﻿हिब्रू.
8.
त ङ्‍यिरा सिक्‍यावु खक्‍छ्‍येवु ताम्‍ङे ति दी राङ यिन, दाक्‍पी थोक्‍ला तेरी सिनाङ कोङ्‍यार छ्‍ये मिरा च्‍यिक ज्‍यु वे। खो देवाच्‍येनकी चोछ्‍येवु कोन्‍छ्‍योककी ग्‍येल्‍ठिककी यावी थाकाला ज्‍यु वे। 
ते खो तेरी सिनाङ चाङ्‍मा वोतुप दासाला कोङ्‍यार छ्‍येकी लाका कियी वे। ती दासा ति यहूदीतिवी कोन्‍छ्‍योकला सोवा देकुप कुर यिन। ती ति मीतिवी जोवु मिन, चोवो कोन्‍छ्‍योककी जो नङ्‍गुप वुतुङ्‍की चाङ्‍मा वोतुप दासा यिन। 
तेरी कोङ्‍यार छ्‍येतिवा ति बुल्‍वा ताङ सेम्‍ज्‍येन सेनी जिन्‍बा बुलुपला पेतुपतिवा यिन। तुक क्‍यानी दी कोङ्‍यार छ्‍येकी साङ काङ रे च्‍यिक रे बुल्‍वा बुल राङ गोकिवी। 
खो दी जम्‍बुलिङला राङ ज्‍यु वोतुप यिन्‍सियाङ कोङ्‍यार मुच्‍युङ्‍गिवी। च्‍यिलासिसिन मोशाकी टिवु कोन्‍छ्‍योककी ठिमला सुङ्‍गुप दोके बुल्‍वा बुलुप कोङ्‍यारतिवा याङ गोमा नेज्‍यु राङ वोतुप्‍जा। 
तिवी शब्‍ज्‍यी कितुप दासा ति वुतुङ के मिन, देवाच्‍येनकी चाङ्‍मा वोतुप दासा दोके पेशुवु तिराङ यिन। च्‍यिलासिसिन मोशाकी यहूदीतिवी कोन्‍छ्‍योकला सोवा देकुप कुर जोप पेला कोन्‍छ्‍योककी मोशाला “ख्‍युरुङला ङे सीनै रीला छ्‍या तेन्‍दुप दोके तुकै राङ क्‍यानी तेरी च्‍यालकतिवा जोपला सेम यी कुक।” सिनी क नाङ वे। 
यिने येशू ख्रीष्‍टकी क्‍या नङ्‍गुप कोङ्‍यारकी लाका ति कोन्‍छ्‍योककी मोशाला नङ्‍गुप ठिमला वोतुप कोङ्‍यारकी लाका सिनाङ मङ खक्‍छ्‍येवु वे। तुक क्‍यानी येशूकी कोन्‍छ्‍योक ताङ मीतिवी पर्ला थाक्‍छ्‍येवु ताम्‍ङे जोपला डिक्‍सुङ। ती थाक्‍छ्‍येवु ताम्‍ङे ति मोशाला नङ्‍गुप ठिम ङ्‍यिङ्‍बा सिनाङ मङ खक्‍छ्‍येवु वे। च्‍यिलासिसिन कोन्‍छ्‍योककी मीतिवाला ती सिनाङ मङ ल्‍यामु ताम्‍ङे तेरुपला थाक्‍छ्‍येनी खोकी मी ताङ मुला ताम्‍ङे सम्‍बा थाक्‍छ्‍येन नाङ्‍सुङ। 
दोजो थल्‍माला कोन्‍छ्‍योक ताङ मी पर्ला थाक्‍छ्‍येवु ताम्‍ङे ति क्‍येन मेतुप च्‍युङ्‍सियाङ थाक्‍छ्‍येवु ताम्‍ङे ङ्‍यिवा ति जो राङ मोगोवु ति यिन्‍जा। 
यिने मीतिवाला क्‍येन फोकुप हाक्‍कोनी कोन्‍छ्‍योककी दुक सिनी सुङ्‍सुङ, “त ती तुजे गितो, चोवो कोन्‍छ्‍योककी सुङ्‍गिवी, ती तुजेला इस्राएलकी मीतिवा ताङ यहूदाकी मीतिवी मुला ङ थाक्‍छ्‍येवु ताम्‍ङे सम्‍बा च्‍यिक जोयिनो।” 
येलुङ चोवोकी दुक सुङ्‍सुङ, “ती सम्‍बा थाक्‍छ्‍येतुप ति तिवी हङ्‍गावातिवाला ङे मिश्र लुङ्‍बा नेसुर तेन्‍नी टिनी वुङ्‍गुप पेला तिवी मुला थाक्‍छ्‍येतुप दोके मेवितो। यिने तिवी ङे थाक्‍छ्‍येतुप ताम्‍ङेला माङ्‍येन। तुक क्‍यानी ङे तिवाला ङ्‍याम माक्‍या।” 
येलुङ चोवोकी दुक सुङ्‍सुङ, “ती तुजेकी ज्‍युक्‍ला ङ इस्राएलकी मीतिवी मुला थाक्‍छ्‍येवु ताम्‍ङे च्‍यिक जोयिनो। तिवी नासामला ङ ङे ठिम ति ज्‍याङ तेरिन, तमा तिवी सेमला ति दी ठिमतिवा टिकिनो। तमा ङ ति तिवी कोन्‍छ्‍योक यिनो, तिवा ति ङे ज्‍यिक्‍तेम्‍बातिवा यिनो। 
तफेन्‍ला सी साङ कोन्‍छ्‍योकला ङो शेवा कि सिनी खोरो युल्‍वातिवा ताङ खोरो अच्‍युनुपतिवाला मोलोप्‍तो। च्‍यिलासिसिन तिवा छ्‍ये नेज्‍यु छ्‍युङा सेक तेरीकी ङला ङो शेकितो। 
ङ तिवी क्‍यावु लाका दुक्‍टातिवा तेरी माफ तेरिनो, तमा तिवी क्‍यावु दिक्‍पातिवा नाम्‍साङ नासाम मोतोङ्‍दो।” 
खोकी “थाक्‍छ्‍येवु ताम्‍ङे सम्‍बा” सिनी खोकी गोमाला थाक्‍छ्‍येवु ताम्‍ङेला ङ्‍यिङ्‍बा जो नाङ्‍सुङ। तमा ती ङ्‍यिङ्‍बा गलुप ताङ फेन मोथोवुतिवा ति तेरी ङमु राङ तोर्नी डिवी। 
