﻿लूका.
20.
ङ्‍यिम्‍ज्‍यिक येशूकी यहूदी ल्‍हङाङला मीतिवाला येन्‍देन लोपुप ताङ कोन्‍छ्‍योककी लेन ल्‍यामु ख्‍याप्‍टाक क्‍या नङ्‍यिन नोक। ती पेला कोङ्‍यार छ्‍येतिवा ताङ यहूदी छ्‍योकी गेकेनतिवा यहूदी गोमा कितुप मी छ्‍येतिवा ताङ मुला खोकी चाला वानी 
दुक सिक्‍यासुङ, “ङ्‍यिराङला सी! चुका ओङ्‍ज्‍येन नेसुर ख्‍योरे दी लाकातिवा कियी वे? सी ख्‍युरुङला दी ओङ्‍ज्‍येन बिन्‍दुप यिन?” 
तमा खोकी तिवाला सुङ्‍सुङ, “ङ साङ ख्‍यिराङला ताम्‍ङे यी टेयिन। ङला सी। 
यूहन्‍नाकी बप्‍तिस्‍मा ति देवाच्‍येन नेमा यिनाङ की, मी नेमा यिनाङ?” 
ती थोसिमा तिवी खोप्‍राङ पर्ला दुक सिक्‍यासुङ, “‘देवाच्‍येन नेमा’ सिरुप सिसिन ‘ख्‍यिरा च्‍यिला तीला तेपा माक्‍या।’ सिनी सिवी, 
‘मी नेमा’ सिरुप सिसिन तेरी मीतिवी दाक्‍पुला दो बेप्‍किवी, च्‍यिलासिसिन यूहन्‍ना ति कोन्‍छ्‍योककी लुङ्‍तेम्‍बा यिन सिनी तिवी तेपा क्‍यानोक।” 
ती तप्‍की तिवी, “ङ्‍यिराङला छ्‍या मे, ती ति कनी नेसुर वावु यिनाङ।” सिनी सिक्‍यासुङ। 
तमा येशूकी तिवाला सुङ्‍सुङ, “तुकै यिन्‍सिन ङ साङ चुका ओङ्‍ज्‍येन नेमा दी लाकातिवा कियी वे ख्‍यिराङला मिसिर।” 
येलुङ येशूकी मीतिवाला दी पे ति शेन नाङ्‍सुङ, “मी मिरा च्‍यिककी गुन्‍डुम शिङ जोनी सप्‍ले कितुपतिवाला पिज्‍यिङला ताङ्‍नी खुरुङ ति थाक्‍रिङ्‍बु मी लुङ्‍बा गल्‍नी अलायी सेक ते देसुङ। 
तमा गुन्‍डुम रुकुप पेला तीकी खोरुङला थोपुप गुन्‍डुम लङ्‍गुपला लावा मिरा च्‍यिकला पिज्‍यिङ्‍बातिवी ते ताङ्‍सुङ। यिने पिज्‍यिङ्‍बातिवी तीला दुनी तोङ्‍बा राङ लोक्‍नी ताङ्‍नोक। 
येलुङ तीकी यम्‍बा लावा यीला ताङ्‍सुङ। यिने तिवी तीला साङ कशेन दुनी खक्‍योवा लङ्‍नी तोङ्‍बा राङ लोक्‍नी ताङ्‍नोक। 
येलुङ तीकी थेङ्‍मा सुम्‍बाला लावा यीला ताङ्‍सुङ, तमा तिवी तीला साङ दुनी म तेन्‍नी तेन ताङ्‍नोक। 
ती ज्‍युक्‍ला शिङ ज्‍यिन्‍दाक तीकी सिक्‍यासुङ, ‘ङ काङ कितुप? त याङ ङ ङरा ङ्‍यिङ्‍ज्‍येवु पुज्‍युङ तीला राङ तोङ्‍यिन, तिवी ङे पुज्‍युङला याङ ताङ्‍देन किते यिन्‍दे।’ 
यिने पिज्‍यिङ्‍बातिवी तीला थोङ्‍सिमा खोप्‍राङ पर्ला दुक सिनी ताम्‍ङे क्‍यासुङ, ‘दी याङ ज्‍यिन्‍दाककी अंश थोप छ्‍योवु यिन, दीला दाक्‍पु सेतुप, तमा तीकी अंश तिङ दाक्‍पुला राङ च्‍युङ्‍गिवी।’ 
तमा तिवी तीला गुन्‍डुम शिङगी पाङ्‍ला तेन ताङ्‍नी सेसुङ। त गुन्‍डुम शिङ ज्‍यिन्‍दाक तीकी तिवाला काङ किताङ? 
ती ति वानी पिज्‍यिङ्‍बातिवाला सेकिवी, तमा गुन्‍डुम शिङ ति यम्‍बा पिज्‍यिङ्‍बातिवाला राङ तोङ्‍गिवी।” ती थोनी मीतिवी सिक्‍यासुङ, “दुकै याङ नाम्‍साङ मेङ्‍शी।” 
येशूकी तिवाला केरी ल्‍हानी सुङ्‍सुङ, “तुकै यिन्‍सिन दी कोन्‍छ्‍योककी सुङला टिवु ति काङ यिनाङ? ‘चुका दो तीला खार चिकुपतिवी फेन मोथोवु सिनी क्‍युर्नी ज्‍याक्‍वे, ती दो ति सुरकी खक्‍छ्‍येवु दो च्‍युङ्‍सुङ।’ 
तमा सु ती दे खला लुम्‍गिवे, ती ति तेरी ठमा ठुमा टुम्‍गिवी। सी खला ती दो ति लुम्‍गिवे, तीला थल्‍दुक जेवी।” 
तमा ती पेला राङ यहूदी छ्‍योकी गेकेनतिवा ताङ कोङ्‍यार छ्‍येतिवी खोला जिम्‍बुप छाल्‍सुङ, च्‍यिलासिसिन तिवी ती पे ति खोप्‍रे तेन्‍दोकला राङ सुङ्‍गुप यिन सिनी छ्‍या नोक। यिने तिवा मीतिवाला ज्‍यिवा किनोक। 
ती ज्‍युक्‍ला तिवी च्‍यु ल्‍हानी देसिमा च च्‍येतुप मीतिवाला मी टेङ्‍बुतिवा दोके जोनी येशूकी चाला ताङ्सुङ, तमा खोकी सुङ्‍गुप ताम्‍ङेला गोकोर्सिमा खोला रोमी ओङ्‍ज्‍येन कितुप मी छ्‍येकी लकला चेक तेतुप नो क्‍यानोक। 
तुक क्‍यानी ती च च्‍येतुप मीतिवी येशूला दुक सिनी टिसुङ, “गेकेन, ङ्‍यिराङला छ्‍या वे, गेकेनकी ताम्‍ङे टेङ्‍बु सुङ्‍गुप ताङ लोप्‍किवी। गेकेनकी मीतिवाला ख्‍ये मेबेवी, यिने कोन्‍छ्‍योककी लाम टेङ्‍बु तिराङ लाप नङ्‍गिवी। 
ङ्‍यिरा रोमी ग्‍येल्‍वु कैसरला से तेतुप ति दाक्‍पी ठिमला डिकी ताङ मिडिकिवी?” 
येशूकी तिवी सेमला च्‍यङ्‍बु क्‍यावु ति हाक्‍कोनी तिवाला सुङ्‍सुङ, 
“ङला ङुलकी डप्‍बु च्‍यिक छ्‍या तेन। दी लोला सी रिमुङ ताङ सी यिकी टि वे?” तमा तिवी सिक्‍यासुङ, “कैसरकी ति यिन।” सिनी सिक्‍यासुङ। 
तमा येशूकी तिवाला सुङ्‍सुङ, “तुकै यिन्‍सिन कैसरकी ति कैसरला राङ ते, कोन्‍छ्‍योककी ति कोन्‍छ्‍योकला राङ पुल।” 
तिवी मी मिङ्‍गाला खोकी सुङ्‍गुप ताम्‍ङे नेसुर खोला गोकोर माथुप, तमा खोकी टिलेन थोनी हलेवा लानी खरक्‍पा देसुङ। 
तमा ललाइ सदुकीतिवी येशूकी चाला वासुङ। सदुकी छ्‍योक्‍पाकी मीतिवा ति मी शिसिमा येलुङ सेन्‍बु मलङ्‍गिवी सिनी तेपा कितुप मीतिवा यिनोक। तिवी येशूला दुक सिनी टिसुङ, 
“ओ गेकेन, मोशाकी दाक्‍पुला दुक सिनी ठिम टिनी बिन्‍सुङ, ‘मी ललाइकी ति अच्‍यु पेजा माक्‍येवा क्‍यानी सिसिन तीकी छाम ताङ मुला जेन्‍दी क्‍यानी खोरो अच्‍युकी थोक्‍ला गिपा फेल ज्‍यि गोकिवी।’ 
दासा यीला मी मिरा च्‍यिककी ति अच्‍युनुप पिन दिन नोक। तिवी पर्ला पिन छ्‍ये तीकी जेन्‍दी क्‍यासुङ, यिने पेजा माक्‍येवा क्‍यानी शिसुङ। 
तमा पिन माहिला तीकी खोरो छाम ताङ मुला जेन्‍दी क्‍यासुङ। 
ती ज्‍युक्‍ला साहिला तीकी साङ छाम ताङ मुला जेन्‍दी क्‍यासुङ। तुक राङ क्‍यानी तिवा पिन दिन्‍करकी जेन्‍दी क्‍यासिमा तेरी पेजा माक्‍येवा क्‍यानी राङ शिसुङ। 
ती ज्‍युक्‍ला ती छाम तिङ शिसुङ। 
तुकै यिन्‍सिन शेप ने सेन्‍बु लङ्‍गुप पेला ती पुम्‍पेजा ति सी पेर्मी च्‍युङ्‍गिवी? च्‍यिलासिसिन ती ति तिवा पिन दिन्‍कर ताङ मुला जेन्‍दी क्‍यानोक।” 
तमा येशूकी तिवाला सुङ्‍सुङ, “दी कल्‍वाकी मीतिवा ति जेन्‍दी साङ किवी। 
यिने ती ज्‍युककी कल्‍वा ताङ शेप ने सेन्‍बु लङ्‍गुपला छ्‍योवु वोतुपतिवा याङ जेन्‍दी मिकिवी, 
यिने तिवा देवाच्‍येनकी लेन क्‍योलुप थुतिवा दोके च्‍युङ्‍नी येलुङ नाम्‍साङ मिसिवी। तिवा शेप ने सेन्‍बु लावु तप्‍की कोन्‍छ्‍योककी पेजातिवा यिन। 
तमा शेपतिवा सेन्‍बु लङ्‍गिवी सिरुप ताम्‍ङेकी कोर्ला मोशाकी साङ बुलुक दोङ्‍बी पे नेसुर छ्‍या तेन्‍सुङ, च्‍यिलासिसिन तीकी चोवोला ‘अब्राहामकी कोन्‍छ्‍योक ताङ इसहाककी कोन्‍छ्‍योक ताङ याकूबकी कोन्‍छ्‍योक यिन।’ सिनी रेन्‍सुङ। 
खो ति शेपतिवी कोन्‍छ्‍योक मिन, यिने सेन्‍बुतिवी कोन्‍छ्‍योक यिन, च्‍यिलासिसिन कोन्‍छ्‍योककी थोङ्‍दाङला तेरी सेन्‍बु वे।” 
तमा यहूदी छ्‍योकी गेकेनतिवा ललाइकी “गेकेन, गेकेनकी याङ टेके राङ सुङ्‍सुङ।” सिनी सिक्‍यासुङ। 
ती ज्‍युक्‍ला सी साङ खोला टिवा यम्‍बा टेप ङाडेङ माक्‍या। 
तमा येशूकी तिवाला टि नाङ्‍सुङ, “चुक क्‍यानी मीतिवी ख्रीष्‍ट ति दाऊदकी गिपा यिन सिवी? 
भजनसंग्रह नाङ्‍ला दाऊद खोरो राङ दुक सिनी टि वे, ‘चोवो कोन्‍छ्‍योककी ङे चोवोला 
“ङे ख्‍योरो डतिवाला ख्‍योरो काङ्‍बी वोक्‍ला मालेपा सेक्‍ला ख्‍युरुङ ङे यावी थाकाला दे।” सिनी सुङ्‍नी वे।’ 
दाऊदकी ख्रीष्‍टला चोवो सिनी सिसिन चुक क्‍यानी खो ति दाऊदकी गिपा च्‍युङ थुप्‍किवी?” 
मी तेरीकी येशूकी सुङ्‍गुप ताम्‍ङे ङ्‍येनिन वोतुप पेला खोकी लोमातिवाला सुङ्‍सुङ, 
“ख्‍यिराङ यहूदी छ्‍योकी गेकेनतिवा नेसुर च्‍याङ्‍से देता। तिवा छ्‍योवा रिङ्‍बु रिङ्‍बु कोन्‍नी फार छुर युकुप गा किवी, हाला मीतिवी खुरुङला छ्‍याक पुलुप गा किवी। तमा यहूदी छ्‍योखाङला तेरी सिनाङ खक्‍छ्‍येवु टाल जिम्‍नी देतुप ताङ डेनला टाल जिम्‍नी देतुप गा किवी। 
तिवी पेर्मी युक्‍सिमतिवी टोङ्‍बा ठोकिवी, तमा मी यम्‍बाला छ्‍या देन्‍दुपला मोपोर रिङ्‍बु रिङ्‍बु किवी। तुक कितुपतिवाला कोन्‍छ्‍योककी मङ पर्च्या ग्‍येर्पु फोकिवी।” 
