराङ मिरा ङ्‍यी सुम ङे मिङला जोम्‍गिवे, ते ङ ख्‍यिरा पर्ला वुङ्‍यिनो।”
MAT 18:21 तमा पत्रुस ति येशूकी चाला वानी, “चोवो, तेपा कितुप अच्‍युनुपकी ङे थोक्‍ला लाका मेलोवा क्‍यासिन तीला थेङ्‍मा चो सेक माफ तेर गोकिवी? थेङ्‍मा दिन सेक तेर गोकिवी?” सिनी सिक्‍यासुङ।
MAT 18:22 तमा येशूकी तीला सुङ्‍सुङ, “ङ ख्‍युरुङला सिरिन, थेङ्‍मा दिन सेक तिराङ मिन, यिने थेङ्‍मा दिनकी दोम्‍बा खल दिन सेक साङ तेर गोकिवी।
MAT 18:23 तुक क्‍यानी देवाच्‍येनकी ग्‍येल्‍खाप ति खोरो लावातिवाला ची लङ्‍गुप ग्‍येल्‍वु मिरा च्‍यिक दोके यिन।
MAT 18:24 ती ग्‍येल्‍वुकी ची कितुप पेला ती नेसुर सेरकी डप्‍बु तोङ्‍डा च्‍यिथम्‍बा छ्‍यावा लावु लावा मिरा च्‍यिकला खोरो चाला टिनी वुङ च्‍यिसुङ।
MAT 18:25 यिने ती लावा तीकी छ्‍यावा ते माथुप्‍सिमा ग्‍येल्‍वु तीकी लावा तीला ‘ख्‍युरुङ ख्‍योरो पेजापेर्मी ताङ ख्‍योरो मुला वोतुप तेरी चोनी छ्‍यावा ची की।’ सिनी क बिन्‍सुङ।
MAT 18:26 तमा ती लावा तीकी पुमुङ सला चुनी, ‘ओ ग्‍येल्‍वु, चेयी पर सेक गु, ङ ख्‍योरे छ्‍यावा तेरी तेतिन।’ सिनी गोङ्‍बा शुसुङ।
MAT 18:27 तमा ग्‍येल्‍वु तीकी तीला ङ्‍यिङ्‍ज्‍ये लानी लङ गोवु छ्‍यावा ति क्‍युर्नी बिन्‍सुङ।
MAT 18:28 यिने ती लावा ति ग्‍येल्‍वी चा नेमा थेन गल्‍नी खोरो नेसुर ङुलकी डप्‍बु सयी छ्‍यावा लङ्‍गुप लावा दाल्‍जा यीला ठेसुङ, तमा तीकी ती दाल्‍जाकी ज्‍यिङ्‍बाला जिम्‍नी ‘ङे नेसुर लावु छ्‍यावा खुर शोक।’ सिनी सिक्‍यासुङ।
MAT 18:29 तमा ती लावा दाल्‍जा ति खवुतुङ्‍मा देनी ‘ठाकुरे चेयी पर सेक गु, ङ ख्‍योरे छ्‍यावा तेतिन।’ सिनी गोङ्‍बा शुसुङ।
MAT 18:30 यिने तीकी ताम्‍ङे माङ्‍येन्‍नी छ्‍यावा मातेवा सेक्‍ला खोरो लावा दाल्‍जा तीला चोन्‍खाङला उप्‍नी ज्‍याक्‍सुङ।
MAT 18:31 ती थोङ्‍सिमा तीकी लावा दाल्‍जा यम्‍बातिवी सेम नासुङ, तमा तिवा गल्‍नी ते च्‍युङ्‍गुप ताम्‍ङे ति ग्‍येल्‍वुला लाप्‍सुङ।
MAT 18:32 तमा ग्‍येल्‍वु तीकी छ्‍यावा क्‍युर्नी बिन्‍दुप लावा तीला कताङ्‍नी ‘ख्‍यो लावा दुक्‍टा! ख्‍योरो ङला गोङ्‍बा शोप पेला ङे ख्‍योरो छ्‍यावा ति क्‍युर्नी बिनिन।
MAT 18:33 ङे ख्‍युरुङला च्‍यम्‍बा क्‍यावु दोके ख्‍योरो दाल्‍जाला च्‍यम्‍बा कि मोगोवी रो?’ सिनी सिक्‍यासुङ।
MAT 18:34 तमा ती ग्‍येल्‍वु ति कशेन ङ्‍यिर्मु लानी तीकी तेरी छ्‍यावा मातेवा सेक्‍ला तीला चोन्‍खाङला उप्‍नी ज्‍योक च्‍यिसुङ।
MAT 18:35 तुक क्‍यानी ख्‍यिरा रङगी अच्‍युनुपतिवाला सेमगी दिङ नेज्‍युनी माफ माबिन्‍सिन देवाच्‍येनला ज्‍यु वोतुप ङे पपी साङ ती ग्‍येल्‍वी दोके ख्‍यिराङला माफ मनङ्‍गिवी।”
MAT 19:1 येशूकी ती येन्‍देनतिवा नङ सिन्‍सिमा गालील नेसुर यर्दन चङ्‍बी फर्केन वोतुप यहूदिया लुङ्‍बा नेवा फेप्‍सुङ।
MAT 19:2 ते मी माङ्‍छ्‍योक खोकी तिङ्‍ला तिङ्‍यासुङ। तमा खोकी तिवी पर्ला वोतुप नेर्पुतिवाला टेक च्‍यिसुङ।
MAT 19:3 ते ललाइ फरिसीतिवा खोकी चाला वानी खोला खोक्‍पा ल्‍हापला “काङ तेन्‍दोक वोसिनाङ ख्‍योवी खोरो पेर्मीला डेलुप ति कोन्‍छ्‍योककी ठिमला गिवी ताङ मेङ्‍गिवी?” सिनी टिसुङ।
MAT 19:4 तमा येशूकी सुङ्‍सुङ, “थल्‍माला स ताङ नाम ज्‍येङ्‍गुप कोन्‍छ्‍योककी मीतिवाला ख्‍योक्‍पेजा ताङ पुम्‍पेजा जो नाङ्‍सुङ,
MAT 19:5 तमा खोकी ‘ख्‍योक्‍पेजा ति खोरो पपाआमा ताङ मुला कुतुक थेन्‍नी खोरो पेर्मी ताङ मुला थिन्‍नी च्‍यिक राङ च्‍युङ्‍गिवी।’ सिनी सुङ्‍गुप ति ख्‍यिरा मारा?
MAT 19:6 ती तप्‍की त तिवा ङ्‍यी मिन, च्‍यिक राङ यिन। कोन्‍छ्‍योककी च्‍यिक राङ जो नङ्‍गुप तीला मीकी डेलुप मेङ्‍गिवी।”
MAT 19:7 तमा लोङ फरिसीतिवी खोला दुक सिनी टिसुङ, “तुकै यिन्‍सिन च्‍यिला मोशाकी ठिमला खोरो पेर्मीला टलुप यिकी टि बिन्‍नी टल्‍सिन गिवी सिनी सिक्‍यावु यिनाङ?”
MAT 19:8 तमा येशूकी तिवाला सुङ्‍सुङ, “ती ति ख्‍यिरा सेम क्‍योङ्‍बु वोतुप तप्‍की पेर्मी टल्‍सिन गिवी सिनी मोशाकी सिक्‍यावु यिन, यिने थल्‍माला कोन्‍छ्‍योककी नोवा ति तुकै मे।
MAT 19:9 ङ ख्‍यिराङला सिरिन, चुका मी तीकी खोरो पेर्मी ति शम्‍डेन माक्‍यावु यिन्‍सिनाङ तीला क्‍युर ज्‍याक्‍नी यम्‍बा पुम्‍पेजाला जेन्‍दी किवे, तीकी शम्‍डेन क्‍यावु राङ यिन।”
MAT 19:10 तमा खोकी लोमातिवी खोला, “ख्‍योवा ताङ पेर्मीकी तम्‍जी ति तुकै वुङ्‍गुप यिन्‍सिन जेन्‍दी माक्‍यावु राङ मङ ल्‍यामु यिन।” सिनी सिक्‍यासुङ
MAT 19:11 तमा येशूकी तिवाला सुङ्‍सुङ, “तेरी मीतिवी दी ताम्‍ङे ति ङ्‍येन मुथुपी, यिने सुला कोन्‍छ्‍योककी दुकै कितुप नोवा नाङ्‍वे, तीकी तिराङ ती ताम्‍ङे ङ्‍येन्‍गिवी।
MAT 19:12 च्‍यिलासिसिन ललाइ ति केयिन राङ रप्‍छ्‍ये गिवी, ललाइ ति मी जोवु रप्‍छ्‍ये गिवी। ललाइ ति कोन्‍छ्‍योककी ग्‍येल्‍खापकी थोक्‍ला खोरुङ राङ रप्‍छ्‍ये गिवी। सी दी ताम्‍ङेला ङ्‍येन थुप्‍किवे, तीकी ङ्‍येन्‍शी।”
MAT 19:13 ती पेला मी ललाइकी खोप्‍रे आङा टिक्‍पेतिवी खला येशूकी छ्‍याक ज्‍याक्‍नी मोपोर क्‍या नाङ सिनी तिवाला खोकी चाला टिनी लेसुङ। यिने लोमातिवी आङातिवाला टिनी वुङ्‍गुप मीतिवाला वोरु तेन्‍सुङ।
MAT 19:14 तमा येशूकी लोमातिवाला सुङ्‍सुङ, “आङा टिक्‍पेतिवाला ङे चाला वुङ च्‍यी, तिवाला माग्‍येक। च्‍यिलासिसिन कोन्‍छ्‍योककी ग्‍येल्‍खाप ति दी आङा टिक्‍पेतिवा दोके खोरुङला मो बेपुप मीतिवी ति यिन।”
MAT 19:15 तमा खोकी आङा टिक्‍पेतिवी खला छ्‍याक ज्‍याक्‍नी मोलाम नङ्‍सिमा खो तेसुर फेप्‍सुङ।
MAT 19:16 थेङ्‍मा यी मी मिरा च्‍यिक येशूकी चाला वानी खोला “ओ गेकेन, नाम्‍साङ मिशिवु मिजी ङ्‍येतुपला ङे काङ लाका टेङ्‍बु कि गोकिवी?” सिनी टिसुङ।
MAT 19:17 तमा येशूकी तीला “ख्‍युरुङ च्‍यिला ङला लाका टेङ्‍बुकी कोर्ला टिवी? टेङ्‍बु ति कोन्‍छ्‍योक च्‍यिक राङ यिन। ख्‍युरुङला नाम्‍साङ मिशिवु मिजी ङ्‍येतुप नो वोसिन कोन्‍छ्‍योककी मोशा नेमा नङ्‍गुप कतिवाला ङ्‍येन।” सिनी सुङ्‍सुङ।
MAT 19:18 तमा तीकी येशूला “चुका कतिवा?” सिनी टिसुङ। तमा येशूकी तीला “मी मासे, शम्‍डेन माकी, कुन माकी, पङ्‍बु जिनोक माजो,
MAT 19:19 ख्‍योरो पपाआमाला ताङ्‍देन की, तमा खोरो युल्‍वातिवाला रङला दोके ङ्‍यिङ्‍ज्‍ये की।” सिनी सुङ्‍सुङ।
MAT 19:20 खोकी तुक सुङ्‍सिमा ती ख्‍योक्‍पेजा नाज्‍युङ तीकी येशूला “दिवा याङ तेरी ङे ङ्‍येन वे। तरोङ साङ ङे ङ्‍येन गोवु ति काङ वे?” सिनी सिक्‍यासुङ।
MAT 19:21 तमा येशूकी तीला सुङ्‍सुङ, “ख्‍युरुङ कोन्‍छ्‍योककी नोवा दोके तेरी कितुप मी च्‍युङ्‍गुप नो वोसिन ख्‍योरो लोला वोतुप नोर टोङ्‍बातिवा चोनी पेराङ्‍बुतिवाला बिन। तुक क्‍यासिन ख्‍युरुङला देवाच्‍येनकी टोङ्‍बा थोप्‍किवी। तमा ती ज्‍युक्‍ला ख्‍युरुङ ङे तिङ्‍ला तिङ्‍यो।”
MAT 19:22 ती ताम्‍ङे थोसिमा ती मी ति सेम्‍दुक लानी गाल्‍सुङ, च्‍यिलासिसिन तीकी मुला नोर टोङ्‍बा बङी नोक।
MAT 19:23 तमा येशूकी लोमातिवाला सुङ्‍सुङ, “वुतुङ के ङ ख्‍यिराङला सिरिन, मी छ्‍युक्‍पुतिवाला याङ कोन्‍छ्‍योककी ग्‍येल्‍खापला शुकुप ति छासे कले गिवी।
MAT 19:24 येलुङ ङ ख्‍यिराङला सिरिन, मी छ्‍युक्‍पुतिवा कोन्‍छ्‍योककी ग्‍येल्‍खापला शुकुप सिनाङ सेम्‍ज्‍येन वोङ्‍मु ति खपकी मिरु नाङ्‍ला शुकुप ति मङ जोल्‍हमु गिवी।”
MAT 19:25 ती थोसिमा लोमातिवा छासे हलेवा लानी, “तुकै यिन्‍सिन चुका मी ति कोन्‍छ्‍योककी थर्वा ङ्‍ये थुप्‍किवी?” सिनी सिक्‍यासुङ।
MAT 19:26 तमा येशूकी तिवी थाकाला ल्‍हानी दुक सुङ्‍सुङ, “मीतिवी ति कि मुथुपी, यिने कोन्‍छ्‍योककी तेरी कि थुप्‍किवी।”
MAT 19:27 तमा पत्रुसकी खोला “ल्‍हो ताङ, चोवोकी तिङ्‍ला तिङ्‍योकुपला ङ्‍यिरा तेरी क्‍युर्नी ज्‍याकिन। त कोन्‍छ्‍योक नेमा ङ्‍यिराङला काङ ङ्‍येकिवी?” सिनी सिक्‍यासुङ।
MAT 19:28 तमा येशूकी तिवाला “वुतुङ के ङ ख्‍यिराङला सिरिन, दी जम्‍बुलिङ तेरी सम्‍बा फोनी ङ मी पुज्‍युङ खोरो मोवा वोतुप ग्‍येल्‍ठिकला देनी ग्‍येला कितुप पेला ख्‍यिराङ ङे तिङ्‍ला तिङ्‍योकुपतिवा साङ ग्‍येल्‍ठिक च्‍यिङ्‍ङीला देनी इस्राएलकी मिरिक च्‍यिङ्‍ङीकी खला ठिम कितो।
MAT 19:29 तमा सी ङे थोक्‍ला खोरो खाङ्‍बा ताङ अच्‍युनुप ताङ अज्‍यीनुम ताङ पपाआमा ताङ पुज्‍युङपुम ताङ शिङ क्‍युर ज्‍याक्‍नी ङे तिङ्‍ला तिङ्‍योकिवे, तीला तीकी क्‍युर्नी ज्‍यकुप सिनाङ दोम्‍बा सयी मङ ल्‍हक्‍पा थोप्‍किवी, तमा नाम्‍साङ मिशिवु मिजी थोप्‍किवी।
MAT 19:30 यिने गोमाला वोतुपतिवा बङी तिङ्‍ला गिवी, तिङ्‍ला वोतुपतिवा बङी गोमाला गिवी।” सिनी सुङ्‍सुङ।
MAT 20:1 येलुङ येशूकी दुक सुङ्‍सुङ, “देवाच्‍येनकी ग्‍येल्‍खाप ति टोपला टेताङ खोरो गुन्‍डुम शिङ खला लाका कितुप मीतिवा छोलुपला पाङ्‍ला थेन्‍दुप शिङ ज्‍यिन्‍दाक दोके यिन।
MAT 20:2 तीकी लाका कितुप मीतिवाला ङ्‍यिमा च्‍यिकला ङुलकी डप्‍बु च्‍यिक तेर्सा क्‍यानी खोरो गुन्‍डुम शिङ खला लाका कितुपला ताङ्‍सुङ।
MAT 20:3 ती ज्‍युक्‍ला टोपला छ्‍युजी गु चोयीला ती ज्‍यिन्‍दाक ति पाङ्‍ला गल्‍नी ल्‍हासालेन्‍सिन हाला मीतिवा लाका मेनी तुक राङ लानी देतुप थोङ्‍सुङ।
MAT 20:4 ती थोङ्‍सिमा तीकी तिवाला ‘ख्‍यिराङ साङ ङे गुन्‍डुम शिङ खला गल्‍नी लाका की। ख्‍यिरा लाका क्‍यावु चोयी ति ल तेरिन।’ सिनी सिक्‍यासुङ।
MAT 20:5 तमा तिवा शिङ खला लाका कितुपला गाल्‍सुङ। येलुङ ती ज्‍यिन्‍दाक ति ङ्‍यिमी गुङगी छ्‍युजी च्‍यिङ्‍ङी चोयीला ताङ छ्‍युजी सुम चोयीला पाङ्‍ला थेन्‍नी तुक राङ क्‍यासुङ।
MAT 20:6 येलुङ गोमु छ्‍युजी ङ चोयीला साङ पाङ्‍ला थेन्‍सियाङ मी यम्‍बातिवा तुक राङ क्‍यानी लानी देतुप थोङ्‍सुङ। तीकी तिवाला साङ ‘ख्‍यिराङ च्‍यिला ङ्‍यिमा काङ लाका माक्‍यानी तुक राङ देकिवी?’ सिनी टिसुङ।
MAT 20:7 तमा तिवी ‘सी साङ ङ्‍यिराङला लाकाला माच्‍यिनी तुक राङ देन वे।’ सिनी सिक्‍यासुङ। तमा तीकी तिवाला ‘ख्‍यिराङ साङ ङे गुन्‍डुम शिङ खला गल्‍नी लाका की।’ सिनी सिक्‍यासुङ।
MAT 20:8 गोमु नाम ल्‍होसिमा ती गुन्‍डुम शिङ ज्‍यिन्‍दाक तीकी खोरो शिङ ल्हाप लावा छ्‍ये तीला ‘लाका कितुपतिवाला कताङ्‍नी तेरी सिनाङ तिङ्‍ला वावुतिवा नेसुर गो चुनी तेरी सिनाङ गोमाला वावुतिवा सेक ल बिन।’ सिनी योक कुसुङ।
MAT 20:9 गोमु छ्‍युजी ङ चोयीला लाका कितुपतिवा वानी तिवा रे रेला ङुलकी डप्‍बु रे रे ङ्‍येसुङ।
MAT 20:10 तमा तेरी सिनाङ गोमाला वानी लाका कितुपतिवी खोरो सेमला तिङ्‍ला वावुतिवाला सिनाङ ल ल्‍हक्‍पा थोप्‍किते सिनी नो क्‍यासुङ, यिने तिवाला साङ ङुलकी डप्‍बु रे रे राङ ङ्‍येसुङ।
MAT 20:11 ल ङ्‍येसिमा तिवा शिङ ज्‍यिन्‍दाकला ङ्‍योशोक ङ्‍योशोक सियी
MAT 20:12 ‘दिवा तिङ्‍ला वानी घण्‍टा च्‍यिक तिराङ लाका क्‍यावुतिवा ताङ ङ्‍यिराङ ङ्‍यिमा छेन्‍दीला ङ्‍यिमा काङ लाका क्‍यावुला च्‍यिक्‍पा राङ ल बिन्‍सुङ।’ सिनी सिक्‍यासुङ।
MAT 20:13 तमा ती शिङ ज्‍यिन्‍दाक तीकी तिवी पर्ला मिरा च्‍यिकला ‘आङो, ख्‍यिराङला ङे काङ मेलोवा माक्‍या वे। ख्‍यिरा ङुलकी डप्‍बु च्‍यिककी लला लाका कितिन सिक्‍यावु मिन?
MAT 20:14 ख्‍यिराङ दाक दाक्‍पुला थोपुप ल खुर्नी ग्‍युक। दी तिङ्‍ला वावुतिवाला ख्‍यिराङला चोयी राङ तेरुप ति ङे नो वे।
MAT 20:15 ङे टङ्‍गाला ङरा काङ कितुप नो वे, तुकै राङ कितुप मेङ्‍येवी रो? ङे च्‍यम्‍बा वोतुप तप्‍की ख्‍युरुङ ठतोक किवी?’
MAT 20:16 तुक क्‍यानी तिङ्‍ला वुङ्‍गुपतिवा ति गोमाला ख्‍येल्‍गिवी, गोमाला वुङ्‍गुपतिवा ति तिङ्‍ला ख्‍येल्‍गिवी।”
MAT 20:17 ती ज्‍युक्‍ला येशू यरूशलेमला फेपिन कितुप पेला खोकी लोमा च्‍यिङ्‍ङीतिवाला कुतुक टि गल्‍नी दुक सुङ्‍सुङ,
MAT 20:18 “ल्‍होसा, त दाक्‍पु यरूशलेम नेवा डोयी वे। मी पुज्‍युङला कोङ्‍यार छ्‍येतिवा ताङ यहूदी छ्‍योकी गेकेनतिवी लकला चेक तेकितो। तमा तिवी तीला क्‍येन बिन्‍नी सेतुप छ्‍येर्पा ग्‍येल्‍गितो।
MAT 20:19 ती ज्‍युक्‍ला तीला यहूदी मिन्‍दुप मिरिक यम्‍बातिवाला चेक तेकितो। तमा तिवी तीला मारे ताङ्‍नी तल्‍ज्‍येक ग्‍यक च्‍यिनी ग्‍यङ्‍शिङला कल्‍नी से ज्‍यिकितो। यिने शेप ङ्‍यिमा सुमकी छेर्मु कोन्‍छ्‍योककी तीला ङोसु लोङ्‍गितो।”
MAT 20:20 ती ज्‍युक्‍ला जब्‍दियाकी पुज्‍युङ याकूब ताङ यूहन्‍नाकी आमा तीकी खोरो पुज्‍युङतिवा ताङ मुला येशूकी चाला वानी पुमुङ सला चुनी खोला गोङ्‍बा शुसुङ।
MAT 20:21 तमा येशूकी तीला “ख्‍युरुङला काङ गोकिवी?” सिनी टि नाङ्‍सुङ। तीकी “ङे पुज्‍युङ ङ्‍यिवुला गेकेनकी ग्‍येल्‍खापला च्‍यिक ति गेकेनकी यावी थाकाला, च्‍यिक ति येन्‍बी थाकाला देतुप ङ्‍येशी।” सिनी सिक्‍यासुङ।
MAT 20:22 येशूकी तिवाला “ख्‍यिरा लङ्‍गुप ति काङ यिन सिनी ख्‍यिराङला छ्‍या मे। काङ ङे थुङ्‍गुप दुक्‍पाकी कोरा नेमा ख्‍यिरा थुङ थुप्‍किवी?” सिनी सुङ्‍सुङ। तमा तिवी “लसे, ङ्‍यिराङ थुङ थुप्‍किवी।” सिनी सिक्‍यासुङ।
MAT 20:23 तमा येशूकी तिवाला सुङ्‍सुङ, “ङे थुङ्‍गुप कोरा ति वुतुङ के ख्‍यिरा थुङ्‍गिवी। यिने ङे यावा ताङ येन्‍बाला देतुप ति ङे कि ज्‍यितुप मिन, ङे पपी सी थोक्‍ला टडिक क्‍यावे, तिवाला राङ देतुप ङ्‍येकिवी।”
MAT 20:24 ती थोसिमा लोमा च्‍यिथम्‍बातिवा याकूब ताङ यूहन्‍नाला ङ्‍यिर्मु क्‍यासुङ।
MAT 20:25 तमा येशूकी तिवा तेरीला चाला कताङ्‍नी सुङ्‍सुङ, “ख्‍यिराङला छ्‍या वे, जम्‍बुलिङकी ग्‍येल्‍वी खोरो मीतिवाला ओङ्‍ज्‍येन किवी, तमा ती लुङ्‍बाकी मी छ्‍येतिवी मीतिवाला ओङ्‍ज्‍येन किवी।
MAT 20:26 यिने ख्‍यिरा पर्ला याङ तुकै मेङ्‍गिवी। बोरु सु ख्‍यिरा पर्ला छ्‍ये डोप नो किवे, ती ति ख्‍यिराङ तेरीला शब्‍ज्‍यी कितुप मी च्‍युङ गोकिवी।
MAT 20:27 तमा ख्‍यिरा पर्ला सु तेरी सिनाङ छ्‍ये डोप नो किवे, ती ति ख्‍यिराङ तेरीकी योक्‍पु च्‍युङ गोकिवी।
MAT 20:28 ङ मी पुज्‍युङ ति मीतिवा नेमा शब्‍ज्‍यी ङ्‍येतुपला वावु मिन, यिने शब्‍ज्‍यी कितुपला ताङ मी बङीला दिक्‍पा ने थर ज्‍यितुपकी थोक्‍ला ङरा मिजी तेरुपला वावु यिन।”
MAT 20:29 तमा येशू ताङ खोकी लोमातिवा यरीहो ने फेपिन कितुप पेला मी माङ्‍छ्‍योक खोकी तिङ्‍ला तिङ्‍यासुङ।
MAT 20:30 ती पेला मिक मोथोङ्‍गुप मिरा ङ्‍यी ते लामकी गारीला देनी येशू ती लाम नेवा फेपिन वे सिरुप थोनी, “ओ चोवो, दाऊदकी सेवु, ङ्‍यिराङला च्‍यम्‍बा की।” सिनी च्‍यार ग्‍यप्‍सुङ।
MAT 20:31 मी माङ्‍छ्‍योककी तिवाला खरक्‍पा दे सिनी वोरु तेन्‍सिनाङ तिवा मङ कशेन च्‍यार ग्‍यकिन सिरा “ओ चोवो, दाऊदकी सेवु, ङ्‍यिराङला च्‍यम्‍बा किटे की।” सिनी सिक्‍यासुङ।
MAT 20:32 तमा येशू ते टङी देनी तिवाला चाला कताङ्‍नी, “ख्‍यिराङला ङे काङ किशी सिरुप नो वे?” सिनी सुङ्‍सुङ।
MAT 20:33 तमा तिवी “ओ चोवो, ङ्‍यिरा मिक ति थोङ्‍गुप डोशी।” सिनी सिक्‍यासुङ।
MAT 20:34 तमा येशूकी तिवाला ङ्‍यिङ्‍ज्‍ये लानी तिवी मिकला खोरे छ्‍याक रेक्सिमा शार्क्येक तिवी मिक ति थोङ थुपुप गाल्‍सुङ। ती ज्‍युक्‍ला तिवा ङ्‍यिकर खोकी तिङ्‍ला तिङ्‍यासुङ।
MAT 21:1 तमा येशू खोकी लोमातिवी मुला यरूशलेम चाला फेप्‍नी जैतुन पम्‍दोकला वोतुप बेथफागे सिरुप ते लेप्सुङ। ते लेप्‍सिमा खोकी लोमा मिरा ङ्‍यीला खोरुङ सिनाङ गोमाला दुक सुङ्‍नी ताङ्‍सुङ,
MAT 21:2 “ख्‍यिराङ देसुर फो चाला वोतुप युलला ग्‍युक। ते लेप्‍सिमा पुङ्‍गोक अमुङ यी तानी ज्‍यकुप ताङ तीकी तिवु यी तीकी चाला वोतुप ठेकितो। तमा तिवाला पि ताङ्‍नी ङे चाला दानी शोक।
MAT 21:3 चुका मी तीकी ख्‍यिराङला काङ रे च्‍यिक रे ताम्‍ङे क्‍यासिन ‘दिवा ति चोवोला गोकिवी।’ सिनी सी। तुक सिक्‍यासिन तीकी शार्क्येक दानी डो ज्‍यिकिवी।”
MAT 21:4 ती ति तोङ्‍ला कोन्‍छ्‍योककी लुङ्‍तेम्‍बा नेसुर कोन्‍छ्‍योककी दुक सिनी सुङ्‍गुप ति छेवुला यिन,
MAT 21:5 “इस्राएलकी मीतिवाला दुक सी। ल्‍होसा, ख्‍यिरा ग्‍येल्‍वु ति ख्‍यिरा चाला फेप्‍कितो। खो ति सेम बोल्‍मु क्‍यानी पुङ्‍गोक खला, पुङ्‍गोक तिवु खला शेन्‍नी फेप्‍कितो।”
MAT 21:6 तमा लोमातिवा गल्‍नी येशूकी क नङ्‍गुप दोके
MAT 21:7 पुङ्‍गोक ताङ तिवु ति दा वानी तिवी खला खोप्‍रे मज्‍यातिवा तिङ्‍सुङ। तमा येशू तीकी खला शेन्‍सुङ।
MAT 21:8 मी माङ्‍छ्‍योककी खोला ताङ्‍देन कितुपला रङगी फिला कोन्‍दुप मज्‍यातिवा पिनी लामला तिङ्‍सुङ, तमा यम्‍बातिवी दोङ्‍बी येल्‍का च्‍येनी लामला तिङ्‍सुङ।
MAT 21:9 ते मी माङ्‍छ्‍योक ललाइ ति खोकी गोमाला, ललाइ ति खोकी तिङ्‍ला तिङ्‍योकिन सिरा “दाऊदकी सेवुला होसन्‍ना!” “चोवोकी मिङला फेपुप तीला मोलाम वोतुप यिनो!” “चोछ्‍येवु कोन्‍छ्‍योकला होसन्‍ना!” सियी कशेन वोरु तेन्‍सुङ।
MAT 21:10 तमा येशू यरूशलेमला शुकुप पेला ती ग्‍येसाकी मीतिवा तेरी हराङ हुरुङ क्‍यानी, “खो सु यिनाङ?” सिनी टिसुङ।
MAT 21:11 तमा मी माङ्‍छ्‍योककी खो गालीलकी नासरत नेसुर फेवु कोन्‍छ्‍योककी लुङ्‍तेम्‍बा येशू यिन सिनी सिक्‍यासुङ।
MAT 21:12 ती ज्‍युक्‍ला येशू यहूदी ल्‍हङाङला शुनी ते छोङ कियी वोतुप ताङ ङ्‍योप्‍चे ग्‍यकिन वोतुपतिवा तेरीला पाङ्‍ला तेन ताङ्‍सुङ। तमा टङ्‍गा ज्‍येपतिवी च्‍योक्‍चीतिवा ताङ बुर्केन चोङ्‍गुपतिवा देतुप तेक्‍पातिवा आलोक ग्‍यप्‍सुङ।
MAT 21:13 तमा खोकी तिवाला सुङ्‍सुङ, “कोन्‍छ्‍योककी सुङला दुक सिनी टि वे, ‘ङे खाङ्‍बा ति मोपोर कितुप खाङ्‍बा यिन सिनी सिवी।’, यिने ख्‍यिरा याङ तीला ‘च्‍याक्‍पातिवा देतुप फुक’ जोसुङ।”
MAT 21:14 ते ल्‍हङाङला मिक मोथोङ्‍गुप ताङ काङ्‍बा थेङ्‍बा वोतुप मीतिवा खोकी चाला वानोक, तमा खोकी तिवाला टेक च्‍यिसुङ।
MAT 21:15 यिने कोङ्‍यार छ्‍येतिवा ताङ यहूदी छ्‍योकी गेकेनतिवा खोकी क्‍या नङ्‍गुप हलेवु लाकातिवा थोङ्‍गुप ताङ पेजातिवी ल्‍हङाङला “दाऊदकी सेवुला होसन्‍ना!” सिनी वोरु देन्‍दुप थोङ्‍सिमा कशेन ङ्‍यिर्मु क्‍यानी
MAT 21:16 येशूला “दी पेजातिवी काङ सिनोक ख्‍योरो थोयी वे?” सिनी टिसुङ। तमा येशूकी सुङ्‍सुङ, “यिन, थोयी वे। ‘चोवोकी पेजा टिक्‍पेतिवा ताङ आङा टिक्‍पेतिवी ख नेमा सोवा देक च्‍यिसुङ।’ सिनी सुङ्‍गुप कोन्‍छ्‍योककी सुङ ति ख्‍यिरा मारा?”
MAT 21:17 तमा येशू तिवाला क्‍युर ज्‍याक्‍नी ती ग्‍येसा ने थेन्‍नी बेथानियाला फेप्सिमा खो ते राङ शासा ज्‍युसुङ।
MAT 21:18 ती सला टोपला टेताङ येलुङ येशू यरूशलेमला लोक्‍नी फेपुप पेला खोला ल्‍होवा लानोक।
MAT 21:19 ती पेला खोकी लामकी गारीला अन्‍जीरकी दोङ्‍बु यी थोङ्‍नी ती दोङ्‍बी चाला फेप्‍नी ल्‍हासालेन्‍सिन लोमा मिसिन यम्‍बा काङ साङ माथोङ। तमा खोकी ती दोङ्‍बुला “तफेन्‍ला दीला नाम्‍साङ डेलु मोगोर्शिता!” सिनी सुङ्‍लुङ्‍मे ती अन्‍जीरकी दोङ्‍बु ति शार्क्येक रेर्पा गाल्‍सुङ।
MAT 21:20 ती थोङ्‍सिमा लोमातिवा हलेवा लानी, “दी अन्‍जीरकी दोङ्‍बु ति चुक क्‍यानी शार्क्येक रेर्पा गलुप यिनाङ?” सिनी सिक्‍यासुङ।
MAT 21:21 तमा येशूकी तिवाला सुङ्‍सुङ, “वुतुङ के ङ ख्‍यिराङला सिरिन, ख्‍यिरा कोन्‍छ्‍योकला तेपा क्‍यानी सेमला नाम्‍दोक माक्‍यासुङ सिसिन ख्‍यिरा ङे दी अन्‍जीरकी दोङ्‍बुला क्‍यावु चोयी तिराङ मिन, दी री तीला ‘पोक्‍नी ग्‍येम्‍छो नाङ्‍ला लुम्‍शी।’ सिक्‍यासिनाङ तुकै राङ च्‍युङ्‍गिवी।
MAT 21:22 ख्‍यिरा तेपा क्‍यासिन मोपोर कितुप पेला काङ लङ्‍सिनाङ ख्‍यिराङला थोप्‍किवी।”
MAT 21:23 येलुङ येशू ल्‍हङाङला फेप्‍नी येन्‍देन लोपिन वोतुप पेला कोङ्‍यार छ्‍येतिवा ताङ लुङ्‍बाकी गोमा कितुप मी छ्‍येतिवा खोकी चाला वानी, “चुका ओङ्‍ज्‍येनकी ख्‍योरो दी लाका कियी वे? सी दी लाका कितुप ओङ्‍ज्‍येन ख्‍युरुङला बिन्‍सुङ?” सिनी टिवा ग्‍यप्‍सुङ।
MAT 21:24 तमा येशूकी तिवाला सुङ्‍सुङ, “ङ साङ ख्‍यिराङला टिवा यी टेयिन। तीकी टिलेन ति ख्‍यिरा ग्‍यप्‍सुङ सिसिन ङ साङ चुका ओङ्‍ज्‍येन नेसुर दी लाका कियी वे, ती ति ख्‍यिराङला लपिन।
MAT 21:25 यूहन्‍नाकी बप्‍तिस्‍मा ति कनी नेमा वावु यिन? कोन्‍छ्‍योक नेमा वावु यिनाङ की, मी नेमा वावु यिन?” ती थोसिमा तिवा खोप्‍राङ पर्ला दुक सियी केवुल क्‍यासुङ, “दाक्‍पी ‘देवाच्‍येन नेमा लावु यिन।’ सिक्‍यासिन ‘ख्‍यिरा च्‍यिला तीला तेपा माक्‍या?’ सिनी सिविते यिन्‍दे।
MAT 21:26 तमा ‘मी नेमा वावु यिन।’ सिक्‍यासिन दाक्‍पु मीतिवाला ज्‍यिवा यिन, च्‍यिलासिसिन मी तेरीकी यूहन्‍नाला कोन्‍छ्‍योककी लुङ्‍तेम्‍बा यिन सिनी तेन्‍गिनोक।”
MAT 21:27 ती तप्‍की तिवी, “ङ्‍यिराङला याङ छ्‍या राङ मे।” सिनी सिक्‍यासुङ। तमा येशूकी तिवाला “तुकै यिन्‍सिन ङ साङ ख्‍यिराङला चुका ओङ्‍ज्‍येनला दी लाका कियी वे, ती ति मिसिर।” सिनी सुङ्‍सुङ।
MAT 21:28 तमा येलुङ येशूकी सुङ्‍सुङ, “ख्‍यिरा दी पेकी कोर्ला चुकै नासाम तोङ्‍गिवी? मी मिरा च्‍यिककी ति पुज्‍युङ पिन ङ्‍यी नोक। तीकी खोरो पुज्‍युङ छ्‍ये तीला गल्‍नी, ‘पुज्‍यो, ख्‍युरुङ हारिङ गुन्‍डुम शिङ खला गल्‍नी लाका की।’ सिनी सिक्‍यासुङ।
MAT 21:29 तमा तीकी ‘ङ मोडो।’ सिक्‍यासुङ, यिने चेयी ज्‍युक्‍ला तीकी सेम ग्‍युर्नी लाका कितुपला गाल्‍सुङ।
MAT 21:30 येलुङ पपा ति पुज्‍युङ छ्‍युङा तीकी चाला गल्‍नी तीला साङ तुक राङ सिक्‍यासुङ। तमा तीकी ‘गिवी, पपो, ङ डोयी।’ सिनी सिक्‍यासुङ, यिने डोप ति मागाल।
MAT 21:31 ख्‍यिरा नासामला ती पुज्‍युङ पिन ङ्‍यीकी नाङ्‍ला चुका तीकी पपी नोवाला वोतुप ति क्‍यासुङ?” तिवी “पुज्‍युङ छ्‍ये तीकी।” सिनी सिक्‍यासुङ। तमा खोकी तिवाला सुङ्‍सुङ, “वुतुङ के ङ ख्‍यिराङला सिरिन। से दुतुपतिवा ताङ छ्‍येमुतिवा ख्‍यिराङ सिनाङ गोमाला कोन्‍छ्‍योककी ग्‍येल्‍खापला लेप्‍किवी।
MAT 21:32 च्‍यिलासिसिन यूहन्‍ना ख्‍यिरा ते वानी ख्‍यिराङला मिजी टेङ्‍बु क्‍योङ्‍गुप लाम छ्‍या तेन्‍सिनाङ ख्‍यिरा तीला तेपा माक्‍या। यिने से दुतुपतिवा ताङ छ्‍येमुतिवी तीला तेपा क्‍यासुङ। तमा ख्‍यिरा तिवी तेपा क्‍यावु थोङ्‍सिमा साङ सेम ग्‍युर्नी खोला तेपा माक्‍या।”
MAT 21:33 येलुङ येशूकी यम्‍बा दुका पे यी साङ शेन नाङ्‍सुङ, “दासा यीला शिङ ज्‍यिन्‍दाक यी नोक। तीकी खोरो शिङ खला गुन्‍डुम चुसिमा तीकी गारी गुरीला खोर क्‍यानोक। तमा ती खोरकी नाङ्‍ला गुन्‍डुम ख्‍वो चिरुपला मुक्‍तुम टुसुङ, तमा र्‍हेन्‍दुप मतेन जोसुङ। ती ज्‍युक्‍ला ती शिङ ति पिज्‍यिङ्‍बातिवाला पिज्‍यिङला तङ ज्‍याक्‍नी ती ति मी लुङ्‍बा गाल्‍सुङ।
MAT 21:34 गुन्‍डुम छोनी रुकुप पेला तीकी खोरुङला थोपुप गुन्‍डुम लङ्‍गुपला खोरो लावातिवाला पिज्‍यिङ्‍बातिवी ते ताङ्‍सुङ।
MAT 21:35 यिने पिज्‍यिङ्‍बातिवी तीकी लावातिवाला जिम्‍नी च्‍यिकला ति दुसुङ, च्‍यिकला ति सेसुङ, तमा च्‍यिकला ति दो पोप्‍सुङ।
MAT 21:36 तीकी येलुङ गोमाला सिनाङ ल्‍हक्‍पा लावातिवाला ताङ्‍सुङ, यिने पिज्‍यिङ्‍बातिवी तिवाला साङ गोमी दोके राङ क्‍यासुङ।
MAT 21:37 तेरी सिनाङ ज्‍युक्‍ला तीकी ‘तिवी ङे पुज्‍युङला याङ ताङ्‍देन किते यिन्‍दे।’ नोनी खोरो पुज्‍युङला ताङ्‍सुङ।
MAT 21:38 यिने ती पिज्‍यिङ्‍बातिवी ज्‍यिन्‍दाककी पुज्युङ वुङ्‍गुप थोङ्‍सिमा ‘दी याङ ज्‍यिन्‍दाककी अंश थोप छ्‍योवु यिन। दीला दाक्‍पु सेतुप, तमा दीला थोपुप अंश ति दाक्‍पु राङ लङ्‍गुप।’ सिनी खोप्‍राङ पर्ला सिक्‍यासुङ।
MAT 21:39 तुक सियी तिवी ती पुज्युङ तीला जिम्‍नी गुन्‍डुम शिङ फिला तेन ताङ्‍नी सेसुङ।
MAT 21:40 तुक क्‍यासिमा ती गुन्‍डुम शिङ ज्‍यिन्‍दाक ति वुङ्‍गुप पेला ती पिज्‍यिङ्‍बातिवाला काङ किताङ?”
MAT 21:41 तमा तिवी सिक्‍यासुङ, “तीकी ती पिज्‍यिङ्‍बा दुक्‍टातिवाला कशेन ठिम तङ्‍नी सेनी ती गुन्‍डुम शिङ ति गुन्‍डुम रुकुप पेला ज्‍यिन्‍दाकला थोपुप ति ज्‍यिन्‍दाकला राङ तेतुप यम्‍बा पिज्‍यिङ्‍बातिवाला तोङ्‍गिवी।”
MAT 21:42 येशूकी तिवाला सुङ्‍सुङ, “काङ ख्‍यिरा कोन्‍छ्‍योककी सुङला दुक सिनी टि वोतुप ति मारा? ‘चुका दो तीला खार चिकुपतिवी फेन मोथोवु सिनी क्‍युर ज्‍याक्‍वे, ती दो ति खाङ्‍बी सुरकी खक्‍छ्‍येवु दो च्‍युङ्‍सुङ। दी ति चोवो कोन्‍छ्‍योककी क्‍यावु यिन, तमा दाक्‍पी थोङ्‍दाङला हलेवु वे।’
MAT 21:43 तुक क्‍यानी ङ ख्‍यिराङला सिरिन। कोन्‍छ्‍योककी ग्‍येल्‍खाप ति ख्‍यिरा नेसुर ठोनी खोकी कला ङ्‍येन्‍दुप यम्‍बा मिरिककी मीतिवाला तेर्किवी।
MAT 21:44 तमा फेन मोथोवु सिनी क्‍युरुप ती दे खला लुम्‍बुपतिवा ति ठमा ठुमा डितो, तमा सी खला ती दो ति लुम्‍गिवे, ती दे वोक्‍ला लेपुप ति थल्‍दुकला डिवी।”
MAT 21:45 कोङ्‍यार छ्‍येतिवा ताङ फरिसीतिवी खोकी सुङ्‍गुप पे ति थोसिमा ती पे ति खोप्‍रे थोक्‍ला राङ शेतुप यिनोक सिनी हाक्‍कोनोक।
MAT 21:46 तुक क्‍यानी तिवी खोला जिम्‍बुप नो क्‍यासुङ। यिने तिवा मी माङ्‍छ्‍योकला ज्‍यिवा क्‍यासुङ, च्‍यिलासिसिन मी माङ्‍छ्‍योककी येशूला कोन्‍छ्‍योककी लुङ्‍तेम्‍बा यिन सिनी तेन्‍गिनोक।
MAT 22:1 येलुङ येशूकी दुका पेतिवा नेसुर तिवाला येन्‍देन नाङ्‍सुङ,
MAT 22:2 “कोन्‍छ्‍योककी ग्‍येल्‍खाप ति खोरो पुज्‍युङकी जेन्‍दीकी डेन टडिक क्‍यावु ग्‍येल्‍वु मिरा च्‍यिक दोके यिन।
MAT 22:3 तीकी केच्‍या क्‍यावु मीतिवाला डेनला फेप सिनी कतोङ्‍गुपला खोरो लावातिवा ताङ्‍सुङ, यिने केच्‍या क्‍यावु मीतिवा वुङ्‍गुप माङ्‍येन।
MAT 22:4 येलुङ तीकी यम्‍बा लावातिवाला दुक सिनी ताङ्‍सुङ, ‘केच्‍या क्‍यावु मीतिवाला गल्‍नी डेन टडिक क्‍या सिन वे, शा ग्‍यामु ग्‍यामु चोनी वे, तेरी साप समातिवा च्‍योम च्‍योम क्‍यानी वे, डेनला फेप सिनी सी।’
MAT 22:5 यिने केच्‍या क्‍यावु मीतिवी ती ताम्‍ङेला ङ्‍याम माक्‍यानी दाक दाक्‍पी लाकाला गाल्‍सुङ। च्‍यिक ति खोरो शिङ खला गाल्‍सुङ, च्‍यिक ति खोरो छोङ कितुपला गाल्‍सुङ।
MAT 22:6 तमा यम्‍बातिवी तीकी लावातिवाला जिम्‍नी किताङ मेलोवा क्‍यानी सेसुङ।
MAT 22:7 तुक क्‍यासिमा ग्‍येल्‍वु ति ङ्‍यिर्मु लानी मक्‍मीतिवा ताङ्‍नी खोरो लावातिवाला सेतुप मीतिवा से च्‍यिसुङ, तमा तिवी ग्‍येसा तीला मे ग्‍यक च्‍यिसुङ।
MAT 22:8 ती ज्‍युक्‍ला तीकी खोरो लावातिवाला ‘जेन्‍दी डेन याङ टडिक वे, यिने केच्‍या क्‍यावु मीतिवा ति डेन सापला वुङ छ्‍योवु मिन्‍दुक।
MAT 22:9 त ख्‍यिराङ ग्‍येलामकी गारी गुरीला गल्‍नी ते ठेतुपतिवा तेरीला जेन्‍दीकी डेनला फेप सिनी गोङ्‍बा शु।’ सिनी सिक्‍यासुङ।
MAT 22:10 तुक क्‍यानी लावातिवा ग्‍येलामला गल्‍नी ठेतुप मी ल्‍यामु मेलोवा तेरीला टि वासुङ। तमा जेन्‍दीकी खाङ्‍बाला मीतिवा क्‍येङ्‍सुङ।
MAT 22:11 तमा ग्‍येल्‍वु ति डेन्‍बुतिवाला ल्‍हापला खाङ्‍बी नाङ्‍ला वासिमा ते जेन्‍दीकी छ्‍या मापोवु मी मिरा च्‍यिक थोङ्‍सुङ।
MAT 22:12 तीला थोङ्‍सिमा ग्‍येल्‍वुकी ‘ओए, ख्‍युरुङ चुक क्‍यानी जेन्‍दीकी छ्‍या मापोवा क्‍यानी दे नाङ्‍ला वोवु?’ सिनी टिसुङ। यिन्‍सिनाङ ती मी तीकी काङ टिलेन तेर माथुप।
MAT 22:13 तमा ग्‍येल्‍वी खोरो लावातिवाला दुक सिनी योक कुसुङ, ‘दीकी लाक्‍पा काङ्‍बा टानी पाङ्‍ला नक्‍तोमीला क्‍युर, ते कशेन ङुयी सिरा स मुर्किवी।’
MAT 22:14 तुक क्‍यानी कोन्‍छ्‍योककी कताङ्‍गुपतिवा बङी वे, यिने खोकी ग्‍येल्‍खापला शुक छ्‍योवुला पेतुपतिवा ङ्‍युङ्‍मु वे।”
MAT 22:15 ती ज्‍युक्‍ला फरिसीतिवा गल्‍नी येशूकी सुङ्‍गुप ताम्‍ङेला चुक क्‍यानी क्‍येन तेरुप सिनी केवुल क्‍यासुङ।
MAT 22:16 तमा तिवी खोप्‍रे लोमातिवाला ग्‍येल्‍वु हेरोदकी छोक्‍पाकी मीतिवी मुला येशूकी चाला ताङ्‍नी खोला दुक सिनी टि च्‍यिसुङ, “गेकेन, गेकेन याङ टेङ्‍बु यिन। गेकेनकी मीतिवी थोक्‍ला कोन्‍छ्‍योककी नोवा काङ यिन सिरुपकी कोर्ला टेङ्‍बो लोप्‍किवी। तमा सुला साङ ज्‍यिवा मिकिवी, च्‍यिलासिसिन गेकेनकी मीतिवाला ल्‍हानी ती मीतिवा ति सु यिन सिनी ङ्‍याम मिकिवी।
MAT 22:17 तुक क्‍यानी ङ्‍यिराङला सी, कैसरला से तेतुप ति मोशाकी ठिमला गिवी ताङ मेङ्‍गिवी?”
MAT 22:18 यिने येशूकी तिवी नासाम दुक्‍टा वोतुप हाक्‍कोनी तिवाला “ओ, खोनक्‍पुतिवा, ख्‍यिराङ च्‍यिला ङला खोक्‍पा ल्‍हेवी?
MAT 22:19 से तेतुप शिकाकी डप्‍बु ति ङला छ्‍या तेन।” सिनी सुङ्‍सुङ। खोकी तुक सुङ्‍सिमा तिवी खोप्‍रे मुला वोतुप ङुलकी डप्‍बु च्‍यिक खोला खुर्नी वासुङ।
MAT 22:20 तमा येशूकी तिवाला “दीकी लोला वोतुप रिमुङ ताङ टिवु मिङ ति सी ति यिन?” सिनी टि नाङ्‍सुङ।
MAT 22:21 येशूकी तुक सुङ्‍सिमा तिवी “कैसरकी ति यिन।” सिनी सिक्‍यासुङ। तमा येशूकी तिवाला सुङ्‍सुङ, “तुकै यिन्‍सिन कैसरकी ति कैसरला ते, कोन्‍छ्‍योककी ति कोन्‍छ्‍योकला राङ पुल।”
MAT 22:22 ती ताम्‍ङे थोसिमा तिवा हलेवा लानी खोला क्‍युर ज्‍याक्‍नी गाल्‍सुङ।
MAT 22:23 ती छेर्मु शेप ने सेन्‍बु मलङ्‍गिवी सिरुप सदुकीतिवी नाङ ने ललाइ येशूकी चाला वानी खोला दुका टिवा यी क्‍यासुङ,
MAT 22:24 “गेकेन, मोशाकी ठिमला ‘मी ललाइ पेजा माक्‍येवा क्‍यानी शिसुङ सिसिन तीकी नुप तीकी अच्‍यी पेर्मीला जेन्‍दी क्‍यानी अच्‍युकी थोक्‍ला गिपा फेल ज्‍यि गोकिवी।’ सिक्‍या वे।
MAT 22:25 दासा यीला अच्‍युनुप पिन दिन नोक। उज्‍यु छ्‍ये तीकी जेन्‍दी क्‍यासिमा तिवाला आङ माक्‍येवा क्‍यानी शिसुङ। उज्‍यु शिसिमा तीकी नुप महिला तीकी खोरो छाम तीला जेन्‍दी क्‍यासुङ।
MAT 22:26 तमा महिला ति साङ आङा माक्‍येवा क्‍यानी शिसुङ। तुक राङ क्यानी सहिला ताङ पिन दिन्‍करकी जेन्‍दी क्‍यासिनाङ आङा माक्‍येनी शिसुङ।
MAT 22:27 ती ज्‍युक्‍ला ती छाम तिङ शिसुङ।
MAT 22:28 तुकै यिन्‍सिन शेप ने सेन्‍बु लङ्‍गुप पेला ती पुम्‍पेजा ति पिन दिनकी पर्ला सी पेर्मी च्‍युङ्‍गिवी? च्‍यिलासिसिन ती पिन दिन्‍करकी तीला जेन्‍दी क्‍यावु यिन।”
MAT 22:29 तमा येशूकी तिवाला सुङ्‍सुङ, “ख्‍यिरा सिक्‍यावु ति टेके मिन। ख्‍यिरा कोन्‍छ्‍योककी सुङ साङ छ्‍या मे, खोकी ओङ साङ हाक्‍माकोवु तप्‍की तुका नासाम तङ्‍गुप यिन।
MAT 22:30 शेप ने सेन्‍बु लङ्‍गुप पेला मीतिवी जेन्‍दी मिकिवी, यिने देवाच्‍येनकी लेन क्‍योलुप थुतिवा दोके च्‍युङ्‍गिवी।
MAT 22:31 यिने शेप ने सेन्‍बु लङ्‍गुपकी कोर्ला कोन्‍छ्‍योककी ख्‍यिराङला सुङ्‍गुप ति ख्‍यिरा मारा?
MAT 22:32 कोन्‍छ्‍योककी ‘ङ अब्राहामकी कोन्‍छ्‍योक ताङ इसहाककी कोन्‍छ्‍योक ताङ याकूबकी कोन्‍छ्‍योक यिन।’ सिनी सुङ्‍सुङ। कोन्‍छ्‍योक ति शेप मीकी कोन्‍छ्‍योक मिन, यिने सेन्‍बु वोतुप मीकी कोन्‍छ्‍योक यिन।”
MAT 22:33 येशूकी तुक सुङ्‍गुप थोसिमा ते वोतुप मी माङ्‍छ्‍योक खोकी येन्‍देनला हलेवा क्‍यासुङ।
MAT 22:34 येशूकी सदुकीतिवाला खरक्‍पा दे च्‍यितुप थोसिमा फरिसीतिवा येशूकी चाला मुला राङ जोम्‍सुङ।
MAT 22:35 तमा तिवी पर्ला यहूदी छ्‍योकी गेकेन यीकी येशूला खोक्‍पा ल्‍हापला दुक सिनी टिसुङ,
MAT 22:36 “गेकेन, कोन्‍छ्‍योककी नङ्‍गुप ठिमकी नाङ्‍ला तेरी सिनाङ क छ्‍ये ति चुका ति यिनाङ?”
MAT 22:37 तमा खोकी तीला सुङ्‍सुङ, “‘ख्‍योरो तेरी सेमगी दिङ ने, ख्‍योरो तेरी मिजी ने, तमा ख्‍योरो तेरी नासाम ने ख्‍योरो चोवो कोन्‍छ्‍योकला ङ्‍यिङ्‍ज्‍ये की।’
MAT 22:38 दी ति तेरी सिनाङ खक्‍छ्‍येवु ताङ थल्‍माकी क यिन।
MAT 22:39 तमा क ङ्‍यिवा साङ ती दोके वे, ‘ख्‍योरो युल्‍वाला रङला दोके ङ्‍यिङ्‍ज्‍ये की।’
MAT 22:40 तेरी ठिम ताङ कोन्‍छ्‍योककी लुङ्‍तेम्‍बातिवी येन्‍देन ति दी क ङ्‍यिवु नाङ्‍ला ख्‍येल्‍गिवी।”
MAT 22:41 फरिसीतिवा ते राङ जोम वोतुप पेला येशूकी तिवाला दुक सिनी टिवा यी टि नाङ्‍सुङ,
MAT 22:42 “ख्‍यिराङ ख्रीष्‍टकी कोर्ला काङ नासाम तोङ्‍गिवी? खो सी गिपा यिन?” तमा तिवी “खो ग्‍येल्‍वु दाऊदकी गिपा यिन।” सिनी सिक्‍यासुङ।
MAT 22:43 येलुङ येशूकी तिवाला सुङ्‍सुङ, “दाऊद ति कोन्‍छ्‍योककी थु चाङ्‍माकी क्‍येङ्‍नी खोला चोवो सिनी दुक सुङ्‍सुङ,
MAT 22:44 ‘चोवो कोन्‍छ्‍योककी ङे चोवोला ख्‍योरो डतिवाला ङे काङ्‍बी वोक्‍ला मालेपा सेक्‍ला ख्‍युरुङ ङे लाक्‍पा यावी थाकाला दे सिनी सुङ्‍सुङ।’
MAT 22:45 ग्‍येल्‍वु दाऊदकी ख्रीष्‍टला चोवो सिवी सिसिन चुक क्‍यानी ख्रीष्‍ट ति दाऊदकी गिपा च्‍युङ्‍गिवी रो?”
MAT 22:46 येशूकी तुक सुङ्‍सिमा सी साङ खोला ताम्‍ङे छिक च्‍यिक साङ लप माथुप, तमा ती छेर्मु नेज्‍युनी सी साङ खोला टिवा ग्‍यकुप ङाडेङ साङ माक्या।
MAT 23:1 तमा येशूकी खोरो लोमातिवा ताङ मी माङ्‍छ्‍योकला दुक सुङ्‍सुङ,
MAT 23:2 “यहूदी छ्‍योकी गेकेनतिवा ताङ फरिसीतिवी मोशाकी ठिम लोपुप ओङ वे।
MAT 23:3 तुक क्‍यानी तिवी ख्‍यिराङला सिक्‍यावु ठिम ति तेरी ङ्‍येन्‍नी की। यिने तिवी किताङ नालु दोके ति माकी, च्‍यिलासिसिन तिवी मी यम्‍बाला लापुप दोके खोप्‍राङ ति मिकिवी।
MAT 23:4 तिवी खुरु च्‍येन्‍दी टानी मीतिवी ग्‍यप्‍ला ग्‍येल्गिवी, यिने खोप्‍राङ ति ती खुरु खुरुपला थो साङ मोतोङ्‍गिवी।
MAT 23:5 तिवी क्‍यावु तेरी लाकातिवा ति मीतिवाला छ्‍या देन्‍दुपला किवी। तिवा कोन्‍छ्‍योककी ठिमतिवा टिवु ति राकी नाङ्‍ला तुम्‍नी ग्‍येर्पु ग्‍येर्पु जोनी टली लोला ताङ लाक्‍पी लोला दोकिवी। तमा फिला कोन्‍दुप मज्‍यी लोला पोजर रिङ्‍बु रिङ्‍बु देन्‍गिवी।
MAT 23:6 तिवा डेनला टाल जिम्‍नी देतुप ताङ यहूदी छ्‍योखाङला टाल जिम्‍नी देतुपला गा किवी।
MAT 23:7 हाला मीतिवी खोप्‍राङला ताङ्‍देन क्‍यानी छ्‍याक पुलुप ताङ मीतिवी खोप्‍राङला गेकेन सिनी सिक्‍यावु ति तिवा गा किवी।
MAT 23:8 यिने ख्‍यिराङला सी साङ गेकेन सिनी सि माज्‍यी। च्‍यिलासिसिन ख्‍यिरा गेकेन ति च्‍यिक राङ वे, ख्‍यिराङ ति तेरी अच्‍युनुपतिवा यिन।
MAT 23:9 तमा ख्‍यिराङ दी जम्‍बुलिङला सुला साङ पपा सिनी मासिर, च्‍यिलासिसिन ख्‍यिरा पपा ति देवाच्‍येनला ज्‍यु वोतुप कोन्‍छ्‍योक च्‍यिक राङ यिन।
MAT 23:10 येलुङ सी साङ ख्‍यिराङला ज्‍यिन्‍दाक सिनी सि माज्‍यी, च्‍यिलासिसिन ख्‍यिरा ज्‍यिन्‍दाक ति कोन्‍छ्‍योककी तङ्‍गुप ख्रीष्‍ट यिन।
MAT 23:11 ख्‍यिरा पर्ला तेरी सिनाङ छ्‍ये वोतुप तीकी ख्‍यिराङला शब्‍ज्‍यी कि गोकिवी।
MAT 23:12 सी खुरुङला छ्‍ये यिन सिनी नो किवे, ती ति मो बेपुप डिवी। सी खुरुङला मो बेप्‍किवे, ती ति छ्‍ये डिवी।”
MAT 23:13 “ख्‍यिराङ यहूदी छ्‍योकी गेकेनतिवा ताङ फरिसीतिवाला मोताप सुकुप यिनो, ख्‍यिराङ खोनक्‍पुतिवा! च्‍यिलासिसिन ख्‍यिराङ ति कोन्‍छ्‍योककी ग्‍येल्‍खापकी गोला गोल्‍ज्‍याक ग्‍यम वे। तमा खुरुङ साङ तीकी नाङ्‍ला मुशुकिवी, शुकुप छोलुप मीतिवाला साङ शुक मिज्‍यिवी।
MAT 23:14 ख्‍यिराङ यहूदी छ्‍योकी गेकेनतिवा ताङ फरिसीतिवाला मोताप सुकुप यिनो, ख्‍यिराङ खोनक्‍पुतिवा! ख्‍यिराङ मीतिवाला छ्‍या देन्‍दुपला मोपोर रिङ्‍बु रिङ्‍बु किवी। तमा ख्‍यिराङ युक्‍सिमतिवी खाङ्‍बा ठोकिवी। तुक क्‍यानी ख्‍यिराङला छासे पर्च्या फोकिवी।
MAT 23:15 ख्‍यिराङ यहूदी छ्‍योकी गेकेनतिवा ताङ फरिसीतिवाला मोताप सुकुप यिनो! ख्‍यिराङ खोनक्‍पुतिवा! च्‍यिलासिसिन ख्‍यिराङ मी मिरा च्‍यिकला यहूदी फयानला शुक ज्‍यितुपला ग्‍येम्‍छो ताङ दासा तेरीला छल्‍नी युकिवी, तमा मिरा च्‍यिकला ङ्‍येसिमा तीला खुरुङ सिनाङ दोम्‍बा ङ्‍यी मङ ङ्‍येलाला डो छ्‍योवु मेलोक्‍पा जेवी।
MAT 23:16 ख्‍यिराङ मिक मोथोङ्‍गुप गोमा कितुपतिवा! ख्‍यिराङला मोताप सुकुप यिनो! ख्‍यिरा ‘सी कोन्‍छ्‍योककी ल्‍हङाङला न क्‍यल्‍सिन काङ मिकिवी, यिने कोन्‍छ्‍योककी ल्‍हङाङकी सेरला न क्‍यल्‍सिन ती ति तेन्‍तेन कि गोकिवी।’ सिनी मीतिवाला लोप्‍किवी।
MAT 23:17 ओ अम्‍बारङ्‍शिङ मिक शर्वातिवा! चुका ति मङ खक्‍छ्‍येवु यिन? सेर खक्‍छ्‍येवु यिनाङ की, सेरला चाङ्‍मा जोप कोन्‍छ्‍योककी ल्‍हङाङ ति खक्‍छ्‍येवु यिन?
MAT 23:18 येलुङ ख्‍यिरा ‘सी छोटीला न क्‍यल्‍सिन काङ मिकिवी, यिने ती छोटीकी खला पुलुप बुल्‍वाला न क्‍यल्‍सिन ती ति तेन्‍तेन कि गोकिवी।’ सिनी मीतिवाला लोप्‍किवी।
MAT 23:19 ओ मिक शर्वातिवा! चुका ति मङ खक्‍छ्‍येवु यिन? बुल्‍वा खक्‍छ्‍येवु यिनाङ की, बुल्‍वाला चाङ्‍मा जोप छोटी ति खक्‍छ्‍येवु यिन?
MAT 23:20 तुक क्‍यानी छोटीला न क्‍योलुप तीकी ती छोटी ताङ तीकी खला वोतुप तेरीला न क्‍यलुप यिन।
MAT 23:21 तमा कोन्‍छ्‍योककी ल्‍हङाङला न क्‍योलुप तीकी ती ल्‍हङाङ ताङ तीकी नाङ्‍ला ज्‍यु वोतुप कोन्‍छ्‍योकला न क्‍यलुप यिन।
MAT 23:22 तमा देवाच्‍येनला न क्‍योलुप तीकी कोन्‍छ्‍योककी ग्‍येल्‍ठिक ताङ ती खला ज्‍यु वोतुप तीला न क्‍यलुप यिन।
MAT 23:23 ख्‍यिराङ यहूदी छ्‍योकी गेकेनतिवा ताङ फरिसीतिवाला मोताप सुकुप यिनो! ख्‍यिराङ खोनक्‍पुतिवा! ख्‍यिराङ मेन्‍डोक ताङ च्‍या छेर्माङ ताङ जीराकी दशांश ति कोन्‍छ्‍योकला बुल्‍गिवी, यिने ठिम टेङ्‍बु ताङ च्‍यम्‍बा ताङ तेपा दोके कोन्छ्‍योककी मोशाला नङ्‍गुप मङ खक्‍छ्‍येवु ठिमला ति ङ्‍याम मिकिवी। ख्‍यिरा कोन्‍छ्‍योकला बुल गोवु दशांश साङ ङ्‍याम क्‍यानी बुल गोकिवी, तमा ती खक्‍छ्‍येवु ताम्‍ङेतिवा साङ कि राङ गोकिवी।
MAT 23:24 ओ मिक मोथोङ्‍गुप गोमा कितुपतिवा! ख्‍यिराङ ति युप्‍राङ टिक्‍पे ति थेन्‍गिवी, यिने सेम्‍ज्‍येन वोङ्‍मुला ति मिता तोङ्‍गिवी।
MAT 23:25 ख्‍यिराङ यहूदी छ्‍योकी गेकेनतिवा ताङ फरिसीतिवाला मोताप सुकुप यिनो! ख्‍यिराङ खोनक्‍पुतिवा! ख्‍यिरा देर्माङ ताङ कोरी फिला ति शिनी कर्मु जेवी, यिने ख्‍यिरा सेमगी दिङ्‍ला ति देर्पा ताङ खुरुङला तिराङ च्‍युङ्‍शी सिरुप नासाम क्‍येङ्‍गिवी।
MAT 23:26 ओ फरिसी मिक शर्वातिवा! तोङ्‍ला कोरा ताङ देर्माङकी नाङ्‍ला ल्‍यामु शी, तुक क्‍यासिन फिला साङ चेङ्‍गा डिवी।
MAT 23:27 ख्‍यिराङ यहूदी छ्‍योकी गेकेनतिवा ताङ फरिसीतिवाला मोताप सुकुप यिनो! ख्‍यिराङ खोनक्‍पुतिवा! च्‍यिलासिसिन ख्‍यिराङ ति पक कर्मु कुवु शेप मीला ज्‍योकुप टककी फुक दोके यिन। ती ति फिला ल्‍हासिन ल्‍यामु थोङ्‍गिवी, यिने तीकी नाङ्‍ला ति शेप मीकी रुकक ताङ तेरी मेचेङ्‍गाकी क्‍येङ्‍गुप गिवी।
MAT 23:28 तुक राङ क्‍यानी ख्‍यिराङ साङ फिला ल्‍हासिन मीतिवी मिङ्‍गाला मी टेङ्‍बु दोके थोङ्‍गिवी, यिने ख्‍यिरा सेमला ति खोनक्‍पु ताङ नासाम दुक्‍टाकी क्‍येङ वे।
MAT 23:29 ख्‍यिराङ यहूदी छ्‍योकी गेकेनतिवा ताङ फरिसीतिवाला मोताप सुकुप यिनो! ख्‍यिराङ खोनक्‍पुतिवा! ख्‍यिराङ कोन्‍छ्‍योककी लुङ्‍तेम्‍बातिवी थोक्‍ला शेप मीला ज्‍योकुप टककी फुकतिवा जेवी। कोन्‍छ्‍योककी थोङ्‍दाङला टेङ्‍बु वोतुपतिवी शेप मीला ज्‍योकुप टककी फुकतिवा ल्‍यामु जेवी।
MAT 23:30 तमा ख्‍यिरा ‘दाक्‍पी पगावा हङ्‍गावाकी ङोला दाक्‍पु वोतुप यिन्‍सियाङ तिवी क्‍यावु कोन्‍छ्‍योककी लुङ्‍तेम्‍बातिवाला सेतुप लाका तिवी मुला राङ मिकिवुजा।’ सिनी सिवी।
MAT 23:31 तुक सिनी ख्‍यिराङ कोन्‍छ्‍योककी लुङ्‍तेम्‍बातिवाला सेतुपतिवी गिपा यिन सिरुप पङ्‍बु ति ख्‍यिरा राङ तेर्किवी।
MAT 23:32 तुकै यिन्‍सिन ख्‍यिरा हङ्‍गावातिवी सिन्‍दा माक्‍यावु लाकातिवा ख्‍यिरा तेरी सिन्‍दा की!
MAT 23:33 ओ रुल ताङ रुल कुपेङकी च्‍यप्‍रुकतिवा! ख्‍यिराङ चुक क्‍यानी ङ्‍येलाकी छ्‍येर्पा ने टो थुप्‍किवी?
MAT 23:34 तुक क्‍यानी ङ ख्‍यिरा पर्ला कोन्‍छ्‍योककी लुङ्‍तेम्‍बातिवा ताङ रिक्‍पा वोतुपतिवा ताङ यहूदी छ्‍योकी गेकेनतिवाला तोङ्‍यिनो। तमा ख्‍यिरा तिवी पर्ला ललाइला ति सेकिवी, ललाइला ति ग्‍यङ्‍शिङला ग्‍येल्‍गिवी, ललाइला ति यहूदी छ्‍योखाङ नाङ्‍ला तल्‍ज्‍येक ग्‍यकिवी, तमा तिवाला ग्‍येसा ग्‍येसाला तिङ्‍यानी छेटाङ तेर्किवी।
MAT 23:35 तुक क्‍यानी क्‍येन मेतुप हाबिलकी ठक नेज्‍युनी कोन्‍छ्‍योककी ल्‍हङाङ ताङ चाङ्‍मा वोतुप छोठीकी पर्ला सेतुप बेरेक्‍याहकी पुज्‍युङ जकरियाकी ठक सेक ताङ जम्‍बुलिङला सेतुप कोन्‍छ्‍योककी थोङ्‍दाङला टेङ्‍बु वोतुपतिवी तेरीकी ठक ति ख्‍यिरा खला ख्‍येल वोतो।
MAT 23:36 वुतुङ के ङ ख्‍यिराङला टेङ्‍बो सिरिन, दी तेरी ताम्‍ङेकी पर्च्या ति दी गिपाकी खला ख्‍येल्‍गितो।”
MAT 23:37 “ओ यरूशलेमकी मीतिवा! ख्‍यिराङ ख्‍यिरा ते तङ्‍गुप कोन्‍छ्‍योककी लुङ्‍तेम्‍बातिवाला सेतुप ताङ दो बेप्‍किवी। च्‍यमुङकी खोरो च्‍यप्‍रुकतिवाला पुशोक वोक्‍ला रुकुप दोके ङे थेङ्‍मा अलायी ख्‍यिराङला ङे चाला रुकुप नो क्‍यायिन, यिने ख्‍यिरा तुक कितुपला माङ्‍येन।
MAT 23:38 तुक क्‍यानी ल्‍होसा, कोन्‍छ्‍योककी ख्‍यिरा ग्‍येसा क्‍युर ज्‍याक्‍नी ती ति तोङ्‍बा डिवितो।
MAT 23:39 ङ ख्‍यिराङला सिरिन, ख्‍यिरा ङला ‘चोवो कोन्‍छ्‍योककी मिङला फेपुप ति मोलाम वोतुप यिनो।’ सिनी सि माक्यावा सेक्‍ला ख्‍यिरा ङला येलुङ मोथोङ्‍गिवी।”
MAT 24:1 ती ज्‍युक्‍ला येशू यहूदी ल्‍हङाङ नेमा थेन्‍नी फेपिन कितुप पेला खोकी लोमातिवा खोकी चिप्‍ला वानी ती ल्‍हङाङकी खाङ्‍बातिवा छासे ल्‍यामु वे सिनी खोला छ्‍या तेन्‍सुङ।
MAT 24:2 यिने येशूकी तिवाला सुङ्‍सुङ, “तन्‍दा ख्‍यिरा दी तेरी थोङ्‍सुङ? ङ ख्‍यिराङला टेङ्‍बो सिरिन, देकी दोतिवा च्‍यिक साङ यम्‍बा दोकी खला मालुवा क्‍यानी तेरी र्‍होम्‍गिवी।”
MAT 24:3 तेसुर येशू जैतुन पम्‍दोकला ज्‍यु वोतुप पेला लोमातिवा खरक्‍पा सोक सिरा खोकी चाला वानी, “ओ चोवो, ङि्‍यराङला सुङ्‍नी, ती ताम्‍ङे नम पेला च्‍युङ्‍गिवी? तमा चोवो फेवु तुजे ताङ जम्‍बुलिङकी तिङ्‍मी तुजेला चुका ततिवा च्‍युङ्‍गिवी?” सिनी खोला टिसुङ।
MAT 24:4 तमा येशूकी तिवाला सुङ्‍सुङ, “च्‍याङ्‍से क्‍यानी देता, सी साङ ख्‍यिराङला मुलुशी।
MAT 24:5 च्‍यिलासिसिन मी बङीकी ङे मिङ लानी ‘ङ ख्रीष्‍ट यिन।’ सिनी मी बङीला लुकितो।
MAT 24:6 तमा ख्‍यिरा मक ग्‍यकुप ताम्‍ङे ताङ मक ग्‍यकिवी सिरुप ताम्‍ङे थोकितो। यिने ख्‍यिराङ ति यर्मिन मर्मिन मोडोवुला च्‍याङ्‍से क्‍यानी देता। च्‍यिलासिसिन दी तेरी ताम्‍ङेतिवा वुङ राङ गोकिवी, यिने तन्‍दा राङ जम्‍बुलिङ तेरी ना डोप तिङ्‍मी तुजे ति मिन।
MAT 24:7 ग्‍येल्‍खाप ग्‍येल्‍खापकी तेन्‍दोकला ताङ मिरिक मिरिककी तेन्‍दोकला लङ्‍गितो, तमा दासा दासाला ङ्‍यिमा मर्वु शरुप ताङ सयीतिवा ग्‍यकितो।
MAT 24:8 यिने दिवा ति दुक्‍पाकी थल्‍मा तिराङ यिन।
MAT 24:9 ती पेला मीतिवी ख्‍यिराङला जिम्‍नी छेटाङ तेरुपतिवी लकला चेक तेनी सेकितो। तमा ख्‍यिरा ङला तेपा क्‍यावु तप्‍की तेरी मिरिककी मीतिवी ख्‍यिराङला ङ्‍यिङ्‍मर किवितो।
MAT 24:10 तमा मीतिवा बङीकी ङला तेपा कितुप क्‍युर्नी ज्‍योकितो। तिवा च्‍यिककी च्‍यिकला क्‍येन तेरुप ताङ ङ्‍यिङ्‍मर कितो।
MAT 24:11 तमा लुङ्‍तेम्‍बा मेटेङ्‍बुतिवा बङी वानी मीतिवा बङीला लुकितो।
MAT 24:12 दुक्‍टा कितुप मीतिवा मङ बङी गलुप तप्‍की मीतिवा बङीकी ङि्‍यङ्‍ज्‍ये अला मिकिवी।
MAT 24:13 यिने चो दुक्‍पा ख्‍येल्‍सिनाङ ज्‍युक्‍ला सेक डेकला देतुप तीला कोन्‍छ्‍योककी र्‍होकितो।
MAT 24:14 तमा दी कोन्‍छ्‍योककी ग्‍येल्‍खापकी लेन ल्‍यामु ति तेरी जम्‍बुलिङला ख्‍याप्‍टाक क्‍यानी तेरी मिरिककी मीतिवाला पङ्‍बु तेर्किवी। ती ज्‍युक्‍ला दी जम्‍बुलिङकी तिङ्‍मी तुजे गिवी।”
MAT 24:15 “तुक क्‍यानी ख्‍यिरा कोन्‍छ्‍योककी लुङ्‍तेम्‍बा दानिएलकी सिक्‍यावु दोके क्‍युक्‍टो लङ्‍गुप च्‍यालक ति चाङ्‍मा वोतुप कोन्‍छ्‍योककी ल्‍हङाङला लानी वोतुप थोङ्‍सिन (लोपुप तीकी दीकी तेन्‍दोक हाक्‍कोशी)
MAT 24:16 ती पेला यहूदियाला वोतुपतिवा री नेवा टोनी डोशी।
MAT 24:17 खाङ्‍बी खाते खला वोतुपतिवा खाङ्‍बी नाङ्‍ला वोतुप समा च्‍यालक थेन्‍दुपला मर मपप्‍शी।
MAT 24:18 शिङ खला वोतुपतिवा खोरो खयिटो लङ्‍गुपला लोक्‍नी मोडोशी।
MAT 24:19 ती तुजेला जु च्‍येन्‍दी वोतुप पुम्‍पेजातिवा ताङ आङाला नुम तेरुप आमातिवाला मङ कले ख्‍येल्‍गिवी।
MAT 24:20 ख्‍यिरा टो डोप तुजे ति गुन्‍बी ल ताङ ङासोप ङ्‍यिमाला मेख्‍येल्‍शी सिनी मोपोर की।
MAT 24:21 च्‍यिलासिसिन ती पेला कशेन छेटाङ ग्‍येर्पु ख्‍येल्‍गितो। तुका छेटाङ याङ कोन्‍छ्‍योककी जम्‍बुलिङ थल्‍मा ज्‍येङ्‍गुप पे नेज्‍युन तन्‍दा सेक नाम्‍साङ माच्‍युङ वे, तिङ्‍ला साङ मेङ्‍गिवी।
MAT 24:22 कोन्‍छ्‍योककी ती छेटाङकी तुजेतिवा ङ्‍युङ्‍मु माजोवु यिन्‍सिन सु साङ सेन्बु लु मुथुपी। यिने खोरे पेतुप मीतिवी थोक्‍ला खोकी ती तुजेतिवा ङ्‍युङ्‍मु जेवी।
MAT 24:23 ती पेला सी ख्‍यिराङला ‘ल्हो ताङ, ख्रीष्‍ट ति दे वे।’ याङ्‍ना ‘खो ते वे।’ सिक्‍यासिन ख्‍यिराङ ती ताम्‍ङेला तेपा माकी।
MAT 24:24 च्‍यिलासिसिन ख्रीष्‍ट जुमातिवा ताङ लुङ्‍तेम्‍बा मेटेङ्‍बुतिवा वानी त ग्‍येर्पु ताङ हलेवु लाकातिवा छ्‍या देनिन सिरा कोन्‍छ्‍योककी पेतुपतिवाला साङ अछ्‍योता सेक लुकिवी।
MAT 24:25 ङ्‍येना, ङ दी ताम्‍ङे ति गोमाला के ख्‍यिराङला सिरिन वे।
MAT 24:26 तुक क्‍यानी तिवी ख्‍यिराङला ‘ल्‍होसा, ख्रीष्‍ट याङ दासा पाङ्‍थेरीला वे।’ सिक्‍यासिनाङ ख्‍यिराङ ते माडो। याङ्‍ना तिवी ‘खो खाङ्‍बी नाङ्‍ला राङ वे।’ सिक्‍यासिनाङ ती ताम्‍ङेला तेपा माकी।
MAT 24:27 च्‍यिलासिसिन शरकी थाकाला चिलाम ग्‍यप्‍सिन नुपकी थाकाला सेक ठछ्‍येली थोङ्‍गुप दोके मी पुज्‍युङ वुङ्‍गुप साङ तुकै राङ डितो।
MAT 24:28 तमा कनी शेप सेम्‍ज्‍येन नोके, ते गिक्‍तातिवा जोम्‍गिवी।”
MAT 24:29 “ती छेटाङ वालुङ्‍मेताला ङ्‍यिमा डिप्‍किवी, उलाकी वो माग्‍यकिवी, कर्मातिवा नाम नेवा लुम्‍गिवी, तमा नामला वोतुपतिवा तेरी योकिवी।
MAT 24:30 ती पेला राङ ङ मी पुज्‍युङ वुङ्‍गुप त ति नामला छ्‍या देन्‍गिवी, तमा जम्‍बुलिङकी तेरी मिरिककी मीतिवा ज्‍यिवा लानी ङुप्‍राङ कियी सिरा ङ मी पुज्‍युङ ओङ ताङ छासे मोवा थोप्‍नी मुक्‍पी खला वुङ्‍गुप ति थोङ्‍गिवी।
MAT 24:31 ती पेला ङ मी पुज्‍युङकी ग्‍येलिङ पुतुप वोरु ताङ मुला ङे देवाच्‍येनकी लेन क्‍योलुप थुतिवा तोङ्‍गिवी। तमा तिवी जम्‍बुलिङ तेरी नेमा ङे पेतुप मीतिवाला जोम ज्‍यिकिवी।”
MAT 24:32 “अन्‍जीरकी दोङ्‍बुला ल्‍हानी येन्‍देन च्‍यिक लोप। तीकी येल्‍कातिवा च्‍योक च्‍योक गल्‍नी ती नेमा ज्‍योक थेन्‍सिन येर्वु थेन्‍दुप छाल्‍नोक सिनी ख्‍यिरा हाक्‍कोकिवी।
MAT 24:33 तुक राङ क्‍यानी ख्‍यिरा दी तेरी ताम्‍ङेतिवा च्‍युङ्‍गुप थोङ्‍सिमा ङ मी पुज्‍युङ छासे चिप्‍ला राङ लेप्‍नी वे सिरुप ति हाक्‍कोवा की।
MAT 24:34 वुतुङ के ङ ख्‍यिराङला सिरिन, दी तेरी ताम्‍ङेतिवा माच्‍युङ्‍वा सेक्‍ला दी गिपा ना मोडोवी।
MAT 24:35 स ताङ नाम ति तोर्नी डिवी, यिने ङे सिक्‍यावु ताम्‍ङेतिवा ति नाम्‍साङ तोर्नी मोडोवी।”
MAT 24:36 “यिने ती ङ्‍यिमा ताङ तुजे ति नम गिते सिनी सुला साङ छ्‍या मे, देवाच्‍येनकी लेन क्‍योलुप थुतिवाला साङ छ्‍या मे, पुज्‍युङला साङ छ्‍या मे, ती ति पपाला तिराङ छ्‍या वे।
MAT 24:37 तमा नोआकी ङोला चुकै च्‍युङ वे, ङ मी पुज्‍युङ वुङ्‍गुप तुजेला साङ तुकै राङ च्‍युङ्‍गितो।
MAT 24:38 तोजो पेला छ्‍यर्वा ग्‍येर्पु ग्‍यकुप सिनाङ गोमाला नोआ टी नाङ्‍ला शुकुप तुजे सेक मीतिवा साप ताङ थुङ्‍गुप ताङ जेन्‍दी कियी वोतुप्‍जा।
MAT 24:39 तमा छ्‍यर्वा ग्‍येर्पु ग्‍यप्‍नी तेरीला ज्‍यानी मागल्‍वा सेक्‍ला मीतिवाला काङ च्‍युङ्‍गिवी सिनी काङ साङ छ्‍या मिन्‍दुक। तमा ङ मी पुज्‍युङ वुङ्‍गुप तुजेला साङ तुकै राङ डितो।
MAT 24:40 ती पेला शिङ खला वोतुप मिरा ङ्‍यीकी नाङ्‍ला मिरा च्‍यिक ति टिनी डिवी, तमा मिरा च्‍यिक ति ते राङ क्‍युर्नी ज्‍योकिवी।
MAT 24:41 पुम्‍पेजा मिरा ङ्‍यी मुला राङ फे तकिन वोतुप पेला मिरा च्‍यिक ति टिनी डिवी, तमा मिरा च्‍यिक ति ते राङ क्‍युर्नी ज्‍योकिवी।
MAT 24:42 ती तप्‍की च्‍याङ्‍से देता, च्‍यिलासिसिन ख्‍यिरा चोवो चुका छेर्मु फेप्‍किवी सिरुप ति ख्‍यिराङला छ्‍या मे।
MAT 24:43 दी ताम्‍ङे हाक्‍कोवा किसा। खाङ्‍बी ज्‍यिन्‍दाकला कुर्मेन नुपला छ्‍युजी चोला गिवी सिरुप छ्‍या वोसिन तीकी ङ्‍यी मालोका क्‍यानी ती कुर्मेनला खोरो खाङ्‍बाला शुक मिज्‍यिवुजा।
MAT 24:44 तुक क्‍यानी ख्‍यिराङ टडिक क्‍यानी देता, च्‍यिलासिसिन ङ मी पुज्‍युङ ति ख्‍यिरा नासाम मातङ्‍गुप तुजेला वुङ्‍गितो।”
MAT 24:45 “सु खोङ्‍तेर्मु ताङ रिक्‍पा वोतुप लावा वोज्‍यिवी? ज्‍यिन्‍दाककी तीला खोरो खाङ्‍बी लावातिवाला टेके तुजेला समा तेरुपला चेक तेसिन तीकी चुक कि गोकिवी?
MAT 24:46 ज्‍यिन्‍दाक लोक्‍नी वुङ्‍गुप पेला तीकी ज्‍यिन्‍दाककी लो तेन्‍दुप दोके कियी वोतुप ठेसिन ती लावाला ल्‍यामु गिवी।
MAT 24:47 वुतुङ के ङ ख्‍यिराङला सिरिन, ज्‍यिन्‍दाक तीकी खोरो तेरी टोङ्‍बा ति ती लावाला लो तेन्‍नी चेक तेकिवी।
MAT 24:48 यिने दोजो ती लावा ति मेलोवा वे, तमा तीकी खोरो सेमला ‘ङे ज्‍यिन्‍दाक याङ फिमु गिते।’ सिनी नासाम तोङ्‍यिन सिरा
MAT 24:49 खोरो दाल्‍जा लावातिवाला दुङ्‍गुप ताङ छ्‍याङ्‍गेलेतिवी मुला छ्‍याङ थुनी देसिन
MAT 24:50 ती लावाकी नासाम मातङ्‍गुप ङ्‍यिमा ताङ छ्‍या मेतुप तुजेला ज्‍यिन्‍दाक लोक्‍नी गिवी।
MAT 24:51 तमा ती ज्‍यिन्‍दाककी ती लावा तीला छेटाङ बिन्‍नी खोनक्‍पुतिवा डो गोवु ङ्‍येलाला क्‍युर्किवी, तमा ते ती ति ङुप्‍राङ कियी सिरा स मुर्किवी।”
MAT 25:1 येलुङ येशूकी सुङ्‍सुङ, “देवाच्‍येनकी ग्‍येल्‍खाप ति दाक दाक्‍पी लकला दिप्‍ली खुर्नी माक्‍पा ठे गलुप जेन्‍दी माक्‍यावु पुम्‍पेजा मिरा च्‍यिथम्‍बाकी पे दोके यिन।
MAT 25:2 तिवी पर्ला मिरा ङ ति रिक्‍पा मेतुप नोक, मिरा ङ ति रिक्‍पा वोतुप नोक।
MAT 25:3 ती रिक्‍पा मेतुपतिवी दिप्‍ली ति खुर्सिनाङ नुम माखुर्नोक।
MAT 25:4 यिने रिक्‍पा वोतुपतिवी दिप्‍ली मुला राङ नुम खुर्नोक।
MAT 25:5 तमा माक्‍पा फिमु वावु तप्‍की तिवा तेरी ङि्‍यसोक ग्‍यप्‍नी ङ्‍यी गाल्‍नोक।
MAT 25:6 तमा नुप फेकाला ‘ल्‍होसा, माक्‍पा वासुङ। खोला ठेतुपला ख्‍यिराङ पाङ्‍ला शोक!’ सिरुप वोर यी ग्‍यप्‍सुङ।
MAT 25:7 ती वोर थोसिमा तिवा तेरी ङ्‍यी छेनी खोप्‍राङ लोला खुरुप दिप्‍लीतिवा नाप टुलुप छाल्‍सुङ।
MAT 25:8 ती पेला रिक्‍पा मेतुपतिवी रिक्‍पा वोतुपतिवाला ‘ख्‍यिरा नुम ति ङ्‍यिराङला च्‍येयी नङ्‍नी, च्‍यिलासिसिन ङ्‍यिरा दिप्‍ली याङ शेप छाल्‍सुङ।’ सिनी सिक्‍यासुङ।
MAT 25:9 यिने रिक्‍पा वोतुपतिवी ‘मेवी, तुक क्‍यासिन ख्‍यिराङ ताङ ङ्‍यिराङ तेरीला मलङ्‍गिवी। बोरु छोङ्‍खाङला गल्‍नी ख्‍यिराङला गोवु नुम ति ङ्‍योनी शोक।’ सिनी सिक्‍यासुङ।
MAT 25:10 तमा ती रिक्‍पा मेतुपतिवा नुम ङ्‍योपला गलुप पेला माक्‍पा वासुङ। तमा ती माक्‍पा ति नुम टडिक क्‍यान देतुप रिक्‍पा वोतुपतिवी मुला जेन्‍दीकी डेनकी खाङ्‍बाला शुसुङ, तमा ती खाङ्‍बी गो च्‍येसुङ।
MAT 25:11 ती ज्‍युक्‍ला रिक्‍पा मेतुपतिवा लोक्‍नी वानी डेनकी खाङ्‍बी गे चाला लानी ‘ओ चोवो, ओ चोवो, ङ्‍यिराङला गो पेनी।’ सिनी च्‍यार ग्‍यप्‍सुङ।
MAT 25:12 यिने माक्‍पा तीकी तिवाला ‘वुतुङ के ङ ख्‍यिराङला सिरिन, ङ ख्‍यिराङला ङो राङ माशे।’ सिनी सिक्‍यासुङ।
MAT 25:13 तुक क्‍यानी ख्‍यिराङ च्‍याङ्‍से देता, च्‍यिलासिसिन ती ङ्‍यिमा ताङ ती तुजे ति ख्‍यिराङला छ्‍या मे।”
MAT 25:14 “येलुङ देवाच्‍येनकी ग्‍येल्‍खाप ति मी लुङ्‍बा डोप पेला खोरो लावातिवाला कताङ्‍नी खोरो नोर टोङ्‍बा ति चेक तेतुप मी मिरा च्‍यिककी पे दोके यिन।
MAT 25:15 तीकी लावातिवा रे रेला दाक दाक्‍पी काङ अछ्‍योवु चोयी च्‍यिकला ति सेरकी डप्‍बु ङ, च्‍यिकला ति सेरकी डप्‍बु ङ्‍यी, तमा च्‍यिकला ति सेरकी डप्‍बु च्‍यिक तेनी खोरुङ ति मी लुङ्‍बा गाल्‍सुङ।
MAT 25:16 तमा सेरकी डप्‍बु ङ ङ्‍येतुप लावा ति शार्क्येक गल्‍नी ती टङ्‍गा ति छोङ क्‍यानी यम्‍बा सेरकी डप्‍बु ङ ल्‍हक्‍पा शम्‍सुङ।
MAT 25:17 सेरकी डप्‍बु ङ्‍यी ङ्‍येतुप लावा तीकी साङ तुक राङ क्‍यानी यम्‍बा सेरकी डप्‍बु ङ्‍यी ल्‍हक्‍पा शम्‍सुङ।
MAT 25:18 यिने सेरकी डप्‍बु च्‍यिक ङ्‍येतुप लावा ति गल्‍नी सला मुक्‍तुम टुनी ती सेरकी डप्‍बु ति बानी ज्‍याक्‍सुङ।
MAT 25:19 लो अलायी ज्‍युक्‍ला ती लावातिवी ज्‍यिन्‍दाक ति लोक्‍नी वासिमा खोरो लावातिवी मुला खोरो टङ्‍गी ची लासुङ।
MAT 25:20 ची लङ्‍गुप पेला सेरकी डप्‍बु ङ ङ्‍येतुप लावा तीकी यम्‍बा सेरकी डप्‍बु ङ साङ खुन वानी, ‘ज्‍यिन्‍दाक, ज्‍यिन्‍दाककी ङला सेरकी डप्‍बु ङ तेन ज्‍याक्‍सुङ। ल्हो ताङ, ङे यम्‍बा सेरकी डप्‍बु ङ ल्‍हक्‍पा शमिन।’ सिनी सिक्‍यासुङ।
MAT 25:21 तमा ज्‍यिन्‍दाक ति गा कियी सिरा ‘को छ्‍येसुङ, ख्‍युरुङ खोङ्‍तेर्मु ताङ लावा ल्‍यामु! ख्‍युरुङ ताम्‍ङे चेयीला खोङ्‍तेर्मु च्‍युङ्‍सुङ, तुक क्‍यानी ङ ख्‍युरुङला ताम्‍ङे बङी चेक तेतिन। ख्‍युरुङ वानी ङ ताङ मुला गा की।’ सिनी सिक्‍यासुङ।
MAT 25:22 ती ज्‍युक्‍ला सेरकी डप्‍बु ङ्‍यी ङ्‍येतुप लावा ति साङ वानी, ‘ज्‍यिन्‍दाक, ज्‍यिन्‍दाककी ङला सेरकी डप्‍बु ङ्‍यी तेन ज्‍याक्‍सुङ। ल्हो ताङ, ङे यम्‍बा सेरकी डप्‍बु ङ्‍यी ल्‍हक्‍पा शमिन।’ सिनी सिक्‍यासुङ।
MAT 25:23 तमा ज्‍यिन्‍दाक तीकी तीला ‘को छ्‍येसुङ, खोङ्‍तेर्मु ताङ लावा ल्‍यामु! ख्‍युरुङ ताम्‍ङे चेयीला खोङ्‍तेर्मु च्‍युङ्‍सुङ, तुक क्‍यानी ङ ख्‍युरुङला ताम्‍ङे बङी चेक तेतिन। ख्‍युरुङ साङ वानी ङ ताङ मुला गा की।’ सिनी सिक्‍यासुङ।
MAT 25:24 यिने सेरकी डप्‍बु च्‍यिक ङ्‍येतुप लावा तिङ वानी, ‘ज्‍यिन्‍दाक, ज्‍यिन्‍दाक याङ माचुवु दासा नेसुर ङकुप ताङ मातपुप दासा नेसुर रुकुप मी च्‍युर्वु यिन सिरुप ति ङला छ्‍या वे।
MAT 25:25 तुक क्‍यानी ङला ज्‍यिवा लासुङ, तमा गल्‍नी ज्‍यिन्‍दाककी ङला चेक तेतुप सेरकी डप्‍बु ति थली वोक्‍ला बानी ज्‍यकिन। ल्हो ताङ, ज्‍यिन्‍दाककी टङ्‍गा ति दे राङ वे।’ सिनी सिक्‍यासुङ।
MAT 25:26 तुक सिक्‍यासिमा ज्‍यिन्‍दाक तीकी तीला सिक्‍यासुङ, ‘ख्‍यो दुक्‍टा ताङ छेर्शिक्‍पा वोतुप लावा, ख्‍युरुङ ङला माचुवु दासा नेसुर ङकुप ताङ मातपुप दासा नेसुर रुकुप मी यिन सिनी छ्‍या वोतुप यिन्‍सिन
MAT 25:27 ख्‍योरो ङे टङ्‍गा पेला तङ ज्‍यकुप यिन्‍सिन ङ वासिमा ङला पे छोवु ति यिन्‍जा।
MAT 25:28 तुक क्‍यानी तीकी लोला वोतुप सेरकी डप्‍बु च्‍यिक तिङ ठोनी सेरकी डप्‍बु च्‍यिथम्‍बा वोतुप तीला बिन।
MAT 25:29 च्‍यिलासिसिन सी लोला नोके, तीला मङ तेर्किवी, तमा तीला छाछिङी डिवी। यिने सी लोला मेवे, तीकी लोला वोतुप तिङ ठोकिवी।
MAT 25:30 तमा दी फेन मोथोवु लावा दुक्‍टा तीला पाङ्‍ला नक्‍तोमीला क्‍युर, ते ती ङुयी सिरा स मुर्किवी।’”
MAT 25:31 “ङ मी पुज्‍युङ तेरी देवाच्‍येनकी लेन क्‍योलुप थुतिवी मुला खोरो मोवाला वुङ्‍गुप पेला ङ ति खोरो ग्‍येल्‍ठिकला देकितो।
MAT 25:32 तमा तेरी मिरिककी मीतिवा ङे चिप्‍ला जोम्‍गितो, ती पेला लुक गोठालाकी रा ताङ लुकला पेतुप दोके क्‍यानी
MAT 25:33 ङ रतिवाला ति यावी थाकाला ताङ लुकतिवाला ति येन्‍बी थाकाला पेनी ज्‍योकितो।
MAT 25:34 तमा ङे यावी थाकाकी मीतिवाला ‘ङे पपा नेमा मोलाम थोपुपतिवा! वानी जम्‍बुलिङ ज्‍येङ्‍गुप पे नेज्‍युनी ख्‍यिरा थोक्‍ला टडिक क्‍या ज्‍यकुप ग्‍येल्‍खापला ओङ्‍ज्‍येन की।
MAT 25:35 च्‍यिलासिसिन ङ ल्‍होवा लावु पेला ख्‍यिरा ङला साप समा बिन्‍सुङ, कोम्‍बा लावु पेला थुङ्‍गुप छ्‍यु बिन्‍सुङ, थाक्‍रिङ्‍बुकी मी यिन्‍दुप पेला ख्‍यिरा खाङ्‍बाला ङला गासो शुसुङ।
MAT 25:36 ङ पेर्तुङ्‍बा वोतुप पेला ख्‍यिरा ङला मज्‍या कोन बिन्‍सुङ, नान वोतुप पेला ङला ल्‍हटे क्‍यासुङ, चोन्‍खाङला शोरुप पेला ङला ठेतुपला वासुङ।’
MAT 25:37 तमा यावी थाकाला वोतुप कोन्‍छ्‍योककी थोङ्‍दाङला टेङ्‍बु वोतुपतिवी ङला दुक सिवी, ‘ओ चोवो, नम ङ्‍यिरा चोवोला ल्‍होवा लावु थोङ्‍नी समा बिन्‍सुङ? कोम्‍बा लावु थोङ्‍नी थुङ्‍गुप छ्‍यु बिन्‍सुङ?
MAT 25:38 तमा थाक्‍रिङ्‍बुकी मी यिन्‍दुप पेला गासो शुसुङ? पेर्तुङ्‍बा वोतुप थोङ्‍नी मज्‍या कोन बिन्‍सुङ?
MAT 25:39 तमा नम नान वोतुप याङ्‍ना चोन्‍खाङला शोरुप थोङ्‍नी ल्‍हा वासुङ?’
MAT 25:40 तमा ङे तिवाला दुक सिवी, ‘वुतुङ के ङ ख्‍यिराङला सिरिन, ख्‍यिरा दे वोतुपतिवी पर्ला तेरी सिनाङ छ्‍युङा मिरा च्‍यिकला काङ क्‍यावे, ती ति ङला राङ क्‍यावु यिन।’
MAT 25:41 ती ज्‍युक्‍ला ङे येन्‍बी थाकाला वोतुपतिवाला दुक सिवी, ‘ख्‍यिराङ मोताप सुकुप मीतिवा! ङे चा नेमा थेन गल्‍नी शैतान ताङ तीकी डेतिवी थोक्‍ला टडिक क्‍यावु नाम्‍साङ मिशिवु मे नाङ्‍ला ग्‍युक।
MAT 25:42 च्‍यिलासिसिन ङ ल्‍होवा लावु पेला ख्‍यिरा ङला साप समा माबिन, कोम्‍बा लावु पेला ङला थुङ्‍गुप छ्‍यु माबिन,
MAT 25:43 थाक्‍रिङ्‍बुकी मी यिन्‍दुप पेला ख्‍यिरा खाङ्‍बाला ङला गासो माशु, पेर्तुङ्‍बा वोतुप पेला मज्‍या कोन माबिन, तमा नान वोतुप याङ्‍ना चोन्‍खाङला शोरुप पेला ङला ठेतुपला माङु।’
MAT 25:44 तमा तिवी ङला दुक सिवी, ‘ओ चोवो, नम ङ्‍यिरा चोवोला ल्‍होवा लावु ताङ कोम्‍बा लावु ताङ थाक्‍रिङ्‍बुकी मी यिन्‍दुप पेला ताङ पेर्तुङ्‍बा वोतुप ताङ नान वोतुप ताङ चोन्‍खाङला शोरुप थोङ्‍नी ख्‍युरुङला शब्‍ज्‍यी माक्‍या वे?’
MAT 25:45 ती पेला ङे तिवाला दुक सिवी, ‘वुतुङ के ङ ख्‍यिराङला सिरिन, ख्‍यिरा दे वोतुपतिवी पर्ला तेरी सिनाङ छ्‍युङा मिरा च्‍यिकला काङ माक्‍यावे, ती ति ङला राङ माक्‍यावु यिन।’
MAT 25:46 तुक क्‍यानी तिवा नाम्‍साङ मिसिन्‍दुप ङ्‍येलाला लुम्‍गिवी, तमा कोन्‍छ्‍योककी थोङ्‍दाङला टेङ्‍बु वोतुपतिवाला ति नाम्‍साङ मिशिवु मिजी थोप्‍किवी।”
MAT 26:1 तमा येशूकी ती ताम्‍ङेतिवा तेरी सुङ सिन्‍सिमा खोरो लोमातिवाला दुक सुङ्‍सुङ,
MAT 26:2 “तफेनकी ङ्‍यिमा ङ्‍यी ज्‍युक्‍ला यहूदी थरुप तुछ्‍येन गिवी सिरुप ति ख्‍यिराङला छ्‍या वे। ती पेला मीतिवी ङ मी पुज्‍युङला ग्‍यङ्‍शिङला कल्‍नी सेतुपला चेक तेकिवी।”
MAT 26:3 ती पेला राङ कोङ्‍यार छ्‍येतिवा ताङ यहूदी छ्‍येतिवा कैयाफा सिरुप तेरी सिनाङ कोङ्‍यार छ्‍येकी खाङ्‍बा जोम्‍नी
MAT 26:4 चुक क्‍यानी क्‍येन बिन्‍नी येशूला जिम्‍नी सेतुप सिनी केवुल क्‍यासुङ।
MAT 26:5 यिने तिवी “ती तुछ्‍येनला ति माकी, तुक क्‍यासिन मीतिवा हराङ हुरुङ किते यिन्‍दे।” सिनी सिक्‍यासुङ।
MAT 26:6 ङ्‍यिम्‍ज्‍यिक येशू बेथानियाला सिमोन सिरुप गोमाला जे ग्‍यपुप मी यीकी खाङ्‍बाला सोल शेयी वोतुप पेला
MAT 26:7 पुम्‍पेजा यीकी सिङ्‍गमरमर सिरुप दो नेसुर जोवु बोक्‍तल नाङ्‍ला छासे गोङ कुर्मु नावु टी जङ्‍बु खाप नुम खुर्नी येशूकी चाला वानी ती नुम ति खोकी गोला पुसुङ।
MAT 26:8 ती थोङ्‍सिमा खोकी लोमातिवा ङ्‍यिर्मु लानी, “च्‍यिला दी टी जङ्‍बु खाप नुम ति तुक क्‍यानी ना तङ्‍गुप यिन?
MAT 26:9 बोरु ती टी जङ्‍बु खाप नुम ति गोङ कुर्मुला चोनी ती टङ्‍गा ति पेराङ्‍बुतिवाला बिन्‍सिन ल्‍यामु वुङ्‍गुप्‍जा।” सिनी सिक्‍यासुङ।
MAT 26:10 ती ताम्‍ङे थोनी येशूकी तिवाला सुङ्‍सुङ, “दी पुम्‍पेजा तीला ख्‍यिरा च्‍यिला वोरु तेन्‍दुप यिन? दीकी याङ ङे थोक्‍ला लाका ल्‍यामु राङ क्‍यासुङ।
MAT 26:11 पेराङ्‍बुतिवा याङ ख्‍यिरा मुला नरी लुकिवी, यिने ङ याङ ख्‍यिरा मुला नरी मुलुवी।
MAT 26:12 दी पुम्‍पेजा तीकी ङे गोला टी जङ्‍बु खाप नुम पुवु ति ङला कल्‍दोक कितुप थोक्‍ला टडिक क्‍यावु यिन।
MAT 26:13 वुतुङ के ङ ख्‍यिराङला सिरिन, जम्‍बुलिङकी कनी दासाला साङ दी लेन ल्‍यामु ख्‍याप्‍टाक किवे, ते दी पुम्‍पेजा तीकी क्‍यावु लाका साङ लाप्‍नी तीला टेन्‍गिवी।”
MAT 26:14 तमा येशूकी लोमा च्‍यिङ्‍ङी पर्ला यहूदा इस्‍करियोत सिरुप ति यहूदी कोङ्‍यार छ्‍येतिवी चाला गल्‍नी
MAT 26:15 तिवाला “दोजो ङे ख्‍यिराङला येशूला जिम बिन्‍सुङ सिसिन ख्‍यिरा ङला काङ तेर्किवी?” सिनी टिसुङ। तमा तिवी ङुलकी डप्‍बु खल सुम ङोनी तीला बिन्‍सुङ।
MAT 26:16 ती पेला नेज्‍युनी यहूदाकी येशूला जिम तेरुपला च्‍यु ल्‍हानी देसुङ।
MAT 26:17 खमीर मालुकुप शुब्‍ज्‍याङ साप तुछ्‍येनकी ङ्‍यिमा तोङ्‍ला लोमातिवा येशूकी चाला वानी, “चोवोकी थोक्‍ला यहूदी थरुप तुछ्‍येनकी डेन सापला ङ्‍यिराङ कनी टडिक कितुप?” सिनी खोला टिसुङ।
MAT 26:18 तमा खोकी तिवाला दुक सुङ्‍सुङ, “ख्‍यिराङ ग्‍येसाला ङे सिक्‍यावु मी मिरा च्‍यिककी ते गल्‍नी तीला दुक सी, ‘ङ्‍यिरा गेकेनकी दुक सुङ्‍सुङ, ङे तुजे छेवु छल वे, ङ ङे लोमातिवी मुला ख्‍योरे खाङ्‍बाला डेन सेवी।’”
MAT 26:19 तमा लोमातिवा गल्‍नी खोकी सुङ्‍गुप दोके यहूदी थरुप तुछ्‍येनकी डेन टडिक क्‍यासुङ।
MAT 26:20 ती छेर्मु नाम ल्‍होसिमा खो लोमा च्‍यिङ्‍ङीतिवी मुला डेन शेवुला ज्‍युसुङ।
MAT 26:21 खोतिवा डेन शेयी वोतुप पेला खोकी लोमातिवाला “वुतुङ के ङ ख्‍यिराङला सिरिन, ख्‍यिरा पर्ला मिरा च्‍यिककी ङला जिम तेर्किवी।” सिनी सुङ्‍सुङ।
MAT 26:22 खोकी तुक सुङ्‍सिमा तिवी सेमला छासे पप लानी, “चोवो, वुतुङ के ती ति ङ यिन?” सिनी रे रेकी खोला टिसुङ।
MAT 26:23 तमा येशूकी तिवाला सुङ्‍सुङ, “सी ङे मुला कोरी नाङ्‍ला खोरो शुब्‍ज्‍याङ पकिन नोके, तीकी राङ ङला जिम तेर्किवी।
MAT 26:24 ङ मी पुज्‍युङ याङ खोरो थोक्‍ला कोन्‍छ्‍योककी सुङला टि वोतुप दोके शि राङ गोकिवी, यिने ङ मी पुज्‍युङला जिम तेरुप तीला याङ मोताप सुकिवी। ती याङ क्‍येप तिरुङ माक्‍येसिन तीकी थोक्‍ला मङ ल्‍यामु वुङ्‍गुप्‍जा।”
MAT 26:25 तमा येशूला जिम तेरुप यहूदा तीकी खोला “गेकेन, काङ ती ति ङ यिन?” सिनी टिसुङ। येशूकी तीला “ख्‍योरो राङ सिक्‍या वे।” सिनी सुङ्‍सुङ।
MAT 26:26 खोतिवा डेन शेयी वोतुप पेला येशूकी शुब्‍ज्‍याङ लानी कोन्‍छ्‍योकला थुचिछे पुल्‍सिमा ती शुब्‍ज्‍याङ ति च्‍याक्‍सुङ। तमा लोमातिवाला तेरिन सिरा दुक सुङ्‍सुङ, “लानी सो, दी ति ङे जु यिन।”
MAT 26:27 तमा येलुङ खोकी कोरा लानी कोन्‍छ्‍योकला थुचिछे पुल्‍सिमा तिवाला तेरिन सिरा दुक सुङ्‍सुङ, “ख्‍यिराङ तेरीकी दी कोरा नेसुर थुङ।
MAT 26:28 ती ति मी बङीकी थोक्‍ला दिक्‍पा ने थर ज्‍यितुपला देन्‍दुप कोन्‍छ्‍योककी थाक्‍छ्‍येन नङ्‍गुप ङे ठक यिन।
MAT 26:29 तमा ङ ख्‍यिराङला सिरिन, ङे पपी ग्‍येल्‍खापला ख्‍यिरा मुला सम्‍बा माथुवा सेक्‍ला ङ येलुङ गुन्‍डुम दोङ्बी डेलु नेमा जोवु ति मुथुङ।”
MAT 26:30 ती ज्‍युक्‍ला खोतिवा कोन्‍छ्‍योकला सोवा देकुप लु च्‍यिक लानी जैतुन पम्‍दोक नेवा फेप्‍सुङ।
MAT 26:31 ती पेला येशूकी लोमातिवाला सुङ्‍सुङ, “हारिङ नुपला ख्‍यिराङ तेरीकी ङला क्‍युर्नी ज्‍योकितो। च्‍यिलासिसिन कोन्‍छ्‍योककी सुङला, ‘ङ लुक गोठालाला सेतिन, तमा लुकतिवा ति मयी नेसुर थरा थुरा डिवी।’ सिनी टि वे।
MAT 26:32 यिने ङ शेप ने सेन्‍बु लासिमा ख्‍यिराङ सिनाङ गोमाला के गालीलला डोयिनो।”
MAT 26:33 तमा पत्रुसकी खोला “तेरीकी चोवोला क्‍युर्नी ज्‍याक्सिनाङ ङ ति नाम्‍साङ क्‍युर्नी मोज्‍योक।” सिनी सिक्‍यासुङ।
MAT 26:34 यिने येशूकी तीला सुङ्‍सुङ, “ङ ख्‍युरुङला टेङ्‍बो सिरिन, हारिङ नुपला च्‍यवु कुकुरी देन्‍दुप सिनाङ गोमाला ख्‍योरो ङला थेङ्‍मा सुम ङो मेशेवी सिनी सिवी।”
MAT 26:35 येलुङ पत्रुसकी खोला “ङ याङ शि राङ गोसिनाङ चोवोला ङो मेशेवी सिनी मिसिर।” सिनी सिक्‍यासुङ। तमा यम्‍बा तेरी लोमातिवी साङ तुकै राङ सिक्‍यासुङ।
MAT 26:36 तमा ती ज्‍युक्‍ला येशू लोमातिवी मुला गेतसमनी सिरुप दासाला फेप्‍नी तिवाला “ङ फेचेक गल्‍नी मोपोर कितुप पेला ख्‍यिराङ ति दे राङ देता।” सिनी सुङ्‍सुङ।
MAT 26:37 तमा खोकी पत्रुस ताङ जब्‍दियाकी पुज्‍युङ पिन ङ्‍यीला टिनी फेप्‍सालेन्‍सिन खो छासे सेम्‍दुक ताङ पप लङ्‍गुप छाल्‍सुङ।
MAT 26:38 तमा खोकी तिवाला सुङ्‍सुङ, “ङला छासे सेम्‍दुक लानी शेप दोके छ्‍याता छ्‍यिता गल वे। तुक क्‍यानी ख्‍यिराङ ङे मुला ङ्‍यिमालोका क्‍यानी देता।”
MAT 26:39 तमा खो ति चेयी फेचेक फेप्‍नी खवुतुङ्‍मा ज्‍युनी दुक सिनी मोपोर क्‍या नाङ्‍सुङ, “ओ ङे पपा, च्‍युङ थुप्‍सिन दी छेटाङकी कोरा ति ङ नेसुर दोनी नाङ। यिन्‍सिनाङ ङे नोवा दोके मिन, पपी नोवा दोके राङ च्‍युङ्‍शी।”
MAT 26:40 ती ज्‍युक्‍ला खो लोमातिवी चाला फेप्‍सालेन्‍सिन तिवा ङ्‍यी गलुप थोङ्‍सुङ। खोकी पत्रुसला सुङ्‍सुङ, “काङ ख्‍यिराङ घण्‍टा च्‍यिक साङ ङे मुला ङ्‍यिमालोका क्‍यानी दे मुथुपी?
MAT 26:41 ख्‍यिराङ शैतानकी खोक्‍पा ल्‍हापला मेख्‍येल्‍शी सिनी ङ्‍यिमालोका क्‍यानी मोपोर की। सेमला ति कितुप नो वे, यिन्‍सिनाङ जुकी अला कि मुथुपी।”
MAT 26:42 येलुङ येशू फेचेक फेप्‍नी, “ओ ङे पपा, दी छेटाङकी कोरा ति ङे माथुवा क्‍यानी दोनी डो मुथुपी सिसिन पपी नोवा दोके राङ च्‍युङ्‍शी।” सिनी मोपोर क्‍यासुङ।
MAT 26:43 येशू येलुङ तिवी चाला फेप्‍नी ल्‍हासालेन्‍सिन तिवा ङ्‍यिलोक्‍नी राङ नोक। च्‍यिलासिसिन तिवा कशेन ङ्‍यिसोक ग्‍यपुप तप्‍की मिक साङ बे मुथुप्‍नोक।
MAT 26:44 तमा येशूकी तिवाला ते राङ क्‍युर ज्‍याक्‍नी येलुङ फेचेक फेप्‍नी गोमी दोके राङ क्‍यानी मोपोर क्‍या नाङ्‍सुङ।
MAT 26:45 तमा खो येलुङ लोमातिवी चाला फेप्‍नी, “ख्‍यिराङ तरोङ साङ ङ्‍यिलोक्‍नी ङ सोयी राङ वे? ल्‍होसा, ङ मी पुज्‍युङ दिक्‍छेनतिवी लकला चेक तेतुप तुजे छेन सिन्‍सुङ।
MAT 26:46 लो, मुला राङ डोप। ल्हो ताङ, ङला जिम तेरुप ति चाला राङ वा वे।” सिनी सुङ्‍सुङ।
MAT 26:47 येशूकी तुक सुङ्‍यिन वोतुप पेला खोकी लोमा मिरा च्‍यिङ्‍ङी नाङ ने यहूदा इस्‍करियोत ति ते लेसुङ। तमा तीकी मुला कोङ्‍यार छ्‍येतिवा ताङ यहूदी छ्‍येतिवी तङ्‍गुप मीतिवा बङी खुर्पा ताङ लकाम खुर्नी लेसुङ।
MAT 26:48 गोमाला के यहूदा तीकी येशूला जिम वावु मीतिवाला “सुला ङे पुका किवे, ती राङ येशू यिन। तीला राङ जिम।” सिनी सिक्‍यानोक।
MAT 26:49 ते लेप्‍सिमा यहूदा ति शार्क्येक येशूकी चाला गल्‍नी खोला “टसी देलेक, गेकेन!” सिनी पुका क्‍यासुङ।
MAT 26:50 तमा येशूकी तीला “ख्‍युरुङ दे काङ कितुपला वावु यिन, ती ति की।” सिनी सुङ्‍सुङ। तमा तिवा वानी येशूला जिम्‍सुङ।
MAT 26:51 ती पेला येशूकी मुला वोतुपतिवी पर्ला मिरा च्‍यिककी खुर्पा थेन्‍नी तेरी सिनाङ कोङ्‍यार छ्‍येकी लावाकी नम्‍ज्‍योक ति टेप च्‍येसुङ।
MAT 26:52 तमा येशूकी ती खुर्पा ग्‍यकुप तीला सुङ्‍सुङ, “ख्‍योरो खुर्पा ति शुपकी नाङ्‍ला च्‍यी। च्‍यिलासिसिन खुर्पा थोकुप मीतिवा खुर्पा थ्‍वोनी राङ ना डिवी।
MAT 26:53 ङे पपाला गोङ्‍बा शुसिन खोकी तन्‍दा राङ मक्‍मी छो च्‍यिङ्‍ङी सिनाङ मङ देवाच्‍येनकी लेन क्‍योलुप थुतिवा ङे थोक्‍ला मोतोङ्‍गिवी सिनी ख्‍यिरा नासाम तोङ्‍गिवी?
MAT 26:54 यिने तुक क्‍यासिन दुकै च्‍युङ गोकिवी सिरुप कोन्‍छ्‍योककी सुङ ति चुक क्‍यानी छेकिवी रो?”
MAT 26:55 तमा येशूकी खोरुङला जिम वावुतिवाला सुङ्‍सुङ, “ख्‍यिराङ च्‍यिला च्‍याक्‍पा जिम्‍बुप दोके क्‍यानी खुर्पा ताङ लकाम खुर्नी ङला जिम वावु? ङ ङ्‍यिमी टेङ यहूदी ल्‍हङाङला येन्‍देन बिन्‍सिनाङ ख्‍यिरा ङला माजिम।
MAT 26:56 यिने दी तेरी च्‍युङ्‍गुप ति कोन्‍छ्‍योककी लुङ्‍तेम्‍बातिवी टिवु खोकी सुङ ति तेरी छेवुला यिन।” ती पेला येशूकी लोमातिवा तेरीकी खोला क्‍युर ज्‍याक्‍नी टोनी गाल्‍सुङ।
MAT 26:57 तमा येशूला जिम्‍बुप मीतिवी खोला तेरी सिनाङ कोङ्‍यार छ्‍ये कैयाफाकी खाङ्‍बाला टिनी गाल। ते यहूदी छ्‍योकी गेकेनतिवा ताङ यहूदी गोमा कितुप मी छ्‍येतिवा जोम्‍नोक।
MAT 26:58 यिने पत्रुस ति थाक्‍रिङ्‍बु नेसुर येशूकी तिङ तिङ्‍ला तिङ्‍यानी कोङ्‍यार छ्‍येकी खाङ्‍बी लेङाङ सेक लेप्‍नोक, तमा ती खाङ्‍बी नाङ्‍ला शुनी येशूला काङ च्‍युङ्‍गिनोक सिनी ल्‍हापला ती खाङ्‍बा र्‍हेन्‍दुपतिवी पर्ला देसुङ।
MAT 26:59 ती पेला कोङ्‍यार छ्‍येतिवा ताङ यहूदी छोक्‍पाकी मी छ्‍येतिवा तेरीकी येशूला सेतुपला खोकी तेन्‍दोकला पङ्‍बु जिनोक तेरुप मीतिवा छोलिन नोक।
MAT 26:60 मीतिवा बङी वानी येशूकी तेन्‍दोकला जिनोक जोप पङ्‍बु बिन्‍सिनाङ तिवी बिन्‍दुप पङ्‍बु ति माडिक। ती तिङ्‍ला मी मिरा ङ्‍यी वानी दुक सिक्‍यासुङ,
MAT 26:61 “दी मी तीकी कोन्‍छ्‍योककी ल्‍हङाङ शिक्‍नी ङ्‍यिमा सुमला राङ जोयी सिनी सिक्‍यासुङ।”
MAT 26:62 तमा तेरी सिनाङ कोङ्‍यार छ्‍ये ति खोक लानी येशूला “दी मीतिवी ख्‍योरो तेन्‍दोकला बिन्‍दुप पङ्‍बु ति काङ यिन? ख्‍युरुङला दी ताम्‍ङेकी कोर्ला काङ साङ टिलेन मे?” सिनी टिसुङ।
MAT 26:63 यिने येशू खरक्‍पा ज्‍युसुङ। येलुङ तेरी सिनाङ कोङ्‍यार छ्‍ये तीकी येशूला “ख्‍युरुङ ङोसु वोतुप कोन्‍छ्‍योकला न क्‍यल्‍नी ङ्‍यिराङला टेङ्बु सी। काङ ख्‍युरुङ कोन्‍छ्‍योककी सेवु ख्रीष्‍ट राङ यिन?” सिनी टिसुङ।
MAT 26:64 तमा येशूकी तीला सुङ्‍सुङ, “ख्‍योरो राङ सिक्‍यासुङ। यिने ङ ख्‍यिराङ तेरीला सिरिन, तफेन्‍ला ङ मी पुज्‍युङ ति चोछ्‍येवु कोन्‍छ्‍योककी यावी थाकाला देतुप ताङ देवाच्‍येनकी मुक्‍पी ख नेमा वुङ्‍गुप ति ख्‍यिरा थोङ्‍गितो।”
MAT 26:65 ती थोसिमा तेरी सिनाङ कोङ्‍यार छ्‍ये तीकी खोरो मज्‍या र्‍होलिन सिरा दुक सिक्‍यासुङ, “दीकी याङ कोन्‍छ्‍योकला के मारे तोङ्‍गिनोक। तुक क्‍यानी त याङ दाक्‍पुला यम्‍बा पङ्‍बु काङ गोसुङ रो? मलोक दीकी कोन्‍छ्‍योकला मारे तङ्‍गुप ताम्‍ङे याङ ख्‍यिरा थोनिङ सिन्‍सुङ।
MAT 26:66 दीकी कोर्ला ख्‍यिरा नासाम काङ वे?” सिनी सिक्‍यासुङ। तमा तिवी “दीला याङ से राङ गोकिवी।” सिनी सिक्‍यासुङ।
MAT 26:67 तमा तिवी येशूकी शालला छ्‍यिन्‍दुर ग्‍यप्‍नी खोला वोक्‍तुम पोप्‍सुङ। ललाइ ललाइकी येशूला डम्‍ज्‍येक ग्‍यकिन सिरा
MAT 26:68 “ओ ख्रीष्‍ट, ङ्‍यिराङला नम्‍दर शे ताङ। ख्‍युरुङला बेपुप ति सु यिन?” सिनी सिक्‍यासुङ।
MAT 26:69 ती पेला पत्रुस ति तेरी सिनाङ कोङ्‍यार छ्‍येकी खाङ्‍बी लेङाङकी फिला देनी नोक। तमा लावाम यी तीकी चाला वानी, “ख्‍युरुङ साङ गालीलला येशूकी मुला देतुप मी मिन?” सिनी सिक्‍यासुङ।
MAT 26:70 यिने पत्रुसकी तिवा तेरीकी मिङ्‍गाला “मिन, ख्‍योरो काङगी कोर्ला सिक्‍यावु ति ङे हाक्‍माको।” सिनी सिक्‍यासुङ।
MAT 26:71 तमा ती ज्‍युक्‍ला पत्रुस पाङ्‍ला गे चाला थेन्‍सिमा यम्‍बा लावाम यीकी तीला थोङ्‍नी, “दी मी तिङ नासरतकी येशू मुला राङ नोक।” सिनी सिक्‍यासुङ।
MAT 26:72 लोङ पत्रुसकी “मिन, ङे ती मीला ङो राङ मेशेवी।” सिनी न क्‍याल्‍सुङ।
MAT 26:73 चेयी ज्‍युक्‍ला ते लानी देतुप मीतिवी पत्रुसकी चाला वानी, “वुतुङ के ख्‍युरुङ तिवी परकी मी राङ यिन, च्‍यिलासिसिन ख्‍योरो ताम्‍ङे लाप्‍ताङ ल्‍हासिन ख्‍युरुङ गालीलकी मी राङ यिन।” सिनी सिक्‍यासुङ।
MAT 26:74 तमा पत्रुसकी मङ डेरेङ शुनी न क्‍योलिन सिरा “वुतुङ के ङे तीला ङो राङ मेशेवी।” सिनी सिक्‍यासुङ। तुक सिक्‍यालुङ्‍मे शार्क्येक च्‍यवु कुकुरी तेन्‍सुङ।
MAT 26:75 तमा “च्‍यवु कुकुरी देन्‍दुप सिनाङ गोमाला ख्‍योरो ङला थेङ्‍मा सुम ङो मेशेवी सिवी।” सिनी येशूकी सुङ्‍गुप ति टेन्‍नी पत्रुस ति पाङ्‍ला गल्‍नी कशेन ङुसुङ।
MAT 27:1 ती सला टोपला टेताङ कोङ्‍यार छ्‍येतिवा ताङ यहूदी गोमा कितुप मी छ्‍येतिवा तेरी जोम्‍नी येशूला सेतुप सिनी केवुल क्‍यासुङ।
MAT 27:2 तमा तिवी येशूला कोङ किन्‍नी तेसुर टि गल्‍नी रोमी ठिम कितुप मी छ्‍ये पिलातसला चेक तेसुङ।
MAT 27:3 ती पेला येशूला क्‍येन तेरुप यहूदा ति खोला सेतुप छ्‍येर्पा कलुप थोङ्‍सिमा खोरो मेलोक्‍पा क्‍यावु यिन सिनी सेम्‍दुक लानी ती ङुलकी डप्‍बु खल सुम ति कोङ्‍यार छ्‍येतिवा ताङ यहूदी गोमा कितुपतिवाला लोकिन सिरा
MAT 27:4 “ङे याङ काङ साङ क्‍येन मेतुप मीला क्‍येन बिन्‍नी दिक्‍पा क्‍यायी।” सिनी सिक्‍यासुङ। यिने तिवी तीला “ङ्‍यिराङला काङ सिवी? ती ति ख्‍योरो राङ जोवु यिन।” सिनी सिक्‍यासुङ।
MAT 27:5 तमा यहूदाकी ती ङुलकी डप्‍बुतिवा ल्‍हङाङ नाङ्‍ला राङ क्‍युर ज्‍याक्‍नी तेसुर थेन गल्‍नी खोरुङ राङ नामला कल्‍नी शिनोक।
MAT 27:6 तमा कोङ्‍यार छ्‍ये तीकी ती ङुलकी डप्‍बुतिवा रुनी, “दी ति मी सेतुपला लावु टङ्‍गा यिन, तुक क्‍यानी ल्‍हङाङकी टङ्‍गी मुला ज्‍योकुप मेवी।” सिनी सिक्‍यासुङ।
MAT 27:7 तमा तिवी ती टङ्‍गा थ्‍वोनी थली नेक्‍योक जोप मीकी शिङ ङ्‍योनी ती शिङ ति छ्‍यिग्‍यपतिवा कल्‍दोक कितुप दासा जोपला तेन्‍तेन क्‍यासुङ।
MAT 27:8 तुक क्‍यानी ती शिङला तन्‍दा सेक ठककी शिङ सिनी सिवी।
MAT 27:9 तमा कोन्‍छ्‍योककी लुङ्‍तेम्‍बा यर्मिया नेसुर दुक सिनी सुङ्‍गुप कोन्‍छ्‍योककी सुङ ति तेरी छेसुङ, “तिवी इस्राएलकी मीतिवी गोङ ग्‍यपुप मीकी ङुलकी डप्‍बु खल सुम लानी
MAT 27:10 ती टङ्‍गा ति थली नेक्‍योक जोप मीकी शिङ ङ्‍योपला थोसुङ। ती ति चोवो कोन्‍छ्‍योककी ङला क नङ्‍गुप दोके यिन।”
MAT 27:11 ती ज्‍युक्‍ला येशू रोमी ठिम कितुप मी छ्‍ये पिलातसकी दोङ्‍ला लासुङ। तमा तीकी येशूला “काङ ख्‍युरुङ यहूदीतिवी ग्‍येल्‍वु यिन?” सिनी टिसुङ। तमा येशूकी तीला “यिन, ख्‍योरे सिक्‍यावु दोके राङ यिन।” सिनी सुङ्‍सुङ।
MAT 27:12 तमा येशूकी ते कोङ्‍यार छ्‍येतिवा ताङ यहूदी गोमा कितुपतिवी क्‍येन ग्‍यपुप ताम्‍ङेला काङ साङ टिलेन मानाङ।
MAT 27:13 ती पेला पिलातसकी येशूला “तिवी ख्‍योरो तेन्‍दोकला पङ्‍बु बङी बिन्‍दुप ति ख्‍योरो माथो?” सिनी सिक्‍यासुङ।
MAT 27:14 यिने येशूकी तीला ताम्‍ङे च्‍यिक साङ मासुङ, तमा तिवी ग्‍यपुप क्‍येनकी पर्ला च्‍यिकला साङ ताम्‍ङे मासुङ। ती थोङ्‍नी रोमी ठिम कितुप मी छ्‍ये ति छासे हलेवा क्‍यासुङ।
MAT 27:15 यहूदी थरुप तुछ्‍येनला रोमी ठिम कितुप मी छ्‍ये तीकी चोन्‍खाङला शोरुप मीतिवी नाङ्‍ला लुङ्‍बाकी मीतिवी पेतुप मी मिरा च्‍यिकला पि तोङ ज्‍यितुप लुक्‍सु नोक।
MAT 27:16 तमा ती पेला मीतिवा तेरीकी छ्‍या वोतुप बरब्‍बा सिरुप छासे मी दुक्‍टा यी चोन्‍खाङला शोर्नोक।
MAT 27:17 ते मीतिवा बङी जोम्‍सिमा पिलातसकी तिवाला “ख्‍यिरा थोक्‍ला ङे सुला पि तोङ्‍शी सिनी नो किवी? बरब्‍बाला पि तोङ्‍गुप की, ख्रीष्‍ट सिरुप येशूला पि तोङ्‍गुप?” सिनी टिसुङ।
MAT 27:18 च्‍यिलासिसिन यहूदीतिवा ठतोक लानी येशू ति खोरुङला चेक तेतुप यिन सिनी पिलातसला छ्‍या नोक।
MAT 27:19 तमा पिलातस ठिम कितुप ठीला देनी वोतुप पेला तीकी पेर्मीकी तीला “ती क्‍येन मेतुप मी तीला काङ साङ माकी, च्‍यिलासिसिन हारिङ नुपला मिलामला तीकी थोक्‍ला ङे छासे दुक्‍पा खुरिन।” सिनी लेन ताङ्‍नोक।
MAT 27:20 यिने कोङ्‍यार छ्‍येतिवा ताङ यहूदी गोमा कितुप मी छ्‍येतिवी मी माङ्‍छ्‍योकला चेन्‍नी बरब्‍बाला ति पि ताङ्‍नी येशूला ति सेतुप छ्‍येर्पा बिन सिनी सि च्‍यिसुङ।
MAT 27:21 येलुङ पिलातसकी तिवाला “दिवा ङ्‍यिवी पर्ला ङे चुका तीला पि तोङ्‍शी सिरुप ख्‍यिरा नो वे?” सिनी टिसुङ। तमा तिवी “बारब्‍बाला राङ पि तोङ।” सिनी च्‍यार ग्‍यप्‍सुङ।
MAT 27:22 तमा पिलातसकी तिवाला “तुकै यिन्‍सिन दी ख्रीष्‍ट सिरुप येशू तीला ति ङ काङ कितुप?” सिनी टिसुङ। तमा तिवा तेरीकी “तीला ग्‍यङ्‍शिङला कल्‍नी काँडी दाप्‍नी से।” सिनी च्‍यार ग्‍यप्‍सुङ।
MAT 27:23 पिलातसकी तिवाला “च्‍यिला? दीकी काङ मेलोवा क्‍या वे?” सिनी टिसुङ। यिने तिवी मङ च्‍यार ग्‍यकिन सिरा “तीला ग्‍यङ्‍शिङला कल्‍नी काँडी दाप्‍नी से।” सिनी सिक्‍यासुङ।
MAT 27:24 पिलातसकी खोरो राङ काङ कि मुथुपुप ताङ मीतिवा हराङ हुरुङ कितुप छलुप थोङ्सिमा मी माङ्‍छ्‍योककी मिङ्‍गाला छ्‍यु थ्‍वोनी लाक्‍पा टुयी सिरा “दी मीला सेतुप क्‍येन ति ङला मे। ती क्‍येन ति ख्‍यिरा राङ खुर गोकितो!” सिनी सिक्‍यासुङ।
MAT 27:25 तमा मीतिवा तेरीकी मुला राङ “दी मीला सेतुप क्‍येन ति ङ्‍यिराङ ताङ ङ्‍यिरा गिपातिवाला राङ ख्‍येल्‍शी।” सिनी सिक्‍यासुङ।
MAT 27:26 तमा पिलातसकी बरब्‍बाला ति पि ताङ्‍नी येशूला ति पाङ्‍शर तोङ ज्‍यितुप ताङ ग्‍यङ्‍शिङला कल्‍नी काँडी दाप्‍नी सेतुपला रोमी मक्‍मीतिवाला चेक तेसुङ।
MAT 27:27 ती ज्‍युक्‍ला पिलातसकी मक्‍मीतिवी येशूला रोमी ठिम कितुप मी छ्‍ये देतुप खाङ्‍बाला टि गल्‍नी यम्‍बा मक्‍मीतिवा तेरीला कताङ्‍नी ते जोम च्‍यिसुङ।
MAT 27:28 तमा तिवी येशूकी नम्‍सा ति पिनी खोला छ्‍योवा मुक्‍पु यी कोन बिन्‍नी
MAT 27:29 छेर्माङ वोतुप येल्‍का कुक्‍नी ग्‍येल्‍वी उशाक दोके जोनी खोकी गोला कोन बिन्‍सुङ। तमा तिवी खोकी छ्‍याक नालोक्‍पाला ङ्‍युङ्‍मी लकाम जिम च्‍यिनी खोकी दोङ्‍ला पुमुङ सला चुनी, “ओ यहूदीतिवी ग्‍येल्‍वु, ख्‍युरुङला छे रिङ्‍बु च्‍युङ्‍शी।” सिनी खोला मारे ताङ्‍सुङ।
MAT 27:30 ती ज्‍युक्‍ला तिवी खोला छ्‍यिन्‍दुर ग्‍यप्‍नी खोकी छ्‍याकला ज्‍यकुप ङ्‍युङ्‍मी लकाम ति ठोनी खोकी गोला राङ पोप्‍सुङ।
MAT 27:31 तिवी तुक क्यानी खोला मारे ताङ सिन्‍सिमा छ्‍योवा मुक्‍पु ति पिनी गोमाला खोकी नुम्‍बुप नम्‍सा ति येलुङ कोन बिन्‍नी ग्‍यङ्‍शिङला कल्‍नी काँडी दाप्‍नी सेतुपला टि गाल।
MAT 27:32 तमा तिवी येशूला टि डोयी कितुप पेला कुरेनी नेमा वावु सिमोन सिरुप मी यीला लामला ठेनी तीला येशूला कल्‍नी सेतुप ग्‍यङ्‍शिङ ति कार क्‍यानी खुर च्‍यिसुङ।
MAT 27:33 तेसुर तिवा गलगथा सिरुप दासाला लेप्‍नोक। ती गलगथा सिरुप तेन्‍दोक ति ‘कप्‍लीकी दासा’ सिक्‍यावु यिन।
MAT 27:34 ते लेप्‍सिमा तिवी येशूला ठिवा र्‍हेवु गुन्‍डुम छ्‍याङ थुङ्‍गुपला बिन्‍सुङ। यिने खोकी ती गुन्‍डुम छ्‍याङ ति च्‍यिप क्‍यासिमा थुङ्‍गुप माङ्‍येन।
MAT 27:35 तमा मक्‍मीतिवी खोला ग्‍यङ्‍शिङला काँडी दाप्‍नी कल्‍सिमा खोकी नम्‍सातिवा ग्‍येन ग्‍यप्‍नी खोप्‍रे पर्ला गोसुङ।
MAT 27:36 ती ज्‍युक्‍ला तिवा खोला र्‍हेन्‍नी देसुङ।
MAT 27:37 तमा खोकी गो तेङ्‍ला “दी ति यहूदीतिवी ग्‍येल्‍वु येशू यिन।” सिरुप क्‍येन ग्‍यपुप यिकी यी पङ्‍लिङ लोला टिनी ग्‍यम ज्‍याक्‍नोक।
MAT 27:38 येशूला ग्‍यङ्‍शिङला काँडी दाप्‍नी ग्‍येलुप पेला च्‍याक्‍पा मिरा ङ्‍यीला साङ च्‍यिक ति खोकी यावी थाकाला ताङ च्‍यिक ति खोकी येन्‍बी थाकाला ग्‍यङ्‍शिङला काँडी दाप्‍नी काल्‍सुङ।
MAT 27:39 ते लाम नेवा फार छुर युकुप मीतिवी गो युकिन सिरा येशूला मारे ताङ्‍नी,
MAT 27:40 “ओ ल्‍हङाङ र्‍हम्‍नी ङ्‍यिमा सुमला राङ जोयी सिरुप मी, ख्‍योरो खुरुङला राङ र्‍होक। ख्‍युरुङ कोन्‍छ्‍योककी सेवु यिन्‍सिन ग्‍यङ्‍शिङ लो नेमा मर पाम शोक।” सिनी सिक्‍यासुङ।
MAT 27:41 तमा तुक राङ क्‍यानी कोङ्‍यार छ्‍येतिवी साङ यहूदी छ्‍योकी गेकेनतिवा ताङ यहूदी गोमा कितुप मी छ्‍येतिवी मुला मुला राङ खोला मारे ताङ्‍नी दुक सिक्‍यासुङ,
MAT 27:42 “दीकी मी यम्‍बाला याङ र्‍होक्‍सुङ, यिने खोरुङला ति र्‍होक माथुप। दी इस्राएलकी ग्‍येल्‍वु मिन? दी ति तन्‍दा राङ ग्‍यङ्‍शिङ लो नेमा पाम वासिन ङ्‍यिराङ दीला तेपा कितुप्‍जा।
MAT 27:43 दीकी कोन्‍छ्‍योकला रेवा क्‍यासुङ। दोजो कोन्‍छ्‍योककी नोवा वोसिन खोकी राङ दीला र्‍होकिते यिन्‍दे, च्‍यिलासिसिन दीकी ‘ङ कोन्‍छ्‍योककी पुज्‍युङ यिन।’ सिनी सिक्‍या वे।”
MAT 27:44 तमा येशूकी मुला ग्‍यङ्‍शिङला कलुप च्‍याक्‍पातिवी साङ तुक राङ सिनी खोला मारे ताङ्‍सुङ।
MAT 27:45 ती पेला ङ्‍यिमी गुङगी छ्‍युजी च्‍यिङ्‍ङी नेज्‍युन छ्‍युजी सुम सेक लुङ्‍बा तेरीला नक्‍तोमी गाल।
MAT 27:46 तमा छ्‍युजी सुम चोयीला येशू “इलोई इलोई लामा सबखथनी।” सिनी थोर ग्‍यप्‍सुङ। तीकी तेन्‍दोक ति “ओ ङे कोन्‍छ्‍योक, ओ ङे कोन्‍छ्‍योक, ख्‍योरे ङला च्‍यिला क्‍युर्नी ज्‍यकुप यिन?” सिक्‍यावु यिन।
MAT 27:47 ती थोनी ते लानी वोतुप मीतिवा ललाइकी “दी मी तीकी याङ एलियाला के कतोङ्‍गिनोक।” सिनी सिक्‍यासुङ।
MAT 27:48 तमा तिवी पर्ला मिरा च्‍यिक ति टिम्‍बु टिम्‍बु छ्‍योङ्‍बाल ग्‍यम गल्‍नी ल्‍हेन्‍दा यी लानी तीला गुन्‍डुम छ्‍याङ क्‍युर्वुकी नाङ्‍ला पासिमा ती ति लकाम गोला ज्‍याक्‍नी येशूला थुङ च्‍यिसुङ।
MAT 27:49 यिने ते देतुप मी यम्‍बातिवी “उकुर च्‍यिक देशी। दीला र्‍होकुपला एलिया गिते यिन्‍दे ल्‍हाप।” सिनी सिक्‍यासुङ।
MAT 27:50 तमा लोङ येशू थोर ग्‍यप्‍नी वोरु तेन्‍सिमा खोकी उ छ्‍येसुङ।
MAT 27:51 ती पेला राङ यहूदी ल्‍हङाङ नाङ्‍ला ग्‍यावु गोयोल ति गो नेमा ज्‍युनी शाप सेक फेका ङ्‍यी गल्‍नी राल्‍सुङ। तमा सयी ग्‍यप्‍नी दो ग्‍येर्पु साङ टुम्‍सुङ।
MAT 27:52 तमा शेप मीला ज्‍योकुप टककी फुककी खतिवा पेनी ती नाङ्‍ला ज्‍यकुप कोन्‍छ्‍योकला तेपा क्‍यावु टेङ्‍बु वोतुप मीतिवा बङी शेप ने सेन्‍बु लासुङ।
MAT 27:53 तिवा येशू टुङ्‍नी ङोसु लावु ज्‍युक्‍ला शेप मीला ज्‍योकुप टककी फुक नेवा थेन्‍नी यरूशलेम ग्‍येसाला गल्‍नी मी बङीकी चिप्‍ला छ्‍यर्सुङ।
MAT 27:54 ती पेला रोमी मक्‍मी सयी च्‍यिककी खकी छ्‍ये ताङ तीकी मुला येशूला र्‍हेन्‍दुप मक्‍मीतिवी सयी ग्‍यकुप ताङ ते च्‍युङ्‍गुप ताम्‍ङेतिवा थोङ्‍सिमा छासे ज्‍यिवा कियी सिरा “वुतुङ के दी याङ कोन्‍छ्‍योककी सेवु राङ यिनोक।” सिनी सिक्‍यासुङ।
MAT 27:55 ते पुम्‍पेजातिवा साङ बङी थाक्‍रिङ्‍बु नेसुर ल्‍हानी देनोक। तिवा ति येशूला शब्‍ज्‍यी कियी सिरा गालील नेसुर खोकी तिङ्‍ला तिङ्‍यानी वावु यिनोक।
MAT 27:56 तिवी पर्ला मरियम मग्‍दलिनी, याकूब ताङ योसेफकी आमा जब्‍दियाकी पेर्मी मरियम नोक।
MAT 27:57 तमा नाम ल्‍होसिमा योसेफ सिरुप अरिमाथियाकी मी छ्‍युक्‍पु यी ते लेसुङ। ती साङ येशूला तेपा क्‍यानी खोकी सुङला युकुप मी यिनोक।
MAT 27:58 ती योसेफ ति पिलातसकी ते गल्‍नी येशूकी फुङ्‍बु खुर्नी डो च्‍यी सिनी गोङ्‍बा शुसिमा पिलातसकी तीला येशूकी फुङ्‍बु बिन सिनी योक कुसुङ।
MAT 27:59 तमा योसेफकी येशूकी फुङ्‍बु ति खुर गल्‍नी रा नेङेनकी नाङ्‍ला टिल्‍सुङ,
MAT 27:60 तमा खोरो थोक्‍ला दो पुङ्‍नी जोवु शेप मीला ज्‍योकुप टककी फुक सम्‍बी नाङ्‍ला येशूकी फुङ्‍बु ज्‍याक्‍नी दो ग्‍येर्पु यी रिल वानी ती टककी फुककी खला ग्‍यम ज्‍याक्‍नी गाल्‍सुङ।
MAT 27:61 ती पेला ती टककी फुककी चाला मरियम मग्‍दलिनी ताङ यम्‍बा मरियम ति येशूकी फुङ्‍बु ज्‍योकुप ति ल्‍हानी देनोक।
MAT 27:62 ती सला ङासोप ङ्‍यिमी छेर्मु कोङ्‍यार छ्‍येतिवा ताङ फरिसीतिवा पिलातसकी ते जोम्‍नी दुक सिक्‍यासुङ,
MAT 27:63 “पिलातस ला, ती जिनोक जोप मी तीकी सेन्‍बु वोतुप पेला ङ्‍यिमा सुमकी तिङ्‍ला खोरुङ शेप ने येलुङ सेन्‍बु लङ्‍यिन सिनी सिक्‍यावु ति ङ्‍यिराङला टासा वे।
MAT 27:64 तुक क्‍यानी ङ्‍यिमा सुम सेक तीला ज्‍यकुप टककी फुकला मक्‍मीतिवा ज्‍याक्‍नी ल्‍यामु क्‍यानी र्‍हेन सिनी क नाङ। मिसियाङ तीकी लोमातिवा वानी तीकी रो ति कुन क्‍या गल्‍नी ‘खो याङ शेप ने ङोसु लासुङ।’ सिनी मीतिवाला सिवी। तुक क्‍यासिन तिवी जोवु तिङकी जिनोक ति गोमीकी सिनाङ मङ मेलोक्‍पा डिवी।”
MAT 27:65 तमा पिलातसकी तिवाला “ख्‍यिरा मुला वोतुप र्‍हेन्‍दुप मक्‍मीतिवा टि गल्‍नी ख्‍यिरा अछ्‍योता सेक ल्‍यामु क्‍यानी र्‍हेन च्‍यी।” सिनी सिक्‍यासुङ।
MAT 27:66 तमा तिवा गल्‍नी शेप मीला ज्‍योकुप टककी फुककी खला कपुप दो ति बे मुथुपु जोसिमा मक्‍मीतिवाला ज्‍याक्‍नी तीला ल्‍यामु क्‍यानी र्‍हेन च्‍यिसुङ।
MAT 28:1 ङासोप ङ्‍यिमा सिन्‍सिमा जा ङ्‍यिमी टोपला टेताङ मरियम मग्‍दलिनी ताङ यम्‍बा मरियम ति येशूकी फुङ्‍बु ज्‍यकुप टककी फुकला ल्‍हापला गाल्‍नोक।
MAT 28:2 ते शार्क्येक सयी ग्‍येर्पु ग्‍यप्‍सुङ, तमा चोवो कोन्‍छ्‍योककी लेन क्‍योलुप थु यी देवाच्‍येन नेमा वानी टककी फुककी खला च्‍येतुप दो ग्‍येर्पु ति दोनी ती दे खला देसुङ।
MAT 28:3 तीकी ङुतुङ ति चिलाम ग्‍यपुप दोके ठदिङी ताङ तीकी मज्‍या ति वोमा दोके छासे कर्मु नोक।
MAT 28:4 तीला थोङ्‍सिमा ते र्‍हेन्‍दुप मक्‍मीतिवा ज्‍यिवा लानी र्‍हुकिन सिरा शेप दोके गाल्‍नोक।
MAT 28:5 यिने ती देवाच्‍येनकी लेन क्‍योलुप थु तीकी ती पुम्‍पेजातिवाला “ख्‍यिराङ ज्‍यिवा माकी। ख्‍यिराङ ग्‍यङ्‍शिङला कल्‍नी काँडी दाप्‍नी सेतुप येशूला छलुप ति ङला छ्‍या वे।
MAT 28:6 खो याङ दे मे, खोकी सुङ्‍गुप दोके खो टुङ्‍गुप ने ङोसु लासुङ। दे वानी खोकी फुङ्‍बु ज्‍यकुप दासाला ल्हो।
MAT 28:7 तमा ख्‍यिराङ टिम्‍बु गल्‍नी खोकी लोमातिवाला ‘खो याङ शेप ने ङोसु लानी ख्‍यिराङ सिनाङ गोमाला के गालीलला फेपिन वे। ख्‍यिरा खोला ते राङ ठेकिवी।’ सिनी लोप। दी ति ङे ख्‍यिराङला सिक्‍यावु ताम्‍ङे यिन।” सिनी सिक्‍यासुङ।
MAT 28:8 ती थोसिमा पुम्‍पेजातिवा सेमला ज्‍यिवा ताङ गा कियी सिरा तेसुर शार्क्येक थेन्‍नी ती लेन ति खोकी लोमातिवाला तेरुपला टिम्‍बु टिम्‍बु छ्‍योङ्‍बाल ग्‍यप्‍नी गाल्‍सुङ।
MAT 28:9 तिवा डोयी कितुप पेला येशू शार्क्येक लामला तिवाला ठेनी, “ख्‍यिराङला लोदिमु वुङ्‍शी!” सिनी सुङ्‍सुङ। तमा तिवा खोकी चाला गल्‍नी खोकी शापला जिमिन सिरा खोला शावा क्‍यासुङ।
MAT 28:10 तमा येशूकी तिवाला सुङ्‍सुङ, “ज्‍यिवा माकी। ख्‍यिराङ गल्‍नी ङे लोमातिवाला गालीलला ग्‍युक सिनी लोप। ते तिवी ङला ठेकिवी।”
MAT 28:11 तमा ती पुम्‍पेजातिवा लामला डोयी कितुप पेला येशूला ज्‍यकुप टककी फुकला र्‍हेन्‍दुप मक्‍मीतिवा ललाइ ति ग्‍येसाला गल्‍नी कोङ्‍यार छ्‍येतिवाला ते च्‍युङ्‍गुप तेरी ताम्‍ङेतिवा सिक्‍यासुङ।
MAT 28:12 तमा कोङ्‍यार छ्‍येतिवा यहूदी गोमा कितुप छ्‍येतिवा ताङ मुला जोम्‍नी केवुल क्‍यासिमा
MAT 28:13 र्‍हेन्‍दुप मक्‍मीतिवाला टङ्‍गा बङी तेरिन सिरा दुक सिक्‍यासुङ, “ख्‍यिरा ‘नुपला ङ्‍यिराङ ङ्‍यी गलुप पेला येशूकी लोमातिवा वानी तीकी रो ति कुनी खुन गाल्‍नोक।’ सिनी सिसा।
MAT 28:14 दोजो रोमी ठिम कितुप मी छ्‍येकी दी ताम्‍ङे थोसिनाङ ङ्‍यिराङ तीकी मुला ताम्‍ङे ल्‍यामु क्‍यानी ख्‍यिराङला काङ साङ दुक्‍पा तेर मिज्‍यितो।” सिनी सिक्‍यासुङ।
MAT 28:15 तमा र्‍हेन्‍दुप मक्‍मीतिवी टङ्‍गा लानी तिवी लापुप दोके तेरी क्‍यासुङ। ती ताम्‍ङे ति तसाम सेक साङ यहूदीतिवी पर्ला टम्‍नी नोक।
MAT 28:16 तमा येशूकी लोमा मिरा च्‍युच्‍यिकतिवा गालीलला गल्‍नी खोकी तिवाला ग्‍युक सिनी सुङ्‍गुप पम्‍दोकला गाल।
MAT 28:17 ते तिवी येशूला थोङ्‍नी खोला शावा क्‍यासुङ। यिने ललाइकी खो येशू यिन्‍दे मिन्‍दे सिनी नो क्‍यासुङ।
MAT 28:18 तमा येशू तिवी चाला राङ फेप्‍नी तिवाला दुक सुङ्‍सुङ, “जम्‍बुलिङ ताङ देवाच्‍येनकी तेरी ओङ्‍ज्‍येन ति कोन्‍छ्‍योककी ङला नङ वे।
MAT 28:19 ती तप्‍की ख्‍यिराङ गल्‍नी लुङ्‍बा तेरीकी मिरिकतिवाला ङे लोमा जो, तमा पपा कोन्‍छ्‍योक ताङ पुज्‍युङ ताङ खोकी थु चाङ्‍माकी मिङला तिवाला बप्‍तिस्‍मा बिन।
MAT 28:20 तमा ख्‍यिराङला ङे क बिन्‍दुप तेरी ताम्‍ङेतिवा तिवाला लाप्‍नी ङ्‍येन च्‍यी। वुतुङ के ङ दी जम्‍बुलिङ ना मागाला सेक ख्‍यिरा मुला राङ नरी देतिनो।”
MAR 1:1 कोन्‍छ्‍योककी सेवु येशू ख्रीष्‍टकी लेन ल्‍यामु ति दुक क्‍यानी गो चुसुङ।
MAR 1:2 कोन्‍छ्‍योककी लुङ्‍तेम्‍बा यशैयाकी टिवु कोन्‍छ्‍योककी सुङ नाङ्‍ला, “ल्‍होसा, ङ ङे लेन क्‍योलुप मीला ख्‍योरे गोमाला तोङ्‍यिनो। तीकी ख्‍योरे लाम टडिक किवितो।
MAR 1:3 दासा पाङ्‍थेरीला दुक सिनी च्‍यार देन्‍दुप वोरु ग्‍येकितो, ‘चोवो फेपुप लाम टडिक की। खो फेपुप लाम थेकाङ जो।’”
MAR 1:4 तमा बप्‍तिस्‍मा तेरुप यूहन्‍नाकी दासा पाङ्‍थेरीला वानी मीतिवाला दिक्‍पा ने थर्वा ङ्‍येतुपकी थोक्‍ला दिक्‍पा ने सेम ग्‍युरुप बप्‍तिस्‍माकी कोर्ला ख्‍याप्‍टाक क्‍यासुङ।
MAR 1:5 तमा यहूदिया लुङ्‍बा ताङ यरूशलेमकी मीतिवा तेरी तीकी चाला गल्‍नी खोरो दिक्‍पा क्‍यावु यिन सिनी ती नेसुर यर्दन चङ्‍बुला बप्‍तिस्‍मा लासुङ।
MAR 1:6 यूहन्‍नाकी ति सेम्‍ज्‍येन वोङ्‍मी पु नेसुर जोवु मज्‍या कोन्‍नोक, तीकी केल्‍दाङला ति क्‍वाकी करा च्‍यिङ्‍गिनोक, तमा च्‍युच्‍यु पे ताङ टाराङ सेनोक।
MAR 1:7 तमा तीकी दुक सिनी ख्‍याप्‍टाक क्‍यासुङ, “ङ सिनाङ ओङ छ्‍ये वोतुप ति ङे तिङ्‍ला फेप्‍कितो। ङ याङ कुक क्‍यानी खोकी शप्‍चेकी र्‍हाम्‍डोक डोलुप साङ पोमु मेङ्‍गिवी।
MAR 1:8 ङे ख्‍यिराङला छ्‍यु थ्‍वोनी बप्‍तिस्‍मा बिनिन, यिने खोकी ख्‍यिराङला कोन्‍छ्‍योककी थु चाङ्‍मा नेसुर बप्‍तिस्‍मा नङ्‍गितो।”
MAR 1:9 ती पेला येशू गालीलकी नासरत ने फेप्‍नी यर्दन चङ्‍बुला यूहन्‍ना नेसुर बप्‍तिस्‍मा लासुङ।
MAR 1:10 येशू छ्‍यी नाङ ने पाङ्‍ला थेन्‍दुप पेला शार्क्येक देवाच्‍येन सेङ्‍गुप ताङ कोन्‍छ्‍योककी थु चाङ्‍मा गम्‍देर दोके क्‍यानी खोरो खला पापुप ति खोकी थोङ्‍सुङ।
MAR 1:11 तमा देवाच्‍येन नेमा दुका वोरु यी ग्‍यप्‍सुङ, “ख्‍युरुङ ङे ङ्‍यिङ्‍ज्‍येवु पुज्‍युङ यिन। ङ ख्‍योरो मुला छासे गा वे।”
MAR 1:12 तमा शार्क्येक कोन्‍छ्‍योककी थु चाङ्‍माकी येशूला दासा पाङ्‍थेरीला ताङ्‍सुङ।
MAR 1:13 येशू ङ्‍यिमा खल ङ्‍यी सेक ते ज्‍युसुङ। तमा शैतानकी खोला खोक्‍पा ल्‍हासुङ। खो रितकतिवी मुला ज्‍युसुङ। ती पेला देवाच्‍येनकी लेन क्‍योलुप थुतिवी खोला शब्‍ज्‍यी पुल्‍सुङ।
MAR 1:14 यूहन्‍ना चोन्‍खाङला शोर्सिमा येशू गालील लुङ्‍बाला फेप्‍नी कोन्‍छ्‍योककी लेन ल्‍यामु ख्‍याप्‍टाक क्‍या नाङ्‍सुङ।
MAR 1:15 खोकी मीतिवाला सुङ्‍सुङ, “कोन्‍छ्‍योककी तुजे छे सिन वे, खोकी ग्‍येल्‍खाप चिप्‍ला वा वे। ख्‍यिराङ दिक्‍पा ने सेम ग्‍युर्नी खोकी लेन ल्‍यामुला तेपा की।”
MAR 1:16 ङ्‍यिम्‍ज्‍यिक येशू गालीलकी ग्‍येम्‍छो गारी ने फेप्‍सालेन्‍सिन सिमोन ताङ तीकी नुप अन्‍द्रियास ति ग्‍येम्‍छोला ङ्‍या जिम्‍बुपला जाल क्‍युरिन वोतुप थोङ्‍सुङ, च्‍यिलासिसिन तिवा ति ङ्‍या जिम्‍बुप मी यिनोक।
MAR 1:17 तमा येशूकी तिवाला “ङे तिङ्‍ला तिङ्‍यो। ङ ख्‍यिराङला ङ्‍या जिम्‍बुप मिन, मीतिवा जिम्‍बुप मी जोयिनो।” सिनी सुङ्‍सुङ।
MAR 1:18 ती थोसिमा तिवा शार्क्येक ङ्‍या जिम्‍बुप जालतिवा क्‍युर ज्‍याक्‍नी येशूकी तिङ्‍ला तिङ्‍यासुङ।
MAR 1:19 तेसुर येशू फेचेक फेपुप पेला जब्‍दियाकी पुज्‍युङ याकूब ताङ तीकी नुप यूहन्‍ना ति टी नाङ्‍ला देनी जाल ल्‍हेन्‍दा ग्‍यकिन वोतुप थोङ्‍नी
MAR 1:20 खोकी शार्क्येक तिवाला कताङ्‍सुङ। तमा तिवा खोप्‍रे पपा जब्‍दियाला ति लावातिवी मुला टुला क्‍युर ज्‍याक्‍नी शार्क्येक येशूकी तिङ्‍ला तिङ्‍यासुङ।
MAR 1:21 येशू खोरो लोमातिवी मुला कफर्नहुम ग्‍येसाला फेप्‍सुङ। तमा ङासोप ङ्‍यिमाला खो यहूदी छ्‍योखाङला फेप्‍नी मीतिवाला येन्‍देन नाङ्‍सुङ।
MAR 1:22 खोकी येन्‍देन थोनी ते वोतुप मीतिवा हलेवा क्‍यासुङ, च्‍यिलासिसिन खोकी येन्‍देन ति यहूदी छ्‍योकी गेकेनतिवी क्‍यावु दोके मिन, यिने खोरे ओङ्‍ज्‍येन नेमा राङ नाङ्‍नोक।
MAR 1:23 ती पेला यहूदी छ्‍योखाङ नाङ्‍ला डेकी कुलुप मी यी नोक। तीकी ति च्‍यार देनिन सिरा सिक्‍यासुङ,
MAR 1:24 “ओ नासरतकी येशू, ख्‍युरुङ ङ्‍यिराङला काङ कितुप छोलुप यिन? काङ ख्‍युरुङ ङ्‍यिराङला ना तोङ्‍गुपला फेवु यिन? ख्‍युरुङ सु यिन सिनी ङला छ्‍या वे, ख्‍युरुङ कोन्‍छ्‍योककी तङ्‍गुप मी टेङ्‍बु यिन।”
MAR 1:25 तमा येशूकी ती डेला वोरु तेन्‍नी सुङ्‍सुङ, “ख्‍युरुङ खरक्‍पा देनी ती मी नाङ नेसुर थेन ग्‍युक!”
MAR 1:26 खोकी तुक सुङ्‍लुङ्‍मे ती डे ति ती मीला छासे र्‍हुक च्‍यिनी च्‍यार ग्‍येर्पु यी देनिन सिरा पाङ्‍ला थेन गाल।
MAR 1:27 ती थोङ्‍सिमा मी तेरी हलेवा लानी, “ओए! दी काङ यिन? दी याङ ओङ छ्‍येवु येन्‍देन सम्‍बा के नोक। दी मी तीकी खोरो ओङ्‍ज्‍येन नेमा डेतिवाला क नङ्‍सिमा तिवी ती कला ङ्‍येन्‍गिनोक।” सिनी सिक्‍यासुङ।
MAR 1:28 तमा येशूकी क्‍या नङ्‍गुप लाकाकी लेन ति शार्क्येक गालील लुङ्‍बाकी छो ज्‍यीला टाम्‍सुङ।
MAR 1:29 तमा येशू यहूदी छ्‍योखाङ नेसुर थेन्‍नी शार्क्येक याकूब ताङ यूहन्‍ना मुला सिमोन ताङ अन्‍द्रियासकी खाङ्‍बा फेप्‍सुङ।
MAR 1:30 ती पेला सिमोनकी यिवी ति छा ग्‍यप्‍नी ङ्‍यिलोक्‍नोक। तमा तिवी तीकी कोर्ला येशूला सिक्‍यासुङ।
MAR 1:31 दी थोसिमा येशू तीकी चाला फेप्‍नी तीकी लाक्‍पाला जिम्‍नी येर लाङ्‍सुङ। लाङ्‍सिमा तीकी छा टेक्‍नी तीकी खोतिवाला शब्‍ज्‍यी पुल्‍सुङ।
MAR 1:32 ती गोमु ङ्‍यिमा गासिमा मीतिवी नेर्पु ताङ डे ग्‍यपुप मीतिवाला येशूकी चाला टि लेसुङ।
MAR 1:33 तमा ग्‍येसाकी मी तेरी खो ज्‍युवु खाङ्‍बी गे चाला जोम्‍सुङ।
MAR 1:34 येशूकी नेजु नम्‍बा बङी वोतुप नेर्पुतिवाला टेक च्‍यिसुङ। तमा खोकी मीतिवी नाङ नेमा डेतिवा बङी तेन्‍सुङ। यिने येशूकी डेतिवाला ताम्‍ङे लप माच्‍यी, च्‍यिलासिसिन येशू सु यिन सिरुप ति तिवाला छ्‍या नोक।
MAR 1:35 तेसुर येशू टोपला टेताङ लानी कुसुमी दासाला फेप्‍नी ते राङ मोपोर क्‍यासुङ।
MAR 1:36 ती पेला सिमोन ताङ तीकी मुला वोतुपतिवा येशूला छोलिन नोक।
MAR 1:37 तिवी येशूला ठेसिमा, “मी तेरीकी गेकेनला छोलिन नोक।” सिनी सिक्‍यासुङ।
MAR 1:38 येशूकी तिवाला सुङ्‍सुङ, “दाक्‍पु चाला वोतुप यम्‍बा युल युलला डोप। ते साङ ङ ख्‍याप्‍टाक कितिन, च्‍यिलासिसिन ङ दी लाका कितुप थोक्‍ला राङ वावु यिन।”
MAR 1:39 तेसुर खो तेरी गालील लुङ्‍बा ताङ यहूदी छ्‍योखाङतिवाला फेप्‍नी ख्‍याप्‍टाक कितुप ताङ डेतिवाला तेन्‍सुङ।
MAR 1:40 ती पेला जे ग्‍यपुप मी मिरा च्‍यिक येशूकी चाला वानी पुमुङ सला चुनी दुक सिनी गोङ्‍बा शुसुङ, “गेकेनकी नो वोसिन ङला टेक ज्‍यि थुप्‍किवी।”
MAR 1:41 तमा खोकी तीला ङ्‍यिङ्‍ज्‍ये लानी छ्‍याक क्‍याङ्‍नी तीला रेक्‍नी दुक सुङ्‍सुङ, “ङला नो वे, ख्‍युरुङ टेक्‍शी।”
MAR 1:42 खोकी तुक सुङ्‍लुङ्‍मे ती मी ति जे ग्‍यपुप नेजु नेसुर टेक्‍सुङ।
MAR 1:43 तमा येशूकी तीला क छ्‍येम्‍बु नाङ्‍नी दुक सिनी ताङ्‍सुङ,
MAR 1:44 “ल्‍होसा, सुला साङ काङ ताम्‍ङे मालाप। त गल्‍नी ख्‍योरो जु कोङ्‍यारला छ्‍या तेन, तमा ख्‍योरे जु टेकुप कोर्ला मोशाकी क बिन्‍दुप दोके जिन्‍बा पुल्‍नी मीतिवाला पङ्‍बु बिन।”
MAR 1:45 यिने ती मी ति पाङ्‍ला गल्‍नी ती तेरी ताम्‍ङे टाम्‍सुङ। तुक क्‍यानी येशू मी मिङ्‍गाला ग्‍येसाला फेप माथुप्‍नी कुसुमी दासाला ज्‍युसुङ। यिन्‍सिनाङ मीतिवा छो ज्‍यी नेसुर खोकी चाला लेसुङ।
MAR 2:1 ङ्‍यिमा चेयी ज्‍युक्‍ला येशू येलुङ कफर्नहुम ग्‍येसाला फेप्‍सुङ। तमा खो खाङ्‍बा यी नाङ्‍ला ज्‍यु वोतुप थोनी
MAR 2:2 मीतिवा ती खाङ्‍बा ति खटेक जोम्‍नी खाङ्‍बी फिला नाङ्‍ला काङ्‍बा ज्‍योकुप दासा साङ माच्‍युङ। तमा तोजो पेला येशूकी तिवाला कोन्‍छ्‍योककी सुङ ख्‍याप्‍टाक कियी नोक।
MAR 2:3 ती पेला लाक्‍पा काङ्‍बा शोरुप मी यीला मिरा ज्‍यीकी खुर्नी ते लेसुङ।
MAR 2:4 ते मी मङ्‍मु वोतुप तप्‍की तिवी ती मी तीला येशूकी चाला खुन डो माथुप। तमा तिवी येशू ज्‍यु वोतुप खाङ्‍बी फी ने केला टापा जेन गल्‍नी ती खाङ्‍बी थोक लोक्‍नी ती लाक्‍पा काङ्‍बा शोरुप मीला सप्‍तेन ताङ डके येशूकी चिप्‍ला पाप्‍सुङ।
MAR 2:5 तिवी तेपा थोङ्‍नी येशूकी ती लाक्‍पा काङ्‍बा शोरुप मी तीला सुङ्‍सुङ, “पुज्‍यो! ख्‍योरो दिक्‍पातिवा तासुङ।”
MAR 2:6 दी थोनी ते वोतुप यहूदी छ्‍योकी गेकेनतिवी खोप्‍रे सेमला दुक सिनी नासाम ताङ्‍नोक,
MAR 2:7 “च्‍यिला दी मी तीकी दुका ताम्‍ङे कि ताङ? दीकी याङ कोन्‍छ्‍योकला के मारे तोङ्‍गिनोक। कोन्‍छ्‍योक मिसिन सी दिक्‍पातिवा ता ज्‍यि थुप्‍किवी?”
MAR 2:8 येशूकी तिवी सेमला दुकै नासाम तङ्‍गुप ति शार्क्येक हाक्‍कोनी तिवाला सुङ्‍सुङ, “ख्‍यिरा च्‍यिला दुका नासाम तोङ्‍गिवी?
MAR 2:9 दी लाक्‍पा काङ्‍बा शोरुप मीला ‘ख्‍योरो दिक्‍पातिवा तासुङ।’ सिरुप ताङ ‘ख्‍योरो सप्‍तेन खुर्नी ग्‍युक।’ सिरुप ताम्‍ङे नाङ ने चुका ति जोल्‍हमु यिनाङ?
MAR 2:10 यिने ङ मी पुज्‍युङला जम्‍बुलिङला दिक्‍पा ता ज्‍यितुप ओङ वे सिरुप ति ङ ख्‍यिराङला हाक्‍को ज्‍यितिन।” तमा येशूकी ती लाक्‍पा काङ्‍बा शोरुप मीला सुङ्‍सुङ,
MAR 2:11 “ङ ख्‍युरुङला सिरिन, ख्‍युरुङ खोक लानी ख्‍योरो सप्‍तेनतिवा खुर्नी खाङ्‍बा ग्‍युक।”
MAR 2:12 खोकी तुक सुङ्‍लुङ्‍मे ती लाक्‍पा काङ्‍बा शोरुप मी ति खोक लानी शार्क्येक तेरी मीतिवी थोङ्दाङला खोरो सप्‍तेन खुर्नी गाल्‍सुङ। तमा ते वोतुप मीतिवा तेरी छासे हलेवा क्‍यानी, “दुका लाका याङ ङ्‍यिरा नाम्‍साङ माथोङ!” सिनी कोन्‍छ्‍योकला सोवा तेक्‍सुङ।
MAR 2:13 ती ज्‍युक्‍ला येशू येलुङ ग्‍येम्‍छोकी गारीला फेप्‍सुङ। ते मी बङी खोकी चाला जोम्‍सालेन्‍सिन खोकी तिवाला येन्‍देन नाङ्‍सुङ।
MAR 2:14 तमा तेसुर येशू फेप्‍सालेन्‍सिन अल्‍फयसकी पुज्‍युङ लेवी ति से दुतुप लेखुङला देतुप थोङ्‍नी खोकी तीला “ख्‍युरुङ ङे तिङ्‍ला तिङ्‍यो।” सिनी सुङ्‍सुङ। तमा ती लेवी ति खोक लानी खोकी तिङ्‍ला तिङ्‍यासुङ।
MAR 2:15 ती ज्‍युक्‍ला येशू लेवीकी खाङ्‍बा सोल शेवुला ज्‍युसालेन्‍सिन ते से दुतुप मीतिवा ताङ दिक्‍छेनतिवा खो ताङ खोकी लोमातिवी मुला देनी समा सयिन नोक, च्‍यिलासिसिन ते खोला तिङ्‍योकुपतिवा बङी नोक।
MAR 2:16 ती पेला खो दिक्‍छेनतिवा ताङ से दुतुपतिवी मुला सोल शेयी वोतुप थोङ्‍नी फरिसी छोक्‍पाकी यहूदी छ्‍योकी गेकेनतिवी खोकी लोमातिवाला टिसुङ, “तीकी च्‍यिला से दुतुपतिवा ताङ दिक्‍छेनतिवी मुला देनी समा सोवु यिन?”
MAR 2:17 दी थोनी येशूकी तिवाला सुङ्‍सुङ, “नेजु मेतुपतिवाला ति आम्‍ज्‍यी मोगोवी, यिने नेर्पुतिवाला याङ गोकिवी। ङ ति खुरुङ राङ मी टेङ्‍बु यिन सिरुपतिवी थोक्‍ला मिन, खुरुङ दिक्‍छेन यिन सिरुपतिवाला कतोङ्‍गुपला वावु यिन।”
MAR 2:18 ती पेला यूहन्‍नाकी लोमातिवा ताङ फरिसीतिवा ङ्‍युङ्‍ने र्‍हुङ्‍गिनोक। तमा ललाइ मीतिवा वानी येशूला टिसुङ, “यूहन्‍नाकी लोमातिवा ताङ फरिसीतिवी लोमातिवा ति ङ्‍युङ्‍ने र्‍हुङ्‍गिनोक, यिने ख्‍योरो लोमातिवा च्‍यिला ङ्‍युङ्‍ने मुर्‍हुङ्‍गिवी?”
MAR 2:19 दी थोनी येशूकी तिवाला सुङ्‍सुङ, “काङ जेन्‍दीकी मीतिवा माक्‍पा ताङ मुला वोता सेक ङ्‍युङ्‍ने र्‍हुङ थुप्‍किवी रो? माक्‍पा तिवी मुला देता सेक तिवा ङ्‍युङ्‍ने र्‍हुङ मुथुपी।
MAR 2:20 यिने माक्‍पाला ठोनी डोप ङ्‍यिमा गिवी, ती पेला तिवा ङ्‍युङ्‍ने र्‍हुङ्‍गिवी।”
MAR 2:21 “सी साङ मज्‍या ङ्‍यिङ्‍बाला ल्‍हेन्‍दा सम्‍बा मग्‍यकिवी। ग्‍यप्‍सिन ती ल्‍हेन्‍दा सम्‍बा तीकी मज्‍या ङ्‍यिङ्‍बा ति गोमी सिनाङ मङ रल ज्यिकिवी।
MAR 2:22 येलुङ सी साङ क्‍वाकी ग्‍यिवु ङ्‍यिङ्‍बी नाङ्‍ला गुन्‍डुम छ्‍याङ सम्‍बा मुलुकिवी। लुक्‍सिन ती क्‍वा ग्‍यिवु ङ्‍यिङ्‍बा रल्‍नी छ्‍याङ ताङ ग्‍यिवु ङ्‍यिकर ना डिवी। तुक क्‍यानी छ्‍याङ सम्‍बा ति क्‍वा ग्‍यिवु सम्‍बाला राङ लुक गोकिवी।”
MAR 2:23 ङासोप ङ्‍यिमाला येशू ताङ खोकी लोमातिवा टे शिङ ख नेवा क्‍यानी फेपिन कितुप पेला लोमातिवी टे ङ्‍यिमा थुसुङ।
MAR 2:24 ती थोङ्‍नी फरिसीतिवी येशूला “ल्‍हो ताङ, ङासोप ङ्‍यिमाला कितुप मेङ्‍गुप लाका तिवी च्‍यिला क्‍यावु यिन?” सिनी सिक्‍यासुङ।
MAR 2:25 तमा येशूकी तिवाला सुङ्‍सुङ, “ग्‍येल्‍वु दाऊद ताङ तीकी मुला वोतुपतिवा साप समा मेनी ल्‍होवा लावु पेला काङ क्‍यासुङ सिरुप ति ख्‍यिरा मारा?
MAR 2:26 अबियाथार तेरी सिनाङ कोङ्‍यार छ्‍ये वोतुप पेला दाऊदकी कोन्‍छ्‍योकला सोवा देकुप खाङ्‍बी नाङ्‍ला शुनी कोङ्‍यारतिवी मिसिन यम्‍बा सी साङ साप मेङ्‍गुप कोन्‍छ्‍योकला पुलुप शुब्‍ज्‍याङ सोनी तीकी मुला वोतुपतिवाला साङ माबिन रो?”
MAR 2:27 तमा लोङ खोकी तिवाला सुङ्‍सुङ, “ङासोप ङ्‍यिमा ति मी थोक्‍ला जोवु यिन, मी ति ङासोपकी ङ्‍यिमी थोक्‍ला जोवु मिन।
MAR 2:28 तुक क्‍यानी ङ मी पुज्‍युङ ति ङासोप ङ्‍यिमाकी साङ चोवो राङ यिन।”
MAR 3:1 येलुङ येशू यहूदी छ्‍योखाङला फेपुप पेला ते लाक्‍पा च्‍यिक कम्‍बु ठोक गलुप मी यी नोक।
MAR 3:2 ते वोतुप मीतिवा ललाइकी खोला क्‍येन तेरुप नोनी ङासोप ङ्‍यिमाला खोकी ती मी तीला टेक ज्‍यिकिते यिन्‍दे सिनी चिवा क्यानी देसुङ।
MAR 3:3 येशूकी ती लाक्‍पा कम्‍बु ठोक गलुप मी तीला “मी तेरीकी दोङ्‍ला लो।” सिनी सुङ्‍सुङ।
MAR 3:4 तमा खोकी तिवाला “ङासोप ङ्‍यिमाला लाका ल्‍यामु कितुप टेके यिनाङ की, मेलोक्‍पा कितुप टेके यिन? तमा मिजी थर ज्‍यितुप टेके यिनाङ की, सेतुप टेके यिन?” सिनी टिसुङ। यिने तिवा खरक्‍पा सोके देसुङ।
MAR 3:5 येशू ङ्‍यिर्मु लानी तिवा तेरीला ल्‍हासुङ। तमा तिवी सेम क्‍योङ्‍बु वोतुप थोङ्‍नी छासे सेम्‍दुक लानी ती लाक्‍पा कम्‍बु ठोक गलुप मीला “ख्‍योरे लाक्‍पा क्‍योङ।” सिनी सुङ्‍सुङ। तमा तीकी लाक्‍पा क्‍याङ्‍सुङ, क्‍याङ्‍सिमा तीकी लाक्‍पा टेक्‍सुङ।
MAR 3:6 ती ज्‍युक्‍ला फरिसीतिवा पाङ्‍ला गल्‍नी हेरोदी छ्‍योक्‍पाकी मीतिवी मुला येशूला चुक क्‍यानी सेतुप सिनी खोप्‍राङ पर्ला केवुल क्‍यासुङ।
MAR 3:7 तेसुर येशू खोरे लोमातिवी मुला ग्‍येम्‍छो गारीला फेप्‍सालेन्‍सिन गालील लुङ्‍बा नेसुर मी माङ्‍छ्‍योक खोकी तिङ्‍ला तिङ्‍यासुङ।
MAR 3:8 ती पेला यहूदिया ताङ यरूशलेम ताङ इदुमिआ ताङ यर्दनकी फर्केन नेसुर ताङ टुरोस ताङ सीदोनकी गारी गुरी नेमा साङ मी माङ्‍छ्‍योक येशूकी क्‍यावु हलेवु लाकाकी कोर्ला थोनी खोकी चाला लेसुङ।
MAR 3:9 मी माङ्‍छ्‍योककी खोरुङला मेटेप्‍शी सिनी येशूकी लोमातिवाला खोरो थोक्‍ला टु च्‍यिक टडिक कि सिनी सुङ्‍सुङ।
MAR 3:10 च्‍यिलासिसिन खोकी मी मङ्मुला टेक च्‍यितुप तप्‍की नेर्पुतिवा तेरी खोला रेक्‍शी सिनी खोकी चाला सुर्तुम ग्‍यकिन नोक।
MAR 3:11 तमा डेतिवी येशूला चो पेला थोङ्‍गिवे, ती पेला राङ तिवा खोकी चाला खवुतुङ्‍मा देनी, “ख्‍युरुङ कोन्‍छ्‍योककी सेवु यिन।” सिनी चार ग्‍यप्‍सुङ।
MAR 3:12 यिने खोकी तिवाला खोरुङ सु यिन सिरुप ति मासिर सिनी क छ्‍येम्‍बु नाङ्‍सुङ।
MAR 3:13 ती ज्‍युक्‍ला येशू रीला फेप्‍नी खोकी नोवाला वोतुपतिवाला खोकी चाला कताङ्‍सुङ, तमा तिवा खोकी चाला वासुङ।
MAR 3:14 खोकी तिवी नाङ ने मिरा च्‍यिङ्‍ङी पेनी तिवाला लोमा छ्‍ये सिनी चिसुङ।
MAR 3:15 खोकी दुक क्‍यावु तेन्‍दोक ति तिवा खोकी मुला देतुप ताङ खोकी तिवाला ख्‍याप्‍टाक कितुप तोङ्‍गुप ताङ तिवाला डेतिवा थेन्‍दुप ओङ तेरुपला यिन।
MAR 3:16 खोकी चिवु मिरा च्‍यिङ्‍ङी नाङ्‍ला च्‍यिक ति सिमोन यिन। तीला ति खोकी पत्रुस सिनी मिङ तासुङ।
MAR 3:17 तमा जब्‍दियाकी पुज्‍युङ याकूब ताङ तीकी नुप यूहन्‍ना यिन। तिवाला ति खोकी बोअनर्गेश सिनी मिङ तासुङ। बोअनर्गेशकी तेन्‍दोक ति ‘डुककी पुज्‍युङतिवा’ यिन।
MAR 3:18 तमा अन्‍द्रियास ताङ फिलिप ताङ बारथोलोमाइ ताङ मत्ती ताङ थोमा ताङ अल्‍फयसकी पुज्‍युङ याकूब ताङ थेदियस ताङ कनानकी मी सिमोन ताङ
MAR 3:19 यहूदा इस्‍करियोत यिन। ती यहूदा इस्‍करियोत ति येशूला जिम्‍नी तेरुप मी यिन।
MAR 3:20 तमा येशू खाङ्‍बा यीला फेप्‍सुङ, ते येलुङ मी मङ्‍मु जोम्‍बुप तप्‍की खो ताङ खोकी लोमातिवाला समा सलुङ साङ माच्‍युङ।
MAR 3:21 ती ताम्‍ङे थोनी खोकी मिछाङतिवा खोला टि डोपला लेसुङ, च्‍यिलासिसिन मीतिवी “खोकी सेम थिला मिन्‍दुक।” सिनी सिक्‍यानोक।
MAR 3:22 तमा यरूशलेम ने वावु यहूदी छ्‍योकी गेकेनतिवी “येशूला डेतिवी ग्‍येल्‍वु बालजिबुल ग्‍यम्‍नोक, तमा ती बालजिबुलकी ओङ नेसुर राङ तीकी डेतिवा देन्‍गिनोक।” सिनी सिक्‍यासुङ।
MAR 3:23 ती थोनी येशूकी तिवाला खोरो चाला कताङ्‍नी पे नेसुर दुक सुङ्‍सुङ, “चुक क्‍यानी शैतानकी शैतानला थेन थुप्‍किवी रो?
MAR 3:24 दोजो ग्‍येल्‍खाप च्‍यिककी नाङगी मीतिवा खोप्‍राङ पर्ला ख्‍ये पेसुङ सिसिन ती ग्‍येल्‍खाप ति लु मुथुपी।
MAR 3:25 येलुङ खाङ्‍बा च्‍यिककी नाङगी मीतिवा खोप्‍राङ पर्ला ख्‍ये पेसुङ सिसिन ती खाङ्‍बा ति लु मुथुपी।
MAR 3:26 तमा शैतान खुरुङ राङ ख्‍ये पेसुङ सिसिन ती ति लु मुथुप्‍नी ना डिवी।
MAR 3:27 गोमाला मी रम्‍बुला कोङ माकिन्‍दा सेक्‍ला सी साङ ती मीकी खाङ्‍बी नाङ्‍ला शुनी तीकी च्‍यालक कुन डो मुथुपी। तीला कोङ किन्‍सिमा तिराङ तीकी खाङ्‍बी च्‍यालक कुनी डो थुप्‍किवी।
MAR 3:28 ङ ख्‍यिराङला टेङ्‍बो सिरिन, मीतिवी क्‍यावु तेरी दिक्‍पातिवा ताङ मारे तोङ्‍गुप ताम्‍ङेतिवा ति माफ ङ्‍येकिवी,
MAR 3:29 यिने सी साङ कोन्‍छ्‍योककी थु चाङ्‍माला मारे ताङ्‍सिन तीला ति नाम्‍साङ माफ मेङ्‍येवी, तमा तीला नरी दिक्‍पाकी क्‍येन लुकिवी।”
MAR 3:30 येशूकी दी पे सुङ्‍गुप ति तिवी “खोला डेकी कुलुप यिन।” सिनी सिक्‍यावु तप्‍की यिन।
MAR 3:31 ती पेला येशूकी आमा ताङ नुपतिवा वानी पाङ्‍ला देनी मी च्‍यिक खोला कतोङ ताङ्‍सुङ।
MAR 3:32 तमा मी मङ्‍मु येशूकी गारी गुरीला देनी खोला दुक सिक्‍यासुङ, “ल्‍हो ताङ, गेकेनकी आमा ताङ नुपतिवा पाङ्‍ला गेकेनला ठेतुपला छोलिन नोक।”
MAR 3:33 तमा येशूकी तिवाला टिसुङ, “सु ङे आमा ताङ ङे नुपतिवा यिन?”
MAR 3:34 तमा खोकी खोरे गारी गुरीला देन वोतुपतिवाला ल्‍हानी सुङ्‍सुङ, “ल्‍हो ताङ, ङे आमा ताङ ङे नुपतिवा ति दिवा राङ यिन।
MAR 3:35 सी कोन्‍छ्‍योककी नोवा दोके किवे, तिवा राङ ङे नुप ताङ नुम ताङ आमा यिनो।”
MAR 4:1 येलुङ येशूकी ग्‍येम्‍छो गारीला सुङ लाप नाङ्‍सुङ। ते मी मङ्‍मु खोकी चाला जोम्‍बुप तप्‍की खो टुला जेनी ती टी नाङ्‍ला ज्‍युनी ग्‍येम्‍छो नेवा फेचेक फेप्‍सुङ। ती पेला मीतिवा तेरी ग्‍येम्‍छो गारीकी स कम्‍बुला देन्‍नोक।
MAR 4:2 तमा खोकी तिवाला पे नेसुर सुङ मङ्‍मु लाप नाङ्‍सुङ। खोकी तिवाला दुक सुङ्‍सुङ,
MAR 4:3 “ङ्‍येना! सेन देपुप मी यी सेन देपुपला पाङ्‍ला थेन्‍सुङ।
MAR 4:4 तीकी सेन देप्‍सालेन्‍सिन ललाइ सेन ति लामला ख्‍येल्‍सुङ, तमा च्‍यच्‍युमतिवा वानी ती सेन ति थुनी सोसुङ।
MAR 4:5 ललाइ सेन ति थला अला मेतुप दोप्‍रोक खला ख्‍येल्‍सुङ, तमा ते थला अला मेतुप तप्‍की ती सेन ति ङमु राङ क्‍येसुङ।
MAR 4:6 यिन्‍सिनाङ ङ्‍यिमा शर्सिमा ती ति ङ्‍यिमी छिक्‍सुङ, तमा तीकी मर मेतुप तप्‍की रेर्पा गल्‍नी काम्‍सुङ।
MAR 4:7 ललाइ सेन ति छेर्माङ दोङ्‍बी पर्ला ख्‍येल्‍सुङ। तमा छेर्माङ दोङ्‍बु ग्‍या वानी तीला सेप्‍नी डुमा ग्‍यक माथुप।
MAR 4:8 ललाइ सेन ति स ल्‍यामुला ख्‍येल्‍सुङ। तमा ती ति क्‍येनी ग्‍यासिमा ललाइला दोम्‍बा खल सुम ताङ ललाइला दोम्‍बा खाल टुक ताङ ललाइला दोम्‍बा सयी डुमा ग्‍यप्‍सुङ।”
MAR 4:9 तमा येशूकी सुङ्‍सुङ, “सी ति ङ्‍येन्‍दुप नम्‍ज्‍योक नोके, तीकी ङ्‍येन्‍शी।”
MAR 4:10 ती ज्‍युक्‍ला येशू च्‍यिक राङ ज्‍यु वोतुप पेला खोकी सुङ थोवु मीतिवा ति लोमा च्‍यिङ्‍ङीतिवी मुला खोकी चाला वानी ती पेकी तेन्‍दोक ति काङ यिन सिनी टिसुङ।
MAR 4:11 तमा खोकी तिवाला सुङ्‍सुङ, “ख्‍यिराङला ति कोन्‍छ्‍योककी ग्‍येल्‍खापकी छ्‍याककी ताम्‍ङे बिन वे। यिने कोन्‍छ्‍योककी ग्‍येल्‍खापकी मी मिन्‍दुपतिवाला ति तेरी ताम्‍ङे पेतिवा नेसुर राङ लप्‍किवी।
MAR 4:12 ती ति ‘तिवी ल्‍हाप याङ ल्‍हेवी, यिने मोथोङ्‍गिवी। थोवु याङ थोकिवी, यिने हाक्‍मोकोवी। तुक क्‍यानी तिवी सेम ग्‍युर्नी दिक्‍पा ने माफ ङ्‍ये मिज्‍यिवुला यिन।’”
MAR 4:13 लोङ येशूकी तिवाला सुङ्‍सुङ, “काङ ख्‍यिरा दी पेकी तेन्‍दोक हाक्‍मोकोसिन चुक क्‍यानी तेरी पेतिवा हाक्‍कोकिवी रो?
MAR 4:14 सेन देपुप मी ति कोन्‍छ्‍योककी सुङ ख्‍याप्‍टाक कितुप यिन।
MAR 4:15 तमा लामला ख्‍येलुप सेन ति दुका मीतिवा दोके यिन। तिवाला कोन्‍छ्‍योककी सुङ ख्‍याप्‍टाक कितुप पेला तिवी थोवु ति थोसुङ, यिने शैतान शार्क्येक वानी तीकी थोवु सुङ ति ठोनी डिवी।
MAR 4:16 तमा दोप्‍रोक खला ख्‍येलुप सेन ति दुका मीतिवा दोके यिन। तिवी सुङ थोसिमा शार्क्येक गा लानी ती सुङ ति सेमला लिङ्‍गिवी।
MAR 4:17 यिने ती सुङ ति तिवी सेमगी दिङ्‍ला माज्‍यकुप तप्‍की चेयी पर सेक तिराङ लुकिवी, सुङगी थोक्‍ला कले ताङ छेटाङ ख्‍येल वासिन शार्क्येक तेपा क्‍युर्नी ज्‍योकिवी।
MAR 4:18 लोङ छेर्माङ दोङ्‍बी पर्ला ख्‍येलुप सेन ति दुका मीतिवा दोके यिन। तिवी सुङ ङ्‍येन्‍गिवी,
MAR 4:19 यिने जम्‍बुलिङकी पप ताङ टोङ्‍बाकी नासाम ताङ यम्‍बा ताम्‍ङेकी देर्पाकी ती सुङला क्‍येक्‍नी डेलु मोगोर्वी।
MAR 4:20 यिने स ल्‍यामुला ख्‍येलुप सेन ति दुका मीतिवा दोके यिन। तीकी सुङ थोनी सेमला ज्‍याक्‍नी ललाइला दोम्‍बा खल सुम ताङ ललाइला दोम्‍बा खाल टुक ताङ ललाइला दोम्‍बा सयी डुमा ग्‍यकिवी।”
MAR 4:21 तमा येशूकी तिवाला सुङ्‍सुङ, “सी दिप्‍ली च्‍येनी शोमकी वोक्‍ला याङ्‍ना ठीकी वोक्‍ला ज्‍योकिवी रो? काङ ती ति च्‍योक्‍ची खला मोज्‍योकिवी रो?
MAR 4:22 काङ बानी ज्‍याक्‍वे, ती ति थोङ्‍गिवी। तमा काङ छ्‍याकला ज्‍याक्‍वे, ती ति ठछ्‍येलीला छ्‍या देन्‍गिवी।
MAR 4:23 सी ति ङ्‍येन्‍दुप नाम्‍ज्‍योक नोके, तीकी ङ्‍येन्‍शी।”
MAR 4:24 तमा खोकी सुङ्‍सुङ, “ख्‍यिरा थोवु ताम्‍ङे ति ल्‍यामु क्‍यानी सेमला ज्‍योक। ख्‍यिरा चुका ताप्‍के नेसुर मी यम्‍बाला ताप्‍नी तेर्किवे, ती ताप्‍के नेमा राङ कोन्‍छ्‍योककी ख्‍यिराङला ताप्‍नी नङ्‍गितो, तमा मङ ल्‍हक्‍पा नङ्‍गितो।
MAR 4:25 सी लोला नोके, तीला मङ ल्‍हक्‍पा थोप्‍कितो। तमा सी लोला मेवे, तीकी लोला वोतुप तिङ ठोकितो।”
MAR 4:26 येलुङ येशूकी सुङ्‍सुङ, “कोन्‍छ्‍योककी ग्‍येल्‍खाप ति मी मिरा च्‍यिककी शिङ खला तपुप सेन दोके यिन।
MAR 4:27 ती मी ति नुपला ङ्‍यिलोकुप ताङ ङ्‍यिमी गुङला लङ्‍गुप पेला ती सेन ति क्‍येनी ग्‍येर्पु गल्‍सिनाङ चुक क्‍यानी तुकै च्‍युङ्‍गुप यिन सिरुप ति ती ति हाक्‍मोकोवी।
MAR 4:28 सेन तप्‍सिमा थला ने राङ डुमा ग्‍यकिवी। गोमाला सेन क्‍येकिवी, ती ज्‍युक्‍ला च्‍यङ्‍बा थेन्‍गिवी, तमा तिङ्‍ला ङ्‍यिमा थेन्‍सिमा तीला डुमा ग्‍यकिवी।
MAR 4:29 ङ्‍यिमा छोसिमा शार्क्येक तीला ङकिवी, च्‍यिलासिसिन तीला ङकुप पेला लेप्‍सुङ।”
MAR 4:30 येलुङ येशूकी सुङ्‍सुङ, “कोन्‍छ्‍योककी ग्‍येल्‍खाप ति दाक्‍पु काङ ताङ मुला डिकिवी? तीला चुका पे नेसुर शेतुप?
MAR 4:31 ती ति राय छेर्माङकी सेन दोके यिन। ती ति सला देपुप पेला तेरी सेन सिनाङ ठेमे यिन।
MAR 4:32 यिने तप्‍सिमा ती ति क्‍येनी ग्‍याकिवी, तमा तेरी ङोछेलतिवा सिनाङ दोङ्‍बु ग्‍येर्पु गल्‍नी तीकी येल्‍काला नामगी च्‍यच्‍युमतिवी छाङ जेवी।”
MAR 4:33 येशूकी तिवी हाक्‍कोवा सेक तिवाला पे बङी नेसुर सुङ लाप नाङ्‍सुङ।
MAR 4:34 खोकी तिवाला पे नेसुर मिसिन काङ मासुङ, यिने खो खोरे लोमातिवी मुला कुतुक ज्‍युवु पेला ती तेरी पेतिवी तेन्‍दोक ति सुङ्‍गिनोक।
MAR 4:35 ती छेर्मु सोर्‍हिपला येशूकी खोरो लोमातिवाला “दाक्‍पु ग्‍येम्‍छो फर्केन डोप।” सिनी सुङ्‍सुङ।
MAR 4:36 तमा लोमातिवी मी मङ्‍मुला क्‍युर ज्‍याक्‍नी येशू ज्‍यु वोतुप टुला जेनी खोकी मुला राङ ग्‍येम्‍छो फर्केन डोप छाल्‍सुङ। ती पेला यम्‍बा टुतिवा साङ खोतिवी मुला राङ गाल।
MAR 4:37 तमा ते शार्क्येक लुङ छ्‍यर्वा ग्‍येर्पु ग्‍यप्‍सुङ। तमा छ्‍यी बालाप ल्‍हानी टी नाङ्‍ला शुनी टु ति क्‍येङ्‍गुप छाल्‍सुङ।
MAR 4:38 तोजो पेला येशू ति टुकी तिङ्‍ला ङाटी ग्‍यप्‍नी ङ्‍यी गाल्‍नोक। तमा लोमातिवी खोला लोङ्‍यिन सिरा “गेकेन, ङ्‍यिराङ नुम्नी शेप छलुप ति गेकेनला पप मलङ्‍नोक?” सिनी सिक्‍यासुङ।
MAR 4:39 तमा येशू लानी लुङ छ्‍यर्वाला वोरु तेन्‍नी ग्‍येम्‍छोकी छ्‍यी बालापला “कुसुमी दे! च्‍यपी दे!” सिनी सुङ्‍सुङ। तुक सुङ्‍लुङ्‍मे लुङ छ्‍यर्वा छ्‍येनी टाक्‍टुक कुसुमी गाल।
MAR 4:40 तमा येशूकी लोमातिवाला सुङ्‍सुङ, “ख्‍यिराङ च्‍यिला दुका ज्‍यिवा किवी? ख्‍यिरा ङला तरोङ साङ तेपा मिकिवी?”
MAR 4:41 तमा तिवा ज्‍यिवा कियी हलेवा क्‍यानी खोप्‍राङ पर्ला दुक सिक्‍यासुङ, “खो चुका परकी मी यिन? लुङ छ्‍यर्वा ताङ छ्‍यी बालापकी साङ खोकी कला ङ्‍येन्‍गिनोक।”
MAR 5:1 तेसुर येशू खोरो लोमातिवी मुला ग्‍येम्‍छो फर्केन गेरासेनसकी लुङ्‍बाला फेप्‍सुङ।
MAR 5:2 येशू टु नेसुर थेन्‍दुप पेला डेकी कुलुप मी यी शेप मीला ज्‍योकुप टककी फुककी पर नेमा वानी खोला ठेसुङ।
MAR 5:3 ती मी ति नरी शेप मीला ज्‍योकुप टककी फुककी परला देकिनोक। तमा सी साङ तीला च्‍यातककी साङ टाक मुथुप्‍नोक।
MAR 5:4 च्‍यिलासिसिन थेङ्‍मा बङी तीकी लाक्‍पा ताङ काङ्‍बाला च्‍यातककी टानी ज्‍याक्‍सिनाङ तीकी ती च्‍यातकला तुम्‍बुर तुम्‍बुर ताङ्‍नी च्‍येकिनोक। तीला खोरो ओङला ज्‍योक थुपुप मी रम्‍बु सु साङ मिन्‍दुक।
MAR 5:5 ती ति ङ्‍यी ताङ नुप्‍ज्‍या नरी शेप मीला ज्‍योकुप टककी फुक परला ताङ पम्‍दोकला देनी च्‍यार ग्‍यकुप ताङ दो थ्‍वोनी खोरो जुला म देन्‍गिनोक।
MAR 5:6 तीकी येशूला थाक्‍रिङ्‍बु नेसुर थोङ्‍नी छ्‍योङ्‍बाल ग्‍यकिन वानी खोकी शापला पुमुङ सला चुसुङ,
MAR 5:7 तमा थोर ग्‍यप्‍नी, “ओ तेरी सिनाङ चोछ्‍येवु कोन्‍छ्‍योककी सेवु येशू, ख्‍योरे ति ङे मुला काङ तम्‍जी वे? ङला दुक्‍पा मातेर सिनी कोन्‍छ्‍योकला न क्‍योल।” सिनी सिक्‍यासुङ।
MAR 5:8 तीकी तुक सिक्‍यावु ति गोमाला के येशूकी तीला “ख्‍युरुङ दी मीकी नाङ नेसुर पाङ्‍ला थेन!” सिनी क नङ्‍गुप तप्‍की यिन।
MAR 5:9 तमा येशूकी तीला “ख्‍योरो मिङ काङ यिन?” सिनी टिसुङ। तीकी “ङे मिङ ति मक्‍मी यिन, च्‍यिलासिसिन ङ्‍यिराङ मङ्‍मु वोतुप तप्‍की यिन।” सिनी सिक्‍यासुङ।
MAR 5:10 तुक सिक्‍यासिमा तीकी येशूला “ङ्‍यिराङला दी लुङ्‍बा नेसुर तेन्‍नी मातोङ।” सिनी छासे गोङ्‍बा शुसुङ।
MAR 5:11 ती पेला ते रीकी बुक्‍योकला फाक्‍पा मङ्‍मु चोयी नोक।
MAR 5:12 ती डेतिवी येशूला “ङ्‍यिराङला फाक्‍पातिवी पर्ला ताङ्‍नी तिवी नाङ्‍ला शुक च्‍यी।” सिनी गोङ्‍बा शुसुङ।
MAR 5:13 येशूकी तिवाला दुक कि च्‍यिसिमा डेतिवा ती मी नाङ नेसुर थेन्‍नी फाक्‍पातिवी नाङ्‍ला शुसुङ। तमा फाक्‍पा तोङ्‍डा ङ्‍यी चोयी रीकी चा नेमा ग्‍येम्‍छोकी थाकाला छ्‍योङ्‍बाल ग्‍यकिन गल्‍नी ग्‍येम्‍छोला लुम्‍नी शिसुङ।
MAR 5:14 तेसुर फाक्‍पा चोपतिवा टोन गल्‍नी ग्‍येसा ताङ युलकी मीतिवाला ती ताम्‍ङे शेसुङ। ती थोनी मीतिवा ते काङ च्‍युङ्‍नोक सिनी ल्‍हापला लेसुङ।
MAR 5:15 तिवा येशूकी चाला लेप्‍नी ती मङ्‍मु डेकी कुलुप मी ति टेन्‍बा ङ्‍येनी मज्‍या कोन देतुप थोङ्‍सुङ, तमा तिवा ज्‍यिवा क्‍यासुङ।
MAR 5:16 गोमा नेज्‍युन ते च्‍युङ्‍गुप ताम्‍ङे थोङ्‍गुप मीतिवी ते वावु मीतिवाला डेकी कुलुप मी ताङ फाक्‍पातिवाला काङ च्‍युङ्‍नोक सिनी लाप्‍सुङ।
MAR 5:17 तमा तिवी येशूला “ङ्‍यिरा युल नेसुर फेप।” सिनी गोङ्‍बा शुसुङ।
MAR 5:18 येशू टी नाङ्‍ला जेकुप पेला गोमाला डेकी कुलुप मी तीकी खोला “ङ साङ ख्‍योरे मुला राङ डो च्‍यी।” सिनी गोङ्‍बा शुसुङ।
MAR 5:19 यिने येशूकी तीला खोरो मुला वुङ माच्‍यिनी, “त ख्‍युरुङ ख्‍योरो खाङ्‍बा गल्‍नी ख्‍योरो मिछाङतिवाला चोवो कोन्‍छ्‍योककी ख्‍युरुङला चुका कटिन नङ्‍नी ख्‍योरो थोक्‍ला काङ क्‍या नङ्‍गुप ति लोप।” सिनी सुङ्‍सुङ।
MAR 5:20 तेसुर ती मी ति डिकापोलिस ग्‍येसाला गल्‍नी येशूकी खोरो थोक्‍ला क्‍या नङ्‍गुप ताम्‍ङे सिक्‍यासुङ। तमा मीतिवा तेरी हलेवा क्‍यासुङ।
MAR 5:21 तेसुर येशू टुला जेनी येलुङ ग्‍येम्‍छो फर्केन फेप्‍सिमा ते मी मङ्‍मु खोकी चाला जोम्‍सुङ। खो ग्‍येम्‍छो चाला ज्‍युसालेन्‍सिन
MAR 5:22 यहूदी छ्‍योखाङकी मी छ्‍ये नाङ ने याइरस सिरुप मी ति ते वासुङ। तमा तीकी येशूला ठेनी पुमुङ सला चुनी खोला
MAR 5:23 “ङे पुम टिक्‍पे ति च्‍येती नानी वे। गेकेन फेप्‍नी तीकी गोला छ्‍याक ज्‍याक्‍नी तीला टेक च्‍यी, तमा ती ति मिशिवी।” सिनी गोङ्‍बा शुसुङ।
MAR 5:24 तमा येशू ती ताङ मुला फेप्‍सालेन्‍सिन मी मङ्‍मु खोकी तिङ्‍ला पुसुम ग्‍यकिन तिङ्‍यासुङ।
MAR 5:25 ती पेला मी मङ्‍मी पर्ला लो च्‍यिङ्‍ङी सेक ठक थेन्‍दुप नेजु वोतुप पुम्‍पेजा यी नोक।
MAR 5:26 ती पुम्‍पेजा तीकी बङी आम्‍ज्‍यीतिवी मुला मेन क्‍यानी दुक्‍पा ङ्‍येनी खोरो मुला वोतुप तेरी नोर सिन्‍दा क्‍यासिनाङ खोरो नेजु ति माटेक्‍नी मङ मेलोक्‍पा गाल्‍नोक।
MAR 5:27 ती पुम्‍पेजा तीकी येशूकी कोर्ला थोनी मी मङ्‍मी पर ने येशूकी ग्‍यप्‍ला वानी खोकी नम्‍साला रेक्‍सुङ।
MAR 5:28 च्‍यिलासिसिन तीकी “येशूकी नम्‍साला तिराङ रेक्‍सिनाङ ङे नेजु ति टेकिवी।” सिनी नासाम ताङ्‍नोक।
MAR 5:29 तमा तीकी रेक्‍लुङ्‍मे ठक थेन्‍दुप ति छ्‍येनी खोरो नेजु टेकुप ति हाक्‍कोसुङ।
MAR 5:30 ती पेला येशूकी शार्क्येक खोरो जु नेसुर ओङ थेन्‍दुप ति हाक्‍कोनी फिल्‍दुङ्‍मा ग्‍युर्नी मी मङ्‍मुतिवाला “सी ङे मज्‍याला रेक्‍सुङ?” सिनी टिसुङ।
MAR 5:31 तमा लोमातिवी येशूला सिक्‍यासुङ, “मी मङ्‍मुकी गेकेनला चुप्‍नी पुसुम ग्‍यपुप याङ गेकेनला राङ छ्‍या वे, यिन्‍सिनाङ ‘सी ङला रेक्‍सुङ?’ सिनी टि नङ्‍गिवी?”
MAR 5:32 यिने येशूकी खुरुङला रेकुप तीला ल्‍हापला फार छुर ल्‍हासुङ।
MAR 5:33 ती पुम्‍पेजा तीकी येशूकी नम्‍साला रेक्‍सिमा खोरो जु टेकुप हाक्‍कोनी ज्‍यिवा लानी र्‍हुकिन सिरा खोकी चाला वासुङ। तमा येशूकी दोङ्‍ला पुमुङ सला चुनी तेरी ताम्‍ङे टेङ्‍बु लाप्‍सुङ।
MAR 5:34 तमा येशूकी तीला सुङ्‍सुङ, “पुमो, ख्‍योरो ङला तेपा क्‍यावु तप्‍की ख्‍युरुङ टेक्‍सुङ। लोदिमु क्‍यानी ग्‍युक। तमा तफेन्‍ला ख्‍युरुङ नाम्‍साङ दुक्‍पाला मेख्‍येल्‍शिता।”
MAR 5:35 येशूकी दी ताम्‍ङे सुङ्‍यिन वोतुप पेला यहूदी छ्‍योखाङकी मी छ्‍ये याइरसकी खाङ्‍बा नेसुर मीतिवा वानी याइरसला “अच्‍यो, ख्‍योरो पुम याङ शिसुङ। त गेकेनला च्‍यिला मङ होप्‍ग्‍यल शिवी?” सिनी सिक्‍यासुङ।
MAR 5:36 येशूकी तिवी ताम्‍ङे थोसिनाङ ङ्‍याम माक्‍यानी याइरसला सुङ्‍सुङ, “ज्‍यिवा माक्‍यावा क्‍यानी तेपा तिराङ की।”
MAR 5:37 तेसुर येशूकी खोरो लोमातिवी नाङ ने पत्रुस ताङ याकूब ताङ याकूबकी नुप यूहन्‍नाला मिसिन यम्‍बा सुला साङ खोरे तिङ्‍ला तिङ्‍योक माच्‍यी।
MAR 5:38 खोतिवा याइरसकी खाङ्‍बा लेप्‍सालेन्‍सिन ते मीतिवा ङोप ताङ ङुप्‍राङ कितुप ताङ हराङ हुरुङ कियी वोतुप येशूकी थोङ्‍सुङ।
MAR 5:39 तमा येशू खाङ्‍बी नाङ्‍ला शुनी तिवाला सुङ्‍सुङ, “ख्‍यिराङ च्‍यिला दुका ङोप ताङ ङुप्‍राङ किवी? दी पुम याङ शेप मिन, यिने ङ्‍यिलोक्‍नी वे।”
MAR 5:40 ती ताम्‍ङे थोनी तेकी मीतिवी खोला मर्च्या क्‍यासुङ। यिने खोकी खाङ्‍बी नाङ्‍ला वोतुप मी तेरीला पाङ्‍ला तेन ताङ्‍नी ती पुमकी पपाआमा ताङ खोरो लोमा सुम तिराङ टिनी ती पुम ज्‍यकुप दासा नाङ्‍ला फेप्‍सुङ।
MAR 5:41 तमा येशूकी ती पुमकी लाक्‍पाला जिम्‍नी सुङ्‍सुङ, “तालिता कूमी!” (दीकी तेन्‍दोक ति “पुमो, ङ ख्‍युरुङला सिरिन, खोक लो!” सिनी सिक्‍यावु यिन।)
MAR 5:42 खोकी तुक सुङ्‍लुङ्‍मे ती पुम ति टङी लानी फला छुला युकुप छाल्‍सुङ। ती पुम ति लो च्‍यिङ्‍ङी ति नोक। दी थोङ्‍नी मीतिवा तेरी हलेवा क्‍यासुङ।
MAR 5:43 येशूकी ते वोतुप मीतिवाला दी ताम्‍ङे ति मी यम्‍बा सुला साङ मासिर सिनी क छ्‍येम्‍बु नाङ्‍सुङ, तमा पुमला ति समा बिन सिनी तिवाला योक कुसुङ।
MAR 6:1 तेसुर येशू खोरे लोमातिवी मुला खोरे युल नासरतला फेप्‍सुङ।
MAR 6:2 ङासोप ङ्‍यिमाला खो यहूदी छ्‍योखाङला फेप्‍नी येन्‍देन नाङ्‍सुङ। ते मी मङ्‍मुकी खोकी येन्‍देन थोनी हलेवा क्‍यासुङ। तमा तिवी “दी मी तीकी दुका ताम्‍ङेतिवा कनी नेसुर लापुप यिनाङ? दी मीला वोतुप रिक्‍पा ति चुका पारकी यिन? दीकी चुक क्‍यानी दुका हलेवु लाका क्‍यावु यिनाङ?
MAR 6:3 काङ दी याङ मरियमकी पुज्‍युङ शिङ्‍जो ति मिन रो? दी मी ति याकूब ताङ योसेफ ताङ यहूदा ताङ सिमोनकी अच्‍यु मिन? तमा दीकी नुमतिवा दे दाक्‍पी मुला मे रो?” सियी खोला सेमला माला।
MAR 6:4 तमा येशूकी तिवाला सुङ्‍सुङ, “कोन्‍छ्‍योककी लुङ्‍तेम्‍बातिवाला दासा यम्‍बाला ताङ्‍देन किवी, यिने रङगी युलकी छेङ्‍गाछाली ताङ रङगी खाङ्‍बी मीतिवी तिराङ तिवाला ताङ्‍देन मिकिवी।”
MAR 6:5 ते खोकी नेर्पु ललाइला तिराङ छ्‍याक ज्‍याक्‍नी टेक ज्‍यितुप ति मिसिन यम्‍बा हलेवु लाका काङ साङ कि माथुप्नोक।
MAR 6:6 तिवी तेपा माक्‍यावु थोङ्‍नी खो हलेवा क्‍यासुङ। तमा येशू युल युलला फेप्‍नी येन्‍देन नाङ्‍सुङ।
MAR 6:7 ती पेला खोकी लोमा च्‍यिङ्‍यीतिवाला खोरो चाला कताङ्‍नी तिवाला मिरा ङ्‍यी ङ्‍यी क्‍यानी डे शोरुप ओङ नङ्नी ताङ्‍सुङ।
MAR 6:8 खोकी तिवाला तोङ्‍गुप पेला दुक सुङ्‍नी क नाङ्‍सुङ, “ख्‍यिराङ लामला डोप पेला पेर्का च्‍यिक मिसिन ज्‍येन काङ साङ माखुर। ग्‍यावी साङ गिवु साङ नम्‍डोक नाङ्‍ला टङ्‍गा साङ माखुर।
MAR 6:9 काचा कोन, यिने ज्‍येन पोयप कितुप मज्‍या माखुर।”
MAR 6:10 तमा येलुङ खोकी तिवाला सुङ्‍सुङ, “दोजो ख्‍यिराङ खाङ्‍बा यीला देसिन यम्‍बा युलला डोप पर सेक ते राङ देता।
MAR 6:11 चुका युलला ख्‍यिराङला शासा मेतेर्वे, याङ्‍ना ख्‍यिरा सिक्‍यावु ताम्‍ङे मेङ्‍येन्‍सिन ती खाङ्‍बा नेसुर थेन डोप पेला तिवी ख्‍यिरा तेन्‍दोकला लावु पङ्‍बुकी थोक्‍ला ख्‍यिरे काङ्‍बी थला र्‍हु बिन।”
MAR 6:12 तमा तिवा गल्‍नी मीतिवाला दिक्‍पा ने सेम ग्‍युर्नी कोन्‍छ्‍योकला तेपा की सिनी ख्‍याप्‍टाक क्‍यासुङ।
MAR 6:13 तिवी डेतिवा बङी थेन्‍दुप ताङ नुम कुनी नेर्पु मङ्‍मुला टेक च्‍यिसुङ।
MAR 6:14 ती पेला येशूकी मिङ ति युल तेरीला फेल्‍सुङ। ती ताम्‍ङे ति ग्‍येल्‍वु हेरोदकी थोनोक। मी ललाइकी “बप्‍तिस्‍मा तेरुप यूहन्‍ना शेप ने सेन्‍बु लासुङ, तुक क्‍यानी ती मी तीकी दी ओङ छ्‍येवु लाका क्‍यावु यिन्‍जु।” सिनी सिक्‍यासुङ।
MAR 6:15 तमा ललाइकी “ती ति एलिया यिन।” सिनी सिक्‍यासुङ। लोङ ललाइकी “ती ति गोमी कोन्‍छ्‍योककी लुङ्‍तेम्‍बातिवा दोके मिरा च्‍यिक यिन।” सिनी सिक्‍यासुङ।
MAR 6:16 यिने मीतिवी दुक सिक्‍यावु ति हेरोदकी थोनी, “दी याङ ङे ज्‍यिङ्‍बा च्‍ये च्‍यितुप यूहन्‍ना यिन। ती ति शेप ने सेन्‍बु लासुङ!” सिनी सिक्‍यासुङ।
MAR 6:17 गोमाला हेरोदकी यूहन्‍नाला जिम्‍नी चोन्‍खाङला उप्‍नोक। च्‍यिलासिसिन हेरोदकी खोरो नुप फिलिपकी पेर्मी ति खोरो पेर्मी जोनी ज्‍याक्‍सुङ।
MAR 6:18 ती पेला यूहन्‍नाकी हेरोदला “ख्‍योरो नुपकी पेर्मी ति ख्‍योरो पेर्मीला ज्‍योकुप ति मेङ्‍गिवी।” सिनी सिक्‍यानोक।
MAR 6:19 तमा हेरोदियासकी यूहन्‍नाला ङ्‍यिर्मु लानी तीला सेतुप छल्‍सिनाङ से माथुप।
MAR 6:20 च्‍यिलासिसिन हेरोदकी यूहन्‍ना ति क्‍येन मेतुप मी टेङ्‍बु यिन्‍दुप हाक्‍कोनी ज्‍यिवा क्‍यानी तीला र्‍होक्‍नी ज्‍याक्‍सुङ। यूहन्‍नाकी सिक्‍यावु ताम्‍ङे थोनी हेरोदकी सेम छासे सेम्‍दुक लासिनाङ तीकी ताम्‍ङे गा क्‍यानी ङ्‍येन्‍सुङ।
MAR 6:21 तमा हेरोदियासला च्‍यु यी ङ्‍येसुङ। हेरोदकी खुरुङ क्‍येवु तुछ्‍येनकी डेनला खोरो लुङ्‍बाकी मी छ्‍येतिवा ताङ मक्‍मी छ्‍येतिवा ताङ गालीलकी मी छ्‍येतिवा कताङ्‍नोक।
MAR 6:22 ती डेनला हेरोदियासकी पुम ति नाङ्‍ला वानी छ्‍यम्‍नी हेरोद ताङ डेन्‍बुतिवाला गा लाङ्‍सुङ। तमा ग्‍येल्‍वी ती पुम्‍पेजाला “ख्‍युरुङला काङ लोङ्‍गुप नो वे, ती ति ङला लोङ।” सिनी सिक्‍यासुङ।
MAR 6:23 येलुङ तीकी न क्‍यल्‍नी, “ख्‍योरो ङला काङ लाङ्‍सिनाङ ङ तेरिन। ग्‍येल्‍खाप फेका यी लाङ्‍सिनाङ ङ तेरिन।” सिनी थाक्‍छ्‍येसुङ।
MAR 6:24 तेसुर ती पुम्‍पेजा ति पाङ्‍ला गल्‍नी खोरो आमाला “ङ काङ लोङ्‍गुप?” सिनी टिसुङ। तमा आमा तीकी तीला “बप्‍तिस्‍मा तेरुप यूहन्‍नाकी गो लोङ।” सिनी सिक्‍यासुङ।
MAR 6:25 तमा ती पुम्‍पेजा ति शार्क्येक ग्‍येल्‍वी चाला वानी, “बप्‍तिस्‍मा तेरुप यूहन्‍नाकी गो ति देर्माङ नाङ्‍ला ज्‍याक्‍नी तन्‍दा ङला नाङ।” सिनी सिक्‍यासुङ।
MAR 6:26 ग्‍येल्‍वु ति छासे सेम्‍दुक लासिनाङ डेन्‍बुतिवी मिङ्‍गाला न क्‍यलुप तप्‍की ती पुम्‍पेजाकी लङ्‍गुप ति मेतेर सिनी सि माथुप।
MAR 6:27 तुक क्‍यानी ग्‍येल्‍वी शार्क्येक खोरुङला र्‍हिन्‍दुप मक्‍मी च्‍यिकला चोन्‍खाङला तङ्‍नी ते वोतुप यूहन्‍नाकी ज्‍यिङ्‍बा च्‍येनी तीकी गो ति खुर शोक सिनी क बिन्‍सुङ। ती मक्‍मी ति चोन्‍खाङला गल्‍नी यूहन्‍नाकी ज्‍यिङ्‍बा च्‍येनी
MAR 6:28 तीकी गो ति देर्माङ नाङ्‍ला खुन वानी ती पुम्‍पेजा तीला बिन्‍सुङ। तमा तीकी ती गो ति खोरो आमाला बिन्‍सुङ।
MAR 6:29 ती ताम्‍ङे थोसिमा यूहन्‍नाकी लोमातिवा वानी तीकी फुङ्‍बु ति खुर्नी शेप मीला ज्‍योकुप टककी फुकला मुक्‍तुम ग्‍यप्‍सुङ।
MAR 6:30 येशूकी तङ्‍गुप लोमा छ्‍येतिवा येशूकी चाला लोङ वानी खोप्‍रे क्‍यावु लाका ताङ लापुप ताम्‍ङे ति तेरी खोला शेसुङ।
MAR 6:31 तमा येशूकी तिवाला सुङ्‍सुङ, “त ख्‍यिराङ ङे मुला कुसुमी दासाला गल्‍नी दाक्‍पु चेयी ङासोप।” च्‍यिलासिसिन ते मी मङ्‍मु फार ताङ छुर डोसालेन्‍सिन खोतिवाला समा सलुङ साङ मिन्‍दुक।
MAR 6:32 तुक क्‍यानी खोतिवा तेसुर टुला जेनी कुसुमी दासाला गाल्‍सुङ।
MAR 6:33 यिने मी मङ्‍मुकी खोतिवा फेपुप थोङ्‍सिमा खोतिवाला ङो शेनी युल बङी नेसुर टिम्‍बु टिम्‍बु युनी खोतिवा सिनाङ गोमाला ते लेप्‍सुङ।
MAR 6:34 तमा येशू टु नेमा थेन्‍नी मी मङ्‍मुला ल्‍हासालेन्‍सिन तिवा गोठाला मेतुप लुक दोके नोक नोनी तिवाला च्‍यम्‍बा लानी येन्‍देन बङी नाङ्‍सुङ।
MAR 6:35 नाम ल्‍होवु तप्‍की लोमातिवा खोकी चाला वानी, “दी ति दासा पाङ्‍थेरी यिन। त याङ नाम साङ ल्‍होसुङ।
MAR 6:36 मीतिवा चाला वोतुप दासा ताङ युलला ताङ्‍नी दाक दाक्‍पी थोक्‍ला समा ङ्‍योनी स च्‍यी।” सिनी सिक्‍यासुङ।
MAR 6:37 येशूकी तिवाला “ख्‍यिरा राङ तिवाला साप समा बिन।” सिनी सुङ्‍सुङ। तमा तिवी खोला “ङ्‍यिराङ गल्‍नी ङुलकी डप्‍बु सयी ङ्‍यीकी शुब्‍ज्‍याङ ङ्‍योनी तिवाला तेरुप?” सिनी सिक्‍यासुङ।
MAR 6:38 खोकी सुङ्‍सुङ, “ख्‍यिरा मुला शुब्‍ज्‍याङ चो वे? गल्‍नी ल्हो ताङ।” तमा तिवी छल्‍नी सिक्‍यासुङ, “शुब्‍ज्‍याङ ङ ताङ ङ्‍या ङ्‍यी नोक।”
MAR 6:39 तमा येशूकी लोमातिवाला “तेरी मीतिवाला च ङोर्मी खला छो छो क्‍यानी दे च्‍यी।” सिनी क नाङ्‍सुङ।
MAR 6:40 तमा तिवा सयी च्‍यिक च्‍यिक ताङ खाल ङ ङ क्‍यानी छो जोनी देसुङ।
MAR 6:41 खोकी शुब्‍ज्‍याङ ङ ताङ ङ्‍या ङ्‍यी लकला लानी देवाच्‍येनला ल्‍हानी कोन्‍छ्‍योकला थुचिछे पुल्‍सिमा शुब्‍ज्‍याङ ति च्‍याक्‍नी मीतिवाला बिन सिनी लोमातिवाला नाङ्‍सुङ। लोङ खोकी ङ्‍या ङ्‍यी साङ तिवा तेरीला गोनी तेर च्‍यिसुङ।
MAR 6:42 ते वोतुप मीतिवा तेरीकी डाता सेक सोसुङ।
MAR 6:43 सोसिमा साङ ल्‍हकुप शुब्‍ज्‍याङ ताङ ङ्‍यातिवी पुर्मा रुनी तोलुम च्‍यिङ्‍ङी नाङ्‍ला क्‍येङ्‍सुङ।
MAR 6:44 ती पेला ते शुब्‍ज्‍याङ साप ख्‍योक्‍पेजातिवा ति तोङ्‍डा ङ नोक।
MAR 6:45 ती ज्‍युक्‍ला येशूकी खोरो लोमातिवाला शार्क्येक टुला जेनी खोरुङ सिनाङ गोमाला फर्केन बेथसेदाला डो च्‍यिसुङ, तमा ते वोतुप मी माङ्‍छ्‍योकला ति तेसुर दाक दाक्‍पी दासाला ताङ्‍सुङ।
MAR 6:46 तिवाला ताङ्‍सिमा खो मोपोर कितुपला पम्‍दोकला फेप्‍सुङ।
MAR 6:47 ती छेर्मु सोर्‍हिपला लोमातिवा जेवु टु ति ग्‍येम्‍छो पर्ला नोक, येशू ति च्‍यिक राङ ग्‍येम्‍छो गारीकी स कम्‍बुला ज्‍युनोक।
MAR 6:48 ती पेला ते ग्‍येम्‍छोला लुङ कशेन ग्‍यप्‍नी लोमातिवाला टु तोङ्‍गुप कले च्‍युङ्‍गुप ति येशूकी थोङ्‍सुङ। तमा खो टेताङ ग्‍येम्‍छो ख नेसुर युनी तिवा वोतुप टुकी चा नेसुर क्‍योक क्‍यानी फेपिन नोक।
MAR 6:49 तिवी खो ग्‍येम्‍छो ख नेसुर युकुप थोङ्‍नी र्‍हेन्‍डी यिन्‍दे नोनी च्‍यार ग्‍यप्‍सुङ।
MAR 6:50 च्‍यिलासिसिन खोला थोङ्‍नी तिवा ज्‍यिवा क्‍यानोक। यिने खोकी तिवाला शार्क्येक “ङाडेङ की, ङ राङ यिन। ज्‍यिवा माकी।” सिनी सुङ्‍सुङ।
MAR 6:51 तमा खो तिवा वोतुप टुला जेसिमा लुङ ति छ्‍याक्‍सुङ। ती थोङ्‍नी लोमातिवा छासे हलेवा क्‍यासुङ।
MAR 6:52 च्‍यिलासिसिन खोकी मी तोङ्‍डा ङला शुब्‍ज्‍याङ नङ्‍गुप हलेवु लाका ति वुतुङ के हाक्‍माकोनी तिवी सेम क्‍योङ्‍बु गाल।
MAR 6:53 येशू लोमातिवी मुला ग्‍येम्‍छो शानी गनेसरेत युलला लेप्‍सिमा टु ति ग्‍येम्‍छोकी गारीला तानी ज्‍याक्‍सुङ।
MAR 6:54 खोतिवा टु नेसुर थेन्‍दुप पेला मीतिवी येशूला ङो शेनी
MAR 6:55 छ्‍योङ्‍बाल ग्‍यकिन तेरी युल युलला गल्‍नी नेर्पुतिवा डोलीला ज्‍याक्‍नी खो ज्‍युवु दासाला खुर्नी लेसुङ।
MAR 6:56 तमा खो युल ताङ ग्‍येसा ताङ कनी कनी फेप्‍सिनाङ तेकी मीतिवी मी नेर्पुतिवाला हाला ज्‍याक्‍नी खोकी नम्‍सी गारीला यिन्‍सिनाङ रेकुप ङ्‍ये च्‍यी सिनी गोङ्‍बा शुसुङ। तमा खोकी नम्‍सी गारीला रेकुपतिवा तेरीकी खोप्‍रे नेजु ति टेक्‍सुङ।
MAR 7:1 ती पेला फरिसीतिवा ताङ यरूशलेम ने वावु यहूदी छ्‍योकी गेकेनतिवा ललाइ येशूकी चाला जोम्‍नोक।
MAR 7:2 तमा तिवी येशूकी लोमातिवा ललाइकी यहूदी लुक्‍सु मातेन्‍नी लाक्‍पा माटुवा क्‍यानी लाक्‍पा मेचेङ्‍गा थ्‍वोनी समा सोवु ति थोङ्‍सुङ।
MAR 7:3 फरिसीतिवा ताङ तेरी यहूदीतिवी ताङ्‍बो ङोकी लुक्‍सु र्‍हुङ्‍नी खोप्‍रे लाक्‍पा माटुवा क्‍यानी समा मसानोक।
MAR 7:4 येलुङ हाट ने लोक्‍नी वासिमा खोप्‍रे जु माटुवा क्‍यानी समा मसानोक। तिवी यम्‍बा लुक्‍सुतिवा साङ बङी नोक, ती ति कइ ताङ लोटा ताङ काँसाकी तिप्‍लीतिवा माटुवा क्‍यानी मोथोक्‍नोक।
MAR 7:5 तेसुर फरिसीतिवा ताङ यहूदी छ्‍योकी गेकेनतिवी येशूला टिसुङ, “ख्‍योरे लोमातिवी च्‍यिला ताङ्‍बो ङोकी लुक्‍सु मातेन्‍नी लाक्‍पा मेचेङ्‍गा थ्‍वोनी समा सोवुजा?”
MAR 7:6 खोकी तिवाला सुङ्‍सुङ, “ख्‍यिराङ खोनक्‍पुतिवी कोर्ला कोन्‍छ्‍योककी लुङ्‍तेम्‍बा यशैयाकी दुक सिनी ल्‍यामो क्‍यानी टि वे, ‘मीतिवी ङला खला तिराङ ताङ्‍देन किवी, यिने तिवी सेमला ति ङला ङ्‍याम मिकिनोक।
MAR 7:7 तिवी ङला तेर्मेला सोवा देकिवी, च्‍यिलासिसिन तिवी मी जोवु येन्‍देनला ङे क दोके क्‍यानी मीतिवाला लोप्‍किनोक।’
MAR 7:8 ख्‍यिराङ कोन्‍छ्‍योककी क ति क्‍युर्नी मीतिवी लुक्‍सु तेन्‍गिनोक।”
MAR 7:9 लोङ खोकी तिवाला सुङ्‍सुङ, “ख्‍यिराङ ख्‍यिरा लुक्‍सु तेन्‍दुपला कोन्‍छ्‍योककी क ति जोल्‍हमु क्‍यानी क्‍युर्नी ज्‍योकिनोक।
MAR 7:10 तोङ्‍ला मोशाकी ‘ख्‍योरो पपाआमाला ताङ्‍देन की।’ सिनी सिक्‍या वे। तमा ‘सी पपा याङ्‍ना आमाला मारे तोङ्‍गिवे, तीला से गोकिवी।’ सिनी सिक्‍या वे।
MAR 7:11 यिने ख्‍यिरा याङ मीतिवाला दुक सिनी लोप्‍किनोक, दोजो मी ललाइकी खोरो पपा याङ्‍ना आमाला ‘ङे ख्‍यिराङला कि गोवु शब्‍ज्‍यी ति कुर्बान यिन।’ सिनी सिक्यासिन ती मी तीकी खोरो पपा याङ्‍ना आमाला शब्‍ज्‍यी कि मोगोवी सिनी ख्‍यिरा सिवी। (ती कुर्बानकी तेन्‍दोक ति कोन्‍छ्‍योकला पुलुप बुल्‍वा यिन।)
MAR 7:12 ख्‍यिरा दुक सिनी मीतिवाला खोरो पपा याङ्‍ना आमाला काङ साङ शब्‍ज्‍यी कि मिज्‍यिनोक।
MAR 7:13 तुक क्‍यानी ख्‍यिरा जोवु लुक्‍सु तेन्‍दुपला कोन्‍छ्‍योककी सुङला ति तेर्मेला जोसुङ। ख्‍यिरा तुका लाका यम्‍बा साङ बङी क्‍या वे।”
MAR 7:14 तमा येशूकी येलुङ मी माङ्‍छ्‍योकला खोरो चाला कताङ्‍नी सुङ्‍सुङ, “ख्‍यिराङ तेरीकी ङे ताम्‍ङे ङ्‍येन्‍नी हाक्‍कोवा किसा।
MAR 7:15 पाङ नेसुर मीकी नाङ्‍ला शुकुप काङगी साङ मीला मेचेङ्‍गा मोजोवी, यिने मीकी नाङ नेसुर पाङ्‍ला थेन्‍दुप तीकी मीला मेचेङ्‍गा जेवी।
MAR 7:16 सी ति ङ्‍येन्‍दुप नाम्‍ज्‍योक नोके, तीकी ङ्‍येन्‍शी!”
MAR 7:17 तेसुर येशू मी मङ्‍मुला क्‍युन ज्‍याक्‍नी खाङ्‍बा यी नाङ्‍ला फेप्‍सिमा खोकी लोमातिवी ती पेकी कोर्ला खोला टिसुङ।
MAR 7:18 तमा खोकी तिवाला सुङ्‍सुङ, “काङ ख्‍यिराङ तरोङ साङ हाक्‍मोकोवी? काङ पाङ नेसुर ख नेमा मी खोकला डोप समी मीला मेचेङ्‍गा मोजोवी सिरुप ति ख्‍यिराङला छ्‍या मे?
MAR 7:19 ती याङ मी सेमला मिन, यिने खोकला लेप्‍नी तेसुर पाङ्‍ला थेन डिवी।” (येशूकी दुक सुङ्‍गुप ति साप समा तेरी चेङ्‍गा यिन सिनी सुङ्‍गुप यिन।)
MAR 7:20 लोङ खोकी तिवाला सुङ्‍सुङ, “काङ मी सेमगी नाङ नेमा पाङ्‍ला थेन्‍दुप तीकी मीला मेचेङ्‍गा जेवी।
MAR 7:21 मी सेमगी नाङ नेमा थेन्‍दुप सेम नक्‍पुतिवा ति दिवा राङ यिन। छ्‍येवु छ्‍येमु कितुप, कुन कितुप, मी सेतुप, शम्‍डेन कितुप,
MAR 7:22 देर्पा कितुप, सेम दुक्‍टा कितुप, क्‍येन्‍दुप, सेम नोजु कितुप, ठतोक कितुप, मारे तोङ्‍गुप, ङराङ यिन सिरुप ताङ अम्‍बारङ्‍शिङ कितुप यिन।
MAR 7:23 दी तेरी मेलोक्‍पातिवा सेमगी नाङ नेमा थेन्‍नी मीला मेचेङ्‍गा जेवी।”
MAR 7:24 तेसुर येशू टुरोसकी लुङ्‍बा नेवा फेप्‍सुङ। तमा खो खाङ्‍बा यी नाङ्‍ला शुनी सी साङ हाक्‍मोकोशी सिनी ते ज्‍युवु नो क्‍यासुङ, यिने खो यिप्‍नी ज्‍यु माथुप।
MAR 7:25 ती पेला डेकी कुलुप पुमकी आमा यीकी येशूकी कोर्ला थोनी ते वानी खोकी शापला शावा क्‍यासुङ।
MAR 7:26 ती पुम्‍पेजा ति ग्रीककी मी यिनोक, तमा सिरिया लुङ्‍बाकी फोनिकेला क्‍येनोक। तीकी येशूला खोरो पुम नेसुर डे थेन नाङ सिनी गोङ्‍बा शुसुङ।
MAR 7:27 येशूकी तीला सुङ्‍सुङ, “गोमाला पेजातिवाला डाता सेक स च्‍यि गोकिवी। पेजातिवी शुब्‍ज्‍याङ लानी कीतिवाला तेरुप ल्‍यामु मिन।”
MAR 7:28 तमा तीकी खोला सिक्‍यासुङ, “लसे, चोवो। यिने कीतिवी साङ च्‍योक्‍ची ख नेमा लुम्‍बुप पुर्मातिवा सेवी।”
MAR 7:29 तमा खोकी सुङ्‍सुङ, “ख्‍योरो दुक सिक्‍यावु तप्‍की त ख्‍युरुङ ख्‍योरो खाङ्‍बा ग्‍युक। ख्‍योरो पुमकी नाङ नेसुर डे ति थेन्‍नी गाल।”
MAR 7:30 ती पुम्‍पेजा ति खोरो खाङ्‍बा गल्‍नी ल्‍हासालेन्‍सिन तीकी पुम ति ठीकी खला देनी वोतुप थोङ्‍सुङ, तमा डे ति थेन्‍नी गल सिन्‍नोक।
MAR 7:31 येलुङ येशू टुरोस नेसुर सीदोनला फेप्‍नी तेसुर गालील ग्‍येम्‍छो नेसुर क्‍यानी डेकापोलिस ग्‍येसाला फेप्‍सुङ।
MAR 7:32 ती पेला मीतिवी वोन्‍बा ताङ कुवा वोतुप मी यी येशूकी चाला टि वानी दीकी गोला छ्‍याक ज्‍याक नाङ सिनी गोङ्‍बा शुसुङ।
MAR 7:33 तमा येशूकी ती मीला तिराङ मी मङ्‍मी पर नेसुर फेचेक टि फेप्‍नी खोरे लाक्‍पी थेप्‍तोक ति तीकी नाम्‍ज्‍योक नाङ्‍ला च्‍यिसुङ। ती ज्‍युक्‍ला खोकी ती लाक्‍पी थेप्‍तोकला च्‍येमाक कुनी ती मीकी च्‍येलाकला रेक्‍सुङ,
MAR 7:34 तमा देवाच्‍येन ने ल्‍हयिन सिरा ङ्‍येन्‍बी सोक ताङ्‍नी तीला “इफ्‍फाता!” सिनी सुङ्‍सुङ। (तीकी तेन्‍दोक ति “पेशी!” सिक्‍यावु यिन।)
MAR 7:35 खोकी तुक सुङ्‍लुङ्‍मे शार्क्येक ती मी तीकी नाम्‍ज्‍योक ति पेनी थोवु गाल, च्‍येलाक साङ गुल्‍नी ताम्‍ङे ल्‍यामु लप थुपुप गल्‍सुङ।
MAR 7:36 तमा येशूकी मीतिवाला दी ताम्‍ङे ति सुला साङ मालाप सिनी क छ्‍येम्‍बु नाङ्‍सुङ। यिने खोकी चो क नङ्‍सिनाङ मीतिवी खोकी कोर्ला मङ ताम्‍ङे टाम्‍सुङ।
MAR 7:37 तमा ती ताम्‍ङे थोवु मीतिवा छासे हलेवा क्‍यानी, “खोकी तेरी लाका ल्‍यामु क्‍यासुङ। खोकी वोन्‍बाला साङ थोवु ताङ कुवाला साङ ताम्‍ङे ल्‍यामु लप थुपुप जोसुङ।” सिनी सिक्‍यासुङ।
MAR 8:1 ङ्‍यिमा चेयी ज्‍युक्‍ला येलुङ मी मङ्‍मु जोम्‍सुङ, यिने ते तिवाला साप समा काङ साङ मिन्‍दुक। येशूकी लोमातिवाला खोरो चिप्‍ला कताङ्‍नी सुङ्‍सुङ,
MAR 8:2 “दी मीतिवाला ङ ङ्‍यिङ्‍ज्‍ये लङ्‍गिनोक, च्‍यिलासिसिन तिवा ङ ताङ मुला देनी तन्‍दा ङ्‍यिमा सुम गाल, तमा तिवी मुला काङ साप समा मे।
MAR 8:3 दोजो ङे तिवाला ल्‍होतुङ्‍बा राङ खोप्‍रे खाङ्‍बा ताङ्‍सिन लामला ल्‍होवा लानी टेन्‍बा तोर्किते यिन्‍दे। च्‍यिलासिसिन तिवी पर्ला थाक्‍रिङ्‍बु नेसुर वावु मीतिवा साङ वे।”
MAR 8:4 ती थोसिमा लोमातिवी खोला सिक्‍यासुङ, “दुका दासा पाङ्‍थेरीला दी मीतिवाला तेरुप समा कनी नेसुर ङ्‍येतुप्‍जा?”
MAR 8:5 तमा येशूकी तिवाला “ख्‍यिरे मुला शुब्‍ज्‍याङ चो वे?” सिनी टि नाङ्‍सिमा तिवी दिन चोके वे सिनी सिक्‍यासुङ।
MAR 8:6 खोकी मी मङ्‍मुला सला दे सिनी क नाङ्‍सुङ। तमा शुब्‍ज्‍याङ दिन ति लानी कोन्‍छ्‍योकला थुचिछे पुल्‍सिमा च्‍याक्‍नी मीतिवाला बिन सिनी लोमातिवाला नाङ्‍सुङ। तमा लोमातिवी ती ति गोनी बिन्‍सुङ।
MAR 8:7 लोङ तिवी मुला ङ्‍या टिक्‍पे साङ चेयी नोक। खोकी तीकी थोक्‍ला साङ कोन्‍छ्‍योकला थुचिछे पुल्‍सिमा मीतिवाला गो बिन सिनी लोमातिवाला नाङ्‍सुङ।
MAR 8:8 तमा मीतिवी डाता सेक सोसुङ। सोसिमा साङ लोमातिवी ल्‍हकुप पुर्मातिवा रुक्‍सालेन्‍सिन ती ति तोलुम दिनकी नाङ्‍ला क्‍येङ्‍सुङ।
MAR 8:9 ती पेला ते साप मीतिवा तोङ्‍डा ज्‍यी चोयी नोक। तमा येशूकी मीतिवाला ते नेसुर ताङ्‍सिमा
MAR 8:10 खो ति शार्क्येक खोरे लोमातिवा ताङ मुला टुला जेनी दलमनुथा लुङ्‍बाला फेप्‍सुङ।
MAR 8:11 ते फरिसीतिवा येशूकी चाला वानी खोला खोक्‍पा ल्‍हापला देवाच्‍येन नेमा वुङ्‍गुप त च्‍यिक छ्‍या तेन सिनी सिक्‍यासुङ।
MAR 8:12 तमा खोकी छासे ङ्‍येन्‍बी सोक ताङ्‍नी सुङ्‍सुङ, “च्‍यिला दी गिपाकी मीतिवा त छोल्‍गी ताङ? ङ ख्‍यिराङला टेङ्‍बो सिरिन, दी गिपाकी मीतिवी चुका त साङ ल्‍हाप मेङ्‍येवी।”
MAR 8:13 तेसुर खो तिवाला क्‍युर ज्‍याक्‍नी लोङ टुला जेनी ग्‍येम्‍छो फर्केन फेप्‍सुङ।
MAR 8:14 खोतिवा टुला फेपिन कितुप पेला लोमातिवी शुब्‍ज्‍याङ खुर्नी वुङ्‍गुप टोक ज्‍येनोक, तुक क्‍यानी टि नाङ्‍ला शुब्‍ज्‍याङ च्‍यिक तिराङ नोक।
MAR 8:15 तमा येशूकी तिवाला सुङ्‍सुङ, “ख्‍यिराङ च्‍याङ्‍से की। फरिसीतिवी खमीर ताङ हेरोदकी खमीर नेसुर कुतुक दे।”
MAR 8:16 तिवी खोकी दुक सुङ्‍गुप ति थोसिमा, “दाक्‍पी मुला शुब्‍ज्‍याङ मेतुप तप्‍की खोकी तुक सुङ्‍गुप यिन्‍दे।” सिनी खोप्‍राङ पर्ला केवुल क्‍यासुङ।
MAR 8:17 येशूकी ती हाक्‍कोनी तिवाला “च्‍यिला ख्‍यिराङ शुब्‍ज्‍याङ मेतुपकी कोर्ला ख्‍यिरा पर्ला केवुल किवी? ख्‍यिराङला तरोङ साङ छ्‍या मे? ख्‍यिरा हाक्‍माको? ख्‍यिरा सेम क्‍योङ्‍बु राङ वे?
MAR 8:18 ख्‍यिराङ मिक वोसिनाङ मोथोङ्‍नोक? नाम्‍ज्‍योक वोसिनाङ मोथोनोक? ख्‍यिराङला टेन्‍दा मे?
MAR 8:19 ङे शुब्‍ज्‍याङ ङकी मी तोङ्‍डा ङला च्‍याक्‍नी तेरुप पेला ख्‍यिरा शुब्‍ज्‍याङकी पुर्मा तोलुम चो रुवु?” सिनी सुङ्‍सुङ। “तोलुम च्‍यिङ्‍ङी।” सिनी तिवी सिक्‍यासुङ।
MAR 8:20 येलुङ येशूकी “शुब्‍ज्‍याङ दिनकी मी तोङ्‍डा ज्‍यीला च्‍याक्‍नी तेरुप पेला ख्‍यिरा शुब्‍ज्‍याङकी पुर्मा तोलुम चो रुवु?” सिनी टि नाङ्‍सुङ। तमा तिवी “तोलुम दिन।” सिनी सिक्‍यासुङ।
MAR 8:21 खोकी तिवाला सुङ्‍सुङ, “ख्‍यिराङ तरोङ साङ हाक्‍मोकोनोक?”
MAR 8:22 ती ज्‍युक्‍ला येशू खोरे लोमातिवी मुला बेथसेदाला लेप्‍सुङ। ते मीतिवी मिक मोथोङ्‍गुप मी यीला खोकी चाला टि वानी तीला रेक नाङ सिनी खोला गोङ्‍बा शुसुङ।
MAR 8:23 तमा खोकी ती मिक मोथोङ्‍गुप मीकी लाक्‍पाला जिम्‍नी युल ने पाङ्‍ला टि फेप्‍नी तीकी मिकला च्‍येमाक कुनी तीला छ्‍याक ज्‍याक्‍नी, “ख्‍योरो काङ रे च्‍यिक रे थोङ्‍गिनोक?” सिनी टि नाङ्‍सुङ।
MAR 8:24 तमा तीकी फार छुर ल्‍हयिन सिरा “मीतिवाला थोङ्‍गिनोक, यिने तिवा दोङ्‍बुतिवा दोके थोङ्‍गिनोक, तमा तिवा फार छुर युकिनोक।” सिनी सिक्‍यासुङ।
MAR 8:25 येलुङ येशूकी तीकी मिकला छ्‍याक ज्‍याक्‍सुङ। तमा तीकी ल्‍यामु क्‍यानी ल्‍हाप छाल्‍सिमा तीकी मिक ति येलुङ थोङ थुपुप गल्‍नी तेरी च्‍यालकतिवा ठछ्‍येली थोङ्‍गुप गाल्‍सुङ।
MAR 8:26 तमा खोकी ती मीला “ख्‍युरुङ ती युलला माडोवा।” सिनी तीला खोरो खाङ्‍बा ताङ्‍सुङ।
MAR 8:27 तमा येशू लोमातिवी मुला कैसरिया फिलिप्‍पी ग्‍येसाकी गारी गुरीला वोतुप युलतिवाला फेपिन कितुप पेला खोकी लोमातिवाला “मीतिवी ङला सु यिन सिनोक?” सिनी टि नाङ्‍सुङ।
MAR 8:28 तिवी सिक्‍यासुङ, “ललाइकी बप्‍तिस्‍मा तेरुप यूहन्‍ना, ललाइकी एलिया, तमा यम्‍बातिवी कोन्‍छ्‍योककी लुङ्‍तेम्‍बातिवी नाङ ने मिरा च्‍यिक यिन सिनी सिनोक।”
MAR 8:29 तमा येशूकी लोमातिवाला टि नाङ्‍सुङ, “त ख्‍यिराङ ति ङला सु यिन सिनी सिवी?” पत्रुसकी “गेकेन याङ ख्रीष्‍ट यिन।” सिनी सिक्‍यासुङ।
MAR 8:30 येशूकी तिवाला खोरो कोर्ला सुला साङ मालाप सिनी क छ्‍येम्‍बु नाङ्‍सुङ।
MAR 8:31 ती ज्‍युक्‍ला येशूकी लोमातिवाला खोरो कोर्ला दुक सिनी सुङ्‍गुप छाल्‍सुङ, “ङ मी पुज्‍युङला दुक्‍पा बङी ङ्‍येकिवी। यहूदी गोमा कितुपतिवा ताङ कोङ्‍यार छ्‍येतिवा ताङ यहूदी छ्‍योकी गेकेनतिवी ङे तेन्‍दोकला लानी ङला सेकिवी। यिने ङ्‍यिमा सुम ज्‍युक्‍ला ङ शेप ने सेन्‍बु लङ्‍गिवी।”
MAR 8:32 खोकी दुक सिनी ती ताम्‍ङे ति तिवा तेरीला हाक्‍कोवा क्‍यानी सुङ्‍सुङ। तमा पत्रुसकी खोला फेचेक टि गल्‍नी दुका ताम्‍ङे कितुप मेङ्‍गिवी सिनी वुर्तम क्‍यासुङ।
MAR 8:33 यिने येशू छुर ग्‍युर्नी लोमातिवाला ल्‍हानी पत्रुसला वोरु देनिन सिरा “शैतान, ङे चा नेवा ग्‍युक। ख्‍युरुङ कोन्‍छ्‍योक नेमा वुङ्‍गुप नासाम मोतोङ्‍नोक, मी नासाम तिराङ तोङ्‍गिनोक।” सिनी सुङ्‍सुङ।
MAR 8:34 ती ज्‍युक्‍ला येशूकी मी मङ्‍मुला खोरे लोमातिवी मुला खोरो चाला कताङ्‍नी सुङ्‍सुङ, “सु ङे तिङ्‍ला तिङ्‍योकुप नो किवे, तीकी खोरो नोवातिवा क्‍युर ज्‍याक्‍नी दाक दाक्‍पी ग्‍यङ्‍शिङ खुर्नी ङे तिङ्‍ला तिङ्‍यो।
MAR 8:35 सी खोरो मिजी र्‍होकुप नो किवे, ती ति तोर्नी डिवी। सी ङ ताङ लेन ल्‍यामुकी थोक्‍ला खोरो मिजी तोर ज्‍यिकिवे, ती ति र्‍होकिवी।
MAR 8:36 मीला जम्‍बुलिङ तेरी ङ्‍येसिनाङ खोरो मिजी तोर्सिन तीला काङ ख्‍येप्‍साङ ङ्‍येकिवी रो?
MAR 8:37 याङ्‍ना तोरुप मिजीकी छापला काङ बिन्‍नी खोरो मिजी लोक थुप्‍किवी?
MAR 8:38 दी शम्‍डेन कितुप ताङ दिक्‍पा वोतुप गिपा नेसुर सी ङ ताङ ङे सुङला ङोछा किवे, ङ मी पुज्‍युङ साङ चाङ्‍मा वोतुप देवाच्‍येनकी लेन क्‍येलुप थुतिवी मुला ङे पपी मोवा थोप्‍नी वुङ्‍गुप पेला तीला ङोछा कितिनो।”
MAR 9:1 येलुङ येशूकी तिवाला सुङ्‍सुङ, “ङ ख्‍यिराङला टेङ्‍बो सिरिन, दे लानी देतुपतिवी पर्ला ललाइकी कोन्‍छ्‍योककी ग्‍येल्‍खाप छासे ङार क्‍यानी वावु माथोङ्‍वा सेक्‍ला मिशिवी।”
MAR 9:2 तेमी ङ्‍यिमा टुककी तिङ्‍ला येशूकी पत्रुस ताङ याकूब ताङ यूहन्‍नाला तिराङ खोरे मुला टिनी रीला फेप्‍सुङ। तमा ती पेला लोमातिवी ल्‍हयी ल्‍हयी येशूकी जुजम ति ग्‍युर्सुङ।
MAR 9:3 खोकी नम्‍सा ति दी जम्‍बुलिङकी मी सी साङ टुनी कर्मु जो मुथुवु दोके वो ग्‍यकुप गाल्‍नोक।
MAR 9:4 ती पेला एलिया ताङ मोशा छ्‍यर्नी येशू ताङ मुला ताम्‍ङे क्‍यावु ति लोमातिवी थोङ्‍सुङ।
MAR 9:5 ती थोङ्‍नी पत्रुसकी येशूला “गेकेन, दाक्‍पु दे देतुप ति छासे ल्‍यामु च्‍युङ्‍नोक। ङ्‍यिराङ दे गेकेन ताङ मोशा ताङ एलियाकी थोक्‍ला बर्केङ रे रे जोप।” सिनी सिक्‍यासुङ।
MAR 9:6 यिने पत्रुसकी काङ सिरुप सिनी खोरो राङ हाक्‍माको नोक, च्‍यिलासिसिन लोमातिवा छासे ज्‍यिवा लानोक।
MAR 9:7 ती पेला राङ मुक्‍पा छुप्‍नी तिवाला उप्‍सुङ। तमा मुक्‍पी नाङ नेमा “दी ति ङे ङ्‍यिङ्‍ज्‍येवु पुज्‍युङ यिन। ख्‍यिराङ दीकी ताम्‍ङेला ङ्‍येना।” सिरुप वोरु यी थेन्‍सुङ।
MAR 9:8 तमा शार्क्येक लोमातिवी फला छुला ल्‍हासालेन्‍सिन येशू मिसिन यम्‍बा सुला साङ माथोङ।
MAR 9:9 खोतिवा री नेमा पपुप पेला येशूकी तिवाला “ङ मी पुज्‍युङ शिनी सेन्‍बु मालावा सेक्‍ला ख्‍यिरा थोङ्‍गुप ति सुला साङ मालापा।” सिनी क छ्‍येम्‍बु नाङ्‍सुङ।
MAR 9:10 तिवी खोकी सुङ्‍गुप ताम्‍ङे ति सेमला ज्‍याक्‍नी, “शिनी सेन्‍बु लङ्‍गुपकी तेन्‍दोक ति काङ यिनाङ?” सिनी खोप्‍रे नाङ्‍ला ताम्‍ङे क्‍यासुङ।
MAR 9:11 तमा लोमातिवी येशूला “च्‍यिला यहूदी छ्‍योकी गेकेनतिवी एलिया गोमाला के वुङ गोकिवी सिनी सिवी?” सिनी टिसुङ।
MAR 9:12 खोकी तिवाला सुङ्‍सुङ, “वुतुङ के एलिया गोमाला वानी मीतिवाला कोन्‍छ्‍योककी थाकाला ग्‍युर च्‍यिनी ख्रीष्‍टकी थोक्‍ला टडिक किवी। तुकै यिन्‍सिन मी पुज्‍युङकी छेटाङ बङी खुर्नी मीतिवी तीला ङ्‍यिङ्‍मर किवी सिनी कोन्‍छ्‍योककी सुङला च्‍यिला टिवु यिन?
MAR 9:13 यिने ङ ख्‍यिराङला सिरिन, एलिया ति वा वे। तमा तीकी कोर्ला टि वोतुप दोके मीतिवी खोरो सेमला काङ कितुप नो क्‍यावे, तुकै राङ तीला क्‍यासुङ।”
MAR 9:14 येशूतिवा लोमा यम्‍बातिवी चाला फेप्‍सालेन्‍सिन ती लोमातिवा ति मी मङ्‍मी पर्ला देनी यहूदी छ्‍योकी गेकेनतिवी मुला केवुल कियी नोक।
MAR 9:15 मी मङ्‍मु तेरीकी येशूला थोङ्‍लुङ्‍मे हलेवा क्‍यानी खोकी चाला छ्‍योङ्‍बाल ग्‍यम वानी खोला छ्‍याक छाल्‍सुङ।
MAR 9:16 तमा खोकी ती लोमातिवाला “ख्‍यिराङ काङगी कोर्ला दिवी मुला केवुल कियी वे?” सिनी टि नाङ्‍सुङ।
MAR 9:17 मी मङ्‍मी पर नेसुर मिरा च्‍यिककी खोला दुक सिनी टिलेन बिन्‍सुङ, “गेकेन, ङे पुज्‍युङला गेकेनकी चाला टि वायिन। तीला ताम्‍ङे लप मुथुपुप डेकी कुल्‍नोक।
MAR 9:18 कनी डेकी तीला कुल्‍गिवे, ती पेला डेकी तीला सला तल ग्‍यक ज्‍यिकिवी। तमा तीकी ख नेमा बोवा थेन्‍गिनोक, स मुर्किनोक, जु ति च दम डिनोक। तमा ङे गेकेनकी लोमातिवाला ती डे ति थेन नाङ सिनी सिक्‍यासिनाङ तिवी थेन माथुप।”
MAR 9:19 येशूकी सुङ्‍सुङ, “ओ, तेपा मेतुप गिपा! ङ ख्‍यिरा मुला नम सेक देतुप्‍जा? ङ ख्‍यिराङला नम सेक हम कितुप्‍जा? ती पेजाला ङे चाला टि शोक ताङ।”
MAR 9:20 तमा तिवी ती पेजा ति येशूकी चाला टि वासुङ। ती डे तीकी येशूला थोङ्‍लुङ्‍मे शार्क्येक ती पेजाला र्‍हुक च्‍यिसुङ। तमा ती पेजा ति सला तला ग्‍यप्‍नी ख नेमा बोवा थेनिन सिरा फला छुला गङ्‍ङ्‍येल क्‍यासुङ।
MAR 9:21 येशूकी तीकी पपाला “ती ति नम नेज्‍युन दुकै गलुप यिन?” सिनी टि नाङ्‍सुङ। तीकी “टिक्‍पे नेज्‍युन राङ यिन।
MAR 9:22 डेकी दीला सेतुपला थेङ्‍मा बङी मे नाङ्‍ला ताङ छ्‍यी नाङ्‍ला क्‍युर्सुङ। गेकेनकी काङ कि थुप्‍सिन ङ्‍यिराङला ङ्‍यिङ्‍ज्‍ये क्‍यानी दाल्‍जा किटे की।” सिनी सिक्‍यासुङ।
MAR 9:23 तमा येशूकी तीला सुङ्‍सुङ, “कि थुप्‍सिन सिरुप ति काङ यिन? तेपा कितुपतिवाला ति तेरी कि थुप्‍किवी।”
MAR 9:24 ती थोसिमा ती पेजी पपा तीकी वोरु देनिन सिरा “ओ गेकेन, ङ तेपा कितिन। ङला तेपा मेतुपला दाल्‍जा किटे की।” सिनी सिक्‍यासुङ।
MAR 9:25 येशूकी मी मङ्‍मु सुर्तुम ग्‍यप्‍नी खोरो चाला वुङ्‍गुप थोङ्‍सिमा ती डे तीला वोरु तेन्‍नी, “ओ कुवा ताङ वोन्बा जोप डे, ङ ख्‍युरुङला सिरिन, ती पेजी नाङ नेमा थेन ग्‍युक। तफेन्‍ला तीकी नाङ्‍ला नाम्‍साङ माशुक।” सिनी सुङ्‍सुङ।
MAR 9:26 तमा ती डे ति च्‍यार ग्‍यकिन सिरा पेजाला छासे र्‍हुक च्‍यिनी ती नेसुर थेन गाल। ती पेजा ति शेप दोके गाल्‍सुङ। तुक क्‍यानी मी मङ्मुतिवी दी पेजा याङ शिसुङ सिनी सिक्‍यासुङ।
MAR 9:27 यिने येशूकी ती पेजाकी लाक्‍पाला जिम्‍नी लाङ्‍सिमा ती ति लासुङ।
MAR 9:28 ती ज्‍युक्‍ला येशू खाङ्‍बी नाङ्‍ला फेप्‍सिमा लोमातिवी खोला छ्‍याकला “ङ्‍यिरा च्‍यिला ती डे ति थेन माथुपुप यिनाङ?” सिनी टिसुङ।
MAR 9:29 खोकी तिवाला सुङ्‍सुङ, “दुका परकी डे ति मोपोर नेसुर तिराङ थेन थुप्‍किवी।”
MAR 9:30 तेसुर खोतिवा गालील लुङ्‍बा नेमा फेप्‍सालेन्‍सिन खोतिवा कनी वे सिरुप ति मी ज्‍येन सी साङ हाक्‍मोकोशी सिनी येशूकी नो क्‍यासुङ।
MAR 9:31 च्‍यिलासिसिन खोकी खोरो लोमातिवाला लोपिन नोक। खोकी दुक सिनी लाप्‍सुङ, “मी पुज्‍युङ मीतिवी लकला चेक तेकिवी। तिवी तीला सेकिवी, तमा शेप ङ्‍यिमा सुमकी तिङ्‍ला ती ति सेन्‍बु लङ्‍गिवी।”
MAR 9:32 यिने खोकी सुङ्‍गुप तेन्‍दोक ति लोमातिवी हाक्‍माकोनोक, तमा तीकी कोर्ला खोला टेप साङ ज्‍यिवा क्‍यासुङ।
MAR 9:33 खोतिवा कफर्नहुमला फेप्‍नी खाङ्‍बा यीला ज्‍यु वोतुप पेला खोकी लोमातिवाला “ख्‍यिराङ लामला काङगी कोर्ला खाँदा क्‍यावु?” सिनी टिसुङ।
MAR 9:34 यिने तिवा खरक्‍पा देसुङ, च्‍यिलासिसिन तेरी सिनाङ सु छ्‍ये यिन सिनी तिवा लामला च्‍यिककी च्‍यिकला खाँदा क्‍यानोक।
MAR 9:35 येशू ज्‍युनी लोमा च्‍यिङ्‍ङीतिवाला कताङ्‍नी सुङ्‍सुङ, “सु तेरी सिनाङ छ्‍ये डोप नो किवे, तीकी तेरी सिनाङ छ्‍युङा च्‍युङ्‍नी तेरीला शब्‍ज्‍यी कि गोकिवी।”
MAR 9:36 तमा खोकी आङा टिक्‍पे यीला टि फेप्‍नी तिवी पर्ला ज्‍याक्‍सुङ। ज्‍याक्‍सिमा ती आङाला खोरो पाङ्‍दुर लानी तिवाला सुङ्‍सुङ,
MAR 9:37 “सी दी आङा टिक्‍पे यीला ङे मिङला गासो शिवे, तीकी ङला गासो शिवी। सी ङला गासो शिवे, तीकी ङला मिन, ङला तोङ्‍गुप तीला गासो शिवी।”
MAR 9:38 यूहन्‍नाकी येशूला सिक्‍यासुङ, “गेकेन, मी यीकी गेकेनकी मिङला डे थेनिन वोतुप ति ङ्‍यिरा थोङ्‍सुङ। तमा ङ्‍यिरा तीला क्‍येकिन, च्‍यिलासिसिन ती ति दाक्‍पी तिङ्‍ला तिङ्‍योकुप मी मिनोक।”
MAR 9:39 यिने येशूकी सुङ्‍सुङ, “तीला माग्‍येक, च्‍यिलासिसिन ङे मिङला हलेवु लाका कितुप तीकी शार्क्येक ङे तेन्‍दोकला ताम्‍ङे मेलोक्‍पा मिसिरी।
MAR 9:40 सी दाक्‍पी तेन्‍दोकला मालङ्‍गिवे, ती ति दाक्‍पी छ्‍योकला गिवी।
MAR 9:41 ङ ख्‍यिराङला टेङ्‍बो सिरिन, सी ख्‍यिराङ ख्रीष्‍टला तेपा कितुप मी यिन सिनी ख्‍यिराङला छ्‍यु कइ काङ थुङ्‍गुपला तेर्किवे, तीला थोप गोवु छ्‍यक्‍तक ति नाम्‍साङ मोतोर्वी।”
MAR 9:42 “सी ङला तेपा कितुप मी छ्‍युङातिवी पर्ला मिरा च्‍यिकला दिक्‍पा कि ज्‍यिकिवे, तीकी ज्‍यिङ्‍बाला लाकुर ग्‍येर्पु रानी ग्‍येम्‍छो नाङ्‍ला क्‍युरुप ति तीकी थोक्‍ला ल्‍यामु यिन।
MAR 9:43 दोजो ख्‍योरो लाक्‍पी ख्‍युरुङला दिक्‍पा कि ज्‍यिसिन ती लाक्‍पा ति च्‍येनी क्‍युर। लाक्‍पा ङ्‍यी वोनी नाम्‍साङ मिशिवु मे वोतुप ङ्‍येलाला डोप सिनाङ लाक्‍पा च्‍यिक राङ वोनी देवाच्‍येनला डोप ल्‍यामु यिन।
MAR 9:45 लोङ ख्‍योरो काङ्‍बी ख्‍युरुङला दिक्‍पा कि ज्‍यिसिन ती काङ्‍बा ति च्‍येनी क्‍युर। काङ्‍बा ङ्‍यी वोनी ङ्‍येलाला डोप सिनाङ बोरु काङ्‍बा च्‍यिक वोनी देवाच्‍येनला डोप ति ल्‍यामु यिन।
MAR 9:47 लोङ ख्‍योरो मिककी ख्‍युरुङला दिक्‍पा कि ज्‍यिसिन ती मिक ति तेन्‍नी क्‍युर। मिक ङ्‍यी वोनी ङ्‍येलाला डोप सिनाङ बोरु मिक च्‍यिक वोनी देवाच्‍येनला डोप ति ल्‍यामु यिन।
MAR 9:48 ती ङ्‍येलाला याङ बु साङ मिशिवी, मे साङ मिशिवी।
MAR 9:49 तेरी मीतिवाला छ लुकुप दोके क्‍यानी मे थ्‍वोनी ग्‍येम्‍गिवी।
MAR 9:50 छ ल्‍यामु यिन, यिने तीकी टोवा तोर्सुङ सिसिन चुक क्‍यानी तीला छटोक जेवी? ख्‍यिरा पर्ला छ वोतुप दोके क्‍यानी च्‍यिककी च्‍यिकला थिन्‍नी देता।”
MAR 10:1 तेसुर येशू लानी यहूदिया लुङ्‍बा ताङ यर्दन चङ्‍बी फर्केन फेप्‍सुङ। ते येलुङ मी मङ्‍मु खोकी चाला जोम्‍सुङ। तमा खोकी नरी दोके क्‍यानी तिवाला येन्‍देन नाङ्‍सुङ।
MAR 10:2 ती पेला फरिसीतिवा खोला खोक्‍पा ल्‍हापला खोकी चाला वानी, “ख्‍योवी खोरो पेर्मी क्‍युर्नी ज्‍योकुप ति ठिमला गिवी ताङ मेङ्‍गिवी?” सिनी टिसुङ।
MAR 10:3 तमा खोकी तिवाला टि नाङ्‍सुङ, “मोशाकी ख्‍यिराङला काङ सिनी क बिन वे?”
MAR 10:4 तिवी सिक्‍यासुङ, “टलुप यिकी टिनी खोरो पेर्मीला टल्‍सिन गिवी सिनी मोशाकी सिक्‍या वे।”
MAR 10:5 यिने येशूकी तिवाला सुङ्‍सुङ, “ख्‍यिरा सेम क्‍योङ्‍बु वोतुप तप्‍की मोशाकी दुका क टिनी बिन्‍दुप यिन।
MAR 10:6 यिने कोन्‍छ्‍योककी जम्‍बुलिङ ज्‍येङ्‍गुप थल्‍मा नेज्‍युनी खोकी मीतिवाला ख्‍योक्‍पेजा ताङ पुम्‍पेजा जो नाङ्‍सुङ।
MAR 10:7 तुक क्‍यानी मीकी खोरो फमाला क्‍युर ज्‍याक्‍नी खोरो पेर्मी ताङ मुला थिन्‍नी देकिवी।
MAR 10:8 तमा तिवा ङ्‍यी ति जु च्‍यिक राङ च्‍युङ्‍गिवी। त तिवा ङ्‍यी मिन, च्‍यिक राङ यिन।
MAR 10:9 तुक क्‍यानी कोन्‍छ्‍योककी डिङ ज्‍यकुप तीला मीकी डेलुप मेङ्‍गिवी।”
MAR 10:10 येलुङ खोतिवा खाङ्‍बी नाङ्‍ला वोतुप पेला लोमातिवी खोला ती ताम्‍ङेकी कोर्ला टिसुङ।
MAR 10:11 तमा खोकी तिवाला सुङ्‍सुङ, “सी साङ खोरो पेर्मी क्‍युर ज्‍याक्‍नी यम्‍बा पुम्‍पेजाला जेन्‍दी क्‍यासिन तीकी खोरो पेर्मीला शम्‍डेन क्‍यावु यिन।
MAR 10:12 लोङ पेर्मीकी साङ खोरो ख्‍योवा क्‍युर ज्‍याक्‍नी यम्‍बा ख्‍योक्‍पेजा ताङ मुला जेन्‍दी क्‍यासिन तीकी साङ शम्‍डेन क्‍यावु यिन।”
MAR 10:13 मीतिवी आङा टिक्‍पेतिवा येशूकी चाला टि वानी तिवी खला खोकी छ्‍याक ज्‍याक नाङ सिनी सिक्‍यासुङ। यिने लोमातिवी तिवाला वोरु तेन्‍सुङ।
MAR 10:14 येशूकी ती थोङ्‍सिमा ङ्‍यिर्मु क्‍यानी लोमातिवाला सुङ्‍सुङ, “आङा टिक्‍पेतिवाला ङे चाला वुङ च्‍यी, तिवाला माग्‍येक। च्‍यिलासिसिन कोन्‍छ्‍योककी ग्‍येल्‍खाप ति दिवा च्‍यिन्‍दैकी ति यिन।
MAR 10:15 ङ ख्‍यिराङला टेङ्‍बो सिरिन, सी साङ आङा टिक्‍पेतिवी दोके क्‍यानी कोन्‍छ्‍योककी ग्‍येल्‍खाप खोरो सेमला मिलिङ वे, ती ति नाम्‍साङ ती नाङ्‍ला शुक मुथुपी।”
MAR 10:16 तमा खोकी आङा टिक्‍पेतिवाला पाङ्‍दुर लानी तिवी खला छ्‍याक ज्‍याक्‍नी तिवाला मोलाम नाङ्‍सुङ।
MAR 10:17 तेसुर येशू लामला फेपिन कितुप पेला मी मिरा च्‍यिक छ्‍योङ्‍बाल ग्‍यकिन खोकी चाला वानी पुमुङ सला चुनी टिसुङ, “ओ गेकेन टेङ्‍बु, नाम्‍साङ मिशिवु मिजी ङ्‍येतुपला ङे काङ कि गोकिवी?”
MAR 10:18 येशूकी तीला सुङ्‍सुङ, “ख्‍योरो ङला च्‍यिला टेङ्‍बु सिनी सिवी? कोन्‍छ्‍योक च्‍यिक मिसिन सु साङ टेङ्‍बु मे।
MAR 10:19 कोन्‍छ्‍योककी नङ्‍गुप कतिवा याङ ख्‍युरुङला छ्‍या वे। तिवा ति दी यिन, ‘मी मासे, शम्‍डेन माकी, कुन माकी, जिनोक जोनी पङ्‍बु मातेर, माक्‍येन, तमा ख्‍योरो फमाला ताङ्‍देन की।’”
MAR 10:20 तीकी खोला सिक्‍यासुङ, “गेकेन, दी कतिवा ति तेरी टिक्‍पे नेज्‍युनी ङे र्‍हुङ्‍गुप यिन।”
MAR 10:21 तमा येशूकी तीला ल्‍हानी ङ्‍यिङ्‍ज्‍ये लानी सुङ्‍सुङ, “तरोङ साङ ख्‍युरुङला ताम्‍ङे च्‍यिक ङ्‍युङ्‍मु वे। त गल्‍नी ख्‍योरे मुला वोतुप ति तेरी चोनी पेराङ्‍बुतिवाला बिन। तुक क्‍यासिन ख्‍युरुङला देवाच्‍येनकी नोर थोप्‍किवी। तमा वानी ङे तिङ्‍ला तिङ्‍यो।”
MAR 10:22 ती ताम्‍ङे थोसिमा तीकी ङो ति नक्‍पु गल्नी सेमला पप लानी गाल, च्‍यिलासिसिन तीकी ति नोर टोङ्‍बा बङी नोक।
MAR 10:23 तमा येशूकी फार छुर ल्‍हानी लोमातिवाला सुङ्‍सुङ, “मी छ्‍युक्‍पुतिवाला कोन्‍छ्‍योककी ग्‍येल्‍खापला शुकुप ति छासे कले गिवी।”
MAR 10:24 ती थोनी लोमातिवा हलेवा क्‍यासुङ। येशूकी तिवाला लोङ सुङ्‍सुङ, “आङातिवा, कोन्‍छ्‍योककी ग्‍येल्‍खापला शुकुप ति छासे कले गिवी।
MAR 10:25 मी छ्‍युक्‍पुला कोन्‍छ्‍योककी ग्‍येल्‍खापला शुकुप सिनाङ सेम्‍ज्‍येन वोङ्‍मुला खपकी मिरु नाङ्‍ला शुकुप ति जोल्‍हमु गिवी।”
MAR 10:26 लोमातिवा मङ हलेवा लानी, “तुकै यिन्‍सिन सु ति थर थुप्‍किवी?” सिनी सिक्‍यासुङ।
MAR 10:27 येशूकी तिवाला ल्‍हानी सुङ्‍सुङ, “दी ति मीकी कि मुथुपी, यिने कोन्‍छ्‍योककी कि थुप्‍किवी। च्‍यिलासिसिन कोन्‍छ्‍योककी कि मुथुपुप ति काङ साङ मे।”
MAR 10:28 पत्रुसकी खोला सिक्‍यासुङ, “ल्‍हो ताङ, ङ्‍यिरा याङ तेरी क्‍युर ज्‍याक्‍नी गेकेनकी तिङ्‍ला तिङ्‍यायिन।”
MAR 10:29 येशूकी सुङ्‍सुङ, “ङ ख्‍यिराङला टेङ्‍बो सिरिन, ङ ताङ लेन ल्‍यामुकी थोक्‍ला खोरो खाङ्‍बा ताङ अच्‍युनुप ताङ अज्‍यीनुम ताङ पपाआमा ताङ पुज्‍युङपुम ताङ शिङ क्‍युर्नी ज्‍योकुप तीला
MAR 10:30 दी मिजीला छेटाङ साङ ङ्‍येकिवी, यिन्‍सिनाङ तीला दोम्‍बा खाल च्‍यिथम्‍बा खाङ्‍बा ताङ अच्‍युनुप ताङ अज्‍यीनुम ताङ पपाआमा ताङ पुज्‍युङपुम ताङ शिङ थोप्‍किवी। तमा तिङ्‍ला वुङ्‍गुप कल्‍वाला नाम्‍साङ मिसिवु मिजी थोप्‍किवी।
MAR 10:31 यिने गोमाला वोतुपतिवा बङी तिङ्‍ला गिवी, तमा तिङ्‍ला वोतुपतिवा बङी गोमाला गिवी।”
MAR 10:32 तमा येशू ताङ खोकी लोमातिवा यरूशलेम फेप्‍सालेन्‍सिन येशू लोमातिवा सिनाङ गोमाला फेपिन नोक। ती पेला लोमातिवा हलेवा क्‍यासुङ, तमा खोकी तिङ्‍ला तिङ्‍योकुप मीतिवा ति ज्‍यिवा क्‍यासुङ। येलुङ येशूकी खोरे लोमा च्‍यिङ्‍ङीतिवाला तिराङ कुतुक टि गल्‍नी त खुरुङला काङ ख्‍येल्‍गिवी सिरुप ति तिवाला सुङ्‍सुङ,
MAR 10:33 “ल्‍होसा, त दाक्‍पु यरूशलेमला डोयी वे। ते लेप्‍सिमा मी पुज्‍युङला कोङ्‍यार छ्‍येतिवा ताङ यहूदी छ्‍योकी गेकेनतिवी क्‍येन तेर्किवी, तमा तिवी तीला सेतुप छ्‍येर्पा कल्‍नी यहूदी मिन्‍दुप मिरिक यम्‍बातिवी लकला चेक तेकितो।
MAR 10:34 तिवी तीला मर्च्या किवी, छ्‍यिन्‍दुर ग्‍यकिवी, तमा तल्‍ज्‍येक ग्‍यप्‍नी सेकिवी। यिने ङ्‍यिमा सुमकी तिङ्‍ला ती ति सेन्‍बु लङ्‍गिवी।”
MAR 10:35 ती ज्‍युक्‍ला जब्‍दियाकी पुज्‍युङ याकूब ताङ यूहन्‍ना ति येशूकी चाला वानी, “गेकेन, ङ्‍यिरा गेकेनला काङ लङ्‍सिनाङ ती ति ङ्‍यिराङला नङ्‍शी सिरुप ति ङ्‍यिरा नो वे।” सिनी सिक्‍यासुङ।
MAR 10:36 येशूकी तिवाला टि नाङ्‍सुङ, “ङे ख्‍यिरा थोक्‍ला काङ किशी सिरुप नो किवी?”
MAR 10:37 तिवी खोला सिक्‍यासुङ, “गेकेनला मोवा ङ्‍येतुप पेला ङ्‍यिराङ ङ्‍यिवुला च्‍यिक ति गेकेनकी यावी थाकाला, च्‍यिक ति येन्‍बी थाकाला देतुप ङ्‍येशी।”
MAR 10:38 तमा येशूकी “ख्‍यिरा काङ लोङ्‍गुप ति ख्‍यिराङला राङ छ्‍या मे। ङे थुङ्‍गुप दुक्‍पाकी कोरा नेमा ख्‍यिरा थुङ थुप्‍किवी? तमा ङे लङ्‍गुप बप्‍तिस्‍मा ख्‍यिरा लङ थुप्‍किवी?” सिनी सुङ्‍सुङ।
MAR 10:39 तिवी खोला “कि थुप्‍किवी।” सिनी सिक्‍यासुङ। तमा येशूकी तिवाला सुङ्‍सुङ, “यिन, ङे थुङ्‍गुप कोरा नेमा ख्‍यिरा थुङ्‍गिवी, ङे लङ्‍गुप बप्‍तिस्‍मा ख्‍यिरा लङ्‍गिवी।
MAR 10:40 यिने ङे यावी थाका ताङ येन्‍बी थाकाला देतुप ति ङे कि ज्‍यितुप मिन। ती ति कोन्‍छ्‍योककी सी थोक्‍ला टडिक क्‍यावे, तीला राङ देतुप ङ्‍येकिवी।”
MAR 10:41 ती थोनी लोमा च्‍यिथम्‍बातिवा याकूब ताङ यूहन्‍नाला ङ्‍यिर्मु क्‍यासुङ।
MAR 10:42 तमा येशूकी लोमातिवाला मुला राङ खोरे चाला कताङ्‍नी सुङ्‍सुङ, “ख्‍यिराङला छ्‍या वे, दी जम्‍बुलिङला ग्‍येला कितुपतिवी खोरो लुङ्‍बाकी मीतिवाला ओङ्‍ज्‍येन किवी। तमा ग्‍येल्‍वी ओङला लाका कितुपतिवी साङ मीतिवाला ओङ्‍ज्‍येन किवी।
MAR 10:43 यिने ख्‍यिरा पर्ला ति तुकै कितुप मेङ्‍गिवी। ख्‍यिरा पर्ला सु छ्‍ये डोप नो किवे, तीकी ख्‍यिराङ तेरीकी शब्‍ज्‍यी कितुप च्‍युङ गोकिवी।
MAR 10:44 तमा ख्‍यिरा पर्ला सु गोमाला थेन्‍दुप नो किवे, तीकी तेरी मीतिवी योक्‍पु च्‍युङ गोकिवी।
MAR 10:45 च्‍यिलासिसिन ङ मी पुज्‍युङ ति खोरुङला शब्‍ज्‍यी लङ्‍गुपला वावु मिन, यिने मीतिवाला शब्‍ज्‍यी कितुपला वावु यिन। तमा मी मङ्‍मुला थर ज्‍यितुपला खोरो मिजी तेरुपला वावु यिन।”
MAR 10:46 तमा येशू लोमातिवी मुला यरीहो ग्‍येसाला फेप्‍सुङ। खोतिवा मी मङ्‍मु ताङ मुला ती ग्‍येसा क्‍युर ज्‍याक्‍नी फेप्‍सालेन्‍सिन तिमैकी पुज्‍युङ बारतिमै सिरुप मिक मोथोङ्‍गुप ति लामला लोङ्‍यिन सिरा देन्‍नोक।
MAR 10:47 ती बारतिमै तीकी नासरतकी येशू फेपिन नोक सिरुप ति थोनी, “ओ दाऊदकी सेवु येशू, ङला ङ्‍यिङ्‍ज्‍ये की!” सिनी थोर ग्‍यप्सुङ।
MAR 10:48 मी मङ्‍मुकी तीला खरक्‍पा दे सिनी वोरु तेन्‍सिनाङ तीकी मङ ल्‍हक्‍पा थोर ग्‍यप्‍नी, “ओ, दाऊदकी सेवु येशू, ङला ङ्‍यिङ्‍ज्‍ये की!” सिनी सिक्‍यासुङ।
MAR 10:49 येशू फेपिन फेपिन टङी लानी, “तीला छुर कतोङ।” सिनी सुङ्‍सुङ। तमा मीतिवी ती मिक मोथोङ्‍गुप तीला कताङ्‍नी सिक्‍यासुङ, “ङाडेङ क्‍यानी येर लो। खोकी ख्‍युरुङला कतोङ्‍यिन नोक।”
MAR 10:50 ती थोसिमा तीकी खोरो खयिटो पिन क्‍युर्नी खोक लानी खोकी चाला वासुङ।
MAR 10:51 तमा येशूकी तीला टि नाङ्‍सुङ, “ख्‍योरो थोक्‍ला ङे काङ कितुप?” ती मिक मोथोङ्‍गुप तीकी खोला “गेकेन, ङे मिक थोङ थुपुप डोशी।” सिनी गोङ्‍बा शुसुङ।
MAR 10:52 येशूकी तीला “ख्‍युरुङ ग्‍युक। ख्‍योरो ङला तेपा क्‍यावु तप्‍की ख्‍योरो मिक थोङ थुपुप गाल्‍सुङ।” सिनी सुङ्‍सुङ। ती पेला राङ शार्क्येक तीकी मिक थोङ थुपुप गल्‍नी येशूकी तिङ्‍ला तिङ्‍यासुङ।
MAR 11:1 येशू ताङ लोमातिवा यरूशलेमला फेपिन कितुप पेला यरूशलेम चाकी जैतुन पम्‍दोकला वोतुप बेथफागे ताङ बेथानिया युलला लेप्‍सुङ। तमा येशूकी खोरो लोमा मिरा ङ्‍यीला दुक सुङ्‍नी ताङ्‍सुङ,
MAR 11:2 “ख्‍यिराङ ते फो वोतुप युलला ग्‍युक। ते शुसिमा सी साङ माशेन्‍दुप पुङ्‍गोक तिवु यी तानी वोतुप ख्‍यिरा थोङ्‍गितो। तीला पि ताङ्‍नी दे दा शोक।
MAR 11:3 दोजो मी ललाइकी ख्‍यिराङला ‘च्‍यिला दुक क्‍यावु यिन?’ सिनी टिसिन ‘दी ति चोवोला गोकिवी। खोकी शार्क्येक छुर लोङ तोङ्‍गिवी।’ सिनी ख्‍यिरा सी।”
MAR 11:4 तमा तिवा गल्‍नी ल्‍हासालेन्‍सिन पुङ्‍गोक तिवु ति लामकी गारीला वोतुप खाङ्‍बा यीकी गे चाला तानी वोतुप थोङ्‍सुङ, तमा तिवी तीला पि ताङ्‍सुङ।
MAR 11:5 ती पेला ते लानी वोतुप मीतिवी पर्ला ललाइकी तिवाला “ख्‍यिरा च्‍यिला दी पुङ्‍गोक तिवु ति पि तङ्‍गुप यिन?” सिनी टिसुङ।
MAR 11:6 तमा लोमातिवी येशूकी खोप्‍राङला सुङ्‍गुप दोके सिक्‍यासिमा मीतिवी तिवाला पुङ्‍गोक तिवु ति दानी डो च्‍यिसुङ।
MAR 11:7 लोमातिवी ती पुङ्‍गोक तिवु ति येशूकी चाला टि वानी खोप्‍रे मज्‍या ती पुङ्‍गोक खला तिङ्‍सिमा येशू तीकी खला शेन्‍सुङ।
MAR 11:8 ती पेला मी मङ्‍मी खोप्‍रे मज्‍या लामला तिङ्‍सुङ, तमा ललाइकी दिङ्‍मा नेसुर दोङ्‍बी येल्‍कातिवा च्‍येन वानी लामला तिङ्‍सुङ।
MAR 11:9 येशूकी गोमाला डोपतिवा ताङ खोकी तिङ्‍ला तिङ्‍योकुपतिवी दुक सिनी थोर ग्‍यकिन सिरा सिक्‍यासुङ, “होसन्‍ना!” “चोवो कोन्‍छ्‍योककी मिङला फेपुप तीला मोलाम थोपुप यिनो!”
MAR 11:10 “त वुङ्‍गुप दाक्‍पी हङ्‍गावा दाऊदकी ग्‍येल्‍खापला मोलाम थोपुप यिनो!” “देवाच्‍येनकी चोछ्‍येवु कोन्‍छ्‍योकला होसन्‍ना!”
MAR 11:11 तमा येशू यरूशलेमला फेप्‍नी यहूदी ल्‍हङाङ नाङ्‍ला शुसुङ, तमा खोकी ल्‍हङाङ नाङ्‍ला फला छुला तेरी ल्‍हासुङ। यिने नाम ल्होवु छलुप तप्‍की खो लोमा च्‍यिङ्‍ङी ताङ मुला बेथानिया युलला फेप्‍सुङ।
MAR 11:12 ती सला तीला येशू ताङ खोकी लोमातिवा बेथानिया नेसुर लोक्‍नी फेपुप पेला खोला ल्‍होवा लानोक।
MAR 11:13 तमा खोकी फेचेक ग्‍यक्‍ला लोमा मङ्‍मु वोतुप अन्‍जीर दोङ्‍बुला थोङ्‍नी तीला डेलु वोते नोनी ती दोङ्‍बी चाला फेप्‍नी ल्‍हासालेन्‍सिन तीला लोमा मिसिन यम्‍बा काङ साङ मिन्‍दुक। च्‍यिलासिसिन ती पेला ति अन्‍जीर दोङ्‍बुला डेलु गोरुप पेला मालेप्‍नोक।
MAR 11:14 येशूकी ती दोङ्‍बुला “तफेन्‍ला ख्‍युरुङ नेसुर डेलु मोगोर्सिता।” सिनी सुङ्‍सुङ। खोकी तुक सुङ्‍गुप ति लोमातिवी थोनोक।
MAR 11:15 ती ज्युक्‍ला खोतिवा यरूशलेमला फेप्‍सुङ। तमा येशू यहूदी ल्‍हङाङला शुनी ते ल्‍हङाङकी लेङाङ खला छोङ कितुप ताङ ङ्‍योप्‍चे ग्‍यकुप मीतिवा तेरीला पाङ्‍ला तेन ताङ्‍सुङ। तमा टङ्‍गा ज्‍येपतिवी च्‍योक्‍चीतिवा ताङ बुर्केन चोङ्‍गुपतिवी देतुप तेक्‍पातिवा आलोक ग्‍यप्‍सुङ।
MAR 11:16 लोङ खोकी मी सुला साङ यहूदी ल्‍हङाङकी लेङाङ ख नेमा छोङ कितुप च्‍यालकतिवा खुन डोप ताङ खुर वुङ्‍गुप कि माच्‍यी।
MAR 11:17 ती ज्‍युक्‍ला खोकी मीतिवाला येन्‍देन लोपिन सिरा दुक सुङ्‍सुङ, “कोन्‍छ्‍योककी सुङगी नाङ्‍ला दुक सिनी टि वे, ‘ङे खाङ्‍बा ति तेरी मीतिवी थोक्‍ला मोपोर कितुप खाङ्‍बा यिन सिनी सिवी।’ यिने ख्‍यिरा याङ तीला ‘च्‍याक्‍पातिवा देतुप फुक’ जोसुङ।”
MAR 11:18 ती ताम्‍ङे थोनी कोङ्‍यार छ्‍येतिवा ताङ यहूदी छ्‍योकी गेकेनतिवी चुक क्‍यानी खोला सेतुप सिनी च्‍यु छाल्‍सुङ। तिवा खोला ज्‍यिवा किनोक, च्‍यिलासिसिन मी मङ्‍मु खोकी येन्‍देनला हलेवा क्‍यासुङ।
MAR 11:19 नाम र्‍होसिमा खोतिवा ती ग्‍येसा नेसुर थेन्‍नी फेप्‍सुङ।
MAR 11:20 ती सला टोपला टेताङ खोतिवा फेपिन कितुप पेला ती अन्‍जीरकी दोङ्‍बु ति मार नेज्‍युन तेरी कम्‍बुप ति तिवी थोङ्‍सुङ।
MAR 11:21 तमा येशूकी ती दोङ्‍बुला सुङ्‍गुप ताम्‍ङे ति पत्रुसकी टेन्‍नी येशूला “गेकेन, ल्हो ताङ! दी गेकेनकी मोताप तपुप अन्‍जीरकी दोङ्‍बु याङ शिनोक।” सिनी सिक्‍यासुङ।
MAR 11:22 तमा येशूकी लोमातिवाला सुङ्‍सुङ, “कोन्‍छ्‍योकला तेपा की।
MAR 11:23 ङ ख्‍यिराङला टेङ्‍बो सिरिन। दोजो ख्‍यिरा दी रीला ‘ख्‍युरुङ पोक्‍नी ग्‍येम्‍छो नाङ्‍ला लुम्‍शी।’ सिवी, तमा नाम्‍दोक माक्‍यानी खोरो सिक्‍यावु दोके च्‍युङ्‍गिवी सिनी तेपा क्‍यासिन तुकै राङ च्‍युङ्‍गिवी।
MAR 11:24 तुक क्‍यानी ङ ख्‍यिराङला सिरिन, ख्‍यिरा मोपोर क्‍यानी काङ लङ्‍सिनाङ ती ति ख्‍यिराङला ङ्‍येन वे सिनी तेपा की, तुक क्‍यासिन ती ति ख्‍यिराङला थोप्‍किवी।
MAR 11:25 येलुङ ख्‍यिराङ मोपोर कितुप पेला मी ललाइला ङ्‍यिर्मु लान वोतुप ताम्‍ङे वोसिन तीला माफ बिन। तुक क्‍यासिन देवाच्‍येनला ज्‍यु वोतुप ख्‍यिरा पपा कोन्‍छ्‍योककी साङ ख्‍यिरा क्‍यावु दिक्‍पातिवाला माफ नङ्‍गिवी।
MAR 11:26 (यिने मी यम्‍बाला माफ माबिन्‍सिन देवाच्‍येनला ज्‍यु वोतुप ख्‍यिरा पपा कोन्‍छ्‍योककी साङ ख्‍यिरा क्‍यावु दिक्‍पातिवा माफ मनङ्‍गिवी।)”
MAR 11:27 येलुङ येशू ताङ लोमातिवा यरूशलेमला फेप्‍सुङ। येशू यहूदी ल्‍हङाङ नाङ्‍ला फार छुर युकिन वोतुप पेला कोङ्‍यार छ्‍येतिवा ताङ यहूदी छ्‍योकी गेकेनतिवा ताङ यहूदी गोमा कितुप छ्‍येतिवा खोकी चाला वानी,
MAR 11:28 “ख्‍युरुङला कनी नेसुर ओङ्‍ज्‍येन ङ्‍येनी दी लाका कियी वे? दी लाका कितुप ओङ्‍ज्‍येन ति सी ख्‍युरुङला बिन्‍सुङ?” सिनी टिसुङ।
MAR 11:29 तमा येशूकी तिवाला सुङ्‍सुङ, “ङ साङ ख्‍यिराङला ताम्‍ङे यी टेयिन, ङला टिलेन नाङ। तमा ङे चुका ओङ्‍ज्‍येन नेमा दी लाका कियी वे, ती ति ख्‍यिराङला सिरिन।
MAR 11:30 यूहन्‍नाकी बप्‍तिस्‍मा तेरुप ओङ्‍ज्‍येन ति देवाच्‍येन नेमा वावु यिनाङ की, मी नेमा वावु यिन? ङला टिलेन नाङ।”
MAR 11:31 ती थोनी तिवा खोप्‍रे पर्ला केवुल कियी सिरा “दोजो ‘देवाच्‍येन नेमा वावु यिन।’ सिक्‍यासिन ‘ख्‍यिरा च्‍यिला तीला तेपा माक्‍या।’ सिनी सिवी।
MAR 11:32 यिने ‘मी नेमा वावु यिन।’ सिनी चुक क्यानी सिरुप्‍जा?” सिनी सिक्‍यासुङ। तिवा मी मङ्‍मुला ज्‍यिवा लानोक, च्‍यिलासिसिन तेरी मीतिवी यूहन्‍नाला कोन्‍छ्‍योककी लुङ्‍तेम्‍बा यिन सिनी तेन्‍गिनोक।
MAR 11:33 तुक क्‍यानी तिवी येशूला “ङ्‍यिराङला याङ छ्‍या राङ मे।” सिनी सिक्‍यासुङ। तमा येशूकी तिवाला सुङ्‍सुङ, “तुकै यिन्‍सिन ङ साङ सी ओङ्‍ज्‍येन नेमा दी लाका कियी वे सिनी ख्‍यिराङला मिसिर।”
MAR 12:1 येलुङ येशूकी तिवाला पे नेसुर दुक सुङ्‍सुङ, “मी मिरा च्‍यिककी गुन्‍डुम शिङ जोनी तीकी गारी गुरीला खोर क्‍यासुङ। तमा गुन्‍डुम चिरुप समा ज्‍योकुपला मुक्‍तुम टुनी गुन्‍डुम शिङ र्‍हेन्‍दुप मतेन यी जोसुङ। ती ज्‍युक्‍ला गुन्‍डुम शिङ ति पिज्‍यिङ्‍बातिवाला तङ ज्‍याक्‍नी खोरुङ ति थाक्‍रिङ्‍बु मी लुङ्‍बाला गाल।
MAR 12:2 तमा गुन्‍डुम छोसिमा ती गुन्‍डुम शिङगी ज्‍यिन्‍दाक तीकी खोरुङला थोपुप गुन्‍डुम लङ्‍गुपला खोरो लावा यीला पिज्‍यिङ्‍बातिवी चाला ताङ्‍सुङ।
MAR 12:3 यिने पिज्‍यिङ्‍बातिवी ती लावा तीला जिम दुनी लाक्‍पा तोङ्‍बा राङ लोक्‍नी ताङ्‍सुङ।
MAR 12:4 येलुङ ज्‍यिन्‍दाककी लावा यम्‍बा यीला पिज्‍यिङ्‍बातिवी चाला ताङ्‍सुङ। तमा तिवी ती लावाकी गोला पोप्‍नी खक्‍योवा लङ्‍नी ताङ्‍सुङ।
MAR 12:5 ती ज्‍यिन्‍दाककी येलुङ खोरो लावा यम्‍बा यीला ताङ्‍सुङ। तमा तिवी तीला ति सेसुङ। ज्‍यिन्‍दाककी खोरो लावा बङीला ताङ्‍सिनाङ तिवी ललाइला दुसुङ, ललाइला सेसुङ।
MAR 12:6 त ज्‍यिन्‍दाककी ति खोरो ङ्‍यिङ्‍ज्‍येवु पुज्‍युङ च्‍यिक तिराङ लुनोक। तमा तीकी ‘तिवी ङे पुज्‍युङला याङ ताङ्‍देन किते यिन्‍दे।’ सिनी तेरी सिनाङ तिङ्‍ला खोरो पुज्‍युङला पिज्‍यिङ्‍बातिवी चाला ताङ्‍सुङ।
MAR 12:7 यिने पिज्‍यिङ्‍बातिवी पुज्‍युङला थोङ्‍सिमा खोप्‍रे नाङ्‍ला ‘दी याङ ज्‍यिन्‍दाककी अंश थोप छ्‍योवु यिन। तीला सेतुप। तुक क्‍यासिन तीला थोपुप अंश ति दाक्‍पुला थोप्‍किवी।’ सिनी सिक्‍यासुङ।
MAR 12:8 तमा तिवी ती पुज्‍युङला जिम टि गल्‍नी सेनी गुन्‍डुम शिङगी फिला क्‍युर्सुङ।
MAR 12:9 त ती गुन्‍डुम शिङगी ज्‍यिन्‍दाक तीकी काङ किताङ? ती ज्‍यिन्‍दाक वानी ती पिज्‍यिङ्‍बातिवाला सेकिवी, तमा गुन्‍डुम शिङ ति यम्‍बा पिज्‍यिङ्‍बातिवाला तोङ्‍गिवी।
MAR 12:10 ख्‍यिरा कोन्‍छ्‍योककी सुङगी नाङ्‍ला दुक सिनी टिवु ति मारा? ‘खाङ्‍बा जोपतिवी फेन मोथोवु सिनी क्‍युर ज्‍यकुप दो ति खक्‍छ्‍येवु सुरकी दो च्‍युङ्‍सुङ।
MAR 12:11 दी ति चोवो कोन्‍छ्‍योककी क्‍या नङ्‍गुप लाका यिन, तमा दाक्‍पी थोङ्‍दाङला हलेवु वे।’”
MAR 12:12 येशूकी ती पे ति खोप्‍रे तेन्‍दोकला सुङ्‍गुप यिन सिरुप हाक्‍कोनी तिवी येशूला जिम्‍बुप छाल्‍सुङ। यिने मी मङ्‍मुला ज्‍यिवा लानी तिवी खोला क्‍युर ज्‍याक्‍नी गाल्‍सुङ।
MAR 12:13 ती ज्‍युक्‍ला तिवी येशूला ताम्‍ङे गो कोरुपला ललाइ फरिसीतिवा ताङ ग्‍येल्‍वु हेरोद छोक्‍पाकी मीतिवाला येशूकी चाला ताङ्‍सुङ।
MAR 12:14 तिवा वानी खोला “गेकेन, गेकेन याङ टेङ्‍बु वे सिरुप ति ङ्‍यिराङला छ्‍या वे। गेकेनकी याङ मी यम्‍बी खोरुङला काङ सिते सिनी ङ्‍याम मिकिवी। गेकेनकी मी ङो ल्‍हानी लाका मिकिवी, यिने कोन्‍छ्‍योककी लाम टेङ्‍बु क्‍यानी लोप्‍किवी। त ङ्‍यिरा रोमी ग्‍येल्‍वु कैसरला से तेतुप ति कोन्‍छ्‍योककी ठिमला गिवी ताङ मेङ्‍गिवी?
MAR 12:15 ङ्‍यिरा से ते गोकिवी ताङ मोगोवी?” सिनी सिक्‍यासुङ। येशूकी तिवी सेम खोनक्‍पु वोतुप हाक्‍कोनी तिवाला “ख्‍यिराङ च्‍यिला ङला खोक्‍पा ल्‍हेवी? ङुलकी डप्‍बु च्‍यिक दे खुर वानी ङला छ्‍या तेन।” सिनी सुङ्‍सुङ।
MAR 12:16 तिवी शिकाकी डप्‍बु च्‍यिक खुर्नी वासिमा खोकी तिवाला “दीकी लोला वोतुप रिमुङ ति सी ति यिन? ती यिकी ति सी ति यिनाङ?” सिनी टि नाङ्‍सुङ। तिवी “कैसरकी ति यिन।” सिनी सिक्‍यासुङ।
MAR 12:17 येशूकी तिवाला सुङ्‍सुङ, “कैसरकी ति कैसरला ते, तमा कोन्‍छ्‍योककी ति कोन्‍छ्‍योकला पुल।” खोकी दुक सुङ्‍गुप थोनी तिवा हलेवा क्‍यासुङ।
MAR 12:18 तमा शेप ने सेन्‍बु मलङ्‍गिवी सिरुप सदुकीतिवा येशूकी चाला वानी दुक सिनी टिसुङ,
MAR 12:19 “गेकेन, मोशाकी दाक्‍पुला टिवु ठिमकी नाङ्‍ला ‘मी ललाइकी ति अच्‍यु ति पेजा माच्‍युङ्‍वा क्‍यानी शिनी तीकी पेर्मी लुसुङ सिसिन तीकी नुप तीकी छाम तीला लानी खोरो अच्‍यी थोक्‍ला गिपा फेल ज्‍यि गोकिवी।’ सिनी सिक्‍यानोक।
MAR 12:20 दासा यीला अच्‍युनुप पिन दिन नोक। तमा अच्‍यु छ्‍ये तीकी पेर्मी लासिमा पेजा माच्‍युङ्‍वा क्‍यानी शिसुङ।
MAR 12:21 तुक राङ क्‍यानी तीकी नुप तीकी छाम तीला लानी ती साङ पेजा माच्‍युङ्‍वा क्‍यानी शिसुङ। लोङ तीकी नुप सुम्‍बा तीकी साङ तुक राङ क्‍यानी शिसुङ।
MAR 12:22 पिन दिन्‍करला पेजा माच्‍युङ। ती ज्‍युक्‍ला ति छाम तिङ शिसुङ।
MAR 12:23 तमा तिवा शेप ने सेन्‍बु लङ्‍गुप पेला ती पुम्‍पेजा ति सी पेर्मी च्‍युङ्‍गिवी? पिन दिन्‍करकी तीला जेन्‍दी क्‍यावु यिन।”
MAR 12:24 तमा येशूकी तिवाला सुङ्‍सुङ, “ख्‍यिरा नोरुप यिन, च्‍यिलासिसिन ख्‍यिरा कोन्‍छ्‍योककी सुङ ताङ खोकी ओङ ति हाक्‍माकोनोक।
MAR 12:25 मीतिवा शेप ने सेन्‍बु लङ्‍गुप पेला जेन्‍दी मिकिवी, यिने देवाच्‍येनकी लेन क्‍योलुप थुतिवा दोके च्‍युङ्‍गिवी।
MAR 12:26 शेपतिवा सेन्‍बु लङ्‍गुप कोर्ला मे बरिन वोतुप बुलुक दोङ्‍बी पर नेमा कोन्‍छ्‍योककी मोशाला काङ सुङ्‍नोक, ती ति मोशाकी टिवु थेप नाङ्‍ला ख्‍यिरा मारा? ती पेला कोन्‍छ्‍योककी मोशाला ‘ङ ति अब्राहामकी कोन्‍छ्‍योक ताङ इसहाककी कोन्‍छ्‍योक ताङ याकूबकी कोन्‍छ्‍योक यिन।’ सिनी सुङ्‍सुङ।
MAR 12:27 कोन्‍छ्‍योक ति शेपतिवी कोन्‍छ्‍योक मिन, यिने सेन्‍बुतिवी कोन्‍छ्‍योक यिन। ख्‍यिराङ छासे नोर्नोक।”
MAR 12:28 ती पेला यहूदी छ्‍योकी गेकेन यी वानी येशूला सदुकीतिवी मुला केवुल कियी वोतुप थोनोक। येशूकी सदुकीतिवाला टिलेन ल्‍यामु नङ्‍गुप थोनी तीकी खोला टिसुङ, “गेकेन, कोन्‍छ्‍योककी कतिवी नाङ्‍ला तेरी सिनाङ क छ्‍ये ति चुका ति यिन?”
MAR 12:29 तमा येशूकी तीला सुङ्‍सुङ, “तेरी सिनाङ क छ्‍ये ति दी राङ यिन। ‘ओ इस्राएलकी मीतिवा, ङ्‍येना। दाक्‍पी चोवो कोन्‍छ्‍योक ति च्‍यिक राङ वोतुप चोवो यिन।
MAR 12:30 ख्‍योरो तेरी सेमगी दिङ ने, ख्‍योरो तेरी मिजी ने, ख्‍योरो तेरी नासाम ने, ख्‍योरो तेरी ङार ने रङगी चोवो कोन्‍छ्‍योकला ङ्‍यिङ्‍ज्‍ये की।’
MAR 12:31 तमा क ङ्‍यिवा ति दी राङ यिन। ‘ख्‍योरो युल्‍वाला रङला दोके ङ्‍यिङ्‍ज्‍ये की।’ दी सिनाङ यम्‍बा क छ्‍ये ति मे।”
MAR 12:32 ती थोनी ती यहूदी छ्‍योकी गेकेन तीकी येशूला सिक्‍यासुङ, “गेकेनकी टेके सुङ्‍सुङ। कोन्‍छ्‍योक च्‍यिक राङ वे, खो मिसिन यम्‍बा सु साङ मे।
MAR 12:33 खोला रङगी तेरी सेमगी दिङ ने, रङगी तेरी रिक्‍पा ने, रङगी तेरी ङार ने ङ्‍यिङ्‍ज्‍ये कितुप ताङ खोरो युल्‍वाला रङला दोके ङ्‍यिङ्‍ज्‍ये कितुप ति सेम्‍ज्‍येन र्‍हेनी जिन्‍बा तोङ्‍गुप ताङ यम्‍बा जिन्‍बा तोङ्‍गुप सिनाङ मङ खक्‍छ्‍येवु यिन।”
MAR 12:34 तीकी सिक्‍यावु रिक्‍पा वोतुप ताम्‍ङे थोनी येशूकी तीला “ख्‍युरुङ ति कोन्‍छ्‍योककी ग्‍येल्‍खापला शुक्‍तु छ्‍येनोक।” सिनी सुङ्‍सुङ। तमा ती ज्‍युक्‍ला सी साङ खोला टिवा टेपला ङाडेङ माक्‍या।
MAR 12:35 तमा येशूकी यहूदी ल्‍हङाङला येन्‍देन लोपिन कितुप पेला खोकी दुक सुङ्‍सुङ, “च्‍यिला यहूदी छ्‍योकी गेकेनतिवी ख्रीष्‍ट ति दाऊदकी गिपा यिन सिनी सिवी?
MAR 12:36 दाऊदकी कोन्‍छ्‍योककी थु चाङ्‍मा नेमा ख्रीष्‍टकी कोर्ला दुक सिक्‍यासुङ, ‘कोन्‍छ्‍योककी ङे चोवोला, “ङे ख्‍योरो डतिवाला ख्‍योरे काङ्‍बी वोक्‍ला मालेपा सेक्‍ला ख्‍युरुङ ति ङे यावी थाकाला देता।” सिनी सुङ्‍सुङ।’
MAR 12:37 दाऊदकी ख्रीष्‍टला खोरो चोवो सिनी सिसिन चुक क्‍यानी ख्रीष्‍ट ति दाऊदकी गिपा च्‍युङ्‍गिवी?” मी मङ्‍मुकी खोकी सुङ ति गा क्‍यानी ङ्‍येन्‍सुङ।
MAR 12:38 येलुङ येशूकी येन्‍देन लोपिन सिरा दुक सुङ्‍सुङ, “यहूदी छ्‍योकी गेकेनतिवा नेसुर च्‍याङ्‍से दे। तिवा छ्‍योवा रिङ्‍बु कोन्‍नी फार छुर युकुप गा किवी, हाला मीतिवी खोरुङला छ्‍याक पुलुप ति गा किवी।
MAR 12:39 तमा यहूदी छ्‍योखाङला टाल जिम्‍बुप ताङ डेनला टला देतुप गा किवी।
MAR 12:40 तिवा पेर्मी युक्‍सिमकी नोर ठोनी सेवी, मीतिवाला छ्‍या देन्‍दुपला मोपोर रिङ्‍बु किवी। तुक कितुपतिवाला ति मङ छ्‍येर्पा ल्‍हक्‍पा फोकिवी।”
MAR 12:41 येशू यहूदी ल्‍हङाङकी बुल्‍वा बुलुप गामकी फेचेक चा नेसुर मीतिवी बुल्‍वा लुकुप ति ल्‍हानी ज्‍युसुङ। ते मी छ्‍युक्‍पुतिवा बङीकी टङ्‍गा बङी लुक्‍सुङ।
MAR 12:42 ती पेला पेर्मी युक्‍सिम पेराङ्‍बु यी वानी सा डेवा ङ्‍यी लुक्‍सुङ।
MAR 12:43 तमा येशूकी लोमातिवाला चाला कताङ्‍नी सुङ्‍सुङ, “ङ ख्‍यिराङला टेङ्‍बो सिरिन, बुल्‍वा बुलुपतिवी पर्ला दी पेर्मी युक्‍सिम तीकी यम्‍बा सिनाङ मङ लुक्‍सुङ।
MAR 12:44 च्‍यिलासिसिन यम्‍बातिवा तेरीकी नोर मङ्‍मु वोतुप नेसुर लुक्‍सुङ, यिने दी पेर्मी युक्‍सिम तीकी याङ पेराङ्‍बु राङ वोसिनाङ खोरो मुला चो वोतुप ति तेरी टङ्‍गा लुक्‍सुङ।”
MAR 13:1 येशू यहूदी ल्‍हङाङ नेसुर पाङ्‍ला थेनिन वोतुप पेला खोकी लोमातिवी पर्ला मिरा च्‍यिककी खोला “ल्‍हो ताङ, गेकेन! चुका दो ग्‍येर्पुतिवा! चुका खाङ्‍बा ग्‍येर्पुतिवा!” सिनी सिक्‍यासुङ।
MAR 13:2 तमा येशूकी तीला सुङ्‍सुङ, “ख्‍योरो दी खाङ्‍बा ग्‍येर्पुतिवा थोङ्‍गिनोक? देकी दो च्‍यिक साङ यम्‍बी खला मालुवा क्‍यानी दिवा तेरी र्‍होम्‍गिवी।”
MAR 13:3 तमा येशू यहूदी ल्‍हङाङकी फर्केन वोतुप जैतुन पम्‍दोकला ज्‍यु वोतुप पेला पत्रुस ताङ याकूब ताङ यूहन्‍ना ताङ अन्‍द्रियासकी खोला खरक्‍पा सोक सिरा टिसुङ,
MAR 13:4 “गेकेन, गेकेनकी गोमाला सुङ्‍गुप ती ताम्‍ङेतिवा नम पेला च्‍युङ्‍गिवी ङ्‍यिराङला सुङ्‍नी। येलुङ दी ताम्‍ङेतिवा च्‍युङ्‍गुप छलुप पेला चुका ततिवा च्‍युङ्‍गिवी?”
MAR 13:5 तमा येशूकी तिवाला सुङ्‍सुङ, “च्‍याङ्‍से दे! सी साङ ख्‍यिराङला मुलुशी।
MAR 13:6 मी बङी ङे मिङला वानी ‘ङ ख्रीष्‍ट यिन।’ सिनी मी बङीला लुकितो।
MAR 13:7 ख्‍यिरा मक ग्‍यकिन वोतुप ताङ मक ग्‍यकुप ताम्‍ङे थोकिवी, यिने ती पेला ख्‍यिराङ ज्‍यिवा माकी। दी ताम्‍ङेतिवा याङ च्‍युङ राङ गोकिवी, यिने ती ति तरोङ साङ जम्‍बुलिङ ना डोप तुजे ति मिन।
MAR 13:8 मिरिक मिरिककी तेन्‍दोकला, लुङ्‍बा लुङ्‍बाकी तेन्‍दोकला मक ग्‍यकितो। तमा दासा दासाला सयी ग्‍यकुप ताङ ङ्‍यिमा मर्वु शर्कितो। दिवा ति दुक्पाकी थल्‍मा तिराङ यिन।
MAR 13:9 तुक क्‍यानी ख्‍यिराङ त वुङ्‍गुप दुक्‍पी थोक्‍ला च्‍याङ्‍से क्‍यानी दे। मीतिवी ख्‍यिराङला ठिम्‍खाङला चेक तेकितो, तमा यहूदी छ्‍योखाङला ख्‍यिराङला दुङ्‍गितो। ख्‍यिरा ङला तेपा क्‍यावु तप्‍की ठिम कितुप मी छ्‍येतिवा ताङ ग्‍येल्‍वुतिवी दोङ्‍ला लानी ङे थोक्‍ला पङ्‍बु तेर्कितो।
MAR 13:10 यिने दी सिनाङ गोमाला तेरी मिरिककी मीतिवाला लेन ल्‍यामु ति ख्‍याप्‍टाक कि गोकितो।
MAR 13:11 तमा मीतिवी ख्‍यिराङला टिनी चेक तेतुप पेला ख्‍यिरा काङ सि गोकिवी सिनी गोमाला के पप माकी। ती पेला कोन्‍छ्‍योककी थु चाङ्‍माकी ख्‍यिराङला काङ लाप्‍किवे, ती राङ सी। च्‍यिलासिसिन ताम्‍ङे कितुप ति ख्‍यिराङ मिन, कोन्‍छ्‍योककी थु चाङ्‍माकी राङ यिन।
MAR 13:12 ती पेला अच्‍युनुपकी खोरो अच्‍युनुपला सेतुपला चेक तेकितो, तमा पपी खोरो पेजाला तुक राङ कितो। पेजातिवी पपाआमी तेन्‍दोकला लानी तिवाला सेतुपला चेक तेकितो।
MAR 13:13 तमा ख्‍यिरा ङला तेपा क्‍यावु तप्‍की मी तेरीकी ख्‍यिराङला ङ्‍यिङ्‍मर कितो। यिन्‍सिनाङ तिङ्‍ला सेक डेकला देतुपतिवाला ति थर्वा ङ्‍येकितो।”
MAR 13:14 “तमा ना तोङ्‍गुप क्‍युक्‍टो लङ्‍गुप च्‍यालक ति वुङ मेङ्‍गुप दासाला लानी वोतुप ति ख्‍यिरा थोङ्‍गिवी। (लोपुप तीकी दीकी तेन्‍दोक हाक्‍कोशी) तमा ती पेला यहूदियाला वोतुपतिवा री नेवा टो डोशी।
MAR 13:15 खाङ्‍बी खाते खला वोतुपतिवा मर मपप्‍शी, याङ्‍ना काङ च्‍यालक साङ थेन्‍दुपला खाङ्‍बी नाङ्‍ला मुशुक्‍शी।
MAR 13:16 तमा शिङ खला वोतुपतिवा खोरो मज्‍या लङ्‍गुपला खाङ्‍बा मोलोक्‍शी।
MAR 13:17 ती पेला जु च्‍येन्‍दी वोतुप पुम्‍पेजातिवा ताङ आङाला नुम तेरुप आमातिवाला मङ कले ख्‍येल्‍गिवी।
MAR 13:18 तुका छेटाङ ति गुन्‍बी लला मेख्‍येल्‍शी सिनी मोपोर की।
MAR 13:19 च्‍यिलासिसिन ती ङ्‍यिमाला छासे छेटाङ ग्‍येर्पु ख्‍येल्‍गिवी, दुका छेटाङ ति कोन्‍छ्‍योककी जम्‍बुलिङ ज्‍येङ्‍गुप थल्‍मा नेज्‍युन तन्‍दा सेक नाम्‍साङ माच्‍युङ वे, ज्‍युक्‍थमाला साङ मेङ्‍गिवी।
MAR 13:20 कोन्‍छ्‍योककी ती तुजेतिवा ङ्‍युङ्‍मु माजोवु यिन्‍सिन सु साङ सेन्‍बु मुलुवी। यिने खोकी खोरे राङ पेतुपतिवी थोक्‍ला ती ङ्‍यिमातिवा ङ्‍युङ्‍मु जो वे।
MAR 13:21 ती पेला सी ख्‍यिराङला ‘ल्हो ताङ, ख्रीष्‍ट याङ दे वे।’ याङ्‍ना ‘ल्हो ताङ, खो याङ ते वे।’ सिक्‍यासिनाङ ती ताम्‍ङेला तेपा माकी।
MAR 13:22 तुका ख्रीष्‍ट जुमातिवा ताङ लुङ्‍तेम्‍बा मेटेङ्‍बुतिवा वुङ्‍गिवी, तमा तिवी ततिवा ताङ हलेवु लाकातिवा छ्‍या तेन्‍नी अछ्‍योता सेक कोन्‍छ्‍योककी पेतुपतिवाला लुतुप छोल्‍गिवी।
MAR 13:23 तुक क्‍यानी ख्‍यिराङ च्‍याङ्‍से देता। ङ ती तेरी ताम्‍ङेतिवा गोमाला के ख्‍यिराङला सिरिन वे।”
MAR 13:24 “ती छेटाङकी तिङ्‍ला ङ्‍यिमा नक्‍तोमी डिवी, तमा उलाकी वो मेतेर्वी।
MAR 13:25 कर्मातिवा नाम नेसुर लुम्‍गिवी, तमा नामला वोतुप ङारतिवा योकिवी।
MAR 13:26 ती पेला मीतिवी ङ मी पुज्‍युङला ओङ ग्‍येर्पु ताङ मोवा थोप्‍नी नामगी मुक्‍पी खला वुङ्‍गुप थोङ्‍गिवी।
MAR 13:27 तमा ङ मी पुज्‍युङकी देवाच्‍येनकी लेन क्‍योलुप थुतिवा ताङ्‍नी जम्‍बुलिङ तेरी दासाकी छो ज्‍यी नेसुर ङे पेतुपतिवाला जोम ज्‍यिकिवी।”
MAR 13:28 “त अन्‍जीरकी दोङ्‍बु नेसुर ताम्‍ङे च्‍यिक लोप। तीकी येल्‍कातिवा च्‍योक च्‍योक गल्‍नी ती नेमा ज्‍योक थेन्‍सिन त याङ येर्वु थेन्‍दुप छाल्‍नोक सिनी ख्‍यिरा हाक्‍कोकिवी।
MAR 13:29 ती दोके दिवा तेरी ताम्‍ङेतिवा च्‍युङ्‍गुप थोङ्‍सिन ङ मी पुज्‍युङ छासे चिप्‍ला राङ लेप्‍नी वे सिरुप ति ख्‍यिरा हाक्‍कोवा की।
MAR 13:30 ङ ख्‍यिराङला टेङ्‍बो सिरिन, ती तेरी ताम्‍ङेतिवा माच्‍युङ्‍वा सेक्‍ला दी गिपा ना मोडोवी।
MAR 13:31 स ताङ नाम ति तोर्नी डिवी, यिने ङे सिक्‍यावु ताम्‍ङेतिवा ति नाम्‍साङ तोर्नी मोडोवी।”
MAR 13:32 “यिने ती ङ्‍यिमा ताङ तुजे ति नम गिते सिनी सुला साङ छ्‍या मे। देवाच्‍येनकी लेन क्‍योलुप थुतिवाला साङ छ्‍या मे, पुज्‍युङला साङ छ्‍या मे, ती ति पपाला तिराङ छ्‍या वे।
MAR 13:33 चेर्मु क्‍यानी च्‍याङ्‍से देता। च्‍यिलासिसिन ती तुजे ति नम गिवी सिनी ख्‍यिराङला छ्‍या मे।
MAR 13:34 दी ताम्‍ङे ति मी मिरा च्‍यिककी खोरो लावातिवाला दाक दाक्‍पी कि गोवु लाका चेक तेनी खाङ्‍बा र्‍हेन्‍दुप तीला ति चेर्मु क्‍यानी ल्‍हटे की सिनी खुरुङ ति मी लुङ्‍बा गलुप दोके यिन।
MAR 13:35 तुक क्‍यानी ख्‍यिराङ चेर्मु क्‍यानी दे। च्‍यिलासिसिन खाङ्‍बी ज्‍यिन्‍दाक ति नम पेला लोक्‍नी गिते, गोमु, याङ्‍ना नुप फेकाला, याङ्‍ना च्‍यवु कुकुरी देन्‍दुप पेला, याङ्‍ना टोपला टेताङ गिते ख्‍यिराङला छ्‍या मे।
MAR 13:36 तमा ज्‍यिन्‍दाक शार्क्येक वानी ख्‍यिराङ ङ्‍यिलोक्‍नी वोतुप मेठेशी।
MAR 13:37 ङे ख्‍यिराङला सिक्‍यावु दी ताम्‍ङे ति मी तेरीला सिरुप ताम्‍ङे यिन। ख्‍यिराङ चेर्मु क्‍यानी देता।”
MAR 14:1 तमा यहूदी थरुप तुछ्‍येन ताङ खमीर मालुकुप शुब्‍ज्‍याङ साप तुछ्‍येन वुङ्‍गुपला ङ्‍यिमा ङ्‍यी लुनी नोक। ती पेला कोङ्‍यार छ्‍येतिवा ताङ यहूदी छ्‍योकी गेकेनतिवी चुक क्‍यानी येशूला जिम्‍नी सेतुप सिनी खोप्‍रे नाङ्‍ला च्‍यु ल्‍हयी नोक।
MAR 14:2 यिने तिवी “ती तुछ्‍येनला ति तुक माकी, मिसियाङ मीतिवा हराङ हुरुङ किवी।” सिनी सिक्‍यासुङ।
MAR 14:3 तमा येशू बेथानिया युलला सिमोन सिरुप जे ग्‍यपुप मी यीकी खाङ्‍बाला फेप्‍सुङ। खो ते सोल शेयी वोतुप पेला पुम्‍पेजा यीकी सिङ्‍गमरमरकी बोक्‍तल यी नाङ्‍ला गोङ कुर्मु नावु टी जङ्‍बु खाप नुम खुर्नी वासुङ। ती र्‍हे मेतुप नुम ति जटामसी सिरुप दोङ्‍बु नेसुर जोवु नोक। तमा तीकी बोक्‍तल च्‍याक्‍नी ती टी जङ्‍बु खाप नुम ति येशूकी गोला पुसुङ।
MAR 14:4 ती थोङ्‍नी ते वोतुप मी ललाइ ङ्‍यिर्मु लानी च्‍यिककी च्‍यिकला “च्‍यिला दी टी जङ्‍बु खाप नुम ति ना तङ्‍गुप यिनाङ?
MAR 14:5 दी ति ङुलकी डप्‍बु सयी सुम सिनाङ ल्‍हक्‍पा क्‍यानी चोनी पेराङ्‍बुतिवाला तेर थुप्‍किवी।” सिनी सिक्‍यासुङ। तमा तिवी ती पुम्‍पेजा तीला छासे वोरु तेन्‍सुङ।
MAR 14:6 यिने येशूकी सुङ्‍सुङ, “तीला क्‍युर्नी ज्‍योक, तीला वोरु मादेन। ख्‍यिराङ च्‍यिला तीला दुक्‍पा तेर्किवी? दी पुम्‍पेजी याङ ङे थोक्‍ला लाका ल्‍यामु राङ क्‍या वे।
MAR 14:7 पेराङ्‍बुतिवा याङ ख्‍यिरा मुला नरी लुकिवी। तुक क्‍यानी नम पेला ख्‍यिरा नो लङ्‍गिवे, ती पेला राङ तिवाला दाल्‍जा कि थुप्‍किवी। यिने ङ याङ नरी ख्‍यिरा मुला मुलुवी।
MAR 14:8 दी पुम्‍पेजा तीकी याङ खोरो काङ कि थुपुप ति क्‍यावु यिन। तीकी ङे जुला टी जङ्‍बु खाप नुम पुनी ङे फुङ्‍बु कल्‍दोक कितुपकी थोक्‍ला टडिक क्‍यावु यिन।
MAR 14:9 ङ ख्‍यिराङला टेङ्‍बो सिरिन। जम्‍बुलिङकी चुका दासाला साङ लेन ल्‍यामु ख्‍याप्‍टाक किवे, ते दी पुम्‍पेजा तीकी क्‍यावु लाका साङ लाप्‍नी तीला टेन्‍गिवी।”
MAR 14:10 तमा येशूकी लोमा च्‍यिङ्‍ङी नाङ ने यहूदा इस्‍करियोत सिरुप लोमा ति कोङ्‍यार छ्‍येतिवी चाला गल्‍नी येशूला जिम तेरुप सिनी ताम्‍ङे क्‍यासुङ।
MAR 14:11 दी ताम्‍ङे थोनी कोङ्‍यार छ्‍येतिवा छासे गा क्‍यानी यहूदाला टङ्‍गा तेरुप सिनी थाक्‍छ्‍येसुङ। तमा यहूदा तीकी येशूला जिम तेरुप च्‍यु ल्हानी देसुङ।
MAR 14:12 ती ज्‍युक्‍ला खमीर मालुकुप शुब्‍ज्‍याङ साप तुछ्‍येन वासुङ। ती तुछ्‍येनकी ङ्‍यिमा थल्‍माला यहूदी थरुप तुछ्‍येनकी थोक्‍ला मीतिवी लुक रुक सेनी जिन्‍बा तोङ्‍गिनोक। ती पेला येशूकी लोमातिवी खोला “गेकेन, ङ्‍यिराङ कनी गल्‍नी गेकेनकी थोक्‍ला यहूदी थरुप तुछ्‍येनकी डेन टडिक कितुप गेकेनकी नो वे?” सिनी टिसुङ।
MAR 14:13 तमा खोकी लोमा मिरा ङ्‍यीला दुक सुङ्‍नी ताङ्‍सुङ, “ख्‍यिराङ ग्‍येसाला ग्‍युक। तमा ते ख्‍यिरा दिङ्‍गर नाङ्‍ला छ्‍यु खुरुप ख्‍योक्‍पेजा यी ठेकिवी। तीला तिङ्‍यानी ग्‍युक।
MAR 14:14 ती मी ति चुका खाङ्‍बी नाङ्‍ला शुकिवे, ती खाङ्‍बी ज्‍यिन्‍दाकला गल्‍नी ‘ङ्‍यिरा गेकेनकी ङ ताङ ङे लोमातिवा यहूदी थरुप तुछ्‍येनकी डेन साप जे ति कनी वे सिनी टि नाङ्‍सुङ।’ सिनी सी।
MAR 14:15 तमा तीकी ख्‍यिराङला येर तेला टडिक क्‍या वोतुप जे ग्‍येर्पु यी छ्‍या देन्‍गिवी। ते राङ दाक्‍पी थोक्‍ला डेन टडिक की।”
MAR 14:16 लोमातिवा तेसुर ग्‍येसाला गल्‍नी ल्‍हासालेन्‍सिन खोकी सुङ्‍गुप दोके तेरी ठेसुङ। तमा तिवी ते राङ यहूदी थरुप तुछ्‍येनकी डेन टडिक क्‍यासुङ।
MAR 14:17 ती गोमु येशू लोमा च्‍यिङ्‍ङी ताङ मुला ती खाङ्‍बाला फेप्‍सुङ।
MAR 14:18 तमा खोतिवा ज्‍युनी डेन शेयी वोतुप पेला येशूकी तिवाला सुङ्‍सुङ, “ङ ख्‍यिराङला टेङ्‍बो सिरिन, ङ ताङ मुला डेन सापतिवी पर्ला मिरा च्‍यिककी ङला जिम तेर्किवी।”
MAR 14:19 ती थोनी तिवी सेमला पप लानी रे रेकी खोला “गेकेन, ती ति ङ यिन?” सिनी सिक्‍यासुङ।
MAR 14:20 तमा खोकी तिवाला सुङ्‍सुङ, “ख्‍यिराङ च्‍यिङ्‍ङी पर्ला मिरा च्‍यिककी ङ ताङ मुला कोरी नाङ्‍ला शुब्‍ज्‍याङ पानी सयी वे, ती राङ यिन।
MAR 14:21 ङ मी पुज्‍युङ ति खोरो कोर्ला कोन्‍छ्‍योककी सुङ नाङ्‍ला टिवु दोके क्‍यानी डिवी, यिने मी पुज्‍युङला जिम तेरुप तीला ति मोताप सुकिवी। ती याङ माक्‍येवु राङ यिन्‍सिन तीकी थोक्‍ला ल्‍यामु वुङ्‍गुप्‍जा।”
MAR 14:22 तमा खोतिवा शेयी वोतुप पेला येशूकी शुब्‍ज्‍याङ लानी कोन्‍छ्‍योकला थुचिछे पुल्‍सिमा च्‍याक्‍नी लोमातिवाला तेरिन सिरा “लोसा, दी ति ङे जु यिन।” सिनी सुङ्‍सुङ।
MAR 14:23 ती ज्‍युक्‍ला खोकी कोरा लानी कोन्‍छ्‍योकला थुचिछे पुल्‍सिमा तिवाला नाङ्‍सुङ। तमा तिवा तेरीकी ती कोरा नेमा थुसुङ।
MAR 14:24 येशूकी तिवाला सुङ्‍सुङ, “दी ति मी बङीकी थोक्‍ला देन्‍दुप कोन्‍छ्‍योककी थाक्‍छ्‍येन नङ्‍गुप ङे ठक यिन।
MAR 14:25 ङ ख्‍यिराङला टेङ्‍बो सिरिन, ङ कोन्‍छ्‍योककी ग्‍येल्‍खापला सम्‍बा क्‍यानी माथुवा सेक्‍ला ङ येलुङ गुन्‍डुम दोङ्बी डेलु नेमा जोवु ति मुथुङ।”
MAR 14:26 ती ज्‍युक्‍ला खोतिवा कोन्‍छ्‍योकला सोवा देकुप लु च्‍यिक लानी जैतुन पम्‍दोक नेवा फेप्‍सुङ।
MAR 14:27 ती पेला येशूकी तिवाला सुङ्‍सुङ, “ख्‍यिराङ तेरीकी ङला क्‍युर ज्‍याक्‍नी टोनी डिवी। च्‍यिलासिसिन कोन्‍छ्‍योककी सुङ नाङ्‍ला दुक सिनी टि वे, ‘ङ लुक गोठालाला सेतिन। तमा लुकतिवा थरा थुरा डिवी।’
MAR 14:28 यिने ङ शेप ने सेन्‍बु लासिमा ख्‍यिराङ सिनाङ गोमाला के गालीलला डोयिनो।”
MAR 14:29 तमा पत्रुसकी येशूला “तेरीकी गेकेनला क्‍युर्नी ज्‍याक्‍सिनाङ ङ याङ नाम्‍साङ क्‍युर्नी मोज्‍योक।” सिनी सिक्‍यासुङ।
MAR 14:30 येशूकी तीला सुङ्‍सुङ, “ङ ख्‍युरुङला टेङ्‍बो सिरिन, हारिङ नुपला च्‍यवु कुकुरी थेङ्‍मा ङ्‍यी देन्‍दुप सिनाङ गोमाला ख्‍योरो ङला थेङ्‍मा सुम ङो मेशेवी सिनी सिवी।”
MAR 14:31 यिने पत्रुसकी मङ कार क्‍यानी, “ङ गेकेन ताङ मुला शि राङ गोसिनाङ गेकेनला ङो मेशेवी सिनी मिसिर।” सिनी सिक्‍यासुङ। तमा यम्बा लोमातिवी साङ तुकै राङ सिक्‍यासुङ।
MAR 14:32 ती ज्‍युक्‍ला येशू लोमातिवा ताङ मुला गेतसमनी सिरुप दुम्‍डोकला फेप्‍सुङ। ते लेप्‍सिमा खोकी लोमातिवाला “ङ मोपोर कितुप सेक ख्‍यिराङ दे राङ दे।” सिनी सुङ्‍सुङ।
MAR 14:33 तमा खोकी लोमातिवी नाङ ने पत्रुस ताङ याकूब ताङ यूहन्‍नाला खोरो मुला राङ टिनी फेप्‍सुङ। ती पेला खोकी सेम छासे सेम्‍दुक लानी छप्‍छुपा कितुप छाल्‍सुङ।
MAR 14:34 खोकी तिवाला सुङ्‍सुङ, “ङे सेम छासे सेम्‍दुक लानी शेप दोके छ्‍याता छ्‍यिता गल वे। ख्‍यिराङ ङ्‍यिमालोका क्‍यानी दे राङ देता।”
MAR 14:35 तमा खो ति चेयी फेचेक फेप्‍नी सला खवुतुङ्‍मा ज्‍युनी च्‍युङ थुप्‍सिन दी छेटाङकी तुजे ति खो नेसुर दोशी सिनी मोपोर क्‍या नाङ्‍सुङ।
MAR 14:36 लोङ खोकी सुङ्‍सुङ, “पपा, ओ ङे पपा, पपी तेरी कि थुप्‍किवी। दी छेटाङकी कोरा ति ङ नेसुर दोनी नाङ। यिन्‍सिनाङ ङे नोवाला मिन, पपी नोवा दोके राङ च्‍युङ्‍शी।”
MAR 14:37 तमा येशू लोमा सुमकी चाला लोक्‍नी फेप्‍सालेन्‍सिन तिवा ङ्‍यिलोङ राङ वोतुप थोङ्सुङ। खोकी पत्रुसला सुङ्‍सुङ, “सिमोन, ख्‍युरुङ ङ्‍यिलोक्‍नी राङ वे? ख्‍युरुङ छ्‍युजी च्‍यिक साङ ङ्‍यिमालोका क्‍यानी दे मुथुप्‍नोक?
MAR 14:38 ख्‍यिराङ खोक्‍पा ल्‍हापला मेख्‍येलुपला ङ्‍यिमालोका क्‍यानी मोपोर की। सेमला ति कितुप नो वे, यिन्‍सिनाङ जुकी अला कि मुथुपी।”
MAR 14:39 येलुङ येशू फार फेप्‍नी गोमी दोके क्‍यानी मोपोर क्‍या नाङ्‍सुङ।
MAR 14:40 लोङ छुर फेप्‍सालेन्‍सिन तिवा ङ्‍यिलोक्‍नी राङ नोक, च्‍यिलासिसिन तिवा छासे ङ्‍यी जिनी मिक साङ बे मुथुप्‍नोक। तमा तिवी खोला काङ सिरुप काङ सिरुप गाल्‍सुङ।
MAR 14:41 येशू थेङ्‍मा सुम्‍बाला मोपोर क्‍यानी छुर फेप्‍सिमा तिवाला सुङ्‍सुङ, “ख्‍यिराङ तरोङ साङ ङ्‍यिलोक्‍नी राङ देकिवी? त याङ ग्‍यावा, तुजे लेम वे। ल्‍होसा, ङ मी पुज्‍युङ दिक्‍छेनतिवी लकला चेक तेतुप छल वे।
MAR 14:42 त याङ ख्‍यिराङ लो, दाक्‍पु डोप! ङला जिम तेरुप ति चाला राङ वा वे।”
MAR 14:43 येशूकी तुक सुङ्‍यिन वोतुप पेला लोमा च्‍यिङ्‍ङी नाङ ने यहूदा सिरुप लोमा ति ते लेसुङ। ती पेला कोङ्‍यार छ्‍येतिवा ताङ यहूदी छ्‍योकी गेकेनतिवा ताङ यहूदी गोमा कितुप मी छ्‍येतिवी तङ्‍गुप मीतिवा खुर्पा ताङ लकाम खुर्नी यहूदा ताङ मुला ते लेसुङ।
MAR 14:44 तमा येशूला जिम तेरुप यहूदा तीकी येशूला जिम वावु मीतिवाला दुक सिक्‍यानोक “सुला ङे पुका किवे, ती राङ येशू यिन। तीला जिम्‍नी टि ग्‍युक।”
MAR 14:45 तमा यहूदा ति येशूकी चिप्‍ला गल्‍नी, “टसी देलेक, गेकेन!” सिनी खोला पुका क्‍यासुङ।
MAR 14:46 तोजो पेला राङ तिवी येशूला जिम्‍सुङ।
MAR 14:47 ते चाला लान देतुप मीतिवी पर ने मिरा च्‍यिककी खुर्पा थेन्‍नी तेरी सिनाङ कोङ्‍यार छ्‍येकी लावाकी नम्‍ज्‍योक ति टेप च्‍येसुङ।
MAR 14:48 तमा येशूकी तिवाला सुङ्‍सुङ, “ख्‍यिराङ च्‍याक्‍पा जिम्‍बुप दोके क्‍यानी खुर्पा ताङ लकाम खुर्नी ङला जिम्‍बुपला वावु?
MAR 14:49 ङ ङ्‍यिमी टेङ यहूदी ल्‍हङाङला ख्‍यिरा मुला देनी मीतिवाला लाप्‍सिनाङ ख्‍यिरा ङला माजिम। यिने कोन्‍छ्‍योककी सुङला टिवु ति तेरी छेवुला दुकै च्‍युङ्‍गुप यिन।”
MAR 14:50 तमा लोमातिवा तेरीकी येशूला क्‍युर ज्‍याक्‍नी टोनी गाल।
MAR 14:51 ती पेला खोरो जुला रा क्‍येङ्‍मा यी तिराङ टिलुप ख्‍योक्‍पेजा नाज्युङ यी येशूकी तिङ्‍ला तिङ्‍यासुङ। तमा तिवी तीला जिम्‍सुङ।
MAR 14:52 यिने ती ति खोरो टिलुप रा क्‍येङ्‍मा ति क्‍युर ज्‍याक्‍नी पेर्तुङ्‍बा राङ टोनी गाल।
MAR 14:53 तमा तिवी येशूला जिम्‍नी तेरी सिनाङ कोङ्‍यार छ्‍येकी चाला टिनी गाल्‍सुङ। ते कोङ्‍यार छ्‍येतिवा ताङ यहूदी गोमा कितुप मी छ्‍येतिवा ताङ यहूदी छ्‍योकी गेकेनतिवा तेरी जोम्‍नोक।
MAR 14:54 पत्रुस ति फेचेक नेसुर येशूकी तिङ्‍ला तिङ्‍यानी तेरी सिनाङ कोङ्‍यार छ्‍येकी खाङ्‍बी लेङाङ नाङ्‍ला शुनी खाङ्‍बा र्‍हेन्‍दुपतिवी मुला मे देयिन देनोक।
MAR 14:55 कोङ्‍यार छ्‍येतिवा ताङ यहूदी छोक्‍पाकी मी छ्‍येतिवी खोला सेतुप क्‍येन तेरुप पङ्‍बु छल्‍सिनाङ काङ पङ्‍बु माङ्‍ये।
MAR 14:56 मी बङीकी येशूकी तेन्‍दोकला जिनोक जोनी पङ्‍बु बिन्‍सुङ, यिन्‍सिनाङ तिवी पङ्‍बु ति माडिक।
MAR 14:57 तमा मी ललाइकी येशूकी तेन्‍दोकला जिनोक जोनी दुक सिनी पङ्‍बु बिन्‍सुङ,
MAR 14:58 “दीकी ‘ङ दी मीकी जोवु ल्‍हङाङ ति र्‍हम्‍नी मीकी माजोवु ल्‍हङाङ यम्‍बा ति ङ्‍यिमा सुमकी नाङ्‍ला राङ जोयी।’ सिनी सिक्‍यावु ति ङ्‍यिरा थोसुङ।”
MAR 14:59 यिने तिवी बिन्‍दुप पङ्‍बु साङ माडिक।
MAR 14:60 तमा तेरी सिनाङ कोङ्‍यार छ्‍ये ति तेरी मीतिवी पर्ला लानी येशूला “तिवी ख्‍योरो तेन्‍दोकला बिन्‍दुप पङ्‍बुकी कोर्ला ख्‍योरो मुला काङ साङ टिलेन मे?” सिनी टिसुङ।
MAR 14:61 यिने येशू खरक्‍पा ज्‍युनी काङ टिलेन मासुङ। लोङ तेरी सिनाङ कोङ्‍यार छ्‍येकी खोला टिसुङ, “वुतुङ के ख्‍युरुङ टेङ्‍बु वोतुप कोन्‍छ्‍योककी सेवु ख्रीष्‍ट राङ यिन?”
MAR 14:62 येशूकी सुङ्‍सुङ, “यिन, ती ति ङ राङ यिन। मी पुज्‍युङ चोछ्‍ये वोतुप कोन्‍छ्‍योककी यावी थाकाला देतुप ताङ देवाच्‍येन नेमा मुक्पी ख नेमा वुङ्‍गुप ति ख्‍यिरा थोङ्‍गितो।”
MAR 14:63 ती ताम्‍ङे थोसिमा तेरी सिनाङ कोङ्‍यार छ्‍ये तीकी खोरो मज्‍या र्‍होलिन सिरा सिक्‍यासुङ, “त ङ्‍यिराङला यम्‍बा पङ्‍बु च्‍यिला गोसुङ?
MAR 14:64 तीकी कोन्‍छ्‍योकला मारे तङ्‍गुप ताम्‍ङे ति ख्‍यिरा थोसुङ। ख्‍यिरा नासामला चुकै वे?” तमा तिवा तेरीकी खोला सेतुप छ्‍येर्पा तेर राङ गोकिवी सिनी च्‍यार ग्‍यप्‍सुङ।
MAR 14:65 तिवी पर्ला ललाइकी येशूला छ्‍यिन्‍दुर ग्‍यप्‍सुङ, तमा खोकी शाल उप्‍नी बेपिन सिरा “त ख्‍युरुङला बेपुप ति सु यिन नम्‍दर शे!” सिनी सिक्‍यासुङ। तमा ती खाङ्‍बा र्‍हेन्‍दुपतिवी साङ खोला पोप्‍सुङ।
MAR 14:66 तोजो पेला पत्रुस मला लेङाङ खला देनी नोक। तमा ती पेला तेरी सिनाङ कोङ्‍यार छ्‍येकी लावाम यी वानी
MAR 14:67 पत्रुस मे देयी वोतुप थोङ्‍सिमा तीला ल्‍यामो क्‍यान ल्‍हानी सिक्‍यासुङ, “ख्‍युरुङ साङ नासरतकी मी येशू ताङ मुला वोतुप मिन रो?”
MAR 14:68 यिने पत्रुसकी “मिन, ख्‍योरे सिक्‍यावु ति ङला हाक राङ माको।” सिनी सिक्‍यासुङ। ती ज्‍युक्‍ला ती ति पाङगी गे चा नेवा गाल।
MAR 14:69 ती पेला येलुङ ती लावाम तीकी पत्रुसला थोङ्‍नी ते लानी वोतुपतिवाला “दी मी ति तिवी परकी मिरा च्‍यिक यिन।” सिनी सिक्‍यासुङ।
MAR 14:70 यिने पत्रुसकी लोङ “ङ मिन।” सिनी सिक्‍यासुङ। चेयी ज्‍युक्‍ला ते लानी देतुप मीतिवी लोङ पत्रुसला “वुतुङ के ख्‍युरुङ ति तिवी परकी मिरा च्‍यिक यिन, च्‍यिलासिसिन ख्‍युरुङ गालीलकी मी यिन।” सिनी सिक्‍यासुङ।
MAR 14:71 येलुङ पत्रुसकी न क्‍यल्‍नी, “ङे जिनोक जोवु यिन्‍सिन ङे खला पर्च्या ख्‍येल्‍शी। ख्‍योरो सिक्‍यावु मी तीला ङे ङो राङ मेशेवी।” सिनी सिक्‍यासुङ।
MAR 14:72 ती पेला राङ शार्क्येक च्‍यवु कुकुरी थेङ्‍मा ङ्‍यिवा तेन्‍सुङ। तमा पत्रुसला “च्‍यवु कुकुरी थेङ्‍मा ङ्‍यी देन्‍दुप सिनाङ गोमाला के ख्‍योरो ङला थेङ्‍मा सुम ङो मेशेवी सिवी।” सिनी येशूकी सुङ्‍गुप ताम्‍ङे ति टेन्‍नी कशेन ङुसुङ।
MAR 15:1 ती सला टोपला टेताङ कोङ्‍यार छ्‍येतिवा ताङ यहूदी गोमा कितुप छ्‍येतिवा ताङ यहूदी छ्‍योकी गेकेनतिवी यहूदी छोक्‍पाकी मी छ्‍येतिवी मुला जोम्‍नी केवुल क्‍यासुङ। तमा तिवी येशूला कोङ किन्‍नी टि गल्‍नी रोमी ठिम कितुप मी छ्‍ये पिलातसला चेक तेसुङ।
MAR 15:2 पिलातसकी येशूला “ख्‍युरुङ यहूदीतिवी ग्‍येल्‍वु यिन?” सिनी टिसुङ। तमा येशूकी “यिन, ख्‍योरे सिक्‍यावु दोके यिन।” सिनी सुङ्‍सुङ।
MAR 15:3 कोङ्‍यार छ्‍येतिवी खोला क्‍येन बङी ग्‍यप्‍सुङ।
MAR 15:4 तुक क्‍यानी लोङ पिलातसकी खोला “काङ ख्‍युरुङला च्‍यिक साङ टिलेन मे? ल्हो ताङ, तिवी ख्‍युरुङला चुका क्‍येन मङ्‍मु ग्‍यकिनोक।” सिनी सिक्‍यासुङ।
MAR 15:5 यिने येशूकी काङ साङ टिलेन मासुङ, तुक क्‍यानी पिलातस हलेवा क्‍यासुङ।
MAR 15:6 यहूदी थरुप तुछ्‍येनला चोन्‍खाङ नाङ्‍ला शोरुपतिवी पर नेमा मीतिवी पेतुप मिरा च्‍यिकला पिलातसकी पि तोङ ज्‍यितुप लुक्‍सु नोक।
MAR 15:7 ती पेला बरब्‍बा सिरुप मी ति लुङ्‍बाकी तेन्‍दोकला लानी मी सेतुप दुक्‍टातिवी मुला चोन्‍खाङला शोर्नोक।
MAR 15:8 मी मङ्‍मु पिलातसकी चाला वानी, “ले टेङ दोके क्‍यानी तलिङ साङ मी यी चोन्‍खाङ नेमा पि तोङ।” सिनी गोङ्‍बा शुसुङ।
MAR 15:9 तमा पिलातसकी तिवाला “ख्‍यिरा यहूदीतिवी ग्‍येल्‍वु सिरुप तीला ङ पि तोङ्‍गुप ति ख्‍यिरा नो किवी?” सिनी सिक्‍यासुङ।
MAR 15:10 कोङ्‍यार छ्‍येतिवी ठतोक लानी येशू ति खोरुङला चेक तेतुप यिन सिनी पिलातसला छ्‍या नोक।
MAR 15:11 यिने कोङ्‍यार छ्‍येतिवी मी मङ्‍मुला चेन्‍नी बोरु बरब्‍बाला पि तोङ सिनी सि च्‍यिसुङ।
MAR 15:12 पिलातसकी लोङ तिवाला टिसुङ, “तुकै यिन्‍सिन ख्‍यिरा यहूदी ग्‍येल्‍वु सिरुप तीला ङ काङ कितुप?”
MAR 15:13 तमा तिवा थोर ग्‍यप्‍नी, “तीला ग्‍यङ्‍शिङला कल्‍नी काँडी दाप्‍नी से!” सिनी सिक्‍यासुङ।
MAR 15:14 पिलातसकी टिसुङ, “दीकी काङ लाका मेलोवा क्‍या वे?” यिने तिवी मङ च्‍यार ग्‍यप्‍नी, “तीला ग्‍यङ्‍शिङला कल्‍नी काँडी दाप्‍नी से!” सिनी सिक्‍यासुङ।
MAR 15:15 पिलातसकी मी माङ्‍छ्‍योकला गा लोङ्‍गुपला बरब्‍बाला ति पि ताङ्‍नी येशूला ति पाङ्‍शर ताङ्‍सिमा ग्‍यङ्‍शिङला कल्‍नी काँडी दाप्‍नी सेतुपला चेक तेसुङ।
MAR 15:16 ती ज्‍युक्‍ला रोमी मक्‍मीतिवी येशूला रोमी ठिम कितुप मी छ्‍ये देतुप खाङ्‍बी लेङाङला टि गाल्‍सुङ, तमा यम्‍बा मक्‍मीतिवा तेरीला कताङ्नी ते जोम च्‍यिसुङ।
MAR 15:17 तिवी येशूला छो मुक्‍पुकी छ्‍योवा यी कोन बिन्‍नी छेर्माङ वोतुप येल्‍का कुक्‍नी ग्‍येल्‍वी उशाक दोके जोनी खोकी गोला कोन बिन्‍सुङ।
MAR 15:18 तमा तिवी खोला “यहूदीतिवी ग्‍येल्‍वुला छ्‍याक छलो!” सिनी सिक्‍यासुङ।
MAR 15:19 लोङ तिवी ङ्‍युङ्‍मा थ्‍वोनी खोकी गोला बेपिन सिरा छ्‍यिन्‍दुर ग्‍यप्‍सुङ। तमा पुमुङ सला चुनी खोला शावा क्‍यासुङ।
MAR 15:20 खोला तुक क्‍यानी मारे ताङ सिन्‍सिमा छो मुक्‍पुकी छ्‍योवा ति पिनी खोकी नुम्‍बुप नम्‍सा ति येलुङ कोन बिन्‍सुङ। ती ज्‍युक्‍ला खोला ग्‍यङ्‍शिङ लोला ग्‍येलुपला टि गाल।
MAR 15:21 तमा मक्‍मीतिवी येशूला टिनी डोयी कितुप पेला सिमोन सिरुप छ्‍यिग्‍यपकी कुरेनी ग्‍येसाकी मी यी ती लामला वुङ्‍यिन कितुप ठेसुङ। ती ति अलेक्‍जेन्‍डर ताङ रुफसकी पपा यिनोक। मक्‍मीतिवी येशूला कल्‍नी सेतुप ग्‍यङ्‍शिङ ति तीला कार क्‍यानी खुर च्‍यिसुङ।
MAR 15:22 तमा तिवी येशूला गलगथा सिरुप दासाला क्‍याल्‍सुङ। (ती गलगथाकी तेन्‍दोक ति ‘कप्‍लीकी दासा’ सिक्‍यावु यिन।)
MAR 15:23 तिवी खोला मुर्र र्‍हेवु गुन्‍डुम छ्‍याङ बिन्‍सिनाङ खोकी माशे।
MAR 15:24 ती ज्‍युक्‍ला तिवी खोला ग्‍यङ्‍शिङ लोला कल्‍नी काँडी दाप्‍नी काल्‍सुङ। तमा तिवी खोकी नम्‍सा ति सुला थोप्‍किवे सिनी ग्‍येन ग्‍यप्‍नी गोसुङ।
MAR 15:25 येशूला ग्‍यङ्‍शिङ लोला ग्‍येलुप पेला टोपकी छ्‍युजी गु गल्‍नोक।
MAR 15:26 तमा ग्‍यङ्‍शिङ लोला खोला क्‍येन ग्‍यपुप यिकी ति “यहूदीतिवी ग्‍येल्‍वु यिन।” सिनी टिनी ज्‍याक्‍नोक।
MAR 15:27 तिवी येशूला ग्‍यङ्‍शिङला काँडी दाप्‍नी ग्‍येलुप पेला च्‍याक्‍पा मिरा ङ्‍यी साङ च्‍यिक ति खोकी यावी थाकाला ताङ च्‍यिक ति खोकी येन्‍बी थाकाला ग्‍यङ्‍शिङला काँडी दाप्‍नी काल्‍सुङ।
MAR 15:28 (तुक क्‍यावु ति कोन्‍छ्‍योककी सुङगी नाङ्‍ला “खो ति मी दुक्‍टातिवी पर्ला मिरा च्‍यिक दोके चिसुङ।” सिनी टिवु ति तेरी छेवुला यिन।)
MAR 15:29 ते ग्‍यङ्‍शिङकी लाम नेवा फार छुर युकुप मीतिवी गो युकिन सिरा येशूला मारे ताङ्‍नी, “ओ ल्‍हङाङ र्‍हम्‍नी ङ्‍यिमा सुमला जोयी सिरुप मी,
MAR 15:30 त खोरुङला राङ र्‍होक्‍नी ग्‍यङ्‍शिङ लो नेमा मर पाम शोक ताङ।” सिनी सिक्‍यासुङ।
MAR 15:31 तुक राङ क्‍यानी कोङ्‍यार छ्‍येतिवा ताङ यहूदी छ्‍योकी गेकेनतिवी साङ खोला मारे तोङ्‍यिन सिरा “दीकी मी यम्‍बाला ति र्‍होक्‍सुङ, यिने खोरुङला ति र्‍होक माथुप।
MAR 15:32 ओ इस्राएलकी ग्‍येल्‍वु ख्रीष्‍ट! त ख्‍युरुङ ग्‍यङ्‍शिङ लो नेमा पाप्‍नी शोक। तमा ङ्‍यिराङ ल्‍हानी तेपा कितुप्‍जा!” सिनी सिक्‍यासुङ। खोकी मुला ग्‍यङ्‍शिङ लोला कलुपतिवी साङ खोला मारे ताङ्‍सुङ।
MAR 15:33 तमा ङ्‍यिमी गुङगी छ्‍युजी च्‍यिङ्‍ङीला लुङ्‍बा तेरीला नक्‍तोमी गल्‍नी छ्‍युजी सुम सेक लुसुङ।
MAR 15:34 छ्‍युजी सुमला येशूकी थोर ग्‍यप्‍नी, “इलोई, इलोई, लामा सबखथनी?” सिनी सुङ्‍सुङ। दीकी तेन्‍दोक ति “ओ ङे कोन्‍छ्‍योक, ओ ङे कोन्‍छ्‍योक, ङला च्‍यिला क्‍युर्नी ज्‍यकुप यिन?” सिनी सिक्‍यावु यिन।
MAR 15:35 खोकी तुक सिनी वोरु तेन्‍दुप थोनी ते लानी देतुप मी ललाइ ललाइकी “ङ्‍येन ताङ, दीकी याङ एलियाला के कतोङ्‍गिनोक।” सिनी सिक्‍यासुङ।
MAR 15:36 तमा मिरा च्‍यिक ति छ्‍योङ्‍बाल ग्‍यम गल्‍नी ल्‍हेन्‍दा गुन्‍डुम छ्‍याङ क्‍युर्वुला पासिमा ती ति लकाम गोला ज्‍याक्‍नी येशूकी खला ज्‍योकिन सिरा “गुसा, काङ एलिया वानी दीला ग्‍यङ्‍शिङ लो नेमा बेप्‍किते ल्‍हाप।” सिनी सिक्‍यासुङ।
MAR 15:37 तमा येशू वोरु थोर ग्‍यप्‍नी टुङ्‍सुङ।
MAR 15:38 ती पेला यहूदी ल्‍हङाङ नाङ्‍ला ग्‍यावु गोयोल ति गो नेमा ज्‍युनी शाप सेक फेका ङ्‍यी गल्‍नी राल्‍सुङ।
MAR 15:39 येशू तुकै क्‍यानी टुङ्‍गुप थोङ्‍नी येशूला कलुप ग्‍यङ्‍शिङकी दोङ्‍ला लानी देतुप रोमी मक्‍मी सयी च्‍यिककी खकी छ्‍ये तीकी “दी मी ति वुतुङ के कोन्‍छ्‍योककी सेवु राङ यिनोक।” सिनी सिक्‍यासुङ।
MAR 15:40 ते ललाइ पुम्‍पेजातिवी साङ थाक्‍रिङ्‍बु नेसुर ल्‍हयी नोक। तिवी पर्ला मरियम मग्‍दलिनी ताङ याकूब टिक्‍पे ताङ योसेफकी आमा मरियम ताङ सलोमी साङ नोक।
MAR 15:41 तिवी येशू गालीलला ज्‍युवु पेला खोकी तिङ्‍ला तिङ्‍यानी खोला शब्‍ज्‍यी क्‍यावु पुम्‍पेजातिवा यिनोक। तमा ते येशूकी मुला यरूशलेमला वावु यम्‍बा पुम्‍पेजातिवा साङ बङी नोक।
MAR 15:42 ती छेर्मु ति टडिक कितुप ङासोप ङ्‍यिमाकी गोमी ङ्‍यिमा नोक। तमा नाम ल्‍होसिमा अरिमाथिया ग्‍येसाकी योसेफ तीकी ङाडेङ क्‍यानी पिलातसकी चाला गल्‍नी येशूकी फुङ्‍बु ति लाङ्‍सुङ।
MAR 15:43 दी योसेफ ति यहूदी छोक्‍पाकी मी छ्‍येतिवी पर्ला मिरा च्‍यिक नोक। तमा ती ति कोन्‍छ्‍योककी ग्‍येल्‍खाप वुङ्‍गुप ति गुनी देनोक।
MAR 15:44 येशू टुङ सिन्‍सुङ सिरुप थोनी पिलातस हलेवा क्‍यासुङ। तमा तीकी रोमी मक्‍मी सयी च्‍यिककी खकी छ्‍ये तीला कताङ्‍नी, “येशू वुतुङ के टुङ सिन्‍सुङ?” सिनी टिसुङ।
MAR 15:45 तमा तीकी खो वुतुङ के टुङ्‍गुप यिन सिनी सिक्‍यासिमा पिलातसकी योसेफला येशूकी फुङ्‍बु खुर्नी डो च्यिसुङ।
MAR 15:46 तमा योसेफकी रा नेङेन ङ्‍यो वानी येशूकी फुङ्‍बु ति ग्‍यङ्‍शिङ लो नेमा पाप्‍नी ती राकी नाङ्‍ला टिल्‍सुङ। तमा दो पुङ्‍नी जोवु शेप मीला ज्‍योकुप टककी फुककी नाङ्‍ला ज्‍याक्‍सुङ। ती ज्‍युक्‍ला दो ग्‍येर्पु यी रिल वानी ती टककी फुककी खला च्‍येनी ज्‍याक्‍सुङ।
MAR 15:47 मरियम मग्‍दलिनी ताङ योसेफकी आमा मरियमकी येशूकी फुङ्‍बु कनी ज्‍योकिनोक सिनी ल्‍हानी देनोक।
MAR 16:1 ङासोप ङ्‍यिमा सिन्‍सिमा ती गोमु मरियम मग्‍दलिनी ताङ याकूबकी आमा मरियम ताङ सलोमीकी येशूकी फुङ्‍बुला कुतुपला टि जङ्‍बु खाप नुम ङ्‍योसुङ।
MAR 16:2 तमा ती सला तीला दिन्‍जाकी ङ्‍यिमा थल्‍माला टोपला टेताङ ङ्‍यिमा शरुप पेला तिवा शेप मीला ज्‍योकुप टककी फुककी चाला गाल्‍सुङ।
MAR 16:3 डोप पेला तिवी “ती फुककी खला च्‍येतुप दो ति सी दोनी तेर्किवी?” सिनी च्‍यिककी च्‍यिकला सिक्‍यासुङ।
MAR 16:4 यिने तिवा ते टककी फुकला लेप्‍नी येर ल्‍हासालेन्‍सिन ती दो ति गोमाला के रिल्‍नी तङ्‍गुप थोङ्‍सुङ।
MAR 16:5 तिवा ती टककी फुककी नाङ्‍ला शुनी ल्‍हासालेन्‍सिन ते मज्‍या कर्मु कोन्‍दुप मी नाज्‍युङ यी ति यावी थाकाला देन वोतुप थोङ्‍नी तिवा छासे ज्‍यिवा क्‍यासुङ।
MAR 16:6 तमा ती मी नाज्‍युङ तीकी तिवाला सिक्‍यासुङ, “ज्‍यिवा माकी। ख्‍यिराङ ग्‍यङ्‍शिङला कल्‍नी टुङ्‍गुप नासरतकी येशूला छोलिन नोक। खो ङोसु लासुङ, खो दे मे। खोकी फुङ्‍बु ज्‍यकुप दासाला ल्हो।
MAR 16:7 त ख्‍यिराङ गल्‍नी खोकी लोमातिवा ताङ पत्रुसला ‘खो ख्‍यिराङ सिनाङ गोमाला गालीलला फेप्‍किवी। खोकी गोमाला ख्‍यिराङला सुङ्‍गुप दोके ते ख्‍यिरा खोला थोङ्‍गिवी।’ सिनी लोप।”
MAR 16:8 तमा तिवा छासे ज्‍यिवा क्‍यानी र्‍हुकिन सिरा ती टककी फुक नेसुर थेन्‍नी टोन गाल। तिवा छासे ज्‍यिवा लावु तप्‍की ती ताम्‍ङे ति सुला साङ मालाप।
MAR 16:9 येशू दिन्‍जाकी ङ्‍यिमा थल्‍माला टेताङ टुङ्‍गुप ने ङोसु लासिमा तेरी सिनाङ गोमाला मरियम मग्‍दलिनीला छ्‍यार्सुङ। ती मरियम नेमा गोमाला येशूकी र्‍हेन्‍डी दिन तेन्‍नोक।
MAR 16:10 तमा ती ति येशूकी तिङ्‍ला तिङ्‍योकुप मीतिवी चाला गल्‍नी ती ताम्‍ङे ति लाप्‍सुङ। ती पेला तिवा सेम्‍दुक क्‍यानी ङुयी नोक।
MAR 16:11 तिवी येशू ङोसु लावु ताङ मरियमकी खोला थोङ्‍गुप ताम्‍ङे थोसिनाङ ती ताम्ङेला तेपा माक्‍या।
MAR 16:12 ती ज्‍युक्‍ला लोमा मिरा ङ्‍यी युल नेवा डोसालेन्‍सिन येशू मिच्‍यिक्‍पा क्‍यानी तिवी चिप्‍ला छ्‍यार्सुङ।
MAR 16:13 तेसुर तिवा यम्‍बा लोमातिवी चाला लोक्‍नी गल्‍नी ती ताम्‍ङे ति लाप्‍सुङ। यिन्‍सिनाङ लोमातिवी ती ताम्‍ङे साङ तेपा माक्‍या।
MAR 16:14 ती ज्‍युक्‍ला लोमा च्‍युच्‍यिकतिवा समा सयी वोतुप पेला येशू तिवी चिप्‍ला छ्‍यार्सुङ, तमा तिवी सेम क्‍योङ्‍बु क्‍यानी खो ङोसु लासिमा खोला थोङ्‍गुपतिवी ताम्‍ङेला तेपा माक्‍यावु तप्‍की तिवाला वोरु तेन्‍सुङ।
MAR 16:15 येशूकी तिवाला सुङ्‍सुङ, “ख्‍यिराङ जम्‍बुलिङ तेरीला गल्‍नी मी तेरीला लेन ल्‍यामु ति ख्‍याप्‍टाक की।
MAR 16:16 सी तेपा क्‍यानी बप्‍तिस्‍मा लङ्‍गिवे, तिवा दिक्‍पा ने थर्वा ङ्‍येकिवी। यिने सी तेपा मिकिवे, तीला पर्च्या फोकिवी।
MAR 16:17 तमा तेपा कितुपतिवी मुला दी ततिवा वुङ्‍गिवी। ती ततिवा ति दिवा यिन। तिवी ङे मिङला र्‍हेन्‍डीतिवा शोर्किवी, ग्‍येताम कुतुक लप्‍किवी,
MAR 16:18 रुलतिवा जिम्‍गिवी, तुक सोसिनाङ काङ साङ मेलोवा मोडोवी, नेर्पुतिवाला लाक्‍पा ज्‍याक्‍सिन तिवा टेकिवी।”
MAR 16:19 चोवो येशूकी तिवाला तोजोयी सुङ्‍सिमा खो देवाच्‍येन ने तेक्‍नी फेप्सुङ, तमा कोन्‍छ्‍योककी यावी थाकाला ज्‍युसुङ।
MAR 16:20 ती ज्‍युक्‍ला लोमातिवा तेरी दासाला गल्‍नी लेन ल्‍यामु ख्‍याप्‍टाक क्‍यासुङ। चोवो तिवी मुला ज्‍युनी लाका क्‍या नाङ्‍सुङ, तमा तिवी क्‍यावु हलेवु ततिवा नेसुर खोकी सुङ्‍गुप सुङ ति टेङ्‍बु वे सिरुप ति हाक्‍को च्‍यिसुङ। आमिन।
LUK 1:1 ङ्‍यिरा पर्ला च्‍युङ्‍गुप ताम्‍ङेतिवी कोर्ला रिम्‍बा क्‍यानी टिकुप छोलुप मी बङी नोक।
LUK 1:2 तिवी ती च्‍युङ्‍गुप ताम्‍ङेतिवा थल्‍मा नेज्‍युन खोरो मिककी थोङ्‍गुप ताङ कोन्‍छ्‍योककी सुङ ख्‍याप्‍टाक कितुपतिवा नेसुर ङ्‍यिरा थोवु दोके टि वे।
LUK 1:3 तमा थियोफिलस ला, ङ साङ तीकी कोर्ला थल्‍मा नेज्‍युन ल्‍यामो क्यानी तेरी ल्‍हावु तप्‍की ती ति ख्‍युरुङला रिम्‍बा क्‍यानी टिकुप ति ल्‍यामु यिन सिनी नासाम तङ्‍यिन।
LUK 1:4 तुक क्‍यानी ख्‍युरुङला ती लापुप ताम्‍ङेतिवा ति टेङ्‍बु यिन सिनी हाक्‍कोशी।
LUK 1:5 यहूदिया लुङ्‍बाला ग्‍येल्‍वु हेरोदकी ग्‍येला कितुप पेला जकरिया सिरुप कोङ्‍यार यी नोक। ती ति अबिया छ्‍योककी कोङ्‍यार यिनोक। तीकी पेर्मी एलिशिबा ति हारून गिपाकी ति यिनोक।
LUK 1:6 तिवा ङ्‍यिकर कोन्‍छ्‍योककी थोङ्‍दाङला टेङ्‍बु नोक, तमा कोन्‍छ्‍योककी तेरी क ताङ ठिमला क्‍येन मेता क्‍यानी तेन्‍गिनोक।
LUK 1:7 यिने तिवाला आङा मिन्‍दुक, च्‍यिलासिसिन एलिशिबा ति रप्‍छ्‍येम नोक, तमा तिवा ङ्‍यिकरकी मिजी गानी सिन्‍नोक।
LUK 1:8 थेङ्‍मा यी जकरिया ति खोरो छ्‍योककी गोर्माला यहूदी ल्‍हङाङला कोन्‍छ्‍योककी दोङ्‍ला कोङ्‍यारकी लाका कियी नोक।
LUK 1:9 ती पेला कोङ्‍यारकी लुक्‍सुला ग्‍येन ग्‍यप्‍सुङ, तमा ल्‍हङाङ नाङ्‍ला गल्‍नी पो च्‍येतुप लाका ति जकरियाला ख्‍येल्‍सुङ।
LUK 1:10 तीकी पो च्‍येतुप पेला तेरी जोम्‍बुप मीतिवा ति ल्‍हङाङकी फिला मोपोर कियी नोक।
LUK 1:11 ती पेला राङ देवाच्‍येनकी लेन क्‍योलुप थु यी जकरियाकी चिप्‍ला छ्‍यर्नी पो च्‍येतुप छोटीकी यावी थाकाला लासुङ।
LUK 1:12 तीला थोङ्‍सिमा जकरिया छासे ज्‍यिवा लानी पार्सुङ।
LUK 1:13 यिने ती देवाच्‍येनकी लेन क्‍योलुप थु तीकी तीला सिक्‍यासुङ, “ओ जकरिया, ज्‍यिवा माकी। कोन्‍छ्‍योककी ख्‍योरो गोङ्‍बा शुवु ति सेन्‍नी वे। ख्‍योरो पेर्मी एलिशिबाकी पुज्‍युङ यी क्‍येकितो। तमा ख्‍योरो तीकी मिङ ति यूहन्‍ना सिनी तोसा।
LUK 1:14 ती आङा क्‍येसिमा ख्‍युरुङला गा ताङ किर्मु गितो, तमा मी बङी ती क्‍येवु थोक्‍ला गा कितो,
LUK 1:15 च्‍यिलासिसिन ती ति कोन्‍छ्‍योककी थोङ्‍दाङला मी छ्‍ये डितो। तमा तीकी गुन्‍डुम छ्‍याङ ताङ यम्‍बा जेप च्‍यालक नाम्‍साङ मुथुङ्‍तो। ती ति खोरो आमी खोकला वोतुप नेज्‍युनी कोन्‍छ्‍योककी थु चाङ्‍माकी क्‍येङ डितो।
LUK 1:16 तमा तीकी इस्राएल गिपाकी मीतिवा बङीला खोप्‍रे चोवो कोन्‍छ्‍योककी थाकाला ग्‍युर ज्‍यिकितो।
LUK 1:17 येलुङ तीकी एलियाकी सेम ताङ ङार ङ्‍येनी चोवो फेपुप सिनाङ गोमाला वानी पपातिवी सेम खोरो पेजातिवी थाकाला ग्‍युर च्‍यितुप ताङ कोन्‍छ्‍योककी सुङला मेङ्‍येन्‍दुपतिवाला कोन्‍छ्‍योककी थोङ्‍दाङला टेङ्‍बु वोतुपतिवी रिक्‍पाकी थाकाला ग्‍युर च्‍यिनी मीतिवाला चोवोकी थोक्‍ला टडिक कि ज्‍यिकितो।”
LUK 1:18 तमा जकरियाकी ती देवाच्‍येनकी लेन क्‍योलुप थु तीला टिसुङ, “ती ताम्‍ङे ति ङ चुक क्‍यानी तेन्‍तेन कितुप? त याङ ङ गावा गल्‍सिन्‍सुङ, ङे पेर्मी साङ गामा गल्‍सिन्‍सुङ।”
LUK 1:19 देवाच्‍येनकी लेन क्‍योलुप थु तीकी तीला सिक्‍यासुङ, “ङ गब्रिएल यिन। ङ कोन्‍छ्‍योककी दोङ्‍ला लानी देकिवी। खोकी राङ ङला ख्‍योरो मुला ताम्‍ङे कितुपला ताङ दी गाकी लेन क्‍योलुपला तङ्‍गुप यिन।
LUK 1:20 ती ताम्‍ङे ति टेके तुजेला च्‍युङ्‍गितो। यिने ख्‍योरो ङे सिक्‍यावु ताम्‍ङेला तेपा माक्‍यावु तप्‍की ती ताम्‍ङे माच्‍युङ्‍वा सेक्‍ला ख्‍युरुङ कुवा गल्‍नी ताम्‍ङे लप मुथुप्‍तो।”
LUK 1:21 ल्‍हङाङकी फिला मीतिवा जकरियाला गुनी देनोक, तमा ती ति ल्‍हङाङ नाङ्‍ला छासे फिमु क्‍यावु तप्‍की च्‍यिला यिन्‍दे सिनी तिवा यम्‍जेन लासुङ।
LUK 1:22 तमा जकरिया ति पाङ्‍ला थेन्दुप पेला तिवी मुला ताम्‍ङे लप मुथुपुप गाल्‍नोक। तुक क्‍यानी तिवी तीकी ल्‍हङाङ नाङ्‍ला ज्‍यल्‍का थोङ्दे यिन्‍दे सिनी नो क्‍यासुङ। तीकी तिवाला ताम्‍ङे मालाप्‍नी लाक्‍पी लातुक तिराङ क्‍यासुङ।
LUK 1:23 जकरिया यहूदी ल्‍हङाङला शब्‍ज्‍यी कितुप खोरो गोर्मा सिन्‍सिमा रङगी खाङ्‍बा लोक्‍नी गाल्‍सुङ।
LUK 1:24 तेमी चेयी ज्‍युक्‍ला तीकी पेर्मी एलिशिबा ति जु चेन्‍दी गाल्‍नोक, तमा ती ति ल ङ सेक यिप्‍नी देसुङ। तीकी दुक सिक्‍यासुङ,
LUK 1:25 “चोवोकी ङे थोक्‍ला दी ति क्‍या नङ्‍गुप यिन। त याङ खोकी ङला च्‍यम्‍बा क्‍या नङ्‍नी मीतिवी ङला ङ्‍यिङ्‍मर कितुप नेसुर र्‍होक्‍सुङ।”
LUK 1:26 तेमी ल टुककी तिङ्‍ला कोन्‍छ्‍योककी देवाच्‍येनकी लेन क्‍योलुप थु गब्रिएलला गालील लुङ्‍बाकी नासरत ग्‍येसाला वोतुप जेन्‍दी माक्‍यावु मरियम सिरुप पुम्‍पेजा यीकी चाला ताङ्‍सुङ।
LUK 1:27 तीकी जेन्‍दी ति दाऊद गिपाकी योसेफ सिरुप मी यी ताङ मुला कितुपला ताम्‍ङे थाक्‍छ्‍येनोक।
LUK 1:28 ती देवाच्‍येनकी लेन क्‍योलुप थु ति मरियमकी चाला गल्‍नी, “ख्‍युरुङला लोदिमु वुङ्‍शिता। कोन्‍छ्‍योककी ख्‍युरुङला छासे कटिन नङ वे। कोन्‍छ्‍योक ख्‍योरो मुला ज्‍यु वे।” सिनी सिक्‍यासुङ।
LUK 1:29 ती ताम्‍ङे थोनी मरियम ति छासे हलेवा लानी तीकी सिक्‍यावु ताम्‍ङेकी तेन्‍दोक ति काङ यिनाङ सिनी छासे यम्‍जेन लासुङ।
LUK 1:30 यिने देवाच्‍येनकी लेन क्‍योलुप थु तीकी तीला सिक्‍यासुङ, “ज्‍यिवा माकी मरियम, कोन्‍छ्‍योककी ख्‍युरुङला छासे च्‍यम्‍बा नाङ्‍नी वे।
LUK 1:31 त ख्‍युरुङ जु चेन्‍दी गल्‍नी पुज्‍युङ यी क्‍येकितो। तमा ख्‍योरो तीकी मिङ ति येशू सिनी तोसा।
LUK 1:32 खो ति छासे चोछ्‍येवु डितो, तमा मीतिवी खोला चोछ्‍येवु कोन्‍छ्‍योककी सेवु सिनी सितो। चोवो कोन्‍छ्‍योककी खोला खोकी हङ्‍गावा दाऊदकी ग्‍येल्‍ठिक नङ्‍गितो।
LUK 1:33 खोकी याकूबकी गिपाकी खला नरी ग्‍येला कितो, तमा खोकी ग्‍येल्‍खाप ति नाम्‍साङ ना मोडोतो।”
LUK 1:34 तमा मरियमकी देवाच्‍येनकी लेन क्‍योलुप थुला सिक्‍यासुङ, “ङ याङ जेन्‍दी माक्‍यावु पुम्‍पेजा यिन, तमा दी ताम्‍ङे ति चुक क्‍यानी च्‍युङ थुप्‍किवी?”
LUK 1:35 देवाच्‍येनकी लेन क्‍योलुप थु तीकी तीला सिक्‍यासुङ, “कोन्‍छ्‍योककी थु चाङ्‍मा ख्‍योरो खला फेप्‍कितो, तमा चोछ्‍येवु कोन्‍छ्‍योककी ओङ ति ख्‍योरो खला ख्‍येल्‍गितो। तुक क्‍यानी क्‍येप आङा ति चाङ्‍मा वोतुप यिन, मीतिवी खोला कोन्‍छ्‍योककी सेवु सिनी सितो।
LUK 1:36 ल्हो ताङ, ख्‍योरो छेङ्‍गा एलिशिबा साङ गामा गल्‍सिनाङ जु चेन्‍दी गल्‍नी वे। तीला रप्‍छ्‍येम यिन सिक्‍यासुङ, यिने त ती जु चेन्‍दी गल्‍नी ल टुक गल वे।
LUK 1:37 च्‍यिलासिसिन कोन्‍छ्‍योककी कि मुथुपु ति काङ साङ मे।”
LUK 1:38 तमा मरियमकी “लसे, ङ चोवो कोन्‍छ्‍योककी योक्‍मु यिन। ख्‍योरो सुङ्‍गुप दोके ङला च्‍युङ्‍शी।” सिनी सिक्‍यासुङ। ती ज्‍युक्‍ला देवाच्‍येनकी लेन क्‍योलुप थु ति मरियम नेमा क्‍येनी गाल्‍सुङ।
LUK 1:39 ङ्‍यिमा चेयी ज्‍युक्‍ला मरियम रिवा क्‍यानी यहूदिया लुङ्‍बाकी रीला वोतुप युल यीला गाल,
LUK 1:40 तमा ते लेप्‍सिमा जकरियाकी खाङ्‍बा शुनी एलिशिबाला “टसी देलेक!” सिक्‍यासुङ।
LUK 1:41 मरियमकी “टसी देलेक!” सिक्‍यावु ति एलिशिबाकी थोलुङ्‍मे तीकी खोकला वोतुप आङा ति फिर्सुङ।
LUK 1:42 ती पेला एलिशिबा कोन्‍छ्‍योककी थु चाङ्‍मा क्‍येङ्‍नी थोर ग्‍यप्‍नी सिक्‍यासुङ, “ख्‍युरुङ पुम्‍पेजातिवी पर नेमा छासे मोलाम थोपुप यिनो, ख्‍योरो क्‍येवु आङा साङ मोलाम थोपुप यिनो।
LUK 1:43 ङे चोवोकी आमा ङे चाला वासुङ, दुका हलेवु लाका ङला चुक क्‍यानी च्‍युङ्‍गुप यिनाङ?
LUK 1:44 ख्‍योरो टसी देलेक सिक्‍यावु ति ङे थोलुङ्‍मे ङे खोकला वोतुप आङा ति गा क्‍यानी फिर्सुङ।
LUK 1:45 चोवो कोन्‍छ्‍योककी ख्‍युरुङला सुङ्‍गुप ति छेकिवी सिनी तेपा क्‍यावु तप्‍की ख्‍युरुङला मोलाम थोपुप यिनो।”
LUK 1:46 तमा मरियमकी सिक्‍यासुङ, “ङे मिजी ने चोवो कोन्‍छ्‍योकला सोवा देकिवी,
LUK 1:47 तमा ङे सेमगी दिङ नेज्‍युनी ङला थर ज्‍यितुप कोन्‍छ्‍योकला गा किवी,
LUK 1:48 च्‍यिलासिसिन खोकी खोरो योक्‍मु ङला ल्‍हाटे क्‍या नाङ्‍सुङ। तफेन्‍ला गिपा तेरीकी ङला मोलाम थोपुप वे सिनी सिवी।
LUK 1:49 च्‍यिलासिसिन ओङ छ्‍येवु कोन्‍छ्‍योककी ङे थोक्‍ला छासे लाका ग्‍येर्पु क्‍या नाङ वे। तमा खोकी मिङ ति चाङ्‍मा वे,
LUK 1:50 खोकी खुरुङला ज्‍यिवा कितुपतिवी गिपा तेरीला नरीकी थोक्‍ला च्‍यम्‍बा नङ्‍गिवी।
LUK 1:51 खोकी खोरो छ्‍याककी राङ ओङ छ्‍येवु लाका क्‍या नाङ वे, सेमला ङ राङ यिन सिरुपतिवाला थरा थुरा ताङ वे।
LUK 1:52 खोकी ङार छ्‍येवु ग्‍येला कितुपतिवाला ति तिवी ग्‍येल्‍ठिक नेसुर तेन ताङ्‍नी वे, सेम बोल्‍मुतिवाला ति येर देकिन वे।
LUK 1:53 खोकी ल्‍होतुङ्‍बा वोतुपतिवाला समा ल्‍यामुकी डा च्‍यिनी वे, छ्‍युक्‍पुतिवाला ति लाक्‍पा तोङ्‍बा राङ लोक्‍नी ताङ वे।
LUK 1:54 खोकी ङ्‍यिरा पगावा हङ्‍गावातिवी मुला थाक्‍छ्‍येन नङ्‍गुप ति तेरी क्‍या नङ्‍नी खोरुङला शब्‍ज्‍यी कितुप इस्राएलला दाल्‍जा क्‍या नाङ वे।
LUK 1:55 तमा खोकी अब्राहाम ताङ तीकी तेरी गिपातिवाला नरीकी नरी च्‍यम्‍बा कितुप टोक माज्‍ये वे।”
LUK 1:56 तमा मरियम एलिशिबा ताङ मुला ल सुम चोयी देसिमा खोरो खाङ्‍बा लोक्‍नी गाल्‍सुङ।
LUK 1:57 तमा एलिशिबाकी आङा क्‍येप पेला लेप्‍नी तीकी पुज्‍युङ यी क्‍येसुङ।
LUK 1:58 चोवो कोन्‍छ्‍योककी तीला छासे कटिन नङ वे सिरुप थोनी तीकी युल्‍वातिवा ताङ छेङ्‍गाछालीतिवा तीकी मुला गा क्‍यासुङ।
LUK 1:59 आङा क्‍येवु ङ्‍यिमा ग्‍येकी छेर्मु तिवी ती आङा तीला यहूदी च्‍येतुप लुक्‍सु कितुपला वासुङ, तमा तीकी मिङ ति खोरो पपी मिङ दोके जकरिया ज्‍योकुप छाल्‍सुङ।
LUK 1:60 यिने आङी आमा तीकी “मिन, दीकी मिङ याङ यूहन्‍ना ज्‍योक गोकिवी।” सिनी सिक्‍यासुङ।
LUK 1:61 तमा तिवी तीला सिक्‍यासुङ, “ख्‍योरो छेङ्‍गाछाली नाङ्‍ला याङ तुका मिङ वोतुप ति सु साङ मे।”
LUK 1:62 तिवी आङी पपाला तीकी मिङ ति काङ ज्‍योकुप नो वे सिनी लाक्‍पी लातुक क्‍यानी टिसुङ।
LUK 1:63 तमा जकरियाकी टिकुप तक्‍ती यी लङ्‍नी ती लोला “दीकी मिङ यूहन्‍ना यिन।” सिनी टिसिमा तिवा तेरी हलेवा क्‍यासुङ।
LUK 1:64 ती पेला शार्क्येक जकरियाकी च्‍येलाक गुल्‍नी तीकी ख नेमा ताम्‍ङे लपुप छल्‍नी कोन्‍छ्‍योकला सोवा पुल्‍सुङ।
LUK 1:65 दी थोङ्‍सिमा युल्‍वातिवा तेरी ज्‍यिवा क्‍यासुङ। तमा ती तेरी ताम्‍ङे ति यहूदिया लुङ्‍बाकी पम्‍दोकला वोतुप युलतिवाला टाम्‍सुङ।
LUK 1:66 ती ताम्‍ङे थोवुतिवा तेरीकी खोप्‍रे सेमला “काङ दी आङा याङ ज्‍युक्‍ला चुका पारी गिताङ?” सिनी नो क्‍यासुङ। च्‍यिलासिसिन चोवो कोन्‍छ्‍योककी ओङ ति ती आङी मुला वुतुङ के ज्‍युनोक।
LUK 1:67 तमा आङी पपा जकरिया ति कोन्‍छ्‍योककी थु चाङ्‍माकी क्‍येङ्‍नी दुक सिनी नम्‍दर शेसुङ,
LUK 1:68 “इस्राएलकी चोवो कोन्‍छ्‍योकला सोवा वुङ्‍शी, च्‍यिलासिसिन खो फेप्‍नी खोरे मीतिवाला र्‍होक्‍सुङ।
LUK 1:69 खोकी खोरो लावा दाऊदकी गिपा नेमा दाक्‍पुला दिक्‍पा ने थर ज्‍यितुप ओङ छ्‍येवु मिरा च्‍यिक ताङ वे।
LUK 1:70 तोङ्‍ला खोरे टेङ्‍बु वोतुप लुङ्‍तेम्‍बातिवी नेसुर खोकी सुङ्‍गुप दोके
LUK 1:71 दाक्‍पी डतिवा ताङ दाक्‍पुला ङ्‍यिङ्‍मर कितुपतिवी लक नेसुर दाक्‍पुला थर च्‍यिसुङ।
LUK 1:72 खोकी खोरे टेङ्‍बु वोतुप थाक्‍छ्‍येतुप ति टेन्‍नी दाक्‍पी पगावा हङ्‍गावातिवाला च्‍यम्‍बा क्‍या नाङ्‍सुङ।
LUK 1:73 ती ति खोकी दाक्‍पी हङ्‍गावा अब्राहाम ताङ मुला थाक्‍छ्‍येन नङ्‍गुप यिन।
LUK 1:74 खोकी दाक्‍पुला डतिवी लक नेसुर थर च्‍यिनी ज्‍यिवा माक्‍यावा क्‍यानी खोला शब्‍ज्‍यी कितुप ताङ
LUK 1:75 दाक्‍पी छे काङ खोकी दोङ्‍ला चाङ्‍मा ताङ टेङ्‍बु क्‍यानी मिजी क्‍योङ च्‍यिसुङ।
LUK 1:76 ओ आङो, ख्‍युरुङ तेरी सिनाङ चोछ्‍येवु कोन्‍छ्‍योककी लुङ्‍तेम्‍बा सिवितो, च्‍यिलासिसिन ख्‍युरुङ चोवोकी गोमाला गल्‍नी खोकी लाम टडिक कितो,
LUK 1:77 तमा खोकी खोरो मीतिवी दिक्‍पा पङ्‍नी तिवाला थर्वा ङ्‍येकिवी सिरुप रिक्‍पा ख्‍युरुङ लोप्‍कितो।
LUK 1:78 च्‍यिलासिसिन दाक्‍पी कोन्‍छ्‍योक ति च्‍यम्‍बा ताङ ङ्‍यिङ्‍ज्‍ये कितुप यिन। खोकी देवाच्‍येन नेमा ङ्‍यिराङला ङ्‍यिमा शर च्‍यिनी
LUK 1:79 नक्‍तोमी ताङ शेपकी र्‍हिपला देतुपतिवाला ठछ्‍येली तेर च्‍यिसुङ, तमा ती ठछ्‍येलीकी ङ्‍यिराङला लोदिमु वोतुप लाम नेवा टिकिवी।”
LUK 1:80 तमा ती आङा ति छरिन सिरा कोन्‍छ्‍योककी थु चाङ्‍मा नेमा रम्‍बु गाल्‍सुङ। तमा ती ति इस्राएलकी मीतिवी मिङ्‍गाला वुङ्‍गुप सिनाङ गोमाला दासा पाङ्‍थेरीला राङ देसुङ।
LUK 2:1 ती पेला रोमी ग्‍येल्‍वु अगस्‍टसकी खोरे लुङ्‍बी तेरी मीतिवाला दाक दाक्‍पी क्‍येवु दासाला मिङ टिनी थो ग्‍योप सिनी क बिन्‍नोक।
LUK 2:2 दी मिङ थो ग्‍यकुप ति कुरेनियसकी सिरिया लुङ्‍बाला ओङ्‍ज्‍येन कितुप पेला थल्‍माला क्‍यावु यिन।
LUK 2:3 मी तेरी खोप्‍रे मिङ थो ग्‍यकुपला दाक दाक्‍पी पगावाकी युल याङ्‍ना ग्‍येसाला गाल।
LUK 2:4 तमा योसेफ साङ गालील लुङ्‍बाकी नासरत नेसुर यहूदियाकी बेथलेहेम सिरुप ग्‍येल्‍वु दाऊद क्‍येवु ग्‍येसाला गाल, च्‍यिलासिसिन ती ति दाऊदकी गिपा नेमा क्‍येवु मी यिनोक।
LUK 2:5 तीकी खोरो जेन्‍दी कितुपला लङ्‍गुप पुम मरियम ताङ मुला मिङ थो ग्‍यकुपला गल्‍नोक। तोजो पेला मरियम ति जु चेन्‍दी नोक।
LUK 2:6 तिवा ते बेथलेहेमला वोतुप पेला मरियमकी जु ठिलुप पेला लेप्‍सुङ।
LUK 2:7 तमा तीकी खोरो पुज्‍युङ छ्‍ये ति क्‍येसुङ, ती आङा तीला छातेनला टिल्‍नी किम्‍बुर यीकी नाङ्‍ला ङ्‍याल्‍सुङ, च्‍यिलासिसिन तिवाला ते डोखाङला देतुप दासा कनी साङ माङ्‍ये।
LUK 2:8 तमा ती नुपला बेथलेहेम युलकी फेचेक चिप्‍ला दिङ्‍मा यीला गोठालातिवा खोप्‍रे लुकतिवा ल्‍हानी देनोक।
LUK 2:9 ती पेला देवाच्‍येनकी लेन क्‍योलुप थु च्‍यिक तिवी चाला छ्‍यार्सुङ। तमा चोवो कोन्‍छ्‍योककी मोवाकी वोसिर तिवी गारी गुरीला ग्‍यप्‍सुङ। ती थोङ्‍नी तिवा छासे ज्‍यिवा क्‍यासुङ।
LUK 2:10 यिने देवाच्‍येनकी लेन क्‍योलुप थु तीकी तिवाला “ज्‍यिवा माकी। ङ तेरी मीतिवी थोक्‍ला छासे गा लङ्‍गुप लेन ल्‍यामु ख्‍यिराङला तेरुपला वावु यिन।
LUK 2:11 हारिङ दाऊदकी ग्‍येसाला मीतिवाला दिक्‍पा ने थर ज्‍यितुप चोवो ख्रीष्‍ट क्‍ये वे।
LUK 2:12 ख्‍यिरा आङा यीला छातेनला टिल्‍नी किम्‍बुर नाङ्‍ला ङ्‍येल वोतुप थोङ्‍गिवी, ती ति ख्‍यिराङला छ्‍या तेन्‍दुप त यिन।” सिनी सिक्‍यासुङ।
LUK 2:13 ती पेला शार्क्येक ती देवाच्‍येनकी लेन क्‍योलुप थु मुला यम्‍बा देवाच्‍येनकी लेन क्‍योलुप थुतिवा बङी छ्‍यार्नी कोन्‍छ्‍योकला सोवा देकिन सिक्‍यासुङ,
LUK 2:14 “तेरी सिनाङ येर देवाच्‍येनला कोन्‍छ्‍योकला मोवा वुङ्‍शी, जम्‍बुलिङला कोन्‍छ्‍योककी सु सुला गा क्‍या वे, तिवाला लोदिमु वुङ्‍शी।”
LUK 2:15 तमा देवाच्‍येनकी लेन क्‍योलुप थुतिवा तिवा नेसुर क्‍येनी येर देवाच्‍येनला गल्‍सिमा गोठालातिवी च्‍यिककी च्‍यिकला सिक्‍यासुङ, “शोक, दाक्‍पु बेथलेहेमला डोप। ते गल्‍नी चोवो कोन्‍छ्‍योककी दाक्‍पुला सुङ्‍गुप ताम्‍ङे च्‍युङ्‍गुप ति ल्‍हाप।”
LUK 2:16 तमा तिवा छ्‍योङ्‍बाल ग्‍यम गल्‍नी मरियम ताङ योसेफ ताङ किम्‍बुर नाङ्‍ला ङ्‍यल्‍नी वोतुप आङा तीला थोङ्‍सुङ।
LUK 2:17 तिवी ती आङाला थोङ्‍सिमा ती आङी कोर्ला देवाच्‍येनकी लेन क्‍योलुप थुकी तिवाला सिक्‍यावु ताम्‍ङे ति मीतिवाला लाप्‍सुङ।
LUK 2:18 गोठालातिवी सिक्‍यावु ताम्‍ङे थोवु मीतिवा तेरी छासे हलेवा क्‍यासुङ।
LUK 2:19 यिने मरियमकी ति ती तेरी ताम्‍ङे खोरो सेमगी दिङ्‍ला ज्‍याक्‍नी छासे नासाम ताङ्‍सुङ।
LUK 2:20 गोठालातिवा खोप्‍रे थोवु ताङ थोङ्‍गुप ताम्‍ङे ति देवाच्‍येनकी लेन क्‍योलुप थुकी सिक्‍यावु दोके राङ यिन सिरुप हाक्‍कोनी कोन्‍छ्‍योकला मोवा कितुप ताङ खोला सोवा देकिन सिरा लोक्‍नी गाल्‍सुङ।
LUK 2:21 ङ्‍यिमा ग्‍येकी छेर्मुला आङाला यहूदीतिवी च्‍येतुप लुक्‍सु कितुप पेला आङी मिङ ति येशू सिनी तासुङ। ती मिङ ति खो आमी खोकला वोतुप सिनाङ गोमाला के देवाच्‍येनकी लेन क्‍योलुप थुकी सिक्यावु मिङ यिन।
LUK 2:22 तमा मोशाकी ठिमला टिवु दोके तिवा चेङ्‍गा जोप ङ्‍यिमा खल ङ्‍यी छेसिमा योसेफ ताङ मरियमकी आङाला कोन्‍छ्‍योककी दोङ्‍ला चेक तेतुपला यरूशलेमला वोतुप यहूदी ल्‍हङाङला खुर्नी वासुङ।
LUK 2:23 ती ति कोन्‍छ्‍योककी ठिमला “थल्‍माला क्‍येवु तेरी पुज्‍युङ छ्‍ये ति कोन्‍छ्‍योककी थोक्‍ला चाङ्‍मा क्‍यानी चिवु यिन।” सिनी टिवु दोके कितुपला यिन।
LUK 2:24 येलुङ कोन्‍छ्‍योककी ठिमला “गम्‍देर छ्‍या च्‍यिक याङ्‍ना बुर्केन च्‍यप्‍रुक ङ्‍यी चोके जिन्‍बा बुल गोकिवी।” सिनी टिवु दोके तिवी बुलुपला वासुङ।
LUK 2:25 तमा ती पेला यरूशलेमला शिमियोन सिरुप मी यी नोक। ती ति कोन्‍छ्‍योककी थोङ्‍दाङला टेङ्‍बु वोतुप ताङ कोन्‍छ्‍योकला मोवा कितुप मी यिनोक। तीकी कोन्‍छ्‍योककी इस्राएलकी मीतिवाला थर ज्‍यितुप तीला गुनी देनोक, तमा तीला कोन्‍छ्‍योककी थु चाङ्‍मा थोप्‍नी नोक।
LUK 2:26 कोन्‍छ्‍योककी थु चाङ्‍माकी तीला “चोवो कोन्‍छ्‍योककी तङ्‍गुप ख्रीष्‍टला ख्‍योरो माथोङ्‍वा सेक्‍ला ख्‍युरुङ मिशिवी।” सिनी हाक्‍को च्‍यिसुङ।
LUK 2:27 तोजो पेला कोन्‍छ्‍योककी थु चाङ्‍माकी तीला गोमा क्‍यानी ती ति यहूदी ल्‍हङाङ नाङ्‍ला गाल्‍सुङ। ती पेला राङ ते योसेफ ताङ मरियमकी आङा येशूला मोशाकी ठिमला वोतुप दोके लुक्‍सु तेन्‍दुपला खुन लेसुङ।
LUK 2:28 शिमियोनकी ती आङाला खोरो पङ्‍दुर लानी कोन्‍छ्‍योकला सोवा बुलिन सिरा सिक्‍यासुङ,
LUK 2:29 “ओ चोवो कोन्‍छ्‍योक, चोवोकी थाक्‍छ्‍येन नङ्‍गुप दोके तेरी छे च्‍यिन वे। त ङ ख्‍योरो लावाला लोदिमु क्‍यानी डो च्‍यिकिवी।
LUK 2:30 च्‍यिलासिसिन चोवोकी तेरी मीतिवाला थर ज्‍यितुपला तङ्‍गुप तीला ङे मिककी राङ थोङ्‍सुङ।
LUK 2:31 जम्‍बुलिङ तेरीकी मीतिवी तीला थोङ्‍शी सिनी चोवोकी टडिक क्‍या नाङ वे।
LUK 2:32 दी ति यहूदी मिन्‍दुप मिरिक यम्‍बातिवाला ति चोवोकी लाम छ्‍या देन्‍दुप वोसिर यिन, तमा इस्राएलकी मीतिवाला ति मोवा ङ्‍ये ज्‍यितुप यिन।”
LUK 2:33 शिमियोनकी आङी कोर्ला सिक्‍यावु ताम्‍ङे थोनी आङी पपा ताङ आमा तीकी हलेवा क्‍यासुङ।
LUK 2:34 शिमियोनकी तिवाला मोलाम बिन्‍नी आङी आमा मरियमला सिक्‍यासुङ, “ल्‍होसा, दी आङा ति इस्राएलकी मीतिवा बङीला ललाइला ति थर ज्‍यितुपकी थोक्‍ला ताङ ललाइला ति ना तोङ ज्‍यितुपकी थोक्‍ला कोन्‍छ्‍योककी पेतुप यिन। दी ति कोन्‍छ्‍योककी छ्‍या तेन्‍दुप त यिन, मी बङीकी तीकी तेन्‍दोकला लानी खोरो सेमगी नासाम छ्‍या देन्गिवी।
LUK 2:35 तमा ख्‍योरो सेम ति टि थ्‍वोनी सुरुप दोके छासे सेम्‍दुक लङ्‍गितो।”
LUK 2:36 ते यहूदी ल्‍हङाङला हन्‍ना सिरुप कोन्‍छ्‍योककी लुङ्‍तेम्‍बा पुम्‍पेजा यी साङ नोक। ती ति आशेरकी गिपाकी फनुएलकी पुम नोक, तमा छासे मी गामा यिनोक। ती ति जेन्‍दी क्‍यावु लो दिनकी ज्‍युक्‍ला युक्‍सिम फोक्‍नोक,
LUK 2:37 तमा युक्‍सिम फोक्‍नी लो खाल गे ताङ ज्‍यी लेपुप पेला सेक ल्‍हङाङला क्‍युर्नी माज्‍याक्‍नी ङ्‍युङ्‍ने र्‍हुङ्‍यिन ताङ मोपोर कियी ङ्‍यी ताङ नुप्‍ज्‍या कोन्‍छ्‍योकला सोवा देकिनोक।
LUK 2:38 ती पेला राङ हन्‍ना ति मरियम ताङ योसेफकी चाला वानी कोन्‍छ्‍योकला थुचिछे पुल्सुङ, तमा कोन्‍छ्‍योककी इस्राएलला थर ज्‍यितुपला गुनी देतुपतिवा तेरीला ती आङी कोर्ला लाप्‍सुङ।
LUK 2:39 योसेफ ताङ मरियम ति चोवो कोन्‍छ्‍योककी ठिमला टिवु दोके तेरी क्‍या सिन्‍सिमा खोप्‍रे युल गालीलकी नासरतला लोक्‍सुङ।
LUK 2:40 आङा येशू ति छरिन रम्‍बु डोयी च्‍यु ताङ रिक्‍पाकी क्‍येङ्‍नी गाल, तमा चोवो कोन्‍छ्‍योककी कटिन खोकी खला नोक।
LUK 2:41 येशूकी पपाआमा ति ले टेङ यहूदी थरुप तुछ्‍येन तेन्‍दुपला यरूशलेमला डिनोक।
LUK 2:42 येशू लो च्‍यिङ्‍ङी लेपुप पेला साङ तिवा नरी दोके क्‍यानी तुछ्‍येन तेन्‍दुपला यरूशलेमला गाल।
LUK 2:43 तमा तुछ्‍येन सिन्‍सिमा तिवा खाङ्‍बा लोकुप पेला पेजा येशू ति यरूशलेमला राङ लुनोक। यिने खोकी पपाआमाला ति ती ताम्‍ङे हाक्‍माकोनी
LUK 2:44 पेजा येशू ति तिवी मुला वुङ्‍गुप मीतिवी पर्ला वोते नोनी तिवा ङ्‍यिमा च्‍यिककी लामला गाल। तिङ्‍ला तिवी छेङ्‍गाछालीतिवा ताङ दाल्‍जातिवी पर्ला खोला छाल्‍सुङ।
LUK 2:45 यिने खोला माङ्‍येसिमा तिवा खोला छोलुपला येलुङ यरूशलेमला राङ लोक्‍सुङ।
LUK 2:46 तमा ङ्‍यिमा सुमकी तिङ्‍ला राङ तिवी येशूला यहूदी ल्‍हङाङला ठेसुङ। ती पेला खो ति यहूदी छ्‍योकी गेकेनतिवी पर्ला देनी तिवी ताम्‍ङे ङ्‍येनिन ताङ तिवाला ताम्‍ङे टिवा कियी नोक।
LUK 2:47 ते खोकी ताम्‍ङे ङ्‍येन्‍दुपतिवा तेरी खोकी च्‍यु ताङ रिक्‍पा ताङ खोकी टिलेन ग्‍यकुप थोङ्‍नी हलेवा क्‍यासुङ।
LUK 2:48 खोला ते थोङ्‍नी खोकी पपाआमा हलेवा क्‍यासुङ। तमा आमा तीकी खोला टिसुङ, “पुज्‍यो, ख्‍योरो च्‍यिला ङ्‍यिराङला दुक क्‍यावु यिन? ल्हो ताङ, ख्‍योरे पालु ताङ ङ ख्‍युरुङला छोल्‍सा छोल्‍सा छासे पप लासुङ।”
LUK 2:49 येशूकी तिवाला सुङ्‍सुङ, “ङला च्‍यिला छलुप्‍जा? ङ ङरा पपी खाङ्‍बाला राङ दे गोकिवी सिरुप ति ख्‍यिराङला छ्‍या मे?”
LUK 2:50 यिने खोकी सुङ्‍गुप ताम्‍ङे ति तिवी हाक्‍माको।
LUK 2:51 ती ज्‍युक्‍ला येशू खोरो पपाआमा मुला नासरतला लोक्‍सुङ, तमा तिवी खला ङ्‍येन्‍नी ज्‍युसुङ। खोकी आमा मरियमकी ती तेरी ताम्‍ङेतिवा खोरो सेमला ज्‍याक्‍सुङ।
LUK 2:52 येशू ति रिक्‍पा ताङ जुजमला छरिन गाल्‍सुङ, तमा कोन्‍छ्‍योक ताङ मीतिवा नेमा मङ ङ्‍यिङ्‍ज्‍ये थोपिन गाल्‍सुङ।
LUK 3:1 रोमी ग्‍येल्‍वु कैसर तिबेरिअसकी ग्‍येला क्‍यावु लो च्‍येङाला पन्‍तियस पिलातस ति यहूदिया लुङ्‍बाला रोमी ठिम कितुप मी छ्‍ये नोक। तमा हेरोद ति गालील लुङ्‍बाला ग्‍येला किनोक, तीकी नुप फिलिप ति इतुरिया ताङ त्राखोनितिस लुङ्‍बाला ग्‍येला किनोक। तमा लुसानियास ति अबिलेने लुङ्‍बाला ग्‍येला किनोक।
LUK 3:2 तोजो पेला हन्‍नास ताङ कैयाफा ति यहूदी ल्‍हङाङला तेरी सिनाङ कोङ्‍यार छ्‍ये यिनोक। ती पेला कोन्‍छ्‍योककी सुङ ति दासा पाङ्‍थेरीला वोतुप जकरियाकी पुज्‍युङ यूहन्‍नाला लेसुङ।
LUK 3:3 तमा यूहन्‍ना ति यर्दन चङ्‍बुकी फार छुरकी तेरी लुङ्‍बाला गल्‍नी मीतिवाला “ख्‍यिराङ दाक दाक्‍पी दिक्‍पा ने सेम ग्‍युर्नी बप्‍तिस्‍मा लो, तमा कोन्‍छ्‍योककी ख्‍यिरा दिक्‍पा ता ज्‍यिकिवी।” सिनी ख्‍याप्‍टाक क्‍यासुङ।
LUK 3:4 ती ति कोन्‍छ्‍योककी लुङ्‍तेम्‍बा यशैयाकी कोन्‍छ्‍योककी सुङला टिवु दोके राङ च्‍युङ्‍सुङ। “दासा पाङ्‍थेरीला मिरा च्‍यिककी थोर ग्‍यप्‍नी सिवी, ‘चोवो फेपुप लाम टडिक की। खोकी थोक्‍ला लाम थेकाङ जो।
LUK 3:5 तेरी बुक्‍योकतिवा सोप गोकिवी, तेरी री ताङ पम्‍दोकतिवा तेल गोकिवी, लाम क्‍यका क्‍योकातिवा थेकाङ जो गोकिवी। तमा लाम कलेतिवा जोल्‍हमु जो गोकिवी।
LUK 3:6 तमा तेरी मीतिवी कोन्‍छ्‍योककी थर्वा नङ्‍गुप ति थोङ्‍गिवी।’”
LUK 3:7 खोरो चाला बप्‍तिस्‍मा लङ वावु मीतिवाला यूहन्‍नाकी दुक सिक्‍यासुङ, “ओ, रुल कुपेङकी च्‍यप्‍रुक दोके दुक्‍टा वोतुपतिवा, त वुङ्‍गुप कोन्‍छ्‍योककी पर्च्या नेमा टो सिनी सी ख्‍यिराङला लाप्‍सुङ?
LUK 3:8 वुतुङ के ख्‍यिराङ दिक्‍पा ने सेम ग्‍युर्नी कोन्‍छ्‍योककी थाकाला वावु यिन्‍सिन ती दोके लाका ल्‍यामु की। तमा ख्‍यिरा सेमला ‘दाक्पु ति अब्राहामकी गिपा यिन।’ सिनी सिरुप माछोल। च्‍यिलासिसिन ङ ख्‍यिराङला सिरिन, कोन्‍छ्‍योककी दी दोतिवा नेसुर साङ अब्राहामकी गिपा जो थुप्‍किवी।
LUK 3:9 दोङ्‍बी शापला तरी ख्‍येल्‍नी सिन वे, तमा डेलु ल्‍यामु मोगोरुप तेरी दोङ्‍बुतिवा च्‍येनी मे नाङ्‍ला क्‍युर्किवी।”
LUK 3:10 तमा मीतिवी यूहन्‍नाला “तुकै यिन्‍सिन ङ्‍यिराङ ति काङ कि गोकिवी?” सिनी टिसुङ।
LUK 3:11 यूहन्‍नाकी तिवाला सिक्‍यासुङ, “सी मुला छ्‍योवा ङ्‍यी नोके, तीकी मेतुपतिवाला तेर्शी। सी मुला साप समा नोके, तीकी साङ मेतुपतिवाला तेर्शी।”
LUK 3:12 से दुतुपतिवा साङ बप्‍तिस्‍मा लङ्‍गुपला ते वानी यूहन्‍नाला “गेकेन, ङ्‍यिराङ ति काङ कि गोकिवी?” सिनी टिसुङ।
LUK 3:13 तमा यूहन्‍नाकी तिवाला सिक्‍यासुङ, “ख्‍यिरा दु गोवु सिनाङ ल्‍हक्‍पा से मादु।”
LUK 3:14 तमा मक्‍मीतिवी साङ टिसुङ, “ङ्‍यिराङ ति काङ कि गोकिवी?” यूहन्‍नाकी तिवाला सिक्‍यासुङ, “सु नेसुर साङ वुर्च्युम ग्‍यप्‍नी टङ्‍गा माठोक, तमा क्‍येन मेटेङ्‍बु ग्‍यप्‍नी माठोक, बोरु दाक दाक्‍पी थोपुप लला लोदिवा क्‍यानी दे।”
LUK 3:15 मीतिवा थर्वा नङ्‍गुप ख्रीष्‍टला रेवा क्यानी गुन देतुप तप्‍की तिवी नासामला “यूहन्‍ना ति ख्रीष्‍ट यिन्‍दे यिन्‍दे।” सिनी नो क्‍यानोक।
LUK 3:16 तिवी नोवा हाक्‍कोनी यूहन्‍नाकी तिवा तेरीला सिक्‍यासुङ, “ङ ख्‍यिराङला छ्‍यु थ्‍वोनी बप्‍तिस्‍मा तेरिन, यिने ङ सिनाङ मङ ओङ छ्‍येवु वोतुप मी यी फेपिन वे। ङ याङ खोकी शप्‍चेकी र्‍हाम्‍डोक डोलुप साङ पोमु मे। खोकी ख्‍यिराङला कोन्‍छ्‍योककी थु चाङ्‍मा ताङ मे नेसुर बप्‍तिस्‍मा नङ्‍गिवी।
LUK 3:17 खोकी लकला ग्‍यालुक वे, ती ग्‍यालुक थ्‍वोनी खोरो लेङाङला वोतुप डुप्‍सेनतिवा च्‍यर्नी डुमा ति खोरो पङाङ नाङ्‍ला दुम ज्‍योकिवी, तमा फुङ्‍मा ति नाम्‍साङ मिशिवु मे नाङ्‍ला र्‍हेकिवी।”
LUK 3:18 यूहन्‍नाकी यम्‍बा टोङ्‍गुतिवा साङ बङी बिन्‍नी मीतिवाला लेन ल्‍यामु ख्‍याप्‍टाक क्‍यासुङ।
LUK 3:19 यिने ग्‍येल्‍वु हेरोदकी खोरो नुपकी पेर्मी हेरोदियासला खोरो पेर्मी जोनी ज्‍यकुप ताङ तीकी क्‍यावु यम्‍बा दुक्‍टातिवी थोक्‍ला यूहन्‍नाकी तीला वोरु तेन्‍सुङ।
LUK 3:20 तमा हेरोदकी मङ दुक्‍टा क्‍यानी यूहन्‍नाला चोन्‍खाङ नाङ्‍ला उप्‍सुङ।
LUK 3:21 तमा तेरी मीतिवी बप्‍तिस्‍मा लासुङ। येशूकी साङ बप्‍तिस्‍मा लानी मोपोर कियी वोतुप पेला देवाच्‍येन सेसुङ।
LUK 3:22 ती पेला कोन्‍छ्‍योककी थु चाङ्‍मा ति गम्‍देर दोके क्‍यानी खोकी खला पाप्‍सुङ। तमा देवाच्‍येन नेमा “ख्‍युरुङ ङे ङ्‍यिङ्‍ज्‍येवु पुज्‍युङ यिन, ख्‍योरो मुला ङ छासे गा ला वे।” सिरुप वोरु यी वासुङ।
LUK 3:23 येशू कोन्‍छ्‍योककी सुङ ख्‍याप्‍टाक कितुप लाका गो जुवु पेला खो ति लो खल्‍ज्‍यिक ताङ च्‍यिथम्‍बा चोयी लेप्‍नोक। मीतिवी खोला योसेफकी पुज्‍युङ यिन सिनी नासाम तोङ्‍गिनोक। योसेफ ति एलीकी पुज्‍युङ नोक,
LUK 3:24 एली ति मत्तातकी पुज्‍युङ, मत्तात ति लेवीकी पुज्‍युङ, लेवी ति मल्‍कीकी पुज्‍युङ, मल्‍की ति यान्‍नाकी पुज्‍युङ,
LUK 3:25 यान्‍ना ति योसेफ मत्ताथियासकी पुज्‍युङ, मत्ताथियास ति आमोसकी पुज्‍युङ, आमोस ति नहूमकी पुज्‍युङ, नहूम ति इसलीकी पुज्‍युङ, इसली ति नग्‍गैकी पुज्‍युङ,
LUK 3:26 नग्‍गै ति माथकी पुज्‍युङ, माथ ति मत्ताथियासकी पुज्‍युङ, मत्ताथियास ति सेमैनकी पुज्‍युङ, सेमैन ति योसेखकी पुज्‍युङ, तमा योसेख ति योदाकी पुज्‍युङ नोक।
LUK 3:27 योदा ति योआननकी पुज्‍युङ, योआनन ति रेसाकी पुज्‍युङ, रेसा ति यरुबाबेलकी पुज्‍युङ, यरुबाबेल ति शालतिएलकी पुज्‍युङ, शालतिएल ति नेरीकी पुज्‍युङ,
LUK 3:28 नेरी ति मल्‍कीकी पुज्‍युङ, मल्‍की ति अद्दीकी पुज्‍युङ, अद्दी ति कोसामकी पुज्‍युङ, कोसाम ति एलमादमकी पुज्‍युङ, एलमादम ति एरकी पुज्‍युङ,
LUK 3:29 एर ति यहोशूकी पुज्‍युङ, यहोशू ति एलीएजरकी पुज्‍युङ, एलीएजर ति योरिमकी पुज्‍युङ, योरिम ति मत्तातकी पुज्‍युङ, मत्तात ति लेवीकी पुज्‍युङ,
LUK 3:30 लेवी ति शिमियोनकी पुज्‍युङ, शिमियोन ति यहूदाकी पुज्‍युङ, यहूदा ति योसेफकी पुज्‍युङ, योसेफ ति योनानकी पुज्‍युङ, योनान ति एल्‍याकीमकी पुज्‍युङ नोक।
LUK 3:31 एल्‍याकीम ति मलेआकी पुज्‍युङ, मलेआ ति मिन्‍नाकी पुज्‍युङ, मिन्‍ना ति मत्ताथाकी पुज्‍युङ, मत्ताथा ति नातानकी पुज्‍युङ, नातान ति दाऊदकी पुज्‍युङ,
LUK 3:32 दाऊद ति यिशैकी पुज्‍युङ, यिशै ति ओबेदकी पुज्‍युङ, ओबेद ति बोअजकी पुज्‍युङ, बोअज ति सल्‍मोनकी पुज्‍युङ, सल्‍मोन ति नहशोनकी पुज्‍युङ,
LUK 3:33 नहशोन ति अम्‍मीनादाबकी पुज्‍युङ, अम्‍मीनादाब ति आरामकी पुज्‍युङ, आराम ति हेस्रोनकी पुज्‍युङ, हेस्रोन ति फारेसकी पुज्‍युङ, फारेस ति यहूदाकी पुज्‍युङ,
LUK 3:34 यहूदा ति याकूबकी पुज्‍युङ, याकूब ति इसहाककी पुज्‍युङ, इसहाक ति अब्राहामकी पुज्‍युङ, अब्राहाम ति तेरहकी पुज्‍युङ, तेरह ति नाहोरकी पुज्‍युङ नोक।
LUK 3:35 नाहोर ति सरूगकी पुज्‍युङ, सरूग ति रऊकी पुज्‍युङ, रऊ ति पेलेगकी पुज्‍युङ, पेलेग ति एबेरकी पुज्‍युङ, एबेर ति शेलहकी पुज्‍युङ,
LUK 3:36 शेलह ति केनानकी पुज्‍युङ, केनान ति अर्पक्षदकी पुज्‍युङ, अर्पक्षद ति शेमकी पुज्‍युङ, शेम ति नोआकी पुज्‍युङ, नोआ ति लेमेखकी पुज्‍युङ,
LUK 3:37 लेमेख ति मतूशेलहकी पुज्‍युङ, मतूशेलह ति हनोककी पुज्‍युङ, हनोक ति येरेदकी पुज्‍युङ, येरेद ति महलालेलकी पुज्‍युङ, महलालेल ति केनानकी पुज्‍युङ,
LUK 3:38 केनान ति एनोशकी पुज्‍युङ, एनोश ति शेतकी पुज्‍युङ, शेत ति आदमकी पुज्‍युङ नोक, तमा आदम ति कोन्‍छ्‍योककी पुज्‍युङ यिनोक।
LUK 4:1 येशू कोन्‍छ्‍योककी थु चाङ्‍माकी क्‍येङ्‍नी यर्दन चङ्‍बु नेमा लोक्‍नी फेप्‍सिमा कोन्‍छ्‍योककी थु चाङ्‍माकी राङ खोला दासा पाङ्‍थेरीला टिनी फेप्‍सुङ।
LUK 4:2 ते ङ्‍यिमा खल ङ्‍यी सेक शैतानकी खोला खोक्‍पा ल्‍हासुङ। ती पेला सेक खोकी काङ साङ माशे, तमा ती ङ्‍यिमातिवा छेसिमा खोला ल्‍होवा लासुङ।
LUK 4:3 तमा शैतानकी येशूला सिक्‍यासुङ, “दोजो ख्‍युरुङ कोन्‍छ्‍योककी सेवु यिन्‍सिन दी दोला शुब्‍ज्‍याङला डोशी सिनी सी।”
LUK 4:4 येशूकी तीला सुङ्‍सुङ, “कोन्‍छ्‍योककी सुङला दुक सिनी टि वे, ‘शुब्‍ज्‍याङकी तिराङ मीला सेन्‍बु मुलुवी।’”
LUK 4:5 येलुङ शैतानकी येशूला दासा थेन्‍बु यीला टि गल्‍नी उकुर च्‍यिकला जम्‍बुलिङकी तेरी ग्‍येल्‍खापतिवा छ्‍या तेन्‍सुङ।
LUK 4:6 तमा तीकी खोला सिक्‍यासुङ, “ङ दी तेरी ओङ्‍ज्‍येन ताङ मोवा ति ख्‍युरुङला तेरिन। दी तेरी ङला थोप्‍नी वे। तुक क्‍यानी ङे सुला तेरुप नो वे, तीला राङ तेरिन।
LUK 4:7 ख्‍योरे ङला शावा क्‍यासिन दी तेरी ख्‍युरुङला तेरिन।”
LUK 4:8 तमा येशूकी तीला सुङ्‍सुङ, “कोन्‍छ्‍योककी सुङला दुक सिनी टि वे, ‘ख्‍योरो चोवो कोन्‍छ्‍योकला तिराङ सोवा तेक, तमा खोला तिराङ शब्ज्‍यी पुल।’”
LUK 4:9 येलुङ शैतानकी येशूला यरूशलेमला टि गल्‍नी खोला यहूदी ल्‍हङाङकी चेला दे च्‍यिनी दुक सिक्‍यासुङ, “दोजो ख्‍युरुङ चोवो कोन्‍छ्‍योककी सेवु यिन्‍सिन दे नेमा छ्‍योङ्‍बाल ग्‍योप।
LUK 4:10 च्‍यिलासिसिन कोन्‍छ्‍योककी सुङला दुक सिनी टि वे, ‘खोकी देवाच्‍येनकी लेन क्‍योलुप थुतिवाला क नाङ्‍नी ख्‍युरुङला र्‍होक्‍टे कि ज्‍यिकिवी।
LUK 4:11 तमा तिवी खोप्‍रे लाक्‍पा जेनी ख्‍योरो काङ्‍बा दोला दप मिज्‍यिवी।’”
LUK 4:12 येशूकी तीला सुङ्‍सुङ, “कोन्‍छ्‍योककी सुङला दुक सिनी टि वे, ‘ख्‍योरो चोवो कोन्‍छ्‍योकला खोक्‍पा माल्‍हा।’”
LUK 4:13 तमा शैतानकी येशूला ती तेरी खोक्‍पा ल्‍हा सिन्‍सिमा यम्‍बा च्‍यु माङ्‍येता सेक खोला क्‍युर ज्‍याक्‍नी गाल।
LUK 4:14 ती ज्‍युक्‍ला येशू कोन्‍छ्‍योककी थु चाङ्‍माकी ङार थोप्‍नी गालील लुङ्‍बाला लोक्‍नी फेप्‍सुङ। तमा खोकी कोर्ला फार छुर तेरी दासाला ताम्‍ङे टाम्‍सुङ।
LUK 4:15 खोकी यहूदी छ्‍योखाङतिवाला येन्‍देन नाङ्‍सुङ, तमा तेरी मीतिवी खोला सोवा तेक्‍सुङ।
LUK 4:16 तमा येशू खुरुङ र्‍होलुप नासरतला फेप्‍नी नरी दोके क्‍यानी ङासोप ङ्‍यिमाला यहूदी छ्‍योखाङला फेप्‍सुङ। तमा खो कोन्‍छ्‍योककी सुङ लोपुपला खोक लानी
LUK 4:17 कोन्‍छ्‍योककी लुङ्‍तेम्बा यशैयाकी टिवु टिलुप थेप लानी तीला पेसिमा ती नाङ्‍ला दुक सिनी टिवु ति छल्‍नी रासुङ,
LUK 4:18 “चोवो कोन्‍छ्‍योककी थु चाङ्‍मा ङे खला ख्‍येल वे। खोकी ङला पेराङ्‍बुतिवाला लेन ल्‍यामु ख्‍याप्‍टाक कितुपला चिनी वे। तमा चोन्‍खाङला शोरुपतिवाला ताङ मिक मोथोङ्‍गुपतिवाला पि तोङ्‍गुपकी कोर्ला ख्‍याप्‍टाक कितुपला ङला ताङ्‍सुङ। तमा मी ङ्‍यप्‍च्‍येला ख्‍येलुपतिवाला पि तोङ ज्‍यितुपला ताङ
LUK 4:19 खोरो मीतिवाला थर्वा नङ्‍गुप तुजे लेपुप ति मीतिवाला ख्‍याप्‍टाक कि च्‍यिसुङ।”
LUK 4:20 ती ज्‍युक्‍ला येशूकी ती थेप ति टिल्‍नी ते शब्‍ज्‍यी कितुप मीला तेनी खो ति ज्‍युसुङ। तमा यहूदी छ्‍योखाङ नाङ्‍ला वोतुपतिवा तेरीकी खोला छ्‍योर छ्‍योर्मे ल्‍हासुङ।
LUK 4:21 तमा खोकी तिवाला सुङ्‍सुङ, “दी कोन्‍छ्‍योककी सुङ ति हारिङ ख्‍यिरा ङ्‍येनिन वोतुप पेला राङ छेसुङ।”
LUK 4:22 तमा मीतिवा तेरीकी खोला चिताङ क्‍यानी खोकी सुङ्‍गुप कटिन वोतुप सुङ थोनी हलेवा क्‍यानी, “दी याङ योसेफकी पुज्‍युङ मिन?” सिनी टिसुङ।
LUK 4:23 तमा येशूकी तिवाला सुङ्‍सुङ, “वुतुङ के ख्‍यिरे ङला ‘ओ आम्‍ज्‍यी, ख्‍योरो खुरुङला राङ टेक च्‍यी।’ सिरुप पे शेकिवी, तमा ‘कफर्नहुमला ख्‍योरो काङ क्‍यावु ति ङ्‍यिरे थो वे, ती ति दे ख्‍योरो युलला साङ की।’ सिनी सिवी।”
LUK 4:24 येलुङ येशूकी तिवाला सुङ्‍सुङ, “ङ ख्‍यिराङला टेङ्‍बो सिरिन, चुका कोन्‍छ्‍योककी लुङ्‍तेम्‍बाला साङ खोरो युलकी मीतिवी ताङ्‍देन मिकिवी।
LUK 4:25 वुतुङ के ङ ख्‍यिराङला सिरिन, एलियाकी ङोला लो सुम ताङ फेका यी सेक छ्‍यर्वा च्‍यिक साङ माग्‍यप्‍नी तेरी लुङ्‍बाला ङ्‍यिमा मर्वु शरुप पेला इस्राएलला युक्‍सिमतिवा बङी वोसिनाङ।
LUK 4:26 कोन्‍छ्‍योककी एलियाला तिवी पर्ला सी ते साङ माताङ्‍नी सीदोन लुङ्‍बाला वोतुप सारपात युलकी युक्‍सिम यीकी ते ताङ्‍सुङ।
LUK 4:27 तुक राङ क्‍यानी कोन्‍छ्‍योककी लुङ्‍तेम्‍बा एलीशाकी ङोला इस्राएलला जे ग्‍यपुप नेर्पुतिवा बङी वोसिनाङ तिवी नाङ्‍ला सुला साङ माटेक्‍सुङ, यिने सिरिया लुङ्‍बाकी नामान सिरुप मी च्‍यिक तिराङ टेक्‍सुङ।”
LUK 4:28 दी ताम्‍ङे थोसिमा यहूदी छ्‍योखाङ नाङ्‍ला वोतुपतिवा तेरी ङ्‍यिर्मु क्‍यासुङ।
LUK 4:29 तमा तिवा लानी येशूला ग्‍येसा नेमा पाङ्‍ला तेन ताङ्‍सुङ। तिवी ग्‍येसा ति पम्‍दोकला नोक, तमा तिवी खोला पम्‍दोक लो नेमा थुला तला ताङ तोङ्‍गुप छाल्‍सुङ।
LUK 4:30 यिने येशू ति तिवी पर नेसुर थेन्‍नी खोरे लाम शुसुङ।
LUK 4:31 ती ज्‍युक्‍ला येशू गालील लुङ्‍बाकी कफर्नहुम सिरुप ग्‍येसाला फेप्‍सुङ। ते खोकी ङासोप ङ्‍यिमाला यहूदी छ्‍योखाङला मीतिवाला येन्‍देन नङ्‍यिन नोक।
LUK 4:32 मीतिवा खोकी सुङ थोनी हलेवा क्‍यासुङ, च्‍यिलासिसिन खोकी सुङ ति ओङ्‍ज्‍येन वोतुप नोक।
LUK 4:33 ती पेला ते यहूदी छ्‍योखाङ नाङ्‍ला डेकी कुलुप मी यी नोक। तीकी च्‍यार ग्‍यकिन सिरा सिक्‍यासुङ,
LUK 4:34 “ओ नासरतकी येशू, ख्‍युरुङ ङ्‍यिराङला काङ कितुप छोलुप यिन? काङ ख्‍युरुङ ङ्‍यिराङला ना तोङ्‍गुपला फेवु यिन? ङ ख्‍युरुङला ङो शेकिवी। ख्‍युरुङ ति कोन्‍छ्‍योककी चाङ्‍मा वोतुप मी यिन।”
LUK 4:35 तमा येशूकी तीला वोरु तेन्‍नी, “खरक्‍पा दे! ती मी नाङ नेसुर थेन ग्‍युक!” सिनी सुङ्‍सुङ। खोकी तुक सुङ्‍लुङ्‍मे ती डे तीकी ती मीला तेरी मीतिवी दोङ्‍ला तला ताङ्‍सुङ, यिने तीला काङ साङ म मातेन्‍वा क्‍यानी थेन्‍नी गाल।
LUK 4:36 ती थोङ्‍नी ते वोतुप मीतिवा तेरी हलेवा क्‍यानी च्‍यिककी च्‍यिकला सिक्‍यासुङ, “ओए! दी चुका परकी सुङ यिन? तीकी खोरो ओङ्‍ज्‍येन ताङ ङार नेमा डेतिवाला क बिन्‍सिन तिवा थेन्‍नी डिनोक।”
LUK 4:37 तमा येशूकी क्‍या नङ्‍गुप हलेवु लाकाकी कोर्ला कफर्नहुम चाकी फार छुर तेरीला टाम्‍सुङ।
LUK 4:38 ती ज्‍युक्‍ला येशू यहूदी छ्‍योखाङ नेमा थेन्‍नी सिमोनकी खाङ्‍बा फेप्‍सुङ। ती पेला सिमोनकी यिवी ति छासे छा ग्‍यप्‍नी नानोक। तमा मीतिवी “तीला टेक च्‍यी।” सिनी येशूला गोङ्‍बा शुसुङ।
LUK 4:39 तमा येशू तीकी चाला फेप्‍नी कुक क्या ल्‍हनी ती छा तीला वोरु तेन्‍सुङ, तमा ती छा ति थेन्‍नी गाल। ती ज्‍युक्‍ला ती ति शार्क्येक लानी खोतिवाला शब्ज्‍यी क्‍यासुङ।
LUK 4:40 ङ्‍यिमा गातुछ्‍येप पेला मीतिवी नेजु नम्‍बा बङी वोतुप नेर्पुतिवाला येशूकी चाला टिनी वासुङ। खोकी तिवा रे रेकी खला खोरे छ्‍याक ज्‍याक्‍नी तिवाला टेक च्‍यिसुङ।
LUK 4:41 डेतिवी साङ “ख्‍युरुङ कोन्‍छ्‍योककी सेवु यिन।” सिनी च्‍यार ग्‍यकिन सिरा मी बङीकी नाङ नेमा थेन्‍नी गाल। यिने येशूकी वोरु तेन्‍नी डेतिवाला काङ ताम्‍ङे लप माच्‍यी, च्‍यिलासिसिन तिवी खोला ख्रीष्‍ट यिन सिनी ङो शेकिनोक।
LUK 4:42 ती सला टेताङ नाम लालुङ्‍मे येशू मी सु साङ मेदेवु दासाला फेप्‍सुङ। तमा मी मङ्‍मु खोला छोलिन खोकी चाला वानी, “ङ्‍यिराङला क्‍युर्नी माफेप।” सिनी खोला ग्‍येकुप छाल्‍सुङ।
LUK 4:43 यिने येशूकी तिवाला सुङ्‍सुङ, “ङे यम्‍बा दासाला साङ कोन्‍छ्‍योककी ग्‍येल्‍खापकी लेन ल्‍यामु ति ख्‍याप्‍टाक कि गोकिवी, च्‍यिलासिसिन कोन्‍छ्‍योककी ङला दी लाकाकी थोक्‍ला राङ तङ्‍गुप यिन।”
LUK 4:44 तुक राङ क्‍यानी येशूकी यहूदिया लुङ्‍बाला वोतुप यहूदी छ्‍योखाङतिवाला फेप्‍नी कोन्‍छ्‍योककी लेन ल्‍यामु ख्‍याप्‍टाक क्‍या क्‍यावा ज्‍युसुङ।
LUK 5:1 ङ्‍यिम्‍ज्‍यिक येशू गनेसरेत सिरुप चोकी गारीला लानी ज्‍युनोक। ती पेला मी मङ्‍मु खोकी गारी गुरीला सुर्तुम ग्‍यकिन वानी कोन्‍छ्‍योककी सुङ ङ्‍येनिन नोक।
LUK 5:2 खोकी ल्‍हासालेन्‍सिन चोकी गारीला टु ङ्‍यी चोके नोक, तमा ङ्‍या जिम्‍बुपतिवा टी फिला देनी खोप्‍रे जाल टुयी नोक।
LUK 5:3 खो ते वोतुप टु ङ्‍यीकी पर्ला सिमोनकी टुला जेनी तीला टु ति चोकी गारी नेमा चेयी फेचेक क्‍योल सिनी सुङ्‍सुङ। तमा खो ति टुला राङ ज्‍युनी मी मङ्‍मुला सुङ लाप नाङ्‍सुङ।
LUK 5:4 सुङ लाप नाङ्‍सिमा येशूकी सिमोनला सुङ्‍सुङ, “फेचेक तिङ्‍मु वोतुप दासाला क्यल्‍नी ङ्‍या जिम्‍बुपला जाल ग्‍योप।”
LUK 5:5 तमा सिमोनकी सिक्‍यासुङ, “गेकेन, ङ्‍यिरे नुप सिर चो टेमु क्‍यासिनाङ ङ्‍या च्‍यिक साङ जिम माथुप। यिने गेकेनकी दुक सुङ्‍गुप तप्‍की ङ जाल ग्‍यकिन।”
LUK 5:6 तिवी खोकी सुङ्‍गुप दोके क्‍यासिमा ङ्‍या बङी ख्‍येल्‍नी जाल ति रलुप छाल्‍सुङ।
LUK 5:7 तमा तिवी यम्‍बा टुला वोतुप पिर्मातिवाला साङ वानी दाल्‍जा किटे कि सिनी लाक्‍पी लातुक क्‍यासुङ। तमा तिवा वानी दाल्‍जा क्‍यासिमा टु ङ्‍यिकरकी नाङ्‍ला ङ्‍या क्‍येङ्‍नी टुतिवा नुम्‍बुप छाल्‍सुङ।
LUK 5:8 दी थोङ्‍सिमा सिमोन पत्रुसकी येशूकी दोङ्‍ला पुमुङ चुनी सिक्‍यासुङ, “ओ चोवो, ङे नेसुर फेप। ङ मी दिक्‍छेन यिन।”
LUK 5:9 च्‍यिलासिसिन तिवी जिम्‍बुप ङ्‍या बङी वोतुप थोङ्‍नी पत्रुस ताङ तीकी मुला वोतुपतिवा तेरी हलेवा क्‍यासुङ।
LUK 5:10 तमा सिमोन ताङ मुला लाका कितुप जब्‍दियाकी पुज्‍युङ याकूब ताङ यूहन्‍ना साङ हलेवा क्‍यासुङ। येशूकी सिमोनला सुङ्‍सुङ, “ज्‍यिवा माकी। तफेन्‍ला ख्‍युरुङ ङ्‍या जिम्‍बुप मिन, मीतिवा जिम्‍बुप डितो।”
LUK 5:11 तमा तिवी खोप्‍रे टुतिवा ति चे गारीला क्‍यल ज्‍याक्‍सिमा तिवी मुला वोतुप तेरी क्‍युर ज्‍याक्‍नी खोकी तिङ्‍ला तिङ्‍यासुङ।
LUK 5:12 थेङ्‍मा यी येशू ग्‍येसा यीला ज्‍यु वोतुप पेला ते जे ग्‍यपुप मी यी नोक। तीकी खोला थोङ्‍नी खोकी दोङ्‍ला खवुतुङ्‍मा देनी, “ओ चोवो, चोवोकी नो वोसिन ङला टेक ज्‍यि थुप्‍किवी।” सिनी गोङ्‍बा शुसुङ।
LUK 5:13 तमा येशूकी खोरो छ्‍याक क्‍याङ्‍नी तीला रेक्नी, “ङला नो वे, ख्‍युरुङ टेक्‍शी।” सिनी सुङ्‍सुङ। तमा शार्क्येक जे ग्‍यपुप नेजु ति ती मी नेसुर थेन्‍नी गाल।
LUK 5:14 येशूकी तीला सुङ्‍सुङ, “दी ताम्‍ङे ति सुला साङ मासिर, यिने ख्‍युरुङ गल्‍नी कोङ्‍यारला ख्‍योरो जु छ्‍या तेन्‍नी ख्‍युरुङ टेक गलुपकी कोर्ला मोशाकी क बिन्‍दुप दोके बुल्‍वा पुल्‍नी ख्‍युरुङ टेकुप पङ्‍बु बिन।”
LUK 5:15 यिन्‍सिनाङ येशूकी क्‍यावु हलेवु लाका ति दासा तेरीला टाम्‍सुङ। तुक क्‍यानी मी मङ्‍मु खोकी सुङ साङ ङ्‍येन्‍दुप ताङ दाक दाक्‍पी नेजु साङ टेकुपला खोकी चाला जोम्‍गिनोक।
LUK 5:16 यिने येशू ति मी सु साङ मेदेवु दासाला फेप्‍नी मोपोर क्‍या नङ्‍गिनोक।
LUK 5:17 ङ्‍यिम्‍ज्‍यिक येशूकी सुङ लाप नङ्‍यिन वोतुप पेला गालील ताङ यहूदियाकी तेरी युलतिवा ताङ यरूशलेम नेसुर वावु फरिसीतिवा ताङ यहूदी छ्‍योकी गेकेनतिवा खोकी चिप्‍ला राङ देनोक। चोवो कोन्‍छ्‍योककी ओङ ति खो मुला वोतुप तप्‍की खोकी नेर्पुतिवाला टेक च्‍यिसुङ।
LUK 5:18 ती पेला ललाइ मीतिवी लाक्‍पा काङ्‍बा शोरुप मी यीला सप्‍तेन ताङ डके खुर वानी तीला खाङ्‍बी नाङ्‍ला येशूकी दोङ्‍ला क्‍योलुप छाल्‍सुङ।
LUK 5:19 यिने मी बङी वोतुप तप्‍की तीला नाङ्‍ला क्‍योलुप लाम माङ्‍येनी तिवा ती खाङ्‍बी थोककी खला जेनी थोक लोक्‍नी तीला सप्‍तेन ताङ डके मी मङ्‍मुकी पर्ला येशूकी दोङ्‍ला पाप्‍सुङ।
LUK 5:20 तमा येशूकी तिवी तेपा थोङ्‍नी सुङ्‍सुङ, “ओ आङो, ख्‍योरो दिक्‍पा तासुङ।”
LUK 5:21 ती थोनी यहूदी छ्‍योकी गेकेनतिवा ताङ फरिसीतिवी च्‍यिककी च्‍यिकला सिक्‍यासुङ, “कोन्‍छ्‍योकला मारे तोङ्‍गुप ताम्‍ङे कितुप दी मी ति सु यिन? कोन्‍छ्‍योककी तिराङ मिसिन सी दिक्‍पा ता ज्‍यि थुप्‍किवी रो?”
LUK 5:22 येशूकी तिवी नासाम हाक्‍कोनी तिवाला टि नाङ्‍सुङ, “ख्‍यिरा सेमला च्‍यिला दुका नासाम तोङ्‍गिवी?
LUK 5:23 ‘ख्‍योरो दिक्‍पा तासुङ।’ सिरुप ताङ ‘लानी ग्‍युक।’ सिरुप नाङ ने चुका ताम्‍ङे ति मङ जोल्‍हमु यिन?
LUK 5:24 यिने ङ मी पुज्‍युङला दी जम्‍बुलिङला दिक्‍पा ता ज्‍यितुप ओङ वे सिरुप ति ख्‍यिरा हाक्‍कोकिवी।” तमा खोकी ती लाक्‍पा काङ्‍बा शोरुप मी तीला सुङ्‍सुङ, “ङ ख्‍युरुङला सिरिन, त लानी ख्‍योरो सप्‍तेन खुर्नी ख्‍योरो खाङ्‍बा ग्‍युक।”
LUK 5:25 तमा ती ति शार्क्येक मीतिवी दोङ्‍ला लानी खुरुङ ङ्‍यिलोकुप सप्‍तेन ति खुर्नी कोन्‍छ्‍योकला सोवा देकिन सिरा खोरो खाङ्‍बा गाल्‍सुङ।
LUK 5:26 दी थोङ्‍नी मीतिवा तेरी हलेवा क्‍यानी कोन्‍छ्‍योकला सोवा तेक्‍सुङ। तमा तिवा ज्‍यिवा लानी, “हारिङ दाक्‍पी चुक ताम्‍ङे मिच्‍यिक्‍पा यी थोङ्‍सुङ।” सिनी सिक्‍यासुङ।
LUK 5:27 ती ज्‍युक्‍ला येशू पाङ्‍ला फेप्‍सालेन्‍सिन लेवी सिरुप से दुतुप मी यी से दुतुप लेखुङला देन वोतुप थोङ्‍सुङ। तमा खोकी तीला सुङ्‍सुङ, “ङे तिङ्‍ला तिङ्‍यो।”
LUK 5:28 तमा लेवी ति लानी खोरो मुला वोतुप तेरी क्‍युर ज्‍याक्‍नी येशूकी तिङ्‍ला तिङ्‍यासुङ।
LUK 5:29 ती ज्‍युक्‍ला ती लेवी तीकी येशूकी थोक्‍ला खोरो खाङ्‍बाला डेन ग्‍येर्पु यी टडिक क्‍यासुङ। ते से दुतुपतिवा बङी ताङ मी यम्‍बातिवा तिवी मुला देनी डेन सयी नोक।
LUK 5:30 ती पेला फरिसीतिवा ताङ यहूदी छ्‍योकी गेकेनतिवी येशूकी लोमातिवाला मुक्‍तम देनिन सिरा “ख्‍यिराङ च्‍यिला से दुतुपतिवा ताङ दिक्‍छेनतिवी मुला देनी साप थुङ्‍गुप कियी वे?” सिनी सिक्‍यासुङ।
LUK 5:31 तमा येशूकी तिवाला सुङ्‍सुङ, “नेजु मेतुपतिवाला ति आम्‍ज्‍यी मोगोवी, यिने नेर्पुतिवाला ति गोकिवी।
LUK 5:32 ङ ति खुरुङ राङ मी टेङ्‍बु यिन सिरुपतिवी थोक्‍ला मिन, यिने खुरुङ राङ दिक्‍छेन यिन सिरुपतिवाला कताङ्‍नी दिक्‍पा ने सेम ग्‍युर ज्‍यितुपकी थोक्‍ला वावु यिन।”
LUK 5:33 ललाइ मीतिवी येशूला सिक्‍यासुङ, “यूहन्‍नाकी लोमातिवी नरी नरी ङ्‍युङ्‍ने र्‍हुङ्‍गुप ताङ मोपोर किनोक, तमा फरिसीतिवी लोमातिवी साङ तुकै राङ किनोक। यिने ख्‍योरो लोमातिवा ति नरी साप थुङ्‍गुप किनोक।”
LUK 5:34 येशूकी तिवाला सुङ्‍सुङ, “काङ ख्‍यिराङ माक्‍पा जेन्‍दीकी डेन्‍बुतिवी मुला वोता सेक तिवाला ङ्‍युङ्‍ने र्‍हुङ ज्‍यि थुप्‍किवी रो?
LUK 5:35 यिने दुका तुजे वुङ्‍गितो, चो पेला माक्‍पा तिवी पर नेसुर ठोनी डिवे, ती पेला तिवा ङ्‍युङ्‍ने र्‍हुङ्‍गिवी।”
LUK 5:36 येलुङ येशूकी तिवाला दी पे शेसुङ, “सी साङ मज्‍या सम्‍बा र्‍हल्‍नी मज्‍या ङ्‍यिङ्‍बाला ल्‍हेन्‍दा मग्‍यकिवी। तुक क्‍यासिन मज्या सम्‍बा साङ ना डिवी, तमा ती मज्या सम्‍बा नेमा र्‍हलुप ल्‍हेन्‍दा ति मज्‍या ङ्‍यिङ्‍बी मुला मिडिकिवी।
LUK 5:37 तमा सी साङ गुन्‍डुम छ्‍याङ सम्‍बा ति क्‍वा ग्‍यिवु ङ्‍यिङ्‍बी नाङ्‍ला मुलुकिवी। तुक क्‍यासिन गुन्‍डुम छ्‍याङ सम्‍बा तीकी क्‍वा ग्‍यिवु रल्‍नी गुन्‍डुम छ्‍याङ साङ पेकिवी, क्‍वा ग्‍यिवु साङ ना डिवी।
LUK 5:38 गुन्‍डुम छ्‍याङ सम्‍बा ति क्‍वा ग्‍यिवु सम्‍बी नाङ्‍ला राङ ज्‍योक गोकिवी।
LUK 5:39 सी साङ गुन्‍डुम छ्‍याङ ङ्‍यिङ्‍बा थुसिमा गुन्‍डुम छ्‍याङ सम्‍बा थुङ्‍गुप नो मिकिवी, तमा थुङ्‍गुप तीकी ‘ङ्‍यिङ्‍बा राङ ल्‍यामु वे।’ सिनी सिवी।”
LUK 6:1 ङासोप ङ्‍यिमा यीला येशू टे शिङ ख नेवा क्‍यानी फेपिन कितुप पेला खोकी लोमातिवी टे ङ्‍यिमा थुनी लाक्‍पी नाङ्‍ला मुरिन सोसुङ।
LUK 6:2 ती थोङ्‍नी फरिसीतिवा ललाइकी तिवाला “ङासोप ङ्‍यिमाला कितुप मेङ्‍गुप लाका ति ख्‍यिराङ च्‍यिला किवी?” सिनी सिक्यासुङ।
LUK 6:3 तमा येशूकी तिवाला सुङ्‍सुङ, “दाऊदकी खोरुङ ताङ खोरो मुला वोतुपतिवा ल्‍होवा लावु पेला काङ क्‍यासुङ, ती ति ख्‍यिरा मारा?
LUK 6:4 तीकी कोन्‍छ्‍योकला सोवा देकुप खाङ्‍बी नाङ्‍ला शुनी कोङ्‍यारतिवा मिसिन यम्‍बा सी साङ साप मेङ्‍गुप कोन्‍छ्‍योकला पुलुप शुब्‍ज्‍याङ ति सोसुङ, तमा खोरो मुला वोतुपतिवाला साङ बिन्‍सुङ।”
LUK 6:5 तमा येशूकी तिवाला सुङ्‍सुङ, “ङ मी पुज्‍युङ ति ङासोप ङ्‍यिमाकी चोवो यिन।”
LUK 6:6 ती ज्‍युक्‍ला यम्‍बा ङासोप ङ्‍यिमाला येशू यहूदी छ्‍योखाङला फेप्‍नी सुङ लाप नाङ्‍सुङ। ते लाक्‍पा नालोक्‍पा ति कम्‍बु ठोक गलुप मी यी नोक।
LUK 6:7 यहूदी छ्‍योकी गेकेनतिवा ताङ फरिसीतिवी येशूला क्‍येन तेरुप तेन्‍दोक छोलिन नोक। तुक क्‍यानी येशूकी ङासोप ङ्‍यिमाला नेजु टेक ज्‍यिकिते सिनी चिवा क्‍यानी देनोक।
LUK 6:8 येशूकी तिवी काङ नासाम तङ्‍गुप ति हाक्‍कोनी ती लाक्‍पा कम्‍बु ठोक गलुप मी तीला “ख्‍युरुङ लानी तेरी मीतिवी पर्ला टङी दे।” सिनी सुङ्‍सुङ। खोकी तुक सुङ्‍सिमा ती मी ति लानी ते टङी देसुङ।
LUK 6:9 तमा येशूकी खोरुङला चिवा क्‍यानी देतुपतिवाला सुङ्‍सुङ, “ङ ख्‍यिराङला ताम्‍ङे यी टेयिन। ङासोप ङ्‍यिमाला काङ कितुप ति दाक्‍पी ठिमला टेके यिन? लाका ल्‍यामु कितुप टेके यिनाङ की, लाका मेलोक्‍पा कितुप? र्‍होकुप टेके यिनाङ की, सेतुप?”
LUK 6:10 येशूकी तिवा तेरीला रिम्‍बा क्‍यानी ल्‍हानी ती लाक्‍पा कम्‍बु ठोक गलुप तीला “ख्‍योरो लाक्‍पा क्‍योङ।” सिनी सुङ्‍सुङ। तीकी खोकी सुङ्‍गुप दोके क्‍यासिमा तीकी लाक्‍पा ति टेक्‍सुङ।
LUK 6:11 ती थोङ्‍नी तिवा छासे ङ्‍यिर्मु लानी येशूला चुक कितुप सिनी खोप्‍राङ पर्ला केवुल क्‍यासुङ।
LUK 6:12 ङ्‍यिम्‍ज्‍यिक येशू मोपोर कितुपला पम्दोकला फेप्नी नुप सिर कोन्‍छ्‍योकला मोपोर क्‍या नाङ्‍सुङ।
LUK 6:13 नाम लासिमा खोकी खोरो लोमातिवाला कताङ्‍नी तिवी पर नेमा मिरा च्‍यिङ्‍ङी पेनी तिवाला लोमा छ्‍ये सिनी मिङ ज्‍याक्‍सुङ।
LUK 6:14 ती च्‍यिङ्‍ङीतिवा ति दिवा राङ यिन। सिमोन (तीला खोकी पत्रुस सिनी मिङ ज्‍याक्‍सुङ), तीकी नुप अन्‍द्रियास, याकूब, यूहन्‍ना, फिलिप, बारथोलोमाइ,
LUK 6:15 मत्ती, थोमा, अल्‍फयसकी पुज्‍युङ याकूब, लुङ्‍बाकी थोक्‍ला टेमु कितुप छोक्‍पाकी मी सिरुप सिमोन,
LUK 6:16 याकूबकी पुज्‍युङ यहूदा ताङ यहूदा इस्‍करियोत नोक। ती यहूदा इस्‍करियोत ति तिङ्‍ला येशूला जिम्‍नी तेरुप मी च्‍युङ्‍नोक।
LUK 6:17 ती ज्‍युक्‍ला येशू लोमातिवा ताङ मुला पम्दोक नेमा मर पाप्‍नी दिङ्‍मा यीला लानी ज्‍युसुङ। ते खोकी यम्‍बा लोमातिवा साङ बङी नोक। तमा तेरी यहूदिया, यरूशलेम, टुरोस ताङ सीदोनकी ग्‍येम्‍छोकी गारी गुरी नेसुर वावु मीतिवा साङ बङी नोक।
LUK 6:18 तिवा ति खोकी सुङ ङ्‍येन्‍दुप ताङ खोप्‍रे नेजुतिवा टेकुपला वावु मीतिवा यिनोक। डेकी कुलुप मीतिवा साङ टेक्‍सुङ।
LUK 6:19 तेरी मीतिवा येशूला रेकुप छोल्‍गिनोक, च्‍यिलासिसिन खो नेमा ओङ थेन्‍नी तिवा तेरीला टेक च्‍यिसुङ।
LUK 6:20 तमा येशूकी खोरो लोमातिवी थाकाला ल्‍हयी सिरा सुङ्‍सुङ, “ख्‍यिराङ पेराङ्‍बुतिवाला मोलाम थोपुप यिनो, च्‍यिलासिसिन कोन्‍छ्‍योककी ग्‍येल्‍खाप ति ख्‍यिरा ति यिनो।
LUK 6:21 ख्‍यिराङ तन्‍दा ल्‍होवा लावुतिवाला मोलाम थोपुप यिनो, च्‍यिलासिसिन ख्‍यिराङ डाकितो। ख्‍यिराङ तन्‍दा सेम्‍दुक लानी ङोपतिवा मोलाम थोपुप यिनो, च्‍यिलासिसिन ख्‍यिराङ गा लानी गोटे कितो।
LUK 6:22 ख्‍यिरा ङ मी पुज्‍युङला तेपा क्‍यावु तप्‍की मीतिवी ख्‍यिराङला ङ्‍यिङ्‍मर कितुप ताङ मीतिवी पर नेसुर तेन तोङ्‍गुप ताङ मर्च्या कितुप ताङ ख्‍यिरा मिङ दुक्‍टा वे सिनी ङोशी मारेला ताङ्‍सिन ख्‍यिराङ मोलाम थोपुप यिनो।
LUK 6:23 ती पेला ख्‍यिराङ गा क्‍यानी फिरा, च्‍यिलासिसिन देवाच्‍येनला थोपुप ख्‍यिरा छ्‍यक्‍तक ति ग्‍येर्पु वे। गोमाला तिवी हङ्‍गावातिवी कोन्‍छ्‍योककी लुङ्‍तेम्‍बातिवाला तुकै राङ क्‍यावु यिन।
LUK 6:24 यिने ख्‍यिराङ छ्‍युक्‍पु वोतुपतिवाला मोताप सुकुप यिनो, च्‍यिलासिसिन ख्‍यिराङला मिजी किर्मु ङ्‍येनी वे।
LUK 6:25 ख्‍यिराङ तन्‍दा डावुतिवाला मोताप सुकुप यिनो, च्‍यिलासिसिन ख्‍यिराङला ल्‍होवा लङ्‍गितो। ख्‍यिराङ तन्‍दा गा लानी गोटे कितुपतिवाला मोताप सुकुप यिनो, च्‍यिलासिसिन ख्‍यिराङ सेम्‍दुक लानी ङ्‍यिवितो।
LUK 6:26 ख्‍यिराङ मीतिवा तेरीकी चिताङ क्‍यावुतिवाला मोताप सुकुप यिनो, च्‍यिलासिसिन तिवी हङ्‍गावातिवी लुङ्‍तेम्‍बा मेटेङ्‍बुतिवाला तुकै राङ क्‍यासुङ।”
LUK 6:27 “यिने ख्‍यिराङ ङे येन्‍देन ङ्‍येन्‍दुपतिवाला ङ सिरिन, ख्‍यिरा डतिवाला ङ्‍यिङ्‍ज्‍ये की, ख्‍यिराङला ङ्‍यिङ्‍मर कितुपतिवाला ल्‍यामु की।
LUK 6:28 ख्‍यिराङला मोताप देपुपतिवी थोक्‍ला मोलाम बिन, ख्‍यिराङला मेलोक्‍पा कितुपतिवी थोक्‍ला मोपोर की।
LUK 6:29 सी ख्‍योरो डम्‍बा च्‍यिकला बेप्‍किवे, तीला डम्‍बा यम्‍बा साङ जेन बिन। सी ख्‍योरो छ्‍योवा ठोकिवे, तीला तेतुङ साङ ठोकुपला माग्‍येक।
LUK 6:30 ख्‍योरो मुला लोङ्‍गुपतिवाला बिन। सी ख्‍योरो च्‍यालक खुर्नी डिवे, तीला येलुङ मालोङ।
LUK 6:31 मी यम्‍बी ख्‍यिराङला चुकै किशी सिरुप ख्‍यिरा नो किवे, तुकै राङ ख्‍यिरा तिवाला की।
LUK 6:32 ख्‍यिराङला ङ्‍यिङ्‍ज्‍ये कितुपतिवाला तिराङ ङ्‍यिङ्‍ज्‍ये किवी सिसिन ख्‍यिराङला काङ ख्‍येप्‍साङ वे रो? दिक्‍छेनतिवी साङ खोरुङला ङ्‍यिङ्‍ज्‍ये कितुपतिवाला ङ्‍यिङ्‍ज्‍ये किवी।
LUK 6:33 ख्‍यिराङला ल्‍यामु कितुपतिवाला तिराङ ल्‍यामु किवी सिसिन ख्‍यिराङला काङ ख्‍येप्‍साङ वे रो? दिक्‍छेनतिवी साङ तुकै राङ किवी।
LUK 6:34 येलुङ ङ्‍येतुप नो क्यानी मीतिवाला छ्‍यावा बिन्‍सुङ सिसिन ख्‍यिराङला काङ ख्‍येप्‍साङ वे रो? दिक्‍छेनतिवी साङ तोजोयी राङ लोक्‍नी ङ्‍येतुप नो क्यानी छ्‍यावा तेर्किवी।
LUK 6:35 यिने ख्‍यिरे डतिवाला ङ्‍यिङ्‍ज्‍ये की, तिवाला ल्‍यामु की, येलुङ लोक्‍नी ङ्‍येतुप रेवा माक्‍यानी छ्‍यावा बिन। तुक क्‍यासिन ख्‍यिराङला छ्‍यक्‍तक ग्‍येर्पु थोप्‍कितो, तमा ख्‍यिराङ चोछ्‍येवु कोन्‍छ्‍योककी पुज्‍युङ च्‍युङ्‍गितो। च्‍यिलासिसिन कोन्‍छ्‍योककी टेन मासम्‍बुपतिवा ताङ दुक्‍टातिवाला साङ च्‍यम्‍बा क्‍या नङ्‍गिवी।
LUK 6:36 ख्‍यिरा पपा कोन्‍छ्‍योक च्‍यम्‍बा वोतुप दोके ख्‍यिराङ साङ च्‍यम्‍बा वोतुप वुङ्‍शी।”
LUK 6:37 “मी यम्‍बाला ठिम माकी, तमा कोन्‍छ्‍योककी साङ ख्‍यिराङला ठिम मिकितो। मी यम्‍बाला क्‍येन मातेर, तमा कोन्‍छ्‍योककी साङ ख्‍यिराङला क्‍येन मेतेर्तो। मी यम्‍बाला माफ बिन, तमा कोन्‍छ्‍योककी साङ ख्‍यिराङला माफ नङ्‍गितो।
LUK 6:38 मी यम्‍बाला बिन, तमा कोन्‍छ्‍योककी साङ ख्‍यिराङला नङ्‍गितो। खोकी सिन ताङ सिनी योनी पेता सेक क्‍यानी बङी नङ्‍गितो। चुक ताप्‍केकी ख्‍यिरा मी यम्‍बाला ताप्‍नी तेर्किवे, ती ताप्‍केकी राङ कोन्‍छ्‍योककी ख्‍यिराङला ताप्‍नी छुर नङ्‍गितो।”
LUK 6:39 तमा येशूकी तिवाला दुका पे यी साङ सुङ्‍सुङ, “काङ मिक मोथोङ्‍गुप मीकी यम्‍बा मिक मोथोङ्‍गुप मीला गोमा कि थुप्‍किवी? तुक क्‍यासिन तिवा ङ्‍यिकर मुक्‍तुम नाङ्‍ला मेख्‍येल्‍वी रो?
LUK 6:40 लोमा खोरो गेकेन सिनाङ छ्‍ये मेवी। यिने सी येन्‍देन तेरी लोप्‍किवे, ती ति खोरो गेकेन दोके डिवी।
LUK 6:41 ख्‍युरुङ मी यम्‍बी मिकला वोतुप बोप ति थोङ्‍गिवी, यिने खोरो मिकला वोतुप दुङ्‍मा ति मोथोङ्‍नोक? ख्‍युरुङ ख्‍योरो मिकला वोतुप दुङ्‍मा ति मोथोङ्‍गिवी सिसिन चुक क्‍यानी मी यम्‍बाला ‘ख्‍योरो मिकला वोतुप बोप ति ङे थेन तेरुप।’ सिनी सि थुप्‍किवी?
LUK 6:42 ओ खोनक्‍पु, गोमाला ख्‍योरो मिकला वोतुप दुङ्‍मा ति थेन, तमा तिराङ ख्‍युरुङ मी यम्‍बी मिकला वोतुप बोप ति थेन्‍दुपला ठछ्‍येली थोङ्‍गिवी।”
LUK 6:43 “दोङ्‍बु ल्‍यामुला डेलु मेलोवा मोगोर्वी, तमा दोङ्‍बु मेलोवाला डेलु ल्‍यामु मोगोर्वी।
LUK 6:44 चुका दोङ्‍बु साङ तीकी डेलु ल्‍हानी हाक्‍कोकिवी। सी साङ छेर्माङ दोङ्‍बु नेसुर अन्‍जीर मुथुवी, तमा छेर्क्योक दोङ्‍बु नेसुर गुन्‍डुम मुथुवी।
LUK 6:45 मी ल्‍यामुकी खोरो सेमला ज्‍यकुप ताम्‍ङे ल्‍यामु नेमा ल्‍यामु राङ देन्गिवी, तमा मी दुक्‍टाकी खोरो सेमला ज्‍यकुप ताम्‍ङे टुक्‍टा नेमा दुक्‍टा राङ देन्गिवी। च्‍यिलासिसिन खोरो सेमला काङ क्‍येङ नोके, ती ति ख नेमा राङ लप्‍किवी।”
LUK 6:46 “ख्‍यिराङ ङे सिक्‍यावु ताम्‍ङे मेङ्‍येन्‍दुप यिन्‍सिन च्‍यिला ङला ‘चोवो, चोवो!’ सिनी सिवी?
LUK 6:47 ङे चाला वानी ङे ताम्‍ङे ङ्‍येन्‍नी ती दोके राङ कितुप मी ति चुकै यिन सिनी ङ ख्‍यिराङला सिरिन।
LUK 6:48 ती मी ति मुक्‍तुम तिङ्‍मु टुनी डम्‍ज्‍यी रम्‍बु तिङ्नी खाङ्‍बा जोवु मी दोके यिन। तमा टोक्‍पा ग्‍यम वानी ती खाङ्‍बाला फोक्‍सिनाङ टोक्‍पाकी ती खाङ्‍बाला योक साङ माथुप, च्‍यिलासिसिन ती खाङ्‍बा ति रम्‍बु जोनोक।
LUK 6:49 यिने ङे सुङ ङ्‍येन्‍नी साङ ती दोके मिकिवु मी ति डम्‍ज्‍यी मातिङ्‍वा क्‍यानी खाङ्‍बा जोवु मी दोके राङ यिन। तमा टोक्‍पा ग्‍यम वानी ती खाङ्‍बाला फोक्‍सिमा ती ति शार्क्येक राम्‍सुङ, तमा तेरी ना गाल्‍सुङ।”
LUK 7:1 तमा येशूकी मीतिवाला ती तेरी येन्‍देन नाङ सिन्‍सिमा कफर्नहुम नेवा फेप्‍सुङ।
LUK 7:2 ते रोमी मक्‍मी सयी च्‍यिककी खकी छ्‍ये यीकी छासे ङ्‍यिङ्‍ज्‍येवु लावा यी नानी शिला के नोक।
LUK 7:3 ती रोमी मक्‍मी छ्‍ये तीकी येशूकी कोर्ला थोनी यहूदी गोमा कितुप मी छ्‍येतिवाला खोकी चिप्‍ला ताङ्‍सुङ, तमा खोला फेप्‍नी खोरो लावाला टेक च्‍यि सिनी गोङ्‍बा शु च्‍यिसुङ।
LUK 7:4 तमा तिवा येशूकी चाला वानी दुक सिनी गोङ्‍बा शुसुङ, “गेकेन, ती रोमी मक्‍मी छ्‍ये ति गेकेन नेसुर दाल्‍जा ङ्‍ये छ्‍योवु मी यिन।
LUK 7:5 च्‍यिलासिसिन ती ति दाक्‍पी मिरिकला ङ्‍यिङ्‍ज्‍ये कितुप मी यिन, दाक्‍पी यहूदी छ्‍योखाङ साङ जो बिन्‍सुङ।”
LUK 7:6 ती थोसिमा येशू तिवी मुला फेप्‍सुङ। खो तिवी मुला रोमी मक्‍मी छ्‍येकी खाङ्‍बी चिप्‍ला लेप्‍तुछ्‍येप पेला रोमी मक्‍मी छ्‍ये तीकी खोरो दाल्‍जातिवाला येशूकी चिप्‍ला ताङ्‍नी खोला दुक सि च्‍यिसुङ, “चोवो, होप्‍ग्‍यल माशु। च्‍यिलासिसिन ङ याङ गेकेनला ङे खाङ्‍बी नाङ्‍ला फेप शु छ्‍योवु मे।
LUK 7:7 तुक क्‍यानी ङ गेकेनकी चाला वुङ साङ मोछ्‍योवु वे सिनी नासाम तङ्‍यिन। सुङ तिराङ सुङ्‍सिन ङे लावा ति टेकिवी।
LUK 7:8 च्‍यिलासिसिन ङ साङ ङ सिनाङ मी छ्‍येकी ओङला देन वे। ङे ओङला साङ मक्‍मीतिवा वे। तिवी नाङ्‍ला च्‍यिकला ङे ग्‍युक सिक्‍यासिन ती ति डिवी, तमा यम्‍बाला शोक सिक्‍यासिन ती ति गिवी। येलुङ ङे लावाला दुक की सिक्‍यासिन तीकी तुकै राङ किवी।”
LUK 7:9 ती ताम्‍ङे थोनी येशू हलेवा क्‍यासुङ, तमा ग्‍युर्नी खोरो तिङ्‍ला तिङ्‍योकुप मी माङ्‍छ्‍योकला सुङ्‍सुङ, “ङ ख्‍यिराङला सिरिन, इस्राएलकी मीतिवी पर्ला साङ दुका तेपा रम्‍बु वोतुप मी याङ ङे त सेक माथोङ वे।”
LUK 7:10 तमा रोमी मक्‍मी छ्‍येकी तङ्‍गुप मीतिवा खाङ्‍बा लोक्‍नी ल्‍हासालेन्‍सिन ती लावा ति टेक नोक।
LUK 7:11 ङ्‍यिमा चेयी ज्‍युक्‍ला येशू नाइन सिरुप ग्‍येसाला फेप्‍सुङ। तमा खोकी लोमातिवा ताङ मी माङ्‍छ्‍योक खोकी मुला गाल्‍सुङ।
LUK 7:12 येशू ग्‍येसाकी गे चाला लेप्‍तुछ्‍येप पेला मीतिवी शेप मी यीला खुर्नी तेमा थेनिन नोक। ती शेप मी ति पेर्मी युक्‍सिम यीकी च्‍यिक राङ वोतुप पुज्‍युङ यिनोक। ती युलकी मीतिवा बङी ती युक्‍सिम ताङ मुला नोक।
LUK 7:13 येशूकी ती युक्‍सिमला थोङ्‍सिमा तीला ङ्‍यिङ्‍ज्‍ये लानी, “माङु।” सिनी सुङ्‍सुङ।
LUK 7:14 तमा खो गोमा कोर्नी खोरो छ्‍याक ति टामला रेक्‍सिमा रो खुरुपतिवा ति ते राङ टङ टङी देसुङ। तमा येशूकी सुङ्‍सुङ, “ओ आङो, ङ ख्‍युरुङला सिरिन, खोक लो।”
LUK 7:15 ती पेला राङ ती शेप पेजा ति खोक लानी ताम्‍ङे लपुप छाल्‍सुङ। येशूकी तीला तीकी आमा तीला चेक तेसुङ।
LUK 7:16 तमा मीतिवा तेरी ज्‍यिवा लानी कोन्‍छ्‍योकला सोवा देकिन सिरा “कोन्‍छ्‍योककी लुङ्‍तेम्‍बा छ्‍ये यी दाक्‍पी पर्ला छ्‍यार्सुङ। तमा कोन्‍छ्‍योक ति खोरो मीतिवाला र्‍होकुपला फेवु यिन।” सिनी सिक्‍यासुङ।
LUK 7:17 येशूकी क्‍यावु दी लाकाकी कोर्ला तेरी यहूदिया ताङ ते गारी गुरीला वोतुप तेरी लुङ्‍बाला टाम्‍सुङ।
LUK 7:18 यूहन्‍नाकी लोमातिवी येशूकी क्‍या नङ्‍गुप तेरी ताम्‍ङेतिवा यूहन्‍नाला लाप्‍सुङ। तमा यूहन्‍नाकी खोरो लोमातिवी पर नेमा मिरा ङ्‍यीला पेनी
LUK 7:19 दुक सिनी येशूला टेपला खोकी चाला ताङ्‍सुङ, “फेप्‍किवी सिनी सिक्‍यावु ति गेकेन राङ यिनाङ की, ङ्‍यिराङ मी यम्‍बाला राङ गुनी दे गोकिवी?”
LUK 7:20 तमा तिवा येशूकी चाला वानी, “बप्‍तिस्‍मा तेरुप यूहन्‍नाकी ‘फेप्‍किवी सिनी सिक्‍यावु ति गेकेन राङ यिनाङ की, ङ्‍यिराङ मी यम्‍बाला राङ गुनी दे गोकिवी?’ सिनी गेकेनला टेपला ङ्‍यिराङला दे ताङ्‍सुङ।” सिनी सिक्‍यासुङ।
LUK 7:21 ती पेला राङ येशूकी नेजु वोतुपतिवा ताङ दुक्‍पाला ख्‍येलुपतिवा ताङ डेकी कुलुपतिवा बङीला टेक च्‍यि नोक, तमा मिक मोथोङ्‍गुपतिवाला मिक थोङ च्‍यि नोक।
LUK 7:22 यूहन्‍नाकी लोमातिवाला येशूकी दुक सुङ्‍सुङ, “ख्‍यिराङ गल्‍नी ख्‍यिरा काङ थोवु ताङ काङ थोङ्‍गुप ति यूहन्‍नाला सी। मिक मोथोङ्‍गुपतिवा थोङ्‍गिवी, थेङ्‍बातिवा युकिवी, जे ग्‍यपुप नेजु वोतुपतिवा टेकिवी, वोन्‍बातिवा थोकिवी, शेपतिवा सेन्‍बु लोङ्‍गिवी, तमा पेराङ्‍बुतिवाला लेन ल्‍यामु ख्‍याप्‍टाक कियी वे।
LUK 7:23 ङला तेपा कितुप क्‍युर्नी मोज्‍योकुप ति मोलाम थोपुप यिनो।”
LUK 7:24 तमा यूहन्‍नाकी तङ्‍गुप लोमातिवा लोक्‍नी गल्‍सिमा येशूकी मी मङ्‍मुला यूहन्‍नाकी कोर्ला दुक सुङ्‍सुङ, “ख्‍यिराङ दासा पाङ्‍थेरीला काङ ल्‍हापला थेन्‍दुप यिन? काङ वुर्तुककी योकिन वोतुप ङ्‍युङ्‍मातिवा ल्‍हापला?
LUK 7:25 ती मिसिन यम्‍बा काङ ल्‍हापला थेन्‍दुप? काङ मज्‍या ल्‍यामु कोन्‍दुप मीला? मिन, मज्‍या ल्‍यामु कोन्‍नी छासे किर्मु क्‍यानी देतुपतिवा याङ ग्‍येल्‍खाङला राङ दे वे।
LUK 7:26 मिसिन ख्‍यिराङ काङ ल्‍हापला थेन्‍दुप? कोन्‍छ्‍योककी लुङ्‍तेम्‍बाला ल्‍हापला? यिन, ङ ख्‍यिराङला सिरिन, ती ति कोन्‍छ्‍योककी लुङ्‍तेम्‍बा सिनाङ छ्‍ये वे।
LUK 7:27 तीकी कोर्ला कोन्‍छ्‍योककी सुङ नाङ्‍ला दुक सिनी टि वे, ‘ल्‍होसा, ङ ङे लेन क्‍योलुप मीला ख्‍योरो गोमा गोमाला तोङ्‍यिनो। तीकी ख्‍योरो गोमाला ख्‍योरो लाम टडिक किवितो।’”
LUK 7:28 “ङ ख्‍यिराङला सिरिन, आम्‍पुमकी खोक नेमा क्‍येवु मीतिवी पर्ला यूहन्‍ना सिनाङ छ्‍ये ति सुङ मे। यिने कोन्‍छ्‍योककी ग्‍येल्‍खापला याङ तेरी सिनाङ छ्‍युङा वोतुप मी यिन्‍सिनाङ यूहन्‍ना सिनाङ मङ छ्‍ये यिन।”
LUK 7:29 तेरी मीतिवा ताङ से दुतुपतिवी साङ यूहन्‍नाकी सिक्‍यावु येन्‍देन थोनी कोन्‍छ्‍योक ति टेङ्‍बु नोक सिनी सेमला लानी यूहन्‍ना नेसुर बप्‍तिस्‍मा लानोक।
LUK 7:30 यिने फरिसीतिवा ताङ यहूदी छ्‍योकी गेकेनतिवी खोरो थोक्‍ला वोतुप कोन्‍छ्‍योककी नोवा ति सेमला मालावु तप्‍की यूहन्‍ना नेसुर बप्‍तिस्‍मा माला।
LUK 7:31 येलुङ येशूकी सुङ्‍सुङ, “दी गिपाकी मीतिवाला ङ काङ ताङ मुला डिङ ल्‍हाप? तिवा काङ च्‍यिन्‍दै यिन?
LUK 7:32 तिवा याङ आङा टिक्‍पेतिवा हाला देनी च्‍यिककी च्‍यिकला ‘ङ्‍यिरा ख्‍यिरा थोक्‍ला लुमु पुसिनाङ ख्‍यिराङ माछ्‍याम, तमा ङ्‍यिरा ङुप्‍राङ क्‍यासिनाङ ख्‍यिराङ माङु।’ सिनी वोरु देन्‍दुप दोके राङ यिन।
LUK 7:33 च्‍यिलासिसिन बप्‍तिस्‍मा तेरुप यूहन्‍ना वानी शुब्‍ज्‍याङ साङ मासो, गुन्‍डुम छ्‍याङ साङ माथु, तमा ती ल्‍हानी ख्‍यिरा तीला डे ग्‍यप्‍नोक सिनी सिक्‍यासुङ।
LUK 7:34 ङ मी पुज्‍युङ वानी सोवु ताङ थुवु ल्‍हानी ख्‍यिरा ‘ल्हो ताङ, ती ति सज्‍युरे ताङ छ्‍याङ्‍गेले यिन, तमा से दुतुप ताङ दिक्‍छेनतिवी दाल्‍जा यिन।’ सिनी सिवी।
LUK 7:35 यिने कोन्‍छ्‍योककी रिक्‍पा टेङ्‍बु वे सिरुप ति ती रिक्‍पाला खोरो सेमला लङ्‍गुपतिवा नेसुर राङ पङ्‍बु छ्‍या देन्‍गिवी।”
LUK 7:36 ङ्‍यिम्‍ज्‍यिक फरिसीतिवी पर नेमा मिरा च्‍यिककी येशूला खोरो मुला सोल शेवुला फेप शुसुङ। तमा खो ती फरिसीकी खाङ्‍बा फेप्‍नी सोल शेवुला ज्‍युसुङ।
LUK 7:37 ती ग्‍येसाला देतुप पुम्‍पेजा दिक्‍छेन यीकी येशू फरिसीकी खाङ्‍बा सोल शेयी वे सिरुप थोनी टी जङ्‍बु खाप नुम देवु सिङ्‍गमरमर सिरुप दो नेसुर जोवु बोक्‍तल खुर्नी वासुङ,
LUK 7:38 तमा येशूकी ग्‍यप नेसुर खोकी शापकी चाला लानी ङुयी सिरा खोकी शाप ति मिक्‍च्‍युर थ्‍वोनी बो च्‍यिसुङ, तमा खोरो र्‍ह थ्‍वोनी पियी सिरा खोकी शापला पुका कियी ती टी जङ्‍बु खाप नुम ति कुनी बिन्‍सुङ।
LUK 7:39 ती थोङ्‍नी येशूला फेप शोप फरिसी तीकी दुका नासाम ताङ्‍सुङ, “दी मी ति वुतुङ के कोन्‍छ्‍योककी लुङ्‍तेम्‍बा यिन्‍सिन खोरुङला रेकुप ती ति चुका पारकी पुम्‍पेजा दिक्‍छेन यिन सिनी हाक्‍कोवु ति यिन्‍जा।”
LUK 7:40 ती पेला येशूकी तीला सुङ्‍सुङ, “ओ सिमोन, ङे ख्‍युरुङला सि गोवु ताम्‍ङे यी वे।” तमा सिमोनकी “गेकेन, ङला सुङ ताङ।” सिनी सिक्‍यासुङ।
LUK 7:41 खोकी सुङ्‍सुङ, “छ्‍यावा तोङ्‍गुप मी मिरा च्‍यिककी मिरा ङ्‍यीला छ्‍यावा ताङ्‍नोक। च्‍यिकला ति ङुलकी डप्‍बु सयी ङ ताङ यम्‍बाला ति ङुलकी डप्‍बु खल ङ छ्‍यावा ताङ्‍नोक।
LUK 7:42 तिवा ङ्‍यिकरकी छ्‍यावा ते माथुप्‍सालेन्‍सिन ती छ्‍यावा तोङ्‍गुप मी तीकी ङ्‍यिकरला छ्‍यावा ति क्‍युर्नी बिन्‍नोक। तुक क्‍यानी तिवा ङ्‍यिकरकी पर्ला चुका तीकी तीला मङ ङ्‍यिङ्‍ज्‍ये किवी?”
LUK 7:43 तमा सिमोनकी सिक्‍यासुङ, “ङे नासामला ती मङ छ्‍यावा क्‍युर्नी बिन्‍दुप तीकी यिन।” ती थोनी येशूकी तीला सुङ्‍सुङ, “ख्‍योरो टेके सिक्‍यासुङ।”
LUK 7:44 तमा येशू ती पुम्‍पेजाकी थाकाला ग्‍युर्नी सिमोनला सुङ्‍सुङ, “ख्‍युरुङ दी पुम्‍पेजाला ल्हो ताङ। ङ ख्‍योरो खाङ्‍बा वायिन। ख्‍योरो ङला काङ्‍बा टुतुप छ्‍यु साङ माबिन, यिने दीकी याङ ङे काङ्‍बाला खोरो मिक्‍च्‍युर थ्‍वोन बोनी खोरो र्‍ह थ्‍वोनी पि बिन्‍सुङ।
LUK 7:45 ख्‍योरो याङ ङला पुका माक्‍या, यिने दीकी याङ ङ दे वा नेज्‍युनी ङे काङ्‍बाला पुका क्‍यावु ति क्‍यातोक वे।
LUK 7:46 ख्‍योरो ङे गोला नुम कु माबिन, यिने दीकी याङ ङे काङ्‍बाला टि जङ्‍बु खाप नुम कुनी बिन्‍सुङ।
LUK 7:47 तुक क्‍यानी ङ ख्‍युरुङला सिरिन, दी पुम्‍पेजा तीकी क्‍यावु दिक्‍पा बङी ति तासुङ, च्‍यिलासिसिन दीकी ङला मङ ङ्‍यिङ्‍ज्‍ये क्‍यासुङ। चेयी तिराङ माफ ङ्‍येतुप तीकी ङ्‍यिङ्‍ज्‍ये साङ चेयी राङ किवी।”
LUK 7:48 तमा येशूकी ती पुम्‍पेजा तीला “ख्‍योरो दिक्‍पा तासुङ।” सिनी सुङ्‍सुङ।
LUK 7:49 ती थोनी ते सापला देतुपतिवी खोप्‍राङ पर्ला दुक सिक्‍यासुङ, “दिक्‍पा साङ ता ज्‍यितुप ती मी ति सु यिनाङ?”
LUK 7:50 यिने येशूकी ती पुम्‍पेजाला “ख्‍योरो ङला तेपा क्‍यावु तप्‍की ख्‍योरो दिक्‍पा तासुङ। त लोदिमु क्‍यानी ग्‍युक।” सिनी सुङ्‍सुङ।
LUK 8:1 ती ज्‍युक्‍ला येशू ग्‍येसा ग्‍येसा ताङ युल युलला फेपिन सिरा कोन्‍छ्‍योककी ग्‍येल्‍खापकी लेन ल्‍यामु ख्‍याप्‍टाक क्‍या नाङ्‍सुङ। खोकी लोमा च्‍यिङ्‍यीतिवा खोकी मुला नोक।
LUK 8:2 तमा डेतिवा ग्‍यकुप ताङ नेजुतिवा नेसुर टेकुप ललाइ पुम्‍पेजातिवा साङ खोकी मुला राङ नोक। तिवी पर्ला गोमाला डे दिन चोके थेन्‍दुप मग्‍दलिनी सिरुप मरियम नोक।
LUK 8:3 तमा यम्‍बा ति ग्‍येल्‍वु हेरोदकी खाङ्‍बी लाका चेक लावु मी खुजासकी पेर्मी योअन्‍ना ताङ सुसन्‍ना ताङ यम्‍बा पुम्‍पेजातिवा नोक। ती पुम्‍पेजातिवी खोप्‍रे टोङ्‍बा नेसुर येशू ताङ खोकी लोमातिवाला शब्‍ज्‍यी कियी नोक।
LUK 8:4 तमा मी मङ्‍मु जोम्‍बुप ताङ ग्‍येसा ग्‍येसा नेसुर मीतिवा येशूकी चाला वुङ्‍यिन कितुप पेला खोकी तिवाला दुका पे यी शेन नाङ्‍सुङ,
LUK 8:5 “सेन देपुप मी यी सेन देपुपला थेन्‍सुङ। तीकी सेन देप्‍सालेन्‍सिन ललाइ सेन ति लामला ख्‍येल्‍नी तिवा ति मीतिवी काङ्‍बी वोक्‍ला लेपुप ताङ नामगी च्‍यच्‍युमतिवी थुनी सोसुङ।
LUK 8:6 तमा ललाइ सेन ति दोप्‍रोक खला ख्‍येल्‍नी क्‍येसुङ, यिने ते स लेन्‍बा मेतुप तप्‍की ती ति कम्‍बु ठोक गाल।
LUK 8:7 तमा ललाइ सेन ति छेर्माङ दोङ्‍बी पर्ला ख्‍येल्‍नी छेर्माङ दोङ्‍बु साङ मुला राङ ग्‍या वानी तीला सेप्‍सुङ।
LUK 8:8 तमा ललाइ सेन ति स ल्‍यामुला ख्‍येल्‍नी क्‍येनी ग्‍यानी दोम्‍बा सयी डुमा ग्‍यप्‍सुङ।” ती सुङ्‍सिमा येशूकी “सी ति ङ्‍येन्‍दुप नम्‍ज्‍योक नोके, तीकी ङ्‍येन्‍शी।” सिनी थोर ग्‍यप्‍नी सुङ्‍सुङ।
LUK 8:9 ती ज्‍युक्‍ला येशूकी लोमातिवी दी पेकी तेन्‍दोक काङ यिन सिनी खोला टिसुङ।
LUK 8:10 तमा खोकी तिवाला सुङ्‍सुङ, “ख्‍यिराङला याङ कोन्‍छ्‍योककी ग्‍येल्‍खापकी छ्‍याककी ताम्‍ङे हाक्‍कोवु रिक्‍पा बिन वे। यिने मी यम्‍बातिवाला याङ ङ पेतिवा नेसुर शेतिन। तुक क्‍यावु ति ‘तिवी ल्‍हासिनाङ मोथोङ्‍शी, तमा थोसिनाङ हाक्‍मोकोशी सिनी यिन।’”
LUK 8:11 “दी पेकी तेन्‍दोक ति दुकै यिन। सेन ति कोन्‍छ्‍योककी सुङ यिन।
LUK 8:12 तमा लामला ख्‍येलुपतिवा ति दिवा राङ यिन। तिवी कोन्‍छ्‍योककी सुङ ति थोवु याङ थोसुङ, यिने शैतान वानी तिवी सेम नेमा ती सुङ ति ठोनी डिवी। तुक क्‍यानी तिवी तेपा क्‍यानी दिक्‍पा ने थर मुथुपी।
LUK 8:13 दोप्‍रोक खला ख्‍येलुपतिवा ति दिवा राङ यिन। तिवी कोन्‍छ्‍योककी सुङ ङ्‍येन्‍नी गा क्‍यानी तीला सेमला लिङ्‍गिवी, यिने मर मेतुप दोके सेमगी दिङ्‍ला सुङ माज्‍यकुप तप्‍की उकुर च्‍यिक तिराङ तेपा किवी, यिने खोक्‍पा ल्‍हापला ख्‍येल्‍सिमा तिवी तेपा क्‍युर्नी ज्‍योकिवी।
LUK 8:14 छेर्माङ दोङ्‍बी पर्ला ख्‍येलुपतिवा ति दिवा राङ यिन। तिवी सुङ ङ्‍येन्‍गिवी, यिने मिजी क्‍योङ्‍गुप पेला पप ताङ टोङ्‍बा ताङ मिजी किर्मुकी नासाम ताङ्‍नी डेलु मोगोर्वी।
LUK 8:15 तमा स ल्‍यामुला ख्‍येलुपतिवा ति दिवा राङ यिन। तिवा सेम टेङ्‍बु ताङ ल्‍यामु क्‍यानी सुङ ङ्‍येन्‍नी ती सुङ ति नरी सेमला ज्‍याक्‍नी हम क्‍यान देनी डेलु गोर्किवी।”
LUK 8:16 “सी साङ दिप्‍ली च्‍येनी नेक्‍योक वोक्‍ला उप्‍नी मोज्‍योकिवी, याङ्‍ना ठीकी वोक्‍ला मोज्‍योकिवी। बोरु तीला खाङ्‍बी नाङ्‍ला वुङ्‍गुपतिवाला ठछ्‍येली थोङ्‍शी सिनी च्‍योक्‍ची खला ज्‍योकिवी।
LUK 8:17 काङ वोसिनाङ बानी ज्‍यकुप ति थोङ्‍गिवी, तमा छ्‍याकला ज्‍यकुप ति हाक्‍को च्‍यिनी ठछ्‍येली छ्‍या देन्‍गिवी।
LUK 8:18 तुक क्‍यानी ख्‍यिराङ च्‍याङ्‍से क्‍यानी ल्‍यामु ङ्‍येना। सी लोला नोके, तीला मङ ल्‍हक्‍पा थोप्‍किवी। तमा सी लोला मेवे, तीकी लोला वोते सिनी नो क्‍यावु ति साङ ठोकिवी।”
LUK 8:19 ती ज्‍युक्‍ला येशूकी आमा ताङ नुपतिवा खोला ठेतुपला वानोक, यिने खाङ्‍बी नाङ्‍ला मी मङ्‍मु वोतुप तप्‍की तिवा खोकी चाला लेप माथुप।
LUK 8:20 तमा मी ललाइकी येशूला “गेकेनकी आमा ताङ नुपतिवा गेकेनला ठेतुप नोनी पाङ्‍ला लानी देन्‍नोक।” सिनी सिक्‍यासुङ।
LUK 8:21 तमा येशूकी तिवाला सुङ्‍सुङ, “सी कोन्‍छ्‍योककी सुङ ङ्‍येन्‍नी ती सुङला युकिवे, तिवा ति ङे आमा ताङ नुपतिवा यिनो।”
LUK 8:22 ङ्‍यिम्‍ज्‍यिक येशूकी खोरो लोमातिवाला “दाक्‍पु चे फर्केन डोप।” सिनी सुङ्‍सुङ। खोतिवा टुला जेनी फेपुप छाल्‍सुङ।
LUK 8:23 तमा खोतिवा फेपिन वोतुप पेला येशू ति ङ्‍यि गाल्‍नोक। ती पेला ते चोला कशेन लुङ छ्‍यर्वा ग्‍यप्‍नी ती टुला छ्‍यी क्‍येङ्‍नी तिवा छासे कलेला ख्‍येल्‍नोक।
LUK 8:24 तमा लोमातिवा येशूकी चाला गल्‍नी खोला ङ्‍यी चेयी सिरा सिक्‍यासुङ, “गेकेन, ओ गेकेन, ङ्‍यिराङ छ्‍यी नाङ्‍ला नुम्‍नी शेप छाल्‍सुङ!” ती थोसिमा येशू शेङ्‍नी ती लुङ ताङ ल्‍हकुप छ्‍यी बालापला वोरु तेन्‍सुङ। तमा लुङ ताङ छ्‍यी बालाप ति छ्‍याक्‍नी तेरी कुसुमी गाल्‍सुङ।
LUK 8:25 तमा खोकी तिवाला “ख्‍यिरा तेपा कनी गाल?” सिनी टिसुङ। तिवा ज्‍यिवा ताङ हलेवा कियी सिरा खोप्‍राङ पर्ला दुक सिक्‍यासुङ, “खो ति सु यिनाङ? खोकी क नङ्‍सिन लुङ ताङ छ्‍यी बालापकी साङ खोकी कला ङ्‍येन्‍गिनोक।”
LUK 8:26 तमा येशू ताङ खोरो लोमातिवा गालील नेसुर चोकी फर्केनला वोतुप गेरासेनसकी लुङ्‍बाला लेप्‍सुङ।
LUK 8:27 येशू टु नेसुर चोकी गारीला पाप्‍सालेन्‍सिन खोकी ती ग्‍येसाला देतुप डेकी कुलुप मी यीला ठेसुङ। ती मी तीकी अलायी गोमा नेज्‍युन मज्‍या माकोन्‍नी खाङ्‍बा मादेवा क्‍यानी शेप मीला ज्‍योकुप टककी फुकला राङ देकिनोक।
LUK 8:28 तीकी येशूला थोङ्‍सिमा च्‍यार ग्‍यप्‍नी खोकी दोङ्‍ला खवुतुङ्‍मा देनी थोर देनिन सिरा, “ओ चोछ्‍येवु कोन्‍छ्‍योककी सेवु येशू, ख्‍योरे ति ङे मुला काङ तम्‍जी वे? ङ गोङ्‍बा शोयिन, ङला दुक्‍पा मातेर।” सिनी सिक्‍यासुङ।
LUK 8:29 तीकी दुक सिक्‍यावु तेन्‍दोक ति येशूकी ती डेला ती मी नाङ नेसुर थेन ग्‍युक सिनी गोमाला के क नङ्‍गुप तप्‍की यिन। डेकी ती मीला थेङ्‍मा बङी जिम्‍नी दुक्‍पा बिन्‍दुप तप्‍की मीतिवी तीकी लाक्‍पा ताङ काङ्‍बाला च्‍यातकला तानी र्‍हेन्‍सुङ। यिन्‍सिनाङ तीकी ती च्‍यातकला तुम्‍बुर तुम्‍बुर च्‍येनी डेकी टिवु दासा पाङ्‍थेरी नेवा टोनी डिनोक।
LUK 8:30 तमा येशूकी तीला टि नाङ्‍सुङ, “ख्‍योरो मिङ काङ यिन?” तीकी “मक्‍मी यिन।” सिनी सिक्‍यासुङ। च्‍यिलासिसिन डे मङ्‍मुतिवा तीकी नाङ्‍ला शुनोक।
LUK 8:31 डेतिवी खोरुङला ङ्‍येलाला मातोङ सिनी येशूला गोङ्‍बा शुसुङ।
LUK 8:32 ती पेला ते फचेक पम्‍दोकला फाक्‍पातिवा चोयी नोक। तमा डेतिवी खोरुङला ती फाक्‍पातिवी नाङ्‍ला शुक च्‍यी सिनी खोला गोङ्‍बा शुसिमा खोकी तिवाला शुक च्‍यिसुङ।
LUK 8:33 तमा डेतिवा ती मी नाङ नेसुर थेन्‍नी फाक्‍पातिवी नाङ्‍ला शुसुङ। शुसिमा फाक्‍पातिवा पम्‍दोक नेमा छ्‍योङ्‍बाल ग्‍यकिन गल्‍नी चोकी नाङ्‍ला लुम्‍नी नुम शिसुङ।
LUK 8:34 ती थोङ्‍नी फाक्‍पा चोपतिवा टोन गल्‍नी ते च्‍युङ्‍गुप ताम्‍ङे ति युल ताङ ग्‍येसाला लाप्‍सुङ।
LUK 8:35 तमा मीतिवा ते च्‍युङ्‍गुप ताम्‍ङे ति ल्‍हापला थेन वासुङ। तिवा येशूकी चाला वासिमा ती डे थेन गलुप मी ति मज्‍या कोन्‍नी येशूकी शापकी चाला देन वोतुप थोङ्‍नी तिवा ज्‍यिवा क्‍यासुङ।
LUK 8:36 गोमा नेज्‍युन ती च्‍युङ्‍गुप ताम्‍ङे थोङ्‍गुपतिवी ती डे ग्‍यपुप मी ति चुक क्‍यानी टेक्‍सुङ सिनी ते वावु मीतिवाला लाप्‍सुङ।
LUK 8:37 तमा गेरासेनसकी फार छुर लुङ्‍बाकी तेरी मीतिवा छासे ज्‍यिवा क्‍यावु तप्‍की खोप्‍राङला क्‍युर ज्‍याक्‍नी फेप सिनी येशूला गोङ्‍बा शुसुङ। तुक क्‍यानी येशू टुला जेनी लोक्‍नी फेप्‍सालेन्‍सिन
LUK 8:38 ती डे थेन गलुप मी तीकी खोरुङला साङ खो ताङ मुला डो च्‍यी सिनी येशूला गोङ्‍बा शुसुङ।
LUK 8:39 यिने येशूकी तीला “ख्‍युरुङ ख्‍योरो खाङ्‍बा लोक्‍नी कोन्‍छ्‍योककी ख्‍योरो थोक्‍ला काङ लाका क्‍या नाङ्‍सुङ, ती ति मीतिवाला लोप।” सिनी सुङ्‍सुङ। तमा ती मी ति तेसुर गल्‍नी येशूकी तीकी थोक्‍ला क्‍या नङ्‍गुप लाकाकी कोर्ला तेरी ग्‍येसातिवाला लाप्‍सुङ।
LUK 8:40 तमा येशू लोक्‍नी फेप्‍सालेन्‍सिन मी मङ्‍मुकी खोला गासो शुसुङ, च्‍यिलासिसिन तिवा तेरी खोला गुनी देनोक।
LUK 8:41 ती पेला याइरस सिरुप यहूदी छ्‍योखाङकी मी छ्‍ये यी वानी येशूकी शापकी चाला देनी खोरो खाङ्‍बा फेप सिनी खोला गोङ्‍बा शुसुङ।
LUK 8:42 च्‍यिलासिसिन तीकी लो च्‍यिङ्‍ङी लेपुप च्‍यिक राङ वोतुप पुम ति नानी शिला के नोक। येशू तीकी मुला फेपिन कितुप पेला मी माङ्‍छ्‍योककी खोला पुलिन नोक।
LUK 8:43 ती पेला ते मी माङ्‍छ्‍योककी पर्ला लो च्‍यिङ्‍ङी सेक ठक थेन्‍दुप नेजु वोतुप पुम्‍पेजा यी नोक। तीकी खोरो लोला वोतुप टोङ्‍बा तेरी डोसुम ताङ्‍सिनाङ तीला सी साङ टेक ज्‍यि माथुप्‍नोक।
LUK 8:44 ती पुम्‍पेजा ति येशूकी तिङ नेसुर वानी खोकी नम्‍सी गारीला रेक्‍सुङ, रेक्‍लुङ्‍मे शार्क्येक तीकी ठक थेन्‍दुप ति छेसुङ।
LUK 8:45 तमा येशूकी “सी ङला रेक ताङ?” सिनी टिसुङ। यिने तेरीकी “ङे याङ मारेक।” “ङे याङ मारेक।” सिनी सिक्‍यासुङ। तमा पत्रुसकी “गेकेन, मी माङ्‍छ्‍योककी गेकेनकी गारी गुरीला चुम्‍नी पुलिन वे।” सिनी सिक्‍यासुङ।
LUK 8:46 यिने येशूकी सुङ्‍सुङ, “ललाइकी ङला रेकुप राङ यिन। ङ नेसुर ङार थेन गलुप ति ङे हाक्‍कोसुङ।”
LUK 8:47 तमा ती पुम्‍पेजा तीकी खुरुङ मङ यिप्‍नी दे मुथुपुप हाक्‍कोनी र्‍हुकिन सिरा वानी खोकी शापला खवुतुङ्‍मा देसुङ। तमा तेरी मीतिवी मिङ्‍गाला तीकी च्‍यिला खोला रेकुप ताङ चुक क्‍यानी शार्क्येक खोरो नेज्‍यु ति टेक्‍सुङ सिनी सिक्‍यासुङ।
LUK 8:48 येशूकी ती पुम्‍पेजाला “पुमो, ख्‍योरो तेपा क्‍यावु तप्‍की ख्‍युरुङ टेक्‍सुङ। त लोदिमु क्‍यानी ग्‍युक।” सिनी सुङ्‍सुङ।
LUK 8:49 येशूकी तुक सुङ्‍यिन वोतुप पेला याइरसकी खाङ्‍बा नेसुर मी यी वानी याइरसला “ख्‍योरो पुम याङ शिसुङ। त गेकेनला मङ होप्ग्‍यल माशु।” सिनी सिक्‍यासुङ।
LUK 8:50 ती थोनी येशूकी याइरसला सुङ्‍सुङ, “ख्‍युरुङ ज्‍यिवा माकी, तेपा तिराङ की। ख्‍योरो पुम टेकिवी।”
LUK 8:51 येशू याइरसकी खाङ्‍बा लेप्‍सिमा पत्रुस, याकूब, यूहन्‍ना ताङ ती पुम्‍पेजी पपाआमाला मिसिन यम्‍बा सुलाङ खोकी मुला खाङ्‍बी नाङ्‍ला शुक माच्‍यी।
LUK 8:52 ते मी तेरी ती पुम शेपकी थोक्‍ला ङुप्‍राङ कियी वोतुप थोङ्‍नी खोकी तिवाला सुङ्‍सुङ, “ङुप्‍राङ माकी। दी याङ माशी वे, ङ्‍यिलोकुप तिराङ यिन।”
LUK 8:53 तिवी ती पुम ति वुतुङ के शेप यिन सिनी छ्‍या वोतुप तप्‍की येशूला मर्च्या क्‍यासुङ।
LUK 8:54 यिने येशूकी ती पुमकी लाक्‍पाला जिम्‍नी, “आङो, खोक लो।” सिनी सुङ्‍सुङ।
LUK 8:55 खोकी तुक सुङ्‍सिमा ती पुमकी नम्‍शिङ ति लोक्‍नी वानी ती ति शार्क्येक खोक लासुङ। येशूकी तीला काङ रे च्‍यिक रे साप समा बिन सिनी तिवाला योक कुसुङ।
LUK 8:56 तमा ती पुमकी पपाआमा ति छासे हलेवा क्‍यासुङ। यिने येशूकी ती च्‍युङ्‍गुप ताम्‍ङे ति सुला साङ मासिर सिनी तिवाला क नाङ्‍सुङ।
LUK 9:1 तमा येशूकी लोमा मिरा च्‍यिङ्‍ङीतिवाला खोरे चाला कताङ्‍नी तिवाला तेरी डेतिवा थेन्‍दुप ताङ नेजुतिवा टेक ज्‍यितुप ङार ताङ ओङ्‍ज्‍येन नाङ्‍सुङ,
LUK 9:2 तमा तिवाला कोन्‍छ्‍योककी ग्‍येल्‍खाप ख्‍याप्‍टाक कितुप ताङ नेर्पुतिवाला टेक ज्‍यितुपला ताङ्‍सुङ।
LUK 9:3 तोङ्‍गुप पेला खोकी तिवाला सुङ्‍सुङ, “ख्‍यिराङ लामला डोप पेला ख्‍यिरा लोला काङ साङ माखुर, लकाम साङ गिवु साङ शुब्‍ज्‍याङ साङ टङ्‍गा साङ पोयप कितुप मज्‍या साङ माखुर।
LUK 9:4 ख्‍यिराङ चुका खाङ्‍बी नाङ्‍ला शुकिवे, ती ग्‍येसा ने थेन मागल्‍वा सेक्‍ला ते राङ देता।
LUK 9:5 चुका दासाला मीतिवी ख्‍यिराङला गासो मुशुवे, ती ग्‍येसा नेवा थेन डोप पेला ख्‍यिरा काङ्‍बाला कोवु थल्‍दुक र्‍हुन ज्‍याक्‍नी तिवी तेन्‍दोकला पङ्‍बु बिन।”
LUK 9:6 तमा लोमातिवा तेसुर गल्‍नी युल युलला कोन्‍छ्‍योककी लेन ल्‍यामु ख्‍याप्‍टाक कियी नेर्पुतिवाला टेक च्‍यिसुङ।
LUK 9:7 तमा दी तेरी च्‍युङ्‍गुप ताम्‍ङेतिवी कोर्ला गालील लुङ्‍बाला ग्‍येला कितुप हेरोदकी थोनी तीकी सेम ति छासे ख्‍यला ख्‍यिला गाल्‍नोक। च्‍यिलासिसिन ललाइकी बप्‍तिस्‍मा तेरुप यूहन्‍ना ति शेप ने सेन्‍बु लानोक सिनी सिनोक,
LUK 9:8 ललाइकी एलिया के छ्‍यार्सुङ सिनोक, तमा ललाइकी तोङगी कोन्‍छ्‍योककी लुङ्‍तेम्बातिवी पर नेमा मिरा च्‍यिक येलुङ सेन्‍बु लानोक सिनी सिक्‍यानोक।
LUK 9:9 यिने हेरोदकी “यूहन्‍नाकी गो याङ ङे च्‍ये च्‍यितिन। तुकै यिन्‍सिन ङे दुका ताम्‍ङेतिवा थोवु ती मी ति सु यिनाङ?” सिनी सिक्‍यासुङ। तमा तीकी येशूला ठेतुप नो क्‍यासुङ।
LUK 9:10 ती ज्‍युक्‍ला लोमातिवा लोक्‍नी वानी खोप्‍रे क्‍यावु तेरी लाकाकी कोर्ला येशूला लाप्‍सुङ। तमा खोकी तिवाला टिनी खोप्‍राङ तिराङ बेथसेदा सिरुप ग्‍येसाला फेप्‍सुङ।
LUK 9:11 यिने मी मङ्‍मुकी दी ताम्‍ङे हाक्‍कोनी खोला तिङ्‍यासुङ। खोकी तिवाला गासो शुनी तिवाला कोन्‍छ्‍योककी ग्‍येल्‍खापकी कोर्ला लाप नाङ्‍सुङ, नेजु टेक ज्‍यि गोवुतिवाला टेक च्‍यिसुङ।
LUK 9:12 तमा नाम ल्‍होवु पेला लोमा च्‍यिङ्‍यीतिवा येशूकी चिप्‍ला वानी सिक्‍यासुङ, “गेकेन, दी मीतिवाला देवा तोङ, तमा तिवा गारी गुरीला वोतुप युलतिवा ताङ सप्‍ले कितुपतिवी खाङ्‍बा गल्‍नी दाक दाक्‍पी थोक्‍ला साप समा ताङ देतुप दासा छोल्शी। दी दाक्‍पु देतुप ति काङ साङ मेङ्‍येवु दासा पाङ्‍थेरी यिन।”
LUK 9:13 यिने येशूकी तिवाला “ख्‍यिरा राङ दिवाला साप समा बिन।” सिनी सुङ्‍सुङ। तमा तिवी “ङ्‍यिरा मुला याङ शुब्‍ज्‍याङ ङ चोके ताङ ङ्‍या ङ्‍यी चोके तिराङ वे। ङ्‍यिराङ गल्‍नी दी तेरी मीतिवी थोक्‍ला साप समा ङ्‍यो गोकिते यिन्‍दे।” सिनी सिक्‍यासुङ।
LUK 9:14 ते तो मिसिन ख्‍योक्‍पेजा मिरा तोङ्‍डा ङ नोक। यिने येशूकी लोमातिवाला सुङ्‍सुङ, “ख्‍यिरा मीतिवाला खल ङ ङकी छो जोनी दे च्‍यी।”
LUK 9:15 तमा लोमातिवी तुक राङ क्‍यानी तेरीला दे च्‍यिसुङ।
LUK 9:16 तमा येशूकी ती शुब्‍ज्‍याङ ङ चोके ताङ ङ्‍या ङ्‍यी चोके छ्‍याकला लानी देवाच्‍येन ने ल्‍हानी कोन्‍छ्‍योकला थुचिछे पुल्‍सिमा तिवा ति च्‍याक्‍नी मीतिवाला गोनी बिन सिनी लोमातिवाला तेसुङ।
LUK 9:17 तिवा तेरी डाता सेक सोसुङ, तमा ल्‍हकुप पुर्मातिवा रुक्‍सालेन्‍सिन तोलुम च्‍यिङ्‍ङी क्‍येङ्‍सुङ।
LUK 9:18 थेङ्‍मा यी येशू च्‍यिक राङ मोपोर कियी वोतुप पेला खोकी लोमातिवा साङ खोकी मुला राङ नोक। खोकी तिवाला दुक सिनी टि नाङ्‍सुङ, “मीतिवी ङला सु यिन सिनी सिनोक?”
LUK 9:19 तमा तिवी “ललाइकी बप्‍तिस्‍मा तेरुप यूहन्‍ना सिनी सिनोक, ललाइकी एलिया सिनी सिनोक, तमा यम्‍बातिवी तोङगी कोन्‍छ्‍योककी लुङ्‍तेम्बातिवी पर ने मिरा च्‍यिक सेन्‍बु लानोक सिनी सिनोक।” सिनी टिलेन ग्‍यप्‍सुङ।
LUK 9:20 तमा खोकी तिवाला टि नाङ्‍सुङ, “तुकै यिन्‍सिन ख्‍यिराङ ति ङला सु यिन सिनी सिवी?” तमा पत्रुसकी “गेकेन याङ कोन्‍छ्‍योककी तङ्‍गुप ख्रीष्‍ट यिन।” सिनी टिलेन ग्‍यप्‍सुङ।
LUK 9:21 तमा येशूकी तिवाला दी ताम्‍ङे ति सुला साङ मासिरा सिनी क छ्‍येम्‍बु नाङ्‍सुङ।
LUK 9:22 येलुङ येशूकी सुङ्‍सुङ, “ङ मी पुज्‍युङला दुक्‍पा बङी खुर गोकिवी, तमा यहूदी गोमा कितुप मी छ्‍येतिवा ताङ कोङ्‍यार छ्‍येतिवा ताङ यहूदी छ्‍योकी गेकेनतिवी ङला क्‍येन बिन्‍नी सेकिवी, तमा ङ्‍यिमा सुम ज्‍युक्‍ला ङ शेप ने सेन्‍बु लङ्‍गिवी।”
LUK 9:23 तमा खोकी तिवा तेरीला सुङ्‍सुङ, “सु ङे तिङ्‍ला तिङ्‍योकुप नो किवे, तीकी खोरो नोवातिवा क्‍युर्नी ङ्‍यिमी टेङ दाक दाक्‍पी ग्‍यङ्‍शिङ खुर्नी ङे तिङ्‍ला तिङ्‍योक गोकिवी।
LUK 9:24 सी खोरो मिजी र्‍होकुप नो किवे, तीकी खोरो मिजी तोर्किवी। तमा सी ङे थोक्‍ला खोरो मिजी तोर ज्‍यिकिवे, तीकी खोरो मिजी र्‍होकिवी।
LUK 9:25 तेरी जम्‍बुलिङ थोप्‍सिनाङ खोरो मिजीला तोरुप याङ्‍ना ठोकिवी सिसिन ती मीला काङ ख्‍येप्‍साङ गिवी रो?
LUK 9:26 सु ङ ताङ ङे येन्‍देनला ङोछा किवे, ङ मी पुज्‍युङ साङ ङ ताङ पपा कोन्‍छ्‍योक ताङ चाङ्‍मा वोतुप देवाच्‍येनकी लेन क्‍योलुप थुतिवी मोवा ताङ मुला वुङ्‍गुप पेला तीला ङोछा कितिन।
LUK 9:27 यिने ङ ख्‍यिराङला टेङ्‍बो सिरिन, दे लानी देतुपतिवी पर्ला ललाइ ललाइ ति कोन्‍छ्‍योककी ग्‍येल्‍खाप माथोङ्‍वा सेक्‍ला मिशिवी।”
LUK 9:28 तमा दी सुङ सुङ्‍सिमा ङ्‍यिमा गेकी तिङ्‍ला येशू पत्रुस ताङ यूहन्‍ना ताङ याकूबला टिनी मोपोर कितुपला रीला फेप्‍सुङ।
LUK 9:29 खोकी मोपोर कियी वोतुप पेला खोकी शाल ति ग्‍युर्सुङ, तमा खोकी नम्‍सा ति वो ग्‍यकुप दोके छासे कर्मु गाल्‍सुङ।
LUK 9:30 तमा शार्क्येक मी मिरा ङ्‍यी छ्‍यर्नी येशू ताङ मुला ताम्‍ङे कियी नोक। तिवा ति मोशा ताङ एलिया यिनोक।
LUK 9:31 तिवा मोवा ताङ क्‍यान छ्‍यर्नी येशूकी यरूशलेमला छे च्‍यितुप खो टुङ्‍गुपकी कोर्ला ताम्‍ङे कियी नोक।
LUK 9:32 पत्रुस ताङ तीकी मुला वोतुपतिवा छासे ङ्‍यी जिनी नोक, यिने तिवा ङ्‍यी छेसिमा येशूकी मोवा ताङ खोकी मुला लानी वोतुप मिरा ङ्‍यीला थोङ्‍सुङ।
LUK 9:33 तमा ती मिरा ङ्‍यी ति येशू ताङ मुला क्‍येनी डोप पेला राङ पत्रुसकी येशूला सिक्‍यासुङ, “गेकेन, ङ्‍यिराङ दे राङ देतुप ल्‍यामु नोक। ङ्‍यिराङ बर्केङ सुम चोके जेवी, च्‍यिक ति गेकेनकी थोक्‍ला, च्‍यिक ति मोशाकी थोक्‍ला, तमा च्‍यिक ति एलियाकी थोक्‍ला।” यिने पत्रुसकी खोरो काङ सिक्‍यावु ति खोरुङला राङ छ्‍या मिन्‍दुक।
LUK 9:34 तीकी तुक सियी वोतुप पेला मुक्‍पा छुप्‍नी तिवाला उप्‍सुङ। तमा मुक्‍पा तम्‍बु छुपुप तप्‍की तिवाला ज्‍यिवा लानोक।
LUK 9:35 तमा मुक्‍पी पर नेमा दुक सिरुप वोरु यी ग्‍यप्‍सुङ, “दी ति ङे पेतुप पुज्‍युङ यिन। ख्‍यिराङ दीकी सिक्‍यावु ति ङ्‍येना।”
LUK 9:36 ती वोरु ग्‍यप्‍सिमा येशू च्‍यिक राङ ते ज्‍युनोक। ती पेला लोमातिवा खरक्‍पा सोके देनी तिवी थोङ्‍गुप ताम्‍ङे ति सुला साङ मालाप।
LUK 9:37 ती सला तीला येशू ताङ खोकी लोमातिवा री नेमा मर पाप्‍सालेन्‍सिन मी बङी खोला ठेसुङ।
LUK 9:38 तमा तिवी पर नेमा मी मिरा च्‍यिककी च्‍यार ग्‍यकिन सिक्‍यासुङ, “गेकेन, ङ गोङ्‍बा शोयी, ङे पुज्‍युङला ल्‍हा नाङ। ती ति ङे च्‍यिक राङ वोतुप पुज्‍युङ यिन।
LUK 9:39 तीला डेकी कुल्‍सिमा ती ति शार्क्येक च्‍यार ग्‍यकिवी, तमा तीला र्‍हुक च्‍यिनी तीकी ख नेसुर बोवा थेन ज्‍यिकिवी, तमा तीला पि माताङ्‍नी छासे दुक्‍पा तेर्किवी।
LUK 9:40 ङे गेकेनकी लोमातिवाला ती डे तीला तेन तोङ सिनी गोङ्‍बा शुयिन, यिने तिवी देन माथुप।”
LUK 9:41 ती थोसिमा येशूकी सुङ्‍सुङ, “ओ तेपा मेतुप ताङ सुर्क्योक्‍पा वोतुप गिपा! ङ नम सेक ख्‍यिरा मुला देतुप्‍जा, तमा नम सेक ख्‍यिराङला हम क्‍यानी देतुप्‍जा? ख्‍योरो पुज्‍युङला दे टि शोक ताङ।”
LUK 9:42 तमा ती पेजा ति येशूकी चाला वुङ्‍यिन कितुप पेला साङ डेकी तीला तल ताङ्‍नी र्‍हुक च्‍यिसुङ। यिने येशूकी ती डे तीला वोरु तेन्‍नी ती पेजाला टेक च्‍यिनी तीकी पपाला चेक तेसुङ।
LUK 9:43 तमा मीतिवा कोन्‍छ्‍योककी चोछ्‍येवु वोतुप ओङ थोङ्‍नी तेरी हलेवा क्‍यासुङ। तमा तेरी मीतिवा येशूकी क्‍या नङ्‍गुप लाका थोङ्‍नी हलेवा कियी वोतुप पेला खोकी खोरे लोमातिवाला सुङ्‍सुङ,
LUK 9:44 “ङे ख्‍यिराङला सिक्‍यावु दी ताम्‍ङे ति ख्‍यिरा ङ्‍याम क्‍यानी ङ्‍येना, ङ मी पुज्‍युङ ति मीतिवी लकला चेक तेकिवी।”
LUK 9:45 यिने तिवी ती ताम्‍ङेकी तेन्‍दोक काङ यिन सिनी हाक्‍माको। च्‍यिलासिसिन तिवी ती ताम्‍ङे हाक्‍मोकोशी सिनी तीकी तेन्‍दोक ति छ्‍याकला राङ नोक। तमा तिवा ज्‍यिवा लानी खोला ती ताम्‍ङेकी कोर्ला टेपला साङ ङाडेङ माक्‍या।
LUK 9:46 तमा लोमातिवी पर्ला सु तेरी सिनाङ छ्‍ये यिन सिरुप कोर्ला खाँदा क्‍यानोक।
LUK 9:47 तिवी नासाम तङ्‍गुप ति येशूकी हाक्‍कोनी आङा टिक्‍पे यीला टि फेप्‍नी खोरो चाला लानी दे च्‍यिनी
LUK 9:48 तिवाला सुङ्‍सुङ, “सी ङे मिङला दी आङा टिक्‍पेला सेमला लिङ्‍गिवे, तीकी ङला सेमला लिङ्‍गुप यिन। तमा सी ङला सेमला लिङ्‍गिवे, तीकी ङला तोङ्‍गुप तीला सेमला लिङ्‍गुप यिन। ख्‍यिरा पर्ला सु तेरी सिनाङ छ्‍युङा नोके, ती ति तेरी सिनाङ छ्‍ये यिन।”
LUK 9:49 ती ज्‍युक्‍ला यूहन्‍नाकी सिक्‍यासुङ, “गेकेन, मिरा च्‍यिककी गेकेनकी मिङला डे देनिन वोतुप ङ्‍यिरा थोङ्‍सुङ। यिने ती ति दाक्‍पी तिङ्‍ला तिङ्‍योकुप मी मिन्‍दुप तप्‍की ङ्‍यिरा तीला तुक कितुपला क्‍येकिन।”
LUK 9:50 तमा येशूकी तीला सुङ्‍सुङ, “तीला माग्‍यक, च्‍यिलासिसिन सु ख्‍यिरा तेन्‍दोकला मेवे, तिवा ख्‍यिरा थोक्‍ला राङ गिवी।”
LUK 9:51 येशू देवाच्‍येनला फेपुप तुजे चिप्‍ला राङ लेपुप तप्‍की खो यरूशलेम नेवा फेपुप सिनी सेमला तेन्‍तेन क्‍यासुङ,
LUK 9:52 तमा खोकी थोक्‍ला तेरी ताम्‍ङे टडिक कितुपला ललाइ मीतिवाला खोरुङ सिनाङ गोमाला सामरीतिवी युल यीला ताङ्‍सुङ।
LUK 9:53 यिने ती युलकी मीतिवी खो यरूशलेमला राङ फेपिन वोतुप हाक्‍कोनी खोला सेमला माला।
LUK 9:54 ती थोङ्‍नी खोकी लोमा याकूब ताङ यूहन्‍नाकी खोला “गेकेन, काङ ङ्‍यिराङ देवाच्‍येन नेमा मे ताङ्‍नी दिवाला ना तोङ ज्‍यितुप गेकेनकी नो वे?” सिनी सिक्‍यासुङ
LUK 9:55 यिने येशूकी तिवी थाकाला ग्‍युर्नी तिवाला वोरु तेन्‍सुङ।
LUK 9:56 तमा खोतिवा यम्‍बा युलला राङ फेप्‍सुङ।
LUK 9:57 ती ज्‍युक्‍ला येशू ताङ लोमातिवा लाम नेवा फेपिन कितुप पेला मी मिरा च्‍यिककी खोला “चोवो कनी फेप्‍किवे, ङ साङ चोवोकी तिङ्‍ला तिङ्‍योकिन।” सिनी सिक्‍यासुङ।
LUK 9:58 तमा येशूकी तीला सुङ्‍सुङ, “च्‍यिप्‍च्‍याङतिवी ति यिपुप मुक्‍तुम वे, तमा नामगी च्‍यच्‍युमतिवी ति छाङ वे। यिने ङ मी पुज्‍युङला याङ गो ज्‍योकुप दासा साङ मे।”
LUK 9:59 लोङ येशूकी मी यम्‍बा यीला सुङ्‍सुङ, “ङे तिङ्‍ला तिङ्‍योक।” यिने तीकी सिक्‍यासुङ, “गोमाला गल्‍नी ङे पपा कल्‍दोक कि च्‍यी।”
LUK 9:60 तमा येशूकी तीला सुङ्‍सुङ, “शेपतिवी खोरो शेपतिवाला कल्‍दोक कि च्‍यी, यिने ख्‍युरुङ ति गल्‍नी कोन्‍छ्‍योककी ग्‍येल्‍खापकी कोर्ला ख्‍याप्‍टाक की।”
LUK 9:61 येलुङ मी यम्‍बा यीकी येशूला सिक्‍यासुङ, “चोवो, ङ याङ चोवोकी तिङ्‍ला तिङ्‍योकिन, यिने गोमाला लोक्‍नी गल्‍नी ङे खाङ्‍बी मीतिवी मु नेसुर क्‍येनी वुङ च्‍यी।”
LUK 9:62 येशूकी तीला सुङ्‍सुङ, “सु खोरो लाक्‍पा थोङ्‍बी लाजेनला जिम्‍नी तिङ्‍ला ग्‍युर्नी ल्‍हे वे, तिवा कोन्‍छ्‍योककी ग्‍येल्‍खापला डो छ्‍योवु मे।”
LUK 10:1 ती ज्‍युक्‍ला चोवो येशूकी यम्‍बा लोमातिवा मिरा खाल दिन ताङ ङ्‍यी पेनी मिरा ङ्‍यी ङ्‍यी क्‍यानी खोरुङ फेपुप छलुप तेरी ग्‍येसा ताङ दासाला खो सिनाङ गोमाला ताङ्‍सुङ।
LUK 10:2 तोङ्‍गुप पेला खोकी तिवाला सुङ्‍सुङ, “सप्‍ले दुतुप याङ बङी वे, यिने सप्‍ले दुतुप मीतिवा ति ङ्‍युङ्‍मु वे। तुक क्‍यानी सप्‍ले दुतुप मीतिवा सप्‍ले दुतुप शिङ खला तोङ सिनी सप्‍लेकी ज्‍यिन्‍दाकला गोङ्‍बा शु।
LUK 10:3 त ग्‍युक, ङ ख्‍यिराङला तङ्‍गुप ति लुक रुकतिवा खटमुतिवी पर्ला तङ्‍गुप दोके राङ यिन।
LUK 10:4 ख्‍यिरा लोला टङ्‍गी छयी साङ गिवु साङ काचा साङ माखुर, तमा लामला सुला साङ टसी देलेक मासिर।
LUK 10:5 ख्‍यिराङ चुका खाङ्‍बाला शुकिवे, गोमाला ‘दी खाङ्‍बी मीतिवाला लोदिमु वुङ्‍शिता।’ सिनी सी।
LUK 10:6 दोजो ती खाङ्‍बी मी तीकी लोदिमु वुङ्‍शी सिरुप नो वोसिन ख्‍यिरा सिक्‍यावु लोदिमु ति ती मीला थोप्‍कितो, मिसिन ती लोदिमु ति ख्‍यिराङला राङ लोक्‍नी गितो।
LUK 10:7 ख्‍यिराङ ती खाङ्‍बाला राङ देनी ते काङ बिन्‍दुप ति साप ताङ थुङ्‍गुप किसा। च्‍यिलासिसिन लाका कितुप मी तीला खोरो ल ङ्‍येतुप ति टेके यिन। तमा खाङ्‍बा खाङ्‍बाला पोतिन सिरा शासा मादे।
LUK 10:8 ख्‍यिराङ चुका ग्‍येसाला शुसिनाङ तेकी मीतिवी ख्‍यिराङला गासो शुसिन तिवी ख्‍यिराङला बिन्‍दुप समा ति सो।
LUK 10:9 तमा ते वोतुप नेर्पुतिवाला टेक च्‍यिनी तिवाला ‘कोन्‍छ्‍योककी ग्‍येल्‍खाप ख्‍यिरा चिप्‍ला राङ वा वे।’ सिनी सी।
LUK 10:10 यिने ख्‍यिराङ चुका ग्‍येसाला शुसिनाङ तेकी मीतिवी ख्‍यिराङला गासो माशुसिन ती ग्‍येसाकी लाम नेमा थेन्‍नी,
LUK 10:11 ‘ङ्‍यिरा काङ्‍बाला कोवु दी ग्‍येसाकी थल्‍दुक ति ख्‍यिरा तेन्‍दोकला र्‍हुनी ज्‍योकिन। यिने कोन्‍छ्‍योककी ग्‍येल्‍खाप चिप्‍ला राङ वा वे सिरुप ति ख्‍यिरा हाक्‍कोवा की।’ सिनी सी।
LUK 10:12 ङ ख्‍यिराङला सिरिन, कोन्‍छ्‍योककी ठिम कितुप तुजेला दी ग्‍येसाकी खला ख्‍येलुप पर्च्या ति सदोमकी खला ख्‍येलुप पर्च्या सिनाङ मङ गिवितो।”
LUK 10:13 “ओ खोराजीनकी मीतिवा, ख्‍यिराङला मोताप सुकितो! ओ बेथसेदाकी मीतिवा, ख्‍यिराङला मोताप सुकितो! ख्‍यिरा पर्ला ङे क्‍यावु हलेवु लाका ति टुरोस ताङ सीदोनला क्‍यावु यिन्‍सिन तेकी मीतिवी गोमाला के रा र्‍होक्‍पुकी मज्‍या कोन्‍नी खोरो गोला थल्‍जाम लुक्‍नी खोप्‍रे दिक्‍पा ने सेम ग्‍युरुप्‍जा।
LUK 10:14 यिने कोन्‍छ्‍योककी ठिम कितुप तुजेला टुरोस ताङ सीदोनकी मीतिवाला सिनाङ ख्‍यिराङला मङ पर्च्या ख्‍येल्‍गितो।
LUK 10:15 ओ कफर्नहुमकी मीतिवा, काङ ख्‍यिराङ येर देवाच्‍येनला के देकिवी? मिन, ख्‍यिराङ याङ मर ङ्‍येलाला के लुम्‍गिवी।
LUK 10:16 सी ख्‍यिरा ताम्‍ङे ङ्‍येन्‍गिवे, तीकी ङे ताम्‍ङे ङ्‍येन्‍दुप यिन। सी ख्‍यिरा तेन्‍दोकला लङ्‍गिवे, ती ति ङे तेन्‍दोकला लङ्‍गुप यिन। तमा सी ङे तेन्‍दोकला लङ्‍गिवे, ती ति ङला तोङ्‍गुप तीकी तेन्‍दोकला लङ्‍गुप यिन।”
LUK 10:17 तमा येशूकी तङ्‍गुप लोमा मिरा खाल दिन ताङ ङ्‍यी ति छासे गा कियी लोक्‍नी वानी खोला दुक सिक्‍यासुङ, “चोवो, चोवोकी मिङ नेसुर डेतिवा साङ ङ्‍यिरा खला ङ्‍येन्‍गिनोक।”
LUK 10:18 तमा खोकी तिवाला सुङ्‍सुङ, “शैतानला देवाच्‍येन नेमा चिलाम दोके क्‍यानी लुम्‍बुप ति ङे थोङ्‍सुङ।
LUK 10:19 ङ्‍येना, ङे ख्‍यिराङला रुलतिवा ताङ बिच्‍छितिवाला लेपुप ताङ डेतिवी तेरी ङारकी खला ग्‍येलुप ओङ बिन वे। तुक क्‍यानी काङगी साङ ख्‍यिराङला मेलोक्‍पा कि मुथुपी।
LUK 10:20 यिने डेतिवा ख्‍यिरा खला ङ्‍येन्‍गिवी सिनी ख्‍यिराङ गा माकी, बोरु ख्‍यिरा मिङ ति देवाच्‍येनला टि वे सिनी गा की।”
LUK 10:21 ती पेला राङ येशू कोन्‍छ्‍योककी थु चाङ्‍मा नेमा छासे गा कियी दुक सुङ्‍सुङ, “ओ पपा, देवाच्‍येन ताङ जम्‍बुलिङकी चोवो। ङ थुचिछे बुलिन, च्‍यिलासिसिन दी ताम्‍ङेतिवा ति रिक्‍पा वोतुप ताङ लापुप मीतिवाला छ्‍याकला ज्‍याक्‍नी आङा टिक्‍पे दोके मालापुप मीतिवाला छ्‍या तेन्‍सुङ। यिन, पपा, दी ति पपाला गा लङ्‍गुप नोवा यिन।
LUK 10:22 ङे पपी ङला तेरी ताम्‍ङे चेक तेन नाङ्‍सुङ। पपी मिसिन पुज्‍युङ सु यिन सिनी सी साङ ङो मेशेवी। तमा पुज्‍युङ ताङ पुज्‍युङकी पपाला ङो शे ज्‍यितुपला पेतुपतिवी मिसिन पपा सु यिन सिनी सी साङ ङो मेशेवी।”
LUK 10:23 ती ज्‍युक्‍ला येशू लोमातिवी थाकाला ग्‍युर्नी खोप्‍राङ पर्ला दुक सुङ्‍सुङ, “ती तेरी ताम्‍ङेतिवा थोङ्‍गुप ङ्‍येतुप ख्‍यिराङ ति मोलाम थोपुप यिनो।
LUK 10:24 ङ ख्‍यिराङला सिरिन, कोन्‍छ्‍योककी लुङ्‍तेम्‍बातिवा ताङ ग्‍येल्‍वुतिवा बङीकी ख्‍यिरा काङ थोङ्‍गुप ति ल्‍हाप नो क्‍यासुङ, यिने माथोङ। तमा ख्‍यिरा काङ थोवु ति ङ्‍येन्‍दुप नो क्‍यासुङ, यिने माथो।”
LUK 10:25 ङ्‍यिम्‍ज्‍यिक यहूदी छ्‍योकी गेकेन यी लानी येशूला खोक्‍पा ल्‍हापला दुक सिनी टिसुङ, “गेकेन, नाम्‍साङ मिशिवु मिजी थोपुपला ङे काङ कि गोकिवी?”
LUK 10:26 तमा येशूकी तीला सुङ्‍सुङ, “कोन्‍छ्‍योककी सुङला काङ सिनी टि वे? ख्‍योरो ती ति चुक क्‍यानी रानी हाक्‍कोसुङ?”
LUK 10:27 तमा तीकी सिक्‍यासुङ, “‘ख्‍योरो तेरी सेमगी दिङ ने, ख्‍योरो तेरी मिजी ने, ख्‍योरो तेरी ङार ताङ ख्‍योरो तेरी नासाम ने ख्‍योरो चोवो कोन्‍छ्‍योकला ङ्‍यिङ्‍ज्‍ये की।’ तमा ‘ख्‍योरो युल्‍वाला रङला दोके ङ्‍यिङ्‍ज्‍ये की।’ सिनी सुङ वे।”
LUK 10:28 तमा येशूकी तीला सुङ्‍सुङ, “ख्‍योरो टेके राङ सिक्‍यासुङ। ख्‍युरुङ तुकै राङ की, तमा ख्‍युरुङ सेन्‍बु लुकिवी।”
LUK 10:29 यिने ती यहूदी छ्‍योकी गेकेन तीकी खोरुङला टेङ्‍बु छ्‍या देन्‍दुपला येशूला “तुकै यिन्‍सिन ङे युल्‍वा ति सु यिनाङ?” सिनी टिसुङ।
LUK 10:30 तमा येशूकी तीला टिलेन नाङ्‍सुङ, “मी मिरा च्‍यिक यरूशलेम नेमा मर यरीहोला डोयी कितुप पेला ती ति च्‍याक्‍पातिवी लकला ख्‍येल्सुङ। च्‍याक्‍पातिवी तीला पेर्तुङ्‍बा सिङी जोसिमा तीला दुनी शिला के जोनी क्‍युर ज्‍याक्‍नी गाल्‍नोक।
LUK 10:31 ती पेला कोङ्‍यार यी ती लाम नेमा राङ मर वासुङ, यिने तीकी ती मी तीला थोङ्‍सिमा तीला क्‍योक क्‍यानी यम्‍बा थाका नेमा गाल्‍सुङ।
LUK 10:32 चेयी ज्‍युक्‍ला लेवी यी साङ ती दासाला वानी तीला थोङ्‍सिमा तीला क्‍योक क्‍यानी यम्‍बा थाका नेमा गाल्‍सुङ।
LUK 10:33 यिने सामरी यी युक डोयी कितुप पेला ती मी वोतुप दासाला लेप्‍नी तीला थोङ्‍सिमा छासे ङ्‍यिङ्‍ज्‍ये लासुङ,
LUK 10:34 तमा ती मी तीकी चाला गल्‍नी तीकी मतिवाला नुम ताङ गुन्‍डुम छ्‍याङ कुन बिन्‍नी मारा टिल बिन्‍सुङ। ती ज्‍युक्‍ला तीकी तीला खोरो पुङ्‍गोकला कल्‍नी डोखाङ यीला क्‍यल्‍नी तीला ल्‍हटे क्‍यासुङ।
LUK 10:35 तमा ती सला तीला तीकी ङुलकी डप्‍बु ङ्‍यी डोखाङकी ज्‍यिन्‍दाकला तेतिन सिरा ‘दीला ल्‍हटे किसा, तमा टङ्‍गा चो ल्‍हक्‍पा ख्‍येलुप ति ङ लोक्‍नी वुङ्‍गुप पेला तेतुप्‍नो।’ सिनी सिक्‍यासुङ।”
LUK 10:36 ती पे सुङ्‍सिमा येशूकी ती यहूदी छ्‍योकी गेकेनला टि नाङ्‍सुङ, “ख्‍योरो नासामला दी मिरा सुमकी पर्ला सु च्‍याक्‍पाकी लकला ख्‍येलुप मी तीकी युल्‍वा ति यिन?”
LUK 10:37 तीकी सिक्‍यासुङ, “तीला ङ्‍यिङ्‍ज्‍ये क्‍यावु मी ति यिन।” तमा येशूकी तीला सुङ्‍सुङ, “गल्‍नी ख्‍युरुङ साङ तुकै राङ की।”
LUK 10:38 तमा येशू ताङ खोकी लोमातिवा डोयी कितुप पेला युल यीला लेप्‍सुङ। ती युलला मार्था सिरुप पुम्‍पेजा यीकी खोतिवाला खोरो खाङ्‍बा गासो शुसुङ।
LUK 10:39 तीकी ति मरियम सिरुप नुम यी नोक। ती मरियम ति चोवोकी शापकी चाला देनी खोकी सुङ ङ्‍येनिन नोक।
LUK 10:40 यिने मार्था ति खोरो टडिक कि गोवु लाकातिवा बङी वोतुप तप्‍की खोम राङ मिन्‍दुक। तमा तीकी येशूकी चाला वानी सिक्‍यासुङ, “चोवो, ङे नुमकी ङला तिराङ लाका कितुपला क्‍युर्नी ज्‍यकुप ति गेकेनकी ङ्‍याम मिकिवी? ङला दाल्‍जा किटे कि सिनी तीला सुङ्‍नी।”
LUK 10:41 यिने चोवोकी तीला सुङ्‍सुङ, “मार्था, मार्था, ख्‍युरुङ याङ ताम्‍ङे बङीकी कोर्ला पप ताङ सेम्‍दुक किनोक।
LUK 10:42 यिने गोवु ताम्‍ङे ति च्‍यिक तिराङ वे। चुका ति ल्‍यामु नोके, ती ति मरियमकी पेसुङ। ती ति सी साङ ती नेसुर ठोक मुथुपी।”
LUK 11:1 ङ्‍यिम्‍ज्‍यिक दासा यीला येशू मोपोर कियी नोक। मोपोर क्‍यान छर्सिमा खोकी लोमातिवी पर ने मिरा च्‍यिककी खोला सिक्‍यासुङ, “चोवो, यूहन्‍नाकी खोरो लोमातिवाला मोपोर कितुप लापुप दोके ङ्‍यिराङला साङ मोपोर कितुप लाप नाङ्‍नी।”
LUK 11:2 तमा येशूकी तिवाला सुङ्‍सुङ, “ख्‍यिराङ दुक सिनी मोपोर की। ‘पपा कोन्‍छ्‍योक, पपी मिङ चाङ्‍मा वुङ च्‍यी। पपी ग्‍येल्‍खाप वुङ्‍शी।
LUK 11:3 ङ्‍यिमी टेङ ङ्‍यिराङला गोवु साप समा नङ्‍डे की।
LUK 11:4 ङ्‍यिरा क्‍यावु दिक्‍पातिवा माफ नङ्‍डे की। च्‍यिलासिसिन ङ्‍यिरा साङ ङ्‍यिरा तेन्‍दोकला दिक्‍पा कितुपतिवाला माफ तेर्किवी। ङ्‍यिराङला खोक्‍पा ल्‍हापला ख्‍येल माज्‍यी।’”
LUK 11:5 ती ज्‍युक्‍ला लोङ येशूकी तिवाला सुङ्‍सुङ, “दोजो ख्‍यिरा पर नेमा ललाइला खोरो दाल्‍जा वोज्‍यिवी। ती ति नुप फेकाला खोरो दाल्जी ते गल्‍नी तीला ‘ओ दाल्‍जो, ङला शुब्‍ज्‍याङ सुम चोके किन्‍बा किनी,
LUK 11:6 च्‍यिलासिसिन ङे दाल्‍जा यी थाक्‍रिङ्‍बु नेसुर वा वे, यिने तीला शोपला ङे मुला काङ साङ मे।’ सिक्‍यासिन
LUK 11:7 ती ति नाङ नेसुर ‘ङला छेरा मालोङ, गो चेन सिन वे, आङातिवा ङे मुला ङ्‍यिलोङ वे। त ङ लानी ख्‍युरुङला काङ तेर मुथुपी।’ सिनी सि थुप्‍किवी?
LUK 11:8 ङ ख्‍यिराङला सिरिन, ती ति खोरो दाल्‍जा यिन्‍दुप तप्‍की ती ति लानी शुब्‍ज्‍याङ माबिन्‍सिनाङ तीकी दाल्‍जी लङ्‍गुप ति लङ्‍दोक क्‍यावु तप्‍की लानी तीला गोवु चोयी तेर्किवी।
LUK 11:9 तुक क्‍यानी ङ ख्‍यिराङला सिरिन, ‘लोङ, तमा ख्‍यिराङला नङ्‍गितो। छोल, तमा ख्‍यिराङला ङ्‍येकितो। गोला डक डक ग्‍योप, तमा ख्‍यिरा थोक्‍ला गो बेकितो।’
LUK 11:10 च्‍यिलासिसिन लोङ्‍गुप तेरीला थोप्‍कितो, छोलुप तेरीला ङ्‍येकितो, तमा गोला डक डक ग्‍यकुप तेरीला गो बेकितो।
LUK 11:11 ख्‍यिरा पर्ला चुका पपा तीकी खोरो पुज्‍युङकी ङ्‍या लाङ्‍सिन तीला रुल तेर्किवी?
LUK 11:12 तमा च्‍ये मेन्‍दोक लङ्‍सिन तीला बिच्‍छी तेर्किवी?
LUK 11:13 ख्‍यिराङ दुक्‍टा वोनी साङ खोरो पेजातिवाला च्‍यालक ल्‍यामु तेर शेकिवी सिसिन देवाच्‍येनला ज्‍यु वोतुप ख्‍यिरा पपी याङ खोला लोङ्‍गुपतिवाला चुका मङ्‍मु खोरे थु चाङ्‍मा मनङ्‍गिवी रो?”
LUK 11:14 थेङ्‍मा यी येशूकी डे ग्‍यप्‍नी कुवा गलुप मी यीकी नाङ नेमा ती डे थेनिन नोक। तमा डे थेन गल्‍सिमा ती मी कुवा ति ताम्‍ङे लपुप छाल्‍सुङ। दी थोङ्‍नी मीतिवा हलेवा क्‍यासुङ।
LUK 11:15 यिने तिवी पर नेमा ललाइकी दुक सिक्‍यासुङ, “डेतिवी ग्‍येल्‍वु बालजिबुलकी ङार नेमा राङ दीकी डेतिवा देन्‍गिनोक।”
LUK 11:16 तमा यम्‍बातिवा ललाइकी देवाच्‍येन नेमा वुङ्‍गुप त च्‍यिक छ्‍या तेन सिनी खोला खोक्‍पा ल्‍हासुङ।
LUK 11:17 तिवी नासाम हाक्‍कोनी येशूकी तिवाला दुक सुङ्‍सुङ, “चुका लुङ्‍बाला साङ च्‍यिककी च्‍यिकला ख्‍ये पेसुङ सिसिन ती लुङ्‍बा ति ना डिवी। तमा खाङ्‍बा साङ खाङ्‍बी मीतिवा च्‍यिककी च्‍यिकला ख्‍ये पेसुङ सिसिन ती खाङ्‍बा ति ना डिवी।
LUK 11:18 ती दोके शैतान साङ खोप्‍राङ पर्ला ख्‍ये पेसिन तीकी ग्‍येल्‍खाप ति चुक क्‍यानी लु थुप्‍किवी रो? ख्‍यिरा ङला बालजिबुलकी ङार नेमा डेतिवा देन्‍गिनोक सिनी सिनोक।
LUK 11:19 दोजो ङे बालजिबुलकी ङार नेमा डेतिवा तेन्‍दुप यिन्‍सिन ख्‍यिरा मीतिवी सी ङार नेसुर डेतिवा देन्‍गिवी रो? तुक क्‍यानी ख्‍यिरा सिक्‍यावु ताम्‍ङे ति टेके मिन सिनी ख्‍यिरा मीतिवी राङ पङ्‍बु तेर्किवी।
LUK 11:20 यिने दोजो ङे कोन्‍छ्‍योककी ङार नेमा डेतिवा तेन्‍दुप यिन्‍सिन कोन्‍छ्‍योककी ग्‍येल्‍खाप ख्‍यिरा पर्ला वा वे।
LUK 11:21 मी रम्‍बु यीकी तेरी लाक्‍च्‍ये खुर्नी खोरो खाङ्‍बा र्‍हेन्‍सिन खोरो च्‍यालकतिवा र्‍होकिवी।
LUK 11:22 यिने ती सिनाङ मङ मी रम्‍बु यी वानी तीला थमु ग्‍यप्‍नी तीकी खला ग्‍येल्‍सिन तीकी रेवा क्‍यावु लाक्‍च्‍येतिवा तेरी ठो गल्‍नी खोप्‍रे पर्ला गोकिवी।
LUK 11:23 ङे छ्‍योकला मेतुप मी ति ङे तेन्‍दोकला लङ्‍गुप मी यिन, तमा ङ ताङ मुला मुरुकुप मी ति थरा थुरा तोङ्‍गुप मी यिन।”
LUK 11:24 “डे च्‍यिक मी ललाइ नेमा थेन्‍सिमा ती ति येन सोप दासा छोलिन दासा पाङ्‍थेरीला फार छुर युकिवी। यिने तीकी दासा माङ्‍येनी, ‘ङ थेन वावु खाङ्‍बाला राङ लोक्‍नी डोयी।’ सिनी सिवी।
LUK 11:25 तीकी ते लोक्‍नी वानी ल्‍हासालेन्‍सिन ती खाङ्‍बा ति च्‍यानी चेङ्‍गा जोवु ताङ रिनी ज्‍यकुप थोङ्‍गिवी।
LUK 11:26 तमा ती ति गल्‍नी खोरुङ सिनाङ मङ दुक्‍टा वोतुप यम्‍बा डे दिन चोकेला खोरो मुला टिनी वानी ती मी नाङ्‍ला शुनी ते राङ देकिवी। तमा ती मी तीकी तिङ्‍मी मिजी ति गोमाला सिनाङ मङ मेलोक्‍पा डिवी।”
LUK 11:27 येशूकी दी सुङ सुङ्‍यिन वोतुप पेला मी मङ्‍मी पर नेमा पुम्‍पेजा यीकी थोर ग्‍यकिन सिक्‍यासुङ, “ख्‍युरुङला क्‍येप ताङ नुम तेरुप आमा ति मोलाम थोपुप यिनो।”
LUK 11:28 ती थोनी येशूकी सुङ्‍सुङ, “बोरु कोन्‍छ्‍योककी सुङ ङ्‍येन्‍नी ती सुङला युकुपतिवा के मोलाम थोपुप यिनो।”
LUK 11:29 तमा मीतिवा बङी जोम्‍सालेन्‍सिन येशूकी सुङ्‍सुङ, “तसामकी गिपा ति दुक्‍टाकी गिपा यिन। तिवी त छोल्‍गिनोक, यिने तिवाला योनाकी त मिसिन यम्‍बा चुका त साङ थोङ्‍गुप मेङ्‍येवी।
LUK 11:30 योना ति निनवे ग्‍येसाकी मीतिवी थोक्‍ला त च्‍युङ्‍गुप दोके ङ मी पुज्‍युङ साङ तसाम पेकी गिपाकी मीतिवी थोक्‍ला त च्‍युङ्‍गिवी।
LUK 11:31 कोन्‍छ्‍योककी ठिम तोङ्‍गुप तुजेला ल्‍होकी थाकाकी लुङ्‍बा नेसुर वावु ग्‍येल्‍मी दी गिपाकी मीतिवा ताङ मुला लानी दी गिपाकी मीतिवाला क्‍येन ग्‍यकिवी। च्‍यिलासिसिन ती ग्‍येल्‍मु ति ग्‍येल्‍वु सोलोमनकी रिक्‍पा ङ्‍येन्‍दुपला जम्‍बुलिङकी तिङ्‍मा ने वासुङ। यिने ल्‍होसा, ग्‍येल्‍वु सोलोमन सिनाङ मङ छ्‍ये वोतुप ति दे वे।
LUK 11:32 येलुङ कोन्‍छ्‍योककी ठिम तोङ्‍गुप तुजेला निनवे ग्‍येसाकी मीतिवी दी गिपाकी मीतिवा ताङ मुला लानी दी गिपाकी मीतिवाला क्‍येन ग्‍यकिवी। च्‍यिलासिसिन तिवी योनाकी ख्‍याप्‍टाक क्‍यावु कोन्‍छ्‍योककी सुङ ङ्‍येन्‍नी दिक्‍पा ने सेम ग्‍युर्नोक। यिने ल्‍होसा, योना सिनाङ मङ छ्‍ये वोतुप ति दे वे।”
LUK 11:33 “सी साङ दिप्‍ली च्‍येनी मोथोङ्‍गुप दासाला याङ्‍ना शोमकी वोक्‍ला मोज्‍योकिवी। बोरु पाङ नेसुर वुङ्‍गुपतिवाला ठछ्‍येली थोङ्‍शी सिनी तेरीकी थोङ्‍गुप दासाला ज्‍योकिवी।
LUK 11:34 ख्‍योरो जुकी दिप्‍ली ति ख्‍योरो मिक यिन। ख्‍योरो मिक ल्‍यामु वोसिन ख्‍योरो जु तेरी ठछ्‍येली गिवी। यिने ख्‍योरो मिक ल्‍यामु मेसिन ख्‍योरो जु तेरी नक्‍तोमी गिवी।
LUK 11:35 तुक क्‍यानी ख्‍यिरा नाङ्‍ला वोतुप ठछ्‍येली ति नक्‍तोमी वोते मेते सिनी ल्‍यामु क्‍यानी ल्‍होसा।
LUK 11:36 दोजो ख्‍योरो जु तेरी ठछ्‍येली गल्‍नी काङ साङ नक्‍तोमी मेसिन दिप्‍लीकी ठछ्‍येलीकी ख्‍युरुङला वो ग्‍यकुप दोके ख्‍योरो जु तेरी वो ग्‍यकिवी।”
LUK 11:37 येशूकी ती ताम्‍ङे सुङ सिन्‍सिमा फरिसी मिरा च्‍यिककी खोला खोरो खाङ्‍बा सोल शेवुला फेप शुसुङ, तमा खो तीकी खाङ्‍बा फेप्‍नी सोल शेवुला ज्‍युसुङ।
LUK 11:38 यिने ती फरिसी तीकी येशूकी सोल शेवु सिनाङ गोमाला छ्‍याक मासिलुप थोङ्‍नी हलेवा क्‍यासुङ।
LUK 11:39 तमा चोवोकी तीला सुङ्‍सुङ, “तन्‍दा ख्‍यिराङ फरिसीतिवा याङ कोरा ताङ देर्माङ फिला ति ल्‍यामु क्‍यानी शिकिवी, यिने ख्‍यिरा नाङ्‍ला ति देर्पा ताङ दुक्‍टाकी क्‍येङ्‍नी वे।
LUK 11:40 ओ अम्‍बारङ्‍शिङतिवा, फीकी ति जो नङ्‍गुप कोन्‍छ्‍योककी राङ नाङगी ति साङ जो नङ्‍गुप मिन रो?
LUK 11:41 कोरा ताङ देर्माङ नाङ्‍ला काङ वे, ती ति पेराङ्‍बुतिवाला बिन, तुक क्‍यासिन तेरी ताम्‍ङेतिवा ख्‍यिरा थोक्‍ला चेङ्‍गा डिवी।
LUK 11:42 ख्‍यिराङ फरिसीतिवाला मोताप सुक्‍शी, च्‍यिलासिसिन ख्‍यिराङ मेन्‍डोक ताङ खम्‍बु ताङ यम्‍बा नम्‍बा तेरीकी मेन्‍चातिवा नेसुर दशांश ति कोन्‍छ्‍योकला बुल्‍गिवी, यिने ठिम टेङ्‍बु ताङ कोन्‍छ्‍योकला ङ्‍यिङ्‍ज्‍ये कितुप ताम्‍ङेला ति ङ्‍याम मिकिनोक। तिवा साङ कि गोकिवी, तमा ठिम टेङ्‍बु ताङ ङ्‍यिङ्‍ज्‍ये कितुप लाका साङ ङ्‍याम कि गोकिवी।
LUK 11:43 ख्‍यिराङ फरिसीतिवाला मोताप सुक्‍शी, च्‍यिलासिसिन ख्‍यिराङ यहूदी छ्‍योखाङला टाल जिम्‍नी देतुप ताङ हाला मीतिवी खोरुङला ताङ्‍देन क्‍यानी छ्‍याक पुलुप ति गा गिनोक।
LUK 11:44 ख्‍यिराङला मोताप सुक्‍शी, च्‍यिलासिसिन ख्‍यिराङ याङ फिला ल्‍हासिन ङो मेशेवु दोके जोवु शेप मीला ज्‍योकुप टककी फुक दोके यिन, तुक क्‍यानी मीतिवा ती खला युसिनाङ ती ति शेप मीला ज्‍योकुप टककी फुक यिन सिनी छ्‍या मे।”
LUK 11:45 ती पेला यहूदी छ्‍योकी गेकेन मिरा च्‍यिककी येशूला सिक्‍यासुङ, “गेकेन, गेकेनकी दी ताम्‍ङेतिवा सुङ्‍नी ङ्‍यिराङला साङ मारे तोङ्‍गिनोक।”
LUK 11:46 तमा येशूकी तीला सुङ्‍सुङ, “ख्‍यिराङ यहूदी छ्‍योकी गेकेनतिवाला साङ मोताप सुक्‍शी, च्‍यिलासिसिन ख्‍यिराङ खुरुपला कले वोतुप खुरु ति मीतिवाला खुर ज्‍यिकिनोक, यिने खोप्‍राङ ति तिवाला दाल्‍जा कितुपला ती खुरुला थो साङ मोतोङ्‍नोक।
LUK 11:47 ख्‍यिराङला मोताप सुक्‍शी, च्‍यिलासिसिन ख्‍यिराङ ति ख्‍यिरा हङ्‍गावातिवी सेतुप कोन्‍छ्‍योककी लुङ्‍तेम्‍बातिवी थोक्‍ला शेप मीला ज्‍योकुप टककी फुकतिवा ल्‍यामु जेवी।
LUK 11:48 तुकै राङ क्‍यानी ख्‍यिराङ ख्‍यिरा हङ्‍गावातिवी क्‍यावु लाकाकी कोर्ला पङ्‍बु तेर्किवी। ख्‍यिरा हङ्‍गावातिवी ति कोन्‍छ्‍योककी लुङ्‍तेम्‍बातिवाला सेसुङ, यिने ख्‍यिराङ ति तिवी थोक्‍ला शेप मीला ज्‍योकुप टककी फुकतिवा जेवी।
LUK 11:49 तुक क्‍यानी तेरी ताम्‍ङे हाक्‍कोवु कोन्‍छ्‍योककी दुक सुङ्‍गिवी, ‘ङ ङे लुङ्‍तेम्‍बातिवा ताङ लोमा छ्‍येतिवाला मीतिवी ते तोङ्‍यिनो। यिने तिवी ङे तङ्‍गुपतिवी पर्ला ललाइला ति सेकिवी, ललाइला ति छेटाङ तेर्किवी।’
LUK 11:50 तुक क्‍यानी जम्‍बुलिङ ज्‍येङ्‍गुप पे नेज्‍युनी सेतुप कोन्‍छ्‍योककी लुङ्‍तेम्‍बातिवी ठककी क्‍येनकी चेक ति दी गिपाकी मीतिवी लङ्‍गिवी।
LUK 11:51 ती ति हाबिलकी ठक नेज्‍युनी छोठी ताङ कोन्‍छ्‍योककी ल्‍हङाङकी पर्ला सेतुप जकरियाकी ठक सेक यिन। यिन, ङ ख्‍यिराङला सिरिन, तिवा तेरी चेक ति दी गिपाकी मीतिवी लङ गोकिवी।
LUK 11:52 ख्‍यिराङ यहूदी छ्‍योकी गेकेनतिवा मोताप सुक्‍शी, च्‍यिलासिसिन ख्‍यिरा कोन्‍छ्‍योककी सुङ हाक्‍कोवु रिक्‍पाकी लिमी खुन गल्‍नी खोरुङ साङ माशु, तमा यम्‍बा शुकुप छोलुपतिवाला साङ शुकुपला ग्‍येकिवी।”
LUK 11:53 तमा येशू ती खाङ्‍बा नेसुर थेन्‍दुप पेला यहूदी छ्‍योकी गेकेनतिवा ताङ फरिसीतिवी खोकी तेन्‍दोकला कशेन क्‍येन तेरुप नोनी खोला टिवा बङी ग्‍यप्‍सुङ।
LUK 11:54 तमा खोकी ख नेमा थेन्‍दुप काङ रे च्‍यिक रे ताम्‍ङे नेसुर खोला क्‍येन तेरुपला तिवी चिवा क्‍यानी देनोक।
LUK 12:1 तोजो पेला मी तोङ्‍डा बङी जोम्‍बुप तप्‍की मीतिवा च्‍यिककी च्‍यिकला लेपुप छाल्‍सुङ। तमा येशूकी गोमाला खोरो लोमातिवाला सुङ्‍सुङ, “ख्‍यिराङ फरिसीतिवी खमीर नेसुर च्‍याङ्‍से देता, ती खमीर ति तिवी खोनक्‍पु यिन।
LUK 12:2 उम ज्‍यकुप ति ज्‍युक्‍ला मोथोङ्‍गुप ति काङ साङ मे, तमा बानी ज्‍यकुप ति ज्‍युक्‍ला हाक्‍मोकोवु ति काङ साङ मे।
LUK 12:3 तुक क्‍यानी काङ ख्‍यिरा नक्‍तोमीला सिक्‍यावे, ती ति ठछ्‍येलीला थोकिवी। तमा काङ ख्‍यिरा खाङ्‍बी जेकी नाङ्‍ला सताम नाङ्‍ला सिक्यावे, ती ति खाङ्‍बी थोक नेमा ख्‍याप्‍टाक किवी।”
LUK 12:4 येलुङ येशूकी सुङ्‍सुङ, “ओ ङे दाल्‍जातिवा, ङ ख्‍यिराङला सिरिन, जु ति सेसिमा ज्‍युक्‍ला यम्‍बा काङ साङ कि मुथुपुप तीला ज्‍यिवा माकी।
LUK 12:5 यिने ख्‍यिराङ सी मुला ज्‍यिवा कि गोकिवी सिरुप ति ङ ख्‍यिराङला हाक्‍को ज्‍यितिन, जुला सेसिमा ज्‍युक्‍ला ङ्‍येलाला क्‍युरुप ओङ वोतुप तीला ज्‍यिवा की। यिन, ङ ख्‍यिराङला सिरिन, खोला ज्‍यिवा की।
LUK 12:6 काङ डेवा ङ्‍यीला बन्‍गिरी ङ चोके मिटिन्‍वी रो? यिने तिवी पर्ला गोर्ता च्‍यिकला साङ कोन्‍छ्‍योककी मेज्‍येवी।
LUK 12:7 मङ ख्‍यिरा ति याङ गोकी र्‍हे ङ्‍येङ्‍मा यी साङ कोन्छ्‍योककी ङोनी ज्‍याङ वे, तुक क्‍यानी ख्‍यिराङ ज्‍यिवा माकी। ख्‍यिराङ याङ ती बङी वोतुप बन्‍गिरीतिवा सिनाङ मङ खक्‍छ्‍येवु वे।”
LUK 12:8 “ङ ख्‍यिराङला सिरिन, चुका मीकी मीतिवी मिङ्‍गाला ङला तेपा किवी सिवे, ङ मी पुज्‍युङकी साङ कोन्‍छ्‍योककी लेन क्‍योलुप थुतिवी मिङ्‍गाला तीला ङे मी यिन सिनी सिरिन।
LUK 12:9 यिने चुका मी तीकी मीतिवी मिङ्‍गाला ङला तेपा मिकिवी सिवे, ङ साङ कोन्‍छ्‍योककी लेन क्‍योलुपतिवी मिङ्‍गाला तीला ङे मी मिन सिनी सिरिन।
LUK 12:10 चुका मी तीकी ङ मी पुज्‍युङकी तेन्‍दोकला लानी ताम्‍ङे मेलोक्‍पा लप्‍किवे, तीला माफ ङ्‍येकिवी। यिने चुका मी तीकी कोन्‍छ्‍योककी थु चाङ्‍माकी तेन्‍दोकला मारे तोङ्‍गिवे, तीला ति माफ मेङ्‍येवी।
LUK 12:11 चो पेला मीतिवी ख्‍यिराङला यहूदी छ्‍योखाङ ताङ ग्‍येला कितुपतिवा ताङ ओङ्‍ज्‍येन कितुपतिवी दोङ्‍ला क्‍योल्‍गिवे, ती पेला ख्‍यिरा चुक सि गोकिवी, याङ्‍ना काङ सि गोकिवी सिनी पप माकी।
LUK 12:12 च्‍यिलासिसिन ती पेला ख्‍यिरा काङ सि गोकिवी सिनी कोन्‍छ्‍योककी थु चाङ्‍माकी राङ ख्‍यिराङला लोप्‍किवी।”
LUK 12:13 तमा मी माङ्‍छ्‍योककी पर नेमा मिरा च्‍यिककी येशूला सिक्‍यासुङ, “ओ गेकेन, ङे च्‍युच्‍युला ङ ताङ मुला अंश ग्‍यम नङ सिनी सुङ्‍डे किनी।”
LUK 12:14 येशूकी तीला सुङ्‍सुङ, “ओए, सी ङला पेनी ख्‍यिराङ ङ्‍यिवु पर्ला ठिम कितुप याङ्‍ना अंश ग्‍यम तेरुप मी जोसुङ?”
LUK 12:15 तमा खोकी ते वोतुप मी तेरीला सुङ्‍सुङ, “च्‍याङ्‍से देता, ख्‍यिराङ तेरी परकी देर्पा नेमा कुतुक दे। खोरो टोङ्‍बा छासे बङी वोसिनाङ मीकी मिजी ति ती टोङ्‍बी मुला मुलुवी।”
LUK 12:16 तमा येशूकी तिवाला दी पे यी शेन नाङ्‍सुङ, “मी छ्‍युक्‍पु यीकी शिङ खला सप्‍ले बङी ल्‍येनोक।
LUK 12:17 तमा तीकी दुका नासाम यी ताङ्‍नोक, ‘ङे सप्‍ले ज्‍योकुप दासाङ मे, ङ काङ कितुप?’
LUK 12:18 तीकी सिक्‍यासुङ, ‘त याङ ङ दुक कितिन, ङरा पङाङ शिक्‍नी मङ ग्‍येर्पु जोयी। तमा ती तेरी ङे सप्‍ले ताङ समा च्‍यालकतिवा ती नाङ्‍ला ज्‍योकिन।’
LUK 12:19 ती ज्‍युक्‍ला ङ ङराङला सिरिन, ‘त ख्‍योरो मुला लो अलायी सेक लङ्‍गुप टोङ्‍बा बङी शम्‍नी ज्‍याङ वे, ख्‍युरुङ किर्मु क्‍या देनी सोनी थुनी गा क्‍यानी दे।’
LUK 12:20 यिने कोन्‍छ्‍योककी तीला सुङ्‍सुङ, ‘ओ अम्‍बारङ्‍शिङ, हारिङ नुपला राङ ख्‍युरुङ शिवी। तमा ख्‍योरो थोक्‍ला शम्‍नी ज्‍यकुप टोङ्‍बा ति सी ति डिवी?’
LUK 12:21 रङगी थोक्‍ला तिराङ टोङ्‍बा शम्‍नी कोन्‍छ्‍योककी थोङ्‍दाङला छ्‍युक्‍पु मेतुपतिवा ति दुकै राङ डितो।”
LUK 12:22 येलुङ येशूकी खोरो लोमातिवाला सुङ्‍सुङ, “तुक क्‍यानी ङ ख्‍यिराङला सिरिन, खोरो मिजीकी थोक्‍ला काङ साप, तमा खोरो जुकी थोक्‍ला काङ कोन्‍दुप सिनी पप माकी।
LUK 12:23 च्‍यिलासिसिन मिजी ति साप समा सिनाङ मङ खक्‍छ्‍येवु वे, तमा जु ति मज्‍या सिनाङ मङ खक्‍छ्‍येवु वे।
LUK 12:24 कलकतिवाला ल्‍हानी नासाम तोङ। तिवी सेन साङ मेदेपी, सप्‍ले साङ मङकिवी, तमा तिवी मुला पङाङ याङ्‍ना बकर साङ मे। यिन्‍सिनाङ कोन्‍छ्‍योककी राङ तिवाला समा नङ्‍गिवी। ख्‍यिराङ याङ च्‍यच्‍युमतिवा सिनाङ मङ खक्‍छ्‍येवु मे रो?
LUK 12:25 काङ ख्‍यिरा पर्ला चुका मी तीकी पप क्‍यानी खोरो मिजीकी छे ति चेयी साङ रिङ्‍बु जो थुप्‍किवी?
LUK 12:26 दी दोके लाका टिक्‍पे यी साङ कि मुथुपी सिसिन ख्‍यिराङ च्‍यिला यम्‍बा ताम्‍ङेकी थोक्‍ला पप किवी?
LUK 12:27 पाके मेन्‍दोकतिवा चुक क्‍यानी ग्‍याकिवी नासाम तोङ। तिवा हुर्ताक साङ मिकिवी, क्‍येलुप साङ मेक्‍येल्‍वी। यिने ङ ख्‍यिराङला सिरिन, छासे मज्‍या ल्‍यामु कोन्‍नी छ्‍यावु ग्‍येल्‍वु सोलोमन साङ दी मेन्‍दोकतिवी पर्ला च्‍यिक दोके चोयी साङ छ्‍यानी मे।
LUK 12:28 हारिङ वोसिनाङ सला मेला र्‍हेन क्‍युरुप सकी चला साङ कोन्‍छ्‍योककी दुक क्‍यानी कोन्‍नी नङ्‍गिवी सिसिन, ओ तेपा अला मेतुप टेङ, ख्‍यिराङला याङ मङ छासे क्‍यानी कोन मनङ्‍गिवी रो?
LUK 12:29 तुक क्‍यानी ख्‍यिरा सेमला काङ साप, काङ थुङ्‍गुप सिनी नासाम ताङ्‍नी पप माकी।
LUK 12:30 कोन्‍छ्‍योकला ङो माशेवु मिरिक यम्‍बातिवी के दिवा तेरी छोल्‍गिवी। दिवा ख्‍यिराङला गोकिवी सिनी ख्‍यिरा पपा कोन्‍छ्‍योकला राङ छ्‍या वे।
LUK 12:31 बोरु ख्‍यिराङ खोकी ग्‍येल्‍खाप छोल, तमा खोकी दिवा साङ ख्‍यिराङला ग्‍यप्‍नी नङ्‍गितो।”
LUK 12:32 “ओ छो टिक्‍पे, ज्‍यिवा माकी, च्‍यिलासिसिन ख्‍यिरा पपा कोन्‍छ्‍योककी ख्‍यिराङला खोकी ग्‍येल्‍खाप नङ्‍गुपला गा किनोक।
LUK 12:33 ख्‍यिरा टोङ्‍बातिवा चोनी कतुकारला ख्‍येलुपतिवाला बिन। तमा ख्‍यिरा थोक्‍ला मरलुप छयीतिवा जो, तमा नाम्‍साङ मिसिन्‍दुप टोङ्‍बा ति देवाच्‍येनला शम्‍नी ज्‍योक। ते कुर्मेन साङ मोफोकिवी, बु साङ मग्‍यकिवी।
LUK 12:34 च्‍यिलासिसिन ख्‍यिरा टोङ्‍बा कनी नोके, ख्‍यिरा सेम साङ ते राङ गिवी।”
LUK 12:35 “ख्‍यिराङ शब्‍ज्‍यी कितुपला टडिक क्‍यानी नरी दाक दाक्‍पी दिप्‍ली च्‍येनी ज्‍योक,
LUK 12:36 तमा खोरो ज्‍यिन्‍दाक जेन्‍दीकी डेन नेमा लोक्‍नी वानी गोला डक डक ग्‍यप्‍सिन शार्क्येक गो बेतुपला गुनी देतुप लावातिवा दोके वुङ गोकिवी।
LUK 12:37 खोरो ज्‍यिन्‍दाक खाङ्‍बा वुङ्‍गुप पेला लावातिवा लानी देतुप ठेसिन ती लावातिवाला ल्‍यामु यिनो। ङ ख्‍यिराङला टेङ्‍बु सिरिन, ती ज्‍यिन्‍दाक तीकी केल्‍दाङ दम्‍नी खोरो लावातिवाला च्‍योक्‍चीला दे ज्‍यिकिवी, तमा तिवी चाला वानी तिवाला समा देनी शब्‍ज्‍यी किवी।
LUK 12:38 ज्‍यिन्‍दाक नुप फेकाला याङ्‍ना ती सिनाङ फिमु वोसिनाङ लावातिवा लानी टडिक क्‍यानी राङ देतुप ठेसिन ती लावातिवाला ल्‍यामु यिनो।
LUK 12:39 यिने ख्‍यिराङ दी हाक्‍कोवा की, खाङ्‍बी ज्‍यिन्‍दाककी कुर्मेन चो पेला गिवी सिनी छ्‍या वोतुप यिन्‍सिन तीकी खोरो खाङ्‍बाला कुर्मेन शुक मिज्‍यिवुजा।
LUK 12:40 तुक क्‍यानी ख्‍यिराङ साङ टडिक क्‍यानी देता, च्‍यिलासिसिन ङ मी पुज्‍युङ ख्‍यिरा नासाम मातङ्‍गुप तुजेला वुङ्‍गितो।”
LUK 12:41 तमा पत्रुसकी येशूला सिक्‍यासुङ, “ओ चोवो, काङ दी पे ति ङ्‍यिरा थोक्‍ला तिराङ सुङ्‍गुप यिनाङ की, मी तेरीकी थोक्‍ला सुङ्‍गुप यिन?”
LUK 12:42 तमा चोवोकी सुङ्‍सुङ, “चुका मी ति खोङ्‍तेर्मु ताङ रिक्‍पा वोतुप खाङ्‍बी लाका चेक लावु मी वोज्‍यिवी? ज्‍यिन्‍दाककी तीला खोरो यम्‍बा लावातिवाला टेके तुजेला समा तेरुपला चेक तेकिवी।
LUK 12:43 ज्‍यिन्‍दाक लोक्‍नी वुङ्‍गुप पेला ती लावा ति तुकै कियी वोतुप राङ ठेसिन ती लावाला ल्‍यामु गिवी।
LUK 12:44 ङ ख्‍यिराङला टेङ्‍बो सिरिन, ज्‍यिन्‍दाक तीकी खोरो तेरी टोङ्‍बा ति ती लावाला चेक तेकिवी।
LUK 12:45 यिने ती लावा तीकी सेमला ‘ङे ज्‍यिन्‍दाक याङ फिमु गिते।’ सिनी नासाम ताङ्‍नी लावातिवा ताङ लावामतिवाला दुनी खोरुङ ति साप ताङ थुङ्‍गुप ताङ जिनी देसुङ सिसिन
LUK 12:46 तीकी ज्‍यिन्‍दाक ति तीकी नो माक्‍यावु छेर्मु ताङ हाक्‍माकोवु तुजेला लोक्‍नी वुङ्‍गिवी, तमा तीला कशेन छ्‍येर्पा बिन्‍नी खोङ्‍तेर्मु मेतुप लावातिवा ताङ मुला क्‍युर कितो।
LUK 12:47 खोरो ज्‍यिन्‍दाककी नोवा हाक्‍कोनी साङ टडिक मिकिवु याङ्‍ना ज्‍यिन्‍दाककी नोवु दोके मिकिवु लावाला बङी दुङ्‍गिवी।
LUK 12:48 यिने ज्‍यिन्‍दाककी नोवा हाक्‍माकोनी दुङ्‍गुप लाका क्‍यावु लावा तीला चेयी राङ दुङ्‍गिवी। तुक क्यानी सुला मङ बिन वे, ती नेमा मङ लङ्‍गिवी। सुला मङ चेक तेवे, ती नेमा मङ ल्‍हक्‍पा लङ्‍गिवी।”
LUK 12:49 “ङ जम्‍बुलिङला मे ग्‍यकुपला वावु यिन। ती मे ति गोमाला के शोरुप यिन्‍सिन छासे ल्‍यामु वुङ्‍गुप्‍जा।
LUK 12:50 यिने ङे लङ गोवु छेटाङकी बप्‍तिस्‍मा यी वे। ती बप्‍तिस्‍मा लङ्‍गुप लाका मासिन्‍दा सेक्‍ला ङला छासे सेम्‍दुक ला वे।
LUK 12:51 काङ ख्‍यिराङ ङ जम्‍बुलिङला लोदिमु तेरुपला वावु यिन सिनी नोकिवी? मिन, ङ ख्‍यिराङला सिरिन, बोरु ङ ख्‍यिराङला ख्‍ये बेतुपला वावु यिन।
LUK 12:52 तफेन्‍ला खाङ्‍बा च्‍यिकला मी मिरा ङ वोसिन मिरा सुमकी तेन्‍दोकला मिरा ङ्‍यी, तमा मिरा ङ्‍यीकी तेन्‍दोकला मिरा सुम लानी च्‍यिककी च्‍यिकला ख्‍ये पेकिवी।
LUK 12:53 पपी तेन्‍दोकला पुज्‍युङ, पुज्‍युङकी तेन्‍दोकला पपा, तमा आमी तेन्‍दोकला पुम, पुमी तेन्‍दोकला आमा, तमा यिवी तेन्‍दोकला नमा, नमी तेन्‍दोकला यिवी लानी तिवी पर्ला ख्‍ये पेकितो।”
LUK 12:54 तमा येशूकी मी माङ्‍छ्‍योकला सुङ्‍सुङ, “ख्‍यिरा नुपकी थाकाला मुक्‍पा वुङ्‍गुप थोङ्‍सिन छ्‍यर्वा ग्‍यकिवी सिनी सिवी, तमा तुकै राङ डिवी।
LUK 12:55 तमा ल्‍होकी थाका ने लुङ ग्‍यप्‍सिन छजुप ल्‍हकिवी सिनी ख्‍यिरा सिवी, तमा तुकै राङ डिवी।
LUK 12:56 ओ खोनक्‍पुतिवा, ख्‍यिरा स ताङ नाम ल्‍हानी नाम चुकै डिवी सिरुप ति बेतुप शेकिवी, यिने तसाम पेलाकी तुजे ति च्‍यिला बेतुप मेशेवी?”
LUK 12:57 “ख्‍यिराङ च्‍यिला चुका ति टेङ्‍बु यिन सिनी ख्‍यिरा राङ तेन्‍तेन कि मुथुपी?
LUK 12:58 ख्‍युरुङला शुवा ग्‍यकुप मी ताङ मुला ठिम कितुप मी ते डोप पेला लामला राङ ती ताङ मुला थिन्‍दुप छोल। मिसियाङ तीकी ख्‍युरुङला ठिम कितुप मीकी दोङ्‍ला टिनी डिवी, तमा ती ठिम कितुप तीकी ख्‍युरुङला चोन्‍खाङकी मी छ्‍येला चेक तेनी तीकी ख्‍युरुङला चोन्‍खाङला उप्‍किवी।
LUK 12:59 ङ ख्‍युरुङला सिरिन, ख्‍योरो डेवा रे रे माछ्‍योला सेक्‍ला ख्‍युरुङ तेसुर थेन मुथुप्‍तो।”
LUK 13:1 ती पेला राङ ललाइ मीतिवा वानी येशूला दुक सिक्‍यासुङ, “गालीलकी मी ललाइ जिन्‍बा तोङ्‍यिन कितुप पेला पिलातसकी तिवाला सेनी तिवी ठक ति जिन्‍बा तोङ्‍गुप सेम्‍ज्‍येनकी ठक ताङ मुला र्‍हेसुङ।”
LUK 13:2 तमा येशूकी तिवाला सुङ्‍सुङ, “ती गालीलकी मीतिवाला तुकै छेटाङ खुरुप तप्‍की तिवा यम्‍बा तेरी गालिलीतिवा सिनाङ मङ दिक्‍छेन यिन सिनी ख्‍यिरा नोकिवी?
LUK 13:3 तुकै मिन। ङ ख्‍यिराङला सिरिन, ख्‍यिराङ साङ दिक्‍पा ने सेम माग्‍युर्सुङ सिसिन तुक राङ क्‍यानी तेरी ना डिवी।
LUK 13:4 येलुङ सिलोआमला वोतुप चिवुर गुतोक तला ग्‍यप्‍नी ती वोक्‍ला लेप्‍नी मी मिरा च्‍याप्‍ग्‍येतिवा शिनोक, तमा तिवा ति यरूशलेमला देतुप यम्‍बा तेरी मीतिवा सिनाङ मङ दिक्‍पा क्‍यावु मीतिवा यिन सिनी ख्‍यिरा नोकिवी?
LUK 13:5 तुकै मिन। ङ ख्‍यिराङला सिरिन, ख्‍यिराङ साङ दिक्‍पा ने सेम माग्‍युर्सुङ सिसिन तुक राङ क्‍यानी तेरी ना डिवी।”
LUK 13:6 ती ज्‍युक्‍ला येशूकी दुका पे यी शेन नाङ्‍सुङ, “मी मिरा च्‍यिककी खोरो गुन्‍डुम शिङ खला अन्‍जीरकी दोङ्‍बु यी चुनोक। तमा ती दोङ्‍बुला डेलु गार्ते सिनी ती ति ल्‍हा वानोक, यिने तीकी काङ साङ डेलु माङ्‍येनोक।
LUK 13:7 तुक क्‍यानी तीकी गुन्‍डुम शिङ खला लाका कितुप लावा तीला सिक्‍यासुङ, ‘ङ लो सुम सेक दी अन्‍जीरकी दोङ्‍बुला डेलु गार्ते सिनी ल्‍हा वायिन, यिने ङे काङ साङ डेलु माङ्‍ये। दीला च्‍येन क्‍युर! दीकी याङ शिङ तिराङ र्‍हिप्‍किनोक।’
LUK 13:8 तमा लावा तीकी सिक्‍यासुङ, ‘ज्‍यिन्‍दाक, दीला लो खोर्मा रे मङ क्‍युर्नी ज्‍योक, ङ दीकी गारी गुरी कोनी छ्‍या लुकिन।
LUK 13:9 त वुङ्‍गुप लोला तीकी डेलु गर्सिन ल्‍यामु यिन, यिने मागर्सिन दीला च्‍येनी क्‍युर।’”
LUK 13:10 ङ्‍यिम्‍ज्‍यिक ङासोप ङ्‍यिमाला येशू यहूदी छ्‍योखाङला येन्‍देन नङ्‍यिन नोक।
LUK 13:11 ती पेला ते लो च्‍याप्‍ग्‍ये नेज्‍युन डे ग्‍यप्‍नी जु ति छासे कोकोरोक गल्‍नी चेयी साङ जु किचोक्‍पा दे मुथुपुप पुम्‍पेजा यी नोक।
LUK 13:12 तमा येशूकी तीला थोङ्‍सिमा तीला चाला कताङ्‍नी सुङ्‍सुङ, “ओ पुमो, त ख्‍युरुङ ख्‍योरो नेजु नेमा टेक्‍सुङ।”
LUK 13:13 तुक सुङ्‍सिमा खोकी तीला खोरो छ्‍याक ज्‍याक्‍सुङ, तमा ती पुम्‍पेजा ति शार्क्येक किचोक्‍पा लानी कोन्‍छ्‍योकला सोवा तेक्‍सुङ।
LUK 13:14 येशूकी ङासोप ङ्‍यिमाला टेक च्‍यितुप तप्‍की ती यहूदी छ्‍योखाङकी मी छ्‍ये तीला ङ्‍यिर्मु लानी मीतिवाला सिक्‍यासुङ, “लाका कितुप ति ङ्‍यिमा टुक वे, तुक क्‍यानी ती ङ्‍यिमा टुककी नाङ्‍ला वानी दाक दाक्‍पुला टेक च्‍यी, यिने ङासोप ङ्‍यिमाला तुक माकी।”
LUK 13:15 यिने येशूकी तीला सुङ्‍सुङ, “ओ खोनक्‍पुतिवा, काङ ख्‍यिरा रे रेकी ङासोप ङ्‍यिमाला साङ खोरो लाङ ताङ पुङ्‍गोकतिवा गोठे नाङ नेमा ताङ्‍नी छ्‍यु लितुपला दा मोडोवी?
LUK 13:16 तुकै यिन्‍सिन लो च्‍याप्‍ग्‍ये सेक शैतानकी खोरो ओङला नरी टानी ज्‍यकुप दी अब्राहामकी गिपा यिन्‍दुप पुम्‍पेजा तीला ङासोप ङ्‍यिमाला पि तोङ्‍गुप मेङ्‍गिवी रो?”
LUK 13:17 येशूकी तुक सुङ्‍सिमा खोकी तेन्‍दोकला लावुतिवा तेरी खक्‍योवा लासुङ। यिने यम्‍बा मी माङ्‍छ्‍योक ति खोकी क्‍या नङ्‍गुप तेरी हलेवु लाकाला गा क्‍यासुङ।
LUK 13:18 लोङ येशूकी सुङ्‍सुङ, “कोन्‍छ्‍योककी ग्‍येल्‍खाप ति काङ च्‍यिन्‍दै यिन? तीला ङ काङ ताङ मुला डिक्‍नी ल्‍हाप?
LUK 13:19 दी ति मी मिरा च्‍यिककी खोरो शिङ खला तपुप राय छेर्माङकी सेन दोके यिन। ती ग्‍यानी दोङ्‍बु ग्‍येर्पु गाल, तमा तीकी यल्‍काला नामगी च्‍यच्‍युमतिवी छाङ जोसुङ।”
LUK 13:20 येलुङ खोकी सुङ्‍सुङ, “लोङ कोन्‍छ्‍योककी ग्‍येल्‍खाप ति ङ काङ ताङ मुला डिक्‍नी ल्‍हाप?
LUK 13:21 ती ति खमीर दोके यिन। पुम्‍पेजा यीकी तीला फे किलो खल्‍ज्‍यिक ताङ ङकी नाङ्‍ला लुक्‍सिमा टम्‍दोक तेरीला बोसुङ।”
LUK 13:22 तमा येशू ग्‍येसा ग्‍येसा ताङ युल युलला येन्‍देन नङ्‍यिन सिरा यरूशलेम नेवा फेप्‍सुङ।
LUK 13:23 ती पेला मी मिरा च्‍यिककी खोला टिसुङ, “चोवो, दिक्‍पा ने थरुप मीतिवा ति चेयी तिराङ वे?” तमा खोकी तिवाला सुङ्‍सुङ,
LUK 13:24 “गच्‍चा वोतुप गो नेमा शुकुपला हुर्ताक की। ङ ख्‍यिराङला सिरिन, मी बङी ती नाङ्‍ला शुकुप छल्‍सिनाङ शुक मुथुपी।
LUK 13:25 तमा खाङ्‍बी ज्‍यिन्‍दाक लानी गो च्‍येन सिन्‍सिमा ख्‍यिराङ ति गे फिला लानी गोला डक डक ग्‍यकिन सिरा, ‘ओ ज्‍यिन्‍दाक, ङ्‍यिराङला गो पेनी।’ सिनी गोङ्‍बा शिवी। यिने ती ज्‍यिन्‍दाककी सिवी, ‘ख्‍यिराङ कनी नेसुर वावु यिन, ङे याङ ख्‍यिराङला ङो राङ माशे।’
LUK 13:26 तमा ख्‍यिरा दुक सिवी, ‘ज्‍यिन्‍दाककी मुला ङ्‍यिरा सोवु यिन, थुवु यिन, तमा ज्‍यिन्‍दाककी ङ्‍यिरा युलला येन्‍देन लाप नङ्‍गुप यिन।’
LUK 13:27 येलुङ तीकी दुक सिवी, ‘ख्‍यिराङ कनी नेसुर वावु यिन, ङे याङ ख्‍यिराङला ङो राङ माशे। ओ ख्‍यिराङ तेरी दुक्‍टा कितुप टेङ, ङ नेसुर ग्‍युक!’
LUK 13:28 ख्‍यिरा अब्राहाम ताङ इसहाक ताङ याकूब ताङ तेरी कोन्‍छ्‍योककी लुङ्‍तेम्‍बातिवा ति कोन्‍छ्‍योककी ग्‍येल्‍खापला वे, यिने खोरुङ ति फिला तेन तङ्‍गुप थोङ्‍गुप पेला ख्‍यिराङ ङुप्‍राङ कियी स मुर्कितो।
LUK 13:29 तमा शरकी थाका नेसुर, नुपकी थाका नेसुर, ल्‍होकी थाका नेसुर, च्‍याङगी थाका नेसुर मीतिवा वानी कोन्‍छ्‍योककी ग्‍येल्‍खापकी डेनला दाक दाक्‍पी दासाला देकिवी।
LUK 13:30 वुतुङ के तिङ्‍ला वोतुपतिवा ति गोमाला ख्‍येल्‍गितो, तमा गोमाला वोतुपतिवा ति तिङ्‍ला ख्‍येल्‍गितो।”
LUK 13:31 ती पेला राङ ललाइ फरिसीतिवा येशूकी चाला वानी, “देसुर थेन्‍नी यम्‍बा दासाला फेप। हेरोदकी ख्‍युरुङला सेतुप छोल्‍गिनोक।” सिनी सिक्‍यासुङ।
LUK 13:32 तमा खोकी तिवाला सुङ्‍सुङ, “गल्‍नी ती च्‍यिप्‍च्‍याङ तीला दुक सी, ‘ङ हारिङ ताङ सला डेतिवा थेन्‍दुप ताङ नेर्पुतिवा टेक ज्‍यिकिवी, तमा ना ति ङे लाका तेरी सिन्‍दा किवी।’
LUK 13:33 यिने हारिङ ताङ सला ताङ ना ति ङ यु युवा राङ दे गोकिवी, च्‍यिलासिसिन चुका कोन्‍छ्‍योककी लुङ्‍तेम्‍बा साङ यरूशलेमला मिसिन यम्‍बा दासाला शि मुथुपी।
LUK 13:34 ओ यरूशलेमकी मीतिवा, ओ यरूशलेमकी मीतिवा, ख्‍यिरा याङ कोन्‍छ्‍योककी लुङ्‍तेम्‍बातिवाला सेतुप ताङ कोन्‍छ्‍योककी ख्‍यिरा ते तङ्‍गुपतिवाला दो थ्‍वोनी बेप्‍किवी। च्‍यमुङकी खोरो च्‍यप्‍रुकतिवाला पुशोक वोक्‍ला रुकुप दोके ङे थेङ्‍मा अलायी ख्‍यिरा आङातिवाला मुला राङ रुकुप छलिन, यिने ख्‍यिराङ माङ्‍येन।
LUK 13:35 ल्‍होसा, तफेन्‍ला कोन्‍छ्‍योककी ख्‍यिरा खाङ्‍बा क्‍युर्नी ज्‍योकितो। चो पेला ख्‍यिरा ‘चोवोकी मिङला फेपुप ति मोलाम थोपुप यिनो।’ मिसिर्वे, ती पेला सेक ख्‍यिरा ङला येलुङ मोथोङ्‍गितो।”
LUK 14:1 ङ्‍यिम्‍ज्‍यिक ङासोप ङ्‍यिमाला येशू फरिसी छ्‍योक्‍पाकी मी छ्‍ये यीकी खाङ्‍बा सोल शेवुला फेप्‍सुङ। ते मीतिवी खोला चिवा क्‍यानी देनोक।
LUK 14:2 ती पेला काङ्‍बा लाक्‍पा बोवु नेर्पु यी खोकी चिप्‍ला नोक।
LUK 14:3 तमा येशूकी यहूदी छ्‍योकी गेकेनतिवा ताङ फरिसीतिवाला टि नाङ्‍सुङ, “ङासोप ङ्‍यिमाला नेर्पु टेक ज्‍यितुप ति कोन्‍छ्‍योककी ठिमला डिकी ताङ मिडिकी?”
LUK 14:4 यिने तिवा खरक्‍पा देसुङ। तमा खोकी ती नेर्पु तीला छ्‍याक ज्‍याक्‍नी टेक च्‍यिनी तीला डो च्‍यिसुङ।
LUK 14:5 ती ज्‍युक्‍ला खोकी तिवाला सुङ्‍सुङ, “ख्‍यिरा पर्ला सी खोरो पुज्‍युङ याङ्‍ना लाङ टोम्‍बी नाङ्‍ला लुम्‍सिन ङासोप ङ्‍यिमाला वोसिनाङ तीला शार्क्येक मेथेन्‍वी रो?”
LUK 14:6 तमा तिवी काङ साङ सि माथुप।
LUK 14:7 ते वावु डेन्‍बुतिवी टाल जिम्‍नी देतुप थोङ्‍नी येशूकी तिवाला दुका पे यी शेन नाङ्‍सुङ।
LUK 14:8 “मी ललाइकी ख्‍युरुङला जेन्‍दीकी डेनला केच्‍या क्‍यासिन टाल जिम्‍नी मादे, च्‍यिलासिसिन ख्‍युरुङ सिनाङ मङ छ्‍ये वोतुप मीला केच्‍या क्‍या वोज्‍यिवी।
LUK 14:9 तुकै यिन्‍सिन ख्‍युरुङ ताङ ती मी छ्‍ये ङ्‍यिकरला केच्‍या क्‍यावु मी ति वानी ख्‍युरुङला ‘खोला ख्‍योरो दासाला दे च्‍यी।’ सिनी सिवी। तमा ख्‍युरुङ ति खक्‍योवा लानी तेरी सिनाङ मला वोतुप दासाला दे गोकिवी।
LUK 14:10 बोरु ख्‍युरुङला केच्‍या कितुप पेला ख्‍युरुङ गल्‍नी तेरी सिनाङ मला वोतुप दासाला दे। तुक क्‍यासिन केच्‍या कितुप मी ति वानी ख्‍युरुङला ‘ओ दाल्‍जा, येला ज्‍यु।’ सिनी सिवी। तमा तेरी डेन्‍बुतिवी मिङ्‍गाला ख्‍युरुङला ताङ्‍देन ङ्‍येकिवी।
LUK 14:11 च्‍यिलासिसिन सी रङला येर देकिवे, ती ति मो बेप्‍किवी। तमा सी रङला मो बेप्‍किवे, ती ति येर देकिवी।”
LUK 14:12 तमा येशूकी खुरुङला केच्‍या क्‍यावु मी तीला साङ दुक सुङ्‍सुङ, “ख्‍योरो टोपला याङ्‍ना गोमुकी डेन कितुप पेला ख्‍योरो दाल्‍जातिवा, ख्‍योरो पिनतिवा, ख्‍योरो छेङ्‍गाछालीतिवा याङ्‍ना युलकी मी छ्‍युक्‍पुतिवाला केच्‍या माकी। तुक क्‍यासिन तिवी साङ ख्‍युरुङला केच्‍या क्‍यानी डेनकी किन्‍बा ख्‍युरुङला लोक्‍नी तेर्किवी।
LUK 14:13 बोरु ख्‍योरो डेन कितुप पेला पेराङ्‍बुतिवा, युक मुथुवुतिवा, थेङ्‍बातिवा ताङ मिक शर्वातिवाला केच्‍या की।
LUK 14:14 तुक क्‍यासिन ख्‍युरुङला मोलाम थोप्‍किवी, च्‍यिलासिसिन तिवी ख्‍युरुङला किन्‍बा लोक्‍नी तेर मुथुपी। यिने कोन्‍छ्‍योककी थोङ्‍दाङला टेङ्‍बु वोतुपतिवा शेप ने सेन्‍बु लङ्‍गुप पेला कोन्‍छ्‍योककी ख्‍युरुङला किन्‍बा लोक्‍नी नङ्‍गिवी।”
LUK 14:15 येशूकी दी ताम्‍ङे सुङ्‍गुप थोसिमा खोकी मुला सापला देतुपतिवी पर ने मिरा च्‍यिककी खोला दुक सिक्‍यासुङ, “सी कोन्‍छ्‍योककी ग्‍येल्‍खापला डेन सेवे, ती ति मोलाम वोतुप यिनो।”
LUK 14:16 ती थोनी येशूकी तीला दुका पे यी नेसुर सुङ्‍सुङ, “दासा यीला मी मिरा च्‍यिककी डेन ग्‍येर्पु यी टडिक क्‍यानी मी बङीला केच्‍या क्‍यानोक।
LUK 14:17 तमा डेन साप पेला लेप्‍सिमा तीकी खोरो लावाला केच्‍या क्‍यावु मीतिवी ते ताङ्‍नी ‘लो, फेवा। त याङ डेन टडिक क्‍या वे।’ सिनी सि च्‍यिसुङ।
LUK 14:18 यिने ती मीतिवा तेरीकी खुङ रे रे क्‍यासुङ, तमा मिरा च्‍यिककी तीला सिक्‍यासुङ, ‘ङे याङ शिङ ङ्‍योनी वे, तीला ल्‍हा डो गोकिवी, सेम्‍ना माकी।’
LUK 14:19 येलुङ यम्‍बा तीकी सिक्‍यासुङ, ‘ङे याङ लाङ पा ङ चोके ङ्‍योनी वे। तीला मोनी ल्‍हापला डोयी वे, सेम्‍ना माकी।’
LUK 14:20 तमा यम्‍बा तीकी सिक्‍यासुङ, ‘ङे याङ मलोक जेन्‍दी क्‍यायी, ती तप्‍की ङ वुङ मुथुपी।’
LUK 14:21 तमा ती लावा ति लोक्‍नी वानी खोरो ज्‍यिन्‍दाकला ती तेरी ताम्‍ङे ति लाप्‍सुङ। ती थोसिमा ज्‍यिन्‍दाक ति छासे ङ्‍यिर्मु लानी लावाला ‘ङमु ग्‍येसाकी लाम ताङ लाम टिक्‍पे नेवा गल्‍नी पेराङ्‍बुतिवा ताङ युक मुथुवुतिवा ताङ शर्वातिवा ताङ थेङ्‍बातिवाला दे टि शोक।’ सिनी योक कुसुङ।
LUK 14:22 ती लावा तीकी तुक क्‍यानी वासिमा ज्‍यिन्‍दाकला सिक्‍यासुङ, ‘ज्‍यिन्‍दाककी योक कुतुप दोके राङ ङे क्‍यायिन, यिने तरोङ साङ दासा वे।’
LUK 14:23 लोङ ज्‍यिन्‍दाककी लावाला सिक्‍यासुङ, ‘लाम ग्‍येर्पु ताङ युलकी लाम टिक्‍पेतिवाला गल्‍नी मीतिवाला उर्च्युम ग्‍यप्‍नी टि वानी ङे खाङ्‍बा क्‍येङ च्‍यी।
LUK 14:24 ङ ख्‍यिराङला सिरिन, गोमाला ङे केच्‍या क्‍यावु मीतिवा सुला साङ ङे डेनकी समी टोवा ल्‍हाप मेङ्‍येवी।’”
LUK 14:25 ङ्‍यिम्‍ज्‍यिक मी माङ्‍छ्‍योक येशूकी मुला डोयी नोक। तमा खोकी तिवी थाकाला ग्‍युर्नी सुङ्‍सुङ,
LUK 14:26 “सु ङे तिङ्‍ला तिङ्‍योकुप नो किवे, तीकी खोरो पपाआमा, पेजापेर्मी, अच्‍युनुप, अज्‍यीनुमतिवा ताङ खोरो मिजीला साङ ङला सिनाङ मङ ङ्‍यिङ्‍ज्‍ये किवी सिसिन ती ति ङे लोमा च्‍युङ मुथुपी।
LUK 14:27 सु खोरो ग्‍यङ्‍शिङ खुर्नी ङे तिङ्‍ला तिङ मोङ्‍योक वे, ती ति ङे लोमा च्‍युङ मुथुपी।
LUK 14:28 ख्‍यिरा पर्ला मिरा च्‍यिककी चिवुर गुतोक यी जोप नो क्‍यासिन ती जोनी सिन्‍दुप चोयी डोसुम ति खोरो लोला वो ताङ मे सिनी गोमाला राङ देनी ची क्‍यानी ल्‍हा मोगोवी रो?
LUK 14:29 तुक माक्‍यानी तीकी डम्‍ज्‍यी तिङ सिन्‍सिमा के तीला जोनी सिन्‍दा कि माथुप्सिन तीला ल्‍हाप मीतिवा तेरीकी ती मी तीला मर्च्या क्‍यानी दुक सिवी,
LUK 14:30 ‘दी मी तीकी जोप याङ गो चुसुङ, यिने सिन्‍दा ति कि माथुप।’
LUK 14:31 येलुङ चुका ग्‍येल्‍वु तीकी यम्‍बा ग्‍येल्‍वी मुला मक ग्‍यक डोप यिन्‍सिन खोरो मुला वोतुप मक्‍मी तोङ्‍डा च्‍यिथम्‍बा तीकी यम्‍बा ग्‍येल्‍वी मक्‍मी तोङ्‍डा खल्‍ज्‍यिक तीकी मुला मक ग्‍यक थुप्‍की ताङ मुथुपी सिनी गोमाला के देनी नासाम मोतोङ्‍गिवी रो?
LUK 14:32 दोजो तीकी मक ग्‍यक मुथुपुप यिन्‍सिन यम्‍बा ग्‍येल्वु थाक्‍रिङ्‍बु राङ वोतुप पेला के खोरो लेन क्‍योलुप मीतिवा ताङ्‍नी थिन्‍दुप सिनी तीला गोङ्‍बा शिवी।
LUK 14:33 दी दोके क्‍यानी सी खोरो लोला वोतुप ति तेरी ङे थोक्‍ला क्‍युर्नी मोज्‍योकवे, ती ति ङे लोमा च्‍युङ मुथुपी।”
LUK 14:34 “छ ति ल्‍यामु यिन, यिने छे टोवा ति तोर्सुङ सिसिन चुक क्‍यानी तीला येलुङ छेटोक जो थुप्‍किवी?
LUK 14:35 ती याङ सला साङ फेन मोथोवी, छ्‍याला साङ फेन मोथोवी। तुक क्‍यानी मीतिवी तीला फिला क्‍युर्किवी। सी ति ङ्‍येन्‍दुप नम्‍ज्‍योक नोके, तीकी ङ्‍येन्‍शी।”
LUK 15:1 ङ्‍यिम्‍ज्‍यिक से दुतुपतिवा ताङ दिक्‍छेनतिवा तेरी येशूकी सुङ ङ्‍येन्‍दुपला खोकी चिप्‍ला जोम्‍नोक।
LUK 15:2 यिने फरिसीतिवा ताङ यहूदी छ्‍योकी गेकेनतिवी मुक्‍तम देनिन सिरा दुक सिक्‍यासुङ, “दी मी तीकी याङ दिक्‍छेनतिवाला गा क्‍यानी तिवी मुला राङ देनी समा शेनोक।”
LUK 15:3 तमा येशूकी तिवाला दी पे ति शेन नाङ्‍सुङ,
LUK 15:4 “ख्‍यिरा पर्ला मी ललाइकी ति लुक सयी च्‍यिक वोज्‍यिवी, तमा तिवी पर्ला लुक च्‍यिक ति तोर्सुङ सिसिन खाल गु ताङ गु तीला चरिनला राङ क्‍युर ज्‍याक्‍नी ती तोरुप लुक तीला माङ्‍येता सेक मोछोल्‍वी रो?
LUK 15:5 तीला ङ्‍येसिमा गा कियी सिरा तीला खोरो पङ्‍दुर ज्‍याक्‍नी
LUK 15:6 खाङ्‍बा खुर्नी गिवी। तमा खोरो दाल्‍जातिवा ताङ युल्‍वातिवाला कताङ्‍नी दुक सिवी, ‘ङे मुला गा की। ङे तोरुप लुक ति ङ्‍येसुङ।’
LUK 15:7 ङ ख्‍यिराङला सिरिन, दी दोके दिक्‍पा ने सेम ग्‍युर मोगोवु मी टेङ्‍बु मिरा खाल गु ताङ गु सिनाङ दिक्‍पा ने सेम ग्‍युरुप मी मिरा च्‍यिककी थोक्‍ला देवाच्‍येनला मङ गा किवी।”
LUK 15:8 “पुम्‍पेजा यीकी ति ङुलकी डप्‍बु च्‍यिथम्‍बा नोक, तिवी पर्ला च्‍यिक ति तोर्सुङ सिसिन तीकी दिप्‍ली च्‍येनी कोमी ग्‍यप्‍नी खाङ्‍बी अर्शा उर्शाला ती तोरुप डप्‍बुला माङ्‍येता सेक मोछोली रो?
LUK 15:9 तमा तीला ङ्‍येसिमा खोरो दाल्‍जातिवा ताङ युल्‍वातिवाला मुला राङ कताङ्‍नी ‘ङ ताङ मुला गा की। ङे तोरुप डप्‍बु याङ ङ्‍येसुङ।’ सिनी सिवी।
LUK 15:10 ङ ख्‍यिराङला सिरिन, दी दोके दिक्‍पा ने खोरो सेम ग्‍युरुप दिक्‍छेन मिरा च्‍यिककी थोक्‍ला कोन्‍छ्‍योककी लेन क्‍योलुप थुतिवा गा किवी।”
LUK 15:11 येलुङ येशूकी सुङ्‍सुङ, “मी मिरा च्‍यिककी ति पुज्‍युङ पिन ङ्‍यी नोक।
LUK 15:12 ङ्‍यिम्‍ज्‍यिक पुज्‍युङ छ्‍युङा तीकी खोरो पपाला ‘पालो, ङला थोप गोवु अंश ति गो नाङ्‍नी।’ सिनी सिक्‍यासुङ। तमा पपा तीकी खोरो टोङ्‍बा ति पुज्‍युङ ङ्‍यिवुला गोनी बिन्‍सुङ।
LUK 15:13 तमा ङ्‍यिमा चेयी ज्‍युक्‍ला ती पुज्‍युङ छ्‍युङा ति खोरुङला थोपुप टोङ्‍बा ति तेरी रुनी थाक्‍रिङ्‍बु लुङ्‍बाला गाल। ते गल्‍नी तीकी सेम नोजु क्‍यानी खोरो टोङ्‍बा ति तेरी ना ताङ्‍सुङ।
LUK 15:14 तीकी तेरी टोङ्‍बा ति सिन्‍दा क्‍यासिमा ती लुङ्‍बाकी तेरी दासाला छासे ङ्‍यिमा मर्वु शर्नी ती ति कतुकारला ख्‍येल्सुङ।
LUK 15:15 तुक क्‍यानी ती ति ती लुङ्‍बाकी मी यीकी ते गल्‍नी लाका लाङ्‍सुङ। तमा तेकी मी तीकी तीला खोरो शिङ खला फाक्‍पा चोपला ताङ्‍सुङ।
LUK 15:16 तीला छासे ल्‍होवा लानी फाक्‍पी सयी वोतुप फाक्‍पी समा यिन्‍सिनाङ सोनी खोरो खोक्‍पा ग्‍येङ्‍गुप नो क्‍यासुङ, यिने सी साङ तीला काङ साप समा माबिन।
LUK 15:17 ती पेला के तीकी टेन्‍बा ङ्‍येनी दुक सिक्‍यासुङ, ‘ङे पाली खाङ्‍बा याङ लावातिवा बङीकी सुप दुन दुन सोनी साङ ल्‍हकिवी। यिने ङ ति दे ल्‍होतुङ्‍बा राङ शेप छाल्‍सुङ।
LUK 15:18 त याङ ङ ङरा पाली चाला गल्‍नी दुक सिरिन, “ओ पालो, ङे कोन्‍छ्‍योक ताङ पाली तेन्‍दोकला दिक्‍पा क्‍यायी।
LUK 15:19 त याङ ङ पाली पुज्‍युङ सि छ्‍योवु मे। ङला पाली लावा मिरा च्‍यिक दोके नोनी ज्‍योक।”’
LUK 15:20 तमा ती खोक लानी खोरो पपी ते गाल। ती ति तरोङ साङ थाक्‍रिङ्‍बु वोतुप पेला राङ पपा तीकी तीला थोङ्‍नी तीला ङ्‍यिङ्‍ज्‍ये लानी छ्‍योङ्‍बाल ग्‍यकिन गल्‍नी पाङ्‍बा तप्‍नी पुका क्‍यासुङ।
LUK 15:21 तमा पुज्‍युङ तीकी पपाला सिक्‍यासुङ, ‘पालो, ङे याङ कोन्‍छ्‍योक ताङ पाली तेन्‍दोकला दिक्‍पा क्‍यायी, तफेन्‍ला ङ याङ पाली पुज्‍युङ सि छ्‍योवु मे।’
LUK 15:22 यिने पपा तीकी लावातिवाला सिक्‍यासुङ, ‘ङमु गल्‍नी तेरी सिनाङ मज्‍या ल्‍यामु ति खुन वानी दीला कोन बिन, थेप्‍तोकला सोर्तुक तान बिन, तमा काङ्‍बाला काचा कोन बिन।
LUK 15:23 तमा लङ्‍डु ग्‍यामु यी सेनी दाक्‍पु डेन कितुप।
LUK 15:24 च्‍यिलासिसिन दी ङे पुज्‍युङ ति शिसुङ, यिने येलुङ सेन्‍बु लासुङ। तोर्सुङ, तमा त याङ ङ्‍येसुङ।’
LUK 15:25 ती पेला पुज्‍युङ छ्‍ये ति शिङ ख नेसुर लोक्‍नी खाङ्‍बी चाला वुङ्‍सालेन्‍सिन लु ताङ छ्‍याम्‍डल के कियी वोतुप वोरु थोसुङ।
LUK 15:26 तमा तीकी लावा यीला कताङ्‍नी, ‘दे काङ च्‍युङ्‍नोक?’ सिनी टिसुङ।
LUK 15:27 तमा लावा तीकी तीला सिक्‍यासुङ, ‘ख्‍योरो नुप लोक्‍नी वासुङ। खो थङ्‍बु राङ लोक्‍नी वावु ख्‍योरो पाली गा क्‍यानी लङ्‍डु ग्‍यामु यी से च्‍यिसुङ।’
LUK 15:28 ती थोसिमा पुज्‍युङ छ्‍ये ति ङ्‍यिर्मु लानी खाङ्‍बी नाङ्‍ला शुकुप साङ माङ्‍येन्‍सुङ। तमा पपा ति पाङ्‍ला राङ वानी तीला लुसुङ।
LUK 15:29 यिने तीकी पपा तीला सिक्‍यासुङ, ‘लो दोजोयी सेक ङे पाली शब्‍ज्‍यी क्‍या देतिन, तमा पाली काङ सुङ्‍गुप ति ङे तेरी ङ्‍येनिन। यिने पाली ङला ङे दाल्‍जातिवी मुला गा कितुपला रेरुक च्‍यिक साङ मनङ वे।
LUK 15:30 यिने छ्‍येमुतिवी मुला शोर्नी पली टोङ्‍बा तेरी ना तोङ्‍गुप दी पली पुज्‍युङ ति लोक्‍नी वासिमा तीकी थोक्‍ला ति लङ्‍डु ग्‍यामु से च्‍यिसुङ।’
LUK 15:31 तमा पपा तीकी तीला सिक्‍यासुङ, ‘पुज्‍यो, ख्‍युरुङ याङ नरी ङ ताङ मुला राङ वे। ङे टोङ्‍बातिवा तेरी ख्‍योरो तिराङ यिन।
LUK 15:32 यिने दी ख्‍योरो नुप याङ शिसुङ, यिने येलुङ सेन्‍बु लासुङ। तोर्सुङ, यिने त याङ ङ्‍येसुङ। तुक क्‍यानी दाक्‍पी गा ताङ किर्मु कि राङ गोकिवी।’”
LUK 16:1 तमा येशूकी खोरो लोमातिवाला सुङ्‍सुङ, “मी छ्‍युक्‍पु यीकी खोरो खाङ्‍बी लाका चेक लावु मी यीला ज्‍याक्‍नोक। तमा ती मी तीकी खोरो टोङ्‍बा ना तोङ्‍गिनोक सिरुप ताम्‍ङे ति ती ज्‍यिन्‍दाककी थोनोक।
LUK 16:2 ती थोसिमा ज्‍यिन्‍दाककी ती मीला कताङ्‍नी दुक सिक्‍यासुङ, ‘ख्‍योरो कोर्ला ङे थोवु दी ताम्‍ङे ति काङ यिन? ख्‍योरे क्‍यावु तेरी ची ति ङला नाङ। तफेन्‍ला ख्‍युरुङ दी लाका कि मुथुपी।’
LUK 16:3 ज्‍यिन्‍दाककी तुक सिक्‍यासिमा ती मी तीकी दुका नासाम यी ताङ्‍सुङ, ‘त याङ ङ काङ कितुप? ज्‍यिन्‍दाककी दी लाका नेमा ङला तेन तोङ्‍गुप छाल्‍सुङ। सशिङ कोपला जुला ङार मे, लङ्‍नी सापला ङोछा लङ्‍गिवी।
LUK 16:4 ए ङोतोक, ङे काङ कि गोकिवी सिनी त हाक्‍कोसुङ। तुक क्‍यासिन ङला दी लाका नेमा तेन तङ्‍सिनाङ मीतिवी ङला तिवी खाङ्‍बा गासो शिवी।’
LUK 16:5 तमा तीकी खोरो ज्‍यिन्‍दाक नेमा छ्‍यावा लङ्‍गुपतिवा रे ताङ रे कताङ्‍नी गोमाला वावु तीला सिक्‍यासुङ, ‘ख्‍युरुङला ङे ज्‍यिन्‍दाककी लाङ गोवु छ्‍यावा ति चो वे?’
LUK 16:6 तीकी सिक्‍यासुङ, ‘नुम लिटर तोङ्‍डा सुम।’ तमा तीकी तीला सिक्‍यासुङ, ‘ल, तमा ख्‍योरो तमसुक लानी टिम्‍बु देनी लिटर सयी च्‍येङा सिनी टी।’
LUK 16:7 तमा तीकी यम्‍बा यीला कताङ्‍नी टिसुङ, ‘ख्‍युरुङला लाङ गोवु छ्‍यावा ति चो वे?’ तीकी सिक्‍यासुङ, ‘ट तवु तोङ्‍डा च्‍यिक।’ तमा तीकी तीला सिक्‍यासुङ, ‘ख्‍योरो तमसुकला तवु सयी ग्‍ये सिनी टी।’
LUK 16:8 तमा ज्‍यिन्‍दाक तीकी ती खोङ्‍तेर्मु मेतुप खोरो खाङ्‍बी लाका चेक लावु मी तीकी किताङ च्‍यङ्‍बु क्‍यावु तप्‍की तीला चिताङ क्‍यासुङ। च्‍यिलासिसिन दी जम्‍बुलिङकी मीतिवी खोप्‍रे पर्ला कितुप किताङ नालु ति ठछ्‍येलीकी गिपाकी मीतिवी ति सिनाङ मङ च्‍यङ्‍बु गिवी।
LUK 16:9 ङ ख्‍यिराङला सिरिन, दी जम्‍बुलिङकी टोङ्‍बा थ्‍वोनी दाक दाक्‍पी थोक्‍ला दाल्‍जातिवा जो, तमा ती टोङ्‍बा सिन्‍सिमा तिवी ख्‍यिराङला नरी लुवु दासाला गासो शुकिवी।”
LUK 16:10 “सु ताम्‍ङे चेयीला खोङ्‍तेर्मु गिवे, ती ति ताम्‍ङे बङीला साङ खोङ्‍तेर्मु गिवी। तमा सु ताम्‍ङे चेयीला खोङ्‍तेर्मु मेवे, ती ति ताम्‍ङे बङीला साङ खोङ्‍तेर्मु मेङ्‍गिवी।
LUK 16:11 तुक क्‍यानी दोजो ख्‍यिराङ जम्‍बुलिङकी टोङ्‍बाला खोङ्‍तेर्मु मेसुङ सिसिन सी देवाच्‍येनकी टोङ्‍बा टेङ्‍बु ति ख्‍यिराङला चेक तेकिवी?
LUK 16:12 तमा ख्‍यिराङ मी यम्‍बी टोङ्‍बाला खोङ्‍तेर्मु मेसुङ सिसिन सी ख्‍यिराङला थोप गोवु रङगी टोङ्‍बा ति तेर्किवी?
LUK 16:13 लावा च्‍यिककी ज्‍यिन्‍दाक ङ्‍यीला शब्‍ज्‍यी कि मुथुपी। तीकी च्‍यिकला ति ङ्‍यिङ्‍मर किवी, यम्‍बाला ति ङ्‍यिङ्‍ज्‍ये किवी। याङ्‍ना च्‍यिकला ति तेन्‍गिवी, यम्‍बाला ति ङ्‍यप्‍च्‍ये किवी। ती दोके क्‍यानी ख्‍यिराङ कोन्‍छ्‍योक ताङ टोङ्‍बा ङ्‍यिकरला शब्‍ज्‍यी कि मुथुपी।”
LUK 16:14 ती ताम्‍ङे थोनी टङ्‍गाला देर्पा कितुप फरिसीतिवी येशूला मर्च्या क्‍यासुङ।
LUK 16:15 तमा येशूकी तिवाला सुङ्‍सुङ, “ख्‍यिराङ ति मीतिवी मिङ्‍गाला खोरुङ राङ टेङ्‍बु यिन सिनी छ्‍या देन्‍गिवी। यिने कोन्‍छ्‍योककी ख्‍यिरा सेम चुकै वे सिरुप ति हाक्‍कोकिवी। मीतिवी छासे खक्‍छ्‍येवु वे सिनी नो कितुपतिवाला ति कोन्‍छ्‍योककी छासे क्‍युक्‍टो किवी।”
LUK 16:16 “मोशाकी ठिम ताङ कोन्‍छ्‍योककी लुङ्‍तेम्‍बातिवी येन्‍देनला तेन्‍दुप ति बप्‍तिस्‍मा तेरुप यूहन्‍ना वुङ्‍गुप सेक तिराङ यिन। ती ज्‍युक्‍ला ति कोन्‍छ्‍योककी ग्‍येल्‍खापकी लेन ल्‍यामु ति ख्‍याप्‍टाक कियी नोक, तमा तेरी मीतिवा ती नाङ्‍ला उर्च्युम ग्‍यप्‍नी शुकिनोक।
LUK 16:17 कोन्‍छ्‍योककी ठिम नेमा छिक च्‍यिक तोरुप सिनाङ स ताङ नाम तोरुप ति मङ जोल्‍हमु गिवी।
LUK 16:18 सी खोरो पेर्मी क्‍युर ज्‍याक्‍नी यम्‍बा पुम्‍पेजा ताङ मुला जेन्‍दी किवे, ती मी तीकी शम्‍डेन कितुप यिन। तमा सी मी यम्‍बाकी क्‍युर्नी ज्‍यकुप पुम्‍पेजाला जेन्‍दी किवे, ती मी तीकी साङ शम्‍डेन कितुप राङ यिन।”
LUK 16:19 “दासा यीला मी छ्‍युक्‍पु यी नोक। ती ति मज्‍या ल्‍यामु ल्‍यामु कोन्‍नी ङ्‍यिमी टेङ छासे किर्मु क्‍यानी मिजी क्‍योङ्‍गिनोक।
LUK 16:20 तीकी खाङ्‍बी गे चाला लाजरस सिरुप जु तेरीला म तिराङ थेन्‍दुप लाङ्‍साप मी यी देकिनोक।
LUK 16:21 तमा तीकी मी छ्‍युक्‍पुकी च्‍योक्‍ची ख नेमा लुम्‍बुप पुर्मातिवा सोनी खोरो खोक्‍पा ग्‍येङ्‍गुप नो किनोक। ते कीतिवा साङ वानी तीकी म ति लकिनोक।
LUK 16:22 ज्‍युक्‍ला ती लाङ्‍साप ति शिसुङ, शिसिमा देवाच्‍येनकी लेन क्‍योलुप थुतिवी तीला अब्राहामकी चाला खुर्नी गाल्‍सुङ। ती मी छ्‍युक्‍पु तिङ शिनी मुक्‍तुम ग्‍यप्‍सुङ।
LUK 16:23 तमा ती ति ङ्‍येलाला लुम्‍नी कशेन छेटाङ खुर्सुङ। ती पेला तीकी येर केला ल्‍हासालेन्‍सिन थाक्‍रिङ्‍बुला अब्राहामला थोङ्‍सुङ, तमा तीकी चाला लाजरस वोतुप थोङ्‍सुङ।
LUK 16:24 तमा ती मी छ्‍युक्‍पु तीकी थोर ग्‍यप्‍नी, ‘ओ पपा अब्राहाम, ङला च्‍यम्‍बा क्‍यानी लाजरसला दे तोङ्‍नी। तीकी लाक्‍पी थेप्‍तोक गो नेमा छ्‍यु पानी ङे च्‍येलाक सिल सङ्‍मु जो च्‍यी। ङ याङ दे मेवुर नाङ्‍ला कशेन छेटाङला ख्‍येल्‍नी वे।’ सिनी सिक्‍यासुङ।
LUK 16:25 यिने अब्राहामकी तीला सिक्‍यासुङ, ‘पुज्‍यो, ख्‍युरुङ नासाम तोङ। ख्‍युरुङ सेन्‍बु वोतुप पेला तेरी गा ताङ किर्मु कितुप ङ्‍येनी वे। यिने दी लाजरस तीकी याङ दुक्‍पा बङी खुर्सुङ। यिने त याङ दीला किर्मु ङ्‍येन वे, ख्‍युरुङ ति छेटाङला ख्‍येल वे।
LUK 16:26 तोजो तिराङ मिन, ङ्‍यिराङ ताङ ख्‍योरो पर्ला छासे मुक्‍तुम तिङ्‍मो यी वे। तुक क्‍यानी दे नेसुर ख्‍योरो ते डोप नो कितुपतिवा साङ डो मुथुपी, तेसुर दे ङ्‍यिरा ते छुर्केन वुङ साङ मुथुपी।’
LUK 16:27 येलुङ ती छ्‍युक्‍पु तीकी सिक्‍यासुङ, ‘तुकै यिन्‍सिन पपो, ङ ख्‍युरुङला गोङ्‍बा शोयी। ती लाजरसला ङे पाली खाङ्‍बा तोङ।
LUK 16:28 ङे अच्‍युनुप पिन ङ वे। तीकी तिवाला च्‍याङ्‍से क्‍यानी दे च्‍यिनी तिवा दी छेटाङ ख्‍येलुप दासाला वुङ मेख्‍येल्‍शी।’
LUK 16:29 यिने अब्राहामकी सिक्‍यासुङ, ‘तिवी मुला याङ मोशा ताङ कोन्‍छ्‍योककी लुङ्‍तेम्‍बातिवा वे, तुक क्‍यानी तिवी ताम्‍ङे ङ्‍येन्‍शी।’
LUK 16:30 तीकी सिक्‍यासुङ, ‘मिन्‍पा, पपा अब्राहाम! शेपतिवी पर ने मी ललाइ सेन्‍बु लानी तिवी ते गल्‍सिन तिवी दिक्‍पा ने सेम ग्‍युर्किवी।’
LUK 16:31 अब्राहामकी तीला सिक्‍यासुङ, ‘तिवी मोशा ताङ कोन्‍छ्‍योककी लुङ्‍तेम्‍बाकी ताम्‍ङे मेङ्‍येन्‍सुङ सिसिन शेप ने ललाइ सेन्‍बु लासिनाङ तेपा मिकिवी।’”
LUK 17:1 येशूकी खोरो लोमातिवाला सुङ्‍सुङ, “मीतिवाला दिक्‍पा कि ज्‍यितुप ताम्‍ङेतिवा ति वुतुङ के ख्‍येल्‍गिवी, यिने तुक कि ज्‍यितुप मीला याङ मोताप शुकिवी।
LUK 17:2 दी छ्‍युङातिवी पर्ला मिरा च्‍यिकला दिक्‍पा कि ज्‍यितुप सिनाङ बोरु तीकी ज्‍यिङ्‍बी लोला लाकुर ग्‍येर्पु रानी ग्‍येम्‍छो नाङ्‍ला क्‍युरुप ति तीकी थोक्‍ला ल्‍यामु गिवी।
LUK 17:3 तुक क्‍यानी ख्‍यिराङ च्‍याङ्‍से देता। दोजो ख्‍योरो अच्‍युनुपतिवी दिक्‍पा क्‍यासुङ सिसिन तीला वोरु तेन, तमा तीकी दिक्‍पा ने सेम ग्‍युर्सुङ सिसिन तीला माफ बिन।
LUK 17:4 तीकी ख्‍योरो तेन्‍दोकला ङ्‍यिमाला थेङ्‍मा दिन्‍कर दिक्‍पा क्‍यानी थेङ्‍मा दिन्‍कर ख्‍योरो चाला वानी, ‘ङ दिक्‍पा ने सेम ग्‍युरिन।’ सिक्‍यासिन तीला माफ बिन।”
LUK 17:5 तमा लोमा च्‍यिङ्‍ङीतिवी येशूला सिक्‍यासुङ, “ङ्‍यिरा तेपा ति फेल च्‍यी।”
LUK 17:6 तमा खोकी तिवाला सुङ्‍सुङ, “ख्‍यिराङला राय डुमा चोयी तेपा वोतुप यिन्‍सिन दी किम्‍बुकी दोङ्‍बु तीला ‘पिनी ग्‍येम्‍छो नाङ्‍ला चु।’ सिक्‍यासिन तुकै राङ च्‍युङ्‍गिवी।”
LUK 17:7 “ख्‍यिरा पर्ला ललाइकी ति शिङ मोतुप याङ्‍ना लुक चोप लावा यी वोज्‍यिवी। ती लावा ति पाङ नेसुर खाङ्‍बा लोक्‍नी वुङ्‍गुप पेला तीला ‘ङमु वानी सापला दे।’ सिनी सिरुप मी वे रो?
LUK 17:8 बोरु तीला ‘ङे समा टडिक की। तमा ङ साप ताङ थुङ्‍गुप पेला ख्‍युरुङ ङला शब्‍ज्‍यी की, तमा तिराङ ख्‍युरुङ सो।’ सिनी मिसिवी रो?
LUK 17:9 खोरो योक कुतुप लाका तेरी ती लावाकी क्‍यावु तप्‍की तीला थुचिछे सिवी रो?
LUK 17:10 तुक राङ क्‍यानी ख्‍यिराङ साङ योक कुतुप लाका तेरी क्‍यानी सिन्‍सिमा, ‘ङ्‍यिराङ याङ फेन मोथोवु लावा यिन, ङ्‍यिरा याङ कि गोवु लाका क्‍यावु तिराङ यिन।’ सिनी सी।”
LUK 17:11 तमा येशू यरूशलेम फेपिन कितुप पेला सामरिया ताङ गालील लुङ्‍बाकी सन्‍छम नेवा क्‍यानी फेप्‍सुङ।
LUK 17:12 खो युल यीला शुक्‍सालेन्‍सिन ते जे ग्‍यपुप मी मिरा च्‍यिथम्‍बाला ठेसुङ। तिवी थाक्‍रिङ्‍बु नेसुर लानी
LUK 17:13 थोर ग्‍यप्‍नी दुक सिक्‍यासुङ, “ओ गेकेन येशू, ङ्‍यिराङला च्‍यम्‍बा नङ्‍डे की।”
LUK 17:14 तिवाला थोङ्‍सिमा खोकी सुङ्‍सुङ, “ख्‍यिराङ गल्‍नी कोङ्‍यारतिवाला ख्‍यिरा जु छ्‍या तेन।” तमा तिवा लामला डोयी कितुप पेला राङ तिवी नेजु ति टेक्‍सुङ।
LUK 17:15 तमा तिवी पर्ला मिरा च्‍यिककी खोरुङ टेकुप ति थोङ्‍सिमा थोर ग्‍यप्‍नी कोन्‍छ्‍योकला सोवा देकिन सिरा लोक्‍नी वासुङ।
LUK 17:16 तमा तीकी येशूकी शापला शावा क्‍यानी खोला थुचिछे पुल्‍सुङ। ती मी ति सामरी मी यिनोक।
LUK 17:17 येशूकी तीला सुङ्‍सुङ, “मिरा च्‍यिथम्‍बा टेकुप मिन? यम्‍बा मिरा गु ति कनी वे?
LUK 17:18 काङ दी यम्‍बा लुङ्‌बाकी मी च्‍यिक मिसिन लोक्‍नी वानी कोन्‍छ्‍योकला सोवा देकुप ति यम्‍बा सु साङ मे?”
LUK 17:19 तमा खोकी तीला सुङ्‍सुङ, “त लानी ग्‍युक। ख्‍योरो तेपा क्‍यावु तप्‍की ख्‍युरुङ टेक्‍सुङ।”
LUK 17:20 थेङ्‍मा यी फरिसीतिवी येशूला कोन्‍छ्‍योककी ग्‍येल्‍खाप नम गिवी सिनी टिसिमा खोकी तिवाला दुक सुङ्‍सुङ, “कोन्‍छ्‍योककी ग्‍येल्‍खाप ति ख्‍यिरा मिककी थोङ्‍गुप दोके क्‍यानी मेङ्‍गिवी,
LUK 17:21 तमा ‘ल्हो ताङ, ती ति दे वे।’ याङ्‍ना ‘ती ति ते वे।’ सि मुथुपी, च्‍यिलासिसिन कोन्‍छ्‍योककी ग्‍येल्‍खाप ति ख्‍यिरा पर्ला राङ वे।”
LUK 17:22 ती ज्‍युक्‍ला येशूकी लोमातिवाला सुङ्‍सुङ, “तुका तुजे यी गिवी, ती पेला ख्‍यिरा ङ मी पुज्‍युङकी तुजेला ङ्‍यिमा च्‍यिक यिन्‍सिनाङ ल्‍हाप नो किवी, यिने ल्‍हाप मेङ्‍येवी।
LUK 17:23 मीतिवी ख्‍यिराङला ‘ल्‍होसा, खो याङ ते वे।’ याङ्‍ना ‘खो याङ दे वे।’ सिवी। यिने ख्‍यिराङ तिवी तिङ्‍ला माडो।
LUK 17:24 चिलाम नामगी पटी यी थाका नेसुर यम्‍बा थाका सेक ग्‍यप्‍नी तेरी ठछ्‍येली डोप दोके ङ मी पुज्‍युङ साङ खोरो तुजेला तुकै राङ क्‍यानी छ्‍या देनिन।
LUK 17:25 यिने दुकै च्‍युङ्‍गुप सिनाङ गोमाला ङे छेटाङ मङ्‍मु खुर गोकिवी, तमा दी गिपाकी मीतिवी ङे तेन्‍दोकला लङ्‍गिवी।
LUK 17:26 नोआकी ङोला चुकै च्‍युङ वे, ङ मी पुज्‍युङकी तुजेला साङ तुकै राङ च्‍युङ्‍गितो।
LUK 17:27 नोआ टी नाङ्‍ला माशुवा सेक्‍ला मीतिवा साप ताङ थुङ्‍गुप ताङ जेन्‍दी कियी नोक। ती पेला राङ छ्‍यर्वा ग्‍येर्पु ग्‍यप्‍नी तिवा तेरीला ना ताङ्‍सुङ।
LUK 17:28 लोतकी ङोला साङ तुकै राङ च्‍युङ्‍सुङ। मीतिवा साप ताङ थुङ्‍गुप ताङ ङ्‍योप्‍चे ग्‍यकुप ताङ सप्‍ले देपुप ताङ खाङ्‍बा जोयी नोक।
LUK 17:29 तमा लोत सदोम नेसुर थेन्‍दुप छेर्मु देवाच्‍येन नेमा मे ताङ तुसोक ग्‍यप्‍नी तेरीला ना ताङ्‍सुङ।
LUK 17:30 ङ मी पुज्‍युङ वुङ्‍गुप पेला साङ तुकै राङ डितो।
LUK 17:31 ती छेर्मु खाङ्‍बी खाते खला वोतुप मी तीकी खाङ्‍बी नाङ्‍ला खोरो च्‍यालकतिवा वोसिनाङ तिवा थेन्‍दुपला मर मपप्‍शी। तुक राङ क्‍यानी शिङ खला वोतुपतिवा खाङ्‍बा लोक्‍नी मोडोशी।
LUK 17:32 लोतकी पेर्मीला नासाम तोङ।
LUK 17:33 सी खोरो मिजी र्‍होकुप छोल्‍गिवे, ती ति तोर्किवी। तमा सी खोरो मिजी तोर ज्‍यिकिवे, ती ति र्‍होकिवी।
LUK 17:34 ङ ख्‍यिराङला सिरिन, ती नुपला मिरा ङ्‍यी ङ्‍यिलोकुप दासा च्‍यिकला मुला राङ ङ्‍यिलोक्‍नी वोतुप पेला मिरा च्‍यिक ति टिनी डिवी, मिरा च्‍यिक ति क्‍युर्नी ज्‍योकिवी।
LUK 17:35 येलुङ पुम्‍पेजा मिरा ङ्‍यी मुला राङ फे तकिन वोतुप पेला मिरा च्‍यिक ति टिनी डिवी, मिरा च्‍यिक ति क्‍युर्नी ज्‍योकिवी।
LUK 17:36 तुक राङ क्‍यानी मिरा ङ्‍यी शिङ खला वोतुप पेला मिरा च्‍यिक ति टिनी डिवी, मिरा च्‍यिक ति क्‍युर्नी ज्‍योकिवी।”
LUK 17:37 तमा लोमातिवी येशूला “चोवो, ती ति कनी च्‍युङ्‍गिवी?” सिनी टिसुङ। खोकी तिवाला सुङ्‍सुङ, “कनी शेप सेम्‍ज्‍येन नोके, ते राङ गिक्‍तातिवा जोम्‍गिवी।”
LUK 18:1 ती ज्‍युक्‍ला येशूकी खोरो लोमातिवाला नरी मोपोर कि गोकिवी, तमा यी छ्‍येता कितुप मेङ्‍गिवी सिरुप कोर्ला खोकी दुका पे यी सुङ्‍सुङ,
LUK 18:2 “ग्‍येसा यीला कोन्‍छ्‍योकला साङ ज्‍यिवा मिकिवु ताङ मीला साङ ङ्‍याम मिकिवु ठिम कितुप मी यी नोक।
LUK 18:3 ती ग्‍येसाला पेर्मी युक्‍सिम यी नोक। ती ति ठिम कितुप मी ते नरीकी नरी वानी, ‘ङे तेन्‍दोकला लावु ड नेसुर ङला ठिम क्‍या नाङ।’ सिनी डिनोक।
LUK 18:4 ङ्‍यिमा अलायी सेक याङ ती ठिम कितुप तीकी पेर्मी युक्‍सिमकी ताम्‍ङे माङ्‍येन। यिने ज्‍युक्‍ला तीकी खोरो सेमला ‘ङ कोन्‍छ्‍योकला साङ ज्‍यिवा मिकी, मीला साङ ङ्‍याम मिकी,
LUK 18:5 यिन्‍सिनाङ दी पेर्मी युक्‍सिम तीकी नरी ङला छेरा लोङ्‍गुप तप्‍की ङ दीला ठिम क्‍यानी तेरिन, मिसियाङ दी ति नरी वानी ङे शा ताङ ठक तेरी सेवी।’ सिनी सिक्‍यासुङ।”
LUK 18:6 लोङ चोवोकी सुङ्‍सुङ, “ती ठिम कितुप मी मेटेङ्‍बु तीकी काङ सिनोक, ङ्‍येना।
LUK 18:7 काङ कोन्‍छ्‍योकला ङ्‍यी ताङ नुप्‍ज्‍या गोङ्‍बा शोप खोरे पेतुपतिवी थोक्‍ला खोकी ठिम फिमु क्‍या नङ्‍गिवी रो?
LUK 18:8 ङ ख्‍यिराङला सिरिन, खोकी टिम्‍बु राङ तिवाला ठिम टेङ्‍बु ङ्‍ये ज्‍यिकिवी। यिने ङ मी पुज्‍युङ वुङ्‍गुप पेला जम्‍बुलिङला तेपा ठेकिवी रो?”
LUK 18:9 खुरुङला राङ टेङ्‍बु यिन सिनी तेन्‍तेन क्‍यानी मी यम्‍बा तेरीला ङ्‍यप्‍च्‍ये कितुपतिवाला येशूकी दी पे ति शेन नाङ्‍सुङ,
LUK 18:10 “मी मिरा ङ्‍यी मोपोर कितुपला यहूदी ल्‍हङाङला गाल्‍नोक। मिरा च्‍यिक ति फरिसी यिनोक, तमा यम्‍बा ति से दुतुप मी यिनोक।
LUK 18:11 तमा फरिसी ति खोक लानी सेमला दुक सिनी मोपोर क्‍यासुङ, ‘कोन्‍छ्‍योक, ङ थुचिछे बुलिन। ङ याङ मी यम्‍बी ति ठोकुप ताङ जिनोक जोप ताङ शम्‍डेन कितुप मी दोके मे, दी से दुतुप दोके साङ मे।
LUK 18:12 ङ ङ्‍यिमा दिनकी नाङ्‍ला थेङ्‍मा ङ्‍यी ङ्‍युङ्‍ने र्‍हुङ्‍यिन, तमा ङला थोपुप तेरी च्‍यालकतिवी नाङ ने दशांश ति कोन्‍छ्‍योकला बुलिन।’
LUK 18:13 यिने से दुतुप ति थाक्‍रिङ्‍बुला लानी देवाच्‍येन ने मिक साङ माल्‍हावा क्‍यानी छेकोक दुङ्‍यिन सिरा दुक सिक्‍यासुङ, ‘ओ कोन्‍छ्‍योक, ङ दिक्‍छेनला च्‍यम्‍बा नङ्‍डे की।’
LUK 18:14 ङ ख्‍यिराङला सिरिन, कोन्‍छ्‍योककी ती मी तीला मी यम्‍बा सिनाङ टेङ्‍बु वे सिनी खोरे सेमला लासुङ, तमा ती ति खोरो खाङ्‍बा गाल। च्‍यिलासिसिन सी खुरुङला येर देकिवे, ती ति मो बेप्‍किवी। तमा सी खुरुङला मो बेप्‍किवे, ती ति येर देकिवी।”
LUK 18:15 मीतिवी आङा टिक्‍पेतिवाला साङ येशूकी चाला टि वानी खोकी तिवाला रेक्‍शी सिनी नो क्‍यानोक। ती थोङ्‍सिमा लोमातिवी तिवाला वोरु तेन्‍सुङ।
LUK 18:16 यिने येशूकी ती आङातिवाला खोरो चिप्‍ला कताङ्‍नी सुङ्‍सुङ, “आङा टिक्‍पेतिवाला ङे चाला वुङ च्‍यी, तिवाला माग्‍येक। च्‍यिलासिसिन कोन्‍छ्‍योककी ग्‍येल्‍खाप ति दिवी ति यिन।
LUK 18:17 ङ ख्‍यिराङला टेङ्‍बो सिरिन, चुका मी तीकी दी आङा टिक्‍पेतिवी दोके कोन्‍छ्‍योककी ग्‍येल्‍खाप खोरो सेमला मिलिङ वे, ती ति ती नाङ्‍ला शुक मुथुपी।”
LUK 18:18 ङ्‍यिम्‍ज्‍यिक यहूदी गोमा कितुप मी छ्‍ये यीकी येशूला दुक सिनी टिसुङ, “ओ गेकेन टेङ्‍बु, नाम्‍साङ मिशिवु मिजी ङ्‍येतुपला ङे काङ कि गोकिवी?”
LUK 18:19 तमा येशूकी तीला सुङ्‍सुङ, “ख्‍युरुङ च्‍यिला ङला टेङ्‍बु सिवी? कोन्‍छ्‍योक मिसिन यम्‍बा सु साङ टेङ्‍बु मे।
LUK 18:20 ख्‍युरुङला कोन्‍छ्‍योककी नङ्‍गुप दी कतिवा याङ छ्‍या वोज्‍यिवी, ‘शम्‍डेन माकी, मी मासे, कुन माकी, पङ्‍बु जिनोक माजो, रङगी पपाआमाला ताङ्‍देन की।’”
LUK 18:21 तमा तीकी सिक्‍यासुङ, “ती तेरी कतिवा याङ ङ टिक्‍पे वोतुप पेला नेज्‍युन तेरी तेन वे।”
LUK 18:22 ती थोसिमा येशूकी तीला सुङ्‍सुङ, “ख्‍युरुङला तरोङ साङ ताम्‍ङे च्‍यिक ङ्‍युङ्‍मु वे। ख्‍योरो मुला वोतुप टोङ्‍बातिवा तेरी चोनी पेराङ्‍बुतिवाला गोनी बिन। तुक क्‍यासिन ख्‍युरुङला देवाच्‍येनला टोङ्‍बा थोप्‍किवी। तमा वानी ङे तिङ्‍ला तिङ्‍योक।”
LUK 18:23 ती ताम्‍ङे थोसिमा ती मी ति छासे सेम्‍दुक क्‍यासुङ, च्‍यिलासिसिन ती ति छासे मी छ्‍युक्‍पु यिनोक।
LUK 18:24 तीकी सेम्‍दुक क्‍यावु थोङ्‍सिमा येशूकी सुङ्‍सुङ, “मी छ्‍युक्‍पुला कोन्‍छ्‍योककी ग्‍येल्‍खापला शुकुप छासे कले वे,
LUK 18:25 वुतुङ के मी छ्‍युक्‍पुला कोन्‍छ्‍योककी ग्‍येल्‍खापला शुकुप सिनाङ सेम्‍ज्‍येन वोङ्‍मुला खपकी मिरु नाङ नेवा शुकुप ति जोल्‍हमु गिवी।”
LUK 18:26 तमा ती सुङ ङ्‍येन्‍नी देतुप मीतिवी खोला टिसुङ, “तमा सु ति थर थुप्‍किवी ताङ?”
LUK 18:27 येशूकी सुङ्‍सुङ, “मीकी कि मुथुपुप लाका ति कोन्‍छ्‍योककी कि थुप्‍किवी।”
LUK 18:28 तमा पत्रुसकी सिक्‍यासुङ, “ल्‍हो ताङ, ङ्‍यिरा याङ रङगी तेरी क्‍युर ज्‍याक्‍नी गेकेनकी तिङ्‍ला तिङ्‍यायिन।”
LUK 18:29 तमा येशूकी तिवाला सुङ्‍सुङ, “ङ ख्‍यिराङला टेङ्‍बो सिरिन, कोन्‍छ्‍योककी ग्‍येल्‍खापकी थोक्‍ला सी खोरो खाङ्‍बा, पेर्मी, अच्‍युनुप, पपाआमा ताङ पुज्‍युङपुम क्‍युर्नी ज्‍योकिवे,
LUK 18:30 तीला दी कल्‍वाला दोम्‍बा बङी मङ थोप्‍किवी, तमा त वुङ्‍गुप कल्‍वाला नाम्‍साङ मिशिवु मिजी थोप्‍किवी।”
LUK 18:31 तमा येशूकी लोमा च्‍यिङ्‍ङीतिवाला कुतुक टि गल्‍नी सुङ्‍सुङ, “ल्‍होसा, दाक्‍पु यरूशलेम नेवा डोयी वे। मी पुज्‍युङकी कोर्ला कोन्‍छ्‍योककी लुङ्‍तेम्‍बातिवी टिवु तेरी ताम्‍ङे ति छेकितो।
LUK 18:32 ती ति यहूदी मिन्‍दुप मिरिक यम्‍बातिवी लकला ख्‍येल्‍गितो। तमा तिवी तीला मारे ताङ्‍नी ङोशी मारेला तोङ्‍यिन सिरा छ्‍यिन्‍दुर ग्‍यकितो।
LUK 18:33 तिवी तीला कोङ किन्‍नी सेकितो। यिने ङ्‍यिमा सुमकी ज्‍युक्‍ला ती ति येलुङ सेन्‍बु लङ्‍गितो।”
LUK 18:34 यिने लोमातिवी ती ताम्‍ङे ति च्‍यिक साङ हाक्‍माको। च्‍यिलासिसिन ती ताम्‍ङेकी तेन्‍दोक ति छ्‍याकला राङ ज्‍याक्‍नोक, तुक क्‍यानी खोकी काङ सुङ्‍गुप यिन सिनी तिवी हाक राङ माको।
LUK 18:35 ती ज्‍युक्‍ला येशू यरीहो चाला लेपुप पेला ते मी मिक शर्वा यी लामकी गारीला देनी लोङ्‍यिन नोक।
LUK 18:36 मी माङ्‍छ्‍योक ती लाम नेवा डोयी कितुप थोनी तीकी “दे काङ च्‍युङ्‍गुप यिन?” सिनी टिसुङ।
LUK 18:37 तमा मीतिवी तीला “नासरतकी येशू देसुर फेपिन वे।” सिक्‍यासुङ।
LUK 18:38 ती थोसिमा तीकी थोर ग्‍यप्‍नी, “ओ दाऊदकी सेवु येशू, ङला च्‍यम्‍बा नङ्‍डे की।” सिनी सिक्‍यासुङ।
LUK 18:39 गोमा गोमाला डोयी कितुप मीतिवी तीला खरक्‍पा दे सिनी वोरु तेन्‍सुङ। यिने तीकी मङ थोर ग्‍यप्‍नी, “ओ दाऊदकी सेवु येशू, ङला च्‍यम्‍बा नङ्‍डे की।” सिनी सिक्‍यासुङ।
LUK 18:40 तमा येशू फेपिन फेपिन टङी ज्‍युनी तीला खोरो चाला टि शोक सिनी क नाङ्‍सुङ। ती ति चाला वासिमा खोकी तीला टिसुङ,
LUK 18:41 “ख्‍योरो थोक्‍ला ङे काङ किशी सिरुप नो वे?” तमा तीकी सिक्‍यासुङ, “चोवो, ङे मिक ति थोङ थुप्‍शी सिरुप नो वे।”
LUK 18:42 येशूकी तीला सुङ्‍सुङ, “ख्‍योरो मिक थोङ्‍गुप ङ्‍येशी। ख्‍योरो तेपाकी ख्‍युरुङ टेक्‍सुङ।”
LUK 18:43 खोकी तुक सुङ्‍लुङ्‍मे तीकी मिक ति थोङ्‍गुप गल्‍नी कोन्‍छ्‍योकला सोवा देकिन खोकी तिङ्‍ला तिङ्‍यासुङ। ती थोङ्‍गुप तेरी मीतिवी साङ कोन्‍छ्‍योकला सोवा तेक्‍सुङ।
LUK 19:1 तमा येशू यरीहोला शुनी तेसुर फेपिन नोक।
LUK 19:2 ते जखायस सिरुप से दुतुप मी छ्‍ये यी नोक, ती ति छ्‍युक्‍पु यिनोक।
LUK 19:3 तीकी येशू सु यिनाङ सिनी ल्‍हाप नो क्‍यासुङ, यिने मी माङ्‍छ्‍योक वोतुप तप्‍की येशूला थोङ माथुप, च्‍यिलासिसिन ती ति ओङ्‍बु टिक्‍पे नोक।
LUK 19:4 तुक क्‍यानी ती ति येशूला ल्‍हापला गोमा कोर्नी टिम्‍बु टिम्‍बु छ्‍योङ्‍बाल ग्‍यम गल्‍नी अन्‍जीरकी दोङ्‍बी गोला जेसुङ, च्‍यिलासिसिन येशू ती लाम नेवा राङ क्‍यानी फेपिन नोक।
LUK 19:5 तमा येशू ती दासाला राङ लेप्‍सिमा येर केला ल्‍हानी तीला सुङ्‍सुङ, “ओ जखायस, ङमु मर पाप्‍नी शोक। हारिङ ङ ख्‍योरो खाङ्‍बा दे गोकिवी।”
LUK 19:6 तमा जखायस ति शार्क्येक मर पाम वानी गा कियी सिरा खोला गासो शुसुङ।
LUK 19:7 ती थोङ्‍नी तेरी मीतिवा मुक्‍तम देनिन सिरा “ती मी याङ मी दिक्‍छेनकी खाङ्‍बा के शासा देतुपला गाल्‍सुङ।” सिनी सिक्‍यासुङ।
LUK 19:8 यिने जखायसकी खोक लानी चोवोला सिक्‍यासुङ, “चोवो, ल्‍होसा! त याङ ङ ङे टोङ्‍बा फेका यी पेराङ्‍बुतिवाला गोनी तेरिन। तमा ङे मी ललाइला क्‍येन्‍नी काङ रे च्‍यिक रे ठोवु वोसिन तीकी दोम्‍बा ज्‍यी फर लोक्‍नी तेरिन।”
LUK 19:9 तमा येशूकी जखायसला सुङ्‍सुङ, “हारिङ दी खाङ्‍बी तेरी मीतिवा दिक्‍पा ने थार्सुङ। च्‍यिलासिसिन दी मी साङ अब्राहामकी गिपा राङ यिन।
LUK 19:10 ङ मी पुज्‍युङ याङ तोरुपतिवाला छल्‍नी र्‍होकुपला वावु यिन।”
LUK 19:11 तमा मीतिवी ती सुङ ङ्‍येनिन वोतुप पेला येशूकी तिवाला पे च्‍यिक शेन नाङ्‍सुङ। च्‍यिलासिसिन खो ति यरूशलेमकी चाला राङ लेप्‍नोक, तमा मीतिवी कोन्‍छ्‍योककी ग्‍येल्‍खाप शार्क्येक छर्शी सिनी नासाम ताङ्‍नोक।
LUK 19:12 तमा खोकी सुङ्‍सुङ, “मी छ्‍ये मिरा च्‍यिक खोरो लुङ्‍बी ग्‍येल्‍वी ओङ थोप्‍नी वुङ्‍गुपला थाक्‍रिङ्‍बो मी लुङ्‍बा गाल्‍सुङ।
LUK 19:13 डोप पेला तीकी खोरो लावा मिरा च्‍यिथम्‍बाला कताङ्‍नी तिवा रे रेला सेरकी डप्‍बु रे रे बिन्‍नी दुक सिक्‍यासुङ, ‘ङ माङुवा सेक दी थ्‍वोनी छोङ किसा।’
LUK 19:14 यिने खोरो लुङ्‍बी मीतिवी तीला ङ्‍यिङ्‍मर क्‍यासुङ, तुक क्‍यानी तीकी तिङ्‍ला लेन क्‍योलुप मीतिवा ताङ्‍नी, ‘तीकी दाक्‍पी खला ग्‍येला कितुप ङ्‍यिरा नो मे।’ सिनी सि च्‍यिसुङ।
LUK 19:15 यिने ती मी ति ग्‍येल्‍वु कितुप ओङ थोप्‍नी लोक्‍नी वासिमा खोरो सेरकी डप्‍बु तेन ज्‍यकुप लावातिवाला कताङ्‍नी तिवा रे रेकी चो ख्‍येप्‍साङ तेन्‍दुप सिनी ल्‍हाप नो क्‍यानोक।
LUK 19:16 तमा गोमाला वावु लावा तीकी सिक्‍यासुङ, ‘ज्‍यिन्‍दाक, ज्‍यिन्‍दाककी तेन ज्‍यकुप सेरकी डप्‍बु च्‍यिक नेसुर ङे सेरकी डप्‍बु च्‍यिथम्‍बा शमिन।’
LUK 19:17 तमा ज्‍यिन्‍दाक तीकी ती लावाला सिक्‍यासुङ, ‘को छ्‍येसुङ, ङे लावा ल्‍यामु! ख्‍युरुङ ताम्‍ङे चेयीला खोङ्‍तेर्मु च्‍युङ्‍सुङ, तुक क्‍यानी ख्‍युरुङला ग्‍येसा च्‍यिथम्‍बी खला ग्‍येला कितुप ङ्‍येकितो।’
LUK 19:18 तमा लावा ङ्‍यिवा ति वानी दुक सिक्‍यासुङ, ‘ज्‍यिन्‍दाक, ज्‍यिन्‍दाककी तेन ज्‍यकुप सेरकी डप्‍बु च्‍यिक नेसुर ङे सेरकी डप्‍बु ङ शमिन।’
LUK 19:19 तीला साङ ज्‍यिन्‍दाककी सिक्‍यासुङ, ‘ख्‍योरो साङ ग्‍येसा ङकी खला ग्‍येला कितुप ङ्‍येकितो।’
LUK 19:20 तमा यम्‍बा लावा यी वानी दुक सिक्‍यासुङ, ‘ज्‍यिन्‍दाक, ज्‍यिन्‍दाककी तेन ज्‍यकुप सेरकी डप्‍बु च्‍यिक याङ दे राङ वे, ङे दीला रुमाल नाङ्‍ला तुम ज्‍याक्नी वे।
LUK 19:21 ङ याङ ज्‍यिन्‍दाकला ज्‍यिवा लासुङ। च्‍यिलासिसिन ज्‍यिन्‍दाक याङ मी च्‍युर्वु यिन, काङ माज्‍यकुप ति लङ्‍गुप ताङ काङ मातपुप ति ङकिवी।’
LUK 19:22 तमा ज्‍यिन्‍दाककी तीला सिक्‍यासुङ, ‘ओ लावा दुक्‍टा, ख्‍योरो सिक्‍यावु ताम्‍ङे नेसुर राङ ङ ख्‍युरुङला ठिम तोङ्‍यिन। ख्‍योरो ङला माज्‍यकुप ति लङ्‍गुप ताङ मातपुप ति ङकुप मी च्‍युर्वु यिन सिनी छ्‍या नोक।
LUK 19:23 तुकै यिन्‍सिन ख्‍योरो च्‍यिला ङे सेरकी डप्‍बु ति पेला तङ माज्‍याक? तुक क्‍यासिन ङ वासिमा तीकी मुला पे साङ छोवु ति यिन्‍जा।’
LUK 19:24 तमा ज्‍यिन्‍दाककी ते चिप्‍ला लानी वोतुपतिवाला सिक्‍यासुङ, ‘तीकी लोला वोतुप डप्‍बु तिङ ठोनी सेरकी डप्‍बु च्‍यिथम्‍बा वोतुप तीला बिन।’
LUK 19:25 तिवी, ‘ज्‍यिन्‍दाक, तीकी लोला याङ सेरकी डप्‍बु च्‍यिथम्‍बा वोतुपकी।’ सिनी सिक्‍यासुङ।
LUK 19:26 तमा ज्‍यिन्‍दाककी सिक्‍यासुङ, ‘ङ ख्‍यिराङला सिरिन, सी लोला नोके, तीला मङ ल्‍हक्‍पा थोप्‍किवी। तमा सी लोला मेवे, तीकी लोला वोतुप तिङ ठोकिवी।
LUK 19:27 त ङला ग्‍येल्‍वु च्‍युङ्‍गुप नो मिकिवु ङे डतिवाला दे टि वानी ङे चिप्‍ला राङ से।’”
LUK 19:28 तमा येशूकी ती पे सुङ्‍सिमा तिवी गोमा गोमाला यरूशलेम नेवा फेप्‍सुङ।
LUK 19:29 खो जैतुन पम्‍दोकला वोतुप बेथफागे ताङ बेथानिया चिप्‍ला लेप्‍सालेन्‍सिन लोमातिवी पर्ला मिरा ङ्‍यीला खोकी दुक सुङ्‍यिन सिरा ताङ्‍सुङ,
LUK 19:30 “ख्‍यिराङ फेचेक युल नेवा ग्‍युक। तमा ते शुसिमा सी साङ माशेन्‍दुप पुङ्‍गोक तिवु यी तानी वोतुप ति ख्‍यिरा थोङ्‍गितो, तमा तीला पि ताङ्‍नी दे दानी शोक।
LUK 19:31 दोजो मी ललाइकी ख्‍यिराङला च्‍यिला तीला पि तङ्‍गुप यिन सिनी टिसिन तीला ‘दी ति चोवोला गोकिवी।’ सिनी सी।”
LUK 19:32 तमा गोमाला तङ्‍गुप लोमातिवा गल्‍नी ल्‍हासालेन्‍सिन खोकी सुङ्‍गुप दोके राङ वोतुप थोङ्‍सुङ।
LUK 19:33 तमा तिवी पुङ्‍गोक तिवु ति पि तोङ्‍गुप पेला तीकी ज्‍यिन्‍दाकतिवी तिवाला “च्‍यिला ख्‍यिरा दी पुङ्‍गोक तिवु पि तङ्‍गुप यिन?” सिनी टिसुङ।
LUK 19:34 तिवी, “दी ति चोवोला गोकिवी।” सिनी टिलेन ग्‍यप्‍सुङ।
LUK 19:35 तमा तिवी ती पुङ्‍गोक तिवु ति येशूकी चिप्‍ला टि वानी खोप्‍रे मज्‍यातिवा तिवु खला तिङ्‍नी येशूला ती खला काल्‍सुङ।
LUK 19:36 तमा खो फेपिन कितुप पेला मीतिवी खोप्‍रे मज्‍यातिवा लामला तिङ्‍सुङ।
LUK 19:37 येशू जैतुन पम्‍दोककी थुलला डोप लामला लेपुप पेला लोमातिवा माङ्‍छ्‍योककी खोप्‍रे थोङ्‍गुप तेरी हलेवु लाकाकी कोर्ला कशेन थोर ग्‍यप्‍नी कोन्‍छ्‍योकला दुक सियी सोवा तेक्‍सुङ,
LUK 19:38 “चोवोकी मिङला फेपुप ग्‍येल्‍वु ति छासे मोलाम थोपुप यिनो! देवाच्‍येनला लोदिमु वुङ्‍शी! तेरी सिनाङ चोछ्‍येवु कोन्‍छ्‍योकला मोवा वुङ्‍शी!”
LUK 19:39 तमा मी मङ्‍छ्‍योककी पर्ला वोतुप ललाइ फरिसीतिवी येशूला सिक्‍यासुङ, “ओ गेकेन, ख्‍योरे लोमातिवाला वोरु तेन।”
LUK 19:40 यिने येशूकी सुङ्‍सुङ, “ङ ख्‍यिराङला सिरिन, दिवा खरक्‍पा देसिन दोतिवा वोरु देन्‍गिवी।”
LUK 19:41 तमा येशू यरूशलेम चिप्‍ला लेप्‍सिमा ती ग्‍येसा थोङ्‍नी खो ङुसुङ।
LUK 19:42 तमा खोकी दुक सुङ्‍सुङ, “हारिङ ख्‍योरो साङ लोदिमुकी थोक्‍ला काङ गोकिवी सिरुप ति हाक्‍कोवु यिन्‍सिन ल्‍यामु वुङ्‍गुप्‍जा। यिने त याङ ख्‍योरो मिककी तीला थोङ मुथुपी।
LUK 19:43 ख्‍योरो खला दुका तुजेतिवा गिवी, ख्‍योरो डतिवी ख्‍योरो तेन्‍दोकला गारी गुरीला दोकर ग्‍यकिवी, तमा तेरी थाका नेसुर ख्‍युरुङला चुप्‍नी
LUK 19:44 ख्‍युरुङ ताङ ख्‍योरो आङातिवाला सला तल तोङ्‍गिवी। तमा तिवी दो च्‍यिक साङ यम्‍बा दे खला लु मिज्‍यिवी, च्‍यिलासिसिन कोन्‍छ्‍योककी ख्‍युरुङला र्‍होकुपला फेपुप तुजे ति ख्‍योरो ङो माशेसुङ।”
LUK 19:45 ती ज्‍युक्‍ला येशू यहूदी ल्‍हङाङ नाङ्‍ला शुनी ल्‍हङाङला छोङ कितुपतिवाला पाङ्‍ला तेन तोङ्‍यिन सिरा दुक सुङ्‍सुङ,
LUK 19:46 “कोन्‍छ्‍योककी सुङला दुक सिनी टि वे, ‘ङे खाङ्‍बा ति मोपोर कितुप खाङ्‍बा यिनो।’, यिने ख्‍यिरा याङ तीला ‘च्‍याक्‍पातिवा देतुप फुक’ जोसुङ।”
LUK 19:47 तमा येशू ङ्‍यिमी टेङ ल्‍हङाङला फेप्‍नी येन्‍देन नङ्‍गिनोक। यिने कोङ्‍यार छ्‍येतिवा ताङ यहूदी छ्‍योकी गेकेनतिवा ताङ यहूदी गोमा कितुप मी छ्‍येतिवी खोला सेतुप छोल्‍गिनोक।
LUK 19:48 यिन्‍सिनाङ तिवी काङ साङ च्‍यु माङ्‍ये, च्‍यिलासिसिन तेरी मीतिवी खोकी सुङ छासे ङ्‍यम्‍ले क्‍यानी ङ्‍येन्‍गिनोक।
LUK 20:1 ङ्‍यिम्‍ज्‍यिक येशूकी यहूदी ल्‍हङाङला मीतिवाला येन्‍देन लोपुप ताङ कोन्‍छ्‍योककी लेन ल्‍यामु ख्‍याप्‍टाक क्‍या नङ्‍यिन नोक। ती पेला कोङ्‍यार छ्‍येतिवा ताङ यहूदी छ्‍योकी गेकेनतिवा यहूदी गोमा कितुप मी छ्‍येतिवा ताङ मुला खोकी चाला वानी
LUK 20:2 दुक सिक्‍यासुङ, “ङ्‍यिराङला सी! चुका ओङ्‍ज्‍येन नेसुर ख्‍योरे दी लाकातिवा कियी वे? सी ख्‍युरुङला दी ओङ्‍ज्‍येन बिन्‍दुप यिन?”
LUK 20:3 तमा खोकी तिवाला सुङ्‍सुङ, “ङ साङ ख्‍यिराङला ताम्‍ङे यी टेयिन। ङला सी।
LUK 20:4 यूहन्‍नाकी बप्‍तिस्‍मा ति देवाच्‍येन नेमा यिनाङ की, मी नेमा यिनाङ?”
LUK 20:5 ती थोसिमा तिवी खोप्‍राङ पर्ला दुक सिक्‍यासुङ, “‘देवाच्‍येन नेमा’ सिरुप सिसिन ‘ख्‍यिरा च्‍यिला तीला तेपा माक्‍या।’ सिनी सिवी,
LUK 20:6 ‘मी नेमा’ सिरुप सिसिन तेरी मीतिवी दाक्‍पुला दो बेप्‍किवी, च्‍यिलासिसिन यूहन्‍ना ति कोन्‍छ्‍योककी लुङ्‍तेम्‍बा यिन सिनी तिवी तेपा क्‍यानोक।”
LUK 20:7 ती तप्‍की तिवी, “ङ्‍यिराङला छ्‍या मे, ती ति कनी नेसुर वावु यिनाङ।” सिनी सिक्‍यासुङ।
LUK 20:8 तमा येशूकी तिवाला सुङ्‍सुङ, “तुकै यिन्‍सिन ङ साङ चुका ओङ्‍ज्‍येन नेमा दी लाकातिवा कियी वे ख्‍यिराङला मिसिर।”
LUK 20:9 येलुङ येशूकी मीतिवाला दी पे ति शेन नाङ्‍सुङ, “मी मिरा च्‍यिककी गुन्‍डुम शिङ जोनी सप्‍ले कितुपतिवाला पिज्‍यिङला ताङ्‍नी खुरुङ ति थाक्‍रिङ्‍बु मी लुङ्‍बा गल्‍नी अलायी सेक ते देसुङ।
LUK 20:10 तमा गुन्‍डुम रुकुप पेला तीकी खोरुङला थोपुप गुन्‍डुम लङ्‍गुपला लावा मिरा च्‍यिकला पिज्‍यिङ्‍बातिवी ते ताङ्‍सुङ। यिने पिज्‍यिङ्‍बातिवी तीला दुनी तोङ्‍बा राङ लोक्‍नी ताङ्‍नोक।
LUK 20:11 येलुङ तीकी यम्‍बा लावा यीला ताङ्‍सुङ। यिने तिवी तीला साङ कशेन दुनी खक्‍योवा लङ्‍नी तोङ्‍बा राङ लोक्‍नी ताङ्‍नोक।
LUK 20:12 येलुङ तीकी थेङ्‍मा सुम्‍बाला लावा यीला ताङ्‍सुङ, तमा तिवी तीला साङ दुनी म तेन्‍नी तेन ताङ्‍नोक।
LUK 20:13 ती ज्‍युक्‍ला शिङ ज्‍यिन्‍दाक तीकी सिक्‍यासुङ, ‘ङ काङ कितुप? त याङ ङ ङरा ङ्‍यिङ्‍ज्‍येवु पुज्‍युङ तीला राङ तोङ्‍यिन, तिवी ङे पुज्‍युङला याङ ताङ्‍देन किते यिन्‍दे।’
LUK 20:14 यिने पिज्‍यिङ्‍बातिवी तीला थोङ्‍सिमा खोप्‍राङ पर्ला दुक सिनी ताम्‍ङे क्‍यासुङ, ‘दी याङ ज्‍यिन्‍दाककी अंश थोप छ्‍योवु यिन, दीला दाक्‍पु सेतुप, तमा तीकी अंश तिङ दाक्‍पुला राङ च्‍युङ्‍गिवी।’
LUK 20:15 तमा तिवी तीला गुन्‍डुम शिङगी पाङ्‍ला तेन ताङ्‍नी सेसुङ। त गुन्‍डुम शिङ ज्‍यिन्‍दाक तीकी तिवाला काङ किताङ?
LUK 20:16 ती ति वानी पिज्‍यिङ्‍बातिवाला सेकिवी, तमा गुन्‍डुम शिङ ति यम्‍बा पिज्‍यिङ्‍बातिवाला राङ तोङ्‍गिवी।” ती थोनी मीतिवी सिक्‍यासुङ, “दुकै याङ नाम्‍साङ मेङ्‍शी।”
LUK 20:17 येशूकी तिवाला केरी ल्‍हानी सुङ्‍सुङ, “तुकै यिन्‍सिन दी कोन्‍छ्‍योककी सुङला टिवु ति काङ यिनाङ? ‘चुका दो तीला खार चिकुपतिवी फेन मोथोवु सिनी क्‍युर्नी ज्‍याक्‍वे, ती दो ति सुरकी खक्‍छ्‍येवु दो च्‍युङ्‍सुङ।’
LUK 20:18 तमा सु ती दे खला लुम्‍गिवे, ती ति तेरी ठमा ठुमा टुम्‍गिवी। सी खला ती दो ति लुम्‍गिवे, तीला थल्‍दुक जेवी।”
LUK 20:19 तमा ती पेला राङ यहूदी छ्‍योकी गेकेनतिवा ताङ कोङ्‍यार छ्‍येतिवी खोला जिम्‍बुप छाल्‍सुङ, च्‍यिलासिसिन तिवी ती पे ति खोप्‍रे तेन्‍दोकला राङ सुङ्‍गुप यिन सिनी छ्‍या नोक। यिने तिवा मीतिवाला ज्‍यिवा किनोक।
LUK 20:20 ती ज्‍युक्‍ला तिवी च्‍यु ल्‍हानी देसिमा च च्‍येतुप मीतिवाला मी टेङ्‍बुतिवा दोके जोनी येशूकी चाला ताङ्सुङ, तमा खोकी सुङ्‍गुप ताम्‍ङेला गोकोर्सिमा खोला रोमी ओङ्‍ज्‍येन कितुप मी छ्‍येकी लकला चेक तेतुप नो क्‍यानोक।
LUK 20:21 तुक क्‍यानी ती च च्‍येतुप मीतिवी येशूला दुक सिनी टिसुङ, “गेकेन, ङ्‍यिराङला छ्‍या वे, गेकेनकी ताम्‍ङे टेङ्‍बु सुङ्‍गुप ताङ लोप्‍किवी। गेकेनकी मीतिवाला ख्‍ये मेबेवी, यिने कोन्‍छ्‍योककी लाम टेङ्‍बु तिराङ लाप नङ्‍गिवी।
LUK 20:22 ङ्‍यिरा रोमी ग्‍येल्‍वु कैसरला से तेतुप ति दाक्‍पी ठिमला डिकी ताङ मिडिकिवी?”
LUK 20:23 येशूकी तिवी सेमला च्‍यङ्‍बु क्‍यावु ति हाक्‍कोनी तिवाला सुङ्‍सुङ,
LUK 20:24 “ङला ङुलकी डप्‍बु च्‍यिक छ्‍या तेन। दी लोला सी रिमुङ ताङ सी यिकी टि वे?” तमा तिवी सिक्‍यासुङ, “कैसरकी ति यिन।” सिनी सिक्‍यासुङ।
LUK 20:25 तमा येशूकी तिवाला सुङ्‍सुङ, “तुकै यिन्‍सिन कैसरकी ति कैसरला राङ ते, कोन्‍छ्‍योककी ति कोन्‍छ्‍योकला राङ पुल।”
LUK 20:26 तिवी मी मिङ्‍गाला खोकी सुङ्‍गुप ताम्‍ङे नेसुर खोला गोकोर माथुप, तमा खोकी टिलेन थोनी हलेवा लानी खरक्‍पा देसुङ।
LUK 20:27 तमा ललाइ सदुकीतिवी येशूकी चाला वासुङ। सदुकी छ्‍योक्‍पाकी मीतिवा ति मी शिसिमा येलुङ सेन्‍बु मलङ्‍गिवी सिनी तेपा कितुप मीतिवा यिनोक। तिवी येशूला दुक सिनी टिसुङ,
LUK 20:28 “ओ गेकेन, मोशाकी दाक्‍पुला दुक सिनी ठिम टिनी बिन्‍सुङ, ‘मी ललाइकी ति अच्‍यु पेजा माक्‍येवा क्‍यानी सिसिन तीकी छाम ताङ मुला जेन्‍दी क्‍यानी खोरो अच्‍युकी थोक्‍ला गिपा फेल ज्‍यि गोकिवी।’
LUK 20:29 दासा यीला मी मिरा च्‍यिककी ति अच्‍युनुप पिन दिन नोक। तिवी पर्ला पिन छ्‍ये तीकी जेन्‍दी क्‍यासुङ, यिने पेजा माक्‍येवा क्‍यानी शिसुङ।
LUK 20:30 तमा पिन माहिला तीकी खोरो छाम ताङ मुला जेन्‍दी क्‍यासुङ।
LUK 20:31 ती ज्‍युक्‍ला साहिला तीकी साङ छाम ताङ मुला जेन्‍दी क्‍यासुङ। तुक राङ क्‍यानी तिवा पिन दिन्‍करकी जेन्‍दी क्‍यासिमा तेरी पेजा माक्‍येवा क्‍यानी राङ शिसुङ।
LUK 20:32 ती ज्‍युक्‍ला ती छाम तिङ शिसुङ।
LUK 20:33 तुकै यिन्‍सिन शेप ने सेन्‍बु लङ्‍गुप पेला ती पुम्‍पेजा ति सी पेर्मी च्‍युङ्‍गिवी? च्‍यिलासिसिन ती ति तिवा पिन दिन्‍कर ताङ मुला जेन्‍दी क्‍यानोक।”
LUK 20:34 तमा येशूकी तिवाला सुङ्‍सुङ, “दी कल्‍वाकी मीतिवा ति जेन्‍दी साङ किवी।
LUK 20:35 यिने ती ज्‍युककी कल्‍वा ताङ शेप ने सेन्‍बु लङ्‍गुपला छ्‍योवु वोतुपतिवा याङ जेन्‍दी मिकिवी,
LUK 20:36 यिने तिवा देवाच्‍येनकी लेन क्‍योलुप थुतिवा दोके च्‍युङ्‍नी येलुङ नाम्‍साङ मिसिवी। तिवा शेप ने सेन्‍बु लावु तप्‍की कोन्‍छ्‍योककी पेजातिवा यिन।
LUK 20:37 तमा शेपतिवा सेन्‍बु लङ्‍गिवी सिरुप ताम्‍ङेकी कोर्ला मोशाकी साङ बुलुक दोङ्‍बी पे नेसुर छ्‍या तेन्‍सुङ, च्‍यिलासिसिन तीकी चोवोला ‘अब्राहामकी कोन्‍छ्‍योक ताङ इसहाककी कोन्‍छ्‍योक ताङ याकूबकी कोन्‍छ्‍योक यिन।’ सिनी रेन्‍सुङ।
LUK 20:38 खो ति शेपतिवी कोन्‍छ्‍योक मिन, यिने सेन्‍बुतिवी कोन्‍छ्‍योक यिन, च्‍यिलासिसिन कोन्‍छ्‍योककी थोङ्‍दाङला तेरी सेन्‍बु वे।”
LUK 20:39 तमा यहूदी छ्‍योकी गेकेनतिवा ललाइकी “गेकेन, गेकेनकी याङ टेके राङ सुङ्‍सुङ।” सिनी सिक्‍यासुङ।
LUK 20:40 ती ज्‍युक्‍ला सी साङ खोला टिवा यम्‍बा टेप ङाडेङ माक्‍या।
LUK 20:41 तमा येशूकी तिवाला टि नाङ्‍सुङ, “चुक क्‍यानी मीतिवी ख्रीष्‍ट ति दाऊदकी गिपा यिन सिवी?
LUK 20:42 भजनसंग्रह नाङ्‍ला दाऊद खोरो राङ दुक सिनी टि वे, ‘चोवो कोन्‍छ्‍योककी ङे चोवोला
LUK 20:43 “ङे ख्‍योरो डतिवाला ख्‍योरो काङ्‍बी वोक्‍ला मालेपा सेक्‍ला ख्‍युरुङ ङे यावी थाकाला दे।” सिनी सुङ्‍नी वे।’
LUK 20:44 दाऊदकी ख्रीष्‍टला चोवो सिनी सिसिन चुक क्‍यानी खो ति दाऊदकी गिपा च्‍युङ थुप्‍किवी?”
LUK 20:45 मी तेरीकी येशूकी सुङ्‍गुप ताम्‍ङे ङ्‍येनिन वोतुप पेला खोकी लोमातिवाला सुङ्‍सुङ,
LUK 20:46 “ख्‍यिराङ यहूदी छ्‍योकी गेकेनतिवा नेसुर च्‍याङ्‍से देता। तिवा छ्‍योवा रिङ्‍बु रिङ्‍बु कोन्‍नी फार छुर युकुप गा किवी, हाला मीतिवी खुरुङला छ्‍याक पुलुप गा किवी। तमा यहूदी छ्‍योखाङला तेरी सिनाङ खक्‍छ्‍येवु टाल जिम्‍नी देतुप ताङ डेनला टाल जिम्‍नी देतुप गा किवी।
LUK 20:47 तिवी पेर्मी युक्‍सिमतिवी टोङ्‍बा ठोकिवी, तमा मी यम्‍बाला छ्‍या देन्‍दुपला मोपोर रिङ्‍बु रिङ्‍बु किवी। तुक कितुपतिवाला कोन्‍छ्‍योककी मङ पर्च्या ग्‍येर्पु फोकिवी।”
LUK 21:1 तमा येशू यहूदी ल्‍हङाङ नाङ्‍ला ज्‍युनी मी छ्‍युक्‍पुतिवी दाक दाक्‍पी बुल्‍वा ति बुल्‍वा देकुप गामकी नाङ्‍ला पुलुप ति थोङ्‍सुङ।
LUK 21:2 येलुङ पेर्मी युक्‍सिम पेराङ्‍बु यीकी डेवा ङ्‍यी बुल्‍वा पुलुप ति खोकी थोङ्‍सुङ।
LUK 21:3 ती थोङ्‍सिमा खोकी सुङ्‍सुङ, “वुतुङ ङ ख्‍यिराङला सिरिन, दी पेर्मी युक्‍सिम पेराङ्‍बु तीकी यम्‍बा तेरीकी सिनाङ मङ बुल्‍वा पुल्‍सुङ।
LUK 21:4 च्‍यिलासिसिन मी यम्‍बातिवी खोप्‍रे बङी वोतुप टोङ्‍बा नेसुर पुल्‍सुङ, यिने तीकी याङ खोरो पेराङ्‍बु वोतुप नेमा खोरो लोला वोतुप तेरी टङ्‍गा पुल्‍सुङ।”
LUK 21:5 थेङ्‍मा यी येशूकी लोमातिवा ललाइकी यहूदी ल्‍हङाङकी कोर्ला ताम्‍ङे कियी वोतुप पेला ती ल्‍हङाङ ति दो ल्‍यामु ल्‍यामु थ्‍वोन जोवु ताङ ती नाङ्‍ला बुल्‍वातिवा ति चुका डछ्‍यावु नोक सिनी सिक्‍यासुङ। ती ताम्‍ङे थोनी येशूकी तिवाला सुङ्‍सुङ,
LUK 21:6 “दुका तुजे यी गितो, ती पेला तन्‍दा ख्‍यिरा थोङ्‍गुपतिवा ति दो च्‍यिक साङ यम्‍बा दे खला मालुवा क्‍यानी तेरी र्‍होम्‍गिवी।”
LUK 21:7 तमा लोमातिवी येशूला टिसुङ, “गेकेन, दी ताम्‍ङेतिवा ति नम च्‍युङ्‍गिवी? तिवा च्‍युङ्‍गुप छलुप पेला चुका त गिवी?”
LUK 21:8 येशूकी तिवाला सुङ्‍सुङ, “च्‍याङ्‍से देता, मीतिवी ख्‍यिराङला मुलुशी। मी बङीकी ङे मिङला वानी, ‘ङ ख्रीष्‍ट यिन।’, ‘तुजे चाला राङ लेम वे।’ सिनी सिवितो। यिने ख्‍यिराङ तिवी तिङ्‍ला तिङ माङ्‍योक।
LUK 21:9 मक ग्‍यकुप ताङ हराङ हुरुङ कितुप ताम्‍ङे थोवु पेला ख्‍यिराङ ज्‍यिवा माकी। दी ताम्‍ङेतिवा गोमाला च्‍युङ राङ गोकिवी, यिने जम्‍बुलिङ शार्क्येक ना डोप ति मेङ्‍गिवी।”
LUK 21:10 येलुङ येशूकी तिवाला सुङ्‍सुङ, “मिरिक मिरिककी तेन्‍दोकला ताङ ग्‍येल्‍खाप ग्‍येल्‍खापकी तेन्‍दोकला लानी मक शोर्कितो।
LUK 21:11 तमा सयी ग्‍येर्पु ग्‍येर्पु ग्‍यकुप ताङ दासा दासाला ङ्‍यिमा मर्वु शरुप ताङ फेलुप नेजु मेलोक्‍पातिवा गिवितो। तमा नाम नेमा ज्‍यिवा लङ्‍गुप ताम्‍ङेतिवा ताङ हलेवु त ग्‍येर्पुतिवा छ्‍या देन्‍गितो।
LUK 21:12 यिने दी तेरी ताम्‍ङेतिवा च्‍युङ्‍गुप सिनाङ गोमाला मीतिवी ख्‍यिराङला जिम्‍गितो, छेटाङ तेर्कितो, तमा ख्‍यिराङला यहूदी छ्‍योखाङ ताङ चोन्‍खाङला चेक तेकितो। तमा ख्‍यिरा ङला तेपा क्‍यावु तप्‍की तिवी ख्‍यिराङला ग्‍येल्‍वुतिवा ताङ रोमी ग्‍येला कितुप मी छ्‍येतिवी चिप्‍ला क्‍योल्‍गितो।
LUK 21:13 यिने ती ति ख्‍यिरा ङे थोक्‍ला पङ्‍बु तेरुप पेला च्‍युङ्‍गितो।
LUK 21:14 ती तप्‍की ख्‍यिराङ रङगी थोक्‍ला काङ सि गोकिवी सिनी गोमाला के पप माकी।
LUK 21:15 च्‍यिलासिसिन ती पेला ङ ख्‍यिराङला लपुप ताम्‍ङे ताङ रिक्‍पा तेरिन, तुक क्‍यानी ख्‍यिरा चुका डतिवी साङ ख्‍यिरा ताम्‍ङेकी तेन्‍दोकला लङ मुथुपी, तमा तिवी ख्‍यिरा ताम्‍ङे टेके मिन सिनी सि मुथुपी।
LUK 21:16 ख्‍यिरा पपाआमा, अच्‍युनुप, छेङ्‍गाछाली ताङ दाल्‍जातिवी साङ ख्‍यिराङला क्‍येन तेर्कितो, तमा तिवी ख्‍यिरा पर्ला ललाइला सेकितो।
LUK 21:17 ख्‍यिरा ङला तेपा क्‍यावु तप्‍की तेरी मीतिवी ख्‍यिराङला ङ्‍यिङ्‍मर कितो।
LUK 21:18 यिने ख्‍यिरा गोकी र्‍हे ङ्‍येङ्‍मा यी साङ तोर्नी मोडोवी।
LUK 21:19 ख्‍यिराङ हम क्‍या देसिन ख्‍यिराङला नाम्‍साङ मिशिवु मिजी ङ्‍येकितो।”
LUK 21:20 “चो पेला यरूशलेम गारी गुरीला मक्‍मीतिवी चुपुप ख्‍यिरा थोङ्‍गिवे, ती पेला ती ग्‍येसा ना डोप तुजे ति चिप्‍ला राङ वानोक सिनी हाक्‍कोवा की।
LUK 21:21 ती पेला यहूदिया लुङ्‍बाला वोतुपतिवा री नेवा टो डोशी, ग्‍येसा नाङ्‍ला वोतुपतिवा ति पाङ्‍ला थेन डोशी, तमा युलला वोतुपतिवा ग्‍येसा नाङ्‍ला मुशुक्‍शी।
LUK 21:22 च्‍यिलासिसिन दी ति टि वोतुप कोन्‍छ्‍योककी सुङ तेरी छेवु पर्च्याकी तुजे यिन।
LUK 21:23 ती तुजेला जु चेन्‍दी वोतुप पुम्‍पेजातिवा ताङ आङाला नुम तेरुप आमातिवाला मङ कले ख्‍येल्‍गितो। जम्‍बुलिङला छेटाङ ग्‍येर्पु ख्‍येल्‍गितो, दी मीतिवी खला कोन्‍छ्‍योककी पर्च्या फोकितो।
LUK 21:24 ललाइला खुर्पा थ्‍वोनी सेकिवी, ललाइला ति जिम्‍नी लुङ्‍बा लुङ्‍बाला टिनी डिवी। तमा यहूदी मिन्‍दुप मिरिक यम्‍बातिवी यरूशलेमला खोरो ओङ्‍ज्‍येनला ज्‍याक्‍नी खोप्‍रे तुजे माछेवा सेक मेलोक्‍पा किवी।”
LUK 21:25 “तमा ङ्‍यिमा ताङ उला ताङ कर्मातिवाला ततिवा गिवी। जम्‍बुलिङला ग्‍येम्‍छोकी टेक्‍च्‍या ताङ ज्‍यिवा लङ्‍गुप बालापकी जोसालेन्‍सिन मीतिवा पप लानी यर्मिन मर्मिन डिवी।
LUK 21:26 तमा मीतिवी जम्‍बुलिङला ख्‍येल वुङ्‍गुप छेटाङकी कोर्ला गोमाला के हाक्‍कोनी ज्‍यिवा लानी टेन्‍बा तोर्किवी, च्‍यिलासिसिन नामगी ओङतिवा तेरी योकिवी।
LUK 21:27 ती पेला ङ मी पुज्‍युङ ति ओङ छ्‍येवु ताङ मोवा क्‍यानी मुक्‍पी खला वुङ्‍गुप ति मीतिवी थोङ्‍गिवी।
LUK 21:28 चो पेला दी ताम्‍ङेतिवा च्‍युङ्‍गुप छोल्‍गिवे, ती पेला ख्‍यिराङ खोक लानी येर केला ल्हो, च्‍यिलासिसिन ख्‍यिरा थर्वा ति चिप्‍ला राङ वा वे।”
LUK 21:29 ती ज्‍युक्‍ला येशूकी तिवाला दी पे च्‍यिक शेन नाङ्‍सुङ; “अन्‍जीरकी दोङ्‍बु ताङ यम्‍बा तेरी दोङ्‍बुला ल्हो।
LUK 21:30 दोङ्‍बी ज्‍योक थेन्‍सिमा ख्‍यिरा तीला खोरो राङ ल्‍हनी येर्वु थेन्‍दुप छाल्‍नोक सिनी हाक्‍कोकिवी।
LUK 21:31 तुक राङ क्‍यानी ख्‍यिरा दी तेरी ताम्‍ङेतिवा च्‍युङ्‍गुप ति थोङ्‍सिन कोन्‍छ्‍योककी ग्‍येल्‍खाप ति चिप्‍ला राङ वानोक सिनी हाक्‍कोकिवी।
LUK 21:32 वुतुङ के ङ ख्‍यिराङला टेङ्‍बो सिरिन, ती तेरी ताम्‍ङेतिवा माच्‍युङ्‍वा सेक्‍ला दी गिपा ना मोडोवी।
LUK 21:33 स ताङ नाम ति तोर्नी डिवी, यिने ङे सिक्‍यावु ताम्‍ङेतिवा ति नाम्‍साङ तोर्नी मोडोवी।”
LUK 21:34 “तुक क्‍यानी ख्‍यिराङ दाक दाक्‍पी थोक्‍ला च्‍याङ्‍से देता, सेम नोजु कितुप ताङ छ्‍याङ थुनी जेप ताङ मिजीकी थोक्‍ला पप कितुपला ख्‍यिरा सेम ख्‍येल माज्‍यी। मिसियाङ ती तुजे ति तर्वा दोके ख्‍यिरा हाक्‍माकोवा क्‍यानी ख्‍यिरा खला ख्‍येल्‍गिवी।
LUK 21:35 च्‍यिलासिसिन ती तुजे ति तेरी जम्‍बुलिङला देतुपतिवी खला ख्‍येल्‍गितो।
LUK 21:36 तुक क्‍यानी ख्‍यिराङ च्‍याङ्‍से देता, त च्‍युङ्‍गुप दी तेरी ताम्‍ङेतिवा नेसुर र्‍होक्‍नी मी पुज्‍युङकी चिप्ला लङ थुप्‍शी सिनी नरी मोपोर किसा।”
LUK 21:37 ती पेला येशू ङ्‍यिमी गुङला ति यहूदी ल्‍हङाङला येन्‍देन नङ्‍गिनोक, तमा नुपला ति ग्‍येसा नेमा थेन्‍नी जैतुन पम्‍दोक सिरुप ते फेप्‍नी शासा ज्‍युकिनोक।
LUK 21:38 तमा तेरी मीतिवा खोकी सुङ ङ्‍येन्‍दुपला टोपला टेताङ यहूदी ल्‍हङाङला गिनोक।
LUK 22:1 त यहूदीतिवी थरुप तुछ्‍येन सिरुप खमीर मालुकुप शुब्‍ज्‍याङ साप तुछ्‍येन चिप्‍ला राङ वानोक।
LUK 22:2 तमा कोङ्‍यार छ्‍येतिवा ताङ यहूदी छ्‍योकी गेकेनतिवी येशूला सेतुप च्‍यु ल्‍हानी देनोक। यिने तिवा मीतिवाला ज्‍यिवा किनोक।
LUK 22:3 तमा लोमा मिरा च्‍यिङ्‍ङी पर्ला इस्‍करियोत सिरुप यहूदाकी सेमला शैतान शुसुङ।
LUK 22:4 तमा ती ति कोङ्‍यार छ्‍येतिवा ताङ यहूदी ल्‍हङाङकी मक्‍मी छ्‍येतिवी चाला गल्‍नी येशूला चुक क्‍यानी जिम तेरुप सिनी तिवी मुला केवुल क्‍यासुङ।
LUK 22:5 तमा तिवा गा लानी तीला टङ्‍गा तेरुप सिनी थाक्‍छ्‍येसुङ।
LUK 22:6 यहूदाकी ती ताम्‍ङे ङ्‍येन्‍नी मी माङ्‍छ्‍योक मेतुप पेला येशूला जिम तेरुप सिनी च्‍यु ल्‍हानी देसुङ।
LUK 22:7 ती ज्‍युक्‍ला खमीर मालुकुप शुब्‍ज्‍याङ साप तुछ्‍येनला लुक रुक सेनी जिन्‍बा तोङ्‍गुप छेर्मु वानोक।
LUK 22:8 तमा येशूकी पत्रुस ताङ यूहन्‍नाला दुक सुङ्‍नी ताङ्‍सुङ, “गल्‍नी दाक्‍पी थोक्‍ला यहूदी थरुप तुछ्‍येनकी डेन साप टडिक की।”
LUK 22:9 तमा तिवी खोला टिसुङ, “ङ्‍यिराङ कनी गल्‍नी डेन टडिक कितुप ति गेकेनकी नो वे?”
LUK 22:10 तमा खोकी तिवाला सुङ्‍सुङ, “ख्‍यिराङ ग्‍येसाकी नाङ्‍ला शुक्‍सालेन्‍सिन दिङ्‍गर नाङ्‍ला छ्‍यु खुरुप ख्‍योक्‍पेजा यीला ठेकिवी। तमा ती ति चुका खाङ्‍बी नाङ्‍ला शुकिवे, तीकी तिङ्‍ला तिङ्‍यो।
LUK 22:11 तमा ती खाङ्‍बी ज्‍यिन्‍दाकला ङ्‍यिरा गेकेनकी ‘ङ ङे लोमातिवा ताङ मुला यहूदी थरुप तुछ्‍येनकी डेन साप पर्खाङ ति कनी वे?’ सिनी टि नाङ्‍सुङ सिनी सी।
LUK 22:12 तुक सिक्‍यासिमा तीकी ख्‍यिराङला येर तेला टडिक क्‍या ज्‍यकुप पर्खाङ ग्‍येर्पु यी छ्‍या देन्‍गिवी। ख्‍यिराङ ते डेन टडिक की।”
LUK 22:13 तमा तिवा गल्‍नी ल्‍हासालेन्‍सिन येशूकी सुङ्‍गुप दोके राङ ठेसुङ। तिवी ते यहूदीतिवी थरुप तुछ्‍येनकी डेन टडिक क्‍यासुङ।
LUK 22:14 तमा डेन साप पेला लेप्‍सिमा येशू लोमातिवी मुला डेन शेवुला ज्‍युसुङ।
LUK 22:15 ती पेला खोकी तिवाला सुङ्‍सुङ, “ङे दुक्‍पा खुरुप सिनाङ गोमाला ख्‍यिरा मुला दी यहूदीतिवी थरुप तुछ्‍येनकी डेन साप छासे नो क्‍यायी।
LUK 22:16 च्‍यिलासिसिन ङ ख्‍यिराङला सिरिन, ती यहूदीतिवी थरुप तुछ्‍येनकी तेन्‍दोक ति कोन्‍छ्‍योककी ग्‍येल्‍खापला तेरी माछेवा सेक्‍ला ङ येलुङ दी डेन मसा।”
LUK 22:17 तमा खोकी कोरा लानी कोन्छ्‍योकला थुचिछे पुल्‍नी लोमातिवाला सुङ्‍सुङ, “दी ति लानी ख्‍यिरा पर्ला गोनी थुङ।
LUK 22:18 ङ ख्‍यिराङला सिरिन, त कोन्‍छ्‍योककी ग्‍येल्‍खाप माङुवा सेक ङ येलुङ गुन्‍डुम दोङ्बी डेलु नेमा जोवु मुथुङ।”
LUK 22:19 येलुङ येशूकी शुब्‍ज्‍याङ लानी कोन्‍छ्‍योकला थुचिछे पुल्‍सिमा च्‍याक्‍नी तिवाला दुक सुङ्‍यिन नाङ्‍सुङ, “दी ति ख्‍यिरा थोक्‍ला तेरुप ङे जु यिन, ङला टेन्‍दुपला दी ति किसा।”
LUK 22:20 तमा गोमुकी सोल शेन सिन्‍सिमा खोकी गोमी दोके क्‍यानी कोरा लानी दुक सुङ्‍सुङ, “दी कोरा ति ख्‍यिरा थोक्‍ला देन्‍दुप ङे ठक नेसुर कोन्‍छ्‍योककी थाक्‍छ्‍येन नङ्‍गुप खोकी ठिम सम्‍बा यिन।
LUK 22:21 यिने ल्हो ताङ, ङला जिम तेरुप ति ङे मुला सापला देन वे।
LUK 22:22 ङ मी पुज्‍युङ याङ कोन्‍छ्‍योककी खोरो थोक्‍ला तेन्‍तेन क्‍यावु दोके डिवी, यिने ङ मी पुज्‍युङला जिम तेरुप तीला याङ मोताप सुकिवी।”
LUK 22:23 तमा लोमातिवी तुक कितुप ति सु यिनाङ सिनी खोप्‍राङ पर्ला च्‍यिककी च्‍यिकला टिसुङ।
LUK 22:24 ती ज्युक्‍ला लोमातिवी नाङ ने सु तेरी सिनाङ छ्‍ये यिन सिरुप कोर्ला खोप्‍रे पर्ला खाँदा क्‍यानोक।
LUK 22:25 येशूकी तिवाला सुङ्‍सुङ, “दी जम्‍बुलिङकी ग्‍येल्‍वुतिवी मीतिवी खला ओङ्‍ज्‍येन किवी। तमा मीतिवी खला ओङ्‍ज्‍येन कितुपतिवी खोरुङ ति दुक्‍पाला ख्‍येलुपतिवाला ल्‍हाटे कितुप मी यिन सिनी सिवी।
LUK 22:26 यिने ख्‍यिराङ ति तुकै वुङ्‍गुप मेङ्‍गिवी। बोरु ख्‍यिरा पर्ला सु तेरी सिनाङ छ्‍ये नोके, ती ति तेरी सिनाङ छ्‍युङा दोके च्‍युङ गोकिवी। तमा ओङ्‍ज्‍येन कितुपतिवा ति शब्‍ज्‍यी कितुप मी दोके च्‍युङ गोकिवी।
LUK 22:27 चुका मी ति मङ छ्‍ये यिन? समा सापला देतुप ति छ्‍ये यिनाङ की, शब्‍ज्‍यी कितुप ति छ्‍ये यिन? समा सापला देतुप ति मिन? यिने ङ याङ शब्‍ज्‍यी कितुप मी दोके क्‍यानी ख्‍यिरा पर्ला वे।
LUK 22:28 ख्‍यिराङ ति ङ दुक्‍पाला ख्‍येलुप पेला ङ ताङ मुला राङ वोतुप मीतिवा यिन।
LUK 22:29 ङे पपी ङला ग्‍येला कितुप ओङ्‍ज्‍येन नङ्‍गुप दोके ङ साङ ख्‍यिराङला ग्‍येला कितुप ओङ्‍ज्‍येन तेरिन।
LUK 22:30 तुक क्‍यानी ख्‍यिराङ ङे ग्‍येल्‍खापला ङ ताङ मुला देनी साप ताङ थुङ्‍गुप ङ्‍येकितो, तमा ग्‍येल्‍ठिकला देनी इस्राएलकी मिरिक च्‍यिङ्‍ङीतिवी खला ठिम कितो।”
LUK 22:31 तमा येशूकी सुङ्‍सुङ, “ओ सिमोन, ओ सिमोन, ल्हो ताङ। शैतानकी ख्‍यिराङ तेरीला ट दोके योलुपला गोङ्‍बा शु वे।
LUK 22:32 यिने सिमोन, ख्‍योरो तेपा ति मोतोर्शी सिनी ङे मोपोर क्‍यायिन। ख्‍युरुङ येलुङ लोक्‍नी वुङ्‍गुप पेला ख्‍योरो तेपा कितुप अच्‍युनुपतिवाला रम्‍बु जोसा।”
LUK 22:33 तमा पत्रुसकी सिक्‍यासुङ, “ओ चोवो, ङ याङ चोन्‍खाङला डो गोसिनाङ, शेप ते डो गोसिनाङ, चोवो ताङ मुला डोप टडिक वे।”
LUK 22:34 तमा येशूकी सुङ्‍सुङ, “पत्रुस, ङ ख्‍युरुङला सिरिन, हारिङ च्‍यवु कुकुरी मातेन्‍दा सेक ख्‍योरो ङला थेङ्‍मा सुम ङो मेशेवी सिवी।”
LUK 22:35 येशूकी लोमातिवाला सुङ्‍सुङ, “ङे ख्‍यिराङला छयी साङ गिवु साङ काचा मेता क्‍यानी तङ्‍गुप पेला ख्‍यिराङला काङ ङ्‍युङ्‍मु च्‍युङ्‍सुङ?” तमा तिवी “माच्‍युङ।” सिनी सिक्‍यासुङ।
LUK 22:36 तमा खोकी सुङ्‍सुङ, “त याङ छयी वोतुप तीकी छयी लो, गिवु वोतुप तीकी साङ तुकै की। तमा दाक दाक्‍पी लोला खुर्पा मेतुपतिवी खोरो मज्‍या चोनी खुर्पा ङ्‍यो।
LUK 22:37 ङ ख्‍यिराङला सिरिन, ‘ती ति मी दुक्‍टातिवी दला शोर्सुङ।’ सिनी टि वोतुप कोन्‍छ्‍योककी सुङ ति ङला छे राङ गोकिवी। यिन, ङे थोक्‍ला टि वोतुप कोन्‍छ्‍योककी सुङ ति ङला छेयी डिवी।”
LUK 22:38 तमा लोमातिवी येशूला सिक्‍यासुङ, “ओ चोवो, ल्हो ताङ, दे खुर्पा ङ्‍यी चोके वे।” तमा येशूकी सुङ्‍सुङ, “तोजोयी वोसिन लङ्‍गिवी।”
LUK 22:39 तमा नरी दोके क्‍यानी येशू ग्‍येसा नेसुर थेन्‍नी जैतुन पम्‍दोकला फेप्‍सुङ, तमा लोमातिवा साङ खोकी तिङ्‍ला गाल्‍सुङ।
LUK 22:40 ते लेप्‍सिमा खोकी लोमातिवाला सुङ्‍सुङ, “ख्‍यिराङ खोक्‍पा ल्‍हापला मेख्‍येल्‍शी सिनी मोपोर की।”
LUK 22:41 तुक सुङ्‍सिमा खो ति लोमातिवी चा नेवा फेचेक फेप्‍नी पुमुङ चुनी दुक सिनी मोपोर क्‍या नाङ्‍सुङ,
LUK 22:42 “ओ पपा, पपी नोवा वोसिन दी छेटाङकी कोरा ति ङ नेसुर दोनी नाङ। यिने ङे नोवाला मिन, पपी नोवा दोके राङ च्‍युङ्‍शी।”
LUK 22:43 ती पेला देवाच्‍येन नेमा लेन क्‍योलुप थु यी खोकी चिप्‍ला छ्‍यर्नी खोला ङाडेङ बिन्‍सुङ।
LUK 22:44 तमा येशू छासे सेम्‍दुक लानी मङ ङार क्‍यानी मोपोर किसालेन्‍सिन खोकी ङुल्‍जुर ति ठककी थितोक दोके क्‍यानी सला लुम्‍सुङ।
LUK 22:45 खोकी मोपोर क्‍या छर्सिमा शेङ्‍नी लोमातिवी चाला फेप्‍सालेन्‍सिन लोमातिवा सेम्‍दुक किसा किसा येन छ्‍येनी ङ्‍यी गाल्‍नोक।
LUK 22:46 तमा खोकी तिवाला सुङ्‍सुङ, “ख्‍यिराङ च्‍यिला ङ्‍यी लोक्‍नी देकिवी? लानी खोक्‍पा ल्‍हापला मेख्‍येल्‍शी सिनी मोपोर की।”
LUK 22:47 येशूकी तुक सुङ्‍यिन वोतुप पेला मी माङ्‍छ्‍योक ते लेसुङ। तमा लोमा मिरा च्‍यिङ्‍ङी पर नेमा यहूदा सिरुप ति तिवाला गोमा क्‍यानी वासुङ। ती ति खोला पुका कितुपला खोकी चिप्‍ला वासुङ।
LUK 22:48 यिने येशूकी तीला सुङ्‍सुङ, “यहूदा, काङ ख्‍युरुङ ङ मी पुज्‍युङला पुका क्‍यानी जिम तेर्किवी?”
LUK 22:49 ते च्‍युङ्‍गुप ताम्‍ङे थोङ्‍नी येशू ताङ मुला वोतुप लोमातिवी खोला टिसुङ, “चोवो, ङ्‍यिराङ दिवाला खुर्पा थोकुप?”
LUK 22:50 तोजो पेला तिवी पर नेमा मिरा च्‍यिककी खुर्पा थेन्‍नी तेरी सिनाङ कोङ्‍यार छ्‍येकी लावा यीकी यावी थाकाकी नम्ज्‍योक ति टेप च्‍येसुङ।
LUK 22:51 यिने येशूकी “वोसी, तुक माकी!” सुङ्‍नी ती लावा तीकी नम्ज्‍योकला रेक्‍नी टेक च्‍यिसुङ।
LUK 22:52 तमा खोला जिम्‍बुपला वावु कोङ्‍यार छ्‍येतिवा ताङ ल्‍हङाङकी मक्‍मी छ्‍येतिवा ताङ यहूदी गोमा कितुप मी छ्‍येतिवाला खोकी दुक सुङ्‍सुङ, “ख्‍यिराङ च्‍यिला खुर्पा ताङ लकाम खुर्नी ङला जिम्‍बुपला वावु? काङ ङ च्‍याक्‍पा यिन रो?
LUK 22:53 ङ ङ्‍यिमी टेङ ख्‍यिरा मुला ल्‍हङाङला देतिन। ती पेला ति ख्‍यिरा ङला लाक्‍पा मालाङ। यिने दी ति नक्‍तोमीकी ओङ्‍ज्‍येन कितुप ख्‍यिरा तुजे यिन।”
LUK 22:54 तमा तिवी येशूला जिम्‍नी तेरी सिनाङ कोङ्‍यार छ्‍येकी खाङ्‍बा टिनी गाल्‍सुङ। पत्रुस ति फेचेक नेसुर खोकी तिङ्‍ला तिङ्‍यानी गाल।
LUK 22:55 ते लेङाङ पर्ला मीतिवा मे तङ्‍नी मे गारी गुरीला देनोक। तमा पत्रुस साङ तिवी पर्ला देसुङ।
LUK 22:56 ती पेला लावाम यीकी पत्रुसला ल्‍यामो क्‍यान ल्‍हानी दुक सिक्‍यासुङ, “दी मी तिङ तीकी मुला राङ नोक।”
LUK 22:57 यिने पत्रुसकी सिक्‍यासुङ, “ओ नुमो, ङे याङ तीला ङो राङ मेशेवी।”
LUK 22:58 येलुङ चेयी ज्‍युक्‍ला यम्‍बा यीकी तीला थोङ्‍नी सिक्‍यासुङ, “ख्‍युरुङ साङ तिवी पर नेमा मिरा च्‍यिक यिन।” यिने पत्रुसकी सिक्‍यासुङ, “अच्‍यो, ङ याङ मिन।”
LUK 22:59 तमा घण्‍टा यी ज्‍युक्‍ला यम्‍बा मिरा च्‍यिककी तेन्‍तेन क्‍यानी सिक्‍यासुङ, “वुतुङ के दी मी याङ तीकी मुला राङ नोक। दी याङ गालीलकी मी यिनोक।”
LUK 22:60 यिने पत्रुसकी सिक्‍यासुङ, “अच्‍यो, अच्‍युकी काङ सुङ्‍गुप यिन ङला छ्‍या राङ मे।” पत्रुसकी तुक सिक्‍यालुङ्‍मे च्‍यवु कुकुरी तेन्‍सुङ।
LUK 22:61 तोजो पेला चोवोकी ग्‍युर्नी पत्रुसला केरी ल्‍हासुङ। तमा चोवोकी खोरुङला “हारिङ च्‍यवु कुकुरी मातेन्‍दा सेक ख्‍योरो ङला थेङ्‍मा सुम ङो मेशेवी सिवी।” सिनी सुङ्‍गुप ताम्‍ङे ति पत्रुसकी टेन्‍सुङ।
LUK 22:62 तमा ती ति पाङ्‍ला थेन गल्‍नी कशेन ङुसुङ।
LUK 22:63 तमा येशूला र्‍हेन्‍दुप मीतिवी खोला मारे तोङ्‍यिन सिरा दुसुङ।
LUK 22:64 तिवी खोकी मिक ति टानी दुक सिक्‍यासुङ, “ख्‍युरुङला बेपुप ति सु यिन, सी ताङ।”
LUK 22:65 तमा तिवी खोला यम्‍बा मारे तोङ्‍गुप ताम्‍ङेतिवा साङ बङी सिक्‍यासुङ।
LUK 22:66 तमा नाम लासिमा कोङ्‍यार छ्‍येतिवा ताङ यहूदी छ्‍योकी गेकेनतिवा जोम्‍नी येशूला यहूदी गोमा कितुप मी छ्‍येकी छोक्‍पाकी दोङ्‍ला टि वुङ च्‍यिनी,
LUK 22:67 “ख्‍युरुङ ख्रीष्‍ट यिन्‍सिन ङ्‍यिराङला सी।” सिनी सिक्‍यासुङ। तमा खोकी तिवाला सुङ्‍सुङ, “ङे ख्‍यिराङला सिक्‍यासिनाङ ख्‍यिरा तेपा राङ मिकिवी।
LUK 22:68 ङे ख्‍यिराङला काङ टिसिनाङ ख्‍यिरा ङला टिलेन मग्‍यकिवी।
LUK 22:69 यिने तफेन्‍ला ङ मी पुज्‍युङ ति ओङ छ्‍येवु कोन्‍छ्‍योककी यावी थाकाला देकिवी।”
LUK 22:70 ती थोसिमा तेरीकी खोला “तुकै यिन्‍सिन ख्‍युरुङ कोन्‍छ्‍योककी सेवु राङ यिन?” सिनी टिसुङ। तमा येशूकी सुङ्‍सुङ, “ख्‍यिरा सिक्‍यावु ति ङ राङ यिन।”
LUK 22:71 तिवी “त ङ्‍यिराङला पङ्‍बु ल्‍हक्‍पा च्‍यिला गोसुङ? दीकी ख नेमा राङ दाक्‍पी थोसुङ।” सिनी सिक्‍यासुङ।
LUK 23:1 ती ज्‍युक्‍ला तेरी यहूदी छोक्‍पाकी मी छ्‍येतिवा लानी येशूला पिलातसकी चिप्‍ला टिनी गाल।
LUK 23:2 तमा तिवी खोकी तेन्‍दोकला दुक सिनी क्‍येन ग्‍यप्‍सुङ, “दी मी तीकी याङ ङ्‍यिरा मिरिककी मीतिवाला लुतिन नोक, रोमी ग्‍येल्‍वुला से तेतुप मेङ्‍गिवी सिनोक, तमा खोरुङ ति ग्‍येल्‍वु ख्रीष्‍ट यिन सिनोक।”
LUK 23:3 ती ताम्‍ङे थोनी पिलातसकी येशूला “काङ ख्‍युरुङ यहूदीतिवी ग्‍येल्‍वु राङ यिन?” सिनी टिसुङ। तमा येशूकी सुङ्‍सुङ, “ती ति ख्‍योरे राङ सिक्‍या वे।”
LUK 23:4 तमा पिलातसकी कोङ्‍यार छ्‍येतिवा ताङ मी माङ्‍छ्‍योकला सिक्‍यासुङ, “ङे याङ दी मी तीला काङ साङ क्‍येन तेरुप माथोङ।”
LUK 23:5 यिने मीतिवा ङार क्‍यानी दुक सिक्‍यासुङ, “दीकी याङ गालील नेज्‍युन दे सेक तेरी यहूदियाकी मीतिवाला खोरो येन्‍देन लाप्‍नी लुतिन नोक।”
LUK 23:6 ती थोसिमा पिलातसकी “दी मी ति गालीलकी मी राङ यिन?” सिनी टिसुङ।
LUK 23:7 तमा तीकी येशू ति हेरोदकी लुङ्‍बी मी यिन्‍दुप हाक्‍कोनी खोला हेरोदकी ते टिनी ताङ्‍सुङ। ती पेला हेरोद ति यरूशलेमला राङ नोक।
LUK 23:8 येशूला थोङ्‍सिमा हेरोद ति छासे गा क्‍यासुङ, च्‍यिलासिसिन तीकी येशूकी कोर्ला थोनी अला गोमा नेज्‍युन खोला ठेतुप नो क्‍यानोक। तमा तीकी खोकी काङ रे च्‍यिक रे हलेवु लाका कितुप ल्‍हापला रेवा क्‍यानोक।
LUK 23:9 तीकी येशूला टिवा बङी ग्‍यप्‍सुङ, यिने खोकी काङ टिलेन साङ मासुङ।
LUK 23:10 तमा कोङ्‍यार छ्‍येतिवा ताङ यहूदी छ्‍योकी गेकेनतिवी ते लान देनी खोला कशेन क्‍येन ग्‍यप्‍सुङ।
LUK 23:11 हेरोदकी खोरो मक्‍मीतिवा ताङ मुला खोला मारे तोङ्‍यिन सिरा मर्च्या क्‍यासुङ, तमा खोला ग्‍येल्‍वुकी कोन्‍दुप च्‍यिन्‍दै छ्‍योवा यी कोन बिन्‍नी पिलातसकी ते लोक्‍नी ताङ्‍सुङ।
LUK 23:12 गोमाला याङ पिलातस ताङ हेरोद ति च्‍यिककी च्‍यिकला ड यिनोक, यिने ती छेर्मु राङ तिवा थिन्‍नी दाल्‍जा च्‍युङ्‍सुङ।
LUK 23:13 तमा पिलातसकी कोङ्‍यार छ्‍येतिवा ताङ यहूदी गोमा कितुप मी छ्‍येतिवा ताङ मीतिवाला कताङ्‍नी
LUK 23:14 तिवाला दुक सिक्‍यासुङ, “दीकी मीतिवाला लुसुङ सिनी ख्‍यिरा दीला ङे चाला टिन लेसुङ। यिने ख्‍यिरा मिङ्‍गाला राङ ङे दीला ताम्‍ङेतिवा टिसिनाङ ख्‍यिरे दीकी तेन्‍दोकला क्‍येन ग्‍यपुप दोके ङे काङ साङ माथोङ।
LUK 23:15 हेरोदकी साङ तीला काङ क्‍येन माथोङ्‍नी तीला ङ्‍यिरा ते लोक्‍नी ताङ्‍नोक। दी मी तीकी याङ सेतुप छ्‍येर्पा तेर गोवु लाका मेलोक्‍पा काङ साङ माक्‍यानोक।
LUK 23:16 तुक क्‍यानी ङ दीला दुनी पि तोङ्‍यिन।”
LUK 23:17 (तमा ले टेङ यहूदीतिवी थरुप तुछ्‍येनला पिलातसकी चोन्‍खाङला शोरुप मिरा च्‍यिकला पि तोङ गोकिनोक।)
LUK 23:18 यिने पिलातसकी ताम्‍ङे थोनी मीतिवा तेरी मुला राङ च्‍यार ग्‍यप्‍नी, “दीला से! बरब्‍बाला ति पि तोङ!” सिनी सिक्‍यासुङ।
LUK 23:19 बरब्‍बा तीकी ग्‍येसाला वुल्‍दुङ्‍बा कितुप ताङ मीतिवा सेतुप क्‍येन फोक्‍नी चोन्‍खाङला शोर्नोक।
LUK 23:20 पिलातसकी येशूला पि तोङ्‍गुप नोनी येलुङ मीतिवाला सिक्‍यासुङ।
LUK 23:21 यिने तिवी “तीला ग्‍यङ्‍शिङला कल्‍नी काँडी दाप्‍नी से! तीला ग्‍यङ्‍शिङला कल्‍नी काँडी दाप्‍नी से!” सिनी मङ च्‍यार ग्‍यपुप ति ग्‍यप्‍तोक क्‍यासुङ।
LUK 23:22 तमा पिलातसकी थेङ्‍मा सुम्‍बाला सिक्‍यासुङ, “च्‍यिला? दी मी तीकी काङ लाका मेलोवा क्‍यासुङ? ङे याङ दीला से गोवु क्‍येन काङ साङ माथोङ, तुक क्‍यानी ङ दीला दुनी पि तोङ्‍यिन।”
LUK 23:23 यिने तिवी येशूला ग्‍यङ्‍शिङला कल्‍नी काँडी दाप्‍नी से सिनी मङ च्‍यार ग्‍यप्नी गोङ्‍बा शुसुङ। तुक क्‍यानी तिवी च्‍यार ग्‍यप्‍नी पिलातसला ग्‍येल्‍सुङ।
LUK 23:24 तमा तिवी गोङ्‍बा शुवु दोके राङ कितुप पिलातसकी तेन्‍तेन क्‍यानी
LUK 23:25 वुल्‍दुङ्‍बा कितुप ताङ मी सेतुप क्‍येन फोक्‍नी चोन्‍खाङला शोरुप तीला ति तिवी सिक्‍यावु दोके पि ताङ्‍सुङ, तमा येशूला ति तिवी नोवाला दोके कि ज्‍यितुपला तिवाला चेक तेसुङ।
LUK 23:26 तेसुर मक्‍मीतिवी येशूला टि डोयी कितुप पेला युल नेसुर ग्‍येसाला वुङ्‍यिन कितुप सिमोन सिरुप कुरेनी ग्‍येसाकी छ्‍यिग्‍यपकी मी यीला जिम्‍नी तीला ग्‍यङ्‍शिङ ति खुर च्‍यिनी येशूकी तिङ्‍ला डो च्‍यिसुङ।
LUK 23:27 तमा मी माङ्‍छ्‍योक खोकी तिङ्‍ला तिङ्‍यासुङ। तिवी पर्ला पुम्‍पेजातिवा खोकी थोक्‍ला ङोप ताङ ङुप्‍राङ कियी नोक।
LUK 23:28 तमा येशूकी ती पुम्‍पेजातिवी थाकाला ग्‍युर्नी सुङ्‍सुङ, “यरूशलेमकी पुमतिवा, ख्‍यिराङ ङे थोक्‍ला माङु, बोरु ख्‍यिराङ ताङ ख्‍यिरा पेजातिवी थोक्‍ला ङु।
LUK 23:29 च्‍यिलासिसिन दुका तुजे ति गिवी, ती पेला मीतिवी ‘रप्‍छ्‍येमतिवा ताङ नाम्‍साङ आङा माक्‍येवु खोक्‍पा ताङ नाम्‍साङ आङाला नुम मेतेरुप नुमला मोलाम थोपुप यिनो।’ सिनी सिवितो।
LUK 23:30 तमा तिवी रीतिवाला ‘ङ्‍यिरा खला लुम।’, तमा पम्‍दोकतिवाला ‘ङ्‍यिराङला उप।’ सिनी सिवितो।
LUK 23:31 दोजो दोङ्‍बु ङोर्मु वोतुप पेला साङ तुकै किसिन दोङ्‍बु कम्‍बुप पेला याङ काङ च्‍युङ्‍गी ताङ?”
LUK 23:32 ती पेला तिवी मी दुक्‍टा मिरा ङ्‍यीला साङ सेतुप छ्‍येर्पा ग्‍येलुपला येशूकी मुला टिनी गाल।
LUK 23:33 तमा कप्‍ली सिरुप दासा यीला लेप्‍सिमा तिवी येशूला ग्‍यङ्‍शिङला काँडी दाप्‍नी काल्‍सुङ। तुक राङ क्‍यानी च्‍याक्‍पा मिरा ङ्‍यीला साङ च्‍यिक ति खोकी यावी थाकाला ताङ च्‍यिक ति खोकी येन्‍बी थाकाला ग्‍यङ्‍शिङला काँडी दाप्‍नी काल्‍सुङ।
LUK 23:34 ती पेला येशूकी सुङ्‍सुङ, “ओ पपा, दिवाला माफ नङ्‍डे की, च्‍यिलासिसिन दिवी काङ कियी वे, ती ति दिवाला छ्‍या मे।” तमा मक्‍मीतिवी खोकी नम्‍सा ति ग्‍येन ग्‍यप्‍नी गोसुङ।
LUK 23:35 मीतिवा लानी ल्‍हयी नोक, तमा यहूदी मी छ्‍येतिवी खोला शा ग्‍यकिन दुक सिक्‍यासुङ, “दीकी मी यम्‍बाला याङ र्‍होक्‍सुङ। दोजो दी कोन्‍छ्‍योककी पेतुप ख्रीष्‍ट राङ यिन्‍सिन खोरुङला राङ र्‍होक ताङ।”
LUK 23:36 मक्‍मीतिवी साङ खोला मारे ताङ्‍सुङ, तमा तिवी खोकी चाला वानी खोला गुन्‍डुम छ्‍याङ क्‍युर्वु तेरिन सिरा दुक सिक्‍यासुङ,
LUK 23:37 “ख्‍युरुङ यहूदी ग्‍येल्‍वु राङ यिन्‍सिन खोरुङला राङ र्‍होक ताङ।”
LUK 23:38 तमा खोकी गो तेङ्‍ला “दी ति यहूदीतिवी ग्‍येल्‍वु यिन।” सिनी पङ्‍लिङ लोला टिवु यिकी ति ग्‍यम ज्‍याक्नोक।
LUK 23:39 येशू ताङ मुला ग्‍यङ्‍शिङला कलुप च्‍याक्‍पा ङ्‍यीकी पर्ला च्‍यिककी खोला मारे तोङ्‍यिन सिरा दुक सिक्‍यासुङ, “काङ ख्‍युरुङ ख्रीष्‍ट मिन? त ख्‍युरुङ ताङ ङ्‍यिराङला र्‍होक ताङ।”
LUK 23:40 यिने यम्‍बा च्‍याक्‍पा तीकी तीला वोरु देनिन सिक्‍यासुङ, “ख्‍युरुङ कोन्‍छ्‍योकला ज्‍यिवा मिकिवी? खोला ख्‍येलुप दोके छ्‍येर्पा ख्‍युरुङला साङ ख्‍येल्‍नी वे।
LUK 23:41 ङ्‍यिरा याङ रङगी क्‍यावु दुक्‍टाकी छ्‍येर्पा खुरिन वे, यिने दी मी तीकी याङ काङ साङ लाका मेलोवा माक्‍या वे।”
LUK 23:42 तमा तीकी येशूला सिक्‍यासुङ, “ओ येशू, ख्‍युरुङ ख्‍योरे ग्‍येल्‍खापला फेपुप पेला ङला नासाम तोङ।”
LUK 23:43 तमा येशूकी तीला सुङ्‍सुङ, “वुतुङ के ङ ख्‍युरुङला सिरिन, ख्‍युरुङ हारिङ राङ ङे मुला देवाच्‍येनला गिवितो।”
LUK 23:44 ङ्‍यिमी गुङगी छ्‍युजी च्‍यिङ्‍ङी गलुप पेला तेरी लुङ्‍बा ति छ्‍युजी सुम सेक नक्‍तोमी गाल।
LUK 23:45 तमा यहूदी ल्‍हङाङ नाङ्‍ला ग्‍यावु गोयोल ति पर नेमा रल्‍नी फेका ङ्‍यी गल्‍सुङ।
LUK 23:46 ती पेला येशूकी थोर ग्‍यप्‍नी सुङ्‍सुङ, “ओ पपा, ङे थु ति पपी छ्‍याकला चेक तेतिन।” तुक सुङ्‍सिमा खोकी उ छ्‍येसुङ।
LUK 23:47 ती च्‍युङ्‍गुप ति थोङ्‍सिमा रोमी मक्‍मी सयी च्‍यिककी खकी छ्‍ये तीकी “वुतुङ के दी याङ मी टेङ्‍बु यिनोक।” सिनी कोन्‍छ्‍योकला सोवा तेक्‍सुङ।
LUK 23:48 ते ल्‍हापला वावु मीतिवा तेरीकी काङ च्‍युङ्‍गुप ति थोङ्‍नी खोप्‍राङ खोप्‍राङ छेकोक दुङ्‍यिन सिरा लोक्‍नी गाल्‍सुङ।
LUK 23:49 यिने येशूला ङो शेवु मीतिवा ताङ गालील नेसुर खोकी तिङ्‍ला तिङ्‍यानी वावु पुम्‍पेजातिवा ति ते काङ च्‍युङ्‍गुप ति थाक्‍रिङ्‍बु नेसुर ल्‍हयी सिरा लानी देनोक।
LUK 23:50 यहूदी छोक्‍पाकी मी छ्‍येतिवी नाङ्‍ला योसेफ सिरुप मी मिरा च्‍यिक नोक। ती ति मी ल्‍यामु ताङ टेङ्‍बु यिनोक।
LUK 23:51 यहूदी छोक्‍पाकी मी छ्‍येतिवी येशूकी तेन्‍दोकला तेन्‍तेन क्‍यावु ताम्ङेला तीकी माङ्‍येन्‍नोक। ती ति अरिमाथिया सिरुप यहूदिया लुङ्‍बाकी युल नेमा वासुङ, तमा कोन्‍छ्‍योककी ग्‍येल्‍खाप वुङ्‍गुप ति गुनी देतुप मी यिनोक।
LUK 23:52 तीकी पिलातसकी चिप्‍ला गल्‍नी येशूकी फुङ्‍बु खुर्नी डो च्‍यी सिनी गोङ्‍बा शुसुङ।
LUK 23:53 तमा तीकी येशूकी फुङ्‍बु ति ग्‍यङ्‍शिङ लो नेमा पाप्‍नी तीला ति रा नेङेन नाङ्‍ला टिल्‍नी शेप मीला ज्‍योकुप टककी फुककी नाङ्‍ला ज्‍याक्‍सुङ। ती टककी फुक ति गोमाला सी रो साङ माज्‍यकुप फुक यिनोक।
LUK 23:54 ती ङ्‍यिमा ति टडिक कितुप ङ्‍यिमा यिनोक, तमा ङासोप ङ्‍यिमा गो जुवु पेला लेप्‍नोक।
LUK 23:55 गालील नेसुर येशूकी मुला वावु पुम्‍पेजातिवा ति योसेफकी तिङ तिङ्‍ला गल्‍नी ती टककी फुकला ल्‍हासुङ। तमा खोकी फुङ्‍बु ति चुक क्‍यानी ती नाङ्‍ला ज्‍योकिनोक सिनी ल्‍हासुङ।
LUK 23:56 ती ज्‍युक्‍ला तिवा खाङ्‍बा लोक्‍नी गल्‍नी टि जङ्‍बु खाप फे ताङ नुम टडिक क्‍यासुङ। तमा तिवा ङासोप ङ्‍यिमाला मोशाकी ठिमला वोतुप दोके ङप्‍सु ताङ्‍सुङ।
LUK 24:1 दिन्‍जाकी ङ्‍यिमा थल्‍माला टोपला टेताङ ती पुम्‍पेजातिवा खोप्‍रे टडिक क्‍यावु टी जङ्‍बु खाप फे ताङ नुम खुर्नी येशूकी फुङ्‍बु ज्‍यकुप टककी फुकला गाल।
LUK 24:2 तमा ते लेप्‍सिमा टककी फुककी खला च्‍येतुप दो ति रिल्‍नी तङ्‍गुप तिवी थोङ्‍सुङ।
LUK 24:3 तिवा टककी फुककी नाङ्‍ला शुनी ल्‍हासालेन्‍सिन चोवो येशूकी फुङ्‍बु ति ते मिन्‍दुक।
LUK 24:4 तमा तिवा काङ कितुप काङ कितुप गल्‍नी वोतुप पेला शार्क्येक वो ग्‍यपुप मज्‍या कोन्‍दुप ख्‍योक्‍पेजा मिरा ङ्‍यी तिवी चिप्‍ला लानी देनोक।
LUK 24:5 ती थोङ्‍सिमा पुम्‍पेजातिवा कशेन ज्‍यिवा लानी सला खवुतुङ्‍मा देसुङ। तमा ती ख्‍योक्‍पेजातिवी तिवाला सिक्‍यासुङ, “ख्‍यिराङ च्‍यिला ङोसु वोतुप तीला शेपतिवी पर्ला छोलिन वे?
LUK 24:6 खो याङ दे मे, खो ङोसु लानी वे। खो गालीलला ज्‍युवु पेला ख्‍यिराङला सुङ्‍गुप ताम्‍ङे ति नासाम तोङ।
LUK 24:7 खोकी ‘ङ मी पुज्‍युङ ति दिक्‍छेनतिवी लकला चेक ते गोकिवी, तमा ग्‍यङ्‍शिङ लोला कल्‍नी ङ्‍यिमा सुमला शेप ने येलुङ सेन्‍बु लङ्‍गिवी।’ सिनी सुङ्‍सुङ।”
LUK 24:8 ती थोसिमा ती पुम्‍पेजातिवी खोकी सुङ्‍गुप ताम्‍ङे ति नासाम शार्सुङ।
LUK 24:9 तमा पुम्‍पेजातिवा शेप मीला ज्‍योकुप टककी फुक नेमा लोक्‍नी वानी लोमा च्‍युच्‍यिकतिवा ताङ मी यम्‍बा तेरीला ते काङ च्‍युङ्‍गुप ताम्‍ङे ति लाप्‍सुङ।
LUK 24:10 ती पुम्‍पेजातिवा ति मरियम मग्‍दलिनी ताङ योअन्‍ना ताङ याकूबकी आमा मरियम यिनोक, तमा तिवी मुला वोतुप यम्‍बा पुम्‍पेजातिवी साङ लोमातिवाला ती ताम्‍ङे ति सिक्‍यासुङ।
LUK 24:11 यिने लोमातिवी ती ताम्‍ङे ति तेर्मे यिन सिनी नासाम ताङ्‍नी पुम्‍पेजातिवी ताम्‍ङेला तेपा माक्‍या।
LUK 24:12 यिने पत्रुस ति लानी येशूकी फुङ्‍बु ज्‍यकुप टककी फुकला छ्‍योङ्‍बाल ग्‍यम गाल्‍सुङ। तमा तीकी कुक क्‍यानी टककी फुककी नाङ्‍ला ल्‍हासालेन्‍सिन ते येशूकी फुङ्‍बु तुम्‍बुप रा नेङेन तिराङ ज्‍याक्‍नी वोतुप थोङ्‍सुङ। ती थोङ्‍सिमा ती ति काङ च्‍युङ्‍नोक सिनी हलेवा कियी सिरा खोरो खाङ्‍बा लोक्‍नी गाल्‍सुङ।
LUK 24:13 तमा ती छेर्मु राङ येशूला तिङ्‍योकुप मी मिरा ङ्‍यी यरूशलेम नेसुर किलोमिटर च्‍युच्‍यिक चोयी थाक्‍रिङ्‍बु वोतुप इम्‍माउस सिरुप युल नेवा डोयी नोक।
LUK 24:14 तोजो पेला तिवा च्‍युङ्‍गुप तेरी ताम्‍ङेतिवा कियी नोक।
LUK 24:15 तिवा ताम्‍ङे कियी वोतुप पेला येशू तिवी चिप्‍ला फेप्‍नी तिवी मुला राङ युसुङ।
LUK 24:16 यिने तिवी खो येशू यिन सिनी ङो माशेनोक।
LUK 24:17 तमा खोकी तिवाला “ख्‍यिराङ युकिन सिरा च्‍यिककी च्‍यिकला केवुल कियी वोतुप ताम्‍ङे ति काङगी कोर्ला यिन?” सिनी टि नाङ्‍सुङ। ती थोनी तिवा ङोतुङ नाक्‍छिल ताङ्‍नी चोक चोके लानी देसुङ।
LUK 24:18 तमा तिवा ङ्‍यिवुकी पर नेमा क्‍लेओपास सिरुप तीकी येशूला टिसुङ, “ख्‍युरुङ यरूशलेमला कोरा ग्‍यप्‍नी वासिनाङ तसाम पेला ते च्‍युङ्‍गुप ताम्‍ङे ख्‍युरुङला तिराङ छ्‍या मे?”
LUK 24:19 तमा खोकी तिवाला “काङगी ताम्‍ङे?” सिनी टिन नाङ्‍सुङ। तिवी सिक्‍यासुङ, “नासरतकी येशूकी कोर्ला च्‍युङ्‍गुप ताम्‍ङे यिन। खो ति कोन्‍छ्‍योक ताङ तेरी मीतिवी थोङ्‍दाङला लाका ताङ सुङला ङार छ्‍येवु कोन्‍छ्‍योककी लुङ्‍तेम्‍बा वोतुप्‍जा।
LUK 24:20 यिने कोङ्‍यार छ्‍येतिवा ताङ ङ्‍यिरा मी छ्‍येतिवी खोला सेतुप छ्‍येर्पा ग्‍येलुपला चेक तेसुङ।
LUK 24:21 तमा खो ति इस्राएलकी मीतिवाला थर ज्‍यितुप मी यिन सिनी ङ्‍यिरा रेवा क्‍यानी वोतुप्‍जा। तोजो तिराङ मिन, ती ताम्‍ङे च्‍युङ्‍गुप ति हारिङ ङ्‍यिमा सुम गाल।
LUK 24:22 ङ्‍यिरा मुकी पुम्‍पेजा ललाइकी ङ्‍यिराङला छासे हलेवा लाङ्‍सुङ। तिवा ति हारिङ टोपला टेताङ येशूकी फुङ्‍बु ज्‍यकुप टककी फुकला गाल्‍नोक,
LUK 24:23 यिने तिवी ते येशूकी फुङ्‍बु ति माथोङ्‍नोक। तमा तिवा लोक्‍नी वासिमा ङ्‍यिराङला दुक सिनी लाप्‍सुङ, ‘ङ्‍यिरा ते देवाच्‍येनकी लेन क्‍योलुप थुतिवाला थोङ्‍सुङ, तिवी खो ङोसु लान वे सिनी सिक्‍यानोक।’
LUK 24:24 ती ताम्‍ङे थोनी ङ्‍यिरा पर्ला ललाइ ति खोकी फुङ्‍बु ज्‍यकुप टककी फुकला गल्‍नी ल्‍हासालेन्‍सिन ती पुम्‍पेजातिवी सिक्‍यावु दोके खोकी फुङ्‍बु ति तिवी माथोङ्‍नोक।”
LUK 24:25 तमा येशूकी तिवाला सुङ्‍सुङ, “ओ ख्‍यिराङ अम्‍बारङ्‍शिङतिवा, ख्‍यिरा कोन्‍छ्‍योककी लुङ्‍तेम्‍बातिवी सिक्‍यावु तेरी ताम्‍ङेतिवाला तेपा कितुपला छासे काले नोक।
LUK 24:26 काङ ख्रीष्‍टकी वुतुङ के दी छेटाङ खुर्नी खोरुङला थोपुप मोवा ङ्‍ये मोगोवी रो?”
LUK 24:27 तमा येशूकी मोशा ताङ तेरी कोन्‍छ्‍योककी लुङ्‍तेम्‍बातिवा नेज्‍युनी तेरी कोन्‍छ्‍योककी सुङगी नाङ्‍ला खोरो कोर्ला टिवु ति तिवाला शेन नाङ्‍सुङ।
LUK 24:28 तमा तिवा ङ्‍यिवु डो गोवु युलला लेप्‍सिमा येशू ति तेसुर तरोङ फेचेक फेपुप छाल्‍सुङ।
LUK 24:29 यिने तिवी खोला “त याङ नाम ल्‍होसुङ, ङ्‍यिमा साङ गासुङ, ङ्‍यिरा मुला राङ ज्‍यु।” सिनी कार क्‍यानी सिक्‍यासुङ। तमा खो तिवी मुला ज्‍युवुला खाङ्‍बा शुसुङ।
LUK 24:30 तमा येशू तिवी मुला सोल शेवुला ज्‍युवु पेला शुब्‍ज्‍याङ लानी कोन्‍छ्‍योकला थुचिछे पुल्‍सिमा च्‍याक्‍नी तिवाला नाङ्‍सुङ।
LUK 24:31 ती पेला राङ तिवी मिक पेनी येशूला ङो शेसुङ। यिने खो तिवी थोङ्‍दाङ नेवा तोक तोर्सुङ।
LUK 24:32 तमा तिवी च्‍यिककी च्‍यिकला सिक्‍यासुङ, “खो लामला दाक्‍पु ताङ मुला अरा उरा सुङ्‍गुप ताङ दाक्‍पुला कोन्‍छ्‍योककी सुङगी तेन्‍दोक ति शे नङ्‍गुप पेला दाक्‍पी सेम ति छासे लोदिमु च्‍युङ्‍नी गा लावु मिन रो?”
LUK 24:33 तमा तिवा शार्क्येक लानी यरूशलेमला लोक्‍नी ल्‍हासालेन्‍सिन लोमा मिरा च्‍युच्‍यिक ताङ तिवी मुला वोतुपतिवा मुला राङ जोम्नी
LUK 24:34 दुक सियी नोक, “वुतुङ के चोवो याङ ङोसु लानी सिमोनकी चिप्‍ला छ्‍यार्सुङ।”
LUK 24:35 तमा ती मिरा ङ्‍यिवु साङ लामला काङ च्‍युङ्‍गुप ताम्‍ङे ताङ खोकी शुब्‍ज्‍याङ च्‍योकुप पेला तिवी खोला ङो शेवु ति तिवाला लाप्‍सुङ।
LUK 24:36 तिवा ती ताम्‍ङे कियी वोतुप पेला शार्क्येक येशू तिवी पर्ला लानी तिवाला “ख्‍यिराङला लोदिमु वुङ्‍शी।” सिनी सुङ्‍सुङ।
LUK 24:37 तमा तिवा र्‍हेन्‍डीला के थोङ्‍गुप यिन्‍दे नोनी ज्‍यिवा लानी पार्सुङ।
LUK 24:38 यिने खोकी तिवाला सुङ्‍सुङ, “ख्‍यिराङ च्‍यिला ज्‍यिवा किवी? ख्‍यिरा सेमला च्‍यिला यिन्‍दे मिन्‍दे नोकिवी?
LUK 24:39 ख्‍यिराङ ङे लाक्‍पा ताङ काङ्‍बा ल्हो। ङ राङ यिन! ङला थो ताङ्‍नी ल्हो। र्‍हेन्‍डी ति श ताङ रुकक मेवी, यिने ङ याङ ख्‍यिरा थोङ्‍गुप दोके श ताङ रुकक वे।”
LUK 24:40 तुक सुङ्‍सिमा येशूकी तिवाला खोरो छ्‍याक ताङ शाप ति छ्‍या तेन नाङ्‍सुङ।
LUK 24:41 तमा लोमातिवा छासे गा ताङ हलेवा क्‍यानी तरोङ साङ यिन्‍दे मिन्‍दे नो कियी वोतुप पेला खोकी तिवाला “ख्‍यिरा लोला काङ रे च्‍यिक रे साप समा वे?” सिनी टि नाङ्‍सुङ।
LUK 24:42 तमा तिवी खोला चोवु ङ्‍या च्‍यिक बिन्‍सिमा
LUK 24:43 खोकी ती ति लानी तिवी मिङ्‍गाला शेसुङ।
LUK 24:44 ती ज्‍युक्‍ला खोकी तिवाला सुङ्‍सुङ, “ङे गोमाला ख्‍यिरा मुला वोतुप पेला ख्‍यिराङला ‘मोशाकी ठिम ताङ कोन्‍छ्‍योककी लुङ्‍तेम्‍बाकी थेप ताङ भजनसंग्रहकी थेपकी नाङ्‍ला ङे कोर्ला टिवु तेरी ताम्‍ङेतिवा छे राङ गोकिवी।’ सिनी सिक्‍या वे।”
LUK 24:45 तमा खोकी तिवाला कोन्‍छ्‍योककी सुङ हाक्‍कोवु सेम नङ्‍यिन सिरा
LUK 24:46 तिवाला दुक सुङ्‍सुङ, “कोन्‍छ्‍योककी सुङला दुक सिनी टि वे, ‘ख्रीष्‍टकी छेटाङ खुर्सिमा ङ्‍यिमा सुमला शेप ने ङोसु लङ्‍गिवी,
LUK 24:47 तमा खोकी मिङला दिक्‍पा ने सेम ग्‍युर्सिन दिक्‍पा ताकिवी सिरुप लेन ल्‍यामु ति यरूशलेम नेसुर गो चुनी लुङ्‍बा तेरीकी मीतिवाला ख्‍याप्‍टाक किवी।’
LUK 24:48 ख्‍यिराङ ति ती तेरी ताम्‍ङेतिवी पङ्‍बु यिनो।
LUK 24:49 ल्‍होसा, ङे पपी थाक्‍छ्‍येन नङ्‍गुप ति ङ ख्‍यिराङला तोङ्‍यिनो। यिने ख्‍यिराङ कोन्‍छ्‍योक नेमा ओङ माथोपा सेक्‍ला दी ग्‍येसाला राङ देता।”
LUK 24:50 ती ज्‍युक्‍ला येशूकी लोमातिवाला ग्‍येसा नेमा तेन्‍नी बेथानिया सेक टिनी फेप्‍सुङ, तमा खोकी छ्‍याक तेक्‍नी तिवाला मोलाम नाङ्‍सुङ।
LUK 24:51 खोकी तिवाला मोलाम नङ्‍यिन वोतुप पेला खो ति तिवी मु नेसुर क्‍येनी देवाच्‍येन ने तेक्‍नी फेप्‍सुङ।
LUK 24:52 तमा तिवा खोला सोवा देकिन छासे गा कियी सिरा यरूशलेम नेवा लोक्‍सुङ।
LUK 24:53 ती ज्‍युक्‍ला तिवा कोन्‍छ्‍योकला सोवा देकिन सिरा यहूदी ल्‍हङाङला नरी देसुङ।
JOH 1:1 थल्‍माला जम्‍बुलिङ ज्‍येङ्‍गुप सिनाङ गोमाला कोन्‍छ्‍योककी सुङ नोक, ती सुङ ति कोन्‍छ्‍योककी मुला नोक। तमा ती सुङ ति वुतुङ के कोन्‍छ्‍योक राङ यिनोक।
JOH 1:2 ती सुङ ति थल्‍मा नेज्‍यु कोन्‍छ्‍योककी मुला नोक।
JOH 1:3 तमा ती सुङ नेसुर राङ कोन्‍छ्‍योककी तेरी जम्‍बुलिङ ज्‍ये नाङ्‍सुङ, ज्‍येवु ति च्‍यिक साङ खोकी मिसिन माजोवु यिन।
JOH 1:4 खोरे ज्‍ये नङ्‍गुपतिवा तेरीकी ती सुङ नेसुर मिजी थोप्‍सुङ, ती मिजी ति मीतिवी वोसिर यिनोक।
JOH 1:5 ती वोसिर ति नक्‍तोमी वुङ्‍ला ग्‍यकिनोक, यिने ती नक्‍तोमीकी ती वोसिरला हाक्‍को माथुप।
JOH 1:6 तमा कोन्‍छ्‍योककी तङ्‍गुप मी मिरा च्‍यिक नोक, तीकी मिङ ति यूहन्‍ना यिनोक।
JOH 1:7 तीकी ती वोसिरकी कोर्ला पङ्‍बु तेरुप ताङ ती पङ्‍बु नेसुर तेरी मीतिवी ती वोसिरला तेपा किशी सिनी वावु यिन।
JOH 1:8 ती ति खुरुङ राङ वोसिर मिन, यिने ती वोसिरकी कोर्ला पङ्‍बु तेरुपला तिराङ वावु यिन।
JOH 1:9 तमा मीतिवा तेरीला ठछ्‍येली तेरुप ती वोसिर टेङ्‍बु ति जम्‍बुलिङला फेपिन नोक।
JOH 1:10 खो ति जम्‍बुलिङला राङ ज्‍युनोक, तमा दी जम्‍बुलिङ ति खोकी राङ ज्‍ये नाङ्‍सुङ, यिन्‍सिनाङ जम्‍बुलिङकी मीतिवी खोला ङो माशेनोक।
JOH 1:11 खो खोरे लुङ्‍बाला फेप्‍सुङ, यिने खोरे मीतिवी राङ खोला सेमला माला।
JOH 1:12 यिने सु सुकी खोला खोरो सेमला लानी खोला तेपा क्‍यावे, खोकी तिवाला कोन्‍छ्‍योककी पुज्‍युङपुम च्‍युङ्‍गुप ओङ्‍ज्‍येन नाङ्‍सुङ।
JOH 1:13 तमा तिवा ति मीकी ठक याङ्‍ना सेम नोजु याङ्‍ना मीकी नोवा नेसुर क्‍येवु मिन, यिने कोन्‍छ्‍योककी नोवा नेमा क्‍येवु यिन।
JOH 1:14 तमा ती सुङ ति मी जुजमला दाक्‍पी पर्ला ज्‍युसुङ। खोकी मोवा ङ्‍यिरा थोङ्‍सुङ, तमा ती मोवा ति कोन्‍छ्‍योककी च्‍यिक राङ वोतुप खोकी सेवुकी मोवा यिनोक। खो ति छासे कटिन ताङ टेङ्‍बुकी क्‍येङ नोक।
JOH 1:15 यूहन्‍नाकी खोकी कोर्ला थोर ग्‍यप्‍नी दुक सिनी मीतिवाला पङ्‍बु बिन्‍सुङ, “दी मी तीकी कोर्ला ‘ङ सिनाङ ज्‍युक्‍ला मिरा च्‍यिक फेप्‍कितो, खो ति ङ सिनाङ चोछ्‍ये वे, च्‍यिलासिसिन खो ति ङ क्‍येप सिनाङ गोमाला के ज्‍युनोक।’ सिनी ङे सिक्‍यावु ति खो राङ यिन।”
JOH 1:16 खोकी छाछिङी नेमा दाक्‍पुला नरीकी नरी कटिन मङ्‍मु थोप्‍नी वे।
JOH 1:17 कोन्‍छ्‍योककी ठिम ति मोशा नेमा राङ ङ्‍येतुप यिन, यिने कटिन ताङ टेङ्‍बु ति येशू ख्रीष्‍ट नेमा वावु यिन।
JOH 1:18 सी साङ नाम्‍साङ कोन्‍छ्‍योकला माथोङ वे। यिने पपा कोन्‍छ्‍योककी मुला च्‍यिक राङ वोतुप खोकी सेवुकी कोन्‍छ्‍योक सु यिन सिरुप ति दाक्‍पुला छ्‍या तेन्‍सुङ।
JOH 1:19 यहूदीतिवी यरूशलेम नेसुर कोङ्‍यार छ्‍येतिवा ताङ लेवीतिवाला यूहन्‍नाकी चाला ताङ्‍नी तीला “ख्‍युरुङ सु यिन?” सिनी टि च्‍यिसुङ।
JOH 1:20 तमा यूहन्‍नाकी ताम्‍ङे माबावा क्‍यानी, “ङ ति ख्रीष्‍ट मिन।” सिनी टेङ्‍बो सिक्‍यासुङ।
JOH 1:21 तमा तिवी तीला “तुकै यिन्‍सिन ख्‍युरुङ सु यिन? ख्‍युरुङ एलिया यिन?” सिनी टिसुङ। तीकी “मिन।” सिनी सिक्‍यासुङ। येलुङ तिवी “ख्‍युरुङ कोन्‍छ्‍योककी लुङ्‍तेम्‍बा यिन?” सिनी टिसुङ। तमा तीकी “मिन।” सिनी सिक्‍यासुङ।
JOH 1:22 तमा येलुङ तिवी तीला “तुकै यिन्‍सिन ख्‍युरुङ सु यिन ङ्‍यिराङला सी। ङ्‍यिराङला टि तोङ्‍गुपतिवाला ङि्‍यरा टिलेन तेर गोकिवी। ख्‍युरुङ खुरुङला सु यिन सिनी सिवी?” सिनी टिसुङ।
JOH 1:23 तमा यूहन्‍नाकी कोन्‍छ्‍योककी लुङ्‍तेम्‍बा यशैयाकी सिक्‍यावु दोके “ङ ति दासा पाङ्‍थेरीला ‘चोवो फेवुकी थोक्‍ला लाम थेकाङ जो।’ सिनी थोर ग्‍यकुप वोरु यिन।” सिनी सिक्‍यासुङ।
JOH 1:24 यूहन्‍नाला ताम्‍ङे टेपला फरिसीतिवी तङ्‍गुपतिवी पर्ला ललाइकी येलुङ यूहन्‍नाला
JOH 1:25 “दोजो ख्‍युरुङ ख्रीष्‍ट साङ मिन, एलिया साङ मिन, कोन्‍छ्‍योककी लुङ्‍तेम्‍बा साङ मिन्‍सिन ख्‍योरो च्‍यिला मीतिवाला बप्‍तिस्‍मा बिन्‍दुप यिन?” सिनी टिसुङ।
JOH 1:26 तमा यूहन्‍नाकी “ङ याङ छ्‍यु थ्‍वोनी बप्‍तिस्‍मा तेरुप यिन। यिने ख्‍यिरा पर्ला मी मिरा च्‍यिक टङी लानी वे, खो सु यिन सिनी ख्‍यिरा ङो राङ मेशेवी।
JOH 1:27 खो ङे ज्‍युक्‍ला फेपुप यिन, यिन्‍सिनाङ ङ याङ खोकी शप्‍चेकी र्‍हाम्‍डोक डोलुप साङ पोमु मे।” सिनी सिक्‍यासुङ।
JOH 1:28 दी तेरी ताम्‍ङे ति यूहन्‍नाकी बप्‍तिस्‍मा बिन्‍दुप यर्दन चङ्‍बी फर्केन बेथानियाला च्‍युङ्‍गुप यिन।
JOH 1:29 ती सला तीला यूहन्‍नाकी येशू खोरो चाला फेपिन कितुप थोङ्‍नी, “ल्‍हो ताङ, जम्‍बुलिङ तेरीकी मीतिवाला दिक्‍पा ने थर ज्‍यितुप कोन्‍छ्‍योककी लुक रुक!
JOH 1:30 गोमाला ङे, ‘ङ सिनाङ ज्‍युक्‍ला मी मिरा च्‍यिक फेप्‍किवी। खो ङ सिनाङ छ्‍ये वे, च्‍यिलासिसिन खो ङ क्‍येवु सिनाङ गोमाला के ज्‍यु वोतुप यिन।’ सिनी सिक्‍यावु ति खो राङ यिन।
JOH 1:31 खो सु यिन सिनी ङे साङ ङो माशे, यिने ङ छ्‍यु थ्‍वोनी मीतिवाला बप्‍तिस्‍मा तेरुप ति इस्राएलकी मीतिवाला खो सु यिन सिनी ङो शे ज्‍यितुपला यिन।” सिनी सिक्‍यासुङ।
JOH 1:32 येलुङ यूहन्‍नाकी दुक सिनी पङ्‍बु बिन्‍सुङ, “देवाच्‍येन नेमा कोन्‍छ्‍योककी थु चाङ्‍मा ति गम्‍देर दोके क्‍यानी पाप्‍नी खोकी खला ज्‍यु वोतुप ति ङे थोङ्‍सुङ।
JOH 1:33 ङे साङ खोला ङो माशे, यिने छ्‍यु थ्‍वोनी बप्‍तिस्‍मा तेरुपला ङला तङ्‍गुप तीकी ‘चुका मी तीकी खला कोन्‍छ्‍योककी थु चाङ्‍मा पाप्‍नी ज्‍यु वोतुप ख्‍योरो थोङ्‍गिवे, ती ति कोन्‍छ्‍योककी थु चाङ्‍मा नेमा बप्‍तिस्‍मा नङ्‍गुप मी यिन सिनी ख्‍योरो हाक्‍कोकितो।’ सिनी ङला सुङ्‍सुङ।
JOH 1:34 ती ताम्‍ङे ति ङे थोङ्‍सुङ, तुक क्‍यानी खो ति कोन्‍छ्‍योककी सेवु यिन सिनी ङे पङ्‍बु बिनिन।”
JOH 1:35 ती सला तीला येलुङ यूहन्‍ना ति खोरो लोमा मिरा ङ्‍यीकी मुला लानी देन वोतुप पेला
JOH 1:36 येशू तिवी चा नेसुर फेपिन कितुप थोङ्‍नी तीकी “ल्‍हो ताङ, कोन्‍छ्‍योककी लुक रुक ति दी राङ यिन!” सिनी सिक्‍यासुङ।
JOH 1:37 यूहन्‍नाकी तुक सिक्‍यासिमा तीकी मुला वोतुप खोरो लोमा मिरा ङ्‍यी येशूकी तिङ्‍ला तिङ्‍यासुङ।
JOH 1:38 ती थोङ्‍सिमा येशू तिवी थाकाला ग्‍युर्नी, “ख्‍यिराङ काङ छोल्‍गिवी?” सिनी टिन नाङ्‍सुङ। तमा तिवी खोला “रब्‍बी, कनी ज्‍युकिवी?” सिनी सिक्‍यासुङ। (दी रब्‍बी सिक्‍यावु तेन्‍दोक ति गेकेन यिन।)
JOH 1:39 खोकी तिवाला “ख्‍यिराङ शोक, तमा ख्‍यिरा थोङ्‍गिवी।” सिनी सुङ्‍सुङ। तमा तिवा खोकी मुला राङ गल्‍नी खो ज्‍युवु दासा ति ल्‍हानी ती छेर्मु ते राङ शासा देसुङ। ती पेला ति गोमी छ्‍युजी ज्‍यी चोयी गाल्‍नोक।
JOH 1:40 यूहन्‍नाकी ताम्‍ङे थोनी येशूकी तिङ्‍ला तिङ्‍योकुप मिरा ङ्‍यीकी पर्ला मिरा च्‍यिक ति सिमोन पत्रुसकी नुप अन्‍द्रियास नोक।
JOH 1:41 तीकी येशूला ठेसिमा तेरी सिनाङ गोमाला खोरो उज्‍यु सिमोनकी चाला गल्‍नी, “ङ्‍यिरा याङ मसीहला ठेसुङ।” सिनी सिक्‍यासुङ। (ती मसीह सिक्‍यावु तेन्‍दोक ति ख्रीष्‍ट यिन।)
JOH 1:42 तमा तीकी खोरो उज्‍यु सिमोनला येशूकी चाला टिनी वासुङ। सिमोनला थोङ्‍नी येशूकी तीला “ख्‍युरुङ ति योआनेसकी पुज्‍युङ सिमोन यिन, यिने त याङ ख्‍युरुङला केफास सिनी मिङ ज्‍योकितो।” सिनी सुङ्‍सुङ। (केफासकी ग्रीक ताम्‍ङे ति पत्रुस यिन।)
JOH 1:43 ती सला तीला येशू गालील लुङ्‍बाला फेपुप सिनी तेन्‍तेन क्‍यासुङ। ती पेला खोकी फिलिप सिरुप मी यीला ठेनी तीला “ङे तिङ्‍ला तिङ्‍यो।” सिनी सुङ्‍सुङ।
JOH 1:44 ती फिलिप ति अन्‍द्रियास ताङ पत्रुसकी युल बेथसेदा ग्‍येसाकी मी यिनोक।
JOH 1:45 तमा फिलिप तीकी नथानेलला ठेनी, “मोशाकी कोन्‍छ्‍योककी सुङला टिवु ताङ कोन्‍छ्‍योककी लुङ्‍तेम्‍बातिवी टिवु ती मी तीला ङ्‍यिरा ठेसुङ। खो याङ नासरत नेसुर फेवु योसेफकी पुज्‍युङ येशू के यिनोक।” सिनी सिक्‍यासुङ।
JOH 1:46 तमा ती थोनी नथानेलकी फिलिपला “नासरत नेसुर काङ ल्‍यामु वुङ थुप्‍किवी रो?” सिनी सिक्‍यासुङ। यिने फिलिपकी “वानी ल्हो ताङ।” सिनी सिक्‍यासुङ।
JOH 1:47 तमा नाथनेल ति खोरो चाला वुङ्‍यिन कितुप थोङ्‍नी येशूकी तीला “ल्‍हो ताङ, ती ति वुतुङ के टेङ्‍बु वोतुप इस्राएलकी मी यिनोक। तीकी मुला काङ साङ जिनोक मे।” सिनी सुङ्‍सुङ।
JOH 1:48 तमा नथानेलकी येशूला “गेकेनकी ङला चुक क्‍यानी ङो शेसुङ?” सिनी टिसुङ। तमा येशूकी तीला “फिलिपकी ख्‍युरुङला कतोङ्‍गुप सिनाङ गोमाला के ङे ख्‍युरुङला अन्‍जीरकी दोङ्‍बी वोक्‍ला वोतुप थोङ्‍सुङ।” सिनी सुङ्‍सुङ।
JOH 1:49 तमा नथानेलकी येशूला “रब्‍बी, रब्‍बी याङ कोन्‍छ्‍योककी सेवु के यिन, तमा इस्राएलकी ग्‍येल्‍वु के यिनोक।” सिनी सिक्‍यासुङ।
JOH 1:50 तमा येशूकी तीला सुङ्‍सुङ, “काङ ङे ख्‍युरुङला अन्‍जीरकी दोङ्‍बी वोक्‍ला वोतुप थोङ्‍सुङ सिनी सिक्‍यावु तप्‍की ख्‍योरो ङला तेपा क्‍यावु यिन? ख्‍योरो दी सिनाङ मङ हलेवु लाकातिवा थोङ्‍गितो।”
JOH 1:51 तमा येशूकी तीला “वुतुङ के ङ ख्‍युरुङला टेङ्‍बो सिरिन, ख्‍योरो देवाच्‍येन सेङ्‍गुप ताङ देवाच्‍येनकी लेन क्‍योलुप थुतिवा ङ मी पुज्‍युङकी खला येर जेकुप ताङ मर पपुप थोङ्‍गितो।” सिनी सुङ्‍सुङ।
JOH 2:1 तेमी ङि्‍यमा सुमकी छेर्मु गालील लुङ्‍बाकी काना सिरुप ग्‍येसाला जेन्‍दी यी नोक। ती जेन्‍दीला येशूकी आमा साङ वानोक।
JOH 2:2 येशू ताङ खोकी लोमातिवाला साङ ती जेन्‍दीला केच्‍या क्‍यानी खोतिवा ते राङ फेप्‍नोक।
JOH 2:3 तमा डेन्‍बुतिवाला तेरुप गुन्‍डुम छ्‍याङ सिन्‍दुप थोङ्‍नी येशूकी आमा तीकी खोला “जेन्‍दीकी मीतिवी मुला गुन्‍डुम छ्‍याङ सिन्‍नोक।” सिनी सिक्‍यासुङ।
JOH 2:4 तमा येशूकी खोरो आमाला “ममो, च्‍यिला ङला ती ताम्‍ङे किवी? तन्‍दा सेक ङे तुजे मालेप वे।” सिनी सुङ्‍सुङ।
JOH 2:5 ती ज्‍युक्‍ला येशूकी आमा तीकी तेकी लावातिवाला “खोकी ख्‍यिराङला काङ सुङ्‍गिवे, तुकै राङ किसा।” सिनी सिक्‍यासुङ।
JOH 2:6 ते तो मिसिन छ्‍यु लिटर सयी शोङ्‍गुप दो पुङ्‍नी जोवु छ्‍यु देकुप दोजुम टुक चोके ज्‍याक्‍नोक। ती दोजुम ति यहूदीतिवी खोप्‍राङ चाङ्‍मा जोप लुक्‍सु तेन्‍दुपला थोकिनोक।
JOH 2:7 तमा येशूकी लावातिवाला “ती दोजुमतिवी नाङ्‍ला छ्‍यु क्‍येङ।” सिनी सुङ्‍सुङ। खोकी तुक सुङ्‍सिमा लावातिवी ती दोजुमतिवी नाङ्‍ला खाटेक छ्‍यु क्‍येङ्‍सुङ।
JOH 2:8 येलुङ खोकी तिवाला “त दोजुम नाङगी छ्‍यु ति चेयी पुनी डेन टडिक कितुप मी छ्‍येला खुर्नी बिन।” सिनी सुङ्‍सुङ। तमा तिवी खोकी सुङ्‍गुप दोके राङ क्यासुङ।
JOH 2:9 तमा डेन टडिक कितुप मी छ्‍ये तीकी ती गुन्‍डुम छ्‍याङला ग्‍युरुप छ्‍यु ति थुनी ल्‍हासुङ। यिने तीला ती गुन्‍डुम छ्‍याङ ति कनी नेसुर वासुङ सिनी छ्‍या मिन्‍दुक, यिने छ्‍यु खुन वावु लावातिवाला ति छ्‍या नोक। तमा ती डेन टडिक कितुप मी छ्‍ये तीकी माक्‍पाला कताङ्‍नी दुक सिक्‍यासुङ,
JOH 2:10 “तेरी मीतिवी गोमाला गुन्‍डुम छ्‍याङ कर्मा ति तेर्किवी, यिने डेन्‍बुतिवा अलायी जिसिमा छ्‍याङ ज्‍यपु ति तेर्किवी। यिने अच्‍युकी याङ दुका तेरी सिनाङ गुन्‍डुम छ्‍याङ कर्मा ति तन्‍दा सेक लु च्‍यिनोक।”
JOH 2:11 दी हलेवु त ति गालील लुङ्‍बाकी काना सिरुप ग्‍येसाला येशूकी थल्‍माला छ्‍या तेन्‍दुप त यिन। खोकी खोरुङला वोतुप मोवा ति छ्‍या तेन्‍सिमा खोकी लोमातिवी खोला तेपा क्‍यासुङ।
JOH 2:12 ती ज्‍युक्‍ला येशू खोरो आमा ताङ नुपतिवा ताङ लोमातिवी मुला मर कफर्नहुम ग्‍येसाला फेप्‍नी ङ्‍यिमा चेयी ते राङ ज्‍युसुङ।
JOH 2:13 ती पेला यहूदीतिवा थरुप तुछ्‍येन वानिङ सिन्‍नोक। तुक क्‍यानी येशू तेसुर येर यरूशलेमला फेप्‍सुङ।
JOH 2:14 ते यहूदी ल्‍हङाङकी लेङाङला खोकी लाङ ताङ लुक ताङ गम्‍देर चोङ्‍गुप मीतिवा ताङ च्‍योक्‍ची खला देनी टङ्‍गा ज्‍येयी वोतुप मीतिवा थोङ्‍सुङ।
JOH 2:15 ती थोङ्‍सिमा खोकी थाक्‍पा लानी तल्‍च्‍येक जोनी लुक ताङ लाङ मुला तिवा तेरीला ल्‍हङाङ तेसुर तेन्‍नी ताङ्‍सुङ। तमा खोकी टङ्‍गा ज्‍येप मीतिवी टङ्‍गातिवा थरा थुरा ताङ्‍नी च्‍योक्‍चीतिवा आलोक ग्‍यप्‍सुङ।
JOH 2:16 खोकी गम्‍देर चोङ्‍गुपतिवाला “देसुर दिवा टाक्‍टुक खुर्नी ग्‍युक। तफेन्‍ला ख्‍यिरा ङे पपी खाङ्‍बाला छोङ कितुप हाट माजोवा।” सिनी सुङ्‍सुङ।
JOH 2:17 ती थोङ्‍सिमा खोकी लोमातिवी कोन्‍छ्‍योककी सुङ नाङ्‍ला “चोवोकी ल्‍हङाङकी थोक्‍ला ङे सेम ति छासे छिकिनोक।” सिनी टि वोतुप ति नासाम शार्सुङ।
JOH 2:18 खोकी तुक क्‍यावु थोङ्‍सिमा यहूदी गोमा कितुप मी छ्‍येतिवा खोकी चाला वानी, “काङ ख्‍युरुङला दुकै कितुप ओङ्‍ज्‍येन वे? वोसिन ङ्‍यिराङला चुका त छ्‍या देन्गिवी?” सिनी खोला टिसुङ।
JOH 2:19 तमा येशूकी तिवाला “दी ल्‍हङाङ ति र्‍होम, तमा ङ ङ्‍यिमा सुमला राङ दीला येलुङ येर लोङ्‍यिन।” सिनी सुङ्‍सुङ।
JOH 2:20 तमा यहूदीतिवी खोला “दी ल्‍हङाङ जोपला लो खल ङ्‍यी ताङ टुक सेक थोवु यिन। ख्‍योरो चुक क्‍यानी दीला ङ्‍यिमा सुमला राङ येर लोङ थुप्‍किवी रो?” सिनी सिक्‍यासुङ।
JOH 2:21 यिने खोकी सुङ्‍गुप ल्‍हङाङकी तेन्‍दोक ति खोरो जुकी कोर्ला सुङ्‍गुप यिन।
JOH 2:22 तमा खो टुङ्‍नी ङोसु लासिमा तिराङ लोमातिवाला खोकी तुक सुङ्‍गुप ति नासाम शार्नोक। तमा तिवी कोन्‍छ्‍योककी सुङ ताङ येशूकी सुङ्‍गुप सुङला तेपा क्‍यासुङ।
JOH 2:23 यहूदीतिवा थरुप तुछ्‍येनला येशू यरूशलेमला राङ ज्‍युनी नोक। ते मीतिवा बङीकी खोकी क्‍यावु हलेवु ततिवा थोङ्‍सुङ, तमा तिवी खोला तेपा क्‍यासुङ।
JOH 2:24 यिने येशूकी तिवाला लो राङ मातेन, च्‍यिलासिसिन खोकी मीतिवा तेरीला छ्‍या नोक।
JOH 2:25 मीतिवा चुकै वे सिनी सी साङ खोला लोप मोगोनोक, च्‍यिलासिसिन मीतिवी सेमला काङ वे सिरुप ति खोला छ्‍या नोक।
JOH 3:1 ते फरिसी छ्‍योक्‍पाकी मीतिवी पर्ला निकोदेमस सिरुप यहूदीतिवाला गोमा कितुप मी मिरा च्‍यिक नोक।
JOH 3:2 ती निकोदेमस ति ङ्‍यिम्‍ज्‍यिक नुपला येशूकी चाला वानी, “गेकेन, गेकेन याङ कोन्‍छ्‍योककी तङ्‍गुप यिन सिरुप ति ङ्‍यिराङला छ्‍या वे। च्‍यिलासिसिन कोन्‍छ्‍योक गेकेनकी मुला मेतुप यिन्‍सिन गेकेनकी क्‍या नङ्‍गुप हलेवु ततिवा ति सी साङ छ्‍या देन मुथुपी।” सिनी सिक्‍यासुङ।
JOH 3:3 तमा येशूकी तीला “वुतुङ के ङ ख्‍युरुङला सिरिन, मीतिवा लोङ माक्‍येसुङ सिसिन सु साङ कोन्‍छ्‍योककी ग्‍येल्‍खाप थोङ मुथुपी।” सिनी सुङ्‍सुङ।
JOH 3:4 निकोदेमसकी खोला “मी गावा गल्‍सिमा चुक क्‍यानी क्‍ये थुप्‍किवी रो? काङ आमी खोकला शुनी येलुङ क्‍येकिवी रो?” सिनी टिसुङ।
JOH 3:5 तमा येशूकी तीला सुङ्‍सुङ, “वुतुङ के ङ ख्‍युरुङला सिरिन। छ्‍यु ताङ कोन्‍छ्‍योककी थु चाङ्‍मा नेमा माक्‍येसुङ सिसिन सु साङ कोन्‍छ्‍योककी ग्‍येल्‍खापला शुक मुथुपी।
JOH 3:6 जु नेमा क्‍येवु ति जु यिन, यिने कोन्‍छ्‍योककी थु चाङ्‍मा नेमा क्‍येवु ति थु यिन।
JOH 3:7 तुक क्‍यानी ङे ख्‍युरुङला लोङ क्‍ये गोकिवी सिनी सिक्‍यावु ताम्‍ङेला हलेवा माकी।
JOH 3:8 वुर्तुक ति खोरो नोवाला राङ ग्‍यकिवी। ख्‍योरो वुर्तुक ग्‍यपुप वोरु ति थोकिवी, यिने ती वुर्तुक कनी नेसुर वावु ताङ कनिवा डिवी सिरुप ति हाक्‍मोकोवी। कोन्‍छ्‍योककी थु चाङ्‍मा नेमा क्‍येवु मी ति तेरी तुकै राङ यिन।”
JOH 3:9 तमा निकोदेमसकी येशूला “ला! चुक क्‍यानी तुकै वुङ थुप्‍किवी रो?” सिनी टिसुङ।
JOH 3:10 येशूकी तीला सुङ्‍सुङ, “ख्‍युरुङ इस्राएलकी गेकेन यिन्‍सिनाङ ती ताम्‍ङे ति हाक्‍मोकोवी?
JOH 3:11 वुतुङ के ङ ख्‍युरुङला सिरिन, ङि्‍यरा काङ शेवु ति सिरिन, तमा काङ थोङ्‍गुप ति पङ्‍बु तेरिन। यिन्‍सिनाङ ङ्‍यिरा पङ्‍बु बिन्‍दुप ति ख्‍यिरा मेङ्‍येन्‍दिवी।
JOH 3:12 ङे ख्‍यिराङला जम्‍बुलिङकी ताम्‍ङे सिक्‍यासिनाङ तेपा मिकिनोक, तुकै यिन्‍सिन चुक क्‍यानी देवाच्‍येनकी ताम्‍ङे सिक्‍यासिन तेपा कि थुप्‍किवी रो?
JOH 3:13 देवाच्‍येन नेमा वावु ङ मी पुज्‍युङ मिसिन यम्‍बा सु साङ देवाच्‍येनला मागाल वे।
JOH 3:14 दासा पाङ्‍थेरीला मोशाकी सेर्मी रुल जोनी जोवाकी लोला लङ्‍गुप दोके मी पुज्‍युङ साङ लोङ गोकिवी।
JOH 3:15 ती ति खोला तेपा कितुप तेरीला नाम्‍साङ मिशिवु मिजी थोपुपला यिन।
JOH 3:16 कोन्‍छ्‍योककी जम्‍बुलिङकी मीतिवाला दुका ङ्‍यिङ्‍ज्‍ये क्‍या नाङ्‍नी खोकी च्‍यिक राङ वोतुप सेवु ति जम्‍बुलिङला ताङ्‍सुङ। ती ति सी खोला तेपा किवे, तिवा ङ्‍येलाला मोडोशी, यिने नाम्‍साङ मिशिवु मिजी थोप्‍शी सिनी यिन।
JOH 3:17 कोन्‍छ्‍योककी खोरे सेवु जम्‍बुलिङला तङ्‍गुप ति जम्‍बुलिङला ठिम कितुपला मिन, यिने खोकी सेवु नेसुर जम्‍बुलिङला र्‍होकुपला यिन।
JOH 3:18 सी खोला तेपा किवे, तीला ठिम मोफोकिवी। यिने तेपा मिकिवुतिवाला ति गोमाला के ठिम फोक्‍नी वे, च्‍यिलासिसिन तिवी कोन्‍छ्‍योककी च्‍यिक राङ वोतुप सेवुला तेपा माक्‍यावु तप्‍की यिन।
JOH 3:19 ती ठिम फोकुप ति दी यिन, कोन्‍छ्‍योककी जम्‍बुलिङला वोसिर तङ वे, यिने मीतिवा दुक्‍टा गलुप तप्‍की वोसिरला सिनाङ नक्‍तोमीला मङ सेमला गाल।
JOH 3:20 दुक्‍टा कितुप तेरी मीतिवा वोसिरला गा मिकिवी, तमा वोसिरकी चाला मेङ्‍गिवी। च्‍यिलासिसिन तिवा खोरो क्‍यावु दुक्‍टा ति मीतिवी थोङ्‍गिवी सिनी ज्‍यिवा किवी।
JOH 3:21 यिने टेङ्‍बु कितुपतिवा वोसिरकी चाला गिवी, च्‍यिलासिसिन तिवी क्‍यावु लाका ति वुतुङ के कोन्‍छ्‍योक नेमा राङ क्‍यावु यिन सिनी मी यम्‍बाला ठछ्‍येली हाक्‍को ज्‍यितुपला यिन।”
JOH 3:22 ती सुङ्‍सिमा येशू खोरो लोमातिवा ताङ मुला यहूदिया लुङ्‍बाला फेप्‍नी ते ङ्‍यिमा चेयी पर सेक ज्‍युनी मीतिवाला बप्‍तिस्‍मा नाङ्‍सुङ।
JOH 3:23 तमा यूहन्‍नाकी साङ सालीम सिरुप दासाकी चाला वोतुप एनोनला मीतिवाला बप्‍तिस्‍मा तेर्किनोक, च्‍यिलासिसिन ते छ्‍यु बङी वोतुप तप्‍की यिन। मीतिवा ङ्‍यिमी टेङ यूहन्‍नाकी चाला वानी बप्‍तिस्‍मा लङ्‍गिनोक।
JOH 3:24 ती पेला सेक यूहन्‍ना ति चोन्‍खाङला माशोर्नोक।
JOH 3:25 तमा यूहन्‍नाकी लोमातिवा ताङ ललाइ यहूदी मी यीकी पर्ला जु चाङ्‍मा जोप यहूदी लुक्‍सुकी कोर्ला लप्‍सिर ग्‍यक्‍टी चेसुङ।
JOH 3:26 ती ज्‍युक्‍ला यूहन्‍नाकी लोमातिवा यूहन्‍नाकी चाला वानी, “गेकेन, गोमाला गेकेन ताङ मुला यर्दन चङ्‍बी फर्केनला वोतुप गेकेनकी पङ्‍बु बिन्‍दुप ती मी ति मीतिवाला बप्‍तिस्‍मा तेरिन नोक, तमा मीतिवा तेरी खोकी चाला डिनोक।” सिनी सिक्‍यासुङ।
JOH 3:27 तमा यूहन्‍नाकी तिवाला दुक सिक्‍यासुङ, “कोन्‍छ्‍योककी देवाच्‍येन नेमा मानाङ्‍सिन मीकी काङ साङ ङ्‍ये मुथुपी।
JOH 3:28 ‘ङ ति ख्रीष्‍ट मिन, यिने खो सिनाङ गोमाला तङ्‍गुप ति यिन।’ सिनी ङे सिक्‍यावु ताम्‍ङेला पङ्‍बु तेरुप ति ख्‍यिराङ राङ यिन।
JOH 3:29 नमाला जेन्‍दी कितुप ति माक्‍पा यिन, यिने माक्‍पी क्‍योल्‍मिन ति माक्‍पी चाला लान देनी माक्‍पी वोरु थोसिमा छासे गा किवी। तुक राङ क्‍यानी ङला छासे गा ला वे।
JOH 3:30 खो ति मङ मङ फेल गोकिवी, ङ ति मङ मङ ङ्‍युङ गोकिवी।”
JOH 3:31 “देवाच्‍येन नेमा फेवु ति तेर ताङ सिनाङ चोछ्‍ये वे। जम्‍बुलिङकी मी ति जम्‍बुलिङकी मी राङ यिन, तमा जम्‍बुलिङकी थोक्‍ला तिराङ ताम्‍ङे किवी। यिने देवाच्‍येन नेमा फेवु ति तेरी सिनाङ चोछ्‍ये वे।
JOH 3:32 तमा खोकी देवाच्‍येन नेमा काङ थोङ्‍गुप ताङ काङ थोवु ति पङ्‍बु नङ्‍गिवी। यिन्‍सिनाङ सी साङ खोकी सुङ्‍गुप पङ्‍बुला तेपा मिकिवी।
JOH 3:33 यिने सी खोकी पङ्‍बुला तेपा किवे, तीकी कोन्‍छ्‍योक ति टेङ्‍बु वे सिनी तेन्‍तेन किवी।
JOH 3:34 कोन्‍छ्‍योककी तङ्‍गुप तीकी कोन्‍छ्‍योककी सुङ लप्‍किवी, च्‍यिलासिसिन कोन्‍छ्‍योककी तीला खोकी थु चाङ्‍मा छासे मङ्‍मु नङ्‍गुप तप्‍की यिन।
JOH 3:35 पपा कोन्‍छ्‍योककी खोरे सेवुला ङ्‍यिङ्‍ज्‍ये क्‍या नाङ्‍नी तेरी ओङ्‍ज्‍येन ति खोला चेक तेन नाङ्‍सुङ।
JOH 3:36 सी कोन्‍छ्‍योककी सेवुला तेपा किवे, तीला नाम्‍साङ मिशिवु मिजी थोप्‍किवी। यिने सी कोन्‍छ्‍योककी सेवुला तेपा मिकिवे, तीला ती मिजी मोथोपिवी, बोरु कोन्‍छ्‍योककी पर्च्या तीकी खला ख्‍येल्‍गिवी।”
JOH 4:1 येशूकी यूहन्‍नाकी सिनाङ मङ लोमातिवा जोवु ताङ बप्‍तिस्‍मा नङ्‍गुप ताम्‍ङे फरिसीतिवी थोवु ति येशूकी हाक्‍कोनोक।
JOH 4:2 यिने बप्‍तिस्‍मा नङ्‍गुप ति येशूकी मिन, खोकी लोमातिवी तेर्किनोक।
JOH 4:3 ती ताम्‍ङे हाक्‍कोनी येशू खोकी लोमातिवा ताङ मुला यहूदिया लुङ्‍बा क्‍युर ज्‍याक्‍नी येलुङ गालील लुङ्‍बाला लोक्‍नी फेपिन नोक।
JOH 4:4 खो फेपुप पेला सामरिया लुङ्‍बा नेवा क्‍यानी फेप गोकिनोक।
JOH 4:5 खो फेप्‍सालेन्‍सिन सामरिया लुङ्‍बाकी सुखार सिरुप ग्‍येसाला लेप्‍सुङ। ती ग्‍येसा ति याकूबकी खोरो पुज्‍युङ योसेफला बिन्‍दुप शिङगी चिप्‍ला राङ ख्‍येल्‍गिनोक।
JOH 4:6 तमा ते याकूबकी जोवु टोम्‍बा यी नोक। येशू युक्‍सा युक्‍सा येन छ्‍येतुप तप्‍की ती टोम्‍बी चाला ज्‍युसुङ। ती पेला ङ्‍यिमी गुङगी छ्‍युजी च्‍यिङ्‍ङी चोयी गाल्‍नोक।
JOH 4:7 ते सामरी पुम्‍पेजा यी छ्‍यु च्‍यकुपला वानोक। तमा येशूकी तीला “ङला थुङ्‍गुप छ्‍यु चेयी नाङ्‍नी।” सिनी सुङ्‍सुङ।
JOH 4:8 ती पेला खोकी लोमातिवा ति साप समा ङ्‍योपला ग्‍येसाला गाल्‍नोक।
JOH 4:9 तमा पुम्‍पेजा तीकी खोला “अच्‍यु ति यहूदी यिन, ङ ति सामरी पुम्‍पेजा यिन। चुक क्‍यानी अच्‍यी ङला छ्‍यु नाङ सिनी सुङ्‍गुप यिन?” सिनी सिक्‍यासुङ। (यहूदीतिवा सामरीतिवी मुला काङ साङ ख मिडिक्‍नोक।)
JOH 4:10 तमा येशूकी ती पुम्‍पेजा तीला सुङ्‍सुङ, “ख्‍युरुङ कोन्‍छ्‍योककी ङ्‍येम्‍बा ताङ ख्‍युरुङला छ्‍यु लोङ्‍गुप मी ति सु यिन सिनी ङो शेसिन तीला ख्‍योरे लोङ्‍गुप्‍जा, तमा खोकी ख्‍युरुङला मिजी तेरुप छ्‍यु तेरुप्‍जा।”
JOH 4:11 तमा ती पुम्‍पेजा तीकी येशूला “अच्‍यी लोला याङ छ्‍यु च्‍यकुप नेक्‍योक साङ मे, दी टोम्‍बा साङ तिङ्‍मु वे। तुक क्यानी अच्‍यी कनी नेसुर मिजी तेरुप छ्‍यु ति खुर्नी वुङ थुप्‍किवी रो?
JOH 4:12 काङ अच्‍यु ङ्‍यिरा हङ्‍गावा याकूब सिनाङ छ्‍ये यिन रो? तीकी दी टोम्‍बा ति ङ्‍यिरा थोक्‍ला जोनी बिन्‍दुप यिन। तमा ती ताङ तीकी पेजातिवा ताङ तीकी रा छ्‍युङ्‍मातिवा तेरीकी दी छ्‍यु थुवु यिन।” सिनी सिक्‍यासुङ।
JOH 4:13 तमा येशूकी तीला दुक सुङ्‍सुङ, “दी छ्‍यु थुङ्‍गुपतिवा तेरीला येलुङ कोम्‍बा लङ्‍गिवी,
JOH 4:14 यिने ङे तेरुप छ्‍यु थुङ्‍गुपतिवाला नाम्‍साङ कोम्‍बा मालङ्‍गिवी। तमा ती छ्‍यु ति तिवी मिजी नेमा नरी दोलुप छ्‍यी पुङ दोके च्‍युङ्‍नी तिवाला नाम्‍साङ मिशिवु मिजी तेर्किवी।”
JOH 4:15 तमा ती पुम्‍पेजा तीकी खोला “अच्‍यो, ती छ्‍यु ति ङला नङ्‍नी ङला नाम्‍साङ कोम्‍बा मालङ्‍शी, तमा ङ दे छ्‍यु च्‍यकुपला नरी वुङ साङ मोगोशी।” सिनी सिक्‍यासुङ।
JOH 4:16 तमा खोकी तीला “ख्‍युरुङ गल्‍नी ख्‍योरो ख्‍योवाला कताङ्‍नी दे टि शोक।” सिनी सुङ्‍सुङ।
JOH 4:17 तमा तीकी “ङे ति याङ ख्‍योवा राङ मे।” सिनी सिक्‍यासुङ। येशूकी तीला सुङ्‍सुङ, “ख्‍योरो ख्‍योवा मे सिक्‍यावु ति टेके राङ यिन।
JOH 4:18 च्‍यिलासिसिन ख्‍योरो ति ख्‍योवा मिरा ङ चोके च्‍युङ्‍नोक, तमा तन्‍दा ख्‍योरो मुला वोतुप ति ख्‍योरो ख्‍योवा मिन। तुक क्‍यानी ख्‍योरो टेके राङ सिक्‍यासुङ।”
JOH 4:19 तमा ती पुम्‍पेजा तीकी सिक्‍यासुङ, “अच्‍यो, अच्‍यु याङ कोन्‍छ्‍योककी लुङ्‍तेम्‍बा यिनोक सिनी ङे हाक्‍कोसुङ।
JOH 4:20 ङ्‍यिरा सामरी हङ्‍गावातिवी दी पम्‍दोकला राङ कोन्‍छ्‍योकला सोवा तेक्‍सुङ। यिने अच्‍यु यहूदीतिवी याङ कोन्‍छ्‍योकला सोवा देक गोवु दासा ति यरूशलेमला राङ वे सिनी सिनोक।”
JOH 4:21 तमा येशूकी तीला सुङ्‍सुङ, “ओ नुमो, ङला तेपा की। तुजे यी गितो, ती तुजेला ख्‍यिराङ दी पम्‍दोकला साङ यरूशलेमला साङ कोन्‍छ्‍योकला सोवा मेदेकिवी।
JOH 4:22 ख्‍यिराङ सामरीतिवी याङ ङो मेशेवु तीला सोवा देकिवी, यिने ङ्‍यिराङ यहूदीतिवा ति ङो शेवु तीला सोवा देकिवी, च्‍यिलासिसिन दिक्‍पा ने थर ज्‍यितुप ति यहूदीतिवा नेसुर राङ गिवी।
JOH 4:23 कोन्‍छ्‍योकला सोवा देकुपतिवी कोन्‍छ्‍योककी थु चाङ्‍मा ताङ सेम टेङ्‍बो क्‍यानी खोला सोवा देकुप तुजे वुङ्‍यिन वे, तमा ती तुजे ति तन्‍दा राङ यिन। पपा कोन्‍छ्‍योककी टेङ्‍बो क्‍यानी खोला सोवा देकुपतिवाला छोल्‍गिवी।
JOH 4:24 कोन्‍छ्‍योक ति थु यिन, तुक क्‍यानी खोला सोवा देकुपतिवी खोकी थु चाङ्‍मा ताङ सेम टेङ्‍बु क्‍यानी सोवा देक गोकिवी।”
JOH 4:25 तमा ती पुम्‍पेजा तीकी येशूला “ख्रीष्‍ट सिरुप मसीह फेपुप ति ङला छ्‍या वे। खो फेप्‍सिमा खोकी राङ ङि्‍यराङला तेरी ताम्‍ङेतिवा शेकिवी।” सिनी सिक्‍यासुङ।
JOH 4:26 तमा येशूकी तीला सुङ्‍सुङ, “तन्‍दा ख्‍योरो मुला ताम्‍ङे कियी वोतुप ङ ति ती राङ यिन।”
JOH 4:27 ती पेला राङ खोकी लोमातिवा लेसुङ, तमा येशूकी ती पुम्‍पेजा ताङ मुला ताम्‍ङे कियी वोतुप थोङ्‍नी तिवा छासे हलेवा लासुङ। यिन्‍सिनाङ तिवी नाङ ने सी साङ “गेकेनला काङ गोसुङ?” याङ्‍ना “च्‍यिला गेकेनकी ती पुम्‍पेजा ताङ मुला अरा उरा सुङ्‍गुप यिन?” सिनी येशूला माटी।
JOH 4:28 तमा ती पुम्‍पेजा ति खोरो दिङ्‍गर क्‍युर ज्‍याक्‍नी खोरो युलला छ्‍योङ्‍बाल ग्‍यम लोङ गल्‍नी युलकी मीतिवाला
JOH 4:29 “दे फेप्‍नी दी मी तीला ल्हो ताङ! ती मी तीला ङे क्‍यावु लाकातिवा तेरी छ्‍या नोक। खो ति ख्रीष्‍ट राङ मिन?” सिनी सिक्‍यासुङ।
JOH 4:30 तमा मीतिवा युल नेसुर थेन्‍नी येशूला ल्‍हापला वुङ्‍यिन नोक।
JOH 4:31 मीतिवा वुङ्‍यिन कितुप पेला येशूकी लोमातिवी खोला “गेकेन, सोल शे।” सिनी खोला गोङ्‍बा शुसुङ।
JOH 4:32 यिने खोकी “ङे मुला याङ ख्‍युरुङला छ्‍या मेतुप साप समा वे।” सिनी तिवाला सुङ्‍सुङ।
JOH 4:33 खोकी तुक सुङ्‍सिमा लोमातिवा च्‍यिककी च्‍यिकला “मी ललाइकी सोल खुर्न वानी खोला शुते यिन्‍दे?” सिनी सिक्‍यासुङ।
JOH 4:34 तमा येशूकी लोमातिवाला सुङ्‍सुङ, “ङे समा ति ङला तोङ्‍गुप कोन्‍छ्‍योककी नोवाला वोतुप दोके कितुप ताङ खोकी ङला कि ज्‍यितुप लाका तेरी कितुप यिन।
JOH 4:35 ख्‍यिरा ‘सप्‍ले दुतुपला तरोङ साङ ल ज्‍यी लु वे।’ सिनी मिसिरी रो? यिने ङ ख्‍यिराङला सिरिन, ख्‍यिराङ सप्‍ले छोवु शिङला ल्‍यामो क्‍यानी ल्हो, सप्‍ले छोनी साङ दुतुप पेला लेप्‍नी वे।
JOH 4:36 सप्‍ले दुतुपतिवाला ल थोप्‍किवी, तमा तिवी ति नाम्‍साङ मिशिवु मिजी थोपुप डुमा दुकिवी। तमा सप्‍ले देपुप ताङ दुतुप ङ्‍यिकर मुला राङ गा किवी।
JOH 4:37 तुक क्‍यानी ‘मिरा च्‍यिककी सप्‍ले देप्‍किवी, तमा यम्‍बा तीकी सप्‍ले दुकिवी।’ सिनी सिक्‍यावु ति टेके डिकिवी।
JOH 4:38 ङे ख्‍यिराङला मी यम्‍बी हुर्ताक क्‍यानी तपुप सप्‍ले दुतुपला तङ्‍यिन। ख्‍यिरा याङ हुर्ताक माक्‍या, यिने मी यम्‍बी हुर्ताक क्‍यानी ङ्‍येतुप नेसुर ख्‍येप्‍साङ ङ्‍येन वे।”
JOH 4:39 ती सामरी पुम्‍पेजा तीकी “ङे काङ क्‍या वे, ती तेरी खोकी ङला सुङ्‍सुङ।” सिनी येशूकी कोर्ला पङ्‍बु बिन्‍दुप तप्‍की ती युलकी सामरीतिवा बङीकी खोला तेपा क्‍यासुङ।
JOH 4:40 तुक क्‍यानी तिवा खोकी चाला वानी तिवी मुला राङ ज्‍यु सिनी खोला गोङ्‍बा शुसुङ। तमा खो ङ्‍यिमा ङ्‍यी सेक तिवी मुला राङ ज्‍युसुङ।
JOH 4:41 ते मीतिवी मङ मङ खोकी सुङ थोनी खोला तेपा क्‍यासुङ।
JOH 4:42 तमा तिवी ती पुम्‍पेजाला “तन्‍दा ङ्‍यिरा तेपा क्‍यावु ति ख्‍योरे सिक्‍यावु तप्‍की मिन, ङ्‍यिरा राङ खोकी सुङ थोनी खो ति वुतुङ के जम्‍बुलिङकी मीतिवाला दिक्‍पा ने थर ज्‍यितुप यिनोक सिनी हाक्‍कोवु तप्‍की यिन।” सिनी सिक्‍यासुङ।
JOH 4:43 तमा ते येशू ङ्‍यिमा ङ्‍यी ज्‍युसिमा तेसुर गालील लुङ्‍बाला फेप्‍सुङ।
JOH 4:44 गोमाला थेङ्‍मा यी येशूकी “कोन्‍छ्‍योककी लुङ्‍तेम्‍बाला खोरो लुङ्‍बा नेसुर मीतिवी ताङ्‍देन मिकिवी।” सिनी सुङ्‍नोक।
JOH 4:45 तमा खो गालीलला फेप्‍सिमा गालीलकी मीतिवी खोला गासो शुसुङ, च्‍यिलासिसिन तिवा साङ यहूदी थरुप तुछ्‍येनला यरूशलेमला गलुप पेला खोकी क्‍या नङ्‍गुप तेरी हलेवु लाका थोङ्‍नोक।
JOH 4:46 तमा येशू गालील लुङ्‍बाकी काना सिरुप ग्‍येसाला लोङ फेप्‍सुङ। ती ग्‍येसा ति गोमाला खोकी छ्‍यु ति गुन्‍डुम छ्‍याङला ग्‍युर च्‍यितुप दासा यिन। ते लुङ्‍बाकी मी छ्‍ये यी नोक, तीकी पुज्‍युङ ति कफर्नहुमला ना नोक।
JOH 4:47 ती मी छ्‍ये तीकी येशू यहूदिया नेसुर गालीलला फेम वे सिरुप ताम्‍ङे थोनी येशूकी चाला वानी, “गेकेन, ठाकुरे फेप्‍नी ङे पुज्‍युङला टेक च्‍यिनी।” सिनी खोला गोङ्‍बा शुसुङ। च्‍यिलासिसिन ती पेला तीकी पुज्‍युङ ति नानी शिला के नोक।
JOH 4:48 तमा येशूकी तीला “ख्‍यिरा ततिवा ताङ हलेवु लाकातिवा माथोङा सेक्‍ला नाम्‍साङ तेपा मिकिवी।” सिनी सुङ्‍सुङ।
JOH 4:49 ती मी तीकी “ओ गेकेन, ङे पुज्‍युङ शेप सिनाङ गोमाला के मर फेप्‍नी तीला टेक च्‍यिनी।” सिनी खोला मङ गोङ्‍बा शुसुङ।
JOH 4:50 तमा येशूकी तीला “ख्‍युरुङ खाङ्‍बा ग्‍युक, ख्‍योरो पुज्‍युङ सेन्‍बु लङ्‍गिवी।” सिनी सुङ्‍सुङ। खोकी तुक सुङ्‍गुप ताम्‍ङेला तेपा क्‍यानी ती मी ति खोरो खाङ्‍बा नेवा गाल।
JOH 4:51 ती मी ति मर डोयी कितुप पेला तीकी लावातिवी तीला लामला ठेनी तीकी पुज्‍युङ सेन्‍बु लासुङ सिनी सिक्‍यासुङ।
JOH 4:52 तमा तीकी खोरो पुज्‍युङ चो पेला टेक्‍सुङ सिनी लावातिवाला टिसालेन्‍सिन तिवी “दाङ ङ्‍यिमी गुङगी छ्‍युजी च्‍यिक चोयीला टेक्‍सुङ।” सिनी सिक्‍यासुङ।
JOH 4:53 तमा ती पुज्‍युङकी पपा तीकी ती तुजे ति येशूकी खुरुङला “ख्‍योरो पुज्‍युङ सेन्‍बु लङ्‍गिवी।” सिनी सुङ्‍गुप तुजे यिन सिरुप ति हाक्‍कोसुङ। तुक क्‍यानी खुरुङ ताङ खोरो मिछाङतिवा तेरीकी येशूला तेपा क्‍यासुङ।
JOH 4:54 दी त ति येशू यहूदिया नेसुर गालीलला लोङ फेप्‍सिमा छ्‍या तेन नङ्‍गुप हलेवु त ङ्‍यिवा यिन।
JOH 5:1 ती ज्‍युक्‍ला यहूदीतिवी तुछ्‍येन यी नोक, तमा ती तुछ्‍येनला येशू येर यरूशलेमला फेप्‍सुङ।
JOH 5:2 ते यरूशलेम नाङ्‍ला लुककी गो सिरुप गे चाला चो च्‍यिक नोक। ती चोला ति हिब्रू ताम्‍ङेला बेथस्‍दा सिनी सिनोक, तमा ती चे गारी गुरीला कज्‍युकी खला थोक कपुप दलान ङ चोके नोक।
JOH 5:3 ती दलानला मिक शर्वातिवा ताङ थेङ्‍बातिवा ताङ लाक्‍पा काङ्‍बा शोरुपतिवा ताङ नेर्पुतिवा बङी ङ्‍यिलोक्‍नी देनोक। तिवा तेरी ती चो ति नम पेला योकिते सिनी गुनी देकिनोक।
JOH 5:4 च्‍यिलासिसिन पर्चिक पर्चिक कोन्‍छ्‍योककी लेन क्‍योलुप थु ति ते वानी ती चो ति योकिनोक, तमा चो योसिमा सु गोमाला ती चे नाङ्‍ला शुकिवे, तीला चुकै राङ नेजु वोसिनाङ टेकिवी सिनी सिनोक।
JOH 5:5 तमा ते वोतुप नेर्पुतिवी नाङ ने लो खल्‍ज्‍यिक ताङ च्‍याप्‍ग्‍ये नेज्‍युन नावु मी यी नोक।
JOH 5:6 ती नेर्पु ति सला ङ्‍यिलोक्‍नी देतुप येशूकी थोङ्‍सुङ। तमा खोकी तीला लो बङी ना नोक सिरुप हाक्‍कोनी, “ख्‍युरुङला टेकुप नो वे?” सिनी टि नाङ्‍सुङ।
JOH 5:7 ती नेर्पु तीकी येशूला “चोवो, ती चो योकुप पेला ङला तेक्‍नी चे नाङ्‍ला लुङ तेरुप मी सु साङ मे। तमा ङ शुकुप छोलुप पेला मी यम्‍बा राङ ङ सिनाङ गोमाला के चे नाङ्‍ला शुकिनोक।” सिनी सिक्‍यासुङ।
JOH 5:8 तमा येशूकी तीला “ख्‍युरुङ खोक लानी ख्‍योरो दिङ्‍ज्‍ये खुर्नी यु।” सिनी सुङ्‍सुङ।
JOH 5:9 खोकी तुक सुङ्‍लुङ्‍मे ती नेर्पु ति शार्क्येक टेक्‍नी खोरो दिङ्‍ज्‍येतिवा खुर्नी युसुङ। ती छेर्मु ति यहूदीतिवी ङासोप ङ्‍यिमा ख्‍येल्‍गिनोक।
JOH 5:10 ती तप्‍की यहूदी गोमा कितुप मी छ्‍येतिवी ती टेकुप मी तीला “हारिङ याङ ङासोप ङ्‍यिमा यिन, तुक क्‍यानी ख्‍योरो दी दिङ्‍ज्‍ये खुरुप ति दाक्‍पी यहूदी ठिमला मेवी।” सिनी सिक्‍यासुङ।
JOH 5:11 यिने तीकी “ङला टेक च्‍यितुप मी तीकी ङला दिङ्‍ज्‍ये खुर्नी यु सिनी सुङ्‍सुङ।” सिनी सिक्‍यासुङ।
JOH 5:12 येलुङ तिवी तीला “ख्‍युरुङला ख्‍योरो दिङ्‍ज्‍ये खुर्नी यु सिनी सिरुप मी ति सु यिन?” सिनी टिसुङ।
JOH 5:13 यिने ती टेकुप मी तीकी खुरुङला टेक च्‍यितुप ति सु यिन सिनी ङो मेसेनोक, च्‍यिलासिसिन ते मी मङ्‍छ्‍योक नोक, तमा येशू तेसुर खरक्‍पा सोक थेन्‍नी फेप्‍नोक।
JOH 5:14 ती ज्‍युक्‍ला येशूकी ती मी तीला यहूदी ल्‍हङाङला ठेसुङ, तमा तीला “ल्‍होसा, त ख्‍युरुङ टेक्‍सुङ, तफेन्‍ला दिक्‍पा माकिता। मिसियाङ ख्‍युरुङला मङ मेलोक्‍पा ख्‍येल्गितो।” सिनी सुङ्‍सुङ।
JOH 5:15 ती थोसिमा ती मी ति यहूदी गोमा कितुप मी छ्‍येतिवी चाला गल्‍नी खुरुङला टेक च्‍यितुप ति येशू यिनोक सिनी सिक्‍यासुङ।
JOH 5:16 ती तप्‍की यहूदीतिवी येशूला छेटाङ तेरुप छाल्‍सुङ, च्‍यिलासिसिन खोकी ङासोप ङ्‍यिमाला तुका लाकातिवा क्‍यासुङ।
JOH 5:17 यिने येशूकी तिवाला दुक सुङ्‍सुङ, “ङे पपी त सेक नरी लाका कियी वे, तुक क्‍यानी ङ साङ लाका कियी वे।”
JOH 5:18 ती ताम्‍ङे थोनी यहूदीतिवी येशूला मङ सेतुप नो क्‍यासुङ, च्‍यिलासिसिन खोकी ङासोप ङ्‍यिमा मेतेन्‍दुप तिराङ मिन, खुरुङ ति कोन्‍छ्‍योक ताङ च्‍यिक्‍पा राङ जोनी कोन्‍छ्‍योकला ति खोरे पपा यिन सिनी सुङ्‍नोक।
JOH 5:19 तमा येशूकी तिवाला सुङ्‍सुङ, “ङ ख्‍यिराङला टेङ्‍बो सिरिन, पुज्‍युङ खोरो राङ काङ साङ कि मुथुपी, यिने पपी काङ कितुप थोङ वे, पुज्‍युङकी साङ तुकै राङ किवी।
JOH 5:20 पपी खोरो पुज्‍युङला ङ्‍यिङ्‍ज्‍ये क्‍यानी खोकी क्‍या नङ्‍गुप लाकातिवा तेरी खोरो पुज्‍युङला छ्‍या देन्‍गिवी। यिन, खोकी ती सिनाङ मङ लाका ग्‍येर्पुतिवा खोरो पुज्‍युङला छ्‍या तेन नङ्‍गिवी, ती थोङ्‍नी ख्‍यिराङ हलेवा लङ्‍गितो।
JOH 5:21 पपी शेपतिवाला सेन्‍बु लङ च्‍यिनी तिवाला नाम्‍साङ मिशिवु मिजी नङ्‍गुप दोके खोकी पुज्‍युङकी साङ सुला मिजी तेरुप नोवा नोके, तीला नाम्‍साङ मिशिवु मिजी तेर्किवी।
JOH 5:22 तोजोयी तिराङ मिन, पपा खोरे राङ सुला साङ ठिम मिकिवी, यिने तेरी ठिम कितुप ओङ ति खोकी पुज्‍युङला चेक तेन नङ वे।
JOH 5:23 ती ति तेरीकी पपाला ताङ्‍देन कितुप दोके खोकी पुज्‍युङला साङ ताङ्‍देन किशी सिनी यिन। सी खोकी पुज्‍युङला ताङ्‍देन मिकिवे, पुज्‍युङला तोङ्‍गुप पपाला साङ ताङ्‍देन मिकिवी।
JOH 5:24 ङ ख्‍यिराङला टेङ्‍बु सिरिन, सी ङे सुङला ङ्‍येन्‍नी ङला तोङ्‍गुप तीला तेपा किवे, तीला नाम्‍साङ मिशिवु मिजी थोप्‍किवी। तीला पर्च्या मोफोकिवी, तमा शेप ने थर्नी मिजी ङ्‍येकिवी।”
JOH 5:25 “ङ ख्‍यिराङला टेङ्‍बो सिरिन, तुजे यी वुङ्‍यिन वे। ती तुजे ति वानिङ सिन वे। ती तुजेला शेपतिवी कोन्‍छ्‍योककी पुज्‍युङकी वोरु थोकिवी, तमा ती वोरु थोवुतिवा ति शेप ने सेन्‍बु लङ्‍गिवी।
JOH 5:26 पपा खोरे मुला मिजी वोतुप दोके खोकी खोरे पुज्‍युङला साङ मिजी वोतुप जो नाङ्‍सुङ।
JOH 5:27 तमा पपी खोरे पुज्‍युङला दी जम्‍बुलिङकी मीतिवा तेरीला ठिम कितुप ओङ नाङ्‍सुङ। ती ति खोकी पुज्‍युङ ति मी पुज्‍युङ यिन्‍दुप तप्‍की यिन।
JOH 5:28 दी ताम्‍ङे थोनी ख्‍यिराङ हलेवा माकी। शेप मीला ज्‍योकुप टककी फुककी नाङ ने शेपतिवा तेरीकी खोकी पुज्‍युङकी वोरु थोवु तुजे वुङ्‍यिन वे।
JOH 5:29 ती तुजेला टेङ्‍बु क्‍यावुतिवा ति मिजी ङ्‍येतुपकी थोक्‍ला सेन्‍बु लङ्‍गिवी, तमा मेटेङ्‍बु क्‍यावुतिवा ति पर्च्याला ख्‍येलुपकी थोक्‍ला शेप ने सेन्‍बु लङ्‍गिवी।”
JOH 5:30 “ङ ङरा राङ काङ साङ कि मुथुपी, यिने पपी ङला काङ क नङ वे, ती दोके क्‍यानी ठिम कितिन। ङे कितुप ठिम ति टेङ्‍बु वे, च्‍यिलासिसिन ङ ङे नोवाला मिन, यिने ङला तोङ्‍गुप तीकी नोवाला दोके कितुप तप्‍की यिन।”
JOH 5:31 “दोजो ङे ङरा थोक्‍ला राङ पङ्‍बु बिन्‍दुप यिन्‍सिन ङे बिन्‍दुप पङ्‍बु ति टेङ्‍बु मेङ्‍गिवी।
JOH 5:32 ङे थोक्‍ला पङ्‍बु नङ्‍गुप ति यम्‍बा यी वे, खोकी ङे कोर्ला नङ्‍गुप पङ्‍बु ति टेङ्‍बु यिन सिरुप ति ङला छ्‍या वे।
JOH 5:33 बप्‍तिस्‍मा तेरुप यूहन्‍नाला ताम्‍ङे टेपला ख्‍यिरा मीतिवा ताङ्‍सुङ, तमा तीकी तिवाला दी टेङ्‍बुकी कोर्ला पङ्‍बु बिन्‍सुङ।
JOH 5:34 तन्‍दा ङे दी ताम्‍ङे सिक्‍यावु ति ङे थोक्‍ला मी नेसुर पङ्‍बु गोवु तप्‍की मिन, यिने ख्‍यिराङला पर्च्या नेमा र्‍होकुपला यिन।
JOH 5:35 यूहन्‍ना ति बर्नी ठछ्‍येली जोप दिप्‍ली दोके यिन, तमा ख्‍यिरा चेयी पर सेक तीकी ठछ्‍येलीला गा क्‍यासुङ।
JOH 5:36 यिने ङे मुला याङ यूहन्‍नाकी बिन्‍दुप पङ्‍बु सिनाङ पङ्‍बु छ्‍ये वे। पपी ङला तेरी सिन्‍दा कि सिनी ङला नङ्‍गुप दी लाका कियी वोतुप ति खोकी ङला तङ्‍गुप यिन सिनी छ्‍या तेन्‍दुप पङ्‍बु यिन।
JOH 5:37 तमा ङला तोङ्‍गुप पपा खोरे राङ ङे थोक्‍ला पङ्‍बु नङ वे। ख्‍यिरा याङ नाम्‍साङ खोकी वोरु माथो वे, खोला थोङ्‍गुप साङ माथोङ वे,
JOH 5:38 तमा खोकी सुङ साङ ख्‍यिरा सेमला माला वे, च्‍यिलासिसिन खोकी तङ्‍गुप तीला ख्‍यिरा तेपा माक्‍यावु तप्‍की यिन।
JOH 5:39 ख्‍यिरा कोन्‍छ्‍योककी सुङ लोपुप ति ती सुङ नेमा नाम्‍साङ मिशिवु मिजी ङ्‍येकिवी सिनी नासाम ताङ्‍नी यिन। तमा ती सुङगी ङे कोर्ला पङ्‍बु तेर्किवी।
JOH 5:40 यिन्‍सिनाङ ख्‍यिराङ ती नाम्‍साङ मिशिवु मिजी ङ्‍येतुपला ङे चाला वुङ्‍गुप नो माक्‍या।
JOH 5:41 ङ ति मीतिवा नेसुर मोवा ङ्‍येतुप मोछोल।
JOH 5:42 यिने ख्‍यिराङ चुका पारकी मी यिन सिरुप ति ङला छ्‍या वे, ख्‍यिरा सेमला कोन्‍छ्‍योकला ङ्‍यिङ्‍ज्‍ये कितुप नो मेतुप साङ ङला छ्‍या वे।
JOH 5:43 ङे पपी मिङला ङ दी जम्‍बुलिङला वायी, यिने ख्‍यिरा ङला सेमला माला। यिने दोजो मी ललाइ खोरो ओङ्‍ज्‍येनला वासुङ सिसिन ख्‍यिरा तीला सेमला लङ्‍गिवी।
JOH 5:44 ख्‍यिराङ च्‍यिककी च्‍यिक नेमा ताङ्‍देन ङ्‍येतुपला गा किवी, यिने च्‍यिक राङ वोतुप कोन्‍छ्‍योक नेमा वुङ्‍गुप मोवा ति मोछोली सिसिन ख्‍यिरा चुक क्‍यानी तेपा कि थुप्‍किवी रो?
JOH 5:45 यिने ङे पपी दोङ्‍ला ख्‍यिराङला क्‍येन तेरुप ति ङ यिन सिनी ख्‍यिराङ नासाम मातोङ। ख्‍यिराङला क्‍येन तेरुप याङ ख्‍यिरा रेवा क्‍यावु मोशा के यिन।
JOH 5:46 दोजो ख्‍यिरा मोशाला तेपा क्‍यावु यिन्‍सिन ङला तेपा कि गोवुजा, च्‍यिलासिसिन मोशाकी याङ ङे कोर्ला राङ टि वे।
JOH 5:47 यिने ख्‍यिरा मोशाकी टिवु ठिमला साङ तेपा माक्‍यासुङ सिसिन चुक क्‍यानी ङे सिक्‍यावु ताम्‍ङेला तेपा किवी रो?”
JOH 6:1 ती ज्‍युक्‍ला येशू गालील ग्‍येम्‍छोकी फर्केन फेप्‍सुङ। ती ग्‍येम्‍छोला ति तिबेरियास ग्‍येम्‍छो साङ सिनोक।
JOH 6:2 ते मी माङ्‍छ्‍योककी खोकी तिङ्‍ला तिङ्‍यासुङ, च्‍यिलासिसिन खोकी नेर्पुतिवाला टेक च्‍यितुप हलेवु ततिवा तिवी थोङ्‍नोक।
JOH 6:3 तमा येशू खोकी लोमातिवी मुला येर पम्‍दोकला जेनी ते राङ ज्‍युसुङ।
JOH 6:4 ती पेला यहूदीतिवी थरुप तुछ्‍येन वुङ्‍ला के नोक।
JOH 6:5 येशूकी मी माङ्‍छ्‍योक खोकी चिप्‍ला वुङ्‍यिन कितुप थोङ्‍नी खोरो लोमा फिलिपला “दाक्‍पु दी मीतिवा तेरीला तेरुपला कनी नेसुर शुब्‍ज्‍याङ ङ्‍योप्‍जा?” सिनी टि नाङ्‍सुङ।
JOH 6:6 खोकी फिलिपला सेम ल्‍हापला तिराङ तुक सुङ्‍नोक, च्‍यिलासिसिन खोकी काङ कितुप छल वे, ती ति वुतुङ के खोला राङ छ्‍या नोक।
JOH 6:7 तमा फिलिपकी “दिवा तेरीला चे चेयी राङ स ज्‍यितुपला साङ ङुलकी डप्‍बु सयी ङ्‍यीकी शुब्‍ज्‍याङ ङ्‍योसिनाङ मलङ्‍गिवी।” सिनी खोला सिक्‍यासुङ।
JOH 6:8 ती पेला येशूकी लोमातिवी पर्ला सिमोन पत्रुसकी नुप अन्‍द्रियास तीकी येशूला दुक सिक्‍यासुङ,
JOH 6:9 “दे पेजा यीकी लोला जौकी शुब्‍ज्‍याङ ङ चोके ताङ ङ्‍या ङ्‍यी चोके वे, यिने दोजोयीकी याङ दोजो मी मङ्‍मुला कङगी लङ्‍गुप्‍जा?” सिनी सिक्‍यासुङ।
JOH 6:10 तमा येशूकी “मीतिवाला दे च्‍यी।” सिनी लोमातिवाला सुङ्‍सुङ। ते च बङी वोतुप दिङ्‍मा नोक, तमा मीतिवा तेरी ती दिङ्‍माला देसुङ। ते तो मिसिन ख्‍योक्‍पेजा मिरा तोङ्‍डा ङ नोक।
JOH 6:11 तमा येशूकी ती शुब्‍ज्‍याङ ति लानी कोन्‍छ्‍योकला थुचिछे पुल्‍सिमा ते देतुप मीतिवा तेरीला गोनी तेर च्‍यिसुङ। तुक राङ क्‍यानी ङ्‍या साङ तिवा तेरीला डाता सेक गोनी तेर च्‍यिसुङ।
JOH 6:12 मीतिवी डाता सेक सो सिन्‍सिमा येशूकी लोमातिवाला “ल्‍हकुप पुर्मातिवा तेरी रु, तिवा च्‍यिक साङ माक्‍युर।” सिनी सुङ्‍सुङ।
JOH 6:13 तमा तिवी जौकी शुब्‍ज्‍याङ ङ नेमा मीतिवी सोसिमा ल्‍हकुप पुर्मातिवा रुसुङ, तमा ती पुर्मातिवा ति तोलुम च्‍यिङ्‍ङी नाङ्‍ला क्‍येङ्‍सुङ।
JOH 6:14 खोकी क्‍या नङ्‍गुप हलेवु लाका थोङ्‍नी मीतिवी “खो याङ वुतुङ के जम्‍बुलिङला फेप्‍किवी सिनी सिक्‍यावु कोन्‍छ्‍योककी लुङ्‍तेम्‍बा यिनोक।” सिनी सिक्‍यासुङ।
JOH 6:15 तमा येशूकी मीतिवी खोरुङला उर्च्युम ग्‍यप्‍नी टि गल्‍नी ग्‍येल्‍वु जोप छोलिन नोक सिरुप हाक्‍कोनी खो खरक्‍पा सोक सिरा तेसुर थेन्‍नी च्‍यिक राङ पम्‍दोक नेवा लोक्‍नी फेप्‍सुङ।
JOH 6:16 ती गोमु नाम ल्‍होसिमा येशूकी लोमातिवा मर ग्‍येम्‍छो गारीला गल्‍नी
JOH 6:17 टुला जेनी ग्‍येम्‍छो फर्केन कफर्नहुम ग्‍येसा नेवा डोप गाल्‍सुङ। यिने नक्‍तोमी गल्‍सिमा साङ येशू तिवी चाला माफेप्‍नोक।
JOH 6:18 ती पेला राङ छासे लुङ ग्‍यप्‍नी ग्‍येम्‍छोकी बालाप कशेन ल्‍हानोक।
JOH 6:19 ते नेसुर लोमातिवा टु ग्‍यप्‍नी किलोमिटर ङ टुक चोयी डोसालेन्‍सिन येशू ग्‍येम्‍छो ख नेसुर युनी टी चाला फेपुप तिवी थोङ्‍सुङ। ती थोङ्‍सिमा तिवा पर्नी छासे ज्‍यिवा क्‍यासुङ।
JOH 6:20 यिने येशूकी तिवाला “ङ राङ यिन, ज्‍यिवा माकी।” सिनी सुङ्‍सुङ।
JOH 6:21 तमा लोमातिवा गा क्यानी येशूला टी नाङ्‍ला गासो शुसुङ, तमा टु ति तिवा डोप नो क्‍यावु दासाला शार्क्येक लेप्‍सुङ।
JOH 6:22 ती सला तीला ग्‍येम्‍छो छुर्केन वोतुप मीतिवी ते टु ति च्‍यिक तिराङ नोक, तमा येशू ति लोमातिवी मुला ती टुला जेनी माफेप्‍नी खोकी लोमातिवा तिराङ गलुप यिन सिरुप ति छ्‍या नोक।
JOH 6:23 तमा तिबेरियास नेसुर वावु यम्‍बा टुतिवा ति गोमाला चोवोकी कोन्‍छ्‍योकला थुचिछे पुल्‍नी मी माङ्‍छ्‍योकला शुब्‍ज्‍याङ नङ्‍गुप दासाकी चाला राङ लेप्‍नोक।
JOH 6:24 तमा तिवी ते येशू साङ ज्‍यु मेतुप ताङ लोमातिवा साङ मेतुप थोङ्‍नी टुतिवाला जेनी येशूला छोलुपला कफर्नहुम ग्‍येसा नेवा गाल्‍सुङ।
JOH 6:25 तिवा ग्‍येम्‍छोकी फर्केन लेप्‍सिमा येशूला ठेसुङ। तमा खोला ठेसिमा तिवी “गेकेन, गेकेन दे नम फेवु?” सिनी टिसुङ।
JOH 6:26 तमा येशूकी तिवाला सुङ्‍सुङ, “वुतुङ के ङ ख्‍यिराङला सिरिन, ख्‍यिरा ङला छलुप ति ङे क्‍यावु हलेवु ततिवा थोङ्‍गुप तप्‍की मिन, यिने ख्‍यिरा डाता सेक शुब्‍ज्‍याङ सोवु तप्‍की यिन।
JOH 6:27 ख्‍यिराङ रुल्‍नी डोप समी थोक्‍ला लाका माकी, बोरु नाम्‍साङ मिशिवु मिजी तेरुप समी थोक्‍ला लाका की। ती मिजी ति ङ मी पुज्‍युङकी ख्‍यिराङला तेर्किवी, च्‍यिलासिसिन पपा कोन्‍छ्‍योककी ती मिजी तेरुप ओङ ति ङला नाङ्‍सुङ।”
JOH 6:28 तमा तिवी खोला “कोन्‍छ्‍योककी नो क्‍यावु लाकातिवा कितुपला ङ्‍यिरा काङ कि गोकिवी?” सिनी टिसुङ।
JOH 6:29 तमा खोकी तिवाला “कोन्‍छ्‍योककी तङ्‍गुप तीला तेपा कितुप ति कोन्‍छ्‍योककी लाका यिन।” सिनी सुङ्‍सुङ।
JOH 6:30 येलुङ तिवी खोला सिक्‍यासुङ, “ख्‍योरे ङ्‍यिराङला चुका त छ्‍या तेन्‍नी ङ्‍यिरा ती त ल्‍हानी ख्‍युरुङला तेपा कि ज्‍यिकिवी? ख्‍योरे काङ लाका किवी?
JOH 6:31 कोन्‍छ्‍योककी सुङगी नाङ्‍ला ‘खोकी देवाच्‍येन नेमा शुब्‍ज्‍याङ पप च्‍यिनी तिवाला स च्‍यिसुङ।’ सिनी टिवु दोके ङ्‍यिरा पगावा हङ्‍गावी याङ दासा पाङ्‍थेरीला मन्‍न सोसुङ।”
JOH 6:32 तमा येशूकी सुङ्‍सुङ, “ङ ख्‍यिराङला टेङ्‍बु सिरिन, देवाच्‍येन नेमा शुब्‍ज्‍याङ तेरुप ति मोशा मिन, यिने देवाच्‍येन नेमा ख्‍यिराङला शुब्‍ज्‍याङ टेङ्‍बु नङ्‍गुप ति ङे पपा यिन।
JOH 6:33 कोन्‍छ्‍योककी शुब्‍ज्‍याङ ति देवाच्‍येन नेमा वानी जम्‍बुलिङकी मीतिवाला नाम्‍साङ मिशिवु मिजी नङ्‍गुप ती यिन।”
JOH 6:34 तमा तिवी खोला “चोवो, दी शुब्‍ज्‍याङ ति ङ्‍यिराङला नरी नङ्‍नी।” सिनी सिक्‍यासुङ।
JOH 6:35 यिने येशूकी तिवाला सुङ्‍सुङ, “नाम्‍साङ मिशिवु मिजी तेरुप शुब्‍ज्‍याङ ति ङ राङ यिन। ङे ते वुङ्‍गुपतिवा नाम्‍साङ ल्‍होवा मलङ्‍गिवी, तमा ङला तेपा कितुपतिवा नाम्‍साङ कोम्‍बा मलङ्‍गिवी।
JOH 6:36 यिने ङे ख्‍यिराङला सिक्‍यावु दोके ख्‍यिरा ङला थोङ्‍सिनाङ ङला तेपा माक्‍या।
JOH 6:37 ङे पपी ङला चेक तेन नङ्‍गुप मीतिवा तेरी ङे ते वुङ्‍गिवी, तमा ङे ते वुङ्‍गुपतिवाला ङ नाम्‍साङ लोक्‍नी मोतोङ।
JOH 6:38 च्‍यिलासिसिन ङ ति ङे नोवा छे ज्‍यितुपला देवाच्‍येन नेमा वावु मिन, यिने ङला तोङ्‍गुप कोन्‍छ्‍योककी नोवा छे ज्‍यितुपला वावु यिन।
JOH 6:39 ङला तोङ्‍गुप खोकी नोवा ति खोकी ङला चेक तेन नङ्‍गुपतिवा सु साङ मोतोर्शी, यिने जम्‍बुलिङकी तिङ्‍मी तुजेला तिवा तेरी सेन्‍बु लङ ज्‍यितुपला यिन।
JOH 6:40 तमा खोकी पुज्‍युङला ल्‍हानी तीला तेपा कितुपतिवा तेरीकी नाम्‍साङ मिशिवु मिजी थोपुप ति ङे पपी नोवा यिन। तमा जम्‍बुलिङकी तिङ्‍मी तुजेला ङ तिवा तेरीला सेन्‍बु लङ ज्‍यितिन।”
JOH 6:41 येशूकी “ङ देवाच्‍येन नेमा पाम वावु शुब्‍ज्‍याङ यिन।” सिनी सुङ्‍सिमा यहूदीतिवा मुक्‍तम देन्‍दुप छाल्‍सुङ।
JOH 6:42 तमा तिवी “दी याङ योसेफकी पुज्‍युङ येशू मिन रो? दीकी पपाआमा याङ दाक्‍पी ङो मेशेवी रो? च्‍यिला दीकी ‘ङ देवाच्‍येन नेमा पाम वावु यिन।’ सिनी सिक्‍यावु यिनाङ?” सिनी सिक्‍यासुङ।
JOH 6:43 तमा येशूकी तिवाला सुङ्‍सुङ, “ख्‍यिरा पर्ला मुक्‍तम मादेन,
JOH 6:44 ङला तोङ्‍गुप पपी मीतिवाला ङे ते वुङ्‍गुप सेम माबिन्‍सुङ सिसिन सु साङ ङे ते वुङ मुथुपी, तमा ङे ते वुङ्‍गुपतिवाला ङ जम्‍बुलिङकी तिङ्‍मी तुजेला सेन्‍बु लोङ्‍यिन।
JOH 6:45 ‘तेरी मीतिवी कोन्‍छ्‍योककी सुङ नेमा लोप्‍किवी।’ सिनी कोन्‍छ्‍योककी लुङ्‍तेम्‍बातिवी टि वे। सी पपी सुङ ङ्‍येन्‍नी खोकी सुङ्‍गुप सुङ लोप्‍किवे, तिवा तेरी ङे ते वुङ्‍गिवी।
JOH 6:46 सी साङ पपाला माथोङ वे, यिने कोन्‍छ्‍योक नेमा वावु तीकी तिराङ पपाला थोङ वे।
JOH 6:47 वुतुङ के ङ ख्‍यिराङला सिरिन, सी ङला तेपा किवे, तीला नाम्‍साङ मिशिवु मिजी थोप्‍किवी।
JOH 6:48 तमा नाम्‍साङ मिशिवु मिजी तेरुप शुब्‍ज्‍याङ ति ङ राङ यिन।
JOH 6:49 ख्‍यिरा हङ्‍गावातिवी दासा पाङ्‍थेरीला मन्‍न सोसिनाङ तिवा शिसुङ।
JOH 6:50 यिने देवाच्‍येन नेमा वावु शुब्‍ज्‍याङ ति दुकै यिन, सी दीला सेवे, तिवा नाम्‍साङ मिशिवी।
JOH 6:51 ङ ति देवाच्‍येन नेमा पाम वोवु सेन्‍बु वोतुप शुब्‍ज्‍याङ यिन। सी दी शुब्‍ज्‍याङ सेवे, तिवा नाम्‍साङ मिशिवी। ती शुब्‍ज्‍याङ ति ङे जु यिन, तमा ती जुकी जम्‍बुलिङकी मीतिवा तेरीला मिजी तेर्किवी।”
JOH 6:52 खोकी तुक सुङ्‍सिमा यहूदीतिवी “दी मी तीकी चुक क्‍यानी खोरो जु दाक्‍पुला स ज्‍यि थुप्‍किवी ताङ?” सिनी खोप्‍राङ पर्ला ताम्‍ङे क्‍यासुङ।
JOH 6:53 तमा येशूकी तिवाला सुङ्‍सुङ, “ङ ख्‍यिराङला टेङ्‍बो सिरिन, ख्‍यिरा ङ मी पुज्‍युङकी जु मासोसिन ताङ ङ मी पुज्‍युङकी ठक माथुसिन ख्‍यिराङला नाम्‍साङ मिशिवु मिजी मोथोपिवी।
JOH 6:54 ङे जु साप ताङ ङे ठक थुङ्‍गुपतिवाला ति नाम्‍साङ मिशिवु मिजी थोप्‍किवी, तमा जम्‍बुलिङकी तिङ्‍मी तुजेला तिवाला ङ शेप ने सेन्‍बु लोङ्‍यिन।
JOH 6:55 च्‍यिलासिसिन ङे जु ति वुतुङ्‍की साप समा यिन, तमा ङे ठक ति वुतुङ्‍की थुङ्‍गुप ति यिन।
JOH 6:56 ङे जु साप ताङ ङे ठक थुङ्‍गुप तीकी ङे मुला देकिवी, तमा ङ साङ तीकी मुला देतिन।
JOH 6:57 ङोसु ज्‍यु वोतुप ङे पपी ङला ताङ्‍सुङ, तमा ङ खो नेसुर मिजी क्‍योङ्‍गिवी। ती दोके ङला साप तीकी साङ ङ नेसुर मिजी क्‍योङ्‍गिवी।
JOH 6:58 ती ति देवाच्‍येन नेमा पाम वावु शुब्‍ज्‍याङ यिन। ती ति ख्‍यिरा हङ्‍गावातिवी सोसिनाङ शेप समा दोके मिन। दी शुब्‍ज्‍याङ सापतिवाला ति नाम्‍साङ मिशिवी।”
JOH 6:59 दी ताम्‍ङेतिवा ति येशूकी कफर्नहुमला वोतुप यहूदी छ्‍योखाङ नाङ्‍ला येन्‍देन नङ्‍गुप पेला सुङ्‍गुप यिन।
JOH 6:60 ती ताम्‍ङे थोनी येशूकी लोमातिवी पर्ला बङीकी “दी सुङ याङ छासे कले नोक, सी हाक्‍को थुपुप्‍जा?” सिनी सिक्‍यासुङ।
JOH 6:61 येशूकी तिवा मुक्‍तम देन्‍दुप हाक्‍कोनी तिवाला सुङ्‍सुङ, “दी ताम्‍ङेकी ख्‍यिराङला ग्‍येकिवी?
JOH 6:62 तुकै यिन्‍सिन ङ मी पुज्‍युङ ति गोमाला खुरुङ वोतुप ते राङ तेक्‍नी डोप थोङ्‍सिन ख्‍यिराङ काङ किवी?
JOH 6:63 नाम्‍साङ मिशिवु मिजी नङ्‍गुप ति कोन्‍छ्‍योककी थु चाङ्‍मा यिन, तमा जु ति काङ साङ फेन मोथोवी। ङे ख्‍यिराङला सिक्‍यावु दी ताम्‍ङे ति कोन्‍छ्‍योककी थु चाङ्‍मा ताङ नाम्‍साङ मिशिवु मिजीकी कोर्ला यिन।
JOH 6:64 यिने ख्‍यिरा पर्ला मी ललाइ ति ङला तेपा राङ मिकिवी।” तमा गोमाला नेज्‍युन खोरुङला तेपा मिकिवुतिवा सु सु यिन, तमा क्‍येन तेरुपतिवा सु सु यिन सिनी खोला छ्‍या नोक।
JOH 6:65 येशूकी येलुङ दुक सुङ्‍सुङ, “तुक क्‍यानी ङे पपी सेम माबिन्‍सुङ सिसिन सु साङ ङे ते वुङ मुथुपी सिनी ङे ख्‍यिराङला सिक्‍यावु यिन।”
JOH 6:66 खोकी तुक सुङ्‍गुप तप्‍की खोकी लोमातिवा बङीकी खोला क्‍युर ज्‍याक्‍नी ती पेला नेज्‍युन खोला तिङ माङ्‍या।
JOH 6:67 तमा येशूकी खोरो लोमा मिरा च्‍यिङ्‍ङीतिवाला “ख्‍यिरा साङ ङला क्‍युर ज्‍याक्‍नी डोप नो वे?” सिनी टि नाङ्‍सुङ।
JOH 6:68 खोकी तुक सुङ्‍सिमा सिमोन पत्रुस तीकी “ओ चोवो, चोवोकी मुला याङ नाम्‍साङ मिशिवु मिजी तेरुप सुङ वे। तुक क्‍यानी ङ्‍यिराङ सी चाला डोप्‍जा?
JOH 6:69 चोवो याङ कोन्‍छ्‍योककी चाङ्‍मा वोतुप मी यिन सिनी ङ्‍यिरा तेपा क्‍यानी हाक्‍को वे।” सिनी सिक्‍यासुङ।
JOH 6:70 तमा येशूकी तिवाला “काङ ङे ख्‍यिराङ मिरा च्‍यिङ्‍ङीतिवाला राङ पेतुप मिन रो? यिन्‍सिनाङ ख्‍यिरा पर्ला मिरा च्‍यिक ति शैतान यिन।” सिनी सुङ्‍सुङ।
JOH 6:71 खोकी दुक सुङ्‍गुप ति सिमोन इस्‍करियोतकी पुज्‍युङ यहूदाकी कोर्ला सुङ्‍गुप यिन, ती ति खोकी लोमा मिरा च्‍यिङ्‍ङी नङगी ति यिन्‍सिनाङ ज्‍युक्‍ला येशूला जिम तेरुप मी यिनोक।
JOH 7:1 ती ज्‍युक्‍ला येशू गालील लुङ्‍बाला राङ फार छुर युनी ज्‍युसुङ, च्‍यिलासिसिन यहूदीतिवी खोला सेतुप छलुप तप्‍की खो यहूदिया लुङ्‍बाला फेपुप नो माक्‍या।
JOH 7:2 तमा ती पेला यहूदीतिवी बर्केङ जोनी देतुप तुछ्‍येन वुङ्‍ला के नोक।
JOH 7:3 ती तप्‍की येशूकी नुपतिवी खोला “च्‍युच्‍यो, दी लुङ्‍बा क्‍युर ज्‍याक्‍नी यहूदिया लुङ्‍बाला फेप, तमा ते देतुप च्‍युच्‍युकी यम्‍बा लोमातिवी साङ च्‍युच्‍युकी क्‍यावु हलेवु लाकातिवा थोङ च्‍यी।
JOH 7:4 सी मी यम्‍बी खुरुङला ङो शेशी सिनी नो किवे, ती ति यिप्‍नी लाका मिकिवी। च्‍युच्‍युकी दुका लाकातिवा किवी सिसिन जम्‍बुलिङकी मीतिवा तेरीकी च्‍युच्‍युला ङो शे च्‍यी।” सिनी सिक्‍यासुङ।
JOH 7:5 च्‍यिलासिसिन खोकी नुपतिवी साङ खो कोन्‍छ्‍योककी तङ्‍गुप यिन सिरुप ति तेपा माक्‍या नोक।
JOH 7:6 तमा येशूकी तिवाला सुङ्‍सुङ, “ङे तुजे ति मालेप वे, यिने ख्‍यिरा तुजे याङ चो पेला साङ टडिक वे।
JOH 7:7 जम्‍बुलिङकी मीतिवी ख्‍यिराङला ङ्‍यिङ्‍मर कि मुथुपी, यिने ङला याङ ङ्‍यिङ्‍मर किवी, च्‍यिलासिसिन जम्‍बुलिङकी मीतिवी किताङ नालु दुक्‍टा वे सिनी ङे पङ्‍बु बिनिन।
JOH 7:8 ख्‍यिराङ ति तुछ्‍येन तेन्‍दुपला ग्‍युक। ङ ति मोडो, च्‍यिलासिसिन ङे तुजे तरोङ साङ मालेप वे।”
JOH 7:9 तुक सुङ्‍सिमा खो गालील लुङ्‍बाला राङ ज्‍युसुङ।
JOH 7:10 यिने येशूकी नुपतिवा तुछ्‍येनला गल्‍सिमा खो साङ मीतिवी हाक्‍माकोवा क्‍यानी ती तुछ्‍येनला फेप्‍सुङ।
JOH 7:11 ती तुछ्‍येनला यहूदी गोमा कितुप छ्‍येतिवी येशूला छोलिन सिरा “ती मी ति कनी नोक?” सिनी टिनोक।
JOH 7:12 तमा मी मङ्‍छ्‍योक खोकी कोर्ला ताम्‍ङे बङी क्‍यासुङ। मी ललाइकी “ती ति मी ल्‍यामु यिन।” सिनी सिनोक, तमा ललाइकी “दी याङ मीतिवाला जिनोक जोप मी यिन।” सिनी सिनोक।
JOH 7:13 यिने तिवा यहूदी गोमा कितुप छ्‍येतिवाला ज्‍यिवा लानी खोकी कोर्ला सी साङ मी मिङ्‍गाला ताम्‍ङे अला माक्‍या।
JOH 7:14 तमा तुछ्‍येनकी तुजे फेका यी सिन्‍सिमा येशू यहूदी ल्‍हङाङला फेप्‍नी तेकी मीतिवाला येन्‍देन लोपुप छाल्‍सुङ।
JOH 7:15 खोकी नङ्‍गुप येन्‍देन थोसिमा यहूदी गोमा कितुप छ्‍येतिवा हलेवा लानी, “दी मी तीकी काङ मालाप सिनाङ चुक क्‍यानी दोजो येन्‍देन शेवु यिनाङ?” सिनी सिक्‍यासुङ।
JOH 7:16 तमा येशूकी तिवाला “ङे तेरुप येन्‍देन ति ङरा राङ तेरुप मिन, यिने ङला तोङ्‍गुप तीकी येन्‍देन यिन।
JOH 7:17 चुका मी तीकी कोन्‍छ्‍योककी नोवाला दोके युकिवे, तीकी ङे तेरुप येन्देन ति कोन्‍छ्‍योक नेमा वावु यिनाङ की, ङे राङ तेरुप यिन सिनी हाक्‍कोकिवी।
JOH 7:18 खोरो राङ लापुप मी तीकी मीतिवा नेसुर ताङ्‍देन छोल्‍गिवी, यिने खोरुङला तोङ्‍गुप तीला मोवा कितुप नो वोतुप मी ति टेङ्‍बु वे, तीकी काङ साङ जिनोक मोजोवी।
JOH 7:19 काङ मोशाकी ख्‍यिराङला कोन्‍छ्‍योककी नङ्‍गुप ठिम बिन्‍दुप मिन रो? यिने ख्‍यिरा पर्ला सु साङ ती ठिमला मेङ्‍येन्‍दिवी। ख्‍यिराङ च्‍यिला ङला सेतुपला छोल्‍गिवी?” सिनी सुङ्‍सुङ।
JOH 7:20 खोकी तुक सुङ्‍सिमा मी माङ्‍छ्‍योककी खोला “ख्‍युरुङला र्‍हेन्‍डी ग्‍यम वे। सी ख्‍युरुङला सेतुपला छोल्‍गिनोक?” सिनी सिक्‍यासुङ।
JOH 7:21 तमा येशूकी तिवाला दुक सुङ्‍सुङ, “ङे हलेवु लाका यी क्‍यायिन, तमा ख्‍यिराङ तेरी हलेवा क्‍यासुङ।
JOH 7:22 मोशाकी ख्‍यिराङला यहूदी च्‍येतुप लुक्‍सु कितुप ठिम बिन वे। वुतुङ के ती ठिम ति मोशाकी बिन्‍दुप मिन, यिने ख्‍यिरा पगावा हङ्‍गावातिवा नेसुर वावु यिन। तुक क्‍यानी ख्‍यिरा ङासोप ङ्‍यिमाला साङ ख्‍यिरा पुज्‍युङतिवाला यहूदी च्‍येतुप लुक्‍सु किनोक।
JOH 7:23 ख्‍यिराङ मोशाकी ठिम तेन्‍दुपला ङासोप ङ्‍यिमाला साङ यहूदी च्‍येतुप लुक्‍सु किवी सिसिन ङे ङासोप ङ्‍यिमाला नेर्पु यीकी जु तेरी टेक च्‍यितुप तप्‍की ख्‍यिराङ च्‍यिला ङला ङ्‍यिर्मु किवी?
JOH 7:24 ख्‍यिरा मी ङो ल्‍हानी तिराङ ठिम माकी, यिने ठिम टेङ्‍बो की।”
JOH 7:25 तमा यरूशलेमकी मीतिवा ललाइकी “यहूदी गोमा कितुप छ्‍येतिवी सेतुपला छोलुप ति दी राङ मिन रो?
JOH 7:26 ल्हो ताङ, दीकी याङ मी मिङ्‍गाला राङ सुङ लप्‍किनोक, यिन्‍सिनाङ तिवी तीकी तेन्‍दोकला काङ साङ मिसिर्नोक। तिवी दी मी ति वुतुङ के ख्रीष्‍ट यिन सिनी हाक्‍कोते?
JOH 7:27 यिने दी मी ति कनी नेसुर वावु यिन सिनी दाक्‍पुला छ्‍या वे। ख्रीष्‍ट फेप्‍सियाङ खो कनी नेसुर फेवु यिन सिनी सी साङ हाक्‍मोकोवी।” सिनी सिक्‍यासुङ।
JOH 7:28 ती पेला येशूकी ते यहूदी ल्‍हङाङ नाङ्‍ला येन्‍देन लाप नङ्‍यिन नोक, तमा खोकी कशेन थोर ग्‍यप्‍नी सुङ्‍सुङ, “ख्‍यिरा ङला ङो शे वे, तमा ङ कनी नेसुर वावु यिन सिरुप साङ छ्‍या वे। यिने ङ ङरा नोवाकी राङ वावु मिन। ङला तोङ्‍गुप ति टेङ्‍बु यिन। ख्‍यिरा खोला ङो राङ मेशेवी,
JOH 7:29 यिने ङे याङ खोला ङो शेकिवी। च्‍यिलासिसिन ङ खो नेमा वावु यिन, तमा खोकी ङला तङ्‍गुप यिन।”
JOH 7:30 येशूकी तुक सुङ्‍सिमा मीतिवी खोला जिम्‍बुप नो क्‍यासुङ, यिने सी साङ खोला जिम माथुप, च्‍यिलासिसिन ती पेला सेक खोकी तुजे मालेप्‍नोक।
JOH 7:31 ते वोतुप मीतिवी पर्ला बङीकी खोला तेपा क्‍यासुङ। तमा तिवी सिक्‍यासुङ, “ख्रीष्‍ट फेप्‍सिनाङ दी मी तीकी क्‍यावु हलेवु ततिवा सिनाङ मङ छ्‍या देन्‍गिवी रो?”
JOH 7:32 मी मङ्‍छ्‍योककी येशूकी कोर्ला तुका मुक्‍तम तेन्‍दुप ति फरिसीतिवी थोसुङ। तमा ती फरिसीतिवी ताङ कोङ्‍यार छ्‍येतिवी येशूला जिम्‍बुपला ल्‍हङाङ र्‍हेन्‍दुप मक्‍मीतिवा ताङ्‍सुङ।
JOH 7:33 तमा येशूकी सुङ्‍सुङ, “तरोङ ङ चेयी पर सेक तिराङ ख्‍यिरा मुला देतिन, तमा ती ज्‍युक्‍ला ङ ङला तोङ्‍गुप तीकी ते लोक्‍नी डोयी।
JOH 7:34 ख्‍यिरा ङला छल्‍सिनाङ ङला मेङ्‍येवी। तमा ङ कनी गाल वे, ते ख्‍यिराङ वुङ साङ मुथुपी।”
JOH 7:35 तमा यहूदी गोमा कितुप छ्‍येतिवा खोप्‍राङ नाङ्‍ला च्‍यिककी च्‍यिकला “ला, दी मी ति कनी डोप नो किताङ? दीला दाक्‍पी ठे मुथुपी सिरुप ति काङ यिनाङ? काङ दी मी ति ग्रीककी लुङ्‍बाला टम्‍नी देतुप यहूदीतिवी पर्ला गल्‍नी येन्‍देन तेरुप नो किते की?
JOH 7:36 दीकी याङ दाक्‍पुला ‘ख्‍यिरा ङला छल्‍सिनाङ मेङ्‍येवी। तमा ङ कनी गाल वे, ते ख्‍यिराङ वुङ साङ मुथुपी।’ सिक्‍यावु तेन्‍दोक ति काङ यिनाङ?” सिनी सिक्‍यासुङ।
JOH 7:37 तमा ती तुछ्‍येनकी तिङ्‍मा ताङ तेरी सिनाङ खक्‍छ्‍येवु ङ्‍यिमाला येशू मी माङ्‍छ्‍योककी पर्ला शेङ्‍नी कशेन थोर ग्‍यप्‍नी दुक सुङ्‍सुङ, “सुला कोम्‍बा लावे, ती ङे चाला वानी ङे बिन्‍दुप ति थुङ।
JOH 7:38 सी ङला तेपा किवे, तीकी सेम नेमा कोन्‍छ्‍योककी सुङला टि वोतुप दोके मिजी तेरुप छ्‍यु नरी दोल्‍गितो।”
JOH 7:39 खोकी तुक सुङ्‍गुप ति खोला तेपा कितुपतिवाला ज्‍युक्‍ला थोपुप कोन्‍छ्‍योककी थु चाङ्‍माकी कोर्ला सुङ्‍गुप यिन। ती पेला सेक कोन्‍छ्‍योककी थु चाङ्‍मा मीतिवाला माथोप्‍नोक, च्‍यिलासिसिन येशू ती पेला सेक देवाच्‍येन ने तेक्‍नी खोला मोवा माङ्‍येवु तप्‍की यिन।
JOH 7:40 खोकी तुक सुङ्‍गुप थोनी मीतिवा ललाइकी “दी याङ वुतुङ के कोन्‍छ्‍योककी तङ्‍गुप लुङ्‍तेम्‍बा राङ यिनोक।” सिनी सिक्‍यासुङ।
JOH 7:41 तमा ललाइकी “दी याङ ख्रीष्‍ट यिनोक।” सिनी सिक्‍यासुङ। यिने ललाइकी “काङ ख्रीष्‍ट ति गालील नेसुर वुङ्‍गिवी रो?
JOH 7:42 कोन्‍छ्‍योककी सुङला ख्रीष्‍ट याङ ग्‍येल्‍वु दाऊदकी गिपा नेसुर गितो, तमा दाऊदकी युल बेथलेहेमला क्‍येकितो सिनी सुङ्‍गुप मिन रो?” सिनी सिक्‍यासुङ।
JOH 7:43 दुक राङ क्‍यानी येशूकी तेन्‍दोकला मी माङ्‍छ्‍योककी पर्ला ख्‍ये पेनोक।
JOH 7:44 तमा तिवी पर्ला ललाइकी येशूला जिम्‍बुप छल्‍सिनाङ सी साङ खोला जिम माथुप।
JOH 7:45 तमा ल्‍हङाङ र्‍हेन्‍दुप मक्‍मीतिवी येशूला जिम माथुप्‍नी कोङ्‍यार छ्‍येतिवा ताङ फरिसीतिवी चाला लोक्‍नी वासिमा तिवी ती मक्‍मीतिवाला “ख्‍यिरा च्‍यिला तीला जिम्‍नी टि माङु?” सिनी टिसुङ।
JOH 7:46 तमा तिवी “ती मी दोके ताम्‍ङे लपुप ति त सेक सु साङ मिन्‍दुक।” सिनी सिक्‍यासुङ।
JOH 7:47 तमा फरिसीतिवी तिवाला “ख्‍यिराङ साङ तीकी जिनोक जोवु ताम्‍ङेला शोर्सुङ?
JOH 7:48 ङ्‍यिरा यहूदी गोमा कितुप छ्‍येतिवा याङ्‍ना फरिसीतिवी पर्ला मी मिरा च्‍यिककी साङ तीला तेपा क्‍यासुङ रो?
JOH 7:49 ती ठिम काङ साङ हाक्‍मोकोवु मी माङ्‍छ्‍योकतिवाला कोन्‍छ्‍योककी मोताप सुकिवी।” सिनी सिक्‍यासुङ।
JOH 7:50 तमा ते वोतुप फरिसीतिवी पर्ला गोमाला येशूला ठेतुपला खोकी चाला गलुप निकोदेमस नोक।
JOH 7:51 तीकी तिवाला “काङ दाक्‍पी ठिमला याङ गोमाला ती मी तीकी ख नेमा माथोवा क्‍यानी ताङ तीकी काङ क्‍या वे, ती हाक्‍माकोवा क्यानी तीला क्‍येन तेर्किवी रो?” सिनी सिक्‍यासुङ।
JOH 7:52 तमा तिवी निकोदेमसला “काङ ख्‍युरुङ साङ गालीलकी मी यिन? ख्‍युरुङ कोन्‍छ्‍योककी सुङ ल्‍यामो क्‍यानी लोप। तुक क्‍यासिन गालील लुङ्‍बा नेसुर कोन्‍छ्‍योककी लुङ्‍तेम्‍बा मेङ्‍गिवी सिरुप ति हाक्‍कोकिवी।” सिनी सिक्‍यासुङ।
JOH 7:53 ती ज्‍युक्‍ला ती तेरी मीतिवा दाक दाक्‍पी खाङ्‍बा लोक्‍नी गाल्‍सुङ।
JOH 8:1 तमा येशू जैतुन पम्‍दोकला फेप्‍सुङ।
JOH 8:2 ती सला टोपला टेताङ खो लोङ यहूदी ल्‍हङाङला फेप्‍सिमा मीतिवा खोकी गारी गुरीला जोम्‍सुङ। तमा खो तिवी पर्ला ज्‍युनी तिवाला कोन्‍छ्‍योककी सुङ लाप नाङ्‍सुङ।
JOH 8:3 ती पेला राङ यहूदी छ्‍योकी गेकेनतिवा ताङ फरिसीतिवी शम्‍डेन कियी वोतुप पुम्‍पेजा यीला जिम्‍नी येशूकी चाला टि वासुङ, तमा तीला तेरी मीतिवी दोङ्‍ला लानी दे च्‍यिसुङ।
JOH 8:4 तमा तिवी येशूला “गेकेन, दी पुम्‍पेजा ति शम्‍डेन कियी वोतुप पेला जिम्‍नोक।
JOH 8:5 मोशाकी ठिमला दुका पुम्‍पेजातिवाला दो पोप्‍नी से गोकिवी सिनी क बिन वे। त गेकेनकी काङ सुङ्‍गिवी?” सिनी टिसुङ।
JOH 8:6 तिवी दुक सिनी टिवु ति येशूला खोक्‍पा ल्‍हानी खोकी सुङ्‍गुप ताम्‍ङेला क्‍येन तेरुपला यिन। यिने येशूकी कुक क्‍यानी सला लाक्‍पी थेप्‍तोक थ्‍वोनी टिसुङ।
JOH 8:7 तमा तिवी खोला टिवु ति टितोक क्‍यासिमा खो शेङ्‍नी तिवाला “ख्‍यिरा पर्ला सु दिक्‍छेन मेवे, तीकी गोमाला राङ दी पुम्‍पेजाला दो पोप।” सिनी सुङ्‍सुङ।
JOH 8:8 तुक सुङ्‍सिमा खोकी येलुङ कुक क्‍यानी सला लाक्‍पी थेप्‍तोक थ्‍वोनी टिसुङ।
JOH 8:9 ती ताम्‍ङे थोसिमा गोमाला गावागामातिवा नेसुर गो चुनी मी नाज्‍युङतिवा सेक तेरी रे ताङ रे क्‍यानी गाल्‍सुङ, तमा ते येशू तिराङ लुसुङ। ती पुम्‍पेजा ति तुक राङ लानी देनोक।
JOH 8:10 तमा येशूकी शेङ्‍नी ती पुम्‍पेजा तीला “ओ नुमो, तिवा कनी गाल? सी साङ ख्‍युरुङला ठिम माक्‍या?” सिनी टि नाङ्‍सुङ।
JOH 8:11 तमा ती पुम्‍पेजा तीकी “मिन, चोवो, सी साङ माक्‍या।” सिनी सिक्‍यासुङ। तमा येशूकी तीला “ङ साङ ख्‍युरुङला ठिम मिकी। ख्‍युरुङ ग्‍युक, तमा तफेन्‍ला येलुङ दिक्‍पा माकी।” सिनी सुङ्‍सुङ।
JOH 8:12 येलुङ येशूकी मीतिवाला “ङ जम्‍बुलिङकी मीतिवाला मिजी तेरुप वोसिर यिन। ङला तिङ्‍योकुपतिवा तफेन्‍ला नक्‍तोमीला मुयुकिवी, यिने तिवाला मिजी तेरुप वोसिर थोप्‍किवी।” सिनी सुङ्‍सुङ।
JOH 8:13 ती ताम्‍ङे थोनी फरिसीतिवी “ख्‍युरुङ ख्‍योरो कोर्ला राङ पङ्‍बु तेर्किनोक, तुक क्‍यानी ख्‍योरो पङ्‍बु ति टेङ्‍बु मिन।” सिनी खोला सिक्‍यासुङ।
JOH 8:14 तमा येशूकी तिवाला सुङ्‍सुङ, “ङे ङरा कोर्ला पङ्‍बु बिन्‍सिनाङ ङे पङ्‍बु ति टेङ्‍बु वे, च्‍यिलासिसिन ङ कनी नेमा वावु ताङ कनी डिवी सिरुप ति ङला छ्‍या वे। यिने ख्‍यिराङला ङ कनी नेमा वावु ताङ कनी डिवी सिरुप ति छ्‍या मे।
JOH 8:15 ख्‍यिराङ ति मीतिवी नासाम नेसुर ठिम तोङ्‍गिवी, यिने ङ याङ सुला साङ ठिम मोतोङ्‍गिवी।
JOH 8:16 यिने दोजो ङे मीतिवाला ठिम ताङ्‍सिनाङ ङे तङ्‍गुप ठिम ति टेङ्‍बु वे। च्‍यिलासिसिन ङ च्‍यिकला राङ ठिम तोङ्‍गुप मिन, यिने ङला तोङ्‍गुप पपा ङे मुला राङ ठिम कियी वे।
JOH 8:17 ख्‍यिरा ठिमला साङ ‘मिरा ङ्‍यीकी पङ्‍बु बिन्‍सिन ती पङ्‍बु ति टेङ्‍बु वे।’ सिनी टि वे।
JOH 8:18 ङे थोक्‍ला ङरा राङ पङ्‍बु तेर्किवी, तमा ङला तोङ्‍गुप पपी साङ ङे थोक्‍ला पङ्‍बु नङ्‍गिवी।”
JOH 8:19 तमा तिवी खोला “ख्‍योरो पपा ति कनी वे?” सिनी टिसुङ। तमा येशूकी तिवाला “ख्‍यिरा ङला साङ ङो माशे, ङे पपाला साङ ङो माशे। दोजो ख्‍यिरा ङला ङो शेसिन ङे पपाला साङ ङो शेवुजा।” सिनी सुङ्‍सुङ।
JOH 8:20 दी ताम्‍ङे ति येशूकी यहूदी ल्‍हङाङला येन्‍देन नङ्‍यिन वोतुप पेला ते वोतुप बुल्‍वा बुलुप गाम ज्‍यकुप दासाला सुङ्‍गुप यिन। यिने ती पेला सी साङ खोला माजिम्‍नोक, च्‍यिलासिसिन खोकी तुजे ति तरोङ साङ मालेप्‍नोक।
JOH 8:21 येलुङ येशूकी तिवाला सुङ्‍सुङ, “ङ डोयी वोतो, तमा ख्‍यिरा ङला छोल्‍गितो, तमा ख्‍यिराङ ति ख्‍यिरा क्‍यावु दिक्‍पाला राङ शिवितो। ङ कनी गाल्‍वे, ते ख्‍यिराङ वुङ मुथुप्‍तो।”
JOH 8:22 ती थोनी यहूदी गोमा कितुप छ्‍येतिवी “तीकी ‘ङ कनी गाल्‍वे, ते ख्‍यिराङ वुङ मुथुप्‍तो।’ सिनी सिनोक। दीकी तेन्‍दोक ति खोरुङ राङ शेपला यिन्‍दे?” सिनी सिक्‍यासुङ।
JOH 8:23 तमा येशूकी तिवाला सुङ्‍सुङ, “ख्‍यिराङ ति मलाकी ति यिन, यिने ङ ति यायु नेमा वावु यिन। ख्‍यिराङ ति दी जम्‍बुलिङकी मी यिन, यिने ङ ति दी जम्‍बुलिङकी मी मिन।
JOH 8:24 तुक क्‍यानी ख्‍यिराङ ति ख्‍यिरा क्‍यावु दिक्‍पाला राङ शिवितो सिनी ङे ख्‍यिराङला सिक्‍यावु यिन। दोजो ख्‍यिरा ‘ङ सु यिन, ती राङ यिन।’ सिरुप तीला तेपा माक्‍यासिन ख्‍यिराङ ख्‍यिरा दिक्‍पाला राङ शिवितो।”
JOH 8:25 तमा तिवी खोला “ख्‍युरुङ सु यिन?” सिनी टिसुङ। येशूकी “ङ सु यिन सिनी थल्‍मा नेज्‍युनी ख्‍यिराङला सिक्‍यावु ति यिन।
JOH 8:26 ख्‍यिरा थोक्‍ला ङे ताम्‍ङे कितुप ताङ ठिम कितुप याङ बङी वे, यिने ङला तोङ्‍गुप ति वुतुङ के टेङ्‍बु वे। ङ ति ङला तोङ्‍गुप तीकी नेमा थोवु ताम्‍ङे तिराङ जम्‍बुलिङकी मीतिवाला लपिन।” सिनी सुङ्‍सुङ।
JOH 8:27 खोकी ती ताम्‍ङे ति पपा कोन्‍छ्‍योककी कोर्ला सुङ्‍गुप यिन सिनी तिवी हाक्‍माको।
JOH 8:28 ती तप्‍की येशूकी तिवाला सुङ्‍सुङ, “ख्‍यिरा ङ मी पुज्‍युङला येर देकुप पेला ‘ङ सु यिन, ती राङ यिन’ सिरुप ताङ ङरा राङ काङ माक्‍यावा क्‍यानी पपी ङला काङ सुङ्वे, ती दोके ङे तेरी सिक्‍यावु यिन सिरुप ति ख्‍यिरा हाक्‍कोकितो।
JOH 8:29 ङला तोङ्‍गुप ति ङे मुला ज्‍यु वे। खोकी ङला च्‍यिक राङ क्‍युन माज्‍याक वे, च्‍यिलासिसिन ङ नरी खोला गा लङ्‍गुप लाका कितिन।”
JOH 8:30 खोकी तुक सुङ्‍गुप ताम्‍ङेतिवा थोनी मीतिवा बङीकी खोला तेपा क्‍यासुङ।
JOH 8:31 तमा येशूकी खोला तेपा कितुप यहूदीतिवाला सुङ्‍सुङ, “ख्‍यिराङ ङे येन्‍देनला लुसुङ सिसिन ख्‍यिराङ वुतुङ के ङे लोमातिवा यिनो।
JOH 8:32 तमा ख्‍यिरा टेङ्‍बुकी कोर्ला हाक्‍कोकितो, तमा ती टेङ्‍बुकी ख्‍यिराङला पि तोङ्‍गितो।”
JOH 8:33 ती थोसिमा तिवी खोला “ङ्‍यिराङ याङ अब्राहामकी गिपा यिन, त सेक ङ्‍यिराङ सी योक्‍पु साङ माच्‍युङ, यिने ख्‍योरे च्‍यिला ङ्‍यिराङला पि तोङ्‍गितो सिनी सिक्‍यावु यिन?” सिनी सिक्‍यासुङ।
JOH 8:34 तमा येशूकी तिवाला सुङ्‍सुङ, “वुतुङ के ङ ख्‍यिराङला सिरिन, दिक्‍पा कितुप ति दिक्‍पाकी योक्‍पु यिन।
JOH 8:35 योक्‍पु ति नरी ज्‍यिन्‍दाककी खाङ्‍बाला मुलुवी, यिने ज्‍यिन्‍दाककी पुज्‍युङ ति नरी लुकिवी।
JOH 8:36 तुक क्‍यानी कोन्‍छ्‍योककी पुज्‍युङकी ख्‍यिराङला पि तोङ्‍गिवी सिसिन ख्‍यिराङ वुतुङ के पितोङ्‍गिवी।
JOH 8:37 ख्‍यिराङ अब्राहामकी गिपा यिन सिरुप ति ङला छ्‍या वे। यिन्‍सिनाङ ख्‍यिरा ङला सेतुप छोल्‍गिवी, च्‍यिलासिसिन ङे सिक्‍यावु ताम्‍ङे ति ख्‍यिरा सेमला मोज्‍योकिवी।
JOH 8:38 ङ ङे पपा नेसुर थोङ्‍गुप ति ख्‍यिराङला लपिन, यिने ख्‍यिराङ ति ख्‍यिरा पपा नेसुर थोवु दोके राङ किवी।”
JOH 8:39 तमा तिवी येशूला “ङ्‍यिरा पपा याङ अब्राहाम यिन।” सिनी सिक्‍यासुङ। येशूकी तिवाला सुङ्‍सुङ, “दोजो ख्‍यिराङ वुतुङ के अब्राहामकी गिपा यिन्‍सिन अब्राहामकी काङ किवे, ख्‍यिरा साङ तुकै राङ कितुप्‍जा।
JOH 8:40 ङे ख्‍यिराङला कोन्‍छ्‍योक नेमा थोवु सुङ टेङ्‍बु ति सिक्‍यायी, यिन्‍सिनाङ ख्‍यिरा ङला सेतुप छोल्‍गिनोक। अब्राहामकी याङ तुकै माक्‍या।
JOH 8:41 ख्‍यिरा पपी काङ किवे, ख्‍यिरा साङ तुकै राङ कियी वे।” सिनी सुङ्‍सुङ। येलुङ तिवी खोला “ङ्‍यिराङ याङ शम्‍डेन क्‍यानी क्‍येवु मिन। ङ्‍यिरा पपा याङ कोन्‍छ्‍योक च्‍यिक राङ यिन।” सिनी सिक्‍यासुङ।
JOH 8:42 येलुङ येशूकी तिवाला सुङ्‍सुङ, “दोजो कोन्‍छ्‍योक ति ख्‍यिरा पपा यिन्‍सियाङ ख्‍यिरा ङला ङ्‍यिङ्‍ज्‍ये कितुप्‍जा, च्‍यिलासिसिन ङ कोन्‍छ्‍योक नेमा वानी तन्‍दा दे राङ वे। तमा ङ ङराङ वावु मिन, यिने खोकी ङला ताङ्‍सुङ।
JOH 8:43 ख्‍यिराङ च्‍यिला ङे सिक्‍यावु ताम्‍ङेला हाक्‍मोकोवी? ती ति ख्‍यिरा ङे सिक्‍यावु ताम्‍ङे ख्‍यिरा ङ्‍येन मुथुपी।
JOH 8:44 ख्‍यिराङ ति ख्‍यिरा पपा शैतानकी गिपा यिन। ख्‍यिरा पपी काङ सिक्‍यावे, ख्‍यिराङ साङ तुक राङ कितुप नो किवी। ती शैतान ति थल्‍मा नेज्‍युनी शेन्‍बा यिन। तीकी नाम्‍साङ टेङ्‍बुला ङ्‍याम मिकिवी, च्‍यिलासिसिन तीकी सेमला काङ साङ टेङ्‍बु मे। तीकी जिनोक जोप पेला खोरो किताङ नालुला राङ जिनोक जेवी, च्‍यिलासिसिन ती ति जिनोक्‍पा यिन, तमा तेरी जिनोककी पपा यिन।
JOH 8:45 ङे ख्‍यिराङला ताम्‍ङे टेङ्‍बु सिक्‍यायिन, तुक क्‍यानी ख्‍यिरा ङे ताम्‍ङेला मेङ्‍येन्‍दिवी।
JOH 8:46 ख्‍यिरा पर्ला सी ङला दिक्‍पा वे सिनी तेन्‍तेन कि थुप्‍किवी रो? ङे ताम्‍ङे टेङ्‍बु लाप्‍सिन ख्‍यिरा च्‍यिला ङला तेपा मिकिवी?
JOH 8:47 सु कोन्‍छ्‍योककी गिपा नोके, तीकी खोकी सुङला ङ्‍येन्‍गिवी। ख्‍यिराङ ति खोकी सुङला मेङ्‍येन्‍दिवी, च्‍यिलासिसिन ख्‍यिराङ कोन्‍छ्‍योककी गिपा मिन्‍दुप तप्‍की यिन।”
JOH 8:48 तमा यहूदीतिवी येशूला “ङ्‍यिरा ख्‍युरुङ सामरी यिन, तमा ख्‍युरुङला डे ग्‍यप्‍नोक सिनी सिक्‍यावु ति टेके मिन रो?” सिनी सिक्‍यासुङ।
JOH 8:49 तमा येशूकी सुङ्‍सुङ, “मिन, ङला डे ग्‍यपुप मिन, यिने ङ ङे पपाला ताङ्‍देन कितिन। यिन्‍सिनाङ ख्‍यिरा याङ ङला मो बेप्‍किवी।
JOH 8:50 ङ ङरा थोक्‍ला राङ मीतिवी नेमा ताङ्‍देन मोछोल, यिने ङे थोक्‍ला ताङ्‍देन छोलुप ताङ ठिम कितुप ति च्‍यिक वे।
JOH 8:51 वुतुङ के ङ ख्‍यिराङला सिरिन, सु ङे सुङला ङ्‍येन्‍गिवे, ती ति नाम्‍साङ मिशिवी।”
JOH 8:52 तमा यहूदीतिवी येशूला सिक्‍यासुङ, “त ख्‍युरुङला वुतुङ के डे ग्‍यप्‍नोक सिनी ङ्‍यिरा तेन्‍तेन हाक्‍कोसुङ। अब्राहाम साङ शिसुङ, कोन्‍छ्‍योककी लुङ्‍तेम्‍बातिवा साङ शिसुङ, यिने ख्‍योरो याङ ‘ङे सुङ ङ्‍येन्‍दुपतिवा नाम्‍साङ मिशिवी।’ सिनी सिनोक।
JOH 8:53 काङ ख्‍युरुङ शिनी गलुप दाक्‍पी पगावा अब्राहाम सिनाङ छ्‍ये यिन रो? खो साङ शिसुङ, कोन्‍छ्‍योककी लुङ्‍तेम्‍बातिवा साङ शिसुङ। ख्‍युरुङ ति खुरुङला राङ सु यिन सिनी नासाम तोङ्‍गिवी?”
JOH 8:54 तमा येशूकी सुङ्‍सुङ, “दोजो ङे ङराङला मोवा छलुप यिन्‍सिन ती मोवा ति तेर्मे यिन। ङला मोवा ङ्‍ये ज्‍यितुप ति ङे पपा यिन। खो ति ख्‍यिरा रङगी कोन्‍छ्‍योक सिनी सिक्‍यावु ति यिन।
JOH 8:55 ख्‍यिरा खोला ङो माशे वे, यिने ङे याङ खोला ङो शे वे। दोजो ङे खोला ङो माशे वे सिनी सिक्‍यासिन ङ साङ ख्‍यिराङ दोके जिनोक्‍पा च्‍युङ्‍गिवी। यिने ङे खोला ङो शे वे, तमा खोकी सुङला ङ्‍येन्‍गिवी।
JOH 8:56 ख्‍यिरा पगावा अब्राहामकी ङ वुङ्‍गुप तुजे ल्‍हाप नोनी सेमला छासे गा लासुङ, तमा तीकी ङ वुङ्‍गुप ति ल्‍हानी गा क्‍यासुङ।”
JOH 8:57 तमा तिवी खोला दुक सिक्‍यासुङ, “काङ ख्‍युरुङ लो खाल ङ साङ मालेपाला के चुक क्‍यानी अब्राहामला थोङ्‍सुङ सिनी सिवी?”
JOH 8:58 तमा येशूकी तिवाला “वुतुङ के ङ ख्‍यिराङला सिरिन, अब्राहाम क्‍येप सिनाङ गोमाला के ङ वोतुप यिन।” सिनी सुङ्‍सुङ।
JOH 8:59 खोकी तुक सुङ्‍सिमा तिवी दो लानी खोला बेपुप छाल्‍सुङ। यिने येशू यिप्‍नी ते यहूदी ल्‍हङाङ नेसुर थेन्‍नी पाङ्‍ला फेप्‍सुङ।
JOH 9:1 तेसुर येशू फेपिन कितुप पेला क्‍येप पे नेज्‍युन मिक मोथोङ्‍गुप मी मिरा च्‍यिकला थोङ्‍सुङ।
JOH 9:2 ती थोङ्‍सिमा खोकी लोमातिवी खोला “गेकेन, दी मी ति क्‍येप पे नेज्‍युन मिक मोथोङ्‍गुप ति सी दिक्‍पा क्‍यावु तप्‍की यिन? तीकी दिक्‍पा क्‍यावु तप्‍की यिनाङ की, तीकी पपाआमी दिक्‍पा क्‍यावु तप्‍की यिनाङ?” सिनी टिसुङ।
JOH 9:3 तमा येशूकी तिवाला सुङ्‍सुङ, “दीकी दिक्‍पा क्‍यावु साङ मिन, दीकी पपाआमी दिक्‍पा क्‍यावु साङ मिन। यिने दीकी मिजी नेमा कोन्‍छ्‍योककी हलेवु लाका ति मीतिवी थोङ्‍शी सिनी तुकै च्‍युङ्‍गुप यिन।
JOH 9:4 ङ्‍यिमी गुङला राङ ङला तोङ्‍गुप तीकी लाकातिवा दाक्‍पी कि गोकिवी। नुपला याङ सी साङ लाका कि मुथुपी।
JOH 9:5 जम्‍बुलिङला वोता सेक ङ ति जम्‍बुलिङकी वोसिर यिन।”
JOH 9:6 तुक सुङ्‍सिमा खोकी सला च्‍येमाक क्‍युर्नी थला ताङ मुला नुप्‍सिमा ती नुपुप ति ती मिक मोथोङ्‍गुप तीकी मिकला कुसुङ।
JOH 9:7 तमा खोकी तीला “ख्‍युरुङ सिलोआम चोला गल्‍नी ख्‍योरो मिक ति शोल।” सिनी सुङ्‍सुङ। (दी सिलोआमकी तेन्‍दोक ति तङ्‍गुप यिन।) खोकी तुक सुङ्‍सिमा ती मी ति गल्‍नी मिक शाल्‍सुङ, तमा तीकी मिक ति थोङ्‍गुप गल्‍नी खाङ्‍बा लोक्‍नी गाल्‍सुङ।
JOH 9:8 तमा तीकी युल्‍वातिवा ताङ गोमाला तीला लाङ सयी वोतुप थोङ्‍गुपतिवी “दी याङ गोमाला देनी लाङ्‍साप ती मी ति मिन?” सिनी टिसुङ।
JOH 9:9 यम्‍बातिवी “यिन, दी मी ति ती राङ यिन।” सिनी सिक्‍यासुङ। तमा ललाइकी “मिन, दी ति ती दोके राङ थोङ्‍गिनोक।” सिनी सिक्‍यासुङ। यिने ती मिक थोङ थुपुप गलुप मी तीकी तिवाला “यिन, ती मी ति ङ राङ यिन।” सिनी सिक्‍यासुङ।
JOH 9:10 तमा मीतिवी “तुकै यिन्‍सिन ख्‍युरुङ चुक क्‍यानी मिक थोङ्‍गुप गाल्‍सुङ?” सिनी तीला टिसुङ।
JOH 9:11 तमा तीकी “येशू सिरुप मी यीकी थला नुप्‍नी ङे मिकला कुन बिन्‍सुङ। तमा ङला सिलोआम चोला गल्‍नी शोल सिनी सुङ्‍सुङ। तमा ङ गल्‍नी ङे मिक शलिन, शल्‍लुङ्‍मे ङे मिक थोङ थुपुप गाल्‍सुङ।” सिनी सिक्‍यासुङ।
JOH 9:12 तुक सिक्‍यासिमा मीतिवी तीला “ती मी ति कनी वे?” सिनी टिसुङ। तमा तीकी “ङला याङ छ्‍या मे।” सिनी सिक्‍यासुङ।
JOH 9:13 तमा मीतिवी ती गोमाला मिक मोथोङ्‍गुप तीला फरिसीतिवी चाला टि गाल्‍सुङ।
JOH 9:14 येशूकी थला नुप्‍नी ती मी तीला मिक थोङ च्‍यितुप ङ्‍यिमा ति ङासोप ङि्‍यमा यिनोक।
JOH 9:15 फरिसीतिवी तीला येलुङ चुक क्‍यानी तीकी मिक थोङ थुपुप गाल्‍सुङ सिनी टिसुङ। तमा तीकी “खोकी थला नुप्‍नी ङे मिकला कुसिमा ङे मिक शलिन, तमा ङे मिक थोङ थुपुप गाल्‍सुङ।” सिनी सिक्‍यासुङ।
JOH 9:16 फरिसीतिवी पर्ला ललाइ ललाइकी “ती मी ति याङ कोन्‍छ्‍योक नेमा वावु मिन, च्‍यिलासिसिन तीकी ङासोप ङ्‍यिमा मेतेन्‍नोक।” सिनी सिक्‍यासुङ। तमा यम्‍बातिवी “मी दिक्‍छेनकी चुक क्‍यानी दुका हलेवु ततिवा छ्‍या देन थुप्‍किवी रो?” सिनी सिक्‍यासुङ। तुक क्‍यानी तिवी पर्ला ताम्‍ङे माडिक।
JOH 9:17 येलुङ फरिसीतिवी गोमाला मिक मोथोङ्‍गुप मी तीला “ती मी तीकी ख्‍योरो मिक थोङ थुपुप जोसुङ सिनी ख्‍योरे सिक्‍यासुङ। त ख्‍युरुङ तीकी कोर्ला काङ नासाम तोङ्‍गिवी?” सिनी टिसुङ। तमा तीकी “खो याङ कोन्‍छ्‍योककी लुङ्‍तेम्‍बा यिन।” सिनी टिलेन बिन्‍सुङ।
JOH 9:18 यिने यहूदी गोमा कितुप छ्‍येतिवी ती मी ति गोमाला मिक मोथोङ्‍गुप नोक, तन्‍दा ति मिक थोङ्‍गुप गाल्‍नोक सिरुप ति लो मातेन। तुक क्‍यानी तिवी ती मी तीकी पपाआमाला कताङ्‍सुङ।
JOH 9:19 कताङ्‍सिमा तिवी तिवाला “दी ति क्‍येप पे नेज्‍युन मिक मोथोङ्‍गुप ख्‍यिरा पुज्‍युङ यिन? तन्‍दा चुक क्‍यानी दीकी मिक थोङ थुपुप गाल्‍सुङ?” सिनी टिसुङ।
JOH 9:20 तमा तीकी पपाआमा तीकी “दी ङ्‍यिरा पुज्‍युङ यिन, दी ति क्‍येप पे नेज्‍यु मिक मोथोङ्‍गुप वे सिनी ङ्‍यिराङला छ्‍या वे,
JOH 9:21 यिने चुक क्‍यानी दीकी मिक थोङ थुपुप गाल्‍सुङ सिरुप ति ङ्‍यिराङला छ्‍या मे। तमा सी दीकी मिक थोङ थुपुप जोसुङ, ती साङ ङ्‍यिराङला छ्‍या मे। दीला राङ टी। दी ति ज्‍येन्‍दा यिन, दीकी खोरो राङ लप्‍किवी।” सिनी सिक्‍यासुङ।
JOH 9:22 तीकी पपाआमा ति यहूदी गोमा कितुप छ्‍येतिवाला ज्‍यिवा लावु तप्‍की तुक सिक्‍यानोक, च्‍यिलासिसिन येशूला ख्रीष्‍ट यिन सिनी सिरुपतिवा सुला साङ यहूदी छ्‍योखाङ नेमा तेन तोङ्‍गुप सिनी तिवी तेन्‍तेन क्‍यानोक।
JOH 9:23 तुक क्‍यानी तीकी पपाआमी खोप्‍रे पुज्‍युङ ति ज्‍येन्‍दा यिन, तीला राङ टि सिनी सिक्‍यावु यिन।
JOH 9:24 येलुङ तिवी गोमाला मिक मोथोङ्‍गुप मी तीला कताङ्‍नी, “कोन्‍छ्‍योकला मोवा की, ती मी ति दिक्‍छेन यिन सिरुप ति ङि्‍यराङला छ्‍या वे।” सिनी सिक्‍यासुङ।
JOH 9:25 तमा तीकी तिवाला “खो दिक्‍छेन यिन्‍दे मिन्‍दे सिनी ङला छ्‍या मे, यिने ङला छ्‍या वोतुप ताम्‍ङे च्‍यिक ति तोङ्‍ला ङे मिक मोथोङ्‍गुप वे, तन्‍दा ति मिक थोङ थुपुप गाल्‍सुङ।” सिनी सिक्‍यासुङ।
JOH 9:26 येलुङ तिवी तीला “तीकी ख्‍युरुङला काङ क्‍यासुङ? चुक क्‍यानी तीकी ख्‍योरो मिक थोङ थुपुप जोसुङ?” सिनी टिसुङ।
JOH 9:27 तमा तीकी तिवाला “ख्‍यिराङला ङे हानाके सिक्‍यायी, यिने ख्‍यिरा ङे ताम्‍ङे लो मातेन। ख्‍यिराङ च्‍यिला येलुङ ती ताम्‍ङे ङ्‍येन्‍दुप नो किवी? काङ ख्‍यिराङ साङ खोकी लोमातिवा च्‍युङ्‍गुप नो किवी?” सिनी टिसुङ।
JOH 9:28 तमा तिवी तीला मारे तोङ्‍यिन सिरा “ख्‍युरुङ ति तीकी लोमा यिन, यिने ङ्‍यिराङ याङ मोशाकी लोमा यिन।
JOH 9:29 कोन्‍छ्‍योककी मोशाला ताम्‍ङे सुङ्‍गुप ति ङ्‍यिराङला छ्‍या वे, यिने दी मी ति कनीकी मी यिन सिरुप ति ङ्‍यिराङला छ्‍या राङ मे।” सिनी सिक्‍यासुङ।
JOH 9:30 तमा तिवाला तीकी सिक्‍यासुङ, “कङ ग्‍या, मिच्‍यिक्‍पा ताम्‍ङे यी! खोकी ङे मिक थोङ थुपुप जोसुङ, यिन्‍सिनाङ खो कनी नेसुर फेवु यिन सिनी ख्‍यिराङला छ्‍या मिन्‍दुक।
JOH 9:31 कोन्‍छ्‍योककी दिक्‍छेनतिवी ताम्‍ङे ति मेसेन्‍दी, यिने खोला ज्‍यिवा क्‍यानी सोवा देकुप ताङ खोकी नोवाला युकुपतिवी ताम्‍ङे सेन्‍गिवी सिरुप ति ङ्‍यिराङला छ्‍या वे।
JOH 9:32 क्‍येप पे नेज्‍युन मिक मोथोङ्‍गुप मीला मिक थोङ थुपुप जोवु ताम्‍ङे याङ जम्‍बुलिङ ज्‍येङ्‍गुप पे नेज्‍यु तन्‍दा सेक सी साङ नाम्‍साङ माथो वे।
JOH 9:33 दोजो ती मी ति कोन्‍छ्‍योक नेमा वावु मिन्‍सिन तुका लाका ति कि राङ मुथुपी।”
JOH 9:34 तमा तिवी तीला “ख्‍युरुङ याङ क्‍येप पेला नेज्‍युनी दिक्‍पाला ख्‍येलुप वुतुङ के दिक्‍छेन यिन, यिन्‍सिनाङ ख्‍योरो के ङ्‍यिराङला लोपुप छोल्‍गिवी?” सिनी तीला यहूदी छ्‍योखाङ नेमा तेन्‍नी ताङ्‍सुङ।
JOH 9:35 ती मी तीला यहूदी छ्‍योखाङ नेमा तेन ताङ्‍नोक सिरुप ताम्‍ङे येशूकी थोसिमा खोकी तीला ठेनी, “काङ ख्‍युरुङ मी पुज्‍युङला तेपा किवी?” सिनी टिसुङ।
JOH 9:36 तमा तीकी “ओ चोवो! खो ति सु यिन? ङला सुङ्‍नी, तमा ङ खोला तेपा कितिन।” सिनी सिक्‍यासुङ।
JOH 9:37 तीकी तुक सिक्‍यासिमा येशूकी तीला “ख्‍योरो तीला गोमाला के थोङ सिन्‍सुङ, तमा तन्‍दा ख्‍योरो मुला ताम्‍ङे कियी वोतुप ति ती राङ यिन।” सिनी सुङ्‍सुङ।
JOH 9:38 तमा तीकी येशूला “ओ चोवो, ङ चोवोला तेपा कितिन।” सिनी खोला शावा क्‍यासुङ।
JOH 9:39 येशूकी तीला “ङ दी जम्‍बुलिङकी मिक मोथोङ्‍गुपतिवाला मिक थोङ्‍गुप जोप ताङ मिक थोङ्‍गुपतिवाला मिक मोथोङ्‍गुप जोपला वावु यिन।” सिनी सुङ्‍सुङ।
JOH 9:40 ती ताम्‍ङे थोसिमा येशूकी चिप्‍ला वोतुप फरिसीतिवा ललाइ ललाइकी येशूला “काङ ङ्‍यिराङ साङ मिक मोथोङ्‍गुप मी यिन सिनी ख्‍योरो सिक्यावु यिन?” सिनी टिसुङ।
JOH 9:41 तमा येशूकी तिवाला सुङ्‍सुङ, “दोजो ख्‍यिराङ मिक मोथोङ्‍गुप यिन्‍सिन ख्‍यिराङला दिक्‍पाकी क्‍येन मोफोकुप्‍जा। यिने ख्‍यिराङ मिक थोङ्‍गिवी सिनी सिक्‍यासुङ, तुक क्‍यानी ख्‍यिरा क्‍यावु दिक्‍पाकी क्‍येन ति तुक राङ लुनी वे।”
JOH 10:1 ती ज्‍युक्‍ला येशूकी तिवाला सुङ्‍सुङ, “वुतुङ के ङ ख्‍यिराङला सिरिन, चुका मी ति लुकतिवा ज्‍योकुप खोरकी नाङ्‍ला शुकुप पेला ती खोरकी गे नाङ नेसुर माशुवा क्‍यानी यम्‍बा थाका नेसुर जेनी शुकिवे, ती ति कुर्मेन ताङ च्‍याक्‍पा यिन।
JOH 10:2 यिने खोरकी गे नाङ नेसुर क्‍यानी खोरकी नाङ्‍ला शुकुप मी ति लुकतिवी गोठाला यिन।
JOH 10:3 खोरकी गोला देनी र्‍हेन्‍दुप मी तीकी गोठालाकी थोक्‍ला खोरकी गो बेकिवी, तमा लुकतिवी खोरो गोठालाकी वोरु हाक्‍कोकिवी। गोठालाकी खोरो लुकतिवा रे रेकी मिङ तेन्‍नी लुकतिवाला पाङ्‍ला देन्‍गिवी।
JOH 10:4 तीकी लुकतिवा तेरी पाङ्‍ला तेन्‍सिमा खोरुङ ति तिवी गोमा गोमाला डिवी, तमा लुकतिवा तीकी तिङ्‍ला तिङ्‍योकिवी, च्‍यिलासिसिन लुकतिवी खोरो गोठालाकी वोरु ङो शेकिवी।
JOH 10:5 यिने मी यम्‍बी तिङ्‍ला याङ तिवा तिङ मोङ्‍योकी, बोरु ती नेसुर तिवा टोनी डिवी, च्‍यिलासिसिन मी यम्‍बी वोरु ति तिवी ङो मेशेवी।”
JOH 10:6 येशूकी तिवाला दी पे सुङ्‍सुङ, यिने तिवी ती पेकी तेन्‍दोक ति हाक्‍माकोनोक।
JOH 10:7 तुक क्‍यानी येशूकी येलुङ तिवाला दुक सुङ्‍सुङ, “वुतुङ के ङ ख्‍यिराङला सिरिन, लुक शुकुप खोरकी गो ति ङ राङ यिन।
JOH 10:8 ङ सिनाङ गोमाला वुङ्‍गुपतिवा तेरी कुर्मेन ताङ च्‍याक्‍पा यिन, यिने लुकतिवी तिवी ताम्‍ङे माङ्‍येन।
JOH 10:9 लुक शुकुप गो ति ङ राङ यिन। सु ङ नेसुर नाङ्‍ला शुकिवे, ती ति र्‍होकिवी, तमा फिला नाङ्‍ला डोप वुङ्‍गुप ताङ चरिन ङोर्मुला च साप ङ्‍येकिवी।
JOH 10:10 कुर्मेन याङ कुन कितुप ताङ सेतुप ताङ ना तोङ्‍गुपला तिराङ गिवी। यिने ङ याङ लुकतिवाला मिजी ङ्‍येशी, तमा छाछिङी ङ्‍येशी सिनी वावु यिन।
JOH 10:11 ङ गोठाला ल्‍यामु यिन। गोठाला ल्‍यामुकी खोरो लुकतिवा र्‍होकुपला खुरुङ शि राङ गोसिनाङ शिवी।
JOH 10:12 यिने ल बिन्‍नी लाका कि च्‍यितुपतिवा ति गोठाला मिन, तमा लुकतिवा साङ खोरो लुक मिन्‍दुप तप्‍की खटमुतिवा वुङ्‍गुप थोङ्‍सिमा लुकतिवाला क्‍युर ज्‍याक्‍नी टोनी डिवी। खटमुतिवा वानी लुकतिवाला जिम्‍नी डिवी, तमा लुकतिवा थरा थुरा जेवी।
JOH 10:13 ती ति टोनी डिवी, च्‍यिलासिसिन ती ति ल बिन्‍नी लाका कि च्‍यितुप मी यिन्‍दुप तप्‍की लुकतिवाला ङ्‍याम मिकिवी।
JOH 10:14 ङ ति गोठाला ल्‍यामु यिन। ङे याङ ङरा लुकतिवाला ङो शेकिवी, ङे लुकतिवी साङ ङला ङो शेकिवी।
JOH 10:15 ती ति पपी ङला ङो शेवु ताङ ङे पपाला ङो शेवु दोके यिन। ङ रङगी लुकतिवी थोक्‍ला शि राङ गोसिनाङ शिवी।
JOH 10:16 ङे मुला दी खोरकी नाङ्‍ला मेतुप यम्‍बा लुकतिवा साङ वे। ङे तिवाला साङ टिनी वुङ गोकिवी। तिवी साङ ङे वोरु थोकिवी, तमा तिवा तेरी गोठाला च्‍यिककी मयी च्‍यिक राङ च्‍युङ्‍गिवी।
JOH 10:17 पपी ङला ङ्‍यिङ्‍ज्‍ये क्‍या नङ्‍गिवी। च्‍यिलासिसिन ङ ङरा राङ शि ज्‍यितिन, तमा येलुङ ङे मिजी ति छुर लोकिन।
JOH 10:18 ङे मिजी ति ङ नेमा सी साङ ठोनी डो मुथुपी, यिने ङ ङरा नोवाकी राङ शि ज्‍यितिन। ङे मिजी शि ज्‍यितुप ओङ साङ ङे मुला वे, येलुङ लङ्‍गुप ओङ साङ ङे मुला वे। ती ति ङे पपी ङला कि सिनी क नङ्‍गुप यिन।”
JOH 10:19 येशूकी तुक सुङ्‍गुप थोसिमा यहूदीतिवी पर्ला येलुङ ठका ठुका गाल्‍सुङ।
JOH 10:20 च्‍यिलासिसिन तिवी पर्ला मी बङीकी “दीला ति र्‍हेन्‍डी ग्‍यप्‍नी ङ्‍येन्‍बु गाल्‍नोक। ख्‍यिराङ च्‍यिला दीकी ताम्‍ङे ङ्‍येन्‍गिवी?” सिनी सिक्‍यासुङ।
JOH 10:21 तमा यम्‍बातिवी “र्‍हेन्‍डी ग्‍यपुप मीकी याङ दुकै ताम्‍ङे मिकिवी। र्‍हेन्‍डीकी चुक क्‍यानी मिक मोथोङ्‍गुप मीला थोङ्‍गुप जो थुप्‍किवी रो?” सिनी सिक्‍यासुङ।
JOH 10:22 तमा यरूशलेमला यहूदी ल्‍हङाङ रप्‍ने क्‍यावु तेन्‍दुप तुछ्‍येन वानोक, ती तुछ्‍येन ति गुन्‍बी लला ख्‍येल्‍नोक।
JOH 10:23 येशू ति ल्‍हङाङ नाङ्‍ला वोतुप सोलोमन दलान नेवा यरा युरा कियी ज्‍युनोक।
JOH 10:24 ती पेला मीतिवा खोकी गारी गुरीला जोम्‍नी दुक सिक्‍यासुङ, “नम सेक ख्‍युरुङ ङ्‍यिराङला यिसिक मिसिक जेवी? काङ ख्‍युरुङ कोन्‍छ्‍योककी तोङ्‍गुप ख्रीष्‍ट यिन्‍सिन ङ्‍यिराङला टेङ्‍बो सी।”
JOH 10:25 तमा येशूकी तिवाला सुङ्‍सुङ, “ङे ख्‍यिराङला गोमाला के सिक्‍यायी, यिने ख्‍यिरा ङला तेपा माक्‍या। ङे पपी मिङला ङे क्‍यावु ती हलेवु लाकातिवा नेसुर राङ ङ सु यिन सिनी पङ्‍बु तेर्किवी।
JOH 10:26 यिन्‍सिनाङ ख्‍यिरा ङला तेपा मिकिवी, च्‍यिलासिसिन ख्‍यिराङ ङे लुकतिवा मिन्‍दुप तप्‍की यिन।
JOH 10:27 ङे लुकतिवी ङे वोरु थोकिवी। ङ तिवाला ङो शेतिन, तमा तिवा ङे तिङ्‍ला तिङ्‍योकिवी।
JOH 10:28 तिवाला ङ नाम्‍साङ मिशिवु मिजी तेरिन, तमा तिवा नाम्‍साङ ना मोडोवी। सी साङ ङे नेसुर तिवाला ठोनी डो मुथुपी।
JOH 10:29 ङला तिवा नङ्‍गुप पपा ति तेरी सिनाङ चोछ्‍ये वे। सी साङ पपा नेसुर तिवाला ठोनी डो मुथुपी।
JOH 10:30 ङ ताङ पपा ति च्‍यिक राङ यिन।”
JOH 10:31 खोकी तुक सुङ्‍सिमा यहूदीतिवी येलुङ खोला दो बेपुपला दो लासुङ।
JOH 10:32 तमा येशूकी तिवाला “पपी ओङ नेमा ङे लाका ल्‍यामुतिवा बङी ख्‍यिराङला छ्‍या तेनिन, ती लाकातिवी नाङ्‍ला चुका लाकाकी तेन्‍दोकला ख्‍यिरा ङला दो बेपुप छोल्‍गिवी?” सिनी सुङ्‍सुङ।
JOH 10:33 तमा यहूदीतिवी खोला दुक सिक्‍यासुङ, “ख्‍योरो लाका ल्‍यामु क्‍यावु तप्‍की ङ्‍यिरा ख्‍युरुङला दो बेपुप छलुप मिन, यिने कोन्‍छ्‍योकला मारे तङ्‍गुप तप्‍की यिन। ख्‍युरुङ मी यिन्‍सिनाङ खुरुङला राङ ङ कोन्‍छ्‍योक यिन सिनी सिनोक।”
JOH 10:34 तमा येशूकी तिवाला सुङ्‍सुङ, “ख्‍यिरा ठिमकी नाङ्‍ला ‘ङ ख्‍यिराङला ल्‍हतिवा यिन सिनी सिरिनो।’ सिनी माटि वे रो?
JOH 10:35 कोन्‍छ्‍योककी सुङ थोपुपतिवाला खोकी ल्‍हा यिन सिनी सुङ्‍सुङ, तमा कोन्‍छ्‍योककी सुङ ति टेङ्‍बु वे।
JOH 10:36 तुकै यिन्‍सिन पपी पेनी दी जम्‍बुलिङला तङ्‍गुप तीकी ‘ङ कोन्‍छ्‍योककी पुज्युङ यिन।’ सिनी सिक्‍यावु ताम्‍ङेला ख्‍यिरा च्‍यिला दीकी कोन्‍छ्‍योकला मारे तङ्‍गुप यिन सिनी क्‍येन बिन्‍दुप यिन?
JOH 10:37 दोजो पपी ङला कि सिनी नङ्‍गुप लाका ङे माक्‍यावु यिन्‍सिन ख्‍यिराङ ङला तेपा माकी।
JOH 10:38 यिने ङे ती लाका क्‍यावु यिन्‍सिन ङला तेपा माक्‍यासिनाङ ती लाकातिवाला ति तेपा की। तुक क्‍यासिन पपा ङे मुला वे, तमा ङ पपी मुला वे सिरुप ति ख्‍यिरा हाक्‍कोकिवी।”
JOH 10:39 खोकी तुक सुङ्‍सिमा येलुङ तिवी खोला जिम्‍बुप छाल्‍सुङ, यिने खो तिवी पर नेसुर थेन्‍नी फेप्‍सुङ।
JOH 10:40 तेसुर येशू येलुङ यर्दन चङ्‍बी फर्केन फेप्‍सुङ। ती दासा ति थल्‍माला यूहन्‍नाकी मीतिवाला बप्‍तिस्‍मा बिन्‍दुप दासा यिनोक। तमा खो ते राङ ज्‍युसुङ।
JOH 10:41 ते मीतिवा बङी खोकी चाला वानी, “यूहन्‍नाकी याङ हलेवु ततिवा च्‍यिक साङ छ्‍या मातेन, यिने यूहन्‍नाकी ती मीकी कोर्ला सिक्‍यावु ताम्‍ङेतिवा ति तेरी टेङ्‍बु नोक।” सिनी सिक्‍यासुङ।
JOH 10:42 तमा ते मीतिवा बङीकी येशूला तेपा क्‍यासुङ।
JOH 11:1 बेथानिया युलला लाजरस सिरुप मी यी नानोक। ती युलला राङ तीकी अज्‍यीतिवा मरियम ताङ मार्था साङ देनोक।
JOH 11:2 ती मरियम ति ज्‍युक्‍ला येशूकी शापला टि जङ्‍बु खाप नुम पुनी खोरो र्‍ह थ्‍वोनी पिन तेरुप पुम्‍पेजा यिनोक। ती नावु लाजरस ति तीकी नुप यिनोक।
JOH 11:3 लाजरस नासिमा तीकी अज्‍यी मार्था ताङ मरियम तीकी येशूला “चोवो, चोवोकी ङ्‍यिङ्‍ज्‍येवु दाल्‍जा ति नानी वे।” सिनी लेन ताङ्‍नोक।
JOH 11:4 ती लेन थोसिमा येशूकी सुङ्‍सुङ, “ती लाजरस नावु ति शेपकी थोक्‍ला मिन, यिने कोन्‍छ्‍योककी मोवा छ्‍या तेन्‍दुपकी थोक्‍ला यिन। तमा ती नेसुर राङ कोन्‍छ्‍योककी पुज्‍युङला मोवा ङ्‍येकिवी।”
JOH 11:5 येशूकी मार्था ताङ मरियम ताङ तिवी नुप लाजरसला ङ्‍यिङ्‍ज्‍ये किनोक।
JOH 11:6 यिने लाजरस नान वे सिरुप लेन थोसिमा साङ खो खोरुङ ज्युवु दासाला राङ ङ्‍यिमा ङ्‍यी ल्‍हक्‍पा ज्‍युसुङ।
JOH 11:7 तमा ती ज्‍युक्‍ला खोकी खोरे लोमातिवाला “लो, त दाक्‍पु येलुङ यहूदियाला राङ लोक्‍नी डोप।” सिनी सुङ्‍सुङ।
JOH 11:8 तमा लोमातिवी खोला “मिन गेकेन, दाङ मलोक तेकी यहूदीतिवी गेकेनला दो बेपुप छाल्‍सुङ। यिन्‍सिनाङ येलुङ गेकेन तेराङ फेपुप नो किवी?” सिनी सिक्‍यासुङ।
JOH 11:9 तमा येशूकी तिवाला सुङ्‍सुङ, “ङ्‍यिमा शरुप ति ङ्‍यिमाला घण्‍टा च्‍यिङ्‍ङी मेवी रो? सु ङ्‍यिमी गुङला युकिवे, तीला नर्तुक मग्‍यकिवी, च्‍यिलासिसिन तीकी ङ्‍यिमी गुङगी ठछ्‍येली थोङ्‍गिवी।
JOH 11:10 यिने नुपला युकुपतिवा याङ नर्तुक ग्‍यकिवी, च्‍यिलासिसिन तीकी मुला ठछ्‍येली मेवी।”
JOH 11:11 खोकी दुक सुङ्‍सिमा तिवाला “दाक्‍पी दाल्‍जा लाजरस ङि्‍य गल वे, ङ गल्‍नी तीला ङि्‍य चेतिन।” सिनी सुङ्‍सुङ।
JOH 11:12 तमा लोमातिवी खोला “ओ चोवो, ती ङ्‍यी गलुप यिन्‍सिन नावु ने टेकिवी।” सिनी सिक्‍यासुङ।
JOH 11:13 येशूकी तुक सुङ्‍गुप तेन्‍दोक ति लाजरस शिनोक सिनी सुङ्‍गुप यिन, यिने लोमातिवी नासामला ति लाजरस वुतुङ ङ्‍यी गलुप यिन सिनी नो क्‍यानोक।
JOH 11:14 तुक क्‍यानी खोकी तिवाला ल्‍यामु हाक्‍कोशी सिनी वुतुङ के सुङ्‍सुङ, “लाजरस शिन वे।
JOH 11:15 ङ लाजरसकी ते मेतुप ति ख्‍यिरा थोक्‍ला ल्‍यामु च्‍युङ्‍सुङ, तुक क्‍यानी ङ गा लावे। ती ति ख्‍यिरा ङला तेपा किशी सिनी यिन। त दाक्‍पु तीकी ते डोप।”
JOH 11:16 तमा लोमातिवी पर्ला दिदुमस साङ सिरुप थोमा तीकी यम्‍बा लोमातिवाला “लो, दाक्‍पु साङ गेकेनकी मुला डोप, तमा खोकी मुला शिराङ गोसिनाङ शेप।” सिनी सिक्‍यासुङ।
JOH 11:17 येशू बेथानियाला लेप्सुङ, तमा खोकी लाजरस ति शिनी तीकी रो ति शेप मीला ज्‍योकुप टककी फुकला ज्‍यकुप ति ङ्‍यिमा ज्‍यि गलुप ति हाक्‍कोसुङ।
JOH 11:18 बेथानिया ति यरूशलेम नेसुर तो मिसिन किलोमिटर सुम चोयी थाक्‍रिङ्‍बु ख्‍येल्‍गिनोक।
JOH 11:19 तमा यहूदीतिवा बङी मार्था ताङ मरियमला तिवी नुप शेपकी कोर्ला टोङ्‍गु तेरुपला वानोक।
JOH 11:20 मार्था ति येशू फेपिन वोतुप ताम्‍ङे थोनी खोला ठेतुपला पाङ्‍ला थेन्‍सुङ, यिने मरियम ति खाङ्‍बी नाङ्‍ला राङ देसुङ।
JOH 11:21 तमा मार्था ति येशूला ठेनी, “ओ चोवो, चोवो दे जुवु यिन्‍सियाङ ङे नुप ति मिशिवुजा।
JOH 11:22 यिन्‍सिनाङ तरोङ साङ चोवोकी कोन्‍छ्‍योकला काङ लाङ्‍सिनाङ खोकी चोवोला नङ्‍गिवी सिरुप ति ङला छ्‍या वे।” सिनी सिक्‍यासुङ।
JOH 11:23 तमा येशूकी मार्थाला “ख्‍योरो नुप येलुङ सेन्‍बु लङ्‍गिवी।” सिनी सुङ्‍सुङ।
JOH 11:24 ती थोसिमा मार्थाकी खोला “शेप मीतिवा शेप ने सेन्‍बु लङ्‍गुप जम्‍बुलिङकी तिङ्‍मी तुजेला ङे नुप येलुङ सेन्‍बु लङ्‍गिवी सिरुप ति ङला छ्‍या वे।” सिनी सिक्‍यासुङ।
JOH 11:25 तमा येशूकी मार्थाला “शेप ने सेन्‍बु लोङ्‍गुप ताङ मिजी तेरुप ति ङ राङ यिन। सी ङला तेपा किवे, ती ति शिसिनाङ सेन्‍बु लङ्‍गिवी।
JOH 11:26 तमा सी सेन्‍बु वोतुप पेला ङला तेपा किवे, तिवा नाम्‍साङ मिशिवी। काङ ख्‍युरुङ दी ताम्‍ङेला तेपा किवी?” सिनी सुङ्‍सुङ।
JOH 11:27 तमा तीकी खोला “लसे चोवो, चोवो याङ दी जम्‍बुलिङला फेपुप कोन्छ्‍योककी सेवु ख्रीष्‍ट यिन सिनी ङ तेपा कितिन।” सिनी सिक्‍यासुङ।
JOH 11:28 तोजोयी सिक्‍यासिमा मार्था ति खाङ्‍बा लोङ गल्‍नी खोरो नुम मरियमला खरक्‍पा सोक सिरा कताङ्‍नी, “गेकेन फेप्‍सुङ, तमा ख्‍युरुङला कतोङ्‍यिन वे।” सिनी सिक्‍यासुङ।
JOH 11:29 ती थोनी मरियम शार्क्येक लानी येशूकी चाला गाल्‍सुङ।
JOH 11:30 ती पेला सेक येशू तिवी युलला माशु नोक, यिने मार्थाला ठेतुप दासाला राङ ज्‍युनी नोक।
JOH 11:31 मरियमकी खाङ्‍बाला टोङ्‍गु तेरुपला वावु यहूदीतिवी मरियम शार्क्येक लानी पाङ्‍ला थेन्‍नी डोप थोङ्‍सिमा तीकी तिङ्‍ला तिङ्‍यासुङ। तिवी मरियम ति खोरो नुपकी रो ज्‍यकुप टककी फुकला ङोपला गलुप यिन्‍दे सिनी नासाम ताङ्‍नोक।
JOH 11:32 मरियम येशू ज्‍यु वोतुप ते लेप्‍नी खोला ठेलुङ्‍मे खोकी शापला खवुतुङ्‍मा देनी, “ओ चोवो, चोवो दे ज्‍युवु यिन्‍सियाङ ङे नुप ति मिशिवुजा।” सिनी सिक्‍यासुङ।
JOH 11:33 तमा मरियम ङुप्‍राङ कितुप ताङ तीकी मुला वावु मीतिवा साङ ङुप्‍राङ कियी वोतुप खोकी थोङ्‍नी खोकी सेमला छासे सेम्‍दुक लानोक।
JOH 11:34 खोकी तिवाला “ख्‍यिरा तीला कनी ज्‍यकुप?” सिनी टि नाङ्‍सुङ। तमा तिवी “चोवो, फेप्‍नी जी ताङ।” सिनी सिक्‍यासुङ।
JOH 11:35 तमा येशू ङुसुङ।
JOH 11:36 येशू ङुवु थोङ्‍सिमा यहूदीतिवी “ल्‍हो ताङ, खोकी लाजरसला चुका ङ्‍यिङ्‍ज्‍ये किनोक।” सिनी सिक्‍यासुङ।
JOH 11:37 यिने तिवी पर ने ललाइ ललाइकी “शर्वाला साङ मिक थोङ थुपुप जोवु दीकी लाजरसला शेप ने र्‍होक माथुप्‍नोक?” सिनी सिक्‍यासुङ।
JOH 11:38 येलुङ येशू छासे सेम्‍दुक लानी शेप मीला ज्‍योकुप टककी फुककी चाला फेप्‍सुङ। ती फुककी खला दो ग्‍येर्पु यी थ्‍वोनी उम ज्‍याक्‍नोक।
JOH 11:39 येशूकी “दी दो ति फर दो।” सिनी सुङ्‍सुङ। यिने ती शेप लजरसकी अज्‍यी मार्था तीकी खोला “चोवो, त याङ टेमा ग्‍यकिवी, च्‍यिलासिसिन तीला शेप मीला ज्‍योकुप टककी फुकला ज्‍यकुप ति हारिङ ङ्‍यिमा ज्‍यी गाल्‍सुङ।” सिनी सिक्‍यासुङ।
JOH 11:40 येशूकी तीला “ख्‍योरो ङला तेपा क्‍यासिन कोन्‍छ्‍योककी मोवा ति थोङ्‍गितो सिनी ङे ख्‍युरुङला सि माक्‍या?” सिनी सुङ्‍सुङ।
JOH 11:41 तमा तिवी ती शेप मीला ज्‍योकुप टककी फुककी खला उम ज्‍यकुप दो ति दोसुङ। ती ज्‍युक्‍ला येशूकी देवाच्‍येन ने केला ल्‍हानी, “ओ पपा, ङ पपाला थुचिछे बुलिन, च्‍यिलासिसिन पपी ङे गोङ्‍बा शुवु ति सेन्‍सुङ।
JOH 11:42 ङे गोङ्‍बा शुवु ति पपी नरी सेन्‍गिवी सिनी ङला छ्‍या वे। यिने पपी ङला तङ्‍गुप यिन सिनी दे देतुप मीतिवी तेपा किशी सिनी तिवी थोक्‍ला ङे दी गोङ्‍बा शुवु यिन।” सिनी सुङ्‍सुङ।
JOH 11:43 तोजोयी सुङ्‍सिमा खोकी कशेन थोर ग्‍यप्‍नी, “ओ लाजरस, पाङ्‍ला थेन शोक!” सिनी सुङ्‍सुङ।
JOH 11:44 तमा ती शेप लाजरस ति लाक्‍पा काङ्‍बा रा नेङेन थ्‍वोनी टा टावा ताङ ङुतुङ ति रा थ्‍वोनी तुम तुम्‍वा राङ पाङ्‍ला थेन्‍सुङ। तमा येशूकी “तीला टावु ति टोल, तमा तीला डो च्‍यी।” सिनी मीतिवाला सुङ्‍सुङ।
JOH 11:45 मरियमकी खाङ्‍बाला वावु यहूदीतिवा बङीकी येशूकी क्‍या नङ्‍गुप हलेवु लाका थोङ्‍नी खोला तेपा क्‍यासुङ।
JOH 11:46 यिने तिवी पर्ला ललाइ ति फरिसीतिवी चाला गल्‍नी येशूकी काङ क्‍या नङ वे, तीकी कोर्ला सिक्‍यासुङ।
JOH 11:47 तमा कोङ्‍यार छ्‍येतिवा ताङ फरिसीतिवी यहूदी छोक्‍पाकी मी छ्‍येतिवी मुला जोम च्‍यिनी, “त दाक्‍पु चुक कितुप? ती मी तीकी हलेवु लाकातिवा बङी किनोक।
JOH 11:48 दोजो दाक्‍पी तीला तुक राङ क्‍या क्‍यावा दे च्‍यिसिन मी तेरीकी तीला तेपा किवी, तमा रोमीतिवा वानी दाक्‍पी यहूदी ल्‍हङाङ ताङ मिरिकतिवा ङ्‍यिकरला ना तोङ्‍गिवी।” सिनी सिक्‍यासुङ।
JOH 11:49 यिने तिवी पर्ला कैयाफा सिरुप मिरा च्‍यिक नोक, ती ति ती लोकी थोक्‍ला तेरी सिनाङ कोङ्‍यार छ्‍ये यिनोक। तीकी यम्‍बातिवाला “ख्‍यिरा काङ मेशेनोक।
JOH 11:50 दाक्‍पी मिरिककी मीतिवा तेरी ना डोप सिनाङ बोरु मी मिरा च्‍यिक मीतिवा तेरीकी थोक्‍ला शेप ति ल्‍यामु यिन सिरुप ति ख्‍यिराङला छ्‍या मे?” सिनी सिक्‍यासुङ।
JOH 11:51 तीकी तुक सिक्‍यावु ति खोरो नोवाला राङ सिक्‍यावु मिन, यिने खोरुङ ति ती लोकी तेरी सिनाङ कोङ्‍यार छ्‍ये यिन्‍दुप तप्‍की तेरी यहूदीतिवी थोक्‍ला येशू टुङ्‍गिवी सिरुप ताम्‍ङे ति नम्‍दर शेतुप यिन।
JOH 11:52 ती ताम्‍ङे ति यहूदीतिवी थोक्‍ला तिराङ मिन, यिने जम्‍बुलिङला थरा थुरा टम्‍नी देतुप कोन्‍छ्‍योकला तेपा कितुप तेरी मीतिवाला जोम्‍नी च्‍यिक राङ जोपला येशू शिवी सिनी सिक्‍यावु यिन।
JOH 11:53 ती छेर्मु नेज्‍यु तिवी येशूला सेतुपला केवुल क्‍यासुङ।
JOH 11:54 ती तप्‍की येशू येलुङ यहूदीतिवी पर्ला तेरीकी थोङ्‍गुप क्‍यानी अला मायु, यिने तेसुर एफ्राइम सिरुप युलला फेप्‍नी लोमातिवी मुला ते राङ ज्‍युसुङ। ती युल ति दासा पाङ्थेरीकी चाला ख्‍येल्‍गिनोक।
JOH 11:55 ती पेला यहूदी थरुप तुछ्‍येन वुङ्‍गुप छाल्‍नोक। तमा तुछ्‍येन वुङ्‍गुप सिनाङ गोमाला मीतिवा बङी दाक दाक्‍पुला चाङ्‍मा जोपला युल युल नेसुर यरूशलेम ने केला गाल्‍सुङ।
JOH 11:56 ते तिवी येशूला छाल्‍सुङ, तमा यहूदी ल्‍हङाङ नाङ्‍ला जोम्‍नी खोप्‍राङ नाङ्‍ला च्‍यिककी च्‍यिकला दुक सिनी टिसुङ, “ख्‍यिरा नासामला चुकै वे? ती मी ति दी तुछ्‍येनला गिते यिन्‍दे?”
JOH 11:57 कोङ्‍यार छ्‍येतिवा ताङ फरिसीतिवी येशूला जिम्‍बुपला येशू कनी नोक सिनी हाक्‍कोसिन खुरुङला सिसा सिनी मीतिवाला योक कुसुङ।
JOH 12:1 यहूदी थरुप तुछ्‍येन सिनाङ ङ्‍यिमा टुक गोमाला येशू बेथानियाला फेप्‍सुङ। ती बेथानिया ति गोमाला येशूकी शेप ने सेन्‍बु लङ्‍गुप लाजरसकी युल यिनोक।
JOH 12:2 येशू ती युलला फेप्‍सिमा मीतिवी खोकी थोक्‍ला गोमी समा टडिक क्‍यासुङ। तमा मार्थाकी समा तेरुप लाका कियी नोक, लाजरस ति येशूकी मुला समा सापला देतुप मीतिवी पर्ला नोक।
JOH 12:3 ती पेला मरियम तीकी छासे गोङ कुर्मु नावु टी जङ्बु खाप जटामसीकी नुम लिटर फेका चोयी खुर वानी येशूकी शापला पुनी खोरो र्‍ह थ्‍वोनी खोकी शाप पिसुङ। तमा ती टी जङ्बु खाप नुमकी टेमा ति खाङ्बा काङ टाम्‍सुङ।
JOH 12:4 ती पेला खोकी लोमातिवी नाङ्ला ज्‍युक्‍ला खोला जिम तेरुप यहूदा इस्‍करियोत तीकी
JOH 12:5 “च्‍यिला दी टी जङ्बु खाप नुम ति तुक क्‍यानी ना तङ्‍गुप यिन? ती ति ङुलकी डप्‍बु सयी सुमला चोनी ती टङ्‍गा ति पेराङ्बुतिवाला बिन्‍सिन ल्‍यामु वुङ्‍गुप्‍जा।” सिनी सिक्‍यासुङ।
JOH 12:6 तीकी तुक सिक्‍यावु ति पेराङ्‍बुतिवाला नासाम ताङ्‍नी सिक्‍यावु मिन, यिने खोरुङ राङ कुर्मेन यिन्‍दुप तप्‍की यिन। ती ति टङ्‍गा ज्‍योकुप मी यिन्‍सिनाङ तीकी पर्चिक पर्चिक टङ्‍गा ज्‍योकुप छयी नङ नेसुर खोरो थोक्‍ला टङ्‍गा थेन्‍गिनोक।
JOH 12:7 तमा येशूकी सुङ्सुङ, “दीला काङ साङ मासिर। दीकी ङे फुङ्बु कल्‍दोक कितुप तुजेकी थोक्‍ला दी टी जङ्‍बु खाप नुम ति टडिक क्‍यान ज्‍याक्‍नी वे।
JOH 12:8 पेराङ्बुतिवा याङ ख्‍यिरा मुला नरी लुकिवी, यिने ङ याङ ख्‍यिरा मुला नरी मुलुवी।”
JOH 12:9 येशू बेथानियाला ज्‍यु वोतुप हाक्‍कोनी मी माङ्‍छ्‍योक ते वानोक। तिवा खोला ल्‍हापला तिराङ मिन, यिने खोकी शेप ने सेन्‍बु लङ्‍गुप लाजरसला साङ ल्‍हापला वानोक।
JOH 12:10 ती तप्‍की कोङ्‍यार छ्‍येतिवी लाजरसला साङ सेतुप सिनी केवुल क्‍यानोक,
JOH 12:11 च्‍यिलासिसिन लाजरसकी जोसालेन्‍सिन यहूदीतिवा बङीकी तिवाला क्‍युर ज्‍याक्‍नी येशूला तेपा क्‍यानोक।
JOH 12:12 ती सला तीला यहूदी थरुप तुछ्‍येनकी थोक्‍ला यरूशलेमला वावु मी माङ्छ्‍योककी येशू ते फेपिन वे सिरुप ति थोनोक।
JOH 12:13 तमा मीतिवा खजूरकी येल्‍का च्‍येनी खोप्‍रे लकला खुर्नी खोला गासो शोपला पाङ्‍ला थेन्‍नी, “होसन्‍ना! कोन्‍छ्‍योककी मिङला फेपुप इस्राएलकी ग्‍येल्‍वुला नरी मोलाम वुङ्‍सिता!” सिनी वोरु तेन्‍सुङ।
JOH 12:14 तमा येशू खोकी थोक्‍ला टि वावु पुङ्‍गोक तिवुकी खला शेन्‍सुङ। तीकी कोर्ला कोन्‍छ्‍योककी सुङ नाङ्‍ला दुक सिनी टि वे,
JOH 12:15 “ओ सियोनकी मीतिवा, ज्‍यिवा माकी। ल्‍होसा, ख्‍यिरा ग्‍येल्‍वु ति पुङ्‍गोक तिवुकी खला शेन्‍नी ख्‍यिरा ते फेपिन वोतो।”
JOH 12:16 खोकी लोमातिवी गोमाला ती ताम्‍ङेकी तेन्‍दोक ति काङ यिन सिनी हाक्‍माकोनोक, यिने तिङ्‍ला येशू शेप ने ङोसु लानी देवाच्‍येनला फेम सिन्‍सिमा तिराङ ती ताम्‍ङे ति खोकी कोर्ला टिवु यिन, तमा मीतिवी साङ खोला तुक क्‍यावु यिन सिनी हाक्‍कोसुङ।
JOH 12:17 तमा येशूकी लाजरसला शेप मीला ज्‍योकुप टककी फुक नेमा कताङ्‍नी शेप ने सेन्‍बु लोङ्‍गुप पेला खोकी मुला वोतुप मीतिवी ती च्‍युङ्‍गुप ताम्‍ङे ति मीतिवाला नरीकी नरी पङ्‍बु बिन्‍सुङ।
JOH 12:18 खोकी ती हलेवु लाका क्यावु ति थोवु तप्‍की मी माङ्छ्‍योक खोला ठेतुपला गाल्‍नोक।
JOH 12:19 तमा फरिसीतिवा च्‍यिककी च्‍यिकला “ल्‍हो ताङ, खोइ! दाक्‍पी याङ काङ साङ कि माथुप। तेरी मीतिवा तीकी तिङ्‍ला तिङ्‍यासुङ।” सिनी सिक्‍यासुङ।
JOH 12:20 यहूदी थरुप तुछ्‍येनकी पेला कोन्‍छ्‍योकला सोवा देकुपला यरूशलेमला वावु मीतिवी पर्ला ललाइ ललाइ ग्रीककी मीतिवा साङ नोक।
JOH 12:21 तिवा गालीलकी बेथसेदा युल नेसुर वावु येशूकी लोमा फिलिपकी चाला गल्‍नी, “अच्‍यो, ङ्‍यिराङ येशूला ठेतुप नो वे।” सिनी सिक्‍यासुङ।
JOH 12:22 तुक सिक्‍यासिमा फिलिप ति अन्‍द्रियासकी चाला गल्‍नी ती ताम्‍ङे सिक्‍यासुङ। तमा तिवा ङ्‍यिकर येशूकी चाला गल्‍नी ग्रीकतिवी खोला ठेतुप नो क्‍यावु ताम्‍ङे ति खोला सिक्‍यासुङ।
JOH 12:23 तमा येशूकी सुङ्सुङ, “मी पुज्‍युङला मोवा ङ्‍येतुप तुजे लेम वे।
JOH 12:24 ङ ख्‍यिराङला टेङ्‍बो सिरिन, दोजो टे सेन च्‍यिक थलाला ख्‍येल्‍नी माशिसिन ती सेन ति च्‍यिक राङ लुकिवी, यिने ती ति थली नाङ्‍ला ख्‍येल्‍नी शिसुङ सिसिन डुमा बङी ग्‍यकिवी।
JOH 12:25 तुक राङ क्‍यानी खोरो मिजीला ङ्‍यिङ्‍ज्‍ये कितुप मी तीकी रङगी मिजी तोर्किवी, यिने दी जम्‍बुलिङला खोरो मिजी ति काङ साङ मिन नोनी ङ्‍यिङ्‍ज्‍ये मिकिवु तीकी नाम्‍साङ मिशिवु मिजी र्‍होक्‍नी ज्‍योकिवी।
JOH 12:26 चुका मी तीकी ङला शब्‍ज्‍यी कितुप नो किवे, ती ति ङे तिङ्‍ला तिङ्‍योक गोकिवी। तमा ङ कनी नोके, ङला शब्‍ज्‍यी कितुप ती साङ ङे मुला राङ तेराङ गिवितो। सी ङला शब्‍ज्‍यी किवे, तीला ङे पपी छ्‍ये जेवितो।”
JOH 12:27 येलुङ येशूकी दुक सिनी सुङ्सुङ, “त याङ ङे सेम ति छासे सेम्‍दुक गल वे, त ङ काङ सिरुप? ‘ओ पपा, ङला दी छेटाङकी तुजे नेसुर र्‍होक्‍टे की।’ सिनी सिरुप? मिन, ङ ति ती छेटाङकी तुजेकी थोक्‍ला राङ वावु यिन।
JOH 12:28 ओ पपा, पपी मोवा ति मीतिवाला छ्‍या तेन।” ती पेला राङ देवाच्‍येन नेमा दुक सिरुप वोरु यी ग्‍यप्‍सुङ, “ङे मोवा लायिन, तमा येलुङ लङ्‍यिन।”
JOH 12:29 तमा ते लानी देतुप मी माङ्‍छ्‍योककी ती वोरु थोसिमा तिवी पर ने ललाइकी “दी याङ सम्‍डुक ग्‍यपुप यिन।” सिनी सिक्‍यासुङ। तमा यम्‍बातिवी “देवाच्‍येनकी लेन क्‍योलुप थुकी तीकी मुला ताम्‍ङे क्‍यावु यिन।” सिनी सिक्‍यासुङ।
JOH 12:30 यिने येशूकी तिवाला “दी ख्‍यिरा थोवु वोरु ति ङे थोक्‍ला मिन, यिने ख्‍यिरा थोक्‍ला राङ यिन।
JOH 12:31 तन्‍दा ति कोन्‍छ्‍योककी दी जम्‍बुलिङला ठिम कितुप तुजे यिन, त कोन्‍छ्‍योककी दी जम्‍बुलिङला ओङ्ज्‍येन कितुप शैतानला तेन तोङ्‍गिवी।
JOH 12:32 तमा ङ जम्‍बुलिङ ने येर तेकुप पेला तेरी मीतिवाला ङे थाकाला वुङ ज्‍यितिनो।” सिनी सुङ्‍सुङ।
JOH 12:33 ती ताम्‍ङे ति खो चुक क्‍यानी टुङ्‍गिवी सिरुपकी कोर्ला खोकी सुङ्‍गुप यिन।
JOH 12:34 ती ताम्‍ङे थोसिमा मी माङ्‍छ्‍योककी येशूला “दाक्‍पी यहूदी ठिमला याङ ख्रीष्‍ट ति नरी सेन्‍बु लुकिवी सिनी टि वे, यिने ख्‍योरो चुक क्‍यानी मी पुज्युङ जम्‍बुलिङ ने येर तेकिवी सिनी सिक्‍यावु यिन? दी मी पुज्‍युङ ति सु यिन?” सिनी टिसुङ।
JOH 12:35 तमा येशूकी तिवाला सुङ्सुङ, “तरोङ चेयी पर सेक वोसिर ख्‍यिरा पर्ला लुकिवी, ख्‍यिराङ ती वोसिर वोता सेक फार छुर यु। तुक क्यासिन नक्‍तोमीकी ख्‍यिराङला उप मुथुपी। नक्‍तोमीला युकुपतिवी खुरुङ कनी डोयी वे सिरुप ति हाक्‍मोकोवी।
JOH 12:36 ती वोसिर ख्‍यिरा मुला वोतुप पेला राङ ख्‍यिराङ ती वोसिरला तेपा की, तमा ख्‍यिराङ ती वोसिरकी गिपा च्‍युङ्‍गिवी।” सिनी सुङ्सुङ। तोजोयी सुङ्‍सिमा येशू तेसुर फेप्‍सुङ, तमा मीतिवी हाक्‍मोकोवु दासाला यिप्‍नी ज्‍युसुङ।
JOH 12:37 येशूकी यहूदीतिवी थोङ्‍दाङला राङ तुका हलेवु ततिवा बङी छ्‍या तेन्‍सिनाङ तिवी खोला तेपा माक्‍या।
JOH 12:38 तिवी तुक क्‍यावु ति कोन्‍छ्‍योककी लुङ्तेम्‍बा यशैयाकी “ओ चोवो, ङ्‍यिरा ख्‍याप्‍टाक क्‍यावु कोन्‍छ्‍योककी सुङला सी तेपा क्‍यासुङ रो? चोवोकी खोरो ओङ्‍ज्‍येन सुला छ्‍या तेन्‍सुङ रो?” सिनी सिक्‍यावु ति तेरी च्‍युङ्‍गुपला यिन।
JOH 12:39 मीतिवी तेपा माक्‍यावु तेन्‍दोक ति कोन्‍छ्‍योककी लुङ्तेम्‍बा यशैयाकी येलुङ दुक सिक्‍या वे,
JOH 12:40 “कोन्‍छ्‍योककी तिवी मिक ति मोथोङ्‍गुप जो वे, तिवी सेम ति क्‍योङ्बु जो वे। तुक क्‍यानी तिवी मिककी मोथोङ्‍गिवी, सेमगी साङ हाक्‍मोकोवी, तमा ङे थाकाला लोक्‍नी मेङ्‍गिवी। मिसियाङ ङे तिवाला टेक ज्‍यितुप्‍जा।”
JOH 12:41 कोन्‍छ्‍योककी लुङ्तेम्‍बा यशैयाकी येशूला मोवा ङ्‍येकिवी सिरुप ति गोमाला के थोङ्‍गुप तप्‍की खोकी कोर्ला दी ताम्‍ङे टिवु यिन।
JOH 12:42 यहूदी गोमा कितुपतिवी पर्ला साङ मी बङीकी खोला तेपा क्‍यासुङ। यिने फरिसीतिवी जोसालेन्‍सिन तिवी ती ताम्‍ङे ति मीतिवी मिङ्‍गाला सि माथुप, च्‍यिलासिसिन फरिसीतिवी खोप्‍राङला यहूदी छ्‍योखाङ नेमा तेन तोङ्‍गिवी सिनी ज्‍यिवा क्‍यासुङ।
JOH 12:43 तिवा कोन्‍छ्‍योक नेमा वुङ्‍गुप मोवा छोलुप सिनाङ मीतिवी खोप्‍राङला ताङ्देन क्‍यावु ति मङ गा किनोक।
JOH 12:44 तमा येशूकी मीतिवाला थोर ग्‍यप्‍नी दुक सुङ्सुङ, “सी ङला तेपा किवे, तीकी ङला तिराङ तेपा कितुप मिन, यिने ङला तोङ्‍गुप तीला तेपा कितुप यिन।
JOH 12:45 सी ङला थोङ्‍गिवे, तीकी ङला तोङ्‍गुप तीला थोङ्‍गिवी।
JOH 12:46 ङ दी जम्‍बुलिङला वावु वोसिर यिन। ती ति ङला तेपा कितुपतिवा सु साङ नक्‍तोमीला लु मिज्‍यिवुला यिन।
JOH 12:47 चुका मी तीकी ङे सुङ थोनी ती सुङला माङ्‍येन्‍सिनाङ ङ तीला ठिम मोतोङ। च्‍यिलासिसिन ङ जम्‍बुलिङकी मीतिवाला ठिम तोङ्‍गुपला वोवु मिन, यिने र्‍होकुपला वावु यिन।
JOH 12:48 ङला क्‍येन तेरुप ताङ ङे सुङला मेङ्‍येन्‍दुपतिवाला ठिम कितुप ति यम्‍बा राङ वे। ङे सिक्‍यावु दी ताम्‍ङेकी राङ जम्‍बुलिङकी तिङ्‍मी तुजेला तिवाला ठिम तोङ्‍गिवी।
JOH 12:49 दी ताम्‍ङे ति टेङ्‍बु यिन, च्‍यिलासिसिन दी ति ङे राङ सिक्‍यावु मिन, यिने ङला तोङ्‍गुप पपी ङे काङ सि गोकिवी, काङ लप गोकिवी सिनी ङला क नङ्‍गुप यिन।
JOH 12:50 खोकी कला ङ्‍येन्‍दुपतिवाला नाम्‍साङ मिसिवु मिजी थोप्‍किवी सिरुप ति ङला छ्‍या वे। तुक क्‍यानी पपी ङला काङ सुङ्‍गिवे, तुकै राङ ङ लपिन।”
JOH 13:1 यहूदी थरुप तुछ्‍येनकी गोमी ङ्‍यिमा नोक। येशूकी खुरुङ दी जम्‍बुलिङ क्‍युर ज्‍याक्‍नी पपी चाला फेपुप तुजे लेपुप ति हाक्‍कोनी खोला तेपा कितुप जम्‍बुलिङला वोतुप खोरो मीतिवाला ङ्‍यिङ्‍ज्‍ये क्‍या नङ्‍गिनोक, तमा खो माटुङा सेक तिवाला मङ ङ्‍यिङ्‍ज्‍ये क्‍या नाङ्‍सुङ।
JOH 13:2 येशू खोरे लोमातिवी मुला गोमी सोल शेयी वोतुप पेला शैतानकी सिमोन इस्‍करियोतकी पुज्‍युङ यहूदाकी सेमला येशूला जिम तेरुप नासाम शर च्‍यिसुङ।
JOH 13:3 पपा कोन्‍छ्‍योककी जम्‍बुलिङकी तेरी ओङ्‍ज्‍येन खुरुङला नङ्‍गुप ताङ खुरुङ कोन्‍छ्‍योक नेमा वानी येलुङ कोन्‍छ्‍योककी चिप्‍ला राङ लोक्‍नी डोप ताम्‍ङे येशूकी हाक्‍कोसुङ।
JOH 13:4 तमा खो सोल शेवु दासा ने शेङ्‍नी खोरो फिला कोन्‍दुप नम्‍सा ति पिन ज्‍याक्‍नी खोकी केल्‍दाङला रुमाल यी टिल्‍सुङ।
JOH 13:5 तमा तोङ्‍मेन नाङ्‍ला छ्‍यु पुनी खोरो लोमातिवाला रे ताङ रे क्‍यानी तिवी काङ्‍बा टुनी खोकी केल्‍दाङ लोला टिलुप रुमाल थ्‍वोनी पिन बिन्‍सुङ।
JOH 13:6 तुक राङ क्‍यानी खो सिमोन पत्रुसकी चाला लेप्‍सिमा पत्रुसकी खोला “अम्‍माइ चोवो, चोवोकी ङे काङ्‍बा टुकिवी?” सिनी सिक्‍यासुङ।
JOH 13:7 तमा येशूकी तीला सुङ्‍सुङ, “ङे काङ कियी वे, ती ति ख्‍योरो तन्‍दा हाक्‍मोकोवी, यिने ज्‍युक्‍ला ति हाक्‍कोकिवी।”
JOH 13:8 येलुङ पत्रुसकी खोला “चोवोकी ङे काङ्‍बा नाम्‍साङ टुतुप मेवी।” सिनी सिक्‍यासुङ। तमा येशूकी तीला “दोजो ङे ख्‍योरो काङ्‍बा माटुसिन ख्‍युरुङ ङ ताङ मुला काङ तम्‍जी मेवी।” सिनी सुङ्‍सुङ।
JOH 13:9 तमा सिमोन पत्रुसकी खोला “ओ चोवो, तुकै यिन्‍सिन ङे काङ्‍बा तिराङ मिन, ङे लाक्‍पा ताङ गो साङ टुनी नाङ्‍नी।” सिनी सिक्‍यासुङ।
JOH 13:10 येशूकी तीला “सी जु टु वे, तीकी तेरी जु ति चेङ्‍गा च्‍युङ्‍नी वे। तुक क्‍यानी त याङ काङ्‍बा तिराङ मिसिन यम्‍बा टु मोगोवी। ख्‍यिराङ याङ चेङ्‍गा राङ वे, यिने ख्‍यिराङ तेरी चेङ्‍गा वोतुप ति मिन।” सिनी सुङ्‍सुङ।
JOH 13:11 येशूकी खोरुङला क्‍येन तेरुप ति सु यिन सिनी ङो शेनोक, ती तप्‍की खोकी तिवाला “ख्‍यिराङ तेरी चेङ्‍गा वोतुप ति मिन।” सिनी सुङ्‍गुप यिन।
JOH 13:12 खोकी तिवी काङ्‍बा टुन सिन्‍सिमा येलुङ खो खोरे नम्‍सा नुम्‍नी गोमाला ज्‍युवु दासाला राङ ज्‍युसुङ। तमा तिवाला “ङे मलोक क्‍यावु ति काङ यिन सिनी ख्‍यिराङला छ्‍या वे?
JOH 13:13 ख्‍यिराङ ङला गेकेन याङ्‍ना चोवो सिनी सिवी, ती ति टेके यिन, च्‍यिलासिसिन ङ वुतुङ के ख्‍यिरा सिक्‍यावु दोके राङ यिन।
JOH 13:14 ङ ख्‍यिरा चोवो ताङ गेकेन यिन्‍सिनाङ ख्‍यिरा काङ्‍बा टुयी। तुक क्‍यानी ख्‍यिरा साङ च्‍यिककी च्‍यिकला काङ्‍बा टु गोकिवी।
JOH 13:15 ङे ख्‍यिराङला दी नमुना छ्‍या तेन्‍दुप तेन्‍दोक ति ङे ख्‍यिरा थोक्‍ला काङ क्‍या वे, ख्‍यिरा साङ तुक राङ किशी सिनी यिन।
JOH 13:16 ङ ख्‍यिराङला टेङ्‍बो सिरिन, लावा खोरो ज्‍यिन्‍दाक सिनाङ छ्‍ये मेवी, तमा लेन क्‍योलुप मी ति तीला तोङ्‍गुप ति सिनाङ छ्‍ये मेवी।
JOH 13:17 ख्‍यिरा दी ताम्‍ङे हाक्‍कोनी ती दोके क्‍यासुङ सिसिन ख्‍यिराङला मोलाम थोप्‍किवी।
JOH 13:18 ङे ख्‍यिराङ तेरीकी कोर्ला सिक्‍यावु मिन, ङे पेतुप मीतिवा चुका पारकी यिन सिनी ङ ङो शेकिवी। यिने ‘ङ ताङ मुला देनी शुब्‍ज्‍याङ साप तीकी राङ ङला क्‍येन तेर्किवी।’ सिनी टिवु कोन्‍छ्‍योककी सुङ ति तेरी छेकिवी।
JOH 13:19 ती ताम्‍ङे च्‍युङ्‍गुप सिनाङ गोमाला के ङे ख्‍यिराङला सिक्‍यावु ति ती ताम्‍ङे च्‍यङ्‍गुप पेला ख्‍यिरा ङ ति कोन्‍छ्‍योक नेमा वावु यिनोक सिनी तेपा कि ज्‍यितुपला यिन।
JOH 13:20 वुतुङ के ङ ख्‍यिराङला सिरिन, सी ङे तङ्‍गुप तीला खोरो सेमला लिङ्‍गिवे, तीकी ङला सेमला लिङ्‍गुप यिन। तमा सी ङला खोरो सेमला लिङ्‍गिवे, तीकी ङला तोङ्‍गुप कोन्‍छ्‍योकला सेमला लिङ्‍गुप यिन।”
JOH 13:21 येशूकी तुक सुङ्‍सिमा खोला छासे सेम्‍दुक लानोक। तमा खोकी खोरो लोमातिवाला दुक सिनी सुङ्‍सुङ, “वुतुङ के ङ ख्‍यिराङला सिरिन, ख्‍यिरा पर्ला मिरा च्‍यिककी ङला जिम तेर्किवी।”
JOH 13:22 खोकी ती ताम्‍ङे ति सी कोर्ला सुङ्‍गुप यिन सिरुप ति हाक्‍माकोनी खोकी लोमातिवा च्‍यिककी च्‍यिकला ल्‍हटी चेसुङ।
JOH 13:23 तमा लोमातिवी पर्ला येशूकी मङ ङ्‍यिङ्‍ज्‍ये क्‍यावु ती लोमा ति खोकी छेकोकला ङ्‍यिम्‍बुर क्‍यानी देसुङ।
JOH 13:24 ती पेला सिमोन पत्रुसकी ती लोमा तीला खोकी तुक सुङ्‍गुप ति सी थोक्‍ला यिन खोला टि सिनी लाक्‍पी छ्‍याक्‍के क्‍यासुङ।
JOH 13:25 तमा तीकी येशूकी छेकोकला मङ ङ्‍यिम्‍बुर क्‍यानी, “ओ चोवो, चोवोला जिम तेरुप ति सु यिनाङ?” सिनी खोला टिसुङ।
JOH 13:26 तमा येशूकी “सुला ङे शुब्‍ज्‍याङ कोरी नाङ्‍ला पानी तेर्किवे, ती राङ यिन।” सिनी तीला सुङ्‍सुङ। ती ज्‍युक्‍ला खोकी शुब्‍ज्‍याङ च्‍याक्‍नी कोरी नाङ्‍ला पानी सिमोन इस्‍करियोतकी पुज्‍युङ यहूदाला नाङ्‍सुङ।
JOH 13:27 ती शुब्‍ज्‍याङ लालुङ्‍मे यहूदाकी सेमला शैतान शुसुङ। तमा येशूकी तीला “ख्‍योरो काङ कितुप छल वे, ती ति शार्क्येक की।” सिनी सुङ्‍सुङ।
JOH 13:28 यिने येशूकी तीला च्‍यिला तुकै सुङ्‍गुप यिन सिरुप ति ते देनी समा सापतिवा सी साङ हाक्‍माको।
JOH 13:29 तमा ललाइकी यहूदाकी लोला लोमातिवी टङ्‍गी छयी ज्‍यकुप तप्‍की येशूकी तीला “तुछ्‍येनकी थोक्‍ला तिवाला गोवु च्‍यालक ङ्‍योप याङ्‍ना पेराङ्‍बुतिवाला काङ रे च्‍यिक रे बिन।” सिनी सुङ्‍गुप यिन्‍दे सिनी नो क्‍यानोक।
JOH 13:30 तमा यहूदाकी शुब्‍ज्‍याङ लालुङ्‍मे शार्क्येक पाङ्‍ला थेन गाल्‍सुङ। ती पेला नाम ल्‍होनिङ सिन्‍नोक।
JOH 13:31 यहूदा पाङ्‍ला थेन गल्‍सिमा येशूकी सुङ्‍सुङ, “त याङ मीतिवी ङ मी पुज्‍युङला मोवा वोतुप थोङ्‍गितो, तमा मी पुज्‍युङ नेमा कोन्छ्‍योक छासे मोवा वोतुप ति थोङ्‍गितो।
JOH 13:32 दोजो कोन्‍छ्‍योक छासे मोवा वोतुप ति मी पुज्‍युङ नेमा छ्‍या तेन्‍सुङ सिसिन कोन्‍छ्‍योककी साङ मी पुज्‍युङला मोवा वोतुप ति छ्‍या देन्‍गिवी। ती ति खोकी ङमु राङ क्‍या नङ्‍गिवी।
JOH 13:33 ङे ङ्‍यिङ्‍ज्‍येवु आङातिवा, ङ चेयी पर सेक तिराङ ख्‍यिरा मुला लुकितो। ती ज्‍युक्‍ला ख्‍यिरा ङला छोल्‍गिवी, तमा ङे गोमाला यहूदी गोमा कितुपतिवाला सिक्‍यावु दोके तन्‍दा ख्‍यिराङला सिरिन, ‘ङ कनी डिवे, ते ख्‍यिराङ वुङ मुथुप्‍तो।’
JOH 13:34 ङ ख्‍यिराङला क सम्‍बा यी तेरिन, ख्‍यिराङ च्‍यिककी च्‍यिकला ङ्‍यिङ्‍ज्‍ये की। ङे ख्‍यिराङला ङ्‍यिङ्‍ज्‍ये क्‍यावु दोके ख्‍यिरा साङ च्‍यिककी च्‍यिकला ङ्‍यिङ्‍ज्‍ये की।
JOH 13:35 दोजो ख्‍यिराङ च्‍यिककी च्‍यिकला ङ्‍यिङ्‍ज्‍ये क्‍यासिन ती ल्‍हानी ख्‍यिराङ ङे लोमा यिन सिरुप ति मीतिवी हाक्‍कोकिवी।”
JOH 13:36 तमा सिमोन पत्रुसकी येशूला “ओ चोवो, चोवो कनी फेप्‍किवी?” सिनी टिसुङ। तमा येशूकी तीला “ङ कनी डिवे, ते ख्‍युरुङ तन्‍दा वुङ मुथुप्‍तो, यिने ज्‍युक्‍ला ति ङला तिङ्‍योकितो।” सिनी सुङ्‍सुङ।
JOH 13:37 येलुङ पत्रुसकी खोला “चोवो, ङ च्‍यिला तन्‍दा राङ तिङ्‍योक मुथुपी? ङ याङ चोवोकी थोक्‍ला शि राङ गोसिनाङ शेयिन।” सिनी सिक्‍यासुङ।
JOH 13:38 तमा येशूकी तीला “वुतुङ के ख्‍युरुङ ङे थोक्‍ला शिराङ गोसिनाङ शिवी? ङ ख्युरुङला टेङ्‍बो सिरिन, ख्‍योरो हारिङ च्‍यवु कुकुरी देन्‍दुप सिनाङ गोमाला थेङ्‍मा सुम ङला ङो मेशेवी सिवी।” सिनी सुङ्‍सुङ।
JOH 14:1 येलुङ येशूकी लोमातिवाला सुङ्सुङ, “ख्‍यिराङ सेम्‍दुक माकी। कोन्‍छ्‍योकला तेपा की, तमा ङला साङ तेपा की।
JOH 14:2 ङे पपी खाङ्बाला देतुप दासा बङी वे। तुकै मिन्‍सिन ङ ख्‍यिरा थोक्‍ला देतुप दासा टडिक कितुपला डोयी सिनी ख्‍यिराङला च्‍यिला सिवी रो?
JOH 14:3 ङ गल्‍नी ख्‍यिरा थोक्‍ला दासा टडिक क्‍यासिमा लोङ वानी ख्‍यिराङला ङे ते टिनी डोयिनो, तमा ङ देतुप ते ख्‍यिराङला साङ देतुप ङ्‍येकितो।
JOH 14:4 ङ कनी डिवे, ते डोप लाम ति ख्‍यिरा ङो शेकितो।”
JOH 14:5 तमा थोमा तीकी खोला “ओ चोवो, चोवो कनी फेप्‍किवी ङ्‍यिराङला छ्‍या मे, तुक क्‍यानी ङ्‍यिरा चुक क्‍यानी चोवो फेपुप लाम ति ङो शेकिवी?” सिनी सिक्‍यासुङ।
JOH 14:6 येशूकी तीला सुङ्सुङ, “लाम ताङ टेङ्‍बु ताङ मिजी ति ङ राङ यिन। ङ नेसुर मिसिन सु साङ पपी ते डो मुथुपी।
JOH 14:7 दोजो ख्‍यिरा ङ सु यिन सिनी वुतुङ के ङो शेसिन ङे पपाला साङ ङो शेवुजा। तफेन्‍ला ख्‍यिरा खोला ङो शेकिवी, तमा ख्‍यिरा खोला थोङ्‍नी वे।”
JOH 14:8 तमा फिलिपकी येशूला “ओ चोवो, ङ्‍यिराङला पपा छ्‍या तेन नाङ, तोजोयी वोसिन ङ्‍यिराङला लो दिकिवी।” सिनी सिक्‍यासुङ।
JOH 14:9 येशूकी तीला सुङ्‍सुङ, “फिलिप, दोजोयी पेला सेक ङ ख्‍यिरा मुला वोसिनाङ ख्‍योरो ङला ङो मेशेवी? सी ङला थोङ वे, तीकी पपाला थोङ्‍गुप यिन। यिने च्‍यिला ख्‍युरुङ ‘ङ्‍यिराङला पपा छ्‍या तेन।’ सिनी सिवी?
JOH 14:10 ङ पपी मुला वोतुप ताङ पपा ङे मुला वोतुप ति ख्‍युरुङ तेपा मिकिवी? ङे ख्‍यिराङला सिक्‍यावु ताम्‍ङे ति ङे राङ सिक्‍यावु मिन, यिने ङे मुला ज्‍यु वोतुप पपी राङ खोरे लाका क्‍या नङ्‍यिन वे।
JOH 14:11 ङ पपी मुला वे, पपा ङे मुला ज्‍यु वे सिनी ङे सिक्‍यावु ताम्‍ङेला ख्‍यिराङ तेपा की। मिसियाङ ङे क्‍यावु लाकातिवा ल्‍हानी ती लाकाला तेपा की।
JOH 14:12 वुतुङ के ङ ख्‍यिराङला सिरिन, सी ङला तेपा किवे, तीकी ङे क्‍यावु हलेवु लाकातिवा साङ किवी, तमा ती सिनाङ मङ लाका छ्‍ये साङ किवी, च्‍यिलासिसिन ङ पपी चाला डोयी वे।
JOH 14:13 ख्‍यिरा ङे मिङला काङ लाङ्‍सिनाङ ङ ख्‍यिराङला ती तेरी च्‍युङ ज्‍यितिन। ती ति पुज्‍युङ नेमा पपाला मोवा च्‍युङ्‍शी सिनी यिन।
JOH 14:14 ख्‍यिरा ङे मिङला काङ लाङ्‍सिनाङ ती ति ङ च्‍युङ ज्‍यितिन।”
JOH 14:15 “दोजो ख्‍यिरा ङला ङ्‍यिङ्ज्‍ये क्‍यावु यिन्‍सिन ङे कला ङ्‍येन्‍गिवी।
JOH 14:16 ङ पपाला गोङ्‍बा शोयी, तमा पपी ख्‍यिराङला यम्‍बा टोङ्‍गु तेरुप यी ताङ्‍नी ख्‍यिरा मुला नरी लु ज्‍यिकितो।
JOH 14:17 खो ति कोन्‍छ्‍योककी थु टेङ्‍बु यिन। जम्‍बुलिङकी मीतिवी खोला सेमला मिलिङ्‍गिवी, च्‍यिलासिसिन तिवी खोला थोङ्‍गुप साङ मोथोङ्‍गिवी, ङो साङ मेशेवी। यिने ख्‍यिरा याङ खोला ङो शेकिवी। च्‍यिलासिसिन खो ख्‍यिरा मुला वे, तमा खो ख्‍यिरा सेमला ज्‍युकिवी।
JOH 14:18 ङ ख्‍यिराङला तप्‍रुक दोके क्‍युर्नी मोज्‍योकिवी, ङ ख्‍यिरा चाला येलुङ लोक्‍नी वुङ्‍यिनो।
JOH 14:19 चेयी ज्‍युक्‍ला जम्‍बुलिङकी मीतिवी ङला येलुङ मोथोङ्‍गितो, यिने ख्‍यिरा याङ ङला थोङ्‍गितो। च्‍यिलासिसिन ङ सेन्‍बु वे, तमा ख्‍यिराङ साङ सेन्‍बु लुकिवी।
JOH 14:20 ती छेर्मु ङ पपी मुला वोतुप ताङ ख्‍यिराङ ङे मुला वोतुप ताङ ङ ख्‍यिरा मुला वोतुप ति ख्‍यिरा हाक्‍कोकितो।
JOH 14:21 सी ङे कतिवाला ङ्‍येन्‍नी ती कतिवाला युकिवे, ती ति ङला ङ्‍यिङ्‍ज्‍ये कितुप मी यिन। सी ङला ङ्‍यिङ्‍ज्‍ये किवे, ङे पपी तीला ङ्‍यिङ्ज्‍ये क्‍या नङ्‍गिवी। तमा ङ साङ तीला ङ्‍यिङ्‍ज्‍ये क्‍यानी तीला ङ सु यिन सिरुप छ्‍या देनिनो।”
JOH 14:22 येशूकी तुक सुङ्‍सिमा यहूदा इस्‍करियोत मिन्‍दुप यम्‍बा यहूदा तीकी खोला “चोवो, चोवोकी च्‍यिला खोरुङ ति ङ्‍यिराङला छ्‍या देन्‍गिवी, यिने जम्‍बुलिङकी मीतिवाला ति छ्‍या मेदेन्‍वी?” सिनी टिसुङ।
JOH 14:23 तमा येशूकी तीला सुङ्‍सुङ, “सी ङला ङ्‍यिङ्‍ज्‍ये किवे, तीकी ङे सिक्‍यावु ताम्‍ङेला ङ्‍येन्‍गिवी। तमा ङे पपी तीला ङ्‍यिङ्ज्‍ये क्‍या नङ्‍गिवी, तमा ङे पपा ताङ ङ ति तीकी चाला गल्‍नी तीकी मुला राङ देतिनो।
JOH 14:24 ङला ङ्‍यिङ्‍ज्‍ये मिकिवु तीकी ङे ताम्‍ङे मेङ्‍येन्‍दिवी। दी ख्‍यिरा थोवु ताम्‍ङे ति ङे ति मिन, यिने ङला तोङ्‍गुप पपी नङ्‍गुप सुङ यिन।
JOH 14:25 ङ ख्‍यिरा मुला वोतुप पेला दी ताम्‍ङेतिवा ति ख्‍यिराङला सिरिन वे।
JOH 14:26 यिने पपी ङे मिङला तङ्‍गुप टोङ्‍गु तेरुप थु चाङ्माकी राङ ख्‍यिराङला तेरी ताम्‍ङेतिवा लोप्‍किवी, तमा ङे ख्‍यिराङला सिक्‍यावु तेरी ताम्‍ङेतिवा खोकी ख्‍यिराङला येलुङ टेन्‍सो लोङ्‍गिवी।
JOH 14:27 ङ ख्‍यिराङला लोदिमु बिन्‍नी डोयी, ङ ङरा लोदिमु ति ख्‍यिराङला तेरिन। ङे ख्‍यिराङला तेरुप लोदिमु ति जम्‍बुलिङकी तेरुप लोदिमु दोके मिन। तुक क्‍यानी ख्‍यिराङ सेम्‍दुक माकी, ज्‍यिवा साङ माकी।
JOH 14:28 ङे, ‘ङ डोयी वे, तमा येलुङ ख्‍यिरा ते लोक्‍नी वुङ्‍गिवी।’ सिनी सिक्‍यावु ति ख्‍यिरा थोनी वे। ख्‍यिरा ङला ङ्‍यिङ्ज्‍ये क्‍यावु यिन्‍सिन ङ पपी ते डोप ति ख्‍यिराङ गा कितुप्‍जा, च्‍यिलासिसिन पपा ङ सिनाङ चोछ्‍ये वे।
JOH 14:29 दी ताम्‍ङे च्‍युङ्‍गुप सिनाङ गोमाला के तन्‍दा ङे ख्‍यिराङला सिक्‍यावु तेन्‍दोक ति ती ताम्‍ङे च्‍युङ्‍गुप पेला ख्‍यिराङ ङला तेपा किशी सिनी यिन।
JOH 14:30 त याङ ङ ख्‍यिरा मुला ताम्‍ङे अला मलाप, च्‍यिलासिसिन दी जम्‍बुलिङला ओङ्ज्‍येन कितुप शैतान ति वुङ्‍यिन नोक। तीकी ङला काङ साङ ओङ्ज्‍येन कितुप ङार मे।
JOH 14:31 यिने ङे पपाला ङ्‍यिङ्‍ज्‍ये कितुप ताङ पपी ङला काङ सुङ वे, तुकै राङ ङे क्‍यावु ति जम्‍बुलिङकी मीतिवी हाक्‍कोशी सिरुप ङे नोवा वे। लोसा, त याङ दाक्‍पु दे नेसुर डोप।”
JOH 15:1 येलुङ येशूकी खोरो लोमातिवाला दुक सुङ्‍सुङ, “वुतुङ्‍की गुन्‍डुम दोङ्‍बु ति ङ राङ यिन, तमा ङे पपा ति ती दोङ्‍बु ल्हाप मी यिन।
JOH 15:2 ङे लोला वोसिनाङ डेलु मोगोरुप येल्‍कातिवा रे रेला खोकी च्‍येकिवी, तमा डेलु गोरुप येल्‍कातिवाला ति मङ डेलु गोर्शी सिनी सेप्‍किवी।
JOH 15:3 ख्‍यिराङ ति ङे ख्‍यिराङला सिक्‍यावु ताम्‍ङे नेमा राङ टेङ्‍बु गल वे।
JOH 15:4 ख्‍यिराङ ङे मुला दे, तमा ङ ख्‍यिरा मुला देतिन। येल्‍का गुन्‍डुम दोङ्‍बी लोला मालुसिन तीकी खोरो राङ काङ डेलु मोगोर्वी। ती दोके ख्‍यिराङ साङ ङे मुला मादेसिन खोरो राङ डेलु गोर मुथुपी।
JOH 15:5 ङ ति गुन्‍डुम दोङ्‍बु यिन, ख्‍यिराङ ति तीकी येल्‍का यिन। सु ङे मुला देकिवे, तमा ङ तीकी मुला देसिन तीकी डेलु बङी गोर्किवी। ङ नेसुर क्‍येङ्‍सु गल्‍सिन ख्‍यिरा काङ साङ कि मुथुपी।
JOH 15:6 सु ङे मुला मेदेवे, ती ति डेलु मोगोरुप येल्‍का दोके च्‍येनी क्‍युर्किवी, तमा ती ति कम्‍बु डिवी। मीतिवी तुका येल्‍कातिवा दुम्‍नी मेला क्‍युर्नी र्‍हेकिवी।
JOH 15:7 दोजो ख्‍यिराङ ङे मुला देतुप ताङ ङे सुङ ख्‍यिरा सेमला लुसुङ सिसिन ख्‍यिरा काङ लाङ्‍सिनाङ तुकै राङ च्‍युङ्‍गितो।
JOH 15:8 ख्‍यिराङ डेलु बङी गर्नी ङे लोमातिवा यिन्‍दुप छ्‍या तेन्‍सिन ती ति ङे पपाला मोवा वुङ्‍गिवी।
JOH 15:9 पपी ङला ङ्‍यिङ्‍ज्‍ये क्‍यावु दोके ङे साङ ख्‍यिराङला ङ्‍यिङ्‍ज्‍ये क्‍यायी। ख्‍यिराङ ङे ङ्‍यिङ्‍ज्‍येला राङ देता।
JOH 15:10 ङ पपी कला ङ्‍येन्‍नी खोकी ङ्‍यिङ्‍ज्‍येला देतुप दोके ख्‍यिराङ ङे कला ङ्‍येन्‍सुङ सिसिन ङे ङ्‍यिङ्‍ज्‍येला देकिवी।
JOH 15:11 ङे ख्‍यिराङला दी ताम्‍ङे सिक्‍यावु ति ङला वोतुप लोदिमु ति ख्‍यिराङला लुशी, तमा ख्‍यिरा लोदिमु ति छाछिङी च्‍युङ्‍शी सिनी यिन।
JOH 15:12 ङे क ति दी राङ यिन। ङे ख्‍यिराङला ङ्‍यिङ्‍ज्‍ये क्‍यावे दोके ख्‍यिरा साङ च्‍यिककी च्‍यिकला ङ्‍यिङ्‍ज्‍ये की।
JOH 15:13 रङगी दाल्‍जी थोक्‍ला खोरुङ राङ शेप सिनाङ मङ ङ्‍यिङ्‍ज्‍ये छ्‍ये ति मे।
JOH 15:14 दोजो ख्‍यिरा ङे कला ङ्‍येन्‍सुङ सिसिन ख्‍यिराङ ङे दाल्‍जातिवा यिनो।
JOH 15:15 तफेन्‍ला ङ ख्‍यिराङला लावा मिसिर, च्‍यिलासिसिन ज्‍यिन्‍दाककी काङ किवे, तीकी लावा तीकी ङो मेशेवी। बोरु ङ ख्‍यिराङला दाल्‍जा सिनी सिरिन, च्‍यिलासिसिन पपा नेमा ङे काङ थोवे, ती तेरी ङे ख्‍यिराङला सिक्‍यायिन।
JOH 15:16 ख्‍यिरा ङला पेतुप मिन, यिने ङे ख्‍यिराङला पेतिन। ती ति ख्‍यिराङ गल्‍नी नरी लुवु डेलु गोर्शी सिनी यिन। तुक क्‍यानी ख्‍यिरा ङे मिङला काङ लाङ्‍सिनाङ पपी ख्‍यिराङला नङ्‍गिवी।
JOH 15:17 दी ति ङे क यिन, ख्‍यिराङ च्‍यिककी च्‍यिकला ङ्‍यिङ्‍ज्‍ये की।”
JOH 15:18 “दोजो जम्‍बुलिङकी मीतिवी ख्‍यिराङला ङ्‍यिङ्‍मर क्‍यासिन तिवी ख्‍यिराङला सिनाङ गोमाला ङला ङ्‍यिङ्‍मर क्‍यावु यिन सिनी ख्‍यिरा नासाम तोङ।
JOH 15:19 ख्‍यिराङ जम्‍बुलिङकी ति यिन्सिन जम्‍बुलिङकी मीतिवी ख्‍यिराङला खोरो मी यिन सिनी ङ्‍यिङ्‍ज्‍ये कितुप्‍जा। यिने ख्‍यिराङ ति जम्‍बुलिङकी ति मिन, ङे ख्‍यिराङला दी जम्‍बुलिङ ने पेतिन। ती तप्‍की जम्‍बुलिङकी मीतिवी ख्‍यिराङला ङ्‍यिङ्‍मर किवी।
JOH 15:20 ‘चुका लावा साङ तीकी ज्‍यिन्‍दाक सिनाङ छ्‍ये मेवी।’ सिनी गोमाला ङे ख्‍यिराङला सिक्‍यावु ति ख्‍यिरा टेन्‍सो की। तिवी ङला छेटाङ बिन्‍सुङ सिसिन ख्‍यिराङला साङ छेटाङ तेर्किवी, यिने तिवी ङे सुङला ङ्‍येन्‍सुङ सिसिन ख्‍यिरा सिक्‍यावु ताम्‍ङेला साङ ङ्‍येन्‍गिवी।
JOH 15:21 तमा ख्‍यिराङ ङे तिङ्‍ला तिङ्‍योकुप तप्‍की तिवी ख्‍यिराङला तुका छेटाङ तेर्किवी। ती ति ङला तोङ्‍गुप तीला तिवी ङो माशेवु तप्‍की यिन।
JOH 15:22 दोजो ङ जम्‍बुलिङला वानी तिवाला सिमाक्‍यावु यिन्‍सिन तिवाला दिक्‍पाकी क्‍येन मोफोकुप्‍जा, यिने त याङ तिवी खोप्‍रे दिक्‍पी थोक्‍ला काङ साङ खुङ कि मुथुपी।
JOH 15:23 सी ङला ङ्‍यिङ्‍मर किवे, तीकी ङे पपाला साङ ङ्‍यिङ्‍मर किवी।
JOH 15:24 दोजो ङे सी साङ माक्‍यावु लाका ति तिवी पर्ला माक्‍यावु यिन्‍सिन तिवाला दिक्‍पाकी क्‍येन मोफोकुप्‍जा। यिने त याङ तिवी ङे क्‍यावु ती हलेवु लाकातिवा थोङ्‍सुङ, यिन्‍सिनाङ तिवी ङ ताङ ङे पपा ङ्‍यिकरला ङ्‍यिङ्‍मर क्‍यासुङ।
JOH 15:25 यिने ती ति कोन्‍छ्‍योककी तिवाला नङ्‍गुप ठिमला ‘तिवी तेन्‍दोक मेताला ङला ङ्‍यिङ्‍मर क्‍यासुङ।’ सिनी टिवु ति तेरी छेवुला यिन।
JOH 15:26 ङे पपा नेमा ख्‍यिराङला तङ्‍गुप टोङ्‍गु तेरुप थु चाङ्‍मा फेप्‍कितो। ती टेङ्‍बु वोतुप थु चाङ्‍मा ति पपा नेमा फेप्‍सिमा ती थु चाङ्‍माकी ङे थोक्‍ला पङ्‍बु नङ्‍गितो।
JOH 15:27 तमा ख्‍यिराङ साङ ङे थोक्‍ला पङ्‍बु तेरुप डितो, च्‍यिलासिसिन थल्‍माला ङे लाका गो चुवु पेला नेज्‍युन ख्‍यिराङ ङे मुला वे।”
JOH 16:1 “ङे ख्‍यिराङला दी ताम्‍ङे सिक्‍यावु ति ख्‍यिरा ङला तेपा क्‍यावु ति येर मर मोडोशी सिनी यिन।
JOH 16:2 मीतिवी ख्‍यिराङला यहूदी छ्‍योखाङ नेमा तेन तोङ्‍गितो। वुतुङ के तुजे यी गितो, ती तुजेला ख्‍यिराङला सेतुपतिवी तुकै कितुप ति कोन्‍छ्‍योकला शब्‍ज्‍यी कितुप लाका यिन सिनी नासाम तोङ्‍गिवी।
JOH 16:3 तिवी तुक क्‍यावु ति तिवी ङे पपाला साङ ङो माशे वे, ङला साङ ङो मेशेवु तप्‍की यिन।
JOH 16:4 ङे ख्‍यिराङला दी ताम्‍ङे सिक्‍यावु ति ज्‍युक्‍ला ती तेरी च्‍युङ्‍गुप पेला ङे ख्‍यिराङला सिक्‍यावु ताम्‍ङे ति ख्‍यिरा नासाम शर्शी सिनी यिन। ङे दी ताम्‍ङे गोमाला ख्‍यिराङला सिमाक्‍यावु ति ङ ख्‍यिरा मुला राङ वोतुप तप्‍की यिन।”
JOH 16:5 “त याङ ङ ङला तोङ्‍गुप तीकी ते डोयी वे। यिन्‍सिनाङ ख्‍यिरा पर्ला सी साङ ङला कनी डिवी सिनी मिटिनोक।
JOH 16:6 बोरु ङे ख्‍यिराङला सिक्‍यावु ताम्‍ङेतिवा थोसिमा ख्‍यिरा सेमला छासे सेम्‍दुक लानी वे।
JOH 16:7 यिने ङ ख्‍यिराङला टेङ्‍बो सिरिन, ङ डोप ति ख्‍यिरा थोक्‍ला ल्‍यामु यिन। ङ मागल्‍सिन टोङ्‍गु तेरुप थु चाङ्‍मा ति ख्‍यिरा ते मेफेवी। यिने ङ गल्‍सिन टोङ्‍गु तेरुप थु चाङ्‍मा ति ख्‍यिरा पर्ला तोङ्‍यिनो।
JOH 16:8 खो फेप्‍सिमा दिक्‍पा ताङ कोन्‍छ्‍योककी टेङ्‍बु ताङ कोन्‍छ्‍योककी ठिमकी कोर्ला हाक्‍माकोवुतिवाला खोकी हाक्‍को ज्‍यिकिवी।
JOH 16:9 दिक्‍पाकी कोर्ला ति ङला तेपा मिकिवु ति दिक्‍पा यिन सिनी खोकी हाक्‍को ज्‍यिकिवी।
JOH 16:10 टेङ्‍बुकी कोर्ला ति ङ ङे पपी ते डोयी, तुक क्‍यानी ख्‍यिरा ङला येलुङ मोथोङ्‍दो सिनी खोकी हाक्‍को ज्‍यिकिवी।
JOH 16:11 कोन्‍छ्‍योककी ठिमकी कोर्ला ति दी जम्‍बुलिङला ओङ्‍ज्‍येन कितुप शैतानला कोन्‍छ्‍योक नेमा पर्च्या ङ्‍येसुङ सिनी हाक्‍को ज्‍यिकिवी।
JOH 16:12 ङे ख्‍यिराङला सि गोवु ताम्‍ङे याङ तरोङ बङी वे, यिने तन्‍दा ति ख्‍यिरा ती ताम्‍ङे ति सेमला ज्‍योक मुथुपी।
JOH 16:13 यिने टेङ्‍बु वोतुप थु चाङ्‍मा फेप्‍सिमा खोकी ख्‍यिराङला कोन्‍छ्‍योककी टेङ्‍बुकी कोर्ला हाक्‍को ज्‍यिकितो, तमा ख्‍यिराङला ती टेङ्‍बुकी लाम नेवा टिकितो। खोकी खोरो ताम्‍ङे मुसुङ्‍गिवी, यिने कोन्‍छ्‍योक नेमा काङ थोवे, ती ताम्‍ङे तिराङ सुङ्‍गितो, तमा ज्‍युक्‍थमाला वुङ्‍गुप ताम्‍ङेतिवा साङ ख्‍यिराङला सुङ्‍गितो।
JOH 16:14 खोकी ङे सिक्‍यावु ति ङ्‍येन्‍नी ख्‍यिराङला हाक्‍को च्‍यितुप तप्‍की ङला मोवा वोतुप ति खोकी छ्‍या देन्‍गिवी।
JOH 16:15 पपी मुला वोतुप ति तेरी ङे ति यिन। तुक क्‍यानी ङे काङ सिक्‍यावे, खोकी थु चाङ्‍माकी ती थोनी ख्‍यिराङला सुङ्‍गिवी सिनी ङे सिक्‍यावु यिन।
JOH 16:16 त चेयी ज्‍युक्‍ला ख्‍यिरा ङला मोथोङ्‍तो, तमा येलुङ चेयी ज्‍युक्‍ला ख्‍यिरा ङला थोङ्‍गितो।”
JOH 16:17 ललाइ ललाइ लोमातिवा खोप्‍राङ नाङ्‍ला “खोकी दाक्‍पुला ‘चेयी ज्‍युक्‍ला ख्‍यिरा ङला मोथोङ्‍तो, तमा येलुङ चेयी ज्‍युक्‍ला ख्‍यिरा ङला थोङ्‍गितो।’ सिनी सुङ्‍गुप ताङ येलुङ खोकी ‘ती ति ङ पपी चाला डोयी वोतुप तप्‍की यिन।’ सिनी सुङ्‍गुप ति काङ यिनाङ?
JOH 16:18 खोकी ‘चेयी ज्‍युक्‍ला’ सिनी सुङ्‍गुप तेन्‍दोक ति काङ यिनाङ? खोकी काङ सुङ्‍गुप यिन सिनी ङि्‍यरा हाक्‍माको।” सिनी सिक्‍यासुङ।
JOH 16:19 येशूकी लोमातिवी खोला टिवा टेप नो क्‍यावु ति हाक्‍कोनी खोकी तिवाला सुङ्‍सुङ, “‘चेयी ज्‍युक्‍ला ख्‍यिरा ङला मोथोङ्‍तो, तमा येलुङ चेयी ज्‍युक्‍ला ख्‍यिरा ङला थोङ्‍गितो।’ सिनी ङे सिक्‍यावु ताम्‍ङेकी कोर्ला ख्‍यिरा पर्ला केवुल क्‍यावु यिन?
JOH 16:20 वुतुङ के ङ ख्‍यिराङला सिरिन, ख्‍यिराङ ङोप ताङ ङुप्‍राङ कितो, यिने जम्‍बुलिङकी मीतिवा ति गा कितो। ख्‍यिराङला छासे पप लानी सेम्‍दुक लङ्‍गितो, यिने ख्‍यिरा सेम्‍दुक ति गाला ग्‍युर्कितो।
JOH 16:21 पुम्‍पेजाला आङा क्‍येप पेला लेप्‍सिमा छेटाङ वुङ्‍गुप तप्‍की तीला छासे पप किवी। यिने आङा क्‍येसिमा तीकी ती छेटाङ ति टोक ज्‍येकिवी, च्‍यिलासिसिन आङा क्‍येवु तप्‍की तीकी सेमला छासे गा लङ्‍गिवी।
JOH 16:22 ख्‍यिराङला साङ दी दोके राङ च्‍युङ्‍गिवी। तन्‍दा ख्‍यिरा सेमला सेम्‍दुक किवी, यिने ङ ख्‍यिराङला येलुङ ठेतुप पेला ख्‍यिरा सेम ति छासे गा लङ्‍गितो। तमा ती गा ति सी साङ ख्‍यिराङ नेसुर ठोक मुथुप्‍तो।
JOH 16:23 ती तुजेला ख्‍यिरा ङला काङ ताम्‍ङे साङ मिटितो। ङ ख्‍यिराङला टेङ्‍बो सिरिन, ख्‍यिरा ङे मिङला ङे पपाला काङ लाङ्‍सिनाङ खोकी ख्‍यिराङला नङ्‍गितो।
JOH 16:24 त सेक ख्‍यिरा ङे मिङला काङ साङ मालाङ वे। त लोङ, तमा ख्‍यिराङला थोप्‍कितो। तमा ख्‍यिराङला लोदिमु तेरी च्‍युङ्‍गितो।”
JOH 16:25 “त सेक ती ताम्‍ङेतिवा ङे ख्‍यिराङला पे नेसुर सिक्‍यायी। यिने तुजे यी वुङ्‍यिन वे, ती तुजेला ङ येलुङ पे नेसुर मिसिर, यिने पपी कोर्ला ल्‍यामो हाक्‍कोवा क्‍यानी ख्‍यिराङला सिरिनो।
JOH 16:26 ती तुजेला ख्‍यिरा ङे मिङला पपाला लोङ्‍गितो, ती ति ङे ख्‍यिरा थोक्‍ला पपाला लोङ्‍गिवी सिरुप ताम्‍ङे मिन।
JOH 16:27 पपी राङ ख्‍यिराङला ङ्‍यिङ्‍ज्‍ये क्‍या नङ्‍गिवी, च्‍यिलासिसिन ख्‍यिरा ङला ङ्‍यिङ्‍ज्‍ये क्‍यासुङ, तमा ङ पपा नेमा वावु यिन सिनी ख्‍यिरा तेपा क्‍यावु तप्‍की यिन।
JOH 16:28 ङ पपा नेमा दी जम्‍बुलिङला वायिन, त ङ जम्‍बुलिङ क्‍युर ज्‍याक्‍नी पपी ते लोक्‍नी डोयी वोतो।”
JOH 16:29 येशूकी तुक सुङ्‍सिमा लोमातिवी खोला सिक्‍यासुङ, “त याङ गेकेनकी पे नेसुर मासुङ्‍नी ङ्‍यिराङला ल्‍यामो हाक्‍कोवा क्‍यानी सुङ्‍गिनोक।
JOH 16:30 गेकेनला तेरी ताम्‍ङे छ्‍या वोतुप ताङ गेकेनला काङ टिवा टि मोगोनोक सिरुप ति तके ङ्‍यिरा हाक्‍कोसुङ। ती तप्‍की गेकेन याङ कोन्‍छ्‍योक नेमा फेपुप यिनोक सिनी ङि्‍यरा तेपा क्‍यायिन।”
JOH 16:31 तमा येशूकी लोमातिवाला सुङ्‍सुङ, “त के ख्‍यिराङ ङला तेपा किनोक!
JOH 16:32 यिने तुजे यी गिवी, ती तुजे ति वानिङ सिन वे। ती तुजेला ख्‍यिरा तेरी थरा थुरा गल्‍नी दाक दाक्‍पी खाङ्‍बाला डितो, तमा ख्‍यिरा ङला च्‍यिक राङ क्‍युन ज्‍योकितो। यिने ङ च्‍यिक राङ मे, च्‍यिलासिसिन पपा ङे मुला ज्‍यु वे।
JOH 16:33 ङे दी ताम्‍ङे ख्‍यिराङला सिक्‍यावु ति ख्‍यिराङ ङे मुला लुनी ख्‍यिरा सेमला लोदिमु ङ्‍येशी सिनी यिन। जम्‍बुलिङला ख्‍यिराङला छेटाङ ख्‍येल्‍गितो, यिने ख्‍यिराङ ङाडेङ की। च्‍यिलासिसिन जम्‍बुलिङकी ओङ्‍ज्‍येन खला ङे ग्‍येल्‍निङ सिन वे।”
JOH 17:1 येशूकी ती ताम्‍ङेतिवा सुङ सिन्‍सिमा देवाच्‍येन ने केला ल्‍हानी दुक सिनी मोपोर क्‍या नाङ्‍सुङ, “ओ पपा, तुजे वानिङ सिन वे। पपी ङ ख्‍योरे पुज्‍युङला मोवा वोतुप ति छ्‍या तेन्‍नी ङ पुज्‍युङकी साङ पपाला मोवा वोतुप ति छ्‍या देन्‍शी।
JOH 17:2 पपी ङ पुज्‍युङला जम्‍बुलिङकी मीतिवा तेरीला ओङ्‍ज्‍येन कितुप ओङ नाङ्‍सुङ। ती ति पपी ङ पुज्‍युङला तेपा कि च्‍यितुप मीतिवा तेरीला ङ नेसुर नाम्‍साङ मिशिवु मिजी थोप्‍शी सिनी यिन।
JOH 17:3 तमा नाम्‍साङ मिशिवु मिजी ति च्‍यिक राङ वोतुप कोन्‍छ्‍योक टेङ्‍बुला ङो शेवु ताङ पपी तङ्‍गुप येशू ख्रीष्‍टला ङो शेवु यिन।
JOH 17:4 पपी ङला कि च्‍यितुप लाका ति ङे तेरी सिन्‍दा क्‍यानी पपा छासे मोवा वोतुप ति दी जम्‍बुलिङकी मीतिवाला छ्‍या तेनिन।
JOH 17:5 ओ पपा, जम्‍बुलिङ ज्‍येङ्‍गुप सिनाङ गोमाला पपा ताङ ङे मुला वोतुप ती मोवा नेसुर पपी थोङ्‍दाङला ङला मोवा च्‍युङ च्‍यी।”
JOH 17:6 “पपी जम्‍बुलिङ नेसुर पेनी ङला तेपा कि च्‍यितुप मीतिवाला पपा सु यिन सिनी ङे ङो शे च्‍यितिन। तिवा ति गोमाला पपी ति यिन, तमा पपी ङला नङ्‍गुप यिन। तिवी पपी सुङला ङ्‍येन्‍सुङ।
JOH 17:7 त याङ पपी ङला नङ्‍गुप ति तेरी पपा नेमा राङ वावु यिन सिरुप ति तिवी हाक्‍कोसुङ।
JOH 17:8 च्‍यिलासिसिन पपी ङला नङ्‍गुप सुङ ति ङे तिवाला लापिन, तमा तिवी ती सुङला ङ्‍येन्‍सुङ। ङ पपा नेमा वावु यिन सिरुप ति वुतुङ के तिवी हाक्‍को वे, तमा पपी ङला तङ्‍गुप यिन सिरुप ति तिवी तेपा क्‍यासुङ।
JOH 17:9 ङ तिवी थोक्‍ला मोपोर कितिन। ङ जम्‍बुलिङकी मीतिवी थोक्‍ला मोपोर मिकिवी, यिने पपी ङला नङ्‍गुपतिवी थोक्ला मोपोर कितिन, च्‍यिलासिसिन तिवा पपी ति यिन।
JOH 17:10 ङे मुला वोतुप ति तेरी पपी ति यिन, पपी मुला वोतुप ति तेरी ङे ति यिन। तमा तिवा नेसुर ङला मोवा ङ्‍ये वे।
JOH 17:11 ङ याङ जम्‍बुलिङला अला मुलुवी, यिने दिवा याङ जम्‍बुलिङला लुकिवी। त याङ ङ पपी ते वुङ्‍यिन वे। ओ चाङ्‍मा वोतुप पपा, पपी ङला नङ्‍गुप ङार वोतुप मिङ नेमा तिवाला र्‍होक्‍टे क्‍यानी पपा ताङ ङ च्‍यिक राङ वोतुप दोके तिवा साङ च्‍यिक राङ च्‍युङ्‍शी।
JOH 17:12 ङ तिवी मुला वोता सेक याङ पपी ङला नङ्‍गुप ङार वोतुप मिङला तिवाला ङे र्‍होक्‍नी ज्‍याकिन। तुक क्‍यानी तिवी पर्ला ङ्‍येलाला डो गोवु तीला मिसिन यम्‍बा सु साङ ङ्‍येलाला माख्‍येल वे। ती ति कोन्‍छ्‍योककी सुङला टिवु ति तेरी छेवुला यिन।
JOH 17:13 त याङ ङ पपी ते वुङ्‍यिन वे। यिने ङ जम्‍बुलिङला वोतुप पेला तिवाला दी ताम्‍ङेतिवा सिक्‍यावु ति ङे लोदिमु ति तिवी सेमला तेरी च्‍युङ्‍शी सिनी यिन।
JOH 17:14 पपी ङला सुङ्‍गुप सुङ ति ङे तिवाला सिक्‍यायिन, तमा जम्‍बुलिङकी मीतिवी तिवाला ङ्‍यिङ्‍मर क्‍यासुङ। च्‍यिलासिसिन ङ जम्‍बुलिङकी मी मिन्‍दुप दोके तिवा साङ जम्‍बुलिङकी मी मिन्‍दुप तप्‍की यिन।
JOH 17:15 ङे मोपोर क्‍यावु ति पपी तिवाला दी जम्‍बुलिङ ने टि फेप सिनी मिन, यिने तिवाला दुक्‍टा शैतान नेसुर र्‍होक्‍टे कि सिनी यिन।
JOH 17:16 ङ दी जम्‍बुलिङकी मिन्‍दुप दोके तिवा साङ दी जम्‍बुलिङकी ति मिन।
JOH 17:17 पपी सुङ ति टेङ्‍बु वे, ती टेङ्‍बु वोतुप सुङ नेसुर राङ तिवाला चाङ्‍मा जो नाङ।
JOH 17:18 पपी ङला जम्‍बुलिङला तङ नङ्‍गुप दोके ङे साङ तिवाला जम्‍बुलिङला तङ्‍यिन।
JOH 17:19 तिवी थोक्‍ला ङे ङरा राङ चाङ्‍मा जोयिन, ती ति तिवा साङ सुङ टेङ्‍बु नेसुर चाङ्‍मा च्‍युङ्‍शी सिनी यिन।”
JOH 17:20 “ङ तिवी थोक्‍ला तिराङ मिन, यिने तिवी लापुप सुङ ङ्‍येन्‍नी ङला तेपा कितुपतिवी थोक्‍ला साङ मोपोर कितिन।
JOH 17:21 ओ पपा, पपा ङे मुला वोतुप ताङ ङ पपी मुला वोतुप दोके तिवा तेरी च्‍यिक राङ च्‍युङ्‍नी तिवा साङ दाक्‍पी मुला राङ च्‍युङ्‍शी, तमा पपी ङला तङ्‍गुप यिन सिरुप ति जम्‍बुलिङकी मीतिवी तेपा किशी।
JOH 17:22 पपी ङला नङ्‍गुप मोवा ति ङे तिवाला थोप च्‍यितिन। ती ति पपा ताङ ङ च्‍यिक राङ यिन्‍दुप दोके तिवा साङ च्‍यिक राङ च्‍युङ ज्‍यितुपला यिन।
JOH 17:23 ङ तिवी मुला वोतुप ताङ पपा ङे मुला वोतुप ति तिवा तेरी च्‍यिक राङ च्‍युङ्‍गुपला यिन। तमा ती ति पपी ङला तङ्‍गुप ताङ पपी ङला ङ्‍यिङ्‍ज्‍ये क्‍या नङ्‍गुप दोके तिवाला साङ ङ्‍यिङ्‍ज्‍ये क्‍या नङ्‍गिवी सिरुप ति जम्‍बुलिङकी मीतिवाला हाक्‍को ज्‍यितुपला यिन।
JOH 17:24 ओ पपा, पपी ङला नङ्‍गुपतिवा साङ ङ वोतुप ते ङे मुला राङ देतुप ङ्‍येशी। तमा जम्‍बुलिङ ज्‍येङ्‍गुप सिनाङ गोमाला के पपी ङला ङ्‍यिङ्‍ज्‍ये क्‍यानी नङ्‍गुप मोवा ति तिवी थोङ्‍शी सिरुप ङे नोवा वे।
JOH 17:25 ओ ठिम टेङ्‍बु क्‍या नङ्‍गुप पपा, जम्‍बुलिङकी मीतिवी पपाला ङो माशे, यिने ङ याङ पपाला ङो शेतिन, तमा ङला तेपा कितुपतिवी साङ पपी ङला तङ्‍गुप यिन सिनी हाक्‍कोनी वे।
JOH 17:26 पपा सु यिन सिनी ङे तिवाला ङो शे च्यितिन, तमा तरोङ साङ ङो शे ज्‍यितिन। ती ति पपी ङला क्‍या नङ्‍गुप ङ्‍यिङ्‍ज्‍ये ति तिवी मुला लुशी, तमा ङ साङ तिवी सेमला देतुप ङ्‍येशी सिनी यिन।”
JOH 18:1 येशूकी तुक सुङ्‍नी मोपोर क्‍या सिन्‍सिमा खोरे लोमातिवी मुला किद्रोन सिरुप टोक्‍पी फर्केन फेप्‍सुङ। ते दुम्‍डोक यी नोक, तमा खो खोरे लोमातिवा ताङ मुला ते शुसुङ।
JOH 18:2 तमा खोला क्‍येन तेरुप यहूदाला साङ ती दासा ति छ्‍या नोक, च्‍यिलासिसिन येशू लोमातिवी मुला माङ्‍शोक ते राङ ठेकिनोक।
JOH 18:3 ती पेला यहूदाकी रोमी मक्‍मीतिवी मुला कोङ्‍यार छ्‍येतिवा ताङ फरिसीतिवी तङ्‍गुप यहूदी ल्‍हङाङला र्‍हेन्‍दुप मीतिवाला टिनी ते वासुङ। तिवी पेक्‍टुल ताङ बाशिङ ताङ मक्‍मीकी लक्‍च्‍येतिवा खुर्नी वानोक।
JOH 18:4 तमा येशूकी खुरुङला त च्‍युङ्‍गुप ताम्‍ङेतिवा तेरी हाक्‍कोनी तिवी दोङ्‍ला फेप्‍नी तिवाला “ख्‍यिराङ सुला छोलुपला वावु यिन?” सिनी टि नाङ्‍सुङ।
JOH 18:5 तमा तिवी “नासरतकी येशूला छोलुपला।” सिनी सिक्‍यासुङ। येशूकी तिवाला “ती ति ङ राङ यिन।” सिनी सुङ्‍सुङ। ती पेला खोला क्‍येन तेरुप यहूदा साङ तिवी मुला राङ लानी देन नोक।
JOH 18:6 येशूकी तिवाला “ती ति ङ राङ यिन।” सिनी सुङ्‍सिमा तिवा फिल्‍दुङ्‍मा गल्‍नी तला ग्‍यप्‍सुङ।
JOH 18:7 येलुङ येशूकी तिवाला “ख्‍यिराङ सुला छोल्‍गिवी?” सिनी टि नाङ्‍सुङ। तमा तिवी “नासरतकी येशूला।” सिनी सिक्‍यासुङ।
JOH 18:8 तमा येशूकी तिवाला “ती ति ङ राङ यिन सिनी ङे ख्‍यिराङला सिक्‍यायी, दोजो ख्‍यिरा ङला छोलुप यिन्‍सिन ङे मुला वोतुप दी यम्‍बातिवाला ति डो च्‍यी।” सिनी सुङ्‍सुङ।
JOH 18:9 येशूकी तुक सुङ्‍गुप ति खोकी गोमाला के “ओ पपा, पपी ङला नङ्‍गुपतिवी नाङ्‍ला च्‍यिक साङ मातोर वे।” सिनी सुङ्‍गुप सुङ ति तेरी छेवुला यिन।
JOH 18:10 तमा सिमोन पत्रुस तीकी खोरो लोला वोतुप खुर्पा थेन्‍नी तेरी सिनाङ कोङ्‍यार छ्‍येकी लावा यीकी यावी थाकाकी नम्‍ज्‍योक टेप च्‍येसुङ। ती लावाकी मिङ ति माल्‍खस नोक।
JOH 18:11 ती थोङ्‍नी येशूकी पत्रुसला सुङ्‍सुङ, “ख्‍योरो खुर्पा ति शुपकी नाङ्‍ला च्‍यी। काङ पपी ङला खुर च्‍यितुप छेटाङ ति ङे मुखुर्वी रो?”
JOH 18:12 तमा रोमी मक्‍मीतिवा ताङ तिवी मुला वावु मक्‍मी छ्‍ये ताङ यहूदी ल्‍हङाङला र्‍हेन्‍दुपतिवी येशूला जिम्‍नी टासुङ।
JOH 18:13 तमा तिवी खोला गोमाला हन्‍नासकी ते टिनी गाल्‍सुङ। ती हन्‍नास ति ती लोकी तेरी सिनाङ कोङ्‍यार छ्‍ये यिन्‍दुप कैयाफाकी मेम यिनोक।
JOH 18:14 ती कैयाफा तीकी “मी मिरा च्‍यिक तेरी मीतिवी थोक्‍ला शेप ति बोरु ल्‍यामु यिन।” सिनी यहूदी गोमा कितुपतिवाला टोङ्‍गु बिन्‍दुप मी यिनोक।
JOH 18:15 येशूला जिम्‍नी टि डोप पेला सिमोन पत्रुस ताङ यम्‍बा लोमा च्‍यिक ति येशूकी तिङ तिङ्‍ला तिङ्‍यासुङ। ती यम्‍बा लोमा ति तेरी सिनाङ कोङ्‍यार छ्‍येकी मुला ङो शेवु तप्‍की येशूकी तिङ तिङ्‍ला तिङ्‍यानी तेरी सिनाङ कोङ्‍यार छ्‍येकी खाङ्‍बी लेङाङ खला सेक गाल्‍सुङ।
JOH 18:16 यिने पत्रुस ति पाङ्‍ला गे चाला राङ लानी देनोक। तमा ती तेरी सिनाङ कोङ्‍यार छ्‍येकी मुला ङो शेवु लोमा तीकी येलुङ लोक्‍नी वानी गोला र्‍हेन्‍दुप पुम्‍पेजा यीला ताम्‍ङे क्‍यानी पत्रुसला नाङ्‍ला टिनी गाल्‍सुङ।
JOH 18:17 तमा ती पेला राङ गोला र्‍हेन्‍दुप ती पुम्‍पेजा तीकी पत्रुसला “काङ ख्‍युरुङ साङ तीकी लोमातिवी पर्ला मिरा च्‍यिक मिन?” सिनी टिसुङ। यिने पत्रुसकी “मिन, ङ याङ मिन।” सिनी सिक्‍यासुङ।
JOH 18:18 ती पेला नाम टङ्‍गा वोतुप तप्‍की खाङ्‍बी लावातिवा ताङ र्‍हेन्‍दुपतिवा मे तङ्‍नी मेकी गारी गुरीला मे देनी देनोक। तमा पत्रुस साङ तिवी मुला राङ लानी मे देनी देसुङ।
JOH 18:19 तमा तेरी सिनाङ कोङ्‍यार छ्‍ये तीकी येशूला खोकी लोमातिवा ताङ खोकी लापुप येन्‍देनकी कोर्ला टिवा क्‍यासुङ।
JOH 18:20 येशूकी “ङे मी तेरीकी मिङ्‍गाला राङ सिक्यायिन। ङे तेरी यहूदीतिवा जोम्बुप यहूदी छ्‍योखाङतिवा ताङ यहूदी ल्‍हङाङला नरी येन्‍देन लापिन। ङे काङ ताम्‍ङे साङ छ्‍याकला सि माक्‍या वे।
JOH 18:21 ख्‍युरुङ च्‍यिला ङला टिवी? सी ङे सुङ थोवे, तिवाला राङ टि। ङे काङ सिक्‍यावु ति तिवाला तेन्‍तेन छ्‍या वे।”
JOH 18:22 येशूकी तुक सुङ्‍गुप थोसिमा ते चाला वोतुप र्‍हेन्‍दुप मी च्‍यिककी “ख्‍युरुङ च्‍युक क्‍यानी तेरी सिनाङ कोङ्‍यार छ्‍येला तुक सिनी ख लोकिवी?” सियी येशूकी शालला डम्‍ज्‍येक पोप्‍सुङ।
JOH 18:23 तमा येशूकी तीला “दोजो ङे सिक्‍यावु ताम्‍ङेला काङ रे च्‍यिक रे मेटेङ्‍बु वोसिन ती मेटेङ्‍बुकी पङ्‍बु ति ङला छ्‍या तेन। यिने दोजो ङे सिक्‍यावु ति टेङ्‍बु राङ यिन्‍सिन ख्‍युरुङ च्‍यिला ङला बेप्‍किवी?” सिनी सुङ्‍सुङ।
JOH 18:24 ती ज्‍युक्‍ला हन्‍नासकी येशूला टा टावा राङ तेरी सिनाङ कोङ्‍यार छ्‍ये कैयाफाकी चाला टिनी ताङ्‍सुङ।
JOH 18:25 तोजो पेला सेक सिमोन पत्रुस ति मे देयी नोक। तमा ते वोतुप मीतिवी तीला “काङ ख्‍युरुङ साङ ती मी तीकी लोमातिवी पर्ला मिरा च्‍यिक मिन रो?” सिनी टिसुङ। यिने तीकी “मिन, ङ याङ मिन।” सिनी सिक्‍यासुङ।
JOH 18:26 ते तेरी सिनाङ कोङ्‍यार छ्‍येकी लावातिवी पर्ला पत्रुसकी नम्‍ज्‍योक च्‍येतुप तीकी छेङ्‍गा मिरा च्‍यिक नोक। तीकी पत्रुसला “ख्‍युरुङ ती मी तीकी मुला राङ दुम्‍डोकला वोतुप ति ङे थोङ्‍सुङ। ख्‍युरुङ ती राङ मिन रो?” सिनी सिक्‍यासुङ।
JOH 18:27 येलुङ पत्रुसकी “मिन।” सिनी सिक्‍यासुङ। ती पेला राङ शार्क्येक च्‍यवु कुकुरी तेन्‍सुङ।
JOH 18:28 टोपला टेताङ मीतिवी येशूला कैयाफाकी खाङ्‍बा नेसुर रोमी ठिम कितुप मी छ्‍ये पिलातसकी खाङ्‍बाला टिनी गाल्‍सुङ। यहूदी थरुप तुछ्‍येनकी डेन सापला खोप्‍राङ मेचेङ्‍गा मोडोशी सिनी यहूदीतिवा ति ती खाङ्‍बी नाङ्‍ला माशु।
JOH 18:29 तमा पिलातस ति पाङ्‍ला थेन्‍नी तिवी चाला वानी, “दी मीला कङगी कोर्ला ख्‍यिरा क्‍येन बिन्‍दुप यिन?” सिनी टिसुङ।
JOH 18:30 तिवी पिलातसला “दी मी तीकी दुक्‍टा माक्‍यावु यिन्‍सिन ङ्‍यिरा दीला ख्‍योरो ते टिनी मेङ्‍गुप्‍जा।” सिनी सिक्‍यासुङ।
JOH 18:31 ती थोसिमा पिलातसकी तिवाला “तुकै यिन्‍सिन ख्‍यिरा राङ दीला टि गल्‍नी ख्‍यिरा ठिमला काङ नोके, तुकै राङ ठिम तोङ।” सिनी सिक्‍यासुङ। यहूदी गोमा कितुपतिवी पिलातसला “ङ्‍यिराङला याङ मीला सेतुप छ्‍येर्पा ग्‍येलुप ओङ मे।” सिनी सिक्‍यासुङ।
JOH 18:32 तुकै च्‍युङ्‍गुप ति येशूकी गोमाला के खोरुङ चुक क्‍यानी टुङ्‍गिवी सिनी सुङ्‍गुप ति तेरी छेवुला यिन।
JOH 18:33 तमा पिलातस खोरो खाङ्‍बाला लोङ गल्‍नी येशूला खोरो चाला कताङ्‍नी, “ख्‍युरुङ यहूदीतिवी ग्‍येल्‍वु राङ यिन रो?” सिनी टिसुङ।
JOH 18:34 येशूकी पिलातसला “काङ दी ख्‍योरे टिवु ताम्‍ङे ति रङगी नासाम नेमा वावु यिनाङ की, मी यम्‍बी ङे कोर्ला सिक्‍यावु यिन?” सिनी टि नाङ्‍सुङ।
JOH 18:35 पिलातसकी येशूला “ङ यहूदी यिन रो? ख्‍योरो मिरिकतिवा ताङ कोङ्‍यार छ्‍येतिवी ख्‍युरुङला ङे ते टि वानी ङला चेक तेसुङ। ख्‍योरो काङ क्‍यावु?” सिनी सिक्‍यासुङ।
JOH 18:36 तमा येशूकी सुङ्‍सुङ, “ङे ग्‍येल्‍खाप ति दी जम्‍बुलिङकी ति मिन। दोजो ङे ग्‍येल्‍खाप दी जम्‍बुलिङकी ति यिन्‍सिन ङला तिङ योकुपतिवी ङे थोक्‍ला थमु ग्‍यप्‍नी ङला यहूदीतिवी लकला ख्‍येल मिज्‍यिवुजा। यिने ङे ग्‍येल्‍खाप ति दी जम्‍बुलिङकी ति मिन।”
JOH 18:37 तमा पिलातसकी येशूला “तुकै यिन्‍सिन काङ ख्‍युरुङ ग्‍येल्‍वु राङ यिन?” सिनी टिसुङ। तमा येशूकी तीला सुङ्‍सुङ, “ख्‍योरो ङला ग्‍येल्‍वु यिन सिनी सिक्‍यावु ति टेके यिन। ङ टेङ्‍बुकी कोर्ला पङ्‍बु तेरुपला क्‍येवु यिन, तमा तीकी थोक्‍ला दी जम्‍बुलिङला वावु यिन। सु मी टेङ्‍बु नोके, तीकी ङे ताम्‍ङे ङ्‍येन्‍गिवी।”
JOH 18:38 तमा पिलातसकी येशूला “टेङ्‍बु सिरुप ति काङ यिन?” सिनी टिसुङ। तोजोयी सिक्‍यासिमा पिलातस ति येलुङ पाङ्‍ला थेन्‍नी यहूदीतिवी चाला गल्‍नी, “दी मीला याङ ङे काङ साङ क्‍येन तेर गोवु माथोङ।
JOH 18:39 यहूदी थरुप तुछ्‍येनला ले टेङ ङे ख्‍यिरा लुक्‍सुला वोतुप दोके चोन्‍खाङला शोरुप मी मिरा च्‍यिकला पि तोङ्‍यिन वे। ङे यहूदीतिवी ग्‍येल्‍वु तीला ख्‍यिरा थोक्‍ला पि तोङ्‍शी सिरुप ख्‍यिरा नो वे?” सिनी तिवाला टिसुङ।
JOH 18:40 यिने मीतिवी कशेन थोर ग्‍यप्‍नी, “मिन, तीला मिन, बरब्‍बाला पि तोङ।” सिनी सिक्‍यासुङ। ती बरब्‍बा ति च्‍याक्‍पा यिनोक।
JOH 19:1 ती ज्‍युक्‍ला पिलातसकी मक्‍मीतिवाला येशूला टि गल्‍नी पङ्‍शार तोङ सिनी योक कुसुङ।
JOH 19:2 तमा मक्‍मीतिवी छेर्माङ वोतुप येल्‍का कुक्‍नी ग्‍येल्‍वी उशाक दोके जोनी येशूकी गोला कोन्‍नी बिन्‍सुङ, तमा ग्‍येल्‍वुकी कोन्‍दुप च्‍यिन्‍दै छ्‍योवा मुक्‍पु यी खोला कोन्‍नी बिन्‍सुङ।
JOH 19:3 तमा तिवा खोकी चाला वानी, “यहूदीतिवी ग्‍येल्‍वुकी नरी ग्‍येला किशिता!” सिनी मारे तोङ्‍यिन सिरा खोकी शालला डम्‍ज्‍येक पोप्‍सुङ।
JOH 19:4 येलुङ पिलातस पाङ्‍ला थेन्‍नी ते जोम्‍बुप यहूदीतिवाला “ङ्‍येना, ङ तीला ख्‍यिरा चाला राङ टि वुङ्‍गिवी। ङे दी मीला काङ क्‍येन तेर गोवु माथोङ सिरुप ति ख्‍यिरा हाक्‍कोवा किसा।” सिनी सिक्‍यासुङ।
JOH 19:5 तमा येशू छेर्माङ उशाक ताङ छ्‍योवा मुक्‍पु कोन कोन्‍वा राङ पाङ्‍ला फेप्‍सुङ। ती पेला पिलातसकी तिवाला “ल्‍हो ताङ, ती मी ति दे राङ वे।” सिनी सिक्‍यासुङ।
JOH 19:6 तमा कोङ्‍यार छ्‍येतिवा ताङ ल्‍हङाङकी मक्‍मीतिवी खोला थोङ्‍सिमा, “तीला ग्‍यङ्‍शिङला कल्‍नी काँडी दाप्‍नी से! ग्‍यङ्‍शिङला कल्‍नी काँडी दाप्‍नी से!” सिनी च्‍यार ग्‍यप्‍सुङ। तमा पिलातसकी तिवाला “तुकै यिन्‍सिन दी मीला ख्‍यिरा राङ टि गल्‍नी ग्‍यङ्‍शिङला कल्‍नी काँडी दाप्‍नी से। ङे दीला काङ क्‍येन तेर गोवु माथोङ।” सिनी सिक्‍यासुङ।
JOH 19:7 तुक सिक्‍यासिमा यहूदीतिवी “ङ्‍यिरा मुला वोतुप ठिमला ल्‍हासिन दी मी याङ शि राङ गोकिवी, च्‍यिलासिसिन तीकी खुरुङ राङ कोन्‍छ्‍योककी सेवु यिन सिनी सिनोक।”
JOH 19:8 ती ताम्‍ङे थोसिमा पिलातस ति मङ ज्‍यिवा क्‍यासुङ।
JOH 19:9 तमा पिलातस येलुङ खोरो खाङ्‍बी नाङ्‍ला लोक्‍नी गल्‍नी येशूला “ख्‍युरुङ कनी नेसुर वावु?” सिनी टिसुङ। यिने येशूकी तीला काङ टिलेन साङ मासुङ।
JOH 19:10 तुक क्‍यानी पिलातसकी येशूला “च्‍यिला ख्‍युरुङ ङला ताम्‍ङे मलाप? ङला ख्‍युरुङला पि तोङ्‍गुप ओङ साङ वे, ग्‍यङ्‍शिङ लोला ग्‍येल ज्‍यितुप ओङ साङ वोतुप ति ख्‍युरुङला छ्‍या मे?” सिनी सिक्‍यासुङ।
JOH 19:11 तमा येशूकी पिलातसला “दोजो कोन्‍छ्‍योककी दुक कितुप ओङ ख्‍युरुङला मानाङ्‍सुङ सिसिन ख्‍योरो ङला काङ साङ कि मुथुपुप्‍जा। तुक क्‍यानी ङला ख्‍योरो लकला चेक तेतुप मी तीला मङ दिक्‍पाकी क्‍येन फोकिवी।” सिनी सुङ्‍सुङ।
JOH 19:12 ती थोसिमा पिलातसकी येशूला पि तोङ्‍गुप छाल्‍सुङ। यिने यहूदीतिवी “दोजो ख्‍योरो दीला पि ताङ्‍सिन ख्‍युरुङ रोमी ग्‍येल्‍वु छ्‍ये कैसरकी खला ङ्‍येन्‍दुप मी राङ मिन। सी खुरुङ ति ग्‍येल्‍वु यिन सिनी सिवे, ती ति कैसरकी तेन्‍दोकला लङ्‍गुप मी यिन।” सिनी च्‍यार ग्‍यप्‍सुङ।
JOH 19:13 ती थोसिमा पिलातसकी येशूला पाङ्‍ला टिनी वानी खोरुङ ति दे येम्‍ज्‍योक तिङ्‍नी जोवु लेङाङ सिरुप दासाला वोतुप ठिम कितुप ठीला देसुङ। (ती दासाला ति हिब्रू ताम्‍ङेला गब्‍बथा सिनी सिनोक।)
JOH 19:14 ती ङ्‍यिमा ति यहूदी थरुप तुछ्‍येन टडिक कितुप ङ्‍यिमा यिनोक। तोजो पेला ङ्‍यिमी गुङगी छ्‍युजी च्‍यिङ्‍ङी गाल्‍नोक। तमा पिलातसकी यहूदीतिवाला “ल्‍होसा, ख्‍यिरा ग्‍येल्‍वु।” सिनी सिक्‍यासुङ।
JOH 19:15 ती थोनी यहूदीतिवी “तीला से, तीला से, तीला ग्‍यङ्‍शिङला कल्‍नी काँडी दाप्‍नी से।” सिनी च्‍यार ग्‍यप्‍सुङ। येलुङ पिलातसकी तिवाला “वुतुङ के ङ दी ख्‍यिरा ग्‍येल्‍वु तीला ग्‍यङ्‍शिङला कल्‍नी काँडी दाप्‍नी सेतुप?” सिनी टिसुङ। तमा कोङ्‍यार छ्‍येतिवी “ङि्‍यरा ति याङ कैसर मिसिन यम्‍बा ग्‍येल्‍वु सु साङ मे।” सिनी सिक्‍यासुङ।
JOH 19:16 तमा पिलातसकी येशूला ग्‍यङ्‍शिङला कल्‍नी काँडी दाप्‍नी सेतुपला तिवाला चेक तेसुङ। तमा मक्‍मीतिवी येशूला टिनी गाल्‍सुङ।
JOH 19:17 तमा येशूकी ग्‍यङ्‍शिङ खुर्नी कप्ली सिरुप दासाला फेप्‍सुङ। ती दासाला ति हिब्रू ताम्‍ङेला गलगथा सिवी।
JOH 19:18 ते लेप्‍सिमा मक्‍मीतिवी खोला ग्‍यङ्‍शिङला काँडी दाप्‍नी काल्‍सुङ। तमा यम्‍बा मिरा ङ्‍यीला च्‍यिक ति खोकी यावी थाकाला ताङ च्‍यिक ति खोकी येन्‍बी थाकाला ग्‍यङ्‍शिङला काँडी दाप्‍नी काल्‍सुङ।
JOH 19:19 पिलातसकी यिकी यी पङ्‍लिङ लोला टिनी ग्‍यङ्‍शिङला ग्‍यक च्‍यिसुङ। ती यिकीला “नासरतकी येशू, यहूदीतिवी ग्‍येल्‍वु” सिनी टिनोक।
JOH 19:20 यहूदीतिवा बङीकी ती यिकी ति रासुङ, च्‍यिलासिसिन येशूला ग्‍यङ्‍शिङ लोला कलुप दासा ति ग्‍येसाकी चाला राङ ख्‍येल्‍गिनोक। ती यिकी ति हिब्रू ताङ रोमी ताङ ग्रीककी ताम्‍ङेला टिवु नोक।
JOH 19:21 यहूदी कोङ्‍यार छ्‍येतिवी पिलातसला दुक सिक्‍यासुङ, “ती यिकीला ‘यहूदीतिवी ग्‍येल्‍वु’ सिनी माटिनी ‘दी मी तीकी खुरुङ यहूदीतिवी ग्‍येल्‍वु यिन सिक्‍यासुङ।’ सिनी टि।”
JOH 19:22 पिलातसकी तिवाला “ङे चुकै टिवे, तुकै राङ देशी।” सिनी सिक्‍यासुङ।
JOH 19:23 मक्‍मीतिवी येशूला ग्‍यङ्‍शिङ लोला कल्‍सिमा खोकी नम्‍सा ति छो ज्‍यी जोनी रे रेला गोसुङ। खोकी नुम्‍बुप यम्‍बा नम्‍सा रिङ्‍बु ति यायु नेमा ज्‍युनी मामु सेक माचेम्‍बा क्‍यानी ल्‍हावु नोक।
JOH 19:24 तुक क्‍यानी तिवी “लो, दाक्‍पु दी मज्‍या ति मर्‍हल्‍वा क्‍यानी ग्‍येन ग्‍यप्‍नी सुला थेप्‍किवे, तीकी खुन डोप।” सिनी केवुल क्‍यासुङ। तुकै च्‍युङ्‍गुप ति “तिवी ङे मज्‍या ति तिवी पर्ला गोसुङ, तमा ङे मज्‍या रिङ्‍बु ति ग्‍येन ग्‍यप्‍सुङ।” सिनी कोन्‍छ्‍योककी सुङला टि वोतुप ति तेरी छेवुला यिन। मक्‍मीतिवी तुकै राङ क्‍यासुङ।
JOH 19:25 येशूला कलुप ग्‍यङ्‍शिङकी चाला राङ खोकी आमा ताङ उरु ताङ क्‍लोपासकी पेर्मी मरियम ताङ मरियम मग्‍दलिनी लानी देनोक।
JOH 19:26 तमा येशूकी खोरो आमा ताङ तीकी चाला खुरुङला ङ्‍यिङ्ज्‍ये कितुप लोमा तीला थोङ्‍नी खोकी खोरे आमा तीला “ममो, दी ति ख्‍योरो पुज्‍युङ यिनो।” सिनी सुङ्‍सुङ।
JOH 19:27 तमा ती ज्‍युक्‍ला खोकी ती लोमा तीला “ल्हो, खो याङ ख्‍योरो आमा यिनो।” सिनी सुङ्‍सुङ। ती पे नेज्‍युनी ती लोमा तीकी येशूकी आमाला खोरो खाङ्‍बा टिनी गल्‍नी खोरो आमाला दोके क्‍यानी शब्‍ज्‍यी क्‍यासुङ।
JOH 19:28 ती ज्‍युक्‍ला येशूकी खोकी कि गोवु लाका तेरी सिन्‍दुप ति हाक्‍कोनोक। तमा कोन्‍छ्‍योककी सुङला टिवु ति छे ज्‍यितुपला येशूकी “ङला कोम्‍बा लासुङ।” सिनी सुङ्‍सुङ।
JOH 19:29 ती पेला ते नेक्‍योक च्‍यिककी नाङ्‍ला गुन्‍डुम छ्‍याङ क्‍युर्वु क्‍येङ्‍नी ज्‍याक्‍नोक। तमा मक्‍मीतिवी ल्हेन्‍दा ति गुन्‍डुम छ्‍याङ क्‍युर्वुला पासिमा ती ति हिसपकी येल्‍काकी गोला ज्‍याक्‍नी येशूकी खला ज्‍याक्‍सुङ।
JOH 19:30 खोकी ती गुन्‍डुम छ्‍याङ क्‍युर्वु ति चेयी च्‍यिप क्‍यासिमा, “त याङ ङे लाका तेरी सिन्‍सुङ।” सिनी सुङ्‍सुङ। तमा खोकी गो कुक क्‍यानी उ छ्‍येसुङ।
JOH 19:31 ती छेर्मु ति ङासोप ङ्‍यिमा टडिक कितुप ङ्‍यिमा यिनोक। ती सला ति खक्‍छ्‍येवु ङासोप ङ्‍यिमा यिन्‍दुप तप्‍की यहूदीतिवी ती ङासोप ङ्‍यिमाला फुङ्‍बुतिवा ग्‍यङ्‍शिङ लोला मुलुशी नोनी फुङ्‍बुतिवी काङ्‍बातिवा च्‍याक्‍नी खुन डो च्‍यि सिनी पिलातसला गोङ्‍बा शुसुङ।
JOH 19:32 तमा मक्‍मीतिवा गल्‍नी येशूकी मुला ग्‍यङ्‍शिङला कलुपतिवी काङ्‍बातिवा रे ताङ रे क्‍यानी च्‍याक्‍सुङ।
JOH 19:33 ती ज्‍युक्‍ला तिवी येशूकी चाला वानी खो टुङ सिन्‍दुप थोङ्‍नी खोकी काङ्‍बा ति माच्‍याक।
JOH 19:34 यिने मक्‍मीतिवी पर्ला मिरा च्‍यिककी दुङ थ्वोनी येशूकी याशिङ्‍बाला सुर्सुङ, तमा तेसुर शार्क्येक ठक ताङ छ्‍यु थेन्‍सुङ।
JOH 19:35 ती थोङ्‍गुप मी तीकी ती ताम्‍ङेकी कोर्ला पङ्‍बु बिन वे। तुक क्‍यानी तीकी पङ्‍बु ति टेङ्‍बु यिन। तीकी खोरो पङ्‍बु बिन्‍दुप ति वुतुङ के च्‍युङ्‍गुप ताम्‍ङे यिन सिनी छ्‍या वे, तमा ख्‍यिरा साङ ती ताम्‍ङेला तेपा किशी सिनी तीकी ती पङ्‍बु बिन्‍दुप यिन।
JOH 19:36 तुकै च्‍युङ्‍गुप ति “खोकी रुकक च्‍यिक साङ मछ्‍याकिवी।” सिनी कोन्‍छ्‍योककी सुङला टिवु ति तेरी छेवुला यिन।
JOH 19:37 तमा येलुङ कोन्‍छ्‍योककी सुङगी यम्‍बा दासाला साङ “खोरुङला दुङ सुरुप तीला तिवी ल्‍हेवितो।” सिनी टि वे।
JOH 19:38 ती ज्‍युक्‍ला अरिमाथिया नेमा वावु योसेफ सिरुप मी ति पिलातसकी चाला गल्‍नी येशूकी फुङ्‍बु ति खुर्नी डो च्‍यि सिनी गोङ्‍बा शुसुङ। ती योसेफ ति येशूला तेपा कितुप मी यिनोक, यिन्‍सिनाङ यहूदीतिवाला ज्‍यिवा लानी तीकी ती ताम्‍ङे ति छ्‍याकला राङ ज्‍याक्‍नोक। तमा पिलातसकी येशूकी फुङ्‍बु खुर डो च्‍यिसिमा ती ति गल्‍नी येशूकी फुङ्‍बु ति ग्‍यङ्‍शिङ लो नेमा मर पाप्‍सुङ।
JOH 19:39 तमा गोमाला के येशूला ठेतुपला नुपला गलुप निकोदेमस साङ टि जङ्‍बु खाप मुर्रकी फे ताङ एलवाकी फे र्‍हेवु किलो खल ज्‍यिक ताङ च्‍युक्‍सुम चोयी खुर्नी ते वासुङ।
JOH 19:40 तमा तिवा ङ्‍यिकरकी यहूदीतिवी कल्‍दोक कितुप लुक्‍सु दोके क्‍यानी ती र्‍हेवु फे ति येशूकी फुङ्‍बुला कुनी रा नेङेनकी नाङ्‍ला टिल्‍सुङ।
JOH 19:41 ते येशूला ग्‍यङ्‍शिङला कलुप दासाला दुम्‍डोक यी नोक। ती दुम्‍डोकला गोमाला सी रो साङ माज्‍यकुप टककी फुक सम्‍बा यी नोक।
JOH 19:42 ती छेर्मु ति ङासोप ङ्‍यिमा टडिक कितुप ङ्‍यिमा यिनोक, तमा ती शेप मीला ज्‍योकुप टककी फुक ति चाला राङ वोतुप तप्‍की तिवी येशूकी फुङ्‍बु ति ती नाङ्‍ला ज्‍याक्‍सुङ।
JOH 20:1 दिन्‍जाकी ङ्‍यिमा थल्‍माला टोपला टेताङ मरियम मग्‍दलिनी ति येशूकी फुङ्‍बु ज्‍यकुप टककी फुकला गाल। ते गल्‍नी ल्‍हासालेन्‍सिन ती टककी फुककी खला च्‍येनी ज्‍यकुप दो ति तेसुर दोवु ति तीकी थोङ्‍नोक।
JOH 20:2 ती थोङ्‍नी ती ति तेसुर सिमोन पत्रुस ताङ येशूकी ङ्‍यिङ्‍ज्‍ये क्‍या नङ्‍गुप यम्‍बा लोमा तीकी चाला छ्‍योङ्‍बाल ग्‍यम गल्‍नी, “मी ललाइकी चोवोकी फुङ्‍बु याङ टककी फुक नेसुर तेन्‍नी गाल्‍नोक। तमा तिवी ती फुङ्‍बु ति कनी ज्‍यकुप यिन सिनी ङ्‍यिराङला छ्‍या मे।” सिनी सिक्‍यासुङ।
JOH 20:3 तमा पत्रुस ताङ यम्‍बा लोमा ङ्‍यिकर शेप मीला ज्‍योकुप टककी फुक नेवा गाल्‍सुङ।
JOH 20:4 तिवा ङ्‍यिकर मुला राङ छ्‍योङ्‍बाल ग्‍यम डोयी कितुप पेला यम्‍बा लोमा ति पत्रुस सिनाङ गोमा कोर्नी ती टककी फुकला लेप्‍सुङ।
JOH 20:5 ते लेप्‍नी तीकी कुक क्‍यानी ती टककी फुककी नाङ्‍ला ल्‍हासियाङ ते रा नेङेन तिराङ वोतुप थोङ्‍नोक, यिने ती ति टककी फुककी नाङ्‍ला माशु।
JOH 20:6 सिमोन पत्रुस साङ तीकी तिङ्‍ला लेप्सुङ। तमा तीकी टककी फुककी नाङ्‍ला शुनी ल्‍हासालेन्‍सिन ते रा नेङेन वोतुप ताङ
JOH 20:7 येशूकी फुङ्‍बुकी गोला टुम्‍बुप रा ति रा नेङेनकी मुला मेनी कुतुक तप ग्‍यप्‍नी वोतुप थोङ्‍सुङ।
JOH 20:8 ती ज्‍युक्‍ला पत्रुस सिनाङ गोमाला ती टककी फुकला लेपुप लोमा ति साङ ती टककी फुककी नाङ्‍ला शुसुङ। तमा ल्‍हासिमा तीकी येशू टुङ्‍गुप ने ङोसु लावु ति तेपा क्‍यासुङ।
JOH 20:9 तिवी येशू टुङ्‍गुप नेसुर ङोसु लङ गोकिवी सिनी टिवु कोन्‍छ्‍योककी सुङ ति तरोङ साङ हाक्‍माकोनोक।
JOH 20:10 ती ज्‍युक्‍ला ती लोमा ङ्‍यिवु ति खोप्‍रे खाङ्‍बा लोक्‍सुङ।
JOH 20:11 यिने मरियम ति शेप मीला ज्‍योकुप टककी फुककी फिला देनी ङुयी नोक। तीकी ङुयी कुक क्‍यानी ती फुककी नाङ्‍ला ल्‍हासालेन्‍सिन
JOH 20:12 ते मज्‍या कर्मु कोन्‍दुप देवाच्‍येनकी लेन क्‍योलुप थु मिरा ङ्‍यी देतुप थोङ्‍सुङ। तिवा च्‍यिक ति येशूकी फुङ्‍बी गो ज्‍यकुप थाकाला, यम्‍बा ति येशूकी फुङ्‍बी काङ्‍बा ज्‍यकुप थाकाला देन नोक।
JOH 20:13 तिवी मरियमला “ओ नुमो, ख्‍युरुङ च्‍यिला ङिवी?” सिक्‍यानोक। तमा मरियमकी तिवाला “मी ललाइकी ङे चोवोकी फुङ्‍बु खुन गाल्‍नोक, तीकी ती फुङ्‍बुला कनी ज्‍यकुप यिन ङला छ्‍या मे।” सिनी सिक्‍यासुङ।
JOH 20:14 मरियमकी तुक सियी तिङ्‍ला ग्‍युर्नी ल्‍हासालेन्‍सिन ते येशू लानी ज्‍यु वोतुप थोङ्‍नोक, यिने खो येशू राङ यिन सिनी तीकी ङो माशेनोक।
JOH 20:15 तमा येशूकी तीला “नुमो, ख्‍युरुङ च्‍यिला ङिवी? सुला छोल्‍गिवी?” सिनी टि नाङ्‍सुङ। यिने मरियमकी नासामला खो ति दुम्‍डोक ल्‍हाप मी यिन्‍दे नोनी, “अच्‍यो, अच्‍यी खोकी फुङ्‍बु ति खुन फेवु यिन्‍सिन ती ति कनी ज्‍याङ वे ङला सुङ्‍नी, ङ खोकी फुङ्‍बुला खुर्नी डोयी।” सिनी सिक्‍यासुङ।
JOH 20:16 तमा येशूकी तीला “मरियम!” सिनी सुङ्‍सुङ। तमा मरियमकी खोकी थाकाला ग्‍युर्नी हिब्रू ताम्‍ङेला “रब्‍बोनी।” सिनी सिक्‍यासुङ। (तीकी तेन्‍दोक ति गेकेन सिक्‍यावु यिन।)
JOH 20:17 तमा येशूकी तीला “ङला जिम जिम्‍वा माज्‍योक, च्‍यिलासिसिन ङ तरोङ साङ पपी चाला लोक्‍नी मागल वे। यिने ख्‍युरुङ ङे लोमातिवी चाला गल्‍नी ख्‍यिरा पपा यिन्‍दुप ङे पपा, ख्‍यिरा कोन्‍छ्‍योक यिन्‍दुप ङे कोन्‍छ्‍योककी ते ङ लोक्नी डोयी वे सिनी लोप।” सिनी सुङ्‍सुङ।
JOH 20:18 तमा मरियम मग्‍दलिनी ति येशूकी लोमातिवी चाला गल्‍नी चोवो येशूला खोरो थोङ्‍गुप ताङ खोकी खोरुङला सुङ्‍गुप ताम्‍ङेतिवा तेरी तिवाला लाप्‍सुङ।
JOH 20:19 ती जा ङ्‍यिमी गोमु राङ लोमातिवा मुला जोम्‍नी गो च्‍येनी देनोक, च्‍यिलासिसिन तिवा यहूदी गोमा कितुप छ्‍येतिवाला ज्‍यिवा क्‍यासुङ। ती पेला राङ येशू फेप्‍नी तिवी पर्ला शेङ्‍नी, “ख्‍यिराङला लोदिमु वुङ्‍शी।” सिनी सुङ्‍सुङ।
JOH 20:20 तुक सुङ्‍सिमा खोकी तिवाला खोरे छ्‍याकतिवाला काँडी दापुप म ताङ याशिङ्‍बाला दुङ सुरुप म ति छ्‍या तेन्‍सुङ। चोवोला थोङ्‍सिमा लोमातिवा छासे गा क्‍यासुङ।
JOH 20:21 येलुङ येशूकी तिवाला “ख्‍यिराङला लोदिमु वुङ्‍शी। पपी ङला तङ्‍गुप दोके ङ ख्‍यिराङला तोङ्‍यिनो।” सिनी सुङ्‍सुङ।
JOH 20:22 खोकी तुक सुङ्‍सिमा तिवाला उ थ्‍वोनी पुयी सिरा दुक सुङ्‍सुङ, “कोन्‍छ्‍योककी थु चाङ्‍मा लोसा।
JOH 20:23 ख्‍यिरा सी दिक्‍पाला माफ तेर्किवे, कोन्‍छ्‍योककी साङ ती दिक्‍पाला माफ नङ्‍गितो। तमा माफ माबिन्‍सिन ती दिक्‍पा ति तुकै राङ लुकितो।”
JOH 20:24 येशूकी लोमा मिरा च्‍यिङ्‍ङीतिवी पर्ला दिदुमस सिरुप थोमा ति येशू फेपुप पेला तिवी मुला मिन्‍दुक।
JOH 20:25 तुक क्‍यानी यम्‍बा लोमातिवी तीला “ङि्‍यरा याङ चोवोला थोङ्‍सुङ।” सिनी सिक्‍यासिनाङ तीकी “ङे खोकी छ्‍याकला काँडी दापुप म ति माथोङ्‍वा सेक ताङ ती मला ङे थेप्‍तोक च्‍यिनी माल्हावा सेक ताङ खोकी याशिङ्‍बाला दुङ सुरुप मला ङे थेप्‍तोक च्‍यिनी माल्हावा सेक्‍ला ङ ती ताम्‍ङेला तेपा मिकिवी।” सिनी सिक्‍यासुङ।
JOH 20:26 दिन्‍जा च्‍यिक तिङ्‍ला येलुङ लोमातिवा खाङ्‍बी नाङ्‍ला जोम्‍नोक, ती पेला थोमा साङ तिवी मुला राङ नोक। तिवा गो च्‍येनी देन्‍नोक, यिने येशू फेप्‍नी तिवी पर्ला शेङ्‍नी तिवाला “ख्‍यिराङला लोदिमु वुङ्‍शी।” सिनी सुङ्‍सुङ।
JOH 20:27 तमा खोकी थोमाला “ख्‍योरो लाक्‍पी थेप्‍तोक ङे लाक्‍पाला ज्‍याक्‍नी ल्हो, तमा ख्‍योरो लाक्‍पा ङे याशिङ्‍बाला ज्योक। यिन्‍दे मिन्‍दे नो माक्‍यानी ङ सेन्‍बु लावु ति तेपा की।” सिनी सुङ्‍सुङ।
JOH 20:28 तमा थोमाकी खोला “ओ ङे चोवो, ओ ङे कोन्‍छ्‍योक।” सिनी सिक्‍यासुङ।
JOH 20:29 तमा येशूकी तीला “ख्‍योरो ङला थोङ्‍गुप तप्‍की तेपा क्‍यावु यिन? ङला माथोङ्‍सिनाङ तेपा कितुपतिवा मोलाम थोपुप यिनो।” सिनी सुङ्‍सुङ।
JOH 20:30 दी थेपकी नाङ्‍ला माटिवु यम्‍बा हलेवु ततिवा साङ येशूकी खोरो लोमातिवी थोङ्‍दाङला बङी छ्‍या तेन्‍सुङ।
JOH 20:31 यिने दी थेप टिवु तेन्‍दोक ति येशू ति ख्रीष्‍ट राङ यिन्‍दुप ताङ कोन्‍छ्‍योककी सेवु यिन्‍दुप ति ख्‍यिरा तेपा किशी, तमा खोला तेपा क्‍यानी ख्‍यिराङला नाम्‍साङ मिशिवु मिजी ङ्‍येशी सिनी यिन।
JOH 21:1 ती ज्‍युक्‍ला येलुङ येशू तिबेरियास ग्‍येम्‍छोकी गारीला लोमातिवी चाला छ्‍यार्सुङ। खो दुकै क्‍यानी छ्‍यरुप यिन।
JOH 21:2 ते सिमोन पत्रुस, दिदुमस सिरुप थोमा, गालीलकी काना ग्‍येसाकी नथानेल, जब्‍दियाकी पुज्‍युङतिवा ताङ यम्‍बा येशूकी लोमा मिरा ङ्‍यी तेरी मुला राङ जोम नोक।
JOH 21:3 सिमोन पत्रुसकी तिवाला “ङ याङ ङ्‍या जिम्‍बुपला डोयी।” सिनी सिक्‍यासिमा तिवी पत्रुसला “ङि्‍यराङ साङ ख्‍योरो मुला राङ डोयी।” सिनी सिक्‍यासुङ। तमा तिवा मुला राङ टुला जेनी गाल्‍सुङ। यिने ती नुपला तिवी ङ्‍या च्‍यिक साङ जिम माथुप।
JOH 21:4 ती सला टोपला नाम लासिमा येशू ग्‍येम्‍छो गारीला लानी ज्‍युनोक, यिने लोमातिवी खो ति येशू राङ यिन सिनी ङो माशे।
JOH 21:5 ती पेला येशूकी तिवाला “आङातिवा, काङ ख्‍यिरा ङ्‍या जिम्‍बुप?” सिनी टि नाङ्‍सुङ। तमा तिवी खोला “मिन, काङ साङ माजिम वे।” सिनी सिक्‍यासुङ।
JOH 21:6 खोकी तिवाला “ख्‍यिरा जाल ति टुकी यावी थाकाला ग्‍योप, तुक क्‍यासिन ङ्‍या जिम्‍गितो।” सिनी सुङ्‍सुङ। तमा तिवी जाल ग्‍यप्‍सिमा ङ्‍या कशेन थोप्‍नी तिवी जाल थेन माथुप्‍नोक।
JOH 21:7 ती पेला येशूकी ङ्‍यिङ्‍ज्‍येवु लोमा तीकी पत्रुसला “खो याङ चोवो के यिनोक।” सिनी सिक्‍यासुङ। खो चोवो यिन सिरुप ताम्‍ङे थोनी पत्रुसकी खोरो पिनी ज्‍यकुप खयिटो टिल्‍नी ग्‍येम्‍छो नाङ्‍ला छ्‍योङ्‍बाल ग्‍यप्‍सुङ।
JOH 21:8 यिने यम्‍बा लोमातिवा टी नाङ्‍ला राङ देनी ङ्‍या क्‍येङ्‍गुप जाल ति थेनिन सिरा ग्‍येम्‍छो गारी नेवा वुङ्‍यिन नोक, च्‍यिलासिसिन तिवा ग्‍येम्‍छो गारी नेसुर थाक्‍रिङ्‍बु मेनी मिटर सयी च्‍यिक चोयी तिराङ फेचेक नोक।
JOH 21:9 तमा तिवा ग्‍येम्‍छो गारीला पाप्‍सिमा ल्‍हासालेन्‍सिन ते मेताक खला ङ्‍या ज्‍यकुप ताङ शुब्‍ज्‍याङ साङ ज्‍यकुप थोङ्‍सुङ।
JOH 21:10 तमा येशूकी तिवाला “ख्‍यिरा तन्‍दा मलोक जिम्‍बुप ङ्‍या चेयी दे खुर शोक।” सिनी सुङ्‍सुङ।
JOH 21:11 ती पेला सिमोन पत्रुस ति येलुङ टुला जेनी ङ्‍या बङी क्‍येङ्‍गुप जाल ति ग्‍येम्‍छो गारीला थेन्‍सुङ। ती जालकी नाङ्‍ला ख्‍येलुप ङ्‍या ति तेरी क्‍यानी सयी च्‍यिक ताङ खाल ङ ताङ सुम चोके नोक। ती जालकी नाङ्‍ला तोजो ङ्‍या मङ्‍मु थोप्‍सिनाङ जाल ति माराल।
JOH 21:12 तमा येशूकी तिवाला “लो, वानी खयुप सो।” सिनी सुङ्‍सुङ। ती पेला लोमातिवी पर्ला सी साङ खोला सु यिन सिनी टेप ङाडेङ माक्‍या, च्‍यिलासिसिन खो चोवो यिन सिरुप ति तिवी ङो शेनोक।
JOH 21:13 तमा येशू फेप्‍नी शुब्‍ज्‍याङ लानी तिवाला नाङ्‍सुङ, तमा तुक राङ क्‍यानी ङ्‍या साङ तिवाला नाङ्‍सुङ।
JOH 21:14 दी ति येशू टुङ्‍नी येलुङ ङोसु लासिमा लोमातिवाला छ्‍यरुप थेङ्‍मा सुम्‍बा यिन।
JOH 21:15 तमा तिवी खयुप सोनी सिन्‍सिमा येशूकी सिमोन पत्रुसला “यूहन्‍नाकी पुज्‍युङ सिमोन, ख्‍योरो ङला दी यम्‍बातिवी सिनाङ मङ ङ्‍यिङ्‍ज्‍ये किवी?” सिनी टिसुङ। तमा पत्रुसकी खोला “लसे चोवो, चोवोला ङे ङ्‍यिङ्‍ज्‍ये क्‍यावु ति चोवोला राङ छ्‍या वे।” सिनी सिक्‍यासुङ। तमा येशूकी तीला “ख्‍युरुङ ङे लुक रुकतिवाला चोसा।” सिनी सुङ्‍सुङ।
JOH 21:16 थेङ्‍मा ङ्‍यिवाला येलुङ येशूकी पत्रुसला “यूहन्‍नाकी पुज्‍युङ सिमोन, ख्‍युरुङ वुतुङ के ङला ङ्‍यिङ्‍ज्‍ये किवी?” सिनी टि नाङ्‍सुङ। तमा पत्रुसकी “लसे चोवो, चोवोला ङे ङि्‍यङ्‍ज्‍ये क्‍यावु ति चोवोला राङ छ्‍या वे।” सिनी सिक्‍यासुङ। तमा खोकी तीला “ख्‍युरुङ ङे लुकतिवाला ल्‍होसा।” सिनी सुङ्‍सुङ।
JOH 21:17 तमा थेङ्‍मा सुम्‍बाला येशूकी पत्रुसला “यूहन्‍नाकी पुज्‍युङ सिमोन, काङ ख्‍युरुङ ङला ङ्‍यिङ्‍ज्‍ये किवी?” सिनी टि नाङ्‍सुङ। खोकी थेङ्‍मा सुम सेक “ख्‍योरो ङला ङ्‍यिङ्‍ज्‍ये किवी?” सिनी टिन नङ्‍सिमा पत्रुसला छासे पप लानी येशूला “चोवो, चोवोला राङ तेरी छ्‍या वे। चोवोला ङे ङ्‍यिङ्‍ज्‍ये क्‍यावु ति चोवोला राङ छ्‍या वे।” सिनी सिक्‍यासुङ। येलुङ येशूकी पत्रुसला सुङ्‍सुङ, “ख्‍योरो ङे लुकतिवाला चोसा।
JOH 21:18 वुतुङ के ङ ख्‍युरुङला सिरिन, ख्‍युरुङ ज्‍येन्‍दा वोतुप पेला याङ ख्‍योरो करा ख्‍योरो राङ च्‍यिनी ख्‍युरुङ कनी डोयी दे लङ्‍गिवे, ते राङ गाल्‍सुङ। यिने ख्‍युरुङ गावा गल्‍सिमा ख्‍योरो लाक्‍पा क्‍योङ्‍गितो, तमा मी यम्‍बी राङ ख्‍योरो करा च्‍यि बिन्‍नी ख्‍युरुङ डोयी मेदेवु दासाला टिनी डितो।”
JOH 21:19 ती ति पत्रुस चुक क्‍यानी शिनी कोन्‍छ्‍योकला मोवा तेर्किवी सिरुप कोर्ला येशूकी सुङ्‍गुप यिन। तुक सुङ्‍सिमा येशूकी पत्रुसला “ङे तिङ्‍ला तिङ्‍यो!” सिनी सुङ्‍सुङ।
JOH 21:20 तमा पत्रुसकी तिङ्‍ला ग्‍युर्नी ल्‍हासियाङ येशूकी ङ्‍यिङ्‍ज्‍येवु लोमा ति तिवी तिङ्‍ला वुङ्‍यिन कितुप थोङ्‍सुङ। ती लोमा ति येशूला जिम्‍बुप सिनाङ गोमाला गोमी समा साप पेला येशूकी छेकोकला ङ्‍यिम्‍बुर क्‍यानी, “चोवो, चोवोला जिम तेरुप ति सु यिन?” सिनी टेप ति यिन।
JOH 21:21 तीला थोङ्‍सिमा पत्रुसकी येशूला “चोवो, तीला ति चुकै च्‍युङ्‍गिवी?” सिनी टिसुङ।
JOH 21:22 तमा येशूकी तीला “ङ माङुवा सेक तीला सेन्‍बु देशी सिरुप ङे नो क्‍यासिनाङ ती ताम्‍ङे ति ख्‍युरुङला काङ गोसुङ? ख्‍युरुङ ति ङे तिङ्‍ला तिङ्‍यो।” सिनी सुङ्‍सुङ।
JOH 21:23 येशूकी तुक सुङ्‍गुप ति खोकी ङ्‍यिङ्‍ज्‍येवु लोमा ति मिशिते सिनी खोला तेपा कितुपतिवी पर्ला टाम्‍सुङ। यिने येशूकी ती लोमा ति मिशिवी सिनी सुङ्‍गुप मिन, “ङ माङुवा सेक तीला सेन्‍बु देशी सिरुप ङे नो क्‍यासिनाङ ती ति ख्‍युरुङला काङ गोसुङ?” सिनी सुङ्‍गुप तिराङ यिन।
JOH 21:24 दी तेरी ताम्‍ङेतिवा पङ्‍बु तेरुप ताङ टिकुप ति ती लोमा राङ यिन। तीकी बिन्‍दुप पङ्‍बु ति टेङ्‍बु यिन सिरुप ति ङ्‍यिराङला छ्‍या वे।
JOH 21:25 येशूकी क्‍या नङ्‍गुप यम्‍बा हलेवु लाकातिवा साङ बङी वे। दोजो ती तेरीकी कोर्ला रे ताङ रे क्‍यानी टिवु यिन्‍सिन ती टिवु थेपतिवा दी जम्‍बुलिङला साङ ज्‍योकुपला मोशोङ्‍दे यिन्‍दे।
ACT 1:1 थियोफिलस ला, येशूकी क्‍या नङ्‍गुप ताङ लोपुपला गो चुवु तेरी ताम्‍ङेतिवा थल्‍माला ङे टिवु थेप नाङ्‍ला टि वे।
ACT 1:2 ती थेप नाङ्ला खोकी पेन नङ्‍गुप लोमातिवाला कोन्‍छ्‍योककी थु चाङ्‍मा नेमा क नङ्सिमा खो देवाच्‍येनला तेङ फेवु छेर्मु सेककी ताम्‍ङे ति तेरी वे।
ACT 1:3 खोकी दुक्‍पा खुर्नी ङोसु लासिमा तिवाला खो ङोसु लावु ति हाक्‍को ज्‍यितुपला पङ्‍बु बङी छ्‍या तेन्‍सुङ। तमा ङ्‍यिमा खल ङ्‍यी सेक थेङ्‍मा अलायी खोरो लोमा छ्‍येतिवी पर्ला राङ छ्‍यर्नी तिवाला कोन्‍छ्‍योककी ग्‍येल्‍खापकी कोर्ला सुङ्‍सुङ।
ACT 1:4 खोरो लोमा छ्‍येतिवी मुला ज्‍युवु पेला खोकी तिवाला दुक सिनी क नाङ्‍सुङ, “ख्‍यिराङ यरूशलेम नेवा कनी साङ माडो, यिने कोन्‍छ्‍योककी ख्‍यिराङला नङ्‍गिवी सिनी थाक्‍छ्‍येन नङ्‍गुप ताम्‍ङेला गुनी देता। तीकी कोर्ला ङे गोमाला के ख्‍यिराङला सिक्‍यायिन।
ACT 1:5 यूहन्‍नाकी याङ ख्‍यिराङला छ्‍युकी बप्‍तिस्‍मा बिन्‍सुङ, यिने त ङ्‍यिमा चेयी ज्‍युक्‍ला ख्‍यिराङला कोन्‍छ्‍योककी थु चाङ्‍माकी बप्‍तिस्‍मा थोप्‍कितो।”
ACT 1:6 येशू तिवा मुला राङ जोम्‍नी वोतुप पेला लोमा छ्‍येतिवी येशूला टिसुङ, “चोवो, येलुङ इस्राएल लुङ्‍बा ति रोमी लुङ्‍बा नेसुर पि तोङ्‍गुप तुजे ति तन्‍दा राङ यिन?”
ACT 1:7 तमा खोकी लोमातिवाला सुङ्‍सुङ, “दी तुजे ति कोन्‍छ्‍योककी ओङ्‍ज्‍येन नेमा राङ खोकी तेन्‍तेन क्‍यानी वे। ती ति ख्‍यिरा हाक्‍को गोवु लाका मिन।
ACT 1:8 यिने कोन्‍छ्‍योककी थु चाङ्‍मा ख्‍यिरा खला फेप्‍सिमा ख्‍यिरा ओङ ङ्‍येनी यरूशलेमला ताङ तेरी यहूदियाला ताङ सामरियाला ताङ जम्‍बुलिङकी दासा अन्‍तिम सेक्‍ला ख्‍यिरा ङे कोर्ला पङ्‍बु तेर्कितो।”
ACT 1:9 खोकी तुक सुङ्‍सिमा लोमातिवी ल्‍हयी ल्‍हयी राङ कोन्‍छ्‍योककी खोला येर देवाच्‍येन ने टि फेप्‍सुङ। तमा मुक्‍पी पर्ने तोक तोर्सुङ।
ACT 1:10 लोमातिवी खो नाम ने टि फेवु ति ल्‍हयी वोतुप पेला शार्क्येक मज्‍या कर्मु कोन्‍दुप मिरा ङ्‍यी तिवी चिप्‍ला छ्‍यर्नी
ACT 1:11 तिवाला सिक्‍यासुङ, “ओ गालीलकी मीतिवा, ख्‍यिराङ च्‍यिला दे लानी नामला ल्‍हानी देकिवी? तन्‍दा ख्‍यिरा पर नेमा येर देवाच्‍येनला टि फेवु येशू ति तन्‍दा चुक क्‍यानी ख्‍यिरा ल्‍हयी ल्‍हयी देवाच्‍येन ने टि फेप्‍वे, तुक राङ क्‍यानी खो येलुङ दी जम्‍बुलिङला लोक्‍नी फेप्‍किवी।”
ACT 1:12 ती ज्‍युक्‍ला लोमा छ्‍येतिवा जैतुन पम्‍दोक नेमा यरूशलेमला लोक्‍सुङ। ती जैतुन पम्‍दोक ति यरूशलेम ने अला थाक्‍रिङ्‍बु मिन्‍दुक।
ACT 1:13 तिवा यरूशलेम लेप्‍सिमा खोप्‍राङ देतुप खाङ्‍बी तेङाङ तेला गाल। तिवा ति पत्रुस ताङ यूहन्‍ना ताङ याकूब ताङ अन्‍द्रियास ताङ फिलिप ताङ थोमा ताङ बारथोलोमाइ ताङ मत्ती ताङ अल्‍फयसकी पुज्‍युङ याकूब ताङ जिलोट सिनी ङो शेवु सिमोन ताङ याकूबकी पुज्‍युङ यहूदा यिनोक।
ACT 1:14 ती लोमातिवा ति पुम्‍पेजातिवा ताङ येशूकी आमा मरियम ताङ खोकी नुपतिवा ताङ मुला जोम्‍नी सेम च्‍यिक राङ थिन्‍नी मोपोर क्‍या क्‍यावा देकिनोक।
ACT 1:15 ती पेला ते तेपा कितुपतिवा मी मिरा सयी च्‍यिक ताङ खल ज्‍यिक चोयी जोम्‍नोक। तमा पत्रुसकी तिवी पर्ला टङी लानी सिक्‍यासुङ,
ACT 1:16 “ओ अच्‍युनुपतिवा, यहूदाकी येशूला जिम तेरुपकी कोर्ला याङ दाऊदकी ख नेमा कोन्‍छ्‍योककी थु चाङ्‍माकी गोमाला के सुङ्‍गुप यिन। कोन्‍छ्‍योककी सुङगी नाङ्‍ला वोतुप ती सुङ ति तेरी छेसुङ।
ACT 1:17 यहूदा ति ङ्‍यिराङ दोके कोन्‍छ्‍योकला शब्‍ज्‍यी बुलुपला येशूकी पेतुप मी यिन।
ACT 1:18 यिने यहूदाकी लाका दुक्‍टा क्‍यानी शम्‍बुप टङ्‍गाकी शिङ यी ङ्‍योसुङ। तमा ती ज्‍युक्‍ला ती ति पिचर्मा लुम्‍नी सुप कानी ग्‍येमाक तिरुङ तेरी पाङ्‍ला थेन्‍सुङ।
ACT 1:19 ती ताम्‍ङे ति यरूशलेमकी मीतिवा तेरीला हाक्‍कोसुङ। तमा ती शिङगी मिङ ति तिवी ताम्‍ङेला आखेल्‍दामा सिनी ज्‍याक्‍सुङ। तीकी तेन्‍दोक ति ठककी शिङ सिक्‍यावु यिन।”
ACT 1:20 येलुङ पत्रुसकी सिक्‍यासुङ, “भजनसंग्रहला दुक सिनी टि वे, ‘तीकी खाङ्‍बा ति तोङ्‍बा सिङी डोशी। तमा ते सु साङ मेदेशी। तीकी ओङ साङ मी यम्‍बी राङ ठोक्‍शी।’
ACT 1:21 तुक क्‍यानी चोवो येशू ङ्‍यिरा मुला वोतुप पेला नरी ङ्‍यिरा मुला राङ फार छुर युकुप मीतिवी पर नेमा यहूदाकी छापला मी मिरा च्‍यिक पेनी ज्‍योक गोकिवी।
ACT 1:22 ती मी ति यूहन्‍नाकी बप्‍तिस्‍मा तेरुप पेला नेज्‍युनी चोवो येशू ङ्‍यिरे पर नेमा देवाच्‍येनला टि फेवु तुजे सेक ङ्‍यिरा मुला राङ वोतुप ति वुङ गोकिवी। च्‍यिलासिसिन ती मी तीकी येशू टुङ्‍नी ङोसु लावु ताम्‍ङेकी पङ्‍बु ति ङ्‍यिरा मुला राङ तेर गोकिवी।”
ACT 1:23 तुक क्‍यानी तिवी बारसाबास सिरुप योसेफ (तीला युस्‍तस साङ सिनोक) ताङ मतियास ति दी लाका कि छ्‍योवु वे सिनी सिक्‍यासिमा
ACT 1:24 दुक सिनी मोपोर क्‍यासुङ, “ओ, तेरी मीतिवी सेमगी ताम्‍ङे हाक्‍कोवु चोवो कोन्‍छ्‍योक, दी मिरा ङ्‍यिवुकी पर्ला सुला बेतुप ति कोन्‍छ्‍योककी नोवा नोके, ती ति ङ्‍यिराङला छ्‍या तेन नाङ।
ACT 1:25 तमा ती पेतुप मी ति लोमा छ्‍येकी छापला देनी शब्‍ज्‍यी कितुप लाका कि थुप्‍शी। च्‍यिलासिसिन ती शब्‍ज्‍यी बुलुप लाका ति यहूदाकी क्‍युर ज्‍याक्‍नी ती ति ङ्‍येलाला गाल।”
ACT 1:26 ती ज्‍युक्‍ला तिवी ती पेतुप मिरा ङ्‍यीकी पर्ला ग्‍येन ग्‍येप्‍सुङ। तमा ग्‍येन ति मतियासकी मिङला ख्‍येल्‍नी ती ति लोमा छ्‍ये मिरा च्‍युच्‍यिक ताङ मुला चिसुङ।
ACT 2:1 ती ज्‍युक्‍ला यहूदीतिवी पेन्‍तिकोस सिरुप तुछ्‍येन यी लेसुङ। ती तुछ्‍येनला तेपा कितुप मीतिवा दासा च्‍यिकला राङ जोम्‍नोक।
ACT 2:2 ती पेला शार्क्येक देवाच्‍येन नेमा वोरु यी वावु तिवी थोसुङ। ती वोरु ति कशेन लुङ ग्‍येर्पुकी वोरु दोके नोक। तमा तिवा देन वोतुप खाङ्‍बा तिरुङ क्‍येङ्‍सुङ।
ACT 2:3 तमा ते मे मेवुर च्‍यिन्‍दै वावु ति तिवी थोङ्‍सुङ। ती मेवुर ति छो छो गल्‍नी तिवा रे रेकी गो खला देसुङ।
ACT 2:4 तमा ते जोम्‍बुपतिवा तेरी कोन्‍छ्‍योककी थु चाङ्‍माकी क्‍येङ्‍नी थु चाङ्‍माकी ओङला ग्‍येताम कुतुक कुतुकला तिवी ताम्‍ङे कितुप छाल्‍सुङ।
ACT 2:5 ती पेला जम्‍बुलिङकी तेरी लुङ्‍बा लुङ्‍बा नेसुर कोन्‍छ्‍योकला सोवा देकुप यहूदीतिवा साङ ती तुछ्‍येनकी थोक्‍ला यरूशलेमला वानोक।
ACT 2:6 तुका वोरु थोसिमा मी माङ्‍छ्‍योक ते जोम्‍नी छासे हलेवा क्‍यासुङ। च्‍यिलासिसिन ते तिवी दाक दाक्‍पी ग्‍येतामला ताम्‍ङे क्‍यावु ति थोसुङ।
ACT 2:7 तमा तिवा हलेवा लानी च्‍यिककी च्‍यिकला सिक्‍यासुङ, “काङ दी दाक्‍पी ग्‍येतामला ताम्‍ङे लपुपतिवा याङ गालीलकी मीतिवा मिन?
ACT 2:8 तुकै यिन्‍सिन दिवी चुक क्‍यानी दाक्‍पु तेरीकी ग्‍येतामला ताम्‍ङे लप थुप्‍किवी?
ACT 2:9 दे याङ दाक्‍पु पार्थीतिवा ताङ मादीतिवा ताङ एलामीतिवा ताङ मेसोपोटामिया ताङ यहूदिया ताङ कापाडोकिया ताङ पोन्‍टस ताङ एशियाकी मीतिवा ताङ
ACT 2:10 फ्रिगिया ताङ पामफिलिया ताङ मिश्र ताङ कुरेनीला ख्‍येलुप लिबियाकी दासा ताङ रोम नेसुर वावु मीतिवा (तिवा ति रोम नेमा वावु यहूदी ताङ यम्‍बा यहूदी छ्‍योला शुवु छ्‍यिग्‍यपकी मीतिवा यिन) ताङ
ACT 2:11 क्रेटला देतुप मीतिवा ताङ अरबीतिवा साङ देनी वे। तमा ङ्‍यिराङ दाक दाक्‍पी ग्‍येतामला कोन्‍छ्‍योककी क्‍या नङ्‍गुप हलेवु लाकाकी कोर्ला तिवी ताम्‍ङे क्‍यावु ति थोयी वे।”
ACT 2:12 तमा तिवा तेरी हलेवा लानी काङ कितुप काङ कितुप गल्‍नी दीकी तेन्‍दोक ति काङ यिनाङ सिनी च्‍यिककी च्‍यिकला टिसुङ।
ACT 2:13 यिने मी माङ्‍छ्‍योककी पर नेमा ललइकी मारे ताङ्‍नी, “दिवा याङ गुन्‍डुम छ्‍याङ थुनी जिनोक।” सिनी सिक्‍यासुङ।
ACT 2:14 तमा पत्रुसकी लोमा छ्‍ये मिरा च्‍युच्‍यिक ताङ मुला खोक लानी थोर ग्‍यकिन सिरा तिवाला सिक्‍यासुङ, “ओ यहूदिया ताङ यरूशलेमला देतुप मीतिवा, ङे सिक्‍यावु ताम्‍ङे ङ्‍येन्‍नी हाक्‍कोवा की!
ACT 2:15 ख्‍यिरा नासाम तङ्‍गुप दोके दिवा माजी वे, च्‍यिलासिसिन तन्‍दा याङ मलोक टोपकी छ्‍युजी गु तिराङ गल वे।
ACT 2:16 यिने दीकी कोर्ला कोन्‍छ्‍योककी लुङ्‍तेम्‍बा योएलकी दुक सिक्‍या वे।
ACT 2:17 ‘ज्‍युक्‍थमाला ङ तेरी मीतिवी खला ङे थु ति तोङ्‍गितो। तमा ख्‍यिरा पुज्‍युङपुमतिवी नम्‍दर शेकितो। ज्‍येन्‍दातिवी कोन्‍छ्‍योककी ज्‍यल्‍का थोप्‍कितो। तमा गावागुवातिवी मिलाम थोङ्‍गितो।
ACT 2:18 ती छेर्मु ङला शब्‍ज्‍यी कितुपतिवी खला ङ ङे थु चाङ्‍मा तोङ्‍गितो। तमा तिवी नम्‍दर शेकितो।
ACT 2:19 येलुङ ङ येर नाम्‍खाला हलेवु लाकातिवा ताङ मर जम्‍बुलिङला ठक ताङ मे ताङ तुसोककी ततिवा छ्‍या देन्‍गितो।
ACT 2:20 तमा चोवो कोन्‍छ्‍योककी मोवा ताङ ग्‍येछ्‍यावु तुजे वुङ्‍गुप सिनाङ गोमाला ङ्‍यिमा नक्‍तोमी डितो। उला ति ठक दोके मर्वु डितो।
ACT 2:21 ती पेला सी ङला र्‍होक्‍टे की सिनी चोवोला गोङ्‍बा शिवे, तिवाला थर्वा ङ्‍येकितो।’
ACT 2:22 ओ इस्राएलकी मीतिवा, ङे ताम्‍ङे ङ्‍येना! चोवो कोन्‍छ्‍योककी नासरतकी येशूला ख्‍यिरा चिप्‍ला तङ्‍नी ओङ छ्‍येवु लाकातिवा ताङ हलेवु लाकातिवा ताङ ततिवा छ्‍या तेन्‍सुङ। ती ताम्‍ङे याङ ख्‍यिराङला साङ छ्‍या राङ वोज्‍यिवी।
ACT 2:23 येशूला ख्‍यिरा कोन्‍छ्‍योककी सुङला मुयुकुपतिवी लकला चेक तेनी ग्‍यङ्‍शिङ लोला कल्‍नी से च्‍यिसुङ। दी ति कोन्‍छ्‍योककी नोवा ताङ दीकी कोर्ला ति तोङ्‍ला राङ खोला छ्‍या नोक।
ACT 2:24 येशूकी छेटाङ बङी खुर्नी टुङ्‍सिनाङ कोन्‍छ्‍योककी खोला टुङ्‍गुप ने ङोसु लाङ्‍सुङ। च्‍यिलासिसिन खो शेप ति शितोक दे मुथुपी।
ACT 2:25 दाऊदकी खोकी कोर्ला दुक सिनोक, ‘चोवोला नरी ङे दोङ्‍ला राङ थोङ्‍गिवी। खो ङे लाक्‍पा यावी थाकाला ज्‍यु वोतुप तप्‍की ङ येर मर मोडोवी।
ACT 2:26 ती तप्‍की ङ गा लानी सेम किर्मु गल वे। तुक क्‍यानी ङ कोन्‍छ्‍योकला रेवा क्‍यानी सोवा देकिन मिजी क्‍योङ्‍यिन।
ACT 2:27 च्‍यिलासिसिन कोन्‍छ्‍योककी ङला शेप मीला ज्‍योकुप टककी फुक नाङ्‍ला राङ क्‍युर्नी मोज्‍योकिवी। तमा खोरो पेतुप मीला शेप ति शितोक ताङ रुल्‍नी ना साङ डो मिज्‍यिवी।
ACT 2:28 कोन्‍छ्‍योककी राङ ङला मिजी टेङ्‍बुकी लाम छ्‍या तेन नाङ्‍सुङ। तमा ङ कोन्‍छ्‍योक ताङ मुला छासे गा कितिन।’
ACT 2:29 ओ अच्‍युनुपतिवा, दाक्‍पी हङ्‍गावा दाऊदकी कोर्ला ङ तेन्‍तेन क्‍यानी ख्‍यिराङला सिरिन, खो शिनी मुक्‍तुम ग्‍यप्‍सुङ। ती खोकी फुङ्‍बु ज्‍यकुप टककी फुक ति तन्‍दा सेक दाक्‍पी पर्ला राङ वे।
ACT 2:30 खो कोन्‍छ्‍योककी लुङ्‍तेम्‍बा यी यिन्‍दुप तप्‍की खोरे गिपा नेमा राङ मिरा च्‍यिक ग्‍येला कितुप मी क्‍येनी खोरे ठीला देकिवी सिरुप दाऊदला छ्‍या नोक। दी ति कोन्‍छ्‍योककी दाऊद ताङ मुला थाक्‍छ्‍येवु यिन।
ACT 2:31 ज्‍युक्‍ला वुङ्‍गुप ताम्‍ङे गोमाला के छ्‍या वोतुप तप्‍की ख्रीष्‍ट टुङ्‍नी ङोसु लङ्‍गुप कोर्ला दाऊदकी दुक सिक्‍या वे, ‘खो ङ्‍येलाला साङ मालुम, रुलुप साङ मारुल।’
ACT 2:32 ती येशूला राङ कोन्‍छ्‍योककी ङोसु लाङ्‍सुङ। ती ताम्‍ङेकी कोर्ला दाक्‍पु तेरी पङ्‍बु वे।
ACT 2:33 ती येशूला कोन्‍छ्‍योककी खोकी यावी थाकाला छासे ताङ्‍देन वोतुप ठीकी खला ज्‍याक नाङ्‍सुङ। तमा खोकी थाक्‍छ्‍येन नङ्‍गुप थु चाङ्‍मा ति येशूला थोप्‍नी ती ति ङ्‍यिरा पर्ला तङ नाङ्‍सुङ। ती ताम्‍ङे ति तन्‍दा ख्‍यिरा थोङ्‍गुप ताङ थोयी वे।
ACT 2:34 च्‍यिलासिसिन दाऊद खोरुङ देवाच्‍येनला मालेप्‍सिनाङ दुक सिवी, ‘कोन्‍छ्‍योककी ङे चोवोला सुङ्‍सुङ,
ACT 2:35 “ख्‍योरो डतिवाला ख्‍योरो काङ्‍बी वोक्‍ला मालेप्‍वा सेक्‍ला ख्‍युरुङ ङे लाक्‍पा यावी थाकाला दे।”’
ACT 2:36 ती तप्‍की ख्‍यिरा ग्‍यङ्‍शिङला कलुप ती येशूला कोन्‍छ्‍योककी चोवो ताङ ख्रीष्‍ट जो नाङ्‍सुङ सिरुप ताम्‍ङे ति तेरी इस्राएलकी मीतिवी ल्‍यामो क्‍यानी हाक्‍को गोकिवी।”
ACT 2:37 पत्रुसकी सुङ ख्‍याप्‍टाक क्‍यावु थोसिमा ते वोतुप मीतिवी सेमला छासे दुङल लानी पत्रुस ताङ यम्‍बा लोमा छ्‍येतिवाला दुक सिक्‍यासुङ, “ओ अच्‍युनुपतिवा, त ङ्‍यिरा काङ कि गोकिवी?”
ACT 2:38 तमा पत्रुसकी तिवाला सिक्‍यासुङ, “ख्‍यिराङ तेरीकी ख्‍यिरा क्‍यावु दिक्‍पा नेमा थरुपला सेम ग्‍युर्नी येशू ख्रीष्‍टकी मिङला बप्‍तिस्‍मा लो! तमा कोन्‍छ्‍योककी थु चाङ्‍माकी ङ्‍येम्‍बा ति ख्‍यिराङला थोप्‍कितो।
ACT 2:39 च्‍यिलासिसिन कोन्‍छ्‍योककी थाक्‍छ्‍येवु ति ख्‍युरुङ ताङ ख्‍योरो गिपा ताङ थाक्‍रिङ्‍बु वोतुप मीतिवा ताङ सु सुला खोकी कताङ नङ्‍गिवे तिवा तेरीकी थोक्‍ला यिन।”
ACT 2:40 पत्रुसकी यम्‍बा ताम्‍ङेतिवा साङ बङी सिक्‍यासुङ। तमा तिङ्‍ला तिवाला दुक सिनी टोङ्‍गु बिन्‍सुङ, “ख्‍यिराङ दी दुक्‍टाकी गिपा ने र्‍होकुप लाका किसा।”
ACT 2:41 तमा सु सुकी पत्रुसकी सिक्‍यावु सुङ थोवे, तिवी बप्‍तिस्‍मा लासुङ। ती छेर्मु तो मिसिन मी तोङ्‍डा सुम चोयी तिवी दला शुसुङ।
ACT 2:42 तमा तिवा यम्‍बा तेपा कितुपतिवा ताङ मुला थिन्‍नी लोमा छ्‍येतिवी येन्‍देन ङ्‍येन्‍दुप ताङ डिक्‍जोम कितुप ताङ चोवोकी डेन साप लाका ताङ मोपोर क्‍या क्‍यावा देकिनोक।
ACT 2:43 ती पेला लोमा छ्‍येतिवी छासे हलेवु लाका ताङ ततिवा छ्‍या तेन्‍सिमा मीतिवा ज्‍यिवा क्‍यासुङ।
ACT 2:44 ती तेपा कितुपतिवा तेरी मुला राङ देकिनोक। तमा दाक दाक्‍पी मुला वोतुप तेरी च्‍यालकतिवा पिर्मा क्‍यानी थोकिनोक।
ACT 2:45 तिवी खोप्‍राङ मुला वोतुप टोङ्‍बा ताङ समा च्‍यालकतिवा साङ चोनी कतुकारला ख्‍येलुपतिवा तेरीला गोनी तेर्किनोक।
ACT 2:46 तिवा ङ्‍यिमी टेङ सेम च्‍यिक्‍पा राङ च्‍युङ्‍नी यहूदी ल्‍हङाङला जोम्‍गिनोक। तमा खाङ्‍बा खाङ्‍बाला कताङ्‍नी मुला राङ देनी सेम गा ताङ क्‍यानी समा सेनोक,
ACT 2:47 कोन्‍छ्‍योकला सोवा देकिनोक। तमा तेरी मीतिवी तिवाला ल्‍यामु सिनोक। दिक्‍पा ने थरुपतिवाला ति कोन्‍छ्‍योककी ङ्‍यिमी टेङ फेल्‍नी डो ज्‍यिकिनोक।
ACT 3:1 ङ्‍यिम्‍ज्‍यिक पत्रुस ताङ यूहन्‍ना ङ्‍यिमी गुङगी छ्‍युजी सुम चोयीला यहूदी ल्‍हङाङ नाङ्‍ला मोपोर कितुपला डोयी नोक।
ACT 3:2 ते ल्‍हङाङ नाङ्‍ला शुकुप मीतिवी लोला टङ्‍गा लोङ ज्‍यितुपला क्‍येप पेला नेज्‍युनी काङ्‍बा योप मुथुवु मी थेङ्‍बा यीला मीतिवी ङ्‍यिमी टेङ खुन वानी ल्‍हङाङकी गे चाला क्‍यल ज्‍योकिनोक। ती गोकी मिङ ति “गो डछ्‍यावु” सिनोक।
ACT 3:3 पत्रुस ताङ यूहन्‍ना ल्‍हङाङ नाङ्‍ला शुकुप थोङ्‍नी ती मी थेङ्‍बा तीकी पत्रुस ताङ यूहन्‍नाला टङ्‍गा लाङ्‍सुङ।
ACT 3:4 तमा पत्रुस ताङ यूहन्‍नाकी तीला ल्‍यामो क्‍या ल्‍हानी पत्रुसकी “ङ्‍यिरा थाकाला ल्हो ताङ!” सिनी सिक्‍यासुङ।
ACT 3:5 तमा काङ रे च्‍यिक रे तेर्किते नोनी ती मी थेङ्‍बा तीकी पत्रुस ताङ यूहन्‍नाला ल्‍हा ल्‍हावा देसुङ।
ACT 3:6 तमा पत्रुसकी सिक्‍यासुङ, “सेर ताङ ङुल याङ ङ्‍यिरा लोला मे, यिने ङ्‍यिरा लोला काङ नोके, ती ति ख्‍युरुङला तेरिन। नासरतकी येशू ख्रीष्‍टकी मिङला यु!”
ACT 3:7 तमा पत्रुसकी तीकी लाक्‍पा नालोक्‍पाला जिम्‍नी लोङ्‍डे क्‍यासुङ, क्‍यासिमा शार्क्येक तीकी काङ्‍बा ताङ छिङ्‍गुरतिवाला ङार ङ्‍येतुप ताङ
ACT 3:8 खोक लानी युसुङ। तमा फिर्नी युकिन सिरा कोन्‍छ्‍योकला सोवा देकिन ल्‍हङाङ नाङ्‍ला शुसुङ।
ACT 3:9 तमा ती मी थेङ्‍बा ति लानी कोन्‍छ्‍योकला सोवा देकिन युकुप ति मीतिवा तेरीकी थोङ्‍सुङ।
ACT 3:10 ती थोङ्‍सिमा “गो डछ्‍यावु” चाला देनी नरी लोङ्‍गुप मी थेङ्‍बा ति दी राङ यिन सिनी ङो शेसुङ। तमा ती मी ति ल्‍यामो क्‍यानी लानी युकुप थोङ्‍सिमा तिवा तेरी हलेवा क्‍यासुङ।
ACT 3:11 ती मी थेङ्‍बा ति पत्रुस ताङ यूहन्‍नाकी लाक्‍पाला जिम्‍नी मुला राङ वोतुप थोङ्‍सिमा मीतिवा तेरी हलेवा लानी सोलोमन लेङाङ खला छ्‍योङ्‍बाल ग्‍यकिन वासुङ।
ACT 3:12 ती थोङ्‍नी पत्रुसकी मीतिवाला सिक्‍यासुङ, “ओ इस्राएलकी मीतिवा, ख्‍यिराङ च्‍यिला हलेवा किवी? काङ दी मीला युक थुपुप जोवु ति ङ्‍यिराङला खक्‍छ्‍येवु ङार वोतुप तप्‍की यिन सिनी ख्‍यिराङ हलेवा क्‍यानी ल्‍हानी देकिवी? याङ्‍ना ङ्‍यिरा कोन्‍छ्‍योककी थोङ्‍दाङला क्‍यावु लाका ल्‍यामुकी यिन्‍दे सिनी नासाम तोङ्‍गिवी?
ACT 3:13 अब्राहाम ताङ इसहाक ताङ याकूब ताङ दाक्‍पी पगावा हङ्‍गावाकी कोन्‍छ्‍योककी खोला शब्‍ज्‍यी बुलुप येशूला मोवा कि छ्‍योवु जो नाङ्‍सुङ। ती येशूला राङ ख्‍यिरा पिलातसकी लकला चेक तेतुप यिन। तमा पिलातसकी खोला पिताङ तोङ्‍गुप सिक्‍यासिनाङ ख्‍यिराङ माङ्‍येन।
ACT 3:14 खो ति चाङ्‍मा ताङ टेङ्‍बु यिन्‍सिनाङ खोला ख्‍यिरा गा माक्‍यानी मी शेन्‍बा यीला के पिताङ तोङ सिनी गोङ्‍बा शुसुङ।
ACT 3:15 तमा मिजी नङ्‍गुप तीला सेसुङ। यिन्‍सिनाङ कोन्‍छ्‍योककी खोला शेप ने ङोसु लाङ्‍सुङ। दीकी पङ्‍बु ति ङ्‍यिराङ यिन।
ACT 3:16 ख्‍यिरा थोङ्‍गुप ताङ ङो शेवु दी मी ति येशूकी मिङ नेसुर काङ्‍बा चुनी युक थुपुप गाल्‍सुङ। येशूला तेपा क्‍यावु तप्‍की राङ हारिङ ख्‍यिरा मिककी थोङ्‍यिन दी मी ति टेकुप यिन।
ACT 3:17 ओ अच्‍युनुपतिवा, ख्‍यिराङ ताङ ख्‍यिरा ठिम कितुपतिवी खो सु यिन सिरुप ति हाक्‍माकोनी येशूला सेतुप यिन सिरुप ति ङला छ्‍या वे।
ACT 3:18 यिने ख्रीष्‍टकी छेटाङ खुर राङ गोकिवी सिनी गोमाला नेज्‍युनी कोन्‍छ्‍योककी लुङ्‍तेम्‍बातिवी नम्‍दर शेतुप ति कोन्‍छ्‍योककी तेरी छे च्‍यिसुङ।
ACT 3:19 ती तप्‍की ‘ङ दिक्‍छेन यिनोक’ सिनी सेम ग्‍युर्नी कोन्‍छ्‍योककी थाकाला ग्‍युर! तुक क्‍यासिन खोकी ख्‍यिरा दिक्‍पा ता च्‍यिनी लोदिमु नङ्‍गिवी।
ACT 3:20 तमा खोकी ख्‍यिरा थोक्‍ला तोङ्‍ला के पेन नङ्‍गुप ख्रीष्‍ट यिन्‍दुप येशूला तङ नङ्‍गिवी।
ACT 3:21 ती येशू ति कोन्‍छ्‍योककी तोङ्‍ला नेज्‍युनी पेतुप खोरे लुङ्‍तेम्‍बा टेङ्‍बुतिवी ख नेमा सुङ्‍गुप तेरी च्‍यालकतिवा सम्‍बा जोप तुजे माङुवा सेक्‍ला देवाच्‍येनला राङ ज्‍यु गोकिवी।
ACT 3:22 मोशाकी दुक सिक्‍या वे, ‘ख्‍यिरा मीतिवी पर नेमा राङ ङ दोके लुङ्‍तेम्‍बा मिरा च्‍यिकला कोन्‍छ्‍योककी टडिक क्‍या नङ्‍गिवी। ती लुङ्‍तेम्‍बाकी काङ सुङ्‍गुप ति तेरी ख्‍यिरा ङ्‍येन गोकितो।
ACT 3:23 तमा सी ती लुङ्‍तेम्‍बाकी सुङ्‍गुप ताम्‍ङे मेङ्‍येन्‍वे, तिवा तेरी तिवी पर नेमा ना तोङ्‍गिवी।’
ACT 3:24 तीकी कोर्ला शमूएल ताङ ती ज्‍युककी कोन्‍छ्‍योककी लुङ्‍तेम्‍बातिवा तेरीकी साङ तन्‍दा वुङ्‍गुप तुजेकी कोर्ला सिक्‍या वे।
ACT 3:25 चुका कोन्‍छ्‍योककी ख्‍यिरा हङ्‍गावातिवाला थाक्‍छ्‍येसुङ, ख्‍यिराङ साङ ती कोन्‍छ्‍योककी लुङ्‍तेम्‍बातिवा ताङ थाक्‍छ्‍येवुकी गिपा राङ यिन। ख्‍यिरा हङ्‍गावा अब्राहामला ‘ख्‍योरो गिपा नेसुर राङ जम्‍बुलिङकी तेरी मिछाङतिवी मोलाम थोप्‍कितो’ सिनी कोन्‍छ्‍योककी सुङ्‍सुङ।
ACT 3:26 ख्‍यिराङ रे रेला ख्‍यिरा क्‍यावु लाका दुक्‍टा नेमा ग्‍युर च्‍यिनी मोलाम नङ्‍गुपला कोन्‍छ्‍योककी खोरुङला शब्‍ज्‍यी बुलुप मी यी पेसुङ। पेसिमा तेरी सिनाङ गोमाला तीला ख्‍यिरा ते ताङ्‍सुङ।”
ACT 4:1 पत्रुस ताङ यूहन्‍ना मीतिवाला ख्‍याप्‍टाक कियी वोतुप पेला कोङ्‍यारतिवा ताङ यहूदी ल्‍हङाङकी मी छ्‍ये ताङ सदुकीतिवा तिवी चाला वानोक।
ACT 4:2 पत्रुस ताङ यूहन्‍नाकी येशू टुङ्‍नी ङोसु लावु यिन सिरुप ताम्‍ङे ति मीतिवाला लोपिन ताङ ख्‍याप्‍टाक क्‍यावु थोनी तिवाला ङ्‍यिर्मु लानोक।
ACT 4:3 तमा तिवी पत्रुस ताङ यूहन्‍नाला जिम्‍नी ती सला टोपला सेक चोन्‍खाङला उम ज्‍याक्‍सुङ। च्‍यिलासिसिन ती छेर्मु नाम ल्‍होनोक।
ACT 4:4 यिने तिवी सुङ ख्‍याप्‍टाक क्‍यावु थोनी मी माङ्‍शोककी येशूला तेपा क्‍यासुङ। तमा तेपा कितुपतिवा तो मिसिन तोङ्‍डा ङ चोयी लेप्‍नोक।
ACT 4:5 तमा ती सला टोपला ओङ्‍ज्‍येन कितुपतिवा ताङ यहूदी गोमा कितुप मी छ्‍येतिवा ताङ यहूदी छ्‍योकी गेकेनतिवा यरूशलेमला जोम्‍नोक।
ACT 4:6 ते तेरी सिनाङ कोङ्‍यार छ्‍ये हन्‍नास ताङ कैयाफा ताङ यूहन्‍ना ताङ अलेक्‍जेन्‍डर ताङ कोङ्‍यार छ्‍येकी खोरो मीतिवा साङ तेरी जोम्‍नोक।
ACT 4:7 तिवी पत्रुस ताङ यूहन्‍नाला खोप्‍रे पर्ला ज्‍याक्‍नी दुक सिनी टिसुङ, “ख्‍यिरा चुका ओङ्‍ज्‍येन नेसुर ताङ सी मिङला दुक क्‍यावु यिन?”
ACT 4:8 तोजो पेला राङ पत्रुस कोन्‍छ्‍योककी थु चाङ्‍माकी क्‍येङ्‍नी तिवाला सिक्‍यासुङ, “ओ मीतिवी खला ओङ्‍ज्‍येन कितुपतिवा ताङ छ्‍योकी गेकेनतिवा,
ACT 4:9 ङ्‍यिरा मी थेङ्‍बा यीला युक थुपुप जोप लाका ल्‍यामु क्‍यावु कोर्ला ती मी ति चुक क्‍यानी टेक थुप्‍सुङ सिनी हारिङ ख्‍यिरा ङ्‍यिराङला टिवु यिन्‍सिन
ACT 4:10 ख्‍यिराङ ताङ इस्राएलकी मीतिवा तेरीकी ग्‍यङ्‍शिङ लोला कल्‍नी सेसिनाङ कोन्‍छ्‍योककी ङोसु लङ्‍गुप नासरतकी येशू ख्रीष्‍टकी मिङला दी मी ति ख्‍यिरा मिङ्‍गाला राङ टेक्‍नी लानी वे।
ACT 4:11 येशू ख्रीष्‍ट ति दो दोके यिन सिनी कोन्‍छ्‍योककी सुङला वे। ‘ख्‍यिराङ खाङ्‍बा जोपतिवी दी दो ति फेन मोथोवी सिनी क्‍युर्सुङ, यिने ती दो ति तेरी सिनाङ सुरकी दोला गाल।’
ACT 4:12 येशू मिसिन सी साङ दिक्‍पा ने थर ज्‍यि मुथुपी। च्‍यिलासिसिन दी जम्‍बुलिङला मी पर्ला कनी साङ दाक्‍पुला दिक्‍पा ने थर ज्‍यितुप यम्‍बा मिङ काङ साङ मे।”
ACT 4:13 पत्रुस ताङ यूहन्‍ना काङ साङ मालापुप ताङ येन्‍देन मेतुप यिन्‍सिनाङ तुका ङाडेङ वोतुप थोङ्‍नी ते वावु मीतिवा हलेवा क्‍यासुङ। तमा पत्रुस ताङ यूहन्‍ना येशूकी मुला युकुप मी यिन सिरुप ति तिवी हाक्‍कोसुङ।
ACT 4:14 यिने ती टेकुप मी ति पत्रुस ताङ यूहन्‍नाकी मुला लानी देतुप थोङ्‍सिमा तिवी काङ साङ सि माथुप।
ACT 4:15 ती तप्‍की तिवी पत्रुस ताङ यूहन्‍नाला तिवी छोक्‍पा नेमा पाङ्‍ला तेन तङ्‍नी खोप्‍राङ पर्ला दुक सिनी केवुल क्‍यासुङ।
ACT 4:16 “त दी मीतिवाला दाक्‍पी काङ कि गोवु यिन? च्‍यिलासिसिन तिवी क्‍यावु हलेवु लाकाकी कोर्ला याङ यरूशलेमकी मीतिवा तेरीकी हाक्‍कोनी वे। दाक्‍पी साङ दी ताम्‍ङेला मिन सि मुथुपी।
ACT 4:17 यिन्‍सिनाङ येलुङ मीतिवाला ख्‍याप्‍टाक माकी सिनी क्‍येक्‍नी येशूकी मिङला यम्‍बा सुला साङ ख्‍याप्‍टाक माकी सिनी वोरु देन गोकिवी।”
ACT 4:18 ती ज्‍युक्‍ला तिवी पत्रुस ताङ यूहन्‍नाला कताङ्‍नी “तफेन्‍ला येशूकी मिङला काङ येन्‍देन साङ मातेर, तमा लोपुप साङ मालोपा!” सिनी सिक्‍यासुङ।
ACT 4:19 तमा पत्रुस ताङ यूहन्‍नाकी दुक सिक्‍यासुङ, “कोन्‍छ्‍योककी सुङ ङ्‍येन्‍दुप क्‍युर ज्‍याक्‍नी ख्‍यिरा ताम्‍ङे ङ्‍येन्‍दुप ति कोन्‍छ्‍योककी थोङ्‍दाङला ल्‍यामु यिनाङ मिन सिनी ख्‍यिराङ राङ नासाम तोङ!
ACT 4:20 च्‍यिलासिसिन ङ्‍यिरा थोङ्‍गुप ताङ थोवु ताम्‍ङेतिवा सि माक्‍यावा क्‍यानी ङ्‍यिराङ दे मुथुपी।”
ACT 4:21 तमा तिवी काङ साङ ठिम तोङ माथुप्‍सिमा पत्रुस ताङ यूहन्‍नाला मङ ज्यिवा कुनी पिताङ ताङ्‍सुङ।
ACT 4:22 च्‍यिलासिसिन लो खल ङ्‍यी सिनाङ मङ युक माथुपुप मी थेङ्‍बा यीला हलेवा क्‍यानी टेक च्‍यितुप थोङ्‍नी मी तेरीकी कोन्‍छ्‍योकला सोवा देकिन नोक।
ACT 4:23 तमा तिवाला पिताङ तङ्‍सिमा पत्रुस ताङ यूहन्‍ना खोरो मीतिवी ते लोङ गल्‍नी कोङ्‍यार छ्‍येतिवा ताङ यहूदी गोमा कितुप मी छ्‍येतिवी सिक्‍यावु ताम्‍ङेतिवा तेरी खोप्‍रे मीतिवाला लाप्‍सुङ।
ACT 4:24 ती थोसिमा तिवा तेरीकी कोन्‍छ्‍योकला दुक सिनी कशेन थोर ग्‍यप्‍नी मोपोर क्‍यासुङ, “ओ सछ्‍या नाम्‍छ्‍या ताङ ग्‍येम्‍छो ताङ ती नाङ्‍ला वोतुप तेरी च्‍यालकतिवा ज्‍येङ्‍गुप चोवो कोन्‍छ्‍योक,
ACT 4:25 कोन्‍छ्‍योककी राङ थु चाङ्‍मा नेमा कोन्‍छ्‍योकला शब्‍ज्‍यी बुलुप दाक्‍पी हङ्‍गावा दाऊदकी ख नेमा दुक सिनी सुङ्‍गुप यिन, ‘मिरिक यम्‍बातिवा च्‍यिला कशेन ङि्‍यर्मु किताङ। तमा मीतिवी च्‍यिला तेर्मेकी ताम्‍ङेतिवा नासाम तोङ्‍गिताङ?
ACT 4:26 चोवो कोन्‍छ्‍योक ताङ खोकी पेन नङ्‍गुप ख्रीष्‍टकी तेन्‍दोकला ग्‍येल्‍वुतिवा ताङ ओङ्‍ज्‍येन कितुपतिवा जोम्‍नी लासुङ।’
ACT 4:27 वुतुङ के हेरोद ताङ पन्‍तियस पिलातस ङ्‍यिकर यहूदी मिन्‍दुक मिरिक यम्‍बातिवा ताङ इस्राएलकी मीतिवी मुला दी ग्‍येसाला राङ जोम्‍सुङ, तमा जोम्‍सिमा कोन्‍छ्‍योककी खोरुङला शब्‍ज्‍यी बुलुपला पेन नङ्‍गुप चाङ्‍मा वोतुप येशूकी तेन्‍दोकला लासुङ।
ACT 4:28 तिवी काङ क्‍यावु ति कोन्‍छ्‍योककी तोङ नेज्‍युनी वोतुप नोवाला राङ तेरी क्‍यावु यिन।
ACT 4:29 ओ चोवो कोन्‍छ्‍योक, त याङ ङ्‍यिराङला छेटाङ दुङल तेरुपतिवाला ल्‍हानी ख्‍योरे शब्‍ज्‍यी बुलुपतिवाला ङाडेङ क्‍यानी सुङ ख्‍याप्‍टाक कि थुपुप जोटे की।
ACT 4:30 तमा नेर्पु टेक ज्‍यितुपला कोन्‍छ्‍योककी छ्‍याक ज्‍याङ नङ्‍नी कोन्‍छ्‍योककी चाङ्‍मा ताङ टेङ्‍बु वोतुप येशूकी मिङ नेसुर ततिवा ताङ हलेवु लाकातिवा च्‍युङ्‍शी।”
ACT 4:31 तुक सिनी मोपोर क्‍यान सिन्‍सिमा तिवा देतुप दासाला सयी ग्‍यपुप दोके क्‍यानी योसुङ। तमा तिवा तेरी कोन्‍छ्‍योककी थु चाङ्‍माकी क्‍येङ्‍नी तिवी ङाडेङ क्‍यानी कोन्‍छ्‍योककी सुङ ख्‍याप्‍टाक क्‍यासुङ।
ACT 4:32 तमा तेपा कितुपतिवा तेरी सेम च्‍यिक राङ च्‍युङ्‍नी थिन देकिनोक। तिवा सी साङ खोप्‍रे नोर टोङ्‍बातिवा “दी ङे ति”, “ती ख्‍योरो ति” सिनी मिसिर्नोक। यिने तेरीकी खोप्‍रे च्‍यालकतिवा पिर्मा किनोक।
ACT 4:33 ती लोमा छ्‍येतिवा छासे ङाडेङ क्‍यानी चोवो येशू टुङ्‍नी ङोसु लावुकी कोर्ला पङ्‍बु तेर्किनोक। तमा तिवा तेरीला कोन्‍छ्‍योककी ग्‍यक्‍चेकी कटिन ति थोप्‍नोक।
ACT 4:34 चुका च्‍यालक साङ तिवाला ङ्‍युङ्‍मु मेङ्‍नोक। च्‍यिलासिसिन खाङ्‍बा शिङ वोतुपतिवी खोरो खाङ्‍बा शिङ चोनी टङ्‍गा ति ते खुन वानी
ACT 4:35 लोमा छ्‍येतिवाला चेक तेर्किनोक। तमा ती टङ्‍गा ति सु सुला काङ काङगी थोक्‍ला गोकिवे, तिवाला गोनी तेर्किनोक।
ACT 4:36 तिवी पर्ला साइप्रस लुङ्‍बाला क्‍येवु लेवी गिपाकी योसेफ सिरुप मी यी साङ नोक। तीला लोमातिवी बारनाबास साङ सिनोक। (बारनाबासकी तेन्‍दोक ति यम्‍बाला टोङ्‍गु तेरुप यिन।)
ACT 4:37 तीकी साङ खोरो शिङ चोनी टङ्‍गा ति खुन वानी लोमा छ्‍येतिवाला चेक तेसुङ।
ACT 5:1 ती पेला हननिया सिरुप मी ताङ तीकी पेर्मी सफिराकी साङ खोप्‍राङ शिङ यी चोनी
ACT 5:2 खोरो पेर्मी ताङ मुला ताम्‍ङे क्‍यानी शिङ चोवु टङ्‍गा चेयी खोरो लोला ज्‍याक्‍सुङ। तेसुर लुवु टङ्‍गा ति खुर वानी लोमा छ्‍येतिवाला पुल्‍सुङ।
ACT 5:3 यिने पत्रुसकी हननियाला सिक्‍यासुङ, “ओ हननिया, कोन्‍छ्‍योककी थु चाङ्‍माला जिनोक जोनी शिङ चोवु टङ्‍गा चेयी ति खोरो लोला ज्‍योकुप नासाम ति चुक क्‍यानी ख्‍योरो सेमला शैतानकी ज्‍याक बिन्‍सुङ?
ACT 5:4 शिङ चोङ्‍गुप सिनाङ गोमाला साङ ती शिङ ति ख्‍योरो तिराङ यिन, तमा चोसिमा ती टङ्‍गा साङ ख्‍योरो तिराङ यिन। यिने चुक क्‍यानी ख्‍योरो सेमला दुका नासाम मेलोक्‍पा शार्सुङ? ख्‍योरो याङ मीला मिन, यिने कोन्‍छ्‍योकला जिनोक जोसुङ।”
ACT 5:5 ती ताम्‍ङे थोलुङ्‍मे हननिया ति शार्क्येक सला तला ग्‍यप्‍नी शिसुङ। तमा ती थोनी मीतिवा तेरी ज्‍यिवा क्‍यासुङ।
ACT 5:6 तमा ललाइ ख्‍योक्‍पेजा नाज्‍युङतिवा वानी ती शेप रो तीला राकी नाङ्‍ला टिल्‍नी मुक्‍तुम ग्‍यप्‍सुङ।
ACT 5:7 तमा छ्‍युजी सुम चोयी ज्‍युक्‍ला हननियाकी पेर्मी सफिरा तिङ तेराङ वासुङ। ती पेला ते च्‍युङ्‍गुप ताम्‍ङे ति तीला छ्‍या मिन्‍दुक।
ACT 5:8 तमा पत्रुसकी सफिराला सिक्‍यासुङ, “ङला सी ताङ, ख्‍यिराङ जप्‍राङ ङ्‍यिवुकी शिङ चोवु टङ्‍गा ति तोजोयी राङ यिन?” तमा तीकी सिक्‍यासुङ, “लसे, तोजोयी राङ यिन।”
ACT 5:9 तमा पत्रुसकी तीला सिक्‍यासुङ, “कोन्‍छ्‍योकला खोक्‍पा ल्‍हापला ख्‍यिराङ च्‍यिला थिन्‍दुप? ल्हो ताङ, ख्‍योरो खाङ्‍बी मीला मुक्‍तुम ग्‍यकुपतिवा गे चा नेमा वुङ्‍यिन वे। तिवी ख्‍युरुङला साङ खुर्नी पाङ्‍ला क्‍योल्‍गितो।”
ACT 5:10 तुक सिक्‍यालुङ्‍मे सफिरा साङ पत्रुसकी चिप्‍ला राङ तला ग्‍यप्‍नी शिसुङ। ती ज्‍युक्‍ला ख्‍योक्‍पेजा नाज्‍युङतिवा नाङ्‍ला वानी तीला शेप थोङ्‍सिमा खोरो ख्‍योवा मुक्‍तुम ग्‍यपुप चाला राङ खुन गल्‍नी तीला साङ मुक्‍तुम ग्‍यप्‍सुङ।
ACT 5:11 तमा तेरी तेपा कितुप मीतिवा ताङ ती ताम्‍ङे थोवु तेरी मीतिवा छासे ज्‍यिवा क्‍यासुङ।
ACT 5:12 ती पेला लोमा छ्‍येतिवी छासे मिच्‍यिक्‍पाकी हलेवु लाकातिवा मीतिवाला छ्‍या तेन्‍सुङ। तमा तेपा कितुपतिवा तेरी मुला राङ ल्‍हङाङकी चाला वोतुप सोलोमनकी लेङाङ खला नरी जोम्‍गिनोक।
ACT 5:13 मी यम्‍बातिवा तिवी मुला थिन्‍दुपला ङाडेङ कि माथुप। यिने माङ्‍शोक मीतिवी तिवाला ताङ्‍देन किनोक।
ACT 5:14 तमा ख्‍योक्‍पेजा ताङ पुम्‍पेजातिवा बङीकी कोन्‍छ्‍योकला तेपा क्‍यानी तिवा ति मङ मङ फेलिन गाल्‍सुङ।
ACT 5:15 तमा मीतिवी पत्रुस युकुप लामला नेर्पुतिवा खुन वानी पत्रुस वुङ्‍गुप पेला खोकी र्‍हिप्‍च्‍याङ तिराङ यिन्‍सिनाङ तिवी खला ख्‍येल्‍शी नोनी सप्‍तेन ताङ ठीकी खला नेर्पुतिवाला ङ्‍याल्‍नी ज्‍योकिनोक।
ACT 5:16 तमा यरूशलेम गारी गुरीकी ग्‍येसा नेसुर साङ मी बङीकी नेर्पुतिवा ताङ डेकी कुलुप मीतिवा टिनी गिनोक। तमा तिवा तेरी टेकिनोक।
ACT 5:17 यिने तेरी सिनाङ कोङ्‍यार छ्‍ये ताङ तीकी मुला वोतुप सदुकी छ्‍योक्‍पाकी मीतिवा ठतोक लानी लोमा छ्‍येतिवी तेन्‍दोकला लासुङ।
ACT 5:18 तमा तिवाला जिम्‍नी चोन्‍खाङला उप्‍सुङ।
ACT 5:19 यिने नुपला कोन्‍छ्‍योककी लेन क्‍योलुप थु यी वानी चोन्‍खाङकी गो ति पेसिमा तिवाला पाङ्‍ला टि वानी सिक्‍यासुङ,
ACT 5:20 “ग्‍युक, ल्‍हङाङ नाङ्‍ला लानी मीतिवाला दी मिजीकी लेन ति तेरी लोप।”
ACT 5:21 तमा तिवा टेताङ ल्‍हङाङ नाङ्‍ला गल्‍नी येन्‍देन तेरुप छाल्‍सुङ। ती पेला तेरी सिनाङ कोङ्‍यार छ्‍ये ताङ तीकी दाल्‍जातिवा तेरी वानी इस्राएलकी ठिम्‍खाङकी मीतिवाला कताङ्‍सुङ। तमा लोमा छ्‍येतिवाला चोन्‍खाङ नेमा पिताङ शोक सिनी मीतिवाला ताङ्‍सुङ।
ACT 5:22 यिने ती मीतिवी तिवा चोन्‍खाङला मेतुप थोङ्‍सिमा लोङ वानी दुक सिक्‍यासुङ,
ACT 5:23 “ङ्‍यिराङ चोन्‍खाङला गल्‍सिङ के चोन्‍खाङकी गोल्‍ज्‍याक साङ ग्‍यप्‍नी नोक, र्‍हेन्‍दुप मीतिवा साङ गोला लानी राङ देन्‍नोक। यिने नाङ्‍ला गो पेनी ल्‍हासिन सु साङ मिन्‍दुक।”
ACT 5:24 ती ताम्‍ङे थोनी त दीकी तेन्‍दोक ति काङ गिते सिनी ल्‍हङाङकी मक्‍मी छ्‍ये ताङ कोङ्‍यार छ्‍येतिवा काङ कितुप काङ कितुप गाल।
ACT 5:25 ती पेला मी मिरा च्‍यिक ते वानी तिवाला “ख्‍यिरा चोन्‍खाङला उप्‍नी ज्‍यकुप मीतिवा याङ ल्‍हङाङ नाङ्‍ला लानी मीतिवाला ख्‍याप्‍टाक कियी नोक।” सिनी सिक्‍यासुङ।
ACT 5:26 ती ताम्‍ङे थोसिमा ल्‍हङाङ र्‍हेन्‍दुप मी छ्‍येतिवा यम्‍बा ल्‍हङाङ र्‍हेन्‍दुप मीतिवी मुला गल्‍नी लोमा छ्‍येतिवाला काङ मेलोक्‍पा माक्‍यावा क्‍यानी टिनी वासुङ। च्‍यिलासिसिन तिवाला मेलोक्‍पा क्‍यासिन मीतिवी खोप्‍राङला दो बेप्‍किते नोनी तिवा ज्‍यिवा क्‍यासुङ।
ACT 5:27 तिवाला टि वानी ठिम्‍खाङकी दोङ्‍ला लाङ्‍सुङ। तमा तेरी सिनाङ कोङ्‍यार छ्‍ये तीकी दुक सिनी टिसुङ,
ACT 5:28 “ख्‍यिराङला येशूकी मिङला काङ साङ ख्‍याप्‍टाक माकिसा सिनी ङ्‍यिरा सिक्‍यायिन, यिन्‍सिनाङ ख्‍यिरा याङ यरूशलेमकी दासा तेरीला ख्‍याप्‍टाक क्‍यानोक। तमा खोला सेतुप क्‍येन ति ख्‍यिरा ङ्‍यिरा खला के ग्‍यकिनोक।”
ACT 5:29 यिने पत्रुस ताङ लोमा छ्‍येतिवी तिवाला सिक्‍यासुङ, “ङ्‍यिरा मी ताम्‍ङे मिन, यिने कोन्‍छ्‍योककी नङ्‍गुप क ङ्‍येन गोकिवी।
ACT 5:30 च्‍यिलासिसिन ख्‍यिरा ग्‍यङ्‍शिङ लोला कल्‍नी सेतुप येशूला दाक्‍पी हङ्‍गावातिवी कोन्‍छ्‍योककी शेप ने ङोसु लाङ्‍सुङ।
ACT 5:31 तमा इस्राएलकी मीतिवाला सेम ग्‍युर ज्‍यितुपला ताङ तिवाला तिवी दिक्‍पा ता ज्‍यितुपला खोला राङ ग्‍येल्‍वु ताङ दिक्‍पा ने थर ज्‍यितुप जोनी कोन्‍छ्‍योककी यावी थाकाला चोछ्‍येवु जोनी ज्‍याक्‍सुङ।
ACT 5:32 दीकी कोर्ला ङ्‍यिराङ तेरी पङ्‍बु वे। तमा कोन्‍छ्‍योककी सुङला युकुपतिवाला खोकी नङ्‍गुप थु चाङ्‍मा साङ दीकी कोर्ला पङ्‍बु वे।”
ACT 5:33 ती ताम्‍ङे थोसिमा तिवा छासे ङ्‍यिर्मु लानी लोमा छ्‍येतिवाला सेतुप नो क्‍यासुङ।
ACT 5:34 यिने ते मीतिवा तेरीकी ताङ्‍देन क्‍यानी चिवु गमलिएल सिरुप यहूदी छ्‍योकी गेकेन फरिसी मिरा च्‍यिक नोक। ती ति ठिम्‍खाङला खोक लानी लोमा छ्‍येतिवाला उकुर च्‍यिक पाङ्‍ला ग्‍युक सिक्‍यासुङ।
ACT 5:35 तमा तीकी ठिम्‍खाङकी मीतिवाला दुक सिक्‍यासुङ, “ओ इस्राएलकी मीतिवा, दी मीतिवाला ख्‍यिरा काङ कितुप नो क्‍यावे, ल्‍यामो क्‍यानी नासाम तङ्‍नी तिराङ किसा।
ACT 5:36 च्‍यिलासिसिन तोङ्‍ला साङ थुदास सिरुप मी यी वानी खोरुङ तिराङ ङ राङ यिन सिनी दप्‍शे ग्‍यप्‍सुङ। तमा तो मिसिन मी सयी ज्‍यी चोयी तीकी तिङ्‍ला तिङ्‍यासुङ। यिने ज्‍युक्‍ला तीला सेसिमा तीकी तिङ्‍ला तिङ्‍योकुपतिवा तेरी थरा थुरा गाल्‍सुङ।
ACT 5:37 ती ज्‍युक्‍ला लुङ्‍बा टङ्‍गा ग्‍यकुप पेला गालीलला देतुप यहूदा सिरुप यी लेसुङ। तीकी साङ मीतिवा रुनी खोरो छोक्‍पाला ज्‍याक्‍सुङ। यिने ज्‍युक्‍ला तीला साङ सेसिमा तीकी तिङ्‍ला तिङ्‍योकुपतिवा तेरी थरा थुरा गाल।
ACT 5:38 ती तप्‍की ङ ख्‍यिराङला सिरिन, दी मीतिवाला काङ माक्‍यावा क्‍यानी पिताङ तोङ। दोजो दी मीतिवी क्‍यावु लाका ति मीकी ओङ्‍ज्‍येन नेमा राङ क्‍यावु यिन्‍सिन तोर्नी डिवी।
ACT 5:39 यिने कोन्‍छ्‍योक नेमा क्‍यावु यिन्‍सिन ख्‍यिरा दिवाला ग्‍येक मुथुपी। मिसियाङ ख्‍यिराङ कोन्‍छ्‍योककी तेन्‍दोकला लावु डितो।”
ACT 5:40 तीकी सिक्‍यावु ताम्‍ङे ति छ्‍योखाङकी मीतिवी सेमला गाल। तमा तिवी लोमा छ्‍येतिवाला नाङ्‍ला कताङ्‍नी दुसिमा तफेन्‍ला येशूकी मिङला ख्‍याप्‍टाक माकी सिनी पिताङ ताङ्‍सुङ।
ACT 5:41 तमा लोमा छ्‍येतिवा येशूकी मिङला छेटाङ दुङल खुर छ्‍योवु च्‍युङ थुप्‍सुङ सिनी गा कियी सिरा छ्‍योखाङ नेमा पाङ्‍ला थेन गाल।
ACT 5:42 तमा येशू राङ ख्रीष्‍ट यिन सिनी खाङ्‍बा खाङ्‍बा ताङ ल्‍हङाङ ल्‍हङाङला ङ्‍यिमी टेङ लेन ल्‍यामु ख्‍याप्‍टाक कियी ताङ येन्‍देन तेरिन युसुङ।
ACT 6:1 ती पेला तेपा कितुपतिवा बङी गाल्‍सुङ। तमा हिब्रू ताम्‍ङे लपुप यहूदीतिवी तेन्‍दोकला ग्रीक ताम्‍ङे लपुप यहूदीतिवी ङ्‍योशोक ङ्‍योशोक सिक्‍यासुङ। च्‍यिलासिसिन लोमातिवी ङ्‍यिमी टेङ साप समा गोतुप पेला ग्रीक ताम्‍ङे लपुप पेर्मी युक्‍सिमतिवाला लङ्‍गुप समा मोथोप्‍नोक।
ACT 6:2 ती तप्‍की लोमा छ्‍ये मिरा च्‍यिङ्‍ङीकी यम्‍बा लोमातिवा तेरीला कताङ्‍नी सिक्‍यासुङ, “दाक्‍पु कोन्‍छ्‍योककी सुङ ख्‍याप्‍टाक कितुप क्‍युर ज्‍याक्‍नी समा गोतुप लाका तिराङ कितुप ति ल्‍यामु मिन।
ACT 6:3 तुक क्‍यानी अच्‍युनुपतिवा, त याङ ख्‍यिरा पर नेमा कोन्‍छ्‍योककी थु चाङ्‍माकी क्‍येङ्‍गुप ताङ रिक्‍पा वोतुप ताङ तेरीकी ताङ्‍देन कितुप मिरा दिनला ख्‍यिरा राङ पेनी समा गोतुप लाका ति तिवाला चेक ते।
ACT 6:4 यिने ङ्‍यिराङ ति नरी मोपोर कितुप ताङ सुङ ख्‍याप्‍टाक कितुप लाका कितिन।”
ACT 6:5 लोमा छ्‍येतिवी तुक सिक्‍यावु ताम्‍ङे ति तेरीकी सेमला गाल। तमा तिवी तेपा रम्‍बु वोतुप ताङ कोन्‍छ्‍योककी थु चाङ्‍माकी क्‍येङ्‍गुप स्‍तिफनस ताङ फिलिप ताङ प्रखरस ताङ निकनोर ताङ तिमोन ताङ पर्मिनास ताङ एन्‍टिओखिया नेसुर वानी यहूदी छ्‍योला शुकुप निकोलाउस तीला पेसुङ।
ACT 6:6 ती पेतुप मीतिवाला लोमा छ्‍येतिवी चाला टि वानी लोमा छ्‍येतिवी तिवी गोला लाक्‍पा ज्‍याक्‍नी मोपोर क्‍यासुङ।
ACT 6:7 तुक राङ क्‍यानी कोन्‍छ्‍योककी सुङ ति फेल गल्‍नी यरूशलेमला साङ कोन्‍छ्‍योकला तेपा कितुपतिवा बङी गाल। तमा यहूदी ल्‍हङाङकी कोङ्‍यारतिवी नाङ ने बङीकी तिवी क्‍यावु तेपा ति सेमला लासुङ।
ACT 6:8 तमा कोन्‍छ्‍योक नेमा कटिन ताङ ओङ थोप्‍नी स्‍तिफनसकी मीतिवी पर्ला हलेवु लाका ताङ ततिवा छ्‍या तेन्‍सुङ।
ACT 6:9 यिने ती पेला कुरेनी ताङ अलेक्‍जेन्‍ड्रिया ताङ किलिकिया ताङ एशियाकी लुङ्‍बा नेसुर वावु मीतिवा ललाइ वानी स्‍तिफनस ताङ मुला खाँदा कितुप छाल्‍सुङ।
ACT 6:10 यिने कोन्‍छ्‍योककी थु चाङ्‍माकी च्‍यु ताङ रिक्‍पा नेमा स्‍तिफनसकी ताम्‍ङे लापुप थोङ्‍सिमा तिवा सी साङ काङ सि माथुप।
ACT 6:11 तमा तिवी छ्‍याकला मीतिवा ललाइला चेन्‍नी स्‍तिफनसकी तेन्‍दोकला दुक सि च्‍यिसुङ, “दीकी याङ कोन्‍छ्‍योक ताङ मोशाकी तेन्‍दोकला के मारे तोङ्‍गुप ताम्‍ङे लपुप ति ङ्‍यिरा थोसुङ।”
ACT 6:12 तमा तिवी मीतिवा ताङ यहूदी गोमा कितुप मी छ्‍येतिवा ताङ यहूदी छ्‍योकी गेकेनतिवाला चेन्‍नी स्‍तिफनसला जिम्‍नी यहूदी छ्‍योकी ठिम्‍खाङला टि वासुङ।
ACT 6:13 तमा तिवी पङ्‍बु जिनोक जोनी दुक सिक्‍यासुङ, “दी मी तीकी याङ मोशाकी ठिम ताङ चाङ्‍मा वोतुप ल्‍हङाङकी तेन्‍दोकला नरी मारे तोङ्‍गुप ताम्‍ङे तिराङ लप्‍किनोक।
ACT 6:14 च्‍यिलासिसिन नासरतकी येशूकी दी दासाला ना तोङ्‍गिवी, तमा मोशाकी दाक्‍पुला बिन्‍दुप लुक्‍सुतिवा साङ पो गोकिवी सिनी तीकी सिक्‍यावु ति ङ्‍यिरा थोसुङ।”
ACT 6:15 तमा ठिम्‍खाङला जोम्‍बुपतिवा तेरीकी स्‍तिफनसला छ्‍योर छ्‍योर्मे ल्‍हासालेन्‍सिन तीकी ङो ति देवाच्‍येनकी लेन क्‍योलुप थुकी ङो दोके ठछ्‍येली थोङ्‍सुङ।
ACT 7:1 ती ज्‍युक्‍ला तेरी सिनाङ कोङ्‍यार छ्‍येकी स्‍तिफनसला “काङ ख्‍योरो तेन्‍दोकला मीतिवी क्‍येन बिन्‍दुप ति टेङ्‍बु यिन?” सिनी टिसुङ।
ACT 7:2 तमा स्‍तिफनसकी सिक्‍यासुङ, “ओ अच्‍युनुपतिवा ताङ पालुतिवा, ङे ताम्‍ङे ल्‍यामो क्‍यानी ङ्‍येना! दाक्‍पी हङ्‍गावा अब्राहाम हारानला डोप सिनाङ गोमाला मेसोपोटामियाला वोतुप पेला मोवा वोतुप कोन्‍छ्‍योककी ज्‍यल्‍का नाङ्‍नी
ACT 7:3 ‘ख्‍युरुङ ख्‍योरो लुङ्‍बा ताङ ख्‍योरो छेङ्‍गाछालीतिवा क्‍युर ज्‍याक्‍नी चुका लुङ्‍बा ति ङे ख्‍युरुङला छ्‍या देन्‍गिवे, ती लुङ्‍बाला ग्‍युक।’ सिनी सुङ्‍नोक।
ACT 7:4 कोन्‍छ्‍योककी तुक सुङ्‍सिमा अब्राहाम कल्‍दीतिवी लुङ्‍बा क्‍युर ज्‍याक्‍नी हारान लुङ्‍बाला गल्‍नी देसुङ। तमा अब्राहामकी पपा नासु गल्‍सिमा कोन्‍छ्‍योककी खोला तन्‍दा दाक्‍पु देन वोतुप लुङ्‍बाला राङ ताङ्‍सुङ।
ACT 7:5 यिने कोन्‍छ्‍योककी ताङ्‍सिमा तीला नोर टोङ्‍बा तिराङ मिन, कोम्‍बा ग्‍यकुप दासा साङ मानाङ। तोजो पेला अब्राहामला पेजा मेसिनाङ कोन्‍छ्‍योककी दुक सिनी ताम्‍ङे यी थाक्‍छ्‍येन नाङ्‍नोक, ‘ज्‍युक्‍थमाला दी तेरी लुङ्‍बा ति ख्‍युरुङ ताङ ख्‍योरो गिपाला तेर्कितो।’
ACT 7:6 तमा कोन्‍छ्‍योककी अब्राहामला दुक सिनी सुङ्‍सुङ, ‘ख्‍योरो गिपा ति छ्‍यिग्‍यपला गल्‍नी दे गोकितो। तमा ती छ्‍यिग्‍यपकी मीतिवी ख्‍योरो गिपाला लो सयी ज्‍यी सेक योक्‍पु जोनी छासे मेलोक्‍पा कितो।
ACT 7:7 यिने ख्‍योरो गिपातिवाला योक्‍पु जोप लुङ्‍बी गिपाकी मीतिवी खला ङ पर्च्या तोङ्‍यिनो। ती ज्‍युक्‍ला ख्‍योरो गिपाकी मीतिवा ती लुङ्‍बा नेसुर थेन वानी दी दासाला राङ ङला सोवा देकितो।’
ACT 7:8 तमा कोन्‍छ्‍योककी अब्राहामला यहूदीतिवी च्‍येतुप लुक्‍सु कितुप ताम्‍ङे साङ थाक्‍छ्‍येन नाङ्‍सुङ। ज्‍युक्‍ला अब्राहामला पुज्‍युङ यी क्‍येनोक। तमा ती पुज्‍युङ क्‍येवु ङ्‍यिमा दिनला तीकी यहूदी च्‍येतुप लुक्‍सु क्‍यासुङ। ज्‍युक्‍ला इसहाककी साङ खोरो पुज्‍युङ याकूबला ती च्‍येतुप लुक्‍सु क्‍यासुङ। तमा याकूबकी साङ खोरो पुज्‍युङ च्‍यिङ्‍ङीला तुक राङ क्‍यासुङ।
ACT 7:9 याकूबकी पुज्‍युङतिवी खोप्‍रे नुप योसेफला ति ठतोक क्‍यानी मिश्र लुङ्‍बाला चोनी ताङ्‍सुङ। क्‍यासिनाङ कोन्‍छ्‍योक ति योसेफ ताङ मुला राङ ज्‍युनोक।
ACT 7:10 ती तप्‍की कोन्‍छ्‍योककी योसेफला ख्‍येलुप तेरी दुक्‍पा नेसुर र्‍होक्‍नी मिश्रकी ग्‍येल्‍वु फारोकी चिप्‍ला खोकी कटिन ताङ रिक्‍पा नाङ्‍सुङ। तमा ग्‍येल्‍वु फारोकी योसेफला खोरो ग्‍येल्‍खाङ ताङ तेरी मिश्र लुङ्‍बाकी मी छ्‍ये जोसुङ।
ACT 7:11 तोजो पेला मिश्र लुङ्‍बा ताङ कनानला ङ्‍यिमा मर्वु शर्नी तेरीला दुक्‍पा च्‍युङ्‍सुङ। तमा दाक्‍पी हङ्‍गावातिवाला साङ ग्‍यावी छ्‍येनी दुक्‍पा ङ्‍येसुङ।
ACT 7:12 मिश्र लुङ्‍बाला डु वे सिरुप ति याकूबकी थोनी खोरो पुज्‍युङतिवाला मिश्र लुङ्‍बाला डु ङ्‍योपला ताङ्‍सुङ।
ACT 7:13 तमा येलुङ तिवा ते डु ङ्‍योपला गलुप पेला योसेफकी उज्‍यु नुपतिवाला खोरो कोर्ला लाप्‍सुङ। तमा योसेफकी गिपातिवी कोर्ला ग्‍येल्‍वु फारोकी हाक्‍कोसुङ।
ACT 7:14 ती ज्‍युक्‍ला योसेफकी पपा ताङ तेरी मिछाङतिवा मिरा खल दिन ताङ ङ तेरीला खोरो ते राङ कताङ्‍सुङ।
ACT 7:15 कताङ्‍सिमा याकूब खोरो पुज्‍युङतिवा ताङ मुला मिश्र लुङ्‍बाला गाल। तमा ते राङ याकूब ताङ दाक्‍पी हङ्‍गावातिवा गावा गल्‍नी नासु गाल।
ACT 7:16 ती ज्‍युक्‍ला तिवी फुङ्‍बु ति शकेमला खुन वानी हमोरकी पुज्‍युङतिवा ताङ मुला अब्राहामकी गोङ तेनी ङ्‍योवु शिङ खला मुक्‍तुम ग्‍यप्‍सुङ।
ACT 7:17 कोन्‍छ्‍योककी अब्राहाम ताङ मुला थाक्‍छ्‍येन नङ्‍गुप तुजे ति छेन सिन्‍सुङ। तमा मिश्र लुङ्‍बाला दाक्‍पी मीतिवा कशेन मङ फेलिन गाल।
ACT 7:18 ती ज्‍युक्‍ला योसेफकी कोर्ला काङ साङ हाक्‍माकोवु यम्‍बा ग्‍येल्‍वु यीकी मिश्र लुङ्‍बाला ग्‍येला क्‍यासुङ।
ACT 7:19 ती ग्‍येल्‍वु तीकी ङ्‍यिरा गिपाकी मीतिवाला किताङ मेलोक्‍पा क्‍यानी दाक्‍पी हङ्‍गावातिवाला मलोक क्‍येवु आङा टिक्‍पेतिवाला सेन्‍बु मलङ्‍शी नोनी क्‍युर च्‍यिसुङ।
ACT 7:20 ती पेला राङ मोशा साङ क्‍येसुङ। ती ति कोन्‍छ्‍योककी थोङ्‍दाङला छासे ल्‍यामु नोक। तमा तीला ल सुम सेक खोरो पपाआमी सोसुङ।
ACT 7:21 यिने ज्‍युक्‍ला तीला बानी ज्‍योक माथुप्‍नी क्‍युर्सिमा फारोकी पुमकी तीला खुन गल्‍नी खोरो पुज्‍युङ दोके क्‍यानी सोसुङ।
ACT 7:22 तमा मोशाकी मिश्रीतिवी लुक्‍सुला वोतुप येन्‍देनतिवा तेरी लाप्‍नी ताम्‍ङे लपुप ताङ लाकाला ङार छ्‍येवु गाल्‍सुङ।
ACT 7:23 मोशा लो खल ङ्‍यी लेप्‍सिमा तीला खोरो इस्राएलकी मीतिवाला ठेतुप नो क्‍यानोक।
ACT 7:24 मोशाकी खोरो मीतिवाला ठेतुप पेला तिवी पर नेमा मिरा च्‍यिकला मिश्री यीकी मेलोक्‍पा क्‍यावु थोङ्‍नी ती मिश्री तीला सेनी ङ्‍येन लासुङ।
ACT 7:25 कोन्‍छ्‍योककी तिवाला मिश्रीकी ओङ नेसुर र्‍होकुपला खोरुङला तङ्‍गुप यिन सिरुप ति खोरो इस्राएलकी मीतिवी हाक्‍कोशी सिनी मोशाकी नो क्‍यानोक। यिने तिवी ती ताम्‍ङे ति हाक्‍माको।
ACT 7:26 येलुङ ती सला तीला इस्राएलकी मी मिरा ङ्‍यी थमु ग्‍यकिन वोतुप मोशाकी थोङ्‍सुङ। तमा तिवाला थिन ज्‍यितुप नोनी दुक सिक्‍यासुङ, ‘ओ नुपतिवा, ख्‍यिराङ याङ पिन के यिन। च्‍यिला ख्‍यिराङ थमु ग्‍यकिवी?’
ACT 7:27 यिने मेलोक्‍पा कितुप मी तीकी मोशाला पुलिन सिरा दुक सिक्‍यासुङ, ‘ख्‍युरुङ ख्‍योरो लाम शु। ख्‍युरुङला सी ङ्‍यिरा खला ठिम तोङ्‍गुप जोसुङ?
ACT 7:28 काङ दाङ ति मिश्रीला सेतुप दोके ख्‍योरो ङला साङ सेतुप नोकिवी?’
ACT 7:29 ती थोसिमा मोशा ति मिश्र लुङ्‍बा नेवा टोनी मिद्यान लुङ्‍बाला गल्‍नी देसुङ। तमा ते तीकी ति पुज्‍युङ पिन ङ्‍यी क्‍येसुङ।
ACT 7:30 तमा ते लो खल ङ्‍यी सेक देसिमा सीनै रीला वोतुप दासा पाङ्‍थेरीला बुलुक दोङ्‍बी लोला बरिन वोतुप मे मेलाप नाङ्‍ला मोशाकी देवाच्‍येनकी लेन क्‍योलुप थु यीला थोङ्‍सुङ।
ACT 7:31 ती थोङ्‍सिमा काङ यिन्‍दे नोनी मोशा ति हलेवा लानी ल्‍ह गाल्‍सुङ। तमा चोवो कोन्‍छ्‍योककी तीला दुक सुङ्‍गुप वोरु थोसुङ,
ACT 7:32 ‘ङ ख्‍योरो हङ्‍गावातिवा, अब्राहाम ताङ इसहाक ताङ याकूबकी कोन्‍छ्‍योक यिन।’ ती थोसिमा मोशा ज्‍यिवा लानी र्‍हुकुप ताङ तेवा ल्‍हापला साङ ङाडेङ माक्‍या।
ACT 7:33 तमा कोन्‍छ्‍योककी तीला सुङ्‍सुङ, ‘ख्‍योरो काङ्‍बाला कोन्‍दुप जुता पी! च्‍यिलासिसिन ख्‍युरुङ लानी देतुप दासा ति चाङ्‍मा यिन।
ACT 7:34 मिश्र लुङ्‍बाला वोतुप ङे मीतिवाला छेटाङ दुङल ख्‍येलुप ति वुतुङ के ङे थोङ्‍सुङ। तिवी ङुप्‍राङ क्‍यावु तिङ ङे थोसुङ। ती तप्‍की ङ तिवाला र्‍होकुपला वावु यिन। दे शोक। त याङ ङ ख्‍युरुङला मिश्र लुङ्‍बा राङ लोक्‍नी तोङ्‍यिनो।’
ACT 7:35 ती मोशाला राङ मीतिवी दुक सिक्‍यावु यिन, ‘ख्‍युरुङला सी ङ्‍यिरा खला ओङ्‍ज्‍येन कितुप ताङ ठिम तोङ्‍गुप जोसुङ?’ यिने कोन्‍छ्‍योककी ती मोशाला राङ ती मीतिवाला ठिम तोङ्‍गुप ताङ थर ज्‍यितुपला मे बरिन वोतुप दोङ्‍बी पर नेमा देवाच्‍येनला लेन क्‍योलुप थु नेसुर ताङ्‍सुङ।
ACT 7:36 तमा मोशाकी मिश्र लुङ्‍बा ताङ ग्‍येम्‍छो मर्वु ताङ दासा पाङ्‍थेरीला क्‍यानी लो खल ङ्‍यी सेक हलेवु लाका ताङ ततिवा छ्‍या तेन्‍नी यहूदीतिवाला तीकी राङ मिश्र लुङ्‍बा नेसुर तेन्‍सुङ।
ACT 7:37 ती मोशाकी राङ इस्राएलकी मीतिवाला दुक सिक्‍या वे, ‘कोन्‍छ्‍योककी ख्‍यिरा रङगी उज्‍युनुपतिवी पर नेसुर ङ दोके खोकी लुङ्‍तेम्बा मिरा च्‍यिकला तोङ्‍गितो।’
ACT 7:38 ती मोशाकी राङ दाक्‍पी हङ्‍गावातिवाला दासा पाङ्‍थेरीला टिनी वासुङ। तमा सीनै रीला देवाच्‍येनकी लेन क्‍योलुप थुकी मोशा ताङ मुला ताम्‍ङे लाप्‍सुङ। ते राङ सुङ टेङ्‍बु ति मोशाला थोप्‍नी दाक्‍पुला बिन्‍दुप यिन।
ACT 7:39 यिने दाक्‍पी हङ्‍गावातिवी खोकी ताम्‍ङे माङ्‍येन, तमा तीला क्‍युर ज्‍याक्‍नी मिश्र लुङ्‍बाला लोक्‍नी डोप नो क्‍यासुङ।
ACT 7:40 तमा तिवी हारूनला दुक सिक्‍यासुङ, ‘ङ्‍यिरा थोक्‍ला गोमा कितुप ल्‍हलुतिवा जो नाङ। च्‍यिलासिसिन ङ्‍यिराङला मिश्र लुङ्‍बा नेसुर तेन वुङ्‍गुप मोशाला काङ क्‍याते, ङ्‍यिराङला छ्‍या मे।’
ACT 7:41 तमा ती ज्‍युक्‍ला तिवी पिउकी कु यी जोनी तीला जिन्‍बा तङ्‍नी खोप्‍रे जोवु च्‍यालकला गा क्‍यासुङ।
ACT 7:42 तुक क्‍यानी कोन्‍छ्‍योककी तिवाला ङ्‍याम माक्‍यानी नामगी कर्मातिवाला छ्‍यो तोङ्‍गुपला क्‍युर्नी ज्‍याक्‍सुङ। ती तप्‍की कोन्‍छ्‍योककी लुङ्‍तेम्‍बाकी सुङला साङ दुक सिनी टि वे, ‘ओ इस्राएलकी मीतिवा, काङ लो खल ङ्‍यी सेक ख्‍यिरा ङला ती दासा पाङ्‍थेरीला बुल्‍वा ताङ सेम्‍ज्‍येन सेनी जिन्‍बा तङ्‍गुप?
ACT 7:43 ख्‍यिरा याङ मोलोख ल्‍हकी कुर ताङ रेफन ल्‍हकी कर्मा ताङ ख्‍यिरा छ्‍यो तोङ्‍गुपला जोवु कुतिवा खुर्नी गाल। ती तप्‍की ख्‍यिराङला बेबिलोन पाङ्‍ला तेन्‍नी तोङ्‍यिन।’
ACT 7:44 तमा पाङ्‍थेरी दासाला देतुप पेला दाक्‍पी हङ्‍गावातिवी पङ्‍बुकी कुर यी नोक। ती कुर ति कोन्‍छ्‍योककी मोशाला छ्‍या तेन्‍दुप दोके राङ जोवु नोक।
ACT 7:45 ज्‍युक्‍ला ती कुर ति दाक्‍पी हङ्‍गावातिवाला थोप्‍सुङ। तमा यहोशूकी मीतिवी मिरिक यम्‍बी लुङ्‍बा ति खोरो लकला लासिमा ती कुर ति ती लुङ्‍बाला खुर्नी वासुङ। ती कुर ति दाऊदकी ङो सेक ते राङ लुसुङ।
ACT 7:46 ती दाऊदकी राङ कोन्‍छ्‍योक नेमा मोलाम थोप्‍नी, याकूबकी कोन्‍छ्‍योक ज्‍युवु दासा यी जो नाङ सिनी गोङ्‍बा शुसुङ।
ACT 7:47 यिने ती दासा जोप ति सोलोमन यिन।
ACT 7:48 क्‍यासिनाङ चोछ्‍येवु कोन्‍छ्‍योक ति मी जोवु खाङ्‍बी नाङ्‍ला मुज्‍युयी। तीकी थोक्‍ला कोन्‍छ्‍योककी लुङ्‍तेम्‍बाकी दुक सिक्‍या वे,
ACT 7:49 ‘देवाच्‍येन ति ङे ठी यिन। जम्‍बुलिङ ति ङे काङ्‍बा ज्‍योक्‍सा यिन। ख्‍यिरा ङे थोक्‍ला चुका खाङ्‍बा जेवी? ङे ङासोप दासा ति चुका ति यिन?
ACT 7:50 काङ दी तेरी च्‍यालकतिवा ङे राङ जेवु मिन?’
ACT 7:51 ओ अम्‍बारङ्‍शिङ ताङ सेम क्‍योङ्‍बु ताङ नम्‍ज्‍योक वोन्‍बी टेङ, ख्‍यिरा हङ्‍गावातिवी क्‍यावु दोके ख्‍यिराङ साङ कोन्‍छ्‍योककी थु चाङ्‍माला मारे तोङ्‍गिनोक।
ACT 7:52 ख्‍यिरा हङ्‍गावातिवी चुका कोन्‍छ्‍योककी लुङ्‍तेम्‍बातिवाला छेटाङ माबिन वे? टेङ्‍बु वोतुप मी यी गितो सिरुप कोन्‍छ्‍योककी लुङ्‍तेम्‍बातिवा तेरीला तिवी सेसुङ। तमा ख्‍यिरा साङ ती टेङ्‍बु वोतुप तीला क्‍येन बिन्‍नी सेतुप यिन।
ACT 7:53 देवाच्‍येनकी लेन क्‍योलुप थुतिवी सिक्‍यावु ठिम याङ ख्‍यिराङला थोप्‍सुङ, यिने ख्‍यिराङ ती ठिमला ति माङ्‍येन।”
ACT 7:54 स्‍तिफनसकी तुक सिक्‍यावु थोसिमा यहूदी छ्‍येतिवा छासे ङ्‍यिर्मु लानी काङ साङ माथोङ।
ACT 7:55 यिने स्‍तिफनस कोन्‍छ्‍योककी थु चाङ्‍माकी क्‍येङ्‍नी देवाच्‍येन ने ल्‍हानी कोन्‍छ्‍योककी मोवा ताङ येशू ख्रीष्‍ट ति कोन्‍छ्‍योककी यावी थाकाला लानी वोतुप थोङ्‍सुङ।
ACT 7:56 तमा तीकी सिक्‍यासुङ, “ल्‍होसा, देवाच्‍येन सेङ्‍गुप ताङ मी सेवु ति कोन्‍छ्‍योककी यावी थाकाला लानी वोतुप ति ङे थोङ्‍सुङ।”
ACT 7:57 ती थोसिमा तिवा तेरी खोप्‍रे नम्‍ज्‍योक उप्‍नी थोर ग्‍यकिन सिरा स्‍तिफनसला दुङ्‍गुपला छ्‍योङ्‍बाल ग्‍यप्‍नी गाल्‍सुङ।
ACT 7:58 तमा तीला टितिन सिरा ग्‍येसाकी फिला क्‍यल्‍नी दो थ्‍वोनी पोप्‍सुङ। ती पेला ते च्‍युङ्‍गुप ताम्‍ङेकी पङ्‍बु देतुपतिवी खोप्‍रे मज्‍यातिवा पिनी शाऊल सिरुप ख्‍योक्‍पेजा यीकी चाला ज्‍याक्‍नोक।
ACT 7:59 मीतिवी खोरुङला दो बेपिन वोतुप पेला स्‍तिफनसकी दुक सिनी मोपोर क्‍यासुङ, “ओ चोवो येशू, ङे सेम ति ख्‍युरुङला राङ चेक तेतिन।”
ACT 7:60 ती ज्‍युक्‍ला खोकी पुमुङ सला चुनी थोर ग्‍यप्‍नी सिक्‍यासुङ, “कोन्‍छ्‍योक, दिवी क्‍यावु दिक्‍पाकी क्‍येन ति दिवाला मोफोक्‍शी।” तोजोयी सिक्‍यासिमा तीकी उ छ्‍येसुङ।
ACT 8:1 स्‍तिफनसला सेतुप मीतिवी पर्ला शाऊल साङ ख च्‍यिक नोक। ती छेर्मु राङ यरूशलेमकी तेपा कितुप मीतिवाला यहूदी गोमा कितुपतिवी जिम्‍नी छेटाङ तेरुप छाल्‍सुङ। तमा लोमा छ्‍येतिवा मिसिन यम्‍बा तेपा कितुप मीतिवा तेरी यहूदिया ताङ सामरियाकी दासा दासा नेवा थरा थुरा गाल्‍सुङ।
ACT 8:2 ललाइ कोन्‍छ्‍योकला सोवा देकुप मीतिवी स्‍तिफनसकी फुङ्‍बु ति खुन गल्‍नी मुक्‍तुम ग्‍यप्‍सुङ। तमा खोकी थोक्‍ला छासे ङुप्‍राङ क्‍यासुङ।
ACT 8:3 यिने शाऊलकी ते वोतुप चर्चतिवा ना तोङ्‍गुप छाल्‍सुङ। तमा खाङ्‍बा खाङ्‍बाला शुनी तेपा कितुप ख्‍योक्‍पेजा ताङ पुम्‍पेजातिवा तेरीला टिनी वुङ्‍यिन ताङ चोन्‍खाङला उपिन क्‍यासुङ।
ACT 8:4 ती थरा थुरा गलुप तेपा कितुप मीतिवा खोप्‍राङ कनी कनी डिवे, ते राङ कोन्‍छ्‍योककी सुङ ति ख्‍याप्‍टाक क्‍यासुङ।
ACT 8:5 तमा फिलिप ति सामरियाकी ग्‍येसा यीला गल्‍नी ख्रीष्‍टकी कोर्ला ख्‍याप्‍टाक क्‍यासुङ।
ACT 8:6 फिलिपकी हलेवु ततिवा छ्‍या तेन्‍दुप ताङ सुङ ख्‍याप्‍टाक क्‍यावु थोङ्‍नी मीतिवी तीकी ताम्‍ङेला ङ्‍याम क्‍यानी ङ्‍येन्‍सुङ।
ACT 8:7 च्‍यिलासिसिन मी माङ्‍शोक नेमा डेतिवा थोर ग्‍यप्‍नी च्‍यार देनिन थेन्‍सुङ। तमा जे ग्‍यपुप मीतिवा ताङ युक मुथुवुतिवा साङ टेक्‍सुङ।
ACT 8:8 ती तप्‍की ती ग्‍येसाकी मीतिवाला छासे सेम लोदिमु च्‍युङ्‍नोक।
ACT 8:9 ती पेला ती ग्‍येसाला सिमोन सिरुप मी यी नोक। तीकी गोमा नेज्‍युनी जिम्‍डुल टुलुप लाकातिवा छ्‍या तेन्‍नी सामरियाकी मीतिवा तेरीला हलेवा लङ्‍नी खोरुङ ति ङ राङ यिन सिनी नो किनोक।
ACT 8:10 तमा तीला छ्‍ये छ्‍युङा तेरीकी “दी मी ति चोछ्‍येवु कोन्‍छ्‍योककी ओङ थोपुप यिन।” सिनी ताङ्‍देन किनोक।
ACT 8:11 च्‍यिलासिसिन तोङ नेज्‍युनी ती सिमोन तीकी मीतिवाला जिम्‍डुल छ्‍या देन्‍दुप लाकातिवा क्‍यानी हलेवा लाङ्‍नोक। तुक क्‍यानी मीतिवा तीकी तिङ्‍ला तिङ्‍योकिनोक।
ACT 8:12 यिने फिलिपकी कोन्‍छ्‍योककी ग्‍येल्‍खापकी कोर्ला ताङ येशू ख्रीष्‍ट मिङकी कोर्ला ख्‍याप्‍टाक क्‍यावु ताम्‍ङेला ख्‍योक्‍पेजा ताङ पुम्‍पेजातिवा तेरीकी तेपा क्‍यानी बप्‍तिस्‍मा लासुङ।
ACT 8:13 तमा ती सिमोन तीकी साङ तेपा क्‍यानी बप्‍तिस्‍मा लासुङ। तमा फिलिप कनी डिवे, ती साङ ते राङ गाल। फिलिपकी क्‍यावु हलेवु लाकातिवा थोङ्‍नी तीला हलेवा लासुङ।
ACT 8:14 तमा सामरियाकी मीतिवी साङ कोन्‍छ्‍योककी सुङ सेमला लासुङ सिरुप ताम्‍ङे ति यरूशलेमला वोतुप लोमा छ्‍येतिवी थोनी पत्रुस ताङ यूहन्‍नाला तिवी ते ताङ्‍सुङ।
ACT 8:15 तिवा ते लेप्‍सिमा तेपा क्‍यावु मी सम्‍बातिवाला कोन्‍छ्‍योककी थु चाङ्‍मा थोप्‍शी सिनी तिवी थोक्‍ला मोपोर क्‍यासुङ।
ACT 8:16 च्‍यिलासिसिन ती पेला तेपा कितुप मी सम्‍बातिवी येशूकी मिङला बप्‍तिस्‍मा तिराङ लानोक, यिने कोन्‍छ्‍योककी थु चाङ्‍मा ति सुला साङ माथोप्‍नोक।
ACT 8:17 ती तप्‍की पत्रुस ताङ यूहन्‍नाकी तिवी गोला लाक्‍पा ज्‍याक्‍सुङ। तमा तिवाला कोन्‍छ्‍योककी थु चाङ्‍मा थोप्‍सुङ।
ACT 8:18 लोमा छ्‍येतिवी मीतिवी गोला लाक्‍पा ज्‍याक्‍सिमा कोन्‍छ्‍योककी थु चाङ्‍मा थोप्‍किनोक सिरुप ति थोङ्‍नी ती सिमोनकी लोमा छ्‍येतिवाला टङ्‍गा तेरिन दुक सिक्‍यासुङ,
ACT 8:19 “दी ओङ ति ङला साङ नङ्‍नी ङे साङ सु थेपकी गोला लाक्‍पा ज्‍याक्‍सिन तीला कोन्‍छ्‍योककी थु चाङ्‍मा थोप्‍शी।”
ACT 8:20 ती थोसिमा पत्रुसकी दुक सिक्‍यासुङ, “ख्‍योरो टोङ्‍बा याङ ख्‍योरो लोला राङ ना डोशी, च्‍यिलासिसिन कोन्‍छ्‍योककी कटिन ति टङ्‍गा तेनी ङ्‍यो थुप्‍किवी सिनी ख्‍योरो नासाम ताङ्‍नोक।
ACT 8:21 दीकी कोर्ला याङ ख्‍योरो ङ्‍यिरा मुला काङ साङ लाका कि मुथुपी। च्‍यिलासिसिन कोन्‍छ्‍योककी थोङ्‍दाङला ख्‍योरो सेम टेङ्‍बु मिन्‍दुक।
ACT 8:22 ख्‍युरुङ दी सेम मेटेङ्‍बु कितुप लाका क्‍युर्नी कोन्‍छ्‍योकला मोपोर की! तुक क्‍यासिन ख्‍योरो सेमगी ताम्‍ङे मेलोक्‍पातिवाला खोकी माफ नङ्‍गिते यिन्‍दे।
ACT 8:23 च्‍यिलासिसिन ङे ल्‍हासिन ख्‍युरुङ खोनक्‍पु ताङ दिक्‍पी ओङला शोर्नी नोक।”
ACT 8:24 ती थोसिमा सिमोनकी सिक्‍यासुङ, “ङे थोक्‍ला कोन्‍छ्‍योकला मोपोर क्‍या नङ, तुक क्‍यासिन ख्‍योरो सुङ्‍गुप दोके ताम्‍ङे मेलोक्‍पातिवा ङे खला मेख्‍येल्‍शी।”
ACT 8:25 तमा पत्रुस ताङ यूहन्‍ना कोन्‍छ्‍योककी सुङ ख्‍याप्‍टाक कियी ताङ पङ्‍बु तेरिन सिरा यरूशलेमला लोक्‍सुङ। लोकुप पेला तिवी सामरियाकी युल बङीला लेन ल्‍यामु ख्‍याप्‍टाक क्‍यासुङ।
ACT 8:26 ती ज्‍युक्‍ला कोन्‍छ्‍योककी लेन क्‍योलुप थु यीकी फिलिपला दुक सिक्‍यासुङ, “ख्‍युरुङ लानी ल्‍होकी थाकाला ख्‍येलुप दासा पाङ्‍थेरीला ग्‍युक। तेसुर यरूशलेम नेवा गाजाला डोप लामला लेप्‍किवी।”
ACT 8:27 ती थोसिमा फिलिप ति लानी गाल। डोप पेला लामला इथियोपियाकी मी छ्‍ये यीला ठेसुङ। ती मी ति इथियोपियाकी ग्‍येल्‍मु कन्‍दाकीकी तेरी नोर टोङ्‍बा ल्‍हाप खाक्‍छ्‍येवु मी छ्‍ये यिनोक। ती ति कोन्‍छ्‍योकला सोवा देकुपला यरूशलेमला वानोक।
ACT 8:28 तमा खाङ्‍बा लोकुप पेला लामला ती मी ति खोरो तखुर खला देनी यशैया लुङ्‍तेम्‍बाकी थेप लोपिन वोतुप फिलिपकी थोङ्‍सुङ।
ACT 8:29 तमा कोन्‍छ्‍योककी थु चाङ्‍माकी फिलिपला सुङ्‍सुङ, “ख्‍युरुङ ती तखुरकी तिङ तिङ्‍ला ग्‍युक।”
ACT 8:30 तमा फिलिप ति छ्‍योङ्‍बाल ग्‍यकिन गाल। ती मी छ्‍ये तीकी कोन्‍छ्‍योककी लुङ्‍तेम्‍बाकी थेप लोपिन क्‍यावु थोनी फिलिपकी तीला दुक सिनी टिसुङ, “दी ख्‍योरो लोपिन वोतुप थेप ति हाक्‍कोकिनोक?”
ACT 8:31 तमा तीकी सिक्‍यासुङ, “दीकी तेन्‍दोक ति ललाइकी सि माक्‍यासिन ङे चुक क्‍यानी हाक्‍कोवुजा?” तुक सिक्‍यासिमा तीकी फिलिपला खोरो तखुर खला मुला राङ दे च्‍यिसुङ।
ACT 8:32 ती मी छ्‍ये तीकी रकिन कितुप सुङ ति दी नोक, “लुक सेतुपला टि गलुप दोके याङ्‍ना पाल टेकुप पेला लुक खरक्‍पा सोके देतुप दोके खोकी काङ साङ मासुङ।
ACT 8:33 तुक राङ क्‍यानी मीतिवी खोला मारे तोङ्‍गुप पेला टेके ठिम क्‍या माबिन। काङ खोकी गिपाकी मेलोवा क्‍यावु कोर्ला सी ताम्‍ङे कि थुप्‍किवी? च्‍यिलासिसिन खोकी मिजी ति दी जम्‍बुलिङ ने तोर्नी गाल।”
ACT 8:34 तमा ती मी तीकी फिलिपला दुक सिनी टिसुङ, “कोन्‍छ्‍योककी लुङ्‍तेम्‍बाकी दुक सिक्‍यावु ति सी थोक्‍ला सिक्‍यावु यिन? खोरो थोक्‍ला यिनाङ की, यम्‍बी थोक्‍ला यिन? ङला लोप।”
ACT 8:35 तमा फिलिपकी ती कोन्‍छ्‍योककी लुङ्‍तेम्‍बाकी थेप नेसुर राङ येशूकी कोर्ला लेन ल्‍यामु ख्‍याप्‍टाक क्‍यासुङ।
ACT 8:36 तेसुर तिवा डोयी कितुप पेला छ्‍यु वोतुप दासा यीला लेप्‍सुङ। तमा ती मी तीकी फिलिपला “ल्‍हो ताङ, दे छ्‍यु नोक। काङ ङला बप्‍तिस्‍मा तेर थुप्‍किवी?” सिनी सिक्‍यासुङ।
ACT 8:37 (तमा फिलिपकी सिक्‍यासुङ, “दोजो ख्‍योरो सेमगी दिङ नेज्‍युनी तेपा क्‍यासिन बप्‍तिस्‍मा लासिनाङ गिवी।” तमा तीकी सिक्‍यासुङ, “येशू ख्रीष्‍ट कोन्‍छ्‍योककी शेवु राङ यिन सिनी ङ तेपा कितिन।”)
ACT 8:38 तीकी तुक सिक्‍यासिमा तखुर तीला तेराङ ज्‍याक्‍नी तिवा ङ्‍यिकर मर छ्‍यी चाला गाल्‍सुङ। तमा फिलिपकी ती मी तीला बप्‍तिस्‍मा बिन्‍सुङ।
ACT 8:39 तमा तिवा ङ्‍यिकर छ्‍यी नाङ ने थेन्‍लुङ्‍मे कोन्‍छ्‍योककी थु चाङ्‍माकी फिलिपला शार्क्येक टिनी फेप्‍सुङ। ती ज्‍युक्‍ला ती मी तीकी फिलिपला माथोङ, यिन्‍सिनाङ गा कियी सिरा खोरो लाम शुसुङ।
ACT 8:40 ती पेला राङ फिलिप ति अश्‍दोदला लेप्‍नोक। तमा कैसरियाला लेप्‍ता सेक लामला वोतुप तेरी युल ताङ ग्‍येसातिवाला लेन ल्‍यामु ख्‍याप्‍टाक कियी गाल।
ACT 9:1 यिने शाऊल ति चोवो येशूला तेपा कितुप लोमातिवाला सेन क्‍युरिन सिनी ज्‍यिवा कुयिन नोक। तमा ती ति तेरी सिनाङ कोङ्‍यार छ्‍येकी चाला गल्‍नी
ACT 9:2 येशूला तेपा कितुप ख्‍योक्‍पेजा ताङ पुम्‍पेजातिवा सुला थेप्‍सिनाङ टानी यरूशलेमला टि वुङ्‍गुप सिनी दमस्‍कसकी छ्‍योखाङतिवी मी छ्‍येला छ्‍या देन्‍दुप यिकी जो नाङ सिनी सिक्‍यासुङ।
ACT 9:3 तमा यिकी थोप्‍नी तेसुर गल्‍सिमा दमस्‍कसला लेप्‍तु छ्‍येवु पेला शार्क्येक देवाच्‍येन नेमा तीकी गारी गुरीला वो सल्‍वु यी ग्‍यप्‍सुङ।
ACT 9:4 तमा वो ग्‍यप्‍लुङ्‍मे शाऊल ति तला लोक ग्‍यप्‍सुङ। ती पेला तीकी दुक सिरुप वोरु यी थोसुङ, “शाऊल, शाऊल, ख्‍युरुङ ङला च्‍यिला छेटाङ तेर्किवी?”
ACT 9:5 तमा शाऊलकी सिक्‍यासुङ, “चोवो ख्‍युरुङ सु यिन?” तमा ते दुक सिरुप वोरु यी शाऊलकी थोसुङ, “ङ येशू यिन, ख्‍योरो ङला छेटाङ तेरिन वे।
ACT 9:6 त ख्‍युरुङ लानी ग्‍येसाला ग्‍युक! तमा ते ख्‍योरो काङ कि गोकी, ती ति मी च्‍यिककी ख्‍युरुङला लोप्‍कितो।”
ACT 9:7 ती थोनी शाऊलकी मुला गलुप मीतिवा हलेवा कियी खरक्‍पा सोके छ्‍योर छ्‍योरी ल्‍हानी देसुङ। च्‍यिलासिसिन तिवी वोरु तिराङ थोनोक, यिने सुला साङ माथोङ्‍नोक।
ACT 9:8 तमा शाऊल खोक लानी मिक पेनी ल्‍हासिन तीकी काङ साङ थोङ मुथुपुप गाल्‍सुङ। ती तप्‍की तीकी मुला वोतुप मीतिवी तीला लाक्‍पाला जिम टिनी दमस्‍कसला क्‍याल्‍सुङ।
ACT 9:9 ङ्‍यिमा सुम सेक तीकी मिक साङ थोङ माथुप। तमा समा साङ मासो, छ्‍यु साङ माथु।
ACT 9:10 ती पेला दमस्‍कसला हननिया सिरुप येशूला तेपा कितुप मी मिरा च्‍यिक नोक। चोवोकी तीला ज्‍यल्‍का थोप्‍नी “ओ हननिया!” सिनी कताङ्‍सुङ। तमा तीकी “ला चोवो, ङ दे राङ वे।” सिनी सिक्‍यासुङ।
ACT 9:11 तमा चोवोकी तीला सुङ्‍सुङ, “ख्‍युरुङ थेकाङ सिरुप लामला वोतुप यहूदाकी खाङ्‍बा ग्‍युक! तमा ते लेप्‍सिमा टार्ससकी शाऊल कनी वे सिनी टी! तन्‍दा ती मी ति तेराङ कोन्‍छ्‍योकला मोपोर क्‍यानी देन वे।
ACT 9:12 तीकी हननिया सिरुप मी यी वानी खोरो गोला लाक्‍पा ज्‍याक्‍सिमा खोरो मिक थोङ थुपुप ज्‍यल्‍का थोप्‍नी वे।”
ACT 9:13 तमा हननियाकी सिक्‍यासुङ, “चोवो, ती मी तीकी याङ यरूशलेमला देतुप तेपा कितुप मीतिवाला छासे मेलोक्‍पा किनोक सिरुप ति मी बङीकी ख नेसुर ङे थोसुङ।
ACT 9:14 दे साङ येशूकी मिङला तेपा कितुपतिवा तेरीला टानी टि डोपला कोङ्‍यार छ्‍येतिवा नेसुर तीला ओङ ङ्‍येनी वे।”
ACT 9:15 यिने चोवोकी हननियाला सुङ्‍सुङ, “ख्‍युरुङ ग्‍युक! गल्‍नी ङे काङ सिक्‍यावे, ती ति की! च्‍यिलासिसिन शाऊल ति मिरिक यम्‍बातिवा ताङ ग्‍येल्‍वुतिवा ताङ इस्राएल मीतिवाला ङे सुङ ख्‍याप्‍टाक कितुपला पेतुप मी यिन।
ACT 9:16 तमा तीकी ङे थोक्‍ला चो दुक्‍पा खुर गोकिनोक सिरुप ति ङ तीला छ्‍या देनिन।”
ACT 9:17 चोवोकी तुक सुङ्‍सिमा हननिया गल्‍नी ती खाङ्‍बी नाङ्‍ला शुसुङ। तमा शाऊलकी गोला लाक्‍पा ज्‍याक्‍नी “आङ शाऊल, ख्‍युरुङ दी ग्‍येसाला वुङ्‍गुप पेला लामला ख्‍युरुङला छ्‍या देन्‍दुप चोवो येशूकी ख्‍युरुङला येलुङ थोङ थुपुप ताङ ख्‍युरुङ कोन्‍छ्‍योककी थु चाङ्‍माकी क्‍येङ्‍शी सुङ्‍नी ङला ख्‍योरो चाला तङ्‍गुप यिन।” सिनी सिक्‍यासुङ।
ACT 9:18 हननियाकी तुक सिक्‍यालुङ्‍मे शाऊलकी मिक नेमा चेताक दोके थेन गल्‍नी तीकी मिक ति थोङ थुपुप गाल्‍सुङ। तमा ती ति खोक लान गल्‍नी बप्‍तिस्‍मा लासुङ।
ACT 9:19 ती ज्‍युक्‍ला तीकी समा सोसिमा जुला ङार ङ्‍येसुङ। तमा शाऊल ङ्‍यिमा अलायी सेक दमस्‍कसला वोतुप लोमातिवी मुला राङ देसुङ।
ACT 9:20 ते शार्क्येक तीकी येशू ति कोन्‍छ्‍योककी सेवु राङ यिन सिनी यहूदी छ्‍योखाङतिवी नाङ्‍ला ख्‍याप्‍टाक कितुप छाल्‍सुङ।
ACT 9:21 तीकी सुङ ख्‍याप्‍टाक क्‍यावु थोनी मीतिवा तेरी हलेवा लानी, “काङ दी मी ति याङ यरूशलेमला वोतुप येशूकी तिङ्‍ला तिङ्‍योकुपतिवाला छेटाङ तेरुप ति मिन? तोजो तिराङ मिन, दीकी याङ देकी तेपा कितुपतिवाला साङ जिम्‍नी कोङ्‍यार छ्‍येतिवाला चेक तेतुपला वावु यिन।” सिनी सिक्‍यासुङ।
ACT 9:22 यिन्‍सिनाङ शाऊल मङ ङार छ्‍येवु गल्‍नी दमस्‍कसला देतुप यहूदीतिवाला वुतुङ के येशू राङ ख्रीष्‍ट यिन सिरुप पङ्‍बु बिन्‍नी तिवी सेमला काङ कितुप काङ कितुप जोसुङ।
ACT 9:23 ती तप्‍की ङ्‍यिमा अलायी ज्‍युक्‍ला यहूदीतिवी शाऊलला सेतुप छाल्‍सुङ।
ACT 9:24 ती ताम्‍ङे ति मीतिवी शाऊलला सिक्‍यासुङ। तमा यहूदीतिवा शाऊलला सेतुप सिनी गारी गुरीला दोकर ग्‍यपुप ग्‍येसा नेमा पाङ्‍ला थेन्‍दुप गोतिवी चाला ङ्‍यी ताङ नुप्‍ज्‍या गुनी देकिनोक।
ACT 9:25 ती तप्‍की तीकी मुला वोतुप लोमातिवी तीला नुपला राङ तोलुम नाङ्‍ला ज्‍याक्‍नी ग्‍येसाकी दोकर ख नेमा मर पाप्‍नी ताङ्‍सुङ।
ACT 9:26 तेसुर शाऊल यरूशलेमला लेप्‍सिमा तेकी लोमातिवा ताङ मुला थिन्‍दुप छाल्‍सुङ। यिने तिवा तेरी ती ताङ मुला ज्‍यिवा क्‍यासुङ। च्‍यिलासिसिन शाऊल ति वुतुङ के येशूकी लोमा यिन सिरुप ति तिवी तेपा कि माथुप।
ACT 9:27 तमा लोमातिवी पर नेमा बारनाबासकी शाऊलकी लाक्‍पाला जिम्‍नी लोमा छ्‍येतिवी चाला टि वानी चुक क्‍यानी चोवो येशूकी शाऊलला दमस्‍कस डोप लामला छ्‍यार्सुङ, खोकी तीला काङ सुङ्‍सुङ, तमा चुक क्‍यानी ती ग्‍येसाला ज्‍यिवा माक्‍यावा क्‍यानी येशूकी मिङला लेन ल्‍यामु ख्‍याप्‍टाक क्‍यासुङ, ती तेरी ताम्‍ङे ति तिवाला लाप्‍सुङ।
ACT 9:28 ती तप्‍की यरूशलेमला वोतुप लोमातिवी शाऊलकी ताम्‍ङेला तेपा क्‍यासुङ। तुक क्‍यानी शाऊल ति तेपा कितुप मीतिवी मुला नरी देनी काङ ज्‍यिवा माक्‍यावा क्‍यानी यरूशलेमला युनी येशूकी सुङ ख्‍याप्‍टाक क्‍यासुङ।
ACT 9:29 तमा खो ग्रीक ताम्‍ङे लपुप यहूदीतिवी मुला येशूकी सुङगी कोर्ला ताम्‍ङे कितुप ताङ केवुल साङ किनोक। यिने तिवी तीला सेतुप छोल्‍गिनोक।
ACT 9:30 ती ताम्‍ङे थोसिमा तेपा कितुपतिवी शाऊलला कैसरियाला टि वानी तेसुर तीला टार्ससला ताङ्‍सुङ।
ACT 9:31 तमा यहूदिया ताङ गालील ताङ सामरियाला वोतुप तेरी चर्चतिवाला लोदिमु ताङ रम्‍बु डोयी गाल। तेपा कितुपतिवा कोन्‍छ्‍योकला ज्‍यिवा क्‍यानी खोकी सुङला युकुप ताङ खोकी थु चाङ्‍माकी टोङ्‍गु ङ्‍येनी चर्चतिवा मङ मङ फरिन गाल्‍सुङ।
ACT 9:32 ती पेला पत्रुस ति फार छुर तेरी दासाला कोरा ग्‍यकिन ग्‍यकिन लुड्‍डाला वोतुप तेपा कितुपतिवी चाला लेप्‍सुङ।
ACT 9:33 ते तीकी एनियास सिरुप मी यी ठेसुङ। ती मी ति लो ग्‍ये नेज्‍युनी काङ्‍बा लाक्‍पा शोरुप नेजु ग्‍यप्‍नी ङ्‍यिलोक्‍नी राङ देकिनोक।
ACT 9:34 तमा पत्रुसकी तीला “ओ एनियास, येशू ख्रीष्‍टकी ख्‍युरुङला टेक ज्‍यिकिवी। खोक लानी ख्‍योरो सप्‍तेन थुल!” सिनी सिक्‍यासुङ। तमा ती ति शार्क्येक खोक लासुङ।
ACT 9:35 ती थोङ्‍सिमा लुड्‍डा ताङ शारोनला देतुप मीतिवा तेरीकी येशूला तेपा क्‍यासुङ।
ACT 9:36 योप्‍पा ग्‍येसाला तबीता सिरुप पुम्‍पेजा यी देकिनोक। तीकी मिङ ति ग्रीक ताम्‍ङेला डोरकास सिनोक। तीकी नरी लाका टेङ्‍बु तिराङ कितुप ताङ पेराङ्‍बुतिवाला साङ दाल्‍जा किनोक।
ACT 9:37 तोजो पेला राङ ती ति नानी शिसुङ। तमा मीतिवी तीला जु टुनी येर तेला वोतुप कोठाला ज्‍याक्‍सुङ।
ACT 9:38 पत्रुस ति लुड्‍डाला वे सिरुप ति लोमातिवी थोनी मी मिरा ङ्‍यीला “ङ्‍यिरा ते ङमु फेप।” सिनी गोङ्‍बा शु ताङ्‍सुङ। च्‍यिलासिसिन लुड्‍डा ति योप्‍पा नेवा थाक्‍ङ्‍यिमु राङ ख्‍येल्‍गिनोक।
ACT 9:39 तमा पत्रुस तिवी मुला ते गाल। ते लेप्‍सिमा तिवी पत्रुसला येला तेला वोतुप कोठाला क्‍याल्‍सुङ। ते पेर्मी युक्‍सिमतिवा तेरी पत्रुसकी गारी गुरीला लानी ङुयी सिरा तबीता तिवी मुला वोतुप पेला तीकी चेम्‍बुप मज्‍यातिवा छ्‍या तेन्‍सुङ।
ACT 9:40 तमा पत्रुसकी ते खाङ्‍बी नाङ्‍ला वोतुप मीतिवा तेरीला पाङ्‍ला तेन तङ्‍नी पुमुङ चुनी मोपोर क्‍यासुङ। ती ज्‍युक्‍ला फुङ्‍बु तीकी थाकाला ल्‍हानी, “ओ तबीता खोक लो!” सिनी सिक्‍यासुङ। तमा तीकी मिक पेनी पत्रुसला थोङ्‍सिमा लानी देसुङ।
ACT 9:41 तमा पत्रुसकी तीकी लाक्‍पाला जिम्‍नी खोक लाङ्‍सुङ। ती ज्‍युक्‍ला तेकी युक्‍सिमतिवा ताङ तेपा कितुपतिवाला नाङ्‍ला कताङ्‍नी ती शेप ने सेन्‍बु लावु ति तेरीला छ्‍या तेन्‍सुङ।
ACT 9:42 ती ताम्‍ङे थोनी योप्‍पाला देतुप मीतिवा माङ्‍शोककी येशूला तेपा क्‍यासुङ।
ACT 9:43 ती ज्‍युक्‍ला पत्रुस योप्‍पा ग्‍येसाला क्‍वा चेम्‍बुप सिमोन सिरुप मी यीकी खाङ्‍बा ङ्‍यिमा अलायी देसुङ।
ACT 10:1 ती पेला कैसरिया ग्‍येसाला कर्नेलियस सिरुप रोमी मी यी नोक। ती ति इटालिया सिरुप रोमी मक्‍मी सयी च्‍यिककी खकी छ्‍ये यिनोक।
ACT 10:2 ती कर्नेलियस ति कोन्‍छ्‍योककी सुङला युकुप मी नोक। तीकी मिछाङतिवा तेरी मुला कोन्‍छ्‍योकला ज्‍यिवा क्‍यानी पेराङ्‍बुतिवाला बुल्‍दिर ग्‍यकुप ताङ कोन्‍छ्‍योकला नरी मोपोर कियिनोक।
ACT 10:3 ङ्‍यिम्‍ज्‍यिक गोसे छ्‍युजी सुम चोयीला ज्‍यल्‍काला कोन्‍छ्‍योककी लेन क्‍योलुप थु यी खोरो चाला वुङ्‍गुप ति कर्नेलियसकी ल्‍यामो क्‍यानी थोङ्‍सुङ। तमा ती लेन क्‍योलुप थु तीकी कर्नेलियसला “ओ कर्नेलियस!” सिनी कताङ्‍सुङ।
ACT 10:4 देवाच्‍येनकी लेन क्‍योलुप थु तीला थोङ्‍सिमा कर्नेलियसकी ज्‍यिवा लानी दुक सिक्‍यासुङ, “ओ चोवो, ख्‍युरुङला काङ गोसुङ?” तमा देवाच्‍येनकी लेन क्‍योलुप थु तीकी सिक्‍यासुङ, “ख्‍योरो मोपोर क्‍यावु ताङ पेराङ्‍बुतिवाला बुल्‍दिर बिन्‍दुप ति कोन्‍छ्‍योकला छ्‍या वे।
ACT 10:5 तुक क्‍यानी त याङ पत्रुस सिरुप सिमोनला कतोङ्‍गुपला मीतिवा योप्‍पा ग्‍येसाला तोङ!
ACT 10:6 ती ति ग्‍येम्‍छो गारीला देतुप क्‍वा चेम्‍बुप सिमोन सिरुप मी यीकी खाङ्‍बा देनी वे।”
ACT 10:7 तोजोयी सिक्‍यासिमा देवाच्‍येनकी लेन क्‍योलुप थु ति गाल। गल्‍सिमा कर्नेलियसकी खोरो लावा मिरा ङ्‍यी ताङ यम्‍बा खोरुङला शब्‍ज्‍यी कितुप कोन्‍छ्‍योककी कला युकुप मक्‍मी यीला कताङ्‍सिमा
ACT 10:8 ते च्‍युङ्‍गुप ताम्‍ङेतिवा तेरी सिक्‍यानी तिवाला योप्‍पा ग्‍येसाला ताङ्‍सुङ।
ACT 10:9 ती सला तीला ङ्‍यिमी गुङगी छ्‍युजी च्‍यिङ्‍ङी चोयीला कर्नेलियसकी तङ्‍गुप मीतिवा योप्‍पा ग्‍येसाला लेप्‍सुङ। ती पेला पत्रुस ति मोपोर कितुपला खाङ्‍बी खला वोतुप कौसीला गाल्‍नोक।
ACT 10:10 ती पेला पत्रुसला ल्‍होवा लावु तप्‍की काङ रे च्‍यिक रे सयिदे लानोक। यिने यम्‍बातिवा समा जोयी कितुप पेला तीकी नाम सेवु ताङ नाम नेमा सुर सुरला टावु च्‍यादार दोके सला पपिन वोतुप ज्‍यल्‍का थोङ्‍सुङ।
ACT 10:12 ती च्‍यादार खला जम्‍बुलिङकी नम्‍बा कुतुक कुतुक ठेक्‍पा ज्‍यी चुनी युकुप सेम्‍ज्‍येन ताङ जु टिनी युकुप बु ताङ नामला फुरुप च्‍यच्‍युमतिवा तेरी नोक।
ACT 10:13 तमा ते पत्रुसला “ओ पत्रुस, लानी तिवा सेनी सो।” सिरुप वोरु यी थोसुङ।
ACT 10:14 तमा पत्रुसकी सिक्‍यासुङ, “चोवो, मिन! ङे याङ नाम्‍साङ मेचेङ्‍गा वोतुप श मासो वे।”
ACT 10:15 ती ज्‍युक्‍ला साङ येलुङ दुक सिरुप वोरु यी लेसुङ, “कोन्‍छ्‍योककी चेङ्‍गा जो नङ्‍गुप च्‍यालकला ख्‍योरो मेचेङ्‍गा यिन सिनी नासाम मातोङ!”
ACT 10:16 येलुङ तिङ्‍ला साङ थेङ्‍मा सुम सेक तुक सिरुप वोरु थोसुङ। तमा ती ज्‍युक्‍ला शार्क्येक ती च्‍यादार ति नाम ने केला राङ लोक्‍नी गाल।
ACT 10:17 तमा खोरो थोङ्‍गुप तेन्‍दोक ति काङ यिनाङ सिनी पत्रुसकी सेम ख्‍यला ख्‍यिला गाल। ती पेला राङ कर्नेलियसकी तङ्‍गुप मीतिवा सिमोन पत्रुस देतुप खाङ्‍बा च च्‍येयी सिरा ती खाङ्‍बी गोला थेन्‍सुङ।
ACT 10:18 तमा ती खाङ्‍बी नाङ्‍ला देतुप मीतिवाला कतोङ्‍यिन सिरा पत्रुस सिरुप सिमोन देतुप खाङ्‍बा ति दी राङ यिन सिनी टिसुङ।
ACT 10:19 ती पेला पत्रुस ति खोरो थोङ्‍गुप ताङ थोवुकी कोर्ला नासाम तोङ्‍यिन नोक। कोन्‍छ्‍योककी थु चाङ्‍माकी तीला सुङ्‍सुङ, “सिमोन, ख्‍युरुङला मी मिरा सुमकी छोलिन नोक।
ACT 10:20 तुक क्‍यानी तन्‍दा लानी मर वोक्‍ला गल्‍नी ज्‍यिवा माक्‍यावा क्‍यानी तिवी मुला राङ ग्‍युक। च्‍यिलासिसिन तिवाला ङे राङ तङ्‍गुप यिन।”
ACT 10:21 तमा पत्रुस मर वोक्‍ला पाप्‍नी ती मीतिवी चाला गल्‍नी सिक्‍यासुङ, “ल्‍हो ताङ, ख्‍यिरा छलुप मी याङ ङ राङ यिन। ख्‍यिराङ दे च्‍यिला वावु यिन?”
ACT 10:22 तमा तिवी सिक्‍यासुङ, “ङ्‍यिराङला याङ रोमी मक्‍मी सयी च्‍यिककी खकी छ्‍ये कर्नेलियसकी तङ्‍गुप यिन। खो ति कोन्‍छ्‍योककी थोङ्‍दाङला टेङ्‍बु वोतुप ताङ खोला ज्‍यिवा कितुप ताङ यहूदीतिवा तेरीकी ताङ्‍देन क्‍यावु मी यिन। चाङ्‍मा वोतुप देवाच्‍येनकी लेन क्‍योलुप थु यीकी ख्‍योरो ताम्‍ङे ङ्‍येन्‍दुपला ख्‍युरुङला कताङ्‍नी शोक सिनी खोला सुङ्‍नोक।”
ACT 10:23 ती ताम्‍ङे थोनी पत्रुसकी ती मीतिवाला गासो शुनी खोरो खाङ्‍बाला शासा दे च्‍यिसुङ। ती सला तीला कर्नेलियसकी तङ्‍गुप मिरा सुमतिवा ताङ मुला पत्रुस गाल्‍सुङ। तिवी मुला योप्‍पाकी यम्‍बा तेपा कितुप मीतिवा साङ गाल्‍सुङ।
ACT 10:24 न तीला तिवा कैसरिया लेप्‍सुङ। ती पेला कर्नेलियस ति खोरो नाङ्‍बातिवा ताङ दाल्‍जातिवाला साङ कताङ्‍नी पत्रुसला गुनी देनोक।
ACT 10:25 तमा पत्रुस कर्नेलियसकी खाङ्‍बा लेप्‍लुङ्‍मेताला पत्रुसकी काङ्‍बाला कर्नेलियसकी शावा क्‍यासुङ।
ACT 10:26 यिने पत्रुसकी कर्नेलियसला दुक सिनी येर लाङ्‍सुङ, “येर लो! ङ साङ ख्‍युरुङ दोके मी राङ यिन।”
ACT 10:27 तमा पत्रुस कर्नेलियस ताङ मुला ताम्‍ङे कियी कोठा नाङ्‍ला गल्‍नी मीतिवा बङी जोम वोतुप ति थोङ्‍नी
ACT 10:28 तिवाला सिक्‍यासुङ, “यहूदी मिन्‍दुप मिरिक यम्‍बाकी मीतिवी मुला ठेतुप ताङ तिवी दला शुकुप ति यहूदी ठिमला ल्‍यामु मिन सिरुप ताम्‍ङे ख्‍यिराङला साङ छ्‍या राङ वे। क्‍यासिनाङ कोन्‍छ्‍योककी ङला मी सुला साङ मेचेङ्‍गा यिन नो माकी सिनी सुङ वे।
ACT 10:29 ती तप्‍की ख्‍यिरा ङला कताङ्‍सिमा ताम्‍ङे काङ साङ माटिवा क्‍यानी ङ दे वायिन। तुक क्‍यानी ङ ख्‍यिराङला ताम्‍ङे यी टेयी, ख्‍यिरा ङला काङगी थोक्‍ला कतङ्‍गुप यिन?”
ACT 10:30 तमा कर्नेलियसकी सिक्‍यासुङ, “ङ्‍यिमा ज्‍यी गोमाला गोसे छ्‍युजी सुम चोयीला ङ खाङ्‍बा देनी मोपोर कियी वोतुप पेला वो ग्‍यकुप मज्‍या कर्मु कोन्‍दुप मी यी शार्क्येक ङे चिप्‍ला वानी,
ACT 10:31 ‘ओ कर्नेलियस, ख्‍योरो मोपोर क्‍यावु ति कोन्‍छ्‍योककी थोनी वे। तमा पेराङ्‍बुतिवाला ख्‍योरो च्‍यम्‍बा क्‍यावु ति कोन्‍छ्‍योकला छ्‍या वे।
ACT 10:32 ती तप्‍की पत्रुस सिरुप सिमोनला दे कतोङ्‍गुपला ख्‍योरो मीतिवा योप्‍पाला तोङ। ती ति ग्‍येम्‍छोकी गारीला क्‍वा चेम्‍बुप सिमोनकी खाङ्‍बा देनी वे।’ सिनी सुङ्‍सुङ।
ACT 10:33 ती तप्‍की ख्‍युरुङला ङे शार्क्येक कतोङ तङ्‍गुप यिन। तमा ख्‍युरुङ साङ दे फेप्‍सुङ। त याङ कोन्‍छ्‍योककी ख्‍युरुङला क नङ्‍गुप तेरी ताम्‍ङेतिवा ङ्‍येन्‍दुपला ङ्‍यिराङ तेरी कोन्‍छ्‍योककी थोङ्‍दाङला जोम वे।”
ACT 10:34 ती थोसिमा पत्रुसकी सिक्‍यासुङ, “त याङ ङे हाक्‍कोसुङ। कोन्‍छ्‍योककी मी ललाइला ल्‍यामु, मी ललाइला मेलोवा मिकिवी, तेरीला च्‍यिक्‍पा राङ किवी।
ACT 10:35 तमा खोला ज्‍यिवा कितुप ताङ लाका टेङ्‍बु कियी वोतुप मिरिक तेरीला खोकी गासो शिवी।
ACT 10:36 इस्राएलकी मीतिवी थोक्‍ला कोन्‍छ्‍योककी नङ्‍गुप सुङ ति ख्‍यिराङला साङ छ्‍या वे। ती सुङ ति येशू ख्रीष्‍ट नेमा सुङ्‍गुप कोन्‍छ्‍योक ताङ मीतिवी पर्ला वोतुप लोदिमुकी लेन ल्‍यामु यिन। तमा येशू ति तेरीकी चोवो यिन।
ACT 10:37 येलुङ ती सुङ ति यूहन्‍नाकी बप्‍तिस्‍माकी सेम ग्‍युरुप कोर्ला ख्‍याप्‍टाक क्‍यावु तिङ्‍ला गालील नेज्‍युन गो चुनी यहूदियाकी लुङ्‍बा तेरीला ख्‍याप्‍टाक क्‍यावु सुङ यिन।
ACT 10:38 कोन्‍छ्‍योककी नासरतकी येशूला खोकी थु चाङ्‍मा ताङ ङार छ्‍येवु ओङ नाङ्‍सुङ। तमा कोन्‍छ्‍योक ति खोकी मुला राङ ज्‍यु वोतुप तप्‍की लुङ्‍बाकी छो ज्‍यीला खोकी लाका ल्‍यामुतिवा कियी शैतानकी दुक्‍पा बिन्‍नी नानी वोतुप ताङ डेकी कुलुपतिवा तेरीला टेक च्‍यितुप ति ख्‍यिराङला साङ छ्‍या वे।
ACT 10:39 यहूदीतिवी लुङ्‍बा ताङ यरूशलेमला खोकी काङ क्‍या नङ वे, ती तेरी ताम्‍ङेकी पङ्‍बु ति ङ्‍यिराङ यिन। खोला राङ यहूदीतिवी ग्‍यङ्‍शिङ लोला कल्‍नी सेसुङ।
ACT 10:40 यिने टुङ्‍गुप ङ्‍यिमा सुमला राङ कोन्‍छ्‍योककी खोला ङोसु लाङ्‍नी मीतिवी चिप्‍ला छ्‍या तेन्‍सुङ।
ACT 10:41 ती पेला तेरी मीतिवी खो माथोङ, यिने खोकी पङ्‍बु तेरुपला ङ्‍यिराङ कोन्‍छ्‍योककी तोङ्‍ला के पेतुपतिवी तिराङ थोङ्‍सुङ। तमा येशू टुङ्‍नी ङोसु लावु ज्‍युक्‍ला खोकी मुला राङ देनी ङ्‍यिरा समा साङ सोयिन।
ACT 10:42 सेन्‍बु वोतुप ताङ शेपतिवी खला ठिम तोङ्‍गुपला कोन्‍छ्‍योककी येशूला पेसुङ। ती ताम्‍ङे ति मीतिवाला ख्‍याप्‍टाक कितुप ताङ पङ्‍बु तेरुपला येशूकी ङ्‍यिराङला क नङ वे।
ACT 10:43 खोला तेपा कितुपतिवा तेरीला खोकी मिङ नेमा तिवी क्‍यावु दिक्‍पा ने थर ज्‍यिकिवी सिनी तेरी कोन्‍छ्‍योककी लुङ्‍तेम्‍बातिवी खोकी कोर्ला सिक्‍या वे।”
ACT 10:44 पत्रुसकी ती ताम्‍ङे ति सियी वोतुप पेला ते सुङ ङ्‍येन्‍दुपतिवा तेरीकी खला कोन्‍छ्‍योककी थु चाङ्‍मा पाप्‍नी फेप्‍सुङ।
ACT 10:45 तमा यहूदी मिन्‍दुप मिरिक यम्‍बाकी मीतिवाला साङ कोन्‍छ्‍योककी थु चाङ्‍मा फेवु थोङ्‍सिमा पत्रुसकी मुला वावु तेपा कितुप यहूदीतिवा हलेवा क्‍यासुङ।
ACT 10:46 च्‍यिलासिसिन तिवा ग्‍येताम कुतुक कुतुकला ताम्‍ङे लपुप ताङ कोन्‍छ्‍योकला सोवा देकुप ति तिवी थोसुङ। तमा पत्रुसकी सिक्‍यासुङ,
ACT 10:47 “ङ्‍यिराङला दोके कोन्‍छ्‍योककी थु चाङ्‍मा याङ दिवाला साङ थोप्‍सुङ। त याङ दी मीतिवाला बप्‍तिस्‍मा लङ्‍गुपला सी ग्‍येक थुप्‍किवी रो?”
ACT 10:48 तमा पत्रुसकी तिवाला येशू ख्रीष्‍टकी मिङला बप्‍तिस्‍मा बिन्‍सुङ। तमा तिवी पत्रुसला ङ्‍यिमा च्‍येयी ते राङ ज्‍यु सिनी गोङ्‍बा शुसुङ।
ACT 11:1 तमा यहूदी मिन्‍दुप मिरिक यम्‍बाकी मीतिवी साङ कोन्‍छ्‍योककी सुङ ङ्‍येन्‍नी तेपा क्‍यानोक सिरुप ताम्‍ङे ति लोमा छ्‍येतिवा ताङ यहूदियाला वोतुप तेपा कितुपतिवी थोनोक।
ACT 11:2 ती थोसिमा पत्रुस यरूशलेमला लेपुप पेला यहूदियाला वोतुप तेपा कितुपतिवी पत्रुसला
ACT 11:3 “ख्‍युरुङ यहूदीतिवी च्‍येतुप लुक्‍सु मालावु मीतिवी ते गल्‍नी तिवी मुला च्‍यिला समा सोवु? ती ति दाक्‍पी लुक्‍सुला मे।” सिनी क्‍येन बिन्‍सुङ।
ACT 11:4 तमा गोमाला काङ च्‍युङ्‍गुप ताम्‍ङे तेरी रिम्‍बा क्‍यानी पत्रुसकी दुक सिनी शेसुङ,
ACT 11:5 “ङ योप्‍पा ग्‍येसाला मोपोर कियी वोतुप पेला ज्‍यल्‍का थोप्‍नी सुर सुरला टावु च्‍यादार दोके नाम नेमा ङे चाला पापिन वोतुप ति ङे थोङ्‍सुङ।
ACT 11:6 तमा ती नाङ्‍ला ङे ल्‍यामो क्‍यान ल्‍हासिन के ते याङ जम्‍बुलिङकी ठेक्‍पा ज्‍यी चुनी युकुप सेम्‍ज्‍येनतिवा ताङ जु टिनी युकुप बु ताङ नामगी च्‍यच्‍युमतिवा नोक।
ACT 11:7 तमा ङला ‘ओ पत्रुस, दिवाला सेनी सो!’ सिरुप वोरु यी ङे थोसुङ।
ACT 11:8 यिने ङे ‘चोवो, मिन! त सेक्‍ला ङे चेङ्‍गा मेतुप च्‍यालक काङ साङ मासो वे।’ सिनी सिक्‍यायी।
ACT 11:9 येलुङ देवाच्‍येन नेमा ‘कोन्‍छ्‍योककी चेङ्‍गा जो नङ्‍गुप च्‍यालकला ख्‍योरो मेचेङ्‍गा यिन नो माकी!’ सिरुप वोरु यी ङला थोसुङ।
ACT 11:10 थेङ्‍मा सुम सेक तुक सिक्‍यासिमा ती च्‍यादार च्‍यिन्‍दै ति येलुङ येर नामला राङ लोक्‍नी गाल्‍सुङ।
ACT 11:11 ती पेला राङ कैसरिया नेसुर ङला कतोङ तङ्‍गुप मी मिरा सुमतिवा ङ देतुप खाङ्‍बी गे चाला राङ वानोक।
ACT 11:12 तमा कोन्‍छ्‍योककी थु चाङ्‍माकी ङला ‘नाम्‍दोक माक्‍यानी तिवी मुला ग्‍युक!’ सिनी सुङ्‍सुङ। तेसुर तन्‍दा ङे मुला वोतुप योप्‍पा नेसुर वावु तेपा कितुप मिरा टुक साङ ङे मुला राङ कैसरियाला गलिन। तमा ती ङ्‍यिराङला कतोङ तोङ्‍गुप मी तीकी खाङ्‍बा टिम्‍बु राङ लेप्‍सुङ।
ACT 11:13 ङ्‍यिराङ ते लेप्‍सिमा ती मी तीकी ङ्‍यिराङला देवाच्‍येनकी लेन क्‍येलुप थु च्‍यिक तीकी खाङ्‍बा वानी, ‘मीतिवा योप्‍पाला तङ्‍नी पत्रुस सिरुप सिमोनला कताङ्‍नी शोक!
ACT 11:14 तमा तीकी ख्‍युरुङला कोन्‍छ्‍योककी सुङ लप्‍कितो। ती नेसुर राङ ख्‍युरुङ ताङ ख्‍योरो तेरी मिछाङला दिक्‍पा ने थर ज्‍यिकिवी।’ सिनी ङ्‍यिराङला लाप्‍सुङ।
ACT 11:15 तमा तिवाला ङे मालोक सुङ लपिन कितुप पेला तोङ्‍ला दाक्‍पी खला फेवु दोके क्‍यानी तिवी खला साङ कोन्‍छ्‍योककी थु चाङ्‍मा फेप्‍सुङ।
ACT 11:16 ती पेला ‘यूहन्‍नाकी याङ छ्‍यु थ्‍वोनी बप्‍तिस्‍मा बिन्‍सुङ। यिने ख्‍यिराङला कोन्‍छ्‍योककी थु चाङ्‍माकी बप्‍तिस्‍मा नङ्‍गितो।’ सिनी चोवो येशूकी गोमाला सुङ्‍गुप ति ङला नासाम शार्सुङ।
ACT 11:17 तुक क्‍यानी दाक्‍पु चोवो येशू ख्रीष्‍टला तेपा कितुपतिवाला कोन्‍छ्‍योककी नङ्‍गुप थु चाङ्‍मा ति तिवाला साङ नाङ्‍सुङ सिसिन खोकी नोवाला ङे चुक क्‍यानी ग्‍येक थुप्‍किवी रो?”
ACT 11:18 ती थोसिमा पत्रुसला क्‍येन तेरुपतिवा खरक्‍पा देसुङ। तमा “त याङ कोन्‍छ्‍योककी यहूदी मिन्‍दुप मिरिक यम्‍बाकी मीतिवाला साङ सेम ग्‍युर्नी नाम्‍साङ मिशिवु मिजी थोपुप लाम नाङ्‍सुङ।” सियी कोन्‍छ्‍योकला सोवा देकुप छाल्‍सुङ।
ACT 11:19 तमा मीतिवी स्‍तिफनसला सेसिमा तेपा कितुप मीतिवाला साङ छेटाङ बिन्‍दुप तप्‍की तेपा कितुप मीतिवा यरूशलेम नेवा थरा थुरा गल्‍नी फोनिके ताङ साइप्रस ताङ सिरियाकी एन्‍टिओखिया लुङ्‍बा सेक लेप्‍सुङ। तमा तिवा ते राङ देनी यहूदीतिवाला तिराङ येशूकी कोर्ला सुङ ख्‍याप्‍टाक क्‍यासुङ।
ACT 11:20 ती पर्ला ललाइ ति साइप्रस ताङ कुरेनीकी मीतिवा नोक। तिवा ति एन्‍टिओखियाला वानी ग्रीककी मीतिवाला साङ येशू ख्रीष्‍टकी कोर्ला लेन ल्‍यामु ख्‍याप्‍टाक क्‍यासुङ।
ACT 11:21 तमा कोन्‍छ्‍योककी ओङ वोतुप तप्‍की तिवी ख्‍याप्‍टाक क्‍यावु सुङ थोनी मी बङी चोवो येशूला तेपा क्‍यानी कोन्‍छ्‍योककी थाकाला ग्‍युर्सुङ।
ACT 11:22 ती ताम्‍ङे ति यरूशलेमकी चर्चला साङ हाक्‍कोनी बारनाबासला एन्‍टिओखियाला ताङ्‍सुङ।
ACT 11:23 बारनाबास ते लेप्‍सिमा तेकी मीतिवाला कोन्‍छ्‍योककी कटिन थोपुप थोङ्‍नी गा क्‍यासुङ। तमा सेमगी दिङ नेज्‍युनी चोवो येशूला तेपा रम्‍बु क्‍यानी दे गोकितो सिनी तिवाला टोङ्‍गु बिन्‍सुङ।
ACT 11:24 ती बारनाबास ति मी टेङ्‍बु ताङ कोन्‍छ्‍योककी थु चाङ्‍माकी क्‍येङ्‍गुप ताङ तेपा रम्‍बु वोतुप मी यिन्‍दुप तप्‍की ते मी बङीकी चोवो येशूला तेपा क्‍यासुङ।
ACT 11:25 ती ज्‍युक्‍ला शाऊलला छोलुपला बारनाबास ति टार्ससला गल्‍नी
ACT 11:26 शाऊलला ठेसिमा एन्‍टिओखियाला टिनी वासुङ। तमा तिवी मुला लो खोर्मा यी सेक देनी चर्चला वोतुप तेपा कितुप मीतिवा बङीला नरी ठेनी येन्‍देन बिन्‍सुङ। ती पेला नेज्‍युनी एन्‍टिओखियाला वोतुप लोमातिवाला थल्‍माला ख्रीष्‍टियान सिनी सिक्‍यावु यिन।
ACT 11:27 ती पेला ललाइ कोन्‍छ्‍योककी लुङ्‍तेम्‍बातिवा यरूशलेम नेसुर एन्‍टिओखियाला वानोक।
ACT 11:28 तिवी पर्ला अगाबस सिरुप कोन्‍छ्‍योककी लुङ्‍तेम्‍बा मिरा च्‍यिककी रोमकी लुङ्‍बा तेरीला छासे ङ्‍यिमा मर्वु शर्कितो सिनी कोन्‍छ्‍योककी थु चाङ्‍मा नेमा नम्‍दर शेसुङ। ती ति रोमकी ग्‍येल्‍वु क्‍लौडियसकी ङोला च्‍युङ्‍गिनोक।
ACT 11:29 तुक क्‍यानी एन्‍टिओखियाला देतुप तेपा कितुप मीतिवी दाक दाक्‍पी काङ अछ्‍योवु ति टङ्‍गा दुनी यहूदियाला देतुप तेपा कितुपतिवी थोक्‍ला कल तोङ्‍गुप सिनी तेन्‍तेन क्‍यासुङ।
ACT 11:30 तमा तिवी दुवु टङ्‍गा ति बारनाबास ताङ शाऊलकी लक नेवा क्‍यानी यरूशलेमला वोतुप चर्चकी गोमा कितुप मी छ्‍येतिवाला कल्‍नी ताङ्‍सुङ।
ACT 12:1 ती पेला यरूशलेमकी चर्चला वोतुप तेपा कितुप मीतिवा ललाइला ग्‍येल्‍वु हेरोदकी छेटाङ तेरुपला जिम्‍बुप छाल्‍सुङ।
ACT 12:2 तमा यूहन्‍नाकी अच्‍यु याकूबला खुर्पा थ्‍वोनी से च्‍यिसुङ।
ACT 12:3 तुक क्‍यासिमा यहूदीतिवा गा क्‍यावु थोङ्‍नी तीकी पत्रुसला साङ जिम्‍सुङ। ती पेला ति खमीर मालुकुप शुब्‍ज्‍याङ साप तुछ्‍येनला यिन्‍नोक।
ACT 12:4 तीकी पत्रुसला जिम्‍नी चोन्‍खाङला उप्‍सिमा मक्‍मी मिरा ज्‍यी ज्‍यीकी छो ज्‍यी जोनी गोर्मा ताङ्‍नी र्‍हेन्‍दुपला ज्‍याक्‍सुङ, तमा खमीर मालुकुप शुब्‍ज्‍याङ साप तुछ्‍येन सिन्‍सिमा लुङ्‍बाकी मीतिवी चिप्‍ला टि वानी ठिम कितुप नो क्‍यानोक।
ACT 12:5 पत्रुस चोन्‍खाङला वोतुप पेला चर्चकी मीतिवा तेरीकी तीकी थोक्‍ला कोन्‍छ्‍योकला मोपोर क्‍यासुङ।
ACT 12:6 तमा ग्‍येल्‍वु हेरोदकी पत्रुसला ठिम तोङ्‍गुपला चोन्‍खाङ नेमा पाङ्‍ला टि वुङ्‍गुप गोमी नुपला पत्रुसला च्‍याटोक ङ्‍यी ग्‍यप्‍नी लाक्‍पा यावी थाकाला मक्‍मी मिरा च्‍यिक, येन्‍बी थाकाला मक्‍मी मिरा च्‍यिककी च्‍याटोकला जिम्‍सुङ। ती पेला पत्रुस ति ङ्‍यिलोक्‍नी नोक। तमा चोन्‍खाङकी गोला साङ मक्‍मीतिवी र्‍हेन्‍दुपला देनोक।
ACT 12:7 ती पेला राङ शार्क्येक देवाच्‍येनकी लेन क्‍योलुप थु यी वानी चोन्‍खाङ नाङ्‍ला वो ग्‍यप्‍सुङ। ती देवाच्‍येनकी लेन क्‍योलुप थु तीकी पत्रुसकी याशिङ्‍बी वोक्‍ला पोप्‍नी “ङमु खोक लो!” सिनी लाङ्‍सुङ। ती ज्‍युक्‍ला पत्रुसकी लाक्‍पाला ग्‍यपुप च्‍याटोकतिवा ति टोल्‍सुङ।
ACT 12:8 तमा ती देवाच्‍येनकी लेन क्‍योलुप थु तीकी पत्रुसला “मज्‍या ताङ काचा कोन!” सिनी सिक्‍यासुङ। तीकी सिक्‍यावु दोके पत्रुसकी क्‍यासुङ। लोङ देवाच्‍येनकी थु तीकी पत्रुसला “खयिटो यालुक ग्‍यप्‍नी ङे तिङ्‍ला शोक!” सिनी सिक्‍यासुङ।
ACT 12:9 तमा पत्रुस मज्‍या कोन्‍नी ती देवाच्‍येनकी थु तीकी तिङ तिङ्‍ला गाल्‍सुङ। यिने देवाच्‍येनकी थु तीकी क्‍यावु ति टेङ्‍बु यिन सिरुप ति तीकी हाक्‍माकोनी मिलाम दोके यिन सिनी नोक्‍यानोक।
ACT 12:10 तिवा र्‍हेन्‍दुपला देतुप दासा तङ्‍बु ताङ ङ्‍यिवाकी मक्‍मीतिवी हाक्‍माकोवा क्‍यानी थेन्‍नी चोन्‍खाङ नेसुर ग्‍येसाला डोप च्‍याकी गोला लेप्‍सिमा ती गो ति खोरुङ राङ पेसुङ। तिवा तेसुर थेन्‍नी लाम यम्‍बाला डोयी कितुप पेला ती देवाच्‍येनकी लेन क्‍योलुप थु तीकी पत्रुसला क्‍युर्नी ज्‍याक्‍सुङ।
ACT 12:11 ती ज्‍युक्‍ला पत्रुसकी टेन्‍बा ङ्‍येनी दुक सिक्‍यासुङ, “त याङ ङे ल्‍यामो क्‍यानी हाक्‍कोसुङ। कोन्‍छ्‍योककी खोकी लेन क्‍योलुप थु तङ्‍नी ङला ग्‍येल्‍वु हेरोद ताङ यहूदीतिवी काङ कितुप नो क्‍यावे, ती नेसुर ङला र्‍होक्‍सुङ।”
ACT 12:12 पत्रुसकी दी ताम्‍ङे हाक्‍कोसिमा मर्कूस सिरुप यूहन्‍नाकी आमा मरियमकी खाङ्‍बा गाल्‍नोक। ती पेला ते मी बङी मोपोर कियी नोक।
ACT 12:13 ते लेप्‍सिमा पत्रुसकी गोला डक डक ग्‍यप्‍सुङ। तमा रोदा सिरुप लावाम यी गो बेतुपला वासुङ,
ACT 12:14 तमा पत्रुसकी वोरु थोसिमा गा लानी गो साङ मापेवा क्‍यानी ङमु नाङ्‍ला गल्‍नी, “पत्रुस गे चाला लानी देनोक!” सिनी मीतिवाला च्‍यार ग्‍यप्‍सुङ।
ACT 12:15 यिने तिवी लावाम तीला दी ङ्‍येन्‍मु ति काङ सिरुप यिनाङ सिक्‍यासुङ। तमा तीकी पत्रुस वुतुङ के वानोक सिनी हम्‍बा क्‍यानी सिक्‍यासुङ। यिने तिवी याङ पत्रुसला ल्हाटे कितुप देवाच्‍येनकी लेन क्‍योलुप थु के यिन्‍दे सिक्‍यासुङ।
ACT 12:16 यिन्‍सिनाङ पत्रुसकी गोला डक डक ग्‍यपुप ति ग्‍यप्‍तोक क्‍यासिमा तिवी गो पेसुङ। तमा पत्रुसला थोङ्‍नी तिवा छासे हलेवा क्‍यासुङ।
ACT 12:17 तमा पत्रुसकी तिवाला खरक्‍पा दे सिनी लाक्‍पी छ्‍याक के क्‍यानी कोन्‍छ्‍योककी खोरुङला चुक क्‍यानी चोन्‍खाङ नेमा तेन्‍सुङ सिरुप ताम्‍ङे ति तिवाला लाप्‍सुङ। तमा ती ताम्‍ङे ति याकूब ताङ यम्‍बा तेपा कितुपतिवाला साङ लोपा सिनी खोरुङ ति दासा यम्‍बाला गाल।
ACT 12:18 ती सला तीला नाम लासिमा पत्रुस चोन्‍खाङ नेमा थेन गलुप थोङ्‍नी मक्‍मीतिवा हराङ हुरुङ क्‍यासुङ।
ACT 12:19 तमा ग्‍येल्‍वु हेरोदकी पत्रुसला छोल च्‍यिसुङ। यिने तीला माङ्‍येसिमा पत्रुसला र्‍हेन्‍दुप मक्‍मीतिवाला ल्‍यामो क्‍यानी टि ल्‍हानी ती मक्‍मीतिवाला सेतुप क बिन्‍सुङ। तमा ग्‍येल्‍वु हेरोद ति खोरुङ देन वोतुप यहूदिया दासा क्‍युर ज्‍याक्‍नी कैसरियाला गल्‍नी ते राङ देसुङ।
ACT 12:20 तमा टुरोस ताङ सीदोनकी मीतिवाला ग्‍येल्‍वु हेरोद छासे ङ्‍यिर्मु कियिनोक। तुक क्‍यानी टुरोस ताङ सीदोनकी मीतिवा ख च्‍यिक क्‍यानी हेरोदकी ग्‍येल्‍खाङला लाका कितुप बलस्‍तस सिरुप मी छ्‍ये तीकी चाला गल्‍नी ग्‍येल्‍वु हेरोद ताङ मुला डिङ नाङ सिनी गोङ्‍बा शुनोक। च्‍यिलासिसिन टुरोस ताङ सीदोनकी मीतिवा ति ग्‍येल्‍वु हेरोदकी लुङ्‍बा नेमा राङ साप डुतिवा खुर्नी वुङ गोकिनोक।
ACT 12:21 ग्‍येल्‍वु हेरोद ति टुरोस ताङ सीदोनकी मीतिवी मुला ठेतुप तुजेला ग्‍येल्‍वी नम्‍सा कोन्‍नी ग्‍येल्‍ठिकला देनी तिवाला कलोप बिन्‍सुङ।
ACT 12:22 तमा मीतिवी खोकी ताम्‍ङे थोनी, “दी ताम्‍ङे ति मी लापुप मिन, ल्‍हे लापुप यिन।” सियी च्‍यार ग्‍यप्‍सुङ।
ACT 12:23 यिने हेरोदकी कोन्‍छ्‍योकला सोवा मातेकुप तप्‍की शार्क्येक देवाच्‍येनकी लेन क्‍योलुप थुकी तीला पोप्‍सुङ। तमा तीकी खोकला बु ग्‍यप्‍नी शिसुङ।
ACT 12:24 यिने कोन्‍छ्‍योककी सुङ ति दासा तेरीला टम्‍बुप ताङ तेपा कितुप मीतिवा साङ बङी गाल्‍सुङ।
ACT 12:25 तमा बारनाबास ताङ शाऊलकी कोन्‍छ्‍योककी क नङ्‍गुप लाकातिवा तेरी क्‍या सिन्‍सिमा मर्कूस सिरुप यूहन्‍नाला साङ मुला राङ टिनी यरूशलेम नेमा एन्‍टिओखियाला लोक्‍सुङ।
ACT 13:1 एन्‍टिओखियाकी चर्चला कोन्‍छ्‍योककी लुङ्‍तेम्‍बातिवा ताङ गेकेनतिवा नोक। तिवा ति बारनाबास ताङ नक्‍पु सिरुप शिमियोन ताङ कुरेनी नेसुर वावु लुकियस ताङ ग्‍येल्‍वु हेरोद टिक्‍पे वोतुप पेलाकी दाल्‍जा मनेन ताङ शाऊल नोक।
ACT 13:2 तिवा कोन्‍छ्‍योकला सोवा तेक्‍नी ङ्‍युङ्‍ने र्‍हुङ्‍यिन कितुप पेला कोन्‍छ्‍योककी थु चाङ्‍माकी तिवाला सुङ्‍सुङ, “बारनाबास ताङ शाऊलला पेनी ज्‍योक! तिवा ति ङे थोक्‍ला लाका कितुपला कतङ्‍गुप यिन।”
ACT 13:3 ती तप्‍की तिवा येलुङ ङ्‍युङ्‍ने र्‍हुङ्‍गुप ताङ मोपोर क्‍यासिमा बारनाबास ताङ शाऊलकी खला लाक्‍पा ज्‍याक्‍नी मोपोर क्‍यानी ताङ्‍सुङ।
ACT 13:4 तमा कोन्‍छ्‍योककी थु चाङ्‍माकी तङ्‍गुप तप्‍की बारनाबास ताङ शाऊल ति मर सिलुकियाला गल्‍नी तेसुर टु जेनी ग्‍येम्‍छोकी पर्ला वोतुप साइप्रस सिरुप ग्‍येम्‍छो परकी स कम्‍बु च्‍यिकला गाल।
ACT 13:5 गल्‍सिमा तिवा सलामिस सिरुप ग्‍येसाला लेप्‍नी यहूदी छ्‍योखाङतिवी नाङ्‍ला कोन्‍छ्‍योककी सुङ ख्‍याप्‍टाक क्‍यासुङ। ती पेला तिवाला दाल्‍जा कितुपला यूहन्‍ना साङ तिवी मुला राङ नोक।
ACT 13:6 तमा तिवा तल्‍ग्‍येक साइप्रस गोम्‍नी पाफोस सिरुप ग्‍येसाला लेप्‍सुङ। ते बार येशू सिरुप जिम्‍डुल छ्‍या देन्‍दुप यहूदी लुङ्‍तेम्‍बा मेटेङ्‍बु यीला ठेसुङ।
ACT 13:7 ती ति ती लुङ्‍बाला ग्‍येला कितुप सर्गियास पौलुस सिरुप मी छ्‍ये यीकी मुला देनी तीला शब्‍ज्‍यी किनोक। ती सर्गियास पौलस ति रिक्‍पा वोतुप मी यिनोक। तुक क्‍यानी तीकी बारनाबास ताङ शाऊलला कताङ्‍नी कोन्‍छ्‍योककी सुङ ङ्‍येन्‍दुप नो क्‍यानोक।
ACT 13:8 यिने एलुमास सिरुप ती जिम्‍डुल छ्‍या देन्‍दुप मी ति बारनाबास ताङ शाऊलकी तेन्‍दोकला लानी सर्गियस पौलसला कोन्‍छ्‍योकला तेपा कि मिज्‍यिवु छाल्‍सुङ। एलुमासकी तेन्‍दोक ति ग्रीक ताम्‍ङेला जिम्‍डुल छ्‍या देन्‍दुप मी यिन।
ACT 13:9 तमा गोमाला शाऊल सिरुप पावल ति कोन्‍छ्‍योककी थु चाङ्‍माकी क्‍येङ्‍नी ती जिम्‍डुल छ्‍या देन्‍दुप तीला छ्‍योर छ्‍योर्मे ल्‍हानी दुक सिक्‍यासुङ,
ACT 13:10 “ख्‍यो टेङ्‍बुला गा मिकिवु डेकी पुज्‍युङ, ख्‍युरुङ जिनोक जोप ताङ दुक्‍टाकी क्‍येङ्‍गुप मी यिन। ख्‍युरुङ कोन्‍छ्‍योककी लाम टेङ्‍बुला क्‍योकोलोक जोप नो किवी?
ACT 13:11 त ल्‍होसा! कोन्‍छ्‍योककी पर्च्या ख्‍युरुङला ख्‍येल वोतो। तुक क्‍यानी चेयी पर सेक ख्‍युरुङ ङ्‍यिमी वो मोथोङ्‍गुप शर्वा डितो!” तुक सिक्‍यालुङ्‍मे मुक्‍पा छुपुप ताङ नक्‍तोमी गल्‍नी तीकी काङ साङ थोङ माथुप्‍नोक। तमा मीतिवी लाक्‍पाला जिम्‍नी टिटे किते नोनी ती ति फार ताङ छुर युकुप छाल्‍सुङ।
ACT 13:12 ती थोङ्‍सिमा ती लुङ्‍बी ग्‍येला कितुप सर्गियस पौलस तीकी कोन्‍छ्‍योकला तेपा क्‍यासुङ। च्‍यिलासिसिन चोवो येशूकी येन्‍देन हाक्‍कोनी ती ति हलेवा लानोक।
ACT 13:13 तमा पावल ताङ खोकी दाल्‍जातिवा पाफोस नेवा टुला जेनी पामफिलियाकी लुङ्‍बाला वोतुप पर्गा सिरुप दासाला लेप्‍सुङ। यिने यूहन्‍ना ति तिवी मु नेसुर केनी यरूशलेमला राङ लोक्‍सुङ।
ACT 13:14 तिवा पर्गा नेसुर थेन्‍नी पिसिदियाकी एन्‍टिओखियाला वासुङ। तमा ङासोप ङ्‍यिमाला यहूदी छ्‍योखाङला गल्‍नी देसुङ।
ACT 13:15 ते यहूदी छ्‍योखाङकी छ्‍येतिवी मोशाकी ठिम ताङ कोन्‍छ्‍योककी लुङ्‍तेम्‍बाकी थेप नेसुर लाप्‍सिमा पावल ताङ बारनाबासला दुक सिनी कताङ्‍सुङ, “ओ नुपतिवा, ख्‍यिरा मुला मीतिवाला टोङ्‍गु नङ गोवु सुङतिवा वोसिन सुङा!”
ACT 13:16 तमा पावल खोक लानी लाक्‍पी छ्‍याक्‍के क्‍यानी मीतिवाला सिक्‍यासुङ, “इस्राएलकी मीतिवा ताङ कोन्‍छ्‍योकला ज्‍यिवा कितुप यहूदी मिन्‍दुप मिरिक यम्‍बाकी मीतिवा, सेना!
ACT 13:17 इस्राएलकी कोन्‍छ्‍योककी दाक्‍पी हङ्‍गावातिवाला खोकी गिपा सिनी पेसुङ। तमा तिवा मिश्र लुङ्‍बाला देतुप पेला खोकी तिवाला फेल ज्‍यितुप ताङ ङार छ्‍येवु जो नाङ्‍सुङ। तमा ङार छ्‍येवु क्‍यानी तिवाला ती लुङ्‍बा नेसुर तेन्‍नी फेप्‍सुङ।
ACT 13:18 तमा दासा पाङ्‍थेरीला लो खल ङ्‍यी सेक तिवी कोन्‍छ्‍योककी सुङला माङ्‍येन्‍सिनाङ खो हम क्‍यानी ज्‍युसुङ।
ACT 13:19 ती ज्‍युक्‍ला खोकी राङ कनानला वोतुप लुङ्‍बा दिनला ना तङ्‍नी इस्राएलकी गिपातिवाला ती लुङ्‍बा ति कोन्‍छ्‍योककी थाक्‍छ्‍येवु टोङ्‍बा जोसुङ।
ACT 13:20 ती सेक लो सयी ज्‍यी ताङ खल ङ लेप्‍सुङ। ती ज्‍युक्‍ला कोन्‍छ्‍योककी लुङ्‍तेम्‍बा शमूएलकी ङो सेक खोकी इस्राएलकी मीतिवाला ठिम तोङ्‍गुप मीतिवा नाङ्‍सुङ।
ACT 13:21 लोङ ती ज्‍युक्‍ला तिवी ग्‍येल्‍वु गोकिवी सिनी लङ्‍गुप तप्‍की कोन्‍छ्‍योककी बिन्‍यामिन गिपाकी कीशकी पुज्‍युङ शाऊलला ग्‍येल्‍वु जो नाङ्‍सुङ। तमा तीकी लो खल ङ्‍यी सेक ग्‍येल क्‍यासुङ।
ACT 13:22 येलुङ कोन्‍छ्‍योककी ग्‍येल्‍वु शाऊलला ग्‍येला कितुप नेमा तेन तङ्‍नी दाऊदला ग्‍येल्‍वु जोसुङ। तीकी कोर्ला कोन्‍छ्‍योककी पङ्‍बु नङ्‍नी ‘दी यिशैकी पुज्‍युङ दाऊदकी सेम ति ङे सेम दोके राङ वोतुप ति ङे थोङ्‍सुङ। दीकी ङे नोवाला वोतुप लाकातिवा तेरी किवितो!’ सिनी सुङ्‍सुङ।
ACT 13:23 तमा ज्‍युक्‍ला ती ग्‍येल्‍वु दाऊदकी गिपा नेमा राङ कोन्‍छ्‍योककी थाक्‍छ्‍येन नङ्‍गुप दोके इस्राएलकी मीतिवाला दिक्‍पा ने थर ज्‍यितुपला येशू ताङ्‍सुङ।
ACT 13:24 येशू फेपुप सिनाङ गोमाला यूहन्‍नाकी तेरी इस्राएलकी मीतिवाला ‘ङ दिक्‍छेन यिनोक सिनी सेम ग्‍युर्नी बप्‍तिस्‍मा लङ गोकिवी’ सिनी ख्‍याप्‍टाक क्‍यासुङ।
ACT 13:25 खोरो ख्‍याप्‍टाक कितुप लाका सिन्‍दु छ्‍येवु पेला यूहन्‍नाकी सिक्‍यासुङ, ‘ख्‍यिरा ङला सु यिन नोकिनोक? ख्‍यिरा गिवी सिनी गु देतुप मी ति ङ मिन, यिने खो ङे तिङ्‍ला फेप्‍किवी। ङ याङ खोकी काची र्‍हाम्‍डोक डोलुप साङ पोमु मे।’
ACT 13:26 ओ अब्राहामकी गिपा ताङ कोन्‍छ्‍योकला ज्‍यिवा कितुप यहूदी मिन्‍दुप मिरिक यम्‍बाकी मीतिवा, दी दिक्‍पा ने थरुप लेन ल्‍यामु ति कोन्‍छ्‍योककी दाक्‍पी पर्ला राङ ताङ वे।
ACT 13:27 यिने यरूशलेमकी मीतिवा ताङ तिवाला ओङ्‍ज्‍येन कितुपतिवी येशू सु यिन सिरुप ति ङो माशेवु ताङ ङासोप ङ्‍यिमा ङ्‍यिमाला रोकुप कोन्‍छ्‍योककी लुङ्‍तेम्‍बाकी सुङतिवा साङ हाक्‍माकोवु तप्‍की खोला क्‍येन बिन्‍सुङ। तुक क्‍यासिमा गोमाला कोन्‍छ्‍योककी लुङ्‍तेम्‍बातिवी खोकी कोर्ला सुङ्‍गुप ताम्‍ङेतिवा तेरी छेसुङ।
ACT 13:28 खोला से गोवु तेन्‍दोक काङ मेसिनाङ तिवी खोला से राङ गोकिवी सिनी पिलातसला गोङ्‍बा शुसुङ।
ACT 13:29 तुक क्‍यानी खोकी कोर्ला कोन्‍छ्‍योककी लुङ्‍तेम्‍बाकी सुङला टिन वोतुप तेरी छेसिमा तिवी खोला ग्‍यङ्‍शिङ लो नेमा पाप्‍नी शेप मीला ज्‍योकुप टककी फुककी नाङ्‍ला ज्‍याक्‍सुङ।
ACT 13:30 यिने कोन्‍छ्‍योककी खोला शेप ने ङोसु लाङ्‍सुङ।
ACT 13:31 ती ज्‍युक्‍ला खोकी मुला राङ गालील नेसुर यरूशलेमला वुङ्‍गुपतिवी चिप्‍ला खो ङ्‍यिमा अलायी सेक छ्‍यार्सुङ। तमा तिवा तन्‍दा साङ खोकी पङ्‍बु यिन।
ACT 13:32 कोन्‍छ्‍योककी दाक्‍पी पगावा हङ्‍गावाला थाक्‍छ्‍येन नङ्‍गुप लेन ल्‍यामु ति ङ्‍यिराङ ख्‍याप्‍टाक किवी।
ACT 13:33 तीकी तेन्‍दोक ति खोकी येशूला ङोसु लाङ्‍सिमा ती थाक्‍छ्‍येन नङ्‍गुप ति तेरी दाक्‍पु तिवी गिपातिवाला डुप्‍सुङ। तुक क्‍यानी भजनसंग्रह ङ्‍यीला दुक सिनी टि वे, ‘ख्‍युरुङ ङे पुज्‍युङ यिनो, हारिङ ङे ख्‍युरुङला क्‍येवु यिन।’
ACT 13:34 कोन्‍छ्‍योककी येशूला ङोसु लाङ्‍सुङ, ङोसु लाङ्‍सिमा नाम्‍साङ रुल डो माच्‍यी। तीकी कोर्ला भजनसंग्रहला दुक सिनी टि वे, ‘दाऊदला थाक्‍छ्‍येवु टेङ्‍बु ताङ तेन्‍तेन क्‍यावु मोलाम ति ङ ख्‍यिराङला तेरिनो।’
ACT 13:35 तुक क्‍यानी भजनसंग्रहकी यम्‍बा दासाला दुक सिनी टि वे, ‘कोन्‍छ्‍योककी खोरे मी टेङ्‍बुला नाम्‍साङ रुल मिज्‍यिवी।’
ACT 13:36 यिन्‍सिनाङ दाऊद जम्‍बुलिङला वोतुप पेला कोन्‍छ्‍योकला ल्‍यामो क्‍यानी शब्‍ज्‍यी पुल्‍नी शिसुङ, शिसिमा तीकी हङ्‍गावातिवी मुला राङ मुक्‍तुम ग्‍यप्‍नी रुल्‍सुङ।
ACT 13:37 यिने कोन्‍छ्‍योककी शेप ने ङोसु लङ्‍गुप तीकी जु ति मारुल।
ACT 13:38 ती तप्‍की अच्‍युनुपतिवा, कोन्‍छ्‍योककी शेप ने ङोसु लङ्‍गुप ती येशूकी क्‍या नङ्‍गुप लाका नेसुर कोन्‍छ्‍योककी ख्‍यिराङला दिक्‍पा ने थर ज्‍यितुप ताम्‍ङे ति ख्‍यिराङला हाक्‍कोशी।
ACT 13:39 ख्‍यिराङ येशूला तेपा कितुपतिवा तेरीला ख्‍यिरा क्‍यावु दिक्‍पा नेसुर थर च्‍यिनी वे। ती थर ज्‍यितुप लाका ति मोशाकी ठिम नेसुर वुङ मुथुपी।
ACT 13:40 ती तप्‍की च्‍याङ्‍से देता! मिसियाङ कोन्‍छ्‍योककी लुङ्‍तेम्‍बातिवी थेप नाङ्‍ला सिक्‍यावु दोके येशूला तेपा माक्‍यासिन ख्‍यिराङ दिक्‍पा ने थर मुथुप्‍तो। ती कोन्‍छ्‍योककी लुङ्‍तेम्‍बाकी थेपला दुक सिनी टि वे,
ACT 13:41 ‘ओ मारे तोङ्‍गुप टेङ, ल्‍होसा। तमा हलेवा क्‍यानी ना डोशी। च्‍यिलासिसिन ख्‍यिरा ङोला राङ ङ लाका यी कितिन। ती लाकाकी कोर्ला सी ख्‍यिराङला सिक्‍यासिनाङ ख्‍यिरा नाम्‍साङ तेपा मिकिवी।’”
ACT 13:42 ती ज्‍युक्‍ला पावल ताङ बारनाबास यहूदी छ्‍योखाङ नाङ नेमा थेन डोप पेला मीतिवी “ज्‍युककी ङासोप ङ्‍यिमाला साङ दी ताम्‍ङे सुङ्‍डे की।” सिनी तिवाला गोङ्‍बा शुसुङ।
ACT 13:43 तमा कोन्‍छ्‍योकला सोवा देकुप छर्सिमा यहूदीतिवा ताङ यहूदी छ्‍योला ल्‍यामो क्‍यानी तेपा कितुप यहूदी मिन्‍दुप मिरिक यम्‍बातिवा बङी पावल ताङ बारनाबासकी तिङ्‍ला तिङ्‍यासुङ। तमा पावल ताङ बारनाबासकी तिवी मुला ताम्‍ङे अरा उरा सिक्‍यासिमा “ख्‍यिराङ नरी कोन्‍छ्‍योककी सुङला ङ्‍येन्‍नी कोन्‍छ्‍योक नेमा वुङ्‍गुप कटिन थोप्‍नी देता।” सिनी तिवाला सिक्‍यासुङ।
ACT 13:44 ज्‍युककी ङासोप ङ्‍यिमाला कोन्‍छ्‍योककी सुङ ङ्‍येन्‍दुपला तेरी ग्‍येसाकी मीतिवा फोक ल्‍हानी यहूदी छ्‍योखाङला वासुङ।
ACT 13:45 मी माङ्‍छ्‍योक वुङ्‍गुप थोङ्‍नी यहूदीतिवा ठतोक लानी पावलकी मीतिवाला लापुप ताम्‍ङे ति टेङ्‍बु मिन सिनी पावलकी तेन्‍दोकला लासुङ।
ACT 13:46 यिने पावल ताङ बारनाबासकी ङाडेङ क्‍यानी सिक्‍यासुङ, “कोन्‍छ्‍योककी सुङ ति थल्‍माला ख्‍यिराङ यहूदीतिवाला राङ ख्‍याप्‍टाक कि गोवु ति यिन्‍जा। यिने ख्‍यिरा दी सुङला माङ्‍येन्‍नी नाम्‍साङ मिशिवु मिजी ङ्‍ये छ्‍योवु मेतुप तप्‍की ङ्‍यिराङ यहूदी मिन्‍दुप मिरिक यम्‍बाकी मीतिवी ते डिवी।
ACT 13:47 च्‍यिलासिसिन कोन्‍छ्‍योककी ‘जम्‍बुलिङकी अन्‍तिमला गल्‍नी यहूदी मिन्‍दुप मिरिक यम्‍बाकी मीतिवाला दिक्‍पा ने थरुप लेन ल्‍यामु ख्‍याप्‍टाक कितुप वोसिर दोके च्‍युङ्‍गुपला ख्‍यिराङ पेनी वे।’ सिनी ङ्‍यिराङला सुङ वे।”
ACT 13:48 ती थोसिमा यहूदी मिन्‍दुप मिरिक यम्‍बाकी मीतिवा गा लानी कोन्‍छ्‍योककी सुङगी थोक्‍ला सोवा तेक्‍सुङ। तमा नाम्‍साङ मिशिवु मिजी थोपुपला कोन्‍छ्‍योककी पेतुप मीतिवा तेरीकी तेपा क्‍यासुङ।
ACT 13:49 तुक क्‍यानी येशूकी सुङ ति फेलिन ताङ ओङ छ्‍येवु डोयी गाल्‍सुङ।
ACT 13:50 यिने यहूदीतिवी पावल ताङ बारनाबासकी तेन्‍दोकला लानी कोन्‍छ्‍योकला सोवा देकुप पुम्‍पेजा छ्‍युक्‍पुतिवा ताङ ती ग्‍येसाला गोमा कितुप मी छ्‍येतिवाला चेन्‍नी तिवाला छेटाङ बिन च्‍यिनी ती ग्‍येसा नेवा तेन ताङ्‍सुङ।
ACT 13:51 यिने पावल ताङ बारनाबासकी खोप्‍राङ तेन्‍दोकला लङ्‍गुपतिवाला काङ्‍बी थला र्‍हुन ज्‍याक्‍नी आइकोनियनला गाल्‍सुङ।
ACT 13:52 तमा एन्‍टिओखियाला वोतुप येशूकी लोमातिवा कोन्‍छ्‍योककी थु चाङ्‍माकी क्‍येङ्‍नी सेम किर्मु क्‍यानी देसुङ।
ACT 14:1 पावल ताङ बारनाबास नरी दोके क्‍यानी आइकोनियनला वोतुप यहूदी छ्‍योखाङला गल्‍नी कोन्‍छ्‍योककी सुङ ख्‍याप्‍टाक क्‍यासुङ। तिवी सुङ ख्‍याप्‍टाक क्‍यावु थोनी यहूदीतिवा ताङ यहूदी मिन्‍दुप मिरिक यम्‍बाकी मीतिवा बङीकी येशूला तेपा क्‍यासुङ।
ACT 14:2 यिने तेपा मिकिवु यहूदीतिवी मिरिक यम्‍बातिवाला चेन्‍नी तेपा कितुपतिवाला सेम मेलोक्‍पा जोसुङ।
ACT 14:3 ती तप्‍की पावल ताङ बारनाबासकी ङाडेङ क्‍यानी चोवो येशूकी सुङ ख्‍याप्‍टाक कियी ङ्‍यिमा अलायी सेक ते राङ देसुङ। तमा चोवो येशूकी तिवाला हलेवु ततिवा ताङ येम्‍जेन लङ्‍गुप लाकातिवा कितुप ओङ नङ्‍नी तिवी ख्‍याप्‍टाक क्‍यावु सुङ ति टेङ्‍बु यिन सिनी पङ्‍बु छ्‍या तेन्‍सुङ।
ACT 14:4 यिने ग्‍येसाकी मीतिवा छो ङ्‍यी गल्‍नी ललाइ ति यहूदीतिवी छ्‍योला लासुङ, ललाइ ति लोमा छ्‍येतिवी छ्‍योला लासुङ।
ACT 14:5 तमा मिरिक यम्‍बा ताङ यहूदीतिवा ति तिवी खला ओङ्‍ज्‍येन कितुपतिवी मुला डिक्‍नी तिवाला छेटाङ तेरुप ताङ दो पोप्‍नी सेतुप छाल्‍सुङ।
ACT 14:6 ती ताम्‍ङे थोनी पावल ताङ बारनाबास लुकोनियाकी दासाला वोतुप लुस्‍त्रा ताङ डर्बी ताङ ती गारी गुरीला वोतुप लुङ्‍बाला टो गल्‍नी
ACT 14:7 तिवी ते साङ नरी कोन्‍छ्‍योककी लेन ल्‍यामु ख्‍याप्‍टाक क्‍यासुङ।
ACT 14:8 ते लुस्‍त्रा ग्‍येसाला मी काङ्‍बा थेङ्‍बा यी सला देनी नोक। ती ति क्‍येप पेला नेज्‍युनी नाम्‍साङ काङ्‍बा चुनी मायुनोक।
ACT 14:9 पावलकी सुङ ख्‍याप्‍टाक कियी वोतुप पेला तीकी ङ्‍येन्‍नी देसुङ। तमा पावलकी तीला केरी ल्‍हासिमा तीकी सेमला “ङ टेक थुप्‍किवी।” सिरुप तेपा वोतुप थोङ्‍नी
ACT 14:10 पावलकी तीला थोर ग्‍यप्‍नी, “काङ्‍बा चुनी खोक लो!” सिक्‍यासिमा ती ति खोक लानी फिर्नी युकुप छाल्‍सुङ।
ACT 14:11 पावलकी तुका लाका क्‍यावु थोङ्‍सिमा मी माङ्‍छ्‍योककी लुकोनियाकी ताम्‍ङेला थोर ग्‍यप्‍नी “ल्‍हतिवा मीला टुल्‍नी दाक्‍पी पर्ला वानोक!” सिनी सिक्‍यासुङ।
ACT 14:12 तमा तिवी बारनाबासला ति जिउस सिरुप ल्‍ह ताङ पावलला ति सुङ तेरुप मी यिन्‍दुप तप्‍की हर्मेस सिरुप ल्‍ह सिनी तेन्‍दुप छाल्‍सुङ।
ACT 14:13 ते ग्‍येसाकी पाङ्‍ला वोतुप जिउस ल्‍हङाङकी कोङ्‍यारकी मेन्‍दोकतिवा तानी लाङतिवा दानी मीतिवा ताङ मुला डिक्‍नी पावल ताङ बारनाबासकी थोक्‍ला ग्‍येसाकी गोला जिन्‍बा तोङ्‍गुपला टडिक क्‍यासुङ।
ACT 14:14 यिने तीकी कोर्ला हाक्‍कोनी बारनाबास ताङ पावलकी खोप्‍रे मज्‍यातिवा र्‍होलिन सिरा मी माङ्‍छ्‍योककी पर्ला छ्‍योङ्‍बाल ग्‍यम गल्‍नी दुक सिनी वोरु तेन्‍सुङ,
ACT 14:15 “ओ अच्‍युनुपतिवा, ख्‍यिराङ च्‍यिला ङ्‍यिराङला ल्‍हलु सिनी तेन्‍दुप यिन? ङि्‍यराङ साङ ख्‍यिराङ दोके मी यिन, ल्‍हलु मिन। यिने ख्‍यिराङला लेन ल्‍यामु ख्‍याप्‍टाक कितुप तेन्‍दोक ति फेन मोथोवु ल्‍हतिवा क्‍युर ज्‍याक्‍नी नाम ताङ ग्‍येम्‍छो ताङ ती नाङ्‍ला वोतुप तेरी च्‍यालकतिवा जो नङ्‍गुप ङोसु वोतुप कोन्‍छ्‍योककी थाकाला ग्‍युर ज्‍यितुपला यिन।
ACT 14:16 कोन्‍छ्‍योककी राङ गलुप ङ्‍यिमाला यहूदी मिन्‍दुप मिरिक यम्‍बातिवा तेरीला दाक दाक्‍पी ल्‍हलुतिवाला तेन्‍दुप ङ्‍याम माक्‍यानोक।
ACT 14:17 यिन्‍सिनाङ खोकी क्‍या नङ्‍गुप लाका ति टेङ्‍बु यिन सिनी पङ्‍बु तेरुप क्‍युर्नी माज्‍याक। च्‍यिलासिसिन खोकी ख्‍यिराङला नाम नेमा छ्‍यर्वा तङ्‍नी डेलु ताङ डुप्‍सेन ताङ ख्‍यिराङला गोवु समातिवा गोरुप तुजे नङ्‍नी ख्‍यिराङला सेम किर्मु जो नाङ्‍सुङ।”
ACT 14:18 तुक सिनी पावल ताङ बारनाबासकी तिवाला छासे कार क्‍यानी तिवी थोक्‍ला जिन्‍बा तोङ मिज्‍यिवुला क्‍येक्‍सुङ।
ACT 14:19 ति ज्‍युक्‍ला ललाइ यहूदीतिवा एन्‍टिओखिया ताङ आइकोनियन नेसुर ते वानोक। तिवी मी माङ्‍छ्‍योकला चेन्‍नी पावलला दो थ्‍वोनी बेप च्‍यिसुङ, तमा पावल शिते यिन्‍दे नोनी ग्‍येसा ने पाङ्‍ला दररर टिनी गाल।
ACT 14:20 यिने तेकी लोमातिवा पावलकी गारी गुरीला चुम्‍नी लेसुङ। तमा पावल खोक लानी ग्‍येसा नाङ्‍ला राङ शुसुङ। तमा ती सला तीला बारनाबास ताङ क्‍यानी ती दासा नेवा थेन्‍नी डर्बीला गाल।
ACT 14:21 तमा पावल ताङ बारनाबासकी डर्बीला साङ लेन ल्‍यामु ख्‍याप्‍टाक क्‍यानी येशूला तेपा कितुप लोमातिवा बङी जोसुङ। ती ज्‍युक्‍ला तिवा लुस्‍त्रा ताङ आइकोनियन ताङ एन्‍टिओखियाला लोक्‍सुङ।
ACT 14:22 तमा लोकुप पेला तेकी लोमातिवाला “ख्‍यिराङ हम क्‍या दे गोकिवी, तेपा रम्‍बु क्‍या दे गोकिवी, तमा कोन्‍छ्‍योककी ग्‍येल्‍खापला लेपुपला ङ्‍यिराङ दुक्‍पा बङी खुर गोकिवी।” सिनी टोङ्‍गु बिन्‍सुङ।
ACT 14:23 ती ज्‍युक्‍ला चर्च रे रेकी मीतिवी थोक्‍ला गोमा कितुप मी छ्‍येतिवा पेसुङ। तमा तिवी थोक्‍ला ङ्‍युङ्‍ने र्‍हुङ्‍नी मोपोर क्‍यानी ती लोमातिवाला रङगी तेपा क्‍यावु कोन्‍छ्‍योकला चेक तेसुङ।
ACT 14:24 ती ज्‍युक्‍ला तिवा पिसिदिया नेवा क्‍यानी पामफिलियाकी लुङ्‍बाला लेप्‍नी
ACT 14:25 पर्गाला सुङ ख्‍याप्‍टाक क्‍यासिमा मर अटालियाला गाल।
ACT 14:26 तेसुर तिवा टुला जेनी एन्‍टिओखियाला गाल्‍सुङ। ती दासा ति तिवी थल्‍माला सुङ ख्‍याप्‍टाक कितुप गो चुवु पेला चर्चकी मीतिवी तिवाला कोन्‍छ्‍योककी कटिनला चेक तेतुप दासा यिनोक। तन्‍दा ति तिवी तेरी ख्‍याप्‍टाक कितुप लाकातिवा छेनोक।
ACT 14:27 तिवा एन्‍टिओखिया लेप्‍सिमा तेकी चर्चकी मीतिवाला मुला राङ कताङ्‍नी कोन्‍छ्‍योककी तिवा नेसुर क्‍या नङ्‍गुप तेरी लाका ताङ कोन्‍छ्‍योककी यहूदी मिन्‍दुप मिरिक यम्‍बाकी मीतिवा चुक क्‍यानी खोला तेपा कि थुपुप जो नाङ्‍सुङ सिरुप ताम्‍ङे ति तिवाला शेसुङ।
ACT 14:28 तमा तिवा ल अलायी सेक लोमातिवी मुला ते राङ देसुङ।
ACT 15:1 ती पेला यहूदिया नेसुर मी ललाइ एन्‍टिओखियाला वानी तेकी तेपा कितुप मीतिवाला “मोशाकी ठिमला सिक्‍यावु दोके यहूदीतिवी च्‍येतुप लुक्‍सु माक्‍यासुङ सिसिन कोन्‍छ्‍योककी ख्‍यिराङला दिक्‍पा ने थर मिज्‍यिवी।” सिनी येन्‍देन बिन्‍सुङ।
ACT 15:2 तुक क्‍यानी पावल ताङ बारनाबास यहूदी मिन्‍दुप मिरिक यम्‍बाकी मीतिवी साङ यहूदीतिवी दोके च्‍येतुप लुक्‍सु कि गोकिवी सिरुप कोर्ला ताम्‍ङे माडिक्‍नी च्‍यिककी च्‍यिकला लप्‍सिर ग्‍यक्‍टी चेसुङ। तमा तेकी तेपा कितुप मीतिवी पावल ताङ बारनाबास ताङ यम्‍बा तेपा कितुप मीतिवाला पेनी ती ताम्‍ङेकी केवुल कितुपला यरूशलेमला लोमा छ्‍येतिवा ताङ गोमा कितुप मी छ्‍येतिवी ते तोङ्‍सा क्‍यासुङ।
ACT 15:3 तोङ्‍गुप पेला चर्चकी मीतिवी तिवाला ल्‍यामो क्‍यानी ताङ्‍सुङ। तमा तिवा यरूशलेम डोप पेला फोनिके ताङ सामरियाला लेप्‍सुङ। लेप्‍सिमा ते वोतुप तेपा कितुप मीतिवाला यहूदी मिन्‍दुप मिरिक यम्‍बाकी मीतिवी सेम ग्‍युर्नी कोन्‍छ्‍योकला तेपा क्‍यासुङ सिरुप ताम्‍ङे ति लाप्‍सुङ। तमा तेकी मीतिवा तेरी गा क्‍यासुङ।
ACT 15:4 तेसुर तिवा यरूशलेमला लेप्‍सिमा तेकी चर्चकी तेपा कितुपतिवा ताङ लोमा छ्‍येतिवा ताङ गोमा कितुप मी छ्‍येतिवी तिवाला गासो शुसुङ। तमा पावल ताङ बारनाबासकी कोन्‍छ्‍योककी तिवी मुला यहूदी मिन्‍दुप मिरिक यम्‍बातिवाला क्‍या नङ्‍गुप तेरी ताम्‍ङेकी शुवा ति तिवाला तेसुङ।
ACT 15:5 यिने तेपा क्‍यावु फरिसी छ्‍योक्‍पाकी मीतिवा ललाइकी लानी यहूदी मिन्‍दुप मिरिक यम्‍बातिवी साङ च्‍येतुप लुक्‍सु क्‍यानी मोशाकी ठिमला युक गोकिवी सिनी सिक्‍यासुङ।
ACT 15:6 तमा ती ताम्‍ङेकी कोर्ला केवुल कितुपला लोमा छ्‍येतिवा ताङ यहूदीतिवी नाङ ने गोमा कितुप मी छ्‍येतिवा जोम्‍नी
ACT 15:7 तिवा अलायी केवुल क्‍यासिमा पत्रुस लानी तिवाला सिक्‍यासुङ। “ओ अच्‍युनुपतिवा, गलुप ङ्‍यिमाला कोन्‍छ्‍योककी ङला ख्‍यिरा पर नेमा ख्‍याप्‍टाक कितुपला पेतुप ताङ यहूदी मिन्‍दुप मिरिक यम्‍बाकी मीतिवी ङे ख्‍याप्‍टाक क्‍यावु लेन ल्‍यामु थोसिमा तेपा क्‍यासुङ सिरुप ति ख्‍यिराङला छ्‍या राङ वे।
ACT 15:8 तमा दाक्‍पी सेमगी ताम्‍ङे हाक्‍कोवु कोन्‍छ्‍योककी यहूदी मिन्‍दुप मिरिक यम्‍बाकी मीतिवाला साङ दाक्‍पुला दोके खोकी थु चाङ्‍मा नङ्‍नी तिवा साङ खोकी पेजा यिन सिरुप पङ्‍बु छ्‍या तेन्‍सुङ।
ACT 15:9 खोकी यहूदी मिन्‍दुप मिरिक यम्‍बातिवा ताङ ङ्‍यिरा पर्ला ललाइला ल्‍यामु, ललाइला मेलोक्‍पा माक्‍या। यिने तेपा क्‍यावु तप्‍की तिवी सेम टेङ्‍बु जो नाङ्‍सुङ।
ACT 15:10 तुक क्‍यानी च्‍यिला मलोक तेपा क्‍यावु यहूदी मिन्‍दुप मिरिक यम्‍बाकी मीतिवाला मोशाकी ठिमला वोतुप दुक्‍पा खुर च्‍यिनी कोन्‍छ्‍योकला खोक्‍पा ल्‍हेवी? ती दुक्‍पा ति दाक्‍पी पगावा हङ्‍गावी साङ खुर माथुप, दाक्‍पी साङ खुर माथुप।
ACT 15:11 यिने चोवो येशूकी कटिन नेमा राङ दाक्‍पु दिक्‍पा ने थरुप दोके तिवा साङ चोवो येशूकी कटिन नेमा राङ दिक्‍पा ने थरुप यिन सिरुप ति ङ्‍यिराङला तेपा वे।”
ACT 15:12 तुक सिक्‍यासिमा ते वोतुप मीतिवा तेरी खरक्‍पा देसुङ। तमा बारनाबास ताङ पावलकी यहूदी मिन्‍दुप मिरिक यम्‍बाकी मीतिवी पर्ला कोन्‍छ्‍योककी खोप्‍रे मिजी नेमा ततिवा ताङ हलेवु लाकातिवा छ्‍या तेन्‍दुप ताम्‍ङे ति तिवाला लाप्‍सुङ। तमा तिवा ती ताम्‍ङे ङ्‍येन्‍नी देसुङ।
ACT 15:13 तिवी लाप्‍नी सिन्‍सिमा याकूबकी दुक सिक्‍यासुङ, “ओ अच्‍युनुपतिवा, ङे ताम्‍ङे ङ्‍येना!
ACT 15:14 यहूदी मिन्‍दुप मिरिक यम्‍बाकी मीतिवी पर नेमा कोन्‍छ्‍योककी खोरो थोक्‍ला गिपा मिरा च्‍यिक पेतुप ताम्‍ङे ति सिमोन पत्रुसकी सिक्‍या वे।
ACT 15:15 ती ताम्‍ङे ति कोन्‍छ्‍योककी लुङ्‍तेम्‍बा नेसुर सुङ्‍गुप सुङला साङ डिकिवी। ती सुङला दुक सिनी टि वे,
ACT 15:16 ‘ती ज्‍युक्‍ला ङ लोङ वानी दाऊदकी र्‍हम्‍बुप खाङ्‍बा ति येलुङ जोयिन। तमा तीकी टेवकतिवा येलुङ जोनी तीला येर लोङ्‍यिन।
ACT 15:17 तमा यम्‍बा लुवु मीतिवी साङ चोवो कोन्‍छ्‍योकला छोल्‍शी। तमा ङे मिङला पेतुप यहूदी मिन्‍दुप मिरिक यम्‍बाकी मी तेरीकी ङला छोल्‍शी।
ACT 15:18 दी ति चोवो कोन्‍छ्‍योककी सुङ यिन। ती कोन्‍छ्‍योककी ताङ्‍बो नेज्‍युनी दाक्‍पुला ती ताम्‍ङे ति हाक्‍को च्‍यिसुङ।’
ACT 15:19 ती तप्‍की ङे सि गोवु ताम्‍ङे ति दी राङ यिन। कोन्‍छ्‍योककी थाकाला ग्‍युरुप यहूदी मिन्‍दुप मिरिक यम्‍बाकी मीतिवाला ङ्‍यिराङ मोशाकी ठिमला दे च्‍यिनी दुक्‍पा मेतेर।
ACT 15:20 यिने तिवाला ‘ल्‍हलुतिवाला पुलुप समातिवा मासा! शम्‍डेन माकी! ज्‍यिङ्‍बा बाक्‍यम तङ्‍नी सेतुप सेम्‍ज्‍येनकी श ताङ ठक मासा।’ सिरुप ताम्‍ङे ति यिकी टिनी तोङ्‍गुप।
ACT 15:21 च्‍यिलासिसिन ताङ्‍बो नेज्‍युनी ग्‍येसा ग्‍येसाला वोतुप यहूदी छ्‍योखाङला ज्‍यिङ्‍बा बाक्‍यम तङ्‍नी सेतुप सेम्‍ज्‍येनकी कोर्ला मोशाकी ठिम ति ङासोप ङ्‍यिमाला नरी रोकिनोक।”
ACT 15:22 ती ज्‍युक्‍ला लोमा छ्‍येतिवा ताङ यहूदी गोमा कितुप मी छ्‍येतिवा ताङ तेपा कितुपतिवा तेरी डिक्‍नी तिवी पर नेमा ललाइ मीतिवाला पेनी पावल ताङ बारनाबासकी मुला एन्‍टिओखियाला तोङ्‍गुप नो क्‍यासुङ। तुक क्‍यानी तेपा कितुपतिवी पर नेमा बारसाबास सिरुप यहूदा ताङ सिलास मिरा ङ्‍यीला पेसुङ।
ACT 15:23 तमा तिवी लकला दुक सिनी यिकी ताङ्‍सुङ, “टसी देलेक, एन्‍टिओखिया ताङ सिरिया ताङ किलिकियाला वोतुप चोवोला तेपा कितुप यहूदी मिन्‍दुप मिरिक यम्‍बाकी अच्‍युनुपतिवाला दे वोतुप ख्‍यिरे अच्‍युनुप यिन्‍दुप लोमा छ्‍ये ताङ चर्चकी गोमा कितुप मी छ्‍येतिवी छ्‍योक नेसुर दी यिकी टिवु यिनो।
ACT 15:24 ङ्‍यिरा पर नेमा ललाइ मीतिवा ङ्‍यिराङला माटिवा क्‍यानी ख्‍यिरा ते गल्‍नी मेतुप ताम्‍ङेतिवा लाप्‍नी ख्‍यिराङला दुक्‍पा बिन्‍दुप ताङ सेम ना लङ्‍गुप ति ङ्‍यिरा हाक्‍कोसुङ।
ACT 15:25 ती तप्‍की ङ्‍यिराङ तेरी डिक्‍नी मी ललाइला पेनी तिवाला ङ्‍यिङ्‍ज्‍येवु बारनाबास ताङ पावलकी मुला ख्‍यिरा ते तङ्‍सिन ल्‍यामु गिते नोसुङ।
ACT 15:26 पावल ताङ बारनाबासकी दाक्‍पी चोवो येशू ख्रीष्‍टकी थोक्‍ला खोप्‍रे मिजी साङ बिन वे।
ACT 15:27 तमा ङ्‍यिरा यहूदा ताङ सिलासला साङ ख्‍यिरा ते तङ्‍गुप यिनो। तिवी ख्‍यिराङला ङ्‍यिरा यिकी टिन तङ्‍गुप ताम्‍ङेकी कोर्ला शेकितो।
ACT 15:28 कोन्‍छ्‍योककी थु चाङ्‍मा ताङ ङ्‍यिराङला ख्‍यिरा ङ्‍येन गोवु खक्‍छ्‍येवु ताम्‍ङेतिवा मिसिन यम्‍बा कले ख्‍येल मिज्‍यी सिनी नो वे।
ACT 15:29 ती ताम्‍ङे ति काङ यिन सिसिन, ख्‍यिराङ ल्‍हला पुलुप च्‍यालक ताङ ज्‍यिङ्‍बा बाक्‍यम तङ्‍नी सेतुप सेम्‍ज्‍येनकी श ताङ ठक साप ताङ शम्‍डेन कितुप लाकातिवा माक्‍यानी देसुङ सिसिन ख्‍यिराङला ल्‍यामु गितो। हारिङ ति दोजोयी राङ गोङ्‍बा शोप्‍नो।”
ACT 15:30 यरूशलेम ने लोमा छ्‍येतिवा ताङ मुला क्‍येसिमा पावल ताङ बारनाबास ताङ यहूदा ताङ सिलास एन्‍टिओखियाला लेप्‍सुङ। तमा ते तेपा कितुप मीतिवा तेरीला जोम च्‍यिनी ती यिकी ति तेसुङ।
ACT 15:31 ती यिकी नाङ्‍ला वोतुप टोङ्‍गु तेरुप ताम्‍ङे ति रासिमा तेकी मीतिवा गा क्‍यासुङ।
ACT 15:32 तमा यहूदा ताङ सिलास साङ कोन्‍छ्‍योककी लुङ्‍तेम्‍बा यिन्‍दुप तप्‍की तेपा कितुप मीतिवाला कोन्‍छ्‍योककी सुङ नेमा टोङ्‍गु बिन्‍नी तिवाला तेपा रम्‍बु जोसुङ।
ACT 15:33 तिवा ते ङ्‍यिमा चेयी देसिमा तेकी तेपा कितुप मीतिवी गा ताङ क्‍यानी तिवाला लोदिमु वुङ्‍शी सिनी मोलाम बिन्‍नी यरूशलेमला ताङ्‍सुङ।
ACT 15:34 (३४ मे)
ACT 15:35 यिने पावल ताङ बारनाबास ति एन्‍टिओखियाला देनी मी यम्‍बा बङीकी मुला कोन्‍छ्‍योककी सुङ ख्‍याप्‍टाक कितुप ताङ मीतिवाला येन्‍देन बिन्‍सुङ।
ACT 15:36 ङ्‍यिमा चेयी ज्‍युक्‍ला पावलकी बारनाबासला “दाक्‍पी गोमाला कोन्‍छ्‍योककी सुङ ख्‍याप्‍टाक क्‍यावु ग्‍येसातिवाला गल्‍नी ते वोतुप तेपा कितुप मीतिवा चुकै वोते ल्‍हा डोप।” सिनी सिक्‍यासुङ।
ACT 15:37 ती पेला बारनाबासकी मर्कूस सिरुप यूहन्‍नाला साङ मुला राङ टिनी डोप नो क्‍यासुङ।
ACT 15:38 यिने पावलकी मर्कूस पामफिलिया नेसुर तिवा ताङ मुला क्‍येनी गलुप ताङ तिवी मुला लाका माक्‍यावु तप्‍की तीला टिनी डोप नो माक्‍या।
ACT 15:39 तुक क्‍यानी तिवी पर्ला कशेन खाँदा शोरुप तप्‍की तिवा पेसुङ। तमा बारनाबास ति मर्कूस ताङ क्‍यानी टुला जेनी साइप्रस लुङ्‍बाला गाल।
ACT 15:40 यिने पावलकी सिलासला पेनी ङ्‍यिकर मुला राङ डोप पेला ते तेपा कितुप मीतिवी तिवाला कोन्‍छ्‍योककी कटिनला दे थुप्‍शी सिनी मोलाम बिन्‍नी ताङ्‍सुङ।
ACT 15:41 तमा पावल ताङ सिलास सिरिया ताङ किलिकियाला कोरा ग्‍यकिन चर्चतिवाला तेपा रम्‍बु जोसुङ।
ACT 16:1 तेसुर पावलतिवा डर्बी ताङ लुस्‍त्राला साङ गाल। तमा लुस्‍त्राला तीकी तिमोथी सिरुप लोमाला ठेसुङ। ती तिमोथीकी आमा ति येशूला तेपा कितुप ताङ यहूदी गिपा यिनोक, पपा ति ग्रीककी मी यिनोक।
ACT 16:2 तमा लुस्‍त्रा ताङ आइकोनियनकी तेपा कितुपतिवी तिमोथीकी कोर्ला ताम्‍ङे ल्‍यामु किनोक।
ACT 16:3 पावलकी तीला मुला राङ टिनी डोप नो क्‍यानोक। तमा ते देतुप यहूदीतिवी खोकी पपा ति ग्रीक यिन सिरुप ति तिवा तेरीला छ्‍या वोतुप तप्‍की पावलकी तीला यहूदीतिवी च्‍येतुप लुक्‍सु क्‍यानोक।
ACT 16:4 तमा तिवा ग्‍येसा ग्‍येसाला डोप पेला यरूशलेमकी लोमा छ्‍येतिवा ताङ यहूदी गोमा कितुप मी छ्‍येतिवी जोवु ठिम ति तिवाला बिन्‍नी ती ठिमला ल्‍यामो क्‍यानी यु सिनी तेकी तेपा कितुपतिवाला सिक्‍यासुङ।
ACT 16:5 तमा चर्चकी मीतिवा तेपा रम्‍बु डोयी गल्‍नी ङ्‍यिमी टेङ फेलिन गाल।
ACT 16:6 ती पेला एशियाकी लुङ्‍बाला कोन्‍छ्‍योककी थु चाङ्‍मा नेमा खोकी सुङ ख्‍याप्‍टाक कि माच्‍यिवु तप्‍की तिवा फ्रिगिया ताङ गलातिया नेवा गाल्‍सुङ।
ACT 16:7 तिवा माइसियाकी सन्‍छमला लेप्‍सिमा बिथिनिया थाकाला डोप नो क्‍यासुङ। यिन्‍सिनाङ येशूकी थुकी तिवाला डो माच्‍यी।
ACT 16:8 तुक क्‍यानी तिवा माइसिया नेवा क्‍यानी त्रोआसला गाल्‍सुङ।
ACT 16:9 ती नुपला माकेडोनियाकी मी यी पावलकी चाला वानी, “माकेडोनियाला वानी ङ्‍यिराङला दाल्‍जा किटे की!” सिनी गोङ्‍बा शुवु ति पावलकी ज्‍यल्‍का थोङ्‍नोक।
ACT 16:10 ती थोङ्‍सिमा पावल ताङ ङ्‍यिराङ शार्क्येक माकेडोनियाला डोप नो क्‍यायिन। च्‍यिलासिसिन कोन्‍छ्‍योककी तेकी मीतिवाला लेन ल्‍यामु ख्‍याप्‍टाक कितुपला ङ्‍यिराङला कताङ नङ्‍गुप यिन सिरुप ति ङ्‍यिरा हाक्‍कोसुङ।
ACT 16:11 तेसुर ङ्‍यिराङ त्रोआस नेसुर टुला जेनी तल्‍ग्‍येक सामोथ्राके नेवा गलिन। तमा ती सला तीला नियापोलिसला लेप्‍नी
ACT 16:12 तेसुर ङ्‍यिराङ काङ्‍बी राङ युनी फिलिप्‍पीला वायिन। फिलिप्‍पी ति माकेडोनियाकी ग्‍येसा नाङ ने छासे ग्‍येर्पु ताङ रोमी लुङ्‍बाकी ओङला वोतुप दासा यिनोक। तमा ङ्‍यिराङ ती ग्‍येसाला ङ्‍यिमा चेयी पर सेक देतिन।
ACT 16:13 तमा ङासोपकी ङ्‍यिमाला ङ्‍यिराङ ग्‍येसाकी गोकी फिला वोतुप चङ्‍बी गारीला यहूदीतिवा मोपोर कितुप दासा वोते सिनी गलिन। ते जोम्‍बुप पुम्‍पेजातिवी मुला ताम्‍ङे अरा उरा सिक्‍यायिन।
ACT 16:14 ती पेला ते जोम्‍बुप पुम्‍पेजातिवी नाङ्‍ला लिडिया सिरुप कोन्‍छ्‍योकला शब्‍ज्‍यी बुलुप पुम्‍पेजा मिरा च्‍यिककी ङ्‍यिरा ख्‍याप्‍टाक क्‍यावु सुङ ति ङ्‍येन्‍सुङ। ती पुम्‍पेजा ति थिआटीरा ग्‍येसा ने वावु रा मुक्‍पु चोङ्‍गुप छोङ्‍मेन नोक। कोन्‍छ्‍योककी तीकी सेम ति पेतुप तप्‍की पावलकी ख्‍याप्‍टाक क्‍यावु सुङ ति ल्‍यामो क्‍यानी ङ्‍येन्‍सुङ।
ACT 16:15 तमा ती पुम्‍पेजा ताङ तीकी खाङ्‍बी मीतिवा तेरीकी बप्‍तिस्‍मा लासिमा तीकी “दोजो ख्‍यिरा ङ्‍यिराङ येशूला तेपा कितुप यिन सिनी नासाम वोसिन ङ्‍यिरा खाङ्‍बाला फेप्‍नी ज्‍यु।” सिनी ङ्‍यिराङला कार क्‍यानी टिसुङ।
ACT 16:16 ङ्‍यिम्‍ज्‍यिक ङ्‍यिराङ यहूदीतिवा मोपोर कितुप दासाला डोयी वोतुप पेला ते ल्‍हलुतिवा रेन्‍नी मो ल्‍हाप पुम्‍पेजा लावाम यीला ठेसुङ। ती पुम्‍पेजा लावाम तीकी मो ल्‍हाप लाका क्‍यानी खोरो ज्‍यिन्‍दाकतिवी थोक्‍ला टङ्‍गा बङी शम्‍नी तेर्किनोक।
ACT 16:17 तमा ती पुम्‍पेजा तीकी च्‍यार ग्‍यकिन सिरा “दी मीतिवा चोछ्‍येवु कोन्‍छ्‍योकला शब्‍ज्‍यी बुलुप मी यिन। दिवी याङ दिक्‍पा ने थर ज्‍यितुप लामकी कोर्ला ख्‍याप्‍टाक किवी।” सियी पावल ताङ ङ्‍यिरा तिङ्‍ला तिङ्‍यानी लेसुङ।
ACT 16:18 तीकी ङ्‍यिमा अलायी सेक तुक सिनी तिङ्‍यासिमा पावलला छेरा लानी ख्‍युर ग्‍युर्नी ती डे तीला, “येशू ख्रीष्‍टकी मिङला ख्‍युरुङ दे नेसुर थेन ग्‍युक!” सिनी वोरु तेन्‍सुङ। तमा ती डे ति शार्क्येक ती पुम्‍पेजी नेसुर थेन्‍नी गाल।
ACT 16:19 ती मो ल्‍हाप पुम्‍पेजा नेमा डे थेन गलुप हाक्‍कोसिमा लावामकी ज्‍यिन्‍दाकतिवी खोप्‍राङला टङ्‍गा शम्‍नी खुन वुङ्‍गुप रेवा मेतुप थोङ्‍नी पावल ताङ सिलासला जिम्‍नी हाला टिनी ठिम तोङ्‍गुपतिवी चाला क्‍याल्‍सुङ।
ACT 16:20 तिवाला ठिम तोङ्‍गुपतिवी ते क्‍यल्‍सिमा “दी मीतिवा यहूदी राङ यिन्‍सिनाङ दाक्‍पी ग्‍येसाकी मीतिवाला ठका ठुका तोङ्‍गिनोक।
ACT 16:21 दिवी याङ दाक्‍पु रोमीतिवी कितुप मेङ्‍गुप ताङ खलाङ कितुप मेङ्‍गुप लुक्‍सुतिवा के दाक्‍पुला लोप्‍किनोक।” सिनी सिक्‍यासुङ।
ACT 16:22 तुक सिक्‍यालुङ्‍मे शार्क्येक पावल ताङ सिलासकी तेन्‍दोकला मी माङ्‍छ्‍योक लासुङ। तमा ठिम तोङ्‍गुप तिवी “तिवाला पेर्तुङ्‍बा सिङ जोनी दु।” सिनी क बिन्‍सुङ।
ACT 16:23 तमा तिवी पावल ताङ सिलासला लकाम थ्‍वोनी कशेन दुसिमा चोन्‍खाङ नाङ्‍ला उप्‍सुङ, तमा दी मीतिवाला ल्‍यामो क्‍यानी र्‍हेना सिनी चोन्‍खाङ ल्‍हाप मीला चेक तेन ज्‍याक्‍सुङ।
ACT 16:24 तमा चोन्‍खाङ ल्‍हाप मी तीकी पावल ताङ सिलासला नाङगी कोठाला टिनी काङ्‍बाला च्‍याटोक ग्‍यप्‍नी ज्‍याक्‍सुङ।
ACT 16:25 यिने नुप फेका चोयीला पावल ताङ सिलास मोपोर कियी कोन्‍छ्‍योकला सोवा देकुप लु लङ्‍यिन नोक। तमा चोन्‍खाङला शोरुप यम्‍बा मीतिवा ति ङ्‍येन्‍नी देनोक।
ACT 16:26 ती पेला राङ शार्क्येक सयी ग्‍येर्पु यी ग्‍यप्‍सिमा चोन्‍खाङकी डम्‍ज्‍यीतिवा योसुङ। तमा चोन्‍खाङकी गोतिवा पेनी तिवाला ग्‍यपुप च्‍याटोकतिवा टोल्‍सुङ।
ACT 16:27 तमा चोन्‍खाङ ल्‍हाप मी ति ङ्‍यि छेनी खोक लानी ल्‍हासालेन्‍सिन चोन्‍खाङकी गोतिवा तेरी पेतुप थोङ्‍सिमा चोन्‍खाङला उम ज्‍यकुप मीतिवा तेरी टोन गाल्‍ते सिनी खोरुङ राङ शेप नोनी खोरुङला खुर्पा थ्‍वोनी बेपुप छाल्‍सुङ।
ACT 16:28 पावलकी ती थोङ्‍नी कशेन थोर ग्‍यप्‍नी, “ओ अच्‍यु, तुक माकी! ङ्‍यिराङ तेरी देराङ वे!” सिनी सिक्‍यासुङ।
ACT 16:29 तमा ती चोन्‍खाङ ल्‍हाप मी ति दिप्‍ली च्‍येनी छ्‍योङ्‍बाल ग्‍यकिन नाङ्‍ला वानी ज्‍यिवा कियी सिरा पावल ताङ सिलासकी चिप्‍ला खवुतुङ्‍मा देसुङ।
ACT 16:30 तमा तिवाला पाङ्‍ला टि गल्‍नी, “ओ गेकेनतिवा, दिक्‍पा ने थरुपला ङे काङ कि गोकिवी?” सिनी टिसुङ।
ACT 16:31 पावल ताङ सिलासकी “चोवो येशूला तेपा क्‍यासिन ख्‍युरुङ ताङ ख्‍योरो मिछाङ तेरी दिक्‍पा ने थर्किवी।” सिनी सिक्‍यासुङ।
ACT 16:32 ती ज्‍युक्‍ला पावल ताङ सिलासकी चोन्‍खाङ ल्‍हाप मी ताङ तीकी खाङ्‍बा वोतुप मिछाङतिवा तेरीला कोन्‍छ्‍योककी सुङ ख्‍याप्‍टाक क्‍यासुङ।
ACT 16:33 ती नुपला राङ तीकी पावल ताङ सिलासला म थेन्‍दुप ति टुनी बिन्‍सुङ। तमा खोरुङ ताङ खोरो खाङ्‍बी मीतिवा तेरीकी बप्‍तिस्‍मा लासुङ।
ACT 16:34 तीकी पावल ताङ सिलासला खोरो खाङ्‍बा कताङ्‍नी समा बिन्‍सुङ। च्‍यिलासिसिन खोरुङ ताङ खोरो मिछाङतिवा तेरीकी कोन्‍छ्‍योकला तेपा क्‍यावु तप्‍की तीला छासे गा लानोक।
ACT 16:35 ती सला तीला नाम लासिमा ठिम तोङ्‍गुपतिवी पावल ताङ सिलासला पिताङ तोङ सिनी चोन्‍खाङ ल्‍हाप मीला लेन क्‍योलुपला मक्‍मीतिवा ताङ्‍सुङ।
ACT 16:36 तमा चोन्‍खाङ ल्‍हाप मी तीकी पावलला “ठिम तोङ्‍गुपतिवी अच्‍युतिवाला पि तोङ सिनी क बिन वे। तुक क्‍यानी लोदिमु क्‍यानी दे नेसुर थेन फेप्‍सिन गिवी।” सिनी सिक्‍यासुङ।
ACT 16:37 यिने पावलकी मक्‍मीतिवाला “ङ्‍यिराङ रोमी नागरिक्ता वोतुप मीतिवाला काङ क्‍येन मेसिनाङ तिवी ङ्‍यिराङला मीतिवी मिङ्‍गाला दुसुङ। तमा चोन्‍खाङला साङ उप्‍सुङ। त च्‍यिला ङ्‍यिराङला सी साङ हाक्‍माकोवा क्‍यानी पि तोङ्‍गुप छोल्‍गिवी? दुकै वुङ मुथुपी। खोप्‍राङ राङ वानी ङ्‍यिराङला पिताङ तोङ्‍शी!” सिनी सिक्‍यासुङ।
ACT 16:38 ती ताम्‍ङे ति मक्‍मीतिवी ठिम तोङ्‍गुपतिवाला सिक्‍यासुङ। पावल ताङ सिलासला रोमी नागरिक्ता वोतुप मीतिवा यिन्‍दुप हाक्‍कोसिमा तिवाला ज्‍यिवा क्‍यासुङ।
ACT 16:39 ती तप्‍की तिवा वानी पावल ताङ सिलासला माफ लाङ्‍सुङ। तमा तिवाला पाङ्‍ला टि गल्‍नी दी ग्‍येसा नेवा फेप सिनी ताङ्‍सुङ।
ACT 16:40 तेसुर तिवा चोन्‍खाङ नेमा थेन गल्‍सिमा लिडियाकी खाङ्‍बा गाल। तमा तेकी तेपा कितुपतिवाला टोङ्‍गु बिन्‍नी तेसुर गाल्‍सुङ।
ACT 17:1 ती ज्‍युक्‍ला पावल ताङ सिलास अम्‍फिपोलिस ताङ अपोल्‍लोनियाकी लाम नेवा क्‍यानी थेसलोनिकेला वासुङ। ते यहूदी छ्‍योखाङ यी नोक।
ACT 17:2 तमा नरी दोके क्‍यानी पावल यहूदी छ्‍योखाङ नाङ्‍ला गल्‍नी ङासोप ङ्‍यिमा ङ्‍यिमाला थेङ्‍मा सुम सेक कोन्‍छ्‍योककी सुङ नेसुर केवुल कियी देसुङ।
ACT 17:3 तमा ख्रीष्‍टकी छेटाङ खुरुप ताङ टुङ्‍नी ङोसु लङ गोवु ताम्‍ङे ति ल्‍यामो क्‍यानी पङ्‍बु बिन्‍नी “ख्‍यिराङला ङे ख्‍याप्‍टाक कियी वोतुप दी येशू ति ख्रीष्‍ट यिनो।” सिनी यहूदी छ्‍योखाङला जोम्‍बुप मीतिवाला सिक्‍यासुङ।
ACT 17:4 ती थोसिमा यहूदी मी अलायीकी येशू ख्रीष्‍टला तेपा क्‍यानी पावल ताङ सिलासकी तिङ्‍ला तिङ्‍यासुङ। तमा ते कोन्‍छ्‍योकला सोवा देकुप ग्रीकतिवा बङी ताङ ग्‍येसाकी पुम्‍पेजा छ्‍येतिवी साङ तेपा क्‍यासुङ।
ACT 17:5 यिने मी बङीकी येशूला तेपा क्‍यावु थोङ्‍सिमा यहूदीतिवा ठतोक लानी हाला लाका मेतुप दुक्‍टातिवाला लङ्‍नी ग्‍येसाला ठका ठुका लोङ च्‍यिसुङ। तमा तिवी यासोन सिरुप मीकी खाङ्‍बा थमु ग्‍यप्‍नी पावल ताङ सिलासला मीतिवी चिप्‍ला टि वुङ्‍गुप छाल्‍सुङ।
ACT 17:6 यिने पावल ताङ सिलासला माङ्‍येसिमा यासोन ताङ यम्‍बा तेपा कितुप मीतिवा ललाइला जिम्‍नी ग्‍येसाकी छ्‍येतिवी चिप्‍ला टि गाल। तमा वोरु देनिन सिरा “दी जम्‍बुलिङला ठका ठुका जोप मीतिवा दे साङ वानोक।
ACT 17:7 तमा यासोनकी तिवाला खोरो खाङ्‍बाला ज्‍याक्‍नोक। तिवा तेरीकी येशू सिरुप यम्‍बा ग्‍येल्‍वु मिरा च्‍यिक गिवी सिनी ग्‍येल्‍वु कैसरकी बिन्‍दुप कला मिचिनोक।”
ACT 17:8 ती ताम्‍ङे थोनी ग्‍येसाकी ठिम तोङ्‍गुपतिवा ताङ यम्‍बा मीतिवा तेरी काङ कितुप काङ कितुप गाल।
ACT 17:9 यिने तिवी यासोन ताङ तिवी मुला गलुप यम्‍बा मीतिवाला टङ्‍गा लानी पिताङ ताङ्‍सुङ।
ACT 17:10 ती नुपला राङ तेपा कितुपतिवी पावल ताङ सिलासला बेरिया सिरुप दासाला ताङ्‍सुङ। तिवा ते लेप्‍सिमा यहूदी छ्‍योखाङ नाङ्‍ला गाल।
ACT 17:11 तेकी यहूदीतिवा ति थेसलोनिके यहूदीतिवा सिनाङ हाक्‍कोमु नोक। तुक क्‍यानी तिवा पावलकी ख्‍याप्‍टाक कितुप पेला सेम गा क्‍यानी ङ्‍येन्‍गिनोक। तमा येशूकी कोर्ला तिवी बिन्‍दुप येन्‍देन ति टेङ्‍बु यिन्‍ताङ मिन्‍ताङ सिनी ङ्‍यिमी टेङ कोन्‍छ्‍योककी सुङ लोप्‍किनोक।
ACT 17:12 ती तप्‍की तेकी यहूदीतिवा माङ्‍शोककी येशूला तेपा क्‍यासुङ। तमा ग्रीककी पुम्‍पेजा छ्‍येतिवा ताङ ग्रीककी ख्‍योक्‍पेजातिवा साङ बङी तेपा क्‍यासुङ।
ACT 17:13 पावलकी बेरियाला साङ कोन्‍छ्‍योककी सुङ ख्‍याप्‍टाक कियी नोक सिरुप ति थेसलोनिकेकी यहूदीतिवी हाक्‍कोनी तिवा ते साङ वानी मी माङ्‍छ्‍योकला ठका ठुका जोसुङ।
ACT 17:14 ती तप्‍की तेपा कितुपतिवी पावलला शार्क्येक ग्‍येम्‍छोकी गारीला ताङ्‍सुङ। यिने सिलास ताङ तिमोथी ति तेराङ देसुङ।
ACT 17:15 पावलला क्‍योल डोपतिवी तीला एथेन्‍स ग्‍येसा सेक क्‍योल गाल। तमा तिवा सिलास ताङ तिमोथीला ङमु राङ पावलकी चाला वुङ गोकिवी सिरुप पावलकी क खुर्नी बेरियाला लोक्‍सुङ।
ACT 17:16 पावल एथेन्‍सला सिलास ताङ तिमोथीला गुन देतुप पेला तेकी ग्‍येसाला कुतिवा तिराङकी क्‍येङ्‍गुप थोङ्‍नी सेमला छासे पप लानोक।
ACT 17:17 ती तप्‍की पावलकी यहूदीतिवा ताङ कोन्‍छ्‍योकला शब्‍ज्‍यी बुलुप यहूदी मिन्‍दुप मिरिक यम्‍बातिवी मुला छ्‍योखाङ नाङ्‍ला येशूकी कोर्ला केवुल क्‍यासुङ। तमा यम्‍बा मीतिवाला साङ हाला ठेनी ङ्‍यिमी टेङ केवुल क्‍यासुङ।
ACT 17:18 ती पेला इपिक्‍युरी ताङ स्‍तोइ सिरुप शेवा खावा वोतुप मीतिवी पर्ला ललाइकी पावल ताङ मुला केवुल क्‍यासुङ। तिवी पर्ला ललाइकी “दी पेतेक पेतेक सिरुप मी तीकी काङ सिक्‍यावु यिनाङ?” सिनी सिक्‍यासुङ। तमा यम्‍बातिवी “दी याङ छ्‍यिग्‍यपकी ल्‍हलुतिवी कोर्ला ख्‍याप्‍टाक कितुप मी दोके थोङ्‍गिनोक।” सिनी सिक्‍यासुङ। च्‍यिलासिसिन पावलकी येशू ताङ खो ङोसु लावु कोर्ला ख्‍याप्‍टाक क्‍यानोक।
ACT 17:19 तमा तिवी पावलला अरियोपागस सिरुप ठिम्‍खाङला टि गल्‍नी, “दी ख्‍योरो बिन्‍दुप येन्‍देन सम्‍बा ति काङ यिन? ङ्‍यिराङला साङ लोप थुप्‍किवी?
ACT 17:20 ख्‍यिरा लापुप ताम्‍ङे ति ङ्‍यिराङला मिच्‍यिक्‍पा थोकिनोक। तुक क्‍यानी ती ताम्‍ङेकी तेन्‍दोक ति काङ यिन, ती ति ङ्‍यिराङ साङ हाक्‍कोवु नो वे।” सिनी सिक्‍यासुङ।
ACT 17:21 तिवी तुक सिनी टिवु तेन्‍दोक ति एथेन्‍सकी मीतिवा ताङ ते देतुप छ्‍यिग्‍यपकी मीतिवी ति ताम्‍ङे सम्‍बा ङ्‍येन्‍दुप ताङ शेतुप मिसिन यम्‍बा लाका काङ साङ मिकिनोक।
ACT 17:22 तमा पावल अरियोपागसकी पर्ला खोक लानी, “ओ एथेन्‍सकी मीतिवा, ख्‍यिराङ ल्‍हलुतिवाला तेन्‍दुपला टेमु वोतुप ति ङे थोङ्‍सुङ।
ACT 17:23 ङ फार छुर युनी ल्‍हासिन ख्‍यिरा तेन्‍दुप ल्‍हतिवा बङी वोतुप ति ङे थोङ्‍सुङ। ती पर्ला ‘ङो मेशेवु ल्‍हे थोक्‍ला’ सिनी टिवु छोटी साङ ङे थोङ्‍सुङ। तमा ख्‍यिरा हाक्‍माकोवा क्‍यानी तेन्‍दुप ति ल्‍हकी कोर्ला ङ ख्‍यिराङला ख्‍याप्‍टाक कितिन।
ACT 17:24 काङ यिन सिसिन जम्‍बुलिङ ताङ तीला वोतुप तेरी च्‍यालकतिवा ति कोन्‍छ्‍योककी ज्‍येसुङ। खो ति देवाच्‍येन ताङ जम्‍बुलिङकी कोन्‍छ्‍योक यिन्‍दुप तप्‍की मी लाक्‍पी जोवु ल्‍हङाङ नाङ्‍ला मुज्‍युवी।
ACT 17:25 कोन्‍छ्‍योककी जम्‍बुलिङ तेरी ज्‍येवु तप्‍की खोला कतुकारला ख्‍येल्‍नोक सिनी मी लक नेसुर खोला शब्‍ज्‍यी बुल मोगोवी। च्‍यिलासिसिन खो तेरी मीतिवाला मिजी ताङ उ ताङ यम्‍बा तेरी गोवु च्‍यालकतिवा नङ्‍गुप कोन्‍छ्‍योक यिन।
ACT 17:26 खोकी मी च्‍यिक नेमा राङ दी जम्‍बुलिङ तेरीकी खला देतुप मी रुजेनतिवा तेरी जो नाङ्‍सुङ। तमा मीतिवा ती जम्‍बुलिङला वासिमा चो सेक दे गोवु छे ताङ देतुप दासा साङ जो नाङ्‍सुङ।
ACT 17:27 कोन्‍छ्‍योककी ती तेरी क्‍यावु तेन्‍दोक ति मीतिवी खोला छोल्‍शी, तमा छोल्‍नी खोला ठेशी सिनी यिन। यिन्‍सिनाङ खो दाक्‍पी मु ने थाक्‍रिङ्‍बु मे।
ACT 17:28 तुक क्‍यानी दाक्‍पु खोकी मुला राङ मिजी क्‍योङ्‍यिन वे, खोकी मुला राङ येर मर कियी वे, तमा खोकी मुला राङ दी जम्‍बुलिङला देयी वे। ती तप्‍की ख्‍यिरा छिक्‍च्‍ये जोपतिवा ललाइकी साङ ‘दाक्‍पु ति वुतुङ के खोकी गिपा राङ यिन।’ सिक्‍या वे।
ACT 17:29 दाक्‍पु कोन्‍छ्‍योककी गिपातिवा यिन्‍दुप तप्‍की खो ति मी लाक्‍पी लक्‍शी नेसुर नासाम तङ्‍नी सेर, ङुल ताङ दो थ्‍योनी जोवु दोके यिन सिनी नासाम तोङ्‍गुप मेङ्‍गिवी।
ACT 17:30 गोमाला मीतिवी हाक्‍माकोनी क्‍यावु तेरी लाकातिवाला कोन्‍छ्‍योककी ङ्‍याम माक्‍या, यिने तफेन्‍ला दासा तेरीकी मीतिवी सेम ग्‍युर गोकिवी सिनी क नङ वे।
ACT 17:31 च्‍यिलासिसिन खोकी तुजे यी तेन्‍तेन क्‍यानी दी जम्‍बुलिङला वोतुप मी तेरीला ठिम टेङ्‍बु क्‍या नङ्‍गिवी। ती ठिम कितुपला कोन्‍छ्‍योककी येशूला पेन नङ्‍गुप यिन। खोकी येशूला शेप ने ङोसु लानी तेरी मीतिवाला दी ताम्‍ङेकी कोर्ला पङ्‍बु छ्‍या तेन नाङ्‍सुङ।”
ACT 17:32 मीतिवी येशू टुङ्‍नी ङोसु लावु कोर्ला थोसिमा ललाइकी मर्च्या क्‍यासुङ। तमा ललाइकी ङ्‍यिराङ येलुङ दी ताम्‍ङे ति ङ्‍येन गोकिवी सिनी सिक्‍यासुङ।
ACT 17:33 तोजोयी सिक्‍यासिमा पावल तिवी पर नेसुर थेन्‍नी गाल्‍सुङ।
ACT 17:34 यिने मी ललाइ ति पावलकी मुला तिङ्‍यानी येशूला तेपा क्‍यासुङ। तिवा ति अरियोपागसकी ठिम कितुप डियनुसियस ताङ दामारिस सिरुप पुम्‍पेजा मिरा च्‍यिक ताङ यम्‍बा मीतिवा यिनोक।
ACT 18:1 ती ज्‍युक्‍ला पावल एथेन्‍स नेसुर थेन्‍नी कोरिन्‍थला गाल्‍नोक।
ACT 18:2 ते लेप्‍सिमा पोन्‍टसला क्‍येवु अकिलास सिरुप यहूदी मिरा च्‍यिकला ठेनोक। ती ति खोरो पेर्मी प्रिस्‍किलाला साङ मुला राङ टिनी इटालिया लुङ्‍बा नेसुर कोरिन्‍थला वानोक। च्‍यिलासिसिन रोमी ग्‍येल्‍वु क्‍लौडियसकी तेरी यहूदीतिवाला रोम नेसुर थेन ग्‍युक सिनी क बिन्‍नोक। तुक क्‍यानी पावल तिवाला ठेतुपला गाल्‍नोक।
ACT 18:3 तिवाला ठेसिमा तिवी लाका ति च्‍यिक्‍पा राङ यिन्‍दुप तप्‍की पावल साङ तिवी मुला राङ देनी लाका क्‍यासुङ। तिवी लाका ति कुर जोप लाका नोक।
ACT 18:4 ङासोप ङ्‍यिमाला नरी पावल यहूदी छ्‍योखाङला गल्‍नी केवुल किनोक, तमा यहूदी ताङ ग्रीककी मीतिवाला ल्‍यामो क्‍यानी हाक्‍को ज्‍यितुप छाल्‍सुङ।
ACT 18:5 ती पेला सिलास ताङ तिमोथी माकेडोनिया नेसुर वानोक। तुक क्‍यानी पावल ति कुर जोप लाका क्‍युर ज्‍याक्‍नी सुङ ख्‍याप्‍टाक कितुप ताङ यहूदीतिवाला येशू ति ख्रीष्‍ट यिन सिनी पङ्‍बु तेरिन नोक।
ACT 18:6 यिने यहूदीतिवा पावलकी तेन्‍दोकला लानी मर्च्या क्‍यासुङ। तमा पावलकी ख्‍युर ग्‍युर्नी तिवाला “ख्‍यिराङला कोन्‍छ्‍योक नेमा ख्‍येलुप पर्च्या ति ख्‍यिरा क्‍येन यिन, ङे ति मिन। त याङ ङ यहूदी मिन्‍दुप मिरिक यम्‍बाकी मीतिवी ते डोयी।” सिनी खोरो मज्‍यी लोकी थल्‍दुक र्‍हुन ज्‍याक्‍नी गाल्‍सुङ।
ACT 18:7 तेसुर पावल तीतस युस्‍तस सिरुप कोन्‍छ्‍योकला सोवा देकुप यहूदी मिन्‍दुप मिरिक यम्‍बाकी मी यीकी खाङ्‍बाला कोन्‍छ्‍योककी सुङ नेमा येन्‍देन तेरुपला गाल। तीकी खाङ्‍बा ति यहूदी छ्‍योखाङकी चिप्‍ला राङ नोक।
ACT 18:8 पावलकी बिन्‍दुप सुङ थोसिमा ती छ्‍योखाङकी मी छ्‍ये क्रिस्‍पस ताङ तीकी मिछाङतिवा तेरीकी येशूला तेपा क्‍यासुङ। तमा कोरिन्‍थकी मीतिवा बङीकी पावलकी ख्‍याप्‍टाक क्‍यावु सुङ थोसिमा कोन्‍छ्‍योकला तेपा क्‍यानी बप्‍तिस्‍मा लानोक।
ACT 18:9 तमा नुप च्‍यिक पावलला ज्‍यल्‍का थोङ्‍मी चोवो येशूकी तीला “ख्‍युरुङ ज्‍यिवा माकी, यिने खरक्‍पा मादेवा क्‍यानी सुङ ति लोप!
ACT 18:10 च्‍यिलासिसिन ङ ख्‍योरो मुला राङ वे। तुक क्‍यानी ख्‍युरुङला सी साङ मेलोक्‍पा कि मुथुपी। दी ग्‍येसाला ङला तेपा कितुप मीतिवा बङी वे।” सिनी सुङ्‍सुङ।
ACT 18:11 तमा पावल तिवी मुला लो च्‍यिक ताङ फेका सेक देनी तिवाला कोन्‍छ्‍योककी सुङ लाप्‍सुङ।
ACT 18:12 तमा गलियोन ति अखैया लुङ्‍बा ओङ्‍ज्‍येन कितुप मी छ्‍ये वोतुप पेला यहूदीतिवा ख च्‍यिक क्‍यानी पावलकी तेन्‍दोकला लानी पावलला ठिम्‍खाङला टिन गल्‍सिमा
ACT 18:13 “दी मी तीकी याङ रोमी ठिम ताङ मुला मिथिन्‍दुप ताम्‍ङे लाप्‍नी कोन्‍छ्‍योकला सोवा देक गोकिवी सिनी लुकिनोक।” सिनी सिक्‍यासुङ।
ACT 18:14 तमा पावलकी लप्‍तुछ्‍येप पेला ती गलियोन तीकी यहूदीतिवाला दुक सिक्‍यासुङ, “ओ यहूदीतिवा, वुतुङ के ख्‍यिरा क्‍यावु दी ताम्‍ङे ति मीला मेलोक्‍पा जोप याङ्‍ना लाका दुक्‍टा कितुप ताम्‍ङे यिन्‍सियाङ ङे ङ्‍येन राङ गोकिवी।
ACT 18:15 यिने दी ताम्‍ङे ति ख्‍यिरा ग्‍येताम ताङ मिङतिवा ताङ रङगी ठिमकी कोर्ला यिन्‍सिन ख्‍यिराङ ल्‍हानी नासाम तोङा! दुका ताम्‍ङेकी ठिम कितुप ति ङला गा मलङ्‍गिवी।”
ACT 18:16 तुक सिक्‍यासिमा तीकी तिवाला ठिम्‍खाङ नेमा तेन ताङ्‍सुङ।
ACT 18:17 तमा मीतिवा तेरीकी यहूदी छ्‍योखाङकी मी छ्‍ये सोस्‍थेनेसला जिम्‍नी ठिम्‍खाङकी दोङ्‍ला राङ दुसुङ। यिने तीकी कोर्ला गलियोनकी काङ साङ ङ्‍याम माक्‍या।
ACT 18:18 ती ज्‍युक्‍ला पावल ङ्‍यिमा अलायी सेक ते राङ देसुङ। तमा कोन्‍छ्‍योकला तेपा कितुप मीतिवी मुला क्‍येनी प्रिस्‍किला ताङ अकिलास साङ मुला राङ टिनी टुला जेनी सिरिया लुङ्‍बाला डोप छाल्‍सुङ। यिने गोमाला कोन्‍छ्‍योकला थाक्‍छ्‍येनी लावा लावु ति नासाम शर्नी किंक्रियाला गल्‍नी खोरो र्‍ह टेसुङ।
ACT 18:19 तेसुर तिवा एफिससला लेप्‍सिमा पावलकी प्रिस्‍किला ताङ अकिलासला तेराङ क्‍युर ज्‍याक्‍नी खोरुङ ति यहूदी छ्‍योखाङ नाङ्‍ला शुनी यहूदीतिवी मुला येशूकी कोर्ला केवुल क्‍यासुङ।
ACT 18:20 तमा तेकी यहूदीतिवी पावलला तरोङ साङ चेयी देराङ ज्‍यु सिनी गोङ्‍बा शुसुङ। यिने पावल माङ्‍येन।
ACT 18:21 तमा तिवी मुला क्‍येनी डोप पेला पावलकी तिवाला “कोन्‍छ्‍योककी नोवा वोसिन ङ येलुङ ख्‍यिरा ते लोङ वुङ्‍गुप्‍नो।” सिनी एफिसस नेसुर टुला जेनी गाल्‍सुङ।
ACT 18:22 तमा कैसरियाला पाप्‍सिमा केन जेनी यरूशलेमकी चर्चला गल्‍नी तेकी तेपा कितुप मीतिवाला ठेनी मर एन्‍टिओखियाला गाल।
ACT 18:23 ते ङ्‍यिमा चेयी देसिमा पावल गलातिया ताङ फ्रिगियाकी लुङ्‍बाला वोतुप दासा कुतुक कुतुकला गल्‍नी ते वोतुप तेपा कितुप मी तेरीला टोङ्‍गु बिन्‍नी तेपा रम्‍बु जोसुङ।
ACT 18:24 ती पेला अलेक्‍जेन्‍ड्रिया ग्‍येसाला क्‍येवु अपोल्‍लोस सिरुप यहूदी मिरा च्‍यिक एफिससला वानोक। ती ति ताम्‍ङे ल्‍यामु लोपुप ताङ कोन्‍छ्‍योककी सुङला खामु वोतुप मी नोक।
ACT 18:25 कोन्‍छ्‍योककी सुङ टेङ्‍बुकी कोर्ला तीकी येन्‍देन ङ्‍येनोक। तुक क्‍यानी ती ति छासे सेम गा क्‍यानी येशूकी कोर्ला ताम्‍ङे लपुप ताङ ताम्‍ङे टेङ्‍बु तिराङ लोपुप किनोक। यिने तीला यूहन्‍नाकी बप्‍तिस्‍माकी कोर्ला तिराङ छ्‍या नोक।
ACT 18:26 ती ति यहूदी छ्‍योखाङ नाङ्‍ला गल्‍नी ङाडेङ क्‍यानी सुङ लप्‍किनोक। यिने तीकी लापुप सुङ थोनी प्रिस्‍किला ताङ अकिलासकी ती अपोल्‍लोस तीला येशूकी कोर्ला ल्‍यामु क्‍यानी हाक्‍माकोवु थोङ्‍नी तीला खोप्‍रे खाङ्‍बा टि वानी येशूकी सुङ टेङ्‍बुकी तेन्‍दोक ति ल्‍यामो क्‍यानी लाप्‍सुङ।
ACT 18:27 तमा ती ज्‍युक्‍ला अपोल्‍लोस अखैयाकी दासाला डोप नो क्‍यासिमा तेपा कितुप मीतिवी तीला ते डोपला टोङ्‍गु बिन्‍सुङ। तमा अखैयाला वोतुप लोमातिवाला “अपोल्‍लोसला ल्‍यामो क्‍यान दाल्‍जा किटे की।” सिनी तिवी यिकी टिनी ताङ्‍सुङ। तेसुर अपोल्‍लोस अखैयाला लेप्‍सिमा कोन्‍छ्‍योककी कटिन थोप्‍नी तेपा क्‍यावुतिवाला दाल्‍जा किटे क्‍यासुङ।
ACT 18:28 च्‍यिलासिसिन कोन्‍छ्‍योककी सुङ नेसुर तीकी येशू तिराङ ख्रीष्‍ट यिन सिरुप सुङ बिन्‍नी तेरीकी मिङ्‍गाला यहूदीतिवा ताङ मुला केवुल क्‍यानी तिवाला खरक्‍पा दे च्‍यिसुङ।
ACT 19:1 अपोल्‍लोस ति कोरिन्‍थला वोतुप पेला पावल ति गलातिया ताङ फ्रिगियाकी दासा नेवा क्‍यानी एफिससला वासुङ। तमा ते ललाइ तेपा कितुप मीतिवा ताङ मुला ठेनी,
ACT 19:2 “ख्‍यिरा तेपा क्‍यासिमा ख्‍यिराङला कोन्‍छ्‍योककी थु चाङ्‍मा ङ्‍येसुङ माङ्‍ये?” सिनी टिसुङ। यिने लोमातिवी पावलला “माङ्‍ये वे। कोन्‍छ्‍योककी थु चाङ्‍मा वे सिरुप ति ङ्‍यिरा थोवु साङ माथो वे।” सिनी सिक्‍यासुङ।
ACT 19:3 तमा पावलकी लोङ तिवाला “तुकै यिन्‍सिन, ख्‍यिरा चुका परकी बप्‍तिस्‍मा लावु?” सिनी टिसुङ। तमा तिवी “ङ्‍यिरा याङ यूहन्‍नाकी बप्‍तिस्‍मा लायी।” सिनी सिक्‍यासुङ।
ACT 19:4 येलुङ पावलकी तिवाला सिक्‍यासुङ, “यूहन्‍नाकी बप्‍तिस्‍मा याङ मीतिवाला सेम ग्‍युरुप थोक्‍ला तिराङ बिन्‍दुप यिन। यूहन्‍नाकी ‘ङे तिङ्‍ला मी यी फेप्‍किवी, ख्‍यिरा खोला तेपा की!’ सिनी सिक्‍यावु ती मी ति येशू यिन।”
ACT 19:5 ती ताम्‍ङे थोसिमा तिवी येशूकी मिङला बप्‍तिस्‍मा लासुङ।
ACT 19:6 ती ज्‍युक्‍ला पावलकी तिवी खला लाक्‍पा ज्‍याक्‍सिमा कोन्‍छ्‍योककी थु चाङ्‍मा तिवी खला फेप्‍नी तिवा ग्‍येताम कुतुक कुतुकला ताम्‍ङे कितुप ताङ ज्‍युक्‍थमाला वुङ्‍गुप ताम्‍ङे साङ शेतुप छाल्‍सुङ।
ACT 19:7 ते तिवा तो मिसिन मिरा च्‍यिङ्‍ङी चोयी नोक।
ACT 19:8 ती ज्‍युक्‍ला पावल यहूदी छ्‍योखाङला गल्‍नी ल सुम सेक ङाडेङ क्‍यानी मीतिवाला कोन्‍छ्‍योककी ग्‍येल्‍खापकी कोर्ला लाप्‍नी तिवाला तेपा कि ज्‍यितुप छाल्‍सुङ।
ACT 19:9 यिने मी ललाइकी सेम क्‍योङ्‍बु वोतुप तप्‍की पावलकी ताम्‍ङेला तेपा माक्‍यानी मीतिवी मिङ्‍गाला पावलकी ताम्‍ङेकी तेन्‍दोकला लासुङ। तुक क्‍यानी पावलकी ती ताम्‍ङे मेलोक्‍पा कितुपतिवाला क्‍युर ज्‍याक्‍नी लोमातिवाला टिनी टुरान्‍नस सिरुप लोपुप दासाला देनी ङ्‍यिमी टेङ तिवाला येशूकी कोर्ला लाप्‍सुङ।
ACT 19:10 पावलकी तिवाला लो ङ्‍यी सेक लाप्‍सिमा ते एशियाला देतुप यहूदी ताङ ग्रीककी मीतिवा तेरीकी येशूकी सुङ ङ्‍येन्‍सुङ।
ACT 19:11 तमा ते कोन्‍छ्‍योककी पावलकी लक नेमा हलेवु लाकातिवा कि च्‍यिसुङ।
ACT 19:12 ती हलेवु लाका ति पावलकी थोकुप रुमाल ताङ लाका कितुप पेला कोन्‍दुप मज्‍या रे काङ रे मीतिवी खुन गल्‍नी नेर्पुकी जुला रेक्‍सिन नेर्पुतिवी नेजुतिवा टेकुप ताङ र्‍हेन्‍डीतिवा थेन डिनोक।
ACT 19:13 तमा ललाइ फार छुर युकुप यहूदी मिंदुङतिवी डेकी कुलुप मीतिवाला येशूकी मिङ तेन्‍नी, “पावलकी ख्‍याप्‍टाक क्‍यावु येशूकी मिङला ङ ख्‍युरुङला सिरिन, थेन ग्‍युक!” सिनी क तेर्किनोक।
ACT 19:14 ते स्‍केवास सिरुप यहूदी कोङ्‍यार छ्‍येकी पुज्‍युङ पिन दिनतिवी साङ तुक राङ किनोक।
ACT 19:15 तिवी तुक कितुप पेला डेकी तिवाला “ङ येशूला ङो शेकिवी, पावलला साङ ङो शेकिवी। यिने ख्‍यिराङ ति सु यिन?” सिनी टिसुङ।
ACT 19:16 तमा ज्‍युक्‍ला डेकी कुलुप मी ति तिवी खला फिर्नी तिवा तेरीला ओङला ज्‍याक्‍नी तला ताङ्‍सुङ। तमा तिवा जुला म थेन्‍नी ती खाङ्‍बा नेमा पेर्तुङ्‍बा सिङ क्‍यानी टोनी गाल्‍सुङ।
ACT 19:17 ती ताम्‍ङे ति एफिससला देतुप यहूदीतिवा ताङ ग्रीकतिवी हाक्‍कोसुङ। ती तप्‍की तिवा तेरी ज्‍यिवा लानी चोवो येशूकी मिङला सोवा तेक्‍सुङ।
ACT 19:18 तमा मलोक तेपा क्‍यावु मीतिवा बङी वानी मीतिवी मिङ्‍गाला खोप्‍रे क्‍यावु मेलोवा लाकातिवा क्‍युर्नी सेम ग्‍युर्सुङ।
ACT 19:19 तिवी पर्ला शाशुता कितुपतिवा बङीकी खोप्‍रे शाशुता कितुप पेज्‍यातिवा तेरी खुन वानी मी तेरीकी मिङ्‍गाला र्‍हेसुङ। ती पेज्‍याकी गोङ ति ची क्‍यासिन ङुलकी डप्‍बु तोङ्‍डा खल ङ चोयी नाकिनोक।
ACT 19:20 तुक क्‍यानी येशूकी सुङ ति मङ मङ टमिन ताङ ओङ छ्‍येवु डोयी गाल।
ACT 19:21 ती ज्‍युक्‍ला पावल कोन्‍छ्‍योककी थु चाङ्‍माकी ओङला माकेडोनिया ताङ अखैयाकी लाम नेवा क्‍यानी यरूशलेमला डोपला नासाम तङ्‍नी, “ते गल्‍सिमा ङ रोमला साङ डो गोकिवी” सिनी सिक्‍यासुङ।
ACT 19:22 तमा खोरुङला दाल्‍जा कितुप तिमोथी ताङ इरास्‍तसला ति माकेडोनियाला ताङ्‍नी खोरुङ ति ङ्‍यिमा चेयी पर सेक एशिया लुङ्‍बाला देसुङ।
ACT 19:23 ती पेला ते पावलकी ख्‍याप्‍टाक क्‍यावु येशूकी सुङगी कोर्ला मीतिवा छासे हराङ हुरुङ क्‍यासुङ।
ACT 19:24 च्‍यिलासिसिन डेमेत्रियस सिरुप ङुलकी कु जोप मी यीकी आर्तेमिस सिरुप ल्‍हमुकी ल्‍हङाङ दोके टिक्‍पे टिक्‍पे जोनी ती लाका कितुप मीतिवाला लाका बङी तेर्किनोक।
ACT 19:25 ती डेमेत्रियसकी कु जोप लाका कितुप मीतिवा ताङ यम्‍बा तुकै राङ लाका कितुप मीतिवाला कताङ्‍नी सिक्‍यासुङ, “ओ नुपतिवा, दी छोङ नेसुर ख्‍येप्‍साङ ल्‍यामु राङ गिवी सिरुप ति याङ ख्‍यिराङला छ्‍या राङ वे।
ACT 19:26 एफिसस ताङ एशियाला वोतुप मीतिवा तेरीला ‘लाक्‍पी जोवु कुतिवा काङ साङ मिन।’ सिनी पावलकी मी बङीला लुनी टिन गलुप ति ख्‍यिरा थोङ्‍गुप ताङ थोनी राङ वे।
ACT 19:27 ती तप्‍की दाक्‍पी छोङला कुन फोकुप तिराङ मिन, दाक्‍पी ओङ छ्‍येन्‍मु आर्तेमिस ल्‍हमुकी ल्‍हङाङला साङ मेतेन्‍वी, तेरी एशियाकी लुङ्‍बा ताङ जम्‍बुलिङ तेरीकी मीतिवी तेन्‍दुप ल्‍हमुकी मोवा साङ तोर्नी डिवी।” सिनी सिक्‍यासुङ।
ACT 19:28 ती थोसिमा तिवा कशेन ङ्‍यिर्मु लानी “ङ्‍यिराङ एफिसीतिवी ल्‍हमु आर्तेमिस राङ छ्‍ये यिन।” सिनी च्‍यार तेन्‍सुङ।
ACT 19:29 तुक क्‍यानी ती ग्‍येसा तेरीला छासे हराङ हुरुङ क्‍यासुङ। तेसुर तिवा ख च्‍यिक क्‍यानी माकेडोनिया नेसुर पावलकी मुला वावु पावलकी दाल्‍जा गायस ताङ अरिस्‍तार्खसला जिम्‍नी टियी सिरा मी बङी ल्‍हेर्मु ल्‍हाप दिङ्‍माला गाल्‍सुङ।
ACT 19:30 तमा पावल मी माङ्‍छ्‍योककी पर्ला राङ डोप नो क्‍यासुङ, यिने लोमातिवी खोला डो माच्‍यी।
ACT 19:31 ते वोतुप पावलकी दाल्‍जा एशियाकी मी छ्‍ये ललाइतिवी पावलला ती ल्‍हेर्मु ल्‍हाप दिङ्‍माला माडो सिनी लेन ताङ्‍नी गोङ्‍बा शुसुङ।
ACT 19:32 ती पेला ती ल्‍हेर्मु ल्‍हाप दिङ्‍माला जोम्‍बुप मीतिवा ललाइकी ताम्‍ङे च्‍यिक, यम्‍बातिवी ताम्‍ङे च्‍यिक सिनी च्‍यार ग्‍यपुप तप्‍की ते छासे हराङ हुरुङ गाल। ते जोम्‍बुप मीतिवा माङ्‍शोककी ते च्‍यिला मी जोम्‍बुप यिन सिरुप ति हाक्‍माकोनोक।
ACT 19:33 तमा ते वोतुप यहूदीतिवी अलेक्‍जेन्‍डरला दी हराङ हुरुङ क्‍यावु तेन्‍दोकला ताम्‍ङे की सिनी मीतिवी दोङ्‍ला पुल्‍नी ताङ्‍सिमा तीकी मीतिवाला खरक्‍पा दे सिनी लाक्‍पी छ्‍याक्‍के क्‍यानी मीतिवाला ताम्‍ङे सिरुप छाल्‍सुङ।
ACT 19:34 यिने अलेक्‍जेन्‍डर यहूदी यिन्‍दुप ति मी माङ्‍शोककी हाक्‍कोनी तिवा घण्‍टा ङ्‍यी सेक “ङ्‍यिरा एफिसीकी आर्तेमिस ल्‍हमु राङ छ्‍ये यिन।” सिनी ख च्‍यिक क्‍यानी च्‍यार तेन्‍सुङ।
ACT 19:35 ती ज्‍युक्‍ला तेकी ग्‍येसाकी मी छ्‍ये तीकी मीतिवाला कुसुमी दे च्‍यिनी दुक सिक्‍यासुङ, “ओ एफिससकी मीतिवा, एफिससकी ग्‍येसाकी मीतिवा ति चोछ्‍येवु ल्‍हमु आर्तेमिसकी ल्‍हङाङ ताङ नाम नेमा पापुप तीकी कुला र्‍होकुप मीतिवा यिन सिरुप ति तेरीला छ्‍या वे।
ACT 19:36 दी ताम्‍ङे ति छासे राङ खक्‍छ्‍येर्मु वे सिनी ख्‍यिराङला साङ छ्‍या वे। तुक क्‍यानी ख्‍यिराङ खरक्‍पा दे गोकिवी। तमा लाका वुल्‍दुङ्‍बा कितुप मेवी।
ACT 19:37 च्‍यिलासिसिन ख्‍यिरा दे टि वावु मीतिवी ल्‍हङाङ नाङ्‍ला वोतुप काङ साङ कुन माक्‍या वे। दाक्‍पी ल्‍हमु अर्तेमिसला साङ मारे माताङ वे।
ACT 19:38 ती तप्‍की डेमेत्रियस ताङ तीकी कु जोप लाका कितुप मीतिवी सी तेन्‍दोकला सि गोवु ताम्‍ङे रे काङ रे वोसिन ठिम्‍खाङ साङ पेनी वे, ठिम कितुप मी साङ वे। ते गल्‍नी च्‍यिककी च्‍यिकला क्‍येन तेर थुप्‍किवी।
ACT 19:39 यिने ती मिन्‍दाला ताम्‍ङे यम्‍बा वोसिन तीकी तेन्‍दोकला ग्‍येसाकी मीतिवा जोम्‍नी केवुल कितुप छोक्‍पाला राङ गल्‍नी ताम्‍ङे कि थुप्‍किवी।
ACT 19:40 च्‍यिलासिसिन हारिङ हराङ हुरुङ क्‍यावु क्‍येन ति दाक्‍पुला राङ फोकुप दोके नोक। दुका तेन्‍दोक राङ मेतुप हराङ हुरुङगी टिलेन ङ्‍यिरा काङ साङ तेर मुथुपी।”
ACT 19:41 तीकी तोजोयी सिक्‍यासिमा मीतिवा तेरीला ताङ्‍सुङ।
ACT 20:1 ती हराङ हुरुङ क्‍यावु ज्‍युक्‍ला पावलकी लोमातिवाला कताङ्‍नी तिवाला टोङ्‍गु बिन्‍नी तिवी मुला क्‍येनी खुरुङ ति माकेडोनिया थाकाला गाल।
ACT 20:2 ते वोतुप दासा दासाला गल्‍सिमा तेकी तेपा कितुप मीतिवाला टोङ्‍गु बङी बिन्‍नी ग्रीसला गाल।
ACT 20:3 तमा ते ल सुम देसिमा टुला जेनी सिरियाला डोप नासाम ताङ्‍सुङ। यिने यहूदीतिवी पावलला सेतुपला च्‍यु क्‍यावु हाक्‍कोनी पावल काङ्‍बी राङ माकेडोनिया नेवा राङ डोप नो क्‍यासुङ।
ACT 20:4 ती पेला पावलकी मुला डोप मीतिवा ति बेरियाला क्‍येवु पुरासकी पुज्‍युङ सेपोत्रस ताङ थेसलोनिकेकी अरिस्‍तार्खस ताङ सिकन्‍दस ताङ डर्बीकी गायस ताङ तिमोथी ताङ एशियाकी तुखिकस ताङ त्रोफिमस नोक।
ACT 20:5 ती मीतिवा ति गोमाला के त्रोआसला गल्‍नी पावल ताङ ङ्‍यिराङला गुनी देनोक।
ACT 20:6 ङ्‍यिराङ ति खमीर मालुकुप शुब्‍ज्‍याङ साप तुछ्‍येन सिन्‍सिमा फिलिप्‍पी नेवा टुला जेनी गलिन। तमा ङ्‍यिमा ङकी छेर्मु त्रोआसला तिवी चाला लेप्‍सुङ। ते लेप्‍सिमा ङ्‍यिमा दिन सेक तिवी मुला राङ देतिन।
ACT 20:7 तमा ङासोप ङ्‍यिमी गोमु ङ्‍यिराङ चोवोकी डेनकी शुब्‍ज्‍याङ सापला जोमिन। तमा पावल ती सला तीला राङ डोप नो क्‍यावु तप्‍की तिवा ताङ मुला नुप फेका सेक कोन्‍छ्‍योककी सुङगी कोर्ला अरा उरा सिनी देसुङ।
ACT 20:8 ते ङ्‍यिराङ देतुप खाङ्‍बी तेङगी कोठाला दिप्‍लीतिवा बङी चेनी नोक।
ACT 20:9 ती पेला युटिकस सिरुप ख्‍योक्‍पेजा नाज्‍युङ यी करुङ खला देनी नोक। पावल अलायी सेक अरा उरा सियी देसिमा ती ति ङ्‍यिला शोर्नोक। तमा ती तप्‍की खाङ्‍बा सुम्‍दोक ख नेमा तला ग्‍यप्‍नी तिवी तीला लोङ्‍सालेन्‍सिन ती ति शिनोक।
ACT 20:10 तमा पावल मर पाम वानी पुमुङ सला चुनी तीला पाङ्‍बा तप्‍नी “ख्‍यिराङ सेम्‍दुक माकी, दी याङ माशि वे।” सिनी सिक्‍यासुङ।
ACT 20:11 ती ख्‍योक्‍पेजा ति सेन्‍बु लावु थोङ्‍सिमा तिवा येर तेला गल्‍नी चोवो येशूकी मिङला च्‍योकुप शुब्‍ज्‍याङ सोसुङ। तमा पावल ति नाम लाङ्‍दा सेक तिवी मुला अरा उरा सिनी देसुङ। नाम लासिमा तिवी मु नेसुर क्‍येसुङ।
ACT 20:12 तमा मीतिवी ती गोमाला तला ग्‍यप्‍नी सेन्‍बु लावु ख्‍योक्‍पेजा तीला टिनी गाल्‍सुङ। ती तप्‍की तिवी सेमला छासे गा लानोक।
ACT 20:13 तेसुर पावल ति काङ्‍बी राङ अस्‍सोस सेक डोप नो क्‍यावु तप्‍की ङ्‍यिराङ टुला जेनी गोमाला राङ अस्‍सोसला गलिन।
ACT 20:14 ते पावलला ठेसिमा टुला जेनी मुला राङ मितिलेनेला गलिन।
ACT 20:15 तेसुर टुला जेनी गल्‍सिमा ती सला तीला ङ्‍यिराङ खियसला लेप्‍सुङ। तमा ङ्‍यिमा ङ्‍यिवाला ङ्‍यिराङ सामोसला लेप्‍नी ङ्‍यिमा सुम्‍बाला मिलेटसला लेप्‍सुङ।
ACT 20:16 पावल एशियाला अला देतुप नो माक्‍यावु तप्‍की एफिससला माशुवा क्‍यानी डोप नो क्‍यासुङ। च्‍यिलासिसिन लेप थुप्‍सिन पेन्‍तिकोसकी तुछ्‍येनला यरूशलेमला राङ लेपुप नोनी रिवा क्‍यासुङ।
ACT 20:17 तमा पावलकी मिलेटस नेमा मीतिवा तङ्‍नी एफिससला वोतुप चर्चला गोमा कितुप मी छ्‍येतिवाला कताङ्‍सुङ।
ACT 20:18 तमा ती गोमा कितुप मी छ्‍येतिवा ते वासिमा पावलकी तिवाला दुक सिनी सिक्‍यासुङ, “ङ एशियाला वावु छेर्मु नेज्‍युनी ख्‍यिरा पर्ला चुक क्‍यानी देतिन सिरुप ताम्‍ङे याङ ख्‍यिराङला छ्‍या वे।
ACT 20:19 ती पेला यहूदीतिवी ङला सेतुपला केवुल क्‍यानी छासे दुक्‍पा वोसिनाङ ङे कुसु ज्‍यम्‍बु क्‍यानी ङुयी सिरा टेमु क्‍यानी कोन्‍छ्‍योकला शब्‍ज्‍यी कितुप माक्‍युर।
ACT 20:20 ख्‍यिराङला ल्‍यामु वुङ्‍गुप ताम्‍ङे वोसिन ङ मी तेरीकी दोङ्‍ला लानी येन्‍देन लोपुप ताङ खाङ्‍बा खाङ्‍बाला गल्‍नी लोपुपला ङे कि मुथुपी सिनी नाम्‍साङ सिमाक्‍या। ती ताम्‍ङे याङ ख्‍यिराङला साङ छ्‍या वे।
ACT 20:21 ङ दिक्‍छेन यिनोक सिनी सेम ग्‍युर्नी कोन्‍छ्‍योककी सुङला ङ्‍येन्‍दुप ताङ येशूला तेपा कि गोकिवी सिरुप ताम्‍ङे ति यहूदीतिवा ताङ ग्रीकतिवाला ङे पङ्‍बु बिनिन।
ACT 20:22 ल्‍होसा, त कोन्‍छ्‍योककी थु चाङ्‍माकी क नङ्‍गुप तप्‍की ङ यरूशलेमला डोयी वोतो। ते ङला काङ ख्‍येल गिते, ती ति ङला काङ साङ छ्‍या मे।
ACT 20:23 यिने ङला दोजो तिराङ छ्‍या वे, ङ चुका ग्‍येसाला गल्‍सिनाङ तिवी ङला छेटाङ दुङल बिन्‍नी चोन्‍खाङला उप्‍किवी सिनी कोन्‍छ्‍योककी थु चाङ्‍माकी ङला हाक्‍को च्‍यिसुङ।
ACT 20:24 यिन्‍सिनाङ ङे कि गोवु लाका तेरी सिन्‍दा कितुप ताङ कोन्‍छ्‍योककी कटिन वोतुप लेन ल्‍यामुकी कोर्ला पङ्‍बु तेरुपला चोवो येशू नेमा ङला चेक तेन नङ्‍गुप लाका तेरी कि थुप्‍सुङ सिसिन ङे मिजी ति काङ साङ मिन।
ACT 20:25 ल्‍होसा, ख्‍यिरा पर्ला कोन्‍छ्‍योककी ग्‍येल्‍खापकी कोर्ला ङे ख्‍याप्‍टाक क्‍यावे, यिने ख्‍यिरा पर्ला सी साङ येलुङ ङला मोथोङ्‍गिवी सिनी मला छ्‍या वे।
ACT 20:26 ती तप्‍की ख्‍यिरा क्‍यावु तेपा क्‍युर्नी ज्‍याक्‍सिनाङ तीकी क्‍येन ति ङला मोफोक्‍शी सिनी हारिङ ङ ख्‍यिराङला ल्‍यामो क्‍यानी पङ्‍बु तेरिन।
ACT 20:27 च्‍यिलासिसिन कोन्‍छ्‍योककी नोवाला वोतुप ताम्‍ङेतिवा तेरी ङे ख्‍यिराङला लापिन।
ACT 20:28 तुक क्‍यानी ख्‍यिराङ गोमा कितुप मी छ्‍येतिवा रङगी थोक्‍ला ल्‍यामो क्‍यानी नासाम तोङ, तमा तेपा कितुप ख्‍यिरा मीतिवाला साङ ल्‍यामो क्‍यानी ल्‍होसा। च्‍यिलासिसिन कोन्‍छ्‍योककी थु चाङ्‍माकी ख्‍यिराङला तेपा कितुप मीतिवा ल्‍हाटे कितुपला चेक तेतुप ताङ खोकी खोरो सेवुकी ठककी ङ्‍योनी नङ्‍गुप चर्च ल्‍यामो क्‍यानी ल्‍हापला पेतुप यिन।
ACT 20:29 ङ गल्‍सिमा ख्‍यिरा पर्ला ज्‍यिवा लोङ्‍गुप खटमुतिवा दोके येन्‍देन मेटेङ्‍बु लोपुपतिवा वानी ख्‍यिरा मीतिवाला ना तोङ्‍गिवी सिरुप ति ङला छ्‍या वे।
ACT 20:30 ख्‍यिरा पर नेमा राङ मी मेलोक्‍पातिवा थेन्‍नी लोमातिवाला खोप्‍रे तिङ्‍ला टि डोपला ताम्‍ङे जिनोक जो थुप्‍किवी।
ACT 20:31 तुक क्‍यानी ख्‍यिराङ च्‍याङ्‍से देता! लो सुम सेक ङ्‍यी ताङ नुप्‍ज्‍या ङुयी सिरा ङे ख्‍यिराङला टोङ्‍गु बिन्‍दुप ति नासाम तोङा।
ACT 20:32 त याङ ङ ख्‍यिराङला कोन्‍छ्‍योककी लकला ज्‍योकिनो। कोन्‍छ्‍योककी कटिन वोतुप सुङगी ख्‍यिराङला र्‍होकिवी। तमा ती सुङगी राङ ख्‍यिराङला रम्‍बु जेवी। खोकी पेतुपतिवा तेरीला खोकी मोलाम नङ्‍गिवी।
ACT 20:33 मी ज्‍येनकी सेर ङुल ताङ कोन्‍दुप मज्‍याला ङे नाम्‍साङ देर्पा माक्‍या।
ACT 20:34 ङ ताङ ङे मुला वोतुपतिवा कतुकारला ख्‍येलुप पेला ङे लाक्‍पी राङ लाका क्‍यानी मिजी क्‍यङ्‍गुप याङ ख्‍यिराङला छ्‍या वे।
ACT 20:35 ख्‍यिरा साङ टेमु क्‍यानी काङ मेतुपतिवाला चुक क्‍यानी दाल्‍जा कि गोकिवी सिनी ङे मिजी नेमा राङ छ्‍या तेन वे। चोवो येशूकी ‘लङ्‍गुप सिनाङ तेरुप ति मङ मोलाम वोतुप यिन।’ सिनी सुङ्‍गुप ति ख्‍यिरा नासाम तोङ।”
ACT 20:36 तोजोयी सिक्‍यासिमा पावलकी पुमुङ सला चुनी खोरो मुला वोतुपतिवा तेरीकी मुला मोपोर क्‍यासुङ।
ACT 20:37 तमा तिवा तेरी ङुयी सिरा पावलला पाङ्‍बा ताप्‍सुङ।
ACT 20:38 च्‍यिलासिसिन पावलकी तिवाला तफेन्‍ला सी साङ येलुङ ङला मोथोङ्‍गिवी सिक्‍यावु तप्‍की तिवा पप क्‍यासुङ। तमा तिवी पावलला टु सेक क्‍योल गाल।
ACT 21:1 एफिससकी गोमा कितुप मी छ्‍येतिवा ताङ मुला क्‍येसिमा ङ्‍यिराङ टुला जेनी तल्‍ग्‍येक कोस ग्‍येसाला वायिन। तमा ती सला तीला रोडसला गल्‍नी ते नेसुर क्‍यानी पटाराला लेप्‍सुङ।
ACT 21:2 तेसुर फोनिकेला डोप टु यी थेप्‍नी ती टुला राङ जेनी गलिन।
ACT 21:3 डोप पेला ङ्‍यिरा ग्‍येम्‍छो परकी स कम्‍बु वोतुप साइप्रस थोङ्‍सुङ। तमा साइप्रसकी ल्‍होकी थाका नेमा क्‍यानी सिरियाला गल्‍नी टुरोसला पापिन। च्‍यिलासिसिन टी नङगी च्‍यालकतिवा ते बेप गोसुङ।
ACT 21:4 ते ङ्‍यिरा लोमातिवाला छल्‍नी ठेसिमा तिवा ताङ मुला ङ्‍यिमा दिन सेक ते राङ देतिन। तिवी पावलला यरूशलेमला माडो सिनी कोन्‍छ्‍योककी थु चाङ्‍मा नेमा सिक्‍यानोक।
ACT 21:5 यिन्‍सिनाङ तेसुर ङ्‍यिराङ क्‍येनी डोप पेला लेप्‍सिमा तिवा तेरी पेजापेर्मीतिवा ताङ क्‍यानी ङ्‍यिराङला क्‍योलुपला ग्‍येसाकी फिला सेक वासुङ। तमा ग्‍येम्‍छो गारीला पुमुङ चुनी मुला राङ मोपोर क्‍यानी तेरी क्‍येयिन।
ACT 21:6 ङ्‍यिराङ ति टुला जेनी गलिन। तिवा ति खोप्‍राङ खाङ्‍बा लोक्‍सुङ।
ACT 21:7 तेसुर ङ्‍यिराङ टुरोस नेसुर गल्‍सिमा टोलेमाइसला लेप्‍नी टु नेसुर पापिन। तमा तेकी तेपा कितुप मीतिवाला ठेनी तिवी मुला ङ्‍यिम्‍ज्‍यिक देतिन।
ACT 21:8 ती सला तीला ङ्‍यिराङ कैसरियाला वानी सुङ ख्‍याप्‍टाक कितुप फिलिपकी खाङ्‍बा देतिन। ती फिलिप ति यरूशलेम चर्चकी सुङ ख्‍याप्‍टाक कितुपला पेतुप मिरा दिनकी नाङ्‍ला मिरा च्‍यिक यिनोक।
ACT 21:9 ती फिलिपला जेन्‍दी माक्‍यावु पुम पिन ज्‍यी नोक। तिवा ति ज्‍युक्‍थमीकी कोर्ला नम्‍दर शेतुपतिवा यिनोक।
ACT 21:10 तमा ङ्‍यिराङ ते ङ्‍यिमा चेयी देतुप पेला यहूदिया नेसुर अगाबस सिरुप नम्‍दर शेतुप मी मिरा च्‍यिक ते वासुङ।
ACT 21:11 तीकी पावलला ठेसिमा पावलकी करा ति लानी खोरो काङ्‍बा लाक्‍पा ति टानी दुक सिक्‍यासुङ, “दी करा ति सी ति नोके, तीला यरूशलेमला यहूदीतिवी दुक राङ क्‍यान टानी यहूदी मिन्‍दुप मिरिक यम्‍बाकी मीतिवाला चेक ते कितो सिनी कोन्‍छ्‍योककी थु चाङ्‍माकी सुङ्‍सुङ।”
ACT 21:12 ती थोसिमा ङ्‍यिराङ ताङ तेकी मीतिवी पावलला यरूशलेम माफेप सिनी गोङ्‍बा शुयी।
ACT 21:13 यिने पावलकी ङ्‍यिराङला “ख्‍यिराङ दुक क्‍यान ङुनी ङे सेम च्‍यिला मेलोवा जेवी? चोवो येशूकी मिङला ङ चोन्‍खाङला शोर्सिनाङ, यरूशलेमला शिराङ गोसिनाङ ङ डोयी।” सिनी सिक्‍यासुङ।
ACT 21:14 तमा पावलला ङ्‍यिरा चो क्‍येक्‍सिनाङ माङ्‍येन्‍सिमा “कोन्‍छ्‍योककी नोवा दोके च्‍युङ्‍शी।” सिनी खरक्‍पा देतिन।
ACT 21:15 ङ्‍यिमा चेयी ज्‍युक्‍ला ङ्‍यिराङ यरूशलेम थाकाला गलिन।
ACT 21:16 डोप पेला कैसरियाकी लोमातिवा साङ ललाइ ङ्‍यिरा मुला राङ गलिन। तिवी ङ्‍यिराङला मनासोन सिरुप मीकी खाङ्‍बा देतुपला टि गाल। ती मी ति साइप्रस ने वावु गोमाला तेपा क्‍यानी लोमा च्‍युङ्‍गुप मी यिनोक।
ACT 21:17 तेसुर ङि्‍यराङ यरूशलेमला लेप्‍सिमा तेकी तेपा कितुप मीतिवी ङ्‍यिराङला गा ताङ क्‍यानी गासो शुसुङ।
ACT 21:18 ती सला तीला पावल ङ्‍यिराङ ताङ क्‍यानी याकूबकी खाङ्‍बा गलिन। ते यरूशलेम चर्चला गोमा कितुप मी छ्‍येतिवा साङ तेरी जोम्‍नोक।
ACT 21:19 तिवाला टसी देलेक सिक्‍यासिमा पावलकी कोन्‍छ्‍योककी थोक्‍ला लाका कितुप पेला खोरो मिजी नेमा यहूदी मिन्‍दुप मिरिक यम्‍बाकी मीतिवी पर्ला कोन्‍छ्‍योककी क्‍या नङ्‍गुप लाकाकी कोर्ला रे ताङ रे क्‍यानी शेसुङ।
ACT 21:20 ती थोसिमा तिवी कोन्‍छ्‍योकला सोवा तेक्‍नी पावलला सिक्‍यासुङ, “ओ नुप, ङ्‍येना! यहूदीतिवी पर्ला तेपा कितुपतिवा तोङ्‍डा च्‍यिथम्‍बा चोयी वे। तमा तिवा तेरी मोशाकी ठिम तेन्‍दुपला छासे ङाडेङ वे।
ACT 21:21 तिवी ख्‍योरो कोर्ला ताम्‍ङे चेयी थोनोक। ती ति यहूदी मिन्‍दुप मिरिक यम्‍बाकी मीतिवी पर्ला देतुप यहूदीतिवाला मोशाकी ठिम क्‍युर्नी ज्‍योकुप ताङ तिवी आङातिवाला यहूदीतिवी च्‍येतुप लुक्‍सु ताङ यम्‍बा लुक्‍सु साङ मातेन सिनी ख्‍योरो लापुप यिन सिनोक।
ACT 21:22 त काङ कितुप? ख्‍युरुङ फेम वे सिरुप ति तिवा तेरीकी हाक्‍को वे।
ACT 21:23 ती तप्‍की ङ्‍यिरा ख्‍युरुङला काङ सिक्‍यावे, ती ति की! कोन्‍छ्‍योककी दोङ्‍ला लावा लङ्‍गुप मीतिवा मिरा ज्‍यी ङ्‍यिरा मुला राङ वे।
ACT 21:24 दिवाला साङ मुला राङ टि गल्‍नी ख्‍युरुङ साङ चाङ्‍मा कि गोकिवी। तमा दिवाला गोवु डोसुमतिवा साङ ख्‍योरो राङ ग्‍यम बिन। तमा दिवी र्‍ह साङ टेक च्‍यी। तुक क्‍यासिन ख्‍युरुङ मोशाकी ठिमला राङ युकिनोक सिनी ख्‍योरो कोर्ला तिवी थोवु ताम्‍ङे ति टेङ्‍बु मिनोक सिनी तेरीकी हाक्‍कोकिवी।
ACT 21:25 यिने तेपा क्‍यावु यहूदी मिन्‍दुप मिरिक यम्‍बाकी मीतिवाला ‘ल्‍हला पुलुप च्‍यालक ताङ ठक ताङ ज्‍यिङ्‍बा बाक्‍यम तङ्‍नी सेतुप सेम्‍ज्‍येनकी श ताङ शम्‍डेन कितुप लाका नेसुर कुतुक दे गोकितो।’ सिनी ङ्‍यिरा तिवाला यिकी टिनी ताङ वे।”
ACT 21:26 तुक सिक्‍यासिमा ती सला तीला पावलकी ती मीतिवा मिरा ज्‍यीला मुला राङ टि गल्‍नी तिवी मुला राङ खोरुङ साङ चाङ्‍मा जोसुङ। तमा चेङ्‍गा जोप तुछ्‍येन ति नम छेकिवी सिरुप ताम्‍ङे ताङ तेरीकी थोक्‍ला बुलुप बुल्‍वाकी थोक्‍ला ताम्‍ङे कितुपला पावल ल्‍हङाङ नाङ्‍ला गाल।
ACT 21:27 तमा लावा लावु ङ्‍यिमा दिन लेप्‍तुछ्‍येप पेला एशिया ने वावु ललाइ यहूदीतिवी पावलला ल्‍हङाङ नाङ्‍ला वोतुप थोङ्‍नोक। तमा तिवी मी माङ्‍छ्‍योकला चेन्‍नी पावलला जिम्‍नी
ACT 21:28 “ओ इस्राएलकी मीतिवा, दाल्‍जा किटे की! दी मी तीकी कनी साङ मीतिवाला दाक्‍पी गिपा ताङ दाक्‍पी ठिम ताङ दी ल्‍हङाङकी थोक्‍ला येन्‍देन मेलोवा तेर किनोक। तोजो तिराङ मिन, दीकी याङ ग्रीककी मीतिवाला साङ ल्‍हङाङ नाङ्‍ला टि वानी दी दासा चाङ्‍माला मेचेङ्‍गा जोसुङ।” सिनी सिक्‍यासुङ।
ACT 21:29 च्‍यिलासिसिन ती सिनाङ गोमाला एफिससकी त्रोफिमस सिरुप मी यीला पावलकी मुला ग्‍येसाला टिन वावु ति तिवी थोङ्‍गुप तप्‍की तीला राङ पावलकी ल्‍हङाङ नाङ्‍ला टि वावु यिन्‍दे नो क्‍यानोक।
ACT 21:30 तुक क्‍यानी ती ग्‍येसा तेरीला हराङ हुरुङ क्‍यासुङ। तमा मीतिवा मुच्‍यिक मुला छ्‍योङ्‍बाल ग्‍यम वानी पावलला जिम्‍नी ल्‍हङाङ नाङ नेमा पाङ्‍ला टि वासिमा शार्क्येक ती ल्‍हङाङकी गोतिवा ति च्‍येनोक।
ACT 21:31 तमा तिवी पावलला सेतुप छोलुप पेला तेरी यरूशलेम ग्‍येसाला छासे हराङ हुरुङ गल वे सिरुप ताम्‍ङे ति रोमी मक्‍मी तोङ्‍डा च्‍यिककी खकी छ्‍ये तीकी साङ थोनोक।
ACT 21:32 ती थोसिमा शार्क्येक मक्‍मी छ्‍ये तीकी यम्‍बा मक्‍मी ताङ मक्‍मी सयी च्‍यिककी खकी छ्‍येतिवाला साङ मुला राङ टिनी तिवा वोतुप दासाला छ्‍योनी लेसुङ। तमा मक्‍मी छ्‍ये ताङ यम्‍बा मक्‍मीतिवाला थोङ्‍सिमा यहूदीतिवी पावलला दुङ्‍गुप क्‍युर्सुङ।
ACT 21:33 तमा मक्‍मी छ्‍ये ति पावलकी चाला वानी दीला जिम्‍नी च्‍यातक ङ्‍यी थ्‍वोनी च्‍याटोक ग्‍योप सिनी मक्‍मीतिवाला क बिन्‍सुङ। तमा “दी मी ति सु यिन? दीकी काङ लाका मेलोक्‍पा क्‍यासुङ?” सिनी मीतिवाला टिसुङ।
ACT 21:34 यिने मी माङ्‍छ्‍योककी पर्ला ललाइकी ताम्‍ङे च्‍यिक, ललाइकी ताम्‍ङे यम्‍बा यी सिनी वोरु तेन्‍नी हराङ हुरुङ क्‍यावु तप्‍की ते च्‍युङ्‍गुप ताम्‍ङे ति काङ यिन सिनी मक्‍मी छ्‍ये तीकी हाक्‍माको। तुक क्‍यानी पावलला मक्‍मीतिवा देतुप दासाला टि ग्‍युक सिनी मक्‍मीतिवाला क बिन्‍सुङ।
ACT 21:35 तमा पावल मक्‍मीतिवा देतुप दासाकी टापी खला लेप्‍सिमा मी माङ्‍छ्‍योक ङ्‍यिर्मु लानी वुल्‍दुङ्‍बा क्‍यावु तप्‍की मक्‍मीतिवी तीला खुर्नी गाल।
ACT 21:36 च्‍यिलासिसिन मी माङ्‍छ्‍योककी तीला सेन क्‍युर सिनी वोरु देनिन सिरा तिङ तिङ्‍ला तिङ्‍यानोक।
ACT 21:37 मक्‍मीतिवी पावलला खुर्नी मक्‍मीतिवा देतुप दासा नाङ्‍ला शुक्‍तुछ्‍येप पेला पावलकी मक्‍मी छ्‍ये तीला “ङ ख्‍युरुङला ताम्‍ङे चेयी सिरुप नो वे।” सिनी सिक्‍यासुङ। तमा मक्‍मी छ्‍ये तीकी पावलला “ए ख्‍योरो ग्रीककी ग्‍येताम लप शेकिवी रो?
ACT 21:38 ख्‍युरुङ ति खर्चे मलोक मिश्र नेसुर वानी रोमी लुङ्‍बी तेन्‍दोकला लानी मी सेतुप मी तोङ्‍डा ज्‍यीला चेन्‍नी दासा पाङ्‍थेरीला टिन डोप ती मी राङ मिन?” सिनी टिसुङ।
ACT 21:39 यिने पावलकी सिक्‍यासुङ, “ङ याङ किलिकिया लुङ्‍बाकी ग्‍येसा ग्‍येर्पु टार्सस ने वावु यहूदी यिन। ङ गोङ्‍बा शोयी। ङला दी मीतिवाला ताम्‍ङे चेयी लपुप ओङ नाङ।” सिनी सिक्‍यासुङ।
ACT 21:40 पावलकी तुक सिक्‍यासिमा मक्‍मी छ्‍ये तीकी पावलला ताम्‍ङे लप च्‍यिसुङ। तमा पावल टापी खला खोक लानी मीतिवाला लाक्‍पी लातुक क्‍यासुङ। ती थोङ्‍सिमा मीतिवा कुशिमी देसुङ। तमा पावलकी हिब्रूकी ताम्‍ङे नाङ्‍ला दुक सिक्‍यासुङ।
ACT 22:1 पावलकी “ओ अच्‍युनुपतिवा, ख्‍यिरा दोङ्‍ला ङे कोर्ला ताम्‍ङे यी सि गोवु वे। ती ति तेरीकी ङ्‍येना!” सिनी सिक्‍यासुङ।
ACT 22:2 पावलकी खोप्‍रे हिब्रू ताम्‍ङेला लापुप थोनी मी माङ्‍छ्‍योक खरक्‍पा सोके देसुङ।
ACT 22:3 तमा पावलकी तिवाला सिक्‍यासुङ, “ङ किलिकिया लुङ्‍बाकी टार्सस ग्‍येसाला क्‍येवु यहूदी मी यिन। तमा दी यरूशलेम ग्‍येसाला राङ गमलिएल गेकेनकी वोक्‍ला देनी ङ्‍यिरा पगावा हङ्‍गावाकी छ्‍योकी ठिमकी कोर्ला ल्‍यामो क्‍यान लापिन। हारिङ ख्‍यिराङ कोन्‍छ्‍योकला चो गा लान वे, ङला साङ तोजो राङ गा लान वोतुप्‍जा।
ACT 22:4 ती पेला ङे येशूला ल्‍यामो क्‍यानी हाक्‍माकोवु तप्‍की खोला तेपा कितुप मीतिवाला छेटाङ बिन्‍नी सेतिन। तमा ख्‍योक्‍पेजा पुम्‍पेजातिवाला टानी चोन्‍खाङला उपिन।
ACT 22:5 तीकी कोर्ला कोङ्‍यार छ्‍येतिवा ताङ यम्‍बा मी छ्‍येतिवी साङ ङे कोर्ला पङ्‍बु तेर्किवी। तिवी राङ दमस्‍कसला वोतुप खोरो यहूदी मीतिवाला जिम्‍बुप यिकी ङला बिन्‍दुप तप्‍की येशूला तेपा कितुपतिवाला टानी यरूशलेम टि वानी छ्‍येर्पा तेरुपला ङ दमस्‍कसला गलिन।
ACT 22:6 डोयी वोतुप पेला ङ्‍यिमी गुङगी छ्‍युजी च्‍यिङ्‍ङी चोयीला ङ दमस्‍कसला लेप्‍तुछ्‍येप पेला नाम नेसुर ङे गारी गुरीला वो ग्‍यिर्पो यी ग्‍यपुप थोङ्‍सुङ।
ACT 22:7 ती थोङ्‍लुङ्‍मे ङ सला तला लोक ग्‍यप्‍सुङ। ती पेला राङ ‘ओ शाऊल, ओ शाऊल, ख्‍युरुङ ङला च्‍यिला छेटाङ तेर्किवी?’ सिरुप वोरु यी ङे थोसुङ।
ACT 22:8 तमा ङे ‘ओ चोवो, ख्‍युरुङ सु यिन?’ सिनी टिसालेन्‍सिन खोकी ‘ङ ति ख्‍योरो छेटाङ तेरिन वोतुप नासरतकी येशू यिन।’ सिनी सुङ्‍सुङ।
ACT 22:9 ती पेला ङे मुला वोतुपतिवी साङ ती वो ति थोङ्‍नोक, यिने ङ ताङ क्‍यानी ताम्‍ङे क्‍यावु ति तिवी माथोनोक।
ACT 22:10 तमा ङे ‘ओ चोवो, त ङ काङ कितुप?’ सिनी टिसालेन्‍सिन चोवोकी ङला सुङ्‍सुङ, ‘खोक लानी दमस्‍कसला ग्‍युक! ख्‍योरो काङ लाकातिवा कि गोवु यिन, ते राङ ख्‍युरुङला लप्‍किवी।’
ACT 22:11 ती वोसिर ग्‍यपुप तप्‍की ङे काङ साङ माथोङ। ती पेला राङ ङे मुला वोतुप दाल्‍जातिवी ङे लाक्‍पाला जिम्‍नी ङला दमस्‍कसला क्‍याल्‍सुङ।
ACT 22:12 ते हननिया सिरुप कोन्‍छ्‍योकला टेङ्‍बु क्‍यानी मोवा कितुप ताङ कोन्‍छ्‍योककी ठिमला युकुप मिरा च्‍यिक नोक। तीला तेरी यहूदीतिवी ताङ्‍देन किनोक।
ACT 22:13 ती ति ङे चाला वानी ‘ओ नुप शाऊल, ख्‍युरुङ थोङ्‍गुप डोशी!’ सिनी सिक्‍यासुङ। तुक सिक्‍यालुङ्‍मे ङे मिक ति थोङ थुपुप गल्‍नी तीला थोङ्‍सुङ।
ACT 22:14 तमा तीकी ङला ‘दाक्‍पी पगावा हङ्‍गावी कोन्‍छ्‍योककी खोरो नोवा हाक्‍को ज्‍यितुपला ताङ टेङ्‍बु वोतुप येशूला थोङ्‍गुपला ताङ खोकी ख नेमा थेन्‍दुप सुङ ङ्‍येन्‍दुपला ख्‍युरुङला पेन नङ्‍गुप यिन।
ACT 22:15 तुक क्‍यानी तेरी मीतिवी चिप्‍ला खोकी थोक्‍ला ख्‍योरो काङ थोङ्‍गुप ताङ हाक्‍कोवु ति ख्‍युरुङ राङ पङ्‍बु वे।
ACT 22:16 त याङ ख्‍युरुङ च्‍यिला गुनी देकिवी? खोक लानी बप्‍तिस्‍मा लो। तमा खोकी मिङला रेन्‍नी ख्‍योरो दिक्‍पातिवा क्‍युर।’ सिनी सिक्‍यासुङ।
ACT 22:17 ती तिङ्‍ला ङ यरूशलेमला लोङ वासिमा ङ ल्‍हङाङ नाङ्‍ला मोपोर क्‍यान देतुप पेला चोवोकी ङला ‘ङमु क्‍यानी यरूशलेम नेसुर थेन्‍नी ग्‍युक। च्‍यिलासिसिन ङे थोक्‍ला ख्‍योरो पङ्‍बु बिन्‍दुप ति तिवी मेङ्‍येन्‍वी।’ सिनी सुङ्‍गुप ति ङे ज्‍यल्‍का थोङ्‍सुङ।
ACT 22:19 यिने ङे सिक्‍यायिन, ‘ओ चोवो, तेरी छ्‍योखाङतिवाला ङ गल्‍नी चोवोला तेपा कितुपतिवाला चोन्‍खाङला उपुप ताङ तिवाला दुवु ति तिवा तेरीला छ्‍या वे।
ACT 22:20 तमा चोवोकी थोक्‍ला पङ्‍बु तेरुप स्‍तिफनसला सेतुप पेला ङ साङ चिप्‍ला राङ देनी तीला सेतुपतिवी मुला शुनी ख च्‍यिक क्‍यानी तिवी मज्‍या र्‍हेन्‍नी देतिन।’
ACT 22:21 यिन्‍सिनाङ चोवोकी ङला ‘ख्‍युरुङ ग्‍युक! च्‍यिलासिसिन ङ ख्‍युरुङला थाक्‍रिङ्‍बुकी यहूदी मिन्‍दुप मिरिक यम्‍बाकी मीतिवी ते ङे थोक्‍ला पङ्‍बु तेरुपला तोङ्‍यिन।’ सिनी सुङ्‍सुङ।”
ACT 22:22 पावलकी तोजोयी सिक्‍यालुङ्‍मे यहूदीतिवा दुक सिनी च्‍यार ग्‍यकुप छाल्‍सुङ, “दुका मी याङ जम्‍बुलिङला ज्‍योकुप सिनाङ से राङ गोकिवी। च्‍यिलासिसिन तुका मी याङ सेन्‍बु दे छ्‍योवु मे।”
ACT 22:23 तिवी तुक सियी पावलकी कोन्‍छ्‍योकला मारे तङ्‍गुप यिन नोनी खोप्‍राङ मज्‍या र्‍होलिन ताङ थल्‍दुक नामला क्‍युरिन सिरा वोरु देन्‍दुप छाल्‍सुङ।
ACT 22:24 ती थोङ्‍सिमा मक्‍मी तोङ्‍डा च्‍यिककी खकी छ्‍ये तीकी मक्‍मीतिवाला क बिन्‍नी “पावलला नाङ्‍ला टिनी काङगी तेन्‍दोकला तिवा दुका वोरु तेन्‍दुप यिन, ती ति हाक्‍कोवुला तीला तल्‍ज्‍येक ग्‍यप्‍नी टी!” सिनी सिक्‍यासुङ।
ACT 22:25 तमा तिवी पावलला टानी तल्‍ज्‍येक थ्‍वोन बेपुप छोलुप पेला पावलकी खोरो चाला लानी वोतुप मक्‍मी सयी च्‍यिककी खकी छ्‍ये तीला दुक सिनी टिसुङ, “काङ क्‍येन मेतुप रोमी नागरिक्ता वोतुप मीला तल्‍ज्‍येक ग्‍यकुप ति रोमी ठिमला वे?”
ACT 22:26 ती थोसिमा मक्‍मी सयी च्‍यिककी खकी छ्‍ये ति मक्‍मी तोङ्‍डा च्‍यिककी खकी छ्‍ये ते गल्‍नी, “ख्‍योरो काङ कितुप छलुप यिन? दी मी याङ रोमी मी के नोक।” सिनी सिक्‍यासुङ।
ACT 22:27 तमा मक्‍मी तोङ्‍डा च्‍यिककी खकी छ्‍ये ति वानी पावलला “ङला सी ताङ। ख्‍यो रोमी नागरिक्ता वोतुप मी राङ यिन?” सिनी टिसुङ। तमा पावलकी “ङ रोमी नागरिक्ता वोतुप मी राङ यिन।” सिनी सिक्‍यासुङ।
ACT 22:28 येलुङ मक्‍मी छ्‍ये तीकी पावलला “ङे याङ रोमी नागरिक्ता ङ्‍येतुपला टङ्‍गा बङी तेनी ङ्‍योवु यिन।” सिनी सिक्‍यासुङ। यिने पावलकी “ङ याङ दी लुङ्‍बाला राङ क्‍येवु रोमी नागरिक्ता वोतुप मी यिन।” सिनी सिक्‍यासुङ।
ACT 22:29 तुक सिक्‍यासिमा पावलला ताम्‍ङे टेपला वावु मक्‍मीतिवा तेरी क्‍येनी गाल। तमा पावल ति रोमी नागरिक्ता वोतुप मी यिनोक सिरुप हाक्‍कोनी मक्‍मी छ्‍ये ति ज्‍यिवा क्‍यानोक। च्‍यिलासिसिन तीकी क्‍येन मेसिनाङ पावलला टानोक।
ACT 22:30 ती सला तीला यहूदीतिवी पावलला काङगी तेन्‍दोकला क्‍येन बिन्‍दुप यिनाङ सिनी हाक्‍कोवुला मक्‍मी तोङ्‍डा च्‍यिककी खकी छ्‍ये तीकी पावलला टावु नेसुर पि ताङ्‍सुङ। तमा तेरी कोङ्‍यार छ्‍येतिवा ताङ यहूदी छ्‍योकी ठिम्‍खाङकी तेरी मीतिवाला जोम सिनी क बिन्‍नी पावलला मर टि वानी तिवी दोङ्‍ला लाङ्‍सुङ।
ACT 23:1 तमा पावलकी ते जोम्‍बुप यहूदी छ्‍योकी ठिम्‍खाङकी मीतिवी थाकाला ल्‍हानी दुक सिक्‍यासुङ, “ओ अच्‍युनुपतिवा, हारिङ ङ्‍यिमा सेक कोन्‍छ्‍योककी थोङ्‍दाङला ङे सेम टेङ्‍बु क्‍यानी मिजी क्‍याङ्‍यिन।”
ACT 23:2 ती ताम्‍ङे थोसिमा तेरी सिनाङ कोङ्‍यार छ्‍ये हननिया तीकी ते चिप्‍ला देतुपतिवाला पावलकी खला पोप सिनी क बिन्‍सुङ।
ACT 23:3 यिने पावलकी तीला “ख्‍युरुङ खोनक्‍पु यिन। कोन्‍छ्‍योककी ख्‍युरुङला बेप्‍कितो। ङला काङ क्‍येन मेसिनाङ ख्‍युरुङ च्‍यिला ङला दुङ्‍गुप क तेर्किवी?” सिनी सिक्‍यासुङ।
ACT 23:4 तमा चाला लानी देतुपतिवी पावलला “काङ ख्‍युरुङ कोन्‍छ्‍योककी तेरी सिनाङ कोङ्‍यार छ्‍येला मारे तोङ्‍गिवी?” सिनी सिक्‍यासुङ।
ACT 23:5 तुक सिक्‍यासिमा पावलकी सिक्‍यासुङ, “ओ अच्‍युनुपतिवा, खो तेरी सिनाङ कोङ्‍यार छ्‍ये यिन सिरुप ति याङ ङला छ्‍या राङ मे। च्‍यिलासिसिन कोन्‍छ्‍योककी सुङला ख्‍योरो लुङ्‍बाला ओङ्‍ज्‍येन कितुपतिवाला मारे मातोङ सिनी टि वे।”
ACT 23:6 तमा ते जोम्‍बुप मीतिवी नाङ ने छो च्‍यिक ति सदुकी ताङ छो यम्‍बा ति फरिसीतिवा नोक सिरुप ति हाक्‍कोनी पावलकी थोर ग्‍यप्‍नी दुक सिक्‍यासुङ, “ओ अच्‍युनुपतिवा, ङ फरिसी यिन, ङे पपाआमा साङ फरिसी यिन। कोन्‍छ्‍योककी शेपतिवा सेन्‍बु लङ्‍गुप रेवाकी थोक्‍ला राङ ख्‍यिरा ङला दे ठिम कियी वे।”
ACT 23:7 पावलकी तुक सिक्‍यासिमा फरिसीतिवा ताङ सदुकीतिवी पर्ला ठका ठुका गाल। तमा मी माङ्‍छ्‍योककी पर्ला साङ क्‍येङ्‍सु गाल।
ACT 23:8 च्‍यिलासिसिन सदुकीतिवी शेप ने ङोसु लङ्‍गुप ताङ देवाच्‍येनकी मी ताङ थुतिवा काङ साङ मेवी सिनोक। यिने फरिसीतिवा ति शेप ने ङोसु लङ्‍गुप ताङ देवाच्‍येनकी लेन क्‍योलुप थु ताङ यम्‍बा थुतिवा तेरी वे सिनी सिनोक।
ACT 23:9 तुक क्‍यानी ते छासे हराङ हुरुङ क्‍यासुङ। तमा फरिसी नाङ ने ललाइ छ्‍योकी गेकेनतिवा लानी दुक सिनी ङ्‍ये छाल्‍सुङ, “ङ्‍यिरा याङ दी मीला काङ साङ क्‍येन माथोङ। कोन्‍छ्‍योककी थु चाङ्‍मा याङ्‍ना देवाच्‍येनकी मीतिवी के दीला ताम्‍ङे लापुप यिन्‍ते यिन्‍दे।”
ACT 23:10 ते तिवा थमु ग्‍यकुप छलुप थोङ्‍सिमा तिवी पावलला येर मर थेन्‍नी सेकिते सिनी ज्‍यिवा लानी मक्‍मी तोङ्‍डा च्‍यिककी खकी छ्‍ये तीकी यम्‍बा मक्‍मीतिवाला “मर गल्‍नी तिवी पर नेसुर पावलला उर्च्युम ग्‍यम टि वानी ङ्‍यिराङ देतुप दासाकी नाङ्‍ला क्‍योल!” सिनी क बिन्‍सुङ।
ACT 23:11 ती गोमु चोवो येशू पावलकी चाला लानी, “पावल, ङाडेङ की! यरूशलेमला ख्‍योरो ङे थोक्‍ला पङ्‍बु बिन्‍दुप दोके रोमला वोतुप मीतिवाला साङ पङ्‍बु तेर गोकितो।” सिनी सुङ्‍सुङ।
ACT 23:12 नाम लासिमा यहूदीतिवा जोम्‍नी पावलला माशेता सेक्‍ला छ्‍यु साङ मुथुङ, समा साङ मासा सिनी न क्‍याल्‍सुङ।
ACT 23:13 ती पावलला मेलोवा कितुप मीतिवा मिरा खल ङ्‍यी सिनाङ मङ नोक।
ACT 23:14 तिवा कोङ्‍यार छ्‍येतिवा ताङ यहूदी छ्‍योखाङकी गोमा कितुप मी छ्‍येतिवी ते गल्‍नी “पावलला माशेता सेक्‍ला छ्‍यु साङ मुथुङ, समा साङ मासा सिनी ङ्‍यिरा तेन्‍तेन क्‍यानी न क्‍यलिन।
ACT 23:15 ती तप्‍की ख्‍यिराङ ताङ यहूदी छ्‍योकी ठिम्‍खाङकी मीतिवा डिक्‍नी मक्‍मी छ्‍येला गोङ्‍बा शुनी पावलला यम्‍बा ताम्‍ङे टि गोकिवी सिनी टिनी शोक। तमा ती दे वुङ्‍गुप पेला ङ्‍यिराङ लामला राङ तीला सेतिन।” सिनी सिक्‍यासुङ।
ACT 23:16 ती ताम्‍ङे ति पावलकी छप्‍युक तीकी थोनी मक्‍मीतिवा देतुप दासाला गल्‍नी पावलला सिक्‍यासुङ।
ACT 23:17 तमा पावलकी मक्‍मी सयी च्‍यिककी खकी छ्‍ये च्‍यिकला कताङ्‍नी “दी ख्‍योक्‍पेजा तीला मक्‍मी तोङ्‍डा च्‍यिककी खकी छ्‍येकी चाला क्‍यल नाङ। च्‍यिलासिसिन दीकी खोला काङ रे च्‍यिक रे सि गोवु वे सिनोक।” सिनी सिक्‍यासुङ।
ACT 23:18 तमा मक्‍मी तीकी पावलकी छप्‍युक तीला मक्‍मी तोङ्‍डा च्‍यिककी खकी छ्‍येकी चाला टि गल्‍नी “चोन्‍खाङला वोतुप पावलकी ङला कताङ्‍नी ‘दी ख्‍योक्‍पेजाला मक्‍मी छ्‍येकी ते टिनी ग्‍युक। दीकी खोला काङ रे च्‍यिक रे सि गोवु ताम्‍ङे वे।’ सिनी ताङ्‍सुङ।” सिनी सिक्‍यासुङ।
ACT 23:19 तमा मक्‍मी तोङ्‍डा च्‍यिककी छ्‍ये तीकी पावलकी छप्‍युकला लाक्‍पाला जिम्‍नी सु साङ मेतुप दासाला टि गल्‍नी ख्‍योरो ङला सि गोवु ताम्‍ङे ति काङ यिन सिनी टिसुङ।
ACT 23:20 तमा तीकी सिक्‍यासुङ, “यहूदीतिवी ङे च्‍येच्‍याङ पावलकी कोर्ला तरोङ साङ यम्‍बा ताम्‍ङे टि गोकिवी सिनी सला येलुङ यहूदी छ्‍योकी ठिम्‍खाङला टिनी वुङ्‍गुपला ख्‍युरुङला गोङ्‍बा शोप सिनी तिवी ताम्‍ङे थाक्‍छ्‍येन नोक।
ACT 23:21 तिवी सिक्‍यावु ताम्‍ङेला माङ्‍येना, च्‍यिलासिसिन तिवी पर्ला मिरा खल ङ्‍यी सिनाङ मङ्‍मुकी पावलला माशेता सेक छ्‍यु साङ मुथुङ, समा साङ मासा सिनी न क्‍यल्‍नी तेरी टडिक क्‍यानी ख्‍योरो ताम्‍ङेला गुनी देन वे।”
ACT 23:22 ती थोसिमा मक्‍मी तोङ्‍डा च्‍यिककी खकी छ्‍ये तीकी पावलकी छप्‍युक तीला “ख्‍योरो ङला सिक्‍यावु ताम्‍ङे ति सुला साङ मासिरा।” सिनी ताङ्‍सुङ।
ACT 23:23 ती ज्‍युक्‍ला मक्‍मी तोङ्‍डा च्‍यिककी खकी छ्‍ये तीकी मक्‍मी सयी च्‍यिककी खकी छ्‍ये मिरा ङ्‍यीला कताङ्‍नी, “हारिङ नुपला छ्‍युजी गु चोयीला मक्‍मी सयी ङ्‍यी ताङ त शेन्‍दुप मिरा खाल दिन तमा दुङ खुरुप मी सयी ङ्‍यी चोयीला कैसरियाला तोङ्‍गुपला टडिक क्‍या ज्‍योक।
ACT 23:24 तमा पावलकी थोक्‍ला साङ ततिवा दा शोक। तमा तीला काङ मेलोवा कि माच्‍यिवा क्‍यानी यहूदिया लुङ्‍बाला ग्‍येला कितुपला रोम ने वावु मी छ्‍ये फेलिक्‍सकी ते क्‍योल।” सिनी क बिन्‍सुङ।
ACT 23:25 तमा ती मक्‍मी छ्‍ये तीकी दुका यिकी यी टिनी ताङ्‍सुङ।
ACT 23:26 “यहूदिया लुङ्‍बाला ग्‍येला कितुपला रोम ने वावु मी छ्‍ये फेलिक्‍सला क्‍लौडियस लुसियसकी टसी देलेक!
ACT 23:27 दी मी ति यहूदियाकी पावल सिरुप मी यिन। दीला यहूदीतिवी जिम्‍नी सेतुप छाल्‍सुङ। यिने दी ति रोमी लुङ्‍बी मी यिनोक सिरुप ति ङे हाक्‍कोनी मक्‍मीतिवी मुला ते गल्‍नी दीला तिवी लक नेमा र्‍होकिन।
ACT 23:28 काङगी तेन्‍दोककी तिवी दीला मेलोक्‍पा सिनी क्‍येन बिन्‍दुप नोक ल्‍हापला ङे तीला यहूदी छ्‍योकी ठिम्‍खाङकी मी छ्‍येतिवी ते टिनी गलिन।
ACT 23:29 ङे हाक्‍कोवु ति तिवी दीला छ्‍योकी ठिमकी टिवा टेपला तिराङ नोक। यिने दीला से गोवु छ्‍येर्पा ताङ चोन्‍खाङला उपुप क्‍येन याङ ङे काङ साङ माथोङ।
ACT 23:30 दी मीला सेतुप च्‍यु क्‍यावु ताम्‍ङे ति ङे हाक्‍कोसुङ। तुक क्‍यानी तीला शार्क्येक ख्‍योरो ते तङ वोतो। दीकी थोक्‍ला क्‍येन तेरुपतिवाला साङ ख्‍योरो चिप्‍ला राङ गल्‍नी सि सिनी ङे क बिनिनो।”
ACT 23:31 मक्‍मी छ्‍येकी तुक सिनी क बिन्‍सिमा मक्‍मीतिवी पावलला नुपला राङ एन्‍टिपाट्रिस सिरुप दासाला क्‍याल्‍सुङ।
ACT 23:32 ती सला पावलला “त याङ ख्‍युरुङ त शेन्‍दुपतिवा ताङ मुला ग्‍युक।” सिनी ते राङ क्‍युर ज्‍याक्‍नी ज्‍येन मक्‍मीतिवा ति मक्‍मीतिवा देतुप दासाला लोक्‍सुङ।
ACT 23:33 तिवा कैसरिया लेप्‍नी यहूदिया लुङ्‍बाला ग्‍येला कितुपला रोम ने वावु मी छ्‍येला यिकी तेसिमा पावलला तीकी दोङ्‍ला क्‍याल्‍सुङ।
ACT 23:34 रोम ने वावु ती मी छ्‍ये तीकी यिकी ति रासिमा पावलला चुका दासाकी मी यिनोक सिनी टिसुङ। तमा पावल किलिकियाकी यिनोक सिरुप हाक्‍कोसिमा खोकी तीला
ACT 23:35 “ख्‍युरुङला क्‍येन तेरुपतिवा वासिमा ङ ख्‍योरो ताम्‍ङे ङ्‍येनिनो।” सिक्‍यासुङ। तमा पावलला “हेरोदकी जोवु ग्‍येल्‍खाङला ज्‍याक्‍नी र्‍हेना!” सिनी मक्‍मीतिवाला क बिन्‍सुङ।
ACT 24:1 ङ्‍यिमा ङकी ज्‍युक्‍ला तेरी सिनाङ कोङ्‍यार छ्‍ये हननिया ताङ ललाइ यहूदी छ्‍योखाङकी गोमा कितुप मी छ्‍येतिवी तर्तुल्‍लस सिरुप ठिमला खामु वोतुप मी ताङ मुला यहूदिया लुङ्‍बाला ग्‍येला कितुपला रोम ने वावु मी छ्‍ये फेलिक्‍सकी ते वानी पावलकी तेन्‍दोकला लानी शुवा ग्‍यप्‍सुङ।
ACT 24:2 तमा पावलला ते कताङ्‍सिमा तर्तुल्‍लसकी दुक सिनी क्‍येन ग्‍यप्‍सुङ। “यहूदियाला ग्‍येला कितुपला रोम ने वावु मी छ्‍ये फेलिक्‍स ला, ख्‍योरो ङ्‍यिराङला छासे लोदिमु बिन वे। तमा दी गिपाकी थोक्‍ला यर्के डोप लाकातिवा क्‍या वे।
ACT 24:3 दी ताम्‍ङे ति ङ्‍यिराङ कनी गल्‍सिनाङ ताङ्‍देन क्‍यानी ङ्‍येन्‍दा कितिन।
ACT 24:4 यिने उकुर च्‍यिक ङ्‍यिरा गोङ्‍बा शुवु ताम्‍ङे ति च्‍येयी सेन्‍डे की।
ACT 24:5 च्‍यिलासिसिन ङ्‍यिरा ल्‍हासिन दी मी तीकी कनी साङ मीतिवाला छासे दुक्‍पा तेरुप ताङ लुङ्‍बा तेरीकी यहूदीतिवी पर्ला हराङ हुरुङ जोप ताङ नासरी छ्‍योककी गोमा कितुप मी छ्‍ये यिन्‍दुप थोङ्‍सुङ।
ACT 24:6 तमा दीकी याङ ल्‍हङाङला साङ मेचेङ्‍गा जोप नो किनोक। तुक क्‍यानी ङ्‍यिरा दीला जिमिन।
ACT 24:7 त याङ ख्‍योरे राङ दीला ल्‍यामो क्‍यानी टिसिन ङ्‍यिरा दीला क्‍येन बिन्‍दुप तेन्‍दोक ति तेरी हाक्‍कोकिवी।” सिनी सिक्‍यासुङ।
ACT 24:9 यम्‍बा यहूदीतिवी साङ ती ताम्‍ङेतिवा टेके राङ यिन सिक्‍यासुङ।
ACT 24:10 ती ज्‍युक्‍ला फेलिक्‍सकी पावलला ताम्‍ङे लपुपला लाक्‍पी लातुक क्‍यासिमा पावलकी दुक सिक्‍यासुङ, “ख्‍युरुङ लो अलायी गोमा नेज्‍युन यहूदी गिपातिवाला ग्‍येला कितुप मी यिन्‍दुप ति ङे हाक्‍कोसुङ। ती तप्‍की मीतिवी ङला क्‍येन बिन्‍दुप कोर्ला गा ताङ क्‍यानी दी ताम्‍ङे सिरिन।
ACT 24:11 ख्‍योरे राङ फार छुर टिनी ल्‍हासिन गिवी, ङ यरूशलेमला वानी सोवा तेकुप ति ङ्‍यिमा च्‍यिङ्‍ङी मिसिन मागल वे।
ACT 24:12 ङे ल्‍हङाङ ताङ छ्‍योखाङ ताङ ग्‍येसाला मी ताङ मुला केवुल क्‍यावु याङ्‍ना मीतिवाला चेन्‍दुप दी ङला क्‍येन तेरुपतिवी काङ साङ माथोङ वे।
ACT 24:13 तुक क्‍यानी ङला क्‍येन बिन्‍दुप ताम्‍ङेकी पङ्‍बु साङ दिवी तेर मुथुपी।
ACT 24:14 यिने ख्‍युरुङला ती ताम्‍ङे ति ङ टेङ्‍बो सिरिन। ङ तिवी यम्‍बा छोक्‍पा सिरुप येशूला तेपा क्‍यानी दाक्‍पी गिपाकी कोन्‍छ्‍योकला सोवा देकिन। तमा ठिमला वोतुप ताम्‍ङे ताङ कोन्‍छ्‍योककी लुङ्‍तेम्‍बाकी थेपला वोतुप तेरी ताम्‍ङेला तेपा कितिन।
ACT 24:15 टेङ्‍बु वोतुपतिवा ताङ मेटेङ्‍बुतिवा तेरीला कोन्‍छ्‍योककी शेप ने सेन्‍बु लोङ्‍गिवी सिरुप ताम्‍ङे ति दिवी खोप्‍रे सेमला लावु दोके ङ साङ कोन्‍छ्‍योकला रेवा कितिन।
ACT 24:16 ती तप्‍की कोन्‍छ्‍योककी थोङ्‍दाङला ताङ मीतिवी थोक्‍ला साङ ङ नरी टेङ्‍बु कितुप छोलिन।
ACT 24:17 लो अलायी ज्‍युक्‍ला ङ ङे गिपातिवी पर्ला दुक्‍पाला ख्‍येलुप मीतिवी थोक्‍ला टङ्‍गा बिन्‍नी दाल्‍जा कितुप ताङ कोन्‍छ्‍योकला बुल्‍वा बुलुपला ङ यरूशलेमला वायिन।
ACT 24:18 ङ ल्‍हङाङ नाङ्‍ला गल्‍नी ठिमला वोतुप दोके चाङ्‍मा कितुप लुक्‍सु कियी वोतुप ति दिवी थोङ्‍सुङ। ती पेला मी मङ्‍मु साङ मे, हराङ हुरुङ साङ मे। यिने ते एशिया ने वावु ललाइ यहूदीतिवा तिराङ वोतुप्‍जा।
ACT 24:19 ती एशिया ने वावु यहूदीतिवी ङे थोक्‍ला काङ रे च्‍यिक रे सि गोवु ताम्‍ङे वोसिन तिवी राङ दे ख्‍योरे चिप्‍ला वानी क्‍येन ग्‍यक थुप गोवु ति यिन्‍जा।
ACT 24:20 ङला क्‍येन बिन्‍दुप ति टेङ्‍बु यिन्‍सिन ङ यहूदी छ्‍योकी ठिम्‍खाङकी मीतिवी चिप्‍ला वोतुप पेला ङला काङ क्‍येन थोङ्‍गुप ति दी मीतिवा खोप्‍रे राङ दे लप्‍शी।
ACT 24:21 ङे तिवी पर्ला लानी थोर ग्‍यप्‍नी सि गोवु ताम्‍ङे च्‍यिक ति दी यिन, ‘कोन्‍छ्‍योककी शेपतिवा सेन्‍बु लोङ्‍गुपकी कोर्ला ङे ख्‍यिराङला ख्‍याप्‍टाक क्‍यावु तप्‍की ख्‍यिरा चिप्‍ला हारिङ ङला ठिम कियी वे।’”
ACT 24:22 ती फेलिक्‍सकी साङ येशूकी कोर्ला तेरी छ्‍या वोतुप तप्‍की “मक्‍मी तोङ्‍डा च्‍यिककी खकी छ्‍ये लुसियस दे वासिमा ङ ख्‍यिरा शुवाकी कोर्ला केवुल क्‍यानी तेरिन।” सिनी सिक्‍यासुङ।
ACT 24:23 तमा तीकी मक्‍मी सयी च्‍यिककी खकी छ्‍ये तीला क बिन्‍नी “पावलला ल्‍यामो ल्‍होसा, तीला चोन्‍खाङ नाङ्‍ला ठिम तम्‍बु माकी। तमा सु वानी तीला गोवु च्‍यालकतिवा दाल्‍जा क्‍यासिनाङ माग्‍येका।” सिनी सिक्‍यासुङ।
ACT 24:24 ङ्‍यिमा अलायी तिङ्‍ला फेलिक्‍स खोरो यहूदी पेर्मी द्रूसिल्‍ला ताङ मुला ते वासुङ। तमा तीकी पावलला कताङ्‍नी ख्रीष्‍ट येशूला तेपा कितुप कोर्ला ङ्‍येन्‍सुङ।
ACT 24:25 पावलकी टेङ्‍बु वोतुप ताङ खोरुङला डेकला ज्‍योकुप ताङ ज्‍युक्‍थमाला कोन्‍छ्‍योककी जम्‍बुलिङकी मीतिवाला ठिम क्‍या नङ्‍गुप कोर्ला ताम्‍ङे किसालेन्‍सिन फेलिक्‍स ति ज्‍यिवा क्‍यानी पावलला “तन्‍दा ति ख्‍युरुङ ग्‍युक, खोम वोतुप पेला ङ ख्‍युरुङला लोङ कतोङ्‍गुप्‍नो।” सिनी सिक्‍यासुङ।
ACT 24:26 पावलकी टङ्‍गा तेर किते यिन्‍दे नोनी तीकी रेवा साङ क्‍यानोक। ती तप्‍की तीकी पावलला पर्चिक पर्चिक कताङ्‍नी अरा उरा सिनोक।
ACT 24:27 यिने लो ङ्‍यी ज्‍युक्‍ला फेलिक्‍सकी छापला पर्किअस फेस्‍तस ओङ्‍ज्‍येन कितुपला वासुङ। ती पेला फेलिक्‍सकी यहूदीतिवाला गा लोङ्‍गुपला पावलला चोन्‍खाङला राङ उम ज्‍याक्‍नी गाल्‍सुङ।
ACT 25:1 फेस्‍तस यहूदिया लुङ्‍बाला ओङ्‍ज्‍येन कितुपला कैसरियाला वानी ङ्‍यिमा सुम तिङ्‍ला यरूशलेमला गाल।
ACT 25:2 तमा ते वोतुप कोङ्‍यार छ्‍येतिवा ताङ यहूदी मी छ्‍येतिवा वानी फेस्‍तसला पावलकी थोक्‍ला क्‍येन ग्‍यप्‍नी
ACT 25:3 पावलला यरूशलेमला टि वुङ च्‍यी सिनी तीला गोङ्‍बा शुसुङ। च्‍यिलासिसिन तिवी पावलला लामला राङ सेतुप सिनी च्‍यु ल्‍हानोक।
ACT 25:4 तमा फेस्‍तसकी तिवाला “पावल ति कैसरियाला राङ उम ज्‍याङ वे। ङ साङ टिम्‍बु राङ ते डो गोकिवी।
ACT 25:5 तुक क्‍यानी ख्‍यिरा ओङ्‍ज्‍येन वोतुप मी छ्‍येतिवा ङे मुला राङ ते गल्‍नी पावलकी लाका मेलोवा क्‍यावु वोसिन तीकी तेन्‍दोकला क्‍येन ग्‍यक थुप्‍किवी।” सिनी सिक्‍यासुङ।
ACT 25:6 तमा फेस्‍तस यरूशलेमला ङ्‍यिमा ग्‍ये च्‍यिथम्‍बा साङ मादेवा क्‍यानी कैसरियाला लोक्‍सुङ। ती सला तीला ठिम कितुप ठीला देनी पावलला टि शोक सिनी क बिन्‍सुङ।
ACT 25:7 तमा पावलला टि वासिमा यरूशलेम नेसुर वावु यहूदीतिवा पावलकी गारी गुरीला लानी तीकी थोक्‍ला छासे क्‍येन मेलोवातिवा ग्‍यप्‍सुङ। यिने तिवी ती क्‍येनकी पङ्‍बु ति काङ साङ तेर माथुप।
ACT 25:8 यिने पावलकी खोरो थोक्‍ला दुक सिक्‍यासुङ, “यहूदीतिवी ठिमकी तेन्‍दोकला ताङ यहूदी ल्‍हङाङकी तेन्‍दोकला ताङ रोमी ग्‍येल्‍वु कैसरकी तेन्‍दोकला ङे काङ साङ मेलोवा माक्‍या वे।”
ACT 25:9 यिने फेस्‍तसकी यहूदीतिवाला गा लोङ्‍गुपला पावलला दुक सिक्‍यासुङ, “काङ ख्‍युरुङ यरूशलेमला गल्‍नी ते ङे चिप्‍ला दी ताम्‍ङेकी कोर्ला ठिम किशी सिनी नोकिवी?”
ACT 25:10 तमा पावलकी “मिन, ङ कैसरकी ठिम कितुप ठिम्‍खाङला राङ वे। ङला दे राङ ठिम कि गोकिवी। यहूदीतिवाला ङे काङ साङ ताम्‍ङे मेलोवा मालाप वे। ती ति ख्‍युरुङला राङ ल्‍यामो छ्‍या वे।
ACT 25:11 ङे शि गोवु छ्‍येर्पा खुर गोवु लाका मेलोवा क्‍यावु यिन्‍सिन ङला शेसिनाङ गिवी। यिने दोजो दिवी ङला क्‍येन बिन्‍दुप ति काङ पङ्‍बु मेसुङ सिसिन सी साङ ङला दिवी लकला चेक ते मुथुपी। तुक क्‍यानी ङला रोमी ग्‍येल्‍वु कैसरकी दोङ्‍ला टि ताङ्‍नी ते राङ ठिम किशी।” सिनी सिक्‍यासुङ।
ACT 25:12 पावलकी तुक सिक्‍यासिमा फेस्‍तसकी केवुल कितुपतिवी मुला ताम्‍ङे क्‍यानी पावलला “ख्‍योरो कैसरकी दोङ्‍ला डोप नो क्‍यावु तप्‍की ख्‍युरुङ कैसर ते राङ तोङ्‍यिन।” सिनी सिक्‍यासुङ।
ACT 25:13 ङ्‍यिमा चेयी ज्‍युक्‍ला फेस्‍तसला टसी देलेक सिरुपला ग्‍येल्‍वु अग्रिपास ति बरनिकी ताङ मुला कैसरियाला वानी
ACT 25:14 ङ्‍यिमा अलायी देसिमा फेस्‍तसकी पावलकी थोक्‍ला ग्‍येल्‍वुला दुक सियी ताम्‍ङे क्‍यासुङ, “फेलिक्‍सकी चोन्‍खाङला उम ज्‍यकुप मिरा च्‍यिक दे वे।
ACT 25:15 दीकी कोर्ला ङ यरूशलेमला वोतुप पेला कोङ्‍यार छ्‍येतिवा ताङ यहूदीतिवाला गोमा कितुपतिवी दीकी तेन्‍दोकला क्‍येन ग्‍यप्‍नी दीला छ्‍येर्पा ग्‍येल गोकिवी सिनी गोङ्‍बा शुसुङ।
ACT 25:16 यिने क्‍येन फोकुप मी तीकी क्‍येन ग्‍यकुप मीतिवाला ठेनी खोरो तेन्‍दोकला ग्‍यपुप क्‍येनकी कोर्ला टिलेन तेरुप सिनाङ गोमाला चुका मीला साङ ठिम कितुप ति रोमी ठिमला मे सिनी तिवाला ङे सिक्‍यायिन।
ACT 25:17 तमा तिवा कैसरियाला ङे मुला राङ वासिमा ती सला तीला राङ ङ फिमु माक्‍यावा क्‍यानी ठिम कितुप ठीला देनी तीला टि शोक सिनी क बिनिन।
ACT 25:18 तीकी थोक्‍ला पावलला क्‍येन तेरुप मीतिवी ङे नो क्‍यावु दोके काङ साङ क्‍येन ग्‍यक गोवु लाका मेलोवा क्‍यावु माथोङ।
ACT 25:19 यिने तिवा नक लक्‍लोका गलुप तेन्‍दोक ति तिवी छ्‍योकी थोक्‍ला ताङ येशू सिरुप शेप मी च्‍यिककी कोर्ला नोक। ती येशूला पावलकी तरोङ साङ ङोसु राङ वे सिनी सिनोक।
ACT 25:20 दीकी कोर्ला ङ काङ कितुप काङ कितुप गलुप तप्‍की पर्साला याङ तीकी यरूशलेमला गल्‍नी ठिम क्‍यान नाङ्‍शी सिरुप नो वोते सिनी ङे तीला टियी।
ACT 25:21 यिने पावलकी खुरुङला रोमी ग्‍येल्‍वु कैसरकी ते राङ ठिम कितुपला तोङ सिनी गोङ्‍बा शुसुङ। ती तप्‍की कैसर ते माताङा सेक्‍ला पावलला र्‍हेना सिनी मक्‍मीतिवाला क बिनिन।”
ACT 25:22 तमा अग्रिपासकी फेस्‍तसला दी मी तीकी ताम्‍ङे ति ङे साङ ङ्‍येन्‍दुप ङ्‍येसिन वुङ्‍गुप्‍जा सिनी सिक्‍यासुङ। तमा फेस्‍तसकी सला ख्‍योरो राङ ङ्‍येन्‍सिन गिवी सिनी अग्रिपासला सिक्‍यासुङ।
ACT 25:23 ती सला तीला अग्रिपास ताङ बरनिकी ति छासे ताङ्‍देन ताङ क्‍यानी मक्‍मी तोङ्‍डा च्‍यिककी छ्‍येतिवा ताङ यहूदी छ्‍योकी ठिम्‍खाङकी मी छ्‍येतिवा ताङ मुला ठिम कितुप दासाला शुसुङ। तमा फेस्‍तसकी क बिन्‍दुप तप्‍की पावलला ते कताङ्‍सुङ।
ACT 25:24 कताङ्‍सिमा फेस्‍तसकी अग्रिपास ताङ ते वोतुप मी तेरीला सिक्‍यासुङ, “ग्‍येल्‍वु अग्रिपास ताङ दे जोम वोतुप तेरी मीतिवा, ख्‍यिरा थोङ्‍गुप दी मी तीकी कोर्ला तेरी यहूदीतिवी ‘दी मी ति सेन्‍बु दे छ्‍योवु मे।’ सिनी यरूशलेमला ताङ दे साङ ङला गोङ्‍बा शुसुङ।
ACT 25:25 यिने दीकी से गोवु छ्‍येर्पा याङ काङ साङ माक्‍यावु ति ङे थोङ्‍सुङ। तमा दीकी साङ रोमी ग्‍येल्‍वु कैसरकी चाला डो च्‍यी सिनी गोङ्‍बा शुवु तप्‍की ङे दीला रोमी ग्‍येल्‍वी ते राङ तोङ्‍सा क्‍यायी।
ACT 25:26 दी मी तीकी कोर्ला ङे रोमी ग्‍येल्‍वुला टि गोवु ताम्‍ङे काङ साङ मे। तुक क्‍यानी दी मीला ख्‍यिराङ ताङ खक्‍छ्‍येवु ग्‍येल्‍वु अग्रिपासकी चिप्‍ला टिन वायी। तमा ङ्‍यिरा दीला ल्‍यामो क्‍यानी टिसिमा ङे काङ रे च्‍यिक रे ताम्‍ङे टिकुप ङ्‍येकिवी।
ACT 25:27 च्‍यिलासिसिन चोन्‍खाङला शोरुप मी तेन्‍दोकला काङ साङ क्‍येन हाक्‍माकोवा क्‍यानी दी मीला तोङ्‍गुप ति ल्‍यामु मिन।”
ACT 26:1 तमा अग्रिपासकी पावलला ख्‍युरुङ ख्‍योरो थोक्‍ला लप थुप्‍किवी सिनी सिक्‍यासुङ। तमा पावलकी खोरो थोक्‍ला ताम्‍ङे लापुपला लाक्‍पी छ्‍याक्‍के क्‍यानी दुक सिक्‍यासुङ।
ACT 26:2 “ओ ग्‍येल्‍वु अग्रिपास, यहूदीतिवी ङला क्‍येन ग्‍यपुप तेरी ताम्‍ङेकी कोर्ला हारिङ ङ ग्‍येल्‍वुकी चिप्‍ला लपुप ङ्‍येतुप तप्‍की ङला छासे गा लानी वे।
ACT 26:3 च्‍यिलासिसिन यहूदीतिवी तेरी लुक्‍सु ताङ छ्‍योला तेपा कितुप ताम्‍ङेला कुतुक कुतुक वोतुप ति ग्‍येल्‍वुला राङ छ्‍या वोतुप तप्‍की ङे ताम्‍ङे ल्‍यामो क्‍यानी सेन सिनी ङ गोङ्‍बा शोयी।
ACT 26:4 ङ ज्‍येन्‍दा वोतुप पेला नेज्‍युनी ङे मिरिककी पर्ला ताङ यरूशलेमला साङ ङे किताङ नालु चुकै वे सिरुप ति तेरी यहूदीतिवाला छ्‍या राङ वे।
ACT 26:5 तिवी ङला तोङ नेज्‍युनी छ्‍या वे। ङ ति छ्‍योकी ठिमला छासे तम्‍बु वोतुप फरिसीकी मी यिन्‍दुप ति तिवी नोवा वोसिन पङ्‍बु तेर थुप्‍किवी।
ACT 26:6 कोन्‍छ्‍योककी ङ्‍यिरा पगावा हङ्‍गावातिवाला थाक्‍छ्‍येन नङ्‍गुप शेप ने ङोसु लावु ख्रीष्‍टकी थोक्‍ला रेवा क्‍यानी गुनी देतुप तप्‍की हारिङ ङ दी ठिम्‍खाङला लानी वे।
ACT 26:7 दाक्‍पी गिपा च्‍यिङ्‍ङीकी मीतिवी ङ्‍यी ताङ नुप्‍ज्‍या सेम च्‍यिक राङ च्‍युङ्‍नी ती कोन्‍छ्‍योककी थाक्‍छ्‍येन नङ्‍गुप ति ङ्‍येतुपला सोवा तेक्‍नी रेवा क्‍यासुङ। ओ ग्‍येल्‍वु, दी रेवाकी थोक्‍ला यहूदीतिवी ङला क्‍येन ग्‍यम वे।
ACT 26:8 कोन्‍छ्‍योककी शेपतिवाला सेन्‍बु लोङ मुथुपी सिनी ख्‍यिराङ च्‍यिला नासाम तोङ्‍गिवी?
ACT 26:9 गोमाला याङ ङे साङ नासरतकी येशूला तेपा कितुपतिवाला क्‍येन तेरुप सिनी नासाम ताङ्‍यिन।
ACT 26:10 तमा यरूशलेमला वोतुप नासरतकी येशूला तेपा कितुप मीतिवा बङीला छ्‍येर्पा बिनिन। कोङ्‍यार छ्‍येतिवा नेसुर ओङ्‍ज्‍येन थोप्‍नी तेपा कितुप मी बङीला चोन्‍खाङला उपिन। तोजो तिराङ मिन, तिवाला सेतुप पेला ङ साङ तिवी मुला ख च्‍यिक क्‍यायिन।
ACT 26:11 छ्‍योखाङ छ्‍योखाङला गल्‍नी तिवाला थेङ्‍मा बङी छ्‍येर्पा बिन्‍नी तेपा कितुप क्‍युर ज्‍यितुप ताङ येशूला मारे तोङ्‍गुप नो क्‍यायिन। तमा तिवाला ङ्‍यिर्मु लानी लुङ्‍बा ज्‍येनकी ग्‍येसातिवाला साङ गल्‍नी छेटाङ बिनिन।”
ACT 26:12 “तमा येलुङ थेङ्‍मा यी ङ कोङ्‍यार छ्‍येतिवी ओङ्‍ज्‍येन ताङ क बिन्‍दुप तप्‍की दमस्‍कसला गलिन।
ACT 26:13 लामला डोयी वोतुप पेला ङ्‍यिमा फेका चोयीला, ओ ग्‍येल्‍वु, देवाच्‍येन नेमा ङ ताङ ङे मुला गलुपतिवी गारी गुरीला ङ्‍यिमा शरुप सिनाङ मङ वो सल्‍वु ग्‍यपुप ति ङे थोङ्‍सुङ।
ACT 26:14 तमा ङ्‍यिराङ तेरी सला तला ग्‍यप्‍सुङ। ती पेला हिब्रू ग्‍येतामला ‘ओ शाऊल, ओ शाऊल, ख्‍युरुङ ङला च्‍यिला छेटाङ तेर्किवी? ख्‍योरो ङला छेटाङ बिन्‍सिन ती छेटाङ ति ख्‍युरुङला राङ फोकिवी।’ सिरुप वोरु यी ङे थोसुङ।
ACT 26:15 तमा ङे ‘ओ चोवो, ख्‍योरुङ सु यिन?’ सिनी टिसालेन्‍सिन खोकी ‘ङ ख्‍योरो छेटाङ तेरिन वोतुप येशू यिन।
ACT 26:16 ख्‍युरुङ खोक लानी टङी दे। च्‍यिलासिसिन ख्‍यिरा ङला थोङ्‍गुप ताङ ङे ख्‍यिराङला छ्‍या तेन्‍दुप ताम्‍ङेकी थोक्‍ला कोन्‍छ्‍योकला शब्‍ज्‍यी कितुप ताङ पङ्‍बु तेरुपला बेतुप नोनी ङ ख्‍यिरा चिप्‍ला छ्‍यरुप यिन।
ACT 26:17 ङ ख्‍युरुङला ख्‍योरो गिपा ताङ यहूदी मिन्‍दुप मिरिक यम्‍बाकी मीतिवी मु नेसुर र्‍होक्‍नी तिवी पर्ला तोङ्‍यिनो।
ACT 26:18 ख्‍युरुङ गल्‍नी ख्‍योरो गिपाकी मीतिवाला कोन्‍छ्‍योककी थाकाला ग्‍युर च्‍यी। तमा तिवा नक्‍तोमी वुङ नेसुर ठछ्‍येलीला ग्‍युर्नी शैतानकी ओङ नेसुर कोन्‍छ्‍योककी थाकाला वुङ्‍शी। तुक क्‍यासिन तिवी दिक्‍पा ताकिवी, तमा ङला तेपा क्‍यानी टेङ्‍बु गलुपतिवी पर्ला देतुप ङ्‍येकिवी।’ सिनी सुङ्‍सुङ।
ACT 26:19 ती तप्‍की ओ ग्‍येल्‍वु अग्रिपास, देवाच्‍येन नेमा सुङ्‍गुप ताम्‍ङेला ङे ङ्‍येनिन।
ACT 26:20 गोमाला दमस्‍कसला ताङ यरूशलेमला, तेसुर यहूदियाकी दासा तेरीला देतुप मीतिवाला ताङ, तेसुर गल्‍नी यहूदी मिन्‍दुप मिरिक यम्‍बाकी मीतिवाला साङ ‘रङगी क्‍यावु दिक्‍पा ने सेम ग्‍युर, तमा कोन्‍छ्‍योककी थाकाला ग्‍युर्नी सेम ग्‍युरुप मी दोके मिजी टेङ्‍बु क्‍योङ।’ सिनी ङे ख्‍याप्‍टाक क्‍यायिन।
ACT 26:21 ती तप्‍की यहूदीतिवी ङला ल्‍हङाङ नाङ्‍ला जिम्‍नी सेतुप छाल्‍सुङ।
ACT 26:22 यिन्‍सिनाङ हारिङ सेक कोन्‍छ्‍योककी ङला दाल्‍जा किटे क्‍यान वे। ती तप्‍की ङ दे लानी छ्‍ये छ्‍युङा ङ्‍यिकरला पङ्‍बु तेरिन। कोन्‍छ्‍योककी लुङ्‍तेम्‍बातिवा ताङ मोशाकी सिक्‍यावु सुङतिवा वुतुङ के छेकिवी सिरुप ताम्‍ङे ति मिसिन यम्‍बा ताम्‍ङे काङ साङ सिमाक्‍या वे।
ACT 26:23 ङे सिक्‍यावु ति ख्रीष्‍टकी दुक्‍पा खुर गोवु ताङ टुङ्‍नी थल्‍माला ङोसु लानी खोरो गिपा ताङ यहूदी मिन्‍दुप मिरिक यम्‍बाकी मीतिवाला दिक्‍पा ने थर ज्‍यितुप वोसिरकी लाम छ्‍या तेन नङ्‍गिवी सिरुप कोर्ला यिन।”
ACT 26:24 पावलकी तुक सिनी खोरो थोक्‍ला ताम्‍ङे लपिन वोतुप पेला फेस्‍तसकी थोर ग्‍यप्‍नी “ओ पावल, ख्‍योरुङ ङ्‍योनोक। ख्‍योरो येन्‍देन बङीकी ख्‍युरुङला ङ्‍येन्‍बु जोवु यिन।” सिनी वोरु तेन्‍सुङ।
ACT 26:25 यिने पावलकी दुक सिक्‍यासुङ, “ओ ओङ छ्‍येवु फेस्‍तस ला, ङ ङ्‍येन्‍बु मिन, ङ टेङ्‍बु ताङ येन्‍देन वोतुप ताम्‍ङे तिराङ लपिन।
ACT 26:26 दी ताम्‍ङेकी कोर्ला ग्‍येल्‍वुकी हाक्‍को वे। तुक क्‍यानी ती ताम्‍ङे ति ङ ङाडेङ क्‍यानी लपिन वे। च्‍यिलासिसिन दी तेरी ताम्‍ङे ति छ्‍याकला मेतुप तप्‍की ग्‍येल्‍वुकी साङ बानी माज्‍याक वे।
ACT 26:27 ग्‍येल्‍वु अग्रिपास ला, काङ ग्‍येल्‍वी लुङ्‍तेम्‍बातिवी खला तेपा किवी? ग्‍येल्‍वुकी तेपा किवी सिरुप ति ङला छ्‍या वे।”
ACT 26:28 तमा अग्रिपासकी पावलला “काङ ख्‍युरुङ ङला उकुर च्‍यिकला राङ ख्रीष्‍टियान जोप नो किवी?” सिनी सिक्‍यासुङ।
ACT 26:29 यिने पावलकी सिक्‍यासुङ, “कोले क्‍यान यिन्‍सिनाङ शार्क्येक यिन्‍सिनाङ ग्‍येल्‍वुला तिराङ मिन, हारिङ ङला च्‍याटोक माग्‍यप्‍सिन ङे ताम्‍ङे ङ्‍येन्‍दुपतिवा तेरी ङ दोके राङ येशूला तेपा किशी सिनी ङ कोन्‍छ्‍योकला मोपोर कितिन।”
ACT 26:30 पावलकी तुक सिक्‍यासिमा ग्‍येल्‍वु ताङ फेस्‍तस ताङ बरनिकी ताङ ते देतुपतिवा तेरी लासुङ।
ACT 26:31 तमा तिवा थेन्‍सिमा खोप्‍राङ पर्ला “दी मी तीकी याङ से गोवु छ्‍येर्पा खुर गोवु ताङ चोन्‍खाङला डो गोवु लाका मेलोवा काङ साङ माक्‍यानोक।” सियी तिवा ताम्‍ङे क्‍यासुङ।
ACT 26:32 तमा अग्रिपासकी फेस्‍तसला “दीकी कैसरकी चाला डोपला गोङ्‍बा माशुवु यिन्‍सिन दी मीला पि तोङ्‍गुप्‍जा।” सिनी सिक्‍यासुङ।
ACT 27:1 तेसुर ङ्‍यिराङ टुला जेनी इटालिया लुङ्‍बाला डोप ताम्‍ङे तेन्‍तेन क्‍यासिमा तिवी पावल ताङ यम्‍बा चोन्‍खाङला शोरुप मी ललाइतिवाला ग्‍येल्‍वु अगस्‍टसकी मक्‍मी नाङ्‍ला युलियस सिरुप मक्‍मी सयी च्‍यिककी खकी छ्‍ये यीला चेक तेसुङ।
ACT 27:2 तमा एड्रामिटेनोस नेसुर एशियाकी दासा दासा नेवा क्‍यानी डोप टुला जेनी ङ्‍यिराङ गलिन। डोप पेला माकेडोनियाला क्‍येवु थेसलोनिकेकी मी अरिस्‍तार्खस साङ ङ्‍यिरा मुला गलिन।
ACT 27:3 ती सला तीला ङ्‍यिराङ सीदोनला लेप्‍सुङ। तमा मक्‍मी छ्‍ये युलियसकी पावलला ङ्‍यिङ्‍ज्‍ये क्‍यानी पावलकी दाल्‍जातिवी चाला गल्‍नी तिवी पावलला दाल्‍जा किटे किशी नोनी डो च्‍यिसुङ।
ACT 27:4 तेसुर ङ्‍यिराङ येलुङ टुला जेनी गलिन। यिने लुङ कशेन ग्‍यपुप तप्‍की ग्‍येम्‍छो परकी स कम्‍बु वोतुप साइप्रसकी ग्‍यप ने क्‍यानी गलिन।
ACT 27:5 तमा तेसुर ङ्‍यिराङ किलिकिया ताङ पामफिलियाकी फर्केन ग्‍येम्‍छो नेवा क्‍यानी लुकियाकी ग्‍येसा माइराला लेप्‍सुङ।
ACT 27:6 ते इटालियाला डोप अलेक्‍जेन्‍ड्रियाकी टु यी थेप्‍सुङ। तमा ङ्‍यिराङ तेरी ती टुला जेनी गलिन।
ACT 27:7 ङ्‍यिमा अलायी सेक कोले कोले क्‍यानी छासे कले क्‍यानी ङ्‍यिराङ क्‍नीडसला लेप्‍सिमा लुङ मङ कशेन ग्‍यप्‍नी डो माच्‍यिवु तप्‍की ग्‍येम्‍छो परकी स कम्‍बु वोतुप क्रेटकी गारी नेवा क्‍यानी सालमोनेकी ग्‍यप नेवा कोर्नी गलिन।
ACT 27:8 छासे कले क्‍यानी ग्‍येम्‍छो गारी गारी नेसुर डोसालेन्‍सिन ङ्‍यिराङ डछ्‍येवु सिरुप टु ग्‍यकुप दासाला वायिन। तमा लासिया सिरुप ग्‍येसा ति थाक्‍ङ्‍यिमु राङ थोङ्‍सुङ।
ACT 27:9 तमा तुजे साङ अलायी गल सिन्‍दुप ताङ तेनकी ल साङ थेन्‍दुप तप्‍की लुङ कशेन ग्‍यप्‍नी ग्‍येम्‍छोला टुला डोप छासे कले नोक। तुक क्‍यानी पावलकी तिवाला दुक सिनी टोङ्‍गु बिन्‍सुङ।
ACT 27:10 “ओ दाल्‍जातिवा, दुक क्‍यानी ग्‍येम्‍छो शानी डोपला टु तिराङ मिन, समा च्‍यालकतिवा नुम डोप ताङ दाक्‍पु साङ तेरीला ज्‍यानी डोप दोके वोतुप ङे थोङ्‍गिनोको।”
ACT 27:11 यिने मक्‍मी छ्‍ये तीकी पावलकी ताम्‍ङे सिनाङ टु तोङ्‍गुप मी ताङ टुकी ज्‍यिन्‍दाककी खला ङ्‍येन्‍सुङ।
ACT 27:12 ते टु ग्‍यकुप दासाला ति गुन्‍बी लला देतुप कले वोतुप तप्‍की अछ्‍योता सेक टु तङ्‍नी फोनिक्‍सला गल्‍नी गुन्‍बी लला तेराङ देतुप सिनी मी माङ्‍शोककी टोङ्‍गु बिन्‍सुङ। फोनिक्‍स ति क्रेटकी टु ग्‍यकुप दासा यी यिन। ती दासा ति ङ्‍यिमा फोकुप थाकाला ख्‍येल्‍गिवी।
ACT 27:13 तमा ल्‍होकी थाका ने लुङ कोले क्‍यानी ग्‍यकुप छाल्‍सुङ। तुक क्‍यानी तिवी नो क्‍यावु दोके तेरी च्‍युङ्‍सुङ नोनी टु तङ्‍नी क्रेटकी गारी गारी ने क्‍यानी गाल्‍सुङ।
ACT 27:14 यिने चेयी ज्‍युक्‍ला ग्‍येम्‍छो परकी स कम्‍बु क्रेट नेसुर ‘च्‍याङ-शर’ सिरुप लुङ कशेन ग्‍येर्पु ग्‍यप्‍सुङ।
ACT 27:15 तमा ती लुङ छासे ग्‍येर्पु वोतुप तप्‍की टु ति लुङ वुङ्‍गुप थाकाला तोङ माथुप। तमा ङ्‍यिराङ जेवु टु ति लुङगी कनी खुन गल्‍सिनाङ गल्‍शी सिनी पिताङ तङ्‍यिन।
ACT 27:16 तमा क्‍लौडा सिरुप ग्‍येम्‍छो परकी स कम्‍बु दासा टिक्‍पे यीकी लोला लेप्‍सिमा ती ग्‍येम्‍छो परकी स कम्‍बु वोतुप दासा ति लुङ क्‍योरुप तप्‍की लुङ अला मग्‍यक्‍नोक। तुक क्‍यानी टु तोङ्‍गुप मीतिवी छासे कले क्‍यानी टु टिक्‍पे तीला टु गिर्पी नाङ्‍ला ज्‍याक्‍सुङ।
ACT 27:17 तमा ती टु टिक्‍पेला टु गिर्पी खला ज्‍याक्‍सिमा थाक्‍पा थ्‍वोन कोर्नी टा ज्‍याक्‍सुङ। तेसुर सिरटिस सिरुप पेमा वोतुप दासाला दोकिवी सिनी ज्‍यिवा लानी तिवी ग्‍येम्‍छो नाङ्‍ला पेमा नोवु मिन्‍दुक सिनी लङ्‍गर ग्‍यप्‍नी ल्‍हासुङ। तमा ती टु ति लुङ डोप थाकाला गाल्‍सुङ।
ACT 27:18 तमा लुङगी ङ्‍यिराङला छासे क्‍यानी योक योक ताङ दिक दिक क्‍यावु ति क्‍यातोक क्‍यासुङ। ती सला तीला टु तोङ्‍गुप मीतिवी टु येङ्‍गा जोपला टी नाङ्‍ला वोतुप समा च्‍यालकतिवा थेन्‍नी क्‍युर्सुङ।
ACT 27:19 तमा ङ्‍यिमा सुमकी छेर्मु तिवी खोरो लाक्‍पी राङ टुकी च्‍यालकतिवा योनी क्‍युर्सुङ।
ACT 27:20 ङ्‍यिमा अलायी सेक ङ्‍यिमा ताङ कर्मा साङ मोथोङ्‍गुप क्‍यानी कशेन लुङ ग्‍यपुप तप्‍की ङ्‍यिरा याङ सेन्‍बु मुलुते सिनी नासाम तङ्‍यिन।
ACT 27:21 ङ्‍यिमा अलायी सेक दाक्‍पु तेरी काङ साङ मासोवा क्‍यानी देतिन। तमा पावल लानी तिवाला दुक सिक्‍यासुङ, “ओ दाल्‍जी टेङ, ख्‍यिराङ ङे खला ङ्‍येन्‍नी क्रेट नेसुर टुला माजेवु यिन्‍सिन ख्‍यिराङला दुका छेटाङ ताङ कुन मोफोकुप ति यिन्‍जा।
ACT 27:22 त याङ ङ ख्‍यिराङला सिरिन ङाडेङ की, ख्‍यिराङ सु साङ ना मोडोवी। यिने टु ति याङ ना डिवी।
ACT 27:23 च्‍यिलासिसिन दाङ नुपला ङे सोवा देकुप कोन्‍छ्‍योककी लेन क्‍योलुप थु यी ङे चाला लानी ङला
ACT 27:24 ‘पावल, ज्‍यिवा माकी। ख्‍युरुङ कैसरकी दोङ्‍ला लङ राङ गोकिवी। ल्‍होसा, ख्‍योरो मुला टि नाङ्‍ला वोतुपतिवा तेरीकी मिजी ति कोन्‍छ्‍योककी ख्‍योरो लकला चेक तेन नङ वे।’ सिनी सिक्‍यासुङ।
ACT 27:25 तुक क्‍यानी दाल्‍जी टेङ, ङाडेङ की। कोन्‍छ्‍योककी ङला काङ सुङ्‍गुप ति तुकै राङ गिवी सिनी ङ तेपा कितिन।
ACT 27:26 यिने दाक्‍पी टु ति लुङगी ग्‍येम्‍छो परकी स कम्‍बु यीला क्‍योल्‍गिवी।”
ACT 27:27 तमा ङ्‍यिमा च्‍युप्‍ज्‍यीकी नुपला ङ्‍यिराङ जेवु टु ति एड्रियास सिरुप ग्‍येम्‍छोला लुङगी पुलिन येर ताङ मर कियी गाल। नुप फेका चोला टु तोङ्‍गुपतिवी टु ति ग्‍येम्‍छो परकी स कम्‍बुला लेप्‍तुछ्‍येन वे सिनी नो क्‍यानोक।
ACT 27:28 तमा चो तिङ्‍मु नोक सिनी तिवी छे ग्‍यप्‍नी ल्‍हासिन दोम्‍बा खल च्‍यिक चोयी वोतुप ति हाक्‍कोसुङ। तमा येलुङ फचेक गल्‍नी छे ग्‍यप्‍नी ल्‍हासिन दोम्‍बा च्‍येङा तिङ्‍मु वोतुप हाक्‍कोसुङ।
ACT 27:29 तमा टु ति ग्‍येम्‍छो नाङ्‍ला वोतुप दोला दो किते सिनी ज्‍यिवा लानी तिवी टि तिङ नेसुर लङ्‍गर ज्‍यी चोके क्‍युर्सुङ। तमा नाम लङ्‍दा सेक रेवा क्‍यानी देसुङ।
ACT 27:30 ती पेला टु तोङ्‍गुपतिवा टु नेमा टोनी डोपला टी गोमा नेसुर लङ्‍गर क्‍युरुप दोके क्‍यानी टी नाङ्‍ला वोतुप टु टिक्‍पे ति ग्‍येम्‍छोला पाप्‍नोक।
ACT 27:31 ती हाक्‍कोसिमा पावलकी मक्‍मी छ्‍ये ताङ यम्‍बा मक्‍मीतिवाला “टु तोङ्‍गुपतिवा टि नाङ्‍ला राङ मादेसियाङ ख्‍यिराङ तेरी शिवी।” सिनी सिक्‍यासुङ।
ACT 27:32 तमा मक्‍मीतिवी टु टिक्‍पेकी थाक्‍पातिवा च्‍येनी टु ति डो च्‍यिसुङ।
ACT 27:33 नक्‍सराङ सिरिङला पावलकी तिवा तेरीला सिक्‍यासुङ, “समा सो, ख्‍यिरा काङ मासोवा क्‍यानी देतुप ति हारिङ ङ्‍यिमा च्‍युप्‍ज्‍यी गाल।
ACT 27:34 तुक क्‍यानी समा सो सिनी ङ ख्‍यिराङला गोङ्‍बा शोयी। काङ रे च्‍यिक रे सोसिन ख्‍यिरा ङार ङ्‍येकिवी। ख्‍यिरा गोकी र्‍हे ङ्‍येङ्‍मा यी साङ ना मोडोयी।”
ACT 27:35 तमा तोजोयी सिक्‍यासिमा पावलकी शुब्‍ज्‍याङ लकला लानी तेरीकी दोङ्‍ला कोन्‍छ्‍योकला थुचिछे पुल्‍सिमा ती शुब्‍ज्‍याङ ति च्‍याक्‍नी सोसुङ।
ACT 27:36 तमा यम्‍बातिवी साङ ङाडेङ ङ्‍येनी काङ रे च्‍यिक रे समा सोसुङ।
ACT 27:37 ती टी नाङ्‍ला ङ्‍यिराङ तेरी क्‍यासिन मिरा सयी ङ्‍यी ताङ खल दिन ताङ टुक वोतुप्‍जा।
ACT 27:38 ङ्‍यिरा डाता सेक सोन सिन्‍सिमा टु येङ्‍गा जोपला तेरी टे डुमातिवा ग्‍येम्‍छो नाङ्‍ला क्‍युरिन।
ACT 27:39 नाम लासिमा ङ्‍यिरा ती दासा ति ङो माशेसिनाङ ग्‍येम्‍छो परकी स कम्‍बु वोतुप दासाकी गारीला पेमा वोतुप दासा थोङ्‍सुङ। तुक क्‍यानी टु तोङ्‍गुपतिवी थुप्‍सिन टु ति ती गारीला क्‍यल ज्‍योकुप सिनी केवुल क्‍यासुङ।
ACT 27:40 तिवी लङ्‍गरतिवा च्‍येनी ग्‍येम्‍छो नाङ्‍ला क्‍युर्सुङ। ती पेला राङ टु फार छुर क्‍योकुप च्‍यालक पि ताङ्‍नी लुङ वुङ्‍गुप थाकाला डोपला ग्‍यावु कुर ति लाङ्‍नी लुङ वुङ्‍गुप थाकाला ग्‍युर्सुङ। तमा टु ति पेमा वोतुप ग्‍येम्‍छो परकी स कम्‍बुला डोप छाल्‍सुङ।
ACT 27:41 यिने टु ति ते राङ वोतुप पेमाला दाप्‍सुङ। तमा दाप्‍सिमा टुकी गो ति ते राङ ग्‍येनी फार छुर कि माथुप। टुकी तिङ्‍ला ति ग्‍येम्‍छोकी बालाप फोक्‍नी छ्‍यकुप छाल्‍सुङ।
ACT 27:42 तमा चोन्‍खाङला शोरुप मीतिवा च्‍याल ग्‍यप्‍नी टोन डिते नोनी मक्‍मीतिवी तिवाला सेतुप नो क्‍यासुङ।
ACT 27:43 यिने मक्‍मी छ्‍ये तीकी पावलला र्‍होकुप नो क्‍यावु तप्‍की तिवाला तुक माकी सिनी क्‍येक्‍सुङ। तमा च्‍याल ग्‍यक थुपुपतिवा चोयी ति टि नाङ नेमा छ्‍योङ्‍बाल ग्‍यप्‍नी फर्केन ग्‍येम्‍छो परकी स कम्‍बुला च्‍याल ग्‍यप्‍नी ग्‍युक सिनी क बिन्‍सुङ।
ACT 27:44 तमा यम्‍बा लुवुतिवा ति टु छ्‍यकुप पङ्‍लिङ ताङ शिङगी खला देनी ग्‍येम्‍छो परकी स कम्‍बुला गाल। तुक क्‍यानी ङ्‍यिराङ तेरी ल्‍यामो क्‍यानी ग्‍येम्‍छो परकी स कम्‍बुला लेप थुप्‍सुङ।
ACT 28:1 तेसुर ङ्‍यिराङ थर्सिमा ती ग्‍येम्‍छो परकी स कम्‍बु वोतुप दासाकी मिङ ति माल्‍टा सिवी सिनी हाक्‍कोसुङ।
ACT 28:2 तमा तेकी मीतिवी ङ्‍यिराङला छासे च्‍यम्‍बा क्‍यासुङ। च्‍यिलासिसिन छ्‍यर्वा ग्‍यप्‍नी ख्‍येवा वोतुप तप्‍की तिवी ङ्‍यिराङला मे तङ बिन्‍नी गासो शुसुङ।
ACT 28:3 तमा पावलकी शिङ पाङ्‍बा काङ खुर वानी मेला च्‍यिसुङ। ती मे राप वोतुप तप्‍की रुल यी थेन वानी पावलकी लाक्‍पाला फेनी ते राङ ज्‍युनी देसुङ।
ACT 28:4 तेकी मीतिवी पावलकी लकला रुल ज्‍युन देतुप थोङ्‍नी खोप्‍राङ पर्ला “दी मी याङ वुतुङ के शेन्‍बा के यिन्‍दे। दी ग्‍येम्‍छो ने थर थुप्‍सुङ, यिने कोन्‍छ्‍योककी पर्च्या नेसुर ति थर माथुप।” सिनी सिक्‍यासुङ।
ACT 28:5 यिने पावलकी ती रुल तीला मे नाङ्‍ला थप र्‍हुन क्‍युर्सुङ। तमा तीला काङ साङ ना माताङ।
ACT 28:6 तमा तेकी मीतिवी पावलकी जु ति बोनी शिते सिनी ल्‍हानी गुन देसुङ। यिने अलायी सेक ल्‍हासिनाङ तीला काङ साङ माक्‍यावु थोङ्‍सिमा तिवी नासाम ग्‍युर्नी “दी मी याङ ल्‍ह यिन्‍दुप यिनोक।” सिनी सिक्‍यासुङ।
ACT 28:7 ते गारी गुरीला पब्‍लियस सिरुप ती ग्‍येम्‍छो परकी स कम्‍बुकी मी छ्‍येकी शिङ नोक। तीकी ङ्‍यिराङला गासो शुनी ङ्‍यिमा सुम सेक तीकी खाङ्‍बा समा बिन्‍सुङ।
ACT 28:8 ती पेला पब्‍लियसकी पपा ति छा ताङ खोक्‍पा शोनी नानोक। तमा पावल तीला ल्‍हापला गल्‍नी तीकी गोला लाक्‍पा ज्‍याक्‍नी कोन्‍छ्‍योकला मोपोर क्‍यानी तीला टेक च्‍यिसुङ।
ACT 28:9 ते तुकै च्‍युङ्‍सिमा ती गारी गुरीकी यम्‍बा मी नेर्पुतिवा साङ ते वासुङ। तमा तिवी नेजु ति पावलकी टेक च्‍यिसुङ।
ACT 28:10 ती तप्‍की तिवी ङ्‍यिराङला छासे ताङ्‍देन क्‍यासुङ। तमा ल सुम ज्‍युक्‍ला ङ्‍यिराङ माल्‍टा नेसुर टुला जेनी रोमला डोप पेला तिवी ङ्‍यिराङला गोवु चोयी समा च्‍यालकतिवा टी नाङ्‍ला ज्‍याक्‍नी बिन्‍सुङ।
ACT 28:11 तमा ल सुम ज्‍युक्‍ला ङ्‍यिराङ माल्‍टा नेसुर टुला जेनी गलिन। ती टु ति अलेक्‍जेन्‍ड्रिया नेसुर वानी गुन्‍बी लला ते राङ ज्‍योकिनोक। ती टुकी गोमाला ल्‍ह छेमाकी कु क्‍वोनी जोवु नोक।
ACT 28:12 तेसुर ङ्‍यिराङ सुराकुसाई सिरुप दासाला लेप्‍सुङ। ते लेप्‍सिमा ङ्‍यिमा सुम ते राङ देतिन।
ACT 28:13 तेसुर गल्‍सिमा ङ्‍यिराङ ग्‍येम्‍छो गारी ताङ गारी ने क्‍यानी रेगियन सिरुप दासाला लेप्‍सुङ। ते लेपुप ङ्‍यिमा च्‍यिककी ज्‍युक्‍ला ल्‍होकी थाका ने लुङ ग्‍यप्‍सुङ। तमा ती सला तीला ङ्‍यिराङ पटिओलीला लेप्‍सुङ।
ACT 28:14 ते ङ्‍यिरा ललाइ तेपा कितुप मीतिवा ताङ मुला ठेसुङ। तमा तिवी ङ्‍यिराङला ते राङ दे सिनी गोङ्‍बा शुवु तप्‍की ङ्‍यिराङ ङ्‍यिमा दिन सेक ते राङ देतिन, तमा तेसुर रोमला गलिन।
ACT 28:15 ङ्‍यिराङ वुङ्‍गुप लेन थोनी रोमला वोतुप तेपा कितुपतिवा अप्‍पियसकी हाला ताङ डोखाङ सुम सिरुप दासा सेक ङ्‍यिराङला ठेतुपला वानोक। तिवाला थोङ्‍सिमा पावलकी ङाडेङ ङ्‍येनी कोन्‍छ्‍योकला थुचिछे पुल्‍सुङ।
ACT 28:16 तमा ङ्‍यिराङ रोमला लेप्‍सिमा पावलला र्‍हेन्‍दुपला मक्‍मी मिरा च्‍यिककी मुला खोप्‍रे लावु खाङ्‍बा यीला दे च्‍यिसुङ।
ACT 28:17 तेमी ङ्‍यिमा सुम तिङ्‍ला पावलकी ते देतुप यहूदी गोमा कितुप मीतिवाला कतोङ ताङ्‍सुङ। यहूदीतिवा ते जोम्‍सिमा पावलकी तिवाला सिक्‍यासुङ, “ओ अच्‍युनुपतिवा, ङे याङ ङरा लुङ्‍बी मीतिवा ताङ पगावा हङ्‍गावी लुक्‍सुकी तेन्‍दोकला काङ लाका माक्‍यासिनाङ यहूदीतिवी ङला जिम्‍नी यरूशलेमला वोतुप रोमीतिवी लकला चेक तेन ताङ्‍सुङ।
ACT 28:18 ती रोमीतिवी ङला ल्‍यामो क्‍यान टिन ल्‍हानी से गोवु छ्‍येर्पा तेर गोवु तेन्‍दोक काङ साङ माथोङ्‍सिमा ङला पिताङ तोङ्‍गुप नो क्‍यावु यिन।
ACT 28:19 यिने यहूदीतिवी ङला पिताङ तोङ्‍गुप गा माक्‍यावु तप्‍की ग्‍येल्‍वु कैसरकी दोङ्‍ला राङ ठिम की सिनी ङे गोङ्‍बा शुयी। यिन्‍सिनाङ ङे गिपाकी तेन्‍दोकला काङ साङ क्‍येन तेरुप ताम्‍ङे माक्‍या वे।
ACT 28:20 ती तप्‍की ख्‍यिराङला ठेनी अरा उरा सिरुप नोनी ङे ख्‍यिराङला कतङ्‍गुप यिन। च्‍यिलासिसिन इस्राएलकी मीतिवी रेवा क्‍यानी गुन देतुप शेप ने ङोसु लावु ख्रीष्‍टकी थोक्‍ला राङ ङला च्‍याटोक ग्‍यपुप यिन।”
ACT 28:21 तमा ते देतुप यहूदी गोमा कितुप मीतिवी पावलला सिक्‍यासुङ, “ङ्‍यिरा याङ अच्‍युकी तेन्‍दोकला यहूदिया नेसुर काङ यिकी राङ माङ्‍ये वे। सु साङ वानी अच्‍युकी थोक्‍ला ताम्‍ङे काङ साङ मालाप वे। अच्‍युकी लाका मेलोवा क्‍यावु यिन सिनी ताम्‍ङे साङ माक्‍या वे।
ACT 28:22 यिने अच्‍युकी नासाम ति काङ नोक सिनी अच्‍युकी ख नेमा राङ ङ्‍येन्‍दुप ङ्‍यिरा नो वे। च्‍यिलासिसिन कनी साङ मीतिवा अच्‍युकी छोक्‍पाकी कोर्ला ताम्‍ङे मेलोवा तिराङ किवी सिरुप ति ङ्‍यिराङला छ्‍या वे।”
ACT 28:23 तुक क्‍यानी तिवी ङ्‍यिमा च्‍यिक पावलला ठेतुप तुजे जोसुङ। तमा मीतिवा बङी पावल देतुप खाङ्‍बा वासुङ। पावलकी टोप नेज्‍युनी सोर्‍हिप सेक तिवाला कोन्‍छ्‍योककी ग्‍येल्‍खापकी कोर्ला लाप्‍सुङ। तमा मोशाकी ठिम ताङ कोन्‍छ्‍योककी लुङ्‍तेम्‍बाकी थेप नेसुर येशूकी कोर्ला तिवाला पङ्‍बु बिन्‍सुङ।
ACT 28:24 पावलकी सिक्‍यावु ताम्‍ङेला ललाइकी तेपा क्‍यासुङ, ललाइकी तेपा माक्‍या।
ACT 28:25 तमा तिवा खोप्‍रे पर्ला साङ ताम्‍ङे माडिक्‍नोक। तुक क्‍यानी केन डोप पेला पावलकी दुक सिनी लाप्‍सुङ, “ख्‍यिरा पगावा हङ्‍गावाला कोन्‍छ्‍योककी थु चाङ्‍माकी यशैया लुङ्‍तेम्‍बा नेमा सुङ्‍गुप सुङ ति टेके राङ नोक। ती सुङ ति दी यिन,
ACT 28:26 ‘गल्‍नी दी मीतिवाला दुक सिनी सी। ख्‍यिरा ङ्‍येन्‍दुप याङ ङ्‍येन्‍गिवी, यिने हाक्‍मोकोवी। ल्‍हाप याङ ल्‍हेवी, यिने मोथोङ्‍गिवी।
ACT 28:27 च्‍यिलासिसिन तिवी सेम ति क्‍योङ्‍बु गल्‍नी वे। तमा तिवी नम्‍ज्‍योक वोन्‍बा गलुप ताङ मिक चुम वे। मिसियाङ तिवी मिककी थोङ्‍गुप ताङ नम्‍ज्‍योक थोवु ताङ सेमगी हाक्‍को थुप्‍नी दिक्‍पा ने ग्‍युरुप ति यिन्‍जा। तमा तिवाला ङे दिक्‍पा ने थर ज्‍यितुप ति यिन्‍जा।’
ACT 28:28 ती तप्‍की ख्‍यिरा हाक्‍कोशी, कोन्‍छ्‍योककी दिक्‍पा ने थर ज्‍यितुप सुङ ति यहूदी मिन्‍दुप मिरिक यम्‍बाकी मीतिवाला ख्‍याप्‍टाक क्‍यानी वे। तमा तिवी ती सुङ ति ङ्‍येन्‍गिवी।”
ACT 28:29 (पावलकी ती सुङ ति ख्‍याप्‍टाक क्‍यासिमा यहूदीतिवा खोप्‍रे पर्ला अलायी लप्‍सिर ग्‍यक्‍टी चेसिमा तेसुर क्‍येनी गाल्‍सुङ।)
ACT 28:30 तमा पावल लो ङ्‍यी सेक खोरे लावु खाङ्‍बाला राङ देसुङ। ते तीकी येशूकी कोर्ला येन्‍देन ङ्‍येन्‍दुपला वुङ्‍गुपतिवा तेरीला गासो शुसुङ।
ACT 28:31 तमा सी साङ पावलला माक्‍येक। तुक क्‍यानी पावलकी ज्‍यिवा माक्‍यावा क्‍यानी कोन्‍छ्‍योककी ग्‍येल्‍खापकी कोर्ला ख्‍याप्‍टाक कियी ताङ चोवो येशू ख्रीष्‍टकी कोर्ला येन्‍देन बिन्‍सुङ।
ROM 1:1 रोमला वोतुप मीतिवा तेरीला टसी देलेक! दी यिकी ति येशू ख्रीष्‍टकी थोक्‍ला लावा च्‍युङ्‍गुप ङ पावलकी टिवु यिनो। ङ ति कोन्‍छ्‍योककी लेन ल्‍यामु ख्‍याप्‍टाक कितुप ताङ लोमा छ्‍ये च्‍युङ्‍गुपला खोकी पेन नङ्‍गुप यिन।
ROM 1:2 ती लेन ल्‍यामु ति काङ यिन सिसिन ती ति तोङ्‍ला के कोन्‍छ्‍योककी खोरो सेवु येशू ख्रीष्‍टकी थोक्‍ला खोरे लुङ्‍तेम्‍बातिवा नेसुर खोकी सुङगी नाङ्‍ला थाक्‍छ्‍येन नङ वे।
ROM 1:3 ती येशू ख्रीष्‍ट ति जम्‍बुलिङकी ताम्‍ङे कितुप पेला ग्‍येल्‍वु दाऊदकी गिपा नेमा क्‍येवु यिन।
ROM 1:4 तमा खो ति कोन्‍छ्‍योककी थु चाङ्‍माकी ताम्‍ङे कितुप पेला टुङ्‍गुप मीतिवी नाङ ने ङोसु लानी ङार छ्‍येवु कोन्‍छ्‍योककी सेवु सिनी पङ्‍बु छ्‍या तेन्‍दुप दाक्‍पी चोवो येशू ख्रीष्‍ट यिन।
ROM 1:5 यहूदी मिन्‍दुप मिरिक यम्‍बाकी मीतिवी येशूला तेपा क्‍यानी खोकी सुङला ङ्‍येन्‍शी सिनी ङला खो नेमा कटिन ङ्‍येनी खोला शब्‍ज्‍यी कितुपला खोकी लोमा छ्‍ये च्‍युङ्‍गुप यिन।
ROM 1:6 तुक राङ क्‍यानी ख्‍यिराङ साङ येशू ख्रीष्‍टला तेपा कितुपला कोन्‍छ्‍योककी कताङ नङ्‍गुप यहूदी मिन्‍दुप मिरिक यम्‍बाकी मीतिवी नाङ्‍ला ख्‍येल्‍गिवी।
ROM 1:7 रोमला वोतुप ख्‍यिराङ कोन्‍छ्‍योककी ङ्‍यिङ्‍ज्‍येवु मीतिवा ताङ खोला तेपा क्‍यावु चाङ्‍मा वोतुप मीतिवा तेरीला दाक्‍पी पपा कोन्‍छ्‍योक ताङ चोवो येशू ख्रीष्‍ट नेमा कटिन ताङ लोदिमु वुङ्‍शी।
ROM 1:8 थल्‍माला ख्‍यिराङ तेरीकी थोक्‍ला येशू ख्रीष्‍टकी छ्‍योक नेमा ङ ङे कोन्‍छ्‍योकला थुचिछे बुल्‍गिवी, च्‍यिलासिसिन ख्‍यिरा खोला तेपा क्‍यावु ताम्‍ङे ति जम्‍बुलिङ तेरीला टम वे।
ROM 1:9 ङ ङे सेमगी दिङ नेज्‍युनी खोकी सेवु येशू ख्रीष्‍टकी थोक्‍ला लेन ल्‍यामु ख्‍याप्‍टाक क्‍यानी खोला शब्‍ज्‍यी क्‍यावु तप्‍की ङे नरी ख्‍यिराङला टेन्‍नी ङ्‍यी ताङ नुप्‍ज्‍या ख्‍यिरा थोक्‍ला मोपोर क्‍यावु ति कोन्‍छ्‍योकला राङ छ्‍या वे।
ROM 1:10 तमा कोन्‍छ्‍योककी नोवा वोसिन ङ ख्‍यिरा ते वुङ थुप्‍शी सिनी नरी खोला मोपोर कितिन।
ROM 1:11 ङ ख्‍यिराङला ठेतुप छासे नो क्‍यावु तेन्‍दोक ति ख्‍यिराङला तेपा रम्‍बु जोपला कोन्‍छ्‍योककी थु चाङ्‍मा नेमा वुङ्‍गुप कटिनकी ङ्‍येम्‍बा ति ख्‍यिराङला साङ शेतुप सिनी यिन।
ROM 1:12 तुक क्‍यासिन ख्‍यिरा क्‍यावु तेपाकी ङला ङाडेङ ङ्‍येशी, ङे क्‍यावु तेपाकी ख्‍यिराङला ङाडेङ ङ्‍येशी सिनी ङला रेवा वे।
ROM 1:13 अच्‍युनुपतिवा, दी ताम्‍ङे ति ख्‍यिरा ल्‍यामु हाक्‍कोशी सिरुप ति ङे नोवा वे। काङ यिन सिसिन ङ ति थेङ्‍मा अलायी सेक ख्‍यिराङला ठेतुपला वुङ्‍गुप नो क्‍यायी। च्‍यिलासिसिन ङ ख्‍यिराङला गल्‍नी यहूदी मिन्‍दुप मिरिक यम्‍बाकी मीतिवी पर्ला तेपा रम्‍बु वोतुप मीतिवा अलायी ल्‍हावु दोके ख्‍यिराङ रोमला वोतुपतिवी पर नेमा साङ तेपा रम्‍बु वोतुप मीतिवा ल्‍हाप ङला नो वे। यिने तन्‍दा सेक ङला देराङ क्‍येक्‍नी ज्‍याङ वे।
ROM 1:14 ङ ति ग्रीककी मी यिन्‍शी ग्रीककी मी मिन्‍शी, रिक्‍पा वोतुप मी यिन्‍शी रिक्‍पा मेतुप मी यिन्‍शी, तेरीकी थोक्‍ला सुङ ख्‍याप्‍टाक क्‍यानी खोकी ठिलेन च्‍योलुप नो वे।
ROM 1:15 ती तप्‍की ख्‍यिराङ रोमीतिवाला साङ ती लेन ल्‍यामु ति ख्‍याप्‍टाक कितुप ङला छासे गा लानी वे।
ROM 1:16 ङ लेन ल्‍यामु ख्‍याप्‍टाक कितुपला सुला साङ ङोछा मिकी, च्‍यिलासिसिन कोन्‍छ्‍योककी लेन ल्‍यामु ति तेपा कितुपतिवा तेरीला दिक्‍पा ने थर ज्‍यितुप कोन्‍छ्‍योककी ओङ यिन। गोमाला यहूदीतिवी थोक्‍ला, तमा ज्‍युक्‍ला ति यहूदी मिन्‍दुप मिरिक यम्‍बाकी मीतिवी थोक्‍ला साङ यिन।
ROM 1:17 ती लेन ल्‍यामु ति कोन्‍छ्‍योककी थोङ्‍दाङला दाक्‍पु दिक्‍छेनतिवाला चुक क्‍यानी टेङ्‍बु वोतुप जोवु ति छ्‍या तेन्‍सुङ। ती टेङ्‍बु ति दाक्‍पी येशूला तेपा क्‍यासिमा तिराङ गिवी। कोन्‍छ्‍योककी सुङला साङ “खोला तेपा क्‍यानी टेङ्‍बु च्‍युङ्‍गुप मीतिवा ति तिवी क्‍यावु तेपा नेमा मिजी ङ्‍येकिवी।” सिनी टि वे।
ROM 1:18 कोन्‍छ्‍योककी पर्च्या ति खोकी सुङ टेङ्‍बुला हाक्‍मोकोवु जोप दुक्‍टातिवा ताङ खोला मोवा मिकिवुतिवी थोक्‍ला देवाच्‍येन नेमा छ्‍या देन्‍गिवी।
ROM 1:19 कोन्‍छ्‍योककी खुरुङ सु यिन सिरुप ति मीतिवाला छ्‍या तेन्‍दुप तप्‍की मी तेरीकी खो सु यिन सिरुप ति हाक्‍को थुप्‍किवी।
ROM 1:20 खोकी ज्‍ये नङ्‍गुप जम्‍बुलिङकी थल्‍मा नेज्‍युनी जम्‍बुलिङला वोतुप च्‍यालकतिवा नेसुर थोङ मुथुवु खोकी ओङ ताङ खो कोन्‍छ्‍योक यिन सिरुप ति मीतिवी ठछ्‍येली हाक्‍को थुप्‍किवी। ती तप्‍की मीतिवी ङ ति हाक्‍मोकोनोक सिनी काङ साङ सि मुथुपी।
ROM 1:21 मीतिवी कोन्‍छ्‍योकला ङो शेसिनाङ खोला कि गोवु मोवा ति माक्‍या, थुचिछे साङ मापुल। तुक क्‍यानी तिवी मुला वोतुप नोवा ति तेर्मे गल वे। तमा तिवी अम्‍बारङ्‍शिङ वोतुप सेमगी जोसालेन्‍सिन काङ हाक्‍को मुथुपुप गल वे।
ROM 1:22 तुक क्‍यानी मीतिवी ङ च्‍यङ्‍बु यिन सिनी सिवी, यिने तिवा अम्‍बारङ्‍शिङ कितुप राङ गल वे।
ROM 1:23 तिवी नाम्‍साङ ना मोडोवु कोन्‍छ्‍योकला मोवा माक्‍यानी ना डोप मी ताङ च्‍यच्‍युम ताङ ठेक्‍पा ज्‍यी चुनी युकुप छ्‍युङ्‍मा ताङ जु टिन युकुप सेम्‍ज्‍येन दोके कु जोनी तिवाला मोवा कितुप गल वे।
ROM 1:24 तुक क्‍यानी कोन्‍छ्‍योककी तिवाला तिवी सेमला काङ मेलोक्‍पा कियी दे लङ्‍गुप ति किशी नोनी पि ताङ ताङ्‍सुङ। ती तप्‍की तिवा तिवी खोप्‍रे पर्ला राङ ङोछा मेतुप लाकातिवा क्‍यासुङ।
ROM 1:25 तिवा कोन्‍छ्‍योक टेङ्‍बुला ति मेटेङ्‍बु जोनी जम्‍बुलिङ ज्‍येङ्‍गुप कोन्‍छ्‍योकला ति मोवा माक्‍यानी खोकी ज्‍ये नङ्‍गुप च्‍यालकतिवाला के सोवा देकुप ताङ शब्‍ज्‍यी कितुप छाल्‍सुङ। जम्‍बुलिङ तेरी ज्‍येङ्‍गुप कोन्‍छ्‍योकला नरी सोवा वुङ्‍शी, आमिन!
ROM 1:26 ती तप्‍की कोन्‍छ्‍योककी तिवाला ङोजु मेतुप लाका कि ज्‍यितुपला पि ताङ ताङ्‍सुङ। तिवा पुम्‍पेजातिवी साङ पुम्‍पेजातिवी मुला राङ शम्‍डेन क्‍यानी लाका मेलोवा क्‍यासुङ।
ROM 1:27 ख्‍योक्‍पेजातिवी साङ ख्‍योक्‍पेजी मुला राङ शम्‍डेन कितुप लाका मेलोवा क्‍यासुङ। तुक क्‍यानी तिवी लाका मेलोवा क्‍यावु तप्‍की तिवाला कोन्‍छ्‍योककी पर्च्या फोक्‍नी वे।
ROM 1:28 कोन्‍छ्‍योकला तिवी सेमला ज्‍योकुप नो माक्‍यावु तप्‍की खोकी तिवाला खोप्‍रे काङ कियी दे लङ्‍गिवे, तुकै राङ किशी सुङ्‍नी तिवाला मेलोवा कि ज्‍यितुपला क्‍युर्नी ज्‍याक्‍सुङ।
ROM 1:29 तमा मीतिवा तेरी वुल्‍दुङ्‍बा कितुप ताङ दुक्‍टा कितुप ताङ देर्पा कितुप ताङ लाका मेलोक्‍पा कितुप गल वे। तिवा ठतोक कितुप ताङ मी सेतुप ताङ थमु ग्‍यकुप ताङ जिनोक जोप ताङ दुक्‍टा वोतुप नासाम तोङ्‍गुप ताङ ताम्‍ङे क्‍योलुप ताङ
ROM 1:30 मीला मेलोवा सिरुप ताङ कोन्‍छ्‍योकला मोवा मिकिवु ताङ मीला मो बेपुप ताङ ङ राङ यिन सिनी छ्‍येजु कितुप ताङ अम्‍बारङ्‍शिङ कितुप ताङ किताङ नालु मेलोक्‍पा जोप ताङ पपाआमी खला मेङ्‍येन्‍दुप गिवी।
ROM 1:31 तमा तिवा सेम माङ्‍येवु दोके कितुप ताङ मीला जिनोक जोनी क्‍येन तेरुप ताङ च्‍यम्‍बा मेतुप ताङ सेमला च्‍यङ्‍च्‍यु मेतुप गिवी।
ROM 1:32 तुका मीतिवाला कोन्‍छ्‍योककी पर्च्या फोकिवी सिरुप ताम्‍ङे ति छ्‍या वोसिनाङ तुका लाका मेलोवा तिराङ किवी। तमा तुका लाका मेलोवा कितुप मीतिवाला “ख्‍योरो छासे लाका ल्‍यामु क्‍यासुङ।” सिनी गा लोङ्‍गिवी।
ROM 2:1 ती तप्‍की ख्‍युरुङ च्‍यिला मी यम्‍बाला क्‍येन तेर्किवी? काङ ख्‍युरुङ ति क्‍येन मेतुप यिन रो? ख्‍युरुङ मी यम्‍बाला क्‍येन तेर्किवी, यिने ती क्‍येन ति ख्‍युरुङला राङ फोकिवी। च्‍यिलासिसिन ख्‍युरुङ मी यम्‍बाला क्‍येन तेर्किवी, यिने ख्‍युरुङ साङ ती लाका राङ किवी।
ROM 2:2 तुका लाका दुक्‍टा कितुप मीतिवाला कोन्‍छ्‍योककी टेङ्‍बु क्‍यानी ठिम क्‍या नङ्‍गिवी सिरुप ति दाक्‍पुला ल्‍यामो क्‍यानी छ्‍या वे।
ROM 2:3 ख्‍युरुङ तुका लाका दुक्‍टा कितुपतिवाला क्‍येन तेर्किवी, यिने ख्‍युरुङ ति ती लाका दुक्‍टा राङ किवी सिसिन काङ ख्‍युरुङ कोन्‍छ्‍योककी पर्च्या नेसुर थर थुप्‍किवी रो?
ROM 2:4 याङ्‍ना कोन्‍छ्‍योककी ख्‍युरुङला सेम ग्‍युर च्‍यिनी दिक्‍पा ने थर ज्‍यितुपला गा कितुप ति हाक्‍माकोनी खोकी च्‍यम्‍बा ताङ हम क्‍या देतुप ताम्‍ङेला मो बेप्‍किवी रो?
ROM 2:5 ख्‍योरो सेम क्‍योङ्‍बु वोतुप ताङ दिक्‍पा ने ग्‍युरुप सेम मेतुप तप्‍की कोन्‍छ्‍योककी मी रे रेला च्‍योङ्‍डा वोतुप टेङ्‍बुकी ठिम क्‍या नङ्‍गुप तुजेला खोकी पर्च्या ति ख्‍युरुङला मङ मङ फोकितो।
ROM 2:6 कोन्‍छ्‍योककी मी रे रेला तिवी काङ काङ क्‍यावे, ती दोके छ्‍यक्‍तक नङ्‍गिवी।
ROM 2:7 छेटाङ ख्‍येल्‍सिनाङ हम क्‍यानी लाका ल्‍यामु कितुप ताङ कोन्‍छ्‍योककी थोक्‍ला मोवा ताङ ताङ्‍देन क्‍यानी खोकी मिङला नाम्‍साङ मिशिवु मिजी छोलुपतिवाला खोकी नाम्‍साङ मिशिवु मिजी नङ्‍गिवी।
ROM 2:8 यिने खुरुङला तिराङ नासाम तोङ्‍गुप ताङ कोन्‍छ्‍योककी सुङ टेङ्‍बुला माङ्‍येन्‍नी लाका दुक्‍टा तिराङ कितुपतिवाला खोकी ङ्‍यिर्मु ताङ पर्च्या तोङ्‍गिवी।
ROM 2:9 तुका लाका दुक्‍टा कितुप मीतिवा तेरीला छेटाङ दुङल ख्‍येल्‍गिवी। ती छेटाङ दुङल ति गोमाला यहूदीतिवाला ख्‍येल्‍गिवी, ती ज्‍युक्‍ला यहूदी मिन्‍दुप मिरिक यम्‍बाकी मीतिवाला ख्‍येल्‍गिवी।
ROM 2:10 यिने लाका ल्‍यामु कितुपतिवाला खोकी मोवा ताङ ताङ्‍देन ताङ लोदिमु नङ्‍गिवी। ती मोवा ताङ ताङ्‍देन ताङ लोदिमु ति गोमाला यहूदीतिवाला नङ्‍गिवी, ती ज्‍युक्‍ला यहूदी मिन्‍दुप मिरिक यम्‍बाकी मीतिवाला नङ्‍गिवी।
ROM 2:11 च्‍यिलासिसिन कोन्‍छ्‍योककी नाम्‍साङ ललाइला ल्‍यामु, ललाइला मेलोवा मिकिवी।
ROM 2:12 कोन्‍छ्‍योककी मोशाला नङ्‍गुप ठिम छ्‍या मेतुप यहूदी मिन्‍दुप मिरिक यम्‍बाकी मीतिवी दिक्‍पा क्‍यासिन तिवी क्‍यावु दिक्‍पाकी थोक्‍ला तिवा ना डिवी। तमा खोकी नङ्‍गुप ठिम छ्‍या वोतुप यहूदीतिवी ती ठिमला मातेन्‍नी दिक्‍पा क्‍यासिन खोकी ठिमला सिक्‍यावु दोके पर्च्या तोङ्‍गिवी।
ROM 2:13 च्‍यिलासिसिन ठिम ङ्‍येन्‍नी मीतिवा ति कोन्‍छ्‍योककी थोङ्‍दाङला टेङ्‍बु मेवी, यिने ती ठिमला युकुप मीतिवा ति कोन्‍छ्‍योककी थोङ्‍दाङला टेङ्‍बु गिवी।
ROM 2:14 यहूदी मिन्‍दुप मिरिक यम्‍बाकी मीतिवी मुला मोशाकी ठिम ति मे, यिने मोशाकी ठिमला सिक्‍यावु दोके तिवी सेम नेमा मिजी टेङ्‍बु क्‍याङ्‍सुङ सिसिन, तिवी मुला ठिम मेसिनाङ ती ति तिवी मिजीकी थोक्‍ला ठिम यिन।
ROM 2:15 तुक क्‍यानी कोन्‍छ्‍योककी ठिमला काङ गोवु ति तिवी सेमला टि वे सिरुप ति तिवी सेम नेमा पङ्‍बु तेर्किवी। तमा तिवी सेमला वोतुप ठिमकी तिवी नासामला ल्‍यामु काङ यिन, मेलोवा काङ यिन सिरुप ति बेकिवी।
ROM 2:16 दी ताम्‍ङे ति ङे ख्‍याप्‍टाक क्‍यावु लेन ल्‍यामुला सिक्‍यावु दोके येशू ख्रीष्‍ट नेसुर कोन्‍छ्‍योककी मीतिवी क्‍यावु छ्‍याकला वोतुप ताम्‍ङेतिवा तेरीकी खला ठिम कितुप तुजेला ठछ्‍येली हाक्‍कोकिवी।
ROM 2:17 दोजो ख्‍युरुङ ङ यहूदी यिन सिवी, ठिमला रेवा क्‍यानी कोन्‍छ्‍योक ताङ मुला तम्‍जी ल्‍यामु वे सिनी अम्‍बारङ्‍शिङ किवी,
ROM 2:18 तमा दोजो ख्‍युरुङ खोकी नोवा साङ हाक्‍कोकिवी, ख्‍युरुङ कोन्‍छ्‍योककी ठिम लापुप तप्‍की खक्‍छ्‍येवु ताम्‍ङेतिवा साङ गिवी सिनी सिवी,
ROM 2:19 तमा दोजो ख्‍युरुङ मिक शर्वाला लाम छ्‍या देन्‍दुप मी यिन, नक्‍तोमीला लाम माङ्‍येवु मीतिवाला लाम छ्‍या देन्‍दुप मी यिन सिनी सिवी,
ROM 2:20 तमा दोजो ख्‍युरुङ कोन्‍छ्‍योककी नङ्‍गुप तेरी ठिम नेसुर रिक्‍पा ताङ मिजी टेङ्‍बुकी कोर्ला हाक्‍कोवु तप्‍की अम्‍बारङ्‍शिङतिवाला मेलोवा गल्‍सिन ल्‍यामु जेवी, काङ साङ हाक्‍मोकोवु मीतिवाला येन्‍देन तेर्किवी सिनी सिवी सिसिन,
ROM 2:21 च्‍यिला ती ताम्‍ङे ति खुरुङ ति मालाप्‍नी मी यम्‍बातिवाला तिराङ लोप्‍किवी? दाक्‍पी कुन कितुप मेवी सिनी ख्‍यिरा मीतिवाला ति लोप्‍किवी, यिने ख्‍युरुङ ति च्‍यिला कुन किवी?
ROM 2:22 शम्‍डेन कितुप मेवी सिनी ख्‍योरो मीतिवाला लोप्‍किवी, यिने ख्‍युरुङ ति च्‍यिला शम्‍डेन किवी? तमा ख्‍युरुङ ल्‍हतिवाला ताङ्‍देन कितुप मेवी सिनी सिवी, यिने च्‍यिला ल्‍हङाङकी च्‍यालक राङ कुन किवी?
ROM 2:23 काङ ख्‍युरुङ कोन्‍छ्‍योककी नङ्‍गुप ठिमकी कोर्ला तेके किवी, यिने च्‍यिला ख्‍युरुङ ति खोकी ठिमला मातेन्‍नी खोला ताङ्‍देन मिकिवी?
ROM 2:24 ती तप्‍की कोन्‍छ्‍योककी सुङला “ख्‍यिरा तेन्‍दोककी यहूदी मिन्‍दुप मिरिक यम्‍बाकी मीतिवी कोन्‍छ्‍योकला मारे तोङ्‍गिवी।” सिनी टि वे।
ROM 2:25 दोजो ख्‍युरुङ कोन्‍छ्‍योककी नङ्‍गुप ठिमला युकिवी सिसिन यहूदीतिवी च्‍येतुप लुक्‍सु तेन्‍दुप साङ तेन्‍दोक वे, यिने ठिम मातेन्‍सुङ सिसिन च्‍येतुप लुक्‍सु तेन्‍दुप साङ तेन्‍दोक मे। ख्‍युरुङ ति यहूदी मिन्‍दुप मिरिक यम्‍बाकी मीतिवा दोके राङ यिन।
ROM 2:26 तुक क्‍यानी च्‍येतुप लुक्‍सु माक्‍यावु मिरिक यम्‍बाकी मीतिवी कोन्‍छ्‍योककी नङ्‍गुप ठिमला सिक्‍यावु दोके मिजी क्‍योङ्‍गिवी सिसिन च्‍येतुप लुक्‍सु मातेन्‍सिनाङ च्‍येतुप लुक्‍सु तेन्‍दुप यहूदीतिवा दोके मिन रो?
ROM 2:27 ती तप्‍की जुला च्‍येतुप लुक्‍सु माक्‍यावुतिवी कोन्‍छ्‍योककी नङ्‍गुप ठिमला वोतुप दोके मिजी क्‍योङ्‍गिवी सिसिन तिवी च्‍येतुप लुक्‍सु क्‍यासिनाङ कोन्‍छ्‍योककी ठिमला सिक्‍यावु दोके मिजी मोक्‍योङ्‍गुप मीतिवाला क्‍येन तेर्किवी।
ROM 2:28 तुक क्‍यानी ख तिराङकी ङ ति यहूदी यिन सिरुप ताङ च्‍येतुप लुक्‍सु क्‍यानी छ्‍या देन्‍दुप ति वुतुङ्‍की यहूदी मिन।
ROM 2:29 यिने वुतुङ्‍की यहूदी टेङ्‍बु ति खोरो सेमगी दिङ नेज्‍युनी कोन्‍छ्‍योककी ठिमला युकिवी। तमा वुतुङ्‍की च्‍येतुप लुक्‍सु क्‍यावु ति ठिमला सिक्‍यावु दोके जुला तिराङ कितुप मिन, कोन्‍छ्‍योककी थु चाङ्‍मा नेमा सेमला क्‍यावु यिन। तुका मीतिवाला मी नेसुर मिन, कोन्‍छ्‍योक नेमा ताङ्‍देन ङ्‍येकिवी।
ROM 3:1 तुकै यिन्‍सिन यहूदीतिवाला काङ ख्‍येप्‍साङ वे रो? यहूदीतिवी च्‍येतुप लुक्‍सु क्‍यासिमा काङ ख्‍येप्‍साङ गिवी रो?
ROM 3:2 ख्‍येप्‍साङ ति बङी वे। ती ति काङ यिन सिसिन थल्‍माला कोन्‍छ्‍योककी यहूदीतिवाला खोकी सुङ टेङ्‍बु ति चेक तेन नङ्‍गुप यिन।
ROM 3:3 दोजो तिवा ललाइकी ती सुङला तेपा माक्‍यासिन तिवी तेपा माक्‍यावु तप्‍की कोन्‍छ्‍योक ति खोङ्‍तेर्मु मेतुप कोन्‍छ्‍योक यिन रो?
ROM 3:4 तुकै मिन, च्‍यिलासिसिन कोन्‍छ्‍योक ति छासे टेङ्‍बु वोतुप कोन्‍छ्‍योक यिन, यिने मी ति जिनोक जोप यिन। तुक क्‍यानी कोन्‍छ्‍योककी सुङला “चोवोकी सुङ्‍गुप ताम्‍ङेला मी तेरीकी ती सुङ ति टेङ्‍बु वे सिनी सिवी। ठिम कितुप पेला साङ चोवोकी राङ ग्‍येल थुप्‍किवी।” सिनी टि वे।
ROM 3:5 दोजो दाक्‍पी दिक्‍पा क्‍यासिमा कोन्‍छ्‍योक ति टेङ्‍बु वोतुप कोन्‍छ्‍योक यिन सिरुप ति हाक्‍कोकिवी सिसिन दाक्‍पु काङ सिरुप? दाक्‍पुला पर्च्या तोङ्‍गुप कोन्‍छ्‍योक ति मेटेङ्‍बु यिन रो? माङ्‍शोक मीतिवी तुकै राङ नासाम तोङ्‍गिवी।
ROM 3:6 ती ताम्‍ङे ति तुकै मिन, कोन्‍छ्‍योक ति मेटेङ्‍बु वोतुप यिन्‍सिन चुक क्‍यानी जम्‍बुलिङला ठिम क्‍या नङ्‍गिवी रो?
ROM 3:7 दोजो मी ललाइकी “ङे जिनोक जोसिनाङ कोन्‍छ्‍योककी ङे जिनोक जोवु ताम्‍ङेतिवा पङ्‍गुप तप्‍की कोन्‍छ्‍योक ति खोङ्‍तेर्मु वोतुप ताङ खोला मोवा वोतुप ति छ्‍या देन्‍गिवी सिसिन ङ ति च्‍यिला दिक्‍छेन दोके च्‍युङ्‍नी पर्च्याला ख्‍येल्‍गिवी?” सिनी सि थुप्‍किवी रो?
ROM 3:8 दोजो मी ललाइकी दाक्‍पी “कोन्‍छ्‍योक नेमा ल्‍यामु च्‍युङ्‍शी सिनी लाका मेलोवा कितुप।” सिवी सिनी दाक्‍पुला ताम्‍ङे मेलोवा क्‍यासिन ती ताम्‍ङे मेलोवा सिरुप मीतिवाला कोन्‍छ्‍योककी पर्च्या फोकिवी।
ROM 3:9 तुकै यिन्‍सिन दाक्‍पु काङ सिरुप? दाक्‍पु यहूदीतिवा यहूदी मिन्‍दुप मिरिक यम्‍बाकी मीतिवा सिनाङ टेङ्‍बु वे रो? तुकै मिन। यहूदी ताङ यहूदी मिन्‍दुप मिरिक यम्‍बाकी मीतिवा तेरी दिक्‍पी ओङला राङ वे। दी ताम्‍ङे ति ङे गोमाला साङ सिक्‍यायी।
ROM 3:10 ती तप्‍की कोन्‍छ्‍योककी सुङला दुक सिनी टि वे, “कोन्‍छ्‍योककी थोङ्‍दाङला टेङ्‍बु वोतुप सु साङ मे, मिरा च्‍यिक साङ मे।
ROM 3:11 कोन्‍छ्‍योककी थोक्‍ला हाक्‍कोवु सु साङ मे, तमा कोन्‍छ्‍योकला छोलुप सु साङ मे।
ROM 3:12 मीतिवा तेरी ख्‍यप्‍नी गल वे, तमा तिवा तेरी फेन मोथोवु गल वे। सी साङ लाका ल्‍यामु मिकिवी, ल्‍यामु कितुप ति मिरा च्‍यिक साङ मे।”
ROM 3:13 “तिवी ख नेमा मी सेतुप ताम्‍ङे मेलोवा लप्‍किवी, तमा तिवी मीला जिनोक जोप ताम्‍ङे किवी।” “तुक क्‍यानी तिवी ख नेमा लापुप ताम्‍ङे ति रुलकी च्‍येलाकला वोतुप तुक दोके छासे मेलोवा वे।”
ROM 3:14 “तिवी ख नेमा मोताप ताङ ताम्‍ङे मेलोवा तिराङ थेन्‍गिवी।”
ROM 3:15 “तिवा मी सेतुपला टिम्‍बु टिम्‍बु युकिवी,
ROM 3:16 ती तप्‍की तिवा कनी डिवे, ते तिवी मी यम्‍बी लाकाला ना तोङ्‍गुप ताङ दुक्‍पा तेरुप लाका मेलोवातिवा किवी।
ROM 3:17 तिवी चुक क्‍यानी लोदिमु गिवी सिरुप ति हाक्‍माको वे।”
ROM 3:18 “तिवा कोन्‍छ्‍योकला काङ साङ ज्‍यिवा मिकिवी।”
ROM 3:19 दी मोशाकी ठिमला सिक्‍यावु तेरी ताम्‍ङे ति ठिमकी ओङला वोतुप मीतिवाला राङ सिक्‍यावु यिन सिरुप ति दाक्‍पुला छ्‍या वे। ती तप्‍की तेरी जम्‍बुलिङकी मीतिवा कोन्‍छ्‍योककी दोङ्‍ला ख चुम क्‍या देनी तेरी मीतिवा दिक्‍छेन यिनोक सिनी हाक्‍कोवा कि गोकिवी।
ROM 3:20 तुक क्‍यानी मोशाकी ठिमला वोतुप लाकातिवा तिराङ क्‍यानी मी सु साङ कोन्‍छ्‍योककी थोङ्‍दाङला टेङ्‍बु मेङ्‍येवी, च्‍यिलासिसिन मोशाकी ठिम नेसुर दाक्‍पी दिक्‍पाकी कोर्ला तिराङ हाक्‍कोकिवी।
ROM 3:21 यिने त याङ मोशाकी ठिम मेसिनाङ कोन्‍छ्‍योक नेमा वावु टेङ्‍बु ति छ्‍या तेन वे। तीकी कोर्ला मोशाकी ठिम ताङ कोन्‍छ्‍योककी लुङ्‍तेम्‍बातिवी गोमाला के पङ्‍बु बिन वे।
ROM 3:22 ती कोन्‍छ्‍योक नेमा वावु टेङ्‍बु ति येशू ख्रीष्‍टला तेपा क्‍यासिमा मी तेरीला वुङ्‍गुप यिन। खोकी सुला साङ नाम्‍साङ ख्‍ये मेबेवी।
ROM 3:23 च्‍यिलासिसिन मी तेरीकी दिक्‍पा क्‍यावु तप्‍की सु साङ मोवा वोतुप कोन्‍छ्‍योककी चिप्‍ला लेप मुथुप्‍नोक।
ROM 3:24 यिने कोन्‍छ्‍योक ति कटिन नङ्‍गुप कोन्‍छ्‍योक यिन। खोकी ख्रीष्‍ट येशू नेसुर थर्वा नङ्‍नी मीतिवाला गोङ ते मागोवा क्‍यानी टेङ्‍बु यिन सिनी खोरे सेमला लासुङ।
ROM 3:25 कोन्‍छ्‍योककी येशू ख्रीष्‍ट ग्‍यङ्‍शिङला टुङ च्‍यिनी खोकी ठक ति जिन्‍बा ताङ्‍सुङ। ती तप्‍की येशू ख्रीष्‍टकी ठक ति दाक्‍पी थोक्‍ला तेन्‍दुप यिन सिनी तेपा क्‍यासिमा दाक्‍पी दिक्‍पातिवा तेरी ताकिवी। कोन्‍छ्‍योककी तुक क्‍या नङ्‍गुप ति दाक्‍पी गोमाला क्‍यावु दिक्‍पाकी थोक्‍ला हम क्‍यासिमा पर्च्या माताङ्‍नी खो टेङ्‍बु वोतुप ति छ्‍या देन्‍दुपला यिन।
ROM 3:26 खोकी हम क्‍यानी पर्च्या माताङ्‍नी तन्‍दा दी कल्‍वाला टेङ्‍बु वोतुप छ्‍या तेन्‍दुप तेन्‍दोक ति खो टेङ्‍बु वोतुप ताङ येशूला तेपा कितुपतिवा तेरी टेङ्‍बु वोतुप ति मीतिवाला हाक्‍को ज्‍यितुपला यिन।
ROM 3:27 ती तप्‍की दाक्‍पु कङगी थोक्‍ला तेके किवी? कोन्‍छ्‍योककी थोङ्‍दाङला दाक्‍पु तेके कितुप काङ लाका माक्‍या वे। चुका ठिमकी थोक्‍ला तेके किवी? खोकी दोङ्‍ला तेके कितुप ति ठिमकी सिक्‍यावु दोके ल्‍यामु क्‍यानी युकुप नेसुर यिन? मिन, येशू ख्रीष्‍टला तेपा क्‍यावु तप्‍की यिन।
ROM 3:28 तुक क्‍यानी कोन्‍छ्‍योककी थोङ्‍दाङला टेङ्‍बु वोतुप ति मोशाकी ठिमला मिजी क्‍यङ्‍नी मिन, यिने येशू ख्रीष्‍टला तेपा क्‍यासिमा तिराङ टेङ्‍बु ङ्‍येकिवी।
ROM 3:29 काङ कोन्‍छ्‍योक ति यहूदीतिवी तिराङ कोन्‍छ्‍योक यिन रो? यहूदी मिन्‍दुप मिरिक यम्‍बाकी मीतिवी कोन्‍छ्‍योक मिन रो? वुतुङ के खो यहूदी मिन्‍दुप मिरिक यम्‍बाकी मीतिवी कोन्‍छ्‍योक साङ यिन।
ROM 3:30 कोन्‍छ्‍योक ति च्‍यिक राङ वोतुप यिन। तुक क्‍यानी खोकी यहूदीतिवी च्‍येतुप लुक्‍सु क्‍यावुतिवाला तिवी क्‍यावु तेपा थोङ्‍नी तिवा टेङ्‍बु वोतुप ङ्‍येकिवी, च्‍येतुप लुक्‍सु माक्‍यावुतिवाला साङ तिवी क्‍यावु तेपा थोङ्‍नी तिवा टेङ्‍बु वोतुप ङ्‍येकिवी।
ROM 3:31 तुकै यिन्‍सिन काङ दाक्‍पु येशूला तेपा क्‍यासिमा मोशाकी ठिम ति क्‍युर्नी ज्‍योकुप यिन रो? मिन, ती ठिमला मङ रम्‍बु जोनी ज्‍यकुप यिन।
ROM 4:1 तुक क्‍यानी दाक्‍पी हङ्‍गावा अब्राहाम ति कोन्‍छ्‍योककी थोङ्‍दाङला टेङ्‍बु वोतुप कोर्ला काङ हाक्‍कोसुङ?
ROM 4:2 दोजो अब्राहामकी लाका ल्‍यामु क्‍यानी टेङ्‍बु च्‍युङ्‍गुप यिन्‍सियाङ खोकी साङ तीकी थोक्‍ला तेके कि थुप्‍किवी, यिने कोन्‍छ्‍योककी थोङ्‍दाङला ति तेके कि मुथुपी।
ROM 4:3 च्‍यिलासिसिन कोन्‍छ्‍योककी सुङगी नाङ्‍ला “अब्राहामकी कोन्‍छ्‍योकला तेपा क्‍यावु तप्‍की खोकी तीला टेङ्‍बु वे सिनी सेमला लासुङ।” सिनी टि वे।
ROM 4:4 तमा लाका कितुप मीला ल तेरुप ति ज्‍यिन्‍दाककी कटिन नेसुर मिन, तीकी क्‍यावु लाकाकी ल बिन्‍दुप यिन।
ROM 4:5 चुका मी तीकी टेङ्‍बु वोतुप लाका ति मिकिवी, यिने कोन्‍छ्‍योक ति मी मेटेङ्‍बुतिवाला साङ टेङ्‍बु वे सिनी सेमला लिङ्‍गुप कोन्‍छ्‍योक यिन सिनी तेपा कितुप पेला तीकी क्‍यावु तेपाला टेङ्‍बु वे सिनी खोकी सेमला लिङ्‍गिवी।
ROM 4:6 ती तप्‍की लाका टेङ्‍बु माक्‍यानी साङ टेङ्‍बु वे सिनी खोकी सेमला लिङ्‍गुप मीतिवाला मोलाम थोपुप कोर्ला ग्‍येल्‍वु दाऊदकी दुक सिक्‍या वे,
ROM 4:7 “कोन्‍छ्‍योककी नङ्‍गुप ठिमला मातेन्‍सिनाङ तिवी दिक्‍पा तानी दिक्‍पा ने थरुप मीतिवाला मोलाम थोपुप यिनो।
ROM 4:8 चो दिक्‍पा क्‍यासिनाङ चोवो कोन्‍छ्‍योककी दिक्‍पा क्‍युर्नी बिन्‍दुप मी तीला मोलाम थोपुप यिनो।”
ROM 4:9 ती मोलाम ति यहूदी च्‍येतुप लुक्‍सु क्‍यावुतिवी थोक्‍ला तिराङ यिन की, च्‍येतुप लुक्‍सु माक्‍यावुतिवी थोक्‍ला साङ यिन? अब्राहामकी साङ तीकी क्‍यावु तेपा नेसुर राङ टेङ्‍बु वे सिनी कोन्‍छ्‍योककी सेमला लासुङ सिनी गोमाला सिक्‍यावु ताम्‍ङे नेसुर दाक्‍पी हाक्‍कोकिवी।
ROM 4:10 चुक क्‍यानी अब्राहामला टेङ्‍बु वे सिनी खोकी सेमला लिङ्‍गुप यिन? तीकी च्‍येतुप लुक्‍सु क्‍यावु तिङ्‍ला तीला टेङ्‍बु वे सिनी खोकी सेमला लिङ्‍गुप यिन की, ती सिनाङ गोमाला के तीला टेङ्‍बु वे सिनी सुङ्‍गुप यिन? तीला टेङ्‍बु वे सिनी खोकी सेमला लिङ्‍गुप ति च्‍येतुप लुक्‍सु क्‍यावु तिङ्‍ला मिन, गोमाला के यिन।
ROM 4:11 अब्राहामकी च्‍येतुप लुक्‍सु कितुप सिनाङ गोमाला कोन्‍छ्‍योकला तेपा क्‍यासुङ। ती तप्‍की तीकी च्‍येतुप लुक्‍सु क्‍यावु ति कोन्‍छ्‍योककी थोङ्‍दाङला टेङ्‍बु च्‍युङ्‍गुप यिन सिरुपला लज्‍युर ग्‍यकुप त तिराङ यिन। अब्राहाम ति च्‍येतुप लुक्‍सु माक्‍यासिनाङ कोन्‍छ्‍योकला तेपा क्‍यावु मीतिवा तेरीकी हङ्‍गावा च्‍युङ्‍गुप यिन। तुक क्‍यानी च्‍येतुप लुक्‍सु माक्‍यावुतिवाला साङ टेङ्‍बु वे सिनी कोन्‍छ्‍योककी सेमला लिङ्‍गिवी।
ROM 4:12 ती तिराङ मिन, अब्राहाम ति च्‍येतुप लुक्‍सु क्‍यावुतिवी हङ्‍गावा साङ यिन। च्‍येतुप लुक्‍सु क्‍यावु तिराङ मिन, च्‍येतुप लुक्‍सु कितुप सिनाङ गोमाला के कोन्‍छ्‍योकला तेपा कितुपतिवा तेरीकी हङ्‍गावा यिन।
ROM 4:13 तमा अब्राहाम ताङ खोकी गिपातिवाला ती जम्‍बुलिङ ति अंश ग्‍यप्‍नी नङ्‍गिवी सिनी कोन्‍छ्‍योककी थाक्‍छ्‍येन नङ्‍गुप ति तिवी मोशाकी ठिमला सिक्‍यावु दोके लाका क्‍यानी मिन, यिने तेपा क्‍यानी टेङ्‍बु च्‍युङ्‍गुप नेसुर यिन।
ROM 4:14 मोशाकी ठिमला दोके लाका कितुपतिवी अंश थोपुप यिन्‍सिन तेपा कितुप ति काङ साङ फेन मोथोवु ताङ खोकी थाक्‍छ्‍येन नङ्‍गुप ति तेर्मेला डिवी।
ROM 4:15 च्‍यिलासिसिन मोशाकी ठिमला वोतुप कतिवा मेङ्‍येन्‍दुपतिवा कोन्‍छ्‍योककी पर्च्याला ख्‍येल्‍गिवी, यिने ठिम मेतुप यिन्‍सिन ठिमला मेङ्‍येन्‍दुप साङ मेवी।
ROM 4:16 ती तप्‍की कोन्‍छ्‍योककी थाक्‍छ्‍येन नङ्‍गुप ति खोला तेपा कितुप मीतिवाला बिन्‍दुप यिन। ती थाक्‍छ्‍येतुप ति कोन्‍छ्‍योककी कटिन नेसुर वावु तप्‍की मोशाकी ठिमला युकुप मीतिवी थोक्‍ला तिराङ मिन, अब्राहामकी दोके तेपा कितुप तीकी गिपातिवा तेरीला तेरुप सिनी तेन्‍तेन क्‍यावु यिन। तुक क्‍यानी अब्राहाम ति तेपा कितुप मी तेरीकी हङ्‍गावा यिन।
ROM 4:17 ती ति कोन्‍छ्‍योककी अब्राहामला “ङ ख्‍युरुङला मिरिक बङीकी पपा जोयिनो।” सिनी खोकी सुङला टिवु दोके राङ यिन। ती थाक्‍छ्‍येन नङ्‍गुप ति अब्राहामकी तेपा क्‍यावु कोन्‍छ्‍योककी तेन्‍तेन क्‍या नङ्‍गुप यिन। खो ति शेपतिवाला मिजी नङ्‍गुप ताङ मेतुप च्‍यालकतिवाला वोतुप जो नङ्‍गुप कोन्‍छ्‍योक यिन।
ROM 4:18 अब्राहामला काङ रेवा मेसिनाङ कोन्‍छ्‍योकला तेपा क्‍यानी रेवा क्‍यावु तप्‍की खो मिरिक बङीकी हङ्‍गावा च्‍युङ्‍सुङ। ती ति कोन्‍छ्‍योककी अब्राहामला “ख्‍योरो गिपातिवा बङी फेल्‍गितो।” सिनी सुङ्‍गुप दोके राङ यिन।
ROM 4:19 तो मिसिन लो सयी लेपुप छलुप अब्राहाम शितुछ्‍येप ताङ पेर्मी साराला पेजा मेक्‍येवी सिरुप छ्‍या वोसिनाङ कोन्‍छ्‍योकला तेपा रम्‍बु क्‍यानी
ROM 4:20 कोन्‍छ्‍योककी थाक्‍छ्‍येन नङ्‍गुप ताम्‍ङेला च्‍यिक साङ नाम्‍दोक माक्‍या। बोरु तेपा रम्‍बु क्‍यानी कोन्‍छ्‍योकला मोवा क्‍यासुङ।
ROM 4:21 कोन्‍छ्‍योककी खोरो थाक्‍छ्‍येन नङ्‍गुप ति तेरी छे ज्‍यितुप ओङ वे सिनी अब्राहामकी तेन्‍तेन क्‍यासुङ।
ROM 4:22 तीकी कोन्‍छ्‍योकला तेपा क्‍यावु तप्‍की “अब्राहाम टेङ्‍बु वे सिनी कोन्‍छ्‍योककी सेमला लासुङ।” सिनी खोकी सुङला टि वे।
ROM 4:23 “अब्राहाम टेङ्‍बु वे सिनी कोन्‍छ्‍योककी सेमला लासुङ।” सिरुप सुङ ति अब्राहामकी थोक्‍ला तिराङ टिवु मिन,
ROM 4:24 येशू ख्रीष्‍टला शेप ने ङोसु लोङ्‍गुप कोन्‍छ्‍योकला तेपा क्‍यानी खोकी थोङ्‍दाङला टेङ्‍बु ङ्‍येतुप दाक्‍पु तेरीकी थोक्‍ला साङ टिवु यिन।
ROM 4:25 येशू ख्रीष्‍ट ति दाक्‍पी दिक्‍पी थोक्‍ला टुङ्‍सुङ, तमा दाक्‍पु कोन्‍छ्‍योककी थोङ्‍दाङला टेङ्‍बु ङ्‍येतुपला खो ङोसु लासुङ।
ROM 5:1 तुक क्‍यानी त याङ दाक्‍पु चोवो येशू ख्रीष्‍टला तेपा क्‍यानी कोन्‍छ्‍योककी थोङ्‍दाङला टेङ्‍बु ङ्‍येतुप तप्‍की येशू ख्रीष्‍ट नेसुर कोन्‍छ्‍योककी मुला तम्‍जी ल्‍यामु च्‍युङ वे।
ROM 5:2 दाक्‍पी येशू ख्रीष्‍टला तेपा क्‍यावु तप्‍की खोकी दाक्‍पुला कटिन नङ्‍नी वे। ती कटिनला राङ दाक्‍पु तसाम देनी वे। तमा ज्‍युक्‍थमाला कोन्‍छ्‍योककी दाक्‍पुला नङ्‍गुप मोवाकी थोक्‍ला रेवा क्‍यानी गा किवी।
ROM 5:3 तोजो तिराङ मिन, दाक्‍पु छेटाङला ख्‍येलुप पेला साङ गा क्‍यानी दे थुप्‍किवी। च्‍यिलासिसिन छेटाङ ख्‍येल्‍सिमा ती छेटाङकी राङ दाक्‍पुला हम क्‍या दे थुपुप जेवी।
ROM 5:4 दाक्‍पु हम क्‍या देसिमा दाक्‍पी किताङ नालु ल्‍यामु जेवी। तमा किताङ नालु ल्‍यामु च्‍युङ्‍सिमा दाक्‍पुला रेवा ङ्‍येकिवी।
ROM 5:5 तमा ती रेवा ङ्‍येसिमा दाक्‍पुला यिछ्‍येता मलङ्‍गिवी। च्‍यिलासिसिन कोन्‍छ्‍योककी दाक्‍पुला नङ्‍गुप थु चाङ्‍मा नेमा खोकी ङ्‍यिङ्‌ज्‍ये ति दाक्‍पी सेमला छासे क्‍यानी नाङ्‍सुङ।
ROM 5:6 तुक क्‍यानी दाक्‍पु दिक्‍पी ओङला शोर्नी काङ साङ कि मुथुपुप पेला राङ येशू ख्रीष्‍ट दाक्‍पी दिक्‍पी थोक्‍ला टेके तुजेला टुङ्‍सुङ।
ROM 5:7 ल्‍यामु वोतुप मी थोक्‍ला शेप ति मी चे चेयी वोज्‍यिवी, तमा टेङ्‍बु वोतुप मी थोक्‍ला शेप ति ललाइ ललाइ तिराङ वे।
ROM 5:8 यिने कोन्‍छ्‍योककी दाक्‍पु दिक्‍छेन वोसिनाङ दाक्‍पी दिक्‍पी थोक्‍ला येशू ख्रीष्‍ट टुङ च्‍यिनी खोकी दाक्‍पुला ङ्‍यिङ्‍ज्‍ये छ्‍या तेन्‍सुङ।
ROM 5:9 तुक क्‍यानी त याङ खोकी ठक नेसुर दाक्‍पु कोन्‍छ्‍योककी थोङ्‍दाङला टेङ्‍बु ङ्‍येतुप तप्‍की वुतुङ के ख्रीष्‍ट नेसुर दाक्‍पु कोन्‍छ्‍योककी पर्च्या नेमा र्‍होकिवी सिरुप ति मङ तेन्‍तेन वे।
ROM 5:10 च्‍यिलासिसिन दाक्‍पु कोन्‍छ्‍योक ताङ मुला डला गल वोसिनाङ खोकी सेवु येशू ख्रीष्‍ट टुङ्‍नी दाक्‍पु कोन्‍छ्‍योक ताङ मुला डिक्‍नी तम्‍जी ल्‍यामु च्‍युङ वे। तुक क्‍यासिन त याङ येशू ख्रीष्‍ट ङोसु वोतुप तप्‍की वुतुङ के दाक्‍पु दिक्‍पा ने थरुप ति मङ तेन्‍तेन वे।
ROM 5:11 तोजो तिराङ मिन, दाक्‍पी चोवो येशू ख्रीष्‍ट नेसुर दाक्‍पु कोन्‍छ्‍योक ताङ मुला तम्‍जी ल्‍यामु च्‍युङ्‍गुप तप्‍की खोकी दाक्‍पी थोक्‍ला क्‍या नङ्‍गुप लाकाकी जोसालेन्‍सिन त याङ दाक्‍पु छासे गा लानी वे।
ROM 5:12 तुक क्‍यानी मी च्‍यिककी दिक्‍पा क्‍यावु तप्‍की दी जम्‍बुलिङला दिक्‍पा वानी ती दिक्‍पाकी जोसालेन्‍सिन मी ति शेपला ख्‍येल्‍सुङ। ती दोके तेरी मीतिवी दिक्‍पा क्‍यावु तप्‍की शेप ति तेरी मीतिवा खला ख्‍येल्‍सुङ।
ROM 5:13 कोन्‍छ्‍योककी मोशाला ठिम नङ्‍गुप सिनाङ गोमाला दी जम्‍बुलिङला दिक्‍पा नोक, यिने दिक्‍पाकी कोर्ला ठिम मेतुप तप्‍की दिक्‍पाकी छ्‍येर्पा साङ मिन्‍दुक।
ROM 5:14 आदमकी ङो नेज्‍यु मोशाकी ङो सेक आदमकी क्‍यावु दिक्‍पा दोके माक्‍यावु मीतिवी खला साङ शेपकी ग्‍येला क्‍यासुङ। ती आदम ति तिङ्‍ला फेपुप ख्रीष्‍टकी नमुना यिन।
ROM 5:15 यिने आदमकी दिक्‍पा ताङ कोन्‍छ्‍योककी कटिन नेमा वावु ङ्‍येम्‍बा ति कुतुक कुतुक यिन। च्‍यिलासिसिन आदमकी दिक्‍पा क्‍यावु तप्‍की मी बङी शिसुङ, यिने कोन्‍छ्‍योककी कटिन ताङ, येशू ख्रीष्‍ट मी च्‍यिककी कटिन नेसुर वावु ङ्‍येम्‍बा ति मी बङीकी थोक्‍ला ग्‍यक्‍चे क्‍यानी च्‍युङ्‍सुङ।
ROM 5:16 कोन्‍छ्‍योककी नङ्‍गुप कटिनकी ङ्‍येम्‍बा ति आदमकी क्‍यावु दिक्‍पाकी क्‍येन दोके मिन। च्‍यिलासिसिन आदम मी च्‍यिककी क्‍यावु दिक्‍पाकी जोसालेन्‍सिन तेरी मीतिवा कोन्‍छ्‍योककी पर्च्याला ख्‍येल्‍सुङ, यिने तेरी मीतिवी दिक्‍पा बङी क्‍यासिनाङ कोन्‍छ्‍योककी कटिनकी ङ्‍येम्‍बा नङ्‍नी मीतिवा तेरीला कोन्‍छ्‍योककी थोङ्‍दाङला टेङ्‍बु ङ्‍येतुप जेवी।
ROM 5:17 आदमकी क्‍यावु दिक्‍पाकी जोसालेन्‍सिन तेरी मीतिवा दिक्‍पाला शोर्नी शेपकी ग्‍येला किवी, यिन्‍सिनाङ कोन्‍छ्‍योककी ग्‍यक्‍चे वोतुप कटिन ताङ टेङ्‍बुकी ङ्‍येम्‍बा थोपुप मीतिवा ति येशू ख्रीष्‍ट मी च्‍यिक नेमा तिवी मिजीला ग्‍येला किवी सिरुप ति मङ तेन्‍तेन वे।
ROM 5:18 तुक क्‍यानी मी मिरा च्‍यिककी क्‍यावु दिक्‍पाकी जोसालेन्‍सिन तेरी मीतिवाला कोन्‍छ्‍योककी पर्च्या फोक्‍सुङ। तुक राङ क्‍यानी मी मिरा च्‍यिककी लाका टेङ्‍बु क्‍यावु तप्‍की तेरी मीतिवाला मिजी नङ्‍गुप कोन्‍छ्‍योककी थोङ्‍दाङला टेङ्‍बु वोतुप ङ्‍येसुङ।
ROM 5:19 च्‍यिलासिसिन आदम मी च्‍यिककी कोन्‍छ्‍योककी कला माङ्‍येन्‍दुप तप्‍की मी बङी दिक्‍छेन च्‍युङ्‍गुप दोके त याङ येशू ख्रीष्‍ट मी च्‍यिककी कोन्‍छ्‍योककी कला ङ्‍येन्‍दुप तप्‍की मी बङीला दिक्‍पा ने थर्नी टेङ्‍बु च्‍युङ्‍सुङ।
ROM 5:20 मोशाकी ठिम ति जम्‍बुलिङला वावु दुक्‍चे क्‍येनतिवा बङी फेलुपला यिन। यिन्‍सिनाङ दिक्‍पा बङी फेलुप तप्‍की कोन्‍छ्‍योककी कटिन साङ मङ फेल्‍सुङ।
ROM 5:21 तुक क्‍यानी दिक्‍पाकी जोसालेन्‍सिन मीतिवा तेरीकी खला शेपकी ग्‍येला कितुप दोके कोन्‍छ्‍योककी कटिन साङ टेङ्‍बु वोतुप नेसुर ग्‍येला किवी। तमा दाक्‍पी चोवो येशू ख्रीष्‍ट नेमा दाक्‍पुला नाम्‍साङ मिशिवु मिजी नङ्‍गिवी।
ROM 6:1 तुकै यिन्‍सिन त ङ्‍यिराङ काङ सिरुप? दाक्‍पी लाका मेलोवा क्‍यासिनाङ कोन्‍छ्‍योककी दाक्‍पुला कटिन नङ्‍गिवी सिनी दाक्‍पु येलुङ दिक्‍पा क्‍या क्‍यावा देकिवी रो?
ROM 6:2 तुकै मिन, काङ दिक्‍पी जोसालेन्‍सिन दाक्‍पु शिसुङ, यिने च्‍यिला येलुङ दिक्‍पा क्‍या क्‍यावा राङ देकिवी?
ROM 6:3 ख्‍यिराङला छ्‍या राङ वे, दाक्‍पु तेरीकी बप्‍तिस्‍मा लासिमा येशू ख्रीष्‍ट ताङ मुला च्‍यिक्‍पा राङ च्‍युङ्‍गुप यिन। तीकी तेन्‍दोक ति दाक्‍पु बप्‍तिस्‍मा लङ्‍गुप पेला दाक्‍पी मिजी ङ्‍यिङ्‍बा ति खोकी मुला राङ शेप यिन।
ROM 6:4 तुक क्‍यानी दाक्‍पु बप्‍तिस्‍मा लावु तप्‍की खोकी मुला राङ शिनी मुक्‍तुम ग्‍यपुप यिन। तमा कोन्‍छ्‍योककी मोवाकी थोक्‍ला येशू ख्रीष्‍ट टुङ्‍नी ङोसु लावु दोके दाक्‍पु साङ खो ताङ मुला मिजी सम्‍बा क्‍योङ्‍गिवी।
ROM 6:5 दोजो दाक्‍पु खोकी मुला राङ शिनी खो ताङ च्‍यिक्‍पा राङ च्‍युङ्‍सिन वुतुङ के दाक्‍पु टुङ्‍नी ङोसु लावु खो ताङ मुला साङ च्‍यिक्‍पा राङ च्‍युङ्‍गिवी।
ROM 6:6 दाक्‍पी दिक्‍पा वोतुप मिजी ति ना डोशी, तमा येलुङ दाक्‍पु दिक्‍पी ओङला मेख्‍येल्‍शी सिनी दाक्‍पी मिजी ङ्‍यिङ्‍बा ति खो ताङ मुला राङ ग्‍यङ्‍शिङ लोला कल्‍नी शेप यिन सिरुप ति दाक्‍पुला छ्‍या वे।
ROM 6:7 च्‍यिलासिसिन मी शिसिमा दिक्‍पाकी तीला ओङ्‍ज्‍येन कि मुथुपी।
ROM 6:8 तुक क्‍यानी दाक्‍पु येशू ख्रीष्‍टकी मुला राङ शेप यिन्‍सिन खोकी मुला राङ ङोसु साङ लङ्‍गिवी सिनी दाक्‍पी तेपा किवी।
ROM 6:9 ख्रीष्‍ट टुङ्‍नी येलुङ ङोसु लावु यिन। त याङ खो नाम्‍साङ मुटुङ्‍गिवी, च्‍यिलासिसिन शेपकी खोला काङ साङ कि मुथुपी सिरुप ति दाक्‍पुला छ्‍या वे।
ROM 6:10 येशू ख्रीष्‍ट थेङ्‍मा च्‍यिक राङ दिक्‍पी थोक्‍ला टुङ्‍गुप यिन। त याङ खो ङोसु लानी कोन्‍छ्‍योककी थोक्‍ला ङोसु ज्‍युकिवी।
ROM 6:11 तुक राङ क्‍यानी ख्‍यिराङ साङ दाक दाक्‍पी दिक्‍पी थोक्‍ला शेप यिन, यिने त याङ येशू ख्रीष्‍ट ताङ मुला राङ कोन्‍छ्‍योककी थोक्‍ला सेन्‍बु लावु यिन सिनी नासाम तोङ गोकिवी।
ROM 6:12 ती तप्‍की तफेन्‍ला ख्‍यिरा शिनी डोप जु ति दिक्‍पी ओङला ख्‍येल माज्‍यी, ख्‍यिरा मिजीला ख्‍यिरा जुकी सेम मेलोवाकी ग्‍येला कि माज्‍यी।
ROM 6:13 रङगी जुकी येन्‍लकतिवा ति लाका मेटेङ्‍बु कितुपला दिक्‍पाला माबिन, यिने ख्‍यिराङ शिनी साङ सेन्‍बु लावु मी यिन्‍दुप तप्‍की ख्‍यिरा मिजी तेरी कोन्‍छ्‍योकला पुल। रङगी जुकी येन्‍लकतिवा ति कोन्‍छ्‍योककी थोङ्‍दाङला टेङ्‍बु वोतुप लाका कितुपला पुल।
ROM 6:14 तुक क्‍यासिन दिक्‍पाकी ख्‍यिरा मिजीला ग्‍येला मिकिवी, च्‍यिलासिसिन ख्‍यिराङ ठिमकी ओङला मिन, कोन्‍छ्‍योककी नङ्‍गुप कटिनकी ओङला वे।
ROM 6:15 तुकै यिन्‍सिन काङ कि गोकिवी? त दाक्‍पु ठिमकी ओङला मेनी कटिनकी ओङला वे। तुक क्‍यानी येलुङ दिक्‍पा राङ कितुप्‍जा? तुकै ति मिन।
ROM 6:16 ख्‍यिराङ सी खला ङ्‍येन्‍नी तीकी योक्‍पु किवे, ख्‍यिराङ तीकी योक्‍पु यिन सिनी छ्‍या मे? ती दोके ख्‍यिराङ दिक्‍पाकी ओङला देतुप यिन्‍सिन ख्‍यिराङ दिक्‍पाकी योक्‍पु च्‍युङ्‍नी शिवी, याङ्‍ना कोन्‍छ्‍योककी कला ङ्‍येन्‍सुङ सिसिन खोकी थोङ्‍दाङला ख्‍यिराङ टेङ्‍बु च्‍युङ्‍गिवी।
ROM 6:17 यिने कोन्‍छ्‍योकला थुचिछे बुल गोकिवी, च्‍यिलासिसिन तोङ्‍ला ख्‍यिराङ थेङ्‍मा यी दिक्‍पाकी योक्‍पु च्‍युङ्‍नी वे, यिने त याङ ङ्‍यिरा ख्‍यिराङला कोन्‍छ्‍योककी कोर्ला नङ्‍गुप येन्‍देन ति टेङ्‍बु नोक सिनी ख्‍यिरा सेमगी दिङ नेज्‍युनी ङ्‍येन्‍दुप तप्‍की
ROM 6:18 ख्‍यिराङ दिक्‍पा ने थर्नी कोन्‍छ्‍योककी थोङ्‍दाङला लाका टेङ्‍बु कितुप योक्‍पु च्‍युङ्‍नी वे।
ROM 6:19 दी ताम्‍ङे ति ख्‍यिराङला हाक्‍कोवु कले वे। ती तप्‍की ङ ख्‍यिरा हाक्‍कोवु ग्‍येतामला सिरिन। च्‍यिलासिसिन तोङ्‍ला ख्‍यिराङ थेङ्‍मा यी ख्‍यिरा रङगी जुकी येन्‍लकतिवा मेटेङ्‍बु कितुप ताङ छासे दुक्‍चे क्‍येनकी लाका कितुपला योक्‍पु दोके च्‍युङ्‍सुङ, यिने त याङ ती ख्‍यिरा जुकी येन्‍लकतिवा कोन्‍छ्‍योककी थोङ्‍दाङला टेङ्‍बु कितुप योक्‍पु दोके खोला चेक ते।
ROM 6:20 तोङ्‍ला ख्‍यिराङ दिक्‍पी ओङला ख्‍येल्‍नी वोतुप पेला कोन्‍छ्‍योककी थोङ्‍दाङला टेङ्‍बु कितुप नो माक्‍या।
ROM 6:21 ती पेला ख्‍यिरा क्‍यावु लाकातिवा नेसुर काङ ङ्‍येसुङ? तन्‍दा नासाम तोङ्‍गुप पेला छासे ङोछा लङ्‍गुप लाका मेलोवा तिराङ क्‍यासुङ। ती तेरी लाकातिवी छ्‍येर्पा ति शेप यिन।
ROM 6:22 यिने त याङ ख्‍यिराङ दिक्‍पा ने थर्नी कोन्‍छ्‍योककी थोक्‍ला शब्‍ज्‍यी कितुप च्‍युङ्‍गुप तप्‍की ख्‍यिराङ कोन्‍छ्‍योककी थोङ्‍दाङला टेङ्‍बु ङ्‍येनी ख्‍यिराङला नाम्‍साङ मिशिवु मिजी थोप्‍नी वे।
ROM 6:23 च्‍यिलासिसिन दिक्‍पा क्‍यावु छ्‍येर्पा ति शेप यिन, यिने कोन्‍छ्‍योककी नङ्‍गुप कटिनकी ङ्‍येम्‍बा ति दाक्‍पी चोवो येशू ख्रीष्‍टला तेपा क्‍यासिमा थोपुप नाम्‍साङ मिशिवु मिजी यिन।
ROM 7:1 अच्‍युनुपतिवा, दी ताम्‍ङे ति ङ ठिमकी कोर्ला हाक्‍कोवुतिवाला सिरिन। मी ति सेन्‍बु वोता सेक ठिमकी ओङला लुकिवी सिरुप ति ख्‍यिराङला छ्‍या मे?
ROM 7:2 तीकी कोर्ला ङ ख्‍यिराङला पे यी शेतिन। पुम्‍पेजा मिरा च्‍यिककी जेन्‍दी क्‍यासिमा तीकी ख्‍योवा वोता सेक ख्‍योवी ओङला देकिवी। यिने तीकी ख्‍योवा शिसुङ सिसिन ती ति ख्‍योवी ओङ नेसुर थर्किवी।
ROM 7:3 तुक क्‍यानी ख्‍योवा माशि वोतुप पेला राङ तीकी मी यम्‍बी मुला जेन्‍दी क्‍यासिन तीकी शम्‍डेन क्‍यावु यिन, यिने ख्‍योवा शिसिमा मी यम्‍बी मुला जेन्‍दी क्‍यासिन ख्‍योवी ओङ नेसुर थरुप तप्‍की तीकी शम्‍डेन क्‍यावु मिन।
ROM 7:4 ती तप्‍की अच्‍युनुपतिवा, ख्‍यिराङ ख्रीष्‍ट ताङ मुला ठिमकी थोक्‍ला साङ शिसुङ। तुक क्‍यानी ख्‍यिराङ साङ ठिमकी ओङ नेसुर थर्नी शेप नेसुर ङोसु लावु ख्रीष्‍टकी मुला च्‍यिक्‍पा राङ च्‍युङ वे। तुक क्‍यानी ख्‍यिराङ डेलु गरुप दोके कोन्‍छ्‍योककी थोक्‍ला लाका ल्‍यामु कि गोकिवी।
ROM 7:5 तोङ्‍ला दाक्‍पु दिक्‍पी ओङला मिजी क्‍योङ्‍यिन वोतुप पेला ठिम नेसुर दाक्‍पुला लाका मेलोवा कितुप नासाम वानी तीकी दाक्‍पुला ज्‍युक्‍ला शि ज्‍यितुप दिक्‍पा कि च्‍यिसुङ।
ROM 7:6 यिने त याङ दाक्‍पु ठिमकी थोक्‍ला शिनी ठिमकी ओङ ने थर्नी वे। तुक क्‍यानी तन्‍दा दाक्‍पु ठिमकी थेप नाङ्‍ला टि वोतुप दोके किताङ नालु ङ्‍यिङ्‍बा मिन, कोन्‍छ्‍योककी थु चाङ्‍माकी सुङ्‍गुप किताङ नालु सम्‍बा क्‍यानी कोन्‍छ्‍योकला शब्‍ज्‍यी बुल्‍गिवी।
ROM 7:7 त ङ्‍यिराङ काङ सिरुप? काङ ठिम ति दिक्‍पा यिन रो? तुकै मिन। दोजो मोशाकी ठिम मेतुप यिन्‍सिन दिक्‍पा काङ यिन सिरुप ति ङला हाक्‍मोकोवी। ठिमकी थेप नाङ्‍ला ख्‍युरुङ देर्पा माकी सिनी सिमाक्‍यावु यिन्‍सिन देर्पा काङ यिन सिरुप ति ङला हाक्‍मोकोवुजा।
ROM 7:8 यिने ठिमकी नाङ्‍ला वोतुप कोन्‍छ्‍योककी कला देर्पा माकी सिनी सिमाक्‍यावु पेला च्‍यु ल्हानी ङला तेरी परकी देर्पा कितुप नासामतिवा शार्सुङ। तुक क्‍यानी ठिम मेतुप यिन्‍सिन दिक्‍पा ति शेप यिन।
ROM 7:9 गोमाला ठिम मेतुप पेला ङ सेन्‍बु राङ वोतुप्‍जा, यिने कोन्‍छ्‍योककी क वासिमा दिक्‍पा काङ यिन सिरुप ताङ ङ दिक्‍छेन यिन सिरुप ति ङे हाक्‍कोसुङ। तुक क्‍यानी ङ ति दिक्‍पाला शोर्नी शेपला ख्‍येल्‍सुङ।
ROM 7:10 तमा कोन्‍छ्‍योककी मिजी तेरुपला थाक्‍छ्‍येन नङ्‍गुप क वासिमा ङ ति शेपला ख्‍येलुप यिन सिनी ङे हाक्‍कोसुङ।
ROM 7:11 तमा ती कोन्‍छ्‍योककी नङ्‍गुप क नेसुर राङ दिक्‍पाकी च्‍यु ल्हानी ङला जिनोक जोसिमा ङला सेसुङ।
ROM 7:12 तुक क्‍यानी मोशाकी ठिम ति टेङ्‍बु यिन, ठिमला वोतुप क साङ चाङ्‍मा ताङ टेङ्‍बु ताङ ल्‍यामु वे।
ROM 7:13 काङ तुकै यिन्‍सिन ती ल्‍यामु वोतुप तीकी ङला सेतुप यिन रो? तुकै मिन। दिक्‍पा काङ यिन सिरुप ति छ्‍या देन्‍दुपला दिक्‍पाकी ल्‍यामु वोतुप ठिम थ्‍वोनी ङला सेतुप यिन। तुक क्‍यानी ठिमकी क नेसुर दिक्‍पा ति मङ मेलोवा वोतुप च्‍युङ्‍सुङ।
ROM 7:14 ठिम ति कोन्‍छ्‍योककी थु चाङ्‍माकी नङ्‍गुप यिन सिरुप ति दाक्‍पुला छ्‍या वे। यिने ङ ति चाङ्‍मा मेतुप तप्‍की दिक्‍पाकी योक्‍पु च्‍युङ्‍गुप यिन।
ROM 7:15 ङ काङ कियी वे सिरुप ति ङला हाक्‍मोकोवी। ङे काङ कितुप नोक्‍यावे, ती ति मिकिवी। यिने ङे काङ मिकी सिनी नोक्‍यावे, ती ति किवी।
ROM 7:16 दोजो ङे नो माक्‍यावु लाका क्‍यासुङ सिसिन ङ ती ठिम ति ल्‍यामु यिन सिनी ङ्‍येनिन।
ROM 7:17 तुक क्‍यानी तसाम ङे क्‍यावु लाका मेलोवा ति ङे क्‍यावु मिन, यिने ङे सेमला वोतुप दिक्‍पाकी कि च्‍यितुप यिन।
ROM 7:18 तुक क्‍यानी दी ताम्‍ङे ति ङला छ्‍या वे। ङे मिजीला ताम्‍ङे ल्‍यामु काङ साङ मे। च्‍यिलासिसिन काङ ल्‍यामु नोके ती लाका ति कितुप सिनी ङे नोक्‍यासिनाङ ती ति ङे कि मुथुपी।
ROM 7:19 ङे काङ लाका ल्‍यामु कितुप नो क्‍यावे, ती ति मिकिवी। यिने ङे कितुप नो माक्‍यावु लाका मेलोवा ति ङे किवी।
ROM 7:20 चुका ति ङे मिकी सिनी नो क्‍यावे, ती ति क्‍यासुङ सिसिन ती कितुप ति ङ मिन, यिने ङे नाङ्‍ला वोतुप दिक्‍पाकी कि च्‍यितुप यिन।
ROM 7:21 तुक क्‍यानी ङे हाक्‍कोवु खक्‍छ्‍येवु ताम्‍ङे ति काङ यिन सिसिन ङला ल्‍यामु कितुप नासाम वोसिनाङ दुक्‍टा कि ज्‍यितुप डे ति ङे मुला वोतुप यिन।
ROM 7:22 ङे सेमगी दिङ नेज्‍युनी कोन्‍छ्‍योककी ठिमला वोतुप दोके लाका कितुप गा लासिनाङ
ROM 7:23 ङे सेमला वोतुप यम्‍बा ठिम दुक्‍टाकी नासाम कुतुक शर्किवी। ती ठिम ति कोन्‍छ्‍योककी ठिमला गा लङ्‍गुप ङे सेमगी ठिम ताङ मुला कशेन माडिक्‍नी ङे मिजीला वोतुप दिक्‍पी ठिमला शोर्किवी।
ROM 7:24 त ङ काङ कितुप्‍जा, ङ दिक्‍पी ओङला ख्‍येल्‍नी टला छ्‍याक्‍पा गाल्‍सुङ। सी ङला दिक्‍पा नेसुर वुङ्‍गुप शेप ने थर ज्‍यि थुप्‍किवी?
ROM 7:25 कोन्‍छ्‍योकला थुचिछे बुलिन, च्‍यिलासिसिन खोकी दाक्‍पी चोवो येशू ख्रीष्‍ट नेसुर ङला शेप ने थर ज्‍यिकिवी। ती तप्‍की ङ ङे सेमला ति कोन्‍छ्‍योककी ठिमला शब्‍ज्‍यी बुलिन, यिने ङे दिक्‍पी किताङ नालु तीकी दिक्‍पाकी ठिमला शब्‍ज्‍यी किवी।
ROM 8:1 तुक क्‍यानी त याङ येशू ख्रीष्‍टला तेपा कितुपतिवाला कोन्‍छ्‍योककी पर्च्या मोफोकिवी।
ROM 8:2 च्‍यिलासिसिन येशू ख्रीष्‍टला तेपा क्‍यासिमा मिजी सम्‍बा नङ्‍गुप कोन्‍छ्‍योककी थु चाङ्‍माकी ठिमकी ख्‍यिराङला दिक्‍पा ताङ शेपकी ठिम ने थर च्‍यिन वे।
ROM 8:3 मीतिवाला दिक्‍पा वोतुप तप्‍की मोशाकी ठिमकी काङ साङ कि मुथुप्‍नोक, यिने कोन्‍छ्‍योककी तिवी थोक्‍ला क्‍यासुङ। तीकी तेन्‍दोक ति खोकी च्‍यिक राङ वोतुप सेवु येशू ख्रीष्‍ट ति दिक्‍छेन दोके दी जम्‍बुलिङला ताङ्‍नी मीतिवी दिक्‍पी थोक्‍ला जिन्‍बा च्‍युङ्‍सुङ। तमा मीतिवी क्‍यावु दिक्‍पाकी छ्‍येर्पा ति खोकी खला ख्‍येल च्‍यिसुङ।
ROM 8:4 तुक क्‍यावु ति दिक्‍पाकी ओङला मिन, कोन्‍छ्‍योककी थु चाङ्‍माकी ओङला युकुप दाक्‍पी थोक्‍ला कोन्‍छ्‍योककी ठिमकी सिक्‍यावु दोके तेरी छे ज्‍यितुपला यिन।
ROM 8:5 दिक्‍पाकी ओङला युकुपतिवा ति दिक्‍पी नासाम तोङ्‍गिवी, यिने कोन्‍छ्‍योककी थु चाङ्‍माकी ओङला युकुपतिवा ति थु चाङ्‍माकी नासाम तोङ्‍गिवी।
ROM 8:6 दिक्‍पी नासाम ति शेप यिन, यिने कोन्‍छ्‍योककी थु चाङ्‍माकी नासाम ति मिजी ताङ लोदिमु यिन।
ROM 8:7 तमा दिक्‍पी नासाम ताङ्‍नी युकुप ति कोन्‍छ्‍योक ताङ मुला डला गलुप यिन, च्‍यिलासिसिन तुका मी ति कोन्‍छ्‍योककी नङ्‍गुप ठिमला सिक्‍यावु दोके युकुप साङ मुयुकिवी, कितुप साङ मुथुपी।
ROM 8:8 तुक क्‍यानी दिक्‍पी नासाम ताङ्‍नी युकुप मी तीकी कोन्‍छ्‍योकला गा लोङ मुथुपी।
ROM 8:9 यिने कोन्‍छ्‍योककी थु चाङ्‍मा ख्‍यिरा मिजीला वोसिन ख्‍यिराङ दिक्‍पाकी ओङला देतुप मिन, कोन्‍छ्‍योककी थु चाङ्‍माकी ओङला मिजी क्‍योङ्‍गुप यिन। तुक क्‍यानी सी मुला ख्रीष्‍टकी थु मेवे, ती ति ख्रीष्‍टकी मी मिन।
ROM 8:10 दोजो ख्‍यिरा मिजीला ख्रीष्‍ट येशू वोसिन ख्‍यिरा जु ति दिक्‍पा क्‍यावु तप्‍की शिसिनाङ कोन्‍छ्‍योककी थोङ्‍दाङला टेङ्‍बु वोतुप तप्‍की ख्‍यिरा सेम ति सेन्‍बु लुकिवी।
ROM 8:11 दोजो येशूला शेप ने ङोसु लोङ्‍गुप कोन्‍छ्‍योककी थु चाङ्‍मा ति ख्‍यिरा मिजीला ज्‍यु वोसुङ सिसिन, येशूला शेप ने ङोसु लोङ्‍गुप कोन्‍छ्‍योककी ख्‍यिरा मुला ज्‍यु वोतुप खोकी थु चाङ्‍मा नेमा ख्‍यिरा शेप जु साङ सेन्‍बु लोङ्‍गिवी।
ROM 8:12 तुक क्‍यानी अच्‍युनुपतिवा, कोन्‍छ्‍योककी थु चाङ्‍माकी दाक्‍पुला सुङ्‍गुप दोके क्‍यानी दाक्‍पी मिजी क्‍योङ गोकिवी, दिक्‍पाकी ओङला सेम नोजु क्‍यानी मिजी क्‍योङ्‍गुप मेवी।
ROM 8:13 दोजो ख्‍यिराङ दिक्‍पाकी ओङला सेम नोजु क्‍यानी राङ मिजी क्‍योङ्‍गिवी सिसिन शिवी, यिने कोन्‍छ्‍योककी थु चाङ्‍माकी ओङ नेसुर ख्‍यिरा दिक्‍पाकी ओङला मिजी क्‍योङ्‍गुप क्‍युर्सुङ सिसिन ख्‍यिराङ सेन्‍बु लुकिवी।
ROM 8:14 च्‍यिलासिसिन सु कोन्‍छ्‍योककी थु चाङ्‍माकी सिक्‍यावु दोके मिजी क्‍योङ्‍गिवे, तिवा तेरी कोन्‍छ्‍योककी पेजातिवा यिन।
ROM 8:15 त याङ ख्‍यिराङ ज्‍यिवा लङ्‍गुप दिक्‍पाकी ओङला मिन, कोन्‍छ्‍योककी थु चाङ्‍माकी ओङ थोपुप तप्‍की ख्‍यिराङ कोन्‍छ्‍योककी पेजातिवा यिन। तुक क्‍यानी दाक्‍पी कोन्‍छ्‍योकला “पपा” सिनी सि थुप्‍किवी।
ROM 8:16 तमा कोन्‍छ्‍योककी थु चाङ्‍माकी दाक्‍पी सेम ताङ मुला राङ दाक्‍पु ति कोन्‍छ्‍योककी पेजातिवा यिन सिरुप ति पङ्‍बु नङ्‍गिवी।
ROM 8:17 दाक्‍पु कोन्‍छ्‍योककी पेजातिवा यिन सिसिन ख्रीष्‍टकी मुला राङ कोन्‍छ्‍योककी ग्‍येल्‍खापकी अंश थोप छ्‍योवु यिन। दोजो दाक्‍पु ख्रीष्‍टकी मुला राङ कोन्‍छ्‍योककी मोवा थोप्‍नी वोसिन खोकी मुला राङ दुक्‍पा साङ खुर गोकिवी।
ROM 8:18 तसाम पेला दी मिजीला दाक्‍पुला वुङ्‍गुप दुक्‍पा ताङ ज्‍युक्‍ला दाक्‍पुला ङ्‍येतुप कोन्‍छ्‍योककी मोवा ति डिक्‍नी ल्‍हासिन ती दुक्‍पा ति काङ साङ मिन सिनी नासाम शर्किवी।
ROM 8:19 कोन्‍छ्‍योककी ज्‍ये नङ्‍गुपतिवा तेरीकी खोकी पेजातिवा वुङ्‍गुप ति ल्‍हापला छासे रेवा क्‍यानी गुनी देन वे।
ROM 8:20 च्‍यिलासिसिन खोकी ज्‍ये नङ्‍गुपतिवा तेरी फेन मोथोवु गल वे, ती ति खुरुङ राङ तुकै गलुप मिन, खोकी नोवाकी राङ जो नङ्‍गुप यिन। यिने तिवाला रेवा ति वे।
ROM 8:21 ती रेवा ति खोकी ज्‍ये नङ्‍गुपतिवा तेरी ना डोप ने र्‍होक्‍नी तिवा खोकी पेजातिवाला नङ्‍गुप मोवा वोतुप रङ्‍ज्‍येन थोपुप रेवा यिन।
ROM 8:22 तसाम सेक खोकी ज्‍ये नङ्‍गुप तेरीला छासे दुक्‍पा वोतुप तप्‍की आङा क्‍येप सुक ग्‍यपुप दोके छेटाङला ख्‍येल वे सिरुप ति दाक्‍पुला छ्‍या वे।
ROM 8:23 तिवा तिराङ मिन, खोकी थु चाङ्‍मा नेसुर गोमाला गरुप डेलु यिन्दुप दाक्‍पु साङ खोकी पेजातिवा च्‍युङ्‍गुपला ताङ खोकी दाक्‍पी मिजी ति तेरी थर्वा नङ्‍शी सिनी दुक्‍पा वोसिनाङ रेवा क्‍यानी गुनी देन वे।
ROM 8:24 च्‍यिलासिसिन दाक्‍पी ती रेवा क्‍यावु तप्‍की खोकी दाक्‍पुला थर्वा नाङ वे। ती रेवा ति दाक्‍पी मिककी थोङ्‍गुप रेवा मिन। च्‍यिलासिसिन सी साङ थोङ्‍गुप च्‍यालकला रेवा मिकिवी।
ROM 8:25 यिने दाक्‍पु मिककी मोथोङ्‍गुप च्‍यालकला रेवा किवी सिसिन ती रेवा क्‍यावु ति माथोपा सेक हम क्‍यानी गुनी दे गोकिवी।
ROM 8:26 तुक राङ क्‍यानी कोन्‍छ्‍योककी थु चाङ्‍माकी साङ दाक्‍पु काङ साङ कि मुथुपुप पेला दाक्‍पुला दाल्‍जा क्‍या नङ्‍गिवी, च्‍यिलासिसिन दाक्‍पी चुक सिनी मोपोर कि गोकिवी दाक्‍पुला हाक्‍मोकोवी, यिने कोन्‍छ्‍योककी थु चाङ्‍माकी राङ दाक्‍पी छापला ङ्‍येन्‍बी सोक ताङ्‍नी मीकी कि मुथुपुप ताम्‍ङेला मोपोर क्‍या नङ्‍गिवी।
ROM 8:27 तमा तेरी मीतिवी सेमगी ताम्‍ङे ल्‍यामु हाक्‍कोवु कोन्‍छ्‍योककी राङ खोकी थु चाङ्‍माकी नोवा काङ यिन सिरुप ति हाक्‍कोकिवी, च्‍यिलासिसिन कोन्‍छ्‍योककी नोवाला वोतुप दोके थु चाङ्‍माकी खोला तेपा कितुप मीतिवी छापला मोपोर क्‍या नङ्‍गिवी।
ROM 8:28 कोन्‍छ्‍योकला ङ्‍यिङ्‍ज्‍ये कितुपतिवा ताङ खोकी नोवा नेसुर पेतुप मीतिवाला ख्‍येल वुङ्‍गुप छेटाङ दुङल ताङ लोदिमु काङ वोसिनाङ खोकी ती तेरी मुला राङ ल्‍यामु जो नङ्‍गिवी सिरुप ति दाक्‍पुला छ्‍या वे।
ROM 8:29 खोकी जम्‍बुलिङ ज्‍येङ्‍गुप सिनाङ गोमाला के खोरे ङो शेवु मीतिवाला पेनी खोरे पुज्‍युङकी जुजम दोके च्‍युङ्‍गुपला जो नाङ्‍सुङ। तुक क्‍यानी ती पुज्‍युङ ति नुपतिवी नाङ्‍ला तेरी सिनाङ छ्‍ये च्‍युङ्‍गुप यिन।
ROM 8:30 सु सुला खोकी गोमाला के पेन नङ वे, पेन नङ्‍गुपतिवाला खोकी कताङ नाङ्‍सुङ। तमा कतङ्‍गुपतिवाला खोकी थोङ्‍दाङला टेङ्‍बु जो नाङ्‍सुङ। तमा टेङ्‍बु जो नङ्‍गुपतिवाला खोकी मोवा साङ नाङ्‍सुङ।
ROM 8:31 दी ताम्‍ङेतिवा ति नासाम तङ्‍सिन दाक्‍पु काङ सि थुप्‍किवी? दोजो कोन्‍छ्‍योक दाक्‍पी छ्‍योला ज्‍यु वोसिन सु दाक्‍पी तेन्‍दोकला लङ थुप्‍किवी?
ROM 8:32 दाक्‍पी दिक्‍पी थोक्‍ला कोन्‍छ्‍योककी खोरे सेवु साङ र्‍होक माज्‍याक्‍नी दाक्‍पुला नाङ्‍सुङ सिसिन, खोकी सेवुकी मुला राङ यम्‍बा साङ तेरी कटिन नेसुर दाक्‍पुला मानङ्‍गिवी रो?
ROM 8:33 खोकी पेन नङ्‍गुप मीतिवाला सी साङ क्‍येन ग्‍यक मुथुपी। तिवाला टेङ्‍बु सिनी चेप ति कोन्‍छ्‍योक राङ यिन।
ROM 8:34 तुक क्‍यानी सी तिवाला क्‍येन तेर्किवी? येशू ख्रीष्‍ट ति मीतिवी दिक्‍पी थोक्‍ला टुङ्‍सिमा ङोसु लानी तन्‍दा कोन्‍छ्‍योककी छ्‍याक यावी थाकाला ज्‍युनी दाक्‍पी छापला मोपोर कियी वे।
ROM 8:35 ती तप्‍की सी दाक्‍पुला येशू ख्रीष्‍टकी ङ्‍यिङ्‌ज्‍ये नेसुर क्‍येङ्‍सु जो थुप्‍किवी रो? दुक्‍पाला ख्‍येल्‍सिनाङ, दुङलला ख्‍येल्‍सिनाङ, छेटाङला ख्‍येल्‍सिनाङ, ल्‍होरेला गल्‍सिनाङ, पेर्तुङ्‍बा थेन्‍सिनाङ, दुक्‍टा ताङ खुर्पाकी कङगी साङ दाक्‍पुला ख्रीष्‍ट नेसुर क्‍येङ्‍सु जो मुथुपी।
ROM 8:36 ती तप्‍की कोन्‍छ्‍योककी सुङला दुक सिनी टि वे, “ख्‍योरो थोक्‍ला मीतिवी ङ्‍यिराङला ङ्‍यिमी टेङ सेतुप छोल्‍गिवी, ङ्‍यिराङ याङ सेतुपला ज्‍यकुप लुक दोके गल वे।”
ROM 8:37 तुकै यिन्‍सिनाङ ङ्‍यिराङला ङ्‍यिङ्‌ज्‍ये क्‍या नङ्‍गुप ख्रीष्‍ट येशू नेसुर दाक्‍पु ति तिवा तेरीकी खला मङ ग्‍येल वे।
ROM 8:38 तमा दाक्‍पुला छासे तेन्‍तेन वे। दाक्‍पु शेप यिन्‍सिनाङ मिजी यिन्‍सिनाङ, याङ्‍ना देवाच्‍येनकी लेन क्‍योलुप थुतिवा यिन्‍सिनाङ दी जम्‍बुलिङला ओङ्‍ज्‍येन कितुपतिवा यिन्‍सिनाङ, याङ्‍ना तसाम पेलाकी ताम्‍ङे यिन्‍सिनाङ ज्‍युक्‍थमाला वुङ्‍गुप ताम्‍ङे यिन्‍सिनाङ दी जम्‍बुलिङकी ङार यिन्‍सिनाङ,
ROM 8:39 याङ्‍ना स ताङ नामला वोतुप ओङ यिन्‍सिनाङ कोन्‍छ्‍योककी ज्‍ये नङ्‍गुप जम्‍बुलिङला वोतुप तेरी च्‍यालकतिवा काङगी साङ ङ्‍यिराङला ख्रीष्‍ट येशूला वोतुप कोन्‍छ्‍योककी ङ्‍यिङ्‍ज्‍ये नेसुर क्‍येङ्‍सु तोङ मुथुपी।
ROM 9:1 ङ येशू ख्रीष्‍टकी मी यिन्‍दुप तप्‍की ख्‍यिराङला जिनोक माजोनी टेङ्‍बो सिरिन। दी ताम्‍ङे ति कोन्‍छ्‍योककी थु चाङ्‍मा नेमा ङे सेमगी पङ्‍बु तेर्किवी।
ROM 9:2 ती काङ यिन सिसिन ङे सेमला छासे दुङल ताङ सेम्‍दुक नरी वे।
ROM 9:3 ङरा यहूदी अच्‍युनुपतिवी थोक्‍ला यिन्‍सिन ङला काङ मोताप तप्‍सिनाङ, ख्रीष्‍ट नेसुर क्‍युन ज्‍याक्‍सिनाङ ङला गा लङ्‍गिवी।
ROM 9:4 तिवा ति इस्राएलकी मीतिवा यिन। कोन्‍छ्‍योककी तिवाला खोरो पुज्‍युङ जो नाङ्‍सुङ, खोकी तिवाला खोरे मोवा छ्‍या तेन्‍सुङ, खोकी तिवी मुला थाक्‍छ्‍येवु ताम्‍ङे जो नाङ्‍सुङ, मोशा नेसुर ठिम साङ जो नाङ्‍सुङ, खोकी तिवाला यहूदी ल्‍हङाङला सोवा देकुप ताङ थाक्‍छ्‍येन नङ्‍गुप ताम्‍ङे साङ तिवाला राङ नाङ्‍सुङ।
ROM 9:5 ती तिराङ मिन, तिवा ति अब्राहाम ताङ इसहाक ताङ याकूबकी गिपातिवा यिन। येशू ख्रीष्‍ट साङ तिवी गिपा नेमा राङ क्‍येवु यिन। ती येशू ख्रीष्‍ट ति जम्‍बुलिङ तेरीकी खला चोछ्‍ये वोतुप कोन्‍छ्‍योक यिन। खोला राङ नरी सोवा वुङ्‍शी, आमिन।
ROM 9:6 यिने इस्राएलकी मीतिवाला कोन्‍छ्‍योककी थाक्‍छ्‍येन नङ्‍गुप सुङ ति लम्‍सुला मागलुप मिन। च्‍यिलासिसिन इस्राएलला क्‍येवुतिवा तेरी इस्राएलकी मी मिन,
ROM 9:7 अब्राहामकी गिपातिवा साङ तेरी वुतुङ के कोन्‍छ्‍योककी पुज्‍युङ पुम मिन। च्‍यिलासिसिन कोन्‍छ्‍योककी सुङला “इसहाक नेमा च्‍युङ्‍गुपतिवा तिराङ ख्‍योरो गिपा यिन सिनी सिवी।” सिनी सुङ्‍सुङ।
ROM 9:8 तीकी तेन्‍दोक ति अब्राहाम नेसुर च्‍युङ्‍गुपतिवा कोन्‍छ्‍योककी पुज्‍युङ पुम मिन, यिने कोन्‍छ्‍योककी थाक्‍छ्‍येन नङ्‍सिमा क्‍येवुतिवा तिराङ अब्राहामकी गिपा यिन।
ROM 9:9 ती कोन्‍छ्‍योककी थाक्‍छ्‍येन नङ्‍गुप सुङ ति दुकै वे, “त वुङ्‍गुप लो खोर्मा यीला ङ लोक्‍नी वुङ्‍गुप पेला साराकी पुज्‍युङ यी क्‍येकितो।”
ROM 9:10 तोजो तिराङ मिन, सारा नेमा क्‍येवु पुज्‍युङ इसहाककी पेर्मी रिबेकाला साङ पुज्‍युङ छेमा क्‍येसुङ।
ROM 9:11 यिने पुज्‍युङ छेमा क्‍येप सिनाङ गोमाला कोन्‍छ्‍योककी रिबेकाला “ख्‍योरो पुज्‍युङ छ्‍ये तीकी छ्‍युङा तीला शब्‍ज्‍यी कितुप डितो।” सिनी थाक्‍छ्‍येन नाङ्‍सुङ। तीकी तेन्‍दोक ति तिवी लाका ल्‍यामु मेलोवा काङ साङ माक्‍यावु पेला मीतिवी लाका ल्‍यामु नेमा मिन, कोन्‍छ्‍योककी नोवाला वोतुप तीला तिराङ पेतुप ति छ्‍या देन्‍दुपला खोकी रिबेकाला तुक सिनी सुङ्‍गुप यिन।
ROM 9:13 कोन्‍छ्‍योककी सुङला साङ तीकी कोर्ला दुक सिनी टि वे, “याकूबला ति ङे ङ्‍यिङ्‍ज्‍ये क्‍यायी, एसावला ति ङ्‍यिङ्‍मर क्‍यायी।”
ROM 9:14 त दाक्‍पु तीकी कोर्ला काङ सिरुप? काङ कोन्‍छ्‍योक ति मीला ख्‍ये बेतुप कोन्‍छ्‍योक यिन रो? तुकै मिन।
ROM 9:15 खोकी मोशाला दुक सुङ्‍नी वे, “सुला ङे ङ्‍यिङ्‍ज्‍ये कितुप नो वे, तीला ङ ङ्‍यिङ्‍ज्‍ये कितिन। सुला ङे च्‍यम्‍बा कितुप नो वे, तीला ङ च्‍यम्‍बा कितिन।”
ROM 9:16 तुक क्‍यानी मी नोवा ताङ टेमु क्‍यानी मिन, यिने कोन्‍छ्‍योककी खोरे नोवा नेमा तिराङ च्‍यम्‍बा गिवी।
ROM 9:17 च्‍यिलासिसिन कोन्‍छ्‍योककी सुङला मिश्रकी ग्‍येल्‍वु फारोकी कोर्ला साङ दुक सिन टि वे, “ङे ङार ति ख्‍युरुङला छ्‍या देन्‍दुप ताङ जम्‍बुलिङकी मीतिवा तेरीला ङे मिङकी थोक्‍ला सुङ ख्‍याप्‍टाक कितुला ङे ख्‍युरुङला ग्‍येल्‍वु च्‍युङ च्‍यितुप यिन।”
ROM 9:18 तुक क्‍यानी कोन्‍छ्‍योककी खोरे च्‍यम्‍बा नङ्‍गुप नोक्‍यावुतिवी खला च्‍यम्‍बा नङ्‍गिवी, तमा सेम क्‍योङ्‍बु जोप नोक्‍यावुतिवाला सेम क्‍योङ्‍बु जो नङ्‍गिवी।
ROM 9:19 तुकै यिन्‍सिन “कोन्‍छ्‍योककी च्‍यिला ङला क्‍येन ग्‍यकिताङ? खोकी नोवाला सी मेलोवा सि थुप्‍किवी?” सिनी ख्‍यिरा सिवी।
ROM 9:20 यिने, ओ मीतिवा, कोन्‍छ्‍योकला ख लोकुप ति ख्‍युरुङ सु यिन? ख्‍युरुङला ज्‍ये नङ्‍गुप तीला ख्‍योरो “ङला च्‍यिला तुक राङ जोवु यिन?” सिनी टि मुथुपी।
ROM 9:21 काङ थली नेक्‍योक जोप मी तीला थला नुपुप दम्‍बक नेसुर थली नेक्‍योक च्‍यिक ति खक्‍छ्‌येवु ताङ यम्‍बा ति अला खक्‍छ्‌येवु मेतुप जोप ओङ मे रो?
ROM 9:22 ती दोके कोन्‍छ्‍योककी साङ खोरे ओङ नेसुर मीतिवाला ना ताङ्‍नी खोकी पर्च्या ताङ ङार छ्‍या देन्‍दुप नोवे, यिने खोकी पर्च्या तोङ्‍गुप नो क्‍यावु मीतिवी थोक्‍ला खो हम क्‍यानी दे मुथुवी रो?
ROM 9:23 तमा खोकी खोरे मोवाकी थोक्‍ला गोमाला के च्‍यम्‍बा नङ्‍गुप टडिक क्‍यावु मीतिवाला छासे मङ्‍मु वोतुप मोवा छ्‍या तेन नङ्‍सिमा दाक्‍पी काङ सि थुप्‍किवी?
ROM 9:24 खोकी दाक्‍पुला पेन नङ्‍गुप पेला यहूदीतिवा नेसुर तिराङ मिन, यिने यहूदी मिन्‍दुप मिरिक यम्‍बाकी मीतिवा नेसुर साङ पेन नङ्‍गुप यिन।
ROM 9:25 होशेकी थेप नाङ्‍ला कोन्‍छ्‍योककी दुक सुङ्‍नी वे, “ङे मी मिन्‍दुप मीतिवाला ङ ‘ङे मीतिवा’ सिनी सिरिनो। तमा ङे ङ्‍यिङ्‍ज्‍ये माक्‍यावु मीतिवाला ङ ‘ङे ङ्‍यिङ्‍ज्‍येवु मीतिवा’ सिनी सिरिनो।”
ROM 9:26 “कनी ख्‍यिराङला ‘ङे मीतिवा मिन’ सिनी सिक्‍यावे, ते तिवा ‘ङोसु वोतुप कोन्‍छ्‍योककी पुज्‍युङ पुम यिन’ सिनी सिरिनो।”
ROM 9:27 तमा इस्राएलकी मीतिवी कोर्ला कोन्छ्‍योककी लुङ्‍तेम्‍बा यशैयाकी वोरु तेन्‍नी, “इस्राएल गिपाकी मीतिवा ग्‍येम्‍छो गारीला वोतुप पेमा दोके वोसिनाङ यम्‍बा ते लुनी वोतुपतिवा तिराङ पर्च्या नेसुर थर्कितो।
ROM 9:28 दी कोन्छ्‍योककी सुङ्‍गुप सुङ ति जम्‍बुलिङला ङमु राङ क्‍यानी तेरी छेकिवी।” सिनी सिक्‍यासुङ।
ROM 9:29 येलुङ लुङ्तेम्‍बा यशैयाकी, “दोजो चोछ्‍येवु कोन्छ्‍योककी दाक्‍पी थोक्‍ला गिपा चेयी माज्‍यकुप यिन्‍सिन दाक्‍पु सदोम ताङ गमोराकी मीतिवा दोके ना डिवी।” सिनी गोमाला के नम्‍दर शेनी वे।
ROM 9:30 तुक क्‍यानी दाक्‍पु काङ सिरुप? यहूदी मिन्‍दुप मिरिक यम्‍बाकी मीतिवी कोन्‍छ्‍योककी ठिमला सिक्‍यावु दोके माक्‍यासिनाङ खोकी थोङ्‍दाङला टेङ्‍बु च्‍युङ वे। ती टेङ्‍बु ति तेपा क्‍यावु तप्‍की च्‍युङ्‍गुप यिन।
ROM 9:31 यिने इस्राएलकी मीतिवी टेङ्‍बुकी ठिमला सिक्‍यावु दोके लाका याङ क्‍यासिनाङ खोकी थोङ्‍दाङला टेङ्‍बु ङ्‍ये माथुप।
ROM 9:32 च्‍यिला माथुप्‍नोक सिसिन, तिवी खोकी थोङ्‍दाङला टेङ्‍बु च्‍युङ्‍गुप ति लाका ल्‍यामु क्‍यानी ङ्‍येकिते नो क्‍यानी कोन्‍छ्‍योकला ति तेपा कितुप नो माक्‍या। तुक क्‍यानी तिवा दोला नर्तुक ग्‍यप्‍नी तला ग्‍यप्‍नी वे।
ROM 9:33 तीकी कोर्ला कोन्‍छ्‍योककी सुङला दुक सिनी टि वे, “ल्‍होसा, ङ सियोनला नर्तुक ग्‍यकुप दो दोके मिरा च्‍यिक ज्‍योकिनो, मीतिवा तीला नर्तुक ग्‍यकितो, यिने तीला तेपा कितुप मीतिवा ति सु साङ ङोछाला मेख्‍येल्‍तो।”
ROM 10:1 अच्‍युनुपतिवा, ङ ङे सेमगी दिङ नेज्‍युनी कोन्‍छ्‍योकला मोपोर कितुप ति यहूदीतिवा दिक्‍पा ने थर्शी सिनी यिन।
ROM 10:2 ङ दी ताम्‍ङे ति पङ्‍बु तेरिन। ती ति काङ यिन सिसिन, तिवी कोन्‍छ्‍योककी थोक्‍ला ल्‍यामो क्‍यानी शब्‍ज्‍यी कितुपला गा क्‍यासुङ, यिने चुक क्‍यानी खोला शब्‍ज्‍यी कि गोकिवी सिरुप ति तिवाला हाक्‍मोकोनोक।
ROM 10:3 तिवी कोन्‍छ्‍योककी थोङ्‍दाङला टेङ्‍बु ङ्‍येतुप ति हाक्‍माकोनी खोप्‍रे राङ टेङ्‍बु कितुप लाका तिराङ क्‍यासिमा खोकी थोङ्‍दाङला टेङ्‍बु ङ्‍येतुपला माङ्‍येन।
ROM 10:4 च्‍यिलासिसिन कोन्‍छ्‍योककी ठिमला गोवु तेरी ताम्‍ङेतिवा ख्रीष्‍टकी छे च्‍यिसुङ। तुक क्‍यानी सी खोला तेपा किवे, तिवा कोन्‍छ्‍योककी थोङ्‍दाङला टेङ्‍बु ङ्‍येकिवी।
ROM 10:5 ठिमला ङ्‍येन्‍नी कोन्‍छ्‍योककी थोङ्‍दाङला टेङ्‍बु ङ्‍येतुपकी कोर्ला ठिमकी थेप नाङ्‍ला मोशाकी “ठिमला ङ्‍येन्‍दुप मीतिवा ति ती ठिम ङ्‍येन्‍दुप नेसुर मिजी क्‍योङ्‍गिवी।” सिनी टि वे।
ROM 10:6 यिने तेपा क्‍यानी कोन्‍छ्‍योककी थोङ्‍दाङला टेङ्‍बु ङ्‍येतुप मीतिवी दुक सिनी सिवी, “ख्‍योरो सेमला ‘सु देवाच्‍येनला डिवी?’ सिनी मासिर।” (तीकी तेन्‍दोक ति ख्रीष्‍टला मर पाम वुङ्‍गुप यिन।)
ROM 10:7 “याङ्‍ना ‘सु ङ्‍येलाला पप्‍किवी?’ सिनी साङ मासिर।” (तीकी तेन्‍दोक ति ख्रीष्‍टला शेप ने येर देकुप यिन।)
ROM 10:8 यिने तेपा क्‍यानी कोन्‍छ्‍योककी थोङ्‍दाङला टेङ्‍बु ङ्‍येतुप मीतिवी काङ सिवी सिसिन “कोन्‍छ्‍योककी सुङ ति ख्‍योरो चिप्‍ला राङ वे, ती सुङ ति ख्‍योरो खला वे, तमा ख्‍योरो सेमला राङ वे।” ती सुङ ति ङ्‍यिरा ख्‍यिराङला ख्‍याप्‍टाक क्‍यावु तेपाकी कोर्ला सिक्‍यावु सुङ यिन।
ROM 10:9 दोजो ख्‍योरो मीतिवी मिङ्‍गाला येशूला चोवो यिन सिनी ख नेमा सिवी, तमा कोन्‍छ्‍योककी खोला शेप ने ङोसु लङ्‍गुप यिन सिनी सेमला तेपा क्‍यासिन ख्‍युरुङ दिक्‍पा ने थर्किवी।
ROM 10:10 च्‍यिलासिसिन सी खोला सेम नेज्‍युनी तेपा किवे, ती ति कोन्‍छ्‍योककी थोङ्‍दाङला टेङ्‍बु ङ्‍येकिवी। सी मीतिवी मिङ्‍गाला खोला तेपा कितिन सिनी सिवे, तीला दिक्‍पा ने थर ज्‍यिकिवी।
ROM 10:11 तुक क्‍यानी कोन्‍छ्‍योककी सुङला साङ दुक सिनी टि वे, “खोला तेपा कितुप मीतिवा सु साङ ङोछाला मेख्‍येल्‍वी।”
ROM 10:12 यहूदी ताङ यहूदी मिन्‍दुप मिरिक यम्‍बाकी मीतिवी पर्ला काङ साङ ख्‍ये मे। कोन्‍छ्‍योक ति मी तेरीकी चोवो यिन। खोला रेन्‍दुपतिवा तेरीला छासे मोलाम थोप्‍किवी।
ROM 10:13 तीकी कोर्ला कोन्‍छ्‍योककी सुङला दुक सिनी टि वे, “चोवो कोन्‍छ्‍योकला रेन्‍दुपतिवा तेरीला खोकी थर ज्‍यिकिवी।”
ROM 10:14 यिने खोला तेपा माक्‍यावुतिवी याङ खोला चुक क्‍यानी रेन्‍गिवी रो? तिवी खोकी कोर्ला थोवु साङ माथो वे, चुक क्‍यानी तिवी खोला तेपा कितुप्‍जा? खोकी कोर्ला ख्‍याप्‍टाक कितुप मी मेसुङ सिसिन चुक क्‍यानी मीतिवी खोकी सुङ थोकिवी रो?
ROM 10:15 तमा सुङ ख्‍याप्‍टाक कितुप मीतिवा माताङ्‍सिन चुक क्‍यानी खोकी सुङ ख्‍याप्‍टाक किवी रो? ती तप्‍की कोन्‍छ्‍योककी सुङला “लेन ल्‍यामु ख्‍याप्‍टाक कितुप मीतिवी कोम्‍बा योपुप ति छासे ल्‍यामु यिन।” सिनी टि वे।
ROM 10:16 यिने तिवी ख्‍याप्‍टाक क्‍यावु लेन ल्‍यामु थोवु मीतिवा तेरीकी तेपा क्‍यावु ति मिन। ती तप्‍की कोन्‍छ्‍योककी लुङ्‍तेम्‍बा यशैयाकी थेपला दुक सिनी टि वे, “ओ चोवो, ङ्‍यिरा ख्‍याप्‍टाक क्‍यावु सुङला सी तेपा क्‍यासुङ रो?”
ROM 10:17 तुक क्‍यानी तेपा ति कोन्‍छ्‍योककी सुङ थोसिमा गिवी, तमा ती थोवु सुङ ति ख्रीष्‍टकी सुङ नेसुर गिवी।
ROM 10:18 यिने ङ ख्‍यिराङला ताम्‍ङे यी टेयी, काङ यहूदीतिवी खोकी सुङ माथोवु यिन रो? वुतुङ के तिवी खोकी सुङ थो वे। च्‍यिलासिसिन “कोन्‍छ्‍योककी सुङ ति जम्‍बुलिङ तेरीला ख्‍याप्‍टाक क्‍या वे, खोकी सुङ ति जम्‍बुलिङकी अन्‍तिम सेक्‍ला टम वे।” सिनी कोन्‍छ्‍योककी सुङला टि वे।
ROM 10:19 येलुङ ङ ख्‍यिराङला ताम्‍ङे यी टेयी, काङ ती ख्‍याप्‍टाक क्‍यावु सुङ ति इस्राएलकी मीतिवी हाक्‍माको वे रो? मिन, हाक्‍को वे। तीकी कोर्ला मोशाकी दुक सिक्‍या वे, “ङे मी मिन्‍दुप मीतिवा वासिमा ख्‍यिराङला ङ ठतोक कितुप जोयी। तमा अम्‍बारङ्‍शिङ वोतुप मीतिवा वासिमा ख्‍यिराङला ङ ङ्‍यिर्मु कितुप जोयी।”
ROM 10:20 ती तप्‍की लुङ्‍तेम्‍बा यशैयाकी ङाडेङ क्‍यानी दुक सिक्‍या वे, “ङला मोछोलुप मीतिवाला ङे ठेसुङ, ङला मोलोङ्‍गुप मीतिवाला साङ ङे छ्‍या तेनिन।”
ROM 10:21 यिने इस्राएलकी मीतिवी कोर्ला यशैयाकी दुक सिक्‍या वे, “ग्‍यिन्‍ना वोतुप ताङ ङे सिक्‍यावु ताम्‍ङेला मेङ्‍येन्‍दुप मीतिवी थोक्‍ला ङ ङ्‍यिमी टेङ ङे लाक्‍पा क्‍याङ्‍नी वे।”
ROM 11:1 तुक क्‍यानी ङ ख्‍यिराङला टेयिन, “काङ कोन्‍छ्‍योककी खोरो पेतुप मीतिवाला क्‍युर्नी ज्‍याक्‍सुङ रो?” मिन, वुतुङ के खोकी तिवाला नाम्‍साङ क्‍युर्नी माज्‍याक। ङ साङ अब्राहामकी गिपा यिन, तमा बेन्‍यामीन मिछाङकी मी यिन।
ROM 11:2 कोन्‍छ्‍योककी तोङ नेज्‍युनी खोकी पेतुप मीतिवाला नाम्‍साङ क्‍युर्नी माज्‍याक। खोकी सुङगी नाङ्‍ला खोकी लुङ्‍तेम्‍बा एलियाकी कोर्ला काङ सिक्‍या वे ख्‍यिराङला छ्‍या मे? खोकी इस्राएलकी मीतिवी तेन्‍दोकला लानी कोन्‍छ्‍योकला दुक सिनी रेन्‍सुङ,
ROM 11:3 “ओ चोवो कोन्‍छ्‍योक, इस्राएलकी मीतिवी चोवोकी तङ्‍गुप लुङ्‍तेम्‍बातिवाला सेसुङ। तमा चोवोकी छोठीतिवा साङ र्‍हम क्‍युर्सुङ। तिवी पर्ला लुवु ति ङ तिराङ यिन। ङला साङ तिवी सेतुपला छोलिन वे।”
ROM 11:4 यिने कोन्‍छ्‍योककी एलियाला काङ लेन ग्‍यप्‍सुङ? “ङ ङरा थोक्‍ला बाल कुला शावा मिकिवु मी तोङ्‍डा दिन र्‍होक्‍नी ज्‍याङ वे।”
ROM 11:5 तुक क्‍यानी तसाम साङ कोन्‍छ्‍योककी कटिन नेसुर पेतुपतिवा लुनी वे।
ROM 11:6 दोजो ती मीतिवा लुवु ति खोकी कटिन नेसुर यिन्‍सिन ती ति तिवी लाका नेसुर मिन, लाका नेसुर यिन्‍सिन कटिन ति कटिन राङ मिन।
ROM 11:7 त काङ सिरुप? इस्राएलकी मीतिवी कोन्‍छ्‍योककी थोङ्‍दाङला टेङ्‍बु च्‍युङ्‍गुप छाल्‍सिनाङ टेङ्‍बु च्‍युङ माथुप। यिने खोकी पेतुपतिवा तिराङ टेङ्‍बु वोतुप च्‍युङ्‍सुङ। तमा यम्‍बा लुवुतिवा ति तेरी सेम क्‍योङ्‍बु गाल्‍सुङ।
ROM 11:8 ती तप्‍की कोन्‍छ्‍योककी सुङला दुक सिनी टि वे, “कोन्‍छ्‍योककी तिवाला काङ साङ हाक्‍मोकोवु सेम नङ्‍सिमा तसाम सेक तिवा मिककी मोथोङ्‍गुप ताङ नम्‍ज्‍योककी साङ मोथोवु गल वे।”
ROM 11:9 तमा दाऊदकी दुक सिक्‍या वे, “तिवी डेन साप च्‍योक्‍ची ति तोर्वाला ख्‍येलुप दोके च्‍युङ्‍शी, तमा नर्तुक ग्‍यप्‍नी तला ग्‍यपुप दोके ताङ ङ्‍येन लङ्‍शी।
ROM 11:10 तिवी मिक ति डिप्‍नी थोङ मुथुपु डोशी, तमा तिवी क्‍येल्‍दाङ ति नरी कोकोरोक डोशी।”
ROM 11:11 तुक क्‍यानी ङ येलुङ ख्‍यिराङला टेयिन, काङ इस्राएलकी मीतिवा दोला नर्तुक ग्‍यप्‍नी तला ग्‍यप्‍सिमा लङ मुथुपी रो? वुतुङ के तुकै मिन। इस्राएलकी मीतिवी येशूला तेपा माक्‍यानी लाका दुक्‍टा क्‍यासिमा यहूदी मिन्‍दुप मिरिक यम्‍बाकी मीतिवी तेपा क्‍यावु तप्‍की तिवा दिक्‍पा ने थर्नी वे। ती थोङ्‍नी इस्राएलकी मीतिवा ठतोक लानी खोला तेपा किशी सिरुप ति कोन्‍छ्‍योककी नोवा यिन।
ROM 11:12 इस्राएलकी मीतिवी लाका दुक्‍टा क्‍यासिमा मोलाम ति जम्‍बुलिङकी मीतिवाला थोप्सुङ। तमा तिवा लम्‍सुला मागलुप मोलाम ति यहूदी मिन्‍दुप मिरिक यम्‍बाकी मीतिवाला थोप्‍सुङ सिसिन तेरी इस्राएलकी मीतिवी तेपा क्‍यासियाङ तिवाला मङ छासे मोलाम थोप्‍किवी।
ROM 11:13 दी ताम्‍ङे ति ङ ख्‍यिराङ यहूदी मिन्‍दुप मिरिक यम्‍बाकी मीतिवाला सिरिन, कोन्‍छ्‍योककी ङला मिरिक यम्‍बाकी मीतिवी थोक्‍ला लोमा छ्‍ये च्‍युङ्‍गुपला पेन नङ्‍गुप तप्‍की कोन्‍छ्‍योककी ङला नङ्‍गुप लाकाला ङ छासे तेके कितिन।
ROM 11:14 मिरिक यम्‍बाकी मीतिवी थोक्‍ला यहूदीतिवी पर्ने मी ललाइ ठतोक लानी कोन्‍छ्‍योककी थाकाला लोक्‍नी थर्वा ङ्‍येशी सिरुप ति ङे रेवा यिन।
ROM 11:15 च्‍यिलासिसिन कोन्‍छ्‍योककी यहूदीतिवाला क्‍युर्नी ज्‍याक्‍सिमा जम्‍बुलिङकी मीतिवा कोन्‍छ्‍योककी मुला तम्‍जी ल्‍यामु च्‍युङ्‍गिवी सिसिन, कोन्‍छ्‍योककी तिवाला सेमला लासियाङ मङ तिवाला शेप ने थरुप मिजी मोथोपी रो?
ROM 11:16 ङ ख्‍यिराङला यहूदीतिवी थोक्‍ला पे यी शेतिन। दोजो टम्‍दोक ङ्‍येतुप पेला कोन्‍छ्‍योकला बुलुप फी ति चाङ्‍मा वोसिन तेरी टम्‍दोक साङ चाङ्‍मा डिवी। तुक राङ क्‍यानी दोङ्‍बी मर ल्‍यामु क्‍याङ्‍सिन तेरी येल्‍कातिवा साङ ल्‍यामु डिवी।
ROM 11:17 दोजो नाठुङ वुङगी जैतुन दोङ्‍बी येल्‍का च्‍येनी वुतुङ्‍की जैतुन दोङ्‍बी येल्‍का च्‍येतुप दासाला थिसुङ सिसिन ती नाठुङ वुङगी जैतुन दोङ्‍बी येल्‍काला ख्‍वो वानी डेलु गोर्किवी।
ROM 11:18 तुक क्‍यानी ख्‍यिराङ नाठुङ वुङगी जैतुन दोङ्‍बु दोके वोतुप यहूदी मिन्‍दुप मिरिक यम्‍बाकी मीतिवा वुतुङ्‍की जैतुन दोङ्‍बु दोके यिन्‍दुप यहूदीतिवाला ङ्‍यिङ्‍मर माकी, च्‍यिलासिसिन दोङ्‍बुला टेकाम तेरुप ति येल्‍का मिन, मर यिन।
ROM 11:19 तमा ख्‍यिराङ यहूदी मिन्‍दुप मिरिक यम्‍बाकी मीतिवी दुक सिवी, “वुतुङ्‍की जैतुन दोङ्‍बी येल्‍का च्‍येतुप ति ङ्‍यिराङ नाठुङ वुङगी जैतुन दोङ्‍बी येल्‍काला थितुपला यिन।”
ROM 11:20 ती ताम्‍ङे ति टेङ्‍बु राङ यिन। यहूदीतिवी तेपा माक्‍यावु तप्‍की वुतुङ्‍की जैतुन दोङ्‍बी येल्‍कातिवा च्‍येतुप दोके गलुप यिन। यिने ख्‍यिराङ ति तेपा क्‍यावु तप्‍की वुतुङ्‍की जैतुन दोङ्‍बुला थितुप दोके यिन। तुक क्‍यानी ख्‍यिराङ ङराङ यिन सिनी अम्‍बारङ्‍शिङ माकी, यिने ज्‍यिवा क्‍यानी दे।
ROM 11:21 च्‍यिलासिसिन कोन्‍छ्‍योककी वुतुङ्‍की जैतुन दोङ्‍बी येल्‍कातिवा साङ माज्‍याक्‍सुङ सिसिन ख्‍यिराङ नाठुङ वुङगी जैतुनकी येल्‍का यिन्‍दुपतिवाला याङ काङगी ज्‍योकुप्‍जा।
ROM 11:22 तुक क्‍यानी कोन्‍छ्‍योक ति च्‍यङ्‍च्‍यु सेम्‍बा वोतुप ताङ पर्च्या तोङ्‍गुप कोन्‍छ्‍योक यिन सिनी नासाम तोङ। ल्‍होसा, कोन्‍छ्‍योककी कला मुयुकुपतिवाला खोकी पर्च्या तोङ्‍गिवी। खोला नरी मोवा कितुपतिवाला खोकी च्‍यम्‍बा क्‍या नङ्‍गिवी। मिसियाङ ख्‍यिराङ साङ दोङ्‍बी येल्‍का दोके च्‍येनी क्‍युर्कितो।
ROM 11:23 यहूदीतिवा कोन्‍छ्‍योकला तेपा माक्‍यावु तप्‍की दोङ्‍बी येल्‍का दोके च्‍येनी क्‍युर्सुङ, यिने दोजो यहूदीतिवा खोला तेपा किवी सिसिन येलुङ खोकी तिवाला वुतुङ्‍की दोङ्‍बुला थि थुप्‍किवी। ती तेरी येलुङ क्‍या नङ्‍गुप ओङ ति कोन्‍छ्‍योकला वे।
ROM 11:24 ख्‍युरुङ नाठुङ वुङगी जैतुनकी दोङ्‍बु ल्‍यामु मेसिनाङ च्‍येनी वुतुङ्‍की जैतुन दोङ्‍बी येल्‍काला थिसिन गोमाला वुतुङ्‍की जैतुन दोङ्‍बी येल्‍का ति वुतुङ्‍की जैतुनकी दोङ्‍बुला थितुप मङ जोल्‍हमु गिवी।
ROM 11:25 अच्‍युनुपतिवा, ख्‍यिराङ अम्‍बारङ्‍शिङ क्‍यानी खुरुङ राङ रिक्‍पा वोतुप यिन सिनी नो मिकिशी सिनी इस्राएलकी मीतिवी कोर्ला छ्‍याकला वोतुप कोन्‍छ्‍योककी नोवा ति ङ ख्‍यिराङला सिरिन। ती ति काङ यिन सिसिन, कोन्‍छ्‍योककी पेतुप यहूदी मिन्‍दुप मिरिक यम्‍बाकी मीतिवा अङ्‌टङ तेरी माछेवा सेक्‍ला इस्राएलकी मीतिवी नाङ्‍ला चेयीकी सेम ति क्‍योङ्‍बु डिवी।
ROM 11:26 तुक राङ क्‍यानी तेरी इस्राएलकी मीतिवा दिक्‍पा ने थर्किवी। तीकी कोर्ला कोन्‍छ्‍योककी सुङला दुक सिनी टि वे, “दिक्‍पा ने थर ज्‍यितुप मिरा च्‍यिक सियोन नेमा गिवी, तमा खोकी याकूबकी गिपाला वोतुप दुक्‍टातिवाला थेन्‍नी क्‍युर्किवी।”
ROM 11:27 येलुङ खोकी सुङ्‍गिवी, “ङे तिवी मुला थाक्‍छ्‍येवु ताम्‍ङे ति दी यिन। ङ तिवी दिक्‍पातिवा तेरी ता ज्‍यितिन।”
ROM 11:28 लेन ल्‍यामुला तेपा माक्‍यावु तप्‍की यहूदीतिवा कोन्‍छ्‍योक ताङ मुला डला गलुप यिन। तुक क्‍यासिमा ख्‍यिराङ यहूदी मिन्‍दुप मिरिक यम्‍बातिवाला ति खोकी लेन ल्‍यामु ङ्‍येन्‍दुप ङ्‍येसुङ। यिन्‍सिनाङ यहूदीतिवा ति तिवी हङ्‍गावी छ्‍योक नेसुर कोन्‍छ्‍योककी पेनी ङ्‍यिङ्‍ज्‍ये क्‍या नङ्‍गुप गिपा यिन।
ROM 11:29 च्‍यिलासिसिन कोन्‍छ्‍योककी मीतिवाला ङ्‍येम्‍बा नङ्‍गुप ति नाम्‍साङ लोक्‍नी मेफेपी। तमा खोरे पेतुपतिवाला नाम्‍साङ क्‍युर्नी साङ मोज्‍योकिवी।
ROM 11:30 गोमाला याङ ख्‍यिराङ यहूदी मिन्‍दुप मिरिक यम्‍बाकी मीतिवा कोन्‍छ्‍योककी खला माङ्‍येन्‍दुप यिन, यिने त याङ यहूदीतिवी कोन्‍छ्‍योककी खला माङ्‍येन्‍दुप तप्‍की ख्‍यिराङला च्‍यम्‍बा ङ्‍येनी वे।
ROM 11:31 तुक राङ क्‍यानी तन्‍दा खोकी कला माङ्‍येन्‍दुप यहूदीतिवी ख्‍यिराङला खोकी च्‍यम्‍बा नङ्‍गुप थोङ्‍सिमा ती च्‍यम्‍बा ति खोप्‍राङला साङ थोप्‍शी सिनी ज्‍युक्‍ला खोकी कला ङ्‍येन्‍दुप डिवी।
ROM 11:32 च्‍यिलासिसिन कोन्‍छ्‍योककी च्‍यम्‍बा ति तेरी मीतिवाला थोप्‍शी सिनी खोकी तिवाला खोरे खला मेङ्‍येन्‍दुप जो नङ वे।
ROM 11:33 ए कोन्‍छ्‍योककी रिक्‍पा ताङ येन्‍देन ति छासे ग्‍यक्‍चे वे! खोकी तेन्‍तेन क्‍यानी छ्‍या तेन नङ्‍गुप लाम ति सी साङ हाक्‍को मुथुपी। तुक क्‍यानी कोन्‍छ्‍योककी सुङला दुक सिनी टि वे,
ROM 11:34 “कोन्‍छ्‍योककी नोवा ति सी हाक्‍को थुप्‍किवी रो? याङ्‍ना खोला टोङ्‍गु तेरुप ति सु यिन रो?”
ROM 11:35 “सी कोन्‍छ्‍योकला छ्‍यक्‍तक बिन्‍दुप तप्‍की खोकी तीकी तेन्‍दोकला लोक्‍नी तेर गोवु वे रो?”
ROM 11:36 जम्‍बुलिङला वोतुप तेरी च्‍यालकतिवा खोकी राङ ज्‍ये नङ्‍गुप यिन। ती तेरी खो नेसुर राङ खोकी थोक्‍ला यिन। तुक क्‍यानी खोला राङ नरीकी नरी मोवा वुङ्‍शी। आमिन।
ROM 12:1 तुक क्‍यानी अच्‍युनुपतिवा, च्‍यम्‍बा वोतुप कोन्‍छ्‍योक नेसुर ङ ख्‍यिराङला ठाकुरे सिरिन। ख्‍यिरा दाक दाक्‍पी मिजी ति कोन्‍छ्‍योकला गा लङ्‍गुप ताङ चाङ्‍मा वोतुप जिन्‍बा पुल। तुक क्‍यावु ति ख्‍यिरा सेमगी दिङ नेज्‍युनी खोला सोवा तेकुप यिन।
ROM 12:2 तमा दी जम्‍बुलिङकी किताङ नालुला येनी मादे, यिने रङगी सेम ति सम्‍बा फोनी ख्‍यिरा थोक्‍ला कोन्‍छ्‍योककी नोवाला ल्‍यामु वोतुप ति काङ यिन, चुक क्‍यानी खोला गा लोङ्‍गुप, चुक क्‍यानी खोकी नोवा दोके क्‍यानी मिजी क्‍योङ्‍गुप, ती तेरी हाक्‍कोवा की।
ROM 12:3 कोन्‍छ्‍योककी ङला नङ्‍गुप कटिन नेसुर ङ ख्‍यिराङ रे रेला ठाकुरे सिनी गोङ्‍बा शोयी। ख्‍यिराङ छ्‍युङा यिन्‍सिनाङ, खुरुङ राङ छ्‍ये यिन सिनी सु साङ नासाम मातोङ। यिने कोन्‍छ्‍योककी ख्‍यिराङला चो तेपा नङ वे, ती ति ल्‍यामो हाक्‍कोनी ती दोके मिजी क्‍योङ।
ROM 12:4 दाक्‍पी जुला येन्‍लकतिवा बङी वोसिनाङ तेरी येन्‍लकतिवी ति लाका कुतुक कुतुक गिवी।
ROM 12:5 ती दोके दाक्‍पु बङी वोसिनाङ ख्रीष्‍ट ताङ मुला च्‍यिक्‍पा राङ जोवु तप्‍की जु ति च्‍यिक राङ यिन। तमा दाक्‍पु रे रे च्‍यिक ताङ च्‍यिककी येन्‍लकतिवा यिन।
ROM 12:6 तुक क्‍यानी कोन्‍छ्‍योककी दाक्‍पुला कटिन नेमा नङ्‍गुप ङ्‍येम्‍बा साङ कुतुक कुतुक वे। दोजो खोकी दाक्‍पुला नङ्‍गुप ङ्‍येम्‍बा ति लुङ्‍तेम्‍बाकी लाका यिन्‍सिन कोन्‍छ्‍योककी दाक्‍पुला नङ्‍गुप तेपाकी ओङ नेसुर लुङ्‍तेम्‍बाकी लाका कि गोकिवी
ROM 12:7 शब्‍ज्‍यी कितुप यिन्‍सिन ल्‍यामु क्‍यानी शब्‍ज्‍यी कि गोकिवी। मीला लाप्‍नी तेरुप यिन्‍सिन ल्‍यामु क्‍यानी लाम तेरुप लाका कि गोकिवी।
ROM 12:8 मीला टोङ्‍गु तेरुप यिन्‍सिन ल्‍यामु क्‍यानी टोङ्‍गु तेरुप लाका कि गोकिवी। बुल्‍दिर ग्‍यकुप यिन्‍सिन सेमगी दिङ नेज्‍युनी बुल्‍दिर ग्‍यक गोकिवी। ग्‍येला कितुप यिन्‍सिन टेमु क्‍यानी ग्‍येला कि गोकिवी। च्‍यम्‍बा कितुप यिन्‍सिन गा ताङ क्‍यानी च्‍यम्‍बा कितुप छ्‍या देन गोकिवी।
ROM 12:9 ख्‍यिराङ मी यम्‍बाला ङ्‍यिङ्‍ज्‍ये कितुप ति मीला छ्‍या देन्‍दुपला तिराङ माकी। चुका ति दुक्‍टा नोके तीला ति ङ्‍यिङ्‍मर की, चुका ति ल्‍यामु नोके तीला राङ शु।
ROM 12:10 च्‍यिककी च्‍यिकला अच्‍युनुप दोके क्‍यानी ङ्‍यिङ्‍ज्‍ये की। रङला सिनाङ मी यम्‍बाला मङ ताङ्‍देन की।
ROM 12:11 हुर्ताक कितुपला तिङ छ्‍येनी मादे, यिने कोन्‍छ्‍योककी थु चाङ्‍माकी ओङ नेसुर वुङ्‍गुप नासाम ताङ्‍नी कोन्‍छ्‍योककी थोक्‍ला शब्‍ज्‍यी पुल।
ROM 12:12 कोन्‍छ्‍योककी ख्‍यिराङला नङ्‍गुप रेवाला ख्‍यिराङ लोदिमु क्‍यानी दे, छेटाङला ख्‍येलुप पेला हम क्‍यानी दे, नरी कोन्‍छ्‍योकला मोपोर की।
ROM 12:13 कोन्‍छ्‍योकला तेपा कितुप मीतिवा कतुकारला ख्‍येल वोसिन तिवाला दाल्‍जा किटे की। खोरो खाङ्‍बाला वावु डेन्‍बुतिवाला गासो शु।
ROM 12:14 ख्‍यिराङला छेटाङ तेरुप मीतिवाला मोताप मादेप, तिवाला मोलाम बिन।
ROM 12:15 गा कितुपतिवी मुला गा की, सेम्‍दुक कितुपतिवी मुला सेम्‍दुक की।
ROM 12:16 तेरीकी मुला सेम च्‍यिक राङ जोनी थिन्‍नी दे, अम्‍बारङ्‍शिङ माकी, यिने मी ङ्‍याम्‍छ्‍युङतिवी दला शु। नाम्‍साङ ङ राङ येन्‍देन वोतुप यिन सिनी नो माकी।
ROM 12:17 सी ख्‍यिराङला मेलोवा किवे, तिवाला ङ्‍येन मलाङ। चुका ताम्‍ङे ति तेरी मीतिवी थोङ्‍दाङला ल्‍यामु नोके, तीला राङ नासाम तोङ।
ROM 12:18 दे थुप्‍सिन मी तेरी ताङ मुला डिक्‍नी दे।
ROM 12:19 ङे ङ्‍यिङ्‍ज्‍येवु अच्‍युनुपतिवा, ख्‍यिरा नाम्‍साङ मीला ङ्‍येन मालाङ, यिने कोन्‍छ्‍योककी लकला चेक ते। च्‍यिलासिसिन कोन्‍छ्‍योककी सुङला “ङ्‍येन लङ्‍गुप ति ङ राङ यिन, ङ राङ ङ्‍येन लङ्‍यिन।” सिनी टि वे।
ROM 12:20 बोरु “ख्‍योरो डतिवा ल्होवा लान वोसिन तिवाला समा बिन, कोम्‍बा लान वोसिन तिवाला थुङ्‍गुप छ्‍यु बिन। तुक क्‍यासिन तिवी गोला मेताक छेन्‍दी पुवु दोके क्‍यानी ख्‍योरो डतिवा ङोछाला ख्‍येल्‍गिवी।” सिनी टि वे।
ROM 12:21 दुक्‍टाकी ख्‍योरो खला ग्‍येल माज्‍यी, यिने ख्‍यिराङ लाका ल्‍यामु क्‍यानी दुक्‍टाकी खला ग्‍येला की।
ROM 13:1 तेरी मीतिवा लुङ्‍बाकी ओङ्‍ज्‍येन कितुपतिवी ओङला देशी। च्‍यिलासिसिन कोन्‍छ्‍योक नेमा वावु ओङ्‍ज्‍येन मिसिन यम्‍बा सी साङ ओङ्‍ज्‍येन कितुप मेङ्‍येवी। तिवा कोन्‍छ्‍योककी राङ पेन नङ्‍गुप यिन।
ROM 13:2 तुक क्‍यानी लुङ्‍बाला ओङ्‍ज्‍येन कितुपतिवी तेन्‍दोकला लङ्‍गुप तीकी कोन्‍छ्‍योककी पेतुप मीतिवी तेन्‍दोकला लङ्‍गुप यिन। तिवाला कोन्‍छ्‍योककी पर्च्या तोङ्‍गिवी।
ROM 13:3 च्‍यिलासिसिन तुका लाका टेङ्‍बु कितुपतिवा ओङ्‍ज्‍येन कितुपतिवाला ज्‍यिवा कितुप मिन, यिने लाका दुक्‍टा कितुपतिवा ओङ्‍ज्‍येन कितुपतिवाला ज्‍यिवा किवी। काङ ख्‍युरुङ ओङ्‍ज्‍येन कितुपतिवाला ज्‍यिवा किवी? तुकै यिन्‍सिन ख्‍युरुङ तिवी ओङला देनी लाका टेङ्‍बु की। तमा तिवी ख्‍युरुङला ताङ्‍देन किवी।
ROM 13:4 च्‍यिलासिसिन ओङ्‍ज्‍येन कितुप मीतिवा ख्‍युरुङला ल्‍यामु च्‍युङ्‍शी सिनी कोन्‍छ्‍योकला शब्‍ज्‍यी कितुप मीतिवा यिन। यिने दोजो ख्‍युरुङ दुक्‍टा किवी सिसिन ख्‍युरुङ तिवाला ज्‍यिवा कि गोकिवी। तीकी तेन्‍दा मेताला खुर्पा मेजेर्वी, लाका दुक्‍टा कितुपतिवाला पर्च्या तोङ्‍गुप कोन्‍छ्‍योकला शब्‍ज्‍यी कितुप मीतिवा यिन।
ROM 13:5 तुक क्‍यानी ख्‍यिराङ कोन्‍छ्‍योककी पर्च्या नेसुर र्‍होकुपला तिराङ मिन, यिने सेमगी दिङ नेज्‍युनी नासाम ताङ्‍नी ओङ्‍ज्‍येन कितुपतिवी ओङला दे गोकिवी।
ROM 13:6 ती तप्‍की ख्‍यिरा तिवाला से ते गोकिवी, च्‍यिलासिसिन तिवा तीकी थोक्‍ला नरी कोन्‍छ्‍योकला शब्‍ज्‍यी कितुप मीतिवा यिन।
ROM 13:7 ती तप्‍की ख्‍यिरा ते गोवु काङ रे च्‍यिक रे वोसिन ते। ते गोवु सेतिवा ते। ज्‍यिवा कि गोवुतिवाला ज्‍यिवा की। ताङ्‍देन कि गोवुतिवाला ताङ्‍देन की।
ROM 13:8 ख्‍यिराङ च्‍यिककी च्‍यिकला ङ्‍यिङ्‍ज्‍ये कितुप ति मिसिन यम्‍बा सी मुला साङ छ्‍यावा मालाङ। च्‍यिककी च्‍यिकला ङ्‍यिङ्‍ज्‍ये कितुप ति मोशाकी ठिमला वोतुप कला सिक्‍यावु तेरी छे ज्‍यितुप यिन।
ROM 13:9 ति ठिम नाङ्‍ला “ख्‍योरो शम्‍डेन माकी, मी मासे, कुन माकी, देर्पा माकी।” सिनी टिवु कतिवा ताङ यम्‍बा कतिवा तेरीकी खक्‍छ्‍येवु तेन्‍दोक ति “रङगी युल्‍वातिवाला रङला दोके ङ्‍यिङ्‍ज्‍ये की।” सिक्‍यावु क ताङ मुला च्‍यिक्‍पा राङ वे।
ROM 13:10 ख्‍योरो सेमला ङ्‍यिङ्‍ज्‍ये वोसिन ख्‍योरो युल्‍वातिवाला साङ मेलोवा मिकिवी। ती तप्‍की ङ्‍यिङ्‍ज्‍ये कितुप ति ठिमला वोतुप कतिवा तेरी छे ज्‍यितुप यिन।
ROM 13:11 दी ताम्‍ङे ति नासाम तोङ। तसाम पेला चुका तुजे यिन सिरुप ति ख्‍यिराङला छ्‍या राङ वे। त याङ ङ्‍यिलोकुप ने लङ्‍गुप तुजे यिन। च्‍यिलासिसिन दाक्‍पु गोमाला तेपा क्‍यावु पेला सिनाङ तसाम पेला मङ दाक्‍पुला दिक्‍पा ने थरुप ति चिप्‍ला राङ वे।
ROM 13:12 त याङ नुप गल सिन्‍नी नाम लङ्‍गुप छाल्‍सुङ। तुक क्‍यानी दाक्‍पु नक्‍तोमीला कितुप लाका दुक्‍टा क्‍युर्नी ठछ्‍येलीला लाका टेङ्‍बु कितुपला कोन्‍छ्‍योककी नङ्‍गुप लाक्‍च्‍ये खुर्नी यु।
ROM 13:13 तमा ङ्‍यिमी गुङला युकुप दोके मिजी टेङ्‍बु क्‍योङ्‍गुप। ङ्‍याम तोङ्‍गुप ताङ छ्‍याङ्‍गेले कितुप ताङ शम्‍डेन कितुप ताङ छ्‍येवु कितुप ताङ थमु ग्‍यकुप ताङ ठतोक कितुप माकी।
ROM 13:14 यिने ख्‍यिराङ काङ क्‍यासिनाङ चोवो येशू ख्रीष्‍टकी दोके की, तमा दिक्‍पा कितुप जुकी किताङ नालुला वोतुप नासाम मेलोवा मातोङ।
ROM 14:1 तेपा रम्‍बु मेतुपतिवाला साङ नासाम तङ्‍नी ल्‍यामु की। तिवी ताम्‍ङेला क्‍येन ग्‍यकुप ति माकी।
ROM 14:2 ललाइ मीतिवी साप समातिवा तेरी साप गिवी सिनी तेपा किवी, यिने तेपा रम्‍बु मेतुपतिवा ललाइकी ङोछेलतिवा तिराङ साप गिवी सिनी तेपा किवी।
ROM 14:3 तुक क्‍यानी सापतिवी मासावुतिवाला मारे मातोङ। मासावुतिवी साङ सापतिवाला क्‍येन मातेर। च्‍यिलासिसिन कोन्‍छ्‍योककी तिवाला पेन नङ्‍गुप यिन।
ROM 14:4 मी यम्‍बी लावाला ठिम कितुप ति ख्‍युरुङ सु यिन? तीकी ज्‍यिन्‍दाककी राङ सु ल्‍यामु यिन, सु मेलोवा यिन सिनी तीला ठिम क्‍या नङ्‍गिवी। तीकी ज्‍यिन्‍दाककी राङ तीला दाल्‍जा क्‍या नङ्‍गिवी।
ROM 14:5 तमा ललाइ मीतिवी ङ्‍यिमा च्‍यिक ति ङ्‍यिमा यम्‍बा सिनाङ खक्‍छ्‍येवु यिन सिनी नासाम तोङ्‍गिवी, यिने मी यम्‍बातिवी तेरी ङ्‍यिमा ति च्‍यिक्‍पा राङ यिन सिनी नासाम तोङ्‍गिवी। तुक क्‍यानी तेरी मीतिवा दाक दाक्‍पी तेपा क्‍यावु ताम्‍ङेला तेन्‍तेन कि गोकिवी।
ROM 14:6 चुका मी तीकी ङ्‍यिमा च्‍यिकला ति खक्‍छ्‍येवु यिन सिनी तेन्‍गिवे, तीकी चोवो कोन्‍छ्‍योककी थोक्‍ला राङ तेन्‍गिवी। तमा चुका मी तीकी श सेवे, तीकी कोन्‍छ्‍योककी थोक्‍ला राङ सेवी। च्‍यिलासिसिन तीकी कोन्‍छ्‍योकला थुचिछे पुल्‍नी सेवी। चुका मी तीकी श मासावे, तीकी साङ कोन्‍छ्‍योककी थोक्‍ला राङ मासावी। तमा कोन्‍छ्‍योकला थुचिछे बुल्‍गिवी।
ROM 14:7 दाक्‍पु सु साङ रङगी थोक्‍ला तिराङ दी जम्‍बुलिङला सेन्‍बु मुलुवी, तमा रङगी थोक्‍ला तिराङ मिशिवी।
ROM 14:8 तुक क्‍यानी दाक्‍पु मिजी क्‍योङ्‍सिनाङ कोन्‍छ्‍योककी थोक्‍ला राङ क्‍योङ गोकिवी, शि गोसिनाङ कोन्‍छ्‍योककी थोक्‍ला राङ शि गोकिवी। तुक क्‍यानी दाक्‍पु शिसिनाङ सेन्‍बु देसिनाङ चोवोकी तिराङ यिन।
ROM 14:9 ख्रीष्‍ट साङ तीकी तेन्‍दोकला राङ टुङ्‍नी ङोसु लासुङ। तुक क्‍यानी ख्रीष्‍ट ति शेप ताङ ङोसु वोतुपतिवा ङ्‍यिकरकी चोवो च्‍युङ्‍सुङ।
ROM 14:10 ख्‍युरुङ च्‍यिला ख्‍योरो अच्‍युनुपतिवाला क्‍येन तेर्किवी? याङ्‍ना ख्‍योरो अच्‍युनुपतिवाला च्‍यिला मो बेप्‍किवी? दाक्‍पु तेरी ङ्‍यिम्‍ज्‍यिक कोन्‍छ्‍योककी ठिम तोङ्‍गुप दासाला थेङ्‍मा यी लाङ राङ गोकिवी।
ROM 14:11 ती तप्‍की कोन्‍छ्‍योककी सुङला दुक सिनी टि वे, “चोवो कोन्‍छ्‍योककी दुक सुङ्‍गिवी, ङ ङोसु वोतुप कोन्‍छ्‍योक यिन। तुक क्‍यानी तेरी मीतिवा ङे दोङ्‍ला पुमुङ सला जुकिवी। तमा तेरी मीतिवी ङला राङ कोन्‍छ्‍योक यिन सिनी सोवा देकिवी।”
ROM 14:12 तुक क्‍यानी दाक्‍पु मिरा रे रेकी रङगी काङ काङ क्‍यावे ती तेरी कोन्‍छ्‍योकला छ्‍या देन गोकिवी।
ROM 14:13 ती तप्‍की दाक्‍पु तफेन्‍ला च्‍यिककी च्‍यिकला क्‍येन मातेर। बोरु रङगी अच्‍युनुपतिवा युकुप लामला नर्तुक ग्‍यकुप ताम्‍ङे लपुप ताङ तिवाला तोक्‍सा छोकुप ताम्‍ङे मालाप सिनी तेन्‍तेन कितुप।
ROM 14:14 चोवो येशूला तेपा क्‍यावु तप्‍की दी ताम्‍ङे ति ङला तेन्‍तेन वे। साप समा ति चुका तिङ मेचेङ्‍गा मेवी, यिने चुका तीकी तीला मेचेङ्‍गा यिन सिनी नासाम तोङ्‍गिवे, तीकी थोक्‍ला मेचेङ्‍गा राङ डिवी।
ROM 14:15 दोजो ख्‍योरो सोवु समाकी ख्‍योरो अच्‍युनुपकी सेमला मेलोवा जेवी सिसिन ख्‍युरुङ तिवाला ङ्‍यिङ्‍ज्‍ये माक्‍यावु यिन। तुक क्‍यानी ख्‍योरो सोवु समाकी ख्‍योरो अच्‍युनुपतिवाला मेलोवा मातोङ। च्‍यिलासिसिन येशू ख्रीष्‍ट तिवी थोक्‍ला टुङ्‍गुप यिन।
ROM 14:16 ख्‍योरो क्‍यावु लाका ल्‍यामुला मी यम्‍बी मेलोवा सिनी क्‍येन मेतेर्शी।
ROM 14:17 च्‍यिलासिसिन कोन्‍छ्‍योककी ग्‍येल्‍खाप ति साप ताङ थुङ्‍गुपकी थोक्‍ला मिन, खोकी थु चाङ्‍माकी ओङला खोकी थोङ्‍दाङला टेङ्‍बु वोतुप ताङ लोदिमु ताङ सेम किर्मुकी थोक्‍ला यिन।
ROM 14:18 चुका मी तीकी तुका लाका क्‍यानी ख्रीष्‍टला शब्‍ज्‍यी बुल्‍गिवे, तीकी कोन्‍छ्‍योकला गा लोङ्‍गुप लाका किवी, तमा मीतिवी साङ तीला ल्‍यामु सिनी चिताङ किवी।
ROM 14:19 ती तप्‍की दाक्‍पु च्‍यिककी च्‍यिकला लोदिमु तेरुप ताङ च्‍यिककी च्‍यिकला रम्‍बु जोपला दाल्‍जा किटे कि गोकिवी।
ROM 14:20 साप समी थोक्‍ला कोन्‍छ्‍योककी क्‍या नङ्‍गुप लाकाला ना मातोङ। साप समातिवा तेरी चेङ्‍गा राङ यिन। यिने चुका समा सोसिमा मी यम्‍बाला मेलोवा जेवे, ती समा साप ति मेलोवा यिन।
ROM 14:21 श साप ताङ गुन्‍डुम छ्‍याङ थुङ्‍गुप ताङ यम्‍बा लाका काङ क्‍यासिनाङ ती लाका क्‍यावु तप्‍की मी यम्‍बाला मेलोवा जेवी सिसिन, तुक माक्‍यावु राङ ल्‍यामु यिन।
ROM 14:22 ख्‍योरो सेमला काङ तेपा क्‍यासिनाङ ती ति कोन्‍छ्‍योक ताङ ख्‍योरो पर्ला तिराङ ज्‍योक। खोरो सेमला शरुप दोके क्‍यानी रङला राङ क्‍येन मेतेरुप मी तीला मोलाम थोप्‍किवी।
ROM 14:23 यिने मी ललाइकी सेमला नाम्‍दोक क्‍यानी काङ रे च्‍यिक रे सोसुङ सिसिन तीला क्‍येन फोकिवी। च्‍यिलासिसिन तीकी साप ति तेपा नेसुर वावु मिन। तेपा माक्‍यानी क्‍यावु लाकातिवा तेरी दिक्‍पा यिन।
ROM 15:1 दाक्‍पु तेपा रम्‍बु वोतुपतिवी तेपा रम्‍बु मेतुपतिवी नोरुप लाका क्‍यासिनाङ तिवाला हम क्‍यानी दे गोकिवी। दाक्‍पु तिराङ गा कितुप लाका माकी।
ROM 15:2 दाक्‍पु तेरीकी मी यम्‍बातिवी तेपा रम्‍बु जोपला ल्‍यामु क्‍यानी तिवाला गा लङ्‍गुप लाका कितुप।
ROM 15:3 च्‍यिलासिसिन ख्रीष्‍टकी साङ खोरुङ तिराङ गा माक्‍या। ती तप्‍की कोन्‍छ्‍योककी सुङला दुक सिनी टि वे, “चोवोकी तेन्‍दोकला लानी बिन्‍दुप क्‍येन ति तन्‍दा ङला फोक्‍सुङ।”
ROM 15:4 तुक क्‍यानी तोङ्‍ला कोन्‍छ्‍योककी सुङला टिवु ताम्‍ङेतिवा दाक्‍पी थोक्‍ला येन्‍देन तेरुप च्‍युङ वे। ती सुङगी नाङ्‍ला वोतुप हम क्‍यानी देतुप ताङ टोङ्‍गु नेसुर दाक्‍पुला रेवा ङ्‍येकिवी।
ROM 15:5 ती दाक्‍पुला हम क्‍यानी दे थुपुप ताङ टोङ्‍गु नङ्‍गुप कोन्‍छ्‍योककी ख्‍यिराङ तेरीला येशू ख्रीष्‍टकी क्‍यावु दोके च्‍यिककी च्‍यिकला सेम थिन्‍नी मिजी क्‍योङ्‍गुपला दाल्‍जा किटे किशी।
ROM 15:6 तमा ख्‍यिराङ तेरी सेम च्‍यिक्‍पा राङ च्‍युङ्‍गुप ताङ ख च्‍यिक क्‍यानी दाक्‍पी चोवो येशू ख्रीष्‍टकी पपा कोन्‍छ्‍योकला सोवा देक थुप्‍शी।
ROM 15:7 तुक क्‍यानी येशू ख्रीष्‍टकी कोन्‍छ्‍योकला मोवा कितुप थोक्‍ला ख्‍यिराङला सेमला लावु दोके ख्‍यिरा साङ च्‍यिककी च्‍यिकला सेमला लङ गोकिवी।
ROM 15:8 ङ ख्‍यिराङला सिरिन, येशू ख्रीष्‍टकी कोन्‍छ्‍योक टेङ्‍बु वोतुप छ्‍या देन्‍दुपला लावा दोके क्‍यानी दी जम्‍बुलिङला फेप्‍नी च्‍येतुप लुक्‍सु क्‍यावु यहूदीतिवाला शब्‍ज्‍यी क्‍यासुङ। तुक क्‍यासिमा कोन्‍छ्‍योककी दाक्‍पी पगावा हङ्‍गावाला थाक्‍छ्‍येन नङ्‍गुप पङ्‍बु ति छ्‍या तेन्‍सुङ।
ROM 15:9 तमा यहूदी मिन्‍दुप मिरिक यम्‍बाकी मीतिवी खोकी नङ्‍गुप च्‍यम्‍बाकी थोक्‍ला खोला मोवा क्‍यासुङ। ती तप्‍की कोन्‍छ्‍योककी सुङला दुक सिनी टि वे, “तुक क्‍यानी यहूदी मिन्‍दुप मिरिक यम्‍बाकी मीतिवी पर्ला ङ ख्‍युरुङला सोवा देकिन। तमा ङ ख्‍योरे मिङला सोवा देकुप लु लङ्‍यिन।”
ROM 15:10 येलुङ दुक सिनी साङ टि वे, “ओ यहूदी मिन्‍दुप मिरिक यम्‍बाकी मीतिवा, खोकी मीतिवी मुला गा की।”
ROM 15:11 तमा येलुङ, “ओ तेरी यहूदी मिन्‍दुप मिरिक यम्‍बाकी मीतिवा, कोन्‍छ्‍योकला सोवा तेक, तमा तेरी मीतिवी साङ खोला राङ सोवा देक्‍शी।”
ROM 15:12 येलुङ कोन्‍छ्‍योककी लुङ्‍तेम्‍बा यशैयाकी दुक सिनी टि वे, “यिशैकी गिपा नेसुर मिरा च्‍यिक फेप्‍नी यहूदी मिन्‍दुप मिरिक यम्‍बाकी मीतिवाला ओङ्‍ज्‍येन क्‍या नङ्‍गिवी, तमा यहूदी मिन्‍दुप मिरिक यम्‍बाकी मीतिवी खोला रेवा किवी।”
ROM 15:13 ख्‍यिराङला रेवा नङ्‍गुप कोन्‍छ्‍योककी ख्‍यिरा क्‍यावु तेपाकी थोक्‍ला गा ताङ लोदिमु तेरी नङ्‍शी। तमा ख्‍यिराङ खोकी थु चाङ्‍माकी ओङला मङ मङ रेवा क्‍यानी दे थुप्‍शी।
ROM 15:14 ङे अच्‍युनुपतिवा, ख्‍यिराङ रङला राङ मी यम्‍बाला ल्‍यामु कितुप ताङ गोवु तेरी येन्‍देन वोतुप ताङ च्‍यिककी च्‍यिकला टोङ्‍गु तेर थुपुप गल वे सिरुप ति ङला तेन्‍तेन वे।
ROM 15:15 यिने ङ ख्‍यिराङला छासे ङाडेङ क्‍यानी माङ्‍शोक ताम्‍ङेतिवा येलुङ नासाम शर ज्‍यितुपला दी यिकी टिवु यिनो।
ROM 15:16 कोन्‍छ्‍योककी ङला नङ्‍गुप कटिनकी जोसालेन्‍सिन ङ ति येशू ख्रीष्‍टकी थोक्‍ला शब्‍ज्‍यी बुलुप मी च्‍युङ्‍नी यहूदी मिन्‍दुप मिरिक यम्‍बाकी मीतिवाला लेन ल्‍यामु ख्‍याप्‍टाक कितुप कोङ्‍यारकी लाकातिवा कितुपला पेन नङ्‍गुप यिन। तुक क्‍यानी यहूदी मिन्‍दुप मिरिक यम्‍बाकी मीतिवा साङ खोकी थु चाङ्‍माकी ओङला टेङ्‍बु च्‍युङ्‍नी खोला गा लङ्‍गुप बुल्‍वा च्‍युङ थुप्‍शी।
ROM 15:17 ती तप्‍की ङ ति येशू ख्रीष्‍टकी ओङला देनी कोन्‍छ्‍योकला शब्‍ज्‍यी बुलुप लाका कितुपला छासे तेके कितिन।
ROM 15:18 येशू ख्रीष्‍टकी ङे मिजी नेमा यहूदी मिन्‍दुप मिरिक यम्‍बाकी मीतिवाला खला ङ्‍येमु जोपला काङ क्‍या नाङ्‍वे, ती तिराङ मिसिन यम्‍बा काङ साङ ताम्‍ङे लपुप ङाडेङ मिकी। ती लाका ति ङे ख्‍याप्‍टाक क्‍यावु सुङ ताङ ङे क्‍यावु लाका ताङ,
ROM 15:19 ततिवा ताङ हलेवु लाकाकी ओङ ताङ, कोन्‍छ्‍योककी थु चाङ्‍माकी ओङ नेसुर क्‍यावु यिन। तुक क्‍यानी येशू ख्रीष्‍टकी लेन ल्‍यामु ति यरूशलेम नेज्‍युनी इल्‍लुरिकन सेक तेरी दासाला ङे ख्‍याप्‍टाक क्‍यायी।
ROM 15:20 मी यम्‍बी कोन्‍छ्‍योककी लेन ल्‍यामु ख्‍याप्‍टाक क्‍यावु दासाला येलुङ ख्‍याप्‍टाक कितुपला ङे नो माक्‍या, यिने सी साङ कोन्‍छ्‍योककी लेन ल्‍यामु ख्‍याप्‍टाक माक्‍यावु दासाला तिराङ ख्‍याप्‍टाक कितुप ति ङे नोवा वे।
ROM 15:21 तीकी कोर्ला कोन्‍छ्‍योककी सुङला दुक सिनी टि वे, “खोकी कोर्ला सी साङ सि माक्‍यासिनाङ तिवी खोला थोङ्‍गिवी, तमा खोकी कोर्ला माथोवु मीतिवी खोकी कोर्ला हाक्‍कोकिवी।”
ROM 15:22 तुक क्‍यानी ङ ख्‍यिरा ते वुङ्‍गुपला थेङ्‍मा बङी क्‍येक्नी वे।
ROM 15:23 त याङ दी दासाला कोन्‍छ्‍योककी थोक्‍ला ङे कि गोवु लाका काङ साङ मेतुप ताङ लो अला गोमा नेज्‍युनी ङ ख्‍यिरा ते वुङ्‍गुप नो वोतुप तप्‍की
ROM 15:24 ङ स्‍पेनला डोप पेला ख्‍यिराङला साङ ठेनी ख्‍यिरा मुला चेयी पर सेक लोदिमु कितुप नो क्‍यायी। तमा ङ स्‍पेनला डोप पेला ख्‍यिरा ङला दाल्‍जा किवी सिरुप ति ङला रेवा वे।
ROM 15:25 यिने त याङ ङ कोन्‍छ्‍योकला तेपा कितुप अच्‍युनुपतिवाला दाल्‍जा किटे कितुपला यरूशलेमला डोयी वे।
ROM 15:26 च्‍यिलासिसिन यरूशलेमला वोतुप तेपा कितुप मी पेराङ्‍बुतिवी थोक्‍ला माकेडोनिया ताङ अखैयाकी तेपा कितुप मीतिवी गा ताङ क्‍यानी टङ्‍गा चेयी दुम्‍नी कल ताङ वे।
ROM 15:27 ती टङ्‍गा ति तिवी सेम्‍बा सेमगी दुम्‍नी ज्‍याक्‍नोक। वुतुङ के तिवी तुका पेराङ्‍बुतिवाला दाल्‍जा किटे कि गोकिवी। च्‍यिलासिसिन दोजो यहूदी मिन्‍दुप मिरिक यम्‍बाकी मीतिवा कोन्‍छ्‍योककी थु चाङ्‍माकी मोलाम थोपुप यिन्‍सिन तिवाला थोपुप मोलाम नेसुर यरूशलेमला वोतुप तेपा कितुप मीतिवी कतुकारला दाल्‍जा किटे कि गोकिवी।
ROM 15:28 तुक क्‍यानी मकेडोनिया ताङ अखैयाकी तेपा कितुप मीतिवी कल तङ्‍गुप टङ्‍गा ति यरूशलेमला चेक तेसिमा ङ ति स्‍पेनला डिवी। ती पेला ङ ख्‍यिरा ते साङ वुङ्‍गुप्‍नो।
ROM 15:29 ङ ख्‍यिरा ते वुङ्‍गुप पेला ख्रीष्‍ट नेसुर वुङ्‍गुप मोलाम बङी खुर्नी वुङ्‍गुप्‍नो।
ROM 15:30 अच्‍युनुपतिवा, दाक्‍पी चोवो येशू ख्रीष्‍ट ताङ कोन्‍छ्‍योककी थु चाङ्‍माकी ङ्‍यिङ्‍ज्‍ये नेसुर ङे थोक्‍ला कोन्‍छ्‍योकला छासे क्‍यानी मोपोर की सिनी ङ ख्‍यिराङला ठाकुरे सिनी गोङ्‍बा शोयी।
ROM 15:31 ङ यहूदियाला वोतुप तेपा मिकिवु मीतिवी लक नेसुर थर थुप्‍शी, तमा यरूशलेमला वोतुप कोन्‍छ्‍योकला तेपा कितुप मीतिवी थोक्‍ला ङे शब्‍ज्‍यी क्‍यावु ति मीतिवी सेमला डोशी।
ROM 15:32 तमा कोन्‍छ्‍योककी नोवा वोसिन ङ ख्‍यिरा ते वासिमा ख्‍यिरा मुला सेम गा क्‍यानी च्‍यिककी च्‍यिकला टोङ्‍गु तेर थुप्‍शी सिनी मोपोर क्‍या नाङ।
ROM 15:33 सेमला लोदिमु नङ्‍गुप कोन्‍छ्‍योक ति ख्‍यिराङ तेरीकी मुला नरी ज्‍युशी। आमिन।
ROM 16:1 ङ किंक्रियाला वोतुप चर्चला कोन्‍छ्‍योककी थोक्‍ला शब्‍ज्‍यी बुलुप दाक्‍पी नुम फिबी ताङ मुला ख्‍यिराङला ङोशी डेशी कितिन।
ROM 16:2 खोकी मी बङीला दाल्‍जा किटे क्‍या वे। तमा ङला साङ दाल्‍जा किटे क्‍यासुङ। ती तप्‍की खो वुङ्‍गुप पेला ख्‍यिरा खोला कोन्‍छ्‍योककी पुम दोके नासाम ताङ्‍नी गासो शुसा। खोला काङ रे च्‍यिक रे गोसिन दाल्‍जा किटे किसा।
ROM 16:3 ख्रीष्‍ट येशूकी कोर्ला ङे मुला राङ शब्‍ज्‍यी कितुप ङे दाल्‍जा प्रिस्‍का ताङ अकिलासला साङ टसी देलेक वोतो।
ROM 16:4 च्‍यिलासिसिन तिवी ङे थोक्‍ला खोप्‍राङ मिजी साङ बिन वे। ङ तिराङ मिन, यिने यहूदी मिन्‍दुप मिरिक यम्‍बाकी चर्चकी मीतिवा तेरीकी साङ तिवाला थुचिछे सिरिन।
ROM 16:5 तिवी खाङ्‍बाला जोम्‍बुप चर्चकी तेपा कितुपतिवा तेरीला ङे टसी देलेक वोतो सिनी सिसा। ङे ङ्‍यिङ्‍ज्‍येवु दाल्‍जा इपेनितसला साङ टसी देलेक वोतो सिनी सिसा। ती ति एशिया लुङ्‍बाला तेरी सिनाङ गोमाला येशू ख्रीष्‍टला तेपा कितुप मी यिन।
ROM 16:6 मरियमला साङ टसी देलेक वोतो सिनी सिसा। तीकी साङ ख्‍यिरा थोक्‍ला टेमु क्‍यासुङो।
ROM 16:7 ङे मुला चोन्‍खाङला शोरुप ङे नाङ्‍बा एन्‍ड्रोनिकस ताङ युनियसला साङ टसी देलेक वोतो सिनी सिसा। च्‍यिलासिसिन तिवा लोमा छ्‍येतिवी पर्ला मिङ थोपुप ताङ ङ सिनाङ गोमाला येशूला तेपा कितुप मीतिवा यिनो।
ROM 16:8 चोवो येशूकी थोक्‍ला शब्‍ज्‍यी कितुप ङे ङ्‍यिङ्‍ज्‍येवु दाल्‍जा एम्‍प्‍लीआतसला साङ टसी देलेक वोतो सिनी सिसा।
ROM 16:9 तमा ख्रीष्‍ट येशूकी कोर्ला ङे मुला राङ शब्‍ज्‍यी कितुप उर्बानस ताङ ङे ङ्‍यिङ्‍ज्‍येवु दाल्‍जा स्‍ताखुसला साङ टसी देलेक वोतो सिनी सिसा।
ROM 16:10 तमा येशू ख्रीष्‍टला तेपा रम्‍बु वोतुप पङ्‍बु तेरुप मी अपेल्‍लेस ताङ अरिस्‍तोबुलसकी खाङ्‍बी मिछाङतिवाला साङ टसी देलेक वोतो सिनी सिसा।
ROM 16:11 तमा ङे छेङ्‍गा हेरोदियनला साङ टसी देलेक वोतो सिनी सिसा। तमा येशूला तेपा कितुप नर्किससकी खाङ्‍बी मीतिवाला साङ टसी देलेक वोतो सिनी सिसा।
ROM 16:12 चोवो येशूकी थोक्‍ला छासे टेमु कितुप नुम तुर्फेना ताङ त्रोफोसाला साङ टसी देलेक वोतो सिनी सिसा। तमा नुम परसीसला साङ टसी देलेक वोतो सिनी सिसा। तीकी साङ चोवो येशूकी थोक्‍ला छासे टेमु क्‍यासुङो।
ROM 16:13 चोवो येशूकी खोरे थोक्‍ला शब्‍ज्‍यी कितुपला पेतुप रूफस ताङ तीकी आमाला साङ टसी देलेक वोतो सिनी सिसा। च्‍यिलासिसिन खोकी आमा साङ ङे आमा दोके राङ यिनो।
ROM 16:14 तमा असिंक्रितस ताङ फलेगन ताङ हर्मेस ताङ पत्रोबास ताङ हर्मास ताङ तिवी मुला वोतुप यम्‍बा तेपा कितुप अच्‍युनुपतिवाला साङ टसी देलेक वोतो सिनी सिसा।
ROM 16:15 फिलोलोगस ताङ युलिया ताङ नेरियस ताङ तीकी नुम ताङ ओलिम्‍पास ताङ तिवी मुला वोतुप तेरी तेपा कितुप मीतिवाला साङ टसी देलेक वोतो सिनी सिसा।
ROM 16:16 ख्‍यिराङ च्‍यिककी च्‍यिकला येशू ख्रीष्‍टकी ङ्‍यिङ्‍ज्‍ये ताङ मुला टसी देलेक सिनी सिसा। ख्रीष्‍ट येशूला तेपा कितुप चर्चकी मीतिवा तेरीकी ख्‍यिराङला टसी देलेक सिनी ताङ वोते।
ROM 16:17 अच्‍युनुपतिवा, ङ ख्‍यिराङला ठाकुरे सिनी गोङ्‍बा शोयी। ख्‍यिराङला लापुप कोन्‍छ्‍योककी सुङगी तेन्‍दोकला लानी ख्‍यिरा पर्ला क्‍येन तेरुप ताङ क्‍येङ्‍सु जोप मीतिवाला ल्हो। तमा तिवा नेसुर क्‍येङ्‍सु दे।
ROM 16:18 च्‍यिलासिसिन तुका मीतिवी दाक्‍पी चोवो येशू ख्रीष्‍टकी थोक्‍ला शब्‍ज्‍यी कितुप मिन, यिने खोरो सुप सोपला तिराङ कोन्‍छ्‍योकला शब्‍ज्‍यी किवी। तिवा ताम्‍ङे ल्‍यामु ल्‍यामु क्‍यानी क्‍योक्‍पु लोक्‍पु मिकिवु मीतिवाला साङ जिनोक जेवी।
ROM 16:19 ख्‍यिराङ खला ङ्‍येमु वोतुप ति तेरी मीतिवाला छ्‍या वे। तुक क्‍यानी ख्‍यिरा थोक्‍ला ङ छासे सेम गा लानी वे। यिने ख्‍यिराङ चुका ति टेङ्‍बु नोके, तीला राङ च्‍यङ्‍बु वुङ गोकिवी। चुका ति दुक्‍टा नोके, ती नेसुर कुतुक दे गोकिवी।
ROM 16:20 तमा लोदिमु नङ्‍गुप कोन्‍छ्‍योककी ङमु राङ शैतानला ख्‍यिरा काङ्‍बी वोक्‍ला लेप ज्‍यिकिवी। दाक्‍पी चोवो येशू ख्रीष्‍टकी कटिन ति ख्‍यिरा मुला नरी लुशिता।
ROM 16:21 ङे मुला राङ कोन्‍छ्‍योकला शब्‍ज्‍यी बुलुप तिमोथी ताङ ङे छेङ्‍गा लुकियस ताङ यासोन ताङ सोसिपात्रोसकी साङ ख्‍यिराङला टसी देलेक सिनी ताङ वोतो।
ROM 16:22 दी यिकी टिकुप ङ तर्तियसकी छ्‍योक नेसुर साङ ख्रीष्‍टकी मिङला ख्‍यिराङला टसी देलेक वोतो।
ROM 16:23 गायसकी साङ ख्‍यिराङला टसी देलेक सिनी ताङ वोतो। खो ति ङ ताङ दे राङ वोतुप चर्चकी मीतिवा तेरीला ल्‍हटे कितुप मी यिन। ती ग्‍येसाकी टङ्‍गा चेक लङ्‍गुप मी इरास्‍तस ताङ नुप क्‍वार्टसकी साङ ख्‍यिराङला टसी देलेक ताङ्‍नी वोतो।
ROM 16:24 (दाक्‍पी चोवो येशू ख्रीष्‍टकी कटिन ति ख्‍यिरा मुला नरी वुङ्‍शी। आमिन।)
ROM 16:25 त याङ दाक्‍पु तेरीकी कोन्‍छ्‍योकला मोवा कितुप। खोकी राङ ख्‍यिराङला ङे ख्‍याप्‍टाक क्‍यावु येशू ख्रीष्‍टकी लेन ल्‍यामु नेसुर नरी तेपा रम्‍बु क्‍या दे ज्‍यिकिवी। ती लेन ल्‍यामु ति कल्‍वा कल्‍वा नेज्‍युनी छ्‍याकला ज्‍याङ वोतुप यिन।
ROM 16:26 यिने त याङ ती छ्‍याकला वोतुप लेन ल्‍यामु ति कोन्‍छ्‍योककी लुङ्‍तेम्‍बातिवी टिवु खोकी सुङला ल्‍यामो क्‍यानी ठछ्‍येली हाक्‍को थुपुप गल वे। तमा नरीकी नरी लुवु कोन्‍छ्‍योककी क नेसुर यहूदी मिन्‍दुप मिरिक यम्‍बाकी मीतिवा तेरीकी तेपा क्‍यानी खोकी सुङला ङ्‍येन्‍सुङ।
ROM 16:27 तुक क्‍यानी च्‍यिक राङ ज्‍यु वोतुप ताङ रिक्‍पाकी क्‍येङ्‍गुप दाक्‍पी कोन्‍छ्‍योकला येशू ख्रीष्‍ट नेसुर नरीकी नरी मोवा वुङ्‍शी। आमिन।
1CO 1:1 टसी देलेक! दी यिकी ति कोन्‍छ्‍योककी नोवा नेमा ख्रीष्‍ट येशूकी लोमा छ्‍ये च्‍युङ्‍गुपला खोकी कताङ नङ्‍गुप ङ पावल ताङ दाक्‍पी नुप सोस्‍थेनेसकी छ्‍योक नेसुर
1CO 1:2 कोरिन्‍थला वोतुप कोन्‍छ्‍योककी चर्च ताङ येशू ख्रीष्‍ट नेसुर टेङ्‍बु च्‍युङ्‍गुप मीतिवा ताङ चाङ्‍मा वोतुप गिपा च्‍युङ्‍गुपला कोन्‍छ्‍योककी पेन नङ्‍गुपतिवा ताङ तेरी दासाला येशू ख्रीष्‍टला दाक्‍पी चोवो सिनी खोकी मिङला कतङ्‍गुप मीतिवा तेरीला टिवु यिनो।
1CO 1:3 ख्‍यिराङ तेरीला दाक्‍पी पपा कोन्‍छ्‍योक ताङ चोवो येशू ख्रीष्‍ट नेमा कटिन ताङ लोदिमु वुङ्‍शी।
1CO 1:4 ङ ख्‍यिरा थोक्‍ला कोन्‍छ्‍योकला नरी थुचिछे बुलिन, च्‍यिलासिसिन येशू ख्रीष्‍ट नेसुर खोकी ख्‍यिराङला कटिन नङ वे।
1CO 1:5 खो नेसुर कोन्‍छ्‍योककी ख्‍यिराङला मीतिवा तेरीला ताम्‍ङे लपुप ताङ तेरी हाक्‍कोवु रिक्‍पा बङी नङ्‍नी वे।
1CO 1:6 तमा ङ्‍यिरा ख्‍यिराङला येशू ख्रीष्‍टकी कोर्ला बिन्‍दुप पङ्‍बु ति ख्‍यिरा मिजीला रम्‍बु च्‍युङ्‍नी वे।
1CO 1:7 तुक क्‍यानी ख्‍यिराङ दाक्‍पी चोवो येशू ख्रीष्‍ट लोक्‍नी फेवु तुजेला गुनी देतुप तप्‍की कोन्‍छ्‍योककी ख्‍यिराङला खोकी थु चाङ्‍माकी नङ्‍गुप ङ्‍येम्‍बा साङ बङी नङ्‍गिवी।
1CO 1:8 तमा दाक्‍पी चोवो येशू ख्रीष्‍ट फेपुप तुजे सेक ख्‍यिराङ काङ साङ क्‍येन मेतुप जोपला खोकी ख्‍यिराङला रम्‍बु जो नङ्‍गिवी।
1CO 1:9 कोन्‍छ्‍योक ति खोङ्‍तेर्मु वे। खोकी खोरे सेवु दाक्‍पी चोवो येशू ख्रीष्‍टकी मुला डिक्‍जोम कितुपला ख्‍यिराङला कताङ नङ वे।
1CO 1:10 अच्‍युनुपतिवा, चोवो येशू ख्रीष्‍टकी मिङला ङ ख्‍यिराङला ठाकुरे सिरिन। ख्‍यिराङ च्‍यिक ताङ च्‍यिककी मुला थिन्‍नी दे। ख्‍यिरा पर्ला ख्‍ये पेतुप लाका माकी, यिने सेम च्‍यिक राङ च्‍युङ्‍नी दे।
1CO 1:11 च्‍यिलासिसिन ख्‍यिरा पर्ला खाँदा शोर्नोक सिरुप लेन ति क्‍लोएकी मिछाङकी मीतिवी ङला बिन्‍सुङ।
1CO 1:12 ती लेन ति काङ यिन सिसिन, ख्‍यिरा पर्ला ललाइकी “ङ पावलकी ति यिन।”, ललाइकी “ङ अपोल्‍लोसकी ति यिन।”, तमा ललाइकी “ङ केफासकी ति यिन।”, तमा ललाइकी “ङ ख्रीष्‍टकी ति यिन।” सिनी सिनोक लो।
1CO 1:13 काङ च्‍यिक राङ वोतुप येशू ख्रीष्‍ट साङ कुतुक कुतुक वे रो? काङ ख्‍यिरा थोक्‍ला पावल ग्‍यङ्‍शिङला टुङ्‍गुप यिन रो? काङ ख्‍यिरा पावलकी मिङला बप्‍तिस्‍मा लावु यिन रो?
1CO 1:14 ङ कोन्‍छ्‍योकला थुचिछे बुलिन। ङे याङ क्रिस्‍पस ताङ गायसला मिसिन यम्‍बा सुला साङ बप्‍तिस्‍मा माबिन वे।
1CO 1:15 तुक क्‍यानी ख्‍यिराङ सी साङ ङ पावलकी मिङला बप्‍तिस्‍मा लावु यिन सिनी सि मुथुपी।
1CO 1:16 ए ङोतोक, स्‍तिफनासकी मिछाङकी मीतिवाला ति बप्‍तिस्‍मा बिन्‍दुप यिन। ती ज्‍युक्‍ला यम्‍बा सुला साङ बप्‍तिस्‍मा बिन्‍दुप ति ङला टासा मे।
1CO 1:17 च्‍यिलासिसिन ख्रीष्‍टकी ङला मीतिवाला बप्‍तिस्‍मा तेरुपला मिन, लेन ल्‍यामु ख्‍याप्‍टाक कितुपला तङ्‍गुप यिन। ती लेन ल्‍यामु ख्‍याप्‍टाक क्‍यावु ति जम्‍बुलिङकी रिक्‍पाकी ताम्‍ङे नेमा मिन। दोजो ङे जम्‍बुलिङकी रिक्‍पा नेमा ख्‍याप्‍टाक क्‍यावु यिन्‍सिन ख्रीष्‍ट ग्‍यङ्‍शिङला टुङ्‍गुप ति तेर्मे जोवु यिन।
1CO 1:18 ख्रीष्‍ट दाक्‍पी दिक्‍पी थोक्‍ला ग्‍यङ्‍शिङला कल्‍नी टुङ्‍गुप कोर्ला लेन ल्‍यामु ख्‍याप्‍टाक कितुप पेला तेपा माक्‍यानी ना डोपतिवी “ती ति तेर्मे यिन।” सिनी सिवी, यिने दाक्‍पु दिक्‍पा ने थरुपतिवी याङ “ती ति कोन्‍छ्‍योककी नङ्‍गुप ङार यिन।” सिनी सिवी।
1CO 1:19 कोन्‍छ्‍योककी सुङला दुक सिनी टि वे, “ङ खामु वोतुपतिवी रिक्‍पा ति ना तोङ्‍यिन। तमा च्‍यङ्‍बु वोतुपतिवी च्‍यङ्‍बु साङ ना तोङ्‍यिन।”
1CO 1:20 ती तप्‍की रिक्‍पा वोतुपतिवी रिक्‍पा ति काङ फेन थोसुङ रो? छ्‍योकी गेकेनतिवी येन्‍देन ति काङ फेन थोसुङ रो? तमा ताम्‍ङे लपुपला खामु वोतुपतिवी ताम्‍ङे ति काङ फेन थोसुङ रो? कोन्‍छ्‍योककी दी जम्‍बुलिङकी रिक्‍पा वोतुपतिवी रिक्‍पा ति काङ साङ फेन मोथोवु जो नाङ्‍सुङ।
1CO 1:21 जम्‍बुलिङकी मीतिवी खोरो रिक्‍पाकी कोन्‍छ्‍योकला ङो माशेवु तप्‍की दाक्‍पुला खोकी रिक्‍पा नाङ्‍सुङ। खोकी रिक्‍पा नेसुर दाक्‍पी ख्‍याप्‍टाक क्‍यावु सुङ ति तेर्मे यिन सिरुपतिवी पर्ला सी ती सुङला तेपा किवे, तिवाला कोन्‍छ्‍योककी र्‍होकुप नो क्‍यासुङ।
1CO 1:22 यहूदीतिवा ति कोन्‍छ्‍योक नेमा वुङ्‍गुप हलेवु त छोल्‍गिवी, तमा ग्रीकतिवा ति कोन्‍छ्‍योककी थोक्‍ला हाक्‍कोवु रिक्‍पा छोल्‍गिवी।
1CO 1:23 यिन्‍सिनाङ ङ्‍यिराङ ति ग्‍यङ्‍शिङला कल्‍नी टुङ्‍गुप येशू ख्रीष्‍टकी कोर्ला सुङ ख्‍याप्‍टाक किवी। ती सुङ ङ्‍येन्‍दुप पेला यहूदीतिवी दी ताम्‍ङे ति कोन्‍छ्‍योकला मारे तोङ्‍गुप यिन सिनी सिवी, ग्रीकतिवी दी ताम्‍ङे ति फेन मोथोवु यिन सिनी सिवी।
1CO 1:24 यिने कोन्‍छ्‍योककी कताङ नङ्‍गुपतिवी थोक्‍ला यहूदी यिन्‍शी ग्रीक यिन्‍शी, ख्रीष्‍ट ति कोन्‍छ्‍योककी ङार ताङ रिक्‍पा यिन सिनी हाक्‍कोकिवी।
1CO 1:25 च्‍यिलासिसिन दाक्‍पी थोङ्‍दाङला कोन्‍छ्‍योककी अम्‍बारङ्‍शिङ क्‍यावु दोके थोङ्‍सिनाङ, ती ति मीतिवी रिक्‍पा सिनाङ छासे छ्‍ये वे। कोन्‍छ्‍योक ति काङ कि मुथुपु दोके थोङ्‍सिनाङ मीतिवी ङार सिनाङ छासे छ्‍ये वे।
1CO 1:26 अच्‍युनुपतिवा, कोन्‍छ्‍योककी ख्‍यिराङला पेन नङ्‍गुप पेला ख्‍यिराङ चुकै वे? नासाम तोङ। जम्‍बुलिङकी मीतिवी थोङ्‍दाङला ख्‍यिरा पर्ला रिक्‍पा वोतुप ताङ ओङ छ्‍ये वोतुप ताङ गी ल्‍यामु वोतुप अला मे।
1CO 1:27 यिने कोन्‍छ्‍योककी दी जम्‍बुलिङकी रिक्‍पा वोतुप मीतिवाला ङोछाला ख्‍येल ज्‍यितुपला जम्‍बुलिङकी अम्‍बारङ्‍शिङ वोतुप मीतिवाला पेन नाङ्‍सुङ। तमा ओङ छ्‍ये वोतुप मीतिवाला ङोछाला ख्‍येल ज्‍यितुपला जम्‍बुलिङकी ओङ मेतुप मीतिवाला पेन नाङ्‍सुङ।
1CO 1:28 तोजो तिराङ मिन, मीतिवी छ्‍ये यिन सिनी सिक्‍यावु मीतिवाला तेन्‍दोक मेतुप जो नङ्‍गुपला कोन्‍छ्‍योककी दी जम्‍बुलिङला तेरीकी ङ्‍यिङ्‍मर क्‍यावु ताङ तेरीकी मर्च्या क्‍यावु मीतिवाला पेन नाङ्‍सुङ।
1CO 1:29 खोकी तुक क्‍या नङ्‍गुप ति दाक्‍पु सु साङ ङ राङ छ्‍ये यिन सिरुप नो मिकिशी सिनी यिन।
1CO 1:30 यिने कोन्‍छ्‍योककी ख्‍यिराङला येशू ख्रीष्‍ट ताङ मुला जु च्‍यिक राङ जो नङ्‍गुप यिन। खोकी ख्रीष्‍ट नेमा दाक्‍पुला खोकी रिक्‍पा नाङ्‍सुङ। तमा खोकी थोङ्‍दाङला दाक्‍पुला चाङ्‍मा ताङ टेङ्‍बु वोतुप जोनी दिक्‍पा ने थर च्‍यिसुङ।
1CO 1:31 ती तप्‍की कोन्‍छ्‍योककी सुङला साङ “दोजो तेके कितुप यिन्‍सिन चोवो कोन्‍छ्‍योककी थोक्‍ला राङ तेके किशी।” सिनी टि वे।
1CO 2:1 अच्‍युनुपतिवा, ङ ख्‍यिरा ते वानी कोन्‍छ्‍योककी थोक्‍ला पङ्‍बु तेरुप पेला ताम्‍ङे ग्‍येर्पु ग्‍येर्पु क्‍यानी छासे रिक्‍पा वोतुप मीतिवी दोके ख्‍याप्‍टाक माक्‍या।
1CO 2:2 च्‍यिलासिसिन ती पेला ङे येशू ख्रीष्‍टकी कोर्ला ताङ खो ग्‍यङ्‍शिङला कल्‍नी टुङ्‍गुप कोर्ला तिराङ मिसिन ताम्‍ङे यम्‍बा काङ साङ कितुप नो माक्‍या।
1CO 2:3 ङ ख्‍यिरा मुला वोतुप पेला काङ साङ कि मुथुवु दोके ताङ छासे ज्‍यिवा लानी र्‍हुकिन वायिन।
1CO 2:4 ङे ख्‍याप्‍टाक क्‍यावु सुङ ताङ टोङ्‍गु बिन्‍दुप ति जम्‍बुलिङकी च्‍यु ताङ रिक्‍पा नेसुर मिन, यिने कोन्‍छ्‍योककी थु चाङ्‍माकी ओङ ताङ ङार नेमा क्‍यावु यिन।
1CO 2:5 तुक क्‍यानी ख्‍यिरा येशूला तेपा क्‍यावु ति मी येन्‍देन ताङ रिक्‍पाला मिन, यिने कोन्‍छ्‍योककी ओङ्‍ज्‍येनला ज्‍योकुपला यिन।
1CO 2:6 यिन्‍सिनाङ कोन्‍छ्‍योकला तेपा रम्‍बु वोतुपतिवाला ताम्‍ङे कितुप पेला ङ्‍यिराङ दी रिक्‍पाकी कोर्ला राङ ख्‍याप्‍टाक किवी। दी रिक्‍पा ति दी जम्‍बुलिङकी रिक्‍पा ति मिन, जम्‍बुलिङकी ओङ्‍ज्‍येन कितुप मीतिवी रिक्‍पा साङ मिन। तिवी रिक्‍पा याङ वुतुङ के तोर्नी डिवी।
1CO 2:7 यिने ङ्‍यिराङ ति गोमाला छ्‍याकला वोतुप ताङ तन्‍दा ति तेरी हाक्‍कोवु कोन्‍छ्‍योककी रिक्‍पाकी कोर्ला ख्‍याप्‍टाक किवी। ती रिक्‍पा ति जम्‍बुलिङ ज्‍येङ्‍गुप सिनाङ गोमा नेज्‍युनी दाक्‍पी मोवाकी थोक्‍ला टडिक क्‍या नङ्‍गुप यिन।
1CO 2:8 ती ताम्‍ङे ति दी कल्‍वाकी ओङ्‍ज्‍येन कितुपतिवी हाक्‍माको। तिवी हाक्‍कोवु यिन्‍सिन मोवा वोतुप चोवो येशू ख्रीष्‍टला ग्‍यङ्‍शिङला मेगेलुप्‍जा।
1CO 2:9 ती तप्‍की कोन्‍छ्‍योककी सुङला साङ दुक सिनी टि वे, “मीतिवी मिककी माथोङ्‍गुप ताङ नम्‍ज्‍योक माथोवु ताङ नासाम मातङ्‍गुप तेरी ताम्‍ङेतिवा कोन्‍छ्‍योकला ङ्‍यिङ्‍ज्‍ये कितुपतिवी थोक्‍ला खोकी टडिक क्‍यानी वे।”
1CO 2:10 ती ताम्‍ङेकी तेन्‍दोक ति कोन्‍छ्‍योककी दाक्‍पुला खोकी थु चाङ्‍मा नेमा हाक्‍को ज्‍यिकिवी, च्‍यिलासिसिन खोकी थु चाङ्‍माकी तेरी ताम्‍ङे ति हाक्‍कोकिवी। सी साङ हाक्‍माकोवु कोन्‍छ्‍योककी नोवाला वोतुप छ्‍याककी ताम्‍ङेतिवा साङ खोकी हाक्‍कोकिवी।
1CO 2:11 मी नोवाला वोतुप ताम्‍ङेतिवा ति खोरो सेमगी राङ हाक्‍कोकिवी। ती दोके कोन्‍छ्‍योककी नोवाला वोतुप ताम्‍ङेतिवा तेरी खोकी थु चाङ्‍माकी मिसिन सी साङ हाक्‍को मुथुपी।
1CO 2:12 त याङ दाक्‍पुला जम्‍बुलिङकी सेम थोपुप मिन, कोन्‍छ्‍योककी थु चाङ्‍मा थोपुप यिन। कोन्‍छ्‍योककी दाक्‍पुला नङ्‍गुप मोलाम ति ल्‍यामो क्‍यानी हाक्‍को ज्‍यितुपला खोकी दाक्‍पुला खोकी थु चाङ्‍मा नङ्‍गुप यिन।
1CO 2:13 तुक क्‍यानी ङ्‍यिरा ख्‍याप्‍टाक क्‍यावु सुङ ति मी रिक्‍पा नेमा ख्‍याप्‍टाक क्‍यावु मिन, खोकी थु चाङ्‍मा नेमा ख्‍याप्‍टाक क्‍यावु यिन। तमा खोकी थु चाङ्‍माकी ओङला मिजी क्‍योङ्‍गुप मीतिवाला ति खोकी थु चाङ्‍माकी ओङ नेसुर वुङ्‍गुप ताम्‍ङे टेङ्‍बु ख्‍याप्‍टाक क्‍यायिन।
1CO 2:14 खोकी थु चाङ्‍मा मेतुप मी तीकी खोकी थु चाङ्‍मा नेसुर वुङ्‍गुप ताम्‍ङेतिवा सेमला मलङ्‍गिवी। च्‍यिलासिसिन तिवी तुका ताम्‍ङेतिवाला तेन्‍दोक मेतुप यिन सिनी सिवी। तमा तिवी हाक साङ मोकोवी। तुका ताम्‍ङेतिवा खोकी थु चाङ्‍मा नेमा तिराङ हाक्‍को थुप्‍किवी।
1CO 2:15 कोन्‍छ्‍योककी थु चाङ्‍मा वोतुप मी तीकी तेरी ताम्‍ङेतिवा ल्‍यामु वोतुप मेतुप ल्‍हेवी, यिने ती मी तीला मी यम्‍बा सी साङ ल्‍यामु वोतुप मेतुप ल्‍हा मुथुपी।
1CO 2:16 च्‍यिलासिसिन कोन्‍छ्‍योककी सुङला दुक सिनी टि वे, “सी कोन्‍छ्‍योककी थु चाङ्‍माकी नोवाला हाक्‍को थुप्‍किवी रो? सी खोला लोप थुप्‍किवी रो?” यिने दाक्‍पी मुला याङ ख्रीष्‍टकी सेम वे।
1CO 3:1 अच्‍युनुपतिवा, ङ ख्‍यिरा मुला ताम्‍ङे कितुप पेला कोन्‍छ्‍योककी थु चाङ्‍मा वोपुप मीतिवी मुला ताम्‍ङे क्‍यावु दोके माक्‍या, यिने जम्‍बुलिङकी ओङला वोतुप मीतिवाला दोके ताङ ख्रीष्‍टला मलोक तेपा क्‍यावु तप्‍की आङा टिक्‍पेतिवाला क्‍यावु दोके ताम्‍ङे क्‍यायिन।
1CO 3:2 ङे ख्‍यिराङला नुम थुङ्‍गुप आङा टिक्‍पेतिवाला दोके हाक्‍को थुपुप येन्‍देन तिराङ बिनिन, समा क्‍योङ्‍बु दोके हाक्‍को मुथुपुप येन्‍देन ति माबिन। च्‍यिलासिसिन तोजो पेला ख्‍यिरा कले वोतुप येन्‍देनतिवा हाक्‍को मुथुपुप वे, तरोङ साङ तुकै राङ वे।
1CO 3:3 ख्‍यिराङ तेपा क्‍यासिनाङ तरोङ साङ जम्‍बुलिङकी ओङला वोतुप मीतिवा दोके राङ वे। च्‍यिलासिसिन ख्‍यिरा पर्ला ठतोक कितुप ताङ खाँदा कितुप किवी। ख्‍यिराङ तुक कितुप ति जम्‍बुलिङकी ओङला वोतुप मीतिवी क्‍यावु दोके मिन रो?
1CO 3:4 ख्‍यिराङ ललाइकी “ङ पावलकी मी यिन।”, तमा ललाइकी “ङ ति अपोल्‍लोसकी मी यिन।” सिनी खाँदा किनोक लो। ख्‍यिरा तुक कितुप ति थोसिमा ख्‍यिराङ ति जम्‍बुलिङकी ओङला वोतुप मीतिवा दोके यिन सिरुप ति ङे हाक्‍कोसुङ।
1CO 3:5 काङ अपोल्‍लोस ति सु यिन रो? पावल ति सु यिन रो? ङ्‍यिरा ख्‍याप्‍टाक क्‍यावु कोन्‍छ्‍योककी सुङ थोनी ख्‍यिरा तेपा क्‍यावु यिन। ङ्‍यिराङ याङ कोन्‍छ्‍योकला शब्‍ज्‍यी कितुप मी तिराङ यिन।
1CO 3:6 दी ति चुशिङ जुवु पे दोके यिन। चुशिङ ति ङे चुयिन, तमा छ्‍यु ति अपोल्‍लोसकी लुक्‍सुङ, यिने तीला ग्‍या ज्‍यितुप ति याङ कोन्‍छ्‍योक राङ यिन।
1CO 3:7 तुक क्‍यानी चुशिङ जुवु ताङ छ्‍यु लुकुप ति खक्‍छ्‍येवु मिन, यिने तीला ग्‍या ज्‍यितुप कोन्‍छ्‍योक ति खक्‍छ्‍येवु यिन।
1CO 3:8 तमा जुवु ताङ छ्‍यु लुकुप ति छ्‍ये साङ मिन, छ्‍युङा साङ मिन, तिवा च्‍यिक्‍पा राङ यिन। कोन्‍छ्‍योककी तिवा रे रेला तिवी चो हुर्ताक क्‍यावे, तोजोयी राङ ल नङ्‍गिवी।
1CO 3:9 ङ्‍यिराङ ति कोन्‍छ्‍योककी थोक्‍ला मुला राङ लाका कितुपतिवा तिराङ यिन। तमा ख्‍यिराङ ति कोन्‍छ्‍योककी शिङ ताङ खोकी जोवु खाङ्‍बा यिन।
1CO 3:10 कोन्‍छ्‍योककी ङला नङ्‍गुप कटिनकी राङ ङ ति खाङ्‍बा जोप मी खामु दोके डम्‍ज्‍यी तिङ्‍यिन। तमा यम्‍बातिवी ती डम्‍ज्‍यी खला खाङ्‍बा जेवी। तमा खाङ्‍बा जोपतिवी चुक क्‍यानी जो गोकिवी सिनी नासाम ल्‍यामु तोङ गोकिवी।
1CO 3:11 च्‍यिलासिसिन कोन्‍छ्‍योककी खाङ्‍बा जोपला डम्‍ज्‍यी तिङ्‍नी वे, ती डम्‍ज्‍यी ति चोवो येशू ख्रीष्‍ट यिन। ख्रीष्‍टकी मिसिन यम्‍बा सी साङ ती डम्‍ज्‍यी दिङ मुथुपी।
1CO 3:12 दोजो दी डम्‍ज्‍यीकी खला मी ललाइकी सेर थ्‍वोनी खाङ्‍बा जोसुङ, ललाइकी ङुलकी खाङ्‍बा जोसुङ, तमा ललाइकी गोङ नावु च्‍यालक थ्‍वोनी खाङ्‍बा जोसुङ, तमा ललाइकी शिङ ताङ च ताङ सोङ्‍मा थ्‍वोनी खाङ्‍बा जोसुङ सिसिन,
1CO 3:13 तुका मीतिवा रे रेकी लाका ति कोन्‍छ्‍योककी छ्‍या देन्‍गिवी। च्‍यिलासिसिन खोकी ठिम क्‍या नङ्‍गुप तुजेला तिवी क्‍यावु लाका ति ठछ्‍येली थोङ्‍गिवी। तमा सु सुकी चुका चुका लाका क्‍यानोक सिनी मे थ्‍वोनी र्‍हेनी ल्‍हेवी।
1CO 3:14 मेला र्‍हेनी ल्‍हासिमा ती खाङ्‍बातिवा माछिक्‍सुङ सिसिन, तीला कोन्‍छ्‍योककी छ्‍यक्‍तक नङ्‍गिवी।
1CO 3:15 दोजो मी ललाइकी जोवु खाङ्‍बा ति मेला छिक्‍सुङ सिसिन ती खाङ्‍बा ति ना गल्‍नी तीला कुन फोकिवी। यिने खुरुङ ति मे नेसुर टो गलुप दोके क्‍यानी र्‍होकिवी।
1CO 3:16 ख्‍यिराङला छ्‍या वे? ख्‍यिराङ ति कोन्‍छ्‍योककी ल्‍हङाङ यिन। तमा खोकी थु चाङ्‍मा ति ख्‍यिरा मुला ज्‍युकिवी।
1CO 3:17 दोजो मी ललाइकी कोन्‍छ्‍योककी ल्‍हङाङला ना तोङ्‍गिवी सिसिन तीला साङ कोन्‍छ्‍योककी ना तोङ्‍गिवी। च्‍यिलासिसिन कोन्‍छ्‍योककी ल्‍हङाङ ति चाङ्‍मा वे। ती ल्‍हङाङ ति ख्‍यिराङ राङ यिन।
1CO 3:18 सी साङ खोरो राङ खुरुङला क्‍येन फोकुप मोजोशी। ख्‍यिराङ सु दी जम्‍बुलिङला रिक्‍पा वोतुप यिन सिनी नोकिवे, ती ति रिक्‍पा मेतुप दोके च्‍युङ्‍शी। तुक क्‍यासिन ख्‍यिराङ रिक्‍पा वोतुप च्‍युङ्‍गिवी।
1CO 3:19 च्‍यिलासिसिन दी जम्‍बुलिङकी रिक्‍पा ति कोन्‍छ्‍योककी थोङ्‍दाङला काङ साङ मिन। ती तप्‍की कोन्‍छ्‍योककी सुङला दुक सिनी टि वे, “रिक्‍पा वोतुपतिवी च्‍यङ्‍बु क्‍यानी लाका मेलोवा क्‍यावु तप्‍की ती ति खुरुङ राङ ना डिवी”
1CO 3:20 येलुङ यम्‍बा कोन्‍छ्‍योककी सुङला दुक सिनी साङ टि वे, “रिक्‍पा वोतुपतिवी सेम चुकै वे सिरुप ति कोन्‍छ्‍योकला तेरी छ्‍या वे। तिवी रिक्‍पा ति काङ साङ फेन मोथोवी।”
1CO 3:21 तुक क्‍यानी सी साङ मीतिवाला तेके मिकिशी। च्‍यिलासिसिन तेरी ति ख्‍यिरा तिराङ यिनो।
1CO 3:22 तीकी तेन्‍दोक ति पावल यिन्‍शी, अपोल्‍लोस यिन्‍शी, पत्रुस यिन्‍शी, जम्‍बुलिङ यिन्‍शी, मिजी यिन्‍शी, याङ्‍ना शेप यिन्‍शी, तसाम पेला यिन्‍शी, याङ्‍ना ज्‍युक्‍थमा यिन्‍शी, तेरी ख्‍यिरा तिराङ यिन।
1CO 3:23 तमा ख्‍यिराङ ती ख्रीष्‍टकी ति यिन, ख्रीष्‍ट ती कोन्‍छ्‍योककी ति यिन।
1CO 4:1 तुक क्‍यानी ङ्‍यिराङ ति येशू ख्रीष्‍टकी लावातिवा यिन्‍दुप ताङ छ्‍याकला वोतुप कोन्‍छ्‍योककी ग्‍येल्‍खापकी कोर्ला शब्‍ज्‍यी कितुप मी यिन सिरुप ति मीतिवी हाक्‍को गोकिवी।
1CO 4:2 तोजो तिराङ मिन, कोन्‍छ्‍योककी ग्‍येल्‍खापकी कोर्ला शब्‍ज्‍यी कितुप मीतिवा ति खोङ्‍तेर्मु वुङ गोकिवी।
1CO 4:3 तमा ख्यिरा ङला क्‍येन बिन्सिनाङ, याङ्‍ना सी ङला ठिम्‍खाङला क्यल्सिनाङ ती ति ङे थोक्ला काङ साङ मिन। ङ राङला साङ क्‍येन फोकुप लाका मिकी।
1CO 4:4 ङ टेङ्‍बु वे सिरुप ति ङला छ्‍या वे, यिन्‍सिनाङ कोन्‍छ्‍योककी थोङ्‍दाङला ति ङ टेङ्‍बु मे। ङला ठिम क्‍या नङ्‍गुप याङ कोन्‍छ्‍योक राङ यिन।
1CO 4:5 तुक क्‍यानी ख्‍यिराङ कोन्‍छ्‍योककी ठिम क्‍या नङ्‍गुप सिनाङ गोमाला के सुला साङ ठिम माकी। चोवो येशू फेपुप पर सेक गुसा। दाक्‍पी सी साङ हाक्‍माकोवा क्‍यानी क्‍यावु लाका ल्‍यामु मेलोवा ति तेरी खोकी ठछ्‍येली थोङ्‍गिवी। मी सेमगी नोवातिवा साङ ठछ्‍येली छ्‍या देन्‍गिवी। ती पेला मीतिवा रे रेला कोन्‍छ्‍योककी “ख्‍यिरा छासे को छ्‍येसुङ।” सिनी सुङ्‍गिवी।
1CO 4:6 अच्युनुपतिवा, ख्यिराङला ल्यामु वुङ्शी सिनी ङ ताङ अपोल्‍लोसकी कोर्ला पङ्बु बिन्‍नी दी ताम्ङेतिवा ङे ख्यिराङला टिवु यिन। ङ्‍यिरा तुक क्यावु ति ख्यिराङ कोन्‍छ्‍योककी सुङला सुङ्‍गुप दोके क्‍यानी मिजी क्योङ्शी सिनी यिन। तुक क्यानी ख्यिराङ सु साङ “ती मी ति छ्‍ये यिन।”, “ती मी ति छ्‍युङा यिन।” सिनी ताम्ङे माकी।
1CO 4:7 सी ख्‍यिराङला मी यम्‍बा सिनाङ छ्‍ये यिन सिनी सिक्‍यासुङ? ख्‍यिरा मुला वोतुप तेरी मोलामतिवा कोन्‍छ्‍योककी ख्‍यिराङला नङ्‍गुप मिन रो? यिन्‍सिनाङ ख्‍यिराङ च्‍यिला तेके किवी?
1CO 4:8 ए, त याङ ख्‍यिराङला गोवु च्‍यालकतिवा तेरी थोप्‍नी ख्‍यिराङ छ्‍युक्‍पु गाल्‍सुङ। ए, त याङ ङ्‍यिराङ मेसिनाङ ख्‍यिराङ ग्‍येल्‍वु दोके च्‍युङ्‍सुङ। वुतुङ के ख्‍यिराङ ग्‍येल्‍वु यिन्‍दुप यिन्‍सियाङ ङ्‍यिराङ साङ ख्‍यिरा मुला राङ ग्‍येल्‍वु कितुप ङ्‍येतुप्‍जा।
1CO 4:9 यिने ङला दुका नासाम यी शर्किनोक, ङ्‍यिराङ ख्रीष्‍टकी लेन ल्‍यामु ख्‍याप्‍टाक कितुप लोमा छ्‍येतिवाला याङ कोन्‍छ्‍योककी मी मिङ्‍गाला सेतुप छ्‍येर्पा बिन्‍नी तेरी सिनाङ छ्‍युङा जो नङ वे। ङ्‍यिराङ याङ देवाच्‍येनकी लेन क्‍योलुप थुतिवा ताङ जम्‍बुलिङकी मीतिवी दोङ्‍ला ल्‍हेर्मु छ्‍या देन्‍दुप च्‍युङ्‍सुङ।
1CO 4:10 ए, ङ्‍यिराङ याङ ख्रीष्‍टकी थोक्‍ला रिक्‍पा मेतुप च्‍युङ्‍सुङ, यिने ख्‍यिराङ ति खोकी जोसालेन्‍सिन रिक्‍पा वोतुप च्‍युङ्‍सुङ। ङ्‍यिराङ ङार मेतुप गल वे, यिने ख्‍यिराङ ति ङार वोतुप गल वे। ख्‍यिराङला ताङ्‍देन ङ्‍येनी वे, यिने ङ्‍यिराङला याङ मीतिवी मारे ताङ्‍सुङ।
1CO 4:11 तन्‍दा सेक ङ्‍यिराङ ल्‍होतुङ्‍बा ताङ कोम्‍बा लावु ताङ पेर्तुङ्‍बा सिङ वे। मीतिवी ङ्‍यिराङला दुङ्‍यिन वे, तमा ङ्‍यिरा खाङ्‍बा शिङ साङ मे।
1CO 4:12 साप ताङ कोन्‍दुपकी थोक्‍ला ङ्‍यिरा राङ लाका टेमु कियी वे। मीतिवी ङ्‍यिराङला मोताप तप्सिनाङ ङ्‍यिरा तिवाला मोलाम तेर्किवी। दुक्‍पा बिन्‍सिनाङ हम क्‍या देकिवी।
1CO 4:13 तिवी ङ्‍यिराङला मारे ताङ्‍सिनाङ तिवाला ङ्‍यिरा ताम्‍ङे ल्‍यामो किवी। तन्‍दा सेक ङ्‍यिराङ जम्‍बुलिङकी मीतिवी थोङ्‍दाङला ज्‍यरा ज्‍यिरा ताङ थल्‍दुक दोके गल वे।
1CO 4:14 ख्‍यिराङला ङोछा लोङ्‍गुप सिनी दी यिकी टिवु मिन, ङे ङ्‍यिङ्‍ज्‍येवु आङातिवाला दोके क्‍यानी टोङ्‍गु तेरुपला टिवु यिनो।
1CO 4:15 येशू ख्रीष्‍टकी कोर्ला ख्‍यिराङला लाम तेरुप मीतिवा याङ तोङ्‍डा च्‍यिथम्‍बा चोयी वोज्‍यिवी, यिने पपा ति च्‍यिक राङ वे। ङे ख्‍यिराङला ख्रीष्‍ट येशूकी थोक्‍ला लेन ल्‍यामु ख्‍याप्‍टाक क्‍यावु तप्‍की ङ ति ख्‍यिरा पपा दोके च्‍युङ वे।
1CO 4:16 तुक क्‍यानी ख्‍यिराङ ङे दोके लुमु सेतुप वुङ गोकिवी सिनी ङ ख्‍यिराङला ठाकुरे सिरिन।
1CO 4:17 ती तप्‍की तिमोथीला ङ ख्‍यिरा ते तोङ्‍यिन वोतो। ती ति येशू ख्रीष्‍टला तेपा कितुप छासे ङ्‍यिङ्‍ज्‍येवु ङे पुज्‍युङ यिन। दासा तेरीला वोतुप चर्चकी मीतिवाला ङे लापुप दोके ङ चुक क्‍यानी येशू ख्रीष्‍टकी कला युनी मिजी क्‍याङ्‍सुङ सिरुप ताम्‍ङे ति तीकी ख्‍यिराङला टेन्‍सो कि ज्‍यिकितो।
1CO 4:18 ख्‍यिरा पर्ला मिरा चोकी याङ ङ ख्‍यिरा ते मेङ्‍गिवी नोक्‍यानी छ्‍येजु क्‍यानी युकिनोक।
1CO 4:19 यिने कोन्‍छ्‍योककी नोवा वोसिन, ङ ख्‍यिरा ते टिम्‍बु राङ वुङ्‍गुप्‍नो। तमा छ्‍येजु कितुपतिवी ताम्‍ङे ति कोन्‍छ्‍योककी ङार नेमा वावु यिनोक मिनोक सिनी ङ हाक्‍कोवा कितिन।
1CO 4:20 च्‍यिलासिसिन कोन्‍छ्‍योककी ग्‍येल्‍खाप ति ताम्‍ङेला मिन, यिने खोकी ङारला वे।
1CO 4:21 ख्‍यिरा नासाम काङ वे? ङ ख्‍यिरा ते वुङ्‍गुप पेला ख्‍यिराङला वोरु देन्‍दुपला वुङ्‍गुप की, सेम बोल्‍मु क्‍यानी ङ्‍यिङ्‍ज्‍ये कितुपला वुङ्‍गुप?
1CO 5:1 ङ ख्‍यिराङला ताम्‍ङे च्‍यिक सिरिन। ख्‍यिरा पर्ला शम्‍डेन कितुपतिवा वे सिरुप ति ङे थोसुङ। तुका शम्‍डेन कितुप लाका याङ कोन्‍छ्‍योकला ङो माशेवु मीतिवी पर्ला साङ मेङ्‍गिवी। ख्‍यिरा पर्ला ललाइकी खोरो उरु आमाला साङ पेर्मीला ज्‍याक्‍नोक सिनोक।
1CO 5:2 ती हाक्‍कोसिनाङ ख्‍यिराङ अम्‍बारङ्‍शिङ किवी? काङ ख्‍यिरा याङ तीकी थोक्‍ला सेम्‍दुक कि गोवु मिन रो? तुका लाका मेलोक्‍पा कितुप मीला ख्‍यिरा पर नेमा तेन तोङ गोवु ति यिन्‍जा।
1CO 5:3 ङ ख्‍यिरा मु नेसुर थाक्‍रिङ्‍बु वोसिनाङ ङे सेम ति ख्‍यिरा मुला राङ वे। ती तप्‍की ङ ख्‍यिरा पर्ला मेसिनाङ वोतुप दोके क्‍यानी तुका लाका मेलोवा कितुप मीला ङे ठिम क्‍यायिन।
1CO 5:4 ख्‍यिराङ दाक्‍पी चोवो येशूकी मिङला जोम्‍बुप पेला ङे सेम साङ ख्‍यिरा पर्ला राङ गिवी। तमा दाक्‍पी चोवो येशूकी ओङ साङ ते गिवी।
1CO 5:5 ती पेला तुका लाका मेलोक्‍पा कितुप मी ति शैतानला चेक ते! तुक क्‍यासिन तीकी जु ति नाडोशी, यिने तीकी सेम ति चोवो फेपुप तुजेला र्‍होक्‍शी।
1CO 5:6 ख्‍यिराङ अम्‍बारङ्‍शिङ कितुप ति ल्‍यामु मिन। खमीर चेयी लुक्‍नी टम्‍दोक ङ्‍येसिन तेरी टम्‍दोक ति बोकिवी सिरुप ति ख्‍यिराङला छ्‍या मे?
1CO 5:7 तुक क्‍यानी ख्‍यिरा गोमाला क्‍यावु दिक्‍पातिवा ति टम्‍दोक नाङ्‍ला लुकुप खमीर यिन। ती तप्‍की ख्‍यिरा खमीर ङ्‍यिङ्‍बा दोके वोतुप शम्‍डेन कितुप मीला तेन्‍नी तोङ! तमा ख्‍यिराङ खमीर मालुकुप टम्‍दोक दोके टेङ्‍बु डिवी। गोमाला यहूदीतिवा मिश्र लुङ्‍बा नेसुर थरुप पेला लुक रुक सेनी जिन्‍बा ताङ्‍सुङ। ती दोके क्‍यानी चोवो येशू ख्रीष्‍ट ति यहूदीतिवा थरुप तुछ्‍येनला सेतुप लुक रुक च्‍युङ्‍नी दाक्‍पुला दिक्‍पा ने थर ज्‍यितुपला टुङ्‍सुङ।
1CO 5:8 तुक क्‍यानी दाक्पी दुक्‍टा ताङ सेम नक्‍पातिवा यिन्‍दुप खमीर ङ्‍यिङ्‍बा लुकुप शुब्‍ज्‍याङ सोनी मिन, खोनक्‍पु मेतुप ताङ टेङ्‍बुकी खमीर मालुकुप शुब्‍ज्‍याङ सोनी यहूदी थरुप तुछ्‍येन तेन्‍दुप।
1CO 5:9 गोमाला साङ ङे ख्‍यिराङला शम्‍डेन कितुपतिवी दला माशुक सिनी यिकी टिनी तङ्‍गुप यिन।
1CO 5:10 तीकी तेन्‍दोक ति दी जम्‍बुलिङकी शम्‍डेन कितुपतिवा ताङ देर्पा कितुपतिवा ताङ कुन कितुपतिवा ताङ कुला छ्‍यो तोङ्‍गुपतिवी मुला नाम्‍साङ तम्‍जी माजो सिक्‍यावु ति मिन। मिसियाङ ख्‍यिराङ दी जम्‍बुलिङ नेमा पाङ्‍ला थेन्‍नी डो गोकिवी।
1CO 5:11 चुका मी तीकी ङ कोन्‍छ्‍योकला तेपा कितुप मी यिन सिवी, यिने शम्‍डेन कितुप ताङ देर्पा कितुप ताङ कुला छ्‍यो तोङ्‍गुप ताङ मीला ङ्‍यिर्मु कितुप ताङ छ्‍याङ्‍गेले कितुप याङ्‍ना कुन किवी सिसिन, तुका मीतिवी मुला तम्‍जी माजो, तिवी मुला देनी समा साङ मासा।
1CO 5:12 च्‍यिलासिसिन कोन्‍छ्‍योकला तेपा मिकिवु मीतिवाला ठिम कितुप ति ङला काङ ख्‍येप्‍साङ वे रो? काङ चर्चकी तेपा कितुप मीतिवाला ख्‍यिरा राङ ठिम तोङ मोगोवी रो?
1CO 5:13 तेपा मिकिवु मीतिवाला ठिम क्‍या नङ्‍गुप ति कोन्‍छ्‍योक यिन। तुक क्‍यानी कोन्‍छ्‍योककी सुङला साङ टि वे, “काङ ख्‍यिरा पर्ला वोतुप मी दुक्‍टातिवाला तेन्‍नी तोङ!”
1CO 6:1 ख्‍यिरा पर्ला मिरा च्‍यिक ति यम्‍बा नुप ताङ मुला थमु शोर्सुङ सिसिन ख्‍यिराङ ठिम कितुपला कोन्‍छ्‍योकला तेपा कितुपतिवी ते मागल्‍नी च्‍यिला कोन्‍छ्‍योकला ङो माशेवु मीतिवी ठिम कितुप ठिम्‍खाङला डिवी?
1CO 6:2 ज्‍युक्‍ला कोन्‍छ्‍योकला तेपा कितुप मीतिवी जम्‍बुलिङला ठिम तोङ्‍गिवी सिरुप ति ख्‍यिराङला छ्‍या मे रो? काङ दी जम्‍बुलिङला ठिम कितुप छ्‍या वोसिन तुका खाँदा टिक्‍पेतिवा डिक्‍नी तेरुप ति ख्‍यिराङला ओङ मे?
1CO 6:3 काङ देवाच्‍येनकी लेन क्‍योलुप थुतिवाला साङ ज्‍युक्‍ला दाक्‍पी ठिम किवी सिरुप ति ख्‍यिराङला छ्‍या मे रो? तुक क्‍यानी दी मिजीला वुङ्‍गुप जम्‍बुलिङकी खाँदातिवा ति दाक्‍पी डिक मुथुवी रो?
1CO 6:4 ख्‍यिरा पर्ला तुका खाँदातिवा वोसिन च्‍यिला ख्‍यिराङ कोन्‍छ्‍योकला ङो माशेवु मीतिवी ठिम कितुप ठिम्‍खाङला डिवी? तुका मीतिवाला याङ चर्चकी काङ ताङ्‍देन मिकिवी।
1CO 6:5 दी ताम्‍ङे ति ङ ख्‍यिराङला ङोछा लोङ्‍गुपला सिरिन। ख्‍यिरा पर्ला खाँदा शोर्सिन डिङ तेरुप रिक्‍पा वोतुप मी ति ख्‍यिरा पर्ला च्‍यिक साङ मे रो?
1CO 6:6 यिने ख्‍यिरा पर्ला मिरा च्‍यिक ति यम्‍बा नुप ताङ मुला थमु शोर्सिन ती डिकुपला ख्‍यिराङ कोन्‍छ्‍योकला तेपा मिकिवु मीतिवी ठिम्‍खाङला डिवी?
1CO 6:7 ख्‍यिराङ च्‍यिककी च्‍यिकला शुवा ग्‍यकुप ति ल्‍हासिन ख्‍यिराङ कोन्‍छ्‍योकला तेपा मिकिवु मीतिवा दोके यिन सिनी हाक्‍कोकिवी। काङ ख्‍यिराङला ङ्‍यप्‍च्‍ये क्‍यासिनाङ हम क्‍यानी दे मुथुवी? ख्‍यिराङला मी यम्‍बी क्‍येन्‍सिनाङ हम क्‍या देसिन मेवी रो?
1CO 6:8 यिने ख्‍यिराङ याङ तेपा कितुप अच्‍युनुपतिवी पर्ला राङ च्‍यिककी च्‍यिकला क्‍येन्‍दुप ताङ मेलोवा किनोक।
1CO 6:9 दुक्‍टा कितुप मीतिवा कोन्‍छ्‍योककी ग्‍येल्‍खापला लेप मुथुपी सिरुप ति ख्‍यिराङला छ्‍या मे? ल्‍यामु क्‍यानी हाक्‍कोवा की। छ्‍येवु छ्‍येमु कितुपतिवा, कुला छ्‍यो तोङ्‍गुपतिवा, शम्‍डेन कितुपतिवा, ख्‍योक्‍पेजा ख्‍योक्‍पेजी पर्ला राङ शम्‍डेन कितुपतिवा,
1CO 6:10 कुन कितुपतिवा, देर्पा कितुपतिवा, छ्‍याङ्‍गेलेतिवा, मीला मारे तोङ्‍गुपतिवा, च्‍याक्‍पा कितुपतिवा ति कोन्‍छ्‍योककी ग्‍येल्‍खापला लेप मुथुपी।
1CO 6:11 गोमाला याङ ख्‍यिराङ साङ ललाइ तुकै राङ नोक। यिने त याङ चोवो येशू ख्रीष्‍ट ताङ दाक्‍पी कोन्‍छ्‍योककी थु चाङ्‍मा नेमा ख्‍यिरा दिक्‍पातिवा तानी ख्‍यिराङ टेङ्‍बु ताङ चाङ्‍मा च्‍युङ वे।
1CO 6:12 ख्‍यिरा पर्ला मी ललाइकी “ङ ति काङ क्‍यासिनाङ गिवी।” सिनी सिवी, यिने ती तेरी ताम्‍ङे ति ख्‍येप्‍साङ वोतुप ति मिन। ङ ति काङ क्‍यासिनाङ गिवी, यिने चुका ताम्‍ङेकी ओङला साङ ङ ति योक्‍पु मेदे।
1CO 6:13 तमा यम्‍बातिवी “समा ति सुपकी थोक्‍ला यिन, सुप ति समी थोक्‍ला यिन।” सिनी सिवी, यिने कोन्‍छ्‍योककी दिवा ङ्‍यिकरला ङ्‍यिम्‍ज्‍यिक फेन मोथोवु जेवी। दाक्‍पी जु ति शम्‍डेन कितुपकी थोक्‍ला मिन, चोवो येशूला शब्‍ज्‍यी बुलुपला यिन। तमा चोवो येशूकी दाक्‍पी जुला गोवु तेरी च्‍यालकतिवा नङ्‍गिवी।
1CO 6:14 कोन्‍छ्‍योककी खोरे ओङ नेमा राङ चोवो येशूला टुङ्‍नी ङोसु लाङ्‍सुङ। तुक क्‍यानी दाक्‍पुला साङ खोकी ओङ नेमा शेप ने सेन्‍बु लोङ्‍गिवी।
1CO 6:15 ख्‍यिरा जु ति चोवो येशू ख्रीष्‍टकी येन्‍लक यिन सिरुप ति ख्‍यिराङला छ्‍या मे? काङ ङ ति खोकी जु ति छ्‍येमुतिवी मुला शम्‍डेन कितुप जोप्‍जा? मिन, तुकै नाम्‍साङ कितुप मेङ्‍गिवी।
1CO 6:16 छ्‍येमुतिवी मुला शम्‍डेन कितुप मी जु ति छ्‍येमु ताङ च्‍यिक्‍पा राङ डिवी सिरुप ति ख्‍यिराङला छ्‍या मे? च्‍यिलासिसिन कोन्‍छ्‍योककी सुङला साङ दुक सिनी टि वे, “तिवा ङ्‍यी ति जु च्‍यिक राङ डिवी।”
1CO 6:17 यिने चुका मी ति चोवो येशू ताङ मुला च्‍यिक्‍पा राङ च्‍युङ्‍गिवे, ती मी ति खोकी थु चाङ्‍मा ताङ मुला च्‍यिक्‍पा राङ च्‍युङ्‍गिवी।
1CO 6:18 तुक क्‍यानी ङ ख्‍यिराङला सिरिन, शम्‍डेन कितुप नेसुर कुतुक दे। मीतिवी क्‍यावु यम्‍बा दिक्‍पातिवा तेरी खोरो जुकी फिला मेलोवा जेवी, यिने शम्‍डेन कितुप मी तीकी खोरो जुला राङ मेलोवा जेवी।
1CO 6:19 ख्‍यिरा जु ति कोन्‍छ्‍योककी थु चाङ्‍मा ज्‍युवु दासा यिन सिरुप ति ख्‍यिराङला छ्‍या मे? ती थु चाङ्‍मा ति कोन्‍छ्‍योककी ख्‍यिराङला नङ्‍गुप यिन। तमा ख्‍योरो मिजी ति ख्‍योरो ति मिन।
1CO 6:20 ख्‍यिराङ ति खोकी गोङ तेनी ङ्‍योवु यिन। तुक क्‍यानी ख्‍यिरा रङगी मिजी ने कोन्‍छ्‍योकला मोवा की।
1CO 7:1 ख्‍यिरा ङला मीतिवी जेन्‍दी माक्‍यावु राङ ल्‍यामु यिन सिनी यिकी टिनी तङ्‍गुप कोर्ला ताम्‍ङे कितुप।
1CO 7:2 ङ ख्‍यिराङला काङ सिरिन सिसिन, शम्‍डेन कितुप नासाम बङी शरुप तप्‍की ख्‍योक्‍पेजातिवी दाक दाक्‍पी थोक्‍ला पेर्मी लङ्‍शी, पुम्‍पेजातिवाला साङ दाक दाक्‍पी थोक्‍ला ख्‍योवा वोशी।
1CO 7:3 ख्‍योवाकी खोरो पेर्मीकी थोक्‍ला कि गोवु लाका ति तेरी की, पेर्मीकी साङ खोरो ख्‍योवी थोक्‍ला कि गोवु लाका ति तेरी की।
1CO 7:4 पेर्मीकी खोरो जुला खोरो राङ ओङ्‍ज्‍येन मिकिवी, यिने तीकी ख्‍योवी ओङ्‍ज्‍येन किवी। तुक राङ क्‍यानी ख्‍योवी साङ खोरो जुला खोरो राङ ओङ्‍ज्‍येन मिकिवी, यिने तीकी पेर्मीकी ओङ्‍ज्‍येन किवी।
1CO 7:5 ख्‍योवा ताङ पेर्मी च्‍यिककी च्‍यिकला मुला राङ ङ्‍यिलोकुप कोर्ला मेवी सिनी मासिर। ख्‍यिराङ मुला राङ ताम्‍ङे क्‍यानी चेयी पर सेक मोपोर तिराङ कितुपला कुतुक देसिनाङ यम्‍बा पेला ति मुला राङ दे। मिसियाङ ख्‍यिराङ सेम डेकला दे माथुप्‍नी शैतानकी खोक्‍पा ल्‍हापला ख्‍येल्‍गिवी।
1CO 7:6 दी ताम्‍ङे ति ङे ख्‍यिराङला क बिन्‍दुप दोके ति मिन, यिने तुक क्‍यासिन गिवी सिक्‍यावु यिन।
1CO 7:7 तेरी मीतिवा ङ दोके जेन्‍दी माक्‍यानी देसिन गिवी सिरुप ति ङ नो कितिन। यिने तेरीला कोन्‍छ्‍योक नेमा दाक दाक्‍पी थोक्‍ला कटिनकी ङ्‍येम्‍बा कुतुक कुतुक थोप्‍नी वे। च्‍यिकला ति कटिनकी ङ्‍येम्‍बा कुतुक, यम्‍बाला ति कटिनकी ङ्‍येम्‍बा कुतुक थोप्‍नी वे।
1CO 7:8 त जेन्‍दी माक्‍यावुतिवा ताङ युक्‍सिमतिवी कोर्ला ङ काङ सिरिन सिसिन, तिवा साङ ङ दोके जेन्‍दी माक्‍यावा क्‍यानी देसिन ल्‍यामु यिन।
1CO 7:9 यिने तिवा सेम डेकला ज्‍योक मुथुपी सिसिन जेन्‍दी किशी। च्‍यिलासिसिन सेम डेकला ज्‍योक मुथुवु सिनाङ बोरु जेन्‍दी क्‍यावु राङ ल्‍यामु यिन।
1CO 7:10 त जेन्‍दी क्‍यावुतिवाला ङ चोवो येशू नेमा वावु क तेरिन, पेर्मीतिवा ख्‍योवा ताङ मुला नाम्‍साङ माटल्‍शी।
1CO 7:11 दोजो टल्‍सिनाङ तीकी जेन्‍दी ति मिकिशी। बोरु येलुङ खोरो ख्‍योवी मुला राङ थिन्‍नी देशी। ख्‍योवी साङ खोरो पेर्मीला मेडेल्‍शी।
1CO 7:12 तमा यम्‍बातिवाला ति ङ चोवो येशू नेमा वावु क ति मिन, यिने ङ टोङ्‍गु तेरिन। दोजो येशूला तेपा कितुप मी मिरा च्‍यिककी ति तेपा मिकिवु पेर्मी वे, यिने ती ति खोरो मुला राङ देतुप नो किसिन तीला टल्‍नी मोज्‍योक्‍शी।
1CO 7:13 तुक राङ क्‍यानी दोजो येशूला तेपा कितुप पुम्‍पेजा मिरा च्‍यिककी ति येशूला तेपा माक्‍यावु ख्‍योवा वे, यिने ती ख्‍योवा ति खोरो मुला देतुप नो किसिन तीला टल्‍नी मोज्‍योक्‍शी।
1CO 7:14 च्‍यिलासिसिन तेपा मिकिवु ख्‍योवा ति तेपा कितुप पेर्मीकी जोसालेन्‍सिन कोन्‍छ्‍योककी थोङ्‍दाङला टेङ्‍बु च्‍युङ्‍गिवी। तेपा मिकिवु पेर्मी साङ तेपा कितुप ख्‍योवी जोसालेन्‍सिन कोन्‍छ्‍योककी थोङ्‍दाङला टेङ्‍बु च्‍युङ्‍गिवी। मिसियाङ तिवी क्‍येवु पेजातिवा साङ टेङ्‍बु मुच्‍युङ्‍गिवी, यिने त याङ तिवा टेङ्‍बु राङ च्‍युङ वे।
1CO 7:15 यिने येशूला तेपा मिकिवु तीकी येशूला तेपा कितुप ख्‍योवा याङ्‍ना पेर्मीला टल्‍नी ज्‍योकिवी सिसिन तिवा टल्‍सिनाङ गिवी। तुक क्‍यासिन ख्‍योवी ओङला साङ पेर्मी दे मोगोवी, पेर्मी ओङला साङ ख्‍योवा दे मोगोवी। कोन्‍छ्‍योककी दाक्‍पुला लोदिमु क्‍यानी देतुपला कताङ नङ्‍गुप यिन।
1CO 7:16 पेर्मीतिवा, ख्‍यिराङला छ्‍या वे, येशूला तेपा कितुप पेर्मीकी खोरो तेपा माक्‍यावु ख्‍योवाला थर ज्‍यि थुप्‍किवी, तमा येशूला तेपा कितुप ख्‍योवी साङ तेपा माक्‍यावु खोरो पेर्मीला थर ज्‍यि थुप्‍किवी।
1CO 7:17 चोवो येशूकी मीतिवा रे रेला चुकै लाका नङ वे, कङगी थोक्‍ला कताङ नङ वे, ती दोके राङ मिजी क्‍योङ्‍शी। दी ति तेरी चर्चतिवाला ङे लापुप येन्‍देन यिन।
1CO 7:18 मी ललाइला कोन्‍छ्‍योककी कताङ नङ्‍गुप पेला गोमाला के यहूदीतिवी च्‍येतुप लुक्‍सु क्‍या वे सिसिन तीकी च्‍येतुप लुक्‍सु क्‍यावु ति तुकै राङ देशी। मी ललाइ च्‍येतुप लुक्‍सु माक्‍यासिनाङ खोकी कताङ नाङ्‍सुङ सिसिन तीकी च्‍येतुप लुक्‍सु कितुप नो मिकिशी।
1CO 7:19 च्‍येतुप लुक्‍सु क्‍यावु ताङ माक्‍यावु ति खक्‍छ्‍येवु मिन, यिने कोन्‍छ्‍योककी कला ङ्‍येन्‍दुप ति खक्‍छ्‍येवु यिन।
1CO 7:20 कोन्‍छ्‍योककी मीला चुकै वोतुप पेला कताङ नङ वे, तुकै राङ देशी।
1CO 7:21 दोजो कोन्‍छ्‍योककी ख्‍युरुङला कताङ नङ्‍गुप पेला ख्‍युरुङ योक्‍पुला वोसिन ख्‍युरुङ पप माकी, यिने ती नेसुर थर थुप्‍सिन थरुप छोल।
1CO 7:22 च्‍यिलासिसिन कोन्‍छ्‍योककी कताङ नङ्‍गुप पेला सु योक्‍पु नोके, ती ति त याङ थर्नी कोन्‍छ्‍योककी गिपा च्‍युङ्‍गुप यिन। तुक राङ क्‍यानी सु मी यम्‍बी ओङला मेवे, तिवाला कोन्‍छ्‍योककी कताङ नङ्‍गुप पेला ख्रीष्‍टकी थोक्‍ला शब्‍ज्‍यी कितुप योक्‍पु यिन।
1CO 7:23 कोन्‍छ्‍योककी ख्‍यिराङला येशू ख्रीष्‍टकी ठककी गोङ तेनी ङ्‍योवु तप्‍की ख्‍यिराङ मीतिवी योक्‍पुला मादे।
1CO 7:24 तुक क्‍यानी अच्‍युनुपतिवा, कोन्‍छ्‍योककी सुला चुकै वोतुप पेला कताङ नङ वे, तुकै राङ क्‍यानी ती मी ति कोन्‍छ्‍योककी मुला तम्‍जी ल्‍यामु जोनी देशी।
1CO 7:25 त जेन्‍दी माक्‍यावु मीतिवी कोर्ला याङ चोवो येशू नेमा काङ साङ क मे। यिने कोन्‍छ्‍योककी च्‍यम्‍बाकी ङला खोङ्‍तेर्मु जो नङ्‍गुप तप्‍की ङ ख्‍यिराङला टोङ्‍गु तेरिन।
1CO 7:26 तसाम पेकी दुका छेटाङ दुङल बङी वोतुप नासाम तङ्‍सिन चुकै नोके तुकै राङ देतुप ल्‍यामु यिन सिरुप ति ङला नासाम वे।
1CO 7:27 काङ ख्‍यिरा जेन्‍दी क्‍या वे? जेन्‍दी क्‍या वोसिन पेर्मी ताङ मुला टलुप नो माकी। काङ ख्‍युरुङ जेन्‍दी माक्‍यानी देन वे? तुकै यिन्‍सिन जेन्‍दी कितुप माछोल।
1CO 7:28 यिने ख्‍योरो जेन्‍दी क्‍यासिनाङ ती ति दिक्‍पा मिन, तमा पुम्‍पेजा नाज्‍युङकी जेन्‍दी क्‍यासिनाङ ती ति दिक्‍पा क्‍यावु मिन। यिन्‍सिनाङ जेन्‍दी क्‍यावु मीतिवी दी मिजीला दुक्‍पा बङी खुर गोकिवी। तुक क्‍यानी ख्‍यिराङला दुक्‍पा मेङ्‍येशी सिरुप ति ङे नोवा वे।
1CO 7:29 अच्‍युनुपतिवा, ङे सिक्‍यावु ताम्‍ङे ति दी राङ यिन। तिङ्‍मी तुजे वा वे। तफेन्‍ला पेर्मी वोतुपतिवा पेर्मी मेतुप दोके क्‍यानी कोन्‍छ्‍योककी थोक्‍ला शब्‍ज्‍यी पुल्‍नी दे।
1CO 7:30 तमा पप क्‍यानी ङोपतिवा माङुवा क्‍यानी देशी। गा कितुपतिवा गा मिकिवुतिवा दोके क्‍यानी देशी, ङ्‍योप्‍चे ग्‍यकुपतिवा खोरो लोला काङ साङ मेतुप दोके जोनी देशी।
1CO 7:31 दी जम्‍बुलिङला देतुप पेला गोवु च्‍यालकतिवा थोकुप ति गिवी, यिने ती च्‍यालकला तिराङ नासाम मातोङ। च्‍यिलासिसिन दी जम्‍बुलिङकी च्‍यालकतिवा याङ तोर्नी डिवी।
1CO 7:32 ख्‍यिराङ तेरी पप मिकिशी सिरुप ति ङे नोवा वे। जेन्‍दी माक्‍यावु मी तीकी चुक क्‍यानी कोन्‍छ्‍योकला गा लोङ्‍गुप सिनी कोन्‍छ्‍योककी थोक्‍ला तिराङ नासाम तोङ्‍गिवी,
1CO 7:33 यिने जेन्‍दी क्‍यावु मी तीकी खोरो पेर्मीला चुक क्‍यानी गा लोङ्‍गुप सिनी जम्‍बुलिङकी ताम्‍ङेला पप क्‍यानी
1CO 7:34 तीकी सेम ति यिसिक मिसिक डिवी। तुक राङ क्‍यानी जेन्‍दी माक्‍यावु पुम्‍पेजा नाज्‍युङकी साङ खोरो मिजी ताङ सेम ति चुक क्‍यानी टेङ्‍बु जोनी देतुप सिनी कोन्‍छ्‍योककी थोक्‍ला तिराङ नासाम तोङ्‍गिवी, यिने जेन्‍दी क्‍यावु पुम्‍पेजा तीकी खोरो ख्‍योवाला चुक क्‍यानी गा लोङ्‍गुप सिनी जम्‍बुलिङकी ताम्‍ङेला तिराङ पप किवी।
1CO 7:35 ङे दी ताम्‍ङेतिवा सिक्‍यावु ति ख्‍यिराङला ग्‍येकुपला मिन, यिने ख्‍यिराङ मिजी टेङ्‍बु क्‍योङ्‍गुप ताङ चोवोकी थोक्‍ला सेम च्‍यिक राङ च्‍युङ्‍नी शब्‍ज्‍यी कि थुप्‍शी सिनी सिक्‍यावु यिन।
1CO 7:36 दोजो मी ललाइकी खोरो जेन्‍दी कितुपला लङ्‍गुप पुम्‍पेजा ताङ मुला जेन्‍दी मिकितुप नासाम वासिनाङ खोरो लङ्‍गुप पुम्‍पेजाला जेन्‍दी मिकिवी सिरुप ति ल्‍यामु मिन, तमा ती पुम्‍पेजा ति जेन्‍दी कितुप पेला च्‍युङ्‍गुप ताङ खुरुङला जेन्‍दी कितुप नो वोसिन जेन्‍दी क्‍यासिन गिवी। तुक क्‍यावु ति दिक्‍पा मिन। तमा तिवा जेन्‍दी कि राङ गोकिवी।
1CO 7:37 यिने चुका मी तीकी खोरो सेमला जेन्‍दी मिकिवु नासाम नोके, तीला सी साङ कार माक्‍या वे, तमा खुरुङ ति डेकला दे थुप्‍किवी सिनी खोरो लङ्‍गुप पुम्‍पेजाला जेन्‍दी मिकी सिनी तेन्‍तेन क्‍यासिन तीकी ल्‍यामु राङ क्‍यावु यिन।
1CO 7:38 तुक क्‍यानी चुका मी तीकी लङ्‍गुप पुम्‍पेजाला जेन्‍दी किवे, तीकी ल्‍यामु राङ क्‍यावु यिन। चुका मी तीकी जेन्‍दी मिकिवे, तीकी मङ ल्‍यामु क्‍यावु यिन।
1CO 7:39 ख्‍योवा माशिवा सेक पेर्मी ति ख्‍योवी ओङला राङ देकिवी, यिने ख्‍योवा शिसिमा तीकी खोरो सेमला गलुप ख्‍योक्‍पेजा ताङ मुला जेन्‍दी कि थुप्‍किवी। यिन्‍सिनाङ ती ख्‍योक्‍पेजा ति कोन्‍छ्‍योकला तेपा क्‍यावु वुङ गोकिवी।
1CO 7:40 ङे नासामला ती पुम्‍पेजा तीकी जेन्‍दी माक्‍यावा क्‍यानी देसिन तीला मङ किर्मु गिवी। कोन्‍छ्‍योककी थु चाङ्‍मा ङे मुला ज्‍यु वोतुप तप्‍की ङे दी ताम्‍ङे सि थुप्‍किवी।
1CO 8:1 त कुला पुलुप साप समी कोर्ला ङ ख्‍यिराङला सिरिन। दाक्‍पु तेरीला रिक्‍पा वे सिरुप ति छ्‍या वे। यिन्‍सिनाङ ती रिक्‍पाकी दाक्‍पुला ङ राङ यिन सिरुप जेवी। यिने ङ्‍यिङ्‍ज्‍येकी मी यम्‍बाला दाल्‍जा कितुप जेवी।
1CO 8:2 दोजो मी ललाइकी खुरुङ ति तेरी शेवु यिन सिनी नोकिवी सिसिन तीकी शे गोवु ति माशेवु गिवी।
1CO 8:3 यिने ललाइकी कोन्‍छ्‍योकला ङ्‍यिङ्‍ज्‍ये किवी सिसिन कोन्‍छ्‍योककी साङ तीला ङो शेकिवी।
1CO 8:4 तुक क्‍यानी कुला पुलुप समा साप कोर्ला ताम्‍ङे कितुप यिन्‍सिन दाक्‍पुला छ्‍या वे, दी जम्‍बुलिङकी कु ताङ ल्‍हलुतिवा काङ साङ मिन, कोन्‍छ्‍योक ति च्‍यिक राङ वोतुप कोन्‍छ्‍योक यिन।
1CO 8:5 नामला याङ्‍ना जम्‍बुलिङला मिङ तिराङ वोतुप ल्‍हलुतिवा वे। तुका ल्‍हलुतिवा बङी वोसिनाङ
1CO 8:6 दाक्‍पी थोक्‍ला ति पपा कोन्‍छ्‍योक च्‍यिक राङ वे। खोकी सुङ नेसुर राङ जम्‍बुलिङला वोतुप च्‍यालकतिवा तेरी ज्‍येसुङ। दाक्‍पु साङ कोन्‍छ्‍योककी थोक्‍ला मिजी क्‍योङ्‍यिन वे। तमा येशू ख्रीष्‍ट तिराङ दाक्‍पी तेपा क्‍यावु चोवो यिन। खो नेसुर राङ कोन्‍छ्‍योककी जम्‍बुलिङला वोतुप तेरी च्‍यालकतिवा ज्‍ये नाङ्‍सुङ। तमा दाक्‍पुला मिजी नङ्‍गुप साङ येशू ख्रीष्‍ट राङ यिन।
1CO 8:7 यिन्‍सिनाङ तेरी तेपा कितुप मीतिवाला साङ दी ताम्‍ङेकी कोर्ला ल्‍यामु क्‍यानी छ्‍या मेवी। माङ्‍शोक मीतिवा गोमाला कुला छ्‍यो तोङ्‍गुप बानी गलुप तप्‍की तरोङ साङ समा साप पेला कुला तेकुप समा राङ सयी वे सिरुप नासाम तोङ्‍यिन वे। तुक क्‍यानी तिवी ल्‍यामु मेलोवा हाक्‍माकोवु तप्‍की ती समा सोनी मेचेङ्‍गा गल वे सिरुप नासाम तोङ्‍गिवी।
1CO 8:8 यिने साप समी दाक्‍पु कोन्‍छ्‍योककी चिप्‍ला टेङ्‍बु च्‍युङ मुथुपी। साप समी दाक्‍पु कोन्‍छ्‍योककी थोङ्‍दाङला मेलोवा साङ मोडोवी, ल्‍यामु साङ मोडोवी।
1CO 8:9 तुक क्‍यानी ख्‍यिराङ च्‍याङ्‍से देता, ख्‍यिराङ तेपा रम्‍बु वोतुपतिवी काङ सोसिनाङ गिवी, यिने ख्‍यिरा जोसालेन्‍सिन तेपा रम्‍बु मेतुपतिवा दिक्‍पाला ख्‍येल्‍गिवी।
1CO 8:10 च्‍यिलासिसिन ख्‍यिराङ तेपा रम्‍बु वोतुपतिवा ल्‍हङाङ नाङ्‍ला देनी कुला तेकुप समा सोवु थोङ्‍सिन तेपा रम्‍बु मेतुपतिवी साङ ङाडेङ क्‍यानी साप नो मिकिवी रो?
1CO 8:11 ख्‍योरो हाक्‍कोवु ताम्‍ङेकी जोसालेन्‍सिन तेपा रम्‍बु मेतुप अच्‍युनुपतिवा दिक्‍पाला ख्‍येल्‍गिवी। दी ताम्‍ङे ल्‍यामु नासाम तोङ! तिवी थोक्‍ला राङ येशू ख्रीष्‍ट टुङ्‍गुप यिन।
1CO 8:12 ख्‍यिरा तुक क्‍यासिन तेपा रम्‍बु मेतुप अच्‍युनुपतिवाला दिक्‍पा कि ज्‍यिकिवी। तमा तिवी सेमला साङ मेलोक्‍पा लङ ज्‍यिकिवी। ती ति ख्रीष्‍टकी तेन्‍दोकला दिक्‍पा क्‍यावु यिन।
1CO 8:13 तुक क्‍यानी दोजो साप समी जोसालेन्‍सिन तेपा कितुप अच्‍युनुपतिवा दिक्‍पाला ख्‍येल्‍गिवी सिसिन, ङ नाम्‍साङ श मसा। तुक क्‍यासिन ङे तेपा कितुप अच्‍युनुपतिवा दिक्‍पाला ख्‍येलुप नेसुर र्‍होकिवी।
1CO 9:1 ङ ख्‍यिराङला सिरिन, काङ ङला काङ साङ कितुप मेङ्‍येवी रो? काङ ङ ति लोमा छ्‍ये मिन रो? काङ ङे चोवो येशूला माथोङ वे रो? काङ ङे ख्‍यिराङला ख्‍याप्‍टाक क्‍यावु सुङ थ्‍वोनी ख्‍यिरा ति सुङला तेपा क्‍यावु मिन रो?
1CO 9:2 मी यम्‍बी ङला लोमा छ्‍ये मिन सिक्‍यासिनाङ ख्‍यिरा थोक्‍ला ति ङ लोमा छ्‍ये यिन, च्‍यिलासिसिन ङे ख्‍यिराङला चोवो येशूकी कोर्ला लेन ल्‍यामु ख्‍याप्‍टाक क्‍यासिमा ख्‍यिरा खोला तेपा क्‍यावु तप्‍की ख्‍यिरा ङला लोमा छ्‍ये यिन सिनी पङ्‍बु तेर्किवी।
1CO 9:3 ङे तेन्‍दोकला लङ्‍गुप मीतिवाला ङे सि गोवु ताम्‍ङे ति दी राङ यिन।
1CO 9:4 काङ ङ्‍यिराङला साप थुङ्‍गुप ओङ मे रो?
1CO 9:5 काङ ङ्‍यिराङला साङ यम्‍बा लोमा छ्‍येतिवा ताङ चोवो येशूकी नुपतिवा ताङ पत्रुसकी दोके तेपा कितुप पेर्मी टिनी युकुप ओङ मे रो?
1CO 9:6 काङ ङ ताङ बारनाबासकी तिराङ मिजी क्‍योङ्‍गुपला लाका कि गोकिवी रो?
1CO 9:7 चुका मी तीकी रङगी डोसुमला मक्‍मीकी लाका किवी रो? चुका मी तीकी गुन्‍डुम तप्‍सिमा गुन्‍डुम डेलु मासावी रो? चुका मी तीकी छ्‍युङ्‍मा सोसिमा छ्‍युङ्‍मी वोमा मुथुङ्‍गिवी रो?
1CO 9:8 ङे सिक्‍यावु ताम्‍ङे ति मी सिक्‍यावु ताम्‍ङे तिराङ मिन, कोन्‍छ्‍योककी सुङगी नाङ्‍ला साङ वे।
1CO 9:9 मोशाकी ठिम नाङ्‍ला दुक सिनी टि वे, “स्‍वा ङ्‍यिलुप पेला लाङगी खला खप्‍चिल माग्‍यक।” तुक सिक्‍यावु ति लाङतिवी कोर्ला कोन्‍छ्‍योककी पप क्‍यानी सुङ्‍गुप मिन,
1CO 9:10 ती सुङ ति कोन्‍छ्‍योककी दाक्‍पी थोक्‍ला राङ सुङ्‍गुप मिन रो? दी तेरी ताम्‍ङे ति दाक्‍पी थोक्‍ला टिवु यिन। च्‍यिलासिसिन शिङ मोतुप ताङ स्‍वा ङ्‍यिलुप तीकी काङ रे च्‍यिक रे ङ्‍येतुप रेवा क्‍यानी लाका किवी।
1CO 9:11 दोजो ख्‍यिरा पर्ला सेन तपुप दोके ङ्‍यिरा ख्‍यिराङला कोन्‍छ्‍योककी सुङ ख्‍याप्‍टाक क्‍यासिमा ख्‍यिरा ङ्‍यिराङला साप थुङ्‍गुपला गोवु च्‍यालक ताङ कोन्‍ज्‍ये लङ्‍सिन ख्‍यिराङला कले च्‍युङ्‍सुङ रो?
1CO 9:12 यम्‍बा कोन्‍छ्‍योककी थोक्‍ला शब्‍ज्‍यी कितुपतिवी ख्‍यिराङला तुक राङ साङ लोङ्‍गिवी सिसिन, ङ्‍यिरा याङ ख्‍यिराङला ती सिनाङ मङ लोङ्‍गुप ओङ वे। यिन्‍सिनाङ ङ्‍यिरा ख्‍यिराङला काङ साङ मालाङ। बोरु चोवो येशू ख्रीष्‍टकी लेन ल्‍यामु ख्‍याप्‍टाक कितुपला दुक्‍पा मेङ्‍शी सिनी चुका दुक्‍पा ख्‍येल्‍सिनाङ हम क्‍यानी देतिन।
1CO 9:13 काङ ख्‍यिराङला छ्‍या मे? कोन्‍छ्‍योककी ल्‍हङाङ नाङ्‍ला लाका कितुपतिवी ल्‍हङाङ नेमा राङ समा सेवी। ल्‍हङाङकी छोटीला शब्‍ज्‍यी कितुपतिवी जिन्‍बा पुलुप नेमा राङ थोप गोवु ति थोप्‍किवी।
1CO 9:14 तुक राङ क्‍यानी लेन ल्‍यामु ख्‍याप्‍टाक कितुपतिवा लेन ल्‍यामु ख्‍याप्‍टाक कितुप नेसुर राङ मिजी क्‍योङ्‍शी सिनी कोन्‍छ्‍योककी क नङ वे।
1CO 9:15 यिने ङला थोप गोवु ओङ ति ङे नाम्‍साङ माछाल। ङला थोप गोवुतिवा तेरी गोकिवी सिनी दी यिकी टिवु साङ मिन। ङे तेके क्‍यावु ताम्‍ङेला सी साङ ग्‍येकिवी सिसिन बोरु ङ शेप राङ गा यिन।
1CO 9:16 दोजो ङे लेन ल्‍यामु ख्‍याप्‍टाक क्‍यासिनाङ काङ अम्‍बारङ्‍शिङ कितुप ताम्‍ङे मे, च्‍यिलासिसिन ङे लेन ल्‍यामु ख्‍याप्‍टाक माक्‍यावाला माक्‍यावी मेवी। ख्‍याप्‍टाक माक्‍यासिन ङला कोन्‍छ्‍योककी पर्च्या फोकिवी।
1CO 9:17 ती सुङ ख्‍याप्‍टाक कितुप लाका ति ङरा राङ क्‍यावु यिन्‍सियाङ ङला काङ रे च्‍यिक रे छ्‍यक्‍तक थोपुप ति यिन्‍जा, यिने दी लाका ति कोन्‍छ्‍योककी ङला चेक तेन नङ्‍गुप तप्‍की ङे क्‍यावु यिन।
1CO 9:18 सुङ ख्‍याप्‍टाक क्‍यानी ङला काङ छ्‍यक्‍तक थोप्‍किवी सिसिन ङे लेन ल्‍यामु ख्‍याप्‍टाक क्‍यासिमा थोपुप ओङ ति मोछोलुप ताङ ङराङला थोप गोवु टङ्‍गा मालावा क्‍यानी ख्‍याप्‍टाक कितुप ति ङला थोप गोवु छ्‍यक्‍तक यिन।
1CO 9:19 ङ ति सी योक्‍पु साङ मिन, यिने मी बङीला ख्रीष्‍टकी लेन ल्‍यामु ख्‍याप्‍टाक क्‍यानी खोला तेपा कि ज्‍यितुपला मी तेरीकी योक्‍पु दोके च्‍युङ्‍यिन।
1CO 9:20 यहूदीतिवाला सुङ ख्‍याप्‍टाक कितुप सिनी ङ यहूदी दोके च्‍युङ्‍यिन। कोन्‍छ्‍योककी ठिमकी ओङला देतुपतिवाला सुङ ख्‍याप्‍टाक कितुप सिनी ङ ठिमकी ओङला मेसिनाङ वोतुप दोके च्‍युङ्‍यिन।
1CO 9:21 तमा ठिमकी ओङला मेतुपतिवाला ख्रीष्‍टकी ओङला टि वुङ्‍गुपला ङ ति ठिमकी ओङला मेतुप दोके राङ च्‍युङ्‍यिन। ङे तुक क्‍यावु ति ङ ति कोन्‍छ्‍योककी ठिमला मेतेन सिक्‍यावु ति मिन, ख्रीष्‍टकी सुङला ङ्‍येन्‍दुप यिन।
1CO 9:22 तमा तेपा रम्‍बु मेतुपतिवाला ख्रीष्‍टला तेपा कि ज्‍यितुपला ङ साङ तेपा मेतुपतिवा दोके राङ च्‍युङ्‍यिन। मी ललाइ ललाइला ख्रीष्‍टला तेपा कि ज्‍यितुपला ङ ति नम्‍बा तेरीकी मीतिवा दोके राङ च्‍युङ्‍यिन।
1CO 9:23 ती दोके क्‍यानी ङे लेन ल्‍यामु ख्‍याप्‍टाक कितुप लाकातिवा तेरी क्‍यावु तेन्‍दोक ति मीतिवी येशूला तेपा कितुप मोलाम थोप्‍शी, तमा ती मोलाम ति ङला साङ थोप्‍शी सिनी यिन।
1CO 9:24 काङ ख्‍यिराङला छ्‍या मे, छ्‍योङ्‍बाल ग्‍यकुप चिर्मुला मीतिवा तेरी छ्‍योङ्‍बाल ग्‍यकिवी, यिने छ्‍यक्‍तक ति मिरा च्‍यिकला तिराङ थोप्‍किवी। तुक क्‍यानी ख्‍यिराङ साङ छ्‍यक्‍तक थोपुप थोक्‍ला छ्‍योङ्‍बाल ग्‍योप।
1CO 9:25 चिर्मु चेपला वुङ्‍गुप मीतिवा तेरी छ्‍यक्‍तक थोपुपला डेकला देनी तालिम किवी। तिवा ना डोप छ्‍यक्‍तक थोपुपला तुक किवी, यिने दाक्‍पु ति नाम्‍साङ ना मोडोवु छ्‍यक्‍तक थोपुपला डेकला देनी तालिम किवी।
1CO 9:26 तुक क्‍यानी ङ साङ छ्‍यक्‍तक थोपुपला छ्‍योङ्‍बाल ग्‍यकुप चिर्मु चेप मीतिवा दोके क्‍यानी छ्‍योङ्‍बाल ग्‍यकिवी। ङ ति वोक्‍तुम ग्‍यकुप चिर्मु चेप मी तीकी तेर्मेला वुर्तुकला वोक्‍तुम माग्‍यकुप दोके क्‍यानी तेन्‍दोक मेतुप लाका मिकिवी।
1CO 9:27 ङ ङे जुला छासे दुक्‍पा वोसिनाङ चिर्मु चेपला तालिम कितुप मी दोके क्‍यानी डेकला देतिन। मिसियाङ मी यम्‍बाला लेन ल्‍यामु ख्‍याप्‍टाक क्‍यासिमा ङ ति छ्‍यक्‍तक थोपुपला फम्‍बुप मी दोके च्‍युङ्‍गिवी।
1CO 10:1 अच्‍युनुपतिवा, ख्‍यिराङ दी ताम्‍ङे ति नासाम तोङ! दाक्‍पी पगावा हङ्‍गावातिवाला कोन्‍छ्‍योककी मिश्र लुङ्‍बा नेसुर तेन्‍नी वुङ्‍गुप पेला तिवी गोमा गोमाला मुक्‍पा तङ्‍नी लाम छ्‍या तेन्‍सुङ। तिवा डोप पेला ग्‍येम्‍छो साङ फेका ङ्‍यी गल्‍नी तिवा डोप लाम पेतुप यिन।
1CO 10:2 तमा तिवा तेरी मोशाकी सिक्‍यावु खला ङ्‍येन्‍नी मुक्‍पा ताङ ग्‍येम्‍छो नाङ नेसुर युनी बप्‍तिस्‍मा च्‍युङ्‍सुङ।
1CO 10:3 ती पेला तिवा तेरीकी कोन्‍छ्‍योककी थु चाङ्‍मा नेमा नङ्‍गुप समा साङ च्‍यिक्‍पा राङ सोवु यिन।
1CO 10:4 तुक राङ क्‍यानी कोन्‍छ्‍योककी थु चाङ्‍मा नेमा नङ्‍गुप छ्‍यु साङ च्‍यिक्‍पा राङ थुसुङ। ती छ्‍यु ति दासा पाङ्‍थेरीकी लामला डोप पेला मुला राङ वोतुप कोन्‍छ्‍योककी थु चाङ्‍माकी दो ग्‍येर्पु नेमा थेन्‍दुप छ्‍यु यिन। ती छ्‍यु थेन्‍दुप दो ग्‍येर्पुकी तेन्‍दोक ति ख्रीष्‍ट यिन।
1CO 10:5 यिन्‍सिनाङ तिवी कोन्‍छ्‍योकला तेपा माक्‍यावु तप्‍की तिवा माङ्‍शोककी मुला खो गा माक्‍या। ती तप्‍की तिवा कनान लुङ्‍बा मालेपा क्‍यानी शिनी तिवी रोतिवा दासा पाङ्‍थेरीला थरा थुरा गाल्‍सुङ।
1CO 10:6 तीकी तेन्‍दोक ति तिवी दोके क्‍यानी दाक्‍पी साङ सेमला मेलोवा कितुप नासाम तोङ्‍गुप मेवी सिनी दाक्‍पी थोक्‍ला येन्‍देन बिन्‍दुप यिन।
1CO 10:7 तिवी पर्ला मिरा चोकी क्‍यावु दोके ख्‍यिराङ साङ कुला छ्‍यो मातोङ। कोन्‍छ्‍योककी सुङला दुक सिनी टि वे, “मीतिवा साप ताङ थुङ्‍गुपला देसुङ, तमा शम्‍डेन कितुप छाल्‍सुङ।”
1CO 10:8 तिवी पर्ला मिरा चोकी शम्‍डेन क्‍यासुङ, यिने दाक्‍पु ति तुक कितुप मेवी। तिवी शम्‍डेन क्‍यावु तप्‍की ङ्‍यिमा च्‍यिकला राङ मिरा तोङ्‍डा खल ज्‍यिक ताङ सुम शिसुङ।
1CO 10:9 दाक्‍पी चोवो ख्रीष्‍टकी तेन्‍दोकला लङ्‍गुप मेङ्‍गिवी। तिवी पर्ला मिरा चोकी खोकी तेन्‍दोकला लावु तप्‍की रुलकी फेनी शिसुङ।
1CO 10:10 दाक्‍पु ति कोन्‍छ्‍योककी तेन्‍दोकला ङ्‍योशोक ङ्‍योशोक सिरुप मेङ्‍गिवी। तिवी पर्ला मिरा चोकी ङ्‍योशोक ङ्‍योशोक सिक्‍यावु तप्‍की कोन्‍छ्‍योककी देवाच्‍येनकी लेन क्‍योलुप थुतिवा ताङ्‍नी तिवाला ना तोङ च्‍यिसुङ।
1CO 10:11 तिवाला तुकै च्‍युङ्‍गुप ति दाक्‍पी थोक्‍ला येन्‍देन तेरुपला यिन। तमा ती ताम्‍ङेतिवा कोन्‍छ्‍योककी सुङला टिवु ति दाक्‍पुला च्‍याङ्‍से दे ज्‍यितुपला यिन। च्‍यिलासिसिन त याङ जम्‍बुलिङ ना डोप तुजे छे वे।
1CO 10:12 तुक क्‍यानी ख्‍यिराङ तेपा रम्‍बु वे सिनी सिरुपतिवा च्‍याङ्‍से क्‍यानी देता। मिसियाङ ख्‍यिराङ तला ग्‍यकितो।
1CO 10:13 ख्‍यिरा मिजीला खोक्‍पा ल्‍हाप ताम्‍ङेतिवा ख्‍येलुप पेला ती खोक्‍पा ल्‍हाप ताम्‍ङेतिवा ति मी यम्‍बाला साङ ख्‍येल्‍गिवी सिनी नासाम तोङ। कोन्‍छ्‍योक ति खोङ्‍तेर्मु वे, खोकी ख्‍यिराङला ख्‍यिरा अछ्‍योवु सिनाङ ल्‍हक्‍पा खोक्‍पा ल्‍हाप ताम्‍ङेला ख्‍येल मिज्‍यिवी। यिने खोक्‍पा ल्‍हाप ताम्‍ङे ख्‍येल वासिनाङ ती नेसुर थरुप लाम साङ नङ्‍गिवी। तुक क्‍यानी ख्‍यिराङ खोक्‍पा ल्‍हापला ख्‍येलुप पेला हम क्‍यानी दे थुप्‍किवी।
1CO 10:14 तुक क्‍यानी ङे ङ्‍यिङ्‍ज्‍येवु अच्‍युनुपतिवा, ख्‍यिराङ कुला छ्‍यो तोङ्‍गुप क्‍युर।
1CO 10:15 ख्‍यिराङ ति मी हाक्‍कोमु यिन। तुक क्‍यानी ख्‍यिराङ ङे सिक्‍यावु ताम्‍ङे ति यिन्‍दे मिन्‍दे सिनी ल्हो।
1CO 10:16 दाक्‍पु चोवोकी डेन साप पेला दाक्‍पुला मोलाम नङ्‍गुप कोरा नेमा थुनी ख्रीष्‍टकी दाक्‍पी थोक्‍ला तेन्‍दुप ठक नेसुर दाक्‍पु खो ताङ मुला तम्‍जी ल्‍यामु जोवु यिन। तमा शुब्‍ज्‍याङ च्‍याक्‍नी साप ति ख्रीष्‍टकी दाक्‍पी थोक्‍ला टुङ्‍गुप जु नेसुर दाक्‍पु खो ताङ मुला तम्‍जी ल्‍यामु जोवु तेन्‍दोक यिन।
1CO 10:17 दाक्‍पु बङी वोसिनाङ दाक्‍पी साप शुब्‍ज्‍याङ ति च्‍यिक राङ वोतुप तप्‍की दाक्‍पी जु ति च्‍यिक राङ यिन। च्‍यिलासिसिन दाक्‍पु तेरीकी शुब्‍ज्‍याङ च्‍यिक नेसुर मुला राङ सेवी।
1CO 10:18 इस्राएलकी मिरिकतिवाला नासाम तोङ। कोन्‍छ्‍योककी थोक्‍ला जिन्‍बा पुलुप श साप ति जिन्‍बा बुलुप मीतिवी मुला दला शुकुप यिन।
1CO 10:19 कुला पुलुप समातिवा काङ यिन रो? कुतिवा काङ यिन रो?
1CO 10:20 तिवा काङ साङ मिन। ङे सिक्‍यावु ताम्‍ङे ति काङ यिन सिसिन, कोन्‍छ्‍योकला ङो माशेवु मीतिवी कुला छ्‍यो तोङ्‍गुप ति कोन्‍छ्‍योकला मोवा क्‍यावु मिन, यिने र्‍हेन्‍डीला जिन्‍बा पुलुप यिन। तुक क्‍यानी ख्‍यिरा साङ र्‍हेन्‍डीला जिन्‍बा बुलुप मीतिवी दला शुकुप ति ङला गा मलङ्‍गिवी।
1CO 10:21 ख्‍यिराङ ति चोवोकी डेन साप पेला वानी चोवोकी कोरा नेमा थुङ्‍गुप ताङ येलुङ गल्‍नी र्‍हेन्‍डीला मोवा कितुपला र्‍हेन्‍डीकी कोरा नेमा थुङ्‍गुप मेङ्‍गिवी। तुक क्‍यानी चोवोकी डेन सोसिमा येलुङ गल्‍नी र्‍हेन्‍डीकी डेन साप साङ मेङ्‍गिवी।
1CO 10:22 काङ ख्‍यिराङ चोवो येशूला ङ्‍यिर्मु लोङ्‍गिवी? काङ खो दाक्‍पु सिनाङ ओङ छ्‍येवु मे रो?
1CO 10:23 मी ललाइकी “मीतिवी काङ क्‍यासिनाङ गिवी।” सिनी सिवी, यिने ती तेरी ताम्‍ङे ति ख्‍येप्‍साङ वोतुप ति मिन। तमा “मीतिवी काङ क्‍यासिनाङ गिवी।” सिनी सिवी, यिने तेरी ताम्‍ङे ति मी यम्‍बाला ख्‍येप्‍साङ मे।
1CO 10:24 सी साङ खोरो थोक्‍ला तिराङ ख्‍येप्‍साङ माछोल, यिने मी यम्‍बी थोक्‍ला साङ ख्‍येप्‍साङ वुङ्‍गुप लाका किशी।
1CO 10:25 श चोङ्‍गुप दासाला गल्‍नी श ङ्‍योप पेला ख्‍योरो सेम लोदिवुला ती श ति कुला पुलुप यिनाङ मिन सिनी काङ साङ माटिवा क्‍यानी ङ्‍योनी सोवा। तुक क्‍यासिन ख्‍योरो सेम ति लो दिकिवी।
1CO 10:26 च्‍यिलासिसिन “जम्‍बुलिङ ताङ जम्‍बुलिङला वोतुप तेरी च्‍यालकतिवा कोन्‍छ्‍योककी राङ जो नङ्‍गुप यिन।” सिनी कोन्‍छ्‍योककी सुङला टि वे।
1CO 10:27 दोजो कोन्‍छ्‍योकला ङो माशेवु मी मिरा च्‍यिककी ख्‍यिराङला डेनला कतोङ्‍गुप पेला ख्‍यिराङला डोप नो वोसिन तिवी बिन्‍दुप समा ति काङ साङ माटिवा क्‍यानी सो। तुक क्‍यासिन ख्‍योरो सेम ति लो दिकिवी।
1CO 10:28 यिने ललाइकी दी याङ कुला पुलुप समा यिन सिक्‍यासिन तुक सिरुप मी तीकी थोक्‍ला ताङ तीकी सेम ज्‍योकुपला ती पुलुप समा ति मासा।
1CO 10:29 ङे तुक सिक्‍यावु ति ख्‍योरो थोक्‍ला मिन, यिने ख्‍युरुङला दी ति कुला पुलुप समा यिन सिरुप मी तीकी सेम ज्‍योकुपला सिक्‍यावु यिन। तुक क्‍यासिन ङ ति मी यम्‍बी सेम ज्‍योकुपला च्‍यिला ङला गा लङ्‍गुप लाका कि मुथुपी?
1CO 10:30 दोजो ङे कोन्‍छ्‍योकला थुचिछे पुल्‍नी समा सोसिन ती समा सोवु तप्‍की मीतिवी ङला च्‍यिला मेलोक्‍पा जोप्‍जा?
1CO 10:31 तुक क्‍यानी ख्‍यिराङ सोसिनाङ थुसिनाङ काङ क्‍यासिनाङ ती तेरी कोन्‍छ्‍योककी मोवाकी थोक्‍ला किसा।
1CO 10:32 यिने यहूदीतिवाला ताङ ग्रीककी मीतिवाला ताङ कोन्‍छ्‍योकला तेपा कितुप चर्चकी मीतिवा सुला साङ दुक्‍पा ख्‍येलुप लाका ति माकिसा।
1CO 10:33 तुक राङ क्‍यानी ङे साङ काङ क्‍यासिनाङ मी तेरीला सेम गा लोङ्‍गुप नो क्‍यायी। ङ ङरा थोक्‍ला तिराङ मिन, यिने मी तेरीला ल्‍यामु च्‍युङ्‍शी सिरुप नो कितिन। तुक क्‍यानी ती मीतिवा साङ दिक्‍पा ने थर्शी।
1CO 11:1 ङे ख्रीष्‍टकी लुमु सेतुप दोके ख्‍यिराङ साङ ङे लुमु से।
1CO 11:2 ख्‍यिरा ङला नरी टेन्‍दुप ताङ ङे लापुप येन्‍देनला ङ्‍येन्‍दुप तप्‍की ङ ख्‍यिरा थोक्‍ला छासे गा लान वे।
1CO 11:3 यिने दी ताम्‍ङे ति ख्‍यिरा हाक्‍कोशी सिरुप ति ङला नोवा वे। तेरी मीतिवा सिनाङ छ्‍ये ति येशू ख्रीष्‍ट यिन। तमा पेर्मी सिनाङ छ्‍ये ति तीकी ख्‍योवा यिन। तमा ख्रीष्‍ट सिनाङ छ्‍ये ति कोन्‍छ्‍योक यिन।
1CO 11:4 ख्‍योक्‍पेजाकी मोपोर कितुप पेला ताङ नम्‍दर शेतुप पेला खोरो गो उपुप ति ख्रीष्‍टला मारे तोङ्‍गुप यिन।
1CO 11:5 यिने पुम्‍पेजाकी गो माउप्‍नी मोपोर कितुप ताङ नम्‍दर शेतुप ति ख्‍योवी थोक्‍ला मारे तोङ्‍गुप यिन। च्‍यिलासिसिन ती ति तीकी खोरो गोकी र्‍ह टेवु दोके यिन।
1CO 11:6 दोजो ललाइ पुम्‍पेजातिवी खोरो गो माउपा क्‍यानी मोपोर किसिन तीकी खोरो र्‍ह टेक्‍शी। यिने र्‍ह टेकुपकी पुम्‍पेजाकी थोक्‍ला ङोछा लङ्‍गुप ताम्‍ङे यिन्‍सियाङ तीकी मोपोर कितुप पेला खोरो गो उप्‍शी।
1CO 11:7 ख्‍योक्‍पेजी मोपोर कितुप पेला खोरो गो उपुप मेङ्‍गिवी, च्‍यिलासिसिन ख्‍योक्‍पेजा ति कोन्‍छ्‍योककी जुजमला राङ जोवु ताङ खोकी मोवा छ्‍या देन्‍दुप यिन। यिने पुम्‍पेजा ति ख्‍योक्‍पेजी मोवा यिन।
1CO 11:8 च्‍यिलासिसिन कोन्‍छ्‍योककी मीला जो नङ्‍गुप पेला पुम्‍पेजा नेमा ख्‍योक्‍पेजा जोवु मिन, ख्‍योक्‍पेजा नेमा पुम्‍पेजा जोवु यिन।
1CO 11:9 तमा पुम्‍पेजी थोक्‍ला ख्‍योक्‍पेजा जोवु मिन, यिने ख्‍योक्‍पेजी थोक्‍ला पुम्‍पेजा जोवु यिन।
1CO 11:10 तुक क्‍यानी देवाच्‍येनकी लेन क्‍योलुप थुतिवी थोङ्‍दाङला रङगी ख्‍योवी ओङला देन वे सिरुप छ्‍या देन्‍दुपला पुम्‍पेजातिवी खोरो गो उप गोकिवी।
1CO 11:11 यिन्‍सिनाङ चोवोकी थोङ्‍दाङला ति ख्‍योक्‍पेजाला पुम्‍पेजा मेसिन मेवी, पुम्‍पेजाला साङ ख्‍योक्‍पेजा मेसिन मेवी।
1CO 11:12 च्‍यिलासिसिन कोन्‍छ्‍योककी ख्‍योक्‍पेजा नेसुर पुम्‍पेजा जोवु दोके पुम्‍पेजी खोक नेमा ख्‍योक्‍पेजा क्‍येवी। तिवा तेरी कोन्‍छ्‍योककी जो नङ्‍गुप यिन।
1CO 11:13 तुक क्‍यानी ख्‍यिराङ नासाम तोङ। पुम्‍पेजी गो माउपा क्‍यानी मोपोर कितुप ति पोमु गिवी रो?
1CO 11:14 वुतुङ के कोन्‍छ्‍योककी ज्‍येवु दी जम्‍बुलिङकी च्‍यालकतिवाला ल्‍हासिन हाक्‍कोकिवी। ख्‍योक्‍पेजी र्‍ह रिङ्‍बु सासिन ती ति ङोछा यिन सिरुप ति दाक्‍पुला छ्‍या वे।
1CO 11:15 यिने पुम्‍पेजी र्‍ह रिङ्‍बु वोतुप ति तिवी थोक्‍ला मोवा वोतुप यिन। च्‍यिलासिसिन पुम्‍पेजी र्‍ह रिङ्‍बु ति तिवी गो उपुपला कोन्‍छ्‍योककी जो नङ्‍गुप यिन।
1CO 11:16 दोजो ललाइकी दी ताम्‍ङेला केवुल कितुप नो किवी सिसिन दुका ताम्‍ङेतिवा ङ्‍यिराङ ङ्‍याम मिकिवी, च्‍यिलासिसिन दुका ताम्‍ङेतिवा ङ्‍यिराङ ताङ कोन्‍छ्‍योककी चर्च तेरीकी लुक्‍सुला मे।
1CO 11:17 त ङे ख्‍यिराङला सिरुप ताम्‍ङेकी कोर्ला ति ख्‍यिरा ल्‍यामु क्‍यावु यिन सिनी सिरुप ति ङला गा मलाङ्‍गिवी। च्‍यिलासिसिन ख्‍यिराङ कोन्‍छ्‍योकला सोवा देकुपला चर्चला जोम्‍बुप ति ल्‍यामु मिन, मेलोक्‍पा गाल्‍सुङ।
1CO 11:18 ख्‍यिराङ चर्चला जोम्‍बुप पेला गोमाला के ख्‍यिरा पर्ला ख्‍ये पेनोक सिरुप ति ङे थोसुङ। ती ताम्‍ङे ति टेके साङ यिन।
1CO 11:19 ख्‍यिरा पर्ला कोन्‍छ्‍योककी थोङ्‍दाङला मी टेङ्‍बु मेटेङ्‍बु सु यिन सिरुप ति हाक्‍कोवुला तुका ताम्‍ङेतिवा वुङ राङ गोकिवी।
1CO 11:20 ख्‍यिराङ मुला राङ जोम्‍बुप पेला चोवोकी डेन सोवु ति वुतुङ के चोवोकी डेन सोवु मिन,
1CO 11:21 च्‍यिलासिसिन मीतिवा यम्‍बाला मागुवा क्‍यानी दाक दाक्‍पी समा सेवी। तुक राङ क्‍यानी ललाइ मीतिवा ति ल्‍होतुङ्‍बा राङ लुकिवी। तमा ललाइ ति छ्‍याङकी जिनी गिवी।
1CO 11:22 साप ताङ थुङ्‍गुपला ख्‍यिरा ति दाक दाक्‍पी खाङ्‍बा मे रो? याङ्‍ना ख्‍यिराङ कोन्‍छ्‍योककी चर्चला मारे तोङ्‍गुप ताङ काङ साङ मेतुपतिवाला ङोछा लोङ्‍गिवी? दीकी कोर्ला काङ सिरुप्‍जा? काङ ङ ख्‍यिरा थोक्‍ला चिताङ कितुप? वुतुङ के ङ दुका ताम्‍ङेला चिताङ मिकी।
1CO 11:23 दी ङे बिन्‍दुप येन्‍देन ति चोवो येशू नेमा राङ ङला थोपुप यिन। खो डकी लकला जिम्‍बुप नुपला खोकी शुब्‍ज्‍याङ लकला लासुङ।
1CO 11:24 तमा कोन्‍छ्‍योकला थुचिछे पुल्‍सिमा ती शुब्‍ज्‍याङ ति च्‍याक्‍नी दुक सुङ्‍सुङ, “दी ति ख्‍यिरा थोक्‍ला बिन्‍दुप ङे जु यिन। ख्‍यिराङ ङला टेन्‍दुपला दी ति किसा।”
1CO 11:25 तुक राङ क्‍यानी खोकी कोरा लकला लानी दुक सिनी सुङ्‍सुङ, “दी ति ङे ठक नेसुर कोन्‍छ्‍योककी थाक्‍छ्‍येन नङ्‍गुप ठिम सम्‍बा यिन। नम पेला ख्‍यिरा दी कोरा नेमा थुङ्‍गिवे, ती पेला ङला टेन्‍दा किसा।”
1CO 11:26 तुक क्‍यानी चो पेला ख्‍यिरा दी शुब्‍ज्‍याङ साप ताङ दी कोरा नेमा थुङ्‍गिवे, खो माफेवा सेक ख्‍यिरा चोवो टुङ्‍गुप कोर्ला ख्‍याप्‍टाक किसा।
1CO 11:27 यिने सी ल्‍यामो हाक्‍माकोवा क्‍यानी दी शुब्‍ज्‍याङ साप ताङ चोवोकी कोरा नेमा थुङ्‍गिवे, तीकी चोवोकी जु ताङ ठकला मेचेङ्‍गा जोवु तप्‍की तीकी दिक्‍पा क्‍यावु यिन।
1CO 11:28 तुक क्‍यानी तेरी मीतिवी गोमाला खुरुङ कोन्‍छ्‍योक ताङ मुला तम्‍जी ल्‍यामु वोतुप मेतुप नासाम तोङ्‍शी, तमा तिराङ चोवोला टेन्‍दुप शुब्‍ज्‍याङ साप ताङ कोरा नेमा थुङ्‍शी।
1CO 11:29 च्‍यिलासिसिन दोजो सी शुब्‍ज्‍याङ ताङ कोरा ति खोकी जु ताङ ठक यिन सिनी ल्‍यामु हाक्‍माकोवा क्‍यानी साप ताङ थुङ्‍गिवे, तीला पर्च्या फोकिवी।
1CO 11:30 तुकै यिन्‍दुप तप्‍की ख्‍यिरा पर्ला ललाइ ति जुला रम्‍बु मेतुप ताङ काङ साङ कि मुथुपुप ताङ ललाइ ति नेर्पु गल वे। तमा मिरा चो ति शिसुङ।
1CO 11:31 यिने दोजो चोवोकी डेन साप सिनाङ गोमाला खोरो मिजी चुकै वे सिरुप ति हाक्‍कोसिमा दाक्‍पु खोकी पर्च्याला मेख्‍येल्‍वी।
1CO 11:32 दाक्‍पु ति जम्‍बुलिङकी मीतिवी मुला राङ ना मोडोशी सिनी कोन्‍छ्‍योककी दाक्‍पुला ठिम क्‍या नङ्‍गिवी, तमा छेटाङ साङ तेर्किवी।
1CO 11:33 तुक क्‍यानी अच्‍युनुपतिवा, ख्‍यिराङ मुला राङ जोम्‍नी चोवोकी डेन साप पेला च्‍यिककी च्‍यिकला गुसा।
1CO 11:34 दोजो ललाइ ल्‍होतुङ्‍बा वोसिन तीकी खोरो खाङ्‍बाला राङ सशी। मिसियाङ मुला राङ जोम्‍नी चोवोकी डेन साप पेला ख्‍यिराङला साङ पर्च्या फोकिवी। यम्‍बा ताम्‍ङेतिवा ति ङ वासिमा सिरुप्‍नो।
1CO 12:1 अच्‍युनुपतिवा, कोन्‍छ्‍योककी थु चाङ्‍मा नेमा थोपुप कटिनकी ङ्‍येम्‍बाकी कोर्ला ख्‍यिराङला टेङ्‍बो क्‍यानी हाक्‍कोशी सिनी ङ दी ताम्‍ङे ति सिरिन।
1CO 12:2 ख्‍यिराङ कोन्‍छ्‍योकला ङो माशेवु पेला ताम्‍ङे लप मुथुपुप कुतिवाला सोवा देकुपला तिवी थाकाला गलुप ति ख्‍यिराङला छ्‍या वे।
1CO 12:3 तुक क्‍यानी ख्‍यिरा दी ताम्‍ङे ति हाक्‍कोवा की। कोन्‍छ्‍योककी थु चाङ्‍मा नेमा ताम्‍ङे कितुप सी साङ “येशूला मोताप सुकुप यिन।” सिनी सि मुथुपी। तमा खोकी थु चाङ्‍मा नेमा तिराङ मिसिन यम्‍बा सी साङ “येशू ति चोवो यिन।” सिनी सि मुथुपी।
1CO 12:4 कोन्‍छ्‍योककी थु चाङ्‍मा नेमा थोपुप कटिनकी ङ्‍येम्‍बा ति कुतुक कुतुक गिवी, यिने ती कटिनकी ङ्‍येम्‍बा नङ्‍गुप खोकी थु चाङ्‍मा ति च्‍यिक राङ यिन।
1CO 12:5 शब्‍ज्‍यी कितुप लाकातिवा नम्‍बा कुतुक कुतुक गिवी, यिने चोवो येशूला शब्‍ज्‍यी कितुप ति च्‍यिक्‍पा राङ यिन।
1CO 12:6 कोन्‍छ्‍योककी थोक्‍ला कितुप लाकातिवा कुतुक कुतुक गिवी, यिने दाक्‍पुला ती तेरी लाका कितुपला कटिनकी ङ्‍येम्‍बा नङ्‍गुप ति कोन्‍छ्‍योक राङ यिन।
1CO 12:7 कोन्‍छ्‍योककी थु चाङ्‍माकी मी रे रेला लाका कितुप खोकी कटिनकी ङ्‍येम्‍बा नङ्‍गुप ति खोरो थोक्‍ला तिराङ मिन, मी तेरीला ल्‍यामु च्‍युङ्‍शी सिनी नङ्‍गुप यिन।
1CO 12:8 कोन्‍छ्‍योककी थु चाङ्‍मा नेसुर राङ ललाइ मीतिवाला रिक्‍पा तेरुप ताम्‍ङे लपुप ताङ ललाइला ति येन्‍देन तेरुप ताम्‍ङे लपुप ताङ
1CO 12:9 ललाइला ति कोन्‍छ्‍योककी थु चाङ्‍मा नेमा राङ तेपा कितुप ताङ ललाइला ति नेजु टेक ज्‍यितुप कटिनकी ङ्‍येम्‍बा नङ्‍नी वे।
1CO 12:10 तमा ललाइला ति हलेवु लाका छ्‍या देन्‍दुप ताङ ललाइला ति नम्‍दर शेतुप ताङ ललाइला ति मीतिवी लापुप सुङ ति खोकी थु चाङ्‍मा नेमा यिन्‍दुप मिन्‍दुप हाक्‍को ज्‍यितुप कटिनकी ङ्‍येम्‍बा नङ्‍नी वे। तमा ललाइला ति ग्‍येताम कुतुक कुतुक लपुप ताङ ललाइला ति ती ग्‍येताम ति छिक ग्‍युरुप कटिनकी ङ्‍येम्‍बा नङ वे।
1CO 12:11 यिने तेरी लाका कितुप ति कोन्‍छ्‍योककी थु चाङ्‍मा नेमा थोपुप यिन। ती कटिनकी ङ्‍येम्‍बातिवा ति खोकी नोवाला वोतुपतिवा तेरीला नङ्‍गिवी।
1CO 12:12 मी जु ति च्‍यिक राङ वोसिनाङ ती जुला लाक्‍पा काङ्‍बा ताङ यम्‍बा येन्‍लकतिवा बङी वे। तमा येन्‍लकतिवा बङी वोसिनाङ जु ति च्‍यिक राङ वे। ती दोके ख्रीष्‍टला तेपा कितुपतिवा बङी वोसिनाङ ख्रीष्‍ट ति च्‍यिक राङ ज्‍यु वे।
1CO 12:13 च्‍यिलासिसिन दाक्‍पु यहूदीतिवा यिन्‍सिनाङ ग्रीकतिवा यिन्‍सिनाङ योक्‍पुतिवा यिन्‍सिनाङ योक्‍पुतिवा मिन्‍सिनाङ कोन्‍छ्‍योककी थु चाङ्‍मा च्‍यिककी ओङला राङ दाक्‍पी बप्‍तिस्‍मा लानी जु च्‍यिक राङ च्‍युङ्‍गुप यिन। तमा दाक्‍पु तेरीला खोकी थु चाङ्‍मा साङ च्‍यिक राङ नङ्‍नी वे।
1CO 12:14 तुक राङ क्‍यानी दाक्‍पी जुला येन्‍लक च्‍यिक राङ वोतुप मिन, यिने येन्‍लकतिवा बङी वे।
1CO 12:15 दोजो काङ्‍बी “ङ लाक्‍पा मिन, तुक क्‍यानी ङ ति जुकी येन्‍लक मिन।” सिक्‍यासिन काङ्‍बा ति जुकी येन्‍लक मिन रो?
1CO 12:16 येलुङ दोजो नम्‍ज्‍योककी “ङ मिक मिन, तुक क्‍यानी ङ ति जुकी येन्‍लक मिन।” सिक्‍यासिन नम्‍ज्‍योक ति जुकी येन्‍लक मिन रो?
1CO 12:17 दोजो तेरी जु ति मिक यिन्‍दुप यिन्‍सियाङ तीकी कनी नेसुर थो थुप्‍किवी रो? दोजो तेरी जु ती नम्‍ज्‍योक यिन्‍दुप यिन्‍सिन तीकी चुक क्‍यानी टेमा नोप्‍जा?
1CO 12:18 यिने कोन्‍छ्‍योककी खोरे नोवाकी राङ जुकी तेरी येन्‍लकतिवा दाक दाक्‍पी दासाला थिनी जोन नङ वे।
1CO 12:19 दोजो येन्‍लक च्‍यिक तिराङ तेरी जु यिन्‍दुप यिन्‍सिन, जु ति वुङ मुथुपी।
1CO 12:20 तुक क्‍यानी जुला येन्‍लकतिवा बङी वोसिनाङ जु ति च्‍यिक राङ यिन।
1CO 12:21 मिक तीकी लाक्‍पाला “ख्‍युरुङ ङला मोगोवी।” सिनी सि मुथुपी। तमा गो तीकी काङ्‍बाला “ख्‍युरुङ ङला मोगोवी।” सिनी सि मुथुपी।
1CO 12:22 बोरु जुला वोतुप यम्‍बा येन्‍लक सिनाङ रम्‍बु मेतुप येन्‍लक ति दाक्‍पी जुला मङ मेताला मेती मेवी।
1CO 12:23 तमा जुला वोतुप चुका येन्‍लक ति खक्‍छ्‍ये मेवे, तीला राङ दाक्‍पी मङ ङ्‍याम किवी। तमा पाङ्‍ला छ्‍या देन्‍दुप मेवु येन्‍लकतिवाला दाक्‍पी ल्‍यामु क्‍यानी ल्‍हटे किवी।
1CO 12:24 यिन्‍सिनाङ मिककी थोङ्‍दाङला ल्‍यामु वोतुप येन्‍लकतिवाला दाक्‍पी वोजिमु कि मोगोवी। तुक क्‍यानी कोन्‍छ्‍योककी दाक्‍पी जुकी रम्‍बु मेतुप येन्‍लकतिवाला मङ ङ्‍याम कितुप जोनी डिक्‍नी ज्‍याङ वे।
1CO 12:25 तुक क्‍यानी जु ति ख्‍ये मेपेवी, तमा जुकी येन्‍लकतिवा तेरी डिक्‍नी च्‍यिककी च्‍यिकला ल्‍यामो क्‍यानी ल्‍हटे किवी।
1CO 12:26 दोजो जुकी येन्‍लक च्‍यिकला दुक्‍पा ख्‍येल्‍सिन यम्‍बा तेरी येन्‍लकतिवी साङ दुक्‍पा खुर गोकिवी। तमा येन्‍लक च्‍यिकला ताङ्‍देन च्‍युङ्‍सिन यम्‍बा येन्‍लकतिवा तेरीला गा लङ्‍गिवी।
1CO 12:27 ख्‍यिराङ तेरी ख्रीष्‍टकी जु यिन, तमा खोकी जुकी येन्‍लकतिवा रे रे यिन।
1CO 12:28 कोन्‍छ्‍योककी चर्चला गोमा कितुप मीतिवा पेन नङ वे। तिवा ति गोमाला लोमा छ्‍येतिवा यिन, तमा ङ्‍यिवा ति नम्‍दर शेतुपतिवा यिन, तमा सुम्‍बा ति गेकेनतिवा यिन, तमा ती ज्‍युक्‍ला हलेवु लाका छ्‍या देन्‍दुपतिवा ताङ नेर्पु टेक ज्‍यितुपतिवा ताङ दाल्‍जा किटे कितुपतिवा ताङ चर्चला ओङ्‍ज्‍येन कितुपतिवा ताङ ग्‍येताम कुतुक लपुपतिवा यिन।
1CO 12:29 यिन्‍सिनाङ तिवा तेरी लोमा छ्‍येतिवा यिन रो? काङ तिवा तेरी कोन्‍छ्‍योककी लुङ्‍तेम्‍बातिवा यिन रो? काङ तिवा तेरी गेकेनतिवा ताङ हलेवु लाका छ्‍या देन्‍दुपतिवा यिन रो?
1CO 12:30 याङ्‍ना काङ तिवा तेरीकी मुला नेर्पु टेक ज्‍यितुप ओङ वे रो? काङ तिवा तेरीकी ग्‍येताम कुतुक कुतुक लप्‍किवी रो? काङ तिवा तेरीकी ग्‍येताम कुतुक कुतुककी छिक ग्‍युरुप थुप्‍किवी रो?
1CO 12:31 यिने ख्‍यिराङ ति कोन्‍छ्‍योककी थु चाङ्‍मा नेमा थोपुप छासे कटिनकी ङ्‍येम्‍बा ङ्‍येतुपला रेवा किसा। तमा ङ ख्‍यिराङला ती सिनाङ मङ खक्‍छ्‍येवु लाम ल्‍यामु छ्‍या देनिनो।
1CO 13:1 दोजो ङे मीतिवी तेरी ग्‍येतामला ताङ देवाच्‍येनकी लेन क्‍योलुप थुतिवी ग्‍येतामला लाप्‍सिनाङ ङे सेमला ति ङ्‍यिङ्‍ज्‍ये मेसिन ङ ति ठिङ ठिङ सिरुप टिलुक ताङ ज्‍याङ ज्‍याङ सिरुप बुक्‍शल दोके तिराङ यिन।
1CO 13:2 ङे मुला नम्‍दर शेतुप कटिनकी ङ्‍येम्‍बा साङ वे, तमा ङे मुला सुला साङ हाक्‍मोकोवु छ्‍याकला वोतुप ताम्‍ङे हाक्‍कोवु ताङ तेरी येन्‍देन शेकिवी, तमा रीतिवा साङ दोक थुपुप तेपा ति ङला वोसिनाङ ङे सेमला ति ङ्‍यिङ्‍ज्‍ये मेसिन ङ ति काङ साङ मिन।
1CO 13:3 दोजो ङे मुला वोतुप नोर टोङ्‍बातिवा तेरी पेराङ्‍बुतिवाला गोनी बिनिन, तमा मीतिवाला छ्‍या देन्‍दुपला ङे जु तिरुङ मेला र्‍हेकुपला बिन्‍सिनाङ ङे सेमला ङ्‍यिङ्‍ज्‍ये मेसिन ङला काङ साङ ख्‍येप्‍साङ मेङ्‍गिवी।
1CO 13:4 सेमला ङ्‍यिङ्‍ज्‍ये वोतुप मी ति हम क्‍यानी दे थुप्‍किवी, मी यम्‍बाला साङ च्‍यम्‍बा किवी, ठतोक मिकिवी, तेके मिकिवी, छ्‍येजु साङ मिकिवी।
1CO 13:5 तमा सेमला ङ्‍यिङ्‍ज्‍ये वोतुप मी तीकी ताङ्‍देन मेतुप किताङ नालु मेलोवा मिकिवी, खुरुङला तिराङ नासाम मोतोङ्‍गिवी, ङ्‍यिर्मु मिकिवी, मी यम्‍बी खुरुङला मेलोवा क्‍यावु ति नासाम मोतोङ्‍गिवी।
1CO 13:6 सेमला ङ्‍यिङ्‍ज्‍ये वोतुप तीकी दुक्‍टा कितुपला गा मिकिवी, यिने ताम्‍ङे टेङ्‍बुला तिराङ गा किवी।
1CO 13:7 सेमला ङ्‍यिङ्‍ज्‍ये वोतुप मी तीकी तेरी ताम्‍ङेला छेटाङ वोसिनाङ हम क्‍यानी देकिवी, तेरी ताम्‍ङेला तेपा किवी, तेरी ताम्‍ङेला रेवा किवी, तमा नरी ताम्‍ङेला डेकला देकिवी।
1CO 13:8 नम्‍दर शेतुप ताम्‍ङेतिवा तोर्नी डिवी, ग्‍येतामतिवा साङ तोर्नी डिवी, येन्‍देनतिवा साङ तोर्नी डिवी, यिने ङ्‍यिङ्‍ज्‍ये कितुप ति नाम्‍साङ तोर्नी मोडोवी।
1CO 13:9 तन्‍दा ति कोन्‍छ्‍योककी चुक क्‍यानी लाका क्‍या नङ्‍गिवी सिरुप ति दाक्‍पुला तेरी हाक्‍मोकोवी, दाक्‍पी नम्‍दर शेतुप ताम्‍ङे साङ तेरी मेछेवी।
1CO 13:10 यिने कोन्‍छ्‍योककी तेरी ताम्‍ङेतिवा हाक्‍कोवु तुजे लेप्‍सिमा दाक्‍पी हाक्‍माकोवु ताम्‍ङेतिवा तेरी हाक्‍कोकिवी।
1CO 13:11 ङ आङा टिक्‍पे वोतुप पेला आङा टिक्‍पेकी दोके राङ ताम्‍ङे लप्‍किवी, हाक्‍कोवु साङ आङा टिक्‍पेकी दोके हाक्‍कोकिवी, नासाम साङ आङा टिक्‍पेकी दोके तोङ्‍गिवी। यिने ङ नाज्‍युङ गल्‍सिमा आङा टिक्‍पेकी दोके किताङ नालुतिवा तेरी क्‍युरिन।
1CO 13:12 तन्‍दा ति दाक्‍पी कोन्‍छ्‍योकला छल्‍नी ल्‍हासिनाङ ल्‍यामो क्‍यानी मोथोङ्‍गिवी, यिने ज्‍युक्‍ला ति दाक्‍पी कोन्‍छ्‍योकला ठछ्‍येली थोङ थुप्‍किवी। तन्‍दा ङे चेयी तिराङ हाक्‍कोकिवी, यिने तुजे छेसिमा कोन्‍छ्‍योककी ङे थोक्‍ला तेरी ताम्‍ङे ठछ्‍येली हाक्‍कोवु दोके ङे साङ तेरी ल्‍यामो क्‍यानी हाक्‍कोकिवी।
1CO 13:13 तुक क्‍यानी तेपा कितुप ताङ रेवा कितुप ताङ ङ्‍यिङ्‍ज्‍ये कितुप दी सुमतिवा ति नरी लुकिवी, यिन्‍सिनाङ दिवा सुमकी पर्ला खक्‍छ्‍येवु ति ङ्‍यिङ्‍ज्‍ये कितुप राङ यिन।
1CO 14:1 तुक क्‍यानी ख्‍यिराङ तेरी सिनाङ गोमाला ङ्‍यिङ्‍ज्‍ये कितुप तिराङ नासाम तोङ। तमा कोन्‍छ्‍योककी थु चाङ्‍मा नेमा नङ्‍गुप कटिनकी ङ्‍येम्‍बा थोपुपला छासे नो की। तमा खक्‍छ्‍येवुला ति कोन्‍छ्‍योककी नङ्‍गुप नम्‍दर शेतुप कटिनकी ङ्‍येम्‍बा थोपुप नो की।
1CO 14:2 च्‍यिलासिसिन सी ग्‍येताम कुतुकला ताम्‍ङे लप्‍किवे, तीकी मीला ताम्‍ङे कितुप मिन, यिने कोन्‍छ्‍योककी मुला ताम्‍ङे क्‍यावु यिन। तमा तीकी क्‍यावु ताम्‍ङे ति सी साङ हाक्‍मोकोवी। च्‍यिलासिसिन तीकी कोन्‍छ्‍योककी थु चाङ्‍मा नेसुर छ्‍याकला वोतुप ताम्‍ङेतिवा लप्‍किवी।
1CO 14:3 यिने नम्‍दर शेतुप तीकी मी ताङ मुला राङ ताम्‍ङे किवी। तमा तीकी मीतिवाला मङ तेपा रम्‍बु जोपला दाल्‍जा कितुप ताङ टोङ्‍गु तेरुप ताङ लोदिमु तेर्किवी।
1CO 14:4 ग्‍येताम कुतुक कुतुकला ताम्‍ङे कितुप तीकी खुरुङला मङ तेपा रम्‍बु जोपला दाल्‍जा किवी, यिने नम्‍दर शेतुप तीकी चर्चकी मीतिवाला तेपा रम्‍बु जोपला दाल्‍जा किवी।
1CO 14:5 ख्‍यिराङ तेरीकी ग्‍येताम कुतुक कुतुकला ताम्‍ङे किशी सिरुप ति ङे नोवा वे, यिने ती सिनाङ मङ खक्‍छ्‍येवु ति ख्‍यिराङ कोन्‍छ्‍योककी नङ्‍गुप नम्‍दर शेतुप ति ङला नोवा वे। दोजो ग्‍येताम कुतुक कुतुकला ताम्‍ङे लपुप पेला ती ताम्‍ङे छिक ग्‍युरुप मी साङ वोसिन तीकी चर्चकी मीतिवाला मङ ल्‍यामु किवी। मिसियाङ हाक्‍मोकोवु ग्‍येताम कुतुक कुतुकला ताम्‍ङे लपुप सिनाङ नम्‍दर शेतुप ति छ्‍ये यिन।
1CO 14:6 अच्‍युनुपतिवा, दोजो ङ ख्‍यिरा ते वानी ग्‍येताम कुतुक कुतुकला ताम्‍ङे क्‍यायी, यिने ङे ख्‍यिरा पर्ला कोन्छ्‍योककी छ्‍या तेन नङ्‍गुप ताम्‍ङे लपुप ताङ रिक्‍पा तेरुप ताङ नम्‍दर शेतुप येन्‍देनतिवा ख्‍यिरा हाक्‍कोवु ताम्‍ङेला सि माक्‍यासिन ख्‍यिराङला काङ साङ ख्‍येप्‍साङ मेवी।
1CO 14:7 ती दोके लुमु पुवु ताङ पिवाङ टिलुप पेला दा ल्‍यामु माथेन्‍सुङ सिसिन मीतिवी चुक क्‍यानी लुमु पुवु ताङ पिवाङ टिलुप वोरु यिन सिनी हाक्‍कोवुजा?
1CO 14:8 येलुङ बिगुल पुतुप मक्‍मी तीकी बिगुलकी दा ल्‍यामु मातेन्‍सुङ सिसिन चुक क्‍यानी यम्‍बा मक्‍मीतिवा मक ग्‍यक डोपला टडिक कितुप्‍जा?
1CO 14:9 तुक राङ क्‍यानी ख्‍यिरा लापुप ग्‍येताम कुतुक कुतुककी ताम्‍ङे ति मीतिवी ल्‍यामु हाक्‍माकोसिन चुक क्‍यानी मीतिवी ख्‍यिरा लापुप ताम्‍ङे ति हाक्‍कोवुजा? ती ति तेन्‍दोक मेतुप डिवी।
1CO 14:10 दी जम्‍बुलिङला ग्‍येतामतिवा नम्‍बा बङी वोसिनाङ तेरी ग्‍येतामतिवा च्‍यिक साङ तेन्‍दोक मेतुप मे।
1CO 14:11 दोजो मी यम्‍बी लापुप ताम्‍ङेकी तेन्‍दोक ति ङे हाक्‍माकोसुङ सिसिन ङ ति तीकी थोक्‍ला छ्‍यिग्‍यपकी मी दोके डिवी। तमा ती ताम्‍ङे लपुप मी ति ङे थोक्‍ला छ्‍यिग्‍यपकी मी दोके डिवी।
1CO 14:12 तुक राङ क्‍यानी ख्‍यिराङ साङ कोन्‍छ्‍योककी थु चाङ्‍माकी नङ्‍गुप कटिनकी ङ्‍येम्‍बा थोपुप नो क्‍यावु तप्‍की तेरी सिनाङ गोमाला ख्‍यिराङ कोन्‍छ्‍योककी थु चाङ्‍माकी नङ्‍गुप कटिनकी ङ्‍येम्‍बा थोप्‍नी चर्च येर्के तोङ्‍गुपला टेमु किसा।
1CO 14:13 तुक क्‍यानी ग्‍येताम कुतुक कुतुकला ताम्‍ङे कितुपतिवी ती ग्‍येतामकी तेन्‍दोक ति छिक ग्‍युरुप कटिनकी ङ्‍येम्‍बा थोपुपला मोपोर की।
1CO 14:14 च्‍यिलासिसिन ङे ग्‍येताम कुतुक कुतुकला मोपोर कितुप पेला ङे कोन्‍छ्‍योककी थु चाङ्‍मा नेमा मोपोर किवी, यिने ती मोपोर क्‍यावु तेन्‍दोक काङ यिन सिरुप ति ङे सेमला हाक्‍मोकोवी।
1CO 14:15 त तीकी कोर्ला ङे काङ कि गोकिवी? ङ मोपोर कितुप पेला ङे कोन्‍छ्‍योककी थु चाङ्‍मा नेमा मोपोर कितिन, तमा सेम नेमा साङ मोपोर कितिन। कोन्‍छ्‍योककी थु चाङ्‍मा नेमा सोवा देकिन, तमा सेम नेमा साङ सोवा देकिन।
1CO 14:16 मिसियाङ ख्‍योरो कोन्‍छ्‍योककी थु चाङ्‍मा नेमा खोला सोवा देकुप पेला यम्‍बा मीतिवी हाक्‍मोकोवी। तुक क्‍यासिन ख्‍योरो खोला थुचिछे सिनी मोपोर क्‍या सिन्‍सिमा चुक क्‍यानी तिवी “आमिन” सिरुप्‍जा?
1CO 14:17 ख्‍योरो याङ कोन्‍छ्‍योकला ल्‍यामु क्‍यानी थुचिछे बुल्‍गिवी, यिने मी यम्‍बातिवाला ति तेपा रम्‍बु जोपला काङ साङ दाल्‍जा कि मुथुपी।
1CO 14:18 ङ कोन्‍छ्‍योकला थुचिछे बुलिन, च्‍यिलासिसिन ख्‍यिराङ सिनाङ ङ मङ ग्‍येताम कुतुक कुतुकला ताम्‍ङे किवी।
1CO 14:19 यिन्‍सिनाङ चर्चला जोम्‍बुप मीतिवाला हाक्‍मोकोवु ग्‍येताम कुतुक कुतुकला ताम्‍ङे तोङ्‍डा च्‍यिथम्‍बा लपुप सिनाङ मीतिवाला येन्‍देन तेरुपला तेरीकी हाक्‍कोवु ताम्‍ङे छिक च्‍यिक ङ्‍यी तिराङ लपुप ति ङे थोक्‍ला मङ ल्‍यामु यिन।
1CO 14:20 अच्‍युनुपतिवा, ख्‍यिराङ आङा टिक्‍पेतिवी दोके नासाम मातोङ। दुक्‍टाकी थोक्‍ला ति आङा टिक्‍पेकी दोके किसा, यिने नासाम ति मी छ्‍येकी दोके वुङ गोकितो।
1CO 14:21 कोन्‍छ्‍योककी सुङला दुक सिन टि वे, “ङ मीतिवी हाक्‍मोकोवु ग्‍येताम कुतुक कुतुकला छ्‍यिग्‍यपकी मीतिवी ख नेमा दी मीतिवी मुला ताम्‍ङे कितिन, यिन्‍सिनाङ तिवी ङे ताम्‍ङे ति मेङ्‍येन्‍वी।”
1CO 14:22 तुक क्‍यानी ग्‍येताम कुतुक कुतुकला ताम्‍ङे कितुप ति कोन्‍छ्‍योकला तेपा कितुपतिवी थोक्‍ला मिन, तेपा मिकिवुतिवी थोक्‍ला त यिन। यिने नम्‍दर शेतुप ति तेपा मिकिवु मीतिवी थोक्‍ला मिन, तेपा कितुप मीतिवी थोक्‍ला त यिन।
1CO 14:23 दोजो चर्चकी मीतिवा तेरी जोम्‍नी सी साङ हाक्‍मोकोवु ग्‍येताम कुतुक कुतुकला ताम्‍ङे कितुप पेला ललाइ तेपा मिकिवु मीतिवा याङ्‍ना ताम्‍ङे हाक्‍मोकोवु मीतिवा ते वासिन तिवी चर्चकी मीतिवाला ङ्‍येन्‍बु मिसिरी रो?
1CO 14:24 यिने तेरी मीतिवी नम्‍दर शेतिन वोतुप पेला ललाइ तेपा मिकिवु मीतिवा याङ्‍ना ताम्‍ङे हाक्‍मोकोवु मीतिवा ते वासिन, तिवी नम्‍दर शेतुप नेसुर खोप्‍रे दिक्‍पा क्‍यावु ति हाक्‍कोनी खुरुङ ति दिक्‍छेन यिनोक सिरुप ति हाक्‍कोकिवी।
1CO 14:25 तमा तीकी खोरो सेमला वोतुप छ्‍याकला ज्‍यकुप ताम्‍ङेतिवा हाक्‍कोनी ती ति खवुतुङ्‍मा देनी कोन्‍छ्‍योकला सोवा देकिवी, तमा “वुतुङ के कोन्‍छ्‍योक ख्‍यिरा पर्ला वे।” सिरुप ति ख्‍याप्‍टाक किवी।
1CO 14:26 अच्‍युनुपतिवा, त ङ्‍यिराङ काङ सिरुप्‍जा? ख्‍यिराङ तेरी मुला जोम्‍बुप पेला ख्‍यिरा मुला कोन्‍छ्‍योकला सोवा देकुप लु लङ्‍गुप ताङ येन्‍देन तेरुप ताङ कोन्‍छ्‍योककी छ्‍या तेन नङ्‍गुप ताम्‍ङे लपुप ताङ ग्‍येताम कुतुक कुतुक लपुप ताङ तीकी तेन्‍दोक छिक ग्‍युरुप मीतिवा वे। तिवा तेरी चर्चकी मीतिवाला तेपा रम्‍बु जोपकी थोक्‍ला किशी।
1CO 14:27 ललाइकी ग्‍येताम कुतुक कुतुकला ताम्‍ङे कितुप पेला मिरा ङ्‍यी याङ्‍ना मिरा सुम चोयीकी पाला क्‍यानी ताम्‍ङे किशी। तमा तीकी तेन्‍दोक ति छिक ग्‍युरुप साङ किशी।
1CO 14:28 यिने ते चर्चला ग्‍येताम कुतुक कुतुकला ताम्‍ङे क्‍यावु ति छिक ग्‍युरुप मी सु साङ मेसिन ती ग्‍येताम कुतुक कुतुकला ताम्‍ङे कितुप ति खरक्‍पा देशी। तमा तीकी खुरुङ ताङ कोन्‍छ्‍योकला तिराङ ताम्‍ङे किशी।
1CO 14:29 नम्‍दर शेतुप पेला मिरा ङ्‍यी सुम चोयीकी तिराङ नम्‍दर शेतुप ताम्‍ङे लप्‍शी। तमा ङ्‍येन्‍दुप मीतिवा तिवी सिक्‍यावु ताम्‍ङे ति टेके यिनोक मिनोक सिनी ल्‍यामु क्‍यानी ल्‍हाशी।
1CO 14:30 यिने ती पर्ला ते वोतुप मी यम्‍बी नम्‍दर शेसुङ सिसिन गोमाला नम्‍दर शेतुप ति खरक्‍पा देशी।
1CO 14:31 तुक क्‍यानी ख्‍यिराङ तेरीकी पाला पाला क्‍यानी नम्‍दर शे थुप्‍किवी। तमा ङ्‍येन्‍दुपतिवा साङ तेरीकी तीकी कोर्ला लोप थुपुप ताङ टोङ्‍गु साङ ङ्‍येकिवी।
1CO 14:32 तमा नम्‍दर शेतुप मी तीकी खोरुङ राङ डेकला दे गोकिवी।
1CO 14:33 च्‍यिलासिसिन कोन्‍छ्‍योक ति थरा थुरा वोतुप कोन्‍छ्‍योक मिन, यिने लोदिमु नङ्‍गुप कोन्‍छ्‍योक यिन। कोन्‍छ्‍योकला तेपा कितुपतिवा चर्चला जोम्‍बुप पेला
1CO 14:34 पुम्‍पेजातिवा ति खरक्‍पा देशी। तिवाला काङ साङ सि माज्‍यी, यिने कोन्‍छ्‍योककी नङ्‍गुप ठिमला सिक्‍यावु दोके तिवा चर्चकी ओङला देशी।
1CO 14:35 दोजो तिवी काङ रे च्‍यिक रे टि गोवु ताम्‍ङे वोसिन खाङ्‍बा गल्‍नी दाक दाक्‍पी ख्‍योवाला टिशी। च्‍यिलासिसिन चर्चला पुम्‍पेजातिवा ताम्‍ङे लपुप ति ङोछा यिन।
1CO 14:36 काङ कोन्‍छ्‍योककी सुङ ति ख्‍यिराङ कोरिन्‍थकी चर्चकी मीतिवी पर नेमा गो चुवु यिन रो? खोकी सुङ ति ख्‍यिरा पर्ला तिराङ वावु यिन रो?
1CO 14:37 सी साङ खुरुङ ति कोन्‍छ्‍योककी लुङ्‍तेम्‍बा याङ्‍ना कोन्‍छ्‍योककी थु चाङ्‍मा थोपुप मी यिन सिनी नोकिवी सिसिन तीकी ङे टिवु ताम्‍ङे ति चोवो येशूकी क यिन सिनी सेमला लङ्‍शी।
1CO 14:38 यिने सी दी ताम्‍ङेला मेङ्‍येन्‍वे, तीकी सिक्‍यावु ताम्‍ङेला साङ माङ्‍येन।
1CO 14:39 तुक क्‍यानी अच्‍युनुपतिवा, नम्‍दर शेतुपला छासे नो की। तमा ग्‍येताम कुतुक कुतुकला ताम्‍ङे माकी सिनी माग्‍यक।
1CO 14:40 यिने तेरी लाकातिवा डिक्‍नी छे क्‍यानी किसा।
1CO 15:1 अच्‍युनुपतिवा, ङे ख्‍यिराङला ख्‍याप्‍टाक क्‍यावु लेन ल्‍यामु ति ख्‍यिराङला येलुङ सिरिन। ख्‍यिराङ ती सुङ ति सेमला लानी तेपा रम्‍बु च्‍युङ्‍नी देन वे।
1CO 15:2 ख्‍यिरा ङे ख्‍याप्‍टाक क्‍यावु लेन ल्‍यामुकी सुङला तेपा क्‍यासिन ख्‍यिराङ दिक्‍पा ने थर्किवी, यिने तेपा रम्‍बु क्‍यानी मादेसुङ सिसिन ख्‍यिरा क्‍यावु तेपा ति तेर्मेला डिवी।
1CO 15:3 ङला थोपुप तेरी सिनाङ खक्‍छ्‍येवु सुङ ति ङे ख्‍यिराङला ख्‍याप्‍टाक क्‍यावु यिन। ती सुङगी तेन्‍दोक ति कोन्‍छ्‍योककी सुङला सुङ्‍गुप दोके ख्रीष्‍ट दाक्‍पी दिक्‍पी थोक्‍ला टुङ्‍गुप यिन।
1CO 15:4 तमा खोकी फुङ्‍बु कल्‍दोक क्‍यासुङ, यिने कोन्‍छ्‍योककी सुङला सुङ्‍गुप दोके खो टुङ्‍सिमा येलुङ ङ्‍यिमा सुमला कोन्‍छ्‍योककी खोला ङोसु लाङ्‍सुङ।
1CO 15:5 तमा खो पत्रुसकी चाला छ्‍यार्सुङ। ती ज्‍युक्‍ला खोकी लोमा मिरा च्‍यिङ्‍ङीतिवी चाला छ्‍यार्सुङ।
1CO 15:6 तमा ती ज्‍युक्‍ला खो थेङ्‍मा च्‍यिकला राङ तेपा कितुप मी सयी ङ सिनाङ मङ्‍मुकी चाला छ्‍यार्सुङ। तिवी पर्ला ललाइ ति शिसुङ, यिने माङ्‍शोक ति तन्‍दा सेक साङ सेन्‍बु वे।
1CO 15:7 येलुङ ती ज्‍युक्‍ला खो याकूब ताङ खोकी लोमातिवा तेरीकी चाला साङ छ्‍यार्सुङ।
1CO 15:8 तमा तेरी सिनाङ ज्‍युक्‍ला खो ङे चाला साङ छ्‍यार्सुङ। ङ ति ल माछेनी क्‍येवु आङा दोके यिन।
1CO 15:9 ङ ति लोमा छ्‍येतिवी पर्ला छासे छ्‍युङा यिन। ङ ति लोमा छ्‍ये वुङ छ्‍योवु साङ मे, च्‍यिलासिसिन कोन्‍छ्‍योकला तेपा कितुप खोकी चर्चकी मीतिवाला ङे कशेन छेटाङ बिन्‍दुप यिन।
1CO 15:10 यिन्‍सिनाङ ङ तन्‍दा दुकै च्‍युङ्‍गुप ति कोन्‍छ्‍योककी कटिन नेसुर राङ च्‍युङ्‍गुप यिन। खोकी ङला नङ्‍गुप कटिन ति तेर्मेला मागल। ङे याङ यम्‍बा लोमा छ्‍येतिवा सिनाङ मङ टेमु क्‍यायिन। ती ति ङे राङ क्‍यावु मिन, यिने ङे मुला वोतुप कोन्‍छ्‍योककी कटिन नेमा क्‍यावु यिन।
1CO 15:11 तुक क्‍यानी ङे ख्‍याप्‍टाक क्‍यावु यिन्‍सिनाङ यम्‍बा लोमा छ्‍येतिवी ख्‍याप्‍टाक क्‍यावु यिन्‍सिनाङ ती सुङ ति ङ्‍यिरा ख्‍याप्‍टाक क्‍यावु यिन। तमा ती सुङ ति ख्‍यिरा तेपा क्‍यानी सेमला ज्‍याक्‍नी वे।
1CO 15:12 ख्रीष्‍ट टुङ्‍नी ङोसु लावु यिन सिनी ङ्‍यिरा ख्‍याप्‍टाक क्‍यासिनाङ ख्‍यिरा पर्ला मी ललाइकी चुक क्‍यानी “शेप ने सेन्‍बु लङ्‍गुप मेङ्‍गिवी।” सिनी सि थुप्‍किवी?
1CO 15:13 दोजो शेपतिवा सेन्‍बु मलाङ्‍गुप यिन्‍सिन काङ ख्रीष्‍ट साङ टुङ्‍नी ङोसु मालावु यिन रो?
1CO 15:14 दोजो ख्रीष्‍ट टुङ्‍नी ङोसु मालावु यिन्‍सिन, दाक्‍पी लेन ल्‍यामु ख्‍याप्‍टाक क्‍यावु सुङ ताङ ख्‍यिरा तेपा क्‍यावु ति तेर्मेला डिवी।
1CO 15:15 तमा ती सिनाङ मङ दाक्‍पु कोन्‍छ्‍योककी थोक्‍ला पङ्‍बु मेटेङ्‍बु तेरुप डिवी। च्‍यिलासिसिन कोन्‍छ्‍योककी ख्रीष्‍टला शेप ने ङोसु लाङ्‍सुङ सिनी दाक्‍पी पङ्‍बु बिन्‍दुप यिन। यिने वुतुङ के शेपतिवा सेन्‍बु मालङ्‍गुप यिन्‍सिन खोकी ख्रीष्‍टला टुङ्‍गुप ने ङोसु मोलोङ्‍गुप्‍जा।
1CO 15:16 दोजो शेपतिवा सेन्‍बु मालावु यिन्‍सियाङ कोन्‍छ्‍योककी ख्रीष्‍टला साङ ङोसु मालङ्‍गुप यिन्‍जा।
1CO 15:17 दोजो ख्रीष्‍ट टुङ्‍नी ङोसु मालावु यिन्‍सियाङ ख्‍यिरा तेपा क्‍यावु ति तेर्मे डिवी। तमा ख्‍यिराङ तरोङ साङ दिक्‍पी ओङला राङ वोतुप ति यिन्‍जा।
1CO 15:18 तुकै यिन्‍सिन ख्रीष्‍टला तेपा क्‍यानी गोमाला शेपतिवा साङ तेरी ना गलुप यिन्‍जा।
1CO 15:19 दोजो दाक्‍पी ख्रीष्‍टला रेवा क्‍यावु ति दी जम्‍बुलिङला देतुप पेला तिराङ यिन सिसिन दाक्‍पु ति तेरी मी यम्‍बातिवा सिनाङ मङ दुङलला ख्‍येलुप्‍जा।
1CO 15:20 यिन्सिनाङ वुतुङ के ख्रीष्‍ट टुङ्‍नी ङोसु लावु यिन, तमा खो शेपतिवी नाङ ने थल्‍माला सेन्‍बु लङ्‍गुप तप्‍की मी यम्‍बातिवाला साङ शेप ने सेन्‍बु लङ्‍गिवी सिरुप पङ्‍बु छ्‍या तेन्‍सुङ।
1CO 15:21 मी मिरा च्‍यिककी दिक्‍पाकी जोसालेन्‍सिन तेरी मीतिवा शि गोसुङ। तुक राङ क्‍यानी मी मिरा च्‍यिक शेप ने ङोसु लावु तप्‍की मीतिवा तेरी शेप ने सेन्‍बु लङ्‍गिवी।
1CO 15:22 तीकी तेन्‍दोक ति तेरी मीतिवा आदमकी गिपा यिन्‍दुप तप्‍की शि गोसुङ। तुक राङ क्‍यानी ख्रीष्‍टला तेपा क्‍यावु तप्‍की मीतिवा तेरी शेप ने सेन्‍बु लङ्‍गिवी।
1CO 15:23 यिने सेन्‍बु लङ्‍गुप पेला रिम्‍बा क्‍यानी सेन्‍बु लङ्‍गिवी। तेरी सिनाङ गोमाला ख्रीष्‍ट टुङ्‍गुप ने ङोसु लावु यिन। तमा खो फेवु तुजेला खोला तेपा कितुपतिवा तेरी शेप ने सेन्‍बु लङ्‍गिवी।
1CO 15:24 तमा जम्‍बुलिङ ना डोप तिङ्‍मी तुजे वुङ्‍गिवी, ती तुजेला ख्रीष्‍टकी तेरी डेकी ओङ्‍ज्‍येन ताङ जम्‍बुलिङकी ओङ्‍ज्‍येन ताङ ङारतिवा ना तङ्‍नी दी जम्‍बुलिङकी तेरी ओङ्‍ज्‍येनतिवा पपा कोन्‍छ्‍योकला चेक तेकिवी।
1CO 15:25 च्‍यिलासिसिन ख्रीष्‍टकी डतिवा तेरीला फम च्‍यिनी तिवाला ख्रीष्‍टकी शापकी वोक्‍ला मालेपा सेक कोन्‍छ्‍योककी दी जम्‍बुलिङला ग्‍येला क्‍या नङ्‍गिवी।
1CO 15:26 तेरी सिनाङ ज्‍युक्‍ला खोकी ना तोङ्‍गुप ड ति शेप यिन।
1CO 15:27 च्‍यिलासिसिन कोन्‍छ्‍योककी सुङला “तेरी जम्‍बुलिङ ति खोकी ओङला ज्‍याङ वे।” सिनी टि वे। “तेरी ओङ्‍ज्‍येन खोकी ओङला ज्‍याङ वे।” सिक्‍यावु ति कोन्‍छ्‍योक साङ खोकी ओङला राङ ख्‍येल्‍गिवी सिनी सिक्‍यावु ति मिन, यिने खोकी तेरी ओङ्‍ज्‍येन ति ख्रीष्‍टकी ओङला ज्‍याङ वे सिनी सिक्‍यावु यिन।
1CO 15:28 तेरी ओङ्‍ज्‍येनतिवा ख्रीष्‍टकी ओङला ख्‍येल्‍सिमा तिराङ ख्रीष्‍ट खुरुङ ति खोला तेरी ओङ्‍ज्‍येन नङ्‍गुप पपा कोन्‍छ्‍योककी ओङला देकिवी। तुक क्‍यानी कोन्‍छ्‍योक ति जम्‍बुलिङ तेरीला ग्‍येला क्‍या नङ्‍गुप चोछ्‍येवु कोन्‍छ्‍योक यिन।
1CO 15:29 दोजो शेपतिवा सेन्‍बु मलङ्‍गुप यिन्‍सिन शेपतिवी थोक्‍ला बप्‍तिस्‍मा लावु ति काङ तेन्‍दोक च्‍युङ्‍सुङ रो? दोजो वुतुङ के शेपतिवा सेन्‍बु मलङ्‍गुप यिन्‍सिन च्‍यिला तिवी थोक्‍ला बप्‍तिस्‍मा बिन्‍दुप यिन?
1CO 15:30 तमा ङ्‍यिराङ ति च्‍यिला ङ्‍यी ताङ नुप्‍ज्‍या दुक्‍पा खुर्किवी रो?
1CO 15:31 अच्‍युनुपतिवा, ख्‍यिरा येशू ख्रीष्‍टला तेपा क्‍यावु तप्‍की ङ वुतुङ के तेके क्‍यानी सिरिन, ङ ङ्‍यिमी टेङ शेयिन।
1CO 15:32 दोजो ङे एफिससला नाठुङ वुङगी सेम्‍ज्‍येन दोके वोतुप मीतिवी मुला थमु ग्‍यप्‍सिनाङ ङला काङ ख्‍येप्‍साङ वे रो? दोजो शेपतिवा सेन्‍बु मलाङ्‍गुप यिन्‍सियाङ “दाक्‍पु साप ताङ थुङ्‍गुप कितुप्‍जा, च्‍यिलासिसिन दाक्‍पु याङ सला शिवी।” सिनी सि थुप्‍किवी।
1CO 15:33 तुका जिनोक जोप मीतिवी ताम्‍ङेला ख्‍यिराङ माख्‍येल। “दाल्‍जा मेलोवातिवी दला शुसिन ख्‍यिरा किताङ नालु साङ मेलोवा डितो।”
1CO 15:34 च्‍याङ्‍से देता! तफेन्‍ला ख्‍यिराङ दिक्‍पा कितुप क्‍युर। च्‍यिलासिसिन मिरा चोला याङ कोन्‍छ्‍योककी कोर्ला छ्‍या राङ मे। दी ताम्‍ङे ति ङे ख्‍यिराङला ङोछा लोङ्‍गुपला सिक्‍यावु यिन।
1CO 15:35 यिने मी ललाइकी “शेपतिवा चुक क्‍यानी सेन्‍बु लङ्‍गिवी? तिवी जु ति चुकै च्‍युङ्‍गिवी?” सिनी टि साङ थुप्‍किवी।
1CO 15:36 ओ हाक्‍मोकोवुतिवा, काङ ख्‍यिरा सेन तप्‍सिमा ती सेन ति माशिवा क्‍यानी दोङ्‍बु क्‍येवी रो?
1CO 15:37 दोजो ख्‍यिरा ट यिन्‍सिनाङ याङ्‍ना यम्‍बा काङ यिन्‍सिनाङ देपुप पेला सेन देप्‍किवी, यिने चुशिङ राङ मेदेपी।
1CO 15:38 तमा कोन्‍छ्‍योककी ख्‍यिरा तपुप सेन तीला खोरे नोवाला वोतुप दोके जो नङ्‍गिवी। तमा खोकी नम्‍बा तेरीकी सेनतिवाला दाक दाक्‍पुला पेवु चुशिङ जो नङ्‍गिवी।
1CO 15:39 ती चुशिङतिवा दोके क्‍यानी तेरीकी जु ति च्‍यिक्‍पा राङ मेवी। मी जु ति कुतुक गिवी, सेम्‍ज्‍येनकी जु ति कुतुक गिवी, तमा च्‍यच्‍युमतिवी जु ति कुतुक गिवी, ङ्‍यातिवी जु ति कुतुक गिवी।
1CO 15:40 तमा जु साङ देवाच्‍येनकी जु ताङ जम्‍बुलिङकी जु गिवी। देवाच्‍येनकी जुकी ति वोसिर कुतुक वे, जम्‍बुलिङकी जुकी ति वोसिर कुतुक वे।
1CO 15:41 ङ्‍यिमी वोसिर ति नम्‍बा कुतुक गिवी, उलाकी वोसिर ति नम्‍बा कुतुक गिवी, तमा कर्मातिवी वोसिर ति नम्‍बा कुतुक राङ गिवी। तमा कर्मा च्‍यिककी वोसिर ति यम्‍बा कर्मातिवी ति सिनाङ कुतुक गिवी।
1CO 15:42 शेपतिवा सेन्‍बु लङ्‍गुप साङ तुकै राङ यिन। मुक्‍तुम ग्‍यकुप पेला रुलुपला मुक्‍तुम ग्‍यकिवी, यिने सेन्‍बु लङ्‍गुप पेला नाम्‍साङ मुरुलुपला सेन्‍बु लङ्‍गिवी।
1CO 15:43 तमा मुक्‍तुम ग्‍यकुप पेला दाक्‍पी जु ति ताङ्‍देन मेतुप ताङ ङार मेतुप डिवी, यिने सेन्‍बु लङ्‍गुप पेला मोवा वोतुप ताङ ङार छ्‍येवु च्‍युङ्‍गिवी।
1CO 15:44 तमा मी जु ति मुक्‍तुम ग्‍यकुप पेला जम्‍बुलिङकी जुला मुक्‍तुम ग्‍यकिवी, यिने सेन्‍बु लङ्‍गुप पेला कोन्‍छ्‍योककी थु चाङ्‍माकी नङ्‍गुप जुला सेन्‍बु लङ्‍गिवी। तुक क्‍यानी जम्‍बुलिङकी जु वोतुप दोके कोन्‍छ्‍योककी थु चाङ्‍माकी नङ्‍गुप जु साङ वे।
1CO 15:45 ती तप्‍की कोन्‍छ्‍योककी सुङला “थल्‍माकी मी आदम ति सेन्‍बु वोतुप मी च्‍युङ्‍सुङ।” सिनी टि वे, यिने तिङ्‍मी आदम यिन्‍दुप ख्रीष्‍ट ति मिजी नङ्‍गुप थु च्‍युङ्‍सुङ।
1CO 15:46 थल्‍माला वावु जु ति थु नेमा वावु जु मिन, तसाम पेलाकी दोके जु यिन। तमा ती ज्‍युक्‍ला वावु जु ति कोन्‍छ्‍योककी थु चाङ्‍मा नेमा वावु जु यिन।
1CO 15:47 थल्‍माकी मी आदम ति जम्‍बुलिङकी थला नेसुर जोवु यिन। तमा ती ज्‍युक्‍ला वावु मी येशू ख्रीष्‍ट ति देवाच्‍येन नेमा वावु यिन।
1CO 15:48 आदमकी गिपा नेमा वावु मीतिवी जु ति आदम दोके राङ डिवी। येशू ख्रीष्‍टला तेपा क्‍यानी देवाच्‍येनला डोप मीतिवी जु ति येशू ख्रीष्‍ट दोके राङ डिवी।
1CO 15:49 तुक क्‍यानी दाक्‍पु ति थला नेसुर जोवु मी आदमकी जुजमला वे। ज्‍युक्‍ला ति दाक्‍पु देवाच्‍येनकी मी यिन्‍दुप येशू ख्रीष्‍टकी जुजमला मिजी सम्‍बा च्‍युङ्‍गिवी।
1CO 15:50 अच्‍युनुपतिवा, ङ ख्‍यिराङला दी ताम्‍ङे ति सिरिन। श ताङ ठकला वोतुप दाक्‍पी जु ति कोन्‍छ्‍योककी ग्‍येल्‍खापला डो मुथुपी। तमा शिनी रुल डोप जु तीकी नाम्‍साङ मिशिवु मिजी ङ्‍ये मुथुपी।
1CO 15:51 ङ्‍येना, ङ ख्‍यिराङला छ्‍याकला वोतुप ताम्‍ङे यी सिरिन। दाक्‍पु तेरी मिशिवी, यिने तेरी सिनाङ तिङ्‍माला सङ्‍दुङकी वोरु तेन्‍लुङ्‍मे कोन्‍छ्‍योककी दाक्‍पी जु ति तेरी फो ज्‍यिकितो।
1CO 15:52 ती पेला शेपतिवा येलुङ नाम्‍साङ मिशिवु च्‍युङ्‍नी सेन्‍बु लङ्‍गितो। तमा कोन्‍छ्‍योककी दाक्‍पी जु साङ फो ज्‍यिकितो।
1CO 15:53 च्‍यिलासिसिन कोन्‍छ्‍योककी ना डोप जुतिवाला ति ना डो मिज्‍यिवी, शिनी डोपतिवाला ति मिशिवु मिजीला फो ज्‍यिकिवी।
1CO 15:54 तुक क्‍यानी ना डोपतिवा नाम्‍साङ ना मोडोवु ताङ शिनी डोपतिवा नरीकी थोक्‍ला लुवु पेला कोन्‍छ्‍योककी सुङला दुक सिनी टि वोतुप ति तेरी छेकिवी, “चोवो कोन्‍छ्‍योककी नरीकी थोक्‍ला शेपकी खला ग्‍येल वे।”
1CO 15:55 “त याङ शेपकी सुला ग्‍येला कि थुप्‍किवी रो? शेपकी ना तोङ्‍गुप ओङ ति कनी गाल?”
1CO 15:56 शेपकी ना तोङ्‍गुप ओङ ति दिक्‍पा यिन। तमा दिक्‍पाकी ओङ ति मोशाकी बिन्‍दुप ठिम यिन।
1CO 15:57 यिने कोन्‍छ्‍योकला थुचिछे बुलिन, खोकी दाक्‍पुला चोवो येशू ख्रीष्‍ट नेसुर शेप ताङ दिक्‍पाकी खला ग्‍येलुप ओङ नङ्‍गिवी।
1CO 15:58 तुक क्‍यानी ङे ङ्‍यिङ्‍ज्‍येवु अच्‍युनुपतिवा, ख्‍यिराङ हम क्‍या देता। सी साङ ख्‍यिराङला येर मर कितुप मोजोशिता। ख्‍यिराङ ति चोवो येशूकी थोक्‍ला शब्‍ज्‍यी कितुला नरी फरिन ग्‍युका। च्‍यिलासिसिन ख्‍यिराङला छ्‍या वे, ख्‍यिरा चोवोकी थोक्‍ला टेमु क्‍यावु ति नाम्‍साङ तेर्मेला मोडोवी।
1CO 16:1 त कोन्‍छ्‍योकला तेपा कितुप यरूशलेमकी मीतिवी थोक्‍ला बुल्‍वा तेरुप कोर्ला गलातियाला वोतुप चर्चतिवाकी मीतिवाला ङे क बिन्‍दुप दोके ख्‍यिराङ साङ किसा।
1CO 16:2 नरी दिन्‍जा च्‍यिककी ङ्‍यिमा थल्‍माला ख्‍यिराङ तेरीकी दाक दाक्‍पी शम्‍बुप टङ्‍गा नेमा टङ्‍गा चे चेयी दुम्‍नी ज्‍योका। तुक क्‍यासिन ङ वासिमा के बुल्‍वा दु मोगोशिता।
1CO 16:3 तमा ङ वासिमा ख्‍यिरा दुम्‍नी ज्‍यकुप बुल्‍वा ति कल्‍नी ख्‍यिरा सेमला गलुप मी मिरा च्‍यिकला यिकी ताङ मुला यरूशलेमला तोङ्‍गुप्‍नो।
1CO 16:4 दोजो ती पेला डो गोवु यिन्‍सिन ङ साङ तिवी मुला राङ यरूशलेमला डोयिनो।
1CO 16:5 ङ माकेडोनियाला गल्‍नी ते नेसुर ख्‍यिराङला ठेतुपला वुङ्‍गुप्‍नो।
1CO 16:6 ङ ख्‍यिरा ते वासिमा चेयी पर सेक देतिनो। च्‍युङ्‍सिन गुन्‍बी ल ति ख्‍यिरा मुला राङ देतुप नो वे। ती ज्‍युक्‍ला ति ङ कनी गल्‍सिनाङ ख्‍यिरा ङला दाल्‍जा कि थुप्‍किवी।
1CO 16:7 दी पाला ङ ख्‍यिरा ते उकुर च्‍यिक तिराङ ठेतुपला वुङ्‍गुप मिन, यिने कोन्‍छ्‍योककी नोवाला वोसिन ख्‍यिरा मुला चेयी पर सेक देतुप नो वे।
1CO 16:8 यिने पेन्‍तिकोसकी तुछ्‍येन सेक ति ङ एफिससला राङ देतिनो,
1CO 16:9 च्‍यिलासिसिन ङे थोक्‍ला छासे खक्‍छ्‍येवु लाका कितुपला गो ग्‍येर्पु पेनी वे, यिने ङे तेन्‍दोकला लङ्‍गुपतिवा साङ बङी वे।
1CO 16:10 दोजो तिमोथी ख्‍यिरा ते वासिन ख्‍यिरा ते देतुप पर सेक ति तीला ख्‍यिरा मुला राङ जोल्‍हमु क्‍यानी दे च्‍यिता। च्‍यिलासिसिन ती साङ ङ दोके कोन्‍छ्‍योककी थोक्‍ला लाका कितुप मी यिन।
1CO 16:11 तुक क्‍यानी सी साङ तीला ङ्‍यिङ्‍मर माकिता। तीला लोदिमो क्‍यानी ङे ते वुङ्‍गुपला दाल्‍जा क्‍यानी तोङ। तेपा कितुप अच्‍युनुपतिवी मुला तिमोथी गिवी सिनी ङ लाम ल्‍हानी गु देनी वोतो।
1CO 16:12 दाक्‍पी नुप अपोल्‍लोसला तेपा कितुप यम्‍बा अच्‍युनुपतिवी मुला राङ टिनी ख्‍यिरा ते ग्‍युक सिनी ङे बङी सिक्‍यायिन, यिने ती तन्‍दा सेक साङ ख्‍यिरा ते डो माथुप वे। ज्‍युक्‍ला च्‍युङ्‍सिन ख्‍यिरा ते डिते यिन्‍दे।
1CO 16:13 ख्‍यिराङ च्‍याङ्‍से देता, तमा तेपा रम्‍बु क्‍यानी ङाडेङ ताङ ङार छ्‍येवु क्‍यानी देता।
1CO 16:14 ख्‍यिराङ काङ कि सिनाङ सेमला ङ्‍यिङ्‍ज्‍ये क्‍यानी किसा।
1CO 16:15 अच्‍युनुपतिवा, अखैयाला तेरी सिनाङ गोमाला कोन्‍छ्‍योकला तेपा क्‍यावु स्‍तिफनासकी खाङ्‍बी मीतिवा तेरीला याङ ख्‍यिरा ङो शेकिवी। तिवी कोन्‍छ्‍योकला तेपा कितुप मीतिवाला छासे क्‍यानी दाल्‍जा किटे क्‍यासुङ।
1CO 16:16 ख्‍यिराङ तुका टेमु कितुप मीतिवा ताङ तिवी मुला राङ शब्‍ज्‍यी कितुप मी तेरीकी ओङला दे सिनी ङ ख्‍यिराङला ठाकुरे सिरिन।
1CO 16:17 स्‍तिफनास ताङ फोर्टुनाटस ताङ अखाइकस ङे ते वासिमा ङ छासे गा क्‍यायी। च्‍यिलासिसिन ख्‍यिराङ मेसिनाङ तिवी ङ्‍यिराङला लोदिमु जोसुङ।
1CO 16:18 तमा तिवी ख्‍यिरा सेमला ङाडेङ जोवु दोके ङे सेमला साङ छासे ङाडेङ ङ्‍येसुङ। तुक क्‍यानी तुका मीतिवाला ख्‍यिरा ताङ्‍देन किसा।
1CO 16:19 एशियाला वोतुप चर्चतिवाकी मीतिवी साङ ख्‍यिराङला टसी देलेक सिनी ताङ्‍नी वोतो। तमा अकिलास ताङ प्रिस्‍काले ताङ तिवी खाङ्‍बाला वोतुप कोन्‍छ्‍योकला तेपा कितुपतिवा तेरीकी साङ ख्‍यिराङला टसी देलेक सिनी ताङ्‍नी वोतो।
1CO 16:20 दे वोतुप तेरी तेपा कितुप अच्‍युनुपतिवी साङ ख्‍यिराङला टसी देलेक सिनी ताङ्‍नी वोतो। ख्‍यिराङ च्‍यिककी च्‍यिकला ङ्‍यिङ्‍ज्‍ये ताङ मुला टसी देलेक सिसा।
1CO 16:21 दी टसी देलेक सिक्‍यावु ति ङ पावलकी लाक्‍पी राङ टिवु यिनो।
1CO 16:22 सी चोवो येशूला ङ्‍यिङ्‍ज्‍ये मिकिवे, तिवा मोताप सुकुप यिनो। ओ ङ्‍यिरा चोवो येशू, ङ्‍यिरा पर्ला फेप!
1CO 16:23 चोवो येशूकी कटिन ति ख्‍यिरा मुला लुशी।
1CO 16:24 ख्रीष्‍ट येशू नेमा ख्‍यिराङ तेरीला ङ ङ्‍यिङ्‍ज्‍ये कितिन। आमिन।
2CO 1:1 टसी देलेक! दी यिकी ति कोन्‍छ्‍योककी नोवा नेमा ख्रीष्‍ट येशूकी लोमा छ्‍ये च्‍युङ्‍गुप ङ पावल ताङ दाक्‍पी नुप तिमोथी नेसुर कोरिन्‍थीला वोतुप कोन्‍छ्‍योककी चर्चकी मीतिवा ताङ अखैया लुङ्‍बाला वोतुप तेरी कोन्‍छ्‍योकला तेपा कितुप मीतिवाला टिवु यिनो।
2CO 1:2 दाक्‍पी पपा कोन्‍छ्‍योक ताङ चोवो येशू ख्रीष्‍टकी ख्‍यिराङला कटिन ताङ लोदिमु नङ्‍शिता।
2CO 1:3 दाक्‍पी चोवो येशू ख्रीष्‍टकी पपा कोन्‍छ्‍योकला सोवा वुङ्‍शी। खो ति च्‍यम्‍बा ताङ टोङ्‍गु तेरी नङ्‍गुप कोन्‍छ्‍योक यिन।
2CO 1:4 खोकी ङ्‍यिराङला तेरी परकी दुक्‍पा ख्‍येलुप पेला टोङ्‍गु नङ्‍गिवी। तुक क्‍यानी ङ्‍यिरा साङ खोकी नङ्‍गुप टोङ्‍गु नेमा मी ललाइला दुक्‍पा ख्‍येल्‍सिन तिवाला टोङ्‍गु तेर थुप्‍किवी।
2CO 1:5 चुक क्‍यानी ख्रीष्‍टकी थोक्‍ला ङ्‍यिरा छेटाङ बङी खुर्किवे, तुक राङ क्‍यानी ख्रीष्‍ट नेमा कोन्‍छ्‍योककी ङ्‍यिराङला छासे क्‍यानी टोङ्‍गु नङ्‍गिवी।
2CO 1:6 ङ्‍यिराङला दुक्‍पा ङ्‍येतुप ति ख्‍यिराङला टोङ्‍गु ताङ थर्वा ङ्‍येतुपला यिन। ङ्‍यिराङला टोङ्‍गु ङ्‍येतुप ति ख्‍यिराङला साङ टोङ्‍गु ङ्‍येतुपला यिन। तमा ती टोङ्‍गु नेसुर राङ ङ्‍यिरा दोके ख्‍यिरा साङ दुक्‍पा खुरुप ताङ हम क्‍यानी दे थुप्‍किवी।
2CO 1:7 तुक क्‍यानी ङ्‍यिरा ख्‍यिराङला रेवा क्‍यावु ति नाम्‍साङ मोयोम्‍बी। ङ्‍यिराङला छ्‍या वे, ङ्‍यिरा खुरुप दोके दुक्‍पा ख्‍यिरा साङ खुर्वे। ङ्‍यिराङला ङ्‍येतुप दोके टोङ्‍गु ति ख्‍यिराङला साङ ङ्‍येकिवी।
2CO 1:8 अच्‍युनुपतिवा, ङ्‍यिरा एशिया लुङ्‍बाला दुक्‍पा खुरुप ति ख्‍यिराङला ल्‍यामु क्‍यानी हाक्‍कोशी सिरुप नोवा वे। ते ङ्‍यिराङला छासे दुक्‍पा ङ्‍येतुप तप्‍की सेन्‍बु लुकिते सिरुप रेवा साङ मेतुप्‍जा।
2CO 1:9 वुतुङ के ङ्‍यिरा याङ त शेप पेला लेप्‍सुङ सिनी नो क्‍यायी। यिने ती ति ङ्‍यिरा खुरुङला राङ रेवा क्‍यावु मिन, शेपतिवाला सेन्‍बु लोङ्‍गुप कोन्‍छ्‍योकला तिराङ रेवा कि थुप्‍शी सिनी तुकै च्‍युङ्‍गुप यिन।
2CO 1:10 खोकी ङ्‍यिराङला तुका शेप ने र्‍होक नाङ्‍सुङ। तमा तन्‍दा साङ र्‍होक नङ्‍गिवी। तुक क्‍यानी येलुङ ज्‍युक्‍ला ङ्‍यिराङला र्‍होक नङ्‍गुप खोला ङ्‍यिरा तेरी रेवा क्‍या वे।
2CO 1:11 तीकी थोक्‍ला ख्‍यिरा ङ्‍यिराङला मोपोर क्‍यानी दाल्‍जा किटे किसा। तुक क्‍यासिन ख्‍यिराङ बङीकी क्‍यावु मोपोर नेसुर कोन्‍छ्‍योककी ङ्‍यिराङला मोलाम नङ्‍गुप तप्‍की मी बङीकी कोन्‍छ्‍योकला थुचिछे बुल्‍गिवी।
2CO 1:12 ङ्‍यिराङ दी ताम्‍ङेला तेके किवी, तमा ङ सेम टेङ्‍बुकी पङ्बु तेरिन। दी जम्‍बुलिङला देनी क्‍यावु ङ्‍यिरा किताङ नालु ताङ खक्‍छ्‍येवुला ख्‍यिरा मुकी तम्‍जीला ताम्‍ङे जिनोक माजोनी कोन्‍छ्‍योक नेमा वावु टेङ्‍बुला क्‍यावु यिन। ङ्‍यिरा तुक क्‍यावु ति जम्‍बुलिङकी रिक्‍पा नेमा वावु मिन, कोन्‍छ्‍योककी कटिन नेमा वावु यिन।
2CO 1:13 ङ्‍यिराङ ख्‍यिराङला लोप थुपुप ताम्‍ङे ताङ हाक्‍को थुपुप ताम्‍ङे तिराङ टिकिन। तन्‍दा ङ्‍यिरा ख्‍यिराङला लापुप ति ख्‍यिरा चेयी तिराङ हाक्‍को वे,
2CO 1:14 यिने तिङ्‍ला ति ख्‍यिरा तेरी हाक्‍को थुप्‍किवी सिनी ङ रेवा कितिन। तुक क्‍यानी दाक्‍पी चोवो येशू फेवु तुजेला ङ्‍यिरा ख्‍यिरा थोक्‍ला तेके क्‍यावु दोके ख्‍यिरा ङ्‍यिरा थोक्‍ला तेके किवितो।
2CO 1:15 ती ताम्‍ङे ति ङला तेन्‍तेन वोतुप तप्‍की गोमाला ङे ख्‍यिराङला ठेतुपला वुङ्‍गुप नो क्‍यायी। तुक क्‍यासिन ङ ख्‍यिरा ते थेङ्‍मा ङ्‍यी वासिमा ख्‍यिराङला लोदिमु च्‍युङ्‍गिवी।
2CO 1:16 ङ माकेडोनिया डोप पेला ख्‍यिराङला ठेनी डोप, तमा माकेडोनिया नेसुर लोकुप पेला साङ ख्‍यिराङला ठेतुप नो क्‍यायी। तमा तेसुर ङ यहूदियाला डोप पेला ख्‍यिरा ङला दाल्‍जा किटे किवी सिनी नो क्‍यायी।
2CO 1:17 काङ ङे नासाम मातङ्‍वा क्‍यानी ख्‍यिरा ते वुङ्‍गुप पोवु यिन सिनी ख्‍यिरा नासाम तङ्‍गुप? काङ ङ जम्‍बुलिङकी मीतिवी दोके मीला गा लोङ्‍गुपला पर्साला “ङ गिवी।”, पर्साला “ङ मेवी।” सिनी रङगी थोक्‍ला तिराङ नासाम तङ्‍नी सिक्‍यावु यिन रो?
2CO 1:18 कोन्‍छ्‍योक ति खोङ्‍तेर्मु वे। तुक क्‍यानी ङ साङ पर्साला “गिवी”, पर्साला “मेवी” सिनी थाक मेछ्‍येवी।
2CO 1:19 च्‍यिलासिसिन सिलास ताङ तिमोथी ताङ ङे ख्‍यिराङला ख्‍याप्‍टाक क्‍यावु कोन्‍छ्‍योककी सेवु येशू ख्रीष्‍ट साङ पर्साला “यिन”, पर्साला “मिन” सिनी ताम्‍ङे ङ्‍यी कितुप मिन। यिने खो ति नरी “यिन” सिरुप तिराङ वे।
2CO 1:20 कोन्‍छ्‍योककी थाक्‍छ्‍येन नङ्‍गुप सुङतिवा तेरी ख्रीष्‍टकी ओङला च्‍युङ्‍गिवी। तुक क्‍यानी कोन्‍छ्‍योककी मोवाकी थोक्‍ला ख्रीष्‍ट नेमा दाक्‍पी “आमिन” सिनी सिवी।
2CO 1:21 कोन्‍छ्‍योककी राङ ङ्‍यिराङ ताङ ख्‍यिराङला ख्रीष्‍टकी मुला तम्‍जी रम्‍बु जो नङ वे। तमा खोकी राङ दाक्‍पुला पेनी
2CO 1:22 दाक्‍पुला खोरे ति यिन सिनी त ग्‍यम वे। तमा दाक्‍पुला थाक्‍छ्‍येतुपकी थोक्‍ला दाक्‍पी सेमला खोकी थु चाङ्‍मा नङ्‍नी वे।
2CO 1:23 ङे सेम हाक्‍कोवु कोन्‍छ्‍योक पङ्‍बु वे। ङे ख्‍यिराङला वोरु तेन्‍नी ख्‍यिराङला कले मेख्‍येल्‍शी सिनी राङ ङ कोरिन्‍थला माङुवु यिन।
2CO 1:24 ङ्‍यिरा ख्‍यिराङला चुक क्‍यानी तेपा कि गोकिवी सिनी ओङ्‍ज्‍येन कितुपला कार क्‍यावु मिन, यिने ख्‍यिराङला गा लोङ्‍गुपला राङ ङ्‍यिराङ ख्‍यिरा मुला लाका कितिनो। च्‍यिलासिसिन ख्‍यिराङ याङ येशूला तेपा रम्‍बु वे।
2CO 2:1 तुक क्‍यानी ङे ख्‍यिराङला वोरु तेन्‍नी ख्‍यिरा सेम मेलोक्‍पा मोडोशी सिनी राङ ङ ख्‍यिरा ते येलुङ मेङ्‍गुप तेन्‍तेन क्‍यायी।
2CO 2:2 च्‍यिलासिसिन ङे ख्‍यिराङला सेम्‍दुक लाङ्‍सिन ती ङे सेम्‍दुक लङ्‍गुप मी तीकी मिसिन यम्‍बा सी ङला गा लोङ थुप्‍किवी रो?
2CO 2:3 गोमाला ङे ख्‍यिराङला ती यिकी टिवु ति ङ ख्‍यिरा ते वुङ्‍गुप पेला ङला गा लोङ्‍गुप मीतिवी राङ ङला सेम्‍दुक मोलोङ्‍शी सिनी यिन। च्‍यिलासिसिन ङला सेम गा लङ्‍गुप ति ख्‍यिराङ तेरीला सेम गा लङ्‍गुप यिन सिरुप ति ङला तेन्‍तेन वे।
2CO 2:4 ङे छासे दुक्‍पा क्‍यानी सेमला दुङल खुरिन ताङ मिकला मिक्‍च्‍युर तोङ्‍यिन सिरा ख्‍यिरा थोक्‍ला ती यिकी ति टियिन। ती ति ख्‍यिराङला सेम्‍दुक लोङ्‍गुपला टिवु मिन, यिने ख्‍यिराङला ङे छासे ङ्‍यिङ्‍ज्‍ये क्‍यावु ति हाक्‍कोशी सिनी टिवु यिन।
2CO 2:5 त येलुङ मी ललाइकी यम्‍बाला सेम्‍दुक लङ्‍सिन ती सेम्‍दुक लङ्‍गुप ति ङे थोक्‍ला बङी सेम्‍दुक लङ्‍गुप मिन, यिने ख्‍यिरा पर्ला मी ललाइतिवाला साङ सेम्‍दुक लङ्‍गुप यिन। दी ताम्‍ङे ति ख्‍यिराङला कोक्‍पु मोजोवुला ङे चेयी तिराङ सिक्‍यावु यिन।
2CO 2:6 ख्‍यिरा पर्ला मी माङ्‍शोक नेसुर तुका मीला याङ चुका परकी छ्‍येर्पा कल्‍सिनाङ ग्‍यावा यिन।
2CO 2:7 त याङ ख्‍यिरा तीला माफ बिन्‍नी टोङ्‍गु तेर गोकिवी। मिसियाङ ती मी ति छासे सेम्‍दुक लानी तेपा कितुप साङ क्‍युर्नी ज्‍योक थुप्‍किवी।
2CO 2:8 तुक क्‍यानी ख्‍यिरा तीला छासे क्‍यानी ङ्‍यिङ्‍ज्‍ये कितुप ति छ्‍या तेन सिनी ङ ख्‍यिराङला ठाकुरे सिरिन।
2CO 2:9 ङे सिक्‍यावु ति ङ्‍येन्‍गिवे मेङ्‍येन्‍वे ल्‍हापला ताङ ख्‍यिराङ खला ङ्‍येमु वोतुप मेतुप हाक्‍कोवुला राङ ङे ती यिकी ति ख्‍यिराङला टिवु यिनो।
2CO 2:10 ख्‍यिरा सुला माफ तेर्किवे, ङ साङ तीला माफ तेरिनो। दोजो ङे ललाइला काङ रे च्‍यिक रे ताम्‍ङेला माफ बिन्‍सिन ती ति ख्रीष्‍टकी थोङ्‍दाङला ख्‍यिरा थोक्‍ला ङे माफ बिन्‍दुप यिन।
2CO 2:11 तुक क्‍यावु तेन्‍दोक ति शैतानकी दाक्‍पुला च्‍यु छोल मुथुप्‍शी सिनी यिन। च्‍यिलासिसिन तीकी खोनक्‍पु वोतुप च्‍युतिवा दाक्‍पुला तेरी छ्‍या वे।
2CO 2:12 ङ ख्रीष्‍टकी कोर्ला लेन ल्‍यामु ख्‍याप्‍टाक कितुपला त्रोआसला वुङ्‍गुप पेला चोवोकी ङला खोकी थोक्‍ला शब्‍ज्‍यी कितुप लाम पेन नाङ्‍सुङ।
2CO 2:13 यिने ङे मुला लाका कितुप नुप तीतसला ते माठेसिमा ङला लोदिमु माच्‍युङ। तुक क्‍यानी ते वोतुप मीतिवी मु नेसुर क्‍येनी माकेडोनियाला गलिन।
2CO 2:14 यिने कोन्‍छ्‍योकला थुचिछे, च्‍यिलासिसिन खोकी ङ्‍यिराङला शैतानकी खला ओङ्‍ज्‍येन कितुपला नरी ख्रीष्‍ट नेसुर गोमा किवी। तमा खोकी ख्रीष्‍टकी कोर्ला वोतुप रिक्‍पा ति छो ज्‍यीला फेल ज्‍यितुपला ङ्‍यिराङला दाल्‍जा किवी। ती रिक्‍पा ति टी जङ्‍बु खाप यिन।
2CO 2:15 च्‍यिलासिसिन ङ्‍यिराङ याङ तेपा क्‍यानी दिक्‍पा ने थरुपतिवा ताङ तेपा माक्‍यानी ना डोपतिवा तेरीकी पर्ला कोन्‍छ्‍योकला पुलुप ख्रीष्‍टकी टी जङ्‍बु दोके यिन।
2CO 2:16 ती टी जङ्‍बु ति ना डोपतिवी थोक्‍ला नरीकी नरी शेप तेन्‍दोक यिन, दिक्‍पा ने थरुपतिवी थोक्‍ला मिजी थोपुप तेन्‍दोक यिन। तमा तुका लाका ग्‍येर्पु कितुप ति सु वे रो?
2CO 2:17 मी यम्‍बी दोके ङ्‍यिरा ति कोन्‍छ्‍योककी सुङला ख्‍येमु वोतुप च्‍यालक छोङ कितुप मी दोके मिन। बोरु ङ्‍यिराङ याङ कोन्‍छ्‍योककी तङ्‍गुप तप्‍की खोकी थोङ्‍दाङला ख्रीष्‍टकी थोक्‍ला ताम्‍ङे टेङ्‍बु तिराङ सिवी।
2CO 3:1 माङ्‍शोक मी ललाइकी खुरुङ ति लाका ल्‍यामु कितुप मी यिन सिनी मी यम्‍बी टिवु यिकी खुर्नी गिवी, यिने ङ्‍यिराङ ख्‍यिरा ते वुङ्‍गुप पेला तुका यिकी खुर वुङ मोगोवी, याङ्‍ना ङ्‍यिराङ दासा यम्‍बाला डोप पेला ख्‍यिरा ङ्‍यिराङला तुका यिकी जो मोगोवी।
2CO 3:2 ख्‍यिराङ ति ङ्‍यिरा थोक्‍ला तेरीकी हाक्‍कोवु ताङ लोप थुपुपला टिवु यिकी यिनो। ती यिकी ति ङ्‍यिरा सेमला राङ टिनी वोतो।
2CO 3:3 वुतुङ के ख्‍यिराङ ति ख्रीष्‍टकी टिवु यिकी यिन। ती यिकी क्‍योलुप ति ङ्‍यिराङ राङ यिन। ती यिकी ति नक्‍ची थ्‍वोनी टिवु मिन, ङोसु वोतुप कोन्‍छ्‍योककी थु चाङ्‍माकी टिवु यिन। दे येम्‍ज्‍येला टिवु मिन, मी सेमला टिवु यिनो।
2CO 3:4 ख्रीष्‍ट नेसुर कोन्‍छ्‍योककी थोङ्‍दाङला तेन्‍तेन वोतुप तप्‍की ङ्‍यिराङ दी ताम्‍ङे ति सिरिन।
2CO 3:5 चुका लाका साङ ङ्‍यिरा राङ क्‍यावु यिन सिनी सि मुथुपी। ङ्‍यिराङला लाका कितुप ङार ति कोन्‍छ्‍योक नेमा राङ ङ्‍येतुप यिन।
2CO 3:6 खोकी ङ्‍यिराङला खो ताङ ङ्‍यिरा पर्ला थाक्‍छ्‍येवु ठिम सम्‍बाकी थोक्‍ला शब्‍ज्‍यी कितुप ङार नाङ्‍सुङ। दी थाक्‍छ्‍येवु ठिम सम्‍बा ति यिकीला टिवु मिन, कोन्‍छ्‍योककी थु चाङ्‍माकी टिवु यिन। यिकीला टिवु ठिमकी मीला शि ज्‍यिकिवी, यिने कोन्‍छ्‍योककी थु चाङ्‍माकी याङ मिजी नङ्‍गिवी।
2CO 3:7 कोन्‍छ्‍योककी मोशाला दे येम्‍ज्‍येला टिवु ठिम नङ्‍गुप पेला खोकी मोवा नेमा वुङ्‍गुप वोसिर ति मोशाकी ङुतुङला ठछ्‍येली गाल्‍सुङ। ती तप्‍की ती ठछ्‍येली ति चेयी पर सेक तिराङ देनी गलुप यिन्‍सिनाङ इस्राएलकी मीतिवी मोशाकी ङुतुङला ल्‍ह ल्‍हावा दे माथुप। तुक क्‍यानी मीला शि ज्‍यितुप ठिम ङ्‍यिङ्‍बाकी शब्‍ज्‍यी कितुप लाकाला साङ तुका वोसिर वोसिन,
2CO 3:8 मिजी थोपुप कोन्‍छ्‍योककी थु चाङ्‍माकी शब्‍ज्‍यी कितुप लाकाला याङ मङ चोके वोसिर वोते?
2CO 3:9 दोजो मीला क्‍येन तेरुप शब्‍ज्‍यीकी लाकाला साङ तुका वोसिर वोसिन मीला टेङ्‍बु जोप शब्‍ज्‍यी कितुप लाकाला याङ मङ चोके वोसिर ग्यकुप वोते।
2CO 3:10 ती ताम्‍ङे ति नासाम ताङ्‍सिन तसाम वावु ठिमकी वोसिर ति छासे सल्‍वु वोतुप तप्‍की गोमी ठिमकी वोसिर ति तोर्नी गाल।
2CO 3:11 चेयी पर सेक तिराङ लुवु ठिमला साङ तुका वोसिर वोसिन नरीकी नरी लुवु ठिमला याङ मङ चोके वोसिर ग्‍यकुप वोते।
2CO 3:12 तुक क्‍यानी ङ्‍यिराङला तुका रेवा वोतुप तप्‍की ङ्‍यिराङ छासे ङाडेङ कितुप गल वे।
2CO 3:13 मोशाकी याङ खोरो ङुतुङला वोसिर ङ्‍युङ्‍मु गलुप ति इस्राएलकी मीतिवी मोथोङ्‍शी सिनी खयिटो गुकुर ग्‍यप्‍सुङ। ङ्‍यिराङ ति मोशाकी दोके लाका मिकिवी।
2CO 3:14 ती पेला नेज्‍युनी इस्राएलकी मीतिवी सेम ति तन्‍दा सेक साङ क्‍योङ्‍बु राङ गल वे। च्‍यिलासिसिन तसाम सेक साङ मोशाकी ठिम लाप्‍सिन तिवी सेम ति गुकुर ग्‍यपुप दोके राङ वे। ती गुकुर ति ख्रीष्‍टला तेपा क्‍यासिन तिराङ पे थुप्‍किवी।
2CO 3:15 वुतुङ के मोशाकी ठिम लाप्‍सिन तसाम सेक साङ तिवी सेम ति गुकुर ग्‍यपुप दोके राङ गिवी।
2CO 3:16 यिने कोन्‍छ्‍योककी मोशाला सुङ्‍गुप दोके “चोवो कोन्‍छ्‍योककी थाकाला ग्‍युरुप पेला ती गुकुर ग्‍यपुप ति पेकिवी।”
2CO 3:17 चोवो कोन्‍छ्‍योक ति थु चाङ्‍मा यिन। कनी कोन्‍छ्‍योककी थु चाङ्‍मा नोके, ते रङ्‍ज्‍येन थोप्‍किवी।
2CO 3:18 तमा दाक्‍पु तेरीकी गुकुर पेतुप ङुतुङला चोवो कोन्‍छ्‍योककी वोसिर ति ठछ्‍येली थोङ्‍गिवी। खो नेसुर वुङ्‍गुप वोसिरकी दाक्‍पुला खो दोके जोनी मङ मङ वोसिर ग्‍यकुप जो नङ्‍गिवी। ती तेरी चोवो कोन्‍छ्‍योककी थु चाङ्‍माकी क्‍यावु यिन।
2CO 4:1 तुक क्‍यानी कोन्‍छ्‍योककी ङ्‍यिराङला च्‍यम्‍बा क्‍यानी खोला शब्‍ज्‍यी कितुप ती लाका नङ्‍गुप तप्‍की ङ्‍यिराङ यिछ्‍येता कि मोगोवी।
2CO 4:2 ङ्‍यिराङ तेरी परकी छ्‍याकला वोतुप ताङ ङोछा लङ्‍गुप लाका मेलोवातिवा नाम्‍साङ मिकिवी। तमा जिनोक जोप ताङ कोन्‍छ्‍योककी सुङ ति कुतुक जोप साङ मिकिवी। यिने टेङ्‍बु वोतुप सुङ तिराङ ख्‍याप्‍टाक क्‍यानी कोन्‍छ्‍योककी थोङ्‍दाङला तेरी मीतिवी सेमला ङ्‍यिराङ टेङ्‍बु यिन सिरुप तेन्‍तेन किवी।
2CO 4:3 ङ्‍यिरा ख्‍याप्‍टाक क्‍यावु लेन ल्‍यामु ति बानी ज्‍याक्‍सिन ती ति ना गल्‍नी पर्च्या ख्‍येलुपतिवी थोक्‍ला तिराङ यिन।
2CO 4:4 दी जम्‍बुलिङकी ल्‍हलु यिन्‍दुप शैतानकी येशूला तेपा मिकिवु मीतिवी सेम ति क्‍योङ्‍बु जोवु तप्‍की तिवी कोन्‍छ्‍योककी जुजमला फेवु ख्रीष्‍टकी मोवा यिन्‍दुप लेन ल्‍यामुकी वोसिर सल्‍वु ति थोङ मुथुपी।
2CO 4:5 ङ्‍यिराङ रङगी कोर्ला ख्‍याप्‍टाक मिकिवी, यिने येशू ख्रीष्‍ट तिराङ चोवो यिन सिरुप ताङ ङ्‍यिराङ ति येशूकी थोक्‍ला शब्‍ज्‍यी कितुप ख्‍यिरा योक्‍पु यिन सिनी ख्‍याप्‍टाक किवी।
2CO 4:6 “नक्‍तोमीला ठछ्‍येली डोशी।” सिनी सुङ्‍गुप कोन्‍छ्‍योककी दाक्‍पी सेमला खोकी वोसिर ति ग्‍यक च्‍यिन वे। तमा ती वोसिरकी दाक्‍पुला येशू ख्रीष्‍टकी शालला वोतुप कोन्‍छ्‍योककी मोवा हाक्‍को ज्‍यिकिवी।
2CO 4:7 यिने ङ्‍यिरा ख्‍याप्‍टाक क्‍यावु खक्‍छ्‍येवु लेन ल्‍यामु ति छ्‍यकुप थली नेक्‍योक नाङ्‍ला ज्‍याङ वे। तीकी तेन्दोक ति तेरी सिनाङ ओङ्‍ज्‍येन छ्‍ये ति ङ्‍यिरा नेसुर वावु मिन, कोन्‍छ्‍योक नेमा वावु यिन सिनी छ्‍या देन्‍दुपला यिन।
2CO 4:8 ङ्‍यिराङ नरी छो ज्‍यिकर नेसुर ङ्‍यप्‍च्‍येला ख्‍येल वोसिनाङ थल्‍दुकला मागल वे। यर्मिन मर्मिन गल्‍सिनाङ यिमाछ्‍ये वे।
2CO 4:9 मीतिवी ङ्‍यिराङला छेटाङ बिन्‍सिनाङ कोन्‍छ्‍योककी ङ्‍यिराङला क्‍युर्नी माज्‍याक वे। मीतिवी ङ्‍यिराङला पोप्‍नी तला ग्‍यप्‍सिनाङ ङ्‍यिराङ येलुङ लानी वे।
2CO 4:10 येशूकी मिजी ति ङ्‍यिरा मिजीला साङ वोतुप छ्‍या देन्‍दुपला ङ्‍यिराङ ङ्‍यिमी टेङ रङगी जुला खोकी थोक्‍ला शिराङ गोसिनाङ दुक्‍पा खुर्किवी।
2CO 4:11 वुतुङ के ङ्‍यिरा दी शिनी डोप मिजीला येशूकी मिजी थोङ्‍शी सिनी ङ्‍यिराङ माशिवा सेक नरी खोकी थोक्‍ला शेपला ख्‍येल्‍गिवी।
2CO 4:12 तुक क्‍यानी ङ्‍यिरा मिजीला ति शेपकी लाका किवी, यिने ख्‍यिराङला ति सेन्‍बु वोतुप मिजीकी लाका किवी।
2CO 4:13 कोन्‍छ्‍योककी सुङला “ङे तेपा क्‍यायी, तुक क्‍यानी ङ लपिन।,” सिरुप तीला कोन्‍छ्‍योककी थु चाङ्‍मा वोतुप दोके ङ्‍यिराङला साङ ती थु चाङ्‍मा वे। तुक क्‍यानी ङ्‍यिराङ साङ कोन्‍छ्‍योकला तेपा क्‍यानी ती ताम्‍ङे लप्‍किवी।
2CO 4:14 ङ्‍यिराङला छ्‍या वे, चोवो येशूला शेप ने ङोसु लोङ्‍गुप कोन्‍छ्‍योककी ङ्‍यिराङला साङ खो ताङ मुला सेन्‍बु लोङ्‍गिवी। तमा ख्‍यिराङ ताङ ङ्‍यिराङ तेरी मुला राङ खोकी चाला टिनी फेप्‍किवी।
2CO 4:15 दी तेरी ताम्‍ङेतिवा ख्‍यिरा थोक्‍ला राङ च्‍युङ्‍गुप यिन। तुक क्‍यानी कोन्‍छ्‍योककी कटिन ति मी बङीला ङ्‍येकिवी, तमा तिवी कोन्‍छ्‍योकला थुचिछे पुल्‍नी मङ खोला मोवा किवी।
2CO 4:16 तुक क्‍यानी ङ्‍यिराङ नाम्‍साङ यिछ्‍येता मिकिवी। ङ्‍यिरा जु ति काङ कि मुथुवु गल्‍सिनाङ ङ्‍यिरा सेम ति मङ मङ रम्‍बु डोयी वे।
2CO 4:17 तन्‍दा दाक्‍पी उकुर च्‍यिक चेयी दुक्‍पा खुर्सिमा ज्‍युक्‍ला नरीकी नरी लुवु कोन्‍छ्‍योककी मोवाकी कोर्ला नासाम ताङ्‍सिन दी दुक्‍पातिवा वुतुङ के काङ साङ मिन।
2CO 4:18 तुक क्‍यानी दाक्‍पु तन्‍दा मिककी थोङ्‍गुप च्‍यालकतिवाला मिन, यिने मिककी मोथोङ्‍गुप ज्‍युककी च्‍यालकतिवाला ङ्‍यम्‍ले किवी। च्‍यिलासिसिन मिककी थोङ्‍गुप च्‍यालकतिवा चेयी पर सेक तिराङ यिन, यिने मिककी मोथोङ्‍गुप च्‍यालकतिवा ति नरीकी नरी थोक्‍ला यिन।
2CO 5:1 दाक्‍पुला छ्‍या वे, दाक्‍पी जु ति ती जम्‍बुलिङला देतुपला ग्‍यावु कुर दोके यिन। दी ति ना डिवी, यिने कोन्‍छ्‍योककी दाक्‍पुला जु सम्‍बा नङ्‍नी वे। ती ति देवाच्‍येनला नरीकी नरी देतुप खाङ्‍बा यिन। ती खाङ्‍बा ति मी लाक्‍पी जोवु मिन।
2CO 5:2 वुतुङ के दाक्‍पु दी जम्‍बुलिङला वोतुप पेला ङ्‍येन्‍बी सोक तोङ्‍गिवी, च्‍यिलासिसिन दाक्‍पु ति देवाच्‍येनकी जु सम्‍बा ङ्‍येतुपला छासे नो किवी।
2CO 5:3 तुक क्‍यासिन ते लेप्‍सिमा दाक्‍पुला जु सम्‍बा ङ्‍येनी पेर्तुङ्‍बा मुलुवी।
2CO 5:4 दाक्‍पु दी जम्‍बुलिङकी खाङ्‍बाला मिजी क्‍योङ्‍गुप पेला पप क्‍यानी ङ्‍येन्‍बी सोक तोङ्‍गिवी। ती ति जम्‍बुलिङकी जु ति क्‍युर्नी ज्‍योकुपला मिन, देवाच्‍येनकी जु ङ्‍येतुपला यिन। तुक क्‍यासिन दाक्‍पी शिनी डोप जु ति नाम्‍साङ मिशिवु जु सम्‍बाला फोकिवी।
2CO 5:5 दी तेरी दाक्‍पी थोक्‍ला टडिक क्‍या नङ्‍गुप ति कोन्‍छ्‍योक राङ यिन। ती थाक्‍छ्‍येतुपकी थोक्‍ला खोकी दाक्‍पुला थु चाङ्‍मा नङ्‍नी वे।
2CO 5:6 तुक क्‍यानी दाक्‍पु ङार क्‍यानी दी जम्‍बुलिङला जुला वोता सेक चोवो येशू ताङ मुला कुतुक देतुप यिन सिरुप ति छ्‍या वे।
2CO 5:7 चोवो येशूला दाक्‍पी मिककी माथोङ्‍सिनाङ खो दाक्‍पी मुला नरी ज्‍युकिवी।
2CO 5:8 वुतुङ के दाक्‍पु ङार क्‍यानी दाक्‍पी जु ति क्‍युर ज्‍याक्‍नी चोवो येशूकी मुला देवाच्‍येनला देतुपला छासे गा लानी वे।
2CO 5:9 तुक क्‍यानी दाक्‍पु दी जुला देसिनाङ दी जु क्‍युर ज्‍याक्‍नी देसिनाङ चोवो येशूला तिराङ गा लोङ्‍गुप नोवा वे।
2CO 5:10 च्‍यिलासिसिन दाक्‍पु रे रेला ख्रीष्‍टकी ठिम क्‍या नङ्‍गिवी। ती पेला दाक्‍पु खोकी चिप्‍ला लङ गोकिवी। तमा दाक दाक्‍पी दी जम्‍बुलिङला जुला वोतुप पेला ल्‍यामु मेलोवा काङ क्‍यावे, तुकै राङ खोकी ठिम किवी।
2CO 5:11 चोवो कोन्‍छ्‍योकला दाक्‍पी ज्‍यिवा कि गोकिवी सिरुप ति हाक्‍कोवु तप्‍की ङ्‍यिराङ मी यम्‍बाला साङ टोङ्‍गु तेर्किवी। कोन्‍छ्‍योककी ङ्‍यिराङला ल्‍यामो क्‍यानी ङो शेकिवी, तमा ख्‍यिरा दोङ्‍ला ङ्‍यिराङ चुकै वे सिरुप ति ख्‍यिरा सेमला साङ ठछ्‍येली छ्‍या वे सिरुप ति ङला रेवा वे।
2CO 5:12 ङ्‍यिरा येलुङ रङगी थोक्‍ला तिराङ तेके कितुप छलुप मिन, बोरु ख्‍यिराङला ङ्‍यिरा कोर्ला तेके कितुपला तुजे बिन वे। तुक क्‍यासिन ख तिराङ ङ राङ यिन सिनी सेम ति मेलोक्‍पा वोतुप मीतिवाला ख्‍यिरा टिलेन तेर थुप्‍किवी।
2CO 5:13 दोजो ङ्‍यिराङ ङ्‍येन्‍बु यिन्‍सिन ती ति कोन्‍छ्‍योककी थोक्‍ला राङ ङ्‍येन्‍बु वोतुप यिन, ङ्‍यिरा सेम थिला वोसिन ख्‍यिरा थोक्‍ला राङ सेम थिला वोतुप यिन।
2CO 5:14 ङ्‍यिराङ याङ ख्रीष्‍टकी ङ्‍यिङ्‍ज्‍येकी ओङला राङ वे। तुक क्‍यानी ङ्‍यिराङ दी ताम्‍ङे ति तेन्‍तेन वोतुप हाक्‍कोकिवी। मी तेरीकी दिक्‍पी थोक्‍ला ख्रीष्‍ट टुङ्‍सुङ। ती तप्‍की मी तेरी खोकी मुला राङ शेप यिन।
2CO 5:15 खो दाक्‍पु तेरीकी थोक्‍ला टुङ्‍सुङ। तुक क्‍यानी सेन्‍बु लुवुतिवी रङगी थोक्‍ला तिराङ मिन, तेरीकी थोक्‍ला टुङ्‍नी ङोसु लङ्‍गुप खोकी थोक्‍ला मिजी क्‍योङ गोकिवी।
2CO 5:16 तफेन्‍ला ङ्‍यिराङ सुला साङ जम्‍बुलिङकी मीतिवी मीला ल्‍हावु दोके क्‍यानी मल्‍हावी। थेङ्‍मा यी ङ्‍यिरा साङ ख्रीष्‍टला तुक राङ क्‍यानी ल्‍हावु यिन, यिने त याङ तुक क्‍यानी मल्‍हावी।
2CO 5:17 तुक क्‍यानी सी ख्रीष्‍टला तेपा क्‍यावे, ती ति मिजी सम्‍बा फोवु यिन। गोमी मिजी ति तोर्नी गाल्‍सुङ। ल्‍होसा, त याङ मिजी सम्‍बा च्‍युङ वे।
2CO 5:18 दी तेरी क्‍या नङ्‍गुप ति कोन्‍छ्‍योक राङ यिन। खोकी दाक्‍पुला ख्रीष्‍ट नेसुर खो ताङ मुला तम्‍जी ल्‍यामु जो नाङ्‍सुङ। तमा यम्‍बातिवाला साङ खोकी मुला तम्‍जी ल्‍यामु जोप लाका ति ङ्‍यिराङला नाङ्‍सुङ।
2CO 5:19 तीकी तेन्‍दोक ति येशू ख्रीष्‍ट नेसुर राङ कोन्‍छ्‍योककी तेरी मीतिवाला येलुङ खोकी मुला तम्‍जी ल्‍यामु जोवु यिन। तमा मीतिवी क्‍यावु दुक्‍चे क्‍येनकी लाकातिवाला खोकी काङ साङ छ्‍येर्पा माबिन्‍नी खोरे मुला तम्‍जी ल्‍यामु जोपला ख्‍याप्‍टाक कितुप लाका ति ङ्‍यिराङला चेक तेन नाङ्‍सुङ।
2CO 5:20 तुक क्‍यानी कोन्‍छ्‍योककी ङ्‍यिराङला ख्रीष्‍टकी थोक्‍ला ख्‍याप्‍टाक कितुपला तङ्‍गुप यिन। ङ्‍यिरा ख्‍याप्‍टाक क्‍यावु सुङ ङ्‍येन सिनी खोकी ख्‍यिराङला ठाकुरे सिनी सुङ्‍गिवी। ङ्‍यिराङ ख्रीष्‍टकी छ्‍योक नेसुर ख्‍यिराङला सिरिन, ख्‍यिराङ कोन्‍छ्‍योककी मुला तम्‍जी ल्‍यामु जो।
2CO 5:21 ख्रीष्‍टला दिक्‍पा मे, यिन्‍सिनाङ कोन्‍छ्‍योककी दाक्‍पी क्‍यावु दिक्‍पी थोक्‍ला खोला पर्च्या नाङ्‍सुङ। तुक क्‍यानी ख्रीष्‍ट नेसुर दाक्‍पु ति खोकी थोङ्‍दाङला टेङ्‍बु च्‍युङ्‍सुङ।
2CO 6:1 ङ्‍यिरा कोन्‍छ्‍योककी थोक्‍ला मुला राङ लाका क्‍यावु तप्‍की ख्‍यिराङला ठाकुरे सिरिन, खोकी ख्‍यिराङला नङ्‍गुप कटिन ति तेर्मेला डो माज्‍यी।
2CO 6:2 खोकी सुङला “ख्‍युरुङला ङे कटिन गोवु पेला ख्‍योरो ङला रेन्‍दुप ति ङे थोसुङ। तमा थरुप तुजेला ङे ख्‍युरुङला दाल्‍जा किटे क्‍यायी।” सिनी सुङ्‍सुङ। ल्‍होसा, ती कोन्‍छ्‍योककी कटिन ङ्‍येतुप तुजे ताङ दिक्‍पा ने थरुप ङ्‍यिमा ति तन्‍दा राङ यिनो।
2CO 6:3 ङ्‍यिरा क्‍यावु लाकाला सी साङ क्‍येन माग्‍यक्‍शी सिनी ङ्‍यिराङ सुला साङ येशूला तेपा कितुप थोक्‍ला नर्तुक ग्‍यकुप लाका मिकिवी।
2CO 6:4 बोरु चुका लाका कितुप पेला साङ ङ्‍यिराङ ति कोन्‍छ्‍योकला शब्‍ज्‍यी कितुप मीतिवा यिन्‍दुप छ्‍या देन्‍दुपला छेटाङला ख्‍येल्‍सिनाङ, दुक्‍पाला ख्‍येल्‍सिनाङ, कले ख्‍येल्‍सिनाङ,
2CO 6:5 मीतिवी दुसिनाङ, चोन्‍खाङला उप्‍सिनाङ, मीतिवा ङ्‍यिरा तेन्‍दोकला लानी हराङ हुरुङ क्‍यासिनाङ, छासे लाका हुर्ताक कि गोसिनाङ, ङ्‍यिलोकुप माङ्‍येसिनाङ, ल्‍होतुङ्‍बा दे गोसिनाङ,
2CO 6:6 ङ्‍यिराङ टेङ्‍बु ताङ कोन्‍छ्‍योककी नङ्‍गुप रिक्‍पा ताङ हम क्‍या देतुप ताङ च्‍यम्‍बा ताङ कोन्‍छ्‍योककी थु चाङ्‍मा नेमा वावु ओङ ताङ ङ्‍यिङ्‍ज्‍ये टेङ्‍बु ताङ
2CO 6:7 सुङ टेङ्‍बु तेरुप ताङ कोन्‍छ्‍योककी नङ्‍गुप ङारला ती लाका तेरी किवी। सु ताङ मुला थमु ग्‍यक गोसिनाङ ङ्‍यिरा टेङ्‍बु वोतुप लक्‍च्‍ये थ्‍वोनी
2CO 6:8 मीतिवी ङ्‍यिराङला ताङ्‍देन क्‍यासिनाङ माक्‍यासिनाङ, ताम्‍ङे ल्‍यामु क्‍यासिनाङ मेलोक्‍पा क्‍यासिनाङ ङ्‍यिराङ ती लाका तेरी किवी। ङ्‍यिराङ ति मीला केन्‍दुप मी दोके च्‍युङ्‍गिवी, यिन्‍सिनाङ ङ्‍यिराङ टेङ्‍बु वे।
2CO 6:9 ङ्‍यिराङ ति ङो मेशेवु दोके वोसिनाङ मी तेरीकी ङो शेवु च्‍युङ वे। शितु छ्‍येनी वोसिनाङ सेन्‍बु लुनी वे। छ्‍येर्पा खुर्सिनाङ माशी वे।
2CO 6:10 सेम्‍दुक लासिनाङ नरी गा लानी वे। पेराङ्‍बु वोसिनाङ मी बङीला छ्‍युक्‍पु जो थुपुप वे। काङ मेतुप दोके वोसिनाङ तेरी वोतुप दोके वे।
2CO 6:11 कोरिन्‍थला वोतुप अच्‍युनुपतिवा, ङ्‍यिरा ख्‍यिराङला दी ताम्‍ङे ति वुतुङ के टेङ्‍बु सिक्‍यावु यिन। ङ्‍यिराङ ख्‍यिराङला सेमगी दिङ नेज्‍युनी ङ्‍यिङ्‍ज्‍ये किवी।
2CO 6:12 ङ्‍यिरा ख्‍यिराङला ङ्‍यिङ्‍ज्‍ये कितुप क्‍युर्नी माज्‍याक वे, बोरु ख्‍यिरा के ङ्‍यिराङला ङ्‍यिङ्‍ज्‍ये अला मिकिनोक।
2CO 6:13 त ङ ख्‍यिराङला ङरा पेजातिवाला सिक्‍यावु दोके क्‍यानी सिरिन, ङ्‍यिरा ख्‍यिराङला ङ्‍यिङ्‍ज्‍ये क्‍यावु दोके ख्‍यिरा साङ ङ्‍यिराङला ङ्‍यिङ्‍ज्‍ये की।
2CO 6:14 येशूला तेपा मिकिवु मीतिवी दला शुनी तिवी मुला राङ लाका माकी। कोन्‍छ्‍योककी थोङ्‍दाङला टेङ्‍बु वोतुपतिवा ताङ दिक्‍पाकी ओङला युकुप मीतिवा चुक क्‍यानी तम्‍जी ल्‍यामु वुङ थुप्‍किवी रो? याङ्‍ना नक्‍तोमीकी मुला ठछ्‍येली ति चुक क्‍यानी डिक्‍जोम किवी रो?
2CO 6:15 काङ ख्रीष्‍ट ताङ शैतान साङ थिन थुप्‍किवी रो? याङ्‍ना तेपा कितुपतिवा ताङ तेपा मिकिवुतिवा च्‍यिक्‍पा राङ यिन रो?
2CO 6:16 कोन्‍छ्‍योककी थु चाङ्‍मा ज्‍युवु ल्‍हङाङ ताङ कुतिवी ति काङ तम्‍जी वे रो? च्‍यिलासिसिन दाक्‍पु ति ङोसु वोतुप कोन्‍छ्‍योककी थु चाङ्‍मा ज्‍युवु ल्‍हङाङ यिन। ती तप्‍की कोन्‍छ्‍योककी सुङला साङ दुक सिनी टि वे, “ङ तिवी मिजीला देतिन, तमा तिवी पर्ला फार छुर कितिन। तमा ङ तिवी कोन्‍छ्‍योक यिन, तिवा ति ङे मीतिवा यिन।”
2CO 6:17 येलुङ चोवो कोन्‍छ्‍योककी सुङ्‍गिवी, “ती तप्‍की ती दुक्‍टा कितुप मीतिवा नेसुर थेन्‍नी शोक। तमा तिवा नेसुर कुतुक दे। मेचेङ्‍गा वोतुप च्‍यालकतिवा काङ साङ थो मातोङ। तुक क्‍यासिन ङ ख्‍यिराङला सेमला लङ्‍यिन।”
2CO 6:18 “तमा ङ ख्‍यिरा पपा यिनो, ख्‍यिराङ ति ङे पुज्‍युङपुमतिवा यिनो। सिनी चोछ्‍ये वोतुप चोवो कोन्‍छ्‍योककी सुङ्‍गिवी।”
2CO 7:1 तुक क्‍यानी ङे ङ्‍यिङ्‍ज्‍येवु अच्‍युनुपतिवा, कोन्‍छ्‍योककी दाक्‍पुला ती ताम्‍ङेतिवा थाक्‍छ्‍येन नङ्‍गुप तप्‍की दाक्‍पी जु ताङ सेम मेचेङ्‍गा जोप तेरी परकी ताम्‍ङे मेटेङ्‍बु नेसुर कुतुक देतुप। तमा कोन्‍छ्‍योकला ताङ्‍देन क्‍यानी वुतुङ के चाङ्‍मा वोतुप मिजी क्‍योङ्‍गुप।
2CO 7:2 ख्‍यिरा ङ्‍यिराङला ङ्‍यिङ्‍ज्‍ये क्‍यानी सेमला लो। ङ्‍यिरा सुला साङ मेलोवा माक्‍या वे, तमा सुला साङ दुक्‍पा माबिन वे। ङ्‍यिरा सी लो नेसुर साङ ख्‍येप्‍साङ माला वे।
2CO 7:3 ङे ख्‍यिराङला क्‍येन तेरुपला दी ताम्‍ङे सिक्‍यावु मिन। गोमाला साङ ङे सिक्‍यायी, ङ्‍यिरा सेमला ख्‍यिराङ राङ वे। ङ्‍यिराङ शिसिनाङ सेन्‍बु वोसिनाङ ख्‍यिरा मुला नरी तम्‍जी लुकिवी।
2CO 7:4 ङ ख्‍यिराङला छासे लो तेन्‍गिवी। ङ ख्‍यिरा थोक्‍ला छासे तेके कितिन। ख्‍यिराङ नेसुर ङला मङ टोङ्‍गु ङ्‍येन वे। ङला चो छेटाङ ख्‍येल्‍सिनाङ सेमला छासे गा लानी वे।
2CO 7:5 ङ्‍यिराङ माकेडोनियाला लेपुप पेला ङ्‍यिराङला उ तोङ्‍गुप साङ माङ्‍ये, यिने छो ज्‍यिकर नेसुर छेटाङ ख्‍येल्‍नी लेसुङ। तमा पङगी मीतिवी ङ्‍यिराङला नरी थमु ग्‍यकुप ताङ सेमला ति ङ्‍यिराङला ज्‍यिवा लासुङ।
2CO 7:6 यिन्‍सिनाङ तीतस ङ्‍यिरा ते वासिमा यिछ्‍येतुप मीतिवाला टोङ्‍गु नङ्‍गुप कोन्‍छ्‍योककी ङ्‍यिराङला टोङ्‍गु नाङ्‍सुङ।
2CO 7:7 तीतस वासिमा तिराङ मिन, तीकी ख्‍यिरा नेसुर ङ्‍येतुप टोङ्‍गुकी कोर्ला लेन खुन वासिमा ङला टोङ्‍गु ङ्‍येसुङ। ख्‍यिरा ङला छासे ठेतुप नो क्‍यावु ताङ ख्‍यिरा गोमाला ङला मेलोवा क्‍यावु यिन सिनी ङे थोक्‍ला पप क्‍यावु ताङ छासे क्‍यानी ङे छ्‍योला लावु ति तीकी तेरी ङला सिक्‍यासुङ। तुक क्‍यानी ङला मङ सेमला गा लासुङ।
2CO 7:8 ङे ख्‍यिराङला यिकी टिन तङ्‍नी ख्‍यिराङला सेम्‍दुक लासिनाङ तीकी कोर्ला ङे लाका मेलोवा क्‍यायिन सिनी नासाम मोतोङ, च्‍यिलासिसिन ती यिकीकी चेयी पर सेक तिराङ ख्‍यिराङला सेम ना च्‍यिनी वे सिरुप ति ङला छ्‍या वे।
2CO 7:9 त याङ ङ गा लावे, ती ति ख्‍यिराङला पप लानोक सिनी मिन, यिने ती पपकी राङ ख्‍यिराङला सेम ग्‍युरुप जोवु तप्‍की यिन। ख्‍यिरा कोन्‍छ्‍योककी नोवा काङ यिन सिनी नासाम तङ्‍नी रङगी क्‍यावु लाकाला पप क्‍यावु तप्‍की ङ्‍यिरा नेसुर ख्‍यिराङला काङ साङ मेलोवा माच्‍युङ्‍सुङ।
2CO 7:10 च्‍यिलासिसिन कोन्‍छ्‍योकला नासाम तङ्‍नी पप क्‍यानी सेम ग्‍युर्सिन दिक्‍पा ने थर्वा ङ्‍येकिवी। तुक क्‍यासिन ङे लाका मेलोवा क्‍यायिन सिनी नासाम तोङ मोगोवी। यिने जम्‍बुलिङकी थोक्‍ला नासाम तङ्‍नी पप कितुप ति शेप ते क्‍योल्‍गिवी।
2CO 7:11 तुक क्‍यानी ल्हो ताङ, कोन्‍छ्‍योककी थोक्‍ला पप क्‍यासिमा ख्‍यिराङला काङ च्‍युङ्‍सुङ, ती ति नासाम तोङ। ख्‍यिराङ काङ लाका क्‍यासिनाङ छासे ङ्‍यम्‍ले क्‍यानी किवी, खुरुङ क्‍येन मेतुप च्‍युङ्‍गुपला ख्‍यिराङ टेमु किवी, तमा मेटेङ्‍बुकी थोक्‍ला चो ङ्‍यिर्मु किवी, काङ कितुप चुक कितुप सिनी ज्‍यिवा किवी, ङला ठेतुपला छासे नो किवी, चुका ङाडेङ नोक, तमा ख्‍यिरा पर्ला दिक्‍पा कितुप मीला पर्च्या फोक्‍शी सिनी चो नोकिवी। ती तेरी ताम्‍ङे नेसुर ख्‍यिराङ ति दिक्‍पा मेतुप यिन सिरुप छ्‍या तेन्‍सुङ।
2CO 7:12 तुक क्‍यानी ङे ती यिकी टिवु ति लाका मेलोवा कितुप मी थोक्‍ला मिन, याङ्‍ना मी यम्‍बी खुरुङला लाका मेलोवा क्‍यानी सेम्‍दुक वोतुप मी थोक्‍ला साङ मिन। यिने कोन्‍छ्‍योककी थोङ्‍दाङला ङ्‍यिराङला ख्‍यिरा चो टेन्‍दा किनोक सिरुप ति छ्‍या देन्‍दुपला टिवु यिन।
2CO 7:13 ती तेरी हाक्‍कोसिमा ङ्‍यिराङला छासे टोङ्‍गु ङ्‍येसुङ। तोजो तिराङ मिन, ख्‍यिराङ तेरीकी तीतसला गासो शुनी तीकी सेमला लोदिमु जोवु तप्‍की ङ्‍यिराङला मङ छासे गा लाङ्‍सुङ।
2CO 7:14 तीतस ख्‍यिरा चाला डोप सिनाङ गोमाला ङे तीला ख्‍यिरा थोक्‍ला छासे तेके क्‍यायिन। तमा ख्‍यिरा ङला यिछ्‍येता माजो वे। ङ्‍यिरा ख्‍यिराङला नरी ताम्‍ङे टेङ्‍बु लापिन। तुक क्‍यानी तीतसकी मुला ङ्‍यिरा ख्‍यिरा थोक्‍ला तेके क्‍यावु ति टेङ्‍बु वोतुप हाक्‍कोसुङ।
2CO 7:15 ख्‍यिराङ तेरीकी तीतसकी खला ङ्‍येन्‍दुप ताङ तीला ज्‍यिवा खुरुप ताङ ताङ्‍देन क्‍यानी गासो शुवु ति नासाम शर्नी तीतसकी ख्‍यिराङला मङ छासे ङ्‍यिङ्‍ज्‍ये क्‍यासुङ।
2CO 7:16 तमा ङे ख्‍यिराङला छासे लो तेन्‍दुप तप्‍की ङला गा लानी वे।
2CO 8:1 अच्‍युनुपतिवा, माकेडोनिया लुङ्‍बाला वोतुप चर्चतिवाला कोन्‍छ्‍योककी कटिन नङ्‍गुप कोर्ला ङ्‍यिराङ ख्‍यिराङला सिरिन।
2CO 8:2 तिवा चो खोक्‍पा ल्‍हाप दुक्‍पातिवाला ख्‍येल्‍सिनाङ छासे सेम गा कितुप ताङ माङ्‍शोक मीतिवा पेराङ्‍बु वोसिनाङ दुक्‍पाला ख्‍येलुप मीतिवाला सेम्‍बा सेमगी दाल्‍जा किटे क्‍यासुङ।
2CO 8:3 ङ ख्‍यिराङला पङ्‍बु तेरिन, तिवी खोप्‍रे तेर थुपुप सिनाङ मङ ल्‍हक्‍पा सेम्‍बा सेमगी दाल्‍जा किटे क्‍यासुङ।
2CO 8:4 तोजो तिराङ मिन, यरूशलेमला वोतुप कोन्‍छ्‍योककी चाङ्‍मा वोतुप मीतिवी थोक्‍ला टङ्‍गा बुल्‍वा कल ताङ्‍नी मुला राङ दाल्‍जा कितुप ङ्‍येशी सिनी तिवी ङ्‍यिराङला गोङ्‍बा शुसुङ।
2CO 8:5 तमा तिवी ङ्‍यिरा नासाम तङ्‍गुप सिनाङ मङ ल्‍हक्‍पा लाका क्‍यासुङ। तिवी गोमाला खोप्‍रे मिजी ति कोन्‍छ्‍योककी थोक्‍ला पुल्‍सुङ, तमा ती ज्‍युक्‍ला कोन्‍छ्‍योककी नोवाला वोतुप दोके क्‍यानी ङ्‍यिरा थोक्‍ला साङ खोप्‍रे मिजी ति चेक तेसुङ।
2CO 8:6 तुक क्‍यानी तीतसकी गोमा नेज्‍युनी सेम्‍बा सेमगी दाल्‍जा कितुप लाका ति गो चुवु तप्‍की ती कटिनकी लाका ति ख्‍यिरा पर्ला सिन्‍दा कितुपला दाल्‍जा किटे किशी सिनी ङ्‍यिरा तीला टोङ्‍गु बिनिन।
2CO 8:7 ख्‍यिरा ती तेरी ताम्‍ङेला मङ ल्‍यामु क्‍या वे। ख्‍यिराङ तेपा कितुप ताङ येन्‍देन तेरुप ताङ रिक्‍पा वोतुप ताङ मी यम्‍बाला दाल्‍जा कितुपला ङ्‍यम्‍ले कितुप ताङ ङ्‍यिराङला ङ्‍यिङ्‍ज्‍ये कितुपला साङ तुक राङ क्‍यानी लाका ल्‍यामु क्‍या वे। तुक क्‍यानी ख्‍यिरा सेम्‍बा सेमगी दाल्‍जा कितुप लाकाला साङ मङ ल्‍यामु किशी सिरुप ति ङ्‍यिरा नोवा वे।
2CO 8:8 दी ताम्‍ङे ति ङे ख्‍यिराङला क तेरुपला सिक्‍यावु मिन। यिने मी यम्‍बी सेम्‍बा सेमगी दाल्‍जा कितुप लाकाला चो ङ्‍यम्‍ले क्‍यासुङ ती ति ख्‍यिराङला सिक्‍यानी ख्‍यिरा ङ्‍यिङ्‍ज्‍ये क्‍यावु ति टेङ्‍बु यिनोक मिनोक हाक्‍कोवुला सिक्‍यावु यिन।
2CO 8:9 दाक्‍पी चोवो येशू ख्रीष्‍टकी कटिन ति ख्‍यिराङला छ्‍या राङ वे। खो छ्‍युक्‍पु वे, यिन्‍सिनाङ ख्‍यिरा थोक्‍ला खो पेराङ्‍बु दोके च्‍युङ्‍सुङ। तीकी तेन्‍दोक ति खो पेराङ्‍बु च्‍युङ्‍गुप नेसुर ख्‍यिराङला छ्‍युक्‍पु च्‍युङ्‍शी सिनी यिन।
2CO 8:10 तमा दीकी कोर्ला ङ ख्‍यिराङला टोङ्‍गु तेरिन। लो खोर्मा यी गोमाला ख्‍यिरा सेम्‍बा सेमगी दाल्‍जा कितुप लाका ति गो चुसुङ। यिन्‍सिनाङ ती तेरी मासिन्‍नी सिन्‍दा कितुप ति ख्‍यिरा नो क्‍या वे।
2CO 8:11 त याङ ख्‍यिरा नो क्‍यावु लाका ति तेरी सिन्‍दा किसा। ख्‍यिरा तेर थुपा सेक बिन्‍नी ती लाका क्‍या सिन्‍सिमा गोमाला गो जुवु पेला ख्‍यिरा मुला वोतुप ङ्‍यिङ्‍ज्‍ये ति छ्‍या तेन।
2CO 8:12 ख्‍यिराङला तेरुप सेम वोसिन ख्‍यिरा लोला चो नोके, ती बिन्‍दुप ति कोन्‍छ्‍योक गा किवी, यिने ख्‍यिरा लोला मेतुप ति खोकी मोछोल्‍वी।
2CO 8:13 दी ताम्‍ङे ति ख्‍यिराङला कले वुङ्‍शी, तमा यम्‍बाला ति जोल्‍हमु वुङ्‍शी सिनी ङे सिक्‍यावु मिन। यिने तेरीला च्‍यिक्‍पा राङ वुङ्‍शी सिनी सिक्‍यावु यिन।
2CO 8:14 तसाम ख्‍यिरा मुला बङी वोतुप पेला ती नेसुर मेतुपतिवाला तेरुप ति छासे ल्‍यामु यिन। तुक क्‍यासिन ज्‍युक्‍ला तिवाला बङी वोतुप पेला ख्‍यिराङला गोवु ति तिवी दाल्‍जा किवी। तमा तेरीला च्‍यिक्‍पा राङ च्‍युङ्‍गिवी।
2CO 8:15 कोन्‍छ्‍योककी सुङला साङ “बङी रुकुपतिवी मुला अला बङी मुलुवी, तमा ङ्‍युङ्‍मु रुकुपतिवाला साङ अला ङ्‍युङ्‍मु मोडोयी।” सिनी टि वे।
2CO 8:16 कोन्‍छ्‍योककी तीतसकी सेमला ङे दोके क्‍यानी ख्‍यिरा थोक्‍ला ल्‍हटे कितुप सेम नाङ्‍सुङ। तुक क्‍यानी ङ खोला थुचिछे बुलिन।
2CO 8:17 च्‍यिलासिसिन ख्‍यिरा ते ग्‍युक सिनी ङ्‍यिरा गोङ्‍बा शुवु ताम्‍ङेला तीकी ङ्‍येन्‍दुप तिराङ मिन, खुरुङ साङ छासे गा क्‍यानी खोरो नोवाकी राङ ख्‍यिरा ते गलुप यिनो।
2CO 8:18 तीकी मुला राङ नुप मिरा च्‍यिक साङ तोङ्‍यिन वोतो। ती ति लेन ल्‍यामु ख्‍याप्‍टाक कितुपला तेरी चर्चतिवी पर्ला छासे मिङ फेलुप मी यिनो।
2CO 8:19 तोजो तिराङ मिन, दुवु बुल्‍वा खुर्नी यरूशलेमला डोप पेला ङ्‍यिरा मुला राङ युक डोप सिनी ती नुप तीला चर्चतिवी पेतुप यिनो। ती बुल्‍वा खुरुप लाका ति चोवोला मोवा कितुप ताङ ङ्‍यिरा यम्‍बाला दाल्‍जा कितुप छासे नोवा वोतुप ति छ्‍या देन्‍दुपला यिन।
2CO 8:20 मी सेमगी दिङ नेज्‍युनी पुलुप दी बुल्‍वा ति दुतुप ताङ गोतुपला गोमा कितुप कोर्ला ङ्‍यिराङला सी साङ क्‍येन माग्‍यक्‍शी सिनी ङ्‍यिराङ च्‍याङ्‍से देनी वे।
2CO 8:21 च्‍यिलासिसिन ङ्‍यिराङ चोवोकी थोङ्‍दाङला तिराङ मिन, मी थोङ्‍दाङला साङ चुका ति टेङ्‍बु नोके ती राङ कितुपला ङ्‍यम्‍ले किवी।
2CO 8:22 तीतसकी मुला यम्‍बा नुप मिरा च्‍यिक साङ ङ्‍यिरा ख्‍यिरा ते तोङ्‍यिन वोतो। तीला ङ्‍यिरा थेङ्‍मा अलायी सेक तिन्‍नी ल्‍हासिमा छासे ङर्मा क्‍यानी दाल्‍जा कितुप थोङ्‍सुङ। तीकी ख्‍यिराङला छासे लो तेन्‍दुप तप्‍की मङ ङार छ्‍येवु गल वे।
2CO 8:23 तीतस ति ख्‍यिरा थोक्‍ला ङे मुला राङ लाका कितुप दाल्‍जा यिन। यम्‍बा नुपतिवा ति चर्चतिवी शब्‍ज्‍यी कितुपला पेतुप मीतिवा यिन। तिवा ख्रीष्‍टकी थोङ्‍दाङला ताङ्‍देन वोतुप मीतिवा यिन।
2CO 8:24 तुक क्‍यानी ख्‍यिरा तिवाला ङ्‍यिङ्‍ज्‍ये क्‍यानी पङ्‍बु छ्‍या तेन। तुक क्‍यासिन ङ्‍यिरा च्‍यिला ख्‍यिरा कोर्ला तेके क्‍यानोक सिरुप ति चर्चतिवी साङ हाक्‍को थुप्‍शी।
2CO 9:1 यरूशलेमला वोतुप तेपा कितुपतिवी थोक्‍ला दाल्‍जा किटे क्‍यावु बुल्‍वाकी कोर्ला याङ ख्‍यिराङला ङे यिकी टिक मोगोवी।
2CO 9:2 च्‍यिलासिसिन ख्‍यिराङ दाल्‍जा किटे कितुपला छासे सेम वे सिरुप ति ङला छ्‍या वे। तीकी कोर्ला माकेडोनियाकी तेपा कितुप मीतिवी चिप्‍ला “ननिङगी लो नेज्‍युनी ख्‍यिराङ अखैयाकी मीतिवी बुल्‍वा तेरुपला टडिक क्‍या वे।” सिनी ङे तेके क्‍यानी सिक्‍या वे। ख्‍यिरा सेमला छासे दाल्‍जा किटे कितुप नो वोतुप तप्‍की तिवी पर्ला मी बङीकी सेमला ङाडेङ ङ्‍येनी वे।
2CO 9:3 यिने नुपतिवाला ङे ख्‍यिरा ते तङ्‍गुप तेन्‍दोक ति ङ्‍यिरा ख्‍यिरा थोक्‍ला तेके क्‍यावु ति तेर्मेला मोडोशी, तमा ङे सिक्‍यावु दोके ख्‍यिराङ टडिक क्‍यानी देशी सिनी यिन।
2CO 9:4 दोजो ललाइ माकेडोनियाकी तेपा कितुप मीतिवा ङ ताङ मुला ख्‍यिरा ते वुङ्‍गुप पेला ख्‍यिराङ बुल्‍वा दुतुप टडिक मेतुप हाक्‍कोसिन ख्‍यिराङ ङोछाला ख्‍येल्‍गितो, ङ्‍यिराङ साङ ङोशी मारेला ख्‍येल्‍गितो। च्‍यिलासिसिन ङ्‍यिरा ख्‍यिराङला छासे रेवा ग्‍येर्पु क्‍या वे।
2CO 9:5 तुक क्‍यानी ख्‍यिरा तेर्सा क्‍यानी थाक्‍छ्‍येतुप बुल्‍वा ति गोमाला के च्‍योम च्‍योम कि ज्‍यितुपला ङ सिनाङ गोमाला राङ ती नुपतिवाला ख्‍यिरा ते तोङ्‍गुप ल्‍यामु यिन सिरुप ङला नासाम शार्सुङ। तुक क्‍यासिन ती बुल्‍वा ति करखापकी दुवु मिन्‍दाला सेम्‍बा सेमगी पुलुप बुल्‍वा च्‍युङि्‍गवी।
2CO 9:6 दी ताम्‍ङे ति टोक माज्‍येता, “सेन चेयी राङ देपुप तीकी डुप्‍सेन साङ चेयी राङ रुकिवी, यिने सेन बङी देपुप तीकी डुप्‍सेन साङ बङी रुकिवी।”
2CO 9:7 चुका मी तीकी साङ खोरो सेम्‍बा सेमगी बिन। तेरुप सेम मेता क्‍यानी मिन, याङ्‍ना करखापला ख्‍येल्‍नी साङ मिन। च्‍यिलासिसिन सेम गा क्‍यानी तेरुप तीला कोन्‍छ्‍योककी ङ्‍यिङ्‍ज्‍ये किवी।
2CO 9:8 कोन्‍छ्‍योककी ख्‍यिराङला तेरी मोलाम ति छासे क्‍यानी नङ्‍गिवी। तुक क्‍यानी ख्‍यिराङला तेरी गोवु च्‍यालकतिवा छासे क्‍यानी च्‍युङ्‍नी गोवु सिनाङ मङ छाछिङी डिवी, तमा ख्‍यिरा मी यम्‍बाला ल्‍यामु कितुपला तेर थुप्‍किवी।
2CO 9:9 ती तप्‍की कोन्‍छ्‍योककी सुङला साङ दुक सिनी टि वे, “सी पेराङ्‍बु वोतुपतिवाला तेर्किवे, तीकी क्‍यावु च्‍यम्‍बा ति मीतिवी नरीकी नरी टेन्‍गिवी।”
2CO 9:10 देपुपतिवाला सेन ताङ सापला समा नङ्‍गुप कोन्‍छ्‍योककी ख्‍यिराङला गोवु तेरी सेन नङ्‍गिवी, तमा तीला फेल ज्‍यिकिवी। तुक क्‍यासिन ख्‍यिरा मीतिवाला मङ दाल्‍जा किटे कि थुप्‍किवी।
2CO 9:11 तमा कोन्‍छ्‍योककी ख्‍यिराङला काङ क्‍यासिनाङ तेरी ताम्‍ङेला मोलाम नङ्‍गिवी, तुक क्‍यासिन ख्‍यिरा नरी सेम्‍बा सेमगी बुल्‍वा तेर थुप्‍किवी। तमा दाक्‍पी ती बुल्‍वा ति गोवु मीतिवाला तेरुप पेला तिवी कोन्‍छ्‍योकला थुचिछे बुल्‍गिवी।
2CO 9:12 ती ख्‍यिरा बिन्‍दुप बुल्‍वा तीकी यरूशलेमला वोतुप कोन्‍छ्‍योककी पुज्‍युङपुमतिवी कतुकार क्‍योङ्‍गिवी। तोजो तिराङ मिन, तिवा बङीकी कोन्‍छ्‍योकला मङ थुचिछे बुल्‍गिवी।
2CO 9:13 ख्‍यिरा तिवी थोक्‍ला बुल्‍वा बिन्‍नी ख्रीष्‍टकी लेन ल्‍यामुला वोतुप सुङला युसुङ, तमा ख्‍यिरा सेम पेनी कोन्‍छ्‍योकला तेपा कितुप मीतिवा ताङ मी बङीकी थोक्‍ला दाल्‍जा किटे क्‍यानी पङ्‍बु छ्‍या तेन्‍दुप तप्‍की मीतिवी कोन्‍छ्‍योकला मोवा किवी।
2CO 9:14 तन्‍दा कोन्‍छ्‍योककी ख्‍यिराङला छासे कटिन नङ्‍गुप तप्‍की तिवी ख्‍यिराङला ङ्‍यिङ्‍ज्‍ये क्‍यानी ख्‍यिरा थोक्‍ला मोपोर किवी।
2CO 9:15 कोन्‍छ्‍योककी नङ्‍गुप ग्‍यक्‍चेकी ङ्‍येम्‍बाकी थोक्‍ला खोला थुचिछे।
2CO 10:1 ङ ख्‍यिरा चिप्‍ला वोतुप पेला ज्‍यिवा क्‍यानी ताम्‍ङे कि मुथुपी, यिने थाक्‍रिङ्‍बु वोतुप पेला ति ख्‍यिरा थोक्‍ला ङाडेङ क्‍यानी ताम्‍ङे किवी सिनी ख्‍यिरा ङला सिवी। ङ पावल ति ख्रीष्‍टकी दोके कुसु ज्‍यम्‍बु ताङ च्‍यम्‍बा क्‍यानी ख्‍यिराङला ठाकुरे सिरिन।
2CO 10:2 ङ ख्‍यिरा ते वुङ्‍गुप पेला ङ्‍यिराङ ति जम्‍बुलिङकी मीतिवी दोके किताङ नालु किनोक सिनी सिरुप मीतिवाला छासे ङाडेङ क्‍यानी ताम्‍ङे किवी। ती पेला ख्‍यिराङला साङ तिवाला दोके क्‍यानी ङाडेङ क्‍यानी सि मोगोशिता।
2CO 10:3 ङ्‍यिराङ दी जम्‍बुलिङला देकिवी, यिने जम्‍बुलिङकी मीतिवी दोके खोरो तेन्‍दोकला लङ्‍गुप मीतिवी मुला थमु मग्‍यकिवी।
2CO 10:4 ङ्‍यिरा थमु ग्‍यकुप लक्‍च्‍येतिवा ति दी जम्‍बुलिङकी दोके मिन, यिने कोन्‍छ्‍योककी ङार यिन। तीकी कोन्‍छ्‍योककी तेन्‍दोकला लङ्‍गुप दुक्‍टाकी ओङ्‍ज्‍येनतिवा तेरी ना तोङ्‍गिवी, तमा तेन्‍दोक मेतुप खाँदा लोङ्‍गुप ताम्‍ङेतिवा साङ ना तोङ्‍गिवी।
2CO 10:5 तमा ङ्‍यिराङ कोन्‍छ्‍योककी रिक्‍पाकी तेन्‍दोकला लङ्‍गुप ङ राङ यिन सिरुप ताम्‍ङेतिवा तेरी ना तोङ्‍गिवी। तमा ती तेरी नोवातिवाला खोकी ओङला ज्‍याक्‍नी ख्रीष्‍टकी कला ङ्‍येन्‍दुप जेवी।
2CO 10:6 ख्‍यिरा ख्रीष्‍टकी कतिवा तेरी ङ्‍येन्‍दुप छे सिन्‍सिमा खोकी कला मेङ्‍येन्‍दुपतिवा तेरीला ङ्‍यिराङ ठिम कितुपला टडिक क्‍यानी देतिनो।
2CO 10:7 ख्‍यिराङ मीला ल्‍हाप पेला फिला तिराङ ल्‍हेवी। दोजो ललाइकी ङ ख्रीष्‍टकी मी यिन सिवी सिसिन, तीकी ख्रीष्‍टकी मी यिन्‍दुप दोके ङ्‍यिराङ साङ ख्रीष्‍टकी मी राङ यिन सिनी नासाम तोङ्‍शी।
2CO 10:8 च्‍यिलासिसिन चोवो येशूकी ङ्‍यिराङला चो ओङ्‍ज्‍येन नङ वे, तीकी कोर्ला ङे ल्‍हक्‍पा तेके क्‍यासिनाङ ङ तीकी थोक्‍ला ङोछा मिकी। ती ओङ्‍ज्‍येन ति ख्‍यिराङला ना तोङ्‍गुपला मिन, ख्‍यिरा तेपा रम्‍बु जोपला नङ्‍गुप यिन।
2CO 10:9 ङे ख्‍यिराङला टिनी तङ्‍गुप दी यिकीतिवा ति ख्‍यिराङला ज्‍यिवा कुतुपला टिवु यिन सिनी नो माकी।
2CO 10:10 मी ललाइकी याङ ङ्‍यिराङला “ख्‍यिराङ यिकीतिवा टिकुप पेला ति च्‍युरुवु ताङ छासे रम्‍बु किवी, यिने ङ्‍यिरा चिप्‍ला वोतुप पेला ति रम्‍बु मेतुप ताङ तेन्‍दोक मेतुप ताम्‍ङे तिराङ किवी।” सिनी सिवी।
2CO 10:11 तुक सिरुप मीतिवी दी ताम्‍ङे ति हाक्‍कोशी। ङ्‍यिराङ ख्‍यिरा मुला मेतुप पेला दी यिकी नाङ्‍ला काङ सिक्‍यावे, ङ्‍यिराङ ख्‍यिरा मुला वोतुप पेला काङ क्‍यावे, ती ति च्‍यिक्‍पा राङ यिन।
2CO 10:12 ङ्‍यिराङ खुरुङ तिराङ ङराङ यिन सिनी नासाम तोङ्‍गुप ललाइ मीतिवी मुला च्‍यिक्‍पा राङ च्‍युङ्‍गुप ताङ तिवी मुला डिक्‍नी माल्‍हावी। तिवा खोप्‍रे नासामला तिराङ मी यम्‍बाला ठिम कितुप ताङ मी यम्‍बाला डिक्‍नी ल्‍हेवी सिसिन, तिवा छासे अम्‍बारङ्‍शिङ च्‍युङ्‍गिवी।
2CO 10:13 यिने ङ्‍यिराङ याङ ङ्‍यिरा सि गोवु ताम्‍ङेला मिसिन पङगी ताम्‍ङेला तेके मिकिवी। कोन्‍छ्‍योककी ङ्‍यिराङला चो सेक ओङ्‍ज्‍येन नङ वे, ती ताम्‍ङेला तिराङ तेके किवी। ङ्‍यिरा ख्‍यिराङला कोन्‍छ्‍योककी सुङ ख्‍याप्‍टाक क्‍यावु लाका साङ ती ओङ्‍ज्‍येनला राङ क्‍यावु यिन।
2CO 10:14 ङ्‍यिराङ ख्‍यिरा ते वुङ्‍गुप ति ती ओङ्‍ज्‍येनला वोतुप दोके यिन, ङ्‍यिरा राङ तेके क्‍यावु ति मिन। च्‍यिलासिसिन ख्रीष्‍टकी लेन ल्‍यामु ख्‍याप्‍टाक कितुपला गोमाला ख्‍यिरा ते वुङ्‍गुप ति ङ्‍यिराङ राङ यिन।
2CO 10:15 ङ्‍यिराङ ती ओङ्‍ज्‍येनला वोतुप सिनाङ ताम्‍ङे ल्‍हक्‍पा जोनी मी यम्‍बी क्‍यावु लाकाला तेके मिकी, यिने ख्‍यिराङ मङ मङ तेपा कियी गल्‍नी ङ्‍यिरा कोन्‍छ्‍योककी सुङ ख्‍याप्‍टाक कितुप लाका साङ ख्‍यिरा नाङ्‍ला मङ ल्‍हक्‍पा फर्नी डिवी सिरुप ति ङ्‍यिरा रेवा यिन।
2CO 10:16 तुक क्‍यानी ङ्‍यिराङ फर्नी गल्‍नी सी साङ कोन्‍छ्‍योककी सुङ ख्‍याप्‍टाक माक्यावु दासा यम्‍बातिवाला गल्‍नी सुङ ख्‍याप्‍टाक किवी। ङ्‍यिराङ मी यम्‍बी क्‍यावु लाकाला तेके कितुप गा मालङ्‍गिवी।
2CO 10:17 कोन्‍छ्‍योककी सुङला दुक सिनी टि वे, “तेके कितुपतिवा कोन्‍छ्‍योककी कोर्ला राङ तेके किशी।”
2CO 10:18 सी साङ खुरुङ ति ङराङ यिन सिनी छ्‍ये मोडोवी, यिने चोवोकी ल्‍यामु यिन सिनी चिवु मी तिराङ मी ल्‍यामु च्‍युङ्‍गिवी।
2CO 11:1 ङे चे चेयी ताम्‍ङे अम्‍बारङ्‍शिङ क्‍यासिनाङ ख्‍यिराङ हम क्‍यानी दे सिरुप ति ङला रेवा वे। ङ येलुङ सिरिन, ख्‍यिराङ हम क्‍यानी दे।
2CO 11:2 ङ ति कोन्‍छ्‍योककी ख्‍यिराङला पप क्‍यावु दोके ख्‍यिरा थोक्‍ला छासे पप क्‍यानी ल्‍हटे किवी। च्‍यिलासिसिन ङे ख्‍यिराङला ख्रीष्‍टकी मुला जेन्‍दी कितुपला पुम्‍पेजा चाङ्‍मा दोके लङ्‍गुप यिनो। तमा ख्रीष्‍ट ति च्‍यिक राङ वोतुप ख्‍यिरा ख्‍योवा यिन।
2CO 11:3 यिने शैतानकी रुल नेसुर जिनोक जोनी हव्‍वाला क्‍येन बिन्‍दुप दोके ख्‍यिरा सेम ति ख्रीष्‍टला वोतुप टेङ्‍बु ताङ खोकी थोक्‍ला सेम च्‍यिक राङ जोनी तेन्‍तेन कितुप नेसुर कुतुक डिते सिनी ङला ज्‍यिवा लान वे।
2CO 11:4 च्‍यिलासिसिन मी ललाइ वानी ङ्‍यिरा ख्‍याप्‍टाक क्‍यावु येशू सिनाङ यम्‍बा येशूकी कोर्ला ख्‍याप्‍टाक क्‍यासुङ सिसिन, याङ्‍ना ख्‍यिराङला थोपुप कोन्‍छ्‍योककी थु चाङ्‍मा सिनाङ यम्‍बा थुकी कोर्ला ख्‍याप्‍टाक क्‍यासुङ सिसिन, याङ्‍ना ख्‍यिरा सेमला लावु सिनाङ यम्‍बा लेन ल्‍यामुकी कोर्ला ख्‍याप्‍टाक क्‍यासुङ सिसिन ख्‍यिराङ तिवी ताम्‍ङेला जोल्‍हमु क्‍यानी सेमला लङ्‍गिवी।
2CO 11:5 ती मीतिवा खोप्‍राङ ति चोछ्‍येवु लोमा छ्‍ये यिन सिनी सिवी, यिने ङ ति चेयी साङ ती मीतिवा सिनाङ छ्‍युङा मे।
2CO 11:6 ङ ति ताम्‍ङे लपुपला खामु मे सिनी सिवी, यिने ङे मुला कोन्‍छ्‍योककी रिक्‍पा ङ्‍युङ्‍मु मे। दी ताम्‍ङे ति ङ्‍यिरा ख्‍यिराङला तेरी ल्‍यामो क्‍यानी हाक्‍को च्‍यिन वे।
2CO 11:7 कोन्‍छ्‍योककी नङ्‍गुप सुङ ति ङे ख्‍यिराङला काङ साङ मालानी तुक राङ ख्‍याप्‍टाक क्‍यासिमा ख्‍यिराङला छ्‍ये जोपला ङ ति मो पापिन। काङ ङे तुक क्‍यावु ति मेलोवा यिन रो?
2CO 11:8 ख्‍यिरा थोक्‍ला लेन ल्‍यामु ख्‍याप्‍टाक कितुपला यम्‍बा चर्चतिवी टङ्‍गा डोसुम तङ्‍नी दाल्‍जा क्‍यासुङ। तुक क्‍यावु ति ख्‍यिराङला दाल्‍जा कितुपला तिवी नेसुर टङ्‍गा ठोवु दोके यिन।
2CO 11:9 ख्‍यिरा मुला वोतुप पेला ङला टङ्‍गी कतुकार ख्‍येल्‍सुङ, यिन्‍सिनाङ ङे ख्‍यिराङ सुला साङ कले मालाङ। च्‍यिलासिसिन माकेडोनिया नेसुर वावु तेपा कितुप अच्‍युनुपतिवी राङ ती ङे कतुकारला दाल्‍जा किटे क्‍यासुङ। ती तप्‍की ङे चुका पर यी क्‍यासिनाङ ख्‍यिराङला कले मेख्‍येल्‍शी सिनी हम क्‍या देतिन। ज्‍युक्‍ला सेक साङ ङ तुक राङ कितिन।
2CO 11:10 ख्रीष्‍टकी टेङ्‍बु ति ङे मिजीला वोता सेक अखैयाकी लुङ्‍बाला सी साङ ङे तेके क्‍यावु ताम्‍ङे ति ग्‍येक मुथुपी।
2CO 11:11 तुक सिक्‍यावु ति ङे ख्‍यिराङला ङ्‍यिङ्‍ज्‍ये माक्‍यावु तप्‍की यिन रो? ङ ख्‍यिराङला ङ्‍यिङ्‍ज्‍ये कितिन। ती ति कोन्‍छ्‍योकला तेरी छ्‍या वे।
2CO 11:12 ङ ङे क्‍यावु लाका ति नरी क्‍या क्‍यावा देतिन। तुक क्‍यासिन खोप्‍राङ राङ चोछ्‍येवु लोमा छ्‍ये दोके जोनी युकुप मीतिवी खोप्‍राङ साङ ङ्‍यिराङ दोके यिन सिरुप च्‍यु मेङ्‍येवी।
2CO 11:13 तुका मीतिवा ति लोमा छ्‍ये जुमा यिन। तिवी येन्‍देन मेटेङ्‍बु लोपुप लाका किवी। तिवा ति ख्रीष्‍टकी लोमा छ्‌ये दोके जोनी युकिवी।
2CO 11:14 यिने दी ताम्‍ङे ति हलेवु ताम्‍ङे मिन, च्‍यिलासिसिन शैतान साङ वोसिरला वोतुप देवाच्‍येनकी मीतिवा दोके जोनी युकिवी।
2CO 11:15 शैतान तिराङ मिन, शैतानला शब्‍ज्‍यी कितुपतिवी साङ कोन्‍छ्‍योककी थोङ्‍दाङला टेङ्‍बु वोतुप दोके जोनी युकिवी। तुक क्‍यानी दी ताम्‍ङे ति यम्‍जेन लङ्‍गुप ताम्‍ङे मिन। यिने ज्‍युक्‍ला तिवी काङ क्‍यावे, ती छ्‍येर्पा ति तिवी खुर गोकिवी।
2CO 11:16 ङ येलुङ सिरिन, सी साङ ङला अम्‍बारङ्‍शिङ यिन सिनी नो मिकिशी। यिने ख्‍यिरा सेमला तुकै राङ नोकिवी सिसिन ख्‍यिरा ङ ति अम्‍बारङ्‍शिङ राङ यिन सिनी सेमला लो। तुक क्‍यासिन ङ ति अम्‍बारङ्‍शिङ वोतुप दोके क्‍यानी चेयी तेके कि थुप्‍किवी।
2CO 11:17 दी ङे तेके क्‍यावु ति चोवो येशूकी ओङ्‍ज्‍येन नेमा क्‍यावु मिन, यिने ङरा राङ अम्‍बारङ्‍शिङ दोके क्‍यानी सिक्‍यावु यिन।
2CO 11:18 मी बङीकी जम्‍बुलिङला क्‍यावु लाकाकी थोक्‍ला ङराङ यिन सिक्‍यावु दोके ङ साङ ङराङ यिन सिनी सिरिन।
2CO 11:19 ख्‍यिराङ रिक्‍पा वोतुप तप्‍की अम्‍बारङ्‍शिङ वोतुप मीतिवी सिक्‍यावु ताम्‍ङेला साङ गा क्‍यानी हम क्‍या देकिवी।
2CO 11:20 ख्‍यिराङला मी ललाइकी योक्‍पु जोसिनाङ, याङ्‍ना टुक्‍तेर क्‍यानी सोसिनाङ, याङ्‍ना ख्‍यिराङ नेसुर ख्‍येप्‍साङ लासिनाङ, याङ्‍ना ख्‍यिराङला दप्‍शे ग्‍यप्‍सिनाङ, याङ्‍ना डम्‍बाला राङ पोप्‍सिनाङ ख्‍यिराङ हम क्‍यानी देकिवी।
2CO 11:21 ङ ङोछा लासिनाङ ती ताम्‍ङे किवी, ङ्‍यिरा याङ तिवी दोके काङ साङ कि मुथुपी। यिने मी ललाइकी तेके किवी सिसिन, ङ साङ तेके राङ कितिन। ङला ती तेके कितुप ति अम्‍बारङ्‍शिङ यिन सिनी छ्‍या वे।
2CO 11:22 तिवा हिब्रू यिन सिसिन ङ साङ हिब्रू यिन। तिवा इस्राएलकी मीतिवा यिन्‍सिन ङ साङ इस्राएलकी मी यिन। तिवा अब्राहामकी गिपा यिन्‍सिन ङ साङ अब्राहामकी गिपा राङ यिन।
2CO 11:23 काङ तिवा ख्रीष्‍टकी थोक्‍ला शब्‍ज्‍यी कितुप मी यिन रो? ङ ङ्‍येन्‍बु दोके ताम्‍ङे किवी, ङ याङ मङ ख्रीष्‍टकी थोक्‍ला शब्‍ज्‍यी कितुप मी यिन। ङे छासे हुर्ताक क्‍यायी, ङ चोन्‍खाङला साङ थेङ्‍मा अलायी शोरुप यिन, तल्‍ज्‍येक साङ बङी ग्‍यप्‍सुङ, थेङ्‍मा बङी शेप ते ख्‍येल्‍सुङ।
2CO 11:24 यहूदीतिवी लक नेसुर ङे तल्‍ज्‍येक खल्‍ज्‍यिक ताङ च्‍युर्कु ति थेङ्‍मा ङ सेक सोयी।
2CO 11:25 थेङ्‍मा सुम ङला लकाम थ्‍वोनी पोप्‍सुङ, थेङ्‍मा यी दो थ्‍वोनी पोप्‍सुङ, थेङ्‍मा सुम याङ ङ शेन्‍दुप टु साङ शिक्‍सुङ, तमा ङ्‍यिमा च्‍यिक ताङ नुप च्‍यिक याङ ग्‍येम्‍छो नाङ्‍ला राङ यर्मिन मर्मिन गल्‍नी देतिन।
2CO 11:26 ङ नरी फार छुर युकुप पेला चङ्‍बु ग्‍यावु दासाला साङ ख्‍येल्‍सुङ, च्‍याक्‍पातिवी लकला साङ ख्‍येल्‍सुङ, रङगी गिपाकी मीतिवा ताङ मिरिक यम्‍बाकी मीतिवी लकला साङ ख्‍येल्‍सुङ, ग्‍येसातिवा ताङ दासा पाङ्‍थेरीला वोतुप दुक्‍पाला साङ ख्‍येल्‍सुङ, तमा ग्‍येम्‍छो नाङ्‍ला साङ ख्‍येल्‍सुङ, तेपा टेङ्‍बु मिकिवुतिवी लकला साङ ख्‍येल्‍सुङ।
2CO 11:27 ङ याङ लाका छाकुल ताङ लाका कलेला साङ ख्‍येल्‍सुङ, थेङ्‍मा अलायी ङ्‍यिलोकुप साङ माङ्‍येसुङ, ल्‍होवा कोम्‍बा लङ्‍गुप ताङ साप समा माङ्‍येसुङ, ख्‍योवा ताङ पेर्तुङ्‍बा साङ देतिन।
2CO 11:28 तोजो तिराङ मिन, ङला याङ तेरी चर्चतिवी थोक्‍ला साङ नरी पप लानी सेमला सेम्‍दुक लङ्‍गिवी।
2CO 11:29 ललाइ ङार मेतुप वोसिन ङ साङ ङार मेतुप च्‍युङ्‍सुङ, ललाइकी मी यम्‍बाला दिक्‍पा कि च्‍यिसिन ङे सेमला छासे पप लासुङ।
2CO 11:30 ङे तेके राङ कि गोसिन ङला ङार मेतुपकी थोक्‍ला राङ तेके किवी।
2CO 11:31 चोवो येशूकी पपा कोन्‍छ्‍योकला नरीकी नरी सोवा वुङ्‍शी। ङे नाम्‍साङ जिनोक मोजोयी सिरुप ति खोला छ्‍या वे।
2CO 11:32 दमस्‍कसला वोतुप अरितस ग्‍येल्‍वी ओङला लाका कितुप ती ग्‍येसाकी मी छ्‍ये तीकी ङला जिम्‍बुपला ती ग्‍येसाकी गोला र्‍हेन्‍दुप मी ज्‍याक्‍नोक।
2CO 11:33 यिन्‍सिनाङ ते वोतुप दाल्‍जातिवी ङला दोकरकी करुङ नेमा तोलुम नाङ्‍ला ज्‍याक्‍नी मर पापुप तप्‍की ङ ति तिवी लक नेसुर टो थुप्‍सुङ।
2CO 12:1 ङे तेके क्‍यावु ताम्‍ङे ति ख्‍येप्‍साङ मेसिनाङ, ङला चोवो नेमा थोपुप ज्‍यल्‍का ताङ खोकी हाक्‍को च्‍यितुप ताम्‍ङेकी कोर्ला ङ सिरिन।
2CO 12:2 येशू ख्रीष्‍टला तेपा कितुप मी मिरा च्‍यिकला ङे ङो शेकिवी। ती ति लो च्‍युप्‍ज्‍यी गोमाला तेरी सिनाङ येर देवाच्‍येन सेक तेक्‍नी गाल्‍सुङ। यिने ती ति जु ताङ डेके तेक्‍नी गलुप यिन्‍दे की, जु मेता क्‍यानी गलुप यिन्‍दे ङला छ्‍या मे। कोन्‍छ्‍योकला तिराङ छ्‍या वे।
2CO 12:3 ङ येलुङ सिरिन, ती मीला ङे ङो शेकिवी। यिने ती ति वुतुङ के यिन्‍दे की, ज्‍यल्‍का यिन्‍दे ङला छ्‍या मे। कोन्‍छ्‍योकला तिराङ छ्‍या वे।
2CO 12:4 ती मी ति कोन्‍छ्‍योककी ग्‍येल्‍खापकी दुम्‍डोकला तेक्‍नी गल्‍सिमा तीकी सि मुथुपु ताम्‍ङेतिवा थोनोक, ती ताम्‍ङे ति मी ख नेमा सिरुप साङ मेवी।
2CO 12:5 ङ ती मी तीकी कोर्ला तेके क्‍यानी सि थुप्‍किवी, यिने ङरा थोक्‍ला ति ङार मेतुप कोर्ला मिसिन ज्‍येन ताम्‍ङेला तेके मिकी।
2CO 12:6 ङे तेके क्‍यासिनाङ ङ ति अम्‍बारङ्‍शिङ कितुप मी दोके मोडोवी, च्‍यिलासिसिन ङ ति टेङ्‍बु वोतुप ताम्‍ङे तिराङ सिरिन। यिने मीतिवी ङे कोर्ला थोङ्‍गुप याङ्‍ना थोवु सिनाङ ल्‍हक्‍पा ति सी साङ नासाम मोतोङ्‍शी सिनी ङ तेके मिकी।
2CO 12:7 यिने ङे छासे हलेवु ताम्‍ङे थोङ्‍सुङ सिनी ङराङ यिन सिरुप नेसुर ग्‍येकुपला कोन्‍छ्‍योककी ङे जुला छेर्माङ सुकुप दोके छेटाङला ख्‍येल च्‍यिसुङ। ती छेटाङ ति शैतानकी लेन क्‍योलुप तीकी ख्‍येल च्‍यितुप यिन। तीकी ङला छासे सुक कि च्‍यिनी ङराङ यिन सिरुप नेसुर क्‍येक्‍सुङ।
2CO 12:8 ती छेटाङ ति ङे जु नेसुर दोनी नाङ सिनी चोवोला ङे थेङ्‍मा सुम सेक गोङ्‍बा शुयी।
2CO 12:9 यिने चोवोकी ङला दुक सुङ्‍सुङ, “ङे कटिन ति ख्‍युरुङला गोवु सिनाङ मङ ल्‍हक्‍पा वे। च्‍यिलासिसिन ङे ङार ति ङार मेतुपतिवी खला राङ तेरी छेकिवी।” तुक क्‍यानी ख्रीष्‍टकी ओङ ति ङे मिजीला लुशी सिनी ङ छासे गा क्‍यानी ङार मेतुपकी थोक्‍ला तेके किवी।
2CO 12:10 तुक क्‍यानी ङ ति ख्रीष्‍टकी थोक्‍ला ङार मेतुप पेला ताङ मी मारे तोङ्‍गुप पेला ताङ कलेला ख्‍येलुप पेला ताङ छेटाङला ख्‍येलुप पेला ताङ दुङलला ख्‍येलुप पेला लोदिमु क्‍यानी दे थुप्‍किवी। च्‍यिलासिसिन ङ ङार मेतुप पेला ङार छ्‍येवु च्‍युङ वे।
2CO 12:11 ख्‍यिरा राङ ङला कार क्‍यानी तुका अम्‍बारङ्‍शिङ कितुप जोवु यिन। ख्‍यिरा ङला ताङ्‍देन कि गोवु ति यिन्‍जा, च्‍यिलासिसिन ङ ति काङ मिन्‍सिनाङ खोप्‍राङ ति चोछ्‍येवु लोमा छ्‍ये यिन सिरुप मीतिवा सिनाङ चेयी साङ छ्‍युङा मे।
2CO 12:12 ङ वुतुङ के लोमा छ्‍ये यिन सिरुप ति छ्‍या देन्‍दुपला ख्‍यिरा पर्ला छासे डेकला देनी हलेवु ततिवा ताङ हलेवु लाकातिवा ताङ ङार छ्‍येवु लाकातिवा क्‍यावु यिन।
2CO 12:13 ख्‍यिराङला ङे थोक्‍ला डोसुम नाङ सिनी ताम्‍ङे माक्‍यावु ति मिसिन ङे यम्‍बा चर्चकी मीतिवाला सिनाङ ख्‍यिराङला काङ मेलोक्‍पा क्‍यासुङ रो? तुकै यिन्‍सिन तीकी कोर्ला ङे ख्‍यिराङला माफ लोङ गोकिवी।
2CO 12:14 त येलुङ ङ थेङ्‍मा सुमला ख्‍यिरा ते वुङ्‍गुप सिनी टडिक क्‍यान वे। ङ वासिनाङ ख्‍यिराङला ति कले ख्‍येल मिज्‍यी। च्‍यिलासिसिन ङ ख्‍यिरा ते वावु ति ख्‍यिरा टोङ्‍बा थोपुपला वावु मिन, ख्यिरा थोक्‍ला वावु यिन। पपाआमी थोक्‍ला पुज्‍युङपुमतिवी टोङ्‍बा मोशोम्‍बी, यिने पुज्‍युङपुमतिवी थोक्‍ला के पपाआमी टोङ्‍बा शोम गोकिवी।
2CO 12:15 ङ ख्‍यिरा थोक्‍ला छासे गा क्‍यानी ङे मुला वोतुप तेरी डोसुम तोङ्‍गुप ताङ ङे मिजी साङ तेरिन। ङे ख्‍यिराङला तुका मङ्‍मु ङ्‍यिङ्‍ज्‍ये क्‍यासिनाङ ख्‍यिरा ङला ङ्‍यिङ्‍ज्‍ये मिकिवी?
2CO 12:16 ङे ख्‍यिराङला कले ख्‍येल माच्‍यिवु ति ख्‍यिराङला साङ छ्‍या वे। यिने ललाइ मीतिवी ङ ति छासे च्‍यङ्‍बु वे, तमा ङे ख्‍यिराङला जिनोक जोनी लुकितो सिनी सिवी।
2CO 12:17 काङ ङे ख्‍यिरा ते तङ्‍गुप मीतिवी पर्ला ललाइ मीतिवी ख्‍यिरा लो नेसुर ख्‍येप्‍साङ तेन्‍सुङ रो?
2CO 12:18 तीतसला ख्‍यिरा ते ग्‍युक सिनी ङे सिक्‍यायी। तमा तीकी मुला यम्‍बा नुपला साङ तङ्‍यिन। काङ तीतसकी ख्‍यिरा लो नेसुर काङ रे च्‍यिक रे ख्‍येप्‍साङ लासुङ रो? ङ ताङ तीकी सेम च्‍यिक्‍पा राङ च्‍युङ्‍नी मुला राङ लाका क्‍यावु मिन रो?
2CO 12:19 काङ ख्‍यिरा ङ्‍यिराङला ति खुरुङ र्‍होकुपला तिराङ दी ताम्‍ङे सिक्‍यावु यिन्‍दे सिनी नोकिवी? मिन, ङ्‍यिराङ येशू ख्रीष्‍टला तेपा क्‍यावु मी दोके च्‍युङ्‍नी कोन्‍छ्‍योककी थोङ्‍दाङला दी ताम्‍ङे सिरिन। ङे ङ्‍यिङ्‍ज्‍येवु अच्‍युनुपतिवा, दी तेरी ताम्‍ङेतिवा ख्‍यिराङला तेपा रम्‍बु जोपला ङ्‍यिरा सिक्‍यावु यिन।
2CO 12:20 ङ ख्‍यिरा ते वुङ्‍गुप पेला ख्‍यिराङ ङे नोवाला वोतुप दोके ठेकिताङ मेठेताङ, ङ साङ ख्‍यिरा नोवाला वोतुप दोके ठेकिताङ मेठेताङ सिनी ङला ज्‍यिवा लानी वे। तमा ख्‍यिरा पर्ला खाँदा कितुप ताङ ठतोक कितुप ताङ ङ्‍यिर्मु कितुप ताङ रङगी थोक्‍ला तिराङ नासाम तोङ्‍गुप ताङ मी यम्‍बाला ताम्‍ङे मेलोवा कितुप ताङ मीला मेतुप ताङ छ्‍येजु कितुप ताङ खुरुङ राङ सेम नोजु क्‍यानी युकुप गल वे सिनी ङला छासे ज्‍यिवा लानी वे।
2CO 12:21 ङ येलुङ ख्‍यिरा ते वुङ्‍गुप पेला कोन्‍छ्‍योककी ख्‍यिरा दोङ्‍ला ङला मो बेप्‍किते यिन्‍दे सिनी ङला ज्‍यिवा लानी वे। तमा गोमाला लाका मेटेङ्‍बु क्‍यावु ताङ शम्‍डेन कितुप ताङ ङोछा लङ्‍गुप लाका क्‍यानी दिक्‍पा कितुप नेसुर सेम मुग्‍युरुपतिवा बङीकी थोक्‍ला ङला छासे पप लानी वे।
2CO 13:1 थेङ्‍मा सुमला ङ ख्‍यिरा ते वुङ्‍यिनो। नासाम तोङा, कोन्‍छ्‍योककी सुङला सुङ्‍गुप दोके “ख्‍यिरा पर्ला वोतुप चुका क्‍येन वोसिनाङ मिरा ङ्‍यी सुम पङ्‍बु ज्‍याक्‍नी तिराङ तेन्‍तेन कि गोकितो।”
2CO 13:2 थेङ्‍मा ङ्‍यीला ङ ख्‍यिरा मुला वोतुप पेला ख्‍यिराङला टोङ्‍गु बिन्‍दुप दोके ङ ख्‍यिरा पर्ला मेसिनाङ ख्‍यिराङला येलुङ छासे क्‍यानी टोङ्‍गु तेरिन, ङ वुङ्‍गुप पेला गोमाला दोके दिक्‍पा कितुपतिवा ताङ यम्‍बा सुला साङ क्‍युर्नी मोज्‍योक।
2CO 13:3 च्‍यिलासिसिन ख्रीष्‍ट ङे मिजी नेमा ताम्‍ङे किवी सिरुप पङ्‍बु ति ख्‍यिरा छोल्‍गितो। खोकी ख्‍यिरा पर्ला ठिम क्‍या नङ्‍गुप पेला खो ङार मेतुप मिन, ङार छ्‍येवु वोतुप ति हाक्‍कोकिवी।
2CO 13:4 खो वुतुङ के जुला वोतुप पेला ङार मेतुप च्‍युङ्‍नी ग्‍यङ्‍शिङ लोला कल्‍नी सेसुङ। यिन्‍सिनाङ कोन्‍छ्‍योककी ओङला खो ङोसु राङ ज्‍यु वे। ती दोके ङ्‍यिराङ साङ खो ताङ मुला वोतुप तप्‍की ङार मेतुप वे, यिने खो शेप ने ङोसु लङ्‍गुप दोके ङ्‍यिराङ कोन्‍छ्‍योककी ओङ नेसुर ख्रीष्‍टकी मुला मिजी क्‍याङ्‍नी ख्‍यिराङला ठिम किवी।
2CO 13:5 ख्‍यिराङ तेपा रम्‍बु वोताङ मे ख्‍यिरा राङ नासाम तोङ, तमा ल्‍यामो क्‍यानी ल्हो। तमा ख्रीष्‍ट ख्‍यिरा मिजीला ज्‍यु वोताङ मे सिरुप ति हाक्‍कोकिवी। ख्रीष्‍ट ख्‍यिरा मिजीला मेसुङ सिसिन ख्‍यिरा तेपा क्‍यावु ति काङ साङ फेन मोथोवु डिवी।
2CO 13:6 वुतुङ के ङ्‍यिराङ ति फेन मोथोवु मागल वे सिरुप ति ख्‍यिरा हाक्‍कोशी सिनी ङला रेवा वे।
2CO 13:7 ख्‍यिराङ काङ साङ लाका मेलोवतिवा मिकिशी सिनी ङ्‍यिराङ कोन्‍छ्‍योकला मोपोर किवी। ङ्‍यिरा मोपोर क्‍यावु ति ङ्‍यिराङ ल्‍यामु वोतुप छ्‍या देन्‍दुपला मिन, यिने ङ्‍यिराङ फेन मोथोवु दोके थोङ्‍सिनाङ ख्‍यिराङ लाका टेङ्‍बु कि थुप्‍शी सिनी ङ्‍यिराङ मोपोर किवी।
2CO 13:8 ङ्‍यिराङ टेङ्‍बुकी तेन्‍दोकला लानी काङ साङ कि मुथुपी, यिने टेङ्‍बुकी थोक्‍ला तिराङ लाका कि थुप्‍किवी।
2CO 13:9 ङ्‍यिराङ ङार मेतुप वोसिनाङ ख्‍यिराङ ति रम्‍बु वोतुप पेला ङ्‍यिराङ छासे गा लङ्‍गिवी। ख्‍यिराङ तेरी येर्के गल्‍नी ल्‍यामु च्‍युङ्‍शी सिनी ङ्‍यिराङ मोपोर किवी।
2CO 13:10 ख्‍यिरा मु नेसुर ङ थाक्‍रिङ्‍बु वोतुप तप्‍की दी यिकी टिकिन वोतो। दीकी तेन्‍दोक ति ङ ख्‍यिरा ते वुङ्‍गुप पेला चोवोकी ङला नङ्‍गुप ओङ्‍ज्‍येन नेसुर ङे ख्‍यिराङला च्‍युरुवु कि मोगोशिता। ती ओङ्‍ज्‍येन ति ख्यिराङला ना तोङ्‍गुपला मिन, तेपा रम्‍बु जोपला यिन।
2CO 13:11 लो तमा, अच्‍युनुपतिवा, त याङ ङ दोजोयी राङ टिकिनो। ख्‍यिराङ येर्के गल्‍नी ल्‍यामु च्‍युङ्‍शिता। ङे सिक्‍यावु ताम्‍ङेला ल्‍यामु क्‍यानी ङ्‍येना। मी यम्‍बी मुला सेम च्‍यिक्‍पा राङ च्युङ्‍नी लोदिमु क्‍यानी देता। दाक्‍पुला ङ्‍यिङ्‍ज्‍ये ताङ लोदिमु नङ्‍गुप कोन्‍छ्‍योक ति ख्‍यिरा मुला ज्‍युकितो।
2CO 13:12 च्‍यिककी च्‍यिकला ङ्‍यिङ्‍ज्‍ये ताङ मुला टसी देलेक सिसा।
2CO 13:13 कोन्‍छ्‍योकला तेपा कितुप तेरी अच्‍युनुपतिवी ख्‍यिराङला टसी देलेक सिनी तङ वोतो।
2CO 13:14 चोवो येशू ख्रीष्‍टकी कटिन ताङ कोन्‍छ्‍योककी ङ्‍यिङ्‍ज्‍ये ताङ खोकी थु चाङ्‍माकी डिक्‍जोम ति ख्‍यिराङ तेरीकी मुला नरी लुशिता।
GAL 1:1 टसी देलेक! दी यिकी ति ङ पावल ताङ ङे मुला वोतुप तेपा कितुपतिवा तेरी नेसुर गलातियाला वोतुप चर्चतिवाला टिवु यिनो। ङ लोमा छ्‍ये च्‍युङ्‍गुप ति मीतिवी नेसुर मिन, मीकी ओङ नेसुर साङ मिन, यिने येशू ख्रीष्‍ट ताङ खोला टुङ्‍गुप ने ङोसु लोङ्‍गुप पपा कोन्‍छ्‍योककी पेन नङ्‍गुप यिन।
GAL 1:3 दाक्‍पी पपा कोन्‍छ्‍योक ताङ चोवो येशू ख्रीष्‍टकी ख्‍यिराङला कटिन ताङ लोदिमु नङ्‍शी।
GAL 1:4 येशू ख्रीष्‍ट ति दाक्‍पी पपा कोन्‍छ्‍योककी नोवा नेसुर दी दुक्‍टाकी क्‍येङ्‍गुप जम्‍बुलिङ ने दाक्‍पुला थर्वा नङ्‍गुपला दाक्‍पी दिक्‍पी थोक्‍ला टुङ्‍सुङ।
GAL 1:5 तुक क्‍यानी कोन्‍छ्‍योकला नरीकी नरी मोवा वुङ्‍शी। आमिन।
GAL 1:6 ख्रीष्‍टकी कटिन नेमा ख्‍यिराङला कताङ नङ्‍गुप कोन्‍छ्‍योकला ख्‍यिरा दुका टिम्‍बु क्‍युर्नी यम्‍बा लेन ल्‍यामुकी थाकाला युकुप थोङ्‍नी ङला छासे हलेवा लानी वे।
GAL 1:7 चोवो येशू ख्रीष्‍टकी लेन ल्‍यामु मिसिन चुका ति साङ टेङ्‍बु मे, यिने मी ललाइकी यम्‍बा लेन ल्‍यामु शेनी ती लेन ल्‍यामुला क्‍योसुङ।
GAL 1:8 यिने ङ्‍यिरा ख्‍याप्‍टाक क्‍यावु लेन ल्‍यामु सिनाङ यम्‍बा लेन ति ङ्‍यिराङ याङ्‍ना देवाच्‍येनकी लेन क्‍योलुप थु सी ख्‍याप्‍टाक क्‍यासिनाङ तीला पर्च्या फोकिवी।
GAL 1:9 दी ताम्‍ङे ति ङे गोमाला साङ सिक्‍यायी, यिने तन्‍दा साङ सिरिन। सी साङ ख्‍यिरा सेमला लावु लेन ल्‍यामु सिनाङ यम्‍बा लेन ल्‍यामु ख्‍यिराङला ख्‍याप्‍टाक किवी सिसिन तीला पर्च्या फोकिवी।
GAL 1:10 त ङे सिक्‍यावु ताम्‍ङे ति मीला गा लोङ्‍गुपला यिनाङ की, कोन्‍छ्‍योकला गा लोङ्‍गुपला यिन? याङ्‍ना ङ मीतिवा नेसुर ताङ्‍देन छोलुपला यिन? ङे तरोङ साङ मीतिवा नेसुर ताङ्‍देन छोलुप लाका क्‍यासुङ सिसिन ङ ख्रीष्‍टला शब्‍ज्‍यी कितुप लावा मिन।
GAL 1:11 अच्‍युनुपतिवा ङे ख्‍यिराङला ख्‍याप्‍टाक क्‍यावु लेन ल्‍यामु ति मी जोवु मिन सिनी ख्‍यिराङला हाक्‍को ज्‍यितुप ङला नो वे।
GAL 1:12 च्‍यिलासिसिन ती ति मी ङला सिक्‍यावु मिन, मी लापुप साङ मिन, यिने चोवो येशू ख्रीष्‍टकी ङला ज्‍यल्‍का नेसुर नङ्‍गुप यिन।
GAL 1:13 गोमाला ङ यहूदी छ्‌योला तेन्‍दुप पेला येशूला तेपा कितुपतिवाला छेटाङ दुङल तेरुप मी यिन सिरुप ति ख्‍यिरा थोनी राङ वे।
GAL 1:14 ती पेला ङ ताङ दुरिम वोतुप यहूदी मी बङी नाङ ने ङ ति यहूदी छ्‍योला तेन्‍दुप खामु वोतुप मी यिन। तमा पगावा हङ्‍गावी तेन्‍दुप लुक्‍सु तेरी ङार छ्‍येवु क्‍यानी तेन्‍दुप मी साङ यिन।
GAL 1:15 यिने ङ क्‍येप सिनाङ गोमाला के कोन्‍छ्‍योककी ङला पेनी खोकी कटिनला कताङ नङ्‍नी
GAL 1:16 खोरे सेवुकी कोर्ला लेन ल्‍यामु माथोवु मीतिवी पर्ला पङ्‍बु तेरुपला खोकी ङला खोरे सेवुला ङो शे ज्‍यितुप गा लानोक। ती पेला ङे मी सुला साङ ती ताम्‍ङे सी माक्‍या।
GAL 1:17 तमा ङ सिनाङ गोमी लोमा छ्‍येतिवाला ठेतुपला यरूशलेम मागल्‍नी शार्क्येक अरब लुङ्‍बाला गल्‍नी तेसुर चेयी ज्‍युक्‍ला दमस्‍कसला लोकिन।
GAL 1:18 तेसुर लो सुम ज्‍युक्‍ला ङ पत्रुसला ठेतुपला यरूशलेमला गल्‍नी ते तीकी मुला ङ्‍यिमा च्‍येङा सेक देतिन।
GAL 1:19 यिने ते ङे चोवो येशूकी नुप याकूबला मिसिन यम्‍बा लोमा छ्‍ये सुला साङ माठे।
GAL 1:20 दी ङे ख्‍यिरा थोक्‍ला टिवु ताम्‍ङे ति तेरी कोन्‍छ्‍योककी थोङ्‍दाङला टेङ्‍बु वे।
GAL 1:21 ती ज्‍युक्‍ला ङ सिरिया ताङ किलिकिया लुङ्‍बाला गलिन।
GAL 1:22 ती पेला सेक ते यहूदियाला वोतुप चर्चकी मीतिवी ङला ङो माशेनोक।
GAL 1:23 तिवी “तोङ्‍ला दाक्‍पुला दुक्‍पा तेरुप मी ति तन्‍दा ना तोङ्‍गुप छोलुप ती सुङ राङ ख्‍याप्‍टाक किनोक।” सिरुप ति थोनोक।
GAL 1:24 ते तिवी ङे मिजी फोवु थोङ्‍नी कोन्‍छ्‍योकला सोवा तेक्‍सुङ।
GAL 2:1 लो च्‍युप्‍ज्‍यी तिङ्‍ला बारनाबास ताङ तीतसला टिनी ङ येलुङ यरूशलेम गलिन।
GAL 2:2 कोन्‍छ्‍योककी ते ग्‍युक सिनी छ्‍या तेन्‍दुप तप्‍की ङ ते गल्‍नी यहूदी मिन्‍दुप मिरिक यम्‍बाला ख्‍याप्‍टाक क्‍यावु लेन ल्‍यामुकी कोर्ला ते वोतुप चर्चकी गोमा कितुप मी छ्‍येतिवी मुला दासा कुतुकला देनी ताम्‍ङे क्‍यायिन। तुक क्‍यावु ति ङे क्‍यावु गोमी लाका ताङ तिङ्‍ला कितुप लाका तेरी तेर्मे मोडोशी सिनी नो क्‍यावु तप्‍की यिन।
GAL 2:3 यिने ङे मुला वोतुप तीतस ति ग्रीककी मी यिन्‍सिनाङ तीला सी साङ यहूदीतिवी च्‍येतुप लुक्‍सु कि राङ गोकिवी सिनी माक्‍या।
GAL 2:4 च्‍यिलासिसिन मेटेङ्‍बु शेतुप अच्‍युनुपतिवी दाक्‍पुला च्‍येतुप लुक्‍सु कि गोकिवी सिनी सिक्‍यासुङ। तुक क्‍यावु तेन्‍दोक ति तिवी दाक्‍पु ख्रीष्‍टला तेपा क्‍यानी रङ्‍ज्‍येन थोपुपतिवाला खोरो योक्‍पु जोपला यिन।
GAL 2:5 तुक क्‍यानी ख्‍यिराङ नरी ख्रीष्‍टकी टेङ्‍बु वोतुप लेन ल्‍यामुला देशी सिनी तिवी सिक्‍यावु ताम्‍ङेला उकुर च्‍यिक साङ ङ्‍यिरा माङ्‍येन।
GAL 2:6 मी छ्‍ये यिन सिरुप मीतिवी ङे ताम्‍ङे काङ साङ मापो। तिवा छ्‍ये वोसिनाङ ङे थोक्‍ला काङ साङ मिन। च्‍यिलासिसिन कोन्‍छ्‍योककी मीला ल्‍हानी मिन, मी सेम ल्‍हानी ठिम क्‍या नङ्‍गिवी।
GAL 2:7 यिने पत्रुसला यहूदीतिवी पर्ला लेन ल्‍यामु ख्‍याप्‍टाक कितुपला पेतुप दोके ङला ति कोन्‍छ्‍योककी यहूदी मिन्‍दुप मिरिक यम्‍बाकी मीतिवी पर्ला लेन ल्‍यामु ख्‍याप्‍टाक कितुपला तङ्‍गुप ति तिवी हाक्‍कोसुङ।
GAL 2:8 च्‍यिलासिसिन कोन्‍छ्‍योककी पत्रुसला यहूदीतिवी पर्ला लेन ल्‍यामु ख्‍याप्‍टाक कितुपला लोमा छ्‍ये जो नङ्‍गुप दोके ङला ति यहूदी मिन्‍दुप मिरिक यम्‍बाकी मीतिवी पर्ला लेन ल्‍यामु ख्‍याप्‍टाक कितुपला लोमा छ्‍ये जोनी ताङ्‍सुङ।
GAL 2:9 तुक क्‍यानी ते चर्चकी खक्‍छ्‍येवु याकूब ताङ पत्रुस ताङ यूहन्‍नातिवी कोन्‍छ्‍योककी ङला कटिन नङ्‍गुप थोङ्‍नी ङ ताङ बारनाबासला मुला थिन्‍नी लाका कितुप सिनी सिक्‍यासुङ। तमा ङ्‍यिराङ ति यहूदी मिन्‍दुप मिरिक यम्‍बाकी मीतिवी पर्ला, तिवा ति च्‍येतुप लुक्‍सु क्‍यावु यहूदीतिवी पर्ला लाका कितुपला ताम्‍ङे डिक्‍सुङ।
GAL 2:10 ते तिवी ङ्‍यिराङला पेराङ्‍बुतिवाला दाल्‍जा किटे की सिनी टोङ्‍गु बिन्‍सुङ, ती लाका ति ङला साङ कितुप गा वोतुप्‍जा।
GAL 2:11 यिने पत्रुस एन्‍टिओखियाला वावु पेला ङे तीला मी तेरीकी पर्ला ङोप्‍सुर ग्‍यपिन, च्‍यिलासिसिन तीकी क्‍येन फोकुप लाका क्‍यानोक।
GAL 2:12 ते याकूबकी तङ्‍गुप यहूदी दाल्‍जातिवा वुङ्‍गुप गोमाला पत्रुस ति यहूदी मिन्‍दुप मिरिक यम्‍बाकी मीतिवी मुला देनी साप थुङ्‍गुप क्‍यानोक। यिने तिवा ते वासिमा तीकी तिवी मुला साप थुङ्‍गुप क्‍युर ज्‍याक्‍नी गाल्‍सुङ। च्‍यिलासिसिन ती ति यहूदी च्‍येतुप लुक्‍सु तेन्‍दुपतिवी मुला ज्‍यिवा किनोक।
GAL 2:13 तमा ते यम्‍बा यहूदीतिवी साङ पत्रुसकी दोके खोनक्‍पु लाकाला तिङ्‍यासुङ। तुक राङ क्‍यानी बारनाबासकी साङ तिवी दोके लुमु सेसुङ।
GAL 2:14 तिवा कोन्‍छ्‍योककी सुङ टेङ्‍बुला मायुकुप थोङ्‍सिमा ङे पत्रुसला मी तेरीकी पर्ला “ख्‍युरुङ यहूदी गिपाकी मी यिन्‍सिनाङ यहूदी मिन्‍दुप मिरिक यम्‍बाकी मी दोके च्‍येर्पा किसिन चुक क्‍यानी मिरिक यम्‍बाला यहूदी दोके च्‍येर्पा कि गोकिवी सिनी सि थुप्‍किवी?” सिनी सिक्‍यायी।
GAL 2:15 दाक्‍पु ति यहूदी गिपाला राङ क्‍येवु यिन, यहूदी मिन्‍दुप मिरिक यम्‍बा दोके दिक्‍छेन मिन।
GAL 2:16 दाक्‍पु ति मोशाकी ठिमला वोतुप लाकातिवा क्‍यानी टेङ्‍बु च्‍युङ्‍गुप मिन, येशू ख्रीष्‍टला तेपा क्‍यासिमा टेङ्‍बु च्‍युङ्‍गुप यिन सिनी हाक्‍कोकिवी। तुक क्‍यानी मोशाकी ठिमला वोतुप लाकातिवा क्‍यानी टेङ्‍बु च्‍युङ्‍गुप मिन, यिने ख्रीष्‍टला तेपा क्‍यासिमा टेङ्‍बु च्‍युङ्‍गुप तप्‍की दाक्‍पु यहूदी साङ येशू ख्रीष्‍टला तेपा किवी। च्‍यिलासिसिन मोशाकी ठिमला वोतुप लाकातिवा क्‍यानी सु साङ टेङ्‍बु च्‍युङ मुथुपी।
GAL 2:17 दाक्‍पु ख्रीष्‍टला तेपा क्‍यानी टेङ्‍बु च्‍युङ्‍गुप छोलुप पेला मोशाकी ठिम मातेन्‍सुङ सिसिन दिक्‍पा कितुप मीतिवा यिन। काङ ती दिक्‍पा ति येशू ख्रीष्‍टकी जो नङ्‍गुप यिन रो? मिन!
GAL 2:18 यिने ङे क्‍युर्नी ज्‍यकुप मोशाकी ठिमकी लाकातिवा येलुङ क्‍यासुङ सिसिन ङ ति क्‍येन फोकुप मी दोके च्‍युङ्‍गिवी।
GAL 2:19 कोन्‍छ्‍योककी थोक्‍ला ङ सेन्‍बु लु थुप्‍शी सिनी ठिमकी थोक्‍ला ङ शिनी वे।
GAL 2:20 ङ ख्रीष्‍ट ताङ मुला ग्‍यङ्‍शिङ लोला कलुप यिन। तुक क्‍यानी तन्‍दा ङे क्‍योङ्‍गुप मिजी ति ङे ति मिन, ख्रीष्‍टकी ति यिन। दी मिजी ति ङला ङ्‍यिङ्‍ज्‍ये क्‍यानी खोरे मिजी साङ ङे थोक्‍ला नङ्‍गुप कोन्‍छ्‍योककी सेवुला तेपा क्‍यानी क्‍योङ्‍गिवी।
GAL 2:21 त ङ कोन्‍छ्‍योककी नङ्‍गुप कटिनला तेर्मे जो मुथुपी। च्‍यिलासिसिन मोशाकी ठिमकी लाकाकी दाक्‍पुला टेङ्‍बु जो थुप्‍सिन ख्रीष्‍ट टुङ्‍गुप ति तेर्मे डिवी।
GAL 3:1 ओ गलातीकी मी अम्‍बारङ्‍शिङतिवा, ख्‍यिराङला सी लुसुङ? येशू ख्रीष्‍ट ग्‍यङ्‍शिङला कलुप ति ख्‍यिरा मिककी राङ थोङ्‍गुप मिन?
GAL 3:2 ङ ख्‍यिराङला ताम्‍ङे यी टेयिन। ती ति काङ यिन सिसिन, ख्‍यिरा कोन्‍छ्‍योककी थु चाङ्‍मा ति मोशाकी ठिमकी लाका क्‍यानी थोपुप यिन की, कोन्‍छ्‍योककी सुङला तेपा क्‍यानी थोपुप यिन?
GAL 3:3 च्‍यिला ख्‍यिराङ दुका अम्‍बारङ्‍शिङ कितुप नोकिवी? ख्‍यिरा गोमाला खोकी थु चाङ्‍मा नेसुर मिजी सम्‍बा थोपुप गो चुसुङ, यिने तन्‍दा रङगी लाका ल्‍यामु क्‍यानी ती मिजी थोपुप छोलिन वे।
GAL 3:4 काङ गोमाला ख्‍यिरा छेटाङ दुङल खुरुप ति तेर्मे गल रो? वुतुङ के तेर्मेला गाल्‍सुङ रो?
GAL 3:5 दी ख्‍यिरा मिजीला वोतुप खोकी थु चाङ्‍माकी लाका ताङ हलेवु लाका ति ख्‍यिरा मोशाकी ठिमला तेन्‍नी थोपुप यिन की, येशू ख्रीष्‍टकी लेन ल्‍यामुला थोनी तेपा क्‍यानी थोपुप यिन?
GAL 3:6 अब्राहामकी मिजीला ल्‍हो, तीकी कोन्‍छ्‍योकला तेपा क्‍यावु तप्‍की तीला खोकी टेङ्‍बु वोतुप मी यिन सिनी सेमला लावु यिन।
GAL 3:7 तुक क्‍यानी सी खोला तेपा किवे, तिवा तेरी अब्राहामकी गिपातिवा यिन सिनी हाक्‍को गोकिवी।
GAL 3:8 खोकी सुङला खोरे राङ यहूदी मिन्‍दुप मिरिक यम्‍बाकी मीतिवाला तिवी क्‍यावु तेपा नेसुर टेङ्‍बु च्‍युङ्‍गुप ति गोमाला के हाक्‍कोसिमा “ख्‍युरुङ नेसुर राङ तेरी गिपातिवाला मोलाम थोप्‍किवी।” सिनी अब्राहामला गोमाला के सुङ्‍नी वे।
GAL 3:9 तुक क्‍यानी खोकी अब्राहामला मोलाम नङ्‍गुप दोके तेपा कितुपतिवा तेरीला साङ अब्राहाम ताङ मुला राङ मोलाम नङ्‍गिवी।
GAL 3:10 तमा मोशाकी ठिमला तिराङ तेन्‍नी टेङ्‍बु च्‍युङ्‍गुप छोलुपतिवा तेरीला पर्च्या फोकिवी। च्‍यिलासिसिन कोन्‍छ्‍योककी सुङला दुक सिनी टि वे, “मोशाकी ठिमला वोतुप क तेरीला नरी मेङ्‍येन्‍दुप मीतिवाला पर्च्या फोकिवी।”
GAL 3:11 दी तेरी ल्‍हानी काङ हाक्‍कोकिवी सिसिन, कोन्‍छ्‍योककी थोङ्‍दाङला मीतिवा सु साङ ठिमला तेन्‍नी टेङ्‍बु च्‍युङ मुथुपी, च्‍यिलासिसिन “टेङ्‍बु ति तेपा क्‍यानी तिराङ च्‍युङ थुप्‍किवी।” सिनी सुङला टि वे।
GAL 3:12 यिने मोशाकी ठिम तेन्‍दुप ति तेपा कितुप नेसुर वुङ्‍गुप मिन। बोरु कोन्‍छ्‍योककी सुङला दुक सुङ्‍नी वे, “मोशाकी ठिमला वोतुप क तेरी तेन्‍दुप मीतिवा टेङ्‍बु च्‍युङ थुप्‍किवी।”
GAL 3:13 ख्रीष्‍टकी ग्‍यङ्‍शिङला कल्‍नी दाक्‍पी थोक्‍ला पर्च्या खुर्नी दाक्‍पुला मोशाकी ठिम तेरी मातेन्‍नी वुङ्‍गुप पर्च्या ने र्‍होक्‍सुङ। च्‍यिलासिसिन ग्‍यङ्‍शिङला कलुप ति तेरी पर्च्या फोकुप यिन सिनी सुङला टि वे।
GAL 3:14 ख्रीष्‍टकी तुक क्‍यावु तेन्‍दोक ति अब्राहामला बिन्‍दुप मोलाम ति यहूदी मिन्‍दुप मिरिक यम्‍बाकी मीतिवाला ङ्‍ये थुप्‍शी, तमा दाक्‍पुला ति तेपा क्‍यासिमा कोन्‍छ्‍योककी थाक्‍छ्‍येन नङ्‍गुप थु चाङ्‍मा ङ्‍ये थुप्‍शी सिनी यिन।
GAL 3:15 अच्‍युनुपतिवा, ङे सिक्‍यावु ताम्‍ङे ति ख्‍यिरा हाक्‍कोशी सिनी ख्‍यिराङला मीतिवी पे नेसुर लापिन। थेङ्‍मा यी थाक्‍छ्‍येनी यिकीला सही क्‍यासिमा तीला सी साङ मिन सिनी सि मुथुपी, तमा ताम्‍ङे ल्‍हक्‍पा ज्‍याक्‍नी टिक साङ मुथुपी।
GAL 3:16 कोन्‍छ्‍योककी अब्राहाम ताङ तीकी गिपाला थाक्‍छ्‍येन नङ्‍गुप पेला “ख्‍योरो गिपातिवाला” सिनी मी बङीला मासुङ, यिने “ख्‍योरो गिपा च्‍यिक राङला” सिनी सुङ्‍नी वे। ती च्‍यिक राङ वोतुप गिपा ति ख्रीष्‍ट यिन।
GAL 3:17 ङे सिक्‍यावु ताम्‍ङे ति काङ यिन सिसिन, कोन्‍छ्‍योककी थेङ्‍मा यी अब्राहाम ताङ मुला थाक्‍छ्‍येन नङ्‍गुप ताम्‍ङेला लो सयी ज्‍यी ताङ खल सुम ज्‍युक्‍ला जोवु मोशाकी टिवु ठिमकी क्‍युर्नी मोज्‍योकिवी।
GAL 3:18 च्‍यिलासिसिन कोन्‍छ्‍योक नेसुर मोलाम थोपुप गिपा च्‍युङ्‍गुप ति मोशाकी ठिम नेसुर वावु यिन्‍सिन, खोकी थाक्‍छ्‍येन नङ्‍गुप ति काङगी तेन्‍दोक राङ मेवी, यिने खोकी थाक्‍छ्‍येन नङ्‍गुप नेसुर अब्राहामला गिपा च्‍युङ्‍गुप मोलाम नाङ्‍सुङ।
GAL 3:19 तुकै यिन्‍सिन दी मोशाकी ठिम ति च्‍यिला बिन्‍दुप यिनाङ? ती ति कोन्‍छ्‍योककी थाक्‍छ्‍येन नङ्‍गुप गिपा वुङ्‍दा सेक दिक्‍पा छ्‍या देन्‍दुपला जो नङ्‍गुप यिन। ती मोशाकी ठिम ति देवाच्‍येनकी लेन क्‍योलुप थुतिवा नेसुर खोकी मोशाला नङ्‍गुप यिन। तमा ती ति मोशाकी मीतिवाला बिन्‍दुप यिन।
GAL 3:20 यिने खोकी अब्राहामला थाक्‍छ्‍येन नङ्‍गुप ति मी यम्‍बी लक नेसुर मिन्‍दाला खोकी राङ नाङ्‍सुङ।
GAL 3:21 तुकै यिन्‍सिन काङ मोशाकी ठिम ति कोन्‍छ्‍योककी थाक्‍छ्‍येन नङ्‍गुप ताम्‍ङेला मिडिकिवी? तुकै मिन। मोशाकी ठिमकी दाक्‍पुला मिजी सम्‍बा तेर थुपुप यिन्‍सिन दाक्‍पु ति मोशाकी ठिमला देनी राङ टेङ्‍बु च्‍युङ थुपुप ति यिन्‍जा।
GAL 3:22 यिने कोन्‍छ्‍योककी सुङला “जम्‍बुलिङकी मीतिवा तेरी दिक्‍पी ओङला वे।” सिनी वे। तुक क्‍यानी येशू ख्रीष्‍टला तेपा कितुप मीतिवाला तिराङ खोकी थाक्‍छ्‍येवु ताम्‍ङे ति थोप्‍किवी।
GAL 3:23 येशू ख्रीष्‍ट फेप्‍सिमा खोला तेपा माक्‍यावा सेक दाक्‍पु ति मोशाकी ठिमकी ओङला ज्‍याक्‍नी वे।
GAL 3:24 तुक क्‍यानी मोशाकी ठिम ति दाक्‍पु येशूला तेपा क्‍यानी टेङ्‍बु माच्‍युङा सेक दाक्‍पुला गोमा कितुप गेकेन दोके यिन।
GAL 3:25 यिने त दाक्‍पी येशूला तेपा क्‍यावु तप्‍की दाक्‍पुला गेकेन दोके गोमा कितुप मोशाकी ठिम ति मोगोवी।
GAL 3:26 तमा ख्रीष्‍ट येशूला तेपा क्‍यावु तप्‍की ख्‍यिराङ तेरी कोन्‍छ्‍योककी पेजातिवा यिन।
GAL 3:27 च्‍यिलासिसिन ख्‍यिराङ तेरी येशूकी मुला बप्‍तिस्‍मा लानी खो मुला राङ सेम च्‍यिक्‍पा राङ च्‍युङ्‍नी वे।
GAL 3:28 तुक क्‍यानी कोन्‍छ्‍योककी थोङ्‍दाङला ख्‍यिरा नाङ्‍ला काङ ख्‍ये मे, यहूदी साङ मिन, ग्रीककी मी साङ मिन। योक्‍पु साङ मिन, ज्‍यिन्‍दाक साङ मिन। पुम्‍पेजा साङ मिन, ख्‍योक्‍पेजा साङ मिन। येशू ख्रीष्‍टला तेपा क्‍यासिमा ख्‍यिराङ तेरी च्‍यिक्‍पा राङ यिन।
GAL 3:29 ख्‍यिराङ ख्रीष्‍टकी ति यिन्‍सिन अब्राहामकी गिपा यिन, तमा कोन्‍छ्‍योककी थाक्‍छ्‍येन नङ्‍गुप अंश थोप छ्‍योवु पुज्‍युङ यिन।
GAL 4:1 ङे सिक्‍यावु ति काङ यिन सिसिन, कोन्‍छ्‍योककी थाक्‍छ्‍येन नङ्‍गुप अंश माथोपा सेक पुज्‍युङ टिक्‍पे वोतुप तप्‍की पुज्‍युङ ति तेरी नोरकी ज्‍यिन्‍दाक यिन्‍सिनाङ ती ति योक्‍पु दोके च्‍युङ्‍गिवी।
GAL 4:2 पपी नोवाला वोतुप तुजे माछेवा सेक तीला ल्‍हाप मी तीकी ओङला ती ति दे राङ गोकिवी।
GAL 4:3 ती दोके दाक्‍पु साङ टिक्‍पे वोतुप पेला ति फेन मोथोवु जम्‍बुलिङकी ल्हलुकी ओङला योक्‍पु दोके वोतुप्‍जा।
GAL 4:4 यिने तुजे छेसिमा कोन्‍छ्‍योककी खोरे सेवुला दी जम्‍बुलिङला तङ्‍नी पुम्‍पेजा यीकी खोक नेमा मोशाकी ठिमकी ओङला क्‍येसुङ।
GAL 4:5 तीकी तेन्‍दोक ति मोशाकी ठिमकी ओङला वोतुप मीतिवाला थर ज्‍यितुप ताङ दाक्‍पु कोन्‍छ्‍योककी थाक्‍छ्‍येन नङ्‍गुप पेजा च्‍युङ्‍गुपला यिन।
GAL 4:6 दाक्‍पु कोन्‍छ्‍योककी पुज्‍युङ यिन्‍दुप तप्‍की खोकी खोरे सेवुकी थु ति दाक्‍पी सेमला ज्‍याङ नाङ्‍सुङ। तुक क्‍यानी दाक्‍पी खोला “पपा कोन्‍छ्‍योक” सि थुप्‍किवी।
GAL 4:7 ती तप्‍की त ख्‍यिराङ योक्‍पु मिन, खोकी पुज्‍युङ यिनो। ख्‍यिराङ खोकी पुज्‍युङ यिन्‍दुप तप्‍की खोकी मुला वोतुप अंश तेरी ख्‍यिराङला थोप्‍किवी।
GAL 4:8 गोमाला ख्‍यिरा कोन्‍छ्‍योकला ङो माशेवु पेला जम्‍बुलिङला वोतुप ल्‍हलुतिवाला योक्‍पु दोके क्‍यानी शब्‍ज्‍यी क्‍यासुङ।
GAL 4:9 यिने त याङ ख्‍यिरा कोन्‍छ्‍योकला ङो शेनी वे, खोकी साङ ख्‍यिराङला ङो शेनी वे। यिन्‍सिनाङ ख्‍यिराङ च्‍यिला ओङ मेतुप ताङ फेन मोथोवु जम्‍बुलिङकी ल्हलुकी ओङला लोक्‍नी शब्‍ज्‍यी कितुप नो किवी?
GAL 4:10 तमा कोन्‍छ्‍योकला गा लोङ्‍गुपला ख्‍यिरा छेवा ताङ ल ताङ नाम ताङ लोला तेन्‍दुप लाका थोङ्‍नी
GAL 4:11 ङे दुक्‍पा क्‍यानी क्‍यावु लाका ति तेर्मेला डिते सिनी ङला पप लङ्‍गिनोक।
GAL 4:12 अच्‍युनुपतिवा, ख्‍यिराङ ङ दोके च्‍युङ्‍शी सिनी गोङ्‍बा शोयिन। च्‍यिलासिसिन ङ साङ ख्‍यिराङ दोके च्‍युङ्‍गुप यिन। ख्‍यिरा गोमाला ङला काङ साङ मेलोक्‍पा माक्‍या वे।
GAL 4:13 ङ अमोछ्‍यो वोतुप तप्‍की ङे ख्‍यिराङला थल्‍माला लेन ल्‍यामु ख्‍याप्‍टाक क्‍यावु ति छ्‍या राङ वे।
GAL 4:14 ङ अमोछ्‍यो वोतुप ति ख्‍यिरा थोक्‍ला खोक्‍पा ल्‍हावु दोके गल्‍सिनाङ ख्‍यिरा ङला ङ्‍यिङ्‍मर माक्‍या, मारे साङ माताङ। यिने देवाच्‍येनकी लेन क्‍योलुप थु ताङ ख्रीष्‍ट येशूला दोके ताङ्‍देन क्‍यासुङ।
GAL 4:15 तोजो पेला वोतुप ख्‍यिरा गा ति कनी गाल? च्‍यिलासिसिन ङला गोसिन ख्‍यिरा ङला रङगी मिक साङ तेन्‍नी तेर थुपुप ति यिन्‍जा।
GAL 4:16 काङ ङे ताम्‍ङे टेङ्‍बु लाप्‍नी के ख्‍यिरा मुला डला गलुप यिन रो?
GAL 4:17 यम्‍बा लेन ल्‍यामु मेटेङ्‍बुला क्‍योकुप मीतिवी ख्‍यिराङला ताम्‍ङे ल्‍यामु जोनी लुकिवी। ती ति तिवी सेम टेङ्‍बु क्‍यानी मिन, ङे मु नेसुर कुतुक पेनी खोप्‍रे ताम्‍ङेला ङर्मा जोपला यिन।
GAL 4:18 तिवी सेम टेङ्‍बुला ङर्मा वोसिन ङ ख्‍यिरा पर्ला वोतुप पेला तिराङ मिन, ङ मेतुप पेला साङ नरी ङर्मा कितुप गिवी।
GAL 4:19 ङे ङ्‍यिङ्‍ज्‍येवु आङातिवा, ख्‍यिराङ ति ख्रीष्‍टकी दोके मिजी माक्‍योङ्‍वा सेक ङ ति आङा क्‍येप पुम्‍पेजाला सुक ग्‍यपुप दोके छेटाङला ख्‍येल्‍नी दे गोकिवी।
GAL 4:20 ङ ख्‍यिरा मुला वोतुप यिन्‍सिन ख्‍यिराङला ङे ल्‍यामो क्‍यानी ताम्‍ङे कितुप्‍जा, यिने ङ थाक्‍रिङ्‍बु वोतुप तप्‍की ख्‍यला ख्‍यिला गाल्‍सुङ।
GAL 4:21 ख्‍यिराङ मोशाकी ठिमकी ओङला देतुप नो कितुपतिवाला ङ ताम्‍ङे यी टेयी। मोशाकी ठिमकी दाक्‍पुला काङ लोप्‍किवी ख्‍यिराङला छ्‍या वे?
GAL 4:22 कोन्‍छ्‍योककी सुङला दुक सिनी टि वे, “अब्राहामकी पुज्‍युङ पिन ङ्‍यी नोक। च्‍यिक ति योक्‍मी थाकाला क्‍येवु ताङ यम्‍बा ति खोरो पेर्मी थाकाला क्‍येवु नोक।”
GAL 4:23 योक्‍मी थाका नेमा क्‍येवु ति मी नोवा नेमा क्‍येवु नोक, यिने खोरो पेर्मी थाका नेमा क्‍येवु ति कोन्‍छ्‍योककी थाक्‍छ्‍येन नङ्‍गुप नेमा क्‍येवु नोक।
GAL 4:24 दी ताम्‍ङे ति पे नेसुर शेतुप यिन। च्‍यिलासिसिन दी पुम्‍पेजा ङ्‍यीकी तेन्‍दोक ति कोन्‍छ्‍योककी थाक्‍छ्‍येन नङ्‍गुप ताम्‍ङे ङ्‍यीकी कोर्ला यिन। कोन्‍छ्‍योककी थाक्‍छ्‍येन नङ्‍गुप ताम्‍ङे च्‍यिक ति सीनै रीला मोशाला सुङ्‍गुप ताम्‍ङे यिन। ती ति हागार यिन। ती हागार ति योक्‍मु यिन्‍दुप तप्‍की ती नेसुर क्‍येवुतिवा तेरी योक्‍पु यिन।
GAL 4:25 तमा हागार ति अराबिया लुङ्‍बी सीनै री दोके यिन। तमा ती ति तन्‍दाकी यरूशलेम दोके यिन। ती ताङ तीकी गिपातिवा ति तन्‍दा वोतुप यरूशलेमकी मीतिवा दोके यिन। तिवा तेरी योक्‍पु दोके मिजी क्‍योङ्‍गिवी।
GAL 4:26 यिने देवाच्‍येनला वोतुप यरूशलेमकी तेन्‍दोक ति योक्‍मु मिन, दाक्‍पी आमा यिन।
GAL 4:27 च्‍यिलासिसिन कोन्‍छ्‍योककी सुङला दुक सिनी टि वे, “ओ आङा मेक्‍येवु आम्‍पुम, गा की। ओ आङा क्‍येप सुक हाक्‍माकोवु आम्‍पुम, गा कियी सिरा च्‍यार तेन। च्‍यिलासिसिन ख्‍योवा वोतुप सिनाङ आम्‍पुम रप्‍छ्‍येमकी गिपातिवा राङ मङ वे।”
GAL 4:28 अच्‍युनुपतिवा, ख्‍यिराङ साङ इसहाक दोके कोन्‍छ्‍योककी थाक्‍छ्‍येन नङ्‍गुप गिपा यिन।
GAL 4:29 ती पेला मी नोवा नेमा क्‍येवु तीकी कोन्‍छ्‍योककी थु चाङ्‍मा नेमा क्‍येवु तीला दुक्‍पा ताङ छेटाङ तेर्किनोक। ती दोके तन्‍दा साङ दाक्‍पी तुकै राङ थोङ्‍गिवी।
GAL 4:30 यिन्‍सिनाङ कोन्‍छ्‍योककी सुङला दुक सिनी टि वे, “योक्‍मु ताङ तीकी पुज्‍युङला तेन्‍नी तोङ। च्‍यिलासिसिन ती योक्‍मुकी पुज्‍युङला कोन्‍छ्‍योककी थाक्‍छ्‍येन नङ्‍गुप पुज्‍युङकी मुला नाम्‍साङ पपी अंश ति थोपुप ओङ मे।”
GAL 4:31 तुक क्‍यानी ङे अच्‍युनुपतिवा, दाक्‍पु ति योक्‍मी थाकाकी ति मिन, कोन्‍छ्‍योककी थाक्‍छ्‍येन नङ्‍गुप अब्राहामकी पेर्मी थाकाकी गिपा यिन।
GAL 5:1 ख्रीष्‍टकी दाक्‍पुला रङ्‍ज्‍येन नङ्‍गुपला दिक्‍पा ने थर च्‍यिनी वे। तुक क्‍यानी ख्‍यिराङ तेपा रम्‍बु जोनी गोमी दोके योक्‍पुकी मिजी माक्‍योङ।
GAL 5:2 ङ्‍येना, ङ पावल ख्‍यिराङला सिरिन। ख्‍यिरा यहूदी च्‍येतुप लुक्‍सु तेन्‍सुङ सिसिन ख्रीष्‍ट नेमा ख्‍यिराङला काङ साङ ख्‍येप्‍साङ मेङ्‍गिवी।
GAL 5:3 यहूदी च्‍येतुप लुक्‍सु तेन्‍दुपतिवा तेरीला येलुङ ङ सिरिन। सी च्‍येतुप लुक्‍सु तेन्‍गिवे, तीकी तेरी मोशाकी ठिम ति तेन्‍दुपला चेक लाङ गोकिवी।
GAL 5:4 ख्‍यिराङ खुरुङला टेङ्‍बु जोपला मोशाकी ठिमला तेन्‍नी देसुङ सिसिन ख्रीष्‍टकी मुला तम्‍जी मे, तमा खोकी कटिन साङ ङ्‍ये मुथुपी।
GAL 5:5 च्‍यिलासिसिन दाक्‍पु ति कोन्‍छ्‍योककी थु चाङ्‍मा नेमा खोला तेपा क्‍यानी टेङ्‍बु च्‍युङ्‍गुप रेवाला गुनी देकिवी।
GAL 5:6 दाक्‍पु ख्रीष्‍टला तेपा क्‍यासिन च्‍येतुप लुक्‍सु तेन्‍सिनाङ मातेन्‍सिनाङ काङ साङ ख्‍येपर मे, यिने ताम्‍ङे च्‍यिक ति काङ यिन सिसिन ङ्‍यिङ्‍ज्‍ये नेसुर दाक्‍पी मिजीला तेपा छ्‍या देन गोकिवी।
GAL 5:7 ख्‍यिरा तेपा ति रम्‍बु डोयी नोक, यिने सी ख्‍यिराङला दी लाका टेङ्‍बु कितुप नेसुर क्‍येक्‍सुङ?
GAL 5:8 दी ग्‍येकुप लाका ति ख्‍यिराङला थर ज्‍यितुप कोन्‍छ्‍योककी क्‍यावु मिन।
GAL 5:9 खमीर चेयीकी टम्‍दोक तेरी बो च्‍यितुप दोके यिन।
GAL 5:10 ख्‍यिराङ तेरी यम्‍बा थाकाला मोडोवी सिनी ङ चोवो कोन्‍छ्‍योकला तेन्‍तेन वे। यिने सी खोकी मुला वोतुप मीला लुनी टिन डिवे, तीला कोन्‍छ्‍योककी पर्च्या फोकिवी।
GAL 5:11 ङे अच्‍युनुपतिवा, ङ च्‍येतुप लुक्‍सुकी कोर्ला तिराङ ख्‍याप्‍टाक किवी सिसिन, च्‍यिला तन्‍दा सेक साङ यहूदीतिवी ङला छेटाङ दुङल तेर्किवी? तुकै यिन्‍सिन ग्‍यङ्‍शिङला कलुप येशूकी दिक्‍पा ने थरुप लेन ल्‍यामु ख्‍याप्‍टाक कितुपला काङ साङ छेटाङ मे।
GAL 5:12 सी ख्‍यिराङला टुक्‍शिङ ग्‍यप्‍नी च्‍येतुप लुक्‍सु तेन ज्‍यितुप छोल्‍गिवे, तीकी खोरो जुकी येन्‍लक राङ च्‍येसिन वुङ्‍गुप्‍जा।
GAL 5:13 ङे अच्‍युनुपतिवा, कोन्‍छ्‍योककी ख्‍यिराङला कताङ नङ्‍गुप तेन्‍दोक ति ख्‍यिराङला रङ्‍ज्‍येन नङ्‍गुपला यिन। तुक क्‍यानी ख्‍यिराङ दिक्‍पा कितुप क्‍युर्नी च्‍यिककी च्‍यिकला ङ्‍यिङ्‍ज्‍ये क्‍यानी शब्‍ज्‍यी की।
GAL 5:14 तेरी ठिमतिवा ति क च्‍यिककी नाङ्‍ला वे, ती ति रङगी युल्‍वातिवाला खुरुङला दोके ङ्‍यिङ्‍ज्‍ये कितुप यिन।
GAL 5:15 यिने ख्‍यिराङ नाठुङकी सेम्‍ज्‍येनतिवा दोके च्‍यिककी च्‍यिकला फेतुप ताङ सेवी सिसिन ख्‍यिरा पर्ला राङ ना डोप लाका यिनो। तीकी कोर्ला ख्‍यिराङ च्‍याङ्‍से देता।
GAL 5:16 ङ ख्‍यिराङला टोङ्‍गु तेरिन, ती ति काङ यिन सिसिन ख्‍यिराङ कोन्‍छ्‍योककी थु चाङ्‍माकी ओङला युसुङ सिसिन जुकी दुक्‍टा वोतुप दिक्‍पी ओङला दे मोगोवी।
GAL 5:17 च्‍यिलासिसिन दाक्‍पी जुकी दुक्‍टा वोतुप नासाम ति कोन्‍छ्‍योककी थु चाङ्‍माकी मुला मिडिकिवी। तुक राङ क्‍यानी थु चाङ्‍माकी नासाम साङ जुकी दुक्‍टा वोतुप नासाम ताङ मुला मिडिकिवी। तिवा ङ्‍यिवु ति ड दोके यिन। तुक क्‍यानी ख्‍यिरा काङ लाका कितुप नो क्‍या वे, ती ति कि मुथुपी।
GAL 5:18 ख्‍यिराङ थु चाङ्‍माकी ओङला युसुङ सिसिन ठिमकी ओङला मे।
GAL 5:19 दिक्‍पी च्‍योलामकी लाकातिवा शम्‍डेन कितुप ताङ मेटेङ्‍बु कितुप ताङ छ्‍येवु छ्‍येमु कितुप ताङ
GAL 5:20 ल्‍हलुला तेन्‍दुप ताङ ङ ग्‍यकुप ताङ डला जोप ताङ थमु ग्‍यकुप ताङ ठतोक कितुप ताङ ङ्‍यिर्मु कितुप ताङ खुरुङला तिराङ च्‍युङ्‍शी नो कितुप ताङ ख्‍ये पेनी दाक दाक्‍पी छोक्‍पा जोप ताङ
GAL 5:21 ठतोक ङर्केल कितुप ताङ छ्‍याङ्‍गेले ताङ खावाला मुदुवु यिन। तीकी कोर्ला ङे ख्‍यिराङला गोमाला सिक्‍यावे, येलुङ साङ सिरिन। सी दुका लाका किवे, तिवा ति कोन्‍छ्‍योककी ग्‍येल्‍खापला शुक मोछ्‍योवी।
GAL 5:22 यिने चो पेला दाक्‍पु कोन्‍छ्‍योककी थु चाङ्‍माकी ओङला देकिवे, ती पेला दाक्‍पी मिजीला डेलु गरुप दोके ङ्‍यिङ्‍ज्‍ये ताङ गा ताङ लोदिमु ताङ हम क्‍या देतुप ताङ च्‍यम्‍बा कितुप ताङ मी यम्‍बी थोक्‍ला लाका ल्‍यामु कितुप ताङ लोतेर्मु कितुप ताङ
GAL 5:23 कुसु ज्‍यम्‍बु ताङ डेकला देतुप तेरी लाकातिवा वुङ्‍गिवी। तीकी तेन्‍दोकला लङ्‍गुप ति काङ साङ ठिम मे।
GAL 5:24 सु येशू ख्रीष्‍टकी सुङला युकिवे, तीकी दिक्‍पाकी किताङ नालु ताङ नोवातिवा खोरो जु ताङ मुला राङ ग्‍यङ्‍शिङला कल वे।
GAL 5:25 दाक्‍पु कोन्‍छ्‍योककी थु चाङ्‍माकी ओङला मिजी क्‍योङ्‍गिवी सिसिन ती थु चाङ्‍माकी ओङला राङ युक गोकिवी।
GAL 5:26 दाक्‍पु ङ राङ यिन सिरुप मेवी, च्‍यिककी च्‍यिकला ङ्‍यिर्मु लोङ्‍गुप मेवी, तमा च्‍यिककी च्‍यिकला ठतोक साङ कितुप मेवी।
GAL 6:1 अच्‍युनुपतिवा, मी ललाइ दिक्‍पाला ख्‍येल्‍सुङ सिसिन ख्‍यिराङ तेपा कितुपतिवी कुसु ज्‍यम्‍बु क्‍यानी तीला ल्‍यामु जोप लाका की। ती पेला ख्‍यिराङ ति च्‍याङ्‍से किसा, मिसियाङ ख्‍यिराङ साङ दिक्‍पाला ख्‍येल्‍गितो।
GAL 6:2 ख्‍यिराङ च्‍यिककी च्‍यिकला दुक्‍पा ख्‍येलुप पेला ख्रीष्‍टकी सुङ्‍गुप ठिमला वोतुप दोके च्‍यिककी च्‍यिकला दाल्‍जा किसा।
GAL 6:3 दोजो मी ललाइकी खोरुङ ति काङ दोके मिन्‍सिनाङ खक्‍छ्‍येवु यिन सिनी नोकिवी सिसिन तीकी खुरुङला राङ जिनोक जोवु यिन।
GAL 6:4 तीकी थोक्‍ला तेरीकी खोरो क्‍यावु लाका ति ल्‍यामो क्‍यानी ल्हो। खोरो क्‍यावु लाका ति मी यम्‍बी मुला डिक्‍नी माल्‍हा। मिसियाङ ख्‍युरुङ छ्‍येजु कितुप डिवितो।
GAL 6:5 च्‍यिलासिसिन मी तेरीकी खोरो चेक लावु लाका ति खोरो राङ कि गोकिवी।
GAL 6:6 कोन्‍छ्‍योककी सुङ लापुपतिवी सुङ लाम तेरुप मी तीला खोरो मुला वोतुप च्‍यालक ल्‍यामुतिवा गोनी बिन।
GAL 6:7 ख्‍योरो रङला राङ जिनोक माजो। कोन्‍छ्‍योकला सी साङ मारे तोङ्‍गुप मेङ्‍गिवी। च्‍यिलासिसिन मी काङ चु वे, तिराङ ङकिवी।
GAL 6:8 तुक क्‍यानी ख्‍युरुङ खोरो जुकी थोक्‍ला तिराङ जुकिवी सिसिन ख्‍योरो जु नेसुर मेलोक्‍पा तिराङ ङकिवी, यिने कोन्‍छ्‍योककी थु चाङ्‍माकी थोक्‍ला जुकिवी सिसिन खोकी थु चाङ्‍मा नेसुर नाम्‍साङ मिशिवु मिजीकी थोक्‍ला ङकिवी।
GAL 6:9 दाक्‍पु मी यम्‍बी थोक्‍ला लाका ल्‍यामु कितुपला नाम्‍साङ येन छ्‍येतुप ताङ यिछ्‍येतुप मेङ्‍गिवी, च्‍यिलासिसिन तुजे छेसिमा ङक थुप्‍किवी।
GAL 6:10 तुक क्‍यानी च्‍यु वोतुप पेला राङ मी तेरीला लाका ल्‍यामु की। खक्‍छ्‍येवुला तेपा कितुपतिवी मिछाङतिवाला मङ ल्‍यामु कि गोकिवी।
GAL 6:11 ल्‍होसा, दी यिकी बोम्‍बु ति ख्‍यिरा थोक्‍ला ङे लाक्‍पी राङ टिवु यिनो।
GAL 6:12 खुरुङला टेङ्‍बु छ्‍या देन्‍दुप गा लङ्‍गुपतिवी ख्‍यिराङला यहूदी च्‍येतुप लुक्‍सु तेन गोकिवी सिवी। तीकी तेन्‍दोक ति तिवा येशू ख्रीष्‍टकी ग्‍यङ्‍शिङकी तेन्‍दोकला वुङ्‍गुप छेटाङ दुङल नेसुर र्‍होकुपकी थोक्‍ला यिन।
GAL 6:13 सी यहूदी च्‍येतुप लुक्‍सु तेन्‍गिवे, तीकी ठिमला मेतेन्‍दी। यिन्‍सिनाङ ख्‍यिराङला ति च्‍येतुप लुक्‍सु तेन गोकिवी सिनी सिवी। तिवी तुक क्‍यावु तेन्‍दोक ति ख्‍यिरा जुकी थोक्‍ला तेके कितुपला यिन।
GAL 6:14 यिने दाक्‍पी चोवो येशू ख्रीष्‍टकी ग्‍यङ्‍शिङकी कोर्ला मिसिन ङ यम्‍बा काङला साङ तेके मिकी। ख्रीष्‍ट नेसुर जम्‍बुलिङ ति ङे थोक्‍ला ताङ ङ ति जम्‍बुलिङकी थोक्‍ला ग्‍यङ्‍शिङला कलुप यिन।
GAL 6:15 च्‍यिलासिसिन ख्रीष्‍ट येशू नेसुर खक्‍छ्‍येवु मिजी सम्‍बा ङ्‍येसिमा यहूदी च्‍येतुप लुक्‍सु क्‍यासिनाङ माक्‍यासिनाङ काङ साङ ख्‍येप्‍साङ मे।
GAL 6:16 त कोन्‍छ्‍योककी कला ङ्‍येन्‍नी मिजी क्‍योङ्‍गुपतिवा ताङ इस्राएलकी कोन्‍छ्‍योककी गिपातिवा तेरीला खोकी लोदिमु ताङ च्‍यम्‍बा थोप्‍शी।
GAL 6:17 तफेन नेज्‍युनी ङला सी साङ दुक्‍पा मेतेर्शी, च्‍यिलासिसिन खोला शब्‍ज्‍यी क्‍यावु यिन सिरुप पङ्‍बुकी मडीतिवा बङी ङे जुला वे।
GAL 6:18 अच्‍युनुपतिवा, दाक्‍पी चोवो येशू ख्रीष्‍टकी कटिन ति ख्‍यिरा सेमला वुङ्‍शी। आमिन।
EPH 1:1 टसी देलेक! दी यिकी ति कोन्‍छ्‌योककी नोवा नेसुर ख्रीष्‍ट येशूकी लोमा छ्‌ये च्‍युङ्‍गुप ङ पावलकी छ्‍योक नेसुर येशू ख्रीष्‍टला तेपा क्‍यानी खोङ्‍तेर्मु वोतुप एफिससकी मीतिवाला टिवु यिनो।
EPH 1:2 दाक्‍पी पपा कोन्‍छ्‌योक ताङ चोवो येशू ख्रीष्‍ट नेमा ख्‍यिराङला कटिन ताङ लोदिमु वुङ्‍शी।
EPH 1:3 दाक्‍पी चोवो येशू ख्रीष्‍टकी पपा कोन्‍छ्‌योकला सोवा वुङ्‍शी, च्‍यिलासिसिन खोकी येशू ख्रीष्‍ट नेसुर देवाच्‍येनला वोतुप तेरी मोलाम ति दाक्‍पुला नङ्‍नी वे।
EPH 1:4 ती मोलाम ति खोकी थोङ्‍दाङला दाक्‍पु चाङ्‍मा ताङ क्‍येन मेतुप च्‍युङ्‍शी सिनी जम्‍बुलिङ ज्‍येङ्‍गुप सिनाङ गोमाला के खोकी दाक्‍पुला पेन नङ्‍गुप यिन।
EPH 1:5 कोन्‍छ्‌योककी दाक्‍पुला ङ्‍यिङ्‍ज्‍ये क्‍या नङ्‍गुप तप्‍की येशू ख्रीष्‍ट नेमा दाक्‍पुला खोरे पुज्‍युङ जोपला गोमाला के पेन नङ्‍सुङ। ती ति खोकी गा लङ्‍गुप नोवा यिन।
EPH 1:6 तुक क्‍यानी खोकी ङ्‍यिङ्‍ज्‍येवु सेवु नेसुर दाक्‍पुला तुक राङ नङ्‍गुप खोकी मोवा वोतुप कटिनकी थोक्‍ला सोवा देकुप।
EPH 1:7 तमा खोकी ग्‍यक्‍चेकी कटिन नेसुर येशू ख्रीष्‍ट दाक्‍पी दिक्‍पी थोक्‍ला टुङ्‍नी खोकी ठककी दाक्‍पी दिक्‍पा ता च्‍यिनी दाक्‍पुला थर्वा ङ्‍येन वे।
EPH 1:8 खोकी ती कटिन ति हाक्‍कोशी नोनी तेरी च्‍यु ताङ रिक्‍पा ति दाक्‍पुला नाङ्‍सुङ।
EPH 1:9 खोकी येशू ख्रीष्‍ट नेसुर गोमाला के जो नङ्‍गुप खोला गा लङ्‍गुप नोवाला वोतुप छ्‍याककी ताम्‍ङे ति दाक्‍पुला तेरी हाक्‍को च्‍यिसुङ।
EPH 1:10 कोन्‍छ्‌योककी नोवा ति काङ यिन सिसिन तुजे छेसिमा देवाच्‍येन ताङ जम्‍बुलिङला वोतुप तेरी ख्रीष्‍टकी मुला खोकी ओङला च्‍युङ्‍शी।
EPH 1:11 खोकी तेरी लाका ति खोरे नोवा नेसुर राङ क्‍या नङ्‍गिवी। तमा खोकी नोवाला वोतुप दोके राङ दाक्‍पुला गोमाला के पेन नङ्‍गुप तप्‍की दाक्‍पु खोकी पुज्‍युङ च्‍युङ्‍नी वे।
EPH 1:12 तुक क्‍यानी दाक्‍पु गोमाला नेज्‍युनी ख्रीष्‍टला रेवा कितुपतिवा तेरीकी कोन्‍छ्‌योकला मोवा ताङ सोवा देकुपला खोकी पेन नङ्‍गुप यिन।
EPH 1:13 ती ख्रीष्‍ट नेसुर दाक्‍पु साङ कोन्‍छ्‌योककी सुङ टेङ्‍बु थोनी खोकी थाक्‍छ्‌येन नङ्‍गुप थु चाङ्‍माकी त ग्‍यप्‍नी वे। ती सुङ टेङ्‍बु ति ख्‍यिराङला दिक्‍पा ने थर ज्‍यितुप लेन ल्‍यामु यिन।
EPH 1:14 ती कोन्‍छ्‌योककी थु चाङ्‍मा ति खोरे गिपातिवा तेरीला थर माच्‍यिवा सेक्‍ला तिवाला थाक्‍छ्‍येन नङ्‍गुप ति तेरी थोप्‍किवी सिनी तेन्‍तेन कितुपला दाक्‍पुला नङ्‍गुप यिन। तीकी थोक्‍ला खोला सोवा देकुप।
EPH 1:15 तुक क्‍यानी ङ मोपोर कितुप पेला नरी ख्‍यिराङला टेन्‍नी कोन्‍छ्‌योकला थुचिछे बुलिन। च्‍यिलासिसिन चोवो येशूला ख्‍यिरा तेपा क्‍यावु ताङ तेरी तेपा कितुप मीतिवाला ख्‍यिरा च्‍यम्‍बा क्‍यावु ति ङे हाक्‍कोसुङ।
EPH 1:17 तमा दाक्‍पी चोवो येशू ख्रीष्‍टकी मोवा वोतुप पपा कोन्‍छ्‌योककी ख्‍यिराङला खोकी च्‍यु ताङ रिक्‍पाकी सेम नङ्‍नी खोला ङो शे थुप्‍शी सिनी ङ नरी मोपोर कितिन।
EPH 1:18 ख्‍योरो सेम पेनी चुका रेवाकी थोक्‍ला कोन्‍छ्‌योककी ख्‍यिराङला कताङ वे, तमा खोला तेपा कितुपतिवाला खोकी नङ्‍गुप हलेवु मोलाम ति ग्‍यक्‍चे वे सिरुप ति ख्‍यिरा हाक्‍को थुप्‍शी सिनी ङ मोपोर कितिन।
EPH 1:19 तमा दाक्‍पु तेपा कितुपतिवी थोक्‍ला खोकी छासेकी ङार ति काङ यिनोक सिनी ख्‍यिरा हाक्‍कोशी सिनी मोपोर कितिन। ती ङार ति खोकी चोछ्‍येवु ङार यिन।
EPH 1:20 ती ङार नेसुर खोकी ख्रीष्‍टला टुङ्‍गुप ने ङोसु लङ्‍नी देवाच्‍येनला खोकी छ्‌याक यावी थाकाला ज्‍याक नाङ्‍सुङ।
EPH 1:21 तमा जम्‍बुलिङ तेरीला ग्‍येला कितुप ताङ तेरी ओङ्‍ज्‍येन ताङ ङार ताङ ग्‍येल्‍खाप ताङ दी कल्‍वाला तिराङ मिन यिने त वुङ्‍गुप कल्‍वा सेक्‍ला वुङ्‍गुपतिवा तेरी सिनाङ चोछ्‌ये जो नाङ्‍सुङ।
EPH 1:22 खोकी दी तेरी ओङ्‍ज्‍येन ति येशू ख्रीष्‍टकी शापकी वोक्‍ला ज्‍याक्‍नी नाङ्‍सुङ। तमा चर्चकी खला साङ खोला राङ तेरी सिनाङ चोछ्‌येवु जो नाङ्‍सुङ।
EPH 1:23 चर्च ति ख्रीष्‍टकी जु यिन, ती चर्चला ख्रीष्‍टकी तेरी छेङ्‍मा जो नङ्‍गिवी।
EPH 2:1 तोङ्‍ला ख्‍यिराङ लाका मेलोक्‍पा ताङ दिक्‍पाला ख्‍येल्‍नी शिन वे।
EPH 2:2 ती पेला दी जम्‍बुलिङ ताङ शैतानकी ओङ्‍ज्‍येनला वोतुप मीतिवी दोके ख्‍यिरा साङ लाका मेलोक्‍पा क्‍यासुङ। ती शैतानकी राङ तन्‍दा साङ कोन्‍छ्‌योककी सुङ मेङ्‍येन्‍दुप तिवी खला ओङ्‍ज्‍येन किवी।
EPH 2:3 ती दोके तोङ्‍ला दाक्‍पी साङ सेमला शरुप तेरी लाका मेलोक्‍पातिवा क्‍यानी मिजी क्‍योङ्‍गुप ताङ रङगी जु ताङ सेमगी नोवाला युवुजा। तुक क्‍यानी दाक्‍पु साङ मी यम्‍बा दोके कोन्‍छ्‌योककी पर्च्या फोकुप गिपा च्‍युङ्‍गुप यिन।
EPH 2:4 यिने कोन्‍छ्‌योक च्‍यङ्‍च्‍यु सेम्‍बा वोतुप तप्‍की खोकी दाक्‍पु तेरीला छासे ङ्‍यिङ्‍ज्‍ये क्‍या नाङ्‍सुङ।
EPH 2:5 दाक्‍पु दिक्‍पाला शोर्नी शिसिनाङ खोकी कटिन नेमा राङ दाक्‍पुला दिक्‍पा ने थर च्‍यिसुङ।
EPH 2:6 तमा खोकी मुला राङ दाक्‍पुला सेन्‍बु लङ्‍नी देवाच्‍येनला येशू ख्रीष्‍टकी मुला ज्‍याक्‍नी नाङ्‍सुङ।
EPH 2:7 तुक क्‍यावु ति च्‍यम्‍बा वोतुप कोन्‍छ्‍योककी येशू ख्रीष्‍ट नेसुर दाक्‍पुला ग्‍यक्‍चेकी कटिन नङ्‍गुप ति त वुङ्‍गुप कल्‍वाला छ्‍या देन्‍दुपला यिन।
EPH 2:8 च्‍यिलासिसिन दाक्‍पी खोला तेपा क्‍यानी खोकी कटिनकी राङ दाक्‍पु दिक्‍पा ने थरुप यिन। दी ति दाक्‍पी ङारकी ङ्‍येतुप मिन, यिने कोन्‍छ्‌योक नेमा थोपुप ङ्‍येम्‍बा यिन।
EPH 2:9 दाक्‍पी लाका ल्‍यामु क्‍यानी ङ्‍येतुप मिन, मिसियाङ मीतिवी ङ राङ यिन सिनी सिवी।
EPH 2:10 दाक्‍पु ति कोन्‍छ्‌योककी थोक्‍ला लाका ल्‍यामु कितुपला ख्रीष्‍ट नेसुर खोकी छ्‍याककी ज्‍येवु यिन। दाक्‍पु खोकी नोवाला वोतुप दोके युक्‍शी सिनी खोकी दाक्‍पुला तोङ्‍ला के ज्‍येवु यिन।
EPH 2:11 तुक क्‍यानी नासाम तोङ, तोङ्‍ला ख्‍यिराङ मिरिक यम्‍बाकी मीतिवा यिन्‍दुप तप्‍की कोन्‍छ्‌योकला ङो माशेनोक। ती पेला यहूदी च्‍येतुप लुक्‍सु क्‍यावुतिवी ख्‍यिराङला ङ्‍यिङ्‍मर क्‍यानी च्‍येतुप लुक्‍सु माक्‍यावुतिवा यिन सिनोक।
EPH 2:12 ती पेला येशू ख्रीष्‍टला ख्‍यिरा ङो माशेवु तप्‍की इस्राएलकी गिपा माच्‍युङ। तमा ख्‍यिराङ ति कोन्‍छ्‌योककी थाक्‍छ्‌येतुप ठिम नेसुर थाक्‍रिङ्‍बु गल्‍नी दी जम्‍बुलिङला रेवा मेतुप ताङ कोन्‍छ्‌योक ङो माशेनी दे नोक।
EPH 2:13 तोङ्‍ला ख्‍यिराङ मिरिक यम्‍बा यिन्‍दुप तप्‍की कोन्‍छ्‌योक नेमा थाक्‍रिङ्‍बु गाल्‍नोक, यिने त याङ येशू ख्रीष्‍टकी ठक नेसुर ख्‍यिराङ कोन्‍छ्‌योक ताङ मुला थाक्‍ङ्‍यिमु गल वे।
EPH 2:14 दाक्‍पुला सेम च्‍यिक्‍पा राङ जो नङ्‍गुप ति येशू ख्रीष्‍ट यिन। खोकी राङ यहूदी ताङ यहूदी मिन्‍दुप मिरिक यम्‍बाकी मीतिवा ङ्‍यिकरला च्‍यिक राङ जो नाङ्‍सुङ। तमा खो टुङ्‍नी खोरो जु नेसुर दाक्‍पी पर्ला डला जोप तम्‍जी मेलोक्‍पातिवा तेरी ना ताङ्‍सुङ।
EPH 2:15 तमा यहूदीतिवी छ्‌यो नाङ्‍ला वोतुप तेरी लुक्‍सुतिवा ना तङ्‍नी खो नेसुर यहूदी ताङ यहूदी मिन्‍दुप मिरिक यम्‍बा ङ्‍यिकरला लोदिमु वोतुप मी सम्‍बा जो नाङ्‍सुङ।
EPH 2:16 तमा येशू ख्रीष्‍ट ग्‍यङ्‍शिङला टुङ्‍नी दाक्‍पु ङ्‍यिकरला डला गलुप ति च्‍यिक राङ जोनी कोन्‍छ्‌योक ताङ मुला थिन च्‍यिसुङ। तमा यहूदी ताङ मिरिक यम्‍बाकी मीतिवी पर्ला ङ्‍यिङ्‍मर कितुप ताम्‍ङेतिवा ना ताङ नाङ्‍सुङ।
EPH 2:17 तमा खो फेप्‍नी ख्‍युरुङ थाक्‍रिङ्‍बु वोतुपतिवाला ताङ थाक्‍ङ्‍यिमु वोतुपतिवाला साङ लोदिमु तेरुप सुङ ख्‍याप्‍टाक क्‍या नाङ्‍सुङ।
EPH 2:18 येशू नेसुर राङ दाक्‍पु ङ्‍यिकरला कोन्‍छ्‌योककी थु चाङ्‍मा ङ्‍येनी ती थु चाङ्‍मा नेमा राङ दाक्‍पु ङ्‍यिकर पपा कोन्‍छ्‍योककी चाला लेप थुप्‍किवी।
EPH 2:19 तुक क्‍यानी त याङ ख्‍यिराङ छ्‍यिग्‍यपकी मी ताङ मिमेलुङ्‍दुङ दोके साङ मिन, यिने चाङ्‍मा वोतुप तेपा कितुप मीतिवा ताङ मुला लुङ्‍बा च्‍यिककी ज्‍यिक्‍तेम्‍बा ताङ कोन्‍छ्‍योककी मिछाङतिवा यिनो।
EPH 2:20 ती मिछाङतिवा ति लोमा छ्‌येतिवा ताङ कोन्‍छ्‌योककी लुङ्‍तेम्‍बातिवी जोवु डम्‍ज्‍यी रम्‍बु दोके यिन। तमा येशू ख्रीष्‍ट ति ती डम्‍ज्‍यीकी खक्‍छ्‍येवु सुरकी दो दोके यिन।
EPH 2:21 येशू ख्रीष्‍ट ताङ मुला च्‍यिक्‍पा राङ जोनी कोन्‍छ्‌योककी मिछाङतिवा तेरी थिन्‍नी खोकी थोक्‍ला कोन्‍छ्‌योककी ल्‍हङाङ ति मङ मङ पोरिन डिवी।
EPH 2:22 येशू ख्रीष्‍ट नेसुर ख्‍यिराङ साङ थु चाङ्‍माकी ओङला कोन्‍छ्‌योक ज्‍युवु दासा च्‍युङ्‍गुपला तेरी मुला थिन्‍नी च्‍यिक्‍पा राङ जोयी डिवी।
EPH 3:1 ती तप्‍की ङ पावल ख्‍यिराङ यहूदी मिन्‍दुप मिरिक यम्‍बातिवी थोक्‍ला चोन्‍खाङला शोर्नी वे।
EPH 3:2 ख्‍यिराङ यहूदी मिन्‍दुप मिरिक यम्‍बातिवाला लेन ल्‍यामु ख्‍याप्‍टाक कितुपला कोन्‍छ्‌योककी ङला चेक तेतुप कटिनकी कोर्ला वुतुङ के ख्‍यिरा थोनी वे सिरुप ति ङला नोवा वे।
EPH 3:3 खोकी नोवा ति छ्‍याकला नोक। ती ति खोकी ङला ज्‍यल्‍का नेसुर हाक्‍को च्‍यिसुङ। तीकी कोर्ला तोङ्‍ला साङ ङे ख्‍यिराङला चेयी टिनी वे।
EPH 3:4 ती ङे टिवु ताम्‍ङे ति ख्‍यिरा रासिन ख्रीष्‍टकी छ्‍याकला वोतुप ताम्‍ङेकी कोर्ला ङे चो हाक्‍कोनोक सिरुप ति ख्‍यिरा साङ हाक्‍कोकितो।
EPH 3:5 तोङगी गिपाकी मीतिवाला हाक्‍को माच्‍यिवु ताम्‍ङे ति खोकी लोमा छ्‌येतिवा ताङ कोन्‍छ्‌योककी लुङ्‍तेम्‍बातिवाला खोरे थु चाङ्‍मा नेसुर तसाम ठछ्‍येली छ्‌या तेन वे।
EPH 3:6 ती छ्‍याकला वोतुप ताम्‍ङेकी तेन्‍दोक ति लेन ल्‍यामु नेसुर राङ यहूदी मिन्‍दुप मिरिक यम्‍बातिवाला साङ यहूदीतिवाला थोपुप कोन्‍छ्‌योककी मोलाम ति मुला राङ थोप्‍नी वे। तमा दाक्‍पु तेरी येशू ख्रीष्‍ट ताङ मुला जु च्‍यिक्‍पा राङ च्‍युङ्‍नी खोकी खोरे मीतिवाला थाक्‍छ्‌येन नङ्‍गुप साङ मुला राङ थोप्‍नी वे।
EPH 3:7 कोन्‍छ्‌योककी ओङ छ्‌येवु लाका नेसुर दी लेन ल्‍यामु ख्‍याप्‍टाक कितुपला ङला खोकी लावा जो नङ्‍गुप यिन। तुक क्‍यावु ति खोकी कटिनकी ङ्‍येम्‍बा यिन।
EPH 3:8 खोला तेपा कितुप मीतिवा तेरीकी पर्ला ङ ति तेरी सिनाङ छ्‍युङा यिन्‍सिनाङ ख्रीष्‍टकी मोलाम नङ्‍गुप ग्‍यक्‍चेकी लेन ल्‍यामु ति यहूदी मिन्‍दुप मिरिक यम्‍बातिवाला ख्‍याप्‍टाक कितुपला ङला दी कटिन ति नङ्‍गुप यिन।
EPH 3:9 तमा तेरी च्‍यालकतिवा ज्‍ये नङ्‍गुप कोन्‍छ्‍योककी ताङ्‍बो ताङ्‍बो नेज्‍युनी छ्‍याकला वोतुप नोवाकी तेन्‍दोक ति काङ यिन सिनी तेरी मीतिवाला ख्‍याप्‍टाक कितुप कटिन ति ङला नङ्‍गुप यिन।
EPH 3:10 ती ति चर्च नेसुर खोकी नम्‍बा कुतुक कुतुककी रिक्‍पा ति देवाच्‍येनकी ग्‍येला कितुप ताङ ओङ्‍ज्‍येन वोतुपतिवी पर्ला तसाम छ्‌या देन्‍दुपला खोकी दुक क्‍या नङ्‍गुप यिन।
EPH 3:11 खोकी तुक क्‍या नङ्‍गुप ति दाक्‍पी चोवो येशू ख्रीष्‍ट नेसुर थल्‍मा नेज्‍युनी खोरे नोवाला वोतुप दोके क्‍या नङ्‍गुप यिन।
EPH 3:12 दाक्‍पी खोला तेपा क्‍यावु तप्‍की दाक्‍पु तेन्‍तेन ताङ ङाडेङ क्‍यानी खोकी चिप्‍ला डोप ङ्‍येकिवी।
EPH 3:13 तुक क्‍यानी ङ ख्‍यिराङला गोङ्‍बा शोयी, ख्‍यिरा थोक्‍ला ङे छेटाङ खुर्सुङ सिनी ख्‍यिराङ यिछ्‍येता माकी। दी ति ख्‍यिरा थोक्‍ला छासे ताङ्‍देन वोतुप ताम्‍ङे यिन।
EPH 3:14 ती तप्‍की जम्‍बुलिङ ताङ देवाच्‍येनला वोतुप तेरी मिछाङतिवी मिङ जो नङ्‍गुप पपा कोन्‍छ्‌योककी चिप्‍ला पुमुङ चुनी मोपोर कितिन।
EPH 3:16 खो ताङ मुला ग्‍यक्‍चेकी मोलाम वोतुप तप्‍की खोकी थु चाङ्‍माकी ङारकी ख्‍यिरा सेमगी दिङ्‍ला रम्‍बु जो नङ्‍शी।
EPH 3:17 तमा ख्‍यिरा क्‍यावु तेपा नेसुर ख्रीष्‍ट ख्‍यिरा सेमला ज्‍युशी। ख्‍यिरा च्‍यिककी च्‍यिकला कितुप ङ्‍यिङ्‍ज्‍ये ति दोङ्‍बी मर क्‍यङ्‍गुप दोके रम्‍बु च्‍युङ्‍शी।
EPH 3:18 ख्‍यिराङ तेपा कितुपतिवा तेरी खोकी मिछाङ च्‍यिक राङ च्‍युङ्‍नी ख्रीष्‍टकी ङ्‍यिङ्‍ज्‍ये ति चो थेन्‍बु वोतुप ताङ चो मोमु ताङ चो रिङ्‍बु वोतुप ति हाक्‍को थुप्‍शी।
EPH 3:19 तमा ख्रीष्‍टकी ङ्‍यिङ्‍ज्‍ये ति चुका रिक्‍पा सिनाङ चोछ्‌ये वे सिनी ख्‍यिरा हाक्‍को थुप्‍शी। तमा काङ साङ ङ्‍युङ्‍मु मेतुप कोन्‍छ्‌योककी तेरी छाछिङीकी ख्‍यिरा मिजीला छाछिङी छेङ्‍शी।
EPH 3:20 कोन्‍छ्‌योककी दाक्‍पी नाङ्‍ला लाका कितुप खोरे ओङ्‍ज्‍येन नेमा राङ दाक्‍पी लङ्‍गुप ताङ नासाम तङ्‍गुप सिनाङ ल्‍हक्‍पा दाक्‍पुला नङ्‍गिवी।
EPH 3:21 ती कोन्‍छ्‌योकला राङ थल्‍मा नेज्‍युनी तिङ्‍मा सेक चर्च ताङ येशू ख्रीष्‍ट नेसुर नरीकी नरी मोवा वुङ्‍शी। आमिन।
EPH 4:1 तुक क्‍यानी ख्रीष्‍टकी थोक्‍ला चोन्‍खाङला शोरुप ङ ख्‍यिराङला ठाकुरे सिनी गोङ्‍बा शोयी। कोन्‍छ्‌योककी ख्‍यिराङला काङगी थोक्‍ला कताङ वे, ती दोके राङ मिजी क्‍योङ।
EPH 4:2 नरी सेम बोल्‍मु ताङ च्‍यङ्‍च्‍यु सेम्‍बा च्‍युङ्‍नी हम क्‍यानी च्‍यिककी च्‍यिकला ङ्‍यिङ्‍ज्‍ये की।
EPH 4:3 खोकी थु चाङ्‍माकी ख्‍यिराङ तेरीला सेम च्‍यिक राङ जोवु तप्‍की ख्‍यिराङ सेम थिन्‍नी लोदिमु क्‍यानी दे थुपा की।
EPH 4:4 खोकी ख्‍यिराङला कताङ नङ्‍गुप पेला रेवा च्‍यिककी थोक्‍ला कताङ नङ्‍गुप दोके जु साङ च्‍यिक राङ यिन, खोकी थु चाङ्‍मा साङ च्‍यिक राङ यिन।
EPH 4:5 चोवो कोन्‍छ्‌योक ताङ तेपा ताङ बप्‍तिस्‍मा च्‍यिक राङ यिन।
EPH 4:6 दाक्‍पु तेरीकी पपा कोन्‍छ्‌योक ति च्‍यिक राङ यिन। खोकी दाक्‍पु तेरीकी खला ओङ्‍ज्‍येन क्‍या नङ्‍गिवी, तमा खो दाक्‍पु तेरीकी मुला ज्‍युनी दाक्‍पी मिजी नेमा लाका क्‍या नङ्‍गिवी।
EPH 4:7 यिने येशू ख्रीष्‍टकी नोवाला वोतुप ङ्‍येम्‍बा दोके खोकी दाक्‍पु तेरीला कटिन नम्‍बा कुतुक कुतुक नङ्‍नी वे।
EPH 4:8 ती तप्‍की कोन्‍छ्‌योककी सुङला तीकी थोक्‍ला दुक सिनी टि वे, “खो येर केला तेङ फेपुप पेला चोन्‍खाङला शोरुप मीतिवाला खोकी मुला राङ टिनी फेप्‍सुङ, तमा खोरे मीतिवाला ङ्‍येम्‍बा नाङ्‍सुङ।”
EPH 4:9 दी खो येर केला तेङ फेपुप तेन्‍दोक ति काङ यिन सिसिन, खो ति गोमाला दी जम्‍बुलिङला पाप्‍नी फेप्‍सुङ सिक्‍यावु यिन।
EPH 4:10 खो मर फेप्‍सिमा तेरी च्‍यालकतिवी खला ग्‍येला कितुपला येलुङ खो देवाच्‍येन सिनाङ मङ केला तेङ फेप्‍सुङ।
EPH 4:11 तमा खोकी मी ललाइला ति लोमा छ्‌ये, ललाइला ति खोरे लुङ्‍तेम्‍बा, ललाइला ति ख्‍याप्‍टाक कितुप मी, ललाइला ति चर्चला गोमा कितुप गेकेन, ललाइला ति खोकी सुङ लोपुप गेकेन जो नाङ्‍सुङ।
EPH 4:12 खोकी तुक क्‍या नङ्‍गुप ति तिवा तेरीकी खोकी लाका ल्‍यामो कितुप जोनी ख्रीष्‍टकी जु यिन्‍दुप चर्च ति येर फर्शी सिनी यिन।
EPH 4:13 तमा दाक्‍पु तेरी कोन्‍छ्‌योककी सेवुला तेपा कितुप ताङ खोला ङो शेवुला च्‍यिक राङ च्‍युङ्‍नी ख्रीष्‍टला छाछिङी वोतुप दोके दाक्‍पु साङ खोकी छाछिङीला लेपुप सेक मङ मङ फरिन डिवी।
EPH 4:14 तुक क्‍यानी दाक्‍पु मीतिवी जिनोक ताङ दुक्‍टा ताङ नम्‍बा कुतुककी येन्‍देन मेटेङ्‍बुला फार छुर युकुप आङातिवा दोके मोडोशी।
EPH 4:15 बोरु ख्‍यिराङ ति च्‍यिककी च्‍यिकला ङ्‍यिङ्‍ज्‍ये क्‍यानी ताम्‍ङे टेङ्‍बु लाप्‍नी तेरी ताम्‍ङेला ख्रीष्‍ट दोके छाछिङी च्‍युङ्‍नी फरिन डो गोकिवी। खो ति गो यिन।
EPH 4:16 ती गो नेसुर दाक्‍पी जुकी तेरी थिन्‍जामतिवा थिनी जु च्‍यिक च्‍युङ्‍गिवी। तमा जुला वोतुप तेरी येन्‍लकतिवी दाक दाक्‍पी लाका ल्‍यामु क्‍यासिमा जु ति मङ रम्‍बु डिवी। तमा च्‍यिककी च्‍यिकला ङ्‍यिङ्‍ज्‍ये कियी ती जु ति खोरुङ राङ फरिन डिवी।
EPH 4:17 ती तप्‍की ङ दी ताम्‍ङे ति चोवो येशूकी मिङला ठाकुरे सिरिन। यहूदी मिन्‍दुप मिरिक यम्‍बाकी मीतिवी तेर्मेकी नासामतिवा तङ्‍नी मिजी क्‍यङ्‍गुप दोके ख्‍यिराङ ति तफेन्‍ला तुका मिजी माक्‍योङ।
EPH 4:18 तिवी सेम क्‍योङ्‍बु गल्‍नी नक्‍तोमी गलुप तप्‍की तिवी कोन्‍छ्‌योककी टेङ्‍बु हाक्‍माकोनी खोकी नङ्‍गुप मिजी ति तिवी माङ्‍ये वे।
EPH 4:19 तिवा ङोछा मेतुप ताङ शम्‍डेन कितुप ताङ देर्पाला ख्‍येल्‍नी सेम नोजु कितुप गल वे।
EPH 4:20 यिने ख्‍यिरा याङ ख्रीष्‍टकी कोर्ला तुकै मालाप वे।
EPH 4:21 ख्‍यिरा याङ येशू ख्रीष्‍टला वोतुप टेङ्‍बुकी कोर्ला लाप्‍नी हाक्‍कोनी वे सिरुप ति ङला छ्‌या वे।
EPH 4:22 तुक क्‍यानी ख्‍यिरा मिजी ङ्‍यिङ्‍बा नेसुर वुङ्‍गुप किताङ नालु ति मज्‍या ङ्‍यिङ्‍बा पिनी क्‍युरुप दोके क्‍यानी क्‍युर। ती मिजी ङ्‍यिङ्‍बा ति जिनोक जोप नासाम दुक्‍टा नेसुर वावु तप्‍की ना डिवी।
EPH 4:23 तमा ख्‍यिरा सेम ति कोन्‍छ्‌योककी थु चाङ्‍मा नेसुर टेङ्‍बु जोनी
EPH 4:24 मज्‍या सम्‍बा कोन्‍दुप दोके ख्‍यिरा मिजी साङ सम्‍बा फोकिवी। ती मिजी सम्‍बा ति कोन्‍छ्‌योक दोके टेङ्‍बु ताङ मोवा वोतुप च्‍युङ्‍गुप यिन।
EPH 4:25 तुक क्‍यानी ख्‍यिराङ जिनोक जोप क्‍युर्नी रङगी मीतिवी मुला ताम्‍ङे टेङ्‍बु लोप। च्‍यिलासिसिन दाक्‍पु तेरी जु च्‍यिककी येन्‍लकतिवा यिन।
EPH 4:26 ख्‍यिराङ ङ्‍यिर्मु लासिनाङ दिक्‍पा ति माकी, ङ्‍यिमा गावु सिनाङ गोमाला के ती ङ्‍यिर्मु ति तोर्शी।
EPH 4:27 डेला ख्‍यिरा नाङ्‍ला लाका कि माज्‍यी।
EPH 4:28 कुन कितुपतिवी साङ तफेन्‍ला कुन मिकिशी। तीकी लाका टेमु क्‍यानी सशी, तमा कतुकारला ख्‍येलुपतिवाला तेर थुप्‍शी।
EPH 4:29 ख्‍यिरा ख नेमा चोताम मालाप, यिने मीला यर्के लोङ्‍गुप ताङ लप गोवु ताम्‍ङे ल्‍यामु तिराङ लोप। तमा ङ्‍येन्‍दुपतिवाला साङ कटिन थोप्‍शी।
EPH 4:30 तमा कोन्‍छ्‌योककी थु चाङ्‍माला सेम्‍दुक मालोङ, ती थु चाङ्‍माकी राङ ख्‍यिराङला दिक्‍पा ने थर ज्‍यितुप तुजे मालेपा सेक्‍ला ख्‍यिराङ खोकी ति यिन सिनी त ग्‍यप्‍नी वे।
EPH 4:31 तेरी सेम मेलोक्‍पा वोतुप ताङ शेताङ कितुप ताङ ङ्‍यिर्मु कितुप ताङ हराङ हुरुङ कितुप ताङ मारे तोङ्‍गुप तेरी परकी दुक्‍टातिवा मुला राङ क्‍युर।
EPH 4:32 बोरु चुक क्‍यानी येशू ख्रीष्‍टकी क्‍या नङ्‍गुप लाका नेसुर कोन्‍छ्‌योककी ख्‍यिरा दिक्‍पा माफ नङ वे, तुक राङ क्‍यानी ख्‍यिरा साङ च्‍यिककी च्‍यिकला सेम बोल्‍मु ताङ च्‍यम्‍बा क्‍यानी माफ बिन।
EPH 5:1 तुक क्‍यानी ख्‍यिराङ ति कोन्‍छ्‌योककी ङ्‍यिङ्‍ज्‍येवु आङातिवा यिन्‍दुप तप्‍की खोकी लुमु से गोकिवी।
EPH 5:2 येशू ख्रीष्‍टकी दाक्‍पुला ङ्‍यिङ्‍ज्‍ये क्‍या नङ्‍नी कोन्‍छ्‌योकला गा लङ्‍गुप बुल्‍वा ताङ जिन्‍बा च्‍युङ्‍नी दाक्‍पी दिक्‍पी थोक्‍ला टुङ्‍सुङ। तुक राङ क्‍यानी ख्‍यिराङ साङ च्‍यिककी च्‍यिकला ङ्‍यिङ्‍ज्‍ये की।
EPH 5:3 यिने ख्‍यिरा पर्ला शम्‍डेन कितुप ताङ तेरी परकी लाका मेटेङ्‍बु कितुप ताङ देर्पा कितुप लाकातिवा क्‍युर। च्‍यिलासिसिन तुका लाकातिवा कोन्‍छ्‌योकला तेपा कितुप मीतिवी कितुप पोमु मेङ्‍गिवी।
EPH 5:4 ताम्‍ङे चोताम लपुप ताङ अम्‍बारङ्‍शिङ कितुप ताङ ख्‍येप्‍साङ मेवु ताम्‍ङे ति क्‍युर, बोरु कोन्‍छ्‌योकला थुचिछे पुल।
EPH 5:5 दी ताम्‍ङे ति ख्‍यिरा तेन्‍तेन क्‍यानी हाक्‍कोवा की। शम्‍डेन कितुप ताङ मेटेङ्‍बु कितुप ताङ देर्पा कितुप ति कुला छ्‍यो तङ्‍गुप च्‍यिन्‍दै यिन। तुका मीतिवा ख्रीष्‍ट ताङ कोन्‍छ्‌योककी ग्‍येल्‍खापला शुक मोछ्‍योवी।
EPH 5:6 सी साङ ख्‍यिराङला ताम्‍ङे मेशोलोक लाप्‍नी जिनोक मोजोशी, च्‍यिलासिसिन ती ताम्‍ङेकी जोसालेन्‍सिन कोन्‍छ्‌योककी सुङ मेङ्‍येन्‍दुपतिवी खला खोकी पर्च्या फोकिवी।
EPH 5:7 तुक क्‍यानी ख्‍यिराङ तुका मीतिवी दला माशुक।
EPH 5:8 च्‍यिलासिसिन तोङ्‍ला कोन्‍छ्‌योकला ङो माशेवु पेला ख्‍यिराङ नकतोमीला युवु यिन, त याङ ख्‍यिराङला खोकी ठछ्‍येली जो नाङ्‍सुङ। तुक क्‍यानी ख्‍यिराङ ठछ्‍येलीला युसा।
EPH 5:9 ती ख्‍यिरा ठछ्‍येलीकी लाकातिवा ति ल्‍यामु वोतुप ताङ टेङ्‍बु ताङ काङ साङ जिनोक मेतुप यिन।
EPH 5:10 तमा कोन्‍छ्‌योककी सेमला डोप लाका ति काङ यिनोक ती ति लोपुप छोल।
EPH 5:11 नक्‍तोमी वुङगी तेर्मे वोतुप लाकातिवाला माशुक, बोरु तुका लाका ति मेलोक्‍पा यिन सिनी छ्‌या तेन।
EPH 5:12 च्‍यिलासिसिन तुका मीतिवी छ्‌याकला क्‍यावु लाका मेलोक्‍पातिवी कोर्ला ताम्‍ङे कितुप साङ ङोछा यिन।
EPH 5:13 ठछ्‍येलीकी छ्‍या देन्‍दुप पेला बानी ज्‍यकुप ताम्‍ङेतिवा तेरी ठछ्‍येली थोङ्‍गिवी।
EPH 5:14 च्‍यिलासिसिन तेरी ताम्‍ङेतिवा थोङ ज्‍यितुप ति ठछ्‍येली यिन। ती तप्‍की मीतिवी दुक सिनी सिवी, “ओ ङ्‍यिलोकुपतिवा लो! तमा ख्‍यिराङ शेपतिवा शेप नेमा येर खोक लो! ख्रीष्‍टकी ख्‍यिराङला वोसिर नङ्‍गिवी।”
EPH 5:15 तुक क्‍यानी ख्‍यिरा किताङ नालु ति चुकै वे, ल्‍यामो क्‍यानी नासाम तोङ! रिक्‍पा मेतुप मी दोके मिन, यिने रिक्‍पा वोतुप मी दोके क्‍यानी युसा।
EPH 5:16 त याङ तुजे ल्‍यामु मेतुप तप्‍की ख्‍यिराङला वोतुप च्‍युतिवाला तुक राङ डो माज्‍यी।
EPH 5:17 तुक क्‍यानी अम्‍बारङ्‍शिङ माकी, यिने कोन्‍छ्‌योककी नोवा काङ यिनोक सिनी हाक्‍कोवा की।
EPH 5:18 छ्‌याङ आराक थुनी जिनी रङगी जुला ना मातोङ, यिने खोकी थु चाङ्‍माकी क्‍येङ्‍नी देता।
EPH 5:19 च्‍यिककी च्‍यिकला कोन्‍छ्‌योककी थु चाङ्‍मा नेसुर वुङ्‍गुप खोला सोवा देकुप तेरी परकी लुतिवा लोसा। तमा दाक दाक्‍पी सेमगी दिङ नेज्‍युनी दातिवा तेन्‍नी चोवो येशूला सोवा तेक।
EPH 5:20 नरी तेरी ताम्‍ङेकी थोक्‍ला दाक्‍पी चोवो येशू ख्रीष्‍टकी मिङला पपा कोन्‍छ्‌योकला थुचिछे पुल।
EPH 5:21 येशू ख्रीष्‍टला ताङ्‍देन क्‍यानी च्‍यिक ताङ च्‍यिककी ओङला देता।
EPH 5:22 पेर्मीतिवा, कोन्‍छ्‌योककी कला युकुप दोके दाक दाक्‍पी ख्‍योवी ओङला देता।
EPH 5:23 च्‍यिलासिसिन ख्रीष्‍ट ति चर्चकी गो यिन्‍दुप दोके पेर्मीकी गो ति ख्‍योवा यिन। तमा चर्च ति ख्रीष्‍टकी जु यिन, खो ति चर्चला थर ज्‍यितुप यिन।
EPH 5:24 ख्रीष्‍टकी कला चर्चकी ङ्‍येन्‍दुप दोके पेर्मीतिवी साङ ख्‍योवी काङ सिक्‍यावु ति तेरी ङ्‍येन गोकिवी।
EPH 5:25 ख्‍योवातिवा, ख्रीष्‍टकी चर्चला ङ्‍यिङ्‍ज्‍ये क्‍यानी खोरो मिजी साङ चर्चकी थोक्‍ला जिन्‍बा च्‍युङ्‍गुप दोके दाक दाक्‍पी पेर्मीतिवाला ङ्‍यिङ्‍ज्‍ये की।
EPH 5:26 खोकी तुक क्‍या नङ्‍गुप ति चर्चला खोकी सुङ नेसुर चाङ्‍मा ताङ टेङ्‍बु जो नाङ्‍शी,
EPH 5:27 तमा टेमा माछ्‌यावु ताङ ङ्‍येर्मा माच्‍यम्‍बुप ताङ काङ साङ मडी मेतुप डछ्‌येर्मु चर्च जोनी खोरुङला राङ छ्‌या देन्‍शी, तमा ती चर्च ति चाङ्‍मा ताङ क्‍येन मेतुप वुङ्‍शी सिनी यिन।
EPH 5:28 तुक राङ क्‍यानी ख्‍योवातिवी साङ दाक दाक्‍पी पेर्मीला खोरुङला दोके ङ्‍यिङ्‍ज्‍ये कि गोकिवी। खोरो पेर्मीला ङ्‍यिङ्‍ज्‍ये कितुप तीकी खोरुङला साङ ङ्‍यिङ्‍ज्‍ये किवी।
EPH 5:29 च्‍यिलासिसिन चुका मी तीकी साङ खोरो जुला ङ्‍यिङ्‍मर मिकिवी, यिने तीला समा तेरुप ताङ ल्हाटे किवी। ती दोके ख्रीष्‍टकी साङ चर्चला तुक राङ क्‍या नङ्‍गिवी।
EPH 5:30 च्‍यिलासिसिन दाक्‍पु ति खोकी जुकी येन्‍लक यिन।
EPH 5:31 कोन्‍छ्‌योककी सुङला दुक सिनी टि वे, “तुक क्‍यानी मी तीकी खोरो पपा आमाला क्‍युर ज्‍याक्‍नी पेर्मी ताङ मुला थिन्‍नी देकिवी। तमा तिवा ङ्‍यिवुकी जु ति च्‍यिक राङ डिवी।”
EPH 5:32 दी ति छासे छ्‍याकला वोतुप ताम्‍ङे यिन। ङ ति दी ताम्‍ङे ख्रीष्‍ट ताङ चर्चकी तम्‍जीकी कोर्ला लपिन।
EPH 5:33 काङ यिन्‍सिनाङ ख्‍यिराङ तेरीकी दाक दाक्‍पी पेर्मीला रङला दोके ङ्‍यिङ्‍ज्‍ये किशी, पेर्मीतिवी साङ रङगी ख्‍योवाला ताङ्‍देन किशी।
EPH 6:1 पुज्‍युङपुमतिवा, कोन्‍छ्‌योककी क नङ्‍गुप दोके दाक दाक्‍पी पपाआमी खला ङ्‍येन, च्‍यिलासिसिन दी ति ताम्‍ङे टेङ्‍बु यिन।
EPH 6:2 रङगी पपाआमाला ताङ्‍देन की, दी ति तोङ्‍ला के कोन्‍छ्‌योककी मोशाला थाक्‍छ्‌येन नङ्‍गुप क तङ्‍बु यिन।
EPH 6:3 तुक क्‍यासिन ख्‍यिराङ दी जम्‍बुलिङला कोन्‍छ्‌योककी मोलाम थोप्‍नी छे रिङ्‍बु च्‍युङ्‍गिवी।
EPH 6:4 पपातिवा, खोरो पुज्‍युङपुमतिवाला ङ्‍यिर्मु मालोङ, यिने तिवाला चोवो येशूकी येन्‍देन ताङ तालिम बिन्‍नी र्‍होल।
EPH 6:5 ख्‍यिराङ योक्‍पुतिवा, ख्रीष्‍टला ताङ्‍देन क्‍यावु दोके दी जम्‍बुलिङकी ख्‍यिरा ज्‍यिन्‍दाकतिवी सिक्‍यावु ताम्‍ङे ति ज्‍यिवा क्‍यानी र्‍हुकिन सिरा सेमगी दिङ नेज्‍युनी की।
EPH 6:6 मीतिवाला गा लोङ्‍गुपला तिवी मिङ्‍गाला तिराङ छ्‌या देन्‍दुप लाका माकी, यिने ख्रीष्‍टला शब्‍ज्‍यी पुलुप दोके सेम टेङ्‍बु क्‍यानी कोन्‍छ्‌योककी नोवाला वोतुप लाका की।
EPH 6:7 मीतिवी थोक्‍ला मिन, यिने चोवो येशूला शब्‍ज्‍यी पुलुप दोके सेम गा क्‍यानी किसा।
EPH 6:8 दी ताम्‍ङे ति हाक्‍कोवा की। योक्‍पु यिन्‍शी मिन्‍शी सी लाका ल्‍यामु किवे, तीला चोवो येशूकी छ्‍यक्‍तक नङ्‍गितो।
EPH 6:9 ज्‍यिन्‍दाकतिवा, रङगी योक्‍पुतिवाला किताङ ल्‍यामु की, तिवाला वोरु मादेन। दी ति हाक्‍कोवा की, ख्‍यिराङ ङ्‍यिकरकी ज्‍यिन्‍दाक ति देवाच्‍येनला ज्‍यु वे। खोकी सुला साङ ख्‍ये मेबेवी।
EPH 6:10 तेरी सिनाङ तिङ्‍ला ङ सिरिन, ख्‍यिराङ चोवो येशूकी ओङला ङार छ्‍येवु वुङ गोकिवी।
EPH 6:11 शैतानकी च्‍युतिवी तेन्‍दोकला लानी दे थुपुपला कोन्‍छ्‌योककी नङ्‍गुप तेरी मक्‍मीकी लाक्‍च्‍येतिवा लोसा।
EPH 6:12 च्‍यिलासिसिन दाक्‍पी ग्‍यकुप मक ति मी ताङ मुला मिन, यिने ओङ्‍ज्‍येन कितुपतिवा ताङ ङार वोतुपतिवा ताङ दी जम्‍बुलिङकी दुक्‍टाकी ङार ताङ देवाच्‍येनला वोतुप डेतिवी मुला यिन।
EPH 6:13 तुक क्‍यानी ती तेरी मक्‍मीकी लाक्‍च्‍येतिवा लङ्‍नी ती तुजे मेलोक्‍पाकी खला ग्‍येल थुपा की। तमा ती मक ग्‍यकुप लाका तेरी सिन्‍सिमा रम्‍बु क्‍यानी दे थुपा की।
EPH 6:14 ती तप्‍की ख्‍यिराङ केल्‍दाङला जिनोक मेतुप करा च्‍यी। तमा छेकोकला टेङ्‍बुकी क्‍योरुप च्‍यालक कोन।
EPH 6:15 तमा लोदिमु नङ्‍गुप कोन्‍छ्‌योककी लेन ल्‍यामु ख्‍याप्‍टाक कि डोपला काङ्‍बाला काचा कोन।
EPH 6:16 लकला तेपा रम्‍बुकी खोरुङ र्‍होकुपला क्‍योरुप च्‍यालक खुर, तुक क्‍यासिन ख्‍यिरा तेन्‍दोकला लावु डेकी तेरी मेलापतिवा से थुप्‍किवी।
EPH 6:17 गोला दिक्‍पा ने थरुप शमुङ कोन। तमा कोन्‍छ्‌योककी थु चाङ्‍माकी खुर्पा खुर, ती ति कोन्‍छ्‌योककी सुङ यिन।
EPH 6:18 नरी खोकी थु चाङ्‍माकी क्‍येङ्‍नी तेरीकी थोक्‍ला मोपोर ताङ गोङ्‍बा पुल। तोजो तिराङ मिन, टेमु ताङ च्‍याङ्‍से क्‍यानी कोन्‍छ्‌योकला तेपा कितुपतिवा तेरीकी थोक्‍ला नरी मोपोर किसा।
EPH 6:19 ङ खोकी सुङ ख्‍याप्‍टाक कितुप पेला ज्‍यिवा माक्‍यावा क्‍यानी छ्‍याकला वोतुप कोन्‍छ्‌योककी सुङगी तेन्‍दोक ति ख्‍याप्‍टाक कि थुप्‍शी सिनी मोपोर क्‍या नाङ।
EPH 6:20 तीकी थोक्‍ला राङ ङ च्‍याटोक ग्‍यप्‍नी चोन्‍खाङला वे, यिन्‍सिनाङ ङ ख्रीष्‍टकी लेन ल्‍यामु ख्‍याप्‍टाक क्‍यावु मी यिन। ङे चुक क्‍यानी लप गोकिवी ती ति ङाडेङ क्‍यानी लप थुप्‍शी सिनी मोपोर किसा।
EPH 6:21 ङ चुकै वे, काङ कियी वे, ती ति ख्‍यिरा साङ हाक्‍कोशी सिनी कोन्‍छ्‌योकला ल्‍यामो क्‍यानी शब्‍ज्‍यी बुलुप ङे ङ्‍यिङ्‍ज्‍येवु नुप तुखिकसकी तेरी ताम्‍ङे ति ख्‍यिराङला शेकितो।
EPH 6:22 दे ङ्‍यिराङला चुकै वे ख्‍यिरा साङ हाक्‍कोशी, तमा ख्‍यिरा सेमला टोङ्‍गु तेरुपला तीला ङे ख्‍यिरा चाला तङ्‍गुप यिनो।
EPH 6:23 पपा कोन्‍छ्‌योक ताङ चोवो येशू ख्रीष्‍ट नेमा खोला तेपा कितुपतिवा तेरीला तेपा नेसुर वुङ्‍गुप ङ्‍यिङ्‍ज्‍ये ताङ लोदिमु वुङ्‍शी।
EPH 6:24 तमा दाक्‍पी चोवो येशू ख्रीष्‍टला नरी ङ्‍यिङ्‍ज्‍ये कितुपतिवा तेरीकी मुला कटिन ति थोप्‍शी।
PHI 1:1 टसी देलेक! दी यिकी ति ख्रीष्‍ट येशूकी थोक्‍ला शब्‍ज्‍यी कितुप ङ पावल ताङ तिमोथी नेसुर फिलिप्‍पीला वोतुप येशूला तेपा कितुप मीतिवा तेरी ताङ चर्चला गोमा कितुप मीतिवा ताङ चर्चला ल्हाटे कितुप मीतिवाला टिवु यिनो।
PHI 1:2 दाक्‍पी पपा कोन्‍छ्‍योक ताङ चोवो येशू ख्रीष्‍ट नेमा ख्‍यिराङला कटिन ताङ लोदिमु वुङ्‍शी।
PHI 1:3 नाम्‍साङ ख्‍यिराङला टेन्‍दुप पेला ङ ङे कोन्‍छ्‍योकला थुचिछे बुलिन।
PHI 1:4 तमा ख्‍यिराङ तेरीकी थोक्‍ला ङ मोपोर कितुप पेला नरी कोन्‍छ्‍योकला सेम गा क्‍यानी मोपोर कितिन।
PHI 1:5 च्‍यिलासिसिन ख्‍यिरा गोमाला येशू ख्रीष्‍टकी लेन ल्‍यामु थोवु पेला नेज्‍यु तन्‍दा सेक ती लेन ल्‍यामु ख्‍याप्‍टाक कितुपला ङ ताङ मुला दाल्‍जा किटे क्‍यासुङ।
PHI 1:6 तमा ख्‍यिरा मिजीला लाका ल्‍यामु गो जुवु कोन्‍छ्‍योककी राङ येशू ख्रीष्‍ट फेवु तुजे सेक ख्‍यिरा मुला ज्‍युनी ती लाका ति सिन्‍दा किवी सिरुप ति ङला तेपा वे।
PHI 1:7 ख्‍यिराङ तेरीकी थोक्‍ला ङे दी नासाम तङ्‍गुप ति टेके यिन। च्‍यिलासिसिन तसाम ङ चोन्‍खाङला वोतुप पेला ताङ चोन्‍खाङ नेमा तेन्‍नी लेन ल्‍यामु ख्‍याप्‍टाक कितुप ताङ तीला तेन्‍तेन कितुप पेला कोन्‍छ्‍योककी नङ्‍गुप कटिनला ख्‍यिरा ङ ताङ मुला लाका क्‍यासुङ। तुक क्‍यानी ख्‍यिराङला नरी ङे सेमला ज्‍याङ वे।
PHI 1:8 येशू ख्रीष्‍टकी सेम दोके ख्‍यिराङ तेरीला ङ छासे नासाम शर्नी ठेतुपला गा लासुङ। दी ताम्‍ङे ति टेङ्‍बु यिन। तीकी थोक्‍ला कोन्‍छ्‍योक पङ्‍बु वे।
PHI 1:9 ख्‍यिरा रिक्‍पा ताङ ल्‍यामु मेलोवा काङ यिन सिरुप ति हाक्‍कोनी ख्‍यिरा ङ्‍यिङ्‍ज्‍ये ति मङ मङ फेलिन डोशी सिनी ङ मोपोर कितिन।
PHI 1:10 तुक क्‍यानी चुका ताम्‍ङे ति खक्‍छ्‍येवु यिन ति ख्‍यिरा बे थुप्‍शी। तमा ख्रीष्‍ट फेवु तुजे सेक ख्‍यिराङ क्‍येन मेतुप ताङ टेङ्‍बु क्‍यानी दे थुप्‍शी।
PHI 1:11 तमा येशू ख्रीष्‍ट नेमा वुङ्‍गुप टेङ्‍बुकी ख्‍यिरा मिजीला डेलु गरुप दोके छाछिङी च्‍युङ्‍नी कोन्‍छ्‍योकला मोवा कितुप ताङ सोवा देकुप च्‍युङ थुप्‍शी।
PHI 1:12 अच्‍युनुपतिवा, ख्‍यिराङला दी ताम्‍ङे ति ल्‍यामु हाक्‍कोशी सिरुप ति ङे नोवा वे। काङ यिन सिसिन ङला छेटाङ ख्‍येलुप तप्‍की राङ लेन ल्‍यामु ख्‍याप्‍टाक कितुप लाका मङ च्‍युङ्‍नी वे।
PHI 1:13 च्‍यिलासिसिन ख्रीष्‍टकी कोर्ला सुङ ख्‍याप्‍टाक क्‍यावु तप्‍की ङ चोन्‍खाङला शोरुप यिन सिरुप ति रोमी ग्‍येल्‍खाङला र्‍हेन्‍दुप मक्‍मीतिवा ताङ यम्‍बा मीतिवा तेरीला छ्‍या वे।
PHI 1:14 ङ चोन्‍खाङला शोर्सिमा माङ्‍शोक तेपा कितुप अच्‍युनुपतिवा ङार छ्‍येवु गल्‍नी कोन्‍छ्‍योककी सुङ ङाडेङ क्‍यानी ख्‍याप्‍टाक क्‍यासुङ।
PHI 1:15 वुतुङ के ललाइ अच्‍युनुपतिवा ति ठतोक लानी खाँदा कियी सिरा लेन ल्‍यामु ख्‍याप्‍टाक क्‍यासुङ, ललाइकी नासाम ल्‍यामो तङ्‍नी ख्रीष्‍टकी कोर्ला लेन ल्‍यामु ख्‍याप्‍टाक क्‍यासुङ।
PHI 1:16 नासाम ल्‍यामो तङ्‍नी लेन ल्‍यामु ख्‍याप्‍टाक कितुपतिवी कोन्‍छ्‍योककी लेन ल्‍यामु र्‍होकुपला राङ ङ चोन्‍खाङला शोरुप यिन सिरुप हाक्‍कोनी ङ्‍यिङ्‍ज्‍ये लानी ख्‍याप्‍टाक क्‍यासुङ।
PHI 1:17 यिने ठतोक लानी खाँदा कितुपतिवी ङला चोन्‍खाङला मङ छेटाङ ङ्‍येशी नोनी सेम टेङ्‍बु क्‍यानी मिन, यिने खोरो थोक्‍ला तिराङ नासाम ताङ्‍नी ख्रीष्‍टकी कोर्ला ख्‍याप्‍टाक क्‍यासुङ।
PHI 1:18 काङ यिन्‍सिनाङ खक्‍छ्‍येवु ताम्‍ङे ति दी यिन। तिवी सेम टेङ्‍बुकी ख्‍याप्‍टाक क्‍यासिनाङ, सेम मेटेङ्‍बुकी क्‍यासिनाङ ख्रीष्‍टकी कोर्ला राङ ख्‍याप्‍टाक क्‍यावु यिन। तीकी थोक्‍ला ङ छासे गा लानी वे। तमा नरी गा कितिन।
PHI 1:19 च्‍यिलासिसिन ख्‍यिरा क्‍यावु मोपोर ताङ येशू ख्रीष्‍ट नेमा वावु थु चाङ्‍माकी दाल्‍जा क्‍यानी ङ दी चोन्‍खाङ ने थर थुप्‍किवी सिरुप ति ङला छ्‍या वे।
PHI 1:20 ङे खक्‍छ्‍येवुला कि राङ गोवु लाका ताङ रेवा ति दी यिन। ङ नाम्‍साङ ङोछाला माख्‍येल्‍नी छासे ङाडेङ ङ्‍येनी शिसिनाङ सेन्‍बु वोसिनाङ नरी दोके तन्‍दा साङ ङे मिजी ति ख्रीष्‍टकी थोक्‍ला मोवा कितुप डोशी।
PHI 1:21 च्‍यिलासिसिन ङ मिजी क्‍योङ्‍गुप ति ख्रीष्‍टकी थोक्‍ला यिन, तमा शेप साङ ङे थोक्‍ला ख्‍येप्‍साङ यिन।
PHI 1:22 दोजो ङ सेन्‍बु लुसिन ख्रीष्‍टकी थोक्‍ला मङ लाका ल्‍यामु कितुप डिवी। यिने ङ शिते सेन्‍बु लुकिते चुका ति बे गोकिवी ती ति ङला छ्‍या मे।
PHI 1:23 तुक क्‍यानी ङ काङ कितुप काङ कितुप गल वे। ङला याङ जम्‍बुलिङ क्‍युर ज्‍याक्‍नी ख्रीष्‍टकी चिप्‍ला राङ देतुप नो वे। ङला ती राङ ल्‍यामु यिन।
PHI 1:24 यिन्‍सिनाङ ङ ति ख्‍यिरा थोक्‍ला राङ सेन्‍बु लु गोकिवी।
PHI 1:25 दी ताम्‍ङे ति तेन्‍तेन हाक्‍कोनी ङ सेन्‍बु देतिन। ख्‍यिराङ येशूला तेपा क्‍यानी येर्के डोप ताङ गा किशी सिनी ङ ख्‍यिराङ तेरीकी मुला नरी देतिन।
PHI 1:26 तुक क्‍यानी ङ येलुङ ख्‍यिरा ते वुङ्‍गुप पेला ख्‍यिरा ङे थोक्‍ला येशू ख्रीष्‍टला मङ सोवा देक थुप्‍किवी।
PHI 1:27 त खक्‍छ्‍येवु ताम्‍ङे ति दी राङ यिन, ख्‍यिरा मिजी ति ख्रीष्‍टकी लेन ल्‍यामुला सुङ्‍गुप दोके च्‍युङ्‍शी। तुक क्‍यानी ङ ख्‍यिरा ते वोसिनाङ माङुसिनाङ ख्‍यिराङ सेम च्‍यिक्‍पा राङ च्‍युङ्‍नी डेकला देतुप ताङ लेन ल्‍यामुला वोतुप तेपाकी थोक्‍ला मुला राङ हुर्ताक क्‍यावु ति ङे थो थुप्‍शी।
PHI 1:28 तमा ख्‍यिराङ रङगी डतिवी काङ क्‍यासिनाङ ज्‍यिवा माकी। तुक क्‍यासिन ख्‍यिरा डतिवा फम्‍बुप ताङ ख्‍यिराङ ति दिक्‍पा ने थरुप त छ्‍या देन्‍गिवी। ती थर्वा ति कोन्‍छ्‍योककी नङ्‍गिवी।
PHI 1:29 च्‍यिलासिसिन ख्‍यिराङ ख्रीष्‍टला तेपा कितुप तिराङ मिन, यिने खोकी थोक्‍ला दुक्‍पा साङ खुर गोकिवी। तुक कितुप ति ख्रीष्‍टकी नङ्‍गुप कटिन यिन।
PHI 1:30 तमा ङे कशेन दुक्‍पा खुरुप ति ख्‍यिरा थोङ वे। तन्‍दा साङ ङ ती दुक्‍पा राङ खुरिन वोतुप ति ख्‍यिरा थोनी वे, ख्‍यिरा साङ ङे दोके राङ क्‍यानी ती दुक्‍पा ति खुरिन वे।
PHI 2:1 दोजो येशू ख्रीष्‍टला तेपा क्‍यासिमा ख्‍यिरा मिजीला काङ टोङ्‍गु वोसिन, याङ्‍ना खोकी ङ्‍यिङ्‍ज्‍येकी लोदिमु च्‍युङ वोसिन, याङ्‍ना कोन्‍छ्‍योककी थु चाङ्‍माकी ओङला डिक्‍जोम च्‍युङ्‍नी तम्‍जी ल्‍यामु वोसिन, याङ्‍ना ख्‍यिरा मिजीला मी यम्‍बी थोक्‍ला सेम ल्‍यामु ताङ च्‍यम्‍बा वोसिन,
PHI 2:2 ख्‍यिराङ सेम च्‍यिक्‍पा राङ च्‍युङ्‍गुप ताङ ङ्‍यिङ्‍ज्‍ये च्‍यिक्‍पा राङ कितुप ताङ नासाम च्‍यिक्‍पा राङ तोङ्‍गुप ताङ तेरी थिन्‍नी ङला कशेन गा लोङ।
PHI 2:3 खोरो थोक्‍ला तिराङ नासाम तोङ्‍गुप ताङ अम्‍बारङ्‍शिङ कितुप मिन, यिने कुसु ज्‍यम्‍बु क्‍यानी च्‍यिककी च्‍यिकला खुरुङ सिनाङ छ्‍ये यिन सिनी नो की।
PHI 2:4 ख्‍यिराङ रङगी थोक्‍ला तिराङ नासाम मातोङ, यिने मी यम्‍बी थोक्‍ला साङ नासाम तोङ।
PHI 2:5 ख्‍यिरा सेम ति येशू ख्रीष्‍टला वोतुप दोके वुङ गोकिवी।
PHI 2:6 खो ति कोन्‍छ्‍योककी जुजमला वोसिनाङ खो कोन्‍छ्‍योक ताङ मुला च्‍यिक्‍पा राङ यिन सिनी खोकी ओङ छोलुप नो माक्‍या,
PHI 2:7 यिने तेरी क्‍युर ज्‍याक्‍नी लावाकी जुजमला च्‍युङ्‍नी दाक्‍पु दोके क्‍यानी दी जम्‍बुलिङला क्‍येसुङ।
PHI 2:8 तमा खोरुङला मो पाप्‍नी शि राङ गोसिनाङ कोन्‍छ्‍योककी कला ङ्‍येन्‍सुङ। तीकी तेन्‍दोक ति ग्‍यङ्‍शिङला कल्‍नी टुङ्‍गुप यिन।
PHI 2:9 ती तप्‍की कोन्‍छ्‍योककी खोला छासे चोछ्‍ये जो नाङ्‍नी तेरी सिनाङ चोछ्‍ये वोतुप मिङ ज्‍याङ नाङ्‍सुङ।
PHI 2:10 तुक क्‍यानी देवाच्‍येनला वोतुपतिवा ताङ जम्‍बुलिङला वोतुपतिवा ताङ जम्‍बुलिङकी वोक्‍ला वोतुपतिवा तेरीकी येशूकी मिङला ताङ्‍देन कितुपला पुमुङ जुकिवी।
PHI 2:11 तमा पपा कोन्‍छ्‍योककी मोवाकी थोक्‍ला तेरीकी ख नेमा येशू ख्रीष्‍ट राङ चोवो यिन सिनी मी मिङ्‍गाला खलाङ किवी।
PHI 2:12 ती तप्‍की ङे ङ्‍यिङ्‍ज्‍येवु अच्‍युनुपतिवा, ङ ख्‍यिरा मुला वोतुप पेला ख्‍यिरा ङे खला ङ्‍येन्‍सुङ। ती दोके त ङ मेतुप पेला मङ ङे ताम्‍ङे ङ्‍येन्‍नी सेमला ज्‍यिवा खुर्नी कोन्‍छ्‍योकला ताङ्‍देन क्‍यानी खोरुङ दिक्‍पा ने थरुप लाका तेरी सिन्‍दा कितुपला टेमु किसा।
PHI 2:13 च्‍यिलासिसिन कोन्‍छ्‍योककी ख्‍यिराङला खोरे नोवाला वोतुप दोके कितुप नासाम तोङ्‍गुप ताङ ती दोके लाका कितुप ओङ नाङ्‍नी ख्‍यिरा मिजी नेमा लाका कियी वे।
PHI 2:14 तमा ख्‍यिराङ काङ किसिनाङ मुक्‍तम देन्‍दुप ताङ खाँदा माक्‍यानी किसा।
PHI 2:15 तुक क्‍यासिन ख्‍यिराङ क्‍येन मेतुप ताङ टेङ्‍बु च्‍युङ्‍नी सुर्क्योक्‍पा ताङ ख्‍यम गलुप मीतिवी पर्ला मडी मेतुप कोन्‍छ्‍योककी गिपा च्‍युङ्‍गिवी। तमा ख्‍यिराङ कर्मा शरुप दोके वो ग्‍यकिवी।
PHI 2:16 मिजीकी सुङला ख्‍यिराङ रम्‍बु क्‍यानी देता, तमा ङे लाका ताङ हुर्ताक क्‍यावु ति तेर्मेला मोडोवी। तुक क्‍यासिन ख्रीष्‍ट फेवु तुजेला ख्‍यिराङ को छ्‍येवु तप्‍की ङे सेमला छासे गा लङ्‍गिवी।
PHI 2:17 ख्‍यिरा कोन्‍छ्‍योकला तेपा क्‍यावु ताङ शब्‍ज्‍यी क्‍यावु ति जिन्‍बा बुलुप दोके राङ यिन। ती जिन्‍बाकी थोक्‍ला ङ शि राङ गोसिनाङ शि थुप्‍किवी। तमा ख्‍यिराङ तेरीकी मुला ङ छासे गा कितिन।
PHI 2:18 तुक राङ क्‍यानी ख्‍यिराङ साङ ङ ताङ मुला राङ छासे गा कि गोकिवी।
PHI 2:19 येशू ख्रीष्‍टकी नोवा वोसिन तिमोथीला ङमु राङ ख्‍यिरा ते तोङ्‍गुप्‍नो। तुक क्‍यासिन ख्‍यिरा लेन थोनी ङला गा लङ्‍गिवी।
PHI 2:20 च्‍यिलासिसिन तिमोथी दोके सेम टेङ्‍बु क्‍यानी ख्‍यिरा थोक्‍ला पप कितुप मी ति ङे मुला सु साङ मे।
PHI 2:21 मी यम्‍बातिवा याङ येशू ख्रीष्‍टला मिन, यिने खोरो थोक्‍ला तिराङ नासाम तोङ्‍गिनोक।
PHI 2:22 यिने तिमोथी खोङ्‍तेर्मु वोतुप ति ख्‍यिराङला साङ छ्‍या वे। तीकी चुक क्‍यानी पुज्‍युङकी पपाला शब्‍ज्‍यी किवे, तुक राङ क्‍यानी ङ ताङ मुला लेन ल्‍यामु ख्‍याप्‍टाक कितुपला दाल्‍जा क्‍यासुङ।
PHI 2:23 तुक क्‍यानी ङला चोन्‍खाङ नेमा पि तोङ्‍गुप मोतोङ्‍गुप तेन्‍तेन च्‍युङ्‍लुङ्‍मे तिमोथीला ख्‍यिरा ते तोङ्‍गुप नो क्‍या वे।
PHI 2:24 चोवो येशूकी नोवा वोसिन ङ साङ ङमु राङ ख्‍यिरा ते वुङ थुप्‍शी सिनी चोवो कोन्‍छ्‍योकला रेवा क्‍या वे।
PHI 2:25 ङे नासामला इपाफ्रोडिटसला ख्‍यिरा ते तोङ गोवु ङे थोङ्‍सुङ। ती ति ङे नुप दोके क्‍यानी ङे मुला राङ लाका क्‍यासुङ, तमा लेन ल्‍यामु ख्‍याप्‍टाक कितुपला थमु ग्‍यकुप मक्‍मी दोके च्‍युङ्‍सुङ। तीकी ख्‍यिरा लेन ति ङला खुर्नी लेसुङ, ती ति ङला दाल्‍जा कितुप थोक्‍ला ख्‍यिरा ङे ते तङ्‍गुप यिन।
PHI 2:26 च्‍यिलासिसिन तीकी ख्‍यिराङ तेरीला छासे ठेतुप नोकिनोक। तमा ती अमोछ्‍योवु हाक्‍कोनी ख्‍यिराङ तीकी थोक्‍ला सेम्‍दुक क्‍यावु थोसिमा ती ति मङ यर्मिन मर्मिन गाल्‍सुङ।
PHI 2:27 वुतुङ के ती ति च्‍येती नासुङ, यिन्‍सिनाङ कोन्‍छ्‍योककी तीला च्‍यम्‍बा नाङ्‍सुङ। तीला तिराङ मिन, ङला पप लावु खला साङ पप मलाङ्‍शी सिनी कोन्‍छ्‍योककी च्‍यम्‍बा नाङ्‍सुङ।
PHI 2:28 ती तप्‍की तीला ख्‍यिरा ते तोङ्‍गुप ङला छासे नो वे। तीकी तेन्‍दोक ति तीला थोङ्‍सिमा ख्‍यिराङ गा किवी। तमा ङला साङ पप अला मलाङ्‍गिवी।
PHI 2:29 चोवोकी मिङला तीला छासे गा क्‍यानी गासो शुसा। तमा तुका मीतिवाला ताङ्‍देन किसा।
PHI 2:30 च्‍यिलासिसिन तीकी ख्रीष्‍टकी थोक्‍ला शि राङ गोसिनाङ लाका क्‍यासुङ, तमा ङे थोक्‍ला ख्‍यिरा कि मुथुपु शब्‍ज्‍यी कितुपला तो मिसिन शिसुङ।
PHI 3:1 अच्‍युनुपतिवा, तिङ्‍मी ताम्‍ङे यम्‍बा ति काङ यिन सिसिन ख्‍यिराङ चोवोला तेपा क्‍यावु मी यिन्‍दुप तप्‍की सेम गा की। दी यिकी लोकुर ग्यप्‍नी टिकुपला ङला छेरा मलङ्‍गिवी, ती ति ख्‍यिराङला र्‍होकुपला यिन।
PHI 3:2 फेतुप की दोके क्‍यानी थमु ग्‍यकुप ताङ लाका दुक्‍टा कितुप ताङ दिक्‍पा ने थरुपला जुला च्‍येतुप लुक्‍सु कि राङ गोकिवी सिरुप मीतिवा नेसुर च्‍याङ्‍से देता।
PHI 3:3 दाक्‍पु ति कोन्‍छ्‍योककी थोङ्‍दाङला वुतुङ के च्‍येतुप लुक्‍सु क्‍यावु मीतिवा यिन। च्‍यिलासिसिन दाक्‍पु याङ कोन्‍छ्‍योककी थु चाङ्‍मा नेमा खोला सोवा देकिवी, तमा येशू ख्रीष्‍टला तेपा क्‍यानी तेके किवी, जुला तिराङ कितुप लुक्‍सुला ति तेपा मिकिवी।
PHI 3:4 ताम्‍ङे कितुप यिन्‍सिन, ङ साङ तुका जुकी ताम्‍ङेतिवाला तेपा कि थुप्‍किवी। दोजो मी ललाइकी जम्‍बुलिङकी लुक्‍सुतिवाला तेपा किवी सिसिन ङ याङ मङ ती ताम्‍ङे कि थुप्‍किवी।
PHI 3:5 ङ क्‍येवु ङ्‍यिमा ग्‍येला यहूदी च्‍येतुप लुक्‍सु क्‍यावु यिन, तमा ङ इस्राएलकी मी यिन, तमा बिन्‍यमिन गिपाकी मी यिन, तमा वुतुङ के हिब्रू मी यिन, तमा यहूदी ठिमकी कोर्ला सि गोवु यिन्‍सिन ङ फरिसी यिन,
PHI 3:6 तमा टेमुकी कोर्ला सि गोवु यिन्‍सिन येशूला तेपा कितुप मीतिवाला ङे छेटाङ बिन्‍दुप यिन, तमा यहूदी ठिमला वोतुप टेङ्‍बुकी कोर्ला सि गोवु यिन्‍सिन ङ ति क्‍येन मेतुप मी यिन।
PHI 3:7 यिने ती तेरी ताम्‍ङेतिवा ङे थोक्‍ला ख्‍येप्‍साङ वोतुप यिन्‍सिनाङ ती ताम्‍ङेतिवा तन्‍दा ख्रीष्‍टकी थोक्‍ला तेरी काङ साङ मिन सिनी ङ नासाम तोङ्‍यिन।
PHI 3:8 तोजो तिराङ मिन, चोवो येशू ख्रीष्‍टला ङो शेवु ति तेरी सिनाङ खक्‍छ्‍येवु यिन्‍दुप तप्‍की यम्‍बा तेरी ताम्‍ङेतिवा कुन यिन्‍दुप ति ङे हाक्‍कोसुङ। तमा ख्रीष्‍टकी थोक्‍ला तेरी ताम्‍ङेतिवा क्‍युर्नी ज्‍याकिन। तमा ती ताम्‍ङेतिवा तेरी ज्‍यरा ज्‍यिरा दोके यिन सिनी नोक्‍यायी। तुक क्‍यानी ङे येशू ख्रीष्‍टला ङ्‍ये थुप्‍शी,
PHI 3:9 तमा खो ताङ मुला च्‍यिक्‍पा राङ च्‍युङ थुप्‍शी। येलुङ ठिमला तेन्‍नी टेङ्‍बु यिन सिनी ङ नो मिकी, यिने तन्‍दा येशू ख्रीष्‍टला तेपा क्‍यासिमा वुङ्‍गुप ति वुतुङ के टेङ्‍बु यिन। ती ति येशूला तेपा क्‍यासिमा कोन्‍छ्‍योक नेमा वुङ्‍गुप टेङ्‍बु यिन।
PHI 3:10 ङला गोवु तेरी ताम्‍ङेतिवा ति दी यिन, ख्रीष्‍टला ङो शेवु ताङ खो टुङ्‍नी ङोसु लावु ओङ ति हाक्‍कोवु ताङ खोकी दाक्‍पी थोक्‍ला दुक्‍पा खुरुप दोके ङे साङ खोकी थोक्‍ला शि राङ गोसिनाङ शि थुप्‍शी।
PHI 3:11 तमा च्‍युङ्‍सिन ङ शिसिमा शेप ने सेन्‍बु लङ थुप्‍शी।
PHI 3:12 ती तेरी ताम्‍ङेतिवा ङे गोमाला के ङ्‍येनी वे सिनी सिक्‍यावु मिन, ती ताम्‍ङेतिवा तन्‍दा तेरी च्‍युङ वे सिक्‍यावु साङ मिन, यिने येशू ख्रीष्‍टकी ङला खोरो ति जो नङ्‍सुङ। ती तप्‍की ङ ख्रीष्‍ट दोके मिजी क्‍योङ थुपुपला छ्‍योङ्‍बाल ग्‍यप्‍नी डोयी वे।
PHI 3:13 ओ अच्‍युनुपतिवा, ङला तन्‍दा साङ ती थोप्‍नी वे सिनी नो मिकी, यिने ङ लाका च्‍यिक ति कितिन। ती ति काङ यिन सिसिन गोमी ताम्‍ङेतिवा क्‍युर ज्‍याक्‍नी तिङ्‍ला वुङ्‍गुप
PHI 3:14 येशू ख्रीष्‍ट नेमा कोन्‍छ्‍योककी देवाच्‍येन नेसुर ङला कताङ नङ्‍गुप छ्‍यक्‍तक थोपुपला ङ कशेन छ्‍योङ्‍बाल ग्‍यप्‍नी डोयी वे।
PHI 3:15 तमा दाक्‍पु तेपा क्‍यानी रम्‍बु वोतुप मीतिवा तेरीकी तुकै नासाम तोङ गोकिवी। दोजो ललाइ मीतिवी नासाम ति कुतुक कुतुक वोसुङ सिसिन ती ति कोन्‍छ्‍योककी ख्‍यिराङला ठछ्‍येली छ्‍या देन्‍गिवी।
PHI 3:16 काङ यिन्‍सिनाङ दाक्‍पु दे सेक लेप्‍नी वे, तीला राङ रम्‍बु क्‍यानी मिजी क्‍योङ्‍गुप।
PHI 3:17 अच्‍युनुपतिवा, ङे काङ क्‍यावे, ख्‍यिरा साङ तुकै राङ नरी लुमु से। तमा ङ्‍यिरा मिजी नेसुर छ्‍या तेन्‍दुप दोके क्‍यानी मिजी क्‍योङ्‍गुप यम्‍बा मीतिवाला ल्हानी लोपा।
PHI 3:18 ख्‍यिराङला ङे गोमाला थेङ्‍मा बङी सिक्‍यायी, त येलुङ ङ ङुयी सिरा सिरिन। काङ यिन सिसिन मीतिवा बङी ख्रीष्‍ट येशूकी ग्‍यङ्‍शिङकी थोक्‍ला डला गल्‍नी युकिवी।
PHI 3:19 तिवा डोप लाम ति ङ्‍येलाला ना डोप यिन। च्‍यिलासिसिन तिवा कोन्‍छ्‍योकला मिन, साप ताङ थुङ्‍गुपकी थोक्‍ला तिराङ सेम नोजु किवी। तिवी खोप्‍रे क्‍यावु लाकातिवाला छासे ल्‍यामु यिन सिनी सिवी, यिने तिवी क्‍यावु लाका ति ङोछा लोङ्‍गुप लाका यिन। तिवी जम्‍बुलिङकी च्‍यालकतिवाला तिराङ नासाम तोङ्‍गिवी।
PHI 3:20 यिने दाक्‍पु याङ देवाच्‍येनला वोतुप कोन्‍छ्‍योककी ग्‍येल्‍खापकी मीतिवा यिन। तमा दाक्‍पुला दिक्‍पा ने थर ज्‍यितुपला देवाच्‍येन नेमा फेपुप येशू ख्रीष्‍टला राङ दाक्‍पु छासे गुनी देन वे।
PHI 3:21 खोकी ङारकी राङ जम्‍बुलिङला वोतुप तेरी च्‍यालकतिवा खोकी ओङला ज्‍योक थुप्‍किवी। तमा खोकी ओङ नेमा राङ दाक्‍पी रुलुप जु ति खोकी मोवाला वोतुप जु दोके सम्‍बा फो ज्‍यिकिवी।
PHI 4:1 तुक क्‍यानी अच्‍युनुपतिवा, ङ ख्‍यिराङला ङ्‍यिङ्‍ज्‍ये लानी नम पेला ठेतुप सिनी नासाम शर्किनोक। तमा ख्‍यिराङला नासाम तोङ्‍गुप पेला ङ छासे गा लानी मीतिवाला ख्‍यिरा कोर्ला तेके कितिन। ङे ङ्‍यिङ्‍ज्‍येवु अच्‍युनुपतिवा, ख्‍यिराङ तुक राङ क्यानी चोवो येशूला तेपा रम्‍बु क्‍यानी देता।
PHI 4:2 इयोदिया ताङ सुन्‍तुखेला ङ छासे क्‍यानी गोङ्‍बा शोयिन, ख्‍यिराङ ङ्‍यिकर चोवोकी मीतिवा यिन्‍दुप तप्‍की थिन्‍नी देता।
PHI 4:3 ङ ताङ मुला लाका ल्‍यामु कितुप दाल्‍जो, ङ ख्‍युरुङला साङ सिरिन। ती आम्‍पुमतिवाला दाल्‍जा किटे किसा। च्‍यिलासिसिन ङ लेन ल्‍यामु ख्‍याप्‍टाक कितुप पेला तिवी क्‍लेमेस ताङ ङे मुला वोतुप यम्‍बा दाल्‍जातिवी मुला लाका टेमु क्‍यासुङ। तमा कोन्‍छ्‍योककी तिवी मिङ ति खोकी मिजीकी थेप नाङ्‍ला टि वे।
PHI 4:4 चोवो येशू ख्‍यिरा मुला ज्‍युवु तप्‍की ख्‍यिराङ नरी सेम गा किसा। ङ येलुङ सिरिन, ख्‍यिराङ सेम गा किसा।
PHI 4:5 ख्‍यिराङ च्‍यङ्‍च्‍यु सेम्‍बा वोतुप ति तेरी मीतिवाला छ्‍या तेन। नासाम तोङा, चोवो ङमु राङ फेपिन वोतो।
PHI 4:6 ख्‍यिराङ काङ साङ पप माकी, यिने मोपोर कितुप पेला कोन्‍छ्‍योकला थुचिछे पुल्‍नी ख्‍यिराङला गोवु तेरी ताम्‍ङेकी थोक्‍ला खोला गोङ्‍बा शु।
PHI 4:7 तुक क्‍यासिन मी नासाम तङ्‍गुप सिनाङ ल्हक्‍पा वोतुप कोन्‍छ्‍योककी लोदिमुकी ख्‍यिरा सेम ताङ नासाम ति येशू ख्रीष्‍टकी ओङ नेसुर र्‍होकितो।
PHI 4:8 तेरी सिनाङ तिङ्‍ला अच्‍युनुपतिवा, चुका ताम्‍ङे ति टेङ्‍बु नोके, चुका ताम्‍ङेला ताङ्‍देन कि गोवु नोके, चुका ताम्‍ङे टेके नोके, चुका ताम्‍ङे ति क्‍येन मेतुप नोके, चुका ताम्‍ङे ति ङ्‍यिङ्‍ज्‍येवु नोके, चुका ताम्‍ङे ति चिताङ कि गोवु नोके, तीला राङ नासाम तोङ। दोजो ललाइ छ्‍ये ताङ टेन छ्‍योवु वोसिन ती ताम्‍ङे ति ल्‍यामु नासाम तोङा।
PHI 4:9 ख्‍यिरा चुका ताम्‍ङे ति ङे नेसुर लाप्‍वे, चुका ताम्‍ङे ति सेमला लावे, चुका ताम्‍ङे ति ङे ख नेमा थोवे, चुका ताम्‍ङे ति ङे मिजीला थोङ्‍वे, ती दोके राङ की। तमा लोदिमु नङ्‍गुप कोन्‍छ्‍योक ख्‍यिरा मुला ज्‍युकितो।
PHI 4:10 ङ्‍यिमा चेयी ज्‍युक्‍ला येलुङ ख्‍यिरा ङला ङ्‍याम क्‍यावु थोङ्‍नी चोवो येशू नेसुर ङ छासे गा लानी वे। वुतुङ के ख्‍यिरा ङे थोक्‍ला पप किनोक, यिने ख्‍यिरा ङला दाल्‍जा कितुप छल्‍सिनाङ तुजे माच्‍युङ्‍नोक।
PHI 4:11 कतुकारला ख्‍येल्‍सुङ सिनी ङे किदुक शेतुप मिन, यिने चो पेला साङ लोदिमु कि गोकिवी सिरुप ति ङे लापिन।
PHI 4:12 ङे लोला बङी वोसिनाङ मेसिनाङ, चुक क्‍यानी मिजी क्‍योङ गोकिवी सिरुप ति ङला छ्‍या वे। डावु पेला ताङ ल्‍होवा कोम्‍बाला ताङ, बङी वोतुप पेला ताङ कतुकारला ख्‍येलुप पेला ताङ, चो पेला साङ लोदिमुला देतुप ति ङे लापिन।
PHI 4:13 च्‍यिलासिसिन ख्रीष्‍टकी नङ्‍गुप ङार नेसुर राङ ङ तेरी ताम्‍ङे कि थुप्‍किवी।
PHI 4:14 यिन्‍सिनाङ ङला छेटाङ ख्‍येलुप पेला ख्‍यिराङ ङे मुला राङ दुक्‍पा खुर्टे क्‍यानी छासे ल्‍यामु क्‍यासुङ।
PHI 4:15 थल्‍माला लेन ल्‍यामु ख्‍याप्‍टाक कितुपला ङ माकेडोनिया नेसुर क्‍येनी डोप पेला ख्‍यिरा मिसिन यम्‍बा चर्चकी मीतिवा सी साङ ङला दाल्‍जा किटे माक्‍या। ती ताम्‍ङे ति ख्‍यिराङ फिलिप्‍पीतिवाला साङ छ्‍या वे।
PHI 4:16 ख्‍यिरा याङ ङ थेसलोनिकेला वोतुप पेला साङ थेङ्‍मा च्‍यिक चोयी ङ्‍यी चोयी ङे थोक्‍ला दाल्‍जा किटे क्‍यासुङ।
PHI 4:17 ङला बुल्‍वा गोकिवी सिक्‍यावु मिन, यिने कोन्‍छ्‍योककी ख्‍यिराङला मोलाम नङ्‍गुप ति ल्हाप नोनी ङे ती ताम्‍ङे सिक्‍यावु यिन।
PHI 4:18 ख्‍यिरा इपाफ्रोडिटसला कल्‍नी तङ्‍गुप बुल्‍वा ति ङे लकला ख्‍येल्‍सुङ। ती बुल्‍वातिवा ङे थोप गोवु सिनाङ मङ यिन। ती ति टी जङ्‍बु खाप पो दोके ताङ कोन्‍छ्‍योकला गा लङ्‍गुप ताङ खोकी सेमला डोप जिन्‍बा दोके यिन।
PHI 4:19 ङे कोन्‍छ्‍योककी खोरे मोवाला वोतुप ग्‍यक्‍चेकी टोङ्‍बा ति येशू ख्रीष्‍ट नेमा ख्‍यिराङला ख्‍येलुप कतुकारतिवा तेरी डुप ज्‍यिकिवी।
PHI 4:20 त याङ दाक्‍पी पपा कोन्‍छ्‍योकला नरीकी नरी मोवा वुङ्‍शी। आमिन।
PHI 4:21 येशू ख्रीष्‍टला तेपा कितुपतिवा तेरीला टसी देलेक वे सिनी सिसा। ङे मुला वोतुप नुपतिवी साङ ख्‍यिराङला टसी देलेक सिनी तङ वोतो।
PHI 4:22 दे वोतुप येशू ख्रीष्‍टला तेपा कितुप मीतिवा तेरी ताङ खक्‍छ्‍येवुला रोमी ग्‍येल्‍वी ग्‍येल्‍खाङकी मीतिवी साङ ख्‍यिराङला टसी देलेक सिनी तङ वोतो।
PHI 4:23 चोवो येशू ख्रीष्‍टकी कटिन ति ख्‍यिरा सेमला वुङ्‍शी।
COL 1:1 टसी देलेक! दी यिकी ति कोन्‍छ्‍योककी नोवा नेसुर ख्रीष्‍ट येशूकी लोमा छ्‍ये ङ पावल ताङ नुप तिमोथी नेसुर
COL 1:2 कलस्‍सेला देतुप कोन्‍छ्‍योकला तेपा कितुप चाङ्‍मा ताङ खोङ्‍तेर्मु वोतुप अच्‍युनुपतिवाला टिवु यिनो। दाक्‍पी पपा कोन्‍छ्‍योककी ख्‍यिराङला कटिन ताङ लोदिमु नङ्‍शी।
COL 1:3 ङ्‍यिराङ ख्‍यिरा थोक्‍ला मोपोर कितुप पेला दाक्‍पी चोवो येशू ख्रीष्‍टकी पपा कोन्‍छ्‍योकला नरी थुचिछे बुल्‍गिवी।
COL 1:4 च्‍यिलासिसिन ख्‍यिरा ख्रीष्‍ट येशूला तेपा क्‍यावु ताङ कोन्‍छ्‍योककी चाङ्‍मा वोतुप मीतिवाला ङ्‍यिङ्‍ज्‍ये क्‍यावु ति ङ्‍यिरा थोसुङ।
COL 1:5 तुका तेपा ताङ ङ्‍यिङ्‍ज्‍ये क्‍यावु ति ख्‍यिरा थोक्‍ला देवाच्‍येनला ज्‍यकुप रेवा नेसुर वुङ्‍गुप यिन। ती रेवाकी कोर्ला गोमाला के ख्‍यिरा सुङ टेङ्‍बु वोतुप कोन्‍छ्‍योककी लेन ल्‍यामु थोवु पेला हाक्‍को वे।
COL 1:6 ती लेन ल्‍यामु ति ख्‍यिरा ते वा वे। तमा ती ति तेरी जम्‍बुलिङला फेल्‍नी डोयी वे। ती दोके क्‍यानी ख्‍यिरा कोन्‍छ्‍योककी टेङ्‍बु वोतुप कटिनकी ताम्‍ङे थोनी हाक्‍कोवु पेला नेज्‍युनी ती लेन ल्‍यामुकी ख्‍यिरा पर्ला लाका कियी वे।
COL 1:7 दी कोन्‍छ्‍योककी कटिन ति ङ्‍यिरा मुला राङ शब्‍ज्‍यी कितुप दाल्‍जा इपाफ्रास नेसुर ख्‍यिराङला लापुप यिन। ती ति ङ्‍यिरा छापला ख्‍यिरा पर्ला ख्रीष्‍टकी थोक्‍ला लाका कितुप खोङ्‍तेर्मु वोतुप नुप यिन।
COL 1:8 तमा कोन्‍छ्‍योककी थु चाङ्‍माकी ख्‍यिराङला नङ्‍गुप ङ्‍यिङ्‍ज्‍येकी कोर्ला तीकी ङ्‍यिराङला सिक्‍यासुङ।
COL 1:9 ती ताम्‍ङे थो नेज्‍युनी ख्‍यिरा थोक्‍ला नरी ङ्‍यिराङ कोन्‍छ्‍योकला मोपोर कियी वे। ख्‍यिराङ कोन्‍छ्‍योककी थु चाङ्‍माकी च्‍यु ताङ रिक्‍पा नेसुर खोकी नोवा काङ यिन सिनी ल्‍यामु हाक्‍कोशी सिनी ङ्‍यिराङ नरी मोपोर कितिन।
COL 1:10 तुक क्‍यासिन ख्‍यिरा चोवोकी सेमला डोप मिजी क्‍याङ्‍नी नरी खोला गा लोङ थुप्‍किवी। तमा ख्‍यिराङ तेरी मङ मङ लाका ल्‍यामु कितुप च्‍युङ्‍नी कोन्‍छ्‍योककी नङ्‍गुप रिक्‍पाला फरिन डिवी।
COL 1:11 तमा कोन्‍छ्‍योककी मोवा वोतुप ङार नेसुर ख्‍यिराङ रम्‍बु च्‍युङ्‍गिवी। तुक क्‍यासिन ख्‍यिराङ तेरी ताम्‍ङेला गा क्‍यानी डेकला देतुप ताङ हम क्‍यानी दे थुप्‍किवी।
COL 1:12 तीकी थोक्‍ला पपा कोन्‍छ्‍योकला थुचिछे पुल। खोकी ठछ्‍येली वोतुप ग्‍येल्‍खापला खोरे चाङ्‍मा वोतुप मीतिवाला तेरिन सिनी थाक्‍छ्‍येतुप ति खोकी ख्‍यिराङला ङ्‍ये छ्‍योवु जो नङ वे।
COL 1:13 खोकी दाक्‍पुला नक्‍तोमीकी ओङ्‍ज्‍येन ने थर्वा नाङ्‍नी खोरे ङ्‍यिङ्‍ज्‍येवु सेवुकी ग्‍येल्‍खापला ल्‍यामो क्‍यानी क्‍यल नङ वे।
COL 1:14 ती खोकी सेवुकी राङ दाक्‍पुला दिक्‍पा ने थर्वा नङ्‍नी दाक्‍पी दिक्‍पातिवा तेरी ता च्‍यिनी वे।
COL 1:15 येशू ख्रीष्‍ट ति दाक्‍पी मिककी मोथोङ्‍गुप कोन्‍छ्‍योककी जुजमला वोतुप चोवो यिन। खो ति जम्‍बुलिङला वोतुप तेरी च्‍यालकतिवा सिनाङ थल्‍माला वोतुप कोन्‍छ्‍योककी सेवु यिन।
COL 1:16 च्‍यिलासिसिन मिककी थोङ्‍गुप ताङ मोथोङ्‍गुप तेरी च्‍यालकतिवा खो नेसुर राङ ज्‍ये नङ्‍गुप यिन। देवाच्‍येन ताङ जम्‍बुलिङला वोतुपतिवा ताङ ग्‍येल्‍ठिकतिवा ताङ ग्‍येला कितुप ओङतिवा ताङ ठिम कितुप ङारतिवा ताङ ओङ्‍ज्‍येनतिवा ताङ तेरी च्‍यालकतिवा खो नेसुर राङ खोरे थोक्‍ला ज्‍ये नङ्‍गुप यिन।
COL 1:17 ख्रीष्‍ट ति तेरी च्‍यालकतिवा सिनाङ गोमाला ज्‍यु वोतुप यिन। तमा तेरी च्‍यालकतिवा खोला राङ ग्‍येनी देन वे।
COL 1:18 चर्च ति जु यिन्‍सिन खो ति चर्चकी गो चोछ्‍येवु यिन। खो ति थल्‍मा नेज्‍यु वोतुप चोवो यिन, शेपतिवी पर नेमा तेरी सिनाङ गोमाला ङोसु लावु ति खो राङ यिन। तुक क्‍यानी तेरीकी खला खो ति चोछ्‍ये वे।
COL 1:19 कोन्‍छ्‍योककी नोवाकी राङ ख्रीष्‍ट ति खो ताङ च्‍यिक्‍पा राङ क्‍यानी ज्‍युवु गा लासुङ।
COL 1:20 तमा ख्रीष्‍ट ग्‍यङ्‍शिङला टुङ्‍नी तेन्‍दुप ठक नेसुर लोदिमु नङ्‍नी खोकी जम्‍बुलिङ ताङ देवाच्‍येनकी तेरी च्‍यालकतिवा खोरे मुला डिक्‍सुङ।
COL 1:21 तोङ्‍ला याङ ख्‍यिराङ लाका दुक्‍टा क्‍यानी कोन्‍छ्‍योक नेसुर थाक्‍रिङ्‍बु गल्‍नी ख्‍यिरा सेम ति खोकी तेन्‍दोकला लानी डला गल वोतुप्‍जा।
COL 1:22 यिने त याङ खोकी थोङ्‍दाङला चाङ्‍मा ताङ मडी मेतुप ताङ क्‍येन मेतुप जोपला येशू ख्रीष्‍ट टुङ्‍नी खोकी ख्‍यिराङ ताङ मुला डिक्‍सुङ।
COL 1:23 तुक कितुपला वुतुङ के ख्‍यिराङ तेपाला येर मर माक्‍यानी नरी डेकला दे गोकिवी। तमा ख्‍यिरा थोवु लेन ल्‍यामुला रेवा क्‍यावु ति क्‍युर्नी माज्‍योक। ती लेन ल्‍यामु ति देवाच्‍येनकी वोक्‍ला वोतुप तेरी मीतिवाला ख्‍याप्‍टाक क्‍यावु यिन। ङ पावल साङ ती लेन ल्‍यामु ख्‍याप्‍टाक कितुप लावा च्‍युङ वे।
COL 1:24 त याङ ङ ख्‍यिरा थोक्‍ला दुक्‍पा खुरुपला गा कितिन। तमा ख्रीष्‍टकी जु यिन्‍दुप चर्चकी थोक्‍ला खुर गोवु दुक्‍पा ताङ छेटाङ ति ङे जुला खुर्नी तेरी कितिन।
COL 1:25 कोन्‍छ्‍योककी ख्‍यिराङला खोकी सुङ तेरी छासे ल्‍यामु क्‍यानी हाक्‍को ज्‍यितुपला खोकी ङला चेक तेन नङ्‍गुप तप्‍की ङ ति चर्चला शब्‍ज्‍यी कितुप लावा च्‍युङ्‍सुङ।
COL 1:26 ती सुङ ति कल्‍वा कल्‍वा ताङ पगावा हङ्‍गावी ङो नेज्‍युनी छ्‍याकला वोतुप ताम्‍ङे यिन, यिने त याङ खोकी तीकी तेन्‍दोक ति खोरे चाङ्‍मा वोतुप मीतिवाला ठछ्‍येली हाक्‍को च्‍यिनी वे।
COL 1:27 तमा खोकी यहूदी मिन्‍दुप मिरिक यम्‍बाकी मीतिवी पर्ला ती छ्‍याकला वोतुप मोवा ति छासे हलेवु वे सिरुप ताम्‍ङे ति खोरे मीतिवाला हाक्‍को ज्‍यितुपला पेन नङ्‍गुप यिन। ती छ्‍याककी ताम्‍ङे ति ख्‍यिरा मिजीला वोतुप ख्रीष्‍ट यिन। ख्रीष्‍ट ख्‍यिरा मिजीला वोतुप तप्‍की ख्‍यिराङला मोवा वोतुप रेवा ङ्‍येनी वे।
COL 1:28 ङ्‍यिराङ दी ख्रीष्‍टकी कोर्ला मीतिवा तेरीला ख्‍याप्‍टाक कितिन। तमा तेरीकी ख्रीष्‍टला तेपा रम्‍बु क्‍यानी कोन्‍छ्‍योककी थोङ्‍दाङला ल्‍यामु वोतुप जोपला ङ्‍यिराङला वोतुप तेरी रिक्‍पा नेसुर तिवा रे रेला टोङ्‍गु ताङ येन्‍देन तेर्किवी।
COL 1:29 ख्रीष्‍टकी ङे सेमगी दिङ्‍ला ङार नङ्‍गुप तप्‍की राङ ङ दी लाका ति छासे टेमु क्‍यानी कितिन।
COL 2:1 वुतुङ के ङे याङ ख्‍यिराङ ताङ लाउडिकियाला वोतुप मीतिवा ताङ ङला ङो माशेवुतिवा तेरीकी थोक्‍ला छासे टेमु क्‍यानी लाका क्‍या वे सिरुप ति ख्‍यिराङला हाक्‍कोशी सिरुप ङे नोवा वे।
COL 2:2 ङे तुक क्‍यावु ति ख्‍यिराङ ताङ तिवी सेमला ङाडेङ ङ्‍येनी च्‍यिककी च्‍यिकला ङ्‍यिङ्‍ज्‍ये किशी सिनी यिन। तुक क्‍यासिन वुतुङ के ख्‍यिराङ तेरीकी सुङ टेङ्‍बु हाक्‍कोनी सेमला तेन्‍तेन तेपा क्‍यानी कोन्‍छ्‍योककी छ्‍याकला वोतुप ख्रीष्‍टला ल्‍यामु क्‍यानी ङो शे थुप्‍किवी।
COL 2:3 ख्रीष्‍टला राङ कोन्‍छ्‍योककी तेरी येन्‍देन ताङ रिक्‍पा ति बानी ज्‍यकुप टोङ्‍बा दोके क्‍यानी ज्‍याक्‍नी वे।
COL 2:4 ङे दी ताम्‍ङे सिक्‍यावु ति सी साङ ख्‍यिराङला ताम्‍ङे टेङ्‍बु वोतुप दोके जिनोक जोनी मुलुशी सिनी यिन।
COL 2:5 ङ ख्‍यिरा पर्ला मेसिनाङ ङे सेम ति ख्‍यिरा पर्ला राङ वे। ख्‍यिराङ येर मर माक्‍यानी ख्रीष्‍टला तेपा क्‍यानी डेकला देतुप ति ल्‍हानी ङ गा कितिन।
COL 2:6 येशू ख्रीष्‍टला ङे चोवो यिन सिनी ख्‍यिरा सेमला लावु तप्‍की ख्‍यिराङ नरी खोकी सुङला ङ्‍येन्‍नी मिजी क्‍योङ।
COL 2:7 तमा दोङ्‍बी मार तिङ्‍मु क्‍यङ्‍नी नाम्‍साङ तला मग्‍यकुप रम्‍बु वोतुप दोके ख्‍यिराङला लापुप येन्‍देनला तेपा रम्‍बु क्‍यानी खोला नरी थुचिछे पुल।
COL 2:8 ख्‍यिराङ च्‍याङ्‍से देता! सी साङ खोप्‍रे च्‍यु ताङ रिक्‍पा नेसुर जिनोक जोवु ताम्‍ङेतिवा लाप्‍नी ख्‍यिराङला मुलुशिता। तुका ताम्‍ङेतिवा ख्रीष्‍ट नेमा वावु मिन, यिने मीतिवी लुक्‍सु ताङ जम्‍बुलिङला वोतुप ङार नेसुर वावु यिन।
COL 2:9 च्‍यिलासिसिन कोन्‍छ्‍योकला वोतुप तेरी छाछिङी ति ख्रीष्‍टकी मुला राङ ज्‍यु वे।
COL 2:10 तमा ख्‍यिरा खोला तेपा क्‍यावु तप्‍की खोला वोतुप तेरी किताङ नालुतिवा ति ख्‍यिरा मिजीला थोप्‍नी वे। खो ति तेरी ओङ्‍ज्‍येन ताङ ङारतिवी खला चोछ्‍ये वे।
COL 2:11 ख्‍यिराङ खोला तेपा क्‍यानी यहूदी च्‍येतुप लुक्‍सु क्‍यावु यिन। ती च्‍येतुप लुक्‍सु ति मी लाक्‍पी क्‍यावु मिन, ख्रीष्‍ट नेमा राङ च्‍युङ्‍गुप यिन। ती ति ख्‍यिराङला वोतुप दिक्‍पाकी किताङ नालु क्‍युरुप यिन।
COL 2:12 बप्‍तिस्‍मा लङ्‍गुप पेला ख्‍यिराङ ख्रीष्‍टकी मुला राङ मुक्‍तुम ग्‍यपुप दोके यिन। तमा ख्रीष्‍टला शेप ने ङोसु लोङ्‍गुप कोन्‍छ्‍योककी ङारला ख्‍यिरा तेपा क्‍यावु तप्‍की ख्‍यिराङ साङ ख्रीष्‍टकी मुला सेन्‍बु लानी वे।
COL 2:13 ख्‍यिरा दिक्‍पा क्‍यावु ताङ दुक्‍टा कितुप किताङ नालु माक्‍युरुप तप्‍की थेङ्‍मा यी ख्‍यिराङ शिनी वोतुप्‍जा, यिने त याङ कोन्‍छ्‍योककी ख्रीष्‍टकी मुला राङ ख्‍यिराङला सेन्‍बु लाङ वे। तमा ख्‍यिरा तेरी दिक्‍पातिवा ता च्‍यिनी वे।
COL 2:14 तीकी तेन्‍दोक ति खोकी दाक्‍पुला क्‍येन फोकुप दाक्‍पी क्‍यावु दिक्‍पी थोक्‍ला टिवु यिकीतिवा तेरी ख्रीष्‍टकी मुला राङ ग्‍यङ्‍शिङला काँडी दाप्‍नी ना ताङ्‍सुङ।
COL 2:15 ती ग्‍यङ्‍शिङ लोला राङ डेतिवी ओङ्‍ज्‍येनतिवा ताङ ङारतिवाला ना ताङ्‍नी तिवी खला खोकी ग्‍येल्‍सुङ। तमा मीतिवी मिङ्‍गाला तिवाला छ्‍या तेन्‍नी ङोशी मारे जोसुङ।
COL 2:16 तुक क्‍यानी सी साङ ख्‍यिराङला साप थुङ्‍गुप ताङ चाङ्‍मा वोतुप ङ्‍यिमा तेन्‍दुप ताङ छेवा च्‍यिक तेन्‍दुप ताङ ङासोप ङ्‍यिमा तेन्‍दुप ताम्‍ङेकी कोर्ला क्‍येन मग्‍यक्‍शी।
COL 2:17 ती तेरी ताम्‍ङेतिवा ज्‍युक्‍ला वुङ्‍गुप ताम्‍ङेकी र्‍हिप्‍च्‍याङ तिराङ यिन, यिने वुतुङ्‍की ति ख्रीष्‍ट राङ यिन।
COL 2:18 ङ्‍यिरा ज्‍यल्‍का थोङ्‍गुप यिन सिनी मी यम्‍बाला छ्‍या देन्‍दुपला कुसु ज्‍यम्‍बु जोप दुक्‍टातिवा ताङ देवाच्‍येनकी लेन क्‍योलुप थुला तेन्‍दुप मीतिवा सी साङ ख्‍यिराङला थोपुप छ्‍यक्‍तक तोर्नी डोप मोजोशी। तिवा ति सेम दुक्‍टा नेसुर तेन्‍दोक मेताला ङ राङ छ्‍ये यिन सिनी सिवी,
COL 2:19 तमा ख्रीष्‍ट ताङ मुला तम्‍जी माजोनी कुतुक देकिवी। यिने ख्रीष्‍टकी ओङला देसिन तीकी तेरी जु ति थिन्‍जाम ताङ चतिवा टेक टेक थिनी ख्रीष्‍टकी ङार नेसुर कोन्‍छ्‍योककी नोवाला वोतुप दोके फेलिन डिवी।
COL 2:20 ख्‍यिराङ याङ ख्रीष्‍टकी मुला राङ शिनी दी जम्‍बुलिङला ओङ्‍ज्‍येन क्‍यावु ठिम नेसुर थर्नी वे। यिन्‍सिनाङ च्‍यिला दी जम्‍बुलिङकी ठिमला वोतुप मीतिवी दोके मिजी क्‍योङ्‍गिवी?
COL 2:21 च्‍यिला ख्‍यिराङ “दीला जिम्‍बुप मेवी, तीकी टोवा ल्‍हाप मेवी, तीला थो तोङ्‍गुप मेवी।” सिरुप ठिमतिवाला तेन्‍गिवी?
COL 2:22 ती तेरी ठिमतिवा थोकिन थोकिन ना डिवी। तिवा ति मीतिवी जोवु ठिम ताङ येन्‍देनतिवा तिराङ यिन।
COL 2:23 तिवा ति खोप्‍रे जोवु छ्‍योला टेङ्‍बु कितुप ताङ कुसु ज्‍यम्‍बु कितुप ताङ खोरो जुला डेकला ज्‍योकुपला छासे रिक्‍पा वोतुप दोके थोङ्‍गिवी, यिने तिवा ति नासाम दुक्‍टाला खोरो ओङला ज्‍योकुपला काङ साङ फेन मोथोवु वे।
COL 3:1 ख्‍यिराङ ख्रीष्‍टकी मुला राङ सेन्‍बु लङ्‍गुप तप्‍की येर देवाच्‍येनकी ताम्‍ङेतिवाला नासाम तोङ। ते देवाच्‍येनला ख्रीष्‍ट कोन्‍छ्‍योककी यावी थाकाला ज्‍युकिवी।
COL 3:2 तुक क्‍यानी ख्‍यिराङ जम्‍बुलिङकी ताम्‍ङेला मिन, येर देवाच्‍येनकी ताम्‍ङेला नासाम तोङ।
COL 3:3 च्‍यिलासिसिन ख्‍यिराङ शिनी वे, तमा ख्‍यिरा मिजी ति ख्रीष्‍टकी मुला राङ कोन्‍छ्‍योककी चिप्‍ला बानी ज्‍याङ वे।
COL 3:4 ख्‍यिरा मिजी ति ख्रीष्‍ट यिन। खो फेपुप तुजेला ख्‍यिराङ साङ खोकी मुला राङ खोकी मोवाला वुङ्‍गुप थोङ्‍गितो।
COL 3:5 तुक क्‍यानी ख्‍यिरा जम्‍बुलिङकी मिजीला वोतुप नोवातिवा तेरी क्‍युर। ती नोवातिवा ति शम्‍डेन कितुप ताङ छ्‍येवु कितुप ताङ चोताम लपुप ताङ नासाम मेलोवा तोङ्‍गुप ताङ देर्पा कितुप यिन। देर्पा कितुप ति कुला छ्‍यो तङ्‍गुप दोके यिन।
COL 3:6 ती ताम्‍ङेतिवी जोसालेन्‍सिन कोन्‍छ्‍योककी पर्च्या ति खोकी कला मेङ्‍येन्‍दुपतिवाला ख्‍येल्‍गिवी।
COL 3:7 गोमाला थेङ्‍मा यी ख्‍यिरा मिजी साङ तुकै राङ वोतुप्‍जा। तमा तुक राङ क्‍यानी युवु साङ यिन्‍दुप्‍जा।
COL 3:8 यिने त याङ ख्‍यिरा मिजी नेसुर ती तेरी ङ्‍यिर्मु कितुप ताङ ङ्‍यिर्मु कोक्‍पु वोतुप ताङ ङ्‍यिङ्‍मर कितुप ताङ मारे तोङ्‍गुप ताङ ताम्‍ङे मेलोवा लपुप ति ख्‍यिरा ख नेमा क्‍युर गोकिवी।
COL 3:9 ख्‍यिराङ च्‍यिककी च्‍यिकला जिनोक माजो। च्‍यिलासिसिन ख्‍यिरा रङगी मिजी ङ्‍यिङ्‍बा ताङ तीला वोतुप किताङ नालुतिवा तेरी क्‍युर्नी
COL 3:10 ख्‍यिरा रङगी मिजी सम्‍बा फोनी वे। तुक क्‍यानी ख्‍यिराङ जो नङ्‍गुप कोन्‍छ्‍योककी ख्‍यिरा मिजी साङ खोकी किताङ नालु दोके मङ मङ सम्‍बा जो नङ्‍गिवी। तमा ख्‍यिरा खोकी रिक्‍पाकी कोर्ला ल्‍यामो क्‍यानी हाक्‍कोकिवी।
COL 3:11 कोन्‍छ्‍योककी मिजी सम्‍बा जो नङ्‍गुप तप्‍की दे याङ ग्रीक ताङ यहूदी, च्‍येतुप लुक्‍सु क्‍यावु ताङ च्‍येतुप लुक्‍सु माक्‍यावु, छ्‍यिग्‍यपकी मी ताङ च्‍योलाम ल्‍यामु मेतुप मी, योक्‍पु ताङ योक्‍पु मिन्‍दुप मीतिवी पर्ला काङ साङ ख्‍ये मे। यिने ख्रीष्‍ट तिराङ तेरी सिनाङ खक्‍छ्‍येवु वे, तमा खो ति तेरी मीतिवी मुला ज्‍यु वे।
COL 3:12 ख्‍यिराङ कोन्‍छ्‍योककी पेन नङ्‍गुप खोकी ङ्‍यिङ्‍ज्‍येवु ताङ टेङ्‍बु वोतुप मी यिन्‍दुप तप्‍की च्‍यङ्‍च्‍यु सेम्‍बा ताङ च्‍यम्‍बा कितुप ताङ खोरुङला मो बेपुप ताङ कुसु ज्‍यम्‍बु ताङ हम क्‍या देतुप वुङ गोकिवी।
COL 3:13 मी ललाइकी ख्‍यिरा तेन्‍दोकला लानी काङ रे च्‍यिक रे ताम्‍ङे क्‍यासिन ख्‍यिराङ च्‍यिककी च्‍यिकला हम क्‍यानी तीला माफ बिन। चोवोकी ख्‍यिराङला माफ नङ्‍गुप दोके ख्‍यिरा साङ माफ तेर गोकिवी।
COL 3:14 दी तेरी सिनाङ मङ खक्‍छ्‍येवुला ख्‍यिराङ च्‍यिककी च्‍यिकला ङ्‍यिङ्‍ज्‍ये की। ख्‍यिराङ च्‍यिककी च्‍यिकला ङ्‍यिङ्‍ज्‍ये क्‍यासिन ख्‍यिरा तेरी सेम ति वुतुङ के च्‍यिक्‍पा राङ च्‍युङ्‍गिवी।
COL 3:15 ख्रीष्‍टकी ख्‍यिराङला लोदिमु नङ्‍गुप तप्‍की ख्‍यिराङ च्‍यिककी च्‍यिकला नरी ङ्‍यिङ्‍ज्‍ये की। च्‍यिलासिसिन ख्‍यिराङ च्‍यिककी च्‍यिकला लोदिमु क्‍यानी सेम थिन्‍नी देतुपला राङ कोन्‍छ्‍योककी ख्‍यिराङला कताङ नङ्‍गुप यिन। तीकी थोक्‍ला ख्‍यिरा खोला थुचिछे पुल।
COL 3:16 ख्रीष्‍टकी सुङ ति छासे क्‍यानी ख्‍यिरा सेमला नरी लुशी। तमा तेरी च्‍यु ताङ रिक्‍पाकी च्‍यिककी च्‍यिकला लोपुप ताङ टोङ्‍गु बिन। कोन्‍छ्‍योकला सोवा देकुप लुतिवा ताङ कोन्‍छ्‍योककी थु चाङ्‍माकी नङ्‍गुप लुतिवा लानी सेमगी दिङ नेज्‍युनी कोन्‍छ्‍योकला थुचिछे पुल।
COL 3:17 तमा ख्‍यिरा ताम्‍ङे ताङ लाका काङ क्‍यासिनाङ चोवो येशूकी मिङला किसा। खो नेसुर राङ पपा कोन्‍छ्‍योकला थुचिछे पुल।
COL 3:18 पेर्मीतिवा, ख्‍यिरा रङगी ख्‍योवातिवी सिक्‍यावु खला ङ्‍येन। तुक कितुप ति चोवोला तेपा कितुप मीतिवी कि गोवु यिन।
COL 3:19 ख्‍योवातिवा, ख्‍यिरा रङगी पेर्मीतिवाला च्‍युरुवु माक्‍यानी ङ्‍यिङ्‍ज्‍ये किसा।
COL 3:20 आङातिवा, ख्‍यिरा नरी रङगी पपाआमी सिक्‍यावु खला ङ्‍येना। तुक क्‍यासिन चोवो येशूला गा लङ्‍गिवी।
COL 3:21 तमा पपातिवा, ख्‍यिरा रङगी पेजातिवाला ङ्‍यिर्मु मालोङ। तुक क्‍यासिन तिवी सेम शिवी।
COL 3:22 लावातिवा, ख्‍यिराङ दी जम्‍बुलिङकी रङगी ज्‍यिन्‍दाकतिवी सिक्‍यावु खला ङ्‍येना। तिवाला गा लोङ्‍गुप नोनी तिराङ तिवी थोङ्‍दाङला लाका माकी, यिने चोवोला ज्‍यिवा खुर्नी सेम टेङ्‍बुकी लाका की।
COL 3:23 ख्‍यिरा काङ किसिनाङ मी थोक्‍ला क्‍यावु दोके मिन, यिने चोवोला क्‍यावु दोके सेमगी दिङ नेज्‍युनी लाका किसा।
COL 3:24 नासाम तोङ, चोवोकी ख्‍यिराङला थाक्‍छ्‍येन नङ्‍गुप छ्‍यक्‍तक नङ्‍गिवी सिरुप ति छ्‍या राङ वे। चोवो येशू ख्रीष्‍ट ख्‍यिरा ज्‍यिन्‍दाक यिन। ख्‍यिरा खोला राङ शब्‍ज्‍यी कियी वे।
COL 3:25 लाका मेलोवा कितुप सु यिन्‍सिनाङ तीला पर्च्या मेलोवा राङ फोकिवी। चोवोकी सुला साङ ख्‍ये मेबेवी।
COL 4:1 ज्‍यिन्‍दाकतिवा, ख्‍यिरा साङ देवाच्‍येनला रङगी ज्‍यिन्‍दाक वे सिरुप ति हाक्‍कोनी रङगी लावातिवाला ख्‍ये मापेवा क्‍यानी टेङ्‍बु किसा।
COL 4:2 ख्‍यिराङ नरी मोपोर क्‍या क्‍यावा देता। मोपोर कितुप पेला चेर्मु क्‍यानी थुचिछे पुल्‍नी मोपोर किसा।
COL 4:3 तमा ङ्‍यिरा थोक्‍ला साङ मोपोर किसा। कोन्‍छ्‍योककी सुङ ख्‍याप्‍टाक कितुपला खोकी दाक्‍पी थोक्‍ला गो पेनी ख्रीष्‍टकी छ्‍याकला वोतुप ताम्‍ङेतिवा ख्‍याप्‍टाक कि थुप्‍शी। तीकी थोक्‍ला राङ ङ चोन्‍खाङला शोर्नी वे।
COL 4:4 तमा कि थुपा सेक ल्‍यामो क्‍यानी ती सुङ ति ङे ख्‍याप्‍टाक कि थुप्‍शी सिनी तीकी थोक्‍ला ख्‍यिरा मोपोर किटे किसा।
COL 4:5 तेपा मिकिवुतिवी मुला किताङ नालु कितुप पेला कोन्‍छ्‍योककी नङ्‍गुप रिक्‍पा नेसुर किसा। तमा ख्‍यिराङला थोपुप तुजेला तेरी ल्‍यामु क्‍यानी लाका किसा।
COL 4:6 छे टोवाकी समा शिम्‍बु जोवु दोके ख्‍यिरा ताम्‍ङे लप्‍ताङ ति नरी कटिन नेसुर वुङ गोकिवी। तुक क्‍यासिन सी ख्‍यिराङला टिवा टिसिनाङ ख्‍यिरा तिवाला ल्‍यामु क्‍यानी टिलेन तेर थुप्‍किवी।
COL 4:7 दाक्‍पी नुप तुखिकसकी राङ ङे कोर्ला तेरी लेन ति ख्‍यिराङला लप्‍कितो। ती ति ङे ङ्‍यिङ्‍ज्‍येवु नुप यिन, तमा ङे मुला राङ चोवोला शब्‍ज्‍यी कितुप खोङ्‍तेर्मु वोतुप मी यिन।
COL 4:8 ङे तीला ख्‍यिरा ते तोङ्‍गुप तेन्‍दोक ति तीकी ङ्‍यिरा कोर्ला ख्‍यिराङला ल्‍यामो हाक्‍को ज्‍यितुप ताङ ख्‍यिरा सेमला ङाडेङ तेरुपला यिन।
COL 4:9 तीकी मुला ङ्‍यिरा ङ्‍यिङ्‍ज्‍येवु ताङ खोङ्‍तेर्मु वोतुप नुप ओनेसिमस साङ वुङ्‍यिन वोतो। ती ति ख्‍यिरा मु नेसुर राङ वावु मी यिनो। दे च्‍युङ्‍गुप ताम्‍ङेतिवा तिवी राङ तेरी ख्‍यिराङला लप्‍कितो।
COL 4:10 ङ ताङ मुला राङ चोन्‍खाङला वोतुप अरिस्‍तार्खसकी साङ ख्‍यिराङला टसी देलेक सिनी तङ वोतो। तमा बारनाबासकी नुप मर्कूसकी साङ ख्‍यिराङला टसी देलेक सिनी तङ वोतो। ती मर्कूसकी कोर्ला गोमाला साङ ङे ख्‍यिराङला सिक्‍यायिनो। ती ख्‍यिरा ते वासिमा तीला ल्‍यामो क्‍यानी गासो शुसा।
COL 4:11 युस्‍तस सिरुप येशूकी साङ ख्‍यिराङला टसी देलेक सिनी तङ वोतो। यहूदीतिवी पर्ला तिवा ति कोन्‍छ्‍योककी ग्‍येल्‍खापकी थोक्‍ला ङे मुला राङ लाका कितुपतिवा यिन। वुतुङ के तिवी ङला छासे टोङ्‍गु बिन्‍सुङ।
COL 4:12 ख्‍यिरा मु नेसुर वावु इपाफ्रासकी ख्‍यिराङला टसी देलेक सिनी तङ वोतो। ती ति येशू ख्रीष्‍टकी थोक्‍ला शब्‍ज्‍यी कितुप मी यिन। तीकी ख्‍यिराङ तेपा रम्‍बु ताङ डेकला देनी कोन्‍छ्‍योककी नोवा ति काङ यिन सिनी तेन्‍तेन हाक्‍को थुप्‍शी सिनी नरी ख्‍यिरा थोक्‍ला मोपोर क्‍या क्‍यावा देकिवी।
COL 4:13 ङ तीकी थोक्‍ला पङ्‍बु तेरिन, तीकी वुतुङ के ख्‍यिराङ ताङ लाउडिकिया ताङ हिरापोलिसला वोतुप मीतिवी थोक्‍ला छासे टेमु क्‍या वे।
COL 4:14 ङ्‍यिरा ङ्‍यिङ्‍ज्‍येवु आम्‍ज्‍यी लूका ताङ डेमासकी ख्‍यिराङला टसी देलेक सिनी तङ वोतो।
COL 4:15 लाउडिकियाला वोतुप नुपतिवा ताङ नुम्‍फास ताङ तीकी खाङ्‍बा जोम्‍बुप चर्चकी मीतिवाला ङ्‍यिरा छ्‍योक नेसुर टसी देलेक सिनी सिसा।
COL 4:16 दी यिकी ति ख्‍यिरा रानी सिन्‍सिमा लाउडिकियाला वोतुप चर्चला साङ रोक च्‍यिता। तुक राङ क्‍यानी लाउडिकियाकी चर्च नेसुर वावु यिकी साङ ख्‍यिरा रोसा।
COL 4:17 तमा “चोवोकी नङ्‍गुप लाका ति तेरी डुप राङ गोकिवी।” सिनी अर्खिप्‍पसला सिसा।
COL 4:18 ङ पावलकी छ्‍योक नेमा ख्‍यिराङला टसी देलेक वोतो। दी टसी देलेक सिक्‍यावु ति ङे लाक्‍पी राङ टिवु यिनो। ङ चोन्‍खाङला शोर्नी च्‍याटोक ग्‍यपुप ति ख्‍यिरा टोक माज्‍येता। कोन्‍छ्‍योककी कटिन ति ख्‍यिरा मुला लुशी।
1TH 1:1 टसी देलेक! पावल ताङ सिलास ताङ तिमोथी नेसुर पपा कोन्‍छ्‍योक ताङ चोवो येशू ख्रीष्‍टला तेपा कितुप थेसलोनिकेला वोतुप चर्चकी मीतिवाला दी यिकी ति टिवु यिनो। ख्‍यिराङ तेरीला कोन्‍छ्‍योककी कटिन ताङ लोदिमु वुङ्‍शी।
1TH 1:2 ङ्‍यिराङ मोपोर कितुप पेला कोन्‍छ्‍योकला नरी थुचिछे पुल्‍नी ख्‍यिराङ तेरीला टेन्‍दा किवी,
1TH 1:3 च्‍यिलासिसिन दाक्‍पी पपा कोन्‍छ्‍योककी थोङ्‍दाङला ख्‍यिरा लाका खोङ्‍तेर्मु क्‍यावु ताङ मी यम्‍बाला ङ्‍यिङ्‍ज्‍ये क्‍यावु ताङ चोवो येशू ख्रीष्‍टला रेवा क्‍यानी गुन देतुप तप्‍की यिन।
1TH 1:4 अच्‍युनुपतिवा, कोन्‍छ्‍योककी ख्‍यिराङला ङ्‍यिङ्‍ज्‍ये क्‍यानी पेन नङ्‍गुप यिन सिनी ङ्‍यिराङला छ्‍या वे।
1TH 1:5 च्‍यिलासिसिन ङ्‍यिरा ख्‍याप्‍टाक क्‍यावु लेन ल्‍यामु ति ख्‍यिरा ते सुङला तिराङ बिन्‍दुप मिन, यिने ओङ ताङ कोन्‍छ्‍योककी थु चाङ्‍मा नेमा तेन्‍तेन क्‍यानी बिन्‍दुप यिन। ङ्‍यिराङ ख्‍यिरा पर्ला वोतुप पेला चुक क्‍यानी ख्‍यिराङला दाल्‍जा किटे क्‍यासुङ सिरुप ति ख्‍यिराङला राङ छ्‍या वे।
1TH 1:6 ख्‍यिराङला छेटाङ ताङ दुक्‍पा बङी च्‍युङ्‍सिनाङ कोन्‍छ्‍योककी थु चाङ्‍माकी लोदिमु नङ्‍गुप तप्‍की ख्‍यिरा कोन्‍छ्‍योककी सुङ ल्‍यामु क्‍यानी ङ्‍येन्‍सुङ। तुक क्‍यानी ख्‍यिरा ङ्‍यिराङ ताङ चोवो येशूकी दोके लुमु सेतुप च्‍युङ्‍सुङ।
1TH 1:7 ती तप्‍की माकेडोनिया ताङ अखैयाकी तेपा कितुपतिवा तेरीकी पर्ला ख्‍यिराङ पे च्‍यिक च्‍युङ्‍सुङ।
1TH 1:8 च्‍यिलासिसिन ख्‍यिरा नेसुर राङ चोवो येशूकी सुङ ति माकेडोनिया ताङ अखैयाला तिराङ फेलुप मिन, यिने कोन्‍छ्‍योकला ख्‍यिरा क्‍यावु तेपा ति दासा तेरीला फेलुप तप्‍की त ख्‍यिराङला दीकी कोर्ला ङ्‍यिरा सि गोवु ताम्‍ङे काङ साङ मे।
1TH 1:9 तमा ङ्‍यिराङ ख्‍यिरा पर्ला वुङ्‍गुप पेला ख्‍यिरा ङ्‍यिराङला गासो शुवु ताङ कुतिवाला शब्‍ज्‍यी बुलुप क्‍युर ज्‍याक्‍नी ङोसु ताङ टेङ्‍बु वोतुप कोन्‍छ्‍योकला सोवा पुलुप ताम्‍ङे ति माकेडोनिया ताङ अखैयाकी मीतिवी खोप्‍रे राङ लप्‍किवी।
1TH 1:10 तोजो तिराङ मिन, टुङ्‍गुप ने ङोसु लानी दाक्‍पुला त ख्‍येल वुङ्‍गुप छ्‍येर्पा नेसुर र्‍होक ज्‍यितुप कोन्‍छ्‍योककी सेवु ति देवाच्‍येन नेमा फेवुला ख्‍यिराङ गुन देतुप ताम्‍ङे साङ तिवी खोप्‍रे राङ लप्‍किवी।
1TH 2:1 अच्‍युनुपतिवा, ङ्‍यिराङ ख्‍यिरा चिप्‍ला वावु ति तेर्मे राङ मागल सिनी ख्‍यिराङला छ्‍या वे।
1TH 2:2 गोमाला ङ्‍यिराङ फिलिप्‍पीला वोतुप पेला छेटाङ खुरुप ताङ तेकी मीतिवी ङ्‍यिराङला ङ्‍यिङ्‍मर क्‍यावु ति ख्‍यिराङला छ्‍या वे। ङ्‍यिराङ थेसलोनिकेला वासिमा साङ तेकी मीतिवा ङ्‍यिरा तेन्‍दोकला लासुङ, यिन्‍सिनाङ कोन्‍छ्‍योककी ङ्‍यिराङला ङाडेङ नङ्‍गुप तप्‍की खोकी लेन ल्‍यामु ति ख्‍यिराङला ख्‍याप्‍टाक क्‍यायिन।
1TH 2:3 ङ्‍यिरा ख्‍यिराङला ख्‍याप्‍टाक क्‍यावु लेन ल्‍यामु ति ङ्‍यिरा नासाम मेलोवा ताङ्‍नी क्‍यावु मिन, सेम मेटेङ्‍बु क्‍यानी क्‍यावु साङ मिन, ताम्‍ङे जोनी ख्‍यिराङला केन्‍दुपला साङ मिन।
1TH 2:4 यिने कोन्‍छ्‍योककी ङ्‍यिराङला लो तेन्‍नी लेन ल्‍यामु ख्‍याप्‍टाक कि च्‍यिसुङ। ङ्‍यिरा ख्‍याप्‍टाक क्‍यावु लेन ल्‍यामु ति मीला गा लोङ्‍गुपला मिन, यिने दाक्‍पी सेम ल्‍हाप कोन्‍छ्‍योकला गा लोङ्‍गुपला यिन।
1TH 2:5 ङ्‍यिरा नाम्‍साङ मीतिवाला ताम्‍ङे ल्‍यामु तिराङ क्‍यानी गा लोङ्‍गुप लाका माक्‍या। तमा देर्पा साङ माक्‍यावु ति ख्‍यिराङला छ्‍या राङ वे। दीकी पङ्‍बु ति कोन्‍छ्‍योक राङ यिन।
1TH 2:6 ङ्‍यिराङ ख्रीष्‍टकी लोमा छ्‍ये यिन्‍दुप तप्‍की ङ्‍यिरा ख्‍यिरा खला ओङ्‍ज्‍येन साङ कि थुप्‍किवी, यिने ख्‍यिराङ ताङ मी यम्‍बा सु नेसुर साङ ङ्‍यिरा ताङ्‍देन माछल्‍नी आमी खोरो आङातिवाला ल्‍हावु दोके ङ्‍यिराङ ख्‍यिरा पर्ला सेम बोल्‍मु च्‍युङ्‍यिन।
1TH 2:8 तुक क्‍यानी ङ्‍यिरा ख्‍यिराङला छासे ङ्‍यिङ्‍ज्‍ये लानी कोन्‍छ्‍योककी लेन ल्‍यामु तिराङ ख्‍याप्‍टाक क्‍यावु मिन, ङ्‍यिरा मिजी साङ ख्‍यिरा थोक्‍ला तेरुप छलिन।
1TH 2:9 अच्‍युनुपतिवा, ङ्‍यिरा हुर्ताक क्‍यानी रङगी टेमु क्‍यावु याङ ख्‍यिराङला छ्‍या राङ वे। ख्‍यिराङ सुला साङ काले मेख्‍येल्‍शी सिनी ङ्‍यिरा ङ्‍यी ताङ नुप्‍ज्‍या लाका बङी क्‍यानी कोन्‍छ्‍योककी लेन ल्‍यामु ति ख्‍यिरा पर्ला ख्‍याप्‍टाक क्‍यायिन।
1TH 2:10 तमा ख्‍यिराङ तेपा कितुपतिवी पर्ला ङ्‍यिरा किताङ नालु ति चाङ्‍मा ताङ टेङ्‍बु वोतुप ताङ काङ साङ क्‍येन मेतुप ति ख्‍यिराङ राङ पङ्‍बु वे, तमा कोन्‍छ्‍योक साङ पङ्‍बु वे।
1TH 2:11 पपी खोरो पुज्‍युङपुमला क्‍यावु दोके ङ्‍यिरा ख्‍यिराङ रे रेला टोङ्‍गु ताङ ङाडेङ बिन्‍दुप ति ख्‍यिराङला राङ छ्‍या वे। तुका टोङ्‍गु बिन्‍दुप ति ख्‍यिरा किताङ नालु ति कोन्‍छ्‍योककी सेमला डो छ्‍योवु च्‍युङ्‍गुपला यिन। ती कोन्‍छ्‍योककी ख्‍यिराङला खोकी ग्‍येल्‍खाप ताङ खोकी मोवाला कताङ नाङ्‍सुङ।
1TH 2:13 तुक क्‍यानी ख्‍यिरा थोक्‍ला ङ्‍यिराङ कोन्‍छ्‍योकला नरी थुचिछे बुलिन। च्‍यिलासिसिन ख्‍यिरा सुङ ङ्‍येन्‍दुप पेला मी सुङ दोके क्‍यानी मिन, यिने कोन्‍छ्‍योककी सुङ दोके क्‍यानी सेमला लासुङ। वुतुङ के ती सुङगी ख्‍यिराङ तेपा कितुपतिवी मिजीला लाका साङ कियी वे।
1TH 2:14 अच्‍युनुपतिवा, ख्‍यिराङ यहूदियाला वोतुप तेपा कितुप कोन्‍छ्‍योककी चर्चकी मीतिवी दोके लुमु सेतुप च्‍युङ्‍सुङ। च्‍यिलासिसिन यहूदियाला वोतुप तेपा कितुप मीतिवाला तेपा मिकिवु यहूदीतिवी छेटाङ बिन्‍दुप दोके ख्‍यिरा साङ ख्‍यिरा लुङ्‍बी मीतिवा नेसुर छेटाङ खुरिन वे।
1TH 2:15 ती यहूदीतिवी राङ गोमाला कोन्‍छ्‍योककी लुङ्‍तेम्‍बातिवाला साङ सेतुप यिन, चोवो येशूला साङ सेसुङ। ङ्‍यिराङला साङ कनी ग्‍येसाला गल्‍सिनाङ दे माच्‍यिनी शार्सुङ। तमा तिवा कोन्‍छ्‍योकला गा मालाङ्‍नी मी तेरीकी तेन्‍दोकला लङ्‍गिनोक।
1TH 2:16 तमा यहूदी मिन्‍दुप मिरिक यम्‍बाकी मीतिवा थर्शी सिनी ङ्‍यिरा तिवाला सुङ ख्‍याप्‍टाक कितुप पेला साङ तिवी ङ्‍यिराङला क्‍येक्‍सुङ। तुक क्‍यानी तिवा ङ्‍यिमी टेङ दिक्‍पी क्‍येङ्‍गुप तप्‍की कोन्‍छ्‍योककी पर्च्या ति तिवी खला ख्‍येल्‍नी वे।
1TH 2:17 अच्‍युनुपतिवा, दाक्‍पु तन्‍दा चेयी पर सेक दासा कुतुक कुतुकला देनी वे, यिने सेम ति च्‍यिक्‍पा राङ वोतुप तप्‍की ख्‍यिराङला छासे ठेयिन्‍दे लासुङ।
1TH 2:18 तुक क्‍यानी ङ्‍यिराङ ख्‍यिरा चाला वुङ्‍गुप नो क्‍यायिन। ङ पावल साङ थेङ्‍मा अलायी ख्‍यिरा ते वुङ्‍गुप छलिन, यिने शैतानकी ङ्‍यिराङला क्‍येक्‍सुङ।
1TH 2:19 च्‍यिलासिसिन चोवो येशू फेपुप पेला खोकी दोङ्‍ला ङ्‍यिरा रेवा ताङ लोदिमु ताङ तेके क्‍यावु उशाक ति काङ ख्‍यिराङ राङ मिन रो?
1TH 2:20 ङ्‍यिरा मोवा ताङ लोदिमु साङ वुतुङ के ख्‍यिराङ राङ यिन।
1TH 3:1 ख्‍यिराङला ठेतुप माङ्‍येसिमा ङ्‍यिराङ हम क्‍यानी दे माथुप। तमा ङ ताङ सिलास ति एथेन्‍सला देतुप ति ल्‍यामु यिन सिनी नासाम तङ्‍गुप तप्‍की
1TH 3:2 कोन्‍छ्‍योककी सुङ ख्‍याप्‍टाक कितुप दाक्‍पी नुप तिमोथीला ख्‍यिरा ते तङ्‍यिन। च्‍यिलासिसिन तीकी ख्‍यिराङला तेपा रम्‍बु क्‍यानी दे ज्‍यितुपला ताङ टोङ्‍गु तेरुपला ताङ
1TH 3:3 चुका छेटाङ ख्‍येल वासिनाङ ख्‍यिराङ सु साङ तेपा नेसुर फला छुला मोडोशी सिनी तीला ख्‍यिरा ते तङ्‍गुप यिन। तुका छेटाङ ति दाक्‍पु तेपा कितुपतिवा तेरीला गिवी सिरुप ति ख्‍यिराङला छ्‍या वे।
1TH 3:4 तोङ्‍ला ङ्‍यिराङ ख्‍यिरा मुला वोतुप पेला साङ ख्‍यिराङला छेटाङ ख्‍येल्‍गिवी सिनी ङ्‍यिरा ख्‍यिराङला थेङ्‍मा बङी सिक्‍यायिन। दी ति वुतुङ के च्‍युङ्‍सुङ। ती ति ख्‍यिराङला साङ छ्‍या वे।
1TH 3:5 तुक क्‍यानी ङ तरोङ साङ हम क्‍यानी दे माथुप्‍नी ती खोक्‍पा ल्‍हाप शैतानकी ख्‍यिराङला साङ खोक्‍पा ल्‍हासिन ङ्‍यिरा क्‍यावु टेमु ति तेर्मे राङ डिते सिनी ज्‍यिवा लानी ख्‍यिरा तेपा चुकै नोक सिनी ल्हापला तिमोथीला ख्‍यिरा ते तङ्‍गुप यिन।
1TH 3:6 यिने तन्‍दा तिमोथी ख्‍यिरा तेसुर ङ्‍यिरा चाला वानी ख्‍यिरा तेपा ताङ ङ्‍यिङ्‍ज्‍ये क्‍यावु लेन ल्‍यामु ति ङ्‍यिराङला लाप्‍सुङ। तोजो तिराङ मिन, ख्‍यिरा ङ्‍यिराङला ङ्‍यिङ्‍ज्‍ये लानी नरी टेन्‍गिनोक। तमा ङ्‍यिरा ख्‍यिराङला ठेतुप नो क्‍यावु दोके ख्‍यिरा साङ ङ्‍यिराङला छासे ठेतुप नो क्‍या वे सिरुप ति तीकी ङ्‍यिराङला लाप्‍सुङ।
1TH 3:7 तुक क्‍यानी अच्‍युनुपतिवा, ख्‍यिरा तेपा क्‍यावु तप्‍की ङ्‍यिराङ दुक्‍पा ताङ छेटाङला ख्‍येलुप पेला साङ ङाडेङ ङ्‍येनी वे।
1TH 3:8 ख्‍यिरा कोन्‍छ्‍योकला तेपा रम्‍बु क्‍यानी देतुप तप्‍की ङ्‍यिराङ सेम लोदिमु क्‍यानी दे थुप्‍किवी।
1TH 3:9 ख्‍यिरा थोक्‍ला ङ्‍यिराङ कोन्‍छ्‍योककी थोङ्‍दाङला छासे लोदिमु वे। तुक क्‍यानी ङ्‍यिरा खोला चो थुचिछे पुल्‍सिनाङ ङ्‍युङ्‍मु डिवी।
1TH 3:10 ख्‍यिराङला येलुङ ठेनी ख्‍यिरा तेपा ति मङ रम्‍बु जोपला ङ्‍यी ताङ नुप्‍ज्‍या ङ्‍यिराङ कोन्‍छ्‍योकला मोपोर कितिन।
1TH 3:11 त दाक्‍पी पपा कोन्‍छ्‍योक ताङ चोवो येशू ख्रीष्‍टकी ङ्‍यिराङला ख्‍यिरा चाला वुङ्‍गुप लाम ति पेन नङ्‍शी।
1TH 3:12 चुक क्‍यानी ङ्‍यिरा ख्‍यिराङला ङ्‍यिङ्‍ज्‍ये क्‍यावे, तुक राङ क्‍यानी कोन्‍छ्‍योककी ख्‍यिराङला च्‍यिककी च्‍यिकला ताङ मी तेरीला मङ मङ ङ्‍यिङ्‍ज्‍ये कितुप जो नङ्‍शी।
1TH 3:13 तमा चोवो येशू ख्रीष्‍टकी ख्‍यिरा तेपा रम्‍बु जो च्‍यिनी खो खोरे चाङ्‍मा वोतुप मीतिवी मुला फेपुप पेला दाक्‍पी पपा कोन्‍छ्‍योककी दोङ्‍ला ख्‍यिराङ चाङ्‍मा ताङ काङ साङ क्‍येन मेतुप जो नङ्‍शी।
1TH 4:1 तेरी सिनाङ तिङ्‍ला अच्‍युनुपतिवा, चोवो येशूकी मिङला ङ्‍यिराङ ठाकुरे सिनी ख्‍यिराङला गोङ्‍बा शुनी टोङ्‍गु तेरिनो। ख्‍यिरा मिजी चुक क्‍यानी क्‍योङ गोकिवी, चुक क्‍यानी कोन्‍छ्‍योकला गा लोङ गोकिवी सिनी ख्‍यिरा ङ्‍यिरा नेसुर लाप्‍सुङ। तमा तन्‍दा सेक ती दोके कियी वे, तरोङ साङ ख्‍यिराङ मङ मङ फरिन ग्‍युक।
1TH 4:2 तमा चोवो येशूकी ओङला चुका चुका कतिवा ङ्‍यिरा ख्‍यिराङला बिन वे, ती ति ख्‍यिराङला राङ छ्‍या वे।
1TH 4:3 च्‍यिलासिसिन कोन्‍छ्‍योककी नोवा ति ख्‍यिराङ चाङ्‍मा देशी सिरुप यिन। तीकी तेन्‍दोक ति ख्‍यिराङ शम्‍डेन माकी,
1TH 4:4 ख्‍यिराङ दाक दाक्‍पुला टेङ्‍बु क्‍यानी रङगी पेर्मीला ताङ्‍देन की,
1TH 4:5 कोन्‍छ्‍योकला ङो माशेवु मिरिक यम्‍बातिवा दोके शम्‍डेन माकी सिनी सिक्‍यावु यिन।
1TH 4:6 तमा सी साङ खोरो नुपला मेलोक्‍पा मिकिशी। च्‍यिलासिसिन दी तेरी ताम्‍ङेकी छ्‍येर्पा तेरुप ति कोन्‍छ्‍योक राङ यिन। ङ्‍यिरा ख्‍यिराङला गोमाला राङ सिक्‍यायिन।
1TH 4:7 काङ यिन सिसिन कोन्‍छ्‍योककी दाक्‍पुला मेटेङ्‍बुकी थोक्‍ला मिन, यिने टेङ्‍बुकी थोक्‍ला कताङ नङ्‍गुप यिन।
1TH 4:8 तुक क्‍यानी सी दी ताम्‍ङेतिवा मेङ्‍येन्‍वे, तीकी मीला माङ्‍येन्‍दुप मिन, ख्‍यिराङला थु चाङ्‍मा नङ्‍गुप कोन्‍छ्‍योकला माङ्‍येन्‍दुप यिन।
1TH 4:9 त अच्‍युनुपतिवा ङ्‍यिङ्‍ज्‍येकी कोर्ला याङ सी साङ ख्‍यिराङला टिक गोवु मे। च्‍यिलासिसिन च्‍यिककी च्‍यिकला ङ्‍यिङ्‍ज्‍ये कितुपकी कोर्ला ति ख्‍यिराङला कोन्‍छ्‍योक नेसुर राङ येन्‍देन ङ्‍येतुप तप्‍की
1TH 4:10 माकेडोनियाकी तेरी अच्‍युनुपतिवाला ख्‍यिराङ वुतुङ के ङ्‍यिङ्‍ज्‍ये कियी वे। अच्‍युनुपतिवा, तरोङ साङ मङ ल्‍हक्‍पा तुक राङ क्‍यानी ङ्‍यिङ्‍ज्‍ये की सिनी ङ ख्‍यिराङला टोङ्‍गु तेरिन।
1TH 4:11 ङ्‍यिरा ख्‍यिराङला टोङ्‍गु बिन्‍दुप दोके मी यम्‍बी कोर्ला ताम्‍ङे माकी, यिने दाक दाक्‍पी लाकाला नासाम तङ्‍नी लाका की।
1TH 4:12 तुक क्‍यासिन तेपा मिकिवु मीतिवी ख्‍यिराङला ताङ्‍देन किवी। तमा ख्‍यिराङला मी यम्‍बी काङ रे च्‍यिक रे तेर्किते सिनी सुला साङ रेवा क्‍यानी मादे।
1TH 4:13 अच्‍युनुपतिवा शेपतिवी कोर्ला ख्‍यिराङ हाक्‍माकोवा क्‍यानी मेदेशी, तमा रेवा मेतुप मीतिवा दोके सेम्‍दुक क्‍यानी साङ मेदेशी सिरुप ति ङ्‍यिरा नोवा वे।
1TH 4:14 च्‍यिलासिसिन येशू टुङ्‍नी येलुङ ङोसु लावु ति ङ्‍यिराङ तेपा किवी। तुक राङ क्‍यानी येशूला तेपा क्‍यानी शेपतिवाला येशू येलुङ दी जम्‍बुलिङला फेपुप पेला कोन्‍छ्‍योककी येशू ताङ मुला राङ तिवाला कताङ नङ्‍गिवी।
1TH 4:15 चोवो येशू दी जम्‍बुलिङला ज्‍युवु पेला नङ्‍गुप सुङ नेसुर राङ ङ्‍यिराङ ख्‍यिराङला सिरिन। ती शेपतिवा ति चोवो येशू लोङ दी जम्‍बुलिङला फेपुप पेला सेक सेन्‍बु वोतुपतिवा सिनाङ गोमाला के येशूला ठेकिवी।
1TH 4:16 च्‍यिलासिसिन चोवो फेपुप पेला क नङ्‍गुप थोर ग्‍येर्पु ताङ देवाच्‍येनकी लेन क्‍योलुप थु छ्‍येकी वोरु ताङ कोन्‍छ्‍योककी ग्‍यङ्‍डा तोङ्‍गुप वोरु ताङ मुला देवाच्‍येन नेमा पाप्‍नी फेप्‍किवी। तमा ख्रीष्‍टला तेपा क्‍यानी शेपतिवा ति गोमाला के सेन्‍बु लङ्‍गिवी।
1TH 4:17 ती ज्‍युक्‍ला दाक्‍पु तेपा क्‍यानी ती पेला सेक सेन्‍बु लुवुतिवा तिवा ताङ मुला राङ नाम ने केला मुक्‍पी पर्ने चोवोला ठेतुपला तेक्‍नी डिवी। तमा दाक्‍पु नरी खोकी मुला राङ देतुप ङ्‍येकिवी।
1TH 4:18 तुक क्‍यानी च्‍यिककी च्‍यिकला चोवो येशूकी नङ्‍गुप दी सुङ नेसुर टोङ्‍गु बिना।
1TH 5:1 अच्‍युनुपतिवा चोवो येशू चो पेला ताङ नम पेला फेपुप कोर्ला याङ ख्‍यिराङला काङ साङ टिक गोवु मे।
1TH 5:2 च्‍यिलासिसिन चोवो येशू फेपुप तुजे याङ नुपला कुर्मेन वावु दोके हाक्‍माकोवा क्‍यानी गिवी सिरुप ति ख्‍यिराङला राङ छ्‍या वे।
1TH 5:3 मीतिवा लोदिमु ताङ सेम किर्मु क्‍यानी देकिवी। ती पेला पेर्मी पुज्‍युङला हाक्‍माकोवा क्‍यानी आङा क्‍येप सुक ग्‍यपुप दोके तिवी खला छेटाङ ख्‍येल गिवी। तमा तिवा सु साङ ती छेटाङ ने थर मुथुपी।
1TH 5:4 यिने अच्‍युनुपतिवा, ख्‍यिराङ याङ येशूला तेपा क्‍यानी नक्‍तोमीला युकुप मी मिन। ती तप्‍की ती कुर्मेन दोके हाक्‍माकोवा क्‍यानी वुङ्‍गुप छेटाङला मेख्‍येल्‍वी।
1TH 5:5 च्‍यिलासिसिन ख्‍यिराङ तेरी ठछ्‍येली ताङ ङ्‍यिमी गुङगी गिपा यिन, नुप ताङ नक्‍तोमीकी गिपा मिन।
1TH 5:6 तुक क्‍यानी दाक्‍पु ति नक्‍तोमीला ङ्‍यिलोकुप मी यम्‍बा दोके ङ्‍यिमालोक्‍नी च्‍याङ्‍से देतुप।
1TH 5:7 च्‍यिलासिसिन ङ्‍यिलोकुपतिवा नक्‍तोमीला ङ्‍यिलोकिवी, तमा छ्‍याङ्‍गेलेतिवा नक्‍तोमीला आराक थुनी जिवी।
1TH 5:8 यिने दाक्‍पु याङ ठछ्‍येलीला वोतुप कोन्‍छ्‍योककी गिपातिवा यिन्‍दुप तप्‍की च्‍याङ्‍से क्‍यानी देतुप। तमा मक ग्‍यकुप पेला मक्‍मीतिवी छेकोक र्‍होकुपला च्‍या ग्‍यपुप दोके क्‍यानी चोवो येशूला तेपा कितुप ताङ च्‍यिककी च्‍यिकला ङ्‍यिङ्‍ज्‍ये किसा। तमा मक्‍मीतिवी गो र्‍होकुपला च्‍याकी शमुङ कोन्‍दुप दोके क्‍यानी कोन्‍छ्‍योककी दाक्‍पुला थर ज्‍यितुप रेवा क्‍यानी देतुप।
1TH 5:9 च्‍यिलासिसिन कोन्‍छ्‍योककी दाक्‍पुला छ्‍येर्पा तेरुपला मिन, यिने दाक्‍पी चोवो येशू ख्रीष्‍ट नेसुर दिक्‍पा ने थर थुपुपला तोङ्‍ला के पेन नङ्‍गुप यिन।
1TH 5:10 खो दाक्‍पी थोक्‍ला टुङ्‍सुङ। ती तप्‍की दाक्‍पु सेन्‍बु देसिनाङ शिसिनाङ नरी खोकी मुला राङ मिजी क्‍योङ्‍गुप।
1TH 5:11 तुक क्‍यानी ख्‍यिरा तसाम क्‍यावु दोके च्‍यिककी च्‍यिकला टोङ्‍गु बिन्‍नी तेपा रम्‍बु क्‍यानी देता।
1TH 5:12 अच्‍युनुपतिवा, ख्‍यिराङला ङ्‍यिराङ ठाकुरे सिनी गोङ्‍बा शोयी। ख्‍यिरा पर्ला टेमु क्‍यानी ख्रीष्‍टकी ओङला गोमा कितुप ताङ टोङ्‍गु तेरुपतिवाला ताङ्‍देन की।
1TH 5:13 तमा तिवी क्‍यावु लाकाकी थोक्‍ला तिवाला ल्‍यामु क्‍यानी मङ ताङ्‍देन किसा। ख्‍यिराङ तेरीकी मुला थिन्‍नी देता।
1TH 5:14 अच्‍युनुपतिवा, ख्‍यिराङला ङ्‍यिराङ टोङ्‍गु तेरिन। छेर्शिक्‍पातिवाला येन्‍देन बिन, सेम्‍दुक कितुपतिवाला साङ टोङ्‍गु बिन, दाल्‍जा कि गोवुतिवाला दाल्‍जा किटे की, तेरीकी पर्ला कुसु ज्‍यम्‍बु क्‍यानी दे।
1TH 5:15 ख्‍यिराङ सी साङ मेलोक्‍पाकी थोक्‍ला मेलोक्‍पा माकी, यिने च्‍यिककी च्‍यिकला ताङ तेरीला ल्‍यामु कितुप नासाम तोङा।
1TH 5:16 नरी सेम किर्मु क्‍यानी दे।
1TH 5:17 नरी मोपोर क्‍यानी देता।
1TH 5:18 दुक्‍पा ख्‍येल्‍सिनाङ किर्मु वोसिनाङ कोन्‍छ्‍योकला थुचिछे पुल। च्‍यिलासिसिन येशूला तेपा कितुप मीतिवा तुकै राङ वुङ गोकिवी सिरुप ति कोन्‍छ्‍योककी नोवा यिन।
1TH 5:19 कोन्‍छ्‍योककी थु चाङ्‍माकी कितुप लाकाला माग्‍यक।
1TH 5:20 कोन्‍छ्‍योककी लुङ्‍तेम्‍बातिवी नम्‍दर शेतुप ताम्‍ङेला मारे मातोङ।
1TH 5:21 तेरी ताम्‍ङेतिवा ल्‍यामु वोतुप मेतुप ल्‍होसा। तमा चुका ताम्‍ङे ति ल्‍यामु नोके, तीला राङ युसा।
1TH 5:22 मेलोवा वोतुप तेरी ताम्‍ङे दुक्‍टा नेसुर कुतुक देता।
1TH 5:23 लोदिमु नङ्‍गुप कोन्‍छ्‍योककी राङ ख्‍यिराङला तेरी टेङ्‍बु जो नङ्‍शी, तमा दाक्‍पी चोवो येशू ख्रीष्‍ट फेपुप पेला सेक ख्‍यिरा थु ताङ सेम ताङ जु तेरी काङ साङ क्‍येन मेतुप च्‍युङ्‍शी।
1TH 5:24 ख्‍यिराङला कताङ नङ्‍गुप कोन्‍छ्‍योक ति खोङ्‍तेर्मु वे, खोकी राङ ख्‍यिराङला ती तेरी ताम्‍ङेतिवा नङ्‍गिवी।
1TH 5:25 अच्‍युनुपतिवा, ङ्‍यिरा थोक्‍ला साङ मोपोर किसा।
1TH 5:26 तेरी अच्‍युनुपतिवाला ङ्‍यिङ्‍ज्‍ये ताङ मुला टसी देलेक सिसा।
1TH 5:27 चोवोकी मिङला ङ ख्‍यिराङला गोङ्‍बा शोयी, दी यिकी ति रानी तेरी अच्‍युनुपतिवाला ङ्‍येन्‍शिता।
1TH 5:28 दाक्‍पी चोवो येशू ख्रीष्‍टकी कटिन ति ख्‍यिराङला वुङ्‍शी।
2TH 1:1 टसी देलेक! दी यिकी ति ङ पावलकी सिलास ताङ तिमोथी मुला राङ दाक्‍पी पपा कोन्‍छ्‍योक ताङ चोवो येशू ख्रीष्‍टला तेपा कितुप थेसलोनिकेकी चर्चकी मीतिवाला टिवु यिनो।
2TH 1:2 दाक्‍पी पपा कोन्‍छ्‍योक ताङ चोवो येशू ख्रीष्‍ट नेसुर ख्‍यिराङला कटिन ताङ लोदिमु वुङ्‍शी।
2TH 1:3 अच्‍युनुपतिवा, ख्‍यिरा थोक्‍ला ङ्‍यिराङ नरी कोन्‍छ्‍योकला थुचिछे बुल राङ गोकिवी। च्‍यिलासिसिन ख्‍यिरा येशूला क्‍यावु तेपा ति ङ्‍यिमा तक्‍पा रम्‍बु डोयी वे। तमा ख्‍यिरा च्‍यिककी च्‍यिकला मङ मङ ङ्‍यिङ्‍ज्‍ये साङ छासे कियी वे।
2TH 1:4 ख्‍यिराङ चो छेटाङ ताङ शैतानकी खोक्‍पा ल्‍हाप ताम्‍ङेतिवा ख्‍येल्‍सिनाङ येशूला तेपा रम्‍बु क्‍या देतुप ताङ हम क्‍यानी देतुप तप्‍की ङ्‍यिराङ कोन्‍छ्‍योकला तेपा कितुप चर्चकी मीतिवी पर्ला तेके कियी वे।
2TH 1:5 कोन्‍छ्‍योककी ख्‍ये मापेवा क्‍यानी च्‍यिक्‍पा राङ ठिम क्‍या नङ्‍गिवी सिरुप पङ्‍बु छ्‍या देन्‍दुपला ख्‍यिरा तुका छेटाङ ताङ दुक्‍पा खुरुप यिन। ख्‍यिरा तुक क्‍यानी छेटाङ ताङ दुक्‍पा खुर्सिन कोन्‍छ्‍योककी ग्‍येल्‍खापला शुक छ्‍योकिवी। दी ताम्‍ङे ति ख्‍यिरा हाक्‍कोवा की।
2TH 1:6 कोन्‍छ्‍योक ति ठिम टेङ्‍बु क्‍या नङ्‍गुप कोन्‍छ्‍योक यिन। खोकी ख्‍यिराङला छेटाङ तेरुपतिवाला छेटाङ तेर्किवी।
2TH 1:7 तमा ख्‍यिराङ खोकी थोक्‍ला दुक्‍पा खुरुपतिवा ताङ ङ्‍यिराङला ति सेम किर्मु नङ्‍गिवी। चोवो येशू देवाच्‍येन नेमा बरुप मे ताङ ङार छ्‍येवु ओङ वोतुप देवाच्‍येनकी लेन क्‍योलुप थुतिवी मुला फेपुप पेला
2TH 1:8 कोन्‍छ्‍योकला ङो माशेवु ताङ दाक्‍पी चोवो येशूकी लेन ल्‍यामुला तेपा मिकिवु मीतिवाला खोकी पर्च्या तोङ्‍गिवी।
2TH 1:9 तमा ती पर्च्या ङ्‍येतुपतिवा ति चोवो येशूकी मु नेसुर ताङ खोकी ङार छ्‍येवु ओङ वोतुप मोवा नेसुर तेन्‍नी नरीकी थोक्‍ला ना तोङ्‍गिवी।
2TH 1:10 चोवो येशू फेपुप तुजेला खोला तेपा कितुपतिवा तेरीकी खोला मोवा कितुप ताङ सोवा देकिवी। ङ्‍यिरा पङ्‍बु बिन्‍दुप ताम्‍ङेला ख्‍यिरा तेपा क्‍यावु तप्‍की ती पेला ख्‍यिराङ साङ तिवी मुला राङ वुङ्‍गिवी।
2TH 1:11 ती तप्‍की ख्‍यिराङ ल्‍यामो क्‍यानी नासाम तोङ। खोकी नोवा नेसुर ख्‍यिराङला कताङ नङ्‍गुप दोके क्‍यानी मिजी क्‍योङ्‍गुप ताङ ख्‍यिरा नासाम ताङ तेपा नेसुर वुङ्‍गुप तेरी लाका ति खोकी ङार नेसुर तेरी डुप्‍शी सिनी ङ्‍यिराङ नरी दाक्‍पी कोन्‍छ्‍योकला मोपोर किवी।
2TH 1:12 तुक क्‍यासिमा दाक्‍पी कोन्‍छ्‍योक ताङ चोवो येशूकी कटिन नेसुर ख्‍यिरा खोकी मिङला मोवा कितुप ताङ ख्‍यिराङला साङ कोन्‍छ्‍योक नेमा वुङ्‍गुप च्‍यम्‍बा ङ्‍येकिवी।
2TH 2:1 अच्‍युनुपतिवा, दाक्‍पी चोवो येशू ख्रीष्‍ट फेपुप ताङ दाक्‍पु खोला ठेतुपला मुला राङ जोम्‍बुप कोर्ला ङ्‍यिराङ ख्‍यिराङला गोङ्‍बा शोयी।
2TH 2:2 ललाइ लुङ्‍तेम्‍बा याङ्‍ना ताम्‍ङे याङ्‍ना ललाइ यिकी नेसुर चोवो फेपुप तुजे वा वे सिक्‍यासिन ख्‍यिराङ पप साङ माकी, यर्मिन मर्मिन साङ माडो।
2TH 2:3 सी साङ ख्‍यिराङला काङगी थोक्‍ला साङ जिनोक जोनी मुलुशी। च्‍यिलासिसिन गोमाला कोन्‍छ्‍योककी तेन्‍दोकला लङ्‍गुप मी दिक्‍छेनतिवा बङी वुङ्‍गुप ताङ ना तोङ गोवु दुक्‍टाकी गिपा माथेन्‍दा सेक्‍ला ती तुजे ति मेवी।
2TH 2:4 ती ना तोङ्‍गुप दुक्‍टाकी गिपा तीकी मीतिवी सोवा देकुपला जोवु तेरी च्‍यालकतिवाला तेन्‍दुप ताङ कोन्‍छ्‍योक दोके जोनी खो ज्‍यु वोतुप दासा चाङ्‍माला देनी खुरुङ राङ कोन्‍छ्‍योक यिन सिनी खोकी तेन्‍दोकला लङ्‍गिवी।
2TH 2:5 ती ताम्‍ङे ति ङ ख्‍यिरा मुला वोतुप पेला नेज्‍युनी ख्‍यिराङला सिक्‍यावु मिन रो?
2TH 2:6 तन्‍दा ती दुक्‍टाकी गिपा ति क्‍येक्‍नी ज्‍याङ वे सिरुप ति ख्‍यिराङला छ्‍या राङ वे। ती दुक्‍टा ति खोरो तुजे छेसिमा गिवी।
2TH 2:7 ती छ्‍याकला वोतुप दुक्‍टाकी ओङकी मीतिवाला कोन्‍छ्‍योककी सुङ ङ्‍येन मिज्‍यिवु लाका कियी राङ वे। यिने कोन्‍छ्‍योककी पिताङ तोङ सिनी मासुङा सेक ती दुक्‍टाला क्‍येक्‍नी ज्‍योकुप मी तीकी ती दुक्‍टा तीला क्‍येक्‍नी राङ ज्‍योकिवी।
2TH 2:8 ती दुक्‍टा तीला पि तोङ्‍गुप पेला चोवो येशू दी जम्‍बुलिङला फेप्‍किवी। तमा खो फेवु पेला ग्‍यपुप वोसिर ताङ खोकी उकी राङ तीला ना तोङ्‍गिवी।
2TH 2:9 ती दुक्‍टाकी गिपा ति शैतानकी ओङ नेसुर वुङ्‍गुप पेला तीकी मीतिवाला मेटेङ्‍बु वोतुप जिम्‍डुल ताङ त ताङ हलेवु लाकातिवा छ्‍या देन्‍दुप ताङ
2TH 2:10 येशूला तेपा माक्‍यावु तप्‍की ना डोपतिवाला जिनोक छ्‍या तेन्‍गिवी। च्‍यिलासिसिन दाक्‍पुला मिजी नङ्‍गुप टेङ्‍बु वोतुप कोन्‍छ्‍योकला तिवी सेमला मालावु तप्‍की यिन।
2TH 2:11 तुक क्‍यानी तिवा जिनोक जोवु ताम्‍ङेला तेपा किशी सिनी कोन्‍छ्‍योककी तिवी सेम ति दुक्‍टाला राङ तेपा कितुपला पिताङ ताङ्‍सुङ।
2TH 2:12 तमा टेङ्‍बु वोतुप कोन्‍छ्‍योकला तेपा माक्‍यानी मेटेङ्‍बुला गा कितुपतिवा तेरीला खोकी क्‍येन तेर्किवी।
2TH 2:13 यिने चोवोकी ङ्‍यिङ्‍ज्‍येवु अच्‍युनुपतिवा, ख्‍यिरा थोक्‍ला कोन्‍छ्‍योकला ङ्‍यिराङ नरी थुचिछे बुलिन। च्‍यिलासिसिन कोन्‍छ्‍योककी गोमा नेज्‍यु ख्‍यिराङला खोकी थु चाङ्‍मा नेमा चाङ्‍मा जो नङ्‍गुपला ताङ कोन्‍छ्‍योक टेङ्‍बुला तेपा क्‍यानी शेप ने र्‍होकुपला खोकी पेन नङ्‍गुप तप्‍की यिन।
2TH 2:14 तीकी थोक्‍ला राङ ङ्‍यिरा ख्‍यिराङला ख्‍याप्‍टाक क्‍यावु लेन ल्‍यामु नेसुर दाक्‍पी येशू ख्रीष्‍टकी मोवा थोपुपला खोकी ख्‍यिराङला कताङ नङ्‍गुप यिन।
2TH 2:15 ती तप्‍की अच्‍युनुपतिवा, तेपा रम्‍बु क्‍यानी ङ्‍यिरा ख्‍याप्‍टाक क्‍यावु सुङ याङ्‍ना ङ्‍यिरा तङ्‍गुप यिकी नेसुर ख्‍यिराङला ङ्‍येतुप येन्‍देनला युसा।
2TH 2:16 तमा दाक्‍पुला ङ्‍यिङ्‍ज्‍ये क्‍या नङ्‍गुप ताङ खोकी कटिन नेसुर नरीकी थोक्‍ला टोङ्‍गु ताङ रेवा ल्‍यामु नङ्‍गुप दाक्‍पी पपा कोन्‍छ्‍योक ताङ चोवो येशू ख्रीष्‍टकी
2TH 2:17 ख्‍यिरा सेमला लोदिमु नङ्‍शी, तमा तेरी लाका ताङ ताम्‍ङे ल्‍यामु कितुपला ख्‍यिराङला रम्‍बु जो नङ्‍शी।
2TH 3:1 त तेरी सिनाङ तिङ्‍ला अच्‍युनुपतिवा, ङ्‍यिरा थोक्‍ला मोपोर किसा। कोन्‍छ्‍योककी लेन ल्‍यामु ति ख्‍यिरा पर्ला टम्‍बुप दोके टिम्‍बु क्‍यानी टम्‍शी, तमा दासा तेरीकी मीतिवी ताङ्‍देन क्‍यानी ङ्‍येन्‍शी,
2TH 3:2 तमा सेम मेलोवा ताङ दुक्‍टा वोतुप मीतिवा नेसुर दाक्‍पु पे थुप्‍शी। च्‍यिलासिसिन तेरी मीतिवा कोन्‍छ्‍योकला तेपा क्‍यावु मे।
2TH 3:3 यिने चोवो याङ खोङ्‍तेर्मु वोतुप चोवो यिन्‍दुप तप्‍की खोकी ख्‍यिराङला नरी रम्‍बु जो नङ्‍गिवी, तमा दुक्‍टा नेसुर र्‍होकिवी।
2TH 3:4 ङ्‍यिरा ख्‍यिराङला काङ की सिक्‍यावे, ती ति ख्‍यिरा कियी साङ वे, ती लाका ति तिङ्‍ला साङ किवी सिनी ङ्‍यिराङला छासे तेन्‍तेन वे।
2TH 3:5 कोन्‍छ्‍योककी ख्‍यिराङला चुक क्‍यानी ङ्‍यिङ्‍ज्‍ये क्‍या नङ्‍गुप ताङ ख्रीष्‍टकी चो छेटाङ ख्‍येल्‍सिनाङ हम क्‍या देतुप ति ख्‍यिरा सेमला ल्‍यामो क्‍यानी हाक्‍कोवुला गोमा किशी।
2TH 3:6 अच्‍युनुपतिवा, दाक्‍पी चोवो येशू ख्रीष्‍टकी मिङला ङ्‍यिराङ ख्‍यिराङला टोङ्‍गु तेरिन। छेरा कितुप ताङ ङ्‍यिरा सिक्‍यावु येन्‍देन मेङ्‍येन्‍दुपतिवा तेरी नेसुर कुतुक दे।
2TH 3:7 च्‍यिलासिसिन ङ्‍यिरा काङ क्‍यावे, ख्‍यिरा साङ तुकै राङ क्‍यानी ङ्‍यिरा लुमु से गोकिवी सिरुप ति ख्‍यिराङला छ्‍या राङ वे। ख्‍यिरा मुला वोतुप पेला ङ्‍यिरा छेरा माक्‍या,
2TH 3:8 सी समा साङ तुक राङ मासो, यिने ख्‍यिराङला कले मेख्‍येल्‍शी नोनी ङ्‍यी ताङ नुप्‍ज्‍या हुर्ताक क्‍यानी रङगी टेमु क्‍यानी लाका क्‍यायी।
2TH 3:9 ङ्‍यिराङला ख्‍यिराङ नेसुर दाल्‍जा ङ्‍येतुप ओङ मेतुप याङ मिन, यिन्‍सिनाङ ख्‍यिरा ङ्‍यिरा क्‍यावु दोके क्‍यानी ङ्‍यिरा लुमु से गोकिवी सिरुप ति ख्‍यिराङला हाक्‍कोशी सिनी ङ्‍यिरा तुक क्‍यावु यिन।
2TH 3:10 च्‍यिलासिसिन ङ्‍यिराङ ख्‍यिरा मुला वोतुप पेला “सी लाका मिकिवे, तीकी समा साङ मासाशी।” सिनी ख्‍यिराङला टोङ्‍गु बिन्‍दुप यिन।
2TH 3:11 यिने ख्‍यिरा पर्ला माङ्‍शोक मीतिवा छेरा क्‍यानी लाका मिकिवु ताङ मी यम्‍बी क्‍यावु लाकाला तोक्‍सा छोकुप लाका किनोक सिरुप ति ङ्‍यिरे थोसुङ।
2TH 3:12 तिवाला ङ्‍यिराङ चोवो येशू ख्रीष्‍टकी मिङला क ताङ टोङ्‍गु तेरिन। तिवा खरक्‍पा सोक सोके देनी दाक दाक्‍पी लाका क्‍यानी सशी।
2TH 3:13 अच्‍युनुपतिवा, ख्‍यिराङ ति लाका ल्‍यामु कितुपला यिछ्‍येता माकी।
2TH 3:14 सी दी ङ्‍यिरा तङ्‍गुप यिकीला टिवु ताम्‍ङे ति मेङ्‍येन्‍वे, तुका मीतिवा ल्‍यामो क्‍यानी ङो शेनी ज्‍योक। तिवी मुला तम्‍जी साङ माजो। तमा तिवा ङोछाला ख्‍येल्‍शी।
2TH 3:15 यिन्‍सिनाङ तिवाला डला माजो, यिने रङगी नुपला दोके क्‍यानी टोङ्‍गु बिन।
2TH 3:16 त लोदिमु वोतुप चोवोकी ख्‍यिराङला चो पेला कनी गल्‍सिनाङ नरी लोदिमु नङ्‍शी। तमा खो नरी ख्‍यिरा तेरीकी मुला राङ ज्‍युशी।
2TH 3:17 दी यिकी ति ङ पावलकी राङ टिक च्‍यिनी तङ्‍गुप यिनो। दी तेरी सिनाङ तिङ्‍ला टसी देलेक सिनी टिवु ति दी यिकी ङे राङ तङ्‍गुप यिन सिनी ख्‍यिराङला हाक्‍को ज्‍यितुपला ङरा लाक्‍पी राङ टिवु यिनो।
2TH 3:18 दाक्‍पी चोवो येशू ख्रीष्‍टकी कटिन ति ख्‍यिराङ तेरीला थोप्‍शी।
1TI 1:1 टसी देलेक! दी यिकी ति दाक्‍पुला थर्वा नङ्‍गुप चोवो कोन्‍छ्‍योक ताङ दाक्‍पी रेवा क्‍यावु येशू ख्रीष्‍टकी क नेसुर खोकी लोमा छ्‍ये च्‍युङ्‍गुपला पेतुप ङ पावलकी
1TI 1:2 वुतुङ के तेपा कितुप आङ तिमोथीला टिवु यिनो। पपा कोन्‍छ्‍योक ताङ दाक्‍पी चोवो येशू ख्रीष्‍ट नेमा ख्‍युरुङला कटिन ताङ च्‍यम्‍बा ताङ लोदिमु वुङ्‍शी।
1TI 1:3 ङ माकेडोनिया डोप पेला ख्‍युरुङला ङे एफिससला राङ दे सिक्‍यावु तेन्‍दोक ति तेकी येन्‍देन मेटेङ्‍बु लोपुप मीतिवाला तुक माकी सिनी क तेरुपला यिन।
1TI 1:4 तमा तिवाला यहूदी गिपाकी पगावा हङ्‍गावाकी काङ काङ क्‍यासुङ, तिवा सु सु यिन सिरुप कोर्ला साङ ङ्‍याम अला माकी सिनी क तेरुपला यिन। च्‍यिलासिसिन तुक क्‍यावु ति कोन्‍छ्‍योककी खोरे नोवाला क्‍यावु लाकाकी थोक्‍ला ताम्‍ङे कितुप सिनाङ केवुल तिराङ क्‍यावु यिन।
1TI 1:5 दाक्‍पी तिवाला क बिन्‍दुप तेन्‍दोक ति तिवा सेम टेङ्‍बु ताङ नासाम ल्यामु वोतुप ताङ तेपा टेङ्‍बु क्‍यानी ङ्‍यिङ्‍ज्‍ये कि ज्‍यितुपला यिन।
1TI 1:6 यिने ललाइ मीतिवा तुका ताम्‍ङेला क्‍युर ज्‍याक्‍नी ताम्‍ङे मेशोलोकला येनी देन वे।
1TI 1:7 तिवा खोप्‍राङला ति मोशाकी ठिमकी गेकेन सिरुप नोकिवी, यिने तिवी खोप्‍रे क्‍यावु ताम्‍ङे ताङ तेन्‍तेन क्‍यानी लापुप ताम्‍ङे ति खोप्‍राङला राङ ल्‍यामु हाक्‍मोकोवी।
1TI 1:8 ल्‍यामु क्‍यानी ती ठिमला सिक्‍यावु दोके मिजी क्‍याङ्‍सुङ सिसिन ती ठिम ति ल्‍यामु वे सिरुप ति दाक्‍पुला छ्‍या वे।
1TI 1:9 ती ठिम ति मी टेङ्‍बुकी थोक्‍ला मिन, यिने ठिमला मुयुकुपतिवा ताङ सिक्‍यावु ताम्‍ङेला मेङ्‍येन्‍दुपतिवा ताङ कोन्‍छ्‍योकला मेतेन्‍दुपतिवा ताङ दिक्‍छेनतिवा ताङ मेटेङ्‍बुतिवा ताङ कोन्‍छ्‍योकला मारे तोङ्‍गुपतिवा ताङ पपाआमा ताङ मी यम्‍बाला सेतुप मीतिवी थोक्‍ला ताङ
1TI 1:10 शम्‍डेन कितुपतिवा ताङ ख्‍योक्‍पेजा ख्‍योक्‍पेजी मुला ङोजु मेतुप लाका कितुप ताङ मीतिवाला लुनी चोङ्‍गुपतिवा ताङ जिनोक जोपतिवा ताङ जिनोक जोनी न क्‍योलुपतिवा ताङ येन्‍देन टेङ्‍बुकी तेन्‍दोकला लङ्‍गुपतिवी थोक्‍ला यिन।
1TI 1:11 दाक्‍पी येन्‍देन ति मोलाम नङ्‍गुप कोन्‍छ्‍योक टेङ्‍बुकी मोवा वोतुप लेन ल्‍यामु ताङ मुला डिकिवी। ती ति खोकी ङला चेक तेन नङ्‍नी वे।
1TI 1:12 ङला ङार नङ्‍गुप दाक्‍पी चोवो ख्रीष्‍ट येशूला थुचिछे बुलिन, च्‍यिलासिसिन खोकी खोरुङला शब्‍ज्‍यी कितुपकी थोक्‍ला ङला खोङ्‍तेर्मु वोतुप सिनी चिसुङ।
1TI 1:13 गोमाला याङ ङे खोला मारे तङ्‍नी तेपा कितुपतिवाला दुक्‍पा बिन्‍नी ङ्‍यप्‍च्‍ये क्‍यायिन। ती ति ङे खोला तेपा माक्‍यावु पेला हाक्‍माकोनी क्‍यावु तप्‍की तन्‍दा खोकी ङला च्‍यम्‍बा नाङ्‍सुङ।
1TI 1:14 चोवोकी ङला नङ्‍गुप कटिन ति छासेकी ग्‍येर्पु वे। तोजो तिराङ मिन, खोकी ङला ख्रीष्‍ट येशूला वोतुप तेपा ताङ ङ्‍यिङ्‍ज्‍ये बङी क्‍या नाङ्‍सुङ।
1TI 1:15 दी सुङ ति मी तेरीकी यिन्‍ज्‍यिक मिन्‍ज्‍यिक सेमला लिङ गोकिवी। च्‍यिलासिसिन दी सुङ ति दिक्‍छेनतिवाला दिक्‍पा ने थर ज्‍यितुपला येशू ख्रीष्‍ट दी जम्‍बुलिङला फेपुपकी कोर्ला यिन। ती दिक्‍छेनतिवी नाङ्‍ला तेरी सिनाङ दिक्‍छेन ति ङ राङ यिन।
1TI 1:16 यिन्‍सिनाङ कोन्‍छ्‍योककी ङला च्‍यम्‍बा नाङ्‍सुङ। च्‍यिलासिसिन ङ दिक्‍छेन यिन्‍सिनाङ ङे मिजी नेसुर येशू ख्रीष्‍टकी छासेकी हम क्‍या देतुप ओङ छ्‍या तेन्‍नी खोला तेपा क्‍यानी नाम्‍साङ मिशिवु मिजी थोपुपकी थोक्‍ला ङ ति पङ्‍बु च्‍युङ्‍गुप यिन।
1TI 1:17 तमा थल्‍मा नेज्‍यु नरीकी नरी सेक ज्‍यु वोतुप दाक्‍पी मिककी मोथोङ्‍गुप ग्‍येल्‍वु ताङ च्‍यिक राङ वोतुप कोन्‍छ्‍योकला ताङ्‍देन ताङ मोवा ति नरीकी नरी वुङ्‍शी। आमिन।
1TI 1:18 ङे ङ्‍यिङ्‍ज्‍येवु आङ तिमोथी, गोमाला के कोन्‍छ्‍योककी लुङ्‍तेम्‍बातिवी ख्‍योरो थोक्‍ला नम्‍दर शेतुप ताम्‍ङे दोके ङ येलुङ क तेरिन। मक्‍मीतिवी ङाडेङ क्‍यानी थमु ग्‍यकुप दोके क्‍यानी चोवो कोन्‍छ्‍योककी थोक्‍ला लाका ल्‍यामु की।
1TI 1:19 तमा येशू ख्रीष्‍टला तेपा कितुप ताङ सेम टेङ्‍बु क्‍यानी दे। ललाइ ललाइकी सेम टेङ्‍बु माक्‍यानी खोरो क्‍यावु तेपा साङ ना गाल्‍सुङ।
1TI 1:20 तिवी पर्ला हुमेनियस ताङ अलेक्‍जेन्‍डर साङ यिन। तिवी कोन्‍छ्‍योकला मारे तोङ्‍गुप मेङ्‍नोक सिरुप ति हाक्‍कोशी सिनी ङे तिवाला शैतानकी लकला ख्‍येल च्‍यितुप यिन।
1TI 2:1 तेरी सिनाङ गोमाला ङ ख्‍युरुङला ठाकुरे सिरिन। तेपा कितुप तेरी मीतिवी थोक्‍ला ख्‍योरो कोन्‍छ्‍योकला गोङ्‍बा शुनी मोपोर कितुप ताङ खोला थुचिछे पुल।
1TI 2:2 तमा ग्‍येल्‍वुतिवा ताङ ग्‍येल्‍वी ओङला लाका कितुप मी छ्‍येतिवा तेरीकी थोक्‍ला साङ मोपोर की। तुक क्‍यासिन दाक्‍पु लोदिमु क्‍यानी कोन्‍छ्‍योकला सोवा देकुप ताङ ल्‍यामु वोतुप मिजी क्‍योङ थुप्‍शी।
1TI 2:3 दी ति दाक्‍पुला दिक्‍पा ने थर ज्‍यितुप कोन्‍छ्‍योककी थोङ्‍दाङला ल्‍यामु ताङ खोला सोवा देक छ्‍योवु डिवी।
1TI 2:4 मीतिवा तेरी दिक्‍पा ने थर्नी टेङ्‍बु वोतुप कोन्‍छ्‍योककी रिक्‍पा ङ्‍येशी सिरुप ति कोन्‍छ्‍योककी नोवा यिन।
1TI 2:5 कोन्‍छ्‍योक ति च्‍यिक राङ ज्‍यु वे। तमा कोन्‍छ्‍योक ताङ मीतिवी पर्ला डिक्‍नी तम्‍जी ल्‍यामु जोप मिरा च्‍यिक वे। ती मी ति ख्रीष्‍ट येशू यिन।
1TI 2:6 खोकी तेरी मीतिवाला दिक्‍पा ने थर ज्‍यितुपला खोरे मिजी साङ मी थोक्‍ला जिन्‍बा च्‍युङ्‍सुङ। तीकी कोर्ला पङ्‍बु छ्‍या देन्‍दुप टेके तुजे ति तन्‍दा राङ यिन।
1TI 2:7 तीकी थोक्‍ला ङ खोकी सुङ ख्‍याप्‍टाक कितुपला लोमा छ्‍ये च्‍युङ्‍गुप यिन। तुक क्‍यानी ङ यहूदी मिन्‍दुप मिरिक यम्‍बाकी मीतिवाला तेपा कि ज्‍यितुपला ताङ टेङ्‍बुकी कोर्ला लोपुप गेकेन साङ च्‍युङ्‍गुप यिन। दी ताम्‍ङे ती टेङ्‍बु सिरिन, जिनोक मिन।
1TI 2:8 ती तप्‍की तेरी जोम्‍नी सोवा देकुप पेला ख्‍योक्‍पेजातिवी सेमला ङ्‍यिर्मु मिकिवु ताङ खाँदा माक्‍यानी क्‍येन मेतुप लाक्‍पा लाङ्‍नी मोपोर किशी सिरुप ति ङे नोवा वे।
1TI 2:9 तुक राङ क्‍यानी पुम्‍पेजातिवी साङ छ्‍येजु कितुप मिन, कुसु ज्‍यम्‍बु क्‍यानी दाक दाक्‍पुला पोमु वुङ्‍गुप मज्‍यातिवा कोन्‍शी। र्‍ह ल्हामा ल्हानी मज्‍या ल्‍यामु कोन्‍नी छ्‍यानी सेर ताङ मोती ताङ गोङ नावु मज्‍यातिवा कोन्‍नी मिन,
1TI 2:10 यिने किताङ नालु ल्‍यामु वुङ गोकिवी। तुक कितुप ति कोन्‍छ्‍योकला मोवा कितुप पुम्‍पेजातिवाला पोमु गिवी।
1TI 2:11 पुम्‍पेजातिवा खरक्‍पा सोक सोके देतुप ताङ ओङ वोतुप मीतिवी खला ङ्‍येन्‍दुपला लोप्‍शी।
1TI 2:12 पुम्‍पेजातिवी ख्‍योक्‍पेजाला लोपुप ताङ ख्‍योक्‍पेजाला ओङ्‍ज्‍येन कि सिनी ङ मिसिर, यिने तिवा खरक्‍पा सोक सोके देशी।
1TI 2:13 च्‍यिलासिसिन थल्‍माला कोन्‍छ्‍योककी आदमला जो नङ्‍गुप यिन, ती ज्‍युक्‍ला पुम्‍पेजा हव्‍वाला जो नङ्‍गुप यिन।
1TI 2:14 आदम ति शैतानकी जिनोकला ख्‍येलुप मिन, पुम्‍पेजा ति शैतानकी जिनोकला ख्‍येल्‍नी दिक्‍पाला शोरुप यिन।
1TI 2:15 यिने पुम्‍पेजातिवी येशूला तेपा कितुप ताङ ङ्‍यिङ्‍ज्‍ये कितुप ताङ टेङ्‍बुकी मिजी क्‍याङ्‍सुङ सिसिन आङा क्‍येप पेला कोन्‍छ्‍योककी तिवाला र्‍होकिवी।
1TI 3:1 दी ताम्‍ङे ति लो तेन गोवु यिन। चुका मी तीकी चर्चला गोमा कितुप नो किवे, तीकी ल्‍यामु राङ कितुप नो क्‍यावु यिन।
1TI 3:2 यिने तुका चर्चला गोमा कितुप मीतिवा ति क्‍येन मेतुप ताङ पेर्मी च्‍यिक राङ वोतुप ताङ काङ किसिनाङ छे क्‍यानी कितुप ताङ सेम थिला ज्‍योकुप ताङ मीतिवी ताङ्‍देन क्‍यावु ताङ डेन्‍बुला ताङ्‍देन कितुप ताङ येन्‍देन लोप थुपुप वुङ गोकिवी।
1TI 3:3 तमा छ्‍याङ्‍गेले मिकिवु ताङ टिम्‍बु ङ्‍यिर्मु मिकिवु, यिने कुसु ज्‍यम्‍बु वोतुप ताङ थमु मग्‍यकुप ताङ नोरला देर्पा मिकिवु ताङ
1TI 3:4 खोरो खाङ्‍बा शिङ ल्‍यामु कि थुपुप ताङ पेजातिवी खुरुङला ताङ्‍देन क्‍यानी खला ङ्‍येमु जोवु वुङ गोकिवी।
1TI 3:5 दोजो तीकी खोरो खाङ्‍बीतिवाला साङ डेकला ज्‍योक माथुप्‍सुङ सिसिन चर्चला चुक क्‍यानी डेकला ज्‍योक थुप्‍किवी रो?
1TI 3:6 तमा चर्चला गोमा कितुप मी ति मलोक तेपा क्‍यावु मी साङ वुङ्‍गुप मेवी। मिसियाङ तीकी खुरुङला ङ राङ यिन सिवी, तमा कोन्‍छ्‍योककी शैतानला ना तङ्‍गुप दोके क्‍यानी तीला पर्च्याला ख्‍येल्‍गिवी।
1TI 3:7 तुका मी ति येशूला तेपा माक्‍यावु मीतिवी थोङ्‍दाङला साङ ल्‍यामु वुङ गोकिवी। तुक क्‍यासिन मीतिवा तीकी तेन्‍दोकला मलाङ्‍गिवी, तमा शैतानकी ओङला साङ मेख्‍येल्‍वी।
1TI 3:8 तुक राङ क्‍यानी चर्चला ल्हाटे कितुप मीतिवा साङ नासाम ल्‍यामु तोङ्‍गुप वुङ गोकिवी। तन्‍दा राङ च्‍यिक तन्‍दा राङ च्‍यिक सिरुप ताङ छ्‍याङ्‍गेले कितुप ताङ नोरला देर्पा कितुप मिन,
1TI 3:9 यिने तिवा खोरो क्‍यावु तेपाला टेङ्‍बु वोतुप ल्‍यामो हाक्‍कोनी नरी सेम टेङ्‍बु क्‍यानी ज्‍योकुप वुङ गोकिवी।
1TI 3:10 तुका मी ति गोमाला ल्‍यामु वोतुप मेतुप ल्हो, तमा क्‍येन मेतुप पङ्‍बु वोसिन तिराङ चर्चला ल्हाटे कितुप लाका किशी।
1TI 3:11 तुक राङ क्‍यानी तिवी पेर्मीतिवा साङ किताङ नालु ल्‍यामु वोतुप ताङ मीला मारे मोतोङ्‍गुप ताङ डेकला देतुप ताङ तेरी ताम्‍ङेला खोङ्‍तेर्मु वुङ गोकिवी।
1TI 3:12 चर्चला ल्हाटे कितुप मी ति पेर्मी च्‍यिक राङ वोतुप वुङ गोकिवी। खोरो पुज्‍युङपुमतिवा ताङ खाङ्‍बा शिङ ल्‍यामु क्‍यानी च्‍योम च्‍योम कि थुपुप वुङ गोकिवी।
1TI 3:13 सी चर्चला ल्‍यामु ल्हाटे किवे, तिवाला मीतिवी साङ ताङ्‍देन किवी। तमा तिवी येशू ख्रीष्‍टला तेपा रम्‍बु क्‍यानी मीतिवाला साङ ङाडेङ क्‍यानी लोप थुप्‍किवी।
1TI 3:14 ङ ख्‍योरो ते ङमु राङ वुङ्‍गुप नो वे। यिन्‍सिनाङ दी यिकी ति ङे ख्‍युरुङला टिवु यिनो।
1TI 3:15 ङ वुङ्‍गुप फिमु गल्‍सिनाङ दी यिकी रानी दाक्‍पु कोन्‍छ्‍योककी मिछाङला चुक क्‍यानी मिजी क्‍योङ गोकिवी सिरुप ति हाक्‍कोवा किसा। ती कोन्‍छ्‍योककी मिछाङ ति ङोसु वोतुप कोन्‍छ्‍योककी चर्च यिनो। ती चर्च ति सुङ टेङ्‍बुकी डम्‍ज्‍यी रम्‍बु ताङ कज्‍यु यिन।
1TI 3:16 वुतुङ के छ्‍याकला वोतुप दाक्‍पी क्‍यावु तेपाकी तेन्‍दोक ति छासे छ्‍ये वे। “येशू ख्रीष्‍ट ति मी जुजमला दी जम्‍बुलिङला फेप्‍सुङ। तमा कोन्‍छ्‍योककी थु चाङ्‍माकी खोला टेङ्‍बु वोतुप सिनी चिसुङ। खो देवाच्‍येनकी लेन क्‍योलुप थुतिवी पर्ला थोङ्‍सुङ। तमा खोकी कोर्ला लुङ्‍बा लुङ्‍बाला ख्‍याप्‍टाक क्‍यासुङ। जम्‍बुलिङकी मीतिवी खोला तेपा क्‍यासुङ। येलुङ कोन्‍छ्‍योककी खोला ताङ्‍देन ताङ क्‍यानी देवाच्‍येन ने तेक्‍नी फेप्‍सुङ।”
1TI 4:1 कोन्‍छ्‍योककी थु चाङ्‍माकी टेङ्‍बु सुङ्‍गिवी। तिङ्‍मी तुजेला जिनोक जोप र्‍हेन्‍डी ताङ डेकी ताम्‍ङेला ङ्‍येन्‍नी मी ललाइकी तेपा कितुप क्‍युर्नी ज्‍योकिवी।
1TI 4:2 ती तेरी येन्‍देनतिवा ति मी खोनक्‍पुतिवा नेसुर गिवी। तिवी सेम ति शैतानकी ति यिन सिनी च्‍या छेन्‍दी थ्‍वोनी डाम ग्‍यपुप दोके यिन।
1TI 4:3 तिवी जेन्‍दी कितुप मेवी, ललाइ समा साङ साप मेवी सिनी ग्‍येकिवी। यिने ती समातिवा ति तेपा कितुपतिवा ताङ टेङ्‍बु काङ यिन सिनी ङो शेवुतिवी थुचिछे पुल्‍नी सापला कोन्‍छ्‍योककी ज्‍ये नङ्‍गुप यिन।
1TI 4:4 कोन्‍छ्‍योककी ज्‍येवु तेरी च्‍यालकतिवा ल्‍यामु वे। तुक क्‍यानी थुचिछे पुल्‍नी सोसिन साप मेवी सिनी सि मोगोवी।
1TI 4:5 च्‍यिलासिसिन तिवा ति कोन्‍छ्‍योककी सुङ ताङ खोला मोपोर क्‍यासिमा चाङ्‍मा वुङ्‍गिवी।
1TI 4:6 ती येन्‍देन ति ख्‍योरो अच्‍युनुपतिवाला साङ लाप्‍सुङ सिसिन ख्‍योरो तेपा क्‍यावु सुङ ताङ येन्‍देन टेङ्‍बुला सिक्‍यावु दोके मङ रम्‍बु च्‍युङ्‍नी ख्‍युरुङ येशू ख्रीष्‍टकी थोक्‍ला लाका ल्‍यामु कितुप डिवी।
1TI 4:7 कोन्‍छ्‍योकला मोवा मेतुप ताङ तेन्‍दोक मेतुप पेतिवा नेसुर ख्‍युरुङ कुतुक दे। तमा खोला मोवा कितुपला तालिम की।
1TI 4:8 च्‍यिलासिसिन जुकी थोक्‍ला तालिम क्‍यावु ति चेयी तिराङ फेन थोकिवी। यिने कोन्‍छ्‍योककी थोक्‍ला तालिम क्‍यावु ति तेरी ताम्‍ङेला फेन थोकिवी, तमा ज्‍युक्‍थमाला कोन्‍छ्‍योककी थाक्‍छ्‍येन नङ्‍गुप नाम्‍साङ मिशिवु मिजी थोप्‍किवी।
1TI 4:9 दी ताम्‍ङे ति टेङ्‍बु वोतुप ताङ तेरीकी सेमला लिङ गोवु वे।
1TI 4:10 तीकी थोक्‍ला राङ दाक्‍पु हुर्ताक ताङ टेमु कियी वे, च्‍यिलासिसिन दाक्‍पी रेवा ति ङोसु वोतुप कोन्‍छ्‍योकला वे। खो ति मी तेरीकी कोन्‍छ्‍योक यिन, खोकी खक्‍छ्‍येवुला तेपा कितुप मीतिवाला दिक्‍पा ने थर ज्‍यिकिवी।
1TI 4:11 तीकी कोर्ला मीतिवाला क बिन, तमा तिवाला लोप।
1TI 4:12 ख्‍युरुङ नाज्‍युङ वे सिनी सी साङ ख्‍युरुङला मो मेबेप्‍शी, यिने मीतिवी थोङ्‍दाङला ताम्‍ङे लप्‍ताङ ताङ किताङ नालु ताङ ङ्‍यिङ्‍ज्‍ये ताङ तेपा ताङ टेङ्‍बु वोतुप पङ्‍बु छ्‍या तेन।
1TI 4:13 तमा ङ वुङ्‍दा सेक ख्‍योरो मीतिवाला कोन्‍छ्‍योककी सुङ रानी तेरुप ताङ ख्‍याप्‍टाक कितुप ताङ येन्‍देन तेरुपला ङ्‍याम की।
1TI 4:14 ख्‍युरुङला थोपुप कटिनकी ङ्‍येम्‍बाला खोङ्‍याम की। ती कटिनकी ङ्‍येम्‍बा ति चर्चकी गोमा कितुपतिवी ख्‍योरो गोला लाक्‍पा ज्‍याक्‍नी मोपोर कितुप पेला नम्‍दर शेनी ख्‍युरुङला थोपुप यिन।
1TI 4:15 ख्‍योरो कि गोवु लाकातिवा तेरी किसा, तमा ती लाकाला राङ नरी ज्‍युनी देता। तुक क्‍यासिन ख्‍योरो मिजी ताङ ख्‍युरुङ मङ ल्‍यामु गलुप ति तेरी मीतिवी थोङ्‍गिवी।
1TI 4:16 ख्‍योरो थोक्‍ला ताङ ख्‍योरो लोपुप येन्‍देनकी थोक्‍ला च्‍याङ्‍से क्‍यानी देता। ख्‍योरो नरी तुक क्‍यासिन ख्‍युरुङ ताङ ख्‍योरो ख्‍याप्‍टाक क्‍यावु सुङ ङ्‍येन्‍दुप मीतिवा साङ र्‍होकितो।
1TI 5:1 ख्‍युरुङ सिनाङ मी गावाला वोरु मादेन, यिने पपाला दोके टोङ्‍गु बिन। ख्‍युरुङ सिनाङ छ्‍युङातिवाला ति रङगी नुपतिवाला दोके क्‍यानी खाखो की।
1TI 5:2 मी गामातिवाला रङगी आमाला दोके ताङ पुम्‍पेजा नाज्‍युङतिवाला सेम टेङ्‍बु क्‍यानी रङगी नुम दोके नासाम तोङ।
1TI 5:3 वुतुङ के युक्‍सिम फोकुपतिवाला ल्‍हाटे की।
1TI 5:4 यिने ललाइ युक्‍सिमकी ति खोरो पुज्‍युङपुम याङ्‍ना नातीनातिनीतिवा वोसिन, तिवी राङ तीला दाल्‍जा किशी। च्‍यिलासिसिन तिवी खोप्‍रे खाङ्‍बा राङ टेङ्‍बुकी लाका कितुप ताङ खोप्‍रे पपाआमी ठिलेन च्‍योलुप लोप्‍शी। ती ति कोन्‍छ्‍योककी थोङ्‍दाङला ल्‍यामु यिन।
1TI 5:5 यिने खोरो ति सु साङ मेतुप युक्‍सिमतिवी वुतुङ के कोन्‍छ्‍योकला तिराङ रेवा क्‍यावु गिवी। तमा ङ्‍यी ताङ नुप्‍ज्‍या खोला राङ गोङ्‍बा शु शुवा देकिवी।
1TI 5:6 दोजो ललाइ युक्‍सिमतिवा गा ताङ किर्मुला तिराङ येनी देकिवी सिसिन तिवा सेन्‍बुला राङ शेप दोके यिन।
1TI 5:7 तुक क्‍यानी तिवा क्‍येन मेतुप च्‍युङ्‍नी देशी सिनी तिवाला दी येन्‍देन बिन।
1TI 5:8 ललाइ ललाइकी याङ खोरो छेङ्‍गाछालीतिवा ताङ खक्‍छ्‍येवुला खोरो मिछाङला साङ ल्‍हाटे मिकिवी। तुकातिवी तेपा कितुप साङ क्‍युर्नी ज्‍यकुप गिवी, तमा तिवा तेपा मिकिवुतिवा सिनाङ मङ दुक्‍टा डिवी।
1TI 5:9 लो खल टुक सिनाङ ल्‍हक्‍पा लेपुप युक्‍सिमतिवाला तिराङ युक्‍सिम यिन सिनी युक्‍सिमतिवी मिङ ति थो ग्‍यप। ती ति ख्‍योवा च्‍यिककी मुला तिराङ जेन्‍दी क्‍यावु वुङ गोकिवी।
1TI 5:10 तीकी पुज्‍युङपुमतिवा ल्‍यामु क्‍यानी र्‍होलुप ताङ खोरो खाङ्‍बा वुङ्‍गुप डेन्‍बुतिवाला ताङ्‍देन क्‍यावु ताङ कोन्‍छ्‍योकला तेपा कितुपतिवाला शब्‍ज्‍यी क्‍यावु ताङ दुक्‍पाला ख्‍येलुपतिवाला दाल्‍जा किटे कितुप ताङ लाका काङ साङ ल्‍यामु क्‍यानी मी यम्‍बाला खोरो किताङ नालु ल्‍यामु वोतुप ति छ्‍या तेन्‍दुप वुङ गोकिवी।
1TI 5:11 यिने नाज्‍युङ वोतुप पेला राङ युक्‍सिम फोकुप पुम्‍पेजातिवाला ति युक्‍सिम यिन सिनी मिङ थो माग्‍यक। च्‍यिलासिसिन तिवा जेन्‍दी कितुप नासाम शर्नी ख्रीष्‍टकी थोक्‍ला शब्‍ज्‍यी कितुप क्‍युर ज्‍याक्‍नी जेन्‍दी कि थुप्‍किवी।
1TI 5:12 तमा तिवी गोमाला येशू ख्रीष्‍टला तिराङ शब्‍ज्‍यी कितुपला थाक्‍छ्‍येतुप ति क्‍युर ज्‍याक्‍नी क्‍येन फोकिवी।
1TI 5:13 तोजो तिराङ मिन, तिवा खाङ्‍बा खाङ्‍बाला युकुप ताङ छेरा कितुप ताङ ताम्‍ङे क्‍योलुप ताङ मी लाकाला लाक्‍पा जिम्‍बुप ताङ लप मोगोवु ताम्‍ङेतिवा लपुप डिवी।
1TI 5:14 ती तप्‍की नाज्‍युङ वोतुप पेला राङ युक्‍सिम फोकुप पुम्‍पेजातिवा जेन्‍दी क्‍यानी पेजातिवा क्‍येनी खाङ्‍बा शिङ क्‍यानी सशी। तमा दाक्‍पी डतिवी दाक्‍पुला ताम्‍ङे जोप लाम मेङ्‍येशी।
1TI 5:15 च्‍यिलासिसिन ललाइ ललाइ युक्‍सिमातिवा याङ गोमाला के येशूला तेपा कितुप क्‍युर ज्‍याक्‍नी शैतानकी थाकाला गल वे।
1TI 5:16 यिने तेपा कितुप पुम्‍पेजातिवी ति ललाइ छेङ्‍गाछाली युक्‍सिम वोसिन तीला दाल्‍जा किटे किशी। तुक क्‍यासिन चर्चला काङ साङ कले मेख्‍येल्‍वी। तमा खोरो मी सु साङ मेतुप युक्‍सिमतिवाला तिराङ चर्चकी दाल्‍जा कि थुप्‍किवी।
1TI 5:17 चर्चला ल्हाटे क्‍यानी गोमा कितुप मीतिवाला तेरीकी दोम्‍बा ङ्‍यी ताङ्‍देन कि गोकिवी। खक्‍छ्‍येवुला कोन्‍छ्‍योककी सुङ ख्‍याप्‍टाक कितुप ताङ लोपुप मीतिवाला मङ ताङ्‍देन की।
1TI 5:18 कोन्‍छ्‍योककी सुङला “स्‍वा ङ्‍यिलुप लाङगी खला खप्‍चिल माग्‍येक।” सिनी सुङ वे। तमा “लाका कितुप मीला तीकी लाका क्‍यावु ल थोप गोकिवी।” सिनी साङ सुङ वे।
1TI 5:19 मिरा ङ्‍यी सुमकी पङ्‍बु मेसिन चर्चला गोमा कितुप मीतिवी तेन्‍दोकला क्‍येन तेरुप मीतिवी ताम्‍ङेला माङ्‍येना।
1TI 5:20 चर्चला तुका दिक्‍पा कितुप मीतिवा वोसिन तिवाला मी तेरीकी मिङ्‍गाला ज्‍याक्‍नी तुक कितुप मेवी सिनी लोप। तुक क्‍यासिन यम्‍बा तेपा कितुप मीतिवा साङ ज्‍यिवा किवी।
1TI 5:21 कोन्‍छ्‍योक ताङ येशू ख्रीष्‍ट ताङ कोन्‍छ्‍योककी पेन नङ्‍गुप देवाच्‍येनकी मीतिवी थोङ्‍दाङला ङ ख्‍युरुङला क छ्‍येम्‍बु तेरिन। ख्‍ये मापेवा क्‍यानी ख्‍युरुङ ङे सिक्‍यावु ठिमला वोतुप दोके क्‍यानी किसा।
1TI 5:22 सुला साङ रिवा क्‍यानी गोला लाक्‍पा ज्‍याक्‍नी चर्चला गोमा कितुप लाका कि माज्‍यी। ख्‍युरुङ दिक्‍पा कितुप मीतिवी दला माशुक, यिने टेङ्‍बु क्‍यानी मिजी क्‍योङ।
1TI 5:23 गोमाला दोके छ्‍यु तिराङ थुङ्‍गुप मिन, यिने ख्‍योरो खोक्‍पी थोक्‍ला ताङ येलुङ येलुङ मानाशी सिनी गुन्‍डुम छ्‍याङ साङ चे चेयी थुङ।
1TI 5:24 ललाइ ललाइ मीतिवी दिक्‍पातिवा ठछ्‍येली थोङ्‍गिवी, तमा ठिमला डोप गोमाला के हाक्‍कोकिवी। यिने ललाइकी दिक्‍पातिवा ति ज्‍युक्‍ला तिराङ थोङ्‍गिवी।
1TI 5:25 तुक राङ क्‍यानी मीतिवी क्‍यावु लाका ल्‍यामुतिवा साङ ठछ्‍येली थोङ्‍गिवी। ललाइकी क्‍यावु ठछ्‍येली मेतुप लाका साङ छ्‍याकला लु मुथुपी, ङ्‍यिम्‍ज्‍यिक ठछ्‍येली थोङ्‍गिवी।
1TI 6:1 तेपा कितुप योक्‍पुला देतुपतिवा तेरीकी दाक दाक्‍पी ज्‍यिन्‍दाकला ताङ्‍देन की। तुक क्‍यासिन सी साङ कोन्‍छ्‍योककी मिङ ताङ दाक्‍पी बिन्‍दुप येन्‍देनला मारे मोतोङ्‍गिवी।
1TI 6:2 ख्‍यिराङ तेपा कितुप योक्‍पुतिवा ज्‍यिन्‍दाककी वोक्‍ला लाका कितुप पेला तिवा दाक्‍पी तेपा कितुप अच्‍युनुप राङ यिन सिनी ताङ्‍देन कितुप ताङ तिवाला मङ ल्‍यामु क्‍यानी शब्‍ज्‍यी की। च्‍यिलासिसिन ख्‍यिरा लाका ल्‍यामु क्‍यासिमा ज्‍यिन्‍दाकला ख्‍येप्‍साङ वुङ्‍गिवी। ती ज्‍यिन्‍दाक ति तेपा कितुप ख्‍यिरा ङ्‍यिङ्‍ज्‍येवु अच्‍युनुपतिवा यिन। दी ताम्‍ङे ति ख्‍यिराङ ल्‍यामु क्‍यानी येन्‍देन तेरुप ताङ ख्‍याप्‍टाक की।
1TI 6:3 दोजो मी ललाइकी येन्‍देन मेटेङ्‍बुतिवा लोप्‍किवी, यिने दाक्‍पी चोवो येशू ख्रीष्‍टकी खक्‍छ्‍येवु सुङ ताङ दाक्‍पी मोवा कि गोवु येन्‍देनकी मुला मिडिकिवी सिसिन,
1TI 6:4 तुका मी ति ङ राङ यिन सिनी सिवी, तीकी काङ साङ येन्‍देन शेवु मेवी। तमा तीकी तेन्‍दोक मेतुप ताम्‍ङेला केवुल कितुप तिराङ क्‍यानी ताम्‍ङे छिक रे रेला थमु ग्‍यकुप छोल्‍गिवी। तीकी जोसालेन्‍सिन ठतोक कितुप ताङ खाँदा शोरुप ताङ मारे तोङ्‍गुप ताङ नाम्‍दोक मेलोवातिवा वुङ्‍गिवी।
1TI 6:5 तमा तुका मी तीकी सेम ना गलुप ताङ टेङ्‍बुला क्‍युर्नी ज्‍यकुप मीतिवी मुला खाँदा क्‍या क्‍यावा किवी। तमा तिवी कोन्‍छ्‍योकला मोवा कितुप ति ख्‍येप्‍साङ वुङ्‍गुप यिन सिनी नोकिवी।
1TI 6:6 यिन्‍सिनाङ सेमला लो दिवु क्‍यानी कोन्‍छ्‍योकला मोवा कितुप ति ख्‍येप्‍साङ यिन।
1TI 6:7 च्‍यिलासिसिन दाक्‍पु क्‍येप पेला दी जम्‍बुलिङला काङ साङ खुर्नी वावु मिन, याङ्‍ना काङ साङ खुर्नी डो साङ मुथुपी।
1TI 6:8 तुक क्‍यानी साप कोन्‍दुप चोयी लङ्‍सिन दाक्‍पु तीला राङ लो दिवा कि गोकिवी।
1TI 6:9 यिने छ्‍युक्‍पु डोप नो कितुपतिवा शैतानकी जिनोकला ख्‍येल्‍नी तोर्वाला ख्‍येलुप दोके डिवी। तमा तिवा अम्‍बारङ्‍शिङ कितुप ताङ मीला ना तोङ्‍गुप नासाम तिराङ तङ्‍नी खोरो राङ खुरुङला मेताला जोनी ना डिवी।
1TI 6:10 च्‍यिलासिसिन टङ्‍गा डेवाला चा कितुप नासाम नेसुर राङ तेरी परकी दिक्‍पातिवा गिवी। टङ्‍गी देर्पाला ख्‍येल्‍नी ललाइ मीतिवा तेपा कितुप क्‍युर्नी ज्‍योकिवी, तमा तिवी सेमला छासे पप लङ्‍गिवी।
1TI 6:11 यिने ख्‍युरुङ ति कोन्‍छ्‍योककी गिपा यिन्‍दुप तप्‍की तुका ताम्‍ङे मेलोवातिवा नासाम माताङ्‍नी टेङ्‍बु ताङ मोवा ताङ तेपा ताङ ङ्‍यिङ्‍ज्‍ये ताङ हम क्‍यानी देतुप ताङ कुसु ज्‍यम्‍बु कितुप छोल।
1TI 6:12 तमा चिर्मु चेपला छ्‍योङ्‍बाल ग्‍यकुप मी दोके तेपा रम्‍बु क्‍यानी नाम्‍साङ मिशिवु मिजी ङ्‍ये थुपा की। तीकी थोक्‍ला राङ कोन्‍छ्‍योककी ख्‍युरुङला पेन नङ्‍गुप यिन। तीकी कोर्ला ख्‍योरो मी बङीकी मिङ्‍गाला पङ्‍बु साङ बिन्‍दुप यिन।
1TI 6:13 मी तेरीला मिजी नङ्‍गुप कोन्‍छ्‍योक ताङ पन्‍तियस पिलातसकी दोङ्‍ला पङ्‍बु टेङ्‍बु नङ्‍गुप येशू ख्रीष्‍टकी थोङ्‍दाङला
1TI 6:14 ङ ख्‍युरुङला क तेरिन। दाक्‍पी चोवो येशू ख्रीष्‍ट माफेवा सेक ख्‍युरुङ ल्‍यामु क्‍यानी खोकी सुङला वोतुप क दोके मिजी क्‍योङ। तमा सी साङ ख्‍युरुङला मेटेङ्‍बु ताङ क्‍येन तेर मुथुपी।
1TI 6:15 कोन्‍छ्‍योककी तुजे छेसिमा चोवो येशू ख्रीष्‍ट ति येलुङ फेप्‍किवी। कोन्‍छ्‍योक ति च्‍यिक राङ वोतुप ताङ ग्‍येल्‍वी खकी ग्‍येल्‍वु ताङ चोवी खकी चोवो यिन। खोला दाक्‍पी सोवा बुल्‍गिवी।
1TI 6:16 खो तिराङ नरीकी नरी लुवु वे। खो ति वोसिरला ज्‍युकिवी, तमा ती वोसिरकी चिप्‍ला सु साङ डो मुथुपी। खोला सी साङ नाम्‍साङ माथोङ वे, याङ्‍ना थोङ साङ मुथुपी। खोला राङ ताङ्‍देन ताङ ओङ्‍ज्‍येन ति नरीकी नरी वुङ्‍शी। आमिन।
1TI 6:17 दी जम्‍बुलिङकी मी छ्‍युक्‍पुतिवाला दुक सिनी क बिन, “अम्‍बारङ्‍शिङ माकी, चेयी पर सेक तिराङ लुवु टोङ्‍बाला मिन, यिने दाक्‍पुला गोवु तेरी च्‍यालकतिवा लोदिमुकी थोक्‍ला ग्‍यक्‍चे क्‍यानी नङ्‍गुप कोन्‍छ्‍योकला तिराङ रेवा की।”
1TI 6:18 तमा तिवाला “मी यम्‍बाला ल्‍यामु कितुप ताङ लाका ल्‍यामु कितुप सेम वोतुप ताङ सेम बोल्‍मु वोतुप ताङ रङगी लोला वोतुप टोङ्‍बातिवा कतुकारला ख्‍येलुपतिवाला तेरुप सेम वोतुप च्‍युङ गोकिवी।” सिनी क बिन।
1TI 6:19 तुक क्‍यानी तिवा डम्‍ज्‍यी रम्‍बु तिङ्‍गुप दोके खोप्‍रे थोक्‍ला ज्‍युक्‍थमी नासाम तङ्‍नी मिजी टेङ्‍बु क्‍योङ थुप्‍शी।
1TI 6:20 आङ तिमोथी, कोन्‍छ्‍योककी ख्‍युरुङला काङ लाका चेक तेन नङ वे, ती ति ल्‍यामो क्‍यानी र्‍होक्‍नी ज्‍योक। तेन्‍दोक मेतुप ताम्‍ङेतिवा क्‍युर्नी ज्‍योक। तिवी रिक्‍पा वोतुप यिन सिवी, यिने ती वुतुङ्‍की रिक्‍पा मेतुप मीतिवी ताम्‍ङे नेसुर कुतुक दे।
1TI 6:21 ती रिक्‍पा मेतुप ताम्‍ङेकी जोसालेन्‍सिन ललाइ मीतिवा तेपा कितुप साङ क्‍युर्नी गल वे। कोन्‍छ्‍योककी कटिन ति नरी ख्‍योरो मुला लुशिता।
2TI 1:1 टसी देलेक! येशू ख्रीष्‍टला वोतुप थाक्‍छ्‍येन नङ्‍गुप मिजी नेसुर कोन्‍छ्‍योककी नोवाकी पेन नङ्‍गुप ख्रीष्‍ट येशूकी लोमा छ्‍ये ङ पावलकी
2TI 1:2 आङ तिमोथीला दी यिकी ति टिवु यिनो। पपा कोन्‍छ्‍योक ताङ दाक्‍पी चोवो ख्रीष्‍ट येशू नेमा ख्‍युरुङला कटिन ताङ च्‍यम्‍बा ताङ लोदिमु वुङ्‍शी।
2TI 1:3 ङ ङ्‍यी ताङ नुप्‍ज्‍या मोपोर कितुप पेला ख्‍युरुङला नासाम तङ्‍नी चोवो कोन्‍छ्‍योकला थुचिछे बुलिन। ती कोन्‍छ्‍योकला ङे पगावा हङ्‍गावातिवी शब्‍ज्‍यी पुलुप दोके ङ साङ सेम टेङ्‍बु क्‍यानी शब्‍ज्‍यी बुलिन।
2TI 1:4 ख्‍योरो सेम्‍दुक क्‍यानी मिक्‍च्‍युर तङ्‍गुप ति नासाम शर्नी ङ ख्‍युरुङला ठेयिन्‍दे लङ्‍गिनोक। ख्‍युरुङला ठेतुप ङ्‍येसिन ङला छासे सेम लोदिमु गिवी।
2TI 1:5 ख्‍योरो सेम टेङ्‍बु क्‍यानी तेपा क्‍यावु ति ङला नासाम शर्किनोक। ती तेपा ति तोङ्‍ला ख्‍योरो गाका लोइसला ताङ ख्‍योरो आमा युनिसला साङ वे, तमा तन्‍दा ख्‍योरो मिजीला साङ वोतुप ति ङला तेन्‍तेन वे।
2TI 1:6 तुक क्‍यानी ङ ख्‍युरुङला ताम्‍ङे यी टेन्‍दा लोङ्‍यिन। ती ति काङ यिन सिसिन, ङे ख्‍योरो गोला लाक्‍पा ज्‍याक्‍नी मोपोर क्‍यासिमा कोन्‍छ्‍योककी ख्‍युरुङला नङ्‍गुप कटिनकी ङ्‍येम्‍बा ति टोक माज्‍येनी तीला रम्‍बु जोपला यिन।
2TI 1:7 च्‍यिलासिसिन कोन्‍छ्‍योककी दाक्‍पुला ज्‍यिवा लङ्‍गुप सेम मिन, ओङ ताङ ङ्‍यिङ्‍ज्‍ये ताङ डेकला देतुप सेम नङ्‍नी वे।
2TI 1:8 ती तप्‍की दाक्‍पी चोवो येशूकी थोक्‍ला पङ्‍बु तेरुपला ङोछा माकी, याङ्‍ना खोकी थोक्‍ला ङ चोन्‍खाङला शोरुप यिन सिनी साङ ङोछा माकी। यिने कोन्‍छ्‍योककी ओङला खोकी लेन ल्‍यामु ख्‍याप्‍टाक कितुपला दुक्‍पा खुर।
2TI 1:9 खोकी दाक्‍पुला दिक्‍पा ने थर च्‍यिनी दाक्‍पु टेङ्‍बु च्‍युङ्‍गुपला कताङ नाङ्‍सुङ। ती ति दाक्‍पी लाका ल्‍यामु क्‍यावु तप्‍की मिन, यिने खोकी नोवा ताङ कटिनकी जोसालेन्‍सिन यिन। ती कटिन ति जम्‍बुलिङ ज्‍येङ्‍गुप पेला नेज्‍युनी येशू ख्रीष्‍ट नेसुर खोकी दाक्‍पुला नङ वे।
2TI 1:10 तन्‍दा ती कटिन ति दाक्‍पुला दिक्‍पा ने थर ज्‍यितुप येशू ख्रीष्‍ट फेप्‍नी छ्‍या तेन वे। खो टुङ्‍नी साङ ङोसु लानी शेपकी ओङला ग्‍येल्‍नी लेन ल्‍यामु नेसुर दाक्‍पुला नाम्‍साङ मिशिवु मिजी वोतुप ति छ्‍या तेन्‍सुङ।
2TI 1:11 ती लेन ल्‍यामु ख्‍याप्‍टाक कितुपला खोकी लोमा छ्‍ये ताङ गेकेन सिनी ङला पेन नङ्‍गुप यिन।
2TI 1:12 ती तप्‍की ङला दुक्‍पा वोसिनाङ तीकी थोक्‍ला ङ ङोछा मिकी। च्‍यिलासिसिन ङे सुला तेपा क्‍या वे, ती ति ङला ल्‍यामु क्‍यानी छ्‍या वे। खो माफेवा सेक खोकी ङला चेक तेन नङ्‍गुप लाका ति खोकी राङ र्‍होक्‍नी ज्‍योकिवी सिरुप ति ङला तेन्‍तेन वे।
2TI 1:13 येशू ख्रीष्‍ट नेसुर वुङ्‍गुप तेपा ताङ ङ्‍यिङ्‍ज्‍ये नेसुर ङे ख्‍युरुङला बिन्‍दुप येन्‍देन टेङ्‍बुला सिक्‍यावु दोके लुमु से।
2TI 1:14 तमा ख्‍युरुङला चेक तेतुप सुङ टेङ्‍बु ति दाक्‍पी मुला ज्‍यु वोतुप कोन्‍छ्‍योककी थु चाङ्‍माकी ओङला र्‍होक्‍नी ज्‍योक।
2TI 1:15 ख्‍युरुङला छ्‍या राङ वे, एशिया लुङ्‍बाला देतुपतिवा तेरीकी ङला क्‍युर ज्‍याक्‍नी गाल्‍सुङ। तिवी पर्ला फुगेलस ताङ हर्मोगेनस साङ यिन।
2TI 1:16 चोवोकी ओनेसिफरसकी मिछाङला मोलाम नङ्‍शी, च्‍यिलासिसिन तीकी ङला माङ्‍शोक टोङ्‍गु बिन्‍सुङ। तमा ङ चोन्‍खाङला ख्‍येलुप थोक्‍ला साङ तीकी ङोछा माक्‍यानी
2TI 1:17 रोमला वासिमा कोरा ख्‍यर ख्‍यिर ग्‍यप्‍नी ङला छाल्‍नोक। तमा ङ ताङ मुला ठेसुङ।
2TI 1:18 चोवो फेपुप तुजेला खोकी तीला च्‍यम्‍बा नङ्‍शी। एफिससला वोतुप पेला तीकी ङला कशेन दाल्‍जा किटे क्‍यासुङ, ती ताम्‍ङे ति ख्‍युरुङला साङ छ्‍या वे।
2TI 2:1 तुक क्‍यानी आङो, ख्‍युरुङ ख्रीष्‍ट येशूकी नङ्‍गुप कटिनला तेपा रम्‍बु क्‍यानी देता।
2TI 2:2 मी मङ्‍मुकी मिङ्‍गाला ङे ख्‍युरुङला येन्‍देन बिन्‍दुप ताम्‍ङे ति खोङ्‍तेर्मु वोतुप मी यम्‍बाला साङ लोप। तमा तिवी येलुङ मी यम्‍बातिवाला लोप थुप्‍शी।
2TI 2:3 मक्‍मीतिवी मक ग्‍यकुपला चो दुक्‍पा वोसिनाङ हम क्‍या देतुप दोके क्‍यानी ख्‍योरो साङ येशू ख्रीष्‍टकी थोक्‍ला लेन ल्‍यामु ख्‍याप्‍टाक कितुपला ङ्‍यिरा मुला दुक्‍पा खुर गोकिवी।
2TI 2:4 मक्‍मीला शुवु मी ति लाका यम्‍बाला येनी मेदेवी। च्‍यिलासिसिन तीकी खुरुङला मक्‍मीला ज्‍यितुप मी तीला सेमला डोप लाका कि गोकिवी।
2TI 2:5 ती दोके चिर्मु चेप पेला साङ चिर्मु चेप मी ति तीकी ठिमला देनी चिर्मु माचेसिन तीला छ्‍यक्‍तक मोथोपिवी।
2TI 2:6 हुर्ताक क्‍यानी सप्‍ले लाका कितुप मी तीकी गोमाला डुप्‍सेन साप ङ्‍ये गोकिवी।
2TI 2:7 दी ङे सिक्‍यावु ताम्‍ङे ति ल्‍यामो नासाम तोङ। च्‍यिलासिसिन चोवोकी ख्‍युरुङला तेरी ताम्‍ङे हाक्‍कोवु ओङ नङ्‍गिवी।
2TI 2:8 ग्‍येल्‍वु दाऊदकी गिपाला क्‍येवु येशू ख्रीष्‍टला नरी नासाम तोङ। कोन्‍छ्‍योककी खोला टुङ्‍गुप ने ङोसु लङ्‍गुप यिन। ङे ख्‍याप्‍टाक क्‍यावु लेन ल्‍यामु ति दी राङ यिन।
2TI 2:9 ती लेन ल्‍यामुकी थोक्‍ला राङ ङ दुक्‍चे क्‍येनला शोरुप मी दोके च्‍याटोक ग्‍यप्‍नी छेटाङ खुरिन वे। यिन्‍सिनाङ कोन्‍छ्‍योककी सुङला च्‍याटोक ग्‍यक मुथुपी।
2TI 2:10 तुक क्‍यानी कोन्‍छ्‍योककी पेतुपतिवी थोक्‍ला ङ हम क्‍यानी देतिन। ती ति तिवाला साङ येशू ख्रीष्‍टकी नङ्‍गुप थर्वा ताङ नाम्‍साङ मिशिवु मोवा ङ्‍ये थुप्‍शी सिनी यिन।
2TI 2:11 दी ताम्‍ङे ति टेङ्‍बु यिन। दोजो दाक्‍पु खो ताङ मुला राङ शिसुङ सिसिन खो ताङ मुला राङ सेन्‍बु साङ लङ्‍गिवी।
2TI 2:12 दाक्‍पु खोकी थोक्‍ला छेटाङ ख्‍येल्‍सिनाङ हम क्‍यानी दे थुप्‍सिन दाक्‍पु खोकी मुला राङ ग्‍येला कितुप ङ्‍येकिवी। यिने दाक्‍पी खोला सेमला मिलिङ्‍गिवी सिसिन खोकी साङ दाक्‍पुला ङो मेशेवी सिनी सुङ्‍गिवी।
2TI 2:13 दाक्‍पु खोङ्‍तेर्मु मेसिनाङ खो खोङ्‍तेर्मु वे, च्‍यिलासिसिन खोकी सुङ्‍गुप ति नाम्‍साङ मोफोवी।
2TI 2:14 दी ताम्‍ङेकी कोर्ला तेपा कितुप मीतिवाला टेन्‍दा लोङ। तमा चोवो कोन्‍छ्‍योककी थोङ्‍दाङला क बिन्‍नी तिवा ताम्‍ङे छिक च्‍यिकला साङ खाँदा मिकिशी। तुका ताम्‍ङे ति काङ साङ फेन मोथोवु यिन, ती ताम्‍ङेकी जोसालेन्‍सिन ङ्‍येन्‍दुपतिवाला मेलोवा जेवी।
2TI 2:15 ख्‍युरुङ अछ्‍योता सेक कोन्‍छ्‍योककी सुङ टेङ्‍बु ति ल्‍यामु क्‍यानी ख्‍याप्‍टाक की, तुक क्‍यासिन खोकी ख्‍युरुङला गा किवी, तमा ख्‍युरुङ ङोछाला साङ मेख्‍येल्‍वी।
2TI 2:16 कोन्‍छ्‍योकला मोवा मेतुप जम्‍बुलिङकी गो ताङ चा मेतुप ताम्‍ङेतिवा माङ्‍येना। च्‍यिलासिसिन तुका ताम्‍ङेतिवी कोन्‍छ्‍योकला मङ मङ मोवा मेतुप जेवी।
2TI 2:17 तुका ताम्‍ङेतिवा म बुनी ङमु ग्‍यावु दोके यिन। तुका ताम्‍ङे मेटेङ्‍बु कितुपतिवी पर्ला हुमेनियस ताङ फिलेतस साङ यिनो।
2TI 2:18 तिवी ती ताम्‍ङे टेङ्‍बु क्‍युर ज्‍याक्‍नी शेप ने सेन्‍बु लङ्‍गुप ति तोङ्‍ला के च्‍युङ्‍गुप यिन सिनी मीतिवाला येन्‍देन मेटेङ्‍बु लोप्‍किनोक। तिवी तुका ताम्‍ङे मेटेङ्‍बु लाप्‍नी माङ्‍शोक मीतिवाला तेपा कितुप क्‍युर्नी ज्‍योक च्‍यिसुङ।
2TI 2:19 यिन्‍सिनाङ कोन्‍छ्‍योककी डम्‍ज्‍यी रम्‍बु जोसुङ। ती डम्‍ज्‍यीला “कोन्‍छ्‍योककी खोरे पेतुप मीतिवाला ङो शेकिवी।” सिनी टि वे। तमा “चोवो कोन्‍छ्‍योकला तेपा किवी सिनी सिरुप मी तेरीकी दिक्‍पा कितुप क्‍युर गोकिवी।” सिनी टि वे।
2TI 2:20 दी ताम्‍ङे साङ नासाम तोङा। मी छ्‍येतिवी खाङ्‍बा सेर ताङ ङुलकी नेक्‍योक तिराङ मेवी, यिने शिङ ताङ थली नेक्‍योक साङ गिवी। ती नाङ्‍ला सेर ताङ ङुलकी नेक्‍योक ति नाथोप डेन्‍बु वुङ्‍गुप पेला थोकिवी, शिङगी नेक्‍योक ताङ यम्‍बा नेक्‍योकतिवा यम्‍बा पेला थोकिवी।
2TI 2:21 ती दोके सी साङ दिक्‍पा कितुप क्‍युर्नी खुरुङ टेङ्‍बु जेवी सिसिन ती ति नाथोप पेला खाङ्‍बी ज्‍यिन्‍दाककी खक्‍छ्‍येवुला थोकुप चेङ्‍गा वोतुप नेक्‍योक दोके च्‍युङ्‍नी ज्‍यिन्‍दाककी थोक्‍ला तेरी लाका ल्‍यामु कितुप च्‍युङ्‍गिवी।
2TI 2:22 ख्‍युरुङ नाज्‍युङ वोतुप पेला नासाम शरुप ताम्‍ङे मेलोवातिवा क्‍युर, तमा सेम टेङ्‍बु क्‍यानी कोन्‍छ्‍योकला तेपा कितुपतिवी मुला राङ टेङ्‍बु कितुप ताङ तेपा रम्‍बु कितुप ताङ मी यम्‍बाला ङ्‍यिङ्‍ज्‍ये कितुप ताङ लोदिमु कितुप छोल।
2TI 2:23 यिने काङ साङ हाक्‍मोकोवु तेन्‍दोक मेतुप ताम्‍ङेला माङ्‍येन। च्‍यिलासिसिन तुका ताम्‍ङेकी थमु तिराङ लोङ्‍गिवी सिरुप ति ख्‍युरुङला साङ छ्‍या वे।
2TI 2:24 कोन्‍छ्‍योककी थोक्‍ला शब्‍ज्‍यी कितुप मी तीकी थमु ग्‍यकुप मेवी, यिने तेरी मीतिवाला च्‍यङ्‍च्‍यु कितुप ताङ तिवाला ल्‍यामु क्‍यानी येन्‍देन तेरुप ताङ हम क्‍या देतुप ताङ
2TI 2:25 कुसु ज्‍यम्‍बु क्‍यानी रङगी तेन्‍दोकला लङ्‍गुप मीतिवाला साङ ल्‍यामु क्‍यानी लोप गोकिवी। तुक क्‍यासिन कोन्‍छ्‍योककी तिवाला साङ सेम ग्‍युर च्‍यिनी तिवी खोकी सुङ टेङ्‍बुला तेपा कि थुप्‍किवी।
2TI 2:26 तमा तिवा सेम ङ्‍येनी शैतानकी ओङ नेसुर थर्नी कोन्‍छ्‍योककी नोवाला युक थुप्‍किवी।
2TI 3:1 आङ तिमोथी, दी ताम्‍ङे ति ल्‍यामो हाक्‍कोवा किसा, कोन्‍छ्‍योककी ठिमकी तुजे मालेपा सेक्‍ला छासे दुक्‍पाकी तुजेतिवा गितो।
2TI 3:2 ती तुजेला मीतिवा खोरो थोक्‍ला तिराङ नासाम तोङ्‍गुप ताङ टङ्‍गा डेवाला तिराङ चा कितुप ताङ अम्‍बारङ्‍शिङ कितुप ताङ तेके कितुप ताङ मीला मारे तोङ्‍गुप ताङ पपाआमी खला मेङ्‍येन्‍दुप ताङ टेन मसम्‍बुप ताङ कोन्‍छ्‍योकला ताङ्‍देन मिकिवु ताङ
2TI 3:3 मी सुला साङ ङ्‍यिङ्‍ज्‍ये मिकिवु ताङ मीला माफ मेतेरुप ताङ ताम्‍ङे क्‍योमा ज्‍यितुप ताङ डेकला मेदेवु ताङ वुल्‍दुङ्‍बा कितुप ताङ ताम्‍ङे टेङ्‍बुला गा मिकिवु ताङ
2TI 3:4 मीला जिनोक जोनी क्‍येन तेरुप ताङ ङ्‍यिर्मु कोक्‍पु वोतुप ताङ ङ राङ यिन सिरुप ताङ कोन्‍छ्‍योकला सिनाङ गा ताङ किर्मुला तिराङ नासाम तोङ्‍गुप ताङ
2TI 3:5 मी मिङ्‍गाला ति कोन्‍छ्‍योकला तेपा कितुप दोके जेवी, यिने कोन्‍छ्‍योकला तेपा क्‍यानी वुङ्‍गुप ओङला ति मेङ्‍येन्‍दुप गिवी। तुका मीतिवा नेसुर कुतुक देता।
2TI 3:6 तिवी पर्ला ललाइ ललाइ मीतिवा खाङ्‍बा खाङ्‍बाला गल्‍नी काङ साङ हाक्‍मोकोवु पुम्‍पेजातिवाला लुनी खोप्‍रे ओङला ज्‍योकिवी। ती पुम्‍पेजातिवा ति दिक्‍पी ओङला शोरुप ताङ जम्‍बुलिङकी नासाम दुक्‍टाला तिराङ युकिवी।
2TI 3:7 तुका पुम्‍पेजातिवा लोपुप याङ नरी लोप्‍किवी, यिने ताम्‍ङे टेङ्‍बु ति नाम्‍साङ हाक्‍मोकोवी।
2TI 3:8 यान्‍नेस ताङ याम्‍ब्रेस मोशाकी तेन्‍दोकला लावु दोके ती मीतिवा साङ टेङ्‍बु वोतुप कोन्‍छ्‍योककी तेन्‍दोकला लङ्‍गिवी। तमा तिवी सेम ति मेलोक्‍पा गलुप ताङ तिवी क्‍यावु तेपा ति टेङ्‍बु मेतुप गिवी।
2TI 3:9 तुका मीतिवा नरी सेक छ्‍यम मुथुपी। च्‍यिलासिसिन यान्‍नेस ताङ यम्‍ब्रेसकी दोके तिवी अम्‍बारङ्‍शिङ क्‍यावु ति मी तेरीला ठछ्‍येली हाक्‍कोकिवी।
2TI 3:10 यिने त याङ ख्‍योरो ङे बिन्‍दुप येन्‍देन ताङ ङे किताङ नालु ताङ ङे मिजीकी नोवा ताङ ङे क्‍यावु तेपा ताङ ङे हम क्‍या देतुप ताङ ङे क्‍यावु ङ्‍यिङ्‍ज्‍ये ताङ ङ डेकला देतुप ति तेरी थोङ्‍नी वे।
2TI 3:11 एन्‍टिओखिया ताङ आइकोनियन ताङ लुस्‍त्राला ङे चो छेटाङ ताङ दुक्‍पा खुर्सुङ सिरुप ति ख्‍युरुङला साङ छ्‍या वे। ङला चो छेटाङतिवा ख्‍येल्‍सिनाङ ती तेरी छेटाङ नेसुर कोन्‍छ्‍योककी ङला र्‍होक्‍सुङ।
2TI 3:12 वुतुङ के येशू ख्रीष्‍टला तेपा क्‍यानी मिजी टेङ्‍बु क्‍योङ्‍गुप मीतिवा तेरी छेटाङला राङ ख्‍येल्‍गिवी।
2TI 3:13 मी दुक्‍टातिवा ताङ मीला केन्‍दुप मीतिवा मीला केन्‍नी राङ मङ मङ दुक्‍टा डिवी। तमा मी यम्‍बी साङ तिवाला तुकै राङ किवी।
2TI 3:14 यिने ख्‍युरुङ ति ख्‍योरो लापुप येन्‍देन ताङ तेपा रम्‍बु क्‍यावु ताम्‍ङेतिवाला ज्‍युनी दे। ती येन्‍देन ति सु नेमा लापुप यिन ख्‍युरुङला छ्‍या राङ वे।
2TI 3:15 ख्‍युरुङ टिक्‍पे वोतुप पेला नेज्‍युनी चाङ्‍मा वोतुप कोन्‍छ्‍योककी सुङगी कोर्ला छ्‍या वे। ती सुङगी ख्रीष्‍ट येशूला तेपा क्‍यासिमा दिक्‍पा ने थरुप कोर्ला ख्‍युरुङला रिक्‍पा तेर्किवी।
2TI 3:16 दी तेरी कोन्‍छ्‍योककी सुङ ति खोकी थु चाङ्‍मा नेमा टेङ्‍बु जोवु यिन। दी ति लाप्‍नी तेरुपला ताङ लाका मेलोक्‍पा कितुपतिवाला वोरु देन्‍दुप ताङ ङ्‍येवुतिवाला ल्‍यामु जोप ताङ टेङ्‍बुकी कोर्ला येन्‍देन तेरुपला छासे खक्‍छ्‍येवु वे।
2TI 3:17 तुक क्‍यानी कोन्‍छ्‍योकला शब्‍ज्‍यी कितुप मी टडिक क्‍यानी तेरी लाका ल्‍यामु कितुप च्‍युङ्‍शी सिनी कोन्‍छ्‍योककी दी सुङ ति दाक्‍पी थोक्‍ला नङ्‍गुप यिन।
2TI 4:1 येशू ख्रीष्‍ट ग्‍येला कितुपला फेपुप पेला सेन्‍बु वोतुप ताङ शेपतिवा तेरीला ठिम क्‍या नङ्‍गिवी। तुक क्‍यानी कोन्‍छ्‍योक ताङ ती येशू ख्रीष्‍टकी थोङ्‍दाङला ङ ख्‍युरुङला क छ्‍येम्‍बु बिन्‍नी सिरिन।
2TI 4:2 ख्‍युरुङ कोन्‍छ्‍योककी लेन ल्‍यामु ख्‍याप्‍टाक कितुप पेला मीतिवी ङ्‍येन्‍सिनाङ माङ्‍येन्‍सिनाङ चो पेला साङ टडिक क्‍यानी दे। ङ्‍येवु मीतिवाला ल्‍यामु जोप ताङ वोरु देन्‍दुप ताङ सेम सो। मीतिवाला येन्‍देन तेरुप पेला डेकला देनी ल्‍यामु क्‍यानी येन्‍देन बिन।
2TI 4:3 च्‍यिलासिसिन तुका तुजे यी गितो। ती तुजेला मीतिवा येन्‍देन टेङ्‍बुला सेमला मोडोवु ताङ खुरुङला सेमला गलुप ताम्‍ङे तिराङ ङ्‍येन्‍दुप नो कितुप ताङ दाक दाक्‍पुला सेमला डोप येन्‍देन लोपुप गेकेनतिवा तिराङ बङी कतोङ्‍गिवी।
2TI 4:4 तिवा येन्‍देन टेङ्‍बुला ति ङ्‍येन्‍दुप नो मिकिवी, यिने मीतिवी शेतुप तेन्‍दोक मेतुप पेतिवा तिराङ ङ्‍येन्‍दुप गा किवी।
2TI 4:5 यिने ख्‍युरुङ ति चो पेला साङ सेम थिला ज्‍याक्‍नी चो दुक्‍पा वोसिनाङ लेन ल्‍यामु ख्‍याप्‍टाक कितुप ताङ खोला शब्‍ज्‍यी कितुप लाका ति तेरी किसा।
2TI 4:6 ङला दी चोन्‍खाङला सेतुप पेला लेप्‍नी वे। त याङ ङे मिजी ति कोन्‍छ्‍योककी थोक्‍ला बुलुपला टडिक वे।
2TI 4:7 ख्रीष्‍टकी थोक्‍ला ङे कि गोवु लाकातिवा तेरी क्‍यानी सिन वे। त याङ ङे छ्‍योङ्‍बाल ग्‍यक गोवु लाका ति तेरी छेसुङ। ङे क्‍यावु तेपा साङ ङे र्‍होक्‍नी ज्‍यकिन।
2TI 4:8 त याङ कोन्‍छ्‍योककी चिप्‍ला ङे लाका टेङ्‍बु क्‍यावु छ्‍यक्‍तक ङ्‍ये गोवु तिराङ लुनी वे। ती ति ठिम क्‍या नङ्‍गुप टेङ्‍बु वोतुप कोन्‍छ्‍योककी राङ ङला नङ्‍गिवी। ङला तिराङ मिन, खो फेपुप तुजे सेक तेपा क्‍यानी गु देतुपतिवा तेरीला खोकी नङ्‍गिवी।
2TI 4:9 च्‍युङ्‍सिन ख्‍युरुङ ङला ठेतुपला ङमु राङ शोक।
2TI 4:10 च्‍यिलासिसिन डेमासकी दी जम्‍बुलिङकी ताम्‍ङेला नासाम तङ्‍नी ङला क्‍युर ज्‍याक्‍नी थेसलोनिकेला गाल्‍सुङ। क्रेसेन्‍स साङ गलातियाला गाल्‍सुङ। तमा तीतस ति दलमातियाला गाल्‍सुङ।
2TI 4:11 तसाम ङे मुला लूका तिराङ वोतो। ख्‍युरुङ वुङ्‍गुप पेला मर्कूसला छल्‍नी ख्‍योरो मुला राङ टिनी शोक। च्‍यिलासिसिन ती ति ङला दाल्‍जा कितुपला छासे फेन थोवु वोतो।
2TI 4:12 तुखिकसला ति ङे एफिससला तङ्‍यिनो।
2TI 4:13 त्रोआसला कार्पसकी ते ङे क्‍युर्नी ज्‍यकुप छ्‍योवा ताङ थेपतिवा ताङ खक्‍छ्‍येवुला क्‍वाकी लोला छ्‍यो टिवु थेपतिवा ख्‍युरुङ वुङ्‍गुप पेला मुला राङ खुर्नी शोक।
2TI 4:14 अलेक्‍जेन्‍डर सिरुप नेक्‍योक जोप तीकी ङला छासे मेलोवा क्‍यासुङ। तीकी क्‍यावु लाकाकी थोक्‍ला कोन्‍छ्‍योककी तीला पर्च्या तोङ्‍गिवी।
2TI 4:15 ख्‍युरुङ ती नेसुर च्‍याङ्‍से देता। च्‍यिलासिसिन दाक्‍पी लेन ल्‍यामु ख्‍याप्‍टाक क्‍यावु ताम्‍ङेला तीकी दाक्‍पी तेन्‍दोकला लासुङ।
2TI 4:16 थल्‍माला ङ ठिम्‍खाङला क्‍यलुप पेला सी साङ ङे छ्‍योला ताम्‍ङे मालाप, यिने तेरीकी ङला क्‍युर ज्‍याक्‍नी गाल्‍सुङ। तीकी क्‍येन ति तिवाला मोफोक्‍शिता।
2TI 4:17 यिने चोवो येशू ङे मिजीला ज्‍युनी ङला ङार नङ्‍सुङ। तीकी तेन्‍दोक ति यहूदी मिन्‍दुप मिरिक यम्‍बाकी मीतिवा तेरीला कोन्‍छ्‍योककी सुङ ख्‍याप्‍टाक क्‍यानी तिवाला ती सुङ तेरी हाक्‍को ज्‍यितुपला यिन। तमा खोकी ङला ठिम्‍खाङकी सेतुप छ्‍येर्पा नेसुर र्‍होक्‍सुङ।
2TI 4:18 तमा चोवो कोन्‍छ्‍योककी ङला तेरी दुक्‍टा नेसुर साङ र्‍होक्‍नी देवाच्‍येनकी ग्‍येल्‍खापला टिनी डिवी। तुक क्‍यानी खोला नरीकी नरी मोवा वुङ्‍शी। आमिन।
2TI 4:19 प्रिस्‍किला ताङ अकिलास ताङ ओनेसिफरसला साङ टसी देलेक सिनी सिसा।
2TI 4:20 इरास्‍तस ति कोरिन्‍थला राङ देसुङ, त्रोफिमस ति नावु तप्‍की मिलेटसला क्‍युर्नी ज्‍यकिन।
2TI 4:21 च्‍युङ्‍सिन ख्‍युरुङ ङमु क्‍यानी गुन्‍बु थेन्‍दुप गोमाला राङ वुङ्‍गुप जोसा। युबुलसकी साङ ख्‍युरुङला टसी देलेक तङ्‍नी वोतो। तमा पुडेस ताङ लिनस ताङ क्‍लौडिया ताङ यम्‍बा तेपा कितुप मीतिवी साङ टसी देलेक तङ्‍नी वोतो।
2TI 4:22 चोवो कोन्‍छ्‍योक ख्‍यिरा सेमला ज्‍युशी, तमा खोकी कटिन साङ ख्‍यिराङला थोप्‍शिता।
TIT 1:1 दी यिकी ति कोन्‍छ्‍योककी लावा ताङ चोवो येशूकी लोमा छ्‍ये ङ पावलकी तङ्‍गुप यिन। कोन्‍छ्‍योककी पेतुपतिवाला टेङ्‍बुला तेपा कि ज्‍यितुप ताङ खोकी रिक्‍पा वोतुप सुङ ति ल्‍यामु क्‍यानी हाक्‍को ज्‍यितुपला कोन्‍छ्‍योककी ङला लोमा छ्‍ये जो नाङ्‍सुङ।
TIT 1:2 तुक क्‍यानी तिवा ति नाम्‍साङ मिशिवु मिजी ङ्‍येतुपला रेन्‍नी देन वे। ती मिजी ति जिनोक जो मनङ्‍गुप कोन्‍छ्‍योककी थल्‍मा नेज्‍युनी थाक्‍छ्‍येन नङ्‍गुप यिन।
TIT 1:3 दाक्‍पुला ती थाक्‍छ्‍येन नङ्‍गुप सुङ ति खोरे पेतुप तुजेला छ्‍या तेन नाङ्‍सुङ। तन्‍दा साङ ती सुङ ख्‍याप्‍टाक कितुपला दिक्‍पा ने थर ज्‍यितुप कोन्‍छ्‍योककी ङला चेक तेसुङ।
TIT 1:4 येशू ख्रीष्‍टला तेपा कितुप च्‍यिक राङ वोतुप ङे आङ तीतसला दी यिकी टिवु यिनो। पपा कोन्‍छ्‍योक ताङ दाक्‍पुला दिक्‍पा ने थर ज्‍यितुप येशू ख्रीष्‍टकी कटिन ताङ लोदिमु ख्‍युरुङला नङ्‍शी।
TIT 1:5 ङे ख्‍युरुङला क्रेटला क्‍युर्नी ज्‍यकुप तेन्‍दोक ति ख्‍योरो क्‍यानी मासिन्‍दुप लाकातिवा कितुपला ताङ ङे ख्‍युरुङला योक कुतुप दोके ग्‍येसा ग्‍येसाला गोमा कितुप मी छ्‍ये बेतुपला यिन।
TIT 1:6 गोमा कितुपला पेतुप मी छ्‍ये ति मीतिवी पर्ला लाका मेलोक्‍पा माक्‍यानी क्‍येन मेतुप वुङ गोकिवी। तीकी ति पेर्मी च्‍यिक राङ वोतुप ताङ तीकी पेजातिवा साङ तेपा कितुप ताङ च्‍योलाम ल्‍यामु वोतुप ताङ पपाआमी खला ङ्‍येन्‍दुप वुङ गोकिवी।
TIT 1:7 च्‍यिलासिसिन गोमा कितुप मी छ्‍ये ति कोन्‍छ्‍योककी लाका कितुप मी यिन्‍दुप तप्‍की क्‍येन मेतुप वुङ गोकिवी। ती ति हम्‍बा मिकिवु ताङ शार्क्येक ङ्‍यिर्मु मिकिवु ताङ छ्‍याङ्‍गेले मेतुप ताङ खाँदा मिकिवु ताङ टोङ्‍बाला देर्पा कितुप वुङ्‍गुप मेवी।
TIT 1:8 यिने डेन्‍बुला ल्‍यामु कितुप ताङ ङ्‍यिङ्‍ज्‍ये च्‍यङ्‍च्‍यु वोतुप ताङ खुरुङला डेकला देतुप ताङ टेङ्‍बु वोतुप ताङ चाङ्‍मा वोतुप ताङ हम क्‍यानी देतुप ताङ
TIT 1:9 खोरो लापुप सुङ टेङ्‍बुला रम्‍बु क्‍यानी युक गोकिवी। तुक क्‍यासिन तीकी सुङ टेङ्‍बुला लापुप दोके येन्‍देन तेर थुप्‍किवी। तमा सुङ टेङ्‍बुकी तेन्‍दोकला लङ्‍गुपतिवाला टेङ्‍बु काङ यिन सिरुप ति लोप साङ थुप्‍किवी।
TIT 1:10 च्‍यिलासिसिन क्रेटला वोतुप माङ्‍शोक मीतिवा ति ओङला मेदेवु, मी यम्‍बाला मेतुप ताङ जिनोक जोप लाका किवी। तिवा ति माङ्‍शोक यहूदी च्‍येतुप लुक्‍सु क्‍यावु मीतिवी नाङ्‍ला ख्‍येल्‍गिवी।
TIT 1:11 तिवाला ख चुम्‍नी दे ज्‍यि गोकिवी, च्‍यिलासिसिन तिवा रङगी ख्‍येप्‍साङकी थोक्‍ला तेरुप मेङ्‍गुप येन्‍देन लाप्‍नी तेरी मिछाङतिवी पर्ला मेलोक्‍पा जेवी।
TIT 1:12 तिवी पर नेमा क्रेटकी लुङ्‍तेम्‍बा मिरा च्‍यिककी दुक सिनी सिक्‍या वे, “क्रेटला देतुप मीतिवा ति नरी जिनोक्‍पा ताङ सेम्‍ज्‍येन दुक्‍टा ताङ छेर्शिक्‍पा गिवी।”
TIT 1:13 दी ताम्‍ङे ति टेङ्‍बु यिन। तुक क्‍यानी तिवाला कशेन वोरु तेन! तमा तिवी तेपा ति रम्‍बु च्‍युङ्‍शी।
TIT 1:14 तमा यहूदीतिवी जोवु फेन मोथोवु पे ताङ ताम्‍ङे मेटेङ्‍बु कितुप मीतिवी योक कुतुप ताम्‍ङेला तिवा ङ्‍याम मिकिशी।
TIT 1:15 मी टेङ्‍बुतिवाला ताम्‍ङे तेरी टेङ्‍बु राङ गिवी, यिने मी मेटेङ्‍बु ताङ तेपा मिकिवुतिवाला ति तेरी ताम्‍ङे मेटेङ्‍बु तिराङ गिवी। तिवी सेम ताङ नासाम साङ मेलोक्‍पा गिवी।
TIT 1:16 तिवा कोन्‍छ्‍योकला ङो शेकिवी सिनी सिरुप याङ सिवी, यिने रङगी किताङ नेसुर खोला मारे तोङ्‍गिवी। तिवा दुक्‍टा ताङ खोकी सुङला मेङ्‍येन्‍दुप गिवी। तमा काङ साङ लाका टेङ्‍बु कि छ्‍योवु मेङ्‍गिवी।
TIT 2:1 यिने तीतस ख्‍युरुङ ति येन्‍देन टेङ्‍बु तिराङ लोप।
TIT 2:2 मी गावातिवाला कुसुमी देतुप ताङ ताङ्‍देन कि छ्‍योवु ताङ खुरुङला डेकला ज्‍योक थुपुप जो। तमा तिवाला तेपा रम्‍बु ताङ ङ्‍यिङ्‍ज्‍ये कितुप ताङ हम क्‍यानी दे थुपुप वुङ गोकिवी सिनी लोप।
TIT 2:3 तुक राङ क्‍यानी मी गामातिवा किताङ नालु ति टेङ्‍बु वोतुप ताङ मी यम्‍बी कोर्ला ताम्‍ङे मेलोवा मिकिवु ताङ छ्‍याङ्‍गेले मेतुप ताङ चुका ति ल्‍यामु नोके तिराङ लोप्‍शी
TIT 2:4 तुक राङ क्‍यानी मी गामातिवी पुम्‍पेजा ज्‍येन्‍दातिवाला दाक दाक्‍पी ख्‍योवा ताङ पेजातिवाला ङ्‍यिङ्‍ज्‍ये कितुप ताङ
TIT 2:5 खुरुङला डेकला ज्‍योकुप ताङ खोरो ख्‍योवी मुला टेङ्‍बु वोतुप ताङ खाङ्‍बा शिङ ल्‍यामो क्‍यानी ल्‍हाप ताङ च्‍यङ्‍च्‍यु सेम्‍बा वोतुप ताङ रङगी ख्‍योवी ओङला दे गोकिवी सिनी लोप्‍शी। तुक क्‍यासिन कोन्‍छ्‍योककी सुङला मी यम्‍बी मारे मोतोङ्‍शी।
TIT 2:6 तुक राङ क्‍यानी ख्‍योक्‍पेजा ज्‍येन्‍दातिवाला साङ डेकला दे सिनी टोङ्‍गु बिन।
TIT 2:7 तमा ख्‍युरुङ लाका तेरीला टेङ्‍बु क्‍यानी ख्‍योरो मिजी ति यम्‍बाला छ्‍या तेन। ख्‍योरो लोपुप येन्‍देन ति टेङ्‍बु ताङ ताङ्‍देन वोतुप ताङ
TIT 2:8 क्‍येन मेतुप वुङ्‍शी। तमा सी साङ ख्‍योरो ताम्‍ङेला मारे तोङ मुथुप्‍शी। तुक क्‍यानी ङ्‍यिरा तेन्‍दोकला लावुतिवी ङ्‍यिरा कोर्ला सिरुप ताम्‍ङे काङ साङ माङ्‍येनी ङोछाला ख्‍येल्‍शी।
TIT 2:9 योक्‍पुतिवा साङ दाक दाक्‍पी ज्‍यिन्‍दाककी ओङ्‍ज्‍येनला देनी ज्‍यिन्‍दाकला गा लङ्‍गुप ताङ ख मग्‍यकुप वुङ गोकिवी सिनी लोप।
TIT 2:10 तिवा कुन कितुप मेङ्‍शी, यिने तेपा कि छ्‍योवु वुङ्‍शी। तुक क्‍यासिन तिवी तेरी ताम्‍ङेला दाक्‍पुला दिक्‍पा ने थर ज्‍यितुप कोन्‍छ्‍योककी कोर्ला लापुप सुङ ति टेङ्‍बु नोक सिनी हाक्‍कोकिवी।
TIT 2:11 च्‍यिलासिसिन कोन्‍छ्‍योककी तेरी मीतिवाला दिक्‍पा ने थर ज्‍यितुपला कटिन नङ वे।
TIT 2:12 ती कटिनकी राङ दाक्‍पु ति कोन्‍छ्‍योकला गा मलङ्‍गुप लाका ताङ तेपा मिकिवु मीतिवी दोके जम्‍बुलिङकी च्‍यालकतिवाला ङ्‍यिङ्‍ज्‍ये कितुप क्‍युर्नी दी जम्‍बुलिङला देतुप पेला खुरुङला डेकला ज्‍योकुप ताङ टेङ्‍बु वोतुप कोन्‍छ्‍योकला गा लङ्‍गुप मिजी क्‍योङ्‍गुपला येन्‍देन नङ्‍गिवी।
TIT 2:13 ती तप्‍की चोछ्‍येवु कोन्‍छ्‍योक ताङ दिक्‍पा ने थर ज्‍यितुप चोवो येशू ख्रीष्‍ट फेपुप मोवाकी थोक्‍ला दाक्‍पु रेवा क्‍यानी गुनी देकिवी।
TIT 2:14 ती ख्रीष्‍टकी राङ दाक्‍पुला रङगी तेरी दुक्‍टातिवा नेसुर थर ज्‍यितुपला खोरे मिजी साङ दाक्‍पी थोक्‍ला नाङ्‍सुङ। तमा लाका ल्‍यामु कितुप खक्‍छ्‍येवु मिरिक जोपला सेम टेङ्‍बु जो नाङ्‍सुङ।
TIT 2:15 तुक क्‍यानी ख्‍युरुङ दी तेरी ताम्‍ङेतिवा मीतिवाला येन्‍देन बिन, ओङ्‍ज्‍येन ताङ मुला टोङ्‍गु बिन्‍नी वोरु तेन। तमा सी साङ ख्‍युरुङला ङ्‍यिङ्‍मर मिकिशी।
TIT 3:1 ओङ्‍ज्‍येन कितुपतिवा ताङ मी छ्‍येतिवी ओङला देनी तिवी खला ङ्‍येन्‍दुप ताङ लाका टेङ्‍बु कितुपला नाम्‍साङ तिङ माछे सिनी मीतिवाला टोङ्‍गु बिन।
TIT 3:2 तमा तिवा सी तेन्‍दोकला साङ मालङ्‍शी, खाँदा मिकिशी, सेम बोल्‍मु ताङ मी तेरीकी मुला कुसु ज्‍यम्‍बु वुङ गोकिवी सिनी तिवाला टेन्‍सो कि च्‍यी।
TIT 3:3 च्‍यिलासिसिन येशूला तेपा कितुप गोमाला ङ्‍यिराङ साङ हम्‍बा कितुप ताङ अम्‍बारङ्‍शिङ कितुप ताङ थङ्‍गी कितुप ताङ शम्‍डेन कितुप ताङ किर्मु तिराङ छोलुप ताङ ठतोक कितुप ताङ मीतिवी ङ्‍यिङ्‍मर क्‍यावु ताङ च्‍यिककी च्‍यिकला ङ्‍यिङ्‍मर कितुप वोतुप्‍जा।
TIT 3:4 यिने दिक्‍पा ने थर ज्‍यितुप कोन्‍छ्‍योककी कटिनकी जोसालेन्‍सिन
TIT 3:5 दाक्‍पुला थर च्‍यिसुङ। ती ति दाक्‍पी लाका टेङ्‍बु क्‍यावु तप्‍की मिन, खोला च्‍यम्‍बा वोतुप तप्‍की यिन। खोकी दाक्‍पुला चाङ्‍मा जोनी मिजी सम्‍बा नङ्‍गुप ताङ खोकी थु चाङ्‍मा नेसुर दाक्‍पुला सम्‍बा फोनी थर च्‍यितुप यिन।
TIT 3:6 ती थु चाङ्‍मा ति खोकी दिक्‍पा ने थर ज्‍यितुप येशू ख्रीष्‍ट नेसुर दाक्‍पुला ग्‍यक्‍चे क्‍यानी नाङ्‍सुङ।
TIT 3:7 तुक क्‍यानी खोकी कटिनकी दाक्‍पु टेङ्‍बु च्‍युङ्‍नी दाक्‍पुला नाम्‍साङ मिसिवु मिजी थोप छ्‍योवु रेवा नाङ्‍सुङ।
TIT 3:8 दी ताम्‍ङे ति टेङ्‍बु यिन, ख्‍यिराङ दी ताम्‍ङेला ङार की सिनी ङ नो कितिन। तुक क्‍यानी सी कोन्‍छ्‍योकला तेपा किवे, तिवी लाका ल्‍यामु कितुपला ङ्‍याम्‍ले किशी। तुक कितुप ति मीतिवी थोक्‍ला छासे ल्‍यामु ताङ ख्‍येप्‍साङ वोतुप यिन।
TIT 3:9 यिने ताम्‍ङे अम्‍बारङ्‍शिङ कितुप ताङ गिपाकी कोर्ला फेन मोथोवु ताम्‍ङे कितुप ताङ खाँदा कितुप ताङ ठिमकी कोर्ला थमु ग्‍यकुपतिवी नेसुर क्‍योक्‍से की, च्‍यिलासिसिन दी ताम्‍ङेतिवा ति ख्‍येप्‍साङ मेतुप ताङ तेर्मे यिन।
TIT 3:10 ख्‍ये बेतुप मीला ति थेङ्‍मा च्‍यिक चोयी ङ्‍यी चोयी टोङ्‍गु बिन, तमा तीकी मुला काङ साङ लिङ्‍गु तेङ्‍गु माकी।
TIT 3:11 ती मी ति दुक्‍टा ताङ दिक्‍छेन यिन्‍दुप ति हाक्‍कोवा की। तमा ती ति खुरुङ राङ क्‍येन फोकिवी।
TIT 3:12 अर्तिमास ताङ तुखिकसला ख्‍योरो ते तोङ्‍गुप पेला ख्‍युरुङ निकोपोलिसला ङे ते यिन्‍ज्‍यिक मिन्‍ज्‍यिक शोक। च्‍यिलासिसिन ङ गुन्‍बी ल ति तेराङ देतुप सिनी नासाम तङ्‍यिन।
TIT 3:13 वकील जेनास ताङ अपोल्‍लोस फार छुर कोरा ग्‍यकुप पेला ल्‍यामो क्‍यानी दाल्‍जा किसा! तिवाला काङ साङ ङ्‍युङ्‍मु मेङ्‍शी।
TIT 3:14 दाक्‍पी मीतिवी नरी लाका ल्‍यामु किशी, तमा कतुकारला ख्‍येलुपतिवाला दाल्‍जा कि थुप्‍नी ङोछाला मेख्‍येल्‍शी।
TIT 3:15 ङ ताङ मुला वोतुपतिवा तेरीकी ख्‍यिराङला टसी देलेक सिक्‍या वोतो। कोन्‍छ्‍योकला तेपा क्‍यानी ङ्‍यिराङला ङ्‍यिङ्‍ज्‍ये कितुपतिवाला साङ टसी देलेक सिनी लोपा। कोन्‍छ्‍योककी कटिन ति ख्‍यिराङ तेरीला वुङ्‍शिता।
PHM 1:1 टसी देलेक! येशू ख्रीष्‍टकी थोक्‍ला चोन्‍खाङला शोरुप ङ पावल ताङ दाक्‍पी नुप तिमोथी नेसुर मुला राङ लाका कितुप दाक्‍पी ङ्‍यिङ्‍ज्‍येवु दाल्‍जा फिलेमोन ताङ
PHM 1:2 दाक्‍पी नुम अप्‍फिया ताङ मक्‍मी दोके च्‍युङ्‍नी दाक्‍पी मुला लाका कितुप अर्खिप्‍पस ताङ ख्‍योरो खाङ्‍बाला जोम्‍बुप चर्चकी तेरी मीतिवाला दी यिकी ति टिवु यिनो।
PHM 1:3 दाक्‍पी पपा कोन्‍छ्‍योक ताङ चोवो येशू ख्रीष्‍टकी ख्‍यिराङला कटिन ताङ लोदिमु नङ्‍शिता।
PHM 1:4 आङ फिलेमोन, ङ मोपोर कितुप पेला ख्‍युरुङला टेन्‍नी कोन्‍छ्‍योकला नरी थुचिछे बुलिन।
PHM 1:5 च्‍यिलासिसिन ख्‍योरो तेपा ति चोवो येशूला वोतुप ताङ कोन्‍छ्‍योकला तेपा कितुप मी तेरीला ख्‍योरो ङ्‍यिङ्‍ज्‍ये क्‍यावु ति ङे थोसुङ।
PHM 1:6 ख्‍योरो क्‍यावु तेपाकी कोर्ला ख्‍योरो मी यम्‍बाला शेसिमा दाक्‍पुला ख्रीष्‍टकी नङ्‍गुप मोलाम ति तेरी ल्‍यामु क्‍यानी हाक्‍कोशी सिनी ङ मोपोर कितिन।
PHM 1:7 आङो, ख्‍योरो क्‍यावु ङ्‍यिङ्‍ज्‍येकी ङला छासे गा ताङ सेमला ङाडेङ बङी ङ्‍येनी वे। च्‍यिलासिसिन कोन्‍छ्‍योकला तेपा कितुप मीतिवी सेमला ख्‍योरो लोदिमु जो वे।
PHM 1:8 ङ ति ख्रीष्‍टला तेपा कितुप ख्‍योरो च्‍युच्‍यु यिन्‍दुप तप्‍की ङाडेङ क्‍यानी ख्‍योरो काङ कि गोकिवी सिनी क तेर थुप्‍किवी,
PHM 1:9 यिन्‍सिनाङ ङे ख्‍युरुङला ङ्‍यिङ्‍ज्‍ये क्‍यावु तप्‍की ख्‍युरुङला गोङ्‍बा शोयिन। ङ पावल मी गावा यिन, तमा येशू ख्रीष्‍टकी थोक्‍ला तसाम चोन्‍खाङला शोर्नी वे।
PHM 1:10 ओनेसिमसकी कोर्ला ङ गोङ्‍बा शोयिन। ङ चोन्‍खाङला वोतुप पेला तीकी ख्रीष्‍टला तेपा क्‍यावु तप्‍की ती ति ङे पुज्‍युङ दोके च्‍युङ्‍नी वे।
PHM 1:11 ती ति गोमाला ख्‍योरो थोक्‍ला फेन मोथोवु वोसिनाङ त याङ ख्‍युरुङ ताङ ङ ङ्‍यिकरकी थोक्‍ला फेन थोवु च्‍युङ वे।
PHM 1:12 ती ति ङे छासे ङ्‍यिङ्‍ज्‍येवु यिन। तन्‍दा तीला ङ ख्‍योरो ते तोङ्‍यिनो।
PHM 1:13 लेन ल्‍यामु ख्‍याप्‍टाक क्‍यावु थोक्‍ला ङ चोन्‍खाङला शोर्नी वोतुप पेला ख्‍योरो छापला ङला दाल्‍जा किटे कितुपला तीला ङे मुला राङ ज्‍योकुप नो वोतुप्‍जा,
PHM 1:14 यिने ख्‍युरुङ माङ्‍येन्‍सुङ सिसिन ङ काङ साङ कितुप गा मलाङ्‍गिवी। ङे करखापकी ख्‍योरो ङला च्‍यम्‍बा कितुप मिन, ख्‍योरो सेम्‍बा सेमगी किशी सिरुप ति ङ नो कितिन।
PHM 1:15 ओनेसिमस नरीकी थोक्‍ला ख्‍योरो मुला लुशी सिनी राङ चेयी पर सेक ती ति ख्‍योरो मु नेसुर कुतुक पेतुप यिन्‍दे सिनी ङे नासामला नोसुङ।
PHM 1:16 त याङ ती ति योक्‍पु मिन, यिने योक्‍पु सिनाङ मङ ङ्‍यिङ्‍ज्‍येवु नुप यिन। ङला ङ्‍यिङ्‍ज्‍येवु मी यिन्‍सिन ख्‍यिराङला ति मङ ङ्‍यिङ्‍ज्‍येवु यिन्‍जा। च्‍यिलासिसिन गोमाला ती ति ख्‍योरो योक्‍पु वोसिनाङ तन्‍दा ति येशूला तेपा क्‍यावु नुप यिन।
PHM 1:17 ख्‍योरो ङला वुतुङ के मुला राङ लाका कितुप दाल्‍जा यिन सिनी नो वोसिन ङला दोके क्‍यानी तीला साङ गासो शु।
PHM 1:18 दोजो तीकी ख्‍योरो ति काङ रे च्‍यिक रे मेलोक्‍पा क्‍या वोसिन याङ्‍ना ते गोवु छ्‍यावा वोसिन ङे मिङला टिनी ज्‍योक।
PHM 1:19 दी यिकी ति ङ पावलकी लाक्‍पी राङ टिवु यिनो। ती छ्‍यावा ति ङे राङ तेतुप्‍नो। ख्‍योरो साङ ङ नेसुर राङ मिजी थोप्‍नी ङे थोक्‍ला ठिलेन च्‍योल गोवु वे। दी ताम्‍ङे ति ङे ख्‍युरुङला सि मोगोवी।
PHM 1:20 तुक क्‍यानी आङो, येशूला तेपा क्‍यावु तप्‍की ङे थोक्‍ला ओनेसिमसला तोजोयी ल्‍यामु किसा। तमा ख्रीष्‍टकी थोक्‍ला ङे सेमला लोदिमु जोनी नाङ।
PHM 1:21 ख्‍युरुङ ङे खला ङ्‍येन्‍गिवी सिनी रेवा क्‍यानी ङ दी यिकी ति टिकिन वोतो। ख्‍योरो ङे सिक्‍यावु सिनाङ ल्‍हक्‍पा किवी सिरुप ति ङला नो वे।
PHM 1:22 तमा यम्‍बा साङ ताम्‍ङे च्‍यिक वे। ख्‍यिरा क्‍यावु मोपोरकी ङ ख्‍यिरा ते वुङ थुप्‍किवी सिरुप ति ङे रेवा क्‍या वे। तुक क्‍यानी ङे थोक्‍ला देतुप दासा यी टडिक क्‍यानी ज्‍योका।
PHM 1:23 येशू ख्रीष्‍टकी थोक्‍ला ङे मुला राङ चोन्‍खाङला शोरुप इपाफ्रासकी साङ ख्‍यिराङला टसी देलेक सिनी तङ वोतो।
PHM 1:24 तमा ङ ताङ मुला राङ लाका कितुप मर्कूस ताङ अरिस्‍तार्खस ताङ डेमास ताङ लूकाकी साङ टसी देलेक सिनी तङ वोतो।
PHM 1:25 चोवो येशू ख्रीष्‍टकी कटिन ति ख्‍यिराङ तेरीला वुङ्‍शिता।
HEB 1:1 ताङ्‍बो ङोला कोन्‍छ्‍योककी खोरे सुङ शेतुप लुङ्‍तेम्‍बातिवा नेसुर दाक्‍पी पगावा हङ्‍गावातिवी मुला थेङ्‍मा बङी ताङ नम्‍बा बङीकी ताम्‍ङे क्‍या नाङ्‍सुङ।
HEB 1:2 यिने तसाम पेलाकी तिङ्‍मी तुजेला खोकी खोरे सेवु नेसुर दाक्‍पी मुला ताम्‍ङे क्‍या नाङ्‍सुङ। खोकी खोरे सेवु नेसुर राङ दी जम्‍बुलिङ ज्‍ये नाङ्‍सुङ। तमा स ताङ नामला वोतुप तेरी च्‍यालकतिवा तेरुपला खोरे सेवुला राङ पेन नाङ्‍सुङ।
HEB 1:3 खोकी सेवुकी कोन्‍छ्‍योककी मोवा छासे चोछ्‍येवु वोतुप ति छ्‍या देन्‍गिवी, तमा खो ति वुतुङ के कोन्‍छ्‍योक दोके राङ यिन। खोकी खोरो ङार छ्‍येवु सुङ नेसुर राङ स ताङ नामगी तेरी च्‍यालकतिवी खला ग्‍येला किवी। मीतिवाला दिक्‍पा ने थरुप लाका सिन्‍सिमा खो देवाच्‍येनला चोछ्‍येवु कोन्‍छ्‍योककी छ्‍याक यावी थाकाला ज्‍यु वे।
HEB 1:4 खोकी सेवु ति देवाच्‍येनकी लेन क्‍योलुप थुतिवा सिनाङ चोछ्‍ये वे। च्‍यिलासिसिन कोन्‍छ्‍योककी खोला देवाच्‍येनकी लेन क्‍योलुप थुतिवा सिनाङ छासे चोछ्‍येवु मिङ ज्‍याक्‍नी वे।
HEB 1:5 कोन्‍छ्‍योककी चुका देवाच्‍येनकी लेन क्‍योलुप थुला साङ “ख्‍युरुङ ङे पुज्‍युङ यिन, हारिङ ङ ख्‍योरो पपा च्‍युङ्‍गिवी।” सिनी मासुङ वे। येलुङ खोकी चुका देवाच्‍येनकी लेन क्‍योलुप थुला साङ “ङ तीकी पपा यिनो, ती ति ङे पुज्‍युङ यिनो।” सिनी मासुङ वे।
HEB 1:6 यिने खोकी खोरे पुज्‍युङ छ्‍येला जम्‍बुलिङला तोङ्‍गुप पेला दुक सुङ्‍सुङ, “कोन्‍छ्‍योककी तेरी देवाच्‍येनकी लेन क्‍योलुप थुतिवी तीला राङ सोवा देक्‍शी।”
HEB 1:7 येलुङ देवाच्‍येनकी लेन क्‍योलुप थुतिवी कोर्ला ति खोकी दुक सुङ वे, “कोन्‍छ्‍योककी खोरो देवाच्‍येनकी लेन क्‍योलुप थुतिवाला वुर्तुक दोके जेवी, तमा खोला शब्‍ज्‍यी कितुपतिवाला ति मे मेलाप दोके जेवी।”
HEB 1:8 यिने पुज्‍युङकी कोर्ला ति खोकी दुक सुङ्‍सुङ, “ओ कोन्‍छ्‍योक, चोवोकी ग्‍येल्‍ठिक ति नरीकी नरी लुकिवी। चोवोकी टेङ्‍बु क्‍यानी ग्‍येला क्‍या नङ्‍गिवी।
HEB 1:9 चोवोकी ताम्‍ङे टेङ्‍बुला सेमला डिवी, ताम्‍ङे मेटेङ्‍बुला ङ्‍यिङ्‍मर क्‍या नङ्‍गिवी। तुक क्‍यानी कोन्‍छ्‍योक, कोन्‍छ्‍योककी चोवोला पेनी चोवोकी दाल्‍जातिवाला सिनाङ मङ गा ताङ ताङ्‍देन क्‍या नाङ्‍सुङ।”
HEB 1:10 येलुङ दुक सिनी सुङ वे, “ओ चोवो, थल्‍माला चोवोकी जम्‍बुलिङ ज्‍ये नाङ्‍सुङ। तमा चोवोकी छ्‍याककी राङ नामतिवा जो नाङ्‍सुङ।
HEB 1:11 तिवा तेरी ना डिवी, यिने चोवो याङ नरीकी नरी ज्‍युकिवी। चोवोकी ज्‍येवुतिवा तेरी मज्‍या दोके ङ्‍यिङ्‍बा डिवी,
HEB 1:12 चोवोकी तिवाला मज्‍या दोके क्‍यानी टिल्‍गिवी। तमा मज्‍या ङ्‍यिङ्‍बा गल्‍सिमा सम्‍बा पोवु दोके क्‍यानी पोकिवी, यिने चोवो याङ नरी च्‍यिक्‍पा राङ लुकिवी।”
HEB 1:13 चुका देवाच्‍येनकी लेन क्‍योलुप थु तीला कोन्‍छ्‍योककी “ख्‍योरो डतिवाला तेरी ख्‍योरो काङ्‍बी वोक्‍ला मालेपा सेक्‍ला ख्‍युरुङ ङे यावी थाकाला दे।” सिनी सुङ्‍सुङ रो?
HEB 1:14 ती देवाच्‍येनकी लेन क्‍योलुप थुतिवा ति सु यिन रो? काङ तिवा याङ दिक्‍पा ने थर्वा ङ्‍येतुपतिवाला शब्‍ज्‍यी कितुप थोक्‍ला तङ्‍गुप थुतिवा तिराङ मिन रो?
HEB 2:1 तुक क्‍यानी दाक्‍पी थोवु कोन्‍छ्‍योककी सुङ टेङ्‍बुला मङ छासे ङ्‍यम्‍ले कि गोकिवी। मिसियाङ दाक्‍पु ति खोकी सुङ्‍गुप सुङला क्‍युर ज्‍याक्‍नी लाम मेटेङ्‍बुला डो थुप्‍किवी।
HEB 2:2 तोङ्‍ला देवाच्‍येनकी लेन क्‍योलुप थुतिवी दाक्‍पी हङ्‍गावातिवाला सिक्‍यावु सुङ ति वुतुङ के टेङ्‍बु च्‍युङ्‍सुङ। तमा ती सुङला मेङ्‍येन्‍दुप ताङ ती सुङला मुयुकुपतिवाला ङ्‍ये गोवु पर्च्या ति ङ्‍येसुङ।
HEB 2:3 दाक्‍पी तुका थर्वा ग्‍येर्पुला साङ ङ्‍याम माक्‍यासुङ सिसिन मङ चुक क्‍यानी ती पर्च्या नेसुर पिशोर थुप्‍किवी रो? दी थर्वा ति गोमाला चोवो येशूकी राङ ख्‍याप्‍टाक क्‍या नाङ्‍सुङ। खोकी ख्‍याप्‍टाक क्‍या नङ्‍गुप सुङ ङ्‍येन्‍दुपतिवी राङ ती सुङ ति टेङ्‍बु यिन सिनी ङ्‍यिराङला पङ्‍बु बिन्‍सुङ।
HEB 2:4 दी थर्वा ति टेङ्‍बु यिन्‍दुप पङ्‍बु छ्‍या देन्‍दुपला कोन्‍छ्‍योककी साङ ततिवा छ्‍या देन्‍दुप ताङ हलेवु लाकातिवा ताङ नम्‍बा बङीकी ङार छ्‍येवु लाकातिवा क्‍या नाङ्‍सुङ। तमा खोकी नोवाला वोतुप दोके खोरे थु चाङ्‍माकी कटिनतिवा साङ नाङ्‍सुङ।
HEB 2:5 दाक्‍पी ताम्‍ङे कियी वोतुप त वुङ्‍गुप जम्‍बुलिङ ति कोन्‍छ्‍योककी खोरे देवाच्‍येनकी लेन क्‍योलुप थुतिवी ओङला माज्‍याक वे।
HEB 2:6 यिने कोन्‍छ्‍योककी सुङला दासा च्‍यिकला दुक सिनी टि वे, “कोन्‍छ्‍योक, मी ति काङ यिन रो! ख्‍योरे तीकी थोक्‍ला नासाम तोङ्‍गुप ती। मी पुज्‍युङ ति सु यिन रो? ख्‍योरे तीकी थोक्‍ला ल्‍हटे कितुप ती।
HEB 2:7 ख्‍योरे चेयी पर सेककी थोक्‍ला तीला देवाच्‍येनकी लेन क्‍योलुप थुतिवा सिनाङ छ्‍युङा जो नाङ्‍सुङ। तमा तीला ग्‍येल्‍वुला दोके मोवा ताङ ताङ्‍देन नाङ्‍सुङ।
HEB 2:8 तमा ख्‍योरे तेरी च्‍यालकतिवा खोकी ओङला राङ ज्‍याङ नाङ्‍सुङ।” कोन्‍छ्‍योककी खोरे ओङला तेरी च्‍यालकतिवा ज्‍याङ नङ्‍गुप पेला खोकी ओङला मेतुप चुका च्‍यालक साङ मे। यिन्‍सिनाङ तसाम दाक्‍पी तेरी च्‍यालकतिवा खोकी ओङला राङ वोतुप मोथोङ्‍गिवी।
HEB 2:9 यिने दाक्‍पु येशूकी कोर्ला नासाम तोङ्‍गुप। कोन्‍छ्‍योककी कटिनकी खो मी तेरीकी थोक्‍ला टुङ्‍गुपला चेयी पर सेककी थोक्‍ला देवाच्‍येनकी लेन क्‍योलुप थुतिवा सिनाङ छ्‍युङा जो नाङ्‍सुङ। मी तेरीकी थोक्‍ला शेपला दुक्‍पा खुर्सिमा कोन्‍छ्‍योककी खोला ग्‍येल्‍वुला दोके मोवा ताङ ताङ्‍देन नाङ्‍सुङ।
HEB 2:10 जम्‍बुलिङकी तेरी च्‍यालकतिवा कोन्‍छ्‍योककी राङ ज्‍ये नङ्‍गुप यिन। तमा तेरी च्‍यालकतिवा खोकी थोक्‍ला राङ वे। खोकी गिपातिवा बङीला खुरुङला वोतुप दोके मोवा ति गोतुपला येशूला छेटाङ खुर च्‍यिनी टेङ्‍बु जो नाङ्‍गुप ति कि राङ गोवु यिन। च्‍यिलासिसिन येशू ति तिवाला थर्वा नङ्‍गुपला लाम छ्‍या तेन्‍सुङ।
HEB 2:11 मीला दिक्‍पा नेसुर टेङ्‍बु जो नङ्‍गुप येशू ताङ खोकी टेङ्‍बु जोवु मी तेरीकी पपा ति च्‍यिक राङ वे। तुक क्‍यानी खोकी खोरे राङ टेङ्‍बु जो नङ्‍गुप मीतिवाला ङे नुपतिवा सिरुपला खो ङोछा मिकिवी।
HEB 2:12 खोकी कोन्‍छ्‍योकला दुक सुङ्‍गिवी, “ङ ङे नुपतिवी पर्ला ख्‍योरे क्‍यावु हलेवु लाका ति ख्‍याप्‍टाक कितिन। तमा तिवा जोम्‍नी सोवा देकुप पेला ङ ख्‍युरुङला सोवा देकिन।”
HEB 2:13 येलुङ खोकी सुङ्‍सुङ, “ङ कोन्‍छ्‍योकला राङ रेवा कितिन।” तमा येलुङ खोकी सुङ्‍सुङ, “ल्‍होसा, कोन्‍छ्‍योककी ङला नङ्‍गुप पुज्‍युङपुमतिवी मुला ङ देन वे।”
HEB 2:14 ती पुज्‍युङपुमतिवा श ताङ ठकला वोतुप जु यिन्‍दुप तप्‍की खो साङ तिवा दोके श ताङ ठकला वोतुप जु च्‍युङ्‍सुङ। तुक क्‍यानी खो टुङ्‍नी शेपकी ङार वोतुप शैतानला ना ताङ्‍सुङ।
HEB 2:15 तुक क्‍यानी छे काङ शेपला ज्‍यिवा क्‍यानी शेपकी ओङला ख्‍येलुपतिवाला खोकी थर्वा नाङ्‍सुङ।
HEB 2:16 वुतुङ के खोकी देवाच्‍येनकी लेन क्‍योलुप थुतिवी थोक्‍ला मिन, यिने अब्राहामकी गिपातिवी थोक्‍ला ङ्‍याम क्‍या नङ्‍गिवी।
HEB 2:17 तुक क्‍यानी तेरी ताम्‍ङेला खो रङगी अच्‍युनुपतिवा दोके च्‍युङ गोसुङ। तमा मीतिवी क्‍यावु दिक्‍पी ठिलेन च्‍योलुपला खो कोन्‍छ्‍योकला शब्‍ज्‍यी बुलुप च्‍यम्‍बा ताङ खोङ्‍तेर्मु वोतुप कोङ्‍यार छ्‍ये च्‍युङ्‍सुङ।
HEB 2:18 खो खोरे साङ बङी शैतानकी खोक्‍पा ल्‍हापला ख्‍येल्‍नी दुक्‍पा खुरुप तप्‍की त याङ खोक्‍पा ल्‍हापला ख्‍येलुपतिवाला खोकी दाल्‍जा किटे क्‍या नङ्‍गिवी।
HEB 3:1 तुक क्‍यानी कोन्‍छ्‍योककी कताङ नङ्‍गुप चाङ्‍मा वोतुप अच्‍युनुपतिवा, दाक्‍पी ख्‍याप्‍टाक क्‍यावु लोमा छ्‍ये ताङ कोङ्‍यार छ्‍ये यिन्‍दुप येशूला नासाम तोङ।
HEB 3:2 खो ति मोशा कोन्‍छ्‍योककी मिछाङला शब्‍ज्‍यी कितुपला खोङ्‍तेर्मु वोतुप दोके खुरुङला कताङ नङ्‍गुप कोन्‍छ्‍योककी थोक्‍ला खोङ्‍तेर्मु च्‍युङ्‍सुङ।
HEB 3:3 यिन्‍सिनाङ खाङ्‍बा सिनाङ खाङ्‍बा जोप मीला मङ ताङ्‍देन वोतुप दोके मोशा सिनाङ येशूला मङ छासे ताङ्‍देन कि छ्‍योवु वे।
HEB 3:4 तेरी खाङ्‍बातिवा ललाइ ललाइ मी जोवु यिन, ती दोके तेरी च्‍यालकतिवा कोन्‍छ्‍योक राङ जो नङ्‍गुप यिन।
HEB 3:5 मोशा कोन्‍छ्‍योककी मिछाङकी मीतिवाला लावा दोके क्‍यानी शब्‍ज्‍यी कितुपला खोङ्‍तेर्मु च्‍युङ्‍सुङ। तमा ज्‍युक्‍थमाला वुङ्‍गुप कोन्‍छ्‍योककी येन्‍देनकी कोर्ला पङ्‍बु बिन्‍सुङ।
HEB 3:6 यिने ख्रीष्‍ट ति कोन्‍छ्‍योककी पुज्‍युङ यिन्‍दुप तप्‍की खोकी मिछाङकी मीतिवी थोक्‍ला खोङ्‍तेर्मु च्‍युङ वे। दोजो दाक्‍पी रेवा क्‍यावु ताम्‍ङेला ङाडेङ ताङ तेके क्‍यानी नरी देसुङ सिसिन दाक्‍पु साङ कोन्‍छ्‍योककी मिछाङकी मीतिवा च्‍युङ्‍गिवी।
HEB 3:7 तुक क्‍यानी कोन्‍छ्‍योककी थु चाङ्‍माकी दुक सुङ्‍गिवी, “हारिङ ख्‍यिरा कोन्‍छ्‍योककी सुङ्‍गुप ति थोसुङ सिसिन,
HEB 3:8 ख्‍यिरा हङ्‍गावातिवी दासा पाङ्‍थेरीला कोन्‍छ्‍योककी तेन्‍दोकला लावु दोके ख्यिरा ति सेम क्‍योङ्‍बु माजो। ती पेला तिवी खोला खोक्‍पा ल्‍हानी खोकी तेन्‍दोकला लासुङ।
HEB 3:9 ते तिवी लो खल ङ्‍यी सेक खोकी क्‍यावु हलेवु लाकातिवा थोङ्‍सिनाङ खोला तेपा माक्‍यानी खोला खोक्‍पा ल्‍हासुङ।
HEB 3:10 तुक क्‍यानी ती मीतिवी थोक्‍ला खो छासे ङ्‍यिर्मु लानी दुक सुङ्‍सुङ, ‘तिवी सेम ति नरी ख्‍येम्‍नी देतुप तप्‍की ङे कला माङ्‍येन वे।’
HEB 3:11 तुक क्‍यानी खो ङ्‍यिर्मु लानी तिवाला दुक सिनी न क्‍याल्‍सुङ, ‘ङे ङासोप दासाला तिवा नाम्‍साङ शुकुप मेङ्‍येवी।’”
HEB 3:12 अच्‍युनुपतिवा, च्‍यक्‍पु किसा। ख्‍यिराङ सु साङ तेपा मिकिवु सेम दिक्‍छेन गल्‍नी ङोसु वोतुप कोन्‍छ्‍योकला क्‍युर्नी माज्‍योका।
HEB 3:13 यिने हारिङगी ङ्‍यिमा सिनी सिक्‍यावु तुजे वोता सेक ङ्‍यिमी टेङ ख्‍यिराङ च्‍यिककी च्‍यिकला टोङ्‍गु बिन। मिसियाङ दिक्‍पाकी जिनोक जोपला ख्‍येल्‍नी ख्‍यिरा सेम साङ तेरी क्‍योङ्‍बु जेवी।
HEB 3:14 दाक्‍पी गोमाला तेपा कितुप पेला तेन्‍तेन क्‍यावु ताम्‍ङेला तिङ्‍ला सेक डेकला देसिन दाक्‍पु ख्रीष्‍टला वोतुप ति तेरी मुला राङ थोप्‍किवी।
HEB 3:15 कोन्‍छ्‍योककी सुङला दुक सुङ्‍गिवी, “हारिङ ख्‍यिरा कोन्‍छ्‍योककी सुङ थोसिन ख्‍यिरा हङ्‍गावी कोन्‍छ्‍योककी तेन्‍दोकला लावु दोके ख्‍यिराङ ति माकी।”
HEB 3:16 सी कोन्‍छ्‍योककी सुङ थोनी खोकी तेन्‍दोकला लासुङ? मोशाकी मिश्र लुङ्‍बा नेसुर तेन्‍नी टिनी वावु मीतिवा तेरीकी मिन रो?
HEB 3:17 सी मुला लो खल ङ्‌यी सेक कोन्‍छ्‍योककी ङ्‍यिर्मु क्‍या नाङ्‍सुङ? दिक्‍पा क्‍यानी ती दासा पाङ्‍थेरीला शेप मीतिवी मुला राङ मिन रो?
HEB 3:18 तमा सुला “ङे ङासोप दासाला शुकुप मेङ्‍येवी।” सिनी कोन्‍छ्‍योककी न क्‍यल वे? काङ खोकी सुङ्‍गुप सुङला मेङ्‍येन्‍दुप मीतिवी थोक्‍ला राङ सुङ्‍गुप मिन रो?
HEB 3:19 तुक क्‍यानी दाक्‍पी हाक्‍कोकिवी, तेपा माक्‍यावु तप्की तिवा ङासोपकी दासाला शुकुप माङ्‍येसुङ।
HEB 4:1 दाक्‍पुला कोन्‍छ्‍योककी ङप्‍सु ङ्‍येतुपला थाक्‍छ्‍येतुप ति तन्‍दा साङ लुनी वे। तुक क्‍यानी दाक्‍पु च्‍यक्‍पु कितुप। तमा ख्‍यिराङ सु साङ ती ङासोप दासाला शुकुप मेङ्‍येवु मोडोशी।
HEB 4:2 दाक्‍पी हङ्‍गावातिवाला दोके दाक्‍पुला साङ लेन ल्‍यामु सिक्‍यानी वे। यिने तिवाला सिक्‍यावु सुङ ति तेर्मेला गाल वे। च्‍यिलासिसिन तिवी ती लेन ल्‍यामु थोसिनाङ तेपा माक्‍या।
HEB 4:3 त याङ दाक्‍पु तेपा कितुपतिवा ति कोन्‍छ्‍योककी थाक्‍छ्‍येन नङ्‍गुप ङासोपकी दासाला शुकुप ङ्‍येकिवी। यिने तेपा मिकिवु मीतिवी कोर्ला खोकी दुक सुङ्‍नी वे, “ङला ङ्‍यिर्मु लानी तिवाला दुक सिनी न क्‍यलिन, ‘ङे ङप्‍सुला तिवा नाम्‍साङ शुकुप मेङ्‍येवी।’” जम्‍बुलिङ ज्‍येनी सिन्‍दुप पेला नेज्‍यु कोन्‍छ्‍योककी ती ङासोप टडिक क्‍या नङ्‍गुप ति छेसिनाङ खोकी तुक सुङ्‍सुङ।
HEB 4:4 दाक्‍पु दी खोकी टडिक क्या नङ्‍गुप ति हाक्‍कोकिवी, च्‍यिलासिसिन खोकी सुङला ङासोप ङ्‍यिमाकी कोर्ला दुक सुङ वे, “कोन्‍छ्‍योककी तेरी लाकातिवा नेसुर ङ्‍यिमा दिनकी छेर्मु ङप्‍सु ताङ्‍सुङ।”
HEB 4:5 यिने खोकी यम्‍बा दासाला दुक साङ सुङ्‍नी वे, “तिवा ङे ङप्‍सुला नाम्‍साङ शुकुप मेङ्‍येवी।”
HEB 4:6 तोङ्‍ला लेन ल्‍यामु थोवुतिवी दी लेन ल्‍यामुला माङ्‍येन्‍दुप तप्‍की खोकी ङप्‍सुला शुकुप माङ्‍ये। यिने ललाइ ति तरोङ साङ ती ङप्‍सुला शुकुप लुनी वे।
HEB 4:7 तुक क्‍यानी येलुङ कोन्‍छ्‍योककी यम्‍बा ङ्‍यिमाला “हारिङ” ङ्‍यिमा सिनी तेन्‍तेन क्‍या नाङ्‍सुङ। तमा तोङ्‍ला सुङ्‍गुप दोके क्‍यानी खोकी लो बङी ज्‍युक्‍ला दाऊद नेसुर दुक सिनी सुङ्‍सुङ, “हारिङ ख्‍यिरा कोन्‍छ्‍योककी सुङ ति थोसुङ सिसिन सेम क्‍योङ्‍बु माजो।”
HEB 4:8 दोजो यहोशूकी इस्राएलकी मीतिवाला कोन्‍छ्‍योककी थाक्‍छ्‍येन नङ्‍गुप ङप्‍सुला क्‍यलुप यिन्‍सिन खोकी ज्‍युक्‍ला वुङ्‍गुप यम्‍बा ङ्‍यिमाकी कोर्ला मुसुङ्‍गुप ति यिन्‍जा।
HEB 4:9 तुक क्‍यानी कोन्‍छ्‍योककी मीतिवी थोक्‍ला ङप्‍सु लङ्‍गुप ति लुनी वे।
HEB 4:10 कोन्‍छ्‍योककी खोरे छ्‍यक्‍लेन नेसुर ङप्‍सु तङ्‍गुप दोके खोकी ङप्‍सु ङ्‍येतुप मीतिवी साङ खोप्‍रे लाका नेसुर ङप्‍सु ङ्‍येकिवी।
HEB 4:11 ती तप्‍की दाक्‍पु साङ खोकी ङप्‍सु ङ्‍येतुपला अछ्‍योता सेक टेमु कितुप। तुक क्‍यानी दाक्‍पु सु साङ तेपा माक्‍यानी खोकी कला मेङ्‍येन्‍दुप मीतिवा दोके तेन्‍नी मोतोङ्‍शी।
HEB 4:12 च्‍यिलासिसिन कोन्‍छ्‍योककी सुङ ति ङोसु ताङ ङार छ्‍येवु वे। ती सुङ ति ख ङ्‍यी वोतुप खुर्पा सिनाङ नेन्‍बु वे। तुक क्‍यानी तीकी मी सेम ताङ थुकी नाङ्‍ला शुकुप ताङ जुकी थिन्‍जाम ताङ रुकककी काङ काङला शुनी कुतुक कुतुक मागल्‍वा सेक तीकी तुप्‍किवी। तमा सेमगी नासाम ताङ नोवा ति काङ नोक सिनी छ्‍या देन्‍गिवी।
HEB 4:13 कोन्‍छ्‍योककी ज्‍येवु च्‍यालकतिवी नाङ्‍ला खोकी थोङ मुथुपुप ति काङ साङ मे। खोकी थोङ्‍दाङला तेरी ताम्‍ङेतिवा ठछ्‍येली थोङ्‍गिवी। तमा खोला राङ दाक दाक्‍पी क्‍यावु लाकाकी कोर्ला तेरी ताम्‍ङे टेङ्‍बु कि गोकी।
HEB 4:14 तुक क्‍यानी देवाच्‍येनला तेक्‍नी फेवु कोन्‍छ्‍योककी सेवु येशू ति चोछ्‍ये वोतुप तेरी सिनाङ कोङ्‍यार छ्‍ये यिन्‍दुप तप्‍की दाक्‍पी मीतिवी मिङ्‍गाला सेमला लानी तेन्‍तेन क्‍यावु तेपाला मङ रम्‍बु क्‍यानी देतुप।
HEB 4:15 खो दाक्‍पुला छेटाङ दुङल ख्‍येलुप पेला टोङ्‍गु तेर मुथुपुप कोङ्‍यार छ्‍ये मिन। च्‍यिलासिसिन खो ति दाक्‍पु दोके तेरी ताम्‍ङेला शैतानकी खोक्‍पा ल्‍हापला ख्‍येल्‍सुङ, यिन्‍सिनाङ खोकी दिक्‍पा माक्‍यासुङ।
HEB 4:16 तुक क्‍यानी दाक्‍पु ज्‍यिवा माक्‍यानी कटिन वोतुप कोन्‍छ्‍योककी ग्‍येल्‍ठिककी चिप्‍ला डोप। तमा कतुकार ख्‍येलुप पेला दाक्‍पुला कटिन ताङ च्‍यम्‍बा थोप्‍किवी।
HEB 5:1 चुका कोङ्‍यार छ्‍ये साङ कोन्‍छ्‍योककी मीतिवा नेसुर बेकिवी। तमा मी छ्‍योक नेसुर कोन्‍छ्‍योककी थोक्‍ला तीकी दिक्‍पाकी थोक्‍ला बुल्‍वा ताङ सेम्‍ज्‍येन सेनी जिन्‍बा बुलुपकी थोक्‍ला ज्‍योकिवी।
HEB 5:2 ती कोङ्‍यार छ्‍ये तीकी खोरो साङ दिक्‍पा कि थुप्‍किवी। ती तप्‍की टेङ्‍बुला ङो माशेनी लाम नोरुपतिवाला तीकी कुसु ज्‍यम्‍बु क्‍यानी टोङ्‍गु तेर थुप्‍किवी।
HEB 5:3 तुक क्‍यानी तीकी मीतिवी दिक्‍पी थोक्‍ला तिराङ मिन, यिने खोरो दिक्‍पाकी थोक्‍ला साङ सेम्‍ज्‍येन सेनी कोन्‍छ्‍योकला जिन्‍बा बुल गोकिवी।
HEB 5:4 तुका कोङ्‍यार छ्‍येकी लाका नेसुर वुङ्‍गुप ताङ्‍देन ति खोरो राङ छल्‍नी मेङ्‍येवी, यिने हारूनला दोके क्‍यानी कोन्‍छ्‍योककी कताङ नङ्‍गुप वुङ गोकिवी।
HEB 5:5 तुक राङ क्‍यानी ख्रीष्‍टकी साङ खोरुङ राङ कोङ्‍यार छ्‍ये च्‍युङ्‍नी ताङ्‍देन छोलुप नो माक्‍या। यिने “ख्‍युरुङ ङे पुज्‍युङ यिनो, हारिङ ङ ख्‍योरो पपा यिनो।” सिनी सुङ्‍गुप कोन्‍छ्‍योककी राङ खोला चिवु यिन।
HEB 5:6 येलुङ कोन्‍छ्‍योककी सुङला दासा यम्‍बाला साङ “ख्‍युरुङ मल्‍कीसेदेककी रिम्‍बाला नरीकी नरी थोक्‍ला कोङ्‍यार यिनो।” सिनी सुङ वे।
HEB 5:7 येशू दी जम्‍बुलिङला मी जुजमला ज्‍युवु पेला खुरुङला शेप ने ङोसु लोङ थुपुप कोन्‍छ्‍योकला थोर ग्‍यप्‍नी ङुयी सिरा मोपोर क्‍यावु ति खोकी सेन्‍सुङ। च्‍यिलासिसिन येशूकी टेङ्‍बु क्‍यानी खोला ताङ्‍देन क्‍या नाङ्‍सुङ।
HEB 5:8 येशू कोन्‍छ्‍योककी सेवु यिन्‍सिनाङ छेटाङ दुङल खुर्नी चुक क्‍यानी खोकी कला ङ्‍येन गोकिवी सिरुप ति लाप्‍सुङ।
HEB 5:9 तमा येशू टेङ्‍बु च्‍युङ्‍नी कोन्‍छ्‍योककी कला ङ्‍येन्‍दुप तप्‍की येशूकी कला ङ्‍येन्‍दुप तेरी मीतिवाला खो नरीकी थोक्‍ला दिक्‍पा ने थर्वा नङ्‍गुप च्‍युङ्‍सुङ।
HEB 5:10 ती तप्‍की कोन्‍छ्‍योककी खोला मल्‍कीसेदेक दोके राङ कोङ्‍यार छ्‍ये जो नाङ्‍सुङ।
HEB 5:11 दी ताम्‍ङेकी कोर्ला ङ्‍यिरा ख्‍यिराङला सि गोवु याङ बङी वे, यिन्‍सिनाङ ख्‍यिराङ ङमु हाक्‍मोकोवु गल वे। तुक क्‍यानी ख्‍यिराङला हाक्‍को ज्‍यितुप छासे कले वे।
HEB 5:12 ख्‍यिरा तेपा क्‍यावु ति लो अलायी गाल, तुक क्‍यानी त याङ ख्‍यिराङ गेकेन के च्‍युङ गोवु ति यिन्‍जा, यिने तरोङ साङ ख्‍यिराङला ललाइकी कोन्‍छ्‍योककी सुङगी कोर्ला गोमा नेज्‍युनी येलुङ लोप गोवु नोक। ख्‍यिराङ याङ समा क्‍योङ्‍बु साप मिन, आमी नुम तिराङ थुङ्‍गुप आङा टिक्‍पे दोके नोक।
HEB 5:13 आमी नुम तिराङ थुङ्‍गुप मी ति आङा टिक्‍पे दोके यिन। ती आङा टिक्‍पेला कोन्‍छ्‍योककी सुङ टेङ्‍बुकी येन्‍देन ति हाक्‍मोकोवी।
HEB 5:14 यिने समा क्‍योङ्‍बु याङ मी ज्‍येन्‍दातिवी थोक्‍ला तिराङ यिन। तुका मीतिवी नरी तालिम क्‍यावु तप्‍की ल्‍यामु ताङ मेलोवा काङ यिन सिनी बे थुपुप गिवी।
HEB 6:1 तुक क्‍यानी दाक्‍पु ख्रीष्‍टकी कोर्ला गोमाला लापुप येन्‍देनतिवा येलुङ लोपुप क्‍युर्नी मङ मङ रम्‍बु हाक्‍को थुपुप च्‍युङ्‍यिन डोप। शेप ते क्‍योलुप लाकातिवा नेसुर सेम ग्‍युरुप ताङ कोन्‍छ्‍योकला तेपा कितुप ताङ
HEB 6:2 बप्‍तिस्‍माकी कोर्ला लापुप येन्‍देनतिवा ताङ मी यम्‍बी गोला लाक्‍पा ज्‍याक्‍नी मोपोर कितुप ताङ शेप ने सेन्‍बु लोङ्‍गुप ताङ तिङ्‍मी तुजेला कोन्‍छ्‍योककी ठिम क्‍या नङ्‍गुपकी कोर्ला येन्‍देन लोपुप ति गोमाला लापुप येन्‍देनतिवा यिन्‍दुप तप्‍की तीला तिराङ लाप्‍नी मादे।
HEB 6:3 दोजो कोन्‍छ्‍योककी नोवा वोसुङ सिसिन दाक्‍पु ती तेरी येन्‍देनतिवा मङ रम्‍बु हाक्‍कोवु च्‍युङ्‍गिवी।
HEB 6:4 च्‍यिलासिसिन सी थेङ्‍मा यी कोन्‍छ्‍योककी सुङ टेङ्‍बु थोवु ताङ देवाच्‍येनकी कटिन हाक्‍को वे, तमा कोन्‍छ्‍योककी थु चाङ्‍मा थोप्‍नी वे,
HEB 6:5 सी कोन्‍छ्‍योककी खक्‍छ्‍येवु सुङ हाक्‍कोवु ताङ ज्‍युक्‍थमाकी कल्‍वाला कोन्‍छ्‍योककी क्‍या नङ्‍गुप ङारकी कोर्ला हाक्‍को वे,
HEB 6:6 यिन्‍सिनाङ तिवा तेपा कितुप क्‍युर्नी थेन गल्‍सिन, येलुङ सेम ग्‍युर्नी वुङ मुथुपी। तुका मीतिवी कोन्‍छ्‍योककी सेवुला येलुङ थेङ्‍मा च्‍यिक ग्‍यङ्‍शिङला ग्‍येल च्‍यिनी मी मिङ्‍गाला खोला मारे तोङ्‍गिवी।
HEB 6:7 छ्‍यर्वा नरी ग्‍यप्‍सिमा शिङ बोकिवी, तमा सशिङकी लाका कितुप मीतिवी थोक्‍ला डुप्‍सेन ल्‍यामु ल्‍येसिन तुका सशिङला कोन्‍छ्‍योककी मोलाम नङ्‍गिवी।
HEB 6:8 यिने ती शिङ खला छेर्क्योक ताङ युर्मा तिराङ क्‍येसुङ सिसिन ती ति काङ साङ फेन मोथोवी। तुका शिङला कोन्‍छ्‍योककी मोताप सुक थुप्‍किवी। तमा ती शिङ खला मे ग्‍यप्‍नी ना डिवी।
HEB 6:9 यिने ङे ङ्‍यिङ्‍ज्‍येवु अच्‍युनुपतिवा, ङ्‍यिरा तुका ताम्‍ङे क्‍यासिनाङ ख्‍यिरा थोक्‍ला ति दिक्‍पा ने थरुप ताङ मङ मोलाम वुङ्‍गुप ताम्‍ङे ल्‍यामु वे सिनी ङ्‍यिराङला तेन्‍तेन वे।
HEB 6:10 ख्‍यिरा यम्‍बा तेपा कितुपतिवाला शब्‍ज्‍यी क्‍यासुङ, तमा तरोङ साङ कियी वे। कोन्‍छ्‍योक ति मीला ख्‍ये मापेवा क्‍यानी ठिम क्‍या नङ्‍गुप कोन्‍छ्‍योक यिन। खोला तेपा कितुपतिवाला ख्‍यिरा शब्‍ज्‍यी क्‍यावु ताङ ङ्‍यिङ्‍ज्‍ये क्‍यावु ति खोकी मेज्‍येवी।
HEB 6:11 ख्‍यिराङ रे रेकी रेवा क्‍यावु ति तेरी च्‍युङ्‍गुपला तुक क्‍यावु ति तिङ्‍ला सेक तुकै राङ क्‍यानी देकिवी सिरुप ति ङ्‍यिरा नोवा वे।
HEB 6:12 ख्‍यिराङ छेरा माकी, यिने खोला तेपा कितुप ताङ हम क्‍या देनी खोकी थाक्‍छ्‍येन नङ्‍गुप ति थोपुप मीतिवा दोके च्‍युङ्‍शी सिरुप ति ङ्‍यिरा नोवा वे।
HEB 6:13 कोन्‍छ्‍योककी अब्राहामला थाक्‍छ्‍येन नङ्‍गुप पेला खो सिनाङ यम्‍बा सु साङ छ्‍ये मेतुप तप्‍की खोरे मिङला दुक सिनी न क्‍याल्‍सुङ,
HEB 6:14 “वुतुङ के ङ ख्‍युरुङला मोलाम बङी तेरिन, तमा ख्‍योरो गिपातिवा बङीकी बङी फेल ज्‍यितिनो।”
HEB 6:15 तमा अब्राहामकी कोन्‍छ्‍योककी कला ङ्‍येन्‍नी हम क्‍यानी गुनी देतुप तप्‍की अब्राहामला खोकी थाक्‍छ्‍येन नङ्‍गुप मोलाम ति तेरी थोप्‍सुङ।
HEB 6:16 मीतिवा खोप्‍राङ सिनाङ मी छ्‍येतिवी मिङला न क्‍योल्‍गिवी, तमा न क्‍यल्‍नी राङ सिक्‍यावु ताम्‍ङेतिवा तेन्‍तेन कितुप ताङ तेरी खाँदातिवा डिकिवी।
HEB 6:17 तुक राङ क्‍यानी कोन्‍छ्‍योककी याङ खोकी थाक्‍छ्‍येन नङ्‍गुप मोलाम थोपुपतिवाला खोकी थाक्‍छ्‍येन नङ्‍गुप ति नाम्‍साङ मोफोवु क्‍यानी तेरुप सिनी तेन्‍तेन कितुपला न क्‍याल्‍सुङ।
HEB 6:18 कोन्‍छ्‍योककी दाक्‍पुला थाक्‍छ्‍येन नङ्‍गुप ताङ न क्‍यल नाङ्‍सुङ। ती ताम्‍ङे ङ्‍यी ति नाम्‍साङ मोफोवी, च्‍यिलासिसिन कोन्‍छ्‍योककी जिनोक जो मुथुपी। तुक क्‍यानी दाक्‍पु र्‍होकुपकी थोक्‍ला टोनी वावुतिवाला दाक्‍पी दोङ्‍ला ज्‍यकुप रेवा ति थोपुपला छासे ङाडेङ ग्‍येर्पु ङ्‍येन वे।
HEB 6:19 ती रेवाला राङ दाक्‍पी मिजी ति रेन्‍नी देन वे। दी रेवा ति ग्‍येम्‍छो नाङ्‍ला वोतुप टुला लङ्‍गर ग्‍यप्‍सिमा टु ति र्‍होकुप दोके दाक्‍पी सेमला रम्‍बु ताङ र्‍होकुप च्‍युङ्‍नी वे। तमा ती रेवा ति यहूदी ल्‍हङाङला ग्‍यपुप गोयोल नङगी छासे चाङ्‍मा वोतुप दासा सेक लेपुपला दाल्‍जा किवी।
HEB 6:20 दाक्‍पी छ्‍योकला येशू ति दाक्‍पु सिनाङ गोमाला के ती गोयोल नाङ्‍ला फेप्‍नी नरीकी नरी थोक्‍ला मल्‍कीसेदेक दोके कोङ्‍यार छ्‍ये च्‍युङ्‍नी वे।
HEB 7:1 ती मल्‍कीसेदेक ति शालेमकी ग्‍येल्‍वु ताङ चोछ्‍येवु कोन्‍छ्‍योककी कोङ्‍यार यिनोक। अब्राहामकी ग्‍येल्‍वुतिवी मुला मक ग्‍यप्‍नी तिवी खला ग्‍येल्‍नी लोङ वुङ्‍गुप पेला तीकी अब्राहामला ठेनी मोलाम बिन्‍दुप यिन।
HEB 7:2 तमा अब्राहामकी साङ खोरो मक नेसुर ग्‍येल्‍नी खुर वावु तेरी च्‍यालकतिवी नाङ्‍ला छो च्‍यिथम्‍बी नाङ ने छो च्‍यिक ति मल्‍कीसेदेकला बुल्‍वा पुल्‍नोक। मल्‍कीसेदेक सिक्‍यावु तेन्‍दोक ति गोमाला टेङ्‍बुकी ग्‍येल्‍वु सिक्‍यावु यिन। तमा ती ज्‍युक्‍ला शालेमकी ग्‍येल्‍वु साङ च्‍युङ्‍गुप तप्‍की तीला लोदिमुकी ग्‍येल्‍वु सिक्‍यावु यिन।
HEB 7:3 ती मल्‍कीसेदेककी पपाआमा ताङ पगावा हङ्‍गावातिवा सु यिन सिरुप ति कोन्‍छ्‍योककी सुङगी नाङ्‍ला कनी साङ टिनी मे। तमा खो क्‍येवु ताङ खो शेपकी कोर्ला साङ टिनी मे। यिने खो ति कोन्‍छ्‍योककी सेवु दोके क्‍यानी नरीकी थोक्‍ला कोङ्‍यार च्‍युङ्‍नी देकिवी।
HEB 7:4 तुक क्‍यानी मल्‍कीसेदेक चो ओङ छ्‍येवु नोक सिरुप ति ख्‍यिरा नासाम तोङ। दाक्‍पी हङ्‍गावा अब्राहामकी साङ खोरो मक नेसुर ग्‍येल्‍नी खुन वावु तेरी च्‍यालकतिवी नाङ्‍ला छो च्‍यिथम्‍बी नाङ ने छो च्‍यिक ति तीला पुल्‍सुङ।
HEB 7:5 लेवीकी गिपाकी कोङ्‍यारतिवा तेरी अब्राहामकी पेजातिवा यिन्‍सिनाङ तिवी खोरो इस्राएलकी मीतिवी शम्‍बुप टोङ्‍बी नाङ नेसुर च्‍यिथम्‍बी नाङ ने च्‍यिक ति दुकिवी। ती ति तिवाला ठिमकी कि च्‍यितुप यिन।
HEB 7:6 यिने मल्‍कीसेदेक याङ लेवीकी गिपा मिन। यिन्‍सिनाङ अब्राहाम नेसुर च्‍यिथम्‍बी नाङ ने च्‍यिक ति लासुङ। तमा कोन्‍छ्‍योककी थाक्‍छ्‍येन नङ्‍गुप ति थोपुप अब्राहामला तीकी मोलाम बिन्‍सुङ।
HEB 7:7 मोलाम थोपुप ति सिनाङ मोलाम तेरुप ति छ्‍ये यिन सिरुप ति तेरीला छ्‍या वे।
HEB 7:8 माङ्‍शोक मीतिवी च्‍यिथम्‍बा नाङ्‍ला च्‍यिक ति कोङ्‍यारला बुल्‍गिवी, यिने तेरी कोङ्‍यारतिवी नाङ्‍ला मल्‍कीसेदेक मिसिन तेरी कोङ्‍यारतिवा शिवी। च्‍यिलासिसिन कोन्‍छ्‍योककी सुङला खो ति सेन्‍बु वे सिनी सुङ वे।
HEB 7:9 त याङ मीतिवी च्‍यिथम्‍बा नाङ्‍ला च्‍यिक ति लेवीकी गिपाला बुल्‍गिवी। तुक क्‍यासिन अब्राहामकी मल्‍कीसेदेकला च्‍यिथम्‍बा नाङ्‍ला च्‍यिक ति बुलुप पेला लेवीकी साङ खोला च्‍यिथम्‍बा नाङ्‍ला च्‍यिक ति पुल्‍सुङ सिनी सि थुप्‍किवी।
HEB 7:10 च्‍यिलासिसिन अब्राहामकी मल्‍कीसेदेकला च्‍यिथम्‍बा नाङ्‍ला च्‍यिक ति पुल्‍सिमा लेवी ति अब्राहामकी गिपाला क्‍येसुङ। यिन्‍सिनाङ अब्राहामकी मल्‍कीसेदेकला ठेतुप पेला सेक लेवी ति माक्‍येनोक।
HEB 7:11 इस्राएलकी मीतिवाला नङ्‍गुप मोशाकी ठिमला लेवीकी गिपातिवाला कोङ्‍यारकी लाका कितुप ओङ्‍ज्‍येन नाङ्‍सुङ। यिन्‍सिनाङ ती कोङ्‍यारतिवी नाङ ने सी साङ मीतिवाला टेङ्‍बु जो माथुप्‍नोक। तुक क्‍यानी मल्‍कीसेदेक दोके हारूनकी गिपा सिनाङ यम्‍बा कोङ्‍यार च्‍यिक वुङ गोकिवी।
HEB 7:12 दोजो कोङ्‍यारतिवा बेतुप लुक्‍सु पोसिन मोशाकी ठिम साङ फो राङ गोकिवी।
HEB 7:13 च्‍यिलासिसिन सी कोर्ला ती ताम्‍ङेतिवा सिक्‍यावे, खो ति यम्‍बा गिपाकी ति यिन। खोकी गिपाला सी साङ जिन्‍बा बुलुप दासाला कोङ्‍यार छ्‍येकी लाका माक्‍या वे।
HEB 7:14 दी ताम्‍ङे ति तेरीला छ्‍या वे, दाक्‍पी चोवो येशू ति यहूदाकी गिपा नेसुर च्युङ्‍सुङ। यिन्‍सिनाङ यहूदाकी गिपा नेसुर कोङ्‍यार च्‍युङ्‍गुप कोर्ला ति मोशाकी काङ साङ सिमाक्‍या।
HEB 7:15 मल्‍कीसेदेक दोके यम्‍बा कोङ्‍यार मिरा च्‍यिक वावु यिन्‍सिन दाक्‍पी काङ सिक्‍यासिनाङ ती ताम्‍ङे ति छासे ल्‍यामु क्यानी हाक्‍कोवु च्‍युङ्‍गिवी।
HEB 7:16 खो मीतिवी जोवु ठिम नेसुर कोङ्‍यार च्‍युङ्‍गुप मिन, यिने नाम्‍साङ मिशिवु ङार नेसुर कोङ्‍यार च्‍युङ्‍गुप यिन।
HEB 7:17 तीकी कोर्ला कोन्‍छ्‍योककी सुङला साङ “ख्‍युरुङ ति मल्‍कीसेदेक दोके नरीकी नरी थोक्‍ला कोङ्‍यार यिनो।” सिनी टि वे।
HEB 7:18 ती ठिम ङ्‍यिङ्‍बा ति काङ साङ कि मुथुपुप ताङ फेन मोथोवु तप्‍की क्‍युर्नी ज्‍यकुप यिन।
HEB 7:19 च्‍यिलासिसिन ती ठिमकी सुला साङ कोन्‍छ्‍योककी थोङ्‍दाङला टेङ्‍बु जो माथुप। तुक क्‍यानी तीकी छापला कोन्‍छ्‍योककी दाक्‍पुला मङ ल्‍यामु रेवा च्‍यिक नङ वे। ती रेवाकी दाक्‍पुला कोन्‍छ्‍योककी चाला क्‍योल्‍गिवी।
HEB 7:20 यम्‍बा ताम्‍ङे च्‍यिक ति काङ यिन सिसिन कोन्‍छ्‍योककी न क्‍यलुप यिन। लेवीकी गिपा नेसुर कोङ्‍यार च्‍युङ्‍गुप पेला कोन्‍छ्‍योककी न माक्‍याल, यिने येशूला कोङ्‍यार जो नङ्‍गुप पेला ति खोकी न क्‍याल्‍सुङ।
HEB 7:21 कोन्‍छ्‍योककी खोला न क्‍यल्‍नी कोङ्‍यार जो नङ्‍गुप कोर्ला खोकी दुक सुङ्‍नी वे, “चोवो कोन्‍छ्‍योककी न क्‍यलुप ति नाम्‍साङ मोपोवी। ख्‍युरुङ नरीकी नरी थोक्‍ला कोङ्‍यार यिनो।”
HEB 7:22 तुक सुङ्‍गुप तप्‍की येशू ति कोन्‍छ्‍योक ताङ मीकी पर्ला थाक्‍छ्‍येवु ताम्‍ङेकी थोक्‍ला तेन्‍तेन क्‍या नाङ्‍सुङ।
HEB 7:23 येलुङ यम्‍बा ताम्‍ङे च्‍यिक ति काङ यिन सिसिन गोमाला ति कोङ्‍यारतिवा बङी वोसिनाङ तिवी कोङ्‍यारकी लाका ति नरी कि माथुप्‍नोक। च्‍यिलासिसिन तिवा ङ्‍यिमा च्‍यिक शिवी।
HEB 7:24 यिने येशू ति नरीकी नरी ङोसु ज्‍युवु तप्‍की खो नरीकी थोक्‍ला कोङ्‍यारकी लाका कितुप च्‍युङ्‍सुङ।
HEB 7:25 तुक क्‍यानी खोला तेपा क्‍यानी कोन्‍छ्‍योककी चिप्‍ला वुङ्‍गुपतिवा तेरीला खोकी वुतुङ के दिक्‍पा ने थर ज्‍यिकिवी। च्‍यिलासिसिन तेपा कितुपतिवी थोक्‍ला कोन्‍छ्‍योकला मोपोर ताङ गोङ्‍बा शोपला खो नरी ङोसु ज्‍युकिवी।
HEB 7:26 दाक्‍पी थोक्‍ला गोवु कोङ्‍यार छ्‍ये ति येशू यिन। खो चाङ्‍मा ताङ क्‍येन मेतुप ताङ टेङ्‍बु वे, तमा दिक्‍छेनतिवा नेसुर कुतुक पेनी देवाच्‍येन सिनाङ येर तेक्‍नी वे।
HEB 7:27 खो ति यम्‍बा कोङ्‍यार छ्‍येतिवा दोके मिन। यम्‍बा कोङ्‍यार छ्‍येतिवी खोरो दिक्‍पी थोक्‍ला ताङ ती ज्‍युक्‍ला मी यम्‍बी दिक्‍पी थोक्‍ला ङ्‍यिमी टेङ जिन्‍बा तोङ गोकिवी, यिने खो याङ थेङ्‍मा च्‍यिकला राङ खोरो मिजी ति जिन्‍बा च्‍युङ्‍सुङ।
HEB 7:28 मोशाकी ठिमकी याङ खोकी सुङ्‍गुप दोके कि मुथुपुप मीतिवाला कोङ्‍यार छ्‍ये सिनी चिसुङ, यिने ती ठिमकी ज्‍युक्‍ला वावु कोन्‍छ्‍योककी थाक्‍छ्‍येन नङ्‍गुप सुङगी नरीकी थोक्‍ला खोकी सुङ्‍गुप दोके वुतुङ के तेरी क्‍या नङ्‍गुप खोरे पुज्‍युङला पेन नाङ्‍सुङ।
HEB 8:1 त ङ्‍यिरा सिक्‍यावु खक्‍छ्‍येवु ताम्‍ङे ति दी राङ यिन, दाक्‍पी थोक्‍ला तेरी सिनाङ कोङ्‍यार छ्‍ये मिरा च्‍यिक ज्‍यु वे। खो देवाच्‍येनकी चोछ्‍येवु कोन्‍छ्‍योककी ग्‍येल्‍ठिककी यावी थाकाला ज्‍यु वे।
HEB 8:2 ते खो तेरी सिनाङ चाङ्‍मा वोतुप दासाला कोङ्‍यार छ्‍येकी लाका कियी वे। ती दासा ति यहूदीतिवी कोन्‍छ्‍योकला सोवा देकुप कुर यिन। ती ति मीतिवी जोवु मिन, चोवो कोन्‍छ्‍योककी जो नङ्‍गुप वुतुङ्‍की चाङ्‍मा वोतुप दासा यिन।
HEB 8:3 तेरी कोङ्‍यार छ्‍येतिवा ति बुल्‍वा ताङ सेम्‍ज्‍येन सेनी जिन्‍बा बुलुपला पेतुपतिवा यिन। तुक क्‍यानी दी कोङ्‍यार छ्‍येकी साङ काङ रे च्‍यिक रे बुल्‍वा बुल राङ गोकिवी।
HEB 8:4 खो दी जम्‍बुलिङला राङ ज्‍यु वोतुप यिन्‍सियाङ कोङ्‍यार मुच्‍युङ्‍गिवी। च्‍यिलासिसिन मोशाकी टिवु कोन्‍छ्‍योककी ठिमला सुङ्‍गुप दोके बुल्‍वा बुलुप कोङ्‍यारतिवा याङ गोमा नेज्‍यु राङ वोतुप्‍जा।
HEB 8:5 तिवी शब्‍ज्‍यी कितुप दासा ति वुतुङ के मिन, देवाच्‍येनकी चाङ्‍मा वोतुप दासा दोके पेशुवु तिराङ यिन। च्‍यिलासिसिन मोशाकी यहूदीतिवी कोन्‍छ्‍योकला सोवा देकुप कुर जोप पेला कोन्‍छ्‍योककी मोशाला “ख्‍युरुङला ङे सीनै रीला छ्‍या तेन्‍दुप दोके तुकै राङ क्‍यानी तेरी च्‍यालकतिवा जोपला सेम यी कुक।” सिनी क नाङ वे।
HEB 8:6 यिने येशू ख्रीष्‍टकी क्‍या नङ्‍गुप कोङ्‍यारकी लाका ति कोन्‍छ्‍योककी मोशाला नङ्‍गुप ठिमला वोतुप कोङ्‍यारकी लाका सिनाङ मङ खक्‍छ्‍येवु वे। तुक क्‍यानी येशूकी कोन्‍छ्‍योक ताङ मीतिवी पर्ला थाक्‍छ्‍येवु ताम्‍ङे जोपला डिक्‍सुङ। ती थाक्‍छ्‍येवु ताम्‍ङे ति मोशाला नङ्‍गुप ठिम ङ्‍यिङ्‍बा सिनाङ मङ खक्‍छ्‍येवु वे। च्‍यिलासिसिन कोन्‍छ्‍योककी मीतिवाला ती सिनाङ मङ ल्‍यामु ताम्‍ङे तेरुपला थाक्‍छ्‍येनी खोकी मी ताङ मुला ताम्‍ङे सम्‍बा थाक्‍छ्‍येन नाङ्‍सुङ।
HEB 8:7 दोजो थल्‍माला कोन्‍छ्‍योक ताङ मी पर्ला थाक्‍छ्‍येवु ताम्‍ङे ति क्‍येन मेतुप च्‍युङ्‍सियाङ थाक्‍छ्‍येवु ताम्‍ङे ङ्‍यिवा ति जो राङ मोगोवु ति यिन्‍जा।
HEB 8:8 यिने मीतिवाला क्‍येन फोकुप हाक्‍कोनी कोन्‍छ्‍योककी दुक सिनी सुङ्‍सुङ, “त ती तुजे गितो, चोवो कोन्‍छ्‍योककी सुङ्‍गिवी, ती तुजेला इस्राएलकी मीतिवा ताङ यहूदाकी मीतिवी मुला ङ थाक्‍छ्‍येवु ताम्‍ङे सम्‍बा च्‍यिक जोयिनो।”
HEB 8:9 येलुङ चोवोकी दुक सुङ्‍सुङ, “ती सम्‍बा थाक्‍छ्‍येतुप ति तिवी हङ्‍गावातिवाला ङे मिश्र लुङ्‍बा नेसुर तेन्‍नी टिनी वुङ्‍गुप पेला तिवी मुला थाक्‍छ्‍येतुप दोके मेवितो। यिने तिवी ङे थाक्‍छ्‍येतुप ताम्‍ङेला माङ्‍येन। तुक क्‍यानी ङे तिवाला ङ्‍याम माक्‍या।”
HEB 8:10 येलुङ चोवोकी दुक सुङ्‍सुङ, “ती तुजेकी ज्‍युक्‍ला ङ इस्राएलकी मीतिवी मुला थाक्‍छ्‍येवु ताम्‍ङे च्‍यिक जोयिनो। तिवी नासामला ङ ङे ठिम ति ज्‍याङ तेरिन, तमा तिवी सेमला ति दी ठिमतिवा टिकिनो। तमा ङ ति तिवी कोन्‍छ्‍योक यिनो, तिवा ति ङे ज्‍यिक्‍तेम्‍बातिवा यिनो।
HEB 8:11 तफेन्‍ला सी साङ कोन्‍छ्‍योकला ङो शेवा कि सिनी खोरो युल्‍वातिवा ताङ खोरो अच्‍युनुपतिवाला मोलोप्‍तो। च्‍यिलासिसिन तिवा छ्‍ये नेज्‍यु छ्‍युङा सेक तेरीकी ङला ङो शेकितो।
HEB 8:12 ङ तिवी क्‍यावु लाका दुक्‍टातिवा तेरी माफ तेरिनो, तमा तिवी क्‍यावु दिक्‍पातिवा नाम्‍साङ नासाम मोतोङ्‍दो।”
HEB 8:13 खोकी “थाक्‍छ्‍येवु ताम्‍ङे सम्‍बा” सिनी खोकी गोमाला थाक्‍छ्‍येवु ताम्‍ङेला ङ्‍यिङ्‍बा जो नाङ्‍सुङ। तमा ती ङ्‍यिङ्‍बा गलुप ताङ फेन मोथोवुतिवा ति तेरी ङमु राङ तोर्नी डिवी।
HEB 9:1 थल्‍माला कोन्‍छ्‍योक ताङ इस्राएलकी मीतिवा पर्ला थाक्‍छ्‍येतुप ताम्‍ङेला साङ कोन्‍छ्‍योकला सोवा देकुप कोर्ला ठिमतिवा नोक। तमा ती ठिमला वोतुप दोके सोवा देकुपला मीतिवी राङ जोवु चाङ्‍मा वोतुप कुर च्‍यिक नोक।
HEB 9:2 ती चाङ्‍मा वोतुप कुरकी नाङ्‍ला जे ङ्‍यी नोक। फीकी जेकी नाङ्‍ला ति मेलाङ ताङ च्‍योक्‍ची ताङ ती च्‍योक्‍ची खला कोन्‍छ्‍योकला पुलुप शुब्‍ज्‍याङतिवा नोक। ती जेला ति चाङ्‍मा वोतुप दासा सिनोक।
HEB 9:3 तमा जेतिवी पर्ला ति गोयोल ग्‍यप्‍नी नोक। ती गोयोलकी ग्‍यप्‍ला वोतुप नङगी जे तीला ति तेरी सिनाङ चाङ्‍मा वोतुप दासा सिनोक।
HEB 9:4 ते सेरकी पोके ताङ सेर थ्‍वोनी कोर्नी जोवु कोन्‍छ्‍योककी थाक्‍छ्‍येतुप तेर्गाम नोक। तीकी नाङ्‍ला मन्‍न देवु सेरकी नेक्‍योक ताङ ज्‍योक ग्‍यावु हारूनकी पेर्का नोक, तमा कोन्‍छ्‍योककी थाक्‍छ्‍येन नङ्‍गुप ताम्‍ङेतिवा नङ्‍गुप पेला मोशाला बिन्‍दुप ठिम च्‍यिथम्‍बातिवा टिवु दे येम्‍ज्‍ये ङ्‍यी साङ नोक।
HEB 9:5 ती तेर्गामकी खला कोन्‍छ्‍योककी मोवा छ्‍या देन्‍दुप करूब सिरुप देवाच्‍येनकी लेन क्‍योलुप थुतिवा नोक। ती लेन क्‍योलुप थुतिवी शोक्‍पा ति दिक्‍पा पङ्‍गुप दासाकी खला ग्‍यानी नोक। तीकी कोर्ला ति तन्‍दा राङ दाक्‍पी तेरी सि मुथुपी।
HEB 9:6 ती तेरी टडिक क्‍या सिन्‍सिमा जे तङ्‍बुला वोतुप दासा चाङ्‍माला कोङ्‍यारतिवा ङ्‍यिमी टेङ दाक दाक्‍पी कि गोवु लाकातिवा तेरी कितुपला डिनोक।
HEB 9:7 यिने जे ङ्‍यिवी नाङ्‍ला ति कोङ्‍यार छ्‍ये तिराङ लोला थेङ्‍मा च्‍यिक ठक खुर्नी डिनोक। ठक माखुर्सिन ती नाङ्‍ला शुक मुथुप्‍नोक। ती ठक ति खोरो दिक्‍पी थोक्‍ला ताङ मीतिवी हाक्‍माकोनी क्‍यावु दिक्‍पी थोक्‍ला जिन्‍बा बुलुपला यिन।
HEB 9:8 तुक क्‍यानी कोन्‍छ्‍योककी थु चाङ्‍माकी दाक्‍पुला काङ लोप्‍किवी सिसिन, जे तङ्‍बुला वोतुप दासा चाङ्‍मा ति मादोवा सेक्‍ला तेरी सिनाङ दासा चाङ्‍माला शुकुप लाम ति मेपेवी।
HEB 9:9 दी याङ तसाम पेकी तुजेकी थोक्‍ला पे च्‍यिक तिराङ यिन। दीकी काङ हाक्‍कोकिवी सिसिन कोन्‍छ्‍योकला बुल्‍वा ताङ सेम्‍ज्‍येन सेनी जिन्‍बा बुलुप मीतिवी सेम ति टेङ्‍बु च्‍युङ मुथुपी।
HEB 9:10 ती बुल्‍वा ताङ जिन्‍बा पुलुप ति साप थुङ्‍गुप ताङ नम्‍बा कुतुक कुतुककी चाङ्‍मा जोप ठिमतिवा तेन्‍दुप दोके तिराङ यिन। ती ठिमतिवा ति कोन्‍छ्‍योककी नङ्‍गुप यम्‍बा ठिम सम्‍बा माफोवा सेककी थोक्‍ला बिन्‍दुप क तिराङ यिन।
HEB 9:11 यिने येशू ख्रीष्‍ट याङ दे वावु ताम्‍ङे ल्‍यामु तेरीकी कोर्ला कोङ्‍यार छ्‍ये दोके च्‍युङ्‍नी फेप्‍सुङ। खो फेवु दासा चाङ्‍मा ति तेरी सिनाङ ग्‍येर्पु ताङ खक्‍छ्‍येवु वोतुप दासा यिन। ती दासा ति मी लाक्‍पी जोवु मिन, दी जम्‍बुलिङकी दासा दोके साङ मिन।
HEB 9:12 खो दासा चाङ्‍मा नेसुर क्‍यानी तेरी सिनाङ चाङ्‍मा वोतुप दासाला फेप्‍सुङ। ती पेला खो रौ ताङ लङ्‍डुकी ठक खुर्नी फेपुप मिन, यिने खो ग्‍यङ्‍शिङला टुङ्‍नी थेन्‍दुप खोरे ठक नेसुर थेङ्‍मा च्‍यिकला राङ फेप्‍नी ती ठक नेसुर खोकी दाक्‍पी थोक्‍ला नाम्‍साङ मिशिवु थर्वा ङ्‍येसुङ।
HEB 9:13 रौ ताङ मयेनकी ठक ताङ लङ्‍डु जिन्‍बा बुलुपला र्‍हेवु थल्‍जाम ति मेचेङ्‍गा मीतिवी जुला थोर्सिन मीतिवी जु ति चाङ्‍मा जेवी सिसिन,
HEB 9:14 नरीकी नरी लुवु कोन्‍छ्‍योककी थु चाङ्‍माकी ओङला खुरुङ राङ क्‍येन मेतुप बुल्‍वा च्‍युङ्‍नी कोन्‍छ्‍योकला बुलुप ख्रीष्‍टकी ठककी याङ मङ छासे क्‍यानी शेप ते क्‍योलुप लाकातिवा नेसुर दाक्‍पी सेम ति टेङ्‍बु जोनी ङोसु वोतुप कोन्‍छ्‍योकला शब्‍ज्‍यी कि थुपुप मोजोवी रो?
HEB 9:15 तुक क्‍यानी ख्रीष्‍ट ति कोन्‍छ्‍योक ताङ मीतिवी पर्ला थाक्‍छ्‍येतुप ताम्‍ङे सम्‍बाला डिङ तेरुप लाका क्‍या नङ्‍गिवी। खोकी तुक क्‍या नङ्‍गुप ति कोन्‍छ्‍योककी कतङ्‍गुप मीतिवाला नरीकी थोक्‍ला खोकी थाक्‍छ्‍येन नङ्‍गुप मोलाम ति थोप्‍शी सिनी यिन। च्‍यिलासिसिन खो मीतिवी गोमी थाक्‍छ्‍येतुप ठिमला क्‍यावु दिक्‍पा ने थर ज्‍यितुपला टुङ्‍सुङ।
HEB 9:16 मीतिवी पर्ला थाक्‍छ्‍येतुप ताम्‍ङे ति मीतिवा शेप सिनाङ गोमाला खज्‍यम ज्‍यकुप दोके राङ यिन। सी खुरुङ शेप सिनाङ गोमाला खज्‍यम ज्‍याक्‍सिनाङ ती ति माशिवा सेक तीकी खज्‍यम ज्‍यकुप ताम्‍ङे ति फेन मोथोवी।
HEB 9:17 च्‍यिलासिसिन ती मी ति शिसिमा तिराङ तीकी खज्‍यम ज्‍यकुप ताम्‍ङे ति लाका कि थुप्‍किवी। खज्‍यम ज्‍योकुप मी ति सेन्‍बु वोता सेक ती खज्‍यम ज्‍यकुप ताम्‍ङेकी लाका कि मुथुपी।
HEB 9:18 तुक क्‍यानी गोमाला थाक्‍छ्‍येतुप ताम्‍ङेला साङ ठक मातेन्‍दा सेक्‍ला लाका कि माथुप।
HEB 9:19 मोशाकी कोन्‍छ्‍योककी नङ्‍गुप ठिमला वोतुप कतिवा तेरी मीतिवाला सिक्‍यासिमा लङ्‍डु ताङ रौकी ठक ति छ्‍यु ताङ मुला र्‍हेनी पाल मर्वु ताङ हिसपकी येल्‍काला पानी ठिमकी थेपकी खला ताङ तेरी मीतिवी खला थोर्नी,
HEB 9:20 “दी ठक ति कोन्‍छ्‍योक ताङ ख्‍यिरा पर्ला थाक्‍छ्‍येतुप ताम्‍ङे यिन, तीला ङ्‍येन गोकिवी।” सिनी तिवाला सिक्‍यासुङ।
HEB 9:21 तुक राङ क्‍यानी मोशाकी चाङ्‍मा वोतुप कुरकी खला ताङ सोवा देकुप पेला थोकुप तेरी च्‍यालकतिवी खला साङ ती ठक ति थोर्सुङ।
HEB 9:22 वुतुङ के कोन्‍छ्‍योककी नङ्‍गुप ठिमला सिक्‍यावु दोके ठक तेन्‍सिन तिराङ माङ्‍शोक तेरी चाङ्‍मा जो थुप्‍किवी। तमा ठक मातेन्‍सिन दिक्‍पा मतावी।
HEB 9:23 दी जम्‍बुलिङला वोतुप देवाच्‍येनकी च्‍यालक जुमातिवा चाङ्‍मा जोपला सेम्‍ज्‍येन सेनी जिन्‍बा बुल गोसुङ सिसिन देवाच्‍येनला वोतुप च्‍यालकतिवाला चाङ्‍मा जोपला याङ ती सेम्‍ज्‍येन सिनाङ मङ खक्‍छ्‍येवु ठककी जिन्‍बा तोङ गोकिवी।
HEB 9:24 तुक क्‍यानी ख्रीष्‍ट याङ मी लाक्‍पी जोवु चाङ्‍मा वोतुप कुरकी नाङ्‍ला फेवु मिन, ती कुर ति देवाच्‍येनकी कुर नेसुर पेशुवु तिराङ यिन। यिने खो ती देवाच्‍येनला राङ फेप्‍सिमा दाक्‍पी छ्‍योकला कोन्‍छ्‍योककी थोङ्‍दाङला ज्‍यु वे।
HEB 9:25 यहूदी कोङ्‍यार छ्‍ये याङ सेम्‍ज्‍येनकी ठक खुर्नी तेरी सिनाङ चाङ्‍मा वोतुप दासाला ले टेङ शुकिवी, यिने येशू ख्रीष्‍ट याङ ती दोके क्‍यानी खुरुङ राङ जिन्‍बा बुलुपला येलुङ येलुङ देवाच्‍येनला माफेप।
HEB 9:26 मिसियाङ जम्‍बुलिङ ज्‍येङ्‍गुप पेला नेज्‍यु तन्‍दा सेक ख्रीष्‍टकी येलुङ येलुङ दुक्‍पा खुर गोवुजा। यिने खो याङ दिक्‍पा पङ्‍गुपला थेङ्‍मा च्‍यिकला राङ जिन्‍बा च्‍युङ्‍गुपला दी कल्‍वाकी तिङ्‍मी तुजेला फेप्‍सुङ।
HEB 9:27 मी ति थेङ्‍मा च्‍यिक वुतुङ के शिवी, शिसिमा तीला कोन्‍छ्‍योककी ठिम फोकिवी।
HEB 9:28 तुक क्‍यानी ख्रीष्‍ट ति मी बङीकी दिक्‍पा ता ज्‍यितुपला थेङ्‍मा च्‍यिकला राङ खुरुङ जिन्‍बा च्‍युङ्‍सुङ। त खो थेङ्‍मा ङ्‍यिवाला येलुङ फेप्‍किवी। खो येलुङ फेपुप पेला दिक्‍पा खुरुपला मिन, यिने खो फेवु लाम ल्‍हानी देतुपतिवाला थर ज्‍यितुपला फेप्‍किवी।
HEB 10:1 मोशाकी ठिम ति वुतुङ्‍की ताम्‍ङे टेङ्‍बु मिन, यिने ज्‍युक्‍ला वुङ्‍गुप ताम्‍ङे ल्‍यामुकी पेशुवु तिराङ यिन। तुक क्‍यानी ले टेङ येलुङ येलुङ जिन्‍बा पुल्‍नी कोन्‍छ्‍योककी चिप्‍ला डोप छोलुप मीतिवाला टेङ्‍बु जो मुथुपी।
HEB 10:2 दोजो ती जिन्‍बा पुल्‍नी मी दिक्‍पातिवा नरीकी थोक्‍ला ताकिवी सिसिन ती जिन्‍बा तोङ्‍गुपतिवा थेङ्‍मा च्‍यिकला राङ टेङ्‍बु च्‍युङ्‍नी तिवी दिक्‍पी थोक्‍ला नासाम राङ तोङ मोगोवु ति यिन्‍जा। तमा ती जिन्‍बा बुलुप ति क्‍युर्नी ज्‍योकुप यिन्‍जा।
HEB 10:3 यिने ती जिन्‍बा तोङ्‍गुप लाका क्‍यानी याङ दाक्‍पुला ले टेङ ङ दिक्‍छेन यिन सिरुप नासाम शर ज्‍यिकिवी।
HEB 10:4 च्‍यिलासिसिन लङ्‍डु ताङ रौकी ठककी नाम्‍साङ मी दिक्‍पा ता ज्‍यि मुथुपी।
HEB 10:5 तुक क्‍यानी ख्रीष्‍ट दी जम्‍बुलिङला फेपुप पेला खोकी कोन्‍छ्‍योकला दुक सुङ्‍नी वे, “जिन्‍बा ताङ बुल्‍वातिवा चोवोला मोगोवी, यिने चोवोकी ङे थोक्‍ला जु च्‍यिक टडिक क्‍या नङ वे।
HEB 10:6 मीतिवी सेम्‍ज्‍येन सेनी र्‍हेसिमा जिन्‍बा पुलुप ताङ दिक्‍पी थोक्‍ला बुल्‍वा पुलुप ति चोवोला गा मलङ्‍गिवी।
HEB 10:7 तमा ङे ‘ओ कोन्‍छ्‍योक, ल्हो ताङ ङ दे वे। कोन्‍छ्‍योककी सुङला ङे कोर्ला टि वोतुप दोके ङ ख्‍योरे नोवाला वोतुपतिवा तेरी छे ज्‍यितुपला वावु यिन।’ सिनी सिक्‍यायी।”
HEB 10:8 गोमाला खोकी दुक सुङ्‍नी वे, “जिन्‍बा ताङ बुल्‍वातिवा ताङ सेम्‍ज्‍येन सेनी र्‍हेसिमा जिन्‍बा पुलुप ताङ दिक्‍पी थोक्‍ला बुल्‍वा पुलुप ति चोवोला मागोसुङ, तमा गा साङ माक्‍यासुङ।” यिन्‍सिनाङ तिवा ति कोन्‍छ्‍योककी ठिमला सुङ्‍गुप दोके क्‍यावु तिराङ यिन।
HEB 10:9 ज्‍युक्‍ला येलुङ खोकी दुक सुङ्‍सुङ, “ओ चोवो कोन्‍छ्‍योक, चोवोकी नोवाला वोतुपतिवा तेरी छे ज्‍यितुपला ङ वायिन।” कोन्‍छ्‍योककी गोमी जिन्‍बातिवा क्‍युर्नी तीकी छापला यम्‍बा च्‍यिक टडिक क्‍या नाङ्‍सुङ।
HEB 10:10 तुक क्‍यानी ती कोन्‍छ्‍योककी नोवा तेरी छे ज्‍यितुपला राङ येशू ख्रीष्‍ट खुरुङ राङ थेङ्‍मा च्‍यिकला राङ जिन्‍बा च्‍युङ्‍नी दाक्‍पुला टेङ्‍बु जो नाङ्‍सुङ।
HEB 10:11 तेरी कोङ्‍यारतिवा जिन्‍बा नम्‍बा च्‍यिक तिराङ येलुङ येलुङ बुलुपला ङ्‍यिमी टेङ शब्‍ज्‍यी कितुपला लानी देकिवी। यिने ती बुल्‍वाकी नाम्‍साङ दिक्‍पा ता ज्‍यि मुथुपी।
HEB 10:12 यिने ख्रीष्‍टकी याङ थेङ्‍मा च्‍यिकला नरीकी थोक्‍ला खोरुङ राङ जिन्‍बा च्‍युङ्‍सुङ। तमा खो कोन्‍छ्‍योककी यावी थाकाला ज्‍युसुङ।
HEB 10:13 तमा खोकी खोरे डतिवाला खोरे शपकी वोक्‍ला मालेप्‍वा सेककी थोक्‍ला खो गुनी देन वे।
HEB 10:14 तमा खो च्‍यिक राङ जिन्‍बा च्‍युङ्‍नी दिक्‍पा नेसुर चाङ्‍मा जोवु मीतिवा तेरीला नरीकी थोक्‍ला टेङ्‍बु जो नाङ्‍सुङ।
HEB 10:15 तुक क्‍यानी कोन्‍छ्‍योककी थु चाङ्‍माकी साङ दाक्‍पुला खोकी सुङ्‍गुप ताम्‍ङेतिवा गोमाला दुक सिनी पङ्‍बु तेर्किवी,
HEB 10:16 “चोवो कोन्‍छ्‍योककी तुक सिनी सुङ्‍गिवी, ‘ज्‍युक्‍थमी ङ्‍यिमाला तिवी मुला ङे थाक्‍छ्‍येतुप ताम्‍ङे ति दी राङ यिनो, ङ ङे ठिम ति तिवी सेमला ज्‍योकिनो, तमा तिवी नासामला साङ टिनी तेरिनो।’”
HEB 10:17 येलुङ खोकी दुक साङ सुङ्‍गिवी, “तिवी क्‍यावु दिक्‍पा ताङ तिवी क्‍यावु लाका दुक्‍टातिवा ङ येलुङ नासाम मोतोङ।”
HEB 10:18 त याङ तेरी दिक्‍पातिवा माफ बिन्‍दुप तप्‍की येलुङ दिक्‍पी थोक्‍ला काङ साङ जिन्‍बा बुल मोगोवी।
HEB 10:19 तुक क्‍यानी अच्‍युनुपतिवा, त याङ येशूकी ठककी जोसालेन्‍सिन दाक्‍पु तेरी सिनाङ चाङ्‍मा वोतुप दासाला ङाडेङ क्‍यानी शुकुप ङ्‍येकिवी।
HEB 10:20 खो टुङ्‍सिमा दाक्‍पुला चाङ्‍मा वोतुप कुरकी नङगी गोयोल नेसुर मिजी सम्‍बा थोपुप लाम सम्‍बा पेनी वे। ती गोयोलकी तेन्‍दोक ति खोकी जु यिन।
HEB 10:21 कोन्‍छ्‍योककी मिछाङला दाक्‍पी थोक्‍ला चोछ्‍येवु कोङ्‍यार मिरा च्‍यिक वोतुप तप्‍की
HEB 10:22 दाक्‍पी सेम टेङ्‍बु नेसुर तेपा रम्‍बु जोनी कोन्‍छ्‍योककी चिप्‍ला डोप। तमा दाक्‍पी सेमला येशूकी ठक थोर्नी दुक्‍टा क्‍यासिमा सेम नेसुर वुङ्‍गुप क्‍येन ति टेङ्‍बु जोप ताङ दाक्‍पी जु ति छ्‍यु चेङ्‍गा थ्‍वोनी टुवु दोके टेङ्‍बु च्‍युङ्‍नी वे।
HEB 10:23 दाक्‍पुला थाक्‍छ्‍येन नङ्‍गुप कोन्‍छ्‍योक ति खोङ्‍तेर्मु वोतुप तप्‍की दाक्‍पु यिसिक मिसिक माक्‍यानी मीतिवी दोङ्‍ला दाक्‍पी ताम्‍ङे क्‍यावु रेवाला रम्‍बु क्‍यानी देतुप।
HEB 10:24 तमा दाक्‍पु च्‍यिककी च्‍यिकला ङ्‍यिङ्‍ज्‍ये कितुप ताङ लाका ल्‍यामु कितुपला चुक क्‍यानी टोङ्‍गु तेर गोकिवी, तीकी थोक्‍ला नासाम तोङ्‍गुप।
HEB 10:25 मी ललाइकी मुला राङ जोम्‍नी डिक्‍जोम कितुप क्‍युर्किवी, यिने दाक्‍पु ति डिक्‍जोम कितुप क्‍युर्नी मोज्‍योक। यिने चोवो फेपुप तुजे चिप्‍ला राङ वावु ति हाक्‍कोवा क्‍यानी च्‍यिककी च्‍यिकला मङ तेपा रम्‍बु जोपला टोङ्‍गु तेरुप।
HEB 10:26 दोजो दाक्‍पी टेङ्‍बु काङ यिन सिरुप ति छ्‍या वोसिनाङ दिक्‍पा क्‍या क्‍यावा राङ देकिवी सिसिन तफेन्‍ला दाक्‍पी क्‍यावु दिक्‍पा तावुला यम्‍बा जिन्‍बाकी काङ साङ कि मुथुपी।
HEB 10:27 बोरु कोन्‍छ्‍योककी ज्‍यिवा लङ्‍गुप ठिम क्‍या नङ्‍गुप ताङ खोकी तेन्‍दोकला लङ्‍गुप मीतिवाला ना तोङ्‍गुप छासे मे छेन्‍दी तिराङ दाक्‍पी थोक्‍ला लुवु ति नासाम तोङ।
HEB 10:28 कोन्‍छ्‍योककी मोशाला नङ्‍गुप ठिम मेङ्‍येन्‍दुप मी ललाइकी कोर्ला मिरा ङ्‍यी सुमकी पङ्‍बु बिन्‍सिन तीला च्‍यम्बा माक्‍यावा क्‍यानी से गोवु लुक्‍सु वे सिसिन,
HEB 10:29 कोन्‍छ्‍योककी सेवुला मारे तोङ्‍गुपतिवा ताङ खुरुङला चाङ्‍मा जोवु कोन्‍छ्‍योककी थाक्‍छ्‍येतुप ठकला मेचेङ्‍गा जोप ताङ कटिन नङ्‍गुप खोकी थु चाङ्‍माला मारे तोङ्‍गुपतिवाला मङ छासे पर्च्या फोकिवी। ती ति ख्‍यिराङ राङ नासाम तोङ।
HEB 10:30 च्‍यिलासिसिन “ङ्‍येन लङ्‍गुप ति ङ यिन। ङ राङ तिवाला ङ्‍येन लङ्‍यिन।” सिनी सुङ्‍गुप तीला दाक्‍पी ङो शेकिवी। येलुङ “चोवो कोन्‍छ्‍योककी राङ खोकी मीतिवी लाका ल्‍यामु मेलोवा काङ क्‍यावे, तीकी थोक्‍ला ठिम क्‍या नङ्‍गिवी।” सिनी सुङ वे।
HEB 10:31 तुक क्‍यानी ङोसु वोतुप कोन्‍छ्‍योककी ठिम क्‍या नङ्‍गुप लकला ख्‍येलुप ति छासे ज्‍यिवा लङ्‍गुप ताम्‍ङे यिन।
HEB 10:32 ख्‍यिराङ थल्‍माला ख्रीष्‍टला तेपा क्‍यावु पेलाकी ताम्‍ङेतिवा नरी नासाम तोङ। ती पेला ख्‍यिरा चो दुक्‍पा खुर्सिनाङ हम क्‍यानी देसुङ।
HEB 10:33 तोजो पेला माङ्‍शोक मीतिवी ख्‍यिराङला तेरी मीतिवी मिङ्‍गाला मारे तोङ्‍गुप ताङ छेटाङ बिन्‍सुङ। यम्‍बा पेला ति ख्‍यिरा यम्‍बा दुक्‍पा खुरुप मीतिवी मुला दुक्‍पा खुर्सुङ।
HEB 10:34 तमा चोन्‍खाङला शोरुप मीतिवाला ख्‍यिरा च्‍यम्‍बा क्‍यासुङ, ख्‍यिरा टोङ्‍बा मीतिवी ठोसिनाङ ख्‍यिराङ गा क्‍यानी हम क्‍या देसुङ। च्‍यिलासिसिन ख्‍यिरा मुला ती सिनाङ मङ ल्‍यामु ताङ नरी लुवु टोङ्‍बा वे सिरुप ति ख्‍यिराङला छ्‍या नोक।
HEB 10:35 तुक क्‍यानी ख्‍यिरा तेन्‍तेन क्‍यावु ति क्‍युर्नी माज्‍योक। तमा कोन्‍छ्‍योककी ख्‍यिराङला छासे खक्‍छ्‍येवु छ्‍यक्‍तक ग्‍येर्पु नङ्‍गिवी।
HEB 10:36 तमा कोन्‍छ्‍योककी नोवाला वोतुप ति तेरी डुप्‍सिमा खोकी ख्‍यिरा थोक्‍ला थाक्‍छ्‍येन नङ्‍गुप ति थोपुपला ख्‍यिराङ नरी हम क्‍यानी दे गोकिवी।
HEB 10:37 च्‍यिलासिसिन कोन्‍छ्‍योककी सुङला “फेप्‍किवी सिनी सुङ्‍गुप ति छासे ङमु राङ फेप्‍किवी, फिमु मिकिवी।
HEB 10:38 ङे थोङ्‍दाङला टेङ्‍बु च्‍युङ्‍गुप मीतिवा ति ङला तेपा क्‍यानी सेन्‍बु लुकिवी, यिने ङला तेपा कितुप क्‍युर्नी ज्‍योकुप तीकी मुला ति ङ गा मिकी।” सिनी टि वे।
HEB 10:39 दाक्‍पु याङ तेपा कितुप क्‍युर्नी ना डोप मीतिवा दोके मिन, बोरु तेपा क्‍यानी दिक्‍पा ने थरुपतिवा यिन।
HEB 11:1 कोन्‍छ्‍योकला तेपा कितुप सिक्‍यावु ति दाक्‍पी रेवा क्‍यावु ताम्‍ङेला खोकी नङ्‍गिवी सिनी तेन्‍तेन कितुप ताङ माथोङ्‍गुप ताम्‍ङेला वे सिनी हाक्‍कोवा कितुप यिन।
HEB 11:2 दाक्‍पी हङ्‍गावातिवी साङ कोन्‍छ्‍योकला तेपा क्‍यावु तप्‍की खोकी तिवाला सेमला गाल।
HEB 11:3 तेपा नेसुर राङ दी जम्‍बुलिङ ति कोन्‍छ्‍योककी सुङगी ज्‍येवु यिन। तमा दाक्‍पी थोङ्‍गुप च्‍यालक ति मोथोङ्‍गुप च्‍यालक नेसुर च्‍युङ्‍गुप यिन सिरुप ति हाक्‍कोकिवी।
HEB 11:4 तेपा नेसुर राङ हाबिलकी कयिनकी सिनाङ मङ कोन्‍छ्‍योकला सेमला डोप जिन्‍बा पुल्‍सुङ। ती तेपा नेसुर राङ हाविल ति कोन्‍छ्‍योककी थोङ्‍दाङला टेङ्‍बु वे सिनी खोकी गा लासुङ। च्‍यिलासिसिन तीकी पुलुप जिन्‍बा खोला सेमला लासुङ। हाविल शिनी गल्‍सिनाङ तीकी तेपा नेसुर तरोङ साङ दाक्‍पुला येन्‍देन ङ्‍येकिवी।
HEB 11:5 तेपा नेसुर राङ हनोक माशी वोतुप पेला राङ देवाच्‍येनला तेक्‍नी गाल्‍सुङ। कोन्‍छ्‍योककी तीला तेक्‍नी फेपुप तप्‍की ती ति कनिवा साङ माङ्‍ये। च्‍यिलासिसिन खोकी तीला तेक्‍नी फेपुप सिनाङ गोमाला तीकी खोला सेमला डोप लाका क्‍यावु पङ्‍बु च्‍युङ्‍सुङ।
HEB 11:6 यिने कोन्‍छ्‍योकला तेपा माक्‍यासिन सी साङ खोला गा लोङ मुथुपी। सु खोकी चाला वुङ्‍गिवे, तीकी कोन्‍छ्‍योक ज्‍यु वोतुप ताङ खोला छोलुपतिवाला खोकी छ्‍यक्‍तक नङ्‍गिवी सिनी तेपा कि गोकिवी।
HEB 11:7 तेपा नेसुर राङ नोआकी ती पेला सेक नाम्‍साङ माथोङ्‍गुप शोतोक ग्‍येर्पु ग्‍यकुपकी कोर्ला कोन्‍छ्‍योककी तीला सुङ्‍गुप ति ङ्‍येन्‍नी खोला मोवा कियी सिरा टु ग्‍येर्पु च्‍यिक जोनी खोरो मिछाङतिवाला र्‍होक्‍सुङ। तीकी तुका तेपा क्‍यानी जम्‍बुलिङकी मीतिवाला क्‍येन वोतुप ति छ्‍या तेन्‍सुङ। तमा खुरुङ ति तेपा क्‍यानी कोन्‍छ्‍योककी थोङ्‍दाङला टेङ्‍बु वोतुप च्‍युङ्‍सुङ। ती मोलाम ति कोन्‍छ्‍योकला तेपा कितुप मी तेरीला थोप्‍किवी।
HEB 11:8 तेपा नेसुर राङ अब्राहामला कोन्‍छ्‍योककी कताङ नङ्‍गुप पेला तीकी खोकी सुङला ङ्‍येन्‍नी खुरुङ कनी डोयी वे सिरुप ति छ्‍या मेसिनाङ खोकी ग्‍युक सिनी सुङ्‍गुप दासाला गाल्‍सुङ। ती दासा ति कोन्‍छ्‍योककी ज्‍युक्‍ला तीला तेरिन सिनी थाक्‍छ्‍येतुप दासा यिन।
HEB 11:9 तेपा नेसुर राङ अब्राहाम छ्‍यिग्‍यपकी मी दोके कोन्‍छ्‍योककी थाक्‍छ्‍येन नङ्‍गुप लुङ्‍बाला गल्‍नी कुर ग्‍यप्‍नी देसुङ। तुक राङ क्‍यानी कोन्‍छ्‍योककी अब्राहामला दोके ती दासा ति तेरिन सिनी इसहाक ताङ याकूबला थाक्‍छ्‍येन नङ्‍गुप तप्‍की तिवा साङ ते मुला राङ देसुङ।
HEB 11:10 च्‍यिलासिसिन अब्राहामकी नरी लुवु खासा वोतुप ग्‍येसाकी थोक्‍ला रेवा क्‍यानी गु देनोक। ती ग्‍येसाकी थोक्‍ला नासाम तोङ्‍गुप ताङ जो नङ्‍गुप ति कोन्‍छ्‍योक राङ यिन।
HEB 11:11 तेपा नेसुर राङ अब्राहामकी कोन्‍छ्‍योककी थाक्‍छ्‍येन नङ्‍गुप ति तेरी क्‍या नङ्‍गिवी सिनी लो तेन्‍दुप तप्‍की तीकी पेर्मी सारा मिजी गानी आङा मुच्‍युङ्‍गुप वोसिनाङ आङा च्‍युङ्‍सुङ।
HEB 11:12 तुक क्‍यानी शेप दोके वोतुप मिरा च्‍यिक नेसुर गिपातिवा नामगी कर्मा दोके मङ्‍मु ताङ ग्‍येम्‍छो गारीकी पेमा दोके ङो मुथुपुप क्‍यानी छासे फेल्‍सुङ।
HEB 11:13 ती तेरी मीतिवा कोन्‍छ्‍योककी थाक्‍छ्‍येन नङ्‍गुप ति माङ्‍येवाला राङ तेपा क्‍यानी शिसुङ। यिन्‍सिनाङ तिवी कोन्‍छ्‍योककी थाक्‍छ्‍येन नङ्‍गुप ति ङ्‍यिम्‍ज्‍यिक ङ्‍येकिवी सिनी तेपा क्‍यानी तिवी सेमला गा लासुङ। तमा दी जम्‍बुलिङला दाक्‍पु ति छ्‍यिग्‍यपकी मी ताङ मिमेलुङ्‍दुङ दोके यिनोक सिरुप ति पङ्‍बु बिन्‍सुङ।
HEB 11:14 खोप्‍राङला छ्‍यिग्‍यपकी मी यिन सिनी सिरुप मीतिवा खोप्‍रे लुङ्‍बा च्‍यिक वे, ती लुङ्‍बाला देतुप ङ्‍येकिवी सिनी लाम ल्हानी देतुप ति हाक्‍कोकिवी।
HEB 11:15 तिवी खोप्‍राङ थेन्‍नी वावु लुङ्‍बाकी थोक्‍ला नासाम तङ्‍गुप यिन्‍सियाङ तिवा लोङ गल्‍नी ती लुङ्‍बाला राङ दे थुपुप्‍जा।
HEB 11:16 बोरु तिवी याङ ती सिनाङ मङ ल्‍यामु वोतुप देवाच्‍येनकी ग्‍येल्‍खापकी कोर्ला छासे नो क्‍यासुङ। तुक क्‍यानी कोन्‍छ्‍योककी तिवाला “ङ तिवी कोन्‍छ्‍योक यिन।” सिनी सुङ्‍गुपला ङोछा मिकिवी। वुतुङ के खोकी तिवी थोक्‍ला ग्‍येसा च्‍यिक टडिक क्‍यानी ज्‍याङ नङ्‍नी वे।
HEB 11:17 तेपा नेसुर राङ अब्राहामला कोन्‍छ्‍योककी खोक्‍पा ल्‍हाप पेला खोरो पुज्‍युङ इसहाक ति जिन्‍बा ताङ्‍सुङ। ती इसहाक ति कोन्‍छ्‍योककी अब्राहामला थाक्‍छ्‍येतुप नेसुर नङ्‍गुप च्‍यिक राङ वोतुप पुज्‍युङ यिन्‍सिनाङ तीकी कोन्‍छ्‍योककी थोक्‍ला सेनी जिन्‍बा तोङ्‍गुपला टडिक क्‍यासुङ।
HEB 11:18 कोन्‍छ्‍योककी गोमाला अब्राहामला, “इसहाक नेसुर राङ ख्‍योरो गिपातिवा फेल्‍गितो।” सिनी थाक्‍छ्‍येन नाङ्‍सुङ।
HEB 11:19 इसहाक शिसिनाङ कोन्‍छ्‍योककी तीला सेन्‍बु लोङ थुप्‍किवी सिरुप ति अब्राहामला तेपा नोक। तमा वुतुङ के इसहाकला शेप ने सेन्‍बु लङ्‍गुप दोके येलुङ ङ्‍येसुङ।
HEB 11:20 तेपा नेसुर राङ इसहाककी खोरो पुज्‍युङ याकूब ताङ एसावला ज्‍युक्‍थमाला वुङ्‍गुप ताम्‍ङेकी थोक्‍ला मोलाम बिन्‍सुङ।
HEB 11:21 तेपा नेसुर राङ याकूबकी खुरुङ शेप पेला योसेफकी पुज्‍युङतिवा रे रेला मोलाम ग्‍यप्‍सुङ। तमा तीकी खोरो पेर्का चुनी राङ कोन्‍छ्‍योकला सोवा तेक्‍सुङ।
HEB 11:22 तेपा नेसुर राङ योसेफकी खुरुङ शितुछ्‍येप पेला ङ्‍यिम्‍ज्‍यिक कोन्‍छ्‍योककी इस्राएल मीतिवाला मिश्र लुङ्‍बा नेसुर तेन्‍नी टि डोप कोर्ला ताम्‍ङे क्‍यासुङ। तमा खोरो रुच्‍ये ति चुक कि गोकिवी सिरुप कोर्ला साङ क बिन्‍सुङ।
HEB 11:23 तेपा नेसुर राङ मोशाकी पपाआमातिवी मोशा क्‍येप पेला ती ति ल सुम सेक बानी ज्‍याक्‍सुङ। च्‍यिलासिसिन तिवी मोशा ति छासे ल्‍यामु वोतुप थोङ्‍सुङ, तमा ग्‍येल्‍वी बिन्‍दुप कला साङ तिवा ज्‍यिवा माक्‍या।
HEB 11:24 तेपा नेसुर राङ मोशा नाज्‍युङ गल्‍सिमा तीकी खुरुङला ग्‍येल्‍वु फारोकी पुमकी पुज्‍युङ यिन सिनी मीतिवी सिक्‍यावु ति तीकी गा माक्‍या।
HEB 11:25 बोरु दिक्‍पा क्‍यानी चेयी पर सेक तिराङ किर्मु कितुप सिनाङ कोन्‍छ्‍योककी पेतुप मीतिवी मुला दुक्‍पा खुरुप राङ मङ ल्‍यामु यिन सिनी नोक्‍यासुङ।
HEB 11:26 तीकी मिश्रला वोतुप नोर ताङ टोङ्‍बा सिनाङ ख्रीष्‍टकी थोक्‍ला मारे गल्‍नी देतुप ति छासे गोङ नावु यिन सिनी नो क्‍यानोक। च्‍यिलासिसिन तीकी कोन्‍छ्‍योककी नङ्‍गुप छ्‍यक्‍तककी थोक्‍ला लाम ल्हानी देसुङ।
HEB 11:27 तेपा नेसुर राङ मोशाकी मिश्रकी ग्‍येल्‍वु ङि्‍यर्मु लानी वोसिनाङ ज्‍यिवा माक्‍यानी ती लुङ्‍बा क्‍युर ज्‍याक्‍नी गाल्‍नोक। तमा तीकी मोथोङ्‍गुप कोन्‍छ्‍योकला साङ थोङ्‍गुप दोके हम क्‍यानी देसुङ।
HEB 11:28 तेपा नेसुर राङ मोशाकी इस्राएलकी मीतिवाला खाङ्‍बी गे लो लोला लुक रुककी ठक ति कुनी थरुप तुछ्‍येन तेन गोकिवी सिनी क बिन्‍सुङ। तुक क्‍यासिन गोमाला क्‍येवु पुज्‍युङ छ्‍येतिवा सेतुपला वुङ्‍गुप तीकी इस्राएलकी मीतिवी नाङ ने गोमाला क्‍येवु पुज्‍युङ छ्‍येतिवाला काङ साङ कि मुथुप्‍नोक।
HEB 11:29 तेपा नेसुर राङ ग्‍येम्‍छो परकी स कम्‍बुला युवु दोके क्‍यानी इस्राएलकी मीतिवा ग्‍येम्‍छो मर्वु शानी गाल्‍सुङ। यिने मिश्रीतिवा ती ग्‍येम्‍छो शकुप छोलुप पेला तेरी ग्‍येम्‍छोला नुम्‍नी शिसुङ।
HEB 11:30 तेपा नेसुर राङ इस्राएलकी मीतिवा ङ्‍यिमा दिन सेक यरीहो ग्‍येसाकी गारी गुरीला वोतुप च्‍यारी ग्‍येर्पु तीकी फिला कोरा ग्‍यप्‍सिमा ती च्‍यारी ति राम्‍सुङ।
HEB 11:31 तेपा नेसुर राङ राहाब छ्‍येमु तीकी यरीहोला च च्‍येतुपला वावु मीतिवाला ल्‍यामु क्‍यानी गासो शुवु तप्‍की कोन्‍छ्‍योककी सुङला मेङ्‍येन्‍दुप ती ग्‍येसाकी मीतिवा तेरी सेसिनाङ तीला ति मासे।
HEB 11:32 त दी सिनाङ ल्‍हक्‍पा याङ ङ काङ सिरुप? च्‍यिलासिसिन गिदोन ताङ बाराक ताङ शिमशोन ताङ यिप्‍ता ताङ दाऊद ताङ शमूएल ताङ कोन्‍छ्‍योककी लुङ्‍तेम्‍बातिवी कोर्ला सिरुपला ङे मुला तुजे मे।
HEB 11:33 तेपा नेसुर राङ तिवी लुङ्‍बा यम्‍बा ताङ मुला मक ग्‍यप्‍नी ग्‍येल्‍सुङ, ठिम टेङ्‍बु क्‍यानी ग्‍येला क्‍यासुङ, कोन्‍छ्‍योककी थाक्‍छ्‍येन नङ्‍गुप साङ थोप्‍सुङ, तिवी सेङ्‍गीकी ख साङ उप्‍सुङ,
HEB 11:34 बरुप मेतिवा साङ नाल्‍सुङ, खुर्पाकी ख नेसुर साङ थार्सुङ, ङ्‍येर्मे वोसिनाङ ग्‍यामु गाल्‍सुङ, मक ग्‍यकुपला साङ छासे ङार छ्‍येवु च्‍युङ्‍सुङ, तमा छ्‍यिग्‍यप लुङ्‍बी मक्‍मीतिवाला साङ तिवी शर्नी ताङ्‍सुङ।
HEB 11:35 तुक राङ क्‍यानी तेपा नेसुर राङ ललाइ पुम्‍पेजातिवी खोप्‍रे शेप मिछाङतिवा शेप ने सेन्‍बु लावु थोङ्‍सुङ। यिने यम्‍बा ललाइकी शिसिमा मङ मिजी ल्‍यामु थोप्‍शी सिनी चोन्‍खाङला शोरुप ने थेन्‍दुप साङ माङ्‍येन्‍नी चो पाङ्‍शर तङ्‍सिनाङ छेटाङ खुर्सुङ।
HEB 11:36 तमा यम्‍बा ललाइला ति मीतिवी मर्च्या कितुप ताङ तल्‍ज्‍येक थ्‍वोनी दुसुङ। तमा यम्‍बा ललाइला ति च्‍याटोक ग्‍यप्‍नी चोन्‍खाङला उप्‍सुङ।
HEB 11:37 तमा यम्‍बा ललाइला ति दो पोप्‍नी सेसुङ, ललाइला सोक्‍ली थ्‍वोनी टेनी फेका ङ्‍यी जोनोक। तुक राङ क्‍यानी ललाइला ति खुर्पा थ्‍वोनी सेसुङ, ललाइ ति पेराङ्‍बु गल्‍नी दुक्‍पा खुरिन ताङ पाङ्‍शर तोङ्‍गुप ताङ लुक ताङ रे क्‍वा कोन्‍नी फार ताङ छुर युनी दे गोसुङ।
HEB 11:38 दी जम्‍बुलिङ मेलोक्‍पा ति ती मीतिवी थोक्‍ला दे छ्‍योवु मिन्‍दुक। तमा तिवा दासा पाङ्‍थेरी ताङ टक ताङ फुक ताङ से वोक्‍ला वोतुप मुक्‍तुमतिवी नाङ्‍ला यिप्‍नी युक गोसुङ।
HEB 11:39 तिवा तेरीकी कोन्‍छ्‍योकला तेपा क्‍यावु तप्‍की खोकी तिवाला गा क्‍यासुङ। यिन्‍सिनाङ खोकी थाक्‍छ्‍येन नङ्‍गुप ति तिवाला माथोप,
HEB 11:40 च्‍यिलासिसिन खोकी दाक्‍पी थोक्‍ला ती सिनाङ खक्‍छ्‍येवु ताम्‍ङे ल्‍यामु यी टडिक क्‍यानी वे। खोकी नोवा ति काङ यिन सिसिन तिवा साङ दाक्‍पी मुला राङ तेरी दिक्‍पा ने थर्नी खोकी चिप्‍ला डोप ङ्‍येशी सिरुप यिन।
HEB 12:1 दाक्‍पी गारी गुरीला कोन्‍छ्‍योकला तेपा कितुप कोर्ला पङ्‍बु तेरुप मीतिवा छासे मङ्‍मु वे। तुक क्‍यानी दाक्‍पी मिजीला तोक्‍सा छोकुपतिवा ताङ दाक्‍पुला क्‍येक्‍नी ज्‍योकुप दिक्‍पातिवा क्‍युर ज्‍यकुप, तमा दाक्‍पु लेप गोवु थाकाला तिराङ ल्‍हानी हम क्‍यानी छ्‍योङ्‍बाल ग्‍यकुप।
HEB 12:2 तमा दाक्‍पी तेपा गो जुवु ताङ ती तेरी छे ज्‍यितुप चोवो येशूला तिराङ नरी ल्‍हाप। खोकी खोरे दोङ्‍ला वोतुप गाकी थोक्‍ला मीतिवी मारे तङ्‍सिनाङ काङ नो माक्‍यानी हम क्‍यानी ग्‍यङ्‍शिङ लोला टुङ्‍सुङ। तमा कोन्‍छ्‍योककी ग्‍येल्‍ठिककी यावी थाकाला ज्‍युसुङ।
HEB 12:3 ख्‍यिराङ चो दुक्‍पा खुर गोसिनाङ येन छ्‍येनी यिछ्‍येता मिकिवुला मी दिक्‍छेनतिवी चो ङ्‍यिङ्‍मर क्‍यासिनाङ हम क्‍यानी देतुप येशूला नासाम तोङ।
HEB 12:4 ख्‍यिरा याङ तन्‍दा सेक सी साङ दिक्‍पा मिकिवु तेन्‍दोकला रङगी मिजी साङ तेर गोवु क्‍यानी थमु ग्‍यक मागो वे।
HEB 12:5 तमा काङ कोन्‍छ्‍योककी सुङगी नाङ्‍ला ख्‍यिराङला खोरो पुज्‍युङतिवाला दोके दुक सिनी टोङ्‍गु बिन्‍दुप ति ख्‍यिरा टोक ज्‍येसुङ? खोकी दुक सिनी सुङ वे, “ओ ङे पुज्‍युङ, चोवो कोन्‍छ्‍योककी ख्‍युरुङला ल्‍यामु च्‍युङ्‍शी सिनी छालेन बिन्‍दुप ति खोङ्‍याम की, खोकी ख्‍युरुङला कप्‍क्‍येन नङ्‍गुप पेला ख्‍युरुङ यिछ्‍येता माकी।
HEB 12:6 च्‍यिलासिसिन खोकी सुला ङ्‍यिङ्‍ज्‍ये क्‍या नङ्‍गिवे, तीला पर्च्या साङ तेर्किवी। तमा खोकी खोरे पुज्‍युङ सिनी चिवुतिवाला छ्‍येर्पा साङ तेर्किवी।”
HEB 12:7 कोन्‍छ्‍योककी ख्‍यिराङला छालेन नङ्‍गुप पेला ख्‍यिराङ हम क्‍यानी दे। च्‍यिलासिसिन खोकी ख्‍यिराङला पपी खोरो पुज्‍युङला कितुप दोके क्‍या नङ्‍यिन वे। काङ पपी खोरो पुज्‍युङतिवाला छालेन मेतेर्वी रो?
HEB 12:8 पपी खोरो पुज्‍युङपुमतिवाला छालेन बिन्‍दुप दोके क्‍यानी कोन्‍छ्‍योककी ख्‍यिराङला छालेन मानाङ्‍सिन ख्‍यिराङ खोकी पुज्‍युङपुम मिन, शम्‍डेन क्‍यानी क्‍येवु पुज्‍युङपुम यिन।
HEB 12:9 तोजो तिराङ मिन, जम्‍बुलिङला वोतुप दाक्‍पी पपी दाक्‍पुला छालेन बिन्‍सिनाङ दाक्‍पी पपाला ताङ्‍देन क्‍यासुङ सिसिन मङ देवाच्‍येनला वोतुप पपा कोन्‍छ्‍योककी ओङला दे मोगोवी रो?
HEB 12:10 च्‍यिलासिसिन जम्‍बुलिङकी पपी खोप्‍रे नोवाला वोतुप दोके क्‍यानी दाक्‍पुला ङ्‍यिमा चेयी पर सेक लाम ल्‍यामुला युक ज्‍यितुपला छालेन बिन्‍सुङ, यिने कोन्‍छ्‍योककी याङ दाक्‍पु ति खो दोके टेङ्‍बु च्‍युङ थुप्‍शी, तमा दाक्‍पुला ल्‍यामु च्‍युङ्‍शी सिनी छालेन नङ्‍गिवी।
HEB 12:11 ती तेरी छालेन ति दाक्‍पुला ख्‍येलुप पेला गोमाला याङ सेमला गा मालङ्‍गिवी, छासे कले गिवी। यिन्‍सिनाङ ती छालेन नेसुर तालिम ङ्‍येसिमा ती ज्‍युक्‍ला कोन्‍छ्‍योककी थोङ्‍दाङला दाक्‍पुला टेङ्‍बु ताङ लोदिमु वोतुप मिजी ङ्‍येकिवी।
HEB 12:12 तुक क्‍यानी ङार मेतुप लाक्‍पातिवा येर लोङ, तमा रम्‍बु मेतुप काङ्‍बी छिङ्‍गुरतिवा साङ रम्‍बु जोसा।
HEB 12:13 तमा ख्‍यिराङ युकुप लाम ति थेकाङ जोसा, तुक क्‍यासिन काङ्‍बा रम्‍बु मेतुपतिवी काङ्‍बी छिङ्‍गुर ति मोटोल्‍शी, यिने टेक्‍शी।
HEB 12:14 तेरी मीतिवी मुला लोदिमु क्‍यानी थिन्‍नी दे थुपा की, तमा टेङ्‍बु क्‍यानी मिजी क्‍योङ थुपा की। टेङ्‍बु मेसिन सी साङ कोन्‍छ्‍योकला मोथोङ्‍गिवी।
HEB 12:15 नासाम तोङा, ख्‍यिराङ सु साङ कोन्‍छ्‍योक नेमा थोपुप कटिनला क्‍युर्नी मोज्‍योक्‍शिता, तमा सेमला लाका मेलोवा कितुप नासाम माज्‍योक। नासाम मेलोवा ज्‍याक्‍सिन तीकी मङ मङ फेल्‍नी मी बङीला मेटेङ्‍बु जेवी।
HEB 12:16 ख्‍यिरा पर्ला सु साङ शम्‍डेनकी लाका माकी। तमा एसाव दोके कोन्‍छ्‍योकला ङ्‍याम मिकिवु माकी। तीकी समा छेक च्‍यिककी थोक्‍ला पुज्‍युङ छ्‍येकी ओङ साङ चोनी सोसुङ।
HEB 12:17 ख्‍यिराङला छ्‍या राङ वे, ती ज्‍युक्‍ला तीकी खोरो पपा नेमा थोप गोवु मोलाम ति थोपुप छाल्‍सुङ, यिन्‍सिनाङ तीला माबिन। च्‍यिलासिसिन तीकी मिक्‍च्‍युर ताङ्‍नी ती मोलाम थोपुप छाल्‍सिनाङ तीकी सेम ग्‍युरुप तुजे माच्‍युङ।
HEB 12:18 ख्‍यिराङ वावु दासा ति गोमाला इस्राएलकी मीतिवा सीनै रीला गलुप दोके मिन। ती दासाला ति थो तोङ थुपुप ताङ मे छेन्‍दी बरुप ताङ मुक्‍पा नक्‍पु छुपुप ताङ नक्‍तोमी ताङ छासे लुङ छ्‍यर्वा ग्‍यकुप ताङ
HEB 12:19 ग्‍येलिङ पुवु वोरु ताङ कोन्‍छ्‍योककी सुङ मेरुप वोरु देन्‍गिनोक। ती वोरु थोवु मीतिवी तुका वोरु ति येलुङ मोथोशी सिनी गोङ्‍बा पुल्‍सुङ।
HEB 12:20 च्‍यिलासिसिन “दोजो सेम्‍ज्‍येनकी ती रीला रेक्‍सिन तीला दो पोप्‍नी से!” सिनी कोन्‍छ्‍योककी क नङ्‍गुप सुङला तिवा युक माथुप्‍नोक।
HEB 12:21 ते वोतुप थोङ्‍छ्‍योल ति छासे ज्‍यिवा लङ्‍गुप नोक। तुक क्‍यानी मोशाकी साङ “ङ ज्‍यिवा लानी र्‍हुकिन वे” सिनी सिक्‍या वे।
HEB 12:22 यिने ख्‍यिराङ वावु दासा ति सियोन री ताङ देवाच्‍येनकी यरूशलेमला राङ यिन। ती दासा ति ङोसु वोतुप कोन्‍छ्‍योककी ग्‍येसा यिन। ख्‍यिराङ तोङ्‍डा बङी देवाच्‍येनकी लेन क्‍योलुप थुतिवा जोम्‍नी लोदिमुकी तुछ्‍येन तेन्दुप दासाला वानी वे।
HEB 12:23 तमा ख्‍यिराङ याङ गोमाला क्‍येवु पुज्‍युङ दोके वोतुप तेपा कितुप मीतिवा तेरी जोम्‍बुप चर्चला वानी वे। तिवी मिङ तेरी ति देवाच्‍येनला टिनी ज्‍याङ वे। तमा ख्‍यिराङ याङ तेरी मीतिवाला ठिम क्‍या नङ्‍गुप कोन्‍छ्‍योक ताङ खोकी खोरे मोवा वोतुप दोके क्‍यानी टेङ्‍बु जोवु मीतिवी थुतिवा वोतुप दासाला वानी वे।
HEB 12:24 तमा ख्‍यिराङ याङ कोन्‍छ्‍योक ताङ मीतिवी पर्ला थाक्‍छ्‍येतुप ताम्‍ङे सम्‍बा जो नङ्‍गुप येशू ताङ खोकी थोरुप ठकला वा वे। ती ठक ति हाबिलकी ठक सिनाङ मङ ल्‍यामो क्‍यानी दाक्‍पुला येन्‍देन तेर्किवी।
HEB 12:25 तुक क्‍यानी ख्‍यिराङ च्‍याङ्‍से देनी कोन्‍छ्‍योककी सुङ्‍गुप कला ल्‍यामो क्‍यानी ङ्‍येन। सीनै री नेसुर मोशाकी बिन्‍दुप कला मेङ्‍येन्‍दुप मीतिवा थर माथुप सिसिन देवाच्‍येन नेमा नङ्‍गुप कोन्‍छ्‍योककी कला मेङ्‍येन्‍दुप दाक्‍पु चुक क्‍यानी थर थुप्‍किवी रो?
HEB 12:26 सीनै रीला कोन्‍छ्‍योककी क नङ्‍गुप वोरुकी जम्‍बुलिङ तिराङ योसुङ, यिने त याङ खोकी दुक सुङ्‍नी थाक्‍छ्‍येन नङ वे, “तरोङ ङ जम्‍बुलिङ तिराङ योक ज्‍यितुप मिन, देवाच्‍येन साङ येलुङ थेङ्‍मा च्‍यिक योक ज्‍यितिनो।”
HEB 12:27 “येलुङ थेङ्‍मा च्‍यिक” सिक्‍यावु सुङगी तेन्‍दोक ति दी यिन, कोन्‍छ्‍योककी ज्‍येवु च्‍यालकतिवा योक थुपुप ताङ दोक थुप्‍किवी। तुक क्‍यासिन योक मुथुपुप च्‍यालकतिवा तिराङ लुकिवी।
HEB 12:28 तुक क्‍यानी योक मुथुपुप कोन्‍छ्‍योककी ग्‍येल्‍खाप थोपुप तप्‍की दाक्‍पु कोन्‍छ्‍योकला थुचिछे बुलुप। तमा खोला नरी ज्‍यिवा ताङ ताङ्‍देन कियी सिरा खोकी सेमला डोप सोवा बुलुप।
HEB 12:29 च्‍यिलासिसिन दाक्‍पी कोन्‍छ्‍योक ति पुसुकी जोप मे यिन।
HEB 13:1 ख्‍यिराङ च्‍यिककी च्‍यिकला रङगी अच्‍युनुपतिवा दोके क्‍यानी ङ्‍यिङ्‍ज्‍ये किसा।
HEB 13:2 ङो माशेवु डेन्‍बुतिवाला गासो शोप टोक माज्‍येता, च्‍यिलासिसिन मी ललाइकी हाक राङ माकोवा क्‍यानी देवाच्‍येनकी लेन क्‍योलुप थुतिवाला शब्‍ज्‍यी क्‍यासुङ।
HEB 13:3 ख्‍यिराङ खुरुङ साङ चोन्‍खाङला वोतुप दोके नासाम तङ्‍नी चोन्‍खाङला शोरुप तिवाला ङ्‍याम किसा। तमा मीतिवी पाङ्‍शर तङ्‍गुपतिवाला साङ नासाम तोङ, च्‍यिलासिसिन ख्‍यिराङ साङ जुला राङ वे।
HEB 13:4 तेरीकी पर्ला जेन्‍दी ति ताङ्‍देन वोतुप वुङ्‍शी। तमा ख्‍योवा ताङ पेर्मी जेन्‍दी क्‍यासिमा मी यम्‍बा ताङ मुला शम्‍डेन कितुप मेङ्‍गिवी, च्‍यिलासिसिन शम्‍डेन कितुप ताङ यम्‍बा ख्‍योक्‍पेजा याङ्‍ना यम्‍बा पुम्‍पेजा ताङ मुला मेलोक्‍पा कितुपतिवाला कोन्‍छ्‍योककी ठिम क्‍या नङ्‍गिवी।
HEB 13:5 ख्‍यिरा मिजी ति टङ्‍गा डेवाला चा कितुप नेसुर कुतुक दे। ख्‍यिरा मुला चो नोके तोजोयीला राङ सेम लोदिमु च्‍युङ्‍नी दे, च्‍यिलासिसिन कोन्‍छ्‍योककी दुक सुङ्‍नी वे, “ङ ख्‍युरुङला नाम्‍साङ पि मोतोङ, तमा क्‍युर्नी साङ मोज्‍योक।”
HEB 13:6 तुक क्‍यानी दाक्‍पु ङाडेङ क्‍यानी सि थुप्‍किवी, “चोवो कोन्‍छ्‍योक ति ङला दाल्‍जा किटे कितुप चोवो यिन, ङ ज्‍यिवा मिकी। मीतिवी ङला काङ कि थुप्‍किवी रो?”
HEB 13:7 ख्‍यिराङला कोन्‍छ्‍योककी सुङ लोपुप गेकेनतिवाला नासाम तोङ। तिवी चुक क्‍यानी मिजी क्‍याङ्‍सुङ, तिवा चुक क्‍यानी शिसुङ, तीकी कोर्ला ल्‍यामु क्‍यान ल्‍हानी ख्‍यिराङ साङ तिवी दोके तेपा किसा।
HEB 13:8 येशू ख्रीष्‍ट दाङ ताङ हारिङ तमा नरीकी नरी च्‍यिक्‍पा राङ ज्‍युकिवी।
HEB 13:9 ख्‍यिराङ नम्‍बा कुतुककी येन्‍देन मेटेङ्‍बुला मेख्‍येल्‍शी। साप थुङ्‍गुप लुक्‍सुतिवा तेन्‍नी मिन, यिने कोन्‍छ्‍योककी कटिन नेमा ख्‍यिरा सेम रम्‍बु च्‍युङ्‍गुप ति ल्‍यामु यिन। तुका लुक्‍सुतिवा तेन्‍नी ख्‍यिराङला काङ साङ ख्‍येप्‍साङ मेवी।
HEB 13:10 दाक्‍पी ति जिन्‍बा तोङ्‍गुप दासा च्‍यिक वे। ती दासाला जिन्‍बा पुलुप च्‍यालकतिवा यहूदीतिवी कोन्‍छ्‍योकला सोवा देकुप कुरला देनी कोन्‍छ्‍योकला शब्‍ज्‍यी कितुपतिवाला साप ओङ मे।
HEB 13:11 ते यहूदी कोङ्‍यार छ्‍येकी दिक्‍पी थोक्‍ला जिन्‍बा तोङ्‍गुप सेम्‍ज्‍येनकी ठक ति तेरी सिनाङ चाङ्‍मा वोतुप दासाला खुर्नी डिवी, तमा ती सेम्‍ज्‍येनकी जु ति मीतिवा देतुप दासा नेसुर फिला खुन गल्‍नी र्‍हेकिवी।
HEB 13:12 तुक क्‍यानी येशू ख्रीष्‍ट साङ ग्‍येसाकी फिला छेटाङ खुर्सुङ। ती ति खोकी ठक नेसुर दाक्‍पुला दिक्‍पा ने थर च्‍यिनी टेङ्‍बु जोपला यिन।
HEB 13:13 ती दोके दाक्‍पु साङ मीतिवा देतुप दासा नेसुर फिला येशूकी चिप्‍ला डोप। तमा दाक्‍पु साङ खोकी दोके मीतिवी मारे तङ्‍सिनाङ हम क्‍यानी देतुप।
HEB 13:14 च्‍यिलासिसिन दी जम्‍बुलिङला दाक्‍पी ति नरीकी थोक्‍ला देतुप ग्‍येसा मे, यिने दाक्‍पु ज्‍युक्‍ला वुङ्‍गुप ग्‍येसाकी थोक्‍ला गुनी देकिवी।
HEB 13:15 तुक क्‍यानी दाक्‍पु येशू नेसुर नरी कोन्‍छ्‍योकला सोवा देकिन सिरा खोला जिन्‍बा तोङ्‍गुप। तुक क्‍यावु ति दाक्‍पी खोला चोवो कोन्‍छ्‍योक यिन सिनी मी यम्‍बाला पङ्‍बु तेरुप यिन।
HEB 13:16 च्‍यिककी च्‍यिकला ल्‍यामु कितुप ताङ रङगी लोला वोतुप च्‍यालकतिवा यम्‍बा गोवुतिवाला तेरुप लाका कितुप टोक माज्‍येता। च्‍यिलासिसिन दाक्‍पी तुका जिन्‍बा पुलुप ति कोन्‍छ्‍योकला सेमला डिवी।
HEB 13:17 ख्‍यिराङला गोमा कितुप गेकेनतिवी सिक्‍यावु खला ङ्‍येन्‍नी तिवी ओङला देता। च्‍यिलासिसिन तिवी ख्‍यिरा मिजीला ल्‍हटे किवी, तमा तिवी खोप्‍रे क्‍यावु लाकाकी ची ति कोन्‍छ्‍योकला ते गोकिवी। ख्यिराङ तिवी ओङला दे। तुक क्‍यासिन तिवी ती लाका ति सेम मेलोक्‍पा क्‍यानी मिन, सेम गा क्‍यानी कि थुप्‍किवी। मिसियाङ ख्‍यिराङला काङ साङ ख्‍येप्‍साङ मेङ्‍गिवी।
HEB 13:18 ङ्‍यिरा थोक्‍ला साङ नरी मोपोर किसा। ङ्‍यिरा सेम टेङ्‍बु वे सिरुप ति तेन्‍तेन वे। ङ्‍यिराङ ति नरी खोङ्‍तेर्मु क्‍यानी मिजी क्‍योङ्‍गुप नो वे।
HEB 13:19 खक्‍छ्‍येवुला ङ ख्‍यिराङला ठाकुरे सिरिन, ङ ख्‍यिरा ते ङमु राङ वुङ थुप्‍शी सिनी ङे थोक्‍ला साङ मोपोर किसा।
HEB 13:20 चोवो येशूकी ग्‍यङ्‍शिङला ठक तेन्‍नी कोन्‍छ्‍योक ताङ मीतिवी पर्ला थाक्‍छ्‍येवु ताम्‍ङे क्‍या नङ्‍गुप तप्‍की खो दाक्‍पुला गोमा कितुप गोठाला छ्‍ये च्‍युङ्‍सुङ। तमा कोन्‍छ्‍योक ति खोला टुङ्‍गुप ने ङोसु लोङ्‍गुप लोदिमु वोतुप कोन्‍छ्‍योक यिन।
HEB 13:21 ती कोन्‍छ्‍योककी खोकी नोवाला वोतुप ति ख्‍यिरा तेरी किशी नोनी ख्‍यिराङला गोवु तेरी ल्‍यामु वोतुपतिवा नङ्‍शी। तमा चुका ति खोला सेमला डोप नोके, येशू ख्रीष्‍ट नेसुर ती ति ख्‍यिरा मिजीला खोकी क्‍या नङ्‍शी। येशू ख्रीष्‍टला नरीकी नरी मोवा च्‍युङ्‍शी। आमिन।
HEB 13:22 अच्‍युनुपतिवा, ङ ख्‍यिराङला ठाकुरे सिरिन, ङे टोङ्‍गु बिन्‍दुप ति ङ्‍येना। दी टोङ्‍गु ति ङे ख्‍यिराङला चेयी तिराङ टिनी वोतो।
HEB 13:23 ङ ख्‍यिराङला दी ताम्‍ङे ति हाक्‍को ज्‍यितिन, दाक्‍पी नुप तिमोथी साङ चोन्‍खाङ ने थेन वोतो। दोजो ती ङमु राङ वासिन ङ तीकी मुला ख्‍यिराङला ठेतुपला वुङ्‍गुप्‍नो।
HEB 13:24 ख्‍यिराङला गोमा कितुप गेकेनतिवा ताङ तेरी तेपा कितुपतिवाला साङ टसी देलेक वे सिनी सिसा। तमा इटालिया नेसुर वावुतिवी साङ ख्‍यिराङला टसी देलेक सिनी तङ वोतो।
HEB 13:25 ख्‍यिराङ तेरीकी मिजीला कोन्‍छ्‍योककी कटिन नङ्‍शी।
JAM 1:1 टसी देलेक! कोन्‍छ्‍योक ताङ चोवो येशू ख्रीष्‍टला शब्‍ज्‍यी बुलुप ङ याकूबकी छ्‍योक नेमा जम्‍बुलिङकी दासा दासाला टम्‍नी देतुप कोन्‍छ्‍योकला तेपा कितुप मीतिवा तेरीला दी यिकी ति टिवु यिनो।
JAM 1:2 ङे ङ्‍यिङ्‍ज्‍येवु अच्‍युनुपतिवा, ख्‍यिरा मिजीला छेटाङ ताङ दुङलतिवा ख्‍येल्‍नी वासिन ती पेला ख्‍यिराङ छासे क्‍यानी गा किसा।
JAM 1:3 च्‍यिलासिसिन येशूला तेपा क्‍यावु तप्‍की खोक्‍पा ल्‍हापला ख्‍येलुप पेला ख्‍यिराङ मङ मङ हम क्‍या दे थुपुप डिवी सिरुप ति ख्‍यिराङला छ्‍या वे।
JAM 1:4 ख्‍यिराङ हम क्‍यानी देतुप ति मङ ल्‍हक्‍पा गल्‍सिमा तेपा रम्‍बु च्‍युङ्‍नी ख्‍यिरा मिजीला काङ साङ ङ्‍युङ्‍मु मेवी।
JAM 1:5 दोजो ख्‍यिरा पर्ला ललाइला रिक्‍पा अला मेसुङ सिसिन ङ्‍यिर्मु माक्‍यानी सेम बोल्‍मु क्‍यानी नङ्‍गुप कोन्‍छ्‍योकला लोङ्‍शी, तमा खोकी तीला नङ्‍गितो।
JAM 1:6 यिने खोला लोङ्‍गुप पेला सेमला तेपा क्‍यानी काङ साङ नाम्‍दोक माक्‍यानी लोङ गोकिवी। सेमला नाम्‍दोक कितुपतिवा याङ वुर्तुक कनिवा ग्‍युकिवे, तेवा राङ ग्‍युकुप ग्‍येम्‍छोकी बालाप दोके यिन।
JAM 1:7 तुका मी तीकी कोन्‍छ्‍योक नेमा काङ ङ्‍येकिवी सिनी नासाम मातोङ।
JAM 1:8 च्‍यिलासिसिन तुका मी ति सेम नटे कोटे वोतुप तप्‍की तीकी काङ क्‍यासिनाङ चारा मुछुवी।
JAM 1:9 पेराङ्‍बु वोतुप अच्‍युनुपतिवा, कोन्‍छ्‍योककी ख्‍यिराङला चुक क्‍यानी छ्‍ये जोसुङ सिनी ख्‍यिराङ गा की।
JAM 1:10 मी छ्‍युक्‍पुतिवा, कोन्‍छ्‍योककी ख्‍यिराङला चुक क्‍यानी छ्‍युङा जोसुङ सिनी गा की। च्‍यिलासिसिन छ्‍युक्‍पु वोतुपतिवी मिजी ति चे मेन्‍दोक दोके रेर्पा डिवी।
JAM 1:11 ङ्‍यिमा छेन्‍दी शर्नी नाम्‍खर क्‍यासिमा च साङ रेर्पा डिवी, मेन्‍दोक साङ ङ्‍यिल्‍गिवी, तमा तीकी थोङ्‍दाङ ल्‍यामु साङ तोर्किवी। ती दोके मी छ्‍युक्‍पुतिवा साङ तुकै राङ यिन, चो लाका क्‍यानी नोर टोङ्‍बा शम्‍सिनाङ ङ्‍यिम्‍ज्‍यिक ती ना डिवी।
JAM 1:12 चुका मी ति खोक्‍पा ल्‍हापला ख्‍येलुप पेला छेटाङ ख्‍येल्‍सिनाङ हम क्‍यानी दे थुप्‍किवे, ती मी ति मोलाम थोपुप यिनो। च्‍यिलासिसिन तीला मिजीकी उशाक थोप्‍कितो। ती छ्‍यक्‍तक ति कोन्‍छ्‍योककी खोला ङ्‍यिङ्‍ज्‍येवु कितुपतिवाला तेरिन सिनी थाक्‍छ्‍येन नङ्‍गुप नाम्‍साङ मिशिवु मिजी यिन।
JAM 1:13 सी साङ लाका मेलोवा कितुप नासाम वुङ्‍गुप पेला दी ति कोन्‍छ्‍योक नेमा वावु यिन सिनी नासाम मातोङ, च्‍यिलासिसिन सी साङ कोन्‍छ्‍योकला खोक्‍पा ल्‍हाप लाका कि मुथुपी, खोकी सुला साङ खोक्‍पा माल्‍हावी
JAM 1:14 यिने मीतिवी सेमला नासाम दुक्‍टा शर्नी देर्पाला ख्‍येल्‍सिमा खोक्‍पा ल्‍हापला ख्‍येल्‍गिवी।
JAM 1:15 तमा मी सेमला नासाम मेलोवा शर्नी तीकी दिक्‍पा किवी, दिक्‍पा मङ टासिमा ती दिक्‍पाकी मीला ङ्‍येलाला क्‍योल्‍गिवी।
JAM 1:16 ङे ङ्‍यिङ्‍ज्‍येवु अच्‍युनुपतिवा, ख्‍यिराङ मी यम्‍बी जिनोकला मेख्‍येल्‍शी।
JAM 1:17 ल्‍यामु वोतुप ताङ काङ साङ ङ्‍युङ्‍मु मेतुप कटिनकी ङ्‍येम्‍बातिवा तेरी पपा कोन्‍छ्‍योक नेमा गिवी। खोकी वोसिर तेरी ज्‍येनी नाङ्‍सुङ। खो ति नाम्‍साङ मोफोवी, तमा उलाकी नक्‍तोमी फोवु दोके मोफोवी।
JAM 1:18 तमा खोकी ज्‍येवु च्‍यालकतिवी नाङ्‍ला दाक्‍पु ति थल्‍माला गरुप डुप्‍सेन दोके जोपला खोकी टेङ्‍बु वोतुप सुङ नेमा खोकी नोवा नेसुर दाक्‍पुला जो नङ्‍गुप यिन।
JAM 1:19 ङे ङ्‍यिङ्‍ज्‍येवु अच्‍युनुपतिवा, दी ताम्‍ङे ति हाक्‍कोवा किसा। ख्‍यिराङ टिम्‍बु क्‍यानी ङ्‍येन्‍दुप ताङ फिमु क्‍यानी ताम्‍ङे लपुप ताङ टिम्‍बु ङ्‍यिर्मु मिकिवु वुङ गोकिवी।
JAM 1:20 च्‍यिलासिसिन मी ङ्‍यिर्मुकी जोसालेन्‍सिन कोन्‍छ्‍योककी टेङ्‍बुकी थोक्‍ला लाका कि मुथुपी।
JAM 1:21 तुक क्‍यानी तेरी लाका मेटेङ्‍बु ताङ दुक्‍टा कितुप क्‍युर। तमा कुसु ज्‍यम्‍बु क्‍यानी ख्‍यिरा सेमला ज्‍यकुप कोन्‍छ्‍योककी सुङला मिजी क्‍योङ। ती कोन्‍छ्‍योककी सुङगी राङ ख्‍यिरा मिजी ति र्‍होक थुप्‍किवी।
JAM 1:22 ख्‍यिराङ कोन्‍छ्‍योककी सुङला ङ्‍येन्‍दुप तिराङ क्‍यानी रङला जिनोकला मेख्‍येल्‍शी, यिने खोकी सुङला यु।
JAM 1:23 चुका मी तीकी सुङ ङ्‍येन्‍नी साङ ती सुङला सुङ्‍गुप दोके मिजी मोक्‍योङ वे, ती मी ति गेलुङ नाङ्‍ला खोरो ङुतुङ ल्‍हाप मी दोके यिन।
JAM 1:24 तीकी खोरो ङुतुङ गेलुङ नाङ्‍ला ल्‍हासिमा शार्क्येक डिवी, तमा खुरुङ चुकै वे सिरुप ति टोक ज्‍येकिवी।
JAM 1:25 यिने चुका मी तीकी रङ्‍ज्‍येन नङ्‍गुप कोन्‍छ्‍योककी ठिम टेङ्‍बुला ङ्‍येन्‍नी नरी युकुप ताङ ती सुङला ङ्‍याम किवे, ती मी ति सुङ ङ्‍येन्‍नी टोक ज्‍येतुप मिन, सुङला सिक्‍यावु दोके मिजी क्‍योङ्‍गिवी। तमा कोन्‍छ्‍योककी सुङला युवु तप्‍की तीला मोलाम थोप्‍किवी।
JAM 1:26 दोजो सी ङ कोन्‍छ्‍योककी थोङ्‍दाङला टेङ्‍बु वे सिनी सिवी, यिने खोरो ख ति डेकला मोज्‍योकिवी सिसिन तीकी खोरो राङ खुरुङला जिनोकला ख्‍येलुप यिन। तमा तीकी कोन्‍छ्‍योककी थोङ्‍दाङला क्‍यावु टेङ्‍बुकी लाका ति तेर्मे यिन।
JAM 1:27 पपा कोन्‍छ्‍योककी थोङ्‍दाङला टेङ्‍बु वोतुप ताङ क्‍येन मेतुप किताङ नालु ति तप्‍रुक ताङ युक्‍सिमतिवाला कतुकारला ख्‍येलुप पेला ल्‍हटे कितुप ताङ दी जम्‍बुलिङकी दुक्‍टा नेसुर खुरुङला राङ कुतुक ज्‍योकुप यिन।
JAM 2:1 ङे ङ्‍यिङ्‍ज्‍येवु अच्‍युनुपतिवा, ख्‍यिराङ मोवा वोतुप दाक्‍पी चोवो येशू ख्रीष्‍टला तेपा कितुप मीतिवा यिन्‍दुप तप्‍की मी सुला साङ ख्‍ये बेतुप लाका माकी।
JAM 2:2 दोजो मी ललाइ सेरकी सोर्तुकतिवा तानी मज्‍या ल्‍यामु कोन्‍नी ख्‍यिराङ जोम्‍बुप दासाला वासुङ, तमा यम्‍बा मी पेराङ्‍बु यी साङ मज्‍या सेर्पा कोन्‍नी तेराङ वासुङ सिसिन,
JAM 2:3 ती मज्‍या ल्‍यामु कोन्‍दुप मी तीला ताङ्‍देन क्‍यानी “दे दासा ल्‍यामुला जोल्‍हमो क्‍यानी ज्‍यु!” सिनी सिवी, यिने ती मी पेराङ्‍बु मज्‍या सेर्पा कोन्‍नी वावु तीला ति “ख्‍युरुङ ते राङ लानी दे, याङ्‍ना ङे काङ्‍बी चाला दे!” सिनी सिवी सिसिन,
JAM 2:4 ख्‍यिराङ मीला ख्‍ये बेतुप ताङ सेम मेलोक्‍पा क्‍यानी मीला ठिम कितुप मीतिवा यिन।
JAM 2:5 तुक क्‍यानी ङे ङ्‍यिङ्‍ज्‍येवु अच्‍युनुपतिवा, दी ताम्‍ङे ङ्‍येना। जम्‍बुलिङला वोतुप पेराङ्‍बुतिवाला कोन्‍छ्‍योककी पेनी तिवी क्‍यावु तेपाला छ्‍युक्‍पु जोनी खोला ङ्‍यिङ्‍ज्‍ये कितुपतिवाला तेरिन सिनी खोकी थाक्‍छ्‍येन नङ्‍गुप ग्‍येल्‍खापला दे छ्‍योवु जो मनङ्‍गिवी रो?
JAM 2:6 यिने ख्‍यिरा याङ पेराङ्‍बुतिवाला ङ्‍यिङ्‍मर क्‍यासुङ। काङ मी छ्‍युक्‍पुतिवी ख्‍यिराङला ओङ्‍ज्‍येन क्‍यानी दुक्‍पा मेतेर्वी रो? काङ तिवी ख्‍यिराङला ठिम्‍खाङला टिनी मोक्‍योल्‍वी रो?
JAM 2:7 काङ तिवी ख्‍यिरा तेपा क्‍यावु चोवो येशू ख्रीष्‍टला साङ मारे तङ्‍गुप मिन रो?
JAM 2:8 कोन्‍छ्‍योककी सुङला साङ “खोरो युल्‍वातिवाला रङला दोके ङ्‍यिङ्‍ज्‍ये की।” सिनी टि वे। वुतुङ के ख्‍यिरा ती कोन्‍छ्‍योककी सुङला वोतुप खक्‍छ्‍येवु कला ङ्‍येन्‍सुङ सिसिन ख्‍यिरा ल्‍यामु राङ क्‍यावु यिन।
JAM 2:9 यिने ख्‍यिरा मीला ख्‍ये बेतुप लाका क्‍यासुङ सिसिन ख्‍यिराङ कोन्‍छ्‍योककी नङ्‍गुप ठिमला मेङ्‍येन्‍दुप ताङ दिक्‍पा क्‍यावु यिन।
JAM 2:10 ललाइ मीतिवी कोन्‍छ्‍योककी नङ्‍गुप ठिमला सिक्‍यावु दोके तेरी किवी, यिने ती ठिमकी नाङ्‍ला वोतुप ताम्‍ङे च्‍यिक ति मेङ्‍येन्‍दिवी सिसिन तीकी ती ठिम तेरी माङ्‍येन्‍दुप यिन।
JAM 2:11 च्‍यिलासिसिन “शम्‍डेन माकी।” सिरुप च्‍यिक राङ वोतुप कोन्‍छ्‍योककी “मी मासे।” सिनी साङ सुङ वे। दोजो मी च्‍यिककी शम्‍डेन ति मिकिवी, यिने मी सेकिवी सिसिन, ती मी तीकी कोन्‍छ्‍योककी नङ्‍गुप ठिमला मातेन्‍दुप यिन।
JAM 2:12 ख्‍यिराङला रङ्‍ज्‍येन नङ्‍गुप कोन्‍छ्‍योककी ठिमला सुङ्‍गुप दोके ख्‍यिरा ताम्‍ङे लप्‍ताङ ताङ किताङ नालु ल्‍यामु की। मिसियाङ ती ठिमकी ख्‍यिराङला पर्च्या तोङ्‍गिवी।
JAM 2:13 च्‍यिलासिसिन कोन्‍छ्‍योककी ठिम क्‍या नङ्‍गुप पेला मीला च्‍यम्‍बा मिकिवु तीला खोकी साङ च्‍यम्‍बा माक्‍यानी ठिम क्‍या नङ्‍गिवी, यिने च्‍यम्‍बा क्‍यावु मी ति खोकी ठिम कितुप पेला ग्‍येल्‍गिवी।
JAM 2:14 ङे ङ्‍यिङ्‍ज्‍येवु अच्‍युनुपतिवा, दोजो मी ललाइकी “ङ येशूला तेपा किवी।” सिनी सिवी, यिने तेपा क्‍यावु दोके लाका ति मिकिवी सिसिन, तीला काङ ख्‍येप्‍साङ गिवी रो? काङ तीकी क्‍यावु तेपाकी तीला र्‍होक थुप्‍किवी रो?
JAM 2:15 दोजो ललाइ नुप रे नुम रे मज्‍या सेर्पा कोन्‍दुप वे, तमा तिवाला ङ्‍यिमी टेङकी साप समा साङ मलाङ्‍गुप वे सिसिन,
JAM 2:16 ख्‍यिरा पर्ला ललाइकी तीला “लोदिमु क्‍यानी ग्‍युक, मज्‍या टेन्‍बु कोन्‍नी दे, तमा डाता सेक क्‍यानी समा सो।” सिनी सिवी, यिने तीला गोवु च्‍यालकतिवा मेतेर्वी सिसिन तीला काङ ख्‍येप्‍साङ वे रो?
JAM 2:17 ती दोके येशूला तेपा क्‍यासिमा साङ तेपा क्‍यावु दोके लाका ति मिकिवी सिसिन, ती तेपा ति काङ साङ फेन मोथोवु डिवी।
JAM 2:18 यिने दोजो मी ललाइकी “ख्‍युरुङला तेपा वे, ङला ति किताङ नालु ल्‍यामु वे। ख्‍योरो किताङ नालु मेतुप तेपा ति ङला छ्‍या तेन! तमा ङे क्‍यावु किताङ नालु नेमा ङे तेपा ति ख्‍युरुङला छ्‍या देनिन।” सिनी सिवी।
JAM 2:19 कोन्‍छ्‍योक च्‍यिक राङ वे सिनी ख्‍यिरा सिवी, ती ताम्‍ङे ति ल्‍यामु यिन। डेतिवी साङ तुकै राङ सिवी, यिने तिवा ज्‍यिवा लानी र्‍हुकिवी।
JAM 2:20 ओ अम्‍बारङ्‍शिङतिवा, लाका मेतुप तेपा ति तेर्मे यिन सिरुप ति ख्‍यिराङ हाक्‍कोवु नोकिवी?
JAM 2:21 दाक्‍पी हङ्‍गावा अब्राहामकी खोरो पुज्‍युङ इसहाक ति कोन्‍छ्‍योककी थोक्‍ला जिन्‍बा पुल्‍सिमा ती ति खोकी थोङ्‍दाङला टेङ्‍बु च्‍युङ्‍गुप मिन रो?
JAM 2:22 ख्‍युरुङला छ्‍या वे, अब्राहामकी तेपा तिराङ क्‍यानी मिन, यिने तेपा क्‍यावु दोके लाका साङ क्‍यावु तप्‍की तीकी तेपा क्‍यावु ति टेङ्‍बु च्‍युङ्‍सुङ।
JAM 2:23 कोन्‍छ्‍योककी सुङला “अब्राहामकी कोन्‍छ्‍योकला तेपा क्‍यावु तप्‍की खोकी अब्राहामला टेङ्‍बु वोतुप यिन सिनी चिसुङ।” सिनी टि वोतुप सुङ ति तेरी छेसुङ। तमा मीतिवी अब्राहाम ति कोन्‍छ्‍योककी दाल्‍जा यिनोक सिनी सिक्‍यासुङ।
JAM 2:24 तुक क्‍यानी ख्‍यिरा हाक्‍कोकिवी, तेपा तिराङ क्‍यानी मिन, यिने तेपा क्‍यावु दोके लाका क्‍यासिमा तिराङ मी ति कोन्‍छ्‍योककी थोङ्‍दाङला टेङ्‍बु च्‍युङ्‍गिवी।
JAM 2:25 पुम्‍पेजा छ्‍येमु राहाबकी साङ च च्‍येतुपला तङ्‍गुप इस्राएलकी मीतिवाला गासो शुनी पिशोर च्‍यितुप तप्‍की तीकी क्‍यावु लाका नेमा राङ ती ति कोन्‍छ्‍योककी थोङ्‍दाङला टेङ्‍बु च्‍युङ्‍गुप मिन रो?
JAM 2:26 तुक क्‍यानी उ मेतुप जु ती शेप दोके, लाका मेतुप तेपा साङ शेप यिन।
JAM 3:1 ङे ङ्‍यिङ्‍ज्‍येवु अच्‍युनुपतिवा, ख्‍यिरा पर्ला माङ्‍शोक गेकेन च्‍युङ्‍गुप नो माकी, च्‍यिलासिसिन येन्‍देन तेरुप गेकेनतिवाला कोन्‍छ्‍योककी मङ छासे क्‍यानी पर्च्या तोङ्‍गिवी।
JAM 3:2 दाक्‍पु तेरीकी च्‍यिक मे च्‍यिक याङ मेलोवा क्‍यावु राङ गिवी। चुका मी तीकी खोरो ख डेकला ज्‍योकिवे, तीकी खोरो जुला साङ डेकला ज्‍योकिवी। तमा ती ति मी टेङ्‍बु च्‍युङ्‍गिवी।
JAM 3:3 ततिवाला ओङला ज्‍योकुपला खला खम्‍देर ग्‍यप्‍सिन, कनिवा डोयी दे लङ्‍गिवे, तेवा राङ टिनी डो थुप्‍किवी।
JAM 3:4 टुतिवाला ल्हो, तिवा वुर्तुक ग्‍येर्पु ग्‍यप्‍सिनाङ टु फार ताङ छुर क्‍योकुप पतवार टिक्‍पे यी थ्‍वोनी टु ग्‍येर्पु तोङ्‍गुप मी तीकी कनिवा ताङ्‍नी डोयी दे लङ्‍गिवे, तेवा राङ डिवी।
JAM 3:5 ती दोके दाक्‍पी च्‍येलाक साङ टिक्‍पे यिन्‍सिनाङ अम्‍बारङ्‍शिङ कितुप ताम्‍ङे ग्‍येर्पु ग्‍येर्पु थेन्‍गिवी। मे मेवुर टिक्‍पे यीकी साङ नाठुङ ग्‍येर्पु ग्‍येर्पुतिवा पुसुकी जेवी।
JAM 3:6 दाक्‍पी च्‍येलाक साङ मे दोके यिन। ती ति जुला वोतुप येन्‍लकतिवी नाङ्‍ला दिक्‍पा कि ज्‍यितुप दुक्‍टा दोके राङ यिन। दीकी जोसालेन्‍सिन दाक्‍पी तेरी मिजीला मेलोवा जेवी, तमा तेरी मिजी ति ङ्‍येलाकी नाम्‍साङ मिशिवु मे नाङ्‍ला क्‍योल्‍गिवी।
JAM 3:7 नम्‍बा तेरीकी सेम्‍ज्‍येन ताङ च्‍यच्‍युम ताङ जु टिनी युकुप सेम्‍ज्‍येन ताङ ग्‍येम्‍छोकी सेम्‍ज्‍येनतिवा ति मीतिवी दुल्‍गिवी,
JAM 3:8 यिने दाक्‍पी च्‍येलाकला सी साङ डेकला ज्‍योक मुथुपी। दीकी नरी ताम्‍ङे मेलोवा तिराङ क्‍यावु ति क्‍यातोक किवी। तमा दीकी दाक्‍पुला तुक सोवु दोके क्‍यानी ङ्‍येलाला क्‍यल्‍नी शि ज्‍यिकिवी।
JAM 3:9 दी दाक्‍पी च्‍येलाककी राङ दाक्‍पी पपा कोन्‍छ्‍योकला सोवा साङ देकिवी, खोकी जुजमला जो नङ्‍गुप मीतिवाला मोताप साङ देप्‍किवी।
JAM 3:10 दाक्‍पी ख च्‍यिक नेमा राङ मीला मोलाम साङ थोप्‍किवी, मोताप साङ देप्‍किवी। ङे ङ्‍यिङ्‍ज्‍येवु अच्‍युनुपतिवा, ख्‍यिराङ ति तुक कितुप मेङ्‍गिवी।
JAM 3:11 काङ छ्‍यु दोलुप छ्‍यी पुङ च्‍यिक नेमा छ्‍यु शिम्‍बु ताङ छ्‍यु खक्‍ती थेन्‍गिवी रो?
JAM 3:12 ङे ङ्‍यिङ्‍ज्‍येवु अच्‍युनुपतिवा, काङ अन्‍जीरकी दोङ्‍बुला जैतुन, याङ्‍ना गुन्‍डुम दोङ्‍बुला अन्‍जीर गोर्किवी रो?। ती दोके क्‍यानी छ्‍यु छेटोक दोलुप छ्‍यी पुङ नेमा छ्‍यु शिम्‍बु थेन मुथुपी।
JAM 3:13 ख्‍यिरा पर्ला रिक्‍पा ताङ येन्‍देन वोतुप मी सु वे? तीकी खोरो किताङ नालु ल्‍यामु नेसुर खुरुङला वोतुप रिक्‍पा ताङ येन्‍देन छ्‍या तेन। ती किताङ नालु ति कुसु ज्‍यम्‍बु ताङ रिक्‍पा नेसुर वुङ गोकिवी।
JAM 3:14 यिने दोजो ख्‍यिरा सेमला ठतोक कितुप ताङ खुरुङला तिराङ नासाम तोङ्‍गिवी सिसिन, छासे रिक्‍पा वे सिनी तुका ताम्‍ङेला हम्‍बा माकी, यिने ताम्‍ङे टेङ्‍बु तिराङ की।
JAM 3:15 च्‍यिलासिसिन तुका परकी रिक्‍पा ति कोन्‍छ्‍योक नेमा वावु रिक्‍पा मिन, दी जम्‍बुलिङ ताङ मी नासाम मेलोक्‍पा नेसुर ताङ डेकी ओङ नेमा वावु रिक्‍पा यिन।
JAM 3:16 कनी ठतोक कितुप ताङ खुरुङला तिराङ च्‍युङ्‍शी सिरुप सेम नोके, ते खाँदा शोरुप ताङ तेरी परकी लाका दुक्‍टातिवा गिवी।
JAM 3:17 यिने देवाच्‍येन नेमा वावु रिक्‍पा ति गोमाला टेङ्‍बु वोतुप ताङ तिङ्‍ला लोदिमु वोतुप ताङ सेम बोल्‍मु ताङ मी यम्‍बी सिक्‍यावु ताम्‍ङेला ङ्‍येन्‍दुप ताङ च्‍यम्‍बा वोतुप ताङ डेलु ल्‍यामु गरुप दोङ्‍बु दोके मिजी ल्‍यामु क्‍योङ्‍गुप गिवी। यम्‍बा देवाच्‍येन नेमा वावु रिक्‍पा ति ललाइला ल्‍यामु ललाइला मेलोवा मिकिवु ताङ खोनक्‍पा मेतुप गिवी।
JAM 3:18 तमा नरी मीतिवाला डिङ तेरुप छोलुप मीतिवाला ज्‍युक्‍ला कोन्‍छ्‍योककी थोङ्‍दाङला टेङ्‍बु वोतुप च्‍युङ्‍गिवी।
JAM 4:1 ख्‍यिरा पर्ला कङगी तेन्‍दोकला खाँदा ताङ थमु शोर्किवी? ती ति ख्‍यिरा पर्ला रङगी थोक्‍ला तिराङ च्‍युङ्‍शी सिनी सेमला थमु ग्‍यकुप नासाम नरी वोतुप तप्‍की यिन।
JAM 4:2 ख्‍यिराङ ख्‍यिरा सेमला नो क्‍यावु च्‍यालकतिवा थोप्‍शी सिरुप याङ नो किवी, यिने मेङ्‍येवी। ख्‍यिराङ ख्‍यिरा नो क्‍यावु च्‍यालकतिवा थोपुपला मी सेतुप ताङ देर्पा क्‍यासिनाङ, खाँदा ताङ थमु ग्‍यप्‍सिनाङ ख्‍यिराङला काङ साङ मेङ्‍येवी। च्‍यिलासिसिन ख्‍यिराङ कोन्‍छ्‍योकला मोलोङ्‍गिवी।
JAM 4:3 ख्‍यिरा कोन्‍छ्‍योकला लोङ्‍गुप याङ लोङ्‍गिवी, यिने मेङ्‍येवी। च्‍यिलासिसिन ख्‍यिराङ खोरुङला तिराङ गा ताङ किर्मु जोप नासाम मेलोवा ताङ्‍नी लोङ्‍गिवी।
JAM 4:4 ओ शम्‍डेन कितुप टेङ, कोन्‍छ्‍योकला तेपा क्‍यानी साङ जम्‍बुलिङला गा कितुप ति कोन्‍छ्‍योक ताङ मुला डला गलुप यिन सिरुप ति ख्‍यिराङला छ्‍या मे? सु दी जम्‍बुलिङला गा किवे, ती ति कोन्‍छ्‍योक ताङ मुला डला गलुप यिन।
JAM 4:5 कोन्‍छ्‍योककी दाक्‍पुला नङ्‍गुप थु चाङ्‍माकी दाक्‍पुला छासे गा लानी ङ्‍यिङ्‍ज्‍ये किवी सिनी कोन्‍छ्‍योककी सुङला टिवु ति तेर्मे यिन सिनी ख्‍यिराङ नासाम तोङ्‍गिवी?
JAM 4:6 यिने खोकी दाक्‍पुला छासेकी कटिन नङ्‍गिवी। ती तप्‍की कोन्‍छ्‍योककी सुङला दुक सिनी टि वे, “अम्‍बारङ्‍शिङ कितुपतिवाला कोन्‍छ्‍योक गा मालङ्‍गिवी, यिने सेम बोल्‍मु वोतुपतिवाला कटिन नङ्‍गिवी।”
JAM 4:7 तुक क्‍यानी रङगी मिजी ति कोन्‍छ्‍योककी ओङला ज्‍योक, तमा शैतानकी तेन्‍दोकला लो। तुक क्‍यासिन ती शैतान ति ख्‍यिरा नेसुर टोनी डिवी।
JAM 4:8 तमा ख्‍यिराङ कोन्‍छ्‍योककी चिप्‍ला ग्‍युक, तुक क्‍यासिन खो ख्‍यिरा चिप्‍ला फेप्‍किवी। ओ दिक्‍छेनतिवा, ख्‍यिराङ दिक्‍पा कितुप क्‍युर। ओ सेम नटेकोटे वोतुप टेङ, ख्‍यिराङ सेम टेङ्‍बु क्‍यानी यु।
JAM 4:9 ख्‍यिरा क्‍यावु दिक्‍पाकी थोक्‍ला पप की, तमा दुङल क्‍यानी ङु। ख्‍यिराङ गोटे कितुप क्‍युर ज्‍याक्‍नी पप की। लोदिमु कितुप क्‍युर ज्‍याक्‍नी दुङल की।
JAM 4:10 ख्‍युरुङ कोन्‍छ्‍योककी थोङ्‍दाङला कुसु ज्‍यम्‍बु क्‍यानी मिजी क्‍योङ, तमा खोकी ख्‍युरुङला छ्‍ये जो नङ्‍गिवी।
JAM 4:11 ओ अच्‍युनुपतिवा, ख्‍यिराङ च्‍यिक ताङ च्‍यिककी तेन्‍दोकला ताम्‍ङे मेलोवा माकी। सी खोरो नुपकी तेन्‍दोकला ताम्‍ङे मेलोवा क्‍यानी क्‍येन तेर्किवे, तीकी कोन्‍छ्‍योककी नङ्‍गुप ठिमकी तेन्‍दोकला ताम्‍ङे मेलोवा कितुप ताङ क्‍येन तेरुप यिन। ख्‍यिरा ठिमकी तेन्‍दोकला क्‍येन बिन्‍सिन कोन्‍छ्‍योककी ठिमला सुङ्‍गुप दोके मिजी क्‍योङ्‍गुप मिन, ठिमकी तेन्‍दोकला क्‍येन बिन्‍दुप यिन।
JAM 4:12 ठिम नङ्‍गुप ताङ ठिम कितुप ति मिरा च्‍यिक राङ वे। खोकी र्‍होकुप साङ थुप्‍किवी, ना साङ तोङ थुप्‍किवी। तुक क्‍यानी रङगी युल्‍वातिवाला क्‍येन तेरुप ति ख्‍युरुङ सु यिन?
JAM 4:13 ख्‍यिराङ दी ताम्‍ङे ति ङ्‍येना, “हारिङ याङ्‍ना सला दाक्‍पु ग्‍येसा यीला गल्‍नी लो खोर्मा यी देनी छोङ क्‍यानी टोङ्‍बा शोम्‍बुप्‍नो” सिनी सिरुप मीतिवा!
JAM 4:14 यिने ख्‍यिरा मिजीला सला काङ ख्‍येल्‍गिवी सिरुप ति ख्‍यिराङला छ्‍या मे। ख्‍यिरा मिजी याङ काङ यिन रो? ख्‍यिरा मिजी याङ उकुर च्‍यिक मिककी थोङ्‍गुप ताङ तोक तोर्नी डोप मुसिल दोके यिन।
JAM 4:15 ख्‍यिरा तुक सिरुप छोलेयाङ बोरु “कोन्‍छ्‍योककी नोवा वोसिन, दाक्‍पु सेन्‍बु देनी दुकै कितुप तुकै कितुप।” सिनी सि गोकिवी।
JAM 4:16 यिने तन्‍दा ख्‍यिराङ रङगी मिजीकी थोक्‍ला नो क्‍यावु ताम्‍ङेला छासे तेके किवी। तुका लाका ति दुक्‍टा यिन।
JAM 4:17 ती तप्‍की चुका मी तीकी लाका ल्‍यामु कि गोकिवी सिरुप छ्‍या वोसिनाङ मिकिवी सिसिन, तीकी दिक्‍पा क्‍यावु यिन।
JAM 5:1 मी छ्‍युक्‍पुतिवा, दी ताम्‍ङे ति ङ्‍येना, ख्‍यिराङला ख्‍येल वुङ्‍गुप छेटाङतिवा नासाम तङ्‍नी ङु। तमा छासे ङुप्‍राङ की।
JAM 5:2 च्‍यिलासिसिन ख्‍यिरा टोङ्‍बा ति च्‍यम सिन वे, ख्‍यिरा कोन्‍दुप मज्‍यातिवाला मुक्‍पा ग्‍यप्‍नी वे।
JAM 5:3 ख्‍यिरा सेर ताङ ङुलला या छ्‍यान वे, तमा ती या ति ख्‍यिरा थोक्‍ला पङ्‍बु डिवी। तीकी ख्‍यिरा जु ति मे छिकुप दोके क्‍यानी ना तोङ्‍गितो। च्‍यिलासिसिन ख्‍यिराङ जम्‍बुलिङ ना डोप तुजे वुङ्‍गुप छल्‍सिनाङ रङगी थोक्‍ला टोङ्‍बा सकुप लाका तिराङ क्‍यासुङ।
JAM 5:4 ल्‍होसा, ख्‍यिरा रङगी शिङ खला लाका कितुपतिवाला तेर गोवु लतिवा माबिन वे। ती तप्‍की तिवा ख्‍योरो तेन्‍दोकला ङुप्‍राङ कियी वे। तिवी ङुप्‍राङ क्‍यावु ति ओङ छ्‍येन्‍बु कोन्‍छ्‍योककी सेन्‍नी वे।
JAM 5:5 ख्‍यिराङ दी जम्‍बुलिङला गा ताङ किर्मु क्‍यानी किकी तोङ्‍यिन सिरा मिजी क्‍योङ्‍यिन वे। तुक क्‍यानी ख्‍यिराङ सेतुप पेला लेप्‍सिनाङ खोरो मिजी तिराङ नासाम तङ्‍नी ग्‍यामु जो ज्‍याक्‍नी वे।
JAM 5:6 ख्‍यिरा काङ साङ क्‍येन मेतुप मीतिवाला क्‍येन बिन्‍नी तिवाला सेसुङ, यिने तिवी ख्‍यिराङला लाक्‍पा मालोक।
JAM 5:7 ती तप्‍की अच्‍युनुपतिवा, ख्‍यिराङ ति चोवो येशू फेवु तुजे माछेवा सेक्‍ला हम क्‍यानी दे। ल्‍होसा, सप्‍ले कितुप मीकी सशिङकी गोङ नावु डुप्‍सेनला ल्‍येशी नोनी येर्वी छ्‍यर्वा ग्‍यक्‍ता सेक ताङ गुन्‍बी छ्‍यर्वा ग्‍यक्‍ता सेक हम क्‍यानी गु देकिवी।
JAM 5:8 ती दोके क्‍यानी ख्‍यिराङ सेम थिला ज्‍याक्‍नी चोवो फेवु तुजेकी थोक्‍ला हम क्‍यानी गुनी देता, च्‍यिलासिसिन चोवो ङमु राङ फेप्‍कितो।
JAM 5:9 ती तप्‍की अच्‍युनुपतिवा, ख्‍यिराङ च्‍यिककी च्‍यिकला ङ्‍योशोक ङ्‍योशोक मासिर। मिसियाङ ख्‍यिराङ कोन्‍छ्‍योककी पर्च्याला ख्‍येल्‍गितो। ल्‍होसा, ख्‍यिराङला ठिम कितुप चोवो ति गे चाला राङ वोतो।
JAM 5:10 अच्‍युनुपतिवा, कोन्‍छ्‍योककी मिङला नम्‍दर शेतुप लुङ्‍तेम्‍बातिवाला ल्हो। तिवा चुक क्‍यानी छेटाङ खुरुप ताङ हम क्‍यान देतुप ति नासाम ताङ्‍नी ख्‍यिराङ साङ तिवी दोके क्‍यानी लुमु से।
JAM 5:11 ल्‍होसा, हम क्‍या देतुपतिवा मोलाम वोतुप यिनो। अय्‍यूबकी चुक क्‍यानी हम क्‍यानी देसुङ, तमा तिङ्‍ला कोन्‍छ्‍योककी तीला मोलाम नाङ्‍सुङ सिरुप ताम्‍ङे साङ ख्‍यिरा हाक्‍को वे। तमा चोवो कोन्‍छ्‍योक ति ङ्‍यिङ्‍ज्‍ये ताङ च्‍यम्‍बा नङ्‍गुप यिन सिरुप साङ हाक्‍को वे।
JAM 5:12 अच्‍युनुपतिवा, खक्‍छ्‍येवु ताम्‍ङे ति काङ यिन सिसिन, ख्‍यिरा पर्ला ताम्‍ङे थाक्‍छ्‍येतुप पेला नाम्‍साङ न माक्‍योल। देवाच्‍येन ताङ जम्‍बुलिङकी थोक्‍ला याङ्‍ना चुका च्‍यालककी थोक्‍ला साङ न माक्‍योल। चुका ताम्‍ङे साङ यिन्‍सिन यिन सी, मिन्‍सिन मिन सी। तुक क्‍यासिन कोन्‍छ्‍योककी ख्‍यिराङला पर्च्या मोतोङ्‍गिवी।
JAM 5:13 ख्‍यिरा पर्ला ललाइकी छेटाङ खुरिन वोसिन तीकी कोन्‍छ्‍योकला मोपोर किशी। ललाइला सेम गा लान वोसिन तीकी कोन्‍छ्‍योकला सोवा देकुप लुतिवा लङ्‍शी।
JAM 5:14 ख्‍यिरा पर्ला ललाइ नेर्पु वोसिन तीकी चर्चला गोमा कितुप मी छ्‍येतिवाला कताङ्‍नी चोवो येशूकी मिङला नुम्‍शाल ग्‍यप्‍नी तीकी थोक्‍ला मोपोर किशी।
JAM 5:15 तेपा क्‍यानी मोपोर क्‍यासिन नेर्पु टेकिवी, तमा कोन्‍छ्‍योककी ती नेर्पुला येर लोङ्‍गिवी। तीकी दिक्‍पा क्‍या वोसिनाङ तीकी क्‍यावु दिक्‍पा ति माफ ङ्‍येकिवी।
JAM 5:16 ती तप्‍की ख्‍यिराङ च्‍यिककी च्‍यिकला ङे दिक्‍पा क्‍यावु यिन सिनी सेम ग्‍युर, तमा च्‍यिककी च्‍यिकला मोपोर की। तुक क्‍यासिन चोवोकी ख्‍यिराङला टेक ज्‍यिकिवी। च्‍यिलासिसिन कोन्‍छ्‍योककी थोङ्‍दाङला टेङ्‍बु वोतुप मीतिवी क्‍यावु मोपोर ति ङार छ्‍येवु गिवी।
JAM 5:17 कोन्‍छ्‍योककी लुङ्‍तेम्‍बा एलिया साङ दाक्‍पु दोके किताङ नालु वोतुप मी राङ यिन, यिने तीकी छ्‍यर्वा मग्‍यक्‍शी सिनी कोन्‍छ्‍योकला मोपोर क्‍यासुङ, तमा लो सुम ताङ ल टुक सेक जम्‍बुलिङला छ्‍यर्वा छ्‍येसुङ।
JAM 5:18 येलुङ तीकी छ्‍यर्वा ग्‍यक्‍शी सिनी कोन्‍छ्‍योकला मोपोर क्‍यासुङ, तमा छ्‍यर्वा ग्‍यप्‍नी सशिङ खला छासे सप्‍ले ल्‍यासुङ।
JAM 5:19 अच्‍युनुपतिवा, ख्‍यिरा पर्ला ललाइकी कोन्‍छ्‍योककी सुङला युकुप क्‍युर्नी ज्‍याक्‍सिन तीला येलुङ लोक्‍नी टि शोक।
JAM 5:20 दी ताम्‍ङे ति हाक्‍कोवा की, दोजो ललाइकी दिक्‍छेन मिरा च्‍यिकला लाम मेटेङ्‍बुला युकुप नेसुर लोक्‍नी टि वासुङ सिसिन, ती दिक्‍छेन तीला शेप ने र्‍होकिवी, तमा तीकी क्‍यावु दिक्‍पातिवा साङ माफ ङ्‍येकिवी।
1PE 1:1 टसी देलेक! ङ येशूकी लोमा छ्‍ये पत्रुसकी छ्‍योक नेसुर पोन्‍टस ताङ गलातिया ताङ कापाडोकिया ताङ एशिया ताङ बिथिनिया लुङ्‍बातिवा नेवा थरा थुरा गल्‍नी छ्‍यिग्‍यपकी मी दोके टम देतुप कोन्‍छ्‍योककी पेन नङ्‍गुप मीतिवाला दी यिकी ति टिवु यिनो।
1PE 1:2 पपा कोन्‍छ्‍योककी थल्‍माला ख्‍यिराङला ल्‍यामो हाक्‍कोनी पेन नङ्‍सुङ, तमा खोकी थु चाङ्‍मा नेसुर ख्‍यिराङ चाङ्‍मा च्‍युङ्‍सुङ। तुक क्‍यानी ख्‍यिरा येशू ख्रीष्‍टकी सुङला ङ्‍येन्‍नी तेपा क्‍यासिमा खोकी ठक नेसुर चाङ्‍मा च्‍युङ्‍सुङ। ख्‍यिराङ तेरीला कोन्‍छ्‍योककी कटिन ताङ लोदिमु वुङ्‍शी।
1PE 1:3 दाक्‍पी चोवो येशू ख्रीष्‍टकी पपा कोन्‍छ्‍योकला सोवा देकिन। च्‍यिलासिसिन खोकी येशू ख्रीष्‍टला शेप ने ङोसु लाङ्‍नी खोकी खोरे छासेकी कटिन नेमा दाक्‍पुला मिजी सम्‍बा नाङ्‍सुङ। तमा दाक्‍पु शिसिनाङ सेन्‍बु लुवु रेवा ङ्‍येन वे।
1PE 1:4 ती तिराङ मिन, कोन्‍छ्‍योककी खोरे पेन नङ्‍गुप मीतिवाला थोपुप मोलाम साङ नाङ्‍सुङ। ती मोलाम ति ना मोडोवु ताङ मेटेङ्‍बु मोडोवु ताङ नाम्‍साङ मेसेतुप यिन, तमा ती मोलाम ति दाक्‍पुला खोकी ग्‍येल्‍खापला टडिक क्‍यानी वे।
1PE 1:5 ख्‍यिरा कोन्‍छ्‍योकला तेपा क्‍यावु तप्‍की खोकी ख्‍यिराङला थर्वा नङ्‍गुप पर सेक खोकी ङार नेसुर ख्‍यिराङला र्‍होक्‍नी वे। ती थर्वा ति खोकी मी तेरीला ठिम क्‍या नङ्‍गुपला फेवु पेला खोकी ख्‍यिराङला छ्‍या देन्दुपला टडिक क्‍या वे।
1PE 1:6 तुक क्‍यानी तन्‍दा ख्‍यिराङ चेयी पर सेक रङगी मिजीला छेटाङ बङी वानी सेमला दुक्‍पा वोसिनाङ गा कि गोकिवी।
1PE 1:7 ती छेटाङ ति ख्‍यिरा तेपा टेङ्‍बु वोतुप छ्‍या देन्‍दुपला यिन। ख्‍यिरा क्‍यावु तेपा ति सेर मे नाङ्‍ला र्‍हेनी ङोमा जोवु सिनाङ छासे खक्‍छ्‍येवु वोतुप तप्‍की येशू ख्रीष्‍ट फेपुप तुजेला ख्‍यिराङला खोकी ग्‍येल्‍खापला सोवा ताङ मोवा ताङ ताङ्‍देन क्‍या नङ्‍गिवी।
1PE 1:8 ख्‍यिरा खोला नाम्‍साङ माथोङ्‍सिनाङ खोला ङ्‍यिङ्‍ज्‍ये किवी, तन्‍दा ख्‍यिरा खोला माथोङ्‍सिनाङ ख्‍यिरा खोला तेपा किवी, तमा ख्‍यिराङला नाम्‍साङ ताम्‍ङे क्‍या मिसिन्‍दुप गा ताङ किर्मु गिवी।
1PE 1:9 च्‍यिलासिसिन ख्‍यिरा खोला तेपा क्‍यावु तप्‍की खोकी ख्‍यिराङला दिक्‍पा ने थर च्‍यिनी नाम्‍साङ मिशिवु मिजी नङ्‍गिवी।
1PE 1:10 ती थर्वाकी थोक्‍ला कोन्‍छ्‍योककी लुङ्‍तेम्‍बातिवी साङ ल्‍यामो क्‍यानी हाक्‍कोवु छाल्‍सुङ। तमा तिवी कोन्‍छ्‍योककी ख्‍यिराङला थर्वा नङ्‍गुप कटिनकी कोर्ला नम्‍दर शेसुङ।
1PE 1:11 तिवी ती थर्वा ति नम पेला गिवी, चुक क्‍यानी गिवी सिनी हाक्‍कोवु छाल्‍सुङ। तमा तिवी सेमला वोतुप ख्रीष्‍टकी थु चाङ्‍मा नेसुर ख्रीष्‍टकी खुर गोवु छेटाङ ताङ ती ज्‍युक्‍ला वुङ्‍गुप मोवाकी थोक्‍ला गोमाला के पङ्‍बु छ्‍या तेन्‍सुङ।
1PE 1:12 कोन्‍छ्‍योककी लुङ्‍तेम्‍बातिवी नम्‍दर शेतुप ताम्‍ङे ति खोप्‍रे थोक्‍ला मिन, यिने ख्‍यिरा थोक्‍ला यिन। दी ताम्‍ङे ति देवाच्‍येन नेमा तङ्‍गुप कोन्‍छ्‍योककी थु चाङ्‍मा नेमा ख्‍यिराङला लेन ल्‍यामु ख्‍याप्‍टाक कितुपतिवी तसाम ख्‍यिराङला सिक्‍यावु यिन। ती ताम्‍ङे ति देवाच्‍येनकी लेन क्‍योलुप थुतिवी साङ छासे ल्‍हाप गा किवी।
1PE 1:13 तुक क्‍यानी रङगी सेम ति थिला ज्‍याक्‍नी डेकला दे। तमा येशू ख्रीष्‍ट फेवु पेला खोकी ख्‍यिराङला नङ्‍गुप कटिन थोपुपला ख्‍यिराङ रेवा की।
1PE 1:14 ख्‍यिराङ कोन्‍छ्‍योककी कला ङ्‍येन्‍दुप खोकी पुज्‍युङपुमतिवा यिन्‍दुप तप्‍की गोमाला कोन्‍छ्‍योकला ङो माशेवु पेला क्‍यावु दोके सेम नोजु कितुप क्‍युर।
1PE 1:15 यिने ख्‍यिराङला कताङ नङ्‍गुप चोवो कोन्‍छ्‍योक टेङ्‍बु वोतुप दोके ख्‍यिराङ साङ ख्‍यिरा मिजीला वोतुप तेरी किताङ नालुतिवा टेङ्‍बु वुङ गोकिवी।
1PE 1:16 च्‍यिलासिसिन कोन्‍छ्‍योककी सुङला “ङ टेङ्‍बु वोतुप दोके ख्‍यिराङ साङ टेङ्‍बु वुङ गोकिवी।” सिनी टि वे।
1PE 1:17 तमा सुला साङ ख्‍ये मापेवा क्‍यानी मीतिवी क्‍यावु लाका ल्हानी ठिम क्‍या नङ्‍गुप कोन्‍छ्‍योक ति ख्‍यिरा पपा सिनी सिक्‍यावु तप्‍की दी जम्‍बुलिङला देतुप पर सेक नरी खोला ज्‍यिवा खुर्नी मिजी क्‍योङ।
1PE 1:18 ख्‍यिराङला छ्‍या वे, ख्‍यिरा पगावा हङ्‍गावातिवा नेसुर वावु तेर्मेकी किताङ नालुतिवा नेसुर ख्‍यिराङ रङ्‍ज्‍येन थोप्‍सुङ। ती ति ना डोप सेर ताङ ङुलतिवा दोके गोङ तेनी ख्‍यिराङला थोपुप मिन,
1PE 1:19 यिने काङ साङ मडी मेतुप ताङ चाङ्‍मा वोतुप लुक रुक येशू ख्रीष्‍टकी गोङ छ्‍येर्मु ठक नेसुर गोङ तेनी ख्‍यिराङला थोपुप यिन।
1PE 1:20 कोन्‍छ्‍योककी दाक्‍पुला रङ्‍ज्‍येन नङ्‍गुपला जम्‍बुलिङ ज्‍येङ्‍गुप सिनाङ गोमाला के येशू ख्रीष्‍टला पेन नङ्‍गुप यिन, यिने तिङ्‍मी तुजेला ख्‍यिरा थोक्‍ला येशू ख्रीष्‍टला दी जम्‍बुलिङला तङ नङ्‍गुप यिन।
1PE 1:21 खो नेसुर ख्‍यिरा कोन्‍छ्‍योकला तेपा क्‍या वे। कोन्‍छ्‍योककी येशूला टुङ्‍नी शेपतिवा नेसुर ङोसु लङ च्‍यिनी मोवा नाङ्‍सुङ। तुक क्‍यानी ख्‍यिरा तेपा ताङ रेवा ति कोन्‍छ्‍योकला ज्‍याक्‍नी वे।
1PE 1:22 त ख्‍यिराङ खोकी सुङ टेङ्‍बुला युनी ख्‍यिरा मिजी ति टेङ्‍बु च्‍युङ्‍गुप तप्‍की रङगी अच्‍युनुपतिवाला खोनक्‍पा माक्‍यानी ङ्‍यिङ्‍ज्‍ये कियी वे, तरोङ साङ सेमगी दिङ नेज्‍यु च्‍यिककी च्‍यिकला छासे ङ्‍यिङ्‍ज्‍ये की।
1PE 1:23 ख्‍यिराङ ति ङोसु वोतुप ताङ नरी लुवु कोन्‍छ्‍योककी सुङ नेसुर मिजी सम्‍बा ङ्‍येतुप यिनो। खोकी सुङ ति ना डोप मिन, यिने नाम्‍साङ ना मोडोवु यिन।
1PE 1:24 तुक क्‍यानी कोन्‍छ्‍योककी सुङला दुक सिनी टि वे, “तेरी मीतिवा च दोके यिन, मीतिवा चोछ्‍ये वोसिनाङ तिवा ति चे मेन्‍दोक दोके यिन। च रेर्पा गल्‍सिमा मेन्‍दोक ङ्‍यिल्‍गिवी,
1PE 1:25 यिने कोन्‍छ्‍योककी सुङ ति नरीकी नरी लुकिवी।” ख्‍यिराङला ख्‍याप्‍टाक क्‍यावु सुङ ति दी राङ यिनो।
1PE 2:1 तुक क्‍यानी ख्‍यिराङ लाका दुक्‍टा कितुप ताङ जिनोक जोप ताङ खोनक्‍पु कितुप ताङ ठतोक ङर्केल कितुप ताङ मीला मारे तोङ्‍गुप ताम्‍ङे तेरी क्‍युर।
1PE 2:2 ख्‍यिरा कोन्‍छ्‍योक च्‍यङ्‍च्‍यु सेम्‍बा वे सिरुप ति हाक्‍कोसुङ सिसिन मलोक क्‍येवु आङातिवा वोमा छलुप दोके ख्‍यिराङ टेङ्‍बु ताङ चाङ्‍मा वोतुप कोन्‍छ्‍योककी सुङला युकुप छासे नो की। तुक क्‍यासिन ख्‍यिराङला मङ मङ दिक्‍पा ने थर्वा ङ्‍येकिवी।
1PE 2:4 ख्‍यिराङ चोवो येशूकी चिप्‍ला शोक। खो ति खाङ्‍बा जोप मीतिवी फेन मोथोवु यिन सिनी तेन्‍नी क्‍युरुप दो यिन, यिन्‍सिनाङ कोन्‍छ्‍योककी ती दो ति पेनी मीतिवी थोक्‍ला मिजी नङ्‍गुप गोङ छ्‍येन्‍बु वोतुप दो जो नाङ्‍सुङ।
1PE 2:5 ख्‍यिराङ साङ कोन्‍छ्‍योककी मिजी नङ्‍गुप दो दोके यिन। खोकी ती दोतिवा दुम्‍नी खोरे थु चाङ्‍माकी ल्‍हङाङ जो नङ्‍गिवी। तुक क्‍यानी ख्‍यिराङ ति येशू ख्रीष्‍ट नेसुर सेम टेङ्‍बु क्‍यानी कोन्‍छ्‍योकला गा लङ्‍गुप जिन्‍बा बुलुप चाङ्‍मा वोतुप कोङ्‍यारतिवा यिनो।
1PE 2:6 च्‍यिलासिसिन कोन्‍छ्‍योककी सुङला दुक सिनी टि वे, “ल्‍होसा, ङ सियोनला ङे पेतुप गोङ नावु सुरकी दो दोके यिन्‍दुप मिरा च्‍यिक ज्‍योकिनो। सी खोला तेपा किवे, तिवा नाम्‍साङ ङोछाला मेख्‍येल्‍वी।”
1PE 2:7 तुक क्‍यानी ख्‍यिराङ सी खोला तेपा किवे, तीकी थोक्‍ला खो गोङ नावु वे, यिने तेपा मिकिवुतिवी थोक्‍ला ति कोन्‍छ्‍योककी सुङला साङ दुक सिनी टि वे, “ती दो ति खाङ्‍बा जोप मीतिवी फेन मोथोवु सिनी क्‍युर वे, यिन्‍सिनाङ ती ति सुरकी दो च्‍युङ्‍गिवी।”
1PE 2:8 तमा यम्‍बा सुङला दुक सिनी टि वे, “दो च्‍यिककी मीतिवाला नर्तुक ग्‍यक ज्‍यिकिवी, तमा टक च्‍यिककी मीतिवाला तला ग्‍यक ज्‍यिकिवी।” ती दोके क्‍यानी मीतिवा तला ग्‍यकिवी, च्‍यिलासिसिन तिवी कोन्‍छ्‍योककी सुङ माङ्‍येन्‍दुप तप्‍की यिन। तिवी थोक्‍ला तुकै च्‍युङ्‍गुप ति कोन्‍छ्‍योककी गोमाला राङ सुङ्‍गुप सुङगी मुला डिकिवी।
1PE 2:9 यिने ख्‍यिराङ याङ तुकै मिन, ख्‍यिराङ ति कोन्‍छ्‍योककी पेन नङ्‍गुप गिपा ताङ खोकी ग्‍येल्‍खापकी कोङ्‍यार ताङ टेङ्‍बु वोतुप मिरिक ताङ कोन्‍छ्‍योककी खोरे मीतिवा यिन। खोकी ख्‍यिराङला नक्‍तोमी ने थेन्‍नी खोकी हलेवु वोसिरला टिन फेप्‍सुङ। तुक क्‍यानी ख्‍यिरा खोकी हलेवु लाकातिवा मी यम्‍बाला ख्‍याप्‍टाक कि थुप्‍शी।
1PE 2:10 गोमाला ख्‍यिराङ सी गिपा साङ मिनोक, यिने त याङ ख्‍यिराङ खोकी गिपा च्‍युङ वे। गोमाला याङ ख्‍यिराङला खोकी च्‍यम्‍बा माथोप वे, यिने त याङ ख्‍यिराङला खोकी च्‍यम्‍बा थोप्‍नी वे।
1PE 2:11 तुक क्‍यानी ङ्‍यिङ्‍ज्‍येवु अच्‍युनुपतिवा, ङ ख्‍यिराङला गोङ्‍बा शोयी। दी जम्‍बुलिङला दाक्‍पु ति ङ्‍यिमा चेयी पर सेक तिराङ देतुप छ्‍यिग्‍यपकी मी ताङ टम्‍नी देतुप मी दोके यिन सिरुप हाक्‍कोनी ख्‍यिरा सेमगी तेन्‍दोकला लङ्‍गुप जुकी नासाम दुक्‍टा नेसुर कुतुक दे।
1PE 2:12 यिने मिरिक यम्‍बाकी मीतिवी पर्ला ख्‍यिरा किताङ नालु ति ल्‍यामु वुङ गोकिवी। सी ख्‍यिराङला मेलोवा सिनी ख्‍यिरा तेन्‍दोकला लासिनाङ ख्‍यिरा लाका ल्‍यामु क्‍यावु ति थोङ्‍नी कोन्‍छ्‍योक फेवु तुजेला तिवी साङ खोला सोवा देक्‍शी।
1PE 2:13 ख्‍यिराङ तेपा कितुप मी यिन्‍दुप तप्‍की चोछ्‍येवु ग्‍येल्‍वु यिन्‍शी, ग्‍येल्‍वी ओङला देनी लुङ्‍बाला ग्‍येला कितुप मी छ्‍येतिवा यिन्‍शी, चोवो कोन्‍छ्‍योककी थोक्‍ला जम्‍बुलिङला वोतुप तेरी ओङ्‍ज्‍येन कितुपतिवी ओङला दे।
1PE 2:14 ती मी छ्‍येतिवा ति लाका दुक्‍टा कितुपतिवाला छ्‍येर्पा तेरुपला ताङ लाका ल्‍यामु कितुपतिवाला ताङ्‍देन कितुपला ग्‍येल्‍वुकी पेतुप मीतिवा यिन।
1PE 2:15 च्‍यिलासिसिन कोन्‍छ्‍योककी नोवा ति ख्‍यिरा लाका ल्‍यामु क्‍यानी ख्‍यिरा तेन्‍दोकला लानी ताम्‍ङे मेलोवा कितुप मी अम्‍बारङ्‍शिङतिवाला खरक्‍पा देतुप जोप यिन।
1PE 2:16 ख्‍यिराङ ति दिक्‍पी ओङ नेमा रङ्‍ज्‍येन थोप्‍नी वे, तुक क्‍यानी रङ्‍ज्‍येन वोतुप मीतिवा दोके मिजी क्‍योङ। रङ्‍ज्‍येन थोपुप तप्‍की ख्‍यिराङ ति काङ लाका मेलोवा क्‍यासिनाङ गिवी सिनी नासाम मातोङ, यिने कोन्‍छ्‍योकला शब्‍ज्‍यी कितुप योक्‍पु दोके च्‍युङ्‍नी मिजी क्‍योङ।
1PE 2:17 मी तेरीला ताङ्‍देन की, तेपा कितुप अच्‍युनुपतिवाला ङ्‍यिङ्‍ज्‍ये की, कोन्‍छ्‍योककी थोक्‍ला ज्‍यिवा की, चोछ्‍येवु ग्‍येल्‍वुला ताङ्‍देन की।
1PE 2:18 ख्‍यिराङ योक्‍पुतिवा यिन्‍सिन, रङगी ज्‍यिन्‍दाकतिवाला ताङ्‍देन क्‍यानी तिवी ओङला दे। ख्‍यिराङला ल्‍यामु कितुप ताङ च्‍यङ्‍च्‍यु कितुप ज्‍यिन्‍दाकतिवाला तिराङ मिन, यिने ख्‍यिराङला दुक्‍टा कितुप ज्‍यिन्‍दाकतिवी ओङला साङ दे।
1PE 2:19 चुका मी तीकी खोरो काङ लाका मेलोवा माक्‍यासिनाङ ज्‍यिन्‍दाककी छेटाङ बिन्‍दुप पेला कोन्‍छ्‍योकला नासाम ताङ्‍नी हम क्‍या देकिवे, ती मी तीला कोन्‍छ्‍योककी गा किवी।
1PE 2:20 दोजो ख्‍यिरा लाका दुक्‍टा क्‍यावु तप्‍की ख्‍यिराङला मी दुसिनाङ हम क्‍यानी देसिन ख्‍येप्‍साङ गिवी सिसिन, ख्‍यिरा लाका ल्‍यामु क्‍यानी दुक्‍पा खुरुप पेला हम क्‍या देकिवी सिसिन कोन्‍छ्‍योककी ख्‍यिराङला गा किवी।
1PE 2:21 च्‍यिलासिसिन खोकी ख्‍यिराङला तीकी थोक्‍ला कताङ नङ्‍गुप यिन। ख्रीष्‍टकी साङ छेटाङ खुर्नी ख्‍यिरा थोक्‍ला पङ्‍बु च्‍युङ्‍सुङ। ती तप्‍की ख्‍यिराङ साङ खोकी क्‍या नङ्‍गुप दोके क्‍यानी मिजी क्‍योङ गोकिवी।
1PE 2:22 खोकी काङ साङ दिक्‍पा माक्‍या, खोकी ख नेमा जिनोक जोप ताम्‍ङे साङ माथेन।
1PE 2:23 मीतिवी खोला मारे तोङ्‍गुप पेला खोकी तिवाला छ्‍याक मालोक। दुक्‍पा तेरुप पेला तिवाला काङ ताम्‍ङे मेलोवा मासुङ। यिने तुजे छेसिमा कोन्‍छ्‍योककी राङ ठिम टेङ्‍बु क्‍या नङ्‍गिवी सिनी खोला रेवा क्‍यासुङ।
1PE 2:24 तमा दाक्‍पी दिक्‍पातिवा तेरी क्‍युर्नी कोन्‍छ्‍योककी थोङ्‍दाङला टेङ्‍बु वोतुप मिजी क्‍योङ्‍शी सिनी दाक्‍पी दिक्‍पा खोकी जुला खुर्नी ग्‍यङ्‍शिङला टुङ्‍सुङ। खोकी जुला म थेन्‍दुप तप्‍की ख्‍यिरा नेजु टेक्‍सुङ।
1PE 2:25 च्‍यिलासिसिन तोङ्‍ला ख्‍यिराङ ख्‍यम्‍नी गलुप लुकतिवा दोके यिन, यिने त याङ ख्‍यिरा सेम ल्‍हाटे कितुप गोठाला दोके यिन्‍दुप ताङ ख्‍यिराङला र्‍होकुप येशू ख्रीष्‍टकी ते ख्‍यिराङ लोक्‍नी वा वे।
1PE 3:1 तुक राङ क्‍यानी पेर्मीतिवा रङगी ख्‍योवी ओङला दे। तुक क्‍यासिन कोन्‍छ्‍योककी सुङला मेङ्‍येन्‍दुप ख्‍योवा साङ पेर्मीकी किताङ नालु ल्‍यामु वोतुप थोङ्‍सिमा कोन्‍छ्‍योककी कोर्ला काङ मालाप्‍सिनाङ ख्‍योवी सेम साङ कोन्‍छ्‍योककी थाकाला ग्‍युर्किवी।
1PE 3:2 च्‍यिलासिसिन ख्‍यिरा मिजी टेङ्‍बु वोतुप ताङ ख्‍यिरा तिवाला ताङ्‍देन क्‍यावु ति तिवी थोङ्‍गिवी।
1PE 3:3 तुक क्‍यानी ख्‍यिराङ र्‍ह शेनी सेरकी क्‍येङ्‍येन तानी मज्‍या ल्‍यामु कोन्‍नी फिला तिराङ छ्‍यावु दोके जेमु जोप मिन,
1PE 3:4 यिने ख्‍यिरा सेमगी दिङ्‍ला ति नाम्‍साङ मोफोवु कुसु ज्‍यम्‍बु ताङ हम क्‍या देतुप च्‍युङ्‍नी मज्‍या ल्‍यामु कोन्‍नी छ्‍यावु दोके जेमु जो। ती ति कोन्‍छ्‍योककी थोङ्‍दाङला छासे गोङ नावु वे।
1PE 3:5 च्‍यिलासिसिन तोङ्‍ला कोन्‍छ्‍योकला रेवा कितुप आम्‍पुम टेङ्‍बुतिवी साङ तुक राङ क्‍यानी खोरो ख्‍योवी ओङला देसुङ।
1PE 3:6 साराकी साङ खोरो ख्‍योवा अब्राहामला चोवो सिनी ख्‍योवी सिक्‍यावु ताम्‍ङेला ङ्‍येन्‍सुङ। दोजो ख्‍यिरा साङ तुक राङ क्‍यानी काङगी थोक्‍ला साङ ज्‍यिवा माक्‍यानी लाका टेङ्‍बु तिराङ क्‍यासिन ख्‍यिराङ साङ सारा दोके यिनो।
1PE 3:7 तुक राङ क्‍यानी ख्‍योवातिवी साङ रङगी पेर्मी ति रम्‍बु मेतुप यिन सिमाक्‍यानी तिवाला ताङ्‍देन क्‍यानी मुला राङ मिजी क्‍योङ, च्‍यिलासिसिन ख्‍योवा ताङ पेर्मी ति कोन्‍छ्‍योककी कटिन नङ्‍गुप मिजी मुला राङ क्‍योङ्‍गुपला जो नङ्‍गुप यिन। तुक क्‍यासिन ख्‍यिराङ मोपोर कितुप पेला ख्‍यिराङला कले मेङ्‍शी।
1PE 3:8 तेरी सिनाङ तिङ्‍ला ङ काङ सिरिन सिसिन, ख्‍यिराङ सेम च्‍यिक्‍पा राङ च्‍युङ्‍गुप ताङ च्‍यिककी च्‍यिकला दुक्‍पाला ख्‍येलुप पेला ङाडेङ तेरुप ताङ ङ्‍यिङ्‍ज्‍ये कितुप ताङ च्‍यम्‍बा कितुप ताङ छ्‍येजु मिकिवु वुङ गोकिवी।
1PE 3:9 ख्‍यिराङला मेलोक्‍पा कितुपतिवाला मेलोक्‍पा माकी, याङ्‍ना मारे तोङ्‍गुपतिवाला ङ्‍येन मालाङ, यिने तिवाला मोलाम बिन। च्‍यिलासिसिन तीकी थोक्‍ला राङ कोन्‍छ्‍योककी ख्‍यिराङला पेन नङ्‍गुप यिन। तुक क्‍यासिन खोकी ख्‍यिराङला मोलाम नङ्‍गिवी।
1PE 3:10 च्‍यिलासिसिन कोन्‍छ्‍योककी सुङला दुक सिनी टि वे, “चुका मी तीकी रङगी मिजीला गा कितुप ताङ लोदिमु छोलुप नोकिवे, तीकी खोरो ख नेमा ताम्‍ङे मेलोक्‍पा मलाप्‍शी, तमा जिनोक जोप ताम्‍ङे साङ मिकिशी,
1PE 3:11 तमा मेलोक्‍पा कितुप नेसुर लोक्‍नी लाका ल्‍यामु किशी, तमा लोदिमु छल्‍नी ती लोदिमुकी तिङ्‍ला तिङ्‍योक्‍शी।
1PE 3:12 च्‍यिलासिसिन चोवोकी सुङला युकुपतिवाला खोकी शाल जिकिवी, तमा तिवी क्‍यावु मोपोर साङ ङ्‍येन्‍गिवी। यिने कोन्‍छ्‍योककी सुङला मुयुकुपतिवाला ति खोकी शाल मिजिवी।”
1PE 3:13 दोजो ख्‍यिरा मीतिवी थोक्‍ला लाका ल्‍यामु कितुपला छासे नो क्‍यासिन सी ख्‍यिराङला मेलोक्‍पा किवी रो?
1PE 3:14 यिने ख्‍यिराङ लाका टेङ्‍बुकी थोक्‍ला दुक्‍पा खुर्सुङ सिसिन ख्‍यिराङला मोलाम थोपुप यिनो। मीतिवी ख्‍यिराङला ज्‍यिवा कुसिन ख्‍यिराङ ज्‍यिवा माकी, यर्मिन मर्मिन साङ माडो।
1PE 3:15 यिने येशू ख्रीष्‍टला चोवो सिनी सेमगी दिङ नेज्‍यु मोवा की। तमा ख्‍यिरा क्‍यावु रेवाकी कोर्ला ललाइकी ख्‍यिराङला टिसिन तीकी टिलेन तेरुपला नरी टडिक क्‍यानी दे। यिने ख्‍यिराङ कुसु ज्‍यम्‍बु कितुप ताङ ताङ्‍देन क्‍यानी किसा।
1PE 3:16 तमा ख्‍यिराङ सेम टेङ्‍बु क्‍यानी दे, तुक क्‍यासिन ख्‍यिरा ख्रीष्‍टला ताङ्‍देन क्‍यानी क्‍यावु लाकाकी तेन्‍दोकला लङ्‍गुपतिवा तिवी क्‍यावु लाका मेलोवाकी थोक्‍ला ङोछा लङ्‍शी।
1PE 3:17 दोजो कोन्‍छ्‍योककी नोवा तुकै राङ यिन्‍सिन लाका मेलोक्‍पा क्‍यानी दुक्‍पा खुरुप सिनाङ लाका ल्‍यामु क्‍यावु तप्‍की दुक्‍पा खुरुप ति मङ ल्‍यामु यिन।
1PE 3:18 च्‍यिलासिसिन चोवो येशू ख्रीष्‍ट साङ दिक्‍पातिवी तेन्‍दोकला थेङ्‍मा च्‍यिक टुङ्‍सुङ, खो दिक्‍पा मेसिनाङ मेटेङ्‍बुतिवाला कोन्‍छ्‍योककी मुला तम्‍जी ल्‍यामु जोपला टुङ्‍गुप यिन। खोकी जु ति टुङ सिनाङ खोकी थु ति कोन्‍छ्‍योककी ङोसु लाङ्‍सुङ।
1PE 3:19 खोकी थु ति ङ्‍येलाला शोरुप नम्‍शिङतिवाला फेप्‍नी कोन्‍छ्‍योककी सुङ ख्‍याप्‍टाक क्‍या नाङ्‍सुङ।
1PE 3:20 ती नम्‍शिङतिवी थल्‍माला नोआकी टु जोप पेला कोन्‍छ्‍योककी कला माङ्‍येन, यिन्‍सिनाङ कोन्‍छ्‍योककी तिवी थोक्‍ला हम क्‍यानी गुसुङ। तमा ती टी नाङ्‍ला शुवु मी मिरा ग्‍ये तिराङ छ्‍यु नेसुर र्‍होक्‍सुङ।
1PE 3:21 ती छ्‍यु ति तन्‍दा ख्‍यिराङला साङ र्‍होकुप बप्‍तिस्‍माकी थोक्‍ला गोमाला के छ्‍या तेन्‍दुप त यिन। ती बप्‍तिस्‍मा ति जुकी टेमा शलुप मिन, यिने ख्‍यिरा सेम टेङ्‍बुकी कोन्‍छ्‍योक ताङ मुला थाक्‍छ्‍येतुप त यिन। च्‍यिलासिसिन कोन्‍छ्‍योककी येशू ख्रीष्‍टला टुङ्‍गुप नेसुर ङोसु लाङ्‍नी ख्‍यिराङला शेप ने थर च्‍यिसुङ।
1PE 3:22 खो देवाच्‍येनला फेप्‍सुङ, तमा देवाच्‍येनकी लेन क्‍योलुप थुतिवा ताङ ओङ्‍ज्‍येन कितुपतिवा ताङ ङारतिवाला खोरे ओङला ज्‍याक्‍नी खो ति कोन्‍छ्‍योककी यावी थाकाला वोतुप ठीला ज्‍युसुङ।
1PE 4:1 चुक क्‍यानी ख्रीष्‍टकी खोरे जुला दुक्‍पा खुर नाङ्‍सुङ, ख्‍यिरा साङ खोकी दोके क्‍यानी दुक्‍पा खुरुपला टडिक क्‍यानी दे। च्‍यिलासिसिन सी ख्रीष्‍टकी थोक्‍ला जुला दुक्‍पा खुर्किवे, तीकी दिक्‍पा कितुप क्‍युर्किवी।
1PE 4:2 तमा तीकी खोरो मिजी वोता सेक दुक्‍टा कितुप नोवाला मिन, यिने कोन्‍छ्‍योककी नोवाला मिजी क्‍योङ्‍गिवी।
1PE 4:3 तोङ्‍ला याङ ख्‍यिराङ साङ यहूदी मिन्‍दुप मिरिक यम्‍बाकी मीतिवा दोके दुक्‍टा कितुप ताङ नासाम मेलोक्‍पा तोङ्‍गुप ताङ छ्‍याङ्‍गेले कितुप ताङ ङ्‍याम तोङ्‍गुप ताङ सज्‍युरे कितुप ताङ कुतिवाला तेन्‍नी ङोछा लङ्‍गुप लाका क्‍यानी बङी लाताक च्‍यक्‍सुङ।
1PE 4:4 यिने त याङ ख्‍यिराङ तुका सेम नोजु कितुप लाका ति तिवी मुला च्‍यिक्‍पा राङ क्‍यानी मिकिवु ल्‍हानी कोन्‍छ्‍योकला ङो मेशेवु मीतिवा हलेवा लानी ख्‍यिराङला मारे तोङ्‍गिवी।
1PE 4:5 यिने सेन्‍बु वोतुप ताङ शेपतिवाला ठिम क्‍या नङ्‍गुप कोन्‍छ्‍योकला तिवी क्‍यावु लाकाकी ची ति तिवी ते राङ गोकिवी।
1PE 4:6 ती तप्‍की शेपतिवाला साङ लेन ल्‍यामु ख्‍याप्‍टाक क्‍यावु यिन। तुक क्‍यानी तिवा दी जम्‍बुलिङला देतुप पेला तिवी क्‍यावु लाकाकी थोक्‍ला ठिम फोक्‍सिनाङ नम्‍शिङ ति कोन्‍छ्‍योक ताङ मुला देकिवी।
1PE 4:7 दी जम्‍बुलिङकी तिङ्‍मी तुजे वुङ्‍यिन वे। तुक क्‍यानी ख्‍यिराङ मोपोर ल्‍यामु कितुपला सेम थिला ज्‍याक्‍नी च्‍याङ्‍से देता।
1PE 4:8 ख्‍यिराङ तेरी सिनाङ मङ च्‍यिककी च्‍यिकला नरी ङ्‍यिङ्‍ज्‍ये की। च्‍यिलासिसिन ङ्‍यिङ्‍ज्‍येकी राङ दिक्‍पातिवा बङी ताकिवी।
1PE 4:9 ख्‍यिराङ ख्‍यिरा खाङ्‍बाला वुङ्‍गुप डेन्‍बुतिवाला मुक्‍तम मातेन्‍नी च्‍यिककी च्‍यिकला ताङ्‍देन किसा।
1PE 4:10 ख्‍यिराङ सुला कोन्‍छ्‍योक नेमा मीतिवाला शब्‍ज्‍यी कितुपला ओङ थोप्‍वे, ती ओङ थोपुप दोके क्‍यानी च्‍यिककी च्‍यिकला शब्‍ज्‍यी की।
1PE 4:11 सी कोन्‍छ्‍योककी सुङ ख्‍याप्‍टाक किवे, तीकी कोन्‍छ्‍योक नेमा थोपुप ओङ नेसुर राङ ख्‍याप्‍टाक की। सी शब्‍ज्‍यी किवे, तीकी कोन्‍छ्‍योक नेमा वावु ओङ नेमा शब्‍ज्‍यी की। तमा ख्‍यिरा क्‍यावु तेरी लाका नेसुर येशू ख्रीष्‍टकी छ्‍योक ने कोन्‍छ्‍योकला सोवा वुङ्‍शी। तमा तेरी मोवा ताङ ओङ ति नाम्‍साङ मोतोरुप तुजे सेक कोन्‍छ्‍योकला वुङ्‍शी, आमिन।
1PE 4:12 ङ्‍यिङ्‍ज्‍येवु अच्‍युनुपतिवा, ख्‍यिराङला तेपा रम्‍बु जोपला छासे खोक्‍पा ल्‍हाप छेटाङतिवा ख्‍येलुप पेला ख्‍यिराङ मिच्‍यिक्‍पा च्‍युङ्‍सुङ सिनी हलेवा माकी,
1PE 4:13 यिने ख्‍यिराङ ख्रीष्‍टकी थोक्‍ला छेटाङ खुरुपतिवा यिन्‍दुप तप्‍की ती पेला गा की। तुक क्‍यासिन खोकी मोवा छ्‍या देन्‍दुप पेला ख्‍यिराङला मङ लोदिमु ताङ गा लङ्‍गिवी।
1PE 4:14 दोजो ख्रीष्‍टला तेपा क्‍यावु तप्‍की मीतिवी ख्‍यिराङला ङ्‍यिङ्‍मर क्‍यासिन ख्‍यिराङला मोलाम थोपुप यिनो, च्‍यिलासिसिन कोन्‍छ्‍योककी मोवा वोतुप थु चाङ्‍मा ति ख्‍यिरा मुला ज्‍यु वे।
1PE 4:15 यिने ख्‍यिराङ सु साङ मी सेतुप ताङ कुन कितुप ताङ दुक्‍टा कितुप ताङ मी यम्‍बी लाकाला लाक्‍पा ग्‍यप्‍नी छेटाङ माखुर।
1PE 4:16 यिन्‍सिनाङ ख्‍यिराङ येशूला तेपा क्‍यावु तप्‍की दुक्‍पा खुर्किवी सिसिन ख्‍यिराङ ङोछा माकी, यिने कोन्‍छ्‍योकला राङ सोवा तेक।
1PE 4:17 च्‍यिलासिसिन कोन्‍छ्‍योककी खोरे मीतिवाला ठिम क्‍या नङ्‍गुप तुजे गो जुवु पेला लेप्‍नी वे। खोकी सुङला ङ्‍येन्‍दुपतिवाला साङ खोकी ठिम क्‍या नङ्‍गिवी सिसिन खोकी सुङला तेपा मिकिवुतिवाला याङ चुका पर्च्या मङ्‍मु के फोकिताङ?
1PE 4:18 तमा कोन्‍छ्‍योककी सुङला साङ दुक सिनी टि वे, “दोजो कोन्‍छ्‍योककी सुङला युकुप मीतिवाला साङ दिक्‍पा ने थरुपला कले वोसिन टेङ्‍बु मेतुपतिवाला याङ चुकै के डि ताङ?”
1PE 4:19 तुक क्‍यानी कोन्‍छ्‍योककी नोवाला वोतुप दोके दुक्‍पा खुरुप मीतिवी लाका ल्‍यामु क्‍यानी खोप्‍रे सेम ति खोङ्‍तेर्मु वोतुप कोन्‍छ्‍योकला चेक ते गोकिवी।
1PE 5:1 तमा ख्‍यिराङ चर्चकी मीतिवी पर्ला गोमा कितुपतिवाला ङ गोङ्‍बा शोयी। ङ साङ चर्चकी गोमा कितुप मी यिन, तमा ख्रीष्‍टकी छेटाङ खुरुप थोक्‍ला साङ पङ्‍बु तेरुप मी यिन। ज्‍युक्‍ला ख्रीष्‍टकी मोवा छ्‍या देन्‍दुप पेला ख्‍यिरा मुला राङ ङला साङ ती मोवा ति थोप्‍किवी।
1PE 5:2 ख्‍यिराङला चेक तेन ज्‍यकुप कोन्‍छ्‍योककी पेतुप मीतिवाला लुक गोठालाकी लुकतिवाला ल्‍हावु दोके क्‍यानी ल्‍यामु ल्‍हटे किसा। कर्खापला ख्‍येल्‍नी कितुप मिन, यिने कोन्‍छ्‍योककी नोवा यिन सिनी सेम्‍बा सेमगी किसा। टङ्‍गा डेवी देर्पाला ख्‍येल्‍नी मिन, यिने गा क्‍यानी किसा।
1PE 5:3 ख्‍यिराङला चेक तेन ज्‍यकुप मीतिवाला ओङ्‍ज्‍येन क्‍यानी मिन, यिने ख्‍यिरा मिजी ति तिवी थोक्‍ला पङ्‍बु च्‍युङ गोकितो।
1PE 5:4 तमा लुक गोठाला छ्‍ये दोके यिन्‍दुप ख्रीष्‍ट फेपुप पेला ख्‍यिराङला नाम्‍साङ मेसेतुप मोवा वोतुप ग्‍येल्‍वुकी उशाक थोप्‍कितो।
1PE 5:5 तमा नाज्‍युङतिवा, गावागुवातिवी ओङला देता। च्‍यिक ताङ च्‍यिककी ओङला देनी छ्‍येजु मिकिवु वुङ गोकितो। च्‍यिलासिसिन “छ्‍येजु कितुप मीतिवाला कोन्‍छ्‍योककी गा मलाङ्‍गिवी, यिने छ्‍येजु मिकिवु मीतिवाला खोकी कटिन नङ्‍गिवी।” सिनी कोन्‍छ्‍योककी सुङला साङ टि वे।
1PE 5:6 ती तप्‍की चोछ्‍येवु कोन्‍छ्‍योककी ओङला देनी खुरुङ छ्‍येजु मिकिवु वुङ गोकिवी। तमा खोकी नोक्‍यावु तुजेला ख्‍यिराङला छ्‍ये जो नङ्‍गिवी।
1PE 5:7 ख्‍यिराङला चुका पपतिवा वोसिनाङ खोला चेक ते, तमा खोकी ख्‍यिराङला ल्‍हटे क्‍या नङ्‍गिवी।
1PE 5:8 च्‍याङ्‍से देता, ङ्‍यी मालोक्‍नी देता! च्‍यिलासिसिन ख्‍यिरा ड शैतान ति सुला थेप्‍किवे, तीला साप सिनी वोरुप सेङ्‍गी दोके वोरिन वोतो।
1PE 5:9 तुक क्‍यानी ख्‍यिराङ तेपा रम्‍बु क्‍यानी तीकी तेन्‍दोकला लोसा, च्‍यिलासिसिन जम्‍बुलिङ तेरीला वोतुप ख्‍यिरा अच्‍युनुपतिवी साङ तुकै राङ छेटाङ खुरिन वोतो।
1PE 5:10 कोन्‍छ्‍योक ति ख्‍यिराङला तेरी कटिन नङ्‍गुप कोन्‍छ्‍योक यिन। खोकी येशू ख्रीष्‍ट ताङ मुला नाम्‍साङ ना मोडोवु मोवाला ख्‍यिराङला कताङ नङ वे। तमा चेयी पर सेक ति ख्‍यिरा छेटाङ खुर्सिनाङ खोकी ख्‍यिरा क्‍यावु दुक्‍पा नेसुर ख्‍यिराङला छ्‍ये जो नङ्‍गिवी। तमा ख्‍यिराङला फार छुर मोयोम्‍बुप ताङ ङार छ्‍येवु जोनी ख्‍यिरा तेपा ति डम्‍ज्‍यी रम्‍बु तिङ्‍गुप दोके जो नङ्‍गिवी।
1PE 5:11 खोला राङ ओङ ताङ ङार ति नरीकी नरी वुङ्‍शी। आमिन।
1PE 5:12 दी यिकी ति खोङ्‍तेर्मु वोतुप ङे नुप सिलासला टिक च्‍यितुप यिनो। दी यिकी ति ख्‍यिराङला टोङ्‍गु तेरुपला ताङ कोन्‍छ्‍योककी कटिन टेङ्‍बु ति दी राङ यिन सिनी पङ्‍बु तेरुपला टिवु यिनो। तुक क्‍यानी ख्‍यिराङ दी कटिनला ल्‍यामो क्‍यानी देता।
1PE 5:13 बेबिलोनकी चर्चला वोतुप कोन्‍छ्‍योककी पेन नङ्‍गुप तेपा कितुपतिवा ताङ ङे पुज्‍युङ दोके राङ यिन्‍दुप मर्कूसकी साङ ख्‍यिराङला टसी देलेक सिनी ताङ वोतो।
1PE 5:14 ख्‍यिराङ च्‍यिककी च्‍यिकला ङ्‍यिङ्‍ज्‍ये क्‍यानी टसी देलेक सिसा। ख्रीष्‍ट येशूला तेपा कितुपतिवा तेरीला लोदिमु वुङ्‍शी।
2PE 1:1 येशू ख्रीष्‍टकी थोक्‍ला शब्‍ज्‍यी कितुप लोमा छ्‍ये ङ सिमोन पत्रुसकी छ्‍योक नेमा टसी देलेक! दी यिकी ति टेङ्‍बु वोतुप दाक्‍पी कोन्‍छ्‍योक ताङ दिक्‍पा ने थर ज्‍यितुप येशू ख्रीष्‍ट नेमा ङ्‍यिरा दोके खक्‍छ्‍येवु तेपा कितुप मीतिवाला टिवु यिनो।
2PE 1:2 कोन्‍छ्‍योक ताङ दाक्‍पी चोवो येशू ख्रीष्‍टला ख्‍यिरा मङ मङ ङो शेनी खो नेमा नङ्‍गुप कटिन ताङ लोदिमु ति ख्‍यिराङला छासे थोप्‍शी।
2PE 1:3 ओङ छ्‍येवु वोतुप कोन्‍छ्‍योककी दाक्‍पुला मिजी टेङ्‍बु क्‍योङ्‍गुपला गोवु ति तेरी नाङ्‍सुङ। ती मोलाम ति कोन्‍छ्‍योककी मोवा ताङ च्‍यङ्‍च्‍यु सेम्‍बा नेसुर थल्‍माला दाक्‍पुला कताङ नङ्‍गुप यिन सिनी दाक्‍पी हाक्‍कोसिमा खोकी दाक्‍पुला नङ्‍गुप यिन।
2PE 1:4 खो ति मोवा ताङ च्‍यङ्‍च्‍यु सेम्‍बा वोतुप तप्‍की दाक्‍पुला छासे चोछ्‍येवु ताङ खक्‍छ्‍येवु ताम्‍ङे थाक्‍छ्‍येन नङ वे। तीकी तेन्‍दोक ति दाक्‍पु दुक्‍टा वोतुप सेम नेसुर वुङ्‍गुप दी जम्‍बुलिङकी नोवा मेलोवा नेसुर थर्नी कोन्‍छ्‍योक दोके टेङ्‍बु वोतुप मिजी क्‍योङ्‍गुपला यिन।
2PE 1:5 तुक क्‍यानी ख्‍यिराङ खोला तेपा क्‍यासिमा अछ्‍योता सेक मी यम्‍बाला ख्‍यिरा किताङ नालु ति ल्‍यामु वुङ गोकिवी, किताङ नालु ल्‍यामु वासिमा ख्‍यिराङला मङ रिक्‍पा थोप गोकिवी,
2PE 1:6 रिक्‍पा थोप्‍सिमा डेकला दे गोकिवी, डेकला देसिमा हम क्‍या दे गोकिवी, हम क्‍या देसिमा ख्‍यिराङ खोरो सेमगी दिङ नेज्‍युनी कोन्‍छ्‍योककी सुङला युक गोकिवी,
2PE 1:7 कोन्‍छ्‍योककी सुङला युसिमा तेपा कितुप अच्‍युतुपतिवाला च्‍यम्‍बा कि गोकिवी, तेपा कितुप अच्‍युतुपतिवाला च्‍यम्‍बा क्‍यासिमा ङ्‍यिङ्‍ज्‍ये की।
2PE 1:8 च्‍यिलासिसिन ख्‍यिरा मिजीला ती ताम्‍ङेतिवा ग्‍यक्‍चे वोसुङ सिसिन ख्‍यिराङ ति दाक्‍पी चोवो येशू ख्रीष्‍टकी येन्‍देन ङ्‍येनी लाका बङी कितुप ताङ छासे डेलु गोर थुप्‍कितो।
2PE 1:9 यिने ती ताम्‍ङेतिवा ख्‍यिरा मिजीला मेसुङ सिसिन थाक्‍रिङ्‍बोला वोतुप च्‍यालक मोथोङ्‍गुप ताङ मिक शर्वा दोके गल्‍नी गोमाला क्‍यावु दिक्‍पा ने थरुप ताम्‍ङेतिवा साङ टोक ज्‍येकिवी।
2PE 1:10 तुक क्‍यानी अच्‍युनुपतिवा, ख्‍यिराङला कोन्‍छ्‍योककी कताङ्‍नी पेन नङ्‍गुप लाका ति मङ तेन्‍तेन कितुपला ङार छ्‍येवु की। तुक क्‍यासिन ख्‍यिराङला नाम्‍साङ नर्तुक माग्‍यकिवी।
2PE 1:11 तमा दिक्‍पा ने थर ज्‍यितुप दाक्‍पी चोवो येशू ख्रीष्‍टकी ख्‍यिराङला नाम्‍साङ ना मोडोवु खोकी ग्‍येल्‍खापला छासे ताङ्‍देन ताङ मुला शुक ज्‍यिकिवी।
2PE 1:12 दी ताम्‍ङे ति ख्‍यिराङला छ्‍या वे, तमा ख्‍यिराङ तेपा रम्‍बु क्‍यानी देकिवी, यिन्‍सिनाङ ङ ख्‍यिराङला नरी टेन ज्‍यितुपला दी ताम्‍ङे ति सिरिन।
2PE 1:13 ङ दी जम्‍बुलिङला लुता सेक ख्‍यिराङला दी ताम्‍ङे ति टेन ज्‍यितुप ताङ च्‍याङ्‍से दे ज्‍यितुप ति टेके लाका यिन सिरुप ति ङला नोवा वे।
2PE 1:14 च्‍यिलासिसिन ङ दी जम्‍बुलिङला देतुप तुजे अला मे सिरुप ति दाक्‍पी चोवो येशू ख्रीष्‍टकी ङला हाक्‍को च्‍यिन वे।
2PE 1:15 ङ शिसिमा साङ ख्‍यिरा दी ताम्‍ङे ति नाम्‍साङ टोक मेज्‍येशी सिनी ङ टेमु कितिन।
2PE 1:16 ङ्‍यिरा ख्‍यिराङला चोवो येशू ख्रीष्‍ट चोछ्‍येवु वोतुप ताङ खो येलुङ फेवु कोर्ला लेन ल्‍यामु ख्‍याप्‍टाक क्‍यावु ति टेङ्‍बु मेतुप जिनोक जोप पे मिन, यिने ङ्‍यिरा वुतुङ के मिककी थोङ्‍गुप खोकी मोवाकी कोर्ला पङ्‍बु बिन्‍दुप यिन।
2PE 1:17 पपा कोन्‍छ्‍योककी चोवो येशूला ठछ्‍येली वोतुप मोवा नेमा “दी ङे ङ्‍यिङ्‍ज्‍येवु पुज्‍युङ यिनो, दीकी मुला ङ छासे गा लानी वोतो।” सिनी वोरु ग्‍यकुप पेला खोकी नङ्‍गुप ताङ्‍देन ताङ मोवा ति येशूला थोप्‍सुङ।
2PE 1:18 ती ताम्‍ङे ति चाङ्‍मा वोतुप रीला ङ्‍यिराङ खोकी मुला वोतुप पेला देवाच्‍येन नेमा सुङ्‍गुप ति ङ्‍यिरा राङ थोवु यिन।
2PE 1:19 तुक क्‍यानी कोन्‍छ्‍योककी लुङ्‍तेम्‍बातिवी ङ्‍यिराङला नम्‍दर शेतुप सुङ टेङ्‍बुला साङ ङ्‍यिराङ तेन्‍तेन वे। ती सुङ ति नक्‍तोमीला दिप्‍ली च्‍येतुप दोके यिन। ती दिप्‍ली ति नक्‍तोमी गल्‍नी कर्ज्याङ माशरुप पे सेक बरुप दोके ङ्‍यिरा सेमला ज्‍याक्‍नी ल्‍यामु क्‍यानी हाक्‍कोवा की।
2PE 1:20 खक्‍छ्‍येवुला ख्‍यिरा दी ताम्‍ङे ति हाक्‍को गोकिवी, कोन्‍छ्‍योककी सुङला वोतुप लुङ्‍तेम्‍बाकी ताम्‍ङेतिवाला सी साङ दुकै ताङ तुकै यिन सिनी खोरो ओङ्‍ज्‍येन नेमा यम्‍बा ताम्‍ङे सि मुथुपी।
2PE 1:21 च्‍यिलासिसिन लुङ्‍तेम्‍बातिवी नम्‍दर शेतुप ति मी नोवा नेमा मिन, कोन्‍छ्‍योककी थु चाङ्‍मा नेमा कोन्‍छ्‍योककी सुङ्‍गुप ताम्ङे ति लुङ्‍तेम्‍बातिवी शेतुप यिन।
2PE 2:1 गोमाला इस्राएलकी मीतिवी पर्ला लुङ्‍तेम्‍बा मेटेङ्‍बुतिवा वोतुप दोके ख्‍यिरा पर्ला साङ गेकेन मेटेङ्‍बुतिवा थेन्‍गितो। तिवी ख्‍यिराङला छ्‍याकला ना डोप येन्‍देन मेटेङ्‍बुतिवा लोप्‍किवी, तमा येशू ति दिक्‍पा ने थर्वा नङ्‍गुप चोवो मिन सिनी तिवा खोप्‍राङ ङमु राङ ना डोप लाका कितो।
2PE 2:2 तमा मी बङीकी तिवी लापुप येन्‍देन मेटेङ्‍बु ङ्‍येन्‍नी दुक्‍टा किवी। तीकी जोसालेन्‍सिन मी यम्‍बातिवी साङ कोन्‍छ्‍योककी सुङ टेङ्‍बुला मारे तोङ्‍गिवी।
2PE 2:3 तिवा देर्पाला ख्‍येल्‍नी ख्‍यिराङला ताम्‍ङे जिनोक जोनी ख्‍यिरा नेसुर ख्‍येप्‍साङ लङ्‍गितो, यिने तिवी खुर गोवु छ्‍येर्पाकी कोर्ला गोमाला के तेन्‍तेन क्‍या वे। तुक क्‍यानी तिवा वुतुङ के ना डिवी।
2PE 2:4 देवाच्‍येनकी लेन क्‍योलुप थुतिवी दिक्‍पा क्‍यासिमा कोन्‍छ्‍योककी तिवा चुका तीला साङ माज्‍याक्‍नी ङ्‍येलाला क्‍युर्सुङ। तमा खोकी ठिम क्‍या नङ्‍गुप तुजे सेककी थोक्‍ला तिवाला ङ्‍येलाकी नक्‍तोमीला टानी ज्‍याक्‍सुङ।
2PE 2:5 नोआकी ङोला कोन्‍छ्‍योककी जम्‍बुलिङला खोरे सुङला मुयुकुप मीतिवा चुका तीला साङ माज्‍याक्‍नी छ्‍यर्वा ग्‍येर्पु ग्‍यक च्‍यिनी ना ताङ्‍सुङ। यिने खोकी सुङ टेङ्‍बु ख्‍याप्‍टाक कितुप नोआ ताङ तीकी मुला वोतुप यम्‍बा मिरा दिनला तिराङ र्‍होक्‍सुङ।
2PE 2:6 येलुङ खोकी सदोम ताङ गमोरा ग्‍येसातिवाला मे थ्‍वोनी ना डो च्‍यिसुङ। तमा ती ग्‍येसाकी मिराप तेरी तोर्नी डो च्‍यिसुङ। तमा खोकी सुङला मुयुकुप मीतिवाला खोकी चुक क्‍यानी ना तोङ्‍गिनोक सिरुप येन्‍देन बिन्‍सुङ।
2PE 2:7 यिने ती ग्‍येसाकी मीतिवी सेम नोजु क्‍यानी ङोछा लङ्‍गुप लाका दुक्‍टातिवा क्‍यावु थोङ्‍नी लोतकी सेमला छासे मेलोवा गाल्‍नोक। तुक क्‍यानी खोकी खोरे थोङ्‍दाङला टेङ्‍बु वोतुप लोतला ति र्‍होक्‍सुङ।
2PE 2:8 ती लोत ति मी दुक्‍टातिवी पर्ला देतुप पेला ङ्‍यिमी टेङ तिवी किताङ नालु मेलोक्‍पा थोङ्‍सा ताङ थोसालेन्‍सिन कोन्‍छ्‍योककी थोङ्‍दाङला टेङ्‍बु वोतुप तीकी सेम ति छासे सेम्‍दुक लानोक।
2PE 2:9 तुक क्‍यानी खोकी सुङला युकुपतिवा छेटाङला ख्‍येलुप पेला र्‍होकुप ताङ खोकी सुङला मुयुकुपतिवाला ठिम कितुप तुजे सेक छ्‍येर्पा बिन्‍नी टानी ज्‍योकुप ति कोन्‍छ्‍योकला छ्‍या वे।
2PE 2:10 खक्‍छ्‍येवुला शम्‍डेन कितुप नासाम ताङ्‍नी मेटेङ्‍बु कितुप ताङ खोकी ओङ्‍ज्‍येनला मारे तोङ्‍गुपतिवाला खोकी ठिम क्‍या नङ्‍गिवी। तिवा ङ राङ यिन सिनी काङ साङ ज्‍यिवा माक्‍यानी मेलोवा किवी, तमा मोवा वोतुप ओङ्‍ज्‍येनतिवाला साङ ज्‍यिवा माक्‍यानी मारे तोङ्‍गिवी।
2PE 2:11 यिने देवाच्‍येनकी लेन क्‍योलुप थुतिवा ति गेकेन मेटेङ्‍बुतिवा सिनाङ मङ ङार छ्‍येवु ताङ ओङ्‍ज्‍येन वोसिनाङ कोन्‍छ्‍योककी दोङ्‍ला ति मोवा वोतुप ओङ्‍ज्‍येनतिवाला मारे तोङ्‍गुप ताङ क्‍येन साङ मेतेरी।
2PE 2:12 यिने ती गेकेन मेटेङ्‍बुतिवा याङ खोरो हाक्‍माकोवु ताम्‍ङेला मारे तोङ्‍गिवी। तिवा नो मेशेवु सेम्‍ज्‍येनतिवा दोके यिन्‍दुप तप्‍की खोप्‍राङ नोवाला तिराङ युकिवी। तिवा जिम्‍नी सेतुपकी थोक्‍ला क्‍येवु सेम्‍ज्‍येन दोके यिन। तुक क्‍यानी सेम्‍ज्‍येनतिवा दोके तिवा ना डिवी।
2PE 2:13 तिवी दुक्‍टा क्‍यावु तप्‍की तिवी छ्‍येर्पा ति खोप्‍रे राङ खुर गोकिवी। तिवा ङ्‍यिमी गुङला छ्‍याङ आराक थुनी देतुप ति गा किवी, तिवा ङोछा मेतुप ताङ ताङ्‍देन कि मोछ्‍योवु मी यिन। तिवी ख्‍यिराङ मुला राङ देनी साप ताङ थुङ्‍गुप पेला साङ नरी जिनोक जोप तिराङ गा किवी।
2PE 2:14 तिवा नरी शम्‍डेन कितुप नासाम तिराङ तोङ्‍गिवी। तिवा चो दिक्‍पा क्‍यासिनाङ सेम लो मिदिवी, तिवी तेपा रम्‍बु मेनी सेम नटेकोटे वोतुप मीतिवाला अलम च्‍योलोम जेवी। तिवी सेम ति देर्पा कितुपला छासे खामु गिवी। तुक क्‍यानी तिवा मोताप सुकुप गिपातिवा यिन।
2PE 2:15 तिवा लाम थेकाङला युकुप क्‍युर ज्‍याक्‍नी लाम मेटेङ्‍बुला गल्‍नी बओरकी पुज्‍युङ लुङ्‍तेम्‍बा बालमकी दला शुकुप गल वे। ती बालम ति गोमाला लाका मेटेङ्‍बु क्‍यानी टङ्‍गा शोम्‍बुप गा किनोक।
2PE 2:16 यिने तीकी क्‍यावु दुक्‍चे क्‍येनकी थोक्‍ला लप्‍सिर सोसुङ। ताम्‍ङे लप मुथुपुप तीकी पुङ्‍गोककी साङ मी दोके क्‍यानी तीकी कितुप लाका मेलोवा ति क्‍येक्‍सुङ।
2PE 2:17 तिवा छ्‍यु मेतुप छ्‍यी पुङ दोके ताङ वुर्तुककी फुरुप ल्‍हवुल दोके यिन। तिवी थोक्‍ला ङ्‍येलाकी नक्‍तोमी दासा टडिक क्‍या वे।
2PE 2:18 तिवा अम्‍बारङ्‍शिङ कितुप ताङ तेन्‍दोक मेतुप ताम्‍ङे तिराङ किवी, तमा मलोक लाका मेलोक्‍पा कितुप क्‍युर ज्‍यकुप मीतिवाला साङ सेम नेसुर वुङ्‍गुप नासाम मेलोक्‍पाला ख्‍येल ज्‍यितुपला लुकिवी।
2PE 2:19 तिवी मीतिवाला दिक्‍पा ने रङ्‍ज्‍येन थोप्‍किवी सिनी थाक्‍छ्‍येकिवी, यिने खोप्‍राङ ति दिक्‍पी ओङला राङ ख्‍येल वे। च्‍यिलासिसिन ख्‍यिराङ चुका मी ति ती ओङला ख्‍येल वे, ती मी ति तीकी योक्‍पु यिन।
2PE 2:20 दोजो तिवी दाक्‍पुला दिक्‍पा ने थर ज्‍यितुप चोवो येशू ख्रीष्‍टला ङो शेनी दी जम्‍बुलिङकी मेटेङ्‍बु वोतुप च्‍यालक नेसुर थेन्‍सिमा येलुङ गोमी किताङ नालुला लोक्‍नी ती दिक्‍पी ओङला राङ डिवी सिसिन तिवा गोमी ति सिनाङ ज्‍युक्‍ला मङ मेलोक्‍पा डिवी।
2PE 2:21 ती तप्‍की तिवाला बिन्‍दुप कोन्‍छ्‍योककी सुङ टेङ्‍बु ति तिवी हाक्‍कोनी साङ ती सुङला मुयुकुप सिसियाङ, बोरु तिवाला कोन्‍छ्‍योककी थोङ्‍दाङला टेङ्‍बु वोतुप सुङगी कोर्ला हाक्‍माकोवु राङ ल्‍यामु यिन्‍दुप्‍जा।
2PE 2:22 तुक क्‍यानी तिवी थोक्‍ला “की तीकी खोरो क्‍युनी खोरो राङ लकिवी। फाक्‍पाला टुनी बिन्‍सिन येलुङ दक्‍च्‍यिरला राङ गङ्‍ङ्‍येल चेवी।” सिरुप पेकी तेन्‍दोक ति डिकिवी।
2PE 3:1 ङे ङ्‍यिङ्‍ज्‍येवु अच्‍युनुपतिवा, दी ति ङे ख्‍यिराङला टिवु यिकी ङ्‍यिवा यिनो। दी यिकी ङ्‍यिकरकी नाङ्‍ला माङ्‍शोक ताम्‍ङेतिवा ति ख्‍यिरा सेमला नासाम टेङ्‍बु तोङ ज्‍यितुप सिनी टोङ्‍गु तेरुपला टि वे।
2PE 3:2 तुक क्‍यानी तोङ्‍ला लुङ्‍तेम्‍बा टेङ्‍बुतिवी नम्‍दर शेतुप ताम्‍ङे ताङ लोमा छ्‍येतिवी ख्‍यिराङला दिक्‍पा ने थर ज्‍यितुप चोवो येशूकी कोर्ला लापुप सुङ ति ख्‍यिरा नरी नासाम ताङ्‍नी टोक माज्‍येता।
2PE 3:3 तेरी सिनाङ गोमाला ख्‍यिरा दी ताम्‍ङे ति हाक्‍को गोकिवी। ती ताम्‍ङे ति काङ यिन सिसिन जम्‍बुलिङकी तिङ्‍मी तुजेला खोरो सेमगी नासाम मेलोक्‍पाकी ओङला वोतुप मीतिवी ख्‍यिराङला मर्च्या क्‍यानी दुक सिनी टिवी,
2PE 3:4 “ख्रीष्‍ट फेप्‍किवी सिनी थाक्‍छ्‍येतुप मिन रो? दाक्‍पी पगावा हङ्‍गावातिवा शिसिमा साङ दी जम्‍बुलिङ ति थल्‍माला ज्‍येङ्‍गुप पेला नेज्‍युन काङ साङ माफो वे।”
2PE 3:5 तिवी तुक सिनी सिक्‍यावु ति कोन्‍छ्‍योककी सुङगी थल्‍माला नाम ज्‍ये नङ्‍गुप यिन, तमा जम्‍बुलिङ ति छ्‍यु नेसुर ज्‍ये नङ्‍गुप यिन,
2PE 3:6 तमा ती छ्‍यु नेसुर राङ तोङ्‍ला जम्‍बुलिङला छ्‍यर्वा ग्‍येर्पु ग्‍यप्‍नी जम्‍बुलिङ तेरी ना तङ्‍गुप यिन सिनी सिरुप ति तिवाला छ्‍या वोसिनाङ छ्‍या मेतुप दोके जोवु यिन।
2PE 3:7 दी कोन्‍छ्‍योककी सुङगी राङ तसाम पेलाकी नाम ताङ जम्‍बुलिङ ति मे नाङ्‍ला ना तोङ्‍गुपला र्‍होक्‍नी ज्‍याङ वे। तमा खोकी सुङला मुयुकुप मीतिवाला ठिम कितुप तुजे सेककी थोक्‍ला सानी ज्‍याङ वे।
2PE 3:8 यिने ङे ङ्‍यिङ्‍ज्‍येवु अच्‍युनुपतिवा, दी ताम्‍ङे ति टोक माज्‍ये। ती ति काङ यिन सिसिन चोवोकी थोक्‍ला ङ्‍यिमा च्‍यिक ति लो तोङ्‍डा च्‍यिक चोयी तिराङ यिन, तमा लो तोङ्‍डा च्‍यिक ति ङ्‍यिमा च्‍यिक चोयी तिराङ यिन।
2PE 3:9 चोवोकी थाक्‍छ्‍येन नङ्‍गुप सुङ ति फिमु क्‍या नङ्‍गिवी सिनी ललाइकी सिक्‍यासिनाङ खो नाम्‍साङ फिमु मिकिवी। यिने मी सु साङ ना मोडोशी, तेरी मीतिवी सेम ग्‍युर्शी सिनी ख्‍यिरा थोक्‍ला खो हम क्‍यानी ज्‍युवु यिन।
2PE 3:10 यिने चोवोकी तुजे ति कुर्मेन वावु दोके हाक्‍माकोवा क्‍यानी गिवी। ती पेला नाम ति वोरु गिर्पो यी तेन्‍नी ना डिवी, तमा ङ्‍यिमा उला ताङ कर्मातिवा मे रापकी तेरी शिनी डिवी। जम्‍बुलिङ ताङ जम्‍बुलिङला वोतुप तेरी शिनी डिवी।
2PE 3:11 दी तेरी च्‍यालकतिवा ना डिवी सिरुप हाक्‍कोनी ख्‍यिरा मिजी ति चुक क्‍यानी टेङ्‍बु ताङ कोन्‍छ्‍योककी सुङला युक गोकिवी सिरुप ति नासाम तोङ।
2PE 3:12 ख्‍यिराङ कोन्‍छ्‍योककी ठिम क्‍या नङ्‍गुप तुजेला गुनी देन वे, तमा ती तुजे ति ङमु राङ वुङ्‍शी सिनी नो की। खोकी तुजे छेवु छेर्मु नामतिवा छिक्‍नी ना डिवी, ङ्‍यिमा उला ताङ कर्मातिवा साङ तेरी मे रापकी शिकिवी।
2PE 3:13 यिने दाक्‍पु याङ खोकी थाक्‍छ्‍येन नङ्‍गुप दोके देवाच्‍येन सम्‍बा ताङ जम्‍बुलिङ सम्‍बाकी थोक्‍ला लाम ल्‍हयी वे। ते कोन्‍छ्‍योककी थोङ्‍दाङला टेङ्‍बु वोतुपतिवा तिराङ दे थुप्‍किवी।
2PE 3:14 ती तप्‍की ङे ङ्‍यिङ्‍ज्‍येवु अच्‍युनुपतिवा, ख्‍यिराङ ती तुजेला गुनी देतुप तप्‍की खोकी थोङ्‍दाङला ख्‍यिराङ मङ टेङ्‍बु ताङ क्‍येन मेतुप ताङ खोकी मुला तम्‍जी ल्‍यामु वोतुप मिजी क्‍योङ।
2PE 3:15 कोन्‍छ्‍योककी हम क्‍यानी गुनी देतुप ति दाक्‍पु दिक्‍पा ने थरुपला यिन सिनी नासाम तोङ। दाक्‍पी नुप पावलकी साङ कोन्‍छ्‍योककी नङ्‍गुप रिक्‍पा नेसुर ख्‍यिराङला ती ताम्‍ङेकी थोक्‍ला टिवु यिन।
2PE 3:16 खोकी तङ्‍गुप यिकीतिवा तेरीकी नाङ्‍ला साङ दी ताम्‍ङेकी कोर्ला टिनी वोतो। ती नाङ्‍ला ललाइ ललाइ ताम्‍ङेतिवा हाक्‍कोवु कले वे, तुक क्‍यानी यिकी मेशेवुतिवा ताङ कोन्‍छ्‍योकला तेपा रम्‍बु मेतुप मीतिवी दी ताम्‍ङेतिवाला यम्‍बा छ्‍योकी थेपला वोतुप दोके फिलोक्‍पा नालोक्‍पा जोनी खुरुङला राङ खोरो ना तोङ्‍गिवी।
2PE 3:17 तुक क्‍यानी ङे ङ्‍यिङ्‍ज्‍येवु अच्‍युनुपतिवा, ख्‍यिराङ गोमाला के दी ताम्‍ङे ल्‍यामु हाक्‍कोनी च्‍याङ्‍से देता। मी दुक्‍टातिवी ताम्‍ङेला येनी मादे, तमा रङगी हाक्‍कोवु सुङला रम्‍बु क्‍यानी डेकला देता।
2PE 3:18 तमा दाक्‍पुला दिक्‍पा ने थर ज्‍यितुप चोवो येशू ख्रीष्‍टकी कटिन ताङ खोकी रिक्‍पाला ख्‍यिराङ मङ मङ फरिन ग्‍युक। खोला तन्‍दा ताङ नरीकी नरी मोवा वुङ्‍शी। आमिन।
1JO 1:1 दी ताम्‍ङेतिवा ति मिजी तेरुप सुङगी कोर्ला टिवु यिन। दी मिजी तेरुप सुङ ति थल्‍माला जम्‍बुलिङ ज्‍येङ्‍गुप पेला राङ वोतुप यिन, तमा ती ति ङ्‍यिरा थोवु ताङ मिककी थोङ्‍गुप साङ यिन, ङ्‍यिरा ल्‍हावु ताङ थोवा तङ्‍गुप साङ यिन।
1JO 1:2 ती मिजी ति जम्‍बुलिङला फेवु ङ्‍यिरा थोङ्‍सुङ। तुक क्‍यानी ती नाम्‍साङ मिशिवु मिजीकी कोर्ला ङ्‍यिराङ ख्‍यिराङला पङ्‍बु बिन्‍नी सिरिन। ती मिजी ति थल्‍माला के पपा कोन्‍छ्‍योककी मुला नोक, ती ति ङ्‍यिरा पर्ला फेप्‍सुङ।
1JO 1:3 ङ्‍यिरा काङ थोङ्‍गुप ताङ थोवु ति ख्‍यिराङला सिरिन वे। च्‍यिलासिसिन ख्‍यिराङ ङ्‍यिरा मुला डिक्‍जोम च्‍युङ्‍नी तम्‍जी ल्‍यामु वुङ्‍शी। तमा ङ्‍यिरा डिक्‍जोम ति पपा कोन्‍छ्‍योक ताङ खोकी सेवु येशू ख्रीष्‍टकी मुला जो वे।
1JO 1:4 दाक्‍पु तेरीला लोदिमु वुङ्‍शी सिनी ङ्‍यिरे दी ताम्‍ङे ति टिवु यिनो।
1JO 1:5 ङ्‍यिरा येशू ख्रीष्‍ट नेमा थोवु लेन ल्‍यामु ति ख्‍यिराङला शेतिनो। ती ति काङ यिन सिसिन कोन्‍छ्‍योक ति ठछ्‍येली वोतुप वोसिर टेङ्‍बु वे। खोकी मुला काङ साङ नक्‍तोमी वोतुप दोके मेटेङ्‍बु मे।
1JO 1:6 दोजो दाक्‍पु खो ताङ मुला डिक्‍जोम च्‍युङ्‍नी तम्‍जी ल्‍यामु वे सिनी सिवी, यिने नक्‍तोमीला राङ युकुप दोके मेटेङ्‍बु किवी सिसिन, दाक्‍पु ति जिनोक जोप ताङ मेटेङ्‍बु यिन।
1JO 1:7 यिने खो ठछ्‍येलीला वोतुप दोके दाक्‍पु साङ खो मुला राङ ठछ्‍येलीला युकिवी सिसिन दाक्‍पु डिक्‍जोम ल्‍यामु च्‍युङ्‍गिवी। तमा खोकी सेवु येशू ग्‍यङ्‍शिङला कल्‍नी तेन्‍दुप ठक नेसुर दाक्‍पी दिक्‍पातिवा तेरी ताकिवी।
1JO 1:8 दोजो दाक्‍पी ङला याङ दिक्‍पा राङ मे सिवी सिसिन, दाक्‍पी दाक्‍पुला राङ जिनोक जोवु दोके यिन। तमा दाक्‍पी सेमला टेङ्‍बु मेतुप यिन।
1JO 1:9 यिने दाक्‍पी ङ दिक्‍छेन यिन सिनी दिक्‍पा ने ग्‍युर्सुङ सिसिन, दाक्‍पी तेरी दिक्‍पातिवा खोकी माफ नङ्‍गिवी, तमा दाक्‍पुला तेरी मेटेङ्‍बु नेसुर टेङ्‍बु जो नङ्‍गिवी। च्‍यिलासिसिन खो खोङ्‍तेर्मु ताङ टेङ्‍बु वोतुप कोन्‍छ्‍योक यिन।
1JO 1:10 येलुङ दोजो दाक्‍पी ङे याङ दिक्‍पा माक्‍या वे सिवी सिसिन, कोन्‍छ्‍योकला दाक्‍पी जिनोक जोप मी दोके जेवी, तमा खोकी सुङ ति दाक्‍पी मिजीला मेवी।
1JO 2:1 ङे आङातिवा, ख्‍यिराङला दिक्‍पा माकी सिनी ङे दी ताम्‍ङे ति ख्‍यिरा थोक्‍ला टिवु यिनो। यिने सी दिक्‍पा क्‍यासिनाङ दाक्‍पी छ्‍योला लानी कोन्‍छ्‍योक ताङ मुला ताम्‍ङे लपुप मिरा च्‍यिक वे, खो ति टेङ्‍बु वोतुप चोवो येशू ख्रीष्‍ट यिन।
1JO 2:2 खो ति दाक्‍पी दिक्‍पी थोक्‍ला कोन्‍छ्‍योकला जिन्‍बा तोङ्‍गुपला खुरुङ राङ टुङ्‍गुप यिन। दाक्‍पी दिक्‍पी थोक्‍ला तिराङ मिन्‍दाला, जम्‍बुलिङला वोतुप तेरी मीतिवी दिक्‍पी थोक्‍ला यिन।
1JO 2:3 दाक्‍पु कोन्‍छ्‍योककी क नङ्‍गुप सुङला युसुङ सिसिन दाक्‍पी खोला ङो शेवु यिन सिनी हाक्‍कोकिवी।
1JO 2:4 यिने चुका मी तीकी ङ कोन्‍छ्‍योकला ङो शेकिवी सिनी सिवी, यिने खोकी कला ति मुयुकिवी सिसिन, ती मी ति जिनोक जोप यिन, टेङ्‍बु वोतुप मिन।
1JO 2:5 यिने चुका मी ति कोन्‍छ्‍योककी सुङला युकिवे, तीकी कोन्‍छ्‍योकला सेम ने ङ्‍यिङ्‍ज्‍ये क्‍यावु ति वुतुङ के तेरी छेकिवी। तुक क्‍यासिन दाक्‍पी मिजीला कोन्‍छ्‍योक वे सिरुप ति हाक्‍कोकिवी।
1JO 2:6 ङे मिजी ति कोन्‍छ्‍योक ताङ मुला तम्‍जी ल्‍यामु वे सिरुप मी तीकी येशूकी दोके मिजी क्‍योङ गोकिवी।
1JO 2:7 ङे ङ्‍यिङ्‍ज्‍येवुतिवा, ङ ख्‍यिराङला यम्‍बा क सम्‍बा मिन, क ङ्‍यिङ्‍बा राङ टिकिन वोतो। ती क ङ्‍यिङ्‍बा ति थल्‍मा नेजु ख्‍यिरा मुला वे। तमा ती क ति ख्‍यिरा थोवु साङ यिन।
1JO 2:8 यिन्‍सिनाङ ङ ख्‍यिराङला क सम्‍बा यी टिकिन। ती टेङ्‍बु वोतुप क ति येशू ख्रीष्‍टला वे, तमा ख्‍यिरा मिजीला साङ वे। च्‍यिलासिसिन नक्‍तोमी ति गानी सिन्‍सुङ, वोसिर टेङ्‍बु ति वो ग्‍यकिन नोक।
1JO 2:9 चुका मी तीकी ङ येशूला तेपा क्‍यानी ठछ्‍येलीला युकुप यिन सिवी, यिने तेपा कितुप यम्‍बा नुप ताङ नुमला ङ्‍यिङ्‍मर किवी सिसिन, ती मी ति तरोङ साङ नक्‍तोमीला राङ वोतुप मी यिन।
1JO 2:10 तमा चुका मी तीकी तेपा कितुप यम्‍बा नुप ताङ नुमला ङ्‍यिङ्‍ज्‍ये किवे, ती ति ठछ्‍येलीला युकुप मी यिन। तीकी काङ साङ लाका मेलोवा मिकिवी।
1JO 2:11 यिने चुका मी तीकी तेपा कितुप यम्‍बा नुप ताङ नुमला ङ्‍यिङ्‍मर किवे, ती मी ति नक्‍तोमीला राङ युकिवी। तमा खुरुङ कनी डोयी वे सिरुप ति तीकी हाक्‍मोकोवी। च्‍यिलासिसिन दिक्‍पाकी तीला मिक मोथोङ्‍गुप जोवु गिवी।
1JO 2:12 ङे आङातिवा, येशूला तेपा क्‍यानी ख्‍यिरा दिक्‍पा ति कोन्‍छ्‍योककी माफ नङ्‍गुप तप्‍की ङ ख्‍यिराङला दी यिकी ति टिकिन वोतो।
1JO 2:13 पपातिवा, ख्‍यिरा थल्‍मा नेज्‍यु वोतुप ख्रीष्‍टला ङो शेवु तप्‍की ङ ख्‍यिराङला दी यिकी ति टिकिन वोतो। नाज्‍युङतिवा, ख्‍यिराङ दुक्‍टाकी खला ग्‍येलुप तप्‍की ङ ख्‍यिराङला दी यिकी ति टिकिन वोतो।
1JO 2:14 ङे आङातिवा, ख्‍यिरा पपा कोन्‍छ्‍योकला ङो शेवु तप्‍की ङ ख्‍यिराङला दी यिकी ति टिकिन वोतो। पपातिवा, ख्‍यिरा थल्‍मा नेज्‍यु वोतुप ख्रीष्‍टला ङो शेवु तप्‍की ङ ख्‍यिराङला दी यिकी ति टिकिन वोतो। तमा नाज्‍युङतिवा, ख्‍यिरा तेपा ति रम्‍बु वोतुप ताङ कोन्‍छ्‍योककी सुङला ङ्‍येन्‍नी दुक्‍टाकी खला साङ ग्‍येलुप तप्‍की ङ ख्‍यिराङला दी यिकी ति टिकिन वोतो।
1JO 2:15 ख्‍यिराङ जम्‍बुलिङ ताङ जम्‍बुलिङला वोतुप तेरीला नासाम मातोङ। चुका मी तीकी जम्‍बुलिङला तिराङ नासाम तोङ्‍गिवे, तीकी कोन्‍छ्‍योकला नासाम मोतोङ्‍गिवी।
1JO 2:16 च्‍यिलासिसिन जम्‍बुलिङला वोतुप तेरीकी तेन्‍दोक ति मी सेमला शरुप नासाम मेलोवा ताङ मिककी थोङ्‍सिमा नासाम मेलोवा शरुप ताङ मी मिजीला ङ राङ यिन सिनी छ्‍येजु कितुप यिन। तिवा ति कोन्‍छ्‍योक नेमा वोवु मिन, यिने जम्‍बुलिङ नेसुर वावु यिन।
1JO 2:17 जम्‍बुलिङ ना डिवी, जम्‍बुलिङला वोतुप नोवातिवा साङ ना डिवी, यिने कोन्‍छ्‍योककी नोवाला वोतुप लाका कितुप मी ति नरीकी नरी लुकिवी।
1JO 2:18 आङातिवा, जम्‍बुलिङ ना डोप तुजे ति तन्‍दा राङ यिन। ख्रीष्‍टकी तेन्‍दोकला लङ्‍गुप ति वुङ्‍यिन वे सिरुप ति ख्‍यिरा साङ थोनी वे। तिवा ति तन्‍दा राङ बङी वा वे। तुक क्‍यानी जम्‍बुलिङ ना डोप तिङ्‍मी तुजे ति दी राङ यिन सिनी ख्‍यिरा हाक्‍कोकिवी।
1JO 2:19 तोङ्‍ला तिवा दाक्‍पी मु नेवा थेन्‍नी गलुप यिन, च्‍यिलासिसिन वुतुङ के तिवा दाक्‍पी थाकाकी ति मिन। दोजो तिवा दाक्‍पी थाकाकी ति यिन्‍दुप यिन्‍सियाङ दाक्‍पी मुला राङ लुवु ति यिन्‍जा। तुक क्‍यानी वुतुङ के तिवा दाक्‍पी थाकाकी ति मिन सिरुप ति ठछ्‍येली हाक्‍कोकिवी।
1JO 2:20 यिने ख्‍यिराङला याङ टेङ्‍बु वोतुप ख्रीष्‍ट नेसुर नुमकी नुम्‍शाल ग्‍यप्‍नी वे। ती तप्‍की ख्‍यिराङ तेरीकी टेङ्‍बुला ङो शेकिवी।
1JO 2:21 ख्‍यिरा टेङ्‍बुला छ्‍या मे सिनी दी यिकी टिवु ति मिन। यिने ख्‍यिरा टेङ्‍बुला छ्‍या वे, तमा टेङ्‍बु नेसुर जिनोक जोप मेङ्‍गिवी सिरुप ति ख्‍यिरा हाक्‍कोवु तप्‍की दी यिकी ति ङे ख्‍यिराङला टिवु यिनो।
1JO 2:22 चुका मी तीकी येशूला दिक्‍पा ने थर ज्‍यितुप ख्रीष्‍ट यिन सिनी सेमला मिलिङ वे, ती ति जिनोक जोप मी यिन। तमा चुका मी तीकी पपा कोन्‍छ्‍योक ताङ खोकी सेवुला सेमला मिलिङ वे, ती ति येशू ख्रीष्‍टकी तेन्‍दोकला लङ्‍गुप मी यिन।
1JO 2:23 कोन्‍छ्‍योककी सेवुला सेमला मिलिङ्‍गुप तीकी मुला पपा कोन्‍छ्‍योक मेवी, यिने खोकी सेवुला सेमला लिङ्‍गुप तीकी मुला पपा कोन्‍छ्‍योक गिवी।
1JO 2:24 चुका ताम्‍ङे ति ख्‍यिरा थल्‍मा नेज्‍यु थोवे, ती ताम्‍ङे ति नरी ख्‍यिरा सेमला ज्‍योक। दोजो थल्‍मा नेज्‍यु हाक्‍कोवु ताम्‍ङे ति ख्‍यिरा सेमला ज्‍याक्‍सुङ सिसिन, पपा कोन्‍छ्‍योक ताङ खोकी सेवु येशू ख्रीष्‍टकी मुला ख्‍यिरा तम्‍जी ल्‍यामु लुकिवी।
1JO 2:25 खोकी ख्‍यिराङला थाक्‍छ्‍येन नङ्‍गुप ति ती नाम्‍साङ मिशिवु मिजी यिन।
1JO 2:26 दी ताम्‍ङे ति ख्‍यिराङला जिनोक जोपतिवी थोक्‍ला ङे टिवु यिनो।
1JO 2:27 ख्रीष्‍ट नेसुर थोपुप थु चाङ्‍मा ति ख्‍यिरा मुला नरी लुनी वे, तुक क्‍यानी ख्‍यिराङला सी साङ लोप मोगोवी। च्‍यिलासिसिन खोकी थु चाङ्‍माकी राङ ख्‍यिराङला तेरी ताम्‍ङे ति लोप्‍किवी। ती थु चाङ्‍माकी लापुप ति टेङ्‍बु यिन, जुमा मिन। तुक क्‍यानी खोकी थु चाङ्‍मा नेसुर लापुप दोके ख्‍यिराङ खोला तेपा क्‍यानी दे।
1JO 2:28 ङे आङातिवा, ख्रीष्‍ट येलुङ फेपुप तुजेला ख्‍यिराङ ङाडेङ क्‍यानी खोकी चिप्‍ला ङोछाला मेख्‍येल्‍शी सिनी तेपा रम्‍बु क्‍यानी देता।
1JO 2:29 खो टेङ्‍बु वोतुप ति ख्‍यिराङला छ्‍या वोतुप तप्‍की कोन्‍छ्‍योककी थोङ्‍दाङला टेङ्‍बु वोतुप लाका कितुपतिवा तेरी खोकी गिपा यिन सिनी ख्‍यिरा हाक्‍कोकिवी।
1JO 3:1 ल्‍होसा, कोन्‍छ्‍योककी दाक्‍पुला छासे ङ्‍यिङ्‍ज्‍ये क्‍या नङ वे। तुक क्‍यानी दाक्‍पुला खोकी पुज्‍युङपुम चिवु तप्‍की वुतुङ के तन्‍दा दाक्‍पु खोकी पुज्‍युङपुम यिन। ती तप्‍की जम्‍बुलिङकी मीतिवी दाक्‍पुला ङो मेशेवी। च्‍यिलासिसिन तिवी कोन्‍छ्‍योकला ङो माशे वे।
1JO 3:2 ङे ङ्‍यिङ्‍ज्‍येवुतिवा, तन्‍दा दाक्‍पु कोन्‍छ्‍योककी पुज्‍युङपुम यिन। दाक्‍पुला ज्‍युक्‍ला काङ ख्‍येल्‍गिवी सिरुप ति तन्‍दा सेक छ्‍या मे, यिने येशू फेवु पेला खो चुकै नोक सिरुप ति दाक्‍पी मिककी राङ थोङ्‍गिवी। तमा दाक्‍पु खो दोके राङ डिवी।
1JO 3:3 तमा खो टेङ्‍बु वोतुप दोके, दाक्‍पु खोला रेवा क्‍यानी देतुपतिवा तेरीकी टेङ्‍बु जोनी दे गोकिवी।
1JO 3:4 दिक्‍पा कितुप मीतिवा तेरी कोन्‍छ्‍योककी ठिमला मेङ्‍येन्‍दिवी। च्‍यिलासिसिन दिक्‍पा कितुप ति कोन्‍छ्‍योककी ठिमला मेतेन्‍दुप यिन।
1JO 3:5 दाक्‍पी दिक्‍पा ता ज्‍यितुपला राङ येशू ख्रीष्‍ट फेपुप यिन सिरुप ति ख्‍यिराङला साङ छ्‍या वे। तमा खोला काङ साङ दिक्‍पा मे।
1JO 3:6 तुक क्‍यानी खो ताङ मुला तम्‍जी ल्‍यामु वोतुपतिवी दिक्‍पा मिकिवी। दिक्‍पा क्‍या क्‍यावा देतुप मीतिवा सी साङ खोला माथोङ वे, ङो साङ माशे वे।
1JO 3:7 ङे ङ्‍यिङ्‍ज्‍येवु आङातिवा, ख्‍यिराङला सी साङ जिनोक मोजोशी। सी लाका टेङ्‍बु किवे, ती ति ख्रीष्‍ट टेङ्‍बु वोतुप दोके टेङ्‍बु यिन।
1JO 3:8 सी दिक्‍पा किवे, ती ति डेकी ति यिन। च्‍यिलासिसिन डेकी गोमा नेज्‍यु दिक्‍पा कियी वे। तुक क्‍यानी डेकी लाकातिवा ना तोङ्‍गुपला राङ कोन्‍छ्‍योककी सेवु येशू ख्रीष्‍ट फेवु यिन।
1JO 3:9 कोन्‍छ्‍योककी पुज्‍युङ पुमतिवा सी साङ दिक्‍पा मिकिवी। च्‍यिलासिसिन खोकी सुङ ति तिवी मुला गिवी। तिवा खोकी पुज्‍युङ पुमतिवा यिन्‍दुप तप्‍की दिक्‍पा क्‍या क्‍यावा मेदेवी।
1JO 3:10 ती नेसुर राङ कोन्‍छ्‍योककी गिपा सु यिन, डेकी गिपा सु यिन सिरुप ति हाक्‍कोकिवी। लाका टेङ्‍बु मिकिवुतिवा ताङ खोरो अच्‍युनुपला ङ्‍यिङ्‍ज्‍ये मिकिवुतिवा ति कोन्‍छ्‍योककी पुज्‍युङपुम मिन।
1JO 3:11 ख्‍यिरा तोङ नेज्‍यु थोवु सुङ ति दी राङ यिन। दाक्‍पी च्‍यिककी च्‍यिकला ङ्‍यिङ्‍ज्‍ये कि गोकिवी।
1JO 3:12 दाक्‍पु कयिन दोके वुङ्‍गुप मेङ्‍गिवी। कयिन ति डेकी ओङला वोतुप मी यिन। तीकी खोरो नुप हाबिलला सेसुङ। तीकी खोरो नुपला च्‍यिला सेसुङ? च्‍यिलासिसिन तीकी लाकातिवा दुक्‍टा नोक, तीकी नुपकी लाका ति टेङ्‍बु नोक।
1JO 3:13 तुक क्‍यानी ङे ङ्‍यिङ्‍ज्‍येवु अच्‍युनुपतिवा, जम्‍बुलिङकी मीतिवी ख्‍यिराङला ङ्‍यिङ्‍मर क्‍यासिन ख्‍यिराङ हलेवा माकी।
1JO 3:14 दाक्‍पुला याङ शेप छ्‍येर्पा मिन, मिजी सम्‍बा थोप्‍नी वे सिरुप ति छ्‍या राङ वे। च्‍यिलासिसिन दाक्‍पी याङ अच्‍युनुपतिवाला ङ्‍यिङ्‍ज्‍ये क्‍या वे। सी खोरो अच्‍युनुपला ङ्‍यिङ्‍ज्‍ये मिकिवे, ती ति शेप ति शितोक लुकिवी।
1JO 3:15 रङगी अच्‍युनुपतिवाला ङ्‍यिङ्‍ज्‍ये मिकिवु मीतिवा तेरी शेन्‍बा दोके यिन। तीला नाम्‍साङ मिसिवु मिजी मोथोपिवी सिरुप ति ख्‍यिराङला साङ छ्‍या वे।
1JO 3:16 ङ्‍यिङ्‍ज्‍ये काङ यिन सिरुप ति चुक क्‍यानी हाक्‍कोकिवी सिसिन, येशू ख्रीष्‍टकी दाक्‍पी थोक्‍ला मिजी नङ्‍गुप ल्‍हासिमा हाक्‍कोकिवी। तुक क्‍यानी दाक्‍पी साङ रङगी अच्‍युनुपतिवी थोक्‍ला मिजी तेर गोकिवी।
1JO 3:17 मी ललाइकी खोरो लोला टोङ्‍बा वोसिनाङ खोरो अच्‍युनुपतिवाला कतुकार ख्‍येलुप थोङ्‍सिनाङ तीकी सेम क्‍योङ्‍बु जेवी सिसिन तीकी मुला कोन्‍छ्‍योककी ङ्‍यिङ्‍ज्‍ये गिवी रो?
1JO 3:18 ङे ङ्‍यिङ्‍ज्‍येवु आङातिवा, ख्‍यिराङ ख तिराङकी ङ्‍यिङ्‍ज्‍ये कितिन सिरुप मिन, यिने लाका टेङ्‍बु क्‍यानी ङ्‍यिङ्‍ज्‍ये छ्‍या तेन।
1JO 3:19 तुक क्‍यासिन दाक्‍पु ति टेङ्‍बुकी गिपा यिन सिनी हाक्‍कोकिवी, तमा कोन्‍छ्‍योककी थोङ्‍दाङला साङ दाक्‍पु तेन्‍तेन च्‍युङ्‍गिवी।
1JO 3:20 यिने दाक्‍पी सेमगी राङ दाक्‍पुला क्‍येन बिन्‍सिनाङ, कोन्‍छ्‍योक ति दाक्‍पी सेम सिनाङ च्‍यम्‍बा वोतुप ताङ चोछ्‍ये वे। तमा तेरी ताम्‍ङे ति खोला छ्‍या वे।
1JO 3:21 तुक क्‍यानी ङे ङ्‍यिङ्‍ज्‍येवुतिवा, दाक्‍पी सेमगी दाक्‍पुला क्‍येन माबिन्‍सिन, दाक्‍पु कोन्‍छ्‍योककी चिप्‍ला ङाडेङ क्‍यानी डो थुप्‍किवी।
1JO 3:22 तमा दाक्‍पी काङ लङ्‍सिनाङ खोकी दाक्‍पुला नङ्‍गिवी। च्‍यिलासिसिन ती ति दाक्‍पु खोकी कला ङ्‍येन्‍नी खोला गा लङ्‍गुप लाका क्‍यावु तप्‍की यिन।
1JO 3:23 खोकी दाक्‍पुला नङ्‍गुप क ति दी यिन। दाक्‍पी येशू ख्रीष्‍टला तेपा कि गोकिवी, तमा येशू ख्रीष्‍टकी दाक्‍पुला सुङ्‍गुप दोके च्‍यिककी च्‍यिकला ङ्‍यिङ्‍ज्‍ये कि गोकिवी।
1JO 3:24 येशू ख्रीष्‍टकी कला ङ्‍येन्‍दुपतिवा तेरी खोकी मुला तम्‍जी ल्‍यामु गिवी, तमा खो साङ तिवी मुला तम्‍जी ल्‍यामु गिवी। खो दाक्‍पी मुला तम्‍जी ल्‍यामु वे सिरुप ति खोकी दाक्‍पुला नङ्‍गुप थु चाङ्‍मा नेसुर हाक्‍कोकिवी।
1JO 4:1 ङे ङ्‍यिङ्‍ज्‍येवुतिवा, थु चाङ्‍मा नेमा वावु ताम्‍ङे क्‍यासिन ख्‍यिराङ तिवा तेरीला तेपा माकी, यिने ती ति कोन्‍छ्‍योक नेमा वावु थु चाङ्‍मा यिनोक मिनोक सिनी हाक्‍कोवा की। च्‍यिलासिसिन लुङ्‍तेम्‍बा मेटेङ्‍बुतिवा बङी दी जम्‍बुलिङला थेन वोतो।
1JO 4:2 चुका तीकी येशू ख्रीष्‍ट दी जम्‍बुलिङला मी जुजमला फेवु यिन सिनी सि वे, तीला कोन्‍छ्‍योक नेमा वावु थु चाङ्‍मा वे।
1JO 4:3 यिने चुका तीकी येशू ख्रीष्‍ट दी जम्‍बुलिङला मी जुजमला फेवु यिन सिनी मिसिर वे, ती ति कोन्‍छ्‍योक नेमा वावु मिन, येशूकी तेन्‍दोकला लङ्‍गुप थु मेटेङ्‍बु यिन। तीकी कोर्ला तोङ्‍ला के जम्‍बुलिङला गिवी सिनी ख्‍यिरा हाक्‍को वे। ती ति जम्‍बुलिङला वान सिन वे।
1JO 4:4 ङे आङातिवा, ख्‍यिराङ याङ कोन्‍छ्‍योककी पुज्‍युङपुमतिवा यिन। तुक क्‍यानी ख्‍यिराङ लुङ्‍तेम्‍बा मेटेङ्‍बुतिवी खला ग्‍येल वे। च्‍यिलासिसिन जम्‍बुलिङला वोतुपतिवी सिनाङ ख्‍यिरा सेमला वोतुप कोन्‍छ्‍योककी थु चाङ्‍मा ति चोछ्‍ये वे।
1JO 4:5 यिने लुङ्‍तेम्‍बा मेटेङ्‍बुतिवा जम्‍बुलिङ नेमा क्‍येवु यिन। तुक क्‍यानी तिवा जम्‍बुलिङकी ताम्‍ङे राङ किवी, जम्‍बुलिङकी मीतिवी साङ तिवी ताम्‍ङे राङ ङ्‍येन्‍गिवी।
1JO 4:6 दाक्‍पु ति कोन्‍छ्‍योककी पुज्‍युङपुमतिवा यिन। सी कोन्‍छ्‍योकला ङो शेवे, तिवी दाक्‍पी ताम्‍ङे साङ ङ्‍येन्‍गिवी। सु कोन्‍छ्‍योककी ति मिन वे, तीकी दाक्‍पी ताम्‍ङे साङ मेङ्‍येन्‍वी। ती नेसुर राङ दाक्‍पी थु टेङ्‍बु ताङ थु मेटेङ्‍बु ङो शेकिवी।
1JO 4:7 ङे ङ्‍यिङ्‍ज्‍येवुतिवा, दाक्‍पु च्‍यिककी च्‍यिकला ङ्‍यिङ्‍ज्‍ये कि गोकिवी। च्‍यिलासिसिन ङ्‍यिङ्‍ज्‍ये ति कोन्‍छ्‍योक नेमा गिवी। सी ङ्‍यिङ्‍ज्‍ये किवे, ती ति कोन्‍छ्‍योककी पुज्‍युङपुम यिन, तीकी कोन्‍छ्‍योकला ङो शेकिवी।
1JO 4:8 च्‍यिककी च्‍यिकला ङ्‍यिङ्‍ज्‍ये मिकिवु मी तीकी कोन्‍छ्‍योकला साङ ङो मेशेवी। च्‍यिलासिसिन कोन्‍छ्‍योक ति ङ्‍यिङ्‍ज्‍ये वोतुप कोन्‍छ्‍योक यिन।
1JO 4:9 कोन्‍छ्‍योककी दाक्‍पुला चुक क्‍यानी ङ्‍यिङ्‍ज्‍ये क्‍यासुङ सिसिन खोकी सेवुला तेपा क्‍यानी दाक्‍पु सेन्‍बु लुशी सिनी खोकी च्‍यिक राङ वोतुप सेवु ति दी जम्‍बुलिङला ताङ्‍सुङ।
1JO 4:10 ङ्‍यिङ्‍ज्‍ये सिरुप ति काङ यिन सिसिन, कोन्‍छ्‍योकला दाक्‍पी ङ्‍यिङ्‍ज्‍ये क्‍यावु मिन, यिने खोकी दाक्‍पुला ङ्‍यिङ्‍ज्‍ये क्‍या नाङ्‍नी दाक्‍पी दिक्‍पी ठिलेन च्‍योलुपला खोकी सेवु येशू ख्रीष्‍ट ताङ्‍नी जिन्‍बा च्‍युङ च्‍यिसुङ।
1JO 4:11 ङे ङ्‍यिङ्‍ज्‍येवुतिवा, कोन्‍छ्‍योककी दाक्‍पुला छासे ङ्‍यिङ्‍ज्‍ये क्‍या नङ्‍गुप तप्‍की दाक्‍पी साङ च्‍यिककी च्‍यिकला ङ्‍यिङ्‍ज्‍ये कि गोकिवी।
1JO 4:12 कोन्‍छ्‍योकला सी साङ नाम्‍साङ माथोङ वे। यिन्‍सिनाङ दाक्‍पी च्‍यिककी च्‍यिकला ङ्‍यिङ्‍ज्‍ये क्‍यासुङ सिसिन, खो दाक्‍पी मुला ज्‍युकिवी, तमा खोकी ङ्‍यिङ्‍ज्‍ये ति दाक्‍पी मिजीला छेकिवी।
1JO 4:13 खोकी दाक्‍पुला थु चाङ्‍मा नङ वे। तुक क्‍यानी खो दाक्‍पी मुला ज्‍यु वे, तमा दाक्‍पु खोकी मुला वे सिरुप ति दाक्‍पी हाक्‍कोकिवी।
1JO 4:14 ङ्‍यिरा थोङ्‍गुप पङ्‍बु ति काङ यिन सिसिन, कोन्‍छ्‍योककी खोरे सेवु साङ जम्‍बुलिङकी मीतिवा दिक्‍पा ने थर ज्‍यितुपला नाङ्‍सुङ।
1JO 4:15 चुका मी तीकी येशू ति कोन्‍छ्‍योककी सेवु यिन सिनी मी मिङ्‍गाला सिवे, तीकी मुला कोन्‍छ्‍योक ज्‍युकिवी, तमा ती मी ति कोन्‍छ्‍योककी मुला वे सिरुप ति हाक्‍कोकिवी।
1JO 4:16 कोन्‍छ्‍योककी दाक्‍पुला ङ्‍यिङ्‍ज्‍ये क्‍या नङ्‍गुप ति हाक्‍कोवु तप्‍की दाक्‍पी खोकी क्‍या नङ्‍गुप ङ्‍यिङ्‍ज्‍येला तेपा क्‍यावु यिन। खो ति ङ्‍यिङ्‍ज्‍ये कितुप कोन्‍छ्‍योक यिन। चुका मी तीकी मी यम्‍बाला ङ्‍यिङ्‍ज्‍ये किवे, ती मी ति कोन्‍छ्‍योककी मुला वे सिरुप हाक्‍कोकिवी। तमा कोन्‍छ्‍योक साङ तीकी मुला ज्‍युकिवी।
1JO 4:17 ती नेसुर दाक्‍पी मिजीला खोकी ङ्‍यिङ्‍ज्‍ये तेरी छेसुङ, तुक क्‍यानी खो येलुङ फेप्‍नी ठिम कितुप तुजेला दाक्‍पु काङ साङ ज्‍यिवा कि मोगोवी। च्‍यिलासिसिन येशू ख्रीष्‍ट दोके क्‍यानी दाक्‍पी साङ मिजी क्‍योङ्‍गिवी।
1JO 4:18 ङ्‍यिङ्‍ज्‍येला ज्‍यिवा मे। दाक्‍पुला ङ्‍यिङ्‍ज्‍ये तेरी वोसिन ज्‍यिवा साङ तोर्किवी। च्‍यिलासिसिन ती ज्‍यिवा ति पर्च्या नेसुर गिवी। सी ज्‍यिवा किवे, तीला ङ्‍यिङ्‍ज्‍ये तेरी मेछेवी।
1JO 4:19 दाक्‍पु च्‍यिककी च्‍यिकला ङ्‍यिङ्‍ज्‍ये किवी, च्‍यिलासिसिन कोन्‍छ्‍योककी गोमाला के दाक्‍पुला ङ्‍यिङ्‍ज्‍ये क्‍या नाङ्‍सुङ।
1JO 4:20 दोजो मी ललाइकी ङ कोन्‍छ्‍योकला ङ्‍यिङ्‍ज्‍ये कितिन सिवी, यिने यम्‍बा अच्‍युनुपतिवाला ङ्‍यिङ्‍मर किवी सिसिन ती ति जिनोक जोप यिन। च्‍यिलासिसिन तीकी खोरो मिककी थोङ्‍गुप अच्‍युनुपतिवाला साङ ङ्‍यिङ्‍ज्‍ये मिकिवी सिसिन मोथोङ्‍गुप कोन्‍छ्‍योकला ङ्‍यिङ्‍ज्‍ये कि मुथुवी।
1JO 4:21 तुक क्‍यानी सी कोन्‍छ्‍योकला ङ्‍यिङ्‍ज्‍ये किवे, तीकी यम्‍बा अच्‍युनुपतिवाला साङ ङ्‍यिङ्‍ज्‍ये कि गोकिवी सिनी खोकी दाक्‍पुला क नङ वे।
1JO 5:1 येशू ति दिक्‍पा ने थर ज्‍यितुप ख्रीष्‍ट राङ यिन सिनी तेपा कितुपतिवा तेरी कोन्‍छ्‍योककी पुज्‍युङपुम यिन। सी पपाला ङ्‍यिङ्‍ज्‍ये किवे, तीकी खोकी पुज्‍युङला साङ ङ्‍यिङ्‍ज्‍ये किवी।
1JO 5:2 दाक्‍पु कोन्‍छ्‍योकला ङ्‍यिङ्‍ज्‍ये कितुप ताङ खोकी कला ङ्‍येन्‍गिवी सिसिन ती नेसुर कोन्‍छ्‍योककी गिपाला दाक्‍पी ङ्‍यिङ्‍ज्‍ये किवी सिरुप ति हाक्‍कोकिवी।
1JO 5:3 कोन्‍छ्‍योककी कला ङ्‍येन्‍दुप ति दाक्‍पी खोला ङ्‍यिङ्‍ज्‍ये क्‍यावु यिन। खोकी कतिवा ङ्‍येन्‍दुप ति कले मे।
1JO 5:4 च्‍यिलासिसिन कोन्‍छ्‍योककी पुज्‍युङपुमतिवा तेरीकी जम्‍बुलिङकी खला ग्‍येल्‍गिवी, जम्‍बुलिङकी खला ग्‍येलुप ति दाक्‍पी कोन्‍छ्‍योकला तेपा क्‍यानी यिन।
1JO 5:5 जम्‍बुलिङला ग्‍येलुप ति सु यिन सिसिन, येशू ति कोन्‍छ्‍योककी सेवु यिन सिनी तेपा कितुप तिराङ जम्‍बुलिङला ग्‍येलुप यिन।
1JO 5:6 ती येशू ति छ्‍यु ताङ ठक नेमा फेवु यिन। छ्‍यु तिराङ मिन, छ्‍यु ताङ ठक नेसुर फेवु यिन। पङ्‍बु तेरुप ति कोन्‍छ्‍योककी थु चाङ्‍मा यिन, च्‍यिलासिसिन कोन्‍छ्‍योककी थु चाङ्‍मा ति टेङ्‍बु वे।
1JO 5:7 पङ्‍बु तेरुप ति सुम चोके वे।
1JO 5:8 तीकी तेन्‍दोक ति थु चाङ्‍मा ताङ छ्‍यु ताङ ठक यिन। दिवा सुम ति च्‍यिक्‍पा राङ यिन।
1JO 5:9 दोजो दाक्‍पु मी पङ्‍बु बिन्‍दुप ताम्‍ङेला साङ सेमला लिङ्‍गिवी सिसिन, कोन्‍छ्‍योककी पङ्‍बु याङ छासे चोछ्‍ये वे। च्‍यिलासिसिन ती पङ्‍बु ति कोन्‍छ्‍योक नेमा वोवु यिन। ती ति खोकी सेवु येशूकी कोर्ला नङ्‍गुप यिन।
1JO 5:10 सी कोन्‍छ्‍योककी सेवुला तेपा किवे, तीकी सेमला ति पङ्‍बु ज्‍यकुप गिवी। यिने कोन्‍छ्‍योककी सेवुला तेपा मिकिवु तीकी खोला मेटेङ्‍बु जोवु गिवी। च्‍यिलासिसिन कोन्‍छ्‍योककी खोरे सेवुकी कोर्ला पङ्‍बु नङ्‍गुप ताम्‍ङेला तीकी तेपा मिकिवी।
1JO 5:11 पङ्‍बु ति दी राङ यिन, कोन्‍छ्‍योककी दाक्‍पुला नाम्‍साङ मिशिवु मिजी नाङ्‍सुङ। ती मिजी ति खोकी सेवु येशूकी मुला वे।
1JO 5:12 सी ति खोकी सेवु येशू ताङ मुला तम्‍जी ल्‍यामु नोके, तीकी मुला मिजी साङ वे। तमा खोकी सेवु ताङ मुला तम्‍जी ल्‍यामु मेतुप तीकी मुला मिजी साङ मे।
1JO 5:13 दी यिकी ति ख्‍यिराङ कोन्‍छ्‍योककी सेवु येशूला तेपा कितुपतिवाला नाम्‍साङ मिशिवु मिजी थोप्‍शी सिनी हाक्‍को ज्‍यितुपला ङे टिवु यिनो।
1JO 5:14 दाक्‍पी कोन्‍छ्‍योकला रेवा क्‍यावु ति काङ यिन सिसिन, खोकी नोवाला काङ लङ्‍सिनाङ खोकी दाक्‍पुला नङ्‍गिवी सिरुप ति दाक्‍पुला तेन्‍तेन वे।
1JO 5:15 तुक क्‍यानी दाक्‍पी मोपोर क्‍यानी काङ लङ्‍सिनाङ कोन्‍छ्‍योककी सेन्‍गिवी सिरुप ति दाक्‍पुला छ्‍या वोतुप तप्‍की दाक्‍पी खोला काङ लाङ्‍वे, ती ति ङ्‍येनिङ वे सिनी तेन्‍तेन गिवी।
1JO 5:16 सी साङ यम्‍बा नुपकी दिक्‍पा कितुप थोङ्‍सुङ, यिने ती दिक्‍पा ति ङ्‍येलाला क्‍योलुप दिक्‍पा मिन्‍सिन, तीकी तिवी थोक्‍ला कोन्‍छ्‍योकला मोपोर कि गोकिवी। तीकी क्‍यावु दिक्‍पा ति ङ्‍येलाला क्‍योलुप दोके मेसिन कोन्‍छ्‍योककी तीला मिजी नङ्‍गिवी। यिने ङ्‍येलाला क्‍योलुप दिक्‍पा साङ वे। तीकी थोक्‍ला ति ङ सुला साङ गोङ्‍बा शु सिनी मिसिर।
1JO 5:17 टेङ्‍बु मेतुपतिवा तेरी दिक्‍पा यिन। यिने ललाइ दिक्‍पा साङ गिवी, तीकी ङ्‍येलाला मोक्‍योल्‍वी।
1JO 5:18 कोन्‍छ्‍योककी पुज्‍युङपुमतिवा सी साङ दिक्‍पा क्‍या क्‍यावा मेदेवी। तिवाला खोकी सेवुकी राङ नरी र्‍होकिवी। तमा दुक्‍टाकी साङ तिवाला ना तोङ मुथुपी।
1JO 5:19 दाक्‍पु ति कोन्‍छ्‍योककी पुज्‍युङपुमतिवा यिन सिनी दाक्‍पुला छ्‍या वे। यिने दी जम्‍बुलिङ ति तेरी दुक्‍टाकी ओङला शोर्नी वे।
1JO 5:20 दाक्‍पुला छ्‍या वोतुप ति काङ यिन सिसिन, कोन्‍छ्‍योककी सेवु दी जम्‍बुलिङला फेप्‍नी दाक्‍पी खोला ङो शेवु रिक्‍पा नङ्‍सुङ। तुक क्‍यानी खो टेङ्‍बु यिन सिरुप ति दाक्‍पी हाक्‍कोकिवी। तमा खो ताङ मुला दाक्‍पी तम्‍जी ल्‍यामु वे, खोकी सेवु येशू ख्रीष्‍टकी मुला साङ तम्‍जी ल्‍यामु वोतुप हाक्‍कोकिवी। ती येशू ख्रीष्‍ट ति टेङ्‍बु वोतुप कोन्‍छ्‍योक यिन। खोकी दाक्‍पुला नाम्‍साङ मिशिवु मिजी नङ्‍गिवी।
1JO 5:21 ङे आङातिवा, ख्‍यिराङ दाक दाक्‍पुला कुतिवा नेसुर र्‍होक्‍नी देता।
2JO 1:1 ङ चर्चला गोमा कितुप मी छ्‍येकी छ्‍योक नेसुर कोन्‍छ्‍योककी पेन नङ्‍गुप आम्‍पुम ताङ तीकी पुज्‍युङपुमतिवाला दी यिकी ति टिवु यिनो। वुतुङ के ङ ख्‍यिराङला ङ्‍यिङ्‍ज्‍ये कितिन। ङ तिराङ मिन, यिने कोन्‍छ्‍योककी सुङ टेङ्‍बु काङ यिन सिनी हाक्‍कोवु मीतिवा तेरीकी साङ ङ्‍यिङ्‍ज्‍ये कितो।
2JO 1:2 ङ्‍यिरा ख्‍यिराङला ङ्‍यिङ्‍ज्‍ये क्‍यावु तेन्‍दोक ति कोन्‍छ्‍योककी सुङ टेङ्‍बु ति तन्‍दा तिराङ मिन, नरी सेक दाक्‍पी सेमला लुवु तप्‍की यिन।
2JO 1:3 दाक्‍पु कोन्‍छ्‍योककी ङ्‍यिङ्‍ज्‍ये ताङ टेङ्‍बु काङ यिन सिनी हाक्‍कोवु तिवाला पपा कोन्‍छ्‍योक ताङ खोकी सेवु येशू ख्रीष्‍ट नेसुर कटिन ताङ च्‍यम्‍बा ताङ लोदिमु ति नरी वुङ्‍शी।
2JO 1:4 ख्‍योरो पुज्‍युङपुमतिवा ललाइ ललाइ पपा कोन्‍छ्‍योककी नङ्‍गुप कला वोतुप दोके क्‍यानी खोकी सुङ टेङ्‍बुला युवु ति ङ्‍यिरा हाक्‍कोसुङ। तुक क्‍यानी ङ्‍यिराङला छासे गा लानी वोतो।
2JO 1:5 ओ पुमो, त याङ ख्‍युरुङला ङे क सम्‍बा टिवु मिन, तोङ नेज्‍यु वोतुप क ङ्‍यिङ्‍बा राङ टिवु यिनो। दाक्‍पु च्‍यिककी च्‍यिकला ङ्‍यिङ्‍ज्‍ये कितुप सिनी ङ ख्‍युरुङला गोङ्‍बा शोयिनो।
2JO 1:6 ती ङ्‍यिङ्‍ज्‍ये ति काङ यिन सिसिन दाक्‍पु खोकी सुङला युकुप यिन। ती क ति ख्‍योरो तोङ नेज्‍यु थोवु साङ यिन। ख्‍युरुङ ति कला वोतुप दोके ङ्‍यिङ्‍ज्‍ये कि गोकिवी।
2JO 1:7 दी जम्‍बुलिङला जिनोक जोप मीतिवा बङी वा वे। तिवी येशू ख्रीष्‍ट मी जुजमला फेवु यिन सिनी मी मिङ्‍गाला मिसिरी। तुका मीतिवा जिनोक जोप ताङ ख्रीष्‍टकी तेन्‍दोकला लङ्‍गुप मी यिन।
2JO 1:8 च्‍याङ्‍से देता, ख्‍यिराङ काङगी थोक्‍ला लाका किवे, ती ति ख्‍यिरा तोर ज्‍यितुप मिन, यिने तिङ्‍ला कोन्‍छ्‍योककी नङ्‍गुप छ्‍यक्‍तक तेरी थोपुप वुङ गोकितो।
2JO 1:9 ख्रीष्‍टकी सुङ्‍गुप कला मुयुकुप ताङ डेकला मेदेवु मीतिवी मुला कोन्‍छ्‍योक मेवी, यिने खोकी नङ्‍गुप सुङला हम क्‍यानी देतुप मीतिवी मुला कोन्‍छ्‍योक ताङ खोकी सेवु ङ्‍यिकर ज्‍युकिवी।
2JO 1:10 दोजो मी ललाइ ख्‍योरो ते वानी येशूकी नङ्‍गुप दोके येन्‍देन मेतेर्वी सिसिन तिवाला खाङ्‍बा साङ गासो माशु, टसी देलेक साङ मासिर।
2JO 1:11 च्‍यिलासिसिन तुका मीला टसी देलेक सिक्‍यासिन दाक्‍पु साङ दुक्‍टाकी लाकाला राङ शुवु यिन।
2JO 1:12 ख्‍यिराङला ङे टिक गोवु ताम्‍ङे याङ बङी वे, यिने शु ताङ नक्‍ची थ्‍वोनी तिराङ मिन, दाक्‍पुला वुतुङ के गा ताङ लोदिमु वुङ्‍शी सिनी ख्‍यिराङ ताङ मुला ठेनी ताम्‍ङे कितुप नो वे।
2JO 1:13 यम्‍बा चर्चकी तेपा कितुप मीतिवी साङ ख्‍यिराङला टसी देलेक सिनी तङ वोतो।
3JO 1:1 ङे ङ्‍यिङ्‍ज्‍येवु येशूला तेपा कितुप दाल्‍जा गायसला टसी देलेक! ङ चर्चकी गोमा कितुप मी छ्‍येकी छ्‍योक नेसुर ख्‍युरुङला वुतुङ के ङ्‍यिङ्‍ज्‍ये क्‍यानी दी यिकी टिवु यिनो।
3JO 1:2 दाल्‍जो, ख्‍योरो मिजीला तेपा रम्‍बु च्‍युङ्‍नी ख्‍युरुङला तेरी ताम्‍ङेतिवा ल्‍यामु वुङ्‍शी, नाप्‍छाप काङ साङ मेङ्‍शी सिनी ङ मोपोर कितिन।
3JO 1:3 माङ्‍शोक तेपा कितुप नुपतिवा ङे ते वानी ख्‍योरो मिजी टेङ्‍बुकी कोर्ला पङ्‍बु बिन्‍सुङ। तुक क्‍यानी ङला छासे लोदिमु च्‍युङ्‍सुङ।
3JO 1:4 ङे ङ्‍यिङ्‍ज्‍येवु आङातिवा टेङ्‍बु क्‍यानी युकिनोक सिरुप ताम्‍ङे थोवु सिनाङ मङ गाकी लेन ति ङे थोक्‍ला काङ के वोतुप्‍जा?
3JO 1:5 ङे ङ्‍यिङ्‍ज्‍येवु दाल्‍जा, ख्‍योरो अच्‍युनुप ताङ कोन्‍छ्‍योककी सुङ ख्‍याप्‍टाक कितुप ङो मेशेवु मी यम्‍बातिवाला साङ शब्‍ज्‍यी क्‍यानी लाका खोङ्‍तेर्मु क्‍यासुङ।
3JO 1:6 तिवा वानी तेपा कितुपतिवी पर्ला ख्‍योरो ङ्‍यिङ्‍ज्‍ये क्‍यावु ताम्‍ङेकी कोर्ला पङ्‍बु बिन्‍सुङ। तुक क्‍यानी तिवा लोक्‍नी वुङ्‍गुप पेला साङ ख्‍योरो कोन्‍छ्‍योककी थोङ्‍दाङला तिवाला ल्‍यामो क्‍यानी दाल्‍जा किसा।
3JO 1:7 च्‍यिलासिसिन तिवा तेपा मिकिवु मीतिवी पर्ला येशूकी थोक्‍ला सुङ ख्‍याप्‍टाक कितुपला गलुप तप्‍की तेपा मिकिवु मीतिवा नेसुर काङ साङ मालाङ्‍नोक।
3JO 1:8 तुक क्‍यानी तुका मीतिवाला दाक्‍पी शब्‍ज्‍यी कि गोकिवी। तुक क्‍यासिन दाक्‍पु साङ खोतिवी मुला राङ टेङ्‍बुकी थोक्‍ला लाका क्‍यावु यिन।
3JO 1:9 ङे ख्‍योरो चर्चकी तेपा कितुप मीतिवी थोक्‍ला ताम्‍ङे चेयी टिनी तङ्‍यिन, यिने ख्‍यिरा पर्ला छ्‍ये कितुप छोलुप डियोत्रिफसकी ङे सिक्‍यावु ताम्‍ङेला मेङ्‍येन्‍दिवी।
3JO 1:10 ती तप्‍की ङ वासिमा तीकी क्‍यावु लाकाकी कोर्ला ताम्‍ङे कितिनो। च्‍यिलासिसिन तीकी ङ्‍यिरा तेन्‍दोकला ताम्‍ङे मेलोवा क्‍यानी युकिनोक। तोजो तिराङ मिन, कोन्‍छ्‍योककी सुङ ख्‍याप्‍टाक कितुपतिवाला साङ गासो मुशुनोक, गासो शोप नो कितुपतिवाला साङ ग्‍येकिनोक। तमा तिवाला चर्च नेमा तेन्‍नी तोङ्‍गिनोक।
3JO 1:11 ङे ङ्‍यिङ्‍ज्‍येवु नुपो, मेलोवा कितुप लुमु मासे, ल्‍यामु तिराङ की। सी ल्‍यामु किवे, ती ति कोन्‍छ्‍योककी मी यिन। सी मेलोवा किवे, ती ति कोन्‍छ्‍योकला माथोङ्‍गुप मी यिन।
3JO 1:12 डेमेत्रियसकी थोक्‍ला याङ मी तेरीकी पङ्‍बु ल्‍यामु बिन वे, ती ति तीकी टेङ्‍बु वोतुप मिजी ल्‍हानी साङ हाक्‍कोकिवी। ङ्‍यिराङ साङ तीकी थोक्‍ला पङ्‍बु तेरिन। ती ति ङ्‍यिरा बिन्‍दुप पङ्‍बु टेङ्‍बु यिन सिनी ख्‍यिरा हाक्‍कोकिवी।
3JO 1:13 ख्‍युरुङला ङे टिक गोवु ताम्‍ङेतिवा याङ बङी वे, यिने शु ताङ ङ्‍युक थ्‍वोनी मिटिक।
3JO 1:14 यिने ङ ङमु राङ ख्‍युरुङला ठेतुपला वुङ्‍गुप नो वे, ख्‍युरुङला ठेसिमा मुला राङ देनी ताम्‍ङे कितुप्‍नो।
3JO 1:15 ख्‍युरुङला लोदिमु वुङ्‍शी! तेरी दाल्‍जातिवा नेसुर ख्‍युरुङला टसी देलेक वोतो। दाल्‍जातिवा रे ताङ रे तेरीला टसी देलेक वोतो सिनी सिसा।
JUD 1:1 टसी देलेक! ङ यहूदा ति याकूबकी नुप ताङ येशू ख्रीष्‍टला शब्‍ज्‍यी कितुप मी यिन। ङे छ्‍योक नेसुर कोन्‍छ्‍योककी कताङ नङ्‍नी ङ्‍यिङ्‍ज्‍ये क्‍या नङ्‍गुप ताङ येशू ख्रीष्‍टकी र्‍होकुप मीतिवाला दी यिकी ति टिवु यिनो।
JUD 1:2 ख्‍यिराङला छासे क्‍यानी ङ्‍यिङ्‍ज्‍ये च्‍यम्‍बा ताङ लोदिमु वुङ्‍शिता।
JUD 1:3 ङे ङ्‍यिङ्‍ज्‍येवु अच्‍युनुपतिवा, दाक्‍पु तेरीला थोपुप थर्वाकी कोर्ला ङ ख्‍यिराङला टिकुपला छासे नो लासुङ। यिने त याङ कोन्‍छ्‍योककी खोरे मीतिवाला थेङ्‍मा च्‍यिक नङ्‍सिमा नरीकी नरी लुवु तेपा ति ख्‍यिरा छासे रम्‍बु क्‍यानी र्‍होक सिनी ङाडेङ तेरुपला ङे दी यिकी टिकुप ति ल्‍यामु यिन सिनी नोसुङ।
JUD 1:4 च्‍यिलासिसिन ललाइ ललाइ मीतिवा ख्‍यिरा पर्ला खरक्‍पा सोक शुनी वे। तिवी कोन्‍छ्‍योकला मेतेन्‍वी। तमा खोकी दाक्‍पुला कटिन नङ्‍नी दाक्‍पु चाङ्‍मा जोवु तप्‍की दाक्‍पी लाका मेलोवा क्‍यासिनाङ गिवी सिनी मीतिवाला लोप्‍किवी। तोजो तिराङ मिन, येशू ख्रीष्‍टला च्‍यिक राङ वोतुप चोवो ताङ ज्‍यिन्‍दाक सिनी तेपा साङ मिकिवी। तुका मीतिवाला क्‍येन फोकुप कोर्ला गोमाला के कोन्‍छ्‍योककी सुङगी नाङ्‍ला टिनी नोक।
JUD 1:5 ती ताम्‍ङे ति ख्‍यिराङला छ्‍या राङ वे, यिन्‍सिनाङ ङ ताम्‍ङे चेयी ख्‍यिराङला टेन्‍सो कि ज्‍यितिन। चोवोकी मीतिवाला मिश्र लुङ्‍बा नेसुर तेन्‍नी वावु मीतिवी नाङ्‍ला तेपा मिकिवु गिपातिवाला खोकी तेरी पुसुकी डो च्‍यिसुङ।
JUD 1:6 तमा खोरो ओङ्‍ज्‍येन सिनाङ पाङ्‍ला डोप ताङ खोप्‍रे दासा क्‍युर्नी ज्‍योकुप देवाच्‍येनकी लेन क्‍योलुप थुतिवाला साङ खोकी ठिम कितुप तुजे ग्‍येर्पु सेककी थोक्‍ला नाम्‍साङ पि मोशोरुप च्‍यातकला टानी नक्‍तोमीला उम ज्‍याक्‍नी वे।
JUD 1:7 तुक राङ क्‍यानी सदोम ताङ गमोरा ताङ तिवी गारी गुरीकी ग्‍येसाकी मीतिवी साङ रे ताङ ङ्‍यी क्‍यानी छ्‍येवु छ्‍येमु कितुप ताङ ङोजु मेतुप शम्‍डेनतिवा क्‍यासुङ। तमा तिवा नाम्‍साङ मिशिवु मे नाङ्‍ला ख्‍येल्‍नी तिवी क्‍यावु लाका मेलोक्‍पाकी थोक्‍ला तिवाला मेकी छ्‍येर्पा फोकुप नमुना च्‍युङ्‍सुङ।
JUD 1:8 तुक राङ क्‍यानी तिवी साङ मिलाम थोङ्‍नी खोप्‍रे जु ति मेटेङ्‍बु जेवी, तमा चोवोकी ओङ्‍ज्‍येनला साङ मेङ्‍येन्‍दिवी, देवाच्‍येनकी लेन क्‍योलुप थुतिवाला साङ मारे तोङ्‍गिवी।
JUD 1:9 देवाच्‍येनकी लेन क्‍योलुप थु छ्‍ये मिखाएलकी मोशाकी फुङ्‍बुकी कोर्ला शैतानकी मुला खाँदा कितुप पेला मिखाएलला ङ्‍यिर्मु लासिनाङ शैतानला क्‍येन माग्‍यप्‍नी “चोवोकी ख्‍युरुङला कप्‍क्‍येन नङ्‍गिवी।” तिराङ सिक्‍यासुङ।
JUD 1:10 यिने ती मीतिवी याङ खोरो हाक राङ माकोवु ताम्‍ङे चुकै यिन्‍सिनाङ मारे तङ्‍नी क्‍येन तेर्किवी। तमा तिवी तेरी ताम्‍ङेतिवा ल्‍यामु हाक्‍कोकिवी सिनी रिक्‍पा मेतुप छ्‍युङ्‍मातिवा दोके क्‍यानी लाका किवी। तुक क्‍यानी तिवा रिक्‍पा मेतुप लाकाकी तेन्‍दोकला राङ ना डिवी।
JUD 1:11 ती मीतिवा मोताप सुकुप यिनो! च्‍यिलासिसिन तिवा कयिनकी दला शुसुङ। टङ्‍गी देर्पाला ख्‍येल्‍नी बालामकी दोके मीतिवाला जिनोक जोसुङ। तमा कोरहकी दोके कोन्‍छ्‍योककी तेन्‍दोकला लानी तिवा कोरह दोके ना डिवी।
JUD 1:12 ती मीतिवा ख्‍यिरा डेन साप पेला ख्‍यिराङला मारेला जोप तिराङ यिन। च्‍यिलासिसिन तिवा मी यम्‍बाला ङ्‍याम माक्‍यानी खोप्‍राङ खोक्‍पा ग्‍येङ्‍गुप नासाम तिराङ तोङ्‍गिवी। तिवा ति वुर्तुककी फार छुर शरुप छ्‍यर्वा माग्‍यकुप मुक्‍पा र्‍हेमे दोके यिन। तमा येर्वु साङ डेलु मोगोरुप दोङ्‍बु मार ताङ डेके पल्‍नी तेरी कम्‍बुप गल्‍नी शेप दोके यिन।
JUD 1:13 तिवा ग्‍येम्‍छो नङगी ज्‍यिवा लङ्‍गुप छ्‍यी बालाप दोके वे। तमा रङगी ङोजु मेतुप लाका ति ग्‍येम्‍छोकी बोवा दोके क्‍यानी छ्‍या देन्‍गिवी। तमा तिवा ख्‍यम्‍नी गलुप कर्मा दोके गल वे। तिवा नरीकी नरी सेक ज्‍यिवा लङ्‍गुप नक्‍तोमी दासाकी थोक्‍ला सानी ज्‍याङ वे।
JUD 1:14 तीकी कोर्ला आदमकी गिपा दिन्‍बा हनोककी साङ दुक सिनी नम्‍दर शेन वे, “ल्‍होसा, छासे देवाच्‍येनकी लेन क्‍योलुप थु मङ्‍मुकी मुला चोवो फेपिन वोतो।
JUD 1:15 खो फेप्‍सिमा तुका लाका मेलोक्‍पा क्‍यावु मीतिवाला ठिम क्‍या नङ्‍गिवी। तमा तिवी क्‍यावु नम्‍बा मेटेङ्‍बुकी लाकातिवा तेरी ताङ खोकी तेन्‍दोकला क्‍यावु ताम्‍ङे मेटेङ्‍बु तेरीकी थोक्‍ला पर्च्या तोङ्‍गिवी।”
JUD 1:16 तुका मीतिवा नरी ङ्‍योशोक ङ्‍योशोक सिरुप ताङ नरी मी यम्‍बाला क्‍येन तेरुप छोलुप ताङ खुरुङ राङ नोवा मेलोवाला युकुप ताङ ङ राङ छ्‍ये यिन सिनी नोकितुप ताङ खोरो ख्‍येप्‍साङकी थोक्‍ला मी यम्‍बाला ख शिम्‍बु जोप गिवी।
JUD 1:17 यिने ङ्‍यिङ्‍ज्‍येवु अच्‍युनुपतिवा, ख्‍यिराङ ति दाक्‍पी चोवो येशू ख्रीष्‍टकी लोमा छ्‍येतिवी गोमाला सिक्‍यावु ताम्‍ङेतिवा नासाम तोङ।
JUD 1:18 तिवी ख्‍यिराङला दुक सिक्‍या वे, “जम्‍बुलिङकी तिङ्‍मी तुजेला कोन्‍छ्‍योकला मोवा माक्‍यानी खोप्‍रे नोवा मेलोक्‍पाला युनी ख्‍यिराङला मर्च्या कितुप मीतिवा वुङ्‍गितो।”
JUD 1:19 तिवा ति ख्‍यिराङला क्‍येङ्‍सु जोप मीतिवा यिन। तिवा जम्‍बुलिङकी नोवाला राङ युकिवी। तुक क्‍यानी तिवी मिजीला कोन्‍छ्‍योककी थु चाङ्‍मा मेवी।
JUD 1:20 यिने अच्‍युनुपतिवा, ख्‍यिराङ ति छासे चाङ्‍मा वोतुप तेपाला रम्‍बु च्‍युङ्‍नी फेलिन ग्‍युक। तमा कोन्‍छ्‍योककी थु चाङ्‍माकी ओङला देनी मोपोर किसा।
JUD 1:21 तमा दाक्‍पी चोवो येशू ख्रीष्‍टकी नाम्‍साङ मिशिवु मिजी नङ्‍गुप च्‍यम्‍बाकी थोक्‍ला गुनी देतुप पेला कोन्‍छ्‍योककी नङ्‍गुप ङ्‍यिङ्‍ज्‍येला क्‍युर्नी माज्‍योक।
JUD 1:22 कोन्‍छ्‍योककी सुङगी थोक्‍ला सेमला नाम्‍दोक कितुपतिवाला च्‍यम्‍बा की।
JUD 1:23 ललाइ ति मे बरुप ङ्‍येलाला ख्‍येल्‍गिवी, तिवाला ति ती नेसुर र्‍होक। तमा यम्‍बाला ति ज्‍यिवा क्‍यानी च्‍यम्‍बा की। यिने च्‍याङ्‍से देता, तिवी दिक्‍पा क्‍यावु दोके काङ साङ लुमु मासेनी ती नेसुर क्‍येङ्‍सु दे।
JUD 1:24 दाक्‍पी कोन्‍छ्‍योककी ख्‍यिराङला दिक्‍पा ने र्‍होकुप ताङ क्‍येन मेतुप जोनी खोकी मोवाकी चिप्‍ला लोदिमु क्‍यानी टिनी डिवी।
JUD 1:25 खो ति च्‍यिक राङ ज्‍यु वोतुप कोन्‍छ्‍योक यिन, खो ति येशू ख्रीष्‍ट नेसुर दाक्‍पुला थर्वा नङ्‍गुप कोन्‍छ्‍योक यिन। खोला तेरी मोवा ताङ ताङ्‍देन ताङ ङार ताङ ओङ्‍ज्‍येन ति थल्‍मा नेज्‍यु तन्‍दा सेक तसाम नेज्‍यु तिङ्‍ला सेक नरीकी नरी वुङ्‍शी, आमिन।
REV 1:1 दी थेप नाङ्‍ला वोतुप ताम्‍ङेतिवा ति येशू ख्रीष्‍टकी हाक्‍को च्‍यितुप ताम्‍ङे यिन। कोन्‍छ्‍योककी खोला शब्‍ज्‍यी कितुपतिवाला दी जम्‍बुलिङला ङमु राङ च्‍युङ्‍गुप ताम्‍ङेतिवी कोर्ला हाक्‍को ज्‍यितुपला खोरे सेवु येशू ख्रीष्‍टला दी ताम्‍ङे ति सुङ्‍गुप यिन। तमा येशूकी देवाच्‍येनकी लेन क्‍योलुप थु च्‍यिक यूहन्‍नाकी चाला ताङ्‍नी ती तेरी ताम्‍ङेतिवा यूहन्‍नाला ठछ्‍येली हाक्‍को च्‍यिसुङ।
REV 1:2 तमा यूहन्‍नाकी खोरो थोङ्‍गुप कोन्‍छ्‍योककी सुङ ताङ येशू ख्रीष्‍टकी पङ्‍बु नङ्‍गुप ताम्‍ङेतिवा तेरी शेसुङ।
REV 1:3 मीतिवाला दी थेपकी नाङ्‍ला वोतुप कोन्‍छ्‍योककी लुङ्‍तेम्‍बाकी सुङतिवा रानी तेरुप मी ताङ दी सुङतिवा ङ्‍येन्‍दुप मीतिवा ताङ ती सुङला सिक्‍यावु दोके क्‍यानी मिजी क्‍योङ्‍गुप मीतिवाला मोलाम थोपुप यिनो। च्‍यिलासिसिन दी थेप नाङ्‍ला वोतुप ताम्‍ङेकी तुजे ति ङमु राङ छेकिवी।
REV 1:4 एशिया लुङ्‍बाकी चर्च दिन्‍करला वोतुप तेपा कितुप मीतिवाला ङ यूहन्‍नाकी छ्‍योक नेमा टसी देलेक! थल्‍माला ज्‍यु वोतुप ताङ तसाम साङ ज्‍यु वोतुप ताङ तिङ्‍ला फेपुप चोवो कोन्‍छ्‍योक नेमा ख्‍यिराङला कटिन ताङ लोदिमु वुङ्‍शिता। खोकी ग्‍येल्‍ठिककी दोङ्‍ला वोतुप थु दिन्‍कर नेसुर साङ कटिन ताङ लोदिमु वुङ्‍शिता।
REV 1:5 तमा पङ्‍बु टेङ्‍बु वोतुप ताङ तेरी सिनाङ थल्‍माला शेप ने ङोसु लङ्‍गुप जम्‍बुलिङकी ग्‍येल्‍वी खकी ग्‍येल्‍वु येशू ख्रीष्‍ट नेसुर कटिन ताङ लोदिमु वुङ्‍शिता। येशू ख्रीष्‍टकी दाक्‍पुला ङ्‍यिङ्‍ज्‍ये क्‍या नङ्‍गुप ताङ खो ग्‍यङ्‍शिङला टुङ्‍नी खोकी ठक नेसुर दाक्‍पी दिक्‍पा ता च्‍यिसुङ।
REV 1:6 तमा दाक्‍पुला खोकी ग्‍येल्‍खापकी मीतिवा जोनी पपा कोन्‍छ्‍योककी थोक्‍ला शब्‍ज्‍यी कितुप कोङ्‍यार जो नाङ्‍सुङ। खोला राङ नरीकी नरी मोवा ताङ ओङ्‍ज्‍येन वुङ्‍शी। आमिन।
REV 1:7 ल्‍होसा, खो मुक्‍पी ख नेमा फेप्‍कितो। खो फेवु ति मी तेरीकी मिककी थोङ्‍गितो। खोला दुङ सुरुप मीतिवी साङ खो फेवु ति थोङ्‍गितो। तमा जम्‍बुलिङला वोतुप तेरी मिरिककी मीतिवा खो फेपुप तप्‍की ङुप्‍राङ कितो। तुकै राङ वुङ्‍शिता। आमिन।
REV 1:8 “ङ ति अल्‍फा ताङ ओमेगा यिन।” सिनी तेरी सिनाङ चोछ्‍ये वोतुप चोवो कोन्‍छ्‍योककी सुङ्‍नी वे। खो हारिङ ज्‍यु वे, थल्‍माला साङ ज्‍यु वोतुप यिन, लोङ तिङ्‍ला साङ फेप्‍किवी।
REV 1:9 ङ यूहन्‍ना ति ख्‍यिराङ दोके येशू ख्रीष्‍टला तेपा कितुप अच्‍यु यिन। ङ साङ ख्‍यिरा मुला राङ खोकी ग्‍येल्‍खापला दे छ्‍योवु च्‍युङ्‍गुपला छेटाङ दुङल खुरुप ताङ हम क्‍यानी देनी वे। ङे कोन्‍छ्‍योककी सुङ ख्‍याप्‍टाक क्‍यावु ताङ येशू ख्रीष्‍टकी थोक्‍ला पङ्‍बु बिन्‍दुप तप्‍की छ्‍येर्पा बिन्‍नी ग्‍येम्‍छो पर्ला वोतुप पत्‍मोस सिरुप ग्‍येम्‍छो परकी स कम्‍बुला वोतुप पेला
REV 1:10 ते चोवोकी ङ्‍यिमाला कोन्‍छ्‍योककी थु चाङ्‍मा ङला फेप्‍नी ङ खोकी ओङला वोतुप पेला कशेन क्‍यानी ग्‍येलिङ पुवु दोके वोरु ग्‍येर्पु ग्‍यप्‍सुङ। तमा ङे तिङ्‍ला दुक सिरुप वोरु यी थोसुङ।
REV 1:11 “ख्‍योरो काङ थोङ्‍गुप ति थेप च्‍यिककी नाङ्‍ला टिनी एफिसस ताङ स्‍मुर्ना ताङ पर्गामम ताङ थिआटीरा ताङ सार्डिस ताङ फिलाडेल्‍फिया ताङ लाउडिकिया चर्च दिन्‍करला तोङ।”
REV 1:12 ङला तुक सिनी ताम्‍ङे लपुप तीला ल्‍हाप सिनी ङे तिङ्‍ला ग्‍युर्नी ल्‍हासालेन्‍सिन शाप च्‍यिक राङ वोतुप सेरकी मेलाङ दिन चोके नोक।
REV 1:13 तमा ती सेरकी मेलाङ पर्ला मी सेवु दोके शाप सेक नम्‍सा नुम्‍नी छेकोक लोला सेरकी करा च्‍यिवु मी मिरा च्‍यिक वोतुप ति ङे थोङ्‍सुङ।
REV 1:14 खोकी गो ताङ र्‍ह ति वोमा ताङ ख दोके कर्मु नोक, खोकी मिक ति मे मेलाप दोके नोक।
REV 1:15 तमा खोकी शापतिवा ति काँसा शितुप दोके वो ग्‍यकुप ताङ खोकी वोरु ति शोतोक ग्‍यपुप दोके ग्‍येर्पु नोक।
REV 1:16 तमा खोकी छ्‍याक यावाला कर्मा दिन चोके जिम्‍नी नोक। खोकी ख नेमा खुर्पा च्‍यिक थेन्‍नोक। ती खुर्पा ति ख ङ्‍यी वोतुप नोक। खोकी शाल ति ङ्‍यिमा शरुप दोके वो ग्‍यकुप नोक।
REV 1:17 खोला थोङ्‍सिमा ङ ति शेप दोके गल्‍नी तला ग्‍यप्‍सुङ। तमा खोकी छ्‍याक यावा ति ङे खला ज्‍याक्‍नी दुक सिनी सुङ्‍सुङ, “ज्‍यिवा माकी। थल्‍मा नेज्‍युनी वोतुप ति ङ राङ यिन, तिङ्‍ला सेक नरी लुवु साङ ङ राङ यिन।
REV 1:18 तमा ङोसु वोतुप ति ङ राङ यिन। ल्‍होसा, ङ शिनी साङ नरीकी थोक्‍ला सेन्‍बु लानी वे। सुला छ्‍येर्पा बिन्‍नी ङ्‍येलाला तोङ गोकिवे, ती ओङ्‍ज्‍येन ति ङला वे।
REV 1:19 तुक क्‍यानी ख्‍योरो थोङ्‍गुप ताङ तन्‍दा च्‍युङ्‍गुप ताम्ङेतिवा ताङ ज्‍युक्‍ला काङ च्‍युङ्‍गिवी सिरुप ति तेरी थेप नाङ्‍ला टिसा।
REV 1:20 दी ङे लाक्‍पा यावाला थोङ्‍गुप कर्मा दिनकी तेन्‍दोक ताङ ती शाप च्‍यिक राङ वोतुप सेरकी मेलाङ दिनकी छ्‍याकला वोतुप तेन्‍दोक ति ङ ख्‍युरुङला सिरिन, कर्मा दिन ति चर्च दिनकी थोक्‍ला लेन क्‍योलुप देवाच्‍येनकी थुतिवा यिन। तमा मेलाङ दिन ति चर्च दिनतिवा यिन।”
REV 2:1 येलुङ खोकी ङला दुक सिनी सुङ्‍सुङ, “एफिससला वोतुप चर्चला ल्‍हटे कितुप देवाच्‍येनकी लेन क्‍योलुप थुला दी ताम्‍ङे ति टिसा। ‘लाक्‍पा यावाला कर्मा दिन लानी शाप च्‍यिक राङ वोतुप सेरकी मेलाङ दिनकी पर्ला युकुप तीकी सुङ्‍गुप यिन।
REV 2:2 ख्‍योरो क्‍यावु लाकातिवा ताङ ख्‍योरो हुर्ताक क्‍यावु ताङ हम क्‍या देतुप ति ङला छ्‍या वे। मी दुक्‍टातिवी थोक्‍ला ख्‍युरुङ हम क्‍या दे मुथुपी। तमा ङ येशूकी लोमा छ्‍ये यिन सिरुप मीतिवाला ख्‍योरो ल्‍यामु मेलोवा ल्हानी तिवा ति लोमा छ्‍ये मिन, यिने जिनोक जोप मी यिन सिनी तेन्‍तेन क्‍यावु साङ ङला तेरी छ्‍या वे।
REV 2:3 तमा ख्‍योरो हम क्‍या देतुप ताङ ङे थोक्‍ला छेटाङ खुरुप ताङ ख्‍योरो ङला क्‍युर्नी माज्‍यकुप साङ ङला छ्‍या वे।
REV 2:4 यिन्‍सिनाङ ख्‍योरो तेन्‍दोकला ङे सि गोवु ताम्‍ङे च्‍यिक वे। ती ति काङ यिन सिसिन ख्‍योरो ङला गोमाला दोके ङ्‍यिङ्‍ज्‍ये कितुप क्‍युर्नी ज्‍याक्‍सुङ।
REV 2:5 तुक क्‍यानी ख्‍योरो ङला चुक क्‍यानी ङ्‍यिङ्‍ज्‍ये कितुप क्‍युर्नी ज्‍यकुप ती ति नासाम तोङ। तमा ङ दिक्‍छेन यिन सिनी दिक्‍पा ने ग्‍युर्नी ख्‍योरो गोमाला क्‍यावु दोके ङ्‍यिङ्‍ज्‍ये की। मिसियाङ ङ ख्‍यिरा ते वासिमा ख्‍यिरा पर्ला वोतुप मेलाङ ति दासा यम्‍बाला पोतिनो। तीकी तेन्‍दोक ति चर्च मेता जोयिनो।
REV 2:6 यिने ख्‍यिरा लाका च्‍यिक ति ल्‍यामु क्‍या वे। ती ति काङ यिन सिसिन ङे दोके क्‍यानी ख्‍यिरा साङ निकोलाइटस सिरुप टेङ्‍बु मेतुप छोक्‍पाकी मीतिवी क्‍यावु लाकाला गा माक्‍या।
REV 2:7 कोन्‍छ्‍योककी थु चाङ्‍माकी चर्चतिवाला दुक सुङ्‍नी वे, सी ल्‍यामो क्‍यानी हाक्‍कोवु नोकिवे, तीकी ल्‍यामो क्‍यानी ङ्‍येन्‍शी। सी शैतानकी ओङ्‍ज्‍येनला ग्‍येल्‍गिवे, तीला कोन्‍छ्‍योककी ग्‍येल्‍खापकी दुम्‍डोकला वोतुप मिजीकी दोङ्‍बी डेलु स ज्‍यितिन। ती दोङ्‍बी डेलु साप तीला नाम्‍साङ मिशिवु मिजी थोप्‍किवी।’”
REV 2:8 “स्‍मुर्नाला वोतुप चर्चला ल्‍हटे कितुप देवाच्‍येनकी लेन क्‍योलुप तीला दी ताम्‍ङे ति टिसा। ‘दी ताम्‍ङे ति थल्‍माला वोतुप ताङ तिङ्‍ला सेक नरी लुवु ताङ शिनी येलुङ ङोसु लावु तीकी सुङ्‍गुप यिन।
REV 2:9 ख्‍युरुङ छेटाङला ख्‍येलुप ताङ पेराङ्‍बु वोतुप ति ङला छ्‍या वे। यिने ख्‍युरुङ याङ पेराङ्‍बु मिन, छ्‍युक्‍पु यिन। ख तिराङकी ङ यहूदी यिन सिरुप मीतिवी ख्‍यिराङला क्‍येन बिन्‍नी ख्‍यिरा तेन्‍दोकला लावु साङ ङला छ्‍या वे। तिवा ति शैतानकी छ्‍योक्‍पाकी मीतिवा यिन।
REV 2:10 ख्‍युरुङला ख्‍येल वुङ्‍गुप छेटाङकी थोक्‍ला ज्‍यिवा माकी। ल्‍होसा, शैतानकी खोक्‍पा ल्‍हापला ख्‍यिरा पर्ला ललाइ ललाइला चोन्‍खाङला ख्‍येल ज्‍यितुप छल वोतो। यिन्‍सिनाङ ख्‍युरुङला ती छेटाङ ति ङ्‍यिमा च्‍यिथम्‍बा सेक तिराङ ख्‍येल्‍गितो। ख्‍युरुङ शिता सेक ङला तेपा रम्‍बु क्‍यानी दे, तमा ङ ख्‍युरुङला नाम्‍साङ मिशिवु मिजीकी छ्‍यक्‍तक तेरिनो।
REV 2:11 कोन्‍छ्‍योककी थु चाङ्‍माकी चर्चतिवाला दुक सुङ्‍नी वे, सी ल्‍यामो क्‍यानी हाक्‍कोवु नोकिवे, तीकी ल्‍यामो क्‍यानी ङ्‍येन्‍शी। सी शैतानकी ओङ्‍ज्‍येनला ग्‍येल्‍गिवे, तीला थेङ्‍मा ङ्‍यिवाला शेपकी साङ ना तोङ मुथुपी।’”
REV 2:12 “पर्गाममला वोतुप चर्चला ल्‍हटे कितुप देवाच्‍येनकी लेन क्‍योलुप थुला दी ताम्‍ङे ति टिसा। ‘दी ताम्‍ङे ति ख ङ्‍यी वोतुप खुर्पा नेन्‍बु खुरुप तीकी सुङ्‍गुप यिन,
REV 2:13 ख्‍यिराङ देतुप ग्‍येसा ति शैतानकी ग्‍येला कितुप दासा यिन सिरुप ति ङला छ्‍या वे। यिन्‍सिनाङ ख्‍यिराङ ङे थोक्‍ला तेपा रम्‍बु क्‍यानी डेकला देसुङ। तमा ख्‍यिराङ देतुप शैतानकी ग्‍येसाला ङे थोक्‍ला खोङ्‍तेर्मु क्‍यानी पङ्‍बु तेरुप एन्‍टिपासला सेसिनाङ ख्‍यिरा ङला तेपा कितुप क्‍युर्नी माज्‍याक।
REV 2:14 यिन्‍सिनाङ ख्‍योरो तेन्‍दोकला ङे ताम्‍ङे चेयी सि गोवु वे। ती ति काङ यिन सिसिन ख्‍यिरा पर्ला ललाइ मीतिवा बालामकी येन्‍देनला ङ्‍येन्‍गिवी। ती बालामकी इस्राएल मीतिवाला दिक्‍पा कि ज्‍यितुपला ग्‍येल्‍वु बालाकला लाप्‍नी ल्‍हला पुलुप समातिवा साप ताङ शम्‍डेन कितुप जोसुङ।
REV 2:15 तुक राङ क्‍यानी निकोलाइटस सिरुप टेङ्‍बु मेतुप छोक्‍पाकी मीतिवी येन्‍देनला ङ्‍येन्‍दुप मीतिवा साङ ख्‍यिरा पर्ला वे।
REV 2:16 ती तप्‍की ख्‍युरुङ दिक्‍पा ने ग्‍युर। मिसियाङ ङ ख्‍योरो ते ङमु राङ वानी ङे ख नेमा थेन्‍दुप खुर्पा थ्‍वोनी ती लाका दुक्‍टा कितुपतिवी मुला थमु ग्‍यकिनो।
REV 2:17 कोन्‍छ्‍योककी थु चाङ्‍माकी चर्चतिवाला दुक सुङ्‍नी वे। सी ल्‍यामो क्‍यानी हाक्‍कोवु नोकिवे, तीकी ल्‍यामो क्‍यानी ङ्‍येन्‍शी। सी शैतानकी ओङ्‍ज्‍येनला ग्‍येल्‍गिवे, तीला छ्‍याकला वोतुप कोन्‍छ्‍योककी मन्‍न तेरिनो। तमा तीला ङ मिङ सम्‍बा टिवु दो कर्मु यी साङ तेरिनो। सुला ती दो ति थोप्‍किवे, तीकी तिराङ ती दोला टिवु मिङ ति हाक्‍कोकिवी।’”
REV 2:18 “थिआटीराला वोतुप चर्चला ल्‍हटे कितुप देवाच्‍येनकी लेन क्‍योलुप थुला दी ताम्‍ङे ति टिसा। ‘दी ताम्‍ङे ति मे बरुप दोके मिक ताङ काँसा शिनी वो ग्‍यकुप दोके शाप वोतुप कोन्‍छ्‍योककी सेवुकी सुङ्‍गुप यिन।
REV 2:19 ख्‍योरो काङ काङ किवी, ख्‍योरो ङला चो ङ्‍यिङ्‍ज्‍ये किवी, ख्‍योरो ङला चो तेपा किवी, ख्‍योरो ङला चो शब्‍ज्‍यी किवी, तमा ख्‍युरुङ ङे थोक्‍ला हम क्‍यानी गुनी देकिवी सिरुप ति ङला तेरी छ्‍या वे। येलुङ ख्‍योरो ङला गोमाला सिनाङ तसाम मङ शब्‍ज्‍यी किवी सिरुप साङ ङला छ्‍या वे।
REV 2:20 यिन्‍सिनाङ ख्‍योरो तेन्‍दोकला ङे सि गोवु ताम्‍ङे च्‍यिक वे। ख्‍युरुङ ईजेबेल पुम्‍पेजी सिक्‍यावु खला ङ्‍येन्‍गिनोक। तीकी खुरुङ ति नम्‍दर शेतुप यिन सिनी सिनोक, यिने ङला शब्‍ज्‍यी कितुपतिवाला ति शम्‍डेन कितुप ताङ कुतिवाला पुलुप समा सोसिन गिवी सिनी लोप्‍किनोक।
REV 2:21 ङे तीला दिक्‍पा नेसुर ग्‍युरुपला तुजे बिनिन, यिने तीकी शम्‍डेन कितुप नेसुर नाम्‍साङ सेम माग्‍युर।
REV 2:22 तुक क्‍यानी ङ तीला छासे क्‍यानी ना ज्‍यितिनो। तीकी मुला शम्‍डेन कितुपतिवी दिक्‍पा कितुप नेसुर सेम माग्‍युर्सुङ सिसिन तिवाला छासे छेटाङ ताङ दुक्‍पा ङ्‍येकितो।
REV 2:23 तुक राङ क्‍यानी तीकी पुज्‍युङपुमतिवाला साङ शि ज्‍यितिनो। तमा मी तेरीकी सेम ताङ नासाम हाक्‍कोवु ति ङ राङ यिनोक सिनी चर्च तेरीकी हाक्‍कोकितो। तमा ङ ख्‍यिराङला लाका ल्‍यामु क्‍यावुतिवाला छ्‍यक्‍तक ल्‍यामु तेरिनो, लाका मेलोवा कितुपतिवाला पर्च्या तोङ्‍यिनो।
REV 2:24 यिने थिआटीराला वोतुप मीतिवी पर्ला ख्‍यिराङ ईजेबेल पुम्‍पेजी सिक्‍यावु खला माङ्‍येन्‍नी शैतानकी छ्‍याकला वोतुप हाक्‍को मुथुपुप ताम्‍ङेला मुयुकुपतिवाला ति ङ काङ साङ यम्‍बा क मेतेर्तो।
REV 2:25 यिने ङ वुङ्‍दा सेक ख्‍यिराङला वोतुप येन्‍देनला ल्‍यामु क्‍यानी देता।
REV 2:26 सी शैतानकी ओङ्‍ज्‍येनला ग्‍येल्‍गिवे, सी ङ वुङ्‍दा सेक ङे नोवाला वोतुप ति तेरी क्‍यानी देकिवे, तीला ङे पपा कोन्‍छ्‍योककी ङला ओङ्‍ज्‍येन नङ्‍गुप दोके क्‍यानी ङ लुङ्‍बा लुङ्‍बाकी मीतिवी खला ग्‍येला कितुप ओङ्‍ज्‍येन तेरिनो।
REV 2:27 तमा तीकी मीतिवाला च्‍याङ्‍युङ थ्‍वोनी ठिम कितो। मी दुक्‍टातिवाला थली नेक्‍योक पुर्मा पुर्मा जोवु दोके क्‍यानी ना तोङ्‍गितो। तुक कितुप ओङ्‍ज्‍येन ति ङला साङ ङे पपा कोन्‍छ्‍योक नेमा थोप्‍नी वे।
REV 2:28 ङ तीला टोपकी कर्मा साङ तेरिनो।
REV 2:29 कोन्‍छ्‍योककी थु चाङ्‍माकी चर्चतिवाला दुक सुङ्‍नी वे। सी ल्‍यामो क्‍यानी हाक्‍कोवु नोकिवे, तीकी ल्‍यामो क्‍यानी ङ्‍येन्‍शी।’”
REV 3:1 “सार्डिसला वोतुप चर्चला ल्‍हटे कितुप देवाच्‍येनकी लेन क्‍योलुप थुला दी ताम्‍ङे ति टिसा। ‘दी ताम्‍ङे ति कोन्‍छ्‍योककी थु दिन ताङ लाक्‍पा यावाला कर्मा दिन वोतुप तीकी सुङ्‍गुप यिन। ख्‍योरो लाकातिवा ङला छ्‍या वे। मीतिवी थोङ्‍दाङला ख्‍यिराङ सेन्‍बु वोतुप थोङ्‍सिनाङ ख्‍यिराङ ति शिन वे।
REV 3:2 तुक क्‍यानी ख्‍यिराङ लोसा, तमा ख्‍यिरा मुला तेपा चेयी तिराङ लुनी शेप दोके गलुप तेपा ति रम्‍बु जो। च्‍यिलासिसिन ख्‍योरो क्‍यावु लाकातिवा ति ङे कोन्‍छ्‍योककी थोङ्‍दाङला तेरी माछेवे।
REV 3:3 ती तप्‍की गोमाला ख्‍योरो लापुप ताङ थोवु ताम्‍ङे ति नासाम तोङ। तमा तीला ङ्‍येन्‍नी दिक्‍पा ने ग्‍युर। ख्‍युरुङ मालासिन ङ ख्‍यिरा हाक्‍माकोवा क्‍यानी शार्क्येक वुङ्‍यिनो। ङ चो पेला गिवी सिरुप तुजे ति ख्‍यिरा हाक्‍मोकोतो।
REV 3:4 यिने सार्डिसला वोतुप ख्‍यिरा पर्ला तेपा कितुपतिवा ललाइ ललाइ ति मज्‍याला टेमा माछ्‍यावु दोके खोप्‍राङ मिजी ति मेटेङ्‍बु माजो वे। तिवा ङे मुला राङ मज्‍या कर्मु कोन्‍नी युकिवी, च्‍यिलासिसिन तिवा तुक कि छ्‍योवु वे।
REV 3:5 सी शैतानकी ओङ्‍ज्‍येन खला ग्‍येल्‍गिवे, तीकी मज्‍या कर्मु कोन्‍गिवी। तमा ङ तीकी मिङ ति नाम्‍साङ मिशिवु मिजीकी थेप नेसुर नाम्‍साङ मेसेतो। तमा तीला ङ ङे पपा कोन्‍छ्‍योक ताङ खोकी लेन क्‍योलुपतिवी चिप्‍ला ङे मी यिन सिनी सिरिनो।
REV 3:6 कोन्‍छ्‍योककी थु चाङ्‍माकी चर्चतिवाला दुक सुङ्‍नी वे। सी ल्‍यामो क्‍यानी हाक्‍कोवु नोकिवे, तीकी ल्‍यामो क्‍यानी ङ्‍येन्‍शी।’”
REV 3:7 “फिलाडेल्‍फियाला वोतुप चर्चला ल्‍हटे कितुप देवाच्‍येनकी लेन क्‍योलुप थुला दी ताम्‍ङे ति टिसा। ‘चाङ्‍मा ताङ टेङ्‍बु वोतुप तीकी सुङ्‍गुप यिन। तीकी लोला दाऊदकी ग्‍येसाकी गो बेतुप लिमी वे। सी साङ तीकी पेतुप गो ति च्‍ये मुथुपी, याङ्‍ना सी साङ तीकी च्‍येतुप गो ति बे मुथुपी।
REV 3:8 ख्‍योरो लाकातिवा ङला छ्‍या वे। ल्‍होसा, ख्‍योरो चिप्‍ला ङे गो पेनी ज्‍याङ वे, ती गो ति सी साङ च्‍ये मुथुपी। ख्‍युरुङला ङार अला मेसिनाङ ङे सुङला सिक्‍यावु दोके मिजी क्‍याङ वे, तमा ङे मिङ हाक्‍माको सिनी सिमाक्‍या वे।
REV 3:9 दी ताम्‍ङे ति ल्‍यामु ङ्‍येना, खोप्‍राङ ति यहूदी यिन सिनी सिरुप शैतानकी छोक्‍पाकी मीतिवा वे। तिवा ति यहूदीतिवा मिन, जिनोक जोप मीतिवा यिन। तिवाला ङ ख्‍योरो काङ्‍बी वोक्‍ला वानी शावा कितुप जोयिनो। तमा ख्‍युरुङला ङे ङ्‍यिङ्‍ज्‍ये क्‍यावु नोक सिरुप ति तिवी हाक्‍कोकितो।
REV 3:10 ख्‍योरो ङे कला ङ्‍येन्‍नी हम क्‍या देसुङ। ती तप्‍की जम्‍बुलिङकी मीतिवा तेरीला खोक्‍पा ल्‍हापला छेटाङ ख्‍येल वुङ्‍गुप पेला ङ ख्‍युरुङला ती छेटाङ नेसुर र्‍होकिनो।
REV 3:11 ल्‍होसा, ङ ङमु राङ वुङ्‍यिनो। ख्‍योरो ङला क्‍यावु तेपा ति र्‍होक्‍नी ज्‍योक। तमा ख्‍युरुङला ङे तेरिन सिक्‍यावु छ्‍यक्‍तक ति सी साङ ठोक मुथुप्‍तो।
REV 3:12 सी शैतानकी ओङ्‍ज्‍येनला ग्‍येल्‍गिवे, तीला ङ ङे कोन्‍छ्‍योककी ल्‍हङाङकी थोक्‍ला कज्‍यु दोके जोयिनो। ती कज्‍यु ति नरी ते राङ लुकितो। तमा ती कज्‍युला ङे कोन्‍छ्‍योककी मिङ ताङ यरूशलेम सम्‍बाकी मिङ साङ टिकिनो। ती यरूशलेम सम्‍बा ति ङे कोन्‍छ्‍योक ज्‍युवु देवाच्‍येन नेमा वुङ्‍गितो। तमा ती कज्‍युला ङे मिङ सम्‍बा टिकिनो।
REV 3:13 कोन्‍छ्‍योककी थु चाङ्‍माकी चर्चतिवाला दुक सुङ्‍नी वे। सी ल्‍यामो क्‍यानी हाक्‍कोवु नोकिवे, तीकी ल्‍यामो क्‍यानी ङ्‍येन्‍शी।’”
REV 3:14 “लाउडिकियाला वोतुप चर्चला ल्‍हटे कितुप देवाच्‍येनकी लेन क्‍योलुप थुला दी ताम्‍ङे ति टिसा। ‘दी ताम्‍ङे ति आमिन वोतुप तीकी सुङ्‍गुप यिन। खो ति कोन्‍छ्‍योककी कोर्ला खोङ्‍तेर्मु क्‍यानी पङ्‍बु टेङ्‍बु तेरुप यिन। तमा खो नेसुर राङ कोन्‍छ्‍योककी तेरी जम्‍बुलिङ ज्‍ये नङ्‍गुप यिन।
REV 3:15 ख्‍योरो काङ काङ लाकातिवा क्‍या वे सिरुप ति ङला तेरी छ्‍या वे। ख्‍युरुङ टङ्‍गा साङ मे, छेन्‍दी साङ मे। ख्‍युरुङ की छेन्‍दी वुङ गोकिवी, की टङ्‍गा वुङ गोकिवी।
REV 3:16 ख्‍युरुङ टङ्‍गा साङ मे, छेन्‍दी साङ मे। मुक्‍चे वे। ती तप्‍की ङ ख्‍युरुङला ङे ख नेमा तेन तोङ्‍यिन।
REV 3:17 ख्‍यिरा याङ ङ छ्‍युक्‍पु वे, ङला नोर टोङ्‍बा बङी वे, ङला काङ साङ मोगोवी सिवी। यिने ख्‍युरुङला छ्‍या मे, ख्‍युरुङ याङ दुक्‍पा ङ्‍येतुप ताङ ल्‍हासिनाङ ङ्‍यिङ्‍ज्‍ये लङ्‍गुप ताङ पेराङ्‍बु ताङ मिक मोथोङ्‍गुप ताङ पेर्तुङ्‍बा गल वे।
REV 3:18 तुक क्‍यानी ङ ख्‍युरुङला टोङ्‍गु तेरिन, ख्‍युरुङ छ्‍युक्‍पु डोप गा वोसिन, ङे नेसुर मेला र्‍हेनी ङोमा जोवु सेर ङ्‍यो। तमा ङोछा लङ्‍गुप ताङ पेर्तुङ्‍बा वोतुप जु उपुपला मज्‍या कर्मु ङ्‍योनी कोन। ख्‍योरो मिक थोङ थुपुपला मिकला मेन ङ्‍योनी कु।
REV 3:19 सुला ङ ङ्‍यिङ्‍ज्‍ये किवे, तीला वोरु साङ देनिन, तमा ल्‍यामु जोपला छ्‍येर्पा साङ तेरिन। तुक क्‍यानी ख्‍यिराङ मङ टेमु क्‍यानी दिक्‍पा ने ग्‍युर।
REV 3:20 ल्‍होसा, ङ गे फिला लानी डक डक ग्‍यकिनो। सी ङे वोरु थोनी गो बेकिवे, ङ ती नाङ्‍ला शुनी तीकी मुला समा सायिनो। तमा तीकी ङ ताङ मुला राङ समा सेवितो।
REV 3:21 सी शैतानकी ओङ्‍ज्‍येनला ग्‍येल्‍गिवे, तीला ङ ङे ग्‍येल्‍ठिकला ङ ताङ मुला राङ देनी ग्‍येला कि ज्‍यितिनो। ङे साङ शैतानकी ओङ्‍ज्‍येनला ग्‍येल्‍नी पपा कोन्‍छ्‍योककी मुला खोकी ग्‍येल्‍ठिकला देनी वे।
REV 3:22 कोन्‍छ्‍योककी थु चाङ्‍माकी चर्चतिवाला दुक सुङ्‍नी वे। सी ल्‍यामो क्‍यानी हाक्‍कोवु नोकिवे, तीकी ल्‍यामो क्‍यानी ङ्‍येन्‍शी।’”
REV 4:1 ती ज्‍युक्‍ला ङे ल्‍हासालेन्‍सिन देवाच्‍येनला गो च्‍यिक वोतुप थोङ्‍सुङ। ती गो ति तङी नोक। थल्‍माला ङे थोवु ग्‍येलिङ पुवु दोके वोरु तीकी ङला “दे केला शोक। ज्‍युक्‍ला चुका चुका ताम्‍ङेतिवा च्‍युङ्‍गिवी, ती ति ङ ख्‍युरुङला लपिन।” सिनी सुङ्‍सुङ।
REV 4:2 तमा कोन्‍छ्‍योककी थु चाङ्‍माकी ङला क्‍येङ्‍नी ङे देवाच्‍येनला ग्‍येल्‍ठिक यी वोतुप थोङ्‍सुङ। ती ग्‍येल्‍ठिककी खला मिरा च्‍यिक ज्‍युनोक।
REV 4:3 ती ग्‍येल्‍ठिककी खला ज्‍यु वोतुप तीकी जुजम ति ङोर्मु ताङ मर्वु वोतुप वो ग्‍यकुप यु दोके थोङ्‍गिनोक। ती ग्‍येल्‍ठिककी गारी गुरीला वो ग्‍यकुप यु ङोर्मु दोके ज्‍य फुकुप नोक।
REV 4:4 तमा ती ग्‍येल्‍ठिककी गारी गुरीला यम्‍बा ग्‍येल्‍ठिक खल्‍ज्‍यिक ताङ ज्‍यी चोके नोक। ती ग्‍येल्‍ठिक रे रेकी खला गोला ग्‍येल्‍वी सेरकी उशाक ताङ जुला मज्‍या कर्मु कोन्‍दुप गोमा कितुप मी छ्‍येतिवा देनी नोक।
REV 4:5 तमा ती ग्‍येल्‍ठिक नेमा चिलाम ग्‍यकुप ताङ सम्‍डुक ग्‍यकुप ताङ टेक्‍च्‍या ग्‍यकिनोक। तमा ती ग्‍येल्‍ठिककी चिप्‍ला बाशिङ दिन चोके च्‍येनी नोक। ती बाशिङ ति कोन्‍छ्‍योककी थु दिन यिनोक।
REV 4:6 तमा ग्‍येल्‍ठिककी चिप्‍ला शेल दोके ठछ्‍येली थोङ्‍गुप ग्‍येम्‍छो चेङ्‍गा यी नोक। ग्‍येल्‍ठिककी छो ज्‍यीला उ वोतुप सेम्‍ज्‍येन ज्‍यी चोके नोक। ती सेम्‍ज्‍येनतिवी गोमाला ताङ तिङ्‍ला ल्‍हाप मिक बङी नोक।
REV 4:7 सेम्‍ज्‍येन च्‍यिक ति सेङ्‍गी दोके नोक। तमा सेम्‍ज्‍येन ङ्‍यिवा ति लङ्‍डु दोके नोक। तमा सेम्‍ज्‍येन सुम्‍बाकी ङोतुङ ति मी ङोतुङ दोके नोक। तमा सेम्‍ज्‍येन ज्‍यिवा ति फुरिन वोतुप च्‍यक्‍युङ दोके नोक।
REV 4:8 ती सेम्‍ज्‍येन ज्‍यिकरकी ति पुशोक टुक टुक नोक। तमा ती पुशोककी गारी गुरीला ताङ जु तेरीला मिक बङी नोक। तिवा ङ्‍यी ताङ नुप्‍ज्‍या दुक सिनी लु ला लावा देकिनोक, “चाङ्‍मा, चाङ्‍मा, चाङ्‍मा! चोछ्‍येवु चोवो कोन्‍छ्‍योक, खो गोमाला ज्‍युन वे, तमा तसाम साङ ज्‍यु वे, ज्‍युक्‍ला सेक नरीकी नरी ज्‍युकिवी।”
REV 4:9 ते वोतुप सेम्‍ज्‍येन ज्‍यिकरतिवी ग्‍येल्‍ठिकला ज्‍यु वोतुप ताङ नरी ङोसु ज्‍युवु तीला मोवा ताङ ताङ्‍देन ताङ थुचिछे पुल पुल्‍वा देकिनोक।
REV 4:10 ती पेला ते वोतुप गोमा कितुप मी छ्‍ये मिरा खल्‍ज्‍यिक ताङ ज्‍यीतिवा ग्‍येल्‍ठिकला ज्‍यु वोतुप तीकी दोङ्‍ला खवुतुङ्‍मा देनी नरीकी नरी ङोसु ज्‍युवु तीला सोवा देकिनोक। तमा खोप्‍रे उशाकतिवा ग्‍येल्‍ठिक चिप्‍ला पिन ज्‍याक्‍नी दुक सियी सिक्‍यासुङ,
REV 4:11 “ओ ङ्‍यिरा चोवो कोन्‍छ्‍योक, चोवो याङ ङ्‍यिरा मोवा ताङ ताङ्‍देन कि छ्‍योवु ताङ ङार वोतुप कोन्‍छ्‍योक यिन। च्‍यिलासिसिन तेरी च्‍यालकतिवा चोवोकी राङ ज्‍ये नङ्‍गुप यिन। चोवोकी नोवा नेमा ती च्‍यालकतिवा तेरी च्‍युङ्‍नी तिवाला मिजी साङ नाङ्‍सुङ।”
REV 5:1 येलुङ ग्‍येल्‍ठिकला ज्‍यु वोतुप तीकी छ्‍याक यावाला ति फिला नाङ्‍ला यिकी टिवु शुकी बिटप च्‍यिक वोतुप ति ङे थोङ्‍सुङ। ती शुकी बिटप ति लज्‍युर दिन ग्‍यप्‍नी ज्‍याक्‍नोक।
REV 5:2 तमा ङे देवाच्‍येनकी लेन क्‍योलुप थु रम्‍बु मिरा च्‍यिक थोङ्‍सुङ। तीकी कशेन वोरु थोर ग्‍यप्‍नी “दी लज्‍युरतिवा तोल्‍नी शुकी बिटप डोल थुपुप ति सु वे?” सिनी सिक्‍यासुङ।
REV 5:3 यिने देवाच्‍येनला ताङ जम्‍बुलिङला ताङ जम्‍बुलिङकी वोक्‍ला ती शुकी बिटप डोलुप ताङ ती नाङ्‍ला ल्‍ह थुपुप ति सु साङ मिन्‍दुक।
REV 5:4 ती शुकी बिटप डोलुप ताङ ती नाङ्‍ला ल्‍ह थुप छ्‍योवु ति सु साङ माथेन्‍दुप तप्‍की ङ कशेन ङुयिन।
REV 5:5 तमा ते ग्‍येल्‍ठिकला देन वोतुप गोमा कितुप मी छ्‍ये मिरा खल्‍ज्‍यिक ताङ ज्‍यीकी पर नेमा मिरा च्‍यिककी ङला “ख्‍युरुङ माङु। ल्‍होसा, यहूदाकी गिपा नेमा ग्‍येल्‍वु दाऊदकी गिपाला क्‍येवु सेङ्‍गी सिरुप मिरा च्‍यिक ग्‍येल वे। खोकी दी लज्‍युर दिनतिवा तोल्‍नी शुकी बिटप बे थुप्‍किवी।” सिनी सिक्‍यासुङ।
REV 5:6 तमा ते ग्‍येल्‍ठिककी दोङ्‍ला लुक रुक च्‍यिक लानी नोक। ती ति गोमाला के सेतुप दोके थोङ्‍गिनोक, यिन्‍सिनाङ तन्‍दा ति सेन्‍बु राङ नोक। तीकी गारी गुरीला सेम्‍ज्‍येन ज्‍यी चोके नोक, तमा सेम्‍ज्‍येन ज्‍यीतिवी गारी गुरीला गोमा कितुप मी छ्‍ये मिरा खल्‍ज्‍यिक ताङ ज्‍यी नोक। ती लुक रुक तीकी ति अर्क्योक दिन ताङ मिक दिन नोक। ती मिक दिन ति तेरी जम्‍बुलिङला तङ्‍गुप कोन्‍छ्‍योककी थु दिन यिनोक।
REV 5:7 तमा ती लुक रुक ति वानी ग्‍येल्‍ठिकला ज्‍यु वोतुप तीकी छ्‍याक यावा नेसुर ती शुकी बिटप ति लासुङ।
REV 5:8 ती बिटप ति लासिमा सेन्‍बु वोतुप सेम्‍ज्‍येन ज्‍यी ताङ गोमा कितुप मी छ्‍ये खल्‍ज्‍यिक ताङ ज्‍यीतिवा लुक रुककी चिप्‍ला वानी खवुतुङ्‍मा देसुङ। तिवा तेरीकी लकला डम्‍ङ्‍याङ ताङ पो क्‍येङ्‍गुप सेरकी पोकेतिवा खुर्नी नोक। ती पो ति कोन्‍छ्‍योकला तेपा कितुपतिवी क्‍यावु मोपोर यिनोक।
REV 5:9 तिवा दुक सियी लु सम्‍बा यी लङ्‍गिनोक, “ख्‍युरुङ दी शुकी बिटप लङ्‍गुप ताङ तीकी लज्‍युरतिवा तोल छ्‍योवु वे। ख्‍युरुङ सेतुप यिन, यिन्‍सिनाङ शेप ने ङोसु लानी ख्‍योरे ठककी गोङ तेनी कोन्‍छ्‍योककी थोक्‍ला तेरी गिपा ताङ ग्‍येताम ताङ मिरिककी मीतिवा ताङ लुङ्‍बाला ङ्‍योसुङ।
REV 5:10 तमा ख्‍योरे तिवाला खोरो मुला राङ ग्‍येला कितुप ताङ कोन्‍छ्‍योककी थोक्‍ला शब्‍ज्‍यी कितुप कोङ्‍यार जो नाङ्‍सुङ। तिवी दी जम्‍बुलिङला ग्‍येला किवी।”
REV 5:11 ती पेला बुङ छेबुङ चोयी देवाच्‍येनकी लेन क्‍योलुप थुतिवा ङे थोङ्‍सुङ। तिवा ग्‍येल्‍ठिक ताङ सेन्‍बु वोतुप सेम्‍ज्‍येनतिवा ताङ गोमा कितुप मी छ्‍येतिवी गारी गुरीला लानी थोर ग्‍यप्‍नी दुक सिनी लु लावु ति ङे थोसुङ,
REV 5:12 “सेतुप लुक रुक ति ओङ छ्‍येवु ताङ छ्‍युक्‍पु वोतुप ताङ रिक्‍पा वोतुप ताङ ङार वोतुप ताङ ताङ्‍देन वोतुप ताङ मोवा वोतुप ताङ सोवा लङ छ्‍योवु वे।”
REV 5:13 तमा देवाच्‍येनला वोतुप तेरी ताङ जम्‍बुलिङला वोतुप तेरी ताङ जम्‍बुलिङकी वोक्‍ला वोतुप तेरी ताङ ग्‍येम्‍छोला वोतुप उ वोतुप सेम्‍ज्‍येन थम्‍ज्‍येनतिवी दुक सिक्‍यावु ति ङे थोसुङ, “ग्‍येल्‍ठिकला ज्‍यु वोतुप कोन्‍छ्‍योक ताङ लुक रुकला सोवा ताङ ताङ्‍देन ताङ मोवा ताङ ओङ्‍ज्‍येन ति नरीकी नरी वुङ्‍शी।”
REV 5:14 ती ज्‍युक्‍ला ग्‍येल्‍ठिककी गारी गुरीला वोतुप सेम्‍ज्‍येन ज्‍यिकरकी “आमिन” सिक्‍यासुङ। तमा गोमा कितुप मी छ्‍येतिवा ति पुमुङ सला चुनी सोवा तेक्‍सुङ।
REV 6:1 तमा ती लुक रुक तीकी लज्‍युर दिनकी नाङ्‍ला लज्‍युर च्‍यिक ति तोलुप थोङ्‍सुङ। तमा सेन्‍बु वोतुप सेम्‍ज्‍येन ज्‍यीकी नाङ्‍ला च्‍यिक तीकी सम्‍डुक ग्‍यकुप दोके वोरु तेन्‍नी “दे शोक!” सिनी सिक्‍यावु ति ङे थोसुङ।
REV 6:2 तमा ङे दोङ्‍ला त कर्मु यी वोतुप थोङ्‍सुङ। ती ते खला शेन्‍दुप तीकी लकला दा च्‍यिक खुर्नी नोक। तमा ती ति गोमाला ग्‍येलुप तप्‍की तीला ग्‍येल्‍वुकी उशाक च्‍यिक कोन्‍नी बिन्‍सुङ। ती ज्‍युक्‍ला ती ति मङ ग्‍येला कियी गाल्‍सुङ।
REV 6:3 ती ज्‍युक्‍ला येलुङ लुक रुककी यम्‍बा लज्‍युर ङ्‍यिवा ति तोल्‍सुङ। तमा सेन्‍बु वोतुप सेम्‍ज्‍येन ङ्‍यिवा तीकी “दे शोक!” सिनी सिक्‍यावु ति ङे थोसुङ।
REV 6:4 तमा यम्‍बा छासे मर्वु वोतुप त च्‍यिक थेन्‍सुङ। ती तला शेन्‍दुप तीला जम्‍बुलिङला थमु लोङ्‍गुप ओङ बिन्‍सुङ। तुक क्‍यानी जम्‍बुलिङला मीतिवा च्‍यिककी च्‍यिकला सेटी ङ्‍येक्‍टी किनोक। तीकी लकला खुर्पा ग्‍येर्पु च्‍यिक नोक।
REV 6:5 येलुङ ती लुक रुककी लज्‍युर सुम्‍बा साङ तोल्‍सुङ। तमा सेन्‍बु वोतुप सेम्‍ज्‍येन सुम्‍बा तीकी “दे शोक!” सिनी सिक्‍यावु ति ङे थोसुङ। तमा येलुङ ङे त नक्‍पु च्‍यिक थोङ्‍सुङ। ती त नक्‍पी खला शेन्‍दुप तीकी लकला गोरुप ग्‍येमा च्‍यिक नोक।
REV 6:6 ती सेन्‍बु वोतुप सेम्‍ज्‍येन ज्‍यीकी पर्ला दुक सिरुप वोरु यी ङे थोसुङ, “ङ्‍यिम्‍ज्‍यिक लाका क्‍यावु ल नेसुर ट किलो च्‍यिक याङ्‍ना जवु किलो सुम ङ्‍यो थुप्‍किवी। यिने जैतुन दोङ्‍बु ताङ गुन्‍डुम दोङ्‍बुला ति ना मातोङ।”
REV 6:7 येलुङ तीकी लज्‍युर ज्‍यिवा ति साङ तोल्‍सुङ। ती ज्‍युक्‍ला सेन्‍बु वोतुप सेम्‍ज्‍येन ज्‍यिवा तीकी साङ “दे शोक!” सिनी सिक्‍यावु ति ङे थोसुङ।
REV 6:8 तमा ङे ल्‍हासियाङ त सेर्वु यी साङ थोङ्‍सुङ। ती ते खला शेन्‍दुप तीकी मिङ ति “शेप” यिन्‍नोक। “ङ्‍येला” ति तीकी तिङ तिङ्‍ला डिनोक। तमा तिवाला जम्‍बुलिङ फेकाकी फेका सेककी मीतिवाला खुर्पा ताङ ल्‍होवारे ताङ नेजु मेलोक्‍पा ताङ रितकतिवा नेसुर सेतुप ओङ बिन्‍नोक।
REV 6:9 येलुङ तीकी लज्‍युर ङवा ति तोल्‍सुङ। तमा ते छोठी वोक्‍ला कोन्‍छ्‍योककी सुङ ख्‍याप्‍टाक क्‍यावु ताङ खोकी थोक्‍ला पङ्‍बु बिन्‍दुप तप्‍की सेतुप मीतिवी नम्‍शिङतिवा वोतुप ति ङे थोङ्‍सुङ।
REV 6:10 तिवा ति “ओ चाङ्‍मा ताङ टेङ्‍बु वोतुप चोछ्‍येवु चोवो, नम पेला सेक ख्‍योरे दी जम्‍बुलिङला लुनी वोतुपतिवाला ठिम क्‍या नङ्‍गुप ताङ ङ्‍यिराङला सेतुप छ्‍येर्पा ति मलाङ्‍गिवी?” सिनी कशेन च्‍यार ग्‍यप्‍सुङ।
REV 6:11 तमा ती ज्‍युक्‍ला तिवा तेरीला मज्‍या कर्मु रे रे बिन्‍नी दुक सिक्‍यासुङ, “ख्‍यिरा मुला शब्‍ज्‍यी कितुप मीतिवा ताङ तेपा कितुप अच्‍युनुपतिवा साङ ख्यिराङला सेतुप दोके तेरी शिनी टङ्‍गा माछेवा सेक ङासोनी देता।”
REV 6:12 येलुङ तीकी लज्‍युर टुक्‍पा ति तोल्‍सुङ। तमा सयी ग्‍येर्पु ग्‍यप्‍नी ङ्‍यिमा ति रा नक्‍पु दोके कशेन नक्‍तोमी गलुप ताङ उला साङ ठक दोके मर्वु गलुप ति ङे थोङ्‍सुङ।
REV 6:13 तमा अन्‍जीरकी दोङ्‍बुला वुर्तुककी योनी माछोवु डेलुतिवा ङ्‍यिलुप दोके क्‍यानी नामगी कर्मातिवा साङ जम्‍बुलिङला लुम्‍सुङ।
REV 6:14 तमा नाम ति शुकी बिटप टिलुप दोके क्‍यानी तोक तोर्सुङ। तेरी टकतिवा ताङ ग्‍येम्‍छो पर्ला वोतुप ग्‍येम्‍छो परकी स कम्‍बुतिवा साङ दाक दाक्‍पी दासा नेसुर पोनी गाल्‍सुङ।
REV 6:15 ती ज्‍युक्‍ला जम्‍बुलिङकी ग्‍येल्‍वुतिवा ताङ लुङ्‍बाला ग्‍येला कितुपतिवा ताङ मक्‍मी छ्‍येतिवा ताङ मी छ्‍युक्‍पुतिवा ताङ मी छ्‍येतिवा ताङ योक्‍पुतिवा ताङ रङ्‍ज्‍येन वोपुप मीतिवा तेरी फुक ताङ टककी अर्शा उर्शाला यिप्‍सुङ।
REV 6:16 तमा तिवी टक ताङ दो ग्‍येर्पुतिवाला दुक सिक्‍यासुङ, “ङ्‍यिरा खला उप्‍नी ग्‍येल्‍ठिकला ज्‍यु वोतुप तीकी थोङ्‍दाङ नेसुर ताङ लुक रुककी ङ्‍यिर्मु नेसुर ङ्‍यिराङला र्‍होक!
REV 6:17 च्‍यिलासिसिन ग्‍येल्‍ठिकला ज्‍यु वोतुप ताङ लुक रुककी पर्च्याकी तुजे ति वा वे। ती पर्च्याला सु साङ हम क्‍यानी दे मुथुपी।”
REV 7:1 ती ज्‍युक्‍ला देवाच्‍येनकी लेन क्‍योलुप थु मिरा ज्‍यी जम्‍बुलिङ ताङ ग्‍येम्‍छो ताङ दोङ्‍बुतिवाला वुर्तुक मग्‍यक्‍शी सिनी जम्‍बुलिङकी छो ज्‍यीकी वुङ्‍ला लानी छो ज्‍यी नेसुर वुङ्‍गुप वुर्तुकतिवा क्‍येक्‍नी देतुप ति ङे थोङ्‍सुङ।
REV 7:2 तमा यम्‍बा देवाच्‍येनकी लेन क्‍योलुप थु च्‍यिक ङोसु वोतुप कोन्‍छ्‍योककी लज्‍युर खुर्नी शरकी थाका नेसुर जेनी वावु ति ङे थोङ्‍सुङ। तीकी जम्‍बुलिङ ताङ ग्‍येम्‍छोला ना तोङ्‍गुप ओङ वोतुप देवाच्‍येनकी लेन क्‍योलुप थु मिरा ज्‍यीला थोर ग्‍यप्‍नी,
REV 7:3 “कोन्‍छ्‍योककी थोक्‍ला शब्‍ज्‍यी कितुपतिवी टलाला दाक्‍पी लज्‍युर माग्‍यपा सेक्‍ला जम्‍बुलिङ ताङ ग्‍येम्‍छो ताङ दोङ्‍बुतिवाला काङ साङ ना मातोङा!” सिनी सिक्‍यासुङ।
REV 7:4 ते लज्‍युर ग्‍यपुपतिवा तेरी इस्राएल गिपाकी मिरिक रे रे नेसुर वावु बुङ च्‍यिक ताङ तोङ्‍डा खल ङ्‍यी ताङ ज्यी वोतुप ति ङे थोसुङ।
REV 7:5 ती पर्ला यहूदाकी गिपा नेसुर तोङ्‍डा च्‍यिङ्‍ङीला लज्‍युर ग्‍यप्‍सुङ, रुबेनकी गिपा नेसुर तोङ्‍डा च्‍यिङ्‍ङीला, गादकी गिपा नेसुर तोङ्‍डा च्‍यिङ्‍ङीला,
REV 7:6 आशेरकी गिपा नेसुर तोङ्‍डा च्‍यिङ्‍ङीला, नप्‍तालीकी गिपा नेसुर तोङ्‍डा च्‍यिङ्‍ङीला, मनश्‍शेकी गिपा नेसुर तोङ्‍डा च्‍यिङ्‍ङीला,
REV 7:7 शिमियोनकी गिपा नेसुर तोङ्‍डा च्‍यिङ्‍ङीला, लेवीकी गिपा नेसुर तोङ्‍डा च्‍यिङ्‍ङीला, इस्‍साखारकी गिपा नेसुर तोङ्‍डा च्‍यिङ्‍ङीला,
REV 7:8 जबूलूनकी गिपा नेसुर तोङ्‍डा च्‍यिङ्‍ङीला, योसेफकी गिपा नेसुर तोङ्‍डा च्‍यिङ्‍ङीला, बेन्‍यामीनकी गिपा नेसुर तोङ्‍डा च्‍यिङ्‍ङीला लज्‍युर ग्‍यप्‍नोक।
REV 7:9 ती ज्‍युक्‍ला ङे ल्‍हासालेन्‍सिन ङोनी साङ ङो मुथुपुप मी माङ्‍छ्‍योक जोम्‍नी नोक। तिवा ति तेरी लुङ्‍बा ताङ गिपा ताङ मिरिक ताङ ग्‍येताम कुतुक कुतुक लपुप मी माङ्‍छ्‍योक यिनोक। तमा तिवा ग्‍येल्‍ठिक ताङ लुक रुककी दोङ्‍ला मज्‍या कर्मु कोन्‍नी लकला खजूरकी येल्‍का खुर्नी लानी देन्‍नोक।
REV 7:10 तिवा कशेन थोर ग्‍यप्‍नी, “थर्वा ति ग्‍येल्‍ठिकला ज्‍यु वोतुप दाक्‍पी चोवो कोन्‍छ्‍योक ताङ लुक रुक नेसुर गिवी।” सिनी वोरु तेन्‍सुङ।
REV 7:11 तमा देवाच्‍येनकी लेन क्‍योलुपतिवा तेरी ग्‍येल्‍ठिक ताङ गोमा कितुप मी छ्‍येतिवा ताङ सेन्‍बु वोतुप सेम्‍ज्‍येन ज्‍यीतिवी गारी गुरीला लासुङ। तमा ग्‍येल्‍ठिककी चिप्‍ला खवुतुङ्‍मा देनी दुक सिनी कोन्‍छ्‍योकला सोवा तेक्‍सुङ,
REV 7:12 “आमिन! सोवा ताङ मोवा ताङ रिक्‍पा ताङ थुचिछे ताङ ताङ्‍देन ताङ ओङ ताङ ङार ति नरीकी नरी ज्‍युवु दाक्‍पी कोन्‍छ्‍योककी तिराङ यिन। आमिन!”
REV 7:13 ते वोतुप गोमा कितुप मी छ्‍येतिवी पर्ला मिरा च्‍यिककी “दी मज्‍या कर्मु कोन्‍दुपतिवा सु यिन? कनी नेसुर वावु यिन?” सिनी ङला टिसुङ।
REV 7:14 तमा ङे तीला दुक सिक्‍यायी, “चोवो, ख्‍युरुङला राङ छ्‍या वे।” तमा तीकी दुक सिक्‍यासुङ, “दिवा ति छेटाङ ग्‍येर्पु ने थर्नी वावु यिन। दिवी कोन्‍दुप मज्‍यातिवा लुक रुककी ठकला टुनी कर्मु जोवु यिन।
REV 7:15 तुक क्‍यानी तिवा कोन्‍छ्‍योककी ग्‍येल्‍ठिककी चिप्‍ला वे। तिवा ङ्‍यी ताङ नुप्‍ज्‍या खोकी ल्‍हङाङला देनी खोला शब्‍ज्‍यी बुल्‍गिवी। तमा ग्‍येल्‍ठिकला ज्‍यु वोतुप तीकी तिवी मुला ज्‍युनी तिवाला र्‍होक्‍टे किवी।
REV 7:16 तिवाला येलुङ ल्‍होवा ताङ कोम्‍बा मालाङ्‍गिवी, तमा ङ्‍यिमा छेन्‍दी याङ्‍ना चुका छेन्‍दीकी साङ तिवा मिछिकिवी।
REV 7:17 च्‍यिलासिसिन ग्‍येल्‍ठिककी पर्ला ज्‍यु वोतुप लुक रुक ति तिवी गोठाला च्‍युङ्‍गिवी। तमा खोकी तिवाला मिजी तेरुप छ्‍यी पुङतिवाला क्‍योल्‍गिवी। तमा कोन्‍छ्‍योककी तिवी मिककी मिक्‍च्‍युर तेरी पिनी तेर्किवी।”
REV 8:1 येलुङ लुक रुककी लज्‍युर दिन्‍बा ति तोल्‍सुङ। ती पेला ते तो मिसिन छ्‍युजी फेका सेक देवाच्‍येन ति कुसुमी देसुङ।
REV 8:2 तमा ते कोन्‍छ्‍योककी चिप्‍ला देवाच्‍येनकी लेन क्‍योलुप थु मिरा दिन लानी वोतुप ति ङे थोङ्‍सुङ। तिवाला ति ग्‍येलिङ रे रे तेसुङ।
REV 8:3 ती ज्‍युक्‍ला सेरकी पोके लकला खुरुप यम्‍बा देवाच्‍येनकी लेन क्‍योलुप थु मिरा च्‍यिक वानी छोठी चिप्‍ला लासुङ। तमा ग्‍येल्‍ठिककी चिप्‍ला वोतुप सेरकी छोठी खला कोन्‍छ्‍योकला तेपा कितुप तेरी मीतिवी क्‍यावु मोपोरकी मुला देकुपला पो बङी तेसुङ।
REV 8:4 ती पोकी तुता ति मीतिवी क्‍यावु मोपोरकी मुला राङ देवाच्‍येनकी लेन क्‍योलुप थुतिवी लक ने केला कोन्‍छ्‍योककी चिप्‍ला गाल्‍सुङ।
REV 8:5 ती ज्‍युक्‍ला देवाच्‍येनकी लेन क्‍योलुप थु तीकी पोके ति लानी छोठीकी मे ति पोके नाङ्‍ला लुक्‍नी जम्‍बुलिङला क्‍युर्सुङ। तमा सम्‍डुक ग्‍यकुप वोरु ताङ चिलाम ग्‍यपुप ताङ सयी ग्‍यप्‍सुङ।
REV 8:6 तेसुर ती ग्‍येलिङ दिन खुरुप देवाच्‍येनकी लेन क्‍योलुप थु दिनतिवा ग्‍येलिङ पुतुपला टडिक क्‍यासुङ।
REV 8:7 देवाच्‍येनकी लेन क्‍योलुप थु तङ्‍बु तीकी ग्‍येलिङ पुसुङ। तमा जम्‍बुलिङला ठक र्‍हेवु सेर ताङ मे पाप्‍सुङ। तीकी जोसालेन्‍सिन जम्‍बुलिङ छो सुमला छो च्‍यिक ताङ दोङ्‍बुतिवा छो सुमला छो च्‍यिक ताङ ङोर्मु वोतुप नम्‍बा तेरीकी चतिवा छिक्‍सुङ।
REV 8:8 येलुङ देवाच्‍येनकी लेन क्‍योलुप थु ङ्‍यिवा तीकी खोरो ग्‍येलिङ पुसुङ। तमा मे बरिन वोतुप टक ग्‍येर्पु यी ग्‍येम्‍छो नाङ्‍ला क्‍युर्सुङ। तमा ग्‍येम्‍छो छो सुमला छो च्‍यिक ति ठकला गाल्‍सुङ।
REV 8:9 तमा ग्‍येम्‍छोला सेन्‍बु वोतुप सेम्‍ज्‍येनतिवा छो सुमला छो च्‍यिक ति शिसुङ। टुतिवा साङ छो सुमला छो च्‍यिक ति ना गाल्‍सुङ।
REV 8:10 येलुङ देवाच्‍येनकी लेन क्‍योलुप थु सुम्‍बा तीकी खोरो ग्‍येलिङ पुसुङ। तमा नाम नेमा बाशिङ च्‍येतुप दोके कर्मा ग्‍येर्पु यी जम्‍बुलिङला पाप्‍सुङ। ती ति चङ्‍बुतिवा छो सुमला छो च्‍यिक ताङ छ्‍यी पुङतिवा वोतुप दासाला पाप्‍सुङ।
REV 8:11 ती कर्माकी मिङ ति “खक्‍ती” यिन। ती कर्मा लुम्‍बुप दासाला छ्‍यु छो सुमला छो च्‍यिक ति तेरी खक्‍ती गाल्‍सुङ। तमा ती छ्‍यु थुङ्‍गुप मीतिवा बङी शिसुङ।
REV 8:12 येलुङ देवाच्‍येनकी लेन क्‍योलुप थु ज्‍यिवा तीकी खोरो ग्‍येलिङ पुसुङ। तमा ङ्‍यिमा ताङ उला ताङ कर्मा छो सुमला छो च्‍यिकला पोप्‍सुङ। तिवी वोसिर छो सुमला छो च्‍यिक ति नक्‍तोमी गाल्‍सुङ। तुक क्‍यानी ङ्‍यिमी दिङगी वोसिर ताङ नुपकी वोसिर छो सुमला छो च्‍यिक ति नक्‍तोमी गाल्‍सुङ।
REV 8:13 तमा ङे ल्‍हासालेन्‍सिन नामला ठ च्‍यिक फुरिन वोतुप थोङ्‍सुङ। तमा तीकी थोर ग्‍यप्‍नी “अबुइ! काङ्‍ग्‍या मोताप सुकुप ताम्‍ङे यिन! जम्‍बुलिङला देतुप मीतिवाला छासे ज्‍यिवा लङ्‍गुप वे। च्‍यिलासिसिन देवाच्‍येनकी लेन क्‍योलुप थु मिरा सुमकी ङमु राङ पु गोवु ग्‍येलिङकी वोरु ति तरोङ साङ लुनी वे।” सिनी सिक्‍यावु ति ङे थोसुङ।
REV 9:1 येलुङ देवाच्‍येनकी लेन क्‍योलुप थु ङवा तीकी खोरो ग्‍येलिङ पुसुङ। तमा नाम नेमा कर्मा च्‍यिक पापुप ति ङे थोङ्‍सुङ। ती कर्मा तीला छासे तिङ्‍मु वोतुप मुक्‍तुमकी गो बेतुप लिमी ति तेसुङ।
REV 9:2 ती कर्मा तीकी ती मुक्‍तुमकी गो ति पेसुङ। तमा मे कशेन बरुप नाङ ने तुता थेन्‍दुप दोके थेन्‍सुङ। ती तुताकी जोसालेन्‍सिन ङ्‍यिमा ताङ नाम साङ नक्‍तोमी गाल्‍सुङ।
REV 9:3 ती तुताकी नङ नेसुर जम्‍बुलिङकी खला च्‍युच्‍यु पेतिवा बङी थेन्‍सुङ। तिवाला बिच्‍छीकी दोके मीला फेसिमा तुक टम्‍बुप ङार बिन्‍सुङ।
REV 9:4 तमा तिवाला “जम्‍बुलिङकी च ताङ दोङ्‍बु ताङ चुशिङतिवाला काङ साङ ना मातोङा, यिने टली लोला कोन्‍छ्‍योककी लज्‍युरकी त मेतुप मीतिवाला तिराङ फेनी छ्‍येर्पा बिन!” सिनी क बिन्‍सुङ।
REV 9:5 ती च्‍युच्‍यु पेतिवाला मीतिवा सेतुप ओङ माबिन, यिने ल ङ सेक तिराङ छेटाङ तेरुप ओङ बिन्‍सुङ। ती च्‍युच्‍यु पेतिवी फेतुप पेला मीतिवाला बिच्‍छीकी फेसिन चो छेटाङ गिवे, तुकै राङ छेटाङ गिनोक।
REV 9:6 ती तुजेला मीतिवा शेप नो क्‍यासिनाङ मिशिवी, शेप छल्‍सिनाङ शि मुखुवी।
REV 9:7 ती च्‍युच्‍यु पेतिवी जुजम ति मक ग्‍यक डोपला टडिक क्‍या ज्‍यकुप ततिवा दोके नोक। तिवी गोला सेरकी ग्‍येल्‍वी उशाक दोके कोन्‍नी नोक। तमा तिवी ङुतुङ ति मी ङुतुङ दोके नोक।
REV 9:8 तिवी र्‍ह ति पुम्‍पेजी र्‍ह दोके ताङ स ति सेङ्‍गीकी स दोके नोक।
REV 9:9 तिवी छेकोकला ति च्‍याकी लिङ ग्‍यप्‍नोक। तिवी पुशोककी वोरु ति थमु ग्‍यक डोपला छ्‍योङ्‍बाल ग्‍यकुप त ताङ तखुरतिवा बङीकी वोरु दोके देन्‍गिनोक।
REV 9:10 तिवी ङमी गोला बिच्‍छीकी दोके दुङ साङ नोक। तिवी ङमाला मीतिवाला ल ङ सेक छेटाङ तेरुप ङार नोक।
REV 9:11 तमा ती छासे तिङ्‍मु वोतुप मुक्‍तुमकी खला ओङ्‍ज्‍येन कितुप देवाच्‍येनकी लेन क्‍योलुप थु तीकी तिवी खला ग्‍येला किनोक। तीकी मिङ ति हिब्रू ताम्‍ङेला एबाड्‍डोन ताङ ग्रीक ताम्‍ङेला अपोल्‍लियोन सिनोक।
REV 9:12 लुनी वोतुप छेटाङ सुमकी नाङ्‍ला थल्‍माकी छेटाङ ति गल सिन्‍सुङ। ती ज्‍युक्‍ला येलुङ यम्‍बा छेटाङ ङ्‍यिवा ति लुनी वे।
REV 9:13 ती ज्‍युक्‍ला देवाच्‍येनकी लेन क्‍योलुप थु टुक्‍पा तीकी खोरो ग्‍येलिङ पुसुङ। तमा कोन्‍छ्‍योककी दोङ्‍ला वोतुप सेरकी छोठीकी सुर ज्‍यी नेमा वोरु यी थेन्‍दुप ति ङे थोसुङ।
REV 9:14 ती ग्‍येलिङ खुरुप देवाच्‍येनकी लेन क्‍योलुप थु टुक्‍पा तीला “चङ्‍बु ग्‍येर्पु यूफ्रेटिसला टानी ज्‍यकुप देवाच्‍येनकी लेन क्‍योलुप थु ज्‍यीला पि तोङ!” सिनी सिक्‍यासुङ।
REV 9:15 ती ज्‍युक्‍ला ती देवाच्‍येनकी लेन क्‍योलुप थु ज्‍यीतिवा पि ताङ्‍सुङ। तिवा ति जम्‍बुलिङला वोतुप मी छो सुमला छो च्‍यिक सेतुपला टेके तुजे ताङ ङ्‍यिमा ताङ ल ताङ लोकी थोक्‍ला टडिक क्‍या ज्‍याक्‍नोक।
REV 9:16 ते त शेन्‍दुप मक्‍मीतिवा छेबुङ खल ज्‍यिक चोयी वे सिरुप ति ङे थोसुङ।
REV 9:17 तमा ङे कोन्‍छ्‍योक नेमा वावु ज्‍यल्‍काला ततिवा ताङ ते खला शेन्‍दुपतिवा थोङ्‍सुङ। ती ते खला शेन्‍दुपतिवी छेकोकला ग्‍यपुप च्‍याकी लिङ ति मे दोके मर्वु ताङ ङोन्‍बु ताङ सेर्वु नोक। ती ततिवी गो ति सेङ्‍गीकी गो दोके नोक। तमा तिवी ख नेसुर मे ताङ तुता ताङ गन्‍धक थेन्‍गिनोक।
REV 9:18 तिवी ख नेमा थेन्‍दुप मे ताङ तुता ताङ गन्‍धक तीकी छेटाङ सुम नेसुर मी मिरिक छो सुमला छो च्‍यिक सेसुङ।
REV 9:19 च्‍यिलासिसिन ती ततिवी ख ताङ ङमाला ङार नोक। तिवी ङमा ति रुल दोके नोक। ती ङमाला गो साङ नोक। ती ङमाकी गो थ्‍वोनी मीतिवाला म देन्‍गिनोक।
REV 9:20 दुका छेटाङ नेसुर मासेनी लुवु मीतिवी खोप्‍रे लाक्‍पी क्‍यावु लाका नेसुर सेम माग्‍युर्नोक। तमा तिवी डेतिवाला तेन्‍दुप ताङ, सेर ताङ ङुल ताङ सेर्मु ताङ दो ताङ शिङगी कुला तेन्‍दुप क्‍युर्नी माज्‍याक। तिवा ति थोङ्‍गुप साङ मोथोङ्‍गुप ताङ थो साङ मुथुपुप ताङ युक साङ मुथुपुप यिन।
REV 9:21 तोजो तिराङ मिन, तिवी खोप्‍रे क्‍यावु मी सेतुप ताङ जिम्‍डुल छ्‍या देन्‍दुप ताङ शम्‍डेन कितुप ताङ कुन कितुप नेसुर सेम माग्‍युर्नोक।
REV 10:1 येलुङ यम्‍बा ङार छ्‍येवु देवाच्‍येनकी लेन क्‍योलुप थु च्‍यिक देवाच्‍येन नेमा पाम वुङ्‍यिन कितुप ति ङे थोङ्‍सुङ। तीकी जु ति मुक्‍पी कोरुप ताङ गोला ति ज्‍य सुकुप दोके नोक। तीकी ङुतुङ ति ङ्‍यिमा दोके नोक, काङ्‍बातिवा ति कज्‍यु दोके मे मेलाप नोक।
REV 10:2 तीकी लकला पेनी वोतुप शुकी बिटप टिक्‍पे यी नोक। तीकी काङ्‍बा यावा ति ग्‍येम्‍छो खला ताङ काङ्‍बा येन्‍बा ति सला ज्‍याक्‍सुङ।
REV 10:3 ती ज्‍युक्‍ला तीकी सेङ्‍गी वुरुप दोके क्‍यानी कशेन वोरु तेन्‍सुङ। तीकी वोरु देन्‍दुप पेला सम्‍डुक ग्‍यपुप दोके वोरु थेङ्‍मा दिन थेन्‍सुङ।
REV 10:4 ती सम्‍डुक ग्‍यपुप वोरु दिनतिवी वोरु ति मी ताम्‍ङे क्‍यावु दोके कुतुक कुतुक तेन्‍सुङ। ती पेला ङ ति ती ताम्‍ङेतिवा टिकुपला टडिक क्‍यायी। यिने तोजो पेला राङ देवाच्‍येन नेमा “ती सम्‍डुक ग्‍यकुप वोरु दिनतिवी कोर्ला ति छ्‍याकला राङ ज्‍योक। ती ति माटिक!” सिरुप वोरु यी ङे थोसुङ।
REV 10:5 तमा ती ङे थोङ्‍गुप ग्‍येम्‍छो ताङ जम्‍बुलिङला काङ्‍बा ज्‍योकुप ङार छ्‍येवु देवाच्‍येनकी लेन क्‍योलुप थु तीकी खोरो लाक्‍पा यावा ति देवाच्‍येन ने लाङ्‍सुङ।
REV 10:6 तमा नाम ताङ ती नाङ्‍ला वोतुप तेरी च्‍यालकतिवा ताङ, जम्‍बुलिङ ताङ जम्‍बुलिङला वोतुप तेरी च्‍यालकतिवा ताङ, ग्‍येम्‍छो ताङ ती नाङ्‍ला वोतुप तेरी च्‍यालकतिवा ज्‍ये नङ्‍गुप नरीकी नरी ङोसु ज्‍यु वोतुप कोन्‍छ्‍योककी मिङला दुक सिनी तीकी थाक्‍छ्‍येसुङ, “तफेन्‍ला नाम्‍साङ फिमु क्‍या मनङ्‍गिवी।
REV 10:7 यिने देवाच्‍येनकी लेन क्‍योलुप थु दिन्‍बा तीकी खोरो ग्‍येलिङ पुतुप तुजेला कोन्‍छ्‍योककी खोला शब्‍ज्‍यी कितुप लुङ्‍तेम्‍बातिवाला सुङ्‍गुप खोकी छ्‍याकला वोतुप ताम्‍ङेतिवा तेरी छेकिवी।”
REV 10:8 तमा येलुङ देवाच्‍येन नेमा गोमाला ङे थोवु वोरु तीकी ङला “ख्‍युरुङ ग्‍युक, ग्‍येम्‍छो ताङ सला लानी वोतुप देवाच्‍येनकी लेन क्‍योलुप थु तीकी लकला पेनी वोतुप शुकी बिटप ति लो!” सिनी सिक्‍यासुङ।
REV 10:9 तमा ङ ति देवाच्‍येनकी लेन क्‍योलुप तीकी चाला गल्‍नी शुकी बिटप टिक्‍पे ति लङ्‍यिन। तमा तीकी ङला “दी ति लानी सो, दीकी ख्‍योरो खोक्‍पाला खक्‍ती जेवी, यिने खला ति राङ दोके ङर्मु गिवी।” सिनी सिक्‍यासुङ।
REV 10:10 ती देवाच्‍येनकी लेन क्‍योलुप थु तीकी लक नेमा ङे ती शुकी बिटप टिक्‍पे ति लानी सोयी। तमा ङे ख ति राङ सोवु दोके ङर्मु गाल्‍सुङ, यिने सोसिमा खोक्‍पाला ति खक्‍ती गाल्‍सुङ।
REV 10:11 ती ज्‍युक्‍ला तिवी ङला “ख्‍योरो येलुङ मी बङी ताङ मिरिक बङी ताङ ग्‍येतामतिवा बङी ताङ ग्‍येल्‍वुतिवा बङीकी थोक्‍ला ज्‍युक्‍ला काङ काङ च्‍युङ्‍गिवी सिरुप कोर्ला नम्‍दर शे गोकितो!” सिनी सिक्‍यासुङ।
REV 11:1 ती ज्‍युक्‍ला ङला तपुप थिक्‍शिङ दोके लकाम च्‍यिक बिन्‍सुङ। तमा तीकी ङला दुक सिक्‍यासुङ, “ख्‍युरुङ लानी कोन्‍छ्‍योककी ल्‍हङाङला गल्‍नी ल्‍हङाङ ताङ छोठी ति तोप! तमा ते खोला सोवा देकुपतिवा तेरी टङ्‍गा ग्योप!
REV 11:2 यिने ल्‍हङाङ फिला वोतुप लेङाङ ति माताप, च्‍यिलासिसिन ती ति मिरिक कुतुक कुतुककी मीतिवाला बिन्‍दुप यिन। तिवी तीला ल खल ङ्‍यी ताङ ङ्‍यी सेक चाङ्‍मा वोतुप यरूशलेम ग्‍येसाकी लेप्‍नी ग्‍येला किवी।
REV 11:3 तमा ङ मिरा ङ्‍यीला पङ्‍बु तेरुप ओङ बिन्‍नी तोङ्‍यिनो, तिवी भाङ्‍ग्रा कोन्‍नी ङ्‍यिमा तोङ्‍डा यी ताङ सयी ङ्‍यी ताङ खल टुक सेक नम्‍दर शेकितो।”
REV 11:4 ती पङ्‍बु तेरुप मिरा ङ्‍यी ति जम्‍बुलिङला ग्‍येला कितुप चोवो कोन्‍छ्‍योककी चिप्‍ला वोतुप जैतुनकी दोङ्‍बु ङ्‍यी ताङ मेलाङ ङ्‍यीतिवा यिन।
REV 11:5 दोजो मी ललाइकी तिवाला ना तोङ्‍गुप नो क्‍यासिनाङ तिवी ख नेसुर थेन्‍दुप मेकी तिवी डतिवाला ना तोङ्‍गिवी। तमा सी तिवाला ना तोङ्‍गुप नोकिवे, तिवाला तुक राङ क्‍यानी सेकिवी।
REV 11:6 कोन्‍छ्‍योककी तिवाला सुङ ख्‍याप्‍टाक कि मच्‍यिवा सेक्‍ला तिवी छ्‍यर्वा मग्‍यक्‍शी सिक्‍यासिमा छ्‍यर्वा मग्‍यप्‍नी नाम्‍खर कि ज्‍यितुप साङ तिवाला ओङ वे। तमा छ्‍युला ठक डो ज्‍यितुप ताङ तिवी नो वोतुप पेला जम्‍बुलिङला नेजु मेलोक्‍पा नम्‍बा कुतुक कुतुक वुङ ज्‍यितुप साङ तिवाला ओङ वे।
REV 11:7 तमा ती पङ्‍बु तेरुप मिरा ङ्‍यीतिवी पङ्‍बु तेरुप लाकातिवा तेरी छेसिमा छासे तिङ्‍मु वोतुप मुक्‍तुम नेसुर सेम्‍ज्‍येन च्‍यिक थेन्‍गिवी। ती सेम्‍ज्‍येनकी तिवाला थमु ग्‍यप्‍नी तिवी खला ग्‍येल्‍नी तिवाला सेकिवी।
REV 11:8 तमा तिवी रोतिवा ति ग्‍येसा ग्‍येर्पुकी लाम नेवा क्‍युर्किवी। ती ग्‍येसाकी मिङ ति सदोम याङ्‍ना मिश्र साङ सिनी ज्‍याङ वे। ते तिवी चोवोला साङ ग्‍यङ्‍शिङला कल्‍नी सेतुप यिन।
REV 11:9 ङ्‍यिमा सुम ताङ फेका सेक गिपा कुतुककी मीतिवा ताङ मिरिक कुतुककी मीतिवा ताङ ग्‍येताम कुतुककी मीतिवा ताङ लुङ्‍बा लुङ्‍बाकी मीतिवी तिवी रोतिवाला ल्‍हेवी। तमा सुला साङ ती रो ति मुक्‍तुम ग्‍यक मिज्‍यिवी।
REV 11:10 तमा ती पङ्‍बु तेरुप मिरा ङ्‍यीला सेतुप थोङ्‍सिमा जम्‍बुलिङकी मीतिवा कशेन गा किवी। तमा तिवी च्‍यिककी च्‍यिकला ङ्‍येम्‍बा तेर्टी चेवी। च्‍यिलासिसिन ती पङ्‍बु तेरुप मिरा ङ्‍यीतिवी दी जम्‍बुलिङकी मीतिवाला छासे छ्‍येर्पा बिन्‍नोक।
REV 11:11 यिने ङ्‍यिमा सुम ताङ फेका यी ज्‍युक्‍ला कोन्‍छ्‍योक नेमा वावु मिजीकी उ ति तिवी नाङ्‍ला शुसुङ। तमा तिवी काङ्‍बा चुनी लासुङ। ती थोङ्‍सिमा मीतिवा कशेन ज्‍यिवा क्‍यासुङ।
REV 11:12 तमा देवाच्‍येन नेमा कशेन थोर ग्‍यप्‍नी “दे केला शोक।” सिक्‍यावु ति ती पङ्‍बु तेरुप मिरा ङ्‍यीतिवी थोसुङ। तमा तिवी डतिवी ल्‍हयी ल्‍हयी तिवा मुक्‍पी पर्ने केला देवाच्‍येन ने गाल्‍सुङ।
REV 11:13 ती पेला राङ सयी ग्‍यिर्पो यी ग्‍यप्‍सुङ, तमा ग्‍येसा छो च्‍यिथम्बाला छो च्‍यिक ति तला ग्‍यप्‍नी मी तोङ्‍डा दिन शिसुङ। तमा यम्‍बा सेन्‍बु लुवु मीतिवा छासे ज्‍यिवा क्‍यानी देवाच्‍येनकी कोन्‍छ्‍योकला मोवा क्‍यासुङ।
REV 11:14 छेटाङ ङ्‍यिवा ति छेसुङ। ल्‍होसा, त येलुङ छेटाङ सुम्‍बा ति वुङ्‍यिन वोतो।
REV 11:15 येलुङ देवाच्‍येनकी लेन क्‍योलुप थु दिन्‍बा तीकी खोरो ग्‍येलिङ पुसुङ। ती ज्‍युक्‍ला देवाच्‍येन नेमा थोर ग्‍यप्‍नी दुक सिरुप वोरु यी ग्‍येर्पु तेन्‍सुङ, “जम्‍बुलिङकी ग्‍येल्‍खाप ति दाक्‍पी चोवो कोन्‍छ्‍योक ताङ खोकी ख्रीष्‍टकी ग्‍येल्‍खाप च्‍युङ्‍सुङ। त खोकी नरीकी नरी ग्‍येला क्‍या नङ्‍गितो।”
REV 11:16 ती ज्‍युक्‍ला कोन्‍छ्‍योककी चिप्‍ला दाक दाक्‍पी ग्‍येल्‍ठिकला देतुप गोमा कितुप मी छ्‍ये खल ज्‍यिक ताङ ज्‍यीतिवा सला खवुतुङ्‍मा देनी दुक सिनी कोन्‍छ्‍योकला सोवा तेक्‍सुङ,
REV 11:17 “ओ, गोमाला नेज्‍यु नरी लुवु ताङ तन्‍दा साङ ज्‍यु वोतुप ओङ छ्‍येवु कोन्‍छ्‍योक, ङ्‍यिराङ कोन्‍छ्‍योकला थुचिछे बुलिन। च्‍यिलासिसिन कोन्‍छ्‍योकला ओङ ग्‍येर्पु वे, तमा जम्‍बुलिङला ग्‍येला कितुप गो चुन नाङ्‍सुङ।
REV 11:18 मिरिक कुतुक कुतुककी मीतिवी ङ्‍यिर्मु क्‍यासुङ, त चोवो ङ्‍यिर्मु कितुप तुजे ति छेसुङ। तमा शेपतिवाला ठिम कितुप तुजे साङ छेसुङ। तमा चोवोला शब्‍ज्‍यी कितुप लुङ्‍तेम्‍बातिवा ताङ तेपा कितुपतिवा ताङ चोवोला ज्‍यिवा कितुप छ्‍ये छ्‍युङा तेरीला छ्‍यक्‍तक तेरुप तुजे साङ छे वे। जम्‍बुलिङ ना तोङ्‍गुपतिवाला पर्च्या तोङ्‍गुप तुजे साङ छे वे।”
REV 11:19 तमा देवाच्‍येनला कोन्‍छ्‍योककी ल्‍हङाङ पेसिमा ती नाङ्‍ला खोकी थाक्‍छ्‍येन नङ्‍गुप तेर्गाम ति थोङ्‍सुङ। ते चिलाम ग्‍यपुप ताङ सम्‍डुक ग्‍यकुप वोरुतिवा थोसुङ। तमा सयी ग्‍यकुप ताङ सेर बोम्‍बु बोम्‍बुतिवा ग्‍यप्‍सुङ।
REV 12:1 तमा ङे देवाच्‍येनला हलेवु त च्‍यिक थोङ्‍सुङ। ती ति काङ यिन सिसिन पुम्‍पेजा मिरा च्‍यिककी मज्‍या कोन्‍दुप दोके ङ्‍यिमा कोन्‍नी नोक। तीकी काङ्‍बी वोक्‍ला उला नोक। तमा तीकी गोला ति कर्मा च्‍यिङ्‍ङी वोतुप उशाक कोन्‍नी नोक।
REV 12:2 ती पुम्‍पेजा ति जु च्‍येन्‍दी वोतुप नोक। तमा जु ठिलुप पेला लेप्‍नी सुक ग्‍यपुप तप्‍की कशेन च्‍यार देनिन नोक।
REV 12:3 येलुङ ङे देवाच्‍येनला यम्‍बा त च्‍यिक साङ थोङ्‍सुङ। ती ति गो दिन ताङ अर्क्योक च्‍यिथम्‍बा वोतुप डुक मर्वु बोम्‍बु यी नोक। तीकी गो रे रेला ग्‍येल्‍वी उशाक रे रे कोन्‍नी नोक।
REV 12:4 तीकी ङमा थ्‍वोनी नामगी कर्मा छो सुमला छो च्‍यिक ति रुनी जम्‍बुलिङला क्‍युर्सुङ। तमा ती पुम्‍पेजाला आङा केलुङ्‍मे ती आङाला मिता तोङ्‍गुप सिनी ती ति आङा क्‍येप छलुप पुम्‍पेजी चिप्‍ला गुनी देसुङ।
REV 12:5 तमा ती पुम्‍पेजा तीकी लुङ्‍बा तेरीकी मीतिवाला च्‍याङ्‍युङ थ्‍वोनी च्‍युरुवु क्‍यानी ग्‍येला कितुप पुज्‍युङ यी क्‍येसुङ। यिने ती पुज्‍युङ तीला शार्क्येक लङ्‍नी कोन्‍छ्‍योक ताङ खोकी ग्‍येल्‍ठिकला टि गाल्‍सुङ।
REV 12:6 तमा ती ज्‍युक्‍ला ती पुम्‍पेजा ति दासा पाङ्‍थेरी नेवा टोनी गाल्‍सुङ। ते तीला कोन्‍छ्‍योककी ङ्‍यिमा तोङ्‍डा च्‍यिक ताङ सयी ङ्‍यी ताङ खल टुक सेक सोपला दासा टडिक क्‍यानी ज्‍याक्‍नोक।
REV 12:7 ती पेला देवाच्‍येनला मक ल्‍हासुङ। तमा मिखाएल सिरुप देवाच्‍येनकी लेन क्‍योलुप थु छ्‍ये ताङ तीकी मक्‍मीतिवी ती डुककी मुला मक ग्‍यप्‍सुङ। तमा डुक ताङ तीकी मक्‍मीतिवी साङ तिवी मुला मक ग्‍यप्‍सुङ।
REV 12:8 यिने ती डुक ताङ तीकी मक्‍मीतिवा तेरी फम्‍नी तिवा देवाच्‍येनला देतुप दासा साङ माङ्‍ये।
REV 12:9 तुक क्‍यानी ती डुक बोम्‍बु ति देवाच्‍येन नेमा जम्‍बुलिङला तेन क्‍युर्सुङ। ती ति थल्‍माकी रुल यिनोक। तीकी मिङ ति दुक्‍टा याङ्‍ना शैतान यिन। तीकी जम्‍बुलिङकी मीतिवाला जिनोक जोनी लाका मेलोवा कि ज्‍यिकिनोक। तीला जम्‍बुलिङला क्‍युरुप पेला तीकी मक्‍मीतिवाला साङ तीकी मुला राङ क्‍युर्सुङ।
REV 12:10 ती पेला देवाच्‍येनला दुक सिक्‍यावु वोरु ग्‍येर्पु यी ङे थोसुङ। “त याङ दाक्‍पी कोन्‍छ्‍योककी तेरी मीतिवाला थर्वा नङ्‍गुप ताङ खोकी ङार ताङ ग्‍येल्‍खाप ताङ खोकी पेन नङ्‍गुप ख्रीष्‍टकी ओङ्‍ज्‍येन ति वा वे। च्‍यिलासिसिन तेपा कितुप दाक्‍पी अच्‍युनुपतिवाला ङ्‍यी ताङ नुप्‍ज्‍या कोन्‍छ्‍योककी दोङ्‍ला क्‍येन तेरुप शैतान ति देवाच्‍येन नेमा तेन्‍नी क्‍युर्नी वे।
REV 12:11 तेपा कितुप दाक्‍पी अच्‍युनुपतिवी थर्वा नङ्‍गुप लुक रुककी ठक ताङ कोन्‍छ्‍योककी कोर्ला पङ्‍बु बिन्‍दुप सुङ नेसुर तिवाला क्‍येन तेरुप शैतानकी खला ग्‍येलुप यिन। च्‍यिलासिसिन पङ्बु तेरुपला तिवा शिराङ गोसिनाङ खोप्‍रे जुकी थोक्‍ला पप माक्‍या।
REV 12:12 ती तप्‍की ओ देवाच्‍येन ताङ देवाच्‍येनला वोतुपतिवा, ख्‍यिराङ कशेन गा की। यिने जम्‍बुलिङ ताङ ग्‍येम्‍छोला वोतुपतिवाला छासे ज्‍यिवा यिन। च्‍यिलासिसिन खुरुङ ना डोप तुजे अला मे सिरुप हाक्‍कोनी शैतान ति छासे ङ्‍यिर्मु कोक्‍पु लानी ख्‍यिराङ जम्‍बुलिङला वोतुपतिवी पर्ला गाल वे।”
REV 12:13 ती डुक तीकी खुरुङ जम्‍बुलिङला क्‍युरुप हाक्‍कोसिमा ती पुज्‍युङ क्‍येप पुम्‍पेजा तीला दुक्‍पा तेरुपला छाल्‍सुङ।
REV 12:14 यिने कोन्‍छ्‍योककी ती पुम्‍पेजा तीला डुककी चिप नेसुर दासा पाङ्‍थेरीला फुर्नी डोपला ठ ग्‍येर्पुकी नप्‍शोक ङ्‍यी बिन्‍सुङ। तमा तीला ते लो सुम ताङ फेका सेक ती डुक नेसुर र्‍होक्‍नी सोपला टडिक क्‍या ज्‍याक्‍सुङ।
REV 12:15 तमा ती डुक तीकी ती पुम्‍पेजा तीला ज्‍ये डोशी सिनी ती पुम्‍पेजी तिङ नेसुर खोरो ख नेमा शोतोक दोके छ्‍यु कशेन तेन्‍सुङ।
REV 12:16 यिने डुककी ख नेमा तेन्‍दुप शोतोककी ती पुम्‍पेजा तीला ज्‍ये मोडोशी सिनी से ख पेनी ती छ्‍यु ति सिम्‍नी गाल्‍सुङ।
REV 12:17 ती तप्‍की डुक ति मङ ङ्‍यिर्मु लानी यम्‍बा लुनी वोतुप पुम्‍पेजी गिपातिवाला थमु ग्‍यकुपला गाल्‍सुङ। ती पुम्‍पेजी गिपातिवा ति कोन्‍छ्‍योककी सुङला ङ्‍येन्‍दुप ताङ मीतिवाला येशूकी थोक्‍ला पङ्‍बु तेरुपतिवा यिन।
REV 12:18 तमा ती डुक ति ग्‍येम्‍छोकी गारीला लानी देसुङ।
REV 13:1 तमा येलुङ ग्‍येम्‍छो नाङ ने सेम्‍ज्‍येन च्‍यिक थेन्‍दुप ति ङे थोङ्‍सुङ। तीकी ति अर्क्योक च्‍यिथम्‍बा ताङ गो दिन चोके नोक। तमा अर्क्योक रे रेला ग्‍येल्‍वी उशाक कोन्‍नोक। तमा ती गो रे रेला कोन्‍छ्‍योकला मारे तोङ्‍गुप मिङ टिनी नोक।
REV 13:2 तीकी जु ति जिक दोके नोक। तमा तीकी काङ्‍बातिवा तोमकी काङ्‍बा दोके ताङ ख ति सेङ्‍गी ख दोके नोक। ती डुक तीकी खोरो ङार ताङ ग्‍येल्‍ठिक ताङ ओङ्‍ज्‍येन ग्‍येर्पु ति ती सेम्‍ज्‍येन तीला बिन्‍सुङ।
REV 13:3 ती सेम्‍ज्‍येनकी गो दिनतिवी नाङ्‍ला गो च्‍यिकला ति म कशेन थेन्‍दुप दोके नोक, यिने ती म ति तोर्नोक। तमा तेरी जम्‍बुलिङकी मीतिवा हलेवा लानी ती सेम्‍ज्‍येनकी तिङ्‍ला तिङ्‍यासुङ।
REV 13:4 ती डुक तीकी खोरो ओङ्‍ज्‍येन ति ती सेम्‍ज्‍येन तीला बिन्‍दुप तप्‍की मीतिवी ती डुक तीला तेन्‍गिनोक। तमा तिवी “दी सेम्‍ज्‍येन दोके याङ यम्‍बा काङ साङ मे। दीकी तेन्‍दोकला सी थमु ग्‍यक थुप्‍किवी रो?” सिनी तीला तेन्‍दुप छाल्‍सुङ।
REV 13:5 तमा ती सेम्‍ज्‍येन तीला कोन्‍छ्‍योकला मारे तोङ्‍गुप ओङ्‍ज्‍येन ताङ ल खल ज्‍यी ताङ ङ्‍यी सेक ग्‍येला कितुप ओङ्‍ज्‍येन बिन्‍सुङ।
REV 13:6 तमा तीकी ख पेनी कोन्‍छ्‍योकला मारे ताङ्‍नी खोकी मिङ ताङ खो ज्‍युवु दासा ताङ देवाच्‍येनला वोतुपतिवा तेरीला मारे तोङ्‍गुप छाल्‍सुङ।
REV 13:7 कोन्‍छ्‍योकला तेपा कितुप मीतिवी मुला थमु ग्‍यकुप ताङ तिवी खला ग्‍येलुप ओङ्‍ज्‍येन साङ कोन्‍छ्‍योककी तीला नाङ्‍सुङ। तमा तेरी गिपातिवा ताङ मीतिवा ताङ ग्‍येतामतिवा ताङ मिरिकतिवाला ग्‍येला कितुप ओङ साङ नाङ्‍सुङ।
REV 13:8 तुक क्‍यानी सेतुप लुक रुककी मिजीकी थेप नाङ्‍ला जम्‍बुलिङ ज्‍येङ्‍गुप गोमाला के मिङ टिनी वोतुप मीतिवा मिसिन यम्‍बा जम्‍बुलिङला वोतुप मीतिवा तेरीकी ती सेम्‍ज्‍येनला राङ ताङ्‍देन किवी।
REV 13:9 सी ल्‍यामो क्‍यानी हाक्‍कोवु नो किवे, तीकी दी ताम्‍ङे ति ल्‍यामो क्‍यानी ङ्‍येना।
REV 13:10 “दोजो सु चोन्‍खाङला डो गोवु नोके, ती ति चोन्‍खाङला टिनी डिवी। दोजो सुला खुर्पा थ्‍वोनी से गोवु नोके, तीला खुर्पा थ्‍वोनी सेकिवी।” तीकी थोक्‍ला कोन्‍छ्‍योककी गिपातिवा ति हम क्‍यानी देतुप ताङ तेपा रम्‍बु क्‍यानी दे गोकिवी।
REV 13:11 तमा येलुङ से दिङ ने यम्‍बा सेम्‍ज्‍येन यी साङ थेन्‍दुप ति ङे थोङ्‍सुङ। ती सेम्‍ज्‍येन ति लुक रुककी दोके अर्क्योक ङ्‍यी वोतुप नोक। तमा तीकी वोरु ति डुककी वोरु दोके तेन्‍नी ताम्‍ङे लप्‍किनोक।
REV 13:12 तीकी गोमाला थेन्‍दुप सेम्‍ज्‍येनकी छापला तेरी ओङ्‍ज्‍येन किनोक। तमा जम्‍बुलिङ ताङ जम्‍बुलिङकी मीतिवाला साङ तीला तेन ज्‍यिकिनोक। ती सेम्‍ज्‍येन ति गोला म थेन्‍दुप सेम्‍ज्‍येन यिनोक।
REV 13:13 तमा तीकी मीतिवी थोङ्‍दाङला नाम नेमा जम्‍बुलिङला मे क्‍युरुप हलेवु त ग्‍येर्पु ग्‍येर्पुतिवा साङ छ्‍या तेन्‍सुङ।
REV 13:14 गोमाला थेन्‍दुप सेम्‍ज्‍येनकी छापला बिन्‍दुप ती ओङ्‍ज्‍येन नेसुर त छ्‍या तेन्‍सिमा जम्‍बुलिङकी मीतिवाला तीकी जिनोक जोसुङ। तमा तीकी गोला म थेन्‍सिनाङ टेकुप सेम्‍ज्‍येन तीला मी तेरीकी तेन ज्‍यितुपला मीतिवाला तीकी कु जो सिनी क बिन्‍सुङ।
REV 13:15 ती गोमी सेम्‍ज्‍येनकी कु तीकी ताम्‍ङे लप्‍शी, तमा ती कुला मेतेन्‍दुप मीतिवा तेरी सेशी सिनी ती कुला उ लुकुप ओङ साङ सेम्‍ज्‍येन ङ्‍यिवाला बिन्‍नोक।
REV 13:16 तमा तीकी मी छ्‍ये ताङ छ्‍युङा यिन्‍शी, छ्‍युक्‍पु ताङ पेराङ्‍बु यिन्‍शी, योक्‍पु ताङ रङ्‍ज्‍येन वोतुप यिन्‍शी, तेरीला लाक्‍पा यावाला याङ्‍ना टली लोला लज्‍युर ग्‍यक च्‍यिसुङ।
REV 13:17 ती लज्‍युर ति ग्‍येम्‍छो नाङ ने थेन्‍दुप सेम्‍ज्‍येनकी मिङ याङ्‍ना तीकी मिङ छ्‍या देन्‍दुप अङ्‍टङ यिन। ती लज्‍युर माग्‍यपुपतिवा ति सु साङ चोङ्‍गुप ताङ ङ्‍योप मेङ्‍येवु च्‍युङ्‍सुङ।
REV 13:18 तीकी थोक्‍ला छासे रिक्‍पा गोकिवी। सी ल्‍यामु क्‍यानी हाक्‍कोवु नोकिवे, तीकी ती सेम्‍ज्‍येनकी अङ्‍टङकी तेन्‍दोक ति हाक्‍कोशी। दी अङ्‍टङ ति मी च्‍यिकला सिक्‍यावु यिन। तीकी अङ्‍टङ ति ६६६ यिन।
REV 14:1 येलुङ ङे ल्‍हासालेन्‍सिन सियोन पम्‍दोकला ती लुक रुक ति लानी देतुप थोङ्‍सुङ। तीकी मुला मी बुङ च्‍यिक ताङ तोङ्‍डा खल ङ्‍यी ताङ ज्‍यी लानी नोक। तिवी टली लोला थर्वा नङ्‍गुप लुक रुक ताङ खोकी पपी मिङ टिनी नोक।
REV 14:2 तमा देवाच्‍येन नेमा छ्‍यु बङी ग्‍युकुप वोरु दोके ताङ सम्‍डुक ग्‍यकुप दोके वोरु ग्‍येर्पु वावु ति ङे थोसुङ। ती वोरु ति डम्‍ङ्‍याङ टिलुपतिवी डम्‍ङ्‍याङ टिलुप वोरु दोके नोक।
REV 14:3 तमा ते १,४४,००० मीतिवी ति ग्‍येल्‍ठिक ताङ सेन्‍बु वोतुप सेम्‍ज्‍येन ज्‍यी ताङ गोमा कितुप मी छ्‍ये मिरा खल ज्‍यिक ताङ ज्‍यीकी दोङ्‍ला लानी लु सम्‍बा यी लासुङ। ती लु ति दी जम्‍बुलिङ ने थर्वा ङ्‍येतुप १,४४,००० मीतिवी मिसिन यम्‍बा सी साङ लोप मुथुप्‍नोक।
REV 14:4 ती मीतिवा नाम्‍साङ पुम्‍पेजी मुला शम्‍डेन कितुप लाका माक्‍यानी चाङ्‍मा देतुपतिवा यिनोक। तिवा लुक रुक कनी डिवे, तीकी तिङ्‍ला तिङ्‍योकुपतिवा यिनोक। तिवा ति मीतिवी नाङ ने थर्वा ङ्‍येनी कोन्‍छ्‍योक ताङ लुक रुककी थोक्‍ला थल्‍माकी डेलु दोके च्‍युङ्‍गुप मीतिवा यिनोक।
REV 14:5 तिवी ख नेमा नाम्‍साङ जिनोक जोप ताम्‍ङे मालापुप ताङ क्‍येन मेतुप नोक।
REV 14:6 येलुङ यम्‍बा देवाच्‍येनकी लेन क्‍योलुप थु मिरा च्‍यिक नामगी पर्ला फुरिन वोतुप ति ङे थोङ्‍सुङ। तीकी मुला जम्‍बुलिङला वोतुप तेरी मिरिक ताङ गिपा ताङ ग्‍येताम ताङ लुङ्‍बाकी मीतिवाला ख्‍याप्‍टाक कितुप नरीकी नरी लुवु कोन्‍छ्‍योककी लेन ल्‍यामु नोक।
REV 14:7 तीकी थोर ग्‍यप्‍नी “कोन्‍छ्‍योकला ज्‍यिवा किसा, खोला मोवा किसा। च्‍यिलासिसिन खोकी ठिम कितुप तुजे वा वे। देवाच्‍येन ताङ जम्‍बुलिङ ताङ ग्‍येम्‍छो ताङ छ्‍यु दोलुप दासा तेरी जो नङ्‍गुप कोन्‍छ्‍योकला मोवा की।” सिनी सिक्‍यासुङ।
REV 14:8 ती ज्‍युक्‍ला येलुङ देवाच्‍येनकी लेन क्‍योलुप थु ङ्‍यिवा ति गोमी लेन क्‍योलुप थु तीकी तिङ्‍ला लेसुङ। तमा तीकी “ना गाल्‍सुङ! ग्‍येसा ग्‍येर्पु बेबिलोन ति ना गाल्‍सुङ! तीकी मिरिक मिरिककी मीतिवा तेरीला गुन्‍डुम छ्‍याङ थुङ च्‍यिसुङ। ती गुन्‍डुम छ्‍याङ ति ती ग्‍येसाकी शम्‍डेन क्‍यावु तप्‍की वुङ्‍गुप कोन्‍छ्‍योककी ङ्‍यिर्मु यिन।” सिनी सिक्‍यासुङ।
REV 14:9 येलुङ देवाच्‍येनकी लेन क्‍योलुप मी सुम्‍बा तीकी कशेन थोर ग्‍यप्‍नी तिवी तिङ तिङ्ला दुक सियी लेसुङ। “चुका मी तीकी ती सेम्‍ज्‍येन ताङ तीकी कुला तेन्‍नी टला याङ्‍ना लाक्‍पाला तीकी लज्‍युर ग्‍यप वे,
REV 14:10 तिवाला कोन्‍छ्‍योककी ङ्‍यिर्मुकी गुन्‍डुम छ्‍याङ थुङ ज्‍यिकिवी। खो छासे ङ्‍यिर्मु लावु तप्‍की खोकी छासे क्‍यानी पर्च्या तोङ्‍गिवी। तमा तिवा चाङ्‍मा वोतुप देवाच्‍येनकी लेन क्‍योलुप थुतिवा ताङ लुक रुककी दोङ्‍ला मे ताङ तुसोककी नाङ्‍ला छेटाङ खुर्किवी।
REV 14:11 तिवाला छेटाङ बिन्‍दुप मे ताङ तुसोककी तुता ति नाम्‍साङ मोतोरी। मिरा चोकी ती सेम्‍ज्‍येन ताङ तीकी कुला ताङ्‍देन क्‍यानी तीकी मिङ वोतुप लज्‍युर टली लोला ग्‍यप वे, तिवाला ङ्‍यी ताङ नुप्‍ज्‍या नाम्‍साङ ङासोप मेङ्‍येवी।”
REV 14:12 तीकी थोक्‍ला कोन्‍छ्‍योककी कला ङ्‍येन्‍दुप ताङ येशूला तेपा कितुपतिवा डेकला दे गोकिवी।
REV 14:13 ती ज्‍युक्‍ला देवाच्‍येन नेमा दुक सिरुप वोरु यी ङे थोसुङ, “दी ताम्‍ङे टिसा! तफेन्‍ला सी चोवो येशूला तेपा क्‍यानी शिवे, तिवा मोलाम थोपुप यिनो।” तमा कोन्‍छ्‍योककी थु चाङ्‍माकी दुक सुङ्‍गिवी, “ती ताम्‍ङे ति टेके यिन। तिवी लाका ल्‍यामु क्‍यावु तप्‍की तिवाला ङासोप ङ्‍येकिवी। तिवी क्‍यावु लाका ति कोन्‍छ्‍योककी टेन्‍सो क्‍या नङ्‍गिवी।”
REV 14:14 तमा ङे ल्‍हासालेन्‍सिन मुक्‍पा कर्मुकी खला मी सेवु दोके मिरा च्‍यिक देन वोतुप ति ङे थोङ्‍सुङ। तीकी गोला ग्‍येल्‍वी सेरकी उशाक कोन्‍नोक। तमा लकला ति छासे नेन्‍बु वोतुप सोर च्‍यिक खुर्नी नोक।
REV 14:15 येलुङ यम्‍बा देवाच्‍येनकी लेन क्‍योलुप थु च्‍यिक ल्‍हङाङ नाङ नेमा थेन वानी ती मुक्‍पी खला देन वोतुप तीला थोर ग्‍यप्‍नी “ख्‍योरो सोर थ्‍वोनी सप्‍ले ङो। च्‍यिलासिसिन जम्‍बुलिङकी तेरी सप्‍लेतिवा छोनी ङकुप पेला लेम वे।” सिनी सिक्‍यासुङ।
REV 14:16 तमा ती मुक्‍पी खला देतुप तीकी खोरो लकला वोतुप सोर थ्‍वोनी जम्‍बुलिङकी सप्‍लेतिवा ङासुङ।
REV 14:17 ती ज्‍युक्‍ला येलुङ देवाच्‍येनला वोतुप ल्‍हङाङ नेमा यम्‍बा देवाच्‍येनकी लेन क्‍योलुप थु यी पाङ्‍ला थेन्‍दुप ति ङे थोङ्‍सुङ। तीकी लकला साङ सोर नेन्‍बु च्‍यिक नोक।
REV 14:18 येलुङ छोटी नेमा मेला ओङ्‍ज्‍येन कितुप यम्‍बा देवाच्‍येनकी लेन क्‍योलुप थु च्‍यिक थेन्‍नी लेसुङ। तमा तीकी ती सोर नेन्‍बु खुरुप देवाच्‍येनकी लेन क्‍योलुप थु तीला थोर ग्‍यप्‍नी “ख्‍योरो सोर नेन्‍बु थ्‍वोनी जम्‍बुलिङकी गुन्‍डुम शिङ खला वोतुप गुन्‍डुमतिवा ङानी दुम। च्‍यिलासिसिन जम्‍बुलिङकी गुन्‍डुमतिवा तेरी छो सिन वे।” सिनी सिक्‍यासुङ।
REV 14:19 तमा ती सोर नेन्‍बु खुरुप देवाच्‍येनकी लेन क्‍योलुप थु तीकी खोरो सोर थ्‍वोनी जम्‍बुलिङला वोतुप गुन्‍डुमतिवा ङानी दुम्‍सुङ। तमा कोन्‍छ्‍योककी ङ्‍यिर्मुकी गुन्‍डुम छ्‍याङ जोप कोल ग्‍येर्पुकी नाङ्‍ला क्‍युर्सुङ।
REV 14:20 ती ज्‍युक्‍ला देवाच्‍येनकी लेन क्‍योलुप थु तीकी ग्‍येसाकी फिला वोतुप कोल नाङ्‍ला ती गुन्‍डुमतिवा लुक्‍नी चिर्सिमा ठक तेन्‍सुङ। ती ठक ति ज्‍यिङ्‍बा सेक तिङ्‍मु ताङ किलोमिटर सयी सुम सेक टाम्‍सुङ।
REV 15:1 येलुङ ङे देवाच्‍येनला हलेवु त ग्‍येर्पु यी थोङ्‍सुङ। ते देवाच्‍येनकी लेन क्‍योलुप थु मिरा दिनतिवी छेटाङ रे रे खुर्नोक। तिवा ति कोन्‍छ्‍योककी तिङ्‍मी छेटाङतिवा यिन। च्‍यिलासिसिन तिवा नेसुर राङ कोन्‍छ्‍योककी पर्च्याकी छेटाङ ति डुप्‍सुङ।
REV 15:2 येलुङ ते मे र्‍हेवु शेलकी ग्‍येम्‍छो दोके वोतुप ति ङे थोङ्‍सुङ। ती शेलकी ग्‍येम्‍छो गारीला सेम्‍ज्‍येन ताङ तीकी कु ताङ तीकी मिङकी अङ्‍टङ वोतुप तीला ग्‍येलुपतिवा तेरी लानी देन्‍नोक। तिवी लकला कोन्‍छ्‍योककी नङ्‍गुप डम्‍ङ्‍याङतिवा खुर्नी नोक।
REV 15:3 तमा तिवा दुक सिनी कोन्‍छ्‍योकला शब्‍ज्‍यी कितुप मोशाकी लु ताङ लुक रुकला सोवा देकुप लु लङ्‍गिनोक। “ओ ङार छ्‍येवु चोवो कोन्‍छ्‍योक, चोवोकी क्‍या नङ्‍गुप लाकातिवा चोछ्‍येवु ताङ हलेवु वे। चोवोकी क्‍या नङ्‍गुप लाकातिवा तेरी टेके ताङ टेङ्बु वे। चोवो याङ नरी ग्‍येला कितुप ग्‍येल्‍वु यिन।
REV 15:4 ओ चोवो कोन्‍छ्‍योक, चोवोला सी ज्‍यिवा मिकिवी रो? सी चोवोकी मिङला मोवा मिकिवी रो? च्‍यिलासिसिन चाङ्‍मा वोतुप ति चोवो तिराङ यिन। मिरिक तेरीकी मीतिवी चोवोला राङ सोवा बुल्‍गिवी। च्‍यिलासिसिन चोवोकी क्‍या नङ्‍गुप लाका टेङ्‍बुतिवा तेरीकी ठछ्‍येली थोङ्‍नी वे।”
REV 15:5 ती ज्‍युक्‍ला येलुङ ङे देवाच्‍येनला वोतुप कोन्‍छ्‍योककी ल्‍हङाङकी गो ति पेतुप थोङ्‍सुङ। ती ल्‍हङाङ ति इस्राएलकी मीतिवा दासा पाङ्‍थेरीला वोतुप पेला कोन्‍छ्‍योककी मोशाला नङ्‍गुप चाङ्‍मा वोतुप पङ्‍बुकी कुर यिन।
REV 15:6 तमा ती ल्‍हङाङ नेमा देवाच्‍येनकी लेन क्‍योलुप थु मिरा दिनतिवा कोन्‍छ्‍योककी नङ्‍गुप छेटाङ रे रे खुर्नी थेन्‍सुङ। तिवा छासे क्‍यानी चेङ्‍गा ताङ वो ग्‍यकुप मज्‍या कर्मु कोन्‍नी छेकोक लोला सेरकी करा च्‍यिनी नोक।
REV 15:7 ती सेन्‍बु वोतुप सेम्‍ज्‍येन ज्‍यीकी नाङ्‍ला च्‍यिककी सेरकी कोरा दिन ति देवाच्‍येनकी लेन क्‍योलुप थु दिनतिवाला तेसुङ। ती सेरकी कोरा नाङ्‍ला नरीकी नरी ङोसु ज्‍युवु कोन्‍छ्‍योककी ङ्‍यिर्मुकी क्‍येङ्‍गुप नोक।
REV 15:8 तमा ते कोन्‍छ्‍योककी मोवा ताङ खोकी ङार नेसुर थेन्‍दुप तुताकी कोन्‍छ्‍योककी ल्‍हङाङ क्‍येङ्‍सुङ। तमा ती देवाच्‍येनकी लेन क्‍योलुप थु मिरा दिनतिवा ति छेटाङ दिनतिवा मासिन्‍दा सेक्‍ला सु साङ ल्‍हङाङ नाङ्‍ला शुक माथुप।
REV 16:1 तमा येलुङ कोन्‍छ्‍योककी ल्‍हङाङ नेमा कशेन थोर ग्‍यप्‍नी “ख्‍यिराङ ग्‍युक, तमा कोन्‍छ्‍योककी ङ्‍यिर्मुकी कोरा दिनतिवा लानी जम्‍बुलिङला पु।” सिनी देवाच्‍येनकी लेन क्‍योलुप थु मिरा दिनतिवाला सिक्‍यावु ति ङे थोसुङ।
REV 16:2 तमा देवाच्‍येनकी लेन क्‍योलुप थु तङ्‍बु ति लानी खोरो कोरा ति जम्‍बुलिङला पुसुङ। तीकी जोसालेन्‍सिन सेम्‍ज्‍येनकी लज्‍युर वोतुप ताङ तीकी कुला तेन्‍दुप मीतिवा तेरीकी जुला छासे सुक मेलोवा वोतुप कुर्मुतिवा थेन्‍सुङ।
REV 16:3 ती ज्‍युक्‍ला येलुङ देवाच्‍येनकी लेन क्‍योलुप थु ङ्‍यिवा तीकी खोरो कोरा ति ग्‍येम्‍छो नाङ्‍ला पुसुङ। तमा ती ग्‍येम्‍छो ति शेप मी ठक दोके गाल्‍सुङ। तमा ग्‍येम्‍छो नाङ्‍ला सेन्‍बु वोतुप सेम्‍ज्‍येनतिवा तेरी शिसुङ।
REV 16:4 येलुङ देवाच्‍येनकी लेन क्‍योलुप थु सुम्‍बा तीकी खोरो कोरा ति चङ्‍बु ताङ छ्‍यी पुङतिवी खला पुसुङ। तमा ती चङ्‍बु ताङ छ्‍यी पुङतिवा तेरी ठकला गाल्‍सुङ।
REV 16:5 तुक राङ क्‍यानी छ्‍युला ओङ्‍ज्‍येन कितुप लेन क्‍योलुप थु तीकी दुक सिक्‍यावु ति ङे थोसुङ। “ओ थल्‍माला ज्‍यु वोतुप ताङ तन्‍दा सेक नरी लुवु चाङ्मा वोतुप चोवो कोन्‍छ्‍योक, चोवोकी दी ठिम क्‍या नङ्‍गुप ति छासे टेके यिन।
REV 16:6 च्‍यिलासिसिन ती दुक्‍टातिवी चोवोला तेपा कितुप मीतिवा ताङ चोवोकी सुङ शेतुप लुङ्‍तेम्‍बातिवाला सेनी ठक तेन्‍सुङ। ती ठक ति चोवोकी तिवाला थुङ च्‍यिसुङ। ती ति तिवाला ङ्‍ये गोवु छ्‍येर्पा यिन।”
REV 16:7 तमा छोठी नेमा दुक सिक्‍यावु ति ङे थोसुङ। “यिन, ङार छ्‍येवु चोवो कोन्छ्‍योक। कोन्‍छ्‍योककी ठिम क्‍या नङ्‍गुप ति वुतुङ के टेङ्बु ताङ टेके यिन।”
REV 16:8 ती ज्‍युक्‍ला देवाच्‍येनकी लेन क्‍योलुप थु ज्‍यिवा तीकी खोरो कोरा ति ङ्‍यिमी खला पुसुङ। तमा ङ्‍यिमाला मीतिवा छिकुप ङार ङ्‍येसुङ।
REV 16:9 तमा ङ्‍यिमा छेन्‍दीकी मीतिवा कशेन छिक्‍सुङ। तिवाला छेटाङ ख्‍येल्‍सिमा तिवी ती छेटाङ तेरुप ति कोन्‍छ्‍योक राङ यिन सिनी खोला मारे ताङ्‍सुङ। यिने सेम ग्‍युर्नी खोला मोवा ति माक्‍या।
REV 16:10 येलुङ देवाच्‍येनकी लेन क्‍योलुप थु ङवा तीकी खोरो कोरा ति गोमाला ग्‍येम्‍छो ने थेन्‍दुप सेम्‍ज्‍येनकी ग्‍येल्‍ठिक खला पुसुङ। तमा ती सेम्‍ज्‍येनकी ग्‍येल्‍खाप ति तेरी नक्‍तोमी गल्‍नी मीतिवा कशेन छेटाङला ख्‍येल्‍नी स मुर्सुङ।
REV 16:11 तिवाला कुर्मु थेन्‍नी कशेन सुक क्‍यावु तप्‍की देवाच्‍येनला ज्‍यु वोतुप कोन्‍छ्‍योकला मारे ताङ्‍सुङ। यिने तिवी खोप्‍राङ क्‍यावु लाका मेलोवा नेसुर सेम ति माग्‍युर।
REV 16:12 तमा देवाच्‍येनकी लेन क्‍योलुप थु टुक्‍पा तीकी खोरो कोरा ति युफ्रेटिस सिरुप चङ्‍बु ग्‍येर्पुकी नाङ्‍ला पुसुङ। तमा ती चङ्‍बी नाङगी छ्‍यु ति तेरी कम्‍नी शरकी थाका नेसुर वुङ्‍गुप ग्‍येल्‍वुतिवी थोक्‍ला लाम टडिक क्‍यासुङ।
REV 16:13 ती ज्‍युक्‍ला ती डुक तीकी ख नेमा ताङ ती सेम्‍ज्‍येनकी ख नेमा ताङ लुङ्‍तेम्‍बा मेटेङ्‍बु तीकी ख नेमा बल्‍वा दोके वोतुप थु मेचेङ्‍गा सुम चोके थेन्‍दुप ति ङे थोङ्‍सुङ।
REV 16:14 तिवा ति हलेवु त छ्‍या देन्‍दुप डेकी थुतिवा यिनोक। तिवा ङार छ्‍येवु कोन्‍छ्‍योक ताङ मुला मक ग्‍यकुपला जम्‍बुलिङकी ग्‍येल्‍वुतिवा तेरीकी ते गल्‍नी दासा च्‍यिकला जोम्‍गिवी। ती मक ग्‍यकुप तुजे ति कोन्‍छ्‍योककी ठिम क्‍या नङ्‍गुप तुजे ग्‍येर्पु यिन।
REV 16:15 “दी ताम्‍ङे ति ल्‍यामो ङ्‍येना। ङ कुर्मेन वावु दोके हाक्‍माकोवा क्‍यानी वुङ्‍गिनो। सु च्‍याङ्‍से क्‍यानी खोप्‍रे मज्‍या कोन्‍नी टडिक क्‍या देकिवे, ती ति मोलाम थोपुप यिनो। तुक क्‍यासिन तिवा मी मिङ्‍गाला पेर्तुङ्‍बा साङ मुलुवी, ङोछाला साङ मेख्‍येल्‍वी।”
REV 16:16 ती ज्‍युक्‍ला ती थु मेचेङ्‍गा सुमतिवी जम्‍बुलिङकी ग्‍येल्‍वुतिवा तेरी दासा च्‍यिकला जोम च्‍यिसुङ। ती दासाकी मिङ ति हिब्रू ताम्‍ङेला आर-मागेड्‍डोन सिवी।
REV 16:17 येलुङ देवाच्‍येनकी लेन क्‍योलुप थु दिन्‍बा तीकी खोरो कोरा ति नामला पुसुङ। तमा कोन्‍छ्‍योककी ल्‍हङाङकी ग्‍येल्‍ठिक नेमा थोर ग्‍यप्‍नी “त याङ तेरी छेसुङ।” सिरुप वोरु यी ग्‍यप्‍सुङ।
REV 16:18 ती ज्‍युक्‍ला चिलाम ग्‍यकुप ताङ कशेन वोरु देन्‍दुप ताङ सम्‍डुक ग्‍यकुप ताङ सयी ग्‍येर्पुतिवा ग्‍यप्‍सुङ। तुका सयी ग्‍येर्पु ति जम्‍बुलिङला मी ज्‍येङ्‍गुप पे नेज्‍यु तन्‍दा सेक नाम्‍साङ माग्‍यप।
REV 16:19 तीकी जोसालेन्‍सिन ते वोतुप चोछ्‍येर्मु ग्‍येसा बेबिलोन ति फेका सुम गाल्‍सुङ। तमा लुङ्‍बा लुङ्‍बाकी ग्‍येसातिवा साङ तेरी रम्‍नी ना गाल्‍सुङ। ती ति कोन्‍छ्‍योककी बेबिलोनकी दिक्‍पा क्‍यावु नासाम शार्नी खोकी ङ्‍यिर्मु लावु पर्च्या ति ती ग्‍येसाला ख्‍येल च्‍यितुप यिन।
REV 16:20 तमा ग्‍येम्‍छो पर्ला वोतुप ग्‍येम्‍छो परकी स कम्‍बु दासा साङ तोर्नी गाल्‍सुङ, टकतिवा साङ तानी गाल।
REV 16:21 ती ज्‍युक्‍ला नाम नेमा किलो खल ङ्‍यी चोयी वोतुप सेर बोम्‍बुतिवा मीतिवी गोला पाप्‍सुङ। तुका छेटाङ ख्‍येलुप तप्‍की मीतिवी कोन्‍छ्‍योकला मारे ताङ्‍सुङ। च्‍यिलासिसिन ती सेर ग्‍यकुप छेटाङ ति छासे ज्‍यिवा लङ्‍गुप नोक।
REV 17:1 ती कोरा दिन खुरुप देवाच्‍येनकी लेन क्‍योलुप थुतिवी पर्ला मिरा च्‍यिक ति ङे चाला वानी “दे शोक, ङ ख्‍युरुङला छासे छ्‍येमु कितुप पुम्‍पेजा तीला कशेन पर्च्या बिन्‍दुप ति छ्‍या देनिन। ती ति छ्‍यु बङीकी खला देनोक।
REV 17:2 जम्‍बुलिङकी ग्‍येल्‍वुतिवी साङ तीकी मुला शम्‍डेन क्‍या वे। तमा जम्‍बुलिङला देतुप मीतिवा साङ तीकी मुला शम्‍डेन क्‍यानी छ्‍याङकी जिवु दोके गाल वे।” सिनी सिक्‍यासुङ।
REV 17:3 तमा देवाच्‍येनकी लेन क्‍योलुप थु तीकी ङला कोन्‍छ्‍योककी थु चाङ्‍माकी ओङला दासा पाङ्‍थेरीला टिसुङ। ते गो दिन ताङ अर्क्योक च्‍यिथम्‍बा वोतुप सेम्‍ज्‍येन मर्वु यीकी खला शेन्‍दुप पुम्‍पेजा यी नोक। ती सेम्‍ज्‍येनकी जुला ति कोन्‍छ्‍योकला मारे तोङ्‍गुप मिङ बङी टिनी नोक।
REV 17:4 ती पुम्‍पेजा तीकी मुक्‍पु ताङ छासे मर्वु वोतुप मज्‍या कोन्‍नी सेर ताङ गोङ नावु यु ताङ मोतीतिवा तानी नोक। तीकी लकला सेरकी कोरा च्‍यिक खुर्नी नोक। ती कोरी नाङ्‍ला क्‍युक्‍टो लङ्‍गुप च्‍यालक ताङ शम्‍डेन क्‍यावु मेचेङ्‍गातिवी क्‍येङ्‍नी नोक।
REV 17:5 तीकी टली लोला छ्‍याकला वोतुप हाक्‍मोकोवु मिङ च्‍यिक टिनी नोक। ती मिङ ति “छ्‍येमुतिवा ताङ जम्‍बुलिङकी क्‍युक्‍टो लङ्‍गुपतिवी आमा बेबिलोन ग्‍येसा ग्‍येर्पु” सिक्‍यावु यिन।
REV 17:6 ती पुम्‍पेजा ति येशूला तेपा कितुप मीतिवा ताङ खोकी थोक्‍ला पङ्‍बु तेरुप मीतिवाला सेतुप ठक थुनी जिन वोतुप ति ङे थोङ्‍सुङ। तीला थोङ्‍सिमा ङला छासे हलेवा लासुङ।
REV 17:7 तमा ती देवाच्‍येनकी लेन क्‍योलुप थु तीकी ङला सिक्‍यासुङ, “ख्‍युरुङ च्‍यिला हलेवा किवी? ती पुम्‍पेजाकी तेन्‍दोक ताङ तीकी शेन्‍दुप गो दिन ताङ अर्क्योक च्‍यिथम्‍बा वोतुप सेम्‍ज्‍येनकी तेन्‍दोक ति ङ ख्‍युरुङला शेतिन।
REV 17:8 ती ख्‍योरो थोङ्‍गुप सेम्‍ज्‍येन ति गोमाला सेन्‍बु वोतुप यिन, यिने तन्‍दा ति सेन्‍बु मे। ती याङ शाप मेतुप मुक्‍तुम तिङ्‍मु ने थेन्‍दुप छल वे। थेन्‍सिमा ती ति ना डिवी। जम्‍बुलिङ ज्‍येङ्‍गुप सिनाङ गोमाला नेज्‍यु मिजीकी थेप नाङ्‍ला मिङ माटि वोतुप जम्‍बुलिङकी मीतिवा ती सेम्‍ज्‍येनला थोङ्‍सिमा हलेवा किवी। च्‍यिलासिसिन ती सेम्‍ज्‍येन ति गोमाला सेन्‍बु वोतुप यिन, तन्‍दा ति सेन्‍बु मे, यिने ती ति ज्‍युक्‍ला थेन वुङ्‍गुप छल वे।
REV 17:9 तीकी थोक्‍ला रिक्‍पा वोतुप सेम गोकिवी। ती गो दिन वोतुप सेम्‍ज्‍येनकी तेन्‍दोक ति पुम्‍पेजा छ्‍येमु देतुप पम्‍दोक दिनतिवा यिन। ती ति ग्‍येल्‍वु दिनतिवा साङ यिन।
REV 17:10 ती ग्‍येल्‍वु दिनतिवी नाङ्‍ला मिरा ङ चोके ति शिसुङ, मिरा च्‍यिककी तरोङ साङ ग्‍येला कियी वे। तमा यम्‍बा च्‍यिक ति वुङ गोवु वे। ती ति वासिमा तीकी चेयी पर सेक तिराङ ग्‍येला किवी।
REV 17:11 ती सेम्‍ज्‍येनतिवा तोङ्‍ला थेङ्‍मा यी सेन्‍बु वोतुप यिन, यिने त याङ मे। ती ति ग्‍येल्‍वु ग्‍येवा यिन। ती ति गोमी ग्‍येल्‍वु दिनकी नाङ्‍ला च्‍यिक यिन। ती ति थेन वासिमा ना डिवी।
REV 17:12 ख्‍योरो थोङ्‍गुप ती अर्क्योक च्‍यिथम्‍बा ति ग्‍येल्‍वु च्‍यिथम्‍बातिवा यिन। तिवाला तन्‍दा सेक साङ ग्‍येल्‍वु कितुप ओङ माङ्‍ये वे, यिने तिवी ती सेम्‍ज्‍येनकी मुला चेयी पर सेक ग्‍येला कितुप ओङ्‍ज्‍येन ङ्‍येकिवी।
REV 17:13 ती ग्‍येल्‍वु च्‍यिथम्‍बातिवा तेरी सेम च्‍यिक राङ च्‍युङ्‍नी खोप्‍रे ग्‍येल्‍वु कितुप ओङ्‍ज्‍येन ति ती सेम्‍ज्‍येन तीला चेक तेकिवी।
REV 17:14 तिवा लुक रुक ताङ मुला थमु ग्‍यकिवी, यिने लुक रुककी तिवी मुला थमु ग्‍यप्‍नी तिवी खला ग्‍येल्‍गिवी। च्‍यिलासिसिन खो ति चोवो खकी चोवो, ग्‍येल्‍वी खकी ग्‍येल्‍वु यिन। तमा खोकी कताङ नङ्‍गुप ताङ खोकी पेतुप खोङ्‍तेर्मु वोतुप मीतिवा खोकी मुला राङ वे।” सिनी सिक्‍यासुङ।
REV 17:15 ती देवाच्‍येनकी लेन क्‍योलुप थु तीकी येलुङ ङला दुक सिक्‍यासुङ, “ख्‍योरो थोङ्‍गुप ती पुम्‍पेजा छ्‍येमु देन वोतुप छ्‍यु ति लुङ्‍बातिवा ताङ मिरिकतिवा ताङ गिपातिवा ताङ ग्‍येताम कुतुक कुतुकतिवा यिन।
REV 17:16 तमा ख्‍योरो थोङ्‍गुप ती अर्क्योक च्‍यिथम्‍बा ताङ सेम्‍ज्‍येन तीकी ती छ्‍येमु तीला ङ्‍यिङ्‍मर क्‍यानी तीकी मुला वोतुप तेरी ठोनी पेर्तुङ्‍बा जोसिमा तीकी श ति सेवी। तमा तीला मे नाङ्‍ला च्‍यिनी र्‍हेकिवी।
REV 17:17 च्‍यिलासिसिन कोन्‍छ्‍योककी खोरे सुङ तेरी माछेवा सेक्‍ला ती सेम्‍ज्‍येनतिवा सेम च्‍यिक राङ च्‍युङ्‍नी ग्‍येला कितुप ओङ ति तेरी ती सेम्‍ज्‍येनला नाङ वे।
REV 17:18 तमा ख्‍योरो थोङ्‍गुप ती पुम्‍पेजा ति जम्‍बुलिङकी ग्‍येल्‍वुतिवा तेरीकी खला ओङ्‍ज्‍येन कितुप ग्‍येसा ग्‍येर्पु यिन।”
REV 18:1 ती ज्‍युक्‍ला येलुङ देवाच्‍येन नेमा कोन्‍छ्‍योककी लेन क्‍योलुप थु यम्‍बा च्‍यिक वुङ्‍यिन वोतुप ति ङे थोङ्‍सुङ। ती ति छासे ओङ्‍ज्‍येन ग्‍येर्पु वोतुप नोक। ती नेसुर वुङ्‍गुप वोसिरकी जम्‍बुलिङ तेरी ठछ्‍येली गाल्‍सुङ।
REV 18:2 तमा तीकी कशेन थोर ग्‍यप्‍नी दुक सिनी वोरु तेन्‍सुङ, “ती ग्‍येसा ग्‍येर्पु बेबिलोन ति ना गाल्‍सुङ! ती ग्‍येसा ग्‍येर्पु बेबिलोन ति ना गाल्‍सुङ! त याङ ती ग्‍येसाला र्‍हेन्‍डी ताङ थु मेचेङ्‍गा ताङ चाङ्मा मेतुप च्‍यच्‍युमतिवा ताङ चाङ्मा मेतुप ताङ क्‍युक्‍टो लङ्‍गुप सेम्‍ज्‍येन देतुप दासा च्‍युङ वे।
REV 18:3 च्‍यिलासिसिन ती बेबिलोन ग्‍येसाकी मीतिवी शम्‍डेन क्‍यावु तप्‍की कोन्‍छ्‍योक नेमा ख्‍येलुप ङ्‍यिर्मुकी गुन्‍डुम छ्‍याङ ति तेरी मिरिककी मीतिवी थुसुङ। जम्‍बुलिङकी ग्‍येल्‍वुतिवी साङ ती ग्‍येसाकी मीतिवी मुला शम्‍डेन कितुप लाका मेलोक्‍पा क्‍या वे। ती ग्‍येसाकी मीतिवाला गोवु च्‍यालक ख्‍येमुतिवा छोङ क्‍यानी जम्‍बुलिङकी छोङ्मेनतिवा साङ छ्‍युक्‍पु गल वे।”
REV 18:4 तमा येलुङ देवाच्‍येन नेमा दुक सिरुप यम्‍बा वोरु यी साङ तेन्‍दुप ती ङे थोसुङ। “ओ ङे मीतिवा, ख्‍यिराङ तेरी ती बेबिलोन नेमा थेन्‍नी शोक। ख्‍यिराङ तिवी क्‍यावु दिक्‍पी दला माशुक। मिसियाङ तीला ख्‍येलुप छेटाङतिवा ख्‍यिराङला साङ ख्‍येल्‍गितो।
REV 18:5 च्‍यिलासिसिन ती ग्‍येसाला वोतुप मीतिवी क्‍यावु दिक्‍पातिवा मङ मङ देवाच्‍येन सेक लेम वे। तमा तिवी लाका दुक्‍टातिवा कोन्‍छ्‍योककी नाम्‍साङ माज्‍ये वे।
REV 18:6 तुक क्‍यानी तिवी मी यम्‍बाला काङ क्‍यावे, तीला तुकै राङ पर्च्या फोकिवी। तिवी मी यम्‍बाला काङ मेलोवा क्‍यावे, तिवाला ती सिनाङ ङ्‍यिग्‍युर यी मङ पर्च्या फोकिवी। तमा तिवी मी यम्‍बाला थुङ ज्‍यितुपला कोरी नाङ्‍ला क्‍येङ्‍गुप छ्‍याङ सिनाङ ङ्‍यिग्‍युर यी मङ कर्मा वोतुप छ्‍याङ ति तिवाला क्‍येङ्‍नी बिन।
REV 18:7 तिवी चो खुरुङ ति ‘ङ तेरी सिनाङ छ्‍ये यिन, ङला चोयी टोङ्‍बा ति सुला साङ मे’ सिनी किर्मु क्‍यावे, तोजोयी राङ तिवाला छेटाङ ताङ ङुप्‍राङला ख्‍येल च्‍यी। च्‍यिलासिसिन बेबिलोनकी सेमला ‘ङ ग्‍येल्‍ठिकला देनी ग्‍येला कितुप ग्‍येल्‍मु यिन। ङ याङ युक्‍सिमा मिन। ङे नाम्‍साङ दुङल कि मोगोवी’ सिनी सिवी।
REV 18:8 तुक क्‍यानी ङ्‍यिमा च्‍यिकला राङ ती ग्‍येसाला नेजु ग्‍यकुप ताङ शेप ताङ ङुप्‍राङ कितुप ताङ ल्‍होवारेला डोप दुक्‍पा ङ्‍येकिवी। तमा ती ति मेला छिक्‍नी ना डिवी। च्‍यिलासिसिन तिवाला ठिम कितुप ति ओङ छ्‍येवु चोवो कोन्‍छ्‍योक यिन।”
REV 18:9 ती ग्‍येसा छिकुप तुता थोङ्‍नी तीकी मुला शम्‍डेन कितुप ताङ तिवी मुला गा ताङ किर्मु कितुप जम्‍बुलिङकी ग्‍येल्‍वुतिवा सेम्‍दुक लानी ङुप्‍राङ किवी।
REV 18:10 ती ग्‍येसाला छेटाङ बिन्‍दुप थोङ्‍सिमा तिवा ज्‍यिवा लानी थाक्‍रिङ्‍बुला देनी “ओए! ओए! च्‍यिला ङार छ्‍येवु ग्‍येसा ग्‍येर्पु बेबिलोनला उकुर च्‍यिकला पर्च्या ख्‍येलुप यिनाङ।” सिनी ङ्‍येन्‍बी सोक तोङ्‍गिवी।
REV 18:11 तमा जम्‍बुलिङकी छोङ्‍मेनतिवा साङ ती ग्‍येसाकी थोक्‍ला सेम्‍दुक क्‍यानी ङुप्‍राङ किवी। च्‍यिलासिसिन तिवी छोङकी च्‍यालकतिवा सी साङ मोङ्‍योवी।
REV 18:12 तिवी छोङकी च्‍यालकतिवा ति सेर ताङ ङुल ताङ गोङ नावु यु ताङ च्‍युरुक, तमा गोङ नावु नेङेनकी रातिवा ताङ रा मुक्‍पुतिवा ताङ बुरा ताङ रा मर्वुतिवा, तमा तेरी नम्‍बा कुतुक कुतुककी टी जङ्‍बु वोतुप शिङतिवा ताङ लङ्‍बी छ्‍येलकतिवा ताङ गोङ नावु शिङ ताङ काँसा ताङ च्‍या ताङ येम्‍ज्‍ये,
REV 18:13 तमा दालचिनी ताङ मसला ताङ पोराङ ताङ टी जङ्‍बु खाप पो ताङ टेमा जङ्‍बु खाप मेन, रा गुन्‍डुम छ्‍याङ ताङ नुम ताङ फे ताङ ट, तमा छ्‍युङ्‍मातिवा ताङ लुकतिवा ताङ ततिवा ताङ तखुरतिवा, तमा योक्‍पुतिवा ताङ मक ग्‍यप्‍नी जिम टि वावु मीतिवा यिन।
REV 18:14 तमा ती छोङ्‍मेनतिवा दुक सिवी, “ओ बेबिलोन ग्‍येसा, ख्‍योरो सेमला गलुप तेरी शिङ्‍तोकतिवा तोर्सुङ। ख्‍योरो टोङ्‍बा ताङ ख्‍योरो मोवातिवा तेरी तोर्सुङ। त याङ ख्‍युरुङला ती च्‍यालकतिवा नाम्‍साङ मेङ्‍येवी।”
REV 18:15 ती ग्‍येसाला छोङ क्‍यानी छ्‍युक्‍पु गलुप मीतिवा ती ग्‍येसाला छेटाङ ख्‍येलुप थोङ्‍सिमा ज्‍यिवा लानी थाक्‍रिङ्‍बु गल्‍नी ङुप्‍राङ कियी दुक सिनी ङ्‍येन्‍बी सोक तोङ्‍गिवी,
REV 18:16 “ओए ओए ग्‍येसा ग्‍येर्पु बेबिलोन, ख्‍युरुङ गोङ नावु नेङेनकी रा ताङ रा मुक्‍पु ताङ रा मर्वुकी मज्‍यातिवा कोन्‍नी सेर ताङ गोङ नावु यु ताङ च्‍युरुक तासुङ।
REV 18:17 यिने उकुर च्‍यिकला राङ ख्‍योरो टोङ्‍बातिवा तेरी ना गाल्‍सुङ।” तेरी टु तोङ्‍गुप मी छ्‍येतिवा ताङ टुला जेकुप मीतिवा ताङ टु तोङ्‍गुप मीतिवा ताङ ग्‍येम्‍छोला लाका क्‍यानी मिजी क्‍योङ्‍गुप छोङ्‍मेनतिवा थाक्‍रिङ्‍बुला लानी
REV 18:18 ती ग्‍येसा ग्‍येर्पु छिक्‍नी तुता थेन्‍दुप थोङ्‍सिमा “ती ग्‍येसा ग्‍येर्पु दोके याङ यम्‍बा चुका ति वोतुप्‍जा।” सिनी वोरु देन्‍गिवी।
REV 18:19 तिवा सेम्‍दुक कियी सिरा दाक दाक्‍पी गोला थला लुक्‍नी ङुप्‍राङ कियी सिरा, “ओ ग्‍येसा ग्‍येर्पु, दी ग्‍येसाकी नोर टोङ्‍बा नेसुर ग्‍येम्‍छोला टु तोङ्‍गुप मीतिवा तेरी छ्‍युक्‍पु गाल वे। यिने ती ति उकुर च्‍यिकला ना गाल्‍सुङ।
REV 18:20 ओ देवाच्‍येनला वोतुपतिवा ताङ तेपा कितुपतिवा ताङ लोमा छ्‍येतिवा ताङ लुङ्‍तेम्‍बातिवा, ख्‍यिराङ गा की! च्‍यिलासिसिन तीकी ख्‍यिराङला चुक क्‍यावे, कोन्‍छ्‍योककी तीला साङ तुकै राङ क्‍यानी ठिम क्‍या नाङ्‍सुङ।” सिनी वोरु तेन्‍सुङ।
REV 18:21 ती ज्‍युक्‍ला ङार छ्‍येवु देवाच्‍येनकी लेन क्‍योलुप थु मिरा च्‍यिककी लाकुर ग्‍येर्पु दोके दो च्‍यिक तेक्‍नी ग्‍येम्‍छो नाङ्‍ला क्‍युरिन सिरा, “दुक राङ क्‍यानी ग्‍येसा ग्‍येर्पु बेबिलोन साङ ङार क्‍यानी क्‍युर्कितो। तमा ती ति येलुङ नाम्‍साङ मोथोङ्‍दो।
REV 18:22 तमा डम्‍ङ्‍याङ टिलुपतिवा ताङ लु लङ्‍गुपतिवा ताङ लुमु पुतुपतिवा ताङ ग्‍येलिङ पुतुपतिवी वोरु ति ख्‍योरो नाम्‍साङ मोथोतो। छोङ कितुप च्‍यालकतिवा जोपला खामु वोतुप मीतिवा साङ ख्‍योरो ते नाम्‍साङ मोथोङ्‍दो। लाकुरकी वोरु साङ ख्‍योरो नाम्‍साङ मोथोतो।
REV 18:23 ती ग्‍येसाला नाम्‍साङ दिप्‍लीकी वोसिर मेङ्‍गितो। नमा मक्‍पा ताङ नमाकी वोरु साङ नाम्‍साङ मोथोतो। तीकी तेन्‍दोक ति ती ग्‍येसाकी छोङ्‍मेनतिवा जम्‍बुलिङकी मी छ्‍येतिवा दोके कितुप ताङ ती ग्‍येसाकी मिरिक कुतुक कुतुककी मीतिवा तेरीला मो ग्‍यप्‍नी जिनोक जोवु तप्‍की यिन।
REV 18:24 तमा कोन्‍छ्‍योककी लुङ्‍तेम्‍बातिवाला सेनी ठक तेन्‍दुप ताङ तेपा कितुपतिवाला साङ सेनी ठक तेन्‍दुप ताङ जम्‍बुलिङकी मी तेरीला सेनी ठक तेन्‍दुप ति ती ग्‍येसा नेमा राङ थोङ्‍गुप तप्‍की यिन।” सिनी सिक्‍यासुङ।
REV 19:1 ती ज्‍युक्‍ला येलुङ देवाच्‍येनला मी माङ्‍छ्‍योककी कशेन वोरु तेन्‍दुप दोके दुक सिक्‍यावु ति ङे थोसुङ। “हल्‍लेलूयाह! कोन्‍छ्‍योक दाक्‍पुला थर्वा नङ्‍गुप कोन्‍छ्‍योक यिन। खोला तिराङ मोवा ताङ ओङ्‍ज्‍येन वे।
REV 19:2 खोकी मी सुला साङ ख्‍ये मापेनी ठिम टेङ्‍बु क्‍या नङ्‍गिवी। तमा तेरी जम्‍बुलिङकी मीतिवाला खोरो मुला शम्‍डेन कि च्‍यिनी ना तोङ्‍गुप छासे छ्‍येमु तीला खोकी पर्च्या नाङ वे। तीकी खोला शब्‍ज्‍यी कितुपतिवाला सेनी ठक तेन्‍दुप थोक्‍ला खोकी तीला ङ्‍येन लासुङ।”
REV 19:3 येलुङ तिवी थोर ग्‍यप्‍नी, “हल्‍लेलूयाह! ती ग्‍येसा ग्‍येर्पु ना गलुप तुता ति नरीकी नरी येर केला डिवी।” सिनी सिक्‍यासुङ।
REV 19:4 तमा गोमा कितुप मी छ्‍ये मिरा खल ज्‍यिक ताङ ज्‍यीतिवा ताङ सेन्‍बु वोतुप सेम्‍ज्‍येन ज्‍यीतिवा खवुतुङ्‍मा देनी ग्‍येल्‍ठिकला ज्‍यु वोतुप कोन्‍छ्‍योकला “आमिन, हल्‍लेलूयाह!” सिनी सिक्‍यासुङ।
REV 19:5 ती पेला ग्‍येल्‍ठिक नेमा “ओ तेरी कोन्‍छ्‍योकला शब्‍ज्‍यी कितुप मीतिवा ताङ खोला ज्‍यिवा कितुपतिवा, ख्‍यिराङ छ्‍ये छ्‍युङा तेरीकी दाक्‍पी कोन्‍छ्‍योकला सोवा तेक।” सिरुप वोरु यी थोसुङ।
REV 19:6 ती ज्‍युक्‍ला मी माङ्‍छ्‍योक च्‍यार ग्‍यप्‍नी वोरु तेन्‍दुप दोके ताङ छ्‍यु बङी ज्‍युङ्‍गुप वोरु ग्‍येर्पु दोके ताङ छासे सम्‍डुक ग्‍यपुप दोके वोरु ङे थोसुङ। ती वोरु तीकी “हल्‍लेलूयाह! च्‍यिलासिसिन चोछ्‍ये वोतुप दाक्‍पी चोवो कोन्‍छ्‍योककी दी जम्‍बुलिङला ग्‍येला क्‍या नङ्‍गिवी।
REV 19:7 दाक्‍पु गा ताङ छासे सेम किर्मु क्‍यानी खोला मोवा कितुप। च्‍यिलासिसिन लुक रुककी जेन्‍दीकी तुजे वा वे। खोकी नमा ति टडिक क्‍या वे।
REV 19:8 खोकी नमाकी वो ग्‍यकुप ताङ चेङ्‍गा वोतुप गोङ नावु नेङेनकी मज्‍या कोन्‍नी वे। ती मज्‍याकी तेन्‍दोक ति खोला तेपा कितुपतिवी क्‍यावु लाका ल्‍यामु यिन।” सिनी सिक्‍यासुङ।
REV 19:9 तमा ती देवाच्‍येनकी लेन क्‍योलुप थु तीकी ङला दुक सिक्‍यासुङ, “लुक रुककी जेन्‍दीकी डेनला कतङ्‍गुप मीतिवाला मोलाम थोपुप यिनो सिनी टिसा।” येलुङ तीकी सिक्‍यासुङ, “दी सुङ ति कोन्‍छ्‍योककी सुङ टेङ्‍बु यिनो।”
REV 19:10 ती पेला ती देवाच्‍येनकी लेन क्‍योलुप थु तीला शावा कितुपला ङ तीकी काङ्‍बी चिप्‍ला खवुतुङ्‍मा देतिन। यिने तीकी ङला “ख्‍योरो शावा माकी। ङ याङ येशूकी थोक्‍ला पङ्‍बु तेरुप ख्‍युरुङ ताङ ख्‍योरो अच्‍युनुपतिवा दोके कोन्‍छ्‍योककी लावा तिराङ यिन। ख्‍योरो कोन्‍छ्‍योकला तिराङ शावा की। च्‍यिलासिसिन येशूकी थोक्‍ला पङ्‍बु तेरुप मी तेरीकी कोन्‍छ्‍योककी थु चाङ्‍मा नेमा वुङ्‍गुप ओङला पङ्‍बु तेर्किवी।”
REV 19:11 येलुङ देवाच्‍येन सेवु ताङ देवाच्‍येनला त कर्मु यी वोतुप ति ङे थोङ्‍सुङ। ती ते खला शेन्‍दुप तीकी मिङ ति खोङ्‍तेर्मु ताङ टेङ्‍बु सिनी सिवी। खोकी मी सुला साङ ख्‍ये मापेनी ठिम क्‍या नङ्‍गिनोक। तमा डतिवी मुला मक ग्‍यकुप पेला साङ ठिम टेङ्‍बु क्‍या नङ्‍गिनोक।
REV 19:12 खोकी मिक ति मे मेलाप दोके ताङ खोकी गोला उशाक बङी कोन्‍नी नोक। खोकी टली लोला मिङ च्‍यिक टिनी नोक। यिने ती मिङ ती खोला तिराङ छ्‍या नोक।
REV 19:13 खोकी ठकला ङ्‍योवु मज्‍या कोन्‍नोक। तमा खोकी मिङ ती “कोन्‍छ्‍योककी सुङ” यिनोक।
REV 19:14 तमा चेङ्‍गा वोतुप ताङ छासे कर्मु वोतुप मज्‍या कोन्‍दुप देवाच्‍येनकी मक्‍मीतिवा त कर्मु शेन्‍नी खोकी तिङ्‍ला तिङ्‍यासुङ।
REV 19:15 तमा मिरिक कुतुक कुतुककी मीतिवाला बेपुपला खोकी ख नेमा खुर्पा नेन्‍बु च्‍यिक थेन्‍नी नोक। खोकी च्‍याङ्‍युङ थ्‍वोनी लुङ्‍बा कुतुककी मीतिवाला ठिम तोङ्‍गिवी। तमा तोरीकी नुम चिरुप कोलला तोरी लुक्‍नी नुम चिरुप दोके चोछ्‍येवु कोन्‍छ्‍योककी पर्च्या कशेन क्‍यानी तिवाला तेर्किवी।
REV 19:16 खोकी मज्‍या ताङ खोकी फिली लोला “ग्‍येल्‍वी खकी ग्‍येल्‍वु” ताङ “चोवो खकी चोवो” सिरुप मिङ टि वे।
REV 19:17 ती ज्‍युक्‍ला येलुङ देवाच्‍येनकी लेन क्‍योलुप थु मिरा च्‍यिक ङ्‍यिमी खला लानी देतुप ति ङे थोङ्‍सुङ। तीकी नामला फुरुप च्‍यातिवा तेरीला थोर ग्‍यप्‍नी “शोक, कोन्‍छ्‍योककी डेन ग्‍येर्पु सापला जोम!
REV 19:18 तमा ग्‍येल्‍वुतिवा ताङ मक्‍मी छ्‍येतिवा ताङ ङार वोतुप मीतिवा ताङ त ताङ ते खला शेन्‍दुप मीतिवा ताङ योक्‍पु ताङ रङ्‍ज्‍येन वोतुपतिवा ताङ छ्‍ये छ्‍युङातिवा तेरीकी श ति सो।” सिनी सिक्‍यासुङ।
REV 19:19 तमा ती त कर्मी खला शेन्‍दुप ती ताङ खोकी मक्‍मीतिवी मुला मक ग्‍यकुपला ती सेम्‍ज्‍येन ताङ जम्‍बुलिङकी ग्‍येल्‍वुतिवा ताङ तीकी मक्‍मीतिवा तेरी जोम्‍बुप ति ङे थोङ्‍सुङ।
REV 19:20 ते ती सेम्‍ज्‍येन ताङ तीकी दोङ्‍ला हलेवु ततिवा छ्‍या देन्‍दुप लुङ्‍तेम्‍बा मेटेङ्‍बु ङ्‍यिकरला जिम्‍सुङ। ती लुङ्‍तेम्‍बा तीकी हलेवु ततिवा छ्‍या तेन्‍नी मीतिवाला ती सेम्‍ज्‍येनकी लज्‍युर ग्‍यक ज्‍यितुप ताङ कुला तेन ज्‍यितुपला लुनोक। तुक क्‍यानी तिवा ङ्‍यिकरला सेन्‍बु राङ मे कशेन बरुप तुसोककी चो दोके वोतुप ते क्‍युर्सुङ।
REV 19:21 तमा यम्‍बा लुवुतिवाला साङ ती त कर्मी खला शेन्‍दुप तीकी ख नेमा थेन्‍दुप खुर्पा थ्‍वोनी सेसुङ। तमा तिवी श ति नामला फुरुप च्‍यातिवी डाता सेक सोसुङ।
REV 20:1 ती ज्‍युक्‍ला शाप मेतुप मुक्‍तुम तिङ्‍मुकी लिमी ताङ च्‍यातक ग्‍येर्पु च्‍यिक लकला खुरुप देवाच्‍येनकी लेन क्‍योलुप थु मिरा च्‍यिक देवाच्‍येन नेमा पाम वावु ति ङे थोङ्‍सुङ।
REV 20:2 तीकी ति तोङगी रुल यिन्‍दुप डुक तीला जिम्‍नी लो तोङ्‍डा च्‍यिककी थोक्‍ला टासुङ। ती डुक तीला डे याङ्‍ना शैतान साङ सिवी।
REV 20:3 तीला टानी शाप मेतुप मुक्‍तुम तिङ्‍मुला क्‍युर्सुङ। तमा लो तोङ्‍डा च्‍यिक माछेवा सेक मिरिक मिरिककी मीतिवाला तीकी लुतुप मेङ्‍येशी सिनी ती मुक्‍तुम तिङ्‍मुकी गो ति च्‍येनी तीला लज्‍युर ग्‍यप्‍नी ज्‍याक्‍सुङ। ती ज्‍युक्‍ला लो तोङ्‍डा च्‍यिक छेसिमा तिराङ तीला चेयी पर सेक पि तोङ गोकिनोक।
REV 20:4 येलुङ गेल्‍ठिकतिवा ताङ तिवी खला देतुपतिवाला ङे थोङ्‍सुङ। तिवाला ठिम कितुप ओङ बिन नोक। ते येशूकी कोर्ला पङ्‍बु बिन्‍दुप थोक्‍ला ताङ कोन्‍छ्‍योककी सुङगी थोक्‍ला सेतुपतिवी नम्‍शिङ साङ ङे थोङ्‍सुङ। तिवा ति सेम्‍ज्‍येन ताङ तीकी कुतिवाला सोवा मेदेकुप ताङ ती सेम्‍ज्‍येनकी लज्‍युर टला याङ्‍ना लाक्‍पी लोला मग्‍यपुपतिवा यिन। तिवा येलुङ सेन्‍बु लानी ख्रीष्‍ट ताङ मुला राङ लो तोङ्‍डा च्‍यिक ग्‍येला क्‍यासुङ।
REV 20:5 शेप ने सेन्‍बु लावु तङ्‍बु ति दी राङ यिन। थल्‍माला सेन्‍बु लावु मीतिवा मोलाम थोपुप ताङ चाङ्‍मा वोतुप यिन। तिवाला थेङ्‍मा ङ्‍यिवाला शेपकी साङ काङ कि मुथुपी। तिवा कोन्‍छ्‍योक ताङ ख्रीष्‍टकी कोङ्‍यार च्‍युङ्‍नी ख्रीष्‍ट ताङ मुला राङ लो तोङ्‍डा च्‍यिक सेक ग्‍येला किवी। तमा यम्‍बा शेपतिवा ति लो तोङ्‍डा च्‍यिक माछेवा सेक सेन्‍बु मालु।
REV 20:7 लो तोङ्‍डा च्‍यिक छेसिमा शैतानला टानी ज्‍यकुप नेसुर पि तोङ्‍गिवी।
REV 20:8 तमा ती ति जम्‍बुलिङकी छो ज्‍यीला वोतुप लुङ्‍बा लुङ्‍बाकी मीतिवाला जिनोक जोपला डिवी। ती लुङ्‍बातिवा ति गोग ताङ मागोग यिन। तिवाला लुनी थमु ग्‍यकुपला तिवा जोम्‍गिवी। तिवा ति ग्‍येम्‍छो गारीकी पेमा सिनाङ मङ्‍मु गिवी।
REV 20:9 तिवा तेरी जम्‍बुलिङला गल्‍नी कोन्‍छ्‍योकला तेपा कितुप मीतिवा देतुप दासाकी गारी गुरीला ताङ खोकी ङ्‍यिङ्‍ज्‍ये क्‍या नङ्‍गुप ग्‍येसाला चुप्‍सुङ। यिने देवाच्‍येन नेमा मे क्‍युर्नी तिवा तेरी ना गाल्‍सुङ।
REV 20:10 तमा तिवाला लुतुप डे ति मे ताङ तुसोक कशेन वोतुप चो दोके वोतुप ते क्‍युर्सुङ। ते ती सेम्‍ज्‍येन ताङ लुङ्‍तेम्‍बा मेटेङ्‍बुतिवा गोमाला के क्‍युर्नी नोक। ते तिवी ङ्‍यी ताङ नुप्‍ज्‍या नरीकी नरी छेटाङ खुर्किवी।
REV 20:11 येलुङ ग्‍येल्‍ठिक कर्मु ग्‍येर्पु यी ताङ तीकी खला ज्‍युवु तीला ङे थोङ्‍सुङ। तमा खोकी दोङ नेमा स ताङ नाम ति तोर्नी गल्‍नी चेयी साङ लुनी वोतुप ति माथोङ।
REV 20:12 तमा शेप छ्‍ये ताङ छ्‍युङातिवा तेरी ग्‍येल्‍ठिककी चिप्‍ला लानी देतुप ताङ थेपतिवा लोकुप ति ङे थोङ्‍सुङ। ते यम्‍बा थेप यी साङ लोक्‍सुङ। ती ति मिजीकी थेप नोक। ती थेपतिवी नाङ्‍ला टिवु दोके तिवी चुका लाका क्‍यावे, तुकै राङ क्‍यानी तिवाला ठिम क्‍यासुङ।
REV 20:13 तमा ग्‍येम्‍छोकी ती नाङ्‍ला वोतुप शेपतिवा बिन्‍सुङ, शेप ताङ ङ्‍येलाकी साङ तिवी मुला वोतुप शेपतिवा बिन्‍सुङ। तमा तिवा तेरीला दाक दाक्‍पी लाका ल्‍यामु मेलोवा काङ क्‍यावे, तुकै राङ ठिम क्‍यासुङ।
REV 20:14 तमा शेप ताङ ङ्‍येला ति मेकी चे नाङ्‍ला क्‍युर्सुङ। दी मेकी चो ति शेप ङ्‍यिवा यिन।
REV 20:15 मिजीकी थेप नाङ्‍ला मिङ माटिवुतिवा सुला साङ माज्‍याक्‍नी ती मेकी चो वोतुप दासाला क्‍युर्सुङ।
REV 21:1 तमा ङे देवाच्‍येन सम्‍बा ताङ जम्‍बुलिङ सम्‍बा थोङ्‍सुङ। ते थल्‍माकी देवाच्‍येन ताङ जम्‍बुलिङ ति तेरी तोर्नी गाल्‍नोक, ग्‍येम्‍छो साङ मोथोङ्‍नोक।
REV 21:2 तमा चाङ्‍मा वोतुप यरूशलेम ग्‍येसा सम्‍बा ति देवाच्‍येन नेमा जम्‍बुलिङला पाप्‍नी तङ्‍गुप ति ङे थोङ्‍सुङ। ती ग्‍येसा ति मक्‍पा ठेतुपला नमा छ्‍यावु दोके टडिक क्‍यावु नोक।
REV 21:3 ती ज्‍युक्‍ला ग्‍येल्‍ठिक नेमा दुक सिनी वोरु थोर ग्‍यपुप ति ङे थोसुङ, “ल्‍होसा, तफेन्‍ला कोन्‍छ्‍योककी देसा ति मीतिवी मुला गिवी। तमा खो मीतिवी मुला ज्‍युकिवी। मीतिवा खोकी गिपा च्‍युङ्‍गिवी। खो खुरुङ मीतिवी मुला ज्‍युकिवी, तमा खो ति तिवी कोन्‍छ्‍योक च्‍युङ्‍गिवी।
REV 21:4 खोकी मीतिवी मिक नेसुर मिक्‍च्‍युर तेरी पिनी तेर्किवी। तमा तिवा येलुङ नाम्‍साङ मिशिवी। सेम क्‍योके कितुप ताङ ङोप ताङ दुङल साङ मेवी। च्‍यिलासिसिन ती जम्‍बुलिङकी ताम्‍ङे ङि्‍यङ्‍बातिवा तेरी तोर्नी गाल।”
REV 21:5 तमा ग्‍येल्‍ठिकला ज्‍यु वोतुप तीकी ङला सुङ्‍सुङ। “ल्‍होसा, त याङ ङ देवाच्‍येन ताङ जम्‍बुलिङला वोतुपतिवा तेरी सम्‍बा जोयिनो।” येलुङ खोकी ङला सुङ्‍सुङ, “दी ताम्‍ङेतिवा टिसा। दिवा छासे खोङ्‍तेर्मु ताङ टेङ्‍बु वे।”
REV 21:6 येलुङ खोकी ङला सुङ्‍सुङ, “त याङ तेरी छेसुङ। ङ अल्‍फा ताङ ओमेगा यिन। तीकी तेन्‍दोक ति थल्‍मा ताङ तिङ्‍मा ङ राङ यिन। सु कोम्‍बा लङ्‍गिवे, तिवाला मिजी तेरुप छ्‍यु दोलुप दासा नेसुर थेन्‍दुप छ्‍यु ति तुक राङ थुङ ज्‍यितिनो।
REV 21:7 सी शैतानकी खला ग्‍येल्‍गिवे, तिवाला ती मोलाम ति तेरी थोप्‍कितो। तमा ङ तिवी कोन्‍छ्‍योक च्‍युङ्‍गितो। तिवा ति ङे पुज्‍युङपुम च्‍युङ्‍गितो।
REV 21:8 यिने च्‍ये ङ्‍यिङ दोके वोतुपतिवा ताङ तेपा मिकिवुतिवा ताङ क्‍युक्‍टो लङ्‍गुप लाका कितुपतिवा ताङ मी सेतुपतिवा ताङ शम्‍डेन कितुपतिवा ताङ मो ग्‍यकुपतिवा ताङ ल्‍हलु तेन्‍दुपतिवा ताङ जिनोक जोपतिवा तेरी मे ताङ तुसोक बरिन वोतुप ग्‍येम्‍छोला क्‍युर्कितो। दी ति शेप ङ्‍यिवा यिन।”
REV 21:9 ती पेला तिङ्‍मी तुजेला ख्‍येलुप छेटाङ दिनकी क्‍येङ्‍गुप कोरा दिन खुरुप देवाच्‍येनकी लेन क्‍योलुप थु मिरा दिन ङे थोङ्‍सुङ। तिवी पर्ला मिरा च्‍यिक ति वानी “शोक, ङ ख्‍युरुङला लुक रुककी पेर्मी यिन्‍दुप खोकी नमा छ्‍या देनिन।” सिनी ङला सिक्‍यासुङ।
REV 21:10 तमा तीकी ङला कोन्‍छ्‍योककी थु चाङ्‍माकी ओङला छासे री थेन्‍बुकी गोला टिनी कोन्‍छ्‍योक ज्‍यु वोतुप देवाच्‍येन नेमा चाङ्‍मा वोतुप ग्‍येसा यरूशलेम ति मर पपिन कितुप छ्‍या तेन्‍सुङ।
REV 21:11 ती ग्‍येसा ति कोन्‍छ्‍योककी मोवाकी ठछ्‍येली गल्‍नी नोक। ती वोसिर ति ङ्‍यिमा दोके छासे वो ग्‍यकुप ताङ शेल दोके नाङ्‍ला थोङ्‍गुप छासे सल्‍वु नोक।
REV 21:12 ती ग्‍येसाकी गारी गुरीला दोकर थेन्‍बु ताङ ग्‍यिर्पो यी ग्‍यप्‍नी नोक। ती दोकरला गो च्‍यिङ्‍ङी नोक। तमा गो रे रेला र्‍हेन्‍दुप देवाच्‍येनकी लेन क्‍योलुप थु रे रे नोक। ती गोला इस्राएलकी गिपा च्‍यिङ्‍ङीकी मिङतिवा टिनी नोक।
REV 21:13 तमा शरकी थाकाला गो सुम ताङ ल्‍होकी थाकाला गो सुम ताङ च्‍याङगी थाकाला गो सुम ताङ नुपकी थाकाला गो सुम नोक।
REV 21:14 ती ग्‍येसाकी दोकरला डम्‍ज्‍यी च्‍यिङ्‍ङी नोक। तमा ती खला लुक रुककी लोमा छ्‍ये मिरा च्‍यिङ्‍ङीकी मिङ टिनी नोक।
REV 21:15 तमा ङे मुला ताम्‍ङे कितुप तीकी लकला ग्‍येसा ताङ तीकी गोतिवा ताङ दोकर ति तपुपला सेरकी थिक्‍शिङ यी खुर्नी नोक।
REV 21:16 ती ग्‍येसा ति सुर ज्‍यी नोक। तमा शाङ ताङ रिङ्‍दुङ ति च्‍यिक्‍पा राङ नोक। ती देवाच्‍येनकी लेन क्‍योलुप थु तीकी ती ग्‍येसा ति ताप्‍नी ल्‍हासियाङ तीकी शाङ ताङ रिङ्‍दुङ ताङ थुचे ति च्‍यिक्‍पा राङ किलो मिटर तोङ्‍डा ङ्‍यी ताङ सयी ज्‍यी नोक।
REV 21:17 येलुङ ती देवाच्‍येनकी लेन क्‍योलुप थु तीकी दोकर ति ताप्‍सुङ। तमा ती दोकर ति मी ताप्‍नी ल्हावु दोके मिटर खल टुक ताङ ङ थेन्‍बु नोक।
REV 21:18 ती दोकर ती बिल्‍लौर सिरुप यु थ्‍वोनी जोवु नोक। तमा ग्‍येसा ति शेल दोके सल्‍वु थोङ्‍गुप सेर ङोमा थ्‍वोनी जोवु नोक।
REV 21:19 ती दोकरकी डम्‍ज्‍यीतिवा गोङ नावु यु नम्‍बा बङी थ्‍वोनी जोवु नोक। थल्‍माकी डम्‍ज्‍यी ति बिल्‍लौर सिरुप यु नेसुर जोवु नोक। डम्‍ज्‍यी ङ्‍यिवा ति नीर सिरुप यु नेसुर जोवु नोक। डम्‍ज्‍यी सुम्‍बा ति हरित सिरुप यु नेसुर जोवु नोक। डम्‍ज्‍यी ज्‍यिवा ति पन्‍ना सिरुप यु नेसुर जोवु नोक।
REV 21:20 डम्‍ज्‍यी ङवा ति आनिक्‍सा सिरुप यु नेसुर जोवु नोक। डम्‍ज्‍यी टुक्‍पा ति लालमणि सिरुप यु नेसुर जोवु नोक। डम्‍ज्‍यी दिन्‍बा ति पीतमणि सिरुप यु नेसुर जोवु नोक, डम्‍ज्‍यी ग्‍येवा ति बेरूज सिरुप यु नेसुर जोवु नोक। डम्‍ज्‍यी गुवा ति पुष्‍पराज सिरुप यु नेसुर जोवु नोक। डम्‍ज्‍यी च्‍युवा ति लसुने सिरुप यु नेसुर जोवु नोक। डम्‍ज्‍यी च्‍युच्‍यिक ति नीलमणि सिरुप यु नेसुर जोवु नोक। डम्‍ज्‍यी च्‍यिङ्‍ङी ति कटेला सिरुप यु नेसुर जोवु नोक।
REV 21:21 ती गो च्‍यिङ्‍ङीतिवा ति मोती च्‍यिङ्‍ङी नेसुर जोवु नोक। तमा गो रे रेला मोती रे रे जोनी नोक। ती ग्‍येसाकी लामतिवा ति शेल दोके सल्‍वु थोङ्‍गुप सेर ङोमा थ्‍वोनी जोवु नोक।
REV 21:22 ती ग्‍येसाला कनी साङ ल्‍हङाङ माथोङ। च्‍यिलासिसिन तेकी ल्‍हङाङ ति ङार छ्‍येवु चोवो कोन्‍छ्‍योक ताङ खोकी सेवु लुक रुक राङ यिनोक।
REV 21:23 ती ग्‍येसा ति ठछ्‍येली जोपला ङ्‍यिमा उला काङ साङ मोगोनोक। च्‍यिलासिसिन कोन्‍छ्‍योककी मोवाकी राङ तेकी ग्‍येसा ति ठछ्‍येली डिनोक। तमा ते ठछ्‍येली जोप दिप्‍ली ति लुक रुक राङ यिनोक।
REV 21:24 जम्‍बुलिङला वोतुप मिरिक कुतुक कुतुककी मीतिवा ती ठछ्‍येलीला युकिवी। तमा जम्‍बुलिङकी ग्‍येल्‍वुतिवी साङ खोप्‍रे मोवा ति ते खुर्नी वुङ्‍गिवी।
REV 21:25 ती ग्‍येसाकी गोतिवा ङ्‍यिमा काङ नाम्‍साङ मेच्‍येवी। च्‍यिलासिसिन ते नाम्‍साङ नाम मोल्‍होवी।
REV 21:26 मिरिक कुतुककी मीतिवी खोप्‍रे मोवा ताङ ताङ्‍देन ति ती ग्‍येसाला खुर्नी गिनोक।
REV 21:27 यिने लुक रुककी मिजीकी थेपला मिङ टिवुतिवा मिसिन यम्‍बा चाङ्‍मा मेतुप ताङ क्‍युक्‍टो लङ्‍गुप ताम्‍ङे कितुप ताङ जिनोक जोपतिवा ती ग्‍येसाला नाम्‍साङ शुक मुथुप्‍नोक।
REV 22:1 येलुङ देवाच्‍येनकी लेन क्‍योलुप थु तीकी ङला शेल दोके सल्‍वु वोतुप मिजीकी चङ्‍बु च्‍यिक छ्‍या तेन्‍सुङ। ती चङ्‍बु ति कोन्‍छ्‍योक ताङ लुक रुककी ग्‍येल्‍ठिक नेमा थेन्‍नी
REV 22:2 ती ग्‍येसाकी लामकी पर नेमा ग्‍युकिनोक। तमा ती चङ्‍बी फला छुला मिजीकी दोङ्‍बु नोक। तीला ल टेङ डेलु नम्‍बा रे रे गोर्किनोक। तमा लो च्‍यिकला नम्‍बा च्‍यिङ्‍ङी डेलु गोर्किनोक। तीकी शोमाक ति मिरिक नम्‍बा कुतुक कुतुककी मीतिवाला टेक ज्‍यितुप मेन यिनोक।
REV 22:3 ती ग्‍येसाला नाम्‍साङ कोन्‍छ्‍योककी मोताप मिन्‍दुक। ते कोन्‍छ्‍योक ताङ खोकी लुक रुककी ग्‍येल्‍ठिक नोक। तमा खोला शब्‍ज्‍यी कितुप मीतिवी खोला सोवा बुल्‍गिनोक।
REV 22:4 तिवी कोन्‍छ्‍योककी शाल ति थोङ्‍गिवी। तमा खोकी मिङ ति टली लोला टिवु नोक।
REV 22:5 ते नाम्‍साङ नाम मोल्‍होनोक। तिवाला दिप्‍ली ताङ ङ्‍यिमी वो साङ मोगोनोक। च्‍यिलासिसिन चोवो कोन्‍छ्‍योक ति तिवी थोक्‍ला वोसिर यिनोक। ते तिवी नरीकी नरी ग्‍येला किनोक।
REV 22:6 ती ज्‍युक्‍ला देवाच्‍येनकी लेन क्‍योलुप थु तीकी ङला दुक सिक्‍यासुङ, “वुतुङ के ख्‍योरो थोवु सुङतिवा तेरी खोङ्‍तेर्मु ताङ टेङ्‍बु वे। लुङ्‍तेम्‍बातिवाला खोरे थु नङ्‍गुप चोवो कोन्‍छ्‍योककी खोरुङला शब्‍ज्‍यी कितुपतिवाला ङमु राङ तेन्‍तेन च्‍युङ्‍गुप ताम्‍ङेकी कोर्ला हाक्‍को ज्‍यितुपला खोरे लेन क्‍योलुप थुतिवा ताङ्‍सुङ।”
REV 22:7 येशूकी सुङ्‍नी वे, “ल्‍होसा, ङ ङमु राङ वुङ्‍यिनो। दी थेप नाङ्‍ला टिवु लुङ्‍तेम्‍बातिवी सुङला सिक्‍यावु दोके ङ्‍येन्‍दुपतिवाला मोलाम थोप्‍कितो।”
REV 22:8 दी ताम्‍ङेतिवा तेरी थोवु ताङ थोङ्‍गुप ति ङ यूहन्‍ना यिन। ती तेरी थोङ्‍गुप ताङ ल्‍हा सिन्‍सिमा दी ताम्‍ङे छ्‍या देन्‍दुप देवाच्‍येनकी लेन क्‍योलुप थु तीला शावा कितुपला ङ खोकी काङ्‍बी चाला खवुतुङ्‍मा देतिन।
REV 22:9 यिने तीकी ङला “ख्‍योरो ङला दुक क्‍यानी शावा कितुप मेवी। ङ साङ ख्‍युरुङ ताङ ख्‍योरो अच्‍युनुप लुङ्‍तेम्‍बातिवा ताङ दी थेपला वोतुप सुङला युकुपतिवा दोके कोन्‍छ्‍योककी लावा तिराङ यिन। तुक क्‍यानी कोन्‍छ्‍योकला तिराङ शावा की।” सिनी सिक्‍यासुङ।
REV 22:10 येलुङ तीकी ङला दुक साङ सिक्‍यासुङ, “दी थेप नाङ्‍ला वोतुप नम्‍दर शेतुप सुङ ति बानी माज्‍योक। च्‍यिलासिसिन त याङ तुजे वानी साङ वे।
REV 22:11 तुक क्‍यानी लाका दुक्‍टा कितुपतिवा ति लाका दुक्‍टा राङ किशी, क्‍युक्‍टो लङ्‍गुप लाका कितुप ति क्‍युक्‍टो लङ्‍गुप लाका राङ किशी, टेङ्‍बु कितुपतिवा ति टेङ्‍बु राङ किशी, तमा चाङ्‍मा वोतुपतिवा ति चाङ्‍मा राङ देशी।”
REV 22:12 येशूकी दुक सुङ वे, “ल्‍होसा, ङ ङमु राङ वुङ्‍यिनो। ङ वासिमा सु सुकी लाका ल्‍यामु मेलोवा क्‍यावे, तिवाला तिवी क्‍यावु लाकाकी छ्‍यक्‍तक ति तेरिनो।
REV 22:13 ङ ति अल्‍फा ताङ ओमेगा, थल्‍मा ताङ तिङ्‍मा, जम्‍बुलिङकी गोमा नेज्‍युनी नरीकी नरी लुवु यिनो।”
REV 22:14 मिजीकी दोङ्‍बी डेलु थोपुप ताङ ग्‍येसाकी गे नाङ्‍ला शुकुप ओङ थोपुपला खोप्‍रे मज्‍या टुवु दोके क्‍यानी सेम टेङ्‍बु जोपतिवा मोलाम थोपुप यिनो।
REV 22:15 यिने ग्‍येसाकी फिला ति की दोके मेलोवा ताङ जिम्‍डुल छ्‍या देन्‍दुपतिवा ताङ शम्‍डेन कितुपतिवा ताङ शेन्‍बातिवा ताङ ल्‍हलु तेन्‍दुपतिवा ताङ जिनोक जोप ताङ जिनोकला गा कितुपतिवा तिराङ युकिवी।
REV 22:16 “ङ येशू यिन, ङे राङ दी ताम्‍ङेतिवा चर्चतिवाला पङ्‍बु तेरुपला ङरा लेन क्‍योलुप थुतिवा तिवी ते तङ्‍गुप यिन। ङ ग्‍येल्‍वु दाऊदकी गिपा नेसुर वावु मी यिन, टोपला शरुप वो ग्‍यकुप कर्ज्याङ साङ यिन।”
REV 22:17 कोन्‍छ्‍योककी थु चाङ्‍मा ताङ नमाकी दुक सुङ्‍गिवी, “फेप!” सी दी ताम्‍ङे थोकिवे, तीकी साङ “फेप!” सिनी सिशी। सुला कोम्‍बा लङ्‍गिवे, ती ति वुङ्‍शी। सी मिजीकी छ्‍यु थुङ्‍गुप नोकिवे, तीला तुक राङ थुङ्‍शी।
REV 22:18 दी थेपकी नाङ्‍ला वोतुप नम्‍दर शेतुप सुङ थोवु मीतिवा रे रेला ङ दी ताम्‍ङे ति छासे क्‍यानी सिरिन। दोजो सी दी थेपकी नाङ्‍ला टिवु ताम्‍ङेला ल्‍हक्‍पा ज्‍याक्‍सिन तीला दी कोन्‍छ्‍योककी थेप नाङ्‍ला टिवु पर्च्यातिवा ख्‍येल ज्‍यिकिवी।
REV 22:19 येलुङ सी दी नम्‍दर शेतुप सुङला चेयी ङ्‍युङ्‍मु ज्‍याक्‍सिन तीला दी थेपकी नाङ्‍ला टिवु कोन्‍छ्‍योककी मिजीकी दोङ्‍बी डेलु ति ठोनी चाङ्‍मा वोतुप ग्‍येसा नेसुर तीला ङ्‍येतुप ति ठोकिवी।
REV 22:20 दी ताम्‍ङेकी पङ्‍बु तेरुप तीकी दुक सुङ्‍गिवी, “वुतुङ के ङ ङमु राङ वुङ्‍यिनो।” आमिन चोवो येशू फेप!
REV 22:21 चोवो येशूकी कटिन ति तेपा कितुपतिवा तेरीला थोप्‍शिता। आमिन।
