﻿१ कोरिन्थी.
14.
तुक क्‍यानी ख्‍यिराङ तेरी सिनाङ गोमाला ङ्‍यिङ्‍ज्‍ये कितुप तिराङ नासाम तोङ। तमा कोन्‍छ्‍योककी थु चाङ्‍मा नेमा नङ्‍गुप कटिनकी ङ्‍येम्‍बा थोपुपला छासे नो की। तमा खक्‍छ्‍येवुला ति कोन्‍छ्‍योककी नङ्‍गुप नम्‍दर शेतुप कटिनकी ङ्‍येम्‍बा थोपुप नो की। 
च्‍यिलासिसिन सी ग्‍येताम कुतुकला ताम्‍ङे लप्‍किवे, तीकी मीला ताम्‍ङे कितुप मिन, यिने कोन्‍छ्‍योककी मुला ताम्‍ङे क्‍यावु यिन। तमा तीकी क्‍यावु ताम्‍ङे ति सी साङ हाक्‍मोकोवी। च्‍यिलासिसिन तीकी कोन्‍छ्‍योककी थु चाङ्‍मा नेसुर छ्‍याकला वोतुप ताम्‍ङेतिवा लप्‍किवी। 
यिने नम्‍दर शेतुप तीकी मी ताङ मुला राङ ताम्‍ङे किवी। तमा तीकी मीतिवाला मङ तेपा रम्‍बु जोपला दाल्‍जा कितुप ताङ टोङ्‍गु तेरुप ताङ लोदिमु तेर्किवी। 
ग्‍येताम कुतुक कुतुकला ताम्‍ङे कितुप तीकी खुरुङला मङ तेपा रम्‍बु जोपला दाल्‍जा किवी, यिने नम्‍दर शेतुप तीकी चर्चकी मीतिवाला तेपा रम्‍बु जोपला दाल्‍जा किवी। 
ख्‍यिराङ तेरीकी ग्‍येताम कुतुक कुतुकला ताम्‍ङे किशी सिरुप ति ङे नोवा वे, यिने ती सिनाङ मङ खक्‍छ्‍येवु ति ख्‍यिराङ कोन्‍छ्‍योककी नङ्‍गुप नम्‍दर शेतुप ति ङला नोवा वे। दोजो ग्‍येताम कुतुक कुतुकला ताम्‍ङे लपुप पेला ती ताम्‍ङे छिक ग्‍युरुप मी साङ वोसिन तीकी चर्चकी मीतिवाला मङ ल्‍यामु किवी। मिसियाङ हाक्‍मोकोवु ग्‍येताम कुतुक कुतुकला ताम्‍ङे लपुप सिनाङ नम्‍दर शेतुप ति छ्‍ये यिन। 
अच्‍युनुपतिवा, दोजो ङ ख्‍यिरा ते वानी ग्‍येताम कुतुक कुतुकला ताम्‍ङे क्‍यायी, यिने ङे ख्‍यिरा पर्ला कोन्छ्‍योककी छ्‍या तेन नङ्‍गुप ताम्‍ङे लपुप ताङ रिक्‍पा तेरुप ताङ नम्‍दर शेतुप येन्‍देनतिवा ख्‍यिरा हाक्‍कोवु ताम्‍ङेला सि माक्‍यासिन ख्‍यिराङला काङ साङ ख्‍येप्‍साङ मेवी। 
ती दोके लुमु पुवु ताङ पिवाङ टिलुप पेला दा ल्‍यामु माथेन्‍सुङ सिसिन मीतिवी चुक क्‍यानी लुमु पुवु ताङ पिवाङ टिलुप वोरु यिन सिनी हाक्‍कोवुजा? 
येलुङ बिगुल पुतुप मक्‍मी तीकी बिगुलकी दा ल्‍यामु मातेन्‍सुङ सिसिन चुक क्‍यानी यम्‍बा मक्‍मीतिवा मक ग्‍यक डोपला टडिक कितुप्‍जा? 
तुक राङ क्‍यानी ख्‍यिरा लापुप ग्‍येताम कुतुक कुतुककी ताम्‍ङे ति मीतिवी ल्‍यामु हाक्‍माकोसिन चुक क्‍यानी मीतिवी ख्‍यिरा लापुप ताम्‍ङे ति हाक्‍कोवुजा? ती ति तेन्‍दोक मेतुप डिवी। 
दी जम्‍बुलिङला ग्‍येतामतिवा नम्‍बा बङी वोसिनाङ तेरी ग्‍येतामतिवा च्‍यिक साङ तेन्‍दोक मेतुप मे। 
दोजो मी यम्‍बी लापुप ताम्‍ङेकी तेन्‍दोक ति ङे हाक्‍माकोसुङ सिसिन ङ ति तीकी थोक्‍ला छ्‍यिग्‍यपकी मी दोके डिवी। तमा ती ताम्‍ङे लपुप मी ति ङे थोक्‍ला छ्‍यिग्‍यपकी मी दोके डिवी। 
तुक राङ क्‍यानी ख्‍यिराङ साङ कोन्‍छ्‍योककी थु चाङ्‍माकी नङ्‍गुप कटिनकी ङ्‍येम्‍बा थोपुप नो क्‍यावु तप्‍की तेरी सिनाङ गोमाला ख्‍यिराङ कोन्‍छ्‍योककी थु चाङ्‍माकी नङ्‍गुप कटिनकी ङ्‍येम्‍बा थोप्‍नी चर्च येर्के तोङ्‍गुपला टेमु किसा। 
तुक क्‍यानी ग्‍येताम कुतुक कुतुकला ताम्‍ङे कितुपतिवी ती ग्‍येतामकी तेन्‍दोक ति छिक ग्‍युरुप कटिनकी ङ्‍येम्‍बा थोपुपला मोपोर की। 
च्‍यिलासिसिन ङे ग्‍येताम कुतुक कुतुकला मोपोर कितुप पेला ङे कोन्‍छ्‍योककी थु चाङ्‍मा नेमा मोपोर किवी, यिने ती मोपोर क्‍यावु तेन्‍दोक काङ यिन सिरुप ति ङे सेमला हाक्‍मोकोवी। 
त तीकी कोर्ला ङे काङ कि गोकिवी? ङ मोपोर कितुप पेला ङे कोन्‍छ्‍योककी थु चाङ्‍मा नेमा मोपोर कितिन, तमा सेम नेमा साङ मोपोर कितिन। कोन्‍छ्‍योककी थु चाङ्‍मा नेमा सोवा देकिन, तमा सेम नेमा साङ सोवा देकिन। 
मिसियाङ ख्‍योरो कोन्‍छ्‍योककी थु चाङ्‍मा नेमा खोला सोवा देकुप पेला यम्‍बा मीतिवी हाक्‍मोकोवी। तुक क्‍यासिन ख्‍योरो खोला थुचिछे सिनी मोपोर क्‍या सिन्‍सिमा चुक क्‍यानी तिवी “आमिन” सिरुप्‍जा? 
ख्‍योरो याङ कोन्‍छ्‍योकला ल्‍यामु क्‍यानी थुचिछे बुल्‍गिवी, यिने मी यम्‍बातिवाला ति तेपा रम्‍बु जोपला काङ साङ दाल्‍जा कि मुथुपी। 
ङ कोन्‍छ्‍योकला थुचिछे बुलिन, च्‍यिलासिसिन ख्‍यिराङ सिनाङ ङ मङ ग्‍येताम कुतुक कुतुकला ताम्‍ङे किवी। 
यिन्‍सिनाङ चर्चला जोम्‍बुप मीतिवाला हाक्‍मोकोवु ग्‍येताम कुतुक कुतुकला ताम्‍ङे तोङ्‍डा च्‍यिथम्‍बा लपुप सिनाङ मीतिवाला येन्‍देन तेरुपला तेरीकी हाक्‍कोवु ताम्‍ङे छिक च्‍यिक ङ्‍यी तिराङ लपुप ति ङे थोक्‍ला मङ ल्‍यामु यिन। 
अच्‍युनुपतिवा, ख्‍यिराङ आङा टिक्‍पेतिवी दोके नासाम मातोङ। दुक्‍टाकी थोक्‍ला ति आङा टिक्‍पेकी दोके किसा, यिने नासाम ति मी छ्‍येकी दोके वुङ गोकितो। 
कोन्‍छ्‍योककी सुङला दुक सिन टि वे, “ङ मीतिवी हाक्‍मोकोवु ग्‍येताम कुतुक कुतुकला छ्‍यिग्‍यपकी मीतिवी ख नेमा दी मीतिवी मुला ताम्‍ङे कितिन, यिन्‍सिनाङ तिवी ङे ताम्‍ङे ति मेङ्‍येन्‍वी।” 
तुक क्‍यानी ग्‍येताम कुतुक कुतुकला ताम्‍ङे कितुप ति कोन्‍छ्‍योकला तेपा कितुपतिवी थोक्‍ला मिन, तेपा मिकिवुतिवी थोक्‍ला त यिन। यिने नम्‍दर शेतुप ति तेपा मिकिवु मीतिवी थोक्‍ला मिन, तेपा कितुप मीतिवी थोक्‍ला त यिन। 
दोजो चर्चकी मीतिवा तेरी जोम्‍नी सी साङ हाक्‍मोकोवु ग्‍येताम कुतुक कुतुकला ताम्‍ङे कितुप पेला ललाइ तेपा मिकिवु मीतिवा याङ्‍ना ताम्‍ङे हाक्‍मोकोवु मीतिवा ते वासिन तिवी चर्चकी मीतिवाला ङ्‍येन्‍बु मिसिरी रो? 
यिने तेरी मीतिवी नम्‍दर शेतिन वोतुप पेला ललाइ तेपा मिकिवु मीतिवा याङ्‍ना ताम्‍ङे हाक्‍मोकोवु मीतिवा ते वासिन, तिवी नम्‍दर शेतुप नेसुर खोप्‍रे दिक्‍पा क्‍यावु ति हाक्‍कोनी खुरुङ ति दिक्‍छेन यिनोक सिरुप ति हाक्‍कोकिवी। 
तमा तीकी खोरो सेमला वोतुप छ्‍याकला ज्‍यकुप ताम्‍ङेतिवा हाक्‍कोनी ती ति खवुतुङ्‍मा देनी कोन्‍छ्‍योकला सोवा देकिवी, तमा “वुतुङ के कोन्‍छ्‍योक ख्‍यिरा पर्ला वे।” सिरुप ति ख्‍याप्‍टाक किवी। 
अच्‍युनुपतिवा, त ङ्‍यिराङ काङ सिरुप्‍जा? ख्‍यिराङ तेरी मुला जोम्‍बुप पेला ख्‍यिरा मुला कोन्‍छ्‍योकला सोवा देकुप लु लङ्‍गुप ताङ येन्‍देन तेरुप ताङ कोन्‍छ्‍योककी छ्‍या तेन नङ्‍गुप ताम्‍ङे लपुप ताङ ग्‍येताम कुतुक कुतुक लपुप ताङ तीकी तेन्‍दोक छिक ग्‍युरुप मीतिवा वे। तिवा तेरी चर्चकी मीतिवाला तेपा रम्‍बु जोपकी थोक्‍ला किशी। 
ललाइकी ग्‍येताम कुतुक कुतुकला ताम्‍ङे कितुप पेला मिरा ङ्‍यी याङ्‍ना मिरा सुम चोयीकी पाला क्‍यानी ताम्‍ङे किशी। तमा तीकी तेन्‍दोक ति छिक ग्‍युरुप साङ किशी। 
यिने ते चर्चला ग्‍येताम कुतुक कुतुकला ताम्‍ङे क्‍यावु ति छिक ग्‍युरुप मी सु साङ मेसिन ती ग्‍येताम कुतुक कुतुकला ताम्‍ङे कितुप ति खरक्‍पा देशी। तमा तीकी खुरुङ ताङ कोन्‍छ्‍योकला तिराङ ताम्‍ङे किशी। 
नम्‍दर शेतुप पेला मिरा ङ्‍यी सुम चोयीकी तिराङ नम्‍दर शेतुप ताम्‍ङे लप्‍शी। तमा ङ्‍येन्‍दुप मीतिवा तिवी सिक्‍यावु ताम्‍ङे ति टेके यिनोक मिनोक सिनी ल्‍यामु क्‍यानी ल्‍हाशी। 
यिने ती पर्ला ते वोतुप मी यम्‍बी नम्‍दर शेसुङ सिसिन गोमाला नम्‍दर शेतुप ति खरक्‍पा देशी। 
तुक क्‍यानी ख्‍यिराङ तेरीकी पाला पाला क्‍यानी नम्‍दर शे थुप्‍किवी। तमा ङ्‍येन्‍दुपतिवा साङ तेरीकी तीकी कोर्ला लोप थुपुप ताङ टोङ्‍गु साङ ङ्‍येकिवी। 
तमा नम्‍दर शेतुप मी तीकी खोरुङ राङ डेकला दे गोकिवी। 
च्‍यिलासिसिन कोन्‍छ्‍योक ति थरा थुरा वोतुप कोन्‍छ्‍योक मिन, यिने लोदिमु नङ्‍गुप कोन्‍छ्‍योक यिन। कोन्‍छ्‍योकला तेपा कितुपतिवा चर्चला जोम्‍बुप पेला 
पुम्‍पेजातिवा ति खरक्‍पा देशी। तिवाला काङ साङ सि माज्‍यी, यिने कोन्‍छ्‍योककी नङ्‍गुप ठिमला सिक्‍यावु दोके तिवा चर्चकी ओङला देशी। 
दोजो तिवी काङ रे च्‍यिक रे टि गोवु ताम्‍ङे वोसिन खाङ्‍बा गल्‍नी दाक दाक्‍पी ख्‍योवाला टिशी। च्‍यिलासिसिन चर्चला पुम्‍पेजातिवा ताम्‍ङे लपुप ति ङोछा यिन। 
काङ कोन्‍छ्‍योककी सुङ ति ख्‍यिराङ कोरिन्‍थकी चर्चकी मीतिवी पर नेमा गो चुवु यिन रो? खोकी सुङ ति ख्‍यिरा पर्ला तिराङ वावु यिन रो? 
सी साङ खुरुङ ति कोन्‍छ्‍योककी लुङ्‍तेम्‍बा याङ्‍ना कोन्‍छ्‍योककी थु चाङ्‍मा थोपुप मी यिन सिनी नोकिवी सिसिन तीकी ङे टिवु ताम्‍ङे ति चोवो येशूकी क यिन सिनी सेमला लङ्‍शी। 
यिने सी दी ताम्‍ङेला मेङ्‍येन्‍वे, तीकी सिक्‍यावु ताम्‍ङेला साङ माङ्‍येन। 
तुक क्‍यानी अच्‍युनुपतिवा, नम्‍दर शेतुपला छासे नो की। तमा ग्‍येताम कुतुक कुतुकला ताम्‍ङे माकी सिनी माग्‍यक। 
यिने तेरी लाकातिवा डिक्‍नी छे क्‍यानी किसा। 
