﻿मत्ती.
27.
ती सला टोपला टेताङ कोङ्‍यार छ्‍येतिवा ताङ यहूदी गोमा कितुप मी छ्‍येतिवा तेरी जोम्‍नी येशूला सेतुप सिनी केवुल क्‍यासुङ। 
तमा तिवी येशूला कोङ किन्‍नी तेसुर टि गल्‍नी रोमी ठिम कितुप मी छ्‍ये पिलातसला चेक तेसुङ। 
ती पेला येशूला क्‍येन तेरुप यहूदा ति खोला सेतुप छ्‍येर्पा कलुप थोङ्‍सिमा खोरो मेलोक्‍पा क्‍यावु यिन सिनी सेम्‍दुक लानी ती ङुलकी डप्‍बु खल सुम ति कोङ्‍यार छ्‍येतिवा ताङ यहूदी गोमा कितुपतिवाला लोकिन सिरा 
“ङे याङ काङ साङ क्‍येन मेतुप मीला क्‍येन बिन्‍नी दिक्‍पा क्‍यायी।” सिनी सिक्‍यासुङ। यिने तिवी तीला “ङ्‍यिराङला काङ सिवी? ती ति ख्‍योरो राङ जोवु यिन।” सिनी सिक्‍यासुङ। 
तमा यहूदाकी ती ङुलकी डप्‍बुतिवा ल्‍हङाङ नाङ्‍ला राङ क्‍युर ज्‍याक्‍नी तेसुर थेन गल्‍नी खोरुङ राङ नामला कल्‍नी शिनोक। 
तमा कोङ्‍यार छ्‍ये तीकी ती ङुलकी डप्‍बुतिवा रुनी, “दी ति मी सेतुपला लावु टङ्‍गा यिन, तुक क्‍यानी ल्‍हङाङकी टङ्‍गी मुला ज्‍योकुप मेवी।” सिनी सिक्‍यासुङ। 
तमा तिवी ती टङ्‍गा थ्‍वोनी थली नेक्‍योक जोप मीकी शिङ ङ्‍योनी ती शिङ ति छ्‍यिग्‍यपतिवा कल्‍दोक कितुप दासा जोपला तेन्‍तेन क्‍यासुङ। 
तुक क्‍यानी ती शिङला तन्‍दा सेक ठककी शिङ सिनी सिवी। 
तमा कोन्‍छ्‍योककी लुङ्‍तेम्‍बा यर्मिया नेसुर दुक सिनी सुङ्‍गुप कोन्‍छ्‍योककी सुङ ति तेरी छेसुङ, “तिवी इस्राएलकी मीतिवी गोङ ग्‍यपुप मीकी ङुलकी डप्‍बु खल सुम लानी 
ती टङ्‍गा ति थली नेक्‍योक जोप मीकी शिङ ङ्‍योपला थोसुङ। ती ति चोवो कोन्‍छ्‍योककी ङला क नङ्‍गुप दोके यिन।” 
ती ज्‍युक्‍ला येशू रोमी ठिम कितुप मी छ्‍ये पिलातसकी दोङ्‍ला लासुङ। तमा तीकी येशूला “काङ ख्‍युरुङ यहूदीतिवी ग्‍येल्‍वु यिन?” सिनी टिसुङ। तमा येशूकी तीला “यिन, ख्‍योरे सिक्‍यावु दोके राङ यिन।” सिनी सुङ्‍सुङ। 
तमा येशूकी ते कोङ्‍यार छ्‍येतिवा ताङ यहूदी गोमा कितुपतिवी क्‍येन ग्‍यपुप ताम्‍ङेला काङ साङ टिलेन मानाङ। 
ती पेला पिलातसकी येशूला “तिवी ख्‍योरो तेन्‍दोकला पङ्‍बु बङी बिन्‍दुप ति ख्‍योरो माथो?” सिनी सिक्‍यासुङ। 
यिने येशूकी तीला ताम्‍ङे च्‍यिक साङ मासुङ, तमा तिवी ग्‍यपुप क्‍येनकी पर्ला च्‍यिकला साङ ताम्‍ङे मासुङ। ती थोङ्‍नी रोमी ठिम कितुप मी छ्‍ये ति छासे हलेवा क्‍यासुङ। 
यहूदी थरुप तुछ्‍येनला रोमी ठिम कितुप मी छ्‍ये तीकी चोन्‍खाङला शोरुप मीतिवी नाङ्‍ला लुङ्‍बाकी मीतिवी पेतुप मी मिरा च्‍यिकला पि तोङ ज्‍यितुप लुक्‍सु नोक। 
तमा ती पेला मीतिवा तेरीकी छ्‍या वोतुप बरब्‍बा सिरुप छासे मी दुक्‍टा यी चोन्‍खाङला शोर्नोक। 
ते मीतिवा बङी जोम्‍सिमा पिलातसकी तिवाला “ख्‍यिरा थोक्‍ला ङे सुला पि तोङ्‍शी सिनी नो किवी? बरब्‍बाला पि तोङ्‍गुप की, ख्रीष्‍ट सिरुप येशूला पि तोङ्‍गुप?” सिनी टिसुङ। 
च्‍यिलासिसिन यहूदीतिवा ठतोक लानी येशू ति खोरुङला चेक तेतुप यिन सिनी पिलातसला छ्‍या नोक। 
तमा पिलातस ठिम कितुप ठीला देनी वोतुप पेला तीकी पेर्मीकी तीला “ती क्‍येन मेतुप मी तीला काङ साङ माकी, च्‍यिलासिसिन हारिङ नुपला मिलामला तीकी थोक्‍ला ङे छासे दुक्‍पा खुरिन।” सिनी लेन ताङ्‍नोक। 
यिने कोङ्‍यार छ्‍येतिवा ताङ यहूदी गोमा कितुप मी छ्‍येतिवी मी माङ्‍छ्‍योकला चेन्‍नी बरब्‍बाला ति पि ताङ्‍नी येशूला ति सेतुप छ्‍येर्पा बिन सिनी सि च्‍यिसुङ। 
येलुङ पिलातसकी तिवाला “दिवा ङ्‍यिवी पर्ला ङे चुका तीला पि तोङ्‍शी सिरुप ख्‍यिरा नो वे?” सिनी टिसुङ। तमा तिवी “बारब्‍बाला राङ पि तोङ।” सिनी च्‍यार ग्‍यप्‍सुङ। 
तमा पिलातसकी तिवाला “तुकै यिन्‍सिन दी ख्रीष्‍ट सिरुप येशू तीला ति ङ काङ कितुप?” सिनी टिसुङ। तमा तिवा तेरीकी “तीला ग्‍यङ्‍शिङला कल्‍नी काँडी दाप्‍नी से।” सिनी च्‍यार ग्‍यप्‍सुङ। 
पिलातसकी तिवाला “च्‍यिला? दीकी काङ मेलोवा क्‍या वे?” सिनी टिसुङ। यिने तिवी मङ च्‍यार ग्‍यकिन सिरा “तीला ग्‍यङ्‍शिङला कल्‍नी काँडी दाप्‍नी से।” सिनी सिक्‍यासुङ। 
पिलातसकी खोरो राङ काङ कि मुथुपुप ताङ मीतिवा हराङ हुरुङ कितुप छलुप थोङ्सिमा मी माङ्‍छ्‍योककी मिङ्‍गाला छ्‍यु थ्‍वोनी लाक्‍पा टुयी सिरा “दी मीला सेतुप क्‍येन ति ङला मे। ती क्‍येन ति ख्‍यिरा राङ खुर गोकितो!” सिनी सिक्‍यासुङ। 
तमा मीतिवा तेरीकी मुला राङ “दी मीला सेतुप क्‍येन ति ङ्‍यिराङ ताङ ङ्‍यिरा गिपातिवाला राङ ख्‍येल्‍शी।” सिनी सिक्‍यासुङ। 
तमा पिलातसकी बरब्‍बाला ति पि ताङ्‍नी येशूला ति पाङ्‍शर तोङ ज्‍यितुप ताङ ग्‍यङ्‍शिङला कल्‍नी काँडी दाप्‍नी सेतुपला रोमी मक्‍मीतिवाला चेक तेसुङ। 
ती ज्‍युक्‍ला पिलातसकी मक्‍मीतिवी येशूला रोमी ठिम कितुप मी छ्‍ये देतुप खाङ्‍बाला टि गल्‍नी यम्‍बा मक्‍मीतिवा तेरीला कताङ्‍नी ते जोम च्‍यिसुङ। 
तमा तिवी येशूकी नम्‍सा ति पिनी खोला छ्‍योवा मुक्‍पु यी कोन बिन्‍नी 
छेर्माङ वोतुप येल्‍का कुक्‍नी ग्‍येल्‍वी उशाक दोके जोनी खोकी गोला कोन बिन्‍सुङ। तमा तिवी खोकी छ्‍याक नालोक्‍पाला ङ्‍युङ्‍मी लकाम जिम च्‍यिनी खोकी दोङ्‍ला पुमुङ सला चुनी, “ओ यहूदीतिवी ग्‍येल्‍वु, ख्‍युरुङला छे रिङ्‍बु च्‍युङ्‍शी।” सिनी खोला मारे ताङ्‍सुङ। 
ती ज्‍युक्‍ला तिवी खोला छ्‍यिन्‍दुर ग्‍यप्‍नी खोकी छ्‍याकला ज्‍यकुप ङ्‍युङ्‍मी लकाम ति ठोनी खोकी गोला राङ पोप्‍सुङ। 
तिवी तुक क्यानी खोला मारे ताङ सिन्‍सिमा छ्‍योवा मुक्‍पु ति पिनी गोमाला खोकी नुम्‍बुप नम्‍सा ति येलुङ कोन बिन्‍नी ग्‍यङ्‍शिङला कल्‍नी काँडी दाप्‍नी सेतुपला टि गाल। 
तमा तिवी येशूला टि डोयी कितुप पेला कुरेनी नेमा वावु सिमोन सिरुप मी यीला लामला ठेनी तीला येशूला कल्‍नी सेतुप ग्‍यङ्‍शिङ ति कार क्‍यानी खुर च्‍यिसुङ। 
तेसुर तिवा गलगथा सिरुप दासाला लेप्‍नोक। ती गलगथा सिरुप तेन्‍दोक ति ‘कप्‍लीकी दासा’ सिक्‍यावु यिन। 
ते लेप्‍सिमा तिवी येशूला ठिवा र्‍हेवु गुन्‍डुम छ्‍याङ थुङ्‍गुपला बिन्‍सुङ। यिने खोकी ती गुन्‍डुम छ्‍याङ ति च्‍यिप क्‍यासिमा थुङ्‍गुप माङ्‍येन। 
तमा मक्‍मीतिवी खोला ग्‍यङ्‍शिङला काँडी दाप्‍नी कल्‍सिमा खोकी नम्‍सातिवा ग्‍येन ग्‍यप्‍नी खोप्‍रे पर्ला गोसुङ। 
ती ज्‍युक्‍ला तिवा खोला र्‍हेन्‍नी देसुङ। 
तमा खोकी गो तेङ्‍ला “दी ति यहूदीतिवी ग्‍येल्‍वु येशू यिन।” सिरुप क्‍येन ग्‍यपुप यिकी यी पङ्‍लिङ लोला टिनी ग्‍यम ज्‍याक्‍नोक। 
येशूला ग्‍यङ्‍शिङला काँडी दाप्‍नी ग्‍येलुप पेला च्‍याक्‍पा मिरा ङ्‍यीला साङ च्‍यिक ति खोकी यावी थाकाला ताङ च्‍यिक ति खोकी येन्‍बी थाकाला ग्‍यङ्‍शिङला काँडी दाप्‍नी काल्‍सुङ। 
ते लाम नेवा फार छुर युकुप मीतिवी गो युकिन सिरा येशूला मारे ताङ्‍नी, 
“ओ ल्‍हङाङ र्‍हम्‍नी ङ्‍यिमा सुमला राङ जोयी सिरुप मी, ख्‍योरो खुरुङला राङ र्‍होक। ख्‍युरुङ कोन्‍छ्‍योककी सेवु यिन्‍सिन ग्‍यङ्‍शिङ लो नेमा मर पाम शोक।” सिनी सिक्‍यासुङ। 
तमा तुक राङ क्‍यानी कोङ्‍यार छ्‍येतिवी साङ यहूदी छ्‍योकी गेकेनतिवा ताङ यहूदी गोमा कितुप मी छ्‍येतिवी मुला मुला राङ खोला मारे ताङ्‍नी दुक सिक्‍यासुङ, 
“दीकी मी यम्‍बाला याङ र्‍होक्‍सुङ, यिने खोरुङला ति र्‍होक माथुप। दी इस्राएलकी ग्‍येल्‍वु मिन? दी ति तन्‍दा राङ ग्‍यङ्‍शिङ लो नेमा पाम वासिन ङ्‍यिराङ दीला तेपा कितुप्‍जा। 
दीकी कोन्‍छ्‍योकला रेवा क्‍यासुङ। दोजो कोन्‍छ्‍योककी नोवा वोसिन खोकी राङ दीला र्‍होकिते यिन्‍दे, च्‍यिलासिसिन दीकी ‘ङ कोन्‍छ्‍योककी पुज्‍युङ यिन।’ सिनी सिक्‍या वे।” 
तमा येशूकी मुला ग्‍यङ्‍शिङला कलुप च्‍याक्‍पातिवी साङ तुक राङ सिनी खोला मारे ताङ्‍सुङ। 
ती पेला ङ्‍यिमी गुङगी छ्‍युजी च्‍यिङ्‍ङी नेज्‍युन छ्‍युजी सुम सेक लुङ्‍बा तेरीला नक्‍तोमी गाल। 
तमा छ्‍युजी सुम चोयीला येशू “इलोई इलोई लामा सबखथनी।” सिनी थोर ग्‍यप्‍सुङ। तीकी तेन्‍दोक ति “ओ ङे कोन्‍छ्‍योक, ओ ङे कोन्‍छ्‍योक, ख्‍योरे ङला च्‍यिला क्‍युर्नी ज्‍यकुप यिन?” सिक्‍यावु यिन। 
ती थोनी ते लानी वोतुप मीतिवा ललाइकी “दी मी तीकी याङ एलियाला के कतोङ्‍गिनोक।” सिनी सिक्‍यासुङ। 
तमा तिवी पर्ला मिरा च्‍यिक ति टिम्‍बु टिम्‍बु छ्‍योङ्‍बाल ग्‍यम गल्‍नी ल्‍हेन्‍दा यी लानी तीला गुन्‍डुम छ्‍याङ क्‍युर्वुकी नाङ्‍ला पासिमा ती ति लकाम गोला ज्‍याक्‍नी येशूला थुङ च्‍यिसुङ। 
यिने ते देतुप मी यम्‍बातिवी “उकुर च्‍यिक देशी। दीला र्‍होकुपला एलिया गिते यिन्‍दे ल्‍हाप।” सिनी सिक्‍यासुङ। 
तमा लोङ येशू थोर ग्‍यप्‍नी वोरु तेन्‍सिमा खोकी उ छ्‍येसुङ। 
ती पेला राङ यहूदी ल्‍हङाङ नाङ्‍ला ग्‍यावु गोयोल ति गो नेमा ज्‍युनी शाप सेक फेका ङ्‍यी गल्‍नी राल्‍सुङ। तमा सयी ग्‍यप्‍नी दो ग्‍येर्पु साङ टुम्‍सुङ। 
तमा शेप मीला ज्‍योकुप टककी फुककी खतिवा पेनी ती नाङ्‍ला ज्‍यकुप कोन्‍छ्‍योकला तेपा क्‍यावु टेङ्‍बु वोतुप मीतिवा बङी शेप ने सेन्‍बु लासुङ। 
तिवा येशू टुङ्‍नी ङोसु लावु ज्‍युक्‍ला शेप मीला ज्‍योकुप टककी फुक नेवा थेन्‍नी यरूशलेम ग्‍येसाला गल्‍नी मी बङीकी चिप्‍ला छ्‍यर्सुङ। 
ती पेला रोमी मक्‍मी सयी च्‍यिककी खकी छ्‍ये ताङ तीकी मुला येशूला र्‍हेन्‍दुप मक्‍मीतिवी सयी ग्‍यकुप ताङ ते च्‍युङ्‍गुप ताम्‍ङेतिवा थोङ्‍सिमा छासे ज्‍यिवा कियी सिरा “वुतुङ के दी याङ कोन्‍छ्‍योककी सेवु राङ यिनोक।” सिनी सिक्‍यासुङ। 
ते पुम्‍पेजातिवा साङ बङी थाक्‍रिङ्‍बु नेसुर ल्‍हानी देनोक। तिवा ति येशूला शब्‍ज्‍यी कियी सिरा गालील नेसुर खोकी तिङ्‍ला तिङ्‍यानी वावु यिनोक। 
तिवी पर्ला मरियम मग्‍दलिनी, याकूब ताङ योसेफकी आमा जब्‍दियाकी पेर्मी मरियम नोक। 
तमा नाम ल्‍होसिमा योसेफ सिरुप अरिमाथियाकी मी छ्‍युक्‍पु यी ते लेसुङ। ती साङ येशूला तेपा क्‍यानी खोकी सुङला युकुप मी यिनोक। 
ती योसेफ ति पिलातसकी ते गल्‍नी येशूकी फुङ्‍बु खुर्नी डो च्‍यी सिनी गोङ्‍बा शुसिमा पिलातसकी तीला येशूकी फुङ्‍बु बिन सिनी योक कुसुङ। 
तमा योसेफकी येशूकी फुङ्‍बु ति खुर गल्‍नी रा नेङेनकी नाङ्‍ला टिल्‍सुङ, 
तमा खोरो थोक्‍ला दो पुङ्‍नी जोवु शेप मीला ज्‍योकुप टककी फुक सम्‍बी नाङ्‍ला येशूकी फुङ्‍बु ज्‍याक्‍नी दो ग्‍येर्पु यी रिल वानी ती टककी फुककी खला ग्‍यम ज्‍याक्‍नी गाल्‍सुङ। 
ती पेला ती टककी फुककी चाला मरियम मग्‍दलिनी ताङ यम्‍बा मरियम ति येशूकी फुङ्‍बु ज्‍योकुप ति ल्‍हानी देनोक। 
ती सला ङासोप ङ्‍यिमी छेर्मु कोङ्‍यार छ्‍येतिवा ताङ फरिसीतिवा पिलातसकी ते जोम्‍नी दुक सिक्‍यासुङ, 
“पिलातस ला, ती जिनोक जोप मी तीकी सेन्‍बु वोतुप पेला ङ्‍यिमा सुमकी तिङ्‍ला खोरुङ शेप ने येलुङ सेन्‍बु लङ्‍यिन सिनी सिक्‍यावु ति ङ्‍यिराङला टासा वे। 
तुक क्‍यानी ङ्‍यिमा सुम सेक तीला ज्‍यकुप टककी फुकला मक्‍मीतिवा ज्‍याक्‍नी ल्‍यामु क्‍यानी र्‍हेन सिनी क नाङ। मिसियाङ तीकी लोमातिवा वानी तीकी रो ति कुन क्‍या गल्‍नी ‘खो याङ शेप ने ङोसु लासुङ।’ सिनी मीतिवाला सिवी। तुक क्‍यासिन तिवी जोवु तिङकी जिनोक ति गोमीकी सिनाङ मङ मेलोक्‍पा डिवी।” 
तमा पिलातसकी तिवाला “ख्‍यिरा मुला वोतुप र्‍हेन्‍दुप मक्‍मीतिवा टि गल्‍नी ख्‍यिरा अछ्‍योता सेक ल्‍यामु क्‍यानी र्‍हेन च्‍यी।” सिनी सिक्‍यासुङ। 
तमा तिवा गल्‍नी शेप मीला ज्‍योकुप टककी फुककी खला कपुप दो ति बे मुथुपु जोसिमा मक्‍मीतिवाला ज्‍याक्‍नी तीला ल्‍यामु क्‍यानी र्‍हेन च्‍यिसुङ। 
