﻿१ थेसलोनिकी.
5.
अच्‍युनुपतिवा चोवो येशू चो पेला ताङ नम पेला फेपुप कोर्ला याङ ख्‍यिराङला काङ साङ टिक गोवु मे। 
च्‍यिलासिसिन चोवो येशू फेपुप तुजे याङ नुपला कुर्मेन वावु दोके हाक्‍माकोवा क्‍यानी गिवी सिरुप ति ख्‍यिराङला राङ छ्‍या वे। 
मीतिवा लोदिमु ताङ सेम किर्मु क्‍यानी देकिवी। ती पेला पेर्मी पुज्‍युङला हाक्‍माकोवा क्‍यानी आङा क्‍येप सुक ग्‍यपुप दोके तिवी खला छेटाङ ख्‍येल गिवी। तमा तिवा सु साङ ती छेटाङ ने थर मुथुपी। 
यिने अच्‍युनुपतिवा, ख्‍यिराङ याङ येशूला तेपा क्‍यानी नक्‍तोमीला युकुप मी मिन। ती तप्‍की ती कुर्मेन दोके हाक्‍माकोवा क्‍यानी वुङ्‍गुप छेटाङला मेख्‍येल्‍वी। 
च्‍यिलासिसिन ख्‍यिराङ तेरी ठछ्‍येली ताङ ङ्‍यिमी गुङगी गिपा यिन, नुप ताङ नक्‍तोमीकी गिपा मिन। 
तुक क्‍यानी दाक्‍पु ति नक्‍तोमीला ङ्‍यिलोकुप मी यम्‍बा दोके ङ्‍यिमालोक्‍नी च्‍याङ्‍से देतुप। 
च्‍यिलासिसिन ङ्‍यिलोकुपतिवा नक्‍तोमीला ङ्‍यिलोकिवी, तमा छ्‍याङ्‍गेलेतिवा नक्‍तोमीला आराक थुनी जिवी। 
यिने दाक्‍पु याङ ठछ्‍येलीला वोतुप कोन्‍छ्‍योककी गिपातिवा यिन्‍दुप तप्‍की च्‍याङ्‍से क्‍यानी देतुप। तमा मक ग्‍यकुप पेला मक्‍मीतिवी छेकोक र्‍होकुपला च्‍या ग्‍यपुप दोके क्‍यानी चोवो येशूला तेपा कितुप ताङ च्‍यिककी च्‍यिकला ङ्‍यिङ्‍ज्‍ये किसा। तमा मक्‍मीतिवी गो र्‍होकुपला च्‍याकी शमुङ कोन्‍दुप दोके क्‍यानी कोन्‍छ्‍योककी दाक्‍पुला थर ज्‍यितुप रेवा क्‍यानी देतुप। 
च्‍यिलासिसिन कोन्‍छ्‍योककी दाक्‍पुला छ्‍येर्पा तेरुपला मिन, यिने दाक्‍पी चोवो येशू ख्रीष्‍ट नेसुर दिक्‍पा ने थर थुपुपला तोङ्‍ला के पेन नङ्‍गुप यिन। 
खो दाक्‍पी थोक्‍ला टुङ्‍सुङ। ती तप्‍की दाक्‍पु सेन्‍बु देसिनाङ शिसिनाङ नरी खोकी मुला राङ मिजी क्‍योङ्‍गुप। 
तुक क्‍यानी ख्‍यिरा तसाम क्‍यावु दोके च्‍यिककी च्‍यिकला टोङ्‍गु बिन्‍नी तेपा रम्‍बु क्‍यानी देता। 
अच्‍युनुपतिवा, ख्‍यिराङला ङ्‍यिराङ ठाकुरे सिनी गोङ्‍बा शोयी। ख्‍यिरा पर्ला टेमु क्‍यानी ख्रीष्‍टकी ओङला गोमा कितुप ताङ टोङ्‍गु तेरुपतिवाला ताङ्‍देन की। 
तमा तिवी क्‍यावु लाकाकी थोक्‍ला तिवाला ल्‍यामु क्‍यानी मङ ताङ्‍देन किसा। ख्‍यिराङ तेरीकी मुला थिन्‍नी देता। 
अच्‍युनुपतिवा, ख्‍यिराङला ङ्‍यिराङ टोङ्‍गु तेरिन। छेर्शिक्‍पातिवाला येन्‍देन बिन, सेम्‍दुक कितुपतिवाला साङ टोङ्‍गु बिन, दाल्‍जा कि गोवुतिवाला दाल्‍जा किटे की, तेरीकी पर्ला कुसु ज्‍यम्‍बु क्‍यानी दे। 
ख्‍यिराङ सी साङ मेलोक्‍पाकी थोक्‍ला मेलोक्‍पा माकी, यिने च्‍यिककी च्‍यिकला ताङ तेरीला ल्‍यामु कितुप नासाम तोङा। 
नरी सेम किर्मु क्‍यानी दे। 
नरी मोपोर क्‍यानी देता। 
दुक्‍पा ख्‍येल्‍सिनाङ किर्मु वोसिनाङ कोन्‍छ्‍योकला थुचिछे पुल। च्‍यिलासिसिन येशूला तेपा कितुप मीतिवा तुकै राङ वुङ गोकिवी सिरुप ति कोन्‍छ्‍योककी नोवा यिन। 
कोन्‍छ्‍योककी थु चाङ्‍माकी कितुप लाकाला माग्‍यक। 
कोन्‍छ्‍योककी लुङ्‍तेम्‍बातिवी नम्‍दर शेतुप ताम्‍ङेला मारे मातोङ। 
तेरी ताम्‍ङेतिवा ल्‍यामु वोतुप मेतुप ल्‍होसा। तमा चुका ताम्‍ङे ति ल्‍यामु नोके, तीला राङ युसा। 
मेलोवा वोतुप तेरी ताम्‍ङे दुक्‍टा नेसुर कुतुक देता। 
लोदिमु नङ्‍गुप कोन्‍छ्‍योककी राङ ख्‍यिराङला तेरी टेङ्‍बु जो नङ्‍शी, तमा दाक्‍पी चोवो येशू ख्रीष्‍ट फेपुप पेला सेक ख्‍यिरा थु ताङ सेम ताङ जु तेरी काङ साङ क्‍येन मेतुप च्‍युङ्‍शी। 
ख्‍यिराङला कताङ नङ्‍गुप कोन्‍छ्‍योक ति खोङ्‍तेर्मु वे, खोकी राङ ख्‍यिराङला ती तेरी ताम्‍ङेतिवा नङ्‍गिवी। 
अच्‍युनुपतिवा, ङ्‍यिरा थोक्‍ला साङ मोपोर किसा। 
तेरी अच्‍युनुपतिवाला ङ्‍यिङ्‍ज्‍ये ताङ मुला टसी देलेक सिसा। 
चोवोकी मिङला ङ ख्‍यिराङला गोङ्‍बा शोयी, दी यिकी ति रानी तेरी अच्‍युनुपतिवाला ङ्‍येन्‍शिता। 
दाक्‍पी चोवो येशू ख्रीष्‍टकी कटिन ति ख्‍यिराङला वुङ्‍शी।
