﻿फिलिप्पी.
2.
दोजो येशू ख्रीष्‍टला तेपा क्‍यासिमा ख्‍यिरा मिजीला काङ टोङ्‍गु वोसिन, याङ्‍ना खोकी ङ्‍यिङ्‍ज्‍येकी लोदिमु च्‍युङ वोसिन, याङ्‍ना कोन्‍छ्‍योककी थु चाङ्‍माकी ओङला डिक्‍जोम च्‍युङ्‍नी तम्‍जी ल्‍यामु वोसिन, याङ्‍ना ख्‍यिरा मिजीला मी यम्‍बी थोक्‍ला सेम ल्‍यामु ताङ च्‍यम्‍बा वोसिन, 
ख्‍यिराङ सेम च्‍यिक्‍पा राङ च्‍युङ्‍गुप ताङ ङ्‍यिङ्‍ज्‍ये च्‍यिक्‍पा राङ कितुप ताङ नासाम च्‍यिक्‍पा राङ तोङ्‍गुप ताङ तेरी थिन्‍नी ङला कशेन गा लोङ। 
खोरो थोक्‍ला तिराङ नासाम तोङ्‍गुप ताङ अम्‍बारङ्‍शिङ कितुप मिन, यिने कुसु ज्‍यम्‍बु क्‍यानी च्‍यिककी च्‍यिकला खुरुङ सिनाङ छ्‍ये यिन सिनी नो की। 
ख्‍यिराङ रङगी थोक्‍ला तिराङ नासाम मातोङ, यिने मी यम्‍बी थोक्‍ला साङ नासाम तोङ। 
ख्‍यिरा सेम ति येशू ख्रीष्‍टला वोतुप दोके वुङ गोकिवी। 
खो ति कोन्‍छ्‍योककी जुजमला वोसिनाङ खो कोन्‍छ्‍योक ताङ मुला च्‍यिक्‍पा राङ यिन सिनी खोकी ओङ छोलुप नो माक्‍या, 
यिने तेरी क्‍युर ज्‍याक्‍नी लावाकी जुजमला च्‍युङ्‍नी दाक्‍पु दोके क्‍यानी दी जम्‍बुलिङला क्‍येसुङ। 
तमा खोरुङला मो पाप्‍नी शि राङ गोसिनाङ कोन्‍छ्‍योककी कला ङ्‍येन्‍सुङ। तीकी तेन्‍दोक ति ग्‍यङ्‍शिङला कल्‍नी टुङ्‍गुप यिन। 
ती तप्‍की कोन्‍छ्‍योककी खोला छासे चोछ्‍ये जो नाङ्‍नी तेरी सिनाङ चोछ्‍ये वोतुप मिङ ज्‍याङ नाङ्‍सुङ। 
तुक क्‍यानी देवाच्‍येनला वोतुपतिवा ताङ जम्‍बुलिङला वोतुपतिवा ताङ जम्‍बुलिङकी वोक्‍ला वोतुपतिवा तेरीकी येशूकी मिङला ताङ्‍देन कितुपला पुमुङ जुकिवी। 
तमा पपा कोन्‍छ्‍योककी मोवाकी थोक्‍ला तेरीकी ख नेमा येशू ख्रीष्‍ट राङ चोवो यिन सिनी मी मिङ्‍गाला खलाङ किवी। 
ती तप्‍की ङे ङ्‍यिङ्‍ज्‍येवु अच्‍युनुपतिवा, ङ ख्‍यिरा मुला वोतुप पेला ख्‍यिरा ङे खला ङ्‍येन्‍सुङ। ती दोके त ङ मेतुप पेला मङ ङे ताम्‍ङे ङ्‍येन्‍नी सेमला ज्‍यिवा खुर्नी कोन्‍छ्‍योकला ताङ्‍देन क्‍यानी खोरुङ दिक्‍पा ने थरुप लाका तेरी सिन्‍दा कितुपला टेमु किसा। 
च्‍यिलासिसिन कोन्‍छ्‍योककी ख्‍यिराङला खोरे नोवाला वोतुप दोके कितुप नासाम तोङ्‍गुप ताङ ती दोके लाका कितुप ओङ नाङ्‍नी ख्‍यिरा मिजी नेमा लाका कियी वे। 
तमा ख्‍यिराङ काङ किसिनाङ मुक्‍तम देन्‍दुप ताङ खाँदा माक्‍यानी किसा। 
तुक क्‍यासिन ख्‍यिराङ क्‍येन मेतुप ताङ टेङ्‍बु च्‍युङ्‍नी सुर्क्योक्‍पा ताङ ख्‍यम गलुप मीतिवी पर्ला मडी मेतुप कोन्‍छ्‍योककी गिपा च्‍युङ्‍गिवी। तमा ख्‍यिराङ कर्मा शरुप दोके वो ग्‍यकिवी। 
मिजीकी सुङला ख्‍यिराङ रम्‍बु क्‍यानी देता, तमा ङे लाका ताङ हुर्ताक क्‍यावु ति तेर्मेला मोडोवी। तुक क्‍यासिन ख्रीष्‍ट फेवु तुजेला ख्‍यिराङ को छ्‍येवु तप्‍की ङे सेमला छासे गा लङ्‍गिवी। 
ख्‍यिरा कोन्‍छ्‍योकला तेपा क्‍यावु ताङ शब्‍ज्‍यी क्‍यावु ति जिन्‍बा बुलुप दोके राङ यिन। ती जिन्‍बाकी थोक्‍ला ङ शि राङ गोसिनाङ शि थुप्‍किवी। तमा ख्‍यिराङ तेरीकी मुला ङ छासे गा कितिन। 
तुक राङ क्‍यानी ख्‍यिराङ साङ ङ ताङ मुला राङ छासे गा कि गोकिवी। 
येशू ख्रीष्‍टकी नोवा वोसिन तिमोथीला ङमु राङ ख्‍यिरा ते तोङ्‍गुप्‍नो। तुक क्‍यासिन ख्‍यिरा लेन थोनी ङला गा लङ्‍गिवी। 
च्‍यिलासिसिन तिमोथी दोके सेम टेङ्‍बु क्‍यानी ख्‍यिरा थोक्‍ला पप कितुप मी ति ङे मुला सु साङ मे। 
मी यम्‍बातिवा याङ येशू ख्रीष्‍टला मिन, यिने खोरो थोक्‍ला तिराङ नासाम तोङ्‍गिनोक। 
यिने तिमोथी खोङ्‍तेर्मु वोतुप ति ख्‍यिराङला साङ छ्‍या वे। तीकी चुक क्‍यानी पुज्‍युङकी पपाला शब्‍ज्‍यी किवे, तुक राङ क्‍यानी ङ ताङ मुला लेन ल्‍यामु ख्‍याप्‍टाक कितुपला दाल्‍जा क्‍यासुङ। 
तुक क्‍यानी ङला चोन्‍खाङ नेमा पि तोङ्‍गुप मोतोङ्‍गुप तेन्‍तेन च्‍युङ्‍लुङ्‍मे तिमोथीला ख्‍यिरा ते तोङ्‍गुप नो क्‍या वे। 
चोवो येशूकी नोवा वोसिन ङ साङ ङमु राङ ख्‍यिरा ते वुङ थुप्‍शी सिनी चोवो कोन्‍छ्‍योकला रेवा क्‍या वे। 
ङे नासामला इपाफ्रोडिटसला ख्‍यिरा ते तोङ गोवु ङे थोङ्‍सुङ। ती ति ङे नुप दोके क्‍यानी ङे मुला राङ लाका क्‍यासुङ, तमा लेन ल्‍यामु ख्‍याप्‍टाक कितुपला थमु ग्‍यकुप मक्‍मी दोके च्‍युङ्‍सुङ। तीकी ख्‍यिरा लेन ति ङला खुर्नी लेसुङ, ती ति ङला दाल्‍जा कितुप थोक्‍ला ख्‍यिरा ङे ते तङ्‍गुप यिन। 
च्‍यिलासिसिन तीकी ख्‍यिराङ तेरीला छासे ठेतुप नोकिनोक। तमा ती अमोछ्‍योवु हाक्‍कोनी ख्‍यिराङ तीकी थोक्‍ला सेम्‍दुक क्‍यावु थोसिमा ती ति मङ यर्मिन मर्मिन गाल्‍सुङ। 
वुतुङ के ती ति च्‍येती नासुङ, यिन्‍सिनाङ कोन्‍छ्‍योककी तीला च्‍यम्‍बा नाङ्‍सुङ। तीला तिराङ मिन, ङला पप लावु खला साङ पप मलाङ्‍शी सिनी कोन्‍छ्‍योककी च्‍यम्‍बा नाङ्‍सुङ। 
ती तप्‍की तीला ख्‍यिरा ते तोङ्‍गुप ङला छासे नो वे। तीकी तेन्‍दोक ति तीला थोङ्‍सिमा ख्‍यिराङ गा किवी। तमा ङला साङ पप अला मलाङ्‍गिवी। 
चोवोकी मिङला तीला छासे गा क्‍यानी गासो शुसा। तमा तुका मीतिवाला ताङ्‍देन किसा। 
च्‍यिलासिसिन तीकी ख्रीष्‍टकी थोक्‍ला शि राङ गोसिनाङ लाका क्‍यासुङ, तमा ङे थोक्‍ला ख्‍यिरा कि मुथुपु शब्‍ज्‍यी कितुपला तो मिसिन शिसुङ। 
