﻿Matiyu.
1.
Enna ewela azaa beting be Yeso Kiristi, kena ka Daoda, kena ka Ibraheng. 
Ibraheng ate a Ishaku, Ishaku ate a Yakubu, a Yakubu ate a Yahuda kaa arone awai alome. 
Yahuda ate a Perez kaa Zera andaaka iini onea waye Tamar, Perez ate a Hezron, a Hezron ate a Aram. 
Aram ate a Aminadab, Aminadab ate a Nashon, aa Nashon ate a Salmon. 
Salmon ate a Bowaza ka iini wai waye Rahab. Bowaza ate a Obed ka iini wai waye Rut, Obed ate a Yese, 
a Yese ate a Ogomo Daoda. Daoda ate a Suleimanu ka iini wai waye Batsheba, ondaye Uriya o samba. 
Suleimanu ate a Rehobowam, Rehobowam ate a Abija, Abija ate a Asa, 
Asa ate a Yehoshapat, Yehoshapat ate a Yehoram, Yehoram ate a Uziya, 
Uziya ate a Yotam, Yotam ate a Ahaz, Ahaz ate a Hezekiya, 
Hezekiya ate a Manase, Manase ate a Amon, Amon ate a Yosiya, 
aa Yosiya ate a Yekoniya ka arone awai, a were aka a bese maYahuda a ale a lezara a Babila. 
Malo besa one a lezara a Babila, Yekoniya ate a Sheyaltiyel, Sheyaltiyel ate a Zerubabel, 
Zerubabel ate a Abihud, Abihud ate a Eliyakim, Eliyakim ate a Azor, 
Azor ate a Zadok, Zadok ate a Akim, Akim ate a Aliyud, 
Aliyud ate a Eleyazar, Eleyazar ate a Mattan, Mattan ate a Yakubu, 
aa Yakubu ate a Yusupu ondaleme Mariya, Mariya kamea ka ngmeng Yeso ka a beya kai na Kiristi. 
Obena pate sepeza a era Ibraheng a alea Daoda, sepeza betuurua ka she naaze. O era Daoda a alea awere amea a bese maYahuda a alea lezara a Babila, sepeza betuurua ka she naaze, o era were lezara a Babila kangza a ale o ngmenga Kiristi, sepeza betuurua ka she naaze. 
Nannaa ongmenga o Yeso Kiristi waze. Awere aka Yusupu waya caasa Mariya kamea ka ngmeng Yeso, zongka wa ana kai, na manaa ka ana etumǝ a surǝ a Obere Ashili. 
Yusupu ondasau kai waye ka boome ba Ashili na wata yeme o kare okai ezǝng a nyimi aromone, nawa eze madoola ma baya kai a suk. 
Nangka waya madoola ma nyimi, na otoma Ashili o dera lepung o Ateokora deya awai atolau. Awa bena, “Yusupu kena ka Daoda, tana okone boome bo ana Mariya ka ka itǝ ondaye one, obena etumǝ ka ka ana, e surea Obere Ashilia. 
Kayo ngmenga kena ka lome, oyo nya kai leze na Yeso, o bena kayo boza aromo aza madinǝ mane.” 
A eze pate nyimia adorana angmǝ Ateokora pene ka Ondo beya angmǝ ka mawo ma Ashili Ishaya beke. 
“Laka! Kagala yo ya etumǝ, ka ka ngmeng kena kalome, ka ayo nya kai leze na Emanuwel, o wore obena Ashili ya legwa ka ro.” 
Nangka Yusupu wa ere atolau, nawa tare epaaka otoma Ashili o dera lepung me wa ote wai na waye, aa wa ana Mariya naka itǝ ondaye wai. 
Pate ka nyimi, wata wa more ka kai ne, se malo ngmenga kena ka kai. Nawa nya kena kame leze na Yeso. 
