﻿1 Pɩyɛɛrɩ.
2.
Kʋntʋ ŋwaanɩ á ja á tɩtɩ dɩ pu-sɩŋa dwi maama dɩ sɩsɩɩna, sɩ á yɩ taá yɩ pipiri-nyɩna, naa á taá jɩgɩ wʋ-gʋʋ, naa á taá yɩ bɩbarɩ-nyɩna. 
Pa-na á fra taa zʋʋrɩ Wɛ kwǝrǝ kam yɩranɩ, nɩ bu-sɩsɩŋa fra na zʋʋrɩ o nu yɩlɩ te tɩn. Kʋntʋ mʋ wʋ́ pa á wʋbʋŋa bɩ dɩ Wɛ cɩga kam, sɩ á na vrɩm fasɩ. 
Kʋ pʋpʋnɩ Wɛ tɔnɔ kʋm wʋnɩ kʋ wɩ: «Abam maŋɩ á maanɩ dɩ́ Yuutu wʋm na tiini o yɩ lanyɩranɩ te tɩn.» 
Nan twɛ-na dɩ́ Yuutu Zezi, sɩ wʋm mʋ yɩ ŋwɩa tu, yɩ o nyɩ dɩ kandwɛ dɩlʋ nabiinǝ na vɩn tɩn. Wɛ nan maŋɩ DƖ kuri wʋntʋ mʋ, yɩ o jɩgɩ kuri dɩ DƖ kʋ ja gaalɩ. 
Abam dɩ na jɩgɩ Wɛ ŋwɩ-dʋŋa kam tɩn, yagɩ-na sɩ Wɛ kwe abam nɩnɛɛnɩ kandwa yalʋ DƖ na wʋra DƖ maa lɔ DƖ digǝ kalʋ DƖ Joro kʋm na wʋ́ ta zʋʋrɩ ka wʋnɩ tɩn. Kʋntʋ, á laan wʋ́ ta yɩ Wɛ kaanɩm tiinǝ, yɩ á na wʋ́ ta kaanɩ-DƖ te tɩn mʋ yɩ sɩ á taá zuli-DƖ dɩ á bɩcara maama, yɩ kʋ poli DƖ wʋ á na ŋwɩ dɩ Zezi Krisi tɩn ŋwaanɩ. 
Kʋ maŋɩ kʋ pʋpʋnɩ Wɛ tɔnɔ kʋm wʋnɩ kʋ wɩ: «Nii-na, amʋ Wɛ lagɩ a cwi kandwɛ dɩlʋ na tiini dɩ lana tɩn, sɩ a ma lɔ sɔŋɔ Siyɔn nɩ. Amʋ kuri kandwɛ dɩm kʋntʋ, yɩ dɩntʋ mʋ yɩ kandwɛ dɩlʋ na paɩ digǝ kam zɩga lana tɩn. Wʋlʋ nan na kɩ o wʋ-dɩdʋa dɩ wʋlʋ na yɩ kandwɛ dɩm kʋntʋ tɩn, cavɩɩra bá fɔgɩ ya ja kʋntʋ tu.» 
Kʋ na yɩ abam balʋ na kɩ á wʋ-dɩdʋa dɩd-o tɩn, o jɩgɩ kuri zanzan dɩ abam. Kʋ daarɩ, kʋ na yɩ balʋ na vɩ-o tɩn, kʋ nyɩ dɩ kʋ na pʋpʋnɩ Wɛ tɔnɔ kʋm wʋnɩ kʋ wɩ: «Kandwɛ dɩlʋ lwara na vɩn tɩn laan mʋ joori dɩ ba dɩ ji kandwɛ dɩlʋ na paɩ digǝ kam dana yɩ ka zɩga lana tɩn.» 
Kʋ na yɩ balʋ na vɩ-o tɩn, kʋ pʋpʋnɩ kʋ wɩ: «O yɩ kandwɛ dɩlʋ ba na wʋ́ magɩ ba tɩtɩ dɩ dɩ ba tʋ tɩga nɩ tɩn.» Kʋ yɩ ba na wʋ sɛ Wɛ kwǝrǝ kam tɩn ŋwaanɩ mʋ baá tʋ kʋntʋ. Kʋ maa maŋɩ sɩ kʋ kɩ-ba kʋntʋ mʋ. 
Kʋ daarɩ kʋ na yɩ abam, abam yɩ dwi dɩlʋ Wɛ tɩtɩ na kuri tɩn. DƖ maa pa á yɩ DƖ kaanɩm tiinǝ balʋ na tʋŋɩ DƖ paarɩ dɩm ŋwaanɩ tɩn. Á maa kwǝri á yɩ dwi tiinǝ balʋ Wɛ tɩtɩ na lɩ sɩ á taá yɩ nɔɔna balʋ na yɩ DƖ nyɩm tɩn. Wɛ bǝŋi abam DƖ pa á nuŋi lim wʋnɩ, yɩ DƖ daarɩ DƖ pa á ŋwɩ DƖ pooni dɩlʋ na lana tɩn wʋnɩ, sɩ á laan wanɩ á pa nɔɔna lwarɩ wo-kamunǝ yalʋ DƖ na kɩ tɩn. 
Abam dɛɛn ya daɩ Wɛ nɔɔna, yɩ á laan ba á ji DƖ nɔɔna. Abam dɛɛn ya daɩ balʋ Wɛ na jɩgɩ á ŋwaŋa tɩn, yɩ DƖ laan ba DƖ duri á ŋwaŋa. 
A badon-sonnu-ba, abam na yɩ vǝrǝ lʋgʋ baŋa nɩ yɩ á ba jɩgɩ kugu je tɩn, a loori abam sɩ á ja á tɩtɩ dɩ á fra na zʋʋrɩ lʋgʋ baŋa wo-yɔɔrʋ tɩlʋ tɩn. Tɩntʋ mʋ kwaanɩ sɩ tɩ cɔgɩ á ŋwɩa. 
Á pa-na á kikiǝ maama taa lana balʋ na ba tɔgɩ Wɛ tɩn tɩtarɩ nɩ. Kʋntʋ mʋ, ba na yáalɩ abam ba wɩ á yɩ wo-lwaanʋ kǝrǝ, ba laan wʋ́ ba ba lwarɩ á kǝm-laarʋ na yɩ te tɩn, yɩ ba daarɩ ba zuli Wɛ maŋa kalʋ DƖ na lagɩ DƖ ba tɩn. 
Kʋ na yɩ nɔɔna balʋ maama na jɩgɩ ni sɩ ba taa te ba donnǝ tɩn, sɩ á taá sɛ ba ni á na tɔgɩ dɩ́ Yuutu wʋm tɩn ŋwaanɩ. Kʋ na yɩ Pa-farʋ wʋlʋ na te tɩʋ kʋm maama tɩn, dɩ o dɩdɛɛra balʋ o na pɛ-ba dam tɩn, sɩ á taá nɩgɩ ba maama. O tiŋi bantʋ sɩ ba taa vaŋɩ balʋ na kɩ balɔrɔ tɩn zwa mʋ, sɩ ba daarɩ ba taa tee balʋ na kɩ lanyɩranɩ tɩn. 
Wɛ wʋbʋŋa na lagɩ te tɩn mʋ yɩ sɩ á pa á kikiǝ taa lana, sɩ kʋ wanɩ kʋ pa nɔn-jwǝǝru pu ba niǝ dɩ ba bɩtar-yɔɔrʋ tɩlʋ ba na ŋɔɔnɩ abam baŋa nɩ tɩn. 
Abam yɩ balʋ na te á tɩtɩ tɩn mʋ, yɩ á ŋwɩa kam maŋɩ sɩ ka taa yɩ kʋntʋ doŋ mʋ. Á nan yɩ tɔgɩ kʋntʋ ŋwaanɩ á bʋŋɩ nɩ á jɩgɩ cwǝŋǝ sɩ á kɩ kǝm-balwaarʋ. Á nan pa-na á kikiǝ taa lana, á na yɩ Wɛ tɩntʋŋna tɩn ŋwaanɩ. 
Á taá zuli nɔɔna maama. Á taá soe balʋ maama na yɩ á ko-biǝ Zezi cwǝŋǝ kam wʋnɩ tɩn. Taá kwarɩ-na Wɛ. Á taá zuli-na Pa-farʋ wʋm. 
Abam balʋ na yɩ tɩntʋŋna tɩn maŋɩ sɩ á taá sɛ á yum tiinǝ niǝ, sɩ á taá nɩgɩ-ba lanyɩranɩ, kʋ na yɩ balʋ na jɩgɩ wʋ-bono yɩ ba kɩ abam lanyɩranɩ, naa kʋ zɩ yɩ balʋ kǝm na cana dɩ abam tɩn dɩ. 
Ba na yaarɩ abam vwan yaara á na sɛ Wɛ tɩn ŋwaanɩ yɩ á vɔ pu-dɩa, kʋntʋ yɩ kʋlʋ na lana tɩn Wɛ yigǝ nɩ. 
Abam nan na kɩ balɔrɔ yɩ ba vaŋɩ á zwɛ kʋ ŋwaanɩ, yɩ á na maŋɩ á vɔ á wʋ dɩ yaara yam kʋntʋ dɩ, kʋ jɩgɩ kuri na? Kʋ daarɩ á na kɩ lanyɩranɩ yɩ ba ta yaarɩ abam, yɩ á na vɔgɩ á wʋ, kʋntʋ lana Wɛ yigǝ nɩ. 
Wɛ na bǝŋi abam sɩ á taá tɔgɩ-DƖ tɩn, kʋ yɩ sɩ á vɔ á wʋ mʋ yaara wʋnɩ. Zezi Krisi tɩtɩ dɛɛn maŋɩ o yaarɩ abam ŋwaanɩ, sɩ kʋ pa á taá tɔgɩ o na-bwǝrǝ mʋ á lwǝni o dɛɛn na kɩ te tɩn: 
Wʋntʋ nan wʋ kɩ lwarɩm dɩ fɩnfɩɩn dɩ, yɩ o ni-taanɩ ba jɩgɩ vwan. 
Nɔɔna dɛɛn maa jɩg-o ba twɩa, yɩ o wʋ tɔgɩ o twɩ-ba. Ba ma kwǝri ba bɛɛs-o, yɩ o wʋ lǝri-ba balɔrɔ. O nan kɩ o tɩtɩ mʋ Wɛ jɩŋa nɩ, dɩntʋ mʋ yɩ dɩlʋ na tɔgɩ cɩga DƖ ma di nɔɔna sarɩya tɩn. 
Zezi Krisi mʋ joŋi dɩbam lwarɩm o tɩ tʋʋn-daa yuu nɩ dɩbam ŋwaanɩ. O kɩ kʋntʋ sɩ kʋ pa lwarɩm daa mʋ yɩ taa te dɩbam. Kʋntʋ, kʋ na yɩ lwarɩm jǝgǝ nɩ, dɩbam nyɩ nɩ twa mʋ te, yɩ dɩ́ laan daarɩ dɩ́ taá jɩgɩ ŋwɩa kalʋ na tɔgɩ cɩga tɩn Wɛ yigǝ nɩ. Ba na pogili Zezi yɩra yam tʋʋn-dagara baŋa nɩ tɩn mʋ pɛ abam na yazurǝ. 
Abam ya nyɩ dɩ peeni sɩlʋ na je tɩn mʋ. Á laan ma joori á ba á kɩ á tɩtɩ Zezi jɩŋa nɩ, wʋlʋ na yɩ abam nayɩrʋ yɩ o nii abam baŋa nɩ tɩn. 
