﻿रोमी.
3.
तुकै यिन्‍सिन यहूदीतिवाला काङ ख्‍येप्‍साङ वे रो? यहूदीतिवी च्‍येतुप लुक्‍सु क्‍यासिमा काङ ख्‍येप्‍साङ गिवी रो? 
ख्‍येप्‍साङ ति बङी वे। ती ति काङ यिन सिसिन थल्‍माला कोन्‍छ्‍योककी यहूदीतिवाला खोकी सुङ टेङ्‍बु ति चेक तेन नङ्‍गुप यिन। 
दोजो तिवा ललाइकी ती सुङला तेपा माक्‍यासिन तिवी तेपा माक्‍यावु तप्‍की कोन्‍छ्‍योक ति खोङ्‍तेर्मु मेतुप कोन्‍छ्‍योक यिन रो? 
तुकै मिन, च्‍यिलासिसिन कोन्‍छ्‍योक ति छासे टेङ्‍बु वोतुप कोन्‍छ्‍योक यिन, यिने मी ति जिनोक जोप यिन। तुक क्‍यानी कोन्‍छ्‍योककी सुङला “चोवोकी सुङ्‍गुप ताम्‍ङेला मी तेरीकी ती सुङ ति टेङ्‍बु वे सिनी सिवी। ठिम कितुप पेला साङ चोवोकी राङ ग्‍येल थुप्‍किवी।” सिनी टि वे। 
दोजो दाक्‍पी दिक्‍पा क्‍यासिमा कोन्‍छ्‍योक ति टेङ्‍बु वोतुप कोन्‍छ्‍योक यिन सिरुप ति हाक्‍कोकिवी सिसिन दाक्‍पु काङ सिरुप? दाक्‍पुला पर्च्या तोङ्‍गुप कोन्‍छ्‍योक ति मेटेङ्‍बु यिन रो? माङ्‍शोक मीतिवी तुकै राङ नासाम तोङ्‍गिवी। 
ती ताम्‍ङे ति तुकै मिन, कोन्‍छ्‍योक ति मेटेङ्‍बु वोतुप यिन्‍सिन चुक क्‍यानी जम्‍बुलिङला ठिम क्‍या नङ्‍गिवी रो? 
दोजो मी ललाइकी “ङे जिनोक जोसिनाङ कोन्‍छ्‍योककी ङे जिनोक जोवु ताम्‍ङेतिवा पङ्‍गुप तप्‍की कोन्‍छ्‍योक ति खोङ्‍तेर्मु वोतुप ताङ खोला मोवा वोतुप ति छ्‍या देन्‍गिवी सिसिन ङ ति च्‍यिला दिक्‍छेन दोके च्‍युङ्‍नी पर्च्याला ख्‍येल्‍गिवी?” सिनी सि थुप्‍किवी रो? 
दोजो मी ललाइकी दाक्‍पी “कोन्‍छ्‍योक नेमा ल्‍यामु च्‍युङ्‍शी सिनी लाका मेलोवा कितुप।” सिवी सिनी दाक्‍पुला ताम्‍ङे मेलोवा क्‍यासिन ती ताम्‍ङे मेलोवा सिरुप मीतिवाला कोन्‍छ्‍योककी पर्च्या फोकिवी। 
तुकै यिन्‍सिन दाक्‍पु काङ सिरुप? दाक्‍पु यहूदीतिवा यहूदी मिन्‍दुप मिरिक यम्‍बाकी मीतिवा सिनाङ टेङ्‍बु वे रो? तुकै मिन। यहूदी ताङ यहूदी मिन्‍दुप मिरिक यम्‍बाकी मीतिवा तेरी दिक्‍पी ओङला राङ वे। दी ताम्‍ङे ति ङे गोमाला साङ सिक्‍यायी। 
ती तप्‍की कोन्‍छ्‍योककी सुङला दुक सिनी टि वे, “कोन्‍छ्‍योककी थोङ्‍दाङला टेङ्‍बु वोतुप सु साङ मे, मिरा च्‍यिक साङ मे। 
कोन्‍छ्‍योककी थोक्‍ला हाक्‍कोवु सु साङ मे, तमा कोन्‍छ्‍योकला छोलुप सु साङ मे। 
मीतिवा तेरी ख्‍यप्‍नी गल वे, तमा तिवा तेरी फेन मोथोवु गल वे। सी साङ लाका ल्‍यामु मिकिवी, ल्‍यामु कितुप ति मिरा च्‍यिक साङ मे।” 
“तिवी ख नेमा मी सेतुप ताम्‍ङे मेलोवा लप्‍किवी, तमा तिवी मीला जिनोक जोप ताम्‍ङे किवी।” “तुक क्‍यानी तिवी ख नेमा लापुप ताम्‍ङे ति रुलकी च्‍येलाकला वोतुप तुक दोके छासे मेलोवा वे।” 
“तिवी ख नेमा मोताप ताङ ताम्‍ङे मेलोवा तिराङ थेन्‍गिवी।” 
“तिवा मी सेतुपला टिम्‍बु टिम्‍बु युकिवी, 
ती तप्‍की तिवा कनी डिवे, ते तिवी मी यम्‍बी लाकाला ना तोङ्‍गुप ताङ दुक्‍पा तेरुप लाका मेलोवातिवा किवी। 
तिवी चुक क्‍यानी लोदिमु गिवी सिरुप ति हाक्‍माको वे।” 
“तिवा कोन्‍छ्‍योकला काङ साङ ज्‍यिवा मिकिवी।” 
दी मोशाकी ठिमला सिक्‍यावु तेरी ताम्‍ङे ति ठिमकी ओङला वोतुप मीतिवाला राङ सिक्‍यावु यिन सिरुप ति दाक्‍पुला छ्‍या वे। ती तप्‍की तेरी जम्‍बुलिङकी मीतिवा कोन्‍छ्‍योककी दोङ्‍ला ख चुम क्‍या देनी तेरी मीतिवा दिक्‍छेन यिनोक सिनी हाक्‍कोवा कि गोकिवी। 
तुक क्‍यानी मोशाकी ठिमला वोतुप लाकातिवा तिराङ क्‍यानी मी सु साङ कोन्‍छ्‍योककी थोङ्‍दाङला टेङ्‍बु मेङ्‍येवी, च्‍यिलासिसिन मोशाकी ठिम नेसुर दाक्‍पी दिक्‍पाकी कोर्ला तिराङ हाक्‍कोकिवी। 
यिने त याङ मोशाकी ठिम मेसिनाङ कोन्‍छ्‍योक नेमा वावु टेङ्‍बु ति छ्‍या तेन वे। तीकी कोर्ला मोशाकी ठिम ताङ कोन्‍छ्‍योककी लुङ्‍तेम्‍बातिवी गोमाला के पङ्‍बु बिन वे। 
ती कोन्‍छ्‍योक नेमा वावु टेङ्‍बु ति येशू ख्रीष्‍टला तेपा क्‍यासिमा मी तेरीला वुङ्‍गुप यिन। खोकी सुला साङ नाम्‍साङ ख्‍ये मेबेवी। 
च्‍यिलासिसिन मी तेरीकी दिक्‍पा क्‍यावु तप्‍की सु साङ मोवा वोतुप कोन्‍छ्‍योककी चिप्‍ला लेप मुथुप्‍नोक। 
यिने कोन्‍छ्‍योक ति कटिन नङ्‍गुप कोन्‍छ्‍योक यिन। खोकी ख्रीष्‍ट येशू नेसुर थर्वा नङ्‍नी मीतिवाला गोङ ते मागोवा क्‍यानी टेङ्‍बु यिन सिनी खोरे सेमला लासुङ। 
कोन्‍छ्‍योककी येशू ख्रीष्‍ट ग्‍यङ्‍शिङला टुङ च्‍यिनी खोकी ठक ति जिन्‍बा ताङ्‍सुङ। ती तप्‍की येशू ख्रीष्‍टकी ठक ति दाक्‍पी थोक्‍ला तेन्‍दुप यिन सिनी तेपा क्‍यासिमा दाक्‍पी दिक्‍पातिवा तेरी ताकिवी। कोन्‍छ्‍योककी तुक क्‍या नङ्‍गुप ति दाक्‍पी गोमाला क्‍यावु दिक्‍पाकी थोक्‍ला हम क्‍यासिमा पर्च्या माताङ्‍नी खो टेङ्‍बु वोतुप ति छ्‍या देन्‍दुपला यिन। 
खोकी हम क्‍यानी पर्च्या माताङ्‍नी तन्‍दा दी कल्‍वाला टेङ्‍बु वोतुप छ्‍या तेन्‍दुप तेन्‍दोक ति खो टेङ्‍बु वोतुप ताङ येशूला तेपा कितुपतिवा तेरी टेङ्‍बु वोतुप ति मीतिवाला हाक्‍को ज्‍यितुपला यिन। 
ती तप्‍की दाक्‍पु कङगी थोक्‍ला तेके किवी? कोन्‍छ्‍योककी थोङ्‍दाङला दाक्‍पु तेके कितुप काङ लाका माक्‍या वे। चुका ठिमकी थोक्‍ला तेके किवी? खोकी दोङ्‍ला तेके कितुप ति ठिमकी सिक्‍यावु दोके ल्‍यामु क्‍यानी युकुप नेसुर यिन? मिन, येशू ख्रीष्‍टला तेपा क्‍यावु तप्‍की यिन। 
तुक क्‍यानी कोन्‍छ्‍योककी थोङ्‍दाङला टेङ्‍बु वोतुप ति मोशाकी ठिमला मिजी क्‍यङ्‍नी मिन, यिने येशू ख्रीष्‍टला तेपा क्‍यासिमा तिराङ टेङ्‍बु ङ्‍येकिवी। 
काङ कोन्‍छ्‍योक ति यहूदीतिवी तिराङ कोन्‍छ्‍योक यिन रो? यहूदी मिन्‍दुप मिरिक यम्‍बाकी मीतिवी कोन्‍छ्‍योक मिन रो? वुतुङ के खो यहूदी मिन्‍दुप मिरिक यम्‍बाकी मीतिवी कोन्‍छ्‍योक साङ यिन। 
कोन्‍छ्‍योक ति च्‍यिक राङ वोतुप यिन। तुक क्‍यानी खोकी यहूदीतिवी च्‍येतुप लुक्‍सु क्‍यावुतिवाला तिवी क्‍यावु तेपा थोङ्‍नी तिवा टेङ्‍बु वोतुप ङ्‍येकिवी, च्‍येतुप लुक्‍सु माक्‍यावुतिवाला साङ तिवी क्‍यावु तेपा थोङ्‍नी तिवा टेङ्‍बु वोतुप ङ्‍येकिवी। 
तुकै यिन्‍सिन काङ दाक्‍पु येशूला तेपा क्‍यासिमा मोशाकी ठिम ति क्‍युर्नी ज्‍योकुप यिन रो? मिन, ती ठिमला मङ रम्‍बु जोनी ज्‍यकुप यिन। 
