MAT 1:1 Ngayu Madiyu, ngayu karungka narrinya nangangi Jisus Krayiskanyi. Ngala waluku barri jangayu nijarrijba yalunya, nanganginmuku miminganjamuku wankalamuku jali jungku wabula, juju waluwa nangandu Jisus Krayisnyina. Nanda wankalanyi nganinyi Yabrayam, nyuli jungku barrinani wankalanyi miminganja nangangi Dayibidkanyi, baki nanda Dayibid, nyuli jungku barrinani wankalanyi miminganja nangangi Jisus Krayiskanyi.
MAT 1:2 Nanda wankalanyi Yabrayam, nangangi jandanyi nganinyi niji nangangi Yayisak. Baki Yayisak barri, nangangi jandanyi nganinyi niji nangangi Jakub. Baki nanda Jakub, kajamuku nanganginmuku jandanyimuku nganinyimuku, ngala yingamali nangangi niji Juda. Baki nanda Juda, nangangi maninganja, niji barri Tamarr, kujarra bulangi jandanyiwuya nganinyiwuya, niji bulangi Biris, baki Sira. Baki nanda Biris, nangangi jandanyi nganinyi, niji nangangi Yisrun. Baki nanda Yisrun barri, nangangi jandanyi nganinyi, niji nangangi Ram. Baki nanda Ram, nangangi jandanyi nganinyi, niji nangangi Yaminadab. Baki nanda Yaminadab, nangangi jandanyi nganinyi niji nangangi Najun. Baki nanda Najun barri, nangangi jandanyi nganinyi niji nangangi Salmun barri. Baki nanda Salmun barri, maninganja nangangi niji Rayab. Bulangi jandanyi nganinyi, niji nangangi Buwas. Baki nanda Buwas, nangangi maninganja barri, niji nangangi Rud, baki bulangi jandanyi nganinyi barri niji nangangi Yubid. Baki nanda Yubid jandanyi nganinyi barri, nangangi niji Jisi. Baki nanda Jisi, nangangi jandanyi nganinyi, niji nangangi Dayibid barri. Nanda Dayibid, nyuli walkurra mambuka nanganginmukuyngka mungkijimukuyngka Jumukuyngka. Maruka nyuli muwa nangangi Kudkanyi. Kudanyu nyuli durrijba nanda jangkurr nangangi Kudkanyi. Jungku nyuli yurlurrmba nangangi barri. Nani barri yali jungku nanamuku wankalamuku. Barriwa.
MAT 1:6b Baki nanda Dayibid, nangangi maninganja, niji nangangi Bajiba. Nanda jibarri Bajiba, nanda waluwinyi nawinganja nangangi, niji nangangi Yuraya, ngala kuyuyi jibarri Dayibidwanyi jali nangka janyba nanda waluwinyi nawinganja nangangi. Nanda Dayibid, nangangi jandanyi nganinyi, niji nangangi Sulumun. Baki nanda Sulumun, nangangi jandanyi nganinyi, niji nangangi Riyubuwam. Baki nanda Riyubuwam, nangangi jandanyi nganinyi, niji nangangi Yabija. Baki nanda Yabija barri, nangangi jandanyi nganinyi, niji nangangi Yasa. Baki nanda Yasa, nangangi jandanyi nganinyi, niji nangangi Jiyusabad. Baki nanda barri Jiyusabad, nangangi jandanyi nganinyi, niji nangangi Jiyuram. Baki nanda barri Jiyuram, nangangi jandanyi nganinyi, niji nangangi Yusiya. Baki nanda barri Yusiya, nangangi jandanyi nganinyi, niji nangangi Judam. Baki nanda barri Judam, nangangi jandanyi nganinyi, niji nangangi Yayas. Baki nanda barri Yayas, nangangi jandanyi nganinyi, niji nangangi Yisikiya. Baki nanda barri Yisikiya, nangangi jandanyi nganinyi, niji nangangi Manasa. Baki nanda barri Manasa, nangangi jandanyi nganinyi, niji nangangi Yamun. Baki nanda barri Yamun, nangangi jandanyi nganinyi, niji nangangi Jusiya. Baki nanda barri Jusiya, jandanyimuku nangangi nganinyimuku, yingamali nangangi niji Jiyuyakin. Nani barri yali jungku nanamuku wankalamuku. Barriwa.
MAT 1:12 Nanamanji barri jali jungku Jiyuyakin walkurra mambuka yalungi Jumukuyngka, baki yingka nyuli walkurra mambuka yalungi jalili yalu jungku yingkana yajina juju karru. Nanangini yingkawanyi nyuli daba yalunya Jumuku. Daba nyuli wakara, baki kuyu nyuli yalunya nanganginkurri yajiyurri, juju karru, niji Babilun. Marrimba nyuli yalunya nanganginyina yajina yurrngumba barri, baki janyba yalungki kudiyamuku. Ngala baku barri juju nanamuku yingkamuku yali wijba bayungu yalunginkurri yajiyurri. Nanda Jiyuyakin, nangangi jandanyi nganinyi, niji nangangi Jiyaldil. Baki nanda barri Jiyaldil, nangangi jandanyi nganinyi, niji nangangi Sirubabil. Baki nanda barri Sirubabil, nangangi jandanyi nganinyi, niji nangangi Yabiyud. Baki nanda barri Yabiyud, nangangi jandanyi nganinyi, niji nangangi Yiliyakim. Baki nanda barri Yiliyakim, nangangi jandanyi nganinyi, niji nangangi Yasurr. Baki nanda barri Yasurr, nangangi jandanyi nganinyi, niji nangangi Saduk. Baki nanda barri Saduk, nangangi jandanyi nganinyi, niji nangangi Yajim. Baki nanda barri Yajim, nangangi jandanyi nganinyi, niji nangangi Yiliyud. Baki nanda barri Yiliyud, nangangi jandanyi nganinyi, niji nangangi Yiliyasarr. Baki nanda barri Yiliyasarr, nangangi jandanyi nganinyi, niji nangangi Madan. Baki nanda Madan, nangangi jandanyi nganinyi, niji nangangi Jakub. Baki nanda barri Jakub, nangangi jandanyi, niji nangangi Jusib. Nanda barri Jusib, nyuli nawinganja nanankanyi jibarrinyi, niji Mari, jali ngardanganja nangangi Jisuskanyi. Nanda Jisus, yingka niji nangangi Krayis, barrinani “nanda jali yarrijba Kudwanyi wankambawarr.”
MAT 1:17 Nani barri yali jungku nanamuku wankalamuku yurrngumba nanankurri jali nangka binandaba Mari bardardanyi Jisus Krayiskanyi.
MAT 1:18 Nanda wurrumbarra, niji Mari, nyuli wulanbi nangangi Jusibkanyi. Waluwa buli jungku maykarra, baki ngawukuku nyuli nanda wurrumbarra, ngala miku nyuliyanyi kuluka yingkana nganinyina. Manjijbayi Kudwanyi nangangi Kunyba Ngarndu nangandurri wurrumbarrayurri, baki nanankardi nyuli ngawukuku.
MAT 1:19 Nanda nganinyi Jusib, nyuli kunyba nganinyi. Jungku nyuli kunybana nananyina yuwana Musiskanyi. Nanda yuwa yanybaka nayi. Jaliyi yingkawanyi yabimba jibarri ngawukuku, jala waluwa nyulu nawinganjayudi, baki nanda balki. Nyulu jungkuka balkina yuwana nanda jibarri. Nanangini nganinyiwanyi marda nyulimi karu yingkamuku nanganginkanyi wulanbinyi, baki janyulu manyirru nanda jibarri. Nani barri nanda yuwa yanybaka. Nanda barri Jusib, ngamu kulukayi nangangi wulanbi Mari yingkana nganinyina. Ngala kunyba nyuli. Miku nyuliyanyi nulijba manyirrumbikanyi nanda wurrumbarra yalungi. Miku nyuliyanyi nulijba yabimbikanyi kiji nangangi. Baki nanankardi barri mankumanku nangki Jusib, miku janyulu kuyu Mari nanganginkanyi maninganjanyi, ngala kardarda barri janyulu manjijba nanganbunanyi. Miku nyuliyi mili nangangi wulanbi. Barriwa.
MAT 1:20 Ngala mankumanku nangki Jusib nani barri, baki manjijba Yanjil nangandurri Kudwanyi. Buwarrajimbayi yaji Jusibwanyi, baki najba nyuli Yanjil jali yanyba nangangi. “Ninji Jusib, ngani wankalanyi nijanganjinyi, nangangi niji Dayibid. Mikujiyi marrala yajinyi. Marda ninjimi kuyu nanda wurrumbarra Mari nganyingkanyi maninganjanyi. Ngawukuku nyulu, ngala miku nyuliya kuluka yingkana nganinyina, miku nyuliyanyi jungku balkina yuwana nangangi Kudkanyi. Manjijba Kudwanyi nangangi Kunyba Ngarndu nangandurri, baki nanankardi nyuli ngawukuku.
MAT 1:21 Baku barri janangka birnandaba jukanyi, baki janinji nijarrijba nanda bardarda Jisus. Janinji nijarrijba bardarda Jisus, janyulu nyulungangi marrimba yalunya mardarda nanganginmuku mungkijimuku. Miku yalungkiyi janyba yurrngumba, jala yalu yabimba balki yaji. Miku yalungkiyi janyba, nyulungangi marrimbaja yalunya mardarda.” Barriwa. Nani barri yanyba nyuli Yanjil nangangi, jali nyulu buwarrajimba yaji. Nanda niji Jisus, nanda Ju yanyi, barrinani “marrimbawarr mardarda.”
MAT 1:22 Wabula barri kamambarra yanybayi wankalanyi nangangi jangkurr Kudkanyi, baki yarrijba nyuli nanda jangkurr najana Kudkanyi. Nayi nyuli yanyba,
MAT 1:23 “Janyulu ngawukuku wurrumbarra, ngala mikukiyanyi kuluka yingkana nganinyina. Janyulu ngawukuku, baki janangka birnandaba jukanyi. Jayalu nijarrijba nanda bardarda Yimanyuwil.” Nanda niji Yimanyuwil, nanda Ju yanyi barrinani “Jungkuka Kud ngamandu.” Nayinda wankalanyi jangkurr wurrumbarranyi, yanybaka nanankanyi Marinyi, jali jungku juju bayngkani. Barriwa.
MAT 1:24 Buwarrajimbayi yaji Jusibwanyi, baki kamu nyuli walajba. Yabimba nyuli nanda jali karu Yanjilwanyi. Kuyu nyuli nanda wurrumbarra Mari nanganginkanyi maninganjanyi.
MAT 1:25 Ngala miku nyuliyanyi kuluka nangandu waluwa nangki birnandaba bardardanyi. Muningka buli kuluka, ngala nyuli ngawukuku. Baku barri nangki birnandaba Mari jukanyi, baki nijarrijbayi niji Jisus Jusibwanyi. Barriwa.
MAT 2:1 Nanamanji barri jali nangka birnandaba Mari bardardanyi Jisuskanyi, nganinyi niji Yirud, nyuli walkurra mambuka yalungi Jumukuyngka. Walajbayi Jisus barrawuyabarrawuyana niji Bidliyim. Baku barri bijal yingkamuku yali badajba karrina. Nanamuku barri yalili ningkijba warrawiji. Yalili ningkijba warrawiji jingkiykanyi yaji. Badajba yali karrina nanankurri walkurrayngkurri barrawuyabarrawuyarri niji Jirusalim.
MAT 2:2 Jali yalu wanbiya nanaba baki yililikajba yali, “Wanjawa nanda bardarda jalija baku jungku walkurra mambuka narringi Jumukuyngka. Wanjawa nyulu. Najba nurri nangangi warrawiji jali kirrijba kingkarri karrina. Najba nurri nangangi warrawiji, baki badajba nurri waykanyi nanda bardarda nurrunginkanyi kunybanyi jangkurranyi. Wanjawa nyulu.”
MAT 2:3 Kajamukunyi yali manku nanda yalungi jangkurr, baki balkijba yali muwa. Baki nanda walkurra mambuka Yirud, nyuli marda balkijba muwa jali nyulu manku jangkurr nanankanyi bardardanyi jalija baku walkurra mambuka. Kudanyu nyuli balkijba muwa.
MAT 2:4 Manjijba nyuli yingka wudumbiji yalunya, mambukamuku yalunginkanyi jurjkanyi, baki milidimbawarrmuku yuwanyi. Badajba yali nangandurri, baki nyuli ngajaka yalunya, “Nanda naja nangangi kudkanyi yanybaka nangangi Krayiskanyi, ngala wanyi yanybaka nanda naja nangangi. Wanjawa barri nangangi ngardanganja janangka birnandaba. Wanjawa yajina. Wanyi yanybaka nanda naja Kudkanyi.” Barriwa.
MAT 2:5 Jananganja yali, “Nanda naja Kudkanyi yanybaka, ‘Birnandaba janangka jibarri nanankanyi Krayiskanyi nananyina barrawuyabarrawuyana niji Bidliyim, nananyina walkurranyina yajina niji Judiya.’ Nanda wankalanyi jali yanyba jangkurr Kudkanyi, yarrijba nyuli nayi najana Kudkanyi,
MAT 2:6 ‘Nanda barrawuyabarrawuya Bidliyim, nananyina walkurranyina yajina Judiya, miku nanda walkurra barrawuyabarrawuya. Nanda ngawamba bayakarda yaji ngala nanda jirrinyi yaji. Nananyina yajina janangka birnandaba jibarri nanankanyi Krayiskanyi jalija baku jungku walkurra mambuka. Janyulu walkurra mambuka yalungi Jumukuyngka, jala nganinyimuku baki jibarrimuku nangangi Kudkanyi’.” Nani barri yali jananganja nanda mambuka Yirud.
MAT 2:7 Mankuyi yalungi jangkurr Yirudwanyi, baki manjijba nyuli yingka kuyunki yalunya karrinawunyi nangandurri. Janyulu kardarda yanyba yalungi. Jilajba yali nangandurri, ngala nyuli nyubana jungku. Kardarda nyuli yanyba yalungi. Miku yaliyi yingkamukunyi manku nangangi jangkurr. Ngajaka nyuli yalunya, wanyimbala walajbayi nanda warrawiji, baki yali jananganja nanda mambuka.
MAT 2:8 Baki nyuli jirrinyba yalunya, “Kujba janarri nanankanyi bardardanyi. Kudanyu janarri kujba nangangi. Jalija narri wakaramba, baki janarri wijba ngakindurri. Janganarri karu wanjawa nanda bardarda jungkuka, baki jangayu marda jilajba nangandurri. Jangayu ngayu marda wajba nanda bardarda kunybanyi jangkurranyi ngakinkanyi.” Nani barri nyuli jirrinyba yalunya, baki nyuli manjijba yalunya kula Bidliyimyurri.
MAT 2:9 Nanamuku karrinawunyi, yali barlba nanganbunanyi, baki mili yali barlba kula, baki mili yali najba nanamannga warrawiji jalili yalu wabula najba karru. Najba yali nanamannga warrawiji, baki yabijba yali muwa. Nanda barri warrawiji jilajbayi kula, baki yali durrijba kula. Jilajbayi warrawiji nanankurri Bidliyimyurri, baki kurrkunbayi. Jungkuyi warrawiji lalijina yundu nanda barrawu, jali jungku nanda bardarda Jisus kalawunyi barri.
MAT 2:11 Yali ngankijba kalawunyi barrawuna, baki najba yali bulanya, nanda bardarda Jisus, baki nangangi ngardanganja Mari. Mururu yali wayka jambana, baki wajba yali bardarda yalunginkanyi kunybanyi jangkurranyi. Baki wajba yali bardarda yajinyi. Yingka yaji dankurrdankurr malankarri, niji kuld, yingka yaji barrinani jirrki ngala nanjananja jali banjawa kunyba kudu, niji brangkinsins, baki yingka yaji barrinani yingka jirrki jali banjawa kunyba kudu, niji barri mirr. Nanankanyi yajinyi yali wajba bardarda. Wabula yalunjali wajba kajanyi dungalanyi wudumbiji nanda yaji bardardanyi.
MAT 2:12 Baki wijba yali karri yalunginkurri yajiyurri. Wijba yali yingkana yubalina. Miku yaliyanyi wijba langki Jirusalimyurri. Miku yaliyanyi karu nanda mambuka Yirud wanjawa yajina janyulu wakaramba bardarda. Ngala yali buwarrajimba yaji nanamukunyi karrinamukunyi, baki karuyi yalunya Kudwanyi, miku yaliya wijba nangandurri Yirudyurri. Baki nanankardi yali wijba karri yingkana yubalina.
MAT 2:13 Baku barri bijal nanda Jusib, nawinganja nangangi Marinyi, nyuli buwarrajimba yaji marda. Najba nyuli Yanjil Kudkanyi jilaykanyi nangandurri. Yanybayi Yanjil nangangi, “Nanda mambuka Jumukuyngka niji Yirud, janyulu bardajba nanginkurri, baki janyulu kujba nanginkanyi bardardanyi kurdanbiji. Walajbakiyi dulu. Kuyukiyi nganyi maninganja baki bardarda, baki wirlku janarri kula nanankurri yajiyurri Yijibyurri. Nanaba janarri jungku nanankurri jalija ngayu karu narringi wiykanyi nanginkurri.” Nani barri karuyi Jusib Yanjilwanyi.
MAT 2:14 Yinarramba barri walajbayi Jusib. Dulaba nyuli Mari baki nanda bardarda. Baki barlba yali kula ngala nyuli yuwajiwa mungana yaji. Barlba yali kula Yijibyurri, baki nanaba yali jungku.
MAT 2:15 Nanda jangkurr Kudkanyi jali yanyba wankalanyi, nanda jangkurr yanybaka nayi, “Kaya ngayi ngakinkanyi jandayngkanyi. Wudumba ngayi nanamunanyi Yijibnanyi.” Duja nanda jangkurr. Wijbayi Jisus kulani Yijibnanyi.
MAT 2:16 Nanamukunyi karrinawunyi yali jujamba nanda walkurra mambuka Yirud. Miku yaliyanyi wijba nangandurri karunki wanjawa yajina bardarda Jisus. Nanda mambuka barri jali nyulu jingkijba, yali jujamba, baki ngarrangarra nyuli muwa yalungi. Kudanyu nyuli kuliwijba yalungi. Jirrinyba nyuli nanganginmuku ngarrkadabawarrmuku. Jirrinybayi yalunya, yalu kurdanbiji bukambiju jukamuku nananyina barrawuyabarrawuyana Bidliyim. Yalu kurdanbiji bukambiju jukamuku, nanamuku jali yalu jungku bardarda, baki nanamuku jali yalu jungku yingamalina baki kujarranyina kindilkurrina. Nani nyuli jirrinyba yalunya, jingkijbangangi nyuli, walajbayi nanda warrawiji karrina kujarranyina kindilkurrina wabula. Nani barri karuyi mambuka nanamukunyi karrinawunyi. Barriwa.
MAT 2:17 Barlbayi ngarrkadabawarrmuku kula nanankurri Bidliyumyurri, baki kurdanba yali bukambiju jukamuku, bardardamuku, baki bayayawa jukamuku. Nanda wankalanyi niji nangangi Jirimaya yanyba nyuli jangkurr nangangi Kudkanyi. Duja barri nangangi jangkurr, nayinda barri.
MAT 2:18 “Manku ngayu yalunya ngindunkurri kudanyu barri, nanamuku jala jungku nananyina yajina niji Rama. Manku ngayu yalunya ngindunkurri kudanyu barri. Nanda jibarri Rajil nyulu nginduka nanganginkanyi kulunganjamukuyngka. Mikuwali yingkawanyi kurrkunba yalunya ngindunkurri, janybangangi yalungki nanganginmuku bayamuku. Janyba yalungki.” Nani barri yanybayi nanda wankalanyi Jirimaya. Yanyba nyuli jangkurr Kudkanyi, nanda jangkurr najana Kudkanyi. Duja nangangi jangkurr. Kurdanba yali jukamuku. Baki Yirud barri ngamu yali kurdanba Jisus, ngala miku. Nyulu jungkuyi Jisus kularra Yijib.
MAT 2:19 Baku barri nanda mambuka Yirud nangki janyba. Baki wijbayi Yanjil nangandurri Jusibyurri ngala nyuli jungku kularra. Wijbayi Yanjil nangandurri ngala nyuli buwarrajimba yaji.
MAT 2:20 Yanybayi Yanjil nangangi, “Walajba janarri, baki janarri wijba narringinkurri yajiyurri Yisrayilyurri. Ninji baki nganyi maninganja baki jandanyi, janarri wijba langki, janybangangi yalungki jali nulijba kurdanbikanyi nayinda juka. Yuku janarri wijba barri.” Nani barri yanybayi Yanjil nangangi Jusibkanyi.
MAT 2:21 Baki walajbayi Jusib. Kuyu nyuli nangangi maninganja baki juka, baki wijba yali langki Yisrayilyurri.
MAT 2:22 Wijba yali langki Yisrayilyurri. Ngala karu yali Jusib nanankanyi buyingkinyi mambukanyi yalunginkanyi Jumukuyngka. Nangangi niji Yarrkilayis. Nyuli jandanyi nanankanyi waluwiyngkanyi mambukanyi Yirudkanyi. Jali manku nanda jangkurr Jusibwanyi, baki marrala nyuli. Mankumanku nangki nangangi Yarrkilayiskanyi, yiningki janyulu nyulu kurdanba Jisus. Nanankardi barri nyuli marrala wiykanyi nanankurri yajiyurri niji Judiya. Ngala mili nyuli buwarrajimba yaji, baki karuyi Jusib Yanjilwanyi, nyulu jilaji mili langki nanankurri yajiyurri, niji Kalili.
MAT 2:23 Nanankardi barri barlba yali mili langki Kaliliyurri, baki nanaba yali jungku barrawuyabarrawuyana niji Nasarid. Nanda jangkurr najana Kudkanyi yanybaka, “Nanda barri nangangi yaji Nasarid.” Duja nanda jangkurr. Jardijbayi Jisus nananyina yajina niji Nasarid.
MAT 3:1 Baku barri, jali jardijba Jisus walkurra nganinyi, baki yingka nganinyi niji Jun, nyuli jilajba mangkurruyurri yajiyurri, nananyina yajina niji Judiya. Yalili nijarrijba nanda nganinyi “Jun Ngurrunbawarr.” Jungku nyuli mangkurruna yajina, bundu bundalina niji Jurdan. Baki nyuli milidimba yalunya nanaba jangkurranyi nanganginkanyi Kudkanyi.
MAT 3:2 Nyulili karu yalunya, “Wijbakiyi jungku balki nangangi Kudkanyi. Marda narrimi ngindu muwa narringinkanyi balkinyi yajinyi. Marda narrimi ngindu muwa, badajbangangi winyurruwa nanda lalanbawarr ngambalangi. Janyulu badajba winyurruwa barri.” Nani barri nyulili karu yalunya.
MAT 3:3 Nanda wankalanyi Yayisaya jalili yanyba jangkurr nangangi Kudkanyi, yarrijba nyuli jangkurr najana Kudkanyi. Yarrijba nyuli jangkurr nanankanyi nganinyingkanyi Junkanyi. Yarrijba nyuli nayi barri, “Jilajbaja nganinyi mangkurruna. Kaya janyulu kudanyu barri. Kaya janyulu nayi barri, ‘Birrirrinja narringkaja kurdulu, badajbajangangi nanda walkurra mambuka. Janyulu badajba, nanda jalija manjijba Kudwanyi. Birrirrinja narringkaja kurduluna nangangi.’” Nani barri yarrijbayi Yayisayawanyi nangangi Junkanyi.
MAT 3:4 Nanda Jun Ngurrunbawarr nayi nyulili jungku. Wudumba nyulili nganya nanankanyi yanimalkanyi niji kamil. Nanda kamil barrinani yarrama. Wudumba nyulili nganya, bakili nyuli yabimba jumbala nangangi nanaba nganyana. Bakili nyulu kijijba waba nanganginyina muwana. Wardamba nangkili ngawamba nyangkunyalinyi baki ngandalanyi. Miku nangkiyanyi wardamba barnyinyi, ngawamba nyangkunyalinyi baki ngandalanyi.
MAT 3:5 Kajamuku yali badajba nangandurri mankunki nangangi jangkurr. Badajba yali bayunguna Jirusalimnanyi, baki kulani nanamunanyi walkurrananyi yajinanyi, niji Judiya. Baki nanamunanyi yajinanyi bundu bundalina, niji Jurdan, yali badajba nanamunanyi yajinanyi marda nangandurri.
MAT 3:6 Ngindu yali muwa yalunginkanyi balkinyi yajinyi, baki karu yali Jun, yali jungku balki nangangi Kudkanyi. Baki nyuli ngurrunba yalunya wabudana Junwanyi. Nyuli babdayis yalunya bundalina niji Jurdan. Barriwa.
MAT 3:7 Badajba yali yingkamuku nangandurri Junyurri, nyuluja ngurrunba yalunya marda. Kudiyamuku yali Barasimuku jalili kudanyu durrijba nanda yuwa nangangi Musiskanyi, ngala miku yaliyanyi jingkijba Kud. Baki kudiyamuku yali Sajusimuku jalili durrijba nanda yuwa nangangi Musiskanyi, ngala yalili yanyba, mikuyaji Yanjilkanyi, baki miku ngambaliyi jungku wanka yurrngumba, ngala ngambalaja jungku kurdan yurrngumba barri. Nanamuku yali badajba nangandurri marda. Najbayi yalunya Junwanyi, baki ngirrwa nyuli yalungi, “Narri balkimuku barrinani miya. Wanyingini karuyi narrinya nangangi Kudkanyi, janyulu manjamanjamba narringi balki yaji baki nanankardi janyulu miku daba narrinya. Wanyingini karuyi narrinya wirlkunkanyi nanankanyi balkinyi yajinyi jalija yabimba narringi Kudwanyi.
MAT 3:8 Jaliyi narri ngindu muwa narringinkanyi balkinyi yajinyi, baki marda narringkimi yangkalamba narringinanyi balkinanyi yajinanyi. Marda narrimi yabimba ngawamba kunyba yaji, baki yingkamukunyi jayalu jingkijba narrinya, narri ngindunkanyi muwa jungunkanyi narri balki. Jayalu jingkijba narrinya ngindunkanyi muwa, jaliyi narri yabimba ngawamba kunyba yaji.
MAT 3:9 Marda narringkimi miku mankumanku nangangi Kudkanyi, nyulu yanybaka narringi, narri jungku kunyba nangangi. Kunyba narri jungku nangangi, Yabrayamngangi nyuli narringi wankalanyi nijanganjinyi. Marda narringkimi miku mankumanku nangangi, narri jungunkanyi kunyba nangangi, narri jungunkanyi kunyba nangangi Kudkanyi, nyulungangi Yabrayam jungkuyi kunyba nangangi Kudkanyi. Yanybaka Kud narringi, narri jungunkanyi balki nangangi. Narri jungkuka balki nangangi, mikungangi narrimi ngindu muwa narringinkanyi balkinyi yajinyi. Baki nanankardi barri janyulu yabimba balki yaji narringi Kudwanyi. Miku narrimi jungku kunyba nangangi Kudkanyi, barrinani jungkuyi Yabrayam kunyba nangangi. Miku narrimi barrinani dujanya jandanyimuku nangangi Yabrayamkanyi. Yuku nyulu kuyungka nayinda dungalamuku Kudwanyi. Yuku nyulu wankambaka yalunya, baki yabimba yalunya nganinyimuku, yalu jungunkanyi barrinani dujanya jandanyimuku nanankanyi wankalanyi Yabrayamkanyi. Ngala narri balkimuku, baki nanankardi janyulu yabimba balki yaji narringi Kudwanyi.” Barriwa. Nani barri ngirrwayi Jun yalungi. Muningka nyuli yanyba dungalanyi. Nanda dungala barrinani ngurranyimuku jali baku kuyu nanda jangkurr nangangi Kudkanyi. Yali jungku dujanya nanganginmuku jandanyimuku Yabrayamkanyi.
MAT 3:10 Baki mili nyuli yanyba yalungi. Muningka nyuli yanyba yalungi, “Yingka nganinyi, kajamuku nanganginmuku kalawanyi. Kudiyamuku yalu kunybayudi mamayudi, ngala kudiyamuku mikuyaji mamanyi yalundu. Baki wudumbaka lama nganinyiwanyi, dayangka nyulu kalawanyi jala mikuyaji mamanyi. Dayangka nyulu, baki janybaka jangurri. Barriwa. Nanda nganinyi, nyulu barrinani Kud, baki nanamuku kurndamuku, yalu barrinani nganinyimuku. Kudiya nganinyimuku yalu jungku kunyba nangangi Kudkanyi. Yalu barrinani kurnda jirdi kajanyi mamanyi. Ngala kudiya nganinyimuku yalu jungkuka balki nangangi Kudkanyi. Yalu barrinani nanda kurnda jala mikuyaji mamanyi, jali nyulu daya baki janybayi jangurri. Nanamuku balkimuku nganinyimuku janyulu bukamba yalunya Kudwanyi. Janyulu janyba yalunya jangurri.
MAT 3:11 Ngayu yawumba narrinya wabudana, baki yingkamukunyi jayalu jingkijba narrinya. Jayalu jingkijba narrinya, narri ngindu muwa narringinkanyi balkinyi yajinyi, ngala yingka janyulu badajba bayngkani ngakindu. Nanda jalija badajba bayngkani ngakindu, nyulu walkurra mambuka. Nyulu mili walkurra mambuka ngaki. Nyulu ngiruka, ngala miku ngayu ngiruka barrinani nyulu. Nanda jalija badajba, janyulu yawumba nanda Kunyba Ngarndu Kudkanyi narrindu. Janyulu yawumba Kunyba Ngarndu narrindu, jaliyi narri ngindu muwa narringinkanyi balkinyi yajinyi. Ngala jaliyi narri miku ngindu muwa nanankanyi balkinyi yajinyi, baki yajbaja narrinya janguwanyi, mankanyi narringi. Barriwa.
MAT 3:12 Jala yalu wudumba nanda daburrul yami jarrkanyi, baki waluku yalu dulaba nanda waban yaminanyi. Yajba yalu nanda waban janguna, ngala yalu kilimba nanda yami jarrkanyi yaji. Nanda yami kunyba mama. Baki nani barri nanda jalija badajba, janyulu manjijba yalunya balkimuku jangurri Yilyurri, ngala janyulu kilimba yalunya jala yalu ngindu muwa yalunginkanyi balkinyi yajinyi.” Nani barri yanybayi Jun yalungi jali jila nangandurri. Barriwa.
MAT 3:13 Nanamanji barri badajbayi Jisus nangandurri Junyurri. Badajba nyuli langina nanganginmunanyi yajinanyi Nasaridnanyi. Nanda yaji Nasarid, nananyina walkurranyina yajina, niji Kalili. Badajba nyuli ngurrunbiji Jisus Junwanyi.
MAT 3:14 Ngala mikukiyanyi nulijba Jun ngurrunbikanyi Jisus. Yanyba nyuli Jisuskanyi, “Marda nganinjimi ngurrunba, ngala ninji jilajbayi ngakindurri, ngayu ngurrunbikanyi ninga.”
MAT 3:15 Ngala jananganjayi Jisuswanyi, “Janinji yabimba nanda jala ninga karu. Nani barri yanybaka Kud. Janungkala yabimba nanda jala nyulu nulijba niyangi yabimbikanyi yaji.” Barriwa. Baki ngayangkuyi Jun nangangi, janyulu ngurrunba Jisus.
MAT 3:16 Baki ngurrunbayi Jisus wabudana Junwanyi. Walajba nyuli waykalinya wabudananyi, baki yinarramba nyuli najba laliji kingkarri. Najba nyuli laliji bardawambikurri nangka. Baki najba nyuli nanda Kunyba Ngarndu Kudkanyi karralankurri kingkarrinya wayka nangandurri. Jungkuyi Ngarndu Kudkanyi nangandu barrinani babangka kulukuku kingkarrinya wayka baki jungkuka kurndana, nani barri karralayi wayka Kunyba Ngarndu Kudkanyi nangandurri Jisusyurri, baki jungkuyi nangandu.
MAT 3:17 Baki yanybayi Kud jangkurr kingkarrinya. Yanyba nyuli, “Nayinda nyulu ngakinmirra jandanyi. Maruka ngayu muwa nangangi kudanyu barri. Nyulu jungkuka kunyba baki mirnarrijba ngayu muwa nangangi.” Nani barri kingkarrinya yanybayi Kud. Barriwa.
MAT 4:1 Baki manjijbayi Jisus kingkarri Kunybawanyi Ngarnduwanyi Kudkanyi. Manjijba nyuli Jisus kingkarri dungalarri. Jungkuyi Jisus dungalana. Mikuyaji yingkanyi nanaba. Yulwa yalu nganinyimuku nanankanyi yajinyi mulijinyi. Manjijbayi Jisus kingkarri nanankurri yajiyurri Kunybawanyi Ngarnduwanyi Kudkanyi, baki badajbayi nanda mambuka wuwarranyi, niji Sayidin. Badajba nyuli nangandurri Jisusyurri, baki balanja nyuli.
MAT 4:2 Jungkuyi Jisus nanaba yingamali yakarl, baki bijal mili, nyuli jungku nanaba. Miku nyuliyanyi kuyu mama nangandurri nanankurri. Mikuyaji mamanyi nanaba nangandu, baki birrkalanyi nyuli kudanyu barri.
MAT 4:3 Baki nanda mambuka wuwarranyi Sayidin, nyuli jilajba nangandurri Jisusyurri balanjanki. Yanybayi Sayidin nangangi, “Ninji barri birrkalanyi. Mikuyaji mamanyi nganyindu. Wanyingkanyi ninji miku wudumba mama. Najbakiyi nayinda dungalamuku wayka jambana. Jaliyi ninji dujanya nangangi jandanyi Kudkanyi, baki jirrinybakiyi yalunya, yalungka yangkalambiji mamanyi. Waluku jalija yalu jungku dungala, ngala jayalu jungku barrinani mama, ninji jarrkanyi nanda barrinani damba. Jaliyi ninji dujanya nangangi jandanyi Kudkanyi, baki ninji ngiruka yabimbikanyi yaji nani barri.”
MAT 4:4 Ngala jananganjayi Sayidin Jisuswanyi, “Miku ngayiyi yabimba nanda jala ninji yanyba. Nanda jangkurr najana Kudkanyi yanybaka nayi, ‘Mardakimi nganinyi miku nulijba ngawamba mamanyi, ngala marda nyulimi nulijba nanganginkanyi jangkurranyi Kudkanyi. Marda nyulimi kudanyu nulijba bukamba nanankanyi jangkurranyi Kudkanyi.’ Nani barri yanybaka jangkurr najana Kudkanyi.” Barriwa.
MAT 4:5 Baki mili barri nanangini Sayidinwanyi nyuli balanja Jisus. Kuyuyi Jisus Sayidinwanyi. Kuyu nyuli Jisus walkurrayngkurri jurjyurri nanaba Jirusalim. Nanaba buli jungku juju barri kingkarri yundukula jurjina.
MAT 4:6 Yanybayi Sayidin nangangi, Jisuskanyi, “Jaliyi ninji dujanya nangangi jandanyi Kudkanyi, baki bulbulngijbakiyi wayka. Bulbulngijbakiyi juju wayka jambarri, jaliyi ninji dujanya nangangi jandanyi Kudkanyi. Yanybaka jangkurr Kudkanyi nayi barri, ‘Jirrinybayi yalunya Yanjilmuku Kudwanyi. Nyuli jirrinyba yalunya, yalu lalanbiji ninya. Miku ningiyi munyajba linjumbikurri nganyingka. Kudanyu ningaja lalanba yurrngumba barri.’ Nani yanybaka jangkurr Kudkanyi, baki nanankardi jaliyi ninji bulbulngijba wayka jambarri, baki janinyalu lalanba Yanjilmukunyi. Miku nganyingkiyi linjumba mankanyi, jaliyi ninji dujanya nangangi jandanyi Kudkanyi.”
MAT 4:7 Ngala jananganjayi Jisuswanyi, “Ngala mili nanda jangkurr Kudkanyi yanybaka nayiba, ‘Marda ninjimi miku balanja nganyi mambuka Kud. Marda ninjimi miku balanja nanda nganyi mambuka Kud.’” Nani barri jananganjayi Sayidin Jisuswanyi. Barriwa.
MAT 4:8 Baki mili balanjayi Jisus Sayidinwanyi. Kuyu nyuli Jisus juju barri kingkarri yundu kulawirana. Juju barri kingkarrinyan bangani buli jungku kulawirana. Yanybayi Sayidin nangangi Jisuskanyi, “Ninji najbangka yaji juju, langki baki kula, karri baki bayungu. Juju ninji najbangka yaji lukuluku. Yingka nyulu mambuka nanankanyi yajinyi langki. Yingka nyulu mambuka nanankanyi yajinyi kula. Kajamuku mambukamuku, ninji najbangka yalungi yaji.
MAT 4:9 Jangayu yarrijba ninga wirimalaru yingkamukuyngka mambukanyi. Janinga yarrijba wirimalaru bukambijuyngka yalungi, jaliyi ninji kuyu ngaki jangkurr, jaliyi ninji durrijba ngaki yuwa. Janinji wirimalaru bukambijuyngka yajinyi jaliyi nganinji yarrijba nganiyingkanyi mambukanyi.” Barriwa.
MAT 4:10 Ngala mili jananganjayi Sayidin Jisuswanyi, kudanyu nyuli ngirrwa nangangi, “Barriwakiyi jilajba juju ngakinbunanyi. Wijbakiyi nganinji balanja. Yanybaka nayi barri nanda jangkurr najana Kudkanyi, ‘Ngawamba yingamali nyulu dujanya Kud. Nyulu wirimalaru bukambijuyngka yalungi. Marda ninjimi yanyba mududu nangangi baki brijbakimi nangangi. Marda ninjimi wajba Kud kunybanyi jangkurranyi nganyingkanyi. Marda ninjimi yabimba yaji ngawamba nangangi, miku yingkanyi jala miku dujanya Kud.’ Barriwakiyi barlba ngakinbunanyi. Ngayu yurlwangka nganyingkanyi jangkurranyi.” Nani barri jananganjayi Sayidin Jisuswanyi.
MAT 4:11 Baki barlbayi Sayidin. Yingijba nyuli Jisus nyubana jungunkurri kulawirana. Baki badajba yali Yanjilmuku nangandurri, lalanba yali Jisus nanaba mulijina yajina. Barriwa.
MAT 4:12 Baku barri yali wudumba nanda Jun Ngurrunbawarr. Wudumba yali Jun ngarrkadabawarrmukunyi baki kijijba yali. Yarrijba yali brisinyina. Bayngkani barri barlbayi langki Jisus nanankurri walkurrayngkurri yajiyurri, niji Kalili.
MAT 4:13 Miku nyuliyanyi jungku nanganginyina yajina Nasarid, ngala nyuli jungku yingkana barrawuyabarrawuyana, yaji niji Kabirnayum. Nanda barrawuyabarrawuya langiya nananyina kanjana, niji Kalili, baki nananyina walkurranyina yajina jalili yalu wankalana nijarrijba, Jibulun baki Nabdali.
MAT 4:14 Nanda wankalanyi niji Yayisaya, nyulili yanyba jangkurr nangangi Kudkanyi, baki nyuli yarrijba jangkurr najana Kudkanyi. Duja nangangi jangkurr.
MAT 4:15 Nayi nyuli yarrijba, “Ngayu yanybaka yalungi jala jungku nanankuyanyina yajina, Jibulun baki Nabdali, nananyina walkurranyina yajina Kalili. Kudiyamuku yalu jungkuka karrurriybana nanaba bundalina niji Jurdan, baki kudiyamuku yalu jungkuka bayangarrinybana kanjana. Yalu jungkuka yalunginyina ngurranyina yajina. Ngayu yanybaka yalungi jala yalu jungku nananyina yajina.
MAT 4:16 Yalu jungku barrinani mungana yajina. Nani yalu jungkuka barrinani mungana yajina, mikungangi yaliyi jingkijba Kud. Ngala badajbaja yingka yalundurri. Janyulu badajba yalundurri, baki janyulu barrinani mirnbi yalungi, yalu naykanyi yaji. Nanangini yingkawanyi janyulu milidimba yalunya nangangi Kudkanyi, baki jayalu jingkijba Kud. Jayalu jingkijba jungunkanyi yurlurrmba nangangi.” Barriwa. Nani yanybayi jangkurr najana Kudkanyi.
MAT 4:17 Ngala jungkuyi Jisus nanaba Kabirnayum, baki milidimba nyuli yalunya nangangi Kudkanyi. Yanybayi Jisus yalungi, “Nanijba barri yuku narri jungku kunyba nangangi Kudkanyi, baki janyulu lalanba narrinya Kudwanyi. Wijba narri jungku balki. Yangkalamba janarringka narringinbunanyi balkinanyi yajinanyi, baki janarri kuyu nayinda kunyba jangkurr nangangi Kudkanyi. Jungku janarri kunyba nangangi Kudkanyi yurrngumba barri. Ngindu janarringka muwa narringinkanyi balkinyi yajinyi. Kuyu janarri nayinda kunyba jangkurr nangangi Kudkanyi, baki janyulu lalanba narrinya yurrngumba barri.” Nani barri nyuli milidimba yalunya Jisuswanyi.
MAT 4:18 Jilajbayi Jisus yundu bayunguna wabudana. Walkurra nanda wabuda barrinani kanja niji Kanja Kalili. Jilajbayi Jisus baki najba nyuli bulanya buwakula, Sayimin baki Yandru. Nanda Sayimin, yingka niji nangangi, Bida. Najbayi bulanya janybikurri bardija wayka wabudarri. Janyba bulili bardija kakunyi mungkujbirriwuyanyi. Nani barri bulili waki yurrngumba wudumbikanyi kaku.
MAT 4:19 Yanybayi Jisus bulangi, “Jilajba janimbala ngakinduwa. Janimbala jungku ngakindu yurrngumba barri, baki jangayu milidimba nimbalanya. Nanijba barri nimbala wudumbaka kaku, ngala baku barri janimbala wudumba yingkamuku ngaki.”
MAT 4:20 Baki yinarramba buli yingijba nanda bardija, yingijba buli bardija yurrngumba barri, baki jilajba buli nangandu Jisusnyina.
MAT 4:21 Mili yali jilajba bayunguna wabudana, baki najba yali yingkawuya buwakula bulanya. Najbayi bulanya, Jayims baki Jun. Marda nijanganjinyi bulangi niji nangangi Zibidi, nyuli bulandu marda. Jungku yali muwardana, baki ngarrkadaba yali bardija nanda bardawayudi. Yanybayi Jisus bulangi, buwakulayngka bulaja jilajba nangandu Jisusnyina. Barriwa.
MAT 4:22 Baki yingijba buli nanda nijanganjinyi bulangi. Nyuli wambu jungku muwardana baki jawuda wakiwarr nangandu, ngala barlbayi buwakula nangandu Jisusnyina. Barriwa.
MAT 4:23 Jilajbayi Jisus nananyina walkurranyina yajina Kalili. Nyulili jilalajba kajayurri jurjyurri, bakili milidimba yalunya nanaba. Milidimba nyulili yalunya kunybanyi jangkurranyi Kudkanyi, nyulu lalanbawarr ngambalangi. Bakili nyulu kunymamba kajamuku jalili yalu lunji.
MAT 4:24 Kajamuku jalili jungku nananyina walkurranyina yajina niji Siriya, yali manku jangkurr nangangi Jisuskanyi. Manku yali jangkurr nangangi, bakili yalungka yanyba nangangi. Bakili kuyu kajamuku jalili yalu lunji nangandurri. Baki kunymamba nyuli yalunya Jisuswanyi. Kudiya yali balkijba muwa, kudiya yali balkijba kulaji, kudiya barri miku yalungkiyanyi ngirringirrikimba mankanyi, kudiya yalu wuwarryudi mankanyina. Lunji yali yanina yanina ngalyayudi. Kuyu yalunjali nangandurri Jisusyurri, baki nyuli kunymamba yalunya bukambiju.
MAT 4:25 Kajamuku yali jilajba nangandurri. Kudiyamuku yali jilajba bayunguna Kalilinanyi, kudiyamuku yali jilajba karrurrinanyi, nanda yaji Dikabulis. Kudiyamuku yali jilajba kulani Jirusalimnanyi, baki Judiyananyi. Kudiyamuku yali jilajba karrurrinybananyi. Yali burrijba nanda bundal niji Jurdan. Baki yali jilajba nangandu, ngala nyuli jilalajba lukuluku milidimbikanyi yalunya jangkurranyi, baki kunymambikanyi yalunya mankanyi.
MAT 5:1 Kajamuku yali jilajba nangandu Jisusnyina, walkurra muramuku. Najbayi yalunya Jisuswanyi, baki mankumanku nangki, janyulu milidimba yalunya. Kirrijba nyuli kingkarri dungalana, baki jungkurrijba nangki jambana. Jilajba yali nanganginmuku kandimuku nangandurri, baki jungku yali walu nangandu. Baki walkurra muramuku yali jungku nanaba nangandu marda.
MAT 5:2 Baki milidimbayi yalunya Jisuswanyi. Milidimbayi yalunya kajanyi jangkurranyi. Nayi nyuli yanyba,
MAT 5:3 “Nanda jala nangka jingkijba, miku nangkimi yabimba jungunkanyi kunyba, janyulu nyulu mirnarrijba muwa. Nyulu jingkijbangka, ngawamba yuku nyulu yabimbaka jungunkanyi kunyba Kudwanyi. Janyulu lalanba nanda yurrngumba Kudwanyi, jala jingkijba nani, baki nanankardi janyulu mirnarrijba muwa. Barriwa.
MAT 5:4 Nanda jala ngindu muwa nanganginkanyi balkinyi yajinyi, baki yingkamukuyngka yalunginkanyi balkinyi yajinyi, janyulu nyulu mirnarrijba muwa. Yabimbaja kunyba yaji nangangi Kudwanyi, baki nanankardi janyulu mirnarrijba muwa. Barriwa.
MAT 5:5 Nanda jala miku nangka walkurramba, ngala jala nangka bayakardamba, janyulu nyulu mirnarrijba muwa. Yabimbaja walkurra yaji nangangi Kudwanyi. Nanda barri janyulu mili wanka jungku nangandu Kudnyina, baki nanankardi barri janyulu mirnarrijba muwa. Barriwa.
MAT 5:6 Nanda jala nulijba jungunkanyi kunyba nangangi Kudkanyi jala nulijba yabimbikanyi nanda jala yanyba kud nangangi yabimbikanyi yaji, janyulu nyulu mirnarrijba muwa. Nyulu jingkijbangka Kud, nyulu lalanbawarr, baki nanankardi barri janyulu mirnarrijba muwa. Barriwa.
MAT 5:7 Nanda jala yabimbaka kunyba yaji yalungi yingkamukuyngka, janyulu nyulu mirnarrijba muwa. Nyulu jingkijbangka Kud, nyulu kandimbaka nanda, marda yabimbaka kunyba yaji nangangi. Nanankardi barri janyulu mirnarrijba muwa. Barriwa.
MAT 5:8 Nanda jala yurrngumba nulijba durriykanyi nanda yuwa nangangi Kudkanyi, jala miku nulijba durriykanyi nanda yingka yuwa, janyulu nyulu mirnarrijba muwa. Miku janangka ngadijba Kud nanganbunanyi, ngala janyulu najba Kud baku barri, baki nanankardi barri janyulu mirnarrijba muwa. Barriwa.
MAT 5:9 Nanda jala yurrngumba kandimba yalunya jala yalu kijiyudi, nanda jala nulijba kurrkunbikanyi yalunya kijinyi, nanda jala nulijba yalungi jungunkanyi mardumardu muwa, janyulu nyulu mirnarrijba muwa. Janyulu kuyu nanda nanganginmirra jandanyi Kudwanyi, baki nanankardi janyulu mirnarrijba muwa. Barriwa.
MAT 5:10 Nanda jala miku nangkimi yangkalamba nanganbunanyi Kudnanyi ngala yingkamukunyi yalu yabimba kiji nangangi, durrijbangangi nyuli yuwa nangangi Kudkanyi, janyulu nyulu marda mirnarrijba muwa. Nyulu jingkijbangka, janyulu mili jungku wanka nangandu lalanbawarranyina, baki nanankardi barri janyulu mirnarrijba muwa. Barriwa.
MAT 5:11 Narri ngakinmuku kandimuku, yingkamukunyi jayalu yabimba kiji narringi, jayalu jujamba jangkurr narringi, durrijbangangi narri ngaki jangkurr. Jayalu yanyba balki jangkurr narringi, ngakingangi. Miku narriyi ngirukijba muwa, ngala janarri mirnarrijba muwa nanankanyi kijinyi. Janarri mirnarrijba muwa, jingkijbangangi narri Kud, janyulu yabimba kunyba yaji narringi. Janyulu lalanba narrinya. Janyulu mili wankamba narrinya, narri jungunkanyi nangandu kingkarri. Baki mili kunyba yaji janyulu yabimba narringi marda. Mili kunyba yaji janyulu yabimba. Wabula kamambarra barri yali yabimba kiji yalungi jalili yanyba nangangi jangkurr Kudkanyi. Kaja kiji yalili yabimba yalungi, baki nani barri jayalu yabimba kiji narringi marda, ngala janarri mirnarrijba muwa nanankanyi kijinyi. Barriwa.”
MAT 5:13 Mili yingka jangkurr yanybayi Jisus yalungi, “Nanda barri ngarrawa, nanda kunyba barnyinyi. Kunymambaka barnyi ngarrawawanyi, baki mikuwali ngujbulijba nanda barnyi. Baki narri barri, narri barrinani nanda ngarrawa. Narri kunymambaka yalunya yingkamuku marda, baki yalu jungku kunyba. Malumba yalu jungku kunyba narrindu. Ngala jaliyi nanda ngarrawa jardibirri, baki ngambala janyba nanda ngarrawa. Nanda ngarrawa miku kunyba barnyinyi jala nyulu jardibirri. Nani barri nanda narringi, jaliyi narri miku marrimba ngaki jangkurr, jaliyi narri miku milidimba yalunya yingkamuku ngakinkanyi jangkurranyi, baki janarri jungku barrinani nanda jardibirri ngarrawa, jala miku kunyba barnyinyi. Janyba yalu nanda jardibirri ngarrawa. Baki nani barri, janyulu janyba narrinya Kudwanyi, miku nyuliyi lalanba narrinya jaliyi narri miku marrimba ngaki jangkurr. Janyulu janyba narrinya nanganbunanyi.” Nani barri yanybayi Jisus yalungi ngarrawanyi.
MAT 5:14 Baki mili yingka jangkurr yanybayi Jisus yalungi, “Minimbaka yaji mungana mirnbiwanyi. Nyulu yarrijbangka mirnbi yundurrinybana nganinyiwanyi, baki janyulu mirnarrijba yaji juju. Miku nyulimi yarrijba mirnbi kalawunyi darladarlana. Miku. Murumbaka mirnbi darladarlawanyi. Yarrijbangka nyulu nanda mirnbi yundurrinybana yajina. Barriwa. Jala nangangi barnda kingkarri dungalana, baki najba yali nangangi mirnbi kingkarri kajamukunyi. Jujunanyi yalu najba nanda mirnbi nanganginyina barndana. Baki narri barri, narri barrinani nanda mirnbi. Narri minimbaka yalunya yingkamuku ngaki. Jala narri ngayangayijba nanankanyi yuwanyi Kudkanyi, baki yingkamukunyi jayalu najba narrinya jungunkurri yurlurrmba nangangi Kudkanyi. Kajamukunyi yalu najba mirnbi mungana, baki nani barri, kajamukunyi jayalu najba narrinya jungunkurri yurlurrmba nangangi. Baki jayalungka marda yangkalamba nangandurri Kudyurri, jayalu yalu marda jungku yurlurrmba nangangi.” Barriwa. Nani yanybayi Jisus yalungi mirnbinyi.
MAT 5:17 Baki mili nyuli milidimba yalunya nayi barri. “Badajba kuna ngayi, manjamanjambikanyi nanda yuwa nangangi Musiskanyi. Miku. Marda narringkimi miku mankumanku nani ngaka. Miku ngayiyanyi badajba manjamanjambikanyi nanda yuwa nangangi Musiskanyi, baki nanda yingka jangkurr jalili yalu milidimba wankalamukunyi jali yanyba jangkurr Kudkanyi. Miku ngayiyanyi badajba manjamanjambikanyi yalungi jangkurr, ngala ngayi badajba dujambikanyi yalunginkanyi jangkurranyi. Yalunginyi jangkurrwanyi karungka narrinya ngaki. Wabula kamambarra yanybayi Kud, janyulu manjijba nanda marrimbikanyi yalunya mardarda. Baki nanamukunyi wankalamukunyi, yali yarrijba nanda jangkurr Kudkanyi najana. Yali yarrijba nanda jangkurr miku yangkalambikanyi. Yali yanyba nangangi Kudkanyi, janyulu manjijba nanda baku barri juju. Miku ngayiyanyi badajba manjamanjambikanyi nanda yalungi jangkurr, ngala jali ngayu badajba baki narri jingkijba duja nanda jangkurr.
MAT 5:18 Mankuwa narri nayinda jangkurr. Bukamba nanda yuwa jali yanyba Kud nangangi Musiskanyi, nanda nangangi yuwa Kudkanyi. Yuwajiwa jungkuja nanda yuwa duja yurrngumba barri. Yurrngumba jungkuja duja nanankurri jalija bukamba yaji Kudwanyi. Nanamanji barri janyulu manjamanjamba laliji baki jamba Kudwanyi. Baki yurrngumba nanankurri jungkuja duja nanda yuwa.
MAT 5:19 Nanankardi barri, marda narrimi bukambiju ngayangayijba nanankanyi yuwanyi. Marda narringkimi miku mankumanku, “Nanda yuwa nangangi Musiskanyi, kudiya nanda walkurra, jangayu ngayangayijba nanankanyi yuwanyi, ngala kudiya bayakarda, jangayu yurlwa nanankanyi yuwanyi.” Marda narringkimi miku mankumanku nani barri. Bukamba nanda yuwa nanda jirrinyi yuwa narringi. Miku yingka walkurra, ngala yingka bayakarda. Jaliyi narri miku ngayangayijba bukamba nanankanyi yuwanyi, baki jaliyi narri milidimba yalunya marda, yalu miku ngayangayiykanyi bukamba nanankanyi yuwanyi, baki nanda balki. Miku nyuliyi lalanba narrinya mili Kudwanyi. Miku nyuliyi mili wankamba narrinya baku barri. Ngala jaliyi narri ngayangayijba bukamba nanankanyi yuwanyi, baki jaliyi narri milidimba yalunya marda, yalu ngayangayiykanyi nanankanyi yuwanyi, baki janyulu mirnarrijba muwa narringi Kud. Janyulu mili lalanba narrinya. Janyulu mili wankamba narrinya baku barri.
MAT 5:20 Kudanyu ngayu karungka narrinya. Jaliyi narri yabimba yaji nani barri, baki janyulu mili lalanba narrinya Kudwanyi. Janyulu mili wankamba narrinya baku barri, jaliyi narri ngayangayijba nanankanyi yuwanyi. Ngala nanamuku milidimbawarrmuku yuwanyi, baki nanamuku Barisimuku, miku nyuliyi lalanba yalunya, mikungangi yalimi jungku yurlurrmba nangangi Kudkanyi. Miku yalimi ngayangayijba nanankanyi yuwanyi Kudkanyi, baki miku yalunjalimi milidimba yingkamuku ngayangayiykanyi nanankanyi yuwanyi. Milidimbaka yalunjalu yinini yuwanyi yalunginkanyi yuwanyi, ngala miku yalunjalimi milidimba nanankanyi duja yuwanyi Kudkanyi. Baki nanankardi barri miku nyuliyi lalanba yalunya Kudwanyi.” Barriwa.
MAT 5:21 Mili barri yanybayi Jisus yalungi, “Narri jingkijba nayinda jangkurr, jali jirrinyba Kudwanyi wabula. Nayi nyuli jirrinyba, ‘Mikujiyi kurdanba yingka. Jaliyi ninji kurdanba yingka, baki jayalu kuyu ninya kurdusyurri, baki jayalu nanaba yanyba nganyingkanyi balkinyi yajinyi.’ Nani barri jayalu yabimba nganyi jaliyi ninji kurdanba yingka.
MAT 5:22 Ngala nanijba barri ngayu narrinya karungka mili jangkurranyi. Jaliyi ninji jungku ngarrangarra muwa nanankanyi yingkanyi, baki nanda balki. Ninji jungkuka balkina yuwana Kudkanyi, jaliyi ninji ngarrangarra muwa yingkanyi. Yiningki janinji yanyba balki jangkurr nangangi. Yiningki janinji yanyba nangangi, ‘Ninji mudu. Ngayu ngarrangarra muwa nganyi.’ Baki yiningki janinji daba nanda. Jaliyi nganyingka kurrkunba kijiwiykanyi yingkanyi baki miku ninjiyi daba, miku ninjiyi kurdanba nanda yingka. Ngayu karungka narrinya, jaliyi ninji yingkanyi ngarrangarra muwa nuliykanyi kurdanbikanyi nanda yingka, baki marda nganyingkimi janyba. Marda nyulimi manjijba ninya wayka jangurri Yilyurri Kudwanyi. Barriwa.
MAT 5:23 Kudiyana narri jilajba walkurrayngkurri jurjyurri. Narri jilajba waykanyi Kud yajinyi. Ngala jalija ninji wanbiya jurjina, jaliyi ninji mankuwa yingkanyi, nyulu ngarrangarra muwa nganyi, yabimbangangi ninji balki yaji nangangi, jaliyi ninji mankuwa nani, baki mikujiyi wajba Kud nanankanyi yajinyi. Jilijbawa.
MAT 5:24 Yingijbakiyi nanda yaji nanaba jurjina, baki jilajbakiyi nanankurri yingkayurri. Karukiyi nanda, ninji ngindu muwa nanankanyi balkinyi yajinyi jala ninji yabimba nangangi. Baki yuku barri, janinji wijba jurjyurri, baki wajba Kud nanankanyi yajinyi. Waluku janinji karu nanda, ninji ngindu muwa nganyingkanyi balkinyi yajinyi, baki yuku barri janinji wajba Kud yajinyi. Barriwa.
MAT 5:25 Mili jangkurr jangayu yanyba narringi. Muningka jangayu yanyba. Wajbayi ninga dungala nganinyiwanyi, ninji wiykunumbikanyi nanda dungala baku barri. Jaliyi nyulu ngajaka ninya nanankanyi dungalanyi, baki marda ninjimi dulu wiykunumba nangandurri. Jaliyi ninji miku wiykunumba baki yiningki janyulu karu yirlarr nanankanyi dungalanyi. Baki janinya karrinjarrijba kalawuyngkurri kurdusnyina. Jayalu yanyba nganyi, baki jayalu yarrijba ninya brisinyina, baki janinga marrimba nanaba, nanankurri jalija ninji wiykunumba bukamba nanda dungala nangandurri. Nanankardi barri, marda ninjimi dulu wiykunumba nanda dungala waluwa nyuli karu yirlarr. Barriwa.
MAT 5:27 “Mili jangkurr jangayu milidimba narrinya. Narri jingkijba nayinda jangkurr, ‘Mikujiyi kuluka yingkana, jala miku nganyinmirra kayikayi.’
MAT 5:28 Ngala nanijba barri ngayu karungka narrinya mili jangkurranyi. ‘Jaliyi ninji najba yingka jibarri, baki kudanyu ninji nulijba nangangi kulukankanyi nangandu, ngala miku, jaliyi ninji kudanyu nulijba nangangi nani, baki nanda balki. Jaliyi ninji kuluka nangandu, nanda balki, baki jaliyi ninji nulijba nangangi nani barri, baki nanda marda balki. Mikujiyi ningkijba yingka jibarri nani, mikujiyi nulijba nangangi nani, baki miku janinji yabimba balki yaji.
MAT 5:29 Ninji najbangka yaji yamiyudinyi. Jaliyi ninji najba yaji, baki nanankardi barri nganyingka mankumanku yabimbikanyi balki yaji, barrinani jala ninji najba yingka jibarri, baki nganyingka mankumanku kulukankanyi nangandu. Jaliyi nganyingka mankumanku nanankanyi balkinyi yajinyi nani barri, jaliyi ninji yabimba nanda balki yaji, baki nanda balki. Jaliyi nganyingka mankumanku nanankanyi jali ninji najba, baki ninji yabimba nanda balki yaji, baki miku ninji jilajba kingkarri nangandurri Kudyurri, ngala janinji jilajba wayka jangurri Yilyurri. Marda nganyingkimi kurrkunba yabimbikurri nanda balki yaji jali ninji najba, baki janinji jilajba kingkarri nangandurri Kudyurri. Barriwa.
MAT 5:30 Ninji yabimbaka yaji marniyudinyi. Jaliyi nganyingka mankumanku yabimbikanyi balki yaji nganyinjudinyi marniyudinyi, baki nanda balki. Jaliyi nganyingka mankumanku yabimbikanyi nanda balki yaji, jaliyi ninji yabimba nanda balki yaji, baki miku ninjiyi jilajba kingkarri nangandurri Kudyurri, ngala janinji jilajba wayka jangurri Yilyurri. Marda nganyingkimi kurrkunba yabimbikanyi nanda balki yaji marniyudinyi, baki janinji jilajba kingkarri nangandurri Kudyurri. Barriwa.
MAT 5:31 Marda nayinda barri jangkurr yali yanyba wabula barri maykarranyi. ‘Jaliyi nanda maninganja kuluka yingkana nganinyina, baki nanda nawinganja nangangi, yuku nyulu manjijba nangangi maninganja nanganbunanyi. Yuku nyulu wajba nangangi maninganja jangkurranyi najana, baki muningka manjijba nanganbunanyi. Nanda jangkurr najana yanybaka jibarrinyi, miku nyulimi mili nangangi maninganja. Baki yuku barri yingkawanyi kuyuja nanda jibarri nanganginkanyi maninganjanyi. Nani barri yanybaka yuwa nangangi Musiskanyi jaliyi kuluka jibarri yingkana nganinyina.
MAT 5:32 Ngala nanijba barri ngayu karungka narrinya mili jangkurranyi. Jaliyi wajbangka nangangi maninganja nanankanyi najanyi nganinyiwanyi baki manjijba nanganbunanyi, ngala nanda jibarri mikukiyanyi kuluka yingkana nganinyina, baki nanda balki. Yanybaka naja, miku nanda jibarri yuwajiwa nangangi maninganja, ngala balki nanda jangkurr najana. Miku nyuliyanyi kuluka yingkana nganinyina, baki nanankardi barri yuwajiwa nanda jibarri nangangi maninganja. Nanangini jibarriwanyi jaliyi nyulu wudumba yingka nawinganja, baki nyulu yabimbaka balki yaji, baki nanda buyingkinyi nawinganja nangangi, nyulu marda yabimbaka balki yaji. Nani barri bula jungku balki, yuwajiwangangi nyulu maninganja nanankanyi waluwiyngkanyi nganiyngkanyi. Barriwa.
MAT 5:33 Narri jingkijba barri, yalunjalu karuyi nayinda, “Jala ninji yanyba ngiruka jangkurr, miku yangkalambikanyi, jala ninji ngajaka Kud mankunkanyi nganyi ngiruka jangkurr, baki marda ninjimi yabimba nanda yaji. Jaliyi ninji miku yabimba nanda jala ninji ngajaka Kud mankunkanyi yaji, baki nanda balki, balkimirra.’ Nani barri yalunjalu karuyi.
MAT 5:34 Ngala nanijba barri ngayu karungka narrinya mili jangkurranyi. Jala ninji nulijba yanybikanyi ngiruka jangkurr, miku yangkalambikanyi, baki mikujiyi ngajaka Kud mankunkanyi nganyi jangkurr. Jaliyi ninji ngajaka Kud nani, baki nanda balki. Nanda nanganginkanyi jangkurranyi Sayidinkanyi. Ngala jala ninji nulijba yanybikanyi ngiruka jangkurr, baki ngawamba yanyba nayi, ‘Yi. Jangayu yabimba nanda yaji.’ Baki yingka jangkurr barrinani nayi, ‘Miku jangayu yabimba nanda yaji.’ Ngawamba nani barri marda ninjimi yanyba ngiruka jangkurr.
MAT 5:38 Baki narri jingkijbangka nayinda marda. Yalu yanyba, ‘Jaliyi yingkawanyi linjumba nganyi yami, jabarri marda ninjimi linjumba nangangi yami. Jaliyi nyulu dalyamba nganyi mayi, jabarri marda ninjimi dalyamba nangangi mayi.’
MAT 5:39 Ngala nanijba barri ngayu karungka narrinya mili jangkurranyi. Jaliyi yingkawanyi yabimbaka kiji nganyi, baki mikujiyi daba. Jaliyi yingkawanyi daba nganyi karnkul, baki mikujiyi kurrkunba. Yuku janyulu daba nganyi yingka karnkul marda.
MAT 5:40 Jaliyi yingka nulijba kuyunkanyi nganyi danyan, baki wajbakiyi marda nganyingkanyi yingkanyi jumbalanyi.
MAT 5:41 Jaliyi ngarrkadabawarranyi karu ninga kuyunkanyi nangangi yaji juju bijal, ngala janyulu muningka jila nganyindu, baki yabimbakiyi nanda jali nyulu karu, ngala milikiyi yabimba. Kuyukiyi nangangi yaji jujumirra.
MAT 5:42 Jaliyi yingkawanyi ngajaka ninya yajinyi, baki mikujiyi kilimba nanda yaji nganyindu. Wajbakiyi nanankanyi jali nyulu ngajaka ninya. Nani barri marda narrimi yabimba yaji nangangi. Barriwa.
MAT 5:43 Marda nayinda jangkurr narri jingkijba, ‘Marda ninjimi maruka muwa yalungi nganyingkanyi kandimukuyngka, ngala marda ninjimi ngirra yalunya jala yalu miku nganyinmuku mungkijimuku.’
MAT 5:44 Ngala nanijba barri ngayu karungka narrinya mili jangkurranyi. Marda ninjimi maruka muwa yalungi, nganyingkanyi kandimukuyngka, baki marda ninjimi maruka muwa yalungi, jala yalu miku nganyinmuku mungkijimuku. Baki marda ninjimi maruka muwa yalungi jala yalu ngirra ninya. Marda ninjimi yanyba mududu nangangi Kudkanyi yalungi, jala yalu yabimba kiji nganyi.
MAT 5:45 Jaliyi ninji jungku nani barri marukankanyi muwa yalungi bukambijuyngka, baki ninji jungku barrinani nyulu jungkuka nganyi Buwakanya kingkarri. Nyulu marukangka muwa yalungi bukambijuyngka. Nyulu yabimbaka kunyba yaji yalungi jala kunybamuku, baki yalungi jala balkimuku.
MAT 5:46 Ngala jaliyi ninji maruka muwa ngawamba yalungi jala yalu maruka muwa nganyi, baki wanyingkanyi mardakimi Kudwanyi yabimba kunyba yaji nganyi. Nanamuku balkimuku yalu marda jungkuka nani. Wanyingkanyi mardakimi Kudwanyi yabimba kunyba yaji yalungi. Ngala jaliyi ninji maruka muwa yalungi jala yalu ngirra ninya, baki janyulu mirnarrijba muwa nganyi Kud.
MAT 5:47 Jaliyi ninji ngawamba jungku yalundu nganyinmukunyina mungkijimukunyi, baki nanda kuna kunyba. Nani yalu marda jungku nanamuku balkimuku. Yalu marda jungkuka yalunginyina mungkijimukunyina. Ngala jaliyi ninji jungku yalundu jala ninyalu ngirra, yanybikanyi yalungi, baki janyulu mirnarrijba muwa nganyi Kud.
MAT 5:48 Nganyi Buwakanya kingkarri, nyulu jungkuka kunyba yurrngumba barri. Miku nyulimi yabimba balki yaji. Miku yingamali balki yaji nyulu yabimbaka. Kunyba nyulu jungkuka yurrngumba barri. Baki narri barri, marda narrimi nulijba jungunkanyi barrinani nyulu. Marda narrimi nulijba yabimbikanyi ngawamba kunyba yaji barrinani nyulu yabimbaka kunyba yaji. Barriwa.”
MAT 6:1 Mili barri yanybayi Jisus yalungi jali yalu jungku yundu kulawirana. “Kajamuku yalungka jujambangka. Yalungka mankumankuka, yalu jungkuka yurlurrmba nanankanyi yuwanyi Musiskanyi, ngala miku. Ngala yalu nulijba yalungi yingkamukuyngka, yalungka yanybikanyi yalungi jujambawarrayngka, yalu jujambawarrmuku jungkuka yurlurrmba nanankanyi yuwanyi. Nanankardi barri yalu nulijba yalungi yingkamukuyngka naji yalunya yabimbikurri yaji nangangi Kudkanyi. Nanankardi barri miku yalimi kardarda yanyba mududu nangangi Kudkanyi yalunginyina barndana. Ngala yalu yanyba mududu nangangi, yalu wajba Kud yalunginkanyi kunybanyi jangkurranyi yajina jala yalunya najba kajamukunyi. Miku nanda kunyba. Jaliyi ninji yabimba yaji nani barri, baki nganyi Buwakanya kingkarri miku janyulu mirnarrijba muwa nganyi. Miku janyulu yabimba kunyba yaji nganyi.
MAT 6:2 Jaliyi yingka nyulu jungku mikuyaji mamanyi, mikuyaji dungalanyi, baki wajbakiyi nanda mamanyi baki dungalanyi. Ngala marda nganyingkimi miku barrarrakijba, wajbangangi ninji yalunya yajinyi marda dungalanyi. Ngala kardardakiyi wajba yajinyi. Miku ninyiyi yingkawanyi najba waykurri nanda. Kudiyamuku yalungka barrarrakijba, wajbangangi yalunjalu yajinyi. Nulijba yalu yalungi yingkamukuyngka naykanyi, jala yalu wajba yingka yajinyi. Baki nanankardi yalunjalu wajba yajinyi walu yalundu kajamukunyina, barrinani jurjina, baki burrandi barndana. Yalu barrakijarramuku. Wajba yalu yajinyi, nulijbangangi yalu yalungi yingkamukuyngka, waykanyi yalunya yalunginkanyi kunybanyi jangkurranyi. Nanankardi miku janyulu wajba yalunya nanganginkanyi kunybanyi jangkurranyi Kudwanyi.
MAT 6:3 Ngala jaliyi ninji nulijba waykanyi yingka mamanyi baki dungalanyi, baki marda ninjimi kardarda wajba yajinyi. Marda ninjimi ngadijba nanda kunyba yaji jala ninji yabimba. Marda ninjimi miku karu nanda nganyi kandi. Marda ninjimi miku munyajba nanda yingka jingkiykanyi nanda kunyba yaji jali ninji yabimba.
MAT 6:4 Nani barri marda ninjimi wajba yingka yajinyi. Mikuwali yingkawanyi jingkijba, ngawamba Kud. Nyulu najbangka bukamba yaji Kudwanyi. Nyulu najbangka nanda jala ninji yabimba kardarda. Baki nganyi Buwakanya kingkarri, janyulu mirnarrijba muwa nganyi, yabimbangangi ninji yaji kardarda. Miku ninjiyanyi nulijba yalungi waykanyi ninga kunybanyi jangkurranyi. Nanankardi barri, nganyinyi Buwakayu kingkarri, janyulu wajba ninga kunybanyi yajinyi, jaliyi ninji wajba kardarda yajinyi.
MAT 6:5 Mikujiyi jungku barrinani nanamuku barrakijarramuku, jala nulijba yalungi yingkamukuyngka waykanyi yalunginkanyi kunybanyi jangkurranyi. Mikujiyi jungku barrinani yalu jungku. Yalu karrinjaka burrandi jurjina baki barndana, baki nanaba yalu yanyba mududu nangangi Kudkanyi, nulijbangangi yalu yalungi yingkamukuyngka naykanyi yalunya yanybikanyi mududu Kudkanyi. Yalu nulijba yalungi yingkamukuyngka yanybikanyi kunyba jangkurr yalungi, ngala miku nyuliyi nyulu yanyba kunyba jangkurr yalungi Kud. Yingkamuku jayalu yanyba kunyba jangkurr yalungi, baki nanankardi miku nyuliyi yanyba kunyba jangkurr yalungi.
MAT 6:6 Ngala ninji barri, jala ninji yanyba mududu nangangi Kudkanyi, baki mikujiyi muningka yanyba nangangi. Mikujiyi muningka yanyba nangangi yurrngumba barri. Nani barri yalili yanyba ngurranyimuku. Ngala jilajbakiyi kalawunyi nganyinyina barndana. Jungkukiyi nanaba ninjuman baki nanabakiyi yanyba mududu nangangi nganyingkanyi Buwakaya kingkarri. Miku ninjiyi najba Buwakanya Kingkarri, ngala yuku nyulu najbangka ninya kingkarrinya. Yurrngumba ninya najbangka, baki nanankardi janyulu wajba ninya kunybanyi yajinyi. Janyulu wajba ninga nanankanyi jala ninji ngajaka yajinyi.
MAT 6:8 Mikujiyi jungku barrinani yalu jala yalu miku jingkijba Kud. Ngamu nyulu mankuka yalungi jangkurr Kudwanyi, ngawamba jala yalu yurrngumba yanyba mududu nangangi Kudkanyi. Mikujiyi jungku barrinani yalu. Mikujiyi yanyba mududu nangangi barrinani yalu yanybaka. Nganyinyi Buwakayu nyulu jingkijbangka nanda yaji jala ninji nulijba. Nyulu jingkijba nanda yaji, waluwa ninji ngajaka Buwakanya nanankanyi yajinyi.
MAT 6:9 Ngala jala ninji yanyba mududu nangangi Kudkanyi, baki marda ninjimi yanyba nayi barri. ‘Buwakanya Kingkarri, ninji nurrungi Buwakanya jala ninji jungkuka lalijina. Nurru wajbangka ninga nurrunginkanyi kunybanyi jangkurranyi. Ninji barri kudukudu.
MAT 6:10 Ninji barri lalanbawarr nurrungi. Ninji lalanbaka nurrunya, nganyinmuku jandanyimuku. Nurru nulijbangka yalungi, bukambijuyngka wandijiyana, yalu yabimbikanyi nanda jala ninji nulijba yalungi yabimbikanyi yaji. Nani barri yalu yabimbaka yaji Yanjilmukunyi. Yalu yabimbaka nanda jala ninji nulijba yalungi yabimbikanyi yaji.
MAT 6:11 Nurru ngajaka ninya, janinji wajba nurrunya mamanyi yurrngumba, baki miku nurriyi birrkalijba.
MAT 6:12 Nurru ngajaka ninya, janinji manjamanjamba nurrungi balki yaji, jali nurru yabimba. Nurru manjamanjambaka nanda balki yaji jali yalu yabimba nurrunya yingkamukunyi, baki nani barri janinji manjamanjamba nurrungi balki yaji.
MAT 6:13 Mikujiyi balanja nurrunya kudanyu barri, ngala marrimbakiyi nurrunya mardarda nanamunanyi balkinanyi wuwarrnanyi Sayidinanyi. Marrimbakiyi nurrunya mardarda, baki miku nurrunyiyi wudumba Sayidinwanyi.’ Barriwa. Nani barri marda narrimi yanyba mududu nangangi Buwakaya Kingkarri.
MAT 6:14 Jala narri manjamanjamba nanda balki yaji jali yabimba yingkawanyi narringi, baki narringinyi Buwakayu janyulu nyulu manjamanjamba narringi balki yaji marda.
MAT 6:15 Ngala jaliyi narri miku manjamanjamba nanda balki yaji jali yabimba yingkawanyi narringi, baki nani barri marda miku janyulu nyulu manjamanjamba narringi balki yaji marda Buwakayu Kingkarri. Barriwa.”
MAT 6:16 Kudiyana barri jali yalu nulijba Jumuku jungunkanyi kunyba nangangi Kudkanyi, baki miku yaliyanyi jarrba mama. Miku yaliyanyi jarrba mama, yiningki yingamalina kambana, yiningki marndakaja. Nani barri yalili jungku miku jarrkanyi mama, jalili yalu nulijba jungunkanyi kunyba nangangi Kudkanyi. Barriwa. Mili barri milidimbayi nanganginmuku kandimuku Jisuswanyi. Yanyba nyuli, “Jala ninji jungku miku jarrkanyi mama, baki marda ninjimi jungku kunyba wali. Ngala kudiyamuku jala yalu jungku miku jarrkanyi mama, baki yalu jungku balki wali. Miku yalungkimi wakardaba mankanyi, ngala yalu jungku jambayudi mankanyi baki nyungka, baki jambayudi jumbala. Nani yalu jungku, nulijbangangi yalu yalungi yingkamukuyngka, yalu jingkiykanyi yalunya, miku yalimi jarrba mama nanamanji. Yalu nulijba yalungi jingkiykanyi nani yalunya. Ngala narri barri, jaliyi narri jungku miku jarrkanyi mama, baki miku narriyi jungku barrinani yalu. Wakardaba narringkaja mankanyi. Kunymamba narringkaja nyungka.
MAT 6:18 Baki yingkamukunyi jayalu miku jingkijba narrinya, narri jungku miku jarrkanyi mama. Jayalu miku jingkijba narrinya, narri nulijba jungunkanyi kunyba nangangi Kudkanyi. Ngala narringinyi Buwakayu janyulu jingkijba nani narringi. Janyulu jingkijba, narri jungunkanyi miku jarrkanyi mama, narri nulijba jungunkanyi kunyba nangangi. Nyulu najbangka narrinya yurrngumba barri, nyulu najbangka nanda jala narri kardarda yabimba, baki janyulu yabimba kunyba yaji narringi baku barri. Barriwa.
MAT 6:19 “Marda narrimi miku nulijba wudumbikanyi kaja yaji yurrngumba barri. Marda narrimi miku dalburrijba kudukudu yaji narringinmirra, barrinani dungala, barrinani jumbala, baki mama. Narringi kaja jumbala, jayalu balkijba baku barri. Baki yiningki janyulu maninjakujba narringi dungala yingkawanyi, jaliyi narri dalburrijba kudukudu yaji.
MAT 6:20 Jaliyi narri nulijba wudumbikanyi kaja yaji, baki janarringka mankumanku wudumbikanyi nanda yaji yurrngumba barri, ngala miku janarringka mankumanku nangangi Kudkanyi. Janarri nulijba mili yajinyi baki mili yajinyi yurrngumba barri, ngala miku janarri nulijba nangangi Kudkanyi. Ngala marda narrimi nulijba yabimbikanyi kunyba yaji. Marda narrimi nulijba yabimbikanyi kaja kunyba yaji nangangi Kudkanyi, baki yalungi yingkamukuyngka. Marda narrimi wajba yalunya yajinyi, jala yalu jungku mikuyaji yajinyi. Marda narrimi wajba yalunya narringinkanyi kunybanyi jangkurranyi. Jaliyi narri yabimba kunyba yaji nani barri, baki mikuwali yingkawanyi maninjakujba nanda kunyba yaji. Jaliyi narri nulijba yabimbikanyi kunyba yaji nani barri, baki narringka mankumanku nangangi Kudkanyi, narri nulijbangka jungunkanyi kunyba nangangi marda. Barriwa.
MAT 6:22 Jaliyi narri jingkijba nanda kunyba yaji narri yabimbikanyi, baki narri yabimba nanda kunyba yaji, baki nanda kunyba. Ngala jaliyi narri jingkijba nanda kunyba yaji narri yabimbikanyi, ngala miku narrimi yabimba nanda kunyba yaji, ngala narri yabimba balki yaji, baki nanda balki, balkimirra. Barriwa.
MAT 6:24 Mikukimi nganinyiwanyi waki kujarrayngka mambukanyi. Jalimi nyulu waki kujarrayngka, yingkawanyi karuja nanda nganinyi yabimbikanyi yingka yaji, ngala yingkawanyi karuja nganinyi yabimbikanyi yingka yaji. Wanyi yaji janyulu yabimba. Miku nyuliyi waki kujarrayngka mambukanyi. Janyulu maruka muwa yingkanyi, baki janyulu yurlwa yingkanyi. Baki nani barri miku narriyi waki wudumbikanyi kaja yaji narringi, baki malumba narri waki nangangi Kudkanyi. Jaliyi narri waki wudumbikanyi kaja narringi yaji, baki miku narriyi waki nangangi Kudkanyi. Barriwa.
MAT 6:25 Wabula ngayi karu narrinya, marda narrimi miku balkijba muwa wudumbikanyi mama marda wabuda, baki jumbala ngarambikanyi mankanyi. Marda narrimi miku balkijba muwa nanankanyi yajinyi. Ngala jaliyi narringka mankumanku nangangi Kudkanyi, jaliyi narri nulijba jungunkanyi kunyba nangangi, baki wakinkanyi nangangi, baki janyulu lalanba narrinya. Janyulu nyulu wajba narrinya mamanyi baki wabudanyi baki jumbalanyi.
MAT 6:26 Mankumanku narringka julakinyi. Mikukimi julakiwanyi yarrijba yami jambana. Mikukimi jardiykunumba nangangi mama. Miku nyulimi dalburrijba kaja mama bakunyi. Mikukimi yabimba yaji nani julakiwanyi, ngala nyulu lalanbaka nanda julaki narringinyi Buwakayu Kingkarrinya. Nyulu lalanbaka nanda julaki, baki nani barri nyulu lalanbaka narrinya marda. Narri barri mili walkurra julakinyi, baki nanankardi janyulu kudanyu lalanba narrinya barri.
MAT 6:27 Jaliyi narri balkijba muwa narringinkanyi mamanyi baki jumbalanyi, baki janarri kuna jungku yurrngumba malbungujba mankanyi. Janarri kuna malbungujba mankanyi, balkijbangangi narri mamanyi baki jumbalanyi. Miku barri. Miku narriyi jungku yurrngumba, balkijbangangi narri muwa yajinyi.
MAT 6:28 Wanyingkanyi narri balkijba muwa jumbalanyi. Ningkijba narri nayinda kaja jal, jala jardijba karnbana. Miku yalimi balkijba muwa jumbalanyi. Miku yalimi yabimba jumbala yalungi. Miku yalimi waki wudumbikanyi dungala, mamanyi marda jumbalanyi. Ngala yalu kunybamirra ngambala naykanyi yalunya nanda jal.
MAT 6:29 Nanda wankalanyi mambuka niji Sulumun, kaja nangangi yaji. Kaja kunyba jumbala nangandu. Ngala miku nangangi jumbala kunybamirra, ngambala naykanyi yalunya, barrinani nayinda kaja jal, yalu kunybamirra ngambala naykanyi yalunya. Nanda jal mili kunyba nanganginkanyi jumbalanyi Sulumunkanyi.
MAT 6:30 Nayinda karnba jalyudi, nyulu lalanbaka yalunya Kudwanyi. Jardijbangka karnba janjawala, ngala nyulu dukujbaja jala wurarawala. Ngawamba jungkuka karnba marndakaja, baki yajbaja karnba janguwanyi. Ngala narri barri, narri mili walkurra karnbanyi. Nyulu lalanbaka karnba Kudwanyi, baki marda narrimi jingkijba Kud, nyulu lalanbaka narrinya marda. Marda narrimi jingkijba Kud, janyulu wajba narrinya narringinkanyi yajinyi.
MAT 6:31 Marda narrimi miku balkijba muwa narringinkanyi yajinyi. Marda narringkimi miku mankumanku nayi, ‘Mikuyaji mamanyi ngakindu munganawayngka, mikuyaji jumbalanyi. Yanka jangayu wudumba mama, baki nyanyalu. Yanka jangayu wudumba jumbala.’
MAT 6:32 Nanamuku jala yalu miku jingkijba Kud, nani barri yalu jungku. Nani barri yalu balkijba muwa yalunginkanyi yajinyi. Ngala narringinyi Buwakayu Kingkarri nyulu jingkijbangka nanda yaji jala narri nulijba. Nyulu lalanbaka narrinya. Janyulu nyulu wajba narrinya nanankanyi yajinyi jala narri nulijba.
MAT 6:33 Marda narringkimi miku mankumanku narringinkanyi yajinyi, ngala marda narringkimi mankumanku nangangi Kudkanyi. Nyulu lalanbawarr narringi. Marda narrimi yanyba kunyba jangkurr nangangi. Marda narrimi ngajaka Kud, yanka janarri waki nangangi. Jaliyi narringka mankumanku nangangi Kudkanyi nani barri, baki nyuluja lalanba narrinya. Nyulu jingkijbangka narrinya jala narri mikuyaji mamanyi, mikuyaji jumbalanyi, baki janyulu nyulu lalanba narrinya.
MAT 6:34 Nanankardi barri marda narrimi miku balkijba muwa munganawayngka yajinyi. Yiningki badajbaja kiji narrindurri munganawa. Marda narrimi miku balkijba muwa nanankanyi kijinyi, jalija badajbawali munganawa. Marda narrimi miku balkijba muwa munganawayngka yajinyi.” Barriwa. Nani barri milidimbayi yalunya Jisuswanyi jali yalu jungku yundu kulawirana.
MAT 7:1 Mili barri milidimbayi yalunya Jisuswanyi. “Marda narrimi miku dulu jurlwa yalungi yingkamukuyngka. Marda narringkimi miku dulu yanyba, ‘Nanda nganinyi nyulu balki. Miku nyulimi durrijba Kud. Nyulu yabimbaka balki yaji.’ Marda narringkimi miku dulu yanyba nani nangangi. Marda narrimi mankuwa Kud, baku barri janyulu karrinjarrijba narrinya walu nangandu, baki janyulu yanyba narringinkanyi balkinyi yajinyi jala narri yabimba. Jaliyi narri dulu jurlwa yalungi, baki janyulu nyulu dulu jurlwa narringi marda Kud. Janyulu dulu jurlwa narringi, jalija narri karrinja walu nangandu. Jaliyi narringka yanyba balki jangkurr yingkanyi, baki janyulu Kud yanyba balki jangkurr narringi, jalija narri karrinja walu nangandu. Nanankardi marda narrimi miku dulu jurlwa yingkanyi.
MAT 7:3 Wanyingkanyi narri mankumankuwa nanda balki yaji jali nyulu yabimba, ngala narri mamanumba nanda balki yaji narringi jali narri yabimba. Nanda barrinani muningka yanyba nanankanyi yingkanyi, ‘Ninji barri, nanda bayakarda yaji barrinani nanda dilwil nganyinyina yamina. Jangayu dulaba nanda dilwil nganyinbunanyi yaminanyi.’ Nani ninji yanyba nangangi, ngala miku ninjimi jingkijba, nanda walkurra yaji barrinani nanda walkurra jakuwanda nganyinyina yamina, baki miku ninjiyi najba yaji kudanyu dulaykanyi dilwil nanganbunanyi yaminanyi. Nanda bayakarda yaji nanganginyina yamina, nanda barrinani balki yaji jali nyulu yabimba, ngala nanda walkurra yaji nanganginyina yamina, nanda barrinani kaja balki yaji jali ninji yabimba. Ninji jurlwangka nangangi, nanankanyi nanganginkanyi balkinyi yajinyi, ngala miku ninjimi mankuwa nanda kaja balki yaji, jali ninji yabimba. Ninji jurlwa nangangi nanganginkanyi balkinyi yajinyi, ngala miku nganyingka mankumanku nganyingkanyi balkinyi yajinyi. Nanda balki. Waluku barri marda ninjimi mankuwa nganyi balki yaji. Marda ninjimi ngindu muwa nganyingkanyi balkinyi yajinyi, baki janyulu manjamanjamba nganyi balki yaji Kudwanyi. Baki yuku barri janinji karu nanda yingka nanganginkanyi balkinyi yajinyi.
MAT 7:6 Miku narrimi wajba bajangu malabanyi yajinyi. Miku. Yiningki janinya bijba ninya. Baki miku narrimi wajba bikibiki dungalanyi, yurlwangangi janyulu bikibiki nanankanyi dungalanyi, yarrijbangangi janyulu dungala jambana. Baki nani barri nanamuku jala yalu ngirra Kud, marda narrimi miku milidimba yalunya malabanyi yajinyi. Marda narrimi miku milidimba yalunya nangangi Kudkanyi. Jayalu miku manku narringi jangkurr. Yalu balkimirra nangangi. Miku yalimi nulijba nangangi Kudkanyi. Yalu barrinani bajangumuku. Miku yalimi nulijba malabanyi yajinyi. Yalu barrinani bikibikimuku. Yalu yurlwangka nanganginkanyi yajinyi Kudkanyi. Barriwa.
MAT 7:7 Jaliyi narri nulijba yajinyi, baki marda narrimi ngajaka Kud nanankanyi yajinyi, baki janyulu wajba narrinya nanankanyi yajinyi. Jaliyi narri nulijba jingkiykanyi yaji, marda narrimi ngajaka Kud, baki janyulu karu narrinya nanankanyi yajinyi Kudwanyi. Jaliyi narri nulijba jingkiykanyi Kud, baki marda narrimi ngajaka Kud, baki janyulu minimba narrinya jungunkanyi yurlurrmba nangangi.
MAT 7:9 Jaliyi ninya ngajaka mamanyi nganyinyi jandanyiwanyi, baki wanyingkanyi janinji wajba. Janinji kuna wajba dalunyi. Miku ninjiyi wajba dalunyi.
MAT 7:10 Jaliyi ninya ngajaka kakunyi, baki wanyingkanyi janinji wajba. Janinji kuna wajba miyanyi. Miku ninjiyi wajba miyanyi.
MAT 7:11 Narri balkimuku, ngala narri wajba narringi jandanyi mamanyi jala narrinya ngajaka. Ngala Kud, nyulu kunybamirra, baki janyulu wajba narrinya nanankanyi kunybanyi yajinyi jala narri ngajaka nanankanyi yajinyi. Narringinyi Buwakayu Kingkarri, janyulu wajba narrinya nanankanyi jala narri nulijba.
MAT 7:12 Narri nulijba yingkamukuyngka, yalu yabimbikanyi kunyba yaji narringi, baki nani barri, marda narrimi yabimba nanamannga kunyba yaji yalungi. Nani barri milidimbaka narrinya yuwawanyi Musiskanyi yabimbikanyi nanamannga kunyba yaji. Baki nanamuku wankalamuku jali yanyba jangkurr nangangi Kudkanyi, yalili marda milidimba narrinya nanamannga jangkurranyi. Barriwa.
MAT 7:13 Ngayu karungka narrinya, nanda yubal jala karralangka wayka nanankurri jangurri Yilyurri, walkurra nanda yubal. Bulidarri nanda yubal, yurlurrmba wayka Yilyurri. Damarldamarl nanda yubal jilaykanyi wayka, baki kajamuku yalu jilalajba nananyina yubalina. Kajamuku yalu jilalajba nanankurri Yilyurri. Ngala marda narrimi miku jilajba nanawa. Marda narrimi jilajba yingkana yubalina jala kirrijba kingkarri nangandurri Kudyurri. Bayakarda nanda yingka yubal, dungalayudi, balki. Ngawamba kujajarra yalu jilalajba nananyina yubalina. Ngawamba kujajarranyi yalu durrijba nanda yuwa nangangi Kudkanyi, yalu jungkuka yurlurrmba nangangi, baki jayalu mili jungku wanka nangandu kingkarri yurrngumba barri.
MAT 7:15 Marda narrimi najbawa yalunya balkimuku milidimbawarrmuku. Yalili yanyba, yalu milidimbaka narrinya jangkurranyi Kudkanyi, ngala miku. Yalu jujambawarr. Nanda jib nyulu kulukulu, miku nyulimi bijbawarr, ngala nanda warrki, nyulu bijbawarr. Nanamuku jujambawarrmuku, yalu yanyba kulukulu jangkurr, baki ngamu yalu kunybamuku milidimbawarrmuku, ngamu yalu jungku kulukulu barrinani jib, ngala miku. Ngala yalu jungku barrinani nanda warrki jala bijbawarr. Miku yalimi yanyba duja jangkurr nangangi Kudkanyi. Barrinani nanda, yalunginyi jangkurrwanyi bijbangka narrinya. Jayalu yabimba kiji narringi. Jaliyi narri kuyu yalungi jangkurr, baki janarri miku jungku yurlurrmba nangangi Kudkanyi.
MAT 7:16 Ngala yanka barri janarri jingkijba yalunya, yalu jujambawarrmuku. Yanka janarri jingkijba yalunya. Janarri najba nanda jala yalu yabimba. Miku yalimi yabimba kunyba yaji nangangi Kudkanyi, ngala yalu jungkuka balki nangangi. Miku yalimi durrijba nangangi yuwa. Miku yalimi yabimba kunyba yaji yalungi yingkamukuyngka, ngala yalu yabimba balki yaji yalungi. Nani barri janarri jingkijba yalunya jujambawarrmuku. Nanamuku jujambawarrmuku, yalu barrinani nyilanyila. Mikukimi nyilanyila jardijba jirdi mamanyi. Baki nanamukunyi jujambawarranyi miku yalimi milidimba kunyba jangkurr, ngala yalu milidimba jujambawarr jangkurr. Ngala nanda kalawanyi jardijbangka jirdi kunybanyi mamanyi. Nanamuku jala yalu durrijba Kud, yalu barrinani nanda kalawanyi. Baki yalungi kunyba jangkurr barrinani nanda kunyba mama kurndana. Barriwa.
MAT 7:17 Nanda kunyba kurnda jardijbangka walkurra, kudukudu mama nangandu, kunyba jarrkanyi. Ngala nanda balki kurnda jardijbangka madil, baki ngawamba bijal mama nangandu, baki balki jarrkanyi nanda mama.
MAT 7:18 Nanda kunyba kurnda, mikuyaji balkinyi mamanyi nangandu. Ngala nanda madil kurnda, mikuyaji kunybanyi mamanyi nangandu.
MAT 7:19 Baki nanda lalanbawarr kurndanyi barri, janyulu daya nanda madil kurnda, baki janybaja jangurri. Nanamuku balkimuku milidimbawarrmuku, yalu barrinani nanda balki kurnda, jala mikuyaji kunybanyi mamanyi nangandu. Miku kunyba yalungi jangkurr. Janybaja nanda balki kurnda jangurri lalanbawarranyi, baki nani barri janyulu janyba yalunya Kudwanyi. Janyulu janyba yalunya jangurri Yilyurri.
MAT 7:20 Nani barri janarri jingkijba yalunya, balkimuku milidimbawarrmuku jujambawarrmuku, mikungangi yalimi durrijba yuwa nangangi Kudkanyi, ngala yalu yabimba balki yaji. Ngala janarri jingkijba yalunya jala yalu durrijba Kud. Janarri jingkijba yalunya, yabimbangangi jayalu kunyba yaji, milidimbangangi jayalunjalu nanganginkanyi jangkurranyi Kudkanyi. Barriwa.
MAT 7:21 Kajamuku yalu yanyba ngaki, ngayu yalunginkanyi mambukanyi. Yalu yanyba, ‘Ninji ngaki mambuka. Jangayu ngayangayijba nganyingkanyi jangkurranyi.’ Nani yalu yanyba, ngala kudiyamuku yalungi miku yalimi ngayangayijba ngakinkanyi jangkurranyi. Miku yalimi yabimba nanda jala nyulu nulijba yalungi yabimbikanyi Buwakanya Kingkarri. Miku yalimi yabimba nangangi yaji. Miku ngayimi dujanya yalungi mambuka. Miku jangayu lalanba yalunya. Ngala kudiyamuku, yalu ngayangayijba ngakinkanyi jangkurranyi, yalu yabimba nanda jala nyulu nulijba yalungi yabimbikanyi Buwakanya Kingkarri. Dujanya ngayu yalungi mambuka. Jangayu lalanba yalunya. Ngawamba yaluja jungku mili wanka nangandu kingkarri. Ngawamba yaluja jungku wanka nangandu yurrngumba barri.
MAT 7:22 Baku barri janyulu karrinjarrijba yalunya Kudwanyi, jarrbalambikanyi yalunya, kudiya kingkarri jungunkanyi nangandu, ngala kudiya wayka Yilnyina. Janyulu karrinjarrijba bukambiju yalunya walu ngakindu, baki jangayu yanyba yalungi. Nanamanji barri kajamuku jayalu yanyba ngaki, ‘Mambuka. Nurrili milidimba yalunya nanganginkanyi jangkurranyi Kudkanyi. Nurrili manjijba kaja wuwarr yalunbunanyi mankanyinanyi, ninjingangi. Kaja ngiruka yaji nurrili yabimba nganyi.’ Nani barri jayalu yanyba ngaki.
MAT 7:23 Ngala jangayu yanyba yalungi, ‘Miku ngayimi jingkijba narrinya. Miku narrimi ngakinmuku kandimuku. Narri jujambawarrmuku. Barriwa narri barlba ngakinbunanyi, narri balkimuku.’ Nani barri jangayu yanyba yalungi, jalili yalu miku waki ngaki. Miku yaliyanyi durrijba ngaki jangkurr. Miku yaliyanyi ngayangayijba nangangi ngakinkanyi Buwakaya Kingkarri. Barriwa.
MAT 7:24 Jangayu muningka karu narrinya nanginkanyi jangkurranyi. Yabimbayi barrawu nganinyiwanyi. Yabimba nyuli ngiruka barrawu. Nanda nganinyi nyuli jingkijbawarr. Jungku nyuli kunyba kulaji, baki yabimba nyuli nanda barrawu yundu kunybana yajina, yundu dungalana yajina yabimbikanyi barrawu. Baki janjawala barri, warrmbayi yaji yunkurrwanyi. Warrmbayi karrina kudanyu barri. Yirrbayi walkurra janja, baki wirlkuyi mali. Ngala mikukiyanyi dalyamba nanda barrawu yunkurrwanyi. Ngala mikukiyanyi dalyamba nanda barrawu maliwanyi. Jungkuyi nanda barrawu ngiruka yurrngumba. Mikukiyanyi dalyawijba nanda barrawu, jungkuyingangi ngiruka yundu kunybana yajina. Baki narri barri, jaliyi narri manku ngaki jangkurr, baki ngayangayijba ngakinkanyi jangkurranyi, baki janarri jungku ngiruka ngaki. Janarri jungku ngiruka barrinani nanda ngiruka barrawu jali mikukiyanyi dalyawijba. Jala yingkamukunyi yalu yabimba kiji narringi, jala yalu linjumba narrinya, jala yalunjalu karu balkinyi jangkurranyi narringi, yalu barrinani nanda yunkurr baki janja baki mali. Jayalu yabimba walkurra kiji narringi, ngala miku narringkiyi yangkalamba ngakinbunanyi. Yuwajiwa janarri jungku ngiruka ngaki, marrimbangangi narri ngaki jangkurr narringinyina kurduluna. Barriwa.
MAT 7:26 Ngala yingka barri nyuli nganinyi mudu. Yabimba nyuli barrawu, ngala miku yundu kunybana jambana, ngala yabimba nyuli barrawu yundu jundurrjundurrina yajina, bundu bundalina. Baki janjawala barri, warrmbayi yaji kudanyu yunkurrwanyi, baki yirrbayi walkurra janja. Wirlkuyi mali, baki dalyawijbayi nanda nangangi barrawu bukamba. Mikuyaji barrawunyi barri nangangi. Baki nani barri, jaliyi narri miku kuyu ngaki jangkurr, jaliyi narri miku ngayangayijba ngakinkanyi jangkurranyi, baki narri jungkuka barrinani nanda barrawu dalyawijba jali. Jala yingkamukunyi yalu yabimba kiji narringi, jala yalu linjumba narrinya, jala yalunjalu karu balkinyi jangkurranyi narringi, baki miku narriyi jungku ngiruka ngaki. Ngala janarringka yangkalamba ngakinbunanyi, mikungangi narrimi jungku ngiruka ngaki, mikungangi narrimi marrimba ngaki jangkurr narringinyina kurduluna.” Barriwa.
MAT 7:28 Nani barri milidimbayi yalunya muran Jisuswanyi. Baki manmala yali nanganginkanyi jangkurranyi jali nyulu milidimba yalunya. Manmala yali kudanyu barri.
MAT 7:29 Miku nyuliyanyi milidimbawarr barrinani yalu jalili milidimba nanda wankalanyi yuwa nangangi Musiskanyi. Yinini nyuli milidimbawarr. Nyuli milidimbawarr barrinani walkurra mambuka. Nanankardi yali manmala nangangi.
MAT 8:1 Karrala yali wayka kulawirananyi Jisus baki nanganginmuku kandimuku. Karrala yali wayka, baki yalunjali durrijba muramukunyi.
MAT 8:2 Badajbayi nganinyi nangandurri Jisusyurri. Nanda nganinyi ngujbulijba nyuli nangangi waban bukamba. Yingkamuku yalili marrala nanankanyi nanganginkanyi ngalyanyi. Mikukiyanyi kunybijba mankanyi. Jiwilijbayi nanda ngalya nangandu, baki janangka janyba baku barri. Nanankardi barri kudanyu yalili marrala nanankanyi ngalyanyi. Jilajba nyuli nangandurri Jisusyurri, baki mururu nyuli wayka mujina nangandu Jisusnyina, baki yanybayi nangangi, “Mambuka, jaliyi ninji nulijba ngaki kunymambikanyi nganinji mankanyi, baki yuku ninji kunymamba ngaki mankanyi.” Barriwa.
MAT 8:3 Manjijba nangki marni Jisus nangandurri, baki marrimbayi nanda nganinyi. Baki yanybayi Jisus nangangi, “Ngayu nulijbangka nganyi kunymambikanyi nganyi mankanyi. Kunybakiyi jungku mankanyi.” Baki yinarramba kunybijbayi nangangi mankanyi. Kunybijbayi.
MAT 8:4 Baki jirrinybayi nanda nganinyi Jisuswanyi, maramaramba nyuli, “Mikujiyi karu yalunya yingkamuku jali ngayu kunymamba nganyi mankanyi. Mikujiyi karu yalunya. Ngala jilajbakiyi nangandurri nanankurri mambukarri jurjkanyi. Minimbakiyi nganyingka mankanyi nangangi, baki muningka wajbakiyi Kud barnyinyi. Nani barri yanybayi nanda wankalanyi Musis, muningka waykanyi Kud barnyinyi. Jayalu wajba Kud barnyinyi, jalija kunybijba mankanyi. Nanankardi barri janinji wajba kud barnyinyi, baki yingkamukunyi jayalu jingkijba ninya, ninji mirnarrijba nangangi muwa Kudkanyi, kunybijbangkangangi nganyi mankanyi.” Barriwa. Nani barri jirrinybayi nganinyi Jisuswanyi. Barriwa.
MAT 8:5 Baki wijbayi Jisus bayungu. Wijba nyuli nanankurri barrawuyabarrawuyarri, niji Kabirnayum. Jali nyulu wanbiya, baki jilajbayi nganinyi nangandurri. Nanda nganinyi, miku nyuliyanyi mungkiji nangangi Jisuskanyi. Nyuli ngurranyi. Nyuli mambuka yalungi ngarrkadabawarrmukungka, yalungi yaji Rum. Jilajba nyuli nangandurri Jisusyurri, baki kudanyu nyuli ngajaka Jisus,
MAT 8:6 “Mambuka, ngaki wakiwarr, nyulu lunjika. Lunjika nyulu kudanyu barri. Miku nangkimi ngirringirrimba mankanyi. Kudanyu nyulu lunjika barri.”
MAT 8:7 Jananganjayi mambuka Jisuswanyi, “Jangayu jilajba nganyindu. Jangayu kunymamba nangangi mankanyi.”
MAT 8:8 Ngala jananganjayi mambukawanyi, “Miku barri. Ninji walkurra mambuka. Miku ninjiyi jilajba ngakindurri barndarri. Jaliyi ninji muningka yanyba jangkurr, kunymambikanyi nangangi mankanyi, baki ngayu jingkijba, janyulu kunybijba mankanyi. Ngala mikujiyi jilajba ngakindurri barndarri, walkurrangangi ninji mambuka.
MAT 8:9 Ngayu mambuka yalungi ngarrkadabawarrmukuyngka, baki yingkamuku yalu mili walkurra ngaki, yalu ngakinmuku mambukamuku. Jala ngayu jirrinyba ngaki ngarrkadabawarr, nyulu jilaykanyi karri, baki janyulu ngayangayijba ngakinkanyi jangkurranyi, janyulu jilajba karri. Jala ngayu jirrinyba yingka ngarrkadabawarr, nyulu jilaykanyi ngakindurri, baki janyulu jilajba ngakindurri. Jala ngayu jirrinyba yingka yabimbikanyi yaji, baki janyulu yabimba nanda yaji. Nani barri ngayu mambuka ngakinmukuyngka ngarrkadabawarrayngka. Baki nani marda ninji barri mambuka kunymambikanyi mankanyi. Jaliyi ninji yanyba jangkurr kunymambikanyi nangangi mankanyi, ngaki wakiwarr, baki ngayu jingkijba, janyulu kunybijba mankanyi.” Nani barri yanybayi nanda mambuka nangangi Jisuskanyi.
MAT 8:10 Jali manku nangangi jangkurr Jisuswanyi, baki manmala nyuli. Kudanyu nyuli manmala, baki yanyba nyuli yalungi muranyi nangandu, “Ngayu karungka narrinya. Nayinda mambuka, miku nyulu ngaki mungkiji, nyulu ngurranyi ngaki. Nangangi yaji juju bayangarri, niji Rum, ngala ngana nyulu jingkijbangka kudanyu. Nyulu kuyungka ngaki jangkurr. Miku yingamali ngakinyi mungkijiwanyi kudanyu kuyungka ngaki jangkurr barrinani nyulu kuyungka ngaki jangkurr. Ngana nyulu jingkijba kudanyu barri.
MAT 8:11 Kudanyu ngayu karungka narrinya. Kajamuku ngurranyimuku jayalu badajba lukulukunanyi, karrina baki bayunguna, langina baki kulani. Jayalu badajba, baki jayalu kuyu ngaki jangkurr. Baki baku barri jayalu jungku kingkarri nangandu Kudnyina. Jayalu jungku yalundu marda wankalamukunyina jali kuyu nanda jangkurr nangangi Kudkanyi, jali durrijba nangangi jangkurr. Jayalu jungku yalundu marda ngamanginyina wankalanyina mungkijimukunyina, barrinani Yabrayam, baki Yayisak, baki Jakub. Kajamukunyi ngurranyimukunyi jayalu kuyu ngaki jangkurr, baki jayalu marda jungku kingkarri yalundu.
MAT 8:12 Ngala kajamuku mungkijimuku ngambalangi Jumuku, miku jayalu jungku kingkarri yalundu, mikungangi yaliyi kuyu ngaki jangkurr. Baki miku janyulu lalanba yalunya Kudwanyi, ngala janyulu manjijba yalunya nanankurri Yilyurri. Baki nanamanji barri jayalu balkijba muwa. Kudanyu barri jayalu ngindu muwa, mikungangi nyuliyi lalanba yalunya nanamanji Kudwanyi.” Barriwa. Nani yanybayi Jisus yalungi muranyi.
MAT 8:13 Baki mili yanybayi Jisus nangangi mambukanyi, “Wijbakiyi nganyindurri barndarri. Janyulu kunybijba mankanyi nganyi wakiwarr. Jangayu kunymamba nangangi mankanyi, kuyungangi ninji ngaki jangkurr.” Barriwa. Baki kunybijbayi nanda wakiwarr mankanyi nanamanji jali yuwajiwa yanybayi Jisus mambukanyi. Barriwa.
MAT 8:14 Baku barri jilajbayi Jisus nanganginkurri barndarri Bidanyi. Ngankijba nyuli kalawunyi barrawuna baki najba nyuli bardibardi jalyuna. Nanda bardibardi nyuli ngunyarringanja nangangi Bidanyi. Lunji nyuli kudanyu barri. Ngarrangarra nyuli mankanyi.
MAT 8:15 Marrimbayi bardibardi marni Jisuswanyi, baki yinarramba kunybijbayi mankanyi nanda bardibardi. Mardumardu mankanyi. Walajba nyuli, baki wudumbayi mama yalungi. Barriwa.
MAT 8:16 Ngabungaburri barri, ngala nyulu bijal mungarri yaji, baki kuyu yalunjali nangandurri Jisusyurri. Kuyuyi yalunya kajamuku nangandurri Jisusyurri. Kajamuku yali wuwarryudi, baki yanybayi Jisus yalungi wuwarrmukuyngka. Jakajba nyuli wuwarr yalunbunanyi mankanyinanyi. Kunymamba nyuli bukambiju yalunya jali yalu lunji.
MAT 8:17 Nani barri kunymambayi yalunya Jisuswanyi. Nanda wankalanyi niji Yayisaya, jali yanyba jangkurr nangangi Kudkanyi, yarrijba nyuli najana nayi jangkurr Kudkanyi. “Nyuli kunymamba ngambalanya jali ngambala lunji. Nyuli dulaba nanda ngalya ngamanbunanyi mankanyinanyi.” Duja nanda jangkurr jali nyulu yarrijba najana. Kunymambayi yalunya bukambiju Jisuswanyi. Barriwa.
MAT 8:18 Baku barri kajamuku yali nangandu Jisusnyina, walkurra muramuku. Najbayi yalunya Jisuswanyi, baki nulijba nyuli barlkanyi nyulu yalunbunanyi. Baki nyuli jirrinyba yalunya nangangimuku kandimuku, yalu burriykanyi karrurrinybarri kanjana muwardana. Jilajba yali wudumbiji muwarda.
MAT 8:19 Yingamali nanaba nangandu, nyuli milidimbawarr yuwanyi Musiskanyi. Yanyba nyuli nangangi Jisuswanyi, “Milidimbawarr, birrirrinja ngaka jilaykanyi nganyindu. Yurrngumba barri, janga jilalajba nganyindu yingkayurri yajiyurri, baki yingkayurri yajiyurri jalija ninji jilajba.”
MAT 8:20 Jananganjayi nanda nganinyi Jisuswanyi, “Nanda wardaba nyulu kulukangka bardawana jambana, baki nanda julaki kulukangka kurndana. Ngala ngayu, Buwanya Bukambijuyngka, mikuyaji barndanyi ngaki kulukankanyi. Jaliyi ninji jilajba ngakindu yurrngumba, baki mikuyaji barndanyi nganyi marda.” Nani barri jananganjayi nganinyi Jisuswanyi.
MAT 8:21 Baki yingka nganinyi, nyuli kandi nangangi Jisuskanyi. Nyuli yanyba nangangi, “Mambuka, marda ngayu marda nulijba jilaykanyi nganyindu, ngala waluku barri, jangayu wijba ngakindurri barndarri. Jalija nangka janyba ngaki nijanganjinyi, jalija ngayu makaba nangangi mankanyi, baki jangayu wijba nganyindurri, jangayu jilalajba nganyindu yurrngumba.”
MAT 8:22 Ngala jananganjayi Jisuswanyi, “Jilajba janinji ngakindu nanijba barri, baki janinji jungku wanka nangangi Kudkanyi. Ngala yingkamuku jala yalu jungku barrinani kurdan nangangi Kudkanyi, yuku jayalu makaba nganyi nijanganjinyi jalija nangka janyba.” Nani barri jananganjayi Jisuswanyi.
MAT 8:23 Ngankijba yali muwardana, Jisus baki nanganginmuku kandimuku. Barlba yali karrurrinybarri kanjana, muwardayudi.
MAT 8:24 Warrmbayi yunkurrwanyi kudanyu karrina. Lakululumbayi yunkurrwanyi wabuda, baki walajbayi juju kingkarri lakululu. Ngankijbayi wabuda kalawuyngkurru muwardana, baki ngurrulijbawali nanda muwarda. Ngala kulukayi Jisus muwardana. Kuluka nyuli jali warrmba yunkurrwanyi karrina. Ngankijbayi wabuda kalawuyngkurru muwardana, ngala nyuli yuwajiwa kuluka kalawuyngkurru.
MAT 8:25 Yali dulaba Jisus kandimukunyi. Dulaba yali, yanyba yali nangangi, “Mambuka. Miku ninjiyi kuna marrala, ngambalaja ngurrulijba. Marrimbakiyi ngambalanya mardarda.”
MAT 8:26 Jananganjayi yalunya Jisuswanyi, “Wanyingkanyi narri marrala. Wanyingkanyi. Miku kuna nganarriyi jingkijba, jangayu lalanba narrinya. Jalimi nganarri kudanyu jingkijba, baki miku narriyi marrala.” Baki walajbayi Jisus. Walajba nyuli, baki kudanyu yanybayi yunkurranyi marda kanjanyi. Jirrinyba nyuli yunkurr marda kanja jungunkanyi kardarda. Baki kanangurrijbayi yaji, marda yunkurr marda lakululu.
MAT 8:27 Ngala manmala yali nanganginmuku kandimuku. Manmala yali kudanyu barri, baki yanyba yalungki, “Nayinda Jisus, ngiruka nyulu, walkurra. Kardijbayi yunkurr marda lakululu jali nyulu jirrinyba yalunya. Walkurra nyulu.” Nani barri yalungki yanyba nangangi. Barriwa.
MAT 8:28 Mili yali barlba karri, baki kamu yali wanbiya karrurrinybana jambana, nanda yaji niji Kadara. Jali walajba Jisus muwardananyi, baki kujarra nganinyiwuya buli jilajba nangandurri. Jilajba buli nanamunanyi yajinanyi jalili yalu makaba nganinyiyurru baki jibarriyurru, nanaba kumayanguna. Nanankuya nganinyiwuya buli wuwarryudi. Kudanyu buli mudu jali jungku wuwarr bulandu. Yingkamuku nganinyimuku, miku yaliyanyi jilajba yubalina nanaba. Kudanyu yali marrala bulangi.
MAT 8:29 Jilajba buli nangandurri Jisusyurri, baki kaya buli kudanyu nangangi, “Ninji barri jandanyi nangangi Kudkanyi, wanyimba janinji ngalinya. Badajba kuna ninji nanginkurri, daji ngalinya. Nanankanyi kuna ninji jilajba nanginkurri.” Nani buli kaya nangangi.
MAT 8:30 Bundu nanaba wardamba yalungki kajamuku bikibikimuku.
MAT 8:31 Baki yililikajba yali Jisus wuwarrmukunyi. Kudanyu yali yililikajba Jisus, “Jalija ninji manjijba nurrunya bulanbunanyi, baki manjijbakiyi nurrunya yalundurri bikibikimukuyngkurri. Janurru ngankijba nanaba bikibikina.”
MAT 8:32 Jananganjayi Jisuswanyi, “Yuku barri. Ngankijbakiyi bikibikina.” Baki ngankijba yali wuwarrmuku bikibikina. Baki muningka yali wirlku bikibikimuku, muningka yali yirrba wayka wabudana. Yirrba yali wayka karnarrana yajina, baki yali bukambiju ngurrulijba wabudana.
MAT 8:33 Nanamuku lalanbawarrmuku bikibikinyi, wirlku yali kula yalunginkurri barrawuyabarrawuyarri. Wanbiya yali, baki karu yalunjali mungkijimuku yalungi bikibikinyi baki nanankanyi jali yabimba Jisuswanyi.
MAT 8:34 Baki bukambiju nanamuku jali yalu jungku nananyina barrawuyabarrawuyana, yali jilajba nangandurri Jisusyurri. Yalu jalili jungku nananyina yajina, yali ngajaka Jisus, janyulu barlba yalunginbunanyi yajinanyi. Baki barlbayi Jisus baki nanganginmuku kandimuku. Barriwa.
MAT 9:1 Wijba yali bayangarri Jisus baki nanganginmuku kandimuku. Ngankijba yali muwardana baki birlbidamba yali bayangarrinybarri nanankurri yajiyurri niji Kabirnayum.
MAT 9:2 Jali yalu wanbiya nanaba, baki yingkamukunyi yali kuyu nganinyi nangandurri Jisusyurri. Nanda nganinyi nyuli lunji, miku nangkiyanyi ngirringirrimba nangangi mankanyi. Kuluka nyuli yurrngumba jalyuna. Marrimba yali nangangi jalyu. Kuyu yali nanda nganinyi nangandurri Jisusyurri. Najbayi yalunya Jisuswanyi, baki jingkijba nyuli yalunya, nanda nganinyi jali lunji, baki nanamuku jali yalu kuyu nganinyi. Jingkijba nyuli yalunya, mankumanku yalungki nangangi Jisuskanyi, yuku nyulu kunymamba nanda nganinyi jala nyulu lunji. Yuku nyulu kunymamba nangangi mankanyi. Baki yanybayi Jisus nganiyngkanyi jali lunji, “Mikujiyi marrala. Jangayu manjamanjamba nganyi balki yaji. Jangayu manjamanjamba nanda balki jali ninji yabimba.”
MAT 9:3 Ngala kudiyamuku milidimbawarrmuku yuwanyi Musiskanyi, yali nanaba nangandu. Manku yali nangangi jangkurr Jisuskanyi, baki yanyba yalungki, “Nayinda nganinyi nyulu balki. Jungkuka nyulu balki nangangi Kudkanyi. Miku nyuliyi manjamanjamba balki yaji. Ngawamba Kudwanyi yuku nyulu manjamanjamba balki yaji, ngala mikuwali nganinyiwanyi. Nayinda barri nyulu jujambawarr.” Nani barri yalungki yanyba nangangi Jisuskanyi.
MAT 9:4 Ngala jingkijbayi yalunya Jisuswanyi. Jingkijba nyuli nanda jali yalungka yanyba nangangi. Baki yanyba nyuli yalungi, “Wanyingkanyi narringka mankumanku balkinyi jangkurranyi ngaki, yanybangangi ngayi jangkurr manjamanjambikanyi nangangi balki yaji. Wanyingkanyi.
MAT 9:5 Wanyi barri mili jardibirri yaji yabimbikanyi. Manjamanjambikanyi balki yaji kuna, kunymambikanyi nayinda nganinyi mankanyi kuna. Wanyi mili jardibirri yaji yabimbikanyi.
MAT 9:6 Ngayu Buwanya Bukambijuyngka. Nyuli yarrijba ngana walkurra mambuka, miku nganinyiwanyi, ngala Kudwanyi. Baki nyuli karu ngana, yuku ngayu manjamanjamba balki yaji. Jalija nganarri najba kunymambikurri nayinda nganinyi mankanyi, baki janganarri jingkijba, yuku ngayu manjamanjamba nangangi balki yaji marda.” Nani barri yanybayi Jisus yalungi. Baki mili nyuli yanyba nanankanyi nganiyngkanyi jali kuluka jalyuna, “Walajbakiyi waykalinya. Walajbakiyi. Mukulmbakiyi nganyi jalyu, baki wijbakiyi nganyindurri barndarri.”
MAT 9:7 Yinarramba walajbayi nanda nganinyi jalyunanyi. Walajba nyuli, mukulmbayi nangangi jalyu, baki wijbayi nanganginkurri barndarri.
MAT 9:8 Kajamukunyi yali najba nanda jali yabimba Jisuswanyi. Najba yali nanda nganinyi jali mili kunybijba nangangi mankanyi, baki marrala yali. Marrala yali, ngala yali wajba Kud yalunginkanyi kunybanyi jangkurranyi, yabimbangangi nyuli Jisus ngiruka yabimbikanyi ngiruka yaji nangangi Kudkanyi. Barriwa.
MAT 9:9 Kamu barri mili jilajbayi Jisus karri yubalina, baki nanganginmuku kandimuku yali jilajba nangandu. Jilajba nyuli, baki najba nyuli nganinyi, nangangi niji Madiyu. Jungku nyuli barrawuna wakinkanyi. Waki nyulili Kubaminkanyi. Kuyu nyulili dungala yalunbunanyi, waykanyi Kubamin mambuka. Najba nyuli nanda Madiyu jungunkurri barrawuna Jisuswanyi. Baki yanybayi Jisus nangangi, “Jilajbakiyi ngakindu.” Walajba nyuli Madiyu, baki jilajba nyuli nangandu Jisusnyina.
MAT 9:10 Jilajba buli bayungu barndarri nangangi jala barnda Madiyukanyi. Jungkuyi Jisus nanaba. Jarrba nyuli mama nanaba nangandu, baki yali jungku nangandu marda nanganginmuku kandimuku. Jilajbayi yingkamuku nanankurri barrawurri. Yali balkimuku. Kudiyamuku yalungi, yalili waki Kubaminkanyi, ngala yali maninjaku. Yalili kuyu dungala yalunbunanyi Kubaminkanyi, ngala kudukudu dungala yalili kuyu, bakili yalu kilimba kudiya nanda dungala yalungi. Malumba yalungki wardamba mamanyi nangandu Jisusnyina.
MAT 9:11 Jawudamuku yali jilajba nanankurri barndarri, Barisimuku yalu jalili kudanyu durrijba nanda yuwa nangangi Musiskanyi. Baki yali najba Jisus wardambikurri nangka mamanyi yalundu balkimukunyina. Ngajaka yali kandimuku Barasimukunyi, “Wanyingkanyi wardamba nangka narringi milidimbawarr mamanyi yalundu, balkimukunyina. Wanyingkanyi.”
MAT 9:12 Manku nyuli nanda yalungi jangkurr Jisuswanyi, baki nyuli jananganja yalunya, “Mikuwali badajba yarrbirra yalundurri jala yalu kunyba mankanyi, ngala nyulu badajba yalundurri jala yalu balki mankanyi. Baki nani barri, miku ngayiyanyi badajba nanganbunanyi Kudnanyi milidimbiji yalunya jala yalu jungku kunyba. Ngala ngayi badajba milidimbiji yalunya jala yalu jungku balki.
MAT 9:13 Ngala barriwa barri barlba. Wijba narri narringinkurri barndarri. Janarringka mankumanku nanankanyi jangkurranyi najana Kudkanyi. Yanybaka nanda jangkurr, ‘Miku ngayimi nulijba narringi, nganarri waykanyi bulukimukuyngka marda sibmukuyngka marda julakimukuyngka. Miku ngayimi nulijbangka narringi, nganarri waykanyi yajinyi nani, ngala ngayu nulijbangka narringi, narri jungunkanyi kunyba yalungi yingkamukuyngka. Marda narrimi yabimba kunyba yaji yalungi yurrngumba barri.’ Nani yanybaka nanda jangkurr. Marda narringkimi mankumanku nanankanyi jangkurranyi.” Baki mili yanybayi Jisus yalungi, “Miku ngayiyanyi badajba nanginkurri milidimbiji yalunya jala yalu jungku yurlurrmba nangangi Kudkanyi. Miku. Ngala ngayi badajba milidimbiji yalunya jala yalu jungku balki nangangi Kudkanyi.” Nani barri jananganjayi yalunya Barasimuku Jisuswanyi. Barriwa.
MAT 9:14 Baki kandimuku Junkanyi Ngurrunbawarrayngka, yali badajba nangandurri Jisusyurri. Ngajaka yali, “Jawudana barri, miku yalungkimi wardamba mamanyi kandimuku Junkanyi, baki Barasimuku. Miku yalungkimi wardamba mamanyi kudiyana, ngala nganyinmuku kandimuku yalungka wardamba mamanyi yurrngumba barri. Wanyingkanyi yalu miku kudiyana miku jarrkanyi mama.”
MAT 9:15 Jananganjayi yalunya Jisuswanyi, “Nanda buyingkinyi nawinganja, kajamuku yalu nangandu ngala nyulu jalannga wudumba maninganja. Miku yaliyi jungku birrkalanyi, ngala yalungka wardamba kajanyi mamanyi. Ngala baku barri janyulu jarimba nanda nangangi nawinganja yingkawanyi. Baki nanamanji barri, miku yaliyi jarrba mama nanganginmukunyi kandimukunyi, ngala jayalu ngindu muwa nangangi. Barriwa.”
MAT 9:16 Mili yanybayi Jisus yalungi nayi barri, “Jaliyi jumbala bakarrawijba, baki ngambala ngarrkadaba jumbala yingkayudinyi rakiyudinyi. Jaliyi buyingkinyi nanda rak, jala ngambala wakardaba nanda jumbala, baki bayakardangujbangka nanda buyingkinyi rak. Baki mili barri bakarrawijbaja nanda jumbala, bayakardangujbangangi nanda rak.
MAT 9:17 Baki mili janarringka mankumanku nanginkanyi jangkurranyi. Ngambala yarrijba ngarrki krayibkanyi kalawunyi bindawarrana. Nanda bindawarra waba jibkanyi. Jaliyi ngambala yarrijba buyingkinyi ngarrki kalawunyi waluwinyi bindawarrana, baki nanda balki. Jalija nanda ngarrki ngujbul bijal, baki dumbaja nanda waba bindawarra. Bunyarrijba janangka nanda ngarrki, baki bakarrawijbaja nanda bindawarra. Ngala ngambala yarrijba buyingkinyi ngarrki krayibkanyi kalawunyi buyingkinyi wabana bindawarrana. Jalija nanda ngarrki ngujbul bijal, baki yuku nanda bindawarra. Mikuwali bakarrawijba nanda waba. Miku nangkiyi bunyarrijba nanda ngarrki. Jungkuka kunyba barri kalawunyi bindawarrana yurrngumba barri.” Nani barri yanybayi Jisus yalungi. Barriwa.
MAT 9:18 Ngala yanybayi Jisus nanda jangkurr, baki jilajbayi nganinyi nangandurri, nyuli mambuka jurjkanyi. Jali nyulu wanbiya nangandu, Jisusnyina, baki mururu nyuli wayka. Yanyba nyuli Jisuskanyi, “Ngaki jandanyi, nanda ngila nyuli lunji. Lunji nyuli kudanyu barri, baki nangki janyba. Janinji kuna jilajba ngakindurri barndarri baki janinji marrimba nanda ngila wankambiji.” Nani nyuli ngajaka Jisus.
MAT 9:19 Walajbayi Jisus, baki jilajbayi nangandu barndarri. Barlba yali bulandu marda, nanganginmuku kandimuku Jisuskanyi.
MAT 9:20 Kajamuku yali lukuluku malumba nangandu Jisusnyina jali nyulu jilajba. Baki yingamali jibarri nanaba yalundu. Nyuli lunji. Ngulya jurrwayi yurrngumba. Wabulinyi jurrwayi yurrngumba 12 kindilkurrinyi. Jilajba nyuli bayngkani nangandu Jisusnyina, baki nyuli marrimba nangangi jumbala.
MAT 9:21 Mankumanku nangki nanda jibarri barrin, “Jaliyi ngayu marrimba nangangi jumbala, baki jangayu kunybijba.” Baki jilajbayi jibarri, baki marrimbayi nangangi jumbala.
MAT 9:22 Yangkalamba nangki Jisus. Najba nyuli jibarri, baki yanybayi nangangi, “Jibarri, mikujiyi marrala. Ninji kunybijba, kuyungangi ninji ngaki jangkurr.” Yinarramba kunybijbayi jibarri, dukujbayi nanda ngulya nangandu. Baki nyuli jingkijba, kunybijbayi nanda ngulya nangangi. Barriwa.
MAT 9:23 Mili barri jilajbayi Jisus nangandu mambukana jurjkanyi, baki wanbiya yali nanganginyina barndana. Kajamuku yali nanaba barndana, marda nanamuku brijbawarrmuku. Ngindu yali muwa kudanyu barri nanankanyi ngilayurruwa.
MAT 9:24 Wanbiyayi Jisus, baki yanyba nyuli yalungi, “Barriwa narri barlba. Wijba janarri barndarri. Mikukimi nayinda ngila kurdan. Muningka nyulu kulukangka. Miku nangkimi janyba.” Ngala yali yurlwa nangangi. Kakalijba yali nanganginkanyi jangkurranyi. Kakalijba yali.
MAT 9:25 Ngala manjijbayi yalunya Jisuswanyi barndananyi. Jali yalu barlba, baki ngankijbayi Jisus barrawuna. Jilajba nyuli nangandurri ngilayurruwarri. Marrimbayi ngila marni Jisuswanyi, baki walajbayi nanda ngila waykalinya. Walajba nyuli, baki yuku barri nyuli. Barriwa.
MAT 9:26 Kajamuku yali manku jangkurr nangangi Jisuskanyi, jali nyulu wankamba nanda ngila. Kajamuku jali jungku lukuluku nananyina yajina, yali manku nanda jangkurr. Barriwa.
MAT 9:27 Yingijbayi nanda barnda nangangi mambukanyi Jisuswanyi, baki barlba nyuli yubalina. Jali nyulu jilajba baki durrijbayi Jisus nganinyiwuyanyi. Buli kabuji yami. Kaya buli nangangi. Kudanyu buli kaya nangangi, “Ninji, mungkiji nangangi nanankanyi wankalanyi Dayibidkanyi, ngindukiyi muwa ngalingi. Ngindukiyi muwa ngalingi kabujiwuyayngka.” Nani buli kaya nangangi.
MAT 9:28 Ngankijbayi Jisus kalawuyngkurri barrawuna, baki bula ngankijbayi bayngkani nangandu. Jilajba buli nangandurri, baki yanybayi Jisus bulangi, “Wanyingkanyi nimbala kaya ngaki. Mankumanku kuna nimbalaka, yuku ngayu kunymamba nimbalanya kabuji yami. Nani kuna nimbalaka mankumanku ngaki.” Jananganja buli Jisus, “Yi, mambuka. Ngali jingkijba ninya, ninji ngiruka. Yuku ninji kunymamba ngalinya yami.”
MAT 9:29 Baki marrimba bulanyi yami Jisuswanyi. Marrimba nyuli yami, baki yanyba nyuli bulangi, “Jangayu yabimba nanda yaji, jala nimbala jingkijba ngana, yabimbikanyi yaji. Jangayu kunymamba nimbalanya yami.”
MAT 9:30 Baki yinarramba barri kunybijbayi bulangi yami, baki najba buli yaji. Ngala jirrinyba bulanyi maramarambiji yaji Jisuswanyi. Kudanyu nyuli jirrinyba bulanya, “Miku janimbala karu yalunya jali ngayu kunymamba nimbalanya yami.”
MAT 9:31 Jilajba buli barndananyi, ngala miku buliyanyi karda jungku. Karu buli yalunya nangangi Jisuskanyi jali nyulu kunymamba bulanya. Baki kajamuku lukuluku nananyina yajina, yali manku nanda jangkurr nangangi Jisuskanyi.
MAT 9:32 Ngala barlba buli jali kunymamba bulanya yami Jisuswanyi, baki wanbiyayi yingkamuku nangandu Jisusnyina. Kuyu yali nganinyi nangandurri Jisusyurri. Nyuli balki janyi. Miku nyuliyanyi yanyba jangkurr, jungkuyingangi wuwarr nangandu mankanyina.
MAT 9:33 Jakajbayi nanda wuwarr mankanyinanyi Jisuswanyi, baki yinarramba yanybayi nanda nganinyi jali balki janyi. Yanyba nyuli jangkurr. Bukambiju nanaba nangandu yalu manmalayi. Manmala yali kudanyu barri. Baki yanyba yalungki, “Jalannga barri ngambala najba nganinyi jirdi balkinyi janyinyi yanybikurri. Jalannga barri. Miku wabula nanginyina yajina Yisrayil kunymambayi balki janyi nganinyiwanyi. Miku barri.” Nani barri yalungki yanyba.
MAT 9:34 Kudiyamuku yalungi jali najba Jisus kunymambikurri nanda nganinyi janyi, yali Barasimuku, jalili kudanyu durrijba nanda yuwa nangangi Musiskanyi. Baki yanyba yalungki Barasimuku, “Nanda mambuka wuwarranyi, nanda Sayidin, nyuli yabimba nayinda Jisus ngiruka jakaykanyi nanda wuwarr nanganbunanyi mankanyinanyi. Nyuli yabimba Jisus ngiruka Sayidinwanyi.” Nani barri yalungki yanyba nangangi Jisuskanyi. Barriwa.
MAT 9:35 Mili barri barlbayi Jisus baki nanganginmuku kandimuku. Jilalajba yali lukuluku nananyina walkurranyina yajina. Yidamba yali kaja barrawuyabarrawuya, baki milidimbayi yalunya yingkana jurjina baki yingkana jurjina Jisuswanyi. Milidimba nyuli yalunya kunybanyi jangkurranyi nangangi Kudkanyi, nyulu lalanbawarr. Kajamuku jali lunji jirdi yinini yinini ngalyanyi, yali jilajba nangandurri, baki nyuli kunymamba yalunya bukambiju.
MAT 9:36 Kajamuku yali jilajba nangandurri Jisusyurri mankunki nangangi jangkurr. Najbayi yalunya Jisuswanyi, baki ngindu nyuli muwa yalungi. Kudanyu nyuli ngindu muwa yalungi, balkijbangangi yali muwa yajinyi. Miku yaliyanyi jingkijba, yanka yuku yalu jungku yurlurrmba nangangi Kudkanyi. Yalu barrinani jibmuku. Yakika yalu jibmuku jala mikuyaji lalanbawarrayngka lalanbikanyi yalunya, baki miku yalungkiyanyi jingkijba wanjawa yalu jilalajba. Nani barri nanda muramuku. Mikuyaji lalanbawarrayngka karunkanyi yalunya. Miku yaliyanyi jingkijba, yanka jayalu jungku yurlurrmba nangangi Kudkanyi.
MAT 9:37 Baki yanybayi Jisus yalungi nanganginmukuyngka kandimukuyngka. Muningka nyuli yanyba yalungi, “Nanginmuku, nganinyimuku baki jibarrimuku, yalu barrinani kingkirr. Nanda kingkirr jala jardijba janjawala, waluku walajbangka wuju, baki baku barri bayngkani, kujarra baki kujarra yakarl, nanda kingkirr yamiyudi, kunyunyu jarrkanyi. Wudumbaka yami baki wuyalangka yalu jarrkanyi. Barriwa. Najba narri nanda kingkirr, kudukudu mama kunyunyu. Birrirrinja nangka nanda yami wudumbikanyi yalu. Nani barri yalu muramuku marda. Birrirrinja yalungka yangkalambikanyi yalungka nangandurri Kudyurri. Birrirrinja yalungka yangkalambikanyi Kudyurri, barrinani nanda yami birrirrinja nangka wudumbikanyi yalu. Ngala ngawamba kujajarra ngambala karunki yalunya yanka jayalungka yangkalamba nangandurri Kudyurri. Ngawamba kujajarra ngambala karunki yalunya.
MAT 9:38 Marda narrimi yanyba mududu nangangi Kudkanyi. Marda narrimi yililikajba Kud, nyulu manjiykanyi kajamuku milidimbawarrmuku yalundurri. Janyulu manjijba kajamuku milidimbawarrmuku yalundurri, barrinani kajamukunyi yalu wudumba nanda kingkirr yami.”
MAT 10:1 Baku barri kayayi Jisus yalungi nanganginmukuyngka kandimukuyngka, nyuli yanybikanyi yalungi. Yali 12 barri nganinyimuku. Yanyba nyuli yalungi, “Ngayu jirrinyba narrinya. Janarri jilalajba lukuluku. Ngayu yabimbaka narrinya ngiruka narri yabimbikanyi ngiruka yaji. Janarri kunymamba yalunya jala yalu lunji jirdi yinini yinini ngalyanyi. Janarri kunymamba yalunya. Janarri jakajba wuwarr yalunbunanyi mankanyinanyi. Ngayu yabimba narrinya ngiruka jakakaykanyi wuwarr, baki kunymambikanyi yalunya.”
MAT 10:2 Nani barri nyuli jirrinyba yalunya nanganginmuku kandimuku 12 barri. Nayinda barri yalungi niji. Sayimin barri, yingka niji nangangi Bida, baki nanda kanyiya nangangi niji Yandru. Marda buwakula, Jayims baki Jun, bulangi nijanganjinyi niji nangangi Sibidi.
MAT 10:3 Baki Bilib baki Bardulumu, marda Dumas baki Madiyu, nanda jalili wudumba dungala yalunbunanyi Jumukunanyi yalungi Kubaminkanyi. Baki yingka nanamannga niji Jayims, ngala nangangi nijanganjinyi niji nangangi Yalbayis, baki Dadayus.
MAT 10:4 Baki yingka nanamannga niji Sayimin, ngala nangangi yaji niji Kayinan, baki Judas Yiskariyud, nyuli nanda jali baku nangka yangkalamba nanganbunanyi Jisusnanyi, baki karuyi mambukamuku jurjkanyi, wanjawa jayalu wakaramba Jisus. Barriwa.
MAT 10:5 Nanamuku 12 barri nganinyimuku, yali kandimuku nangangi Jisuskanyi. Manjijba nyuli yalunya lukuluku nananyina yajina. Karu nyuli yalunya, “Miku narriyi jilajba nanankurri yajiyurri niji Samariya. Miku narriyi jilajba nanankurri yajiyurri jala yalu jungku ngurranyimuku.
MAT 10:6 Janarri jilalajba nananyina yajina niji Yisrayil, jala yalu jungku narringinmuku mungkijimuku. Yalu barrinani nanda jibmuku jala yalu yakika. Mikuyaji lalanbawarrayngka lalanbikanyi yalunya. Miku yalimi jingkijba yanka jayalu jungku yurlurrmba nangangi Kudkanyi.
MAT 10:7 Janarri karu yalunya nangangi Kudkanyi, nyulu lalanbawarr yalungi. Birrirrinja nangka Kud lalanbikanyi yalunya, jaliyi yalungka yangkalamba nangandurri Kudyurri.
MAT 10:8 Janarri kunymamba yalunya jala yalu lunji. Janarri kunymamba yalunya jala yalu ngujbulijba waban, jala marrala yalu nangangi. Janarri wankamba yalunya jala yalungka janyba. Janarri jakajba wuwarr nanganbunanyi mankanyinanyi. Ngayu yabimba narrinya ngiruka yabimbikanyi bukamba nayinda yaji. Ngala miku nganarriyi wajba dungalanyi, yabimbangangi narrinya ngiruka. Muningka ngayu yabimbaka narrinya ngiruka. Baki nani barri, jalija narri yabimba ngiruka yaji yalungi, baki miku narriyi kuyu yalungi dungala. Muningka janarri yabimba ngiruka yaji yalungi marda.
MAT 10:9 Miku narriyi kuyu kudukudu yaji narrindu jalija narri jilalajba. Mikuyaji dungalanyi janarri kuyu narrindu.
MAT 10:10 Miku narriyi kuyu bindawarra narrindu ngajakankanyi yingka dungalanyi yarriykanyi dungala bindawarrana. Miku narriyi kuyu yingka mili jumbala, miku yingka mili jabunungkaji, miku yingka mili ridiridi janarri kuyu. Narri wakingka nangangi Kudkanyi. Janyulu nyulu lalanba narrinya. Nanamuku jalija narri kunymamba yalunya, marda yalimi wajba narrinya yajinyi. Nani barri marda yalimi lalanba narrinya jala narri milidimba yalunya.
MAT 10:11 Jalija narri wanbiya barrawuyabarrawuyana, baki janarri kujba kunybanyi nganiyngkanyi. Jalija ninji jingkijba nyulu kunyba, nyulu nulijba kandimbikanyi ninya, baki yuku barri janinji jungku nanganginyina barndana. Nanaba janinji jungku yurrngumba jalija ninji milidimba yalunya nananyina barrawuyabarrawuyana.
MAT 10:12 Jalija ninji ngankijba barndana milidimbikanyi yalunya nanaba, baki marda ninjimi ngajaka Kud, janyulu nyulu wajba yalunya mardumardu muwa. Baki nanamuku jalili jungku nananyina barndana, janyulu wajba yalunya mardumardu muwa Kudwanyi.
MAT 10:13 Jaliyi yalu kandimba ninya, baki janyulu wajba yalunya mardumardu muwa Kudwanyi. Ngala jaliyi yalu miku kandimba ninya, baki miku janyulu wajba yalunya mardumardu muwa.
MAT 10:14 Jalija narri wanbiya barrawuyabarrawuyana, baki yiningki jayalu yurlwa narringi. Yiningki jayalu miku manku narringi jangkurr. Barlba narri nanamunanyi yajinanyi. Jayajayamba narringka nukami manjiykanyi jundurr. Jayalu najba narrinya jayajayambikurri narringka nukami, manjiykanyi jundurr, baki jayalu jingkijba, yalu balkimuku. Balki yalu, mikungangi yaliyi manku nangangi jangkurr Kudkanyi.
MAT 10:15 Baku barri, janyulu karrinjarrijba yalunya bukambiju walu nangandu Kudwanyi. Janyulu karrinjarrijba yalunya barrinani kurdusnyina. Nanamanji barri janyulu yanyba yalungi balkimukuyngka jalili jungku nananyina barrawuyabarrawuyana. Janyulu yanyba yalungi, ‘Narri jungkuka balkimuku. Miku narriyanyi kandimba ngakinmuku kandimuku, jali ngayu manjijba narrindurri. Miku narriyanyi manku yalungi jangkurr ngaki. Nanankardi barri jangayu yabimba kiji narringi. Janarringka janyba yurrngumba. Nanamuku wankalamuku jalili jungku nanawuyanyina yajina, niji Sudum baki Kumurra, yali balkimuku, ngala narri barri narri balkimirra. Janarringka narringka janyba yurrngumba barri.’” Barriwa.
MAT 10:16 Mili yanybayi Jisus yalungi nanganginmukuyngka kandimukuyngka. Yanyba nyuli, “Manku narri nayinda ngaki jangkurr. Ngayu manjijbangka narrinya kajayurri yajiyurri lukuluku. Marda narringkimi najbawa yalungi. Narri kunybamuku nganinyimuku, ngala ngayu manjijbangka narrinya yalundurri jala yalu balkimuku. Marda narringkimi najbawa, yanka narri jungku yalungi. Marda narrimi miku manku kiji yalungi.
MAT 10:17 Marda narringkimi najbawa yalungi, jala ngananjalu ngirra. Jayalu marrimba narrinya. Jayalu kuyu narrinya nangandurri malbuyurri kurdusyurri. Jayalu wajuba narrinya jurjina.
MAT 10:18 Jayalu kuyu narrinya mambukarri jurjkanyi, marda mambukarri Kubaminkanyi, kuyungangi narri ngaki jangkurr. Ngala jalija yalu kuyu narrinya nanamukuyngkurri mambukarri, baki janarri karu yalunya ngaki. Janarri karu yalunya ngakinkanyi jangkurranyi.
MAT 10:19 Jalija yalu kuyu narrinya kurdusyurri, jalija yalu karrinjarrijba narrinya walu mambukana, baki marda narrimi miku balkijba muwa, nanankanyi jangkurranyi jalija narri jananganja nanda mambuka. Marda narrimi miku balkijba muwa. Jalija narri karrinja walu nananyina mambukana, baki yingkawanyi janyulu karu narrinya nanankanyi jangkurranyi, narri yanybikanyi.
MAT 10:20 Nanda jangkurr jalija narri yanyba, miku nanda narringi jangkurr, ngala yingkawanyi janyulu wajba narrinya nanankanyi jangkurranyi. Janyulu wajba narrinya Kunybawanyi Ngarnduwanyi Kudkanyi. Janyulu nyulu karu narrinya jangkurranyi jananganjankanyi nanda mambuka. Nanankardi barri marda narrimi miku balkijba muwa jalija narri karrinja walu nangandu mambukana.
MAT 10:21 Nanamanji barri kajamukunyi mungkijimukunyi baki ngurranyimukunyi jala ngananjalu ngirra, jayalu manjijba narrinya mambukarri, nyulu kurdanbiji narrinya. Buwakula, yingkawanyi manjijbaja yingka nangandurri mambukarri. Nijanganjinyiwanyi manjijbaja jandanyi nangandurri mambukarri, baki jandanyiwanyi manjijbaja nijanganjinyi baki yarrijinyi nangandurri mambukarri, nyulu kurdanbiji yalunya.
MAT 10:22 Kajamukunyi jayalu ngirra narrinya ngaki. Nanamukunyi jala yalu miku kuyu ngaki jangkurr, jayalu ngirra narrinya. Jayalu yabimba kiji narringi. Ngala jaliyi narri yuwajiwa kuyu ngaki jangkurr, jaliyi narringka miku yangkalamba ngakinbunanyi, baki jangayu marrimba narrinya mardarda. Jayalu yabimba kiji narringi yingkamukunyi, ngala jangayu marrimba narrinya mardarda. Jangayu marrimba yalunya mardarda bukambiju jaliyi yalungka miku yangkalamba ngakinbunanyi.
MAT 10:23 Jalija yalu yabimba kiji yingkana barrawuyabarrawuyana, baki janarri yingijba nanda yaji. Jilajba yingkarri barrawuyabarrawuyarri. Janarri jilajba yingkarri barrawuyabarrawuyarri baki yingkarri barrawuyabarrawuyarri nanginyina walkurranyina yajina Yisrayil. Ngayu Buwanya Bukambijuyngka, jangayu wijba nanginkurri jambarri baku barri, ngala miku narriyi yidamba bukamba barrawuyabarrawuya waluwa ngayuja wijba.
MAT 10:24 Nanda jala yingkawanyi milidimbaka, miku nyulimi walkurra, ngala nanda nangangi milidimbawarr, nyuli mili walkurra nangangi. Nanda jala nyulu milidimbaka yingkawanyi, marda nyulimi mirnarrijba muwa, jala nyulu bayakarda nganinyi. Nanda wakiwarr, miku nyulimi walkurra, ngala nanda nangangi mambuka, nyulu mili walkurra nangangi. Baki nanda wakiwarr, marda nyulimi mirnarrijba muwa jala nyulu bayakarda nganinyi. Baki nani barri ngayu narringi mambuka, baki narri ngaki wakiwarrmuku. Yalu yabimbaka kiji ngaki, baki jayalu yabimba walkurra kiji narringi. Yalungka yanyba ngaki, ngayu mambuka yalungi wuwarranyi, baki nani barri jayalungka yanyba narringi, narri wuwarrmuku marda. Barriwa.
MAT 10:26 Marda narrimi miku marrala yalungi yingkamukuyngka, jalija yalu yabimba kiji narringi. Nanijba barri miku narrimi jingkijba bukamba yaji, ngala baku barri janyulu minimba narrinya bukamba yajinyi Kudwanyi. Janyulu minimba narrinya yalungi nanamukuyngka jala yalu kunybamuku, baki nanamukuyngka jala yalu balkimuku. Janyulu minimba narrinya yalungi. Miku yaliyi ngadijba nanganbunanyi Kudnanyi. Nanankardi barri marda narrimi miku marrala yalungi.
MAT 10:27 Kardarda ngayu karungka narrinya nanginkanyi jangkurranyi. Ngala baku barri, janarri kudanyu karu yalunya nanginkanyi jangkurranyi. Janarri kudanyu karu yalunya jala jungku barndana, baki jurjina, baki barrawuyabarrawuyana. Janarri kudanyu karu yalunya bukambiju nanginkanyi jangkurranyi jala ngayu kardarda karu narrinya.
MAT 10:28 Marda narrimi miku marrala yalungi jala yalu ngirra narrinya. Yiningki jayalu kurdanba narrinya mankanyi, ngala miku yaliyi kurdanba narrinya ngarndu. Marda narrimi miku marrala yalungi. Ngala marda narringkimi kudanyu mankumanku nangangi Kudkanyi. Yuku nyulu kurdanbaka narrinya mankanyi, baki ngarndu marda. Yuku nyulu manjijba narrinya jangurri Yilyurri, jaliyi narri yurlwa nanganginkanyi jangkurranyi.
MAT 10:29 Nanda bayakarda julaki, nanda kijirrikijirri. Yuku narri wudumba nanda julaki yingamalina bayakardana dungalana. Ngala jingkijbaja Kudwanyi, jalija nangka janyba yingamali kijirrikijirri baki yirrbaja jambarri. Ngawamba nangkaja janyba, jaliyi munyajba janybikurri nangka Kudwanyi.
MAT 10:30 Jingkijbangka narrinya marda Kudwanyi. Kudanyu nyulu jingkijbangka narrinya. Nyulu jingkijbangka yankana nyungka narringinyina kulajina.
MAT 10:31 Lalanbaka kijirrikijirri Kudwanyi, ngala narri barri mili walkurra nanankanyi kijirrikijirrinyi. Janyulu lalanba narrinya marda Kudwanyi. Kudanyu janyulu lalanba narrinya. Nanankardi barri marda narrimi miku marrala yalungi jala yalu ngirra narrinya.” Barriwa.
MAT 10:32 Mili barri yanybayi Jisus yalungi nanganginmukuyngka kandimukuyngka. “Jala nganinyi miku manyirru ngaki, ngala kudanyu nyulu karungka yalunya, nyulu durrijbangka ngaki jangkurr, baki miku ngayiyi manyirru nangangi. Jalija nyulu karrinja walu nangandu Kudnyina, baki jangayu karu Kud nangangi, ‘Nayinda nganinyi nyulu ngaki kandi. Nyulu durrijba ngaki jangkurr yurrngumba barri.’
MAT 10:33 Ngala jala nganinyiwanyi karungka yalunya, miku nyulimi durrijba ngaki jangkurr, baki nanamanji baku barri jangayu karu Kud nangangi, ‘Nayinda nganinyi miku nyulimi ngaki kandi. Miku nyuliyanyi durrijba ngaki jangkurr.’ Nani barri jangayu karu Kud yinini yinini jangkurranyi yalungi.
MAT 10:34 Marda narringkimi miku mankumanku ngaki, ngayi badajba yabimbiji yalunya bukambiju yalu jungunkanyi malumba mardumardu muwa. Miku ngayiyanyi badajba nanankanyi, ngala ngayi badajba yabimbiji kiji yalungi. Baki jayalungka jakakajba kudanyu barri.
MAT 10:35 Kudiyamukunyi jayalu kuyu ngaki jangkurr, ngala kudiyamukunyi jayalu miku kuyu ngaki jangkurr, baki nanankardi badajbaja kiji yalundurri. Yingkawanyi buwakaya kuyuja ngaki jangkurr, ngala nanganginyi jandanyiwanyi janyulu miku kuyu ngaki jangkurr. Yingkawanyi ngardanganjawanyi kuyuja ngaki jangkurr ngala nanganginyi kulunganjawanyi janyulu miku kuyu ngaki jangkurr. Yingkawanyi bardibardiwanyi kuyuja ngaki jangkurr, ngala nanganginyi ngunyarringanjawanyi janyulu miku kuyu ngaki jangkurr. Nani barri badajbaja kiji yalundurri.
MAT 10:36 Mungkijimuku jayalungka kudanyu jakakajba, baki jayalungka ngirra.
MAT 10:37 Nanda jala kudanyu marukangka muwa nanganginkanyi nijanganjiyngkanyi marda yarrijiyngkanyi, ngala ngawamba bijal nyulu marukangka muwa ngaki, miku nyulimi jungku kunyba ngaki. Miku nyulimi dujanya ngaki kandi. Nanda jala kudanyu marukangka muwa nanganginkanyi jandayngkanyi, ngala ngawamba bijal nyulu marukangka muwa ngaki, baki miku nyulimi jungku kunyba ngaki. Miku nyulimi dujanya ngaki kandi. Nanda jala kudanyu marukangka muwa nanganginkanyi kulunganjanyi ngala ngawamba bijal nyulu marukangka muwa ngaki, baki miku nyulimi jungku kunyba ngaki. Miku nyulimi dujanya ngaki kandi.
MAT 10:38 Nanda jala durrijbangka ngaki jangkurr, yingkamukunyi jayalu yabimba kiji nangangi. Jayalu ngarrkadaba, yiningki jayalu kurdanba. Jaliyi nangka miku yangkalamba ngakinbunanyi, baki nyulu dujanya ngaki kandi. Janyulu mili wanka jungku baku barri nangandu Kudnyina. Ngala jaliyi nangka yangkalamba ngakinbunanyi jala yingkamukunyi yalu yabimba kiji nangangi, baki miku nyulimi dujanya ngaki kandi. Miku nyuliyi wanka jungku nangandu Kudnyina, ngala janyulu jungku kurdan yurrngumba barri.
MAT 10:40 Jaliyi nganinyiwanyi kandimba narrinya jala narri durrijba ngaki jangkurr, baki nanda barrinani ngana nyulu kandimbaka. Baki jala ngana nyulu kandimba, baki nanda barrinani nyulu kandimbaka Kud, jali ngana manjijba nanginkurri wayka.
MAT 10:41 Manjijbangka milidimbawarrmuku Kudwanyi, baki nyulu yabimbaka kunyba yaji yalungi. Jaliyi yingkawanyi kandimba milidimbawarr, manjijbayingangi nanda nganinyi Kudwanyi, baki janyulu yabimba kunyba yaji nangangi Kudwanyi. Barriwa. Jaliyi nganinyiwanyi kandimba yingka, jala jungku kunyba nangangi Kudkanyi, baki janyulu yabimba kunyba yaji bulangi Kudwanyi. Janyulu yabimba kunyba yaji nangangi jala jungkuka kunyba, baki nangangi jala kandimba nanda.
MAT 10:42 Ngayu yanybaka duja jangkurr narringi. Jaliyi ninji yabimba kunyba yaji nangangi jalili nyulu durrijba ngaki jangkurr yurrngumba, baki nanda kunyba. Jaliyi ninji yabimba bijal yaji nangangi, ninji wajba nanda durrijbawarr wabudanyi ngaraykanyi, baki nanda kunyba. Jaliyi ninji wajba nanda wabudanyi, nyulungangi ngaki durrijbawarr, baki jangayu yabimba kunyba yaji nganyi.” Barriwa. Nani barri yanybayi Jisus yalungi nanganginmukuyngka kandimukuyngka.
MAT 11:1 Barriwa barri bukamba nyuli milidimba yalunya Jisuswanyi nanamuku 12 barri kandimuku nangangi. Baki yinarramba barlbayi Jisus nanamunanyi yajinanyi jali nyulu milidimba yalunya nanaba. Mili nyuli jilalajba lukuluku nananyina yajina, bakili nyulu milidimba yalunya.
MAT 11:2 Nanamanji barri nanda Jun Ngurrunbawarr nyulili jungku brisinyina. Wabula barri yali marrimba, baki manjijba yali brisinyurri. Ngala nyuli jungku brisinyina, baki manku nyuli jangkurr nangangi Jisuskanyi. Manku nyuli jangkurr nanankanyi yajinyi jali yabimba Jisuswanyi. Baki manjijba nyuli kudiya nanganginmuku kandimuku nangandurri Jisusyurri.
MAT 11:3 Wanbiya yali, baki yanyba yali nangangi Jisuskanyi, “Nanangini Junwanyi Ngurrunbawarranyi nyulili karu yalunya yingkanyi walkurrayngka nganiyngkanyi jalija badajba bayngkani nangandu. Nyulili karu yalunya nanankanyi yingkanyi jalija nyulu badajba nanginkurri. Karukiyi nurrunya, ninji kuna nanda walkurra nganinyi, jali karu yalunya nangangi Junwanyi. Ninji kuna nanda. Yiningki janurru mili yukumba yingkanyi. Karukiyi nurrunya nganyi, jaliyi ninji nanda walkurra nganinyi, yanyba jali Jun nangangi.”
MAT 11:4 Jananganjayi yalunya Jisuswanyi, “Wijba janarri nangandurri Junyurri, baki janarri karu Jun nanankanyi jala narri najba. Janarri karu Jun nanankanyi jala narri manku yalunya yanybikurri.
MAT 11:5 Kajamuku jali yalu wabula kabuji yami, ngala nanijba barri yalu kunyba yami naykanyi yaji. Kajamuku jali wabula yalu balki nukami, jali miku jilajba, ngala nanijba barri yalu yuku kunyba nukami jilaykanyi. Kajamuku jali yalu wabula ngujbulijba waban, ngala nanijba barri yalu kunyba waban. Kajamuku jali yalu wabula balki kuwarda, jala mikuwali manku yaji, ngala nanijba barri yalu yuku, kunyba kuwarda mankunkanyi yaji. Kudiya jali nangka barriwa janyba, ngala nanijba barri yalu mili wanka jungku. Baki nanda kunyba jangkurr nangangi Kudkanyi, ngayu karungka yalunya nanankanyi jangkurranyi. Kajamuku jala miku yalungka walkurramba, ngala jala yalungka bayakardamba, ngayu karungka yalunya nanankanyi kunybanyi jangkurranyi nanganginkanyi Kudkanyi.
MAT 11:6 Kajamukunyi yalu manku ngaki jangkurr, yalu najba ngana kunymambikurri yalunya, baki ngana yalu jingkijba, ngayu nanda walkurra, jali ngayu badajba bayngkani nangandu Junyina. Nani yalu jingkijba ngana, baki nanankardi yalu mirnarrijbangka muwa ngaki. Janarri wijba nangandurri Junyurri. Janarri karu Jun ngakinkanyi jangkurranyi, baki janyulu jingkijba ngayu nanda.”
MAT 11:7 Baki barriwa barlba yali kandimuku nangangi Junkanyi Ngurrunbawarrayngka. Wijba yali nangandurri karunki yaji. Ngala yali barlba, baki yanybayi Jisus yalungi muranyi jali yalu nanaba nangandu. Nayi nyuli yanyba yalungi, “Wabula barri narri jilajbayi kula nangandurri Junyurri. Narri jilajbayi kularriji mangkurruyurri yajiyurri, naji nanda Jun, baki mankunki nangangi jangkurr. Narri jilajbayi nangandurri, baki wanyi narri najba. Najba kuna narri nganinyi jali yangkalamba kaja jangkurr, jali mili dingkaba yanyba. Jungku nyuli nani kuna, barrinani wunanybala karnba. Jala warrmbaka yunkurrwanyi karrina baki wayngkalulumbaka nanda karnba bayungu. Ngala jala warrmbaka yunkurrwanyi bayunguna, baki wayngkalulumba nanda karnba karri. Nani kuna nyulili mili yanyba dingkaba Jun. Ngala miku barri. Miku nyuliyanyi jungku nani Jun. Miku nyuliyanyi mili yanyba dingkaba.
MAT 11:8 Jungku kuna nyuli barrinani jirrinyi nganinyi, barrinani walkurra mambuka jirdi kunybanyi jumbalanyi. Nani kuna nyuli jungku. Miku nyuliyanyi jungku nani. Nanda walkurra mambuka jirdi kunybanyi jumbalanyi, nyulili jungku walkurranyina barrawuna. Ngala Jun miku nyuliyanyi walkurra mambuka.
MAT 11:9 Ngala wanyi narri najba. Najba kuna narri nganinyi jalili yanyba jangkurr nangangi Kudkanyi. Yi. Jali narri najba Jun, baki narri najba nanda nganinyi jalili yanyba jangkurr nangangi Kudkanyi. Nyuli walkurramirra nganinyi nangangi Kudkanyi.
MAT 11:10 Nanda naja Kudkanyi yanybaka nangangi Junkanyi. Yanybaka naja nayi barri nangangi, ‘Yanybaka Kud, “Ninji ngaki jandanyi, jangayu manjijba nganinyi waluwa nganyindu. Janyulu karu yalunya, nanangini nganinyiwanyi, jalija ngayu manjijba. Janyulu karu yalunya nganyi, janinji badajba. Janinji badajba bayngkani nangandu. Marda yalungkimi mankumanku nanankanyi balkinyi yajinyi jali yalu yabimba. Marda yalimi ngindu muwa nanankanyi balkinyi yajinyi, badajbangangi janinji.’” Nani barri nanda naja Kudkanyi yanybaka nangangi Junkanyi.
MAT 11:11 Nyulu nanda jali manjijba Kudwanyi karunki yalunya nanganginkanyi jangkurranyi Kudkanyi. Ngayu karungka narrinya duja jangkurranyi. Nanda Jun Ngurrunbawarr, nyulu walkurramirra nganinyi. Miku yingka mili walkurra nangangi. Nyulu mili walkurra yalungi wankalamukuyngka jali yanyba jangkurr nangangi Kudkanyi wankalana. Nyulu mili walkurra yalungi. Ngala baku barri kajamukunyi jayalu kuyu ngaki jangkurr, baki janyulu lalanba yalunya Kudwanyi. Ngala nanamuku jalija kuyu ngaki jangkurr, jayalu mili walkurra nangangi Junkanyi Ngurrunbawarrayngka. Jayalu mili walkurra nangangi.
MAT 11:12 Yanybayi Jun jangkurr Kudkanyi karunkanyi yalunya, marda yalimi ngindu muwa yalunginkanyi balkinyi yajinyi. Karuyi yalunya Junwanyi nangangi Kudkanyi nyulu Lalanbawarr. Jalannga barri jali yanyba Jun nani, baki yali manku kiji nangangi yingkamukunyi. Nanamanji barri yali yabimba kiji nangangi, baki yurrngumba nanginkurri yuwajiwa yalu manku kiji nurrungi jala milidimba nanamannga jangkurranyi. Yalu balkimuku. Yalu dabawarrmuku.
MAT 11:13 Narri jingkijba nanda jangkurr najana Kudkanyi jali yanyba nanamuku wankalamuku. Baki nanda yuwa nangangi Musiskanyi najana Kudkanyi, narri jingkijba nanda jangkurr marda. Yalunginyi jangkurrwanyi karungka narrinya nanankanyi barrinani Yalayija jalija manjijba Kudwanyi. Narri jingkijba nanda jangkurr, baki jaliyi narri kuyu nanda jangkurr, baki narri jingkijba nayi marda. Nanda Jun Ngurranbawarr, nyulu nanda barrinani Yalayija jali manjijba Kudwanyi.
MAT 11:15 Narri jungku kuwardayudi, narri manku ngaki jangkurr, baki marda narrimi jingkijba ngaki jangkurr nangangi Junkanyi Ngurranbawarryngka.” Barriwa.
MAT 11:16 Mili yanybayi Jisus yalungi, “Nganinyimuku baki jibarrimuku jala yalu jungku nanijba, yalu barrinani bayamuku jala baja burrandi barndana yajina.
MAT 11:17 Malumba yali baja bayamuku. Yingka yanybayi yalungi, ‘Waluku ngayi nulijba ngambalangi bajankanyi ngambala wangarranyi, ngala miku narriyanyi nulijba bajankanyi nani ngakindu. Bayngkani barri ngayi nulijba ngambalangi bajankanyi ngambala makaykanyi kuyuwana, ngala mili barri miku narriyanyi nulijba bajankanyi nani ngakindu. Miku narrimi mirnarrijba muwa bajankanyi yinini yinini.’ Nani barri yanybayi yingka yalungi bayamukuyngka.
MAT 11:18 Jali badajba Jun karunki jangkurranyi Kudkanyi, baki miku nyuliyanyi jarrba mama kudiyana, miku nyuliyanyi ngaraba nanda ngarrki krayibkanyi. Ngala ngindu nyuli muwa, jungkukangangi nganinyimuku balki nangangi Kudkanyi. Nani nyuli jungku Jun Ngurrunbawarr, ngala yali yanyba nangangi, jungkuka wuwarr nangandu mankanyi.
MAT 11:19 Ngala jali ngayu Buwanya Bukambijuyngka badajba milidimbiji jangkurranyi Kudkanyi, baki jarrba ngayi yaji, ngaraba ngayi ngarrki krayibkanyi. Ngala yalu yanyba ngaki, ‘Najbakiyi nanda nganinyi. Jarrbangka nyulu kaja mama. Ngarabangka nyulu kaja ngarrki krayibkanyi. Baki nyulu kandimbaka yalunya balkimuku jala kuyu bayngkani dungala ngamanbunanyi yalungi kubaminkanyi.’ Nani barri yalu yanyba yinini yinini jangkurr. Nani barri yalu barrinani bayamuku. Miku yalimi mirnarrijba muwa nangangi Junkanyi, nanankanyi jali nyulu yabimba. Baki miku yalimi mirnarrijba muwa ngaki nanankanyi jala ngayu yabimba. Ngala nanamuku jala kuyu nanda jangkurr nangangi Junkanyi, baki kuyu ngaki jangkurr marda, yalu barri kunyba kulaji. Yalu jungkuka kunyba kulaji nangangi Kudkanyi yurrngumba barri. Barriwa.” Nani yanybayi Jisus yalungi.
MAT 11:20 Yabimba nyuli kaja ngiruka yaji Jisuswanyi. Yabimba nyuli ngiruka yaji kajana barrawuyabarrawuyana. Ngala nanamuku jali yalu jungku nananyina yajina, yali yurlwa nanganginkanyi ngirukanyi yajinyi. Miku yaliyanyi ngindu muwa yalunginkanyi balkinyi yajinyi. Miku yalungkiyanyi yangkalamba yalunginbunanyi balkinanyi yajinanyi. Baki yanybayi Jisus yalungi,
MAT 11:21 “Narri jala jungku nananyina yajina niji Kurasin, baki yingkana yajina niji Bidsayida, badajbaja walkurra kiji narrindurri. Yabimba ngayi kaja ngiruka yaji narringinyina yajina, ngala miku narriyanyi kuyu ngaki jangkurr. Wabula barri wankalana, nanamuku jali jungku nanawuyanyina yajina niji Daya baki Sayidun, yali balkimuku. Ngala jaliyanyi yingkawanyi yabimba nanamannga ngiruka yaji yalunginyina yajina, barrinani nganarri najba yabimbikurri yaji, baki yaliyanyi ngindu muwa. Yaliyanyi ngindu muwa yalunginkanyi balkinyi yajinyi. Yalungkiyanyi yangkalamba nangandurri Kudyurri, jaliyanyi yalu najba nanamannga ngiruka yaji.
MAT 11:22 Ngayu karungka narrinya. Jalija nyulu karrinjarrijba yalunya bukambiju walu nangandu Kudwanyi, baki janyulu ngirrwa yalungi balkimukuyngka. Janyulu yanyba yalungi jalili wabula jungku nanawuyanyina yajina Daya baki Sayidin. Janyulu yanyba yalungi, yalu balkimuku. Ngala narri jala jungku nanginkuyanyina yajina Kurasin baki Bidsayida, janyulu yanyba narringi, narri balkimirra. Miku narriyanyi kuyu ngaki jangkurr, baki nanankardi narri mili balki yalungi nanamukuyngka wankalamukuyngka. Barriwa.
MAT 11:23 Ngala narri jala jungku nananyina barrawuyabarrawuyana Kabirnayum, mankumanku kuna narringka, narri kunybamuku, baku janarri jungku kingkarri nangandu Kudnyina. Nani kuna narringka mankumanku. Ngala ngayu karungka narrinya, miku narrimi kunybamuku, ngala narri marda balkimuku. Janyulu manjijba narrinya Yilyurri Kudwanyi, mikungangi narriyanyi kuyu ngaki jangkurr. Jaliyanyi nganinyiwanyi yabimba nanamannga ngiruka yaji nananyina yajina Sudum, barrinani nganarri najbangka yabimbikurri yaji, baki yuwajiwa jungkukiyanyi nanda barrawuyabarrawuya nanijba barri. Ngala dalyambayi nanda yaji Kudwanyi. Kurdanba nyuli bukambiju jali yalu jungku nanaba, jungkungangi yali balki nangangi. Ngala narri barri narri yurlwa ngakinkanyi yajinyi, baki narri jungkuka mili balki yalungi.
MAT 11:24 Jalija nyulu karrinjarrijba bukambiju yalunya walu nangandu Kudwanyi, baki janyulu yanyba, “Nanamuku jali jungku Sudum, yali jungku balki ngaki, ngala nanamuku jali jungku Kabirnayum, yalu jungkuka balkimirra, yurlwangangi yalu nanankanyi ngirukanyi yajinyi jali yabimba Jisuswanyi. Yalu jungkuka ngiruka balkimuku.’ Barriwa.” Nani barri yanybayi Jisus yalungi jali yurlwa nanankanyi ngirukanyi yajinyi jali nyulu yabimba yalunginyina yajina. Barriwa.
MAT 11:25 Nanamanji barri yanybayi Jisus mududu nangangi Kudkanyi. Yanyba nyuli, “Buwakanya. Ninji barri walkurra mambuka lalijinyi baki jambanyi. Walkurra mambuka ninji bukambijuyngka yajinyi. Mirnarrijba ngayu muwa nganyi. Ninji ngadijba nganyi jangkurr yalunbunanyi jala yalungka mankumanku, yalu kunyba kulaji nganyi, yalu jingkijbangka nganyi yuwa. Yalungka mankumanku yalu jingkijbangka nganyi yuwa, yalu kunyba kulaji nganyi, ngala miku. Baki miku yalimi nulijba jingkiykanyi ngaki jangkurr nganyi. Nanankardi barri ninji ngadijba nganyi jangkurr yalunbunanyi. Ngala ninji minimbayi yalunya jala yalungka miku mankumanku yalu jingkijbangka nganyi jangkurr. Ninji minimbayi yalunya jala yalu mili nulijba jingkiykanyi nganyi jangkurr. Ninji minimba yalunya ngakinkanyi jangkurranyi, duja nanda ngaki jangkurr. Nani barri ninji yabimba yaji.” Barriwa.
MAT 11:27 Mili barri yanybayi Jisus yalungi, “Ngakinyi Buwakayu nyuli wajba ngana bukamba yajinyi. Nyuli yarrijba ngana walkurra mambuka bukamba yajinyi. Ngawamba nyulu ngana jingkijba ngakinyi Buwakayu. Baki ngawamba ngayu jingkijbangka nanda ngaki Buwakanya. Ngala jangayu yarrijba kudiya jingkiykanyi ngaki Buwakanya. Jangayu minimba yalunya ngakinkanyi Buwakaya, baki jayalu marda jingkijba ngaki Buwakanya.
MAT 11:28 Narri jala narri balkijba muwa, jala yabimba balki yaji, jala jungku narri balki nangangi Kudkanyi, marda narrimi badajba ngakindurri. Narri barrinani nganinyi jala wakingka mambukanyi, jala dukanarrijba wabuda kurndayudinyi. Rambaka janki wabudawanyi, baki biwi nangangi janki. Baki nani barri narringinyi balkiwanyi yajiwanyi rambaka narringi kurdulu. Ngala jaliyi narri badajba ngakindurri, jaliyi narri durrijba ngaki yuwa, baki mikukimi ngakinyi yuwawanyi ramba narringi kurdulu.
MAT 11:29 Marda narrimi badajba ngakindurri. Marda narrimi kuyu ngaki jangkurr. Marda narrimi durrijba ngaki jangkurr, baki jangayu manjamanjamba narringi balki yaji, baki janarri jungku mardumardu muwa. Miku ngayiyi kijiwijba narringi. Miku ngayiyi ngirrwa narringi, ngala jangayu yili yanyba narringi. Jangayu milidimba narrinya ngaki, baki jangayu yabimba narrinya jungunkanyi mardumardu muwa. Marda narrimi durrijba ngaki yuwa. Mikukimi ngakinyi yuwawanyi ramba narringi kurdulu. Kunyba ngaki yuwa narringi. Janarri dululijba kurdulu.” Barriwa.
MAT 12:1 Baku barri burrandijba yali nananyina yajina jali jardijba nanda karnba daburrul. Nanda karnba yami kunyunyu jarrkanyi. Burrandijba yali, Jisus baki nanganginmuku kandimuku ngala nyuli Sadidi barri. Birrkalanyi yali kandimuku, baki dulaba yali yami, baki jarrba yali.
MAT 12:2 Ngala kudiyamuku Barisimuku jalili kudanyu durrijba nanda yuwa nangangi Musiskanyi, yali nanaba marda yalundu. Yali najba kandimuku dulaykurri yami baki jarrkurri yaji. Baki yanyba yalungki, “Yalu dulabangka yami karnbananyi. Nani barri yalu wakingka.” Baki yanyba yali nangangi Jisuskanyi, “Najbakiyi yalunya nganyinmuku kandimuku. Yalu dulabangka daburrul yami jarrkanyi. Nani yalu wakingka. Nani yalu jungkuka balkina yuwana Musiskanyi. Yanybaka nanda yuwa, mardakimi nganinyi miku waki Sadidi barri. Yuku yalu waki yingkana kambana, ngala miku Sadidi. Jala barri Sadidi ngala nganyinmuku kandimuku yalu wakingka, yalu dulabangka daburrul yami. Wanyingkanyi yalimi miku ngayangayijba nanankanyi yuwanyi Musiskanyi.”
MAT 12:3 Jananganjayi yalunya Jisuswanyi, “Narri jingkijbangka nanda jangkurr najana Kudkanyi, jala karu ngambalanya nanankanyi walkurrayngka mambukanyi Dayibidkanyi. Narri jingkijbangka nanda jala nyuli yabimba. Jali yalu birrkalanyi, Dayibid baki nanamuku yalu nangandu, baki wanyimbayi Dayibid.
MAT 12:4 Ngankijba nyuli kalawunyi walkurranyina jurjina Kudkanyi, baki wajbayi Dayibid dambanyi mambukawanyi jurjkanyi. Jarrba yali nanda damba. Ngala nanda damba, nanda kudukudu yaji nangangi Kudkanyi. Nanda yuwa nangangi Musiskanyi yanybaka, ngawamba mambukamukunyi jurjkanyi, ngawamba yuku yalu jarrba nanda kudukudu mama. Mikuwali yingkawanyi, ngawamba mambukawanyi jurjkanyi. Ngala barimbayi nanda yuwa Dayibidwanyi. Jarrba nyuli nanda mama baki yalu nangandu. Baki narri jingkijba yalunya mambukamuku jurjkanyi. Yalu waki Sadidi marda. Yalu karrinja walu yalundu jurjina. Yalu yanybaka mududu nangangi Kudkanyi. Yalunjalu milidimbaka jangkurranyi Kudkanyi baki yuwanyi Musiskanyi. Nani barri yalu marda wakingka Sadidi. Nani kuna barri yalu barimbaka nanda yuwa, miku wakinkanyi Sadidi. Nani kuna barri. Ngayu karungka narrinya duja. Dayibid baki nanamuku nangandu yali birrkalanyi. Jaliyanyi yalu miku wudumba mama baki yaliyanyi majubujba mankanyi, baki miku yaliyanyi jilajba juju. Yuku barri nanangini mambukwanyi jurjkanyi yalunya wajbayi dambanyi, baki yali kunyba mankanyi jilaykanyi. Nanda mambuka jurjkanyi, jali nyulu wajba yalunya dambanyi, miku nyuliyanyi jungku balki nangangi Kudkanyi, ngala nyuli jungku kunyba nangangi. Baki nanamuku jala yalunjalu milidimbaka jurjina Sadidi barri, miku yalimi jungku balki nangangi Kudkanyi, ngala yalu marda jungkuka kunyba nangangi.
MAT 12:6 Nanda yuwa jurjkanyi, baki nanda yuwa miku wakinkanyi Sadidi, nanda kunyba yuwa. Ngala ngayu karungka narrinya yingkanyi yuwanyi Kudkanyi, nyulu lalanbikanyi narrinya. Nayinda yingka yuwa mili walkurra nanankanyi waluwiyngkanyi yuwanyi. Nayinda yuwa yanybaka nangangi Kudkanyi, nyulu lalanbaka narrinya.
MAT 12:7 Nanda naja Kudkanyi yanybaka, ‘Miku ngayimi nulijba narringi waykanyi nganarri barnyinyi. Ngala ngayu nulijba narringi yabimbikanyi kunyba yaji yalungi yingkamukuyngka. Ngayu nulijba narringi kandimbikanyi yalunya jala yalu balkijba muwa.’ Jalimi narri kudanyu jingkijba nanda jangkurr najana Kudkanyi, baki miku narrimi yanyba yalungi yingkamukuyngka yalu jungkuka balkina yuwana jala yalu yabimba kunyba yaji yingkamukuyngka. Miku yalimi jungku balki jala yalu yabimba kunyba yaji yalungi.
MAT 12:8 Ngayu Buwanya Bukambijuyngka narringi. Ngayu mambuka bukambijuyngka narringi yurrngumba barri. Ngayu mambuka narringi jala narri waki, baki jala narri jungku, marda ngayu mambuka nanankanyi yajinyi jala narri yabimba Sadidi barri.”
MAT 12:9 Kamu barri yingkijbayi nanda yaji Jisuswanyi, baki mili jilajba nyuli, baki wanbiya nyuli barrawuyabarrawuyana, baki ngankijba nyuli jurjina nanaba. Bayakarda nanda jurj.
MAT 12:10 Nanaba jurjina jungkuyi nganinyi jirdi balkinyi marninyi. Mikuwali marrimba yaji. Mardil nangangi marni. Barriwa. Kudiya nanaba jurjina yali nulijba balanjankanyi Jisus. Yali nulijba Jisuskanyi nyulu yabimbikanyi balki yaji nanankanyi yuwanyi Musiskanyi. Baki ngajaka yali Jisus, “Jaliyi nganinyiwanyi kunymamba yingka jala lunji ngala nyulu Sadidi yajina, baki nani nyulu wakingka. Nani nyulu wakingka ngala nyulu Sadidi yajina. Wanyi ninji yanyba. Jungku kuna nyulu balkina yuwana, jaliyi nyulu waki nani Sadidi yajina. Wanyi ninji yanyba nangangi.” Nani barri yali ngajaka Jisus balanjanki ngajaka.
MAT 12:11 Jananganjayi yalunya Jisuswanyi, “Mankumankuwa narringka nganiyngkanyi jirdi kajanyi jibkanyi. Jaliyi yingamali nangangi jib yirrba wayka rirrkina Sadidi yajina, baki mikuwali kirrijba, baki wanyimba janyulu. Jaliyi nyulu yingkijba nanda jib wayka wabudana baki ngurrulijbaja. Ngala janyulu dulaba nanda jib waykalinya wabudananyi ngala nyulu yuwajiwa Sadidi yajina, baki nanda kunyba. Mikukimi nanda yuwa Musiskanyi yanyba, marda ninjimi munyajba nanda jib ngurrulijba, jaliyi nyulu jirrba wabudarri Sadidi yajina. Yuku nyulu yabimbaka kunyba yaji Sadidi yajina.
MAT 12:12 Ngala yingamali nganinyi, nyulu mili walkurra jibkanyi. Yuku ninji kunymamba nganinyi jala lunji ngala nyulu Sadidi yajina. Yuku ninji kunymamba Sadidi yajina.” Nani barri jananganjayi yalunya Jisuswanyi.
MAT 12:13 Baki yanybayi Jisus nganiyngkanyi jali mardil marni. Jirrinyba nyuli nanda nganinyi, “Manjijbakiyi nganyingka marni.” Manjijba nangki marni baki kunybijbayi nanda marni. Yuku barri nyuli yabijba marni barrinani nanda yingka marni.
MAT 12:14 Kudiyamuku jali najba Jisus kunymambikurri marni Sadidi yajina, yali Barisimuku, baki yali ngarrangarra muwa. Yinarramba yali walajba. Barlba yali jurjnanyi, baki yanyba yalungki kurdanbikanyi Jisus.
MAT 12:15 Ngala mankuyi jangkurr yalungi Jisuswanyi, yalu nulijba kurdanbikanyi Jisus, baki barlba nyuli nanamunanyi yajinanyi. Baki kajamuku yali jilajba nangandu walkurra muranmuku. Nyulu kunymambayi yalunya jali yalu lunji. Kunymamba nyuli yalunya bukambiju.
MAT 12:16 Ngala jirrinyba nyuli yalunya, marda yalimi miku karu yalunya yingkamuku nangangi. Nani barri nyuli jirrinyba yalunya Jisuswanyi.
MAT 12:17 Nanda wankalanyi Yayisaya jali yanyba jangkurr nangangi Kudkanyi, yarrijba nyuli jangkurr najana Kudkanyi. Duja nanda jangkurr nayi barri.
MAT 12:18 “Yanybaka Kud nayi barri, ‘Nayinda, nyulu ngaki wakiwarr. Ngayi yarrijba nayinda, nyulu wakinkanyi ngaki kudanyu. Ngayu marukangka muwa nangangi. Mirnarrijba ngayu muwa nangangi, marda jangayu yawumba ngaki Kunyba Ngarndu nangandu, baki janyulu yanyba ngaki jangkurr. Janyulu karu yalunya bukambiju nanankanyi jalija ngayu yabimba yalungi, jaliyi yalu mili jungku balki ngakinkanyi yuwanyi yurrngumba barri. Janyulu karu yalunya nanankanyi balkinyi yajinyi jalija ngayu yabimba yalungi.
MAT 12:19 Miku nyuliyi ngarrangarra muwa yalungi. Miku nyuliyi jakakajba yalunya. Miku nyuliyi ngirrwa yalungi. Miku nyuliyi waka yalunya burrandi barndana.
MAT 12:20 Ngala janyulu jungku mardumardu muwa yalungi. Janyulu kandimba yalunya jala yalu miku ngirukijba mankanyi jala yalu majabujba mankanyi. Janyulu milidimba yalunya kunybanyi jangkurranyi. Yurrngumba janyulu milidimba yalunya nanankurri jalija kunybawanyi yajiwanyi wakaramba nanda balki yaji. Nanankurri janyulu milidimba yalunya.
MAT 12:21 Baki jayalu jingkijba nanda marda, janyulu marrimba yalunya mardarda. Janyulu marrimba yalunya bukambiju. Nani janyulu yabimba, nanda wakiwarr ngaki.’” Barriwa. Nani barri yanybayi nanda wankalanyi Yayisaya. Duja nanda nangangi jangkurr. Yanyba nyuli nangangi Jisuskanyi. Barriwa.
MAT 12:22 Baku barri kudiyamuku yali jilajba nangandurri Jisusyurri. Kuyu yali nganinyi jali kabuji yami. Nyuli kabuji yami, baki balki janyi. Miku nyuliyanyi najba yaji, miku nyuliyanyi yanyba jangkurr, jungkuyingangi wuwarr nangandu mankanyina. Kuyu yali nanda nganinyi nangandurri Jisusyurri, baki kunymambayi nganinyi Jisuswanyi. Yuku nyuli najba yaji baki yanyba jangkurr.
MAT 12:23 Ngala nanda muramuku nanaba nangandu, manmala yali jali kunymamba nganinyi Jisuswanyi. Manmala yali kudanyu barri. Yililikajba yalungka, “Yanybayi Kud, janyulu manjijba nganinyi marrimbiji ngambalanya mardarda. Nanda jalija manjijba Kudwanyi, janyulu barrinani jandanyi nangangi Dayibidkanyi juju bayngkani nangandu. Nani yanybayi Kud. Nayinda Jisus, yiningki nyulu nanda jali yanyba Kud janyulu manjijba nanginkurri.”
MAT 12:24 Mankuyi yalungi jangkurr kudiyamukunyi Barasimukunyi. Manku yali nanda jangkurr jali yalungka yililikajba, baki jananganja yali, “Miku barri, miku. Miku nyulimi nanda jalija manjijba Kudwanyi. Nayinda Jisus, nyulu yabimbaka ngiruka yaji, nyulu jakajbangka wuwarr, wakingkangangi nyulu nangangi mambukanyi wuwarranyi, Sayidinkanyi. Nanangini Sayidinwanyi nyulu yabimbaka Jisus ngiruka, yabimbikanyi ngiruka yaji, baki nanankardi nyulu jakajbangka wuwarr.”
MAT 12:25 Ngala jingkijbayi Jisuswanyi nanda jali yalungka yanyba. Jingkijba nyuli nanda jangkurr. Baki yanyba nyuli yalungi, “Jalimi yalu mungkiykurramba kurdanbiji, baki baku barri, janyulu mikuyaji mungkijinyi. Janyba jayalungka bukamba. Jalimi yalu mungkiykurramba kurdanbiji, yalu jala kuluka yingamalina barndana, baki baku barri janyulu mikuyaji mungkijinyi nanaba barndana.
MAT 12:26 Jalimi yalu mungkiykurramba kurdanbiji, Sayidin marda wuwarrmuku, baki baku barri janyulu mikuyaji wuwarranyi, kurdanbangangi jayalungka.
MAT 12:27 Narri yanyba ngaki, ngayu jakajba wuwarr mankanyinanyi, nyulungangi yabimbaka ngana ngiruka jakaykanyi wuwarr Sayidinwanyi. Ngala kudiyamuku kandimuku narringi, yalu marda jakajba wuwarr mankanyinanyi. Yanka yalu jakajba wuwarr. Nyulu kuna yabimbaka yalunya ngiruka marda Sayidinwanyi. Nanankardi kuna yalu jakajbangka wuwarr. Nanda jangkurr jali narri yanyba ngaki, miku nanda duja.
MAT 12:28 Miku ngayiyi jakajba wuwarr, nyulungangi ngana yabimbayi ngiruka Sayidinwanyi. Ngala nyulu yabimbaka ngana ngiruka nani Kunybawanyi Ngarnduwanyi Kudkanyi. Wajba ngana nanganginkanyi Kunybanyi Ngarndunyi Kudwanyi, baki nanankardi ngayu ngiruka jakaykanyi wuwarr. Jaliyi narri jingkijba nani ngaki, baki narri jingkijba nayi marda nangangi Kudkanyi. Nyulu barri nayi lalanbawarr Kud, marda nyulu barri ngana manjijbayi marrimbiji yalunya mardarda.
MAT 12:29 Mikuwali ngankijba nganinyi barrawuna jala nanda nangangi barrawu ngirukanyi nganiyngkanyi. Miku nyuliyi ngankijba barrawuna maninjakuji yaji. Waluwa barri marda nyulimi kijijba nanda ngiruka nganinyi kurulyudinyi nanangini maninjakuwanyi. Jala nyulu kijijba nanda ngiruka nganinyi, baki yuku barri janyulu maninjakujba nangangi yaji.
MAT 12:30 Badajba ngayi milidimbiji yalunya nangangi Kudkanyi, marda yalimi durrijba nangangi yuwa yurrngumba barri. Ngakinmukunyi kandimukunyi, yalunjalu milidimba nanamannga jangkurranyi durriykanyi Kud. Jaliyi nganinyi ngaki kandi, baki nani nyulu milidimbaka yalunya. Ngala jaliyi nganinyi miku ngaki kandi, baki nyulu kandi nangangi Sayidinkanyi, nyulu nulijbangka yangkalambikanyi yalunya yingkamuku nanganbunanyi Kudnanyi.
MAT 12:31 Jala nganinyi yanybaka balki jangkurr, jala nyulu yabimbaka yinini yinini balki yaji, baki yuku nyulu manjamanjambaka nanda balki yaji Kudwanyi. Yuku nyulu manjamanjambaka nanda yinini yinini balki yaji nangangi, jaliyi nanda nganinyi nyulu ngindu muwa jungunkanyi balki. Jala nganinyi yanybaka balki jangkurr ngaki, Buwanya Bukambijuyngka, jala nyulu yanyba balki jangkurr ngaki, baki yuku nyulu manjamanjambaka nanda balki yaji Kudwanyi. Yuku nyulu manjamanjambaka nanda balki yaji, jaliyi nanda nganinyi ngindu muwa jungunkanyi balki. Ngala jala nganinyi yanyba balki jangkurr nangangi Kunybanyi Ngarndunyi Kudkanyi, jala nyulu mijba nanda Kunyba Ngarndu Kudkanyi, baki mikuwali manjamanjamba nanda balki yaji Kudwanyi. Miku nyuliyi manjamanjamba nanda balki yaji miykanyi Kunyba Ngarndu nangangi Kudkanyi. Barriwa.”
MAT 12:33 Mili barri yanybayi Jisus yalungi Barasimukuyngka. “Jala kunyba karlawanyi jardijba kunybana jambana, baki kaja kunyba mama nangandu. Ngala jala balki nanda karlawanyi, jala mardil jardijba, baki balki nanda mama nangandu. Jala narri najba kaja kunyba mama kurndana, baki narri jingkijba kunyba nanda kurnda ngiruka barri. Ngala jala narri najba balki mama kurndana, baki narri jingkijba balki nanda kurnda. Narri barrinani nanda balki kurnda jirdi balkinyi mamanyi.
MAT 12:34 Narri balkimuku. Miku narriyi yanyba kunyba jangkurr, jungkungangi narri balki kurdulu yurrngumba barri. Mankumanku narringka balkinyi jangkurranyi yurrngumba, baki yanyba narri ngawamba balki jangkurr yurrngumba. Narri barrinani nanda bijbawarr miya, jala yabimba kiji yalungi, jala yalunya bijba. Narri nulijbangka yabimbikanyi kiji yalungi, narri nulijbangka linjumbikanyi yalunya.
MAT 12:35 Ngala nanda nganinyi jirdi kunybanyi kurdulunyi nangka mankumankuka kunybanyi yajinyi. Baki nanankardi nyulu yabimbaka kunyba yaji, nyulu yanybaka kunyba jangkurr marda. Ngala nanda nganinyi jirdi balkinyi kurdulunyi, nangka mankumankuka balkinyi yajinyi, baki nanankardi nyulu yabimbaka balki yaji, nyulu yanybaka balki jangkurr marda.
MAT 12:36 Ngayu karungka narrinya duja jangkurr. Janyulu karrinjarrijba narrinya walu nangandu Kudwanyi. Janyulu karrinjarrijba narrinya, baki janyulu mankuwa bukamba narringi balki jangkurr. Narri jala jungku balki nangangi, janyulu mankuwa narringi balki jangkurr, baki nanankardi barri janyulu yanyba narringi, narri balkimuku. Janyulu yabimba balki yaji narringi. Ngala narri jala yanyba kunyba jangkurr, janyulu mankuwa narringi jangkurr marda Kudwanyi. Baki janyulu yanyba narringi, narri kunybamuku.” Barriwa. Nani barri milidimbayi yalunya Jisuswanyi.
MAT 12:38 Kudiyamuku jali milidimbawarr yuwanyi Musiskanyi, baki kudiyamuku Barasimuku, yali yanyba nangangi Jisuskanyi. Ngajaka yali Jisus, “Milidimbawarr. Yuku ninji yabimba kaja ngiruka yaji. Nurrimi najba ninya yabimbikurri mili ngiruka yaji. Ngiruka yaji nurrimi najba ninya yabimbikurri.” Nani yali ngajaka Jisus, ngala miku yaliyanyi kuyu nangangi jangkurr, nyuli milidimbawarr nangangi Kudkanyi.
MAT 12:39 Ngala jananganjayi yalunya Jisuswanyi, “Nganarri jingkijba, ngayu kunymamba yalunya jala yalu lunji, ngayu jakajba wuwarr yalunbunanyi mankanyinanyi, ngala nganarri ngajaka, ngayu yabimbiji mili ngiruka yaji. Kajamuku yalu jungku balki nangangi Kudkanyi, baki narri marda, narri jungkuka balki nangangi. Miku narrimi durrijba nangangi yuwa. Miku ngayiyi minimba narrinya mili ngirukanyi yajinyi. Ngawamba yingamali ngiruka yaji janarri najba, barrinani ngiruka yaji jali yabimba Kudwanyi nangangi Junakanyi.
MAT 12:40 Nanda wankalanyi Juna, nyuli yirrba wayka wabudarri jali nanda waya karrinja burrandi kanjana. Yirrba nyuli wabudarri, ngala mikukiyanyi ngurrulijba. Bilyinybayi nanda nganinyi walkurranyi kakuwanyi, ngala mikukiyanyi kurdanba Juna kakuwanyi. Jungku nyuli kalawunyi muwana wankan. Kujarraka barndayka nyuli jungku muwana, baki baku barri balunbayi nanda kaku nanankanyi nganiyngkanyi. Manjijbayi nanda Juna bijalina wabudana, baki yuku nyuli jungku. Miku nyuliyanyi ngurrulijba. Mardarda nyuli jungku kalawunyi kakuna muwana kujarraka barndayka. Baki nani barri ngayu marda Buwanya Bukambijuyngka. Nani barri janganarri najba jungunkurri kalawunyi jambana kujarraka barndayka. Miku ngayiyi yabimba narringi mili ngiruka yaji. Ngawamba nanda ngiruka yaji janarri najba.
MAT 12:41 Manjijbayi nanda wankalanyi Juna Kudwanyi. Manjijba nyuli Juna karri barrawuyabarrawuyarri niji Niniba. Manjijba nyuli Juna karri milidimbiji yalunya nangangi Kudkanyi. Nanamuku jali yalu jungku nanaba Niniba, yali jungku balki nangangi Kudkanyi. Kudanyu yali jungku balki, ngala milidimbayi yalunya Junawanyi, baki yali ngindu muwa yalunginkanyi balkinyi yajinyi. Ngindu yali muwa, baki yangkalamba yalungki nangandurri Kudyurri, baki jungku yali kunyba nangangi. Ngayu milidimbaka narrinya ngirukanyi jangkurranyi, ngala miku narrimi ngindu muwa narringkanyi balkinyi yajinyi. Miku narringkimi yangkalamba nangandurri Kudyurri. Baku barri jalija nyulu karrinjarrijba narrinya walu nangandu Kudwanyi, nanamanji barri nanamuku jali wabula yalu jungku Niniba, jali yalungki yangkalamba nangandurri Kudyurri, jayalu ngirrwa narringi. Nayi jayalu yanyba, ‘Nurrungki yangkalamba nangandurri Kudyurri, jali milidimba nurrunya Junawanyi, ngala miku narringkiyanyi yangkalamba nangandurri Kudyurri jali milidimba narrinya Jisuswanyi. Ngala nanda Jisus, nyulu mili walkurra nangangi Junakanyi. Nyulu mili walkurra nangangi, ngala miku narriyanyi kuyu nangangi jangkurr.’ Nani barri jayalu ngirrwa narringi nanamanji barri.
MAT 12:42 Baki yingka wankalanyi jibarri, nyuli mambuka nanganginkanyi yajinyi juju kula niji Jiba. Nyuli jilajba kulani nanda jibarri mambuka yidambiji yingka mambuka niji Sulumun. Nyuli mambuka yalungi Jumukuyngka nanda Sulumun. Nyuli kunyba kulaji. Wajbayi kunyba kulaji Kudwanyi. Baki badajbayi nanda jibarri nangandurri mankunki nangangi jangkurr nangandu. Janyulu nyulu marda ngirrwa narringi jalija nyulu karrinjarrijba narrinya walu nangandu Kudwanyi. Janyulu yanyba narringi, ‘Ngayi kuyu nanda jangkurr nangangi Sulumunkanyi, kunybangangi nangangi kulaji. Ngala nanda Jisus nyulu mili kunyba kulaji nangangi Sulumunkanyi, ngala miku narriyanyi kuyu nangangi jangkurr.’ Nani barri janyulu nyulu marda ngirrwa narringi nanamanji baku barri. Barriwa.”
MAT 12:43 Mili yanybayi Jisus yalungi. Muningka nyuli yanyba, “Jala wuwarr barlba nanganbunanyi mankanyinanyi, baki nyulu jilajbangka lukuluku. Kujbangka yingkanyi mankankanyi nyulu ngankiykanyi. Jaliyi nyulu miku wakaramba yingka mankanyi, baki nangka yanyba, ‘Barriwa jangayu wijba nanankurri mankanyiyurri jali ngayu yingijba.’ Baki nyulu wijbangka nanankurri mankanyiyurri. Nyulu najbangka mikuyaji yingkanyi, mikuyaji kunybanyi wuwarranyi nanaba mankanyina. Mikuyaji kunybanyi wuwarranyi nanaba, ngala likalika nanda mankanyi, kunyba jungunkanyi. Nyulu mili barlbangka, baki wudumbaka kaja mili wuwarrmuku. Nyulu wudumbaka 7 mili wuwarr, baki yalu wijbangka nanankurri mankanyiyurri. Yalu jungkuka nangandu mankanyina yurrngumba barri. Baki nanda nganinyi nyulu jungkuka balki. Kudanyu barri nyulu jungkuka balki, jungkukangangi nangandu mankanyina nanamuku wuwarrmuku, jala waki nangangi Sayidinkanyi. Narri milidimbawarr jala manku ngaki jangkurr, narri barrinani nanda nganinyi wuwarryudi. Jalannga jali narri manku nanda duja jangkurr nangangi Kudkanyi, baki narri ngindu muwa narringinkanyi balkinyi yajinyi. Ngindu narri muwa, ngala miku narringkiyanyi yangkalamba nangandurri Kudyurri, baki mikukiyanyi ngankijba Kunyba Ngarndu Kudkanyi narrindu mankanyina. Muningka narri ngindu muwa narringinkanyi balkinyi yajinyi, baki baku barri mili narri jungku balki nangangi. Kudanyu narri jungku balki nangangi barrinani nanda nganinyi, kudanyu nyuli jungku balki jali kajamuku wuwarr nangandu mankanyina.” Nani barri yanyba Jisus yalungi milidimbawarrayngka. Barriwa.
MAT 12:46 Ngala yuwajiwa yanybayi Jisus yalungi, baki wanbiya yali ngardanganja nangangi Jisuskanyi marda bababanyamba nyulu yalunya. Karrinja yali danbina barndana. Miku yaliyanyi bunundujba Jisusyurri muramukungangi. Manjijba yali jangkurr nangandurri Jisusyurri, nyulu jilaykanyi yalundurri, yalu yanybikanyi nangangi.
MAT 12:47 Jungkuyi muramuku nangandu Jisusnyina, baki yali yanyba nangangi, “Nanda ngardanganja nganyi, marda bababanyamba ninji yalunya, danbina yalu jungku. Yalu kujbangka nganyi, ninji jilajbaja yalundurri.”
MAT 12:48 Ngala yinybayi yaji Jisuswanyi marnina. Yinyba nyuli yalunya nanganginmuku kandimuku, baki jananganja nyuli, “Najba janarri yalunya, nanginmuku ngakinmuku kandimuku. Yalu barrinani ngaki ngardanganja, barrinani ngaki bababanyamba ngayu yalunya.
MAT 12:50 Nanda jala durrijbangka nangangi jangkurr ngakinkanyi Buwakaya Kingkarri, nanda jala yabimbaka nanda yaji jala nyulu nulijba nangangi yabimbikanyi, nyulu barrinani nanda bababanyamba ngayu nangangi. Nyulu barrinani ngaki ngardanganja.” Nani barri jananganjayi yalunya Jisuswanyi. Barriwa.
MAT 13:1 Kamu barri yingijbayi nanda barrawu Jisuswanyi, baki barlba nyuli kula kanjarri. Kajamuku yali jilajba nangandurri baki jungkurrijba nangki Jisus, milidimbiji yalunya. Kudukudu yali jilajba nangandurri, mankunki nangangi jangkurr, walkurra muramuku. Bukamba yalungki ngirringirrimba, baki jululumba yalungki. Nanankardi barri nyuli ngankijba muwardana baki jungku nyuli wilina kanjana. Baki milidimba nyuli yalunya muramuku, ngala nyuli jungku muwardana, ngala yali jungku bijalina.
MAT 13:3 Milidimba nyuli yalunya kajanyi jangkurranyi. Muningka nyuli yanyba yalungi, “Manku nganarri. Wudumbayi kudukudu yami nganinyiwanyi barrinani daburrul yami. Janyba nyuli nanda yami jambarri, jardiykunumbikanyi.
MAT 13:4 Jawuda yami yirrbayi yubalina, baki wanbiyayi julakimuku. Jarrba yali nanda mama yubalina julakimukunyi. Barriwa.
MAT 13:5 Marda jawuda yami yirrbayi didirrina yajina. Walajbayi daburrul karnba, ngala bijal jamba didirrina yajina.
MAT 13:6 Mikuyaji landurranyi jardijbayi didirrina yajina, baki janyba nangki. Yajbayi nanda karnba ngardarawanyi, baki janyba nangki. Janyba nangki, mikuyajingangi landurranyi. Barriwa.
MAT 13:7 Marda jawuda yami yirrbayi yajina jali jardijba nyilanyila. Walajbayi nanda yami wuju, marda walajbayi nanda nyilanyila, baki munybayi yaji. Jardijbayi juju kingkarri nanda nyilanyila, ngala ngawamba madilijbayi nanda daburrul yami. Mikuwali jardijba nani kingkarri. Munybayi yingkawanyi. Mikuyaji yaminyi nangandu daburrulina. Barriwa.
MAT 13:8 Marda mili jawuda yami yirrbayi kunybana jambana. Nanda karnba jardijbayi walkurra. Kudukudu yami nangandu jardijbayi. Yingka karnba yami nangangi kaja bijal, yingka karnba yami nangangi kaja, baki yingka karnba yami nangangi kajamirra.” Barriwa.
MAT 13:9 Yanybayi Jisus yalungi, “Jaliyi narri nulijba jingkiykanyi ngaki jangkurr, baki manku narri kudanyu.” Barriwa.
MAT 13:10 Kamu barri yali jilajba nangandurri Jisusyurri nanganginmuku kandimuku. Yilikajba yali Jisus, “Wanyingkanyi ninji muningka yanyba jangkurr yalungi. Wanyingkanyi ninji karu yalunyi nanankanyi jangkurranyi yaminyi.” Nani yali yilikajba Jisus.
MAT 13:11 Jananganjayi yalunya Jisuswanyi, “Narri jingkijbangka Kud, nyulu marukangka muwa narringi, nyulu lalanbaka narrinya yurrngumba barri. Ngala yingkamukunyi miku yalimi jingkijba Kud, nyulu lalanbawarr. Baki nanankardi muningka ngayu yanyba yalungi, ngayu milidimbiji yalunya.
MAT 13:12 Jaliyi nganinyiwanyi bijal jingkijba ngana, baki jangayu mili milidimba ngaki. Jaliyi nyulu kudanyu manku ngaki jangkurr, baki nyulu mili jingkijba yaji ngaki. Ngala jaliyi nyulu miku kudanyu manku ngaki jangkurr, baki nyulu mamanumba nanda ngaki jangkurr.
MAT 13:13 Muningka ngayu yanybaka jangkurr yalungi, mikungangi yalimi jingkijba Kud. Miku yalimi jingkijba nanda jala ngayu milidimba yalunya nangangi. Muningka yalu manku ngaki jangkurr, ngala miku yalimi jingkijba ngaki jangkurr.
MAT 13:14 Nanda wankalanyi Yayisaya, nyuli yarrijba jangkurr najana Kudkanyi. Duja nangangi jangkurr. Nanganginyi jangkurrwanyi karungka ngambalanya yalungi jala muningka yalu manku ngaki jangkurr. Nayi nyuli yarrijba, ‘Jungku narri kuwardayudi, ngala miku narrimi manku yaji. Jungku narri yamiyudi ngala miku narrimi najba yaji.
MAT 13:15 Narri Jumuku, narri jungku jardibirri muwa. Yurlwa narri ngakinkanyi jangkurranyi. Nani narringka makaba narringi kuwarda, baki miku narriyi manku ngaki jangkurr. Miku narriyi najba nanda ngiruka yaji jala ngayu yabimba. Jungku narri nani, baki nanankardi miku nganarrimi jingkijba. Ngala jaliyi narri jingkijba ngaki yaji, jaliyi narri kuyu ngaki jangkurr, baki jangayu manjamanjamba narringi balki yaji. Jangayu janyba narringi balki yaji narrinbunanyi kurdulunanyi.’ Nani barri nyuli yarrijba jangkurr najana Kudkanyi, nanangini wankalawanyi. Yarrijba nyuli nanda jangkurr jali karu Kudwanyi.
MAT 13:16 Ngala narri barri, ngakinmuku kandimuku, marda narrimi mirnarrijba muwa, najbangangi narri nanda ngiruka yaji jala ngayu yabimba, baki manku narri ngaki jangkurr. Baki nganarri jingkijba. Nganarri jingkijba nanankanyi jala ngayu yabimba, baki narri kuyu ngaki jangkurr.
MAT 13:17 Nayinda jangkurr jala ngayu karu narrinya, duja nayinda jangkurr. Nanamuku jali manjijba Kudwanyi yanybikanyi nangangi jangkurr, baki kajamuku wankalamuku jali kuyu nangangi jangkurr Kudkanyi, nulijba yali naykanyi ngana, baki mankunkanyi ngaki jangkurr. Ngala miku ngana yaliyanyi najba, miku yaliyanyi manku marda ngaki jangkurr. Janyba yalungki waluwa ngaki. Barriwa.”
MAT 13:18 Mili yanybayi Jisus yalungi kandimukuyngka, “Manku nganarri. Jangayu mili karu narrinya nanankanyi yaminyi jali muningka ngayu yanyba narringi barrin. Nanda daburrul yami nanda barrinani jangkurr nangangi Kudkanyi.
MAT 13:19 Jawuda yami yirrbayi yubalina. Baki nani barri, jawuda yalu manku nangangi jangkurr Kudkanyi, ngala yurlwa yalu nanganginkanyi jangkurranyi. Nanda jala yalu yurlwa, yalu barrinani nanda yubal. Nanda yubal jardibirri, baki mikuwali jardijba mama nanaba. Jarrbayi yami yubalina julakimukunyi. Baki nani barri, yalu jardibirri kurdulu. Nanda jangkurr jala yalu manku, jawurrbangka nanda jangkurr yalunbunanyi Sayidinwanyi. Barriwa.
MAT 13:20 Jawuda yami yirrbayi didirrina yajina. Baki nani barri, jawudawanyi yalu kuyu nangangi jangkurr Kudkanyi, baki yalu mirnarrijba muwa. Ngala yingkamuku yalu ngirrwa yalungi, kuyungangi yali nanda jangkurr. Baki miku yalimi mili nulijba nanankanyi jangkurranyi Kudkanyi. Yalu yingkijbangka nanda jangkurr. Yalu jala yingkijbangka nanda jangkurr nangangi Kudkanyi, yalu barrinani nanda didirr yaji. Nanda yami jali walajba didirrina yajina, mikuyaji landurranyi. Yuku wankijbayi bijal, ngala yajbayi yaji ngardarawanyi, baki janyba nangki. Nanda karnba wankijba bijal didirrina yajina. Nanda didirr yaji nanda barrinani yalu jala bijal kuyu nangangi jangkurr Kudkanyi. Ngala jala yingka ngirrwa yalungi, baki miku yalimi mili nulijba jangkurranyi Kudkanyi. Yingijba yali nangangi jangkurr. Barriwa.
MAT 13:22 Jawuda yami yirrbayi yajina jali jardijba nyilanyila. Baki nani barri, jawuda yalu mankuka jangkurr nangangi Kudkanyi. Bijal yalu kuyungka nanda jangkurr, ngala kudanyu yalu nulijbangka yingkanyi yajinyi. Nulijbangka yalu kajanyi dungalanyi marda yajinyi. Yalu kuliwijbangka yajinyi kudanyu barri. Yalu jala kuliwijba yajinyi, yalu barrinani nanda jamba jala jardijba nyilanyila. Nanda daburrul yami jardijbayi mardil, mikuyaji yaminyi. Nani barri yalu jala kuliwijbangka yajinyi, ngala miku yalimi nulijba nanganginkanyi jangkurranyi Kudkanyi. Jardijba yalu mardil kurdulu nangangi Kudkanyi. Barriwa.
MAT 13:23 Jawuda yami yirrbayi kunybana jambana. Baki nani barri, jawudawanyi yalu mankuka nangangi jangkurr Kudkanyi. Yalu kuyungka nanda jangkurr, baki yalunya kunymambaka yingkamuku yalu mirnarrijkanyi muwa. Yalu jala kunymambaka yingkamuku, yalu barrinani nanda kunyba jamba. Nanda karnba jali jardijba kunybana jambana, yingka karnba yami nangangi kaja bijal, yingka karnba yami nangangi kaja, baki yingka karnba yami nangangi kajamirra. Nani barri yalu jala kunymamba yingkamuku mirnarrijkanyi muwa. Yingkamuku yalu jungkuka bijal kunyba, yingkamuku yalu jungkuka kunyba, baki yingkamuku yalu jungkuka kunybamirra. Barriwa.”
MAT 13:24 Mili barri yanybayi Jisus yalungi. Muningka nyuli yanyba yalungi, “Jangayu karu narrinya nanankanyi jangkurranyi, jala lalanba narrinya Kudwanyi. Janybayi daburrul yami jambana nganinyiwanyi. Janyba nyuli daburrul yami jardiykunumbikanyi mili yami jarrkanyi.
MAT 13:25 Kamu barri mungana jali kuluka nanda nganinyi baki bukambiju jali nangandu, baki badajbayi yingka. Ngirra nyuli nanda jali janyba daburrul yami. Nyuliyanyi yabimba balki yaji nangangi. Binanyba nangki mungana, baki yarrijba nyuli yinini yami nananyinawa jambana. Nanda yingka yami miku yaliyi jarrba. Yarrijba nyuli yami jambana, baki binanyba nangki nanganginkurri barndarri.
MAT 13:26 Baku barri walajbayi nanda daburrul karnba, baki jardijbayi walkurra yamiyudi. Baki jardijbayi nanda yingka marda nangandu.
MAT 13:27 Badajba yali wakiwarrmuku mambukanyi. Bardajba yali nangandurri, baki yanyba yali, ‘Mambuka. Nanda daburrul yami jali ninji janyba jambana, kunyba nanda yami, mikuyaji yingkanyi yaminyi nangandu. Ngala yanka barri jardijbangka yingka karnba nangandu. Yanka barri.’
MAT 13:28 Jananganjayi yalunya mambukawanyi, ‘Yi. Janyba ngayi ngawamba kunyba daburrul yami jambana, ngala yingkawanyi jala ngana ngirra, yiningki nyuli janyba yinini yami jambana.’ Baki ngajaka yali nanda mambuka, ‘Janurru kuna dulaba nanda yingka karnba.’
MAT 13:29 Ngala nyuli jananganja yalunya, ‘Miku. Miku narriyi dulaba. Jilijbawa yaji. Jaliyi narri dulaba nanijba nanda yingka karnba, baki yiningki janarri dulaba kudiya daburrul karnba marda. Jardijbangka yalu malumba jambana. Yiningki walajbawali daburrul karnba, jaliyi narri dulaba nanda yingka nanijba.
MAT 13:30 Ngala munyajba janarri daburrul baki nanda yingka karnba. Mili janyulu jardijba barri. Jayalu jardijba malumba nanankurri jalija kunyunyu daburrul yami. Nanamanji barri jangayu karu ngakinmuku wakiwarrmuku, waluku jayalu dulaba nanda yingka karnba, baki nanamunanyi jayalu bakarrijba. Baki yuku barri kamu jayalu wudumba nanda daburrul yami. Jayalu wudumba nanda yami, baki jayalu dalburrijba ngakinyina barrawuna yarriykanyi mama.’ Nani barri jananganjayi yalunya mambukawanyi. Barriwa.”
MAT 13:31 Mili barri nyuli milidimba yalunya Jisuswanyi. “Jangayu mili karu narrinya nanankanyi jangkurranyi jala lalanba narrinya Kudwanyi. Mili barri jangayu muningka yanyba narringi. Nanda nukunu yami, yuku nanda bayakarda yami. Janybaka yami jambana nganinyiwanyi. Ngala baku barri walajbangka wuju nukunu. Jardijbangka juju kingkarri, walkurramirra nanda nukunu. Yabimba yalu jabaka nukununa kingkarrinyina bangani julakimukunyi. Nani barri jardijbangka walkurra nanda bayakarda yami. Barriwa.” Nani muningka yanybayi Jisus yalungi. Nanda nukunu yami, jali jardijba, waluku nanda kurdalirri kurnda, ngala baku barri janyulu jardijba wunanybala. Nanda barrinani nayi. Waluku barri ngawamba kujajarra yali kuyu nanda jangkurr nangangi Jisus Krayiskanyi, yali durrijba nangangi yuwa, ngala baku barri mili yali kuyu nangangi jangkurr, baki mili, baki mili yurrngumba barri. Baku yali jungku kajamuku jali kuyu nangangi jangkurr, wirdikudukudumukunyi. Barriwa.
MAT 13:33 Mili barri nyuli milidimba yalunya nangangi Kudkanyi. “Jangayu mili karu narrinya nanankanyi jangkurranyi, jala lalanba narrinya Kudwanyi. Mili barri jangayu muningka yanyba narringi. Jala yabimbaka damba jibarriwanyi, baki nyulu wudumbaka kaja kandirri baki bijal bululu. Jidimbaka yaji jibarriwanyi, jirdi wabudanyi. Kamu barri bululujbangka nanda damba, walkurramba nangka. Nani barri walkurrambaka nanda damba bijalwanyi bululuwanyi. Barriwa.” Nani muningka yanybayi Jisus yalungi. Nanda kandirri jala bululu yaji kalawunyi, waluku barri nanda bayakarda yaji, ngala kamu barri walkurramba nangka nanda damba. Nanda barrinani nayi. Jalannga jala nganinyi kuyungka jangkurr nangangi Kudkanyi, baki ngawamba bijal nyulu jingkijbangka Kud. Ngala baku barri janyulu jingkijba mili yaji nangangi Kudkanyi, baki janyulu jungku mili ngiruka nangangi. Janyulu mili jingkijba Kud yurrngumba barri, baki janyulu jungku mili ngiruka, baki mili ngiruka nangangi yurrngumba barri. Barriwa.
MAT 13:34 Nanamanji barri mikukiyanyi yanyba Jisus yurlurrmba jangkurr yalungi muramukuyngka. Yurrngumba nyuli muningka yanyba jankurr yalungi milidimbikanyi yalunya.
MAT 13:35 Nanda wankalanyi barri yanyba nyulu jangkurr nangangi Kudkanyi, baki yarrijba nyuli nanda jangkurr najana Kudkanyi. Nayi barri nanda jangkurr. “Jalija ngayu milidimba yalunya, baki muningka jangayu yanyba yalungi. Miku jangayu yanyba yurlurrmba jangkurr. Muningka jangayu yanyba yalungi. Jangayu milidimba yalunya buyingkiyngkanyi yajinyi, jala miku yaliyanyi jingkijba yingkamukunyi jali yalu jungku wabula.” Nani barri yarrijbayi wankalawanyi. Duja nangangi jangkurr. Muningka barri yanybayi Jisus yalungi. Barriwa.
MAT 13:36 Kamu barri barlbayi Jisus yalunbunanyi muramukunanyi, baki ngankijba nyuli barrawuna. Jilajba yali kandimuku Jisuskanyi nangandurri, baki yanyba yali, “Miku nurrimi jingkijba nanda jangkurr jali ninji muningka yanyba barrin. Miku nurrimi jingkijba nanda jangkurr nganyi daburrulanyi marda nanankanyi yingkanyi karnbanyi. Karukiyi nurrunya yurrngumba nanankanyi jangkurranyi, ngambala jingkiykanyi.”
MAT 13:37 Jananganjayi yalunya Jisuswanyi, “Jangayu karu narrinya. Nanda nganinyi jali janyba daburrul yami jambana, nyulu barrinani ngayu Buwanya Bukambijuyngka.
MAT 13:38 Baki nanda jamba jala jardijba karnba nanaba, nanda jamba barrinani bukamba yaji wandijiyana. Nanda kunyba daburrul yami, nanda barrinani nganinyimuku baki jibarrimuku jala yalu durrijba nangangi jangkurr Kudkanyi. Baki nanda balki yami jali janyba yingkawanyi, nanda barrinani nanamuku jala durrijba nangangi jangkurr Sayidinkanyi.
MAT 13:39 Nanda nganinyi jali nangka binanyba, jali janyba nanda balki yami, nyulu barrinani nanda mambuka wuwarranyi, Sayidin. Nanamanji barri jali yalu karlba nanda karnba kunyunyuyudi yamiyudi, nanda barrinani nanamanji jalija bukamba nayinda yaji Kudwanyi. Baki nanamuku wakiwarrmuku jali yalu karlba nanda karnba, yalu barrinani Yanjilmuku jala waki nangangi Kudkanyi.
MAT 13:40 Wudumba yali nanda balki karnba wakiwarrmukunyi, baki bakarrijba yali janguna. Baki nani barri baku barri jalija bukamba nayinda yaji Kudwanyi.
MAT 13:41 Nanamanji barri ngayu Buwanya Bukambijuyngka, jangayu manjijba ngakinmuku Yanjilmuku. Jayalu badajba yalundurri wudumbiji bukambiju yalunya jala yalu jungku balki nangangi Kudkanyi. Nanamuku jala yalu yabimba balki yaji, baki nanamuku jala yalunjalu yabimba yingkamuku yabimbikanyi balki yaji, jayalunjalu wudumba bukambiju wandijiyana Yanjilmukunyi.
MAT 13:42 Jayalunjalu marrimba, baki jayalunya janyba walkurrayngkurri jangurri, Yilyurri. Nanaba barri jayalu ngindu muwa nanankanyi balkinyi yajinyi jali yalu yabimba. Kudanyu jayalu balkijba muwa, baki muningka jayalungka waka kudanyu barri.
MAT 13:43 Ngala nanamuku jali yalu jungku yurlurrmba nangangi Kudkanyi, jali durrijba nangangi jangkurr, jayalu jungku kingkarri lalijina. Jayalu jungku kingkarri ngalindu, Kudnyina. Kudanyu jayalu mirnarrijba muwa, jungkungangi jayalu kingkarri lalijina yurrngumba barri. Narri jala mankuka nayi jangkurr, marda narringkimi mankumanku, yanka narri jungku nangangi Kudkanyi. Barriwa.”
MAT 13:44 “Mili barri jangayu karu narrinya nangangi Kudkanyi, jala lalanba narrinya Kudwanyi. Mili barri jangayu muningka yanyba narringi. Kurrijbayi jamba nganinyiwanyi, baki wakaramba nyuli kaja dungala kalawuyngkurru. Wakaramba nyuli nanda kaja dungala kalawuyngkurru jambana, ngala miku nanda nangangi jamba, ngala nanda yingkanyi nganiyngkanyi nangangi jamba. Baki mankumanku nangki nanda nganinyi jali wakaramba nanda kaja dungala jambana. Mankumanku nangki, ‘Jangayu wudumba nanda jamba dungalana. Jalija nanda ngaki jamba, baki nanda kaja dungala jambana, nanda ngaki dungala marda.’ Barriwa. Mili nyuli makaba nanda dungala jambana, baki wijba nyuli nanganginkurri barndarri. Wudumba nyuli bukamba nangangi yaji, baki wajbayi yingka nanankanyi yajinyi wudumbikanyi dungala. Kuyu nyuli nanda dungala nangandurri jala nanda nangangi jamba dungalayudi. Wajba nyuli nanda yingka dungalanyi, baki wudumba nyuli nanda jamba nanganginmirra. Baki nanda kaja dungala jambana, nanda nanganginmirra dungala marda, jungkukangangi nanganginyina jambana. Barriwa.”
MAT 13:45 “Mili barri jangayu karu narrinya nangangi Kudkanyi jala lalanba narrinya. Muningka jangayu yanyba narringi. Najbayi kunyba yarrama nganinyiwanyi. Kunybamirra nanda yarrama, ngala nanda yingkanyi, nanda yarrama nangangi. Ngala nulijba nyuli nanankanyi kunybanyi yarramanyi, ngala mikuyaji dungalanyi nangandu wudumbikanyi nanda yarrama. Ngala wudumbayi bukamba nangangi yaji nganinyiwanyi. Wudumbayi nangangi wuni baki ngubungu, marda jalyu junu, baki wajbayi yingka nanankanyi yajinyi, nyulu wudumbikanyi dungala. Nani barri nyuli wudumba kaja dungala, baki wijba nyuli nangandurri, mambukarri nanankanyi kunybanyi yarramanyi. Wajba nyuli mambuka dungalanyi, baki wudumba nyuli nanda yarrama. Nanda nanganginmirra yarrama, baki kudanyu barri nyuli mirnarrijba muwa. Barriwa.” Nanda jangkurr nganiyngkanyi jali wakaramba kaja dungala jambana, jali nulijba nanankanyi dungalanyi nanganginkanyimirra, baki nanda jangkurr nganiyngkanyi jali wakaramba kunyba yarrama, jali nulijba yarramanyi nanganginkanyimirra, yanyba bula nanankujarra jangkurrwuya nanamannga. Marda narrimi nulijba nangangi Kudkanyi, nyulu lalanbikanyi narrinya. Marda narrimi kudanyu nulijba nangangi nani. Mardakimi nayinda jirrinyi narringi, nyulu lalanbikanyi narrinya Kudwanyi. Mardakimi miku yingka yaji jirrinyi narringi. Marda narrimi kudanyu nulijba nangangi Kudkanyi, nyulu lalanbikanyi narrinya.”
MAT 13:47 Mili barri yanybayi Jisus yalungi. “Mili jangayu karu narrinya nangangi Kudkanyi, jala lalanba narrinya Kudwanyi. Mili barri jangayu muningka yanyba narringi. Kudiyawanyi nganinyiwanyi yalili wajarrijba kaku, bakili wajba yingka kakunyi wudumbikanyi yalu dungala. Barlba yali kanjana muwardana, baki janyba yali badija kanjana. Walkurra nanda badija, baki wakaramba yali kaja kaku, yinini yinini kaku.
MAT 13:48 Jali walbinyi nanda badija, baki wililijba yali badija waykalinya wabudananyi. Wudumba yali kaku badijananyi. Kudiya kaku jali kunyba jarrkanyi, yali yarrijba bindawarrana, ngala kudiya kaku jali balki jarrkanyi, muningka yali janyba wabudarri.
MAT 13:49 Nanda jangkurr wudumbikanyi kaku, nanda barrinani nanamanji baku barri jalija bukamba yaji Kudwanyi. Nanda kaku, yinini yinini kaku, yalu jungku barrinani nganinyimuku baki jibarrimuku. Kudiya kaku kunyba jarrkanyi, ngala kudiya balki jarrkanyi. Baki nani barri, kudiya yalu jungku yurlurrmba nangangi Kudkanyi, ngala kudiya yalu jungku balki nangangi Kudkanyi. Nanamuku wajarrijbawarrmuku, yalu barrinani Yanjilmuku. Nanamanji barri jalija bukamba yaji Kudwanyi, baki janyulu manjijba yalunya Yanjilmuku, baki jayalunjalu wudumba jala yalu jungku balki nangangi Kudkanyi. Jayalunjalu dulaba yalunbunanyi kunybamukunanyi,
MAT 13:50 baki janybaja walkurrayngkurri jangurri Yilyurri. Nanaba jayalu ngindu muwa nanankanyi balkinyi yajinyi jali yalu yabimba. Kudanyu jayalu balkijba muwa, marda jayalungka waka kudanyu. Barriwa.” Nani barri milidimbayi yalunya Jisuswanyi. Nani nyuli milidimba yalunya nanganginmuku kandimuku.
MAT 13:51 Ngajaka nyuli yalunya, “Jingkijba kuna narri nanda jali ngayu karu narrinya. Jingkijba kuna narri ngaki jangkurr.” Jananganja yali, “Yi. Nurru jingkijbangka nayinda nganyi jangkurr.”
MAT 13:52 Baki yanybayi Jisus yalungi, “Jaliyi narri jingkijba ngaki jangkurr nangangi Kudkanyi, nyulu lalanbikanyi narrinya, jaliyi narri kuyu ngaki jangkurr nangangi, baki marda narrimi milidimba yalunya yingkamuku nanankanyi nanamannga jangkurranyi. Marda narrimi mankuwa nanda jangkurr najana Kudkanyi, nanda jangkurr jali yarrijba wankalamukunyi. Marda narrimi mankuwa nanankanyi wankalanyi jangkurranyi Kudkanyi, baki milidimba yalunya ngakinkanyi buyingkiyngkanyi jangkurranyi marda. Barriwa.” Nani barri muningka yanybayi Jisus yinini yinini jangkurr yalungi milidimbikanyi yalunya.
MAT 13:53 Jali nyulu yanyba Jisus bukamba nanda jangkurr yalungi, baki barlba yali nanamunanyi yajinanyi, Jisus marda nanganginmuku kandimuku.
MAT 13:54 Barlba yali bayungu baki wanbiya yali nanganginyina yajina Jisuskanyi. Ngankijbayi Jisus jurjina, baki nyuli milidimba yalunya nanganginmuku mungkijimuku. Jali yalu manku nangangi jangkurr Jisuskanyi, baki manmala yali. Manmala yali, baki yanyba yalungki, “Yanka nyuli jingkijba nanda jangkurr. Yanka nyuli jingkijba milidimbikanyi marda kunymambikanyi yalunya.
MAT 13:55 Miku nyulu mambuka. Muningka nyulu jungkuka barrinani ngambala. Miku nyulimi mambuka milidimbikanyi yaji. Muningka nyulu jandanyi nangangi jalili nyulu yabimba barrawu wabula. Nyulu kulunganja nangangi Marikanyi. Baki kaja bababanyamba nyulu yalunya nayiba, Jayims baki Jusib, Sayimin baki Judas.
MAT 13:56 Marda jibarrimuku bababanyamba nyulu yalunya, yalu jungkuka nanganginyina yajina marda. Miku nyulimi mambuka, ngala yanka nyuli jingkijba milidimbikanyi ngambalanya.”
MAT 13:57 Nani barri yalungki yanyba. Miku yaliyanyi kuyu nangangi jangkurr mungkijimukunyi nanganginyina yajina. Yurlwa yali nanganginkanyi jangkurranyi. Yanybayi Jisus yalungi, “Nanda jala yanybaka jangkurr nangangi Kudkanyi, nyulu jilalajbangka lukuluku. Nyulu yanymimbaka jangkurr nanaba yajina yalungi Kudkanyi, baki yalu kuyungka nanda nangangi jangkurr. Ngala jala nyulu jungkuka nanganginyina yajina, jala nyulu yanybaka jangkurr nanganginmukuyngka mungkijimukuyngka, baki miku yalimi kuyu nangangi jangkurr. Yalu yurlwangka nangangi nanganginkanyi jangkurranyi. Baki nani barri narri marda, narri ngakinmuku mungkijimuku, ngakinmuku bababanyamba ngayu narrinya, ngala miku narrimi kuyu ngaki jangkurr. Nganarri jingkijba yurrngumba wabulinyi, ngala narri yurlwangka ngaki ngakinkanyi jangkurranyi. Barriwa.”
MAT 13:58 Baki miku nyuliyanyi yabimba kaja ngiruka yaji nanaba nanganginyina yajina. Ngawamba kujajarra nyuli kunymamba yalunya, mikungangi yaliyanyi kuyu nangangi jangkurr.
MAT 14:1 Nanamanji barri, nanda nganinyi, niji Yirud, nyuli walkurra mambuka Kubaminkanyi nanankanyi yajinyi Kalilikanyi. Manku nyuli yalunya yanybikurri nangangi Jisuskanyi, nanankanyi ngirukanyi yajinyi jali nyulu yabimba, baki ngamungku nyulu Jisus nanamannga Jun Ngurranbawarr. Yanyba nyuli yalungi nanganginkanyi wakiwarrayngka, “Nanda Jun Ngurranbawarr, jali ngayu kurdanba, jali yingkawanyi daya janki ngaki, nyulu mili wankijbayi. Mili nyulu wanka jungkuka nanijba. Ngawamba nanda Jun, ngawamba nyulu ngiruka kunymambikanyi yalunya mankanyi. Miku yingka ngiruka kunymambikanyi yalunya. Ngawamba nyulu Jun Ngurranbawarr.” Nani barri ngamungku nyulu Jisus nanamannga Jun Ngurranbawarr.
MAT 14:3 Wabula barri nanangini mambukawanyi Yirudwanyi, nyuli jarimba nanda jibarri, jali yingkanyi nangangi maninganja, jali maninganja nanganginkanyi bababanyamba nyulu Yirudkanyi, niji Bilib. Jarimba nyuli nanda jibarri, baki kuyuyi nangangi barri maninganja. Nanda jibarri niji nangangi Yirudayis. Nani barri yabimbayi balki yaji Yirudwanyi. Jungku nyuli balkina nananyina yuwana Kudkanyi. Nani barri nyuli jungku balki nanda Yirud. Baki nanankardi barri ngirrwayi nangangi Jun Ngurrunbawarr. Ngirrwa nyuli nangangi nanankanyi balkinyi yajinyi jali nyulu yabimba. Nanankardi barri nyuli manjijba nanganginmuku ngarrkadabawarrmuku Yirudwanyi. Nyuli manjijba yalunya wudumbiji Jun Ngurrunbawarr. Marrimba yali Jun, baki yarrijba yali brisinyina kiybakiybayudi. Nani barri yabimbayi yaji Yirudwanyi nangangi Junkanyi, karungangi Yirud Junwanyi, nyulu Yirud jungkuyi balki nangangi Kudkanyi.
MAT 14:5 Nulijba nyuli kurdanbikanyi Jun Yirudwanyi, ngala nyuli marrala. Marrala nyuli yalungi Jumukuyngka. Jingkijba yali Jun, nyuli yanyba jangkurr nangangi Kudkanyi. Jalimi nyulu kurdanba Jun, baki jayalu ngarrangarra muwa nangangi Yirudkanyi. Jayalu ngarrangarra muwa nangangi, yanybayingangi Jun jangkurr nangangi Kudkanyi. Ngala yarrijba nyuli Jun brisinyina, Yirudwanyi.
MAT 14:6 Nanda jibarri Yirudayis, kulunganja nangangi wurrumbarra. Nyuli kunyba kajurrawarr, nanda wurrumbarra. Kudiyamukunyi mambukamukunyi yali yidamba Yirud. Jarrba yali mama nangandu, ngaraba yali yaji marda. Yabimba yali jarrkanyi yaji. Ngala yalungki wardamba, baki manjijba yingka Yirudwanyi wudumbiji nanda wurrumbarra. Badajba nyuli baki kajurrayi walu yalundu.
MAT 14:7 Kudanyu nyulu kajurra yalungi, Yirudkanyi marda mambukamukuyngka. Mirnarrijba yali muwa nangangi. Yanybayi Yirud nangangi wurrumbarranyi, “Wanyingkanyi ninji nulijba. Janinga wajba yajinyi. Janinga wajba nanankanyi jala ninji nulijba. Duja ngayu yanyba.”
MAT 14:8 Jilajbayi wurrumbarra danbiyurri, baki karuyi nangangi ngardanganja nanankanyi jangkurranyi waykanyi yajinyi Yirudwanyi. Yilikajbayi nangangi ngardanja, “Wanyingkanyi jangayu ngajaka. Wanyingkanyi.” Jananganjayi ngardanganjawanyi, “Yilikajbakiyi nanganginkanyi kulajinyi Junkanyi Ngurrunbawarrayngka. Yilikajbakiyi nanganginkanyi kulajinyi.” Wijba nyuli Yirudyurri wurrumbarra, baki yanybayi nangangi, “Wajba janganinji kulajinyi Junkanyi Ngurrunbawarrayngka najana. Nulijba ngayu nanganginkanyi kulajinyi.” Barriwa.
MAT 14:9 Ngala nginduyi Yirud muwa. Kudanyu nyuli ngindu muwa, mikungangi nyuliyanyi nulijba kurdanbikanyi Jun. Ngala nyuli yilikajba wurrumbarra barrin wanyingkanyi yajinyi janyulu wajba. Nyuli yanyba waykanyi yajinyi, baki bukambijunyi yali manku nanda nangangi jangkurr. Miku nyuliyi yangkalamba nanda jangkurr. Barriwa, janyulu wajba yajinyi.
MAT 14:10 Baki nyuli jirrinyba ngarrkadabawarr, “Dayakiyi Jun janki, baki wiykunumbakiyi kulaji nanginkurri.”
MAT 14:11 Barlbayi ngarrkadabawarr, baki nyuli kurdanba Jun. Nyuli daya janki brisinyina. Wiykunumba nyuli kulaji najana, baki wajbayi wurrumbarra. Baki kuyuyi kulaji wurrumbarrawanyi, wajbayi nangangi ngardanganja kulajinyi. Barriwa.
MAT 14:12 Nanamuku kandimuku Junkanyi, jali yalu manku Jun janyba nangki, jilajba yali brisinyurri baki dulaba yali nangangi mankanyi, makaykanyi. Baki yali yarrijba nangangi mankanyi kalawunyi kumayanguna. Yarrijba yali mankanyi kumayanguna kalawunyi, baki yali jilajba Jisusyurri. Karu yali Jisus nangangi Yirudkanyi, nyuli kurdanba Jun Ngurrunbawarr. Barriwa.
MAT 14:13 Jali nyulu manku nanda jangkurr nganinyiyurruwa Jisuswanyi, baki barlba nyuli nanamunanyi yajinanyi. Barlba nyuli karrurrinybarri kanjana muwardana. Barlbayi nyuluma karrurrinybarri nanankurri yajiyurri jali mikuyaji yingkanyi nanaba. Nulijba nyuli nyuluman jungunkanyi. Ngala jawudamukunyi yali najba Jisus jilaykurri muwardana karrurrinybarri, baki yalunjali karu yingkamuku nangangi Jisuskanyi, barlbayi karrurrinybarri muwardana. Baki yali barlba nukamina nanankurri yajiyurri. Dulu yali barlba.
MAT 14:14 Wanbiyayi Jisus karrurrinybana, baki walajbayi muwardananyi. Nyuli najba yalunya walkurra muranmuku wanbiyankurri, baki ngindu nyuli muwa yalungi. Kudanyu nyuli ngindu muwa yalungi, mikuyajingangi nyuli lalanbawarrayngka yalungi. Baki kunymamba nyuli yalunya. Kunymamba nyuli yalunya kajamuku jali yalu lunji.
MAT 14:15 Ngabungabu barri jilajbayi nangandurri Jisusyurri kandimuku nangangi. Baki yanyba yali Jisuskanyi, “Barriwa barri. Ngabungabu yaji nayinda. Mikuyaji mamanyi nayiba, baki mikuyaji barndanyi. Marda ninjimi manjijba yalunya barrawuyabarrawuyarri lukuluku. Marda ninjimi manjijba yalunya wudumbiji yalungi mama.”
MAT 14:16 Jananganjayi yalunya Jisuswanyi, “Miku ngayiyi manjijba yalunya. Yuku yalu wambu jungku nayiba. Janarri wajba yalunya nayiba mamanyi.”
MAT 14:17 Yanyba yali nangangi Jisuskanyi, “Ngala ngawamba bayayawa mama nayiba nurrundu. Ngawamba kujarra baki kujarra baki yingamali bayayawa damba, marda kujarra kaku nayiba nurrundu.”
MAT 14:18 Baki yanyba nyuli yalungi, “Janarri kuyu nanda mama ngakindurri. Janganarri wajba mamanyi.”
MAT 14:19 Baki jirrinybayi yalunya muramuku Jisuswanyi, yalu jungunkanyi dalbu dalbu nanaba karnbana, baki jungkurrijba yalungki karnbana. Barriwa. Wudumbayi nanda damba marda kaku Jisuswanyi. Kingkarri nyuli najba lalijiyurri, baki yanybayi Kudkanyi nanankanyi mamanyi. Yanyba nyuli mududu nangangi Kudkanyi nanankanyi mamanyi. Barriwa. Baki dalyamba nyuli damba. Wajbayi kandimuku, baki yali wajba muramuku dambanyi. Wawajba yalunjalili dambanyi marda kakunyi.
MAT 14:20 Jarrba yali mama bukambijunyi, baki wardijba yali muwa. Ngala miku yaliyanyi jarrba kudanyu nanda mama. Kudiya mama kiliyi nanaba. Baki wudumba yali nanda mama kandimukunyi, baki yarrijba yali birndawarrana mijimbanguna 12 barri.
MAT 14:21 Kajamukunyi yali jarrba mama mijimbangu 5000 barri nganinyimuku. Baki jibarrimuku baki bayamuku marda. Barriwa.
MAT 14:22 Baki jirrinyba nyuli yalunya nanganginmuku kandimuku Jisuswanyi. Yanybayi yalungi, “Janarri ngankijba muwardana, baki janarri barlba kanjana bayangarrinybarri. Ngala jangayu manjijba yalunya muramuku yalunginkurri barndarri.” Baki barlba yali kandimuku nangangi muwardana.
MAT 14:23 Baki manjijba nyuli yalunya muramuku Jisuswanyi. Mudambayi yalunya, baki barlba yali. Ngala kirrijbayi Jisus kingkarri dungalana. Kirrijba nyuli nyubana yanybiji nangangi Kudkanyi. Jungku nyuli nanaba dungalana kingkarrinyin bangani, baki mungijbayi nangangi yaji.
MAT 14:24 Ngala nanganginmuku kandimuku yuwajiwa yali wajanganja burrandijba kanjana. Kudanyu yali wajanganja baralala, karnungkumbayingangi yalunya yunkurrwanyi bayunguna baki walajbayi lakululu.
MAT 14:25 Ngala nyulu kambalingijba yaji karrina, baki jilajbayi Jisus yalundurri. Jilajba nyuli nukamina yundu wabudana.
MAT 14:26 Najba yali Jisus jilaykurri yundu wabudana, baki ngamungku nyuli wuwarr. Marrala yali, baki kaya yali, “Wuwarr, nanda wuwarr badajbangka.” Marrala yali kudanyu barri.
MAT 14:27 Yinarramba barri yanybayi Jisus yalungi, “Miku narriyi marrala ngaki. Nayinda ngayu, Jisus. Miku narriyi marrala ngaki.”
MAT 14:28 Baki yanybayi Bida nangangi Jisuskanyi, “Mambuka, miku ninyiyi jingkijba. Jaliyi ninji dujanya nanama ninji, baki janganinji karu, jangayu jilajba nganyindurri yundu wabudana, jaliyi ninji miku wuwarr, jaliyi ninji dujanya.”
MAT 14:29 Jananganjayi nyulu Bida, Jisuswanyi, “Yi. Jilajbakiyi ngakindurri yundu wabudana.” Baki walajbayi Bida. Walajba nyuli muwardananyi, baki jilajbangka nyulu nangandurri Jisusyurri yundu wabudana.
MAT 14:30 Ngala warrmbayi yaji yungkurrwanyi kudanyu barri. Baki nanankardi marralayi Bida. Marrala nyuli, baki karralangka wayka wabudana, baki kaya nyuli nangangi Jisuskanyi. Kayayi Bida, “Mambuka. Marrimbakiyi nganinji. Marrimbakiyi nganinji mardarda barri.”
MAT 14:31 Baki yinarramba marrimba nyuli Bida Jisuswanyi. Marrimba nyuli baki yanybayi Bidanyi, “Wanyingkanyi nganyingka mankumankuka janinji ngurrunba nanda. Wanyingkanyi nganyingka balkijba muwa. Marda nganinjimi jingkijba, janinga marrimba mardarda. Marda nganinjimi jingkijba, janinga kudanyu lalanba.”
MAT 14:32 Buli ngankijba muwardana, baki kurrkunba nangki yungkurr. Mikukiyanyi warrmba mili.
MAT 14:33 Baki nanamukunyi kandimukunyi, yali wajba Jisus kunybanyi jangkurranyi yalunginkanyi. Kunybanyi jangkurranyi yali wajba Jisus. Yanyba yali nangangi, “Nayinda jangkurr duja, ninji nangangi jandanyi Kudkanyi. Ninji nangangi jandanyi.”
MAT 14:34 Mili yali wajanganja bayungu. Birlbidamba yali bayangarrinybarri, baki wanbiya yali nananyina yajina niji Kinisirid.
MAT 14:35 Jala yali walajba muwardananyi, jawudamukunyi yali jingkijba Jisus. Jingkijba yali Jisus, baki wirlku yali lukuluku nani. Wirlku yali yalundurri jala yalu lunji, baki kuyu yalunjali nangandurri Jisusyurri.
MAT 14:36 Yililikajba yali Jisus, “Yuku kuna janurru marrimba nganyi jumbala, baki janurru kunybijba. Yuku kuna.” Bukambiju jali yalu marrimba nanda jumbala nangangi Jisuskanyi, baki yali yabijba mankanyi. Yabijba yali mankanyi.
MAT 15:1 Nanamanji barri nanamuku Barasimuku, nayi yalungi yuwa. Waluku yalungkili wakardaba marni, baki kamu yalili jarrba mama. Nani barri yalungi yuwa nanamukuyngka Barasimukuyngka. Baki yalunjalili karu yingkamuku, marda yalungkimi bukambiju waluku wakardaba marni, baki kamu jayalu jarrba mama. Nani barri yalunjalili karu nanankanyi yuwanyi. Jalili yalu wudumba mama dungalana, miku yaliyanyi jarrba nanda mama ngala yali jilajba. Waluku yalungkili wakardaba marni, baki kamu yaluja jarrba nanda mama. Mili yalungi yuwa wakardaykanyi yaji. Wakardaba yalili yukurumuku marda bujilimuku. Wakardaba yalili kaja yaji yalunginkanyi yuwanyi. Karuyi yalunya wakardaykanyi yaji nanankanyi yuwanyi, jalili yalunya karu wankalawanyi. Nanamanji barri nanamuku Barasimuku, nani barri yalili wakardaba yaji nanankanyi yuwanyi. Barriwa. Baku barri kudiya Barasimuku, baki kudiya milidimbiwarr yuwanyi, badajba yali kulani Jirusalimnanyi. Badajba yali nangandurri Jisusyurri baki yali ngajaka Jisus.
MAT 15:2 “Najba nurri nganyinmuku kandimuku jarrkurri mama. Jarrba yali mama nganyinmukunyi kandimukunyi, ngala miku yalungkiyanyi waluwa wakardaba marni. Dulu yali jarrba nanda mama. Wanyingkanyi yalungkimi miku wakardaba marni waluwa yalu jarrkanyi yaji. Nani barri yanybaka nanda yuwa wakardaykanyi yaji. Ngala wanyingkanyi miku yalimi ngayangayiyba nanankanyi yuwanyi.” Barriwa.
MAT 15:3 Jananganjayi yalunya Jisuswanyi, “Ngala narri barri, wanyingkanyi narriyi miku ngayangayijba nanganginkanyi yuwanyi Kudkanyi, ngala narri ngayangayijba narringinkanyi yuwanyi. Yanybayi Kud nayinda jangkurr, ‘Marda ninjimi lalanba bulanya, nganyi nijanganjinyi marda ngardanganja. Marda ninjimi wajba bulanya mamanyi marda dungalanyi. Marda ninjimi miku yanyba balki jangkurr bulangi. Jaliyi ninji yanyba balki jangkurr bulangi, jaliyi ninji miku wajba bulanya mamanyi marda dungalanyi, baki marda ninyalimi kurdanba yingkamukunyi.’ Nanda jangkurr, nanda nangangi yuwa Kudkanyi.
MAT 15:5 Ngala miku narrimi milidimba yalunya nanankanyi nanganginkanyi jangkurranyi. Yinini jangkurranyi narri milidimba. Narri milidimba yalunya, jaliyi yingka nyulu yanyba bulangi nanganginkanyi nijanganjiyngkanyi baki ngardanganjanyi, jaliyi nyulu yanyba bulangi, ‘Miku ngayiyi wajba nimbalanyi mamanyi, miku ngayiyi lalanba nimbalanya. Yanyba ngayi jangkurr nangangi Kudkanyi, jangayu wajba Kud dungalanyi baki yajinyi, baki miku ngayiyi yangkalamba nanda jangkurr. Baki nanankardi barri miku ngayiyi wajba nimbalanya dungalanyi baki yajinyi. Miku ngayiyi lalanba nimbalanya.’ Narri yanyba jaliyi nyulu yanyba nani bulangi, baki nanda kunyba. Narri yanybaka nanda kunyba nyulu waykanyi Kud dungalanyi, ngala mikuyaji mili dungalanyi wudumbikanyi mama bulangi. Ngala balki nanda narringi yuwa. Miku narrimi ngayangayijba nanganginkanyi yuwanyi Kudkanyi. Narringinyi yuwawanyi manjamanjambaka nanda yuwa nangangi Kudkanyi. Nanangini balkiwanyi jangkurrwanyi manjamanjambaka nanda kunyba jangkurr nangangi Kudkanyi. Narri jungkuka balki jala miku narrimi lalanba bulanya yarrijinyi baki nijanganjinyi, jala miku narrimi wajba bulanya dungalanyi, ngala narri wajba Kud dungalanyi. Nani barri narri yurlwa nanganginkanyi jangkurranyi Kudkanyi, ngala narri milidimba yalunya narringinkanyi jangkurranyi.
MAT 15:7 Narri balkimuku. Narri yabimba balki yaji jala narri mamanumba nanda yuwa nangangi Kudkanyi, jala narri karu yalunya yinini yuwanyi. Narri balkimuku. Nanda wankalanyi jangkurr jali yanyba Yasisaya, duja nanda jangkurr. Nanangini jangkurrwanyi karungka yalunya narringi. Nayi nanda jangkurr,
MAT 15:8 ‘Yanybaka Kud nayinda jangkurr, ‘Nanginmuku, muningka yalu yanyba, yalu maruka muwa ngaki, yalu durrijba ngaki yuwa, ngala miku. Miku yalimi maruka muwa ngaki. Miku yalimi durrijba ngaki yuwa. Muningka yalu wajba ngana yalunginkanyi kunybanyi jangkurranyi, ngala miku yalimi kunyba kurdulu ngaki.
MAT 15:9 Jalija yalu wajba ngana kunybanyi jangkurranyi, baki miku ngayiyi manku yalungi jangkurr. Miku ngayiyi manku yalungi kunyba jangkurr, mikungangi yalimi milidimba ngakinkanyi jangkurranyi. Yalu yanybaka nanda ngaki jangkurr, ngala miku. Milidimba yalunjalu yalunginkanyi jangkurranyi, miku ngakinkanyi jangkurranyi.’ Nani barri nanda jangkurr najana Kudkanyi. Barriwa.”
MAT 15:10 Baki kayayi Jisus yalungi muramukuyngka, yalu jilaykanyi nangandurri. Mili nyuli yanyba yalungi wakardaykanyi yalungka marni baki jarrkanyi mama. Yanyba nyuli yalungi, “Manku janarri ngaki jangkurr, baki jingkijba janarri.
MAT 15:11 Miku nyulimi jungku balki, jarrbangkangangi nyulu mama. Nyulu jungkuka balki, mankumankukangangi nangka balkinyi yajinyi. Waluku nangka mankumankuka balkinyi yajinyi, baki nyulu yanybaka balki jangkurr, nyulu yabimbaka nanda balki yaji. Nani barri nyulu jungkuka balki.” Barriwa.
MAT 15:12 Yanybayi nanganginmuku kandimuku nangangi Jisuskanyi, “Nanamuku Barasimuku, miku yalimi mirnarrijba muwa nanankanyi nganyingkanyi jangkurranyi, ngala yalu ngarrangarra muwa.”
MAT 15:13 Jananganjayi yalunya Jisuswanyi, “Jangayu muningka karu narrinya jangkurranyi. Yarrijba karnba yami nanganginyina jambana mambukawanyi baki baku barri jardijbayi kunyba karnba. Ngala jardijbayi yingka karnba marda, jala mikukiyanyi yarrijba nanda yami jambana mambukawanyi. Jardijbayi nanda yingka balki karnba. Ngala nanda mambuka, janyulu badajba, janyulu dulaba bukamba nanda balki karnba jali miku nyuliyanyi yarrijba yami jambana. Janyulu dulaba bukamba nanda balki karnba. Nanda kunyba karnba, nanda barrinani nanamuku jala durrijba nanda jangkurr nangangi Kudkanyi. Ngala nanda balki karnba, nanda barrinani nanamuku jala miku yalimi durrijba nangangi jangkurr. Baki nanda mambuka jali dulaba nanda balki karnba, nyulu barrinani ngaki Buwakanya kingkarri. Bukamba yalu jala miku yalimi durrijba nangangi jangkurr, janyulu dulaba yalunya ngakinyi Buwakayu. Janyulu bukamba yalunya, mikungangi yalimi durrijba nangangi jangkurr.
MAT 15:14 Marda narrimi miku balkijba muwa yalungi Barasimukuyngka. Yalu barrinani nanda kabujiwuya. Jaliyi yingkawanyi kabujiwanyi yalilijba nanda yingka kabuji, baki jabula yirrba wayka bardawana. Jabula yirrba, mikungangi bulimi najba yaji wanjawa bula jilalajba. Nanamukunyi Barasimukunyi, miku yalimi durrijba nanda yuwa nangangi Kudkanyi, ngala yalu durrijbangka yalungi yuwa. Nanankardi barri yalu jungku balki nangangi Kudkanyi, baki yalu yalilijba yingkamuku, yalu marda jungunkanyi balki nangangi.”
MAT 15:15 Yilikajbayi Jisus Bidawanyi, “Wanyi nanda jangkurr. Miku nurrimi jingkijba nanda nganyi jangkurr. Yanka barri jangkurrwanyi balkimbaka nanda nganinyi. Karukiyi nurrunya mili.”
MAT 15:16 Jananganja nyuli Bida, Jisuswanyi, “Marda narri kuna. Miku narrimi kunyba kulaji jingkiykanyi yaji kuna. Miku kuna narrimi jingkijba ngaki jangkurr. Jungku kuna narri barrinani yalu. Jangayu karu narrinya nanankanyi jangkurranyi. Nanda mama jala narri jarrba, nanda mama ngankijbangka narrindu muwana. Mikukimi jungku nanda mama muwana yurrngumba. Nanda mama walajbangka muwananyi, mankanyinanyi. Nani barri miku narrimi jungku balki, jarrbangangi narri jawuda mama.
MAT 15:18 Ngala jaliyi narringka mankumanku balkinyi yajinyi, baki janarri yabimba balki yaji. Baki nani barri janarri jungku balkina yuwana Kudkanyi. Waluku nangka mankumanku nganinyi balkinyi, baki kamu janyulu yanyba balki jangkurr.
MAT 15:19 Kamu janyulu yabimba balki yaji. Kamu janyulu kurdanba yingka nganinyi. Kamu janyulu kuluka yingkana jibarrina, kamu janyulu maninjakujba yaji, kamu janyulu jujamba yaji.
MAT 15:20 Nani barri waluku nangka mankumanku nganinyi balkinyi yajinyi, baki kamu janyulu yabimba nanda balki yaji. Nani barri jungku nanda nganinyi balkina yuwana Kudkanyi. Ngala miku nyulimi jungku balkina yuwana Kudkanyi, jarrbangangi nyulili mama barrin. Barriwa.”
MAT 15:21 Barlbayi Jisus nanamunanyi yajinanyi. Barlba nyuli yingkayurri yajiyurri. Barlba nyuli langki, bundu nanankuyanyina barrawuyabarrawuyana, niji Daya marda Sayidun.
MAT 15:22 Ngala jungkuyi Jisus nanaba, baki jilajbayi jibarri nangandurri. Nanda jibarri, nangangi yaji niji Kayina, bundu nananyina yajina jali jungku nanamanji Jisus. Nanda kulunganja nangangi ngila, nyuli lunji. Lunji nyuli kudanyu barri. Jilajbayi jibarri nangandurri. Yanyba nyuli Jisuskanyi, “Mambuka. Ninji barrinani jandanyi nanankanyi wankalanyi Dayibidkanyi. Ngindukiyi muwa ngaki. Ngaki kulunganja nyulu wuwarryudi mankanyiyudi. Kudanyu nyulu lunjika. Janinji kuna jakajba nanda wuwarr ngilananyi mankanyinanyi. Janinji kuna jakajba nanda wuwarr, baki janyulu yuku jungku.” Nani nyuli ngajaka Jisus.
MAT 15:23 Nanda jibarri, nangangi yaji Kayinan, baki nyuli ngurranyi yalungi Jumukuyngka. Baki nanamuku Jumuku, miku yaliyanyi maruka muwa yalungi ngurranyimukuyngka barrinani nanankanyi jibarrinyi. Yalili yanyba, “Yingkamuku ngurranymuku, yalu barrinani bajangumuku.” Manku nyuli nanda jangkurr jibarrinyi Jisuswanyi, ngala miku nyuliyanyi jananganja nanda jibarri. Miku nyuliyanyi yanyba jangkurr. Ngala yali jilajba kandimuku nangandurri. Yililikajba yali Jisuskanyi, “Mambuka. Marda ninjimi barriwa manjijba nanda jibarri nganyinbunanyi. Nyulu durrijbangka ngambalanya. Janyulu yabimba kiji ngambalangi.”
MAT 15:24 Ngala nyuli jananganja nanda jibarri Jisuswanyi. “Ngana manjijbayi ngakinyi Buwakayu milidimbiji ngawamba yalunya, ngakinmuku mungkijimuku, Jumuku. Yalu barrinani jibmuku jala yalu yakika. Miku yalimi jingkijba yaji wanjawa jayalu jilajba. Manjijba ngani Buwakayu milidimbiji yalunya nangangi Kudkanyi. Barriwa.”
MAT 15:25 Jali manku nangangi jangkurr jibarriwanyi, baki mururu nyuli wayka walu nangandu. Baki yanyba nyuli nangangi, “Mambuka. Kunymambakiyi ngaki ngila.”
MAT 15:26 Jananganja nyuli nanda jibarri Jisuswanyi. “Waluku barri janurru wajba bayamuku mamanyi. Waluku jayalu jarrba kaja mama. Miku nurriyi wajba bajangumuku mamanyi waluwa. Waluku jayalu yalu jarrba yaji bayamukunyi. Ngayu Ju, ngala ninji ngurranyi ngaki. Badajba ngayi milidimbiji yalunya ngakinmuku mungkijimuku Jumuku. Badajba ngayi yabimbiji ngiruka yaji yalungi barri. Yalu barrinani nanamuku bayamuku. Miku ngayiyanyi badajba milidimbiji yalunya ngurranyimuku. Miku ngayiyanyi badajba yabimbiji ngiruka yaji yalungi. Yalu barrinani nanamuku bajangumuku.”
MAT 15:27 Yanybayi jibarri Jisuskanyi, “Yuku barri, mambuka. Ngala jala yalu jarrba mama bayamukunyi, jaliyi yirrba jawuda mama jambarri, baki nanda jarrbangka bajanguwanyi. Jarrbangka nanda bijal mama bajanguwanyi, jaliyi yirrba mama jambarri. Ngala jala ninji milidimba yalunya nganyinmuku mungkijimuku, baki kudiyamukunyi ngurranyimukunyi yalu marda mankuka nganyi jangkurr. Yalu marda kuyungka nganyi jangkurr. Janinji kuna yabimba ngiruka yaji yalungi marda ngurranyimukuyngka jala kuyu nganyi jangkurr. Janinji kuna kunymamba marda ngaki ngila.”
MAT 15:28 Baki nyuli jananganja jibarri Jisuswanyi, “Mirnarrijba ngayu muwa nanankanyi jangkurranyi jali ninji yanyba. Kudanyu barri nganinji jingkijba, yuku ngayu yabimba ngiruka yaji. Jangayu kunymamba nanda ngila. Wijbakiyi wayka barndarri ngilayurri. Nanda wuwarr barlbayi nanganbunanyi mankanyinanyi. Mikuyaji wuwarranyi nanaba ngilana mankanyina.” Ngala nyuli yanyba nanda jangkurr, baki kunybijbayi nanda ngila mankanyi. Barlbayi wuwarr jali yanyba Jisus nanda jangkurr. Barriwa.
MAT 15:29 Mili barlbayi Jisus, baki wijba nyuli kula nanankurri yajiyurri karriya nananyina kanjana niji Kalili. Kirrijba nyuli kingkarri dungalana, baki jungkurrijba nangki.
MAT 15:30 Badajbayi walkurra muramuku nangandurri, baki kuyu yalunjali kajamuku jala yalu lunji nangandurri. Kudiya yali balki nukami, kudiya yali kabuji yami, kudiya miku yaliyanyi jilalajba. Kudiya yali balki janyi, miku yaliyanyi yanyba jangkurr, kudiya yali yinini yinini ngalya. Kuyu yalunjali nangandurri Jisusyurri. Jungku yali walu nangandu baki nyuli kunymamba yalunya bukambiju.
MAT 15:31 Ngala yalu muramuku, manmala yali. Kudanyu yali manmala, jali yalu najba Jisus kunymambikurri yalunya. Najba yalunjali jali yalu balki janyi yanybikurri. Najbayi yalunya jali yalu balki nukami jilajkurri, marda yalunya jala kabuji yami naykanyi yaji. Baki mirnarrijba yali muwa nanankardi. Baki yali wajba Kud yalunginkanyi kunybanyi jangkurranyi.
MAT 15:32 Marndakaja barri jali yalu yuwajiwa jungku dungalana, kayayi Jisus yalungi nanganginmukuyngka kandimukuyngka, yalu jilaykanyi nangandurri. Badajba yali baki yanyba nyuli yalungi. Yanybayi Jisus, “Nginduka ngayu muwa yalungi nanginmukuyngka muramukuyngka. Yali jungku ngakindu kujarraka barndayka, baki nanijba barri mikuyaji mamanyi nayiba yalundu jarrkanyi. Warriyaluku. Birkalanyi yalu kudanyu barri. Jawuda yalingi barnda juju barri. Jalimi ngayu manjijba yalunya barndarri, baki yiningki jawuda jayalu jungku buwandiwa. Majabujba mankanyi yalu, birrkalanyingangi.” Nani barri yanybayi Jisus yalungi kandimukuyngka.
MAT 15:33 Yanybayi kandimuku nangangi Jisuskanyi, “Ngala yanka janurru wajba yalunya mamanyi, yanka barri. Miku nurriyi wudumba mama nanginyina mangkurruna yajina.”
MAT 15:34 Yilikajbayi yalunya Jisuswanyi, “Yankanu damba narrindu.” Jananganja yali, “Ngawamba 7 bayayawa damba, marda kudiya bayayawa kaku.”
MAT 15:35 Baki jirrinyba yalunyi muramuku Jisuswanyi, yalu jungunki jambana.
MAT 15:36 Baki wudumba nyuli nanda damba, marda kaku. Baki nyuli yanyba mududu nangangi Kudkanyi. Dalyamba nyuli nanda bayayawa damba baki kaku. Wajba nyuli yalunya kandimuku nanankanyi mamanyi, baki yalunjali wajba muramuku nanankanyi bayayawanyi dambanyi, marda kakunyi. Wajba yalunjali bukambiju mamanyi.
MAT 15:37 Jarrba yali nanda mama, baki wardijba yali muwa. Miku yaliyanyi jarrba bukamba nanda mama, kiliyi kudiya mama. Wudumba yali nanda mama kandimukunyi. Yarrijba yali bindawarrana, 7 bindawarra walbinyi.
MAT 15:38 Kajamukunyi yali jarrba nanda mama, mijimbangumukunyi. 4000 nganinyimuku, baki kajamuku jibarrimuku marda wawarramuku, walkurra muramuku.
MAT 15:39 Baki manjijbayi yalunya Jisuswanyi. Nyuli manjijba yalunya yalunginkurri barndarri. Baki nyuli ngankijba muwardana. Ngankijba nyuli muwardana, marda nanganginmuku kandimuku nangandu, baki jilajba yali bayangarrinybarri yingkayurri yajiyurri, niji Makadan.
MAT 16:1 Jala yali wanbiya bayangarrinybana, baki yingkamuku yali jilajba nangandurri Jisusyurri. Kudiya yali Barasimuku baki kudiya yali Sajusimuku jala yalu jurlwa nangangi Jisuskanyi. Jilajba yali nangandurri balanjanki Jisus. Yanyba yali Jisuskanyi, “Yabimbakiyi ngiruka yaji nurrungi, baki janurru jingkijba Kud, nyulu mirnarrijbangka muwa nganyi, ninji nangangi kandi. Nani janinya nurru jingkijba jaliyi ninji yabimba ngiruka yaji nurrungi.”
MAT 16:2 Ngala jananganjayi yalunya Jisuswanyi, “Narri jingkijba nanda yaji lalijina. Yingkana kambana narri najba laliji, baki narri yanyba, ‘Miku. Mikuwali yirrba janja winyurru.’ Ngala yingkana kambana narri najba ngalu lalijina, baki narri yanyba, ‘Yirrbaja janja winyurru.’ Narri najba nanda laliji, baki narri jingkijba nanda yaji janjanyi. Ngala narri najbayi nanda ngiruka yaji jali ngayu yabimba, ngala miku narriyi jingkijba yaji. Miku nganarriyi jingkijba, jaliyi manjijba ngana Kudwanyi.
MAT 16:4 Ngala miku barri. Miku ngayiyi yabimba mili ngiruka yaji narringi. Narri jungku balki nangangi Kudkanyi. Miku narrimi ngayangayijba nanganginkanyi jangkurranyi ngirukanyi. Yi. Kajamuku yalu jungku balki barrinani narri. Miku ngayiyi yabimba mili ngiruka yaji narringi. Ngawamba yingamali ngiruka yaji janarri najba baku barri, barrinani nanda ngiruka yaji jali jungku Juna wanka muwana kakuna kujarraka barndayka. Ngawamba ngiruka yaji barrinani nani janarri najba yaji.” Nani barri jananganjayi Jisuswanyi. Barlba nyuli yalunbunanyi.
MAT 16:5 Ngankijba yali muwardana, baki mili yali jilajba karrurrinybarri kanjana, Jisus marda kandimuku. Ngala mamanumba yali yaji kandimukunyi. Mamanumba yali yaji damba. Mikuyaji mamanyi yalundu muwardana.
MAT 16:6 Yanybayi Jisus yalungi, “Marda narringkimi najbawa yalunginkanyi bululunyi yajinyi, Barasimukuyngka marda Sajusimukuyngka. Marda narringkimi najbawa yalunginkanyi bululunyi yajinyi.”
MAT 16:7 Jali manku nangangi jangkurr kandimukunyi, baki ngamu yanybayi Jisus dambanyi. Baki yanyba yalungki, “Mikuyaji dambanyi ngambalangi. Nanankardi barri nyuli yanyba nani barri, mamanumbangangi ngambali kuyunkanyi ngambalangi damba.”
MAT 16:8 Ngala mankuyi yalunya Jisuswanyi, baki nyuli yanyba yalungi, “Wanyingkanyi narringka yanyba nani dambanyi. Miku kuna narrimi jingkijba ngaki jangkurr. Miku kuna narrimi kuyu ngaki jangkurr.
MAT 16:9 Miku kuna narrimi jingkijba ngaki jangkurr. Miku kuna narrimi mankumankuwa nanda wabulinyi yaji jali ngayu yabimba, jali kajamukunyi yalu jarrba damba marda kaku, baki wardijba yali muwa. Miku kuna narrimi jingkijba nanda yaji jali waluku ngayi dalyamba damba yalungi 5000kanyi. Yankanu bindawarra narri wudumbayi nanda mama, jali yalu yingijba. Yankanu barri.
MAT 16:10 Baki mili jangkurr ngayu ngajaka narrinya. Buyingka barri baku mili ngayi dalyamba mama yalungi muramukuyngka 4000kanyi. Dalyamba ngayi 7 damba yalungi waluwa yali jarrba. Bayngkani barri yankanu bindawarra narri wudumbayi nanda mama nanamanji, jali yalu yingijba. Yankanu barri. Mamanumba kuna narri nanda jali ngayu kujarraka yabimba damba.
MAT 16:11 Jaliyi narri mankumankuwa nanda yaji jali ngayu yabimba, baki marda nganarrimi jingkijba. Marda nganarrimi jingkijba, yuku ngayu wajba narrinya dambanyi. Yuku ngayu wajba narrinya mamanyi jala narri nulijba. Jaliyi nganarri jingkijba nani, baki marda narrimi jingkijba ngaki jangkurr nanankanyi yalunginkanyi bululunyi yajinyi. Miku ngayiyanyi yanyba nanankanyi mamanyi narri jarrkanyi, ngala ngayi yanyba yalunginkanyi yuwanyi jalili yalunjalu milidimba, Barasimukunyi baki Sajusimukunyi. Jala narri yabimba damba, baki narri yarrijba nanda bululu yaji kandirrina, baki bululunbaka mama. Walkurramba mama bululuwanyi yajiwanyi. Baki nani barri nanda yuwa jalili yalunjalu milidimba Barasimukunyi baki Sajusimukunyi. Waluku barri kudiyamukunyi yali kuyu yalungi yuwa, yali durrijba nanda yuwa, ngala baku barri mili yali kuyu nanda yuwa, baki mili baku barri. Baki nanijba barri kajamukunyi yalu kuyungka nanda yuwa, yalu durrijbangka nanda yuwa. Ngala narri barri, marda narringkimi najbawa nanankanyi yuwanyi. Miku nanda nangangi yuwa Kudkanyi. Nanda ngawamba yalungimayngka yuwa. Nanda balki yuwa. Baki nanankardi barri marda narringkimi najbawa yalunginkanyi yuwanyi. Barriwa.”
MAT 16:12 Jali yanyba Jisus nanda jangkurr yalungi, baki jingkijba yali yaji kandimukunyi. Jingkijba yali nanda jangkurr jali yanyba Jisus barrin bululunyi yajinyi. Miku nyuliyanyi yanyba bululunyi yajinyi jala walkurramba damba, ngala nyuli yanyba yalunginkanyi yuwanyi Barasimukuyngka marda Sajusimukuyngka. Nyuli yanyba yalunginkanyi balkinyi yuwanyi. Barriwa.
MAT 16:13 Baku barri mili yali jilajba langki, Jisus marda nanganginmuku kandimuku. Jilajba yali langki nanankurri yajiyurri, bundu nananyina barrawuyabarrawuyana, niji Sisariya Bilibayi. Ngala yali jilajba yubalina, ngajaka nyuli nangangi kandimuku Jisuswanyi, “Ngayu Buwanya Bukambijuyngka, wanyingkanyi yalu yanybaka ngaki, wanyi ngayu, wanyi. Wanyingkanyi yalu yanyba ngaki, wanyi ngayu.”
MAT 16:14 Jananganja yali Jisus nanganginmukunyi kandimukunyi, “Yanybaka yalu yinini yinini jangkurr nganyi. Yingkamuku yalu yanybaka nganyi, ninji Jun Ngurrunbawarr. Yingkamuku yalu yanybaka nganyi, ninji nanda wankalanyi Yalayija mili wankiykanyi. Yingkamuku yalu yanyba nganyi, ninji wankalanyi jali yanyba jangkurr Kudkanyi, yiningki Jirimaya, yiningki yingka.” Barriwa.
MAT 16:15 Yanybayi Jisus yalungi, “Ngala narri barri, wanyingkanyi narri yanybaka ngaki, Wanyi ngayu, wanyi.”
MAT 16:16 Baki jananganjayi Bidawanyi, “Ninji barri Krayis. Ninji Jandanyi nangangi Kudkanyi, jala nyulu jungku wanka yurrngumba. Ninji nanda Krayis, jali manjijba Kudwanyi.” Nani barri jananganjayi Bidawanyi. Kamambarra barri yanybayi Kud yalungi wankalanyi. Karuyi yalunya, baku barri juju, janyulu manjijba walkurra mambuka. Janyulu jilajba nanda mambuka lalanbiji yalunya Jumuku. Baki jayalu nijarrijba nanda mambuka ‘Krayis’. Jingkijbayi Bidawanyi, nanda nganinyi Jisus, nyulu nanda mambuka Krayis, jali manjijba Kudwanyi.
MAT 16:17 Baki yanybayi Jisus nangangi Bidanyi, “Nanda jangkurr nganyi, nanda kunyba jangkurr. Sayimin Bida, ninji jandanyi nangangi Junkanyi. Mikukiyanyi yingkawanyi karu ninya nanankanyi jangkurranyi, ngala ngakinyi Buwakayu Kingkarri nyuli ninya karu nanankanyi jangkurranyi ngaki. Nyuli ninga karu ngaki, ngayu barri Krayis.
MAT 16:18 Ngayu karungka ninya. Nganyi niji Bida, nanda niji Krik yanyi barrinani ‘dungala’. Baki ninji barrinani nanda dungala. Janinji jungku ngiruka barrinani nanda ngiruka dungala. Janinji kuyu ngaki jangkurr, baki janinji marrimba ngaki jangkurr mardarda nganyinyina kurduluna yurrngumba barri. Janinji kuyu ngaki jangkurr, baki janinji milidimba yalunya ngakinkanyi jangkurranyi. Baki kajamukunyi jayalu durrijba ngaki jangkurr, ninjingangi ngiruka milidimbikanyi yalunya. Baki jayalu marda jungku ngiruka ngaki. Baki miku nyuliyi yangkalamba yalunya Sayidinwanyi. Miku nyuliyi yangkalamba yalunya ngakinbunanyi, jungkungangi jayalu ngiruka ngaki. Baki jalija yalungka janyba, baki janyulu mili wankamba yalunya Kudwanyi, yalu jungunkanyi nangandu kingkarri. Miku nyuliyi jarimba yalunya Yilyurri nanangini Sayidinwanyi, jungkungangi yalu ngiruka ngaki yurrngumba barri.
MAT 16:19 Ninji Bida, baki nanginmukunyi ngakinmukunyi kandimukunyi marda, janarri karu yalunya yingkamuku ngakinkanyi kunybanyi jangkurranyi. Yingkamuku jalija yalu kuyu nanda jangkurr, janarri karu yalunya nangangi Kudkanyi, janyulu lalanba yalunya. Ngala yingkamuku jalija yalu miku kuyu ngaki jangkurr, janarri karu yalunya nangangi Kudkanyi, miku janyulu lalanba yalunya, ngala janyulu janyba yalunya nanganbunanyi. Jaliyi narri manjamanjamba nanda balki yaji yalungi, baki janyulu najba yalunya Kudwanyi jungunkanyi kunybana yuwana. Jaliyi narri miku manjamanjamba yalungi balki yaji, baki yuwajiwa jayalu jungku balkina yuwana.” Nani barri yanybayi Jisus yalungi.
MAT 16:20 Baki jirrinybayi yalunya Jisuswanyi. Yanyba nyuli kudanyu yalungi, “Miku narriyi karu yalunya yingkamuku nanankanyi jangkurranyi ngaki, ngayu Krayis. Miku. Barriwa.”
MAT 16:21 Nanamunanyi barri milidimbayi yalunya yurlurrmba jangkurranyi Jisuswanyi. Nyuli milidimba yalunya nanganginmuku kandimuku yurlurrmba jangkurranyi. Yanyba nyuli, “Ngayu karungka narrinya, jangayu barlba kula nanankurri Jirusalimyurri, baki jayalu yabimba kiji ngaki nanaba. Nanamukunyi mambukamukunyi baki malbumalbuwanyi jurjkanyi, baki milidimbawarrmukunyi yuwanyi, jayalu yabimba kiji ngaki nanaba. Janganjalu manjijba janybiji ngaka. Jangaka janyba, ngala baku barri kujarraka barndayka, jangayu mili wankijba barri.”
MAT 16:22 Nani barri nyuli milidimba yalunya. Ngala nanangini kandiwanyi Bidawanyi, nyuli kuyu Jisus danbiyurri, baki yanybayi Bida nangangi Jisuskanyi. Kudanyu yanyba nyuli nangangi, “Mikujiyi yanyba nanda jangkurr, yalu yabimbikanyi kiji nganyi, marda janybikanyi nganyingka. Mikujiyi yanyba nani barri, mambuka.”
MAT 16:23 Yangkalamba nangki Jisus mankanyi. Ningkijba nyuli Bida, baki yanybayi nangangi, “Barriwa barri. Barlbakiyi ngakinbunanyi. Miku nganinjiyi kurrkunba nani, yabimbikanyi nangangi yaji Kudkanyi. Nyuli yanyba nanda jangkurr ngaki Sayidin. Nyuli karu ninya Sayidinwanyi, ninji yanybiji nanda jangkurr ngaki. Miku nganyingkimi mankumanku yajinyi barrinani nangka mankumankuka Kud yajinyi. Ngala nganyingka mankumankuka barrinani nganinyi nangka mankumankuka yajinyi.”
MAT 16:24 Baki yanybayi Jisus yalungi kandimukuyngka, “Jaliyi narri nulijba jilaykanyi ngakindu, baki marda narringkimi miku lalanba narringka. Marda narrimi yurlwa narringinkanyi yajinyi. Mardakimi nanda narringi yaji miku jirrinyi narringi. Jaliyi narri jilajba ngakindu, baki yiningki kurdanbaja narrinya yingkawanyi. Yiningki janyulu kurdanba narrinya, milidimbangangi narri ngaki jangkurr. Barriwa.
MAT 16:25 Jaliyi narri kudanyu nulijba jungunkanyi wanka nayiba yajina yurrngumba, baki janarringka janyba. Ngala jaliyi narringka janyba, mikungangi narringkiyi yangkalamba ngakinbunanyi, ngala narri durrijbayi ngaki jangkurr kudanyu barri, jaliyi narringka janyba nanankardi, baki janarri mili jungku wankan yurrngumba barri.
MAT 16:26 Mankumanku narringka nganiyngkanyi jirdi kajanyi yajinyi. Mirnarrijba nyulu muwa nanganginkanyi yajinyi, ngala warriyaluku, mankumanku nangka nanganginkanyi yajinyi, ngala miku nangkimi mankumanku nangangi Kudkanyi. Nangangi yaji jirrinyi nangangi, ngala miku nyulu Kud jirrinyi nangangi. Jalija nangka janyba, baki miku janyulu mili wanka jungku. Mikuwali nanganginyi yajiwanyi mili wankamba nanda nganinyi.
MAT 16:27 Kudiya narri jala narri jungku nayiba ngakindu, janganarri najba janybikurri ngaka. Baki janganarri najba mili wankiykurri baku barri. Kudiya narringi miku narringkiyi janyba waluwa ngayuja wijba. Baku barri ngayu Buwanya Bukambijuyngka, jangayu jungku kingkarri nangandu ngakinyina Buwakayu, baki janyulu lalanba yalunya bukambiju, jala yalu kuyu ngaki jangkurr. Janyulu lalanba yalunya kudanyu barri. Jangana nyulu yarrijba walkurra mambuka barrinani nyulu. Marda nanganginmuku Yanjilmuku, jayalu ngakinmuku wakiwarrmuku marda. Baki baku barri janyulu karrinjarrijba yalunya bukambiju walu ngalindu nyalinyalimbikanyi yalunya. Nanamanji barri jangana nyulu yarrijba Kudwanyi, ngayu karunkanyi yalunginkanyi yajinyi. Jangayu yabimba balki yaji yalungi jali yalu jungku balki yurrngumba. Jangayu manjijba yalunya wayka Yilyurri. Ngala nanamuku jali yalu jungku kunyba, jangayu yabimba kunyba yaji yalungi. Jangayu manjijba yalunya kingkarri, jungunkanyi nangandu Kudnyina yurrngumba barri. Barriwa.” Nani barri yanybayi Jisus yalungi. Barriwa.
MAT 17:1 Baku barri, 6 kambana baku, kirrijba yali dungalana, Jisus marda murrku nanganginmuku kandimuku, Bida marda buwakula Jayims baki Jun. Kirrijba yali juju kingkarri yundurrinybana dungalana yaluman.
MAT 17:2 Jali yalu jungku nanaba yundu, baki yangkalamba nangki Jisus. Wali nangangi bilirrbayi, barrinani kamba, jali nangka yangkalamba Jisus. Marda jumbala nangangi, bilirrbayi bunyala.
MAT 17:3 Baki yali najba Jisus, murrkuwanyi, marda yali najba kujarra mili karrinjankurri wilina nangandu. Buli malbuwuya wankalawuya jali bula jungku juju wabula kamambarra. Yingka wankala nyuli Musis, marda yingka wankala nyuli Yalayija. Badajba buli kingkarrinya. Yanyba yalungki malbuwuya baki Jisus. Barriwa. Nani barri yali najba yaji kandimukunyi. Najba yali Jisus marda malbuwuya yanybikurri yalungka. Barriwa.
MAT 17:4 Yanybayi Bida Jisuskanyi, “Mambuka. Yuku barri kunyba nurru nayiba naykanyi narrinya. Jangayu yabimba murrku ngarndu wanjirr, yingka nganyi, yingka nangangi Musiskanyi marda yingka nangangi Yalayijakanyi. Yabimba jangayu ngarndu narringi.” Ngala muningka yanybayi Bida nanda jangkurr.
MAT 17:5 Jala yanybayi Bida nani barri, baki walajbayi ngalu. Walajbayi ngalu waykalinya, baki bilirrbayi. Murumbayi yalunya ngaluwanyi. Baki yali manku jangkurr ngaluna kandimukunyi. Yanybayi Kud ngaluna, “Nayinda ngaki jandanyi, jala ngayu maruka muwa nangangi. Mankukiyi nangangi jangkurr.” Barriwa.
MAT 17:6 Jali yalu manku nanda jangkurr kandimukunyi, baki marrala yali. Kudanyu yali marrala, baki yirrba yali jambarri, wayka wali.
MAT 17:7 Ngala badajbayi Jisus yalundurri. Marrimbayi yalunya, baki yanybayi, “Walajbakiyi. Miku narriyi marrala.”
MAT 17:8 Baki walajba yali waykalinya, baki kujba yalungki lukuluku, ngala miku yaliyanyi najba nanankujarra wankalawuya. Mikuyaji bulangi nanaba, ngawamba karrinjayi Jisus yalundu. Barriwa.
MAT 17:9 Karrala yali wayka dungalananyi. Ngala yali karrala wayka, baki yanybayi Jisus yalungi. Jirrinyba nyuli yalunya, “Mikujiyi karu yalunya nanankanyi jali narri najba. Ngayu Buwanya Bukambijuyngka, jangaka janyba, ngala baku barri jangayu wankijba mili. Yuku barri nanamanji baku janarri karu yalunya nanankanyi jali najba nanaba dungalana. Yuku barri nanamanji baku, ngala jilijbawa yaji.” Barriwa.
MAT 17:10 Jali yalu karrala wayka, baki yilikajba yali Jisus kandimukunyi, “Nanamuku milidimbawarrmuku yuwanyi, wanyingkanyi yalili yanyba nayi barri, ‘Waluku janyulu wijba nanda wankalanyi Yalayija. Janyulu wijba waluku.’ Wanyingkanyi yali yanyba nani barri. Wanyingkanyi.”
MAT 17:11 Jananganja nyuli yalunya Jisuswanyi, “Yuku barri. Yanybayi Kud najana. Yanyba nyuli nayi ‘Waluku barri janyulu badajba. Janyulu badajba nanda barrinani Yalayija. Janyulu badajba karunki yalunya kunybanyi jangkurranyi, baki janyulu kunymamba bukamba yaji. Janyulu karu yalunya, marda yalimi ngindu muwa, yurlwangangi yalu nanankanyi yuwanyi Kudkanyi. Waluku barri janyulu badajba, baki baku barri badajbaja nanda yingka Buwanya Bukambijuyngka. Janyulu badajba bayngkani nangandu nananyina barrinani Yalayija. Barriwa.’
MAT 17:12 Ngala ngayu karungka narrinya nanginkanyi jangkurranyi. Nanda nganinyi barrinani Yalayija, ngala nyuli badajba yalundurri, ngala yali yurlwa nangangingangi. Miku yaliyanyi kandimbangangi. Baki nani barri marda jayalu jungku ngaki, Buwanya Bukambijuyngka. Jayalu yurlwa ngaki. Jangananjalu ngirra. Jangananjalu daba.” Barriwa.
MAT 17:13 Baki yali jingkijba nangangi jangkurr kandimukunyi. Jingkijba yali, nyuli karu yalunya nangangi Junkanyi Ngurrunbawarrayngka. Nanda Jun, nyuli nanda barrinani Yalayija jali badajba. Barriwa.
MAT 17:14 Karrala yali kula wayka jambarri, Jisus marda kandimuku nangangi. Wijba yali yalundurri, yingkamukuyngkurri kandiyurri yalungi. Walkurra muramuku yali jungku nanaba yalundu kandimukunyina. Baki jilajbayi Jisus yalundurri. Jali nyulu wanbiya yalundu, baki jilajbayi nganinyi nangandurri Jisusyurri. Mururu nyuli wayka nangandu Jisusnyina.
MAT 17:15 Baki yanyba nyuli, “Mambuka. Ngayu ngajaka ninga, janinji ngindunki muwa ngakinkanyi jandaynkanyi. Warriyaluku ngaki jandanyi. Ngankijbayi wuwarr nangandu mankanyina. Balkimbaka kaburr wuwarrwanyi. Janybaka nanda kaburr wuwarrwanyi kudiyana jangurri, kudiyana wabudarri.
MAT 17:16 Ngayi ngajaka yalunya, nganyinmuku kandimuku. Ngayi ngajaka yalunya jakaji nanda wuwarr, ngala miku yaliyi jakajba. Miku yaliyi kunymamba ngaki jandanyi, miku.”
MAT 17:17 Yanybayi Jisus yalungi, muramukuyngka. “Bukambiju narri jala narri wanka jungku nanijba, miku narrimi kuyu ngaki jangkurr. Narri yurlwangka ngaki. Ngayu jungkuka narrindu yurrngumba. Ngayu milidimbaka kaja narrinya, ngala miku narrimi kuyu ngaki jangkurr. Wanyimbala janarri kuyu ngaki jangkurr. Wanyimbala.” Baki yanybayi Jisus nijanganjiyngkanyi, “Kuyukiyi nanda kaburr ngakindurri. Kuyukiyi.”
MAT 17:18 Kuyu nyuli nangangi jandanyi nangandurri Jisusyurri, baki nyuli jirrinyba nanda wuwarr. Jirrinybayi wuwarr walaji kaburrnanyi mankanyinanyi. Walajbayi nanda wuwarr kaburrnanyi, baki kunybijbayi nanda kaburr.
MAT 17:19 Kamu barri, barlba yali yalunbunanyi muramukunanyi. Barlbayi Jisus marda kandimuku. Jali yaluman jungku, baki yali ngajaka Jisus kandimukunyi, “Yuku ninji jakajbayi nanda wuwarr. Ngala wanyingkanyi miku nurriyi jakajba. Wanyingkanyi.”
MAT 17:20 Jananganjayi yalunya Jisuswanyi, “Narri kuyu ngaki jangkurr, ngala miku narrimi kudanyu kuyu ngaki jangkurr. Jalimi kudanyu narri kuyuyi ngaki jangkurr, baki yuku janarri jakajba wuwarr barrinani ngayu. Ngayu karungka narrinya nanginkanyi jangkurranyi. Jaliyi narri kuyu ngaki jangkurr, jaliyi narri jingkijba ngaki jangkurr, nanda duja jangkurr ngaki, baki yuku janarri yabimba ngiruka yaji. Ngiruka yaji janarri yabimba marda, jaliyi narri jingkijba ngaki jangkurr duja barri. Yuku janarri yanyba nanankanyi dungalanyi, ‘Dungala. Barlbakiyi nanamunanyi yajinanyi. Jungkukiyi nanaba yingkana yajina.’ Jaliyi narri yanybaka nani dungalanyi, baki janyulu barlba. Janyulu jungku yingkana yajina. Yuku janarri yabimba bukamba yaji, jaliyi narri kudanyu kuyu ngaki jangkurr.
MAT 17:22 Baki mili yali barlba nanamunanyi yajinanyi, Jisus marda nanganginmuku kandimuku. Jilajba yali kula. Jali yali wanbiya nananyina walkurranyina yajina Kalili, baki yanybayi Jisus yalungi, “Jawudawanyi, janganjalu wudumba Buwanya Bukambijuyngka.
MAT 17:23 Janganjalu marrimba baki janganjalu kurdanba. Jangaka janyba, ngala baku barri jangayu wankijba mili. Kujarraka barndayka jangayu mili wankijba. Barriwa.” Jali yalu manku nangangi jangkurr Jisuskanyi, baki yali ngindu muwa kandimuku. Kudanyu yali ngindu muwa nangangi. Barriwa.
MAT 17:24 Mili yali barlba kula Kabirnayumyurri, baki wanbiya yali barrawuyabarrawuyana. Ngankijbayi Jisus kalawuyngkurru barrawuna, ngala yuwajiwa karrinjayi Bida danbina. Yalu jalili yalu wudumba dungala yalunbunanyi walkurrayngka jurjkanyi, yali jilajba nangandurri Bidayurri. Ngajaka yali Bida, “Nganyinyi milidimbawarranyi nyulu kuna wajbangka yalunya dungalanyi walkurrayngka jurjkanyi. Nyulu kuna wajbangka yalunya dungalanyi jurjkanyi.”
MAT 17:25 Jananganjayi yalunya Bidawanyi, “Yi. Nyulili wajba dungalanyi walkurrayngka jurjkanyi.” Barriwa. Baki ngankijbayi Bida barrawuna jali jungku Jisus nanaba. Baki waluwa nyuluwarri yanybayi Jisus nangangi, Sayimin Bida, “Wanyingkanyi ninji yanyba. Wanyingkanyi. Wanjangini mardakimi wajba walkurra Kubamin mambuka dungalanyi. Nanganginmukunyi jandanyimukunyi kuna. Nanamukunyi ngurranyimukunyi kuna jalili yalu jungku nanaba nanganginyina yajina. Wanyingkanyi ninji yanyba.”
MAT 17:26 Jananganjayi Bidawanyi, “Nanamukunyi ngurranyimukunyi jalili yalu jungku nanaba nanganginyina yajina, marda yalimi wajba nanda Kubamin mambuka dungalanyi. Ngala miku nanganginyi jandanyimukunyi, miku yaliyi wajba dungalanyi.” Barriwa. Baki yanybayi Jisus nangangi Bidanyi, “Yanyba ninji duja jangkurr. Mardakimi miku jandanyimukunyi wajba Kabamin mambuka dungalanyi. Yuku yalu muningka jungku. Miku yaliyi wajba nanda mambuka. Barriwa. Ngala ngayu nangangi jandanyi Kudkanyi baki marda ngayimi miku wajba yalunya mambukamuku jurjkanyi dungalanyi. Nanda jurj, nanda nangangi yaji ngakinkanyi Buwakaya Kingkarri. Nanankardi barri marda ngayu muningka jungku, miku waykanyi dungalanyi.
MAT 17:27 Ngala yalu mambukamuku jurjkanyi, yiningki jayalu kijiwijba, jaliyi miku nungkala wajba yalunya dungalanyi. Jilajbakiyi wayka kanjarri, baki wajarrijbakiyi kakunyi. Nanda lirrka kaku jalija ninji wakaramba, dalamba ninji nangangi janyi. Nanaba janyina janinji wakaramba yingamali dungala. Dulabakiyi nanda dungala kakunanyi janyinanyi. Wajbakiyi yalunya nanankanyi dungalanyi. Nani janinji wajba yalunya dungalanyi jala yalu nulijba niyangi waykanyi yalunya dungalanyi. Barriwa.”
MAT 18:1 Nanamanji barri badajba yali nangandurri Jisusyurri nanganginmuku kandimuku. Badajba yali nangandurri, baki yilikajba yali, “Nimbala Kud, nimbala walkurrawuya mambukawuya nanankanyi yajinyi kingkarri. Ngala wanyi janyulu jungku walkurra mambuka bayngkani nimbalandu. Wanyi barri.”
MAT 18:2 Ngala wudumbayi juka Jisuswanyi. Karrinjarrijba nyuli nanda juka burrandi yalundu.
MAT 18:3 Baki yanybayi Jisus yalungi kandimukuyngka, “Najba janarri nayinda juka. Narri nulijbangka jungunkanyi walkurra mambuka, ngala marda narringkimi yangkalamba kurdulu, marda narrimi jungku bayakarda barrinani nayinda juka. Miku nyulu walkurra mambuka, ngala muningka nyulu bayakarda. Jaliyi narringka miku yangkalamba kurdulu, jaliyi narri miku jungku bayakarda barrinani nayinda juka, baki miku janyulu lalanba narrinya Kudwanyi. Marda narrimi lalanba yalunya nanamuku jala yalu miku walkurra mambuka, ngala muningka bayakarda jungku. Marda narrimi lalanba nanamuku jala yalu bayakarda barrinani nayinda juka. Jala narri lalanbaka nanda bayakarda, baki nanda barrinani jala nganarri lalanba. Nanda barrinani jala nganarri lalanbaka, marukangangi ngayu muwa yalungi bayakardanyi. Maruka ngayu yalungi jala narri lalanba yalunya. Jala nganarri lalanbaka, baki nanda barrinani jala narri lalanbaka Kud, manjijbangangi ngani Kudwanyi narrindu. Nanda jala lalanbaka yalunya bayakardamuku, janyulu nyulu walkurra nganinyi bayngkani ngalindu.
MAT 18:6 Yalu kuyungka ngaki jangkurr bayamukunyi. Yalu yabimbaka kunyba yaji ngaki. Jaliyi yingkawanyi nyulu milidimbaka bayamuku yalu yabimbikanyi balki yaji, baki nanda balkimirra. Nanda balkimirra jaliyi yingkawanyi nyulu milidimbaka bayamuku, yalu yabimbikanyi balki yaji. Dabaja nanda nganinyi kudanyu barri Kudwanyi. Jaliyi nyulu yabimba balki yaji nani barri, baki marda nangkimi janyba. Jaliyanyi nangka janyba wabula, baki miku nyuliyanyi yabimba bayamuku, yalu yabimbikanyi balki yaji. Jaliyanyi nangka janyba wabula, baki miku nyuliyanyi yabimba nanda balki yaji nani barri, baki miku nyuliyanyi daba nanda nganinyi Kudwanyi.
MAT 18:7 Marda narringkimi miku yangkalamba nanganbunanyi Kudnanyi. Kudiya jayalungka yangkalamba nanganbunanyi, baki nanda balki. Baki kudiyawanyi jayalu balanja narrinya. Jayalu nulijba narringi, narringka yangkalambikanyi nanganbunanyi Kudnanyi. Najbawa narringkiyi. Jaliyi narri munyajba yingka, nyulu yangkalambikurri narrinya nanganbunanyi Kudnanyi, baki nanda balki. Ngala nanda jala balanjaka narrinya, jala nulijbangka narringi, narringka yangkalambikanyi nanganbunanyi, nanda jala balanjaka narrinya nani, baki nyulu jungkuka balki. Nyulu barri balkimirra. Janyulu mankuwa nangangi balki yaji Kudwanyi.
MAT 18:8 Ninji yabimbaka yaji marniyudinyi. Jaliyi nganyingka mankumanku yabimbikanyi balki yaji nganyinjudinyi marniyudinyi, baki nanda balki. Jaliyi nganyingka mankumanku yabimbikanyi nanda balki yaji, jaliyi ninji yabimba nanda balki yaji, baki miku ninjiyi jilajba kingkarri nangandurri Kudyurri, ngala janinji jilajba wayka jangurri Yilyurri. Ninji jilajbangka nukamina. Jaliyi nganyingka mankumanku jilaykanyi nukamina, ninji yabimbikanyi balki yaji, baki nanda balki. Jaliyi nganyingka mankumanku jilaykanyi baki yabimbikanyi nanda balki yaji, jaliyi ninji jilajba baki yabimba nanda yaji, baki miku ninjiyi jilajba kingkarri nangandurri Kudyurri, ngala janinji jilajba wayka jangurri Yilyurri. Marda nganyingkimi kurrkunba yabimbikurri nanda balki yaji marniyudinyi, marda nganyingkimi kurrkunba jilaykurri nukamina yabimbiji nanda balki yaji, baki janinji jilajba kingkarri nangandurri Kudyurri. Barriwa.
MAT 18:9 Ninji najbangka yaji yamiyudinyi. Jaliyi ninji najba yaji, baki nanankardi nganyingka mankumanku yabimbikanyi balki yaji, barrinani jala ninji najba yingka jibarri, baki nganyingka mankumanku kulukankanyi nangandu. Jaliyi nganyingka mankumanku nanankanyi balkinyi yajinyi nani barri, jaliyi ninji yabimba nanda balki yaji, baki nanda balki. Jaliyi nganyingka mankumanku nanankanyi jali ninji najba, baki ninji yabimba nanda balki yaji, baki miku janinji jilajba kingkarri nangandurri Kudyurri, ngala janinji jilajba wayka jangurri Yilyurri. Marda nganyingkimi kurrkunba yabimbikurri nanda balki yaji jali ninji najba, baki janinji jilajba kingkarri nangandurri Kudyurri. Barriwa.
MAT 18:10 Nanamuku bayayawamuku, marda narrimi miku yurlwa yalungi, ngala marda narrimi kudanyu maruka muwa yalungi. Marda narrimi lalanba yalunya. Ngaki Buwakanya jala jungkuka kingkarri lalijina, kajamuku nanganginmuku Yanjilmuku, jala yalu waki nangangi. Yalunjalu lalanbaka bayayawamuku bayamuku Yanjilmukunyi. Yalunjalu lalanbaka yurrngumba barri, baki marda narrimi lalanba yalunya marda.
MAT 18:12 Mankumanku narringka nanginkanyi jangkurranyi, jalija ngayu muningka yanyba narringi. Yingka nganinyi, nyulu lalanbawarr jibkanyi. Kajamuku nangangi jibmuku, wirdikudukudu, 100 barri. Yingamali nangangi jib, jilajbayi nyubana, baki yakika nyuli. Mikuwali wijba nganinyiyurri. Baki nginduyi muwa nanda lalanbawarr nangangi. Yingkijba nyuli nanganginmuku yingkamuku jibmuku barrikina, ngala nyuli kujba nanankanyi yingamaliyngka jali yakika munjimunji.
MAT 18:13 Kudanyu nyuli kujba nanankanyi jibkanyi, baki wakara. Wakaramba nyuli, baki mirnarrijba nyuli muwa. Yingkamuku nanganginmuku jibmuku mardarda yali jungku barrikina, baki mirnarrijba nyuli muwa yalungi. Ngala kudanyu barri nyuli mirnarrijba muwa jali nyulu wakaramba nanda yingka jali yakika.
MAT 18:14 Nanamuku bayayawamuku, yalu barrinani jibmuku. Baki Kud nyulu barrinani nanda lalanbawarr jibkanyi. Jaliyi yingamali yalungi bayayawamukuyngka, jaliyi nangka yangkalamba nanganbunanyi Kudnanyi, baki nyulu nginduka muwa Kud nanankanyi. Kudanyu nyulu nginduka muwa nanankanyi. Ngala jaliyi mili nangka yangkalamba nangandurri Kudyurri, baki mirnarrijbangka muwa Kud nangangi. Mirnarrijbangka nyulu muwa yalungi jala yalu durrijba nangangi yuwa yurrngumba, ngala kudanyu barri nyulu mirnarrijbangka muwa yalungi, jala yalu mili wijba nangandurri.
MAT 18:15 Jaliyi yingkawanyi nyulu yabimbaka balki yaji nganyi, nganyinyi kandiwanyi, baki marda ninjimi miku karu yalunya yingkamuku nanankanyi balkinyi yajinyi jali nyulu yabimba nganyi. Ngala marda ninjimi jilajba nangandurri jali yabimba balki yaji nganyi. Marda ninjimi jilajba nangandurri, baki kardarda yanyba nangangi nanankanyi yajinyi jali nyulu yabimba nganyi. Yiningki janyulu ngindu muwa nanankanyi balkinyi yajinyi. Jaliyi nyulu ngindu muwa, baki janinji manjamanjamba nanda balki yaji, jali nyulu yabimba nganyi, baki janimbala mili jungku kandiyarra.
MAT 18:16 Ngala jaliyi nyulu miku ngindu muwa nanankanyi balkinyi yajinyi, baki marda ninjimi mili wijba nangandurri bayngkani barri. Marda ninjimi kuyu yiningki yingamali, yiningki kujarra nganinyiwuya nganyindu, baki mili janinji yanyba nangangi nanganginkanyi balkinyi yajinyi. Nayi barri yanybaka naja Kudkanyi, ‘Jala ninji yanyba yingkanyi nanankanyi balkinyi yajinyi jali nyulu yabimba, baki mardakimi yiningki kujarra, yiningki murrku jungku nganyindu mankunki nimbalangi jangkurr. Jayalu manku nimbalangi jangkurr, baki jayalu jingkijba wanyi jangkurr dujanya.” Nani yanybaka jangkurr najana Kudkanyi, baki nanankardi barri marda ninjimi kuyu bulanya nganyindu, jala ninji mili yanyba nanankanyi jali yabimba balki yaji nganyi.
MAT 18:17 Ngala jaliyi nyulu yurlwa bulanginkanyi jangkurranyi marda, baki marda ninjimi karu yalunya, jala yalu malumba jungku jurjina, jala kuyu nangangi jangkurr Kudkanyi. Marda ninjimi karu yalunya nanankanyi balkinyi yajinyi jali nyulu yabimba nganyi. Baki jaliyi nyulu yurlwa yalungi marda bukambijuyngka, baki marda yalimi yanyba nangangi, miku nyuliyi mili jilajba jurjyurri. Miku nyuliyi mili jungku yalundu. Barriwa.
MAT 18:18 Kudanyu ngayu karungka narrinya, jaliyi narri manjamanjamba balki yaji yalungi, baki Kudwanyi janyulu najba yalunya jungunkanyi kunybana yuwana. Ngala jaliyi narri miku manjamanjamba yalungi balki yaji, baki yuwajiwa jayalu jungku balkina yuwana.
MAT 18:19 Baki mili jangkurranyi ngayu karungka narrinya. Jaliyi yiningki kujarra, yiningki murrku narringi, jaliyi yalu yanyba mududu nangangi Kudkanyi nanankanyi yajinyi, jaliyi yalu ngajaka Kud nanankanyi yajinyi, baki ngakinyi Buwakayu Kingkarri janyulu yabimba nanda jala yalu ngajaka.
MAT 18:20 Jala yiningki kujarra, yiningki murrku malumba yalu jungku, jaliyi yalu ngakinmuku kandimuku, jaliyi yalu kuyu ngaki jangkurr, baki jangayu ngayu jungku yalundu marda. Ngaki ngarndu janyulu jungku yalundu kandimbiji yalunyaja. Barriwa.”
MAT 18:21 Baki jilajbayi Bida nangandurri Jisusyurri, baki ngajaka nyuli, “Mambuka, jala yingkawanyi kandiwanyi nyulu yabimbaka balki yaji ngaki, baki marda ngayimi manjamanjamba nanda balki yaji nangangi. Ngala jalili nyulu yabimbaka balki yaji ngaki yurrngumba barri, baki yankana marda ngayimi manjamanjamba nangangi balki yaji. Kujarraka baki kujarraka baki kujarraka barndayka kuna. Wanyi ninji yanyba.”
MAT 18:22 Jananganjayi Bida Jisuswanyi, “Miku ngawamba kujarraka baki kujarraka baki kujarraka barndayka, ngala marda ninjimi yurrngumba manjamanjamba nanda balki yaji, jalili nyulu yabimba nganyi. Marda nganyingkimi miku kurrkunba manjamanjambikanyi nangangi balki yaji yurrngumba.
MAT 18:23 Muningka jangayu karu narrinya nanginkanyi jangkurranyi. Nanda walkurra mambuka, kaja nanganginmuku wakiwarrmuku. Kudiya yali jilajba nangandurri mambukarri, wudumbiji dungala nanganbunanyi. Jayalu wiykunumba nanda dungala nangandurri baku. Badajbaja yingkana yakarlina, baki yingkana yakarlina baki yingkana yakarlina, ngala miku yaliyanyi wiykunumba nanda dungala nangandurri mambukarri.
MAT 18:24 Kuyu yali yingka wakiwarr nangandurri mambukarri. Wabula, nanangini wakiwarranyi, nyuli wudumba kaja dungala nanganbunanyi, wirdikudukudu dungala, barrinani 1,000,000 dula,
MAT 18:25 ngala mikuyaji kajanyi dungalanyi nangandu wiykunumbikanyi mambukarri. Nanankardi barri nanda mambuka nyuli kijiwijba nanankanyi nganiyngkanyi. Jirrinyba nyuli yingka wudumbiji nanda wakiwarr, marda nangangi maninganja, marda jandanyimuku. Janyulu wudumba yalunya, baki wajbaja yingka nganinyi dungalanyi, barrinani waykanyi yingka bulukinyi dungalanyi. Nani barri nanganginyi mambukawanyi janyulu wudumba nanda dungala, jala miku nyuliyi wiykunumba wakiwarranyi. Nani barri nyuli jirrnyba yingka wudumbiji nanda wakiwarr.
MAT 18:26 Jali manku nanda jangkurr wakiwarranyi, baki jilajba nyuli nangandurri mambukarri. Mururu nyuli wayka nangandu, baki ngajaka nyuli, ‘Yukumbakiyi mili nayiba ngaki, baki janinga wajba bukamba nanankanyi dungalanyi. Ngindu ngayu muwa nganyi, mikungangi ningiyanyi wajba wabula nanankanyi dungalanyi. Jaliyi ninji yukumba bijal mili, baki janinga wajba dungalanyi.’ Barriwa. Nani nyuli yanyba nanganginkanyi mambukanyi.
MAT 18:27 Baki nanda mambuka, nyuli ngindu muwa nanankanyi nganiyngkanyi baki yangkalamba nangki kulaji. Yuku barri. Miku nyuliyi wiykunumba nangandurri nanda dungala. Yuku barri, nyulu kiliyi nanda kaja dungala nangandu.
MAT 18:28 Ngala nanda wakiwarr, nyuli barlba mambukananyi, baki wijba nyuli nanganginkurri barndarri. Ngala nyuli jilajba, baki najba nyuli yingka wakiwarr, jali wabula wudumba bijal dungala nanganbunanyi, baki jilijbawa wiykunumbaja nanda dungala. Najba nyuli nanda yingka wakiwarr, baki kijiwijba nyuli nangangi. Marrimba nyuli nanda dujana ngurlkumbayi duka. Kaya nyuli nangangi, ‘Wiykunumbakiyi nanda dungala jali ninga wajba. Barriwa wiykunumbakiyi yinarramba.’
MAT 18:29 Ngala nanda yingka wakiwarr, nyuli yirrba jambarri, baki kudanyu nyuli yilikajba, ‘Yukumbakiyi bijal mili, baki jangayu wiykunumba bukamba dungala.’
MAT 18:30 Ngala miku nyuliyanyi ngindu muwa, nanda waluwinyi wakiwarr. Jardibirri nyuli muwa. Karu nyuli yilarrmuku nanankanyi yingkanyi wakiwarrayngka, baki yali wudumba nanda yingka, baki janybayi brisinyurri. Nanaba janyulu jungku yurrngumba nanankurri jalija nyulu wiykunumba bukamba dungala nangandurri.
MAT 18:31 Ngala yingkamuku wakiwarrmuku, yali jingkijba nanda yaji. Yali najba nanda wakiwarr jilaykurri brisinyurri, baki ngindu yali muwa nangangi. Kudanyu yali ngindu muwa nangangi, baki jilajba yali nangandurri mambukarri. Karu yali mambuka nanankanyi wakiwarrayngka, manjijbayi brisinyurri nanangini waluwinyiwanyi wakiwarranyi.
MAT 18:32 Baki kijiwijbayi nanda mambuka nangangi. Manjijba nyuli yingka wudumbiji nanda waluwinyi wakiwarr. Badajba nyuli mambukarri, baki yanybayi mambuka nangangi, ‘Ninji balkimirra. Miku ngayiyanyi yabimba kiji nganyi, ngala ngayi ngindu muwa nganyi. Manjamanjamba ngayi nanda kaja dungala jali ninji wudumba ngakinbunanyi. Manjamanjamba ngayi nanda dungala jali nganinji ngajaka.
MAT 18:33 Ngala wanyingkanyi miku ninjiyanyi ngindu muwa nanankanyi, jali nyulu wudumba bijal dungala nganyinbunanyi. Wanyingkanyi ninji yabimba kiji nangangi.’
MAT 18:34 Baki nanda mambuka, nyuli ngarrangarra muwa nanankanyi balkinyi wakiwarrayngka. Kudanyu nyuli ngarrangarra muwa nangangi. Manjijba nyuli nanda brisinyurri, baki nanaba nyuli jungku yurrngumba nanankurri jalija nyulu wiykunumba bukamba nanda kaja dungala nangandurri mambukarri.” Barriwa.
MAT 18:35 Baki yanybayi Jisus yalungi, “Ngaki Buwakanya Kingkarri, nyulu lalanbawarr. Ngala jaliyi narri jungku barrinani nanda balki wakiwarr, jaliyi narri miku manjamanjamba yingkanyi nangangi balki yaji, baki miku nyuliyi manjamanjamba narringi balki yaji ngakinyi Buwakayu. Ngala jaliyi narri manjamanjamba yingkanyi nangangi balki yaji, baki janyulu marda manjamanjamba narringi balki yaji. Barriwa.”
MAT 19:1 Jali bukamba yanyba Jisus nani yalungi, baki yali barlba nanamunanyi yajinanyi Kalilinanyi, Jisus marda nanganginmuku kandimuku. Jilajba yali kula yingkayurri yajiyurri, niji Judiya. Birlbidamba yali bundal niji Jurdan, baki jilajba yali kula Judiyayurri.
MAT 19:2 Kajamuku yali jilajba nangandu Jisusnyina, ngala nyuli jilajba. Kunymamba nyuli nanamuku jali yalu lunji. Kunymamba nyuli yalunya jali yalu jilajba nangandurri.
MAT 19:3 Baki jawuda Barasimuku yali jilajba nangandurri. Balanja yali Jisus. Ngajaka yali Jisus Barasimukunyi, “Jaliyi nyulu yingkijba nangangi maninganja nganinyiwanyi, jaliyi muningka nyulu manjijba nanda jibarri nanganbunanyi, miku nyulu mili nangangi maninganja, baki jungkuka kuna nyulu kunybana yuwana. Wanyi ninji yanyba.” Nani barri yali ngajaka Jisus balanjanki.
MAT 19:4 Jananganja yalunyi Jisuswanyi, “Miku kuna narrimi jingkijba nanda jangkurr najana Kudkanyi. Nayi barri yanybaka nanda jangkurr, ‘Juju wabula kamambarra, jala mikuyaji yajinyi, baki yabimbayi bukamba yaji Kudwanyi. Yabimba nyuli nganinyi marda jibarri.
MAT 19:5 Baki yanybayi Kud, “Mardakimi nganinyiwanyi yingijba bulanya nijanganjinyi marda ngardanganja. Marda nyulimi maninganja wudumba, baki jabula malumba jungku yurrngumba. Maykarra bula. Waluku bula kujarra, ngala bayngkani barri bula maykarra, barrinani yingamali.’”
MAT 19:6 Maykarra bula jungkuka malumba barrinani yingamali. Yanybaka Kud, ‘Jala nanankujarra maykarra jungkuka barrinani yingamali, baki mardakimi yingkawanyi miku nyalimba bulanya. Mardakimi miku nyalimba bulanya yingkawanyi.’ Nani barri yanybayi Kud, baki nanankardi marda nyulimi miku manjijba nangangi maninganja nganinyiwanyi.” Barriwa. Nani barri jananganjayi yalunya Jisuswanyi.
MAT 19:7 Ngala mili barri yali ngajaka Jisus, “Ngala wanyingkanyi Musiswanyi wajbayi ngambalanya yinini yuwanyi maykarrayngka. Nanda nangangi yuwa yanybaka, ‘Yuku nyulu wajba nangangi maninganja najanyi nganinyiwanyi. Yuku nyulu wajba najanyi jala yanybaka, miku nanda jibarri mili nangangi maninganja. Yuku nyulu wajba jibarri nanankanyi najanyi, baki muningka manjijba nanda jibarri nanganbunanyi.’ Wanyingkanyi wajbayi ngambalanya nanankanyi yinini yuwanyi Musiswanyi.”
MAT 19:8 Jananganjayi yalunya Jisuswanyi, “Nani barri yanybayi Musis, jingkijbangangi nyuli narrinya, narri jardibirri kurdulu nangangi Kudkanyi. Miku narriyi kuyu nangangi jangkurr, jala nyulu milidimba narrinya Kudwanyi. Ngala jalannga barri jali yabimba nganinyi baki jibarri Kudwanyi, baki miku nyuliyanyi yanyba nani barri, manjiykanyi maninganja nanganbunanyi najayudi. Miku nyuliyanyi yanyba nani jalannga barri.
MAT 19:9 Ngayu karungka narrinya, jaliyi muningka nyulu manjijba nangangi maninganja nanganbunanyi nganinyiwanyi, jaliyi muningka manjijba nanganbunanyi, ngala miku nyuliyanyi kuluka yingkana nganinyina nanda jibarri, baki nanda balki. Nyulu jungkuka balkina yuwana Kudkanyi nanda nganinyi. Baki jaliyi nyulu kuyu yingka jibarri nanganginkanyi maninganjanyi, baki nanda balki. Nyulu jungkuka balkina yuwana Kudkanyi, yuwajiwangangi nanda waluwinyi jibarri nangangi maninganja. Nani ngayu karungka narrinya manjiykanyi nanda nganyi maninganja. Barriwa.”
MAT 19:10 Kamu barri yanybayi kandimuku Jisuskanyi nangangi, “Nanda yuwa jala ninji yanybayi bulangi maykarrayngka, nanda jardibirri yuwa ngambala durriykanyi. Jaliyi nyulu balki jibarri ngala miku nyuliyanyi kuluka yingkana nganinyina, baki miku nyuliyi manjijba nanganbunanyi nawinganjawanyi. Marda ngambalimi miku jamalu jibarri. Marda ngambalimi jungku nyubana.”
MAT 19:11 Jananganjayi yalunya Jisuswanyi, “Nanda jangkurr maykarrayngka, yi, nanda jardibirri jangkurr durriykanyi, ngala miku ngayiyanyi yanyba nanda jangkurr bukambijuyngka yalungi. Ngala kudiyawanyi jayalu durrijba nanda jangkurr, jayalu mirnarrijba muwa nanankanyi jangkurranyi, miku muningka manjiykanyi nanda maninganja nangangi. Ngayi yanyba nanda jangkurr yalungi, jalija durrijba nanda jangkurr ngaki.
MAT 19:12 Ngala jawudamukunyi, miku yaliyi jamalu nanda jibarri. Yingkamukunyi, miku yaliyi jamalu nanda jibarri, mikungangi yaliyi yabimba jibarri ngawukuku. Nanankardi barri miku yaliyala jamalu nanda jibarri. Ngala yingkamuku barri, miku yalimi nulijba jibarrinyi, jungkungangi yalu barrinani buluki, jali yalunya karlba nganinyiwanyi. Nanankardi barri miku yaliyala jamalu nanda jibarri. Ngala yingkamukunyi barri, miku jayalu jamalu nanda jibarri, nulijbangangi yalu wakinkanyi nangangi Kudkanyi yurrngumba barri. Mankumanku yalungka, ‘Jaliyi ngayu jamalu nanda jibarri, baki baku barri janungkala jungku jirdi kajanyi bayamukuyngka. Jaliyi ngayuman jungku, baki yuku ngayu jilalajba yingkarri yajiyurri baki yingkarri yajiyurri karunki yalunya nangangi Kudkanyi. Ngala jaliyi ngayu jungku jirdi maninganjanyi baki bayamukuyngka, baki marda ngayimi wambu jungku lalanbijina yalunya bayamuku baki maninganja.” Nanankardi barri miku yaliyala jamalu nanda jibarri, ngala yali waki nangangi Kudkanyi. Yi, jardibirri nayinda jangkurr, ngala kudiyawanyi jayalu durrijba nayinda jangkurr, jayalu jungku nani barri.” Barriwa.
MAT 19:13 Baku barri, kudiyawanyi yali kuyu bayamuku nangandurri Jisusyurri. Kaja bayamuku yali kuyu nangandurri. Nulijba yali nangangi, nangka yarriykanyi marni yalundu, nyulu yanybikanyi mududu nangangi Kudkanyi yalungi. Baki janyulu lalanba yalunya Kudwanyi, janyulu yabimba kunyba yaji yalungi. Ngala nanganginmuku kandimuku Jisuskanyi, yali ngirrwa yalungi. Kudanyu yali ngirrwa yalungi, jali kuyu bayamuku nangandurri.
MAT 19:14 Ngala yanybayi Jisus yalungi nanganginmukuyngka kandimukuyngka, “Janarri munyajba bayamuku jilaykanyi ngakindurri. Marda narrimi miku kurrkunba yalunya. Nanginmukunyi bayamukunyi, ngana yalu jingkijbangka, miku ngayimi jujambawarr. Yalu kuyungka ngaki jangkurr, baki nanankardi nyulu lalanbaka yalunya Kudwanyi. Jaliyi nganinyiwanyi jingkijba ngana barrinani nanginmukunyi bayamukunyi ngana yalu jingkijbangka, baki janyulu marda lalanba nanda Kudwanyi, barrinani nyulu lalanbaka nanginmuku bayamuku. Nanankardi barri janarri munyajba bayamuku jilaykanyi ngakindurri.” Barriwa.
MAT 19:15 Baki yarrijba nangki Jisus marni yalundu bayamukunyina. Yanyba nyuli mududu nangangi Kudkanyi yalungi. Ngajaka nyuli Kud, nyulu lalanbiji yalunya. Nani nyuli yabimba yalungi, baki barriwa nyuli barlba. Mili nyuli jilajba kula barri.
MAT 19:16 Baku barri badajbayi nganinyi nangandurri Jisusyurri, baki yanyba nyuli nangangi, “Milidimbawarr. Wanyi kunyba yaji jangayu yabimba, baki janyulu wankamba ngana Kudwanyi, ngayu jungunkanyi mili wanka nangandu yurrngumba barri. Wanyi kunyba yaji jangayu yabimba.”
MAT 19:17 Jananganjayi nanda nganinyi Jisuswanyi, “Wanyingkanyi nganinji ngajaka kunybanyi yajinyi. Ngawamba Kud, nyulu kunyba. Yingkamuku miku yalimi kunyba. Jaliyi ninji nulijba jungunkanyi wanka yurrngumba barri, baki marda ninjimi durrijba nanda yuwa nangangi Kudkanyi yurrngumba barri.”
MAT 19:18 Mili barri ngajakayi Jisus nganinyiwanyi, “Wanyi barri nanda yuwa nangangi Kudkanyi jala marda ngayimi durrijba yurrngumba barri. Wanyi barri yuwa.” Baki jananganjayi Jisuswanyi, “Ninji jingkijbangka nanda yuwa nangangi Kudkanyi, jali nyulu jirrinyba narrinya bukambiju. Nayinda nanda yuwa nangangi Kudkanyi. Mikujiyi kurdanba nganinyi. Mikujiyi kuluka yingkana jibarrina jala miku nganyi maninganja. Mikujiyi maninjakujba yaji. Mikujiyi jujamba yaji yalungi yingkamukuyngka.
MAT 19:19 Marda ninjimi maruka muwa yalungi yingkamukuyngka barrinani nganyingka maruka muwa. Kuyukiyi bulangi jangkurr, nganyingkanyi nijanganjiykanyi baki yarrijiyngkanyi. Nani barri nanda yuwa jala marda ninjimi durrijba.”
MAT 19:20 Yanybayi nganinyi Jisuskanyi, “Ngayangayijba ngayu nanankanyi yuwanyi yurrngumba barri. Yurrngumba ngayu ngayangayijba bukamba nanankanyi yuwanyi. Wanyi yingka yaji marda ngayimi yabimba, ngayu jungunkanyi wanka nangandu Kudnyina.”
MAT 19:21 Baki jananganjayi Jisuswanyi, “Jaliyi ninji nulijba jungunkanyi kunyba nangangi Kudkanyi yurrngumba barri, jaliyi ninji nulijba jungunkanyi nani barri, baki marda ninjimi yabimba nayi barri. Barlbakiyi, baki wajbakiyi yingkamuku bukamba nganyingkanyi yajinyi dungalanyi. Janinji wudumba kaja dungala nganyingkanyi yajinyi. Wajbakiyi yalunya nanankanyi dungalanyi, nanamuku jala yalu jungku mikuyaji dungalanyi. Wajbakiyi yalunya nanankanyi kajanyi dungalanyi. Baki barriwa, baki wijbakiyi ngakindurri. Jilalajbakiyi ngakindu yurrngumba barri. Baki yuku barri janyulu mirnarrijba Kud muwa nganyi, janyulu mili wankamba ninya.” Barriwa.
MAT 19:22 Jali nyulu manku nanda jangkurr nangangi Jisuskanyi nganinyiwanyi, baki barlba nyuli. Baki ngindu nyuli muwa nanankanyi jangkurranyi. Ngindu nyuli muwa, jungkungangi nyuli kajayudi yajiyudi marda dungalayudi. Barlba nyuli nanganbunanyi Jisusnanyi, ngala miku nyuliyala yabimba nanda jali karu Jisuswanyi.
MAT 19:23 Baki yanybayi Jisus nanganginkanyi kandimukuyngka, “Warriyaluku barri, jala nyulu kajayudi yajiyudi baki dungalayudi. Jardibirri nyulu jungunkanyi kandi nangangi Kudkanyi, nyulu lalanbikanyi Kudwanyi. Jardibirri nyulu jungunkanyi kandi nangangi Kudkanyi jala nyulu kajayudi yajiyudi.
MAT 19:24 Mili ngayu karungka narrinya. Jala nganinyi jirdi kajanyi yajinyi, jala nyulu nulijba jungunkanyi kandi nangangi Kudkanyi, baki nanda jardibirri. Jalimi nanda kamil ngankijba kalawunyi yamina nidilina, baki nanda jardibirri. Mikuwali ngankijba. Ngala jala nganinyi jirdi kajanyi yajinyi, jala nyulu kuyu jangkurr nangangi Kudkanyi, jala nyulu kandi nangangi Kudkanyi, baki nanda jardibirri nyulu kudanyu barri.” Barriwa.
MAT 19:25 Baki nyuli ningkijba yalunya Jisuswanyi, baki jananganjayi, “Miku yalungkimi wankamba. Miku. Ngawamba Kudwanyi, yuku nyulu wankambaja yalunya mili. Yuku barri nyulu. Ngawamba Kudwanyi, yuku nyulu marrimbaka yalunya mardarda. Yuku nyulu yabimbaka bukamba yaji Kudwanyi.” Jali yalu manku nanda jangkurr nangangi Jisuskanyi, baki manmala yali kandimuku. Manmala yali kudanyu barri, baki ngajaka yali Jisus, “Jaliyi jardibirri jungunkanyi kandi nangangi Kudkanyi, baki wanyimuku janyulu marrimba yalunya mardarda Kudwanyi. Wanyimuku jayalu wankijba mili nangandu kingkarri.”
MAT 19:27 Yanybayi kandi Bida nangangi, “Ngala nurru barri, yingijba nurri bukamba nurrungi yaji nganyi, baki jilajba nurri nganyindu. Baki nanankardi barri wanyingkanyi yajinyi janurrunya wajba Kudwanyi. Wanyingkanyi yajinyi barri.”
MAT 19:28 Jananganjayi Jisuswanyi, “Karungka ngayu duja jangkurranyi. Nanda jala ngaki kandi, nyuli yingijba bukamba nangangi yaji ngaki. Yingijba nyuli nangangi barnda. Marda yingijba nyuli yalunya, buwanganjamuku, marda majunganjamuku, marda bababanyamba nyulu yalunya. Yingijba nyuli nangangi ngardanganja marda nijanganjinyi. Yingijba nyuli yalunya nanganginmuku jandanyimuku marda, baki kardikardimba nyulu yalunya, baki yingijba nyuli nangangi jamba. Bukamba nanganginmuku nyuli yingijba yalunya ngaki. Ngala jangayu wajba nanda yingkanyi yajinyi. Kajanyi yajinyi jangayu wajba nanda, mili baki mili. Baki janyulu jungku mili wanka yurrngumba. Janyulu jungku mili wanka kingkarri nangandu Kudnyina. Kajamuku jala ngamu yalu walkurra, janyulu baku bayakardamba yalunya Kudwanyi. Janyulu bayakardamba yalunya, jala ngamu yalu walkurra. Ngala yingkamuku jala yalungka mankumanku, yalu bayakarda, janyulu walkurramba yalunya Kudwanyi. Janyulu walkurramba yalunya barri. Ngala narri barri, baku barri janarri jungku kingkarri nangandu Kudnyina. Baku barri, jalija nyulu yabimba bukamba yaji buyingkinyi Kudwanyi, baki ngayu Buwanya Bukambijuyngka, jangayu jungku mambuka bayngkani nangandu Kudnyina. Baki narri marda, ngakinmuku 12 kandimuku, janarri jungku kingkarri ngalindu. Janarri jungku mambukamuku bayngkani ngalindu. Janarri jungku mambukamuku bukambijuyngka yalungi jalija nyulu mili wankamba yalunya Kudwanyi. Janarri mambukamuku yalungi narringinmukuyngka mungkijimukuyngka.” Barriwa. Nani yanybayi Jisus yalungi.
MAT 20:1 Baki mili barri milidimbayi yalunya Jisuswanyi, “Jangayu mili karu narrinya nangangi Kudkanyi, nyulu lalanbawarr yalungi jala durrijba nangangi jangkurr. Muningka barri jangayu karu narrinya mambukanyi. Walajbayi nanda mambuka ngala nyulu kambalingijba yaji, baki jilajba nyuli yingkarri barndarri wudumbiji jawuda, yalu wakinkanyi nangangi. Wudumba nyulu yalunya, yalu wakinkanyi nanganginyina jambana, jala jardiykunumba nyulu krayib wanjirr.
MAT 20:2 Karu nyuli yalunya, janyulu wajba yalunya dungalanyi. Janyulu wajba yalunya barrinani 20 dulanyi, jaliyi yalu waki nangangi wujuju barri. Baki nyuli manjijba yalunya wakinkanyi nanganginyina jambana.
MAT 20:3 Kamu barri ngala nyulu yuwajiwa yalibala, jilajbayi nanda mambuka yingkarri barndarri, baki najba nyuli nganinyimuku jungunkurri nanaba.
MAT 20:4 Baki nyuli yanyba nanamannga jangkurr yalungi, janyulu wajba yalunya dungalanyi jaliyi yalu waki nanganginyina jambana.
MAT 20:5 Baki yali marda jilajba, baki wakiyi nangangi. Kamu barri mukunjana, jilajbayi nanda mambuka yingkarri barndarri, baki wudumba nyuli mili nganinyimuku. Karu nyuli yalunya nanamannga jangkurranyi, baki yalu marda jilajbayi, baki wakiyi nangangi. Baki kamu barri ngabungabu bijal, mili nyuli wudumba yalunya, yalu wakinkanyi nangangi dungalanyi.
MAT 20:6 Baki kamu barri ngabungabu, mili nyuli jilajba yingkarri barndarri baki najba nyuli nganinyimuku muningka jungunkurri nanaba. Ngajaka nyuli yalunya, ‘Wanyingkanyi narri muningka jungku wujuju, miku wakinkanyi. Wanyingkanyi barri. Jaliyi narri waki, baki janarri wudumba dungala mamanyi. Wanyingkanyi narri miku wakingka.’
MAT 20:7 Jananganja yali nanda mambuka, ‘Nurrimi waki, ngala mikuyaji wudumbikanyi nurrunya, wakinkanyi nangangi.’ Baki yanybayi nanda mambuka yalungi, ‘Yuku janarri waki ngaki. Jilajba janarri ngakindurri jambarri jali jardijba krayib wanjirr. Nanaba janarri waki ngaki dungalanyi.’ Nani nyuli yanyba yalungi, baki barlba yali, waki yali nangangi.
MAT 20:8 Kamu barri ngabungaburri ngala nyulu karrala kamba wayka bayungu, baki yanybayi nanda mambuka nanganginkanyi walkurrayngka wakiwarrayngka jali waki nangangi yurrngumba barri. Karu nyuli nanda walkurra wakiwarr. ‘Wudumbakiyi yalunya jali yalu waki jala ngakinyina jambana, baki wajbakiyi yalunya dungalanyi. Waluku barri janinji wajba yalunya dungalanyi jali yalu waki ngawamba bijal ngaki ngabungabunanyi. Baki bayngkani janinji wajba yalunya dungalanyi jali yalu waki ngaki bijal mili, bijalnanyi ngabungabunanyi, baki bayngkani yalunya jali yalu waki ngaki mukunjanananyi, baki bayngkani yalunya jali yalu waki ngaki yalibalananyi. Baki bayngkani janinji wajba yalunya jali yalu waki ngaki wujuju yurrngumba kambalingiykanyi yaji. Nani barri janinji wajba yalunya dungalanyi.’ Barriwa.
MAT 20:9 Baki kaya nyuli yalungi, baki wajbayi yalunya dungalanyi. Nanamuku jali yalu waki ngawamba bijal, wajba nyuli yalunya dungalanyi barrinani 20 dulanyi. Nani nyuli wajba yalunya bukambiju wakiwarr nanamannga dungalanyi barrinani 20 dulanyi, nanamuku jali waki bijal nangangi mambukanyi, baki nanamuku jali yalu waki kudanyu nangangi. Nanamannga dungalanyi nyuli wajba yalunya.
MAT 20:10 Ngala nanamuku lirrkamuku jali yalu waki nangangi yurrngumba wujuju, ngamu jayalu wudumba mili dungala yalungi jala waki ngawamba bijal, ngala miku. Nyuli wajba yalunya nanamannga dungalanyi barrinani 20 dulanyi. Nanamannga dungalanyi nyuli wajba yalunya bukambiju.
MAT 20:11 Ngala nanamukunyi lirrkamukunyi, yali kuyu yalungi dungala, ngala balkijba yali muwa nanankanyi dungalanyi. Baki jakakajba yali nanankanyi mambukanyi, wirangu dungala. Nulijba yali mili dungalanyi.
MAT 20:12 Yanyba yali nangangi mambukanyi, ‘Nanamuku jadunyimuku wakiwarrmuku, waki yali ngawamba bijal nganyi, ngala nurru barri, waki nurri kudanyu nganyi wujuju barri, ngala nyulu ngarrangarra yaji kudanyu barri. Ngala wajba ninji yalunya nanamannga dungalanyi barrinani ninji wajba nurrunya. Miku ninjiyanyi wajba nurrunya mili dungalanyi yalungi.’
MAT 20:13 Ngala jananganjayi yalunya mambukawanyi, ‘Manku narri ngaki jangkurr. Miku ngayiyanyi jujamba narrinya. Miku. Wajba ngayi narrinya nanankanyi dungalanyi, 20 dulanyi jali narrinya karu, jangayu wajba. Ngayangku narri wakinkanyi 20 dulanyi, baki narrinya wajbayi 20 dulanyi. Miku ngayiyanyi jujamba narrinya. Miku.
MAT 20:14 Ngala kuyu janarri nayinda dungala, baki wijba janarri narringinkurri barndarri. Marda narrimi mirnarrijba muwa nanankanyi dungalanyi. Nulijbangka ngayu yabimbikanyi kunyba yaji bukambijuyngka yalungi jala yalu waki ngaki. Nulijbangka ngayu waykanyi narrinya bukambiju nanamannga dungalanyi.
MAT 20:15 Nayinda ngaki dungala, baki yuku jangayu ngayu wajba yalunya nanginkanyi dungalanyi, yingka baki yingka baki yingka. Yiningki narri ngurunguru yalunya, wajbangangi ngayi yalunya nanamannga dungalanyi. Yiningki narri kuliwijba dungalanyi.’ Barriwa. Nani barri jananganjayi mambukawanyi.
MAT 20:16 Ngayu karungka narrinya. Nanamuku jali yalu waki ngawamba bijal nangangi mambukanyi, yalu barrinani nanamuku jala yalu kuyu ngaki jangkurr, ngala marndakaja jayalungka janyba. Ngawamba bijal mili yalu wanka jungku nayiba jambana, ngawamba bijal jayalu waki ngaki. Ngala janyulu yabimba kunyba yaji yalungi Kudwanyi, janyulu mili wankamba yalunya, yalu jungunkanyi nangandu kingkarri. Ngala nanamuku jali yalu waki kudanyu nangangi wujuju barri, yalu barrinani nanamuku jala yalu kuyu ngaki jangkurr, ngala yuwajiwa jayalu jungku wanka nayiba jambana yurrngumba barri. Kudanyu jayalu waki ngaki yurrngumba barri. Baki janyulu yabimba nanamannga kunyba yaji yalungi Kudwanyi, janyulu mili wankamba yalunya marda, yalu jungunkanyi nangandu kingkarri. Janyulu yabimba nanamannga kunyba yaji bukambijuyngka yalungi jala yalu kuyu ngaki jangkurr. Barriwa.”
MAT 20:17 Baku barri jilajba yali kula Jirusalimyurri, Jisus marda nanganginmuku kandimuku. Yingkamuku yali jilajba kula nangandu. Baki nyuli yanyba yalungi nanganginmukuyngka kandimukunyi. Kardarda nyuli yanyba yalungi. Mikuyaji yingkanyi mankunkanyi nangangi jangkurr, ngawamba kandimukuyngka. Nayi nyuli yanyba yalungi ngala yali jilajba,
MAT 20:18 “Narri. Ngambala jilajbangka kularriji. Ngambala jilajbangka nanankurri Jirusalimyurri. Janganjalu wudumba, Buwanya Bukambijuyngka. Janganjalu wudumba walkurrawanyi mambukawanyi jurjkanyi, marda milidimbawarrmukunyi yuwanyi. Jayalu yanyba ngaki, marda ngakimi janyba.
MAT 20:19 Baki ngaki jayalunjalu wajba ngurranyimuku. Janganjalu bajalingijba nanamukunyi ngurranyimukunyi. Jayalu yanyba balki jangkurr ngaki. Jayalu kakalijba ngaki. Janganjalu wajuba kurulyudinyi. Janganjalu langandaba wabangkarra kurndana. Nani barri janganjalu kurdanba barri. Ngala baku barri, kujarraka barndayka jangayu mili wankijba. Nanamanji barri jangayu mili wankijba.” Nani barri yanybayi Jisus yalungi nanganginmukuyngka kandimukuyngka.
MAT 20:20 Ngala yali jilajba kula yubalina, baki jilajbayi jibarri bundu nangandu Jisusyurri. Nyuli maninganja nangangi Sibidikanyi, baki nyuli ngardanganja bulangi buwakulayngka, niji bulangi Jayims marda Jun. Jilajba nyuli bundu nangandurri, baki nanganginwuya kulunganjawuya jilajba buli bayngkani nangandu. Mururu nyuli wayka walu nangandu, baki ngajaka nyuli Jisus, nyulu yabimbiji kunyba yaji nangangi.
MAT 20:21 Ngajakayi jibarri Jisuswanyi, “Wanyimba jangayu nganyi. Wanyimba.” Jananganja nyuli jibarriwanyi, “Mambuka, janinji kuna yabimba kunyba yaji nurrungi. Ninga ngajakangka, janinji kuyu bulanya ngakinkuya jandanyiwuya kingkarri nganyindu. Janinji kuyu bulanya kingkarri nganyindu, bula jungunkanyi nganyindu, jungunkanyi yingka jinyanyina nganyindu, yingka wakunyina nganyindu barrinani mambukawuya bayngkani nganyindu. Nani barri kuna jabula jungku nganyindu, jalija ninji jungku walkurra mambuka kingkarri yajina Kudkanyi.”
MAT 20:22 Jananganjayi yalunya Jisuswanyi, “Miku narrimi jingkijba nanda jangkurr jala nganarri ngajaka. Janganjalu linjumba. Janganjalu kurdanba. Nani kuna jayalu linjumba nimbalanya, jayalu kudanyu linjumba nimbalanya marda. Nulijba kuna nimbala nanankanyi linjumbikanyi nimbalanya, barrinani jayalu yabimba ngaki yaji. Nani kuna nimbala nulijba.” Jananganja buli buwakulawanyi, “Yuku barri ngali. Yuku jayalu ngalinya linjumba nani barri.” Barriwa.
MAT 20:23 Baki mili yanybayi Jisus bulangi, “Jayalu linjumba nimbalanya, jayalu kudanyu linjumba nimbalanya, barrinani janganjalu linjumba. Ngala wanyimuku jayalu jungku walkurra ngakindu. Miku ngayiyi yarrijba yalunya jalija yalu jungku walkurra ngakindu. Ngala ngakinyi Buwakayu janyulu nyulu yarrijba yalunya yingka jinyanyina, baki yingka wakunyina ngakindu. Birrirrinja nyuli nanamukuyngka jalija yalu jungku mambuka bayngkani ngakindu. Yiningki nimbala, yiningki yingkamuku.” Barriwa.
MAT 20:24 Ngala manku yali yaji yingkamukunyi kandimukunyi. Manku yali bulanya ngajakankurri Jisus nanankanyi yajinyi, baki yali ngarrangarra muwa bulangi. Baki ngirrwa yali bulangi.
MAT 20:25 Baki nyuli karu yalunya Jisuswanyi, yaluja jilajba nangandurri, baki nyuli yanyba yalungi, “Narri barri, jingkijba narri yalunya walkurramuku mambukamuku ngurranyimuku. Yalu yanybaka nyilala jangkurr yalungi. Yalu ngirrwawarrmuku.
MAT 20:26 Ngala narri barri, marda narrimi miku jungku walkurra mambuka barrinani yalu ngurranyimuku jungkuka walkurra mambuka. Miku. Jaliyi yingamali narringi, jaliyi nyulu nulijba jungunkanyi walkurra mambuka, baki marda nangkimi bayakardamba. Marda nyulimi lalanba yalunya yingkamuku. Marda nyulimi waki yalungi yingkamukuyngka.
MAT 20:27 Jaliyi nyulu nulijba jungunkanyi mili walkurra yalungi, baki marda nyulimi jungku barrinani wakiwarr yalungi, marda nyulimi waki kudanyu yalungi yurrngumba barri.
MAT 20:28 Marda nyulimi jungku barrinani ngayu. Ngayu Buwanya Bukambijuyngka yalungi, ngala badajba ngayi lalanbiji yalunya, miku yaluwali lalanbiji ngana. Jayalu mili wankijba nangandu Kudnyina, janybangangi jangaka yalungi. Barriwa.”
MAT 20:29 Mili yali jilajba kula, baki wanbiya yali barrawuyabarrawuyana niji Jiriku. Baki mili yali barlba nanamunanyi bayungu, Jisus marda nanganginmuku kandimuku. Walajbayi walkurra muramuku, baki jilajba yali nangandu Jisusnyina.
MAT 20:30 Jungkuyi wilina yubalina kujarra nganinyiwuya kabujiwuya. Jali jilajba Jisus bundu bulandu, baki kaya buli nangangi nanankujarra kabujiwuya. Kudanyu buli kaya nangangi, “Ninji barri. Ninji Jandanyi nangangi wankalanyi Dayibidkanyi, ngindukiyi muwa ngalingi, kabujiwuyayngka. Ngindukiyi muwa ngalingi.” Nani buli kaya kudanyu barri nangangi.
MAT 20:31 Kajamuku yali ngirrwa bulangi kurrkunbiji bulanya kayankurri. Yanyba yali, “Kardakiyi jungku, Karda. Mikujiyi kaya.” Ngala mili barri kayayi kabujiwuya nangangi Jisuskanyi, “Ninji barri Jandanyi nangangi Dayibidkanyi. Ngindukiyi muwa ngalingi.”
MAT 20:32 Jilajbayi Jisus, baki karrinjayi. Baki nyuli kaya bulangi. Walajba buli, baki jilajba buli nangandurri. Jali bula wanbiya nangandu, baki ngajaka nyuli bulanya, “Wanyimba jangayu nimbalangi. Wanyimba.”
MAT 20:33 Jananganja buli Jisus, “Mambuka. Nulijba ngali nganyi, ninji waykanyi ngalinya kunybanyi yaminyi. Nulijba ngali nganyi, ninji kunymambikanyi ngalingi yami, baki jangali mili najba yaji.”
MAT 20:34 Baki nginduyi Jisus muwa bulangi. Manjijba nangki Jisus marni bulandurri. Marrimba nyuli bulanya yami, ngindungangi nyuli muwa bulangi. Marrimba nyuli bulangi yami, baki yinarramba yuku buli najba yaji. Yuku buli najba yaji, baki jilajba buli nangandu Jisusnyina. Baki mili yali jilajba bayungu Jirikunanyi.
MAT 21:1 Jilajba yali bayungu Jisus baki nanganginmuku kandimuku. Bunundujba yali Jirusalimyurri. Nanda barrawuyabarrawuya Jirusalim, nanda yaji bayinga, ngala nanda bayakarda barrawuyabarrawuya niji Bidbaj, nanda yaji kulaya, ngala langkiya barri nanda kulawira niji Yulib. Wanbiya yali barrawuyabarrawuyana Bidbaj, baki manjijbayi Jisuswanyi kujarra kandiwuya waluwa yalundu.
MAT 21:2 Jirrinyba nyuli bulanya, “Janimbala ngankijba nayinda barrawuyabarrawuya, baki nanaba janimbala wakaramba yirrikirri kijijinyi, marda nangangi bulungu, walkurra bijal nangandu. Janimbala dulaba kurul, baki kuyu nimbalaja bulanya ngakindurri.
MAT 21:3 Jaliyi yingkawanyi ngajaka nimbalanya, wanyimba nimbalaja nanda yirrikirri, baki janimbala jananganja, ‘Nyulu nulijbangka yirrikirrinyi nanda mambuka barri.’ Nani barri janimbala jananganja, baki yuku barri janyulu munyajba nimbalanya kuyunkanyi bulanya ngakindurri.”
MAT 21:4 Nani barri yanybayi Jisus bulangi kandiwuyayngka. Wankalana barri yanybayi nganinyi jangkurr Kudkanyi. Nayi nyuli yanyba, “Ngayu karungka narrinya jala jungku Jirusalim. Badajbangka nanginkurri narrindurri narringi mambuka walkurramirra. Ngala miku nyulimi ngabangabala yarramana barrinani yalu yingkamuku mambukamuku ngabangabala yarramana. Miku nangkiyi walkurramba. Ngala bayakardambaka nangka, baki ngabangabala nyulu yirrikirrina, jala bulungu, walkurra bijal.” Duja nanda jangkurr jali yanyba wankalanyi. Yabimbayi yaji nani Jisuswanyi. Barriwa.
MAT 21:6 Baki barlba buli kandiwuya, baki yabimba buli nanda jali karu bulanya Jisuswanyi.
MAT 21:7 Wudumba buli yirrikirri baki nangangi bulungu, baki kuyuyi nangandurri Jisusyurri. Dulaba buli bulangi danyan baki yarrijbayi nanda jumbala bulunguna ngulurrina. Baki jungkuyi Jisus yundu ngulurrina.
MAT 21:8 Kajamuku yali nangandu Jisusnyina, walkurra muramuku. Yingkamukunyi yali dulaba yalungi danyan, baki yarrijba yali yubalina, nanda yirrikirri jilaykanyi nyulu jumbalana. Ngala yingkamukunyi yali dalyamba wanjirr kurndananyi, baki yarrijba yali wanjirr yubalina. Nani barri yalili yabimba yaji, jalili badajba walkurra mambuka yidambiji yalunya.
MAT 21:9 Baki yingkamuku yali jilajba walu nangandu Jisusnyina, ngala yingkamuku yali jilajba bayngkani nangandu. Bukambiju yali kaya kunyba jangkurr nangangi Kudkanyi. Kudanyu yali kaya nangangi, “Nayinda nyulu barrinani jandanyi nangangi Dayibidkanyi. Nurru wajbangka Kud kunybanyi jangkurranyi nurrunginkanyi, nangangingangi Jisuskanyi. Ninya nurru ngajakangka, janinji yabimba kunyba yaji nangangi Jisuskanyi. Nyulu walkurramirra mambuka nurrungi Jumukuyngka. Mirnarrijba nurru muwa nangangi barri.” Nani barri yali kaya, ngala yali jilajba yubalina nangandu.
MAT 21:10 Jali ngankijba Jisus Jirusalim karrina, baki bukambiju jali yalu jungku nananyina yajina, walajba yali barndananyi. Najba yalunjali badaykurri baki kayankurri, ngala miku yaliyanyi jingkijba yaji. Yali yililikajba muramuku nangangi, “Nayinda nganinyi, wanyi nyulu, wanyi nyulu.” Nani barri yali yililikajba kudanyu yajinyi.
MAT 21:11 Baki jananganja yali, “Nayinda nganinyi, nyulu yanybawarr jangkurranyi Kudkanyi. Nangangi yaji langkurri niji Nasarid, nanayina walkurranyina yajina niji Kalili. Nyulu yanybaka jangkurr nangangi Kudkanyi.” Barriwa.
MAT 21:12 Baki ngankijbayi Jisus walkurranyina jurjina nanaba. Ngankijba nyuli, baki najba nyuli yalunya nanaba. Yalunjali wawajba yajinyi dungalanyi, baki wududumba yali bayngkani dungala yajinyi. Najbayi yalunya Jisuswanyi, baki ngarrangarrayi muwa. Baki jakajba nyuli yalunya bukambiju nanamunanyi jurjnanyi. Janyba nyuli yalungi darladarlamuku dungalayudi. Kudiya yali jungku darladarlana, jali yalunjalu wajba kulukukunyi dungalana. Baki janyba nyuli yalungi darladarla marda.
MAT 21:13 Baki ngirrwa nyuli yalungi, “Nanda naja nangangi Kudkanyi yanybaka, ‘Kajamuku jayalu badajba ngakinkurri walkurrayngkurri jurjyurri. Jayalu yanyba mududu ngaki nanaba.’ Nani barri yanybaka jangkurr najana Kudkanyi, ngala narri barri, narri maninjakumuku. Narri maninjakujbangka yaji nanginyina nanganginyina jurjina.” Nani barri nyuli ngirrwa yalungi kudanyu barri. Barriwa.
MAT 21:14 Jungkuyi Jisus jurjina, baki jawuda jirdi kabujinyi yaminyi, marda jirdi balkinyi nukaminyi, yali jila nangandurri. Jilajba yali nangandurri, baki nyuli kunymamba yalunya.
MAT 21:15 Ngala mambukamuku jurjkanyi, baki nanamuku jali yalu milidimba yuwanyi Musiskanyi, yali nanaba marda jurjina. Najba yali Jisus yabimbikurri ngiruka yaji. Baki manku yali bayamuku nanaba kayankurri, “Nayinda, nyulu mungkiji nangangi nanankanyi wankalanyi Dayibidkanyi. Nurru wajbangka Kud kunybanyi jangkurranyi nurrunginkanyi nangangingangi.” Nani barri yali manku bayamuku kayankurri, baki nanankardi ngarrangarra yali muwa nangangi Jisuskanyi.
MAT 21:16 Baki ngajaka yali Jisus, “Manku kuna ninji nanda jangkurr, jala yalu kayangka bayamuku. Miku yalungi jangkurr kunyba.” Jananganjayi yalunya Jisuswanyi, “Yi. Manku ngayu yalungi jangkurr. Nanda kunyba jangkurr yalungi barri. Miku kuna narriyanyi najba nanda jangkurr najana Kudkanyi. Miku kuna narriyanyi najba nanda jangkurr jala yanybaka, ‘Milidimbayi ninji bayamuku, yalu waykanyi ninya kunybanyi jangkurranyi yalunginkanyi.’ Miku kuna narriyanyi najba nanda jangkurr.” Nani barri jananganjayi yalunya Jisuswanyi.
MAT 21:17 Baki barlbayi yalundunanyi Jisus. Barlba nyuli nanamunanyi barrawuyabarrawuyananyi Jirusalimnanyi. Jilajba nyuli karri bayakardarri barrawuyabarrawuyarri niji Bidani, baki nanaba nyuli kuluka mungana.
MAT 21:18 Munganawa barri, ngala wijbayi Jisus bayungu Jirusalimyurri, baki birrkalanyi nyuli.
MAT 21:19 Najba nyuli kurnda barrinani kalawumbi danbina yubalina. Baki jilajba nyuli kurndarri wudumbiji mama. Ngala najba nyuli mikuyaji mamanyi nanaba, ngawamba wanjirr. Jilijbawa jardijbangka mama. Baki yanybayi Jisus nanankanyi kurndanyi, “Miku ninjiyi mili jardiykunumba mama. Miku.” Baki yinarramba barri dukujbayi nanda kurnda.
MAT 21:20 Baki kandimuku nangangi Jisuskanyi, yali nanaba nangandu. Manku yali nangangi jangkurr, baki najba yali kurnda dukuykurri, baki manmala yali. Manmala yali kudanyu barri, baki ngajaka yali, “Yanka barri nanda kurnda dulu dukujbangka nani barri. Yanka barri.”
MAT 21:21 Jananganjayi yalunya Jisuswanyi, “Ngayu karungka narrinya, jaliyi narri kudanyu kuyu nangangi jangkurr Kudkanyi, baki janarri jingkijba Kud. Janarri jingkijba Kud, janyulu yabimba nanda yaji, jala narri ngajaka Kud yabimbikanyi. Miku narringkimi mankumanku nangangi, yiningki janyulu yabimba narringi yaji Kudwanyi, yiningki miku. Janarri jingkijba Kud, janyulu yabimba nanda yaji jala narri ngajaka. Jaliyi narri kudanyu kuyu nangangi jangkurr nani barri, baki yuku marda janarri yanyba nanankanyi kurndanyi nani barri. Yuku marda janarri yabimba nanamannga yaji. Janarri yanyba kulawiranyi, ‘Ninji kulawira, walajbakiyi. Yirrirdkunumba nganyingkiyi. Jungkukiyi kanjana.’ Nani barri janarri yanyba kulawiranyi, baki janyulu ngayangayijba narringinkanyi jangkurranyi. Janangka yirrirdkunumba. Janyulu jungku kanjana.
MAT 21:22 Jaliyi narri kudanyu kuyu nangangi jangkurr Kudkanyi, baki janyulu yabimba nanda yaji jala ninji ngajaka Kud yabimbikanyi. Barriwa.” Nani barri jananganjayi yalunya Jisuswanyi.
MAT 21:23 Mili barri jilajbayi Jisus bayungu Jirusalimyurri. Wanbiya nyuli, baki mili nyuli ngankijba walkurranyina jurjina. Baki milidimba nyuli yalunya nanaba yajina. Ngala nyuli milidimba yalunya, baki jilajba yali nangandurri mambukamuku jurjkanyi marda malbumalbu. Ngajaka yali Jisus, “Wanyingini yarrijba ninya mambuka. Wanyingini ninya karuyi jakaykanyi yalunya jurjnanyi. Wanyingini ninya karuyi milidimbikanyi yalunya.” Barriwa.
MAT 21:24 Jananganjayi yalunya Jisuswanyi, “Waluku barri jangayu ngajaka narrinya yajinyi. Jaliyi nganarri jananganja, baki yuku jangayu karu narrinya, wanyingini ngana karuyi yabimbiji yaji nani barri.
MAT 21:25 Ngala waluku barri janganarri karu, wanyingini manjijbayi nganinyiyurru Jun, ngurrunbiji yalunyi. Wanyingini. Yiningki Kudwanyi, yiningki nganinyiwanyi. Waluku janganarri karu.” Barriwa. Baki karda yalungki jakakajba. Yanyba yalungki, “Wanyingkanyi jangambala jananganja. Wanyingkanyi. Jaliyi ngambala yanyba, manjijbayi Jun Kudwanyi, baki janyulu yilikajba ngambalanya, ‘Ngala wanyingkanyi miku narriyanyi kuyu nangangi jangkurr.’ Nani janyulu yilikajba ngambalanya, jaliyi ngambala yanyba, manjijbayi Jun Kudwanyi.
MAT 21:26 Ngala kajamuku muramuku yalu yanybaka nangangi Junkanyi, nyuli yanybawarr jangkurranyi nangangi Kudkanyi, jali manjijba Kudwanyi. Jaliyi ngambala yanyba, manjijbayi Jun nganinyiwanyi, baki yiningki jangamanjalu daba. Marrala ngambala yalungi. Yiningki jangamanjalu daba, jaliyi ngambala yanyba, manjijbayi nganinyiwanyi.” Barriwa. Nani barri yalungki jakakajba wanyingkanyi jangkurranyi jayalu jananganja Jisus.
MAT 21:27 Nanankardi barri yali jananganja, “Miku nurriyi jingkijba, wanyingini manjijbayi Jun. Miku nurriyi jingkijba.” Barriwa. Baki yanybayi Jisus yalungi, “Miku nganarriyanyi jananganja kunymamba, baki miku ngayiyi jananganja narrinya. Miku ngayiyi karu narrinya nanankanyi jali ngana karu milidimbiji yalunya.” Barriwa.
MAT 21:28 Mili barri yanybayi Jisus yalungi mambukamukuyngka jurjkanyi baki malbumalbunyi. “Wanyi janarri karu nanginkanyi jangkurranyi. Yingka malbu kujarra nangangi jandanyiwuya. Yingkana kambana nyuli walajba, baki yanyba nyuli nanganginkanyi lirrkanyi jandayngkanyi, ‘Kajakaja. Janinji waki ngaki winyurru. Janinji jilajba baki janinji waki ngakinyina jambana jala jardijba krayib wanjirr.’
MAT 21:29 Ngala jananganjayi jandanyiwanyi, ‘Miku ngayimi nulijba wakinkanyi nganyi. Jangayu wambu jungku barndana.’ Nani barri nyuli jananganja nangangi nijanganjinyi, ngala kamu barri yangkalamba nangki. Jilajba nyuli, baki waki nyuli nanganginkanyi nijanganjiyngkanyi nanganginyina jambana.
MAT 21:30 Waluku barri yanybayi malbu nanganginkanyi lirrkanyi jandayngkanyi, baki bayngkani barri nyuli jilajba nanganginkurri jaduyngkurri jandayngkurri, baki ngajaka nyuli nanda jadunyi nangangi jandanyi wakinkanyi nanganginyina jambana. Jananganjayi nanangini jandanyiwanyi, ‘Yi malbu. Jangayu waki ngaki. Jangayu waki nganyinyina jambana.’ Ngala jujijba nyuli. Miku nyuliyanyi jilajba. Miku nyuliyanyi waki nangangi. Wambu nyuli jungku barndana. Barriwa.
MAT 21:31 Ngayu ngajakangka narrinya, Wanyingini yabimbayi nanda jali ngajaka malbuwanyi. Wanyingini.” Baki jananganja yali, “Nanda lirrka jandanyi jali nangka yangkalamba, nyuli yabimba nanda jali ngajaka malbuwanyi.” Baki yanybayi Jisus yalungi, “Ngayu karungka narrinya, nanamuku jala yalu balkimirra, nanamuku jala yalu kuluka yingkana nganinyina baki yingkana nganinyina yurrngumba barri, nanamuku jala yalu kuyu bayngkani dungalana yalunbunanyi yurrngumba barri, jayalungka yangkalamba nangandurri Kudyurri. Janyulu lalanba yalunya Kudwanyi.
MAT 21:32 Badajbayi Jun Ngurrunbawarr, baki milidimba nyuli narrinya nanankanyi yurlurrmba yuwanyi, narri durriykanyi, ngala miku narriyanyi kuyu nangangi jangkurr. Ngala nanamukunyi balkimukunyi, yali kuyu nangangi jangkurr, yali durrijba nangangi yuwa. Narri jingkijbangka yalunya, yali kuyu nangangi jangkurr, baki jungku kunybana nanganginyina yuwana, ngala yuwajiwa barri miku narrimi ngindu muwa narringinkanyi balkinyi yajinyi. Miku narrimi kuyu nangangi jangkurr. Baki nanankardi barri janyulu lalanba yalunya waluwa narringi Kudwanyi.” Barriwa. Nani barri ngirrwayi Jisus yalungi. Barriwa.
MAT 21:33 Mili barri yanybayi Jisus yalungi milidimbiji yalunya. Muningka nyuli yanyba yalungi, “Karrinjarrijbayi krayib wanjirr malbuwanyi nanganginyina jambana. Karrinjarrijba nyuli kaja wanjirr jambana. Yabimba nyuli barriki lukuluku jambana, baki kurrijba nyuli lawarr. Nanda lawarr jidimbikanyi ngarrki krayibnanyi. Baki yabimba nyuli barrawu jungunkanyi nganinyi kalawunyi jala yalu lalanba nanda jamba. Nani nyuli yabimba yaji malbuwanyi. Baki yarrijba nyuli yingkamuku nganinyimuku, yalu lalanbiji nangangi jamba. Baki janyulu wajba yalunya kudiyayngka krayibkanyi lalanbikanyi nangangi yaji. Baki barlba nyuli yingkarri yajiyurri. Barlba nyuli juju, baki jungku nyuli nananyina yajina yurrngumba barri. Barriwa.
MAT 21:34 Jardijbayi wanjirr walkurra mamayudi. Jali nanda mama kunyunyu, baki manjijbayi nanganginmuku wakiwarrmuku malbuwanyi. Manjijba nyuli yalunya yalundurri jala lalanba nangangi jamba. Manjijbayi yalunya wudumbiji nangangi mama, kudiyambikanyi kudukudu.
MAT 21:35 Ngala nanamuku nganinyimuku jali yalu lalanba nangangi jamba, miku yaliyi kunybamuku. Marrimba yali nanamuku wakiwarrmuku jali manjijba malbuwanyi. Yingka yali wajuba, yingka yali kurdanba, yingka yali daba dungalayudinyi.
MAT 21:36 Ngala manjijbayi mili wakiwarrmuku malbuwanyi. Manjijba nyuli kaja mili yalundurri wudumbiji nangangi mama. Jabarri mili yali marrimba yalunya nanamukunyi balkimukunyi lalanbawarranyi. Wajuba yali, baki kurdanba yali, baki daba yali dungalayudinyi.
MAT 21:37 Baku barri manjijbayi yingka yalundurri malbuwanyi. Manjijbayi nangangi jandanyi. Mankumanku nangki malbu, ‘Jalija jilajba ngakinmirra jandanyi yalundurri, baki jayalu karda jungku. Miku yaliyi daba. Jayalu kuyu nangangi jangkurr.’
MAT 21:38 Ngala jali yalu najba nangangi jandanyi jilaykurri yalundurri, baki yanyba yalungki, ‘Nayinda jala badajbangka, nyulu jandanyi nangangi malbunyi. Jalija nangka janyba malbu, baki nanangini nanganginyi jandanyiwanyi, janyulu wudumba nayinda jamba ngabayidi. Jangambala marrimba, jangambala kurdanba, baki jangambala kuyu nayinda jamba ngabayidi ngamanginkanyi barri.’ Nani barri yalungki yanyba.
MAT 21:39 Baki jali wanbiya nanda jandanyi, baki marrimba yali, janyba yali danbiyurri barrikina, baki kurdanba yali. Barriwa.”
MAT 21:40 Baki ngajakayi yalunya Jisuswanyi, “Jalija badajba nanda malbu nanganginkurri jambarri, baki wanyimba janyulu yalunya, jali nyulu yarrijba lalanbikanyi nangangi yaji. Wanyimba janyulu yalunya.”
MAT 21:41 Jananganja yali, “Janyulu kurdanba nanamuku balkimuku lalanbawarrmuku. Janyulu kurdanba yalunya, baki janyulu yarrijba yingkamuku lalanbikanyi nangangi jamba. Janyulu yarrijba kunybamuku lalanbawarrmuku, jalija wajba nanda malbu nanganginkanyi mamanyi jalija kunyunyu.” Barriwa. Baki yanybayi Jisus yalungi, “Yi. Nanda jangkurr narringi duja jangkurr.
MAT 21:42 Ngayu karungka narrinya. Miku nyuliyi mili lalanba narrinya Kudwanyi, ngala janyulu lalanba yalunya jala yalu ngindu muwa yalunginkanyi balkinyi yajinyi, jala yalu jungku kunyba nanganginyina yuwana. Janyulu lalanba yalunya Kudwanyi, miku narrinya.” Baki mili yanybayi Jisus yalungi, “Jingkijba kuna narri nayi jangkurr najana Kudkanyi jala muningka yanybaka, ‘Jali yalu yabimba barrawu, baki miku yaliyanyi nulijba yingamali kurnda. Ngala janyba yali nanda kurnda. Ngala baku barri yingkawanyi nyuli yabimba barrawu nangangi Kudkanyi. Wudumba nyuli nanda kurnda jali yalu waluwa janyba, baki yarrijba nyuli yundukula nananyina barrawuna Kudkanyi. Nanda jirrinyi kurnda nanganginyina barrawuna.’” Barriwa. Nani yanybayi Jisus yalungi, nyuli barrinani nanda jirrinyi kurnda yundukula, jali waluwa yingkawanyi janyba. Kajamuku yali yurlwa nangangi Jisuskanyi, ngala nyuli yarrijba Jisus walkurra mambuka Kudwanyi. Mili barri yanybayi Jisus yalungi, “Mili nanda jangkurr najana Kudkanyi yanybaka. ‘Ngambala najbangka yaji jala yabimbaka Kudwanyi, baki ngambala mirnarrijba muwa nangangi.’ Barriwa.
MAT 21:45 Mankuyi nangangi jangkurr mambukamukunyi jurjkanyi marda Barasimukunyi. Manku yali nanda jangkurr jali muningka nyulu yanyba, baki jingkijba yali, nyulu karuyi jangkurranyi yalungi. Jingkijba yalungki, nyuli yanyba yalungi, yalu jungunkanyi balki nangangi Kudkanyi.
MAT 21:46 Baki nanankardi barri yali ngarrangarra muwa nangangi. Yali kijiwijba kudanyu barri. Yaliyanyi marrimba Jisus, yaliyanyi janyba brisinyurri, ngala miku yaliyanyi marrimba. Marrala yali yalungi muramukuyngka. Marrala yali muramukuyngka jali yanyba nangangi Jisuskanyi, nyuli nanda jala yanyba jangkurr nangangi Kudkanyi. Nanankardi barri miku yaliyanyi marrimba Jisus nanamanji barri. Barriwa.
MAT 22:1 Mili barri yanybayi Jisus yalungi muramukuyngka, “Jangayu mili karu narrinya Kudkanyi. Mili barri jangayu muningka yanyba narringi. Yingka barri walkurra mambuka, nyuli jandanyiyudi. Jamaluyi jibarri jandanyiwanyi, baki yabimbayi wangarr bulangi nanangini mambukawanyi. Yabimba nyuli wangarr bulangi jali bulangka jamalu.
MAT 22:3 Manjijba nyuli nanganginmuku wakiwarrmuku wudumbiji yingkamuku wangarranyi. Karu yalunjali wangarranyi, ngala miku yaliyanyi nulijba badaykanyi.
MAT 22:4 Baki manjijba nyuli mili wakiwarrmuku yalundurri wudumbiji yalunya. Karu yalunjali nanankanyi jangkurranyi mambukanyi, ‘Marda narrimi walajba wangarranyi. Ngarrkadaba ngayi buluki baki kabikabi. Kaja barnyi ngayi wudumba narringi marda mama. Marda narrimi walajba wangarranyi.’
MAT 22:5 Ngala yurlwa yali nanankanyi jangkurranyi mambukanyi. Miku yaliyala badajba. Yingkamukunyi yali muningka yabimba yaji yalungi.
MAT 22:6 Ngala yingkamukunyi yalunjali marrimba nanamuku wakiwarrmuku mambukanyi. Yalunjali wajuba baki kurdanba.
MAT 22:7 Ngala nanda mambuka barri, jali nyulu manku jangkurr nanankanyi yajinyi, baki ngarrangarra nyuli muwa. Ngarrangarra nyuli muwa yalungi jali yalu kurdanba nanganginmuku wakiwarrmuku. Baki manjijba nyuli nanganginmuku ngarrkadabawarrmuku yalundurri. Ngarrkadaba yalunjali balkimuku, baki kurdanba yalunjali. Baki bakarrijba yali yalungi barndamuku. Bakarrijba yali nanamuku barrawuyabarrawuya, barriwa barri bukamba.
MAT 22:8 Baki mili nyuli kaya yalungi nanganginmukuyngka wakiwarrmukuyngka. Baki yanyba nyuli yalungi, ‘Nanamuku jali ngayu ngajaka barrin jilaykanyi wangarranyi, yali balkimuku. Jungku yali balki, yurlwangangi yali ngakinkanyi jangkurranyi. Ngala kaja mama nyulu nayiba marda barnyi wangarranyi.
MAT 22:9 Janarri jilalajba yubarlina lukuluku. Janarri karu yalunya jala narri najba barndana. Janarri yililikajba yalunya, yalu walaykanyi nanginkurri wangarranyi.’ Nani barri nyuli jirrinyba yalunya. Barriwa.
MAT 22:10 Baki jilalajba yali lukuluku. Najba yali kajamuku, nganinyimuku baki jibarrimuku, kudiya kunybamuku baki kudiya balkimuku. Baki yililikajba yalunjali walaykanyi wangarranyi. Baki kajamuku yali walajba nanankanyi wangarranyi, jali yabimba mambukawanyi. Kajamuku yali walajba. Jali yalu wanbiya, baki wajba yalunjali kunybanyi jumbalanyi wakiwarrmukunyi. Yawumba yalungki nanda jumbala, baki ngankijba yali barrawuna wangarranyi. Baki walbinyi nanda barrawu. Barriwa.
MAT 22:11 Waluku barri bukambiju yali ngankijba barrawuna, baki bayngkani barri nanda mambuka ngankijbayi. Ngala najba nyuli yingamali nganinyi, mikuyaji kunybanyi jumbalanyi nangandu. Miku nangkiyanyi yawumba kunyba jumbala jali wajba wakiwarranyi.
MAT 22:12 Baki ngajakayi nanda nganinyi mambukawanyi, ‘Kandi. Wanyingkanyi ninji ngankijba barrawuna wangarranyi, mikuyaji kunybanyi jumbalanyi, jali ngayu wajba ninga.’ Nani barri ngajakayi nganinyi mambukawanyi, ngala miku nyuliyanyi jananganja nanangini nganinyiwanyi. Mikukiyanyi jananganja nanda mambuka.
MAT 22:13 Baki nanangini mambukawanyi, nyuli jirrinyba nangangi wakiwarr, ‘Marrimbakiyi nayinda nganinyi. Kijijbakiyi nangangi jalu baki nguli kurulyudinyi, baki janybakiyi danbiyurri, jala mungijba yaji. Nanaba barri janangka ngindu muwa. Kudanyu barri janangka ngindu muwa, mikungangi nangkiyanyi yawumba nanda kunyba jumbala.’ Barriwa.”
MAT 22:14 Nani barri yanybayi Jisus yalungi wangarranyi, baki mili nyuli yanyba yalungi, “Nanda mambuka jali yabimba wangarr yalungi, nyuli barrinani Kud. Nanangini mambukawanyi, nyuli yililikajba yalunya, yalu walaykanyi nanganginkurri barrawurri wangarr. Kajamuku nyuli yililikajba wangarranyi. Baki nani barri nyulu marda yililikajbangka yalunya Kudwanyi. Nyulu yililikajbangka yalunya walaykanyi nangandurri, jungunkanyi mili wanka nangandu kingkarri. Jali yilikajba yalunya wakiwarranyi, baki kajamuku yali yurlwa nanankanyi jangkurranyi mambukanyi. Miku yaliyala walajba wangarranyi. Baki nani barri, kajamuku yalu yurlwangka nanganginkanyi jangkurranyi Kudkanyi, baki miku yaliyi jungku mili wanka nangandu Kudnyina yurrngumba barri. Ngala yingkamuku walajba yali wangarranyi, yalungki yawumba jumbala jali wajba yalunya mambukawanyi. Baki nani barri yingkamuku yalu kuyungka nanda jangkurr jali wajba yalunya Kudwanyi. Jayalu jungku mili wanka nangandu Kudnyina. Ngala yingka nyuli nulijba jungunkanyi wangarranyi, baki ngankijba nyuli barrawuna, ngala miku nangkiyanyi yawumba jumbala jali wajba mambukawanyi. Baki nani barri, yingkamuku yalu nulijba jungunkanyi mili wanka nangandu Kudnyina, ngala miku yalimi kuyu nanda jangkurr, jali wajba Kudwanyi. Miku yalimi kuyu nangangi jangkurr, baki nanankardi janyulu janyba yalunya danbiyurri nanankurri Yilyurri. Barriwa.” Nani barri nyuli milidimba yalunya Jisuswanyi.
MAT 22:15 Nanamukunyi Barasimukunyi yali manku nangangi jangkurr, baki jingkijba yali, jali muningka yanyba Jisus jangkurranyi, baki nyuli karu nanankanyi jangkurranyi yalungi. Jingkijba yalungki, yalu jungunkanyi balkina yuwana Kudkanyi. Nanankardi barri yaliyanyi marrimba Jisus. Barlba yali baki yanyba yalungki, yanka jayalu marrimba Jisus. Yanka jayalu yililikajba Jisus jangkurranyi, balanjankanyi Jisus, nyulu yanybikanyi balki jangkurr.
MAT 22:16 Nani barri yalungki yanyba, baki manjijba yali yingkamuku yalunya nangandurri Jisusyurri. Manjijba yalunjali jawuda yalunginmuku kandimuku, baki jawuda jali yalu durrijba jangkurr nangangi Yirudkanyi, jali yalu nulijba Yirudkanyi yalunginkanyi mambukanyi. Wanbiya yali, baki yanybayi yali nangangi Jisuskanyi, “Milidimbawarr. Nurru jingkijbangka ninga, ninji yanybaka duja jangkurr. Ninji milidimbaka duja nangangi Kudkanyi. Miku ninjimi marrala yalungi yingkamukuyngka. Ninji milidimbaka walkurra mambukamuku, baki bayakardamuku. Ninji milidimbaka bukambiju yalunya.
MAT 22:17 Karukiyi nurrunya, wanyi ninji yanyba nanginkanyi. Nanda wirimalaru Kubaminkanyi, niji Sisa, nyulu wudumbaka dungala ngamanbunanyi. Nyulu manjijbangka nganinyimuku wudumbiji dungala ngamanbunanyi. Yuku barri kuna yuwana Kudkanyi ngambala waykanyi Kubamin mambuka dungalanyi. Jangambala wajba kuna. Yiningki miku ngambaliyi wajba dungalanyi. Wanyi ninji yanybaka.” Nani yali ngajaka Jisus.
MAT 22:18 Ngala jingkijbayi yalunya Jisuswanyi, balanja yali. Muningka yali ngajaka Jisus, nyulu yanybikanyi balki jangkurr nanankanyi mambukanyi Sisakanyi. Baki jaliyi nyulu yanyba balki jangkurr nani mambukanyi, baki jayalu marrimba. Baki yanybayi Jisus yalungi, “Narri jujambawarrmuku. Wanyingkanyi nganarri balanjaka. Wanyingkanyi narri nulijbangka jujambikanyi nganarri.
MAT 22:19 Minimbakiyi yingamali dungala ngaki.” Baki minimba yali dungalanyi.
MAT 22:20 Baki ngajakayi yalunya Jisuswanyi, “Wanyi wali nayiba dungalana, wanyi niji nayiba dungalana. Wanyi barri.”
MAT 22:21 Baki jananganja yali, “Nayinda nangangi wali baki nangangi niji Sisakanyi.” Barriwa. Baki yanybayi Jisus yalungi, “Ngayu karungka narrinya nanginkanyi jangkurranyi. Wajbakiyi Sisa nanankanyi nanganginkanyi yajinyi, ngala wajbakiyi Kud nanankanyi nanganginkanyi yajinyi.” Barriwa.
MAT 22:22 Jali yalu manku nangangi jangkurr, baki manmala yali. Manmala yali nanganginkanyi jangkurranyi. Baki barlba yali. Barriwa.
MAT 22:23 Kamu barri badajbayi yingkamuku nangandurri Jisusyurri. Yali Sajusimuku jalili yalu durrijba nanda yuwa nangangi Musiskanyi, ngala yalili yanyba, miku ngambaliyi jungku mili wanka yurrngumba, ngala jangambala jungku kurdan yurrngumba barri. Badajba yali nangandurri.
MAT 22:24 Baki yanyba yali, “Milidimbawarr. Yarrijbayi Musiswanyi jangkurr najana Kudkanyi ngambalangi. Nayi nangangi jangkurr yanybaka, ‘Jaliyi nangka janyba buwanya, baki yingijba nyulu nangangi maninganja, ngala buli mikuyaji bardardanyi bulangi. Jaliyi nangka janyba nangangi buwanganja nani barri, baki nanganginyi bababanyamba nyulu janyulu wudumba nanda jibarri. Baki baku barri jalija bula wakaramba bardarda, baki jayalu muningka yanyba nanankanyi bardardanyi, ‘Nayinda bardarda, nyulu jandanyi nangangi, nanankanyi buwanganjarruwa. Nyulu nangangi jandanyi.’ Nani barri yanybaka yuwa nangangi Musiskanyi. Nani jayalu muningka yanyba nanankanyi bardardanyi.
MAT 22:25 Janurru nurru karu ninga buwawakulayngka. Kajamuku buwawakula, 7-barri. Nanangini lirrkawanyi, nyulu wudumbayi maninganja, ngala bijal barri baku nangki janyba. Mikuyaji bardardanyi bulangi. Mikuyaji. Barriwa. Baki yingkawanyi bababanyamba nyulu bayngkani nangandu, nyuli wudumba nanda miyaji.
MAT 22:26 Ngala janyba nangki nanda nganinyi marda, baki mikuyaji nangangi bardardanyi. Barriwa. Baki yingkawanyi bababanyamba nyulu bayngkani nangandu, nyuli wudumba nanda miyaji, ngala baku barri bijal nangki janyba, mikuyaji nangangi bardardanyi. Barriwa. Nani barri yingkawanyi bababanyamba nyulu wudumbayi nanda miyaji, baki nangki janyba. Baki yingkawanyi wudumbayi baku, baki yingkawanyi baku barri. Nani barri bukambiju buwawakula yalungki janyba.
MAT 22:27 Ngala nanda miyaji, mikuyaji nangangi bardardanyi. Baki baku barri bayngkani nangki janyba nanda miyaji marda.
MAT 22:28 Baku barri juju jalija yalu wankijba mili, baki wanyi janyulu nawinganja nanankanyi jibarrinyi. Wanyi barri. Nyuli maninganja yalungi bukambijuyngka buwawakulayngka. Wanyi janyulu nawinganja nanankanyi jibarrinyi.” Barriwa. Nani barri yalu ngajaka Jisus.
MAT 22:29 Ngala jananganjayi yalunya Jisuswanyi, “Barimba narri nanda jangkurr jali yanyba Musis najana Kudkanyi. Barimba narri nangangi jangkurr. Miku narrimi jingkijba nanda naja Kudkanyi. Baki miku narrimi jingkijba nanda ngiruka yaji jalija yabimba Kudwanyi baku barri.
MAT 22:30 Jalija yalu mili wankijba, baki miku jayalu wudumba maninganja, baki nawinganja. Miku jayalu jungku mili maykarra. Ngala jayalu jungku barrinani Yanjilmuku, jala mikuyaji yalungi kayikayinyi.
MAT 22:31 Ngala narri barri, narri yanyba nanankanyi nganinyiyurruwa, miku nyuliyi wankijba mili. Janyulu jungku kurdan yurrngumba. Ngala narri jingkijba nanda jangkurr najana Kudkanyi. Yanybayi Kud nayinda jangkurr yalungi wankalamukuyngka,
MAT 22:32 ‘Ngayu Kud nangangi Yabrayamkanyi. Ngayu Kud nangangi Yayisakanyi. Marda ngayu Kud nangangi Jakubkanyi.’ Nani barri yanybayi Kud yalungi wankalamukuyngka. Ngala miku nyulimi Kud yalungi jala yalu jungku kurdan. Ngala nyulu Kud yalungi nanamukuyngka jala yalu wanka jungku. Nanankardi ngambala jingkijba, nanamuku wankalamuku yalu mili wankijba barri, nyulungangi yalungi Kud.” Barriwa.
MAT 22:33 Jali yalu manku nangangi jangkurr muramukunyi, baki manmala yali. Manmala yali nanganginkanyi jangkurranyi, jali nyulu jananganja yalunya Sajusimuku. Nangangi jangkurr mili ngiruka yalunginkanyi jangkurranyi. Nyuli wakaramba yalunya, baki miku yaliyi jananganja Jisus mili jangkurranyi. Barriwa.
MAT 22:34 Yingkamukunyi yalunjali karu Barasimuku nanankanyi jangkurranyi Jisuskanyi, jali mikuwali jananganja Sajusimukunyi baki yalungki malumba yanyba Barasimuku.
MAT 22:35 Yaliyanyi jujamba Jisus, baki manjijba yali yingka jali milidimba yuwanyi Musiskanyi. Manjijba yali nanda milidimbawarr nangandurri Jisusyurri, jujambikanyi Jisus jangkurryudinyi.
MAT 22:36 Ngajaka nyuli Jisus, “Milidimbawarr. Nanda yuwa jungunkanyi ngambala kunyba nangangi Kudkanyi, kaja nanda jangkurr. Ngala wanyi nanda yingamali jirrinyi jangkurr. Janganinji karu, wanyi yingamali jirrinyi jangkurr.”
MAT 22:37 Jananganjayi Jisuswanyi, “‘Marda ninjimi maruka muwa nangangi Kudkanyi. Marda ninjimi kudanyu maruka muwa nangangi. Marda ninjimi kudanyu nulijba nangangi Kudkanyi nganyinyina kurduluna. Marda nganyingkimi mankumanku nangangi Kudkanyi nganyinyina kulajina.’
MAT 22:38 Nayinda nanda yingamali jirrinyi jangkurr, narri ngayangayiykanyi.
MAT 22:39 Marda yingka jirrinyi jangkurr bayngkani nangandu. Nayi barri, ‘Nganyingka maruka muwa, baki nani barri marda ninjimi kudanyu maruka muwa yalungi yingkamukuyngka marda.’
MAT 22:40 Nanginkujarra jirrinyi yuwa narringi. Bukamba nanda yuwa nangangi Musiskanyi, baki nanda jangkurr nangangi Kudkanyi jali yanyba wankalamuku, yalu bayngkani nanankujarrayngka. Nanankujarra yuwa kujanya nanamukuyngka yingkamukuyngka yuwanyi. Jaliyi narri ngayangayijba nanankujarrayngka yuwanyi, baki janarri ngayangayijba bukamba nanamukuyngka yingkamukuyngka yuwanyi. Barriwa.”
MAT 22:41 Karrinjayi jawuda Barasimuku nangandu Jisusnyina, baki ngajaka nyuli yalunya,
MAT 22:42 “Nanamukunyi wankalamukunyi nangangi Kudkanyi, yali karu ngambalanya nangangi Krayiskanyi jalija manjijba Kudwanyi baku barri. Yali karu ngambalanya nangangi. Wanyi narri yanyba nangangi Krayiskanyi. Wanyi nyulu barrinani wankalanyi nijanganjinyi nangangi Krayiskanyi.” Jananganja yali, “Nanda walkurra nganinyi Dayibid, nyulu barrinani wankalanyi nijanganjinyi nangangi Krayiskanyi.” Barriwa.
MAT 22:43 Baki mili ngajakayi yalunya Jisuswanyi, “Minimbayi Dayibid yajinyi Kunybawanyi Ngarnduwanyi Kudkanyi. Minimba nyuli Dayibid Krayiskanyi, baki yanybayi Dayibid nangangi, ‘Nanda Krayis, nyulu ngaki mambuka. Mambuka nyulu ngaki.’ Barriwa.
MAT 22:44 Baki yarrijbayi nayinda jangkurr najana Dayibidwanyi. Nayinda barri, ‘Yanybayi Kud ngakinkanyi mambukanyi Krayiskanyi. Yanybayi Kud nangangi, “Jungkukiyi ngakindu. Kajamuku, jala miku yalimi maruka muwa ngaki, janinya yalu daba, ngala jangayu ngayu yalunya daba wakara barri. Jangayu wakaramba yalunya, jalija ngayu daba yalunya. Baki jayalu jingkijba ninya, ninji barri mambuka yalungi.’ Nani nyuli yarrijba jangkurr najana Dayibidwanyi.
MAT 22:45 Yanybayi Dayibid nangangi Krayiskanyi, nanda Krayis, nyulu nangangi mambuka. Ngala yanka barri nyulu Dayibid barrinani wankalanyi miminganja nangangi Krayiskanyi nanankanyi, jali nyulu kuyu nangangi mambuka. Yanka barri. Janganarri jananganja.”
MAT 22:46 Ngala miku yaliyanyi jingkijba wanyi jangkurr jananganjankanyi. Kardarda yali jungku, baki nanamunanyi kambananyi, marrala yali ngajakankanyi Jisus mili jangkurranyi. Baki miku yaliyanyi ngajaka mili barri.
MAT 23:1 Baki yanybayi Jisus yalungi muramukuyngka, baki nanganginmukuyngka kandimukuyngka. Yanyba nyuli,
MAT 23:2 “Nanamuku jala milidimba yuwanyi Musiskanyi, baki nanamuku Barasimuku, yalu marda milidimbawarr nanankanyi yuwanyi Musiskanyi. Yalu jingkijbawarr nanganginkanyi yuwanyi Musiskanyi wankalanyi.
MAT 23:3 Nanankardi barri marda narrimi kuyu yalungi jangkurr. Marda narrimi ngayangayijba yalunginkanyi jangkurranyi. Yalu milidimbaka narrinya, narri jungunkanyi kunymamba nananyina yuwana Musiskanyi. Nani yalu milidimbaka narrinya, ngala yalu barri, miku yalimi jungku kunyba nananyina yuwana. Marda narrimi kuyu yalungi jangkurr, ngala marda narrimi miku yabimba nanda jala yalu yabimba, mikungangi yalimi jungku kunymamba nananyina yuwana. Yalunjalu karu yingkamuku ngayangayiykanyi yuwanyi Musiskanyi, ngala yalu barri miku yalimi ngayangayijba nanankanyi yuwanyi.
MAT 23:4 Baki yalu yabimbaka kaja mili yuwa narringi ngayangayiykanyi. Kaja mili yuwa yalu yabimbaka, ngala miku yalungi yuwa kunyba. Jardibirri yalungi yuwa ngayangayiykanyi. Miku yalimi ngayangayijba bukambijuyngka yalunginkanyi yuwanyi, ngala yalu yurlwa kudiyayngka yalunginkanyi yuwanyi. Yalunjalu milidimbaka nanankanyi yuwanyi, ngala miku yalunjalimi minimba, yanka jayalu jungku kunymamba nananyina yuwana.
MAT 23:5 Yalili yarrijba jawuda nanda yuwa najana milidimbawarranyi, bakili yalu kijijba nanda naja yalunginyina jaluna baki walina, barrinani bakiri. Nani barri yalili jungku, baki yingkamuku jayalungka mankumanku yalungi milidimbawarrayngka, yalu jungku kunymamba nananyina yuwana. Yalili yarrijba kurdalirri kurul yalundu jumbalana. Barlbarlbalakili yalundu ngulina. Nani barri yalili yabimba minimbiji yalunya, yalu marukangka muwa nangangi Kudkanyi. Nani barri yalili jungku. Baki nanankardi yingkamuku barri, ngamu yalu jungkuka kunymamba nangangi Kudkanyi. Ngala miku yalimi jungku kunymamba nangangi. Yalunjalu jujambaka.
MAT 23:6 Nulijba yalu yalungi, yalungka mankumankunkanyi yalungi, yalu jirrinyi nganinyimuku. Jalili yalu jungku jurjina, baki wangarrina, bakili yalu jungku walu barri yalundu mambukamukunyina.
MAT 23:7 Muningka yalili jilajba lukuluku barrawuyabarrawuyana, baki yingkamukunyi yalunjalili najba jilalaykurri. Yanyba yalungkili, yalu walkurramuku. Nulijba yalu yingkamukuyngka, yalu yanybikanyi yalungi nayi barri, “Narri barri, narri Milidimbawarr yuwanyi nangangi Kudkanyi. Nurru wajbangka narrinya kunybanyi jangkurranyi nurrunginkanyi.” Barriwa.
MAT 23:8 Ngala narri barri ngakinmuku kandimuku, marda narrimi miku munyajba yingka, nyulu nijarriykanyi narrinya “Milidimbawarr.” Marda narrimi miku munyajba yingka nyulu yarriykanyi yingka mili walkurra waluwa yingkanyi. Narri jungku kandimuku, narri jungku barrinani buwawakula. Miku narrimi milidimbawarr yalungi. Ngala yingamali narringi milidimbawarr. Ngawamba yingamali narringi milidimbawarr, ngayu barri.
MAT 23:9 Narri jungkuka nayiba jambana, ngala ngawamba yingamali nyulu narringi Buwakanya Kingkarri. Nyulu Kud, nyulu narringi Buwakanya Kingkarri, nyulu jirrinyimirra mambuka narringi. Nanankardi barri, marda narrimi miku yarrijba yingka jirrinyimirra mambuka narringi. Marda narrimi miku nijarrijba yingka ‘Buwakanya,’ jala nyulu miku dujanya nganyi nijanganjinyi.
MAT 23:10 Baki marda narrimi miku nijarrijba yingka ‘Walkurra Mambuka.’ Ngawamba yingamali narringi walkurra mambuka, ngayu barri Krayis.
MAT 23:11 Nanda walkurra narringi, marda nyulimi jungku wakiwarr narringi.
MAT 23:12 Nanda jala nangka walkurramba, janyulu nyulu bayakardamba Kudwanyi. Ngala nanda jala nangka bayakardamba barri, jala wakiwarr yalungi, janyulu nyulu walkurramba Kudwanyi. Barriwa.
MAT 23:13 Narri, Barasimuku, baki narri milidimbawarrmuku yuwanyi, ngayu karungka narrinya ngirukanyi jangkurranyi. Narri balkimirra. Narri jujambawarrmuku. Dabaja narrinya Kudwanyi. Miku narrimi milidimba yurlurrmba jangkurr nangangi Kudkanyi, baki nanankardi barri miku yaliyi kirrijba kingkarri nangandurri Kudyurri, miku nyuliyi lalanba yalunya Kudwanyi. Baki miku nyuliyi lalanba narrinya marda, milidimbangangi narri balki jangkurr. Nanamuku jala yalu nulijba kuyunkanyi nanda duja jangkurr nangangi Kudkanyi, narri jujamba yalunya. Narri yabimba yalunya kuyunkanyi narringi balki jangkurr. Nanankardi barri janarri miku jungku mili wanka nangandu Kudnyina. Baki nanamuku jala yalu kuyu narringi jangkurr, narringinyi balkiwanyi jangkurrwanyi kurrkunbaka yalunya marda, yalu jungunkanyi mili wanka nangandu Kudnyina.
MAT 23:15 Narri Barasimuku, baki narri milidimbawarrmuku yuwanyi, ngayu karungka narrinya ngirukanyi jangkurranyi. Narri balkimuku. Narri jujambawarrmuku. Dabaja narrinya Kudwanyi. Miku narrimi milidimba yurlurrmba jangkurranyi. Narri jilajbangka juju nukamina yingkarri yajiyurri, baki yingkarri yajiyurri. Narri birlbidambaka kanja yingkarri yajiyurri, baki yingkarri yajiyurri. Narri kujbangka yalungi, jalija yalu manku narringi jangkurr, baki janarri milidimba yalunya narringinkanyi balkinyi jangkurranyi. Baki jalija yalu kuyu nanda jangkurr narringi, jalija yalu durrijba nanda jangkurr, baki jayalu jungku mili balki nangangi Kudkanyi. Baki nanankardi barri janyulu bukamba yalunya Kudwanyi. Janyulu manjijba yalunya wayka jangurri Yilyurri. Baki janyulu manjijba narrinya marda jangurri Yilyurri, milidimbangangi narri yalunya nanankanyi balkinyi jangkurranyi. Barriwa.
MAT 23:16 Narri balkimuku. Narri mudumuku. Dabaja narrinya Kudwanyi. Narri barrinani nanda nganinyi jala wililijba nanda kabuji kurndayudinyi, ngala nyulu marda kabuji yami. Miku narrimi kudanyu jingkijba nanda yuwa nangangi Kudkanyi, jala narri milidimba yalunya. Miku narrimi milidimba yalunya kunymamba, ngala barimba narri milidimba yalunya. Nayi narri milidimba. Narri karu yalunya nanankanyi dankurrdankurranyi malankarrinyi walkurranyina jurjina. Nanda dankurr malankarri nanda kudukudu yaji, ngala miku nanda walkurra jurj kudukudu. Ngawamba nanda malankarri kalawuyngkurru jurjina. Ngala narri mudumuku. Ngala miku nanda kunyba jangkurr narri yanyba. Nanda walkurra jurj, nanda kudukudu yaji nangangi Kudkanyi, ngala miku nanda dankurr malankarri yaji kudukudu. Jala yalu yarrijba nanda dankurr malankarri kalawuyngkurru jurjina, baki yabimbaka malankarri kudukudu nanangini jurjwanyi, nandangangi jurj nangangi yaji Kudkanyi.
MAT 23:18 Baki narri yanyba yingka jangkurr. Narri milidimba yalunya nayi barri, ‘Nanda dungala yaji, niji Yalda nananyina walkurranyina jurjina, miku nanda dungala kudukudu. Ngala nanda barnyi jala yalu yarrijba yundu nananyina dungalana, nanda barri kudukudu.’ Nani barri narri milidimba yalunya, ngala miku nanda kunyba jangkurr.
MAT 23:19 Narri barrinani nanda kabujimuku. Miku narrimi jingkijba nanda duja jangkurr. Nanda dungala yaji, nanda Yalda, nanda kudukudu yaji nangangi kudkanyi, ngala miku nanda barnyi kudukudu. Ngala jala yalu yarrijba nanda barnyi yundu dungalana Yaldana, baki yabimbaka nanda barnyi kudukudu nanangini dungalawanyi.
MAT 23:20 Nayinda barri duja jangkurr. Nanda walkurra jurj, nanda kudukudu yaji nangangi Kudkanyi, baki nanda dungala Yalda, nanda kudukudu yaji nangangi marda. Ngala nanda dankurr malankarri, ngawamba nyulu jungkuka kudukudu, jala yalu yarrijba kalawuyngkurru nananyina jurjina nangangi Kudkanyi. Baki nanda barnyi marda, ngawamba nyulu jungkuka kudukudu, jala yalu yarrijba yundu nananyina dungalana nangangi Kudkanyi.
MAT 23:22 Baki nani barri nayi marda. Jaliyi yingka yanybaka nanankanyi lalijinyi kingkarri, nanda kudukudu yaji, baki miku nanda duja jangkurr. Miku nanda laliji kudukudu. Ngawamba Kud jala jungkuka lalijina, nyulu barri kudukudu. Nani barri narri barimba milidimba yalunya. Barriwa.
MAT 23:23 Narri Barasimuku, baki narri milidimbawarrmuku yuwanyi, ngayu karungka narrinya ngirukanyi jangkurranyi. Narri balkimuku. Narri jujambawarrmuku. Dabaja narrinya Kudwanyi. Narri ngayangayijbangka kudiyayngka bayakardanyi yuwanyi Kudkanyi, narri wajbaja Kud bijalanyi mamanyi jala narri jardiykunumba, ngala miku narrimi ngayangayijba nanankanyi jirriyngkanyi yuwanyi. Miku narrimi jungku yurlurrmba yalungi yingkamukuyngka. Miku narrimi yabimba kunyba yaji yalungi. Miku narrimi ngindu muwa yalungi jala yalu balkijba muwa. Miku narrimi kuyu nanda jangkurr nangangi Kudkanyi. Marda narrimi ngayangayijba nanankanyi jirriyngkanyi yuwanyi Kudkanyi, baki yuwajiwa janarri ngayangayijba nanankanyi bayakardanyi yuwanyi marda.
MAT 23:24 Narri barrinani nanda kabuji jala wililijba nanda yingka kabuji. Baki yingkanyi barri jangayu muningka karu narrinya. Narri barrinani nanda nganinyi jali dulaba kunima nanganbunanyi nyanyalunanyi waluwa nyuli ngaraba nyanyalu. Ngala nyuli yurlwa warrkinyi jali banjarrba nyanyaluna, baki bilyinyba nyuli nanda warrki nganinyiwanyi. Baki nani barri narri marda. Narri ngayangayijba nanankanyi bayakardanyi yuwanyi nanganginkanyi Kudkanyi, ngala narri yurlwa nanganginkanyi jirriyngkanyi yuwanyi. Barriwa.
MAT 23:25 Narri Barasimuku, baki narri milidimbawarrmuku yuwanyi, ngayu karungka narrinya ngirukanyi jangkurranyi. Narri balkimuku. Narri jujambawarrmuku. Dabaja narrinya Kudwanyi. Narringka wakardaba mankanyi dulaykanyi jamba, barrinani yanybaka yuwa wakardaykanyi narringka mankanyi. Narri dulaba nanda jamba mankanyinanyi, baki narri jungku likalika mankanyi, ngala miku narrimi dulaba nanda balki yaji narringinbunanyi kurdulunanyi. Miku narrimi ngayangayijba nanankanyi yuwanyi, jungunkanyi jirdi kunybanyi kurdulunyi nangangi Kudkanyi. Yuwajiwa narri jungku jirdi balkinyi kurdulunyi. Narri ngayangayijbangka nanankanyi yuwanyi waykanyi Kud yajinyi, ngala yuwajiwa narri kuliwijba yajinyi marda. Narri jarijbangka yalunginkanyi yajinyi, narri kuyungka bayngkani dungala yalunbunanyi. Baki narri dalburrijba kaja yaji narringinmirra yaji. Nani barri narri kuliwijba yajinyi.
MAT 23:26 Narri barrinani nanda kabujimuku. Miku narringkimi jingkijba, narri jungunkanyi balki nangangi Kudkanyi. Marda narrimi waluku janyba nanda balki narringinbunanyi kurdulunanyi. Marda narrimi jungku kunyba nangangi Kudkanyi yurrngumba barri, baki janarri jungku likalika nangangi Kudkanyi. Barriwa.
MAT 23:27 Narri Barasimuku, baki narri milidimbawarrmuku yuwanyi, ngayu karungka narrinya ngirukanyi jangkurranyi. Narri balkimuku. Narri jujambawarrmuku. Dabaja narrinya Kudwanyi. Narri barrinani kumayangu jala yalu makaba kuyuwana. Yalu laduba nanda kumayangu wilina, baki kunymamba nanda yaji yalu naykanyi. Kunyba nanda yaji wilina, ngala kalawuyngkurru barri balki yaji ngujbul. Nani barri narri jungkuka. Wakardaba narringka mankanyi, baki narri jungku kunyba mankanyi, ngala yuwajiwa narri balki kalawuyngkurru. Yuwajiwa narri jungkuka balki kurdulu nangangi Kudkanyi. Barriwa.
MAT 23:29 Narri Barasimuku, baki narri milidimbawarrmuku yuwanyi, ngayu karungka narrinya ngirukanyi jangkurranyi. Narri balkimuku. Narri jujambawarrmuku. Dabaja narrinya Kudwanyi. Yingkamuku wankalamuku yali yanyba jangkurr nangangi Kudkanyi, ngala yingkamukunyi, miku yaliyanyi kuyu yalungi jangkurr. Ngala yalunjali daba, yalunjali kurdanba. Baki yali makaba kuyuwana kumayanguna. Baki narri lalanbaka nanda kumayanguna. Narri warlwarlmbaka nanda yaji yurrngumba barri. Narri yanybaka nayi barri, ‘Nanamuku wankalamuku, jali kurdanba yalunya, yalu balkimuku. Jaliyanyi nurru jungku nanamanji, baki miku nurriyanyi kurdanba yalunya. Miku.’ Nani narri yanybaka. Ngala nanamuku wankalamuku, yalu barrinani wankalanyi nijanganjinyimuku narringi, baki narri jungkuka barrinani yalu jungkuyi. Narri nulijbangka kurdanbikanyi nganarri. Narri nulijbangka kurdanbikanyi nganarri, yanybangangi ngayu jangkurr nangangi Kudkanyi. Narri jardibirri muwa. Yuwajiwa janarri yurlwa ngakinkanyi jangkurranyi. Janganarri kurdanba, barrinani narringinmukunyi wankalamukunyi yalunjali kurdanba nanamuku jali yanyba jangkurr nangangi Kudkanyi.
MAT 23:33 Narri balkimuku. Narri barrinani bijbawarr miya jala nangka ngadijba karnbana, jala yukumbaka biykanyi yingka. Narri yukumbaka linjumbikanyi yalunya. Ngala miku narringkiyi ngadijba nanganbunanyi Kudnanyi. Janyulu wakaramba narrinya. Janyulu manjijba narrinya wayka Yilyurri.
MAT 23:34 Ngayu karungka narrinya. Baku barri jangayu manjijba yalunya yingkamuku narrindurri. Jangayu manjijba yalunya yanybawarr jangkurranyi Kudkanyi, baki yalunya milidimbawarr, baki yalunya jirdi kunybanyi kulajinyi. Jangayu manjijba yalunya narrindurri, ngala miku janarri kuyu yalungi jangkurr, ngala janarri yabimba balki yaji yalungi marda. Yingkamuku janarri kurdanba yalunya. Yingkamuku janarri langandaba yalunya wabangkarra kurndana. Yingkamuku janarri wajuba yalunya jurjina, janarri jakajba yingkananyi barrawuyabarrawuyananyi, baki yingkananyi barrawuyabarrawuyananyi. Nani janarri yabimba balki yaji yalungi marda.
MAT 23:35 Baki nanankardi barri janyulu daba narrinya Kudwanyi. Bukambiju narrinya jala narri kurdanba nanganginmuku nganinyimuku Kudkanyi, jali yalu jungku kunyba nangangi, janyulu daba narrinya Kudwanyi. Nanda lirrka jali yalu kurdanba, nyuli nanda kunyba nganinyi, niji Yabil. Baki kajamuku yalunjali kurdanba bayngkani nangandu. Baki nanda yingka yali kurdanba, niji nangangi Sakaraya, nyulu jandanyi nangangi Birakiyanyi. Kurdanba yali nanda nganinyi kalawuyngkurru walkurranyina jurjina, wilina dungalana, niji Yalda. Yi. Kajamuku narri kurdanba yalunya, ngala janyulu daba narrinya Kudwanyi. Janyulu kurdanba bukambiju narrinya Jumuku, jala narri kurdanba nanamuku kunybamuku nganinyimuku. Janyulu kurdanba narrinya Kudwanyi.” Barriwa. Nani barri kudanyu ngirrwayi Jisus yalungi Barasimukuyngka baki milidimbawarrayngka.
MAT 23:37 Baki nginduyi Jisus muwa yalungi jali yalu jungku nananyina barrawuyabarrawuyana Kudkanyi, niji Jirusalim. Kudanyu nyuli ngindu muwa yalungi, baki yanyba nyuli, “Narri Jumuku, kudanyu ngayu nginduka muwa narringi. Narri kurdanbayi yalunya jali manjijba Kudwanyi karunkanyi nanganginkanyi jangkurranyi. Narri kurdanbayi yalunya, ngala ngayu nulijbangka lalanbikanyi narrinya. Yurrngumba ngayu nulijbangka lalanbikanyi narrinya, barrinani lalanbaka nanganginmuku bulungumuku julakiwanyi, barrinani bulungumuku jungkuka mardarda kala jaluna.
MAT 23:38 Nani barri ngayu nulijbangka lalanbikanyi narrinya marda. Ngala narri yurlwangka ngaki, baki nanankardi narringi walkurra jurj, janyulu manimani. Mikuyaji yalungi jungunkanyi nanaba muramukuyngka yurrngumba barri.
MAT 23:39 Ngayu karungka narrinya, barlba jangayu yurrngumba barri. Miku nganarriyi najba mili barri. Ngala baku barri juju, jalija narri kuyu ngaki jangkurr, ngawamba nanamanji barri janganarri mili najba. Baku barri juju jalija narri yanyba nangangi Kudkanyi ngaki, ‘Nurru ngajakangka Kud, nyulu lalanbiji nanda jali nyulu manjijba. Nurru ngajakangka Kud, nyulu yabimbiji kunyba yaji nangangi.’ Ngawamba nanamanji barri janganarri mili najba.” Barriwa. Nani barri nginduyi Jisus muwa yalungi, jali yalu jungku nanaba Jirusalim. Barriwa.
MAT 24:1 Baki walajbayi Jisus walkurrananyi jurjnanyi. Jali nyulu walajba, baki badajba yali nanganginmuku kandimuku nangandurri. Yanyba yali nangangi nanankanyi jurjkanyi, walkurra nanda jurj, kunyba barrawu, baki ngiruka marda dungalana.
MAT 24:2 Ngala yanybayi Jisus yalungi, “Yi. Nayinda jurj walkurra, ngala ngayu karungka narrinya, dalyawijbaja nayinda jurj bukamba barri. Baki jarrbalijbaja bukamba dungala. Miku yingka dungala yundu nangandu yingkana. Jarrbalijbaja bukamba dungala.” Barriwa.
MAT 24:3 Baki jilajbayi Jisus karri, baki kirrijba nyuli kulawirana niji Yulib. Badajba yali kandimuku nangangi nangandurri, baki karda yali yanyba nangangi. Ngajaka yali Jisus, “Karukiyi nurrunya, wanyimbala dalyawijbaja nanda walkurra jurj. Wanyimbala. Baki yanka janurru jingkijba jalija ninji wijba, jalija bukamba nangka nayinda yaji. Karukiyi nurrunya, wanyimbaja yaji nanamanji, baki janurru jingkijba, winyurruwa janinji wijba. Karukiyi nurrunya nanankanyi yajinyi.” Barriwa.
MAT 24:4 Baki jananganjayi yalunya Jisuswanyi, “Marda narringkimi lalanbawa, baki marda narrimi miku munyajba yingka jujambikanyi narrinya.
MAT 24:5 Nanamanji barri jayalu badajba nanamuku jujambawarrmuku. Waluku yingka baki bayngkani yingka, baki yingka, baki yingka. Jayalu yanyba, ‘Ngayu Krayis, nanda jali manjijba Kudwanyi.’ Nani barri jayalunjalu jujamba.
MAT 24:6 Nanamanji barri janarri manku yaji yalungi yingkamukuyngka, jayalungka daba. Janarri manku yaji yalungi, jayalungka daba, yingkamuku bundu narringinyina yajina, ngala yingkamuku juju. Ngala marda narrimi miku marrala. Marda narrimi miku marrala jalija narri manku yaji, yalungka daykurri. Bunjulijba jayalungka daykanyi, ngala jilijbawa bukambaja yaji Kudwanyi.
MAT 24:7 Ngayu karungka narrinya. Jayalungka daba. Yalu jala jungku yingkana yajina, baki yingkana yajina, jayalungka daba ngurranyimuku. Baki nanamanji barri mikuwali jardijba nanda mama kajana yajina, baki jayalu birrkalanyi jungku, mikuyaji mamanyi. Baki kulbaja jamba marda. Kudanyu barri kulbaja kudukudu jamba, bundu baki juju barri.
MAT 24:8 Bukamba nayinda kiji badajbaja waluwa, baki bayngkani barri mili kiji badajbaja, walkurra kiji. Barriwa.
MAT 24:9 Nanamanji barri jayalu marrimba narrinya, baki janarrinya kuyu nangandurri mambukarri kurdusnyina, nyulu dabanki narrinya. Janyulu jirrinyba yalunya, yalu kurdanbiji narrinya. Bukambijunyi jayalu ngirra narrinya, durrijbangangi narri ngaki jangkurr.
MAT 24:10 Kajamuku jalija kuyu ngaki jangkurr, jayalu karrinja walu nangandu mambukana kurdusnyina, baki janyulu yabimba kiji yalungi. Ngala warriyaluku barri, kajamuku jayalungka yangkalamba ngakinbunanyi. Jayalu yingijba ngaki jangkurr. Yalu jala yalu waluku jungku malumba kandimuku, jayalungka ngirra. Yingkawanyi janyulu karu mambuka kurduskanyi nanganginkanyi kandinyi, baki jayalu marrimba nanda nangangi kandi dabanki.
MAT 24:11 Badajbaja yingkamuku jujambawarrmuku, baki jayalunjalu jujamba kajamuku jala durrijba ngaki jangkurr.
MAT 24:12 Walkurrambaja nanda kiji baki nanankardi barri miku jayalungka mili maruka muwa. Miku yaliyi jingkijba wanyi yalungi mungkijimuku, ngala jayalungka jakakajba.
MAT 24:13 Ngala nanamuku jalija yalungka miku yangkalamba ngakinbunanyi, jalija yalu jungku ngiruka ngaki yurrngumba barri, janyulu marrimba yalunya mardarda Kudwanyi. Jayalu jungku mili wanka nangandu kingkarri.
MAT 24:14 Ngala waluku barri kajamukunyi jayalunjalu karu kunybanyi jangkurranyi Kudkanyi. Jayalunjalu karu nangangi Kudkanyi, janyulu lalanba yalunya jala yalu kuyu nangangi jangkurr. Waluku barri jayalunjalu karu bukambiju wandijiyana nangangi, baki bayngkani barri bukambaja yaji Kudwanyi. Barriwa.
MAT 24:15 Yingka wankala jali yanyba jangkurr nangangi Kudkanyi, niji nangangi Danyil. Karu nyuli yalunya yingkanyi jalija badajba baku barri juju. Janyulu balkimirra. Janyulu yabimba kaja balki yaji yalungi. Ngayu karungka narrinya, badajbaja nanda balkimirra. Janyulu ngirra Kud. Janyulu karrinja nanaba malaba yajina, baki janyulu balkimba nanda yaji.” Narri jala narri najba nanda jangkurr nangangi Danyilkanyi najana, marda narrimi jingkijba nangangi jangkurr nanankanyi balkinyi jalija nyulu badajba nangankurri.
MAT 24:16 “Jalija nyulu badajba, baki nanamuku jalija yalu jungku nananyina walkurranyina yajina Judiya, baki marda yalimi wirlku nanganbunanyi. Marda yalimi wirlku juju nanganbunanyi kulawirarri yajiyurri.
MAT 24:17 Nanamanji barri jalija nyulu badajba, baki kudiya jayalu jungku danbina jambana. Marda yalimi miku ngankijba barrawuna wudumbiji yalungi yaji. Ngala marda yalimi yinarramba wirlku kulawirarri.
MAT 24:18 Kudiya jayalu waki munjimunji. Marda yalimi miku wijba barndarri wudumbiji yalungi jumbala. Ngala marda yalimi yinarramba wirlku kulawirarri.
MAT 24:19 Kudiya jibarrimuku, jayalu ngawukuku. Kudiya ngardanganjamuku jayalu ngamulujba bardarda yalungi. Ngala warriyaluku. Miku yaliyi wirlku dulu. Jayalunjalu daba burrandiwa.
MAT 24:20 Marda narrimi yanyba mududu nangangi Kudkanyi. Marda narrimi ngajaka Kud, ‘Mikujiyi munyajba nanda balkimirra badaykanyi Sadidi, jala marda nurrimi wuyalijba Jumuku. Baki mikujiyi munyajba badaykanyi wurarawala, jala madujba yaji kudanyu barri.’ Nani barri marda narrimi ngajaka Kud.
MAT 24:21 Wabula barri kamambarra yabimbayi yaji Kudwanyi. Nanamunanyi yurrngumba nanginkurri mikuyaji walkurrayngka kijinyi barrinani nayinda kiji jalija badajba, jalija marda narrimi wirlku kulawirarri. Baki bayngkani barri miku mili walkurra kiji barrinani nayinda kiji.
MAT 24:22 Ngala kurrkunbaja nanda kiji Kudwanyi. Jalimi miku nyulu kurrkunba kiji, baki bukambiju jayalungka janyba nanankanyi kijinyi. Ngala janyulu kurrkunba nanda kiji, marukangangi nyulu muwa nanganginmukuyngka jali nyulu wabula yarrijba nanganginmirra. Barriwa.
MAT 24:23 Nanamanji barri jalija badajba nanda balkimirra, nanda jalija ngirra Kud, yingka janyulu yanyba, ‘Najbakiyi nayinda, nyulu Krayis jali manjijba Kudwanyi,’ ngala yingka janyulu yanyba yingkanyi, nyulu nanda Krayis. Ngala marda narrimi yurlwa yalunginkanyi jangkurranyi.
MAT 24:24 Badajbaja jujambawarrmuku baki jayalu yanyba jujambawarr jangkurr. Yingka yanybaja, ‘Ngayu Krayis,’ ngala yingka yanybaja, ‘Ngayu Krayis.’ Yingka yanybaja, ‘Manjijba ngani Kudwanyi karunki nangangi jangkurr,’ ngala yingka yanybaja, ‘Ngala manjijba ngani Kudwanyi karunki nangangi jangkurr.’ Jayalu nulijba jujambikanyi yalunya, jali yarrijba nanganginmirra Kudwanyi. Jayalu yabimba ngiruka yaji jujambiji yalunya, ngala miku jayalunjalu jujamba.
MAT 24:25 Ngala marda narrimi najbawa yalunya. Ngayu karungka narrinya nanginkanyi yajinyi waluwa barri, baki jalija yalu badajba nanamuku jujambawarrmuku, baki janarri jingkijba yalunya, baki miku narriyi kuyu yalungi jangkurr.
MAT 24:26 Jaliyi yingkawanyi karuja narrinya, ‘Nyulu jungkuka nanaba karru mangkurruna yajina nanda Krayis,’ baki miku narriyi barlba nanankurri. Jaliyi yingkawanyi karuja narrinya, ‘Nangka ngadijbangka bundu nayiba,’ baki miku narrimi kuyu nangangi jangkurr. Jujamba yalu yanyba.
MAT 24:27 Ngayu karungka narrinya, jalija ngayu badajba Buwanya Bukambijuyngka, baki jangayu badajba dulu, barrinani ngajarrwanyi jala bumbaju yaji karrina bayungu. Nani jangayu badajba dulu.
MAT 24:28 Jala nangka janyba mankanyi, baki badajba bukaji. Badajbaja kaja bukaji jarrji yaji. Baki nani barri jalija walkurramirra nanda kiji, baki nanamanji barri jangayu badajba marda.
MAT 24:29 Nanankardi walkurrananyi kijiwunyi barri, baki mikuyaji kambanyi, mikuyaji yakarlanyi. Mikuwali yajba yaji kambawanyi baki yakarlwanyi. Jayalu yirrba warrawiji kingkarrinya. Jayalu karrala wayka. Ngirringirrimba jayalungka kamba baki yakarl, baki warrawiji. Ngirringirrimba jayalungka, baki jayalu wirlku yingkarri yajiyurri.
MAT 24:30 Baki nanamanji barri ngayu Buwanya Bukambijuyngka, jangayu wijba, baki janganjalu najba lalijina. Janganjalu najba badaykurri ngaluna bukambijunyi. Baki jangayu walkurra mambuka yalungi. Baki bukambiju wandijiyana jala yalu jungku balki nangangi Kudkanyi, jayalungka ngindu muwa. Kudanyu jayalungka ngindu muwa, jalija ngayu wijba.
MAT 24:31 Jayalu manku yaji barrinani jala ngurrwangka yaji kudanyu barri, baki manjijbaja Yanjilmuku Kudwanyi. Janyulu manjijba nanganginmuku Yanjilmuku langki baki karri, kula baki bayungu lukuluku wandijiyana. Baki jayalunjalu wudumba nanganginmirra Kudkanyi, baki kuyuja yalunya nangandurri Kudyurri.” Barriwa.
MAT 24:32 Mili yanybayi Jisus yalungi, “Mankumanku narringka nanankanyi kabulanyi. Jala narri najba kabula jal, baki narri jingkijbangka, barringa barri ngardarawala. Barringa barri ngardarawala, jala walajba kabula jal.
MAT 24:33 Baki nani barri, jalija narri najba nayinda walkurra kiji, baki janganarri jingkijba, jangayu wijba jambarri. Janganarri jingkijba, ngayu Buwanya Bukambijuyngka, jangayu wijba jambarri winyurruwa barri.
MAT 24:34 Marda narrimi mankumankuwa nayinda ngaki jangkurr. Ngakinmuku mungkijimuku, Jumuku, miku yaliyi bukamba, waluwa badajbaja nayinda walkurra kiji. Kudiyamuku ngakinmuku mungkijimuku jayalu yuwajiwa jungku, jalija badajba nayinda kiji.
MAT 24:35 Baku barri janyulu manjamanjamba laliji baki jamba Kudwanyi. Janyulu manjamanjamba yalunya. Ngala ngaki jangkurr barri, mikuwali manjamanjamba ngaki jangkurr yingkawanyi. Duja ngaki jangkurr jungkuka yurrngumba barri. Barriwa.
MAT 24:36 Ngala miku ngambalimi jingkijba wanyimbala badajbaja nanda walkurra kiji. Baki miku ngambalimi jingkijba, wanyimbala jangayu wijba jambarri. Nanamukunyi Yanjilmukunyi jala yalu waki nangangi Kudkanyi, miku yalimi jingkijba. Baki ngayu barri Buwanya Bukambijuyngka, miku ngayimi jingkijba. Ngala ngawamba Buwakayu Kingkarri, ngawamba nyulu jingkijbangka, wanyimbala badajbaja nanda walkurra kiji. Ngawamba nyulu jingkijbangka wanyimbala jangayu marda wijba.
MAT 24:37 Wabula kamambarra, manjijbayi walkurra mali Kudwanyi, baki makabayi bukamba yaji walkurranyi maliwanyi. Nanamanji barri yingka wankala, niji nangangi Nuwa, nyuli jungku kunyba nangangi Kudkanyi. Baki nanankardi barri marrimbayi Nuwa mardarda Kudwanyi. Marrimba nyuli Nuwa mardarda, baki nangangi maninganja, baki nanganginmuku jandanyimuku nganinyimuku, baki yalinginmuku maninganjamuku. Marrimbayi bukambiju yalunya mardarda Kudwanyi, jungkungangi Nuwa kunyba nangangi Kudkanyi.
MAT 24:38 Ngala bukambiju yalu yingkamuku, yali jungku balki nangangi Kudkanyi. Yurlwa yali nangangi Kudkanyi, ngala muningka yalungka mankumankuyi yalunginkanyi yajinyi. Jarrba yali yaji, baki ngaraba yali, baki jamalu yalungki, ngala miku yalungkiya mankumanku nangangi Kudkanyi. Miku yaliyanyi kuyu nanda jangkurr nangangi Kudkanyi, jali karu yalunya Nuwawanyi. Nani barri yali jungku yurrngumba barri, nanankurri jali ngankijba Nuwa muwardana kalawuyngkurru.
MAT 24:39 Ngala jali manjijba mali Kudwanyi, baki jingkijba yali nanda jangkurr jali karu yalunya Nuwawanyi, nanda duja jangkurr. Ngurrunbayi yalunya bukambiju maliwanyi. Barriwa. Baki nani marda jalija ngayu wijba Buwanya Bukambijuyngka. Nanamanji jayalu jungku nani marda. Miku jayalu kuyu nangangi jangkurr Kudkanyi, miku jayalungka birrirrinja jilaykanyi ngakindurri. Ngawamba kujajarra jayalu jungku kunyba nangangi Kudkanyi, jayalungka birrirrinja jilaykanyi ngakindurri.
MAT 24:40 Nanamanji barri jalija ngayu wijba, yiningki kujarra nganinyiwuya, jabula malumba waki. Kuyuja yingka ngakindurri Yanjilwanyi, ngala janyulu yingijba nanda yingka wambu barri.
MAT 24:41 Yiningki kujarra jibarriwuya, jabula wuyala mama. Kuyuja yingka ngakindurri Yanjilwanyi, ngala janyulu yingijba nanda yingka jibarri wambu barri.
MAT 24:42 Marda narringkimi birrirrinja jilaykanyi ngakindurri. Miku narrimi jingkijba wanyimbala jangayu wijba Buwanya Bukambijuyngka. Nanankardi barri marda narringkimi birrirrinja yurrngumba jilaykanyi ngakindurri. Barriwa.”
MAT 24:43 Mili yanybayi Jisus yalungi. Muningka nyuli yanyba, “Yiningki badajbayi maninjaku nganyindurri barndarri mungana. Miku ninjiyanyi jingkijba badaykanyi nyulu, baki maninjakujba nyuli nganyi yaji mungana. Ngala jaliyanyi ninji jingkijba, wanyimbala nyuluja badajba nanda maninjaku, baki nganyingkiyanyi birrirrinja nangangi. Ninjiyanyi jungku yamininyi mungana yukumbikanyi nanankanyi maninjakunyi, baki miku nyuliyi maninjakujba yaji.
MAT 24:44 Baki nani barri miku nganarri jingkijba Buwanya Bukambijuyngka. Miku narrimi jingkijba wanyimbala jangayu wijba nanginkurri. Marda narringkimi miku mankumanku, ‘Jilijbawa janyulu wijba. Jilijbawa. Miku nyuliyi badajba winyurru. Yiningki janyulu badajba baku barri ngardarawala.’ Marda narringkimi miku mankumanku nani barri, mikungangi narrimi jingkijba wanyimbala jangayu badajba. Yiningki winyurruwa, yiningki baku barri. Ngala marda narringkimi birrirrinja yurrngumba ngaki jilaykanyi ngakindurri jalija ngayu wijba. Barriwa.”
MAT 24:45 Mili barri yanybayi Jisus yalungi. Muningka nyuli yanyba yalungi, “Yingka mambuka nyuli barlba nanganbunanyi barndananyi. Barlba nyuli yingkarri yajiyurri, baki jungku nyuli nanaba yurrngumba. Waluwa nyuli barlba, baki yarrijba nyuli yingka wakiwarr nangangi lalanbikanyi nangangi jamba baki nanganginmuku yingkamuku wakiwarrmuku, waykanyi yalunya mamanyi. Janyulu yarrijba kunyba wakiwarr, jirdi kunybanyi kulajinyi lalanbikanyi nangangi yaji.
MAT 24:46 Baku barri jalija nyulu wijba nanda mambuka, baki janyulu mirnarrijba muwa nanankanyi lalanbawarrayngka jali nyulu yarrijba. Baki nanda lalanbawarr janyulu marda mirnarrijba muwa, jungkungangi nyuli kunyba nanganginkanyi mambukanyi. Kudanyu nyuli lalanba nanda yaji mambukanyi, marda nanganginmuku wakiwarrmuku.
MAT 24:47 Baki nanangini mambukawanyi, janyulu yarrijba nanda kunyba lalanbawarr mambuka bayngkani nangandu, lalanbikanyi nanganginkanyi yajinyi junu. Janyulu lalanba nangangi jamba baki bulukimuku baki wakiwarrmuku yurrngumba barri, nyulungangi kunyba kulaji baki kunyba lalanbawarr barri.
MAT 24:48 Ngala jaliyi miku kunyba nanda lalanbawarr, jali yarrijba mambukawanyi lalanbikanyi nangangi yaji. Jaliyi nyulu balki nganinyi, baki yiningki janangka yanyba, ‘Ngaki mambuka, janyulu jungku nananyina yajina yurrngumba barri. Miku nyuliyi wijba dulu.’
MAT 24:49 Baki miku janyulu lalanba yalunya wakiwarrmuku kudanyu barri. Miku janyulu wajba yalunya mamanyi, ngala janyulu daba yalunya. Janyulu kandimba yingkamuku balkimuku. Jayalu malumba jungku, baki jayalungka wardamba mamanyi, jayalu ngaraba kamukamu.
MAT 24:50 Ngala baku barri janyulu wijba nanda mambuka nanganginkurri barndarri. Janyulu wijba nanamanji jalimi miku jingkijba nanda balki lalanbawarr. Baki janyulu najba nanda lalanbawarr wayawayambikurri nangka kulaji. Ngala nanganginmuku wakiwarrmuku jungku yalu birrkalanyi. Janyulu najba nanda balki yaji jali yabimba nanangini lalanbawarranyi, baki janyulu ngarrangarra muwa nangangi. Janyulu kudanyu ngarrangarra muwa nangangi, baki janyulu daba nanda balki lalanbawarr baki janyulu janyba nanganbunanyi barndananyi. Baki janangka ngindu muwa nanda balki lalanbawarr, janyulu waka kudanyu barri. Barriwa.” Nani barri muningka yanybayi Jisus yalungi karunki yalunya yajinyi. Marda yalimi jungku barrinani nanda kunyba lalanbawarr jirdi kunybanyi kulajinyi. Waki nyuli kudanyu barri, baki nani nangki birrirrinja nanganginkanyi mambukanyi jali nyulu wijba. Nanankardi barri yabimbayi kunyba yaji nangangi mambukawanyi. Ngala nanda balki lalanbawarr miku nangkiyanyi birrirrinja nanankanyi mambukanyi jali nyulu wijba. Baki nani barri marda jalija wijba Jisus. Nanamuku kunybamuku, janyulu yabimba kunyba yaji yalungi, jayalu jungku mili wanka kingkarri barri. Ngala nanamuku balkimuku, janyulu yabimba balki yaji yalungi, janyulu janyba yalunya jangurri Yilyurri jalija nyulu wijba.” Barriwa.
MAT 25:1 Mili barri yanybayi Jisus yalungi, “Mili jangayu karu narrinya nanankanyi jangkurranyi jala lalanba narrinya Kudwanyi. Mili barri jangayu muningka yanyba narringi. Jamalu bulangki, baki kamu barri mungana yali yabimba wangarr bulangi barrawuna. Walajbayi kaja wurrumbarramuku wangarranyi 10 barri. Walajba yali, ngala jilijbawa wanbiyaja nanda buyingkinyi nawinganja. Badajbaja nyulu jujunanyi. Baki jilajba yali wurrumbarramuku yubalina madamadambiji yalungka. Nani barri yalili yabimba yaji Jumukunyi, jalili bulangka jamalu. Wudumba yali mirnbi. Kaja mirnbi yali wudumba. Yingkamuku wurrumbarramuku, 5 barri, yali kunyba kulaji. Bunyarrijba yali yalungi mirnbi kunguyudinyi waluwa yali jilajba, baki kuyu yali mili kungu yalundu bayayawana bujilina. Ngala nanamuku yingkamuku wurrumbarramuku, yali mudumuku. Miku yaliyanyi kuyu mili kungu yalundu. Baki jilajba yali juju bijal, baki yukumba yali nanankanyi nanganginkanyi nawinganjanyi. Yukumba yali nangangi, bak kuluka yali. Barriwa.
MAT 25:6 Burrandi mungana barri, kayayi yingka yalungi wurrumbarramukuyngka, ‘Nyulu badajbangka nanda buyingkinyi nawinganja. Jangambala jilajba nangandurri, madamadambiji ngambalaka.’
MAT 25:7 Walajba yali wurrumbarramuku baki kunymambayi yalungi mirnbi, waluwa jayalu jilajba nangandurri.
MAT 25:8 Ngala nanamuku mudumuku wurrumbarramuku, mikuyaji mili kungunyi yarriykanyi mirnbina. Ngajaka yalunjali yingkamuku, ‘Janarri wajba nurrunya kudiyayngka narringinkanyi kungunyi, baki janurru marda jilajba mirnbiyudi.’
MAT 25:9 Ngala jananganja yalunjali mudumuku, ‘Miku nurriyi wajba narrinya kungunyi. Ngawamba bayakarda nayi kungu nurrungi, miku kaja. Janarri wijba, mili wudumbiji narrinyi kungu dungalana.’
MAT 25:10 Baki wijba yali wudumbiji mili kungu. Ngala jala yalu yuwajiwa wudumbawa yaji, ngala wanbiyayi nanda buyingkinyi nawinganja nangangi. Baki nanamuku kunybamuku wurrumbarramuku jali yalu mili kuyu kungu yalundu, yalungki birrirrinja, baki yali jilajba nangandu barrawurri wangarranyi. Wanbiya yali, baki ngankijba yali barrawuna, baki murumbayi bardawa yingkawanyi baki kijijbayi kudanyu barri.
MAT 25:11 Kamu barri nanamuku yingkamuku wurrumbarramuku yali wanbiya barrawuna, ngala murumbayi nanda bardawa. Baki kaya yali nangangi nawinganjanyi, ‘Dulabakiyi nayinda bardawa. Dulabakiyi, baki janurru ngankijba.’
MAT 25:12 Ngala jananganjayi nawinganjawanyi, ‘Miku ngayiyi dulaba. Miku ngayimi jingkijba narrinya. Miku.’” Barriwa. Nani barri muningka yanybayi Jisus yalungi.
MAT 25:13 Baki mili yanybayi Jisus yalungi, “Nanamuku wurrumbarramuku jirdi kunybanyi kulajinyi, yalungki birrirrinja jilaykanyi nangandu buyingkinyina nawinganjana jali nyuli badajba. Baki nani barri marda narringkimi birrirrinja jilaykanyi ngakindu jalija ngayu badajba. Barriwa.”
MAT 25:14 Mili barri yanybayi Jisus yalungi, “Mili jangayu karu narrinya nanankanyi jangkurranyi, jala lalanba narrinya Kudwanyi. Mili barri jangayu muningka yanyba narringi. Yingka mambuka nyuli barlba nanganbunanyi yajinanyi. Nyuli barlba yingkarri yajiyurri, baki jungkuyi nanaba yajina. Ngala waluku barri, waluwa nyuli barlba, baki yanyba nyuli yalungi murrkuyngka wakiwarrayngka nanganginkanyi. Karu nyuli yalunya, jayalu lalanba nangangi dungala ngala janyulu jungku nananyina yingkana yajina.
MAT 25:15 Baki wajba nyuli yalunya wakiwarrmuku nanganginkanyi dungalanyi. Yingka wakiwarr, nyuli kunybamirra kulaji, baki nyuli wajba nanda wakiwarr kajanyi dungalanyi, 5,000 dulanyi. Yingka wakiwarr, nyuli kunyba kulaji, baki nyuli wajba nanda wakiwarr kajanyi dungalanyi, 2,000 dulanyi. Ngala yingka wakiwarr, nyuli kunyba bijal kulaji, baki nyuli wajba nanda wakiwarr kudiyanyi dungalanyi 1,000 dulanyi. Nani nyuli wajba yalunya dungalanyi lalanbikanyi nangangi, baki barlba nyuli.
MAT 25:16 Nanda wakiwarr jirdi kunybanyimirra kulajinyi nangangi, nyuli kuyu nanda kaja dungala 5,000 dula, baki nyulu wudumba kaja yaji nananyina dungalana. Baku barri nyuli wajba yingkamuku nanankanyi yajinyi, baki wudumba nyuli kaja mili dungala 10,000 dula. Nani barri nyuli yabimba nanangini wakiwarranyi jirdi kunybanyimirra kulajinyi nangangi. Nani nyuli walkurramba nanda dungala jali wajba mambukawanyi, nyulu lalanbikanyi. Barriwa.
MAT 25:17 Baki nanda wakiwarr jirdi kunybanyi kulajinyi, nyuli kuyu nanda 2,000 dula, baki nyuli yabimba nanamannga yaji. Wudumba nyuli kaja yaji nananyina dungalana, baki baku barri nyuli wajba yingkamuku nanankanyi yajinyi dungalanyi, baki wudumba nyuli 4,000 dula. Nani nyuli walkurramba nanda dungala jali wajba mambukawanyi. Barriwa.
MAT 25:18 Ngala nanda yingka wakiwarr jali bijal kunyba kulaji, barlba nyuli, baki ngadijba nyuli nanda 1,000 dula jali wajba mambukawanyi. Kurrijba nyuli lawarr jambana, yarrijba nyuli nanda dungala wayka lawarrina, baki makaba nyuli yaji. Barriwa.
MAT 25:19 Baku barri juju wijbayi nanda mambuka nanganginkurri yajiyurri. Wijba nyuli, baki manjijba nyuli yingka wudumbiji nanganginmuku wakiwarrmuku. Baki badajba yali nanamuku murrku wakiwarrmuku, jali wajba yalunya dungalanyi lalanbikanyi mambukawanyi. Jilajba yali nangandurri mambukarri.
MAT 25:20 Waluku barri walajbayi nanda wakiwarr jali wajba mambukawanyi 5,000 dulanyi, baki nyuli yanyba, ‘Mambuka. Nganinji wajbayi 5,000 dulanyi, baki ngayi walkurramba nanda dungala. Nanijba nyulu 10,000 dula. Ninga wajbangka bukamba nanginkanyi kajanyi dungalanyi.’ Barriwa.
MAT 25:21 Baki jananganjayi mambukawanyi, ‘Ninji kunyba wakiwarr. Ninji kunyba kulaji. Waki ninji kudanyu barri ngaki, baki nanankardi janinga yarrijba mambuka bayngkani ngakindu lalanbikanyi kaja ngaki yaji. Ngankijbakiyi ngakinkurri barrawurri. Jungkukiyi ngakindu, baki janungkala mirnarrijba muwa.’ Nani barri nyuli jananganja nanda wakiwarr. Barriwa.
MAT 25:22 Bayngkani barri walajbayi nanda wakiwarr jali wajba mambukawanyi 2,000 dulanyi, baki yanyba nyuli, ‘Mambuka. Nganinji wajbayi 2,000 dulanyi, baki ngayi walkurramba nanda dungala. Nanijba barri nyulu 4,000 dula. Ninga wajbangka bukamba nanginkanyi kajanyi dungalanyi.’ Barriwa.
MAT 25:23 Baki jananganjayi mambukawanyi, ‘Ninji kunyba wakiwarr. Ninji kunyba kulaji. Waki ninji kudanyu barri ngaki, baki nanankardi janinga yarrijba mambuka bayngkani ngakindu lalanbikanyi kaja ngaki yaji. Ngankijbakiyi ngakinkurri barrawurri. Jungkukiyi ngakindu, baki janungkala mirnarrijba muwa.’ Nani barri nyuli jananganja nanda wakiwarr. Barriwa.
MAT 25:24 Bayngkani barri walajbayi nanda wakiwarr, jali wajba mambukawanyi 1,000 dulanyi, baki yanyba nyuli, ‘Mambuka. Ninga jingkijbangka ninji jardibirri muwa. Miku ninjimi waki wudumbikanyi dungala. Ngala ninji wudumbaka yingkamuku, yalu wakinkanyi kudanyu nganyi, baki nanankardi ninji wudumbaka kaja dungala, wakingangi yalu kudanyu nganyi nganyinmuku wakiwarrmuku.
MAT 25:25 Baki marrala ngayu nganyi. Miku ngayiyanyi nulijba mamanumbikanyi nanda dungala jali nganinji wajba lalanbikanyi nganyi. Marrala ngayi mamanumbikanyi nanda dungala nganyi, baki ngadijba ngayi nanda dungala. Makaba ngayi wayka jambana. Nayiba nanda dungala, nanda 1,000 dula jali nganinji wajba wabula. Nayiba nanamannga dula.’ Barriwa.
MAT 25:26 Ngala ngirrwayi mambuka nangangi, ‘Ninji barri balki. Ninji bunmalijba. Wanyingkanyi ninji ngadijba nanda dungala jambana. Nganinji jingkijba, ngayu wudumbaka dungala, wakingangi narri kudanyu ngaki.
MAT 25:27 Baki nanankardi barri marda ninjiyanyi yabimba yaji barrinani nanankujarranyi, bula yabimbayi yaji. Marda ninjiyanyi walkurramba nanda dungala ngaki. Marda ninjiyanyi yarrijba nanda 1,000 dula najana. Baki baku barri ninjiyanyi dulaba najananyi, baki ninjiyanyi wudumba 1,000 dula baki bijal mili. Marda ninjiyanyi yarrijba dungala najana nani. Miku ninji kunyba wakiwarr. Ninji balkimirra.’ Nani barri ngirrwayi mambuka nangangi.
MAT 25:28 Baki karu nyuli yingka wakiwarr nangandu, ‘Kuyukiyi nayinda dungala nanganbunanyi. Wajbakiyi nanda jali wudumba mijimbangu dungala ngaki, 10,000 dula. Nyulu kunyba wakiwarr. Wajbakiyi nanginkanyi dungalanyi.
MAT 25:29 Ngala kuyukiyi nayinda balki wakiwarr ngakinbunanyi. Janybakiyi nanankurri danbiyurri jala mungijba yaji. Nanaba janangka ngindu muwa kudanyu barri. Nanda jala jungku jirdi kajanyi yajinyi, janyulu wudumba mili yaji, baki nyulu jungkuja kajamukuyngka yajinyi jirdi. Ngala nanda jala jungku jirdi bayayawayngka yajinyi, janyulu mamanumba nanda bayayawa yaji. Yingkawanyi kuyuja yaji nanganbunanyi, baki janyulu jungku mikuyaji yajinyi.’ Nani barri yanybayi mambuka yalungi. Janarri jingkijba nanda jangkurr. Kud, nyulu barrinani nanda mambuka. Jaliyi ngambala waki kudanyu nangangi Kudkanyi, baki janyulu wajba ngambalanya kajanyi yajinyi. Janyulu yabimba kunyba yaji ngambalangi. Ngala jaliyi ngambala miku kudanyu waki nangangi, baki miku janyulu wajba ngambalanya yajinyi. Miku janyulu yabimba kunyba yaji ngambalangi. Barriwa.”
MAT 25:31 Mili barri yanybayi Jisus yalungi, “Baku barri ngayu Buwanya Bukambijuyngka, jangayu wijba nanginkurri, baki jangayu wirimalaru nanamanji barri. Jangayu wijba nanginkurri, baki yalu Yanjilmuku, jayalu marda wijba ngakindu. Jangayu wijba, baki jangayu wirimalaru yalungi bukambijuyngka.
MAT 25:32 Nanamukunyi Yanjilmukunyi jayalunjalu kuyu bukambiju ngakindurri. Nganinyimuku baki jibarrimuku, bukambiju wandijiyana, jayalunjalu kuyu ngakindurri, baki jangayu nyalinyalimba yalunya. Jangayu nyalinyalimba yalunya, barrinani yalili nyalinyalimba bulukimuku.
MAT 25:33 Nanamuku barri, jala yalu maruka muwa nangangi Kudkanyi, jala yalu jungku yurlurrmba nanganginkanyi yuwanyi, jangayu manjijba yalunya nanankurri karriya yajiyurri. Ngala nanamuku jala miku yalimi maruka muwa nangangi Kudkanyi, jala yalu miku jungku yurlurrmba nanganginkanyi yuwanyi, jangayu manjijba yalunya nanankurri bayinga yajiyurri.
MAT 25:34 Baki ngayu wirimalaru, jangayu yanyba yalungi, nanamukuyngka karriya ngakindu, ‘Kabukawa. Janarri jungku kingkarri nangandu Kudnyina yurrngumba barri. Narri jungkuyi yurlurrmba nangangi Kudkanyi, baki Buwakanya Kud nyulu mirnarrijbangka muwa narringi. Wabula kamambarra, waluwa yabimbayi yaji Kudwanyi, waluwa nyuli yabimba laliji baki jamba, nanamanji barri mankumanku nangki Kud, janyulu kuyu narrinya nanganginkurri yajiyurri, narri jungunkanyi nangandu yurrngumba. Nani barri mankumanku nangki Kud wabula. Baki nanijba nyulu yabimbaka nanda yaji. Janarri jungku nangandu kingkarri yurrngumba barri lalijina.
MAT 25:35 Jangayu manjijba narrinya nangandurri, jungkungangi narri kunyba ngaki. Jali ngayu birrkalijba, baki nganarri wajbayi mamanyi. Jali ngayu warinjijba, baki nganarri wajbayi wabudanyi. Jali ngayu ngurranyi narringi, baki nganarri kandimbayi, nganarri kuyuyi narringinkurri barndarri.
MAT 25:36 Jali ngayu mikuyaji jumbalanyi, baki nganarri wajbayi jumbalanyi. Jali ngayu lunji, baki nganarri lalanbayi. Jali ngayu jungku brisinyina, baki nganarri yidadambayi barri.’ Barriwa. Nani jangayu yanyba yalungi nanamukuyngka karriya jali yalu jungku yurlurrmba nangangi Kudkanyi.
MAT 25:37 Ngala janganjalu yililikajba, ‘Ngala Mambuka. Wanyimbala ninji birrkalijbayi, wanyimbala, baki ninya nurru wajba mamanyi. Wanyimbala ninji warinjijbayi, baki ninya nurru wajba wabudanyi.
MAT 25:38 Wanyimbala ninji jungkuyi barrinani ngurranyi nurrungi, baki ninya nurru kandimba. Wanyimbala ninji jungkuyi mikuyaji jumbalanyi, baki ninya nurru wajba jumbalanyi.
MAT 25:39 Wanyimbala ninji lunjiyi, baki ninya nurru lalanba. Wanyimbala ninji jungkuyi brisinyina, baki ninya nurru yidadamba. Miku ninjiyanyi jungku nani. Miku ninya nurriyanyi lalanba nani barri. Miku nurriyi jingkijba nganyi jangkurr.’ Nani barri janganjalu yililikajba.
MAT 25:40 Baki jangayu jananganja yalunya nayi barri, ‘Ngayu wirimalaru. Ngayu karungka narrinya. Jali narri lalanba yalunya nanamuku bayakardamuku, baki nanda barrinani jali nganarri lalanba, yalungangi bababanyamba ngayu yalunya. Jali narri wajba nanda bayakarda mamanyi ngala nyuli birrkalijba, baki nanda barrinani jali nganarri wajba mamanyi. Jali narri wajba nanda bayakarda wabudanyi ngala nyuli warinjijba, baki nanda barrinani jali nganarri wajba wabudanyi. Nani barri nganarri lalanbayi, jali narri ngindu muwa yalungi, jali narri lalanba yalunya bayakardamuku. Baki nanankardi barri ngayu mirnarrijbangka muwa narringi. Barriwa janarri jungku kingkarri nangandu Kudnyina.’ Nani barri jangayu yanyba yalungi karriya.
MAT 25:41 Ngala nanamuku jalija yalu jungku bayinga ngakindu, jangayu yanyba yalungi, ‘Narri balkimuku. Barriwa janarri barlba juju ngakinbunanyi. Yanybaka Kud narringi, janarri jungku kurdan yurrngumba. Ngayu manjijbangka narrinya wayka Yilyurri, jala yajbangka walkurra jangu yurrngumba barri. Nanaba jayalu jungku marda, nanda mambuka wuwarranyi, nanda Sayidin, baki nanganginmuku balkimuku Yanjilmuku. Ngayu manjijbangka yalunya janguyurri, baki jayalu jungku nanaba janguna yurrngumba, baki janarri marda jungku yalundu janguna.
MAT 25:42 Ngayu manjijbangka narrinya janguyurri, mikungangi narriyanyi jungku kunyba ngaki, mikungangi nganarriyanyi lalanba. Jali ngayu birrkalijba, baki miku nganarriyanyi wajba mamanyi. Jali ngayu warinjijba, baki miku nganarriyanyi wajba wabudanyi.
MAT 25:43 Jali ngayu ngurranyi narringi, baki miku nganarriyanyi kandimba. Jali ngayu mikuyaji jumbalanyi, baki miku nganarriyanyi wajba jumbalanyi. Jali ngayu lunji, baki miku nganarriyanyi lalanba. Jali ngayu jungku brisinyina, baki miku nganarriyanyi yidadamba. Nanankardi barri jangayu manjijba narrinya jangurri. Barriwa.’ Nani barri jangayu yanyba yalungi.
MAT 25:44 Ngala nanamukunyi balkimukunyi, jayalu yililikajba ngana, ‘Ngala mambuka. Ngala wanyimbala ninji birrkalijbayi. Ngala wanyimbala ninji warinjijbayi. Ngala wanyimbala ninji jungku ngurranyi nurrungi. Ngala wanyimbala ninji jungkuyi mikuyaji jumbalanyi. Ngala wanyimbala ninji lunjiyi. Ngala wanyimbala ninji jungkuyi brisinyina. Wanyimbala ninji jungkuyi nani, nurru lalanbikanyi ninya. Miku ninya nurriyanyi najba jungunkanyi nani.’ Nani barri janganjalu yililikajba.
MAT 25:45 Baki jangayu jananganja yalunya, ‘Ngayu wirimalaru. Ngayu karungka narrinya, narri najbayi nanamuku bayakardamuku jungunkanyi nani, ngala miku narriyanyi ngindu muwa yalungi, miku narriyanyi lalanba yalunya. Ngala narri yurlwayi yalungi. Baki nanda barrinani narri yurlwayi ngaki, yalungangi bababanyamba ngayu yalunya.”
MAT 25:46 Nani barri jangayu jananganja yalunya, nanamuku balkimuku. Baki jangayu manjijba yalunya wayka Yilyurri, yalu jungunkanyi nanaba yurrngumba. Ngala nanamuku kunybamuku, jangayu manjijba yalunya kingkarri nangandurri Kudyurri, baki nanaba jayalu jungku mili wanka nangandu yurrngumba barri. Barriwa.” Nani yanybayi Jisus yalungi milidimbikanyi yalunya. Barriwa.
MAT 26:1 Jali bukamba milidimbayi yalunya nanginkanyi jangkurranyi Jisuswanyi, baki mili nyuli yanyba yalungi, nanganginmukuyngka kandimukuyngka,
MAT 26:2 “Narri jingkijbangka, baku barri yingkana munganawa jayalu yabimba nanda wangarr, niji Kangandijba Barndana Yajinyi, jalili yalu jarrba nanda bulungu nangangi jibkanyi, baki damba ngala nyulu mikuyaji bululunyi. Jayalu yabimba nanda wangarr yingkana munganawa, baki nanamanji barri, janganjalu wudumba, Buwanya Bukambijuyngka. Janganjalu wudumba. Janganjalu langandaba wabangkarra kurndana kurdanbiji ngana.” Nani nyuli yanyba yalungi. Barriwa.
MAT 26:3 Ngala mambukamuku jurjkanyi baki malbumalbumuku, malumba yali jungku yanybikanyi yalungki nangangi Jisuskanyi. Malumba yali jungku nanganginyina barrawuna Kayabaskanyi, jali walkurra mambuka jurjkanyi.
MAT 26:4 Yanyba yalungki yanka jayalu kardarda marrimba Jisus, baki jayalu kurdanba Jisus. Miku yaliyanyi nulijba yalungi muramukuyngka jingkiykanyi jalija yalu marrimba Jisus.
MAT 26:5 Yanyba yalungki, “Jangambala marrimba Jisus baki jangambala kurdanba, ngala miku nanamanji jalija ngambala jungku nanginkanyi wangarranyi. Kajamuku yalu badajbangka nanginkurri nanginkanyi wangarranyi, baki yalungka yanyba nangangi Jisuskanyi, nyulu nanda jali manjijba Kudwanyi. Jayalu yabimba kiji ngambalangi jaliyi ngambala marrimba Jisus wangarrina. Jayalu yabimba walkurra kiji ngambalangi.” Barriwa. Nani yalungki yanyba marrimbikanyi Jisus kardarda barri.
MAT 26:6 Barlbayi Jisus karri nanankurri bayakardarri barrawuyabarrawuyarri niji Bidani, baki ngankijba nyuli barrawuna. Nanda nangangi barrawu Sayiminkanyi. Nanda nganinyi Sayimin, wabula nyulili ngujbulijba waban bukamba, ngala nanijba kunybijbayi barri. Jungkuyi Jisus baki nanganginmuku kandimuku nangandu, baki wardamba yalungki mamanyi.
MAT 26:7 Ngala yalungki wardamba mamanyi, baki ngankijbayi jibarri kalawuyngkurru barrawuna. Kuyu nyuli bujili nangandu marnina. Kalawunyi bujilina nanda yaji barrinani jirrki, ngala nanjananja. Banjawayi kunyba kudu. Nanamanji barri yalili yarrijba nanda yaji kuyuwanana Jumukunyi waluwa yalili makaba mankanyi nangangi jambana. Wajbayi kajanyi dungalanyi jibarriwanyi, baki wudumba nyuli nanda barrinani jirrki. Jilajba nyuli nangandurri Jisusyurri, baki bindabayi nanda barrinani jirrki nangandu kulajina Jisusnyina.
MAT 26:8 Najba yali yaji kandimukunyi. Najba yali jibarri bindabankurri nanda barrinani jirrki nangandu kulajina, baki yali ngarrangarra muwa nangangi. Yanyba yalungki, “Nayinda jibarri, nyulu balki. Wanyingkanyi nyuli bindaba nanda yaji nangandu kulajina. Jaliyanyi nanda nurrungi, baki nurriyanyi wajba yalunya nanankanyi wudumbiji kaja dungala. Baki nurriyanyi wajba yalunya nanankanyi dungalanyi, yalunya jala mikuyaji yalungi dungalanyi.”
MAT 26:10 Ngala jingkijbayi Jisus nanda jali yalungka yanyba, baki yanyba nyuli yalungi, “Wijbakiyi jurlwa nanankanyi jibarrinyi. Yabimba nyuli kunybamirra yaji ngaki.
MAT 26:11 Jawuda nanda jala mikuyaji yalungi dungalanyi, yurrngumba yalu jungkuka narrindu. Yurrngumba yuku narri lalanba yalunya jala mikuyaji dungalanyi yalungi. Ngala miku ngayiyi ngayu jungku nayiba narrindu yurrngumba. Miku janarri jurlwa nangangi.
MAT 26:12 Bindaba nyuli nanda barrinani jirrki ngakinyina mankanyina, baki nanankardi birrirrinja ngaka mankanyi makaykanyi nganjalu jambana.
MAT 26:13 Ngayu karungka narrinya duja jangkurranyi. Baku barri juju jayalunjalu karu ngakinkanyi kunybanyi jangkurranyi. Yurrngumba jayalunjalu karu wandijiyana. Jalija yalunjalu karu ngaki, baki jayalunjalu karu nanginkanyi jibarrinyi marda. Jayalunjalu karu nanginkanyi yajinyi jali nyulu yabimba ngaki. Baki jayalu marda jingkijba nayinda jibarri, nyulu kunyba marda ngaki.” Barriwa.
MAT 26:14 Yingka kandi nangangi Jisuskanyi, niji Judas Yiskariyud, nyuli jilajba yalundurri, walkurrayngkurri mambukarri jurjkanyi.
MAT 26:15 Ngajaka nyuli yalunya, “Yankanu dungala janganarri wajba, jaliyi ngayu kuyu narrinya nangandurri Jisusyurri, narrija marrimbiji Jisus.” Yanyba yali nangangi, “Janinya nurru wayba 30 dulanyi, jaliyi ninji kuyu nurrunya nangandurri.” Baki wajba yali Judas nanankanyi dungalanyi. Barriwa.
MAT 26:16 Nanankardi barri nanangini Judaswanyi nyuliyanyi kuyu yalunya mambukamuku jurjkanyi nangandurri Jisusyurri, yalu marrimbiji Jisus. Yurrngumba nangki mankumanku yanka janyulu kuyu yalunya nangandurri. Barriwa.
MAT 26:17 Jali waluwinyi nanda wangarr yalungi niji Kangandijba Barndana Yajinyi, baki jilajba yali kandimuku nangandurri Jisusyurri. Baki yilikajba yali, “Wanjawa yajina janurru yarrijba nayinda yaji kamunyi wangarranyi. Wanjawa yajina janurru yarrijba mama barri.”
MAT 26:18 Yanybayi Jisus kujarrayngka yalungi. Nyuli karu bulanya, jabula jilajba yingkarri kandiyurri nangangi Jisuskanyi. Yanyba nyuli, “Jalija nimbala wanbiya nangandu, baki janimbala yanyba nayinda jangkurr nangangi, ‘Nanda Milidimbawarr nurrungi, nyulu yanybaka, barringa barri bukamba nyulu wakinkanyi nayiba jambana. Nyulu baki nanganginmukunyi kandimukunyi, janurru jarrba nayinda wangarr kamu nganyinyina barrawuna.’ Nani barri janimbala yanyba nangangi, baki janimbala yarrijba yaji wangarranyi nanganginyina barrawuna.” Barriwa.
MAT 26:19 Baki jilajba buli nanankurri nganinyiyurri. Karu buli nanankanyi jangkurranyi Jisuskanyi, baki jilajba buli nangandu nanganginkurri barrawurri. Baki nanaba buli yundijba mama kamunyi wangarranyi niji Kangandijba Barndana Yajinyi. Barriwa.
MAT 26:20 Ngala nyuli mungimungijba yaji, baki badajba yali karrina, Jisus baki nanganginmuku kandimuku. Jilajba yali nanankurri barrawurri baki jungku yali wangarranyi.
MAT 26:21 Ngala yali jarrba yaji, baki yanybayi Jisus yalungi, “Ngayu karungka narrinya, yingamali narringi janangka yangkalamba ngakinbunanyi. Janyulu karu yingkamuku wanjawa janganjalu wudumba. Baki janganjalu marrimba.” Barriwa.
MAT 26:22 Jali manku nanda jangkurr kandimukunyi, baki ngindu yali muwa. Yanyba yali nangangi, yingka, baki yingka, baki yingka, “Mambuka. Miku kuna ngayu nanda. Miku ngayiyi ngayu karu yalunya nganyi.” Nani yalili yanyba nangangi.
MAT 26:23 Jananganjayi yalunya Jisuswanyi, “Yingamali jala jarrbangka mama ngakindu, janangka yangkalamba ngakinbunanyi. Janyulu karu yalunya ngaki.
MAT 26:24 Ngayu Buwanya Bukambijuyngka, jangaka janyba. Nanangini najawanyi Kudkanyi karungka yalunya ngaki, jangaka janyba. Ngala nanda nganinyi jalija yalunya wajba ngaki, janangka ngindu muwa. Janangka ngindu muwa kudanyu barri. Jaliyanyi nangki miku binandaba, baki yuku janyulu kunyba yaji nangangi.” Barriwa.
MAT 26:25 Baki nanda Judas, jali wujina wudumba dungala yalunbunanyi, nyulu marda yanybayi nangangi Jisuskanyi, “Milidimbawarr. Miku kuna ngayu nanda. Miku jangayu karu mambuka nganyi. Miku barri.” Ngala kardarda barri jananganjayi Judas Jisuswanyi, “Ninji barri nayi. Ninji.” Barriwa.
MAT 26:26 Ngala yalungki wardamba mamanyi, baki wudumbayi kudiya damba Jisuswanyi. Marrimba nyuli nanda damba, baki yanyba nyuli mududu nangangi Kudkanyi nanankanyi dambanyi. Dalyamba nyuli damba baki wawajba nyuli yalunya bijalanyi dambanyi. Yanyba nyuli yalungi, “Kuyu narri nayinda damba. Janarri jarrba. Nayinda damba barrinani ngaki mankanyi.” Barriwa.
MAT 26:27 Baki nyuli wudumba yukururu jirdi ngarrkinyi krayibkanyi. Yanyba nyuli mududu nangangi Kudkanyi nanankanyi ngarrkinyi, baki wawajba nyuli yalunya ngarrkinyi. Yanyba nyuli yalungi, “Ngaraba narri bukambijunyi nayinda ngarrki.
MAT 26:28 Nayinda ngarrki barrinani ngaki ngulya. Bukambijunyi yalu barimbaka yaji. Baki marda yalungkimi janyba yalunginkanyi balkinyi yajinyi jalili yalu yabimba. Ngala jangaka ngaka janyba yalungi. Jalija yalu kuyu ngaki jangkurr, baki jayalu wankijba, janybangangi jangaka yalungi. Nani barri ngaki ngulya barlbangka kajamukuyngka. Nani barri jangayu yabimba, nanankanyingangi jangkurranyi jali yanyba Kud, miku yangkalambikanyi.
MAT 26:29 Ngayu karungka narrinya, miku ngayiyi mili ngaraba ngarrki krayibkanyi nayiba jambana. Ngala baku barri jalija ngayu wankijba mili, jalija ngayu jungku kingkarri nangandu Kudnyina, nanamanji barri jalija ngambalaka malumba jungku, baki jangayu mili ngaraba ngarrki krayibkanyi narrindu. Barriwa.”
MAT 26:30 Brijba yali wangarr, baki barriwa yali walajba barndananyi. Barlba yali karrurrinybarri kulawirarri niji Yulib ngala nyulu mungijba yaji.
MAT 26:31 Ngala yali jilajba, baki yanybayi Jisus yalungi, “Kamu barri ngala nyulu yuwajiwa mungana yaji, baki janarri wirlku ngakinbunanyi. Janganarri yingijba nyubana jungunkurri. Nanda naja Kudkanyi yanybaka nayi barri, ‘Jalija nyulu daba nanda lalanbawarr jibkanyi Kudwanyi, jalija nyulu kurdanba, baki jayalu jarrbalijba jibmuku.’ Nanda jangkurr yanybaka ngaki. Jalija ngananjalu daba, baki janarri wirlku ngakinbunanyi.
MAT 26:32 Ngala baku barri jalija ngayu mili wankijba, baki jangayu jilajba langki nanankurri yajiyurri Kaliliyurri. Jangayu jilajba langki nanankurri waluwa narringi.” Barriwa.
MAT 26:33 Yanybayi Bida nangangi Jisuskanyi, “Jaliyi nanginmuku yalu wirlku nganyinbunanyi, ngala miku ngayiyi. Miku ningiyi yingijba nyubana. Miku.”
MAT 26:34 Ngala yanybayi Jisus nangangi Bidanyi, “Ngayu karungka ninga. Bukambiju janarri wirlku ngakinbunanyi, baki mili yaji janinji yabimba ngaki. Janinji karu yalunya yingkamuku, miku nganinjimi jingkijba. Kujarraka barndayka janinji karu yalunya, miku nganinjimi jingkijba, waluwa kayaja nanda julaki barrinani dalmurra. Waluwa nyulu kayaja kamu ngala nyulu kambalingijba yaji.”
MAT 26:35 Ngala jananganjayi Jisus Bidawanyi, “Miku ngayiyi karu yalunya nani nganyi. Miku. Jaliyi nganjalu kurdanba, baki miku ninyiyi yingijba nyubana. Miku ngayiyi yanyba yalungi, miku ninyimi jingkijba. Duja ngayu yanyba.” Nani barri nyuli jananganja Jisus. Baki nanamuku yingkamuku kandimuku, yali marda yanyba nanamannga jangkurr nangangi. Barriwa.
MAT 26:36 Mili barri yali jilajba Jisus baki nanganginmuku kandimuku, baki wanbiya yali nananyina yajina munjimunji, niji Kidsamani. Yanybayi Jisus yalungi, “Janarri jungku nayiba, ngala jangayu jilajba bijal bundu. Jangayu yanyba mududu nangangi Kudkanyi.” Barriwa.
MAT 26:37 Kuyu nyuli murrku nanganginmuku kandimuku nangandu, Bida, baki jandanyiwuya nangangi Sibidikanyi, niji bulangi Jayims baki Jun. Jilajba yali bijal bundu nangandu Jisusnyina. Ngala Jisus barri kudanyu nangki ngindu nangangi muwa.
MAT 26:38 Yanyba nyuli yalungi murrkuyngka, “Nginduka ngaka muwa. Kudanyu ngaka nginduka muwa. Jungku janarri nayiba, baki najbawa janarri yaji ngaki.”
MAT 26:39 Mili jilajbayi Jisus bijal bundu yalunbunanyi, baki kulujarrijba nangki wayka jambana wali wayka. Baki yanyba nyuli mududu, “Buwakanya. Winyurruwa jayalu jilajba wudumbiji ngana. Nulijba yalu kurdanbikanyi nganjalu. Ngala ninga ngayu jingkijba, yuku ninji yabimba bukamba yaji. Janinji kuna wudumba nayi kiji ngakinbunanyi. Ngala jaliyi ninji miku wudumba nayi kiji ngakinbunanyi, baki yuku barri. Jangayu yabimba nanda jala ninji nulijba ngaki yabimbikanyi.” Nani barri yanybayi Jisus mududu baki barriwa barri.
MAT 26:40 Wijbayi Jisus yalundurri murrkuyngkurri, baki najbayi yalunya kulukankurri. Dulabayi yalunya Jisuswanyi, baki yanyba nyuli nangangi Bidanyi, “Wanyingkanyi narri kuluka, jali narrinya ngajaka, najbawankanyi yaji ngakindu. Wanyingkanyi narri miku najbawa bijal ngakindu.
MAT 26:41 Janarri najbawa ngakindu, baki janarri yanyba mududu nangangi Kudkanyi. Marda narrimi ngajaka Kud, nyulu yabimbiji narrinya ngiruka nangangi barri. Nulijba narri najbawankanyi yaji ngakindu, ngala narri ngunjarra, baki narri kuluka. Nulijba narri yabimbikanyi kunyba yaji, ngala miku narrimi ngiruka yabimbikanyi kunyba yaji. Ngala Sayidin nyulu ngiruka. Nyulu nulijbangka jujambikanyi narrinya, narri yabimbikanyi balki yaji. Nanankardi barri marda narrimi ngajaka Kud, nyulu yabimbiji narrinya ngiruka nangangi.” Barriwa.
MAT 26:42 Mili barri jilajbayi Jisus bijal bundu yalunbunanyi, baki mili nyuli yanyba mududu nangangi Kudkanyi, “Buwakanya. Jaliyi ninji miku wudumba nayi kiji ngakinbunanyi, baki yuku barri. Jangayu yabimba nanda yaji jala ninji nulijba ngaki yabimbikanyi.” Nani barri yanybayi Jisus mududu, baki barriwa barri.
MAT 26:43 Mili nyuli wijba yalundurri, baki najbayi yalunya kulukankurri. Miku yalungkiyanyi kurrkunba kulukankanyi.
MAT 26:44 Baki mili barri nyuli barlba bijal bundu yalunbunanyi. Mili nyuli yanyba mududu nangangi Kudkanyi. Yanyba nyuli nanamannga jangkurr nangangi. Nani barri yanybayi Jisus mududu, baki barriwa barri.
MAT 26:45 Baki mili nyuli wijba yalundurri. Walajba yali jali nyulu yanyba yalungi. Yanyba nyuli, “Yuwajiwa kuna narri kuluka. Walajba narri. Nanijba barri nanamuku balkimuku, yalu badajbangka wudumbiji ngana, marrimbiji ngana Buwanya Bukambijuyngka.
MAT 26:46 Janarri walajba. Jangambala jilajba. Nayinda nyulu badajbangka, nanda jali nangka yangkalamba ngakinbunanyi. Nyulu kuyungka yalunya ngakindurri, yalu marrimbiji ngana.” Barriwa.
MAT 26:47 Ngala yuwajiwa yanybayi Jisus yalungi, baki wanbiyayi nanda yingka kandi Judas, baki kajamuku yalu nangandu. Yingkamukunyi yali kuyu wunanybala jankunbijinyi, yingkamukunyi yali kuyu kuduru. Manjijbayi yalunya mambukamukunyi jurjkanyi, baki malbumalbuwanyi, yalu marrimbiji Jisus.
MAT 26:48 Waluwa yanybayi nanda balki kandi Judas yalungi, “Nanda jalija ngayu jawunja, nyulu nanda jala narri kujba nangangi. Nanda barri janarri marrimba.” Nani barri nyuli yanyba yalungi waluwa barri.
MAT 26:49 Wanbiya yali, baki yinarramba jilajbayi Judas nangandurri Jisusyurri, yanybayi nangangi, “Nanama ninji Milidimbawarr”, baki jawunja nyuli Jisus.
MAT 26:50 Yanybayi Jisus nangangi, “Kandi. Dulukiyi yabimba nanda yaji nganyi.” Baki bunundujba yali nangandurri, baki marrimba yali Jisus.
MAT 26:51 Ngala yingka nanaba, kandi nangangi Jisuskanyi, nyuli karrinja nanaba jankunbijinyiyudi wunanybalanjudi. Dulaba nyuli kingkarri nangangi jankunbijinyi, baki jinamba nangki. Karlba nyuli kuwarda jankunbijinyiyudinyi, barriwa barri bukamba. Karlba nyuli nangangi kuwarda, nanda jalili waki nangangi mambukanyi jurjkanyi.
MAT 26:52 Ngala jirrinybayi nanda kandi Jisuswanyi, “Wiykunumbakiyi nanda jankunbijinyi. Yarrijbakiyi kalawuyngkurru. Marda ninjimi miku dulu daba yalunya jankunbijinyiyudinyi, ngala waluku barri marda ninjimi ngajaka Kud, ninji daykanyi yaji. Jaliyanyi ngayu nulijba nganyi daykanyi yalunya, baki ningiyanyi karu.
MAT 26:53 Jaliyanyi ngayu nulijba dulaykanyi ngaka yalunbunanyi, baki yuku ngayiyanyi ngajaka ngaki Buwakanya Kingkarri. Yuku ngayiyanyi ngakaja, nyulu manjiykanyi kajamuku Yanjilmuku dabawarrmuku ngakindurri, baki yalunjaliyanyi daba wakara barri nanginmuku.
MAT 26:54 Ngala miku. Miku ngayiyanyi ngajaka ngaki Buwakanya nani. Nanamuku wankalamuku jali yalu yanyba jangkurr nangangi Kudkanyi, yali yarrijba nanda jangkurr najana Kudkanyi. Nanda naja yanybaka ngaki, janganjalu marrimba, janganjalu linjumba. Jaliyanyi manjijba Kudwanyi Yanjilmuku daji yalunya, baki miku duja nanda jangkurr najana Kudkanyi. Ngala duja yalungi jangkurr. Ngayu yabimbaka nanda jala yalungi jangkurr yanybaka ngaki.” Barriwa. Baki yanybayi Jisus yalungi nanamukuyngka lukuluku, “Wanyingkanyi narri jilajba wudumbiji ngana jankunbijinyiyudi baki kuduruyudi barrinani narri jilajba wudumbiji nanda maninjaku jalija daba narrinya. Yingkana kambana baki yingkana kambana ngayi milidimba yalunya walkurranyina jurjina narrindu, ngala miku nganarriyanyi marrimba nanaba. Wanyingkanyi nanijba narri jilajba nanginjudi marrimbiji ngana.” Barriwa. Bukambiju kandimuku nangangi yali wirlku barri. Wirlku yali nanganbunanyi, marralangangi yali kudanyu barri.
MAT 26:57 Nanamukunyi jali yalu marrimba Jisus, kuyu yali Jisus barrawurri. Nanda nangangi barrawu, walkurrayngka mambukanyi jurjkanyi, niji nangangi Kayabas. Nanaba jungkuyi milidimbawarrmuku yuwanyi baki malbumalbumuku. Malumba yali jungku nananyina barrawuna, baki yukumba yali nangangi Jisuskanyi. Yali kuyu Jisus yalundurri.
MAT 26:58 Ngala durrijbayi yalunya Bidawanyi. Durrijba nyuli juju bijal bayngkani, baki ngankijba nyuli barrikina jali lukuluku nananyina barrawuna. Jungku nyuli yalundu yilarrmukunyina, nyulu naji yaji, wanyimba jayalu nangangi Jisuskanyi.
MAT 26:59 Nanamuku walkurramuku mambukamuku jurjkanyi, baki nanamuku kunsilmuku, nulijba yali kurdanbikanyi Jisus. Kujba yali yingkamukuyngka, yalu karunkanyi jujambawarrayngka jangkurranyi nangangi Jisuskanyi, nanankanyi jali nyulu yabimba. Jala yingkamuku yalu yanyba jujambawarr jangkurr nangangi, baki nanamuku mambukamuku baki kunsilmuku, jayalu yanyba kurdanbikanyi Jisus. Nanankardi yali kujba yalungi jalija yalu yanyba jujambawarr jangkurr nangangi Jisuskanyi. Kajamukunyi yali yanyba jujambawarr jangkurr nangangi, ngala miku yaliyanyi yanyba balkinyi yajinyi jali yabimba Jisuswanyi. Miku yaliyanyi yanyba nanganginkanyi balkinyi yajinyi, yalu kurdanbikanyi Jisus. Kujba yalungki yingkamukuyngka. Ngajaka yali yingka, baki yingka, baki yingka. Baki kujarra nganinyiwuya buli jilajba yalundurri kunsilmukuyngkurri.
MAT 26:61 Baki yanyba buli yalungi, “Nayinda nganinyi, wabula nyuli yanyba, ‘Yuku ngayu dalyamba nayinda walkurra jurj. Ngala baku barri, kujarraka barndayka, yuku jangayu mili yabimba yingka jurj.’ Nani nyuli yanyba wabula. Duja ngali karungka narrinya.” Barriwa.
MAT 26:62 Karrinjayi nanda walkurra mambuka jurjkanyi, baki ngajaka nyuli Jisus, “Ninji mankuyi bulangi jangkurr, ngala wanyingkanyi ninji miku jananganja bulanya nanankanyi jangkurranyi jali bula yanyba. Wanyingkanyi barri.”
MAT 26:63 Ngala miku nyuliyanyi jananganja nanda mambuka Jisuswanyi. Karda nyuli jungku. Baki mili ngajakayi Jisus walkurranyi mambukawanyi jurjkanyi, “Karukiyi nurrunya duja. Mankuka nganyi jangkurr Kudwanyi. Ninji kuna nanda Krayis jali manjijba Kudwanyi. Ninji kuna Jandanyi nangangi Kudkanyi. Karukiyi nurrunya duja jangkurranyi.”
MAT 26:64 Baki jananganjayi walkurra mambuka Jisuswanyi, “Yi. Ngayu Krayis. Ngala ngayu karungka narrinya. Janganarri najba Buwanya Bukambijuyngka. Janganarri najba jungunkurri kingkarri nangandu Kudnyina, baki badaykurri kingkarrinya lalijinanyi ngaluna. Nani barri janganarri najba.”
MAT 26:65 Jali manku nanda jangkurr mambukawanyi jurjkanyi, baki bakarramba nyuli nangangi jumbala. Nani yalili bakarramba yalungi jumbala Jumukunyi, jalili yingka yanyba balki jangkurr nangangi Kudkanyi. Bakarramba nyuli nangangi jumbala, baki kaya nyuli kudanyu barri, “Jujamba nyuli yalunya. Jujamba. Jujambawarr jangkurr nyuli yanyba ngambalangi nangangi Kudkanyi. Nyulu balkimirra. Mikujiyi kuyu mili karunkanyi ngambalanya nanganginkanyi balkinyi yajinyi. Ngambala mankuyi nangangi jangkurr. Barriwa nyulu balkimirra.
MAT 26:66 Wanyimba jangambala nangangi Jisuskanyi. Wanyimba.” Baki jananganja yali, “Marda nangkimi janyba. Yanyba nyuli balkimirra jangkurr nangangi Kudkanyi, baki nanankardi marda nangkimi janyba.” Barriwa.
MAT 26:67 Baki yali kiwumba wali Jisus yingkamukunyi, ngala yingkamukunyi yali daba Jisus marniyudinyi. Daba yali Jisus muwana marnina.
MAT 26:68 Ngirrikimba yali Jisus, baki yali yanyba nangangi, “Jaliyi ninji dujanya Jandanyi nangangi Kudkanyi, baki karukiyi nurrunya, wanjangini ninya daba. Marda ninjimi jingkijba nanda jali ninya daba, jaliyi ninya manjijbayi Kudwanyi. Karukiyi nurrunya wanjani nanda nganinyi.” Barriwa.
MAT 26:69 Jungkuyi Bida barrikina muwana, lukuluku nananyina barrawuna. Jilajbayi nangandurri jibarri jalili waki nangangi mambukanyi jurjkanyi. Jilajba nyuli nangandurri Bidayurri, baki nyuli yanyba nangangi Bidanyi, “Ninya jingkijbangka, jungku ninji barri nangandu Jisusnyina, nangangi yaji Kalili. Ninji marda jungkuka nangandu.”
MAT 26:70 Ngala jujambayi nanda jibarri Bidawanyi. Yanyba nyuli, “Miku barri. Miku ngayimi jingkijba nanda nganinyi. Miku.” Nani barri yanybayi Bida nangangi, walu yalundu yingkamukunyina.
MAT 26:71 Baki barlbayi Bida bardawarri barrikina. Barriwa. Kamu barri najbayi Bida yingkawanyi jibarriwanyi wakiwarranyi. Yanyba nyuli yalungi nganinyimukuyngka jali yalu jungku nanaba nangandu. Yanyba nyuli yalungi, “Nanda nganinyi nyulili jungku nangandu Jisusnyina.”
MAT 26:72 Baki mili barri jujambayi Bidawanyi. Yanyba nyuli, “Ngayu karungka ninya. Miku ngayimi jingkijba nanda Jisus. Miku.” Barriwa.
MAT 26:73 Kamu barri yalu jali karrinja nanaba nangandu, yanyba yali nangangi Bidanyi, “Yi. Ninji barri kandi nangangi Jisuskanyi. Ninji nangangi kandi. Yanyba ninji barrinani nyulu yanybaka nanda jangkurr. Nanamannga jangkurr nimbala yanybaka. Nganyi yaji Kalili marda, barrinani nangangi yaji.” Barriwa.
MAT 26:74 Baki jananganjayi yalunya Bidawanyi. Jujamba nyuli yalunya. Yanyba nyuli balki jangkurr yalungi, “Ngayu karungka narrinya duja jangkurranyi. Ngayu ngajakangka Kud, nyulu dabanki ngana jaliyi miku duja nanda jangkurr. Miku ngayimi jingkijba nanda nganinyi. Miku.” Nani barri jananganjayi Bidawanyi, baki yinarramba kayayi nanda julaki barrinani dalmurra. Kaya nyuli barri.
MAT 26:75 Baki mankuwayi Bidawanyi nanda jangkurr jali yanyba Jisus nangangi barrin, “Kujarraka barndayka janinji karu yalunya, miku nganinjimi jingkijba, waluwa kayaja nanda julaki barrinani dalmurra.” Mankuwayi nanda jangkurr Bidawanyi, baki ngindu nangki muwa kudanyu barri. Barlba nyuli juju barri, baki ngindu nangki muwa. Kudanyu nangki ngindu muwa mirlarryudi. Barriwa.
MAT 27:1 Ngala nyulu kambalingijba yaji, baki yanyba yalungki walkurramuku mambukamuku jurjkanyi marda malbumalbumuku. Yanyba yalungki Jisuskanyi, yanka jayalu kurdanba Jisus.
MAT 27:2 Baki yali kijijba Jisus jaluwuya. Kijijba yali, baki kuyu yali Jisus nangandurri Biladyurri. Nanda Bilad, nyuli walkurra mambuka Kubaminkanyi nananyina yajina.
MAT 27:3 Ngala nanda Judas, jali kuyu yalunya Jisusyurri, jali nyulu jingkijba jayalu kurdanba Jisus, baki ngindu nyuli muwa. Kudanyu nyuli ngindu muwa nanankanyi jali nyulu yabimba, kuyunkanyi yalunya nangandurri Jisusyurri. Kudanyu nyuli ngindu muwa, baki wijba nyuli yalundurri mambukamukuyngkurri jurjkanyi baki malbumalburri. Wiykunumba nyuli nanda 30 dula, jali yalu waluwa wajba. Wiykunumba nyuli nanda dungala yalundurri.
MAT 27:4 Yanyba nyuli yalungi, “Ngayu balki. Yabimba ngayi balki yaji jali ngayu kuyu yalunya narringinmuku yilarrmuku wudumbiji Jisus. Nanankardi jayalu kurdanba Jisus, ngala nyulu kunyba nganinyi. Miku nyuliyanyi yabimba balki yaji. Miku. Ngala ngayu barri balkimirra.” Barriwa. Ngala jananganja yali Judas, “Miku nanda nurrungi yaji. Miku. Barriwakiyi barlba. Kuyukiyi nayinda dungala nurrunbunanyi.”
MAT 27:5 Baki janyba nyuli nanda 30 dula wayka jambarri Judaswanyi. Janyba nyuli nanda dungala jambarri kalawuyngkurru jurjyurri, baki barlba nyuli. Barlba nyuli, baki nangki langandaba kurndana. Langandaba nangki dukana kurndana kurulyudinyi, baki nani nangki janyba. Barriwa.
MAT 27:6 Jala nyuli barlba jurjnanyi, baki wudumba yali nanda 30 dula. Wudumba yali nanda dungala, baki yanyba yalungki, “Wanyimba ngambalaja nanginkanyi dungalanyi. Wanyimbaja. Wajba ngambali nganinyi nanginkanyi dungalanyi nyulu yabimbiji balki yaji ngambalangi, ngambala kurdanbikanyi Jisus. Wanyimba jangambala nanginkanyi dungalanyi. Miku ngambaliyi yarrijba dungala darladarlana jurjkanyi. Marda ngambalimi wudumba jamba nanginyina dungalana. Marda ngambalimi wudumba jamba makaykanyi kuyuwana nanaba.” Nani barri yalungka yanybayi, baki wudumba yali jamba nananyina dungalana. Wudumba yali nangangi jamba, nanankanyi jalili mungkijbirri yabimbikanyi kulkarra, yukururu, baki bujili junu. Baki nanaba yalili makaba ngurranyimuku kuyuwana.
MAT 27:8 Baku barri, yingkamukunyi yalili nijarrijba nanda yaji, “Ngulyayudi Jamba.” Nani barri yalili nijarrijba nanda jamba, wudumbangangi yali nanda jamba nananyina balkina dungalana.
MAT 27:9 Yingka wankalanyi jali yanyba jangkurr nangangi Kudkanyi, niji nangangi Jirimaya. Yarrijba nyuli nayi jangkurr najana Kudkanyi, “Nanda 30 dula, jali yalu wayba yingka wudumbikanyi nanda nganinyi, jayalu mili kuyu nanda dungala Jumukunyi.
MAT 27:10 Jayalu mili kuyu nanda dungala, baki jayalu wudumba jamba nananyina dungalana. Jayalu wudumba nangangi jamba nanankanyi jalili mungkijbirri yabimbikanyi kulkarra, baki yukururu baki bujili junu.” Nani barri nyuli yarrijba. Duja nangangi jangkurr. Barriwa.
MAT 27:11 Kuyu yali Jisus nangandurri Biladyurri, baki karrinjayi Jisus walu nangandu. Ngajakayi Jisus Biladwanyi, “Ninji barri kuna walkurra mambuka yalungi Jumukuyngka.” Jananganjayi Bilad Jisuswanyi, “Yi. Ngayu nanda. Ngayu.”
MAT 27:12 Baki yali jujamba Bilad nangangi Jisuskanyi, nanamukunyi mambukamukunyi jurjkanyi, marda malbumalbuwanyi. Yanyba yali balki jangkurr nangangi Jisuskanyi. Jujamba yali Bilad nanankanyi jali yabimba Jisuswanyi. Ngala miku nyuliyanyi yanyba Jisus. Miku nyuliyanyi jananganja yalunya.
MAT 27:13 Baki yanybayi Bilad nangangi Jisuskanyi, “Manku kuna ninji yalungi jangkurr. Wanyingkanyi ninji karda jungku. Yanyba yalu kajanyi nganyingkanyi balkinyi yajinyi. Ngala miku kuna ninjiyi jananganja yalunya.” Barriwa.
MAT 27:14 Ngala mili miku nyuliyanyi yanyba Jisus nangangi Biladkanyi. Miku nyuliyanyi jananganja nanda kabamin mambuka. Baki manmalayi Bilad. Manmala nyuli jali mikukiyanyi jananganja Jisuswanyi. Barriwa.
MAT 27:15 Yurrngumba yingkana kindilkurrinyina baki yingkana kindilkurrinyina, ngala nyuli wangarr niji Kangandijba Barndana Yajinyi barri, baki nanangini kabaminwanyi mambukawanyi nyulili muningka manjijba yingamali nganinyi jalili jungku brisinyina. Nyulili muningka manjijba yingamali nanganginkurri barndarri. Yalili karu nanda mambuka nanankanyi jalija nyulu manjijba. Yalili nijarrijba nangangi niji, bakili nyulu muningka manjijba nanda jalili yalu nijarrijba.
MAT 27:16 Nanamanji barri jungkuyi nganinyi brisinyina, nangangi niji Barabas. Jingkijba yali nanda nganinyi bukambijunyi Jumukunyi.
MAT 27:17 Badajbayi walkurra muramuku barrawurri Biladkanyi. Jilajba yali mankunki yaji nangangi Jisuskanyi. Karrinja yali nanaba danbina, baki ngajakayi yalunya Biladwanyi, “Nayimanji barri, ngayili muningka manjijba yingamali nganinyi brisinanyi. Ngala wanyi jangayu manjijba nanijba barri. Nanda nganinyi niji Barabas kuna. Nayinda kuna Jisus, niji nangangi Krayis. Wanyi jangayu manjijba.” Barriwa.
MAT 27:18 Jingkijba nyuli yalunya mambukamuku jurjkanyi Biladwanyi. Nyuli jingkijba yalunya, yali kuyu Jisus nangandurri, ngurungurujbangangi yali nangangi Jisuskanyi.
MAT 27:19 Ngala jungkuyi Bilad kurdusnyina, baki manjijbayi jangkurr nangandurri nanganginyi maninganjawanyi. Manjijba nyuli nayi jangkurr nangandurri, “Buwarrajimba ngayi yaji barrin mungana. Buwarrajimba ngayi yaji nangangi Jisuskanyi. Nanankardi ngayu jingkijba nyulu yurlurrmba nganinyi, kunybamirra. Miku nyuliyanyi yabimba balki yaji. Miku. Nginduka ngayu muwa nangangi. Mikujiyi yabimba balki yaji nangangi. Mikujiyi manjijba yalundurri, yalu kurdanbikanyi.” Nani barri manjijbayi jangkurr nangandurri maninganjawanyi.
MAT 27:20 Jungkuyi Bilad kalawuyngkurru kurdusnyina, ngala nanamuku muramuku yali jungku danbina. Yanybayi yalungi muramukuyngka nanamuku mambukamuku jurjkanyi baki malbumalbumuku. Karu yalunjali marda yalimi ngajaka Bilad, janyulu muningka manjijba nanda nganinyi Barabas brisinanyi, ngala janyulu manjijba Jisus janybikanyi nangka. Nani barri yali yanyba kudanyu yalungi muramukuyngka.
MAT 27:21 Jilajbayi Bilad yalundurri muramukuyngkurri, baki ngajaka nyuli yalunya, “Wanyi barri jangayu muningka manjijba. Jisus kuna. Barabas kuna. Wanyi jangayu muningka manjijba.” Jananganja yali muramukunyi. Kaya yali, “Manjijbakiyi Barabas. Manjijbakiyi Barabas.”
MAT 27:22 Baki ngajakayi yalunya Biladwanyi, “Ngala wanyimba jangayu nanginkanyi Jisuskanyi, jala yalu nijarrijba Krayis. Wanyimba jangayu nangangi.” Mili barri yali kaya kudanyu nangangi, “Kurdanbakiyi. Kurdanba. Langandabakiyi kingkarri kurndana.”
MAT 27:23 Ngajakayi yalunya Biladwanyi, “Wanyingkanyi marda ngayimi kurdanba. Miku nyuliyanyi yabimba balki yaji. Nyulu jungkuka kunybana yuwana. Wanyingkanyi marda ngayimi kurdanba.” Ngala mili yali kaya nangangi, “Kurdanbakiyi. Langandabakiyi kingkarri kurndana. Kurdanbakiyi.” Nani barri yali kudanyu kaya nangangi.
MAT 27:24 Baki jingkijbayi Biladwanyi, miku nyuliyi yabimba yalunya, yalungka yangkalambikanyi yalunginkanyi jangkurranyi nangangi Jisuskanyi, ngala jayalu mili ngarrangarra muwa, baki jayalu kijijiwujba danbina. Nani barri jingkijbayi Biladwanyi, baki wudumba nyuli wabuda. Wakardaba nangki marni walu yalundu muramukunyina. Nani nangki wakardaba marni minimbiji yalunya, miku nanda nangangi yaji kurdanbikanyi Jisus. Baki yanybayi Bilad yalungi, “Miku ngayimi nulijba kurdanbikanyi nanda Jisus. Nanda narringi yaji. Miku ngaki.”
MAT 27:25 Ngala yali jananganja Bilad muramukunyi, “Yi. Nurrungi nanda yaji kurdanbikanyi Jisus. Nurru Jumuku, janurru nurru yanyba kurdanbikanyi Jisus. Jaliyi nayinda balki kurdanbikanyi Jisus, baki yuku janyulu daba nurrunya Kudwanyi. Janyulu yabimba balki yaji nurrungi baki nurrunginmukuyngka mimimba nurru yalunya, jala yalu juju bayngkani nurrundu. Nani yuku janyulu daba nurrunya, jaliyi balki kurdanbikanyi Jisus. Janangka janyba nurrunginkanyi yajinyi, miku nganyingkanyi yajinyi.” Nani barri yali jananganja Bilad. Barriwa.
MAT 27:26 Baki muningka manjijbayi Barabas brisinanyi Biladwanyi. Nanganginyi ngarrkadabawarrmukunyi yali dulaba Barabas brisinanyi, baki muningka manjijbayi nanganginkurri barndarri. Ngala nyuli jirrinyba nanganginmuku ngarrkadabawarrmuku, yalu wajuji Jisus, yalu kurdanbiji Jisus barrinani kudanyu ngajakayi Bilad Jumukunyi. Baki wajuba yali Jisus nanaba.
MAT 27:27 Baki nanamukunyi ngarrkadabawarrmukunyi Biladkanyi, yali kuyu Jisus kalawuyngkurru nanganginyina barrawuna. Karrinja yali lukuluku nangandu baki ngirrikimba yali Jisus.
MAT 27:28 Dulaba yali nangangi jumbala nanganbunanyi, baki yali yarrijba danyan nangandu mankanyina. Nganmarra nanda danyan, wunanybala wayka darnyiyurruwa.
MAT 27:29 Wudumba yali wakankurrul kurnda nyilanyilayudi, baki kijijba yali bakiri. Yarrijba yali nanda bakiri lukuluku nangandu kulajina Jisusnyina. Wajba yali Jisus nanankanyi ridiridinyi marrimbikanyi nyulu. Nani barri jungkuyi walkurra mambuka nanamanji barri, jirdi bakirinyi baki nganmarranyi danyanyi, baki ridiridinyi. Mururu yali wayka walu nangandu, baki muningka yali kaya nangangi, “Ninji barri, ninji walkurra mambuka yalungi Jumukuyngka. Ninji barri wirimalaru yalungi.” Nani barri yali muningka kaya nangangi baki ngirrikimba yali Jisus.
MAT 27:30 Baki kiwumba yali Jisus. Dulaba yali nanda ridiridi nanganbunanyi marninanyi, baki daba yali Jisus kulaji ridiridiyudinyi.
MAT 27:31 Nani barri yali ngirrikimba Jisus. Barriwa. Baki dulaba yali nanda nganmarra danyan nanganbunanyi mankanyinanyi, baki mili yawumba nangki Jisus nanganginkanyi jumbalanyi. Baki kuyu yali Jisus bayungu kulawirarri langandaji.
MAT 27:32 Ngala yali jilajba bayungu, baki yingka nganinyi, niji Sayimin, nyuli jilajba bayunguna. Nangangi yaji juju bayungu, yaji niji Sayirin. Nyulu jilajbayi bayunguna nananyina yubalina. Baki nanamukunyi ngarrkadabawarranyi, yali jirrinyba nanda nganinyi, nyulu kuyunkanyi nanda wabangkarra kurnda nangangi Jisuskanyi. Baki dukangarrijba nyuli kurnda bayangarriji.
MAT 27:33 Mili yali jilajba bayungu, baki wanbiya yali nananyina kulawirana, niji Kulkuda. Nanda niji Kulkuda, nanda Ju yanyi, barrinani ‘Kulaji Nguli.’
MAT 27:34 Jidimba yali malumba jirrki baki ngarrki krayibkanyi. Yarrijba yali jawuda yukururuna, baki wajba yali Jisus. Balanjayi kardarda, ngala miku nyuliyanyi ngaraba kudanyu.
MAT 27:35 Baki yali langandaba Jisus wabangkarra kurndana ngarrkadabawarranyi. Ngarrkadaba yali Jisus marni nyilanyilayudinyi. Dulaba yali nangangi jumbala, baki baja yali barrinani kard wudumbikanyi nangangi jumbala. Baki kuyu yali, nanda yalungi jumbala.
MAT 27:36 Baki jungku yali nanaba ngarrkadabawarrmuku, baki lalanba yali Jisus.
MAT 27:37 Yarrijba yali jangkurr najana. Nanangini jangkurrwanyi karuyi yalunya nanankanyi balkinyi yajinyi jali yalu yanyba yabimbayi Jisuswanyi. Yarrijba yali jangkurr najana, baki langandaba yali nanda naja kingkarri kurndana Jisusnyina. Nayi nanda jangkurr najana, “Nayinda nyulu Jisus. Nyulu walkurramirra mambuka yalungi Jumukuyngka.” Barriwa.
MAT 27:38 Baki langandaba yali yingkawuya nangandu Jisusnyina, maninjakuwuya. Yingka langayi wabangkarra kurndana karriya, ngala yingka langayi wabangkarra kurndana bayinga, ngala nyulu Jisus burrandi bulandu.
MAT 27:39 Kajamuku yali kangandijba yalundu, baki ngirringirrimba yalungki kulaji. Nani barri yalungkili ngirringirrimba kulaji, jalili yalu bajalingijba yingka. Ngirrikimba yali Jisus. Yanyba yali balki jangkurr nangangi,
MAT 27:40 “Yanybayi ninji, yuku janinji dalyamba nanda walkurra jurj, ngala baku barri kujarraka barndayka, yuku janinji yabimba yingka mili jurj. Jaliyi yuku ninji yabimba yaji nani, jaliyi ninji dujanya nangangi jandanyi Kudkanyi, baki lalanba nganyingkiyi. Karralakiyi wayka kurndananyi, jaliyi ninji dujanya jandanyi nangangi Kudkanyi.” Nani barri yali yanyba balki jangkurr nangangi.
MAT 27:41 Baki mambukamuku jurjkanyi, baki malbumalbumuku, baki milidimbawarrmuku yuwanyi, yali marda yanyba balki jangkurr nangangi,
MAT 27:42 “Nyuli yalunya marrimba mardarda Jisuswanyi, ngala miku nangkiyi marrimba mardarda. Yanyba nangki, nyulu walkurra mambuka nurrungi Jumukuyngka. Jaliyi nyulu karrala wayka kurndananyi, baki yuku janurru kuyu nangangi jangkurr, nyulu nurrungi mambuka. Janurru kuyu nangangi jangkurr, jaliyi nyulu karrala wayka kurndananyi.
MAT 27:43 Nangka yanybaka, nyulu jandanyi nangangi Kudkanyi, nyulu kuyungka nanda jangkurr nangangi Kudkanyi. Nani barri nangka yanybaka. Ngala jaliyi nyulu dujanya nangangi jandanyi Kudkanyi, baki yuku barri janurru najba Kud dulaykurri Jisus kurndananyi. Janurru najba Kud marrimbikurri Jisus mardarda, jaliyi dujanya nyulu jandanyi nangangi.” Nani barri yali yanyba balki jangkurr nangangi.
MAT 27:44 Baki nanankuya maninjakuwuya, jali bula langa nangandu, buli marda yanyba balki jangkurr nangangi. Buli marda yanyba nanamannga jangkurr nangangi. Barriwa.
MAT 27:45 Ngala nyulu mukunjana barri, baki mungijbayi yaji bukamba. Mikuyaji ngardaranyi. Yuwajiwa mungijbayi yaji, baki mili walajbayi nanda ngardara ngabungabu bijal.
MAT 27:46 Ngala nyuli yuwajiwa mungijba yaji, baki kayayi Jisus kudanyu barri. Kudanyu nyuli kaya Ju yanyi, “Yiluyi. Yiluyi. Lama sabakdani.” Barrinani, “Ngaki Kud. Ngaki Kud. Wanyingkanyi nganinji yingijba.” Nani barri kayayi Jisus. Barriwa.
MAT 27:47 Jawuda jali karrinja bundu nangandu, jali manku Jisus kayankurri, yanyba yali, “Mankukiyi. Nyulu kayangka nangangi Yalayijakanyi.”
MAT 27:48 Yarangul nanaba jirdi ngarrkinyi krayibkanyi ngujbulanyi. Yingkawanyi nyuli kijijba karnjal wadiwadina. Yarrijba nyuli karnjal ngarrkina, baki manjijba nyuli kingkarri nangandurri Jisusyurri janyiyurri, nyulu ngaraykanyi.
MAT 27:49 Ngala yingkamuku, jali yalu manku Jisus kayankurri, yali yanyba, “Jangambala yukumba nayiba. Jangambala lalanba yaji, jaliyi nyulu badajba Yalayija nanginkurri, jaliyi nyulu marrimba Jisus mardarda, jaliyi nyulu waykalumba Jisus kurndananyi.” Barriwa.
MAT 27:50 Baki mili kayayi Jisus kudanyu barri. Kaya nyuli, baki mikukiyanyi ngalijba. Barriwa barri nangki janyba Jisus. Barriwa.
MAT 27:51 Kalawuyngkurru nananyina walkurranyina jurjina, langayi walkurra blanki. Langayi nanda walkurra blanki kingkarrinya wayka jambarri. Nanamanji barri jali nangka janyba Jisus, baki bakarrawijba nanda blanki Kudwanyi. Bakarrawijba nyuli kingkarrinya wayka bukamba. Kulbayi jamba, baki dumba nyuli walkurra dungala.
MAT 27:52 Baki nanda jamba jalili yalu makaba kuyuwana, dumba nyuli nanda jamba marda. Nanda mankanyi yalungi, waluwa jali yalu durrijba Kud, walajba yali wankan mili.
MAT 27:53 Barlba yali nanamunanyi yajinanyi kumayangunanyi. Jali Jisus mili wankijba, baki jilajba yali nanankurri barrawuyabarrawuyarri Jirusalimyurri. Najba yalunjali jali yalu wankijba mili kajamukunyi.
MAT 27:54 Yali najba bukamba nayi yaji, ngarrkadabawarrmukunyi, jali yalu lalanba Jisus, baki yalunginyi mambukawanyi. Najba yali jamba kulbankurri. Bukamba nanda yaji yali najba, baki marrala yali. Kudanyu barri yali marrala, baki yanyba yalungki, “Nayinda Jisus, dujanya nyuli Jandanyi nangangi Kudkanyi. Dujanya nyuli nangangi jandanyi.”
MAT 27:55 Jali langa Jisus kurndana, jali nangka janyba, baki karrinjayi jawuda jibarrimuku bundu bijal nangandu. Yali nanamuku jibarrimuku jalili yalu jilalajba nangandu Jisusnyina, jalili yalu lalanba Jisus, baki yali badajba langina Kalilinanyi nangandu. Kudiya yalungi, yingka jibarri nangangi niji Mari Makdalin, yingka nangangi niji Mari, nyuli ngardanganja bulangi Jayimskanyi baki Jusibkanyi. Yingka nyuli maninganja nangangi Sibidikanyi. Karrinja yali juju bijal nangandu Jisusnyina jali nangka janyba.
MAT 27:57 Baki yingka nganinyi, niji nangangi Jusib, nangangi yaji Yarimadiya, nyuli jungku jirdi kajanyi yajinyi, kajanyi dungalanyi. Nyuli marda kandi nangangi Jisuskanyi. Ngabungabu barri nyuli jilajba nanankurri mambukarri Biladyurri, baki ngajaka nyuli Bilad, “Jangayu kuna kuyu nanda Jisus mankanyi makaykanyi. Yuku kuna jangayu kuyu nangangi mankanyi.” Barriwa. Baki karuyi nanganginmuku ngarrkadabawarrmuku Biladwanyi, yalu waykanyi nanda Jusib mankanyi Jisuskanyi.
MAT 27:59 Baki kuyuyi Jisus mankanyi Jusibwanyi. Wudumba nyuli wunanybala raki barrinani blanki, baki kijijba nyuli mankanyi lukuluku bukamba nukamiyurru.
MAT 27:60 Baki yarrijba nyuli mankanyi kumayanguna. Nanda nanganginmirra kumayangu makaykanyi nangangi mankanyi baku barri jalija nangka janyba. Buyingkinyi nanda kumayangu. Ngawamba yali kurrijba nanda lawarr wujina dungalana. Yarrijba nyuli Jisus mankanyi kumayanguna, baki murumba nyuli bardawa nangangi dungalayudinyi. Karranunumba nyuli walkurra dungala murumbiji bardawa, baki barlba nyuli.
MAT 27:61 Nanda jibarri Mari Makdalin, baki nanda yingka jibarri niji Mari, buli jungku nanaba. Najba buli Jusib yarriykurri mankanyi kumayanguna. Barriwa.
MAT 27:62 Munganawa barri Sadidi, jilajba yali mambukamuku jurjkanyi, baki Barasimuku. Jilajba yali nangandurri Biladyurri yanybiji nanangi.
MAT 27:63 Yanyba yali, “Mambuka. Nanda nganinyiyurru nyuli jujambawarr. Karu nyuli yalunya, ‘Jalija ngaka janyba, baki jangayu mili wankijba. Baku barri kujarraka barndayka, jangayu mili wankijba barri.’ Nani barri nyuli yanyba, nanda jujambawarr.
MAT 27:64 Baki nanganginmukunyi kandimukunyi yiningki jayalu dulaba nangangi mankanyi. Yiningki jayalu ngadijba nangangi mankanyi. Baki jayalunjalu karu nangangi Jisuskanyi, nyulu mili wankijbayi. Nyulu mili wankijbayi, mikuyajingangi mankankanyi kumayanguna. Jaliyi yalu dulaba nangangi mankanyi, jaliyi yalu yanyba nani nangangi, baki nanda balki. Nanankardi barri nurru ngajaka ninya, janinji jirrinyba nganyinmuku ngarrkadabawarrmuku, yalu lalanbiji nanda kumayangu. Yurrngumba kujarraka barndayka jayalu lalanba nanda kumayangu, baki mikuwali nanganginyi kandimukunyi dulaba nangangi mankanyi.” Barriwa.
MAT 27:65 Jananganjayi yalunya Biladwanyi, “Yuku barri. Yuku janarri kuyu yalunya narringinmuku yilarrmuku. Janarri yarrijba yalunya lalanbiji nanda kumayangu. Jayalu kudanyu lalanba nanda kumayangu narringi, baki mikuwali yingkawanyi dulaba nanda mankanyi.” Nani barri jananganjayi yalunya Biladwanyi. Barriwa.
MAT 27:66 Barlba yali kumayangurri mambukamuku jurjkanyi, baki Barasimuku, baki yilarrmuku. Kijijba yali kurul danbina kumayanguna langina kularriji yundukula dungalana. Marrumba nanda kurul dungalana birnyiyudinyi. Jaliyi yingkawanyi dulaba dungala baki ngankijba kumayanguna, baki waluku janyulu dalyamba nanda kurul. Baki jayalu najba nanda kurul dalyawiykurri, baki jayalu jingkijba ngankijbayi yingka kumayanguna. Nani barri yali marrumba nanda kurul, baki lalanba yali nanda yaji yilarrmukunyi. Ngala mambukamuku jurjkanyi baki Barasimuku, yali wijba yalunginkurri barndarri. Barriwa.
MAT 28:1 Munganawa barri Sadidi, wuyalijba yali. Yingkana mungana Sundi, ngala nyuli kambalingijba yaji, baki jilajbayi jibarriwuya karri kumayangurri. Jilajba buli Mari Makdalin, baki yingka jibarri niji Mari.
MAT 28:2 Waluwa barri mungana kulbayi nanda jamba kudanyu barri, baki karralayi Yanjil nangangi Kudkanyi. Karrala nyuli kingkarrinya lalijinanyi wayka kumayangurri, baki lukulukumba nyuli nanda dungala bardawananyi. Lukulukumba nyuli nanda dungala wiliyurri bardawarri, baki jungku nyuli dungalana.
MAT 28:3 Nanda Yanjil barri, bilirrbayi wali nangangi barrinani nanda mirnbi ngajarranyi, baki nangangi jumbala buludamirra.
MAT 28:4 Ngala nanamuku yilarrmuku jali yalu lalanba nanda kumayangu, marrala yali. Kudanyu yali marrala jali yalu najba nanda Yanjil, baki birrirra yali muwa kudanyu barri. Yirrba yali wayka jambarri, baki kuluka yali kudanyu barri barrinani yalungki janyba. Barriwa.
MAT 28:5 Jali bula wanbiya jibarriwuya kumayanguna, baki yanybayi nanda Yanjil bulangi, “Marda nimbalimi miku marrala. Ngayu jingkijbangka nimbalanya, nimbala kujbangka nangangi Jisuskanyi, nanankanyi jali yalu langandaba wabangkarra kurndana.
MAT 28:6 Miku nyulimi nayiba. Miku nyulimi nangangi mankanyi kumayanguna. Walajba nyuli. Nyulu mili wanka jungkuka, barrinani wabula nyuli karu narrinya, nyuluja mili wankijba. Kabukawa. Najba janimbala nayinda kalawunyi kumayanguna. Janimbala najba nanda yaji jali jungku nangangi mankanyi wulaninyi. Janimbala najba mikuyaji mankankanyi nanaba.
MAT 28:7 Ngala janimbala dulu wirlku yalundurri nanganginmukuyngkurri kandimukuyngkurri. Janimbala karu yalunya nangangi Jisuskanyi, walajba nyuli, nyulu mili wanka jungkuka. Baki nyulu jilajbangka langki waluwa yalundu Kaliliyurri. Nanaba jayalu najba Jisus. Barriwa. Nani janimbala karu yalunya. Ngala miku nimbaliyi mamanumba nayinda jangkurr.” Barriwa. Nani barri yanybayi Yanjil bulangi.
MAT 28:8 Dulu buli wirlku kumayangunanyi. Dulu buli wijba bayungu barrawuyabarrawuyarri. Marrala buli yajinyi, ngala mili buli mirnarrijba muwa yajinyi. Wirlku buli yalundurri kandimukuyngkurri karunki yajinyi.
MAT 28:9 Ngala buli wirlku, baki wakun minimba nangki Jisus bulangi. Karrinja nyuli walu bulandu. Kurrkunba bulangki, baki yanybayi Jisus bulangi, “Nanama nimbala.” Jingkijba buli, nyuli Jisus. Jilajba buli nangandurri. Mururu buli wayka jambana walu nangandu, baki marrimba buli nangangi nukami. Nani buli yabimba minimbiji nyuli walkurramirra bulangi. Baki wajba buli Jisus kunybanyi jangkurranyi bulanginkanyi.
MAT 28:10 Yanybayi Jisus bulangi, “Miku nimbaliyi marrala ngaki. Janimbala jilajba yalundurri, ngakinmukuyngkurri kandimukuyngkurri, jala ngayu bababanyamba ngayu yalunya. Janimbala karu yalunya, jayalu jilajba langki Kaliliyurri. Nanaba janganjalu najba.” Barriwa. Nani buli najba Jisus, baki mili buli jilajba yalundurri kandimukuyngkurri karunki yajinyi.
MAT 28:11 Ngala buli jilajba, baki walajba yalu nanamuku yilarrmuku, baki kudiyamuku yali wijba barrawuyabarrawuyarri. Yali jilajba walkurrayngkurri jurjyurri, baki karu yali mambukamuku jurjkanyi nanankanyi yajinyi, jali yalu najba. Karu yali mambukamuku Yanjilkanyi jali badajba, baki dungalanyi jali jungku wilina, baki mikuyaji mankankanyi nanaba kumayanguna.
MAT 28:12 Baki yanyba yalungki mambukamuku jurjkanyi, baki malbumalbumuku. Yanyba yalungki, wanyimba jayalu nanankardi. Yanyba yalungki, baki wajba yali yilarrmuku kajanyi dungalanyi.
MAT 28:13 Wajba yali yilarrmuku dungalanyi, baki jirrinyba yalunjali, “Miku narriyi yanyba duja jangkurr nanankanyi yajinyi, ngala janarri yanyba nayi barri, ‘Ngala nurri kuluka mungana, baki wanbiya yali kandimuku nangangi Jisuskanyi. Wanbiya yali, baki maninjakujba yali nanda mankanyi ngala nurri kulukawa.’ Nani barri janarri yanyba.
MAT 28:14 Ngala nanda mambuka Bilad, jaliyi yingkawanyi karu Bilad narringinkanyi jangkurranyi, narri kulukankanyi, jala marda narriyanyi lalanba nanda kumayangu, jaliyi yingkawanyi karu Bilad nani narringi, baki janurru nurru yanyba nangangi Biladkanyi narringi. Janurru kurrkunba Bilad nyulu yabimbikanyi kiji narringi, nyulu daykanyi narrinya. Yuku narri jungku mardumardu muwa nanginkanyi yajinyi. Miku nurriyi munyajba Bilad, nyulu yabimbikanyi kiji narringi.” Nani barri yalunjali jirrinyba, yalu yanybiji jujambawarr jangkurr yilarrmuku.
MAT 28:15 Baki kuyu yali nanda kaja dungala yilarrmukunyi. Kuyu yali nanda dungala, baki barlba yali. Yabimba yali nanda yaji jali yalunjalu jirrinyba mambukamukunyi jurjkanyi. Karu yalunjali kandimukuyngka Jisuskanyi, yali maninjakujba nanda mankanyi ngala yali kulukawa yilarrmuku. Kajamukunyi jali yalu jungku lukuluku nananyina yajina, yali manku nanda jujambawarr jangkurr, baki kuyu yali nanda jangkurr. Yuwajiwa yalungka yanyba nanankanyi yajinyi, maninjakujba jali yalu nanda mankanyi nanganginmukunyi kandimukunyi. Barriwa.
MAT 28:16 Jilajba buli jibarriwuya yalundurri kandimukuyngkurri. Karuyi yalunya jangkurranyi Jisuskanyi, baki barlba yali langki Kaliliyurri. Nanamuku kandimuku 11 barri, yali jilajba langki nanankurri kulawirarri jali yanyba Jisus yalungi yalu jilaykanyi nanankurri.
MAT 28:17 Wanbiya yali, baki najba yali Jisus, baki jilajba yali bijal bundu nangandurri. Baki yali wajba Jisus kunybanyi jangkurranyi yalunginkanyi. Ngala yingkamukunyi, yali jingkijba, nanda nyuli Jisus mili wanka jungunkanyi. Ngala yingkamuku yalungki mankumanku, yiningki nanda Jisus mili wankijbayi, ngala yiningki nanda yingka.
MAT 28:18 Baki jilajbayi Jisus bundu yalundurri, baki yanyba nyuli yalungi, “Yarrijba ngani Kudwanyi wirimalaru narringi. Ngana nyuli yarrijba wirimalaru bukambijuyngka yalungi wandijiyana, lalijina baki jambana.
MAT 28:19 Baki ngayu karungka narrinya. Janarri jilalajba lukuluku wandijiyana. Janarri mililidimba yalunya ngaki. Kudanyu janarri mililidimba yalunya ngaki, baki kajamukunyi jayalu kuyu narringi jangkurr ngaki, jayalu marda ngakinmuku kandimuku. Jalija yalu kuyu ngaki jangkurr, baki janarri ngurrunba yalunya marda. Janarri karu yalunya nayi, yalungi mambuka nyulu Kud. Yalungi mambuka nyulu nanda Buwakanya Kingkarri, baki nyulu nanda Jandanyi nangangi Kudkanyi, baki nyulu nanda Kunyba Ngarndu nangangi Kudkanyi. Malumba yalu jungkuka barrinani yingamali mambuka yalungi.
MAT 28:20 Janarri milidimba yalunya, yalu ngayangayiykanyi ngakinkanyi jangkurr. Jayalu ngayangayijba bukambijuyngka nanankanyi jangkurranyi jali ngayu milidimba narrinya. Mankumankuwa narri. Jangayu jungku narrindu yurrngumba barri. Jangayu jungku narrindu kurduluna yurrngumba nanankurri jalija bukamba yaji Kudwanyi.” Barriwa barri. Bukamba nayinda jangkurr.
MAR 1:1 Ngayu karungka narrinya nangangi Jisus Krayiskanyi. Ngayu karungka narrinya kunybanyi jangkurranyi nangangi Jisus Krayiskanyi, nyulu jandanyi nangangi Kudkanyi.
MAR 1:2 Wabula wankalana yarrijbayi jangkurr najana Kudkanyi nganinyiwanyi. Nangangi niji Yayisaya. Nanda nganinyi, nyuli yanybawarr jangkurranyi Kudkanyi. Yarrijba nyuli nanda jangkurr najana jali karu Kudwanyi. Nayinda barri nanda jangkurr jali yanyba Kud nanganginkanyi jandayngkanyi, “Jangayu manjijba nganinyi waluwa nganyindu, baki janyulu kaya yalungi. Janyulu kaya yalungi nayi barri, ‘Birrirrinja narringkaja kurdulu nangangi. Birrirrinja narringkaja kurdulu.’
MAR 1:3 Nanda nganinyi jalija ngayu manjijba waluwa barri nganyindu, janyulu jungku mangkurruna yajina, baki janyulu kaya yalungi barri, ‘Birrirrinja narringkaja kurdulu, badajbajangangi nanda walkurra mambuka. Janyulu badajba, nanda jalija manjijba Kudwanyi. Birrirrinja narringkaja kurdulu nangangi’.” Barriwa. Nani barri yanybayi nanda jangkurr najana Kudkanyi. Barriwa.
MAR 1:4 Jungkuyi nganinyi mangkurruna yajina, nangangi niji Jun Ngurrunbawarr. Nyulili ngurrunba yalunya wabudana. Nyulili babdayis yalunya. Nyulili milidimba yalunya nayi barri, “Ngindu narri muwa narringinkanyi balkinyi yajinyi. Ngindu narri muwa, jungkungangi narrili balki nangangi Kudkanyi, baki janyulu manjamanjamba narringi balki yaji Kudwanyi, baki jangayu ngurrunba narrinya wabudana.” Nani barri nyulili milidimba yalunya.
MAR 1:5 Kajamuku yali badajba nangandurri Junyurri, mankunki nangangi jangkurr. Badajba yali kulani nanamunanyi walkurrananyi yajinanyi niji Judiya, baki bayunguna barrawuyabarrawuyananyi niji Jirusalim. Ngindu yali muwa yalunginkanyi balkinyi yajinyi, baki karu yali Jun, yali jungku balki nangangi Kudkanyi. Baki nyuli ngurrunba yalunya wabudana Junwanyi. Nyuli ngurrunba yalunya bundalina, niji Jurdan.
MAR 1:6 Nanda barri Jun Ngurrunbawarr, nayi nyulili jungku. Wudumba nyulili nganya nanankanyi yanimalkanyi, niji kamil. Nanda kamil barrinani yarrama. Wudumba nyulili nanda nganya, bakili nyulu yabimba jumbala nangangi nganyayudinyi. Bakili nyulu kijijba waba nanganginyina muwana. Wardamba nangkili ngawamba nyangkunyalinyi baki ngandalanyi. Miku nangkiyanyi wardamba barnyinyi, ngawamba nyangkunyalinyi baki ngandalanyi.
MAR 1:7 Karuyi yalunya Junwanyi Ngurrunbawarranyi, “Nanda barri nganinyi jalija nyulu badajba bayngkani ngakindu, nyulu walkurra mambuka ngambalangi. Nyulu mili walkurra mambuka ngaki. Nyulu ngiruka, ngala miku ngayu ngiruka barrinani nyulu.
MAR 1:8 Ngayu yawumba narrinya wabudana, ngala nanangini jalija badajba, janyulu yawumba Kunyba Ngarndu nangangi Kudkanyi narrindu. Janyulu yawumba nanda Kunyba Ngarndu nangangi Kudkanyi narrindu kurduluna.” Nani barri karuyi yalunya Junwanyi. Barriwa.
MAR 1:9 Nanamanji barri badajbayi Jisus nangandurri Junyurri. Badajba nyuli langina nanganginbunanyi yajinanyi, niji Nasarid. Nanda yaji Nasarid, nananyina walkurranyina yajina, niji Kalili, Badajbayi Jisus nangandurri Junyurri, baki ngurrunbayi Jisus wabudana Junwanyi. Ngurrunba nyuli Jisus bundalina, niji Jurdan.
MAR 1:10 Jali walajba Jisus wabudananyi, baki yinarramba nyuli najba laliji kingkarri. Najba nyuli laliji bardawambikurri nangka. Baki najba nyuli nanda Kunyba Ngarndu nangangi Kudkanyi karralankurri kingkarrinya wayka nangandurri. Karralayi nanda Kunyba Ngarndu Kudkanyi nangandurri, baki jungkuyi ngarndu nangandu kulajina, barrinani babangka kulukuku kingkarrinya wayka, baki jungkuka kurndana.
MAR 1:11 Baki yanybayi Kud jangkurr kingkarrinya. Nayi nyuli yanyba, “Ninji barri ngakinmirra jandanyi, jala ngayu maruka muwa kudanyu barri. Ninji jungkuka kunyba. Ngayu mirnarrijbangka muwa nganyi barri.” Barriwa.
MAR 1:12 Yinarramba barri manjijbayi Jisus kingkarri Kunybawanyi Ngarnduwanyi Kudkanyi. Manjijba nyuli Jisus kingkarri dungalarri. Jungkuyi Jisus nanaba dungalana. Mikuyaji yingkanyi nangandu. Yurlwa yali nganinyimuku nanankanyi mulijinyi yajinyi.
MAR 1:13 Jungkuyi Jisus nanaba nyuluman, baki jawuda bijbawarr yanimal nanaba nangandu marda. Jungku nyuli nanaba yingamali yakarl, baki bijal mili nyuli jungku nanaba. Ngala badajbayi nanda mambuka wuwarranyi, niji Sayidin. Badajba nyuli nangandurri Jisusyurri, baki balanja nyuli Jisus. Nulijba nyuli nangangi Jisuskanyi, nyulu yanybikanyi balki jangkurr nangangi Kudkanyi, nyulu yabimbikanyi balki yaji nangangi barri. Nanankardi barri nyuli balanja Jisus, ngala jungkuyi Jisus kunyba yurrngumba barri. Baki nanamuku Yanjilmuku jalili yalu waki nangangi Kudkanyi, badajba yali nangandurri Jisusyurri. Lalanba yali Jisus nanaba mulijina yajina. Barriwa.
MAR 1:14 Baku barri yali wudumba nanda Jun Ngurrunbawarr. Wudumba yali Jun ngarrkadabawarrmukunyi, baki kijijba yali. Yarrijba yali brisinyina. Barriwa. Bayngkani barri barlbayi Jisus langki nanankurri walkurrayngkurri yajiyurri, niji Kalili. Jungku nyuli nanaba, baki karu nyuli yalunya nanankanyi kunybanyi jangkurranyi nanganginkanyi Kudkanyi.
MAR 1:15 Yanybayi Jisus nayi barri yalungi, “Nanijba barri yuku narri jungku kunyba nangangi Kudkanyi, baki janyulu lalanba narrinya Kudwanyi. Wijba narri jungku balki. Yangkalamba narringka narringinbunanyi balkinanyi yajinanyi, baki janarri kuyu nayinda kunyba jangkurr nangangi Kudkanyi. Jungku janarri kunyba nangangi Kudkanyi yurrngumba barri. Ngindu janarringka muwa narringinkanyi balkinyi yajinyi. Kuyu janarri nayinda kunyba jangkurr nangangi Kudkanyi, baki janyulu lalanba narrinya yurrngumba barri.” Nani barri milidimbayi yalunya Jisuswanyi. Barriwa.
MAR 1:16 Jilajbayi Jisus yundu bayunguna wabudana. Walkurra nanda wabuda, barrinani kanja, niji barri Kanja Kalili. Jilajbayi Jisus, baki najba nyuli bulanya buwakula, Sayimin baki Yandru. Nyulu najbayi bulanya janybikurri bardija wayka wabudarri. Janyba bulili bardija wayka kakunyi, mungkijbirriwuyanyi. Nani barri bulili waki yurrngumba wudumbikanyi kaku.
MAR 1:17 Yanybayi Jisus bulangi, “Jilajba janimbala ngakinduwa. Janimbala jungku ngakindu yurrngumba barri, baki jangayu milidimba nimbalanya. Nanijba barri nimbala wudumbaka kaku, ngala baku barri janimbala wudumba yingkamuku ngaki nganinyimuku.”
MAR 1:18 Baki yinarramba buli yingijba nanda bardija. Yingijba buli bardija yurrngumba barri, baki jilajba buli nangandu Jisusnyina. Barriwa.
MAR 1:19 Jilajba yali bijal mili bayunguna wabudana, baki najba yali yingkawuya buwakula bulanya. Najbayi bulanya, Jayims baki Jun. Marda nijanganjinyi bulangi, niji nangangi Jibidi, nyuli bulandu marda. Jungku yali muwardana, baki ngarrkadaba yali nanda bardawa badija.
MAR 1:20 Najbayi yalunya Jisuswanyi baki yinarramba nyuli yanyba bulangi buwakulayngka, bulaja jilajba nangandu Jisusnyina. Baki yingijba buli nanda nijanganjinyi bulangi. Nyuli wambu jungku muwardana, baki jawuda wakiwarr nangandu. Ngala barlba buli buwakula nangandu Jisusnyina. Barriwa.
MAR 1:21 Jilajba yali, baki wanbiya yali nananyina barrawuyabarrawuyana, niji Kabirnayum, baki jungku yali nanaba. Ngala nyulu Sadidi, baki ngankijba yali jurjina. Baki yanybayi Jisus yalungi nanaba jurjina. Nyulu milidimbayi yalunya nanganginkanyi jangkurranyi Kudkanyi.
MAR 1:22 Manku yali nangangi jangkurr, baki manmala yali. Manmala yali kudanyu barri. Mankumanku yalungki, “Wanyi nayinda. Wanyi. Miku nyulimi barrinani nanamuku milidimbawarrmuku yuwanyi Musiskanyi. Yalili milidimba ngawamba nanankanyi wankalanyi yuwanyi. Ngala nayinda barri yinini nyulu. Nyulu yanybaka jangkurr nangangi Kudkanyi barrinani walkurra mambuka. Wanyi nyulu. Wanyi.” Barriwa. Nani barri yalungki mankumanku nangangi Jisuskanyi.
MAR 1:23 Ngala yanybayi Jisus yalungi jurjina, baki ngankijbayi yingka nganinyi jurjina. Jungkuyi balki wuwarr nangandu mankanyina. Ngankijbayi nanda nganinyi wuwarryudi,
MAR 1:24 baki kaya nyuli kudanyu barri, “Ninji barri Jisus, nganyi yaji Nasarid. Wanyimba janinji nurrungi. Badajba kuna ninji kurdanbiji nurrunya. Ngayu jingkijbangka ninya, ninji barri nanda malaba nangangi Kudkanyi.” Barriwa.
MAR 1:25 Ngala ngirrwayi Jisus nanankanyi wuwarranyi. Ngirrwa nyuli nangangi, “Kardakiyi jungku. Karda. Walajbakiyi nanganbunanyi mankanyinanyi. Walajbakiyi.” Barriwa.
MAR 1:26 Ngala janybayi nanda nganinyi wayka jambarri wuwarrwanyi. Janyba nyuli wayka, baki kayayi nanda wuwarr kudanyu barri. Kaya nyuli kudanyu, baki walajba nyuli nanganbunanyi mankanyinanyi. Baki yuku barri nanda nganinyi.
MAR 1:27 Ngala nanamuku barri jali yalu karrinja nanaba lukuluku bulandu, manmala yali. Kudanyu yali manmala nanankanyi jali yalu najba, baki yililikajba yalungki nangangi Jisuskanyi, “Wanyi nayinda. Wanyi. Nyulu kuna buyingkinyi milidimbawarr. Nyulu yanybaka barrinani yalu yanybaka walkurramuku mambukamuku. Jirrinybaka nyulu wuwarrmuku, yalu walaykanyi mankanyinanyi, baki yalu ngayangayijbangka nanganginkanyi jangkurranyi, yalu walajbangka mankanyinanyi.” Nani barri yalungki yanyba nangangi Jisuskanyi.
MAR 1:28 Yingkamukunyi yalunjali karu yingkamuku nangangi Jisuskanyi, jabarri yalunjali karu yingkamuku nangangi barri. Kajamukunyi yali manku jangkurr nangangi Jisuskanyi, baki nanganginkanyi jangkurranyi. Kajamukunyi jalili yalu jungku langkiya baki bayinga, karriya baki kulaya nananyina walkurranyina yajina Kalili, yali manku jangkurr nangangi. Barriwa.
MAR 1:29 Walajbayi Jisus jurjnanyi, baki jilajba nyuli barrawurri. Nanda bulangi barrawu, buwakulayngka, Sayiminkanyi, baki Yandrukanyi. Ngankijbayi Jisus nanaba barrawuna, marda kujarra kandiwuya nangandu, Jayims baki Jun.
MAR 1:30 Nanaba barrawuna kulukayi bardibardi jali nyulu lunji. Nyuli ngunyarringanja nangangi Sayiminkanyi. Ngarrangarra nyuli mankanyi. Karu yali Jisus nanankanyi bardibardinyi, nyuli lunji.
MAR 1:31 Jilajbayi Jisus nangandurri, marrimba nyuli bardibardi marni, baki kingkarrumba nyuli bardibardi marninanyi. Kunybijbayi nanda bardibardi mankanyi. Mardumardu mankanyi. Walajba nyuli baki wudumbayi mama yalungi barri. Barriwa.
MAR 1:32 Ngabungaburri barri, ngala nyulu bijal mungarri yaji, baki kuyu yalunjali nangandurri Jisusyurri. Kajamuku jali yalu lunji, baki kajamuku jali yalu wuwarryudi, yalunjali kuyu nangandurri Jisusyurri, ngala nyulu bijal mungarri yaji.
MAR 1:33 Baki bukambiju jali yalu jungku nananyina yajina, yali jilajba nanankurri barrawurri jali jungku Jisus. Kajamuku, wirdikudukudumuku yali jilajba nanankurri, baki karrinja yali danbina.
MAR 1:34 Baki kunymambayi yalunya Jisuswanyi. Kunymamba nyuli bukambiju jali yalu lunji. Jakajba nyuli wuwarr yalunbunanyi mankanyinanyi. Baki kardamba nyuli wuwarr yanybikanyi. Jingkijba yali Jisus wuwarrmukunyi, baki nanankardi nyuli kardamba yalunya yanybikanyi. Barriwa.
MAR 1:35 Munganawa barri ngala nyuli kamambawurri yaji, baki walajbayi Jisus. Walajba nyuli barrawunanyi, baki jilajba nyuli munjiyurri. Mikuyaji yingkanyi nanaba. Nyubana nyuli jungku. Baki yanybayi Jisus mududu nangangi Kudkanyi. Yanyba nyuli mududu nangangi Kudkanyi nanaba nyubana. Barriwa.
MAR 1:36 Bijal barri kamu walajbayi Sayimin, baki yingkamuku nangandu. Durrijba yali Jisus.
MAR 1:37 Wakaramba yali Jisus, baki yanyba yali nangangi, “Kajamuku barri yalu kujbangka nganyi. Yalu kujbangka nganyi bukambiju.”
MAR 1:38 Ngala yanybayi Jisus yalungi, “Ngambalaja jilajba yingkarri barrawuyabarrawuyarri, baki yingkarri barrawuyabarrayuwarri. Jangambala yidamba kajamuku barrawuyabarrawuya, baki jangayu yanyba yalungi. Jangayu milidimba yalunya marda jangkurranyi. Nanankardi barri ngayi badajba milidimbiji yalunya kajamuku.” Barriwa.
MAR 1:39 Baki mili jilajbayi Jisus. Jilalajba nyuli lukuluku barri nananyina yajina Kalili. Jilalajba nyuli langki, kula, bayungu, baki karri. Kaja jurj nyuli nanaba yajina, baki ngankijba nyuli yingkana baki yingkana baki yingkana milidimbiji yalunya. Milidimba nyuli yalunya kajana jurjina. Baki kajamuku jali yalu wuwarryudi mankanyi, nyuli jakajba wuwarr yalunbunanyi mankanyinanyi. Barriwa.
MAR 1:40 Jilajbayi nganinyi nangandurri Jisusyurri. Nanda nganinyi ngujbulijba nyuli nangangi waba bukamba. Yingkamuku yalili marrala nanankanyi nanganginkanyi ngalyanyi. Mikukiyanyi kunybijba mankanyi. Jiwilijbayi nanda ngalya nangandu, baki janangka janyba baku barri. Nanankardi barri kudanyu yalili marrala nanankanyi ngalyanyi. Jilajba nyuli nangandurri Jisusyurri, baki mururu nyuli wayka mujina nangandu Jisusnyina, baki yanybayi nangangi Jisuskanyi, “Jaliyi ninji nulijba ngaki, kunymambikanyi ngaki mankanyi, baki yuku ninji kunymamba ngaki mankanyi.” Barriwa.
MAR 1:41 Nginduyi Jisus muwa nangangi. Ngindu nyuli muwa nangangi, baki manjijba nangki marni. Manjijba nangki Jisus marni nangandurri, baki marrimbayi nanda nganinyi. Baki yanybayi Jisus nangangi, “Ngayu nulijbangka nganyi, kunymambikanyi ninga mankanyi. Kunybakiyi jungku mankanyi.”
MAR 1:42 Baki yinarramba kunybijbayi nangangi mankanyi. Mili kunyba nangangi waba.
MAR 1:43 Baki jirrinybayi nanda nganinyi Jisuswanyi. Maramaramba nyuli, “Mikujiyi karu yalunya yingkamuku jali ngayu kunymamba nganyi mankanyi. Mikujiyi karu yalunya. Ngala jilajbakiyi nangandurri, nanankurri mambukarri jurjkanyi. Minimbakiyi nganyingka mankanyi nangangi, baki muningka wajbakiyi Kud barnyinyi. Nani barri yanybayi nanda wankalanyi Musis, muningka waykanyi Kud barnyinyi. Jayalu wajba Kud barnyinyi, jalija kunybijba mankanyi. Nanankardi barri, janinji wajba Kud barnyinyi, baki yingkamukunyi jayalu jingkijba ninya, ninji mirnarrijba muwa nangangi Kudkanyi, kunybijbangkangangi nganyi mankanyi.” Barriwa. Nani barri jirrinybayi nganinyi Jisuswanyi. Maramaramba nyuli nganinyi, baki manjijba nyuli nanda nganinyi nangandurri mambukarri jurjkanyi.
MAR 1:45 Ngala mikukiyanyi karda jungku nanda nganinyi. Jilajba nyuli, baki karu nyuli yalunya bukambiju nangangi Jisuskanyi. Nyuli karu yalunya nangangi Jisuskanyi, nyuli kunymamba nangangi mankanyi. Mankuyi nanda jangkurr kajamukunyi, baki jilajba yali nangandurri Jisusyurri, wirdikudukudumuku. Jilalajba yali nangandu lukuluku yurrngumba barri. Baki nanankardi barri mikukiyanyi mili jilalajba Jisus barrawuyabarrawuyana, ngala jungku nyuli munji. Ngala kajamuku yali jilajba nangandurri munjiyurri. Jilajba yali langina baki bayunguna, karrina baki kulani. Malimalijba yalungki nangandurri Jisusyurri. Barriwa.
MAR 2:1 Bijal barri baku wijbayi Jisus nanankurri barrawuyabarrawuyarri niji Kabirnayum. Wijba nyuli, baki jungku nyuli barrawuna. Kajamuku yali manku jangkurr nangangi Jisuskanyi, nyulu jungkuka nananyina barrawuna.
MAR 2:2 Baki jilajba yali nangandurri barrawurri. Ngankijba yali kalawuyngkurru barrawuna. Baki walbinyi nanda barrawu nyulu kalawuyngkurru. Baki mili barri yali wanbiya kajamuku, baki karrirrinja yali danbina barrawuna. Baki milidimbayi yalunya Jisuswanyi. Nyuli karu yalunya nangangi Kudkanyi.
MAR 2:3 Yingkamuku yali jilajba nangandurri Jisusyurri. Kuyu yali nganinyi kujarrawanyi baki kujarrawanyi. Nanda nganinyi nyuli lunji. Miku nangkiyanyi ngirringirrimba nangangi mankanyi. Kuluka nyuli yurrngumba jalyuna. Marrimba yali nangangi jalyu, baki kuyu yali nanda nganinyi nangandurri Jisusyurri.
MAR 2:4 Kajamuku yali karrinja danbina barrawuna, baki walbinyi nanda barrawu nyuli. Baki nanankardi barri miku yaliyi ngankijba. Miku yaliyi kuyu nanda nganinyi nangandurri Jisusyurri. Kajamuku yali kalawuyngkurru barrawuna, baki lukuluku marda. Ngala nanamuku jali yalu kuyu nanda nganinyi, kirrijba yali kingkarri yundu nananyina barrawuna. Kirrijba yali kingkarri, baki jungku yali yundukula barrawuna. Bardawamba yali nanda barrawu yundu. Kijijba yali kujarra baki kujarra kurul jalyuna. Baki manjijba yali nanda nganinyi wayka kurulyudinyi. Manjijba yali wayka jambarri walu nangandu Jisusnyina.
MAR 2:5 Najbayi yalunya Jisuswanyi, baki jingkijba nyuli yalunya, nanda nganinyi jali lunji, baki nanamuku jali yalu kuyu nganinyi. Jingkijba nyuli yalunya, mankumanku yalungki nangangi Jisuskanyi, yuku nyulu kunymamba nanda nganinyi jala nyulu lunji. Yuku nyulu kunymamba nangangi mankanyi. Baki yanybayi Jisus nganiyngkanyi jali lunji, “Ngaki kandi. Jangayu manjamanjamba nanda balki jali ninji yabimba.”
MAR 2:6 Ngala kudiyanymuku milidimbawarrmuku yuwanyi Musiskanyi, yali jungku nanaba nangandu. Manku yali nangangi jangkurr Jisuskanyi, baki yanyba yalungki,
MAR 2:7 “Nayinda nganinyi nyulu balki. Jungkuka nyulu balki nangangi Kudkanyi. Miku nyuliyi manjamanjamba balki yaji. Ngawamba Kudwanyi yuku nyulu manjamanjamba balki yaji, ngala mikuwali nganinyiwanyi. Nayinda barri nyulu jujambawarr.” Nani barri yalungki yanyba nangangi Jisuskanyi.
MAR 2:8 Ngala yinarramba jingkijbayi yalunya Jisuswanyi. Jingkijba nyuli nanda jali yalungka yanyba nangangi. Baki yanyba nyuli yalungi barri, “Wanyingkanyi narringka mankumanku balkinyi jangkurranyi ngaki, yanybangangi ngayi jangkurr manjamanjambikanyi nangangi balki yaji. Wanyingkanyi.
MAR 2:9 Wanyi barri mili jardibirri yaji yabimbikanyi. Manjamanjambikanyi balki yaji kuna. Kunymambikanyi nayinda nganinyi mankanyi kuna. Wanyi mili jardibirri yaji yabimbikanyi.
MAR 2:10 Ngayu Buwanya Bukambijuyngka. Nyuli yarrijba ngana walkurra mambuka, miku nganinyiwanyi, ngala Kudwanyi. Baki nyuli karu ngana, yuku ngayu manjamanjamba balki yaji. Jalija nganarri najba kunymambikurri nayinda nganinyi mankanyi, baki janganarri jingkijba, yuku ngayu manjamanjamba nangangi balki yaji marda.” Nani barri yanybayi Jisus yalungi. Baki mili nyuli yanyba nanankanyi nganiyngkanyi, jali kuluka jalyuna,
MAR 2:11 “Ngayu karungka ninya. Walajbakiyi waykalinya. Walajbakiyi. Baki mukulmbakiyi nganyi jalyu, baki wijbakiyi nganyinkurri barndarri.”
MAR 2:12 Yinarramba walajbayi nanda nganinyi jalyunanyi. Walajba nyuli, mukulmbayi nangangi jalyu, baki barlbayi nanankardi barndananyi. Baki nanamuku barri jali yalu najba nanda nganinyi walaykurri, baki manmala yali. Kudanyu yali manmala, ngala yali wajba Kud yalunginkanyi kunybanyi jangkurranyi. Baki yanyba yalungki, “Jalannga ngambala najba nganinyi kunybiykurri jala nyulu lunji nanginkanyi ngalyanyi. Jalannga ngambala najba kunybiykurri.” Barriwa.
MAR 2:13 Baku barri mili jilajbayi Jisus bayunguna yundu nananyina wabudana niji Kalili. Kajamuku yali jilajba nangandurri, baki nyuli milidimba yalunya.
MAR 2:14 Ngala jilajbayi Jisus, baki najba nyuli nganinyi, nangangi niji Madiyu, yingka niji nangangi Libayi, ngala nangangi nijanganjinyi, nangangi niji Yalbayis. Jungkuyi nanda nganinyi barrawuna nyulu wakinkanyi. Waki nyulili Kubaminkanyi. Kuyu nyulili dungala yalunbunanyi, waykanyi Kabamin mambuka. Najba nyuli nanda Madiyu jungunkurri barrawuna Jisuswanyi, baki yanybayi Jisus nangangi, “Jilajbakiyi ngakindu.” Walajba nyuli Madiyu baki jilajba nyuli nangandu Jisusnyina.
MAR 2:15 Jilajba buli bayungu barndarri, nangangi jala barnda Madiyukanyi. Jungkuyi Jisus nanaba. Jarrba nyuli mama nanaba nangandu, baki yali jungku nangandu marda nanganginmuku kandimuku. Jilajbayi yingkamuku nanankurri barrawurri. Yali balkimuku. Kudiyanymuku yalungi, yalili waki Kabaminkanyi, ngala yali maninjaku. Yalili kuyu dungala yalunbunanyi Kabaminkanyi, ngala kudukudu dungala yalili kuyu, bakili yalu kilimba kudiya nanda dungala yalungi barri. Malumba yalungki wardamba mamanyi nangandu Jisusnyina.
MAR 2:16 Jawudanymuku yali jilajba nanankurri barndarri. Yali milidimbawarrmuku yuwanyi Musiskanyi. Jilajba yali barndarri, baki najba yali Jisus wardambikurri nangka mamanyi yalundu balkimukunyina. Ngajaka yali kandimuku nangangi Jisuskanyi, “Wanyingkanyi wardamba nangka narringi milidimbawarr mamanyi yalundu balkimukunyina. Wanyingkanyi.”
MAR 2:17 Manku nyuli nanda yalungi jangkurr Jisuswanyi, baki nyuli jananganja yalunya, “Mikuwali badajba yarrbirra yalundurri jala yalu kunyba mankanyi, ngala nyulu badajba yalundurri jala yalu balki mankanyi. Baki nani barri, miku ngayiyanyi badajba nanganbunanyi Kudnanyi milidimbiji yalunya jala yalu jungku kunyba. Ngala ngayi badajba milidimbiji yalunya jala yalu jungku balki.” Nani barri jananganjayi yalunya Jisuswanyi. Barriwa.
MAR 2:18 Nanamuku kandimuku Junkanyi Ngurrunbawarrayngka, baki nanamuku Barasimuku, kudiyana barri miku yalungkiyanyi wardamba mamanyi barndaykamba, ngala yalungki mankumanku nangangi Kudkanyi yurrngumba barri. Nanamuku Barasimuku, kudanyu yalili durrijba nanda yuwa nangangi Musiskanyi, ngala miku yaliyanyi jingkijba Kud. Kudiyana barri miku yalungkiyanyi wardamba mamanyi, ngala yali yanyba mududu nangangi Kudkanyi. Nanamanji kambana barri, miku yalungkiyanyi wardamba mamanyi kandimuku Junkanyi baki Barasimuku. Yingkamuku yali jilajba nangandurri Jisusyurri, baki ngajaka yali, “Kudiyana barri miku yalungkimi wardamba mamanyi kandimuku Junkanyi, baki Barasimuku. Miku yalungkimi wardamba mamanyi kudiyana, ngala nganyinmuku kandimuku yalungka wardamba mamanyi yurrngumba barri. Wanyingkanyi yalu miku kudiyana miku jarrkanyi mama. Wanyingkanyi.”
MAR 2:19 Jananganjayi yalunya Jisuswanyi, “Nanda buyingkinyi nawinganja, kajamuku kandimuku yalu nangandu ngala nyulu jalannga wudumba maninganja. Miku yaliyi jungku birrkalanyi, ngala yalungka wardamba kajanyi mamanyi.
MAR 2:20 Ngala baku barri janyulu jarimba nanda nangangi nawinganja yingkawanyi. Baki nanamanji barri, miku yaliyi jarrba mama nanganginmukunyi kandimukunyi, ngala jayalu ngindu muwa nangangi.” Barriwa.
MAR 2:21 Mili barri yanybayi Jisus yalungi nayi barri, “Jaliyi jumbala bakarrawijba, baki ngambala ngarrkadaba jumbala yingkayudinyi rakiyudinyi. Jaliyi buyingkinyi nanda raki, jala ngambala wakardaba nanda jumbala, baki bayakardangujbangka nanda buyingkinyi raki. Baki mili barri bakarrawijbaja nanda jumbala, bayakardangujbangkangangi nanda raki. Baki nanankardi barri ngambala wudumba waluwinyi raki ngarrkadaykanyi. Barriwa.
MAR 2:22 Baki mili janarringka mankumanku nanginkanyi jangkurranyi. Ngambala yarrijba ngarrki krayibkanyi kalawunyi bindawarrana. Nanda bindawarra waba jibkanyi. Jaliyi ngambala yarrijba buyingkinyi ngarrki kalawunyi waluwinyi bindawarrana, baki nanda balki. Jalija nanda ngarrki ngujbul bijal, baki dumbaja nanda waba bindawarra. Bunyarrijba janangka nanda ngarrki, baki bakarrawijbaja nanda bindawarra. Ngala ngambala yarrijba buyingkinyi ngarrki krayibkanyi kalawunyi buyingkinyi waba bindawarra. Jalija nanda ngarrki ngujbul bijal, baki yuku nanda bindawarra. Mikuwali bakarrawijba nanda waba. Miku nangkiyi bunyarrijba nanda ngarrki. Jungkuka kunyba barri kalawunyi bindawarrana yurrngumba barri.” Nani barri yanybayi Jisus yalungi. Barriwa.
MAR 2:23 Baku barri burrandijba yali nananyina yajina jali jardijba nanda karnba barrinani daburrul. Nanda karnba yami kunyba jarrkanyi. Burrandijba yali, Jisus baki nanganginmuku kandimuku, ngala nyuli Sadidi. Ngala yali burrandijba, baki dulabayi yami kandimukunyi. Dulaba yali yami, baki jarrba yali.
MAR 2:24 Ngala kudiyanymuku Barasimuku jalili yalu kudanyu durrijba nanda yuwa nangangi Musiskanyi, yali nanaba marda yalundu. Yali najba kandimuku dulaykurri yami baki jarrkurri yaji. Baki yanyba yalungki, “Yalu dulabangka yami karnbananyi. Nani barri yalu wakingka.” Baki yanyba yali nangangi Jisuskanyi, “Najbakiyi yalunya, nganyinmuku kandimuku. Yalu dulabangka yami jarrkanyi. Nani barri yalu wakingka. Nani barri yalu jungkuka balkina yuwana Musiskanyi. Yanybaka nanda yuwa, mardakimi nganinyi miku waki Sadidi barri. Yuku yalu waki yingkana kambana, ngala miku Sadidi. Jala barri Sadidi, ngala nganyinmuku kandimuku yalu wakingka, yalu dulabangka yami. Wanyingkanyi yalimi miku ngayangayijba nanankanyi yuwanyi Musiskanyi. Wanyingkanyi.”
MAR 2:25 Jananganjayi yalunya Jisuswanyi, “Narri jingkijbangka nanda jangkurr najana Kudkanyi, jala karu ngambalanya nanankanyi walkurrayngka mambukanyi Dayibidkanyi. Narri jingkijbangka nanda jali nyulu yabimba. Jali yalu birrkalanyi, Dayibid baki nanamuku yalu nangandu, baki wanyimbayi Dayibid.
MAR 2:26 Ngankijba nyuli kalawunyi walkurranyina jurjina Kudkanyi, baki wajbayi Dayibid dambanyi mambukawanyi jurjkanyi. Jarrba yali nanda damba. Nanamanji barri nanda malbu, niji Yabiyadarr, nyuli walkurra mambuka jurjkanyi. Jarrba yali nanda damba. Ngala nanda damba, nanda kudukudu yaji nangangi Kudkanyi. Nanda yuwa nangangi Musiskanyi yanybaka, ngawamba mambukamukunyi jurjkanyi, ngawamba yuku yalu jarrba nanda kudukudu mama. Mikuwali yingkawanyi, ngawamba mambukawanyi jurjkanyi. Ngala barimbayi nanda yuwa Dayibidwanyi. Jarrba nyuli nanda mama, baki yalu nangandu.”
MAR 2:27 Mili barri yanybayi Jisus yalungi, “Wankalana kamambarra yabimbayi nganinyi Kudwanyi. Baki yanybayi Kud nangangi nganiyngkanyi, ‘Janarri waki 6 kambana, baki munganawa janarri wuyalijba. Jalija narri wuyalijba, baki janarri jungku kunyba barri.’ Nanyina kambana jala yalu wuyalijba, yabimbayi nanyina kambana Kudwanyi. Yabimba nyuli nanyina kambana yalungi nganinyimukuyngka.
MAR 2:28 Ngayu Buwanya Bukambijuyngka narringi. Ngayu mambuka bukambijuyngka narringi yurrngumba barri. Ngayu mambuka narringi, jala narri waki, baki jala narri jungku. Marda ngayu mambuka nanankanyi yajinyi jala narri yabimba Sadidi barri.” Nani barri jananganjayi yalunya Jisuswanyi.
MAR 3:1 Kamu barri Sadidi wijbayi Jisus barrawuyabarrawuyarri, baki ngankijba nyuli jurjina nanaba. Bayakarda nanda jurj. Nanaba jurjina jungkuyi nganinyi jirdi balkinyi marninyi. Mikuwali marrimba yaji. Mardil nangangi marni. Barriwa.
MAR 3:2 Kudiya nanaba jurjina Barasimuku, yali nulijba balanjankanyi Jisus. Nulijba yali Jisuskanyi, nyulu yabimbikanyi balki yaji nanankanyi yuwanyi Musiskanyi. Baki nanangajba yali Jisus naji jaliyi nyulu kunymamba nangangi marni nanamanji Sadidi. Nanamuku Barasimuku yalili yanyba, jaliyi yingkawanyi kunymamba yingka Sadidi barri, baki nanda balki, wakingkangangi nyulu Sadidi. Nanangajba yali Jisus, naji jaliyi nyulu kunymamba nangangi marni Sadidi.
MAR 3:3 Yanybayi Jisus nganiyngkanyi jirdi balkinyi marninyi, “Kabukawa.” Baki jilajba nyuli nangandurri Jisusyurri. Karrinjayi walu nangandu.
MAR 3:4 Baki yanybayi Jisus yalungi Barasimukuyngka. Ngajakayi yalunya, “Wanyi yanybaka ngambalangi yuwa, ngambala wakinkanyi Sadidi. Wanyi yaji marda ngambalimi yabimba Sadidi. Kunyba yaji kuna. Balki yaji kuna. Yuku kuna ngambalaja wankamba yingka nganinyi. Yuku kuna ngambalaja kurdanba. Wanyi yanybaka nanda yuwa ngambala yabimbikanyi yaji Sadidi. Wanyi barri yanybaka.” Barriwa. Ngala miku yaliyanyi jananganja Jisus. Karda yali jungku.
MAR 3:5 Wangkawangkijbayi Jisus yalungi, baki kijiwijba nyuli yalungi. Ngindu nyuli muwa yalungi, jardibirringangi yali muwa. Miku yaliyanyi ngindu muwa nanankanyi nganiyngkanyi jirdi balkinyi marninyi, ngala jardibirri yali muwa nangangi. Yanybayi Jisus nanankanyi nganiyngkanyi. Jirrinyba nyuli nanda nganinyi, “Manjijbakiyi nganyingka marni.” Manjijba nangki marni, baki kunybijbayi nanda marni. Yuku barri nyuli yabijba marni barrinani nanda yingka marni.
MAR 3:6 Ngala nanamuku Barasimuku, yali ngarrangarra muwa nangangi Jisuskanyi. Yinarramba yali walajba, baki barlba yali jurjnanyi. Barlba yali yalundurri kandimukuyngkurri Yirudkanyi, baki yanyba yalungki yalu kurdanbikanyi Jisus. Barriwa.
MAR 3:7 Ngala barlbayi Jisus karri, marda nanganginmuku kandimuku nangandu. Barlba yali karri barri kanjarri. Ngala yingkamuku yali jilajba nangandurri Jisusyurri. Kajamuku yali jilajba nangandurri yingkananyi yajinanyi, baki yingkananyi yajinanyi. Yingkamuku yali jilajba kulani Jirusalimnanyi, baki Judiyananyi, baki Yidumiyananyi. Yingkamuku yali jilajba bayunguna Kalilinanyi. Yingkamuku yali jilajba langina Dayananyi baki Sayidunnanyi. Yingkamuku yali jilajba karrurrinybananyi bundalnanyi Jurdananyi. Kajamuku yali jilajba nangandurri mijimbangu, mankungangi yalunjali yanybikurri nangangi Jisuskanyi, nanda yaji jali nyulu yabimba.
MAR 3:9 Bunundijba yali nangandurri Jisusyurri kajamuku barri. Jululumba yalungki, yalu karrinjankanyi bundu nangandu barri. Baki karuyi nanganginmuku kandimuku Jisuswanyi, yalu wudumbiji muwarda nangangi. Jayalu kuyu muwarda bundu bijalina jali nyulu karrinja nanaba. Jaliyi yalu bunundijba kudanyu barri, jaliyi yalu jululumba Jisus, baki janyulu ngankijba muwardana, baki janyulu milidimba yalunya, ngala nyulu jungku muwardana.
MAR 3:10 Wabula barri kunymambayi Jisuswanyi kajamuku jali yalu lunji. Baki nanankardi barri kajamuku jali yalu lunji, yali jilajba bundu nangandurri. Jululumba yalungki, nulijbangangi yali marrimbikanyi Jisus. Nulijba yali marrimbikanyi Jisus, nyulu kunymambiji yalunya. Nanankardi barri yalungki jululumba, yalu karrinjankanyi bundu nangandu Jisusnyina.
MAR 3:11 Yingkamuku yali nanaba nangandu, jali yalu wuwarryudi mankanyi. Jali yalu najba Jisus wuwarrmukunyi, baki yirrba yali jambarri nganinyimuku wuwarryudi, baki kaya yali kudanyu barri, “Ninji barri jandanyi nangangi Kudkanyi. Ninji nangangi jandanyi.” Barriwa.
MAR 3:12 Ngala maramarambayi wuwarrmuku Jisuswanyi. Wijba yali karunkanyi nangangi Jisuskanyi, wanyi nyuli. Maramaramba nyuli yalunya. Barriwa.
MAR 3:13 Baku barri kirrijbayi Jisus kingkarri dungalana. Nulijba nyuli jawudanymukuyngka yalu jilalaykanyi nangandu yurrngumba barri. Baki kaya nyuli yalungi, nanganginmukuyngka kandimukuyngka. Jilajba yali nangandurri.
MAR 3:14 Baki nyuli yarrijba 12 nganinyimuku, nanganginmirra kandimuku. Yanyba nyuli yalungi, “Janarri jilalajba ngakindu, baki jangayu milidimba narrinya. Baki baku barri jangayu manjijba narrinya yingkarri yajiyurri, baki yingkarri yajiyurri. Baki janarri milidimba yalunya yingkamuku nanankanyi kunybanyi jangkurranyi Kudkanyi.
MAR 3:15 Jangayu yabimba narrinya ngiruka, narri yabimbikanyi ngiruka yaji. Nanamuku jala yalu wuwarryudi mankanyi, janarri jakajba wuwarr yalunbunanyi mankanyinanyi.” Barriwa.
MAR 3:16 Yarrijbayi 12 nganinyimuku nanganginmuku kandimuku Jisuswanyi. Nayinda barri yalungi niji. Sayimin barri, yingka niji nangangi Bida.
MAR 3:17 Marda buwakula, Jayims baki Jun. Bulangi nijanganjinyi, niji nangangi Sibidi. Yanybayi Jisus bulangi nanankuya nganinyiwuya, buli barrinani ngurrwangka, baki nijarrijbayi bulanya yingka niji, ‘Nganinyiwuya Ngurrwangka.’
MAR 3:18 Yingkamuku yalungi niji Yandru baki Bilib, marda Bardulumu baki Madiyu, marda Dumas. Baki yingka nanamannga niji Jayims, ngala nangangi nijanganjinyi, niji nangangi Yalbayis. Baki mili barri Dadayus, baki yingka nanamannga niji Sayimin, ngala nangangi yaji niji Kayina.
MAR 3:19 Baki Judas Yiskariyud. Nyuli nanda jali baku nangka yangkalamba nanganbunanyi Jisusnanyi, baki karuyi mambukamuku jurjkanyi wanjawa jayalu wakaramba Jisus. Barriwa.
MAR 3:20 Wijbayi Jisus nanganginkurri ngardanganjarri barndarri. Baki kajamuku yali jilajba nangandurri nanaba, walkurra muramuku. Karrinja yali lukuluku nangandu wujuju bayungu. Baki miku yaliyi jarrba mama Jisuswanyi baki nanganginmukunyi kandimukunyi. Miku yaliyi jarrba mama, karrinjangangi muramuku lukuluku yalundu yurrngumba, ngala milidimbayi yalunya Jisuswanyi.
MAR 3:21 Ngala nanganginyi mungkijimukunyi, yali manku jangkurr Jisuskanyi baki kajamukuyngka nangandu. Manku yali jangkurr nangangi, nyuli nananyina barndana, baki kajamuku yali nangandu lukuluku karrinja. Baki yali jilajba nanankurri wudumbiji Jisus. Ngamu nyuli Jisus mudu, baki nanankardi yali jilajba wudumbiji. Ngala miku nyuliyanyi mudu. Miku.
MAR 3:22 Kudiyanymuku jali yalu milidimbawarrmuku yuwanyi, wanbiya yali kulani Jirusalimnanyi. Karu yalunjali yingkamuku nangangi Jisuskanyi, “Nayinda Jisus, nyulu yabimbaka ngiruka yaji, nyulu jakajbangka wuwarr, wakingkangangi nyulu nangangi mambukanyi wuwarranyi Sayidinkanyi. Nanangini Sayidinwanyi nyulu yabimbaka Jisus ngiruka, yabimbikanyi ngiruka yaji, baki nanankardi nyulu jakajbangka wuwarr.” Nani barri yalunjali karu nangangi Jisuskanyi milidimbawarrmukunyi.
MAR 3:23 Ngala yanybayi Jisus yalungi muramukuyngka, jali yalu jungku nangandu. Yanyba nyuli yalungi, “Jalimi ngana yabimba ngiruka jakakaykanyi wuwarr mambukawanyi wuwarranyi, baki nanda barrinani nangka jakajbangka Sayidin. Yanka barri nangka jakajba Sayidin. Yanka barri.
MAR 3:24 Jalimi yalu mungkiykurramba kurdanbiji, baki baku barri janyulu mikuyaji mungkijinyi. Janyba jayalungka bukamba barri.
MAR 3:25 Jalimi yalu mungkiykurramba kurdanbiji, yalu jala kuluka yingamalina barndana, baki baku barri janyulu mikuyaji mungkijinyi nanaba barndana.
MAR 3:26 Baki jalimi yalu mungkiykurramba kurdanbiji Sayidin marda wuwarrmuku, baki baku barri janyulu mikuyaji wuwarranyi, kurdanbangangi jayalungka.
MAR 3:27 Mikuwali ngankijba nganinyi barrawuna jala nanda nangangi barrawu ngirukanyi nganiyngkanyi. Miku nyuliyi ngankijba barrawuna maninjakuji yaji. Waluwa barri, marda nyulimi kijijba nanda ngiruka nganinyi kurulyudinyi nanangini maninjakuwanyi. Jala nyulu kijijba nanda ngiruka nganinyi, baki yuku barri janyulu maninjakujba nangangi yaji.
MAR 3:28 Jala nganinyi yanybaka balki jangkurr, jala nyulu yabimbaka yinini yinini balki yaji, baki yuku nyulu manjamanjambaka nanda balki yaji Kudwanyi. Yuku nyulu manjamanjambaka nanda yinini yinini balki yaji nangangi, jaliyi nanda nganinyi nyulu ngindu muwa jungunkanyi balki.
MAR 3:29 Ngala jala nganinyi yanybaka balki jangkurr nangangi Kunybanyi Ngarndunyi Kudkanyi, jala nyulu mijba nanda Kunyba Ngarndu Kudkanyi, baki mikuwali manjamanjamba nanda balki yaji Kudwanyi. Miku nyuliyi manjamanjamba nanda balki yaji miykanyi Kunyba Ngarndu nangangi Kudkanyi.” Barriwa.
MAR 3:30 Nani barri yanybayi Jisus yalungi muramukuyngka, yanybangangi yali milidimbawarrmuku nangangi Jisuskanyi, yabimbayi Jisus ngiruka jakaykanyi wuwarr Sayidinwanyi. Barriwa.
MAR 3:31 Baki wanbiya yali barndana ngardanganja nangangi Jisuskanyi marda bababanyamba nyulu yalunya. Karrinja yali danbina barndana. Miku yaliyanyi bunundujba Jisusyurri muramukungangi. Manjijba yali jangkurr nangandurri Jisusyurri, nyulu jilaykanyi, yalu yanybikanyi nangangi.
MAR 3:32 Jungkuyi muramuku nangandu Jisusnyina, baki yali yanyba nangangi, “Nanda ngardanganja nganyi, marda bababanyamba ninji yalunya, danbina yalu jungku. Yalu kujbanka nganyi, ninji jilajbaja yalundurri.”
MAR 3:33 Ngala jananganjayi yalunya Jisuswanyi, “Najba janarri yalunya, ngakinmuku kandimuku nayiba ngakindu. Yalu barrinani ngaki ngardanganja, barrinani ngaki bababanyamba ngayu yalunya.
MAR 3:35 Nanda jala durrijbangka nangangi jangkurr, ngakinkanyi Buwakaya Kingkarri, nanda jala yabimbaka nanda yaji jala nyulu nulijbangka nangangi yabimbikanyi yaji, nyulu barrinani nanda bababanyamba ngayu, nyulu barrinani ngaki ngardanganja.” Nani barri jananganjayi yalunya Jisuswanyi. Barriwa.
MAR 4:1 Mili barri jungkuyi Jisus bundu kanjana, baki nyuli milidimba yalunya yajinyi. Kajamuku yali jilajba nangandurri mankunki nangangi jangkurr, kajamuku muramuku. Bukamba yalungki ngirringirrimba, baki jululumba yalungki barri. Nanankardi barri nyuli ngankijba muwardana, baki jungku nyuli wilina kanjana. Baki milidimba nyuli yalunya muramuku, ngala nyuli jungku muwardana, ngala yali jungku bijalina.
MAR 4:2 Milidimba nyuli yalunya kajanyi jangkurranyi. Muningka nyuli yanyba yalungi, milidimbiji yalunya kajanyi yajinyi.
MAR 4:3 Muningka yanybayi Jisus yalungi, “Manku nganarri. Wudumbayi kudukudu yami nganinyiwanyi, barrinani daburrul yami. Janyba nyuli nanda yami jambarri jardiykunumbikanyi yaji.
MAR 4:4 Jawuda yami yirrbayi yubalina, baki wanbiyayi julakimuku. Jarrba yali nanda mama yubalina julakimukunyi. Barriwa.
MAR 4:5 Marda jawuda yami yirrbayi didirrina yajina. Walajbayi daburrul karnba, ngala bijal jamba didirrina yajina.
MAR 4:6 Mikuyaji landurranyi jardijbayi didirrina yajina, baki janyba nangki. Yajbayi nanda karnba ngardarawanyi, baki janyba nangki. Janyba nangki, mikuyajingangi landurranyi. Barriwa.
MAR 4:7 Marda jawuda yami yirrbayi yajina jali jardijba nyilanyila. Walajbayi nanda yami wuju, marda walajbayi nanda nyilanyila, baki munybayi yaji. Jardijbayi juju kingkarri nanda nyilanyila, ngala ngawamba madilijbayi nanda daburrul yami. Mikuwali jardijba nani kingkarri. Munybayi yingkawanyi. Mikuyaji mamanyi nangandu daburrulina. Barriwa.
MAR 4:8 Marda mili jawuda yami yirrbayi kunybana jambana. Nanda karnba jardijbayi walkurra. Kudukudu yami nangandu jardijbayi. Yingka karnba yami nangangi kaja bijal, yingka karnba yami nangangi kaja, baki yingka karnba yami nangangi kajamirra.” Barriwa.
MAR 4:9 Yanybayi Jisus yalungi, “Jaliyi narri nulijba jingkiykanyi ngaki jangkurr, baki manku narri kudanyu barri.” Barriwa.
MAR 4:10 Kamu barri kajamuku yali jilajba nanganbunanyi Jisusnanyi. Wijba yali yalunginkurri barndarri. Ngala nanganginmuku 12 kandimuku yali wambu jungku nangandu Jisusnyina, marda jawuda mili yalundu. Baki yanyba yali nangangi Jisuskanyi, “Miku nurrimi jingkijba nanda jangkurr nganyi yaminyi. Karukiyi nurrunya mili nanamannga jangkurr.” Barriwa.
MAR 4:11 Ngala yanybayi Jisus yinini jangkurr yalungi barri, “Narri jingkijbangka Kud, nyulu marukangka muwa narringi, nyulu lalanbaka narrinya yurrngumba barri. Ngala yingkamukunyi, miku yalimi jingkijba Kud, nyulu lalanbawarr. Baki nanankardi barri muningka ngayu yanyba yalungi, ngayu milidimbiji yalunya.
MAR 4:12 Nanda jangkurr najana Kudkanyi yanybaka nanginmukuyngka jala yalu muningka manku ngaki jangkurr. Nayi barri nanda jangkurr, “‘Jungkuka yalu yamiyudi, ngala miku yalimi najba ngaki yaji. Jungkuka yalu kuwardayudi, ngala miku yalimi manku ngaki yaji. Jalimi yalu manku ngaki jangkurr, jalimi yalu jingkijba ngaki jangkurr, baki yalimi ngindu muwa, yalu jungunkanyi balki. Yalungkimi yangkalamba yalunbunanyi balkinanyi yajinanyi, baki ngayimi manjamanjamba yalungi balki yaji. Ngala miku yalimi najba ngaki yaji, miku yalimi manku ngaki yaji, baki nanankardi barri miku ngayiyi manjamanjamba yalungi balki yaji.’” Barriwa.
MAR 4:13 Mili yanybayi Jisus yalungi kandimukuyngka, “Miku kuna narrimi jingkijba nanda ngaki jangkurr jali ngayu muningka yanyba yaminyi. Jaliyi narri miku jingkijba nayinda jangkurr, baki yanka janarri jingkijba yingka jangkurr jalija ngayu muningka yanyba narringi.
MAR 4:14 Manku nganarri. Jangayu mili karu narrinya nanankanyi yaminyi. Nanda daburrul yami, nanda barrinani jangkurr nangangi Kudkanyi.
MAR 4:15 Jawuda yami yirrbayi yubalina. Jawuda yalu manku nangangi jangkurr Kudkanyi, ngala yurlwa yalu nanganginkanyi jangkurranyi. Nanda jala yalu yurlwa, yalu barrinani nanda yubal. Nanda yubal jardibirri, baki mikuwali jardijba mama nanaba. Jarrbayi yami yubalina julakimukunyi. Baki nani barri yalu jardibirri kurdulu. Nanda jangkurr jala yalu manku, jawurrbangka nanda jangkurr yalunbunanyi Sayidinwanyi. Barriwa.
MAR 4:16 Jawuda yami yirrbayi didirrina yajina. Jawudawanyi yalu kuyu nangangi jangkurr Kudkanyi, baki yalu mirnarrijba muwa. Ngala yingkamuku yalu ngirrwa yalungi, kuyungangi yali nanda jangkurr. Baki miku yalimi mili nulijba nanankanyi jangkurranyi Kudkanyi. Yalu yingijbangka nanda jangkurr. Yalu jala yingijbangka nanda jangkurr nangangi Kudkanyi, yalu barrinani nanda didirr yaji. Nanda yami jali walajba didirrina yajina, mikuyaji landurranyi. Yuku wankijbayi bijal, ngala yajbayi yaji ngardarawanyi, baki janyba nangki. Nanda karnba wankijbayi bijal didirrina yajina. Nanda didirr yaji, nanda barrinani yalu jala bijal kuyu nangangi jangkurr Kudkanyi. Ngala jala yingka ngirrwa yalungi, baki miku yalimi mili nulijba jangkurranyi Kudkanyi. Yingijba yalu nangangi jangkurr. Barriwa.
MAR 4:18 Jawuda yami yirrbayi yajina jali jardijba nyilanyila. Jawuda yalu mankuka jangkurr nangangi Kudkanyi. Bijal yalu kuyungka nanda jangkurr, ngala kudanyu yalu nulijbangka yingkanyi yajinyi. Nulijbangka yalu kajanyi dungalanyi marda yajinyi. Yalu kuliwijba yajinyi kudanyu barri. Yalu jala kuliwijba yajinyi, yalu barrinani nanda jamba jala jardijba nyilanyila. Nanda daburrul yami jardijbayi mardil, mikuyaji yaminyi. Nani barri yalu jala kuliwijbangka yajinyi, ngala miku yalimi nulijba nanganginkanyi jangkurranyi Kudkanyi. Jardijba yalu mardil kurdulu nangangi Kudkanyi. Barriwa.
MAR 4:20 Jawuda yami yirrbayi kunybana jambana. Jawudawanyi yalu mankuka jangkurr nangangi Kudkanyi. Yalu kuyungka nanda jangkurr, baki yalunya kunymambaka yingkamuku, yalu mirnarriykanyi muwa. Jala yalu kunymamba yingkamuku, yalu barrinani nanda kunyba jamba. Nanda karnba jali jardijba kunybana jambana, yingka karnba yami nangangi kaja bijal, yingka karnba yami nangangi kaja, baki yingka karnba yami nangangi kajamirra. Nani barri yalu jala kunymamba yingkamuku, yalu mirnarriykanyi muwa. Yingkamuku yalu jungkuka bijal kunyba, yingkamuku yalu jungkuka kunyba, baki yingkamuku yalu jungkuka kunybamirra.” Barriwa. Nani barri karuyi yalunya nanankanyi jangkurranyi yaminyi Jisuswanyi.
MAR 4:21 Mili barri yanybayi Jisus yingka jangkurr yalungi milidimbikanyi yalunya. “Wudumbaka mirnbi nganinyiwanyi, baki langandabangka kingkarri, nyulu naykanyi bukamba yaji mungana barri. Miku nyulimi yarrijba kalawuyngkurru darladarlana. Miku. Murumbaja mirnbi darladarlawanyi. Ngala nyulu langandabangka mirnbi kingkarri, naykanyi bukamba yaji.
MAR 4:22 Baki nani barri jalija nyulu ngadijba nangangi yaji nganinyiwanyi, baki baku barri janyulu wakaramba nanda nangangi yaji yingkawanyi. Janyulu wakaramba nanda jali nyulu ngadijba. Baki jalija nyulu karda karu yingka yajinyi, baki baku barri jayalu jingkijba nanda yaji bukambijunyi. Jayalu jingkijba nanda jali nyulu karda karu yingka.
MAR 4:23 Jaliyi narri nulijba jingkiykanyi yaji, baki marda narrimi manku yaji. Marda narrimi kudanyu manku yaji, jaliyi narri nulijba jingkiykanyi yaji.” Barriwa.
MAR 4:24 Baki mili yanybayi Jisus yalungi, “Mankumankuwa narri, nanda jala narri manku. Jaliyi narri wajba nganinyi kajanyi yajinyi, jabarri narrinyaja wajba baku barri. Wajbaja narrinya kajanyi yajinyi Kudwanyi. Jaliyi narri ngirrwa nganiyngkanyi, jabarri baku barri ngirrwaja Kud narringi barri.
MAR 4:25 Jaliyi narri kudanyu manku ngaki jangkurr, baki janarri jingkijba mili yaji ngaki. Ngala jaliyi narri miku kudanyu manku ngaki jangkurr, baki janarri mamanumba nanda ngaki yaji.” Barriwa.
MAR 4:26 Baki mili barri yanybayi Jisus yalungi, “Jangayu karu narrinya nanankanyi jangkurranyi jala lalanba narrinya Kudwanyi. Jangayu muningka yanyba narringi. Jarrbalambayi daburrul yami jambana nganinyiwanyi.
MAR 4:27 Ngala miku nyuliyanyi mili waki jardiykunumbikanyi nanda karnba. Muningka nyuli jungku kajana kambana. Miku nyuliyanyi mili waki jardiykunumbikanyi nanda karnba. Ngala baku barri walajbayi nanda wuju waykalinya. Ngala miku nyuliyanyi jingkijba yanka barri jardijbayi karnba. Miku.
MAR 4:28 Manjijbayi karnba kingkarri jambawanyi. Waluku walajbayi wuju bayakarda waykalinya, baki baku barri jardijbayi walkurra yamiyudi.
MAR 4:29 Jali kunyunyu nanda yami, baki birrirrinja nangka nyulu wudumbikanyi nganinyiwanyi. Baki wudumba nyuli nanda yami jarrkanyi jali bukamba kunyunyu barri. Nanda nganinyi jali nyulu jarrbalamba daburrul yami, nyulu barrinani Kud. Yarrijbayi nangangi jangkurr ngambalandu kurduluna Kudwanyi. Jardijbayi nanda daburrul yami jambana, jardijbayi walkurra karnba yamiyudi. Birrirrinja nangka wudumbikanyi nganinyiwanyi. Baki nani barri mankumankuyi ngambalaka nanankanyi nanganginkanyi jangkurranyi, baki jardijbangka nanda jangkurr ngambalandu kurduluna. Baki baku barri ngambalaka birrirrinja durriykanyi nangangi jangkurr Kudkanyi.
MAR 4:30 Mili barri nyuli milidimba yalunya Jisuswanyi, “Jangayu mili karu narrinya nanankanyi jangkurranyi, jala lalanba narrinya Kudwanyi. Mili barri jangayu muningka yanyba narringi.
MAR 4:31 Nanda nukunu yami, yuku nanda bayakarda yami. Janybaka yami jambana nganinyiwanyi.
MAR 4:32 Ngala baku barri walajbangka wuju nukunu. Jardijbangka juju barri kingkarri, walkurramirra nanda nukunu. Yabimba yalu jabaka nukununa kingkarrinyina bangani julakimukunyi. Nani barri jardijbangka walkurra nanda bayakarda yami. Barriwa.” Nani barri muningka yanybayi Jisus yalungi. Nanda nukunu yami jali jardijba, waluku nanda kurdalirri kurnda, ngala baku barri janyulu jardijba wunanybala. Nanda barrinani nayi barri. Waluku barri ngawamba kujajarra yali kuyu nanda jangkurr nangangi Jisuskanyi, yali durrijba nangangi yuwa, ngala baku barri mili yali kuyu nangangi jangkurr, baki mili, baki mili yurrngumba barri. Baku yali jungku kajamuku jali yalu kuyu nangangi jangkurr wirdikudukudumukunyi. Barriwa.
MAR 4:33 Nanamanji barri mikukiyanyi yanyba Jisus yurlurrmba jangkurr yalungi muramukuyngka. Yurrngumba nyuli muningka yanyba jangkurr yalungi milidimbikanyi yalunya. Kaja jangkurr nyuli muningka yanyba yalungi. Jali yalu jingkijba yingka jangkurr, baki nyuli yanyba mili jangkurr yalungi barri. Ngala jali nyulu jungku ngawamba yalundu nanganginmukunyina kandimukunyina, baki mili nyuli yanyba yalungi. Yanyba nyuli yurlurrmba jangkurr yalungi, yalu jingkiykanyi nanda jali nyulu muningka yanyba. Barriwa.
MAR 4:35 Nananyina kambana jungkuyi Jisus muwardana ngala nyuli milidimba yalunya. Kamu barri mungarri yanybayi Jisus yalungi nanganginmukuyngka kandimukuyngka, “Jangambala birlbirdamba kanja karrurrinybarri.”
MAR 4:36 Baki ngankijba yali kandimuku nangandu muwardana, baki barlba yali karri muwardana. Yingkamuku muwarda nanaba marda bijalina. Jawudamuku yali ngankijba nanamukunyina muwardana, baki barlba yali karrurrinybarri marda nangandu.
MAR 4:37 Walajbayi yunkurr karrina, baki warrmbayi yaji kudanyu barri. Lakululumbayi yunkurrwanyi wabuda, baki walajbayi juju kingkarri lakululu. Ngankijbayi wabuda kalawuyngkurru muwardana, baki ngurrulijbawali nanda muwarda.
MAR 4:38 Ngala kulukayi Jisus bunyina muwardana. Kulukayi Jisus nanganginyina kulajbina. Ngankijbayi wabuda muwardana, ngala nyuli yuwajiwa kuluka kalawuyngkurru. Dulaba yali Jisus kandimukunyi. Dulaba yali, baki yanyba yali nangangi. “Milidimbawarr. Miku ninjiyi kuna marrala, ngambalaja ngurrulijba. Marrimbakiyi ngambalanya mardarda.”
MAR 4:39 Walajbayi Jisus, baki kudanyu yanybayi yunkurranyi marda kanjanyi, “Kardakiyi jungku. Kanangurrijbaja lakululu marda yunkurr.” Baki kanangurrijbayi yaji, marda yunkurr marda lakululu.
MAR 4:40 Baki yanybayi Jisus yalungi kandimukuyngka, “Wanyingkanyi narri marrala. Wanyingkanyi. Miku kuna nganarriyi jingkijba, jangayu lalanba narrinya. Jalimi nganarri kudanyu jingkijba, baki miku narriyi marrala.”
MAR 4:41 Ngala manmala yali nanganginmuku kandimuku. Manmala yali kudanyu barri, baki yanyba yalungki, “Nayinda Jisus, ngiruka nyulu, walkurra. Kardijbayi yunkurr marda lakululu, jali nyulu jirrinyba yalunya. Walkurra nyulu.” Nani barri yalungki yanyba nangangi. Barriwa.
MAR 5:1 Mili barri yali barlba karri muwardana, Jisus baki nanganginmuku kandimuku, baki kamu yali wanbiya karrurrinybana jambana. Nanda yaji niji Kirasin.
MAR 5:2 Jali walajba Jisus muwardananyi, baki jilajbayi nganinyi nangandurri. Jungkuyi wuwarr nangandu mankanyina. Jilajba nyuli nanamunanyi yajinanyi jalili yalu makaba nganinyiyurru baki jibarriyurru nanaba kumayanguna.
MAR 5:3 Nyulili jungku nananyina yajina jalili yalu makaba kuyuwana. Kuluka nyulili nanaba. Nyuli mudu kudanyu barri, wuwarrngangi nangandu mankanyina. Yalili kijijba nangangi jalu baki darnyi kurulyudinyi, ngala nyulili dalyamba nanda kurul. Mili yalili kijijba kijbakijbayudinyi, ngala nyulili dalyamba kijbakijba marda. Miku yaliyi kijijba nanda mudu mili. Nyuli ngiruka kudanyu barri.
MAR 5:5 Yurrngumba barri kambana baki mungana, nyulili muningka jilalajba nananyina yajina, nyulili muningka kaya, nangkili karlba mankanyi majajayudinyi.
MAR 5:6 Nanda barri mudu, jali nyulu najba Jisus jujunanyi, baki nyuli wirlku nangandurri Jisusyurri, baki mururu nyuli mujina wayka jambana nangandu.
MAR 5:7 Yanybayi Jisus nangangi, “Wuwarr. Walajbakiyi nanganbunanyi mankanyinanyi. Walajbakiyi.” Ngala kayayi nanda mudu nganinyi. Kudanyu nyuli kaya, “Ninji barri jandanyi nangangi Kudkanyi. Wanyimba janinji ngaki. Badajba kuna ninji nanginkurri daji ngana. Nanankanyi kuna ninji jilajba nanginkurri.” Nani barri nyuli kaya nangangi Jisuskanyi. Barriwa.
MAR 5:9 Ngajakayi nanda mudu nganinyi Jisuswanyi, “Wanyi nganyi niji.” Baki jananganjayi nganinyiwanyi, “Ngaki niji Kaja, kajangangi nurru wuwarrmuku kalawuyngkurru mankanyina.”
MAR 5:10 Baki yililikajba nyuli Jisus, “Mikujiyi manjijba yalunya wuwarrmuku nanginbunanyi yajinanyi. Munyajbakiyi yalunya yuwajiwa jungunkurri nayiba yajina.”
MAR 5:11 Bundu barri nanaba lungkulina wardamba yalungki kajamuku bikibikimuku.
MAR 5:12 Baki yililikajba yali Jisus wuwarrmukunyi. Kudanyu yali yililikajba Jisus, “Jalija ninji manjijba nurrunya nanganbunanyi, baki manjijbakiyi nurrunya yalundurri bikibikimukuyngkurri. Janurru ngankijba nanaba bikibikina.” Barriwa.
MAR 5:13 Baki barriwa munyajba yalunya wuwarrmuku ngankiykurri bikibikimukunyina Jisuswanyi. Baki ngankijba yali bikibikina. Baki muningka wirlku yali bikibikimuku. Muningka yali yirrba wayka wabudana. Yirrba yali wayka karnarrana yajina, baki yali bukambiju ngurrulijba wabudana. Nanamuku bikibikimuku yali wirdikudukudumuku, 2000 barri.
MAR 5:14 Ngala nanamuku lalanbawarrmuku bikibikinyi, wirlku yali kula yalunginkurri barrawuyabarrawuyarri. Wanbiya yali, baki karu yalunjali mungkijimuku yalungi bikibikinyi, baki nanankanyi jali yabimba Jisuswanyi. Baki kajamuku yali jilajba nanankurri Jisusyurri naji yaji.
MAR 5:15 Wanbiya yali nangandu Jisusnyina, baki najba yali nanda mudu nganinyi, jali barrin wuwarryudi mankanyi. Ngala miku nyuliyanyi mili muningka kaya. Karda nyuli jungku jumbalayudi. Miku nyuli mudu, ngala kunyba nyuli kulaji. Najba yali nanda nganinyi, baki marrala yali.
MAR 5:16 Baki nanamukunyi jali yalu najba Jisus manjiykurri wuwarrmuku yalundurri bikibikyurri, yalunjali karu yingkamuku. Yalunjali karu yingkamuku jali yalu wanbiya nanaba.
MAR 5:17 Baki yali ngajaka Jisus, janyulu barlba yalunbunanyi yajinanyi.
MAR 5:18 Jali mili ngankijba Jisus muwardana, baki nanangini nganinyiwanyi jali waluwa nyulu wuwarryudi mankanyi, kudanyu nyuli ngajaka Jisus, “Jangayu jila nganyindu. Munyajbakiyi ngana jilaykanyi nganyindu.”
MAR 5:19 Ngala jananganjayi Jisuswanyi, “Mikujiyi jilajba ngakindu. Miku. Ngala wijbakiyi nganyinkurri barndarri. Karukiyi yalunya nganyinmuku mungkijimuku, nanankanyi yajinyi jali yabimba Kudwanyi nganyi. Karukiyi yalunya nangangi Kudkanyi, nyuli ngindu muwa nganyi, baki nyuli kunymamba ninya mankanyi.” Barriwa.
MAR 5:20 Baki wijbayi nanda nganinyi. Jilalajba nyuli nananyina yajina. Yidamba nyuli kaja barrawuyabarrawuya, 10 barri. Baki nyuli karu yalunya nanankanyi jali yabimba Jisuswanyi nangangi, jali nyulu jakajba wuwarrmuku nanganbunanyi mankanyinanyi. Baki bukambiju jali yalu manku nangangi jangkurr, baki manmala yali. Kudanyu yali manmala nanankanyi yajinyi. Barriwa.
MAR 5:21 Wijba yali bayangarrinybarri Jisus baki nanganginmuku kandimuku. Ngankijba yali muwardana, baki birlbirdamba yali bayangarriji. Wanbiya yali, baki walajba yali muwardananyi. Jilajbayi walkurra muramuku nangandurri Jisusyurri, mijimbangu barri. Karrinja yali lukuluku nangandu.
MAR 5:22 Jilajbayi nganinyi nangandurri Jisusyurri. Nyuli mambuka jurjkanyi nananyina yajina, nangangi niji Jayirus. Wanbiya nyuli nanaba nangandu Jisusnyina, baki mururu nyuli wayka nangandu.
MAR 5:23 Yanyba nyuli nangangi Jisuskanyi, “Ngaki jandanyi, nanda ngila, nyulu lunjika. Lunjika nyulu kudanyu barri. Barringa barri janangka janyba. Janinji kuna jilajba ngakinkurri barndarri, baki janinji marrimba nanda ngila kunymambiji.” Nani nyuli ngajaka Jisus.
MAR 5:24 Walajbayi Jisus baki jilajbayi nangandu nanganginkurri barndarri. Kajamuku yali lukuluku malumba nangandu Jisusnyina jali nyulu jilajba. Jululumba yalili Jisus.
MAR 5:25 Baki yingamali jibarri nanaba yalundu. Nyuli lunji. Ngulya jurrwayi yurrngumba barri. Wabulinyi jurrwayi yurrngumba 12 kindilkurrinyi.
MAR 5:26 Wabula barri nyulili barlba kajayurri yarrbirrayurri. Nyulili wajba yalunya kajanyi dungalanyi. Ngala jaru barri. Miku yaliyala kunymamba nanda jibarri. Yuwajiwa jurrwayi ngulya yurrngumba barri. Lunji nyuli kudanyu barri. Mikuyaji dungalanyi nangandu.
MAR 5:27 Waluwa nyuli manku yalunya yanybikurri nangangi Jisuskanyi, nyuli kunymamba yalunya yingkamuku. Baki nulijba nyuli Jisuskanyi, nyulu kunymambikanyi nangangi mankanyi marda. Jilajba nyuli bayngkani nangandu Jisusnyina.
MAR 5:28 Mankumanku nangki nanda jibarri, “Jaliyi ngayu marrimba nangangi jumbala, baki jangayu kunybijba.” Nani barri mankumanku nangki, baki nanankardi nyuli jilajba bayngkani nangandu Jisusnyina.
MAR 5:29 Baki marrimba nyuli nangangi jumbala. Baki dukujbayi nanda ngulya nangandu. Dukujbayi. Jingkijbayi jibarriwanyi, dukujbayi nanda ngulya, kunybijbayi nangangi mankanyi.
MAR 5:30 Ngala yinarramba barri majabujbayi Jisus mankanyi, jali marrimba jumbala jibarriwanyi. Majabujba nyuli mankanyi. Yangkalamba nangki Jisus, baki yanyba nyuli yalungi, “Wanyingini marrimbayi ngaki jumbala. Wanyingini.”
MAR 5:31 Ngala yanybayi nanganginmuku kandimuku nangangi, “Kajamuku yalu lukuluku nganyindu. Yalili jululumba ninya yurrngumba barri. Wanyingkanyi ninji ngajaka, wanyingini ninya marrimbayi.”
MAR 5:32 Ngala mili kulwayi Jisus yalungi naji nanda jali marrimba nangangi jumbala.
MAR 5:33 Ngala nanda jibarri, jingkijba nyuli, kunybijbayi nangangi mankanyi, baki marrala nyuli kudanyu barri. Birrirra nyuli mankanyi nangangi. Ngala jilajba nyuli nangandurri Jisusyurri, baki mururu nyuli wayka nangandu. Baki karu nyuli Jisus nanganginkanyi mankankanyi.
MAR 5:34 Yanybayi Jisus nangangi, “Jibarri, mikujiyi marrala ngaki. Ninji kunybijbangka, kuyungangi ninji ngaki jangkurr. Wijbakiyi nganyinkurri barndarri. Janinji jungku mardumardu muwa.” Barriwa.
MAR 5:35 Ngala yuwajiwa yanybayi Jisus jibarrinyi, baki wanbiyayi kudiya nanganbunanyi barndananyi mambukananyi. Jilajba yali nangandurri mambukarri Jayirusyurri, baki karu yali, “Janyba nangki nganyi jandanyi ngilayurru. Janyba nangki. Marda nyulimi miku jilajba nanda milidimbawarr nganyinkurri barndarri. Marda nyulimi wambu jungku, janybangangi nangki nganyi jandanyi ngilayurru.”
MAR 5:36 Ngala yurlwayi Jisus nanankanyi jangkurranyi. Manku nyuli, ngala yurlwa nyuli. Ngala yanyba nyuli nanankanyi mambukanyi, “Mikujiyi marrala yajinyi, ngala kuyukiyi ngaki jangkurr.” Barriwa.
MAR 5:37 Baki yanybayi Jisus yalungi muramukuyngka, “Miku janarri mili jilajba ngakindu. Miku.” Ngala ngawamba kujarra yingamali kandimuku yali mili jilajba nangandu. Yali Bida, baki buwakula Jayims baki Jun. Ngawamba yali mili jilajba nangandu, marda nanda mambuka Jayirus.
MAR 5:38 Mili yali jilajba, baki wanbiya yali barndana. Kajamuku yali nanaba barndana. Ngindu yali muwa kudanyu barri nanankanyi ngilayurruwa.
MAR 5:39 Ngankijbayi Jisus barndana, baki yanyba nyuli yalungi, “Wanyingkanyi narri kudanyu ngindu muwa. Wanyingkanyi. Mikukimi nayinda ngila kurdan. Muningka nyulu kulukangka. Miku nangkimi janyba.”
MAR 5:40 Ngala yurlwa yali nangangi. Kakalijba yali nanganginkanyi jangkurranyi. Kakalijba yali. Ngala manjijbayi yalunya barndananyi Jisuswanyi. Jali yalu barlba, baki kuyu nyuli yalunya, ngardanganja nangangi ngilayurruwa, baki nijanganjinyi nangangi, marda murrku kandimuku nangangi. Jilajba yali nangandurri ngilayurruwarri.
MAR 5:41 Marrimbayi ngila marni Jisuswanyi, baki yanybayi nangangi, “Dalida kumi.” Nanda jangkurr Ju yanyi barrinani, “Ngila. Ngayu karungka ninya, walajbakiyi.” Barriwa.
MAR 5:42 Baki walajbayi nanda ngila waykalinya. Walajba nyuli, baki jilajba nyuli. Yuku barri nyuli. Nanda barri ngila, barringa barri nyuli wurrumbarra. Jali yalu najba nanda ngila walaykurri, baki manmala yali. Manmala yali kudanyu barri.
MAR 5:43 Jirrinybayi yalunya Jisuswanyi, maramaramba nyuli, “Miku janarri karu yingkamuku, jali ngayu wankamba nayinda ngila. Miku. Ngala wajba janarri ngila mamanyi.” Nani barri nyuli jirrinyba yalunya Jisuswanyi. Barriwa.
MAR 6:1 Barlba yali nanamunanyi yajinanyi, Jisus marda nanganginmuku kandimuku. Barlba yali bayungu, baki wanbiya yali nanganginyina yajina Jisuskanyi.
MAR 6:2 Ngala nyuli Sadidi, baki ngankijbayi Jisus jurjina, baki nyuli milidimba yalunya nanganginmuku mungkijimuku kajamuku barri. Jali yalu manku nangangi jangkurr, baki manmala yali. Manmala yali, baki yanyba yalungki, “Yanka nyuli jingkijba nanda jangkurr. Yanka nyuli jingkijba milidimbikanyi marda kunymambikanyi yalunya.
MAR 6:3 Miku nyulimi mambuka. Muningka nyulu jungkuka barrinani ngambala. Miku nyulimi mambuka milidimbikanyi yaji. Nyulu nanda, jalili nyulu muningka yabimba barrawu wabula. Nyulu kulunganja nangangi Marikanyi. Baki kaja bababanyamba nyulu yalunya nayiba, Jayims, baki Jusib, Judas baki Sayimin. Marda jibarrimuku bababanyamba nyulu yalunya, yalu jungkuka nanginyina yajina marda.” Nani barri yalungki yanyba nangangi. Miku yaliyanyi kuyu nangangi jangkurr mungkijimukunyi nanganginyina yajina. Yurlwa yali nanganginkanyi jangkurranyi.
MAR 6:4 Yanybayi Jisus yalungi, “Nanda jala yanybaka jangkurr nangangi Kudkanyi, nyulu jilalajbangka nanaba yajina. Nyulu yanymimbaka jangkurr yalungi Kudkanyi, baki yalu kuyungka nanda nangangi jangkurr. Ngala jala nyulu jungkuka nanganginyina yajina, jala nyulu yanybaka jangkurr nanganginmukuyngka mungkijimukuyngka, baki miku yalimi kuyu nangangi jangkurr. Yalu yurlwangka nangangi nanganginkanyi jangkurranyi. Baki nani barri narri marda. Narri ngakinmuku mungkijimuku, ngakinmuku bababanyamba ngayu narrinya, ngala miku narrimi kuyu ngaki jangkurr. Nganarri jingkijba yurrngumba wabulinyi, ngala narri yurlwangka ngaki, ngakinkanyi jangkurranyi.” Barriwa.
MAR 6:5 Baki miku nyuliyanyi yabimba kaja ngiruka yaji nanaba nanganginyina yajina. Ngawamba kujajarra nyuli marrimba yalunya, nyulu kunymambiji yalunya.
MAR 6:6 Manmalayi Jisus, jali yalu miku kuyunkanyi nangangi jangkurr. Manmala nyuli kudanyu barri yalungi. Baki mili jilalajbayi Jisus. Yidamba nyulili kaja barrawuyabarrawuya, bakili nyulu milidimba yalunya jangkurranyi Kudkanyi. Barriwa.
MAR 6:7 Yanybayi Jisus yalungi nanganginmukuyngka kandimukuyngka. Yanyba nyuli yalungi. Baki manjijba nyuli yalunya, kujarra nayiwa, kujarra nayiwa, baki kujarra nayiwa. Nani nyuli manjijba yalunya nanankurri barrawuyabarrawuyarri. Karuyi yalunya Jisuswanyi, yuku jayalu jakajba wuwarr yalunbunanyi mankanyinanyi.
MAR 6:8 Yanybayi Jisus yalungi, “Ngayu manjijbangka narrinya milidimbiji yalunya, ngala miku narriyi kuyu kudukudu yaji narrindu jalija narri jilalajba. Mikuyaji dungalanyi janarri kuyu narrindu. Miku narriyi kuyu bindawarra narrindu, ngajakankanyi yingka dungalanyi, yarriykanyi dungala bindawarrana. Miku narriyi kuyu mili mama. Miku narriyi kuyu mili jumbala, ngawamba jumbala nganyindu mankanyina, baki jabunungkaji nganyindu nukamina, baki ridiridi jilaykanyi. Nani barri janarri jilalajba mikuyaji kajanyi yajinyi narrindu.” Barriwa.
MAR 6:10 Mili yanybayi Jisus yalungi, “Jalija narri wanbiya barrawuyabarrawuyana, baki janarri jungku kunybana nganinyina, jala nyulu nulijba kandimbikanyi narrinya. Janarri jungku nanganginyina barndana yurrngumba, jalija narri milidimba yalunya nananyina barrawuyabarrawuyana.
MAR 6:11 Jalija ninji wanbiya barrawuyabarrawuyana, baki yiningki jayalu yurlwa narringi. Yiningki jayalu miku manku narringi jangkurr. Barlba narri nanamunanyi yajinanyi. Jayajayamba narringka nukami manjiykanyi jundurr. Jayalu najba narrinya jayajayambikurri narringka nukami, baki jayalu jingkijba, yalu balkimuku. Balki yalu, mikungangi yaliyi manku nangangi jangkurr Kudkanyi.” Nani barri yanybayi Jisus yalungi.
MAR 6:12 Baki nyuli manjijba yalunya. Barlba yali. Baki milidimba yalunjali kandimukunyi Jisuskanyi. Milidimba yalunjali, marda yalimi ngindu muwa yalunginkanyi balkinyi yajinyi.
MAR 6:13 Baki yabimba yali ngiruka yaji marda. Jakajba yali wuwarr yalunbunanyi mankanyinanyi. Bunyarrijba yali nanjananja kungu yalundu mankanyina, jali yalu lunji, baki kunymambayi yalunya mankanyi Kudwanyi. Nani barri yali yabimba ngiruka yaji kandimukunyi Jisuskanyi. Barriwa.
MAR 6:14 Nanamanji barri, nanda nganinyi, niji Yirud, nyuli walkurra mambuka Kubaminkanyi nanankanyi yajinyi Kalilikanyi. Manku nyuli yalunya yanybikurri nangangi Jisuskanyi, nanankanyi ngirukanyi yajinyi jali nyulu yabimba. Ngala yanyba yali yinini yinini jangkurr nangangi Jisuskanyi. Yingkamuku yali yanyba nangangi Jisuskanyi, “Nayinda Jisus, nyulu nanda Jun Ngurrunbawarr jali nangka janyba. Mili nyulu wanka jungkuka nanijba barri. Baki nanankardi barri nyulu ngiruka kunymambikanyi yalunya mankanyi.”
MAR 6:15 Ngala yingkamuku yali yanyba nangangi Jisuskanyi, “Nayinda Jisus, nyulu nanda wankalanyi nganinyi, niji Yalayija, ngala nyulu mili wanka jungkuka.” Ngala yingkamuku yali yanyba nangangi Jisuskanyi, “Nayinda Jisus, nyulu yanybaka jangkurr nangangi Kudkanyi, barrinani nanamuku wankalamuku jali yalu yanyba jangkurr nangangi Kudkanyi.” Nani barri yali yanyba yinini yinini jangkurr nangangi.
MAR 6:16 Ngala jali manku yalungi jangkurr nanangini mambukawanyi Yirudwanyi, baki yanyba nyuli, “Nayinda Jisus, nyulu nanda Jun Ngurrunbawarr, jali ngayu kurdanba, jali yingkawanyi daya nangangi janki ngaki. Mili nyulu jungkuka wanka nanijba barri.” Nani barri yanybayi Yirud yalungi nangangi Jisuskanyi.
MAR 6:17 Wabula barri nanangini mambukawanyi Yirudwanyi, nyuli jarimba nanda jibarri, jali yingkanyi nangangi maninganja, jali maninganja nanganginkanyi bababanyamba nyulu Yirudwanyi, niji Bilib. Jarimbayi nanda jibarri, baki kuyuyi nangangi barri maninganja. Nanda jibarri nangangi niji Yirudayis. Nani barri yabimbayi balki yaji Yirudwanyi. Jungku nyuli balki nananyina yuwana Kudkanyi. Nani barri nyuli jungku nanda Yirud. Baki nanankardi barri ngirrwayi nangangi Jun Ngurrunbawarr. Ngirrwa nyuli nangangi Yirudkanyi, “Ninji jungkuka balkina yuwana Kudkanyi. Jarimba ninji nanda jibarri, jali nangangi maninganja Bilibkanyi. Nani barri ninji jungkuka balkina yuwana Kudkanyi.” Barriwa. Nanangini jibarriwanyi Yirudayiswanyi, nyuli jingkijba Jun Ngurrunbawarr. Nyuli jingkijba, ngirrwayi Jun nangangi Yirudkanyi, nangangingangi Yirudayiskanyi. Baki ngarrangarra nyuli muwa nangangi Junkanyi. Nulijba nyuli yalungi, yalu kurdanbikanyi Jun. Ngala kardambayi jibarri Yirudwanyi, yalu kurdanbikanyi Jun. Kardamba nyuli jibarri, marralangangi nyuli nangangi Junkanyi Ngurrunbawarrayngka. Jingkijba nyuli Jun, nyulu kunyba nganinyi, jali nyulu yabimba kunyba yaji nangangi Kudkanyi yurrngumba barri. Nanankardi nyuli kardamba nanda jibarri Yirudwanyi. Ngala nyuli manjijba yilarrmuku, yalu wudumbiji Jun. Wudumba yali, yarrijba yali brisinyina, baki kijijba yali. Jali jungku Jun brisinyina, baki karu nyuli Yirud nanganginkanyi jangkurranyi Kudkanyi. Mankumanku nangki Yirud nanankanyi jangkurranyi, baki balkijba nyuli muwa. Balkijba nyuli muwa, ngala mili nyuli manku jangkurr nangangi Junkanyi Ngurrunbawarrayngka nangangi Kudkanyi. Mili nyuli manku nanda jangkurr Yirudwanyi, baki mili baki mili. Barriwa.
MAR 6:21 Nanda jibarri Yirudayis, kulunganja nangangi wurrumbarra. Nyuli kunyba kajurrawarr nanda wurrumbarra. Yabimbayi walkurra wangarr Yirudwanyi. Kajamuku mambukamuku Kubaminkanyi, yali jungku nangandu marda mambukamuku yalungi yilarranyi, marda malbumalbu nanankanyi yajinyi. Jarrba yali mama nangandu, ngaraba yali yaji marda. Yabimba yali jarrkanyi yaji.
MAR 6:22 Ngala yalungki wardamba, baki wanbiyayi nanda wurrumbarra, baki kajurrayi nyulu yalundu. Kudanyu nyuli kajurra yalungi, Yirudkanyi baki mambukamukuyngka. Mirnarrijba yali muwa nangangi. Yanybayi Yirud nangangi wurrumbarranyi, “Wanyingkanyi ninji nulijba. Janinya wajba yajinyi. Janinya wajba nanankanyi jala ninji nulijba.
MAR 6:23 Jaliyi ninji nulijba, baki janinya wajba kudiyanyi jambanyi, marda kajanyi barrawunyi, marda nganinyimukuyngka yalu wakinkanyi nganyi. Janinya wajba nanankanyi jala ninji nulijba. Duja ngayu yanyba.” Nani barri yanybayi Yirud nangangi.
MAR 6:24 Jilajbayi wurrumbarra danbiyurri, baki karuyi nangangi ngardanganja nanankanyi jangkurranyi, waykanyi yajinyi Yirudwanyi. Yilikajbayi nangangi ngardanganja, “Wanyingkanyi jangayu ngajaka. Wanyingkanyi.” Jananganjayi ngardanganjawanyi, “Yilikajbakiyi nanganginkanyi kulajinyi Junkanyi Ngurrunbawarrayngka. Yilikajbakiyi nanganginkanyi kulajinyi.”
MAR 6:25 Wijbayi wurrumbarra nangandurri Yirudyurri, baki yanybayi nangangi, “Wajba janganinji kulaji Junkanyi Ngurrunbawarrayngka najana. Nulijba ngayu nanganginkanyi kulajinyi.” Barriwa.
MAR 6:26 Ngala nginduyi Yirud muwa. Kudanyu nyuli ngindu muwa, mikungangi nyuliyanyi nulijba kurdanbikanyi Jun. Ngala nyuli yilikajba wurrumbarra barrin wanyingkanyi janyulu wajba. Nyuli yanyba waykanyi yajinyi, baki bukambijunyi yali manku nangangi jangkurr. Miku nyuliyi yangkalamba nangangi jangkurr. Barriwa janyulu wajba yajinyi.
MAR 6:27 Baki nyuli jirrinyba ngarrkadabawarr, “Dayakiyi Jun janki, baki wiykunumbakiyi kulaji nanginkurri.” Barlbayi ngarrkadabawarr, baki nyuli kurdanba Jun. Nyuli daya janki brisinyina.
MAR 6:28 Wiykunumba nyuli kulaji najana, baki wajbayi wurrumbarra. Baki kuyuyi kulaji wurrumbarrawanyi, wajbayi nangangi ngardanganja kulajinyi. Barriwa.
MAR 6:29 Nanamuku kandimuku Junkanyi, jali yalu manku Jun Ngurrunbawarr nangki janyba, baki jilajba yali brisinyurri, baki dulaba yali nangangi mankanyi makaykanyi. Baki yali yarrijba nangangi mankanyi kalawunyi kumayanguna. Barriwa.
MAR 6:30 Waluwa barri manjijbayi yalunya kandimuku Jisuswanyi, yalu milidimbiji nangangi yaji. Barlba yali, baki milidimba yalunjali. Baki baku yali wijba nangandurri Jisusyurri. Karu yali Jisus bukamba nanankanyi yajinyi jali yalu yabimba, baki jali yalunjalu milidimba. Barriwa.
MAR 6:31 Kajamuku yali jilajba nangandurri Jisusyurri. Baki mili jawudamuku yali jilajba bayngkani yalundu, baki mili bayngkani barri. Miku yalungkiyi wardamba mamanyi, Jisus baki nanganginmuku kandimuku, kajangangi yalu nanaba nangandu yurrngumba barri. Yanybayi Jisus yalungi kandimukuyngka, “Jangambala ngambala jilajba munjimunji. Jangambala jungku ngambalaman, jala yalungi mikuyaji muramukuyngka. Jangambala wuyalijba nanaba barri.” Barriwa.
MAR 6:32 Ngankijba yali muwardana, baki birlbirdamba yali karrurrinybarri jungunkanyi yaluman.
MAR 6:33 Ngala kajamukunyi barri, yali najba nganinyimuku jilaykurri muwardana, baki yali jingkijba, nanamuku nganinyimuku, yali Jisus baki nanganginmuku kandimuku. Baki yali jingkijba nanda yaji jalija nyulu jilajba nanankurri. Baki wirlku yali nukamina nanankurri yajiyurri. Kajamuku yali wirlku lukuluku nanankurri yajiyurri, ngala jilajbayi Jisus muwardana. Baki wanbiya yali waluwa yalundu, Jisusnyina baki kandimukunyina.
MAR 6:34 Walajbayi Jisus muwardananyi, baki nyuli najba yalunya walkurra muramuku. Baki ngindu nyuli muwa yalungi. Kudanyu nyuli ngindu muwa yalungi, mikuyajingangi nyuli lalanbawarrayngka yalungi. Baki milidimbayi yalunya Jisuswanyi.
MAR 6:35 Ngabungabu barri jilajbayi nangangi kandimuku nangandurri Jisusyurri, baki yanyba yali nangangi, “Barriwa barri ngabungabu yaji nayinda. Mikuyaji mamanyi nayiba, baki mikuyaji barndanyi.
MAR 6:36 Marda ninjimi manjijba yalunya barrawuyabarrawuyarri. Marda ninjimi manjijba yalunya wudumbiji yalungi mama.”
MAR 6:37 Jananganjayi yalunya Jisuswanyi, “Miku ngayiyi manjijba yalunya. Yuku yalu wambu jungku nayiba. Janarri narri wajba yalunya nayiba mamanyi.” Jananganja yali Jisus, “Kajamuku nanginmuku. Jayalu jarrba kudukudu mama. Yanka janurru wudumba damba yalungi. Jaliyi 200 dula nurrundu, baki yuku janurru wudumba kudukudu damba yalungi.”
MAR 6:38 Ngajakayi yalunya Jisuswanyi, “Yankanu damba yalundu. Kujbakiyi yankanu damba.” Jilajba yali, wakaramba yali, baki karu yali Jisus, “Wakaramba nurri ngawamba kujarra baki kujarra baki yingamali bayayawa damba, baki kujarra kaku marda.”
MAR 6:39 Baki jirrinybayi yalunya muramuku Jisuswanyi, yalu jungunkanyi dalbu dalbu nanaba karnbana. Baki jungkurrijba yalungki karnbana.
MAR 6:40 Jawuda yali malumba jungku 100 barri, jawuda yali malumba jungku 50 barri. Nani barri yali jungku dalbu dalbu. Barriwa.
MAR 6:41 Wudumbayi nanda damba marda kaku Jisuswanyi. Kingkarri nyuli najba lalijiyurri, baki yanyba nyuli nangangi Kudkanyi nanankanyi mamanyi. Barriwa. Baki dalyamba nyuli damba. Wajbayi kandimuku, baki yali wawajba muramuku nanankanyi dambanyi. Jabarri dalyambayi kaku Jisuswanyi, baki wajbayi kandimuku. Wawajba yalunjalili muramuku dambanyi baki kakunyi.
MAR 6:42 Jarrba yali bukambiju, baki wardijba yali muwa.
MAR 6:43 Ngala miku yaliyanyi jarrba kudanyu nanda mama. Kudiya mama kiliyi nanaba. Baki wudumba yali nanda mama kandimukunyi, baki yarrijba yali bindawarrana, 12 barri.
MAR 6:44 Kajamukunyi yali jarrba mama mijimbangumukunyi nganinyimukunyi, 5000mukunyi. Barriwa.
MAR 6:45 Baki jirrinyba nyuli yalunya nanganginmuku kandimuku Jisuswanyi. Yanybayi yalungi, “Janarri ngankijba muwardana, baki janarri barlba kanjana bayangarrinybarri, nanankurri yajiyurri niji Bidsayida. Ngala jangayu manjijba yalunya muramuku yalunginkurri barndarri.” Baki barlba yali kandimuku nangangi muwardana.
MAR 6:46 Baki manjijba nyuli yalunya muramuku Jisuswanyi. Mudambayi yalunya, baki barlba yali. Ngala kirrijbayi Jisus kingkarri dungalana. Kirrijba nyuli nyubana yanybiji nangangi Kudkanyi.
MAR 6:47 Jali mungana barri, baki nanganginmuku kandimuku yuwajiwa yali wajanganja burrandijba kanjana, ngala jungkuyi Jisus nanaba dungalana kingkarrinyin bangani.
MAR 6:48 Najbayi yalunya kandimuku Jisuswanyi. Nyuli najba yalunya wajanganjankurri. Kudanyu yali wajanganja, karnungkumbayingangi yalunya yunkurrwanyi bayunguna. Ngala nyulu barringa barri kambalingijba yaji karrina, baki jilajbayi Jisus yalundurri. Jilajba nyuli nukamina yundu wabudana. Jilajba nyuli bayungu langkiya yalundu.
MAR 6:49 Najba yali Jisus jilaykurri yundu wabudana, baki ngamungka nyuli wuwarr. Marrala yali, baki kaya yali, “Wuwarr, nanda wuwarr badajbangka ngamandurri.”
MAR 6:50 Marrala yali kudanyu barri, jali yalu najba Jisus. Ngala yanybayi Jisus yalungi, “Miku narriyi marrala ngaki. Nayinda ngayu Jisus. Miku narriyi marrala ngaki.”
MAR 6:51 Ngankijbayi Jisus muwardana, baki kurrkunba nangki yunkurr. Mikukiyanyi warrmba yaji mili. Ngala manmala yali kandimuku. Manmala yali kudanyu barri.
MAR 6:52 Miku yaliyanyi kudanyu jingkijba mamanyi. Nanda bayayawa mama, ngala walkurrambayi Jisuswanyi. Miku yaliyanyi jingkijba, yanka nyuli yabimba nanda bayayawa mama kudukudu. Barriwa.
MAR 6:53 Mili yali wajanganja bayungu. Birlbidamba yali bayangarrinybarri, baki wanbiya yali nananyina yajina, niji Kinisirid. Baki kijijba yali muwarda.
MAR 6:54 Jali yalu walajba muwardananyi, baki jawudanymukunyi yali jingkijba Jisus.
MAR 6:55 Jingkijba yali Jisus, baki wirlku yali nayiwa baki nayiwa baki nayiwa. Wirlku yali yalundurri jali yalu lunji. Baki kuyu yalunjali nangandurri Jisusyurri, nyulu kunymambiji yalunya.
MAR 6:56 Jalili wanbiya Jisus barrawuyabarrawuyana, bakili yalu kuyu nangandurri nanamuku jali yalu lunji. Yalunjalili kuyu burrandijba barndana, nyulu kunymambiji yalunya. Yililikajba yali Jisus, jaliyi yuku yalu marrimba nangangi jumbala, baki jayalu kunybijba mankanyi. Baki bukambiju jali yalu marrimba nangangi jumbala, baki kunybijba yali mankanyi. Barriwa.
MAR 7:1 Nanamanji barri nanamuku Barasimuku, nayi yalungi yuwa. Waluku yalungkili wakardaba marni, baki kamu yalili jarrba mama. Nani barri yalungi yuwa nanamukuyngka Barasimukuyngka. Baki yalunjalili karu yingkamuku, marda yalungkimi bukambiju waluku wakardaba marni, baki kamu jayalu jarrba mama. Nani barri yalunjalili karu nanankanyi yuwanyi. Jalili yalu wudumba mama dungalana, baki miku yaliyanyi jarrba nanda mama ngala yali jilajba. Waluku yalungkili wakardaba marni, baki kamu yaluja jarrba nanda mama. Mili yalungi yuwa wakardaykanyi yaji. Wakardaba yalili yukururumuku, marda bujilimuku. Wakardaba yalili kaja yaji yalunginkanyi yuwanyi. Karuyi yalunya wakardaykanyi yaji nanankanyi yuwanyi jalili yalunya karu wankalamukunyi. Nanamanji barri nanamuku Barasimuku, nani barri yalili wakardaba yaji nanankanyi yuwanyi. Barriwa. Baku barri kudiya Barasimuku, baki kudiya milidimbawarrmuku yuwanyi, badajba yali kulani Jirusalimnanyi. Badajba yali nangandurri Jisusyurri. Najba yali kudiya kandimuku Jisuskanyi jarrkurri mama. Miku yalungkiyanyi wakardaba marni waluku yali jarrba mama.
MAR 7:5 Yanyba yali nangangi Jisuskanyi, “Najba nurri nganyinmuku kandimuku jarrkurri mama. Jarrba yali mama, ngala miku yalungkiyanyi waluwa wakardaba marni. Dulu yali jarrba nanda mama. Wanyingkanyi yalungkiyanyi miku wakardaba marni waluwa yali jarrba yaji. Nani barri yanybaka nanda yuwa wakardaykanyi yaji. Ngala wanyingkanyi miku yalimi ngayangayijba nanankanyi yuwanyi.” Barriwa.
MAR 7:6 Jananganjayi yalunya Jisuswanyi, “Narri balkimuku. Narri yabimba balki yaji, jala narri mamanumba nanda yuwa nangangi Kudkanyi, jala narri karu yalunya yinini yuwanyi. Narri balkimuku. Nanda wankalanyi jangkurr jali yanyba Yayisaya, duja nanda jangkurr. Nanangini jangkurrwanyi karungka yalunya narringi. Nayi nanda jangkurr, ‘Nanginmuku, muningka yalu yanyba, yalu maruka muwa ngaki, yalu durrijba ngaki yuwa, ngala miku. Miku yalimi maruka muwa ngaki. Miku yalimi durrijba ngaki yuwa. Muningka yalu wajba ngana yalunginkanyi kunybanyi jangkurranyi, ngala miku yalimi kunyba kurdulu ngaki.
MAR 7:7 Jalija yalu wajba ngana kunybanyi jangkurranyi, baki miku ngayiyi manku yalungi jangkurr. Miku ngayiyi manku yalungi kunyba jangkurr, mikungangi yalimi milidimba ngakinkanyi jangkurranyi. Yalu yanybaka nanda ngaki jangkurr, ngala miku. Milidimbaka yalunjalu yalunginkanyi jangkurranyi, miku ngakinkanyi jangkurranyi.’ Nani barri nanda jangkurr najana Kudkanyi. Barriwa.
MAR 7:8 Narri yurlwangka nanankanyi jangkurranyi Kudkanyi, ngala narri durrijbangka nanda wankalanyi jangkurr, jali yalu yanyba nganinyimuku.” Nani barri ngirrwayi Jisus yalungi barri.
MAR 7:9 Mili barri yanybayi Jisus yalungi, “Narri yurlwangka nanankanyi yuwanyi Kudkanyi, ngala narri ngayangayijbangka narringinkanyi wankalanyi yuwanyi.
MAR 7:10 Nanda barri yuwa jali wajba Musis Kudwanyi, nanda yuwa yanybaka nayi barri, ‘Marda ninjimi lalanba bulanya nganyi nijanganjinyi marda ngardanganja. Marda ninjimi wajba bulanya mamanyi baki dungalanyi. Marda ninjimi miku yanyba balki jangkurr bulangi. Jaliyi ninji yanyba balki jangkurr bulangi, jaliyi ninji miku wajba bulanya mamanyi marda dungalanyi, baki marda ninyalimi kurdanba yingkamukunyi.’ Nanda jangkurr, nanda nangangi yuwa Kudkanyi.
MAR 7:11 Ngala miku narrimi milidimba yalunya nanankanyi nanganginkanyi jangkurranyi. Yinini jangkurranyi narri milidimba. Narri milidimba yalunya, jaliyi yingka nyulu yanyba bulangi, nanganginkanyi nijanganjiyngkanyi baki ngardanganjanyi, jaliyi nyulu yanyba bulangi, ‘Miku ngayiyi wajba nimbalanya dungalanyi baki yajinyi, miku ngayiyi lalanba nimbalanya. Yanyba ngayi jangkurr nangangi Kudkanyi, jangayu wajba Kud dungalanyi baki yajinyi, baki miku ngayiyi yangkalamba nanda jangkurr. Baki nanankardi barri miku ngayiyi wajba nimbalanya dungalanyi baki yajinyi. Miku ngayiyi lalanba nimbalanya.’ Narri yanyba, jaliyi nyulu yanyba nani bulangi, baki nanda kunyba. Narri yanybaka nanda kunyba, nyulu waykanyi Kud dungalanyi, ngala mikuyaji mili dungalanyi wudumbikanyi mama bulangi.
MAR 7:13 Ngala balki nanda narringi yuwa. Miku narrimi ngayangayijba nanganginkanyi yuwanyi Kudkanyi. Narringinyi yuwawanyi manjamanjambaka nanda yuwa nangangi Kudkanyi. Nanangini balkiwanyi jangkurrwanyi manjamanjambaka nanda kunyba jangkurr nangangi Kudkanyi. Narri jungkuka balki, jala miku narrimi lalanba bulanya yarrijinyi baki nijanganjinyi, jala miku narrimi wajba bulanya dungalanyi, ngala narri wajba Kud dungalanyi. Baki narri milidimbaka mili kajanyi balkinyi yajinyi marda. Mili kajanyi balkinyi yajinyi narri milidimbaka yalunya barri.” Barriwa.
MAR 7:14 Baki kayayi Jisus yalungi muramukuyngka, yalu jilaykanyi nangandurri. Mili nyuli yanyba yalungi, wakardaykanyi yalungka marni baki jarrkanyi mama. Yanyba nyuli yalungi, “Manku janarri ngaki jangkurr, baki jingkijba janarri.
MAR 7:15 Miku nyulimi jungku balki, jarrbangkangangi nyulu mama. Nyulu jungkuka balki, mankumankukangangi nangka balkinyi yajinyi. Waluku nangka mankumankuka balkinyi yajinyi, baki nyulu yanybaka balki jangkurr, nyulu yabimbaka nanda balki yaji. Nani nyulu jungkuka balki.” Barriwa.
MAR 7:17 Kamu barri barlbayi Jisus yalunbunanyi murananyi. Ngankijba nyuli barrawuna, baki jungku nyuli nanaba kalawuyngkurru. Jilajbayi nanganginmuku kandimuku nangandurri, baki ngajaka yali Jisus, “Wanyi nanda jangkurr jali ninji yanyba barrin. Miku nurrimi jingkijba.”
MAR 7:18 Ngala jananganjayi yalunya Jisuswanyi, “Marda narri kuna. Miku narrimi kunyba kulaji jingkiykanyi yaji kuna. Miku kuna narrimi jingkijba ngaki jangkurr. Jungku kuna narri barrinani yalu. Jangayu karu narrinya nanankanyi jangkurranyi. Nanda mama jala narri jarrba, nanda mama ngankijbangka narrindu muwana. Mikukimi jungku nanda mama muwana yurrngumba. Nanda mama walajbangka muwananyi, mankanyinanyi. Nani barri mikuwali nanangini mamawanyi yabimba narrinya balki, narringka mankumankunkanyi balkinyi yajinyi. Miku narrimi jungku balki, jarrbangangi narri jawuda mama.” Barriwa. Nani barri yanybayi Jisus mamanyi, bukamba mama kunyba jarrkanyi. Miku jawuda mama malaba, miku yaliyi jarrkanyi. Barriwa.
MAR 7:20 Baki mili yanybayi Jisus yalungi, “Ngala jaliyi narringka mankumanku balkinyi yajinyi, baki janarri yabimba balki yaji. Baki nani barri janarri jungku balkina yuwana Kudkanyi.
MAR 7:21 Waluku nangka mankumanku nganinyi balkinyi, baki kamu janyulu yabimba balki yaji, kamu janyulu maninjakujba yaji. Kamu janyulu kurdanba yingka nganinyi.
MAR 7:22 Waluku nangka mankumanku nganinyi balkinyi, baki kamu janyulu kuluka yingkana jibarrina, kamu janyulu kuliwijba yajinyi, kamu janyulu jujamba yalunya, kamu janyulu ngurrunajba yingka, kamu janyulu barrakijarra.
MAR 7:23 Nani barri waluku nangka mankumanku nganinyi balkinyi yajinyi, baki kamu janyulu yabimba nanda balki yaji. Nani barri jungkuka nanda nganinyi balkina yuwana Kudkanyi. Ngala miku nyulimi jungku balkina yuwana Kudkanyi, jarrbangangi nyulili mama barrin.” Barriwa. Nani barri yanybayi Jisus yalungi kandimukuyngka.
MAR 7:24 Barlbayi Jisus nanamunanyi yajinanyi. Barlba nyuli yingkayurri yajiyurri. Barlba nyuli langki bundu nanankuyanyina barrawuyabarrawuyana, niji Daya marda Sayidun. Ngankijbayi Jisus barrawuna, baki jungku nyuli nanaba. Nulijba nyuli jungunkanyi karda nanaba barrawuna nyuluman, ngala miku. Wakaramba yali Jisus nananyina barrawuna yingkamukunyi.
MAR 7:25 Jilajbayi jibarri nangandurri. Nanda jibarri nangangi yaji niji Bunijiya. Miku nyuliyanyi mungkiji nangangi Jisuskanyi. Miku nyuliyanyi Ju, ngala nyuli ngurranyi. Yanyba nyuli yinini yanyi, Krik yanyi. Nanamuku Jumuku, miku yaliyanyi maruka muwa yalungi ngurranyimukuyngka barrinani nanda jibarri. Yalili yanyba yalungi, “Yingkamuku ngurranyimuku, yalu barrinani bajangumuku.” Ngala nanda kulunganja nangangi ngila, nyuli lunji. Jungkuyi wuwarr nangandu mankanyina. Manku nyuli nangangi Jisuskanyi, nyuli nanaba barrawuna, baki jilajbayi jibarri nangandurri, baki mururu nyuli wayka jambana nangandu. Yilikajba nyuli Jisus, nyulu jakaji nanda wuwarr ngilananyi mankanyinanyi.
MAR 7:27 Ngala yanybayi Jisus nangangi jibarrinyi, “Waluku barri janurru wajba bayamuku mamanyi. Waluku jayalu jarrba kaja mama. Miku nurriyi wajba bajangumuku mamanyi waluku barri. Waluku jayalu yalu jarrba yaji bayamukunyi. Ngayu Ju, ngala ninji ngurranyi ngaki. Badajba ngayi milidimbiji yalunya ngakinmuku mungkijimuku Jumuku. Badajba ngayi yabimbiji ngiruka yaji yalungi barri. Yalu barrinani nanamuku bayamuku. Miku ngayiyanyi badajba milidimbiji yalunya ngurranyimuku. Miku ngayiyanyi badajba yabimbiji ngiruka yaji yalungi. Yalu barrinani nanamuku bajangumuku.”
MAR 7:28 Yanybayi jibarri nangangi Jisuskanyi, “Yuku barri, mambuka. Ngala jala yalu jarrba mama bayamukunyi, jaliyi yirrba jawuda mama jambarri, baki nanda jarrbangka bajanguwanyi. Jarrbangka nanda bijal mama bajanguwanyi, jaliyi yirrba mama jambarri. Ngala jala ninji milidimba yalunya nganyinmuku mungkijimuku, baki kudiyanymukunyi ngurranyimukunyi yalu marda mankuka nganyi jangkurr. Yalu marda kuyungka nganyi jangkurr. Janinji kuna yabimba ngiruka yaji yalungi marda ngurranyimukuyngka jala kuyu nganyi jangkurr. Janinji kuna kunymamba marda ngaki ngila.”
MAR 7:29 Baki nyuli jananganja jibarri Jisuswanyi, “Mirnarrijba ngayu muwa nanankanyi jangkurranyi jali ninji yanyba. Kudanyu barri nganinji jingkijba, yuku ngayu yabimba ngiruka yaji. Jangayu kunymamba nanda nganyi ngila. Wijbakiyi wayka barndarri ngilayurri. Nanda wuwarr barlbayi nanganbunanyi mankanyinanyi. Mikuyaji wuwarranyi nanaba ngilana mankanyina.” Barriwa.
MAR 7:30 Wijbayi nanda jibarri nanganginkurri barndarri. Jali nyulu wanbiya, baki najba nyuli ngila jalyuna. Mikuyaji wuwarranyi nangandu. Barriwa.
MAR 7:31 Baku barri barlbayi Jisus nanamunanyi yajinanyi Dayananyi. Jilajba nyuli langki nanankurri yajiyurri Sayidunyurri. Mili nyuli jilajba karrurrinyba kula nananyina yajina jali kaja barrawuyabarrawuya 10 barri. Baki mili nyuli jilajba bayungu nanankurri kanjarri, niji Kalili.
MAR 7:32 Kuyu yali nganinyi nangandurri Jisusyurri jawudawanyi. Nanda nganinyi, nyuli mudu kuwarda. Miku nyuliyi manku yaji. Baki nyuli balki janyi. Miku nyuliyi yanyba jangkurr kunymamba barri. Nyuli balki janyi. Yalu jali yalu kuyu nanda nganinyi nangandurri Jisusyurri, ngajaka yali Jisus, nyulu marrimbiji nanda nganinyi kulaji marniyudinyi.
MAR 7:33 Dulabayi nanda nganinyi yalunbunanyi Jisuswanyi. Jungkuyi bulaman. Baki yarrijba nangki Jisus marni nanganginyina kuwardana. Janybayi jabula Jisuswanyi, baki yarrijba nangki marni nanganginyina jalinyina.
MAR 7:34 Najbayi laliji kingkarri Jisuswanyi, baki wirnngalijbayi kudanyu barri. Baki yanybayi Jisus nganiyngkanyi, “Yibada.” Nanda jangkurr Ju yanyi, barrinani, “Dumbakiyi kuwarda, baki wirriwirrijbakiyi jalinyi.”
MAR 7:35 Baki yinarramba kunybijbayi nanda nganinyi. Manku nyuli yaji, baki yanyba nyuli jangkurr kunymamba barri.
MAR 7:36 Wijbayi Jisus yalundurri muramukuyngkurri, baki jirrinyba nyuli yalunya. Maramaramba nyuli, “Miku narriyi karu yingkamuku nanginkanyi nganiyngkanyi, jali ngayu kunymamba. Miku narriyi karu.” Nani barri nyuli jirrinyba yalunya, ngala miku yaliyanyi ngayangayijba nanganginkanyi jangkurranyi. Barlba yali, baki karu yali yingkamuku. Jali mili jirrinyba yalunya, miku karunkanyi Jisuswanyi, baki mili yali karu yingkamuku, nyuli kunymamba nanda nganinyi.
MAR 7:37 Baki jali yalu manku nanda jangkurr, baki manmala yali. Manmala yali kudanyu barri, baki yanyba yali, “Nanangini Jisuswanyi, nyulu yabimbaka bukamba yaji kunymamba. Nyulu kunymambaka kuwarda mankunkanyi yaji. Marda nyulu kunymambaka janyi yanybikanyi jangkurr.” Barriwa.
MAR 8:1 Marndakaja barri mili yali jilajba nangandurri Jisusyurri walkurra muramuku. Jungku yali nangandu murrkana kambana. Bukamba yali nanda mama jali yalu kuyu yalundu, ngala mili yali jungku nangandu, mikuyaji mamanyi. Kayayi Jisus yalungi nanganginmukuyngka kandimukuyngka. Badajba yali, baki yanybayi Jisus yalungi,
MAR 8:2 “Nginduka ngayu muwa yalungi, nanginmukuyngka muramukuyngka. Yali jungku ngakindu kujarraka barndayka, baki nanijba barri mikuyaji mamanyi yalundu jarrkanyi. Birrkalanyi yalu kudanyu barri.
MAR 8:3 Jawuda yalungi barnda juju barri. Jalimi ngayu manjijba yalunya barndarri, baki yiningki jawuda jayalu jungku buwandiwa. Majabujbayi mankanyi yalu, birrkalanyingangi.” Nani barri yanybayi Jisus yalungi kandimukuyngka.
MAR 8:4 Yanybayi kandimuku nangangi Jisuskanyi, “Ngala yanka janurru wajba yalunya mamanyi. Yanka barri. Miku nurriyi wudumba mama nanginyina mangkurruna yajina.”
MAR 8:5 Yilikajbayi yalunya Jisuswanyi, “Yankanu damba narrindu. Yankanu.” Jananganja yali, “Ngawamba 7 bayayawa damba.”
MAR 8:6 Baki jirrinybayi yalunya muramuku Jisuswanyi, yalu jungunki jambana. Baki wudumba nyuli nanda damba, baki yanyba nyuli mududu nangangi Kudkanyi. Dalyamba nyuli nanda bayayawa damba. Wajba nyuli yalunya kandimuku nanankanyi mamanyi, baki yalunjali wawajba muramuku nanankanyi bayayawanyi dambanyi.
MAR 8:7 Mili kujajarra bayayawa kaku yalundu marda. Wudumbayi nanda kaku Jisuswanyi, jabarri nyuli yanyba mududu nangangi Kudkanyi nanankanyi kakunyi. Baki nyuli jirrinyba kandimuku, yalunjalu wawaykanyi kakunyi marda.
MAR 8:8 Jarrba yali nanda mama, baki wardijba yali muwa. Miku yaliyanyi jarrba bukamba nanda mama. Kiliyi kudiya mama. Wudumba yali nanda mama kandimukunyi. Yarrijba yali bindawarrana, 7 bindawarra walkinyi.
MAR 8:9 Kajamukunyi yali jarrba nanda mama, mijimbangumukunyi, 4000 barri. Baki manjijbayi yalunya Jisuswanyi. Nyuli manjijba yalunya yalunginkurri barndarri.
MAR 8:10 Baki ngankijbayi Jisus muwardana. Ngankijba nyuli muwardana, marda nanganginmuku kandimuku nangandu, baki jilajba yali bayangarrinybarri yingkayurri yajiyurri, niji Dalmanuda. Barriwa.
MAR 8:11 Jali yalu wanbiya bayangarrinybana, baki yingkamuku yali jilajba nangandurri Jisusyurri. Yali Barasimuku jali yalu jurlwa nangangi Jisuskanyi. Jilajba yali nangandurri balanjanki Jisus. Yanyba yali Jisuskanyi, “Yabimbakiyi ngiruka yaji nurrungi, baki janurru jingkijba Kud, nyulu mirnarrijbangka muwa nganyi, ninji nangangi kandi. Nani janinya nurru jingkijba, jaliyi ninji yabimba ngiruka yaji nurrungi.” Barriwa.
MAR 8:12 Wirnngalijbayi Jisus kudanyu barri. Ngindu nyuli muwa yalungi jali yalu balanja Jisus. Baki yanyba nyuli yalungi, “Narri jala narri jungku nayimanji barri, wanyingkanyi nganarri ngajaka ngayu yabimbiji mili ngiruka yaji narringi. Narri najbayi nanda ngiruka yaji jali ngayu yabimba, ngala miku narriyi jingkijba yaji. Miku nganarriyi jingkijba, jali manjijba ngana Kudwanyi. Ngala miku barri. Miku ngayiyi yabimba mili ngiruka yaji narringi. Miku.” Nani barri jananganjayi yalunya Jisuswanyi.
MAR 8:13 Barlbayi Jisus yalunbunanyi. Ngankijba yali muwardana, Jisus baki kandimuku, baki mili yali jilajba karrurrinybarri kanjana muwardayudi.
MAR 8:14 Ngala mamanumba yali yaji kandimukunyi. Mamanumba yali wudumbikanyi mili damba. Ngawamba yingamali damba yalundu muwardana.
MAR 8:15 Yanybayi Jisus yalungi, “Marda narringkimi najbawa yalunginkanyi bululunyi yajinyi, Barasimukuyngka baki Yirudkanyi. Marda narringkimi najbawa yalunginkanyi bululunyi yajinyi.”
MAR 8:16 Jali manku nangangi jangkurr kandimukunyi, baki ngamu yanybayi Jisus dambanyi. Baki yanyba yalungki, “Mikuyaji dambanyi ngambalangi. Nanankardi barri nyuli yanyba nani barri, mamanumbangangi ngambala kuyunkanyi ngambalangi damba.”
MAR 8:17 Ngala mankuyi yalunya Jisuswanyi, baki nyuli yanyba yalungi, “Wanyingkanyi narringka yanyba nani dambanyi. Miku kuna narrimi jingkijba ngaki jangkurr. Balki kuna narri kulaji jingkiykanyi ngaki yaji.
MAR 8:18 Narri yamiyudi. Nganarri najbangka yabimbikurri yaji, ngala miku kuna narrimi jingkijba nanda yaji. Narri kuwardayudi. Narri mankuka ngaki jangkurr, ngala miku kuna narrimi jingkijba nanda jangkurr. Miku kuna narrimi mankuwa nanda wabulinyi yaji.
MAR 8:19 Miku kuna narrimi mankuwa nanda yaji jali ngayu yabimba, jali kajamukunyi yalu jarrba damba marda kaku, baki wardijba yali muwa. Miku kuna narrimi jingkijba nanda yaji jali waluku ngayu dalyamba damba yalungi 5000kanyi. Yankanu bindawarra narri wudumbayi nanda mama jali yalu yingijba. Yankanu barri.” Jananganja yali “Wudumba nurri 12 bindawarra.”
MAR 8:20 Baki mili ngajakayi yalunya Jisuswanyi, “Buyingka barri baku mili ngayi dalyamba mama yalungi muramukuyngka 4000kanyi. Dalyamba ngayi 7 damba yalungi waluwa yali jarrba. Bayngkani barri yankanu bindawarra narri wudumbayi nanda mama nanamanji jali yalu yingijba. Yankanu.” Jananganja yali, “Wudumba nurri 7 bindawarra nanamanji barri.”
MAR 8:21 Mili yanybayi Jisus yalungi, “Jilijba kuna narri jingkijba. Jilijba kuna.” Barriwa. Miku yaliyanyi jingkijba nangangi jangkurr bululunyi yajinyi. Jalili yalu yabimba damba, bakili yalu yarrijba nanda bululu yaji kandirrina, bakili bululunba mama. Walkurrambakili nanda mama bululuwanyi yajiwanyi. Baki nani barri yalu Barasimuku baki Yirud. Yalu barrinani nanda bululu yaji. Yalu yabimbaka kaja balki yaji, baki nanankardi barri yalunjalu yabimbaka yingkamuku yalu yabimbikanyi kaja balki yaji marda. Barriwa.
MAR 8:22 Birlbirdamba yali kanja karrurrinybarri, baki wanbiya yali nananyina yajina niji Bidsayida. Jawudanymukunyi, yali kuyu kabuji nganinyi nangandurri Jisusyurri. Kudanyu yali ngajaka Jisus, nyulu marrimbiji nanda kabuji, nyulu kunymambiji.
MAR 8:23 Marrimbayi kabuji marni Jisuswanyi, baki yalilijbayi danbiyurri barrawuyabarrawuyana. Jabulabayi Jisuswanyi kabuji yami, baki marrimba nyuli kabuji marniyudinyi. Ngajakayi kabuji Jisuswanyi, “Najba kuna ninji yaji.”
MAR 8:24 Ningkiningkijbayi yaji nganinyiwanyi, baki yanyba nyuli, “Ngayu najbangka nganinyimuku, ngala yalu barrinani kurndamuku jilalaykurri.”
MAR 8:25 Mili marrimbayi nanda nganinyi Jisuswanyi. Yarrijba nangki Jisus marni nanganginyina yamina. Mili ningkiningkijbayi yaji nganinyiwanyi, baki najba nyuli yaji kunymamba. Najba nyuli bukamba yaji jujunkurri.
MAR 8:26 Baki yanybayi Jisus nangangi, “Mikujiyi jilajba barrawuyabarrawuyarri, ngala wijbakiyi nganyinkurri barndarri.” Baki manjijbayi nanda nganinyi nanganginkurri barndarri Jisuswanyi. Barriwa.
MAR 8:27 Baku barri mili yali jilajba langki, Jisus marda nanganginmuku kandimuku. Jilajba yali langki nanankurri yajiyurri bundu nananyina barrawuyabarrawuyana, niji Sisariya Bilibayi. Ngala yali jilajba yubalina, baki ngajaka nyuli nangangi kandimuku Jisuswanyi, “Wanyingkanyi yalu yanybaka ngaki. Wanyi ngayu. Wanyi.”
MAR 8:28 Jananganja yali Jisus kandimukunyi, “Yanybaka yalu yinini yinini jangkurr nganyi. Yingkamuku yalu yanybaka nganyi, ninji Jun Ngurrunbawarr. Yingkamuku yalu yanybaka nganyi, ninji nanda wankalanyi Yalayija, mili wankijbayi. Yingkamuku yalu yanybaka nganyi, ninji wankalanyi jali yanyba jangkurr nangangi Kudkanyi.” Barriwa.
MAR 8:29 Yanybayi Jisus yalungi, “Ngala narri barri, wanyingkanyi narri yanybaka ngaki. Wanyi ngayu.” Baki jananganjayi Bidawanyi, “Ninji barri Krayis. Ninji nanda Krayis jali manjijba Kudwanyi.” Nani barri jananganjayi Bidawanyi. Kamambarra barri yanybayi Kud yalungi wankalanyi. Karuyi yalunya, baku barri juju, janyulu manjijba walkurra mambuka. Janyulu jilajba nanda mambuka lalanbiji yalunya Jumuku. Baki jayalu nijarrijba nanda mambuka Krayis. Jingkijbayi Bidawanyi, nanda nganinyi Jisus, nyulu nanda mambuka Krayis jali manjijba Kudwanyi.
MAR 8:30 Baki jirrinybayi yalunya Jisuswanyi, “Miku janarri karu yingkamuku nanankanyi jangkurranyi ngaki, ngayu Krayis. Miku janarri karu yalunya nani ngaki.” Barriwa.
MAR 8:31 Nanamunanyi barri milidimbayi yalunya kandimuku Jisuswanyi. Karu nangki yalungi, “Ngayu Buwanya Bukambijuyngka. Ngayu karungka narrinya, jayalu yabimba kiji ngaki, nanamukunyi mambukamukunyi, baki malbumalbuwanyi jurjkanyi baki milidimbawarrmukunyi yuwanyi. Jayalu yabimba kiji ngaki. Janganjalu manjijba janybiji ngaka. Jangaka janyba, ngala baku barri kujarraka barndayka, jangayu mili wankijba barri.”
MAR 8:32 Nani barri nyuli yanyba yurlurrmba jangkurr. Ngala nanangini kandiwanyi Bidawanyi, nyuli kuyu Jisus danbiyurri, baki yanybayi Bida nangangi Jisuskanyi, “Mikujiyi yanyba nanda jangkurr, yalu yabimbikanyi kiji nganyi, marda janybikanyi nganyingka. Mikujiyi yanyba nani barri.”
MAR 8:33 Yangkalamba nangki Jisus mankanyi. Ningkijba nyuli Bida, baki yanyba nyuli nangangi, “Barriwa barri, Barlbakiyi ngakinbunanyi. Nyuli yanyba nanda jangkurr ngaki Sayidin. Ninya karuyi Sayidinwanyi, ninji yanybiji nanda jangkurr ngaki. Miku nganyingkimi mankumanku yajinyi barrinani nangka mankumankuka Kud yajinyi. Ngala nganyingka mankumankuka yajinyi barrinani nganinyi nangka mankumankuka yajinyi.” Barriwa.
MAR 8:34 Baki kayayi Jisus yalungi muramukuyngka baki nanganginmukuyngka kandimukuyngka, yalu jungunki nangandu. Baki yanyba nyuli yalungi, “Jaliyi narri nulijba jilaykanyi ngakindu, baki marda narringkimi miku lalanba narringka. Marda narrimi yurlwa narringinkanyi yajinyi. Mardakimi nanda narringi yaji miku jirrinyi nganyi. Jaliyi narri jilajba ngakindu, baki yiningki kurdanbaja ninya yingkawanyi. Yiningki janyulu kurdanba ninya, milidimbangangi narri ngaki jangkurr.
MAR 8:35 Jaliyi narri kudanyu nulijba jungunkanyi wanka nayiba yajina yurrngumba, baki janarringka janyba. Ngala jaliyi narringka janyba, mikungangi narringkiyi yangkalamba ngakinbunanyi, ngala narri durrijbayi ngaki jangkurr kudanyu barri, jaliyi narringka janyba nanankardi barri, baki janarri mili wanka jungku yurrngumba barri.
MAR 8:36 Mankumanku narringka nganiyngkanyi jirdi kajanyi yajinyi. Mirnarrijba nyulu muwa nanganginkanyi yajinyi. Ngala warriyaluku. Mankumanku nangka nanganginkanyi yajinyi, ngala miku nangkimi mankumanku nangangi Kudkanyi. Nangangi yaji jirrinyi nangangi, ngala miku nyulu Kud jirrinyi nangangi. Jalija nangka janyba, baki miku janyulu mili wanka jungku. Mikuwali nanganginyi yajiwanyi mili wankamba nanda nganinyi.
MAR 8:38 Kajamuku yalu balkimiku. Yalu yurlwangka nangangi Kudkanyi. Yalu yabimbaka balki yaji nangangi Kudkanyi. Yalungka yangkalamba nanganbunanyi yuwananyi Kudkanyi. Nani barri yalu balkimuku. Ngayu Buwanya Bukambijuyngka, jangayu walkurra mambuka barrinani Buwakanya Kud. Baku barri jangayu wijba. Jangayu wijba kingkarrinya, baki nanamuku Yanjilmuku, jayalu jilajba ngakindu. Jaliyi narri yurlwa ngaki nanijba barri, jaliyi narri manyirru ngaki baki ngakinkanyi jangkurranyi, baki jangayu yurlwa narringi, jangayu manyirru narringi jalija ngayu wijba.” Barriwa.
MAR 9:1 Mili yanybayi Jisus yalungi, “Kudiya narri jala narri jungku nayiba ngakindu, janganarri najba janybikurri ngaka. Baki janganarri najba mili wankiykurri baku barri. Kudiya narringi, miku narringkiyi janyba waluwa ngayuja wankijba mili. Baku barri jangayu jungku kingkarri nangandu ngakinyina Buwakayu, baki janyulu lalanba yalunya bukambiju, jala yalu kuyu ngaki jangkurr. Janyulu lalanba yalunya kudanyu barri.” Barriwa.
MAR 9:2 Baku barri 6 kambana, kirrijba yali dungalana, Jisus marda murrku nanganginmuku kandimuku, Bida marda buwakula Jayims baki Jun. Kirrijba yali juju kingkarri yundurrinybana dungalana yaluman. Jali yalu jungku nanaba yundu, baki yangkalamba nangki Jisus. Mankanyi nangangi bilirrbayi barrinani kamba, jali nangka yangkalamba Jisus.
MAR 9:3 Marda jumbala nangangi bilirrbayi bunyala kudanyu barri. Mikuwali yingka jumbala bilirrba nani barri.
MAR 9:4 Baki yali najba Jisus murrkuwanyi, marda yali najba kujarra mili karrinjankurri wilina nangandu. Buli malbuwuya wankalawuya, jali bula jungku juju wabula kamambarra. Yingka wankala nyuli Musis, marda yingka wankala nyuli Yalayija. Badajba buli kingkarrinya. Yanyba yalungki, malbuwuya baki Jisus. Barriwa. Nani barri yali najba yaji kandimukunyi. Najba yali Jisus marda malbuwuya yanybikurri yalungka. Barriwa.
MAR 9:5 Yanybayi Bida nangangi Jisuskanyi, “Mambuka. Yuku barri kunyba nurru nayiba naykanyi narrinya. Jangayu yabimba murrku ngarndu wanjirr, yingka nganyi, yingka nangangi Musiskanyi, marda yingka nangangi Yalayijakanyi. Yabimba jangayu ngarndu narringi.”
MAR 9:6 Ngala muningka yanybayi Bida nanda jangkurr. Muningka nyuli yanyba, marralangangi yali kandimuku. Marrala yali kudanyu barri.
MAR 9:7 Ngala walajbayi ngalu. Walajbayi ngalu waykalinya, baki murumbayi yalunya ngaluwanyi. Baki manku yali jangkurr ngaluna kandimukunyi. Yanybayi Kud ngaluna, “Nayinda ngaki jandanyi, jala ngayu maruka muwa nangangi. Mankukiyi nangangi jangkurr.” Barriwa.
MAR 9:8 Baki kujba yalungki dulu lukuluku kandimuku, ngala miku yaliyanyi najba nanankujarra wankalawuya. Mikuyaji bulangi nanaba. Ngawamba karrinjayi Jisus yalundu. Barriwa.
MAR 9:9 Karrala yali wayka dungalananyi. Ngala yali karrala wayka, baki yanybayi Jisus yalungi. Jirrinyba nyuli yalunya, “Mikujiyi karu yalunya nanankanyi jali narri najba. Ngayu Buwanya Bukambijuyngka, jangaka janyba, ngala baku barri jangayu wankijba mili. Yuku barri nanamanji baku janarri karu yalunya nanankanyi jali narri najba dungalana. Yuku barri nanamanji baku barri, ngala jilijbawa yaji.” Barriwa.
MAR 9:10 Baki yali ngayangayijba nanganginkanyi jangkurranyi. Miku yaliyanyi karu yingkamuku nanankanyi jali yalu najba dungalana. Ngala yililikajba yalungki nanganginkanyi jangkurranyi, janangka janyba, baki janyulu baku mili wankijba. Yililikajba yalungki nanankanyi jangkurranyi, mikungangi yaliyanyi jingkijba nanda jangkurr.
MAR 9:11 Baki ngajaka yali Jisus kandimukunyi, “Nanamuku milidimbawarrmuku yuwanyi, wanyingkanyi yalili yanyba nayi barri, ‘Waluku janyulu wijba nanda wankalanyi Yalayija. Janyulu wijba waluku.’ Wanyingkanyi yalili yanyba nani barri. Wanyingkanyi.”
MAR 9:12 Jananganjayi yalunya Jisuswanyi, “Yuku barri. Yanybayi Kud najana. Yanyba nyuli nayi, ‘Waluku barri janyulu badajba. Janyulu badajba nanda barrinani Yalayija. Janyulu badajba karunki yalunya kunybanyi jangkurranyi, baki janyulu kunymamba bukamba yaji. Janyulu karu yalunya, marda yalimi ngindu muwa, yurlwangangi yalu nanankanyi yuwanyi Kudkanyi. Waluku barri janyulu badajba, baki baku barri badajbaja nanda yingka, Buwanya Bukambijuyngka. Janyulu badajba bayngkani nangandu nananyina barrinani Yalayija. Jayalu yurlwa nangangi, jayalu linjumba nangangi mankanyi.’ Barriwa.
MAR 9:13 Ngala ngayu karungka narrinya nanginkanyi jangkurranyi. Nanda nganinyi barrinani Yalayija, ngala nyuli badajba yalundurri, ngala yali yurlwa nangangingangi. Yali linjumba, yali kurdanba, barrinani yanybayi najana Kudkanyi, jayalu yabimba yaji nangangi.” Barriwa. Nani barri yanybayi Jisus yalungi, ngala yali karrala wayka dungalananyi.
MAR 9:14 Karrala yali kula wayka jambarri, Jisus marda kandimuku nangangi. Wijba yali yalundurri, yingkamukuyngkurri kandiyurri yalungi. Walkurra muramuku yali jungku nanaba yalundu kandimukunyina, marda kudiya jali yalu milidimbawarrmuku yuwanyi. Jakakajba yalungki kandimuku marda milidimbawarrmuku.
MAR 9:15 Jali yalu najba Jisus jilaykurri yalundurri muramukunyi, baki manmala yali. Kudanyu yali manmala, baki wirlku yali nangandurri.
MAR 9:16 Ngajakayi nangangi kandimuku Jisuswanyi, “Wanyingkanyi narringka jakakajabangka. Wanyingkanyi.”
MAR 9:17 Yanybayi nganinyi nangangi Jisuskanyi, “Milidimbawarr. Warriyaluku ngaki jandanyi. Ngayu kuyungka nganyindurri. Ngankijbayi wuwarr nangandu mankanyina, baki nyulu jakudiyngka. Mikuwali yanyba.
MAR 9:18 Balkimbaka kaburr wawarrwanyi. Janybaka nanda kaburr jambarri wuwarrwanyi. Jabula kanngangka janyina, baki bijba nangka mayi. Baki nganarrkalijbangka mankanyi. Ngayi ngajaka yalunya nganyinmuku kandimuku. Ngayi ngajaka yalunya, jakaji nanda wuwarr, ngala miku yaliyi jakajba. Miku yaliyi kunymamba ngaki jandanyi. Miku.”
MAR 9:19 Yanybayi Jisus yalungi muramukuyngka, “Bukambiju narri, jala narri jungku nanijba, miku narrimi kuyu ngaki jangkurr. Narri yurlwangka ngaki. Ngayu jungkuka narrindu yurrngumba. Ngayu milidimbaka kaja narrinya, ngala miku narrimi kuyu ngaki jangkurr. Wanyimbala janarri kuyu ngaki jangkurr. Wanyimbala.” Baki yanybayi Jisus nangangi nijanganjiyngkanyi, “Kuyukiyi nanda kaburr ngakindurri. Kuyukiyi.”
MAR 9:20 Kuyu nyuli nangangi jandanyi nangandurri Jisusyurri. Jali najba Jisus wuwarrwanyi, baki ngirringirrimbayi nanda kaburr wuwarrwanyi. Ngirringirrimba nyuli kaburr. Yirrbayi kaburr jambarri, baki kanngayi jabula janyina.
MAR 9:21 Ngajakayi nijanganjinyi Jisuswanyi, “Wanyimbala nyuli lunji jalannga barri.” Jananganjayi nijanganjinyiwanyi, “Lunji nyuli ngala nyuli bayakarda juka yurrngumba barri.
MAR 9:22 Dabakili kaburr yurrngumba wuwarrwanyi. Janybakili jangurri baki wabudarri kurdanbiji. Ngala yuku kuna ninji kunymamba ngaki jandanyi. Jaliyi yuku ninji kunymamba, baki ngindukiyi muwa ngalingi, baki yabimbakiyi nanda kunyba yaji ngalingi barri.”
MAR 9:23 Yanybayi Jisus nangangi, “Wanyingkanyi nganinji ngajaka, yuku kuna ngayu kunymamba nganyi jandanyi. Marda ninjimi kuyu ngaki jangkurr. Jala yalu kuyu ngaki jangkurr, baki nganjalu jingkijba, yuku ngayu kunymamba yalunya jala yalu lunji, yuku ngayu wankamba yalunya jala yalungka janyba. Marda ninjimi marda kuyu ngaki jangkurr.”
MAR 9:24 Baki nginduyi nanda nijanganjinyi, baki kudanyu yanyba nyuli nangangi Jisuskanyi, “Bijal ngayu kuyungka nganyi jangkurr. Ngala nganinjikiyi kandimba, baki jangayu mili kuyu nganyi jangkurr kudanyu barri.” Barriwa.
MAR 9:25 Kulwayi Jisus, baki najba nyuli yalunya muramuku wirlkunkurri nangandurri. Baki jirrinyba nyuli nanda wuwarr, “Ninji wuwarr, ngayu jirrinybaka ninya, walajbakiyi nanganbunanyi mankanyinanyi kaburrnanyi. Walajbakiyi. Mikujiyi mili wijba nanganginkurri mankanyiyurri.”
MAR 9:26 Kayayi nanda kaburr. Kaya nyuli kudanyu barri. Ngirringirrimbayi kaburr wuwarrwanyi, baki walajbayi wuwarr nanganbunanyi mankanyinanyi. Muningka kulukayi kaburr jambana, baki ngamu nangki janyba. Yanyba yalungki, “Janyba nangki nayinda kaburr. Janyba nangki.”
MAR 9:27 Ngala marrimbayi kaburr marni Jisuswanyi, baki kingkarrumba nyuli nanda kaburr. Baki karrinjayi yuku barri.
MAR 9:28 Kamu barri barlba yali, Jisus marda kandimuku. Ngankijba yali barrawuna, baki jungkuyi yaluman. Ngajaka yali Jisus kandimukunyi, “Yuku ninji jakajbayi nanda wuwarr, ngala wanyingkanyi miku nurriyi jakajba. Wanyingkanyi.”
MAR 9:29 Jananganjayi yalunya Jisuswanyi, “Jalija ninji jakajba wuwarr barrinani nanda wuwarr, baki marda narrimi waluku yanyba mududu nangangi Kudkanyi. Marda narrimi kudanyu yanyba mududu nangangi Kudkanyi, waluwa narri jakajba wuwarr barrinani nanda.” Barriwa.
MAR 9:30 Baki mili yali barlba nanamunanyi yajinanyi, Jisus marda nanganginmuku kandimuku. Jilajba yali kula baki kangandijba yali nananyina walkurranyina yajina, niji Kalili. Jilajba yali karda. Mikukiyanyi nulijba jisus yalungi kajamukuyngka, yalu jingkiykanyi nyuli nanaba. Karda nyuli jilajba.
MAR 9:31 Baki milidimba nyuli yalunya kandimuku nangangi. Yanybayi Jisus yalungi, “Jawudawanyi, janganjalu wudumba Buwanya Bukambijuyngka. Janganjalu marrimba, baki janganjalu kurdanba. Jangaka janyba, baki baku barri jangayu wankijba mili. Kujarraka barndayka jangayu mili wankijba barri.” Barriwa.
MAR 9:32 Ngala nanganginmukunyi kandimukunyi, miku yaliyanyi jingkijba nangangi jangkurr. Miku yaliyanyi jingkijba, ngala marrala yali nangangi ngajakankanyi. Baki miku yaliyanyi ngajaka Jisus nanankanyi jangkurranyi.
MAR 9:33 Mili yali jilajba Jisus baki kandimuku. Jilajba yali karri Kabirnayumyurri. Ngala yali jilajba yubalina, baki jakakajba yalungki kandimuku. Kardarda yalungki jakakajba, wanyi yalungi mili walkurra yingkamukuyngka. Wanbiya yali barrawuyabarrawuyana, baki ngankijba yali barrawuna. Ngala yali jungku nanaba, baki ngajakayi yalunya Jisuswanyi, “Wanyi nanda jangkurr jali narringka yanyba yubalina. Wanyi nanda jangkurr.” Barriwa. Ngala miku yaliyanyi jananganja Jisus. Karda yali jungku, manyirrungangi yali nanankanyi yalunginkanyi jangkurranyi.
MAR 9:35 Jungkurrijba nangki Jisus, baki yanyba nyuli yalungi kandimukuyngka 12kanyi, “Jaliyi ninji nulijba jungunkanyi walkurra mambuka, baki marda nganyingkimi bayakardamba. Marda ninjimi waki yalungi yingkamukuyngka.”
MAR 9:36 Wudumbayi juka Jisuswanyi, baki karrinjarrijba nyuli nanda juka burrandi yalundu. Marrimba nyuli juka jaluyudinyi, baki yanyba nyuli yalungi kandimukuyngka,
MAR 9:37 “Najba janarri nayinda juka. Miku nyulu walkurra mambuka, ngala muningka nyulu bayakarda. Marda narrimi lalanba yalunya, nanamuku jala yalu miku walkurra mambuka, ngala muningka bayakarda jungku. Marda narrimi lalanba nanamuku jala yalu bayakarda barrinani nayinda juka. Jala narri lalanbaka nanda bayakarda, baki nanda barrinani jala nanda nganarri lalanba. Nanda barrinani jala nganarri lalanba, marukangangi ngayu muwa yalungi bayakardanyi. Jala nganarri lalanbaka, baki nanda barrinani jala narri lalanbaka Kud, manjijbangangi ngana Kudwanyi narrindurri.” Barriwa.
MAR 9:38 Baku barri yanybayi kandi, niji Jun, nangangi Jisuskanyi. Yanyba nyuli, “Milidimbawarr. Najba nurri nganinyi jakaykurri wuwarr mankanyinanyi. Jakajba nyuli wuwarr nijarriykanyi ninya niji. Ngala miku nyulimi kandi ngambalangi, baki kurrkunba nurri nanda nganinyi. Karu nurri, marda nyulimi miku jakajba wuwarr, mikungangi nyulimi kandi ngambalangi.”
MAR 9:39 Ngala yanybayi Jisus nangangi, “Marda ninjiyanyi miku kurrkunba nanda nganinyi jakaykanyi wuwarr. Nanda jala yabimbaka ngiruka yaji nijarriykanyi ngana niji, baki miku nyuliyi baku yanyba balki jangkurr ngaki. Miku nyuliyi yurlwa ngaki baku barri.
MAR 9:40 Nanamuku jala yalu miku yurlwa ngambalangi, yalu kandimuku ngambalangi.
MAR 9:41 Kudanyu ngayu karungka narrinya. Narri ngakinmuku. Jaliyi yingkawanyi yabimba kunyba yaji narringi, jaliyi nyulu wajba narrinya wabudanyi ngala narri warrinjijba, narringangi ngakinmuku kandimuku, baki janyulu yabimba kunyba yaji nangangi Kudwanyi. Janyulu yabimba kunyba yaji nanankanyi, jali nyulu yabimba kunyba yaji narringi barri.” Barriwa.
MAR 9:42 Mili barri karuyi yalunya bayamukuyngka Jisuswanyi. “Yalu kuyungka ngaki jangkurr bayamukunyi. Yalu yabimbaka kunyba yaji ngaki. Jaliyi yingkawanyi nyulu milidimbaka bayamuku, yalu yabimbikanyi balki yaji, baki nanda balkimirra. Nanda balkimirra, jaliyi yingkawanyi nyulu yabimbaka bayamuku, yalu yabimbikanyi balki yaji. Dabaja nanda nganinyi kudanyu barri Kudwanyi. Jaliyi nyulu yabimba balki yaji nani barri, baki marda nangkimi janyba. Jaliyanyi nangka janyba wabula, baki miku nyuliyanyi yabimba bayamuku yalu yabimbikanyi balki yaji. Jaliyanyi nangka janyba wabula, baki miku nyuliyanyi yabimba nanda balki yaji nani barri. Baki miku nyuliyanyi daba nanda nganinyi Kudwanyi.
MAR 9:43 Ninji yabimbaka yaji marniyudinyi. Jaliyi nganyingka mankumanku yabimbikanyi balki yaji nganyinjudinyi marniyudinyi baki nanda balki. Jaliyi nganyingka mankumanku yabimbikanyi nanda balki yaji, jaliyi ninji yabimba nanda yaji, baki miku ninjiyi jilajba kingkarri nangandurri Kudyurri, ngala janinji jilajba wayka jangurri Yilyurri. Marda nganyingkimi kurrkunba yabimbikurri nanda balki yaji marniyudinyi, baki janinji jilajba kingkarri nangandurri Kudyurri. Barriwa.
MAR 9:45 Ninji jilajbangka nukamina. Jaliyi nganyingka mankumanku jilaykanyi nukamina, ninji yabimbikanyi balki yaji, baki nanda balki. Jaliyi nganyingka mankumanku jilaykanyi, baki yabimbikanyi nanda balki yaji. Jaliyi ninji jilajba baki yabimba nanda yaji, baki miku ninjiyi jilajba kingkarri nangandurri Kudyurri, ngala janinji jilajba wayka jangurri Yilyurri. Marda nganyingkimi kurrkunba jilaykurri nukamina yabimbiji nanda balki yaji, baki janinji jilajba kingkarri nangandurri Kudyurri. Barriwa.
MAR 9:47 Ninji najbangka yaji yamiyudinyi. Jaliyi ninji najba yaji, baki nanankardi nganyingka mankumanku balkinyi yajinyi, barrinani jala ninji najba yingka jibarri, baki nganyingka mankumanku kulukankanyi nangandu, jaliyi nganyingka mankumanku nanankanyi balkinyi yajinyi nani barri, jaliyi ninji yabimba nanda balki yaji, baki nanda balki. Jaliyi nganyingka mankumanku nanankanyi jali ninji najba, baki ninji yabimba nanda balki yaji, baki miku janinji jilajba kingkarri nangandurri Kudyurri, ngala janinji jilajba wayka Yilyurri. Marda nganyingka nganyingkimi kurrkunba yabimbikurri nanda balki yaji jali ninji najba, baki janinji jilajba kingkarri nangandurri Kudyurri. Barriwa.
MAR 9:48 Nanaba wayka Yilnyina, yalu jarrbangka barnyi yurrngumba barri mawuwanyi. Baki mikuwali mungijba jangu. Yajbangka yaji yurrngumba barri janguwanyi.
MAR 9:49 Jaliyi narringka miku yangkalamba ngakinbunanyi jala yingkamukunyi yalu wajba narrinya kijinyi, baki janarri jardijba ngiruka kurdulu. Janarri jardijba mili ngiruka kurdulu ngaki. Barriwa.
MAR 9:50 Nanda ngarrawa, nanda kunyba barnyinyi. Kunymambaka barnyi jarrkanyi ngarrawawanyi. Ngala jaliyi nanda ngarrawa jardibirri, baki ngambala janyba nanda ngarrawa. Nanda ngarrawa miku kunyba barnyinyi jala nyulu jardibirri. Narri barrinani nanda ngarrawa. Marda narringkimi mardumardumba muwa, baki marda narrimi mardumardu muwa yalungi yingkamukuyngka. Marda narrimi maruka muwa yalungi. Nani barri janarri kunymamba yalunya yingkamuku, barrinani kunymambaka barnyi ngarrawawanyi. Ngala jaliyi narringka miku mardumardumba muwa, jaliyi narringka jakakajba yajinyi, baki narri barrinani nanda jardibirri ngarrawa jali yalu janyba. Narri barrinani nanda jardibirri ngarrawa, mikungangi narriyi yabimba yalunya yingkamuku, yalu jungunkanyi mardumardu muwa. Miku.” Barriwa. Nani barri yanybayi Jisus yalungi.
MAR 10:1 Baki yali barlba nanamunanyi yajinanyi, Jisus marda nanganginmuku kandimuku. Jilajba yali kula yingkayurri yajiyurri, niji Judiya. Birlbirdamba yali bundal niji Jurdan, baki jilajba yali kula Judiyayurri. Kajamuku yali jilajba nangandurri Jisusyurri, jabarri nyuli milidimba yalunya.
MAR 10:2 Baki jawuda Barasimuku, yali jilajba nangandurri. Balanja yali Jisus. Ngajaka yali Jisus Barasimukunyi, “Jaliyi nyulu yingijba nangangi maninganja nganinyiwanyi, jaliyi muningka nyulu manjijba nanda nanganbunanyi, miku nyulu mili nangangi maninganja, baki jungkuka kuna nyulu kunybana yuwana. Wanyi ninji yanyba.” Nani barri yali ngajaka Jisus balanjanki.
MAR 10:3 Jananganjayi yalunya Jisuswanyi, “Wanyi yanybaka nanda yuwa nangangi Musiskanyi yingiykanyi maninganja. Wanyi yanybaka nangangi yuwa maykarrayngka.”
MAR 10:4 Jananganja yali, “Nanda yuwa nangangi Musiskanyi yanybayi nayi barri, ‘Yuku nyulu wajba nangangi maninganja najanyi nganinyiwanyi. Yuku nyulu wajba najanyi jala yanybaka, miku nanda jibarri mili nangangi maninganja. Yuku nyulu wajba nanda jibarri nanankanyi najanyi, baki muningka manjijba nanda jibarri nanganbunanyi.’ Nani barri nangangi yuwa yanybayi.”
MAR 10:5 Yanybayi Jisus yalungi, “Nani barri yanybayi Musis, jingkijbangangi nyuli narrinya, narri jardibirri kurdulu nangangi Kudkanyi. Miku narriyi kuyu nangangi jangkurr, jala milidimba narrinya Kudwanyi.
MAR 10:6 Juju wabula kamambarra jali mikuyaji yajinyi, baki yabimbayi bukamba yaji Kudwanyi. Baki karungka ngambalanya jangkurrwanyi Kudkanyi, jali yabimba bukamba yaji Kudwanyi, baki yabimba nyuli nganinyi baki jibarri.
MAR 10:7 Baki yanybayi Kud, ‘Mardakimi nganinyiwanyi yingijba bulanya nijanganjinyi marda ngardanganja. Marda nyulimi maninganja wudumba, baki jabula malumba jungku yurrngumba maykarra bula.
MAR 10:8 Waluku bula kujarra, ngala bayngkani barri bula maykarra barrinani yingamali.’ Maykarra bula jungkuka malumba barrinani yingamali.
MAR 10:9 Yanybaka Kud, jala nanankujarra maykarra jungkuka barrinani yingamali, baki mardakimi yingkawanyi miku nyalimba bulanya. Mardakimi miku nyalimba bulanya yingkawanyi. Jungkuka nganinyi balkina yuwana Kudkanyi jaliyi nyulu muningka manjijba nangangi maninganja.” Nani barri jananganjayi yalunya Jisuswanyi.
MAR 10:10 Kamu barri wijba yali Jisus baki kandimuku barndarri. Jali yali jungku barndana, baki mili yali ngajaka Jisus maykarrayngka kandimukunyi.
MAR 10:11 Baki yanybayi Jisus yalungi, “Jaliyi muningka nyulu manjijba nangangi maninganja nanganbunanyi nganinyiwanyi, baki nyulu wudumbaka yingka jibarri nanganginkanyi maninganjanyi, baki nanda balki. Barimba nyulu kuluka nangandu. Nyulu jungkuka balkina yuwana Kudkanyi, yuwajiwangangi nanda waluwinyi jibarri nangangi maninganja.
MAR 10:12 Jabarri jaliyi muningka nyulu yingkijba nangangi nawinganja jibarriwanyi, baki nyulu wudumbaka yingka nganinyi nanganginkanyi nawinganjanyi, baki nanda balki. Barimba nyulu kuluka nangandu. Nyulu jungkuka balkina yuwana Kudkanyi, yuwajiwangangi nanda waluwinyi nganinyi nangangi nawinganja.” Barriwa. Nani barri milidimbayi yalunya maykarrayngka Jisuswanyi.
MAR 10:13 Baku barri kudiyawanyi yali kuyu bayamuku nangandurri Jisusyurri. Kajamuku bayamuku yali kuyu nangandurri. Nulijba yali nangangi, nangka yarriykanyi marni yalundu, nyulu yanybikanyi mududu nangangi Kudkanyi yalungi. Baki janyulu lalanba yalunya Kudwanyi, janyulu yabimba kunyba yaji yalungi. Ngala nanganginmuku kandimuku Jisuskanyi, yali ngirrwa yalungi. Kudanyu yali ngirrwa yalungi, jali kuyu bayamuku nangandurri,
MAR 10:14 Mankuyi yalunya ngirrwankurri yalungi Jisuswanyi, baki yanybayi Jisus yalungi kandimukuyngka, “Janarri munyajba bayamuku jilaykanyi ngakindurri. Marda narrimi miku kurrkunba yalunya. Nanginmukunyi bayamukunyi, ngana yalu jingkijbangka, miku ngayimi jujambawarr. Yalu kuyungka ngaki jangkurr, baki nanankardi nyulu lalanbaka yalunya Kudwanyi. Jaliyi nganinyiwanyi jingkijba ngana barrinani nanginmukunyi bayamukunyi ngana yalu jingkijbangka, baki janyulu marda lalanba nanda Kudwanyi, barrinani nyulu lalanbaka nanginmuku bayamuku. Ngala jaliyi nganinyiwanyi miku jingkijba ngana, barrinani nanginmukunyi bayamukunyi ngana yalu jingkijbangka, baki miku nyuliyi lalanba nanda nganinyi Kudwanyi. Mikumirra.” Barriwa.
MAR 10:16 Baki marrimbayi bayamuku jaluna Jisuswanyi. Nganarrijbayi yalunya, yarrijba nangki marni yalundu bayamukunyina, baki yanyba nyuli mududu nangangi Kudkanyi yalungi. Ngajaka nyuli Kud, nyulu lalanbiji yalunya. Barriwa.
MAR 10:17 Mili jilajbayi Jisus kula. Ngala nyuli walajba barrawuyabarrawuyananyi, baki wirlkuyi nganinyi nangandurri. Mururu nyuli wayka nangandu, baki yanyba nyuli nangangi Jisuskanyi, “Ninji barri kunyba milidimbawarr. Wanyi kunyba yaji jangayu yabimba, baki janyulu wankamba ngana Kudwanyi, ngayu jungunkanyi mili wanka nangandu yurrngumba barri. Wanyi kunyba yaji jangayu yabimba.”
MAR 10:18 Jananganjayi nanda nganinyi Jisuswanyi, “Wanyingkanyi ninji yanyba ngaki, ngayu kunyba. Ngawamba Kud, nyulu kunyba ngambalangi. Yingkamuku, miku yalimi kunyba, ngawamba nyulu kunyba.
MAR 10:19 Ninji jingkijbangka nanda yuwa nangangi Kudkanyi, jali nyulu jirrinyba narrinya bukambiju. Nayinda nanda yuwa nangangi Kudkanyi. Mikujiyi kurdanba nganinyi. Mikujiyi kuluka yingkana jibarrina jala miku nganyi maninganja. Mikujiyi maninjakujba yaji. Mikujiyi jujamba yaji yalungi yingkamukuyngka. Mikujiyi jujamba yaji wudumbiji bayngkani dungala. Kuyukiyi bulangi jangkurr, nganyingkanyi nijanganjiyngkanyi baki yarrijiyngkanyi. Nani barri nanda yuwa, jala marda ninjimi durrijba.”
MAR 10:20 Yanybayi nganinyi nangangi Jisuskanyi, “Milidimbawarr, jingkijba ngayi nanda yuwa jali ngayu juka, baki ngayangayijba ngayi nanankanyi yuwanyi yurrngumba jukananyi. Yurrngumba ngayu ngayangayijba bukamba nanankanyi yuwanyi.” Barriwa.
MAR 10:21 Ningkijbayi nganinyi Jisuswanyi, baki maruka nyuli muwa nangangi. Yanybayi Jisus nangangi, “Yingka mili yaji marda ninjimi yabimba, baki janinji jungku kunyba nangangi Kudkanyi. Barlbakiyi, baki wajbakiyi yingkamuku bukamba nganyingkanyi yajinyi dungalanyi. Janinji wudumba kaja dungala nganyingkanyi yajinyi. Wajbakiyi yalunya nanankanyi dungalanyi, nanamuku jala yalu jungku mikuyaji dungalanyi. Wajbakiyi yalunya nanankanyi kajanyi dungalanyi. Baki barriwa, baki wijbakiyi ngakindurri. Jilalajbakiyi ngakindu yurrngumba barri. Baki yuku barri janyulu mirnarrijba Kud muwa nganyi, janyulu mili wankamba ninya.” Barriwa.
MAR 10:22 Jali nyulu manku nanda jangkurr nangangi Jisuskanyi nganinyiwanyi, baki barlba nyuli. Baki ngindu nyuli muwa nanankanyi jangkurranyi. Ngindu nyuli muwa, jungkungangi nyuli kajayudi yajiyudi marda dungalayudi. Barlba nyuli nanganbunanyi Jisusnanyi, ngala miku nyuliyala yabimba nanda jali karu Jisuswanyi. Barriwa.
MAR 10:23 Baki yanybayi Jisus nanganginkanyi kandimukuyngka, “Warriyaluku barri jala nyulu kajayudi yajiyudi baki dungalayudi. Jardibirri nyulu jungunkanyi kandi nangangi Kudkanyi, nyulu lalanbikanyi Kudwanyi. Jardibirri nyulu jungunkanyi kandi nangangi Kudkanyi, jala nyulu kajayudi yajiyudi.”
MAR 10:24 Manmala yali kandimuku. Manmala yali nanganginkanyi jangkurranyi. Baki mili yanybayi Jisus yalungi, “Jala nganinyi jirdi kajanyi yajinyi, jala nyulu nulijba jungunkanyi kandi nangangi Kudkanyi baki nanda jardibirri.
MAR 10:25 Jalimi nanda kamil ngankijba kalawunyi yamina nidilina, baki nanda jardibirri. Mikuwali ngankijba. Ngala jala nganinyi jirdi kajanyi yajinyi, jala nyulu kuyu jangkurr nangangi Kudkanyi, jala nyulu kandi nangangi Kudkanyi, baki nanda jardibirri nyulu kudanyu barri.” Barriwa.
MAR 10:26 Jali yalu manku nanda jangkurr nangangi Jisuskanyi, baki manmala yali kandimuku. Manmala yali kudanyu barri, baki ngajaka yali Jisus, “Jaliyi jardibirri jungunkanyi kandi nangangi Kudkanyi, baki wanyinmuku janyulu marrimba yalunya mardarda Kudwanyi. Wanyinmuku jayalu wankijba mili nangandu kingkarri.”
MAR 10:27 Baki nyuli ningkijba yalunya Jisuswanyi, baki jananganjayi, “Miku yalungkimi wankamba. Miku. Ngawamba Kudwanyi, yuku nyulu wankambaja yalunya mili. Yuku barri nyulu. Ngawamba Kudwanyi, yuku nyulu marrimbaka yalunya mardarda. Yuku nyulu yabimbaka bukamba yaji Kudwanyi.”
MAR 10:28 Yanybayi kandi Bida nangangi, “Ngala nurru barri, yingijba nurri bukamba nurrungi yaji nganyi, baki jilajba nurru nganyindu.”
MAR 10:29 Jananganjayi Jisuswanyi, “Karungka ngayu duja jangkurranyi. Nanda jala ngaki kandi, nyuli yingijba bukamba yaji ngaki. Yingkijba nyuli nangangi barnda. Marda yingijba nyuli yalunya, buwanganjamuku marda majunganjamuku, marda bababanyamba nyulu yalunya. Yingijba nyuli nangangi ngardanganja marda nijanganjinyi. Yingkijba nyuli yalunya, nanganginmuku jandanyimuku marda, baki kardikardimba nyulu yalunya, baki yingijba nyuli nangangi jamba. Bukamba nanganginmuku nyuli yingijba yalunya ngaki.
MAR 10:30 Ngala jangayu wajba nanda yingkanyi yajinyi. Kajanyi yajinyi jangayu wajba. Jangayu wajba nanda kajanyi barndanyi baki jambanyi. Jangayu wajba kajanyi buwanganjanyi, kajanyi majunganjanyi, kajanyi bababanyamba nyulu yalunya. Jangayu wajba kajanyi ngardanganjanyi, kajanyi nijanganjiyngkanyi. Jangayu wajba kajanyi jandayngkanyi, kajanyi kardikardimba nyulu yalunya, Kajanyi yajinyi jangayu wajba nanda jali nyulu yingijba bukamba nangangi yaji ngaki. Baki jangayu munyajba yalunya waykurri nanda kijinyi. Jangayu munyajba yalunya linjumbikurri nangangi mankanyi. Ngala janyulu jungku mili wanka yurrngumba barri. Janyulu jungku mili wanka kingkarri nangandu Kudnyina.
MAR 10:31 Kajamuku jala ngamu yalu walkurra, janyulu baku bayakardamba yalunya Kudwanyi. Janyulu bayakardamba yalunya jala ngamu yalu walkurra. Ngala yingkamuku jala yalungka mankumanku, yalu bayakarda, janyulu walkurramba yalunya Kudwanyi. Janyulu walkurramba yalunya barri.” Barriwa. Nani yanybayi Jisus yalungi, ngala yali jilajba yubalina.
MAR 10:32 Mili yali jilajba kula Jirusalimyurri, Jisus marda nanganginmuku kandimuku. Jilajbayi Jisus waluwa, ngala jilajbayi kandimuku bayngkani nangandu, baki yingkamuku yalundu. Manmala yali kandimuku Jisuskanyi. Manmala yali nangangi, nyulu wiykanyi Jirusalimyurri. Ngala nanamuku yingkamuku yalundu, yali marrala yajinyi. Mili yanybayi Jisus yalungi nanganginmukuyngka kandimukuyngka. Kardarda nyuli yanyba yalungi. Mikuyaji yingkanyi mankunkanyi nangangi jangkurr, ngawamba kandimukunyi. Karu nyuli yalunya nanankanyi jalija yabimba yaji nangangi baku barri yingkamukunyi.
MAR 10:33 Yanybayi Jisus yalungi, “Narri. Ngambalaja jilajba kularriji. Ngambalaja jilajba nanankurri Jirusalimyurri. Janganjalu wudumba, Buwanya Bukambijuyngka. Janganjalu wudumba walkurrawanyi mambukawanyi jurjkanyi, marda milidimbawarrmukunyi yuwanyi. Jayalu yanyba ngaki, marda ngakimi janyba. Baki ngaki jayalunjalu wajba ngurranyimuku.
MAR 10:34 Janganjalu bajalingijba nanamukunyi ngurranyimukunyi. Jayalu yanyba balki jangkurr ngaki. Jayalu kakalijba ngaki. Janganjalu wajuba kurulyudinyi. Janganjalu langandaba kurndana. Nani barri janganjalu kurdanba barri. Ngala baku barri kujarraka barndayka jangayu mili wankijba. Nanamanji barri jangayu mili wankijba barri.” Nani barri yanybayi Jisus yalungi, nanganginmukuyngka kandimukuyngka. Barriwa.
MAR 10:35 Ngala yali jilajba kula yubalina, baki jilajba buli bundu nangandurri Jisusyurri, buwakula Jayims baki Jun. Bulangi nijanganjinyi, nangangi niji Sibidi. Jilajba buli bundu nangandurri, baki yanyba buli nangangi, “Milidimbawarr. Janinya ngaliya ngajaka yajinyi, janinji yabimba nanda yaji ngalingi.”
MAR 10:36 Jananganjayi bulanya Jisuswanyi, “Wanyimba jangayu nimbalangi. Wanyimba.”
MAR 10:37 Baki jananganja buli, “Jalija ninji jungku walkurra mambuka kingkarri yajina Kudkanyi, baki janinji kuyu ngalinya kingkarri nganyindu, ngaliya jungunkanyi nganyindu, jungunkanyi yingka janyanyina nganyindu, yingka wakunyina nganyindu, jangaliya jungku barrinani mambukawuya bayngkani nganyindu. Nani kuna jangaliya jungku nganyindu jalija ninji jungku walkurra mambuka kingkarri barri.”
MAR 10:38 Jananganjayi bulanya Jisuswanyi, “Miku nimbalimi jingkijba nanda jangkurr jali ngana ngajaka. Janganjalu linjumba. Janganjalu kurdanba. Nani kuna jayalu linjumba nimbalanya, jayalu kudanyu linjumba nimbalanya marda. Nulijba kuna nimbala nanankanyi linjumbikanyi nimbalanya, barrinani jayalu yabimba yaji ngaki. Nani kuna nimbala nulijba.”
MAR 10:39 Jananganja buli buwakulawanyi, “Yuku barri ngali. Yuku jayalu ngalinya linjumba nani barri.” Baki mili yanybayi Jisus bulangi, “Jayalu linjumba nimbalanya. Jayalu kudanyu linjumba nimbalanya barrinani janganjalu linjumba.
MAR 10:40 Ngala wanyinmuku jayalu jungku walkurra ngakindu. Miku ngayiyi yarrijba yalunya, jalija yalu jungku walkurra ngakindu. Ngala ngakinyi Buwakayu, janyulu nyulu yarrijba yalunya yingka janyanyina, baki yingka wakunyina ngakindu. Birrirrinja nyuli nanamukuyngka jalija yalu jungku mambuka bayngkani ngakindu. Yiningki nimbala. Yiningki yingkamuku.”
MAR 10:41 Ngala manku yali yaji yingkamukunyi kandimukunyi. Manku yali bulanya ngajakankurri Jisus nanankanyi yajinyi, baki yali ngarrangarra muwa bulangi, Jayimskanyi baki Junkanyi.
MAR 10:42 Baki nyuli karu yalunya Jisuswanyi, yaluja jilajba nangandurri, baki nyuli yanyba yalungi, “Narri barri. Jingkijba narri yalunya walkurramuku mambukamuku ngurranyimuku. Yalu yanybaka nyilala jangkurr yalungi. Yalu ngirrwawarrmuku. Yingkamuku yalu birrirra yalungi.
MAR 10:43 Ngala narri barri, marda narrimi miku jungku walkurra mambuka barrinani yalu ngurranyimuku jungkuka walkurra mambuka. Miku. Jaliyi yingamali narringi, jaliyi nyulu nulijba jungunkanyi walkurra mambuka, baki marda nangkimi bayakardamba. Marda nyulimi lalanba yalunya yingkamuku. Marda nyulimi waki yalungi yingkamukuyngka.
MAR 10:44 Jaliyi nyulu nulijba jungunkanyi mili walkurra yalungi, baki marda nyulimi jungku barrinani wakiwarr yalungi. Marda nyulimi waki kudanyu yalungi yurrngumba barri.
MAR 10:45 Marda nyulimi jungku barrinani ngayu. Ngayu Buwanya Bukambijuyngka yalungi, ngala badajba ngayi lalanbiji yalunya, miku yaluwali lalanbiji ngana. Jayalu mili wankijba nangandu Kudnyina, janybangangi jangaka yalungi.” Barriwa.
MAR 10:46 Mili yali jilajba kula, baki wanbiya yali barrawuyabarrawuyana niji Jiriku. Baki mili yali barlba nanamunanyi bayungu barri, Jisus marda nanganginmuku kandimuku. Walajbayi walkurra muramuku, baki jilajba yali nangandu Jisusnyina. Jungkuyi nganinyi wilina yubalina. Nyuli kabuji yami. Niji nangangi Bardimayus. Nangangi nijanganjinyi, niji nangangi Dimayus. Jungku nyulili wilina yubalina nanda kabuji, bakili nyulu ngajaka yalunya dungalanyi, jalili yalu jilajba nanganbiyangka.
MAR 10:47 Jungkuyi nanda kabuji wilina yubalina, ngala jilajbayi walkurra muramuku nanganbiyangka. Manku nyuli yalunya yanybikurri yalungka nangangi Jisuskanyi, jali nyulu mungkiji nanankanyi yajinyi, niji Nasarid. Yanyba yalungki nangangi jisuskanyi, nyuli nanaba yalundu. Baki kayayi nanda kabuji. Kaya nyuli kudanyu barri, “Jisus. Ninji jandanyi nangangi wankalanyi Dayibidkanyi. Ngindukiyi muwa ngaki kabujinyi. Ngindukiyi muwa ngaki.” Nani barri nyuli kaya kudanyu barri.
MAR 10:48 Kajamuku yali ngirrwa nangangi kurrkunbiji kayankurri. Ngala mili nyuli kaya kudanyu barri, “Jisus, ninji jandanyi nangangi Dayibidkanyi. Ngindukiyi muwa ngaki.”
MAR 10:49 Jilajbayi Jisus, baki karrinjayi. Baki yanyba nyuli, “Kuyukiyi kawa ngakindurri nanda kabuji.” Kudiya yali jilajba nangandurri kabujiyurri, baki yanyba yali nangangi, “Yuku barri, walajbakiyi kawa. Kayangka Jisus nganyi. Nyulu kayangka nganyi. Walajbakiyi kawa.”
MAR 10:50 Dulaba nangki danyan nanda kabuji, baki walajbayi. Baki jilajba nyuli nangandurri Jisusyurri.
MAR 10:51 Ngajakayi kabuji Jisuswanyi, “Wanyimba jangayu nganyi. Wanyimba.” Jananganjayi kabujiwanyi, “Milidimbawarr. Nulijba ngayu mili naykanyi yaji. Ngayimi mili najba yaji.”
MAR 10:52 Baki yanybayi Jisus nangangi, “Barriwa barri barlbakiyi. Nganinji jingkijbangka, yuku ngayuja kunymamba ninya. Jangayu yabimba ninya naykanyi yaji, jingkijbangangi nganinji, yuku ngayuja kunymamba ninya.” Baki yinarramba najbayi yaji nanangini kabujiwanyi. Najba nyuli yaji, baki jilajba nyuli nangandu Jisusnyina mili bayungu barri. Barriwa.
MAR 11:1 Jilajba yali bayungu, Jisus baki nanganginmuku kandimuku. Bunundujba yali Jirusalimyurri. Nanda barrawuyabarrawuya Jirusalim, nanda yaji bayinga, ngala yingka bayakarda barrawuyabarrawuya niji Bidbaj, nanda yaji kulaya, ngala yingka bayakarda barrawuyabarrawuya niji Bidani karriya. Ngala langkiya barri nanda kulawira niji Yulib. Ngala yali bunundujba Jirusalimyurri, baki manjijbayi Jisuswanyi kujarra kandiwuya waluwa yalundu.
MAR 11:2 Jirrinyba nyuli bulanya, “Janimbala ngankijba nayinda barrawuyabarrawuya kulaya, baki nanaba janimbala wakaramba yirrikirri. Janimbala wakaramba yirrikirri walkurra bijal kijijinyi. Jilijbawa yalu jungku ngulurrina yirrikirrina. Janimbala dulaba kurul, baki kuyu nimbalaja ngakindurri.
MAR 11:3 Jaliyi yingkawanyi ngajaka nimbalanya, wanyimba nimbalaja nanda yirrikirri, baki janimbala jananganja, ‘Nyulu nulijbangka yirrikirrinyi nanda mambuka, ngala janyulu manjijba nganyindurri kamu barri jalija nyulu bukamba.’ Nani barri janimbala jananganja.” Barriwa.
MAR 11:4 Barlba buli kandiwuya, baki wakaramba buli yirrikirri kijijinyi danbina barrawuna. Dulaba buli kurul.
MAR 11:5 Ngala kudiyamukunyi jali yalu karrinja nanaba, najba bulanjali dulaykurri kurul, baki ngajaka yali, “Wanyimba janimbala yirrikirrinyi. Wanyingkanyi nimbala dulaba kurul.”
MAR 11:6 Jananganja buli nanankanyi jangkurranyi jali karu bulanya yanybikanyi Jisuswanyi. Baki manjijba yali yirrikirri bulandu. Barriwa.
MAR 11:7 Baki kuyu buli nanda yirrikirri nangandurri Jisusyurri. Dulaba buli bulangi danyan, baki yarrijbayi nanda jumbala yirrikirrina ngulurrina. Baki jungkuyi Jisus yundu ngulurrina.
MAR 11:8 Kajamuku yali nangandu Jisusnyina, walkurra muramuku. Yingkamukunyi yali dulaba yalungi danyan, baki yarrijba yali yubalina, nanda yirrikirri jilaykanyi nyulu jumbalana. Ngala yingkamukunyi, yali dalyamba wanjirr kurndananyi, baki yarrijba yali wanjirr yubalina. Nani barri yalili yabimba yaji, jalili badajba walkurra mambuka yidambiji yalunya.
MAR 11:9 Baki yingkamuku yali jilajba walu nangandu Jisusnyina, ngala yingkamuku yali jilajba bayngkani nangandu. Bukambiju yali kaya kunyba jangkurr nangangi Kudkanyi. Kudanyu yali kaya nangangi, “Nayinda nyulu walkurra mambuka. Nurru wajbangka Kud kunybanyi jangkurranyi nurrunginkanyi, nangangingangi Jisuskanyi. Ninya nurru ngajakangka, janinji yabimba kunyba yaji nangangi Jisuskanyi. Nyulu walkurramirra mambuka nurrungi Jumukuyngka, barrinani nanda wankalanyi Dayibid, nyuli walkurramirra mambuka yalungi barri. Mirnarrijbangka nurru muwa nangangi barri.” Nani barri yali kaya, ngala yali jilajba yubalina nangandu.
MAR 11:11 Jali ngankijba Jisus Jirusalim karrina muwa, baki jilajba nyuli walkurrayngkurri jurjyurri nanaba. Ngankijba nyuli kalawuyngkurru, baki ningkijba nyulu yaji nanaba kalawuyngkurru. Kudanyu nyuli ningkijba yaji lukuluku barri, baki mili walajba nyuli jurjnanyi. Baki barlba yali karri, Jisus baki nanganginmuku kandimuku. Jilajba yali karri nanankurri bayakardarri barrawuyabarrawuyarri, niji Bidani. Jilajba yali kulukanki nanaba, ngabungabungangi nyuli yaji.
MAR 11:12 Munganawa barri jali yalu wijba karrina Bidaninanyi, baki birrkalanyi nyuli Jisus.
MAR 11:13 Najba nyuli kurnda barrinani kalawumbi jujunkurri. Nanda kurnda kajayudi wanjirryudi. Jilajbayi Jisus nanankurri kurndarri wudumbiji mama. Ngala najba nyuli mikuyaji mamanyi nanaba, ngawamba wanjirr. Jilijbawa jardijbangka mama.
MAR 11:14 Baki yanybayi Jisus nanankanyi kurndanyi, “Miku jayalu mili jarrba mama nanginkanyi kurndanyi, mikuwalingangi jardijba mili mama nanginyina kurndana.” Kandimuku nangangi Jisuskanyi, yali nanaba nangandu. Manku yali nanda jangkurr jali yanyba Jisus nanankanyi kurndanyi. Manku yali nangangi jangkurr. Barriwa.
MAR 11:15 Mili yali jilajba. Wanbiya yali Jirusalim, baki ngankijbayi Jisus walkurranyina jurjina nanaba. Ngankijba nyuli, baki najba nyuli yalunya nanaba. Yalunjali wawajba yajinyi dungalanyi, baki wudumba yali bayngkani dungala yajinyi. Najbayi yalunya Jisuswanyi, baki ngarrangarrayi muwa. Jakajba nyuli yalunya bukambiju nanamunanyi jurjnanyi. Janyba nyuli yalungi darladarlamuku dungalayudi. Kudiya yali jungku darladarlana, jali yalunjalu wajba kulukukunyi dungalana. Baki janyba nyuli yalungi darladarla marda.
MAR 11:16 Kudiyamukunyi muningka yali kuyu yalungi yaji kalawuyngkurru barrikina lukuluku nananyina jurjnyina. Birlbirdamba yali barriki yalunginjudinyi yajiyudinyi. Kurrkunbayi yalunya Jisuswanyi. Ngirrwa nyuli yalungi, “Miku narriyi kuyu yaji nayiwa. Janarri kuyu yaji nanawa danbina lukuluku barri.”
MAR 11:17 Milidimbayi yalunya Jisuswanyi. Yanyba nyuli nayi barri, “Nanda naja nangangi Kudkanyi yanybaka, ‘Kajamuku jayalu badajba ngakinkurri walkurrayngkurri jurjyurri. Jayalu badajba kajananyi yajinanyi ngurranyimuku. Jayalu yanyba mududu ngaki nanaba.’ Nani barri yanybaka jangkurr najana Kudkanyi, ngala narri barri, narri maninjakumuku. Narri maninjakujbangka yaji nanginyina nanganginyina jurjina.” Nani barri yanybayi Jisus yalungi.
MAR 11:18 Ngala mambukamuku jurjkanyi baki nanamuku jali yalu milidimba yuwanyi Musiskanyi, yali nanaba marda jurjina. Manku yali nanda jangkurr nangangi Jisuskanyi, baki nulijba yali kurdanbikanyi Jisus. Baki yanyba yalungki, yanka jayalu kurdanba. Ngala marrala yali nangangi Jisuskanyi. Marrala yali nangangi. Kajamukunyi yali manku Jisus milidimbikurri jangkurranyi Kudkanyi. Manku yali nangangi jangkurr, baki bukambiju yali manmala nanganginkanyi jangkurranyi. Manmala yali bukambiju, baki nanankardi barri marrala yali nangangi mambukamuku jurjkanyi baki milidimbawarrmuku.
MAR 11:19 Jali nyulu ngabungabu yaji, baki mili barlba yali Jirusalimnanyi, Jisus baki kandimuku. Jilajba yali karri nanankurri yingkayurri barrawuyabarrawuyarri kulukaja nanaba. Barriwa.
MAR 11:20 Munganawa barri wijba yali Jirusalimyurri. Wijba yali nananyina yubalina jali yalu jilajba wulani. Najba yali nanda kurnda jali ngirrwa Jisus nangangi. Dukujbayi bukamba wanjirr. Janyba nangki mankanyi nangangi.
MAR 11:21 Mankuwayi Bidawanyi nanda jangkurr jali ngirrwa Jisus nanankanyi kurndanyi. Baki yanyba nyuli nangangi Jisuskanyi, “Milidimbawarr. Najbakiyi nanda kurnda jali ninji ngirrwa. Janyba nangki barri. Janyba nangki.”
MAR 11:22 Yanybayi Jisus yalungi kandimukuyngka, “Marda narrimi kuyu nangangi jangkurr Kudkanyi.
MAR 11:23 Ngayu karungka narrinya, jaliyi narri kudanyu kuyu nangangi jangkurr Kudkanyi, baki janarri jingkijba Kud. Janarri jingkijba Kud, janyulu yabimba nanda yaji jala narri ngajaka Kud yabimbikanyi yaji. Miku narringkimi mankumanku nangangi, yiningki janyulu yabimba narringi yaji Kudwanyi, yiningki miku. Janarri jingkijba Kud, janyulu yabimba nanda yaji jala narri ngajaka. Jaliyi narri kudanyu kuyu nangangi jangkurr nani barri, baki yuku barri janarri marda yabimba nanamannga ngiruka yaji. Janarri yanyba kulawiranyi, ‘Ninji kulawira, walajbakiyi. Yirrirdkunumba nganyingkiyi. Jungkukiyi kanjana.’ Nani barri janarri yanyba kulawiranyi, baki janyulu ngayangayijba narringinkanyi jangkurranyi. Janangka yirridkurnumba. Janyulu jungku kanjana.
MAR 11:24 Jala narri ngajaka Kud yajinyi, jaliyi narri kudanyu kuyu nangangi jangkurr Kudkanyi, jaliyi narri jingkijba Kud, janyulu yabimba nanda yaji jala narri ngajaka Kud yabimbikanyi yaji, baki janyulu yabimba nanda yaji narringi. Janyulu yabimba nanda yaji jala narri ngajaka.
MAR 11:25 Waluwa narri yanyba mududu nangangi Kudkanyi, waluwa narri ngajaka Kud yajinyi, baki marda narringkimi mankumanku, jaliyi yingkawanyi yabimba balki yaji narringi barri. Baki marda narrimi manjamanjamba nanda balki yaji jali nyulu yabimba narringi. Marda narrimi mamanumba nangangi balki yaji. Baki narringinyi Buwakayu kingkarri, janyulu manjamanjamba narringi balki yaji marda. Baki yuku barri janarri yanyba mududu nangangi Kudkanyi. Janarri ngajaka Kud yajinyi.” Barriwa.
MAR 11:27 Mili yali jilajba bayungu, baki wanbiya yali Jirusalim. Baki mili ngankijbayi Jisus walkurranyina jurjina. Jilajba yali nangandurri, mambukamuku jurjkanyi, marda milidimbawarrmuku yuwanyi, marda malbumalbu.
MAR 11:28 Ngajaka yali Jisus, “Wanyingini yarrijba ninya mambuka. Wanyingini ninya karu jakaykanyi yalunya jurjnanyi. Wanyingini ninya karuyi milidimbikanyi yalunya.” Barriwa.
MAR 11:29 Jananganjayi yalunya Jisuswanyi, “Waluku barri jangayu ngajaka narrinya yajinyi. Jaliyi nganarri jananganja, baki yuku jangayu karu narrinya, wanyingini ngana karuyi yabimbiji yaji nani barri.
MAR 11:30 Ngala waluku barri janganarri karu, wanyingini manjijbayi nganinyiyurru Jun ngurrunbiji yalunya. Wanyingini manjijbayi. Yiningki Kudwanyi, yiningki nganinyiwanyi. Waluku janganarri karu.” Barriwa.
MAR 11:31 Baki karda yalungki jakakajba. Yanyba yalungki, “Wanyingkanyi jangambala jananganja. Wanyingkanyi. Jaliyi ngambala yanyba, manjijbayi Jun Kudwanyi, baki janyulu yilikajba ngambalanya, ‘Ngala wanyingkanyi miku narriyanyi kuyu nangangi jangkurr.’ Nani janyulu yilikajba ngambalanya, jaliyi ngambala yanyba, manjijbayi Jun Kudwanyi.
MAR 11:32 Ngala kajamuku muramuku, yalu yanybaka nangangi Junkanyi, nyuli yanybawarr jangkurranyi nangangi Kudkanyi, jali manjijba Kudwanyi. Jaliyi ngambala yanyba, manjijbayi Jun nganinyiwanyi, baki yiningki jangamanjalu daba. Marrala ngambala yalungi. Yiningki jangamanjalu daba, jaliyi ngambala yanyba, manjijbayi nganinyiwanyi.” Barriwa. Nani barri yalungki jakakajba wanyingkanyi jangkurranyi jayalu jananganja Jisus.
MAR 11:33 Nanankardi barri yali jananganja, “Miku nurriyi jingkijba, wanyingini manjijbayi Jun. Miku nurriyi jingkijba.” Barriwa. Baki yanybayi Jisus yalungi, “Miku nganarriyanyi jananganja kunymamba, baki miku ngayiyi jananganja narrinya. Miku ngayiyi karu narrinya nanankanyi jali ngana karu milidimbiji yalunya.” Barriwa.
MAR 12:1 Mili barri yanybayi Jisus yalungi milidimbiji yalunya. Muningka nyuli yanyba yalungi, “Karrinjarrijbayi krayib wanjirr malbuwanyi nanganginyina jambana. Karrinjarrijba nyuli kaja wanjirr jambana. Yabimba nyuli barriki lukuluku jambana, baki kurrijba nyuli lawarr. Nanda lawarr jidimbikanyi ngarrki krayibnanyi. Baki nyuli yabimba barrawu jungunkanyi nganinyi kalawunyi, jala nyulu lalanba nanda jamba. Nani nyuli yabimba yaji malbuwanyi. Baki yarrijba nyuli yingkamuku nganinyimuku, yalu lalanbiji nangangi jamba. Baki janyulu wajba yalunya kudiyayngka krayibkanyi lalanbikanyi nangangi yaji. Baki barlba nyuli yingkayurri yajiyurri. Barlba nyuli juju, baki jungku nyuli nananyina yajina yurrngumba barri. Barriwa.
MAR 12:2 Jardijbayi wanjirr walkurra mamayudi. Jali nanda mama kunyunyu, baki manjijbayi nangangi wakiwarr malbuwanyi. Manjijba nyuli yalundurri, jala lalanba nangangi jamba. Manjijbayi nanda wudumbiji nangangi mama, kudiyambikanyi kudukudu.
MAR 12:3 Ngala nanamuku nganinyimuku jali yalu lalanba nangangi jamba, miku yaliyi kunybamuku. Marrimba yali nanda wakiwarr jali manjijba malbuwanyi. Wajuba yali, baki mili manjijbayi nangandurri malbuyurri mikuyaji mamanyi nangandu.
MAR 12:4 Ngala manjijbayi yingka wakiwarr yalundurri lalanbawarrayngkurri wudumbiji nangangi mama. Ngala marrimba yali nanda wakiwarr marda. Daba yali kulaji, baki yabimba yali balki yaji nangangi.
MAR 12:5 Manjijbayi yingka mili malbuwanyi, ngala yali kurdanba nanda yingka. Mili wakiwarrmuku manjijbayi malbuwanyi, wudumbiji nangangi mama. Jabarri mili yalunjali marrimba nanamukunyi balkimukunyi lalanbawarranyi. Kudiya yali wajuba. Kudiya yali kurdanba barri.
MAR 12:6 Baki manjijbayi yingka yalundurri malbuwanyi. Manjijba nyuli nanganginmirra jandanyi, jali nyulu kudanyu maruka muwa nangangi. Mankumanku nangki malbu, ‘Jalija jilajba ngakinmirra jandanyi yalundurri, baki jayalu karda jungku. Miku yaliyi daba. Jayalu kuyu nangangi jangkurr.’
MAR 12:7 Ngala jali yalu najba nangangi jandanyi jilaykurri yalundurri, baki yanyba yalungki, ‘Nayinda jala badajbangka, nyulu jandanyi nangangi malbunyi. Jalija nangka janyba malbu, baki nangini nanganginyi jandanyiwanyi, janyulu wudumba nayinda jamba ngabayidi. Jangambala marrimba, jangambala kurdanba, baki jangambala kuyu nayinda jamba ngabayidi ngamanginkanyi barri.’ Nani barri yalungki yanyba.
MAR 12:8 Baki jali wanbiya nanda jandanyi, baki marrimba yali. Kurdanba yali, baki janyba yali nangangi mankanyi danbiyurri barrikina.” Barriwa.
MAR 12:9 Baki ngajakayi yalunya Jisuswanyi, “Wanyimbaja malbuwanyi yalunya, jali nyulu yarrijba lalanbikanyi nangangi yaji. Wanyimba janyulu yalungi. Jangayu karu narrinya. Janyulu badajba nanganginkurri jambarri, baki janyulu kurdanba nanamuku balkimuku lalanbawarrmuku. Janyulu kurdanba yalunya, baki janyulu yarrijba yingkamuku lalanbikanyi nangangi jamba. Janyulu yarrijba kunybamuku lalanbawarrmuku. Barriwa.”
MAR 12:10 Mili yanybayi Jisus yalungi, “Jingkijba kuna narri nayi jangkurr najana Kudkanyi jala muningka yanybaka, ‘Jali yalu yabimba barrawu, baki miku yaliyanyi nulijba yingamali kurnda. Ngala janyba yali nanda kurnda. Ngala baku barri yingkawanyi, nyuli yabimba barrawu nangangi Kudkanyi. Wudumba nyuli nanda kurnda jali yalu waluwa janyba, baki yarrijba nyuli yundukula nanganginyina barrawuna Kudkanyi. Nanda jirrinyi kurnda nanganginyina barrawuna.’” Barriwa. Nani yanybayi Jisus yalungi, nyuli barrinani nanda jirrinyi kurnda yundukula, jali waluwa yingkawanyi janyba. Kajamuku yali yurlwa nangangi Jisuskanyi, ngala nyuli yarrijba Jisus walkurra mambuka Kudwanyi.
MAR 12:11 Mili barri yanybayi Jisus yalungi, “Mili nanda jangkurr najana Kudkanyi yanybaka, ‘Ngambala najbangka yaji jala yabimbaka Kudwanyi, baki ngambala mirnarrijbangka muwa nangangi,’ Barriwa.”
MAR 12:12 Mankuyi nangangi jangkurr mambukamukunyi jurjkanyi marda malbumalbuwanyi. Manku yali nanda jangkurr jali muningka nyulu yanyba, baki jingkijba yali, nyulu karuyi yingkamuku jangkurranyi yalungi barri. Jingkijba yalungki, nyuli yanyba yalungi, yalu jungunkanyi balki nangangi Kudkanyi. Baki nanankardi barri yali ngarrangarra muwa nangangi. Yali kijiwijba kudanyu barri. Yaliyanyi marrimba Jisus, yaliyanyi janyba brisinyurri, ngala miku yaliyanyi marrimba. Marrala yali yalungi muramukuyngka. Baki nanankardi barri miku yaliyanyi marrimba Jisus nanamanji barri. Ngala barlba yali nanganbunanyi. Barriwa.
MAR 12:13 Manjijba yali yingkamuku nangandurri Jisusyurri. Manjijba yali kudiya Barasimuku, baki kudiya jali yalu durrijba jangkurr nangangi Yirudkanyi, jali yalu nulijba Yirudkanyi yalunginkanyi mambukanyi. Manjijba yalunjali yilikaykanyi jangkurranyi, balanjankanyi Jisus, nyulu yanybikanyi balki jangkurr.
MAR 12:14 Wanbiya yali nangandu Jisusnyina, baki yanyba yali nangangi, “Milidimbawarr. Nurru jingkijbangka ninya, ninji yanybaka duja jangkurr. Ninji milidimbaka duja nangangi Kudkanyi. Miku ninjimi marrala yalungi yingkamukuyngka. Ninji milidimbaka walkurra mambukamuku baki bayakardamuku. Ninji milidimbaka bukambiju yalunya. Karukiyi nurrunya, wanyi ninji yanyba nanginkanyi. Nanda wirimalaru Kubaminkanyi, niji Sisa, nyulu wudumbaka dungala ngamanbunanyi. Nyulu manjijbangka nganinyimuku wudumbiji dungala ngamanbunanyi. Yuku barri kuna yuwanyi Kudkanyi ngambala waykanyi Kubamin mambuka dungalanyi. Jangambala wajba kuna. Yiningki miku ngambaliyi wajba dungalanyi. Wanyi ninji yanybaka.” Nani yali ngajaka Jisus.
MAR 12:15 Ngala jingkijbayi yalunya Jisuswanyi, balanja yali. Muningka yali ngajaka Jisus, nyulu yanybikanyi balki jangkurr nanankanyi mambukanyi Sisakanyi. Baki jaliyi nyulu yanyba balki jangkurr nani barri mambukanyi, baki jayalu marrimba. Baki yanybayi Jisus yalungi, “Wanyingkanyi nganarri balanjaka. Wanyingkanyi narri nulijbangka jujambikanyi nganarri. Minimbakiyi ngaki yingamali dungala, ngayu naykanyi.”
MAR 12:16 Baki minimba yali dungala. Baki ngajakayi yalunya Jisuswanyi, “Wanyi wali nayiba dungalana. Wanyi niji nayiba dungalana. Wanyi barri.” Baki jananganja yali, “Nayinda nangangi wali baki nangangi niji Sisakanyi.” Barriwa.
MAR 12:17 Baki yanybayi Jisus yalungi, “Ngayu karungka narrinya nanginkanyi jangkurranyi. Wajbakiyi Sisa nanankanyi nanganginkanyi yajinyi, ngala wajbakiyi Kud nanankanyi nanganginkanyi yajinyi.” Barriwa. Jali yalu manku nangangi jangkurr, baki manmala yali. Manmala yali nanganginkanyi jangkurranyi.
MAR 12:18 Badajbayi yingkamuku nangandurri Jisusyurri. Yali Sajusimuku jalili yalu durrijba nanda yuwa nangangi Musiskanyi, ngala yalili yanyba, miku ngambaliyi jungku mili wanka yurrngumba, ngala jangambala jungku kurdan yurrngumba barri. Badajba yali nangandurri, baki yanyba yali,
MAR 12:19 “Milidimbawarr. Yarrijbayi Musiswanyi jangkurr najana Kudkanyi ngambalangi. Nayi nangangi jangkurr yanybaka, jaliyi nangki janyba buwanganja, baki yingijba nyulu nangangi maninganja, ngala bula mikuyaji bardardanyi bulangi. Jaliyi nangka janyba nangangi buwanganja nani barri, baki nanganginyi bababanyamba nyulu, janyulu wudumba nanda jibarri. Baki baku barri jabula wakaramba bardarda, baki jayalu muningka yanyba nanankanyi bardardanyi, ‘Nayinda bardarda, nyulu jandanyi nangangi, nanankanyi buwanganjarruwa. Nyulu nangangi jandanyi.’ Nani barri yanybaka yuwa nangangi Musiskanyi. Nani jayalu muningka yanyba nanankanyi bardardanyi.
MAR 12:20 Janurru nurru karu ninya buwawakulayngka. Kajamuku buwawakula 7-barri. Nanangini lirrkawanyi, nyulu wudumbayi maninganja, ngala bijal barri baku nangki janyba. Mikuyaji bardardanyi bulangi. Mikuyaji. Barriwa.
MAR 12:21 Baki yingkawanyi bababanyamba nyulu bayngkani nangandu, nyuli wudumba nanda miyaji. Ngala janyba nangki nanda nganinyi marda, baki mikuyaji nangangi bardardanyi. Barriwa. Baki yingkawanyi bababanyamba nyulu bayngkani nangandu, nyuli wudumba nanda miyaji, ngala baku barri bijal nangki janyba, mikuyaji nangangi bardardanyi. Barriwa.
MAR 12:22 Nani barri yingkawanyi bababanyamba nyulu, wudumbayi nanda miyaji, baki nangki janyba. Baki yingkawanyi wudumbayi baku, baki yingkawanyi baku barri. Nani barri bukambiju buwawakula yalungki janyba. Ngala nanda miyaji, mikuyaji nangangi bardardanyi. Baki baku barri bayngkani nangki janyba nanda miyaji marda.
MAR 12:23 Baku barri juju, jalija yalu wankijba mili, baki wanyi janyulu nawinganja nanankanyi jibarrinyi. Wanyi barri. Nyuli maninganja yalungi bukambijuyngka buwawakulayngka. Wanyi janyulu nawinganja nanankanyi jibarrinyi.” Barriwa. Nani barri yalu ngajaka Jisus.
MAR 12:24 Ngala jananganjayi yalunya Jisuswanyi, “Barimba narri nanda jangkurr, jali yanyba Musis najana Kudkanyi. Barimba narri nangangi jangkurr. Miku narrimi jingkijba nanda naja Kudkanyi. Baki miku narrimi jingkijba nanda ngiruka yaji jalija yabimba Kudwanyi baku barri.
MAR 12:25 Jalija yalu mili wankijba, baki miku jayalu wudumba maninganja baki nawinganja. Miku jayalu jungku mili maykarra. Ngala jayalu jungku barrinani Yanjilmuku, jala mikuyaji yalungi kayikayinyi.
MAR 12:26 Ngala narri barri, narri yanybaka nanankanyi nganinyiyurruwa, miku nyuliyi wankijba mili. Janyulu jungku kurdan yurrngumba barri. Ngala narri jingkijbangka nanda jangkurr najana Kudkanyi, jali yarrijba Musiswanyi. Ngala jungkuyi Musis mangkurruna yajina, baki yanybayi Kud nangangi. Yanybayi Kud nangangi manikujananyi jali yajba nanda wanjirr. Yanybayi Kud nayinda jangkurr nangangi yalungi wankalamukuyngka, ‘Ngayu Kud nangangi Yabrayamkanyi. Ngayu Kud nangangi Yayisakanyi. Marda ngayu Kud nangangi Jakibkanyi.’ Nani barri yanybayi Kud nangangi yalungi wankalamukuyngka. Mikukiyanyi yanyba Kud, ‘Ngayi Kud nangangi nganinyiyurruwa Yabrayamkanyi. Ngayi Kud nangangi nganinyiyurruwa Yayisakanyi. Ngayi Kud nangangi nganinyiyurrawa Jakibkanyi.’ Mikukiyanyi yanyba Kud nani barri.
MAR 12:27 Miku nyulimi Kud yalungi jala yalu jungku kurdan. Ngala nyulu Kud yalungi nanamukuyngka jala yalu wanka jungku. Nanankardi barri ngambala jingkijba nanamuku wankalamuku, yalu mili wankijba barri, nyulungangi yalungi Kud. Nanangini jangkurrwanyi Kudkanyi minimbaka narrinya, barimba narri nanda jangkurr jungunkanyi mili wanka. Miku narrimi jingkijba nanda ngiruka yaji jalija yabimba Kudwanyi baku. Barriwa.” Nani barri jananganjayi yalunya Jisuswanyi.
MAR 12:28 Yingka jali nyulu jungku nanaba mankunkurri yaji, nyuli milidimbawarr yuwanyi Musiskanyi. Baki jingkijba nyuli, jananganjayi Jisuswanyi kunybanyi jangkurranyi buwawakulayngka. Baki ngajaka nyuli Jisus, “Nanda yuwa jungunkanyi ngambala kunyba nangangi Kudkanyi, kaja nanda jangkurr. Ngala wanyi nanda yingamali jirrinyi jangkurr. Janganinji karu, wanyi yingamali jirrinyi jangkurr.”
MAR 12:29 Jananganjayi Jisuswanyi, “Nayinda barri jirrinyi jangkurr narri ngayangayiykanyi. ‘Bukambiju narri Jumuku. Janganarri manku. Ngambalangi Kud, ngawamba nyulu duja Kud. Nyulu duja wirimalaru ngambalangi.
MAR 12:30 Marda ninjimi maruka muwa nangangi Kudkanyi. Marda ninjimi kudanyu maruka muwa nangangi. Marda ninjimi kudanyu nulijba nangangi Kudkanyi nganyinyina kurduluna. Marda nganyingkimi mankumanku nangangi Kudkanyi nganyinyina kulajina. Marda ninjimi waki kudanyu nangangi barri.’ Nayinda nanda yingamali jirrinyi jangkurr narri ngayangayiykanyi.
MAR 12:31 Marda yingka jirrinyi jangkurr bayngkani nangandu. Nayi barri, ‘Nganyingka maruka muwa, baki nani barri marda ninjimi kudanyu maruka muwa yalungi yingkamukuyngka marda.’ Nanginkujarra jirrinyi yuwa narringi barri. Miku yingka yuwa mili jirrinyi nanginkujarrayngka.” Barriwa.
MAR 12:32 Mili yanybayi nanda milidimbawarr nangangi Jisuskanyi, “Yuku barri milidimbawarr. Kunyba nganyi jangkurr. Ngambalangi Kud, ngawamba nyulu duja Kud. Nyulu duja wirimalaru. Mikuyaji yingkanyi.
MAR 12:33 Kunyba nganyi jangkurr, marda ngambalimi kudanyu maruka muwa nangangi Kudkanyi. Marda ngambalimi kudanyu nulijba nangangi Kudkanyi ngamanginyina kurduluna. Marda ngambalakimi mankumankuwa nangangi Kudkanyi ngamanginyina kulajina. Marda ngambalimi kudanyu waki nangangi. Marda ngambalimi kudanyu maruka muwa yalungi yingkamukuyngka, barrinani ngambalaka maruka muwa. Nanginkujarra jirrinyi yuwa ngambalangi. Jala ngambala wajba Kud barnyinyi, jala ngambala yundijba nanda barnyi nangangi Kudkanyi, baki ngambala yabimba kunyba yaji. Ngala jala ngambala ngayangayijba nanginkujarrayngka yuwanyi, baki ngambala yabimbaka mili kunyba yaji.” Nani barri yanybayi nanda milidimbawarr nangangi Jisuskanyi.
MAR 12:34 Jali manku nangangi jangkurr Jisuswanyi, baki jingkijbayi Jisuswanyi, nyuli kunyba kulaji nanda milidimbawarr, baki jananganja nyuli kunyba jangkurr. Baki yanybayi Jisus nangangi, “Nyulu lalanbaka nanganginmuku kandimuku Kudwanyi. Nyulu lalanbaka yalunya. Ninji jingkijbangka kudiya nangangi yaji Kudkanyi. Barringa barri ninji kandi nangangi Kudkanyi.” Nani barri yanybayi Jisus nangangi. Baki nani barri nyuli jananganja yalunya kunybanyi ngirukanyi jangkurranyi, jali yalu ngajaka Jisus yajinyi. Baki nanankardi barri miku yaliyanyi mili ngajaka Jisus yajinyi. Marrala yalu ngajakankanyi mili jangkurranyi. Barriwa.
MAR 12:35 Jungkuyi Jisus walkurranyina jurjina, baki nyuli milidimba yalunya muramuku yajinyi. “Nanamuku milidimbawarrmuku yuwanyi Musiskanyi yalu yanyba nangangi Krayiskanyi, nanda walkurra nganinyi Dayibid, nyulu barrinani wankalanyi miminganja nangangi Krayiskanyi.
MAR 12:36 Ngala yarrijbayi jangkurr najana Dayibidwanyi. Yarrijba nyuli jangkurr jali minimba Kunybawanyi Ngarnduwanyi Kudkanyi. Nayinda nanda jangkurr jali yarrijba Dayibidwanyi, ‘Yanybayi Kud ngakinkanyi mambukanyi Krayiskanyi. Yanybayi Kud nangangi, “Jungkukiyi ngakindu. Kajamuku jala miku yalimi maruka muwa ngaki, janinya yalu daba, ngala jangayu ngayu yalunya daba wakara barri. Jangayu wakaramba yalunya, jalija ngayu daba yalunya. Baki jayalu jingkijba ninya, ninji barri mambuka yalungi.’” Nani nyuli yarrijba jangkurr najana Dayibidwanyi.
MAR 12:37 Yanybayi Dayibid nangangi Krayiskanyi, nanda Krayis, nyulu nangangi mambuka. Ngala yanka barri nyulu Dayibid barrinani wankalanyi miminganja nangangi Krayiskanyi, nanankanyi jali nyulu kuyu nangangi mambuka. Yanka barri.” Nani barri yanybayi Jisus yalungi muramukuyngka. Baki mirnarrijba yali muwa jali yalu manku nangangi jangkurr. Mirnarrijba yali muwa nanganginkanyi jangkurranyi.
MAR 12:38 Baki mili nyuli milidimba yalunya muramuku, “Najbawa janarri yalunya, milidimbawarrmuku yuwanyi Musiskanyi. Najbawa janarri yalunya. Yalili jilajba wunanybalayudi danyayudi nukamiyurru wayka, baki yingkamukunyi jayalunjalu jingkijba, yalu milidimbawarrmuku yuwanyi. Muningka yalili jilalajba lukuluku barrawuyabarrawuyana. Muningka yalili jilalajba, nulijbangangi yalu yingkamukuynga, yalunjalu naykanyi, marda jingkiykanyi yalungi, yalu jirrinyi nganinyimuku.
MAR 12:39 Jalili yalu jungku jurjina, baki wangarrina, bakili yalu jungku walu barri yalundu mambukamukunyina.
MAR 12:40 Ngala miku yalunjalimi lalanba jibarrimuku miyajimuku, ngala yalili kuyu yaji yalunbunanyi, nanda yalungi yaji. Bakili yalu yanyba mududu nangangi Kudkanyi. Yalili kudanyu yanyba mududu nangangi, nulijbangangi yalungi yingkamukuyngka, yalunjalu naykanyi yanybikurri mududu nangangi. Miku yalimi yanyba mududu kunymamba. Muningka yalu yanyba mududu nangangi nananyina yajina jalija yalunjalu najba kajamukunyi. Ngamu yalu jungku kunyba nangangi Kudkanyi, ngala miku. Nani barri yalili yabimba balki yaji nanamukunyi milidimbawarrmukunyi, baki nanankardi barri janyulu daba yalunya Kudwanyi. Jayalu jungku kurdan yurrngumba barri, jalija yalungka janyba.” Barriwa.
MAR 12:41 Jungkuyi Jisus walkurranyina jurjina bundu darladarlana. Nanda darladarla jangumba yarriykanyi dungala kalawuyngkurru nangangi Kudkanyi. Jungkuyi Jisus bundu darladarlana, baki muningka nyuli najba yalunya. Najba nyuli yalunya nganinyimuku baki jibarrimuku yarriykanyi dungala darladarlana. Nani barri yalili wajba Kud dungalanyi nanamanji barri. Kajamukunyi jirdi kajanyi yajinyi baki kajanyi dungalanyi, yarrijba yali kaja dungala darladarlana, ngala yuwajiwa kaja dungala yalundu. Kiliyi kaja dungala yalundu.
MAR 12:42 Baki jilajbayi jibarri nanankurri. Nyuli miyaji. Ngawamba bijal yaji nangandu. Jilajba nyuli darladarlarri, baki yarrijba nyuli kujarra bayakarda dungala kalawuyngkurru. Nanankujarra dungalawuya barrinani yingamali bayakarda dungala ngambalangi nanijba barri. Yarrijba nyuli nanankujarra bayakardawuya dungala darladarlana.
MAR 12:43 Kandimuku nangangi Jisuskanyi, yali nanaba nangandu jurjina. Baki yanybayi Jisus yalungi, “Ngayu karungka narrinya duja. Nanangini jibarriwanyi miyajiwanyi, nyuli yarrijba barrinani kaja dungala darladarlana. Ngala nanamukunyi yingkamukunyi, yarrijba yali barrinani kujajarra dungala darladarlana.
MAR 12:44 Yarrijba yali kaja dungala kalawuyngkurru, ngala yuwajiwa kaja mili dungala yalundu. Baki nanankardi barri yali yarrijba barrinani kujajarra dungala. Ngala nanangini miyajiwanyi, yarrijba nyuli ngawamba kujarra bayakarda dungala. Ngala yarrijba nyuli bukambiju nangangi dungala darladarlana. Baki nanankardi barri nyuli yarrijba barrinani kaja dungala, mikuyajingangi mili dungalanyi nangandu wudumbikanyi yaji. Mikumirra.” Barriwa.
MAR 13:1 Jali walajba Jisus walkurrananyi jurjnanyi, baki yanybayi yingka kandi nangangi, “Milidimbawarr. Ningkijbakiyi nayinda walkurra jurj, kunybamirra, jirdi kajanyi walkurrayngka dungalanyi jali yalu dalburrijba yabimbikanyi jurj.”
MAR 13:2 Yanybayi Jisus, “Yi. Nayinda jurj walkurra. Ngala dalyawijbaja nayinda jurj bukamba barri. Jarrbalijbaja bukamba dungala. Mikuyaji yingkanyi dungalanyi yundu nangandu. Jarrbalijbaja bukamba dungala.” Barriwa.
MAR 13:3 Baki jilajbayi Jisus karri, baki kirrijba nyuli kulawirana niji Yulib. Baki badajba yali kudiyamuku kandimuku nangandurri, Bida baki Jayims, baki Jun, baki Yandru. Badajba yali yanybiji karda nangangi. Jungku yali karriya kulawirana, baki najba yali nanda walkurra jurj bayinga barri.
MAR 13:4 Ngajaka yali Jisus, “Karukiyi nurrunya, wanyimbala dalyawijbaja nanda walkurra jurj. Wanyimbala. Yanka janurru jingkijba, jalija dalyawijba, jalija nangka bukamba nayinda yaji. Karukiyi nurrunya, wanyimbaja yaji nanamanji barri.” Barriwa.
MAR 13:5 Baki jananganjayi yalunya Jisuswanyi, “Marda narringkimi lalanbawa, baki marda narrimi miku munyajba yingka jujambikanyi narrinya.
MAR 13:6 Nanamanji jayalu badajba, nanamuku jujambawarrmuku. Waluwa yingka, baki bayngkani yingka, baki yingka, baki yingka. Jayalu yanyba, ‘Ngayu Krayis, nanda jali manjijba Kudwanyi.’ Nani barri jayalunjalu jujamba.
MAR 13:7 Nanamanji barri janarri manku yaji yalungi yingkamukuyngka, jayalungka daba. Janarri manku yaji yalungi, jayalungka daba, yingkamuku bundu narringinyina yajina, ngala yingkamuku juju. Ngala marda narrimi miku marrala. Marda narrimi miku marrala, jalija narri manku yaji yalungka daykurri. Bunjulijba jayalungka daykanyi, ngala jilijbawa bukambaja yaji Kudwanyi.
MAR 13:8 Ngayu karungka narrinya, jayalungka daba. Yalu, jala yalu jungku yingkana yajina, baki yingkana yajina, jayalungka daba ngurranyimuku. Baki nanamanji barri kulbaja jamba marda. Kudanyu barri kulbaja kudukudu jamba, bundu baki juju barri. Baki mikuwali jardijba nanda mama kajana yajina, baki jayalu birrkalanyi jungku, mikuyaji mamanyi. Bukamba nayinda kiji badajbaja waluwa, baki bayngkani barri mili kiji badajbaja, walkurra kiji. Barriwa.
MAR 13:9 Marda narringkimi lalanbawa. Nanamanji barri jayalu marrimba narrinya, baki janarrinya kuyu nangandurri mambukarri kurdusyurri. Jayalu wajuba narrinya jurjina. Jayalu karrinjarrijba narrinya walu yalundu mambukamukunyina kabaminkanyi, kuyungangi narri ngaki jangkurr. Ngala jalija yalu kuyu narrinya mambukamukuyngkurri, baki janarri karu yalunya ngaki. Janarri karu yalunya ngakinkanyi jangkurranyi.
MAR 13:10 Ngala waluku barri yingkamukunyi jayalunjalu karu kunybanyi jangkurranyi Kudkanyi. Jayalunjalu karu bukambiju mungkijimuku wandijiyana, baki bayngkani barri janyulu bukamba yaji Kudwanyi.
MAR 13:11 Jalija yalu kuyu narrinya Kurdusyurri, jalija yalu karrinjarrijba narrinya walu nangandu mambukana, baki marda narrimi miku balkijba muwa nanankanyi jangkurranyi jalija narri jananganja nanda malbu. Marda narrimi miku balkijba muwa. Jalija narri karrinja walu nananyina mambukana, baki yingkawanyi janyulu karu narrinya nanankanyi jangkurranyi, narri yanybikanyi. Nanda jangkurr jalija narri yanyba, miku nanda narringi jangkurr, ngala janyulu wajba narrinya nanankanyi jangkurranyi Kunybawanyi Ngarnduwanyi Kudkanyi. Janyulu nyulu karu narrinya jangkurranyi jananganjankanyi nanda mambuka. Nanankardi barri marda narrimi miku balkijba muwa, jalija narri karrinja walu nangandu mambukana.
MAR 13:12 Nanamanji barri kajamukunyi mungkijimukunyi baki ngurranyimukunyi, jala ngananjalu ngirra, jayalu manjijba narrinya. Jayalu manjijba narrinya mambukarri, nyulu kurdanbiji narrinya. Buwakula yingkawanyi manjijbaja yingka nangandurri mambukarri. Nijanganjinyiwanyi manjijbaja jandanyi nangandurri mambukarri, baki jandanyiwanyi manjijbaja nijanganjinyi baki yarrijinyi nangandurri mambukarri, nyulu kurdanbiji yalunya.
MAR 13:13 Kajamukunyi jayalu ngirra narrinya ngaki. Nanamukunyi jala yalu miku kuyu ngaki jangkurr, jayalu ngirra narrinya. Jayalu yabimba kiji narringi. Ngala jaliyi narri yuwajiwa kuyu ngaki jangkurr, jaliyi narringka miku yangkalamba ngakinbunanyi, baki jangayu marrimba narrinya mardarda. Jayalu yabimba kiji narringi yingkamukunyi, ngala jangayu marrimba narrinya mardarda. Jangayu marrimba yalunya mardarda bukambiju, jaliyi yalungka miku yangkalamba ngakinbunanyi.
MAR 13:14 Yingka wankala, nyuli yanyba jangkurr nangangi Kudkanyi. Karu nyuli yalunya yingkanyi jalija nyulu badajba baku barri juju. Janyulu balkimirra. Janyulu yabimba kaja balki yaji yalungi. Ngayu karungka narrinya, badajbaja nanda balkimirra. Janyulu ngirra Kud. Janyulu karrinja nanaba malabana yajina, baki janyulu balkimba nanda yaji.” Barriwa. Narri jala narri najba nangangi jangkurr najana, marda narrimi jingkijba nangangi jangkurr nanankanyi balkinyi jalija nyulu badajba nanginkurri. “Jalija nyulu badajba, baki nanamuku jalija yalu jungku nananyina walkurranyina yajina Judiya, marda yalimi wirlku nanganbunanyi. Marda yalimi wirlku juju nanganbunanyi kulawirarri yajiyurri.
MAR 13:15 Nanamanji barri jalija nyulu badajba, baki kudiya jayalu jungku danbina jambana. Marda yalimi miku ngankijba barrawuna, wudumbiji yalungi yaji. Ngala marda yalimi yinarramba wirlku kulawirarri.
MAR 13:16 Kudiya jayalu waki munjimunji. Marda yalimi miku wijba barndarri wudumbiji yalungi jumbala. Ngala marda yalimi yinarramba wirlku kulawirarri.
MAR 13:17 Kudiya jibarrimuku, jayalu ngawukuku. Kudiya ngardanganjamuku jayalu ngamulujba bardarda yalungi. Ngala warriyaluku. Miku yaliyi wirlku dulu. Jayalunjalu daba burrandiwa.
MAR 13:18 Marda narrimi yanyba mududu nangangi Kudkanyi. Marda narrimi ngajaka Kud, ‘Mikujiyi munyajba nanda balkimirra badaykurri wurarawala, jala madujba yaji kudanyu barri.’ Nani barri marda narrimi ngajaka Kud.
MAR 13:19 Wabula barri kamambarra yabimbayi yaji Kudwanyi. Nanamunanyi nanginkurri mikuyaji walkurrayngka kijinyi barrinani nayinda kiji, jalija badajba, jalija marda narrimi wirlku kulawirarri. Baki bayngkani barri miku mili walkurra kiji barrinani nayinda kiji.
MAR 13:20 Ngala kurrkunbaja nanda kiji Kudwanyi. Jalimi miku nyulu kurrkunba kiji, baki bukambiju jayalungka janyba nanankanyi kijinyi. Ngala janyulu kurrkunba nanda kiji, marukangangi nyulu muwa nanganginmukuyngka, jali nyulu wabula yarrijba nanganginmirra. Barriwa.
MAR 13:21 Nanamanji barri jalija badajba nanda balkimirra, yingka janyulu yanyba, ‘Najbakiyi nayinda, nyulu Krayis jali manjijba Kudwanyi.’ Ngala yingka janyulu yanyba yingkanyi, nyulu nanda Krayis. Ngala marda narrimi yurlwa yalunginkanyi jangkurranyi.
MAR 13:22 Badajbaja jujambawarrmuku, baki jayalu yanyba jujambawarr jangkurr. Yingka yanybaja, ‘Ngayu Krayis’, ngala yingka yanybaja, ‘Ngayu Krayis’. Yingka yanybaja, ‘Manjijba nganyi Kudwanyi, karunki nangangi jangkurr’, ngala yingka yanybaja ‘Ngala manjijba nganyi Kudwanyi karunki nangangi jangkurr’. Jayalu nulijba jujambikanyi yalunya, jali yarrijba nanganginmirra Kudwanyi. Jayalu yabimba ngiruka yaji jujambiji yalunya ngala miku jayalunjalu jujamba.
MAR 13:23 Ngala marda narrimi najbawa yalunya. Ngayu karungka narrinya nanginkanyi yajinyi waluwa barri, baki jalija yalu badajba nanamuku jujambawarrmuku, baki janarri jingkijba yalunya, baki miku narriyi kuyu yalungi jangkurr.
MAR 13:24 Nanankardi walkurrananyi kijinanyi barri, baki mikuyaji kambanyi, mikuyaji yakarlanyi. Mikuwali yajba yaji kambawanyi baki yakarlwanyi.
MAR 13:25 Jayalu yirrba warrawiji kingkarrinya. Jayalu karrala wayka. Ngirringirrimba jayalungka kamba, baki yakarl, baki warrawiji. Ngirringirrimba jayalungka, baki jayalu wirlku yingkarri yajiyurri.
MAR 13:26 Baki nanamanji barri ngayu Buwanya Bukambijuyngka, jangayu wijba, baki janganjalu najba lalijina. Janganjalu najba badaykurri ngaluna bukambijunyi. Jangayu walkurra mambuka yalungi. Baki bukambiju wandijiyana jala yalu jungku balki nangangi Kudkanyi, jayalungka ngindu muwa. Kudanyu jayalungka ngindu muwa jalija ngayu wijba.
MAR 13:27 Baki manjijbaja yalunya Yanjilmuku Kudwanyi. Janyulu manjijba nanganginmuku Yanjilmuku langki baki karri, kula baki bayungu, wandijiyana. Baki jayalunjalu wudumba nanganginmirra Kudkanyi, baki kuyuja yalunya nangandurri Kudyurri.” Barriwa.
MAR 13:28 Mili yanybayi Jisus yalungi, “Mankumanku narringka nanankanyi kabulanyi. Jala narri najba kabula jal, baki narri jingkijbangka barringa barri ngardarawala. Barringa barri ngardarawala, jala walajba kabula jal.
MAR 13:29 Baki nani barri jalija narri najba nayinda walkurra kiji, baki janganarri jingkijba, jangayu wijba jambarri. Janganarri jingkijba, ngayu Buwanya Bukambijuyngka, jangayu wijba jambarri winyurruwa barri.
MAR 13:30 Marda narrimi mankumankuwa nayinda ngaki jangkurr. Ngakinmuku mungkijimuku Jumuku, miku yaliyi bukamba, waluwa badajbaja nayinda walkurra kiji. Kudiyamuku ngakinmuku mungkijimuku jayalu yuwajiwa jungku, jalija badajba nayinda kiji.
MAR 13:31 Baku barri janyulu manjamanjamba laliji baki jamba Kudwanyi. Janyulu manjamanjamba yalunya. Ngala ngaki jangkurr barri, mikuwali manjamanjamba ngaki jangkurr yingkawanyi. Duja ngaki jangkurr jungkuka yurrngumba barri. Barriwa.
MAR 13:32 Ngala miku ngambalimi jingkijba wanyimbala badajba nanda walkurra kiji. Baki miku ngambalami jingkijba, wanyimbala jangayu wijba. Nanamukunyi Yanjilmukunyi jalili yalu waki nangangi Kudkanyi, miku yalimi jingkijba. Baki ngayu barri Buwanya Bukambijuyngka, miku ngayimi jingkijba. Ngala ngawamba Buwakayu Kingkarri, ngawamba nyulu jingkijbangka wanyimbala badajbaja nanda walkurra kiji. Ngawamba nyulu jingkijbangka wanyimbala jangayu marda wijba.
MAR 13:33 Marda narringkimi lalanbawa. Marda narringkimi najbawa ngaki. Marda narringkimi birrirrinja jilaykanyi ngakindurri. Miku narrimi jingkijba wanyimbala jangayu wijba. Nanankardi barri marda narringkimi birrirrinja yurrngumba jilaykanyi ngakindu.” Barriwa.
MAR 13:34 Mili yanybayi Jisus yalungi, “Jangayu muningka yanyba narringi, narri jingkiykanyi mili yaji. Barlbayi mambuka nanganbunanyi yajinanyi, baki jilalajba nyuli yingkana yajina. Ngala waluku barri, waluwa nyuli barlba, baki yarrijba nyuli kudiyamuku nanganginmiku wakiwarrmuku, yalu lalanbikanyi nangangi yaji ngala nyuli barlba. Yingka nyuli yarrijba lalanbikanyi nanda bardawa barrikina lukuluku nanganginyina barrawuna. Baki nyuli karu nanda lalanbawarr bardawanyi, ‘Najbawakiyi yaji ngaki jalija ngayu wijba. Najbawakiyi yaji ngaki, ninji dulaykanyi nanda bardawa ngaki.’
MAR 13:35 Baki nanangini lalanbawarranyi bardawanyi, marda nyulimi najbawa nangangi yaji yurrngumba barri. Miku nyuliyi jingkijba wanyimbala janyulu wijba. Yiningki ngabungabu, yiningki mungana, yiningki ngala nyulu kambalingijba yaji, yiningki yalibala. Nanankardi barri marda nyulimi najbawa nangangi yaji yurrngumba barri, bakiyi wijba nanda mambuka ngala nyulu kulukawa. Barriwa. Baki nani barri miku narrimi jingkijba wanyimbala ngayuja wijba, yiningki winyurru, yiningki baku barri. Baki nanankardi barri marda nganarrimi najbawa jalija ngayu wijba.” Barriwa. Nani barri yanybayi Jisus yalungi.
MAR 14:1 Baku barri yingkana munganawa jayalu yabimba nanda wangarr, niji Kangandijbayi Barrawuna Yajinyi, jalili yalu jarrba nanda bulungu nangangi jibkanyi, baki damba ngala nyulu mikuyaji bululunyi. Nanamanji barri jali yingkana mungawawa jayalu yabimba nanda wangarr, baki malumba yali jungka, mambukamuku jurjkanyi baki milidimbawarrmuku yuwanyi. Malumba yali jungku, baki yanyba yalungki yanka jayalu marrimba Jisus, baki jayalu kurdanba Jisus. Miku yaliyanyi nulijba yalungi muramukuyngka jingkiykanyi jalija yalu marrimba Jisus.
MAR 14:2 Yanyba yalungki, “Jangambala marrimba Jisus, baki jangambala kurdanba, ngala miku nanamanji jalija ngambala jungku nanginkanyi wangarranyi. Kajamuku yalu badajbangka nanginkurri nanginkanyi wangarranyi, baki yalungka yanyba nangangi Jisuskanyi, nyulu nanda jali manjijba Kudwanyi. Jayalu manku kiji ngambalangi, jaliyi ngambala marrimba Jisus wangarrina. Jayalu manku walkurra kiji ngambalangi,” Barriwa. Nani yalungki yanyba marrimbikanyi Jisus kardarda barri.
MAR 14:3 Barlbayi Jisus karri nanankurri bayakardarri barrawuyabarrawuyarri niji Bidani, baki ngankijba nyuli barrawuna. Nanda nangangi barrawu Sayiminkanyi. Nanda nganinyi Sayimin, wabula nyulili ngujbulijba waban bukamba, ngala nanijba kunybijbayi barri. Jungkuyi Jisus baki nanganginmuku kandimuku nangandu, baki wardamba yalungki mamanyi. Ngala yalungki wardamba mamanyi, baki ngankijbayi jibarri kalawuyngkurru barrawuna. Kuyu nyuli bujili nangandu marnina. Kalawunyi bujilina nanda yaji barrinani jirrki, ngala nanjananja. Banjawayi kunyba kudu. Niji nanankanyi yajinyi, nard. Nanamanji barri yalili yarrijba nanda yaji kuyuwana Jumukunyi, waluwa yalili makaba mankanyi nangangi jambana. Wajbayi kajanyi dungalanyi jibarriwanyi, baki wudumba nyuli nanda nard. Jilajba nyuli nangandurri Jisusyurri, baki bindabayi nanda yaji nangandu kulajina Jisusnyina.
MAR 14:4 Ngala kudiya nanaba jali yalu najba jibarri bindabankurri nanda nard nangandu kulajina, baki yali ngarrangarra muwa nangangi. Baki yanyba yalungki, “Nayinda jibarri, nyulu balki. Wanyingkanyi nyuli bindaba nanda yaji nangandu kulajina. Jaliyanyi nanda nurrungi, baki nurriyanyi wajba yalunya nanankanyi wudumbiji kaja dungala. Baki nurriyanyi wajba yalunya nanankanyi dungalanyi, yalunya jala mikuyaji yalungi dungalanyi.” Nani barri yali jurlwa nanankanyi jibarrinyi.
MAR 14:6 Ngala yanybayi Jisus yalungi, “Wijbakiyi jurlwa nanankanyi jibarrinyi. Yabimba nyuli kunybamirra yaji ngaki.
MAR 14:7 Jawuda jala yalu mikuyaji yalungi dungalanyi, yurrngumba yalu jungkuka narrindu. Yurrngumba yuku narri lalanba yalunya, jala mikuyaji yalungi dungalanyi. Ngala miku ngayiyi ngayu jungku nayiba narrindu yurrngumba. Miku narriyi jurlwa nangangi.
MAR 14:8 Bindaba nyuli nanda nard ngakinyina mankanyina, baki nanankardi barri birrirrinja ngaka mankanyi makaykanyi nganjalu jambana.
MAR 14:9 Ngayu karungka narrinya jangkurranyi. Baku barri juju jayalunjalu karu ngakinkanyi kunybanyi jangkurranyi. Yurrngumba jayalunjalu karu wandijiyana. Jalija yalunjalu karu ngaki, baki jayalunjalu karu nanginkanyi jibarrinyi marda. Jayalunjalu karu nanginkanyi yajinyi, jali nyulu yabimba ngaki. Baki jayalu marda jingkijba nayinda jibarri, nyulu kunyba marda ngaki.” Barriwa.
MAR 14:10 Yingka kandi nangangi Jisuskanyi, niji Judas Yiskariyud, yangkalamba nangki kurdulu nanganbunanyi Jisusnanyi. Baki jilajba nyuli yalundurri, walkurrayngkurri mambukarri jurjkanyi. Karuyi yalunya Judaswanyi, janyulu kuyu yalunya nangandurri Jisusyurri, yalu marrimbiji Jisus.
MAR 14:11 Mirnarrijba yali muwa nangangi, baki karu yali Judas, jayalu wajba dungalanyi, nyulu kuyunkanyi yalunya nangandurri Jisusyurri. Baki nanankardi barri nanangini Judaswanyi nyuliyanyi kuyu yalunya mambukamuku jurjkanyi nangandurri Jisusyurri, yalu marrimbiji Jisus. Yurrngumba barri nangki mankumanku yanka janyulu kuyu yalunya nangandurri. Barriwa.
MAR 14:12 Jali waluwinyi nanda wangarr yalungi, niji Kangandijbayi Barrawuna Yajinyi, jalili yalu kurdanba nanda bulungu jibkanyi. Jali waluwinyi nanda wangarr, baki jilajba yali kandimuku nangandurri Jisusyurri. Baki yilikajba yali, “Wanjawa yajina janurru yarrijba nayinda yaji kamunyi wangarranyi. Wanjawa yajina janurru yarrijba mama barri.”
MAR 14:13 Yanybayi Jisus kujarrayngka yalungi. Nyuli karu bulanya, “Janimbala jilajba bayungu barrawuyabarrawuyarri Jirusalimyurri. Jalija nimbala wanbiya, baki janimbala najba nganinyi dukanarriykurri wabuda lujulujuna. Janimbala jilajba nangandu wakiwarrina.
MAR 14:14 Janimbala jilajba nangandu barrawurri. Jalija nimbala wanbiya barrawuna, baki janimbala yanyba nangangi mungkijinyi nanankanyi barrawunyi, ‘Nanda milidimbawarr nurrungi, nyulu yanybaka nganyi, nyulu baki nanganginmukunyi kandimukunyi, janurru jarrba nayinda wangarr kamu nganyinyina barrawuna. Nani barri nyulu yanybaka nganyi. Wanjawa yajina jangaliya yarrijba mama. Janinji minimba ngalinya barri.’ Nani barri janimbala yanyba nangangi barri.
MAR 14:15 Baki janimbalanya minimba walkurrayngka yajinyi yundukula barrawuna. Nanda kunyba yaji yabimbikanyi wangarr. Nanaba barri janimbala yarrijba mama kamunyi wangarranyi.” Nani barri yanybayi Jisus bulangi, baki nyuli manjijba bulanya.
MAR 14:16 Barlba buli barrawuyabarrawuyarri, baki yabimba buli nanda yaji jali karu Jisuswanyi. Najba buli nganinyi wabudayudi, baki jilajba buli nangandu mungkijiyurri barrawunyi. Nyuli minimba bulanya yajinyi yundukula barrawuna, baki nanaba buli yundijba bulungu jib kamunyi wangarranyi, niji Kangandijbayi Barrawuna Yajinyi.
MAR 14:17 Ngala nyuli mungimungijba yaji, baki badajba yali karrina, Jisus baki nanganginmuku kandimuku 12 barri. Jilajba yali nanankurri barrawurri, baki jungku yali wangarranyi.
MAR 14:18 Ngala yali jarrba yaji, baki yanybayi Jisus yalungi, “Ngayu karungka narrinya, yingamali narringi jala nyulu jarrbangka mama ngakindu, janangka yangkalamba ngakinbunanyi. Janyulu karu yingkamuku wanjawa janganjalu wudumba. Baki janganjalu marrimba.”
MAR 14:19 Jali manku nanda jangkurr kandimukunyi, baki ngindu yali muwa. Yanyba yali nangangi, yingka baki yingka baki yingka, “Miku kuna ngayu nanda. Miku ngayiyi karu yalunya nganyi.” Nani yalili yanyba nangangi.
MAR 14:20 Jananganjayi yalunya Jisuswanyi, “Yingamali jala jarrbangka mama ngakindu, janangka yangkalamba ngakinbunanyi. Janyulu karu yalunya ngaki.
MAR 14:21 Ngayu Buwanya Bukambijuyngka, jangaka janyba. Nanangini najawanyi Kudkanyi karungka yalunya ngaki, jangaka janyba. Ngala nanda nganinyi jalija yalunya wajba ngaki, janangka ngindu muwa. Janangka ngindu muwa kudanyu barri. Jaliyanyi nangka miku birnandaba, baki yuku janyulu kunyba yaji nangangi.” Barriwa.
MAR 14:22 Ngala yalungki wardamba mamanyi, baki wudumbayi kudiya damba Jisuswanyi. Marrimba nyuli nanda damba, baki yanyba nyuli mududu nangangi Kudkanyi nanankanyi dambanyi. Dalyamba nyuli damba, baki wawajba nyuli yalunya bijalanyi dambanyi. Baki yanyba nyuli yalungi, “Kuyu narri nayinda damba. Janarri jarrba. Nayinda damba barrinani ngaki mankanyi.” Barriwa.
MAR 14:23 Baki nyulu wudumba yukururu jirdi ngarrkinyi krayibkanyi. Yanyba nyuli mududu nangangi Kudkanyi nanankanyi ngarrkinyi, baki wawajba nyuli yalunya ngarrkinyi. Baki ngaraba yali bijal ngarrki bukambijunyi.
MAR 14:24 Baki yanybayi Jisus yalungi, “Nayinda ngarrki barrinani ngaki ngulya. Bukambijunyi yalu barimbaka yaji. Baki marda yalungkimi janyba yalunginkanyi balkinyi yajinyi, jalili yalu yabimba. Ngala jangaka ngaka janyba yalungi. Jalija yalu kuyu ngaki jangkurr, baki jayalu wankijba, janybangangi jangaka yalungi. Nani barri ngaki ngulya barlbangka kajamukuyngka. Nani barri jangayu yabimba yaji, nanankanyingangi jangkurranyi, jali yanyba Kud miku yangkalambikanyi.
MAR 14:25 Ngayu karungka narrinya, miku ngayiyi mili ngaraba ngarrki krayibkanyi nayiba jambana. Ngala baku barri jalija ngayu wankijba mili, jalija ngayu jungku kingkarri nangandu Kudnyina, nanamanji barri jangayu mili ngaraba ngarrki krayibkanyi.” Barriwa.
MAR 14:26 Brijba yali wangarr, baki barriwa yali walajba barndananyi. Barlba yali karrurrinybarri kulawirarri niji Yulib, ngala nyulu mungijba yaji.
MAR 14:27 Ngala yali jilajba, baki yanybayi Jisus yalungi, “Kamu barri ngala nyulu yuwajiwa mungana yajina, baki janarri wirlku ngakinbunanyi. Janganarri yingijba nyubana jungunkurri. Nanda naja Kudkanyi yanybaka nayi barri, ‘Jalija nyulu daba nanda lalanbawarr jibkanyi Kudwanyi, jalija nyulu kurdanba, baki jayalu jarrbalijba jibmuku.’ Nanda jangkurr yanybaka ngaki. Jalija ngananjalu daba, baki janarri wirlku ngakinbunanyi.
MAR 14:28 Ngala baku barri, jalija ngayu mili wankijba, baki jangayu jilajba langki nanankurri yajiyurri Kaliliyurri. Jangayu jilajba langki nanankurri waluwa narringi barri.” Barriwa.
MAR 14:29 Yanybayi Bida nangangi Jisuskanyi, “Jalija nanginmuku yalu wirlku nganyinbunanyi, ngala miku ngayiyi. Miku ninyiyi yingkijba nyubana. Miku.”
MAR 14:30 Ngala yanybayi Jisus nangangi Bidanyi, “Ngayu karungka ninya. Bukambiju janarri wirlku ngakinbunanyi, baki mili yaji janinji yabimba ngaki. Janinji karu yalunya yingkamuku, miku nganinjimi jingkijba. Kujarraka barndayka janinji karu yalunya, miku nganinjimi jingkijba waluwa kayaja kujarraka nanda julaki barrinani dalmurra, waluwa nyulu kayaja kamu ngala nyulu kambalangijba yaji.”
MAR 14:31 Ngala jananganjayi Jisus Bidawanyi, “Miku ngayiyi karu yalunya nani nganyi. Miku. Jaliyi nganjalu kurdanba, baki miku ninyiyi yingkijba nyubana. Miku ngayiyi yanyba yalungi, miku ninyimi jingkijba. Duja ngayu yanyba.” Nani barri nyuli jananganja Jisus. Baki nanamuku yingkamuku kandimuku, yali marda yanyba nanamannga jangkurr nangangi. Barriwa.
MAR 14:32 Mili barri yali jilajba, Jisus baki nanganginmuku kandimuku, baki wanbiya yali nananyina yajina munjimunji, niji Kidsamani. Yanybayi Jisus yalungi, “Janarri jungku nayiba, ngala jangayu jilajba bijal bundu. Jangayu yanyba mududu nangangi Kudkanyi.” Barriwa.
MAR 14:33 Kuyu nyuli murrku nanganginmuku kandimuku nangandu, Bida baki Jayims baki Jun. Jilajba yali bijal bundu nangandu Jisusnyina. Ngala Jisus barri, kudanyu nangki ngindu muwa.
MAR 14:34 Yanyba nyuli yalungi murrkunyi, “Nginduka ngaka muwa. Kudanyu ngaka nginduka muwa. Jungku janarri nayiba, baki najbawa janarri yaji ngaki.”
MAR 14:35 Mili jilajbayi Jisus bijal bundu yalunbunanyi, baki kulujarrijba nangki wayka jambana, wali wayka. Baki yanyba nyuli mududu nangangi Kudkanyi, “Buwakanya. Winyurruwa jayalu jilajba wudumbiji ngana. Nulijba yalu kurdanbikanyi nganjalu. Ngala ngayu jingkijbangka ninya, yuku ninji yabimba bukamba yaji. Janinji kuna wudumba nayi kiji ngakinbunanyi. Janinji kuna wudumba nayi kiji. Ngala jaliyi ninji miku wudumba nayi kiji ngakinbunanyi, baki yuku barri. Jangayu yabimba nanda jala ninji nulijba ngaki yabimbikanyi yaji.” Nani barri yanybayi Jisus mududu, baki barriwa.
MAR 14:37 Wijbayi Jisus yalundurri murrkuyngkurri, baki najbayi yalunya kulukankurri. Dulabayi yalunya Jisuswanyi, baki yanyba nyuli nangangi Bidanyi, “Wanyingkanyi narri kuluka, jali narrinya ngajaka najbawakanyi yaji ngakindu. Wanyingkanyi narri miku najbawa yaji ngakindu.
MAR 14:38 Najbawa janarri ngakindu, baki yanyba janarri mududu nangangi Kudkanyi. Marda narrimi ngajaka Kud, nyulu yabimbiji narrinya ngiruka nangangi barri. Nulijba narri najbawankanyi yaji ngakindu, ngala narri ngunjarra, baki narri kuluka. Nulijba narri yabimbikanyi kunyba yaji, ngala miku narrimi ngiruka yabimbikanyi kunyba yaji. Ngala Sayidin nyulu ngiruka. Nyulu nulijbangka jujambikanyi narrinya, narri yabimbikanyi balki yaji. Nanankardi barri marda narrimi ngajaka Kud, nyulu yabimbiji narrinya ngiruka nangangi barri.” Barriwa.
MAR 14:39 Mili barri jilajbayi Jisus bijal bundu yalunbunanyi. Baki mili nyuli yanyba mududu nangangi Kudkanyi. Yanyba nyuli nanamannga jangkurr jali nyulu yanyba barrin. Nani barri mili yanybayi Jisus mududu, baki barriwa barri.
MAR 14:40 Mili nyuli wijba yalundurri, baki najbayi yalunya kulukankurri. Miku yalungkiyanyi kurrkunba kulukankanyi. Mili dulabayi yalunya Jisuswanyi, baki manyirru yali. Miku yaliyanyi jingkijba wanyi jangkurr yanybikanyi nangangi Jisuskanyi.
MAR 14:41 Baki mili barri nyuli barlba bijal bundu yalunbunanyi. Mili barri yanybayi Jisus mududu, baki barriwa barri. Baki mili nyuli wijba yalundurri. Yanyba nyuli yalungi, “Yuwajiwa kuna narri kululuka. Walajba narri. Nanijba barri nanamuku balkimuku, yalu badajbangka wudumbiji ngana, marrimbiji ngana Buwanya Bukambijuyngka.
MAR 14:42 Janarri walajba. Jangambala jilajba. Nayinda nyulu badajbangka, nanda jali nangka yangkalamba ngakinbunanyi. Nyulu kuyungka yalunya ngakindurri, yalu marrimbiji ngana.” Barriwa. Walajba yali ngala nyuli yanyba yalungi.
MAR 14:43 Ngala yuwajiwa yanybayi Jisus yalungi, baki wanbiyayi nanda yingka kandi Judas, baki kajamuku yalu nanaba nangandu. Yingkamukunyi yali kuyu wunanybala jankunbijinyi, baki yingkamukunyi yali kuyu kuduru. Manjijbayi yalunya mambukamukunyi jurjkanyi baki milidimbawarrmukunyi yuwanyi, baki malbumalbuwanyi, yalu marrimbiji Jisus.
MAR 14:44 Waluwa yanybayi nanda balki kandi Judas yalungi, “Nanda jalija ngayu jawunja, nyulu nanda jala narri kujba nangangi. Nanda barri janarri marrimba, janarri kuyu.” Nani barri nyuli yanyba yalungi waluwa barri.
MAR 14:45 Wanbiya yali, baki yinarramba jilajbayi Judas nangandurri Jisusyurri, yanybayi nangangi, “Nanama ninji Milidimbawarr”, baki jawunja nyuli Jisus.
MAR 14:46 Bunundujba yali nangandurri, baki marrimba yali Jisus.
MAR 14:47 Ngala kandi nangangi Jisuskanyi, nyuli karrinja nanaba jankunbijinyiyudi wunanybalanjudi. Dulaba nyuli kingkarri nangangi jankunbijinyi, baki jinamba nangki. Karlba nyuli nangangi kuwarda jankunbijiyudinyi. Barriwa barri bukamba karlba nyuli kuwarda, nanda jalili waki nangangi mambukanyi jurjkanyi.
MAR 14:48 Yanybayi Jisus yalungi nanamukuyngka lukuluku, “Wanyingkanyi narri jilajba wudumbiji ngana jankunbijinyiyudi baki kuduruyudi, barrinani narri jilajba wudumbiji nanda maninjaku, jalija daba narrinya.
MAR 14:49 Yingkana kambana, baki yingkana kambana ngayi milidimba yalunya walkurranyina jurjina narrindu, ngala miku nganarriyanyi marrimba nanaba. Wanyingkanyi nanijba barri narri jilajba nanginjudinyi marrimbiji ngana. Nanamuku wankalamuku jali yalu yanyba jangkurr nangangi Kudkanyi, yali yarrijba nanda jangkurr najana Kudkanyi. Nanda naja yanybaka ngaki, janganjalu marrimba, janganjalu linjumba. Duja yalungi jangkurr. Narri yabimbaka nanda yaji ngaki.”
MAR 14:50 Bukambiju kandimuku nangangi, wirlku yali. Wirlku yali nangandunanyi, marralangangi yali kudanyu barri. Barriwa.
MAR 14:51 Ngala yingka kaburr, nyuli jilajba bayngkani nangandu Jisusnyina. Ngawamba yingamali jumbala lukuluku nangandu mankanyina, barrinani danyan. Marrimbayi kaburr yingkawanyi.
MAR 14:52 Ngala ngawamba nyuli marrimba nangangi jumbala. Jali wirlku nanda kaburr, baki dalijbayi nangangi jumbala. Yingijba nyuli jumbala wambu yingkana marnina, baki wirlku nyuli mikuyaji jumbalanyi. Barriwa.
MAR 14:53 Kuyu yali Jisus barrawurri. Nanda nangangi barrawu, walkurrayngka mambukanyi jurjkanyi. Nanaba barri jungkuyi mambukamuku jurjkanyi, baki milidimbawarrmuku yuwanyi, baki malbumalbumuku. Malumba yali jungku nananyina barrawuna, baki yukumba yali nangangi Jisuskanyi. Kuyu yali Jisus yalundurri.
MAR 14:54 Ngala durrijbayi yalunya Bidawanyi. Durrijba nyuli juju bijal bayngkani, baki ngankijba nyuli barrikina jali lukuluku nananyina barrawuna. Jungku nyuli yalundu yilarrmukunyina. Ngarrijba nyuli janguna. Barriwa.
MAR 14:55 Nanamuku walkurramuku mambukamuku jurjkanyi, baki nanamuku kunsilmuku, nulijba yali kurdanbikanyi Jisus. Kujba yali yingkamukuyngka, yalu karunkanyi jujambawarrayngka jangkurranyi nangangi Jisuskanyi, nanankanyi jali nyulu yabimba. Jala yingkamuku yalu yanyba jujambawarr jangkurr nangangi, baki nanamuku mambukamuku baki kunsilmuku, jayalu yanyba kurdanbikanyi Jisus. Nanankardi barri yali kujba yalungi, jalija yalu yanyba jujambawarr jangkurr nangangi Jisuskanyi. Kajamuku yali yanyba yinini yinini jujambawarr jangkurr nangangi. Miku yaliyanyi yanyba nanamannga jangkurr nangangi.
MAR 14:57 Kudiya yalungki karrinjarrijba, baki yanyba yali nayi jujambawarr jangkurr,
MAR 14:58 “Manku nurri nayinda nganinyi yanybikurri nayi barri, ‘Jangayu dalyamba nayinda walkurra jurj. Jangayu dalyamba nayinda jurj jali yalu yabimba yingkamukunyi. Ngala baku barri kujarraka barndayka, jangayu mili yabimba yingka jurj. Ngayu barri ngiruka yabimbikanyi ngiruka yaji. Jangayu ngayuman yabimba nanda yingka jurj kujarraka barndayka.’ Nani barri nurri manku Jisus yanybikurri.”
MAR 14:59 Ngala miku yaliyanyi yanyba nanamannga jangkurr. Yinini yinini jangkurr yali yanyba nangangi.
MAR 14:60 Karrinjayi nanda walkurra mambuka jurjkanyi burrandi yalundu, baki ngajaka nyuli Jisus, “Ninji mankuyi yalungi jangkurr, ngala wanyingkanyi ninji miku jananganja yalunya nanankanyi jangkurranyi, jali yalu yanyba. Wanyingkanyi barri.”
MAR 14:61 Ngala miku nyuliyanyi jananganja nanda mambuka Jisuswanyi. Karda nyuli jungku. Baki mili ngajakayi Jisus walkurranyi mambukawanyi jurjkanyi, “Ninji kuna nanda Krayis, jali manjijba Kudwanyi. Ninji kuna jandanyi nangangi Kudkanyi. Karukiyi nurrunya duja jangkurranyi.”
MAR 14:62 Baki jananganjayi walkurra mambuka Jisuswanyi, “Yi. Ngayu Krayis. Ngala ngayu karungka narrinya, janganarri najba Buwanya Bukambijuyngka. Janganarri najba jungunkurri kingkarri nangandu Kudnyina, baki badaykurri kingkarrinya lalijinanyi ngaluna. Nani barri janganarri najba.” Barriwa.
MAR 14:63 Jali manku nanda jangkurr mambukawanyi jurjkanyi, baki bakaramba nyuli nangangi jumbala. Nani barri yalili bakaramba yalungi jumbala Jumukunyi, jalili yingka yanyba balki jangkurr nangangi Kudkanyi. Bakaramba nyuli nangangi jumbala, baki yanyba nyuli, “Mikujiyi kuyu mili karunkanyi ngambalanya nanganginkanyi balkinyi yajinyi.
MAR 14:64 Ngambala mankuyi nangangi jangkurr. Jujambawarr jangkurr nyuli yanyba ngambalangi nangangi Kudkanyi. Jujambawarr jangkurr. Wanyimba ngambalaja nangangi Jisuskanyi. Wanyimba.” Baki bukambiju yali yanyba, “Marda nangkimi janyba, yanybangangi nyuli balkimirra jangkurr nangangi Kudkanyi.” Nani barri yali yanyba.
MAR 14:65 Baki yali kiwumba wali Jisus yingkamukunyi, ngala yingkamukunyi yali makaba Jisus yami, baki daba yali Jisus marniyudinyi. Ngala ngajaka yali Jisus, “Wanjangini ninya daba. Marda ninjimi jingkijba nanda jali ninya daba. Wanjangini ninya daba. Karukiyi nurrunya.” Kuyu yali Jisus yilarrmukunyi, baki yali marda daba Jisus muwana marnina. Barriwa.
MAR 14:66 Jungkuyi Bida barrikina muwana lukuluku nananyina barrawuna. Jilajbayi nangandurri jibarri jalili waki nangangi mambukanyi jurjkanyi.
MAR 14:67 Najba nyuli Bida ngarambikurri nangka janguna. Ningkijbayi Bida jibarriwanyi, baki yanyba nyuli nangangi, “Ninya jingkijbangka, jungku ninji barri nangandu Jisusnyina, nangangi yaji Nasarid. Ninji marda jungkuka nangandu.” Barriwa.
MAR 14:68 Ngala jujambayi nanda jibarri Bidawanyi. Yanyba nyuli, “Miku barri. Miku ngayimi jingkijba nanda nganinyi. Miku.” Nani barri yanybayi Bida nangangi. Walajbayi Bida, baki barlba nyuli bardawarri.
MAR 14:69 Mili najbayi Bida nanangini jibarriwanyi, baki yanyba nyuli yalungi jali yalu karrinja nanaba, “Nayinda nganinyi, nyulu kandi nangangi Jisuskanyi.” Barriwa.
MAR 14:70 Mili barri jujambayi Bidawanyi, “Miku ngayimi nangangi kandi. Miku.” Barriwa. Kamu barri yalu jali karrinja nanaba nangandu, yanyba yali nangangi Bidanyi, “Yi. Ninji barri kandi nangangi Jisuskanyi. Ninji nangangi mungkiji. Nganyi yaji Kalili marda. Nimbala mungkijiwuya. Yingamali nimbalangi yaji.” Barriwa.
MAR 14:71 Baki jananganjayi yalunya Bidawanyi. Jujamba nyuli yalunya. Yanyba nyuli balki jangkurr yalungi, “Ngayu karungka narrinya duja jangkurranyi. Ngayu ngajakangka Kud, nyulu dabanki ngana jaliyi miku duja nanda jangkurr. Miku ngayimi jingkijba nanda nganinyi. Miku.” Nani barri jananganjayi yalunya Bidawanyi.
MAR 14:72 Baki yinarramba kayayi nanda julaki barrinani dalmurra. Kaya nyuli barri. Baki mankuwayi Bidawanyi nanda jangkurr jali yanyba Jisus nangangi barrin, “Kujarraka barndayka janinji karu yalunya, miku nganinjimi jingkijba, waluwa kayaja kujarraka nanda julaki barrinani dalmurra.” Mankuwayi nanda jangkurr Bidawanyi, baki ngindu nangki muwa kudanyu barri. Kudanyu nangki ngindu muwa mirlarryudi. Barriwa.
MAR 15:1 Ngala nyulu kambalingijba yaji, baki yanyba yalungki, walkurramuku mambukamuku jurjkanyi, baki malbumalbumuku, baki milidimbawarrmuku yuwanyi, baki kunsilmuku. Yanyba yalungki nangangi Jisuskanyi. Barriwa. Kijijba yali Jisus jaluwuya, baki kuyu yali Jisus nangandurri Biladyurri, nyulu yanybiji kurdanbikanyi Jisus. Nanda Bilad nyuli walkurra mambuka kabaminkanyi nananyina yajina. Wajba yali Bilad nangangi Jisuskanyi.
MAR 15:2 Ngajakayi Jisus Biladwanyi, “Ninji barri kuna walkurra mambuka yalungi Jumukuyngka.” Jananganjayi Bilad Jisuswanyi, “Yi. Ngayu nanda.”
MAR 15:3 Baki yali jujamba Bilad nangangi Jisuskanyi, nanamukunyi mambukamukunyi jurjkanyi. Yanyba yali balki jangkurr nangangi Jisuskanyi. Jujamba yali Bilad nanankanyi jali yabimba Jisuswanyi.
MAR 15:4 Yanybayi Bilad nangangi Jisuskanyi, “Manku kuna ninji yalungi jangkurr. Wanyingkanyi ninji karda jungku. Yalu yanybaka kajanyi nganyingkanyi balkinyi jangkurranyi. Ngala miku kuna ninjiyi jananganja yalunya.” Barriwa.
MAR 15:5 Ngala mili miku nyuliyanyi yanyba Jisus nangangi Biladkanyi. Miku nyuliyanyi jananganja nanda kubamin mambuka. Baki manmalayi Bilad. Manmala nyuli jali mikukiyanyi jananganja Jisuswanyi.
MAR 15:6 Yurrngumba barri yingkana kindilkurrinyina, baki yingkana kindilkurrinyna, ngala nyuli Kangandijbayi Barrawuna Yajinyi, baki nanangini Kubaminwanyi mambukawanyi, nyulili muningka manjijba yingamali nganinyi jalili jungku brisinyina. Nyulili muningka manjijba yingamali nanganginkurri barndarri. Yalili karu nanda mambuka nanankanyi jalija nyulu manjijba. Yalili nijarrijba nangangi niji, bakili nyulu muningka manjijba nanda jalili yalu nijarrijba.
MAR 15:7 Nanamanji barri jungkuyi nganinyi brisinyina, nangangi niji Barabas. Waluwa barri nyulu baki yingkamukunyi yali manku kiji yalungi Kubaminkanyi. Yalunjali daba, baki kurdanbayi yingka nanangini Barabaswanyi. Nanankardi barri yali marrimba nanda Barabas yilarrmukunyi, baki yarrijba yali brisinyina.
MAR 15:8 Badajbayi walkurra muramuku barrawurri Biladkanyi. Karrinja yali nanaba danbina, baki yililikajba yali Bilad, nyulu muningka manjiykanyi yingamali brisinanyi.
MAR 15:9 Ngajakayi yalunya Biladwanyi, “Nayimanji barri ngayili muningka manjijba yingamali nganinyi brisinanyi. Ngala wanyi jangayu manjijba nanijba barri. Jangayu kuna manjijba narringi mambuka Jumukuyngka. Jangayu kuna manjijba nayinda Jisus.”
MAR 15:10 Jingkijba nyuli yalunya mamabukamuku jurjkanyi Biladwanyi. Nyuli jingkijba yalunya, yali kuyu Jisus nangandurri, ngurungurujbangangi yali nangangi Jisuskanyi.
MAR 15:11 Yanybayi yalungi muramukuyngka nanamuku mambukamuku jurjkanyi baki malbumalbumuku. Karu yalunjali, yalimi ngajaka Bilad, janyulu muningka manjijba brisinanyi nanda nganinyi Barabas, ngala janyulu manjijba Jisus janybikanyi nangka. Nani barri yali yanyba kudanyu yalungi muramukuyngka. Baki nanankardi barri yali ngajaka Bilad muramukunyi. Yali ngajaka Bilad, nyulu muningka manjiykanyi Barabas.
MAR 15:12 Ngajakayi yalunya muramuku Biladwanyi. Nyuli ngajaka yalunya, “Jaliyi ngayu manjijba Barabas, baki wanyimba jangayu nangangi, narringinkanyi mambukanyi Jumukuyngka. Wanyimba jangayu nangangi Jisuskanyi.”
MAR 15:13 Kaya yali kudanyu nangangi, “Kurdanbakiyi. Kurdanba. Langandabakiyi kingkarri kurndana.”
MAR 15:14 Ngajakayi yalunya Biladwanyi, “Wanyingkanyi barri marda ngayimi kurdanba. Miku nyuliyanyi yabimba balki yaji. Nyulu jungkuka kunybana yuwana. Wanyingkanyi marda ngayimi kurdanba.” Ngala mili yali kaya nangangi, “Kurdanbakiyi. Langandabakiyi kingkarri kurndana. Kurdanbakiyi.” Nani barri yali kudanyu kaya nangangi.
MAR 15:15 Nulijbayi Bilad yabimbikanyi kunyba yaji yalungi muramukuyngka, baki muningka nyuli manjijba Barabas brisinanyi, ngala nyuli jirrinyba nanganginmuku ngarrkadabawarrmuku, yalu wajuji Jisus, yalu kurdanbiji Jisus, barrinani kudanyu ngajakayi Bilad Jumukunyi. Baki wajuba yali Jisus nanaba barri.
MAR 15:16 Baki nanamukunyi ngarrkadabawarrmukunyi Biladkanyi, yali kuyu Jisus kalawuyngkurru nanganginyina barrawuna. Baki yali kaya yalungi yingkamukuyngka ngarrkadabawarrmukuyngka, baki bukambiju yali karrinja lukuluku nangandu Jisusnyina, baki yali ngirrikimba Jisus.
MAR 15:17 Dulaba yali nangangi jumbala nanganbunanyi, baki yarrijba yali danyan nangandu mankanyina. Nganmarra nanda danyan, wunanybala wayka darnyiyurruwa. Wudumba yali wardankurrul kurnda nyilanyilayudi, baki kijijba yali bakiri. Yarrijba yali nanda bakiri lukuluku nangandu kulajina Jisusnyina. Nani barri jungkuyi walkurra mambuka nanamanji barri, jirdi bakirinyi, jirdi nganmarranyi danyanyi.
MAR 15:18 Baki muningka yali kaya nangangi, “Ninji barri, ninji walkurra mambuka yalungi Jumukuyngka. Ninji barri wirimalaru yalungi.” Nani barri yali muningka kaya nangangi, baki ngirrikimba yali Jisus.
MAR 15:19 Daba yali Jisus kulaji ridiridiyudinyi, baki kiwumba yali nangandurri. Mururu yali wayka walu nangandu.
MAR 15:20 Nani barri yali ngirrikimba Jisus ngarrkadabawarrmukunyi. Barriwa. Baki dulaba yali nanda nganmarra danyan nanganbunanyi mankanyinanyi, baki mili yawumba nangki Jisus nanganginkanyi jumbalanyi. Baki kuyu yali Jisus bayungu kulawirarri langandaji.
MAR 15:21 Ngala yali jilajba bayungu, baki yingka nganinyi, niji Sayimin, nyuli jilajba bayunguna. Nangangi yaji juju bayungu, yaji niji Sayirin. Jandanyiwuya nangangi bulangi niji Yalisandra baki Rubas. Nyulu jilajbayi bayunguna nananyina yubalina. Baki nanamukunyi ngakadabawarrmukunyi, yali jirrinyba nanda nganinyi, nyulu kuyunkanyi nanda wabangkarra kurnda nangangi Jisuskanyi. Baki dukanarrijba nyuli kurnda bayangarriji.
MAR 15:22 Mili yali jilajba bayungu, baki wanbiya yali nananyina yaji niji Kulkuda. Nanda niji Kulkuda, nanda Ju yanyi, barrinani Kulaji Nguli.
MAR 15:23 Jidimba yali malumba jirrki baki ngarrki krayibkanyi. Yarrijba yali jawuda yukururuna, baki wajba yali Jisus. Ngala miku nyuliyanyi ngaraba.
MAR 15:24 Baki yali langandaba Jisus wabangkarra kurndana ngarrkadabawarrmukunyi. Ngarrkadaba yali Jisus marni nyilanyilayudinyi. Dulaba yali nangangi jumbala, baki baja yali barrinani kard wudumbikanyi nangangi jumbala. Baki kuyu yali nanda yalungi jumbala.
MAR 15:25 Langandaba yali Jisus nyilanyilayudinyi ngala nyuli yalibala.
MAR 15:26 Yarrijba yali jangkurr najana. Nanangini jangkurrwanyi karuyi yalunya nanankanyi balkinyi yajinyi, jali yalu yanyba yabimbayi Jisuswanyi. Yarrijba yali jangkurr najana, baki langandaba yali nanda naja kingkarri kurndana Jisusnyina. Nayi nanda jangkurr najana, “Nayinda nyulu walkurramirra mambuka yalungi Jumukuyngka.” Barriwa.
MAR 15:27 Baki langandaba yali yingkawuya nangandu Jisusnyina maninjakuwuya. Yingka langayi wabangkarra kurndana karriya, ngala yingka langayi wabangkarra kurndana bayinga, ngala nyulu Jisus burrandi bulandu.
MAR 15:29 Kajamuku yali jilajba kangandijba yalundu, baki ngirringirrimba yalungki kulaji. Nani barri yalungkili ngirringirrimba kulaji, jalili yalu bajalingijba yingka. Ngirrikimba yali Jisus. Yanyba yali balki jangkurr nangangi, “Yanybayi ninji, yuku janinji dalyamba nanda walkurra jurj, ngala baku barri kujarraka barndayka, yuku janinji yabimba yingka mili jurj.
MAR 15:30 Jaliyi yuku ninji yabimba yaji nani, baki lalanba nganyingkiyi. Karralakiyi wayka kurndananyi.” Nani barri yali yanyba balki jangkurr nangangi.
MAR 15:31 Baki mambukamuku jurjkanyi, baki milidimbawarrmuku yuwanyi, yali marda yanyba balki jangkurr nangangi, “Nyuli yalunya marrimba mardarda Jisuswanyi, ngala miku nangkiyi marrimba mardarda. Miku.
MAR 15:32 Yanyba nangki, nyulu nanda Krayis jali manjijba Kudwanyi, nyulu walkurra mambuka nurrungi Jumukuyngka. Jaliyi nyulu karrala wayka kurndananyi, baki yuku janurru kuyu nangangi jangkurr. Janurru kuyu nangangi jangkurr, jaliyi nyulu karrala wayka kurndananyi.” Nani barri yali yanyba balki jangkurr nangangi. Baki nanankuya maninjakuwuya, jali bula langa nangandu, bula marda yanybayi balki jangkurr nangangi. Bula marda yanybayi nanamannga jangkurr nangangi. Barriwa.
MAR 15:33 Ngala nyulu mukunjana barri, baki mungijbayi yaji bukamba. Mikuyaji ngardaranyi. Yuwajiwa mungijbayi yaji, baki mili walajbayi nanda ngardara ngabungabu bijal.
MAR 15:34 Ngala nyuli yuwajiwa mungijba yaji, baki kayayi Jisus kudanyu barri. Kudanyu nyuli kaya Ju yanyi, “Yiluyi. Yiluyi. Lama sabakdani.” Barrinani “Ngaki Kud. Ngaki Kud. Wanyingkanyi nganinji yingijba.” Nani barri kayayi Jisus. Barriwa.
MAR 15:35 Jawuda jali yalu karrinja bundu nangandu, jali manku Jisus kayankurri, baki yanyba yali, “Mankukiyi. Nyulu kayangka nangangi Yalayijakanyi.”
MAR 15:36 Yarungul nanaba jirdi ngarrkinyi krayibkanyi ngujbulanyi. Yingkawanyi nyuli kijijba karnjal wadiwadina. Yarrijba nyuli karnjal ngarrkina, baki manjijba nyuli kingkarri nangandurri Jisusyurri janyiyurri, nyulu ngaraykanyi. Baki yanyba nyuli, “Jangambala yukumba nayiba. Jangambala lalanba yaji, jaliyi nyulu badajba Yalayija nanginkurri, jaliyi nyulu marrimba Jisus mardarda, jaliyi nyulu waykalumba Jisus kurndananyi. Barriwa.”
MAR 15:37 Baki mili kayayi Jisus kudanyu barri, baki barriwa barri nangki janyba Jisus. Barriwa.
MAR 15:38 Kalawuyngkurru nananyina walkurranyina jurjina langayi walkurra blanki. Langayi nanda walkurra blanki kingkarrinya wayka jambarri. Nanamanji barri jali nangka janyba Jisus, baki bakarrawijbayi nanda blanki Kudwanyi. Bakarrawijba nyuli kingkarrinya wayka bukamba barri. Barriwa.
MAR 15:39 Nanda mambuka yalungi ngarrkadabawarrayngka jali yalu lalanba Jisus, nyuli karrinja nanaba walu nangandu Jisusnyina. Najba nyuli Jisus janybikurri nangka, baki yanyba nyuli, “Nayinda Jisus, dujanya nyuli jandanyi nangangi Kudkanyi. Dujanya nyuli nangangi jandanyi.”
MAR 15:40 Jali langa Jisus kurndana, jali nangka janyba, baki karrinjayi jawuda jibarrimuku juju bijal nangandu. Yali nanamuku jibarrimuku jalili yalu jilalajba nangandu Jisusnyina, nananyina yajina Kalili, jalili yalu lalanba Jisus. Baki yali badajba langina nangandu nanankurri Jirusalimyurri. Jawuda yalungi, yingka jibarri nangangi niji Mari Makdalin, yingka nangangi niji Mari, nyuli ngardanganja bulangi Jayimskanyi baki Jusibkanyi. Baki yingka nangangi niji Salumi.
MAR 15:42 Munganawa barri Sadidi, jalili yalu miku waki Jumuku. Miku yalili yundijba mama Sadidi Jumukunyi. Ngala yalili yundijba waluwa barri. Yingka nganinyi, nangangi niji Jusib, nangangi yaji Yarimadiya. Nanda Jusib, nyulu walkurra nganinyi, jali nyulu jungku yalundu kunsilina walkurrayngka jurjkanyi. Mankumanku yalungki kunymamba nangangi. Nulijba nyuli nangangi Kudkanyi, nyulu lalanbikanyi. Ngala nyulu ngabungabu, baki jilajbayi Jusib yurlurrmba nangandurri Biladyurri, baki ngajaka nyuli Bilad, “Jangayu kuna kuyu nanda Jisus mankanyi makaykanyi. Yuku kuna jangayu kuyu nangangi mankanyi.”
MAR 15:44 Manmalayi Bilad. Mankumanku nangki, dulu nangki janyba Jisus. Kaya nyuli nangangi, mambukanyi yalungi ngarrkadabawarrayngka, baki ngajaka nyuli nanda mambuka, jaliyi nangki janyba Jisus.
MAR 15:45 Karuyi Bilad mambukawanyi, “Yi, nangki janyba.” Baki karuyi Jusib Biladwanyi, yuku janyulu dulaba Jisus mankanyi makaykanyi.
MAR 15:46 Wudumbayi walkurra raki barrinani blanki Jusibwanyi. Wudumba nyuli nanda walkurra raki, baki wijba nyuli nanankurri yajiyurri jali langa Jisus mankanyi. Dulaba nyuli Jisus mankanyi, baki kijijba nyuli mankanyi lukuluku bukamba nukamiyurru rakiyudinyi. Baki yarrijba nyuli mankanyi kumayanguna, jali kurrijba nanda lawarr wujina dungalana yingkawanyi. Yarrijba nyuli Jisus mankanyi kumayanguna, baki murumba nyuli bardawa nangangi dungalayudinyi. Karranunumba nyuli walkurra dungala murumbiji bardawa.
MAR 15:47 Nanda jibarri Mari Makdalin, baki nanda yingka jibarri niji Mari, jali nyulu ngardanganja nangangi Jusibkanyi, jungku buli nanaba. Najba buli Jusib yarriykurri mankanyi kumayanguna. Barriwa.
MAR 16:1 Munganawa barri Sadidi, baki jali yalu wuyalijba. Ngala mungana barri wudumba yali jirrki jibarrimukunyi. Wudumba yali nanjananja jirrki jali kunyba kudu. Jayalu yarrijba mankanyina Jisusnyina. Murrku yali jibarrimuku, yingka nyuli Mari Makdalin, yingka nyuli nanda Mari jali nyulu ngardanganja nangangi Jayimskanyi, baki yingka nyuli Salumi.
MAR 16:2 Yingkana mungana Sundi, ngala nyuli kambalingijba yaji, baki jilajba yali jibarrimuku kumayangurri.
MAR 16:3 Ngala yali jilajba, baki ngajaka yalungki, “Wanyingini janyulu jululumba dungala bardawananyi, baki jangambala ngankijba kalawuyngkurru kumayanguna. Wanyingini janyulu jululumba dungala ngambalangi.” Nani barri yalungki ngajaka, walkurrangangi nanda dungala bardawana. Wanbiya yali kumayanguna, baki najba yali nanda dungala jungunkurri wilina bardawana.
MAR 16:5 Ngankijba yali kumayanguna, baki najba yali nganinyi jungunkurri kalawuyngkurru wilina muwana. Nangangi jumbala nyuli buludamirra. Najbayi nganinyi jibarrimukunyi, baki marrala yali yajinyi.
MAR 16:6 Yanyba nyuli yalungi, “Miku narriyi marrala ngaki. Ngayu jingkijbangka narrinya, narri kujbangka nangangi Jisuskanyi, nangangi yaji Nasarid, jali yalu langandaba kurndana. Miku nyulimi nayiba. Mili nyuli walajba. Najba janarri danbal jali kululuka nangangi mankanyi nanaba. Miku nyulimi nayiba. Walajbayi mili.
MAR 16:7 Ngala wijba janarri karri Jirusalimyurri, Wijba janarri yalundurri kandimukuyngkurri Jisuskanyi. Baki janarri yanyba nayinda jangkurr yalungi, baki nangangi Bidanyi. Nyulu jilajbangka langki Kaliliyurri waluwa yalundu. Nyulu jilajbangka langki nanankurri, baki nanaba jayalu najba Jisus, barrinani nyuli karu yalunya wabula. Jayalu najba Jisus nanaba barri.” Barriwa.
MAR 16:8 Walajba yali jibarrimuku kumayangunanyi, baki wirlku yali karri. Wirlku yali, marralangangi yali yajinyi. Birrirri yali mankanyi. Miku yaliyanyi karu yingkamuku nanankanyi yajinyi. Barriwa.
MAR 16:9 Walajbayi Jisus kumayangunanyi Sundi barri, ngala nyuli barringa barri kambalangiykanyi yaji. Baki minimba nangki Jisus waluku nangangi Mari Makdalinkanyi. Nyuli najba Jisus waluwa yingkamukuyngka. Nanda Mari Makdalin, nyuli nanda jibarri jali waluwa jakajba kaja wuwarr 7-barri nanganbunanyi mankanyinanyi Jisuswanyi. Najba nyuli Jisus waluku barri.
MAR 16:10 Baki jilajbayi Jisus yalundurri nanganginmukuyngkurri kandimukuyngkurri. Malumba yali jungku, baki ngindu yali muwa kudanyu barri nangangi Jisuskanyi. Karuyi yalunya Mariwanyi, nyuli najba Jisus mili wankiykurri. Jali yalu manku nangangi jangkurr, baki miku yaliyanyi kuyu nanda jangkurr. Ngamu jujambayi yalunya Mariwanyi. Miku yaliyanyi kuyu nangangi jangkurr. Barriwa.
MAR 16:12 Kamu barri najba buli Jisus yingkawuyanyi. Ngala buli jilajba bayungu yubalina Jirusalimnanyi, baki kabujurru bulanya Jisuswanyi. Waluku barri yakanajba buli Jisus, ngala kamu buli jingkijba.
MAR 16:13 Wijba buli karri Jirusalimyurri, baki bula marda karuyi yalunya kandimuku nangangi Jisuskanyi, mili wankijbayi. Ngala miku yaliyanyi kuyu bulangi jangkurr marda. Barriwa.
MAR 16:14 Kamu barri jali yalu jarrba yaji kandimukunyi 11 barri, baki minimba nangki Jisus yalundurri. Ngirrwa nyuli yalungi, mikungangi yaliyanyi kuyu yalungi jangkurr jali yalu najba Jisus mili wankijbayi. Yali jardibirri kurdulu. Miku yaliyanyi kuyu nanda jangkurr yalungi nangangi Jisuskanyi mili wankijbayi.
MAR 16:15 Yanybayi Jisus yalungi, “Ngayu karungka narrinya. Janarri jilalajba wandijiyana. Janarri milidimba yalunya bukambiju ngakinkanyi kunybanyi jangkurranyi.
MAR 16:16 Kajamukunyi jayalu kuyu narringi jangkurr ngaki, baki janarri ngurrunba yalunya wabudana. Baki janyulu marrimba yalunya mardarda Kudwanyi. Ngala yingkamukunyi jayalu miku kuyu narringi jangkurr ngaki, baki janyulu daba yalunya Kudwanyi. Janyulu manjijba yalunya wayka jangurri.
MAR 16:17 Ngala nanamuku jalija yalu kuyu narringi jangkurr ngaki, jangayu yabimba yalunya ngiruka, yalu yabimbikanyi ngiruka yaji. Kudiyana jayalu jakajba wuwarrmuku yalundunanyi mankanyinanyi nijarriykanyi ngaki niji. Kudiyana jayalu yanyba yinini yinini yanyi.
MAR 16:18 Kudiyana barri jaliyi yalu marrimba bijbawarr miya, baki miku yalunyiyi kurdanba miyawanyi. Jaliyi yalu ngaraba yilarr, baki miku yaliyi lunji. Jaliyi yalungka yarrijba marni yalundu jala yalu lunji, baki jayalu kunybijba mankanyi. Nani barri jayalu yabimba ngiruka yaji ngaki.” Barriwa.
MAR 16:19 Nani barri yanybayi mambuka Jisus yalungi, baki bayngkani nyuli kirrijba kingkarri lalijiyurri. Jungku nyuli nangandu Kudnyina. Nyulu walkurra mambuka bayngkani nangandu Kudnyina.
MAR 16:20 Ngala nanganginmuku kandimuku yalili jilalajba wandijiyana. Yalunjalili milidimba kunybanyi jangkurranyi Jisuskanyi. Bakili kandimba yalunya mambukawanyi Jisuswanyi ngala yalili waki nangangi. Baki nanankardi barri yalili yabimba ngiruka yaji, ngala yalunjalili milidimba. Yingkamukunyi yalunjali najba kandimuku yabimbikurri ngiruka yaji, baki yali yanyba, “Nanda jangkurr nangangi Jisuskanyi, nanda duja jangkurr. Ngambala najbangka Kud wakinkurri yalundu.” Barriwa barri. Bukamba nayinda jangkurr.
JOH 1:1 Wabula kamambarra barrabarruji, jali mikuyaji jambanyi, mikuyaji wabudanyi, nanamanji kamambarra, baki nanda barri jungku nyulili Kudnyina. Nanda barri jungkukili kingkarri nangandu Kudnyina, nanda karu jali jangkurranyi nangangi kudkanyi. Jungku bulili malumba, nanda baki Kud. Malumba bulili jungku nanankujarra. Mankumanku bulangkili nanamannga jangkurranyi. Yanyba bulili nanamannga jangkurr. Nyulu barrinani Kud nanda barri.
JOH 1:3 Nanda jalili jungku Kudnyina, yabimba nyuli bukamba yaji, laliji, baki jamba, baki kanja. Bukamba yaji nyuli yabimba. Waluwa mikuyaji, ngala bayngkani nyuli yabimba yaji, laliji, marda yaji wandijiyana, marda kanja. Bukamba yaji nyuli yabimba.
JOH 1:4 Nanangini barri nyuli yabimba ngambalanya wankan jungunkanyi yurrngumba. Yabimbayi nganinyimuku marda jibarrimuku jungunkanyi yurrngumba wankan. Barriwa. Nanda barri nanda Jisus, nyulu barrinani mirnbi. Jala warnbarrarlbangka yaji mirnbiwanyi, baki minimbaka yaji, baki najba yalu yaji mungana. Nani barri nanda Jisus, nyulili minimba ngambalanya nanankanyi yuwanyi Kudkanyi.
JOH 1:5 Nanda mirnbi warnbarrarlbangka yaji yurrngumba mungijba jala yaji. Yurrngumba nyulu warnbarrarlbangka yaji. Mikuwali mungamba nanda mirnbi nanangini mungawanyi. Warnbarrarlbangka yaji yurrngumba mirnbiwanyi. Barriwa.
JOH 1:6 Baki bayngkani juju, nyuli manjijba nganinyi Kudwanyi. Nijarrijba nyuli nanda nganinyi Jun.
JOH 1:7 Manjijba nyuli nanda, karunki yingkamuku nganinyimuku nanankanyi mirnbinyi. Manjijbayi nanda Jun Kudwanyi, karunki yalunya nanankanyi Jisuskanyi.
JOH 1:8 Nanda Jun, miku nyuli nanda barrinani nanda mirnbi. Miku. Ngala nyuli badajba karunki yalunya nanankanyi mirnbinyi. Miku nyuli barrinani nanda mirnbi.
JOH 1:9 Ngala Jisus, nyulu nanda barrinani nanda mirnbi walkurra. Nyulu minimbaka ngambalanya nanankanyi yuwanyi Kudkanyi. Nyulu karungka bukambiju ngambalanya jangkurranyi Kudkanyi.
JOH 1:10 Baki nanda Jisus, badajba nyuli jambarri. Badajba nyuli, baki nyuli jungku ngambalandu nanganginyina yajina. Yabimba nyuli bukamba yaji, ngala mungkijimuku nangangi, mudumbanyi yali nangangi. Nanda Jisus jali yabimba yaji wandijiyana, miku yaliya jingkijba nanda Jisus.
JOH 1:11 Badajba nyuli nanganginkurri yajiyurri, ngala nanganginmuku mungkijimuku, miku yaliya kandimba. Miku yaliya kuyu nangangi jangkurr.
JOH 1:12 Ngala yingkamukunyi yuku. Kandimba yali Jisus. Manku yali, baki kuyu yali nangangi jangkurr. Jingkijba yali, nyulu jandanyi nangangi Kudkanyi. Jali yalu kuyu nangangi jangkurr, baki nyuli karu yalunya jungunki kunybana yuwana Kudkanyi. Jaliyi yalu jungku kunybana yuwana Kudkanyi, baki yalu jungku barrinani jandanyimuku nangangi Kudkanyi. Nani nyuli yarrijba yalunya jandanyimuku nangangi Kudkanyi.
JOH 1:13 Nanganginmuku jandanyimuku nyuli yarrijba yalunya. Jandanyi yalu nangangi Kudkanyi, ngala miku barrinani bula kuluka malumba maykarra, baki bayngkani nangka binandaba bardardanyi. Miku nani. Miku. Ngala Kudwanyi nyulu yarrijba yalunya nanganginmirra jandanyimuku. Yarrijba nyulu yalunya, kuyu jali yalu nangangi jangkurr Jisuskanyi.
JOH 1:14 Nanda Jisus, karu jala ngambalanya jangkurranyi Kudkanyi, nanda Jisus manjijbayi Kudwanyi ngamandurri. Jungku nyuli ngambalandu mankanyiyudi. Jungku nyuli, baki yanyba nyuli duja jangkurr, mankumanku nangki kunybanyi yajinyi. Najba ngambali nanda Jisus. Jingkijba ngambali nyuli walkurra mambuka, nyulungangi jandanyi nangangi Kudkanyi, nanganginmirra jandanyi nyuluman.
JOH 1:15 Nanda Jun Ngurrunbawarr, yanyba nyuli Jisuskanyi. Karu nyuli yingkamuku kudanyu Jisuskanyi. Nayi nyuli yanyba yalungi, “Nanda jalija badajba bayngkani ngakindu, nyulu barri walkurra mambuka nyuluman. Miku ngayu walkurra. Miku. Ngala nanda, nyulu walkurramirra, jungkungangi nyulu waluwa ngaki, waluwa ngayi bardarda. Ngala ngayu mikuyaji, ngala nyulu jungku wankan.”
JOH 1:16 Nyulu walkurra mambuka, baki nyulu yabimba kunyba yaji ngambalangi. Kunyba yaji nyulu yabimba ngambalangi, marukangangi nyulu muwa ngambalangi. Kaja yaji kunyba nyulu yabimba, baki mili kunyba yaji, baki mili, marukangangi nyulu muwa bukambijuyngka, nganiyngkanyi, jibarrinyi, bayamukuyngka. Barriwa.
JOH 1:17 Nanangini wankalawanyi Musiswanyi, kamambarra nyuli milidimba ngambalanya yuwanyi Kudkanyi. Milidimba nyuli yuwanyi Kudkanyi. Ngala nanangini Jisuswanyi Krayiswanyi, mili nyulu milidimba ngambalanya yingkanyi jangkurranyi. Nanda jangkurr yanybaka Kudkanyi, nyulu maruka muwa ngambalangi. Nanda jangkurr jali yanyba Jisus Krayis, nanda duja jangkurr Kudkanyi, maruka nyulu muwa ngambalangi.
JOH 1:18 Nanda Jisus, jungku nyuli wilina Kudnyina. Ngawamba nyuli najba Kud. Miku yingkawanyi najbayi Kud. Miku. Ngawamba Jisuswanyi nyuluman najbayi Kud, baki nyuli karu ngambalanya Kudkanyi. Barriwa.
JOH 1:19 Nanamuku mambukamuku jurjkanyi, jungku yalili Jirusalim. Jali yalu manku nangangi Junkanyi Ngurrunbawarrayngka, baki manjijba yalunjali nangandurri. Manjijba yali kudiya malbumalbu jurjkanyi. Manjijba yalunjali nangandurri Junyurri.
JOH 1:20 Kangandijba yali karri bundalina niji Jurdan, jali ngurrunba yalunya Junwanyi. Kangandijba yali nanankurri yajiyurri Bidaniyurri. Jali yalu wanbiya Junyina, ngajaka yali, “Ninji ngurrunbawarr, wanyi ninji, wanyi.” Jananganjayi yalunya Junwanyi. Mikuwali julanba. Jananganja nyuli, “Miku ngayu nanda Krayis. Miku.” Barriwa. Baki ngajaka yali, “Ngala wanyi ninji. Ninji kuna nanda wankalanyi Yalayija.” Jananganjayi Junwanyi, “Miku. Miku ngayu nanda Yalayija.” Mili yali ngajaka nanda Jun, “Ngala ninji kuna nanda jali nyulu manjijba Kudwanyi. Nanda wankala Musis yanyba nyuli nayinda jangkurr, ‘Manjijba janyulu yingka barrinani ngayu. Yingka barrinani ngayu janyulu manjijba Kudwanyi.’ Barriwa. Ninji kuna nayi.” Ngala mili yalunya jananganjayi Junwanyi, “Miku ngayu nayinda. Miku ngayu.” Baki mili yali yanyba nangangi Junkanyi, “Ngala wanyi barri ninji. Karukiyi nurrunya nganyi. Karukiyi nurrunya wanyi ninji. Nanamuku manjijba jali nurrunya nganyindurri, yalu nulijba jingkiykanyi nganyi. Wanyi jangkurr nganyi janurru wiykunumba yalundurri. Ngala wanyi barri ninji.” Barriwa. Baki jananganjayi Junwanyi. Nayi nyuli yanyba, “Ngayu nayi. Nanangini wankalawanyi Yayisayawanyi yarrijba nyuli nayinda jangkurr. Yarrijba nyuli najana Kudkanyi nayi, ‘Jilalajbaja nganinyi mangkurruna. Kaya janyulu kudanyu. Kaya janyulu nayi.’ Birrirrinja narringka nanda narringi kurdulu, badajbangangi nanda walkurra mambuka. Badajba janyulu, nanda jalija Kudwanyi manjijba. Birrirrinja narringka nanda kurdulu nangangi. Nani yanybayi nanda Yayisaya. Barriwa. Nanda jala kaya mangkurruna nanda ngayu.” Barriwa. Kudiyamuku nanaba jali yanyba nangangi Junkanyi, manjijbayi yalunya Barasimukunyi nangandurri Junyurri. Nanamuku Barasimuku yalili kudanyu durrijba nanda yuwa nangangi Musiskanyi. Ngajaka yali Jun nangingkanyi jangkurranyi Barasimukunyi, “Yanyba ninji, miku ninji Krayis. Miku ninji Yalayija. Miku ninji nanda barrinani Musis. Ngala wanyingkanyi ninji yalunya ngurrunba. Wanyingkanyi barri.” Jananganja yalunyi Junwanyi, “Ngurrunba ngayili yalunya wabudana. Wabudana ngayili ngurrunba yalunya. Ngala nayiba jungkuka yingka nganinyi narrinbu, ngala miku narrimi jingkijba. Miku. Miku narrimi jingkijba nanda jala jungkuka narrinbu. Ngala nyulu nanda jala badajba bayngkani ngakindu. Waluwa ngayi badajba, baki bayngkani nyulu. Nyulu walkurra mambuka, ngala miku ngayu. Miku ngayu walkurra dulaykanyi nangangi jabunungkaji. Miku ngayu walkurra barrinani nanda. Miku ngayiyi dulaba jabunungkaji nanganbunanyi nukaminanyi. Walkurra kudanyu nyulu ngaki. Nyulu ngiruka. Miku ngayu.” Nani jananganjayi yalunya Junwanyi. Barriwa. Nani yali yililikajba Jun Jumukunyi, baki wijba yali bayungu Jirusalimyurri.
JOH 1:29 Munganawa, najbayi Jisus Junwanyi. Najba nyuli Jisus badaykurri nangandurri. Ngala nyuli badajba, baki yanybayi Jun yalungi nanganbu, “Ningkijbakiyi narri. Nanda jala badajbangka, nyulu barrinani Bulungu Jibkanyi. Ngambalili kurdanba bulungu jibkanyi manjamanjambikanyi ngambalangi balki yaji Kudwanyi. Nyulu jala badajbangka nyulu barrinani Bulungu Jibkanyi Kudkanyi. Kuyu janyulu narringi balki yaji, yabimba jala narri. Manjamanjamba janyulu narringi balki yaji, Bulungungangi nyulu, barrinani Jib Kudkanyi.” Nayinda jangkurr “Bulungu Jibkanyi Kudkanyi”, nayinda yingka niji nangangi barrinani Krayiskanyi.
JOH 1:30 Mili yanybayi Jun nayi, “Nanda jala badajbangka, nyulu nanda, yanyba jala ngayi narringi wabula. Karu ngayi narrinya nangangi wabula. Nyulu nanda walkurra mambuka, manjijba jali Kudwanyi. Nyulu nanda walkurra mambuka. Miku ngayu walkurra mambuka barrinani nyulu, jungkungangi nyuli waluwa ngaki.
JOH 1:31 Miku ngayiya jingkijba kudanyu wanyi nayi badajba bayngkani ngakindu. Miku ngayiya jingkijba. Ngala ngurrunba ngayu yalunya, jali yalu ngindu yalunginkanyi balkinyi yajinyi. Baki jayalu jingkijba nanamukunyi Jumukunyi. Jayalu jingkijba nanda jala badajba ngamandurri. Jayalu jingkijba, nyulu Bulungu Jibkanyi, nanda Krayis.” Nani Junwanyi karuyi yalunya Jumuku, Jisuskanyi. Nani nyuli karu yalunya ngala badajbayi Jisus nangandurri Junyurri.
JOH 1:32 Baki mili karuyi yalunya Junwanyi, “Najba ngayi nanda Kunyba Ngarndu Kudkanyi. Najba ngayi nanda Ngarndu karralankurri kingkarrinya. Kingkarrinya nyuli karrala nangandurri Jisusyurri. Jungku nyuli nangandu kulajina, barrinani kulukuku babangka kingkarrinya kurndarri. Nani barri karralayi Ngarndu Kudkanyi nangandurri Jisusyurri.
JOH 1:33 Miku ngayiya jingkijba wanyi nayinda, jangumba karralayi kingkarrinyi nanda Kunyba Ngarndu Kudkanyi nangandu kulajina, barrinani kulukuku. Kudwanyi manjijbayi ngana ngurrunbiji yalunya. Manjijbayi ngana ngurrunbiji kalawunyi wabudana. Yanybayi Kud ngaki, ‘Ngurrunba janinji yalunya. Yingka barri janyulu badajba nganyindurri. Jalija nyulu wanbiya, manjijba jangayu ngaki Kunyba Ngarndu nangandurri. Najba janinji ngaki Ngarndu karralankurri nangandurri kulajiyurri, jungunki nangandu kulajina. Jalija ninji najba, baki janinji jingkijba nanda nyulu. Yawumba ninji yalunya wabudana, ngala nyulu, yawumba janyulu Ngaki Kunyba Ngarndu yalundu.’ Nani barri yanybayi Kud ngaki, jali ngana manjijba Kudwanyi.
JOH 1:34 Ngala nanamanji jali ngayu najba Jisus, nanamanji ngayi jingkijba. Jingkijba ngayi, nyulu Jandanyi Kudkanyi. Karu ngayu narrinya, nayinda nyulu Jandanyi Kudkanyi nyuluman.” Barriwa. Nani yanybayi Jun yalungi ngala badajbayi Jisus nangandurri. Barriwa.
JOH 1:35 Munganawa barri, ngala nyuli ngabungabujba yaji, nanda Jun Ngurrunbawarr, jungku nyuli nanaba. Jungku nyuli baki kandiwuya nanaba nangandu. Malumba yali jungku nanamannga nanda yaji.
JOH 1:36 Jungkuyi Jun baki mili nyuli najba Jisus jilaykurri. Najba nyuli Jisus jilaykurri. Najba nyuli Jisus jilaykurri nanganduyangka. Baki nyuli yanyba, “Ningkijbakiyi. Nanda, nyulu Bulungu Jibkanyi Kudkanyi.”
JOH 1:37 Manku buli nanda jangkurr, kandiwuyanyi Junkanyi, jali jungku nangandu. Manku buli baki walajba buli. Walajbayi baki durrijba buli Jisus.
JOH 1:38 Yangkalambayi Jisus, baki najba nyuli bulanya kandiwuya Junkanyi. Najbayi bulanya durriykurri bayngkani nangandu. Yanyba nyuli bulangi. Nayi nyuli yanyba, “Wanyingkanyi ngana nimbala durrijba. Wanyingkanyi.” Jananganja buli, “Milidimbawarr. Wanjawa nganyi barnda. Wanjawa janinji kuluka.”
JOH 1:39 Yanybayi Jisus bulangi, “Nimbala. Jilajba janimbala ngakindu, baki janimbala najba ngaki barnda. Janimbala jilajba ngakindu.” Barriwa. Baki barlba buli nangandu Jisusnyina. Najba buli nangangi barnda, baki jungku buli nangandu baki mungijbayi yaji.
JOH 1:40 Nanankujarra, manku jali jangkurr Junkanyi, jilajba jali nangandu Jisusnyina, yingka nangangi niji Yandru, nyuli kanyiya nangangi Sayimin.
JOH 1:41 Baki Yandru, waluku nyuli barlba kuji nanganginkanyi buwanganjanyi. Kujbayi nangangi, niji nangangi Sayimin. Jala wakarambayi nangangi buwanganja, karu nyuli, “Wakaramba nurri nanda Krayis. Wakaramba nurri.” Barriwa.
JOH 1:42 Baki buli badajba Jisusyurri. Jala buli wanbiya nangandu, baki ningkijba nyuli Sayimin Jisuswanyi. Ningkijba nyuli, baki yanybayi Sayiminkanyi, “Nganyi niji Sayimin, ninji jandanyi Junkanyi. Nanda Jun, yingka nyuli, malbu nanamannga niji Jun. Nganyi niji Sayimin, ngala wajba ningaja yingkanyi nijinyi. Nijarrijba janinga yingka niji, Bida. Nanda niji Bida, nanda buyingkinyi niji nganyi.” Nanda jangkurr Bida, Krik yanyi barrinani nanda jangkurr ‘dungala.’
JOH 1:43 Nanankujarra buwakula Yandru marda Bida, jungku bulili barrawuyabarrawuyana niji Bidsayida. Nanda bulangi yaji Bidsayida. Marda yingka nganinyi, jungku nyulili nanaba, nangangi niji Bilib. Barriwa. Munganawa barri, najbayi wakaramba nyuli nanda Bilib Jisuswanyi. Najbayi baki yanybayi nangangi, “Barlba jangayu nanankurri yajiyurri niji Kalili. Janinji jilajba ngakindu. Langki nungkalaja jilajba.” Barriwa.
JOH 1:45 Waluku barri jilajbayi Bilib. Wakaramba nyuli nangangi kandi, niji Nadanyil. Yanybayi Bilib nanganginkanyi kandinyi, “Wakaramba nurri nanda Kudkanyi. Nanangini wankalawanyi Musiswanyi, yarrijba nyuli najana Kudkanyi. Yarrijba nyuli nangangi, manjijba jalija Kudwanyi. Wakara barri. Wakaramba nurri nanda barrinani Musis. Marda yingkamukunyi wankalamukunyi, yanyba jali jangkurr Kudkanyi, yarrijba yali nangangi marda. Wakaramba nurri nanda, yanyba jali yalu nangangi, nangangi niji Jisus. Jungku nyulili Nasarid, nangangi yaji. Nyulu jandanyi nangangi malburruwa Jusibkanyi. Wakaramba nurri barri.” Barriwa.
JOH 1:46 Jananganjayi Bilib kandiwanyi Nadanyilkanyi. Yanybayi, “Nanda, najba jali narri, nangangi yaji Nasarid kuna. Mikuyaji walkurrayngka mambukanyi jardijbayi nanama Nasarid.” Barriwa. Baki Bilib, nyuli yanyba nanganginkanyi kandinyi, “Jilajbakiyi ngakindu naji nanda Jisus. Janinji najba Jisus.” Baki barlba buli Jisusyurri.
JOH 1:47 Najba nyuli bulanya Jisuswanyi. Jali nyulu najba bulanya badaykurri bundu nangandu, baki yanyba nyuli, “Najbakiyi nanda nangandu Bilibnyina. Nyulu kunyba nganinyi Ju, kunybamirra. Nyulu yanybawarr yurlurr, marda jungkuka kunyba. Mikuyaji nangandu balkinyi. Miku nyulimi jujamba yaji.” Barriwa.
JOH 1:48 Mankuyi nanda jangkurr Nadanyilwanyi. Ngala nyuli wanbiya, baki ngajaka nyuli Jisus. “Miku nganinji jingkijba. Miku nganinji najba wabula. Yanka ninji yanyba nanda jangkurr ngaki. Yanka barri.” Jananganjayi Jisuswanyi, “Najba ningi barrin, jungku jali ninji ngarnduna kalawumbina. Najbayi ninga jungunki nanaba, waluwa jilajbayi Bilib nganyindurri.” Barriwa.
JOH 1:49 Baki yanybayi Nadanyil Jisuskanyi, “Milidimbawarr. Ninji Jandanyi Kudkanyi. Ninji walkurra mambuka bukambijuyngka Jumukuyngka. Ninji Jandanyi Kudkanyi.”
JOH 1:50 Yanybayi Jisus, “Nanda jangkurr yanyba ninji ngaki. Mankumanku nganyingka ngayu Jandanyi Kudkanyi kuna, karungangi ninga, najba ninga barrin ngarnduna kalawumbina. Nani kuna nganyingka mankumanku ngaki, ngayu Jandanyi Kudkanyi. Nanda ngaki yaji kunyba, ngala ngawamba bijal ngiruka jingkijba jala ngayi, ninji nanaba ngarnduna. Mili jardibirri ngiruka yaji baku. Najba janganinji yabimbikurri ngiruka yaji kudukudu baku barri.”
JOH 1:51 Mili yanybayi Jisus, “Karungka ngayu duja jangkurr. Baku barri, najba janinji bardawa lalijina. Najba janinji nanamuku Yanjilmuku, waki jala Kudkanyi. Badajba jayalu ngakindurri, Buwayarri Bukambijuyngka. Wurrududu jayalu kingkarrinya ngakindurri, baki kirrijba jayalu kingkarri. Barriwa.” Nani yanybayi Jisus nangangi Nadanyilkanyi.
JOH 2:1 Yingkana mungana, jamalu bulangki nananyina yajina barrawuyabarrawuyana, niji Kayina, baki jarrba yali kunyba mama bulangi. Marda ngardanganja nangangi Jisuskanyi, jarrba nyuli mama nanaba bulangi.
JOH 2:2 Jisus marda nanganginmuku kandimuku, jungku yali nanaba. Jarrba yali mama marda. Jarrba yali mama, baki ngaraba yali marda ngarrki krayibkanyi.
JOH 2:3 Kamu barri, yali ngaraba bukamba ngarrki krayibkanyi. Jali bukamba nanda ngarrki, baki ngardanganja Jisuskanyi yanyba nyuli nangangi Jisuskanyi. Nayi nyuli yanyba, “Mikuyaji ngarrkinyi krayibkanyi. Mikuyaji. Bukamba yali.” Barriwa.
JOH 2:4 Jananganjayi Jisuswanyi, “Wanyingkanyi nganinji karu ngarrkinyi. Wanyingkanyi. Jilijbawa ngayuja minimba yalungi nanda ngiruka yaji jalija ngayu yabimba. Jilijbawa. Barriwa.”
JOH 2:5 Ngala nyuli karu yalunya wakiwarrmuku ngardanganjawanyi Jisuskanyi. Yanyba nyuli yalungi, “Yabimbakiyi nanda, karu jalija narrinya yabimbikanyi. Yabimbakiyi nanda, yanyba jalija nyulu. Barriwa.”
JOH 2:6 Nanamuku Jumuku, nayinda yalungi yaji. Waluku yalungkili wakardaba marni, baki bayngkani yali jarrba yaji. Nanda yuwa Jukanyi yanybayi nani wakardaykanyi marni. Barriwa. Jungkuyi nanaba kaja lujuluju marda yalungi wabudanyi. Nanda lujuluju yalungi jungkuyi kujarra yingamali baki kujarra yingamali. Walkurra barri kudanyu nanda lujuluju.
JOH 2:7 Baki yanybayi Jisus yalungi wakiwarrayngka. Karu nyuli yalunya, “Wudumbakiyi yalunya kaja lujuluju baki kularrijbakiyi wabuda. Kularrijba janarri wabuda.” Ngayangayijba yali nanda jangkurr Jisuskanyi. Wudumba yali wabuda, kularrijba yali nanda wabuda walbinyi.
JOH 2:8 Baki karu nyuli yalunya Jisuswanyi, “Wudumbakiyi kudiya wabuda lujulujunanyi. Wudumbakiyi wabuda, baki kuyukiyi nanda wabuda mambukarri. Wajba janarri nanda mambuka wabudanyi lujulujunanyi. Barriwa.” Ngayangayijba yali Jisuskanyi. Kuyu yali nanda wabuda mambukarri. Barriwa.
JOH 2:9 Marrimbayi nanda wabuda mambukawanyi, wajba jali wakiwarranyi. Marrimba nyuli, baki balanjayi. Ngala miku nanda wabuda. Miku. Waluwa nyuli wabuda, ngala yangkalamba nangki ngarrki krayibkanyi. Miku nyuliya jingkijba nanda ngarrki krayibkanyi mambukawanyi. Miku nyuliya jingkijba, ngala wakiwarranyi, yuku yalu jingkijbayi. Nanda mambuku jilajbayi nangandurri buyingkingkurri nawinganjarri. Ngamu kilimbayi kunyba ngarrki kamunyi nawinganjawanyi.
JOH 2:10 Baki yanybayi nangangi, “Yingkamukunyi, waluku yalunjalu wajba kunybayi ngarrkinyi krayibkanyi. Waluku nanda kunyba ngarrki, ngala bayngkani wajba yalunjalu yingkanyi ngarrkinyi jala miku kunyba. Ngala ninji barri miku. Bayngkani ninji wajba nurrunya nanginkanyi kunybanyi ngarrkinyi. Ninji barri kunyba nganinyi. Kunyba ninji.”
JOH 2:11 Nani yabimbayi walkurra yaji ngiruka Jisuswanyi. Jalannga nyuli yabimba ngiruka yaji nananyina yajina Kayina. Nanda yaji Kayina, nananyina walkurranyina yajina Kalili. Jingkijba yali, nyuli walkurra mambuka, yabimbangangi nyuli nanda ngiruka yaji ngarrkinyi krayibkanyi. Nanamukunyi nanganginmukunyi kandimukunyi, jingkijba yali, nyuli Jandanyi Kudkanyi. Barriwa.
JOH 2:12 Baku barri jilajba nyuli karri, marda yali jilajba nangandu, nangangi ngardanganja, marda nanganginmuku kanyiyamuku, marda nanganginmuku kandimuku. Bukamba yali jilajba karri Kabirnayumyurri. Jungku yali nanaba mardunguji.
JOH 2:13 Winyurru nanda wangarr yalungi, niji ‘Kangandijbayi Barrawuna Yajinyi,’ jalili yalu jarrba nanda damba, mikuyaji bululunyi. Kajamuku Jumuku yalili jilajba Jirusalimyurri wangarranyi. Jisus marda yingkamuku nangandu, jilajba yali kularriji Jirusalimyurri. Jilajba yali wangarranyi niji ‘Kangandijbayi Barrawuna Yajinyi.’
JOH 2:14 Jilajbayi Jisus walkurrayngkurri, jurjyurri. Ngankijba nyuli kalawunyi, baki najba nyuli kajamuku nganinymuku nanaba jurjina, kalawunyi. Kudiya yali jungku nanaba bulukiyudi, marda kudiya yali nanaba jibyudi, kudiya yali kulukukuyudi. Jungku yali nanaba waykanyi yajinyi, marda bulukinyi, marda jibkanyi, marda kulukukunyi. Wajba yalunjali dungalanyi yingkamukunyi, wudumba jali yalu nanda yaji. Barriwa. Ngala yingkamukunyi, yali kuyu yalungi dungala, wajba yalunjali yingkanyi dungalanyi. Jali nyulu ngankijba kalawunyi jurjina, baki najbayi yalunya Jisuswanyi, baki nyuli ngarrangarra muwa yalungi. Ngarrangarra nyuli muwa jala nyuli najba yalunya wawaykurri yajinyi.
JOH 2:15 Wudumba nyuli laja, baki yabimba nyuli kurul wajuykanyi yaji. Jakajba nyuli nanamuku bulukimuku, marda jibmuku. Jakajbayi danbiyurri kurulyudinyi. Jakajba nyuli jurjnanyi danbiyurri. Baki nyuli janyba darladarlamuku, jungku jali nanda dungala yundu. Janyba nyuli baki jarrbalamba nyuli yalungi dungala junu.
JOH 2:16 Baki jirrinyba nyuli nanamuku, kuyu jali kulukuku kalawunyi wudumbiji dungala. Jirrinyba nyuli, “Mikujiyi kuyu yaji nayiwa. Kuyukiyi yaji nanawa danbiyurri. Mikujiyi kuyu nanda kulukuku kalawuyngkurru jurjyurri. Nayinda yaji jurj nangangi Kudkanyi. Nayinda nangangi barrawu ngakinkanyi Buwanganjanyi. Miku nayinda barrawu waykanyi narrinya dungalanyi.”
JOH 2:17 Baki kandimukunyi Jisuskanyi, mankuwa yali wankalanyi jangkurr. Nayi nanda jangkurr, “Ngurrunajba nganyi ngakinkanyi Kudkanyi. Marda ngurrunajba nganyingkanyi barrawunyi jurjkanyi. Janganjalu linjumba, kurdanba, marukangangi ngayu muwa nganyingkanyi jurjkanyi, kurrkunbangangi ngayu yalunya, baki yalu barimba nanda kudukudu yaji nganyi.” Kandimukunyi Jisuskanyi mankuwa yali nanda jangkurr, jali Jisuswanyi jakajbayi yaji jurjnanyi.
JOH 2:18 Ngala mambukamukunyi jurjkanyi, ngajaka yali Jisus, “Wanjangi ninya karuyi jakaykanyi yalunya jurjnanyi nani. Karuyi ninya Kudwanyi kuna. Jaliyi ninya karu Kudwanyi, baki yabimbakiyi ngiruka yaji nurrungi, baki janurru jingkijba ninji walkurra ngiruka. Janinya nurru jingkijba, manjijba ninyi Kudwanyi, yabimba jalija ninji ngiruka yaji.” Barriwa.
JOH 2:19 Jananganjayi yalunya Jisuswanyi, “Jaliyi dalyawijba nayinda jurj, baki jangayu mili yabimba nayinda jurj. Kujarraka barndayka jangayu mili yabimba, baki kunybijbaja bukamba.” Barriwa.
JOH 2:20 Yanyba yali nangangi, “Miku ninjimi yabimba mili kujarraka barndayka. Miku. Jali yalu yabimba nayinda jurj, waki yali yurrngumba kajana kindilkurrinyina. Kajana kindilkurrinyina, 46 barri yali waki yabimbiji nayinda jurj. Miku ninjiyi mili yabimba kujarraka barndayka.” Barriwa.
JOH 2:21 Jali yanyba Jisus mili yabimbikanyi yaji, miku nyuliya yanyba yabimbikanyi nanda walkurra jurj. Miku. Ngala yanyba nyuli nanganginkanyi mankankanyi, janyulu wankijba mili. Wankijba janyulu mili kujarraka barndayka bayngkani jalija nangka janyba.
JOH 2:22 Baku barri jali kurdanba yalu Jisus, baki wankambayi Jisus mili Kudwanyi, baki mankumanku yalungki kandimuku Jisuskanyi. Mankuwa yali nangangi jangkurr, yabimbikanyi yaji mili. Baki jingkijba yali nanda yingka wankalanyi jangkurr nangangi, ngurrunajba jali yajinyi. Kuyu yali nanda wankalanyi jangkurranyi. Marda kuyu yali nanda jangkurr Jisuskanyi, yabimbikanyi yaji mili. Barriwa.
JOH 2:23 Jungkuyi Jisus Jirusalim wangarranyi niji ‘Kangandijbayi Barrawuna Yajinyi.’ Ngala nyuli nanaba, yabimba nyuli kaja walkurra yaji ngiruka. Kajamukunyi, jingkijba yali Jisus, nyuli Krayis, najbangangi yali nanda ngiruka yaji kaja, yabimba jali nyulu. Najba yali nanda ngiruka yaji baki jingkijba yali, nyuli Krayis.
JOH 2:24 Ngala Jisuswanyi jingkijba nyuli yalunya. Jingkijba nyuli bukambiju, nganinymuku jibarrimuku, baki mikukiya yingkawanyi karu Jisus yalungi, wanyingkanyi nangka mankumanku yalungi. Muningka yalunya jingkijba. Jingkijbayi yalunya, nanamanji yali kuyu nangangi jangkurr, maruka yali muwa nangangi. Ngala baku jayalungka yangkalamba nanganbunanyi. Nani nyuli jingkijba yalunya. Baki nyuli jabulinyba yalunya Jisuswanyi. Jabulinybayi yalunya. Barriwa.
JOH 3:1 Nanda mambuka Jukanyi, niji nangangi Nikidimus. Nyuli barri Barasi.
JOH 3:2 Jilajba nyuli nangandurri Jisusyurri. Jilajbayi mungana yanybikanyi. Yanybayi Nikidimus, “Mambuka. Nurru jingkijba ninya, ninji milidimbawarr. Manjijbayi ninya Kudwanyi. Mikuwali yabimba yaji nyuluma kunymambikanyi yalunya. Ngawamba kunymambikanyi yalunya, kandimba jala nanda Kudwanyi.” Barriwa.
JOH 3:3 Yanybayi Jisus nangangi, ngala miku yurlurrmbikanyi, “Ngayu karungka ninya duja. Muningka janyulu yingka walajba mili, baki yuku janyulu jungku yurrngumba Kudnyina.” Barriwa.
JOH 3:4 Ngajakayi Jisus malbuwanyi, “Yanka barri mili nganinyi walajbaja. Yanka nyulu mili ngankijba muwana ngardanganjana jali jalanmirri birnandaba nangka mili. Mikuwali ngankijba mili.” Barriwa.
JOH 3:5 Jananganjayi Jisuswanyi, “Nayinda duja jangkurr. Jalija nangka birnandaba Kunyba Ngarndu Kudkanyi nangangi, baki yuku janyulu jungku nangandu, Kudnyina. Nanda jala walajba bardarda mankanyi, yuku nyulu jungku nayiba yajina, ngala nanda jala birnandaba nangka Kunyba Ngarndu Kudkanyi, yuku janyulu jungku wanka yurrngumba Kudnyina.
JOH 3:7 Mikujiyi manmala, yanyba jala ngayu nganyi, marda ninjimi mili walajba baki jungku janinji wanka yurrngumba. Mikujiyi manmala.
JOH 3:8 Janganyingka mankumanku yunkurranyi. Warrmbaka yaji yunkurrwanyi. Yuku ninji manku yunkurr, ngala miku ninjimi jingkijba, wanjamunanyi badajbangka, wanjakurri jilajbangka. Miku ninjimi jingkijba. Barrinani nangka birnandaba nangangi Kunyba Ngarndu Kudkanyi. Miku ninjimi jingkijba kudanyu yunkurranyi. Miku ninjimi kudanyu jingkijba nanda Kunyba Ngarndu Kudkanyi, nangka birnandaba nangangi. Duja ngayu yanyba. Janyulu walajba mili.” Barriwa.
JOH 3:9 Yanybayi malbu Nikidimus, “Yanka barri nayinda. Miku ngayimi jingkijba.”
JOH 3:10 Jananganjayi Jisuswanyi, “Ninji mambuka Jukanyi. Ninji milidimbawarr, ngala miku ninjimi jingkijba.
JOH 3:11 Nayinda duja jangkurr. Nurru karungka nanda jala nurru jingkijba. Nurru karungka nanda jala nurru najba yaji, ngala miku ninjimi kuyu nurrungi jangkurr.
JOH 3:12 Jala ninya karu jungunkanyi nanijba, baki miku ninjimi kuyu nanda jangkurr, ngala yanka janinji jingkijba, jalija ninya karu nanganginkanyi yajinyi Kudkanyi. Yanka janinji kuyu nanda jangkurr.
JOH 3:13 Mikuwali yingka kirrijba kingkarri Kudyurri. Ngawamba nanda jali karrala wayka Kudnanyi. Ngawamba yuku nyulu kirrijba kingkarri Kudyurri. Ngawamba nyuli Buwanya Bukambijuyngka.
JOH 3:14 Juju wabula nanda mambuka Musis, jala nyuli jungku nanaba mangkurruna yajina, langandaba nyuli miya, yabimba jali nyulu. Langandaba nyuli miya kurndana. Nani barri jayalu Buwanya Bukambijuyngka langandaba kurndana.
JOH 3:15 Baki nanda jala mirnarrijbangka muwa nangangi Buwaya Bukambijuyngka, janyulu wankijba yurrngumba.” Nani barri yanybayi Jisus nangangi malbunyi.
JOH 3:16 Marukangka Kud muwa kudanyu barri bukambijuyngka, nganinyimukuyngka, jibarrimukuyngka, bayamukuyngka. Manjijbayi nangangi Jandanyi Kudwanyi, marukangkangangi nyulu muwa bukambijuyngka. Ngala nanda jala jungku kunyba yurrngumba, jala kuyu nangangi jangkurr jandayngkanyi, janyulu wankijba yurrngumba. Jalija nangka janyba, baki mili wankijbaja, janyulu jungku wanka kingkarri Kudnyina.
JOH 3:17 Manjijbayi Kudwanyi nangangi Jandanyi Jisus. Manjijbayi Jisus Kudwanyi, miku muningka karunkanyi yalunya yalu balki kudanyu, miku jayalu jungku yurrngumba nangandu Kudnyina. Miku nanankardi manjijbayi Jisus Kudwanyi. Ngala manjijba nyuli Jisus, nyulu karunkanyi yalunya Kudkanyi, karunkanyi yalunya, marukangka muwa yalungi Kud kudanyu. Manjijbayi Jisus Kudwanyi nyulu karunkanyi yalunya, jalija yalu jungku kunyba, jalija yalu kuyu nangangi jangkurr, waluwa jayalungka janyba, baki mili jayalu walajba. Jayalu jungku wanka kingkarri nangandu.
JOH 3:18 Nanda jala kuyu jangkurr Jisuskanyi, baki maruka muwa Kudkanyi, nanda jala jungku kunybana yuwana Kudkanyi, janyulu wankijba mili. Ngala nanda jala miku kuyu jangkurr nangangi Jisuskanyi, Jandayngkanyi Kudkanyi. Nanda jala miku kuyu nangangi jangkurr, jalija nangka janyba, miku janyulu mili wanka jungku Kudnyina. Jaliyi nyulu miku maruka muwa Kudkanyi, jaliyi nyulu miku jungku kunyba Kudkanyi, baki miku kuyu nanda jangkurr Jisuskanyi, mikuwali mili wankijba. Barriwa.
JOH 3:19 Nani barri, jala nyulu mungijba yaji, baki mikukimi najba yaji. Mikuwali yingkawanyi najba. Jaliyi nganinyi nulijba barimbikanyi yaji baki nyulu barimba yaji mungana, mikuwali yingkawanyi najba nanda barimbikanyi yaji. Barimba nyulu yaji mungana. Mirnarrijba nyulu muwa munganyi jala mikuyaji mirnbinyi wambarralba yaji. Nyulu balki jungku mungana, jala mikuwali najba yingkawanyi. Ngala Jisus, nyulu barrinani mirnbi. Yalu, jala yalu balki, miku yalimi jilajba nangandurri Jisusyurri. Jingkijbangka yalunya Jisuswanyi, yalu balki jungku.
JOH 3:21 Ngala nanda jala jungku kunybana yuwana Kudkanyi, jala maruka muwa Kudkanyi, nyulu jungkuka kunyba yurrngumba, kambana baki mungana. Baki yingkawanyi najbangka, baki jingkijbangka nangangi kunyba yaji. Nyulu jilajbangka Jisusyurri, marukangangi nyulu muwa Kudkanyi baki Jisuskanyi. Barriwa.
JOH 3:22 Baku barri barlba yali Jirusalimnanyi, Jisus marda nanganginmuku kandimuku. Jilalajba yali langkurri nananyina walkurranyina yajina Judiya. Marda ngurrunba yali kudiya, jungku jali yalu nanaba. Nanda Jun Ngurrunbawarr, nyuli nanaba marda, nananyina yajina Yayinin. Nanda Yayinin, bundu yingkana yajina Salim. Ngurrunba nyuli yalunya kajangangi wabuda nanaba. Nanamuku jilajba jali nangandurri, ngurrunba nyuli yalunya.
JOH 3:24 Nanamanji jilijbawa yarrijba nyuli Jun brisinyina, nanangini walkurranyi mambukawanyi.
JOH 3:25 Kudiya kandimuku nanganginmuku Junkanyi jakakajba yali. Jakakajba yali kandimuku Junkanyi, marda yingka Ju jungku jali nanaba. Jakakajba yalungki jangkurranyi, yarrijba jali Musiswanyi wakardaykanyi yalungka. Jakakajba yalungki nanankanyi yuwanyi Musiskanyi wakardaykanyi yalungka.
JOH 3:26 Baki jilajba yali Junyurri. Yanyba yali nangangi, “Milidimbawarr. Jingkijba ninji nanda jali jungku wabula nganyindu, karrurrinybana bundalina. Mankuwa kuna ninji nanda. Karu ninji nurrunya nangangi. Nanijba barri nyuli ngurrunba yalunya, baki kajamuku yali barlba nangandurri. Yingijba ninyalu, baki barlba yali bukamba nangandurri.” Barriwa.
JOH 3:27 Jananganjayi yalunya Junwanyi, “Yingkamuku jilajba yali ngakindurri. Yingkamuku barlba yali nangandurri. Ngala ngawamba Kudwanyi nyulu manjijba yalunya. Manjijbangka Kudwanyi yalunya. Barriwa.
JOH 3:28 Manku narri ngaki jangkurr wabula. Manku nganarri yanybikurri, ‘Miku ngayu Krayis. Miku. Ngala manjijba ngani Kudwanyi. Manjijba ngani karunki yingkamuku Krayiskanyi.’ Karu ngayi yalunya, manjijba ngani Kudwanyi waluwa nangangi. Baki bayngkani nanda Krayis, janyulu jilajba. Manjijba ngani Kudwanyi karunki yalunya birrirranjanki yalungka Krayiskanyi.
JOH 3:29 Mirnarrijba ngayu muwa, manjijbangangi ngani Kudwanyi karunki yalunya Krayiskanyi. Nanda walkurra yaji. Ngala Krayis, nyulu walkurramirra mambuka bukambijuyngka, jungku jalili wandijiyana. Miku ngayu walkurra. Ngala Krayis, badajba nyuli, baki mirnarrijba ngayu muwa, badajbangangi nyuli. Baki mirnarrijba ngayu muwa yalungi jali yalu barlba nangandurri. Miku ngayimi ngirukijba muwa, yingijba jala ngananjalu, baki barlba nangandurri. Miku. Marda yalimi barlba nangandu, baki janyulu milidimba yalunya. Nyulu walkurra mambuka. Miku ngayu. Miku.
JOH 3:30 Waluwa nyuli badajba, ngayi walkurra mambuka. Ngala bayngkani nyuli badajba, nyulu walkurra mambuka. Miku ngayu walkurra. Nanijba nyulu walkurra mambuka. Miku ngayu. Kajamukunyi yalu durrijba Krayis nanijba, ngala kujajarranyi ngana yalu durrijba. Ngala ngayu mirnarrijba muwa nanankanyi. Barriwa.”
JOH 3:31 Nanda Krayis, nyulu walkurra mambuka. Ngala yingkamuku mambukamuku, miku yalu mambuka barrinani Krayis. Nanamuku yingkamuku mambukamuku yalu jandanyi maykarranyi bulangi, ngala Krayis, nyulu Jandanyi Kudkanyi. Nyulu walkurra mambuka, badajbangangi nyuli Kudnanyi. Baki yanyba nyulili yajinyi Kudkanyi, ngala yingkamuku mambukamuku, yalili yanyba jambanyi yajinyi. Miku yaliyi jingkijba nanda laliji yaji.
JOH 3:32 Nanda jali badajba Kudnanyi, karungka nyulu yalunya yajinyi, najba jali nyulu yaji. Karungka nyulu yalunya jangkurranyi, karu jali Kudwanyi, ngala miku yalimi kuyu nangangi jangkurr Krayiskanyi. Ngala ngawamba kujajarrawanyi yali kuyu nangangi jangkurr.
JOH 3:33 Nanamukunyi kuyu jala nangangi jangkurr, jingkijba yalu Kud, nyulu duja. Yanyba nyulu duja jangkurr. Ngala yingkamuku miku jali yalu kuyu nangangi jangkurr, mankumanku yalungka Kudkanyi, jujamba nyulu yalunya.
JOH 3:34 Nanda badajba jali Kudnanyi, yanyba nyulu nangangi jangkurr Kudkanyi, jungkukilingangi nanda Kunyba Ngarndu Kudkanyi nangandu.
JOH 3:35 Buwakanya Kingkarri, maruka nyulu muwa kudanyu nanganginkanyi Jandayngkanyi. Yabimba nyuli nangangi Jandanyi ngiruka yabimbikanyi bukamba yaji.
JOH 3:36 Nanda jala kuyu jangkurr Jandayngkanyi Kudkanyi, janyulu wankijba mili bayngkani jalija nangka janyba. Jungku janyulu wanka mili Kudnyina. Ngala nanda jala miku ngayangayijba jangkurranyi Jandayngkanyi, miku wali wankijba mili. Miku janyulu jungku wanka mili Kudnyina. Baki Kud, janyulu ngarrangarra muwa yalungi jala miku kuyu jangkurr Krayiskanyi. Ngarrangarra janyulu muwa yurrngumba. Barriwa.
JOH 4:1 Kajamuku yali barlba Jisusyurri. Milidimba nyuli yalunya. Jali yalu kuyu nangangi jangkurr, baki ngurrunba yalunjali nanganginyi kandimukunyi Jisuskanyi. Miku nyuliya ngurrunba yalunya Jisuswanyi, ngala karu nyuli nangangi kandimuku, yalunjalu ngurrunbiji, nanamuku kuyu jali nangangi jangkurr. Kajamuku, yali jilajba Jisusyurri, kuyu yali nangangi jangkurr, ngala ngawamba kudiyamuku, yali jilajba nangandurri Junyurri. Ngurrunbawarrayngkurri. Nanamukunyi Barasiwanyi manku yali nanankanyi. Manku yali kajamukuyngka, kuyu jali jangkurr Jisuskanyi, ngala ngawamba kudiyamukunyi kuyu yali jangkurr Junkanyi. Manku yali nanda, baki ngirukijba yali muwa.
JOH 4:3 Ngala Jisuswanyi jingkijbayi yalunya Barasimuku. Jingkijba nyuli, yali ngirukijba muwa nangangi. Baki barlbayi Jisus Judiyananyi. Barlba nyuli langki Kaliliyurri, marda kandimuku nangandu. Barlba yali langki.
JOH 4:4 Ngala buwandijba yali langki nananyina yingkana yajina Samariya.
JOH 4:5 Jila yali barrawuyabarrawuyarri niji Sikarr, nananyina walkurranyina yajina Samariya. Jila yali bundu nananyina yajina jali juju wabula wankalana, wajbayi yajinyi Jakubwanyi. Wajba nyuli nangangi jandanyi Jusib, nanankanyi yajinyi.
JOH 4:6 Nanangini wankalawanyi nyuli kurrijba rirrki nanaba. Barriwa. Jisus marda kandimuku jilajba yali jujunanyi. Wanbiya yali nanaba mukunjana, baki balkijbayi Jisus. Jungku nyuli bundu rirrkina,
JOH 4:7 ngala nangangi kandimuku, jilajba yali barrawuyabarrawuyarri, wudumbiji mama dungalana. Jungkuyi Jisus rirrkina, ngala jibarri jalili jungku nanaba Sikarr, jilajba nyuli rirrkiyurri wudumbiji wabuda walkurranyina yukururuna. Ngajakayi jibarri Jisuswanyi, “Wajba janganinji wabudanyi ngaraykanyi.”
JOH 4:9 Jananganjayi jibarriwanyi, “Kurdu nganyi Ju kuna, ngala ngajaka nganinji wabudanyi.” Barriwa. Nanamuku jali jungku Samariya, miku yali mungkiji Jukanyi. Miku yalunjaliya kandimba Jumukunyi. Miku yalili yanyba yalungi. Jungku yali yanina yanina. Baki nanankardi yanybayi jibarri nangangi Jisuskanyi, “Kurdu nganyi Ju kuna, ngala ngajaka nganinji wabudanyi.”
JOH 4:10 Jananganjayi jibarri Jisuswanyi, “Miku nganinjimi jingkijba. Jalimi nganinji jingkijba, jalimi ninji jingkijba nanda jala yuku wajba ninya Kudwanyi, baki nganinji ngajaka wabudanyi, yinini wabuda nanda wanka. Jalimi nganinji ngajaka wabudanyi, baki jangayu wajba ninya nanankanyi yinini wabudanyi.”
JOH 4:11 Yanybayi jibarri, “Mikuyaji yukururunyi nganyindu, wudumbikanyi wabuda. Juju wayka nanda wabuda rirrkina. Wanjawa janinji wudumba nanda wabuda jala jungku wanka.
JOH 4:12 Ngala mambuka kuna ninji. Walkurra mambuka kuna. Nanangini wankalawanyi nyuli yabimba nayinda rirrki nurrungi. Nyuli walkurra mambuka, nanda malbu Jakub. Ngaraba nyulili wabuda nanginyina rirrkina, baki nanganginyi jandanyimukunyi baki bulukimukunyi, yalili ngaraba nayinda wabuda. Ninji kuna walkurramirra mambuka nangangi. Barriwa.”
JOH 4:13 Jananganjayi jibarri Jisuswanyi, “Nanda jala ngaraba nayinda wabuda rirrkina, baku janyulu mili warinjijba, janyulu mili ngaraba,
JOH 4:14 ngala nanda jala ngaraba wabuda, wajba jala ngayu, miku nyulimi warinjijba mili. Janyulu wanka jungku yurrngumba Kudnyina.” Nani yanybayi Jisus wabudanyi. Karu nyulili yalunya Kudkanyi Jisuswanyi. Nanda jala kuyu nangangi jangkurr, marda maruka nyulu muwa Kudkanyi, jalija nangka janyba, janyulu wankijba mili yurrngumba Kudnyina. Nanda jala jungku mikuyaji wabudanyi wariyngkanyi baki janangka janyba. Nanda jala ngaraba wabuda, yuku nyulu wanka jungku nayiba jambana. Nanda jangkurr, yanyba jala Jisus, nanda jangkurr barrinani wabuda. Nanda jala kuyu jangkurr Jisuskanyi, janyulu yuku wanka jungku yurrngumba Kudnyina. Nani nanda jangkurr Jisuskanyi barrinani wanka wabuda.
JOH 4:15 Yanybayi jibarri Jisuskanyi, “Mambuka. Nganinji wajba nanankanyi wabudanyi, jala nganinji karu, baki miku ngayiyi warinjijba mili. Miku ngayu mili jila nanginkurri rirrkiyurri wabudanyi.”
JOH 4:16 Yanybayi Jisus nangangi, “Barriwakiyi jilajba. Wudumbakiyi nganyi nawinganja. Janinji wiykunumba ngakindurri.”
JOH 4:17 Jananganjayi jibarriwanyi, “Mikuyaji nawinganjanyi ngakinkanyi.” Yanybayi Jisus nangangi, “Nanda duja jangkurr, yanyba ninji ngaki, mikuyaji nawinganjanyi nganyingkanyi.
JOH 4:18 Kaja barri nganyi nawinganja yingijba ninji, kujarra baki kujarra baki yingamali. Ngala nanijba ninji yingkana kuluka. Miku nanda nganyi nawinganja. Duja ninji yanyba, mikuyaji nawinganjanyi nganyi.” Barriwa.
JOH 4:19 Yanybayi jibarri, “Mambuka. Jingkijba ninji bukamba yaji. Ninji walkurra mambuka, yanyba jala ninji jangkurr Kudkanyi.
JOH 4:20 Maruka nurru muwa Kudkanyi. Nurrili jilajba jurjyurri nanginyina dungalana. Nayiba nurrili yanyba mududu Kudkanyi. Ngala narri Jumuku, narri yanyba nurrungi, marda nurrimi jila nanankurri walkurrayngkurri jurjyurri, nanaba Jirusalim. Marda nurrimi yanyba mududu Kudkanyi nananyina jurjina.” Barriwa.
JOH 4:21 Jananganjayi Jisuswanyi, “Jibarri, mankukiyi nayinda duja jangkurr. Winyurruwa badajbaja nanda yaji jalija yalu miku jila jurjyurri nanginyina dungalana, marda miku nananyina yajina Jirusalim. Miku nayiba, baki miku Jirusalim jayalu yanyba Buwakaya Kingkarri. Barriwa.
JOH 4:22 Miku narrimi jingkijba nanda, yanyba jala narri mududu nangangi. Ngala nurru barri Jumuku, jingkijba nurru nanda, yanyba jala nurru mududu nangangi. Nanda jala jila marrimbikanyi bukambiju mardarda kurdu nangangi Ju.
JOH 4:23 Winyurruwa badajbaja nanda yaji marda nanijba, nanda jala wajba Buwakanya Kingkarri kunybanyi jangkurranyi, nanangini Kunybawanyi Ngarnduwanyi Kudkanyi, nyulu kandimba nanda jala wajba Buwakanya kunybanyi jangkurranyi. Nulijba Kud yalungi waykanyi Kud kunybanyi jangkurranyi, yanybikanyi mududu nangangi.
JOH 4:24 Buwakanya Kud, nyulu duja yijan. Nanangini Kunybawanyi Ngarndwanyi Kudkanyi, nyulu kandimba nanda jala yanyba mududu Kudkanyi, jala yanyba duja jangkurr Kudkanyi.” Barriwa.
JOH 4:25 Yanybayi jibarri Jisuskanyi, “Jingkijba ngayu Kud, janyulu manjijba nanda kingkarrinya, nangangi niji Krayis. Manjijba janyulu Krayis milidimbiji nurrunya bukamba.” Barriwa.
JOH 4:26 Yanybayi Jisus, “Ngayu, yanyba jala ngayu nganyi, ngayu nayinda jali ngana manjijba Kudwanyi. Barriwa.”
JOH 4:27 Ngala yanybayi Jisus jibarrinyi, wanbiya yali kandimuku nangangi. Manmala yali Jisuskanyi, yanybangangi nyuli nanankanyi ngurrayngkanyi jibarrinyi. Ngala miku yaliyanyi ngajaka Jisus, “Wanyimba janurru nganyi.” Miku yaliyanyi ngajaka, “Wanyingkanyi ninji yanyba nangangi.”
JOH 4:28 Barriwa barlbayi jibarri. Yingijbayi yukururu baki jilajbayi nanganginkurri barndarri. Yanyba nyuli nanganginkanyi mungkijimukuyngka,
JOH 4:29 “Barriwa ngambalaja. Najba janarri nanda, karu jali ngana bayankalijbanyi ngaki. Yiningki nayinda nanda jala manjijbayi Kudwanyi. Yiningki nyulu Krayis.”
JOH 4:30 Barriwa barlba yali barndananyi nayinkardi. Jilajba yali Jisusyurri.
JOH 4:31 Ngala yuwaji yanybayi jibarri nanganginkanyi mungkijimukuyngka, nanamanji yanyba yali kandimuku Jisuskanyi. Yanyba yali, “Jarrbakiyi nayinda mama jala nurru kuyu.”
JOH 4:32 Ngala yanybayi Jisus, “Yinini mama nayiba ngakindu. Miku narrimi jingkijba nayinda yinini mama.” Barriwa.
JOH 4:33 Ngala miku yaliyanyi jingkijba nangangi jangkurr kandimukunyi. Miku yaliyanyi jingkijba jangkurr, ‘Yinini nayinda mama.’ Yanyba yalungki, “Yiningki yingkawanyi wajbayi mamanyi jali ngambala jarijba.”
JOH 4:34 Yanybayi Jisus yalungi, “Manjijba ngani Kudwanyi yabimbiji yaji. Jala ngayu yabimba nayinda yaji Kudkanyi, baki ngayu maruka muwa. Jala ngayu jarrba mama baki ngayu maruka muwa. Nani barri ngayi yabimba nayinda yaji Kudkanyi, baki ngayu maruka muwa.
JOH 4:35 Nanda kingkirr jala jardijba janjawala, waluku walajbangka wuju, baki bayngkani baku, kujarra baki kujarra yakarl, nanda kingkirr yamiyudi, kunyunyu. Wudumba yalu yami baki wuyala yalu jarrkanyi. Barriwa. Najba narri nanda kingkirr, kudukudu mama kunyunyu wudumbikanyi. Nani barri marda narrimi karu yalunya kajamuku Kudkanyi wudumbikanyi yalunya Kudkanyi. Birrirrinja yalungka mankunkanyi jangkurranyi Kudkanyi, barrinani nanda yami birrirrinja nangka wudumbikanyi.
JOH 4:36 Jala nyulu waki mambukanyi, jala nyulu wudumba kingkirr yami, baki wajbangka dungalanyi mambukawanyi. Wajbangka yalunya dungalanyi, waki jala nanganginyina barrikina. Nani barri jala narri waki Kudkanyi, jala narri karu yalunya yingkamuku ngakinkanyi, baki yalu kuyu nganyi jangkurr. Jala narri waki Kudkanyi, miku narrinyiyi wajba dungalanyi, ngala janyulu wankamba narrinya yurrngumba Kudwanyi. Janarri jungku maruka muwa.
JOH 4:37 Nanda kingkirr, yingkawanyi yarrijbangka yami jambana. Jala jardijba walkurra ngala yingkawanyi wudumbaka yami.
JOH 4:38 Nani barri yingka nyuli waki Kudkanyi karuyi yalunya Kudkanyi, ngala narri, wudumba janarri yalunya. Miku narriya waki waluwa, ngala janarri wudumba yalunya Kudkanyi.” Barriwa yanybayi Jisus nani kandimukuyngka.
JOH 4:39 Karuyi jibarriwanyi nangangi mungkijimuku Jisuskanyi. Karuyi yalunya, jungku jali nanaba Samariya. Yanyba nyuli, “Nyuli karu ngana bayankalijbanyi ngaki. Bayankalijbanyi ngaki karuyi.” Barriwa. Kajamuku nangangi mungkiji, yali kuyu jangkurr nangangi Jisuskanyi.
JOH 4:40 Kaja yali jila Jisusyurri. Yali ngajaka Jisus jungunkanyi yalundu barndana. Baki jungku nyuli yalundu kujarrana kambana.
JOH 4:41 Kajamuku yali kuyu jangkurr Jisuskanyi, kajamuku.
JOH 4:42 Yanyba yali jibarrinyi, “Waluwa nurri kuyu nganyi jangkurr nangangi Jisuskanyi, ngala nanijba nurri manku nangangi jangkurr. Manku nurri nangangi jangkurr, baki jingkijba nurri, nyuli badajba marrimbikanyi ngamanya bukambiju mardarda, kuyu jala nangangi jangkurr.” Barriwa.
JOH 4:43 Barlbayi Jisus nanamunanyi yajinanyi Samariyananyi. Barlba nyuli kujarrana kambana bayngkani, baki jilajba nyuli langki. Langki nyuli jila yingkayurri yajiyurri, niji Kalili.
JOH 4:44 Yanybayi Jisus, “Yurlwa yalu nangangi, nanda jali manjijba Kudwanyi. Yurlwa yalu nangangi nananyina yajina, jardijba jali nyulu.” Barriwa.
JOH 4:45 Jila yali langki Jisus baki nangangimuku kandimuku. Wanbiya yali Kalili. Yalu jali jungku nanaba, kandimba yali Jisus. Wabula yali jilajba kularriji Jirusalimyurri wangarranyi niji ‘Kangandijbayi Barrawuna Yajinyi.’ Najba yali Jisus nanaba, baki najba yali nangangi yaji ngiruka. Najba yali nanda ngiruka yaji, yabimba jali nyulu nanaba Jirusalim. Barriwa.
JOH 4:46 Wijbayi Jisus Kayinayurri, nanankurri yajiyurri jali wabula nyulu yangkalamba nanda wabuda. Yangkalamba nyuli nanda wabuda ngarrkinyi. Nananyina yajina Kayina, nyuli yabimba nanda ngiruka yaji. Juju karriya nangandu, nanda barrawuyabarrawuya barrawuya, niji Kabirnayum. Jungkuyi mambuka nananyina yajina karru. Jandanyi nangangi lunjiyi kudanyu.
JOH 4:47 Karu yali nanda mambuka Jisuskanyi, nyulu jungkuka nanaba bayangarri Kayina. Jala nyuli jingkijba Jisus nanaba bayangarri, baki barlba nyuli bayungu Jisusyurri. Wanbiya nyuli baki ngajakayi Jisus, “Jilajba kuna janinji ngakinkurri jandanyiyurri. Lunji nyulu kudanyu. Yiningki janangka janyba. Jilajba kuna janinji nangandurri baki kunymamba janinji ngaki jandanyi.” Ngajaka nyuli Jisus kudanyu barri.
JOH 4:48 Jananganjayi Jisuswanyi, “Ninji. Miku ninjiyi kuyu ngaki jangkurr, jala muningka ngayu yanyba nganyi. Ngala jaliyi ninji najba ngiruka yaji ngaki, baki janinji kuyu ngaki jangkurr. Jaliyi miku ninji najba ngiruka yaji, baki miku ninjiyi kuyu ngaki jangkurr.” Nani jananganjayi Jisuswanyi.
JOH 4:49 Yanybayi nanda mambuka nangangi, “Mambuka. Barlba kuna janinji ngakindu karri, ngakinkurri jandanyiyurri, bakiyi nangka janyba.”
JOH 4:50 Yanybayi Jisus nangangi, “Wijba janinji karri, wankijbangangi nganyi jandanyi. Yuku barri janyulu kunybijba mili.” Kuyuyi nanda jangkurr Jisuskanyi mambukawanyi baki barlba nyuli.
JOH 4:51 Wijba nyuli karri, nanda mambuka. Munganawa barri, ngala nyuli jilijbawa, najba nyuli yalunya nanganginmuku wakiwarrmuku. Najbayi yalunya badaykurri karrina nangandurri. Karu yali mambuka, “Nanda juka nganyi wankijbayi. Kunybijba nyuli nganyi jandanyi.” Barriwa.
JOH 4:52 Baki ngajakayi yalunya mambukawanyi, “Wanyimbala kunybijbayi. Wanyimbala.” Jananganja yali, “Wulani mukunjana nyuli kunybijba. Waluwa nyuli jungku ngarrangarra mankanyi, ngala mukunjana mardumardujbayi nangangi mankanyi. Kunybijbayi.” Barriwa.
JOH 4:53 Nanangini mambukawanyi, jingkijba nyuli, duja nanda jangkurr Jisuskanyi. Wulani mukunjana yanybayi Jisus nangangi “Wankijbayi nganyi jandanyi.” Nanamanji mardumardujbayi nangangi mankanyi. Kunybijba nyuli mankanyi. Baki kuyu nyuli jangkurr Jisuskanyi nanangini mambukawanyi baki nanamukunyi, jungku jalili yalu nanganginyina barndana. Durrijba yali nanda jangkurr nangangi Jisuskanyi.
JOH 4:54 Kujarra yaji ngiruka yabimbayi Jisuswanyi. Waluku yangkalamba nyuli wabuda ngarrkinyi, bayngkani nyuli jila kula Jirusalimyurri nananyina yajina Judiya. Wijba nyuli langki Kaliliyurri. Nayimanji kunybijba nyuli juka. Kujarra yaji ngiruka yabimba nyuli nanaba Kalili. Barriwa.
JOH 5:1 Baku barri jilajbayi Jisus kula Jirusalimyurri. Jilajba nyuli yingkanyi wangarranyi Jukanyi.
JOH 5:2 Nanaba Jirusalim, barriki lukuluku nanaba barrawuyabarrawuyana. Marda murrku bardawa barrikina jilaykanyi danbiyurri. Yingamali bardawa niji nangangi, “Bardawa Jibkanyi.” Marda jiwirl nanaba, bundu nanda bardawa. Yabimba yali ngarndu jiwirlina. Kujarra baki kujarra yingamali ngarndu yali yabimba lukuluku jiwirlina. Nijarrijba yali nanda yaji Ju yanyi, “Bidsada.”
JOH 5:3 Kudukudu jali balkijba, jungku yalili ngarnduna kambana, kudukudu. Kudiya yali kabuji yami. Kudiya yali balki nukami marda nguli. Kudiya miku yaliyi jilajba nukamina, kuluka yali yurrngumba. Jungku yalili nanaba kambana, yukumba yali wabudanyi bulbulmbikanyi nyulu wabuda kudiyana.
JOH 5:4 Kudiyana jilajbayi Yanjil Kudkanyi kingkarrinya. Jilajbayi Yanjil nanankurri jiwirlyurri. Jidamba nyuli nanda wabuda, baki bulbulmbayi nanda wabuda. Yinarramba nanda lirrka jali ngankijba wabudana bayngkani, kunybijba nyuli mankanyi. Kunybijbayi nanda lirrka wabudana.
JOH 5:5 Jungku nyulili nanaba nganinyi. Yurrngumba nyuli jungku nanaba, kajana 38 kindilkurrinyina. Jungku nyuli yurrngumba, balkingangi nangangi mankanyi.
JOH 5:6 Jilajbayi Jisus jiwirlyurri. Najba nyuli nanda nganinyi. Jingkijba nyuli nanda jali balkijba mankanyi yurrngumba, baki ngajakayi nganinyi Jisuswanyi, “Nulijba kuna ninji kunybanyi mankanyi.”
JOH 5:7 Jananganjayi nganinyiwanyi, “Mambuka. Miku yingka nayiba ngakindu yarriykanyi ngana kalawuyngkurru wabudana. Jali bulbulmba nanda wabuda, yingka nyuli ngankijba wabudana waluwa ngaki. Miku ngayiyi jilajba dulu. Yingka nyuli ngankijba wabudana ngala ngayu jilijba walajba. Yurrngumba yingka ngaki ngankijbayi.” Barriwa.
JOH 5:8 Yanybayi Jisus nangangi, “Walajbakiyi. Wudumbakiyi nganyi jalyu, baki jilajbakiyi.”
JOH 5:9 Yinarramba nyuli walajba baki kunybijbayi mankanyi. Walajba nyuli, wudumbayi nangangi jalyu baki jilajbayi. Nanda kambana jali kunybijbayi nganinyi, nanda Sadidi. Kunymambayi nanda nganinyi Jisuswanyi Sadidi.
JOH 5:10 Najba yali nanda nganinyi mambukamukunyi jurjkanyi. Najba yali, baki karu yali nanda, “Jala Sadidi, baki yanybaka yuwa Jumukuyngka marda ngambalimi miku kuyu yaji Sadidi. Kuyu ninji nganyi jalyu. Nani ninji waki. Yanybaka yuwa, marda ninjimi miku waki Sadidi. Barimba ninji yaji. Jala Sadidi.” Barriwa.
JOH 5:11 Jananganja nyuli yalunya nanangini nganinyiwanyi, “Nanda jali ngana kunymamba, karu nyuli ngana, ‘Wudumbakiyi nganyi jalyu, baki jilajbakiyi.’”
JOH 5:12 Ngajaka yali, “Wanyi nanda. Wanyingi ninya kunymambayi. Wanyi nanda yanybayi nganyi. Wanyi nanda.”
JOH 5:13 Ngala miku nyuliya jingkijba nanda jali kunymamba. Miku nyuliya jingkijba Jisus. Kunymambayi nganinyi Jisuswanyi, baki yinarramba karrinjayi Jisus burrandi yalundu murana, karrinja jali yalu lukuluku nangandu. Barriwa.
JOH 5:14 Kamu barri wakarambayi nanda nganinyi Jisuswanyi. Wakaramba nyuli nganinyi walkurranyina jurjina. Yanybayi Jisus nangangi, “Kunybijba ninji mankanyi nanijba. Kunybijba. Jungkukiyi kunybana yuwana Kudkanyi. Wijbakiyi jungku balkina yuwana Kudkanyi, bakiyi ninji mili jungku, balkijba ninjiyi mili mankanyi. Balkimirra.” Barriwa.
JOH 5:15 Jilajbayi nanda nganinyi yalundurri mambukarri jurjkanyi. Karuyi yalunya Jisuskanyi, Jisuswanyi kunymambayi nangangi mankanyi.
JOH 5:16 Jali yalu jingkijba Jisus, nyuli kunymamba nanda nganinyi Sadidi, baki manku yali kiji nangangi. Kiji yali manku nangangi, wakingangi nyuli Sadidi.
JOH 5:17 Yanybayi Jisus yalungi, “Wanyingkanyi narri manku ngaki kiji. Wanyingkanyi. Yurrngumba nyulili waki ngaki Buwakanya, marda nanijba nyuluwa waki. Marda ngayu, marda ngayimi waki barrinani nyulu.” Barriwa.
JOH 5:18 Jali yalu manku nanda jangkurr Jisuskanyi, baki nulijba yali kurdanbikanyi Jisus. Nulijba yali kurdanbikanyi Jisus, wakingangi nyuli Sadidi, baki kuyungangi nyuli Kud nanganginkanyi Buwakaya, marda yarrijbangangi nangki walkurra mambuka barrinani Kud.
JOH 5:19 Mili yanybayi Jisus yalungi, “Yanyba ngayu duja jangkurr. Nanda Jandanyi Kudkanyi, miku nyulimi yabimba yaji nyuluma. Najba nyulili Buwakanya yabimbikurri yaji, baki yabimba nyulu nanamannga yaji, najba jala nyuli. Marda Buwakanya nangangi, marda Jandanyi nangangi, waki bula malumba. Nanda yaji, yabimba jala Buwakayu, nanamannga yaji yabimbaka Jandanyiwanyi.
JOH 5:20 Maruka nyulu muwa Buwakanya. Maruka nyulu muwa nanganginkanyi Jandayngkanyi. Minimbaka nangangi Jandanyi, yabimba jala nyulu nani Buwakayu. Minimbaka Jandanyi bukambijuyngka yajinyi. Minimbaka ngirukanyi yajinyi kajanyi. Ngala baku barri, janyulu minimba yingkanyi yajinyi kajanyi. Minimbaja Jandanyi mili ngirukanyi yajinyi. Manmala janarri kudanyu, jalija narri najba nanda, yabimba jalija Jandanyiwanyi. Jalija narri najba nanda yaji nangangi, manmala janarri kudanyu.
JOH 5:21 Kudwanyi, janyulu wankamba yalunya yurrngumba jalija yalungka janyba. Janyulu wankamba yalunya yurrngumba. Nani barri Jandanyiwanyi wankamba yalunya jala nyulu yarrijba yalunya.
JOH 5:22 Karuyi ngana Kudwanyi, ‘Karrinjarrijba janinji yalunya walu nganyindu. Karrinjarrijba janinji yalunya barrinani Kurdusnyina, baki yanyba janinji yalungi, wanyimuku janinji kuyu ngakindurri.’ Nani barri yanybayi ngaki Buwakanya ngaki. Miku janyulu karrinjarrijba yalunya Buwakayu, Miku. Ngana karuyi Buwakayu karrinjarriykanyi yalunya.
JOH 5:23 Baki jingkijba jayalu nangangi Jandanyi, nyulu walkurra mambuka, barrinani nangangi Buwakanya. Ngala jaliyi yalu kalalajba nangangi Jandanyi, baki nanamannga yalu kalalajba nangangi, Buwakaya manjijba jali Jandanyi.”
JOH 5:24 Mili yanybayi Jisus yalungi, mambukanyi jurjkanyi, “Karungka ngayu narrinya duja jangkurranyi. Nanda jala manku ngaki jangkurr, baki kuyu ngaki jangkurr, karu jalija ngayu narrinya Buwakaya, janyulu wanka jungku nangandu Buwakayu yurrngumba. Miku ngayiyi karrinjarrijba nanda waluwa ngakindu. Miku.
JOH 5:25 Nayinda ngaki jangkurr duja. Nanamuku jala miku jungku kunybana yuwana Kudkanyi, manku, jayalu ngaki jangkurr. Kudiyawanyi, jayalu manku jayalu kuyu ngaki jangkurr. Kuyu jayalu ngaki jangkurr, jingkijbangangi jayalu, ngayu Jandanyi Kudkanyi. Baki jayalu jungku Kudnyina yurrngumba.
JOH 5:26 Nanda Kud, nyuli jungku yurrngumba nanaba yajina, baki yuwajiwa jungkuka nanaba yajina nanganginyina. Mikuwali yingkawanyi wankamba Kud. Miku. Ngala miku nangkiyi nganinyi wankiykunumba. Miku. Ngawamba Kudwanyi wankiykunumba nganinyi. Marda karuyi ngana, nangangi Jandanyi, yuku ngayu wankiykunumba nganinyi.
JOH 5:27 Karuyi ngana Kudwanyi, jangayu karrinjarriykanyi yalunya, baki jangayu yanyba yalungi, manjiykanyi yalunya. Jangayu manjijba yalunya, Buwanyangangi ngayu Bukambijuyngka.
JOH 5:28 Mikujiyi manmala nanginkanyi jangkurranyi ngakinkanyi. Baku barri nanamuku nganinyiyurru baki jibarriyurru, jayalu manku ngaki jangkurr.
JOH 5:29 Baki walajba jayalu. Walajba jayalu jambananyi jali yalunjalu makaba. Nanamuku jungku jali kunybana yuwana Kudkanyi, walajba jayalu nanankardi jambananyi, wankijbaja mili. Ngala nanamuku jungku jali balkina yuwana Kudkanyi, walajba jayalu marda, ngala miku jayalu wankijba mili Kudnyina. Miku. Jungku jayalu yingkana yajina. Jayalu jungku balkina yajina juju Kudnanyi.
JOH 5:30 Miku ngayimi waki ngayuma. Ngaki Buwakanya Kud, jungku nyulu ngakindu. Manku ngayu nangangi jangkurr, baki yabimba ngayu nanda jala nyulu yanyba ngaki. Karrinjarrijba ngayu yalunya walu ngakindu, baki yanyba ngayu yalungi. Yanyba ngayu yarriykanyi yalunya. Nanda jangkurr yarriykanyi, yanyba ngayu nanda jangkurr, karu jala ngana Kudwanyi.
JOH 5:31 Jaliyi ngayuma yanyba ngaki, baki yiningki miku narriyi kuyu ngaki jangkurr, baki yiningki mikuwali jangkurr ngaki duja.
JOH 5:32 Ngala Kudwanyi, nyulu karu ngaki. Jingkijba ngayu nangangi jangkurr duja. Nanda jangkurr nangangi ngaki, duja jangkurr.
JOH 5:33 Manjijba narri yingkamuku nangandurri Junyurri. Karu nyuli yalunya duja jangkurranyi ngaki.
JOH 5:34 Ngala miku ngayimi nulijba yingkanyi karunkanyi narrinya ngaki. Karu ngayu narrinya nanankanyi jangkurranyi Junkanyi. Miku narriyi mamanumba nanda jangkurr nangangi Junkanyi. Jaliyi narri durrijba nanda jangkurr, baki marrimba mardarda janyulu narrinya Kudwanyi.
JOH 5:35 Nanda Jun, nyuli barrinani mirnbi. Mungana minimba narrinya yubarlanyi nanangini mirnbiwanyi. Nani barri, Junwanyi minimbayi narrinya yuwanyi Kudkanyi. Ngawanji narri durrijba Jun mankunki nangangi jangkurr. Mirnarrijba narri muwa nanganginkanyi jangkurranyi. Mirnarrijba narri muwa ngawanji, ngala miku yurrngumba. Ngawamba nayinji narri mirnarrijba muwa nanganginkanyi jangkurranyi.
JOH 5:36 Nanangini Junwanyi, nyuli yabimba kaja kunyba yaji. Ngala nanda yaji kaja yabimba jala ngayu, nanda walkurra yaji, ngiruka. Yabimba ngayu nanda ngiruka yaji, manjijbangangi nyuli ngana ngakinyi Buwakayu. Manjijbayi ngana yabimbiji kaja ngiruka yaji. Jala narri najba nanda ngiruka yaji, marda narrimi jingkijba Kud, nyulu manjijbayi ngana.
JOH 5:37 Karu nyuli narrinya ngakinyi Buwakayu. Nanamukunyi wankalawanyi yali yarrijba nangangi jangkurr najana Kudkanyi, ngala miku narriyi manku Kud yanybikurri. Miku narriyi najba nangangi wali.
JOH 5:38 Ngala miku narrimi kuyu nangangi jangkurr jala yanyba ngaki. Miku narrimi kuyu nanda jangkurr nangangi, manjijba jali ngana Kudwanyi. Barriwa.
JOH 5:39 Najba narri nanda jangkurr najana Kudkanyi yurrngumba. Kudanyu narri najba nanda jangkurr, ngala miku narrimi jingkijba nanda jangkurr, karu jala ngaki. Ngamu janarri jungku wanka nangandu Kudnyina yurrngumba, najbangangi narri jangkurr Kudkanyi najana yurrngumba.
JOH 5:40 Ngala miku narriyi nulijba jilaykanyi ngakindurri. Yuku ngayu wankamba narrinya, ngala miku narriyi jilajba ngakindurri. Barriwa.
JOH 5:41 Miku ngayiyi nulijba yalungi barrarrakiykanyi ngaki. Miku ngayiyi nulijba waykanyi ngana kunybanyi jangkurranyi.
JOH 5:42 Ngala ngayu jingkijba narrinya. Miku narrimi maruka muwa nangangi Kudkanyi. Miku.
JOH 5:43 Ngakinyi Buwakayu, nyuli manjijba ngana. Manjijba ngani yanybiji nangangi jangkurr, baki karunki narrinya nangangi Buwakaya. Ngala miku narrimi manku ngaki jangkurr karu jala narrinya nangangi. Miku. Miku narriyi kuyu nanda jangkurr. Ngala jaliyi yingka nganinyi jilajba narrindurri, jaliyi muningka jilajba narrindurri, janangka yanyba, baki kuyu janarri nangangi jangkurr. Nangangi jangkurr janarri kuyu, yanyba jalija nangka. Ngala miku narrimi kuyu Buwakaya jangkurr manjijba jali ngana Buwakuya karunki narrinya.
JOH 5:44 Narri nulijba yalungi barrarrakiykanyi narringi, ngala miku narringkiyi mankumanku Kudkanyi. Miku narriyi nulijba Kudkanyi barrarrakiykanyi narringi. Ngawamba nyulu duja Kud. Jala narri nani nulijba, baki yanka janarri kuyu nanda jangkurr Kudkanyi. Yanka janarri maruka muwa Kudkanyi kudanyu.
JOH 5:45 Miku ngayu karu nanda Buwakanya narringinkanyi balkinyi yajinyi, yabimba jala narri. Miku. Nanda wankalanyi Musis, kudanyu kuyu narri nangangi jangkurr, ngala nanangini jangkurrwanyi nanganginyi minimbaka Buwakanya narringinkanyi balkinyi yajinyi.
JOH 5:46 Yarrijba nyuli nanda jangkurr ngaki Musiswanyi. Yarrijba nyuli jangkurr ngaki, ngala miku narriyi kuyu nanda jangkurr nangangi. Miku. Ngala jalimi narri kuyu nangangi jangkurr, baki yuku narri kuyu ngaki jangkurr.
JOH 5:47 Baki yanka janarri kuyu ngaki jangkurr, jala miku narriyi kuyu nangangi jangkurr Musiskanyi.” Barriwa yanybayi Jisus yalungi mambukamukuyngka jurjkanyi.
JOH 6:1 Baku barri jali winyurruwa janyulu wangarr niji ‘Kangandijbayi Barrawuna Yajinyi’ wangarr yalungi Jumukuyngka, nanamanji burrijbayi Jisus karri kanjana. Kujarra niji nanankanyi kanjanyi, Kalili, baki Dayibiriyas. Burrijba nyuli karrurrinybarri, ngala kudukudu yali jila bayunguna bayngkani nangandu. Juju bijal jila yali lukuluku nukamina, najbangangi yali Jisus yabimbikurri ngiruka yaji, jali nyulu kunymamba yalunya jali lunji. Najba yali nangangi ngiruka yaji, baki jilajba yali bayngkani nangandu. Kirrijbayi Jisus kingkarri kulawirana. Jungku nyuli nanaba marda kandimuku nangandu. Najbayi yaji Jisuswanyi. Najba nyuli kudukudu jilaykurri nangandurri. Yanybayi Jisus kandinyi niji Bilib. Ngajakayi Jisuswanyi, “Yanka jangambala wudumba mama dungalana nanginmukuyngka, baki jayalungka wardamba. Yanka jangambala wudumba mama.”
JOH 6:6 Jingkijbayi Jisuswanyi nanda jalija nyulu yabimba mama. Jingkijba nyuli. Ngala balanjayi Bilibkanyi. Nulijbayi Jisus jingkiykanyi Bilibkanyi, yanka janyulu wajba yalunya muran mamanyi Jisuswanyi.
JOH 6:7 Jananganjayi Bilibwanyi, “Jaliyi nurru wudumba mama 200 dungalana, ngawamba nurru wajba yalunya kardarda mamanyi. Ngala kudiya yalu munjijba mamanyi kujajarrangangi mama.” Barriwa.
JOH 6:8 Yingka kandi nanaba, niji Yandru, buwanganja nangangi Sayimin Bida. Yanybayi Yandru nangangi Jisuskanyi,
JOH 6:9 “Juka nayiba jungkuka. Nayinda nangandu kujarra kaku, baki bayakarda damba kujajarra, kujarra, baki kujarra yingamali. Nayinda mama ngawamba kujajarra, ngala kajamuku yalu nayinda, walkurra muran.” Barriwa.
JOH 6:10 Yanybayi Jisus yalungi kandimukuyngka, “Jungkurrijbakiyi yalunya wayka.” Kaja karnba nanaba. Jungku yali karnbana walkurra muran, 5,000 barri.
JOH 6:11 Marrimbayi damba Jisuswanyi, yanyba nyuli mududu Kudkanyi mamanyi, baki nyuli wajba yalunya jali yalu jungku jambana. Kakunyi nani marda wajbayi. Jarrba yali baki wardijba yali junu.
JOH 6:12 Jali bukambijunyi yalu jarrba, baki karuyi kandimuku Jisuswanyi, “Wudumba narri nanda mama jali yalu miku jarrba. Wudumba narri mama baki kaku junu jali kili yandarra.”
JOH 6:13 Nyalimba yali kandimukunyi bukamba mama baki kaku jali yalu yingijba. Yarrijba yali bindawarrana, 12 bindawarra walbinyi. Waluwa nyuli 5 damba baki kujarra kaku, ngala nanda jali yalu yingijba murawanyi, nanda kudukudu mama.
JOH 6:14 Najba yali Jisus yabimbikurri nanda ngiruka yaji mamanyi. Jali yalu najba Jisus walkurrambikurri kaja mama, yanyba yali, “Nayinda nyulu jali manjijba Kudwanyi. Walajba nyuli jungunkanyi ngambalandu.”
JOH 6:15 Jingkijba yalunyi Jisuswanyi, jayalu yarrijba Jisus mambuka yalungi. Walkurra mambuka Kubaminkanyi jayalu yarrijba Jisus. Ngala Jisus miku nyuliya karijba yalungi, yalu yarriykanyi mambuka. Miku nyuliya karijba. Barlbayi Jisus nanarrinyaba. Barlbayi nyuluma dungalarri. Barriwa.
JOH 6:16 Kamu barri mungarri, jilajba yali kandimuku kanjarri.
JOH 6:17 Ngankijba yali muwardana, yalu jilaykanyi bayungu yajiyurri, niji Kabirnayum. Yingijba yali bijal. Wajanganja yali bayungu. Ngala nyuli mungijba yaji, jilajbayi Jisus. Jilajbayi yalundurri.
JOH 6:18 Karnungkumba yalunyi yunkurrwanyi barri. Bayunguna walajbayi lakululu.
JOH 6:19 Wajanganja yali juju 4 mils, baki najba yali Jisus jilaykurri nukamina yundu wabudana baki bunundujbayi Jisus muwardarri. Marrala yali nanamuku kandimuku.
JOH 6:20 Ngala yanybayi Jisus yalungi, “Nayinda ngayu. Mikujiyi narri marrala.”
JOH 6:21 Kudanyu yali maruka muwa baki kuyu yali Jisus muwardarri. Yinarramba yali wanbiya bayungu Kabirnayum. Barriwa.
JOH 6:22 Jawuda yali jungku dungalana nananyina yajina jali yalunya wajba mamanyi Jisuswanyi. Munganawa barri yali jala jungku dungalana, miku yaliya jingkijba wanjawa Jisus. Wulani yali najba ngawamba yingamali muwarda nanaba karriya. Yali najba kandimuku Jisuskanyi wajanganjankurri bayungu nananyina muwardana. Mikuyaji Jisuskanyi yalundu jali yalu jila muwardana. Wambu nyuli jungku dungalana.
JOH 6:23 Jawuda yali jila muwardana. Jila yali kulani Dayibiriyasnanyi. Wijba yali nanankurri yajiyurri jala wulani yalunyi wajba mamanyi Jisuswanyi, waluwa nyuli yanyba mududu Kudkanyi nanankanyi mamanyi. Wijba yali nanankurri yajiyurri.
JOH 6:24 Ngala miku yaliyanyi wakaramba Jisus nanaba, marda kandimuku nangangi. Miku yalunjaliya wakaramba. Baki mili yali ngankijba muwardana. Barlba yali bayungu Kabirnayumyurri kuykanyi Jisuskanyi.
JOH 6:25 Wakaramba yali Jisus bayangarrinybana. Yanyba yali nangangi, “Mambuka. Ninji milidimbawarr. Wanyimbala ninji jilajbayi nanginkurri.”
JOH 6:26 Yanybayi Jisus yalungi, “Ngayu karungka narrinya duja. Miku narriya kujba ngaki, yabimbangangi ngayu ngiruka yaji, ngala narri kujbayi ngaki, ngala mili narri nulijba mamanyi.
JOH 6:27 Mikujiyi kujba mamanyi jarrkanyi. Jaliyi narri dalburrijba mama, miku narriyi jarrba bukamba, bakiyi ngujbulijba. Yuku ngayu wajba narrinya yinini mamanyi. Jalija narri jarrba nanda yinini mama, janarri jungku yurrngumba Kudnyina. Ngayu Buwanya Bukambijuyngka. Yuku ngayu wajba narrinya nanankanyi yinini mamanyi, narri jungunkanyi wanka yurrngumba. Ngakinyi Buwakayu nyuli manjijba ngana waykanyi narrinya nanginkanyi yinini mamanyi.” Barriwa.
JOH 6:28 Baki yali ngajaka Jisus, “Wanyimba janurru. Wanyi yaji janurru yabimba Kudkanyi.”
JOH 6:29 Jananganjayi Jisuswanyi, “Nayinda janarri yabimba Kudkanyi. Janarri kuyu ngaki jangkurr Kudkanyi, manjijbangangi ngani Kudwanyi milidimbikanyi narrinya.”
JOH 6:30 Ngajaka yali Jisus, “Wanyi ngiruka yaji janinji yabimba nurrungi, baki ninya nurruja jingkijba, manjijbayi ninya Kudwanyi. Wanyi ngiruka yaji janinji yabimba.”
JOH 6:31 Mili yali yanyba Jisuskanyi, “Juju wabula nanamukunyi wankalamukunyi yali jarrba mama niji mana. Jarrba yali mama, jali yalunya wajba Kudwanyi, nanamanji jali yalu jungku mangkurruna, jali Musis nyuli yalungi mambuka. Yingkawanyi wankalawanyi yarrijba nyuli jangkurr najana Kudkanyi. Yarrijba nyuli nayinda, “Nyuli wajba yalunya mamanyi Kudwanyi, manjijba jali nyulu nanda mama kingkarrinya yalundurri. Nyuli wajba yalunya nanankanyi mamanyi kingkarrinya jarrkanyi.” Barriwa.
JOH 6:32 Baki yanybayi Jisus yalungi, “Ngayu karungka narrinya duja. Mikukiya Musiswanyi yalunya wajba mamanyi wankalana kingkarrinya. Miku nyuliya wajba yalunya mamanyi. Ngala ngakinyi Buwakayu, nyuli wajba yalunya nanankanyi mamanyi. Baki nani barri ngakinyi Buwakayu, nyulu wajbangka narrinya duja mamanyi kingkarrinya.
JOH 6:33 Nanda mama jala manjijbaka Kudwanyi narrindurri kingkarrinya, nanda mama wankambikanyi narrinya.” Barriwa.
JOH 6:34 Yanyba yali Jisuskanyi, “Mambuka. Wajbakiyi nurrunya nanginkanyi mamanyi yurrngumba. Wajbakiyi nurrunya mamanyi.”
JOH 6:35 Yanybayi Jisus yalungi, “Barrinani mamawanyi baki wabudawanyi wankamba mankanyi, nani ngayu wankamba narrinya yurrngumba. Ngayu barrinani mama narringinkanyi ngarndunyi. Ngayu barrinani wabuda narringinkanyi ngarndunyi. Nanda jala kuyu ngaki jangkurr, miku nyuliyi warinjijba mili, miku nyuliyi birrkalanyi mili.
JOH 6:36 Ngala ngayu karungka narrinya, najba nganarri, manku nganarri, ngala miku narriyi kuyu ngaki jangkurr.
JOH 6:37 Nanamuku nganinyimuku jala yalunya manjijba ngakindurri Buwakayu Kingkarri, jayalu jila ngakindurri. Jayalu jila ngakindurri, jala manjijba yalunya ngakindurri Buwakayu. Nanamuku jala yalu jila ngakindurri, miku ngayiyi manjijba yalunya ngakinbunanyi. Miku ngayiyi manjijba yalunya. Maruka ngayu muwa yalungi jalija yalu jila ngakindurri.
JOH 6:38 Badajba ngayi kingkarrinya. Badajba ngayi kingkarrinya, manjijbangangi ngani Buwakayu. Waki ngayu nangangi Buwakaya. Miku ngayiyi waki ngayuma. Waki ngayu nanda jala ngana karu Buwakayu.
JOH 6:39 Nanamuku, jala jila ngakindurri, jala kuyu ngaki jangkurr, jangayu marrimba yalunya mardarda. Miku ngayiyi mamanumba yalunya. Jangayu wankamba yalunya baku. Manjijba ngani Buwakayu, ngayu lalanbiji yalunya.
JOH 6:40 Ngaki Buwakanya nulijbangka yajinyi. Nulijba nyulu nayi. Nanda jala najba nangangi Jandanyi, baki kuyu nangangi jangkurr, janyulu wankijba mili yurrngumba. Jangayu wankamba baku. Nani nulijbangka ngaki Buwakanya.” Barriwa. Nani yanybayi Jisus yalungi.
JOH 6:41 Nanamuku Jumuku, jala yali manku Jisus yanybikurri, baki jurlwa yali nanganginkanyi jangkurranyi. Yanyba yalungki, “Nanda balki jangkurr jala Jisus yanyba, ‘Ngayu wankambikanyi yurrngumba, barrinani mama wankambikanyi mankanyi. Ngayu badajbayi kingkarrinya.’ Balki nanda jangkurr jala yanybayi Jisus.” Nani yalungki yanyba.
JOH 6:42 Miku yaliya kuyu nangangi jangkurr wankambikanyi yurrngumba. Miku yaliya kuyu nangangi jangkurr badaykanyi nyulu kingkarrinya. Yali yanyba, “Nayinda nganinyi nyulu Jisus. Nyulu jandanyi nangangi Jusibkanyi. Jingkijba ngambala baki nijanganjinyi baki yarrijinyi nangangi. Yanka nyuli yanyba jali nyulu badajba kingkarrinya.” Barriwa.
JOH 6:43 Yanybayi Jisus yalungi, “Mikujiyi jurlwa ngaki jangkurr nani. Nayinda duja ngaki jangkurr.
JOH 6:44 Jala nganinyi jilajba ngakindurri, jala nyulu kuyu ngaki jangkurr, miku nyuliyi jilajba ngakindurri nyuluman. Jilajba nyulu ngakindurri, ngawamba manjijbangangi nanda ngakindurri Buwakayu, baki jangayu wankamba baku. Buwakayu manjijba ngani kingkarrinya nanginkurri. Nyulu manjijba yalunya ngakindurri Buwakayu, yalu kuyunkanyi ngaki jangkurr.
JOH 6:45 Yarrijbayi jangkurr Kudkanyi najana wankalawanyi. Nayinda nyuli yarrijba, ‘Milidimba jayalunya Kudwanyi. Janyulu milidimba yalunya.’ Nanda jala manku jangkurr Kudkanyi, nanda jala jingkijba jangkurr Kudkanyi janyulu jilajba ngakindurri.
JOH 6:46 Miku yaliyi najba Buwakanya, ngala nanda jali manjijba Kudwanyi, ngawamba nyulu najbayi Buwakanya. Ngawamba nyulu najbayi.
JOH 6:47 Ngayu karungka narrinya duja. Nanda jala durrijba ngaki jangkurr, janyulu wankijba yurrngumba.
JOH 6:48 Ngayu barrinani mama wankambikanyi. Nanda jala durrijba ngaki jangkurr, janyulu wankijba yurrngumba.
JOH 6:49 Narringi wankalanyi mungkijimuku jungku yali mangkurruna. Kuyuyi yalunya Musiswanyi kulani Yijibnanyi, baki jungku yali mangkurruna. Nanaba yali jarrba nanda mama niji mana. Jarrba yali nanda mama, manjijba jali Kudwanyi yalundurri kingkarrinya. Jarrba yali nanda mama, baki janyba yalungki barri bukambiju.
JOH 6:50 Nanda mama jali badajba kingkarrinya, ngayu barrinani nanda mama. Nanda jala jarrba ngaki mama, baki miku nangkiyi janyba mili. Janyulu wankijba yurrngumba.
JOH 6:51 Ngayu wankamba narrinya yurrngumba. Ngayu barrinani nanda mama wankambikanyi narrinya yurrngumba. Ngayi badajba kingkarrinya. Nanda mama jala ngayu wajba narrinya wankambikanyi, nanda mama ngaki barnyi.” Barriwa.
JOH 6:52 Nanamuku Jumuku, mili yalungki yanyba. Yilikajba yalungki, “Mili yanka nangini nganinyiwanyi ngamanya wajba nanganginkanyi barnyinyi jarrkanyi. Mili yanka nayi. Yanka.” Barriwa.
JOH 6:53 Mili yanybayi Jisus yalungi, “Ngayu karungka narrinya duja. Jaliyi narri miku jarrba barnyi nangangi, Buwaya Bukambijuyngka, jaliyi narri miku ngaraba ngulya nangangi, baki narriyi miku wankijba yurrngumba.
JOH 6:54 Nanda jala jarrba ngaki barnyi, baki ngaraba ngaki ngulya, janyulu wankijba yurrngumba. Jangayu wankamba baku.
JOH 6:55 Ngaki barnyi barrinani mama jarrkanyi. Ngaki ngulya barrinani wabuda ngaraykanyi.
JOH 6:56 Nanda jala jarrba ngaki barnyi, baki ngaraba ngaki ngulya, janyulu jungku ngakindu kurduluna yurrngumba, baki jangayu jungku nangandu kurduluna yurrngumba.
JOH 6:57 Buwakanya Kingkarri, nyulu jungkuka wanka yurrngumba. Ngana nyuli manjijba kingkarrinya. Ngayu jungku wanka nayiba Buwakanyangangi. Nyulu wankamba ngani. Nani barri nanda jala ngana jarrba, janyulu jungku wanka yurrngumba ngakingangi. Ngayuja wankamba nanda.
JOH 6:58 Nayinda barri, nanda mama jali badajba kingkarrinya. Nanda mama miku barrinani nanda yingka mama nanda mana, jali wankalawanyi mungkijimukunyi yalu jarrba mangkurruna. Jarrba yali nanda mana, baki yuwaji janyba yalungki. Ngala nanda jala jarrba ngaki mama, janyulu wankijba yurrngumba.”
JOH 6:59 Yanybayi Jisus bukamba nayinda jangkurr jurjina. Milidimba nyuli yalunya jurjina, yaji niji Kabirnayum.
JOH 6:60 Kajamuku yali kandimuku Jisuskanyi. Jali yalu manku nayinda jangkurr Jisuskanyi, yalungki yanyba, “Miku nayinda kunyba jangkurr nangangi. Nayinda jardibirri jangkurr. Miku ngambaliyi kuyu nayinda jangkurr nangangi.” Barriwa.
JOH 6:61 Ngala jingkijbayi yaji Jisuswanyi. Miku nyuliyanyi manku yalungi jangkurr, ngala muningka nyuli jingkijba nanda jangkurr, jali yalu yanyba, miku kuyunkanyi nangangi jangkurr. Yanybayi Jisus yalungi, “Ngamu ngayu yanyba balki jangkurr narringi.
JOH 6:62 Ngala jaliyi narri najba Buwanya Bukambijuyngka kirriykurri kingkarri, jaliyi narri najba kirriykurri nanankurri, nanda jali waluwa badajba kingkarrinya, jaliyi narri najba Buwanya Bukambijuyngka kirriykurri nanankurri, baki yiningki janarri kuyu ngaki jangkurr.
JOH 6:63 Miku nangkiyi nganinyi wankamba mankanyi yurrngumba. Miku. Ngawamba Ngarnduwanyi Kudkanyi, yuku nyulu wankamba nganinyi. Nayinda jangkurr jala ngayi karu narrinya, jalija narri kuyu nayinda jangkurr, janarri jungku wanka yurrngumba. Marda jungkuja Ngarndu Kudkanyi narrindu yurrngumba.
JOH 6:64 Jawuda narri, yuwaji narrimi miku kuyu ngaki jangkurr.” Barriwa. Wabula wankalana jingkijbayi bukamba yaji Jisuswanyi. Jingkijba nyuli yalunya jali yalu miku kuyu nangangi jangkurr. Jingkijba nyuli yalunya, waluwa nyuli yanyba. Jingkijbayi yalunya jala yalu miku kuyu nangangi jangkurr. Nanda barrinani nyuli jingkijba nanda nganinyi jali waluku nyuli kandi Jisuskanyi, ngala baku yangkalamba nangki Jisusnanyi. Nanangini nganinyiwanyi jali nangka yangkalamba Jisusnanyi, karu nyuli mambuka jurjkanyi nangangi Jisuskanyi, baki wakaramba yali Jisus kurdanbikanyi. Jingkijbayi nanda nganinyi jali yangkalamba nangka Jisusnanyi. Jingkijba nyuli bukamba yaji.
JOH 6:65 Mili yanybayi Jisus, “Ngayu karu narrinya. Ngawamba nanamuku jala manjijba Buwakayu ngakindurri, ngawamba yalu badajba ngakindurri. Jayalu badajba ngakindurri, manjijbangangi yalunya ngakindurri Buwakayu. Ngawamba jayalu kuyu ngaki jangkurr.”
JOH 6:66 Yanybayi Jisus nayinda jangkurr waluwa. Bayngkani jawuda nanganginmuku kandimuku, yingijba yali Jisus. Miku yaliyi mili kandi nangangi. Miku yaliya kuyu nangangi jangkurr barnyinyi, baki ngulyanyi, baki wankiykanyi mili. Miku yaliya mili kuyu nangangi jangkurr. Miku yaliyi mili kandi nangangi.
JOH 6:67 Ngajakayi Jisuswanyi nanganginmuku kandimuku, jali yalu yuwaji nangandu, 12 barri. Ngajaka nyuli yalunya, “Marda janganarri yingijba kuna.”
JOH 6:68 Jananganjayi yalkunyiwanyi kandiwanyi, niji Sayimin Bida. Jananganjayi, “Mambuka, wanjakurri nurruja jila. Ninji yanybayi nanda kunyba jangkurr wankiykanyi yurrngumba.
JOH 6:69 Nurru kuyu nganyi jangkurr. Jingkijba ninya nurru, ninji nanda kudukudu nganinyi jala manjijbayi Kudwanyi.” Barriwa.
JOH 6:70 Yanybayi Jisus yalungi, “Ngayu yarrijba narrinya ngakinmuku kandimuku. Ngayu yarrijba narrinya, kajamuku 12 ngakinmuku kandimuku. Janarri jilalajba ngakindu yurrngumba. Ngala warriyaluku, yingamali nanda narrindu wuwarryudi.” Nani yanybayi Jisus yalungi.
JOH 6:71 Nanda jali wuwarryudi, nyuli Judas, nijanganjinyi nangangi Sayimin Yiskariud. Jingkijbayi Judas Jisuswanyi, janangka yangkalamba Jisusnanyi. Janyulu karu mambuka jurjkanyi nangangi Jisuskanyi baki jayalu wakaramba Jisus kurdanbikanyi. Barriwa barri.
JOH 7:1 Baku barri jilajbayi Jisus nananyina yajina niji Kalili. Miku nyuliyala jilalajba yingkana kulaya yajina Judiya. Yaliyanyi kurdanba Jisus mambukamukunyi Jukanyi nanaba Judiya. Yaliyanyi kurdanba Jisus, baki jilalajba nyuli langkiya Kalili.
JOH 7:2 Nanamanji winyurruwa janyulu wangarr yalungi, nijarrijba jalili yalu “Wangarr Jurjkanyi.”
JOH 7:3 Kanyiyamuku nangangi Jisuskanyi, yanyba yali nangangi, “Marda ninjimi barlba nanginbunanyi yajinanyi. Marda ninjimi barlba kula Judiyayurri, baki kandimukunyi nganyinmukunyi, jayalu najba kunyba yaji nganyi. Jayalu najba nanda jala ninji yabimba.
JOH 7:4 Jaliyi nganyingka mankumanku ninji walkurra mambuka, baki marda ninjimi miku waki kardarda. Marda ninjimi waki nanayina yajina jalija ninyalu najba kajamukunyi. Marda ninyalimi najba yabimbikurri nanda walkurra yaji. Barriwa.”
JOH 7:5 Nani yanybayi kanyiyamuku nangangi Jisuskanyi, ngala miku yaliya kuyu nangangi jangkurr.
JOH 7:6 Yanybayi Jisus yalungi, “Jilijba jangayu jilajba wangarranyi Jirusalimyurri. Jilijba. Jaliyi narri nulijba jilaykanyi nanankanyi wangarranyi, baki yuku narri jila. Ngala miku ngayiyi jilajba nanijba.
JOH 7:7 Miku yaliyi ngirra narrinya. Miku narrinjaliyi linjumba mankanyi. Ngala nganjalu ngirra, karungangi ngayi yalunya, yalu jungku balkina yuwana. Nani nganjalu ngirra. Yanyba ngayu yalungi nayinda yurlurr jangkurr, baki nulijba yalu ngaki, linjumbikanyi nganjalu. Miku ngayiyi ngayu jilajba wangarranyi, ngala yuku narri jilajba. Barriwa.”
JOH 7:9 Nani yanybayi Jisus, baki wambu nyuli jungku nanaba Kalili. Barriwa.
JOH 7:10 Barlba yali kula kanyiyamuku nanganginmuku Jisuskanyi. Barlba yali kula Jirusalimyurri. Baku barri barlbayi Jisus yalundu bayngkani. Ngala miku nangkiya minimba yingkamukuyngka. Miku yaliya jingkijba nyuli wanbiya.
JOH 7:11 Nanamuku mambukamuku Jukanyi, bayiwujba yali Jisuskanyi wangarrina. Ngajaka yali, “Wanjawa nanda Jisus. Wanjawa nyulu.” Ngala miku yaliyanyi wakaramba Jisus.
JOH 7:12 Kajamuku yalungki yanyba nangangi Jisuskanyi. Yanyba yalungki kardarda nangangi, marralangangi yali mambukamukuyngka Jukanyi. Jingkijba yali nanamuku mambukamuku Jukanyi nulijba yali nangangi linjumbikanyi Jisus. Baki yanyba yalungki kardarda nangangi. Yingkamuku yalungki yanyba, “Nanda, nyulu kunyba nganinyi. Kunyba nyulu nanda nganinyi.” Ngala yingkamuku yalungki yanyba, “Miku nyulimi nanda kunyba nganinyi. Jujambaka nanangi ngamanya. Jujambaka. Jungkuka balki.” Nani kardarda yalungki yanyba yingka jangkurr baki yingka jangkurr. Miku yalungki yanyba kudanyu, ngala kardarda ngawamba. Barriwa.
JOH 7:14 Jilajbayi Jisus walkurrayngkurri jurjyurri. Nanda wangarr nyuli barndaykana wik. Burrandimbijina wiknyina jilajbayi Jisus jurjyurri. Ngankijba nyuli kalawuyngkurru jurjina, baki milidimbayi yalunya. Milidimbayi yalunya nanaba jurjina.
JOH 7:15 Mambukamuku jurjkanyi, manmala yali nanganginkanyi jangkurranyi. Manmala yali baki yanyba yalungki, “Nyulu nayinda jingkijbawarr, ngala miku nyuliya jungku skulina. Yanka nyuli jingkijba yaji kudanyu. Yanka.”
JOH 7:16 Manku nyuli nanda jangkurr yalungi Jisuswanyi. Jananganja nyuli yalunya, “Karu nyuli ngana yajinyi nanangini, manjijba jali ngana. Ngana karuyi yajinyi, baki milidimba ngayu yalunya nanankanyi yajinyi. Nyuli manjijba ngana milidimbiji yalunya, baki milidimba ngayi nanganginkanyi jangkurranyi.
JOH 7:17 Jaliyi nyulu nulijba ngayangayiykanyi Kudkanyi, baki janyulu jingkijba. Jingkijba janyulu nanda jala ngayu maramaramba yalunya. Jingkijba janyulu miku ngayiyi maramaramba ngakinkanyi jangkurranyi. Miku. Maramaramba ngayu ngawamba nanankanyi jangkurranyi Kudkanyi. Maramaramba ngayu nanankanyi jala nyuli karu ngana maramarambikanyi Kudwanyi. Nani barri janyulu jingkijba ngana.
JOH 7:18 Nanda nganinyi, nangkama jala yanyba jangkurr, nulijba nyuli yalungi yingkamukuyngka, yalu barrarrakiykanyi nanda. Nyuli nulijba yalungi ngayangayiykanyi nangangi, barrarrakiykanyi, nanda jala nangkaman yanyba. Ngala nanda jalimi miku nangkama yanyba jangkurr, ngala yanyba nyulu jangkurr nangangi manjijba jali nanda, miku nyulimi nulijba yalungi, yalu barrarrakiykanyi nanda. Miku. Ngala nulijba nyuli yalungi barrarrakiykanyi nanda yingka, jali manjijba yalundurri. Nanda jala nulijba yalungi nani nanankanyi yingkanyi, nanda yurlurr jala jungku.
JOH 7:19 Nanangini wankalawanyi Musiswanyi, wajba nyuli narrinya nanankanyi yuwanyi. Ngala miku narriyi ngayangayijba nanankanyi yuwanyi. Miku narriyi jungku kunybana yuwana Musiskanyi. Wanyingkanyi narri nulijba ngaki, kurdanbikanyi nganarri. Wanyingkanyi. Miku narrimi nani jungku kunybana yuwana Musiskanyi, nulijba jala narri kurdanbikanyi nganarri.” Nani yanybayi Jisus yalungi.
JOH 7:20 Ngala yanyba yali nangangi, “Ninji mudu, wuwarrngangi nganyindu jungkuka mankanyina. Miku nurrimi nulijba nganyi kurdanbikanyi ninya. Miku. Mudu ninji. Mudu.” Barriwa.
JOH 7:21 Jananganjayi Jisuswanyi, “Yabimba ngayi ngiruka yaji nganiyngkanyi, baki manmala narri. Kudanyu narri manmala jali ngayu kunymamba nanda nganinyi balkiyudi mankanyiyudi. Kunymamba ngayi nanda nganinyi Sadidi. Ngala yanyba narri ngaki, ngayi waki, jali ngayu kunymamba nanda Sadidi. Yanyba narri, ngayi jungku balkina yuwana.
JOH 7:22 Nanangini Musiswanyi, jirrinyba nyuli narrinya, narri kaburrmbikanyi bardarda juka. Jalili jungku bardarda yingamali wik, baki munganawa narrili kaburrmba nanda bardarda. Karlba narri bardarda mankanyi nananyina kambana. Ngayangayijba narri nanankanyi yuwanyi, jali yarrijba najana Musiswanyi. Marda nanamuku wankalamuku jungku yali barrabarruji. Jungku yali waluwa Musiskanyi ngala nyuli jilijba. Marda yalili kaburrmba bardarda. Barriwa. Yabimba narri nanda yuwa Musiskanyi. Kaburrmba narri bardarda. Kaburrmba narri bardarda, marda Sadidi. Nani narri waki Sadidi, baki jungku narri balkina nananyina yuwana, miku wakinkanyi Sadidi. Nani ngayi waki marda Sadidi, jali ngayu kunymamba nanda nganinyi mankanyi Sadidi. Wanyingkanyi narri jungku ngarrangarra muwa ngaki. Wanyingkanyi. Marda narringkimi mankumanku kudanyu waluku.
JOH 7:24 Mikujiyi manku kiji wakun. Mikujiyi yanyba, ngayu yabimba balki yaji. Waluku narringki mankumanku kudanyu, baki janarri jingkijba yaji.” Barriwa.
JOH 7:25 Nanamuku jungku jalili yalu Jirusalim, yingkamuku yalungki yanyba, “Nayinda Jisus, nyulu nanda jala yalu nulijba kurdanbikanyi nangangi.
JOH 7:26 Ngala yanybaka nyulu kudanyu nanginkanyi muranyi nayiba jurjina. Kudanyu nyulu yanybaka yalungi, miku kardarda. Miku nangkiyi ngadijba yalungi mambukamukuyngka. Miku nangkiyi ngadijba yalungi. Ngala miku yalimi manku kiji nangangi mambukamukunyi. Yiningki marda yalu jingkijbangka nangangi, nyulu Krayis.
JOH 7:27 Ngala nanda jangkurr yanybaka najana Kudkanyi. Yanybaka nanda jangkurr nangangi Krayiskanyi. Miku yaliyi jingkijba nangangi yaji Krayiskanyi. Miku yaliyi jingkijba nanda yaji nangangi. Ngala nayinda nganinyi Jisus, jingkijba ngambala nangangi yaji. Nangangi yaji Kalili. Jingkijba ngambala nangangi yaji Jisuskanyi, ngala nanda Krayis, miku ngambaliyi jingkijba nangangi yaji.” Barriwa. Nani yalungki yanyba nangangi Jisuskanyi.
JOH 7:28 Mili yalunyi Jisuswanyi milidimba walkurranyina jurjina. Yanyba nyuli kudanyu. “Yi. Nganarri jingkijba. Marda narri jingkijba nanda yaji ngaki langku. Ngala miku ngayiyi badajba narringi ngayuma. Miku. Nanda jali ngana manjijba, nyulu jilalajbangka ngakindu yurrngumba. Ngala miku narrimi jingkijba nanda. Miku narrimi jingkijba Kud. Ngamu narrimi jingkijba Kud, ngala miku.
JOH 7:29 Ngala ngayu, jingkijba ngayu nanda Kud, jungkungangi ngayu nangandu yurrngumba. Ngana nyuli manjijba milidimbiji narrinya. Barriwa.” Nani nyuli milidimba yalunya.
JOH 7:30 Jali yalu manku nangangi jangkurr, baki kudiyamukunyi mambukamukunyi, yaliyanyi wudumba Jisus yarriykanyi brisinyina, ngala miku. Miku yaliyi wudumba Jisus. Jilijba jayalu wudumba, nulijbangangi Kud nangangi Jisuskanyi, nyulu wakinkanyi mili. Miku yaliya wudumba Jisus nanamanji. Jilijbawa. Mili janyulu waki Kudkanyi.
JOH 7:31 Ngala kajamukunyi, jali yalu manku nangangi jangkurr, baki kuyu yali nanda jangkurr nangangi. Yanyba yalungki, “Nani nanda duja. Nyulu Krayis. Yabimba nyulu kaja ngiruka yaji. Mikuyaji nganiyngkanyi yabimba nanda yaji ngiruka. Miku. Mikuwali yingkawanyi yabimba nanda ngiruka yaji. Ngawamba nyulu.” Barriwa.
JOH 7:32 Kudukudumuku yalungki yanyba kardarda Jisuskanyi. Kardarda yalungki yanyba nangangi. Nanamukunyi Barasimukunyi, manku yali nanda kardarda jangkurr. Manku yali nanda jangkurr, baki manjijba yali yilarrmuku wudumbiji Jisus. Manjijba yalunjali Barasimukunyi marda mambukamukunyi jurjkanyi wudumbiji Jisus.
JOH 7:33 Jali yalu wanbiya nanganda Jisusnyina, nanamuku yilarrmuku, baki yanybayi Jisus yalungi, “Marndakaja jangayu jungku nayiba narrindu. Baku barri jangayu wijba nangandurri, jala ngana manjijba narrindurri. Wijba jangayu nangandurri.
JOH 7:34 Bayiwujba janarri ngaki, jungkungangi jangayu yingkana yajina. Miku narriyi jilajba nanankurri yajiyurri. Barriwa.”
JOH 7:35 Nanamukunyi mambukamukunyi, yali manku nanda jangkurr Jisuskanyi. Manku yali, baki yanyba yalungki, “Wanjakurri yajiyurri janyulu barlba, baki bayiwujba jangambala nangangi. Wanjawa janyulu yajina jungku. Barlba kuna janyulu bayangarriji, nanankurri yingkayurri yajiyurri niji Kris. Kajamuku Jumuku jungku yalili nanaba. Yiningki janyulu barlba yalundurri milidimbiji yalunya, jungku jalili yalu nananyina yajina. Milidimba kuna janyulu yalunya. Barriwa.”
JOH 7:36 Yanybayi Jisus ngambalangi, ‘Bayiwujba janarri ngaki,’ baki mili nyuli yanyba, “Miku narriyi jilajba nanankurri yajiyurri jalija ngayu jungku.’ Miku ngambalimi jingkijba nanda jangkurr nangangi. Miku ngambalimi jingkijba.” Nani yalungki yanyba jangkurranyi Jisuskanyi. Barriwa.
JOH 7:37 Jungku yalili nanaba wangarranyi, 8 kambana, baki barndaykana kambana karrinjayi Jisus kalawunyi jurjina. Karrinjayi Jisus, baki yanyba nyuli kudanyu yalungi, “Jala narri warinjijba, baki marda narrimi badajba ngakindurri ngaraji wabuda.
JOH 7:38 Yanybaka nanda naja Kudkanyi nayinda jangkurr, ‘Nanda jala durrijba ngaki jangkurr, jala ngayangayijba ngaki, janyulu maruka muwa bukambijuyngka. Janyulu maruka muwa yalungi, barrinani ngayu marukangka muwa yalungi bukambijuyngka. Janyulu minimba yalunya jungunkanyi kunybana yuwana Kudkanyi. Nani janyulu wanka jungku yurrngumba nangandu Kudnyina. Nanda wabuda dudibangka bundalina, baki jardijbangka kurnda baki karnba ngiruka bijalina wabudana. Nani janyulu jardijba ngiruka Kudkanyi. Janyulu karu yingkamuku nangangi Kudkanyi. Janyulu maruka muwa yalungi. Janyulu maruka muwa yalungi mili kudanyu baki mili kudanyu yurrngumba barri. Barriwa.”
JOH 7:39 Nani yanybayi Jisus. Muningka nyuli karu yalunya wabudanyi, ngala yanyba nyuli nanda jangkurr Kunybanyi Ngarndunyi Kudkanyi. Janyulu manjijba nanda Kunyba Ngarndu Kudwanyi. Janyulu manjijba Kunyba Ngarndu yalundurri jalija yalu durrijba nangangi jangkurr Jisuskanyi. Ngala jilijbawa nyuli manjijba Kunyba Ngarndu. Waluku janangka janyba, janyulu mili wankijba, baki janyulu kirrijba kingkarri nangandurri Kudyurri. Bayngkani janyulu manjijba Kunyba Ngarndu Kudwanyi. Nani milidimbayi yalunya Jisuswanyi.
JOH 7:40 Kajamukunyi yali manku jangkurr nangangi Jisuskanyi. Yingkamuku yalungki yanyba, “Nanda nganinyi, nyulu nanda jali manjijba Kudwanyi, yanybiji nangangi jangkurr. Nyulu nanda jali manjijba Kudwanyi.”
JOH 7:41 Ngala yingkamuku yalungki yanyba, “Nyulu nanda, nyulu Krayis.” Ngala yingkamuku yalungki yanyba, “Miku nyulu nanda Krayis. Jingkijba nurru Krayis, miku nyuliyi jardijba nanaba langkiya, nananyina yajina Kalili, jali nayinda nganinyi Jisus jardijba. Miku. Ngala janyulu jardijba kulaya.
JOH 7:42 Nanda naja Kudkanyi yanybaka nayi, ‘Nanda wankala Dayibid, jungku nyulili nananyina yajina niji Bidliyim. Nyuli barrinani kamambarra buwakanya nangangi Krayiskanyi. Nanda yaji Bidliyim nanda nangangi yaji Dayibidkanyi. Nanda nangangi yaji marda Krayiskanyi. Mikuwali Krayis jardijba langkiya, ngala janyulu jardijba kulaya.’” Nani yalungki yanyba yinini yinini jangkurr nangangi Jisuskanyi.
JOH 7:43 Baki yingkamuku kurranja yalungki marda, baki kuyungangi yali nanda jangkurr Jisuskanyi. Ngala yingkamuku yanyba yalungki Jisuskanyi, miku nyuli nanda Krayis. Marda kurranja yalungki marda.
JOH 7:44 Ngala yingkamuku yali nulijba yalungi yilarrmukuyngka, yalu wudumbikanyi Jisus. Ngala miku yaliya marrimba Jisus yilarrmukunyi.
JOH 7:45 Wijba yali yilarrmuku jurjyurri. Ngajaka yalunjali mambukamukunyi marda Barasimukunyi. Ngajaka yali yilarrmuku, “Wanyinganyi narriyi miku wudumba nanda Jisus. Wanyinganyi narriyi miku kuyu nurrundurri.”
JOH 7:46 Jananganja yali, “Mikuwali yingka yanyba nanda jangkurr barrinani Jisus. Yanyba nyuli ngiruka jangkurr.”
JOH 7:47 Ngajaka yalunjali Barasimukunyi, “Jujambayi kuna narriya marda nanangini Jisuswanyi.
JOH 7:48 Jingkijba kuna narri marda, miku yaliyi kuyu nangangi jangkurr marda mambukamukunyi marda Barasimukunyi. Miku yaliyi kuyu nangangi jangkurr.
JOH 7:49 Ngala nanangini murawanyi, mudumbanyi yalu jungku. Miku yalimi jingkijba nanda yuwa Musiskanyi. Janyulu yabimba balki yaji yalungi Kudwanyi, mikungangi yalu kuyu nangangi jangkurr Jisuskanyi.” Nani yali ngirrwa yalungi yilarrmukuyngka.
JOH 7:50 Nanda mambuka niji Nikidimus, jungku nyuli nanaba yalundu Barasimukunyina. Nyuli nanda malbu jali jilajba waluwa nangandurri Jisusyurri. Jilajba nyuli kardarda nangandurri mungana yanybikanyi Jisuskanyi. Yanybayi nanda mambuka yalungi nayi,
JOH 7:51 “Yanybaka ngambalangi yuwa, waluwa jangambala karrinjarrijba nganinyi. Jangambala karrinjarrijba nganinyi waluwa Kurdusnyina. Waluku jangambala manku nangangi jangkurr, baki yanyba jangambalaka nanankanyi, wanyimba jangambala nangangi. Waluwa marda ngambalimi jingkijba nanda yaji, yabimba jali nyulu yaji. Nani yanybaka nanda yuwa Musiskanyi. Marda ngambalimi waluku karrinjarrijba nanda Jisus ngamandu, yanybikanyi nangangi.” Barriwa.
JOH 7:52 Jananganja yali nanda Nikidimus, “Nanda yaji Kalili, marda kuna nganyi yaji. Nanda Jisus, nangangi yaji Kalili. Yiningki ninji kandi nangangi. Ningkijba janinji naja nangangi Kudkanyi, baki jingkijba janinji nayi. Mikuyaji yalungi jali yalu jardijba Kalili, miku yalungkiya yanyba jangkurr Kudkanyi.”
JOH 7:53 Baki barriwa yalungki yanyba. Bukamba yalungki yanyba, baki wijba yali yalunginkurri barndarri.
JOH 8:1 Ngala Jisus, kirrijba nyuli kingkarri kulawirarri, yaji niji ‘Yulib.’ Barriwa.
JOH 8:2 Munganawa nyuli wijba walkurrayngkurri jurjyurri. Ngankijba nyuli kalawunyi jurjina. Kaja muran jungku yali lukuluku nangandu. Jungkuyi Jisus, baki milidimbayi yalunya.
JOH 8:3 Nanamuku, milidimba jalili yalu yalungi yuwa jurjina, marda nanamuku Barasimuku, ngankijba yali jurjina. Kuyu yali jibarri yalundu kalawuyngkurru. Wakaramba yali nanda jibarri kulukankurri yingkana nganinyina, ngala nyuli mikuyaji nanganginkanyi nawinganjanyi. Kuyu yali nanda jibarri Jisusyurri, baki karrinjarrijba yali waluwa yalundu murana.
JOH 8:4 Baki yanyba yali Jisuskanyi, “Milidimbawarr. Wakaramba nurri nayinda jibarri. Kuluka nyuli yingkana nganinyina, miku nanganginyina nawinganjana.
JOH 8:5 Nanda yuwa Musiskanyi yanybaka nayi, ‘Jaliyi jibarri kuluka nyulu yingkana nganinyina, miku nanganginyina nawinganjana, baki marda ngambalimi kurdanba. Marda ngambalimi janyba dungala nangandurri, baki janangka janyba.’ Nani barri yanybaka nanda yuwa Musiskanyi. Ngala yanka ninji yanybaja nangangi.” Barriwa.
JOH 8:6 Yanyba yali nanda jangkurr nangangi Jisuskanyi. Nani yali ngajaka Jisus, nulijbangangi yali jujambikanyi Jisus. Nulijba yali Jisuskanyi nyulu yanybikanyi, nanda yuwa Musiskanyi, nanda balki jangkurr. Jaliyi nyulu yanyba nanankanyi yuwanyi Musiskanyi, nanda balki jangkurr, baki jayalu manku kiji nangangi. Ngala miku nyuliyanyi jananganja yalunya wakun. Ngala wududu nyuli wayka, baki ngirrikimbayi jamba marniyudinyi.
JOH 8:7 Ngala nyuli ngirrikimba jamba, baki yali karrinja nangandu, ngala yali ngajakawa nanankanyi jangkurranyi. Baki walajbayi Jisus waykalinya, baki karrinjarrijba nangki, baki yanybayi yalungi, “Nanda jalili jungku kunybana yuwana yurrngumba, miku nyuliya barimba yingamali yuwa, marda nyuluwarri janybaja dungala nangandurri jibarriyurri. Nyuluwarri janybaja dungala jibarriyurri, jala jungku kunybana yuwana yurrngumba. Barriwa.”
JOH 8:8 Baki mili nyuli wududu wayka. Mili ngirrikimbayi jamba.
JOH 8:9 Jali yalu manku nanda jangkurr nangangi, baki mankumanku yalungki kudanyu, baki barriwa barlba yali. Waluwa barlbayi malbumalbu, baki bayngkani yingkamuku, bayngkani yingkamuku. Bukamba yali barlba. Ngawamba bulaman nanaba, Jisus baki nanda jibarri.
JOH 8:10 Mili najbayi jibarri Jisuswanyi waykalinya, baki yanybayi nanankanyi jibarrinyi, “Ninji jibarri. Ngala wanjawa yalu nganyinmuku. Miku yaliyanyi jungku nayiba nganyinbu yanybikanyi nganyi, kurdanbikanyi ninya. Mikuyaji yalungi nayiba kuna.”
JOH 8:11 Jananganja nyuli Jisus, “Mikuyaji yalungi nayiba. Barlba yali bukamba.” Yanybayi Jisus nangangi, “Miku ngayiyi yanyba kurdanbikanyi ninya. Miku. Wijbakiyi nganyingkurri barndarri, ngala jungkukiyi kunybana yuwana. Mikujiyi yabimba mili balki yaji. Ngala barriwakiyi jilajba nganyingkurri barndarri. Barriwa.”
JOH 8:12 Baku barri mili yanybayi Jisus yalungi, “Ngayu barrinani mirnbi. Jala mungijbangka yaji, baki miku yaliyi najba yubarl jilaykanyi. Miku yaliyi najba nanda yubarl jala mungijbangka yaji. Ngala jaliyi nyulu kuyu mirnbi yingkawanyi naykanyi yubarl, baki yuku yalu najba nanda yubarl. Nani ngayu barrinani nanda mirnbi. Minimba jangayu narrinya durriykanyi yuwa Kudkanyi. Jalija yalu durrijba ngaki yuwa, baki wankijba jayalu nangandu Kudnyina yurrngumba, minimbangangi ngayu yalunya yuwanyi Kudkanyi. Ngayu barrinani mirnbi minimbikanyi yalungi. Nani ngayu milidimba narrinya yuwanyi Kudkanyi.” Barriwa.
JOH 8:13 Yanybayi Barasimuku nangangi, “Yanyba nganyingkama. Mikuwali yingkawanyi karu nurrunya nganyi. Yurlwa nurru nanankanyi nganyingkanyi jangkurranyi, yanybangangi nganyingkaman.” Barriwa.
JOH 8:14 Jananganjayi Jisuswanyi, “Jala ngakaman yanyba narringi, baki duja nanda jangkurr ngaki. Jingkijba ngaka, wanjamunanyi yajinanyingangi ngayi badajba, baki wanjakurri yajiyurri ngayuja barlba. Ngala miku narrimi jingkijba nanda yaji ngaki. Miku. Duja ngaki jangkurr, jingkijbangangi ngayu nanda yaji.
JOH 8:15 Miku narringkimi mankumanku kudanyu nanankanyi yajinyi, najba jali nganarri yabimbikurri nanda yaji. Miku. Muningka narringka mankumanku bijal, ngala miku nganarriyi jingkijba kudanyu. Nganarri karuyi, balkina ngayu jungku yajina. Ngala ngayu, miku ngayimi karu yalunya, balkina yalu jungku yajina. Miku.
JOH 8:16 Ngala jalija ngayu karu yalunya jangkurranyi, baki duja nanda jangkurr ngaki yalungi. Mankumanku ngaka duja jangkurranyi yalunginkanyi, mankumankungangi ngalingki Buwakanya. Mikungangi ngayiyi jungku ngayuman. Ngaliya Buwakanya, manjijba jali ngana, malumbangangi ngaliya jungku.
JOH 8:17 Yanybaka nanda yuwa Kudkanyi, jala kujarra nganinyi yanyba bula nanamannga jangkurr yajinyi, baki duja nanda jangkurr.
JOH 8:18 Nani barri kujarra yanyba buli ngaki. Ngayu karungka narrinya ngaki, baki ngaki Buwakanya jali ngana manjijba, baki nyulu karungka narrinya ngaki. Yanyba nyulu nanamannga jangkurr.” Barriwa.
JOH 8:19 Ngajaka yali Jisus, “Wanjawa nganyi Buwakanya. Wanyi nyulu.” Barriwa. Jananganjayi Jisuswanyi, “Miku narrimi jingkijba ngaki Buwakanya, baki miku nganarrimi jingkijba. Jaliyi nganarri jingkijba, baki jingkijba janarri ngaki Buwakanya marda. Barriwa.”
JOH 8:20 Nani yanybayi Jisus, ngala nyuli milidimba yalunya walkurranyina jurjina. Milidimba nyuli yalunya nananyina yajina jalili yalu yarrijba dungala darladarlana Kudkanyi. Ngala miku yaliyi wudumba Jisus nanamukunyi yilarrwanyi. Miku yaliyi wudumba Jisus nanamanji. Jilijbawa. Mili janyulu waki Kudkanyi. Barriwa.
JOH 8:21 Mili yanybayi Jisus yalungi Jumukuyngka. “Barlba jangayu. Bayiwujba janarri ngaki. Miku narriyi barlba nanankurri yajiyurri jalija ngayu barlba. Miku. Janyba janarringka, ngala narri jungkuwa balkina yuwana Kudkanyi. Barriwa.”
JOH 8:22 Yanyba yalungki nanamuku mambukamuku Jukanyi, “Wanyingkanyi nyuli yanyba, ‘Miku narriyi barlba nanankurri yajiyurri, jalija ngayu barlba.’ Wanyingkanyi nyuli yanyba nani. Kurdanba nangkaja kuna.”
JOH 8:23 Jananganjayi yalunya Jisuswanyi, “Nayinda jamba narringi yaji. Jardijba narri nayiba narringinyina yajina. Ngala ngayu, ngaki yaji kingkarri. Badajba ngayi kingkarrinya. Nayinda jamba miku ngaki yaji.
JOH 8:24 Karu ngayi narrinya nanginkanyi jangkurranyi, ‘Janyba janarringka, ngala narri jungkuwa balkina yuwana Kudkanyi.’ Jaliyi narri yurlwa ngakinkanyi jangkurranyi, baki janarringka janyba, ngala narri jungkuwa balkina yuwana. Janarringka janyba, jaliyi narri miku kuyu ngaki jangkurr, yanyba jala ngakaman.” Barriwa.
JOH 8:25 Ngajaka yali Jisus, “Ngala wanyi ninji. Wanyi.” Jananganjayi Jisuswanyi, “Ngayu nanda jali ngayu karu narrinya wabula.
JOH 8:26 Mili jangayu karu narrinya kajamukuyngka jangkurranyi. Karrinja janarri waluwa ngakindu. Karu jangayu kajanyi jangkurranyi narringi. Karu jangayu narringinkanyi kajanyi balkinyi yajinyi, yabimba jala narri. Nanda jali ngana manjijba, yanybawa duja jangkurr, baki karu jangayu bukambiju nanankanyi jangkurranyi jali nyulu karu ngana. Nayinda duja jangkurr. Miku nayinda ngaki jangkurr. Ngana nyuli manjijba karunkanyi nayinda jangkurr narringi. Barriwa.” Nani yanybayi Jisus.
JOH 8:27 Ngala miku yaliya jingkijba nangangi jangkurr Jisuskanyi, jali nyulu karu yalunya nanganginkanyi Buwakaya Kudkanyi. Miku yaliya jingkijba nanda jangkurr.
JOH 8:28 Mili yanybayi Jisus yalungi, “Jalija narri langandaba Buwanya Bukambijuyngka, baki janarri jingkijba ngaki, ngayu Buwanya Bukambijuyngka. Janarri jingkijba ngayu nanda jala ngayu karu narrinya. Janarri jingkijba ngaki jangkurr. Miku nayinda ngakinmirra jangkurr, ngala nayinda jangkurr, ngalingi jangkurr, ngalingi Buwakaya jangkurr. Yabimba ngayu nanda jala nyulu karu ngana yabimbiji. Yanyba ngayu nanda jangkurr, jala nyulu karu ngana yanybikanyi. Nyuli milidimba ngana nanginkanyi jangkurranyi Buwakayu.
JOH 8:29 Miku ngayiyi jungku ngayuman. Nanda jali manjijba ngana, nyulili jungku ngakindu yurrngumba, yabimbangangi ngayili nanda yaji. Yabimba ngayu nanda yaji, jalili nyulu ngana karu. Mirnarrijba nyulu muwa ngaki, yabimbangangi ngayu nanda yaji yurrngumba. Barriwa.”
JOH 8:30 Kajamukunyi yali manku nanda jangkurr Jisuskanyi, baki kuyu yali nangangi jangkurr. Kuyu yali nanda jangkurr nangangi.
JOH 8:31 Baki mili yanybayi Jisus yalungi Jumukuyngka, kuyu jali yalu nangangi jangkurr. Yanybayi Jisus, “Jaliyi narri ngayangayijba nanankanyi jangkurranyi, milidimba jalili ngayu narrinya, baki janarri jungku ngakinmuku mungkijimuku. Duja ngayu yanyba. Janarri jungku ngakinmuku mungkijimuku.
JOH 8:32 Baki janarri jingkijba nanda jangkurr Kudkanyi, nanda jangkurr duja, yurlurr. Baki miku narriyi durrijba nanda balki wuwarr. Miku narriyi durrijba nanda yingka balki mambuka narringi. Mirnarrijba janarri muwa, mikungangi narriyi durrijba nanda balki mambuka. Baki miku narriyi yabimba nanda balki yaji.” Barriwa.
JOH 8:33 Ngala jananganja yali Jisus, “Nanda wankalanyi Yabrayam, nyuli barrinani wankalanyi nijanganjinyi nurrungi. Wanyingkanyi ninji yanyba nanda, ‘Miku nurriyi durrijba nanda balki mambuka nurrungi. Miku nurriyi waki mambukanyi. Wanyingkanyi ninji yanyba nani. Miku nurriyi waki mambukanyi.”
JOH 8:34 Jananganjayi yalunya Jisuswanyi, “Karungka ngayu narrinya duja jangkurranyi. Jala narri jungku balkina yuwana, nanda barrinani narri waki nanankanyi balkinyi mambukanyi. Jala narri waki balkinyi mambukanyi, baki narri yabimba balki yaji yurrngumba. Nanangini balkiwanyi jarrbangka narringi kurdulu.
JOH 8:35 Baki mili nayindakiyi manku. Nanda wakiwarr yiningki miku nyulimi jungku yingamalina mambukana yurrngumba. Yiningki nanganginyi mambukawanyi janyulu manjijba barriwa nanda wakiwarr nanganbunanyi, baki mili nyuliyi miku waki nanankanyi mambukanyi. Ngala jandanyi nangangi nanankanyi mambukanyi, jungka nyulili nangandu yurrngumba. Nanda nyulu jandanyi nangangi yurrngumba nanganginkanyi wulukanjanyi. Barriwa.
JOH 8:36 Nanangini Jandanyiwanyi Kudkanyi, jaliyi nyulu dulaba narrinya balkinanyi mambukananyi, baki yuku janarri barlba nanganbunanyi mambukananyi. Baki miku nyuliyi mili marrimba narrinya mambukawanyi.
JOH 8:37 Jingkijba ngayu narrinya, narri jungkuka barrinani jandanyimuku nanankanyi wankalanyi Yabrayamkanyi, ngala miku janarri kuyu ngaki jangkurr jala ngayu milidimba. Nganarrimi kurdanba. Miku narrimi kuyu ngaki jangkurr. Jungkuka narri barrinani jandanyimuku nangangi Yabrayamkanyi, ngala miku narrimi yabimba yaji barrinani nyuli yabimba Yabrayamwanyi. Ngawamba nyuli yabimba nanda yaji, jali karu Kudwanyi, ngala miku narrimi yabimba yaji Kudkanyi, jala nulijba narri kurdanbikanyi nganarri.
JOH 8:38 Yabimba ngayu nanda yaji kaja, jali nyulu karu ngana ngakinyi Buwakayu. Ngala miku narriyi yabimba nangangi yaji ngakinkanyi Buwakaya. Narri yabimbaka nanda jala nyulu karungka narrinya narringinyi buwakayu. Yabimbaka narri nangangi yaji narringinkanyi buwakaya.” Barriwa.
JOH 8:39 Mili yali jananganja Jisus, “Nanda wankalanyi Yabrayam, nyuli barrinani wankalanyi buwakanya nurrungi. Jungkuka nurru barrinani jandanyimuku nangangi.” Barriwa. Jananganjayi yalunya Jisuswanyi, “Jalimi narri jandanyimuku Yabrayamkanyi, baki narrimi yabimba nanda yaji barrinani nyulu yabimba yaji. Ngala miku narrimi yabimba nanda yaji barrinani nyulu yabimbayi Yabrayamwanyi. Miku narrimi ngayangayijba Kudkanyi, ngala Yabrayam nyuli ngayangayijba Kudkanyi yurrngumba.
JOH 8:40 Yurrngumba ngayi karu narrinya nanankanyi duja jangkurranyi. Karu ngayi narrinya nanganginkanyi jangkurranyi Kudkanyi, ngala nulijba narri ngaki kurdanbikanyi nganarri. Miku nyuliya yabimba balki yaji nani Yabrayamwanyi. Miku nyuliyanyi nulijba kurdanbikanyi nanda yingka, ngala narri nulijba ngaki kurdanbikanyi nganarri.
JOH 8:41 Narri yabimbaka balki yaji barrinani nyulu yabimbaka balki yaji narringinyi buwakayu. Jungkuka nyulu balki, baki nani narri jungkuka balki marda.” Nani yanybayi Jisus yalungi. Jananganja yali Jisus, “Kud, nyulu nurrungi Buwakanya. Jungku nurru jandanyimuku nangangi Kudkanyi. Ngawamba Kud, nyulu nurrungi Buwakanya, nyuluman.” Barriwa.
JOH 8:42 Yanybayi Jisus yalungi, “Jalimi nyulu narringi Buwakanya Kud, baki narrimi maruka muwa ngaki. Marda narrimi maruka muwa ngaki, badajbangangi ngayi kingkarrinya Kudnanyi. Badajba ngayi Kudnanyi nanginkurri. Manjijba ngani Kudwanyi. Miku ngakiya manjijba ngakaman. Manjijba ngani Kudwanyi.
JOH 8:43 Miku narrimi jingkijba ngaki jangkurr, mikungangi narriyi nulijba mankunkanyi ngaki jangkurr. Miku narriyi mirnarrijba muwa ngakinkanyi jangkurranyi.
JOH 8:44 Buwakanya narringi nyulu Sayidin. Narri jandanyimuku nangangi mambukanyi wuwarranyi, Sayidinkanyi. Nulijba narri durriykanyi balkina yuwana Sayidinkanyi. Nyulu kurdanbawarr. Marda barrabarruji marda nanijba nyuli kurdanbawarr. Miku nyuliyala yanyba duja jangkurranyi. Miku nyuliyala manku duja jangkurr. Jujijba nyulili yurrngumba. Miku nyuliyala yanyba duja jangkurr. Ngawamba jujijba nyulili. Nyulu barrinani buwakanya yalungi jala jujijba, karungangi nyulili yingkamuku yalu jujiykanyi yurrngumba.
JOH 8:45 Ngala miku ngayili jujijba. Miku. Yanyba ngayili duja jangkurr. Ngawamba duja jangkurr yurlurr ngayili yanyba. Ngala nanda Sayidin, nyulu narringi buwakanya, baki nanankardi miku narriyi kuyu ngaki jangkurr. Miku narriyi mirnarrijba muwa nanankanyi duja jangkurranyi.
JOH 8:46 Miku narriyi yanyba ngaki, jala ngayu yabimba balki yaji. Miku narriyi yanyba nani ngaki. Miku ngayimi jungku balki. Baki yanybawa ngayu duja jangkurranyi. Miku ngayiyi jujijba. Ngala wanyingkanyi narriyi miku kuyu ngaki jangkurr.
JOH 8:47 Nanamukunyi jandanyiwanyi Kudkanyi, yalu manku nangangi jangkurr Kudkanyi. Ngala miku narriyi nangangi jandanyi Kudkanyi. Miku narrimi manku nangangi jangkurr, mikungangi narrimi badajba Kudnanyi.” Barriwa.
JOH 8:48 Jananganja yali Jumukunyi, “Yanyba nurri duja nganyi. Nganyi yaji langku, niji Samariya. Baki jungkuka wuwarr kalawunyi nganyindu mankanyina. Nani barri nanda jangkurr nurrungi duja. Nanda wuwarr jungkuka nganyindu.”
JOH 8:49 Jananganja yalunyi Jisuswanyi, “Miku ngayimi jungku wuwarryudi. Miku. Jingkijba ngayu ngaki Buwakanya, nyulu walkurra mambuka. Nani ngayu jingkijba nangangi. Ngala narri, miku narringkimi mankumanku ngaki, ngayu walkurra mambuka marda. Miku narringkimi mankumanku nani ngaki. Miku narrimi kuyu ngaki jangkurr.
JOH 8:50 Miku ngayimi nulijba yalungi, yalu barrarrakiykanyi ngana. Ngala yingka nyulu nulijbangka yalungi, yalu barrarrakiykanyi ngana. Nanda yingka, nyulu Kud. Nulijbangka nyulu yalungi nani ngaki, jingkijbangangi nyulu ngaki, ngayu jungkuka kunyba yurrngumba.
JOH 8:51 Narri. Ngayu karungka narrinya duja jangkurranyi. Nanda jala durrijba ngaki jangkurr, miku nangkiyi janyba. Janyulu wanka jungku yurrngumba.” Barriwa.
JOH 8:52 Mili yanyba yali nangangi Jumuku, “Mudu ninji mudu. Jungkuka wuwarr nganyindu mankanyina. Miku nganyi jangkurr duja. Jujijba ninji. Jujijba. Nanda nurrungi walkurra mambuka wankalanyi, nanda Yabrayam janyba nangki. Marda yingkamuku, karu jali yalu jangkurr Kudkanyi, marda yalungki janyba. Ngala yanyba ninji, jaliyi nurru kuyu nganyi jangkurr, baki miku nurrungkiyi janyba mili. Mudu ninji. Mudu.
JOH 8:53 Nanda Yabrayam, marda yingkamuku wankalamuku, bukamba yalungki janyba. Ninji kuna mili walkurra mambuka nangangi Yabrayamkanyi. Miku ninji walkurra mambuka nangangi mili. Ngala wanyi ninji. Wanyi.” Barriwa.
JOH 8:54 Jananganjayi yalunya Jisuswanyi, “Jaliyi ngayu yanyba, ngayu walkurra mambuka bukambijuyngka, baki miku nanda jangkurr kunyba. Ngala yingkawanyi nyulu barrarrakijba ngana ngakinyi Buwakayu. Nyulu yanybaka ngaki, ngayu jungku walkurramirra mambuka bukambijuyngka. Nyulu barrarrakijba ngana. Nganarri karu nangangi, ngakinkanyi Buwakaya, nyulu narringi Kud,
JOH 8:55 ngala miku narrimi jingkijba nanda Kud. Miku narrimi jingkijba ngaki Buwakanya. Miku. Ngala ngayu, jingkijba ngayu nanda Kud, nyulu ngaki Buwakanya. Jaliyi ngayu yanyba, miku ngayimi jingkijba Kud, baki jujamba ngayimi narrinya. Miku ngayiyi jujijba narringi, ngala narri jujijbangka yajinyi. Miku narrimi jingkijba Kud. Ngala ngayu jingkijba Kud, baki kuyu ngayu nangangi jangkurr.
JOH 8:56 Nanda wankalanyi Yabrayam, jungku nyuli wabula kamambarra, baki nyuli mirnarrijba muwa ngaki nanamanji kamambarra. Mirnarrijba nyuli muwa ngaki, jingkijbangangi nyuli yaji ngaki, jangayu badajba nanginkurri baku bayngkani. Ngala nayimanji mili nyuli mirnarrijba muwa ngaki, najbangangi ngani badaykurri nanginkurri.” Barriwa.
JOH 8:57 Mili yanyba yali Jumuku nangangi, “Miku ninjimi yanyba duja jangkurr nurrungi. Miku ninji malbumirra mankanyi. Miku. Ngala jilijbawa ninji malbumirra. Karu ninji nurrunya nanankanyi wankalanyi Yabrayamkanyi, najba ninji nanda malbu. Ngala jujijba ninji. Jujijba. Nangka janybayi wabulawa kamambarra. Miku ninjiyi najba nanda wankalanyi.” Barriwa.
JOH 8:58 Jananganjayi Jisuswanyi, “Karu ngayu narrinya duja jangkurranyi. Miku ngayiyi jujamba narrinya. Jungku ngayi wanka waluwa Yabrayamkanyi, ngala nyuli mikuyaji nangangi. Barriwa.”
JOH 8:59 Jali yalu manku nanda jangkurr Jisuskanyi Jumukunyi, baki ngarrangarra yali muwa nangangi. Wudumba yali dungala janybikanyi nangandurri. Nulijba yali kurdanbikanyi Jisus. Wudumba yali dungala janybikanyi, ngala miku nyuliya jungku nanaba. Ngala ngadijba nangki Jisus. Barlba nyuli yalunbunanyi. Barlbayi jurjnanyi. Barriwa.
JOH 9:1 Baku barri yali jilajba, Jisus marda nanganginmuku kandimuku. Ngala yali jilajba, baki najba yali nganinyi. Nanda nganinyi kabuji yami. Kabuji nyuli yami ngala nyuli bardardanji.
JOH 9:2 Ngajaka yali Jisus, nanganginyi kandimukunyi, “Milidimbawarr. Wanyi jungkuyi balkina yuwana, baki nanda barri kabujingujbayi yami. Nayinda nganinyi kuna, nangangi nijanganjinyi marda yarrijinyi, bula kuna. Wanyi jungkuyi balkina yuwana, baki nanankardi kabujingujbayi yami.”
JOH 9:3 Jananganjayi yalunya Jisuswanyi, “Nayinda nganinyi, miku nyulimi kabuji yami, jungkungangi nyuli balkina yuwana. Baki miku nyulimi kabuji yami, jungkungangi buli balkina yuwana. Miku. Nyulu jungkuka nanijba kabuji, ngala Kudwanyi yuku nyulu yabimba ngiruka yaji nangangi. Baki yingkamukunyi jayalu najba nanda ngiruka yaji, yabimba jalija Kudwanyi.
JOH 9:4 Marda ngambalimi waki kambana Kudkanyi, manjijba jali ngana. Waki yali ngawamba kambana. Miku yalimi waki jala mungijba yaji. Miku yaliyi waki mungana, mikungangi yaliyi najba yaji. Ngayu barrinani mirnbi. Yuku yalu waki, jala mirnbi nanaba, mirnajijba yaji. Ngala ngayu jungku narrindu, baki yuku narri najba yaji, yuku narri waki. Yuku narri waki ngakindu, ngala ngayu jungku narrindu milidimbiji narrinya. Ngayu milidimba narrinya nanankanyi yajinyi jala nyulu nulijba ngambalangi yabimbikanyi. Ngana nyuli manjijba Kudwanyi, wakinki nangangi. Milidimba ngayu nanda jali nyulu karu ngana Kudwanyi. Ngala ngayu jungku narrindu, baki yuku ngambalaja waki, ngambalaja milidimba yalunya. Ngala winyurru miku jangayu jungku nayiba narrindu, ngala barlba jangayu. Jalija ngayu miku jungku nayiba narrindu, baki miku narriyi waki. Miku narriyi waki, mikungangi ngayiyi nayiba karunkanyi narrinya nanankanyi jala nulijba Kud narringi yabimbikanyi yajinyi. Miku yaliyi waki mungana, mikuyajingangi mirnbinyi, baki nani barri miku narriyi waki, jalija ngayu barlba. Ngayu barrinani mirnbi. Minimba ngayu narrinya nanankanyi yajinyi jalija narri yabimba. Nanda barrinani mirnajijba yaji. Jalija ngayu barlba, nanda barrinani mungijba yaji, baki miku narriyi waki. Jungku ngayu barrinani mirnbi bukambijuyngka. Barriwa.”
JOH 9:6 Ngala yanybayi Jisus nani yalungi kandimukuyngka, baki janyba nyuli jabula wayka jambarri. Baki ngirrikimbayi nanda jabula nangangi. Yabimba nyuli janja. Yarrijba nyuli janja nganinyina yamina jali nyulu kabuji. Nanda kabuji janjayudi yami.
JOH 9:7 Baki karu nyuli nanda kabuji Jisuswanyi, “Barlbakiyi wayka rirrkiyurri, niji Saluyam, baki wakardaba nganyingkiyi yami wabudana. Wakardaba nganyingkiyi yami rirrkina.” Nanda niji Saluyam, Ju yanyi, barrinani, “Manjijbayi.” Barlbayi nanda kabuji rirrkiyurri. Wakardaba nangki yami, baki yuku nyuli najba yaji. Najba nyuli yaji, baki wijbayi nanganginkurri barndarri. Barriwa.
JOH 9:8 Wabula nanda nganinyi jungkukili wilina yubalina, baki yililikajba nyuli yingkamuku jalili yalu jilajba nanganbiyangka. Yililikajba nyuli yalunya dungalanyi, mikungangi nyulili waki dungalanyi, kabujingangi nangangi yami. Barriwa. Yingkamuku jalili jungku bundu nanganginyina barndana, baki yingkamuku jali wabula najba nanda nganinyi yililikaykurri dungalanyi, yanyba yalungki, “Nayinda nganinyi, nyulu nanda jalili jungku wilina yubalina, jalili yililikajba ngambalanya dungalanyi. Nyulu nanda.”
JOH 9:9 Yingkamuku yali yanyba, “Yi. Nyulu barri nanda kabuji. Nyulu nanda barri jalili jungku kabuji.” Ngala yingkamuku yali yanyba, “Miku nyulu nanda kabuji. Nyulu yingka, ngala nyulu barrinani nanda kabuji.” Baki nyuli manku nanda jangkurr yalungi nanangini nganinyiwanyi. Karu nyuli yalunya, “Ngayu nayinda kabuji, jali ngayu jungku waluwa kabuji yami, ngala nanijba kunybijba ngaki yami. Yuku ngayu najba yaji.”
JOH 9:10 Ngajaka yali nanda nganinyi, “Wabula ninji jungku kabuji, ngala nanijba yuku ninji najba yaji. Ngala yanka ninji najba yaji nanijba. Yanka.”
JOH 9:11 Jananganja nyuli yalunya, “Nanangini nganinyiwanyi niji Jisus, nyuli yabimba janja. Baki nyuli yarrijba nanda janja ngakindu yamina. Ngana nyuli jirrinyba, ‘Jilajbakiyi rirrkiyurri, niji Saluyam, baki wakardaba nganyingkiyi yami.’ Nani nyuli jirrinyba ngana. Jilajba ngayi rirrkiyurri, wakardaba ngaki yami, baki yuku ngaki yami. Yuku ngayu najba yaji.”
JOH 9:12 Ngajaka yali nanda nganinyi, “Wanjawa nanda Jisus. Wanjawa nanda jali ninyi kunymamba yami.” Jananganjayi nganinyiwanyi, “Junu barri nanda. Miku ngayiyi jingkijba nanda yaji nangangi.”
JOH 9:13 Baki yali kuyu nanda nganinyi yalundurri Barasimukuyngkurri.
JOH 9:14 Najba yali nanda nganinyi, kabuji yami Sadidi.
JOH 9:15 Marda nanamukunyi Barasimukunyi, marda yali ngajaka nanda nganinyi nanganginkanyi yaminyi. “Yanka ninji najba yaji. Yanka.” Karu nyuli yalunya, “Yarrijba nyuli janja ngakindu yamina. Baki wakardaba ngaki yami wabudana, baki yuku ngayi najba yaji.”
JOH 9:16 Yingkamuku Barasimuku, yanyba yali, “Nyuli kunymamba nganyi yami Sadidi. Nanda balki. Yanybaka nanda yuwa Musiskanyi, miku nyuliyi waki Sadidi. Miku nyulimi jungku kunybana yuwana, jaliyi nyulu waki Sadidi. Mikukiyanyi Kudwanyi manjijba nanda nganinyi Jisus. Miku nyulimi jungku kunybana yuwana.” Barriwa. Ngala yingkamuku Barasimuku yali yanyba nayi, “Yanka barri nyuli barimba yuwa jala nyuli yabimba ngiruka yaji Sadidi. Miku nyuliya jungku balkina yuwana, jali nyulu kunymamba nayinda nganinyi yami Sadidi. Jaliyi jungku nganinyi balkina yuwana, baki miku nyuliyi yabimba ngiruka yaji nani. Miku nyuliyi kunymamba kabuji yami.” Barriwa. Nani yalungki jakakajba. Yingkamuku yali yanyba Jisuskanyi, nyuli jungku balkina yuwana, ngala yingkamuku yali yanyba Jisuskanyi, nyuli jungku kunybana yuwana. Jakakajba yalungi nanganginbunanyi.
JOH 9:17 Baki mili yali ngajaka nanda nganinyi jali kunymamba Jisuswanyi, “Yanyba ninji, miku ninjiyanyi najba yaji wabula, baki kunymamba nyuli nganyi yami, nanangini nganinyiwanyi. Baki wanyi ninji yanyba nangangi. Wanyi nyulu.” Jananganja nyuli yalunya, “Nanda nganinyi manjijbayi Kudwanyi. Nyulu nanda jali manjijba Kudwanyi.”
JOH 9:18 Ngala miku yaliyala kuyu nangangi jangkurr. Baki miku yaliyanyi kuyu nangangi jangkurr, jali nangka yanyba, wabula nyulili jungku kabuji. Baki yali manjijba yingka wudumbiji nangangi nijanganjinyi marda ngardanganja. Badajba buli yalundurri Barasimukuyngkurri.
JOH 9:19 Ngajaka yali bulanya, “Nayinda nganinyi, nyulu nimbalangi jandanyi kuna, jali jungku yurrngumba kabuji, ngala nyuli bardardanji. Ngala yanka nyuli yuku najba yaji nanijba. Yanka barri.”
JOH 9:20 Jananganja buli yalunya, “Nyulu ngalingi jandanyi. Jali nyulu bardarda, baki jungkuyi kabuji yami. Miku nyuliya najba yaji.
JOH 9:21 Ngala miku ngaliyi jingkijba nanijba, yanka nyuli najba yaji. Miku ngalimi jingkijba. Baki miku ngalimi jingkijba nanda jali kuynmamba nangangi yami. Marda narrimi ngajaka nanda. Nyulu walkurra nganinyi. Miku nyulu juka. Yuku nyulu karu narrinya.” Barriwa.
JOH 9:22 Yanyba buli nani, marralangangi buli yalungi mambukamukuyngka Jumukuyngka. Nanamuku mambukamuku, yanyba yali nayi, “Nayinda nganinyi Jisus, miku nyulu Krayis. Miku nyulu nanda jali manjijba Kudwanyi. Nanda jala yanyba, nyulu Krayis, baki janurru manjijba nanda jurjnanyi. Miku nyuliyi mili ngankijba kalawunyi jurjina. Mikujiyi narri kuyu nangangi jangkurr.” Nijanganjinyi marda yarrijinyi nanankanyi kabujinyi, buli marrala yalungi mambukamukuyngka, yanybangangi yali nani. Baki nanankardi buli yanyba, “Marda narrimi ngajaka ngalingi jandanyi. Nyulu walkurra nganinyi. Miku nyuliya juka jungku.” Marrala buli yalungi.
JOH 9:24 Mili yali manjijba yingka wudumbiji nanda kabuji nganinyi. Jala nyuli wanbiya yalundu, yali yanyba nangangi, “Marda ninjimi maruka muwa Kudkanyi. Marda ninjimi wajba Kud kunybanyi jangkurranyi, najbangangi ninji yaji nanijba. Jingkijba nurru nanda Jisus, nyulu jungkuka balkina yuwana. Miku nyulimi jungku kunybana yuwana. Marda ninjimi maruka muwa nangangi Kudkanyi.” Barriwa.
JOH 9:25 Jananganja nyuli yalunya, “Miku ngayimi jingkijba yaji. Yiningki nanda Jisus, nyulu jungkuka balkina yajina, yiningki nyulu jungkuka kunybana yajina. Miku ngayimi jingkijba. Ngala nayi ngayu jingkijba, wabula ngayi jungku kabuji yami, ngala nanijba, yuku ngayu najba yaji.” Barriwa.
JOH 9:26 Ngajaka yali nanda nganinyi, “Wanyimba nyuli nganyi. Wanyimba. Ngala yanka ninji najba yaji nanijba.”
JOH 9:27 Jananganja nyuli, “Barrin ngayi karu narrinya. Karu ngayi barrin, ngala miku narriyala manku ngaki jangkurr. Wanyingkanyi narri nulijba mankunkanyi mili ngaki jangkurr. Nulijba narri kuna nangangi. Marda janarri kuna jungku nangangi kandimuku nanijba.” Barriwa.
JOH 9:28 Kijiwijba yali nangangi kudanyu. Yanyba yali balki jangkurr nangangi. Yanyba yali “Ninjija jungku kandi nangangi Jisuskanyi, ngala nurruja jungku kandimuku nangangi wankalanyi Musiskanyi. Miku nurru kandimuku nangangi Jisuskanyi.
JOH 9:29 Jingkijba nurru Musis. Yanybayi Kud nangangi Musiskanyi, ngala nanda yingka, miku nurrimi jingkijba nangangi yaji.” Barriwa.
JOH 9:30 Jananganjayi nganinyiwanyi, “Manmala ngayu kudanyu barri. Miku narrimi jingkijba nangangi yaji, ngala nyuli kunymamba ngaki yami, baki yuku ngayu najba yaji. Manmala ngayu kudanyu barri.
JOH 9:31 Jingkijba ngambala Kud, miku nyulimi manku jangkurr yalungi jalili yalu jungku balkina yuwana. Miku nyulimi manku yalungi jangkurr. Ngala nyulu mankuka nanda jangkurr yalungi, jalija yalu ngayangayijba nangangi. Nyulu mankuka yalungi jangkurr jalija yalu yabimba nanda jala nyulu nulijba yalungi yabimbikanyi nanda. Mankuka nyulu jangkurr yalungi jala ngayangayijba nangangi, jala yabimba nangangi yaji.
JOH 9:32 Miku ngambaliya manku jangkurr nanankanyi kabujinyi yaminyi, ngala nyuli kabuji bardardanji. Miku ngambaliya manku jangkurr kunymambikanyi yami nanda kabuji. Miku yaliya karu wankalanyi jangkurranyi, marda nanijba nani kunymambikanyi yami.
JOH 9:33 Nanda nganinyi jali kunymamba ngaki yami, jaliyi nyulu badajba Kudnanyi, baki yuku nyulu yabimba ngiruka yaji nani. Ngala jaliyi nyulu miku badajba Kudnanyi, baki miku nyuliyi kunymamba yami.” Nani barri yanybayi nanda nganinyi kabuji.
JOH 9:34 Baki kijiwijba yali nangangi, “Barriwakiyi barlba. Barriwa ninji nurrunbunanyi, balkingangi ninji jungku. Jungku ninji balki bardardanji yurrngumba. Barriwakiyi barlba nurrunbunanyi. Miku ninjiyi milidimba nurrunya. Jungku ninji balkina yajina. Miku ninjiyi milidimba nurrunya.” Baki yali manjijba nanda nganinyi yalunbunanyi, walkurrananyi jurjnanyi. Barriwa.
JOH 9:35 Karu yali Jisus yingkamukunyi, “Nanamukunyi Barasimukunyi, yali manjijba nanda nganinyi jali ninji kunymamba yami. Manjijba yali jurjnanyi.” Baki wankawankijbayi Jisus nangangi. Jala nyuli wakaramba, yanybayi Jisus nangangi, “Kuyu kuna ninji nanda jangkurr nangangi Buwaya Bukambijuyngka. Kuyu kuna ninji nangangi jangkurr.”
JOH 9:36 Jananganjayi Jisus nganinyiwanyi, “Mambuka. Nanda nganinyi Buwanya Bukambijuyngka, wanyi nyulu. Karu janganinji nangangi, baki jangayu ngayangayijba nangangi, jangayu kuyu nangangi jangkurr.” Barriwa.
JOH 9:37 Yanybayi Jisus nangangi, “Barrin ninji najba nanda Buwanya Bukambijuyngka. Nyulu nanda jala yanybaka nganyi nanijba. Ngayu Buwanya Bukambijuyngka.” Barriwa.
JOH 9:38 Yanybayi nganinyi Jisuskanyi, “Mambuka. Kuyu ngayu nganyi jangkurr. Nanijba ninga jingkijba, ninji Buwanya Bukambijuyngka.” Baki maruka nyuli muwa nangangi Jisuskanyi. Yanyba nyuli mududu nangangi marda.
JOH 9:39 Yanybayi Jisus nangangi, “Badajba ngayi karunkanyi yalunya nganinymuku baki jibarrimuku. Jingkijba jangayu yalunya, yingkamuku yali jungku kunyba Kudkanyi, yingkamuku yali jungku balki Kudkanyi. Baki nanamuku jala yalu jungku kabuji, jayalu najba yaji, ngala nanamuku jala yalu najba yaji, jayalu jungku barrinani kabuji.”
JOH 9:40 Kudiyamuku Barasimuku, yali karrinja bundu nangandu. Manku yali nanda jangkurr nangangi, baki ngajaka yali, “Jungku kuna nurru barrinani kabuji yami.”
JOH 9:41 Jananganjayi yalunya Jisuswanyi, “Nanangini kabujiwanyi, miku nyuliyi najba yaji. Ngala nyulu miku naykanyi yaji, baki miku nyulimi jingkijba yaji. Baki miku nyulimi jungku balki, mikungangi nyuliyi jingkijba yaji. Nani nanda kabuji, miku nyuliyi jungku balkina yuwana, mikungangi nyuliyi jingkijba yaji. Jaliyi narri jungku barrinani kabuji, baki miku narriyi jungku balkina yajina, mikungangi narriyi jingkijba yaji. Ngala miku narrimi kuyu ngaki jangkurr. Miku narriyi jingkijba nanda jala ngayi karu narrinya. Ngala miku narrimi jungku barrinani nanda kabuji, yanybangangi narri, narri jingkijba bukamba yaji. Ngala miku narrimi kuyu ngaki jangkurr. Yanyba narri, narri jingkijba bukamba yaji, ngala miku narrimi jingkijba ngaki jangkurr. Miku narrimi kuyu ngaki jangkurr. Jungku narri balkina yajina, yanybangangi narri, narri jingkijba yaji, ngala miku narrimi kuyu ngaki jangkurr. Balkina yajina narri jungku yurrngumba, yurlwangangi narri ngakinkanyi jangkurranyi.” Barriwa. Nani jananganjayi yalunya Jisuswanyi.
JOH 10:1 Baku barri mili yanybayi Jisus yalungi. Muningka nyuli karu yalunya nanginkanyi jangkurranyi, “Mankukiyi nayinda duja jangkurr. Mankumanku narringka jibkanyi. Nanangini lalanbawarranyi jibkanyi mungana nyulu yarrijba nangangi jibmuku. Yarrijba nyulu jibmuku kalawunyi barrikina mungana. Baki nanda maninjaku, miku nyulimi ngankijba kalawuyngkurru bardawana. Miku. Ngankijba nyulu kalawuyngkurru yingkana yajina bayngkani. Yiningki nyulu lukulukumba langkiya wilina barrikina, baki ngankijba kalawuyngkurru barrikina maninjakuykanyi jib.
JOH 10:2 Ngala nanda jala ngankijba nanaba bardawana, nyulu nanda lalanbawarr jibkanyi.
JOH 10:3 Yingka jala jungku barrikina, nyulu lalanbawarr bardawanyi. Jala badajba nanda lalanbawarr jibkanyi, baki nanangini lalanbawarranyi bardawanyi dulaba nyulu bardawa, baki ngankijbangka nanda lalanbawarr jibkanyi kalawuyngkurru barrikina. Ngala jala badajba maninjaku, baki miku nyuliyi dulaba nanda bardawa nangangi maninjakunyi. Miku. Yiningki lukulukumba langkiya wilina barrikina. Nanamukunyi jibwanyi jingkijba yalu nanda yalungi lalanbawarr. Manku yalu nangangi jangkurr, baki jingkijba yalu nangangi jangkurr. Nijarrijba nyulu yalungi niji, ngala nyulu kaya yalungi. Jala yalu manku nangangi jangkurr baki walajba yalu, baki yalilijba nyulu yalunya.
JOH 10:4 Dulaba nyulu yalunya, nanamuku nanganginmuku jibmuku, baki nyulu jilajba waluwalu, ngala yalu nanganginmuku jibmuku bayngkani nangandu. Durrijba yalu nanda lalanbawarr yalungi. Durrijba yalu nanda, jingkijbangangi yalu nanda nangangi jangkurr.
JOH 10:5 Ngala miku yalimi durrijba ngurranyimuku. Miku. Wirlkungka yalu nanganbunanyi ngurranyinanyi, mikungangi yalimi jingkijba nangangi jangkurr. Wirlku yalu nanganbunanyi.” Barriwa.
JOH 10:6 Muningka karuyi yalunya nani Jisuswanyi, milidimbikanyi yalunya, ngala miku yaliya jingkijba nangangi jangkurr jibkanyi. Miku yaliya jingkijba.
JOH 10:7 Mili yanybayi Jisus yalungi, “Karu ngayu narrinya duja jangkurranyi. Ngala nyulu bijal mungijba yaji, baki nanangini lalanbawarranyi, nyulu yarrijbangka nanganginmuku jibmuku kalawuyngkurru barrikina. Yarrijbangka nyulu yalunya kalawuyngkurru barrikina, baki murumbaka nyulu bardawa yalungi. Jala murumba nanda bardawa, baki nanamuku jibmuku mardarda yalu jungku kalawuyngkurru mungana. Mikuwali yingka ngankijba kalawuyngkurru jibyurri, jala nyulu murumbaka nanda bardawa. Mikuwali warrki ngankijba kalawunyi bardawana, marda maninjaku, miku nyuliyi ngankijba kalawunyi bardawana. Ngayu barrinani nanda bardawa. Kurrkunbaka jibmuku kalawunyi nanangini bardawawanyi, baki yalu jungku mardarda. Nganinymuku baki jibarrimuku jala yalu durrijba Kud, yalu barrinani jibmuku. Ngankijba yalu bardawana jala yalu jilajba Kudyurri. Ngayu barrinani nanda bardawa. Ngayu manjijba yalunya Kudyurri, baki yalu jungku mardarda nangandu. Barriwa. Munganawa ngala nyulu kambalingijba yaji, baki walajbangka jibmuku nanankardi barri bardawananyi. Walajba yalu, baki durrijba yalu nanda lalanbawarr yalungi. Durrijba yalu lalanbawarr, baki nyulu kuyungka yalunya karnbarri baki wabudarri. Baki mili yalu wijba ngabungaburri. Ngankijba yalu bardawana, baki jungku yalu muwana kalawunyi barrikina mungana. Jungku yalu mardarda. Miku yalunyiyi wudumba yingkawanyi. Ngayu barrinani nanda bardawa. Ngayu lalanba yalunya nganinymuku baki jibarrimuku Kudkanyi. Lalanba ngayu yalunya yurrngumba, kambana baki mungana, ngala yalu walajba, baki ngala yalu ngankijba. Barriwa. Kudiya nganinymuku, badajba yalu waluwa ngaki. Badajba yali baki milidimba yalunjali. Muningka yali yanyba, ‘Ngayu Krayis. Ngayu nanda jali manjijba Kudwanyi.’ Ngala miku. Jujijba yali. Miku yaliya Krayis. Yalu barrinani maninjaku jibkanyi. Mikukiyanyi jibwanyi durrijba maninjaku, mikungangi yaliya jingkijba nangangi jangkurr. Nanda jali badajba waluwa ngaki, jali yanyba ngayu Krayis, miku yaliyanyi yingkamukunyi kuyu nangangi jangkurr. Miku yaliya durrijba nanda, mikungangi nyuli Krayis.
JOH 10:10 Ngala nanda maninjaku, jilajba nyuli mungana yalundurri jibyurri. Binanyba nyuli yalunya baki kurdanbiji yalunya. Daba jayalunya. Ngala ngayu miku ngayu barrinani nanda maninjaku. Miku ngayiyanyi jilajba nayinda nanginkurri daji yalunya. Jilajba ngayi, marrimbiji yalunya mardarda, lalanbiji yalunya nganinymuku jibarrimuku. Miku ngayiyanyi jilajba kurdanbiji yalunya, ngala ngayi jilajba wankambiji yalunya, maruka jala muwa nangangi Kudkanyi. Jayalu jungku wanka yurrngumba nangandu Kudnyina, baki janyulu yabimba kunyba yaji yalungi Kudwanyi.”
JOH 10:11 Mili yanybayi Jisus yalungi, “Ngayu barrinani nanda lalanbawarr jibkanyi. Nanangini lalanbawarranyi, nyulu yabimbaka kunyba yaji yalungi nanganginmukuyngka jibkanyi. Kurrkunbaka nyulu maninjakunyi wudumbikanyi jib. Marda warrkinyi nyulu kurrkunbaka kurdanbikanyi jib. Mankumanku nangka lalanbawarr, “Nanangini warrkiwanyi miku nyuliyi wudumba ngakinmuku jibmuku. Miku nyuliyi kurdanba yalunya. Jangayu kurrkunba nanankanyi warrkinyi. Waluku jangana nyulu kurdanba, waluwa nyuli wakaramba jib.” Nani nyulu lalanbaka nanganginmuku jibmuku. Nanamuku jibmuku yalu nanganginmirra jibmuku. Nyulu lalanbaka yalunya kudanyu barri.
JOH 10:12 Yiningki nanda mambuka jibkanyi, yiningki nyulu karu yingka lalanbiji nanganginmuku jibmuku. Wajbayi nanda yingka dungalanyi, janyulu lalanba nanda jibmuku nangangi. Jala walajbangka warrki jibkanyi, baki marrala nanda yingka, baki wirlku nyulu. Wirlku nyulu, marralangangi nyulu warrkinyi. Baki bijbawali warrkiwanyi, kurdanbawali. Wirlku nyulu nanamunanyi jibnanyi. Miku janyulu lalanba yalunya kudanyu, mikungangi yalu nanganginmirra jibmuku. Wirlku nyulu, baki kurdanbaka jib warrkiwanyi, baki jarrbalambaka yalunya junu.
JOH 10:14 Ngayu barrinani nanda kunyba lalanbawarr. Ngayu lalanba yalunya, maruka jala muwa nangangi Kudkanyi. Miku ngayiyi wirlku yalunbunanyi. Ngakinyi Buwakayu, ngana nyuli jingkijba, baki ngayu jingkijba ngaki Buwakanya. Nani barri ngayu jingkijba ngakinmuku, baki ngana yalu jingkijba. Jangaka janyba yalungi, maruka jala yalu muwa Kudkanyi. Jangaka janyba, baki nani jangayu marrimba yalunya barri mardarda.
JOH 10:16 Ngala yingkamuku yalu ngaki marda. Jilijba jayalu jungku nayiba mardarda ngakindu. Marda ngayimi wudumba yalunya. Jangayu marrimba yalunya nangangi Kudkanyi, barrinani jayalu mardarda jungku kalawunyi barrikina. Jayalu jingkijba ngaki jangkurr. Janganjalu durrijba. Jayalu jungku barrinani jibmuku ngaki, baki jangayu lalanba yalunya bukambiju. Nani barri jangayu marrimba kudukudu nganinymuku baki jibarrimuku nangangi Kudkanyi. Jayalu jungku Kudkanyi baki jangayu lalanba yalunya.
JOH 10:17 Ngaki Buwakanya nyulu marukangka muwa ngaki. Marukangka nyulu muwa ngaki, jilajbangangi ngayi kingkarrinya wayka jambarri. Wajba jangaka ngakinkanyi mankankanyi janybikanyi ngaka. Janyba jangaka, ngala miku jangayu jungku kurdan yurrngumba. Miku. Jangayu walajba mili. Baki mili jangayu wankijba. Jangayu jungku nangandu ngakinyina Buwakayu.
JOH 10:18 Miku jangaka janyba, kurdanbangangi janganjalu yingkamukunyi. Jangaka janyba, wajbangangi jangaka mankankanyi yalungi, kurdanbikanyi nganjalu. Narri jala jungku nayiba wayka jambana, miku nganarriyanyi karu jilaykanyi nanginkurri, baki baku barri jangaka janyba. Miku nganarriyanyi karu nani. Ngayuman ngaka yanyba. Mikuwali narri jungku mambuka ngaki. Ngayuman mambuka ngaki. Ngakinyi Buwakayu ngana jirrinybayi yabimbikanyi yaji.” Barriwa. Nani barri yanybayi Jisus.
JOH 10:19 Jali yalu manku nanda jangkurr nangangi Jisuskanyi, jakakajba yalungki Jumuku nanganginbunanyi.
JOH 10:20 Yingkamuku yali yanyba, “Mudu nyulu mudu, wuwarrngangi jungkuka nangandu kalawunyi mankanyina. Nyulu mudu. Wanyingkanyi narri nangangi manku jangkurr. Wanyingkanyi. Mudu nyulu mudu.”
JOH 10:21 Ngala yingkamuku yali yanyba, “Miku nyulu mudu. Mikukimi jungku wuwarr nangandu kalawunyi mankanyina. Mikuwali wuwarr yanyba nanda jangkurr jala nyuli yanyba. Mikuwali wuwarrwanyi kunymamba kabuji, baki yuku nyulu najba yaji. Miku nyulu mudu.” Barriwa.
JOH 10:22 Nanamanji wurarawala, baki yali jilajba nanankurri Jirusalimyurri. Jilajba yali walkurrayngkurri jurjyurri wangarranyi, niji Didikajin.
JOH 10:23 Mardungujbayi yaji nanamanji wurarawala. Jilalajbangka Jisus walkurranyina jurjina. Jilalajbangka nyulu nananyina yajina niji “Sulumun nangangi Ngarndu.”
JOH 10:24 Baki kudiya Jumuku jilajba yali nangandurri. Karrinja yali lukuluku nangandu, baki yanyba yali nangangi, “Karukiyi nurrunya duja. Ninji kuna nayinda Krayis. Kurdadikiyi nurrunya yingijba, nurrungkaja mankumanku. Jaliyi ninji nayinda Krayis jali manjijba Kudwanyi, baki karu janinji nurrunya duja.” Barriwa.
JOH 10:25 Jananganjayi Jisuswanyi, “Wabula ngayi karu narrinya nanda jangkurr, ngajaka jali nganarri. Karu ngayi narrinya wabula, ngala miku narriyanyi kuyu ngaki jangkurr. Waki ngayu ngakinkanyi Buwakaya. Ngana nyuli jirrinyba, ngayu yabimbiji nayinda kaja ngiruka yaji. Baki nganarri najbayi jali ngayu yabimba nayinda ngiruka yaji. Marda miku nganarriya ngajaka nanankanyi jangkurranyi, ngayu kuna Krayis. Jali narri najba nayinda ngiruka yaji ngaki, baki marda nganarrimi jingkijba. Nanangi ngirukawanyi yajiwanyi karuyi narrinya ngaki.
JOH 10:26 Ngala miku narrimi kuyu ngaki jangkurr, mikungangi narri barrinani ngakinmuku jibmuku. Nanangini lalanbawarranyi nyulu jingkijba yalunya nanganginmuku jibmuku, baki nanamuku jibmuku yalu jingkijba nanda jangkurr nangangi. Nani ngayu jingkijba yalunya, ngayu lalanba yalunya, kuyu jala yalu ngaki jangkurr. Ngala miku narrimi kuyu ngaki jangkurr. Nani miku narrimi barrinani ngakinmuku jibmuku, mikungangi narrimi kuyu ngaki jangkurr. Ngakinmukunyi, ngana yalu durrijba, ngala miku nganarrimi durrijba. Miku.
JOH 10:28 Jangayu mili wankamba yalunya bayngkani jalija yalungka janyba. Miku jayalungka mili janyba. Mili jayalu jungku wanka yurrngumba nangandu, ngakinyina Buwakaya. Mikuwali yingkawanyi dulaba yalunya ngakinbunanyi, lalanbangangi ngayu yalunya. Mikuwali yingkawanyi dulaba yalunya.
JOH 10:29 Ngakinyi Buwakayu, ngana nyuli yarrijba yalungi lalanbikanyi. Nyulu walkurra mambuka ngiruka bukambijuyngka, baki mikuwali yingkawanyi dulaba yalunya nanganbunanyi jala yalu jungku kunyba nangandu Buwakayu. Mikuwali yalunya yingkawanyi dulaba jala yalu durrijba Kud.
JOH 10:30 Ngaki Buwakanya marda ngayu, jungku ngali malumba. Ngayu barrinani nyulu, baki nanamannga nyulu barrinani ngayu. Malumba ngali jungku barrinani yingamali mambuka. Barriwa.” Nani yanybayi Jisus yalungi.
JOH 10:31 Ngala nanamukunyi Jumukunyi, miku yaliya kuyu nanda jangkurr nangangi Jisuskanyi. Ngamu yanybayi balki jangkurr nangangi Kudkanyi. Wudumba yali dungala janybiji nangandurri. Kurdanba yaliyanyi nanda Jisus, ngamungangi nyuli yanyba balki jangkurr Kudkanyi.
JOH 10:32 Baki yanybayi Jisus yalungi, “Yabimba ngayi kaja kunyba yaji ngiruka. Ngana nyuli jirrinyba yabimbiji yaji Buwakayu. Nulijba narri janybikanyi dungala ngakindurri, kurdanbikanyi ngana, yabimbangangi ngayi ngiruka yaji, ngala wanyi nayi ngiruka yaji. Janganarri daba, wanyingangi nayi ngiruka yaji jali ngayu yabimba.” Nani barri ngajakayi yalunya Jisuswanyi.
JOH 10:33 Jananganja yali Jisus, “Miku nurrimi nulijba janybikanyi dungala nganyindurri, yabimbangangi ninji kunyba yaji. Miku. Ngala nulijba nurru janybikanyi dungala nganyindurri, yanybangangi ninji balki jangkurr Kudkanyi. Yanyba ninji balki jangkurr, baki nanankardi janinya nurru daba. Ninji nganinyi, ngala yanyba nganyingki, ninji barrinani Kud. Nanankardi nurrimi janyba dungala nganyindurri, yanybangangi nganyingki, ninji barrinani Kud. Nanda balkimirra jangkurr. Barriwa.”
JOH 10:34 Jananganjayi yalunya Jisuswanyi, “Nanangini wankalawanyi, yarrijba nyuli jangkurr najana Kudkanyi. Nayinda jangkurr Kudkanyi nyuli yarrijba, ‘Ngayi yarrijba narrinya, narri walkurra mambuka. Barrinani Kud narri jungku. Narri yabimba nanda jala nyulu karu narrinya Kudwanyi. Nani narri barrinani Kud.’
JOH 10:35 Nanda jangkurr najana Kudkanyi, nanda duja jangkurr yurrngumba, miku nangkiya yangkalamba. Nanda jali yarrijba jangkurr Kudkanyi, nyuli nijarrijba yalunya barrinani kudmuku. Nani nyuli nijarrijba yalunya, yalu barrinani kudmuku.
JOH 10:36 Ngala ngayu, yarrijba ngana Buwakayu, baki ngana nyuli manjijba wayka jambarri. Nyuli nijarrijba yalunya wankalamuku Kudwanyi, yalu barrinani kudmuku, ngala wanyingkanyi narri yanyba ngaki. Wanyingkanyi narri yanyba ngaki, ngayu jala yanyba balki jangkurr. Yanyba ngaka, ngayu Jandanyi Kudkanyi. Wanyingkanyi narri yanyba ngaki, nanda ngaki jangkurr balkimirra. Wanyingkanyi narri yanyba nani ngaki.
JOH 10:37 Jalimi miku ngayu yabimba ngiruka yaji nangangi, ngakinkanyi Buwakaya, baki marda narrimi miku kuyu ngaki jangkurr. Ngala ngayu yabimba ngiruka yaji nangangi ngakinkanyi Buwakaya.
JOH 10:38 Ngala jaliyi narri miku kuyu ngaki jangkurr, baki marda narrimi manku nanda ngiruka yaji jali ngayu yabimba narringi. Marda narrimi kuyu ngaki ngiruka yaji. Marda nganarrimi jingkijba, ngayu waki Kudkanyi, nyuli ngana manjijba wakinkanyi nangangi. Jaliyi narri jingkijba nyuli manjijba ngana Kudwanyi wakinkanyi nangangi, baki marda nganarrimi jingkijba, ngayu jungkuka nangandu ngakinyina Buwakayu, baki ngaki Buwakanya, nyulu jungkuka ngakindu. Malumba ngali jungku yurrngumba.” Barriwa.
JOH 10:39 Ngala yuwaji barri miku yaliya kuyu nangangi jangkurr. Baki wudumba yaliyanyi Jisus. Wudumba yaliyanyi kurdanbikanyi. Ngala miku yaliyi wudumba Jisus nanamanji. Barlba nyuli, baki miku yaliyi wudumba.
JOH 10:40 Barlba nyuli karri. Baki burrijba nyuli bundalina, niji Jurdan. Barlba nyuli karrurriji nanankurri yajiyurri jalili nyulu ngurrunba yalunya, nanangini Junwanyi Ngurrunbawarranyi. Nanaba nyulili ngurrunba yalunya wabula. Jilajbayi Jisus nanankurri yajiyurri.
JOH 10:41 Baki kajamuku badajba yali nanankurri nangandurri. Badajba yali nangandurri, baki yanyba yalungki, “Nanda Jun Ngurrunbawarr, jungku nyulili nayiba wabula. Miku nyuliyanyi yabimba ngiruka yaji. Miku. Ngala yanyba nyulili kunyba jangkurr nanginkanyi nganiyngkanyi, jali badajba bayngkani nangandu. Wabula nyuli yanyba kunyba jangkurr nangangi. Bukamba nanda jangkurr yanyba jali nyulu nanda ngurrunbawarr, bukamba nanda jangkurr nangangi duja.” Nani barri yalungki yanyba nangangi Jisuskanyi.
JOH 10:42 Marda kudukudu jali yalu jila nangandurri Jisusyurri, kuyu yali jangkurr nangangi. Barriwa.
JOH 11:1 Yingka nganinyi, niji nangangi Lasaris, jungku nyulili nananyina yajina bayangarrinybana. Yaji niji nanda Bidani. Lunji nyuli kudanyu. Jungku nyulili nanaba, marda kanyiyawuya nangangi jibarriwuya. Nanaba bulili jungku nangandu. Niji bulangi, Mari marda Marda.
JOH 11:2 Nanangini Mariwanyi, baku nyuli bindaba nanda yaji barrinani kunyba jirrki, niji nard. Baku nyuli bindaba nanda yaji nangandu nukamina Jisusnyina. Baki nambayi Jisus nukami jibarriwanyi nanganginjudinyi nyungkayudinyi. Waluwa lunjiyi buwanganja nangangi, ngala bayngkani bindabayi yaji nukamina Jisusnyina nanangini jibarriwanyi Mariwanyi.
JOH 11:3 Nanamanji jungkuyi Jisus yingkana yajina karru juju. Baki nanankujarranyi majukulanyi, manjijba buli yingka karrurriji. Manjijba buli yingka nangandurri Jisusyurri karrurri. Jilajbayi nanda yingka nangandurri, baki karuyi Jisus bulanginkanyi jangkurranyi, “Mambuka. Mirnarrijba ninji muwa bulanginkanyi buwaya, ngala nyulu lunjika nanda Lasaris. Lunjika nyulu kudanyu nanaba bayangarri.”
JOH 11:4 Jali nyulu manku nanda jangkurr, baki yanybayi Jisus nanganginmukuyngka kandimukuyngka, “Nanda Lasaris, lunjika nyulu kudanyu, baki janangka janyba. Ngala miku janyulu jungku kurdan yurrngumba. Ngala yingkamukunyi, jayalu jingkijba Kud. Jayalu jingkijba Kud, nyuluja ngiruka kudanyu, nyuluja walkurra mambuka. Yuku nyuluja yabimba bukamba yaji. Bukambijunyi jayalu jingkijba nani Kudkanyi, janybangangi nangkaja nanda Lasaris.” Nani barri yanybayi Jisus yalungi, nanganginmukuyngka kandimukuyngka.
JOH 11:5 Marukayi Jisus muwa yalungi, Lasariskanyi, marda nanankujarrayngka majukulayngka. Maruka nyuli muwa yalungi.
JOH 11:6 Jali yingkawanyi karu Jisus Lasariskanyi, jali nyulu lunji, yuwajiwa jungkuyi Jisus nayiba. Mili nyuli jungku nayiba kujarraka kambana.
JOH 11:7 Baki yanybayi Jisus yalungi nanganginkanyi kandimukuyngka, “Barriwa jangambala wijba bayangarri. Jangambala wijba Judiyayurri.”
JOH 11:8 Ngala nanganginmuku kandimuku marrala yali. Marrala yali baki yanyba yali Jisuskanyi, “Milidimbawarr, wujini yaliyanyi janyba dungala nganyindurri, kurdanbiji ninga. Jingkijba ninji, ninyaliya kurdanba, ngala yuwaji janinji wijba bayangarriji.”
JOH 11:9 Yanybayi Jisus yalungi, “Nanangini kambawanyi, mirnmirnbaka yaji juju kambana, baki yuku ngambala jilalajba kambana. Miku ngambaliyi damalijba nayinda kambana, najbangangi ngambala yaji juju. Ngala jaliyi ngambala jilalajba mungana, baki damalijba ngambaliyi, mikungangi ngambaliyi najba yaji mungana. Mungijbangka yaji ngambalangi. Miku ngambaliyi waki Kudkanyi jala mungijba yaji. Jala ngayu jungku nayiba jambana, nanda barrinani kambana. Yuku ngayu waki Kudkanyi. Jalija ngaka janyba, baki nanda barrinani mungijba yaji, mikungangi ngayiyi waki mili. Nayimanji barrinani kambana yaji ngaki, baki yuku mili ngayu waki Kudkanyi. Jilijba jangaka janyba.”
JOH 11:11 Mili barri yanybayi Jisus yalungi, “Nanda ngambalangi kandi, Lasaris, kuluka nyulu nanijba. Kuluka nyulu, ngala ngayuja barlba nangandurri. Jangayu dulaba waykalinya, baki walajbaja ngakinkurri, baki jungkuja yaminnga.”
JOH 11:12 Jananganja yali Jisus, “Mambuka. Jaliyi nyulu kuluka, baki yuku barri. Janyulu kunybijba. Miku nyuliyi lunji mili.”
JOH 11:13 Miku yaliyanyi jingkijba nanda jangkurr Jisuskanyi kulukankanyi. Ngala Jisuswanyi, nyuli jingkijba nanda Lasaris, janyba nangki. Ngala muningka yanybayi Jisus yalungi, nyulu kulukangka Lasaris, baki nanankanyi barri ngamu nyuliya kulukawa Lasaris.
JOH 11:14 Baki mili yanybayi Jisus yalungi yurlurr, “Nanda kandi ngambalangi Lasaris, janyba nangki.
JOH 11:15 Ngala mirnarrijba ngayu muwa narringi, mikungangi ngayiyanyi jungku nangandu nanda waluwa jali nangka janyba. Mirnarrijba ngayu muwa narringi, najbangangi janarri yingka ngiruka yaji. Baki mili janarri kuyu ngaki jangkurr kudanyu. Barriwa ngambalaja nangandurri bayangarriji.”
JOH 11:16 Yingamali kandi nangangi Jisuskanyi, niji nangangi Dumas, baki yingka niji nangangi Didimus. Yanyba nyuli yalungi yingkamukuyngka kandimukuyngka, “Jangambala jilajba nangandu Jisusnyina, baki jangambala lalanba Jisus. Jaliyi yalu kurdanba Jisus, waluwa ngamanjalu kurdanbaja.”
JOH 11:17 Wijba yali bayangarriji Judiyayurri, Jisus marda nanganginmuku kandimuku. Wanbiya yali Bidani. Ngala janyba nangki nanda Lasaris wujini, kujarra baki kujarra kambana wabula. Yarrijba yali mankanyi nangangi kumayanguna.
JOH 11:18 Nanda yaji Bidani karriya bundu nananyina barrawuyabarrawuyana Jirusalim. Bundu barri, kujarra mil karriya.
JOH 11:19 Baki kudukudu Jumuku yali jilajba nanamunanyi yajinanyi Jirusalimnanyi. Jilajba yali Bidaniyurri. Yidamba yali bulanya majukula nganinyiyurruwa. Yidamba yali bulanya ngindunki bulandu, janybangangi nangki bulangi buwanya. Kudukudu yali jungku bulandu. Ngindu yali bulangi.
JOH 11:20 Ngala badajbayi Jisus nayinda bundu, karuyi yingkawanyi nanda jibarri burrandinyi niji Marda. Karu nyuli Jisuskanyi, badajbangka nayinda. Baki jilajbayi nanda jibarri nangandurri Jisusyurri, ngala nanda kanyiya nangangi niji Mari, yuwaji nyuli jungku barndana. Jungku nyuli nanaba barndana, ngala nanda majunganja nangangi, jilajba nyuli nangandurri Jisusyurri.
JOH 11:21 Jala nyuli wanbiya Jisusnyina, yanybayi nanda jibarri nangangi, “Mambuka. Buwanya ngalingi, janyba nangki. Janyba nangki ngalingi. Warriyaluku. Jaliyanyi ninji badajba wabula, bakiya nangka miku janyba. Jaliyanyi ninji jungku nayiba nurrundu, baki miku nangkiyanyi janyba. Warriyaluku.
JOH 11:22 Ngala ngayu jingkijba Kud. Janyulu yabimba nanda yaji, jalija ninji ngajaka Kud yabimbikanyi yaji. Janyulu yabimba bukamba yaji jalija ninji nulijba nangangi yabimbikanyi yaji. Nani ngayu jingkijba.” Barriwa.
JOH 11:23 Yanybayi Jisus nangangi, “Marda ninjimi miku ngindu mili nganyingkurruwa buwanganjarruwa. Marda ninjimi miku ngindu mili nangangi. Janyulu wankijba mili. Janyulu walajba baki janyulu mili wanka jungku.” Barriwa.
JOH 11:24 Jananganjayi Jisus jibarriwanyi, “Jingkijba ngayu Kud. Janyulu wankamba ngambalanya nanamanji baku barri juju. Janyulu marda walajba nanamanji ngalinginkurru buwanganjarru. Janyulu jungku wanka nangandu Kudnyina yurrngumba nanamanji baku.”
JOH 11:25 Yanybayi Jisus nangangi, “Ngayu, ngayuman jala ngayu wankamba yalunya jala yalungka janyba. Nanda jala kuyu ngaki jangkurr, janyulu wankijba mili. Jalija nangka janyba, janyulu wankijba mili. Janyulu jungku wanka yurrngumba Kudnyina.
JOH 11:26 Baki nanda jala wanka jungku, jala kuyu ngaki jangkurr, miku nangkiyi janyba. Kuyu kuna ninji nayinda jangkurr ngaki wankiykanyi mili.”
JOH 11:27 Jananganjayi Jisus jibarriwanyi, “Mambuka, yuku ngayu kuyu nganyi jangkurr. Jingkijba ninga, ninji nanda Krayis, nanda jandanyi Kudkanyi. Manjijba ninga Kudwanyi. Nanamukunyi wankalawanyi, yarrijba yali jangkurr nganyi najana Kudkanyi. Nanda jangkurr yanybayi, janinji jilajba jambarri. Janinji jilajba Kudnanyi nayiba wayka jambarri. Kuyu ngayu nganyi jangkurr, ninji badajbayi Kudnanyi.”
JOH 11:28 Nani yanybayi nanda jibarri, nanda burrandinyi, baki nyuli wijba nanganginkurri kanyiyarri barndarri. Kuyu nyuli nangangi kanyiya nyubarri, baki yanyba bulangki kardarda. Yanyba nyuli, “Nanda Milidimbawarr, wanbiyayi bundu nayiba, baki nulijba nyulu yanybikanyi nganyi nanaba.”
JOH 11:29 Jali nyulu manku nanda jangkurr kanyiyawanyi, baki walajba nyuli. Walajba nyuli dulu, baki jilajbayi danbiyurri. Jilajba nyuli karri nangandurri Jisusyurri.
JOH 11:30 Jilijba wanbiyayi Jisus barndana. Yuwaji nyuli jungku nananyina yajina jali yanyba yingka jibarri nangangi barrin. Jungku nyuli nananyina yajina.
JOH 11:31 Nanamuku Jumuku jungku jali yalu barndana, ngindu jali yalu bulangi nanankujarrayngka majukulayngka, walajba yali marda. Jilajba yali bayngkani nangandu marda, ngamungangi janyulu jilajba kumayangurri. Ngamu janyulu jilajba nanankurri kumayangurri jali yalu makaba buwayankurru, ngindunki nanaba. Ngala miku. Jilajba nyuli Jisusyurri, baki durrijba yali bulanya, nanankujarra majukula nangandurri Jisusyurri.
JOH 11:32 Jala buli wanbiya nangandu Jisusnyina, jilajbayi nanda kanyiya nangandurri. Mururu nyuli wayka nukamina Jisusnyina. Mururu nyuli wayka baki yanybayi Jisuskanyi, “Mambuka, janyba nangki ngalingi buwanya. Jaliyanyi ninji jungku nayiba wabula, baki miku nangkiyanyi janyba. Jaliyanyi ninji jungku nayiba, ngala nyuli lunji, baki yuwaji nyuliyanyi wanka jungku.”
JOH 11:33 Baki nginduyi nanda jibarri, nanda kanyiya nangangi kudanyu. Ngindu nyuli mirlarryudi. Nanamuku Jumuku badajba jali bayngkani nangandu, marda yali ngindu mirlarryudi. Najba nyuli yalunya ngindunkurri Jisuswanyi, baki ngindu nyuli muwa yalungi. Ngindu nyuli muwa kudanyu yalungi.
JOH 11:34 Baki nyuli ngajaka bulanya majukula, “Wanjawa nanda nganinyiyurruwa mankanyi. Wanjawa nimbali yarrijba nangangi mankanyi.” Jananganja buli Jisus, “Mambuka. Barriwa ngambalaja barlba. Janinya ngali milidimba nanankanyi kumayangunyi, yarrijba jali yalu mankanyi kalawuyngkurru.” Nani buli yanyba nangangi Jisuskanyi,
JOH 11:35 baki nginduyi Jisus nangangi mirlarryudi. Ngindu nyuli kudanyu nangangi.
JOH 11:36 Baki nanamuku yingkamuku jala yali karrinja nangandu, najba yali Jisus ngindunkurri, baki yanyba yalungki, “Yabijba nyuli muwa nangangi nganinyiyurruwa wabula, baki nanankanyi nanijba barri nyulu nginduka muwa kudanyu barri nangangi.
JOH 11:37 Ngala yingkamuku yanyba yalungki, “Kunymamba nyuli nanda kabuji yami Jisuswanyi. Jaliyanyi jungku Jisus nayiba, baki yiningki nyuliyanyi kurrkunba nanankurru nganinyiyurru janybikanyi nangka.” Nani barri yalungki yanyba Jumuku.
JOH 11:38 Mili nginduyi Jisus kudanyu yalungi, baki jilajba nyuli bulandu kumayangurri. Wujini, jali yalu yarrijba nangangi mankanyi kalawuyngkurru kumayanguna, murumba yali bardawa walkurranyina dungalana. Yarrijba yali nanda walkurra dungala waluwa kumayanguna bardawana. Barriwa. Wanbiya yali kumayanguna.
JOH 11:39 Baki jirrinybayi yalunya Jisuswanyi, “Dulabakiyi nanda dungala bardawananyi.” Ngala jananganjayi nanangini jibarriwanyi burrandinyiwanyi, “Mambuka, buwayankurru ngalingi, kili nyuli kurdan kujarrana kambana baki kujarrana. Ngujbulijbaka mankanyi nangangi. Banjawaka ngujbul kudu nangangi. Warriyaluku.”
JOH 11:40 Yanybayi Jisus nangangi, “Barrin ninga karuyi nayi. Jaliyi ninji kuyu ngaki jangkurr, baki janinji najba nanda walkurra yaji ngiruka, jalija yabimba Kudwanyi. Janyulu yabimba ngiruka yaji, jaliyi ninji kuyu nanda jangkurr ngaki.” Barriwa.
JOH 11:41 Baki dulaba yali nanda dungala kumayangunanyi. Dulaba yali dungala. Dimbilijba nyuli yami Jisus kingkarri lalijiyurri, baki yanybayi Jisus, “Buwakanya kingkarri, mirnarrijba ngayu muwa nganyi, mankungangi ninji ngaki jangkurr.
JOH 11:42 Jingkijba ninga, ninji mankuka ngaki jangkurr yurrngumba. Ngala ngayu yanybaka nayinda jangkurr nanijba, baki nanginmukunyi jungku jala yalu nayiba ngakindu, jayalu manku nayinda jangkurr marda. Yanyba ngayu nayi, baki nanginmukunyi ninya yalu jingkijba, nganinji manjijbayi nanginkurri.”
JOH 11:43 Nani barri yanybayi Jisus, baki yanyba nyuli kudanyu nanankanyi nganinyiyurruwa, “Ninji, Lasaris, walajbakiyi. Walajbakiyi nanankardi kumayangunanyi.”
JOH 11:44 Baki walajbayi nanda nganinyiyurru. Karrinjayi danbina. Waluwa yali kijijba mankanyi lukuluku bukamba wayka nukamiyurruwa rakiyudinyi. Nani barri Jumukunyi, yalili kijijba mankanyi waluwa yali yarrijba kumayanguna. Kijijba yalili mankanyi rakina. Barriwa. Walajbayi nanda Lasaris, ngala nyuli yuwajiwa munburr rakiyudi marniyurru, baki nukamiyurru, baki yingka raki nyuli lukuluku kulajina. Baki jirrinybayi yalunya Jisuswanyi, “Dulabakiyi nanda raki nanganbunanyi walinanyi, marda mankanyinanyi. Dulabakiyi nanda raki baki janyulu jilalajba.” Barriwa.
JOH 11:45 Kajamuku Jumuku, jali jilajba kumayangurri nangandu nanaba kanyiyana, najba yali nanda jali yabimba Jisuswanyi. Najba yali Jisus, wankambikurri nanda nganinyiyurru, baki kuyu yali nangangi jangkurr Jisuskanyi. Kajamukunyi Jumukunyi yali kuyu nangangi jangkurr. Jingkijba yali Jisus, nyuli walkurra mambuka Kudkanyi.
JOH 11:46 Ngala yingkamuku, miku jaliyanyi yalu kuyu nangangi jangkurr, wijba yali bayungu Jirusalimyurri, baki karu yali nanamuku Barasimuku Jisuskanyi. Karu yalunjali nanankanyi yajinyi jali yabimba Jisuswanyi, jali nyulu wankamba nanda nganinyiyurru. Barriwa.
JOH 11:47 Baki nanankardi barri, Barasimukunyi marda walkurrawanyi mambukamukunyi jurjkanyi, karu yalunjali malbumalbu kunsilkanyi, yanybikanyi yalungka malumba. Jungku yali, baki yanyba yalungki malumba, “Wanyimba jangambala. Yabimba nyuli kaja yaji ngiruka ngambalangi. Wanyimba jangambala nangangi Jisuskanyi.
JOH 11:48 Jaliyi nyulu mili yabimba ngiruka yaji ngambalangi, baki kudukuduwanyi jayalu kuyu nangangi jangkurr. Bukambijunyi jayalu kuyu nangangi jangkurr. Ngala ngurranyimuku Rumankanyi yalu mambukamuku ngambalangi. Jayalu dalyamba nayinda ngambalangi walkurra jurj, jaliyi yalu kudukudumukunyi kuyu nangangi jangkurr. Nayinda walkurra jurj ngambalangi, miku ngurranyimukuyngka. Kudukudu yalungi nayinda jurj. Ngala ngurranyimukunyi, jayalu dalyamba nayinda walkurra jurj. Jayalu linjumba ngambalanya. Yiningki jangamanjalu kurdanba jaliyi yalu kudukudumukunyi kuyu jangkurr Jisuskanyi. Marda ngambalimi kurrkunba nanda Jisus, mikuwali yabimba mili ngiruka yaji. Marda ngambalimi kurrkunba.”
JOH 11:49 Nanda walkurramirra mambuka jurjkanyi, nangangi niji Kayabas. Nanamanji nyuli jungku walkurramirra mambuka jurjkanyi. Yanyba nyuli yalungi, “Narri malbumalbumuku, miku narriyi jingkijba nanda jalija ngambala yabimba. Miku narriyi nulijba nanankanyi jangkurranyi yurlurrmba.
JOH 11:50 Marda narrimi jingkijba nayi. Nanda Jisus, marda nangkimi janyba. Jaliyi nangka janyba, baki miku nyuliyi yabimba mili kiji ngambalangi. Baki miku ngamanjaliyi linjumba nanamukunyi mambukamukunyi Rumankanyi. Marda nangkimi janyba, baki miku ngamangkiyi janyba.” Nani yanybayi walkurramirra mambuka jurjkanyi.
JOH 11:51 Ngala miku nyuliya yanyba nani nyuluman. Miku. Kudiyana nanda walkurramirra mambuka jurjkanyi, kudiyana yuku nyuli yanyba jangkurr Kudkanyi. Nanda jangkurr, yanyba jali nyulu nanamanji, nanda jangkurr duja jangkurr nangangi Kudkanyi. Yanyba nyuli Jisuskanyi, janangka janyba, ngala nanganginmuku mungkijimuku jayalu jungku mardarda.
JOH 11:52 Baki yingkamuku bukambiju wandijiyana, maruka jala yalu muwa Kudkanyi, marda jayalu jungku mardarda. Janyulu marrimba yalunya mardarda yurrngumba Kudwanyi. Janangka janyba nanda Jisus, baki bukambiju wandijiyana, jala maruka muwa Kudkanyi, jayalu jungku barrinani mungkijimuku nangangi. Jayalu jungku barrinani jandanyimuku nangangi Kudkanyi.
JOH 11:53 Baki yurrngumba nanankardi jali yanyba walkurra mambuka jurjkanyi nani, yurrngumba nanankardi yaliyanyi kurdanba Jisus mambukamukunyi Jukanyi. Yilikajba yalungki, yanka jayalu kurdanba Jisus. Barriwa.
JOH 11:54 Baki mikukiyanyi jilalajba Jisus mili nananyina yajina Judiya, ngala barlba nyuli nanamunanyi yajinanyi. Barlba nyuli langki yingkayurri yajiyurri, niji Yibrayim. Nanda yaji Yibrayim, bundu mangkurruna yajina. Jungku nyuli nanaba, marda nanganginmuku kandimuku yali nanaba nangandu.
JOH 11:55 Winyurruwa janyulu wangarr yalungi Jumukuyngka niji Kangandijbayi Barrawuna Yajinyi, jalili yalu jarrba nanda bulungu jibkanyi, baki damba ngala nyulu mikuyaji bululunyi. Kajamuku Jumuku yali jilajba Jirusalimyurri. Jilajba yali langina, kulani, karrina bayunguna nanankurri Jirusalimyurri. Jilajba yali nanankanyi wangarranyi jarrkanyi yaji. Baki wakardaba yalungki mankanyi wangarranyi. Nani yalungki birrirrinja mankanyi wangarranyi, jali yalungka wakardaba mankanyi.
JOH 11:56 Jilajba yali Jirusalimyurri wangarranyi, baki bayiwujba yali Jisuskanyi muramuku. Bayiwujba yali nangangi. Yililikajba yalungki, “Yanka janinji ninji yanyba nangangi Jisuskanyi. Miku kunawali jilajba nanginkurri wangarranyi. Marralangka kuna jilaykanyi nanginkurri.” Nani yalungki yililikajba nangangi Jisuskanyi.
JOH 11:57 Jirrinybayi yalunjalu mambukamukunyi jurjkanyi marda Barasimukunyi. Jirrinyba yalunjali, “Narri nayiba Jirusalim. Jaliyi narri najba nanda Jisus, baki karu janarri nurrunya nangangi Jisuskanyi. Janurru jilajba wudumbiji Jisus.” Nani barri jirrinyba yalunya mambukamukunyi jurjkanyi marda Barasimukunyi, wudumbangangi yaliyanyi Jisus kurdanbiji Jisus. Barriwa.
JOH 12:1 Waluwa nanda wangarr, kujarra kambana, baki kujarra baki kujarra waluwa nanda wangarr, nanamanji, jilajbayi Jisus karri Bidaniyurri. Jilajba nyuli nanankurri yajiyurri, jalili jungku Lasaris nanaba yajina. Nanda Lasaris, nyuli nanda, wankamba jali Jisuswanyi bayngkani jali nangka janyba. Jilajbayi Jisus nanganginkurri barndarri Lasariskanyi.
JOH 12:2 Yundijba buli mama nangangi Jisuskanyi majukulanyi Lasariskanyi. Yundijba buli mama. Baki nanangini burrandinyiwanyi, niji Marda, nyuli wajba yalunya mamanyi. Kudukudu yali malumba jungku, Lasaris, marda Jisus, marda nanganginmuku kandimuku. Jungku yali malumba baki jarrba yali nanda mama jali wajba jibarriwanyi Mardawanyi.
JOH 12:3 Ngala nanda kanyiya, niji Mari, wudumba nyuli bujili. Kalawunyi bujilina nanda barrinani jirrki, ngala nanjananja. Banjawayi kunyba kudu. Nijarrijba yalu nanda yaji Nard. Nanamanji yalili yarrijba nard nganinyiyurrunyina mankanyina Jumukunyi, waluwa yalili makaba mankanyi. Wajbayi kajanyi dungalanyi jibarriwanyi, baki wudumba nyuli nanda Nard. Bindabayi nard nukamina Jisusnyina, baki namba nyuli Jisus nukami jibarriwanyi. Namba nyuli Jisus nukami nanganginjudinyi nyungkayudinyi. Banjawayi nanda kunyba kudu lukuluku barrawuna. Kunyba nanda kudu banjawayi.
JOH 12:4 Ngala ngirrwayi jibarri yingamaliwanyi kandiwanyi Jisuskanyi. Yanyba nyuli, “Wanyingkanyi nyuli bindaba nukami nananyina nardnyina. Kunyba nanda nard. Jaliyanyi nanda nurrungi, baki nurriyanyi wajba yalunya nardkanyi dungalanyi. Nurriyanyi wudumba kudukudu dungala 300 dula nanankanyi nardkanyi. Baki nurriyanyi wajba yalunya nanankanyi dungalanyi, yalunya jala mikuyaji yalungi dungalanyi.” Nani yanybayi nanda kandi Jisuskanyi, niji Judas Yiskariyud. Baku barri bijal nanangini Judaswanyi, nyuli wudumba dungala mambukananyi jurjkanyi. Karu nyuli nanda mambuka wanjawa jayalu wakaramba Jisus, baki wudumba nyuli dungala karunkanyi.
JOH 12:6 Yanyba nyuli nanda jangkurr waykanyi yalunya nardkanyi dungalana, ngala miku nyuliyala wajba yingkamuku nanankanyi dungalanyi. Miku. Nulijba nyuli maninjakuykanyi nanda dungala. Nyulili marrimba nanda bindawarra dungalayudi. Nyulili lalanbawarr dungalanyi yalungi. Ngala nyulili maninjaku. Kuyu nyulili jawuda dungala nanganginmirra. Nulijba nyuli maninjakuykanyi nanda dungala.
JOH 12:7 Ngala yanybayi Jisus nangangi Judaskanyi, “Yingijbakiyi nanda jibarri. Mikujiyi ngirrwa nangangi. Mikujiyi yabimba kiji nangangi. Nyulu yabimbaka kunyba yaji ngaki. Jawuda nanda jala mikuyaji yalungi dungalanyi, yurrngumba yalu jungku narrindu. Yurrngumba yuku narri lalanba yalunya, jala mikuyaji dungalanyi yalungi. Yalu narrindu yurrngumba. Ngala miku ngayiyi jungku nayiba narrindu yurrngumba. Mikujiyi ngirrwa nangangi jibarrinyi. Kili nyuli nanda kunyba nard, yarriykanyi ngakinyina mankanyina waluwa jayalu makaba ngaki mankanyi.” Barriwa.
JOH 12:9 Kudiyawanyi yalunjali karu yingkamuku Jumuku nangangi Jisuskanyi, nyuli jungku nanaba barndana Lasariskanyi. Karu yalunjali Jisuskanyi, nanamanji nyuli jungku nanaba Bidani nangandu. Baki kudukudu Jumuku, jilajba yali Bidaniyurri naji bulanya. Yaliyanyi najba bulanya, Jisus marda nanda Lasaris jali wankamba mili Jisuswanyi wujini.
JOH 12:10 Baki kajamukunyi Jumukunyi durrijba yali nanda jangkurr Jisuskanyi, wankambangangi nyuli nanda Lasaris. Ngala nanamuku mambukamuku jurjkanyi, mankumanku yalungki, kurdanbikanyi bulanya, Jisus baki Lasaris. Yaliyanyi kurdanba bulanya, kajamukunyingangi yali durrijba jangkurr Jisuskanyi. Durrijba yali jangkurr Jisuskanyi, wankambangangi nyuli nanda Lasaris. Miku yaliyanyi mili durrijba jangkurr mambukamukuyngka, ngala durrijba yali nanda jangkurr Jisuskanyi.
JOH 12:12 Bindabayi nard nangandu Jisusnyina jibarriwanyi, baki munganawa kajamukunyi Jumukunyi, jilajba jali Jirusalimyurri wangarranyi, manku yali Jisuskanyi, nyulu badajbangka nanankurri Jirusalimyurri, jali yalu jungku.
JOH 12:13 Baki yali dalyamba kaja wanjirr. Kuyu yali danbiyurri barrikiyurri Jirusalimkanyi. Jilajba yali danbiyurri madamadambiji yalungki karru. Kawanyba yali wanjirryudinyi, marda kaya yali Jisuskanyi wanjirryudi. Kaya yali kudanyu, “Yanyba nurru kunyba jangkurr nganyi Kud. Ngajaka ninga, janinji yabimba kunyba yaji nangangi Jisuskanyi. Nyulu walkurramirra mambuka nurrungi Jumukuyngka. Mirnarrijba nurru muwa nangangi Jisuskanyi.” Nani barri yali kaya Jisuskanyi, ngala nyuli jilajba yalunbiyangka.
JOH 12:14 Wudumba nyuli yirrikirri Jisuswanyi, jungku nyuli ngulurrina, baki jilajba nyuli bayungu Jirusalimyurri yirrikirriyudi. Nayi barri yanybayi nanda wankalanyi jangkurr najana Kudkanyi.
JOH 12:15 “Mikujiyi marrala, narri jala jungku Jirusalim. Mikujiyi marrala. Badajbangka nanginkurri narringi mambuka walkurramirra. Badajbangka nyulu yirrikirriyudi.” Nani barri nyuli yarrijba nanda jangkurr Kudkanyi wankalawanyi. Duja nanda jangkurr. Duja.
JOH 12:16 Ngala miku yaliyanyi jingkijba yaji nanamanji kandimukunyi Jisuskanyi. Miku yaliyanyi jingkijba yaji nanamanji. Ngala baku barri, bayngkani jali nangka janyba Jisus, yali mankuwa jangkurr yirrikirrinyi. Jali wijba Jisus kingkarri Kudyurri, baki yali mankuwa nanda jangkurr yirrikirrinyi najana Kudkanyi, kandimukunyi. Mankuwa yali jali yalu wudumba nanda yirrikirri nangangi Jisuskanyi. Baki mankuwa yali nanda wankalanyi jangkurranyi. Duja nanda jangkurr.
JOH 12:17 Nanamuku Jumuku, najba jali yalu Jisus wankambikurri nanda Lasaris wujini, wijba yali bayangarriji Jirusalimyurri. Karu yali yingkamuku Jisuskanyi jali nyulu wankamba nanda Lasaris. Karu yalunjali mura Jisuskanyi, jali nyulu yabimba nanda yaji ngiruka, baki yaliyanyi najba Jisus marda murawanyi.
JOH 12:19 Nanamuku Barasimuku, jali yalu najba muran durriykurri Jisus, baki yanyba yalungki, “Kajawanyi murawanyi, yalu durrijbangka nanda Jisus. Bukambijunyi yalu durrijbangka Jisus. Miku ngambaliyi kurrkunba yalunya. Bukambijunyi yalu kuyu nanda, mambuka nyulu yalungi. Miku ngambaliyi kurrkunba yalunya.” Barriwa.
JOH 12:20 Kudiyamuku kudu yalungi Krik, badajba yali Jirusalimyurri wangarranyi. Badajba yali yanybiji mududu Kudkanyi, marda briji Kudkanyi.
JOH 12:21 Jilajba yali kandiyurri Jisuskanyi, niji nangangi Bilib. Nanda Bilib, nangangi yaji Bidsayida, nananyina walkurranyina yajina Kalili. Jila yali nangandurri Bilibyurri nanamuku Krikmuku, baki yanyba yali nangangi, “Mambuka. Najba nurrimi nanda Jisus. Yanyba nurrimi nangangi.” Barriwa.
JOH 12:22 Baki jilajbayi Bilib yingkayurri kandiyurri Yandruyurri. Karu nyuli Yandru yalungi Krikmukuyngka, yalimi najba Jisus. Baki jilajba buli Jisusyurri. Karu buli Jisus yalungi Krikmukuyngka, yalimi yanyba nangangi.
JOH 12:23 Jananganjayi bulanya Jisuswanyi, “Nayimanji, bukambijunyi janganjalu najba, ngayu Buwanya Bukambijuyngka, ngayu walkurramirra mambuka. Milidimba janyulu yalunya nayi Kudwanyi, ngayu Buwanya Bukambijuyngka.
JOH 12:24 Yanyba ngayu duja jangkurr. Nanda daburrul yami, yaliyi jungku muningka nanda yami, baki mikuwali jardijba. Mikuwali jungku baku yingkayudi yamiyudi. Ngala jala yalu yarrijba nanda daburrul yami jambana, baki janyba nangka yami kalawuyngkurru jambana. Jala nangka janyba yami, baki walajbangka wuju baku barri bayngkani. Nanda daburrul jardijbangka walkurra, baki baku barri nyulu jungkuka kajayudi yamiyudi. Yalu wudumba nanda yami jarrkanyi. Ngayu barrinani nanda daburrul yami, jala nangka janyba. Jangaka janyba nani barri. Ngala mili jayalu jardijba nganinyimuku baki jibarrimuku Kudkanyi. Jayalu maruka muwa nangangi Kudkanyi. Jayalu durrijba ngaki jangkurr jalija ngaka janyba. Nani ngayu barrinani nanda daburrul yami.
JOH 12:25 Jaliyi maruka nangka muwa nganinyi, baki miku nyulimi maruka muwa yingkamukuyngka, baki miku nyulimi maruka muwa Kudkanyi. Jungkuka nyulu balkina yuwana Kudkanyi, jala nangka maruka muwa. Janangka janyba, ngala miku nyuliyi wankijba mili. Miku. Ngala nanda jala nangka miku maruka muwa, jala maruka muwa Kudkanyi, nyulu jungkuka kunybana yuwana Kudkanyi. Nyulu yabimbaka yaji, nanankanyi jala nulijba Kud. Nyulu durrijbangka Kud, baki janyulu wankamba nanda baku Kudwanyi. Janyulu jungku wanka nangandu Kudnyina, bayngkani jalija nangka janyba.
JOH 12:26 Nanda jala nulijba wakinkanyi ngaki, marda nyulimi durrijba ngana, marda nyulimi jilajba ngakindu yurrngumba. Ngakinyi Buwakayu, janyulu yabimba kunyba yaji nanankanyi jala waki ngaki. Kunyba yaji janyulu yabimba nangangi ngakinyi Buwakayu.
JOH 12:27 Ngindu ngaka muwa, kijingangi ngakindu. Ngaki Buwakanya, nyulu nulijbangka ngaki, yabimbikanyi wanyi yaji. Wanyingkanyi janga ngakaja ngaki buwakanya. Nayinda kuna. ‘Buwakanya. Janganinji lalanba kuna. Janinji kuna janyba nanda kiji ngakinbunanyi. Janganinji kuna marrimba mardarda.’ Nani kuna jangayu ngajaka. Ngala miku ngayiyi ngajaka nani. Miku, manjijbangangi ngani Kudwanyi. Ngani manjijba nanginkurri yajiyurri. Janganjalu linjumba kudanyu. Janganjalu kurdanba kudanyu.
JOH 12:28 Buwakanya, yabimbakiyi yalunya jingkiykanyi ninyalu, ninji walkurra mambuka, walkurramirra. Buwakanya, yabimbakiyi nanda yaji yalungi.” Nani yanybayi Jisus. Baki yali jala karrinja nangandu, manku yali jangkurr lalijinanyi. Lalijinanyi yali manku nayinda jangkurr Buwakaya. Nayi yali manku kingkarrinya, “Wabula ngayi minimba yalunya walkurra yaji ngiruka. Baki mili jangaka minimba yalungi, ngayu walkurramirra mambuka. Yuku ngayu yabimba bukamba yaji ngiruka.” Nani yali manku jangkurr lalijinanyi.
JOH 12:29 Kajamuku nganinyimuku marda jibarrimuku, karrinja jali yalu nanaba nangandu Jisusnyina, manku yali nanda jangkurr. Yingkamuku yalungki yanyba, “Ngurrwangka yaji. Ngurrwangka.” Ngala yingkamuku yalungki yanyba, “Yanybayi Yanjil nangangi Jisuskanyi. Nanda Yanjil jali waki nangangi Kudkanyi yanybayi nangangi Jisuskanyi.”
JOH 12:30 Ngala yanybayi Jisus yalungi muranyi, “Miku nyuliya yanyba nanda jangkurr ngaki, ngayu mankunkanyi. Miku. Ngala nyuli yanyba nanda jangkurr narringi, narri mankunkanyi nanda jangkurr.
JOH 12:31 Nanijba janyulu karrinjarrijba narrinya Kudwanyi. Janyulu karrinjarrijba narrinya bukambiju wandijiyana walu nangandu, baki janyulu yanyba nanda jalija nyulu yabimba narringi. Yingkamukuyngka janyulu yanyba yalungi, ‘Narri, narri kunyba. Narri durrijba ngakinyina yuwana.’ Ngala yingkamukuyngka janyulu yanyba yalungi, ‘Miku narri durrijba ngakinyina yuwana. Jungka narri balki ngaki’. Nani barri janyulu karrinjarrijba bukambiju. Baki mili janyulu yanyba Kud. Janyulu yanyba wuwarranyi Sayidinkanyi, ‘Miku ninjiyi mili jungku walkurra mambuka. Miku. Jungku janinji bayakarda wuwarr.’ Nani barri Kud janyulu yanyba nangangi Sayidinkanyi, mambukanyi wuwarranyi. Janyulu manjijba Sayidin juju.
JOH 12:32 Janganjalu langandaba. Ngala jayalungka mankumanku ngaki bayngkani jalija ngaka janyba. Jayalungka mankumanku ngaki bukambiju wandijiyana. Jangayu yarrijba ngaki jangkurr yalunginyina ngaluna. Baki jayalungka mankumanku ngaki.” Barriwa.
JOH 12:33 Nani barri yanybayi Jisus, yalu langandaykanyi mankanyi nangangi. Yanyba nyuli nani yalungi, jingkijbangangi nyuli, jayalu langandaba mankanyi nangangi kurndana kurdanbikanyi. Baki nanankardi barri nyuli karu yalunya nani, yalu langandaykanyi nangangi mankanyi.
JOH 12:34 Ngajaka yali nangangi, murawanyi, “Nanda yuwa Musiskanyi yanybayi nayi Krayiskanyi, ‘Janyulu jungku wanka yurrngumba. Miku janangkiyi janyba.’ Ngala ninji yanyba nangangi Buwaya Bukambijuyngka, jayalu langandaba nanda. Wanyi nyuli nanda, Buwanya Bukambijuyngka. Wanyi nyulu.” Nani yali yanyba nangangi nanamuku jali yalu karrinja nanaba nangandu Jisusnyina.
JOH 12:35 Jananganjayi yalunya Jisuswanyi, “Jala narri jilalajba mungana, miku narriyi najba yaji. Miku narriyi jingkijba nanda yaji jala narri jilalajba. Miku narri jingkijba nanda yaji jilaykanyi jala mungijbangka yaji. Ngala jala mirnmirnbaka yaji mirnbiwanyi, baki yuku narri jingkijba nanda yaji. Jingkijba narri nanda yaji, jilaykanyi. Ngayu barrinani nanda mirnbi. Minimba ngayu narrinya jilaykanyi. Minimba ngayu narrinya yabimbikanyi kunyba yaji, jungungkanyi kunyba Kudkanyi. Mili jangayu jungku narrindu marndakaja. Jala ngayu jungku narrindu, baki nanda barrinani kambana yajina. Yuku narri durrijba ngaki jangkurr. Baku barri, miku ngayiyi jungku narrindu, ngala yuwaji janarri jingkijba ngaki yaji. Yuwaji janarri jingkijba jungunkanyi kunybana ngakinyina yuwana, durriykanyi ngaki jangkurr. Janarri jungku barrinani yalunya jala yalu jilalajba kambana yajina. Marda narrimi durrijba ngaki jangkurr yurrngumba, ngala ngayu jungku narrindu, baki ngala ngayimi miku jungku narrindu. Marda narrimi durrijba ngaki jangkurr yurrngumba.” Nani barri milidimbayi yalunya Jisuswanyi, mirnbinyi.
JOH 12:36b Barriwa barlbayi Jisus yalunbunanyi. Ngadijba nangki, baki miku yaliyi najba Jisus mili nanamanji. Miku yaliyanyi kuyu nangangi jangkurr, ngala yali najba nanda kaja yaji ngiruka jali nyulu yabimba. Kaja walkurra yaji yabimbayi Jisuswanyi, ngala miku yaliyanyi kuyu nangangi jangkurr. Yurlwa yali nanganginkanyi jangkurranyi.
JOH 12:38 Kamambarra yarrijba nyuli jangkurr najana Kudkanyi wankalawanyi, niji nangangi Yayisaya. Nayi nyuli yarrijba “Mambuka, ninji jungku ngiruka yabimbikanyi yaji. Milidimba ninji yalunya kuyunkanyi nurrungi jangkurr. Ngala wanjangini jayalu kuyu nurrungi jangkurr?” Nanda jangkurr, yarrijba jali wankalawanyi, nanda jangkurr duja.
JOH 12:39 Marda yingka jangkurr nyuli yarrijba. Nayi nyuli yarrijba, ‘Yalu jardibirri muwa. Miku nganjaliyanyi jingkijba. Jali yalu najba nanda ngiruka yaji ngaki, miku yaliyala jingkijba nanda yaji. Miku yaliyala jingkijba nanda jali ngayu yabimba. Miku yaliyala jingkijba ngaki. Baki yabimba ngayi yalunya jungunkanyi jardibirri muwa, mikungangi yaliyala jingkijba ngaki mikungangi yaliyala kuyu ngaki jangkurr. Miku yalungkiyala yangkalamba ngaki, jungunkanyi yurlurr ngakinyina yuwana. Yali yurlwa ngaki. Miku yalungkiyala yangkalamba durriykanyi ngana, baki yabimba ngayi yalunya jungunkanyi jardibirri muwa.’ Barriwa. Nani nyuli yarrijba nanda jangkurr Kudkanyi wankalawanyi Yayisayawanyi. Baki miku yaliyi kuyu nanda jangkurr, jungkungangi yalu jardibirri muwa. Nanda jangkurr, yarrijba jali Yayisayawanyi, nanda duja jangkurr.
JOH 12:41 Yarrijba nyuli nanda jangkurr Yayisayawanyi, jingkijbangangi nyuli nanda Krayis. Milidimbayi Kudwanyi nanda wankalanyi nganinyi nangangi Krayiskanyi. Milidimba nyuli Yayisaya Krayiskanyi, janyulu jungku walkurramirra bukambijuyngka. Nani nyuli milidimba Yayisaya Krayiskanyi. Baki nanangini wankalawanyi, nyuli yarrijba nanda jangkurr Krayiskanyi najana Kudkanyi.
JOH 12:42 Nanamanji kudiyawanyi mambukamukunyi Jukanyi, yali kuyu nanda jangkurr Jisuskanyi, ngala miku yaliya karu yingkamuku, marralangangi yali yalungi Barasimukuyngka. Yanybayi Barasimuku, jayalunjalu janyba jurjnanyi nanamuku, kuyu jala jangkurr Jisuskanyi. Baki nanankardi barri marrala yali karunkanyi yingkamuku nangangi Jisuskanyi.
JOH 12:43 Nulijba yali yingkamukuyngka waykanyi yalunya kunybanyi jangkurranyi yalunginkanyi, ngala miku yaliya nulijba Kudkanyi waykanyi yalunya kunybanyi jangkurranyi. Nulijba yali jungunkanyi kunyba yingkamukuyngka, ngala miku yaliya nulijba jungunkanyi kunyba Kudkanyi.
JOH 12:44 Yanybayi Jisus kudanyu, “Jaliyi narri kuyu ngaki jangkurr, baki janarri kuyu nanda jangkurr nangangi Kudkanyi. Janarri kuyu nanda jangkurr Kudkanyi, manjijba jali ngana nanginkurri. Janarri kuyu nangangi jangkurr marda, manjijbangangi nyuli ngana karunki narrinya nanankanyi jangkurranyi.
JOH 12:45 Jaliyi nganarri jingkijba, baki narri jingkijba Kud, manjijba jali ngana.
JOH 12:46 Ngayu barrinani mirnbi. Minimbaka yaji nanangini mirnbiwanyi, baki yuku narri najba yubarl jilaykanyi. Nani barri ngayu minimba narrinya jungunkanyi kunyba Kudkanyi. Jaliyi narri ngayangayijba ngaki, baki janarri ngayangayijba Kudkanyi. Miku janarri jungku balkina yuwana Kudkanyi. Ngala nanda jala yurlwa ngakinkanyi jangkurranyi, yuwaji nyulu jungkuka balkina yuwana. Jungkuka nyulu barrinani mungana yajina. Miku nyuliyi najba yubarl jilaykanyi, mikuyajingangi mirnbinyi nangangi. Ngayu barrinani nanda mirnbi. Ngayu minimba narrinya jungunkanyi kunybana yuwana Kudkanyi.
JOH 12:47 Nanda jala manku ngaki jangkurr, jaliyi nyulu miku ngayangayijba nanankanyi jangkurranyi, ngala miku ngayiyi yanyba nangangi, nyulu jungkuka balki. Miku. Miku ngayiyi yanyba nangangi, mikuwali jungku wanka yurrngumba Kudnyina. Miku ngayiyi yanyba nani nangangi, jaliyi nyulu miku kuyu ngaki jangkurr. Miku ngayiyanyi badajba kingkarrinya yanybiji nani. Ngala badajba ngayi nanginkurri, marrimbikanyi yalunya mardarda. Badajba ngayi marrimbikanyi yalunya.
JOH 12:48 Nanda jala miku durrijba ngaki jangkurr, yingkamukunyi jayalu jingkijba nanda, miku nyulimi jungku kunyba Kudkanyi. Jayalu jingkijba nanda, miku nyulimi durrijba ngaki jangkurr, jungkuka nyulu balki, jungkuka nyulu balkina nanganginyina yuwana Sayidinkanyi. Baki miku janyulu wanka jungku mili Kudnyina. Yingkamukunyi jayalu jingkijba nani nanankanyi, miku jala durrijba ngaki jangkurr.
JOH 12:49 Ngakinyi Buwakayu, nyuli karu ngana yanybiji nayinda jangkurr. Miku ngakiyanyi mankumanku nanginkanyi jangkurranyi ngakaman, karunki narrinya nani. Miku. Jirrinyba nyuli ngana ngakinyi buwakayu, ngayu yanybiji nayinda jangkurr.
JOH 12:50 Nayinda jangkurr yanybaka wankambikanyi narrinya Kudwanyi. Jaliyi narri durrijba ngaki jangkurr, baki janyulu wankamba narrinya mili Kudwanyi. Nayinda jangkurr yanybaka jungunkanyi wanka mili Kudkanyi.” Barriwa. Nani nyuli milidimba yalunya Jisuswanyi.
JOH 13:1 Munganawa janyulu wangarr yalungi niji Kangandijbayi Barrawuna Yajinyi. Baki jingkijbayi yaji Jisuswanyi, winyurruwa janyulu wijba kingkarri nangandurri Kudyurri, nanganginkurri Buwakayarri. Maruka nyuli muwa yalungi nanganginmuku, durrijba jalili yalu nangangi jangkurr. Maruka nyuli muwa yalungi yurrngumba. Yali nanganginmirra kandimuku. Maruka nyuli muwa yalungi kudanyu.
JOH 13:2 Nanamanji, bunundujbangka yaji wangarranyi, ngala nyulu mungijba yaji, jungku yali malumba, Jisus marda nanganginmuku kandimuku. Jungku yali malumba jarrkanyi mama. Ngala waluwa nanangini Sayidinwanyi, karu nyuli nanda kandi Judas Yiskariyud, nijanganjinyi nangangi niji Sayimun. Karu nyuli kandi Judas janyulu wajba mambukamuku jurjkanyi nangangi Jisuskanyi, yaluja kurdanbiji Jisus. Janyulu wajba yalunya dungalanyi nangangi Jisuskanyi. Jingkijba nyuli nanda yaji Jisuswanyi. Jingkijba nyuli, jayalu wudumba Jisus mambukamukunyi.
JOH 13:3 Baki mili jingkijbayi yaji Jisuswanyi. Jingkijba nyuli Kud, nyuli yabimba Jisus ngiruka, yabimbikanyi walkurra yaji ngiruka. Jingkijba nyuli, nyuli jungku ngiruka yabimbikanyi yaji. Baki mili jingkijbayi Jisuswanyi, wabula nyuli badajba kingkarrinya Kudnanyi, baki mili janyulu wijba kingkarri nangandurri Kudyurri. Jingkijba nyuli bukamba yaji nani barri.
JOH 13:4 Ngala yali jarrba nanda mama, baki walajbayi Jisus. Walajba nyuli baki wudumba nyuli raki. Dulaba nyuli nangangi danyan, baki kijijba nyuli nanda raki nangandu muwana.
JOH 13:5 Bindaba nyuli wabuda lujulujuna, baki wakardaba nyuli yalungi nukami kandimukuyngka nanganginmukuyngka. Wakardaba nyuli yalungi nukami, baki dukumba nyuli nukami rakiyudinyi.
JOH 13:6 Nani barri nyuli wakardaba nukami kudiyanymukuyngka kandimukuyngka, baki badajba nyuli yingkayurri nangandurri, Bidayurri. Ngala yanybayi Bida nangangi Jisuskanyi, “Mikujiyi wakardaba ngaki nukami. Miku Mambuka. Mikujiyi ninji wakardaba ngaki nukami.”
JOH 13:7 Jananganjayi Bida Jisuswanyi, “Miku ninjimi jingkijba nanda jala ngayu yabimba. Miku ninjimi jingkijba nanijba, ngala baku barri janinji jingkijba. Janinji jingkijba nayinda jala ngayu yabimbaka narringi.”
JOH 13:8 Baki mili yanybayi Bida Jisuskanyi, “Mikujiyi ninji wakardaba ngaki nukami. Miku. Miku nanijba, baki mili miku baku. Mikujiyi ninji wakardaba ngaki nani barri. Miku.” Jananganjayi Bida Jisuswanyi, “Jaliyi ngayu miku wakardaba nganyi nukami, baki miku ninjiyi jungku ngaki kandi. Miku ninjiyi kandi ngaki.”
JOH 13:9 Baki mili yanybayi Bida Jisuskanyi, “Yuku, mambuka. Yuku barri ninji wakardaba ngaki nukami, ngala janinji wakardaba ngaki marda wali, marda marni.”
JOH 13:10 Ngala yanybayi Jisus nangangi, “Nanda jala wakardaba nangka bukamba nangangi mankanyi, baki likalika nyulu nangangi mankanyi bukamba. Baki jala nyulu jilajba yingkayurri barndarri jarrji mama, ngawamba nangangi nukami nyuli jundurryudi, jilajbangangi nyuli jundurrina yajina. Marda nangkimi wakardaba ngawamba nangangi nukami. Barriwa. Nyuli yabimba narrinya likalika kurdulu Kudwanyi, baki miku narriyi jungku balki nangangi. Ngala yingamali narringi, miku nyulimi likalika, nyulu jungkuka balki kurdulu narrindu.”
JOH 13:11 Jingkijbayi Jisuswanyi nanda jalija karu mambukamuku jurjkanyi nangangi, yalu wudumbikanyi Jisus. Jingkijba nyuli nanda, baki nanankardi barri nyuli yanyba, “Ngala yingamali, miku nyulimi jungku likalika kurdulu.” Yanyba nyuli nanda jangkurr, jingkijbangangi nyuli nanda jalija karu mambukamuku nangangi. Barriwa.
JOH 13:12 Baki nyuli wakardaba bukamba yalungi nukami. Barriwa. Mili nyuli wudumba nangangi danyan, baki nyuli yarrijba nanda danyan nangandu mankanyina, baki jungku nyuli wayka. Ngajaka nyuli yalunya Jisuswanyi, “Jingkijba kuna narri nanda jali ngayu yabimba narringi. Jingkijba kuna narri.
JOH 13:13 Nganarrili nijarrijba ‘Milidimbawarr,’ marda yingka niji ‘Mambuka.’ Nani barri nganarrili nijarrijba. Yuku barri marda nganarrimi nijarrijba nani, jungkungangi ngayu mambuka, marda milidimbawarr narringi. Nani barri ngayu jungkuka narringi bukambijuyngka. Ngala wakardaba ngayi narringi nukami. Nani barri marda narringkimi wakardaba nukami narringi. Marda narrimi yabimba bayakarda yaji narringi, barrinani ngayi yabimba bayakarda yaji narringi. Nanda yaji jala ngayi yabimba narringi, miku nanda walkurra yaji. Nanda bayakarda yaji ngayi yabimba. Marda narrimi yabimba bayakarda yaji narringi.
JOH 13:16 Ngayu karungka narrinya duja jangkurranyi. Nanda wakiwarr, miku nyulu walkurra barrinani nangangi mambuka. Nyulu bayakarda nganinyi. Nani barri narri wakiwarr ngaki. Narri bayakarda. Ngayu manjijbangka narrinya karunkanyi ngakinkanyi jangkurranyi. Miku narringkiyi mankumanku narri walkurra mambuka. Miku narrimi walkurra mambuka barrinani ngaliya Kud.
JOH 13:17 Jaliyi narri durrijba nayinda jangkurr, jaliyi narri jungku barrinani nanda bayakarda nganinyi, barrinani nanda wakiwarr, baki janarri yabijba muwa yurrngumba. Janarri yabijba muwa yurrngumba jaliyi narri yabimba nayinda yaji. Barriwa.
JOH 13:18 Yanyba ngayu nayinda jangkurr narringi, ngala miku ngayiya yanyba nayinda jangkurr bukambijuyngka narringi. Jingkijba ngayu yingamali narringi. Jingkijba ngayu yingamali narringi, janangka yangkalamba ngakinmunanyi, janyulu karu mambukamuku jurjkanyi ngaki, yalu wudumbikanyi ngana. Nanda jangkurr jali yarrijba wankalawanyi, nanda jangkurr yanybaka duja, ‘Nanda jala jarrba mama ngakindu, janangka yangkalamba ngakinmunanyi.’ Nani yanybayi nanda wankalanyi jangkurr duja.
JOH 13:19 Ngayu karungka narrinya nanginkanyi jangkurranyi, yangkalambikanyi nangka yingamali, baki kamu jalija nangka yangkalamba, janarri jingkijba nayinda jangkurr ngaki duja. Janarri jingkijba ngaki, ngayu nanda Krayis.
JOH 13:20 Ngayu karungka narrinya duja. Janga manjijba narrinya karunki yingkamuku ngaki. Nanamuku, jaliyi yalu kandimba narrinya, nanda barrinani nanamannga ngana yalu kandimba. Jaliyi ngana yalu kandimba, baki nanda barrinani nanamannga yalu kandimba Kud, manjijba jali nyulu ngana.” Barriwa.
JOH 13:21 Jali yanyba Jisus nani, baki ngindu nyuli muwa. Jungku nyuli balki muwa. Baki yanybayi Jisus yurlurrmba jangkurr, “Ngayu karungka narrinya duja jangkurranyi. Yingamali narringi, janangka yangkalamba ngakinbunanyi. Janyulu karu yingkamuku wanjawa janganjalu wudumba. Baki marrimba janganjalu. Warriyaluku.” Barriwa.
JOH 13:22 Ningkijba yalungki nanganginmuku kandimuku. Miku yaliya jingkijba wanyi nanda jalija nangka yangkalamba nanganbunanyi Jisusnanyi. Miku yaliya jingkijba wanyi nyulu.
JOH 13:23 Yingamali yalungi, jungku nyuli bundu nangandu Jisusnyina. Marukayi muwa Jisus nangangi. Jungku nyuli bundu nangandu Jisusnyina. Baki yingka kandi, Sayimin Bida, yanyba nyuli nanankanyi kandinyi jali bundu Jisusnyina.
JOH 13:24 Yanybayi Sayimin Bida, “Janinji ngajaka Jisus, wanyi nanda jalija nangka yangkalamba nanganbunanyi Jisusnanyi. Ngajakakiyi Jisus wanyi nanda.”
JOH 13:25 Baki nanda yingka kandi, yirirdba nyuli mili bundu Jisusyurri. Ngajaka nyuli Jisus, “Mambuka. Wanyi nanda jalija nangka yangkalamba nganyinbunanyi. Wanyi nanda.”
JOH 13:26 Jananganjayi Jisuswanyi, “Najbakiyi nayinda mama. Jangayu yarrijba nayinda mama ngarrkina krayabkanyi. Baki jangayu wajba nanda nanginkanyi mamanyi. Jangayu wajba nanda jalija nangka yangkalamba ngakinbunanyi.” Baki nyuli yarrijba mama ngarrkina krayabkanyi, baki wajbayi Judas nanankanyi mamanyi. Nanda Judas, nyuli jandanyi nangangi Sayimin Yiskariyudkanyi. Wajba nyuli Judas nanankanyi mamanyi Jisuswanyi.
JOH 13:27 Jali nyulu kuyu nanda mama Judaswanyi, baki yinarramba ngankijbayi nanda wuwarr Sayidin nangandu mankanyina Judasnyina. Ngankijbayi Sayidin nangandu mankanyina. Yanybayi Jisus nangangi “Jilajbakiyi dulu. Yabimbakiyi nanda jala ninji nulijba yabimbikanyi. Dulukiyi jila.” Nani barri jirrinybayi Judas Jisuswanyi.
JOH 13:28 Yingkamukunyi kandimukunyi nanaba, miku yaliyanyi jingkijba nanda jangkurr jali yanyba Jisus nangangi. Nanangini Judaswanyi, nyulili lalanba dungala yalungi. Manku yali nanda jangkurr Jisuskanyi, ngala ngamu yiningki Jisuswanyi karuyi Judas wudumbiji mama yalungi dungalana, yiningki karuyi Judas waji yingkamuku dungalanyi. Miku yaliyanyi jingkijba nanda jangkurr Jisuskanyi.
JOH 13:30 Nyuli kuyu nanda mama Judaswanyi. Jarrba nyuli, baki yinarramba nyuli jilajba danbiyurri. Baki mungijbayi yaji nangangi kudanyu.
JOH 13:31 Jali barlbayi Judas yalunbunanyi, baki mili yanybayi Jisus yalungi, “Nanijba janyulu minimba yingkamuku Kudwanyi. Janyulu minimba yalunya ngaki Buwaya Bukambijuyngka, ngayu walkurra mambuka bukambijuyngka. Janganjalu jingkijba, ngayu walkurra, ngirukamirra. Baki jayalu jingkijba Kud, nyulu walkurra mambuka marda. Jungku ngaliya malumba walkurrawuya mambukawuya, ngirukawuya.
JOH 13:33 Narri, jandanyimuku ngaki. Miku jangayu jungku narrindu yurrngumba. Kujba janarri ngaki, ngala miku nganarriyi najba nanaba. Nanijba ngayu karungka narrinya nanamannga jangkurranyi jali wabula ngayi karu nanamuku Jumuku. Nanamannga jangkurranyi ngayu karungka narrinya, ‘Miku narriyi jilajba ngakindu. Jangayu jilajba yingkayurri yajiyurri, jala miku narriyi jila nanankurri. Miku narriyi jila nanankurri yajiyurri.’ Nani ngayi yanyba yalungi baki nanda jangkurr narringi marda.
JOH 13:34 Ngala ngayu jirrinyba narrinya buyingkinyi yuwanyi. Marukakiyi narringka muwa. Maruka ngayu muwa narringi kudanyu. Nani barri marda narringkimi maruka muwa.
JOH 13:35 Jaliyi narringka maruka muwa nani, baki yingkmukunyi, jayalu jingkijba narrinya, narri ngakinmuku kandimuku. Jayalu jingkijba nani narringi, jaliyi narringka maruka muwa.” Barriwa.
JOH 13:36 Ngajakayi Jisus kandiwanyi Bidawanyi, “Mambuka, wanjawa janinji jilajba. Wanjawa.” Jananganjayi Bida Jisuswanyi, “Miku nganinjiyi durrijba nanankurri yajiyurri nanijba. Miku. Ngala baku barri bayngkani yuku nganinjija durrijba. Miku nganinjiyi nanijba durrijba nanankurri yajiyurri, ngala baku barri yuku.”
JOH 13:37 Mili ngajakayi Bidawanyi, “Mambuka, wanyingkanyi miku ningiyi durrijba nanijba. Wanyingkanyi. Birrirrinja ngaka, janybikanyi ngaka nganyi.”
JOH 13:38 Jananganjayi Jisuswanyi, “Nanda jangkurr nganyi, janybikanyi janganyingka ngaki, nanda duja kuna. Karungka ngayu duja jangkurranyi. Kujarraka barndayka janinji yanyba, miku nganinjimi jingkijba. Yanyba janinji yingkamukuyngka kujarraka barndayka, ‘Miku ngayimi jingkijba nanda Jisus.’ Nani barri janinji yanyba waluwa kayaja nanda julaki barrinani dalmurra munganawa kambalingijina.” Nani barri yanybayi Jisus nangangi Bidanyi. Barriwa.
JOH 14:1 Mili yanybayi Jisus yalungi kandimukuyngka, “Barriwa jangayu barlba, ngala mikujiyi marrala. Mikujiyi marrala, barlbangangi jangayu. Narri kuyu nangangi jangkurr Kudkanyi. Maruka narri muwa nangangi. Kuyu narri ngaki jangkurr marda.
JOH 14:2 Nanda yaji nangangi Buwakaya, nanda walkurra yaji. Jangayu jilajba nanankurri, yabimbiji barnda narringi nanaba. Duja ngayu yanyba narringi.
JOH 14:3 Janga jilajba yabimbiji barnda narringi nanaba, baki jangayu wijba. Janarrinya kuyu nanankurri. Janarri jungku nanaba ngakindu yurrngumba.
JOH 14:4 Narri jingkijba nanda yubarl jalija ngayu durrijba. Narri jingkijba nanda yubarl.” Barriwa.
JOH 14:5 Yanybayi kandi, niji nangangi Dumas. Yanyba nyuli, “Mambuka, miku nurrimi jingkijba nanda yaji jalija ninji jilajba nanankurri yajiyurri. Miku nurrimi jingkijba nanda yubarl jilaykanyi nanankurri. Mudumbanyi nurru. Mudumbanyi.”
JOH 14:6 Yanybayi Jisus, “Ngayu barrinani nanda yubarl jilaykanyi kingkarri Buwakayarri. Ngayu nanda duja yaji. Ngayu nayinda jala ngayu wankamba narrinya. Ngawamba nanamuku jala yalu kuyu ngaki jangkurr, jayalu jilajba kingkarri.
JOH 14:7 Jaliyanyi nganarri jingkijba, baki narriyanyi jingkijba Buwakanya ngaki. Nanginkardi janarri jingkijba ngaki Buwakanya, baki janarri najba ngaki Buwakanya.” Barriwa.
JOH 14:8 Yanybayi yingka kandi, niji nangangi Bilib, “Mambuka, minimbakiyi nurrunya nganyinkanyi Buwakaya. Janurru najba mankanyi, baki janurru mirnarrijba muwa, baki miku ninya nurriyi ngajaka mili.”
JOH 14:9 Yanybayi Jisus nangangi, “Bilib, jungku ngayi narrindu yurrngumba, ngala miku kuna nganinjiyi jingkijba. Jala nganarri najba, baki Buwakanya narri najba marda. Wanyingkanyi nganinji ngajaka, ‘Minimbakiyi nurrunya Buwakaya.’
JOH 14:10 Marda ninjimi kuyu nayinda jangkurr ngaki, ‘Ngayu jungkuka Buwakaya, nanganginyina kurduluna baki nyulu Buwakanya jungkuka ngakindu ngakinyina kurduluna.’ Nayinda jangkurr jala ngayu karungka narrinya, miku nayinda ngaki jangkurr. Ngala karuyi ngana Buwakayu yanybikanyi nayinda jangkurr. Buwakayu jala ngakindu, nyulu yabimbaka yaji.
JOH 14:11 Kuyukiyi nayinda jangkurr. Ngayu jungkuka nangandu Buwakaya nanganginyina kurduluna, baki nyulu Buwakanya jungkuka ngakindu ngakinyina kurduluna. Mankuwakiyi nayinda ngaki jangkurr, baki kuyukiyi ngaki jangkurr. Jaliyi miku narri kuyu nayinda ngaki jangkurr, baki mankuwakiyi nanda yaji jali ngayu yabimba, baki kuyukiyi ngaki jangkurr.
JOH 14:12 Ngayu karu narrinya nanginkanyi duja jangkurranyi. Nanda jala kuyu ngaki jangkurr, janyulu yabimba nanamannga yaji barrinani ngayu yabimbaka. Janyulu mili yabimba ngiruka yaji ngaki, walkurramirra yaji ngaki, jilajbangangi ngayu Buwakayarri.
JOH 14:13 Nanda jala nganarri ngajaka, baki narri nijarrijba ngaki niji, janga yabimba nanda yaji narringi. Baki yingkamukunyi jayalu najba nanda yaji, jalija ngayu yabimba narringi, baki jayalungka mankumanku Buwakaya. Jayalungka mankumanku Buwakaya, jalija yalu najba nanda ngiruka yaji, yabimba jalija ngayu narringi. Jayalungka yanyba kunyba jangkurr nangangi Buwakaya marda. Nyulu nanda walkurra mambuka, manjijba jali ngana.
JOH 14:14 Jalija nganarri ngajaka yajinyi, nijarriykanyi ngaki niji, jangayu yabimba nanda yaji narringi. Ngiruka yaji janga yabimba narringi, jalija nganarri ngajaka nanankanyi ngirukanyi yajinyi.
JOH 14:15 Jaliyi narri maruka muwa ngaki, janarri kuyu nanda yuwa ngaki, janarri durrijba ngaki yuwa.
JOH 14:16 Baki jangayu yanyba mududu nangangi Buwakaya narringi. Jangayu ngajaka Buwakanya, baki janarrinya wajba kandinyi jungunkanyi narrindu yurrngumba.
JOH 14:17 Janarrinya wajba kandinyi, ngarndunyi nanganginkanyi Kudkanyi. Nyulu yanybaka duja, nanda ngarndu Kudkanyi. Nanamuku miku jalimi yalu kuyu jangkurr ngaki, mikukimi manjijba ngarndu yalundurri Buwakayu. Miku yalimi jingkijba nanda ngarndu Kudkanyi. Ngala narri jingkijbangka nanda ngarndu Kudkanyi, jungkukangangi nyulu narrindu.
JOH 14:18 Barriwa jangayu yingijba narrinya. Ngala miku ngayiyi yingijba narrinya yurrngumba, narriman jungunkanyi nayiba. Jangayu wijba narrindurri.
JOH 14:19 Baku barri bijal, miku janganjalu najba yingkamukunyi, ngala yuku janganarri najba. Yuku janarri wankijba mili baku, wankijbangangi jangayu. Jangayu wanka jungku baki nanankardi barri janarri narri marda wanka jungku.
JOH 14:20 Nanamanji, jalija ngayu wanka jungku, janarri jingkijba nayinda jangkurr, ‘Ngayu nangandu, ngakinyina Buwakaya nanganginyina kurduluna, marda narri ngakindu ngakinyina kurduluna, baki ngayu narrindu narringinyina kurduluna marda.’ Nani janarri jingkijba nanamanji.
JOH 14:21 Nanda jala kuyu ngaki jangkurr, ngaki yuwa, jala jungku kunybana ngakinyina yuwana, nyulu maruka muwa ngaki kudanyu. Nanda jala maruka muwa ngaki, ngaki Buwakanya janyulu maruka muwa nangangi, marda jangayu ngayu maruka muwa nangangi. Jangaka minimba nangandurri.” Barriwa.
JOH 14:22 Yanybayi kandi Jisuskanyi, niji nangangi Judas, ngala miku nyuliya nanda yingka Judas Yiskariyud. Yinini nanda. Ngajaka nyuli Jisus, “Mambuka, yanka barri nganyingka minimba nurrungi, ngala miku nganyingka minimba yalungi jala yalu miku kuyu nganyi jangkurr. Yanka barri.”
JOH 14:23 Jananganjayi Jisuswanyi, “Nanda jala maruka muwa ngaki, nyulu jungkuka kunybana ngakinyina yuwana, baki ngaki Buwakanya nyulu marukangka muwa nangangi. Jangaliya ngaki Buwakanya jilajba nangandurri, jangaliya jungku nangandu kurduluna.
JOH 14:24 Nanda jaliyi miku maruka muwa ngaki, miku nyulimi jungku ngakinyina yuwana. Nayinda yuwa jala narri manku, miku nayinda ngaki jangkurr. Nayinda nangangi jangkurr buwakaya, jali ngana manjijba narrindurri.
JOH 14:25 Ngayu karungka narrinya nanginkanyi jangkurranyi ngala ngayu yuwaji narrindu.
JOH 14:26 Ngala nanda yingka kandi, nanda Kunyba Ngarndu Kudkanyi, jangayu ngajaka Buwakanya baki janyulu manjijba nanda Ngarndu narrindurri. Janyulu milidimba narrinya bukamba yajinyi nanangini Ngarnduwanyi. Janyulu milidimba narrinya, janarri mankuwa bukamba nayinda jangkurr ngaki.
JOH 14:27 Jangayu kandimba narrinya, baki janarri jungku mardumardu muwa. Mikuyaji kijinyi narrindu. Nani barri jangayu kandimba narrinya, ngala mikuwali yingkawanyi kandimba narrinya nani. Miku narringkiyi mankumanku. Mikujiyi marrala.
JOH 14:28 Narri mankuyi ngaki jangkurr jali ngayu karu narrinya barrin, ‘Jangayu barlba, baki baku jangayu wijba narrindurri.’ Narri mankuyi nanda jangkurr. Jaliyi narri maruka muwa ngaki, baki janarri yabijba muwa, barlbangangi jangayu ngakinkurri Buwakayarri. Ngaki Buwakanya, nyulu walkurramirra ngaki.
JOH 14:29 Ngayu karungka narrinya nanginkanyi jangkurranyi waluwa jangayu barlba. Baki nanamanji jalija ngayu barlba, janarri jingkijba nayinda jangkurr, janarri kuyu nayinda jangkurr ngaki. Barriwa.
JOH 14:30 Nanda yingka mambuka badajbangka, ngala miku nyulu ngaki mambuka. Mambuka nyulu yalungi jala yalu miku kuyu ngaki jangkurr. Nyulu badajbangka, baki miku janga mili yanyba kaja jangkurr narringi. Nanda mambuka, miku nyulu ngaki mambuka. Miku ngayimi yabimba nanda jala nyulu karu,
JOH 14:31 ngala yabimba ngayu nanda jala ngana karu Buwakayu, baki bukambijunyi ngananjalu jingkijba, ngayu marukangka muwa nangangi Buwakaya. Marukangka ngayu muwa nangangi. Barriwa jangambala barlba.”
JOH 15:1 Mili yanybayi Jisus yalungi kandimukuyngka, “Mankumanku narringka wanjirranyi krayibkanyi. Karrinjarrijba nyuli jambana wanjirr krayibkanyi. Manjijba yalungki balalawalamuku. Marrimbayi nanda barriki. Jardijba yali walkurra. Kajamuku balalawalamuku, yalu kajayudi mamayudi, ngala kujajarra balalawala, mikuyaji mamanyi yalungi. Nanangini lalanbawarranyi, wudumba nyuli nanda mama balalawalananyi, ngala nyuli karlba nanda balalawala jala mikuyaji mamanyi. Karlba nyuli nanda balki balalawala landurrnanyi. Baki bukamba kunyba nanda wanjirr krayibkanyi. Mikuyaji balkinyi balalawalanyi nangandu. Birrirrinja nanda wanjirr jardiykunumbikanyi mili mama. Ngayu barrinani nanda landurr krayibkanyi, baki ngaki Buwakanya, nyulu barrinani nanda lalanbawarr krayibkanyi, baki narri, narri barrinani nanda balalawala. Ngayu barrinani nanda landurr, ngala narri barrinani nanda kaja balalawala, jala jardijba nanamunanyi yingamalinanyi landurrnanyi. Narri jungku kunyba Kudkanyi, milidimbangangi ngayi narrinya jungunkanyi kunyba yurrngumba. Birrirrinja narringka wakinkanyi kunyba ngaki. Jala narri waki Kudkanyi, jala narri yabimba kunyba yaji Kudkanyi, baki jungku narri barrinani nanda balalawala kajayudi mamayudi. Narri barrinani nanda kaja balalawala. Ngayu barrinani nanda landurr, baki narri kili ngakindu yurrngumba. Jaliyi balalawala dalyamba nangka landurrnanyi, baki janangka janyba. Mikuyaji mamanyi nangandu. Nani barri, jaliyi narri kili ngakindu, jaliyi narri ngayangayijba ngakinkanyi jangkurranyi, baki janarri jungku kunyba Kudkanyi. Jaliyi narri durrijba ngaki jangkurr, baki jangayu wajba narrinya bukamba yajinyi, jala nganarri ngajaka. Jangayu wajba narrinya bukamba yajinyi. Ngala jaliyi narri miku jungku kunybana yuwana kudkanyi, jaliyi narri miku waki Kudkanyi, baki narri barrinani nanda balki balalawala, mikuyaji mamanyi nangandu. Nanangini lalanbawarranyi janyulu karlba nanda balki balalawala landurrnanyi. Janyulu karlba, baki janyulu janyba nanda balki balalawala nanganbunanyi. Baki baku janyulu wudumba nanda balki balalawala jala duku. Janyulu wudumba, baki janyulu janyba jangurri. Yajbaja nanda duku balalawala janguwanyi. Ngaki Buwakanya, nyulu barrinani nanda lalanbawarr krayibkanyi. Janyulu dulaba ngakinbunanyi nanamuku, jungku jala yalu balki nangangi Kudkanyi. Janyulu dulaba yalunya ngakinbunanyi. Miku jayalu jungku wanka nangandu yurrngumba. Nani barri, jaliyi narri miku durrijba ngaki jangkurr, baki janarri jungku barrinani nanda balki balalawala. Janyulu manjijba narrinya ngakinbunanyi Kudwanyi, baki baku janyulu janyba narrinya jangurri.
JOH 15:8 Jaliyi narri waki kudanyu Kudkanyi, jaliyi narri yabimba yaji Kudkanyi, baki yingkamukunyi jayalu jingkijba Buwakanya, nyulu jungkuka walkurra mambuka, walkurramirra. Jaliyi narri waki kudanyu nangangi Kudkanyi, baki janyulu lalanba narrinya, nanganginmuku wakiwarrmuku. Baki yingkamukunyi jayalu jingkijba Buwakanya, nyulu jungkuka walkurra. Nani barri jayalu jingkijba, jalija yalu najba narrinya yabimbikurri ngiruka yaji. Jaliyi narri waki kudanyu, baki janarri jungku ngakinmuku kandimuku.
JOH 15:9 Jingkijba narri ngaki Buwakanya, nyulu marukangka muwa ngaki kudanyu. Nani ngayu marukangka muwa narringi. Mankuwa nganarri yurrngumba, ngayu maruka muwa narringi. Mikujiyi mamanumba.
JOH 15:10 Baki jaliyi narri ngayangayijba ngakinkanyi jangkurranyi, jaliyi narri durrijba ngaki jangkurr, baki jangayu yurrngumba maruka muwa narringi. Nani barri, ngaki Buwakanya nyulu marukangka muwa ngaki yurrngumba. Ngayi yurrngumba ngayangayijba nanganginkanyi jangkurranyi, baki nyulu marukangka muwa yurrngumba ngaki.
JOH 15:11 Jali ngayu jungka nayiba jambana baki ngayi mirnarrijba muwa. Mirnarrijba ngayi muwa, yabimbangangi ngayi bukamba yaji, jali ngana jirrinyba ngakinyi Buwakayu yabimbikanyi yaji. Yabimba ngayi nanda bukamba yaji, baki ngayi mirnarrijba muwa. Nani barri, jangayu mirnarrijba muwa narringi, jaliyi narri yabimba bukamba yaji, jali ngayu jirrinyba narrinya. Jaliyi narri yabimba nani, baki narri mirnarrijba muwa marda.
JOH 15:12 Barrin ngayi jirrinyba narrinya buyingkiyngkanyi yuwanyi. Jirrinyba ngayi narrinya nani, marda narringkimi maruka muwa. Marda narringkimi maruka muwa, barrinani ngayu marukangka muwa narringi.
JOH 15:13 Jaliyi nganinyi maruka muwa nanganginmukuyngka kandimukuyngka, baki janyulu wajba yalunya yajinyi, janyulu yabimba yaji yalungi. Nanda nganinyi nyulu kunyba. Ngala jaliyi nyulu maruka muwa kudanyu yalungi, baki janangka birrirrinja janybikanyi nangka yalungi. Jaliyi nangka birrirrinja yabimbikanyi yaji nani yalungi, nyulu kunybamirra.
JOH 15:14 Jungku narri ngakinmuku kandimuku, jaliyi narri ngayangayijba ngakinkanyi jangkurranyi. Jaliyi narri yurrngumba durrijba ngaki jangkurr, baki janarri yurrngumba ngakinmuku kandimuku.
JOH 15:15 Miku ngayiyi mili karu narrinya ngakinmuku wakiwarrmuku. Miku. Nanangini mambukawanyi, miku nyulimi karu nangangi wakiwarrmuku nanankanyi jalija nyulu yabimba. Miku nyulimi karu yalunya nanankanyi. Ngawamba nyulu karu kandimuku nangangi nanankanyi jalija nyulu yabimba. Miku narriyi mili jungku ngakinmuku wakiwarrmuku, ngala narri ngakinmuku kandimuku. Narri ngakinmuku kandimuku, karungangi ngayi narrinya bukamba yajinyi. Karu ngayi narrinya bukamba yajinyi jali nyulu karu ngana ngakinyi Buwakayu. Narri ngakinmuku kandimuku, karungangi ngayi narrinya bukamba nani.
JOH 15:16 Miku nganarriyanyi yarrijba, narri jungunkanyi ngakinmuku kandimuku. Miku. Ngala ngayi yarrijba narrinya, narri jungunkanyi ngakinmuku kandimuku. Ngayu karungka narrinya yabimbiji ngiruka yaji. Jalija narri yabimba nanda kaja ngiruka yaji, baki janarri barrinani nanda kaja balalawala krayibkanyi, kajayudi mamayudi. Ngujbulijbangka nanda mama krayibkanyi. Ngala nanda ngiruka yaji jala narri yabimba, nanda barrinani nanda mama jala mikukimi ngujbulijba. Jalija narri karu yingkamuku ngaki, baki kudiyawanyi jayalu kuyu narringi jangkurr ngaki. Jayalu durrijba ngaki jangkurr yurrngumba. Nanda jala yalu yabimba, nanda jungkuja yurrngumba. Jaliyi narri waki kudanyu ngaki, jaliyi narri yabimba ngiruka yaji ngaki, baki yuku narri ngajaka Buwakanya yajinyi, baki janyulu wajba narrinya nanankanyi yajinyi ngakinyi Buwakayu. Janyulu wajba narrinya bukamba yajinyi jalija narri ngajaka. Janyulu wajba yajinyi, yabimbangangi narri yaji ngaki.
JOH 15:17 Mili ngayu jirrinyba narrinya, maruka narringka muwa. Narringka maruka muwa. Marda maruka narri yalungi marda, yingkamukuyngka yurrngumba.”
JOH 15:18 Mili nyuli milidimba yalunya Jisuswanyi, “Mankuwa narri mili nayinda ngaki jangkurr. Nganjali ngirra yingkamukunyi. Waluwa nganjali ngirra kudanyu. Baki jayalu ngirra narrinya marda, durrijbangangi narri ngaki jangkurr, jungkungangi narri ngakinmuku kandimuku.
JOH 15:19 Jaliyanyi narri yurlwa ngakinkanyi jangkurranyi, baki yaliyanyi mirnarrijba muwa narringi. Ngala miku narriyanyi yurlwa ngakinkanyi jangkurranyi. Ngayangayijba narri ngaki. Yarrijba ngayi narrinya jungunkanyi ngakinmuku kandimuku. Yarrijba ngayi narrinya, baki miku nganarrimi ngirra, ngala narri maruka muwa ngaki. Ngala jayalu ngirra narrinya kudanyu, marukangangi narri muwa ngaki.
JOH 15:20 Mankuwakiyi nanda jangkurr, karu jali ngayu narrinya barrin. Mankuwakiyi nanda jangkurr wakiwarrayngka. ‘Miku nanda wakiwarr mili walkurra nanganginkanyi mambukanyi, ngala nyulu bayakarda. Yurrngumba nanda mambuka jungkuka walkurra nanganginkanyi wakiwarrayngka.’ Nani barri ngayi karu narrinya barrin. Narri wakiwarr ngaki. Miku narri mili walkurra ngaki. Jaliyi yalu ngayangayijba ngakinkanyi jangkurranyi, baki jayalu ngayangayijba narringinkanyi jangkurranyi marda. Ngala jaliyi yalu yabimba kiji ngaki, baki jayalu yabimba kiji narringi marda. Jayalu yabimba kiji narringi, narringangi ngakinmuku kandimuku. Miku yalimi jingkijba Kud, manjijba jali ngana milidimbikanyi yalunya. Miku yalimi jingkijba Kud. Yalu yurlwa nangangi Kudkanyi, baki nani nanankardi jayalu yurlwa narringi marda. Jayalu yabimba kiji narringi.
JOH 15:22 Wabula miku yalungkiyanyi jingkijba jungunkanyi balkina yuwana Kudkanyi. Ngamu yali jungku kunyba Kudkanyi. Miku yalungkiyanyi jingkijba nanankanyi nani wabula. Ngala ngayi milidimba yalunya jungunkanyi kunyba Kudkanyi, baki nanijba marda yalungkimi jingkijba, yalu jungkuka balkina yuwana Kudkanyi. Marda yalungkimi jingkijba nani, milidimbangangi ngayi yalunya. Ngala yuwaji yalu jungkuka balkina yuwana Kudkanyi. Najba yali nanda ngiruka yaji, yabimba jali ngayu. Mikuwali yingkawanyi yabimba ngiruka yaji barrinani ngayu yabimbaka. Miku. Jingkijba nganjalu, nyuli manjijba ngana Kudwanyi, yabimbangangi ngayi nanda ngiruka yaji. Jingkijba nganjalu, manjijba ngani Kudwanyi, ngala yuwaji nganjalu ngirra. Jala nganjalu ngirra, nani yalu ngirra ngaki Buwakanya. Yalu ngirra ngalinya. Baki jaliyi yalu ngirra ngalinya, baki yalu jungku balkina yuwana Kudkanyi.
JOH 15:25 Nanda jangkurr duja, yanyba jali nanda wankalanyi. Barrabarruji nyuli yarrijba jangkurr najana Kudkanyi nayi, ‘Miku ngayiya yabimba yaji, nganjali ngirrankanyi. Ngala muningka nganjali ngirra.’ Duja nanda wankalanyi jangkurr.”
JOH 15:26 Mili yanybayi Jisus yalungi, “Nanda Kunyba Ngarndu Kudkanyi, janyulu badajba nanginkurri. Jangayu manjijba nanda Kunyba Ngarndu narrindurri. Nyulu duja nanda Ngarndu. Jangayu manjijba nanda Kunyba Ngarndu wayka nanganbunanyi Buwakayananyi. Baki nanangini Kunybawanyi Ngarnduwanyi Kudkanyi, janyulu karu narrinya ngaki. Janyulu karu narrinya ngaki.
JOH 15:27 Baki janarri narri marda karu yingkamuku ngaki. Janyulu karu yalunya ngaki, Kunybawanyi Ngarnduwanyi Kudkanyi, marda janarri karu yalunya ngaki marda. Janarri karu yalunya, jungkungangi narri ngakindu yurrngumba wabulinyi. Jali wabula jalannga ngayu milidimba yalunya, baki narri jungkuyi ngakindu. Yurrngumba narrili jilalajba ngakindu. Yurrngumba narrili najba nanda yaji, jalili ngayu yabimba. Baki janarri marda karu yalunya ngaki.” Barriwa. Nani barri milidimbayi yalunya Jisuswanyi.
JOH 16:1 Baki mili yanybayi Jisus yalungi, nanganginmukuyngka kandimukuyngka. “Yanyba ngayi bukamba nayinda jangkurr narringi, baki nanankardi barri miku narringkiyi yangkalamba ngakinbunanyi balkinyi nanankanyi yajinyi. Jaliyi narri kuyu nayinda ngaki jangkurr, baki miku narringkiyi yangkalamba.
JOH 16:2 Jayalu manjijba narrinya Jumukunyi. Jayalu manjijba narrinya kajananyi jurjnanyi. Miku jayalu nulijba narringi jungunkanyi yalundu jurjina. Jayalu yabimba kiji narringi. Jayalu nulijba kurdanbikanyi narrinya. Jaliyi nganinyiwanyi kurdanba yingamali narringi, baki ngamu nyulu jungkuka kunyba Kudkanyi. Ngamu nyulu wakingka kunyba Kudkanyi, jaliyi nyulu kurdanba yingamali narringi.
JOH 16:3 Miku yalimi jingkijba Buwakanya, baki miku nganjalimi jingkijba. Jayalu yabimba kiji narringi, mikungangi yalimi jingkijba ngalinya Kud.
JOH 16:4a Marda narrimi mankuwa nanda yaji bukamba, karu jali ngayu narrinya. Marda narrimi mankuwa nanda yaji. Jalija yalu yabimba kiji narringi, baki marda narrimi miku marrala yajinyi. Janarri miku marrala, jalija narri mankuwa ngaki jangkurr.
JOH 16:4b Miku ngayiyanyi karu narrinya nanginkanyi jangkurranyi wabula ngala ngayi yuwaji jungku narrindu. Miku ngayiyanyi karu narrinya wabula. Ngala nayimanji jangayu barlba nangandurri, manjijba jali ngana nanginkurri. Jangayu barlba nangandurri. Ngala miku nganarriyi ngajaka, ‘Wanjawa janinji barlba. Wanjawa.’ Miku nganarriyi ngajaka nani.
JOH 16:6 Ngala nayimanji barri ngayu karu narrinya, jangayu barlba, baki ngindu narri muwa. Ngindu narri muwa kudanyu, barlbangangi jangayu.
JOH 16:7 Ngala yanyba ngayu duja jangkurranyi. Jangayu barlba, ngala kunyba nanda nani narringi. Nanda kunyba narringi, badajbajangangi Kunyba Ngarndu Kudkanyi narrindurri. Jaliyi ngayu kili narrindu, baki mikuwali badajba Kunyba Ngarndu Kudkanyi. Ngala jangayu barlba, baki jangayu manjijba nanda Ngarndu narrindurri bayngkani jalija ngayu barlba.
JOH 16:8 Jalija nyulu badajba kingkarrinya, nanda Kunyba Ngarndu Kudkanyi, janyulu milidimba yingkamuku yalunginkanyi balkinyi yajinyi. Miku yalimi jingkijba nanda balki yaji yalungi kurdulunyi, ngala janyulu milidimba yalunya yalungi balkinyi yajinyi. Janyulu milidimba yalunya jungunkanyi kunyba Kudkanyi, jungunkanyi yurlurrmba yuwana Kudkanyi. Janyulu milidimba yalunya yalu jungku balkina yuwana, mikungangi yalimi kuyu ngaki jangkurr. Janyulu milidimba yalunya, yuku yaluja jungku yurlurrmba, barlbangangi jangayu Buwakayarri. Janyulu milidimba yalunya Kudkanyi, karrinjarrijba janyulu bukambiju yalunya walu nangandu yanybikanyi yalungi. Ngala wabula nyuli ningkijba Sayidin Kudwanyi, baki yanybayi Kud nanganginkanyi balkinyi yajinyi Sayidinkanyi. Janyulu manku walkurra kiji nangangi Sayidinkanyi.
JOH 16:12 Mili jangkurr yuku ngayu karu narrinya, ngala miku narriyi jingkijba nanda mili jangkurr nanijba, baki miku ngayiyi karu narrinya. Ngala baku barri janyulu milidimba narrinya mili yajinyi Kunybawanyi Ngarnduwanyi Kudkanyi. Janyulu milidimba narrinya mili baku.
JOH 16:13 Badajbaja nanda Kunyba Ngarndu Kudkanyi narrindurri. Baki janyulu minimba narrinya duja yajinyi. Janyulu milidimba narrinya bukamba duja yajinyi. Janyulu karu narrinya bukamba nanankanyi jangkurranyi, jalija ngayu yanyba nangangi. Janyulu karu narrinya ngakinkanyi jangkurranyi jungunkanyi kunybana yuwana Krayiskanyi. Miku nyuliyi karu narrinya nanganginkanyi jangkurranyi. Janyulu karu narrinya ngawamba ngakinkanyi jangkurranyi. Nani barri janyulu minimba narrinya ngaki, ngayu walkurra mambuka bukambijuyngka.
JOH 16:15 Janyulu karu narrinya ngakinkanyi jangkurranyi. Nanda jangkurr ngaki, nanda barrinani nanamannga jangkurr Kudkanyi. Jangaliya Kud jungku malumba. Jangaliya waki malumba. Jangaliya yabimba yaji bukamba malumbijunyi. Baki nanda jangkurr, yanyba jala ngayu, nanda barrinani nanamannga jangkurr nangangi Buwakaya.
JOH 16:16 Winyurru barri miku nganarriyi najba, ngala baku barri nganarrija najba.” Nani yanybayi Jisus yalungi kandimukuyngka.
JOH 16:17 Ngala ngajaka yalungki kudiyanymuku nanganginmuku kandimuku, “Wanyi nayi jangkurr yanybaka. Wanyi. ‘Winyurru barri miku nganarriyi najba, ngala baku barri nganarrija najba.’ Wanyi nanda jangkurr. Miku ngambalimi jingkijba nanda jangkurr naykanyi Jisus. Miku ngambalimi jingkijba nangangi jangkurr. Baki mili nanda nyuli yanyba, ‘Barlba jangayu Buwakayarri.’ Miku ngambalimi jingkijba nanda jangkurr marda.” Nani yalungki ngajaka.
JOH 16:19 Jingkijba nyuli yalunya Jisuswanyi. Jingkijba nyuli yalunya ngajakankurri yalungki nani. Baki nyuli ngajaka yalunya, “Yanyba ngayi, ‘Winyurru barri miku nganarriyi najba, ngala baku barri nganarrija najba.’ Ngajaka kuna narringki nanankanyi jangkurranyi.
JOH 16:20 Yanyba ngayu duja jangkurr. Janarri ngindu muwa kudanyu mirlarryudi, ngala yingkamuku jala yalu miku ngakinmuku, jayalu mirnarrijba muwa jalija ngayu miku mili jungku nayiba. Nayimanji jayalu mirnarrijba muwa barlbangangi jangayu, ngala narri janarri ngindu muwa. Nayimanji barri janarri ngindu muwa ngaki, ngala baku barri mili janarri mirnarrijba muwa ngaki.
JOH 16:21 Jalija winyurru barri nangka binandaba jibarri bardardanyi, baki nyulu ngindu. Ngindu nyulu, linjungangi janyulu muwa winyurru. Ngala kamu barri, jalija nangka binandaba bardardanyi, baki mirnarrijbaja muwa bardardanyi. Mirnarrijbaja, jungkungangi janyulu bardardayudi. Janyulu mamanumba nanda biwi. Janyulu mamanumba, jungkungangi janyulu bardardayudi.
JOH 16:22 Jungku janarri barrinani nanda jibarri. Ngindu narri muwa, barlbangangi jangayu. Ngala baku mili janarri mirnarrijba muwa, wijbangangi jangayu narrindurri. Janarri mirnarrijba muwa jalija ngayu wijba. Mikuwali yingkawanyi yabimba narrinya mili ngindunkanyi muwa. Janarri mirnarrijba muwa yurrngumba. Janarri jungku barrinani nanda jibarri bardardayudi, mirnarrijba jala muwa. Janarri mirnarrijba muwa, wijbangangi jangayu narrindurri.
JOH 16:23 Nanamanji jalija ngayu wijba, miku nganarriyi ngajaka yajinyi. Karungka ngayu narrinya duja jangkurranyi. Nanamanji jalija narri yanyba mududu Buwakaya, jalija narri yililikajba Buwakanya yajinyi, baki janyulu jananganja narrinya. Janyulu yabimba nanda jalija narri yililikajba Buwakanya yabimbikanyi yajinyi narringi. Janyulu jananganja narrinya, kuyungangi narri ngaki jangkurr yurrngumba, jungkungangi narri ngakinmuku kandimuku.
JOH 16:24 Wabula nganarri ngajaka yajinyi, marda narri ngajaka Buwakanya yajinyi, jungkungangi narri ngakinmuku kandimuku. Jalija ngayu barlba, marda narrimi yililikajba Buwakanya yajinyi, jungkungangi narri ngakinmuku kandimuku, ngayangayijbangangi narri ngakinkanyi jangkurranyi. Marda narrimi yililikajba Buwakanya nanankanyi yajinyi jala narri nulijba. Jaliyi narri yililikajba Buwakanya, jungkungangi narri ngakinmuku kandimuku, baki janyulu jananganja narrinya. Janyulu yabimba nanda jala narri yililikajba, baki janarri mirnarrijba muwa yurrngumba.”
JOH 16:25 “Nanijba barri muningka ngayi karu narrinya nayinda jangkurr, ngala miku narriyi jingkijba bukamba nayinda jangkurr. Marda narringkimi mankumanku nanginkanyi jangkurranyi, jardibirringangi nayinda jangkurr jingkiykanyi. Ngala winyurru miku jangayu mili yanyba narringi muningka. Jangayu karu narrinya yurlurrmba nayinda jangkurr Buwakaya, narri jingkiykanyi nayinda jangkurr Buwakaya.
JOH 16:26 Nanamanji janarri ngajaka Buwakanya yajinyi, ngala miku jangayu ngajaka ngaki Buwakanya yajinyi narringi. Janarri narri ngajaka narriman Buwakanya narringinkanyi yajinyi, jungkungangi narri ngakinmuku kandimuku, durrijbangangi narri ngaki jangkurr.
JOH 16:27 Janarri ngajaka Buwakanya yajinyi, marukangangi nyulu muwa narringi. Nyulu maruka muwa narringi, marukangangi narri muwa ngaki, kuyungangi narri nayinda jangkurr ngaki, ‘Manjijbayi ngana Kudwanyi.’ Kuyu narri nayinda jangkurr ngaki, maruka narri muwa ngaki, baki nanankardi barri Kud nyulu maruka muwa narringi.
JOH 16:28 Nanda jangkurr duja. Badajba ngayi nanginkurri yajiyurri nanganbunanyi Buwakayananyi. Badajba ngayi nanganbunanyi. Ngala nayimanji jangayu yingkijba nayinda yaji, baki jangayu wijba Buwakayarri.” Barriwa. Nani yanybayi Jisus yalungi.
JOH 16:29 Baki yanyba yali nanganginmuku kandimuku nangangi Jisuskanyi, “Mambuka. Yuku nurru jingkijba nanda jangkurr nganyi. Miku ninjimi yanyba muningka.
JOH 16:30 Nanijba nurru jingkijba ninya, ninji jingkijbangka bukamba yaji. Jaliyi nurrungka mankumanku jangkurranyi, ngajakankanyi ninya, miku nurriyi ngajaka ninya nanankanyi jangkurranyi. Miku nurriyi ngajaka ninya, jingkijbangangi ninji nanda jangkurr jala ninya nurrimi ngajaka. Jananganja ninji nurrunya waluwa nurri ninya ngajaka. Kuyu nurru nganyi jangkurr, jingkijbangangi ninji nanda jangkurr jala nurrungka mankumanku nganyi. Nanda jangkurr, badajba ninji nanganbunanyi Kudnanyi, nanda duja jangkurr. Manjijba ninyi Kudwanyi.” Barriwa.
JOH 16:31 Jananganjayi yalunya Jisuswanyi, “Kuyu kuna narri ngaki jangkurr nanijba. Yu, narri kuyu ngaki jangkurr. Nanda kunyba barri.
JOH 16:32 Ngala winyurru janarri jarrbalijba. Jarrbalijba janarri. Yingka barlbaja nanganginkurri yajiyurri, baki yingka nanganginkurri yajiyurri. Janarri jungku yinini yinini narringinyina barndana. Nani barri janarri jarrbalijba. Janganarri yingijba. Jangayu jungku nayiba ngayuman. Ngala miku ngayiyi jungku nyubana, jungkukangangi ngaki Buwakanya ngakindu yurrngumba.
JOH 16:33 Jayalu manku kiji narringi, ngala janarri jungku mardumardu muwa, karungangi ngayi narrinya nanginkanyi jangkurranyi. Janarri jungku mardumardu muwa. Jangayu jungku narrindu kurduluna yurrngumba. Yalu mankuka kiji ngaki. Kaja kiji yalu mankuka ngaki, ngala jangayu wakaramba yalunya. Jangayu jungku mambuka yalungi, jala miku yalimi maruka muwa Kudkanyi.”
JOH 17:1 Jali nyulu yanyba Jisus bukamba nanda jangkurr kandimukuyngka, baki ningkijbayi Jisus kingkarri lalijiyurri. Ningkijba nyuli kingkarri, baki yanyba nyuli kingkarri nangangi Kudkanyi, “Buwakanya, ngayu ngajaka ninga, ninjija minimbiji yalunya wandijiyana, ngayu jungku nganyi jandanyi, ngayu walkurra mambuka. Baki jaliyi yalu jingkijba ngana, ngayu walkurra mambuka, baki jayalu jingkijba ninya, ninji walkurra mambuka marda.
JOH 17:2 Baki jangayu wankamba yalunya, jungunkanyi niyandu kingkarri lalijina. Jangayu wankamba yalunya, yarrijbangangi nganinji jungunkanyi walkurra mambuka yalungi wandijiyana. Jangayu wankamba mili yalunya, jalija yalu durrijba ngaki jangkurr. Yurrngumba yalu durrijba ngaki jangkurr, yarrijbangangi ninji yalunya ngaki. Yarrijba ninji yalunya durriykanyi ngaki jangkurr.
JOH 17:3 Jangayu mili wankamba yalunya, baki jayalu jingkijba niyanya. Jayalu jingkijba ninga, ngawamba ninji duja Kud, marda jayalu jingkijba ngana, ngayu Jisus Krayis, nanda jali ninji manjijba.
JOH 17:4 Yabimba ngayi nanda kaja yaji jali nganinji karu nanankanyi yabimbiji. Yabimba ngayi bukamba nani. Barriwa. Baki jayalu jingkijba ninya, ninji walkurra Kud yalungi wandijiyana, wakingangi ngayi nani barri. Barriwa.
JOH 17:5 Jingkijba ngayu nayinda yaji. Winyurruwa jangaka janyba. Baki ngayu ngajaka ninga, jangayu jungku mambuka nganyindu kingkarri. Janungkala jungku malumba, barrinani wabula nungkala jungkuyi malumba mambukawuya, waluwa nganinji manjijbayi wayka jambarri. Ngayu ngajaka ninga, janungkala jungku malumba barrinani wabula kamambarra, jali nungkala yabimba bukamba yaji wandijiyana. Barriwa.
JOH 17:6 Nanamuku nganinyimuku jali yalu maruka muwa nganyi, ninji yarrijba yalunya ngaki. Yalu ngakinmuku kandimuku. Karu ngayi yalunya nganyi, baki jingkijba yalu ninga, ngayangayijba yalu nganyinkanyi jangkurranyi.
JOH 17:7 Baki nayimanji yalu jingkijba ngaki jangkurr. Nganinji karu nanankanyi jangkurranyi, ngayu karunki yalunya. Bukamba nanankanyi jangkurranyi, karu jala ngayi yalunya, nanda nganyi jangkurr. Yalu jingkijba nanda nganyi jangkurr.
JOH 17:8 Karu ngayi yalunya nanankanyi nganyingkanyi jangkurranyi, baki yali kuyu nganyi jangkurr. Kuyu yali nganyi jangkurr, karu jali ngayu yalunya. Jingkijba yalu nayinda duja jangkurr, ‘Badajba ngayi nganyinbunanyi, nganinji manjijbayi yalundurri.’ Kuyu yali nayinda jangkurr ngaki.
JOH 17:9 Ngayu karungka ninga yalungi. Yalu nganyinmuku jandanyimuku. Yingkamukunyi jala miku yaliyanyi kuyu nganyi jangkurr, miku ningimi karu yalungi. Ngala nanginmuku ngakinmuku kandimuku, yali kuyu nganyi jangkurr, yalu jungku kunyba nganyi nanijba. Ninji walkurra mambuka yalungi, baki ninji yarrijbayi yalunya ngakindurri. Jungku ngayu marda, walkurra mambuka yalungi. Baki ninga ngajaka yalungi, ninjija lalanbiji yalunya. Baki jayalu milidimba yingkamuku ngaki, ngayu mambuka bukambijuyngka wandijiyana.
JOH 17:11 Winyurruwa jangayu barlba nganyindurri. Miku jangayu mili jungku nayiba jambana. Miku jangayu jungku mili yalundu kandimukunyina ngakinyina. Jayalu jungku yaluman. Buwakanya, ninji kudukudu. Baki janinga ngajaka kuna, janinji lalanba ngakinmuku kandimuku. Lalanbakiyi yalunya. Marrimbakiyi yalunya mardarda, jungkungangi ninji ngiruka. Baki jayalu jungku yurrngumba ngiruka marda malumbiju, barrinani nungkala jungku ngiruka malumbiju.
JOH 17:12 Wabula ngayili jungku yalundu. Lalanba ngayili yalunya, yabimbangangi nganinji ngiruka lalanbikanyi yalunya. Kudanyu ngayili lalanba yalunya bukambiju. Ngala yingamali nyuli yingijba ngakindu. Jalija nangka janyba nanda yingamali, baki miku nyuliyi jungku mili wanka nganyindu. Yingkijba nyuli ngakindu. Nani yarrijbayi jangkurr nganyinyina najana wankalawanyi. Barrabarruji nyuli yarrijba nanda duja jangkurr nanankanyi yingamaliyngka, jalija yingijba ngakindu nanijba.
JOH 17:13 Winyurruwa jangayu barlba nganyindurri, ngala nanijba ngayu yuwaji jungku nayiba jambana. Ngayu yanybaka nganyi, baki nanginmuku kandimuku ngakinmuku, yalu nayiba ngakindu. Yalu mankuka nayinda jangkurr. Ngayu ngakaja ninya, janinji lalanba yalunya, baki jayalu mirnarrijba muwa. Jayalu mirnarrijba muwa, barrinani ngayu mirnarrijba muwa, jingkijbangangi ninyalu, janinji lalanba yalunya yurrngumba.
JOH 17:14 Karu ngayi yalunya nganyingkanyi jangkurranyi. Ngala yingakmukunyi yalunjali ngirra ngakinmuku kandimuku, durrijbangangi yali nganyi jangkurr. Ngala nanamukunyi yingkamukunyi, durrijba yali yalungi balki yuwa. Miku ngayimi durrijba yalungi yuwa, baki ngakinyi kandimukunyi, miku yalimi durrijba nanda balki yuwa yalungi yingkamukuyngka. Baki nanankardi barri yalunjalu ngirra ngakinmuku kandimuku, mikungangi yalimi durrijba nanda balki yuwa.
JOH 17:15 Miku ninyimi ngajaka ninya, ninjija dulaji yalunya yalunbunanyi balkimukunanyi. Miku ninyimi ngajaka nani yalungi. Ngala ngayu ngajaka ninya, ninji lalanbiji yalunya, ninji marrimbiji yalunya mardarda. Baki nanangini balkiwanyi wuwarrwanyi, nanangini Sayidinwanyi, miku yalunyiyi yangkalamba ngakinbunanyi yuwananyi.
JOH 17:16 Miku ngayimi durrijba nanda balki yuwa yingkamukuyngka, baki ngakinyi kandimukunyi, miku yalimi durrijba nanda balki yuwa. Durrijba yalu nganyi yuwa. Nanda yuwa nganyi, nanda yinini kunyba yuwa.
JOH 17:17 Manjijbayi nganinji jambarri milidimbikanyi, baki nani ngayu manjijba yalunya, yalu milidimbikanyi yingkamuku. Ngala janinji marrimba yalunya mardarda, miku yalu yabimbikanyi balki yaji, baki jayalu waki nganyi. Jayalu durrijba nganyi jangkurr, nanda duja jangkurr.
JOH 17:19 Nani jangayu waki nganyi. Jangayu yurlwa yingkamukuyngka, ngala jangayu durrijba nganyi jangkurr yurrngumba. Baki jayalu waki nganyi. Jayalu durrijba nganyi jangkurr, jingkijbangangi nganjalu, ngayu durrijba nganyi jangkurr. Nani barri marda jayalu durrijba nganyi jangkurr yurrngumba.
JOH 17:20 Miku ngayimi yanybaka nganyi ngawamba nanginmukuyngka, ngakinmukuyngka kandimukuyngka. Ngala yanybaka ngayu nganyi marda yingkamukuyngka. Yanybaka ngayu nganyi yalungi yingkamukuyngka, jalija yalu marda manku nganyi jangkurr. Ngakinmukunyi kandimukunyi jayalunjalu milidimba nganyingkanyi jangkurranyi. Baki kudiyanymukunyi jayalu kuyu nanda nganyi jangkurr. Yanybaka ngayu nganyi marda yalungi marda kudiyanymukuyngka, kuyu jalija nanda nganyi jangkurr baku.
JOH 17:21 Buwakanya, yanyba ngayu nganyi yalungi, baki jayalungka mankumanku nanamannga jangkurr. Nani barri niyangka mankumanku nanamannga jangkurr. Mankumanku nganyingka nanamannga jangkurr, baki mankumanku ngaka nanamannga jangkurr. Nani niyangka mankumanku nanamannga jangkurr. Ngayu yanybaka nganyi yalungi, jayalungka marda mankumanku nanamannga jangkurr. Baki yingkamukunyi, jalija yalunjalu najba mankumankunkurri yalungka nanamannga jangkurr, jayalu jingkijba, nganinji manjijbayi nanginkurri jambarri.
JOH 17:22 Yurrngumba ngayi yabimba nanda yaji jali nganinji karu. Yurrngumba nungkala waki malumbiju. Nani barri ngakinyi kandimukunyi jayalu yabimba nanda yaji jalija ninji karu yalunya. Jayalu waki malumbiju niyandu. Jangambala malumba waki bukambiju.
JOH 17:23 Niyangka mankumankuka nanamannga jangkurr. Ninji jungkuka ngakinyina kurduluna. Ngayu jungkuka nganyinyina kurduluna, marda jangayu jungku yalunginyina kurduluna. Baki jayalungka mankumanku nanamannga jangkurr, jalija ngayu jungku yalunginyina kurduluna. Baki bukambijunyi wandijiyana, janganjalu jingkijba, nganinji manjijba. Baki jayalu jingkijba, ninji maruka muwa yalungi, barrinani ninji maruka muwa ngaki.
JOH 17:24 Buwakanya, ninji yarrijba yalunyi ngakindurri, yalu durriykanyi ngaki yuwa. Ngajaka ninya, jayalu jungku nananyina yajina, jalija ngayu barlba nanankurri yajiyurri. Baki janganjalu najba jungunkurri kunyba marda walkurra, barrinani ninji jungku kunyba marda walkurra. Maruka ninji muwa ngaki yurrngumba. Maruka ninji muwa ngaki wabula, waluwa nungkala yabimbayi bukamba yaji, laliji marda kanja marda jamba. Maruka ninji muwa ngaki waluwa nungkali yabimba bukamba yaji. Ngayu jungku kunyba marda walkurra, marukangangi ninji muwa ngaki yurrngumba.
JOH 17:25 Buwakanya. Ninji jungku yurlurr yurrngumba. Yingkamukunyi miku yalimi jingkijba ninya, ngala ngayu jingkijba ninya. Ngayu jingkijba ninya, ninji jungku yurlurr, ninji yanyba duja jangkurr. Baki nanginmukunyi kandimukunyi ngakinyi, jingkijba ninyalu marda. Yalu jingkijba ngana, nganinji manjijbayi.
JOH 17:26 Karu ngayi yalunya nganyi. Milidimba ngayi yalunya nganyi, baki mili jangayu milidimba yalunya nganyi. Baki ninji maruka muwa ngaki, baki nani barri marda yalimi marukangka muwa yalungi yingkamukuyngka. Baki jangayu jungku yalundu kurduluna yurrngumba. Barriwa barri ngayu yanyba nganyi nani.” Nani barri yanybayi Jisus nanganginkanyi Buwakaya.
JOH 18:1 Jali yanyba Jisus nani barri mududu Kudkanyi, baki barlba yali barndananyi, Jisus marda nanganginmuku kandimuku. Barlba yali karrurrinybarri balarri, niji nanankanyi balanyi Kidrun barri. Jungku yali nanaba mungana karrurrinybana munjimunji.
JOH 18:2 Jungku yalili nanaba karrurrinybana, Jisus marda nanganginmuku kandimuku. Baki nanangini Judaswanyi, jingkijba nyuli jalili yalu jungku nanaba. Nanamanji yanybayi Judas yalungi mambukamukuyngka jurjkanyi. Karu nyuli yalunya Jisuskanyi, nyuli jungku nanaba karrurrinybana.
JOH 18:3 Mambukamukunyi jurjkanyi marda Barasimukunyi, manjijba yalunjali wudumbiji Jisus. Manjijbayi yalunya, yilarrmuku marda nganinyimuku ngarrkadabawarrmuku. Waluluwijbayi Judas yalungi karrurrinybarri balarri. Barlba yali mirnbiyudi baki janganiyudi.
JOH 18:4 Ngala nyuli jingkijba bukamba yaji Jisuswanyi. Jingkijbayi yalunya Jisuswanyi, yalu daykanyi, marda nyuli muningka jilajba yalundurri, jali yalu kujba nangangi. Jilajba nyuli yalundurri, baki ngajaka nyuli yalunya, “Wanyingkanyi narri kujba. Wanyingkanyi.”
JOH 18:5 Jananganja yali, “Nangangi nurru kujba Jisuskanyi, niji nangangi yaji Nasarid. Nangangi nurru kujba Jisuskanyi.” Yanybayi Jisus yalungi, “Nayinda ngayu.” Nanda Judas, karrinja nyuli nanaba yalundu. Barrin nyuli wudumba dungala karunkanyi mambukamuku jurjkanyi. Karu nyuli yalunya, janyulu waluluwijba yalungi Jisusyurri. Barriwa.
JOH 18:6 Jali yanyba Jisus, “Nayinda ngayu”, baki jilajba yali bayngkani, baki yirrba yali jambarri.
JOH 18:7 Mili nyuli ngajaka yalunya Jisuswanyi, “Wanyingkanyi narri kujba. Wanyingkanyi?” Baki mili yali jananganja Jisus, “Kujbangka nurru Jisuskanyi, nangangi yaji Nasarid.”
JOH 18:8 Yanybayi Jisus yalungi, “Karu ngayi narrinya barrin, nayinda ngayu. Jaliyi narri kujba ngaki, baki manjijbakiyi yalunya ngakindu yalunginkurri barndarri. Manjijbakiyi nanginmuku kandimuku, jungka jala yalu nayiba ngakindu.”
JOH 18:9 Yanybayi Jisus barrin, “Yalu jala jilalajba ngakindu yurrngumba, jangayu lalanba yalunya. Yurrngumba jangayu yalunya lalanba.” Nani barri yanybayi Jisus barrin. Duja nanda jangkurr nangangi. Lalanba nyuli yalunya nanamanji jali yalu jila wudumbiji Jisus. Barriwa.
JOH 18:10 Nanda kandi Bida, nyuli jankunbijinyiyudi wunanybalanjudi. Karrinja nyuli nanaba nangandu Jisusnyina, baki dulaba nyuli kingkarri nangangi jankunbijinyi. Dulaba nyuli, baki jinamba nangki, ngala karlbayi kuwarda jankunbijinyiyudinyi. Karlba nyuli nangangi kuwarda, nanda jalili waki mambukanyi jurjkanyi. Niji nangangi wakiwarr, mikuyaji kuwardanyi, Malkis.
JOH 18:11 Ngala Jisuswanyi nyuli jirrnyba nanda Bida, “Wiykunumbakiyi yarrijba kalawunyi. Wijbakiyi kundula ngaki. Kuyunyi nganjalu. Buwakanya, yanyba nyuli ngaki. Yanyba nyuli, ngayuja jilajba yalundu nanginmukunyina jala jila ngakindurri wudumbiji ngana. Jangana yalu kurdanba. Nani barri nyuli yanyba Buwakanya ngaki, jangayu jila yalundu.” Barriwa.
JOH 18:12 Marrimba yali Jisus baki kijijba yali jaluwuya. Mijimbangu yali nanaba nangandu, nganinyimuku ngarrkadabawarr, marda mambuka yalungi, marda yilarrmuku. Kijijba yali Jisus. Barriwa.
JOH 18:13 Baki waluku yali kuyu Jisus malburri Yanasyurri. Nanda Yanas, kardunganja nyuli nangangi Kayabaskanyi. Nanda Kayabas, nyuli walkurra mambuka jurjkanyi nanamanji jali yalu marrimba Jisus.
JOH 18:14 Nanda Kayabas, wabula nyuli yanyba yalungi kunsilkanyi Jukanyi. Yanyba nyuli, “Nanda Jisus, marda nangkimi janyba. Jaliyi nangka janyba, baki miku nyuliyi yabimba mili kiji ngambalangi. Baki miku ngamanjaliyi linjumba nanamukunyi mambukamukunyi Rumankanyi. Marda nangkimi janyba, baki miku ngambalakiyi janyba.” Nani barri yanybayi nanda Kayabas wabula. Waluku yali kuyu Jisus nanganginkurri barndarri Yanaskanyi.
JOH 18:15 Jilajba buli bayngkani nangandu Jisusnyina, Sayimin Bida, baki yingka kandi Jisuskanyi nangandu. Jilajba buli bayngkani Jisusnyina nanganginkurri barndarri Yanaskanyi. Nanangini Yanaswanyi, jingkijba nyuli nanda yingka kandi Jisuskanyi. Baki ngankijba nyuli kalawuyngkurru barrikina jala nanaba lukuluku mambukanyi barndana. Ngankijbayi nanda yingka kandi kalawuyngkurru nangandu Jisusnyina.
JOH 18:16 Ngala nanda yingka kandi, Bida, yukumba nyuli danbina bardawana. Yukumba nyuli danbina bardawana, ngala nanda yingka kandi ngankijba jali waluwa barrikina, nyuli yanyba nanankanyi jibarrinyi, lalanba jala bardawa. Yanyba nyuli jibarrinyi, baki wijba nyuli danbiyurri wudumbiji Bida. Baki ngankijba buli kalawuyngkurru barrikina.
JOH 18:17 Nanda jibarri jali lalanba bardawa, yanyba nyuli Bidanyi, “Marda ninji kuna kandi nangangi Jisuskanyi.” Jangumba jujambayi Bidawanyi. Yanyba nyuli nangangi, “Miku ngayu kandi nangangi. Miku.”
JOH 18:18 Karrijba yali janguna ngarrkadabawarrmuku baki wakiwarrmuku, baki yilarrmuku. Mardujbayi yaji mungana. Karrijba yali janguna, marda nanda Bida nyuli karrinja marda yalundu janguna. Ngarrijba yali janguna. Barriwa.
JOH 18:19 Baki nanangini mambukawanyi jurjkanyi ngajaka nyuli Jisus. Yililikajbayi Jisus nanganginmukuyngka kandimukuyngka, marda yililikajbayi Jisus nanganginkanyi jangkurranyi, milidimba jalili nyulu yalunya yurrngumba.
JOH 18:20 Jananganjayi Jisuswanyi, “Yanyba ngayi jangkurr, baki bukambijunyi, yali manku nanda jangkurr. Milidimba ngayili yalunya jurjina, marda walkurranyina jurjina jalili yalu bukambiju jungku nanaba. Miku ngayiyanyi yanyba kardarda yingamaliyngka, ngala yanyba ngayili kajanyi, kudanyu bukambijuyngka.
JOH 18:21 Wanyingkanyi nganinji ngajaka ngakinkanyi jangkurranyi. Ngajakakiyi yalunya jali yalu manku ngaki jangkurr. Yalu jingkijba ngaki jangkurr. Marda ninjimi ngajaka yalunya.”
JOH 18:22 Jali yanyba Jisus nayinda jangkurr, baki dabayi Jisus karnkul yingamalinyi yilarrwanyi. Daba nyuli karnkul marniyudinyi balamba. Daba nyuli Jisus karnkul, baki ngirrwayi nangangi Jisuskanyi, “Wijbakiyi jananganja walkurra mambuka nani. Yanybakiyi yabimba nangangi.”
JOH 18:23 Jananganjayi Jisuswanyi, “Jaliyanyi ngayu milidimba yalunya barimba, baki wudumbakiyi yalunya jali yalu manku nanda jangkurr ngaki. Janinya yalu karu ngakinkanyi balkinyi jangkurranyi, jaliyanyi ngayu yanyba barimba. Ngala ngayi yanyba kunyba jangkurr, baki wanyingkanyi nganinji dabayi karnkul. Wanyingkanyi.” Barriwa.
JOH 18:24 Baki nanangini Yanaswanyi, manjijba nyuli Jisus yingkayurri mambukarri jurjkanyi. Manjijba nyuli Jisus nangandurri, niji nangangi Kayabas. Jilajbayi Jisus yuwajiwa jaluwuya kurulyudi. Barriwa.
JOH 18:25 Nanabawa janguna karrinjayi Bida. Ngarrijbayi janguna. Baki yanybayi yingka nganinyi nangangi Bidanyi, “Ninji kuna kandi nangangi Jisuskanyi. Ninji kuna nangangi kandi.” Ngala mili jujijbayi Bida. Jujijba nyuli, “Miku ngayu nangangi kandi. Miku.”
JOH 18:26 Yingka nganinyi nanaba. Mungkiji nyuli nanankanyi jali karlbayi kuwarda Bidawanyi barrin. Jungku nyuli nanaba janguna. Nanda mungkiji nyuli waki walkurrayngka mambukanyi jurjkanyi. Ngajaka nyuli Bida, “Miku kuna ningiyanyi najba marda nangandu Jisusnyina karrurrinybana Kidrunyina. Miku kuna ningiyanyi najba nanaba.”
JOH 18:27 Mili jujijbayi Bida, “Miku. Miku ngayiyanyi nanaba nangandu Jisusnyina karrurrinybana. Miku.” Baki yinarramba kayayi nanda julaki barrinani dalmurra. Kudanyu kayayi nanda julaki. Barriwa.
JOH 18:28 Baki kuyu yali Jisus bayungu Kayabasnanyi Jumukunyi. Kuyu yali Jisus bayungu nangandurri walkurrayngkurri mambukarri Kubaminkanyi. Ngala nyuli kambalingijba yaji karrina. Jilajba yali kalawuyngkurri barrawurri, Jisus marda ngarrkadabarwarrmuku. Ngala nanamuku Jumuku, miku yaliyanyi ngankijba. Miku yaliyanyi ngankijba kalawuyngkurru. Jaliyanyi yalu ngankijba kalawuyngkurru ngurranyina barrawuna, baki jungku yalu balkina yuwana Jukanyi. Jaliyanyi yali ngankijba ngurranyina barrawuna, baki miku yaliyi jarrba mama nanankanyi wangarranyi niji Kangandijbayi Barrawuna Yajinyi. Karrinja yali danbina.
JOH 18:29 Nanda mambuka walkurra Kabaminkanyi, niji nangangi Bilad. Walajba nyuli danbiyurri yalundurri, jala miku yaliyanyi ngankijba kalawuyngkurru nangandurri. Jilajbayi Bilad yalundurri, baki ngajakayi yalunya Jumuku, “Yanka nyulu jungku balkina yuwana nanda Jisus. Yanka barri.”
JOH 18:30 Yali jananganja Bilad, “Jalimi nyulu kunyba jungku, baki miku nurriyi kuyu nganyindurri.”
JOH 18:31 Yanybayi Bilad yalungi, “Janarri kuyu Jisus narriman. Janarri kuyu, baki janarringka jingkijba jaliyi nyulu jungku balkina narringinyina yuwana Jukanyi. Janarringka jingkijba nangangi.” Jananganja yali, “Jungku nyulu balkina nurrunginyina yuwana. Marda nangkimi janyba, ngala mambuka Kubaminkanyi Rumankanyi nyulu yanybaka, miku nurriyi daba kurdanbikanyi nanijba. Jangumba wabula nurrili daba yaji, ngala miku nanijba.”
JOH 18:32 Nanamuku Jumuku, mankumanku yalungki Biladkanyi, marda nyulimi jirrinyba nangangi ngarrkadabawarrmuku, baki jayalu daba Jisus kurdanba. Wabula Jisus yanybayi nayinda jangkurr, “Janganjalu langandaba kurndana kurdanbikanyi.” Duja nanda jangkurr, yanyba jali nyulu wabula. Barriwa.
JOH 18:33 Baki wijbayi Bilad, ngankijba nyuli kalawuyngkurru barrawurri. Karu nyuli ngarrkadabawarr, yalu kuyunkanyi Jisus nangandurri. Kuyu yali Jisus, baki ngajakayi Biladwanyi, “Ninji kuna walkurra mambuka Jukanyi. Ninji kuna yalungi walkurra mambuka.”
JOH 18:34 Ngala ngajakayi Bilad Jisuswanyi, “Nanda jangkurr jali nganinji ngajaka, nanda nganyi jangkurr kuna. Yiningki yingkawanyi ninya karuyi nanankanyi jangkurranyi.”
JOH 18:35 Baki jananganjayi Biladwanyi, “Miku ngayu mungkiji nganyi. Miku ngayu Ju. Ngala yalu kuyuyi ninya ngakindurri, nganyinmukunyi mungkijimukunyi. Ngala ngajaka ningi, yanka ninji jungku balki. Wanyi balki yaji ninji yabimba.”
JOH 18:36 Jananganjayi Bilad Jisuswanyi, “Yi, ngayu walkurra mambuka, ngala miku ngayu mambuka barrinani yingkamuku mambukamuku. Miku ngayu mambuka barrinani nanamuku mambukamuku Jukanyi. Miku ngayu mambuka barrinani yalu, nayiba jala yalu jungku jambana nayiba. Jalimi ngayu mambuka barrinani yalu, baki nganimi nanangajba ngakinmukunyi ngarrkadabawarrmukunyi. Nanangajba nganjalimi. Ngala miku ngayimi mambuka barrinani yingkamuku mambukamuku jala ninji jingkijba. Yinini mambuka ngayu. Yinini.”
JOH 18:37 Baki mili ngajakayi Jisus Biladwanyi, “Ngala ninji kuna walkurra mambuka.” Jananganjayi Jisuswanyi, “Nanda nganyi jangkurr. Ninji yanyba ngaki, ngayu walkurra mambuka. Manjijbayi ngana Kudwanyi. Badajba ngayi kingkarrinya nanginkurri yajiyurri, jungku ngayi nayiba jambana, karunki duja jangkurr. Manjijba nyuli ngana, karunki duja jangkurr. Bukambiju nanamuku nganinyimuku jala yalu nulijba mankunkanyi duja jangkurr, jayalu manku ngaki jangkurr. Jayalu manku ngaki jangkurr. Jayalu kuyu ngaki jangkurr, dujangangi ngaki jangkurr.”
JOH 18:38 Ngajakayi Jisus Biladwanyi, “Ngala wanyi yaji duja. Wanyi.” Baki mili walajbayi Bilad danbiyurri yalundurri Jumukuyngkurri, baki yanybayi yalungi, “Mankumanku ngaka nangangi Jisuskanyi, miku nyulimi jungku balkina yuwana. Miku nyulimi jungku balki.
JOH 18:39 Ngala yurrngumba nayimanji kindilkurrinyi ngurrwayi, jala wangarr niji Kangandijbayi Barrawuna Yajinyi narringi, yurrngumba nayimanji muningka ngayili manjijba yingamali nganinyi, jungku jala brisinyina. Muningka ngayili manjijba yingamali nayimanji. Wanyi nganinyi jangayu manjijba nanijba. Wanyi. Jangayu kuna manjijba narringi mambuka Jukanyi. Jangayu kuna manjijba nayinda Jisus.”
JOH 18:40 Ngala kaya yali Jumuku. Kaya yali kudanyu nangangi, “Mikujiyi manjijba nayinda Jisus. Ngala nanda manjijbakiyi yingka, niji nangangi Barabas. Mikujiyi manjijba Jisus.” Ngala nanda Barabas, nyuli maninjaku, nyuli dabawarr.
JOH 19:1 Baki karuyi nganinyimuku ngarrkadabawarrmuku Biladwanyi. Jirrinyba nyuli yalunya, yalu kuyunki Jisus, yalu wajuji Jisus kurulyudinyi. Yalu wajuji Jisus kudanyu barri.
JOH 19:2 Kuyu yali Jisus. Wudumba yali wardankurrul kurnda nyilanyilayudi, baki kijijba yali bakiri. Yarrijba yali nanda bakiri lukuluku nangandu kulajina Jisusnyina, marda yali yarrijba danyan wunanybala wayka nangandu danyiyurruwa. Nganmarra nanda danyan. Nani barri nanamanji nyulili jungku walkurra mambuka. Jungku nyulili marda danyayudi nganmarranjudi, marda bakiriyudi. Nani barri yali yarrijba bakiri nyilanyilayudi marda nganmarra danyan nangandu Jisusnyina ngirrikimbiji Jisus.
JOH 19:3 Ngirrikimba yali Jisus ngarrkadabawarrmukunyi. Yanyba yali nangangi, “Marda ninji mambuka walkurramirra Jukanyi, ninji barri kuna.” Nani yali ngirrikimba Jisus. Baki yali daba Jisus. Dabayi Jisus wali. Barriwa.
JOH 19:4 Baki mili walajbayi Bilad danbiyurri yalundurri Jumukuyngkurri. Jilajba nyuli yalundurri, baki nyuli yanyba yalungi, “Narri. Ngayu kuyungka Jisus narrindurri. Mankumanku ngaka nangangi Jisuskanyi, miku nyulimi jungku balkina yuwana. Nyulu jungkuka kunybana yuwana. Miku nyulimi jungku balkina yuwana. Miku.”
JOH 19:5 Walajbayi Jisus. Walajba nyuli, yuwajiwa nyuli bakiriyudi marda nganmarranjudi danyayudi. Baki yanybayi Bilad yalungi, “Ningkijbakiyi nayinda Jisus. Nayiba nyulu. Ningkijbakiyi.”
JOH 19:6 Jali yalu najba Jisus, mambukamukunyi jurjkanyi marda wakiwarrmukunyi jurjkanyi, yali kaya nangangi Biladkanyi. Kudanyu yali kaya nangangi, “Langandabakiyi. Langandabakiyi nayinda Jisus kurndana. Langandabakiyi.” Baki yanybayi Bilad yalungi, “Narri. Narri kuyu, narri langandaji kurndana. Narri kuyu kurdanbiji, ngala yuwaji ngayu yanybaka nangangi, nyulu jungkuka kunybana yuwana. Kunybana yuwana nyulu jungkuka.”
JOH 19:7 Yali jananganja Bilad, mambukamukunyi jurjkanyi, “Marda nangkimi janyba nanda, balkijbangkangangi nyulu nurrunginkanyi yuwanyi. Balkijbangka nyulu jali nyulu yanyba nyulu jandanyi nangangi Buwakaya Kudkanyi. Nani nyulu balkijbangka.”
JOH 19:8 Baki marralayi Bilad. Marrala nyuli kudanyu jali nyulu manku nanda jangkurr Jisuskanyi, nyulu jandanyi Kudkanyi. Marrala nyuli kudanyu.
JOH 19:9 Mili buli ngankijba kalawunyi barrawuna, Bilad marda Jisus. Jali bula kalawunyi, ngajakayi Jisus Biladwanyi, “Wanjawa nganyi yaji.” Ngala miku nyuliyanyi jananganja Bilad Jisuswanyi. Miku nyuliyanyi yanyba jangkurr nangangi.
JOH 19:10 Baki mili ngajakayi Jisus Biladwanyi, “Wanyingkanyi ninji miku yanybikanyi ngaki. Ngayu walkurra mambuka Kubaminkanyi nganyi. Marda nganinjimi jingkijba. Yiningki janinga muningka manjijba barndarri, ngala yiningki janinga manjijba yalundurri Jumukuyngkurri, baki janinga yalu daba, langandaba kurndana, janinga yalu kurdanba. Ngayu walkurra mambuka manjiykanyi ninya nani.”
JOH 19:11 Ngala yanybayi Jisus nangangi Biladkanyi, “Jangumba ninji jungkuka mambuka ngaki barri, yanybangangi nyuli Kud ngaki. Yanybayi Kud, ninji mambuka ngaki. Jalimi nganinji kurdanba ninjuma, baki ninji jungku balkina yuwana Kudkanyi. Ngala nanangini mambukawanyi jurjkanyi, Kayabaswanyi, ngana nyuli manjijba nganyindurri, nganinji kurdanbiji. Nanda yingka Kayabas, nyulu jungkuyi balkinamirra Kudkanyi kudanyu.”
JOH 19:12 Jali yanyba Jisus nanda jangkurr, baki Biladwanyi nyuliyanyi muningka manjijba Jisus nanganginkurri barndarri. Miku nyuliyala manjijba Jisus kurdanbikanyi. Ngala kaya yali kudanyu Jumuku nangangi. Kaya yali kudanyu, “Jaliyi ninji muningka manjijba nanganginkurri barndarri, baki miku ninjiyi jungku kandi nangangi nanankanyi walkurrayngka mambukanyi niji Sisa. Miku ninji kandi nangangi jaliyi ninji muningka manjijba Jisus.” Baki mili yali kaya nangangi Biladkanyi, “Jaliyi nganinyi yanyba, ‘Ngayu walkurra mambuka barrinani Sisa mambuka,’ baki nanda Sisa nyulu ngarrangarra muwa nanankanyi.” Barriwa.
JOH 19:13 Jali manku nanda jangkurr Biladwanyi, baki nyuli jilajba nanankurri yajiyurri, niji Ju yanyi Kabada. Kudukudu dungala nanaba yundu bijal kalawuyngkurru barrawuna. Baki darladarla nanaba jungunkanyi yali jalili yalungka yanyba jangkurr kurdanbikanyi nangangi. Baki jungkuyi Bilad nananyina darladarlana. Kuyu yali Jisus nangandurri ngarrkadabawarrmukunyi.
JOH 19:14 Nanamanji jali yalu kuyu Jisus nangandurri Biladyurri, nanamanji munganawa wangarr yalungi niji Kangandijbayi Barrawuna Yajinyi. Baki mukunjana barri yanybayi Bilad yalungi Jumukuyngka, “Narri, nayinda nganinyi nyulu mambuka narringi walkurramirra.”
JOH 19:15 Ngala yali kaya kudanyu, “Kurdanbakiyi. Langandabakiyi nayinda Jisus kingkarri kurndana. Kurdanbakiyi. Kurdanba.” Ngajakayi yalunya Biladwanyi, “Jangayu kuna langandaba nayinda mambuka narringi walkurramirra. Jangayu kuna langandaba.” Jananganja yali Bilad mambukamukunyi jurjkanyi, “Miku nayinda nurrungi mambuka. Miku nyulimi jungku walkurramirra mambuka nurrungi. Nanda Sisa, nyuluma nurrungi walkurramirra mambuka. Nyuluman Sisa. Miku nayinda nganinyi.”
JOH 19:16 Baki yanybayi Bilad yalungi, “Barriwa narri karu yalunya ngarrkadabawarrmuku langandaji Jisus. Barriwa narri kuyu Jisus.”
JOH 19:17 Baki kuyu yali Jisus juju danbiyurri langandaji wabangkarra. Juju danbiyurri yali kuyu bayangarriji. Niji nanankanyi yajinyi bayungu, Ju yanyi Kulkuda, barrinani Kulaji Nguli. Ngala Jisuswanyi nyuli kuyu nanda kurnda nangangi wabangkarra. Bayngkani ngulurrina wayka kuyuyi wabardala. Kuyu nyuli wabangkarra bayangarriji.
JOH 19:18 Nanaba barri langandaba yali Jisus kurndana wabangkarra. Ngarrkadaba yali marni nyilanyilayudinyi. Langandaba yali Jisus nanaba, marda kujarra mili langandaba yali bundu nangandu Jisusnyina. Nyulu Jisus burrandi bulandu. Yingka kurndana wabangkarra karriya, baki yingka kurndana wabangkarra bayinga. Nani barri yalunjali langandaba ngarrkadabawarranyi.
JOH 19:19 Marda Biladwanyi, nyuli karu yalunya ngarrkadabawarrmuku, “Yarrijbakiyi nayinda jangkurr najana, baki kijijbakiyi langandaba kingkarri kurndana Jisuskanyi.” Nayinda jangkurr nyuli yarrijba, ‘Nayinda Jisus, nangangi yaji Nasarid. Nayinda nyulu mambuka walkurramirra Jukanyi.” Yarrijba yali nanda jangkurr kingkarri wabangkarra kurndana. Yarrijba nyuli nanda jangkurr Ju yanyi, baki Rumin yanyi, baki Krik yanyi. Yarrijba yali nanda jangkurr kurndana jali yalu langandaba Jisus. Nanda yaji bayangarriji jali yalu langandaba Jisus, nanda yaji bundu kudukudu barrawuyabarrawuya Jirusalim. Najbayi kajamukunyi Jumukunyi nanda jangkurr kurndana. Najba yali nanda jangkurr.
JOH 19:21 Ngala yanyba yali Biladkanyi mambukamuku jurjkanyi, “Mikujiyi yarrijba nanda jangkurr, ‘Nyulu mambuka walkurramirra Jukanyi.’ Mikujiyi yarrijba nani barri. Miku nyulimi jungku barrinani mambuka nurrungi. Yininikiyi yarrijba. Yinini. Yarrijbakiyi nayinda yinini jangkurr, ‘Muningka nangka yanyba, nyulu mambuka walkurramirra Jukanyi.’”
JOH 19:22 Nani barri yali ngakaja Bilad, ngala jananganjayi yalunya Biladwanyi, “Miku jangayu yarrijba yinini jangkurr. Yarrijba jayalu ngaki jangkurr kingkarri kurndana.” Barriwa.
JOH 19:23 Kujarra baki kujarra ngarrkadabawarr yali jungku nanaba. Dulaba yalu jumbala nangangi Jisuskanyi baki langandaba yali wabangkarra kurndana. Dulaba yali jumbala Jisuskanyi, baki kuyu yali jumbala marda yalungi barri bukambijunyi, nani yingamali jumbala. Ngala yingka jumbala nangangi yingkijba yali. Wunanybala jumbala nukamiyurru wayka barri barrinani danyan.
JOH 19:24 Yanyba yalungki, “Kajamuku ngambala. Miku ngambaliyi bakarramba nayinda jumbala nangangi. Jangambala baja wudumbikanyi jumbala barrinani kard. Jangambala baja wudumbikanyi nanda jumbala.” Wabula kamambarra yanybayi wankalanyi, “Wudumba yali ngaki jumbala, marda yali baja ngakinkanyi jumbalanyi.” Yarrijbayi nanda jangkurr nanangini wankalawanyi. Duja nanda jangkurr.
JOH 19:25 Nani barri ngarrkadabawarrmukunyi, baja yali nanganginkanyi jumbalanyi. Baki kudiya jibarrimuku, karrinja yali nanaba nangandu Jisusnyina wabangkarra. Karrinja yali jibarrimuku, nangangi ngardanganja Jisuskanyi, baki nangangi jujarranganja, marda yingka Mari, nawinganja nangangi niji Klubas, marda yingka, niji nangangi Mari Makdalin. Karrinja yali nanaba nangandu Jisusnyina. Marda yingka yalundu, kandi nyulu nangangi Jisuskanyi.
JOH 19:26 Najbayi bulanya Jisuswanyi, nanganginmirra ngardanganja, baki nanda kandi jala maruka nyuli muwa nangangi kudanyu. Nanda kandi karrinjayi bundu nanganginyina ngardanganjana, baki yanybayi Jisus, “Ngarda, nangini kandiwanyi ngakinyi, janinga yukumba. Kuyukiyi nganyinmirra jandanyi.”
JOH 19:27 Baki yanybayi Jisus nanganginkanyi kandinyi, “Yukumbakiyi, baki lalanbakiyi. Kuyukiyi nganyinmirra ngardanganja.” Kamu barri nanangini kandiwanyi, nyuli kuyu nanda bardibardi nanganginkurri barndarri. Jungku nyulili nanaba nangandu yurrngumba.
JOH 19:28 Ngala langayi Jisus kurndana, mankumanku nangki, “Bukamba barri nanda yaji ngayi yabimba, yanyba jali nyulu ngaki, ngaki Buwakanya. Bukamba barri.” Baki yanybayi Jisus, “Warinjijba ngayu.” Wabula kamambarra yanybayi wankalanyi nayi, “Janyulu warinjijba. Janyulu ngaraba ngarrki krayibkanyi ngujbul.” Duja nanda jangkurr yanyba jali wankalanyi. Wabula nyuli yarrijba nanda jangkurr najana Kudkanyi. Yanybaka nanda jangkurr nangangi Jisuskanyi.
JOH 19:29 Yarangul nanaba, jirdi ngarrkinyi krayibkanyi ngujbulanyi. Kijijba yali karnjal wadiwadina. Yarrijba yali karnjal ngarrkina, baki manjijba yali kingkarri Jisusyurri janyiyurri, warinjijbangangi nyuli. Manjijba yali nanda karnjal ngarrkiyudi nangandurri Jisusyurri janyiyurri.
JOH 19:30 Jali ngaraba nanda ngarrki Jisuswanyi, baki yanybayi, “Barriwa barri.” Nani barri nyuli yanyba, “Barriwa barri”, baki karlwijbayi duka nangangi. Manjijba nangki ngarndu nangangi. Baki barriwa barri, janyba nangki Jisus nani.
JOH 19:31 Ngala nanamukunyi Jumukunyi, yilikajba yali Bilad nyulu karunki ngarrkadabawarrmuku. Yilikajba yali Bilad, nyulu karunki yalunya dalyambiji nguli nganinyimuku jali langa kurndana wabangkarra. Jala yalu dalyawijba nguli, baki dulu yalungkaja janyba. Yaliyanyi dulaba mankanyi Jumukunyi, yaliyanyi dulaba mankanyi waluwa munganyi, munganawangangi Sadidi, walkurra Sadidi Wangarr niji Kangandijbayi Barrawuna Yajinyi. Miku yaliyala yingijba mankanyi langankurri Sadidi. Barriwa.
JOH 19:32 Baki dalyamba yali nguli kujarrawuya, jali langa nangandu Jisusnyina. Dalyamba yali nguli kujarrawuya nganinyiwuya ngarrkadabawarrmukunyi.
JOH 19:33 Ngala yali najba Jisus, nyuli nganinyiyurru, baki miku yaliyanyi dalyamba Jisus nguli.
JOH 19:34 Ngala yingamalinyi ngarrkadabawarranyi, nyuli ngarrkadaba Jisus mankanyi. Ngarrkadaba nyuli Jisus mankanyi wili wuniyudinyi. Jali nyulu dulaba wuni, baki ngulya barlbayi, baki wabuda. Ngulya marda wabuda walajbayi Jisusnanyi mankanyinanyi.
JOH 19:35 Nyuli najba nayinda bukamba barri yingamalinyi nganinyiwanyi, baki nyulu karungka narrinya nanginkanyi jangkurranyi jala ngayu yarrijba. Nayinda jangkurr duja. Nyulu narrinya karungka nanginkanyi jangkurranyi, najbangangi nyuli. Duja nangangi jangkurr. Nyuli najba nayinda bukamba barri.
JOH 19:36 Miku yaliyanyi dalyamba Jisus nguli. Kamambarra yanybayi wankalanyi, “Miku janyulu dalyawijba nguli.” Nanda jangkurr najana Kudkanyi jali yanyba wankalwanyi, nanda duja jangkurr, mikungangi yaliyanyi dalyamba Jisus nguli.
JOH 19:37 Marda mili jangkurr yanybayi wankalanyi kamambarra, “Jayalu ningkijba nanda nganinyimuknyi marda jibarrimukunyi. Jayalu ningkijba nanda jali yalu ngarrkadaba.” Nanda yingka jangkurr duja, yarrijba jali nanangini wankalawanyi najana Kudkanyi. Barriwa.
JOH 19:38 Baki yingka nganinyi, niji Jusib, nangangi yaji Yarimadiya. Jilajba nyuli nangandurri Biladyurri, baki ngajaka nyuli Bilad, “Jangayu kuna kuyu nanda Jisus mankanyi makaykanyi. Yuku kuna ngayu kuyu nanda nangangi mankanyi.” Jananganjayi Biladwanyi, “Yi. Kuyukiyi mankanyi.” Baki kuyuyi mankanyi Jusibwanyi. Nanda Jusib nyuli kandi Jisuskanyi, ngala miku yalunyiya karu, nyuli kandi Jisuskanyi, marralangangi nyuli yalungi Jumukuyngka. Miku yalunyiya karu nyuli kandi nangangi Jisuskanyi.
JOH 19:39 Baki yingka, nangangi niji Nikidimus, jalannga nyuli jilajba nangandurri Jisusyurri mungana yanybiji nangangi wabula. Kuyu nyuli nanda barrinani jirrki, ngala nanjananja, baki banjawayi kunyba kudu. Nanda yarriykanyi mankanyina. Nyuli kuyu kudukudu nanda barrinani jirrki. Kudukudu kuyuyi murrku lujuluju.
JOH 19:40 Baki buli kuyu mankanyi Jisus, Jusibwanyi marda Nikidimuswanyi. Wudumba buli wunanybala raki barrinani kurul. Namba buli nanda raki jirrkiyudinyi baki kijijba buli mankanyi lukuluku bukamba nukamiyurru. Kijijba buli mankanyi rakiyudinyi jirdi nanankanyi barrinani nanjananja jirrki. Kijijba buli mankanyi nanankurru nukamiyurru. Nani barri yalili kijijba mankanyi Jumukunyi.
JOH 19:41 Nanda yaji jali yalu langandaba Jisus, bundu nanda yingka yaji jali yukumba nganinyiwanyi. Nananyina yajina barri kumayangu yarriykanyi mankanyi kalawunyi. Buyingkinyi nanda kumayangu. Jilijbawa nanda kumayangu, miku yaliyanyi yarrijba kalawunyi mankanyi.
JOH 19:42 Nanda kumayangu bundu baki yarrijba yali Jisus mankanyi nananyina kumayanguna. Munganawa Sadidi jalili yalu miku waki. Miku yaliyanyi kuyu Jisus mankanyi juju. Muningka yali yarrijba mankanyi bundu. Yarrijba yali Jisus mankanyi kalawuyngkurru kumayanguna, baki murumba yali bardawa nangangi dungalayudinyi. Walkurra dungala yali lukulukumba bardawarri. Barriwa.
JOH 20:1 Yingkana mungana kambalingijba yaji Sundi barri. Nanda jibarri Mari, nangangi yaji Makdala, nyuli jilajba kumayangurri. Nyuli najba mikuyaji dungalanyi nanaba bardawa. Mikuyaji dungalanyi. Wilina jungkuyi nanda dungala, jali yalu murumba.
JOH 20:2 Baki nyuli wirlku nanda jibarri Mari. Wirlku nyuli bulandurri, Bidayurri marda yingkayurri kandirri. Wirlkuyi bulandurri. Yanyba nyuli bulangi, “Mikuyaji mankankanyi nanaba kumayanguna. Jawudawanyi yali kuyu ngambalangi mambuka. Mikuyaji mankankanyi nanaba. Wanjawa yiningki yali yarrijba mankanyi. Wanjawa. Mudumbanyi ngamabala.”
JOH 20:3 Walajba buli barndananyi. Walajbayi Bida baki yingka nangangi kandi, baki bayungu bula jila kumayangurri yidambiji.
JOH 20:4 Bayungu buli wirlku. Nanda yingka kandi, nyuli waluwa wanbiya kumayanguna. Wanbiya nyuli waluwa.
JOH 20:5 Baki wayngkamba nyuli kalawunyi kumayangu. Najba nyuli nanda raki kijiykanyi mankanyi kilinkurri kalawunyi, ngala miku nyuliyanyi ngankijba kalawunyi.
JOH 20:6 Baki wanbiyayi Bida bayngkani. Ngankijba nyuli kalawunyi kumayanguna. Miku nyuliyanyi karrinja danbina bardawana. Ngankijba nyuli kalawunyi, baki nyuli marda najba nanda raki kilinkurri nanaba.
JOH 20:7 Ngala nanda yingka raki jala makaba nangki kulaji, miku nanda raki malumba nananyina yingkana rakina. Nanda raki kijiykanyi kulaji kiliyi nyuluman.
JOH 20:8 Baki nanda yingka kandi, jali wanbiya waluwa, marda nyuli ngankijba. Najba nyuli mikuyaji mankankanyi. Mikuyaji. Nanda yingka jala ngankijba bayngkani, nyuli jingkijba jala wankijbayi Jisus. Jingkijba nyuli Jisus, wankijbayi mili.
JOH 20:9 Nanamanji mudumbanyi yali nanankanyi wankalanyi jangkurranyi Kudkanyi. Mudumbanyi yali nanankanyi jangkurranyi, jali nangka janyba Jisus, baki wankijba janyulu mili. Mudumbanyi yali nanamanji.
JOH 20:10 Baki wijba buli karri barndarri. Wijbayi kandiwuya karri.
JOH 20:11 Ngala nanda jibarri Mari, wijba nyuli karrina mili kumayangurri bayngkani bulangi. Karrinja nyuli danbina. Ngindu nyuli, baki nyuli wayngkamba kalawunyi kumayangu, ngala nyuli dadijba ngindu.
JOH 20:12 Baki Mariwanyi najbayi kujarra Yanjil. Nanda Yanjil, yalili waki Kudkanyi. Jumbala bulangi bunyala. Jungku buli kalawunyi kumayanguna. Yingka jungkuyi kulajiyangka, yingka nukamiyangka Jisuswunyinyina yajina jalanyina.
JOH 20:13 Yilikajba buli jibarri Yanjilwuyanyi, “Jibarri, wanyingkanyi ninji ngindu. Wanyingkanyi.” Jananganja nyuli bulanya jibarriwanyi, “Kuyu yali ngaki mambuka jawudawanyi. Mudumbanyi ngayu wanjawa yali yarrijba mankanyi. Mudumbanyi ngayu.”
JOH 20:14 Jali nyulu yanyba nanda jangkurr, baki yangkalamba nangki, baki najbayi Jisus karrinjankurri. Ngala yakanajba nyuli Jisus. Mudumbanyi nyuli.
JOH 20:15 Yanybayi Jisus nangangi, “Jibarri, wanyingkanyi ninji nginduka. Wanyingkanyi. Baki wanyingkanyi ninji kujba.” Ngamu nyuli Jisus jungkayi nanankanyi yajinyi. Ngamu Jisus, nyuli lalanbawarr nanankanyi yajinyi. Baki ngajakayi Mariwanyi, “Jaliyi ninji dulaba mankanyi, baki wanjawa ninji yarrijbayi, baki jangayu jilajba dulaji mankanyi.”
JOH 20:16 Ngala yanybayi Jisus nangangi. Nijarrijbayi nangangi niji Jisuswanyi, “Mari.” Baki kudanyu ningkijbayi Mariwanyi nanda jali yanyba nangangi. Ningkijbayi, baki jingkijbayi Jisus. Yanybayi Mari nangangi Jisuskanyi. “Rabunayi.” Yalili nijarrijba mambuka milidimbawarr “Rabunayi.” Rabunayi, nayinda Ju yanyi.
JOH 20:17 Yanybayi Jisus nangangi, “Mikujiyi nganinjiyi marrimba. Jilijba ngayu kirrijba jila Buwakayarri. Ngala jilajbakiyi ngakinkurri kandimukuyngkurri. Karukiyi yalunya nayinda jangkurr, “Ngayu kirrijbangka nangandurri Kudyurri Buwakayarri. Nyulu ngaki Buwakanya Kud, marda nyulu narringi Buwakanya Kud.” Bukamba nanda jangkurr yanybayi Jisus nangangi Marinyi. Barriwa.
JOH 20:18 Baki nanda jibarri Mari, wijba nyuli karri yalundurri kandimukuyngkurri. Jali nyulu wanbiya yalundu, baki nyuli yanyba yalungi, “Najba ngayi mambuka ngambalangi.” Baki nyuli yanyba yalungi kandimukuyngka bukamba nanda jangkurr jali Jisus yanyba yalungi. Karu nyuli yalunya nanankanyi jangkurranyi Jisuskanyi. Barriwa.
JOH 20:19 Mungana nanamanji Sundi barri, yali jungku malumba barrawuna kandimuku nangangi. Murumba yali bardawa, kijijba yali, marralangangi yali kudanyu mambukamukuyngka Jukanyi, jali yalu wudumba Jisus. Marrala yali kudanyu yalungi. Baki wanbiyayi Jisus karrinjankiwa yalundu. Miku nyuliyanyi ngankijba bardawana. Muningka yalu najba kalawunyi karrinjankurri yalundu. Yanybayi Jisus yalungi, “Nanama narri.”
JOH 20:20 Yanyba nyuli nani “Nanama narri”, baki minimba nangki mawal marnina marda wilina, jali yalu ngarrkadaba. Yabijba yali muwa nangangi kandimuku jala yali jingkijba.
JOH 20:21 Mili nyuli yanyba yalingi, “Janarri jungku mardumardu muwa. Buwakayu ngambalanginyi, nyuli manjijba ngana narrindurri. Nani barri baku jangayu manjijba narrinya karunki yalunya yingkamuku ngaki. Janarri karu yalunya ngaki, nganinymuku marda jibarrimuku.” Barriwa.
JOH 20:22 Yanyba nyuli nanda jangkurr yalungi, baki nyuli wirnngalijbayi yalundu, baki nyuli yanyba, “Ngayu manjijbangka narrindurri Kunyba Ngarndu Kudkanyi.”
JOH 20:23 Baki mili yanybayi Jisus yalungi, “Jaliyi ninji manjamanjamba balki yaji yalungi, baki Kudwanyi janyulu najba yalunya jungunkanyi kunybana yuwana. Jaliyi ninji miku manjamanjamba yalungi balki yaji, baki yuwaji jayalu jungku balkina yuwana.” Barriwa.
JOH 20:24 Yingamali kandi Jisuskanyi, kujarra ninji nangangi, Dumas baki Didimus. Mikuyaji Dumaskanyi nanaba yalundu kandimukunyina marda Jisusnyina. Miku nyuliyanyi najba nanda Jisus nanamanji mungana jali jungku Jisus yalundu.
JOH 20:25 Baki yali karu Dumas yingkamukunyi kandimukunyi. Karu yali, “Najba nurri mambuka ngambalangi. Jungku nyuli nurrundu.” Ngala yanybayi Dumas yalungi, “Waluwa waluka jangayu najba mawal marnina. Jangayu ngankijba marni nanaba mawalina nanganginyina marnina. Jangayu ngankijba ngaki marni mawalina nangandu wilina. Jangayu ngankijba bukamba mawal nangangi, baki bayngkani jangayu kuyu narringi jangkurr, jangayu jingkijba nyulu jungkuja wanka mili. Jaliyi ngayu ngankijba mawalina nanganginyina, baki jangayu jingkijba nyulu wankijba mili.” Barriwa.
JOH 20:26 Baki baku, yingkana wik, nanganginmuku kandimuku, mili yali malumba jungku barrawuna. Marda nyuli nanaba yalundu marda, nanda Dumas. Murumbayi bardawana, kijijbayi kudanyu bardawa, baki wanbiyayi Jisus yalundu. Karrinjayi, baki yanybayi Jisus, “Nanama narri.”
JOH 20:27 Baki yanybayi Jisus nangangi Dumaskanyi, “Ningkijbakiyi mawal ngakinyina marnina. Ngankijbakiyi marni ngakinyina mawalina, baki ngankijbakiyi marni wilina mawalina. Miku ninjiyanyi kuyu yalungi jangkurr ngaki, jala ngayu wanka mili. Kuyukiyi yalungi jangkurr nanijba jala ngayu wanka.”
JOH 20:28 Baki nanangini Dumaswanyi, jananganja nyuli, “Ninji ngaki mambuka. Ninji ngaki Kud, ngakinmirra.”
JOH 20:29 Baki yanybayi Jisus nangangi Dumaskanyi, “Nganinji jingkijba, najbangangi nganinji. Ninji jingkijba jala ngayu Jisus wankijba mili. Ngala nanamuku, jalija yuwaji nganjalu jingkijba jala ngayu wankijba, ngala miku nganjalu najba, baki yabijba jayalu ngaki. Yabijba jayalu muwa ngaki, jalija nganjalu jingkijba ngayu wankijba, ngala miku nganjalu najba.”
JOH 20:30 Nanganginmuku kandimuku, yali nanaba nangandu Jisusnyina yurrngumba. Yali jungku nangandu yurrngumba. Yali manku nangangi jangkurr bukamba. Yali najba Jisus wakinkurri. Miku nanginyina najana bukamba jangkurr jali Jisus yanyba. Miku bukamba jangkurr nangangi nayiba. Marda nanda jala nyuli waki, miku bukamba nayinda. Miku. Ngawamba jawuda jangkurr Jisuskanyi nayiba najana. Ngala bukamba nayinda jangkurr duja jangkurr. Yarrijba ngayi jangkurr najana narringi, narri kuyunkanyi nayinda jangkurr, baki janarri jingkijba Jisus, nyulu mambuka, nyulu Krayis, nyulu jandanyi Kudkanyi, nanda jala manjijbayi Kudwanyi, marda nyulu wankijbangka. Jaliyi narri kuyu nayinda bukamba jangkurr, baki janarri wanka jungku yurrngumba, nangangingangi. Barriwa.
JOH 21:1 Baku barri minimba nangki Jisus kandimukuyngka kanjana wilina. Kujarra nangangi niji, nanankanyi kanjanyi, Kalili baki Dayibiriyas. Nanijba yali najba Jisus.
JOH 21:2 Kaja yali kandimuku nanaba wabudana, nanda Bida baki Dumas, yingka niji nangangi Didimus, baki Nadanyil, nangangi yaji Kayana Kalili, marda buwakula Jayims baki Jun, bulangi buwakanya, niji nangangi Sibidi, marda kujarra mili kandiwuya. Bukamba yali jungku nanaba kanjana kandimuku.
JOH 21:3 Baki yanybayi Bida yalungi, “Barriwa jangayu wajarrijba kaku.” Yali yanyba nangangi, “Nurruja nganyindu marda wajarrijba kaku.” Marda yali ngankijba muwardana, baki wajarrijba yali baralala, ngala miku yaliya wudumba kaku. Mikuyaji kakunyi. Warriyaluku.
JOH 21:4 Kamambawurri barri karrinjayi Jisus wayka wirlina wabudana, ngala kandimuku nangangi, mudumbanyi yali nangangi Jisuskanyi. Yakanajba yali Jisus.
JOH 21:5 Kayayi Jisus yalungi, “Narri. Mikuyaji kakunyi narrindu kuna.” Jananganja yali, “Mikuyaji kakunyi. Mikuyaji.”
JOH 21:6 Kayayi Jisus yalungi, “Janybakiyi lawaka karriya muwardana, baki janarri wakaramba kaku nanaba. Janybakiyi lawaka karriya.” Baki yali janyba nanda lawaka karriya, baki wakaramba yali kaku barri junu. Kudukudu kaku. Ngiruka nyuli kudanyu nanda lawaka jali kaku kudukudu kalawunyi. Miku yaliya winymamba lawaka kingkarri. Ramba yali lawaka kajawanyi kakuwanyi.
JOH 21:7 Nanda kandi jali jungku yurrngumba Jisusnyina, nyuli yanyba Bidanyi, “Nanda, nyulu mambuka ngambalanginmirra. Nyulu Jisus.” Jali manku nanda jangkurr Bidawanyi, baki yawumba nangki jumbala. Mikuyaji nyuli jumbalanyi wakinkanyi, ngawamba jarrawaja. Yawumba nangki jumbala, baki jurrulaba nyuli wayka kanjana bijalina.
JOH 21:8 Ngala yingkamuku kandimuku, yali jilajba muwardana. Wililijba yali lawaka, marda kaku kalawunyi nanaba lawakana, ngala yali bundu bijalina, juju bijal barri.
JOH 21:9 Jali yalu walajba muwardananyi jambarri, baki yali najba jangu nanaba. Marda Jisus nyuli nanaba, karrinjayi janguna. Yundijba nyuli kaku baki damba.
JOH 21:10 Yanybayi Jisus yalungi, “Kuyu narri kaku ngakindurri, jali narri wakaramba.”
JOH 21:11 Baki jilajbayi Bida muwardarri baki wililijbayi lawaka bijalyurri. Nanda lawaka kajayudi kakuyudi. Mikukiya dalyawijba nanda lawaka, ngala kajayudi kakuyudi, wirdikudukudu, 153 kaku.
JOH 21:12 Nanamanji yalungki mankumanku, “Yiningki nanda Jisus, yiningki yingka.” Ngala miku yaliyanyi ngajaka, “Wanyi ninji.” Miku. Manyirru yali nangangi Jisuskanyi. Baki yanybayi Jisus yalungi, “Jungku narri nayiba. Wardamba narringka mamanyi.” Baki yali jingkijba nanda, nyuli Jisus, nyuli yalungi mambuka.
JOH 21:13 Wajba yalunyi Jisuswanyi dambanyi baki kakunyi marda.
JOH 21:14 Nani barri minimba nangki Jisus yalungi kandimukuyngka. Wabula kujarraka yali najba Jisus wanka, bayngkani nangki janyba barri, baki nyuli wankamba Jisus Kudwanyi.
JOH 21:15 Jali yalu wardajba muwa, baki yilikajbayi Bida Jisuswanyi, “Sayimin Bida, maruka ninji wajarriykanyi. Ngala wanyingkanyi ninji maruka kudanyu, wajarriykanyi kuna, ngaki kuna.” Jananganjayi Bidawanyi, “Mambuka, ninji jingkijba jala ngayu maruka muwa nganyi.” Yanybayi Jisus nangangi, “Lalanbakiyi ngakinmuku, barrinani yalu lalanbawarr, barrinani yalu lalanba jibmuku.”
JOH 21:16 Mili nyuli yilikajba Bida Jisuswanyi, “Sayimin Bida, maruka kuna ninji ngaki.” Jananganjayi Bidawanyi, “Yi, mambuka, ninji jingkijba jala ngayu maruka muwa nganyi.” Yanybayi Jisus nangangi, “Lalanbakiyi ngakinmuku barrinani yalu lalanba jibmuku.”
JOH 21:17 Baki mili yilikajbayi Bida Jisuswanyi, “Sayimin Bida, maruka kuna ninji ngaki?” Ngala nginduyi muwa Bida jali mili ngakaja Jisuswanyi nanamannga jangkurr kujarraka barndayka, “Maruka kuna ninji ngaki.” Nginduyi Bida nanankanyi nanamannga jangkurranyi. Baki nyuli jananganja, “Mambuka, ninji jingkijba bukamba yaji. Ninji jingkijba jala ngayu maruka muwa nganyi.” Baki yanybayi Jisus nangangi, “Lalanbakiyi ngakinmuku barrinani yalu lalanba jibmuku.”
JOH 21:18 Mili yanybayi Jisus Bidanyi, “Yanyba ngayu duja jangkurr, jala ninji juka wabula, ninji muningka jila, ngala jalija ninji malbu, baki manjijba janganyingka jalu. Janganyingka manjijba jalu, baki ngurranyiwanyi janinya kijijba jalu, kijijba janinya jalu kudanyu barri, baki kuyuja ninya yingkayurri yajiyurri ngurranyiwanyi, ngala miku ninjiyi nulijba jilaykanyi, jalija ninya kuyu nanankurri.”
JOH 21:19 Nanda jangkurr yanybayi Jisus Bidanyi, karunki nanda Bida jayalu daba kurdanba nganinymukunyi. Nani barri nangkaja janyba. Baki yingkamukunyi jayalu wajba Kud kunybanyi jangkurranyi, jalija nani barri nangka janyba Bida. Nani barri yanybayi Jisus Bidanyi baki mili yanybayi Jisus nangangi Bidanyi, “Jilajbakiyi ngakindu yurrngumba.” Barriwa.
JOH 21:20 Kulwayi Bida, baki najba nyuli nanda yingka kandi, nanda jali jungku Jisusnyina yurrngumba nangandu, nanda jali maruka Jisus muwa nangangi kudanyu, nanda jali jungku wabula bundu Jisusnyina mungana ngala yalungki wardamba mamanyi, nanda jali yanyba nanamanji, “Mambuka, wanyi nanda jalija nangka yangkalamba nganyinbunanyi.”
JOH 21:21 Kulwayi Bida baki najba nyuli nanda yingka kandi nangangi, baki yanybayi Bida Jisuskanyi, “Mambuka, ngala nayinda wanyimbaja.”
JOH 21:22 Jananganjayi Jisuswanyi, “Jalimi ngayu yanyba nangangi, janyulu jungku wanka yurrngumba nanankurri jalija ngayu wijba, ngala miku nanda nganyi yaji. Munyajbakiyi. Ninjikiyi jilajba ngakindu.”
JOH 21:23 Yanyba yalungkili kandimuku nanankanyi jangkurranyi yanyba jali Jisus. Mankumanku yalungki Jisuskanyi jangkurranyi. Ngamu yanybayi Jisus nangangi, “Miku nangkiyi janyba nanda kandi.” Ngala miku yanybayi Jisus miku nangkiyi janyba nanda nangangi kandi. Miku nyuliyi yanyba nani. Yinini jangkurr nyuli yanyba. Muningka nyuli yanyba nayinda jangkurr, “Jalimi ngayu yanyba nangangi, janyulu jungku wanka yurrngumba nanankurri jalija ngayu wijba, ngala miku nanda nganyi yaji.” Barriwa.
JOH 21:24 Ngayu nanda kandi jali najba bukamba nayinda yaji. Ngayu karungka narrinya kudukudunyi jangkurranyi nangangi Jisuskanyi. Ngayu yarrijba nayinda jangkurr najana, narri jingkiykanyi nayinda jangkurr nangangi duja barri.
JOH 21:25 Yanybayi Jisus kudukudu jangkurr. Nyuli kunymamba yalunya kudukudu. Miku bukamba jangkurr jali yanyba Jisus nanginyina najana. Nanda yingkamuku jangkurr Jisuskanyi, jalimi bukamba jangkurr Jisuskanyi yarrijba nganinyiwanyi najana, baki nanamuku najamuku walbinyi, kajamuku najamuku, wirdikudukudu. Barriwa barri. Bukamba nayinda jangkurr.
ACT 1:1 Diyubulu, wabula ngayi yarrijba jangkurr najana. Manjijba ngayi nanama jangkurr nganyindurri. Nanda naja yanybaka Jisuskanyi, jali nyulu milidimba baki kunymamba yalunya kajamuku.
ACT 1:2 Baku, jali janyba nangka Jisus, wankambayi Jisus Kudwanyi, baki kirrijba nyuli kingkarri jungunki Kudnyina. Waluwa nyuli kirrijba, yanyba nyuli Jisus kandimukuyngka. Jirrinybayi Jisuswanyi kudukudunyi yajinyi. Baki buli manjijba yalunya nanamuku kandimuku. Manjijbayi Jisuswanyi marda Kunybawanyi Ngarnduwanyi Kudkanyi. Waluwa buli yarrijba nanamuku kandimuku wabula.
ACT 1:3 Yingamali yakarl baki bijal mili 40 kambana minimba nangki Jisus yalunburri. Jungku nyuli yalunbu, baki mili jungkuyi, baki mili. Yali jingkijba jali nyulu wanka, najba yali Jisus. Najbayi Jisus, baki yanyba yali nangangi. Yali jingkijba jali nyulu wanka jungku. Baki Jisus, nyuli karu yalunya Kudkanyi, lalanbayi yalunya yurrngumba Kudwanyi.
ACT 1:4 Buyingka barri baku bijal, jali Jisus yalunbu, nyuli jirrinyba yalunya nanginkanyi jangkurranyi, “Wambu narri. Jungku nayiba Jirusalim. Mikujiyi jila nanginbunanyi, nayibakiyi jungku. Janarri yukumba nayiba Jirusalim nanankanyi, manjijba jalija Kudwanyi. Wabula ngayi karu narrinya nanankanyi jalija manjijba Kudwanyi narrindurri.
ACT 1:5 Nanda nganinyi, niji Jun Ngurrunbawarr, nyuli yawumba narrinya wabudana, ngala Kudwanyi, janyulu yawumba nangangi Kunyba Ngarndu Kudkanyi narrindu. Janyulu yawumba Kunyba Ngarndu Kudkanyi narrindu mankanyina. Janyulu manjijba nangangi Kunyba Ngarndu narrindurri Kudwanyi.”
ACT 1:6 Nanamuku jali manjijba Jisuswanyi, yali malumba jungku nangandu Jisusnyina kajamuku. Yali ngajaka Jisus, “Mambuka. Ninjija kuna jungku mambuka. Janinji jungku mambuka kuna Jumukuyngka baki ngurranyimukuyngka lukuluku. Mambuka kuna janinji jungku. Winyurru kuna janinji minimba yalunya, janinji jungka mambuka bukambijuyngka.”
ACT 1:7 Janangajayi Jisuswanyi, “Nanda jangkurr jala ngaki Buwakanya yanybaka, nanda duja jangkurr. Jungku jangayu mambuka bukambijuyngka baku. Ngala miku narrimi jingkijba yaji baku. Ngawamba Kud, ngawamba nyulu jingkijba yaji baku.
ACT 1:8 Ngala janarri jungku mirnarrijba muwa, janarri jungku ngiruka, jalija Kudwanyi yawumba Kunyba Ngarndu Kudkanyi narrindu. Jalija Kudwanyi yawumba Kunyba Ngarndu nangangi Kudkanyi narrindu, baki janarri karu yalunya kudukudu ngaki. Janarri karu ngaki kudukuduna yajina, nanginyina yajina Jirusalim, nananyina yajina Judiya, baki yingkana yajina Samariya, baki yingkana yajina, bukambijina yajina. Janarri karu ngaki bukambijina yajina, wandijiyana.”
ACT 1:9 Jali nyulu yanyba Jisus nanankanyi jangkurranyi barriwa, baki manjijba nyuli Jisus kingkarriji Kudwanyi. Yali najba Jisus kirriykurri kingkarri ngaluna. Kujba yalungki nangangi Jisuskanyi ngaluna, ngala mikuyaji. Bayiwujba yali nangangi.
ACT 1:10 Jali yalu kujba nangangi ngaluna, nganinyiwuya bula karrinja yalundu. Jumbala bulangi bunyala. Buli Yanjilwuya waki jalili Kudkanyi. Karrinja buli yalundu Yanjilwuya.
ACT 1:11 Baki yanyba buli yalungi, “Narri, jalili jungku wabula nananyina yajina Kalili, narri kujbangka yaji lalijina. Wanyingkanyi narri kujba nangangi lalijina. Nanda Jisus, manjijbayi nanda Kudwanyi ngaluna, ngala baku janyulu wijba ngaluna. Nyuluwa wijbaja baku ngaluna.” Nani yanybayi Yanjilwuya.
ACT 1:12 Yali karrinja yundu kulawirana niji Yulib, jali kirrijba Jisus kingkarriji. Wijbayi nganinyiwuya kingkarri lalijiyurri Yanjilwuya, baki wijba yali Jirusalimyurri. Nanda kulawira Yulib bundu Jirusalim. Nanda kulawira bundu karru.
ACT 1:13 Wijba yali karrina Jirusalimyurri, baki ngankijba yali barrawuna, nananyina barrawuna jalili yalu jungku. Jungku yali nanaba, Bida, Jun, Jayims baki Yandru. Marda Bilib, baki Dumas. Bardulumu baki Madiyu, baki yingka Jayims, nangangi nijanganjinyi Yalbayis, baki Sayimin Saludi, baki Judas, nangangi nijanganjinyi Jayims.
ACT 1:14 Jila yalili nanankurri barrawurri yanybiji yurrngumba. Yalili yanyba mududu Kudkanyi nanaba. Marda kudiya jibarri nanaba yalundu. Nanda ngardanganja Jisuskanyi, niji Mari, marda nyuli nanaba jungku yalundu. Baki kanyiya nangangi Jisuskanyi nganinymuku, yali jungku nanaba. Malumba yalili yanyba mududu Kudkanyi nanaba barrawuna. Barriwa.
ACT 1:15 Nanamanji kudukudu jali mirnarrijba yalu muwa Jisuskanyi, yali malumba jungku. Kudukudu nganinymuku baki jibarrimuku, 120 yali jungku malumba. Baki yanybayi Bida yalungi.
ACT 1:16 Yanyba nyuli, “Mankukiyi narri ngaki. Manku nganarri. Wabula wankala yanybayi Kunyba Ngarndu Kudkanyi. Yanyba nyuli wankalanyi mambukanyi Dayibidkanyi. Baki mambukawanyi nyuli yarrijba nanda jangkurr najana. Yarrijba nyuli jangkurr, nanda jali karu Kunybawanyi Ngarnduwanyi Kudkanyi. Yarrijbayi mambukawanyi Judaskanyi, ‘Janyulu minimba ngarrkadabawarr nanankanyi yajinyi, marrimba jayalu Jisus nanaba. Marrimba jayalu Jisus, minimbajangangi yalunya Judaswanyi nanankanyi yajinyi jalija jungku Jisus.’
ACT 1:17 Nanda Judas kandi nyulili Jisuskanyi. Kandi nyulili ngambalangi. Nyuli minimba ngarrkadabawarr nananyina yajina, marrimba jayalu Jisus. Baki wudumba nyuli dungala Judaswanyi, kuyunkanyi Judaswanyi ngarrkadabawarr nanganburri.” Barriwa. Nani barri yanybayi Bida yalungi Judaskanyi.
ACT 1:18 Nanangini Judaswanyi nyuli wudumba dungala, kuyungangi nyuli ngarrkadabawarr nangandurri Jisusyurri. Balki. Wudumba nyuli dungala Judaswanyi. Wajba nyuli yingka nanankanyi dungalanyi, baki wudumba nyuli yaji jamba dungalana. Baki janyba nangki Judas nananyina nanganginyina jambana. Yirrba nyuli jambarri, baki dumbayi muwa. Dumbayi muwa baki walajbayi nanda karnal.
ACT 1:19 Bukamba jali jungku nanaba Jirusalim, manku yali nanda jangkurr Judaskanyi, nyuli wudumba dungala jali nyulu yabimba balki yaji. Manku yali Judaskanyi janyba nangki. Baki nijarrijba yali nanda jamba nangangi, nijarrijba yali “Yakildama.” Nanda Yakildama Ju yanyi, barrinani jangkurr “Ngulyayudi Jamba.”
ACT 1:20 Mili yanybayi Bida yalungi. Yanyba nyuli nanda jangkurr jali yarrijba wankalawanyi Dayibidwanyi najana Kudkanyi. Yanybayi Bida, “Yarrijbayi Dayibidwanyi nayinda jangkurr najana Kudkanyi, nayinda barri. ‘Mikuwali yingka nganinyi jungku nananyina jambana. Mikuwali yingkawanyi yabimba nangangi barnda nanaba.’ Baki yingka mili jangkurr yarrijbayi Dayibidwanyi, ‘Mardakimi yingka nyuluja waki nangangi ngala nangki janyba.’” Barriwa.
ACT 1:21 Mili yanybayi Bida, “Marda ngambalimi yarrijba yingka kandi ngamandu. Marda ngambalimi yarrijba yingka, mikungangi Judas ngamandu jungunkanyi. Marda ngambalimi yarrijba yingka, nanda jala jilajbayi lukuluku ngamanbu yurrngumba Jisusnyina, nanda jali jilajba Jisusnyina yurrngumba, yurrngumba nanankardi barri jali ngurrunba yalunya Junwanyi wabudana. Marda ngambalimi yarrijba yingka nani barri, nanda jali ngamanbu yurrngumba jungku, nanda jali najba Jisus janybikurri nangka, baki wankiykurri mili. Nanda jali jila nanganbu Jisusnyina yurrngumba nanankurri barri jali wiykunumbayi Jisus kingkarri Kudwanyi.” Nani barri yanybayi Bida. Barriwa.
ACT 1:23 Baki yanyba yalungki kujarrayngka nganinyiwuyayngka. Yingka niji nangangi Madayis. Yingka niji nangangi Jusib. Nanda Jusib, kujarra yingamali niji nangangi, yingka Jusib, yingka Basabas, yingka Jusdus. Murrku nangangi niji.
ACT 1:24 Yanyba yalungki nganinyiwuyayngka, baki yanyba yali mududu Kudkanyi. Yanyba yali, “Mambuka, ninji jingkijba nanda jala nurrungki mankumanku. Ninya nurru ngajaka, minimbikanyi nurrungi, ninji minimbikanyi nurrungi nanda yingka kandi nurrundu.
ACT 1:25 Janinji minimba nanda yingka kandi. Bukambaja yingkawanyi nanda jali yingijba Judaswanyi. Jabarri yingkawanyi yabimbaja yaji. Mikuwali waki Judas nani janybangangi nangki Judas, baki barlba nyuli, ngarndu nangangi nanankurri balkiyurri yajiyurri Yilyurri.” Barriwa.
ACT 1:26 Baki baja yali barrinani kard kujarrayngka nganinyiwuyayngka. Baja yali wakarambiji yalu nanda jali yarrijba Kudwanyi. Baki wakarambayi barri Madayiswanyi. Baki nyuli jungku yalundu Kandimukunyina Jisuskanyi. Yali jungku 11 baki nyuli yingka mili yalundu nganinyimukunyina, manjijba jali Jisuswanyi.
ACT 2:1 Nanamuku mungkijimuku Jumuku, yalili jilajba kajamuku nanankurri Jirusalimyurri, jungkukili malumba wurarawala. Yalili jungku malumba nanamanji wurarawala wangarranyi. Nanda wangarr Bindikus. Nanamanji Bindikus nanamuku jali kuyu jangkurr Jisuskanyi yali malumba jungku yingamalina barndana. Jungku yali marda malumba.
ACT 2:2 Baki manku yali kirirr bardaykurri kingkarrinya. Nanda kirirr barrinani kururlwayi walkurra yunkurr. Manku yali kirirr jala yali jungku barndana.
ACT 2:3 Baki najba yali yaji, nanda barrinani jangu lukuluku. Nanda barrinani jangu, nanda jungkuyi yalundu kulajina, bayakarda mirnbi barrinani.
ACT 2:4 Nanamuku kajamuku barndana, yawumbayi Kunyba Ngarndu Kudkanyi kalawunyi yalundu mankanyina Kudwanyi. Yawumbayi nangangi Ngarndu yalundu Kudwanyi, baki minimbayi yalunya Kunybawanyi Ngarnduwanyi Kudkanyi, yalu yanybiji yinini yinini yanyi. Kudiya yali yanyba yingka yanyi, kudiya yanybayi yingka yanyi, kudiya yingka yanyi. Nani barri yali yanyba yinini yinini yanyi, jali yawumba Kunyba Ngarndu Kudkanyi bukamba yalundu Kudwanyi.
ACT 2:5 Nanamanji kajamuku Jumuku yali jungku nanaba Jirusalim. Nanamuku yali mirnarrijba yalu muwa Kudkanyi, yali jilajba nanankurri Jirusalimyurri wangarranyi, Bindikuskanyi. Yali jilajba jujunanyi, langina, kulani, bayunguna, karrina nanankurri barri.
ACT 2:6 Jala yali manku kirirr barrinani walkurra yunkurr, kudukudu yali jilajba nanankurri barndarri. Jilajba yali naji wanyingi ngirringirrimbayi yaji. Yali najba nanamuku jali kuyu jangkurr Jisuskanyi, baki manku yalunjali yanybikurri yinini yinini yanyi. Yali manku nanda yanyi jali yalungkili yanyba nananyina yingkana yajina juju jala yalili jungku. Manku yali nanda yanyi jali yalungkili yanyba. Manku yali yinini yinini yanyi, baki manmala yali kudanyu.
ACT 2:7 Manmala yali kudanyu, baki yanyba yalungki, “Nanginmuku jala yanyba kaja yanyi nani, yalungi yaji Kalili. Ngawamba yali jingkijba nanda Kalili yanyi yalkunyi. Miku yalimi jingkijba nanda jangkurr yanyba jala nurru.
ACT 2:8 Ngala yali yanyba yinini yanyi kaja barri. Ngambala manku jangkurr ngamanginmirra yanyi. Yanka yali yanyba yinini yanyi.
ACT 2:9 Ngambala jingkijba yalungi jangkurr. Ngambala jingkijba ngamanginmirra yanyi, ngala ngambalili jungku kajana yajina lukuluku. Jungku ngambalili kajana yajina, Bardiya, Midiya, Yilam, baki Misubidamiya. Kudiya ngambalili jungku Judiya, Kabadusiya, baki Bundus, Yasiya.
ACT 2:10 Kudiya ngambalili jungku Brijiya, Bambiliya, Yijib, baki Libiya bundu Sayirin. Kudiya ngambalili jungku Rum. Kudiya ngambala Jumuku. Kudiya ngambala ngurranyimuku, jungkukili yingkana kajana yajina. Bukamba ngambala maruka muwa Kudkanyi.
ACT 2:11 Kudiya ngambalili jungku Krid, baki Yarabiya. Ngala bukamba ngambala maruka muwa Kudkanyi. Manmala ngambala kudanyu jala ngambala manku nanginmuku nganinyimuku yanybikurri yinini yanyi. Manmala ngambala kudanyu. Yanyba yalu kaja yanyi. Yalu karu ngambalanya kajanyi ngirukanyi yajinyi jali yabimba Kudwanyi. Karu yalu nanamannga jangkurr. Yalu yanyba kaja yanyi.” Barriwa. Nani yalungki yanyba nanamuku jali yalu jilajba nanankurri. Barriwa.
ACT 2:12 Manmala yali kudanyu. Miku yaliyanyi jingkijba yaji. Yililikajba yalungki, yililikajbayi, “Yanka yalu yanyba nanda yinini yinini yanyi. Yanka yalu yanyba.” Barriwa. Nani yalungki yilikajba.
ACT 2:13 Jawuda yali yanyba nani, ngala jawuda yali yanyba, “Wanindijbangka kulaji. Yanyba yalu yinini jangkurr, ngarabangangi yali kaja kamukamu. Wanindijbangka kulaji.” Barriwa.
ACT 2:14 Ngala nanda Bida, jungku nyuli yalundu, manjijba jali Jisuswanyi. Karrinja nyuli, baki kaya nyuli kudanyu muranyi. Kaya nyuli, “Narri mungkiji ngaki, baki bukamba narri jalili jungku Jirusalim. Manku nganarri. Janga karu narrinya nanginkanyi jala narri manku.
ACT 2:15 Nanda jangkurr kamukamunyi, miku nanda duja. Miku nurru wanindijba kulaji. Yuwaji yalibala. Jumuku ngambala. Miku ngambalili ngaraba yalibala.
ACT 2:16 Janga karu narrinya jangkurranyi Kudkanyi. Yarrijbayi jangkurr najana wankalawanyi barri, niji Jul. Mankukiyi nayinda jangkurr nangangi wankalanyi.
ACT 2:17 Yanybayi Kud wankala, ‘Baku juju janga yabimba kudukudu. Janga yabimba kudukudu ngiruka yaji. Janga yawumba ngaki Kunyba Ngarndu yalundu bukambijunyina. Jandanyi narringi, nganinymuku, jibarrimuku, jayalu yanyba ngaki jangkurr. Kaburrwaburr narringi, jayalu buwarrajimba yaji, baki malbumalbu narringi jayalu buwarrajimba yaji marda. Jayalu buwarrajimba yaji Kudkanyi ngala yalu yamininyi jungku. Jayalu buwarrajimba yaji, yabimba jalija Kudwanyi.
ACT 2:18 Yi. Janga yawumba ngaki Kunyba Ngarndu yalundu wakiwarr marda. Nganinymuku baki jibarrimuku wakiwarr, jayalu yanyba ngaki jangkurr.
ACT 2:19 Janga yabimba ngiruka yaji lalijina, baki jambana. Janga yabimba ngulya, baki jangu, baki walkurra kurnngarr.
ACT 2:20 Mungijbaja yaji bukamba, mikuyaji ngardaranyi. Nanda yakarl, janyulu nganmarra barrinani ngulya. Waluku janyulu yabimba nanda yaji Kudwanyi. Bayngkani jalija nyulu wijba, janyulu yanyba yalungi bukambijuyngka, jali yalu barimba yaji, jali yalu balkijba yaji.
ACT 2:21 Nanamanji barri nanda jala kaya Kudkanyi, nanda jala ngindu jungunkanyi nyulu balki, jalija nyulu kaya Kudkanyi, baki baku marrimbaja nanda mardarda Kudwanyi.’ Bukamba nanda jangkurr yanybayi wankalanyi.
ACT 2:22 Mili yanybayi Bida yalungi, “Manku nganarri mili. Narri Jumuku. Minimba nyuli Jisuskanyi, nangangi yaji Nasarid. Minimbayi ngambalanya Kudwanyi Jisuskanyi. Nanda Jisus nyuli walkurra mambuka. Narri najba nanda kudukudu yaji ngiruka, jali yabimba Jisuswanyi. Narri najbayi Jisus yabimbikurri nanda ngiruka yaji kudukudu. Narri jingkijba Jisus, nyuli milidimba kajamuku, kunymamba nyuli kajamuku. Narri jingkijba nanda ngiruka yaji kaja, jali nyulu yabimba Jisuswanyi. Kandimbayi Jisus Kudwanyi. Yabimba buli yaji ngiruka. Nani narri jingkijba.
ACT 2:23 Waluwa janyba nangki Jisus, waluwa barri, jingkijbayi narrinya Kudwanyi. Jingkijbayi narrinya nanankanyi jalija narri yabimba, narri kurdanbiji Jisus. Janyba nangkaja Jisus wabangkarra kurndana. Langandaba janarri Jisus kurndana. Ngarrkadaba janarri. Jingkijbayi Kudwanyi waluwa, ngala dadijba manjijba nyuli Jisus.
ACT 2:24 Baku bijal barri jala janyba nangki Jisus, baki wankamba nyuli Jisus Kudwanyi. Nanda Jisus, nyuli walkurra mambuka. Nanamukunyi nganinyimukunyi yali kurdanba Jisus, ngala nyuli wankijba mili. Miku nangkiya janyba yurrngumba, ngala Kud nyuli ngiruka. Ngiruka nyuli wankambikanyi Jisus mili. Wankijbayi Jisus baku bijal. Barriwa.
ACT 2:25 Yarrijbayi jangkurr najana yingkawanyi wankalawanyi, niji nangangi Dayibid. Yarrijba nyuli najana Kudkanyi, ‘Najba niyanya, ngaki mambuka ngakindu. Jungku nungkala malumba. Miku jangana yalu julwamba, jungkungangi nungkala malumba. Miku ngayiyi marrala.
ACT 2:26 Maruka ngayu muwa, mambukangangi nyulu ngakindu. Yanyba ngayu kunyba jangkurr nangangi, jingkijbangangi ngayu nayinda, jalija ngaka janyba, baki jangayu wankijba mili. Jungku jangayu wanka yurrngumba. Nanda ngayu jingkijba baki maruka ngayu muwa.
ACT 2:27 Jingkijba ninya Kud. Jingkijba ngayu, miku janganinji yingijba mankanyi ngujbuliykanyi, jalija ngaka janyba. Mikuwali ngujbulijba ngaki mankanyi, mikuwalingangi ngaki ngarndu barlba karrurriji. Mikuwali ngaki ngarndu barlba karrurriji, baki mikuwali ngujbulijba ngaki mankanyi.
ACT 2:28 Minimbayi ninji ngaki nayinda, janyba jangaka, baki janga wankijba mili. Maruka jangayu muwa, jingkijbangangi ngayu, jangayu jungku nganyindu.’ Nani yanybayi wankala. Barriwa.”
ACT 2:29 Mili yanybayi Bida, milidimba nyuli muran. Yanybayi Bida. “Mungkijimuku, nayinda jangkurr duja. Janyba nangki nanda wankalanyi Dayibid. Janyba nangki baki yali makaba nangangi mankanyi jambana. Makaba yali jambana bundu nayiba.
ACT 2:30 Nanda wankalanyi Dayibid, nyuli yanyba jangkurr Kudkanyi. Waluwa juju karuyi Dayibid Kudwanyi. Karuyi Kudwanyi nanginkanyi jangkurranyi, baku juju janyulu manjijba mungkiji. Nanda jalija manjijba Kudwanyi janyulu walkurra mambuka bukambijuyngka. Barriwa. Nanda Dayibid, nyuli walkurra mambuka Jumukuyngka. Baki manjijbaja yingka walkurra mambuka Kudwanyi juju bayngkani Dayibidkanyi, ngala nangki janyba wabula.” Barriwa.
ACT 2:31 Mili yanybayi Bida, yanyba nyuli, “Jingkijbayi Dayibidwanyi, yingka mambuka manjijbaja. Yarrijba nyuli nayinda jangkurr Dayibidwanyi. Yarrijba nyuli jangkurr nangangi jingkiykanyi nyuli yingkanyi walkurrayngka mambukanyi. Yarrijba nyuli nayinda jangkurr, ‘Mikuwali nangangi mankanyi kili jambana. Miku nyuliyi yingijba jambana, jalija nangka janyba. Mikuwali ngujbulijba mankanyi nangangi, jalija yalu makaba mankanyi jambana.’ Yarrijba nyuli nanda jangkurr, mambukanyi Dayibidwanyi, jingkijbangangi nyuli mambuka walkurra, wankijba janyulu mili.” Barriwa.
ACT 2:32 Yanybayi Bida yalungi muranyi, “Miku nanda mankanyi Jisuskanyi kiliyi jambana. Wankambayi Jisus mankanyi Kudwanyi. Najba nurri nanda Jisus wankiykurri. Najba nurri wankijbayi.
ACT 2:33 Nanda Jisus, kirrijba nyuli kingkarri lalijiyurri. Jungku nyulu kingkarri Kudnyina nangandu. Wajbayi Jisus Kunybanyi Ngarndunyi nanganginkanyi Kudwanyi. Wajbayi Jisus nanganginkanyi Ngarndunyi Kudwanyi. Baki Kud Buwakanya nangangi Jisuskanyi, wabula juju yanyba nyuli waykanyi Jisus Ngarndunyi. Yanyba nyuli waykanyi Jisus Kunybanyi Ngarndunyi Kudkanyi. Nayimanji barri, yawumbayi Kunyba Ngarndu Kudkanyi nurrundu Kudwanyi. Yawumbayi Kunyba Ngarndu Kudkanyi nurrundu Kudwanyi, baki yuku yanyba nurru yinini yinini yanyi. Nani yuku yanyba nurru, yawumbangangi Jisuswanyi Kunyba Ngarndu Kudkanyi nurrundu. Yabimba nurru kudukudu ngiruka yaji. Yuku yanyba nurru kaja yanyi. Nani yuku yabimba nanijba, baki yuku yanyba nurru yanyi, wajbangangi nurrunya Jisuswanyi Kunybanyi Ngarndunyi Kudkanyi. Barriwa.
ACT 2:34 Nanda mambuka Dayibid, miku nyuliyi yayanyba nanganginmayngka nanda jangkurr, jali ngayunarrinya karu. Miku nyuliyi kirrijba kingkarri barrinani Jisus kirrijbayi. Mili jangkurr yarrijbayi najana Dayibidwanyi. Yarrijba nyuli nayinda jangkurr, ‘Karuyi mambuka ngaki Kudwanyi, bulija jungku malumba kingkarri, Kud baki mambuka. Karu nyuli mambuka ngurrayngkanyi Kudwanyi, miku jayalu yabimba kiji nangangi mambukanyi ngurranyiwanyi. Nyulu ngirukamirra bukambijuyngka. Janyulu mambuka, janyulu mambuka bukambijuyngka nganinymukuyngka baki jibarrimukuyngka.’” Barriwa. Nani yanybayi Bida yalungi.
ACT 2:36 Baki mili yanybayi Bida yalungi, “Marda narrimi Jumukunyi jingkijba nayinda jangkurr. Nanda Jisus, narri kurdanba nanda. Ngarrkadaba narri kurndana. Kurdanba narri, ngala nyuli yarrijba Jisus Kudwanyi. Yarrijba nyuli Jisus walkurramirra mambuka bukambijuyngka. Nanda Jisus yingka niji nangangi, Krayis. Nanda niji Krayis, barrinani ‘nanda jala yarrijba Kudwanyi.’” Barriwa.
ACT 2:37 Jali manku yalu jangkurr Bidanyi, baki ngindu yali muwa muran. Ngindu yali kudanyu, kurdanbangangi yali Jisus. Yilikajba yali nanamuku jali manjijba Jisuswanyi. Yilikajba yali, “Narri, kandimuku Jisuskanyi. Wanyimba janurru. Wanyimba janurru.”
ACT 2:38 Jananganjayi Bidawanyi, “Marda miku narrimi jungku balkina yuwana Kudkanyi. Marda narrimi waluku ngindu balkinyi yajinyi, nanda jalili narri yabimba, baki marda narrinyimi ngurrunba. Marda narrinyimi ngurrunba, babdayis barri narrinya, durrijba jala jangkurr Jisuskanyi. Baki janyulu manjamanjamba narringi balki yaji Kudwanyi. Baki janyulu yawumba nangangi Kunyba Ngarndu narrindu Kudwanyi.
ACT 2:39 Wabula juju wankala yanybayi Kud, janyulu wajba narrinya nanganginkanyi Kunybanyi Ngarndunyi. Janyulu wajba yalunya marda, jandanyimuku narringinmuku. Nanda jangkurr waykanyi Kunybanyi Ngarndunyi Kudkanyi, yanybayi Kud nanda jangkurr bukambijuyngka jala yalu jungku nanijba, marda jala bayngkani yaluja wanbiya. Yanybayi Kud nanda jangkurr bukambijuyngka jala yarrijba nyulu yalunya, yalu jilaykanyi nangandurri.” Barriwa.
ACT 2:40 Kajamuku jangkurr yanybayi Bida yalungi. Baki mili yanybayi jangkurr yalungi, “Narri, nganinymuku baki jibarrimuku balki narringi yaji kudanyu. Yanybaja Kud narringi, janarringka janyba, jalija narri miku ngindu jungunkanyi balki. Janarringka janyba, jalija yuwaji narri jungku balkina yuwana Kudkanyi.” Barriwa.
ACT 2:41 Kudiya kajamuku, yali kuyu nangangi jangkurr Bidanyi. Ngindu yali kudanyu yalunginkanyi balkinyi yajinyi, baki ngurrunbayi yalunya kandimukunyi nanijba. Ngurrunbayi yalunya kajamuku, wirdikudukudu, 3000 barri, nganinymuku baki jibarrimuku. Ngurrunbayi yalunya, ngindungangi yali yalunginkanyi balkinyi yajinyi.
ACT 2:42 Baki milidimba yalunyi yurrngumba kandimukunyi manjijba jali Jisuswanyi. Jungku yalili malumba, baki milidimba yalunjali jangkurranyi nanganginkanyi Jisuskanyi. Malumba yalili jungku. Milidimba yalunjali Jisuskanyi jangkurranyi, baki yanyba yalili mududu Kudkanyi. Jarrba yalili mama malumba marda.
ACT 2:43 Minimbayi yalunya manjijba jali Jisuswanyi. Minimbayi yalunya kajanyi yajinyi Kudwanyi. Ngirukanyi yajinyi minimbayi Kudwanyi. Baki kudiyamukunyi yali najba yalunya yabimbikurri ngiruka yaji, baki manmala yali kudanyu.
ACT 2:44 Jungku yalili malumba. Yanyba yalili mududu Kudkanyi. Wajba yalungkili yalunginkanyi yajinyi.
ACT 2:45 Wajba yali yingkamuku yalunginkanyi jambanyi. Wudumba yali dungala jambanyi, baki barrawunyi baki yajinyi. Wudumba yali dungala, baki muningka wajbayi yingkamuku yalundu nanankanyi dungalanyi. Mamanyi baki jumbalanyi yali wajba muningka. Muningka yalunya wajbayi, jala mikuyaji yalungi yajinyi.
ACT 2:46 Yalili jungku malumba walkurranyina jurjina, baki kamu yalili jarrba mama malumba barndana. Baki yanyba yalungkili Kudkanyi. Marukakili yalungi muwa Kudkanyi.
ACT 2:47 Yurrngumba yingkana kambana, baki yingkana kambana yanyba yalili kunyba jangkurr Kudkanyi. Brijba yalili Kudkanyi. Yanyba yalili mududu. Baki yingkamukunyi yali manku yalunya yanybikurri Kudkanyi, briykurri yalungka, baki nanamuku yingkamuku mirnarrijba yalungi muwa, jali yalu kuyu jangkurr Jisuskanyi. Yurrngumba, yingkana kambana, baki yingkana kambana yingkamuku kaja mili jungkuyi yalundu, yingkamuku jali manjamanjamba yalungi balki yaji Kudwanyi, jala nyuli marrimba yalunya mardamarda Kudwanyi. Barriwa.
ACT 3:1 Baku barri jilajba buli, Bida baki Jun. Jilajba buli walkurrayngkurri jurjyurri. Jila buli ngala nyuli bijal ngabungaburri yaji. Nanamuku Jumuku, yalili jilajba walkurrayngkurri jurjyurri. Yurrngumba yalili jilajba yanybiji mududu Kudkanyi ngala nyuli bijal ngabungaburri yaji.
ACT 3:2 Nanda jurj, walkurra bardawa nanaba jurjkanyi. Yalili karu nanda bardawa ‘Kunyba.’ Jungku nyuli nganinyi nanaba bardawana. Mikuwali jilajba nangangi nukami. Balki nangangi nukami bayakardanji. Yurrngumba yalili mula nanda nganinyi yingkamukunyi nanankurri bardawarri. Mikuwali jila nyuluma. Jungka nyulili nanaba wujuju, bakili nyulu yililikajba yingkamuku dungalanyi, jali yalu jilajba jurjyurri. Nani wudumba nyulili dungala mamanyi.
ACT 3:3 Jungku nyuli bardawana, baki najbayi bulanya Bida baki Jun jilaykurri nanganburri. Jali nyulu najba, kaya nyuli. Yilikajba nyuli bulanya, bula waji yajinyi, dungalanyi.
ACT 3:4 Ningkijba buli nanda nganinyi. Ningkijba buli, baki yanybayi Bida nangangi, “Ningkijbakiyi ngalinya.”
ACT 3:5 Baki ningkijbayi bulanya nganinyiwanyi. Ningkijba nyuli, mankumankungangi nangki, bulija wajba yajinyi, dungalanyi.
ACT 3:6 Yanybayi Bida nganiyngkanyi, “Mikuyaji dungalanyi ngakindu, mikuyaji. Ngala janinya wajba yinini yajinyi. Yinini janinya wajba. Nanda barri Jisus Krayis, nyulu ngiruka kunymambikanyi. Walajbakiyi ninji. Kunymambaka ninya Jisus Krayiswanyi. Walajbakiyi baki jilajbakiyi.”
ACT 3:7 Baki marrimba nyuli nganinyi marni Bidawanyi. Kingkarrumba nyuli. Yinarramba kunybijbayi nganinyi nukami baki darnyi. Ngiruka nyuli jilaykanyi.
ACT 3:8 Walajba nyuli dulu nanda nganinyi. Karrinja nyuli, baki jila nyuli nukamina yuku barri. Jilajba nyuli kalawuyngkurri jurjyurri. Jilajba nyuli kalawuyngkurri bulandu, Bidana baki Junyina. Bajaja nyuli baki yanyba nyuli kunyba jangkurr Kudkanyi, kunymambayingangi nukami Jisuswanyi. Yanyba nyuli “Kud, nyulu walkurra, nyulu ngiruka.” Barriwa. Walkurra muran nanaba jurjina. Yali najba nanda nganinyi. Najba yali nanda jilaykurri marda bajajankurri. Manku yali nganinyi yanybikurri kunyba jangkurr Kudkanyi.
ACT 3:10 Najba yali nganinyi, manku yali jangkurr nangangi murawanyi. Manmala yali kudanyu, jingkijbangangi yali nanda nganinyi. Jingkijba yali, nyulu nanda jali miku wabula jilaykanyi, jungkuyi nukami balki. Jingkijba yali, nanda jungkukili bardawana jurjkanyi. Manmala yali, jali yalu najba nanda jilaykurri. Barriwa.
ACT 3:11 Marrimba nyuli bulanya Bida marda Jun. Kajamuku yali jilajba yalundurri, karrinja yali lukuluku. Yaliyanyi najba bundu nanda nganinyi, manmalangangi yali nangangi. Karrinja yali nananyina yajina lukuluku. Nanda yaji niji, ‘Sulumun, nangangi Ngarndu.’ Karrinja yali nanaba naji yalunya, Bida marda Jun, marda nganinyi jali kunybijba. Barriwa.
ACT 3:12 Baki najba nyuli muran bundu Bidawanyi. Najba nyuli muran, baki yanybayi yalungi, “Narri Jumuku, wanyingkanyi narri manmala. Wanyingkanyi narri ningkijba nurrunya kudanyu. Wanyingkanyi narringka mankumanku. Mankumanku narringka nanginkanyi kuna, ‘Yiningki kunymambayi nganinyi nanginkujarranyi, ngirukangangi bula. Yiningki ngiruka bula kunymambiji yaji, yanybangangi bulili Kudkanyi, brijbangangi bulili Kudkanyi.’ Marda miku narringkimi mankumanku nani. Ngala kunymamba ngali nanda nganinyi Jisusngangi. Jisus, nyulu ngiruka kudanyu.
ACT 3:13 Nanda Jisus, nyulu jungku wakiwarr Kudkanyi. Wakingka nyulu Kudkanyi. Yarrijba nyuli Jisus walkurra mambuka Kudwanyi. Kud, nyulu Kud bukambijuyngka. Nyulu Kud yalungi wankalanyi, Yabrayamkanyi, Yayisakanyi, marda Jakubkanyi. Nyulu Kud bukambijuyngka, wankalanyi marda ngambalangi barri nanijba. Ngala narri, marrimba narri nanda Jisus. Wudumba narri Jisus mambukamukuyngka jurjkanyi, yali kurdanbiji. Miku nyuliyala nulijba kurdanbikanyi Jisus nanangini mambukawanyi kabaminkanyi, niji Bilad. Nanangini Biladwanyi nyuliyanyi manjijba Jisus brisinanyi, jungku janyulu muningka, ngala miku. Nyuli wajba Jisuskanyi narrinya. Wajbayi Biladwanyi narrinya Jisuskanyi langandaji narri kurndana.
ACT 3:14 Nanda Jisus, nyulili jungku kunyba. Nyuli Kudkanyi. Ngala narriyanyi kurdanba Jisus. Nyuliyanyi manjijba Jisus barndarri Biladwanyi, ngala narri barri, ngajaka narri Bilad manjiykanyi yingka brisinanyi, jungku janyulu muningka. Wabula nanangini yingkawanyi daba nyuli nganinyi, kurdanba. Narri nulijba Biladkanyi manjiykanyi nanda yingka, ngala narri nulijba kurdanbikanyi Jisus. Narri manjijbayi Jisus Biladyurri kurdanbiji. Ngala yurrngumba jungkuyi Jisus kunyba Kudkanyi. Yanybayi Jisus jangkurr Kudkanyi, duja jangkurr. Nyuli jungku kunyba Kudkanyi yurrngumba.
ACT 3:15 Nani barri narri kurdanbayi Jisus, nanda jalija wankamba ngambalanya mili. Narri kurdanbayi, ngala wankambayi Jisus mili Kudwanyi. Najba nurri Jisus wankiykurri mili, baki nurru karu narrinya nayi kaja jangkurr.
ACT 3:16 Nayinda nganinyi, yuku nangangi nukami, ngiruka jilaykanyi. Jisus nyulu ngiruka kunymambikanyi. Kunymamba ngali nayinda nganinyi, ngirukangangi Jisus. Kunymambayi nganinyi nukami Jisuswanyi, durrijbangangi ngali jangkurr Jisuskanyi. Najba narri nanda jalili wabula jungku yurrngumba balki nukami. Najba narri nganinyi karrinjankurri, jilaykurri, durrijbangangi ngali jangkurr Jisuskanyi.
ACT 3:17 Narri mungkiji ngaki. Mankukiyi ngaki jangkurr. Jingkijba ngayu narrinya. Jingkijba ngayu, muningka narri kurdanbayi Jisus. Miku narriyanyi jingkijba yaji, mudambanyi narri. Marda mambukamuku narringi, mudumbanyi yali jungku, baki kurdanba yali Jisus, yanybangangi nangka, nyulu jandanyi Kudkanyi. Yali ngamu nyulu jujijba.
ACT 3:18 Wabula juju yanyba yali nanamuku wankalanyi Krayiskanyi. Yanyba yali jangkurr Kudkanyi Krayiskanyi. Nayinda yali yanyba, ‘Linjumba jayalu kudanyu Krayis.’ Nanda jangkurr duja. Yanyba yali duja jangkurr wankalanyi. Nanijba barri narri linjumbayi nanda Krayis, narri kurdanbayi Jisus.
ACT 3:19 Ngindukiyi narri narringinkanyi balkinyi yajinyi. Jalija narri ngindu, jalija narringka yangkalamba Kudkanyi, baki manjamanjambaja nanda barri balki yaji Kudwanyi.
ACT 3:20 Marda narrimi maruka muwa Kudkanyi. Marda narrimi yabimba kunyba yaji yalungi, Kudkanyi baki yingkamukuyngka. Marda narrimi yabimba kunyba yaji yurrngumba, baki janyulu manjijba Jisus Kudwanyi. Wijbaja Jisus, janyulu jungku narringi mambuka marda.
ACT 3:21 Jungku janyulu Jisus Kudnyina. Jungku janyulu Kudnyina yurrngumba nanankurri jalija yabimba bukamba Kudwanyi barrinani buyingkinyi. Nanamuku wankalanyi, yali yanyba yingka jangkurr. Yanyba yali, ‘Yabimbaja Kudwanyi, yabimba janyulu bukamba barrinani buyingkinyi. Yabimba janyulu barrinani buyingkinyi nganinymuku, jibarrimuku baki jamba, baki yaji kudukudu. Bukamba junu yaji yabimbaja barrinani buyingkinyi Kudwanyi.’ Barriwa.
ACT 3:22 Wabula juju yanybayi nanda wankalanyi Musis, nyuli yanyba, ‘Manjijbaja Kudwanyi yingka, nanda jalija yanyba jangkurr Kudkanyi. Manjijba janyulu yingka, yanyba jalija jangkurr Kudkanyi. Janyulu mungkiji narringi, yaji nangangi Yisrayil. Nyulu barrinani ngayu, yaji ngaki Yisrayil marda. Marda narrimi manku nangangi jangkurr. Marda narrimi manku kudanyu.
ACT 3:23 Mankukiyi narri kudanyu nanda jalija manjijba Kudwanyi. Marda narrimi manku nanda jalija nyulu yanyba. Jaliyi narri yurlwa nanganginkanyi jangkurranyi, baki yanybaja Kud, janarringka janyba. Miku janarri wankijba mili.’ Nani yanybayi wankalanyi Musis. Barriwa.
ACT 3:24 Mili yanybayi Bida yalungi, “Bukambiju jali yanyba jangkurr Kudkanyi, wankalamuku, yalili yanyba nanankanyi, jalija manjijba Kudwanyi. Yalili yanyba nangangi Jisuskanyi. Nanda wankalanyi Samiyul, nyulili yanyba Jisuskanyi. Baki nanamuku bayngkani juju jali manjijba Kudwanyi yanybiji jangkurr Kudkanyi, yalili yanyba Jisuskanyi marda.
ACT 3:25 Nanamuku wankalanyi, yali mungkiji narringi. Yaji yalungi Yisrayil, barrinani narri, yaji narringi Yisrayil marda. Nanda jangkurr Kudkanyi, jali yanyba wankalanyi, marda yaliyanyi manku nanda jangkurr. Marda yaliyanyi manku yingkamukunyi wankalamukunyi. Marda juju bayngkani murrkani, marda yaliyanyi manku yanybikurri. Nanda jangkurr yalungi jali jungku juju baku bayngkani murrkani. Marda nanda jangkurr narringi, marda narrimi manku nanda jangkurr nanijba. Yanybayi Kud Yabrayamkanyi wankalanyi. Nayinda nyuli yanyba barri, ‘Karu ngayu duja jangkurr. Juju bayngkani murrkani janyulu jungku mungkiji nganyi. Janinji barrinani wankalanyi buwakanya nangangi. Wabulinyi ninji nangangi wulukanja. Janyulu jungku juju bayngkani. Nganinymuku baki jibarrimuku, jayalu maruka muwa jalija ngayu manjijba nanda juju bayngkani. Kajamuku nganinyi baki jibarri jayalu maruka muwa, yabimbangangi janyulu kunyba yaji ngiruka. Maruka jayalu.’ Barriwa.
ACT 3:26 Nani yanybayi Kud Yabrayamkanyi. Baki nyuli manjijba jandanyi nangangi Kudwanyi. Yarrijbayi Jisus Kudwanyi, nyuluja waki nangangi Kudkanyi. Waluwa manjijbayi Jisus Kudwanyi nanginkurri yajiyurri ngamanginkurri, Yisrayilyurri. Manjijba nyuli Jisus ngambalangi, milidimbiji ngambalanya. Baki milidimbayi Jisuswanyi ngambalanya ngindunkanyi ngamanginkanyi balkinyi yajinyi. Milidimba nyuli ngambalanya jungunkanyi kunybana yuwana Kudkanyi.” Barriwa.
ACT 4:1 Nani buli yanyba, Bida marda Jun. Ngala yuwaji buli yanyba yalungi walkurrana jurjina, baki wanbiyayi yingkamuku. Wanbiyayi mambukamuku nanankanyi jurjkanyi, baki mambukamuku yilarranyi, baki nanamuku Sajusi wanbiya yali marda. Nanamuku Sajusi yalili yanyba, mikuwali yali wankijba mili baku, jalija yalungka janyba. Nani yalili yanyba. Wanbiya yali, ngala yuwaji buli milidimba yaji.
ACT 4:2 Yurlwa yali nanamuku mambukamuku. Ngarrangarra yali muwa bulangi, Bidanyi marda Junkanyi, milidimbangangi buli nanamuku walkurranyina jurjina. Milidimbangangi buli yalunya. Yanyba buli nayinda jangkurr, “Janyba nangki Jisus, baki wankambayi mili nanda Jisus Kudwanyi. Nani wankambaja yingkamuku Kudwanyi. Janyba jayalungka yingkamuku, baki janyulu wankamba yalunya mili Kudwanyi.” Nani buli milidimba yalunya, baki mambukamuku nanaba yali ngarrangarra muwa bulangi Bidanyi baki Junkanyi nanankanyi jangkurranyi.
ACT 4:3 Ngala kajamukunyi, kuyu yali bulangi jangkurr. Manku yali bulanya, baki kuyu yali bulangi jangkurr. Nanamanji kajamuku, yali kuyu jangkurr Jisuskanyi, mijimbangu, 5000 barri. Ngala ngarrangarra yali muwa nanamuku mambukamuku, baki yali wudumba bulanya, marrimba yali. Yarrijba yali Bida baki Jun brisinyina, milidimbangangi buli jangkurr wankiykanyi mili. Jungku buli brisinyina mungana. Barriwa.
ACT 4:5 Munganawa, mambukamuku jurjkanyi baki nanamuku jalili milidimba yuwa Jukanyi, yali jungku malumba. Jungku yali Jirusalimnyina. Marda jungku yali walkurramuku mambukamuku jurjkanyi. Niji yalungi Yanas, baki Kayabas, baki Jun, baki Yalisanda. Jungku yali nanaba nanamuku walkurramuku mambukamuku jurjkanyi. Yingkamuku nanaba marda. Walkurra muran, jungku yali malumba.
ACT 4:7 Manjijba yali yilarr wudumbiji Bida marda Jun brisinanyi. Wanbiya buli baki karrinjayi waluwa muranyina. Ngajaka yali mambukamukunyi, “Yanka nimbali kunymamba nanda nganinyi jali mikuwali jilajba nukamina. Wanyi nimbalangi mambuka jali ngiruka nyulu kunymambikanyi.” Barriwa.
ACT 4:8 Nanda Kunyba Ngarndu Kudkanyi, nyuli jungku kalawunyi bulandu Bidana baki Junyina. Baki jananganjayi Bidawanyi, “Mambukamuku, mankukiyi ngaki jangkurr. Baki narri malbumalbu marda, mankukiyi.
ACT 4:9 Wanyingkanyi narri ngajaka ngalinya yabimbikanyi kunyba yaji nanankanyi nganiyngkanyi. Jungku ngali balki kuna, kunybijbangangi nyuli mankanyi. Narri ngajaka ngalinya, ‘Yanka kunybijbayi nanda nganinyi.’ Ngajaka nganarri, ‘Yanka barri.’
ACT 4:10 Marda narrimi jingkijba, baki bukambiju jali jungku nanginyina yajina Yisrayil. Marda narrimi jingkijba, kunymambayi nganinyi Jisus Krayiswanyi. Nanangini Jisus Krayiswanyi, kunymamba nyuli nanda nganinyi. Nanda Jisus Krayis, nangangi yaji Nasarid, nyulu ngiruka kunymambikanyi. Ngala narri kurdanba Jisus, langandaba narri kurndana. Langandaba narri nanda Jisus, ngala wankambayi Jisus mili Kudwanyi.
ACT 4:11 Yarrijba nanangini wankalawanyi jangkurr najana Kudkanyi. Nyuli yarrijba nayinda jangkurr, ‘Ngala nanda kurnda jali yalu janyba, nanda kurnda walkurra. Yingka nyuli nulijba nanankanyi walkurrayngka kurndanyi yundukula.’ Yarrijba nyuli, nanangini wankalawanyi, Jisuskanyi. Nanda kurnda barrinani Jisus. Narri janyba nanda kurnda, narri kurdanbayi nanda Jisus. Nanda kurnda walkurra barrawunyi, nanda Jisus, nyulu walkurramirra mambuka.
ACT 4:12 Kudwanyi nyuli karu Jisus, nyulu janybiji balki yaji nganinyinanyi. Ngawamba Jisuswanyi nyuluma janybaja balki yaji. Yuku janybaka balki Jisuswanyi, yuku nyulu marrimba yalunya mardarda, nganinymuku, jibarrimuku, baki jayalu jungku kunyba Kudkanyi. Miku nyuliyanyi karu yingka janybiji balki Kudwanyi. Miku yingka jala nayiba jungku, baki miku yingka jala yingkana yajina. Ngawamba Jisuswanyi, yuku nyulu marrimba yalunya mardarda, nyuluma.” Barriwa.
ACT 4:13 Manmala yali nanamuku kajamuku mambukamuku. Manmala yali kudanyu. Bida baki Jun, buli yanyba barrinani mambukawuya. Miku yaliyanyi jingkijba bulanya, mambukamukunyi. Mankumanku yalungki, “Miku bula walkurrawuya nganinyiwuya barrinani ngambala. Miku buli jila skulyurri.” Ngala jingkijba yali bulanya, kandiwuya Jisuskanyi. Jingkijba yali, jungku bulili nangandu Jisusnyina.
ACT 4:14 Muningka yali jungku karda mambukamuku. Miku yaliyi yanyba bulangi, jala buli yabimba balki yaji. Muningka yali karda jungku mambukamuku. Nanda nganinyi jali kunybijba, nyuli karrinja bulandu Bidana marda Junyina. Miku yaliyi yanyba balki bulangi.
ACT 4:15 Baki karu yali Bida marda Jun mambukamukunyi. Yali karu bulanya barlbiji danbiyurri. Jilajba yali danbiyurri Bida marda Jun, marda nganinyi jali kunybijba. Yukumba yali danbina, ngala yanyba yalungki mambukamuku.
ACT 4:16 Ngajaka yalungki, “Wanyimba jangambala bulangi. Jingkijba yali bukambiju jala jungku Jirusalim. Yali jingkijba bulanya, buli kunymamba nanda nganinyi. Miku ngambaliyi yanyba, jujamba buli yaji, jala buli yabimba nanda nganinyi. Barriwa duja.
ACT 4:17 Jaliyi miku jabula mili yanyba Jisuskanyi, baki yingkamuku, yiningki miku jayalu manku nanda nganinyi kunybiykanyi. Karu jangambala bulanya, miku jabula mili yanyba Jisuskanyi. Marda miku bulimi karu yingkamuku Jisuskanyi. Baki jayalu mamanumba Jisus bukambijunyi.” Barriwa.
ACT 4:18 Baki kayayi yalungi mambukamukunyi. Kayayi yalungi, wiykanyi kalawuyngkurri. Wijba yali, Bida marda Jun, marda nanda nganinyi jali kunybijba. Jirrinyba yali nganinyiwuya mambukawanyi. Jirrinyba yali Bida baki Jun, miku bula mili yanybiji, miku milidimbiji Jisuskanyi mili. Nani yali jirrinyba bulanya. Barriwa.
ACT 4:19 Ngala buli jananganja, “Wanyingkanyi jangkurranyi marda ngalimi ngayangayijba, narringi jangkurr kuna, Kudkanyi nangangi jangkurr kuna. Wanyingkanyi jangkurranyi marda ngalimi ngayangayijba. Marda narringkimi waluku mankumanku nanankanyi jangkurranyi jali ngalinya ngajaka ngayangayiykanyi.
ACT 4:20 Najba ngali kaja yaji ngiruka jali yabimba Jisuswanyi. Najba ngali nanda jali narri langandaba kurndana. Najba ngali nanda Jisus jali wankamba mili Kudwanyi. Manku ngali nanda Jisus jali nyulu milidimba nurrunya. Miku ngaliyi jungku karda. Jangali karu yingkamuku Jisuskanyi.” Barriwa.
ACT 4:21 Ngirrwa yali bulangi mambukamuku. Mili yali jirrinyba bulanya miku karunki yingkamuku Jisuskanyi. Mili yali jirrinyba bulanya kudanyu, baki yali karu bulanya barlkanyi. Yali manjijba bulanya jurjnanyi. Miku yaliyanyi linjumba bulanya, wakingangi buli Kudkanyi. Baki yanybayi bukambiju Kudkanyi, kunymambangangi nyuli nganinyi Kudwanyi. Yanyba yali kunybanyi jangkurranyi Kudkanyi. Mirnarrijba yali muwa nanankanyi nganiyngkanyi.
ACT 4:22 Nanda nganinyi jali kunymamba Kudwanyi, bijal malbu, nyuli jungku 40 janjawala.
ACT 4:23 Barlba buli jurjnanyi, baki yinarramba buli wijba yalundurri kandimukuyngkurri. Karu buli yalunya nanankanyi jali jirrinyba bulanya mambukamukunyi. Karuyi yalunya nanankanyi jangkurranyi.
ACT 4:24 Jali yalu manku nanda jangkurr yingkamukunyi kandimukunyi, baki yali yanyba mududu Kudkanyi, malumba. Yanyba yali mududu nanginkanyi jangkurranyi, “Ninji walkurra mambuka nurrungi. Yabimba ninji bukamba yaji kunyba. Yabimba ninji jamba, marda laliji, marda kanja. Yabimba ninji nganinymuku baki jibarrimuku, marda mama. Yabimba ninji bukamba yaji.
ACT 4:25 Wabula juju nganyinyi Kunybawanyi Ngarnduwanyi nyuli karu nanda wankalanyi Dayibid. Karu nyuli Dayibid yarriji nganyi jangkurr. Yarrijba nyuli nayinda jangkurr Dayibidwanyi, ‘Birrirrinja jayalungka yabimbiji kiji ngurranyimuku. Birrirrinja jayalungka yabimbiji walkurra kiji bulangi Kudkanyi baki Krayiskanyi. Wanyingkanyi jayalunya birrirrinja kijinyi. Jayalu jila lukulukunanyi, karrina, bayunguna, langina baki kulani jayalu jila mambukamuku. Malumba jayalu jungku. Birrirrinja jayalungka yabimbiji kiji bulangi Kudkanyi baki Krayiskanyi. Birrirrinja jayalungka ngala wambu barri, mamanumba barri yaji.’ Nani yanybayi wankalanyi.”
ACT 4:27 Mili yali yanyba mududu, “Yanyba nyuli duja jangkurr Dayibid. Nanda mambuka Jukanyi, Yirud, marda mambuka kubaminkanyi Bilad, marda Jumuku, marda ngurranyimuku, bukambijunyi yali yabimba kiji nangangi Jisuskanyi. Nanda Jisus wakiwarr nyulu nganyi. Wabula juju ninji yanyba, janinji manjijba nanda Jisus.
ACT 4:28 Baki baku barri jila yali malumba baki yali kurdanba Jisus. Langandaba yali Jisus, ngarrkadaba yali. Ngala ninji jingkijba bukamba nanda waluwa. Manjijba ninji nganyi jandanyi, ngala jingkijba ninji, jayalu kurdanba Jisus.
ACT 4:29 Mambuka, mankukiyi nurrunya jala nurru yanyba mududu nganyi. Nanamukunyi mambukawanyi, yali jirrinyba bulanya, jirrinyba yali bulanya Bida marda Jun, miku buliyi karu yingkamuku Jisuskanyi. Ngajaka nurru ninya. Ngajaka nurru ninya, janinji yabimbiji nurrunya ngiruka. Janinji yabimba ngiruka, baki janurru mili karu yalunya Jisuskanyi. Jungku nurru malumba, wakinki nganyi.
ACT 4:30 Yabimba ninji ngiruka yaji, baki jayalu manmala yingkamuku. Jayalu manmala, jalija yalu najba nganinymuku kunybiykurri, nganyi jandanyingangi. Nyulu ngiruka kunymambikanyi. Nyulu ngiruka kunymambikanyi bukambiju nanamuku jala lunji.” Barriwa.
ACT 4:31 Nani barri yali yanyba mududu nangangi Kudkanyi. Baki kulbayi nanda barrawu jali yalu jungku nanaba. Kulbayi nanda barrawu, yawumbangangi Kudwanyi nangangi Kunyba Ngarndu yalundu mankanyina. Nanamanji barri kulbayi nanda barrawu. Baki nanankardi barri yali yanyba ngiruka jangkurr nangangi Kudkanyi.
ACT 4:32 Nanamuku kandimuku, mankumanku yalungki nanamannga yajinyi. Miku yingkanyi. Nanamannga yajinyi. Nanamannga yajinyi yalungki mankumanku. Wawajba yalungki yajinyi. Miku yaliya yanyba, ‘Nanda ngaki.’ Miku. Wawajba yalungki yajinyi, barrinani jumbalanyi, marda mamanyi, marda dungalanyi.
ACT 4:33 Nanamuku manjijba jali Jisuswanyi, yali karu kajamuku Jisuskanyi. Yanyba yali Jisuskanyi janybikanyi nangka, baki wankiykanyi mili. Yanyba yali ngiruka. Yabimbayi Kudwanyi kunyba yaji yalungi, maruka jali muwa nangangi. Kaja mama yalungi, kaja jumbala. Kudiyawanyi nanamukunyi, yali wajba yiningki jambanyi, yiningki barrawunyi. Wudumba yali dungala nanankanyi yajinyi. Jalili yalu wudumba nanda dungala, wajba yalili dungalanyi nanamuku jali manjijba Jisuswanyi. Baki nanamukunyi jali manjijba Jisuswanyi, yalili wajba nganinyi kudiyanyi dungalanyi, jali mikuyaji dungalanyi nangandu. Barriwa.
ACT 4:36 Yingka nganinyi nanaba, niji nangangi Jusib, nangangi yaji Sayibris. Wabula juju nanda wankalanyi, niji nangangi Libayi, nyuli barrinani wankalanyi buwakanya nangangi Jusibkanyi. Wabulinyi nyuli nangangi wulukanja. Nanamuku jali manjijba Jisuswanyi, yali nijarrijba nanda Jusib. Yingka niji Barabas. Nanda niji Barabas, Ju yanyi barrinani jangkurr, ‘mirnarrijba jayalu muwa nangangi.’
ACT 4:37 Nanangini Jusibwanyi nyuli wajba yingka nanganginkanyi jambanyi. Wudumba nyuli dungala jambanyi, baki wajbayi dungalanyi nanamuku jali manjijba Jisuswanyi. Barriwa.
ACT 5:1 Yingka nganinyi, niji nangangi Yananayis. Nangangi maninganja, niji nangangi Sabira. Nyuli wajba bulanya dungalanyi nganinyiwanyi. Nyuli wajba bulanya dungalanyi bulanginkanyi jambanyi nganinyiwanyi. Wudumba nyuli dungala jambanyi. Yanyba bulangki, wajba jabula kudiyanyi dungalanyi, ngala jabula kili kudiya dungala bulandu.
ACT 5:2 Baki wajbayi nawinganjawanyi kudiyanyi nanganginkanyi dungalanyi nanamuku jali manjijba Jisuswanyi. Kili nyuli kudiya dungala nanganbu. Jingkijbayi maninganjawanyi kudiya dungala nanganbu kiliyi nawinganjana barri. Miku nyuliya wajba bukamba dungalanyi.
ACT 5:3 Yanybayi Bida Yananayiskanyi. Yanyba nyuli, “Balanjayi ninya Sayidinwanyi. Manku ninji Sayidin, mambuka wuwarranyi, baki yabimba ninji nanda jali nyulu karu ninya. Kiliyi kudiya dungala nganyinbu. Marda ninjimi miku kuyu nangangi jangkurr Sayidinkanyi. Walalamba ninji Kunybanyi Ngarndunyi Kudkanyi. Kiliyi kudiya dungala nganyindu.
ACT 5:4 Wabula nanda jamba nganyi. Jali ninji wajba yingka nanankanyi jambanyi, wudumba ninji dungala. Nganyi nanda dungala. Ngala ninji nulijbayi nurrungi, janurrungka mankumanku, wajba ninji nurrunya bukamba dungalanyi. Wanyingkanyi ninji yanyba, ‘Nayinda bukamba dungalanyi.’ Walalamba ninji Kudkanyi. Miku ninji walalamba bukambijuyngka nurrungi, ngala ninji walalamba Kudkanyi.” Nani yanybayi Bida. Barriwa.
ACT 5:5 Mankuyi Yananayiswanyi nanda jangkurr Bidanyi. Yinarramba nyuli yirrba jambarri, janyba nangki nanda Yananayis. Marrala yali kudanyu, jali yalu manku Yananayis janyba nangki, balanjangangi Sayidinwanyi baki nyuli ngayangayijba Sayidinkanyi jangkurranyi. Marrala yali, ngirukangangi Kud kudanyu.
ACT 5:6 Ngankijbayi kaburrwaburr nanankurri barndarri. Ngankijba yali kuyunkanyi mankanyi. Mulamba yali nanda ngabaya, kuyu yali baki mankanyi yali makaba jambana.
ACT 5:7 Kamu barri jilajbayi nanda miyaji nangangi, jibarri. Jilajba nyuli barrawurri. Mudumbanyi nyuli. Miku nyuliya jingkijba, nawinganja nangangi janyba nangki.
ACT 5:8 Ngajakayi jibarri Bidawanyi, “Wajbayi nurrunya dungalanyi nganyinyi nawinganjawanyi. Nanda dungala, bukamba barri kuna. Wajba nyuli bukamba dungalanyi kuna jali wudumba nyuli jambanyi.” Jananganjayi Bida jibarriwanyi, walalamba nyuli, “Yi, nanda bukamba dungala jali nyulu wajba narrinya.”
ACT 5:9 Baki yanybayi Bida jibarrinyi, “Marda miku nimbaliyanyi balanja Kunyba Ngarndu Kudkanyi. Walalamba nimbali Kudkanyi. Miku nimbaliyanyi wajba nurrunya bukamba dungalanyi, ngala kudiya nanankanyi dungalanyi yuwaji nimanbu. Karrinjaka yalu danbina kaburrwaburr. Makaba yali mankanyi nangangi nawinganjanyi nganyi, baki janinyalu makaba mankanyi.”
ACT 5:10 Yinarramba nyuli yirrba jambarri nanda jibarri, janyba nangki. Ngankijbayi kaburrwaburr, baki najba yali ngabaya. Kuyu yali mankanyi baki makaba yali jibarri wilina nawinganjana nanganbu. Barriwa.
ACT 5:11 Bukambiju jali maruka Jisuskanyi, marrala yali. Baki yingkamuku marrala yali, jala yali manku jangkurr bulangi ngabayawuyayngka. Bukambiju marrala yali kudanyu. Barriwa.
ACT 5:12 Yabimba yalili kudukudu yaji ngiruka. Yinini yinini ngiruka yaji yabimba yalili jali manjijba Jisuswanyi. Nanamukunyi jali jungku nanaba, najba yali nanda ngiruka yaji. Baki kandimuku yalili jila jungunki malumba nanaba, yaji niji, ‘Sulumun Nangangi Ngarndu.’ Nanaba yalili jungku.
ACT 5:13 Yingkamuku yali marrala, jali yalu najba kandimuku jali maruka yalu Jisuskanyi. Marrala yali. Ngayangayijba yali yalungi. Mankumanku yalungki, ‘Yalu jungku kunyba Kudkanyi. Jilajba ngayimi yalundurri, ngala miku ngayu jungku kunyba Kudkanyi barrinani yalu. Miku ngayiyi jila yalunburri.’
ACT 5:14 Ngala yingkamuku kaja, yali jungku kunyba Kudkanyi, jilajba yali yalundu, kandimukunyina. Yali maruka muwa Jisuskanyi kudanyu, baki jilajba yali kandimukunyina. Baku barri kudukudu mili jilajba yali kandimukunyina, nganinymuku baki jibarrimuku.
ACT 5:15 Yabimba yali kaja yaji ngiruka, nanamukunyi jali manjijba Jisuswanyi. Nanamuku jali lunji, yingkamukunyi yalili kuyu yalunya. Yalili kuyu wilina yubalina. Yarrijba yalunjalili blankina wilina yubalina. Mankumanku yalungkili nayinda, “Jalija kangandijba Bida yalunbiyangka jala lunji, baki nangangi ngarndu jilaja yundu yalundu, baki jayalu kunybijba.” Nani mankumanku yalungkili.
ACT 5:16 Badajba yalili karrina, bayunguna, langina, baki kulani. Badajba yalili lukulukunanyi. Kuyu yalili yalunya jali lunji, marda yalunya jali wuwarryudi kalawunyi mankanyina. Kuyu yalili nanamuku Jirusalimyurri. Baki kunymamba yalunjalili kandimukunyi. Barriwa.
ACT 5:17 Baki yali nguwajba kandimukuyngka, walkurra mambuka jurjkanyi. Nguwajba yali, walkurra mambuka baki yingkamuku Sajusi. Nguwajba yali nanamukuyngka jali manjijba Jisuswanyi. Mankumanku yalungki nanamukuyngka kandimukuyngka. Mankumanku yalungki nayi. “Nanamuku jala kunymamba kajamuku, jayalu jungku walkurra mambukamuku, ngala ngambala walkurra mambukamuku.”
ACT 5:18 Baki yali manjijba yilarr wudumbiji nanamuku jali manjijba Jisuswanyi. Wudumba yali, baki yarrijbayi yalunya brisinyina.
ACT 5:19 Ngala mungana barri wanbiyayi Yanjil jali waki nyulu Kudkanyi. Wanbiyayi Yanjil bardawana brisinyina. Nyuli dulaba nanda bardawa, baki dulabayi yalunya jali manjijba Jisuswanyi. Dulaba nyuli yalunya danbiyurri baki yanyba nyuli yalungi,
ACT 5:20 “Jilajbakiyi narri walkurrayngkurri jurjyurri. Karukiyi narri yalunya nganinymuku, baki jibarrimuku, karukiyi yalunya wankiykanyi mili.”
ACT 5:21 Ngayangayijba yali jangkurranyi Yanjilkanyi. Kambalingijba yaji yali jilajba walkurrayngkurri jurjyurri. Ngankijba yali kalawunyi, baki milidimba yalunjali jala jungkuyi nanaba kalawunyi. Barriwa. Ngala yalibala barri walkurra mambuka jurjkanyi, baki kandimuku nangangi mambukanyi jungku yali malumba. Jirrinyba yali malbumalbu kunsilkanyi jilaji malumba yalundurri. Jali yalu wanbiya, yanyba yalungki nanamukuyngka jali manjijba Jisuswanyi. Baki manjijba yali kudiya mambukamuku yilarranyi brisinyurri wudumbiji nanamuku Jisuskanyi. Karu yalunjali mambukamukunyi kunsilkanyi, kuyunki nanamuku kunsilyurri.
ACT 5:22 Jali yalu wanbiya brisinyina, najba yali baki mikuyaji yalungi kalawunyi nanamukuyngka Jisuskanyi. Manmala yali kudanyu, baki wijba yali kunsilyurri karunki.
ACT 5:23 Yanyba yali kunsilkanyi, “Jali nurru wanbiya brisinyina, najba nurri bardawa kijijinyi. Yuwaji kijijba kudanyu. Marda yilarrmuku, yuwaji yali nanaba bardawana. Lalanba yali jungku. Jali nurru dulaba bardawa, baki najba nurri mikuyaji yalungi kalawunyi.”
ACT 5:24 Manmala yali mambuka yilarranyi, baki walkurra mambukamuku jurjkanyi. Manmala yali kudanyu, jali yalu manku nanda jangkurr. Miku yaliya jingkijba, yanka walajbayi brisinanyi nanamuku Jisuskanyi.
ACT 5:25 Baki wanbiyayi yingka nganinyi nanaba. Yanyba nyuli kunsilkanyi, “Manku narri. Nanamuku nganinymuku jali narri yarrijba brisinyina, yalu karrinjaka walkurranyina jurjnyina. Milidimba yalunjalu yingkamuku nanaba.”
ACT 5:26 Jali yalu manku nanda jangkurr, jilajbayi mambuka yilarranyi, baki kudiya yilarrmuku nanganbu. Jilajba yali jurjyurri. Wudumba yali nanamuku Jisuskanyi. Wudumba yalunjali baki kuyuyi kunsilyurri. Miku yaliya linjumba yalunya yilarrwanyi. Kardarda yali kuyu nganinymuku kunsilyurri. Miku yaliya linjumba, janybawalingangi dungala muramukunyi. Janybawali dungala yalundurri yilarryurri muramukunyi. Kuyu yalunjali kardarda.
ACT 5:27 Kuyu yali nanamuku kunsilyurri. Baki nanamuku Jisuskanyi karrinja yali waluwa yalundu kunsilkanyi. Yanybayi walkurra mambuka jurjkanyi, yanyba nyuli yalungi,
ACT 5:28 “Nurri jirrinyba narrinya kudanyu, miku janarri milidimba Jisuskanyi. Ngala narri yurlwa nurrungi. Bukambijunyi jala jungku Jirusalim, yali manku narringi jangkurr. Narri milidimba Jisuskanyi. Yanyba narri, nurri kurdanba nanda Jisus.” Nani nyuli yanyba yalungi walkurra mambuka jurjkanyi.
ACT 5:29 Yanybayi Bida baki yingkamuku nangandu Jisuskanyi. Yanyba yali, “Marda nurrimi ngayangayijba Kudkanyi. Miku nganinyi walkurramirra mambuka. Ngala Kud, nyulu walkurramirra mambuka. Marda nurrimi ngayangayijba Kudkanyi, miku nganiyngkanyi.
ACT 5:30 Kud, nyulu Kud ngamanginkanyi mungkijinyi jali jungku juju wabula wankalana. Narri kurdanbayi Jisus. Ngarrkadaba narri wabangkarra kurndana nayilyudinyi, ngala nyuli wankamba Jisus mili Kudwanyi.
ACT 5:31 Yabimba nyuli Jisus walkurramirra mambuku Kudwanyi. Malumba bula jungku Jisus baki Kud. Nanangini Jisuswanyi nyulu janyba balki yalunbunanyi, nganinyinanyi marda jibarrinanyi. Nyulu wankamba yalunya. Nanda Jisus nyulu walkurramirra mambuka. Nyulu janyba balki yalungi, baki janyulu manjamanjamba yalungi balki yaji Kudwanyi.
ACT 5:32 Najba nurri nanda yaji. Najba nurri, baki karu nurri yingkamuku nanankanyi yajinyi. Karu nurru yajinyi, marda karu nyulu Kunybawanyi Ngarnduwanyi Kudkanyi. Malumba nurru karu yajinyi. Baki Kudwanyi janyulu yawumba nangangi Kunyba Ngarndu nurrundu, ngayangayijba jala nurru nangangi jangkurr, jungku jala nurru kunyba nangangi Kudkanyi.” Nani yanyba yali nanamuku Jisuskanyi. Nani yanybayi Bida yalungi. Barriwa.
ACT 5:33 Manku yali nanda jangkurr Kunsilmukunyi, baki ngarrangarra yali muwa. Ngarrangarra yali muwa kudanyu. Yaliyanyi kurdanba nanamuku jali manjijba Jisuswanyi.
ACT 5:34 Ngala nganinyi nanaba, niji nangangi Kamaliyil. Nyuli Barasi, nyuli milidimbawarr yuwanyi. Yingkamuku yali ngayangayijba nangangi, mankumanku yalungki Kamaliyilkanyi, nyulu walkurra mambuka. Karrinja nyuli, baki jirrinyba nyuli yilarrmuku kuyunki danbiyurri nanamuku jali manjijba Jisuswanyi. Kuyu yalunjali yilarrwanyi danbiyurri.
ACT 5:35 Yanyba nyuli Kamaliyil yalungi kunsilkanyi. Yanyba nyuli, “Ngambala Jumuku. Marda ngambalimi jungku karda. Jangambala mankumanku yalungi, wanyimba jangambala yalunya. Marda ngambalimi karda jungku.
ACT 5:36 Wabula nanda nganinyi, niji nangangi Dudas, jilajba nyuli Jirusalimyurri. Yanyba nangki, nyuli walkurra mambuka. Kudiyawanyi yali kuyu nangangi jangkurr. Nganinymukunyi, jibarrimukunyi kuyu yali nangangi jangkurr, 400-wanyi, baki yali jilajba nangandu. Ngala janyba nangki nanda Dudas, kurdanbayi yingkawanyi. Baki nanamuku jali kuyu nangangi jangkurr, jarrbalijba yali. Wijba yali yalunginkurri barndarri. Mudujba yali nangangi Dudaskanyi.
ACT 5:37 Baku barri, jabarri yingka jilajbayi Jirusalimyurri. Niji nangangi Judas, yaji nangangi niji Kalili. Nanamanji mambukamukunyi kubaminkanyi, yarrijba yali niji najana. Yarrijba yali niji bukambijuyngka Jumukuyngka najana. Nanamanji barri jilajbayi Judas Jirusalimyurri. Kuyu yali nangangi jangkurr kudiyawanyi, baki jilajbayi kajamuku muran nangandu. Jabarri yingkawanyi kurdanbayi nanda Judas, baki jarrbalijba yali, jali yalu jila nangandu.
ACT 5:38 Baki mili nanijba barri. Karu ngayu duja jangkurr. Marda ngambalimi miku kurdanba nanginmuku nganinyimuku. Marda yalimi muningka jilajba. Jaliyi yalu waki yaluman, baki winyurru yalu jala kuyu yalungi jangkurr, mamanumba jayalu yaji yalungi. Mamanumba jayalu yaji. Ngala jaliyi yalu wakingka Kudkanyi, baki Kud nyulu ngiruka ngambalangi. Jaliyi kurdanba ngambala nanginmuku, baki jangambala yabimba kiji Kudkanyi. Marda ngambalimi muningka manjijba yalunya. Yiningki yalu wakingka Kudkanyi, yiningki miku. Ngala jaliyi yalu wakingka yaluman, baki mamanumba jayalunjalu muramukunyi.” Manku yali nanda jangkurr Kamaliyilkanyi baki maruka yali muwa nanankanyi jangkurranyi. Yabimba yali nanda yaji jali karu yalunya Kamaliyilwanyi.
ACT 5:40 Manjijba yali yilarr kuyunki nanamuku Jisuskanyi. Kuyu yalunjali kalawuyngkurri, baki mambukamukunyi kunsilkanyi karu yali yilarrmuku, jayalu wajuba nanamuku Jisuskanyi. Wajubayi yalunya yilarrmukunyi. Baki jirrinybayi yalunya mambukamukunyi kunsilkanyi. Jirrinybayi yalunya, miku yaliyi yanyba mili Jisuskanyi. Baki manjijbayi yalunya kunsilwanyi nanarrinanyi yajinanyi.
ACT 5:41 Barlba yali nanamunanyi yajinanyi nanamuku jali manjijba Jisuswanyi. Jungku yali, maruka yali muwa, linjumbangangi yalunjali kunsilwanyi. Wabula barri, yali linjumba Jisus, ngala nanamanji yali linjumba nanamuku Jisuskanyi. Maruka yali muwa, linjumbangangi yalunjali kunsilwanyi, barrinani yali linjumba Jisus. Nanamannga yaji yali yabimba yalungi barrinani yali yabimba Jisuskanyi.
ACT 5:42 Ngala miku yaliya ngayangayijba jangkurranyi kunsilkanyi. Yuwaji yali karu walkurranyina jurjina, baki yingkana barrawuna, yingkana barrawuna. Yuwaji yali karu Jisuskanyi, marda milidimba yali Jisuskanyi nyulu walkurra mambuka Kudkanyi. Manku yali wirdikudukudu, manku yali jangkurr yalungi, nanamukunyi, jali manjijba Jisuswanyi. Manku yali jangkurr Jisuskanyi baki kuyu yali nanda jangkurr Jisuskanyi. Malumba yali jungku yalundu nanamukunyina jali manjijba Jisuswanyi. Karu yalungki, “Kandimuku nangangi Jisuskanyi.”
ACT 6:1 Baku barri mili yali kuyu nangangi jangkurr Jisuskanyi, kajamukunyi. Ngala jakakajba yalungki, kudiya Jumuku jali yanyba Krik yanyi, baki kudiya Jumuku jali yanyba Ju yanyi. Jakakajba yalungki. Yali jali yanyba Krik yanyi, yanyba yali, “Kudukudu jibarrimuku miyajimuku ngamandu, mikuyaji yalungi dungalanyi. Nurrunginyi jibarrimukunyi miyajimukunyi jali yalu yanyba Krik yanyi, wudumba yali ngawamba bijal dungala, ngala narringinyi jibarrimukunyi jala yalu yanyba Ju yanyi, yalu wudumba kaja dungala.” Nani yalungki jakakajba.
ACT 6:2 Baki nanamukunyi jali manjijba Jisuswanyi 12-wanyi, wudumba yalunjali bukambiju jala kuyu jangkurr Jisuskanyi. Wudumba yali bukambiju kandimuku. Malumba yali jungku. Baki nanamukunyi jali manjijba Jisuswanyi, yanyba yali kandimukuyngka, “Marda nurrimi milidimba yingkamuku yurrngumba. Marda nurrimi miku lalanba dungala. Marda nurrimi milidimba jangkurranyi Jisuskanyi yurrngumba.
ACT 6:3 Kandimuku. Yarrijba janarri nganinymuku jala jungkuka narrinbu. Yarrijba janarri 7-barri nganinymuku. Marda yalimi jingkijba yaji kudanyu. Mardakimi jungku yalundu nanda Kunyba Ngarndu Kudkanyi. Baki jayalu lalanba dungala. Jayalu wudumba dungala, baki jayalu wajba dungalanyi yalunya jala mikuyaji dungalanyi.
ACT 6:4 Nanamuku 7-barri, jalija narri yarrijba, jayalu lalanba narrinya kandimuku, ngala janurru milidimba yingkamuku, janurru yanyba mududu Kudkanyi.” Nani yanyba yali, nanamuku jali manjijba Jisuswanyi, baki barlba yali.
ACT 6:5 Mankumanku yalungki jangkurranyi. Mankumanku yalungki kandimuku barri, baki maruka yali muwa nanankanyi jangkurranyi. Yarrijba yali Sdibin, kudanyu nyuli durrijba jangkurr Kudkanyi, marda Kunybayudi Ngarnduyudi Kudkanyi. Mili yali yarrijba, Bilib, Brukuris, Nikanurr, Dimun, baki Barminas, marda Nikilus. Nanda Nikilus, nyuli ngurranyi, nangangi yaji Yandiyuk. Miku nyuli Ju, ngala maruka nyuli Kudkanyi barrinani marukayi Jumuku Kudkanyi.
ACT 6:6 Baki jilajba yali kandimuku yalundurri, nanamukuyngkurri jali manjijba Jisuswanyi. Karu yalunjali, yali yarrijba 7 nganinyi. Karu yali yalungi niji. Baki yanyba yali mududu Kudkanyi, nanamuku jali manjijba Jisuswanyi. Yali yanyba mududu, baki yarrijba yalungki marni yalundu 7nyina kuyina, ngala yali yanyba mududu Kudkanyi. Nani yalungki yarrijba marni yalundu kuyina, minimbiji yingkamuku, nanamuku jayalu waki Kudkanyi.
ACT 6:7 Kajamukunyi yali manku jangkurr nangangi Kudkanyi, baki kuyu yali nanda jangkurr kajamukunyi. Wirdikudukudu yali kandimuku Jisuskanyi nanaba Jirusalim. Kajawanyi mambukamukunyi jurjkanyi kuyu yali jangkurr Jisuskanyi marda.
ACT 6:8 Nanda Sdibin, jali yalu yarrijba, nyuli ngiruka Kudkanyi. Kunymamba nyuli kaja nganinymuku baki jibarrimuku. Yabimba nyuli ngiruka yaji marda. Maruka nyuli muwa Kudkanyi, baki yabimbayi ngiruka yaji nangangi Kudwanyi.
ACT 6:9 Ngala jawudamukunyi yabimba yali kiji nangangi Sdibinkanyi. Nanamuku jali yabimba kiji, yalungi jurj, niji nangangi, ‘Nganinymuku jala yalu waki yaluman.’ Nanamuku jalili jungku nananyina jurjina yali Jumuku, ngala yalungi yaji Sayirin baki Yalisandiya. Nanamuku yali kijiwijba nangangi Sdibinkanyi. Baki yingkamuku Jumuku kijiwijba yali nangangi. Kudiya yalungi yaji niji Sisiliya. Kudiya yalungi yaji niji Yasiya. Yabimba yali kiji nangangi Sdibinkanyi, kijiwijba yali nangangi.
ACT 6:10 Ngala yabimba nyuli Sdibin ngiruka yanybikanyi Kunybawanyi Ngarndwanyi Kudkanyi. Wajbayi Sdibin kunybanyi jangkurranyi nanangini Kunybawanyi Ngarnduwanyi. Baki jali yanyba nyulu Sdibin nanankanyi kunybanyi jangkurranyi, miku yaliyi manku kijin Sdibinkanyi Jumukunyi.
ACT 6:11 Baki ngajaka yali yingkamuku yabimbiji kiji nangangi. Jayalu karu balki jangkurr Sdibinkanyi. Jujijba jayalu nangangi. Wajba yalunjali dungalanyi karunkanyi balki jangkurr nani nangangi Sdibinkanyi. Nayinda jangkurr jujakun jujijba yali, “Manku nurri nanda Sdibin karunkurri balki jangkurr Musiskanyi marda Kudkanyi.” Nani yali jujijba.
ACT 6:12 Yingkamuku yali manku nanda balki jangkurr jujakun, baki ngarrangarra yali muwa Sdibinkanyi. Ngarrangarra yali muwa, nganinymuku, malbumalbu, marda nanamuku milidimbawarr yuwana. Ngarrangarra yali muwa. Wudumba yali Sdibin. Marrimba yali, baki kuyu yali Sdibin kunsilyurri.
ACT 6:13 Kuyu yali Sdibin kunsilmukuyngkurri, baki kuyu yali nanamuku jali yalu jujijba Sdibinkanyi kunsilmukuyngkurri. Yanyba yali jujakunyi jangkurranyi kunsilkanyi. Nayi yali yanyba, “Nayinda Sdibin, nyulu yanybawa balki jangkurr. Yanybawa nyulu balki jangkurr nanankanyi walkurrayngka jurjkanyi Kudkanyi. Yanybawa nyulu balki ngamanginkanyi walkurrayngka jurjkanyi. Marda yuwanyi Musiskanyi, nyulu yanybawa balki jangkurr yuwanyi Musiskanyi.
ACT 6:14 Manku nurri Sdibin yanybikurri mili balki jangkurr. Yanyba nyuli, ‘Dalyamba janyulu walkurra jurj Kudkanyi. Dalyambaja walkurra jurj Jisuswanyi, nangangi yaji Nasarid.’ Mili nyuli yanyba yingka balki jangkurr. Wajbayi ngambalanya yuwanyi wankalawanyi Kudkanyi. Wajbayi ngambalanya yuwanyi wankalawanyi Musiswanyi. Ngala Sdibin, miku nyuli nulijba ngambalangi jungunkanyi ngambala nananyina yuwana Musiskanyi. Nulijba nyuli ngambalangi jungunkanyi yinini yuwana. Yanyba nyuli, ‘Marda ngambalimi jungku yinini yuwana.” Barriwa.
ACT 6:15 Jala yali yanyba nanda jujakun jangkurr, baki nanamukunyi kunsilwanyi ningkijba yali Sdibin. Ningkijba yali nanda wali nangangi, barrinani Yanjil wali.
ACT 7:1 Ngajaka nyuli Sdibin walkurranyi mambukawanyi jurjkanyi. Ngajaka nyuli, “Nanda jangkurr jali yalu yanyba, nanda jangkurr duja jangkurr kuna. Nani kuna yanyba ninji.”
ACT 7:2 Jananganja nyuli Sdibinwanyi, “Narri, mungkijimuku, mambukamuku. Ngambalangi Kud nyulu jungkuka ngiruka. Wabula kamambarra minimba nangki ngamanginkanyi wankalanyi mungkijinyi. Niji nangangi Yabrayam. Najba nyuli Kud, nanangini wankalawanyi, ngala nyuli jungku nananyina yingkana yajina juju karru, yaji niji Misubudamiya. Nyuli najba Kud waluwa, baki bayngkani nyuli barlba bayungu jungunki yingkana yajina, niji Yaran.
ACT 7:3 Minimba nangki Kud, baki yanybayi Kud nangangi. Jirrinyba nyuli, ‘Yingijbakiyi ninji nganyi mungkiji, baki nganyi yaji yingijbakiyi, baki jilajba janinji yingkayurri yajiyurri, nanda jalija ngayu minimba nganyi.’
ACT 7:4 Baki yingijba nyuli nangangi yaji Kaldiya. Nanda yaji Kaldiya, nananyina walkurranyina yajina, Misubudamiya. Yingijba nyuli Kaldiya. Barlbayi Yabrayam, baki buwakanya nangangi, marda yingkamuku. Barlba yali bayungu jungunki nanaba Yaran. Barriwa. Baku barri nanda buwakanya Yabrayamkanyi janyba nangki. Baki nyuli jirrinyba Yabrayam Kudwanyi. Jirrinyba nyuli Yabrayam barlbiji nanginkurri yajiyurri, jala ngambala jungku.
ACT 7:5 Miku nyuliya wajba Yabrayam nanginkanyi jambanyi nanganginmirra Kudwanyi. Miku. Kudiya jamba nangangi. Ngala yanybayi Kud Yabrayamkanyi, yanyba nyuli, janyulu wajba Yabrayam nanginkanyi yajinyi. Yanybayi Kud, janyulu wajba yalunya nanginkanyi yajinyi, Yabrayam, marda nangangi jandanyi, marda yalunya bayngkani, marda ngambalanya nanijba. Nayi janyulu wajba ngambalanya nanginkanyi jambanyi, Yabrayamngangi nyuli barrinani wankalanyi buwakanya ngambalangi. Nanamanji jali yanyba Kud waykanyi nanginkanyi yajinyi, mikuyaji jandayngkanyi Yabrayamkanyi.
ACT 7:6 Nayinda jangkurr yanybayi Kud Yabrayamkanyi, ‘Jayalu bayngkani nganyindu, jayalu jungku yingkana ngurranyina yajina. Jayalu waki mambukanyi nanankanyi yajinyi. Jayalu waki kudanyu yurrngumba 400 kamambarra kindilkurrinyi.
ACT 7:7 Ngala janga yabimba walkurra kiji yalungi mambukanyi, wakimbangangi jayalunya kudanyu. Baki yalu bayngkani nganyindu, jayalu wijba nanginkurri yajiyurri. Nayiba jayalu maruka ngaki kudanyu. Jayalu yanyba mududu ngaki nanginyina yajina.’ Nani yanybayi Kud Yabrayamkanyi. Barriwa.
ACT 7:8 Baki wajbayi Yabrayam wangarranyi Kudwanyi, kaburrmbikanyi jala yalu bardarda. Nayi barri jali yalu karlba bardarda, baki jingkijba yalunjali jandanyi Kudkanyi. Baki jingkijbayi yalunya nangangi jandanyi Kudwanyi. Nayinda jangkurr kaburrmbijina, jali yanyba Kud Yabrayamkanyi, nayinda jangkurr yurrngumba nayimannga, miku yangkalambikanyi. Nani kaburrmba nyuli nangangi jandanyi Yayisak Yabrayamwanyi, ngala nyuli marrandal jilijba. Jabarri Yayisakwanyi, jali nyulu nganinyi, nyuli kaburrmba nangangi jandanyi Jakub. Jabarri nyuli, Jakubwanyi kaburrmba nangangi kaja jandanyi, 12 jandanyi. Nanamuku jandanyi 12, yalu barrinani wankalanyi buwakanya ngambalangi. Yingka buwakanya yanina yanina ngambalangi.
ACT 7:9 Nanamuku jandanyimuku 10 barri Jakubkanyi, nguwajba yali yalungi kanyiyanyi Jusibkanyi. Nguwajba yali Jusibkanyi buwawakulawanyi. Wajba yali ngurranyi jalili jungku yajina juju kularra, niji Yijib. Wajba yali ngurranyi Jusibkanyi. Wudumba yali dungala buwawakulawanyi, waykanyi ngurranyi yalunginkanyi kanyiyanyi. Baki Jusib nyuli waki nganiyngkanyi nananyina yajina kularra Yijib. Ngala lalanbayi Jusib Kudwanyi.
ACT 7:10 Lalanbayi Jusib Kudwanyi, jali yingkamukunyi yalu yabimba kiji nangangi Jusibkanyi. Baku barri nanda walkurra mambuka Yijibkanyi, niji nangangi Bayira, yanyba nyuli Jusibkanyi. Yabimbayi Kudwanyi Jusib kunyba, marda jingkijbayi yanybawarr. Mankumanku nangki Bayira Jusibkanyi, nyuli kunyba, nyuli jingkijbawarr. Baki yarrijbayi Jusib Bayirawanyi. Yarrijba nyuli Jusib mambuka bukamba yajinyi, baki yarrijbayi Jusib mambuka nanganginkanyi barrawumukuyngka Bayirakanyi.
ACT 7:11 Nanda Jusib, nyuli walkurra mambuka wabulinyi nananyina yajina Yijib. Baku barri 7 kamambarra kindilkurrinyi, mikuyaji janjanyi yirrbayi nanaba Yijib, marda langku Kayinan. Nanda yaji Kayinan, yingka niji nangangi Yisrayil. Mikuyaji mamanyi nanaba Kayinan. Bukambiju nanaba Kayinan, yali birrkalijba. Wabulinyi yali jungku wirndaykanyi. Miku yaliya wakaramba mama, ngamanginyi wankalanyi mungkijiwanyi.
ACT 7:12 Baki malbuwanyi Jakubwanyi, manku nyuli jangkurr, mamanyi nanaba kularra Yijib, kaja mama nanaba kularra. Baki manjijba nyuli jandanyimuku nangangi kularriji Yijibyurri mamanyi. Manjijbayi yalunya kularriji mamanyi. Jilajba yali Yijibyurri, nanda yaji jali jungku kanyiya yalungi Jusib mambuka. Wakaramba yali mama nanaba kaja mama. Wijba yali langkurriji Kayinanyurri mamayudi.
ACT 7:13 Wardardamba yalungki, baki baku barri bayngkani, mikuyaji mamanyi yalundu. Baki mili manjijbayi jandanyimuku kularriji Jakubwanyi. Manjijba nyuli yalunya Yijibyurri mamanyi. Jilajba yali Yijibyurri, baki najba yali Jusib. Yanyba yalungki buwawakula marda Jusib. Baki karu nyuli Bayira Jusibwanyi. Karu nyuli nangangi mambuka Bayira nanganginkanyi mungkijinyi. Baki Bayirawanyi nyuli karu Jusib wudumbiji nangangi mungkiji, kuyunki yalunya Yijibyurri, jungunkanyi yurrngumba.
ACT 7:14 Baki manjijba nyuli nangangi buwanganjamuku Jusibwanyi. Manjijba nyuli yalunya langkurriji Kayinanyurri wudumbiji yalunya, buwakanya baki yingkamuku mungkijimuku. Karu nyuli yalunya kuyunki bukambiju Yijibyurri. Wijba yali langki, karu yali buwakanya Jakub, ‘Barlba jangambala Yijibyurri.’ Baki Jakub marda nangangi jandanyimuku, marda yingkamuku, yali jila Yijibyurri kularra. Kaja yali jilajba 75 barri. Baku barri kudiya kindilkurrinyi, janyba nangki nanda malbu Jakub.
ACT 7:16 Jungku yali nanaba yurrngumba. Baki nangki janyba nanda malbu. Baku barri yurrngumba yalungki janyba jandanyi malbunyi. Wiykunumba yalunjali mankanyi langkurriji malburru. Wiykunumba yalunyi mankanyi Jijimyurri. Nanaba yalunjali makaba mankanyi. Makaba yalunyi mankanyi nananyina yajina jali wudumba Yabrayamwanyi makaykanyi mankanyi. Wudumba nyuli jamba ngurranyinanyi jali jungku Kayinan. Nanamuku ngurranyimuku yalungi wankalanyi buwakanya niji nangangi Yamurr. Wudumba nyuli jamba dungalanyi nanangini wankalawanyi Yabrayamwanyi. Barriwa.
ACT 7:17 Waluwa juju wabula, yanybayi Kud, janyulu wajba jambanyi Kayinankanyi yalunya, jalija yalu jungku juju bayngkani nangandu, jalija nangki janyba Yabrayam. Baku barri janyba nangki Yabrayam. Baku barri mili janyba nangki nangangi jandanyi Yayisik. Baku barri mili janyba nangki nangangi jandanyi Jakub. Baku barri janyba nangki Jusib, baki yingka baku janyba nangki, yingka baku, yurrngumba janyba yalungki. Nani baku kaja kamambarra kindilkurrinyi wirdikudukudu wankalanyi, jungku yali Yijib. Yali juju bayngkani nangandu jali nangka janyba Jusib.
ACT 7:18 Nanamanji yingka walkurra mambuka nyuli jungku nanaba Yijib. Miku nyuliyanyi jingkijba nanda malburru Jusib. Miku nyuliya mankumanku Jusibkanyi.
ACT 7:19 Yabimba nyuli kiji yalungi ngamanginkanyi wankalanyi mungkijinyi. Julanba nyuli yalunya nanangini mambukawanyi. Karu nyuli yalunya, nanamuku wankalamuku, jayalu yarrijba yalungi bardarda munjimunji. Yingijba jayalunjalu bardardamuku nyubana, baki yalungkaja janyba bardardamuku.
ACT 7:20 Nanamanji barri birnandaba nangki jibarri bardardanyi jukanyi, nangangi niji Musis. Nyuli kunyba bardarda, kunyba wali. Mikuwali yingijba munjimunji. Jardiykunumba nyuli bardarda yarrijinyiwanyi. Jardiykunumbayi kujarra yingamali yakarl. Miku yaliyanyi wakaramba bardarda yilarrmukunyi. Ngadijbayi bardarda barndana maykarranyi.
ACT 7:21 Jungku nyuli barndana kujarra yingamali yakarl nanda bardarda. Baki ngadijba nyuli bardarda yingkana yajina yarrijinyiwanyi. Ngala miku nangkiya janyba. Wakarambayi nanda bardarda. Wakarambayi bardarda wurrumbarrawanyi. Nanda wurrumbarra, nyuli jandanyi mambukanyi. Wudumba nyuli bardarda, baki jardiykunumba nyuli nanda juka barrinani nyuli nanganginmirra kulunganja.
ACT 7:22 Baku nyuli jila skulyurri nanda Musis. Nyulili jungku yurrngumba skulnyina. Milidimba yali Musis kajanyi yajinyi skulnyina. Nyuli jingkijbawarr. Jala nyuli nganinyi, nyuli jingkijbawarr yanybikanyi jangkurranyi, marda yabimbikanyi yaji. Jungku nyulili yalundu, kandi nyuli yalungi Yijibkanyi. Miku nyuliya jungku yalundu, nanganginyina mungkijina, Jumukunyina.
ACT 7:23 Jali nyulu walkurra nganinyi, barrinani mambuka, 40 wabula kamambarra kindilkurrinyina, nyuli jilajba nanankurri yajiyurri jalili yalu jungku nangangi mungkiji. Jilajba nyuli nanankurri yajiyurri yidambiji yalunya mungkijimuku nangangi.
ACT 7:24 Najba nyuli yilarr, nangangi yaji Yijib. Nanangini yilarrwanyi, nyuli linjumba yingka mungkiji Musiskanyi. Najba nyuli yilarr linjumbikurri mungkiji Musiswanyi. Nyuliyanyi kurrkunba nanda yilarr. Daba nyuli baki kurdanbayi yilarr. Kurdanba nyuli nanda yilarr Musiswanyi.
ACT 7:25 Nanamanji, jali nyulu yidamba nangangi mungkijimuku, mankumanku nangki Musis, ‘Ngaki mungkijimuku, yalu jingkijba Kudkanyi, ngana nyuli yabimba mambuka ngakinkanyi mungkijimukuyngka. Yalu jingkijba Kud, ngana nyuli manjijba, jangayu jarimba yalunya ngaki mungkijimuku. Jarimba jangayu yalunya yingkayurri yajiyurri.’ Nani barri mankumanku nangki Musis. Ngala miku yalungkiya mankumanku nani mungkijimuku nangangi. Miku yalungkiya mankumanku Kudkanyi, nyuli manjijba Musis jarimbiji yalunya.
ACT 7:26 Kurdanba nyuli yilarr Musiswanyi, baki munganawa najba nyuli nganinyiwuya. Daba bulangki. Nyuliyanyi kurrkunba bulanya daykanyi. Yanyba nyuli bulangi, ‘Nimbala, mankukiyi ngaki jangkurr. Nimbala mungkijiwuya. Wanyingkanyi nimbalaka daba.’
ACT 7:27 Ngala nanda waluwa jali daba, nyuli jululumba Musis wiliyurri. Jululumba nyuli Musis. Yanyba nyuli Musiskanyi, ‘Miku ninji mambuka nurrungi. Marda miku ninjimi jirrinyba nurrunya.’
ACT 7:28 Baki nyuli ngajaka Musis, ‘Marda nganinjimi kurdanba kuna, barrinani kurdanba ninji nanda yilarr wulani.’
ACT 7:29 Miku nyuliya jananganja Musiswanyi. Marrala nyuli. Miku nyuliya jingkijba, yingkawanyi nyuli najba Musis kurdanbikurri nanda yilarr wulani. Wirlkuyi Musis karrurriji. Wirlku nyuli yingkayurri yajiyurri. Niji nanankanyi yajinyi Midiyan. Jungku nyuli nanaba Midiyan wabulinyina yajina. Ngala nyuli nanaba, wudumba nyuli maninganja. Kujarra jandanyi bulangi, jukawuya.
ACT 7:30 Jungku nyuli nananyina yajina Midiyan wabulinyina yajina. 40 kamambarra kindilkurrinyina. Baku nyuli jungku mandalbulina, bundu nananyina walkurranyina dungalana, niji Sayinayi. Ngala nyuli jungku nanaba, najba nyuli manikuja yaykurri. Baki najba nyuli Yanjil mirnbina karrinjankurri.
ACT 7:31 Manmala nyuli, jali nyulu najba nanda manikuja yaykurri, baki Yanjil janguna kalawuyngkurru. Walajba nyuli baki jilajbayi bundu manikujana, ningkiji nyulu yaji. Ngala nyuli manku Kud yanybikurri. Yanybayi Kud Musiskanyi.
ACT 7:32 Nayi yanyba nyuli, ‘Ngayu Kud. Ngayu Kud yalungi nganyingkanyi mungkijinyi wankalanyi jali jungku yalu juju wabula. Ngayu Kud Yabrayamkanyi, baki Yayisakanyi baki Jakubkanyi.’ Marralayi Musis kudanyu. Birrirra nyuli, marralangangi nyuli. Baki miku nyuliya ningkijba yaji mili Musiswanyi. Marrala nyuli naykanyi.
ACT 7:33 Yanybayi Kud Musiskanyi, ‘Nayinda ngaki jamba, malaba ngaki yaji. Dulabakiyi nganyi jabunungkaji nukaminanyi. Jala ninji karrinja nanginyina malaba jambana, baki marda miku ninjimi karrinja jabunungkajiyudi.’
ACT 7:34 Mili yanybayi Kud Musiskanyi. Yanyba nyuli, ‘Ningkijba ngayi yalunya, ngakinmuku nganinymuku, jibarrimuku, baki bayamuku. Ningkijba ngayi yalunya nananyina yajina Yijib. Linjumba yalunjali mambukamukunyi. Manku ngayi yalunya ngindunkurri, jali linjumba yalunya mambukawanyi. Badajba ngayi. Janga marrimba yalunya mardarda. Ninyaja ngayu manjijba Yijibyurri.’ Barriwa.
ACT 7:35 Waluwa mungkijimuku Musiskanyi, yurlwa yali Musiskanyi. Yanyba yali nangangi, ‘Miku ninji mambuka nurrungi. Miku.’ Miku yali nulijba Musis yalunginkanyi mambukanyi. Ngala baku manjijbayi Musis Kudwanyi, manjijba nyuli Musis Yijibyurri, kuyunki yalunya mungkijimuku nangangi, kuyunki yalunya yingkayurri yajiyurri. Yabimbayi Musis walkurra mambuka Kudwanyi, walkurra mambuka ngamanginkanyi mungkijimukuyngka. Marrimbayi mardarda wankalanyi mungkijimuku ngambalangi Musiswanyi. Nanda Yanjil jali najba Musiswanyi manikujana jali yajba, nanangini Yanjilwanyi, nyuli yabimba Musis ngiruka. Yabimba nyuli Musis ngiruka mambuka.
ACT 7:36 Baki jarimba nyuli mungkijimuku karri Musiswanyi. Yabimba nyuli kaja ngiruka yaji. Yabimba nyuli ngiruka yaji nanaba Yijib, baki yingkana yajina niji ‘Kanja Nganmarra.’ Baki mangkurruna yabimbayi ngiruka yaji Musiswanyi. Jungku yali mangkurruna yurrngumba, 40 kamambarra kindilkurrinyina, ngala yabimbayi kaja yaji ngiruka Musiswanyi.
ACT 7:37 Yanybayi Musis yalungi mungkijinyi, yanyba nyuli yalungi, ‘Manjijbaja yingka nganinyi Kudwanyi. Ngana nyuli manjijba, baki baku janyulu manjijba yingka, jalija yanyba nangangi jangkurr Kudkanyi. Janyulu karu yalunya mungkijimuku bayngkani ngambalandu, janyulu karu yalunya jangkurranyi Kudkanyi. Manjijba janyulu nanda, barrinani ngayu. Barrinani ngayu janyulu manjijba Kudwanyi. Janyulu Ju mungkiji ngambalangi.’ Barriwa.” Nani yanybayi Sdibin kunsilmukuyngka.
ACT 7:38 Baki mili jangkurr yanyba nyuli, “Nanda Musis, nyuli yalundu mungkijimukunyina mangkurruna. Nanaba nyuli jungku marda ngamanginmuku mungkijimuku yurrngumba. Nanaba nyuli jungku yundu Dungala Sayinayi, nanamannga yajina jali yanyba Yanjil Musiskanyi wabula. Yanybayi Kud Musiskanyi nanganginkanyi jangkurranyi Kudkanyi. Yanybayi jangkurr Musiskanyi. Wajbayi Musis nanganginkanyi yuwanyi Kudwanyi. Yanybayi Kud yuwa Musiskanyi, nyulu karunki yingkamuku nanankanyi yuwanyi. Baki nyuli yarrijba nanda yuwa najana Musiswanyi.
ACT 7:39 Ngala miku yaliya ngayangayijba Musis wankalamukunyi. Miku yaliya manku nangangi. Muningka yaliyanyi wijba Yijibyurri.
ACT 7:40 Ngala nyuli jungku Musis yundu Dungala Sayinayi, baki mungkijimukunyi yali ngajaka nangangi buwanya Musiskanyi, niji Yarin. Ngajaka yali Yarin, ‘Wanjawa Musis. Miku nyulu ngambalandu. Marda ninjimi yabimba yingkamuku kud ngambalangi. Baki kuyu jangambala nanda yingkamuku kud ngambalandu, jalija ngambala barlba. Nanda Musis, jali jarimba ngambalanya Yijibnanyi, wanjawa nyulu jungku.’
ACT 7:41 Baki milidimba yalunya Yarinwanyi, yabimbikanyi yali yaji barrinani kabikabi. Yabimba yali nanda yaji malankurriyudinyi dankurryudinyi. Nanda jali yalu yabimba, nanda barrinani kabikabi. Yaliyanyi yanyba mududu nanankanyi kabikabinyi. Nanamanji jalili yalu yanyba mududu Kudkanyi, bakili yalu wajba Kud barnyinyi. Yaliyanyi yanyba mududu nanankanyi kabikabinyi. Wudumba yali barnyi. Yarrijba yali nanda barnyi kabikabina. Yarrijba yali barnyi, barrinani jayalu wajba Kud. Mankumanku yalungki, ‘Nayinda kabikabi nyulu barrinani kud. Nayinda ngambalangi mambuka.’ Yabimba yali nanda kabikabi, baki maruka yali muwa kabikabinyi.
ACT 7:42 Ngala yali yanyba mududu kabikabinyi, yingijbayi yalunya Kudwanyi. Yingijbayi yalunya, jungku yali yaluman, marukangangi yali muwa kudanyu kabikabinyi. Miku yali maruka muwa Kudkanyi. Yanyba yali mududu warrawijinyi marda. Yanyba yali mududu kabikabinyi marda warrawijinyi. Barriwa. Yarrijba nyuli jangkurr Kudkanyi najana wankalawanyi. Yarrijba nyuli jangkurr Kudkanyi, ‘Narri mungkiji, narringi yaji Yisrayil. Miku narriyanyi kurdanba barnyi ngaki, baki miku ngana narriyanyi wajba barnyinyi. Ngala narri jilalajba 40 kamambarra kindilkurrinyi mangkurruna, miku narriyanyi kurdanba yaji ngaki, ngala yingkanyi narri kurdanbayi barnyi.
ACT 7:43 Baki yingkawuyayngka narri yanyba mududu bulangi. Yingka narri yabimba barrinani nganinyi, nangangi niji Muluk. Yarrijba narri yaji darladarlana, barnda nangangi Mulukanyi. Yanyba narrili mududu nanankanyi. Marda yanyba narri mududu warrawijinyi. Karu narri nanda warrawiji Rimban. Kuyu narri nanamuku narrindu. Yanyba narri mududu nanamukuyngka, ngamu kudmuku. Ngala manjijba jangayu narrinya juju karrurriji. Janga manjijba narrinya nanankurri yajiyurri karru, niji Babalun. Janga manjijba narrinya juju, yanybangangi narrili mududu nanankanyi kudmukuyngka.’ Barriwa.
ACT 7:44 Mili yanybayi Sdibin kunsilkanyi. Nayi nyuli yanyba, ‘Karu nyuli Musis Kudwanyi, karu nyuli Musis yabimbikanyi barnda nangangi Kudkanyi.’ Wudumba yali waban. Yabimba yali barnda nangangi Kudkanyi. Yabimbayi kunymamba mungkujbirrimukunyi. Yabimbayi yaji kunymamba, barrinani karuyi Musis Kudwanyi. Kuyu yalili nanda barnda Kudkanyi yurrngumba jalili yalu jilalajba mangkurruna. Kuyu yali nanda barnda yalundu ngambalanginyi wankalawanyi.
ACT 7:45 Baku murrkani, yuwaji yali kuyu nanda barnda Kudkanyi. Waluwa janyba nangki Musis, yarrijba nyuli nanda Jujuwa. Yarrijbayi Jujuwa mambuka nanganginkanyi mungkijinyi. Jali janyba nangka Musis, baki yalilijbayi nangangi mungkiji mambukawanyi, Jujuwawanyi. Yalilijba nyuli yalunya nanankurri yajiyurri jali wajba yalunya Kudwanyi. Kuyu yali nanda barnda Kudkanyi jali yalu jilajba nanankurri yajiyurri. Kandimba nyuli yalunya Jumuku Kudwanyi. Nyuli yalundu, jali yalu daba nanamuku jalili jungku nananyina yajina, niji Kayinan. Daba yali, kurdanba yali nanamuku jalili jungku yalu Kayinan. Yabimba nyuli yalunya ngiruka daykanyi nanamuku Kudwanyi. Yurrngumba nanda barnda Kudkanyi yalundu. Yanyba yalili mududu Kudkanyi nananyina barndana. Yanyba yalili mududu, marda brijba yalili Kudkanyi nanaba. Nanda barnda Kudkanyi, yuwaji nanaba juju bayngkani nangangi, jali jungku yingka mambuka Dayibid.
ACT 7:46 Nanda Dayibid, nyuli jungku nananyina yajina Kayinan juju bayngkani nangangi Jujuwa. Walkurra mambuka nanda Dayibid. Baki Kud, maruka nyuli muwa Dayibidkanyi. Nyuliyanyi yabimba barrawu Kudkanyi Dayibidwanyi, baki ngajaka nyuli Kud yabimbikanyi nangangi barrawu Kudkanyi.
ACT 7:47 Miku nyuliya yabimba nanda barrawu, ngala nanganginyi jandanyiwanyi, niji Sulumun, yabimba nyuli nanda walkurra barrawu Kudkanyi.
ACT 7:48 Ngala Kud, miku nyulimi jungku barrawuna. Miku nyulimi jungku barrawuna jali yabimba nganinyiwanyi. Miku. Yanyba nyuli nanda wankalanyi, yanyba nyuli yingka jangkurr Kudkanyi.
ACT 7:49 ‘Ngayu Kud. Nanangajba ngayu bukamba yaji. Jungkuwa ngayu lalijina, marda jambana ngayuwa jungku. Yuwajiwa ngayu jungku wandijiyana. Ngala miku ngayimi jungku barrawuna jali yabimba nganinyiwanyi. Yabimba ngayi bukamba yaji.’ Barriwa.” Nani yanybayi Sdibin yalungi.
ACT 7:51 Kijiwijba nyuli yalungi kunsilkanyi Sdibin. Kijiwijba nyuli. Nayi nyuli yanyba yalungi, “Narri jardibirrimuku. Miku narri kuyu jangkurr Kudkanyi. Miku. Miku narri nulijba Kud. Narri barrinani nanamuku wankalanyi, jali jungku juju wabula. Miku yaliyanyi ngayangayijba Kunyba Ngarndu Kudkanyi. Marda narri, miku narrimi ngayangayijba nanda Kunyba Ngarndu Kudkanyi.
ACT 7:52 Kurdanba yali nanamuku jali yanyba jangkurr Kudkanyi wankalawanyi. Narringinyi wankalanyi buwakanyamukunyi kurdanba yali bukambiju jali manjijba Kudwanyi yanybiji nangangi jangkurr. Nanamuku jali yanyba jangkurr Kudkanyi, yanyba yali, janyulu badajba nanda kunyba wakiwarr. Yanyba yali, janyulu badajba, ngala jali nyulu badajba, baki karu janarri yingkamuku kurdanbiji nanda. Badajba nyuli, ngala karu narri yingkamuku kurdanbiji nanda. Narri, kurdanba narri nanda kunyba wakiwarr.
ACT 7:53 Nanda jangkurr Kudkanyi, nanda yuwa jali karu Yanjilwanyi, nanda yuwa narringi yuwa. Jingkijba narri nanda yuwa, ngala miku narriyi manku yaji yabimbikanyi nayi yaji.” Barriwa. Nani yanybayi Sdibin.
ACT 7:54 Nanamuku kunsilkanyi, ngarrangarra yali muwa nanankanyi jangkurranyi Sdibinkanyi. Ngala nyuli yanyba, baki ngarrangarra yali muwa kudanyu nangangi.
ACT 7:55 Ngala Sdibin, nanda Kunyba Ngarndu Kudkanyi nangandu. Ningkijba nyuli laliji kingkarri. Ningkijba nyuli kingkarri, baki najba nyuli Kud. Najba nyuli walkurra mirnbi. Najba nyuli Kud jungunkurri mirnbina. Jungkuyi Kud mirnbina marda Jisus nangandu. Jungku buli malumba, Kud marda Jisus.
ACT 7:56 Kayayi Sdibin, “Ningkijbakiyi narri laliji. Najba ngayu lalijina Buwakanya Bukambijuyngka. Nyulu karrinja wilina Kudnyina.”
ACT 7:57 Ngala kaya yali kudanyu kunsilmuku. Murumba yalungki kuwarda. Miku yaliyanyi manku nanda jangkurr jali yanyba Sdibin. Wirlku yali Sdibinyurri wudumbiji nanda.
ACT 7:58 Wudumba yali Sdibin, baki kuyu yali juju danbina barrawuyabarrawuyana. Yaliyanyi kurdanba Sdibin. Kuyu yali nanda danbina juju, baki janyba yali dungala nangandurri kurdanbiji Sdibin. Kudiya nganinyi nanaba, yalungki dulaba danyan yalungi, janyba jayalu dungala. Yarrijba yali danyan jambana bundu nganinyina, nangangi niji Sul, nyulu lalanbiji danyan.
ACT 7:59 Jabarri janyba yali dungala nanganburri Sdibinyurri. Jingkijba nyuli, janangka janyba Sdibin, baki kaya nyuli, “Mambuka Jisus, kuyu janinji ngaki ngarndu.”
ACT 7:60 Mururu nyuli baki kayayi kudanyu, “Kud, mudujbakiyi nayinda balki yaji, jala yalu yabimba ngaki daykanyi.” Nani yanyba nyuli baki janyba nangki. Yali kurdanba nanda Sdibin dungalayudinyi. Barriwa.
ACT 8:1a Nanda nganinyi Sul, jali lalanba danyan, maruka nyuli muwa, jali nyulu najba yalunya kurdanbikurri Sdibin. Marukayi Sul muwa. Mankumanku nangki, yuku kunyba, jali yalu kurdanba Sdibin.
ACT 8:1b Baku barri kudanyu yali julanba nanamuku Jisuskanyi. Yabimba yali kiji yalungi jali maruka yali muwa Jisuskanyi. Nanankardi yingijba yali nanda yaji Jirusalim, nanamukunyi jali maruka muwa Jisuskanyi. Jarrbalijba yali bukamba. Barlba yali yingkayurri yajiyurri lukuluku, Judiyayurri marda Samariyayurri. Ngala kudiya yali wambu jungka Jirusalim, nanamuku jali manjijba Jisuswanyi. Yali wambu jungku. Miku yaliya barlba.
ACT 8:2 Makaba yali nganinyiyurru mankanyi kudiyawanyi jali maruka Kudkanyi. Yali ngindu muwa nangangi. Ngindu yali kudanyu nangangi nganinyiyurruwa.
ACT 8:3 Ngala kujba nyuli Sul nanamukuyngka jali maruka Jisuskanyi. Ngankijba nyuli kalawunyi kajana barrawuna, kujba nyuli yalungi. Wudumba nyuli kajamuku, baki kuyuyi yalunya brisinyurri. Ngarrangarra nyuli muwa yalungi, jala yali maruka muwa Jisuskanyi.
ACT 8:4 Ngala yalu jali jarrbalijba, jilajba yali lukuluku juju, baki karu yalunjali yingkamuku jangkurranyi Jisus Krayiskanyi.
ACT 8:5 Nyuli jilajba Samariyayurri nanda Bilib. Karu nyuli jangkurranyi Jisuskanyi nanaba.
ACT 8:6 Kajamukunyi yali manku jangkurr Bilibkanyi, muramukunyi. Manku yali kudanyu nangangi jangkurr. Manku yali, baki najba yali ngiruka yaji jali yabimba Bilibwanyi.
ACT 8:7 Jakajba nyuli wuwarr yalunbunanyi mankanyinanyi. Kaja wuwarr nyuli jakajba. Jakajba nyuli wuwarr nganinyinanyi baki jibarrinanyi. Jali yalu walajba mankanyinanyi, baki yali kaya kudanyu wuwarrwanyi. Kunymamba nyuli kudukudu jali miku yaliyanyi jilajba nukamina. Kudukudu jali miku yalungkiya ngirringirrimba mankanyi, kunymamba nyuli yalunya Bilibwanyi.
ACT 8:8 Mirnarrijba yali muwa nangangi, yalu jali jungku Samariya, kunymambangangi nyuli kudukudu Bilibwanyi. Mirnarrijba yali muwa, karungangi nyuli yalunya Jisuskanyi marda.
ACT 8:9 Yingka nganinyi, jungku nyulili nanaba Samariya. Nangangi niji Sayimin. Yabimba nyuli ngiruka yaji barrinani yabimbayi yarrbirrawanyi. Yanyba nangki, walkurra mambuka nyuli nanda nganinyi Sayimin.
ACT 8:10 Bukambiju jalili jungku nanaba, yalili manku yaji kudanyu nangangi Sayiminkanyi. Yanyba yalili, “Nyulu mambuka. Yabimba nyulu ngiruka yaji. Yabimbayi nanda mambuka ngiruka Kudwanyi. Nyulu Kudkanyi.” Nani yanyba yalili bukambiju.
ACT 8:11 Yali manmala kudanyu jalili yabimba nyulu yaji ngiruka. Manku yalili kudanyu nanganginkanyi jangkurranyi. Yabimba nyulili ngiruka yaji juju, waluwa wanbiya nyuli Bilib nanaba.
ACT 8:12 Jali yalu manku nangangi jangkurr Bilibkanyi, baki yali kuyu nangangi jangkurr Jisuskanyi, marda nangangi jangkurr Kudkanyi, nyulu lalanba yalunya bukambiju Kudwanyi. Kuyu yali jangkurr Bilibkanyi, Jisuskanyi marda Kudkanyi. Kuyu yali jangkurr baki nyuli ngurrunba yalunya, babdayis yalunya Bilibwanyi.
ACT 8:13 Nanda Sayimin, nyuli kuyu nanda jangkurr Jisuskanyi marda. Ngurrunbayi nanda Sayimin Bilibwanyi. Baku barri, jilajba nyuli nangandu Bilibnyina yurrngumba. Najba nyuli Bilib yabimbikurri kaja ngiruka yaji, baki manmalayi.
ACT 8:14 Nanamuku jali manjijba Jisuswanyi, jali wambu yalu jungku kularra Jirusalim, manku yali jangkurr langina. Manku yali Bilibkanyi Samariya, baki manku yali nanamukuyngka jali kuyu jangkurr Kudkanyi. Baki yali manjijba Bida baki Jun langki Samariyayurri. Manjijbayi bulanya milidimbiji nanamuku.
ACT 8:15 Jali bula wanbiya langku Samariya, yanyba buli mududu Kudkanyi. Yanyba buli mududu. Ngajaka buli Kud waji nanamuku jali ngurrunba Bilibwanyi, ngajaka buli Kud waji yalunya nanganginkanyi Kunybanyi Ngarndunyi.
ACT 8:16 Ngajaka buli Kud waji Kunybanyi Ngarndunyi. Jilijbawa yaji. Mikuyaji Ngarndunyi Kudkanyi yalundu. Ngurrunba nyuli yalunya, durrijba jali jangkurr Jisuskanyi. Ngurrunbayi yalunya Bilibwanyi, ngala jilijba nyulu ngankijba yalundu mankanyina Kunyba Ngarndu Kudkanyi.
ACT 8:17 Yarrijba bulangki marni yalundu kulajina, ngala buli yanyba mududu. Baki ngankijbayi yalundu mankanyina Kunyba Ngarndu Kudkanyi.
ACT 8:18 Nanda Sayimin, jali jila Bilibnyina yurrngumba, najba nyuli bulanya. Najba nyuli bulanya yarriykurri bulangki marni yalundu kulajina. Jingkijba nyuli, ngankijbayi yalundu Kunyba Ngarndu Kudkanyi, jali bulangki yarrijba marni yalundu. Yanyba nyuli bulangi, “Wajba janga nimbalanya dungalanyi.
ACT 8:19 Jabarri nganimbalaja wajba mankanyi ngayu ngiruka. Jabarri jangayu jungku ngiruka waykanyi yingka Kunybanyi Ngarndunyi Kudkanyi. Jangayu wawajba yalunya Kunybayi Ngarndunyi Kudkanyi.”
ACT 8:20 Ngala kijiwijbayi Bida nangangi. Jananganjayi Bidawanyi, “Ngawamba Kudwanyi, yuku nyulu wajba nanganginkanyi Kunybanyi Ngarndunyi. Miku ninjiyi wudumba nanda ngiruka mankanyi, jala ninji wajba dungalanyi. Jaliya nganyingka mankumanku nani, baki miku janyulu nganyi nulijba Kud. Miku. Miku nyuliyi nganyi nulijba Kud, marda miku nyuliyi nulijba nganyingkanyi dungalanyi. Miku janyulu kuyu nganyi dungala Kudwanyi. Jaliyi nganyingka mankumanku nani, baki janinji jilajba Yilyurri, ninji marda nganyi dungala.
ACT 8:21 Miku janinji waki nurrundu. Miku ninji jungku kunyba Kudkanyi.
ACT 8:22 Marda ninjimi ngindu nganyingkanyi balkinyi yajinyi. Marda ninjimi ngindu nanankanyi nganyingkanyi mankankanyi ngirukanyi, jali ninji ngajaka. Marda ninjimi yanyba mududu Kudkanyi, ngajaka Kud manjamanjambiji nanda nganyi balki yaji Kudwanyi.
ACT 8:23 Ninji nguwajba nurrungi. Jungku ninji balki yurrngumba, nguwajbangangi ninji.” Barriwa.
ACT 8:24 Baki ngajakayi bulanya Sayiminwanyi, “Yanyba janimbala mududu Kudkanyi ngaki. Ngajaka janimbala Kud, miku janyulu manjijba ngana Yilyurri.” Barriwa.
ACT 8:25 Baku barri, milidimba buli yalunya, nanamuku jali yalu kuyu jangkurr Jisuskanyi nananyina yajina. Karu buli yalunya bukamba nanankanyi jali bula jingkijba Jisuskanyi. Baki wijba buli kularriji Jirusalimyurri, Bida marda Jun. Milidimba buli yingkamuku ngala buli jilajba nananyina walkurranyina yajina, niji Samariya. Jilajba buli kajayurri barrawuyabarrawuyarri, baki buli milidimba kajamuku jali yalu jungku nanaba. Mili buli barlba kula, baki buli wanbiya Jirusalim. Barriwa.
ACT 8:26 Ngala nanda Bilib, yuwaji nyuli nanaba langku. Baku barri yanybayi Yanjil Bilibkanyi. Nayi yanybayi Yanjil, “Jilajba janinji kula. Kulakiyi jila nanankurri yubarlyurri, jali wirlku karrina Jirusalimnanyi mili bayungu Kasayurri. Jilajba janinji nanankurri yubarlyurri.” Wirlkuyi nanda yubarl mangkurruna yajina.
ACT 8:27 Ngayangayijba nyuli Yanjil Bilibwanyi. Jilajba nyuli kularriji, baki jungku nyuli nanaba. Ngala yingka mambuka, waluwa nyuli jilajba Jirusalimyurri. Badajba nyuli jujunanyi kularrinybananyi. Nanda yaji niji Yidiyubiya. Waki nyuli walkurrayngka mambukanyi nanaba Yidiyubiya. Nanda walkurra mambuka Yidiyubiyakanyi, miku nganinyi, nyuli jibarri, Kiyin. Yingka niji Kiyinkanyi, Kandaki. Lalanba nyuli dungala nanangini nganinyiwanyi. Lalanba nyuli dungala yurrngumba nanaba Yidiyubiya. Jilajba nyuli Jirusalimyurri walkurrayngkurri jurjyurri. Nanankurri nyuli jilajba, yanybiji mududu Kudkanyi. Jila nyuli yanybiji mududu Kudkanyi, marda briji Kudkanyi.
ACT 8:28 Baku nyuli yingijba Jirusalim, baki wijba nyuli nanginkurri yajiyurri Yidiyubiyayurri. Karrinja nyuli darladarlana jali wililijba yarramawanyi. Ngala nyuli jilajba karrina Jirusalimnanyi, yanyba nyuli jangkurr najana, jangkurr Kudkanyi. Yanyba nyuli nanda jangkurr jali yarrijba wankalawanyi Yayisayawanyi.
ACT 8:29 Badajba nyuli nanankurri yajiyurri jali yukumba Bilib kularra. Badajba nyuli bundu nangandu Bilibnyina, baki jirrinyba nyuli Bilib Kunybawanyi Ngarnduwanyi Kudkanyi. Yanyba nyuli, “Jilajbakiyi ninji nanankurri darladarlayurri. Janinji jila wilina. Janinji jila bayungu mili bundu nanaba darladarlana.”
ACT 8:30 Wirlkuyi Bilib darladarlayurri. Manku nyuli mambuka kalawunyi. Manku nyuli mambuka yanybikurri jangkurr najana, jali yarrijba wankalawanyi Yayisayawanyi. Manku nyuli jangkurr mambukanyi Bilibwanyi, baki ngakaja nyuli nanda mambuka, “Jingkijba kuna ninji nanda jangkurr jala ninji yanyba najana. Jingkijba kuna ninji nanda jangkurr.”
ACT 8:31 Jananganja nyuli Bilib nanangini mambukawanyi, “Miku ngayu jingkijba nayinda jangkurr. Marda nyulimi milidimba ngana yingkawanyi. Miku ngayu jingkijba.” Baki ngajaka nyuli Bilib jungunki nangandu darladarlana.
ACT 8:32 Yanybayi mambuka nanda jangkurr jali yarrijba Yayisayawanyi najana. Nayi nyuli yarrijba wankalawanyi jangkurr Kudkanyi. ‘Nyulu barrinani jib, nanda jali yalu kuyu kurdanbikanyi. Nyulu barrinani nanda jib, jala yalu karlba nyungka. Jungkuyi karda nanda jib, jali yalu karlba nyungka. Nani barri nyuli jungku karda barrinani jib. Miku nyuli yanyba jangkurr.
ACT 8:33 Yanyba yali balki jangkurr nangangi kudukudu. Yuku yaliyanyi muningka manjijba. Yuku yaliyanyi muningka manjijba nanda, ngala miku. Jaliyi yalu muningka manjijba, baki miku jayalu kurdanba nanda. Ngala yali kurdanba nanda. Miku jayalu karu nangangi jandanyimuku, marda nangangi mimimba nyulu. Mikuyaji yalungi. Kurdanba yali nanda. Miku nyulu wanka jungku.’ Barriwa. Nani yanybayi mambuka jangkurr najana.
ACT 8:34 Yanybayi nanda mambuka Bilibkanyi, “Wanyi nanda jali nyulu yarrijba. Yarrijba nyuli nanganginmayngka kuna. Yarrijba nyuli yingkanyi kuna.”
ACT 8:35 Baki jananganjayi Bilibwanyi. Karu nyuli mambuka, “Yarrijba nyuli jangkurr Jisuskanyi, wankalawanyi Yayisayawanyi. Nanda barrinani jib, nyuli Jisus.” Baki nyuli karu mambuka bukamba nanda jali jingkijba nyulu Jisuskanyi. Barriwa.
ACT 8:36 Ngala buli jila yubalina, wanbiya buli yajina wabudayudinyina. Ngajaka nyuli Bilib mambukawanyi, “Wabuda nayiba. Yuku kuna janganinji ngurrunba nanginyina wabudana.”
ACT 8:37 Jananganjayi Bilibwanyi, “Janga ngurrunba ninya, jaliyi ninji kuyu nanda jangkurr Jisuskanyi. Jaliyi ninji kuyu nanda jangkurr, baki janinya ngurrunba.” Baki yanybayi mambuka Bilibkanyi, “Kuyu ngayu nanda jangkurr ngiruka. Jingkijba ngayu, nanda Jisus, nyulu jandanyi Kudkanyi.”
ACT 8:38 Kurrkunbayi yarrama mambukawanyi, baki karrala buli jambarri. Karrinja buli wabudana, Bilib marda mambuka. Ngurrunba nyuli mambuka Bilibwanyi, baki buli walajba wabudananyi.
ACT 8:39 Jali bula walajba wabudananyi, kuyu nyuli Bilib yingkayurri yajiyurri Ngarndwanyi Kudkanyi. Ngala nanda mambuka, bayiwujba nyuli nangangi Bilibkanyi. Kirrijba nyuli darladarlana, baki mili nyuli jilajba bayungu. Baki mirnarrijba nyuli muwa. Ngala miku nyuliyanyi najba Bilib mili barri.
ACT 8:40 Jali kuyu Bilib Kunybawanyi Ngarnduwanyi Kudkanyi, baki Bilib nyuli jungku langku, yaji niji Yajdud. Najba yali Bilib nanaba langku. Milidimba nyuli nanamuku yingkana barrawuna, yingkana barrawuna yurrngumba jala nyuli jila mili langki. Milidimba nyuli kudukudu, baki wanbiya nyuli Sisariya. Nanaba nyuli jungku.
ACT 9:1 Ngala Bilib nanaba Samariya, nanda Sul jali lalanba jumbala jali yalu kurdanba Sdibin, yuwaji nyuli Jirusalim. Yuwaji nyuli barimba yuwa yalungi jali maruka yalu Jisuskanyi. Yabimba nyuli kiji yalungi. Nyuliyanyi kijijba yalunya brisinyina. Nyuliyanyi kurdanba yalunya, kandimuku Jisuskanyi. Jilajba nyuli walkurrayngkurri mambukarri jurjkanyi. Ngajaka nyuli nanda mambuka najanyi.
ACT 9:2 Ngajaka nyuli najanyi baki mambukawanyi jurjkanyi, yarrijba nyuli jangkurr najana, nanankanyi yingkanyi mambukanyi jali jungku yingkana yajina juju langku, yaji niji Damaskus. Yarrijba nyuli jangkurr. Wajba nyuli Sul nanankanyi najanyi, minimbiji mambukamuku jurjkanyi nanaba langku Damaskus. Nanda jangkurr najana yanybayi, ‘Nangini Sulwanyi, yuku barri janyulu wudumba nanamuku jala maruka Jisuskanyi, jala durrijba nangangi yuwa. Wiykunumba janyulu yalunya Jirusalimyurri, yarrijbaja yalunya brisinyina. Yuku yarrijba janyulu nanamuku kandimuku Jisuskanyi brisinyina, nganinyi marda jibarri.’ Nani yanybayi naja.
ACT 9:3 Jilajbayi Sul juju langki, baki kudiya nanganbu. Jala nyuli bundu Damaskus wambarrardbayi mirnbi walkurra lalijinanyi lukuluku nangandu Sulnyina. Nyuli karrinja burrandi walkurranyina mirnbina.
ACT 9:4 Yirrba nyuli jambarri, baki manku nyuli jangkurr. Nayi nanda jangkurr, “Sul, Sul. Wanyingkanyi ninji ngarrangarra muwa ngaki. Wanyi wirangu ninji kurdanba ngaki kandimuku. Wanyingkanyi ninji yabimba kiji ngaki.”
ACT 9:5 Ngajakayi Sulwanyi, “Wanyi ninji mambuka. Wanyi mambuka ninji jala yanyba ngaki.” Jananganjayi nanangini, “Ngayu Jisus. Ngayu nanda jala nganinji ngalangalaka, kurda.”
ACT 9:6 Yanyba nyuli Sulkanyi, nanda jali yanyba waluwa, “Walajbakiyi. Langkukiyi jila nanankurri barrawuyabarrawuyarri Damaskusyurri. Janyulu karu ninya yingkawanyi nanankanyi jalija ninji yabimba ngaki.”
ACT 9:7 Nanamuku jali jilajba nangandu Sulnyina, kurrkunba yali. Manku yali nanda jangkurr, ngala miku yaliya najba nanda jali yanyba. Manmala yali baki miku yaliya yanyba.
ACT 9:8 Baki walajbayi Sul. Ngarraba nangki yami, ngala miku nyuliyi najba yaji. Kabuji nyuli. Baki marrimba yali Sul marni. Jalulu yali jila yurrngumba Damaskusyurri.
ACT 9:9 Miku nyuliya najba yaji kujarraka barndayka. Ngala miku nyuli najba, mikuyaji nangangi mamanyi, mikuyaji wabudanyi. Miku nyuli jarrba mama, miku nyuli ngaraba wabuda kujarraka barndayka. Barriwa.
ACT 9:10 Jungku nyulili Damaskus nanda nganinyi, nangangi niji Yananayis. Maruka nyuli muwa Jisuskanyi. Nanamanji barri nyuli buwarrajimba yaji ngala nyuli yamininyi jungku. Jali nyulu buwarrajimba, najba nyuli Kud. Baki yanybayi Kud nangangi, “Nanama ninji Yananayis.” Jananganja nyuli, “Nayinda ngayu, mambuka.”
ACT 9:11 Yanybayi Kud nangangi, ngala nyuli buwarrajimba yaji. Yanybayi Kud, “Walajbakiyi. Jilajbakiyi nanankurri yubalyurri, nangangi niji ‘Yuwarl.’ Janinji jila barrawurri nananyina yubalina, nanankurri barrawurri jalili nyulu jungku, nanda nangangi niji Judas. Nanganginkurri barrawurri janinji jila. Jalija ninji wanbiya, janinji karu yalunya barndana, ninji wanbiya yanybiji nanankanyi nganiyngkanyi Sulkanyi, nangangi yaji Darsus. Jayalunya karu, janinji yanyba nangangi Sulkanyi. Nanda nganinyi Sul, nyulu yanybaka mududu ngaki.
ACT 9:12 Baki buwarrajimba nyuli yaji Sulwanyi. Najba nyuli nganinyi niji Yananayis, ngala buwarrajimba Sulwanyi. Najba nyuli Yananayis ngankiykurri nanganburri barrawurri. Najba nyuli Yananayis yarriykurri nangka marni nanganbu Sulnyina, baki najbayi yaji mili Sulwanyi.” Barriwa. Nani yanybayi Kud nangangi Yananayiskanyi, ngala nyuli buwarrajimba yaji.
ACT 9:13 Jananganjayi Kud Yananayiswanyi. Jananganja nyuli, “Mambuka, karu ngana yali nangangi kudukuduwanyi. Karu yali nangangi, jali balki yaji nangangi. Karu yali nangangi, barimba jala nyulu yaji nganyingkanyi kandimukuyngka jali yalu jungku Jirusalim.
ACT 9:14 Wanbiya nyuli nayiba Damaskus. Kuyu nyuli jangkurr najana mambukanyi jurjkanyi. Nanda jungkurr yanybaka, yuku nyulu wudumba yalunya, yarrijba yalunya brisinyina, yali jala nganyi kandimuku.”
ACT 9:15 Yanybayi Kud nangangi Yananayiskanyi, “Jilajbakiyi Sulyurri. Yarrijba ngayi Sul mambuka. Janyulu waki ngaki. Janyulu karu kudukudu ngaki. Kudukudu ngurranyimuku, marda mambukamuku, marda kudukudu Jumuku, janyulu karu yalunya ngaki.
ACT 9:16 Ngala ngayuma, jangayu karu Sul nayinda, yingkamukunyi jayalu linjumba nanda Sul ngaki. Nani jangayu karu Sul.” Barriwa. Nani yanybayi Kud Yananayiskanyi ngala nyuli buwarrajimba yaji.
ACT 9:17 Baki jilajba nyuli Yananayis nanankurri barrawurri. Ngankijba nyuli kalawunyi barrawuna. Jilajba nyuli Sulyurri. Yarrijba nangki marni nanganbu Sulnyina kulajina, baki yanybayi nangangi, “Kandi Sul, manjijba ngani mambukawanyi Jisuswanyi. Nyulu nanamannga Jisus najba jali ninji yubalina. Ngana nyuli manjijba, baki yuku janinji najba yaji mili, baki nanda Kunyba Ngarndu Kudkanyi, janyulu ngankijba nganyindu mankanyina.” Barriwa.
ACT 9:18 Yinarramba yirrbayi Sulnanyi yaminanyi nanda barrinani kalya. Yirrbayi nanda nanganbunanyi yaminanyi, baki nyuli najba yaji. Karrinja nyuli baki ngurrunbayi nanda Sul kandiwanyi Jisuskanyi.
ACT 9:19 Baki nyuli jarrba mama Sulwanyi, baki kunybijbayi mili mankanyi. Jungku nyuli mardunguji kandimukunyina nanaba Damaskus.
ACT 9:20 Baki jilajba nyuli yingkayurri jurjyurri baki yingkayurri jurjyurri baki yingkayurri nananyina yajina. Nani nyuli jila jurjmukuyngkurri. Karu nyuli yalunya Jisuskanyi, nanamuku jali jungku jurjina. Yanyba nyuli, “Nanda Jisus, nyulu jandanyi Kudkanyi.”
ACT 9:21 Manmala yali, nanamuku jali manku nangangi jangkurr. Yanyba yalungki, “Nayinda Sul, nyulu nanda jali wudumba kandimuku Jisuskanyi, nanda jali yarrijba yalunya brisinyina nanaba Jirusalim. Badajba nyuli nanginkurri wudumbiji yingkamuku kandimuku jali maruka muwa Jisuskanyi. Badajba nyuli wudumbiji yalunya, baki wiykunumbiji yalunya walkurrayngka mambukanyi jurjkanyi nanaba Jirusalim.” Barriwa. Manmala yali baki nani yalungki yanyba Sulkanyi.
ACT 9:22 Ngala milidimba nyuli yalunya Sulwanyi. Milidimba nyuli yalunya duja ngirukanyi jangkurranyi, nanamuku Jumuku jali jungku Damaskus. Nayi nyuli milidimba yalunya, “Wabula juju yanybayi Kud, janyulu manjijba walkurra mambuka. Nanda Jisus, nyulu nanda jali manjijba Kudwanyi. Nyulu nanda Krayis, baki nyulu jungkuka nanda walkurra mambuka ngambalangi.” Nani yanybayi Sul duja jangkurr. Nanamuku Jumukunyi, miku yaliya kuyu nangangi jangkurr, ngala miku yaliya jingkijba wanyi jangkurr jananganjanyi Sul. Miku yaliya jananganja Sul. Barriwa.
ACT 9:23 Baku barri, mardunguji, jungku yali malumba nanamuku Jumuku. Kurdanba yaliyanyi Sul. Yanyba yalungki kurdanbikanyi nanda.
ACT 9:24 Ngala karuyi Sul yingkawanyi. Karu nyuli nanankanyi jangkurranyi kurdanbikanyi Sul. Kudiyawanyi, nulijba jali kurdanbikanyi Sul, kurrkurrnajba yali bardawa barrikina. Wujuju marda baralala kurrkurrnajba yali nanda bardawa barrikina. Nanda barriki lukuluku Damaskus. Yabimba yali nanda barriki dungalayudinyi, wunanybala kingkarri. Kurrkurrnajba yali bardawa, Sul wudumbiji, kurdanbiji nanda.
ACT 9:25 Nanda barriki wunanybala, juju kingkarri. Mungana barri yarrijba yali Sul walkurranyina kamulana. Kijijba yali kurul kamulana, baki manjijba yali Sul kingarrinya. Manjijbayi Sul jambarri kamulana kurulyudinyi. Karrala nyuli jambarri barrikina nanda Sul, ngala kurrkurrnajba yali bardawa Sulkanyi kudiyawanyi.
ACT 9:26 Jilajbayi Sul kula Jirusalimyurri. Jali nyulu nanaba Jirusalim, nyuliyanyi jungku yalundu kandimukunyina. Karu nyuli yalunya, maruka nyuli muwa Jisuskanyi, ngala miku yaliya kuyu nangangi jangkurr. Marrala yali bukambiju Sulkanyi.
ACT 9:27 Ngala kandimba nyuli Sul yingkawanyi kandiwanyi, nangangi niji Barnabas. Kuyu nyuli Sul nanamukuyngkurri jali manjijba Jisuswanyi. Karu nyuli yalunya Sulkanyi Barnabaswanyi. Karu nyuli yalunya nanginkanyi jangkurranyi, “Najbayi mambuka Jisus yubalina Sulwanyi, baki yanybayi Jisus nangangi Sulkanyi. Baku yanybayi Sul duja jangkurr Jisuskanyi jurjina nanaba Damaskus. Kudanyu nyuli yanyba yalungi bukambijuyngka Jisuskanyi.” Nani karuyi yalunya Sulkanyi Barnabaswanyi.
ACT 9:28 Baki jungku nyuli Sul yalundu kandimukunyina. Jilajba nyuli lukuluku Jirusalim yanybikanyi yalungi Jisuskanyi.
ACT 9:29 Marda yanybayi Sul Jisuskanyi yalungi Jumukuyngka jali yanyba Krik yanyi. Yingkawanyi ngajakayi baki yingkawanyi ngajakayi baki jananganjayi yalunya Sulwanyi. Jakakajba yalungki Jisuskanyi. Ngala yaliyanyi kurdanba Sul, nanamukunyi Jumukunyi jali yalu yanyba Krik yanyi. Kurdanba yaliyanyi Sul.
ACT 9:30 Ngala yali manku nanda jangkurr kurdanbikanyi Sul kandimukunyi. Baki yali kuyu Sul langki Sisariyayurri, baki nanamunanyi yali manjijba nanda Sul mili langki nanganginkurri yajiyurri Darsusyurri, juju langku.
ACT 9:31 Jungku yali kardarda nanamuku kandimuku jali maruka muwa Jisuskanyi. Wabulinyina yajina jungku yali kardarda, nanaba Judiya, marda Kalili, marda Samariya. Miku yaliya linjumba kandimuku, yingkamukunyi Jumukunyi jali miku yali kuyu jangkurr Jisuskanyi. Miku yaliya linjumba kandimuku. Yurrngumba barri jabarri mili yali kuyu jangkurr Jisuskanyi, kandimbangangi yalunya Kunybawanyi Ngarnduwanyi Kudkanyi. Jungku yali kunyba Kudkanyi. Ngayangayijba yali Kudkanyi, marukangangi yali muwa Jisuskanyi. Barriwa.
ACT 9:32 Mardunguji jilajbayi Bida yingkayurri yajiyurri baki yingkayurri yajiyurri lukuluku. Baki wanbiya nyuli barrawubarrawuna niji Lida. Jilajba nyuli nanaba yidambiji kandimuku jali yalu jungku nanaba Lida. Yidamba nyuli kandimuku nanamukunyina yajina.
ACT 9:33 Najba nyuli nganinyi nanaba Lida, nangangi niji Yaniyas. Miku nyuliya jilajba. Miku nangkiya ngirringirrimba mankanyi. Yurrngumba nyuli kuluka nanganginyina jalyuna 8 kindilkurrinyi.
ACT 9:34 Yanybayi Bida nangangi, “Ninji Yaniyas, kunymamba ninya Jisus Krayiswanyi. Walajbakiyi, baki jalyumbakiji.” Yinarramba nyuli walajba. Kunybijba nyuli. Yuku nyuli jilajba kunybijba.
ACT 9:35 Kudukudu jali jungku nananyina marndarlbarlina, niji Jarun, yali najba nanda nganinyi, miku jali jila wabula. Nanda barrawuyabarrawuya, niji Lida, jungkuyi kularra marndarlbarlina. Marda nanamuku jali jungku Lida, najba yali nanda nganinyi jali kunymamba Jisuswanyi. Najba yali, baki kuyu yali jangkurr Jisuskanyi. Maruka yali muwa Jisuskanyi. Barriwa.
ACT 9:36 Jungkuyi bardibardi nananyina yajina, niji Juba. Nanda yaji Juba bundu Lida. Juba bayinga, ngala Lida karriya. Maruka nyuli muwa Jisuskanyi nanda bardibardi. Nangangi niji Dabida. Dabida, nanda Ju yanyi, barrinani dirr, ngala Krik yanyi Dukas. Nanda dirr barrinani bayakarda buluki. Kandimba nyuli yingkamuku yurrngumba bardibardiwanyi. Wajba nyuli yalunya yajinyi, mamanyi marda jumbalanyi, nanamuku jali mikuyaji dungalanyi yalunbu.
ACT 9:37 Nanamanji jali jungku Bida Lida, nanda bardibardi lunji nyuli kudanyu, baki janyba nangki. Wakardaba yali mankanyi bardibardiyurru. Kuyu yali mankanyi kingkarriji. Yarrijba yali mankanyi jalyuna yundukula.
ACT 9:38 Nanda yaji Juba janyba jali nangka bardibardi nanaba, nanda Juba bundu Lida. Yuwaji jungkuyi Bida nanaba Lida. Karu yali kandimuku jali jungku Juba, karu yalunjali Bidakanyi, yuwaji nyuli jungku Lida. Baki yali manjijba nganinyiwuya. Manjijba bulanjali Bidayurri. Yanyba buli Bidanyi, “Badajba janinji dulu nurrundurri Jubayurri. Dulukiyi jila ngalinbu.”
ACT 9:39 Baki jilajba nyuli bayungu bulandu Bida Jubayurri. Jali nyulu wanbiya barrawuna, jali janyba nangki bardibardi, baki yali kuyu nanda Bida yajiyurri yundu. Kuyu yali Bida naji mankanyi bardibardiyurru. Kudukudu miyaji jibarrimuku jungku yali mankanyina. Ngindu yali. Minimba yali Bida kudukudu jumbala jali nyulu yabimba bardibardiyurrunyi. Yabimba nyulili jumbala yalungi jali mikuyaji dungalanyi yalundu.
ACT 9:40 Manjijba nyuli nanamuku miyajimuku danbiyurri Bidawanyi. Manjijba nyuli yalunya danbiyurri, baki mururu nyuli wayka. Yanyba nyuli mududu Kudkanyi. Baki yangkalamba nangki mankanyiyurri. Yanyba nyuli, “Dabida, walajbakiyi.” Dimbulijbayi yami. Jali nyulu najba Bida, baki jungkurrijbayi jalyuna nanda bardibardi.
ACT 9:41 Manjijba nangki Bida marni bardibardiyurri. Marrimba nyuli, ngala walajbayi bardibardi. Karrinja nyuli. Baki kayayi Bida yalungi, kandimukuyngka marda miyajimukuyngka. Ngankijba yali. Najba yali bardibardi wankiykurri.
ACT 9:42 Kudukudu yali manku nanda jangkurr Bidanyi, wankamba jali nyulu bardibardi mili. Kudukudu yali manku, baki yali kuyu nanda jangkurr Jisuskanyi. Manku yali bardibardinyi bukambiju jali jungku Juba, baki kudukudunyi yali kuyu jangkurr Jisuskanyi.
ACT 9:43 Mili jungku nyuli Bida nanaba Juba yurrngumba, kuluka nyuli nanganginyina barrawuna Sayiminkanyi. Nanda Sayimin yabimba nyulili yaji wabayudinyi.
ACT 10:1 Jungkuyi nganinyi, nangangi niji Kurniliyus. Jungku nyuli langku, yaji niji Sisariya. Nyuli mambuka kajamukuyngka ngarrkadabawarrayngka. Yalungi yaji ngarrkadabawarrayngka, juju bayungu, niji Yidali.
ACT 10:2 Maruka nyuli muwa Kudkanyi. Nyuli, marda nangangi maninganja, jandanyi nangangi marda, maruka yali muwa Kudkanyi. Miku nyuli Ju, ngala Ruman nyuli. Ngala kandimba nyulili Jumuku, nanamuku jali yalu ngawamba bijal dungala yalunbu. Wajba nyulili yalunya kajanyi yajinyi. Yanyba nyulili mududu Kudkanyi.
ACT 10:3 Ngala nyuli bijal ngabungaburri yaji, buwarrajimba nyuli yaji mambukawanyi, ngala nyuli yamininyi jungku. Ngala nyuli buwarrajimba, najba nyuli Yanjil Kudkanyi ngankiykurri kalawunyi nanganburri. Yanybayi Yanjil nangangi, “Nanama ninji Kurniliyus.”
ACT 10:4 Ningkijba nyuli Yanjil. Marrala nyuli kudanyu, baki nyuli jananganja, “Nayinda ngayu mambuka.” Yanybayi Yanjil nangangi, “Manku ninya Kudwanyi, jali ninji yanyba mududu Kudkanyi. Manku nyuli ninya yanybikurri mududu. Baki nyuli najba ninya, jali ninji yabimba kunyba yaji yingkanyi. Mankuwayi nyulu nganyi kunyba yaji. Kud marukangka muwa nganyi.
ACT 10:5 Manjijbakiyi nganinymuku Jubayurri, yali wudumbiji nanda, nangangi niji Bida.
ACT 10:6 Jungku nyulu barrawuna kanjana. Nanda barrawu, nangangi barrawu Sayiminkanyi, jala nyulu yabimba yaji wabayudinyi.”
ACT 10:7 Nani yanybayi Yanjil baki barlbayi. Jala nyulu walajba Kurniliyus, kaya nyuli kujarrayngka wakiwarrayngka, marda yingamalinyi ngarrkadabawarrayngka. Nanda ngarrkadabawarr, maruka nyuli muwa Kudkanyi. Lalanba nyulili nangangi yaji mambukanyi Kurniliyuskanyi.
ACT 10:8 Karu nyuli yalunya mambukawanyi Yanjilkanyi, baki manjijba nyuli yalunya kula Jubayurri.
ACT 10:9 Munganawa barri bunundujba yali Juba. Nanamanji barri mukunjana jali yalu bunundujba, jilajbayi Bida yundu barrawuna. Jilajba nyuli yundu yanybiji mududu Kudkanyi.
ACT 10:10 Birrkalijba nyuli, wardamba nangkiyanyi. Yukumba nyuli, ngala yundijbayi mama yingkawanyi. Yukumba nyuli, baki buwarrajimba nyuli yaji, ngala nyuli yamininyi jungku.
ACT 10:11 Najba nyuli yaji jali bardawajba ngaluna Bidawanyi. Najba nyuli yaji barrinani walkurra blanki ngala nyuli karrala kingkarrinya wayka. Kijijbayi nanda blanki yingkawanyi kurulina.
ACT 10:12 Jungkuyi kaja barnyi kalawunyi nananyina blankina, julaki marda miya, marda wardaba marda yingkamuku. Jungkuyi kalawunyi blankina kaja barnyi junu. Ngala miku yalili jarrba bukamba nanda barnyi jali blankina kalawunyi. Kudiya yalili jarrba, ngala kudiya miku. Miku yalili jarrba bukamba barnyi, yuwangangi yalungi Jukanyi.
ACT 10:13 Manku nyuli jangkurr lalijinanyi Bidawanyi, ngala nyuli buwarrajimba yaji. Nayi nanda jangkurr, “Bida, walajbakiyi. Kurdanbakiyi barnyi, baki wardambakiyi nganyingka.” Nani mankuyi jangkurr lalijinanyi Bidawanyi.
ACT 10:14 Jananganjayi Bidawanyi, “Mambuka miku ngayiyi jarrba nanda barnyi. Miku nurrili jarrba nanda, yuwangangi. Jaliyi nurru jarrba nanda barnyi, nurru Jumukunyi, baki nurru jungku balkina yuwana Kudkanyi.”
ACT 10:15 Mili nyuli manku jangkurr kingkarrinya Bidawanyi. Nayi nyuli manku, “Mikuyaji balkinyi jarrkanyi, jali yanyba Kud nanda kunyba jarrkanyi.”
ACT 10:16 Nani mankuyi jangkurr Bidawanyi. Kujarraka barndayka manku nyuli nanda nanamannga jangkurr. Baki kirrijbayi nanda blanki kingkarri lalijiyurri.
ACT 10:17 Mankumanku nangki Bida blankinyi marda barnyinyi. Miku nyuliya jingkijba. Ngala mankumanku nangki, wanbiya yali bardawana kujarra yingamali nganinyi jali manjijba Kurniliyuswanyi langina.
ACT 10:18 Kaya yali. Ngajaka yali, “Jungku kuna nayiba nganinyi, nangangi niji Bida.”
ACT 10:19 Yuwaji nyuli miku jingkijba barnyinyi Bidawanyi. Yuwaji mankumanku nangki, ngala yanybayi nanda Kunyba Ngarndu Kudkanyi nangangi. Yanyba nyuli, “Mankukiyi ngaki jangkurr. Kujarra yingamali yalu yukumba nganyi danbina.
ACT 10:20 Walajbakiyi, baki karralakiyi wayka yanybiji yalungi. Jilajbakiyi yalunbu, manjijbangangi ngayi yalunya.”
ACT 10:21 Baki karrala nyuli wayka yalunburri. Yanyba nyuli yalungi, jali yalu yukumba nangangi Bidanyi. Yanyba nyuli, “Nayinda ngayu, Bida, nanda jala narri kujba. Wanyingkanyi narri badajba.”
ACT 10:22 Jananganja yali Bida, “Nurrungi mambuka, nyulu Kurniliyus. Manjijba nyuli nurrunya. Nyulu kunyba nganinyi, jala maruka muwa Kudkanyi. Kandimba nyulu nanamuku Jumuku, baki yalu yanyba, nyulu kunyba nganinyi. Karuyi nurrungi mambuka Yanjilwanyi. Karu nyuli mambuka manjiji nurrunya, kuyuja ninya nanganginkurri barrawurri. Baki manku janyulu nanda jangkurr, jalija ninji yanyba.” Barriwa.
ACT 10:23 Baki nyuli kuyu yalunya kalawunyi barrawuna Bidawanyi. Kuluka yali nanaba mungana. Munganawa nyuli wijba langki yalundu Kurniliyusyurri. Jilajbayi Bida, marda kudiya kandimuku Jisuskanyi yalundu. Jilajba yali langki wujuju.
ACT 10:24 Munganawa yali wanbiya Sisariya, jali yukumba nyuli Kurniliyus yalungi. Ngajaka nyuli Kurniliyuswanyi kudiya kandi jungunki nangandu. Yukumba yali Bidanyi marda yingkamukuyngka. Baki yali wanbiya barrawuna Kurniliyuskanyi, Bida marda yingkamuku.
ACT 10:25 Jali yalu wanbiya barrawuna, jilajbayi Kurniliyus Bidayurri. Nyuli murrurru wayka nangandu Bidana, yanybiji mududu nangangi Bidanyi.
ACT 10:26 Ngala karuyi nanda Kurniliyus Bidawanyi, karu nyuli walaykanyi kingkarri. Yanyba nyuli Bida, “Karrinjakiyi, ngawambangangi ngayu nganinyi. Ngawamba ngayu nganinyi. Miku ngayu Kud.”
ACT 10:27 Yanyba nyuli Bida Kurniliyuskanyi, ngala buli ngankijba barrawuna. Yingkamuku yali jilajba bayngkani bulandu. Jali bula wanbiya kalawunyi barrawuna, najba nyuli kudukudu jungunkurri kalawunyi Bidawanyi. Nanangini Kurniliyuswanyi waluwa nyuli ngajaka yalunya jungunki yalu barrawuna.
ACT 10:28 Yanybayi Bida bulangi, “Jingkijba narri yuwa Jukanyi. Nurru Jumuku, miku nurriyi ngankijba yingkana barrawuna ngurrayngkanyi, jala miku nyulu Ju. Ngala karuyi ngana Kudwanyi, ngala ngayi buwarrajimba yaji. Karu nyuli ngana ngurrayngkanyi, miku yalu balki. Nanamuku jala jungku kunyba, miku ngawamba Jumuku, yali jungku kunyba. Ngala ngurranyimuku, jungku yalu kunyba marda.
ACT 10:29 Narri manjijba jangkurr ngaki, ngayu jilaji narrindurri nanginkurri barrawurri. Miku nayinda barrawu Jukanyi, ngala miku ngayiyanyi manku kiji. Jila ngayi dulu, karungangi ngana Kudwanyi. Nanda yuwa Jukanyi miku ngankiykanyi barrawuna ngurrayngkanyi, miku yurlurr nanda yuwa. Miku nanda yuwa yurlurr. Wanyingkanyi ninji manjijba jangkurr ngayu jilaykanyi nanginkurri.”
ACT 10:30 Jananganjayi Bida Kurniliyuswanyi, “Yingkana wulaniyana ngayi yanyba mududu Kudkanyi. Nanamanji, bijal ngabungaburri yaji, jalili yalu yanyba mududu Kudkanyi, nanamanji ngayi yanyba mududu Kudkanyi, baki karrinja nyuli waluwa ngakindu. Bunyala jumbala nangangi, nyuli Yanjil Kudkanyi.
ACT 10:31 Yanybayi Yanjil ngaki nayi, ‘Kurniliyus, manku ninya Kudwanyi, jali ninji yanyba mududu Kudkanyi. Manku nyuli ninya yanybikurri mududu. Baki nyuli najba ninya, jali ninji yabimba kunyba yaji yingkanyi. Mankuwayi nyulu yaji nganyi kunyba. Nyulu maruka muwa nganyi.
ACT 10:32 Manjijbakiyi nganinymuku kularriji Jubayurri, yalu wudumbiji nanda, nangangi niji Sayimin Bida. Jungku nyulu barrawuna kanjana. Nanda barrawu, nangangi barrawu Sayiminkanyi, jala nyulu yabimba yaji wabayudinyi.’ Nani yanybayi Yanjil ngaki.
ACT 10:33 Baki yinarramba ngayi manjijba yalunya kula wudumbiji ninya. Jungku ngayu mirnarrijba muwa, jilajbangangi ninji nanginkurri. Nayimanji ngambala jungku malumba, ngambala Kudkanyi. Yukumba nurru. Manku janurru nanda jangkurr jalija ninji yanyba. Manku janurru nanda jangkurr, jali karu ninya yanybiji Kudwanyi.” Barriwa.
ACT 10:34 Yanybayi Bida yalungi, “Jingkijba ngayu nayinda. Kud, nyulu jungku Kud bukambijuyngka. Miku nyulu Kud ngawamba Jukanyi. Nyulu Kud ngurrayngkanyi marda. Nulijba nyulu bukambijuyngka, Jumukuyngka marda ngurranyimukuyngka. Nani barri nyulu jungku bukambijuyngka.
ACT 10:35 Nyulu jungku Kud, maruka nyulu muwa nanamukuyngka jala yalu jungku kunyba Kudkanyi, Jukanyi marda ngurrayngkanyi. Maruka nyulu muwa bukambijuyngka Jukanyi marda ngurrayngkanyi. Maruka nyulu muwa nanamukuyngka, jala yalu jungka kunybana yuwana Kudkanyi.
ACT 10:36 Jingkijba narri nanda kunyba jangkurr, jali nyulu karu Jumuku Kudwanyi. Nanangini Jisuswanyi karu nyuli nanankanyi nanamannga jangkurranyi. Nyuli mambuka bukambijuyngka. Milidimbayi nanginkanyi jangkurranyi Jisuswanyi, ‘Jala yalu maruka muwa Jisuskanyi, yalu jungku kardarda muwa.’ Karu nyuli nanda kunyba jangkurr lukuluku, Kalili marda Judiya Jisuswanyi. Jingkijba narri nanda walkurra yaji bayngkani, jali ngurrunba nyulu Jisus Junwanyi. Nanamanji wajbayi Jisus Kudwanyi, nanganginkanyi Kunybanyi Ngarndunyi Kudkanyi. Nyuli yawumba Kunyba Ngarndu Kudkanyi nangandu mankanyina Jisusnyina. Baki nyuli ngiruka yabimbikanyi yaji. Jilalajbayi Jisus lukuluku. Yabimba nyuli ngiruka yaji. Jakajba nyuli wuwarr mankanyinanyi. Kunymamba nyuli yalunya. Bukamba yaji yabimbayi Jisuswanyi, jungkungangi Kud nangandu Jisusnyina yurrngumba.
ACT 10:39 Najba nurri bukamba yaji jali nyulu yabimba nanaba Jirusalim, marda bukamba yajina Jukanyi. Baku barri kurdanba yali nanda Jisus Jumukunyi. Ngarrkadaba yali wabangkarra kurndana nanamukunyi Jumukunyi.
ACT 10:40 Ngala wankamba nyuli nanda Jisus Kudwanyi. Wankamba nyuli yingkana munganawa. Ngala minimbayi nurrunya Jisuskanyi Kudwanyi. Miku bukambiju minimbayi Kudwanyi, ngawamba nurruman. Najba nurri Jisus. Yarrijba nurrunya Kudwanyi, yarrijba nyuli nurrunya naji Jisus. Jarrba nurri mama nangandu, marda ngaraba nurri nangandu Jisusnyina. Janyba nangki Jisus, wankijba nyuli mili, baki jarrba nurri yaji bayngkani nangandu.
ACT 10:42 Jirrinyba nyuli nurrunya Jisuswanyi. Jirrinybayi nurrunya karunki nanda kunyba jangkurr bukambijuyngka. Mili jirrinyba nyuli nurrunya, nurru karunki Jisuskanyi. Yarrijbayi Jisus Kudwanyi, baki janyulu jingkijba nanda kunyba yaji baki balki yaji, jala ngambala yabimba. Yuku nanangini Jisuswanyi, jingkijba nyulu bukambiju, nanamuku jala jungku wanka, marda nanamuku janyba jali yalungka.
ACT 10:43 Yali karu nangangi Jisuskanyi nanamukunyi wankalanyi, jali yalu yanyba jangkurr Kudkanyi. Yanyba yali, ‘Nanda jala kuyu nangangi jangkurr Jisuskanyi, marda ngayangayijba Jisus, janyulu manjamanjamba nangangi balki yaji Jisuswanyi.’ Barriwa.
ACT 10:44 Ngala yuwaji yanybayi Bida yalungi, nanda Kunyba Ngarndu Kudkanyi, ngankijba nyuli yalunbu mankanyina. Ngankijba nyuli yalundu, manku jali yalu jangkurr Bidanyi. Baki yanyba yali yinini yinini yanyi.
ACT 10:45 Manmala yali, kandimuku Jumuku jali badajba yali kulani nangandu Bidana. Manmala yali, wajbangangi yalunya ngurranyimuku nanganginkanyi Kunybanyi Ngarndunyi Kudwanyi. Manmala yali.
ACT 10:46 Jingkijba yali, yawumbayi nangangi Kunyba Ngarndu yalundu ngurranyimukunyina Kudwanyi. Nanamukunyi nangandu Bidana, manku yali ngurranyimuku yanybikurri yinini yinini yanyi. Yanyba yali kunyba jangkurr Kudkanyi marda. Jingkijba yali, nanamukunyi nangandu Bidana, jingkijba yali, yawumbayi nangangi Kunyba Ngarndu ngurranyimukunyina Kudwanyi. Baki yanybayi Bida, “Yawumba nyuli Kunyba Ngarndu Kudkanyi nanamukunyina ngurranyimukunyina Kudwanyi, barrinani nyuli yawumba Kunyba Ngarndu nurrundu. Marda nurrimi ngurrunba yalunya yuku barri.”
ACT 10:48 Baki jirrinyba nyuli kandimuku Jisuskanyi ngurrunbiji nanamuku ngurranyimuku Bidawanyi. Baki ngurrunba yalunjali Jisus Krayiskanyi. Baki ngajaka yali Bida Kurniliyuswanyi marda yingkamukunyi, ngajaka yali Bida jungunki yalundu mardunguji.
ACT 11:1 Nanamukunyi jali jungku Jirusalim, manku yali yaji. Manku yali nanda jangkurr, nanamukunyi kandimukunyi Jisuskanyi, marda nanamukunyi jali manjijba Jisuswanyi, manku yali yaji. Manku yali yingkamukuyngka langku, jali kuyu nanda jangkurr Kudkanyi. Kurniliyuswanyi marda kudiyawanyi ngurranyiwanyi, kuyu yali jangkurr Kudkanyi.
ACT 11:2 Baki wijbayi Bida kula Jirusalimyurri. Mankumanku yalungki, kudiya Jumuku jali jungku nanaba, mankumanku yalungki, “Jaliyi yalu kuyu jangkurr Kudkanyi ngurranyiwanyi, baki marda nurrimi yalunya kaburrmba. Marda yalunyimi kaburrmba.” Kijiwijba yali Bidanyi, nanamuku jali mankumanku yalungki nani.
ACT 11:3 Yanyba yali Bidanyi, “Ngankijba ninji barrawuna ngurrayngkanyi. Nanda balkina yuwana. Jarrba ninji mama yalundu ngurranyina. Jungku ninji balkina yuwana.” Nani yali kijiwijba Bidanyi.
ACT 11:4 Baki nyuli karu yalunya bukamba yaji Bidawanyi. Nayi nyuli yanyba,
ACT 11:5 “Jungku ngayi barrawuna bayungu Juba. Ngala ngayi yanyba mududu Kudkanyi, buwarrajimba ngayi yaji, ngala ngayi yamininyi jungku. Najba ngayi walkurra yaji barrinani blanki. Karralayi kingkarrinya nanda blanki. Kijijbayi nanda blanki yingkawanyi kurulyudinyi. Karralayi blanki wayka, baki kurrkunbayi bundu ngakindu.
ACT 11:6 Ningkijba ngayi kudanyu nanda yaji kalawunyi blankina. Najba ngayi barnyi junu. Najba ngayi julaki, marda miya, marda wardaba, marda yingkamuku.
ACT 11:7 Baki manku ngayi jangkurr. Nayi nanda jangkurr, ‘Bida, walajbakiyi. Kurdanbakiyi barnyi, baki wardambakiyi nganyingka.’ Nani ngayi manku jangkurr, ngala ngayi buwarrajimba yaji.
ACT 11:8 Ngala jananganja ngayi, ‘Miku mambuka. Miku ngayiyi jarrba nanda barnyi, yuwangangi. Jaliyi ngayu jarrba nanda barnyi, baki janga jungku balkina yuwana Kudkanyi. Yanybaka nanda yuwa, miku nurrimi jarrba nanda barnyi, nurru Jumukunyi.’
ACT 11:9 Mili ngayi manku jangkurr kingkarrinya. Nayi nanda jangkurr, ‘Mikuyaji balkinyi jarrkanyi, jali yanyba Kud nanda kunyba jarrkanyi.’
ACT 11:10 Kujarrakana baki barndaykana manku ngayi nanda jangkurr. Baki kamu kirrijbayi kingkarri lalijina nanda blanki.
ACT 11:11 Nanamanji barri, wanbiya yali nananyina barrawuna, jali ngayu jungku. Wanbiya yali, kujarra yingamali nganinyi jali badajba yali langina Sisariyananyi.
ACT 11:12 Karu nyuli ngana jilaji langki yalundu Kunybawanyi Ngarnduwanyi Kudkanyi. Miku ngayiyi yurlwa, ngala ngayi jila dulu yalundu. Jilajba ngayi, marda nanginmuku kandimuku, kujarra baki kujarra baki kujarra, yali jila ngakindu. Wanbiya nurri. Ngankijba nurri barrawuna Kurniliyuskanyi.
ACT 11:13 Karuyi nurrunya Yanjilkanyi Kurniliyuswanyi. Karrinjayi nanda Yanjil nangandu barrawuna, baki yanybayi Yanjil nangangi Kurniliyuskanyi, ‘Manjijbakiyi kudiya kula Jubayurri, wudumbiji nganinyi, nangangi niji Bida.
ACT 11:14 Yanyba janyulu jangkurr nganyi. Jala ninji kuyu nanda jangkurr, baki marrimba janinya mardarda Kudwanyi. Marrimba janarrinya mardarda, nganyi maninganja, marda nganyi jandanyi, marda bukambiju jala jungku nganyindu barrawuna.’ Nani yanybayi Yanjil nangangi Kurniliyuskanyi.
ACT 11:15 Jali ngayu yanyba yalungi, karrala nyuli wayka yalundu Kunyba Ngarndu Kudkanyi. Karrala nyuli yalundu, barrinani waluwa nyuli karrala nurrundu.
ACT 11:16 Baki mankuwa ngayi nanda jangkurr, jali yanybayi mambuka Jisus ngambalangi. Nayi nyuli yanyba, ‘Yawumba nyuli narrinya wabudana Junwanyi, ngala yawumba janyulu nangangi Kunyba Ngarndu narrindu Kudwanyi.’
ACT 11:17 Jingkijba ngayi Kud, nyuli wajba nanamuku ngurranyimuku Kunybanyi Ngarndunyi, barrinani nyuli wajba nurrunya, jali nurru kuyu nangangi jangkurr mambukanyi Jisuskanyi Krayiskanyi. Nani Kunybanyi Ngarndunyi nyuli wajba nanamuku ngurranyimuku. Waluwa nyuli yarrijba ngambala nanganginkanyi kandimukuyngka Kudwanyi. Nanijba nyulu yarrijba yalunya ngurranyimuku nanganginkanyi kandimukuyngka. Bukamba ngambala kandimuku Jisuskanyi.” Barriwa.
ACT 11:18 Jali yalu manku nanda jangkurr Bidanyi, jungku yali karda. Miku yali mili kijiwijba Bidanyi. Ngala yali yanyba kunyba jangkurr Kudkanyi, nanankanyi jali nyulu yabimba Kudwanyi. Mili yali yanyba nayi jangkurr, “Yanyba nyuli Kud, yuku yalu ngurranyimuku marda, jalija yalu ngindu yalunginkanyi balkinyi yajinyi, baki jayalu jungku wanka yurrngumba.” Barriwa.
ACT 11:19 Bayngkani jali nangka janyba Sdibin, jarrbalijba yali, nanamuku kandimuku Jisuskanyi. Yingkamukunyi yali yabimba kiji yalungi. Yaliyanyi wudumba kandimuku Jisuskanyi. Yaliyanyi yarrijba nanamuku brisinyina, kurdanba yiningki jayalunya. Nanankardi barri jarrbalijba yali kandimuku Jisuskanyi. Kudiya yali jilajba burrandi langki Bunijiyayurri, kudiya yali jila juju langkimirra Yandiyukyurri. Kudiya yali kangandijba bayungu kanjana waliyangurri Sayibrisyurri. Karu yalunjali kunybanyi jangkurranyi Jisuskanyi, yingkana yajina baki yingkana yajina. Ngala karu yalunjali ngawamba yalungi mungkijimuku Jumuku. Miku yaliya karu ngurranyimuku.
ACT 11:20 Ngala yingkamuku yali jilajba langki juju Yandiyukyurri. Kudiya yalungi yaji Sayisbris, marda kudiya yalungi yaji Sayirin, jilajba yali langki juju Yandiyukyurri marda. Yali karu Jumuku, marda ngurranyimuku yali karu kunybanyi jangkurranyi mambukanyi Jisuskanyi.
ACT 11:21 Yabimba nyuli yalunya ngiruka yanybikanyi Jisuswanyi. Baki kudukudu jali manku nanda jangkurr, yali kuyu jangkurr Jisuskanyi, baki maruka yali muwa nangangi Jisuskanyi. Kuyu yali kudukudumukunyi nanda jangkurr, nanamukunyi jali jungku Yandiyuk. Barriwa.
ACT 11:22 Manku yali jangkurr, nanamukunyi jali yalu yuwaji jungku kularra Jirusalim. Manku yali jangkurr kajanyi, jali yalu kuyu jangkurr Jisuskanyi langku Yandiyuk. Baki yali jali jungku Jirusalim, manjijba yali nanda Barnabas langkurriji Yandiyukyurri.
ACT 11:23 Jilajba nyuli langki Yandiyukyurri. Jali wanbiya Barnabas, najba nyuli bukamba yaji jali nyulu yabimba yalungi Kudwanyi. Mirnarrijba nyuli muwa yalungi. Karu nyuli yalunya kudanyu, marda yalimi maruka muwa Jisuskanyi yurrngumba, marda yalimi jungku ngiruka Jisuskanyi, marda yalimi ngayangayijba Jisuskanyi. Nani nyuli milidimba yalunya Barnabaswanyi.
ACT 11:24 Nanda nganinyi Barnabas, kunyba nyuli. Nanda Kunyba Ngarndu Kudkanyi jungkuyi nangandu. Yabimba nyuli Barnabas ngiruka kudanyu Ngarnduwanyi, milidimbikanyi nyulu yingkamuku. Jabarri nanamuku kudukudu, kuyu yali jangkurr Jisuskanyi.
ACT 11:25 Baki jilajbayi Barnabas bayungu Darsusyurri. Jala nyuli wanbiya, kujba nyuli Sulkanyi.
ACT 11:26 Wakaramba nyuli Sul, baki wijba buli malumba karri Yandiyukyurri. Yingkanyi kindilkurriyngkanyi jungku buli nanaba yurrngumba. Milidimba buli yalunya jurjina. Milidimba buli yalunya kudukudumuku. Nanamanji ngala buli jungku Yandiyuk, nanamanji yingkamukunyi karu yalunjali Krisjin. Jalannga karu yalunjali Krisjin, nanamuku jali yalu maruka muwa Jisuskanyi, jali yalu jungku nanaba Yandiyuk. Nijarrijba yalunjali ‘Krisjin’.
ACT 11:27 Nanamanji barri yali kannga Jirusalimnanyi, kudiya yali jali yanyba jangkurr Kudkanyi. Jilajba yali langki juju Yandiyukyurri, baki wanbiya yali.
ACT 11:28 Yingamali nganinyi jali yanyba jangkurr Kudkanyi, nangangi niji Yakabus. Karrinja nyuli waluwa yalundu Krisjinmukunyina. Yanyba nyuli jangkurr. Karu nyuli nanda Yakabus jangkurranyi yanybikanyi Kunybawanyi Ngarnduwanyi Kudkanyi. Nayi yanybayi Yakabus, “Winyurru janyulu dukujba yaji kudanyu. Mikuwali yirrba janja. Dukujba janyulu yaji yurrngumba. Baki mikuyaji mamanyi jardijbawali.” Nani yanybayi Yakabus. Duja nanda jangkurr nangangi. Badajbayi nanda yaji dukun, jali Kludiyus nyuli walkurra mambuka Kubaminkanyi Rumankanyi.
ACT 11:29 Yanyba yalungki nanamuku kandimuku. Yanyba yalungki nanankanyi jangkurranyi Yababuskanyi jalija nyulu duku yaji. Baki yali yanyba, jayalu manjijba dungala yalungi nanamukuyngka kandimukuyngka jali jungku kularra Judiya. Jayalu manjijba dungala yalundurri.
ACT 11:30 Baki yabimba yali nanda yaji. Wawajba yali dungalanyi. Dalburrijba yali dungala. Manjijba yali nanda dungala malbumalbuyurri jurjkanyi nanaba kularra Jirusalim. Buli kuyu nanda dungala, Sulwanyi marda Barnabaswanyi. Kuyu buli dungala jali bula jilajba kula Jirusalimyurri. Barriwa.
ACT 12:1 Nanamanji nanda walkurra mambuka Yirud, jungku nyuli Jirusalim. Nyuli kubamin mambuka yalungi Jukanyi. Yabimba nyuli kiji yalungi Krisjinkanyi, janyulu kijijba yalunya, janyulu kurdanba nanamuku kandimuku Jisuskanyi.
ACT 12:2 Wudumba nyuli nanda Jayims, buwanganja Junkanyi. Karu nyuli yalunya, kurdanbiji nanda Jayims Yirudwanyi. Kurdanba yali Jayims jankunbijinyiyudinyi wunanybalanjudinyi.
ACT 12:3 Nanamuku Jumuku jali miku yalu maruka Jisuskanyi, mirnarrijba yali muwa nanankanyi. Jingkijbayi Yirud yalungi, yali mirnarrijba muwa, jali kurdanba Jayims yilarrmukunyi. Baki karu nyuli yilarr wudumbiji Bida Yirudwanyi. Wudumba yali Bida, baki yarrijba yali brisinyina. Nanamanji wangarr yalungi, niji Kangandijbayi Barrawuna Yajinyi. Yalili jarrba nanda bulungu jibkanyi baki damba ngala nyulu mikuyaji bululunyi, nanankanyi wangarranyi niji Kangandijbayi Barrawuna Yajinyi. Nanamanji yabimba yali yalungi wangarr niji Kangandijbayi Barrawuna Yajinyi, jali jungku Bida brisinyina.
ACT 12:4 Yarrijba yali Bida brisinyina. Yukumba yali Bida nanaba brisinyina kajamukunyi yilarrwanyi. Kujarra baki kujarra yurrngumba yalili jungku malumba nangandu. Nani yalili yukumba Bida brisinyina nanamukunyi yilarrmukunyi. Mankumanku nangki Yirud, janyulu karrinjarrijba Bida kurdusnyina. Karrinjarrijba janyulu Bida bayngkani wangarranyi niji Kangandijbayi Barrawuna Yajinyi. Nani mankumanku nangki nanda mambuka Jukanyi Yirud.
ACT 12:5 Jala jungkayi Bida brisinyina, nanamuku kandimuku krisjinmuku, yanyba yali mududu Kudkanyi. Yanyba yali kudanyu Kudkanyi. Ngajaka yali Kud, nyulu lalanbiji Bida. Barriwa.
ACT 12:6 Munganawa manjijba janyulu Bida kurdusyurri Yirudwanyi. Mungana barri kuluka nyuli Bida burrandi bulandu yilarrwuyanyina. Kijijba yali Bida kujarrayudinyi kijbakijbayudinyi. Nanawuya yilarr buli kuluka nanganbu Bidana, baki yingkawuya yilarr karrinja buli bardawana brisinyina. Yukumba buli yaji bardawa.
ACT 12:7 Ngala kulukayi Bida brisinyina mungana, baki karrinjayi Yanjil nanganbu Bidana, baki bilirrbayi yaji mirnbiwanyi mungana kalawunyi brisinyina. Dulaba nyuli Bida wili Yanjilwanyi. Jala dimbulijbayi yami Bida, baki yanybayi Yanjil Bidanyi, “Walajbakiyi dulu.” Yinarramba yirrbayi kijbakijba nanganbunanyi marninanyi.
ACT 12:8 Mili yanybayi Yanjil, “Yawumbakiyi nganyingka mankanyi jumbalana. Yawumbakiyi nganyingka nukami jabunungkajina.” Baki nani nyuli yabimba yaji Bidawanyi. Baki yanybayi Yanjil, “Yawumbakiyi nganyingka mankanyi danyana, baki jilajbakiyi ngakindu.” Yawumba nangki Bida mankanyi danyana.
ACT 12:9 Baki jilajba nyuli nanganbu Yanjilnyina. Walajba buli malumba. Mudumbanyi nyuli Bida. Mankumanku nangki Bida, yiningki buwarrajimba nyuli yaji. Mudumbanyi nyuli jila.
ACT 12:10 Kangandijba buli jila yingkana yilarrina baki yingkana yilarrina, baki wanbiya buli bardawana. Walkurra nanda bardawa, ngiruka kudanyu. Jali bula wanbiya bardawana, dulaba nangki nangkama nanda bardawa. Kangandijba buli jilajba bardawana, jali dulaba nangki, baki jilajba buli yubalina barrawuyabarrawuyanyina. Yinarramba yingijbayi Bida Yanjilwanyi, barlbayi Yanjil nanganbunanyi. Jilajbayi Bida nyuluman.
ACT 12:11 Baki jingkijbayi Bidawanyi, miku nyuliya buwarrajimba yaji. Miku nyulimi jungku brisinyina. Yanyba nangki, “Nayi duja. Manjijba nyuli nangangi Yanjil ngakinyi mambukawanyi Jisuswanyi. Wudumba nyuli ngana, kuyuyi ngana brisinanyi Yirudkanyi nanangini Yanjilwanyi. Miku nganiyi kurdanba Yirudwanyi marda yingkamukunyi Jumukunyi, miku nganiyi kurdanba.”
ACT 12:12 Mankumanku nangki Bida yajinyi, baki barlba nyuli barndarri. Nanda nangangi bardibardinyi barnda. Nangangi niji Mari. Nanda bardibardi, ngardanganja nyuli Jun Makanyi. Kudukudu nganinymuku marda jibarrimuku jungku yali malumba nanaba barrawuna. Yanyba yali mududu Kudkanyi.
ACT 12:13 Wanbiyayi Bida barrawuna. Karrinja nyuli danbina bardawana, baki kaya nyuli yalungi kalawunyi. Badajba nyuli wurrumbarra nanankurri bardawarri. Nanda wurrumbarra wakiwarr nyuli, nangangi niji Ruda. Karrinja nyuli kalawunyi bardawana, baki yanybayi Bida nangangi.
ACT 12:14 Jingkijba nyuli nanda nganinyi jali nyulu yanyba nangangi wurrumbarrawanyi. Jali nyulu manku nangangi jangkurr Bidanyi, baki jingkijba nyuli, karrinjaka Bida nanaba danbina. Mirnarrijba nyuli muwa nangangi, ngala miku nyuliya dulaba bardawa. Wirlku nyuli yingkamukuyngkurri. Karu nyuli nanamuku jali jungku kalawunyi. Yanyba nyuli, “Nanda Bida. Karrinjaka nyulu danbina.”
ACT 12:15 Ngala jananganja yali, “Mudu ninji. Mudu.” Ngala yuwaji nyuli yanyba, “Nanda duja. Karrinjaka Bida danbina bardawana.” Ngala yanyba yali, “Nanda jala karrinja danbina, nyulu Yanjil Bidanyi. Nyulu nanda Yanjil jala lalanba Bida.”
ACT 12:16 Ngala mili kayayi Bida kudanyu. Baki yali dulaba nanda bardawa. Dulaba yali bardawa, baki najba yali Bida karrinjankurri danbina. Manmala yali kudanyu barri, jali yalu najba Bida karrinjankurri. Manmala yali kudanyu.
ACT 12:17 Kawanyba nyuli marni yalunya, karda yali jungunkanyi. Baki karu nyuli yalunya manjiykanyi Bida brisinanyi Jisuswanyi mambukawanyi. Yanybayi Bida yalungi, “Karukiyi Jayims, kanyiya nangangi Jisuskanyi, marda karukiyi yingkamuku kandimuku nanginkanyi jangkurranyi. Karu janarri yalunya mambukanyi jali manjijba Yanjil wudumbiji ngana brisinanyi.” Baki barlbayi Bida. Barlba nyuli yingkayurri yajiyurri.
ACT 12:18 Munganawa barri nanamuku yilarr jali yukumba brisin, manmala yali. Mikuyaji nangangi Bidanyi. Muningka yali jungku. Miku yaliya manku, yanka walajbayi Bida. Manmala yali kudanyu.
ACT 12:19 Yirudwanyi jirrinyba nyuli kaja yilarr, kujba nangangi Bidanyi, ngala mikuyaji nyuli nangangi. Bayiwujba yali Bidanyi. Baki yanybayi Yirud yilarrmukuyngka. Ngajaka nyuli yalunya, yanka walajbayi Bida. Mudumbanyi yali. Baki jirrinybayi Yirudwanyi yingkamuku kurdanbiji nanamuku yilarr, jali yukumba yaji. Barriwa. Baku barri nanda mambuka Yirud, yingijba nyuli nanda yaji Judiya. Jilajba nyuli langki Sisariyayurri. Nanaba nyuli jungku. Barriwa.
ACT 12:20 Ngala jungkuyi nanda mambuka Yirud Sisariya, kudiya nganinyi jilajba yali yanybiji Yirudkanyi. Kudiya yalungi yaji niji Daya, kudiya yalungi yaji niji Sayidun. Jilajba yali langina, yanybiji Yirudkanyi. Yalili wajba Yirud dungalanyi wudumbiji mama, nanamukunyi jali jungku Daya marda Sayidun. Ngala yurlwayi Yirud yalungi, ngarrangarra nangangi muwa yalungi, baki miku nyuliya wajba yalunya mamanyi. Kudiya yali jila Yirudyurri, yanybiji nangangi mamanyi. Waluwa yali yanyba Blasduskanyi. Nanda Blasdus, nyuli mambuka barrawunyi Yirudkanyi. Ngajaka yali Blasdus, “Janinji kuna yanyba Yirudkanyi, nyulu wajbaja nurrunya mamanyi.” Jananganja nyuli Blasduswanyi, janyulu ngajaka Yirud mamanyi yalungi. Ngajaka nyuli Yirud, baki jananganjayi Yirudwanyi, janyulu yanyba yalungi mamanyi baku.
ACT 12:21 Baku barri yanyba nyuli yalungi, nanamukuyngka jali jungku Daya marda Sayidin. Yawumba nangki kunybana jumbalana. Baki ngankijba nyuli nananyina walkurrana yajina, jalili nyulu yanyba kajanyi ngurranyimukuyngka. Ngankijba nyuli, jungku nyuli nanganginyina walkurranyina darladarlana. Baki nyuli yanyba yalungi jali jungku nanaba kalawunyi nanganbu.
ACT 12:22 Mankumanku yalungki, nanamuku jali jungku yali nanganbu. Baki yali kaya kudanyu Yirudkanyi, “Miku ninji nganinyi. Ninji kud. Nyulu kud jala yanyba nurrungi.”
ACT 12:23 Miku nyuliya kurrkunba yalunya yanybikurri nani. Kuyu nyuli yalungi jangkurr. Miku nyuliya yanyba, “Miku ngayu kud. Ngawamba ngayu nganinyi.” Miku nyuliya yanyba nani. Jungku nyuli karda. Kuyu nyuli yalungi jangkurr. Yinarramba nyuli lunji, balkijbayi muwa. Balkimbayi muwa Yanjilwanyi, kuyungangi nyuli yalungi jangkurr. Baki wardamba yalungki Yirudkanyi kaja barrinani jijil. Baki janyba nangki Yirud. Barriwa.
ACT 12:24 Mili yali kuyu jangkurr Kudkanyi kudukudumukuyngka, baki mili baki mili. Durrijba yali jangkurr Kudkanyi.
ACT 12:25 Kuyu buli nanda dungala kula Jirusalimyurri Barnabaswanyi marda Sulwanyi. Kuyu buli nanda dungala jali yalu wajba, nanamukunyi jali jungku langku juju Yandiyuk. Kuyu buli dungala baki wajbayi yalunya dungalanyi kularra. Baki wijba buli langki Yandiyukyurri. Barlba buli langki marda yingka bulandu, nangangi niji Jun Mak. Barlba yali langki Yandiyukyurri. Barriwa.
ACT 13:1 Wanbiya yali langkurri Yandiyuk, Sul marda Barnabas, marda Jun Mak. Bijal yali jungku nanaba Yandiyuk. Jungku yali Krisjin langkurri Yandiyuk, kudukudu Krisjin. Yingkamuku yalundu, yali jala yanybawarr jangkurranyi Kudkanyi. Yingkamuku yalundu, yali jala milidimbawarr. Nanamuku niji yalungi, Barnabas, marda Simiyun, marda Lusiyus, marda Manayin, marda Sul. Nanda Simiyun, yingka nangangi niji ‘Kukurdu.’ Nanda Lusiyus, nangangi yaji Sayirin, baki nanda Manayin, jardijba nyuli nangandu Yirudnyina ngala nyulu juka. Nanda Yirud nyuli yingka Yirud. Miku nyuli nanda jali yabimba kiji krisjinmukuyngka. Yingka nyuli, ngala nanamannga niji.
ACT 13:2 Jungku yali malumba. Yanyba yali mududu Kudkanyi, ngala miku yaliya jarrba mama nanamanji. Miku yaliya jarrba mama, nulijbangangi yali Kudkanyi nyulu karunkanyi yalunya nanda jalija yalu yabimba. Yanyba yali kunyba jangkurr nangangi Kudkanyi, marda brijba yali yaji Kudkanyi. Baki yanyba nyuli yalungi, nanda Kunyba Ngarndu Kudkanyi. Yanyba nyuli, “Wajbakiyi ngana Sulkanyi marda Barnabaskanyi. Yabimba jabula yingka yaji ngaki. Jabula waki ngaki.” Barriwa.
ACT 13:3 Baki mili yali miku jarrba mama, ngala yanyba yali mududu Kudkanyi. Yarrijba yali marni bulandu Barnabasnyina marda Sulnyina. Yarrijba yalungki marni kulajina, ngala yali mili yanyba mududu Kudkanyi bulangi. Baki yali manjijba bulanya, Barnabas marda Sul. Baki nanda Jun Mak, jilajba nyuli bulanbu.
ACT 13:4 Baki manjijbayi bulanya Kunybawanyi Ngarnduwanyi Kudkanyi. Barlba yali bayungu Silusiyayurri wilina kanjana, nanamuku, Barnabas, marda Sul, marda Jun Mak. Jilajba yali wayana. Kangandijba yali bayungu kanjana nanankurri waliyangurri, niji Sayibris.
ACT 13:5 Wanbiya yali barrawuyabarrawuyana waliyanguna, nangangi niji Salamis. Nanda Salamis, nyuli karriya wilina kanjana. Karu yali jangkurr Kudkanyi nanamukuyngka jali jungku nanaba Salamis. Yanyba yali nanda jangkurr kalawunyi jurjina Jukanyi.
ACT 13:6 Baki mili yali jila bayangarrinybarri kanjarri. Jila yali nanankurri yajiyurri, nangangi niji Babus. Jungku nyulili nanaba nganinyi yarrbirra. Nyuli Ju. Nangangi niji Bajisus. Yingka nangangi niji, Krik yanyi, Yilimas. Nanda Bajisus yanyba nyuli, “Ngayu yanyba jangkurr Kudkanyi.” Ngala jujamba nyuli yaji. Miku nyuliya yanyba jangkurr Kudkanyi.
ACT 13:7 Nyuli kandi nangangi walkurrayngka mambukanyi kubaminkanyi waliyanguna. Nanda mambuka nangangi niji Sirjiyus Bulus. Nyuli jingkijbawarr. Manjijba nyuli yingka karunki Barnabas baki Sul. Nanangini yingkawanyi karu nyuli bulanya, badaji barndarri mambukanyi, bula karunki mambuka Jisuskanyi.
ACT 13:8 Ngala nanangini yarrbirrawanyi, nyuliyanyi kurrkunba mambuka mankunkanyi bulangi jangkurr. Mankumanku nangki yarrbirra mambukanyi, “Yiningki janyulu kuyu nanda jangkurr Jisuskanyi mambukawanyi. Jaliyi miku nyulu manku mili jangkurr Jisuskanyi, baki yiningki janyulu mudujba nanda jangkurr.” Nyuliyanyi kurrkunba mambuka mankunkanyi jangkurr.
ACT 13:9 Nanda Sul, yingka nangangi niji Bul. Wajba nyuli Bul jangkurranyi yanybikanyi nanangini Kunybawanyi Ngarnduwanyi Kudkanyi. Ningkijbayi yarrbirra Bulwanyi.
ACT 13:10 Baki yanybayi nangangi, “Ninji barrinani wuwarr Sayidin. Ninji jungku balki. Yabimba ninji kiji bukambijuyngka kunybanyi yajinyi. Miku ninjiyi jungku yurlurrmba. Yabimba ninji balki yaji yurrngumba. Miku ninjiyi yanyba jangkurr Kudkanyi. Miku. Jujijba ninji Kudkanyi.
ACT 13:11 Ngala linjumba janinya Kudwanyi, jujijbangangi ninji Kudkanyi. Janinji jungku kabuji. Miku janinji najba kamba mardunguji.” Yinarramba makabayi yarrbirra yami yajiwanyi, barrinani kukurdu kangulki. Maramarimba nyuli yaji. Nulijbayi yingkanyi, kuyunkanyi nanda yarrbirra marni yingkayurri yajiyurri.
ACT 13:12 Jali nyulu najba nanda yarrbirra kabuji mambukawanyi, baki manmala nyuli kudanyu. Kuyu nyuli jangkurr Kudkanyi nanangini kabaminwanyi mambukanyi. Barriwa.
ACT 13:13 Baki barlba yali langki wayana Babusnanyi, Bul marda nangangi kandimuku. Kangandijba yali langkurrinybarri Birkayurri wilina kanjana. Nanda yaji Birka nananyina walkurranyina yajina Bambiliya. Ngala nyuli yingijba yalunya nanaba Jun Makwanyi. Wijba nyuli kularriji Jirusalimyurri.
ACT 13:14 Jilajba yali langki Birkananyi. Jilajba yali Yandiyukyurri. Kujarra yaji nanamannga niji. Yingka Yandiyuk kularra, jala yali jungku waluwa. Yingka Yandiyuk langku nananyina walkurranyina yajina Bisidiya. Sadidi barri, ngankijba yali jurjina, baki yali jungku nanaba kalawunyi.
ACT 13:15 Yanyba yali jangkurr najana mambukamuku jurjkanyi. Nanda jangkurr, nangangi niji ‘Yuwa Musiskanyi.’ Baki yingka jangkurr yali yanyba najana, nanda jangkurr jali yalu yarrijba najana wankalawanyi jali yanyba jangkurr Kudkanyi. Yanyba yali jangkurr najana. Barriwa. Baki manjijba yali yingka yalundurri Bulyurri baki kudiyayurri nanganbu. Yanyba nyuli yalungi, “Kandimuku, yanyba kuna janarri bukambijuyngka, jala jungku nayiba. Yiningki janarri yanyba jangkurranyi milidimbiji nurrunya, baki janurru jingkijba mili Kudkanyi, janurru maruka muwa mili Kudkanyi.” Barriwa.
ACT 13:16 Baki karrinja nyuli Bul, kawanyba nyuli marni yalunya Bulwanyi, yalu jungunkanyi kardarda. Baki yanyba nyuli, “Narri. Narri mungkijimuku Yisrayilnanyi marda narri ngurranyimuku, narri jala maruka muwa Kudkanyi. Mankukiyi ngaki jangkurr.
ACT 13:17 Yarrijba nyuli nanamuku nurrunginmuku mungkiji Jumuku, jalili jungku wabula juju wankalana. Yarrijbayi yalunya Kudwanyi. Yabimba nyuli yalunya kudukudu, jali yalu jungku ngurranyina yajina Yijib. Nanda Kud nyuli ngiruka kudanyu. Kuyu nyuli yalunya Yijibnanyi.
ACT 13:18 Baki yurrngumba 40 kindilkurrinyi nyuli lalanba yalunya mangkurruna yajina. Ngala yali yurlwa Kudkanyi, yuwaji nyuli lalanba yalunya.
ACT 13:19 Kudukudu yalili jungku nanaba Kayinan ngurranyimuku. Kudiya jala ngurranyimuku, kudiya yingkamuku jala ngurranyimuku, kudiya yingkamuku jala ngurranyimuku, 7-barri yalili jungku Kayinan. Kurdanba nyuli yalunya bukambiju jali jungku Kayinan Kudwanyi. Kurdanba nyuli yalunya, baki wajba nyuli nanamuku Jumuku nanankanyi yajinyi Kayinankanyi, nanda jamba ngabayidi yalungi. Jungku yalili nananyina yajina yurrngumba 450 kindilkurrinyina.
ACT 13:20 Baki yarrijba nyuli mambukamuku yalungi Kudwanyi. Yarrijba nyuli kudukudu mambuka, yingka, baki yingka bayngkani, baki yingka bayngkani. Nani nyuli yarrijba mambuka Kudwanyi. Baki yarrijba nyuli nanda yingka mambuka Samiyul. Nanda Samiyul, nyuli yanyba jangkurr Kudkanyi.
ACT 13:21 Baki yali ngajaka Kud walkurrayngka mambukanyi, kingkanyi. Baki yarrijba nyuli walkurra mambuka king Jumukuyngka. Yarrijba nyuli Sul walkurrayngka mambukanyi Kudwanyi. Nanda Sul, nyuli jandanyi Kiskanyi, nangangi wankalanyi nijanganjinyi nyuli Binjamin. Jungku nyuli Sul walkurra mambuka Jumukuyngka yurrngumba 40 kindilkurrinyina.
ACT 13:22 Baki nyuli dulaba Sul Kudwanyi, baki yarrijba nyuli Dayibid walkurrayngka mambukanyi kingkanyi. Yanybayi Kud Dayibidkanyi, ‘Wakaramba ngayi nanda Dayibid, nyulu jandanyi Jisinyi. Nanda Dayibid, ngayu maruka muwa nangangi. Yabimba janyulu bukamba yaji, jalija ngayu karu yabimbiji.’ Nani yanybayi Kud Dayibidkanyi.
ACT 13:23 Baki Jisus, nyuli jungku juju bayngkani nanganbu Dayibidnyina. Manjijba nyuli Jisus Kudwanyi, nyulu lalanbiji marda marrimbiji mardarda Jumuku. Waluwa juju karu nyuli Dayibid Kudwanyi, ‘Jangayu manjijba yingka bayngkani juju jalija nganyingka janyba. Nanda jalija ngayu manjijba, janyulu nganyi jandanyi juju bayngkani nganyindu.’
ACT 13:24 Baku barri juju nanangini Junwanyi Ngurrunbawarranyi, nyulili milidimba yalunya, marda yalungkimi kurrkunba jungunkanyi balki. Baki janyulu ngurrunba yalunya jalija yalu ngindu yalunginkanyi balkinyi yajinyi. Nani nyuli milidimba yalunya jali jungku Yisrayil.
ACT 13:25 Yanyba nyuli Jun yalungi Jumukuyngka, ‘Narringka mankumanku ngaki, wanyi ngayu. Miku ngayu nanda jala narri yukumba. Ngala kurrkurrnajbakiyi. Badajba janyulu bayngkani ngakindu.’ Nani karuyi Junwanyi Jisuskanyi, jali barringa barri bukamba nanda yaji jali yabimba Junwanyi.” Barriwa.
ACT 13:26 Mili yanybayi Bul yalungi, “Narri, kandimuku, narri jala jungku juju bayngkani nangandu Yabrayamnyina, baki bukambiju ngurranyimuku jala maruka muwa Kudkanyi, manjijbayi nanda jangkurr ngambalangi Kudwanyi. Manjijba nyuli Jisus, milidimbiji ngambalanya, janybiji nangka ngambalangi. Ngawamba Jisuswanyi nyulu marrimba ngambalanya mardarda, nyulu lalanba ngambalanya.
ACT 13:27 Yali jala jungku Jirusalim, kurdanba yali Jisus. Nanamukunyi Jumukunyi marda yalunginyi mambukamukunyi kurdanba yali Jisus, mikungangi yaliya jingkijba nyulu marrimbawarr, lalanbawarr, nanda Jisus. Baki miku yaliya jingkijba nanda jangkurr jali yarrijba najana nanamukunyi wankalawanyi. Miku yaliya jingkijba nanda jangkurr kurdanbikanyi nanda jalija manjijba Kudwanyi. Miku yaliya jingkijba nanda jangkurr jalili yalu manku yingkana Sadidi, yingkana Sadidi yurrngumba. Ngala nanda jangkurr duja, kurdanbangangi yali Jisus Jumukunyi. Kurdanba yali nanda jali manjijba Kudwanyi.
ACT 13:28 Balanja yali Jisus, ngala jungku nyuli yurlurr kunybana yuwana. Jujijba yali Jisuskanyi, baki ngajaka yali Bilad nyulu karunki ngarrkadabawarrmuku yalu kurdanbikanyi nanda Jisus.
ACT 13:29 Yabimba yali nanda kaja yaji, jali yalu yarrijba najana wankalawanyi, jali yanyba jangkurr Kudkanyi. Nanda kaja yaji yabimba yali Jisuskanyi Jumukunyi. Baki yali dulaba Jisus mankanyi kingkarrinya kurndananyi wabangkarra. Yarrijba yali mankanyi kalawunyi kumayanguna. Nani yalili yarrijba mankanyi nanamanji.
ACT 13:30 Ngala wankambayi Jisus mili Kudwanyi.
ACT 13:31 Najba yali Jisus, nanamukunyi jali yalu jilajba nangandu kula Kalilinanyi Jirusalimyurri. Najba yali Jisus mardunguji. Yalu jali najba Jisus wanka, karu yali yingkamuku Jisuskanyi. Karu yali yingkamuku jala jungku Yisrayil.
ACT 13:32 Baki nurru nayiba narrinbu, badajba nurri karunki narrinya nanankanyi kunybanyi jangkurranyi Jisuskanyi. Karu nyuli Kudwanyi, nanamuku wankalamuku jali yalu barrinani wankalanyi nijanganjinyi ngambalangi wabula juju. Karu nyuli wankalamuku Kudwanyi, janyulu yabimba kaja yaji. Baki nayimanji yabimba nyuli nanda kaja yaji ngambalangi. Wankamba nyuli Jisus Kudwanyi. Wakaramba nyuli nyirirr wankalawanyi Dayibidwanyi. Niji nanankanyi nyirirranyi ‘Kujarra.’ Nayi nyuli yarrijba najana jangkurr Kudkanyi, ‘Ninji ngaki jandanyi. Nayimanji minimbaka ngayu bukamba, ninji ngaki jandanyi.’
ACT 13:34 Mili yanybayi Kud Jisuskanyi wankiykanyi mili, ‘Mikuwali janyba nangka mili. Mikuwali ngujbulijba nangangi mankanyi. Jungku janyulu wanka yurrngumba.’ Nayi yanybayi Kud nangangi Dayibidkanyi, ‘Yuku duja. Wajba jangayu yalunya yingkanyi mambukanyi walkurrayngkamirra. Yabimba janyulu kaja yaji kunyba yalungi jalija badajba bayngkani nganyindu.’ Nani yanybayi Kud Dayibidkanyi.
ACT 13:35 Baki yingkanyi jangkurranyi nyirirranyi nyuli yanyba, Dayibid. Nayi yanyba nyuli Kudkanyi, ‘Miku janinji yingijba nangangi mankanyi kumayanguna ngujbuliykanyi. Miku janinji yingijba nanda jala yabimba bukamba yaji, jala ninji karu. Miku janinji yingijba ngujbuliykanyi nanda jala maruka nyulu muwa nganyi.’ Nani yanybayi Dayibid nyirirranyi Kudkanyi.
ACT 13:36 Ngala Dayibidwanyi, yabimba nyuli bukamba yaji, nanda jali karu Kudwanyi. Yabimbayi bukamba yaji Dayibidwanyi, ngala nyuli wanka jungku. Maruka nyuli muwa Kudkanyi marda. Baki janyba nangki Dayibid. Makaba yali nangangi mankanyi nananyina yajina, jalili yalu makaba nangangi mungkiji mankanyi.
ACT 13:37 Ngala mikukiyanyi ngujbulijba nangangi mankanyi, nanda jali nyulu wankamba mili Kudwanyi. Nanda Jisus, janyba nangki, baki wankambayi mili Kudwanyi. Mikukiyanyi ngujbulijbayi nangangi mankanyi Jisus. Barriwa.
ACT 13:38 Mankukiyi narri, ngaki mungkiji. Marda narrimi jingkijba Jisuskanyi. Karu ngayu narrinya nanankanyi jangkurranyi Jisuskanyi. Milidimba nyuli Jisuswanyi manjamanjambikanyi nyulu balki yaji narringi mankanyinanyi. Karu ngayu narrinya nanankanyi jangkurranyi manjamanjambikanyi balki yaji mankanyinanyi. Baki janarri jingkijba nanankanyi, milidimba jali nyulu Jisuswanyi. Marda narrimi kuyu nanda jangkurr Jisuskanyi. Wankalanyi barri yarrijba najana nyuli nanda yuwa Kudkanyi Musiswanyi. Yarrijba nyuli nanda jangkurr, nanda yuwa jali yanyba Kud nangangi Musiskanyi. Yanybaka nanda yuwa nayi, ‘Jaliyi yalu jungku balkina yuwana Kudkanyi, marda yalimi wudumba barnyi Kudkanyi. Marda yalimi kurdanba nanda barnyi baki yajba barnyi dungalana, niji Yalda, Kudkanyi. Nani marda yalimi yabimba yaji, jaliyi yalu jungku balkina yuwana. Jala yalu yabimba nani jala yalu kurdanba barnyi Kudkanyi, baki jingkijbangka yalunya Kudwanyi, yalu ngindu yalunginkanyi balkinyi yajinyi. Miku nyulu manjamanjamba nanda balki Kudwanyi, ngala jingkijba nyuli yalunya, yalu ngindu yalunginkanyi balkinyi yajinyi, jala yalu yabimba yaji nani. Ngala jala yalu kuyu nanda jangkurr Jisuskanyi, baki nyulu manjamanjamba yalungi balki yaji Jisuswanyi. Miku nyuli manjamanjamba yalungi balki yaji, kurdanbangangi yalu barnyi, yajbangangi nanda barnyi Kudkanyi. Miku. Ngala nyuli manjamanjamba yalungi balki yaji, kuyungangi yalu nanda jangkurr Jisuskanyi, marda marukangangi yalu muwa Jisuskanyi. Dulaba nyulu yalungi balki yaji Kudwanyi. Manjamanjamba nyulu yalungi balki yaji, jala yalu kuyu nangangi jangkurr.
ACT 13:40 Marda narrimi manku kudanyu nanda jangkurr jala nyuli yarrijba najana nanangini wankalawanyi. Nayi karuyi nanda wankalanyi Kudwanyi, ‘Mankukiyi kudanyu, narri jala yurlwa ngakinkanyi jangkurranyi. Marda narringkimi mankumanku kudanyu ngakinkanyi jangkurranyi. Jaliyi narri yurlwa ngakinkanyi jangkurranyi, baki janarringka janyba. Yabimba ngayu ngiruka yaji, yinini yinini yaji nayimanji ngala narri jungku wanka. Ngala miku janarri kuyu nanda yaji, jala ngayu yabimba. Miku janarri kuyu nanda jangkurr jalija yingkawanyi nyulu milidimba narrinya nanankanyi yajinyi.’ Nani yarrijbayi wankalawanyi. Marda narrimi manku kudanyu nanda jangkurr Kudkanyi. Jaliyi narri miku kuyu nayinda jangkurr, baki janarringka janyba.” Barriwa. Nani yanybayi Bul yalungi jurjina.
ACT 13:42 Ngala buli jilajba jurjnanyi Bul marda Barnabas, ngajaka yali yingkamuku jali jungku bulandu jurjina, ngakaja yali bulanya, jabula wijba jurjyurri yingkana Sadidi, baki jabula milidimba mili nanamannga jangkurranyi. Jabula karu yalunya mili nanankanyi jangkurranyi Jisuskanyi.
ACT 13:43 Ngala buli jila yubalina jurjnanyi. Kudukudu yali jilajba bulandu, Jumuku marda ngurranyimuku jali maruka yali muwa Kudkanyi. Yanyba buli yalungi. Mili kudanyu buli karu yalunya, marda yalimi jungku kunyba Kudkanyi, marda yalimi yarrijba yalungi kurdulu nangangi Kudkanyi.
ACT 13:44 Baki baku yingkana Sadidi badajba yali jurjyurri, kajamuku, wirdikudukudumuku. Badajba yali mankunki nanda jangkurr Kudkanyi.
ACT 13:45 Ngala yali nguwajba bulangi Bulkanyi marda Barnabaskanyi. Nguwajba yali bulangi nanamuku Jumuku, baki yali jabulinyba jujijba bulanya. Nguwajba yali, badajbangangi kajamuku mankunki nanda jangkurr Bulkanyi, jali nyulu milidimba muran. Yanyba yali balkinyi jangkurranyi Bulkanyi.
ACT 13:46 Ngala yanyba buli ngirukanyi jangkurranyi. Mili yanyba buli Jumukuyngka nayi, “Karu nyuli ngalinya Kudwanyi, marda ngalimi waluku karu narrinya Jumuku nanankanyi jangkurranyi Kudkanyi. Marda ngalimi waluku karu narrinya, ngala miku narriyi kuyu nanda jangkurr Kudkanyi. Baki miku janarri wankijba yurrngumba. Nayimanji jangali yingijba narrinya Jumuku, mikungangi kuyu narri nanda jangkurr Kudkanyi. Jangali yingijba narrinya, baki jangali milidimba yalunya ngurranyimuku.
ACT 13:47 Jangali milidimba yalunya ngurranyimuku, jirrinybangangi nyuli ngalinya mambukawanyi Kudwanyi. Jirrinyba nyuli ngalinya nayi, ‘Wudumba janinji kudukudu ngaki. Jangayu marrimba mardarda bukambiju, jala yalu nulijba ngaki. Jangayu marrimba yalunya mardarda wandijiyana. Marda yalimi badajba ngakinburri, baki jangayu marrimba yalunya. Mungana barri jala yalu najba walkurra mirnbi, badajba yalu malumba nanankurri mirnbiyurri. Jungku yalu mirnbina. Nani janinji jungku barrinani nanda walkurra mirnbi. Badajba jayalu malumba nganyinburri, jalija yalu najba ninya. Jayalu badajba nganyinburri, barrinani yalu badajba mirnbiyurri.’ Nani yanybayi Kud ngalingi.” Barriwa.
ACT 13:48 Mirnarrijba yali muwa nanamuku ngurranyimuku, jala yali manku nanda jangkurr. Mirnarrijba yali muwa nanankanyi jangkurranyi Kudkanyi. Baki kuyu yali nanda jangkurr kudukuduwanyi ngurranyimukunyi, jingkijbangangi yalunya wabula juju Kudwanyi, jayalu kuyu nangangi jangkurr. Wankamba jayalunya Kudwanyi bayngkani jalija yalungka janyba.
ACT 13:49 Manku yali nanda jangkurr mambukanyi Jisuskanyi, kudukuduwanyi jali yalu jungku lukuluku nananyina yajina. Kuyu yali nanda jangkurr Jisuskanyi kudukuduwanyi, baki jungku yali Krisjinmuku.
ACT 13:50 Ngala yali ngarrangarra muwa bulangi Bulkanyi marda Barnabaskanyi. Kudiya mambuka Jukanyi, ngarrangarra yali muwa bulangi. Yabimba yali kiji bulangi. Yanyba yali kudiyayngka malbumalbumukuyngka, marda bardibardimukuyngka ngurranyimukuyngka. Nanamuku bardibardimuku yali walkurramuku mambukamuku, jalili brijba Kudkanyi, jalili yanyba mududu Kudkanyi. Yali ngarrangarra muwa bulangi, Jumuku marda malbumalbumuku marda bardirdibardimuku ngurranyimuku. Yurlwa yali bulangi Bulkanyi marda Barnabaskanyi, yali manjijba bulanya nanamunanyi yajinanyi.
ACT 13:51 Ngala wayawayamba bulangki nukami manjiykanyi jundurr, baki yingijbayi yalunya. Nani bulili wayawayamba bulangki nukami jali yalu yingkamuku yurlwa jangkurr Kudkanyi. Miku buliyi milidimba yalunya Kudkanyi mili. Baki jilajba buli karri Yikuniyumyurri, Bul marda Barnabas.
ACT 13:52 Ngala nanamuku jali kuyu nanda jangkurr Jisuskanyi, mirnarrijba yali nuwa. Mirnarrijba yali muwa, nanamuku krisjinmuku nanaba Yandiyuk, ngankijbangangi yalundu mankanyina Kunyba Ngarndu Kudkanyi.
ACT 14:1 Jali bula wanbiya Yikuniyum, Bul baki Barnabas, ngankijba buli jurjina Jukanyi. Yanyba buli nanankanyi jangkurranyi Jisuskanyi. Kuyu yali nanda jangkurr Jisuskanyi. Nanamuku, kudiya yali Jumuku, baki kudiya yali ngurranyimuku. Kuyu yali jangkurr Jisiskanyi, baki yali jungku krisjinmuku.
ACT 14:2 Ngala nanamuku Jumuku, jali miku kuyu jangkurr Jisuskanyi, julanba yali. Yabimba yali kiji bulangi Bulkanyi marda Barnabaskanyi, marda yingkamukuyngka Krisjinkanyi. Yanyba yali yalungi ngurranyimukuyngka jali miku kuyu jangkurr Jisuskanyi. Wajba yalunjali kiji bulangi.
ACT 14:3 Nanankujarra manjijba jali Jisuswanyi, jungku buli nanaba Yikuniyum. Jungku buli nanaba wabulinyina yajina yurrngumba. Karu yali nanda jali yabimba bulangi Jisuswanyi. Yanyba buli ngiruka Jisuskanyi. Yanyba buli duja jangkurranyi. Minimba nyuli bulanya nanankanyi jangkurranyi duja Jisuswanyi. Yabimba nyuli bulanya ngiruka, baki yabimba buli kaja yaji ngiruka. Najba yali nanda kaja yaji yingkamukunyi, baki yali jingkijba, nanda jangkurr Jisuskanyi, nanda duja jangkurr.
ACT 14:4 Bukambiju nanamuku jali jungku Yikuniyum, kudiyamukunyi yali kurranja bulanya Bul baki Barnabas, ngala kudiyamukunyi yali kurranja Jumuku jali julanba bulangi.
ACT 14:5 Yali jali julanba bulanya, kudiya Jumuku baki kudiya ngurranyimuku, yanyba yalungki. Yanyba yalungki linjumbikanyi bulanya. Yanyba yalungki janybikanyi dungala bulandurri, kurdanbikanyi bulanya.
ACT 14:6 Ngala karuyi bulanya yingkawanyi nanankanyi jangkurranyi janybikanyi dungala bulandurri. Baki dulu buli barlba nanamunanyi yajinanyi. Jilajba buli kula yingkayurri yajiyurri. Karu buli yalunya kunybanyi jangkurranyi Jisuskanyi, nanamuku, jali yalu jungku nanaba kularra. Karu buli yalunya nanankanyi jangkurranyi, nanamuku jali jungku lukuluku barrawuyabarrawuyana yajina, niji Lisdira marda Dirbi. Nanankujarra barrawuyabarrawuya buli nananyina walkurranyina yajina, niji Likuniya.
ACT 14:8 Jungku nyuli nanaba Lisdira nganinyi, balki nangangi nukami. Mikuwali jilajba nukamina. Balki nangangi nukami ngala nyuli bardarda. Mikuwali jilajba jukanji.
ACT 14:9 Jungkuyi nanaba nanda nganinyi jali balki nukami. Manku nyuli Bul yanybikurri jangkurr Jisuskanyi. Kuyu nyuli nanda jangkurr. Jingkijba nyuli Bul, yuku nyulu kunymamba Bulwanyi. Ningkijbayi nanda nganinyi Bulwanyi. Jingkijba nyuli nanda nganinyi, nyuli kuyu nangangi jangkurr Jisiskanyi, baki yuku kunymamba nanda nganinyi Bulwanyi, yabimbangangi Jisuswanyi Bul ngiruka kunymambikanyi.
ACT 14:10 Ningkijbayi nganinyi Bidawanyi, baki yanyba nyuli nangangi kudanyu, “Karrinjakiyi ninji. Karrinjakiyi nganinyina nukamina.” Baki karrinja nyuli dulu, baki jilajba nyuli lukuluku nanganginyina nukamina.
ACT 14:11 Najba yali nanda nganinyi jilaykurri kunybana nukamina, kajamukunyi. Baki yali yanyba yalungi yanyi, Likuniya yanyi. Kaya yali yalungi yanyi, “Nanginkujarra bula Kudwuya. Yabimba bulangki barrinani nganinyiwuya. Jila bula kudwuya kingkarrinya nurrundurri.” Ngamu buli kudwuya.
ACT 14:12 Ngamu nanda Barnabas, nyuli kud niji Jus, baki ngamu nanda Bul, nyuli kud niji Yirmus, yanybangangi nyuli Bul kudanyu, barrinani nanda kud Yirmus yanybawarr. Ngamu Bul marda Barnabas bula kujarra Kud.
ACT 14:13 Wabula yabimba yali jurj yalunginkanyi kudkanyi, Juskanyi. Yabimba yali nanda jurj danbina barrikina jali lukuluku barrawuyabarrawuyana. Mambukawanyi nanankanyi jurjkanyi, kuyu nyuli bulukimuku baki kaja jal. Kuyu nyuli yaji nanankurri barrikiyurri. Kuyu nyuli buluki, kurdanbiji nanawuyayngka, wangarranyi bulangi. Yaliyanyi brijba, yaliyanyi yanyba mududu bulangi, Bulkanyi marda Barnabaskanyi.
ACT 14:14 Ngala buli manku nanda jangkurr kurdanbikanyi buluki. Manku buli wangarranyi, briykanyi marda yanybikanyi mududu bulangi, baki bakarramba buli bulangi jumbala. Nani yalili bakarramba jumbala Jumukunyi, jalili yingkamukunyi yabimba balki yuwa Kudkanyi. Bakarramba buli jumbala, baki wirlku buli burrandibijina yalunbu. Kaya buli kudanyu yalungi.
ACT 14:15 Nayi buli kaya, “Marda miku narrimi yabimba nayinda. Marda miku narrimi yabimba wangarr ngalingi. Ngawamba ngaliya nganinyiwuya, nganinyi barrinani narri nganinyi. Miku ngaliya kudwuya, ngawamba nganinyiwuya. Badajba ngali nanginkurri karunki nanda kunyba jangkurr Jisuskanyi. Nulijbayi narringi Kud, narri yingiykanyi nanankanyi yingkanyi kudkanyi jala miku kud. Yanybayi Kud, marda narrimi kuyu nangangi jangkurr. Ngala nanda duja Kud, nyulu ngiruka. Yabimba nyuli bukamba yaji. Yabimba nyuli jamba, marda kanja marda laliji, marda bukamba yaji jali jungku. Yabimba nyuli bukamba yaji Kudwanyi.
ACT 14:16 Wabula bukambijunyi, yali yabimba nanda yaji, jali yalu nulijba yabimbikanyi nanda yaji. Miku nyuliya kurrkunba yalunya Kudwanyi.
ACT 14:17 Ngala minimba nangki Kud nganinyimukuyngka. Kaja kunyba yaji nyuli yabimba narringi. Wajba nyuli narrinya Kudwanyi janjanyi kingkarrinya, marda kajanyi mamanyi jala jardijba. Wajba nyuli narrinya kajanyi mamanyi. Marda narrimi mirnarrijba muwa yurrngumba Kudkanyi, yabimbangangi nyuli nanda kaja yaji narringi.” Barriwa. Nani yanybayi Bul yalungi, jali yaliyanyi yabimba wangarr bulangi.
ACT 14:18 Nani buli yanyba kudanyu yalungi kurrkunbiji yalunya. Yuwaji yaliyanyi yabimba wangarr, ngala buli kurrkunba yalunya wangarranyi. Barriwa.
ACT 14:19 Kudiya Jumuku, badajba yali langina jujunanyi Yandiyuknanyi nananyina walkurranyina yajina Bisidiya. Marda kudiya Jumuku badajba yali langina Yikuniyumnanyi. Badajba yali kularriji Lisdirayurri, jali bula jungku. Yabimba yali walkurra kiji bulanyi, Bulkanyi marda Barnabaskanyi. Wajba yalunjali kijinyi jala jungku nananyina yajina. Julanba yali bulanya murawanyi. Wudumba yali walkurra dungala. Janyba yali dungala nangandurri Bulyurri kurdanbiji. Janyba yali walkurra dungala kaja nangandurri. Baki yali jarimba nanda Bul. Wililijba yali danbiyurri barrikina. Yingijba yali Bul nanaba jambana. Ngamu nangki janyba.
ACT 14:20 Ngala nanamuku krisjinmuku, jilajba yali nangandurri. Karrinja yali lukuluku nangandu Bulnyina, baki walajba nyuli waykalinya Bul jambananyi. Karrinja nyuli, baki wijba nyuli kalawunyi barrawuyabarrawuyarri. Munganawa buli barlba nanamunanyi. Jilajba buli kula Dirbiyurri, Bul baki Barnabas.
ACT 14:21 Milidimba buli yalunya nanamuku yali jungku nanaba Dirbi. Karuyi yalunya kunybanyi jangkurranyi Jisuskanyi. Jabarri kudukuduwanyi, kuyu yali nanda jangkurr Jisuskanyi. Milidimba buli yalunya. Yabimba buli yalunya ngiruka jungunkanyi yurlurr Jisuskanyi. Yabimbayi yalunya ngiruka ngayangayiykanyi Jisus. Nayi buli milidimba yalunya krisjinmuku, “Jayalu yabimba kaja kiji ngambalangi yingkamukunyi. Baki jangamanjalu linjumba. Jangamanjalu yabimba nanda biwi. Ngala Kudwanyi, nyulu lalanbaka ngambalanya. Ngambala jandanyimuku nangangi. Lalanbaka nyulu ngambalanya yurrngumba.” Barriwa. Nani buli milidimba yalunya krisjinmuku jali jungku Lisdira marda Yikuniyum, marda Yandiyuk walkurranyina yajina Bisidiya. Yarrijba buli kudiya malbu, mambuka yalungi nanamukuyngka krisjinkanyi. Yarrijba buli mambukamuku lalanbikanyi yalunya krisjinmuku. Baki yali jungku malumba. Miku yaliya jarrba mama, ngala yali yanyba mududu Kudkanyi. Nayi yali yanyba, “Buwakanya kingkarri, janinji lalanba nanginmuku nganinyimuku. Jingkijba nurru, lalanba janinji yalunya.” Nani buli milidimba yalunya, baki yarrijba buli kudiya mambuka yalungi. Yanyba buli mududu Kudkanyi jala buli yarrijba mambuku. Nani buli yabimba yaji nanaba Dirbi, marda yingkana yajina Lisdira, marda yingkana yajina Yikuniyum, ngala yali wijba nanankurri yajiyurri Yandiyukyurri.
ACT 14:24 Barlba buli nanamunanyi yajinanyi Yandiyuknanyi. Baki birlbidamba buli kula burrandijba nananyina walkurranyina yajina Bisidiya. Baki mili buli birlbidamba kula burrandijba yingkana walkurranyina yajina, niji Bambiliya.
ACT 14:25 Wanbiya buli barrawuyabarrawuyanyina, niji Birka, burrandi nananyina yajina Bambiliya. Milidimba buli yalunya jali jungku nanaba. Milidimba buli nanankanyi jangkurranyi Jisuskanyi. Baki barlba buli mili kula Yadaliyayurri, wilina kanjana.
ACT 14:26 Jali bula wanbiya Yadaliya, baki ngankijba buli wayana. Kangandijba buli karrurrinybarri Yandiyukyurri. Nanda Yandiyuk, walkurranyina yajina Siriya. Wabula bulili jungku nanaba Yandiyuk Siriya. Jungku buli nanaba wabula bulanginyina yajina. Waluwa krisjinmukunyi nanaba yali ngajaka Kud lalanbiji bulanya Bul marda Barnabas. Baki barlba buli bayungu nanamunanyi yajinanyi. Yabimba buli nanda yaji, baki nanamanja buli wijba bayunguna nanankurri yajiyurri.
ACT 14:27 Bukambiju krisjinmuku nanaba Yandiyuk, jungku yali malumba yajina nanaba. Karu buli yalunya bukamba yajinyi jali yabimba nyuli bulangi Kudwanyi. Mili buli yanyba yalungi nayi, “Lalanba nyuli ngalinya yurrngumba Kudwanyi. Minimba nyuli ngalinya marda nanamukuyngka ngurranyimukuyngka, marda yalimi kuyu nanda jangkurr Jisuskanyi, marda yalimi maruka muwa nangangi.”
ACT 14:28 Baki jungku buli nanaba Yandiyuk yalunbu krisjinmukunyina, yingkanyi yawulawulanyi.
ACT 15:1 Badajba yali kudiya nganinyi Jumuku, badajba yali kulani Judiyananyi, langki Yandiyukyurri. Milidimba yali krisjinmuku ngurranyimuku jalili yalu miku yabimba kaburr. Milidimba yali nayi, “Marda yalimi kaburrmba narrinya mankanyi, marda yalimi yabimba narrinya kaburrwaburr, baki janyulu maruka muwa narringi Kud, janyulu marrimba mardarda narrinya. Jaliyi miku kaburrmba narrinya mankanyi, baki miku janyulu marrimba narrinya Kudwanyi. Nani yanybaka nanda yuwa Musiskanyi kaburrmbikanyi mankanyi.”
ACT 15:2 Ngala yurlwa buli Bul marda Barnabas, jala buli manku nanda jangkurr. Yurlwa buli yalungi. Yanyba buli yalungi, miku duja nanda jangkurr kaburrmbikanyi mankanyi. Jakakajba yalungki kudanyu. Nanamuku krisjinmuku, yanyba yalungki kaburrmbikanyi mankanyi, baki yali manjijba kudiya kula Jirusalimyurri. Manjijba yali Bul marda Barnabas marda kudiya mili jali jungku Yandiyuk bulanbu. Manjijba yalunjali yanybiji nanamukuyngka jali manjijba Jisuswanyi, marda malbumalbunyi nanaba Jirusalim. Manjijba yalunjali yanybiji yalungki kaburrmbikanyi yaji.
ACT 15:3 Manjijbayi yalunya kula nanamukunyi krisjinmukunyi. Barlba yali Yandiyuknanyi, baki jila yali kula. Birlbidamba yali kangandijba kula, kujarranyina yajina niji Bunijiya baki Samariya. Yanyba yali yingkana barrawuyabarrawuyana baki yingkana barrawuyabarrawuyana ngala yali barlba kula. Karu yalunjali ngurranyimukuyngka jali yalu kuyu nanda jangkurr Jisuskanyi. Kuyu yali nanda jangkurr Jisuskanyi ngurranyimukunyi. Jali yalu manku nanda jangkurr ngurranyimukuyngka, baki mirnarrijba yali muwa.
ACT 15:4 Jilajba yali kula, baki wanbiya yali Jirusalim. Nanamuku krisjinmuku jali jungku Jirusalim, mirnarrijba yali muwa, jali yalu najba Bul marda nangangi kandimuku. Mirnarrijba yali muwa, nanamuku jali manjijba Jisuswanyi, marda malbumalbu. Baki karu buli Bulwanyi marda Barnabaswanyi. Karu buli yalunya nanankanyi bukambijuyngka yajinyi jali yabimba Kudwanyi. Karu buli kudukudunyi ngurranyimukuyngka, jali yalu krisjinmuku. Karu buli kudukudunyi, kunymamba jali yalunya Kudwanyi.
ACT 15:5 Ngala kudiya krisjin nanaba Jirusalim, yali Barasi. Karrinja yali, yanyba yali, “Marda yalimi kaburrmba yalunya mankanyi, krisjinmuku jala miku kaburr. Marda yalimi yabimba yalunya kaburrwaburr, baki marda yalimi ngayangayijba yuwanyi Musiskanyi.”
ACT 15:6 Baki jungku yali malumba, nanamuku jali manjijba Jisuswanyi marda malbumalbu. Yanyba yalungki kaburrmbikanyi mankanyi baki ngayangayiykanyi yuwanyi Musiskanyi.
ACT 15:7 Jakakajba yalungki kudanyu. Baki karrinjayi Bida. Yanyba nyuli yalungi, “Kandimuku. Jingkijba narri nayinda. Juju wabula nyuli yarrijba ngana Kudwanyi. Ngana nyuli yarrijba milidimbiji ngurranyimuku nanankanyi kunybanyi jangkurranyi Jisuskanyi. Manku yali nanda jangkurr, baki kuyu yali nanda jangkurr kudukuduwanyi ngurranyiwanyi.
ACT 15:8 Jingkijba nyuli nanda jala yalungki mankumanku Kudwanyi. Jingkijba nyuli bukamba yaji. Minimba nyuli ngambalanya ngurranyimukuyngka, nyuli maruka muwa yalungi jali yalu kuyu nangangi jangkurr. Wajba nyuli yalunya nanganginkanyi Kunybanyi Ngarndunyi. Yawumba nyuli yalunbu ngurranyimukunyina mankanyina, nangangi Kunyba Ngarndu Kudwanyi. Nani wabula yabimba nyuli nanamannga yaji ngambalangi Kudwanyi.
ACT 15:9 Miku yanybayi Kud yingka jangkurr ngambalangi Jumukuyngka, ngala yingka jangkurr yalungi ngurranyimukuyngka. Maruka nyuli muwa Kud yalungi ngurranyimukuyngka, barrinani nyuli maruka muwa ngambalangi. Miku muningka nyuli manjamanjamba yalungi balki yaji. Miku. Ngala manjamanjamba nyuli yalungi balki yaji, durrijbangangi yali ngurranyiwanyi nangangi jangkurr Jisuskanyi.
ACT 15:10 Wanyingkanyi narri balanja Kud. Marda miku yalimi ngurranyimuku jungku barrinani Ju. Nanda yuwa jali yanyba Musis, miku nanda yalungi yuwa. Ngambalangi wankalanyi mungkiji, miku yaliya jungku kunybana yuwana Musiskanyi, marda ngambala, miku ngambalimi jungku kunybana yuwana yurrngumba. Kudiyana ngambala jungku balkina yuwana. Wanyingkanyi narri nulijba yalungi durriykanyi nanda yuwa Musiskanyi.
ACT 15:11 Karu ngayu narrinya duja jangkurranyi, jala ngayu yanyba nayinda narringi. Kuyu ngambali nanda jangkurr nangangi Jisuskanyi, baki Jisus nyuli maruka muwa ngambalangi. Nani nyulu maruka muwa yalungi marda, ngurranyimukuyngka. Manjamanjamba nyuli ngambalangi balki yaji Kudwanyi. Nani nyuli manjamanjamba yalungi balki yaji marda.” Barriwa. Nani yanybayi Bida yalungi.
ACT 15:12 Baki yanyba buli yalungi Bul baki Barnabas. Manku yali kudanyu bulangi jangkurr, mambukawanyi marda malbumalbuwanyi. Miku yaliya yanyba. Manku yali kudanyu nanda jangkurr bulangi. Karu buli yalunya nanankanyi jali yabimba Kudwanyi, jali bula milidimba ngurranyimuku. Yabimba nyuli bulanya ngiruka Kudwanyi, buli ngiruka yabimbikanyi nanda kaja yaji, jali nyulu jirrinyba bulanya Kudwanyi.
ACT 15:13 Jali bula yanyba nani, baki yanybayi Jayims yalungi. Nanda Jayims nyuli kanyiya Jisuskanyi. Yanyba nyuli, “Mankukiyi kandimuku. Manku janarri ngaki jangkurr.
ACT 15:14 Yanybayi Sayimin Bida ngambalangi nanankanyi yajinyi jali nyulu yabimba Kudwanyi. Lalanba nyuli kudiya yalunya ngurranyimuku Kudwanyi. Yarrijba nyuli kudiya ngurranyimuku nanganginkanyi jandayngkanyi.
ACT 15:15 Nanamuku wankalanyi jali yanyba jangkurr Kudkanyi, yarrijba yali jangkurr Kudkanyi najana. Yanybaka nanda naja Kudkanyi nayi,
ACT 15:16 ‘Yanyba nyuli ngambalangi walkurra mambuka, nayinda barri. “Baku barri jangayu wijba. Jangayu wijba, baki janga lalanba yalunya. Jayalu barrinani jandanyi nangangi, nanankanyi wankalanyi Dayibidkanyi. Jangayu yarrijba nganinyi jalija jungku barrinani jandanyi nangangi Dayibidkanyi, jalija jungku bayngkani juju nangandu.
ACT 15:17 Baki jayalu kujba ngaki, walkurrayngka mambukanyi. Bukambiju nanamuku ngurranyimuku, jalija ngayu yarrijba ngakinmuku, jayalu kujba ngaki.”
ACT 15:18 Nani nyuli yanyba, nyulu walkurra mambuka. Nani nyuli yanyba yalungi wabula wankalana.’”
ACT 15:19 Mili yanybayi Jayims yalungi, “Mankumanku ngaka nayi. Marda ngambalimi miku julanba yalunya ngurranyimuku. Marda ngambalimi miku julanba yalunya, jala yangkalamba yalungki Kudkanyi.
ACT 15:20 Ngala marda ngambalimi manjijba jangkurr najana yalungi. Nayinda jangkurr jalija ngambala manjijba, nayinda jangkurr milidimbikanyi yalunya. Jangambala yarrijba nayi, ‘Marda narrimi miku jarrba barnyi jali waluku yalu wajba yalungi yingka kud nanankanyi barnyinyi, ngala miku nanda duja kud, yingka nanda, yingka. Marda miku narrimi kuluka yingkana nganinyina jibarrina, miku jala nganyi kayikayi. Marda narrimi miku jarrba barnyi jali muningka yali dalyamba janki marniyudinyi, yuwaji ngulyayudi. Miku yaliya karlba. Marda narrimi miku jarrba ngulya.’ Nani marda ngambalimi manjijba yalungi najana.
ACT 15:21 Marda ngambalimi manjijba jangkurr yalungi ngurranyimukuyngka nani, milidimbangangi yalunjali nani bukamba jurjina milidimbawarranyi. Milidimba yali nanda jangkurr yuwanyi Musiskanyi jurjina. Milidimba yalili bukamba jurjina lukuluku yingkana Sadidi baki yingkana Sadidi yurrngumba wabulinyina.” Barriwa. Nani yanybayi Jayims yalungi.
ACT 15:22 Baki mili yalungki yanyba nanamuku jali manjijba Jisuswanyi, marda malbumalbu, marda bukambiju yingkamuku krisjinmuku. Yanyba yalungki, baki yali yarrijba kudiya nganinyi manjiji langki Yandiyukyurri. Yarrijba yali nanda Judas, yingka niji nangangi Basabas, marda Silas. Nanankujarra buli malbuwuya, buli jungku barrinani mambukawuya. Yarrijba yali nanankujarra wiykanyi Yandiyukyurri bulandu, Bulnyina marda Barnabasnyina.
ACT 15:23 Baki yarrijba yali jangkurr najana nanamukuyngka jali jungku nanaba langku Yandiyuk. Nayi yali yarrijba, “Nanama narri, narri jali miku Ju, ngala narri ngurranyimuku, yingkanyi yajinyi. Manjijba nurru nayinda jangkurr narringi. Nurru, kandimuku nanamuku jali manjijba Jisuswanyi, marda malbumalbu, manjijba nurru nayinda naja narringi jala jungku Yandiyuk, baki Siriya, baki Silisiya.
ACT 15:24 Manku nurri jangkurr yalungi jali yalu jilajba narrindurri wujini. Jilajba yali kudiya krisjinmuku Jirusalimnanyi. Yabimba yali kiji narringi jali yalu yanyba jangkurr narringi. Ngala miku nurriya karu yalunya yanybiji nanda jangkurr.
ACT 15:25 Jungku nurri malumba, yanyba nurrungki, baki yarrijba nurri nganinyiwuya. Manjijba janurru nanankujarra narrindurri. Jilajba jabula langki bulanbu, Bulnyina marda Barnabasnyina. Maruka nurru muwa bulangi.
ACT 15:26 Karu buli nanda kunyba jangkurr Jisuskanyi. Waki buli ngambalanginkanyi mambukanyi Jisus Krayiskanyi. Karu buli, marda waki buli, ngala yaliyanyi linjumba, yaliyanyi kurdanba bulanya yingkamukunyi. Maruka nurru muwa bulangi.
ACT 15:27 Manjijba janurru nanankujarra Judas baki Silas. Manjijba janurru bulanya narrindurri, baki jabula karu narrinya nayimannga jangkurranyi jala nurru yarrijba najana.
ACT 15:28 Mankumanku nangki Kunyba Ngarndu Kudkanyi, marda mankumanku nurrungki, marda narrimi ngayangayijba nayinda jangkurr. Nayinda jirrinyi yuwa, nayinda.
ACT 15:29 Marda narrimi miku jarrba mama jala yalu waluku wajba yaji yalungi yingka kud, ngala miku nanda duja kud. Marda narrimi miku jarrba ngulya. Marda narrimi miku jarrba barnyi, jala muningka yalu dalyamba janki marniyudinyi, yuwaji ngulyayudi. Marda narrimi miku kuluka yingkana nganinyina, jibarrina, miku jala nganyi kayikayi. Nani janarri jungku kunyba Kudkanyi, jaliyi narri miku yabimba nayinda yaji. Barriwa barri.” Nani yali yarrijba jangkurr najana krisjinmukuyngka nanaba langku Yandiyuk.
ACT 15:30 Manjijba yali nanamuku langki. Bul marda Barnabas, Judas marda Silas. Manjijba yalunjali langki Yandiyukyurri. Jali yalu wanbiya langkurri, badajba yali malumba krisjinmuku yalundurri. Jungku yali malumba yalundu, jali wanbiya Jirusalimnanyi. Wajba yalunjali nanankanyi najanyi, jali yalu kuyu.
ACT 15:31 Jali yalu manku nanda jangkurr najana, mirnarrijba yali muwa krisjinmuku Yandiyuk. Mirnarrijba yali muwa nanankanyi jangkurranyi najana.
ACT 15:32 Nanankujarra Judas marda Silas, yanyba bulili jangkurr Kudkanyi. Milidimba buli nanamuku krisjinmuku nanaba Yandiyuk mardunguji. Milidimba buli yalunya jangkurranyi jungunkanyi kunyba, ngiruka Jisuskanyi, marda marukankanyi muwa nangangi. Jungku yali nanaba mardunguji. Baki wijba nyuli kula Jirusalimyurri nanda Judas. Marda kudiya yali jila nangandu. Wijba yali nanamukuyngkurri, manjijba jali yalunya waluwa kulani.
ACT 15:34 Ngala nanda Silas, jungku nyuli wambu nanaba Yandiyuk.
ACT 15:35 Marda jungku buli nanaba Yandiyuk mardunguji Bul baki Barnabas. Milidimba buli jangkurranyi Jisuskanyi. Marda kudukudunyi yingkamukunyi, bulandu, milidimba yali jangkurranyi Jisuskanyi.
ACT 15:36 Baku barri yanybayi Bul Barnabaskanyi. Yanyba nyuli, “Janungkala wijba nanamukuyngkurri barrawuyabarrawuyarri jali nungkala milidimba yalunya wabula. Janungkala yidamba nanamuku krisjinmuku. Janungkala yidamba yalunya naji yalunya, jaliyi yuku yalu jungku.”
ACT 15:37 Nulijba nyuli Barnabas kuyunkanyi Jun Mak bulandu.
ACT 15:38 Ngala Bul, miku nyuliya nulijba kuyunkanyi Jun Mak bulandu. Mankumanku nangki Bul Jun Makanyi, nyuli yabimba balki yaji, yingijba jali nyulu bulanya wabula jali yalu Bambiliya. Miku nyuliya jilajba bulandu yurrngumba jala buli milidimba Jisuskanyi. Wijba nyuli Jirusalimyurri. Mankumanku nangki Bul, miku nanda kunyba yingiykanyi bulanya. Miku nyuliya nulijba Jun Makanyi jilaykanyi bulanbu.
ACT 15:39 Jakakajba bulangki Jun Makanyi. Jakakajba bulangki baki yingijba bulangki. Barnabas, nyuli jilajba wayana bayangarrinybarri Sayibrisyurri. Kuyu nyuli Jun Mak nangandu. Barlba buli bayangarrinybarri wayana.
ACT 15:40 Ngala Bulwanyi, nyuli yarrijba Silas, kandi nangangi. Ngajaka yali Kud yingkamukunyi krisjinmukunyi, ngajaka yali Kud, lalanbiji bulanya, baki barlba buli.
ACT 15:41 Birlbidamba buli kangandijba nanankujarranyina walkurranyina yajina, niji Siriya marda Silisiya. Milidimba buli yalunya krisjinmuku lukuluku barrawuyabarrawuyamukunyina. Milidimba buli yalunya jungunki ngiruka Jisuskanyi.
ACT 16:1 Mili buli jilajba bayungu, Bul marda Silas. Jilajba buli bayungu nanankurri yajiyurri lukuluku Dirbi marda Lisdira. Jungku nyuli nganinyi nanaba, nangangi niji Dimudi. Nyuli krisjin. Nangangi yarrijinyi, nyuli Ju, marda nyuli krisjin, ngala nangangi nijanganjinyi, nyuli Krik.
ACT 16:2 Bukambiju yali krisjinmuku, jali jungku Lisdira marda Yikuniyum, yanyba yali nangangi Dimudikanyi, nyuli kunyba. Yanyba yali nangangi, nyuli kunyba nganinyi.
ACT 16:3 Nulijbayi Bul kuyunkanyi Dimudi nangandu, ngala miku Dimudi kaburr. Nangangi nijanganjinyi, nyuli Krik. Miku yaliya yabimba kaburrwaburr nanamukunyi Krikwanyi. Wudumbayi Dimudi Bulwanyi, baki nyuli yabimba nanda Dimudi kaburr, jingkijbangangi yali bukambijunyi Jumukunyi jali jungku nanaba, jingkijbangangi yali nanda Dimudi nangangi nijanganjinyi, nyuli Krik. Barriwa. Baki yali barlba nanamunanyi yajinanyi, Bul marda Silas, marda Dimudi.
ACT 16:4 Jilajba yali bayungu kajayurri barrawuyabarrawuyarri. Karu yali bukambiju krisjinmuku nanankanyi jangkurranyi najana. Karu yalunjali jangkurranyi, jali yalu jirrinyba, malbumalbunyi marda nanamukunyi jali manjijba Jisuswanyi. Karu yali nanamuku krisjinmuku, jayalu ngayangayijba nanankanyi jangkurranyi.
ACT 16:5 Yali jungku mili ngiruka Jisuskanyi, nanamuku krisjinmuku. Jabarri yingkamuku yali kuyu nanda jangkurr Jisuskanyi, baki mili, baki mili yali kuyu nangangi jangkurr. Barriwa.
ACT 16:6 Jilajba yali bayungu, nananyina yajina Brijiya marda Kalajiya. Yaliyanyi jilajba bayungu yingkana yajina Yasiya, ngala kurrkunba nyuli yalunya Kunybawanyi Ngarnduwanyi Kudkanyi. Kurrkunba nyuli yalunya yanybikanyi Jisuskanyi nanaba Yasiya. Miku yaliya karu nanda kunyba jangkurr Jisuskanyi nanamuku jali jungku nananyina yajina Yasiya, kurrkunbangangi yalunya jilaykanyi nanankurri Kunybawanyi Ngarnduwanyi Kudkanyi.
ACT 16:7 Jali yalu wanbiya bundu Misiya, baki mili kurrkunba nyuli yalunya jilaykanyi nanankurri yingkayurri yajiyurri langkiya Bidiniya. Mili kurrkunbayi yalunya Kunybawanyi Ngarnduwanyi Kudkanyi. Miku yaliyanyi ngankijba nananyina yajina Bidiniya, nyulungangi Kunyba Ngarndu Kudkanyi.
ACT 16:8 Baki birlbidamba yali bayungu yajina Misiya. Wanbiya yali barrawuyabarrawuyanyina yajina, niji Druwas. Marda ngayu nayinda jala yarrijba najana nayinda jangkurr, jungku ngayi nanaba yalundu marda.
ACT 16:9 Ngala kulukayi Bul mungana, buwarrajimba nyuli yaji. Najba nyuli nganinyi nangangi yaji bayangarrinybana wilina kanjana, Masiduniya. Karrinja nyuli nanda nganinyi. Yanyba nyuli nangangi Bulkanyi. Ngajaka nyuli Bul, “Badajba janinji ngakinkurri yajiyurri, Masiduniyayurri. Badajba janinji, baki yabimba janinji yaji nurrungi.” Nani nyuli ngajakawa Bul, nanangini nganinyiwanyi Masiduniyakanyi. Barriwa.
ACT 16:10 Kamu, jali nyulu walajba, karu nyuli nurrunya nanankanyi jali nyulu najba, ngala nyuli buwarrajimba yaji. Yanyba nurrungki nanankanyi jali najba Bulwanyi. Mankumanku nurrungki, yanyba nurrungki, “Karungka nyulu ngambalanya Kudwanyi, marda ngambalimi barlba nanankurri Siduniyayurri. Marda ngambalimi milidimba yalunya nanaba nanankanyi kunybanyi jangkurranyi Jisuskanyi.” Barriwa. Baki birrirrinja nurrungki barlkanyi Druwasnanyi.
ACT 16:11 Barlba nurri bayungu kanjana wayayudi. Birlbidamba nurri bayangarriji waliyangurri, niji Samudrakis. Kuluka nurri nanaba, baki munganawa birlbidamba nurri mili bayangarriji kanjana nanankurri walkurrayngkurri yajiyurri. Wanbiya nurri yajina yundu kanjana, niji yajinyi Niyabulis. Nanda yaji Niyabulis, karriya nananyina walkurranyina yajina Masiduniya. Walajba nurri wayananyi.
ACT 16:12 Mili nurri jila bayungu nanamunanyi, mili nanankurri yajiyurri, niji Bilibayi. Wabula juju yabimba yali nanda barrawuyabarrawuya ngarrkadabawarrmukunyi Rumankanyi. Nanda Bilibayi walkurra barrawuyabarrawuya. Nanda yaji Bilibayi nananyina walkurranyina yajina Masiduniya. Jungku nurru nanaba mardunguji.
ACT 16:13 Walajba nurri barrawuyabarrawuyananyi Sadidi. Walajba nurri, baki jilajba nurri bundalyurri. Mankumanku nurrungki, yiningki yaji nanaba yanybikanyi mududu Kudkanyi. Yiningki yalili yanyba mududu Kudkanyi. Yiningki yalili yanyba mududu Kudkanyi bundalina Jumuku. Jungku nurri yundu bundalina, baki yanyba nurri nanamukuyngka jibarrimukuyngka jali jungku nanaba bundalina.
ACT 16:14 Yingamali jali jungku nanaba jibarri, nangangi niji Lidiya, nangangi yaji Dayadira. Wudumba nyuli nganmarra wabawaba, kunybamirra. Wajba nyulili yalunya wabawabanyi kunybanyi dungalanyi. Wajba yalili nanda jibarri kajanyi dungalanyi nanankanyi wabawabanyi. Nanda jibarri, nyulili maruka muwa Kudkanyi, baki nyuli manku kudanyu jangkurranyi Bulkanyi, jali nyulu karu yalunya. Kandimba nyuli nanda jibarri Jisuswanyi mambukawanyi, jali manku jangkurr jibarriwanyi. Baki nyuli jingkijba nanda jangkurr jibarriwanyi, baki nyuli kuyu nanda jangkurr Jisuskanyi, jala yanybayi Bul.
ACT 16:15 Baki ngurrunba yali nanda jibarri bundalina, kuyungangi nyuli nanda jangkurr. Nanamuku yingkamuku jalili jungku nangandu, jalili jungku nanganginyina barndana, baki yali ngurrunba yalunya marda. Ngurrunba yali bukambiju, jalili jungku nanganginyina barndana. Baki ngajaka nyuli nurrunya jibarriwanyi, “Kuluka janarri kuna nurrunginyina barndana. Jungku kuna janarri ngakindu, jaliyi narringka mankumanku ngaki, ngayu jungku krisjin, ngayu jungku yuwarl Jisuskanyi. Jaliyi narringka mankumanku nani ngaki, baki janarri kuluka nurrunginyina barndana.” Baki jungku nurri nanganginyina barndana.
ACT 16:16 Nanamanji barri, jilajba nurri nanankurri yajiyurri, jalili yalu yanyba mududu Kudkanyi. Ngala nurri jilajba, najba nurri wurrumbarra wakiwarr. Jungkuyi wuwarr nangandu mankanyina. Karu nyuli jangkurranyi wurrumbarrawanyi baki baku barri nanda jangkurr, nanda duja. Yabimbayi nanda yaji jali karu wabula wurrumbarrawanyi. Nani nyulili yanyba jangkurr, jali baku nanda jangkurr duja. Nanganginyi mambukamukunyi, yalili wudumba dungala nanankanyi jangkurranyi, jali yanyba wurrumbarra. Yingkamukunyi yalili wajba nangangi mambukamuku dungalanyi, baki nyulili karu yalunya nanda jangkurr bakunyi wurrumbarrawanyi. Karu nyuli jangkurr bakunyi, wuwarrngangi nangandu nanganginyina yuwana.
ACT 16:17 Jilajba nyuli nanganbu bayngkani Bulnyina nanda wurrumbarra. Jilajba nyulili bayngkani nurrundu. Ngala jilajba nyuli, kaya nyuli kudanyu, “Nanginmuku nganinyimuku, yalu waki Kudkanyi. Yalu waki nangangi walkurrayngkamirra mambukanyi Kudkanyi. Yalu wakiwarr nangangi. Karu yalu narrinya nanankanyi jalija nyulu marrimba narrinya mardarda Kudwanyi.”
ACT 16:18 Nani nyuli kaya kudanyu wurrumbarrawanyi yurrngumba, yingkana kambana, baki yingkana kambana. Kaya nyulili, ngala nyulili jila bayngkani, durrijba nurrundu. Baki ngarrangarra nyuli muwa Bul nangangi. Kulwayi Bul nangangi. Yanyba nyuli wuwarranyi, “Wuwarr. Ngayu jirrinyba ninya. Walajbakiyi mankanyinanyi wurrumbarrananyi. Walajbakiyi, nyulungangi ngiruka, nanda Jisus Krayis.” Yinarramba nyuli walajba nanda wuwarr nanganbunanyi mankanyinanyi. Baki miku nyuliya karu mili nanda jangkurr bakunyi nanangini wurrumbarrawanyi, walajbayingangi nanda wuwarr nanganbunanyi.
ACT 16:19 Baki yali jingkijba nanamukunyi mambukamukunyi wurrumbarranyi, jingkijba yali, miku yaliya wudumba dungala mili. Miku nyuliyi mili karu jangkurranyi dungalanyi wurrumbarrawanyi. Baki yali ngarrangarra muwa mambukamuku nangangi. Ngarrangarra yali muwa Bulkanyi. Baki yali wudumba bulanya Bul baki Silas. Wudumba yali bulanya, kuyu yali bulanya mambukamukuyngkurri burrandimbijina barrawuyabarrawuyana. Yanyba yali mambukamukuyngka Rumankanyi, “Nanginkuya nganinyiwuya, bula Juwuya, baki yabimba bula kiji nayiba.
ACT 16:21 Karu bula nurrunya, marda nurrimi miku jungku nurrunginyina yuwana Rumankanyi. Karu buli nurrunya, marda nurrimi jungku yingkana yuwana.” Barriwa.
ACT 16:22 Kudukudu yali karrinja lukuluku. Jali yalu manku nanda jangkurr, baki yali daba bulanya murawanyi. Ngarrangarra yali muwa bulangi, daba yali bulanya. Bakarramba yali jumbala bulanbunanyi mankanyinanyi mambukamukunyi Rumankanyi. Bakarramba yali jumbala bulanbunanyi mankanyinanyi. Karrinja buli nanaba, mikuyaji jumbalanyi. Baki yali jirrinyba kudiya ngarrkadabawarr, mambukamukunyi Rumankanyi. Jirrinyba yalunjali wajubiji bulanya.
ACT 16:23 Daba yali bulanya kudanyu, kurndayudinyi. Baki yali yarrijba bulanya brisinyina, ngarrkadabawarrmukunyi. Baki yali jirrinyba nanda mambuka jali yukumba brisin, jirrinyba yali mambuka kijiji bulanya kudanyu.
ACT 16:24 Jali nyulu manku nanda jangkurr kijiykanyi bulanya kudanyu, baki nyuli yarrijba bulanya yajina burrandi wayka brisinyina. Kijijba nyuli bulanya nukami walkurranyina kurndana.
ACT 16:25 Ngala baralala barri, yanyba buli mududu Kudkanyi, Bul marda Silas. Yanyba buli mududu, baki brijba buli Kudkanyi. Manku yali bulanya yingkamukunyi jali nanaba jungku brisinyina.
ACT 16:26 Ngala brijba buli, kulbayi jamba. Kulbayi jamba kudanyu, marda kulbayi nanda brisin. Dulaba yalungki bukamba bardawamuku. Dulaba yalungki. Yirrbayi kijbakijba wayka jambarri yalunbunanyi mankanyinanyi, jali jungku yalu brisinyina.
ACT 16:27 Walajba nyuli, nanda mambuka jali yukumba brisin. Walajba nyuli, baki nyuli najba yaji junu, bardawabardawa junu bukamba. Ngamu, yali barlba bukambiju, jali jungku brisinyina. Nanamanji jali dulaba nangki nganinyi brisinanyi, baki nanda yukumbawarr brisinkanyi, yingkawanyi janyulu kurdanba nanda yukumbawarr. Kurdanbaja nanda mambukawanyi Kabaminkanyi. Nanangini mambukawanyi dulaba nyuli kingkarri nangangi wunanybala jankunbijinyi kalawunyinanyi. Dulaba nyuli nanda jankunbijinyi, kurdanbiji nangka. Ngamu yali barlba brisinanyi.
ACT 16:28 Najbayi Bulwanyi nanda mambuka, jali nyulu dulaba nanda jankunbijinyi. Ngala nyuli najba, baki kaya nyuli kudanyu Bulwanyi. Kaya nyuli, “Mikujiyi ngarrkadaba nganyingka. Mikujiyi linjumba nganyingka jankunbijinyiyudinyi. Jungku nurru nayiba. Bukambiju nurru yuwaji nayiba. Miku nurriya barlba.”
ACT 16:29 Kaya nyuli mirnmilarranyi nanda mambuka. Jali nyulu wudumba mirnmilarra, jilajba nyuli bulandurri, Bulyurri marda Silasyurri. Mururu nyuli wayka bulandu. Marrala nyuli, baki birrirrayi mankanyi.
ACT 16:30 Kuyu nyuli bulanya danbiyurri brisinyina, baki ngajaka nyuli, “Mambukawuya, wanyimba jangayu, baki janyulu marrimba ngana mardarda Kudwanyi. Wanyimba jangayu.”
ACT 16:31 Jananganja buli nanda mambuka, “Marda ninjimi kuyu nanda jangkurr mambukanyi Jisuskanyi, baki janyulu marrimba ninya. Janyulu marrimba ninya mardarda, marda nanamuku jala jungku nganyinyina barndana. Janyulu marrimba yalunya, jaliyi ninji kuyu nangangi jangkurr.”
ACT 16:32 Baki buli milidimba nanda mambuka, marda nanamuku jali jungku nanganginyina barndana. Karu buli yalunya Jisuskanyi. Karuyi yalunya yajinyi jali yabimba Jisuswanyi.
ACT 16:33 Yinarramba nyuli wakardaba bulanya biwi mankanyi, daba jala yalu, baki buli ngurrunbayi nanda mambuka, marda bukambiju nangandu barndana. Ngurrunbayi yalunya Bulwanyi, marda Silaswanyi.
ACT 16:34 Baki kuyu nyuli bulanya nanganginkurri barndarri. Wajba nyuli bulanya mamanyi. Yali mirnarrijba muwa, nanda mambuka marda yingkamuku nangandu. Mirnarrijba yali muwa, kuyungangi nyuli nanda jangkurr Kudkanyi.
ACT 16:35 Munganawa barri mambukamukunyi Rumankanyi, manjijba yali yilarrmuku brisinyurri. Manjijba yali yilarrmuku jangkurryudi manjiykanyi bulanya brisinanyi. Karu yali nanda mambuka brisinkanyi, “Manjijba janinji nanankuya nganinyiwuya brisinanyi.”
ACT 16:36 Baki nyuli yanyba Bulkanyi nanda mambuka. Nayi nyuli yanyba, “Manjijba yali yilarrmuku nanginkurri mambukamukunyi Rumankanyi. Manjijba yali yilarrmuku jala yanyba, jangayu manjijba nimbalanya brisinanyi. Jilajba janimbala. Lalanba janyulu nimbalanya Kudwanyi, jalija nimbala jila.”
ACT 16:37 Ngala yanybayi Bul mambukanyi brisinkanyi. Nayi nyuli yanyba, “Miku jilijba jangali barlba brisinanyi. Marda yalimi badajba yaluman nanginkurri manjiji ngalinya. Marda yalimi badajba yaluman nanamuku mambukamuku Rumankanyi. Miku ngaliya yabimba balki yaji yuwana Rumankanyi, ngala yali daba ngalinya, baki yingkamukunyi yalunjali najba daykurri. Baki yali yarrijba ngalinya brisinyina. Miku jangali jila brisinanyi kardarda. Miku ngalinjaliya ngajaka yanybikanyi. Daba ngalinjali wajamba. Ngali Juwuya, ngala mungkiji ngali Rumankanyi marda.” Nani nyuli yanyba Bul mambukanyi brisinkanyi. Kamambarra nanamuku Rumankanyi, yalili yabimba nayi ngurrayngkanyi. Jali nyulu yabimba kaja yaji kunyba Rumankanyi ngurranyiwanyi, jali nyulu waki kudanyu yalungi Rumankanyi, baki yali wajba nanda ngurranyi jangkurranyi najana. Wajba yali jangkurranyi najana. Yanybayi nanda jangkurr nayi, “Nangini nganinyiwanyi, nyuli yabimba kaja yaji kunyba Rumankanyi. Nyulu ngurranyi. Miku nyulu Ruman, ngala nayimanji nurru yabimba nayinda nurrungi mungkiji. Nyulu barrinani Ruman.” Nani yalili yabimba nangangi, jali nyulu waki kunyba Rumankanyi, baki nanda ngurranyi nyuli mungkiji Rumankanyi. Baki nangangi jandanyi, nyuli Ruman mungkiji marda. Nanda ngurranyi, jaliyi nyulu jungku balkina yuwana Rumankanyi, baki mambukawanyi Rumankanyi, yuku janyulu daba wajamba nanda ngurranyi. Ngala mikuwali nyulu wajamba daba mungkiji Rumankanyi jali jungku balkina yuwana. Waluka marda nyulimi karrinjarrijba nanda mungkiji kurdusnyina, jali nyulu yabimba balki yaji. Baki nyuli yuku karu yalunya nanganginkanyi yajinyi mungkijiwanyi, baki yuku nyulu kuyu kandi yanybikanyi nanganginkanyi yajinyi. Nani yuku nyulu yabimba, jala nyulu jungku balkina yuwana Rumankanyi. Mili yanybayi Bul nangangi mambukanyi brisinkanyi, “Marda yalimi badajba nanginkurri mambukamuku Rumankanyi, manjiji ngalinya yaluman. Jalija ngali barlba brisinanyi, baki jayalu najba ngalinya jilaykurri kudukuduwanyi. Miku jangali jila kardarda.” Nani yanybayi Bul.
ACT 16:38 Baki yali wijba yilarrmuku. Karu yali mambukamuku Rumankanyi nanankanyi jangkurranyi Bulkanyi. Marrala yali, jali yalu manku nanda jangkurr. Miku yaliya jingkijba bulanya, buli mungkiji Rumankanyi.
ACT 16:39 Baki yali badajba brisinyurri mambukamuku. Yanyba yali bulangi Bulkanyi marda Silaskanyi. Nayi yali yanyba, “Jungku nurru balki. Marda nurriyanyi miku daba nimbalanya, miku yarrijba nimbalanya brisinyina. Marda nurriyanyi waluku manku nimbalangi jangkurr.” Baki yali kuyu bulanya danbiyurri brisinyina, ngala yali ngajaka bulanya, bula barlbiji nanamunanyi yajinanyi barrawuyabarrawuyananyi.
ACT 16:40 Jilajba buli nanankurri barndarri jibarrinyi Lidiya. Yidamba buli jibarri. Nanamuku krisjinmuku, malumba yali jila nanankurri barndarri. Yanyba buli yalungi. Milidimba buli yalunya mili Jisuskanyi. Milidimbayi yalunya, yabimbiji yalunya ngiruka Jisuskanyi. Barriwa. Baki barlba buli nanamunanyi yajinanyi.
ACT 17:1 Jilajba yali bayungu. Birlbidamba yali kangandijba yingkana yajina Yambibulus, baki yingkana yajina Yabuluniya. Baki yali wanbiya bayangarri Disalunika.
ACT 17:2 Jilajba nyulili jurjyurri yurrngumba Sadidi, nanda Bul. Jali nyulu wanbiya Disalunika, baki nyuli jila jurjyurri nanaba marda. Ngankijba nyuli jurjina yingkana Sadidi, baki yingkana Sadidi, baki yingkana Sadidi, nanaba bayangarri Disalunika. Yanyba nyuli yalungi jurjina. Yanyba nyuli wankalanyi jangkurranyi, jali yalu yarrijba najana Kudkanyi nanamukunyi wankalamukunyi. Jakakajba nyuli yalunya nanankanyi wankalanyi jangkurranyi.
ACT 17:3 Milidimba nyulili nayi, “Karu ngayu narrinya Krayiskanyi. Yarrijba yali jangkurr nangangi Krayiskanyi najana Kudkanyi. Yarrijba yali jangkurr nangangi wankalamukunyi. Yanyba yali Krayiskanyi, jayalu linjumba, baki janangka janyba, baki janyulu wankijba mili.” Nani nyuli milidimba yalunya jurjina Bulwanyi. Baki nyuli karu yalunya, “Nayinda Jisus, jala ngayu karu narrinya nangangi, nyulu Krayis. Nyulu nanda jali yarrijba Kudwanyi.”
ACT 17:4 Nanamuku jali manku jangkurr Bulkanyi, kudiyawanyi yali kuyu nanda jangkurr. Kudiya jali kuyu jangkurr, yali Jumuku. Marda kudukudu Krikmuku jali maruka yali muwa Kudkanyi, marda bardibardimuku walkurramuku, kudukudu yali kuyu nanda jangkurr Jisuskanyi. Baki kandimba yali bulanya Bul marda Silas.
ACT 17:5 Ngala yingkamuku Jumuku nguwajba yali. Nguwajba yali bulangi, baki yali wudumba kudiya balkimuku yabimbiji kiji bulangi. Karu yalunjali balkinyi jangkurranyi bulangi Bulkanyi baki Silaskanyi. Yabimba yali walkurra kiji bulangi. Bukambiju yali badadajba kijinyi. Yurlwa yali bulangi, baki yali jilajba nanganginkurri barrawurri Jayisinkanyi. Karrirrinja yali barrawuna. Janyba yali dungala barrawurri, baki dalyamba yali bardawa. Ngamu buli jungku nanaba barrawuna, ngala miku. Yaliyanyi marrimba Bul. Kuyu yaliyanyi bulanya Bul baki Silas.
ACT 17:6 Kujba yali bulangi kalawunyi barrawuna, ngala mikuyaji bulangi nanaba. Baki marrimba yali kudiya krisjinmuku, Jayisin baki kandimuku nangangi. Marrimba yalunjali. Kuyu yalunjali. Karrinjarrijba yalunjali mambukamukunyina nanankanyi yajinyi. Kaya yali mambukamukuyngka, “Nanankujarra nganinyiwuya, yabimba buli kiji bukamba yajina jala bula jila. Jilajba buli nanginkurri yabimbiji kiji marda.
ACT 17:7 Jungku bula nanganginyina barndana Jayisinkanyi. Jungku bula nanaba nanganbu, baki bula jungku balkina yuwana. Jungku bula balkina yuwana walkurrayngka mambukanyi Rumankanyi. Yanyba bula, yingka nyulu walkurramirra mambuka, nangangi niji Jisus.” Nani yali kaya mambukamukuyngka jali yalunjalu marrimba kijinyi.
ACT 17:8 Jali yalu manku nanda jangkurr, baki yali ngarrangarra muwa. Ngarrangarra yali muwa, mambukamuku marda yingkamuku kudukudu jali karrinja lukuluku.
ACT 17:9 Ngala mambukamukunyi karu yalunjali. Karuyi Jayisin marda yingkamuku nangandu, waluku jayalunjalu wajba dungalanyi, baki jayalu muningka barlba. Wudumba yali kudukudu dungala, wajba yalunjali dungalanyi, baki muningka yali barlba barndarri.
ACT 17:10 Ngala mungana barri nanamukunyi krisjinmukunyi, manjijba yali bulanya Bul marda Silas nanamunanyi barrawuyabarrawuyananyi. Manjijbayi bulanya mungana bayungu yingkayurri yajiyurri, nangangi niji Biriya. Jilajba buli Biriyayurri. Jala buli wanbiya, ngankijba buli jurjina nanaba.
ACT 17:11 Jungku yali kunyba, nanamuku jurjina Biriya. Kudanyu yali manku bulanya, jali bula milidimba yalunya. Manku yali kunyba, miku barrinani yali karrurri Disalunika, jali yurlwa jangkurr Jisuskanyi. Milidimba buli yalunya jangkurranyi najana Kudkanyi, baki nanamuku jali manku, yingkana kambana, baki yingkana kambana, baki yingkana kambana, najba yali nanda naja Kudkanyi. Najba yali kudanyu. Kujba yali jaliyi nanda jangkurr jala buli yanyba, nanda nanamannga jangkurr, jala nanaba najana Kudkanyi. Kujba yali nanamannga jangkurranyi.
ACT 17:12 Kuyu yali nanda jangkurr Jisuskanyi kudukudu nanaba jurjina. Kudukuduwanyi Jumukunyi, marda kudukuduwanyi Krikwanyi, marda bardirdibardimukunyi, kuyu yali nanda jangkurr.
ACT 17:13 Ngala nanamuku Jumuku jali jungku karru Disalunika, manku yali Bulkanyi marda Silaskanyi. Manku yali bulangi, jali milidimba bula nanda jangkurr Jisuskanyi nanaba Biriya. Barlba yali bayungu Biriyayurri. Jali yalu wanbiya, yali yabimba kiji bulangi. Wajba yalunjali, kudukudu kijinyi bulangi.
ACT 17:14 Yinarramba yali manjijba nanda Bul. Manjijba yali Bul kula kanjarri. Nanamukunyi Krisjinmukunyi jali jungku Biriya, manjijba yali Bul kula. Ngala buli jungku wambu nanaba Biriya, Silas marda Dimudi. Yuwaji buli wambu jungku nanaba.
ACT 17:15 Kudiyawanyi jali lalanba Bul, kuyu yali Bul kula. Kuyu yali Bul Yadinyurri, baki yingijbayi Bul nanaba. Jali yalu wijba langku Biriyayurri, karu nyuli yalunya Bulwanyi, manjiykanyi bulanya. Karu nyuli yalunya manjiykanyi bulanya nangandurri winyurru, Silas marda Dimudi.
ACT 17:16 Nanamuku jalili jungku Yadin, yali yabimba kajamuku yaji barrinani kudkanyi. Yabimba yali kajamuku yaji jala yali yanyba mududu nanankanyi. Ngala nyuli yukumba bulangi, Silaskanyi marda Dimudikanyi, jilajbayi Bul barrawuyabarrawuyana baki najba nyuli nanamuku yajimuku barrinani kudkanyi. Ngindu nyuli muwa kudanyu nanamuku yajimuku barrinani kudkanyi. Ngindu nyuli muwa kudanyu, jala nyuli najba nanamuku jali miku duja Kud.
ACT 17:17 Baki nyuli milidimba yalunya jurjina, Bulwanyi. Jakakajba nyuli yalunya, Jumuku marda ngurranyimuku jali yanyba mududu, marda brijba yali Kudkanyi. Jakakajba nyuli yalunya. Jilajba nyuli burrandi wayka barrawuyabarrawuyana. Karrinja nyuli nanaba, baki milidimbayi yalunya, jali yalu jila bundu nangandurri.
ACT 17:18 Jungku yalili nanaba Yadin, kaja yali miku kuyu nanda jangkurr Kudkanyi. Yingkamukunyi, yalili kuyu jangkurr wankalanyi Krikanyi, nangangi niji Yibikuriyus. Yingkamukunyi, yalili kuyu jangkurr yingkanyi wankalanyi Krikanyi, nangangi niji Sinu. Nijarrijba yali nanamuku Sduwik. Miku yalili kuyu jangkurr duja Kudkanyi. Miku. Yanyba yalungki, Bul, marda yali Yibkuriyanmuku marda yali Sduwikmuku. Jakakajba yalungki. Kudiya yalungki yanyba, “Nayinda barrikijarra, wanyi nyuli yanyba.” Ngala kudiya yalungki yanyba, “Ngurrayngkanyi kudmukuyngka nyulu karu. Ngurrayngkanyi kudmukuyngka.” Nani yalungki yanyba jali milidimba nyuli yalunya Jisuskanyi Bulwanyi. Miku yaliya jingkijba nanda jangkurr jali nyulu yanyba Jisuskanyi, wankiykanyi mili.
ACT 17:19 Baki yali kuyu Bul. Kuyu yali kingkarri nanankurri yajiyurri yundu kulawirana, niji Yariyubakus. Malumba yalili jungku nanaba kulawirana, yanybiji yaji. Yalungkili yanyba nanaba. Kuyu yali Bul nanankurri, baki ngajaka yali, “Karu janinji nurrunya nanginkanyi jangkurranyi. Milidimba janinji nurrunya nanginkanyi buyingkiyngkanyi yajinyi.
ACT 17:20 Nanda jangkurr jala ninji yanyba, nanda yinini jangkurr. Miku nurriya manku nanda jangkurr wabula. Nulijba nurru jingkiykanyi mili nanankanyi jangkurranyi.” Nani yali ngajaka Bul.
ACT 17:21 Nanamukunyi, jalili jungku Yadin, manku yalunjalili yanybikurri yurrngumba. Krikmukunyi baki ngurranyimukunyi yalunjalili karu jangkurranyi marda manku jangkurranyi yurrngumba. Nulijba yalili mankunkanyi buyingkinyi yaji.
ACT 17:22 Kudukudu yali jungku nanaba kulawirana Yariyubakus. Baki karrinjayi Bul waluwa yalundu. Yanyba nyuli yalungi nayi, “Narri. Mankukiyi ngaki jangkurr, narri jala jungku Yadin. Jingkijba ngayu narrinya, mankumanku narringka kudanyu kajanyi Kudkanyi.
ACT 17:23 Najba ngayi yaji, ngala ngayi jilajba barrawuyabarrawuyana. Najba ngayi kajamuku kud. Najba ngayi marda yalda, jali yalu yabimba dungalayudinyi. Baki najba ngayi jangkurr yundu dungalana. Nanda jangkurr yanybayi nayi, ‘Nayinda dungala jungkuka nangangi kudkanyi, jala miku nurriyi jingkijba nanda.’ Yanyba narri mududu nanankanyi kudkanyi jali miku narriyi jingkijba. Ngala ngayu karu narrinya nanankanyi Kudkanyi, jalimi narri miku jingkijba.
ACT 17:24 Nanda Kud, nyulu mambuka lalijinyi marda jambanyi. Yabimba nyuli jamba baki bukamba yaji junu jambana. Miku nyulimi jungku jurjina, jala yali yabimba nganinymukunyi. Miku.
ACT 17:25 Miku nyulimi nulijba yajinyi, jala yalu wajba nanda Kud nganinyiwanyi. Miku yalimi yabimba yaji jala nyulu nulijba Kud. Ngawamba nyulu yuku wankamba yaji, nyuluman. Nyubana wankamba nyulu yaji. Wirnngalijba yalu yaji yanimalmuku, marda nganinyimuku. Wirnngalijba yalu yaji Kudngangi. Nyulu wankamba yaji. Miku nganinyiwanyi, miku nyuliyi wankamba yaji.
ACT 17:26 Wankalanyi kamambarra, ngala nyulili mikuyaji, yabimba nyuli yingamali nganinyi Kudwanyi. Nanda yingamali nganinyi, nyulu barrinani wankalanyi miminganja bukambijuyngka nanijba. Nanijba yalu jungku lukuluku wandijiyana, marda ngambala, kajamuku, wirdikudukudu. Bukamba ngambala jungku barrinani mimimba nyulu, nanankanyi wankalanyi. Mankumanku nangki Kud yajinyi, baki nyuli yarrijba nganinymuku yalunginyina jambana. Wajba nyuli yalunya yalunginkanyi jambanyi. Jungku yalu nananyina yajina jala yanyba Kud, yalu jungunkanyi. Jungkuyi nganinyi baki janyba nangki nanamanja jali yanyba Kud, janangka janyba.
ACT 17:27 Miku nyuliya yabimba nganinyimuku muningka. Miku. Nulijba nyulu nganinyimuku kuykanyi nangangi Kudkanyi, mankumankunkanyi yalungka nangangi Kudkanyi. Ngala miku nyulimi jungku juju ngambalandunanyi. Jungku nyulu Kud bundu ngambalandu.
ACT 17:28 Yanybayi wankalanyi, nayi nyuli yanyba, ‘Yabimba nyuli ngambalanya, wankiykanyi, baki jilaykanyi, baki jarrkanyi mama.’ Marda kudiya narringi mungkiji jali wakaramba nyirirr, nayi yali yanyba, ‘Marda ngambala nangangi jandanyi. Jandanyi ngambala nangangi marda.’
ACT 17:29 Jaliyi ngambala jandanyi Kudkanyi, baki marda miku ngambalakimi mankumanku, yuku ngambala yabimba nanda Kud. Marda miku ngambalakimi mankumanku nani. Miku ngambaliyi yabimba Kud kurndana, marda malankarrina marda dungalana. Nani miku ngambaliyi yabimba Kud. Ngala yingkamukunyi yali yabimba yalungi yaji barrinani Kud. Ngala miku nanda duja Kud, muningka nanda, ngawamba dungala baki malankarri baki kurnda.
ACT 17:30 Wabula kamambarra, miku yaliya jingkijba Kud, yali mudumbanyi nangangi. Nanamanji yingijbayi yalunya Kudwanyi, jali miku yaliya jingkijba Kud. Ngala nanijba nyulu jirrinyba bukambiju yalunya, yangkalambiji yalunginkanyi balkinyi yajinyi. Jirrinyba nyulu yalunya, yalu jungunki kunybana yuwana, nanganginyina yuwana.
ACT 17:31 Baku barri janyulu karrinjarrijba ngambalanya yajina Kudwanyi. Nanda yaji barrinani kurdus. Janyulu yarrijba nganinyi mambuka walkurra bukambijuyngka, Kudwanyi. Janyulu jungku mambuka nananyina yajina kurdus. Mankumanku janangka mambuka ngambalangi, janyulu yanyba yabimbikanyi yaji ngambalangi bukambijuyngka. Nani janyulu jungku, nanda nganinyi jala yarrijba Kudwanyi. Nani janyulu jungku, yabimbikanyi yaji bukambijuyngka lukuluku. Minimba nyuli ngambalanya nanankanyi nganiyngkanyi wabula Kudwanyi. Janyba nangki nanda Jisus, ngala mardunguji wankambayi Jisus mili Kudwanyi. Jingkijba ngambala, janyulu yarrijba Jisus Kudwanyi yabimbikanyi yaji ngambalangi, wankambangangi Jisus waluwa Kudwanyi.” Barriwa. Nani yanybayi Bul yalungi yundu kulawirana.
ACT 17:32 Jali yalu manku nanda jangkurr wankiykanyi mili, kudiya yali kakalijba nangangi Bulkanyi. Miku yaliya jingkijba Kud, yuku nyulu wankamba mili nganinyi bayngkani nangka janyba. Kakalijbayi yingkamuku nangangi. Ngala yingkamuku yali yanyba nangangi. Yanyba yali nayinda jangkurr, “Janurru mili manku nayinda jangkurr nganyi baku. Manku janurru mili baku.” Barriwa.
ACT 17:33 Baki nyuli yingijba yalunya kulawirana Bulwanyi. Barlba nyuli wayka yalunbunanyi.
ACT 17:34 Ngala kudiyamuku maruka yali muwa nangangi Kudkanyi. Maruka yali muwa, kuyungangi yali nanda jangkurr nangangi Bulkanyi. Yingka jali kuyu nanda jangkurr, nangangi niji Diyunisiyus, baki yingka jibarri nyuli, nangangi niji Damaris. Kuyu yali nanda jangkurr Kudkanyi, nanankujarranyi, marda yingkamukunyi.
ACT 18:1 Jilijba buli badajba langina, Silas baki Dimudi. Baki barlbayi Bul Yadinanyi. Jilajba nyuli bayungu yingkayurri barrawuyabarrawuyarri, niji Kurin.
ACT 18:2 Wabula barri, waluwa badajbayi Bul Kurinyurri, wanbiya buli nanaba, maykarra buli Juwuya. Nanda nawinganja, nangangi niji Yakila, nangangi ngardanganja birnandaba nangki nangangi karrurri yaji, niji Bundus. Nangangi maninganja, niji Brisila. Wabula jungku bulili nanaba bayangarri yajina niji Rum, nananyina walkurranyina yajina niji Yidali. Nanda walkurra mambuka nanankanyi yajinyi Yidalinyi, nangangi niji Kladiyus. Jirrinyba nyuli Jumuku, jayalu barlba nanamunanyi yajinanyi Rumnanyi. Jirrinyba nyuli nanamuku Jumuku bukambiju, jayalu barlba Rumnanyi. Baki nanankujarra maykarra, buli barlba karri Rumnanyi. Wanbiya buli Kurin, waluwa nyuli wanbiya Bul nanaba. Jilajba nyuli yidambiji bulanya maykarra, jala nyuli wanbiya nananyina yajina Kurin.
ACT 18:3 Ngarrkadaba bulili kanbiji, bakili buli yabimba wardara makanyi. Nani buli waki. Jungkuyi Bul nanaba barndana bulanbu. Marda nyulili ngarrkadaba yaji bulanbu. Malumba yalili waki.
ACT 18:4 Milidimba nyuli yalunya jurjina yurrngumba yingkana Sadidi, baki yingkana Sadidi, baki yingkana Sadidi. Milidimba nyuli yalunya, Jumuku marda Krikmuku. Nyuli nulijba yalungi, kuyunkanyi nangangi jangkurr Jisuskanyi.
ACT 18:5 Baku kandiwuya Bulkanyi, Silas marda Dimudi, wanbiya buli langina Masiduniyananyi. Wanbiya buli nanaba Kurin, baki Bul, miku nyuliya waki mili. Nyulili milidimba yalunya yurrngumba. Karu nyulili yalunya, Jumuku Jisuskanyi, nanda Jisus, nyuli Krayis.
ACT 18:6 Ngala yali yurlwa nanankanyi jangkurranyi. Miku yaliya kuyu nanda jangkurr Jisuskanyi. Nanamuku Jumuku yanyba yali balki jangkurr Bulkanyi. Baki nyuli dadarraba nangangi jumbala manjiykanyi jundurr Bulwanyi. Nani nyuli dadarraba nangangi jumbala jali yalu yurlwa jangkurr Kudkanyi. Yanyba nyuli yalungi Jumukuyngka, “Barriwa barri. Yanyba janyulu Kud narringi, narringka janybikanyi. Janyba janarringka, mikungangi janarri kuyu nangangi jangkurr. Yabimba ngayu nangangi yaji. Waki ngayu Kudkanyi. Karu ngayi narrinya nanganginkanyi jangkurranyi. Jalija ngaka janyba, baki mili jangana wankamba Kudwanyi. Ngala jalija narringka janyba, miku janarri wankijba mili nanganbu Kudnyina, mikungangi janarri kuyu nangangi jangkurr. Barriwa jangayu, milidimba jangayu yalunya ngurranyimuku yurrngumba barri.”
ACT 18:7 Baki yingijba nyuli nanganginmuku mungkijimuku. Yingijbayi yalunya Jumuku Bulwanyi. Barlba nyuli, baki jungku nyuli ngurranyina barndana, nangangi niji Dijus Jusdus. Maruka nyuli muwa Kudkanyi marda, ngurranyi. Nangangi barnda bundu wilina jurjina Jukanyi.
ACT 18:8 Manku nyuli nanda jangkurr Jisuskanyi nanangini mambukawanyi jurjkanyi, jali nyulu milidimba yalunya Bulwanyi. Kuyu nyuli nanda jangkurr mambukawanyi, niji nangangi Krisbus. Kuyu yali nanda jangkurr, nyulu, marda nanganginyi maninganjawanyi, marda nanganginmukunyi jandanyiwanyi. Jabarri yingkamukunyi, yali kuyu nanda jangkurr jali yalu manku, baki yalunjali ngurrunba.
ACT 18:9 Mungana barri nyuli buwarrajimba yaji Bulwanyi. Buwarrajimba nyuli yaji Jisuskanyi, nyulu yanybikurri nangangi Bulkanyi. Yanybayi Jisus nangangi, “Mikujiyi marrala. Milidimba janinji yalunya yurrngumba. Mikujiyi karda jungku. Yanybakiyi ninji milidimbikanyi yalunya.
ACT 18:10 Jungku ngayu nganyindu. Miku jayalu linjumba ninya, kuyungangi yalu ngaki jangkurr kudukuduwanyi, jala jungku nanginyina barrawuyabarrawuyana. Yalu barrinani ngaki kanyiyamuku marda.” Nani yanybayi Jisus nangangi Bulkanyi, jali nyulu buwarrajimba yaji.
ACT 18:11 Baki mili nyuli jungku nanaba Kurin yingamalinyina kindilkurrinyina baki mili burrandibijina. Milidimba nyulili yalunya yurrngumba nanganginkanyi jangkurranyi Kudkanyi.
ACT 18:12 Nanda walkurra mambuka Rumkanyi, nangangi niji Kladiyus, jungku nyuli Rum. Nyuli yarrijba yingka mambuka kubaminkanyi. Yarrijba nyuli mambuka nanankanyi yingkanyi walkurrayngka yajinyi Kriskanyi. Nanda mambuka Kriskanyi, nangangi niji Kaliyu. Nanamanji, jali Kaliyu nyulu mambuka Kriskanyi, nanamukunyi Jumukunyi nanaba Kurin, yabimba yali walkurra kiji nangangi Bulkanyi. Malumba yali jila Jumuku. Wudumba yali Bul, baki kuyu yali Bul kurdusyurri.
ACT 18:13 Kuyu yali Bul mambukarri Kaliyuyurri kurdusnyina. Karu yali nanda mambuka Bulkanyi. Yanyba yali, “Milidimbaka yalunya Bulwanyi, marda yalimi maruka muwa Kudkanyi, ngala miku nyulimi yanyba nanamannga jangkurranyi Musiskanyi marukanki muwa Kudkanyi. Yinini jangkurr nyulu yanyba. Milidimba nyulu yalunya yinini yuwana marukanki muwa Kudkanyi. Jala nyulu yanyba nani, baki jungku nyulu balkina yuwana Rumankanyi.” Nani yali yabimba kiji nangangi Bulkanyi.
ACT 18:14 Yuku nyuliyanyi jananganja mambuka Bulwanyi, ngala nanda mambuka Kaliyu, yanyba nyuli yalungi Jumukuyngka. Nayi nyuli yanyba, “Miku jangayu manku nanda jangkurr narringinkanyi yuwanyi Jukanyi. Miku jangayu manku jangkurr yuwanyi Musiskanyi, baki yingkanyi yuwanyi Jukanyi. Miku barri. Jalimi nyulu maninjakujba yaji, jalimi nyulu kurdanba yingka, baki jangayu yabimba yaji nangangi. Jalimi nyulu yabimba yaji barrinani nanda, jalimi nyulu jungku balkina yuwana Rumankanyi, baki jangayu manku narringi jangkurr. Ngala narri yanyba bayakardanyi jangkurranyi, marda narringinkanyi yuwanyi Jukanyi. Nanda narringi nanda yaji, Jukanyi. Miku nanda walkurra jangkurr nurrungi Rumankanyi. Miku jangayu yanyba nanginkanyi nganiyngkanyi Bulkanyi. Marda narringkimi yanyba nangangi.”
ACT 18:16 Baki nyuli karu yilarrmuku, jakajba yalunya Jumuku kurdusnanyi. Jakajba yali danbiyurri nanamuku Jumuku jali yabimba kiji Bulkanyi.
ACT 18:17 Jali yalu danbina kurdusnyina, baki wudumba yali nganinyi, niji Susdanis. Nanda Susdanis, nyuli mambuka jurjkanyi. Wudumba yali, baki daba yali. Daba yali mambuka jurjkanyi danbina kurdusnyina. Ngala nanda kubamin mambuka jakajba jali yalunya, manku nyuli yalunya daykurri nganinyi danbina. Jingkijba nyuli, yali daba nanda mambuka jurjkanyi nanamukunyi Jumukunyi. Jingkijba nyuli, ngala muningka nyuli jungku kalawunyi. Miku nyuliya kurrkunba yalunya. Barriwa.
ACT 18:18 Baki mili jungkuyi Bul nanaba Kurin yalunbu krisjinmukunyina. Jungku nyuli mardunguji, baki mili barlba nyuli wiji juju karri Siriyayurri. Barlba nyuli, baki waluku nyuli wanbiya bijal karru barrawuyabarrawuyana, niji Kinjiya. Ngala nyuli jungku nanaba, yanyba nyuli Kudkanyi ngiruka, miku yangkalambikanyi nanda jangkurr. Karu nyuli Kud, janyulu waki kudanyu Kudkanyi, marda maruka janyulu muwa Kudkanyi mili. Baki nyuli karlba nangangi nyungka bukamba. Nanamuku Jumuku, jalili yalu yanyba ngiruka Kudkanyi, miku yangkalambikanyi, yalili karlba yalungi nyungka bukamba, jalili yalu yanyba Kudkanyi nani. Baki miku yalili mili karlba nyungka, jardijbaja barri yuku. Barriwa. Baki nyuli birlbidamba karri kanjana wayayudi. Marda nanda maykarra Yakila baki Brisila, buli birlbidamba karri nanganbu.
ACT 18:19 Wanbiya yali barrawuyabarrawuyana, niji Yibisus. Baki jilajbayi Bul jurjyurri. Milidimba nyuli Jumuku. Jakakajba nyuli yalunya Jisuskanyi. Ngajaka yali Bul, nyulu jungunki nanaba yalunbu yurrngumba, ngala miku nyuliya jungku yalunbu yurrngumba. Karu nyuli yalunya, “Miku jangayu jungku nayiba. Miku. Barlba jangayu. Ngala jaliyi nyulu nulijba ngaki wiykanyi Kud, baki jangayu wijba narrindurri.” Baki barlba nyuli karri. Birlbidamba nyuli juju karri kanjana wayana. Ngala wambu nanda maykarra, Yakila marda Brisila. Wambu buli jungku nanaba Yibisus.
ACT 18:22 Birlbidambayi Bul juju karri wayana. Baki nyuli wanbiya nananyina yajina niji Sisariya. Mili nyuli jilajba kula Jirusalimyurri. Yanyba nyuli yalungi nanaba krisjinmukuyngka, baki nyuli mili barlba langki Yandiyukyurri, nananyina walkurranyina yajina Siriya.
ACT 18:23 Mardunguji nyuli jungku nanaba Yandiyuk, baki mili nyuli barlba. Birlbidamba nyuli nanankujarranyina yajina, Kalajiya marda Brijiya. Milidimba nyuli krisjinmuku nananyina kajana yajina. Milidimba nyuli yalunya yabimbiji yalunya ngiruka Jisuskanyi. Barriwa.
ACT 18:24 Wanbiyayi nganinyi Yibisus, nangangi niji Yabulus. Jali nyulu juka, jungku nyulili kularra Yalisandiya. Nyuli milidimbawarr jangkurranyi Kudkanyi, bakili nyulu milidimba kunyba. Nyuli jingkijbawarr najanyi Kudkanyi.
ACT 18:25 Milidimba yali nanda Yabulus Kudkanyi marda Jisuskanyi. Jingkijba nyuli Jisuskanyi, marda jingkijba nyuli nanda Jun, jalili ngurrunba yalunya. Ngala miku nyuliyanyi jingkijba, jalili yalu ngurrunba yalunya, kuyungangi yali nanda jangkurr Jisuskanyi. Miku nyuliya jingkijba ngurrunbikanyi yalunya Jisuskanyi. Ngawamba nyuli jingkijba Junkanyi, jali nyulu ngurrunba yalunya. Jali yalu ngindu, ngurrunba nyulili yalunya, jungkungangi yali balkina yuwana Kudkanyi.
ACT 18:26 Wanbiyayi Yabulus nanaba Yibisus, baki nyuli yanyba ngiruka jurjina. Milidimba nyuli yalunya Jisuskanyi, ngala miku nyuliya jingkijba yaji bukamba Jisuskanyi. Nanankujarra maykarra, Yakila marda Brisila, buli jungku nanaba jurjina marda. Manku buli nanda jangkurr, yanyba jali Yabulus. Baki buli kuyu Yabulus bulanginkurri barndarri. Baki buli karu Yabulus bukambijuyngka yajinyi, jali miku nyulu jingkijba Jisuskanyi.
ACT 18:27 Baku barri yanybayi Yabulus, janyulu barlba bayungu nanankurri yajiyurri Krisyurri. Yingkamukunyi krisjinmukunyi, yali manku nangangi jangkurr jilaykanyi Krisyurri, baki yali yarrijba jangkurr najana. Manjijba yali nanda naja bayungu nanganbu. Manjijba yali nanda naja krisjinmukuyngkurri nanaba Kris. Nanamukunyi jangkurrwanyi najana, karu yali krisjinmuku lalanbiji Yabulus, jalija nyulu wanbiya. Baku barlbayi Yabulus bayungu najayudi. Wanbiya nyuli Kris, baki nyulili milidimba yalunya jurjina. Yabimba nyuli yalunya ngiruka Kudkanyi, jala nyuli yanyba yalungi. Minimbayi yalunya Kudwanyi, nyulu maruka muwa yalungi, baki kuyu yali nangangi jangkurr.
ACT 18:28 Milidimba nyulili yalunya kunybanyi jangkurranyi. Ngala jakakajba yali Yabulus kudiyamukunyi Jumukunyi jurjina, ngala yanyba nyuli ngiruka jangkurr yalungi. Baki miku yaliya jananganja nanda Yabulus. Minimba nyulili yalunya nanginkanyi jangkurranyi najana Kudkanyi, “Nanda Jisus, nyuli Krayis, jali yanyba jangkurr najana Kudkanyi nangangi.” Nani nyuli milidimba yalunya Yabuluswanyi. Baki miku jakakajba mili nangangi.
ACT 19:1 Jungkuyi Yabulus Kurin, nananyina walkurranyina yajina Kris. Ngala nyuli yuwaji jungku nanaba, birlbidambayi Bul yundu bayungu yajina. Baki nyuli wanbiya barrawuyabarrawuyana, niji Yibisus. Kudiya krisjinmuku yali jungku nanaba.
ACT 19:2 Yali jungku nanaba 12 nganinymuku krisjinmuku. Ngajaka nyuli yalunya Bulwanyi, “Ngankijba kuna narrinbu nanda Kunyba Ngarndu Kudkanyi, jali narri kuyu nanda jangkurr Jisuskanyi. Ngankijba kuna kunyba Ngarndu Kudkanyi narrinbu.” Jananganja yali, “Miku nyuliya ngankijba nurrunbu. Miku nurrimi jingkijba nanda Kunyba Ngarndu Kudkanyi. Wanyi nanda.” Mili nyuli ngajaka yalunya, “Wanyingkanyi yali ngurrunba narrinya.” Baki yali jananganja Bul, “Ngurrunba yali nurrunya barrinani nanangini Junwanyi nyulili ngurrunba yalunya. Nani yali ngurrunba nurrunya.” Ngala nyuli yanyba yalungi, “Ngurrunba nyulili yalunya Junwanyi, jalili yalu ngindu yalunginkanyi balkinyi yajinyi mankankanyi. Ngurrunba nyulili yalunya jalili yalu ngindu nanankanyi balkinyi yajinyi. Ngala nyulili karu yalunya yingkanyi jalija nyulu wanbiya bayngkani nanganbu Junyina. Karu nyulili yalunya kuyunki nanda jangkurr yingkanyi, badajba jalija bayngkani Junyina. Nanda jalija bardajba bayngkani, badajba nyuli. Nyuli Jisus. Yanyba nyuli Jisuskanyi, jalili nyulu karu yalunya nanankanyi jangkurranyi Junwanyi.” Barriwa. Jali yalu manku nanda jangkurr Bulkanyi nanamukunyi krisjinmukunyi, baki yali nulijba Bulkanyi ngurrunbikanyi yalunya. Baki nyuli ngurrunba yalunya Jisuskanyi. Baki nyuli yarrijba marni yalunbu kulajina. Yinarramba ngankijba nyuli yalundu mankanyina Kunyba Ngarndu Kudkanyi. Baki yali yanyba yinini yinini yanyi. Baki yali yanyba jangkurr Kudkanyi.
ACT 19:8 Jungkuyi Bul nanaba Yibisus mardunguji. Kujarra baki yingamali yakarl nyuli jungku nanaba. Ngankijba nyuli jurjina Sadidi, baki yanyba nyuli yalungi. Milidimba nyulili yalunya kudanyu Kudkanyi yurrngumba jalili jungku nanaba. Milidimba nyuli yalunya Kudkanyi, lalanbikanyi yalunya Kudwanyi. Jakakajba nyuli yalunya Kudkanyi.
ACT 19:9 Ngala kudiya yali jardibirri muwa. Miku yaliyanyi kuyu nanda jangkurr Jisuskanyi. Yanyba yali balki jangkurr nanankanyi yuwanyi, milidimba jalili Jisuswanyi. Baki barlbayi Bul jurjnanyi, baki miku nyuliya wijba. Marda yali krisjinmuku, jilajba yali nanganbu jurjnanyi, jardibirringangi yali kudiya muwa. Jilajba nyuli walkurrayngkurri barrawurri. Nanda barrawu nangangi Diranuskanyi, yanybikanyi yaji. Ngabungabu nyulili yanyba Bul nanaba, milidimba nyulili yalunya Jisuskanyi.
ACT 19:10 Jilajba nyuli nanankurri yajiyurri yanybikanyi yurrngumba. Kujarranyina kindilkurrinyina nyulili jungku nanaba Yibisus, milidimbakili yalunya. Manku yali nanda jangkurr Jisuskanyi, yalu jalili jungku nananyina yajina Yasiya. Manku yali nanda jangkurr Jumukunyi marda ngurranyimukunyi.
ACT 19:11 Nanamanji yurrngumba nyuli yabimba kudukudu yaji ngiruka Bulwanyi. Yabimba nyuli ngiruka yaji, yabimbangangi Bul ngiruka Kudwanyi. Yabimbayi Bul ngiruka Kudwanyi, baki nyuli yabimba ngiruka yaji Bulwanyi.
ACT 19:12 Kuyu yalili jumbala, jalili marrimba Bulwanyi. Kuyu yalili jumbala yalundurri jali lunji, bakili yali marrimba yaji Bulkanyi, yalu jali lunji. Bakili yali kunybijba. Walajbakili wuwarrmuku yalunbunanyi mankanyinanyi, jalili yalu marrimba yaji Bulkanyi marda.
ACT 19:13 Ngala kudiya Jumuku, jilajba yalili yajina lukuluku, kunymambiji yalunya jali lunji. Yali barrinani yarrbirra. Yalili kunymamba yalunya jali lunji. Yaliyanyi manjijba wuwarr, barrinani Bulwanyi, nyuli manjijba yalunya. Nayi yalili jirrinyba, “Walajbakiyi mankanyinanyi, ninji wuwarr. Manjijba ngayu ninya mankanyinanyi barrinani Bul jali nyulu milidimba walaykanyi. Manjijba ngayu ninya wuwarr mankanyinanyi, Jisusngangi, nyulu ngiruka manjiykanyi.”
ACT 19:14 Kudiya Jumuku, buwawakula yali, 7-barri. Nijanganjinyi yalungi nangangi niji Skiba, nyuli mambuka jurjkanyi Jukanyi. Yali manjijba wuwarrmuku mankanyinanyi nani. Yaliyanyi manjijba wuwarr, barrinani manjijbayi Bulwanyi, jali nyulu yanyba Jisuskanyi.
ACT 19:15 Ngala yanybayi wuwarr yalungi, “Wanyi narri. Jingkijba ngayu nanda Jisus. Jingkijba ngayu Bul marda. Ngala wanyinmuku narri. Miku ngayu jingkiykanyi narrinya.”
ACT 19:16 Baki daba nyuli yalunya kudanyu barri nganinyiwanyi wuwarryudinyi. Daba nyuli yalunya kudanyu, baki yali wirlku nanganginbunanyi barrawunanyi. Linjumba nyuli yalunya, bakarrambayi jumbala yalungi. Wirlku yali barrawunanyi, mikuyaji jumbalanyi yalungi. Wakaramba nyuli.
ACT 19:17 Kudukudu yali manku nanda jangkurr, daykanyi yalunyi nganinyiwanyi wuwarryudinyi. Manku yali yaji Jumukunyi marda ngurranyimukunyi nanaba Yibisus. Krisjinmuku, marda nanamuku jala miku krisjin, marrala yali kudanyu. Marrala yali. Ngala yali jingkijba nanda Jisus nyulu ngirukamirra. Yanyba yali kunyba jangkurr nangangi.
ACT 19:18 Ngala kudukudu krisjinmuku, karrinja yali waluwa yingkamukunyina, baki karu yalunjali yalunginkanyi balkinyi yajinyi. Yabimba yali nanamuku balki yaji wabula, jali miku yalu krisjinmuku, baki karu yalunjali nanankanyi balkinyi yajinyi.
ACT 19:19 Ngala kudiyamuku krisjinmuku, wabula yalili yabimba yaji barrinani yarrbirra. Yarrijba yali nanda yarrbirra yaji najana. Kudukuduna najana yali yarrijba nanda yaji. Kudiyamuku jali yalu kuyu jangkurr Jisuskanyi, kuyu yali yalunginmuku naja, jala yanyba nanankanyi yarrbirranyi yajinyi. Dalburrijba yali nanda naja kaja, baki yali bakarrijba naja janguna. Najba yali naja janguna bakarriykanyi yingkamukunyi krisjinmukunyi. Wabula yali wajba kajanyi dungalanyi jali yalu wudumba nanda naja kaja. Wajba yali kajanyi dungalanyi 50,000 dula.
ACT 19:20 Jali yingkamukunyi yali manku nanda ngiruka yaji, kudukuduwanyi, yali kuyu nanda jangkurr Jisuskanyi. Kuyu yali nanda jangkurr kudukuduwanyi jali jungku barndana lukuluku. Mili baki mili yali kuyu jangkurr Jisuskanyi wandijiyana. Barriwa barri.
ACT 19:21 Baku barri mankumanku nangki Bul. Mankumanku nangki barlkanyi nyulu bayungu Masiduniyayurri. Birlbidamba janyulu bayungu Masiduniya marda Kris, baki mili janyulu wijba karrurriji Jirusalimyurri. Karu nyuli kandimuku, “Jangayu barlba bayungu Masiduniyayurri baki Krisyurri, baki baku barri mili janga wijba karrurriji Jirusalimyurri. Baku barri jangayu barlba mili bayungu Rumyurri.” Barriwa.
ACT 19:22 Manjijba nyuli kujarra kandiwuya nangangi, Dimudi marda Yirasdus. Manjijba nyuli bulanya Masiduniyayurri, ngala yuwaji nyuli jungku mardunguji nanaba Yasiya.
ACT 19:23 Nanamanji barri, kudukudu yali ngarrangarra muwa, kuyungangi yali yingkamukunyi kudukuduwanyi jangkurr Jisuskanyi.
ACT 19:24 Nananyina yajina Yibisus, walkurra barrawu nanaba barrinani jurj. Yabimba yali yaji barrinani jibarri. Yarrijba yali nanda kalawunyi barrawuna. Nanda yalungi kud. Niji nangangi Yardimis. Jilajba yalili nanankurri barrawurri, nanamuku jalili jungku nanaba Yibisus. Jilajba yalili yanybiji mududu nanankanyi marda briji nanankanyi kudkanyi Yardimiskanyi. Yabimba nyuli bayayawa barrawu junu nganinyiwanyi, nangangi niji Dimidriyus. Yabimba nyulili bayayawa barrawu barrinani nanda walkurra barrawu yalunginkanyi kudkanyi Yardimuskanyi. Marda yabimba nyulili bayayawa yaji junu malankarriyudinyi. Yabimba nyulili bayayawa yaji barrinani jibarri mankanyi yarriykanyi kalawunyi nananyina barrawuna. Yingkamukunyi yalunjalili wajba dungalanyi nanankanyi yajinyi. Yarrijba yalili nanda kalawunyi yalunginyina bayayawana barrawuna. Bakili yali yanyba mududu nanankanyi barrinani jibarrinyi. Nanda yalungi kud. Yabimba nyulili nanda bayayawa barrawu, marda yaji Dimidriyuswanyi. Marda kudiyamuku yalili waki nangangi. Yabimba yalili nanamannga yaji. Baki wudumba yalili kaja dungala nanankanyi.
ACT 19:25 Yabimba yalili nanda yaji junu yingkamukunyi marda. Baki nyuli karu yalunya, jalili yabimba nanda yaji Yardimiskanyi. Karu nyuli yalunya jilaji nangandurri Dimidriyuswanyi. Jungku yali malumba, baki yanyba nyuli yalungi. Nayi nyuli yanyba, “Mankukiyi ngaki jangkurr, narri kandimuku ngaki. Yabimba ngambala yaji malankarriyudinyi bunyalayudinyi. Yabimba ngambala kaja junu yaji barrinani nanda jibarri Yardimis, marda bayayawa barrawu Yardimiskanyi. Wajba yalunya ngambala yajinyi dungalanyi baki wudumba ngambala kaja junu dungala.
ACT 19:26 Jingkijba narri Bulkanyi. Karu nyuli yingkamuku nanankanyi yajinyi jala ngambala yabimba. Yanyba nyulu nayi, ‘Nanda yaji barrinani jibarri jali yabimba nganinyiwanyi, miku nanda kud.’ Jali yalu manku nanda jangkurr nangangi Bulkanyi, kudukuduwanyi yali kuyu nangangi jangkurr. Baki miku yalimi nulijba nanankanyi yajinyi jala ngambala yabimba. Kuyu yali nanda jangkurr kudukuduwanyi jala jungku nayiba Yibisus, marda yali jala jungku walkurranyina yajina Yasiya. Kuyu yali nanda jangkurr nangangi.
ACT 19:27 Wanyimba jangambala. Jaliyi miku yalu wudumba nayinda ngambalangi yaji barrinani jibarri, baki miku jangambala wudumba kaja dungala. Yalu jala jungku Yasiya, yalu yanyba kunyba jangkurr nanankanyi jibarrinyi Yardimiskanyi. Marda yalu jala jungku yingkana yajina, yanyba yalu kunyba jangkurr nangangi. Marda ngambalimi kurrkunba Bul karunkanyi Jisuskanyi. Jaliyi miku ngambala kurrkunba nangangi jangkurr, baki miku jayalu nulijba Yardimiskanyi. Jayalu mamanumba nangangi yaji Yardimiskanyi.” Nani nyuli yanyba yalungi.
ACT 19:28 Jali yalu manku nanda jangkurr, baki ngarrangarra yali muwa kudanyu. Kaya yali kudanyu barri, “Nanda jibarri Yardimis, nyulu walkurra kud Yibisuskanyi. Walkurra nyulu kud Yibisuskanyi.”
ACT 19:29 Kaya yali kudanyu, baki kudukuduwanyi manku yali nanda yalungi jangkurr. Kudukuduwanyi nananyina yajina Yibisus, manku yalunjali kayankurri kudanyu. Malumba yali jilajba, marda yali kaya nanda jangkurr kudkanyi Yardimiskanyi. Ngarrangarra yali muwa kudanyu barri, baki yali wudumba bulanya, niji bulangi Kayus baki Yarisdarkus, yaji bulangi Masiduniya. Bula kandiwuya nangangi Bulkanyi. Jilajba bulili nanganbu yurrngumba. Wudumba yali bulanya, baki kuyuyi burrandimbijina barrawuyabarrawuyana. Kuyu yali bulanya burrandimbijina yalunbu.
ACT 19:30 Ngala Bul barri, nyuliyanyi karrinja waluwa yalunbu yanybiji yalungi. Nyuliyanyi yanyba yalungi. Ngala kurrkunba yali Bul karrinjankurri nanganginyi kandimukunyi.
ACT 19:31 Marda kudiya mambukamuku barrawuyabarrawuyanyi, yali kandimuku Bulkanyi. Manjijba yali nganinyi Bulyurri. Jilajba nyuli Bulyurri. Karu nyuli Bul nanankanyi jangkurranyi yalungi mambukamukuyngka. Karu nyuli Bul, “Nganyi kandimuku mambukamuku, yanyba yali, ‘Marda ninjimi miku karrinja waluwa yalunbu, linjumbangangi jayalu ninya. Marda ninjimi wambu jungku barndana.’ Nani yali yanyba kandimuku nganyi.” Barriwa.
ACT 19:32 Ngala ngarrangarra yali muwa kudanyu barri, nanamuku jali karrinja malumba. Ngarrangarra yali muwa, baki kaya yali kudanyu barri. Yingkamuku yali kaya yingkanyi jangkurranyi. Yingkamuku yali kaya yingkanyi jangkurranyi, ngala yingkamukunyi miku yaliya jingkijba wanyingkanyi yali nanaba, wanyingkanyi nanaba yali kaya. Kaya yali bukambiju kudanyu barri, yingkanyi jangkurranyi, baki yingkanyi jangkurranyi. Kudukudunyi jangkurranyi yali kaya.
ACT 19:33 Ngala kudiyawanyi Jumukunyi, yarrijba yali nganinyi waluwa yalunbu. Karrinjarrijba yali nanda nganinyi waluwa yalunbu, nyulu karunki yalunya bukambiju kunybanyi jangkurranyi Jumukuyngka. Nangangi niji Yalisanda. Karrinjarrijba yali nanda yanybiji yalungi. Baki nyuli kawanyba marni yalungi, kurrkunbiji yalunya kayankurri. Kawanyba nyuli marni yanybiji yalungi.
ACT 19:34 Ngala yali najba nanda nganinyi Yalisanda, jingkijba yali nangangi, nyuli Ju. Baki yali kaya mili barri kudanyu. Nayi yali kaya yurrngumba, “Nanda jibarri Yardimis, nyulu walkurra mambuku, nanginkanyi yajinyi Yibisuskanyi nyulu kud.” Nani yali kayawa kudanyu barri, mili kudanyu barri, kujarraka.
ACT 19:35 Kamu barri, yingamali mambuka barrawuyabarrawuyanyi, kaya nyuli yalungi. Yabimba nyuli yalunya jungunkanyi karda, baki yanybayi yalungi. Nayi nyuli yanyba, “Mankukiyi ngaki jangkurr, narri jala jungku Yibisus. Yalu jala jungku bukambijunyina yajina, jingkijba yalu nanginkanyi yajinyi. Jingkijba yalu ngambalanya, ngambala lalanba nanda barrawu Yardimiskanyi. Nanda jibarri, nanda kud ngambalangi Yardimis, nyulu dungala. Nyulu nanda dungala, jali wabula kamambarra yirrbayi lalijinanyi. Nyulu nanda dungala jali yirrbayi jambarri.
ACT 19:36 Jingkijba yalu nanda bukambijunyi. Jingkijba yalu, jungku nyulu Yardimis nayiba. Jingkijba yalu nanda duja jangkurr. Marda narrimi jungku karda.
ACT 19:37 Kuyu narri bulanya Kayus marda Yarisdarkus. Kuyu narri bulanya nanginkurri. Marda miku narrimi linjumba bulanya. Miku bula maninjakuykanyi yaji. Miku buliya maninjakujba yaji barrawunanyi Yardimiskanyi. Miku buliya yanyba balki jangkurr nangangi Yardimiskanyi.
ACT 19:38 Nanamuku jala yabimba nayinda kiji, Dimidriyus baki nanamuku jalili yalu yabimba bayayawa barrawu junu marda yaji yarriykanyi kalawunyi, marda yalimi jilajba kurdusyurri. Jaliya yalungki mankumanku bulangi, jungku bula balki yalungi, baki marda yalimi jilajba kurdusyurri. Marda yalungka mankumanku bulangi.
ACT 19:39 Jaliyi narri nulijba yanybikanyi yingkanyi jangkurranyi nanankanyi kijinyi, marda narrimi yukumba bakunyi. Baku barri jayalu jungku nanginyina yajina, mambukamuku Yibisuskanyi. Baki marda narrimi karu yalunya mambukamuku nanankanyi jangkurranyi.
ACT 19:40 Marda narriyanyi miku jilajba nanginkurri jala barri. Marda narriyanyi miku yabimba kiji bulangi. Yiningki jayalungka mankumanku mambukamuku kubaminkanyi, kurdanba narri bulanya. Yiningki jayalungka mankumanku nani barri. Baki wanyi jangambala yanyba. Wanyingkanyi narri kayayi kudanyu. Miku ngambalimi jingkijba wanyi jangkurr jalija ngambala janangaja.”
ACT 19:41 Jali nyulu yanyba nani, jirrinyba nyuli yalunya wiykanyi yalunginkurri barndarri.
ACT 20:1 Jali yalu jungku kardarda, nanamuku jalili jungku Yibisus, baki Bulwanyi, nyuli manjijba jangkurr yalunburri krisjinmukuyngkurri. Manjijba nyuli jangkurr yalunburri, jayalu jila malumba nanginkurri. Jali yalu wanbiya nangandu, nyuli yanyba yalungi. Yanyba nyuli kunyba jangkurr Kudkanyi marda Jisuskanyi, baki mirnarrijba yali muwa nanankanyi jangkurranyi. Baki nyuli mudamba yalunya, baki yingijba nyuli nanda yaji yalungi Yibisus. Barlba nyuli bayungu. Birlbidamba nyuli nanda yaji Masiduniya.
ACT 20:2 Ngala nyuli jila, yanyba nyulili kunyba jangkurr yalungi Krisjinmukuyngka. Baki yali mirnarrijba muwa Jisuskanyi. Baki nyuli mili jilajba kula nanankurri yajiyurri Krisyurri.
ACT 20:3 Jungku nyuli nanaba kujarra yingamali yakarl. Ngala nyuli barringa barri barlkanyi nanamunanyi yajinanyi karrurriji Siriyayurri, ngala nyuli barringa barri barlkanyi, manku nyuli Jumukuyngka. Manku nyuli jangkurr yalungi, jayalu kurdanba Bul. Ngala jujamba nyuli yalunya Jumuku. Miku nyuliya barlba karri Siriyayurri, barlba nyuli langki Masiduniyayurri. Miku nyuliya barlba karri, ngala barlba nyuli langki. Jujamba nyuli yalunya.
ACT 20:4 Kudiyamuku krisjinmuku, yali barlba langki waluwa nangandu Bulnyina. Yingka, nangangi niji Subadirr, nangangi yaji Biriya, buwanganja nangangi niji Birus. Marda yingkawuya Yarisdarrkus marda Sikundus, bulangi yaji Disalunika. Yingkawuya Dikikus marda Drubimus, bulangi yaji Yasiya. Baki yingka, nangangi niji Kayus, nangangi yaji Dirbi, marda nanda Dimudi.
ACT 20:5 Barlba yali langki waluwa Druwasyurri, ngala baku barri ngali barlba langki. Ngayu, nayinda, jala yarrijba nayinda jangkurr najana, ngayu barlba langki marda nanganbu Bulnyina Bilibayiyurri.
ACT 20:6 Wanbiya ngali Bilibayi. Ngala ngali jungku nanaba, ngali jila wangarryurri niji Kangandijbayi Barrawuna Yajina. Nanankanyi wangarranyi niji Kangandijbayi Barrawuna Yajina, yalili jarrba wirimbil ngala nyulu mikuyaji bululunyi. Baku barlba ngali karri Bilibayinanyi wayana. Birlbidamba ngali kanjana karrurriji Druwasyurri. Jilajba ngali karri kanjana mardunguji, kujarrana baki kujarrana, baki barndaykana, baki ngali wanbiya barrawuyabarrawuyana Druwas. Yukumba yali ngalingi nanaba Druwas, nanamuku jali barlba waluwa. Yukumba yali nanaba yingamali wik.
ACT 20:7 Mungana Sadidi jungku nurri malumba barrawuna. Kaja krisjinmuku, yali nanaba nurrundu. Malumba nurri jungku baki jarrba nurri mama. Yanybayi Bul nurrungi. Milidimba nyuli nurrunya Jisuskanyi yurrngumba baralala, yingijbangangi janyulu yalunya munganawa.
ACT 20:8 Nanda barrawu jali nurru jungku, nanda wunanybala juju kingkarri. Jungku nurri kalawunyi nananyina yunduwanyina barrawuna. Marda kajana mirnbina kalawunyi jungku nurri.
ACT 20:9 Jungkuyi kaburr bayakardana bardawana naykanyi yaji. Nangangi niji Yudikus. Ngala nyuli yanybawa Bul, nanda kaburr kulukayi. Kuluka nyuli jali nyulu jungku bardawana, baki yirrba nyuli kingkarrinya juju wayka jambarri. Yirrba nyuli jambarri baki muyumba yali nanda kaburr, ngala janyba nangki. Janyba nangki, jali nyulu yirrba juju kingkarrinya.
ACT 20:10 Ngala karrala nyuli kingkarrinya wayka Bul, ngala nyulu kiliyi wayka nanda kaburr. Baki kulajarrijba nangki Bul yundu nanganbu ngulurrina. Marrimbayi wakulu, baki yanyba nyuli nurrungi, “Yuku barri, wankijbayi.”
ACT 20:11 Baki wijbayi Bul kingkarriji. Jarrba nyuli mama, baki mili nyulili milidimba nurrunya baralala, baki ngala nyulu kambalingijba yaji, baki barlba nurri.
ACT 20:12 Kuyu yali kaburr yingkamukunyi. Kuyu yali kaburr nanganginkurri barndarri. Wanka nyuli jungku. Kunybijbayi mankanyi. Baki yali mirnarrijba muwa nangangi.
ACT 20:13 Karu nyuli nurrunya Bulwanyi, janyulu buwandijba nananyina mulumuluna nukamina, ngala janurru barlba lukuluku wayana. Baki jilajba nyuli Druwasnanyi buwandijba kula nukamina, ngala nurri jila wayana barrawuyabarrawuyarri Yasusyurri kulanaynga.
ACT 20:14 Jali nurru wanbiya Yasus, yukumbayi Bul nanaba nurrungi, baki nyuli ngankijba wayana nurrundu. Jilajba nurri mili kula wayana yingkayurri yajiyurri, niji Midilin.
ACT 20:15 Mili nurri jila kula kanjana, baki munganawa kangandijba nurri kula waliyanguna bayungu, niji Kiyus. Mili nurri jila kula, baki munganawa kangandijba nurri yingkana waliyanguna bayungu, niji Samus. Baki munganawa nurri wanbiya Milidus.
ACT 20:16 Karu nyuli nurrunya Bulwanyi, janyulu jila mili wayana, miku janyulu jilajba Yibisusyurri. Kangandijba janyulu Yibisus karriya. Yuwarlmba janyulu jila Milidusyurri. Nulijba nyuli barlkanyi dulu Jirusalimyurri. Nulijba nyuli wanbiyankanyi Jirusalim waluwa nanda wangarr, niji Bindikus.
ACT 20:17 Jali nurru wanbiya Milidus, nyuli manjijba nganinyi langki Yibisusyurri Bulwanyi. Manjijba nyuli nanda nganinyi karunki malbumalbu krisjinmuku jurjkanyi, jayalu badajba nangandurri Milidusyurri.
ACT 20:18 Jali yalu wanbiya langina, yanyba nyuli Bul yalungi nayinda jangkurr, “Jingkijba narri ngaki yurrngumba nanankardi jali ngayu jalannga wanbiya narrinbu Yibisus.
ACT 20:19 Jungku ngayi kunyba Kudkanyi. Waki ngayi Kudkanyi yurrngumba, ngala ngayi jungku narrinbu. Miku ngayiya yanyba kunyba jangkurr ngaki. Ngindu ngayi muwa yalungi Jumukuyngka, jali yalu yabimba kaja kiji ngaki.
ACT 20:20 Ngana narri jingkijba, karu ngayi bukamba yaji Jisuskanyi. Milidimba ngayi narrinya bukamba nanda jala marda narrimi jingkijba Kudkanyi marda Jisuskanyi. Baki narri jungku kunyba Krisjinmuku jali narri jingkijba nanda jangkurr bukamba, jali ngayu milidimba narrinya. Milidimba ngayi narrinya narringinyina barndana marda barrawuyabarrawuyana.
ACT 20:21 Karu ngayi yalunya Jumuku, marda ngurranyimuku. Karu ngayi yalunya, jungku jala balkina yuwana, marda yalimi ngindu yalunginkanyi balkinyi yajinyi. Marda yalimi jila kunybana yuwana. Marda yalimi maruka muwa Kudkanyi marda Jisuskanyi. Marda yalimi kuyu nangangi jangkurr Jisuskanyi. Nani ngayi milidimba yalunya.”
ACT 20:22 Mili yanybayi Bul yalungi, “Nayimanji ngayuja barlba Jirusalimyurri, jirrinybangangi ngana Kunybawanyi Ngarnduwanyi Kudkanyi. Jirrinyba nyuli ngana, ngayuja barlba Jirusalimyurri. Wanyimba jayalu ngaki nanaba. Miku ngayiyi jingkijba yaji ngaki.
ACT 20:23 Ngala jingkijba ngayu nanda jali nyulu karu ngana Kunybawanyi Ngarnduwanyi Kudkanyi. Karuyi ngana Ngarnduwanyi Kudkanyi jali ngayu jungku yingkana barrawuyabarrawuyana, baki yingkana barrawuyabarrawuyana. Karuyi ngana, jayalu yabimba kiji ngaki. Kaja kiji jayalu yabimba. Karuyi ngana, janganjalu yarrijba brisinyina, janganjalu linjumba.
ACT 20:24 Ngala nulijba ngayu yabimbikanyi nanda yaji jala nyuli karu ngana yabimbiji. Jangayu yabimba nanda yaji jalija nyulu karu ngana ngakinyi mambukawanyi Jisuswanyi. Karu nyuli ngana, ngayu milidimbiji yalunya. Marda yalimi kuyu nanda jangkurr Jisuskanyi, baki manjamanjambaja yalungi balki yaji Kudwanyi. Karu nyuli ngana yabimbiji nanda yaji, milidimbiji nani. Baki mirnarrijba jangayu muwa jaliyi ngaka janyba.
ACT 20:25 Ngala ngayi jilajba lukuluku barndamukunyina, ngayi milidimba narrinya Kudkanyi, jala lalanba nyuli narrinya. Lalanba nyuli narrinya Kudwanyi, jala narri maruku muwa nangangi Kudkanyi, jala narri ngayangayijba nangangi jangkurr. Nayimanji ngayu jingkijba, miku janarri najba ngana mili. Miku jangayu wijba nanginkurri mili buyingkinyina narrinburri.
ACT 20:26 Karu ngayu narrinya kudanyu. Jaliyi nganinyi, miku janyulu kuyu ngaki jangkurr, baki miku janyulu wankijba mili Kudnyina. Miku janyulu wankamba nanda Kudwanyi jalija nangka janyba. Ngala miku nyuliyi ngarrangarra muwa ngaki, mikungangi wankambaja nanda mili Kudwanyi. Miku nyuliyi ngarrangarra muwa ngaki. Karu ngayi Jisuskanyi, ngala miku nyulimi kuyu nanda ngaki jangkurr.
ACT 20:27 Karu ngayi narrinya nanankanyi jangkurranyi Kudkanyi. Nanda jangkurr yurlurr, duja. Karu ngayi narrinya nanankanyi jangkurranyi bukambijuyngka, jali nyulu karu ngana yanybiji Kudwanyi.
ACT 20:28 Narri malbumalbu. Lalanba narringkiyi, marda lalanbakiyi yalunya bukambiju krisjinmuku narringinyina jurjina. Wajba nyuli narrinya yalungi Kunybawanyi Ngarnduwanyi Kudkanyi, narri lalanbiji yalunya. Marda narrimi lalanba yalunya barrinani yalu lalanba sib. Yalu lalanbawarrmuku sibkanyi. Nani barri marda narrimi lalanba yingkamuku krisjinmuku nayiba Yibisus. Narri krisjinmuku, narri Kudkanyi. Nanda Jisus, nyulu jandanyi Kudkanyi. Nyulili jungku kunyba yurrngumba. Miku nyuliya jungku balki, ngala janyba nangki ngamanginkanyi balkinyi yajinyi mankankanyi. Manjamanjamba janyulu ngambalangi balki yaji Kudwanyi, janybangangi nangki Jisus, ngamanginkanyi balkinyi yajinyi.
ACT 20:29 Jingkijba ngayu, jangayu barlba nanginbunanyi yajinanyi, baki baku barri bayngkani jayalu badajba. Badajba jayalu, yingkamuku milidimbawarrmuku. Milidimba jayalu narrinya nanankanyi jangkurranyi, jalija miku duja. Jujamba jayalu narrinya. Jujamba jayalu Jisuskanyi. Mankumanku narringkiyi warrkinyi. Jala wakaramba sibmuku warrkiwanyi, yabimba nyulu walkurra kiji yalungi, linjumba nyulu yalunya. Nani barri narringi, jalija yalu badajba yingkamuku milidimbiji nanankanyi jangkurranyi, jala miku duja. Jalija yalu badajba, jayalu yabimba walkurra kiji narringi. Lalanba narringkiyi, marda lalanbakiyi yingkamuku krisjinmuku jalija yalu badajba, jalija yalu milidimba nanankanyi jangkurranyi, jala miku duja. Lalanbakiyi narringka marda yalunya, barrinani yalu lalanba sib, jala badajba warrki sibkanyi. Nayinda jangkurr jala ngayu karu narrinya, nayinda duja yurlurr jangkurr ngiruka.
ACT 20:30 Baku barri kudiya kandimuku jalija jungku narrinbu jurjina, jayalu jujijba. Jayalu yangkalamba nanda jangkurr Jisuskanyi. Jayalu jujijba, kuyunki yingkamuku Jisusnanyi. Jayalu jujijba, jayalungka yabimba walkurra mambuka.
ACT 20:31 Najbawakiyi yalunya. Mikujiyi kuyu yalungi jangkurr, jalija yalu jujamba narrinya. Mankukiyi yaji ngaki yurrngumba. Milidimba ngayi narrinya yurrngumba, kujarranyina baki yingamalina kindilkurrinyina. Milidimba ngayi narrinya kambana marda mungana, baki ngindu ngayi muwa narringi marda. Mikujiyi mamanumba nanda jangkurr jali ngayu milidimba narrinya, baki mikujiyi kuyu yalungi jangkurr jalija yalu jujijba.” Barriwa.
ACT 20:32 Mili yanybayi Bul yalungi, “Nanijba barri ngayu ngajaka Kud, nyulu lalanbiji narrinya. Nyulu kunyba. Janyulu lalanba narrinya. Janarri jungku ngiruka Kudkanyi, jaliyi narri manku nangangi jangkurr. Marukangka Kud muwa narringi. Janyulu yabimba kunyba yaji narringi. Janyulu yabimba narrinya ngiruka durriykanyi nangangi yuwa Kudkanyi. Janyulu yabimba kunyba yaji bukambijuyngka, nanganginkanyi nganiyngkanyi marda jibarrinyi. Barriwa.
ACT 20:33 Miku ngayiya ngajaka narrinya dungalanyi mamanyi jumbalanyi. Miku.
ACT 20:34 Jingkijba narri. Waki ngayi ngakinyina marnina dungalanyi. Waki ngayi dungalanyi wudumbiji ngaki yaji. Wudumba ngayi dungala jali ngayu waki, baki ngayi wudumba jumbala marda mama ngaki. Wudumba ngayi yaji yalungi marda, ngakinkanyi kandimukuyngka.
ACT 20:35 Minimba ngayi narrinya nanginkanyi. Jala ngambala waki kudanyu, wudumba ngambala kaja dungala. Baki yuku ngambala wajba yajinyi yalunya jala miku yalu ngiruka wakinkanyi. Marda ngambalakimi mankumanku nanankanyi jangkurranyi jali yanyba Jisus. Nayi nyuli yanyba, ‘Jaliyi narri wajba yingka yajinyi, baki janarri mirnarrijba muwa kudanyu. Ngala jaliyi narri kuyu nanda yaji jala wajba narrinyi yingkawanyi, baki janarri mirnarrijba muwa ngawamba bijal.’”
ACT 20:36 Nani yanybayi Bul yalungi barriwa. Baki nyuli mururu wayka yalundu, baki yanyba nyuli mududu Kudkanyi. Malumba yali mururu wayka, yanybayi Kudkanyi.
ACT 20:37 Ngindu yali muwa Bulkanyi. Yali marrimba nanda Bul, baki mudamba yali nangangi.
ACT 20:38 Ngindu yali muwa kudanyu barri nanankanyi jangkurranyi jali nyulu yanyba barrin, miku janyulu najba yalunya mili. Ngindu yali muwa kudanyu barri nanankanyi jangkurranyi. Baki yali barlba wayka nangandu wayarri mudambiji Bul. Manjijba yali Bul. Barriwa.
ACT 21:1 Mudamba nurri yalunya, malbumalbumuku Yibisuskanyi, baki ngankijba nurri wayana. Yingijba nurri nanda yaji Milidus. Birlbidamba nurri kula kanjana waliyangurri kularra, nangangi niji Kus. Munganawa nurri barlba kula yingkayurri waliyangurri, niji Rudis, baki mili nurri barlba karri yajiyurri, niji Badara.
ACT 21:2 Walajba nurri wayananyi nanaba Badara, baki wakaramba nurri yingka waya. Jilajbaja nanda yingka waya mili karri Bunijiyayurri. Ngankijba nurri nananyina wayana, baki barlba nurri karri juju Bunijiyayurri.
ACT 21:3 Barlba nurri mardunguji, baki najba nurri waliyangu langkiya niji Sayibris, ngala barlba nurri kulaya karri waliyanguna. Barlba nurri mili karri Bunijiyayurri, baki wanbiya nurri barrawuyabarrawuyana niji Daya. Nanda barrawuyabarrawuya Daya nananyina walkurranyina yajina Bunijiya. Walajba nurri wayananyi nanaba, baki jungku nurri yundu jambana. Dulaba yali yaji junu muwardananyi nanaba Daya, nanda yaji jali yalu kuyu bayunguna. Mardunguji nurri jungku nanaba Daya, ngala yali dulaba yaji wayananyi, jabarri yarrijbayi yingka yaji junu nanaba wayana, kuyuja yingkayurri yajiyurri.
ACT 21:4 Jungku yali nanaba, kudiya krisjinmuku, baki jungku nurri yalundu yingamali wik. Karu nyuli yalunya krisjinmuku jangkurranyi Kunybawanyi Ngarnduwanyi Kudkanyi. Karu nyuli yalunya jangkurranyi Ngarnduwanyi Kudkanyi, baki yali karu Bul nanankanyi jangkurranyi. Karu yali Bul nanganginkanyi jangkurranyi Kunybanyi Ngarndunyi Kudkanyi. Yanyba yali Bulkanyi, “Mikujiyi ninji barlba Jirusalimyurri. Mikujiyi barlba nanankurri yajiyurri.” Nani yali yanyba Bulkanyi.
ACT 21:5 Ngala barlba nurri, birrirrinja jali nangka waya. Bukambiju yali jilajba nurrundu barrawuyabarrawuyananyi wayka wabudarri. Jilajba yali nurrundu wabudarri mudambiji nurrunya. Nganinyimuku marda yalungi maninganja, marda bayamuku, jilajba yali nurrundu wayarri. Mururu nurri wayka jambana kanjana, baki nurri yanyba mududu Kudkanyi.
ACT 21:6 Baki mudamba nurri yalunya, baki ngankijba nurri wayana, ngala yali wijba yalunginkurri barndarri.
ACT 21:7 Barlba nurri kula wayana, yingkayurri yajiyurri, niji Dulimayis. Najba nurri yalunya krisjinmuku nanayina yajina, baki jungku nurri yalundu yingamalinyina kambana.
ACT 21:8 Munganawa barlba nurri mili kula wayana, yajiyurri, niji Sisariya. Nanda jala milidimba yalunya Jisuskanyi, niji Bilib, nyuli jungku nanaba Sisariya. Nanda Bilib, nyuli yingamali yalungi nanamukuyngka 7kanyi jali wabula juju yali yarrijba lalanbikanyi miyajimuku nanaba Jirusalim.
ACT 21:9 Kujarra baki kujarra jandanyimuku nangangi Bilibkanyi wurrumbarramuku, mikuyaji yalungi nawinganjanyi. Yanyba yalili jangkurranyi Kudkanyi. Barlba nurri nanganginkurri barndarri, baki mardunguji nurri jungku nangandu, Bilibnyina.
ACT 21:10 Mardunguji barri, ngala nurri jungku nanganginyina barndana, wanbiya nyuli nganinyi, nangangi niji Yakabus. Nyulili karu nanankanyi jangkurranyi Kudkanyi. Jilajba nyuli kulani Judiyananyi, yaji niji.
ACT 21:11 Jungku nyuli nurrundu, baki dulaba nyuli drabu ngulurrnanyi Bulnanyi. Dulaba nyuli drabu, baki kijijba nangki marni marda nukami drabuyudinyi. Baki yanyba nyuli nurrungi, “Nayi yanyba nyulu nanda Kunyba Ngarndu Kudkanyi. Yanyba nyulu nanginkanyi jangkurranyi, ‘Nayi jala ngaka kijijba, nani jayalu barri kijijba nanda jala nayinda nangangi drabu. Nani jayalu kijijba nanda Jumukunyi Jirusalim. Baki jayalu manjijba nanda yalunburri, ngurranyimukuyngkurri.’” Barriwa.
ACT 21:12 Jali nurru manku nanda jangkurr, mili baki mili nurrili ngakaja Bul, miku nyulu barlkanyi mili Jirusalimyurri.
ACT 21:13 Ngala jananganja nyuli Bulwanyi, “Wanyimba narri ngaki. Wanyingkanyi narri ngindu ngaki nani. Birrirrinja ngaka yalungi, jalija yalu kijijba ngana. Birrirrinja ngaka janybikanyi ngaka Jisuskanyi. Janyba jangaka jaliyi nyulu nulijba ngana janybikanyi ngaka Jisuswanyi.”
ACT 21:14 Miku nyuliya yabimba Bulwanyi nanda jali nurru ngajaka. Miku nyuliya wambu jungku. Baki kurrkunba nurri ngajakankanyi. Yanyba nurri, “Yabimba janyulu Kudwanyi nanda jala nyulimi yabimba.” Barriwa.
ACT 21:15 Mardunguji nurri jungku nanaba barndana Bilibkanyi, baki wudumba nurrili yaji junu nurrungi, baki barlba nurri kula nukamina.
ACT 21:16 Jilajba yali nurrundu kudiya krisjinmuku, jalili jungku Sisariya. Jala nurri wanbiya Jirusalim, kuyu yali nurrunya barndarri nganiyngkanyi, nangangi niji Minasun, nangangi yaji Sayibris. Nanda, nyuli kandi Jisuskanyi wabula juju. Nyuli jungku krisjin yurrngumba wabulinyi. Jungku nurri nangandu, nanganginyina barndana nanaba Jirusalim.
ACT 21:17 Jala nurri wanbiya Jirusalim, baki mirnarrijba yali muwa krisjinmuku, jali yalu najba nurrunya. Mirnarrijba yali muwa nurrungi barri.
ACT 21:18 Munganawa jilajba nurru marda Bul. Jilajba nurri yidambiji Jayims. Bukambiju malbumalbu jurjkanyi yali jungku nanaba nanganbu marda.
ACT 21:19 Yanybayi Bul yalungi, “Nanama narri.” Baki nyuli karu yalunya bukambijuyngka yajinyi jali yabimba Kudwanyi ngurranyimukuyngka. Karu nyuli yalunya yajinyi jali yabimba Kudwanyi, jala nyuli milidimba yalunya Bulwanyi.
ACT 21:20 Baki yali yanyba kunyba jangkurr Kudkanyi, jali yalu manku nanda jangkurr Bulkanyi. Baki yali yanyba Bulkanyi nayi, “Jungku nurru mirnarrijba muwa nganyi, ngala kudiya Jumuku Jirusalim, yalu kunyba krisjinmuku, ngala miku yalu kudanyu mirnarrijba muwa nganyi. Kaja Jumuku, wirdikudukudu Jumuku, nayiba yalu krisjinmuku, yalu kunyba krisjinmuku, ngala yuwaji yalu jungku kunybana yuwana Musiskanyi.
ACT 21:21 Yingkamukunyi yalunjali karu krisjinmuku jangkurranyi nganyi, jala ninji milidimba. Ngala miku ninjiya milidimba nanankanyi jangkurranyi jali yalu karu. Yalu yanyba, milidimba ninji Jumuku jala jungku ngurranyina yajina. Milidimba ninji yalunya mamanumbiji nanda yuwa Musiskanyi. Karu ninji yalunya, yuku yalu miku kaburrmba bardarda. Karu ninji yalunya marda, yuku yalu miku yabimba nanda yaji jalili karu wankalanyi yuwanyi. Yingkamuku yali yanyba nganyi, ninji milidimba nanankanyi jangkurranyi. Ngala miku nanda jangkurr duja, jala yalu yanyba. Nurru jingkijba, miku ninjiya milidimba nani.
ACT 21:22 Manku jayalu, ninji wanbiya Jirusalim, nanamukunyi krisjinmukunyi. Wanyimba janurru barri. Wanyimba janurru.
ACT 21:23 Marda ninjimi yabimba nanda jalija nurru karu ninya. Kujarra baki kujarra nganinyi nayiba, yali yanyba Kudkanyi ngiruka, miku yangkalambikanyi nanda jangkurr. Karu yali Kud, jayalu waki kudanyu nangangi, marda jayalu maruka muwa Kudkanyi mili.
ACT 21:24 Marda ninjimi barlba yalundu, baki janarri yabimba wangarr walkurranyina jurjina. Yanybaka nanda yuwa Musiskanyi, marda narrimi wajba Kud barnyinyi baku barri yingamali wik. Baku barri yingamali wik janarri yabimba nanda wangarr, janarri jilajba jurjyurri. Janinji wajba mambukamuku jurjkanyi nanankanyi barnyinyi barrinani yanybayi Musis. Janinji wajba barnyinyi bukambijuyngka narringi. Jalija ninji yabimba nani, baki jayalu karlba nyungka bukamba. Jayalu jingkijba bukambijunyi, ninji jungku kunybana yuwana Musiskanyi, yabimbangangi ninji nanda wangarr yalundu. Jayalu jingkijba nanda jangkurr nganyi, jali yalunjalu karu yingkamuku, miku nanda duja. Jayalu jingkijba, miku ninjiya milidimba nayinda, ‘Marda miku yalimi ngayangayijba yuwa Musiskanyi.’ Jingkijba jayalu nanda jangkurr miku nanda duja, jungkungangi ninji kunybana yuwana.” Barriwa.
ACT 21:25 Mili yali yanyba nangangi Bulkanyi, “Ngala ngurranyimuku krisjinmuku, manjijba nurri naja yalunburri. Nanda jangkurr nananyina najana yanybaka, marda yalimi miku jarrba mama ngala yalu waluku wajba yajinyi yalungi kud, ngala miku nanda kud. Marda yalimi miku jarrba ngulya, marda yalimi miku jarrba barnyi jala muningka yalu dalyamba janki marniyudinyi, yuwaji ngulyayudi. Marda yalimi miku kuluka yingkana nganinyina jibarrina, miku jala yalungi kayikayi. Nani jayalu jungku kunyba Kudkanyi jaliyi yalu yabimba nayinda yaji. Yarrijba nurri nanda jangkurr najana ngurranyimukuyngka.” Barriwa. Nani yanybayi malbumalbu krisjinmuku Bulkanyi.
ACT 21:26 Jilajbayi Bul, baki yabimba nyuli nanda jali yanybayi malbumalbu nangangi. Munganawa yali jilajba walkurrayngkurri jurjyurri, kujarra baki kujarra nganinymuku baki Bul. Yabimba yali wangarr, baki yali karu mambukamuku jurjkanyi, jayalu wajba barnyinyi baku barri yingamali wik.
ACT 21:27 Baku barri, ngala buyingka barri, nyulu jilijba yingamali wik, yali najba Bul walkurranyina jurjina. Najba yali Bul kudiyawanyi Jumukunyi, jungku jalili yalu walkurranyina yajina Yasiya. Yidamba yali Jirusalim. Najba yali Bul walkurranyina jurjina, baki yabimba yali kiji nangangi. Wajba yali yalunjali yingkamuku kijinyi. Ngarrangarra yalu muwa Bulkanyi, baki marrimba yali Bul.
ACT 21:28 Kaya yali kudanyu, “Narri, narringi yaji Yisrayil. Narri, kabukawa. Najba narri nayinda. Nayinda barri, nyulu jilajba lukuluku kajana yajina milidimbikanyi yingkamuku. Milidimba nyulu yalunya, marda yalimi miku ngayangayijba yuwa Musiskanyi. Yabimba nyulu kiji nanginyina jurjina marda. Nayimanji nyuli kuyu ngurranyimuku kalawunyi jurjina. Jungku nyulu balkina yuwana, jala nyulu yabimba nanda yaji, jala nyuli kuyu ngurranyi kalawunyi jurjina.”
ACT 21:29 Nani yali kaya kudanyu, najbangangi yali nanda ngurranyi, nangangi niji Drubimus. Nanda ngurranyi nangangi yaji Yibisus. Najba yali Bul nangandu nananyina ngurranyina, ngala buli jilajba barrawuyabarrawuyana. Ngamukiya Bulwanyi kuyuyi ngurranyi jurjyurri, ngala mikukiya kuyu.
ACT 21:30 Yabimba yali walkurra kiji nangangi Bulkanyi nanaba barrawuyabarrawuyana, nanankanyi jangkurranyingangi. Malumba yali wirlku. Marrimba yali Bul, baki wililijba yali jurjnanyi. Yinarramba yali murumba bardawa jurjina mambukawanyi jurjkanyi.
ACT 21:31 Daba yali Bul kudanyu barri murawanyi, kurdanbiji. Ngala wirlkuyi nganinyi mambukarri ngarrkadabawarrayngka Rumankanyi. Karu nyuli mambuka, “Yabimba yalu walkurra kiji Jumukunyi.”
ACT 21:32 Yinarramba barlba nyuli, mambuka Rumankanyi, marda kudiya ngarrkadabawarrmuku nangandu. Dulu yali wirlku murayurri. Jali yalu najba mambuka Rumankanyi marda nanamuku ngarrkadabawarr nangandu, kurrkunba yali miku daykanyi Bul.
ACT 21:33 Nanda mambuka, jilajba nyuli Bulyurri, marrimba nyuli Bul, baki jirrinyba nyuli ngarrkadabawarrmuku jayalu kijijba Bul kujarrayudinyi kijbakijbayudinyi. Baki ngajaka nyuli yalunya mambukawanyi, “Wanyi nayinda nganinyi. Wanyimba nyuli.”
ACT 21:34 Kaya yali kudanyu barri nangangi jananganjanyi mambuka. Yingkamukunyi yali kaya yingka jangkurr, yingkamukunyi yali kaya yingka jangkurr. Manjamanjamba yalungki kudiyamuku yalunginkanyi jankurranyi. Miku nyuya manku jangkurr mambukawanyi. Miku nyuliya jingkijba nanda kiji. Baki jirrinyba nyuli ngarrkadabawarrmuku yalu kuyunki Bul yalunginkurri barrawurri.
ACT 21:35 Kuyu yali Bul dungalarri. Nanda dungala kirriykanyi kingkarri barrawarri yalunginkanyi barrawunyi. Baki yali wirdiwirdi Bul kingkarri kurrkunbiji yalunya, mikuwali yalu daba mili.
ACT 21:36 Ngala yali kirrijba dungalana, kaya yali kudanyu barri nanamukunyi kijiyudinyi. Nayi yali kaya, “Kurdanbakiyi nayinda nganinyi. Kurdanbakiyi.”
ACT 21:37 Ngala yali barringa barri kuyu Bul kalawunyi barrawuna, baki yanybayi Bul mambukanyi. Yanyba nyuli Krik yanyi, “Mambuka, jangayu yanyba nganyi.” Yanybayi mambuka Bulkanyi, “Yanyba ninji Krik yanyi.
ACT 21:38 Miku ninji nanda nganinyi, nangangi yaji juju kularra Yijib. Miku ninji nanda jali wudumba wirdukudukudu nganinyimuku dabanki nurrunya Rumanmuku. Baki barlba yali nanganbu mangkurruna 4000 barri, yali barlba dabawarr nanganbu. Miku ninji nanda nganinyi. Yinini ninji.”
ACT 21:39 Jananganjayi mambuka Bulwanyi, “Ngayu Ju. Ngaki yaji langkurri Darsus. Nanda Darsus walkurra barrawuyabarrawuya, nananyina yajina Silisiya. Ngayanyi yanyba yalungi muranyi.”
ACT 21:40 Yanybayi mambuka Bulkanyi, “Yi. Janinji yanyba yalungi barri.” Baki karrinjayi Bul yundu dungalana, kawanyba nyuli marni yalungi muranyi. Jali yalu karrinja karda, baki nyuli yanyba yalungi Ju yanyi.
ACT 22:1 Nayi yanyba nyuli Bul yalungi muranyi, “Narri, ngaki mungkijimuku. Mankukiyi ngaki jangkurr.”
ACT 22:2 Jali yalu manku Bul yanybikurri yalungi Ju yanyi, jungku yali karda mili.
ACT 22:3 Mili yanybayi Bul, “Ngayu Ju. Ngaki yaji Darsus, walkurranyina yajina Silisiya, ngala ngayi jardijba nayiba Jirusalim. Nanda mambuka yuwanyi Musiskanyi niji Kamaliyil, ngana nyuli milidimba. Milidimbayi kudanyu bukambijuyngka yuwanyi Musiskanyi, baki ngayu maruka muwa Kudkanyi, barrinani narri maruka muwa nangangi. Barriwa.
ACT 22:4 Kujba ngayi nanamukuyngka, durrijba jali jangkurr Jisuskanyi. Yabimba ngayi walkurra kiji yalungi. Wudumba ngayi yalunya, baki manjijbayi yalunya brisinyurri. Nganinymuku baki jibarrimuku ngayi manjijba brisinyurri, baki kurdanbayi jawuda yalunya yingkawanyi.
ACT 22:5 Yalu jingkijba nayinda jangkurr duja walkurranyi mambukawanyi jurjkanyi, marda bukambijunyi kunsilkanyi. Yalu jingkijba nayinda duja jangkurr. Ngajaka ngayi yalunya najanyi, baki yarrijba yali jangkurr najana Jumukuyngka langku Damaskus. Wajba ngananjali nanankanyi najanyi, kuyunkanyi langki Damaskusyurri. Yanybayi nanda jangkurr najana ngayu wudumbiji nanamuku krisjinmuku. Baki jangayu kijijba yalunya kijbakijbayudinyi, baki jangayu yalunya wiykunumba Jirusalimyurri. Baki linjumba jayalunjalu mambukamukunyi kunsilkanyi. Nani yanybayi nanda jangkurr, yarrijba jali najana mambukawanyi kunsilkanyi.”
ACT 22:6 Mili barri yanybayi Bul yalungi, “Mukunjana barri, ngala ngayi jilajba bundu Damaskus, wambarrardbayi walkurra mirnbi, yajina lukuluku ngakindu. Wambarrardbayi nanda mirnbi lalijinanyi ngakindu lukuluku.
ACT 22:7 Yirrba ngayi jambarri, baki ngayu manku nayinda jangkurr, ‘Sul. Sul. Wanyingkanyi ninji ngarrangarra muwa ngaki. Wanyi wirangu ninji kurdanba ngaki kandimuku. Wanyingkanyi ninji yabimba kiji ngaki.’
ACT 22:8 Jananganja ngayi, ‘Wanyi ninji mambuka. Wanyi mambuka ninji, jala yanyba ngaki.’ Baki mili ngayi manku nayinda jangkurr, ‘Ngayu Jisus, ngaki yaji Nasarid. Ngayu nanda jala nganinji ngalangalaka, kurda.’
ACT 22:9 Najba yali mirnbi nanamukunyi jila jali ngakinbu, ngala miku yaliya manku nanda jangkurr.
ACT 22:10 Ngajaka ngayi, ‘Wanyimba jangayu mambuka.’ Baki nyuli yanyba ngaki, ‘Walajbakiyi. Baki janinji jilajba Damaskusyurri. Janyulu karu ninya yingkawanyi nanankanyi jalija ninji yabimba ngaki.’ Nani nyuli yanyba ngaki mambuka kingkarrinya.
ACT 22:11 Baki miku ngayiya najba yaji, kabuji ngayi. Baki yalu jali jilajba ngakindu, yali marrimba ngana marni, baki jalulu nganjali jila yurrngumba barrawuyabarrawuyarri, Damaskusyurri.
ACT 22:12 Jungku nyulili Damaskus, nganinyi nangangi niji Yananayis. Maruka nyuli muwa Kudkanyi. Nyuli jungku kunybana yuwana Musiskanyi. Yanyba yalili kunyba jangkurr nangangi bukambiju Jumuku, jungku jalili nanaba.
ACT 22:13 Badajba nyuli ngakindurri. Karrinja nyuli ngakindu, baki yanyba nyuli, ‘Kandi Sul. Najbakiyi yaji mili.’ Yinarramba ngayi najba yaji. Ngayi najba nanda nganinyi karrinjankurri ngakinbu.
ACT 22:14 Mili nyuli yanyba ngaki, ‘Yarrijba nyuli ninya nanangini Kudwanyi. Nyulu Kud niyangi, marda bukambijuyngka Jumukuyngka, marda wankalamukuyngka, nyulu Kud yalungi marda. Yarrijba nyuli ninya, marda ninjimi yabimba nanda jalija nyulu karu ninya. Ninya yarrijbayi. Janinji jingkijba yaji, jalija ninji yabimba nangangi. Najbayi ninji nangangi jandanyi Jisus yubarlina, marda mankuyi ninji nanda jangkurr nangangi Jisuskanyi.
ACT 22:15 Janinji karu bukambiju nganinymuku, nanankanyi jali ninji najba, marda manku ninji. Janinji karu yalunya yajinyi.
ACT 22:16 Mikujiyi yukumba. Walajbakiyi, baki janurru ngurrunba ninya, baki janyulu manjamanjamba nganyi balki yaji Kudwanyi. Manjamanjamba janyulu nganyi balki yaji kaja, jalija ninji kuyu nanda jangkurr Jisuskanyi, jandayngkanyi Kudkanyi.’ Nani yanybayi Yananayis ngaki.”
ACT 22:17 Mili barri yanybayi Bul yalungi muranyi. “Baku barri ngayi wijba Jirusalimyurri. Ngankijba ngayi kalawunyi walkurranyina jurjina. Ngala ngayi yanyba mududu Kudkanyi, ngayi buwarrajimba yaji.
ACT 22:18 Ngala ngayi buwarrajimba, najba ngayi mambuka Jisus baki yanyba nyuli ngaki. Yanyba nyuli nayinda jangkurr, ‘Barlbakiyi Jirusalimnanyi. Barlbakiyi dulu, mikungangi jayalu kuyu nganyi jangkurr ngaki. Miku jayalu kuyu nanda jangkurr.’
ACT 22:19 Jananganja ngayi, ‘Mambuka, yalu nayiba Jirusalim, yalu jingkijba ngaki yaji. Ngayili jila kajayurri jurjyurri. Jingkijba yalu, ngayili daba yalunya krisjinmuku. Wudumba ngayi yalunya yarriji yalunya brisinyina, nanamuku kuyu jala nganyi jangkurr.
ACT 22:20 Jali yalu kurdanba nanda, karu jali yingkamuku nganyi, nangangi niji Sdibin, jali yalu kurdanba nanda, baki ngayi nanaba. Mankumanku ngaki, kunyba nanda kurdanbikanyi Sdibin. Baki lalanba ngayi jumbala. Lalanba ngayi danyan yalungi, yalu jali kurdanba Sdibin.’ Nani ngayi jananganja Jisus, ngala ngayi buwarrajimba yaji.
ACT 22:21 Ngala nyuli jirrinyba ngana Jisuswanyi. Jirrinyba nyuli, ‘Barlbakiyi. Jangayu manjijba ninya juju ngurranyimukuyngkurri. Janinji barlba yingkamukuyngkurri yajiyurri juju.’” Barriwa. Nani yanybayi Bul yalungi muranyi.
ACT 22:22 Waluku jali yanyba Bul yalungi, manku yali nanda jangkurr, baki jungku yali karda. Ngala jali nyulu yanyba nanda jangkurr ngurranyimukuyngka, baki yali kaya kudanyu, “Kurdanbakiyi nanda. Kurdanbakiyi. Baki miku nyuliyi jungku wanka mili. Kurdanbakiyi.”
ACT 22:23 Yali ngarrangarra muwa nangangi. Kaya yali kudanyu barri. Janyba yali yalungi danyan kingkarri. Wudumba yali jundurr jambananyi, baki janyba yali jundurr kingkarri marda. Ngarrangarra yali muwa kudanyu nangangi Bulkanyi. Nani yalili yabimba Jumukunyi, jali yalu ngarrangarra muwa, jali yingkawanyi yanybayi balki jangkurr Kudkanyi.
ACT 22:24 Jirrinyba nyuli ngarrkadabawarrmuku mambukawanyi. Jirrinybayi yalunya, yalu kuyunki Bul kalawunyi barrawuna. Baki mili nyuli jirrinyba yalunya, jayalu wajuba Bul. Miku nyuliyanyi jingkijba mambukawanyi, wanyingkanyi yali ngarrangarra muwa nangangi Jumuku. Jirrinyba nyuli ngarrkadabawarrmuku, jayalu wajuba Bul, baki yiningki janyulu karu mambuka Bulwanyi. Yiningki janyulu karu mambuka, wanyingkanyi yalu ngarrangarra muwa nangangi.
ACT 22:25 Ngala, jali yalu kijijba Bul wajuykanyi, yanyba nyuli nangangi ngarrkadabawarrayngka. Yanybayi Bul nangangi karrinja jala nangandu bundu. Yanyba nyuli, “Ngayu mungkiji Rumankanyi. Miku janarri jungku kunybana yuwana Rumankanyi, jaliyi narri wajuba ngana. Ngayu mungkiji Rumankanyi. Jilijba narri kuyu ngana kurdusyurri. Jilijba nyulu manku ngaki jangkurr mambukawanyi kurduskanyi.” Nani yanybayi Bul.
ACT 22:26 Jala nyuli manku nanda jangkurr ngarrkadabawarranyi, baki nyuli jilajba mambukarri Rumankanyi ngarrkadabawarrayngka. Yanyba nyuli mambukanyi, “Marda ngambalimi miku wajuba. Nyulu mungkiji Rumankanyi. Marda miku ngambalimi wajuba.”
ACT 22:27 Baki nyuli jilajba Bulyurri nanda mambuka. Ngajaka nyuli Bul, “Ninji kuna mungkiji Rumankanyi.” Jananganja nyuli mambuka Bulwanyi, “Yi. Ngayu mungkiji Rumankanyi.”
ACT 22:28 Yanyba nyuli Bulkanyi nanda mambuka, “Wajba ngananjali nanankanyi najanyi. Yarrijba yali najana ngayu mungkiji Rumankanyi, ngala waluku ngayi wajba yalunya kajanyi dungalanyi, wudumbiji nanda jangkurr najana.” Jananganjayi mambuka Bulwanyi, “Miku ngayiya wajba dungalanyi najanyi, nijanganjinyingangi ngaki, nyuli mungkiji Rumankanyi. Baki ngayu mungkiji Rumankanyi marda, ngayungangi jandanyi nangangi.”
ACT 22:29 Kudiyamuku ngarrkadabawarrmuku, yali karrinja nanaba yilikaykanyi Bul jangkurranyi. Yinarramba jali yalu manku nanda jangkurr Bulkanyi, jilajba yali nanganbunanyi. Marrala yali. Marda nanda mambuka marrala nyuli. Yiningki janyulu yabimba kiji yalungi Bulwanyi, kijijbangangi yali Bul kijbakijbayudinyi. Miku nanda kunybana yuwana Rumankanyi, kijiykanyi mungkiji Rumankanyi. Marrala yali kudanyu barri.
ACT 22:30 Ngala yuwaji miku nyuliya jingkijba mambukawanyi. Miku nyuliya jingkijba, wanyingkanyi yali ngarrangarra muwa Jumuku nangangi Bulkanyi. Jirrinyba nyuli yalunya, Jumuku kunsilkanyi, marda walkurra mambuka jurjkanyi. Jirrinyba nyuli yalunya, munganawa jayalu jila malumba jungunki. Baki munganawa jirrinyba nyuli yingka dulaji kijbakijba mankanyinanyi Bulnanyi, baki jilajba buli kunsilyurri, nanda mambuka marda Bul. Karrinjarrijba nyuli Bul waluwa yalungi kunsilkanyi mambukawanyi.
ACT 23:1 Ningkijba nyuli yalunya kunsilkanyi Bulwanyi, baki yanyba nyuli yalungi, “Ngakinmuku mungkijimuku. Jingkijba ngaka, yurrngumba ngayu jungku kunyba Kudkanyi.”
ACT 23:2 Jala nyuli manku nanda jangkurr walkurranyi mambukawanyi jurjkanyi, jala nyuli manku jangkurr, jirrinyba nyuli yalunya, daba jayalu Bul. Jirrinyba nyuli yalunya daba, jayalu Bul janyi, yalu jali jungku bundu nangandu Bulnyina.
ACT 23:3 Yanybayi Bul nangangi mambukanyi, “Ninji. Jungku ninji balki muwa. Jungku ninji balkimirra, ngala muningka ninji yanyba kunyba jangkurr, muningka ninji yabimba kunyba yaji. Nulijba ninji yalungi yingkamukuyngka mankumankunkanyi yalungka, ninji jungku kunyba Kudkanyi. Ngamu ninji jungku kunyba Kudkanyi, yanybangangi ninji kunyba jangkurr. Ngala miku. Miku ninjiyi jungku kunyba. Jungku ninji balki Kudkanyi. Daba janinya Kudwanyi. Jungku ninji nayiba yanybikanyi yuwanyi Musiskanyi. Jungku ninji nayiba balanjankanyi ngaki. Yanyba ninji, ngayu yabimba balki yaji nanankanyi yuwanyi Musiskanyi, ngala yanybaka nanda yuwa Musiskanyi marda ninjimi miku daba ngana. Jungku ninji balki nanankanyi yuwanyi, jirrinybangangi ninji yalunya, yalu daji ngana. Jungku ninji balki nanankanyi yuwanyi Musiskanyi.”
ACT 23:4 Yanyba yali Bulkanyi, yali jala karrinja bundu nangandu, “Ngala miku ninjimi yanyba nanama jangkurr, waluku mili nyulu walkurra mambuka Kudkanyi. Wanyingkanyi ninji mili yanyba nanama jangkurr nangangi.”
ACT 23:5 Jananganjayi Bulwanyi, “Miku ngayiya jingkijba nyulu nanda walkurra mambuka. Ngamu nyulu malbu kunsilkanyi. Ngindu ngayu nanankanyi jangkurranyi, yanyba jali ngayu nangangi. Nanda jangkurr Musiskanyi najana Kudkanyi, yanybaka nanda jangkurr, ‘Marda ninjimi miku yanyba balki jangkurr nangangi walkurrayngka mambukanyi Jumukuyngka.’ Ngindu ngayu muwa nanankanyi jangkurranyi.”
ACT 23:6 Baki ningkijba nyuli malbumalbu kunsilkanyi Bulwanyi, jingkijba nyuli yalunya, yingkamuku yali Sajusimuku, yingkamuku yali Barasimuku. Baki yanyba nyuli yalungi kunsilkanyi nayi barri, “Mungkijimuku. Ngayu Barasi. Nijanganjinyi ngaki nyuli Barasi marda. Jala narri ngaki balanja, mankumankungangi ngaka, jayalu wankijba mili bayngkani jalija yalungka janyba. Wankijba jayalungka mili. Nani narri balanja ngaki. Nanamuku Sajusimuku, yalili yanyba, miku jayalu wankijba mili bayngkani jalija yalungka janyba. Miku jayalu mili wankijba. Mili yalili yanyba marda, mikuyaji Yanjilmukuyngka, mikuyaji wuwarrmukuyngka. Ngala Barasimuku, yalili yanyba, jungku yalu Yanjilmuku marda wuwarrmuku. Mili yalili yanyba, jayalu wankijba mili, bayngkani jalija yalungka janyba.” Yinarramba, jali yanyba Bul nanda jangkurr, jakakajba yalungki, Barasimuku, marda Sajusimuku. Yanybayi Barasimuku yingka jangkurr, ngala yanybayi Sajusimuku yingka jangkurr. Yanyba yali yinini jangkurr wankiykanyi mili.
ACT 23:9 Jakakajba yalungki kudanyu barri. Kaya yali kudanyu. Baki karrinja nyuli yingamali milidimbawarr yuwanyi. Nyuli Barasi nanda milidimbawarr. Yanyba nyuli ngiruka, “Yiningki nyulu jungku kunybana yuwana, nayinda nganinyi Bul. Yiningki nangangi jangkurr duja. Yiningki yanybayi Yanjil nangangi. Yiningki yanybayi ngarndu nangangi.” Barriwa.
ACT 23:10 Jakakajba yalungki kudanyu baki mankumanku nangki nanda mambuka Rumankanyi, mankumanku nangki, nayi, “Jayalu linjumba Bul. Yiningki jayalu kurdanba.” Baki jirrinyba nyuli ngarrkadabawarrmuku, jayalu wudumba Bul. Wudumba yali, baki kuyu yali Bul yalunginkurri barrawurri.
ACT 23:11 Munganawa barri mungana, karrinjayi Jisus nangandu Bulnyina. Karrinja nyuli waluwa nangandu, baki yanybayi Jisus nangangi, “Mikuwali ninji marrala. Karuyi ninji yingkamuku ngaki nayiba Jirusalim. Nani janinji karu yingkamuku ngaki nananyina yajina Rum marda. Janinji karu yalunya ngaki nanaba marda.” Nani yanybayi Jisus Bulkanyi mungana.
ACT 23:12 Munganawa, malumba yali jungku kudiya Jumuku. Jungku yali malumba, baki yanyba yalungki, jayalu kurdanba Bul. Yanyba yali nayinda jangkurr, miku yangkalambikanyi, “Miku ngambaliyi jarrba mama, miku ngambaliyi ngaraba wabuda jangumba kurdanbijiwa Bul. Jangambala kurdanba Bul, baki bayngkani jangambala jarrba, ngaraba.”
ACT 23:13 Nanamuku jali yanyba nanda jangkurr, yali 40 nganinymuku.
ACT 23:14 Jilajba yali yanybiji yalungi mambukamukuyngka, marda malbumalbunyi jurjkanyi. Yanyba yali, “Yanyba nurru nayinda jangkurr miku yangkalambikanyi, ‘Miku nurriyi jarrba mama, jangumba kurdanbijiwa nurru Bul.’ Nani nurri yanyba jangkurr miku yangkalambikanyi.
ACT 23:15 Ngajaka janurru narrinya marda yalunya kunsilkanyi. Janarri manjijba nganinyi mambukarri Rumankanyi, baki janyulu karu mambuka, nyulu kuyunki Bul narrindurri. Nayi janarri yanyba, nulijba narri yanybikanyi Bul mili narringi. Marda nyulimi Bul yanyba mili narringi. Ngala janurrungka birrirrinja kurdanbikanyi Bul. Janurru kurdanba Bul, ngala nyulu jilajba burrandi. Miku janyulu wanbiya waluwa.” Nani yalunjali ngajaka Bulkanyi.
ACT 23:16 Ngala kardikardimba nyulu Bulwanyi, manku nyuli nanda jangkurr jukawanyi. Manku nyuli nanda jangkurr kurdanbikanyi Bul, baki jilajba nyuli barrawurri ngarrkadabawarrayngka. Ngankijba nyuli kalawunyi, baki jilajba nyuli nangandurri Bulyurri. Karu nyuli Bul nanankanyi jangkurranyi kurdanbikanyi.
ACT 23:17 Baki kayayi Bul ngarrkadabawarrayngka. Jali nyulu badajba, baki yanybayi Bul nangangi, “Kuyu janinji nayinda juka nganyingkurri mambukarri. Janyulu yanyba jangkurr mambukanyi.” Barriwa.
ACT 23:18 Baki nyuli kuyu nanda juka nanganginkurri mambukarri ngarrkadabawarranyi. Yanyba nyuli mambukanyi, “Nanda Bul jala brisinyina, nyuli kaya ngaki, baki ngajaka ngani, ngayu kuyunki nayinda juka nganyindurri. Yanyba janyulu jangkurr nganyi.”
ACT 23:19 Marrimba nyuli juka marni mambukawanyi. Kuyu nyuli juka yingkayurri yajiyurri, bulaman nyubana. Miku nyuliyanyi manku jangkurr ngarrkadabawarranyi. Yanybayi mambuka jukanyi, “Karu nganinji nganyingkanyi jangkurranyi.”
ACT 23:20 Yanybayi juka, “Munganawa barri, jayalu ngajaka ninya mambukamukunyi Jukanyi. Ninya jayalu ngajaka, janinji kuyu Bul yalundurri. Ninya jayalu karu, nulijba yalu ngajakankanyi Bul jangkurranyi, baki mankunkanyi nangangi jangkurr, baki jayalu jingkijba mili nangangi.
ACT 23:21 Ngala mikujiyi manku yalungi jangkurr, ngadijbangangi jayalungka kudiyamuku. Yukumba jayalu nangangi Bulkanyi, baki jayalu kurdanba. Ngadijba jayalungka kudukudu barri, 40 nganinymuku. Yanyba yali jangkurr Kudkanyi, miku yangkalambikanyi. Yanyba yali, miku jayalu jarrba mama, miku jayalu ngaraba wabuda, jangumba kurdanbijiwa nanda Bul. Nayimanji yalungka jala birrirrinja, yukumba yalu nganyi, ninji yanybikanyi yalungi, janinji kuyu Bul yalundurri.” Barriwa.
ACT 23:22 Yanybayi mambuka jukanyi, “Mikujiyi karu yingka nanankanyi jangkurranyi jali nganinji karu.” Baki manjijba nyuli nanda juka. Wijbayi juka nanganginkurri barndarri.
ACT 23:23 Nanda mambuka ngarrkadabawarrmukuyngka, nyuli walkurra mambuka yalungi. Yingkamuku yali mambuka marda bayngkani nangandu, ngala nyuli walkurra mambuka yalungi. Baki kaya nyuli kujarrayngka mambukanyi. Jali bula wanbiya, jirrinyba nyuli bulanya, “Wudumba janimbala nanginmuku barri, 200 barri ngarrkadabawarr wunanybalayudi jankunbijinyiyudi, marda 70 ngarrkadabawarr yarramayudi, marda 200 ngarrkadabawarr wuniyudi. Wudumba janimbala yalunya. Karu jayalunya. Jayalungka birrirrinja waluwa. Birrirrinja jayalungka waluwa. Barlba jayalu langki Sisariyayurri kamu, ngala nyulu bijal yaji buwandi mungana.
ACT 23:24 Wudumba janimbala mili kudiya yarrama Bulkanyi. Ngabala janyulu yingka yarrama, ngala yingka wuyalijba jila. Kuyu janarri Bul langki mambukarri kubaminkanyi nanankanyi yajinyi, niji mambukanyi Bilis. Lalanba janarri Bul kudanyu ngala nyulu jila.” Nani yanybayi mambuka bulangi.
ACT 23:25 Baki yarrijba nyuli jangkurr najana mambukawanyi. Yarrijba nyuli jangkurr kubaminkanyi mambukanyi langku. Nayi nyuli yarrijba.
ACT 23:26 “Ngayu Kludiyus Lisiyas, yarrijba ngayu nayinda jangkurr najana nganyi. Yarrijba ngayu nganyi, walkurrayngka mambukanyi Biliskanyi.
ACT 23:27 Wudumba yali nayinda nganinyi Jumukunyi. Wudumba yali kurdanbiji. Jali ngayu jingkijba nayinda nganinyi, nyulu mungkiji Rumankanyi, baki wudumba ngayi. Dulaba ngayi nayinda nganinyi yalunbunanyi lalanbiji.
ACT 23:28 Nulijba ngayi jingkiykanyi nanda balki yaji nangangi. Baki ngayi kuyu nayinda nganinyi yalundurri Jumukuyngkurri kunsilkanyi. Nulijba ngayi jingkiykanyi, wanyingkanyi yaliyanyi kurdanba.
ACT 23:29 Yanyba yali nangangi, nyulu jungkuka balkina yalunginyina yuwana, ngala miku nyulimi jungku balkina yuwana Rumankanyi. Kurrkunba ngayi yalunya kurdanbikanyi nanda, mikungangi nyuli jungku balkina nurrunginyina yuwana. Miku nyulimi jungku balki, ngayu kurrkunbikanyi, yarriykanyi brisinyina.
ACT 23:30 Baki karuyi ngana jukawanyi. Karu nyuli ngana Jumukuyngka, jayalu kurdanba nayinda nganinyi. Mankumanku ngaki kijinyi, baki manjijba ngayu nayinda nganinyi nganyindurri. Ninji walkurra mambuka. Marda ninjimi yanyba Jumukuyngka. Marda yalimi karu ninya nanginkanyi nganiyngkanyi, wanyingkanyi nyuli yabimba balki. Karu ngayi Jumuku, yalu yanybiji nganyi kijinyi.” Nani nyuli yarrijba jangkurr najana mambukawanyi ngarrkadabawarrayngka.
ACT 23:31 Yabimba yali nanda jala jirrinybayi yalunya mambukawanyi. Birrirrinja yalungki ngarrkadabawarrmuku. Wudumba yali Bul, baki mungana yali barlba langkurriji yajiyurri, niji Yandibadris.
ACT 23:32 Munganawa barri nanamuku ngarrkadabawarrmuku jila jali nukamina, wijba yali kularriji Jirusalimyurri. Wijba yali kularriji, ngala yingkamuku ngarrkadabawarrmuku yarramayudi, jilajba yali mili langki nangandu Bulnyina.
ACT 23:33 Wanbiya yali langkurri Sisariya. Baki yali wajba mambuka kubaminkanyi nanankanyi jangkurranyi najana, yarrijba jali nyulu mambuka kularra Jirusalim. Nani yali kuyu Bul nangandurri lalanbikanyi nyulu Bul.
ACT 23:34 Najba nyuli nanda jangkurr najana mambukawanyi, baki nyuli ngajaka Bul, “Wanjawa nganyi yaji.” Jananganjayi Bulwanyi, “Ngaki yaji Darsus, nananyina walkurranyina yajina Silisiya langkurrinybana.” Nanamuku Rumanmuku, yali mambuka nanankanyi yajinyi Silisiyakanyi.
ACT 23:35 Jali nyulu manku nanda jangkurr, baki nyuli yanyba Bulkanyi, “Jalija yalu wanbiya kulani, yalu jala yabimba kiji nganyi, jalija yalu wanbiya, baki jangayu manku nganyi jangkurr.” Baki nyuli jirrinyba ngarrkadabawarr, jayalu yarrijba Bul kalawunyi barrawuna jali yabimbayi Yirudwanyi wabula. Jirrinyba nyuli yalunya, jayalu lalanba Bul kurrkunbiji Bul nanabawa. Mikuwali nyulu jila nanamunanyi yajinanyi.
ACT 24:1 Mardunguji barri kujarra baki kujarra baki yingamali kambana nanda walkurra mambuka jurjkanyi Yananayis, nyuli barlba langkurriji Sisariyayurri. Jilajba yali nangandu, kudiya malbumalbu, marda yingka nganinyi niji nangangi Dirdulus. Yarrijba yali nanda Dirdulus Jumukunyi. Yarrijba yali Dirdulus, karunkanyi nyulu walkurra mambuka Rumankanyi Bulkanyi. Wanbiya yali, baki jilajba yali mambukarri, baki karu yali mambuka kubaminkanyi Bulkanyi. Karuyi Dirduluswanyi nanankanyi balkinyi yajinyi, jali yalu yanyba, nyuli yabimba Bulwanyi.
ACT 24:2 Jali yalu karu nanda Dirdulus yanybikanyi, baki yanybayi Dirdulus nangangi mambukanyi. Nayi nyuli yanyba, “Mambuka, ninji jingkijbawarr. Ngala ninji jungku mambuka nurrungi, baki ngambala jungku karda. Mikuyaji kijinyi ngambalangi. Yabimba ninji kaja kunyba yaji nurrungi Jumukuyngka.
ACT 24:3 Mirnarrijba nurru muwa yurrngumba bukambijunyina yajina. Mirnarrijba nurru muwa nganyi, yabimbangangi ninji nanda. Kunyba ninji, yabinjuwali.
ACT 24:4 Ngala ninji walkurra mambuka, baki miku jangayu yanyba kaja jangkurr nganyi. Miku jangayu yanyba kaja jangkurr. Ngajaka ninya, janinji jungku kunyba nurrungi, ngala ninji manku jangkurr.
ACT 24:5 Nayinda nganinyi Bul, jingkijba nurru nayinda. Nyulu balki. Nyulu yabimbaka walkurra kiji bukambijunyina yajina jala nyulu jilajba, kajambaka, walkurrambaka kiji. Yabimba nyulu walkurra kiji Jumukuyngka lukuluku. Nyulu mambuka yalungi, nijarrijba jala yalungka ‘Najarinmuku.’
ACT 24:6 Kuyu nyuli yingka nganinyi walkurrayngkurri jurjyurri, Bulwanyi. Nanda nganinyi nyuli ngurranyi. Jilajba nyuli nangandu Bulnyina. Nulijba nyuli nanankanyi ngurrayngkanyi, ngankiykanyi kalawunyi jurjina nangandu. Nanda balki yuwanyi Jukanyi. Mikuwali yali ngankijba kalawunyi jurjina ngurranyimuku. Baki nurri wudumba nanda Bul. Marrimbayi nanda. Ngajaka janinji Bul nanginkanyi jangkurranyi. Nayinda duja jangkurr, karu jala ngayu ninya.” Barriwa. Nani yanybayi nanda Dirdulus mambukanyi.
ACT 24:9 Nanamuku yingkamuku Jumuku, jungku jali nanaba, marda yali yanyba, nanda jangkurr duja.
ACT 24:10 Baki yanybayi mambuka marnina Bulkanyi yanybikanyi, baki yanybayi Bul nayi barri, “Jingkijba ngayu, ninji walkurra mambuka Jumukuyngka kajana kindilkurrinyina. Jingkijba ngayu, ninji jungku kunyba mambuka, jali yalu karrinjarrijba Jumuku waluwa nganyindu kurdusnyina. Baki jangayu mirnarrijba muwa, karrinjankanyi waluwa nganyindu ngala ninji manku ngaki jangkurr.
ACT 24:11 Wanbiya ngayi Jirusalim wabula, barringa barri kujarra wik. Jilajba ngayi Jirusalimyurri briji Kudkanyi, marda yanybiji mududu Kudkanyi walkurranyina jurjina.
ACT 24:12 Miku nganiya manku jakakaykurri yalunya Jumukunyi. Miku ngayiyanyi jakakajba walkurranyina jurjina. Miku ngayiyanyi wajba yalunya kijinyi barrawuyabarrawuyana marda.
ACT 24:13 Miku yaliya minimba ninya ngaki, ngayu yabimbikanyi balki yaji. Miku ngayiya yabimba nanda balki yaji kaja, yanyba jali yalu ngayi yabimba. Miku yaliya minimba ninya, mikungangi ngayi jungku balkina yuwana. Nayinda jangkurr duja, yanyba jala ngayu. Miku yaliyi minimba ninya ngaki, ngayu jujijba. Miku ngayimi jujamba ninya. Nayinda duja jangkurr.
ACT 24:14 Ngala ngayu karu ninya nanginkanyi jangkurranyi. Maruka ngayu muwa Kudkanyi barrinani yalu wankalamuku, maruka yalili muwa Kudkanyi kamambarra. Maruka ngayu muwa Kudkanyi. Nyulu yingamali Kud, maruka jali yalu muwa nangangi. Ngala ngayu maruka muwa Jisuskanyi marda. Durrijba ngayi nangangi yuwa Jisuskanyi, ngala nanginmuku, yanyba yalu, miku nanda duja yuwa Jisuskanyi. Jingkijba ngayu nanda jangkurr Jisuskanyi duja barri. Durrijba ngayu nangangi jangkurr, marda nanda jangkurr jali nyulu yarrijba najana Kudkanyi Musiswanyi. Durrijba ngayu nanda jangkurr Musiskanyi, marda nanda jangkurr, yarrijba jali yalu najana wankalamukunyi. Ngayu jungku kunybana yuwana Musiskanyi.
ACT 24:15 Jingkijba ngayu, bukambiju jayalu wankijba mili bayngkani jaliya yalungka janyba. Yalu, jungku jala kunyba, marda yalu, jungku jala balki, jayalu wankijba mili bayngkani jalija yalungka janyba. Yalu jingkijba nanankanyi marda nanginmuku nganinyimuku, jungku jala yalu nayiba. Jingkijba yalu Kudkanyi, janyulu wankamba yalunya bukambiju mili bayngkani jalija yalungka janyba.
ACT 24:16 Baki nulijba ngayu yabimbikanyi yaji, ngawamba kunyba yaji. Nulijba ngayu jungunkanyi kunyba Kudkanyi marda nganinymukuyngka yurrngumba. Barriwa.
ACT 24:17 Miku ngayiya jungku Jirusalim kajana kindilkurrinyina. Ngala wijba ngayi Jirusalimyurri jalanmirra kuyu ngayi dungala ngakinkanyi mungkijimukuyngka. Wijba ngayi Jirusalimyurri waykanyi yalunya dungalanyi.
ACT 24:18 Ngala ngayi jungku walkurranyina jurjina, waji Kud barnyinyi wangarranyi, ngana yali najba kudiyawanyi Jumukunyi. Ngana yali najba nanaba. Nanamuku Jumuku, jilajba yali langina Yasiyananyi, baki ngana yali najba jurjina. Jungku ngayi nyubana. Miku ngayiya wajba yingka kijinyi. Ngana yali najba nanaba Jumukunyi Yasiyananyi. Marda yalimi jilajba nanginkurri, najba jali ngana jurjina. Marda yalimi karu ninya ngaki. Marda yalimi miku jungku wambu Jirusalim, jaliyi nulijba yalu yabimbikanyi kiji ngaki. Marda yalimi jila nanginkurri.
ACT 24:20 Ngala miku yaliya badajba. Baki nanginmukunyi Jumukunyi kunsilkanyi, marda ninyalimi karu ngaki. Marda ninyalimi karu nanankanyi yajinyi, yabimba jali ngayu. Ngala miku yalimi karu ninya ngakinkanyi balkinyi yajinyi. Miku ngayiya yabimba balki yaji nanaba walkurranyina jurjina. Miku ngayiya yabimba balki yaji nanaba yuwanyi Jukanyi. Miku ngayiya yabimba balki yaji yuwanyi Rumankanyi marda. Miku nanaba Jirusalim, baki miku yingkana yajina.
ACT 24:21 Ngala ngawamba ngayi yabimba nayinda yaji. Kaya ngayi, jala ngayi karrinja waluwa yalunbu kunsilkanyi. Kaya ngayi yalungi, nayi, “Yanyba narri, ngayu jungku balkina yuwana, yanybangangi ngayu, jayalu wankijba mili. Jayalu wankijba mili bayngkani jalija yalungka janyba.’ Ngawamba ngayi yabimba nanda yaji.” Barriwa. Nani yanybayi Bul nangangi mambukanyi.
ACT 24:22 Nanda mambuka Jumukuyngka Bilis, jali nyulu manku jangkurr Bulkanyi, yanyba nyuli yalungi. Nayi nyuli yanyba, “Barriwa barri. Baku barri jangayu manku yingka jangkurr narringi. Baku barri yuku narri yanyba mili, jalija nyulu badajba nanginkurri yajiyurri, nanda walkurra mambuka ngarrkadabawarrayngka, niji Lisiyas. Jalija nyulu badajba, baki jangayu manku narringi jangkurr mili. Jangayu yanyba jangkurr manjiykanyi Bul, yiningki brisinyurri, yiningki muningka nanganginkurri barndarri.” Nani yanybayi Bilis yalungi Jumukuyngka. Nanda mambuka Bilis, nyuli jingkijbawarr. Nyuli jingkijba nanda jangkurr Jisuskanyi, ngala miku nyuliya kuyu nanda jangkurr.
ACT 24:23 Baki jirrinyba nyuli mambuka ngarrkadabawarrayngka, lalanba jali Bul. Jirrinyba nyuli nanda, nyulu lalanbiji Bul mili. Nayi nyuli jirrinyba Biliswanyi, “Wiykunumba janinji Bul walkurrayngkurri barrawurri. Lalanba janinji kudanyu, ngala mikujiyi kijijba. Yuku nyulu jilajba. Yuku yalu kuyu yaji nangandurri, nanganginyi kandimukunyi. Yuku yalu yidamba Bul, marda kuyu yaji nangandurri.” Barriwa. Baki manjijba nyuli Bul nangandu barrawurri.
ACT 24:24 Nanda mambuka Bilis, maninganjayudi, niji nangangi Drusila, nyuli Ju marda. Mardunguji barri jilajba buli walkurrayngkurri barrawurri, jungku jali Bul. Manjijba nyuli yingka mambukawanyi, kuyunki Bul nangandurri. Kuyu nyuli Bul, baki jirrinybayi Bul mambukawanyi. Jirrinybayi Bul, janyulu karu bulanya Jisus Krayiskanyi. Baki yanybayi Bul bulangi. Yanyba nyuli jingkiykanyi Jisuskanyi, jingkiykanyi nayinda, janyulu yabimba yaji nangangi Jisuswanyi, kuyungangi nyulu jangkurr Jisuskanyi, ngayangayijbangangi nyulu jangkurranyi Jisuskanyi marda. Milidimba nyuli bulanya Bulwanyi, jingkiykanyi Jisuskanyi marda kuyunkanyi jangkurr Jisuskanyi. Milidimba nyuli bulanya, durriykanyi nanda yuwa Jisuskanyi yurrngumba. Milidimba nyuli, miku bulangka yangkalambikanyi yingkanyi yuwanyi. Milidimba nyuli bulanya, jungunkanyi kunyba Jisuskanyi marda yingkamukuyngka. Milidimba nyuli nanankanyi jalija nyulu kuyu bukambiju malumba baku Kudwanyi. Ngajaka janyulu yalunya Kudwanyi, yalunginkanyi balkinyi yajinyi, yabimba jali yalu. Barriwa. Ngala nanda mambuka Bilis, marrala nyuli jali nyulu manku nanda jangkurr Bulkanyi, baki yanyba nyuli Bulkanyi, “Jilajba janinji. Jangayu manjijba jangkurr baku barri, yingkawanyi wudumbiji ninya. Jangayu manjijba nganyi baku barri, jalija ngayu muningka jungku.” Barriwa.
ACT 24:26 Ngala nanamanji nulijbayi Bilis Bulkanyi. Nulijba nyuli Bulkanyi, waykanyi nanda Bilis dungalanyi. Buyingka baki buyingka baki buyingka yidamba nyuli Bul yanybikanyi, ngala yuwaji nyuli nulijba Bulkanyi waykanyi dungalanyi. Mankumanku nangki Bilis nayi, “Yiningki janyulu wajba ngana dungalanyi, baki ngayiyi manjijba Bul muningka nanginbunanyi barrawunanyi.” Nani mankumanku nangki Bilis. Ngala miku. Miku nyuliya wajba Bilis dungalanyi Bulwanyi.
ACT 24:27 Yuwaji jungkuyi Bul brisinyina kujarranyina kindilkurrinyina, ngala miku nyuliya manjijba Bul brisinanyi nanangini Biliswanyi. Miku nyuliya manjijba Bul, nulijbangangi nyuli jungunkanyi kunyba yalungi Jumukuyngka. Nanamuku Jumuku nulijba yali nangangi Biliskanyi nyulu kurdanbiji Bul. Miku yaliya nulijba nangangi Bulkanyi, muningka jilaykanyi brisinanyi. Nanda Bilis nyuli nulijba yalungi Jumukuyngka yalu marukankanyi muwa nangangi Biliskanyi. Nanankardi barri miku nyuliya manjijba Bul brisinanyi. Baki yingka nyuli badajba mambuka nanankanyi yajinyi. Nyuli walkurra kubamin mambuka Jumukuyngka. Nanda buyingkinyi mambuka nangangi yaji Rum, nangangi niji Burkiyus Bisdus. Ngala nanda waluwa jala jungku mambuka Bilis, barlba nyuli yingkarri yajiyurri.
ACT 25:1 Nanda buyingkinyi mambuka kubaminkanyi, badajba nyuli Sisariyayurri, baki jungkuyi mardunguji. Baki kujarrakana barndaykana, barlba nyuli kularriji Jirusalimyurri.
ACT 25:2 Jali nyulu wanbiya Jirusalim, nyuli yidamba mambukamuku jurjkanyi, baki malbumalbu Jumukuyngka. Karu yali nanda mambuka Bisdus nangangi Bulkanyi, jungunkanyi nyulu balkina yuwana. Ngajaka yali Bisdus, janyulu yabimba kunyba yaji yalungi, janyulu manjijba Bul langina Jirusalimyurri. Nani yali ngajaka nanda mambuka kudanyu barri. Nulijba yali nanankanyi mambukanyi nyulu manjiykanyi Bul Jirusalimyurri, baki jayalu kurdanba Bul ngala nyuluja jilajba. Kurdanba yalimi Bul ngala janyulu jilajba Jirusalimyurri.
ACT 25:4 Jananganja nyuli yalunya nanangini mambukawanyi. Jananganja nyuli Jumuku, “Nurruja yuwaji marrimba nanda Bul langku Sisariya. Janyulu kili nanaba. Winyurru jangayu wijba nanankurri.
ACT 25:5 Narri mambukamuku, janarri badajba nanankurri ngakindurri. Jangambala jila malumba. Baki janarri karu ngana nanankanyi balkinyi yajinyi, yanyba jala narri nyuli yabimba.”
ACT 25:6 Nanda mambuka Bisdus, jungku nyuli nanaba yalundu. Yingamali wik marda bijal mili nyuli jungku Jirusalim, baki wijba nyuli langki. Marda jilajba yali marda nanganbu langkurriji, Sisariyayurri. Wanbiya yali. Munganawa nyuli jungku kurdusnyina. Nanda mambuka, nyulu mambuka kurduskanyi marda. Jungku nyuli kurdusnyina, baki jirrinyba nyuli ngarrkadabawarr wudumbiji Bul, kuyunki Bul kurdusyurri.
ACT 25:7 Jali nyulu wanbiya Bul kurdusnyina, baki yali karrinja nanganbu Bulnyina, nanamuku Jumuku jali yalu jilajba nanganbu, Bisdusnyina kulani. Yanyba yali, “Nyulu balki, nayinda Bul. Jungku nyulu balkina yuwana.” Ngala miku yaliya minimba nanda mambuka yalungi jangkurr duja. Muningka yali yanyba.
ACT 25:8 Ngala yanybayi Bul, “Miku ngayiyanyi yabimba balki yaji. Miku ngayiya jungku balkina yuwana Jukanyi. Miku ngayiya yabimba balki yaji walkurranyina jurjina. Miku ngayiya jungku balkina yuwana walkurrayngka mambukanyi Sisakanyi. Miku ngayiya jungku balki nanganginkanyi yuwanyi.” Nani yanybayi Bul. Nanda mambuka Sisa nyulu walkurramirra mambuka. Nyulu mambuka Jukanyi marda Rumankanyi.
ACT 25:9 Ngala nanda mambuka Bisdus, nyuli nulijba Jumukuyngka, mankumankunkanyi yalungka nangangi, nyulu kunyba mambuka yalungi. Baki ngajaka nyuli Bul nayinda jangkurr, “Barlba kuna janinji kularriji Jirusalimyurri, baki jangayu manku nganyi jangkurr nanaba. Barlba kuna janinji kularriji kurdusyurri.”
ACT 25:10 Jananganjayi Bulwanyi. Jananganja nyuli mambuka nayi, “Nanda walkurra mambuka Sisa, kudukudu nangangi Kurdus. Karrinja ngayu nayiba kurdusnyina. Nayinda kurdus, nayinda nangangi kurdus, walkurrayngka mambukanyi. Nayinda nangangi kurdus Sisakanyi. Marda ninjimi manku ngaki jangkurr nanginyina kurdusnyina Rumankanyi. Marda ngayimi miku jila nanankurri kurdusyurri nanaba Jirusalim. Marda ngayimi nayiba yanyba. Miku ngayiyanyi yabimba balki yaji Jumukuyngka. Jingkijba ninji nayinda jangkurr ngaki, duja jangkurr.
ACT 25:11 Jaliyi ngayu yabimba balki yaji kudanyu, baki marda ngakimi janyba. Marda ninjimi jirrinyba yalunya, yalu kurdanbiji ngana, jaliyi ngayu yabimba balki yaji kudanyu. Ngala miku. Miku ninjiyi manjijba ngana yalundurri Jumukuyngkurri, mikungangi ngayu jungku balki. Ninji ngajaka ngana jilaykanyi yalundurri Jirusalimyurri, ngala ngayu karungka ninya, jangayu yanyba nangangi walkurrayngka mambukanyi. Jangayu yanyba nangangi Sisakanyi. Nyulu walkurramirra mambuka bukambijuyngka jungku jala bayungu Rum. Mikuwali ninji manjijba ngana yalundurri Jumukuyngkurri, balkingangi nanda yuwanyi Rumankanyi.” Nani yanybayi Bul.
ACT 25:12 Baki yanyba yalungki, nanda mambuka Bisdus marda nangangi jingkijbawarrmuku yuwanyi Rumankanyi. Yanyba yalungkili, barriwa. Baki yanyba nyuli Bulkanyi nanda mambuka, “Yanyba ninji, ninji nulijba yanybikanyi walkurrayngka mambukanyi Sisakanyi. Jangayu manjijba ninya nanganburri. Jilajba janinji Sisayurri.” Barriwa.
ACT 25:13 Baku barri yingka nyuli wanbiya Sisariya. Nyuli walkurra mambuka bukambijuyngka Jumukuyngka. Nangangi niji Yakriba. Nijanganjinyi nangangi niji Yirud. Wanbiya nyuli Sisariya, marda nangangi maninganja nangandu, nangangi niji Birnis. Jilajba buli Sisariyayurri yidambiji nanda, yingka mambuka Bisdus.
ACT 25:14 Mardunguji barri, buli jungku nanaba. Karu nyuli nanda Yakriba nangangi Bulkanyi, mambukawanyi Bisduswanyi. Yanyba nyuli, “Nganinyi nayiba. Yali marrimba nanda nganinyi waluwa ngakindu, jali nyulu mambuka nanda Bilis. Yuwaji nyulu jungku nayiba brisinyina kalawunyi. Nanda nganinyi, nangangi niji Bul.
ACT 25:15 Jali ngayu jilajba kula Jirusalimyurri, karu yali ngana Bulkanyi mambukamukunyi jurjkanyi marda malbumalbuwanyi. Karu ngananjali Bulkanyi jungunkanyi balkina yuwana. Nulijba yali ngaki, ngayu yanybiji, ‘Yu, balki nyulu.’ Ngala miku ngayiya yanyba nani.
ACT 25:16 Karu ngayi yalunya nanankanyi yuwanyi Rumankanyi. Miku nanda yuwa yanyba nani. Nanda balki yuwanyi Rumankanyi. Nanda yuwa yanybaka, marda yalimi malumba jungku, yalu, yanyba jala nyulu jungku balki, baki nanda jala yalu yanyba nangangi. Baki janyulu karu nanganginmirra jangkurr nanankanyi balkinyi yajinyi, yanyba jala yalu nyuli yabimba. Barriwa.
ACT 25:17 Baku barri nanamuku Jumuku, jilajba yali nanginkurri. Yinarramba, munganawa jungku ngayi kurdusnyina, baki jirrinyba ngayi ngarrkadabawarr yali kuyunki Bul kalawunyi kurdusyurri.
ACT 25:18 Karrinja yali Jumuku, yanybiji Bulkanyi. Mankumanku ngaki, yiningki jayalu yanyba, nyuli kurdanba nganinyi, yiningki nyuli maninjakujba yaji, ngala miku. Miku yaliya yanyba nani.
ACT 25:19 Ngala yali jakakajba nanda Bul yalunginkanyi yuwanyi Musiskanyi. Jakakajba yalungki nanamuku Jumuku, marda Bul. Jakakajba yalungki nganiyngkanyi, nangangi niji Jisus. Jakakajba yalungki yuwanyi Musiskanyi marda Jisuskanyi. Nanda Jisus, janyba nangki wabula, ngala yanybayi Bul, nanda Jisus, mili nyulu wanka jungku.
ACT 25:20 Nulijba ngayi jingkiykanyi mili Jisuskanyi marda yuwanyi Musiskanyi. Ngajaka ngayi Bul, “Barlba janinji kuna kula kurdusyurri nanaba Jirusalim, baki jangayu manku mili jangkurr nanginkanyi yajinyi.” Nani ngayi ngakaja Bul yanybikanyi mili nurrungi Jirusalim.
ACT 25:21 Ngala miku nyuliya jananganja jilaykanyi Jirusalimyurri. Yinini jangkurr nyuli yanyba. Ngana nyuli ngajaka, ngayu manjiji Bul walkurrayngkurri mambukarri Sisayurri, nanaba Rum. Nyuluja Bul yanyba nangangi Sisakanyi. Barriwa. Baki ngayi jirrinyba ngarrkadabawarrmuku, jayalu mili marrimba, mili lalanbaja Bul, nanankurri jalija ngayu birrirrinja manjiykanyi Bul Sisayurri.” Nani yanybayi mambuka Bisdus yingkanyi mambukanyi Yakribakanyi.
ACT 25:22 Baki yanybayi Yakriba, “Nulijba ngayu mankunkanyi nangangi jangkurr Bulkanyi. Jangayu marda manku nangangi jangkurr.” Jananganja nyuli Yakriba, Bisduswanyi, “Munganawa janinji manku nanda jangkurr jalija nyulu yanyba nanda Bul.” Barriwa.
ACT 25:23 Munganawa barri yali jilajba walkurrayngkurri barrawurri yanybikanyi. Jilajba yali, nanda walkurra mambuku Jumukuyngka, Yakriba, marda nangangi maninganja Birnis, marda malbumalbu nanankanyi yajinyi. Jilajba yali barrawurri kunybayudi jumbalayudi. Malumba yali ngankijba kalawunyi barrawuna yanybikanyi. Baki jirrinyba nyuli ngarrkadabawarr kuyunki Bul Bisduswanyi. Kuyu nyuli Bul kalawuyngkurri yalunburri.
ACT 25:24 Yanyba nyuli Bisdus, “Mambuka Yakriba, marda bukambiju jungku jala nayiba ngambalanbu, mankukiyi narri ngaki jangkurr. Najba narri nayinda nganinyi Bul. Yali yanyba nangangi, nanamuku Jumuku, yingkamuku jungku jala nayiba Sisariya, marda yingkamuku jungku jala nanaba kularra Jirusalim. Yanyba yali nangangi, nyulu jungkuka balkina yuwana. Kaya yali kudanyu ngaki, marda ngayimi jirrinyba ngarrkadabawarr kurdanbiji nayinda nganinyi Bul.
ACT 25:25 Ngala manku ngayi yalungi jangkurr Jumukuyngka, baki manku ngayi nangangi jangkurr Bulkanyi. Barriwa. Baki mankumanku ngaki ‘Marda miku nangkimi janyba, mikungangi nyuli yabimba balki yaji. Miku nyuliya kurdanba yingka. Miku nyuliya maninjakujba yaji.’ Marda miku ngayiyi jirrinyba yalunya kurdanbiji Bul. Baki ngana nyuli ngajaka Bulwanyi, ngayu manjiji Bul walkurrayngkurri mambukarri Sisayurri. Baki janga manjijba nangandurri Sisayurri. Barriwa.
ACT 25:26 Ngala ngaka mankumanku nayi, ‘Wanyi jangkurr janga yarrijba najana nangangi Sisakanyi.’ Baki ngayi kuyu Bul nganyinburri, mambuka Yakriba. Yiningki janinji ngajaka Bul jangkurranyi, baki jangambala manku nangangi jangkurr. Baki yiningki jangayu jingkijba nanda jangkurr jalija ngayu yarrijba najana Sisakanyi. Yiningki jangayu jingkijba nanda balki yaji nangangi, jalija ngayu yarrijba.
ACT 25:27 Miku ngayimi manjijba Bul nangandurri Sisayurri, mikuyaji najanyi nanganbu. Miku nanda kunyba. Marda ngayimi karu Sisa nanankanyi balkinyi yajinyi, yabimba jala nyuli. Ngala miku ngayimi jingkijba, wanyi balki yaji nyuli yabimba nanankanyi yuwanyi Rumankanyi. Warriyaluku.” Nani yanybayi Bisdus yingkanyi mambukanyi Yakribakanyi. Barriwa.
ACT 26:1 Yanyba nyuli Bulkanyi, mambuka Jukanyi Yakriba. Nayi nyuli yanyba, “Karukiyi nurrunya nganyi.” Baki minimba nangki marni Bul minimbiji, janyulu yanyba. Baki yanyba nyuli nayi,
ACT 26:2 “Mankukiyi ngaki jangkurr, mambuka Yakriba. Nayinda kunyba yaji, jala ninga minimba, miku ngayiya jungku balkina yuwana. Yanyba yali nanamuku Jumuku, yanyba yali ngaki, ngayu jungku balkina yuwana, ngala miku.
ACT 26:3 Jingkijba ninji yalunya Jumuku, marda jingkijba ninji nanda yuwa Musiskanyi. Jingkijba ninji nanda jangkurr jala yalungka jakakajba Jumuku. Baki ngayu mirnarrijba muwa, jingkijbangangi ninji yaji. Ngajaka ngayu ninga, ninji jungunki kardarda, ngala ngayu karu ninga ngaki jangkurr.
ACT 26:4 Ngana yali jingkijba bukambijunyi Jumukunyi. Jingkijba yalu, ngayu jungku kunybana yuwana yurrngumba. Ngala ngayi juka, jungku ngayi langki, ngakinyina yajina. Baku ngayi barlba kula Jirusalimyurri. Jungku ngayi nanaba kularra yurrngumba kajana kindilkurrinyina.
ACT 26:5 Yalu jungku kunybana yuwana Musiskanyi, bukamba Jumuku. Ngala nanamuku Barasimuku, yalu jungku kunybanyimirra yuwanyi. Jungku yalu yurlurr yuwanyi. Jingkijba ngananjali Jumukunyi, ngayi Barasi. Ngayi Barasi yurrngumba. Marda yalimi karu ninga ngaki, ngayi Barasi yurrngumba. Marda yalimi ninga karu ngaki, jungku ngayi kunybanyimirra yuwanyi Musiskanyi, barrinani bukambiju Barasimuku, yalu jungku kunybanyimirra yuwanyi.
ACT 26:6 Jala ngayu karrinja nayiba waluwa nganyindu. Karrinja ngayu nayiba, kuyungangi ngayu nanda jangkurr wankiykanyi mili. Jingkijba ngayu, janyulu wankamba mili ngambalanya Kudwanyi, bayngkani jalija ngambalaka janyba.
ACT 26:7 Wankalanyi yanybayi Kud, janyulu manjijba yingka. Jungku janyulu walkurramirra mambuka bukambijuyngka Jumukuyngka. Yurrngumba kamambarra yukumba yali Jumuku nanankanyi mambukanyi. Yurrngumba yali yukumba nangangi. Jingkijba yali Kud, janyulu manjijba nanda, yanybangangi nyuli nanda jangkurr manjiykanyi yingka. Yalu yanyba mududu Kudkanyi bukambiju Jumuku. Yanyba yalu mududu yalibala marda mungana nanankanyi manjijba jalija Kudwanyi. Manjijba nyuli nanda mambuka Kudwanyi, baki janyba nangki. Ngala nyuli wankamba mili nanda Kudwanyi. Mankukiyi ngaki jangkurr, mambuka Yakriba. Yanyba yali ngaki, ngayu jungku balkina yuwana, kuyungangi ngayu nanda jangkurr wankiykanyi mili.
ACT 26:8 Wanyingkanyi miku narrimi kuyu nanda jangkurr Kudkanyi, nanda jangkurr wankiykanyi mili bayngkani jalija yalungka janyba. Wanyingkanyi miku narrimi kuyu nanda jangkurr Jumukunyi. Barriwa.
ACT 26:9 Wabula mankumanku ngaki, jangayu jungku kunybana yuwana Kudkanyi. Jangayu yabimba kiji nanankanyi, kuyu jala yalu jangkurr Jisuskanyi, nangangi yaji Nasarid. Yabimba jangayu walkurra kiji yalungi.
ACT 26:10 Nayi ngayi yabimba Jirusalim. Yabimba ngayi walkurra kiji yalungi, jali yalu kuyu nanda jangkurr Jisuskanyi. Yanybayi mambukamuku jurjkanyi ngaki, yuku jangayu yarrijba yalunya brisinyina. Baki wudumba ngayi kaja yalunya. Yarrijba ngayi yalunya brisinyina. Yarrijba ngayi yalunya kudukudu nganinymuku, jibarrimuku nanamuku Kudkanyi. Baku barri karrinja yali kurdusnyina. Baki jungku ngayi yalundu kunsilnyina. Yanyba ngayi, yuku jayalungka janyba. Jayalungka janyba barri.
ACT 26:11 Jilajba ngayili yingkarri yajiyurri, yingkarri yajiyurri. Kujba ngayili yalungi, yalu jali maruka muwa Jisuskanyi. Jali ngayu wakaramba yalunya, baki ngayi yabimba walkurra kiji yalungi. Jirrinyba ngayi yalunya, nulijba ngayi yalungi, yalu yanybikanyi nanankanyi Jisuskanyi, miku nyulu yalungi mambuka, miku nyulu jandanyi Kudkanyi. Nulijba ngayi yalungi, yalu yanybikanyi nanda jangkurr. Jaliyi miku yaliyanyi yanyba nanda jangkurr, baki wudumba ngayi yalunya, yarrijba ngayi brisinyina. Ngayi ngarrangarra muwa yalungi. Barlba ngayi yingkarri kajayurri barrawuyabarrawuyarri. Barlba ngayi barrawuyabarrawuyarri ngurrayngkanyi marda. Barlba ngayi, kujba yalungi, yalu jali maruka muwa Jisuskanyi.
ACT 26:12 Nani ngayi barlba langkurriji Damaskusyurri. Ngana yali wajba najanyi mambukamukunyi jurjkanyi. Yanybayi nanda jangkurr najana, jangayu wudumba nanamuku, maruka jala muwa Jisuskanyi. Jangayu wudumba yalunya, yarrijbaja brisinyina. Nani yanybayi nanda jangkurr najana, wajba jali ngana mambukamukunyi jurjkanyi. Barriwa.
ACT 26:13 Mankukiyi nayinda jangkurr, mambuka Yakriba. Mukunjana ngayi jila langki yubalina Damaskusyurri. Baki najba ngayi mirnbi, walkurra mirnbi. Nanda mirnbi kambanyi ngawamba walkurra bijal, ngala nayinda yingka mirnbi walkurramirra. Bilyirrbayi nanda mirnbi ngakindu marda yalundu, nganinymukunyina, jila jali yalu ngakindu. Bilyirrbayi mirnbi kudanyu nurrundu lalijinanyi.
ACT 26:14 Yirrba nurri jambarri, baki manku ngayi jangkurr kingkarrinya yanybikurri. Yanybayi jangkurr Ju yanyi, ‘Sul, Sul. Wanyingkanyi ninji ngarrangarra muwa ngaki. Wanyi wirangu ninji kurdanba ngaki kandimuku. Wanyingkanyi ninji yabimba walkurra kiji ngaki. Wanyingkanyi. Linjumba nganyingka. Jala burrkanijba dungala ladaladawanyi yarramawanyi, baki linjumba nangka nanda yarrama nukami. Nani, nganyingka linjumba, jala ninji yabimba kiji ngaki. Yabimba nganyingka kiji marda.’ Nani yanybayi nanda jangkurr kingkarrinya.
ACT 26:15 Ngajaka ngayi, ‘Wanyi ninji mambuka. Wanyi mambuka ninji jala yanyba ngaki.’ Jananganjayi nanangini kingkarrinya, ‘Ngayu Jisus. Ngayu nanda jala nganinji ngalangalaka. Kurda.
ACT 26:16 Ngala walajbakiyi. Karrinjakiyi. Badajba ngayi nganyinburri, karunki ninga yajinyi. Yarrijba ngayi ninga. Waki janinji ngaki. Karu janinji yingkamuku nanankanyi najba jala ninji nayimanji. Karu janinji yalunya ngaki. Baku barri, janinji karu yalunya nanankanyi jalija ngayu minimba ninga.
ACT 26:17 Lalanba janinga. Marrimba janinga, jalija ninyalimi kurdanba. Manjijba janinga nganyingkurri mungkijimukuyngkurri, marda ngurranyimukuyngkurri. Baki nulijba jayalu kurdanbikanyi ninga, ngala marrimba janinga mardarda.
ACT 26:18 Janinji milidimba yalunya ngaki. Baki jayalu jingkijba ngana. Jalija yalu jingkijba ngana, baki miku jayalu ngayangayijba nanda mambuka wuwarranyi Sayidin. Miku jayalu ngayangayijba mili nanda mambuka wuwarranyi. Ngayangayijba jayalu Kudkanyi, jalija yalu manku ngaki, kuyu ngaki jangkurr, baki janyulu manjamanjamba yalungi balki yaji Kudwanyi. Janyulu kandimba yalunya Kudwanyi, jalija yalu kuyu ngaki jangkurr, jalija yalu maruka ngaki. Kandimbaja yalunya Kudwanyi.’ Barriwa. Nani yanybayi Jisus ngaki yubalina.” Nani barri yanybayi Bul yalungi.
ACT 26:19 Mili barri yanybayi Bul. “Mambuka Yakriba. Ngayangayijba ngayi nanda jangkurr Jisuskanyi jali ngayu manku lalijinanyi.
ACT 26:20 Waluku ngayi jila Damaskusyurri. Milidimba ngayi yalunya Jumuku nanaba. Baki ngayi milidimba yalunya Jirusalim. Baku barri ngayi milidimba yalunya bukambijunyina yajina, Jumukuyngka. Baki milidimba ngayi ngurranyimuku marda. Karu ngayi yalunya, marda yalungkimi ngindu yalunginkanyi balkinyi yajinyi. Marda yalungkimi yangkalamba Kudkanyi. Marda yalimi yabimba kunyba yaji Kudkanyi. Baki yingkamukunyi, jala yalu najba yalungi kunyba yaji, baki jayalu jingkijba yalunya, ngindu yali yalunginkanyi balkinyi yajinyi.
ACT 26:21 Baki wudumba ngananjali Jumukunyi, milidimbangangi ngayi nani. Wudumba ngananjali walkurranyina jurjina, baki kurdanbiji ngananjalu.
ACT 26:22 Ngala yurrngumba nyuli yabimba kunyba yaji ngaki Kudwanyi. Lalanbayi ngana. Jala barri ngayu karrinja nayiba, karu ngayu bukambiju, walkurramuku mambukamuku, marda yingkamuku. Karu ngayu bukambiju nanamannga jangkurranyi Jisuskanyi. Karu ngayu nanamannga jangkurranyi. Musis, marda bukambiju jali yanyba jangkurr Kudkanyi, yanyba yali marda nanamannga jangkurranyi.
ACT 26:23 Yarrijba yali nanamannga jangkurranyi najana Kudkanyi. Yanybaka nanda jangkurr, ‘Kudanyu jayalu linjumba nanda jalija manjijba Kudwanyi. Linjumba jayalu, kurdanba jayalu, ngala wankijba janyulu mili. Lirrka janyulu wankijba. Janyulu wanka jungku waluwa. Barriwa. Janyulu karu yalunya, marrimba janyulu yalunya mardarda. Jumuku marda ngurranymuku marrimbaja mardarda nanangini jalija manjijba Kudwanyi.’” Barriwa. Nani yanybayi Bul mambukanyi Yakribakanyi marda yingkamukuyngka.
ACT 26:24 Baki kaya nyuli nanda mambuka Rumankanyi Bisdus. Kaya nyuli kudanyu Bulkanyi, “Bul. Ninji mudu. Yurrngumba ninji ningkijba jangkurr najana jingkiykanyi mili. Ninji balki kulaji.”
ACT 26:25 Jananganjayi Bulwanyi. “Miku mambuka Bisdus. Miku ngayu mudu. Ngayu kunyba kulaji. Nanda jangkurr ngaki, nanda duja jangkurr.
ACT 26:26 Mambuka Yakriba, yanyba ngayu nganyi yurlurr jangkurr. Jingkijba ninji nayinda yaji, karu jala ngayu narrinya. Manku ninji bukamba yaji. Manku ninji Jisuskanyi. Manku yalu nangangi bukambijunyi Jumukunyi.
ACT 26:27 Mambuka Yakriba. Wankalawanyi yanyba yali jangkurr Kudkanyi. Yarrijba yali nanda jangkurr najana Kudkanyi. Kuyu kuna ninji nanda jangkurr. Jingkijba ngayu ninga, kuyu ninji nanda jangkurr wankalanyi.”
ACT 26:28 Jananganjayi Bul Yakribawanyi. Miku nyuliyanyi jananganja yurlurr. Yanyba nyuli yinini Bulkanyi nayi, “Mankumanku nganyingka kuna, winyurru jangayu jungku krisjin, mankungangi ngayu nganyi jangkurr. Nani kuna nganyingka mankumanku ngaki.”
ACT 26:29 Jananganjayi Bulwanyi, “Yurrngumba yanyba ngayu mududu Kudkanyi. Ngajaka ngayu Kud, janinji jungku krisjin, yiningki winyurru barri, yiningki baku barri. Yanyba ngayu mududu Kudkanyi nganyi, marda bukambijuyngka manku jala ngaki jangkurr. Yanyba ngayu mududu Kudkanyi narringi, janarri jungku krisjinmuku. Ngajaka ngayu Kud, janarri jungku krisjin barrinani ngayu jungku krisjin. Nulijba ngayu nganyi, jungunkanyi krisjin, ngala miku ngayimi nulijba nganyi jungunkanyi brisinyina, barrinani ngayu.” Barriwa.
ACT 26:30 Baki walajba yali, mambuka Jukanyi Yakriba, marda nangangi maninganja Birnis, marda nanda mambuka kubaminkanyi Bisdus. Walajba yali baki bukambiju yingkamuku nanaba.
ACT 26:31 Jilajba yali danbiyurri baki yanyba yalungki. Nayi yalungki yanyba, “Kijijba yali nayinda Bul, ngala miku nyuliya yabimba kiji. Marda miku nangkimi janyba, jungunkanyi balkina yuwana. Marda miku ngambalimi jirrinyba yalunya kurdanbiji Bul. Marda miku nyulimi jungku brisinyina.” Nani yalungki yanyba.
ACT 26:32 Baki yanybayi mambuka Jukanyi Yakriba. Yanyba nyuli mambukanyi kubaminkanyi Bisduskanyi. Yanyba nyuli, “Nanda Bul, marda ninjimi muningka manjijba brisinanyi, ngala miku ninjiyi manjijba, ngajakangangi nyuli yanybiji walkurrayngka mambukanyi Sisakanyi. Marda ninjimi muningka manjijba, ngala nyuli ngajaka yanybiji Sisakanyi nanaba Rum.” Barriwa.
ACT 27:1 Baku barri yanyba nangki mambuka kubaminkanyi Bisdus. Yanyba nangki, “Nayimanji jangayu manjijba Bul marda yingkamuku Rumyurri, nanayina walkurranyina yajina Yidali.” Jirrinyba nyuli mambuka ngarrkadabawarrayngka, niji nangangi Juliyus. Jirrinyba nyuli nanda kuyunki Bul marda yingkamuku Rumyurri. Nanamuku yingkamuku, yali jungku brisinyina marda. Yukumba yali brisinyina Bisduskanyi, nyulu manjiykanyi yalunya walkurrayngkurri mambukarri Sisayurri. Nanamuku ngarrkadabawarrmuku yalungi niji ‘Ngarrkadabawarr walkurrayngka mambukanyi Sisakanyi.’
ACT 27:2 Jungkuyi yingka nganinyi nanaba Sisariya, nangangi yaji langku juju, yaji niji Yadramidiyam. Badajba nyuli Sisariyayurri nanganginyina walkurranyina wayana. Nanda nanganginmirra waya. Birrirrinja nangki barlkanyi Sisariyananyi wayana. Barlbaja waya langki kanjana nanankurri walkurrayngkurri yajiyurri Yasiyayurri. Barlbaja kajayurri barrawuyabarrawuyarri langki. Ngankijba yali wayana Bul, marda yingkamuku nanganbu brisinanyi. Marda nanda Yarisdarkus, nangangi yaji Masiduniya, jungku nyulili Disalunika, ngankijba nyuli wayana yalundu. Marda ngayu jala yarrijba nayinda jangkurr najana, ngankijba ngayi wayana yalundu. Baki barlba nurri langki.
ACT 27:3 Munganawa nurri wanbiya Sayidun. Nanda mambuka ngarrkadabawarrayngka Juliyus, nyuli kunyba Bulkanyi. Yanyba nyuli Bulkanyi, “Yuku barri. Yuku ninji barlba yundu jambana. Yuku ninji yidamba nganyi kandimuku nayiba. Yuku ninji wiykunumba yaji jaliyi ninyalu wajba.”
ACT 27:4 Barlba nurri Sayidunanyi, baki jila nurri mili langki kanjana. Warrmbayi yunkurr kudanyu bayunguna, baki karriya lukulukumbayi waya wilina waliyanguna, ngala nyuli bijal karnangurrina yajina. Jilajba nurri langki, karriya nananyina waliyanguna, niji Sayibris. Kangandijba nurri waliyanguna, baki jila nurri bayungu, langkiya waliyanguna.
ACT 27:5 Birlbidamba nurri bayungu burrandijba, kulaya waliyanguna baki langkiya nananyina walkurranyina yajina Silisiya. Baki kangandijba nurri kulaya yingkana yajina Bambiliya. Baku barri wanbiya nurri barrawuyabarrawuyana niji Mayira. Nanda yaji Mayira, nananyina walkurranyina yajina, niji Lisiya. Walajba nurri wayananyi nanaba baki jungku nurri barrawuyabarrawuyana.
ACT 27:6 Jungku nurri, ngala mambuka ngarrkadabawarrayngka kujba nyuli yingkanyi wayanyi jilaykanyi mili bayungu. Jungkuyi nanaba yingka nganinyi, nangangi yaji kularrinybana kanjana juju. Niji nangangi yaji Yalisandiya. Badajba nyuli kulani nanganginyina walkurranyina wayana. Nanda waya nanganginmirra. Karu nyuli mambuka, janyulu kuyu nurrunya bayungu Yidaliyurri nanganginyina wayana. Baki ngankijba nurri wayana.
ACT 27:7 Barlba nurri nanamunanyi yajinanyi baki jilajba nurri bayungu yili barri. Warrmbayi yunkurr kudanyu bayunguna. Miku nurriya jilajba dulu bayungu yunkurrngangi. Ngala mardunguji wanbiya nurri barrawuyabarrawuyana, niji Kayidus. Miku nurriyi jilajba mili bayungu. Baki jilajba nurri kula waliyangurri niji Krid. Kangandijba nurri karriya muluna, niji Salmuni.
ACT 27:8 Jilajba nurri kula bundu waliyanguna, ngala jila nurri yili yunkurrngangi. Baki mili nurri barlba bayungu. Baku barri, nurri wanbiya ngarrkana yajina, niji ‘Kunyba Yaji Wayanyi.’ Nanda yaji bundu barrawuyabarrawuyana, niji Lasiya. Jala nurri wanbiya nanaba, janyba yali dungala wayka kurulyudi wayananyi marrimbikanyi. Jungkuja waya, mikuwali ruru.
ACT 27:9 Jungku nurri nanaba juju, ngala nurri yukumba kunybanyi yunkurranyi. Jungku nurri ngala nyulu bundu wurarawala. Winyurru warrmbaja yunkurr kudanyu. Walajbaja walkurra lakululu wajuykanyi waya. Miku yalili jilajba kajana wayana nanamanji wurrarrawala, warrmbangangi yunkurr kudanyu. Baki yanybayi Bul yalungi wayana,
ACT 27:10 “Narri. Jingkijba ngayu, jaliyi ngambala barlba mili wayana nayimanji, baki dalyawijbaja waya. Dalyambaja waya yunkurrwanyi marda lakululuwanyi. Ngurrulijbawali yaji wayana, marda ngurrulijbawali waya. Ngurrulijba ngambaliyi marda.”
ACT 27:11 Ngala yanyba buli mambuka wayanyi, marda nanda yingka nanganginmirra nanda waya, yanyba buli, “Marda ngambalimi jilajba mili bayungu Yidaliyurri.” Baki nyuli jirrinyba bulanya mambukawanyi ngarrkadabawarrayngka. Jirrinybayi bulanya, “Jangambala barlba mili bayungu Yidaliyurri.” Miku nyuliya kuyu nanda jangkurr Bulkanyi ngurruliykanyi. Yurlwa nyuli Bulkanyi.
ACT 27:12 Kudukudu nganinymuku wayana, yaliyanyi barlba nanamunanyi yajinanyi. Miku nanda yaji kunyba wayanyi wurarawala, jala warrmbayi yunkurr kudanyu. Yaliyanyi jilajba bayungu yingkarri yajiyurri nananyina waliyanguna Krid. Niji nanankanyi yingkanyi yajinyi Binis. Ngarrka yaji nanaba, kunyba yaji wayanyi jala warrmba yunkurr langina, marda kulani. Kudukudu waya yalili jungku nanaba ngarrkana yajina yurrngumba wurarawala.
ACT 27:13 Baki warrmbayi bayakarda yunkurr kulani yili barri. Mikukiya warrmba yunkurr kudanyu. Mankumanku yalungki nanda kunyba yunkurr jilaykanyi mili bayungu nanankurri yingkarri yajiyurri. Baki kingkarrumba yali nanda dungala marrimbikanyi waya. Wililijba yali nanda kurul dungalayudi. Wililijba yali waykalinya wabudananyi, baki jilajba yali bayungu bundu waliyanguna kulaya barri.
ACT 27:14 Kamu barri kurdadijbayi nanda yunkurr kulani, ngala warrmbayi yingka yunkurr jalili yalu karu, ‘Karriya Langina.’ Warrmbayi yunkurr kudanyu karriya langina, wurarumu.
ACT 27:15 Jala warrmbayi yunkurr karriya langina, baki miku nurriyi jilajba langki kajikaji. Bundu nanda waliyangu langkurri. Baki lukujba nurri kula. Wirlkuyi barri waya. Warrmbayi yunkurr bayngkani wayana.
ACT 27:16 Kangandijba nurri yingkana bayakardana waliyanguna, niji Kuda. Kangandijba nurri kulaya waliyanguna. Karnngurrijbayi yaji bijal kulaya waliyanguna, kurrkunbayi yunkurr bijal waliyanguwanyi. Yurrngumba wililijbayi bayakarda muwarda nanangini walkurranyi wayawanyi.
ACT 27:17 Ngala nurri jilajba kulaya wilina waliyanguna, kingkarrumba yali nanda bayakarda muwarda. Langandaba yali nanda muwarda wayana nanamukunyi, waki jala wayana. Jaru yali langandaba nanda muwarda, wirrburrumbayi nanda rumu. Langandaba yali, baki kijijba yali yundu wayana kurulyudinyi. Baki yali kijijba kaja kurul wunanybala lukuluku wayana muwana. Kaja kurul yali kijijba lukuluku muwana, baki jungkuyi nanda waya mili ngiruka. Marrala yali. Marrala yali kudanyu yunkurranyi marda lakululunyi. Mankumanku yalungki, “Yiningki warrmbaja nanda yunkurr yurrngumba. Yiningki jangambala birlbidamba kula nanankurri walkurrayngkurri yajiyurri, niji Libiya. Yiningki dalyawijbaja waya dungalana.” Nani yalungki mankumanku. Dulaba yali kurndarrurru kingkarrinya, baki mikukiya wirlku nanda waya dulu. Ngala yuwaji jilajbayi waya, mikuyaji kurndarrurrunyi.
ACT 27:18 Warrmbawaka nanda yunkurr kudanyu. Walajbangka lakululu walkurramirra. Baki munganawa yali janyba yaji wayananyi kanjarri. Janyba yali kaja yaji, kuyu jali yalu wayana. Janyba yali yaji baki bululujbayi nanda waya.
ACT 27:19 Mili yali janyba yaji munganawa. Janyba yali kurul marda yingka yaji wayanyi.
ACT 27:20 Mardunguji barri munybayi yaji bukamba ngaluwanyi, kukurdu nanda ngalu. Mikuyaji kambanyi, mikuyaji warrawijinyi mungana. Warrmbawaka yunkurr kudanyu yurrngumba. Mankumanku nurrungki nayi, “Dalyawijbaja nayinda waya. Dalyawijbaja. Ngurrulijba jangambala. Janyba jangambalaka.” Nani nurrungki mankumanku. Miku nurriya jingkijba wanjawa nurri. Mikuyaji kambanyi, mikuyaji warrawijinyi.
ACT 27:21 Jungku yali yurrngumba. Miku yaliya jarrba mama. Baki karrinjayi Bul waluwa yalundu. Yanyba nyuli yalunya, “Narri. Yuku narriyanyi kuyu ngaki jangkurr wabula. Marda miku nurriyanyi barlba walkurrananyi waliyangunanyi Kridnanyi. Jaliyanyi ngambala wambu jungku nanaba waliyanguna, yukukiyanyi jungku nanda yaji wayana.
ACT 27:22 Ngala nayimanji ngayu ngajaka narrinya, karda janarri jungku. Miku narriyi marrala. Dalyawijbaja nayinda waya. Ngurrulijbaja, ngala miku narringkiyi janyba. Miku narriyi ngurrulijba.
ACT 27:23 Karungka ngayu narrinya nanginkanyi jangkurranyi, karrinjangangi nyuli waluwa ngakindu Yanjil Kudkanyi. Manjijba nyuli Yanjil ngakindurri nanangini Kudwanyi, maruka jala ngayu muwa nangangi.
ACT 27:24 Karrinja nyuli walu ngakindu, baki yanyba nyuli ngaki. Nayi yanybayi Yanjil. ‘Bul. Miku ninjiyi marrala. Badajba janinji Rumyurri. Badajba janinji kurdusyurri mambukanyi Sisakanyi. Lalanbawa ninga Kudwanyi. Miku ninjiyi ngurrulijba. Marda yalu yingkamuku, jungku jala nganyindu, miku yaliyi ngurrulijba. Lalanbawa yalunya marda Kudwanyi.’ Nani yanybayi nanda Yanjil ngaki.
ACT 27:25 Baki karda janarri jungku muwa. Miku narriyi marrala, jingkijbangangi ngayu Kud. Jingkijba ngayu janyulu yabimba nanda jala nyulu yanyba yurrngumba. Miku narriyi marrala.
ACT 27:26 Ngala wajubaja waya yunkurrwanyi. Wirlkuja waya jambarri yingkarri waliyangurri.” Barriwa. Nani yanybayi Bul yalungi nganinymukuyngka wayana.
ACT 27:27 Warrmbayi nanda yunkurr karrina barri. Warrmbayi yurrngumba kujarra wik. Nani janybayi yalunya yunkurrwanyi yurrngumba nananyina kanjana. Ngala nyuli buwawandi mungana, kudiyamuku waki jala wayana, mankumanku yalungki, “Yiningki bunundujba nurri jambarri.”
ACT 27:28 Baki yali kijijba dungala kurulina. Janyba yali dungala wayka kanjarri. Kujba yali wanjarruwada jamba kala wabudana. Wakaramba yali jamba juju wayka 120 nukami. Mili yali janyba kurul kamu dungalayudi. Wakaramba yali jamba bijal juju wayka 90 nukami. Baki jingkijba yali nanda waya barringa barri bundu waliyanguna.
ACT 27:29 Nanamuku waki jali wayana, marrala yali. Marrala yali wayanyi, wirlkuwali dungalarri, baki dalyambawali dungalawanyi. Marrala yali. Baki yali janyba walkurra dungala wayka wayananyi marrimbikanyi nanda waya, baki nyulu miku ruru. Janyba yali kujarrakujarra dungala kurulyudi. Kijijba yali kujarra kurul bunyina wayana. Kijijba yali kurul dungalayudi, baki yanyba yali mududu, winyurru janyulu kamambalingijba yaji karrina, baki yuku barri jayalu najba yaji.
ACT 27:30 Nanamuku waki jali muwardana, nulijba yali kardiykanyi jambarri. Dulaba yali kurul bayakardananyi muwardananyi, baki yali yarrijba nanda muwarda wayka wabudana. Yanyba yali, jayalu jilajba muwardana, jayalu janyba mili dungala muluna wayana. Ngala jujijba yali. Yaliyanyi jilajba jambarri muwardana.
ACT 27:31 Ngala yanybayi Bul mambukanyi marda ngarrkadabawarrmukuyngka. Yanyba nyuli, “Marda yalimi jungku wayana. Jaliyi miku yalu jungku wayana, baki miku narrinyiyi marrimba mardarda Kudwanyi. Marda yalimi jungku wayana wakiwarrmuku.”
ACT 27:32 Baki karlba yali kurul ngarrkadabawarranyi. Karlba yali kurul, baki bulunbayi nanda bayakarda muwarda juju.
ACT 27:33 Jilijba bijal kambalingijba yaji, baki karu nyuli yalunya kudanyu Bulwanyi. Karu nyuli yalunya jaji mama. Yanyba nyuli yalungi, “Jungku narri nayiba wayana kujarra wik, ngala miku narriya jarrba yaji yurrngumba. Marrala narri kudanyu yurrngumba.
ACT 27:34 Ngayu karungka narrinya kudanyu janarri jarrba mama. Miku narriyi jungku wanka, jaliyi miku narri jarrba yaji. Marda narrimi jarrba yaji, baki janarri jungku ngirukayudi mankanyiyudi. Lalanba janyulu narrinya bukambiju Kudwanyi. Mikuwali narrinya linjumba.”
ACT 27:35 Nani yanybayi Bul, baki nyuli wudumba damba. Yanyba nyuli mududu Kudkanyi. Yanybayi Bul, “Buwakanya kingkarri, nurru mirnarrijba muwa nanginkanyi mamanyi. Nurru mirnarrijba muwa, wajbangangi ninji nurrunya bukambijuyngka yajinyi. Wajba ninji nurrunya nanginkanyi mamanyi.” Baki nyuli dalyamba nanda damba baki wardamba nangki mamanyi.
ACT 27:36 Baki miku yaliya marrala mili. Kuyu yali mama, baki jarrbayi mama. Wardamba yalungki bukambiju nanamuku jungku jali yalu wayana.
ACT 27:37 Kudukudu nurri wayana 276 barri.
ACT 27:38 Jali yalu jarrba kaja mama, wardijba yali muwa. Baki janyba yali daburrul yami. Janyba yali kudukudu yami kanjarri, baki bululujbayi nanda waya.
ACT 27:39 Kamambawurri yaji, najba yali nanda waliyangu wakiwarrmukunyi. Najba yali jamba, ngala miku yaliya jingkijba nanda yaji. Ngala yali najba muwa yaji kanjana, mankumanku yalungki, “Yarrijba jangambala waya muwana yajina. Yiningki jilajbaja waya nanankurri, baki yuku jungkuja.”
ACT 27:40 Baki karlba yali kujarra kujarra kurul dungalayudi. Karlba yali kurul marrimbikanyi waya. Dulaba yali yingka kurul nanamunanyi riminanyi bunyina jala jungku wayana. Karrinjarrijba yali nanda kurndarrurru wayana. Kijijba yali kurndarrurru kingkarri, baki jilajbayi waya jambarri. Jululumbayi waya bayngkani yunkurrwanyi.
ACT 27:41 Ngala dabayi jamba kala wabudana wayawanyi. Kinybayi wali kudanyu janjana. Mikukiyanyi ruru. Dabayi bunyi waya lakululuwanyi. Dabayi waya kajawanyi lakululuwanyi walkurrawanyi, baki dalyambayi nanda waya.
ACT 27:42 Yanyba yalungki ngarrkadabawarrmuku. Yanyba yalungki, “Kurdanba jangambala yalunya, kuyu jali ngambala brisinanyi. Yiningki jayalu banjarrba jambarri baki wirlku jayalu ngamanbunanyi. Kurdanba jangambala yalunya, baki mikuwali yalu wirlku ngamanbunanyi.” Barriwa.
ACT 27:43 Ngala yalungi mambuka, yanyba nyuli “Mikujiyi kurdanba yalunya.” Miku nyuliya nulijba yalungi kurdanbikanyi Bul. Baki jirrinyba nyuli yalunya bukambiju, jungku jali wayana. Jirrinyba nyuli yalunya banjarrkanyi. Jirrinyba nyuli yalunya mambukawanyi, jayalu jurrulaba baki banjarrba jayalu jambarri.
ACT 27:44 Ngala yingkamuku ngurrumuku, jirrinyba nyuli yalunya, jayalu marrimba yiningki kurnda, yiningki yaji wayanyi. Jayalu jurrulaba yajiyudi, baki jayalu jilajba jambarri. Barriwa. Nani yali yabimba yaji, baki bukambiju yali wanbiya jambana. Yuku barri.
ACT 28:1 Wanbiya nurri yundu jambana. Miku nurriya linju mankanyi. Yuku nurri jungku bukambiju. Kandimba nurrunjali mungkijimukunyi nanankanyi waliyangunyi. Niji waliyangunyi Malda. Yirrbayi janja barri, baki mardujbayi yaji kudanyu. Bakarrijba yali jangu mungkijimukunyi waliyanguna. Karu nurrunjali, nurru jungunki janguna.
ACT 28:3 Wungumbayi jangu Bulwanyi. Ngala nyuli yarrijba kudiya kurnda janguna, walajbayi miya bijbawarr kurndananyi. Bijbayi Bul marni miyawanyi, baki marrimbayi marni.
ACT 28:4 Najba yali nanda miya marrimbikurri Bul marni mungkijimukunyi waliyangunyi. Najba yali miya, baki yanyba yalungki, “Nayinda nganinyi, nyulu kurdanbawarr. Bijbayi miyawanyi, kurdanbangangi nyuli yingka nganinyi. Ngala miku nyuliyi jungku wanka. Miku nyuliya ngurrulijba kanjana, ngala janyba janangka, wirangu nanda miya. Janyba janangka, jungkungangi nyulu balki.” Nani yalungki yanyba.
ACT 28:5 Ngala barawara nangki jalu Bul, baki yirrbayi nanda miya wayka jangurri. Mikukiya linjumba Bul miyawanyi. Yuwajiwa nyuli jungku kunyba.
ACT 28:6 Yukumba yali nanamuku jali jungku waliyanguna. Mankumanku yalungki, “Bilyinyba janangka mankanyi dulu. Yiningki janyba janangka.” Ngala yukumba yali Bulkanyi juju. Najba yali Bul kudanyu. Miku nangkiya bilyinyba. Miku nangkiya janyba. Marrala yali kudanyu, baki yanyba yalungki,” “Nayinda nganinyi nyulu kud.
ACT 28:7 Jungku yali wurruna. Nanda yaji bundu wurru, nanda nangangi yaji, mambuka waliyangunyi. Nanda mambuka nangangi niji Bubliyus. Kandimba nyuli nurrunya mambukawanyi, baki jungku nurri nanganbu mardunguji.
ACT 28:8 Buwakanya mambukanyi lunji nyuli. Kuluka nyuli jalyuna. Ngarrangarrayi mankanyi. Dayngkayi muwa. Barlbayi Bul malburri. Yanyba nyuli mududu Kudkanyi nangangi. Yarrijba nangki Bul marni malbuna, baki kunybijbayi nanda malbu. Kunymamba nyuli malbu Bulwanyi.
ACT 28:9 Yingkamukunyi jungku jali waliyanguna, manku yali yaji malbunyi nyuli kunybijba. Manku yali yaji malbunyi baki bukambiju jali yalu lunji, badajba yali Bulyurri. Badajba yali, baki nyuli kunymamba yalunya Bulwanyi.
ACT 28:10 Muningka yali wajba nurrunya yajinyi. Wajba nurrunjali kajanyi yajinyi. Baku barri jala nurri barlba waliyangunanyi, wajba nurrunjali mili yajinyi. Wajba nurrunjali yajinyi jali nurru nulijba.
ACT 28:11 Jungku nurri waliyanguna kujarra yingamali yakarl, baki barlba nurri langki. Barlba nurri langki yingkana wayana. Niji nanankanyi wanyanyi, ‘Kujarra Buwakula.’ Wabula nanda waya badajbayi kulani Yalisandiyananyi. Jungkuyi nanda waya waliyanguna yurrngumba wurarawala. Nanamanji jali bukamba wurarawala, barlba nurri langkurrinybarri yingkarri waliyangurri walkurrayngkurri.
ACT 28:12 Baki nurri wanbiya barrawuyabarrawuyana, niji Sayirakus, karriya walkurranyina waliyanguna. Jungku nurri nanaba mardunguji, kujarra yingamali kambana.
ACT 28:13 Baki barlba nurri mili langki wayana. Wanbiya nurri barrawuyabarrawuyana langkurrinybana waliyangunanyi, niji Rikiyum, nananyina walkurranyina yajina Yidali. Munganawa warrmbayi yunkurr kulani. Dulu nurri jilajba mili langki juju, jululumbangangi bayngkani yunkurrwanyi. Baku barri kujarra kambana, wanbiya nurri yingkana barrawuyabarrawuyana, niji Budiyuli. Walajba nurri wayananyi nanaba.
ACT 28:14 Kudiya krisjinmuku jali jungku nanaba, ngajaka nurrunjali jungunki yalunginyina barndana. Jungku nurri nanaba yalundu yingamali wik, baki jilajba nurri mili langki nukamina. Karu yali krisjinmuku nanaba Rum nurrungi yingkamukunyi. Karu yali krisjinmuku ngala jilijba nurri wanbiya Rum, baki yali jilajba langina nurrunburri, madamadambiji nurrungka. Madamadamba nurrungki yajina, niji Yabiyus Burum. Kandimba nurrunjali, baki jilajba bukamba nurri mili langki. Yingkamuku krisjinmuku Rumkanyi, jilajba yali langina bayngkani. Madamadamba nurrungki, burrandi yajina, niji ‘Kujarra Yingamali Barndamuku.’ Kandimba nurrunjali. Mirnarrijbayi muwa Bul, najba jala nyuli yalunya. Yanyba nyuli mududu Kudkanyi, Kud nyulu kunyba Bulkanyi. Baki kamu barri nurri wanbiya Rum.
ACT 28:16 Yanyba nyuli Bulkanyi nanda mambuka ngarrkadabawarrayngka. Yanyba nyuli Bulkanyi, yuku barri nyuli jungku barndana. Yuku barri nyuli jungku barndana yingamali ngarrkadabawarr nanganbu. Mikuyaji yingkamukuyngka nanganbu, ngawamba yingamali ngarrkadabawarr.
ACT 28:17 Baku barri, kujarra yingamali kambana, nyuli ngajaka malbumalbu Jukanyi nanaba Rum. Ngajakayi yalunya badaykanyi malumba nanganburri, baki janyulu yanyba yalungi. Malumba yali badajba nanganburri, baki yanybayi Bul yalungi. Nayi nyuli yanyba, “Mungkijimuku, yarrijba ngananjali brisinyina nanaba Jirusalim. Yarrijba ngani brisinyina ngambalanginyi mungkijimukunyi. Ngala miku ngayiya jungku balkina yuwana. Miku ngayiya jungku balkina yuwana yalungi wankalamukuyngka. Miku ngayiya yabimba balki yaji yuwanyi Jukanyi. Ngala ngananjali wudumba, baki manjijba yalundurri mungkijiyurri Rumkanyi.
ACT 28:18 Ngajaka ngani jangkurranyi yingkawanyi mambukawanyi kubaminkanyi Rumkanyi. Ngajaka ngani jangkurranyi, baki manku nyuli ngaki jangkurr. Yanyba nyuli, “Miku nyuliya yabimba balki yaji yuwanyi Rumkanyi. Miku ngayiyi jirrinyba yalunya, yalu kurdanbiji Bul. Miku nyuliyi jungku balkina yuwana. Miku.” Baki nyuli yanyba janyulu muningka manjijba ngana ngakinkurri barndarri.
ACT 28:19 Ngala yuwaji yali nulijba ngaki kurdanbikanyi ngana nanamuku Jumuku. Baki ngayi karu nanda mambuka Rumkanyi. Karu ngayi mambuka, janyulu manjijba ngana walkurrayngkurri mambukarri Sisayurri. Janyulu manjijba ngana nanginkurri Rumyurri. Ngala miku jangayu karu nanda mambuka Sisa balkinyi yalungi, yalu jungkuyi balki.
ACT 28:20 Jali nurru wanbiya nayiba Rum, ngayi ngajaka narrinya jilaji ngakindurri. Karu ngayiyanyi narrinya nanginkanyi jangkurranyi. Ngambala Jumuku, yukumba ngambala nangangi Krayiskanyi. Yali yukumba nangangi marda, wankalamuku. Wankala barri yanybayi Kud, janyulu manjijba Krayis. Kuyu ngayi nanda jangkurr Jisuskanyi. Nyulu nanda Krayis. Kijijba ngananjali nanginjudi kijbakijbayudi, kuyungangi ngayu nayinda jangkurr, nanda Jisus, nyulu Krayis.” Barriwa. Nani yanybayi Bul yalungi.
ACT 28:21 Jali yalu manku nangangi jangkurr malbumalbuwanyi, yanyba yali nangangi, “Miku yaliyanyi manjijba jangkurr najana nganyi Jumukunyi nanaba Judiya. Miku yaliyanyi manjijba jangkurr nganyi. Badajba yali Judiyananyi kudiya mungkijimuku, ngala miku yaliya yanyba nganyi. Miku yaliya karu nurrunya balkinyi yajinyi nganyingkanyi.
ACT 28:22 Ngala nurrimi manku mili nganyi jangkurr nangangi Krayiskanyi. Jingkijba nurru kudukudu nganinymuku lukuluku, yalu yanyba balki jangkurr nganyi. Miku yalimi yanyba kunyba jangkurr narringi krisjinmukuyngka. Nurrimi manku mili jangkurr nganyi Krayiskanyi.” Barriwa.
ACT 28:23 Yanyba yalungki malbumalbu Jukanyi. Yanyba yalungki, baki yali karu Bul, jayalu wijba nanganginkurri barndarri baku barri. Nanamanji jali yalu wijba, kudukudu mili yali badajba Jumuku. Badajba yali yalibala, baki yanyba nyuli yalungi yurrngumba baki mungijbayi yaji. Yanybayi Bul kaja jangkurr Kudkanyi, jala nyulu lalanba yalunya. Nulijba nyuli yalungi, yalu kuyunkanyi nangangi jangkurr Jisuskanyi. Yanyba nyuli jangkurr, yarrijba jali yalu najana, Musiswanyi marda wankalawanyi. Karu nyuli yalunya wankalanyi jangkurranyi nanganginyina barndana.
ACT 28:24 Kuyu yali nanda jangkurr Bulkanyi yingkamukunyi. Ngala yingkamukunyi miku yaliyanyi kuyu nanda jangkurr.
ACT 28:25 Baki yanybayi Bul nayinda jangkurr, “Yanyba nyuli duja jangkurr nanda Kunyba Ngarndu Kudkanyi. Yanyba nyuli duja jangkurr, karu jali nyulu wankalawanyi Yayisayawanyi. Karu nyuli wankalanyi, nyulu yanybiji nayinda jangkurr yingkamukuyngka,
ACT 28:26 ‘Jilajba janinji. Yanyba janinji Jumukuyngka nayinda jangkurr, “Manku narri jangkurr, ngala miku narrimi jingkijba nanda jangkurr. Jungku narri yamiyudi, ngala miku narrimi najba yaji. Najba narri yaji, ngala miku narrimi jingkijba nanda jala narri najba.
ACT 28:27 Yali jardibirri Jumuku. Yurlwa yali ngakinkanyi jangkurranyi. Nayi yali makaba yalungi kuwarda. Nayi yali makaba yalungi yami. Baki miku yaliyi manku ngaki jangkurr. Miku yaliya najba nanda jala ngayu yabimba. Jungkungangi yali nani, baki miku yaliyi jingkijba ngaki yaji. Ngala, jaliyi yalu jingkijba ngaki yaji, jaliyi yalu kuyu ngaki jangkurr, baki jangayu manjamanjamba yalungi balki yaji. Janyba jangayu yalungi balki yaji kurdulunanyi.’” Nani nyuli yarrijba jangkurr najana, nanangini wankalawanyi. Yarrijba nyuli nanda jangkurr jali karu Kunybawanyi Ngarnduwanyi Kudkanyi.” Barriwa. Nani yanybayi Bul yalungi.
ACT 28:28 Baki mili yanybayi Bul yalungi Jumukuyngka. Nayi nyuli yanyba, “Karu ngayu narrinya, nyuli manjijba ngana yalunburri ngurranyimukuyngkurri. Jangayu karu yalunya ngurranyimuku nanginkanyi jangkurranyi, baki jayalu manku ngaki jangkurr ngurranyimukunyi. Jayalu kuyu ngaki jangkurr.” Nani yanybayi Bul yalungi malbumalbu, yidamba jali Bul nanganginyina barndana.
ACT 28:29 Baki yali barlba barndananyi. Jakakajba yalungki ngala yali jilajba. Jakakajba yalungki nanganginkanyi jangkurranyi Bulkanyi. Barriwa.
ACT 28:30 Kujarranyina kindilkurrinyina barri jungkuyi Bul nanaba Rum nanganginyina barndana. Wajba nyuli dungalanyi jungunkanyi nananyina barrawuna. Kandimba nyuli yalunya bukambiju jali yalu yidamba Bul.
ACT 28:31 Milidimba nyuli yalunya Kudkanyi nayi, “Lalanba nyulu yalunya Kudwanyi, jala yalu kuyu nanda jangkurr Jisuskanyi.” Nani nyuli milidimba yalunya Jisus Krayiskanyi. Miku nyuliyi manyirru milidimbikanyi, baki miku yaliyanyi kurrkunba Bul milidimbikanyi yingkamukunyi. Kudanyu nyuli milidimba yalunya Kudkanyi, marda Jisus Krayiskanyi. Barriwa barri. Bukamba nayinda jangkurr.
GAL 1:1 Ngayu, ngaki niji Bul. Ngayu manjijba nayinda jangkurr najana narrindurri. Ngayu manjijba nayinda jangkurr narrindurri Krisjinmukuyngkurri nananyina walkurranyina yajina niji Kalajiya. Bula ngani manjijba, Jisus Krayiswanyi baki Buwakayu Kudwanyi. Bula ngani manjijba, milidimbiji yingkamuku bulangi. Mikukiyanyi manjijba ngana nganinyiwanyi, ngala bula ngani manjijba, Jisus Krayiswanyi baki Buwakayu, nanda jali wankamba Jisus Krayis mili. Nurru manjijbangka nayinda jangkurr narrindurri. Ngayu marda ngakinmukunyi kandimukunyi nayiba ngakindu, nurru manjijbangka jangkurr narrindurri.
GAL 1:3 Yanyba nurri mududu bulangi Kudkanyi marda Jisus Krayiskanyi. Ngajaka nurru bulanya, jabula yabimbiji kunyba yaji narringi, baki janarri jungku mardumardu muwa. Janyba nangki Jisus Krayis. Janyba nangki ngamanginkanyi balkinyi yajinyi. Nganinyimukunyi yalu yabimbaka balki yaji, kudukudu balki yaji yurrngumba. Ngala Jisus Krayiswanyi, nyuli yabimba kunyba yaji yurrngumba. Nyuli yabimba nanda jali nulijba Kud nangangi yabimbikanyi. Jungku nyuli kunyba nangangi Kudkanyi yurrngumba, baki janyba nangki ngamanginkanyi balkinyi yajinyi. Manjijbayi Jisus Krayis Kudwanyi janybikanyi nangka ngambalangi, baki nanankardi ngambala jungkuka yurlurrmba nangangi Kudkanyi nanijba barri. Baki nanankardi barri, baku jalija ngambalaka janyba, jangambala jungku wanka nangandu yurrngumba. Ngambala mirnarrijba muwa nangangi Kudkanyi. Nyulu walkurramirra mambuka. Baki baku yurrngumba janyulu walkurramirra mambuka ngambalangi. Mikuwali yingka walkurra barrinani nyulu. Barriwa.
GAL 1:6 Ngala manmala ngayu narringi. Wabula ngayi milidimba narrinya nanankanyi jangkurranyi nanganginkanyi Jisus Krayiskanyi, baki narri kuyuyi nanda jangkurr. Narri durrijbayi nangangi jangkurr Jisus Krayiskanyi, nanda jali yarrijba narrinya nanganginmuku durrijbawarrmuku. Nanda jangkurr nangangi duja, yurlurrmba. Waluku narri durrijbayi nangangi jangkurr. Ngala baku mardunguji narri yingkijbayi nanda nangangi jangkurr, narringki yangkalamba nanamunanyi jangkurrnanyi, baki nanijba narri durrijbangka yinini jangkurr.
GAL 1:7 Yingkamukunyi yali karu narrinya nanankanyi yingkanyi jangkurranyi, yingkamukunyi jala miku yalimi kuyu yurlurrmba jangkurr nangangi Jisus Krayiskanyi. Yalu balkimuku milidimbawarrmuku. Yangkalamba narringki nanankardi dujananyi jangkurrnanyi. Yangkalamba narringki nanankurri yingkayurri jangkurryurri, ngala miku nanda duja jangkurr.
GAL 1:8 Nurri milidimba narrinya nanankanyi duja jangkurranyi nangangi Jisus Krayiskanyi. Ngawamba nanda nangangi jangkurr duja, ngala yinini nanda jangkurr, miku nanda duja jangkurr. Jalimi nurru karu narrinya yinini jangkurranyi, baki miku nanda duja. Jaliyi yingkawanyi karu narrinya yinini jangkurranyi, baki miku nanda duja marda. Jaliyi Yanjilwanyi karu narrinya yinini jangkurranyi, baki miku nanda duja marda. Ngawamba nanda jangkurr, milidimba jala nurru narrinya wabula, ngawamba nanda jangkurr duja. Jaliyi yingkawanyi milidimba narrinya yinini jangkurranyi, baki mikujiyi manku nangangi jangkurr. Jaliyi yingkawanyi milidimba yinini jangkurranyi, baki baku barri, manjijbaja nanda Kudwanyi wayka jangurri Yilyurri. Kudanyu nurru karungka narrinya nanankanyi jangkurranyi. Jirrinyi nanda jangkurr. Barriwa.
GAL 1:10 Jala ngayu yanyba nani barri, baki yanka narringka mankumanku ngaki. Mankumanku kuna narringka ngaki, ngayu nulijba yalungi yingkamukuyngka, yalu barrarrakiykanyi ngana. Ngala miku. Miku ngayimi nulijba yalungi, yalu barrarrakiykanyi ngana. Ngala ngayu nulijba nangangi Kudkanyi, nyulu barrarrakiykanyi ngaki. Milidimba ngayimi yalunya, ngawamba nanankanyi jangkurranyi yurlurrmba yurrngumba. Jalimi ngayu nulijba yalungi, yalu barrarrakiykanyi ngana, baki miku ngayimi jungku wakiwarr nangangi Jisus Krayiskanyi, baki miku ngayimi milidimba yalunya nanganginkanyi duja jangkurranyi. Barriwa.
GAL 1:11 Narri, ngakinmuku bababanyamba ngambalaka. Nanda jangkurr, milidimba jala ngayu narrinya, mikukiyanyi wajba ngana jangkurranyi nganinyiwanyi. Miku. Ngala nyuli wajba ngana nanankanyi jangkurranyi Jisus Krayiswanyi. Ngawamba nanganginkanyi jangkurranyi ngayu milidimba. Miku ngayimi milidimba yingkanyi nganiyngkanyi jangkurranyi. Ngawamba nanganginkanyi jangkurranyi Jisus Krayiskanyi. Barriwa.
GAL 1:13 Jingkijba nganarri wabula, waluwa jali ngayu Krisjin. Jingkijba narri ngaki yuwa nanamanji, ngayili yabimba kiji yalungi, kuyu jali jangkurr nangangi Jisus Krayiskanyi. Ngayiyala kurrkunba yalunya kuyunkanyi nangangi jangkurr. Yabimba ngayili kudukudu balki yaji yalungi, jandanyimukuyngka Kudkanyi. Miku ngayiyanyi durrijba nanda yuwa Jisus Krayiskanyi, ngala ngayi durrijba nanda nurrungi wankalanyi yuwa, Jukanyi. Kudanyu ngayili durrijba nanda yuwa. Jungku ngayili kunybamirra nanankanyi yuwanyi. Yingkamuku yalili jungku bijal kunyba nanankanyi yuwanyi, ngala ngayili jungku kunymamba nanankanyi yuwanyi. Ngala miku ngayiyanyi kuyu jangkurr nangangi Jisus Krayiskanyi. Miku ngayiyanyi kuyu nangangi jangkurr nanamanji. Barriwa.
GAL 1:15 Ngala ngana nyuli yarrijba Kudwanyi. Ngala ngayu mikuyaji nanamanji bardardanyi, ngana nyuli yarrijba wakinki nangangi baku. Baku barri, ngana minimbayi nanganginkanyi jandayngkanyi Kudwanyi. Najba ngayi nangangi jandanyi, Jisus Krayis, baki yanyba nyuli ngaki. Karuyi ngana, ngayu milidimbiji yalunya ngurranyimuku nangangi, ngayu milidimbiji yalunya jala yalu miku Jumuku. Baki miku ngayiyanyi jila kula Jirusalimyurri. Miku ngayiyanyi jila yalundurri manjijba jali Jisuswanyi, yanybiji yalungi. Miku ngayiyanyi ngajaka yingka nanankanyi jalija ngayu yabimba. Ngala ngayi jilajba karri yingkayurri yajiyurri, niji Yarabiya. Baki baku ngayi wijba langki nanankurri yajiyurri Damaskusyurri.
GAL 1:18 Nanaba ngayi jungku kujarrana yingamalinyina kindilkurrinyina, baki jilajba ngayi kula. Jilajba ngayi nanankurri Jirusalimyurri yidambiji Bida. Jungku ngayi nangandu, nanaba nanganginyina barndana kujarra wik.
GAL 1:19 Nanamanji barri, jali ngayu jungku nanaba, ngawamba ngayi najba Jayims, jala kanyiya ngambalangi mambukanyi Jisus Krayiskanyi. Miku ngayiyanyi najba nanamuku yingkamuku, manjijba jali Jisus Krayiswanyi. Ngawamba ngayi najba Jayims nanamanji jali ngayu yidamba Bida. Barriwa.
GAL 1:20 Nayinda jangkurr jala ngayu yarrijba, nayinda duja jangkurr. Jingkijba ngana Kudwanyi, miku ngayimi jujijba.
GAL 1:21 Baki jilalajba ngayi langki yingkayurri yajiyurri, niji Siriya, baki mili langki nanankurri yajiyurri niji Silisiya.
GAL 1:22 Nanamanji barri nanamuku Krisjinmuku jurjina kularra Judiya, miku nganjaliya jingkijba. Miku nganjaliya jingkijba, ngayu kuyunkanyi jangkurr nangangi Jisus Krayiskanyi.
GAL 1:23 Ngala yali manku jangkurr jali yalu yingkamuku yanyba ngaki. Yanyba yali, “Nanda Bul, wabula nyulili yabimba kiji yalungi Krisjinmukuyngka, ngala nanijba nyulu karungka yingkamuku jangkurranyi Jisus Krayiskanyi. Wabula nyuliyala jakajba nanda yuwa Jisus Krayiskanyi, ngala nanijba nyulu milidimbaka yalunya durriykanyi nanda yuwa nangangi.” Barriwa. Nani yali yanyba ngaki.
GAL 1:24 Baki nanankardi nanamuku Krisjinmuku yali mirnarrijba muwa ngaki. Yali wajba Kud kunybanyi jangkurranyi ngaki.
GAL 2:1 Baku barri juju, 14 kindilkurrinyi baku, mili ngayi wijba kula Jirusalimyurri. Nanda Barnabas, nyuli jila ngakindu, baki kuyu ngali yingka marda ngalindu, niji Didus.
GAL 2:2 Jilajba ngayi kularriji Jirusalimyurri, karungangi ngani Kudwanyi, ngayuja jilajba nanankurri. Jali ngayu wanbiya, baki jilajba ngayi yalundurri malbumalbuyurri jurjkanyi. Karu ngayi yalunya nanankanyi jangkurranyi, milidimba jali ngayu yalunya ngurranyimuku nangangi Jisus Krayiskanyi. Nulijba ngayi yalungi malbumalbunyi, yalu jingkiykanyi nanda jangkurr jali ngayu milidimba yalunya. Nulijba ngayi yalungi, yalu jingkiykanyi nanda jangkurr yanyba jali ngayu, yurlurrmba nanda jangkurr. Miku ngayiyanyi nulijba yalungi, yalu yanybikanyi ngaki, barimba ngayi milidimba yalunya. Barriwa.
GAL 2:3 Nanda kandi ngaki Didus, miku nyuli Ju, nyuli ngurranyi, nyuli Krik, baki nanamukunyi Krikmukunyi, miku yalili kaburrmba mankanyi. Miku yalili kaburrmba mankanyi, ngala nanda yuwa Jukanyi, wajba jali Musiswanyi, yanybaka nanda yuwa kaburrmbikanyi mankanyi. Ngaki kandi Didus, nyuli Krisjin, ngala miku nyuli kaburr. Baki nanamukunyi malbumalbumukunyi jurjkanyi, miku yaliyanyi yanyba, marda nyulimi jungku kaburr. Miku yaliyanyi yanyba nani. Yuku nyuluja jungku miku kaburr. Ngala yingkamuku barri yali jujijbawarrmuku, yanyba yalungki ngamu yali krisjinmuku, ngala miku. Jujijba yali. Ngala yuwajiwa yali jungku yalundu Krisjinmukunyina. Yali nulijba jingkiykanyi nurrunya, jaliyi nurru ngayangayijba nanginkanyi yuwanyi Musiskanyi. Nulijba yali bukambijuyngka, ngayangayiykanyi yuwanyi Musiskanyi, kaburrmbikanyi mankanyi. Yanyba yalungki nangangi Diduskanyi, mardakimi jungku kaburr, barrinani yalu Jumuku bukambiju kaburrwaburrmuku. Ngala nurri barri yanyba, “Miku barri, miku. Nayinda Didus, miku nyulu Ju. Nyulu Krik, baki miku yalili kaburrmba mankanyi Krikmukunyi. Mardakimi ngawamba Jumuku ngayangayijba yuwanyi Musiskanyi. Miku ngurranyimuku.” Barriwa.
GAL 2:5 Miku nurriyanyi kuyu yalungi jangkurr nani, kaburrmbikanyi mankanyi. Miku nyuliyanyi yanyba nani Jisus Krayis, kaburrmbikanyi yalunya mankanyi, baki miku nurriyanyi yangkalamba nanda nangangi jangkurr. Nurrili marrimba nangangi jangkurr mardarda. Nurrili yanyba ngawamba nanda yurlurrmba jangkurr nangangi Jisus Krayiskanyi. Barriwa.
GAL 2:6 Nanamuku malbumalbu jurjkanyi Jirusalim, yingkamuku yalungkili yanyba nanamukuyngka, yalu mambukamuku jurjkanyi. Ngala miku ngayimi jingkijba yalunya, yiningki yalu jungku mambukamuku jurjkanyi. Miku ngayimi jingkijba yalunya, ngala nayinda ngayu jingkijba, bukambiju ngambala Krisjinmuku, ngambala nanamannga jungkuka nangangi Kudkanyi. Mikukimi yanyba Kud, “Nayinda nyulu walkurra mambuka, ngala nayinda yingka ngawamba bayakarda nyulu.” Mikukimi yanyba Kud nani, nyulungangi marukangka muwa bukambijuyngka nanamannga. Miku yingka kudanyu, ngala yingka bijal. Marukangka nyulu muwa bukambijuyngka nanamannga. Ngala nanamukunyi malbumalbunyi, miku ngana yaliyanyi ngajaka yanybiji yingka mili jangkurr. Miku. Yuku barri bukamba duja nanda jangkurr jali ngayu milidimba yalunya.
GAL 2:7 Yali jingkijba nayi. Yarrijbayi ngalinya Kudwanyi, ngana baki Bida. Yarrijba nyuli ngalinya baki yabimba nyuli ngalinya ngiruka milidimbikanyi nanankanyi kunybanyi jangkurranyi nanganginkanyi Jisus Krayiskanyi. Nani yabimbayi ngalinya ngiruka Kudwanyi. Baki manjijbayi Bida Jisus Krayiswanyi milidimbiji yalunya, Jumuku, baki nanamannga barri, ngani manjijba Jisus Krayiswanyi milidimbiji yalunya ngurranyimuku nangangi.
GAL 2:9 Nanamuku nganinymuku, Jayims, baki Bida, baki Jun, yingkamuku yali yanyba yalungi, yali malbumalbu jurjkanyi. Nanamukunyi yali jingkijba Kud, ngana nyuli yarrijba milidimbiji yalunya ngurranyimuku. Baki marrimba yali ngalinya marni, ngakindu baki Barnabasnyina. Marrimba yali ngalinya marni, baki nanankardi jingkijba nurrungkili yuwanyi milidimbikanyi yalunya. Baki yanyba nurrungki, yuku barri jangali milidimba yalunya ngurranyimuku, ngala jayalu milidimba yalunya Jumuku. Nani nurrungki yanyba. Barriwa.
GAL 2:10 Ngala yali ngajaka ngalinya nayi, ngali marda narri ngurranyimukunyi, marda ngambalimi mankuwa nanamuku Krisjinmuku kularra Jirusalim, marda ngambalimi mankuwa yalunya jala jungku mikuyaji dungalanyi wudumbikanyi mama marda jumbala. Marda ngambalimi mankuwa yalunya, baki wajba yalunya dungalanyi. Nani yali ngajaka ngalinya, baki mirnarrijba ngayu muwa yabimbikanyi nani. Ngayili nulijba waykanyi yalunya dungalanyi. Barriwa.
GAL 2:11 Baku barri nanda Bida, nyuli jilajba langki nanankurri Yandiyukyurri. Jilajba nyuli langki yidambiji yalunya Krisjinmuku ngurranyimuku nanaba. Wanbiya nyuli, bakili nyulu jungku yalundu, yalunginyina barndana. Jarrba nyulili mama yalundu marda. Ngala baku barri, nanangini Jayimswanyi, nyuli manjijba yalunya yingkamuku langki nanankurri. Jali yalu wanbiya nanaba langku, baki nanda Bida nangki yangkalamba yalunbunanyi ngurranyimukunanyi. Miku nyuliyanyi mili jarrba mama yalundu. Marrala nyuli yalungi jali yanyba “Nanamuku Krisjinmuku jala ngurranyimuku, mardakimi yingkawanyi kaburrmba yalunya.” Marralayi Bida yalungi baki nanankardi nangki yangkalamba Bida yalunbunanyi ngurranyinanyi.
GAL 2:13 Marda yingkamuku Krisjinmuku jali yalu Jumuku, yali marda marralayi yalungi barrinani Bida marralayi yalungi. Yali balki yami. Baki Barnabas marda, nyuli balki yami marda. Miku yaliyanyi mili jungku yalundu ngurranyimukunyina. Miku yaliyanyi mili jarrba mama yalundu. Barriwa.
GAL 2:14 Jali ngayu jingkijba yalunya, yangkalamba yalungki yalundunanyi ngurranyinanyi, baki jingkijba ngayi, nanda balki. Miku yaliyanyi jungku yurlurrmba yuwana nanganginkanyi Jisus Krayiskanyi. Miku yaliyanyi jungku yurlurrmba nangangi. Bukambiju Krisjinmuku, marda Jumuku marda ngurranyimuku, bukambiju yalu jandanyimuku nangangi Kudkanyi. Nanankardi ngayi ngirrwa nangangi Bidanyi. Ngirrwa ngayi nangangi, baki yingkamukunyi ngana yali manku ngirrwankurri. Ngirrwa ngayi nangangi, “Ninji barri Ju. Waluku jali ninji wanbiya, baki yuku ninji jungku yalundu ngurranyimukunyina. Ninji jungkuyi barrinani mungkiji yalungi. Waluku ninji yabijba muwa jungunkanyi yalundu, ngala nanijba balkijba ninji muwa. Nanijba ninji yanyba, mardakimi yingkawanyi kaburrmba yalunya. Jalija yalu jungku kaburrwaburr barrinani Jumuku, baki yuku janinji mili jungku yalundu. Wanyingkanyi ninji yanyba yalungi, marda yalimi durrijba nanda wankalanyi yuwa Musiskanyi. Wanyingkanyi ninji yanyba nani. Wanyingkanyi.” Nani ngayi ngirrwa nangangi. Barriwa.
GAL 2:15 Nurru barri, nurrungi miminganja marda kukulinganja, nurrungi nijanganjinyi marda ngardanganja, bukamba yalu Jumuku, baki nanankardi nurru marda Jumuku. Miku nurru ngurranyimuku, nanamuku jala mikukimi jingkijba Kud. Nurru Jumuku, nurrungkili yanyba yalungi ngurranyimukuyngka, yalu balkimuku, jala mikukimi jingkijba Kud. Nani nurrungkili yanyba yalungi.
GAL 2:16 Ngala nurru jingkijba, nurru jungkuka yurlurrmba nangangi Kudkanyi, kuyungangi nurru jangkurr nangangi Jisus Krayiskanyi. Miku nurrimi jungku yurlurrmba Kudkanyi, ngayangayijbangangi nurru nanankanyi yuwanyi Jukanyi jala wajba nurrunya Musiswanyi. Miku nurrimi jungku yurlurrmba, yabimbikanyi nanda Ju yuwa. Miku. Nurru Krisjinmuku barri jala Jumuku, nurri kuyu jangkurr nangangi Jisus Krayiskanyi baki nanankardi nurru jungkuka yurlurrmba nangangi Kudkanyi. Miku nurrimi jungku yurlurrmba nangangi, ngayangayijbangangi nurru yuwanyi nanganginkanyi Musiskanyi. Mikukimi nganinyi jungku yurlurrmba Kudkanyi nani. Marda nyulimi kuyu jangkurr nangangi Jisus Krayiskanyi, marda nyulimi durrijba nangangi jangkurr, baki janyulu jungku yurlurrmba nangangi Kudkanyi.
GAL 2:17 Jala nurru Jumuku nulijba jungunkanyi yurlurrmba nangangi Kudkanyi, baki marda nurrimi kuyu nangangi jangkurr Jisus Krayiskanyi. Nurru jala kuyu nangangi jangkurr, jaliyi nurrimi miku durrijba bukamba yuwa nangangi Musiskanyi, baki nurru jungkuka barrinani ngurranyimuku, miku jala ngayangayijba yuwanyi Musiskanyi. Yanyba yalungka Jumuku yalungi ngurranyimukuyngka, “Nanamuku ngurranyimuku yalu balki. Miku yalimi durrijba nanda yuwa nangangi Musiskanyi.” Ngala nurru Jumuku jala nurru Krisjinmuku, jaliyi nurru miku durrijba bukamba nanda yuwa nangangi Musiskanyi, baki yingkamuku Jumuku, yalu yanybaka nurrungi, nurru marda balki. Miku nurrimi durrijba yuwa nangangi Musiskanyi, barrinani ngurranyimukunyi miku yalimi durrijba yuwa nangangi Musiskanyi. Jaliyi nurru Krisjinmukunyi durrijba yuwa nangangi Jisus Krayiskanyi, ngala miku nurrimi durrijba yuwa nangangi Musiskanyi baki wanyi barri. Nanda barrinani nayi kuna, barrinani, milidimbaka nurrunya Jisus Krayiswanyi jungunkanyi balki nangangi Kudkanyi. Nani kuna. Ngala miku. Miku nanda duja. Miku nyulimi milidimba nurrunya jungunkanyi balki. Miku nyulimi milidimba nurrunya nani Jisus Krayiswanyi. Ngala nanda yuwa Jisus Krayiskanyi, nanda buyingkinyi yuwa. Barriwa barri bukamba nanda wabula yuwa Musiskanyi. Nanda yuwa Jisus Krayiskanyi mili walkurra yingkanyi yuwanyi Musiskanyi.
GAL 2:18 Wabula ngayi karu narrinya nangangi Jisus Krayiskanyi, nyuli wajba ngambalanya nanganginkanyi buyingkiyngkanyi yuwanyi. Marda ngambalimi miku durrijba nanda yuwa nangangi Musiskanyi, ngala marda ngambalimi durrijba nanda buyingkinyi yuwa. Nani barri ngayi karu narrinya wabula. Ngala nanijba barri, jalimi ngayu yanyba nayi, “Marda ngambalimi yuwajiwa durrijba nanda yuwa nangangi Musiskanyi.” Jalimi ngayu nanijba yanyba nani, baki wabula jali ngayu karu narrinya miku durriykanyi nanda yuwa Musiskanyi, nanamanji barri ngayu jungkuyi balkina yuwana Musiskanyi. Ngala miku ngayimi yanyba nani.
GAL 2:19 Miku ngayimi durrijba bukamba yuwa nangangi Musiskanyi. Yangkalamba ngaki nanamunanyi wankalananyi yuwananyi, baki nanijba ngayu durrijbangka nanda buyingkinyi yuwa nangangi Jisus Krayiskanyi. Ngayu yurlwangka nanankanyi yuwanyi Musiskanyi. Ngayu barrinani nanda nganinyiyurru, jala yurlwangka yuwanyi. Nani barri ngayu yurlwangka yuwanyi nanganginkanyi Musiskanyi, ngala ngayu jungkuka yurlurrmba nangangi Kudkanyi, durrijbangangi ngayu nangangi jandanyi Jisus Krayis.
GAL 2:20 Yanyba ngaka, ngayu barrinani nganinyiyurru nanankanyi wabuliyngka yuwanyi jala ngayi yurlwa. Ngala ngayu jungkuka buyingkinyi nganinyi nanijba, jungkukangangi Jisus Krayis ngakinyina kurdulana. Janyba nangki Jisus Krayis kurndana ngakinkanyi balkinyi yajinyi. Maruka nyuli muwa ngaki, baki janyba nangki ngaki. Baki nanijba ngayu marukangka muwa nangangi, ngayu durrijbangka Jisus Krayis, nanda jandanyi nangangi Kudkanyi.
GAL 2:21 Marukangka Kud muwa ngambalangi, baki manjijba nyuli Jisus Krayis janybikanyi nangka ngambalangi. Janyba nangki Jisus Krayis kurndana ngambalangi jala kuyu nangangi jangkurr, marda durrijba nangangi yuwa. Nanankardi barri ngambala jingkijba, jangambala jungku yurlurrmba nangangi Kudkanyi, jangambala jungku mili wanka nangandu, jalija ngambalaka janyba. Ngala nanamuku Jumuku, ngamu jayalu jungku mili wanka nangandu baku, durrijbangangi yalu nanda yuwa nangangi Musiskanyi. Ngala miku. Miku nanda duja jangkurr. Jalimi yalu mili jungku wanka, durrijbangangi yalu nanda yuwa Musiskanyi, baki muningka nangki janyba Jisus Krayis. Ngala miku nanda duja. Janyba nangki Jisus Krayis ngambalangi, baki nanankardi ngambalaja jungku mili wanka nangandu yurrngumba. Barriwa.
GAL 3:1 Narri jala jungku nananyina yajina Kalajiya, narri mudu. Wanyingkanyi miku narringkimi mankumanku yurlurrmba. Yiningki yingkawanyi brijba narrinya. Narri mudu. Milidimba ngayi narrinya yurlurrmba jangkurranyi nanganginkanyi Jisus Krayiskanyi. Milidimbayi narrinya nangangi, janyba nangki kurndana ngambalangi.
GAL 3:2 Ngayu ngajakangka narrinya nayi. Ngayangayijba kuna narri nanankanyi yuwanyi Musiskanyi, baki nanankardi ngankijbayi narrindu mankanyina nanda Kunyba Ngarndu Kudkanyi. Nani kuna. Mikukiyanyi ngankijba Ngarndu Kudkanyi narrindu, ngayangayijbangangi narri yuwanyi Musiskanyi. Ngala ngankijbayi Kunyba Ngarndu Kudkanyi narrindu, kuyungangi narri nanda duja jangkurr nangangi Jisus Krayiskanyi. Manku narri nangangi jangkurr, kuyu narri nanda jangkurr, baki nanankardi nanda Kunyba Ngarndu Kudkanyi, nyuli ngankijba narrindu. Ngala miku nyuliyanyi ngankijba narrindu, ngayangayijbangangi narri yuwanyi Musiskanyi. Miku.
GAL 3:3 Jali nanda Kunyba Ngarndu Kudkanyi ngankijbayi narrindu, baki narri jungkuyi barrinani buyingkinyi nganinyimuku. Ngala nanijba yanyba kuna narri, miku narrimi mili nulijba nanganginkanyi Kunybanyi Ngarndunyi. Nanijba kuna narri yanyba, narri ngiruka durriykanyi nangangi yuwa Kudkanyi, baki miku narrimi mili nulijba nanganginkanyi Kunybanyi Ngarndunyi. Nani kuna narri yanyba.
GAL 3:4 Jala narri jalannga jungku Krisjinmuku, baki yingkamukunyi yali yabimba kaja kunyba yaji narringi, baki narri mirnarrijba muwa nanankanyi yajinyi. Miku narrimi mankuwa kuna yanka narri jungku mirnarrijba muwa nanamanji.
GAL 3:5 Wanyingkanyi nyuli yawumba nangangi Kunyba Ngarndu narrindu Kudwanyi. Wanyingkanyi nyuli yabimba ngiruka yaji narringi. Ngayangayijbangangi kuna narri nanankanyi yuwanyi Musiskanyi. Miku nanankanyi. Ngala nyuli wajba narrinya nanganginkanyi Kunybanyi Ngarndunyi, nyuli yabimba ngiruka yaji narringi, kuyungangi narri nanda jangkurr nangangi Jisus Krayiskanyi. Barriwa.
GAL 3:6 Mankuwa narri nanda wankalanyi Yabrayam. Nanangini najawanyi Kudkanyi karungka ngambalanya nangangi. Nanda naja yanybaka nayi, “Nanangini Yabrayamwanyi nyuli kuyu jangkurr nangangi Kudkanyi, baki nanankardi yanybayi Kud nangangi Yabrayamkanyi, nyuli jungku yurlurrmba nangangi Kudkanyi.” Barriwa.
GAL 3:7 Baki nani barri narri marda. Jala narri kuyu nanda jangkurr nangangi Jisus Krayiskanyi, baki narri jungku yurlurrmba nangangi Kudkanyi, barrinani Yabrayamwanyi nyuli kuyu jangkurr Kudkanyi, baki jungkuyi yurlurrmba nangangi. Nanda Yabrayam nyuli barrinani wankalanyi nijanganjinyi bukambijuyngka jala kuyu jangkurr nangangi Jisus Krayiskanyi.
GAL 3:8 Nanda naja Kudkanyi yanybaka yingka jangkurr marda, nayi jangkurr “Nganinymuku baki jibarrimuku jala yalu miku Jumuku, jayalu marda kuyu jangkurr nangangi Kudkanyi, baki jayalu marda jungku yurlurrmba nangangi.” Barriwa. Baki mili yanybayi nanda naja nangangi Yabrayamkanyi, “Janyulu yabimba kunyba yaji bukambijuyngka Kudwanyi. Janyulu yabimba kunyba yaji yalungi, ninjingangi Yabrayam, kuyungangi ninji nangangi jangkurr.” Barriwa.
GAL 3:9 Kuyu nyuli jangkurr Kudkanyi Yabrayamwanyi, baki yabimbayi kunyba yaji nangangi Kudwanyi. Nani barri nanamannga ngambalangi. Yabimbaja Kudwanyi kunyba yaji bukambijuyngka, jala ngambala kuyu nangangi jangkurr. Barriwa.
GAL 3:10 Kajamuku, mankumanku yalungki, yalu jungku yurlurrmba nangangi Kudkanyi, ngayangayijbangangi yalu nanda yuwa nangangi Musiskanyi. Jala yalungka mankumanku nani, ngala miku yalimi ngayangayijba bukambijuyngka nanankanyi yuwanyi yurrngumba, baki jayalungka janyba. Yanybaka nanda naja Kudkanyi nayi, “Nanda jala miku yurrngumba ngayangayijba bukambijuyngka yuwanyi, yarrijba jala Musiswanyi, janangka janyba nanda.” Nani yanybaka naja Kudkanyi. Ngala miku ngambalimi yurrngumba jungku yurlurrmba nanankanyi yuwanyi. Kudiyana ngambala barimba nanda yuwa. Baki nanankardi yanybaka Kud, jangambalaka janyba.
GAL 3:11 Kudiyana ngambala barimba nanda yuwa, baki jangambalaka janyba, mikungangi ngambalimi yurrngumba jungku yurlurrmba nangangi Kudkanyi. Baki yingka mili nayi jangkurr yanybaka nanda naja Kudkanyi, “Nanda jala kuyungka nangangi jangkurr Kudkanyi, janyulu mili wanka jungku.” Jaliyi ngambala kuyu nanda jangkurr Kudkanyi, baki ngambala jungku yurlurrmba nangangi, baki nanankardi jangambala mili wanka jungku nangandu.
GAL 3:12 Nanda yuwa Musiskanyi, miku nanda yuwa yanybaka, kuyunkanyi nanda jangkurr nangangi Kudkanyi. Miku. Ngala nanda naja Kudkanyi yanybaka nayi, “Nanda jala yurrngumba ngayangayijba bukambijuyngka yuwanyi Musiskanyi, janyulu mili jungku wanka. Ngala jaliyi nyulu bijal barimba nanda yuwa, baki miku nyuliyi mili jungka wanka.”
GAL 3:13 Mili barri nayinda jangkurr najana Kudkanyi yanyba, “Jala narri najba nganinyi langankurri kurndana, baki narri jingkijba nanda nganinyi, nyulu balkimirra. Jungku nyuli balkina yuwana Kudkanyi, baki nanankardi marda nangkimi janyba.” Nani yanybayi Kud nanganginyina najana. Janyba nangki Jisus Krayis kurndana nani, ngala miku nyuliyanyi jungku balkina yuwana Kudkanyi. Miku. Jungku nyuli kunyba yurrngumba. Ngala ngambala barri, jala kudiyana ngambala jungku balki, baki marda ngambalakimi janyba nani barri. Marda ngambalakimi janyba, jungkungangi ngambala balki, ngala miku. Janyba nangki Jisus Krayis ngambalangi. Baki nanijba barri, jala ngambala kuyu nangangi jangkurr, jala ngambala durrijba Jisus Krayis, baki miku jangambalaka janyba nani, janybangangi nangki Jisus Krayis ngambalanginkanyi balkinyi yajinyi.
GAL 3:14 Wabula wankalana, karuyi Yabrayam Kudwanyi, janyulu yabimba kunyba yaji yalungi, jalija jungku juju bayngkani nangandu Yabrayamnyina. Nanijba barri nyulu wajbangka ngambalanya nanankanyi kunybanyi yajinyi. Bukambiju Jumuku, marda ngurranyimuku, nyulu wajbangka ngambalanya nanankanyi kunybanyi yajinyi. Nayinda nanda kunyba yaji. Nyulu manjamanjambaka ngambalangi balki yaji, janybangangi nangki Jisus Krayis ngamanginkanyi balkinyi yajinyi. Baki mili kunyba yaji nyulu yabimbaka ngambalangi, nyulu wajbangka ngambalanya nanganginkanyi Kunybanyi Ngarndunyi Kudwanyi, jala ngambala kuyu nanda jangkurr nangangi Jisus Krayiskanyi. Janyulu wajba nanganginkanyi Kunybanyi Ngarndunyi, yalunya bukambiju jala kuyu nangangi jangkurr, jala yalu ngindu muwa yalunginkanyi balkinyi yajinyi. Barriwa.
GAL 3:15 Narri, ngakinmuku bababanyamba ngambalaka. Yingka jangkurr jangayu karu narrinya. Kudiyana kujarra nganinyiwuya yanyba bulangki jangkurranyi, miku bulangki yangkalamba. Yurrngumba jungkuja nanda jangkurr. Miku nangkimi yingamali yangkalamba nanamunanyi jangkurrnanyi. Miku bulimi yurlwa nanankanyi jangkurranyi, baki mikuwali yingkawanyi barimba nanda jangkurr bulangi. Duja nanda jangkurr yurrngumba.
GAL 3:16 Nani barri yanybayi Kud jangkurr nangangi Yabrayamkanyi. Nanda jangkurr miku yangkalambikanyi. Nanda jangkurr nangangi Yabrayamkanyi, baki nanankanyi jalija jungku juju bayngkani nangandu. Nanda jangkurr yanyba jali Kud, nanda jangkurr yingamaliyngka nganiyngkanyi jalija jungku juju bayngkani nangandu. Miku nanda jangkurr kajamukuyngka juju bayngkani nangandu, Yabrayamnyina. Miku. Ngawamba yingamaliyngka. Nanda yingamali nganinyi jali yanyba Kud nangangi, nanda nyulu Jisus Krayis. Yanybayi Kud nanda jangkurr miku yangkalambikanyi bulangi, Yabrayamkanyi, marda nangangi Jisus Krayiskanyi.
GAL 3:17 Waluku yanybayi Kud nanda jangkurr, miku yangkalambikanyi, baki baku barri juju 430 kindilkurrinyi baku barri, nanamanji wajbayi Musis nanganginkanyi yuwanyi Kudwanyi. Ngala miku nyuliyanyi mamanumba nangangi jangkurr Yabrayamkanyi. Nanda yuwa jala wajba Musis Kudwanyi, mikukiyanyi nanangini yuwawanyi yangkalamba nanda jangkurr jali yanyba Kud Yabrayamkanyi waluwa. Mikukiyanyi yangkalamba nanda waluwinyi jangkurr.
GAL 3:18 Nanda yuwa Musiskanyi, nanda yingka jangkurr, ngala mikukimi nanangini yuwawanyi barimba nanda waluwinyi jangkurr jala yanyba Kud Yabrayamkanyi.
GAL 3:19 Ngala wanyingkanyi wajbayi Musis nanankanyi yuwanyi Kudwanyi. Wanyingkanyi. Jangayu karu narrinya. Nanda yuwa Musiskanyi, nanda yuwa karunkanyi ngambalanya nanankanyi yajinyi jala balki. Wajbayi ngambalanya nanankanyi yuwanyi Kudwanyi nanankurri jali badajba Jisus Krayis. Karuyi Yabrayam Kudwanyi, janyulu yabimba kunyba yaji bukambijuyngka jalija badajba nanda juju bayngkani nangandu Yabrayamnyina. Nanda barri badajbayi. Nyulu Jisus Krayis, baki nyulu marrimbaka ngambalanya Krisjinmuku. Nyulu marrimbaka ngambalanya mardarda yurrngumba. Wajbayi Kudwanyi nanganginkanyi yuwanyi yalunya Yanjilmuku, yalu waykanyi Musis nanankanyi yuwanyi. Baki nyuli milidimba yalunya nanankanyi yuwanyi Musiswanyi. Nyuli milidimba yalunya Jumuku nanankanyi yuwanyi Kudkanyi.
GAL 3:20 Jala wajbayi Jumuku nanganginkanyi yuwanyi Kudwanyi, karu nyuli Musis nanankanyi yuwanyi, nyulu milidimbikanyi yalunya nanankanyi. Ngala jali yanyba Kud Yabrayamkanyi, janyulu yabimba kunyba yaji nangangi, miku nyuliyanyi karu yingka yanybiji jangkurr nanankanyi Yabrayamkanyi. Miku. Miku nyuliyanyi karu yingka, janyulu yabimba kunyba yaji Yabrayamkanyi. Miku. Ngawamba Yabrayam nyuli karu nanankanyi kunybanyi jangkurranyi. Barriwa.
GAL 3:21 Waluku barri karuyi Yabrayam Kudwanyi nanankanyi kunybanyi jangkurranyi, baki baku barri nyuli wajba Musis nanankanyi yingkanyi jangkurranyi, baku barri nyuli wajba Musis nanganginkanyi yuwanyi. Nanangini yuwawanyi Musiskanyi mikukimi barimba nanda waluwa jangkurr jali karu Yabrayam Kudwanyi. Jaliyi nganinyi jungku kunybana yuwana Musiskanyi, jaliyi nyulu miku bijal jungku balki nananyina yuwana, baki janyulu jungku yurlurrmba nangangi Kudkanyi.
GAL 3:22 Ngala yanybaka nanda naja Kudkanyi, mikuwali jungku nganinyi kunybanyi nanankanyi yuwanyi yurrngumba. Bukambiju yalu balkimuku. Nani barri yanybaka nanda naja Kudkanyi, baki ngambala jingkijba nanda jangkurr najana, duja barri. Ngala manjijbayi Jisus Krayis Kudwanyi. Manjijba nyuli Jisus Krayis, janybiji nangka ngamanginkanyi balkinyi yajinyi. Nanankardi barri, jaliyi ngambala kuyu jangkurr nangangi Jisus Krayiskanyi, baki jangambala mili wanka jungku baku barri.
GAL 3:23 Wabula kamambarra wajbayi Musis nanankanyi yuwanyi Kudwanyi, baki nanda yuwa kujanya ngambalangi yurrngumba wabulinyi. Ngala mikukiyanyi ngambalaka yabimba jungunkanyi kunyba nanankanyi yuwanyi yurrngumba. Miku. Ngala badajbayi Jisus Krayis, baki minimba nyuli ngambalanya buyingkiyngkanyi yuwanyi. Kuyu ngambali nanda buyingkinyi yuwa, baki nanijba barri, barriwa barri bukamba nanda yuwa Musiskanyi ngambalangi. Janyba nangki nanda yuwa. Mikukimi mili nanda yuwa kujanya ngambalangi, janybangangi nangki Jisus Krayis ngambalangi. Jala ngambala kuyu nangangi jangkurr, jala ngambala durrijba nangangi yuwa, baki yanybaka Kud ngambalangi, ngambala jungku yurlurrmba, janybangangi nangki Jisus Krayis ngambalanginkanyi balkinyi yajinyi. Barriwa.
GAL 3:26 Narri, Krisjinmuku jala jungku Kalajiya, narri kuyuyi nanda jangkurr nangangi Jisus Krayiskanyi, baki nanankardi bukamba narri jandanyimuku nangangi Kudkanyi. Narri jandanyimuku Kudkanyi, baki Jisus Krayis, nyulu narringi Buwanya, nyulungangi Buwanya bukambiju jala kuyu nangangi jangkurr.
GAL 3:27 Kuyu narri nangangi jangkurr, baki yingkawanyi ngurrunbayi narrinya, baki nyulu bababanyamba narrinya Jisus Krayiswanyi. Nyulu jungkuka yurlurrmba, baki nani barri narri jungkuka yurlurrmba marda.
GAL 3:28 Baki nanijba barri narri bukambiju Krisjinmuku, kudiya narri Jumuku, kudiya ngurranyimuku, kudiya wakiwarrmuku, kudiya mambukamuku, kudiya nganinyimuku, kudiya jibarrimuku. Ngala narri jungkuka bukambiju malumba nayinda barri, nyulungangi bababanyamba narrinya Jisus Krayiswanyi.
GAL 3:29 Nanda wankalanyi Yabrayam, nyuli barrinani wankalanyi nijanganjinyi nangangi Jisus Krayiskanyi. Baki nyulu barrinani wankalanyi nijanganjinyi narringi marda, Jisus Krayisngangi. Nyulu narringi Buwanya, baki nanankardi nanda wankalanyi Yabrayam, nyulu barrinani wankalanyi nijanganjinyi narringi marda. Nanda jangkurr jali yanyba Kud Yabrayamkanyi, miku yangkalambikanyi, nanda jangkurr manjamanjambikanyi balki yaji, marda waykanyi Kunybanyi Ngarndunyi Kudkanyi, nanda jangkurr narringi. Nanijba nanda jangkurr narringi marda, nyulungangi bababanyamba narrinya marda Jisus Krayiswanyi. Barriwa.
GAL 4:1 Muningka ngayu karungka narrinya nanginkanyi jangkurranyi. Nanda yuwa Rumankanyi yanybaka nayi, “Nanda malbu jirdi kajanyi jambanyi, jirdi kajanyi yajinyi, yuku nyulu yanyba, ‘Jangayu wajba ngaki jandanyi bukamba ngakinkanyi jambanyi marda yajinyi. Jangayu wajba ngaki jandanyi bukamba ngakinkanyi yajinyi, ngala yuwajiwa nyulu juka. Nanankardi jangayu yarrijba nganinyi lalanbikanyi nayinda jamba baki yaji ngakinkanyi jukanyi. Baku jalija ngaki jandanyi jardijba walkurra nganinyi, yuku nanamanja janyulu lalanba yaji nyuluma, ngala jilijbawa, nyulu juka.’ Nani barri yuku nyulu yanyba malbu jirdi kajanyi yajinyi.” Jala nanda jandanyi yuwajiwa juka, baki nanda yingka nganinyi, nanda lalanbawarr yajinyi, nyulu mambuka nanankanyi jukanyi. Mikukimi jukawanyi wudumba buluki dungalana, lalanbawarrngangi nyulu mambuka nanankanyi jukanyi marda nanganginkanyi dungalanyi. Nanda juka, nyulu barrinani wakiwarr nanankanyi lalanbawarrayngka.
GAL 4:2 Ngala nyulu yuwajiwa juka, baki yarrijbangka yingka malbuwanyi lalanbikanyi nanda juka, marda nangangi yaji, ngala baku barri, jala nyulu jardijba walkurra nganinyi baki mikukimi yingkawanyi lalanba nangangi yaji. Nyulu barri mambuka nanganginkanyi yajinyi, jali wajba nijanganjinyiwanyi ngala yuwajiwa wanka jungkuka nanda malbu. Barriwa.
GAL 4:3 Baki ngambala barri, wabula waluwa ngambala jungkuyi jandanyimuku nangangi Kudkanyi, nanamanji barri ngambali barrinani nanda juka jali yingka mambuka nangangi. Nanamuku yijanmuku, jujijbawarr, wabula yali walkurra mambuka ngambalangi. Yabimbayi ngambala ngawamba nanda yaji jali karu ngambalanya yijanwanyi. Miku ngambaliyi yabimba yaji, jali yalu miku nulijba ngambalangi yabimbikanyi yaji. Yalu ngambalangi mambuka nanamuku yijanmuku. Ngambala wakiwarr yalungi.
GAL 4:4 Ngala yanybayi Kud, “Yuku barri. Barriwa jangayu manjijba ngaki jandanyi wayka jambarri.” Baki manjijba nyuli nangangi jandanyi. Yarrijbayi Kudwanyi wurrumbarra, niji Mari. Manjijba nyuli nangangi Kunyba Ngarndu nangandurri, baki baku barri birnandaba nangki bardardanyi jukanyi, niji nangangi Jisus. Nyuli jandanyi nangangi Kudkanyi. Ngala nyuli juka, baki kujanya nangangi nanda yuwa nangangi Musiskanyi. Kujanya Jisuskanyi ngala nyuli juka.
GAL 4:5 Nani barri manjijbayi Jisus Kudwanyi marrimbiji ngambalanya Krisjinmuku mardarda. Baki nyulu bababanyamba ngambalanya kuyu Jisus Krayiswanyi. Nanankardi ngambala jandanyimuku nangangi Kudkanyi baki nani barri, mikukimi nanda yuwa Musiskanyi mili kujanya ngambalangi. Miku.
GAL 4:6 Jala ngambala jandanyimuku nangangi Kudkanyi, baki Kud nyulu ngambalangi Buwakanya. Nyuli yawumba nangangi Kunyba Ngarndu ngambalandu kurduluna, baki nanankardi, jala ngambala yanyba nangangi Kudkanyi, ngambala yanybaka nangangi, “Ninji nurrungi Buwakanya. Buwakanya ninji nurrungi.” Nani ngambala yanyba. Nanangini Kunybawanyi Ngarnduwanyi Kudkanyi, nyulu karungka ngambalanya Kudkanyi, nyulu ngambalangi Buwakanya.
GAL 4:7 Baki nanankardi barri, mikukimi nanda yuwa Musiskanyi mili kujanya ngambalangi. Miku. Ngambala jandanyimuku nangangi Kudkanyi. Karu ngayi narrinya nanankanyi malbunyi, jali wajba nangangi jandanyi nanganginkanyi jambanyi marda yajinyi, baki nani barri nanamannga nyulu wajbangka ngambalanya kajanyi kunybanyi yajinyi Kudwanyi. Nyulu wajbangka ngambalanya kunybanyi yajinyi, ngambalangangi nanganginmuku jandanyimuku.
GAL 4:8 Wabula barri, waluwa narri kuyu nangangi jangkurr Jisus Krayiskanyi, nanamanji barri, miku narriyanyi jingkijba Kud, ngala nanamuku yijanmuku, yalu narringi mambukamuku. Nanamuku yijanmuku, miku yalu duja Kud, ngala yali narringi mambukamuku.
GAL 4:9 Ngala nanijba barri, narri jingkijbangka Kud, nyulu marda narringi Kud. Ngala miku. Marda ngayiyanyi yanyba nayi. Nyulu jingkijbangka narrinya Kudwanyi, nyulu yabimbaka narrinya jungunkanyi yurlurrmba nangangi. Nyulu yarrijbangka narrinya nanganginmirra jandanyimuku. Ngala wanyingkanyi narri nulijbangka narringka yangkalambikanyi nanganbunanyi Kudnanyi. Wanyingkanyi narri nulijbangka durriykanyi nanda wankalanyi yuwa Musiskanyi. Miku narriyanyi jungku yurlurrmba nangangi Kudkanyi wabula, jali narri durrijba narringi wankalanyi yuwa yijankanyi, baki miku narrimi jungku yurlurrmba nangangi nanijba jala narri durrijba nanda yuwa nangangi Musiskanyi. Wabula narri wakiwarr nanankanyi yuwanyi yijankanyi, ngala nanijba narri nulijba wakiwarrayngka nanankanyi yuwanyi Musiskanyi. Mikukimi yuwawanyi yijankanyi yabimba narrinya jungunkanyi yurlurrmba nangangi Kudkanyi, baki mikukimi yuwawanyi Musiskanyi yabimba narrinya jungunkanyi yurlurrmba nangangi Kudkanyi. Miku. Ngawamba narri jungkuka yurlurrmba nangangi Kudkanyi, jala narri durrijba nanda buyingkinyi yuwa nangangi Jisus Krayiskanyi.
GAL 4:10 Narringka yangkalamba nanamunanyi buyingkinyinanyi yuwanyi, baki narri durrijba nanda yuwa nangangi Musiskanyi. Nanijba narrili yabimba wangarr nanankanyi yuwanyi. Ngamu narri jungkuka yurlurrmba nangangi Kudkanyi jala narri yabimba nanda kaja wangarr yalungi Jumukuyngka, ngala miku. Miku narrimi jungku yurlurrmba nangangi nani.
GAL 4:11 Ngindu ngayu muwa narringi. Kudanyu barri ngayi waki, jali ngayu milidimba narrinya nangangi Jisus Krayiskanyi. Nanamanji barri narri kuyu ngaki jangkurr, ngala janarri kuna miku mankuwa nanda jangkurr yurrngumba. Muningka kuna ngayi milidimba narrinya. Nanijba kuna narri yurlwa ngakinkanyi jangkurranyi. Barriwa.
GAL 4:12 Kudanyu ngayu yililikajba narrinya, janarri jungku barrinani ngayu. Ngayu Ju, baki wabula, ngayi nulijba jungunkanyi yurlurrmba Kudkanyi. Ngala nanda yuwa Musiskanyi kujanya ngaki. Wajbayi ngana kujayu durriykanyi nanda yuwa. Waluwa barri, nanda yuwa kujayu ngakinyi, ngala nanijba barri, barriwa bukamba nanda yuwa ngaki, janyba nangki bukamba. Ngala ngayi kuyu nanda jangkurr nangangi Jisus Krayiskanyi, baki nanijba barri, ngayu jungkuka kunybana yuwana nanganginyina. Nanda kujayu, bukamba ngayi. Narri barrinani ngayu. Wabula, narringki yangkalamba narringinanyi wankalananyi yuwananyi, baki ngayu marda yangkalamba ngaki nurrunginanyi wankalananyi yuwananyi Jukanyi. Barriwa. Miku narriya yabimba balki yaji ngaki, ngala jungkuyi narri kunyba ngaki yurrngumba, ngala ngayi jungku narrindu.
GAL 4:13 Mankuwa kuna narri, jali ngayu jalannga karu narrinya nanganginkanyi jangkurranyi Jisus Krayiskanyi. Nanamanji ngayu lunji barri. Jungku ngayi narrindu, lunjingangi ngayi, baki milidimba ngayi narrinya, jali ngayu jungku narringinyina barndana. Miku narriyanyi yabimba balki yaji ngaki, ngala nganarri kandimba.
GAL 4:14 Kudanyu ngayi lunji, ngala miku nganarriyanyi jakajba narringinbunanyi yajinanyi. Kudanyu nganarri lalanba, jali ngayu lunji narrindu. Ngayu jingkijbangka narrinya. Jalimi badajba yanjil Kudkanyi kingkarrinya narrindurri, baki kudanyu narrimi kandimba nanda yanjil. Jalimi badajba Jisus Krayis kingkarrinya narrindurri, baki kudanyu narrimi kandimba nanda. Nani barri nganarri kandimba. Nganarri lalanba jali ngayu lunji narrindu kudanyu.
GAL 4:15 Nanamanji narri mirnarrijba muwa ngaki. Kudanyu narri mirnarrijba muwa ngaki. Jaliyanyi ngayu jungku balkiyudi yamiyudi, baki narriyanyi dulaba narringi yami baki yawumbayi ngakinyina kulajina, baki mili ngayu naykurri, baki mili ngayu milidimbikanyi narrinya. Nani narriyanyi yabimba kunyba yaji ngaki nanamanji. Ngala wanyingkanyi narri miku mirnarrijba muwa ngaki nanijba barri. Wanyingkanyi barri.
GAL 4:16 Milidimba ngayi narrinya duja jangkurranyi, ngala nanijba barri yiningki narri miku nulijba kuyunkanyi nanda duja jangkurr. Yiningki narringki yangkalamba ngakinbunanyi marda, nanankanyingangi duja jangkurranyi jali ngayu milidimba narrinya. Yiningki miku narrimi kandimuku ngaki mili. Barriwa.
GAL 4:17 Nanamuku jala milidimba narrinya jungunkanyi yuwana Musiskanyi, yalu balki milidimbawarrmuku. Nulijba yalu narringi kandimbikanyi yalunya, ngala miku yalimi nulijba yabimbikanyi kunyba yaji narringi. Miku. Nulijba yalu narringi mamanumbikanyi ngana. Jalija nganarri mamanumba, baki janarri mamanumba nanda jangkurr jali ngayu milidimba narrinya. Janarri mankuwa ngawamba yalungi jangkurr, baki janarri mirnarrijba muwa ngawamba yalungi. Janarri kandimba yalunya balkimuku milidimbawarrmuku.
GAL 4:18 Jaliyi narri nulijba kandimbikanyi yingka nganinyi, baki nanda kunyba. Ngala marda narrimi kandimba ngawamba nanda jala nulijba yabimbikanyi kunyba yaji narringi. Nayi jangkurr jungkuja duja yurrngumba. Jala ngayu jungku narrindu, baki jala ngayu miku narrindu, yurrngumba nayi jungkuja duja jangkurr narringi.
GAL 4:19 Ngakinmuku kandimuku. Maruka ngayu muwa narringi kudanyu. Maruka ngayu muwa narringi, barrinani marukangka muwa jibarri nanganginkanyi bardardanyi. Nulijba ngayu narringi jungunkanyi ngiruka nangangi Jisus Krayiskanyi, jungunkanyi mili ngiruka, baki mili ngiruka nangangi yurrngumba. Nulijba ngayu narringi jungunkanyi ngirukamirra nangangi Jisus Krayiskanyi, durriykanyi nangangi jangkurr yurlurrmba.
GAL 4:20 Nulijba ngayu jilaykanyi narrindurri. Kudanyu ngayu nulijba yidambikanyi narrinya, jungunkanyi narrindu barndana. Nulijba ngayu yanybikanyi narringi, jingkiykanyi narrinya yanka narri jungku nangangi Jisus Krayiskanyi. Ngirukijba ngayu muwa narringi. Wanyimba jangayu narrinya, wanyingkanyi narri kuyu nanda balki jangkurr. Barriwa.
GAL 4:21 Kudiya narri nulijba, durriykanyi nanda yuwa nangangi Musiskanyi. Marda narringkimi waluku mankumanku nanankanyi yuwanyi. Marda narrimi kudanyu jingkijba nanda yuwa. Mankukiyi ngaki jangkurr, ngala ngayu muningka karu narrinya nanankanyi yuwanyi.
GAL 4:22 Nanda wankalanyi niji Yabrayam, kujarra nangangi jandanyiwuya jukawuya. Nanda lirrka jandanyi nangangi, ngardanganja nangangi, miku nyuliyanyi maninganja nangangi Yabrayamkanyi, ngala nyuli wakiwarr jibarri nangangi Yabrayamkanyi. Niji nangangi Yakarr. Kulukayi Yabrayam nangandu wakiwarranyina, baki baku barri birnandaba nangki jibarri jukanyi. Nanda nangangi juka, nyuli lirrka jandanyi nangangi Yabrayamkanyi. Ngala baku barri juju, nanda maninganja nangangi Yabrayamkanyi, niji Sara, birnandaba nangki bardardanyi marda. Birnandaba nangki jukanyi, yabimbayingangi ngiruka yaji nangangi Kudwanyi. Nanda Yabrayam, ngala nyuli malbumirra, baki nangangi maninganja nyuli bardibardimirra, ngala yabimbayi ngiruka yaji bulangi Kudwanyi, baki birnandaba nangki Sara bardardanyi. Waluwa yanybayi Kud jangkurr miku yangkalambikanyi, janangka birnandaba Sara bardardanyi, baki duja nangangi jangkurr. Juju bayngkani nangki birnandaba bardardanyi. Nanda juka nyuli burrandinyi jandanyi nangangi Yabrayamkanyi. Barriwa.
GAL 4:24 Muningka jangayu karu narrinya yingkanyi jangkurranyi. Nanankujarra jibarriwuya, bula barrinani kujarra jangkurr nangangi Kudkanyi, miku yangkalambikanyi. Nanda jibarri wakiwarr, nyuli barrinani nanda yuwa jali yanyba Kud nangangi Musiskanyi. Nyuli barrinani nanda yuwa jali yanyba Kud yundu kulawirana niji Sinayi, nananyina walkurranyina yajina Yarabiya. Nanda jibarri Yakarr, nyuli wakiwarr, baki nanankardi nangangi kulunganja, nyuli wakiwarr marda.
GAL 4:25 Nanda jibarri Yakarr, baki nanganginmuku kulunganjamuku, juju bayngkani nangandu, yalu barrinani Jumuku, jala jungku nananyina yajina Jirusalim. Nanamuku Jumuku yali jungku wakiwarrmuku nanankanyi yuwanyi Musiskanyi. Yali wakiwarrmuku nanankanyi yuwanyi wajba jali Musis Kudwanyi, ngala jungkuyi Musis yundu kulawirana niji Sinayi. Nanda jibarri Yakarr, nyuli wakiwarr nangangi Yabrayamkanyi, baki nani barri nanamuku Jumuku yalu wakiwarrmuku nanankanyi yuwanyi Musiskanyi.
GAL 4:26 Ngala yingka yaji, nanamannga niji Jirusalim, nanaba kingkarri lalijina. Nanda nangangi yaji Kudkanyi. Nanda yingka yaji lalijina, barrinani nanda maninganja nangangi Yabrayamkanyi niji Sara. Nanda bardibardi Sara, miku nyuliyanyi wakiwarr, nyuli maninganja nangangi Yabrayamkanyi. Baki ngambala Krisjinmuku, ngambala barrinani nanganginmuku kukulimba nyulu, juju bayngkani nangandu. Miku nyuliyanyi wakiwarr, nanda bardibardi, baki nangangi kulunganja, miku nyuliyanyi wakiwarr marda. Baki ngambala marda, miku ngambalimi wakiwarrmuku nanankanyi yuwanyi Musiskanyi.
GAL 4:27 Nanda jangkurr najana Kudkanyi yanybaka nayi, “Nanda jibarri jali yurrngumba jungku nawinganjayudi, mikuyaji kulunganjanyi nangangi, baki nanankardi nyuli mirnarrijba muwa. Ngala yingka jibarri, nyuli kulunganjayudi, ngala manjijbayi nanda jibarri nanganginyi nawinganjawanyi. Baku barri janyulu wudumba kajamuku kulunganjamuku juju barri bayngkani nangandu. Nanankardi barri nanda jibarri nawinganjayudi marda nyulimi kudanyu mirnarrijba muwa. Barriwa.
GAL 4:28 Manku narri ngaki jangkurr, narri ngaki bababanyamba ngayu narrinya. Nanda juka Yayisak, nyuli kulunganja nangangi Saranyi. Birnandaba nangki Sara bardardanyi, yanybayingangi Kud Yabrayamkanyi. Yanyba nyuli nanda jangkurr miku nangkiyi yangkalamba. Baki nani barri bukambiju ngambala Krisjinmuku, ngambala jandanyimuku nangangi Kudkanyi. Ngambala nanganginmuku jandanyimuku, nanankardi barri nanamannga jangkurranyi yanyba jali Kud Yabrayamkanyi, nanda jangkurr miku nangki yangkalamba. Barriwa.
GAL 4:29 Nanda bardibardi Sara, nangki birnandaba bardardanyi, nanankardingangi nyuli Kunyba Ngarndu Kudkanyi. Ngala nanangini kulunganjawanyi wakiwarrayngka, nyuli yabimba kiji nangangi, kulunganjanyi Sarakanyi. Yabimba nyuli kaja kiji nanganginkanyi bababanyamba nyulu. Baki nani barri nanamukunyi jala miku jandanyimuku nangangi Kudkanyi, yalu yabimbaka kiji ngambalangi Krisjinmukuyngka jala jandanyimuku nangangi Kudkanyi. Kaja kiji yalu yabimbaka ngambalangi.
GAL 4:30 Ngala ngambala jingkijba nanda jangkurr Kudkanyi nanganginyina najana. Nanda jangkurr yanybaka, “Manjijbakiyi nanda jibarri wakiwarr, marda nangangi kulunganja. Manjijbakiyi bulanya, mikungangi nyuliyi wudumba kaja yaji nangangi jukawanyi nijanganjiyngkanyi. Jalija nangka janyba nangangi nijanganjinyi, baki miku nyuliyi wudumba nangangi yaji, nanganginkanyi ngabayidiyngka yajinyi, jukawanyi. Nanankardi manjijbakiyi bulanya. Ngala nanangini kulunganjawanyi Sarakanyi, ngala janyulu nyulu wudumba nijanganjiyngkanyi yaji, nanganginkanyi ngabayidiyngka yajinyi.” Barriwa. Nani barri yanybaka jangkurr najana Kudkanyi.
GAL 4:31 Miku ngambalimi barrinani kulunganja nanankanyi jibarrinyi wakiwarrayngka. Miku ngambalimi wakiwarr nanankanyi yuwanyi Musiskanyi. Miku ngambalimi wakiwarr yingkanyi Kudkanyi, jala miku duja Kud. Ngala ngambala barrinani kulunganjamuku nanankanyi duja maninganjanyi. Ngambala nanganginmuku jandanyimuku nanankanyi jala duja Kud. Barriwa.
GAL 5:1 Wabula barri ngambali wakiwarr, wakiwarrmuku ngambali. Baki nanda yingka balki yuwa, nanda ngambalangi mambuka, ngala miku nanijba barri. Miku ngambaliyi wakiwarr nanankanyi yuwanyi nanijba. Dulabayi ngambalanya Jisus Krayiswanyi. Dulaba nyuli ngambalanya nanankardi yingkananyi yuwananyi, ngambala durriykanyi Jisus Krayis. Baki ngayu karungka narrinya kudanyu, jungkukiyi yurlurrmba nangangi Jisus Krayiskanyi. Mikujiyi durrijba yingka yuwa. Mikujiyi mili jungku wakiwarr yingkanyi yuwanyi, ngala jungkukiyi yurlurrmba nangangi.
GAL 5:2 Manku narri nayinda ngaki jangkurr. Ngayu Bul, ngayu karungka narrinya nanginkanyi jangkurranyi. Mardakimi miku yingkawanyi kaburrmba narrinya. Jaliyi munyajba narri yingka kaburrmbikurri, baki narringka yangkalamba nanganbunanyi Jisus Krayisnanyi. Miku narrimi kuyu nangangi jangkurr Jisus Krayiskanyi.
GAL 5:3 Mili ngayu karu narrinya kudanyu. Jaliyi narri munyajba yingka kaburrmbikurri narrinya, baki narri durrijbangka nanda yuwa Musiskanyi, nanda yuwa nangangi kaburrmbikanyi yaji. Jaliyi narri durrijba bijal nanda yuwa Musiskanyi, baki marda narrimi durrijba bukamba nanda yuwa. Jaliyi yingkawanyi kaburrmba narrinya, baki marda narrimi jungku yurlurrmba bukamba nanankanyi yuwanyi Musiskanyi. Marda narrimi yabimba bukamba nanda yuwa.
GAL 5:4 Kudiya narri, ngamu narri jungku yurlurrmba nangangi Kudkanyi, ngamu narri yurlurrmba jungku jala narri ngayangayijba nanankanyi yuwanyi Musiskanyi, ngala miku. Jaliyi narringka mankumanku nani, baki miku nyuliyi narringi Buwanya Jisus Krayis. Jaliyi narringka mankumanku nani, baki miku narriyi jandanyimuku nangangi Kudkanyi, baki miku nyuliyi yabimba kunyba yaji narringi Kudwanyi.
GAL 5:5 Ngala nurru barri, nurru jingkijba Kud, janyulu yabimba nurrunya jungunkanyi yurlurrmba nangangi. Nurru jingkijba Kud, janyulu yabimba nanda nurrungi, kuyungangi nurru nangangi jangkurr Jisus Krayiskanyi, baki wajbangangi nurrunya nanganginkanyi Kunybanyi Ngarndunyi Kudwanyi. Nanankardi nurru jingkijba Kud, janyulu yabimba nurrunya jungunkanyi yurlurrmba nangangi.
GAL 5:6 Bukamba ngambala, Jumuku marda nanamuku jala miku Jumuku, bukamba ngambala, nyulu bababanyamba ngambalanya Jisus Krayiswanyi, jaliyi ngambala kuyu nangangi jangkurr. Yuku barri yingkamuku ngambala kaburrwaburr, ngala kudiyamuku ngambala miku yalimi kaburrwaburr. Yuku nanda. Ngala miku ngambalimi jungku yinini yinini nangangi Jisus Krayiskanyi. Miku. Bukamba ngambala nyulu bababanyamba ngambalanya, kudiya jala kaburrwaburr, baki kudiya jala miku kaburrwaburr. Bukamba ngambala nyulu bababanyamba ngambalanya jaliyi ngambala kuyu nangangi duja jangkurr. Nanankardi barri ngambala maruka muwa nangangi, baki ngambala maruka muwa yalungi yingkamukuyngka, marukangangi nyulu muwa ngambalangi. Barriwa.
GAL 5:7 Wabula narri kuyuyi nangangi jangkurr Jisus Krayiskanyi. Narri durrijbayi nangangi buyingkinyi yuwa. Ngala wanyingini karuyi narrinya, marda narrimi miku durrijba nanda duja jangkurr nangangi. Wanyingini narrinya kurrkunba ngayangayiykanyi nanganginkanyi duja jangkurranyi.
GAL 5:8 Ngayu jingkijbangka Kud jali yarrijba narrinya nanganginmuku jandanyimuku. Ngayu jingkijbangka Kud, miku nyuliyanyi kurrkunba narrinya ngayangayiykanyi nanganginkanyi duja jangkurranyi. Miku nyuliyanyi kurrkunba narrinya durriykanyi nangangi jangkurr.
GAL 5:9 Nayinda jangkurr yalili muningka yanyba, “Jala nyulu yabimbaka damba, baki ngawamba bijal bululu nyulu yarrijbangka, baki kamu barri bukamba nanda damba bululujbangka.” Nani barri yalili muningka yanyba. Baki nani barri nanda nanamannga bijalwanyi balkiwanyi yabimbaka walkurra kiji yalungi kajanyi. Barriwa.
GAL 5:10 Jalija narri yanyba nayinda jangkurr jala ngayu yarrijba narringi, jalija narringka kudanyu mankumanku nanginkanyi jangkurranyi, baki ngayu jingkijba narrinya, janarri kuyu nayi jangkurr. Nani ngayu jingkijba narrinya, ngambalangangi bukambiju bababanyamba nyulu ngambalanya Jisus Krayiswanyi. Baki ngayu jingkijba nanda balki milidimbawarr marda. Janyulu karrinjarrijba nanda balki milidimbawarr walu nangandu Kudwanyi. Janyulu karrinjarrijba nanda walu nangandu, baki janyulu yanyba nanganginkanyi balkinyi yajinyi. Janyulu yabimba balki yaji nangangi Kudwanyi, milidimbangangi nyuli balki jangkurr narringi. Barriwa.
GAL 5:11 Ngala ngayu barri, jaliyi ngayili milidimba yingkamuku, marda yalimi jungku kaburrwaburr barrinani yanybaka yuwa Musiskanyi, jaliyi ngayili milidimba yalunya nani, baki wanyingkanyi yalu yabimba kiji ngaki nanamukunyi Jumukunyi. Ngala miku ngayimi milidimba nanankanyi jangkurranyi. Baki yalu yabimba kiji ngaki Jumukunyi, yanybangangi ngayu nanankanyi yuwanyi kaburrmbikanyi mankanyi miku nanda jirrinyi yuwa durriykanyi. Marda narrimi ngawamba durrijba nanda buyingkinyi yuwa nangangi Jisus Krayiskanyi.
GAL 5:12 Nanamuku jala nulijba narringi jungunkanyi barrinani kaburrwaburr, nayi ngayu yanyba yalungi. Marda yalungkimi kaburrmba yalungi mankanyi yalungi, barriwa barri bukamba, barrinani bulukimuku. Jaliyi yalungka yabimba nani, baki jayalu yingijba narrinya, jayalu barlba narrinbunanyi, jayalu miku mili milidimba narrinya balkinyi jangkurranyi. Barriwa.
GAL 5:13 Ngala narri barri, narri barrinani bababanyamba ngayu narrinya, durrijbangangi narri Jisus Krayis, baki nyulu bababanyamba narrinya marda Jisus Krayiswanyi. Wabula barri narringi wankalanyi yuwa kujaya narringi, ngala dulabayi narrinya nanamunanyi yuwananyi Jisus Krayiswanyi. Dulaba nyuli narrinya. Mikuwali nanda yuwa kujaya narringi nanijba barri. Ngala mikujiyi yarrijba yingka yuwa narringi kujaya, baki miku narringkiyi mankumanku nayi, “Yuku ngayu yabimbaka bukamba yaji nanijba barri. Yuku ngayu yabimba nanda jala ngaki mankanyi nulijba yabimbikanyi nayi.” Mikujiyi mankumanku nanda nani. Ngala marda narringkimi maruka muwa, marda narringkimi kudanyu maruka muwa, baki janarringka yabimba kunyba yaji narringi.
GAL 5:14 Jaliyi narri nulijba durriykanyi nanda yuwa nangangi Musiskanyi, baki marda narrimi mankuwa nanda jirrinyi yuwa. Yanybaka nanda jirrinyi yuwa nayi, “Marda narringkimi maruka muwa, barrinani nganyingka marukangka muwa.” Jaliyi narri nulijba durriykanyi nanda yuwa Musiskanyi, baki marda narrimi yabimba yaji nani. Ngala mikuwali nganinymuku yurrngumba ngayangayijba nanankanyi yuwanyi marukankanyi muwa yalungka. Ngala nanijba barri, nyulu marda jirrinybaka ngambalanya nanamannga yuwanyi Jisus Krayiswanyi. Nyulu marda jirrinybaka ngambalanya marukankanyi muwa yingkamukuyngka. Ngala, jala ngambala durrijbangka Jisus Krayis, baki yuku ngambala ngayangayijba nanganginkanyi yuwanyi, wajbangangi ngambalanya nanganginkanyi Kunybanyi Ngarndunyi Kudwanyi. Kandimbaka ngambalanya Kunybawanyi Ngarnduwanyi, baki nanankardi, yuku ngambala ngayangayijba nanankanyi yuwanyi.
GAL 5:15 Ngala miku narringkimi maruka muwa. Kudiya narri, jala nulijba durriykanyi nanda jangkurr yalungi balkimukuyngka milidimbawarrayngka, narri jakakajbangka nanankanyi jangkurranyi marukankanyi muwa ngambalaka. Narringka yabimbaka kijinyi. Miku narringkimi maruka muwa. Kudanyu narringka yabimbaka kijinyi. Narri barrinani bajangumuku, jala yalungka bijba. Wijbakiyi yabimba kiji, bakiyi narringka linjumba mankanyi kudanyu barri. Barriwa.
GAL 5:16 Nanginkanyi ngayu karungka narrinya marda. Marda narrimi yabimba ngawamba nanda jala karu narrinya yabimbikanyi Kunybawanyi Ngarnduwanyi Kudkanyi. Marda narrimi jungku kunyba nangangi yurrngumba. Marda narrimi miku yabimba nanda jala narri nulijba yabimbikanyi mankankanyi. Miku. Ngala marda narrimi yabimba ngawamba nanda jala nulijba Kunyba Ngarndu Kudkanyi narringi yabimbikanyi.
GAL 5:17 Ngambala nulijbangka yabimbikanyi kaja yaji, ngala nanda Kunyba Ngarndu Kudkanyi, nyulu nulijbangka ngambalangi yabimbikanyi yinini yaji, jala kunyba ngambalangi. Nani ngambala baki nanda Kunyba Ngarndu Kudkanyi, ngambalaka jakakajba, wanyi jangambala yabimba. Ngala marda ngambalimi yabimba ngawamba nanda jala nulijba Kunyba Ngarndu Kudkanyi ngambalangi yabimbikanyi yaji. Marda ngambalimi yabimba nanda jala nyulu karu ngambalanya.
GAL 5:18 Jaliyi narri yabimba nani, baki mikuwali nanda yuwa Musiskanyi kujaya narringi. Ngala narri ngayangayijbangka nanankanyi Kunybanyi Ngarndunyi Kudkanyi, miku narriyi ngayangayijba nanankanyi yuwanyi Musiskanyi. Barriwa.
GAL 5:19 Jaliyi ngambala miku ngayangayijba Kunybanyi Ngarndunyi Kudkanyi, baki ngambala yabimba kaja balki yaji. Ngambalaka mankumanku yabimbikanyi balki yaji, barrinani bajangumuku, barrinani kulukankanyi yingkana baki yingkana yurrngumba. Ngambala yabimbaka ngawamba nanda yaji jala ngambala nulijba yabimbikanyi.
GAL 5:20 Ngambalaka mankumanku yanybikanyi nanankanyi barrinani Kudkanyi, marda waykanyi nanda ngambalanginkanyi jangkurranyi, ngala nanda barri, miku nyulu duja Kud. Ngambalaka mankumankuka daykanyi yingka, marda briykanyi yingka, kurdanbikanyi nanda yingka nganinyi. Ngambalaka mankumanku ngurrunaykanyi yingka nganinyi, marda jungunkanyi ngarrangarra muwa yingkanyi, marda jungunkanyi walkurra mambuka yingkamukuyngka. Ngambalaka daba mungkijimuku.
GAL 5:21 Ngambalaka mankumanku wudumbikanyi yingkanyi nangangi yaji, marda ngaraykanyi kamukamu, marda jarrkanyi kaja barnyi baki mama. Nani ngambalaka mankumanku yurrngumba, jaliyi ngambala miku ngayangayijba Kunybanyi Ngarndunyi Kudkanyi. Ngayi karu narrinya waluwa, baki mili ngayu karungka narrinya, jaliyi ngambalaka mankumanku nani, jaliyi ngambala yabimba balki yaji nani, baki miku ngambaliyi jungku yalundu, nanamukunyina jala lalanba yalunya yurrngumba Kudwanyi. Miku nyuliyi lalanbawarr ngambalangi, jaliyi ngambala yabimba balki yaji nani. Barriwa.
GAL 5:22 Ngala jaliyi ngambala ngayangayijba nanankanyi Kunybanyi Ngarndunyi Kudkanyi, jungku jala ngamandu kurduluna, jaliyi ngambala ngayangayijba Ngarndunyi Kudkanyi, baki jangambalaka maruka muwa. Jangambalaka mirnarrijba muwa, jangambala marda jungku mardumardu muwa marda. Baki kurrkunba jangambalaka ngaranbikanyi ngambalaka. Jangambala yabimba kunyba yaji yalungi yingkamukuyngka marda, baki yingkamukuyngka, jala yalu jingkijba ngambalanya, jangambala yabimba ngawamba kunyba yaji yalungi.
GAL 5:23 Nani barri jangambala jungku, jaliyi Kunyba Ngarndu Kudkanyi jungkuka ngamandu. Baki jangambala mili jungku nayi barri. Jangambala miku nulijba jungunkanyi mambuka yingkamukuyngka. Jangambala mirnarrijba muwa nanankanyi jala ngambalangi mambuka. Jangambala mirnarrijba muwa yingkamukuyngka jala yalu wudumba yaji. Jangambala miku yabimba nanda jala ngambalangi mankanyi nulijba yabimbikanyi yaji. Nani ngambala jungku, jaliyi Kunyba Ngarndu Kudkanyi jungkuka ngamandu kurduluna. Baki mikukimi yingkawanyi yuwawanyi kurrkunba ngambalanya jungunkanyi kunyba nani. Jalija ngambala jungku kunyba nani yurrngumba, baki jangambala jungku kunyba bukambijuyngka yuwanyi.
GAL 5:24 Jaliyi ngambala durrijba Jisus Krayis yurrngumba, baki miku jangambala nulijba yabimbikanyi balki yaji, ngala jangambala nulijba yabimbikanyi ngawamba nanda jala kunyba nanankanyi yuwanyi nanganginkanyi Jisus Krayiskanyi.
GAL 5:25 Jaliyi Kunyba Ngarndu Kudkanyi jungkuka ngamandu kurduluna, baki duja ngambala jungku wankan barrinani nanda buyingkinyi nganinyi. Baki marda ngambalimi yabimba ngawamba nanda jala nyulu karu ngambalanya yabimbikanyi Kunybawanyi Ngarnduwanyi Kudkanyi. Marda ngambalimi yabimba ngawamba nanda jala nyulu karu ngambalanya.
GAL 5:26 Marda ngambalimi miku barrakijarra mankanyi. Marda ngambalimi miku wajba yingka kijinyi. Marda ngambalimi miku ngurrunajba yingka nganinyi. Marda ngambalimi miku jungku nani, jaliyi Kunyba Ngarndu Kudkanyi jungkuka ngamandu kurduluna. Barriwa.
GAL 6:1 Narri, ngakinmuku bababanyamba ngambalaka, yingka jangkurr jangayu karu narrinya. Jaliyi ninji najba yingka barimbikurri yaji, jaliyi nyulu yabimba balki yaji Kudkanyi, baki marda ninjimi ngirrwa nangangi. Ninji jala jungku jirdi Kunybanyi Ngarndunyi Kudkanyi nganyindu, marda ninjimi karu nanda, mili jungunki yurlurrmba nangangi Kudkanyi. Mikujiyi ngarrangarra muwa nangangi, ngala kardardakiyi ngirrwa nangangi. Minimbakiyi nanda, yanka nyulu jungkuka balki. Baki najbawa nganyingkiyi, bakiyi ninji marda nulijba yabimbikanyi balki yaji. Najbawa nganyingkiyi marda.
GAL 6:2 Marda narringkimi yabimba yajinyi. Jaliyi yingamali narringi, jaliyi nyulu jungku kijiyudi, baki marda narrimi mankumankuwa nanda kiji nangangi. Marda narrimi kandimba nanda kijiyudi. Jaliyi narri kandimba yingka nani, baki janarri ngayangayijba nanankanyi yuwanyi Jisus Krayiskanyi.
GAL 6:3 Jaliyi nangka mankumanku nganinyi nayi, “Ngayu walkurra mambuka. Jirrinyi ngayu mambuka yalungi ngakinmukuyngka mungkijinyi.” Jaliyi nangka mankumanku nani, ngala miku nyulimi walkurra mambuka, baki nangka jujamba. Jujamba nangka, nyulu walkurra mambuka yalungi barri.
GAL 6:4 Ngala mardakimi nangka nganinyi mankumanku, marda nangkimi kudanyu mankumanku nanankanyi jala nyulu yabimba, yinini kunyba yaji, yinini balki yaji. Jaliyi nyulu jingkijba, nyuli yabimba kunyba yaji, baki marda nyulimi mirnarrijba muwa nanankanyi yajinyi. Ngala marda nangkimi miku barrarrakijba nanganginkanyi yajinyi. Marda nangkimi miku mankumanku nanganginkanyi kunybanyi yajinyi, baki yanyba, “Nanangini yingkawanyi, yiningki nyuli yabimba kunyba yaji, ngala ngayu barri, ngayu yabimbayi kunybamirra yaji.” Marda nangkimi miku barrarrakijba nani, ngala marda nyulimi mirnarrijba muwa nanankanyi kunybanyi yajinyi jali nyulu yabimba. Barriwa.
GAL 6:5 Marda ngambalakimi kudanyu mankumanku nanankanyi jala ngambala yabimba jaliyi nanda kunyba yaji, jingkijbangkangangi Kudwanyi bukamba yaji. Jingkijbangka nyulu nanda jala ngambala yabimba. Baki yurrngumba janyulu mankuwa ngambalangi yaji. Barriwa.
GAL 6:6 Jala milidimbawarr jungkuka narrindu yurrngumba, jala nyulu milidimba narrinya bulangi Kudkanyi baki Jisus Krayiskanyi, baki marda narrimi lalanba nanda milidimbawarr. Marda narrimi wajba nanda nganinyi mamanyi baki jumbalanyi. Marda narrimi kudanyu lalanba nanda nganinyi jala nyulu milidimba narrinya.
GAL 6:7 Marda narringkimi mankumanku yurrngumba, jaliyi narri jungku yurlurrmba nangangi Kudkanyi, jaliyi narringka jujamba nangangi Kudkanyi, bakiyi nyulu jingkijbangka narrinya Kudwanyi, narri jujijbawarr. Miku narriyi jujamba Kud. Miku. Jaliyi narri yabimba balki yaji, baki janyulu mankuwa nanda balki yaji narringi Kudwanyi. Janyulu mankuwa nanda balki yaji baku, jalija nyulu karrinjarrijba narrinya walu nangandu. Baki jaliyi narri yabimba kunyba yaji, baki janyulu mankuwa nanda kunyba yaji nanamanji marda.
GAL 6:8 Jaliyi narri yabimba ngawamba nanda balki yaji, jala narri nulijba narringinkanyi mankankanyi, baki janarringka janyba. Miku narriyi wankijba mili, ngala janarri kurdan yurrngumba. Ngala jaliyi narri ngayangayijba nanankanyi Kunybanyi Ngarndunyi Kudkanyi, jaliyi narri yabimba nanda jala nyulu karu narrinya, baki janarri wankijba mili. Janarri mili wanka jungku bayngkani jalija narringka janyba.
GAL 6:9 Narri yabimbaka kunyba yaji yalungi yingkamukuyngka, ngala mikujiyi balkijba yabimbikanyi kunyba yaji yalungi. Milikiyi yabimba kunyba yaji yalungi yurrngumba. Jaliyi narri yabimba kunyba nani yurrngumba, baki baku barri janyulu yabimba kunyba yaji narringi marda Kudwanyi.
GAL 6:10 Nanankardi barri, marda ngambalimi yabimba kunyba yaji yalungi bukambijuyngka. Baki marda ngambalimi yabimba kaja kunyba yaji yalungi Krisjinmukuyngka. Barriwa.
GAL 6:11 Nayinda waluwa jangkurr, ngayu karuyi yingka baki nyuli yarrijba nanda jangkurr najana narringi, ngala nayinda jangkurr barri, ngayu Bul, ngayu yarrijbangka nayinda jangkurr najana ngakinyina marnina.
GAL 6:12 Nanamuku balkimuku milidimbawarrmuku, yalu nulijba narringi jungunkanyi kaburrwaburr. Yalu nulijbangka yingkamukuyngka, yalungka mankumankunkanyi yalungi milidimbawarrayngka, yalu jirrinyimuku nganinyimuku barrinani mambukamuku. Nanamuku balkimuku milidimbawarrmuku, yalu yanyba barrinani jirrinyi nganinyimuku, ngala miku. Ngawamba yalungka mankumanku yalunginkanyi mankankanyi. Miku yalimi milidimba bukamba nanda duja jangkurr nangangi Jisus Krayiskanyi. Miku yalimi milidimba bukamba duja jangkurr nangangi. Janyba nangki Jisus Krayis kurndana, baki wankambayi mili Kudwanyi. Miku yalimi milidimba bukamba nangangi jangkurr. Ngala marralangka yalu nanamukuyngka Jumukuyngka jala yalu durrijba bukamba nanda yuwa Musiskanyi. Marralangka yalungi kudanyu. Yiningki jayalu Jumukunyi yabimba kiji yalungi, jaliyi yalu milidimba duja jangkurr nangangi Jisus Krayiskanyi. Mankumanku yalungka, jaliyi yalu milidimba jangkurranyi yarriykanyi kaburrwaburr, baki yiningki Jumukunyi, miku yaliyi yabimba kiji yalungi, miku yaliyi linjumba yalunya. Marralangka yalu kijinyi, baki nanankardi yalu milidimba jangkurranyi yarriykanyi kaburrwaburr.
GAL 6:13 Nanamuku Jumuku jala yabimba kaburrwaburr, miku yalimi ngayangayijba bukamba nanankanyi yuwanyi Musiskanyi. Miku. Ngala yalu nulijba narringi jungunkanyi kaburrwaburr, baki jayalunjalu karu narringi, narri kaburrwaburr, yalungingangi, yabimba narri nanda jala yalu jirrinybayi narrinya yabimbikanyi.
GAL 6:14 Ngala ngayu barri Bul, miku ngayimi karu yalunya nanankanyi jali ngayu yabimba. Miku. Ngala ngayu nulijba karunkanyi yalunya nangangi, ngambalanginkanyi mambukanyi Jisus Krayiskanyi. Jangayu karu yalunya bukambiju nangangi. Janyba nangki Jisus Krayis wabangkarra kurndana, baki nanankardi barri janyulu wankamba ngambalanya mili Kudwanyi, jungunkanyi nangandu yurrngumba. Nani barri jangayu karu yalunya. Ngawamba nanankanyi yajinyi jirriyngkanyi ngaki, mikuyaji yingkanyi. Baki ngayu nulijbangka yabimbikanyi ngawamba nanda jala nyulu jirrinyba. Miku yingkanyi yajinyi ngayimi nulijba.
GAL 6:15 Miku barri nayinda jirrinyi yaji ngaki, yingkamuku yalu kaburrwaburr, ngala yingkamuku miku yalimi kaburrwaburr. Miku nanda jirrinyi yaji ngaki. Ngala nayinda barri jirrinyi yaji ngaki, kuyunkanyi nanda jangkurr nangangi Jisus Krayiskanyi. Jaliyi narri kuyu nangangi jangkurr, baki narri jungku barrinani nanda buyingkinyi nganinyi.
GAL 6:16 Jala narri jungku nani, jala narri durrijba nangangi yurlurrmba yuwa yurrngumba, baki janarri jungku mardumardu muwa yurrngumba. Janarri jungku mardumardu muwa, baki janyulu yabimba kunyba yaji narringi marda Kudwanyi. Janyulu manjamanjamba narringi balki yaji. Janyulu yabimba nayinda yaji narringi baki yalungi, bukambijuyngka nanganginmukuyngka jandanyimukuyngka Kudkanyi. Barriwa.
GAL 6:17 Baki mili yingka nayi jadunyi jangkurr ngayu jirrinybaka narrinya, mikujiyi yabimba mili kiji ngaki. Jungkuka ngayu wakiwarr nangangi Jisus Krayiskanyi, baki nanankardi yingkamukunyi nganjali linjumba. Kaja mawarl ngakinyina mankanyina jali nganjalu linjumba mankanyi. Ngala narri barri mikujiyi yabimba mili kiji ngaki. Barriwa.
GAL 6:18 Ngayu yanybaka mududu nangangi, ngambalanginkanyi mambukanyi Jisus Krayiskanyi. Ngayu ngajakangka Jisus Krayis, janyulu jungku narrindu, janyulu yabimba kunyba yaji narringi yurrngumba. Barriwa barri bukamba nayinda jangkurr narringi.
EPH 1:1 Nayinda ngayu, Bul. Ngayu nayinda jali ngana manjijba Jisus Krayiswanyi, nyulungangi Kud nulijbayi ngaki milidimbikanyi yalunya. Yarrijba ngayu nayinda jangkurr najana narringi bukambijuyngka Krisjinmukuyngka jalili narri jungku nananyina yajina niji Yibisus. Kuyu narri nanda jangkurr nangangi Jisus Krayiskanyi, baki durrijba narri nangangi jangkurr yurrngumba barri.
EPH 1:2 Yanyba ngayu mududu nangangi Kudkanyi narringi. Ngajaka ngayu Kud narringi, janarri jungku mardumardu muwa yurrngumba barri, marrimbangangi narrinya mardarda Kudwanyi. Nanankujarra barri, ngambalangi Buwakanya Kud, baki ngambalangi mambuka Jisus Krayis, bula marukangka muwa ngambalangi. Ngajaka ngayu bulanya, jabula marrimba narrinya mardarda yurrngumba barri, baki janarri jungku mardumardu muwa. Barriwa.
EPH 1:3 Wajbangka ngambala Kud kunybanyi jangkurranyi. Kajanyi kunybanyi jangkurranyi ngambala wajbangka Kud. Nyulu Buwakanya ngambalanginkanyi mambukanyi Jisus Krayiskanyi. Yabimba nyuli ngambalangi kunyba yaji Kudwanyi, manjijba jali nyulu nangangi jandanyi Jisus Krayis, wayka ngamandurri jambarri. Nyulu ngambalangi buwanya, Jisus Krayis, baki nanankardi nyuli wajba ngambalanya kunybanyi yajinyi Kudwanyi. Kajanyi kunybanyi yajinyi nyuli wajba ngambalanya kingkarrinyawunyi lalijiwunyi.
EPH 1:4 Wabula barri kamambarra, waluwa nyuli yabimba nayinda jamba, baki mankumanku nangki Kud yabimbikanyi yaji. Mankumanku nangki yabimbikanyi ngambalanya nganinyimuku marda jibarrimuku. Mankumanku nangki yarriykanyi ngambalanya nanganginmuku jandanyimuku, baki nyulu bababanyambikanyi ngambalanya Jisus Krayiswanyi. Nanamanji wabula barri nyuli yarrijba ngambalanya jungunkanyi kunyba nangangi, jungunkanyi yurlurrmba nangangi. Nanamanji barri nangki mankumanku manjamanjambikanyi ngambalangi balki yaji, baki jangambala jungku kunybana yuwana nangangi. Jangambala jungku yurlurrmba nangangi Kudkanyi yurrngumba barri. Nani barri mankumanku nangki Kud, baki barriwa nyuli yabimba ngambalanya nganinyimuku, jibarrimuku. Maruka nyulu muwa ngambalangi.
EPH 1:5 Maruka nyulu muwa ngambalangi, baki nanankardi manjijbayi nangangi jandanyi. Manjijbayi nangangi jandanyi Jisus Krayis ngamandurri. Jaliyi ngambala durrijba nanda jangkurr nangangi Jisus Krayiskanyi, baki ngambala jungku jandanyimuku nangangi Kudkanyi. Nyulu jandanyi nangangi Kudkanyi Jisus Krayis barri, baki nyulu bababanyamba ngambalanya. Nanankardi barri ngambala marda jungkuka jandanyimuku nangangi Kudkanyi. Bukamba nani nyuli yabimba yaji ngambalangi, marukangkangangi nyulu muwa ngambalangi, baki nyuli nulijba yabimbikanyi kunyba yaji ngambalangi. Mirnarrijba nyulu muwa yabimbikanyi nanda kunyba yaji ngambalangi.
EPH 1:6 Marda ngambalimi wajba Kud kunybanyi jangkurranyi ngambalangi, yabimbangangi nyuli kunyba yaji ngambalangi, jali muningka nyulu manjijba nangangi jandanyi ngamandurri. Manjijba nyuli nangangi jandanyi ngamandurri. Manjijba nyuli nangangi jandanyi, maruka jali nyulu muwa nangangi kudanyu barri. Nanankardi barri marda ngambalimi wajba Kud kunybanyi jangkurranyi ngambalangi. Barriwa.
EPH 1:7 Nangangi jandanyi Jisus Krayis nangki janyba ngambalangi. Janyba nangki ngambalanginkanyi balkinyi yajinyi, baki nanankardi barri nyulu manjamanjambaka ngambalangi balki yaji Kudwanyi. Nani barri nyuli yabimba walkurra yaji ngambalangi Kudwanyi. Nani barri walkurramirra yaji nyuli yabimba ngambalangi.
EPH 1:8 Walkurra kunyba yaji nyuli yabimba ngambalangi. Nyulu kunyba kulaji. Jingkijbangka nyulu bukamba yaji. Jingkijba nyulu bukamba yaji, wabulinyi marda nanijba, marda bakunyi yaji. Bukamba yaji nyulu jingkijbangka, kunybangangi nangangi kulaji. Barriwa.
EPH 1:9 Wabula kamambarra mankumanku nangki Kud, janyulu yabimba nayi, janyulu manjijba nangangi jandanyi wayka ngamandurri. Janyulu manjijba nangangi jandanyi karunki ngambalanya nangangi Kudkanyi, nyulu marrimbikanyi ngambalanya mardarda. Baki janyulu karu ngambalanya nanganginyi jandanyiwanyi. Janyulu karu ngambalanya, wankambaja ngambalanya mili Kudwanyi. Barriwa. Nani barri nangki mankumanku Kud, baki manjijba nyuli nangangi jandanyi. Manjijbayi nangangi jandanyi nyulu marrimbiji ngambalanya mardarda, nyulu wankambiji ngambalanya mili Kudwanyi. Janyulu wankamba ngambalanya mili jala ngambala durrijba nanda jangkurr nangangi Jisus Krayiskanyi.
EPH 1:10 Ngambala jingkijba nayi marda nangangi Kudkanyi. Janyulu yabimba yingka mili walkurra yaji baku barri. Wabula kamambarra jali yabimba bukamba yaji Kudwanyi, baki kunybamirra nanda yaji. Ngala baku barri jungkuyi nganinyimuku balki nangangi Kudkanyi, baki barimba yali nanda yaji jali yabimba Kudwanyi kunyba yaji. Ngala baku barri janyulu mili yabimba bukamba yaji kunyba Kudwanyi. Janyulu yabimba bukamba yaji kunyba, kingkarri lalijina, baki nayiba wayka jambana. Bukamba yaji janyulu yabimba kunyba. Baki nanamanji barri jungkuja Jisus Krayis mambuka bukambijuyngka. Janyulu mambuka bukambijuyngka yajinyi jalija mili kunyba. Barriwa.
EPH 1:11 Jingkijbangka bukamba yaji Kudwanyi. Jingkijbangka nyulu bukamba yaji jalija yalu yabimba nganinyimukunyi. Wabula jali nyulu yabimba bukamba yaji, baki jingkijba nyuli nganinyimuku, jayalu jungku balki, miku jayalu durrijba nangangi yuwa. Nanamanji wabula nangki yanyba Kud, janyulu baku manjijba nangangi jandanyi, baki nyuli yarrijba ngambalanya durriykanyi nangangi jandanyi Jisus Krayis. Jala ngambala durrijba nangangi jandanyi, baki nyulu bababanyamba ngambalanya jandanyiwanyi, baki ngambala jandanyimuku nangangi Kudkanyi. Nani barri mankumanku nangki Kud, yabimbikanyi nanijba yaji baku barri.
EPH 1:12 Manjijbayi nangangi jandanyi Kudwanyi. Manjijbayi nangangi jandanyi Jisus Krayis wayka jambarri, baki milidimbayi jangkurranyi Jisus Krayiswanyi. Milidimba nyuli nanganginmuku mungkijimuku. Milidimba nyuli nurrunya Jumuku nangangi Kudkanyi. Kudiyawanyi nurri kuyu nangangi jangkurr, baki nurri nurru lirrkamuku jandanyimuku nangangi Kudkanyi. Marda nurrimi wajba Kud kunybanyi jangkurranyi nurrungi. Nyulu nurrungi walkurramirra mambuka, wirimalaru.
EPH 1:13 Baki narri marda ngurranyimuku, narri marda kuyuyi nanda kunyba jangkurr nangangi Jisus Krayiskanyi. Narri marda kuyuyi nanda duja jangkurr nangangi, milidimba jali ngayu narrinya. Nanankardi barri narri marda jingkijbangka Jisus Krayis, nyulu bababanyamba narrinya, nyulu marrimba ngambalanya mardarda. Barriwa. Baki wuyubayi ngambalanya kurdulu, jali ngambalanya wajba nanganginkanyi Kunybanyi Ngarndunyi Kudwanyi. Wajba nyuli ngambalanya nanankanyi jali nyulu karu ngambalanya, janyulu wajba ngambalanya.
EPH 1:14 Jala wajba ngambalanya nanganginkanyi Kunybanyi Ngarndunyi Kudwanyi, baki ngambala jingkijba Kud, janyulu yabimba nanda jala nyulu yanyba. Nanda yuwa Musiskanyi, baki nanda yingka yuwa yijankanyi, mikuwali kujanya ngambalangi nanijba barri. Nyulu bababanyamba ngambalanya Jisus Krayiswanyi, baki ngambala jandanyimuku nangangi Kudkanyi. Janyulu marrimba ngambalanya mardarda, jaliyi ngambala durrijba nangangi jangkurr Jisus Krayiskanyi. Janyulu manjamanjamba ngambalangi balki yaji Kudwanyi, baki baku barri janyulu wankamba ngambalanya mili, ngambala jungunkanyi nangandu yurrngumba barri. Ngambala jingkijba Kud, janyulu yabimba bukamba nayinda kunyba yaji ngambalangi. Janyulu yabimba bukamba nayinda ngambalangi, wajbangangi nyulu ngambalanya nanganginkanyi Kunybanyi Ngarndunyi. Nanankardi barri, marda ngambalimi wajba Kud kunybanyi jangkurranyi ngambalangi. Nyulu ngambalangi walkurra mambuka, wirimalaru. Barriwa.
EPH 1:15 Yingkamukunyi ngananjali karu narringi, narrili durrijba nangangi jangkurr Jisus Krayiskanyi. Narrili durrijba nangangi jangkurr yurrngumba barri, baki nanankardi narrili maruka muwa yalungi marda, yingkamukuyngka Krisjinmukuyngka. Narrili yabimba kunyba yaji yalungi marda.
EPH 1:16 Nani barri narrili durrijba nanda yuwa nangangi Jisus Krayiskanyi, baki nanankardi ngayu yanyba mududu nangangi Kudkanyi narringi yurrngumba. Ngayu yanyba kunyba jangkurr nangangi Kudkanyi jali yabimba narrinya nanganginmuku jandanyimuku. Ngayu mankuwa narrinya yurrngumba jala ngayu yanyba mududu nangangi Kudkanyi.
EPH 1:17 Ngayu ngajakangka Kud narringi. Nyulu Buwakanya ngambalangi, marda nyulu Buwakanya ngambalanginkanyi mambukanyi Jisus Krayiskanyi. Ngayu ngajakangka Kud, nyulu waykanyi narrinya nanganginkanyi Kunybanyi Ngarndunyi. Nanangini Kunybawanyi Ngarnduwanyi Kudkanyi, janyulu wajba narrinya kunybanyi kulajinyi, janyulu minimba narrinya nangangi Kudkanyi, baki janarri jingkijba Kud.
EPH 1:18 Ngayu ngajakangka Kud narringi, janyulu minimba narrinya kajanyi kunybanyi yajinyi, baki janarri jingkijba nanda yaji narringinyina kurduluna. Janarri jingkijba narringinyina kurduluna, jingkijbangangi narri Kud, janyulu yabimba bukamba nayinda kunyba yaji narringi. Nyuli yarrijba narrinya nanganginmuku jandanyimuku. Nyuli wajba narrinya nanganginkanyi Kunybanyi Ngarndunyi, jungunkanyi nyulu narringinyina kurduluna. Baki narri jingkijba Kud, janyulu wankamba narrinya mili jungunkanyi nangandu yurrngumba barri. Bukamba nayinda kaja kunyba yaji janyulu yabimba narringi, nanganginmukuyngka jandanyimukuyngka.
EPH 1:19 Baki nayinda narri jingkijba naijba narringinyina kurduluna, jingkijbangangi narri Kud, janyulu yabimba bukamba nayinda kunyba yaji narringi. Nyuli yarrijba narrinya nanganginmuku jandanyimuku. Nyuli wajba narrinya nanganginkanyi Kunybanyi Ngarndunyi, jungunkanyi nyulu narringinyins Krayis, baki nyuli mili wankamba Kudwanyi, baki kuyuyi kingkarri jungunki nangandu kingkarri lalijina yurrngumba barri. Nani barri nyuli yabimba ngiruka yaji nangangi, baki nanamannga janyulu yabimba ngiruka yaji ngambalangi baku.
EPH 1:21 Jisus Krayis nyulu walkurra mambuka bukambijuyngka yajinyi. Nyulu wirimalaru bukambijuyngka yajinyi. Mikuyaji yingkanyi mambukanyi barrinani nyulu. Nyulu walkurra mambuka barrinani nangangi Buwakanya Kud, nyulu walkurra mambuka. Nyulu walkurra mambuka lalijinyi, marda jambanyi. Nyulu walkurra mambuka nanijba baki baku. Nyulu walkurra mambuka ngirukanyi yajinyi. Nyulu walkurra mambuka nanamukuyngka, wuwarranyi marda ngiwunyanyi, marda briykanyi yaji. Ngawamba nyulu wirimalaru bukambijuyngka yajinyi wandijiyana. Barriwa.
EPH 1:22 Yarrijbayi Kudwanyi Jisus Krayis walkurra mambuka bukambijuyngka yajinyi wandijiyana. Nyulu mambuka bukambijuyngka yajinyi, yabimba jala Kudwanyi. Baki nanijba barri nyulu mambuka ngambalangi marda Krisjinmukuyngka.
EPH 1:23 Nyulu ngambalangi walkurra mambuka, baki nyulu bababanyamba ngambalanya Krisjinmuku. Ngambala jungkuka malumba nangandu, baki nyulu wajbangka ngambalanya bukambijuyngka kunybanyi yajinyi. Nyulu yabimbaka ngambalanya ngiruka nangangi. Nyulu jungkuka ngamandu kurduluna, baki nyulu walkurra mambuka bukambijuyngka yajinyi wandijiyana, lalijina baki jambana. Nyulu jungkuka ngambalandu kurduluna, baki ngambala jungkuka ngiruka nangangi, ngambala jungkuka yurlurrmba barri. Nyulu jungkuka wirimalaru yurrngumba ngambalangi barri. Barriwa.
EPH 2:1 Wabula barri, narri jala miku Jumuku, miku narriyanyi jungku yurlurrmba nangangi Kudkanyi. Miku narriyanyi jingkijba Kud. Miku narriyanyi durrijba Kud. Narri jungkuyi balki nangangi.
EPH 2:2 Nanamanji barri narri yabimbayi kaja balki yaji, narri durrijbayi nanda yuwa nangangi, mambukanyi wuwarranyi. Narri durrijbayi nanda mambuka Sayidin. Narri ngayangayijbayi nanganginkanyi jangkurranyi. Nyulu mambuka yalungi jala miku durrijba Kud. Nyulu mambuka yalungi marda, wuwarranyi, ngiwunyanyi, marda briykanyi yaji.
EPH 2:3 Baki nurru barri Jumuku, nyuli wajba nurrunya nanganginkanyi yuwanyi Kudwanyi, ngala miku nurriyanyi durrijba nanda yuwa. Ngala nurri durrijba nanda yuwa nangangi Sayidinkanyi, nanda yuwa jungunkanyi balki nangangi Kudkanyi. Baki narri ngurranyimukunyi, narri marda durrijbayi nanda yuwa Sayidinkanyi. Bukambiju ngambala, jungku ngambali balki nani, baki mardakimi yanyba Kud ngambalangi, jangambalaka janyba, baki jangambala jungku kurdan yurrngumba barri. Mardakimi yanyba Kud nani barri ngambalangi. Nanamuku wankalamuku, baki ngambala nanijba marda, bukambiju ngambala jungkuyi balki nangangi Kudkanyi. Miku ngambaliyanyi ngayangayijba nanganginkanyi jangkurranyi. Mankumankuyi ngambalaka balkinyi yajinyi yurrngumba barri, baki yabimba ngambali nanda kaja balki yaji. Nani barri ngambali yabimba, nyulungangi ngambalangi mambuka Sayidin. Barriwa.
EPH 2:4 Ngala nyulu marukangka muwa bukambijuyngka Kud. Nyulu marukangka muwa nurrungi Jumukuyngka baki narringi ngurranyimukuyngka. Nyulu marukangka muwa bukambijuyngka ngambalangi, baki nulijbangka Kud yabimbikanyi kunyba yaji ngambalangi. Jaliyi ngambala jungku balki nangangi Kudkanyi, baki yuwajiwa nyulu marukangka muwa ngambalangi, yuwajiwa nyulu nulijbangka yabimbikanyi kunyba yaji ngambalangi.
EPH 2:5 Wabula barri, miku ngambaliyanyi ngayangayijba nanganginkanyi jangkurranyi Kudkanyi. Ngambala jungkuyi barrinani nganinyiyurru nangangi Kudkanyi. Mikuwali nganinyiyurru ngayangayijba jangkurranyi. Baki nani barri wabula, ngambala jungkuyi barrinani nganinyiyurru. Miku ngambaliyanyi ngayangayijba nanganginkanyi jangkurranyi Kudkanyi. Ngala nanijba barri ngambala jala kuyu nangangi jangkurr, ngambala barrinani buyingkinyi nganinyimuku, ngambala jungkuka wanka nangangi Kudkanyi, baki baku barri janyulu mili wankamba ngambalanya jungunkanyi nangandu yurrngumba barri. Yabimbayi Kudwanyi kunyba yaji ngambalangi, jali nyulu manjijba nangangi jandanyi ngamandurri. Miku ngambaliyanyi yabimba nanda kunyba yaji ngambalangi. Miku. Nyuli yabimba nanda kunyba yaji ngambalangi, marukangkangangi nyulu muwa ngambalangi Kud. Nyulu bababanyamba ngambalanya Jisus Krayiswanyi, baki ngambala jungkuwa Krisjinmuku malumba nangandu yurrngumba barri, kuyungangi ngambali nangangi jangkurr. Baki nyulu marrimbaka ngambalanya mardarda. Wankambayi Jisus Krayis Kudwanyi, nyulu jungunkanyi malumba nangandu kingkarri. Nyulu jirrinyi mambuka barrinani Kud. Wankambayi Jisus Krayis Kudwanyi, baki baku barri nyuluja marda wankamba ngambalanya. Jangambala jungku nangandu kingkarri yurrngumba barri. Nyulu jirrinyi mambuka ngambalangi.
EPH 2:7 Yarrijbayi ngambalanya Kudwanyi nangangimuku jandanyimuku. Baki bukambiju Krisjinmuku, ngambala jala jungku nanijba, baki nanamuku jalija yalu jungku bijal baku, baki nanamuku jalija yalu jungku juju baku, jangambala nanganginmuku jandanyimuku. Baki yingkamukunyi jangamanjalu najba marukankurri muwa ngambalaka, baki jungunkurri ngambala yurlurrmba nangangi Kudkanyi, kuyungangi ngambala nangangi jangkurr Jisus Krayiskanyi. Jangamanjalu najba durriykurri nangangi jangkurr yurrngumba barri. Jalija ngamanjalu najba jungunkurri nani, baki jayalu jingkijba Kud, nyulu kunybamirra, nyulu ngirukamirra, nyulu wirimalaru, nyulu marukangka muwa bukambijiyngka ngambalangi. Nyulu yabimbaka kunyba yaji ngambalangi, nulijbangangi nyulu yabimbikanyi kunyba yaji ngambalangi. Barriwa.
EPH 2:8 Yarrijbayi ngambalanya Kudwanyi nanganginmuku jandanyimuku marukangkangangi nyulu muwa ngambalangi. Miku nyuliyanyi yarrijba ngambalanya nanganginmuku jandanyimuku jungkungangi ngambali kunyba nangangi, yabimbangangi ngambali kunyba yaji nangangi. Miku nanankardi nyuli yarrijba ngambalanya nanganginmuku jandanyimuku. Marda ngambalakimi miku barrarrakijba, baki karu yalunya, ngambala walkurramuku, baki nanankardi yarrijbayi ngambalanya nanganginmuku jandanyimuku Kudwanyi. Marda ngambalakimi miku barrarrakijba, baki karunkanyi yalunya nani barri. Ngala nyuli yarrijba ngambalanya nanganginmuku jandanyimuku, nulijbangangi nyuli yabimbikanyi kunyba yaji ngambalangi, baki nyulu marrimbaka ngambalanya mardarda yurrngumba barri. Miku ngambalakiyi marrimba mardarda yurrngumba. Ngawamba Kudwanyi, nyulu marrimbaka ngambalanya mardarda yurrngumba jala ngambala kuyu nangangi jangkurr Jisus Krayiskanyi.
EPH 2:10 Ngambala nanganginmuku jandanyimuku, yarrijbangangi ngambalanya Kudwanyi nanganginmuku, baki nanijba barri ngambala jungkuka malumba nangandu, ngamanginyina Buwakayu Jisus Krayisnyina. Baki nanankardi barri, jangambala yabimba kunyba yaji yalungi yingkamukuyngka. Jangambala yabimba kunyba yaji yalungi yurrngumba, jala ngambala jungku wankan nayiba wayka jambana. Jingkijbangka Kudwanyi, nanda jala nyulu nulijba ngambalangi yabimbikanyi nanijba baki baku barri. Jingkijbangka nyulu bukamba yaji. Barriwa.
EPH 2:11 Nanamuku Jumuku, yalungka karu yalu barrinani jandanyimuku nangangi Kudkanyi, nyuli yarrijba yalunya nanganginmirra jandanyimuku, yalu barrinani kudukudu nangangi. Ngala nanamuku ngurranyimuku, miku yalimi barrinani jandanyimuku nangangi Kudkanyi. Miku yalimi barrinani kudukudu nangangi. Nani yalungka karu Jumuku. Narri Krisjinmuku jala ngurranyimuku, marda narrimi mankumankuwa yanka narrili jungku wabula. Nanamanji barri, miku narriyanyi jingkijba Jisus Krayis. Miku nyuliyanyi jungku narrindu kurduluna. Narri ngurranyimuku nangangi Kudkanyi. Miku narriyanyi Jumuku, nanamuku jali yarrijba Kudwanyi nanganginmuku jandanyimuku. Nanda kunyba jangkurr Kudkanyi, miku yangkalambikanyi, miku nyuliyanyi yanyba nanda jangkurr narringi ngurranyimukuyngka. Jungkuyi narri narringinyina barndana, ngala miku narriyanyi jingkijba Kud. Miku narriyanyi jingkijba Kud, yuku nyulu mili wankamba yalunya bayngkani jalija yalungka janyba. Miku narriyanyi jingkijba nani barri. Mudumbanyi narrili jungku.
EPH 2:13 Ngala nanijba barri narri jingkijbangka Kud, baki nanijba nyulu bababanyamba narrinya Jisus Krayiswanyi. Wabula narrili jungku juju nanganbunanyi, ngala nanijba narri jungkuka malumba nangandu. Nyulu jungkuka narringinyina kurduluna, janybangangi nangki Jisus Krayis narringinkanyi balkinyi yajinyi.
EPH 2:14 Wabula barri miku yaliyanyi malumba jungku Jumuku baki ngurranyimuku. Jungku yalili yanina yanina. Nanda barrinani jungkuyi Jumuku kalawunyi barrikina, ngala ngurranyimuku miku yalili ngankijba kalawuyngkurri, ngawamba yalili jungku danbina. Ngala janyba nangki Jisus Krayis kurndana, janyba nangki bukambijuyngka yalunginkanyi balkinyi yajinyi, Jumukuyngka baki ngurranyimukuyngka. Baki nanda barrinani nyuli dalyamba nanda barriki Jisus Krayiswanyi, baki nanijba barri yalu malumba jungku Jumuku baki ngurranyimuku. Bukambiju Krisjinmuku yalu malumba jungku nanijba barri, Jisus Krayisngangi, bababanyamba nyulu yalunya bukambiju. Baki yalu malumba jungku, yalungka mardumardungka muwa.
EPH 2:15 Wabula barri nanamukunyi Jumukunyi yalili durrijba yalungi yuwa, ngala narri barri ngurranyimukunyi narrili durrijba narringi yuwa. Ngala nanijba barri yali yingijba yalungi yuwa nanamukunyi Jumukunyi jala yalu Krisjinmuku, baki narri ngurranyimukunyi Krisjinmukunyi, narri yingijba narringi yuwa. Nanijba barri ngambala jungkuka malumba. Miku ngambaliyi jungku yanina yanina, ngala ngambalaja jungku malumba baki jangambala durrijba nanda buyingkinyi yuwa nangangi Jisus Krayiskanyi, baki nyulu bababanyamba ngambalanya Jisus Krayiswanyi. Ngambala jungkuja barrinani nanda buyingkinyi nganinyi. Ngambalaja malumba jungku mardumardu muwa. Barriwa.
EPH 2:16 Jala nangki janyba Jisus Krayis kurndana, baki nangki janyba bukambijuyngka ngambalangi. Janyba nangki ngambalanginkanyi balkinyi yajinyi. Baki nanankardi barri nanijba ngambala malumba jungku. Miku ngambalakiyi yabimba kijinyi. Ngambala barrinani mungkijimuku, baki nyulu ngambalangi Buwakanya Kud.
EPH 2:17 Jali badajba Jisus Krayis nanginkurri, baki nangki janyba kurndana ngambalangi. Nanankardi barri manjamanjambayi ngambalangi balki yaji Kudwanyi, baki nanijba barri yuku ngambala jungku mardumardu muwa. Nurru jala Jumuku, baki narri jala ngurranyimuku, yuku ngambala jungku mardumardu muwa nangangi Kudkanyi. Nani barri yuku ngambala jungku mardumardu muwa, jaliyi ngambala Jumukunyi baki ngurranyimukunyi, jaliyi ngambala kuyu nangangi jankurr Jisus Krayiskanyi, jaliyi ngambala durrijba nangangi jangkurr. Yuku ngambala jungku nangandu Kudnyina, nyulungangi wajbangka ngambalanya Kunybanyi Ngarndunyi nanganginkanyi. Jala nanda Kunyba Ngarndu Kudkanyi jungkuka ngambalandu kurduluna, baki yuku ngambala jungku yurlurrmba nangangi. Ngambala Jumuku marda ngurranyimuku, yuku ngambala jungku yurlurrmba nangangi, ngambalanginkanyi Buwakaya Kudkanyi. Yuku ngambala jungku yurlurrmba nangangi, jala ngambala kuyu nangangi jangkurr Jisus Krayiskanyi.
EPH 2:19 Baki nanijba barri narri jala miku Jumuku, narri kuyuyi nangangi jangkurr Jisus Krayiskanyi, baki nanankardi miku narrimi ngurranyimuku nurrungi. Narri jandanyimuku nangangi Kudkanyi, narri mungkijimuku bukambijuyngka nanganginkanyi jandanyimukuyngka wandijiyana.
EPH 2:20 Jangayu muningka karu narrinya barrawunyi. Yabimbayi barrawu Kudwanyi. Yabimba nyuli barrawu yundu kunybana yajina. Waluku nyuli karrinjarrijba lirrka kurndamuku. Kujarra baki kujarra ngiruka kurndamuku nyuli karrinjarrijba. Baki bayngkani nyuli yarrijba mili kurnda, Kajamuku kurndamuku nyuli yarrijba, baki bukamba nyuli nanda barrawu. Ngiruka nanda barrawu, ngirukangangi nanamuku lirrkamuku kurndamuku. Baki baku barri nyuli walkurramba nanda barrawu. Wudumba nyuli kaja mili kurndamuku, baki yabimba nyuli nanda barrawu mili walkurra. Mankumanku narringka nanankanyi barrawunyi. Nanamuku manjijba jali Jisus Krayiswanyi, baki nanamuku yanyba jali nanamuku yanyba jali jangkurr Kudkanyi, yalu barrinani nanda kunyba jamba, jali karrinja barrawu yundu. Yali milidimba ngambalanya duja jangkurranyi Kudkanyi. Jaliyi ngambala kuyu yalungi duja jangkurr, baki jangambala durrijba nanda duja yuwa nangangi Kudkanyi. Baki miku ngambalakiyi yangkalamba yingkayurri jujambawarrayngkurri jangkurryurri. Yurrngumba yalungi jangkurr jungkuka duja barrinani nanda kunyba jamba jala marrimba nanda barrawu yurrngumba. Barriwa. Baki Jisus Krayis barri, nyulu barrinani nanamuku lirrkamuku kurndamuku jali ngirukamba nanda barrawu. Nanamukunyi kurndamukunyi yalu marrimba nanda barrawu kudanyu barri. Nanda barrawu jungkuka ngiruka, ngirukangangi nanamuku lirrkamuku kurndamuku. Kudanyu barri yalu marrimbaka bukambiju yingkamuku kurndamuku barrawuna. Baki nani barri Jisus Krayiswanyi, kudanyu nyulu marrimbaka bukambiju ngambalanya Krisjinmuku. Bababanyamba nyulu ngambalanya, baki ngambala jungku ngiruka nangangingangi. Barriwa. Baki ngambala Krisjinmuku ngambala barrinani nanamuku mili kurndamuku kajamuku, jali yarrijba Kudwanyi barrawuna. Kajamuku kurndamuku nananyina barrawuna, baki kajamuku ngambala Krisjinmuku, ngambala malumba jungku nangandu Jisus Krayisnyina. Nyulu yabimbaka ngambalanya jungunkanyi ngiruka nangangi. Baki yingkamukunyi, jayalu kuyu nangangi jangkurr baku barri. Kajamukunyi wirdikudukudumukunyi, jayalu kuyu nangangi jangkurr. Yalu barrinani yingkamuku kurndamuku jali yarrijba Kudwanyi jali nyulu walkurramba nanda barrawu. Kajamuku jayalu kuyu nangangi jangkurr Jisus Krayiskanyi, jayalu Krisjinmuku marda. Bukambiju Krisjinmuku, Jumuku baki ngurranyimuku, jayalu malumba jungku barrinani barrawu Kudkanyi, barrinani jurj nangangi. Jayalu malumba jungku ngiruka, nyulungangi marrimbaka yalunya ngiruka Jisus Krayiswanyi. Mili jayalu kuyu nangangi jangkurr baki mili baki mili yurrngumba. Jayalu jungku malumba barrinani jurj nangangi, barrinani malaba yaji nangangi Kudkanyi. Baki narri Krisjinmuku jala jungku nanaba Yibisus, narri barrinani kudiyamuku kurndamuku nananyina jurjina Kudkanyi. Narri marda jandanyimuku nangangi Kudkanyi, narri jungku malumba yalundu bukambijunyina Krisjinmukunyina. Baki jungkuka Kunyba Ngarndu Kudkanyi narrindu marda. Barriwa.
EPH 3:1 Ngayu yanybaka mududu nangangi Kudkanyi narringi. Ngayu Bul, ngayu jungkuka nayiba brisinyina, wakingangi ngayi nangangi, ngambalanginkanyi mambukanyi Jisus. Ngayu jungkuka nayiba brisinyina, yabimbangangi ngayi nanda jali nyulu nulijba ngaki yabimbikanyi. Milidimba ngayi narrinya, narri jandanyimuku nangangi Kudkanyi, kuyungangi narri nangangi jangkurr Jisus Krayiskanyi. Ngala yalu barri mambukamuku Kabaminkanyi, miku yaliyanyi kuyu nangangi jangkurr, baki nanankardi ngananjali ngirra, ngananjali yarrijba brisinyina. Nani ngayi milidimba narrinya jangkurranyi nangangi Jisus Krayiskanyi. Baki miku narrimi jungku barrinani ngurranyimuku nanijba barri, ngala narri mungkijimuku bukambijuyngka, yalungi jala Jumuku, baki yalungi jala miku Jumuku. Narri mungkijimuku bukambijuyngka yalungi jala kuyu nangangi jangkurr. Nani ngayi milidimba narrinya, nani ngayi waki nangangi Kudkanyi.
EPH 3:2 Yabimbayi walkurra yaji ngaki Kudwanyi. Ngana nyuli yarrijba wakinkanyi nangangi, milidimbikanyi narrinya. Ngayu nulijba narringi baki bukambijuyngka Krisjinmukuyngka. Ngayu nulijba narringi jingkiykanyi nayi. Marukangka Jisus Krayis muwa ngambalangi. Kudanyu nyulu marukangka muwa ngambalangi. Yurrngumba nyulu marukangka muwa kudanyu barri.
EPH 3:3 Nyuli minimba ngana Kudwanyi, baki ngayu jingkijba, janyba nangki Jisus Krayis yalungi bukambijuyngka. Miku nangkiyanyi janyba ngawamba yalungi Jumukuyngka, ngala nangki janyba bukambijuyngka. Nanginkanyi yajinyi bijal ngayi karu narrinya wabula barri. Ngayi yarrijba nayi yaji narringi.
EPH 3:4 Baki jaliyi narri najba bukamba nayinda jangkurr najana, baki janarri jingkijba. Janganarri jingkijba, minimba ngani Kudwanyi, janyulu yabimba yalunya Jumuku baki ngurranyimuku. Janyulu yabimba yalunya nanganginmuku jandanyimuku, jalija yalu kuyu nangangi jangkurr Jisus Krayiskanyi. Janyulu marrimba yalunya mardarda, janyulu mili wankamba yalunya jungunkanyi nangandu yurrngumba. Nani barri minimba ngani Kudwanyi.
EPH 3:5 Wabula barri miku yaliyanyi jingkijba nani Kudkanyi nganinyimukunyi. Miku yaliyanyi jingkijba nani. Ngala nanijba barri manjijbayi nangangi Kunyba Ngarndu Kudwanyi minimbiji nurrunya yajinyi. Nyuli minimba nurrunya, nanamuku jala yanyba jangkurr Kudkanyi, baki nanamuku manjijba jali Jisus Krayiswanyi. Nyuli minimba nurrunya Kunybawanyi Ngarnduwanyi. Nyuli minimba nanankanyi jali yanyba Kud wabula, janyulu yabimba baku barri, nayi jala yaji. Nyulu yabimbaka kunyba yaji yalungi jala kuyu nangangi jangkurr. Nani barri minimbayi nurrunya Kunybawanyi Ngarnduwanyi Kudkanyi.
EPH 3:6 Nani barri milidimbaka nurrunya Kunybawanyi Ngarnduwanyi Kudkanyi. Nyulu milidimbaka nurrunya, yabimbaka Kudwanyi kunyba yaji yalungi jala kuyu nangangi jangkurr Jisus Krayiskanyi. Nyulu yabimbaka kunyba yaji bukambijuyngka ngambalangi, miku ngawamba Jumukuyngka ngala ngurranyimukuyngka marda. Bababanyamba nyulu ngambalanya Jisus Krayiswanyi. Ngambala malumba jungku jandanyimuku nangangi Kudkanyi. Ngambala malumba jungku barrinani mungkijimuku. Barriwa.
EPH 3:7 Yabimbayi ngiruka yaji ngaki Kudwanyi. Kunyba ngiruka yaji nyuli yabimba ngaki. Ngana nyuli yarrijba wakiwarr nangangi. Ngana yabimbayi ngiruka milidimbikanyi kunybanyi jangkurranyi Jisus Krayiskanyi
EPH 3:8 Ngala miku ngayimi jirrinyi nganinyi. Miku ngayimi walkurra mambuka. Jungku ngayu bayakarda Krisjin. Yingkamuku Krisjinmuku yalu walkurra, ngala miku ngayimi. Ngala yabimbayi kunyba yaji ngaki Kudwanyi, ngana nyuli yarrijba karunki yalunya ngurranyimuku. Ngana yarrijbayi karunki yalunya kunybanyi jangkurranyi Jisus Krayiskanyi, nyulu ngambalangi walkurra mambuka, jala kudanyu marukangka muwa ngambalangi. Miku yingka mambuka barrinani nyulu. Nyulu yabimbaka kaja kunyba yaji ngambalangi.
EPH 3:9 Ngana yarrijbayi Kudwanyi, karunki yalunya nanankanyi jangkurranyi nangangi Jisus Krayiskanyi, marda karunki yalunya nanankanyi jali nangka yanyba Kud wabula. Wabula kamambarra nangki yanyba Kud nanankanyi jalija nyulu yabimba. Yabimbayi bukamba yaji Kudwanyi, jamba baki kanja, bukamba yaji junu. Miku nyuliyanyi karu nganinyimuku nanankanyi jalija nyulu yabimba baku barri. Ngankijba nyuli nanda jangkurr nangandu. Miku nyuliya karu yingkamuku. Ngala nanijba barri ngana nyuli yarrijba Kudwanyi karunki yalunya nanankanyi yajinyi jali wabula nyulu ngadijba. Ngana yarrijbayi karunki narrinya nanankanyi jalija nyulu yabimba. Janyulu yabimba ngambalanya nanganginmuku jandanyimuku, baki jangambala jungku nangandu, janybangangi nangki Jisus Krayis bukambijiyngka ngambalangi jala jungku barrinani mungkijimuku nangangi Kudkanyi, ngambala Jumuku, baki ngambala jala miku ngambala Jumuku. Janyba nangki Jisus Krayis ngambalanginkanyi balkinyi yajinyi.
EPH 3:10 Wabula barri miku nyuliyanyi karu yingka nanankanyi jali nangka mankumanku Kud. Ngadijba nyuli nangangi jangkurr. Ngala nanijba barri nanamuku jali kuyu jangkurr Jisus Krayiskanyi, nyuli yarrijba yalunya nanganginmuku jandanyimuku. Baki nanankardi barri Yanjilmuku jala yalu jungku lalijina, jayalu marda jingkijba Kud, nyulu jungkuka kunyba kulaji. Yurrngumba nyulu jungkuka kunybamirra kulaji. Jayalu marda jingkijba Kud nani, Yanjilmukunyi baki ngirukawanyi yajiwanyi marda.
EPH 3:11 Wabula barri kamambarra jingkijbayi Kudwanyi, janyulu manjijba nangangi jandanyi, janybikanyi nangka ngambalanginkanyi balkinyi yajinyi. Nani nyuli jingkijba, baki yabimba nyuli nanda yaji, nayi jala yaji. Baki nanankardi barri nanijba ngambala Krisjinmuku, ngambala nanganginmuku jandanyimuku.
EPH 3:12 Nangangi jandanyi Jisus Krayis, nyulu ngambalangi mambuka, baki bababanyamba nyulu ngambalanya, kuyungangi ngambali nangangi jangkurr. Kuyu ngambali nangangi jangkurr, baki nanijba ngambala jingkijba, ngambala jandanyimuku nangangi Kudkanyi, nyulu ngambalangi Buwakanya. Miku ngambaliyi marrala nangangi. Miku. Yuku ngambala yanyba nangangi. Baki ngambala jingkijba, jangambala mili jungku wankan nangandu baku barri, ngambalangangi nanganginmuku jandanyimuku. Barriwa.
EPH 3:13 Ngayu karungka narrinya, mikujiyi ngindu muwa ngaki, jungkungangi ngayu nayiba brisinyina. Mikujiyi ngindu muwa ngaki. Mikujiyi balkijba muwa ngaki, ngala marda narrimi jungku ngiruka nangangi Kudkanyi. Ngana yali yarrijba brisinyina, milidimbangangi ngayi yalunya Jisus Krayiskanyi, nangki janyba yalungi bukambijuyngka. Nanankardi barri ngananjali yarrijba brisinyina, baki marda narrimi mirnarrijba muwa, milidimbangangi ngayi narrinya nani. Narri kuyuyi nanda jangkurr, baki nanankardi barri nyulu lalanbaka narrinya Kudwanyi.
EPH 3:14 Ngayu yanybaka nangangi Kudkanyi narringi, ngala ngayu mururu. Nyulu narringi Buwakanya.
EPH 3:15 Nyulu kunybamirra Buwakanya bukambijuyngka yalungi. Yabimba nyuli bukamba yaji lalijina baki jambana, baki nanankardi barri nyulu barrinani Buwakanya bukambijuyngka yalungi.
EPH 3:16 Ngayu jingkijbangka Kud, nyulu ngirukamirra, nyulu nulijba yabimbikanyi kunyba yaji ngambalangi, baki nanankardi barri ngayu ngajakangka Kud narringi. Ngayu ngajakangka Kud, janyulu wajba narrinya nanganginkanyi Kunybanyi Ngarndunyi. Janyulu yabimba narrinya ngiruka nangangi Kudkanyi.
EPH 3:17 Ngayu ngajaka Kud narringi, janyulu jungku Jisus Krayis narringinyina kurduluna, kuyungangi narri nangangi jangkurr. Ngayu ngajakangka Kud narringi, janarri maruka muwa nangangi Jisus Krayiskanyi. Kudanyu janarri maruka muwa nangangi.
EPH 3:18 Ngayu nulijba narringi baki bukambijuyngka Krisjinmukuyngka. Ngayu nulijba narringi jingkiykanyi nayi. Marukangka Jisus Krayis muwa ngambalangi. Kudanyu nyulu marukangka muwa ngambalangi. Yurrngumba nyulu marukangka muwa ngambalangi kudanyu barri.
EPH 3:19 Ngayu nulijba narringi jingkiykanyi Jisus Krayis, nyulu marukangka muwa ngambalangi. Kudanyu nyulu marukangka muwa ngambalangi. Mikuwali nganinyi kudanyu maruka muwa, barrinani nyulu marukangka muwa ngambalangi. Baki mili ngayu ngajakangka Kud narringi, janyulu wajba narrinya kunybanyi yajinyi Kudwanyi. Janyulu wajba narrinya kajanyi kunybanyi yajinyi. Janyulu yarrijba narrinya jungunkanyi yurlurrmba nangangi, barrinani nyulu Kud jungkuka yurlurrmba yurrngumba. Nani ngayu ngajakangka Kud narringi. Barriwa.
EPH 3:20 Jangambala wajba Kud kunybanyi jangkurranyi ngambalangi. Kunybanyi jangkurranyi jangambala wajba Kud. Yuku nyulu yabimba ngambalanya ngiruka yabimbikanyi kunyba yaji. Miku ngambaliyi yabimba kunyba yaji ngambalaman, ngala yuku nyulu yabimba ngambalanya ngiruka yabimbikanyi kunyba yaji Kudwanyi. Jala ngambala ngajaka Kud yabimbiji kunyba yaji ngambalangi, baki yuku nyulu yabimba nanda yaji ngambalangi. Baki mili kunyba yaji yuku nyulu yabimba ngambalangi, jala miku ngambalakiyanyi mankumanku ngajakankanyi nanankanyi yajinyi. Yuku nyulu yabimba nanda mili kunyba yaji ngambalangi marda.
EPH 3:21 Bukambijunyi ngambala Krisjinmukunyi, marda ngambalimi wajba Kud kunybanyi jangkurranyi. Baki Jisus Krayis, ngambalangi walkurra mambuka, nyulu jungkuka ngambalandu, baki nanankardi barri ngambala wajba Kud kunybanyi jangkurranyi. Nyulu ngambalangi walkurra mambuka yurrngumba. Nanijba baki baku barri, yurrngumba nyulu ngambalangi walkurra mambuka. Baki nanamuku jalija baku kuyu nangangi jangkurr Jisus Krayiskanyi, nanamuku jala jungku jilijbawa, jayalu marda baku wajba Kud kunybanyi jangkurranyi yalungi. Barriwa.
EPH 4:1 Nanijba barri ngayu jungku nayiba brisinyina, wakingangi ngayi ngambalanginkanyi mambukanyi Jisus Krayiskanyi, baki ngayu ngajaka narrinya. Kudanyu ngayu ngajaka narrinya, janarri jungku yurlurrmba nangangi Kudkanyi. Nyuli yarrijba narrinya, nanganginmuku jandanyimuku, baki narri jingkijba Kud, nyulu jungkuka kunyba. Kunyba nyulu jungkuka yurrngumba. Baki nani barri marda narrimi jungku kunyba marda. Marda narrimi jungku yurlurrmba nangangi, yarrijbangangi nyuli narrinya nanganginmuku jandanyimuku.
EPH 4:2 Marda narringkimi maruka muwa, ngala marda narrimi miku ngarrangarra muwa yingkamukuyngka. Nanda Krisjin, marda nangkimi miku barrarrakijba, marda nangkimi miku mankumanku, nyulu mili walkurra yingkanyi. Marda nangkimi miku mankumanku nani, ngala marda nyulimi jungku mardumardu muwa. Marda nyulimi kardarda yanyba yingkamukuyngka.
EPH 4:3 Ngayu karungka narrinya kudanyu, marda narrimi nulijba jungunkanyi malumba mardumardu muwa. Marda narrimi kudanyu nulijba nani, baki marda narrimi jungku malumba nani, mikuyaji kijinyi narringi. Wajbayi narrinya nangangi Kunyba Ngarndu Kudwanyi, nyulu jungunkanyi bukambijunyina narrindu, baki bababanyamba narrinya Jisus Krayiswanyi. Nanankardi barri marda narrimi malumba jungku mardumardu muwa, marda narringkimi maruka muwa.
EPH 4:4 Marda narrimi malumba jungku barrinani mungkijimuku, jungkungangi narri jirdi nanankanyi yingamaliyngka Kunybanyi Ngarndunyi Kudkanyi. Nanda Kunyba Ngarndu Kudkanyi jungkuka narrindu, baki narri malumba jungku barrinani mungkijimuku. Narri jingkijba nanda walkurra yaji, jalija yabimba Kudwanyi ngambalangi baku, janyulu wankamba ngambalanya jungunkanyi nangandu yurrngumba. Narri jingkijba Kud, janyulu yabimba nanda walkurra yaji ngambalangi.
EPH 4:5 Bukambiju ngambala Krisjinmuku, yingamali ngambalangi mambuka, nyulu Jisus Krayis barri. Ngambala kuyuyi nangangi jangkurr, nanda jangkurr jali nyulu milidimba ngambalanya nangangi Kudkanyi. Ngambala kuyuyi nangangi jangkurr baki ngambala jungkuyi nanankanyi yingamaliyngka wangarranyi. Yingamaliyngka wangarranyi ngambala jungkuyi jali ngurrunba ngambalanya wabudana.
EPH 4:6 Baki yingamali ngambalangi Kud. Nyulu mambuka bukambijuyngka wandijiyana. Nyulu ngambalangi Buwakanya, baki nyulu Buwakanya bukambijuyngka krisjinmukuyngka wandijiyana. Miku yingka walkurra barrinani nyulu. Nyulu wirimalaru bukambijuyngka yajinyi wandijiyana. Karungka ngambalanya Kudwanyi nanankanyi jala nyulu nulijba, baki ngambala yabimba nanda yaji nangangi. Ngambala waki nangangi. Ngambala yabimba nanda jala nyulu nulijba yabimbikanyi.
EPH 4:7 Jali ngambala kuyu nangangi jangkurr Jisus Krayiskanyi, baki nyuli manjijba nanda Kunyba Ngarndu Kudkanyi ngamandurri. Manjijbayi Jisus Krayiswanyi nanda Kunyba Ngarndu Kudkanyi, baki ngankijbayi nanda Ngarndu ngambalandu mankanyina. Ngankijbayi Kunyba Ngarndu Kudkanyi yingkana mankanyina, baki yingkana mankanyina, baki yingkana mankanyina. Nani ngankijbayi Kunyba Ngarndu Kudkanyi, baki nanankardi barri yuku ngambala waki nangangi, ngambalanginkanyi mambukanyi Jisus Krayiskanyi. Yuku ngambala waki nangangi, yabimbangangi ngambalanya ngiruka Kunybawanyi Ngarnduwanyi. Yabimbaka ngambalanya ngiruka wakinkanyi nangangi Jisus Krayiskanyi.
EPH 4:8 Yanybaka jangkurr najana Kudkanyi, yanybaka jangkurr nayi barri, “Jali nyulu kirrijba kingkarri, baki kudukudu nyuli kuyu yalunya nangandu. Jali nyulu kirrijba kingkarri, baki wajba nyuli yalunya yajinyi. Kajanyi yajinyi nyuli wajba yalunya yingkamuku.” Barriwa. Nani yanybaka jangkurr najana Kudkanyi.
EPH 4:9 Nanda jangkurr “kirrijba nyuli kingkarri”, wanyi nanda jangkurr. Nanda jangkurr yanybaka nangangi Jisus Krayiskanyi. Waluku nyuli jungku kingkarri nangandu Kudnyina, baki baku nyuli karrala wayka jambarri. Baki baku barri mili nyuli kirrijba kingkarri nangandurri Kudyurri. Nani barri nanda jangkurr yanybaka.
EPH 4:10 Nyuluwannga Jisus Krayis, waluku nyuli karrala wayka jambarri, baki baku barri nyuli kirrijba kingkarri lalijiyurri, baki nanijba nyulu jungkuka nangandu Kudnyina yurrngumba. Jali nyulu jungku nayiba wayka jambana, baki jilalajba nyuli yingkayurri yajiyurri, baki yingkayurri yajiyurri. Ngala nanijba barri nyulu jungkuka kingkarri nangandu Kudnyina, ngala nyulu makabangka yaji marda. Nyulu makabangka yaji wandijiyana yurrngumba. Miku nyulimi jilalajba yingkayurri yajiyurri, baki yingkayurri yajiyurri, ngala nyulu makabangka yaji wandijiyana. Nyulu wirimalaru yalungi bukambijuyngka wandijiyana. Baki nani barri nyulu jungkuka ngambalandu kurduluna. Bukambijunyina Krisjinmukunyina, nyulu jungkuka ngambalandu kurduluna marda.
EPH 4:11 Baki nyulu wajbangka ngambalanya kajanyi yajinyi. Nyuli yarrijba ngambalanya wakiwarr nangangi, baki nyulu yabimbaka ngambalanya ngiruka wakinkanyi nangangi. Yingkamuku nyuli yarrijba yalunya, nanamuku jali manjijba Jisus Krayiswanyi. Yingkamuku nyuli yarrijba yalunya yanybikanyi jangkurr nangangi Kudkanyi. Yingkamuku nyuli yarrijba yalunya karunkanyi nangangi Jisus Krayiskanyi. Yingkamuku nyuli yarrijba yalunya lalanbikanyi yalunya Krisjinmuku. Yingkamuku nyuli yarrijba yalunya milidimbikanyi nanganginkanyi jangkurranyi.
EPH 4:12 Nani nyuli yarrijba kudiya ngambalanya Jisus Krayiswanyi, baki nyuli yabimba ngambalanya ngiruka wakinkanyi nangangi. Nyuli yarrijba ngambalanya milidimbikanyi baki lalanbikanyi yalunya. Nani nyuli yarrijba ngambalanya, nulijbangangi nyuli ngambalangi bukambijuyngka jingkiykanyi Kud. Jangambala jingkijba mili nangangi, baki mili nangangi yurrngumba barri. Baki jangambala jungku barrinani nyulu, ngambalangi mambuka. Jangambala jungku mili ngiruka, baki mili ngiruka nangangi yurrngumba. Baki nanankardi barri jangambala mili jingkijba Jisus Krayis. Jangambala mili jingkijba Jandanyi Kudkanyi yurrngumba. Jangambala kuyu nangangi jangkurr, jangambala durrijba nangangi jangkurr, jangambala jungku ngiruka nangangi, baki jangambala malumba jungku barrinani mungkijimuku barri.
EPH 4:14 Jalannga jali ngambala kuyu jangkurr nangangi Jisus Krayiskanyi, baki miku ngambaliyanyi jungku ngiruka nangangi. Ngawamba bijal ngambali jingkijba Kud. Jungku ngambali barrinani bayamuku, jala yalu jingkijba ngawamba bijal yaji bayamukunyi. Miku ngambaliyanyi kudanyu jingkijba Kud nanamanji barri. Ngawamba bijal ngambala jingkijbayi Kud, baki mankuyi ngambala nanda jangkurr yalungi, balkimukuyngka milidimbawarrayngka. Milidimba yali yinini jangkurranyi, miku nanda duja jangkurr nangangi Jisus Krayiskanyi. Kudiyawanyi ngambala kuyuyi yalungi jangkurr, mikungangi ngambaliyanyi kudanyu jingkijba Jisus Krayis. Nanamanji barri ngambali barrinani lakululu jala warrmbaka yunkurrwanyi, waluku langki, baki bayngkani kula. Ngambali barrinani lakululu jali ngambala manku waluku duja jangkurr, baki bayngkani balki jangkurr. Waluku ngambala kuyuyi yingka jangkurr, baki bayngkani yingka jangkurr. Nani ngambali barrinani lakululu barri. Ngala marda ngambalimi miku jungku nani nanijba barri.
EPH 4:15 Marda ngambalimi jingkijba mili nangangi Jisus Krayiskanyi. Marda ngambalimi waki malumba nangandu. Marda ngambalimi jungku yurlurrmba nangangi. Marda ngambalimi durrijba nangangi duja jangkurr. Baki marda ngambalimi kudanyu maruka muwa nangangi. Jaliyi ngambala jungku nani, baki miku ngambalimi barrinani bayamuku nangangi, ngala ngambala barrinani nganinyimuku baki jibarrimuku nangangi, jingkijbangangi ngambala Kud kudanyu barri. Kudanyu ngambala durrijba nangangi jangkurr. Baki mili ngambala jungku barrinani ngambalangi mambuka Jisus Krayis. Mili ngambala jungku barrinani nyulu baki mili yurrngumba.
EPH 4:16 Mankumanku narringka mankankanyi. Nanda mankanyi, kaja yaji nangangi, jalu, baki marni, nala baki nukami, kulaji baki muwa, baki ngulurr. Malumba yalungka yingamali mankanyi. Baki nanda kulaji mili walkurra nanankanyi mankankanyi nangangi. Karungka nukami kulajiwanyi jilaykanyi, baki jilajbangka nanda nukami. Karungka marni kulajiwanyi yabimbikanyi yaji, baki yabimbaka yaji marniwanyi. Karungka mankanyi kulajiwanyi jungunkanyi, baki jungkuka nanda mankanyi. Nani barri nanda kulaji mambuka nanankanyi mankankanyi. Baki Jisus Krayis barri, nyulu barrinani kulaji, baki ngambala Krisjinmuku, ngambala barrinani nanda mankanyi. Karungka ngambalanya yabimbikanyi yaji Jisus Krayiswanyi, baki ngambala yabimba nanda jala nyulu karu. Nani barri ngambala barrinani nanda mankanyi, ngambala malumba waki nangangi, Jisus Krayiskanyi, marukangangi ngambalaka muwa nangangi, baki wakingangi ngambala malumba nangangi. Ngala nyulu Jisus Krayis, nyulu barrinani nanda kulaji karunkanyi yaji. Jaliyi ngambala waki malumba nangangi, baki jangambala jungku mili ngiruka baki mili ngiruka nangangi Jisus Krayiskanyi yurrngumba barri. Barriwa.
EPH 4:17 Ngayu karungka narrinya kudanyu barri, yanybaka Kud, marda narrimi jungku kunyba nangangi yurrngumba. Mikujiyi jungku barrinani nanamuku jala miku yalimi jingkijba Kud. Yalu jungku balki nangangi. Yalungka mankumanku balkinyi yajinyi, baki yalu yabimba nanda balki yaji, mikungangi yalimi jingkijba Kud. Miku yalimi nulijba nangangi Kudkanyi, baki miku jayalu wanka jungku nangandu yurrngumba. Miku yalimi jingkijba Kud. Miku yalimi kunyba kulaji nangangi, ngala yalu mudumbanyi nangangi, yalu jardibirri kulaji nangangi.
EPH 4:19 Jala yalu yabimba balki yaji, baki miku yalimi ngindu muwa nanankanyi yajinyi. Miku yalungkimi balkijba muwa. Yalungka mankumanku yabimbikanyi mili balki yaji, baki yalu yabimba nanda mili balki marda. Miku yalimi nulijba yalungka kurrkunbikanyi jungunkanyi balki. Ngala mili yalu yabimba balki yaji yurrngumba barri.
EPH 4:20 Ngala mikukiyanyi milidimbayi jangkurranyi Jisus Krayiswanyi jungunkanyi nani. Miku nyuliyanyi milidimba nani.
EPH 4:21 Nurri karu narrinya nanganginkanyi jangkurranyi, baki narri kuyuyi nangangi jangkurr, narri durrijbayi nanda duja jangkurr nangangi Jisus Krayiskanyi.
EPH 4:22 Baki mili ngayu karungka narrinya. Wijbakiyi jungku balki. Yangkalamba narringkiyi nanamunanyi balkinanyi yajinanyi, jala narri nulijba yabimbikanyi. Yangkalamba narringkiyi, baki jungkukiyi yurlurrmba nangangi Kudkanyi.
EPH 4:23 Jala narri yabimba nani, baki janarri jungku barrinani buyingkinyi nganinyimuku. Janarri barrinani buyingkinyi nganinyimuku jala narri kuyu nangangi jangkurr Jisus Krayiskanyi. Yawumbaja nangangi Kunyba Ngarndu narrindu mankanyina Kudwanyi, baki janarri barrinani buyingkinyi nganinyimuku. Janarri yabimba kunyba yaji nangangi Jisus Krayiskanyi. Baki janarri miku nulijba yabimbikanyi mili balki yaji. Ngawamba kunyba yaji janarri nulijba yabimbikanyi, jalija jungku Kunyba Ngarndu Kudkanyi narrindu. Janarri jungku yurlurrmba nangangi Kudkanyi. Janarri jungku barrinani kudukudu, barrinani malaba nangangi. Barriwa.
EPH 4:25 Mikujiyi jujamba yaji, ngala duja narringka yanyba jangkurranyi. Duja jangkurranyi narringka yanyba yurrngumba, narringangi jungku malumba barrinani mungkijimuku. Narri barrinani mankanyi nangangi Jisus Krayiskanyi baki bababanyamba nyulu narrinya kuyu Jisus Krayiswanyi. Marda ngambalaka yanyba duja jangkurr yurrngumba, baki jangambala malumba jungku mardumardu muwa nangangi.
EPH 4:26 Jaliyi narri ngarrangarra muwa yingkanyi, baki mikujiyi yabimba balki yaji nangangi. Mikujiyi yabimba kiji nangangi. Jaliyi narri ngarrangarra muwa, baki marda narrimi dulu mardumardujba muwa nangangi. Marda narrimi miku yuwajiwa ngarrangarra muwa nangangi munganawa.
EPH 4:27 Jaliyi narri dulu mardumardujba muwa, jaliyi narri mili jungku mardumardu muwa, baki nanangini mambukawanyi wuwarranyi, nanangini Sayidinwanyi, miku nyuliyi yabimba narrinya yabimbikanyi balki yaji nanankanyi yingkanyi. Miku nyuliyi yabimba narrinya jungunkanyi balki nani, jaliyi narri dulu mardumardujba muwa.
EPH 4:28 Nanda jala wabula maninjaku, marda nangkimi kurrkunba muwa maninjakuykanyi yaji. Marda nyulimi miku mili maninjakujba yaji. Ngala marda nyulimi waki kudanyu wudumbikanyi dungala, baki miku janyulu mili maninjakujba yaji. Marda nangkimi yangkalamba waykanyi yalunya yajinyi.
EPH 4:29 Marda narrimi miku walkurra janyi. Marda narrimi miku yanyba kudanyu jangkurr yingkanyi. Marda narrimi miku yanyba balki jangkurr. Marda narrimi miku mijba yingka. Ngala marda narrimi yanyba kunyba jangkurr nangangi, baki nani janarri kandimba nanda yingka. Narringinyi kunybawanyi jangkurrwanyi, jayalu walkurramba nanda nganinyi, baki janyulu mirnarrijba muwa narringi, kandimbangangi narri.
EPH 4:30 Marda narrimi jungku kunyba nangangi Kudkanyi. Marda narrimi jungku kunyba nangangi yurrngumba. Yawumbayi Kudwanyi nangangi Kunyba Ngarndu narrindu mankanyina, baki jaliyi narri yabimba balki yaji, baki nanda Kunyba Ngarndu Kudkanyi, janyulu balkijba muwa narringi. Janyulu balkijba muwa nanankanyi balkinyi jali narri yabimba. Wuyubayi narrinya kurdulu Kudwanyi jirdi nanganginkanyi Kunybanyi Ngarndunyi, baki nyulu jungkuka narrindu kurduluna yurrngumba nanankurri jalija wankamba narrinya mili Kudwanyi. Jala nangangi Kunyba Ngarndu jungkuka narrindu, baki narringka jingkijba, narri jandanyimuku nangangi Kudkanyi. Narri jingkijba Kud, nyulu lalanbaka narrinya, nyulu marrimbaka narrinya mardarda. Nani narri jingkijba, jala Kunyba Ngarndu Kudkanyi jungkuka narrindu.
EPH 4:31 Marda narringkimi kudanyu mankumanku nanginkanyi jangkurranyi ngaki. Marda narrimi miku jungku ngarrangarra muwa yingkamukuyngka. Marda narrimi miku yanyba balki jangkurr yalungi. Baki marda narrimi miku ngirra yalunya. Marda narrimi miku jungku nani.
EPH 4:32 Ngala marda narringkimi maruka muwa, marda narringkimi yabimba kunybanyi yajinyi. Jaliyi yingkawanyi yabimba balki nganyi, baki marda narrimi manjamanjamba nanda balki yaji nangangi, barrinani Kudwanyi nyulu manjamanjambaka narringi balki yaji. Nyulu manjamanjambaka narringi balki yaji, jala narri durrijba Jisus Krayis. Marda narrimi jungku nani barri. Barriwa.
EPH 5:1 Yarrijbayi narrinya nanganginmuku jandanyimuku Kudwanyi. Nyulu marukangka muwa narringi kudanyu barri, baki marda narrimi nulijba jungunkanyi barrinani nyulu. Manjamanjamba nyuli narringi balki yaji, baki nani barri marda narrimi manjamanjamba yalungi balki yaji yingkamukuyngka. Jaliyi yingkawanyi yabimba balki yaji narringi, baki marda narrimi manjamanjamba nanda balki yaji jali nyulu yabimba narringi. Nani barri marda narrimi nulijba jungunkanyi barrinani nyulu. Nani barri janarri jungku kunyba barrinani Kud nyulu jungkuka kunyba yingkamukuyngka yurrngumba.
EPH 5:2 Marda narrimi maruka muwa, barrinani Jisus Krayis nyulu marukangka muwa ngambalangi. Waluku nyuli maruka muwa ngambalangi, baki bayngkani nangki janyba kurndana ngambalangi. Muningka nangki wajba mankanyi Jisus Krayis yalundurri, yalu kurdanbikanyi, baki mirnarrijba Kud muwa nangangi nanankardi. Nani nangki janyba Jisus Krayis ngambalanginkanyi balkinyi yajinyi, baki nanijba barri nanankardi barri janyulu wankamba ngambalanya mili Kudwanyi.
EPH 5:3 Waluwa narri kuyu jangkurr nangangi Kudkanyi, baki nanamanji narrili jungku balki. Yabimba narrili kaja balki yaji. Ngala nanijba barri narri Krisjinmuku, baki marda narrimi miku yabimba balki yaji, marda narringkimi miku mankumanku yabimbikanyi balki yaji. Marda narringkimi miku mankumanku, kuliwiykanyi kajanyi yajinyi, baki nuliykanyi kulukankanyi yingkana nganinyina baki jibarrina. Marda narringkimi miku mankumanku nani. Baki marda narrimi miku yanyba nanankanyi yajinyi marda.
EPH 5:4 Marda narrimi miku mijba yingka. Marda narrimi miku kakalijba nangangi Kudkanyi. Ngala marda narrimi wajba Kud kunybanyi jangkurranyi narringi.
EPH 5:5 Ngayu karungka narrinya duja jangkurranyi. Jaliyi narrili yabimba balki yaji, baki miku nyuliyi lalanba narrinya Kudwanyi. Miku narriyi jungku wanka nangandu yurrngumba. Jaliyi narri kuliwijba dungalanyi baki kulukankanyi yingkana jibarrina, baki miku narrimi duja Krisjinmuku. Miku narrimi jandanyimuku nangangi Kudkanyi. Miku. Jaliyi narri kuliwijba nanankanyi yajinyi, baki nanda barrinani narri maruka muwa nanankanyi yajinyi, baki miku narrimi maruka muwa nangangi Kudkanyi.
EPH 5:6 Kudiya yalu yanyba, “Ngala yuku barri, yuku narri jungku balki, yuku narri yabimba balki yaji nani, manjamanjambangangi Kudwanyi narringi balki yaji.” Ngala balki yalungi jangkurr. Kijiwijba Kud yalungi jala yalu yanyba nani. Janyulu ngarrangarra muwa yalungi, jala yalu miku ngayangayijba nanganginkanyi jangkurranyi. Baki janyulu yanyba yalungi, jayalu jungku kurdan yurrngumba.
EPH 5:7 Jaliyi yanyba nganinyi nani, jaliyi nyulu jungku balki nani, baki yingijbakiyi nanda nganinyi. Mikujiyi jungku nangandu. Mikujiyi yanyba nangangi. Yingijbakiyi nanda nganinyi jala yanyba nani.
EPH 5:8 Wabula barri miku narriyanyi jingkijba Jisus Krayis. Narri jungkuyi balki nangangi. Narri barrinani nganinyi jala jilajba mungana, ngala mikuyaji mirnbinyi nangandu. Miku nyulimi jingkijba wanjawa nyulu jilajbangka jala mungijba yaji. Ngala nanijba narri jingkijbangka Jisus Krayis, baki narri barrinani nganinyi jala jilajba mirnbiyudi. Yuku nyulu najba wanjawa nyulu jilajbangka. Narri jingkijbangka wanjawa narrija jilajba, durrijbangangi narri Jisus Krayis. Nyulu barrinani mirnbi narringi, nyulu minimbaka narrinya jungunkanyi kunybana nanganginyina yuwana. Nanankardi barri marda narrimi durrijba nangangi jangkurr. Marda narrimi jungku kunybana yuwana Jisus Krayiskanyi. Marda narrimi jungku kunybana nanganginyina yuwana yurrngumba.
EPH 5:9 Ngambalangi mambuka nyulu Jisus Krayis, nyulu milidimbaka ngambalanya yanka ngambalaja jungku kunyba. Minimbaka ngambalanya yabimbikanyi kunyba yaji, baki ngayangayiykanyi nanganginkanyi yuwanyi. Jaliyi ngambala durrijba nangangi yuwa yurrngumba, baki jangambala jungku yurlurrmba nangangi, baki janyulu mirnarrijba muwa ngambalangi.
EPH 5:11 Ngala nanamuku jala jungku balkina yuwana Kudkanyi, yalu barrinani nanda nganinyi jala jilajba mungana, mikuyaji mirnbinyi nangandu. Miku yalimi jingkijba Kud. Yalu jungku balkina yuwana Kudkanyi, mikungangi yalimi durrijba Jisus Krayis. Marda narrimi miku jungku yalundu. Marda narrimi miku kandimba yalunya. Ngala marda narrimi ngirrwa yalungi. Marda narrimi karu yalunya yingiykanyi balki yaji yalungi, baki durriykanyi nanda yuwa Jisus Krayiskanyi.
EPH 5:12 Nanamukunyi balkimukunyi kudiyana yalu yabimba balkimirra yaji. Ngadijba yalu nanda balki yaji. Miku ngambalimi nulijba yanybikanyi nanankanyi balkinyi yajinyi jala yalu yabimba. Miku ngambalimi nulijba yanybikanyi nanankanyi. Manyirru ngambala yanybikanyi nanankanyi. Manyirru ngambala, balkinmirrangangi nanda jangkurr.
EPH 5:13 Jala nganinyiwanyi ngadijba balki yaji nangangi, baki yingka ngirrwangka nangangi, baki nanda barrinani nayi. Jala nganinyiwanyi ngadijba balki yaji nangangi, baki nanda barrinani nyulu yabimbaka yaji mungana. Jala mungijba yaji, baki mikukimi yingkawanyi najba yaji, mikukimi yingkawanyi jingkijba nanda balki yaji jala nyulu yabimba. Ngala jala yingka jilajba mirnbiyudi, baki najbangka yaji. Nyulu jingkijbangka nanda balki yaji jala yabimba nganinyiwanyi nani. Nyulu ngirrwangka nangangi, baki yingkamukunyi yalu marda jingkijbangka nanda balki yaji jala nyulu yabimba.
EPH 5:14 Yalu jingkijbangka nanda balki yaji jala nyuli ngadijba. Nanda naja Kudkanyi yanybaka nayi, “Walajba narri jala narri kurdan. Walajba narri. Janarri jungku wankan, baki janyulu milidimba narrinya Jisus Krayiswanyi. Janyulu milidimba narrinya nangangi Kudkanyi.” Barriwa.
EPH 5:15 Ngayu karungka narrinya kudanyu. Najbawa narringkiyi, yanka narri jungku. Marda narrimi jungku kunyba nangangi Kudkanyi yurrngumba barri. Mikujiyi jungku barrinani nanamuku balkimuku. Miku yalimi jingkijba Kud. Yalu mudumbanyi nangangi. Ngala marda narrimi jungku jirdi kunybanyi kulajinyi nangangi. Baki yingkamukunyi, jayalu jingkijba narrinya kunybayudi kulajiyudi nangangi Kudkanyi.
EPH 5:16 Marda narrimi miku bunmalijba, ngala marda narrimi waki nangangi Kudkanyi. Marda narrimi karu yingkamuku nangangi Jisus Krayiskanyi. Marda narrimi karu yalunya nanganginkanyi kunybanyi jangkurranyi yurrngumba barri. Marda narrimi yabimba kunyba yaji yalungi. Nayimanji barri kajamuku yalu jungku balki nangangi Kudkanyi, baki nanankardi barri marda narrimi waki nani nangangi Kudkanyi.
EPH 5:17 Marda narrimi jungku kunybayudi kulajiyudi nangangi Kudkanyi. Marda narrimi yanyba mududu nangangi Kudkanyi. Marda narrimi yanyba mududu nangangi, jingkiykanyi nanda jala nulijba Kud narringi yabimbikanyi. Jaliyi narri jungku kunybayudi kulajiyudi nangangi Kudkanyi, baki janarri jingkijba nanda jala nyulu nulijba narrinya yabimbikanyi. Janarri jingkijba nanda. Barriwa.
EPH 5:18 Mikujiyi ngaraba kaja balki kamukamu. Mikujiyi wanindijba kulaji. Jala nganinyi wanindijba kulaji baki balkimba nangka, baki nyulu yabimbaka kaja balki yaji. Mikujiyi wanindijba kulaji nanaba kamukamuna, ngala munyajbakiyi Kunyba Ngarndu Kudkanyi jungunkanyi nganyindu kurduluna. Janyulu yabimba ninga ngiruka kurrkunbikanyi nganyingka yabimbikanyi balki yaji. Janyulu yabimba ninga ngiruka yabimbikanyi kunyba yaji.
EPH 5:19 Jala narri malumba jungku, baki marda narringkimi yanyba jangkurranyi nangangi Kudkanyi, marda narrimi brijba wangarr nangangi Kudkanyi. Marda narrimi brijba nangangi. Marda narrimi brijba jangkurr najana Kudkanyi. Marda narrimi mirnarrijba muwa nangangi, baki wajba Kud kunybanyi jangkurranyi.
EPH 5:20 Marda narrimi wajba Buwakanya Kud kunybanyi jangkurranyi, manjijbangangi nyuli nangangi jandanyi Jisus Krayis, janybikanyi nangka ngambalangi. Marda narrimi wajba Buwakanya kunybanyi jangkurranyi, yarrijbangangi nyuli ngambalanya jungunkanyi yurlurrmba nangangi. Nanankardi barri ngambala mirnarrijba muwa nangangi. Marda ngambalimi wajba Kud kunybanyi jangkurranyi, jala nyulu yabimbaka kunyba yaji ngambalangi, baki jala yingkamukunyi yalu yabimba kiji ngambalangi. Marda ngambalimi wajba Kud kunybanyi jangkurranyi yurrngumba barri, jingkijbangangi ngambala, ngambala jungkuka yurlurrmba nangangi yurrngumba barri.
EPH 5:21 Marda narrimi malumba jungku wakiwarr nangangi Jisus Krayiskanyi. Marda nganyingkimi miku yarrijba walkurra yingkanyi, ngala marda ninjimi yarrijba yingka Krisjin walkurra nganyi. Munyajbakiyi nanda yingka mambuka nganyi. Nyulu marukangka muwa bukambijuyngka narringi Jisus Krayis, baki narri marukangka muwa nangangi, narri ngayangayijba nangangi. Baki nani barri, marda narringkimi ngayangayijba nangangi barri.
EPH 5:22 Narri Krisjinmuku jibarrimuku nawinganjayudi. Marda ninjimi ngayangayijba nganyingkanyi nawinganjanyi. Marda ninjimi ngayangayijba nanganginkanyi jangkurranyi, barrinani ninji ngayangayijba nangangi Jisus Krayiskanyi.
EPH 5:23 Nanda nawinganja nyulu mambuka nanganginkanyi maninganjanyi. Baki Jisus Krayis barri nyulu ngambalangi mambuka, Krisjinmukuyngka. Nyulu marrimbaka ngambalanya mardarda.
EPH 5:24 Ngambala Krisjinmuku, ngambala mirnarrijbangka muwa jala ngambala ngayangayijba nangangi, ngambalanginkanyi mambukanyi Jisus Krayiskanyi, baki nani barri narri maninganjamuku janarri mirnarrijba muwa jalija narri ngayangayijba narringinkanyi nawinganjanyi.
EPH 5:25 Baki narri nganinyimuku maninganjayudi. Manku narri nayinda jangkurr. Narri nawinganjamuku yalungi, marda narrimi maruka muwa narringinkanyi maninganjanyi barrinani marukangka muwa ngambalangi Jisus Krayis. Kudanyu nyulu marukangka muwa ngambalangi, baki nanankardi barri nangki janyba ngambalangi.
EPH 5:26 Wakardabangka juka wabudana jibarriwanyi. Dulabangka jamba wabudawanyi baki nanda juka jungkuka likalika. Baki nani barri ngambala Krisjinmuku, jala ngambala kuyu nangangi jangkurr Jisus Krayiskanyi. Jala ngambala ngindu ngamanginkanyi balkinyi yajinyi, baki nyulu dulabangka ngambalangi balki yaji Kudwanyi. Nyulu manjamanjambaka ngambalangi balki yaji, jala ngambala ngindu nanankanyi balkinyi yajinyi,
EPH 5:27 baki ngambala jungku yurlurrmba nangangi. Bukambiju ngambala Krisjinmuku, ngambala jungkuka malumba nangangi yurlurrmba. Baki baku barri, jalija wijba Jisus Krayis nanginkurri, baki jangambala kirrijba nangandu, jangambala jungku nangandu yurrngumba. Jangambala jungku kunybamirra nangangi, barrinani likalika nangangi. Mikuyaji balkinyi ngambalandu. Miku jangambala yabimba mili balki yaji nangangi, jangambala jungku yurlurrmba nangangi yurrngumba barri. Nani barri kudanyu nyuli maruka muwa ngambalangi Jisus Krayis.
EPH 5:28 Baki nani barri ninji nangangi nawinganja marda ninjimi maruka muwa nganyingkanyi maninganjanyi barrinani nganyingka marukangka muwa. Marda ninjimi lalanba nganyi maninganja yurrngumba barri, barrinani nganyingka lalanbaka mankanyi.
EPH 5:29 Mikukimi nganinyi nangka ngirra mankanyi. Miku. Nangka lalanbaka mankanyi. Jarrbangka mama, ngarabangka wabuda. Nanda kunyba nanganginkanyi mankankanyi. Baki nani barri Jisus Krayis nyulu mambuka ngambalangi Krisjinmukuyngka, bababanyamba nyulu ngambalanya, baki nyulu lalanbaka ngambalanya, nyulu wajbangka ngambalanya bukamba kunybanyi yajinyi. Nyulu yabimbaka kunyba yaji ngambalangi barri.
EPH 5:30 Nanda kulaji, nanda mambuka ngambalangi mankankanyi. Baki nani barri Jisus Krayis, nyulu barrinani kulaji ngambalangi, nyulu ngambalangi mambuka. Baki ngambala Krisjinmuku, ngambala barrinani nanda mankanyi. Kajamuku yalu jungkuka malumba mankanyina, nguli baki barnyi baki walkuji junu. Yalu malumba jungku yingamalinyina mankanyina. Baki nani barri ngambala malumba jungku barrinani yingamali mankanyi nangangi Jisus Krayiskanyi. Ngambala barrinani mankanyi nangangi, baki nyulu lalanbaka ngambalanya. Barriwa.
EPH 5:31 Nanda jangkurr najana Kudkanyi yanybaka nayi, “Mardakimi nganinyiwanyi yingijba bulanya, nijanganjinyi marda ngardanganja. Marda nyulimi wudumba maninganja nangangi, baki jabula jungku bulama yurrngumba malumba maykarra bula. Waluku bula jungku kujarra. Baku barri jabula jungku maykarra, barrinani nanda yingamali.
EPH 5:32 Nanda jangkurr yanybaka maykarrayngka baki nanankardi barri ninji nawinganja nangangi, marda ninjimi maruka muwa nganyingkanyi maninganjanyi barrinani nganyingka maruka muwa. Nganyingka lalanba mankanyi, baki nani barri marda ninjimi lalanba nganyi maninganja. Baki maninganja nangangi, marda ninjimi ngayangayijba nangangi nganyingkanyi nawinganjanyi. Barriwa. Baki mili nanda jangkurr maykarrayngka yanybaka nayi. Nanda jangkurr yanybaka Jisus Krayiskanyi baki Krisjinmukuyngka. Jisus Krayis barri, nyulu barrinani nanda nawinganja ngambalangi, baki ngambala Krisjinmuku, ngambala barrinani maninganja nangangi. Marukangka Jisus Krayis muwa ngambalangi, nyulu lalanbaka ngambalanya. Miku nyuliyi yingijba ngambalanya. Nyulu lalanbaka ngambalanya yurrngumba barri. Baki ngambala Krisjinmuku, marda ngambalimi ngayangayijba nangangi ngambalanginkanyi mambukanyi Jisus Krayiskanyi. Barriwa.
EPH 6:1 Baki narri bayamuku, marda narrimi ngayangayijba bulangi, nganyingkanyi yarrijiyngkanyi, baki nijanganjiyngkanyi. Marda narrimi ngayangayijba bulanginkanyi jangkurranyi, barrinani marda bulimi ngayangayijbangka nanganginkanyi jangkurranyi Kudkanyi. Nani narri jungku yurlurrmba nangangi Kudkanyi.
EPH 6:2 Yanybaka jangkurr najana Kudkanyi nayi barri, “Marda ninjimi ngayangayijba bulangi, nganyingkanyi nijanganjiyngkanyi baki nganyingkanyi yarrijiyngkanyi. Marda ninjimi ngayangayijba bulangi yurrngumba. Jaliyi ninji ngayangayijba bulangi, baki janinji jungku kunyba, janinji wanka jungku yurrngumba malbuna, baki bardibardina.” Nani yanybaka jangkurr najana Kudkanyi. Barriwa.
EPH 6:4 Baki narri nijanganjinyimuku baki yarrijinyimuku, marda narrimi lalanba narringi bayamuku, marda narrimi yabimba kunyba yaji yalungi, marda narrimi maruka muwa yalungi kudanyu barri. Baki jayalu miku jungku ngarrangarra muwa narringi. Jayalu miku nulijba yurlwankanyi narringinkanyi jangkurranyi. Marda narrimi milidimba narringi bayamuku nangangi Kudkanyi, baki jayalu marda maruka muwa nangangi Kudkanyi ngala yalu yuwajiwa bayamuku.
EPH 6:5 Baki narri wakiwarrmuku, marda narrimi ngayangayijba narringinkanyi mambukanyi. Marda narrimi waki kudanyu nangangi yurrngumba. Marda narrimi waki kudanyu nangangi, ngala nyulu karrinja narrindu lalanbijina wakinkurri, baki ngala nyulu barlba, ngala narrija waki dadijba. Marda narrimi mirnarrijba muwa ngala narri waki, baki janyulu mirnarrijba muwa narringi Kud. Narri nulijbangka ngayangayiykanyi nangangi, ngambalanginkanyi mambukanyi Jisus Krayiskanyi, baki nani barri marda narrimi ngayangayijba narringinkanyi mambukanyi. Jala narri waki kudanyu nangangi, baki nanda barrinani narri wakingka nangangi Jisus Krayiskanyi marda, nulijbangangi nyulu narringi wakinkanyi nani. Nani barri janarri mirnarrijba muwa ngala narri waki.
EPH 6:8 Mankuwa narri nayi marda. Janyulu yabimba kunyba yaji narringi Kudwanyi, jaliyi narri yabimba kunyba yaji nangangi. Jaliyi narri waki kudanyu nangangi, baki janyulu yabimba kunyba yaji narringi. Janyulu yabimba nani bukambijuyngka Krisjinmukuyngka, wakiwarrayngka, baki mambukanyi. Janyulu yabimba kunyba yaji yalungi, jaliyi yalu waki nangangi.
EPH 6:9 Baki narri mambukamuku. Marda narrimi lalanba yalunya narringinmuku wakiwarrmuku. Marda narrimi miku ngirrwa yalungi, janinji daba yalunya. Mankumankuwa narri nayi marda. Narri mambukamuku, baki yalu narringinmuku wakiwarrmuku, bukambiju narri wakiwarr nangangi mambukanyi kingkarriyngka. Nyulu narringinmuku mambuka. Mikukimi yanyba Kud, “Ninji barri mambuka, jangayu yabimba kaja kunyba yaji nganyi, ngala ninji barri wakiwarr, ngawamba bijal kunyba yaji jangayu yabimba nganyi.” Mikukimi yanyba Kud nani. Bukambiju Krisjinmuku ngambala jandanyimuku nangangi Kudkanyi, miku mili yingka walkurra. Mikuyaji. Janyulu yabimba kunyba yaji bukambijuyngka yalungi jala waki kudanyu nangangi. Barriwa.
EPH 6:10 Marda narrimi jungku ngiruka nangangi Kudkanyi. Marda narrimi jungku mili ngiruka baki mili ngiruka nangangi yurrngumba. Janyulu yabimba narrinya mili ngiruka nani Kudwanyi, nyulungangi ngirukamirra. Miku yingka ngiruka barrinani nyulu. Janyulu yabimba narrinya ngiruka, nyulungangi bababanyamba narrinya Jisus Krayiswanyi. Janarri jungku ngiruka nangangi. Janarri barrinani ngarrkadabawarrmuku nangangi Kudkanyi.
EPH 6:11 Nanamuku ngarrkadabawarrmuku, yalungka yawumbaka barrinani malankarri yaji, barrinani jumbala yalungi. Yalungka yawumbaka barrinani malankarri yaji mankanyina jala yalunjalu daba yingkamukunyi ngarrkadabawarrmukunyi. Nani yalungka yawumbaka barrinani malankarri yaji, baki kurrkunbaka wuni malankarriwanyi. Mikukimi ngarrkadaba, mikukimi linjumba mankanyi wuniwanyi. Barriwa. Marda narrimi jungku barrinani ngarrkadabawarrmuku malankarriyudi. Nanda wuwarr Sayidin, nyulu barrinani ngurranyi ngarrkadabawarr, nyulu yabimbaka kiji narringi, barrinani narrinya daba, ngala miku nyuliyi ngarrkadaba narrinya. Miku nyuliyi linjumba narrinya, jungkungangi narri ngiruka nangangi Kudkanyi.
EPH 6:12 Ngambala ngarrkadabawarrmuku nangangi Kudkanyi. Ngala miku ngambaliyi daba nganinyimuku. Ngambalaja daba wuwarrmuku marda nanamuku balkimuku, nanamuku ngirukamuku lalijina, jala ngirra Kud. Ngambalaja daba yalunya, nulijbangangi yalu ngambalangi, ngambalaka yangkalambikanyi nanganbunanyi Kudnanyi.
EPH 6:13 Baki nanankardi barri, marda ngambalimi jungku ngiruka nangangi Kudkanyi. Marda ngambalimi jungku barrinani ngarrkadabawarrmuku nangangi, baki jangambala daba wakara nanamuku balkimuku. Yurrngumba yalu nulijbangka ngambalangi, linjumbikanyi ngambalanya, yalu nulijbangka ngambalangi, ngambalaka yangkalambikanyi nanganbunanyi Kudnanyi. Ngala jangambala daba yalunya wakara, jungkungangi ngambala ngiruka nangangi Kudkanyi.
EPH 6:14 Nanda jumbala yalungi ngarrkadabawarrayngka, barrinani malankarri, kaja jumbalamuku, baki kulabajarra baki kuyuwarru. Baki nani barri wajbangka narrinya Kudwanyi. Nyulu wajbangka narrinya kajanyi yajinyi yabimbikanyi narrinya ngiruka nangangi. Nanda jumbala ngaluna nangandu, jala kurrkunbaka wuni linjumbikanyi mankanyi, nanda barrinani jungunkanyi yurlurrmba nangangi Kudkanyi. Jaliyi narri jungku yurlurrmba nangangi, baki mikuwali wuwarrmukunyi linjumba narrinya. Miku yaliyi linjumba narrinya. Miku. Baki nanda kurul jala nangka kijijba ngarrkadabawarr muwana, nanda barrinani nanda duja jangkurr nangangi Jisus Krayiskanyi. Nangangi jangkurr jungkuka ngiruka yurrngumba barri. Jaliyi narri munyajba nangangi jangkurr jungunkanyi narrindu kurduluna, baki janarri jungku ngiruka nangangi Kudkanyi. Barriwa.
EPH 6:15 Yawumbaka nangka ngarrkadabawarr jabunungkajina, baki birrirrinja nangka jilaykanyi juju. Baki nani barri marda narringkimi birrirrinja jilalaykanyi baki karunkanyi yalunya yingkamuku nangangi Jisus Krayiskanyi. Jala narri karu yalunya nangangi, baki narri jungku ngiruka nangangi marda. Baki yingkamuku jala yalu kuyu nanda jangkurr Jisus Krayiskanyi, baki jayalu jungku mardumardu muwa. Barriwa.
EPH 6:16 Baki kuyungka kuyuwarru nangandu ngarrkadabawarranyi. Kuyungka nyulu kuyuwarru kurrkunbiji wuni. Baki nani barri marda narrimi kuyu nangangi jangkurr Jisus Krayiskanyi. Narri jingkijba nangangi jangkurr duja barri, baki nanankardi barri mikuwali linjumba narrinya Sayidinwanyi. Jala nyulu yabimba kiji narringi baki miku nyuliyi linjumba narrinya. Narri jingkijba nanda duja jangkurr nangangi Jisus Krayiskanyi, baki narri kurrkunba nanda balki jangkurr nangangi Sayidinkanyi. Miku narrimi kuyu nangangi balki jangkurr. Barriwa.
EPH 6:17 Yawumbaka nangka ngarrkadabawarr kulabajarranyi, baki mikuwali yingkawanyi daba nangangi kulaji. Jungkuka mardarda nangangi kulaji kaluwunyi kulabajarrana. Baki nani barri narri jungkuka mardarda. Nyulu marrimbaka narrinya mardarda Jisus Krayiswanyi jala narri kuyu nangangi jangkurr. Barriwa. Baki kuyungka ngarrkadabawarranyi wunanybala jankunbijinyi karlkanyi mankanyi. Kuyungka nyulu jankunbijinyi, baki jarimbaka nyulu nanda yingka ngarrkadabawarr. Nanda jankunbijinyi, nanda barrinani jangkurr nangangi Kudkanyi jala wajba narrinya Kunybawanyi Ngarnduwanyi Kudkanyi. Nanamuku jala miku yalimi jingkijba Kud, yalu manku nanda balki jangkurr nangangi Sayidinkanyi. Yalu manku nangangi balki jangkurr. Ngala jalija narri karu yalunya duja jangkurranyi nanganginkanyi Kudkanyi, baki jayalu kuyu nanda duja jangkurr. Nanangini duja jangkurrwanyi Kudkanyi jarimbaka nanda balki jangkurr nangangi Sayidinkanyi. Barriwa.
EPH 6:18 Jala narri jungku nani Kudkanyi, jala narri barrinani ngarrkadabawarrmuku nangangi, baki marda narrimi yanyba mududu nangangi Kudkanyi. Marda narrimi ngajaka Kud, nyulu yabimbiji narrinya ngiruka wakinkanyi nangangi. Yurrngumba barri marda narrimi ngajaka Kud nani barri, baki nanganginyi Kunybawanyi Ngarnduwanyi, janyulu karu narrinya nanganginkanyi jangkurranyi narri yanybikanyi mududu nangangi Kudkanyi. Baki nanankardi barri marda narringkimi miku kurrkunba yanybikanyi mududu nangangi, ngala marda narrimi yurrngumba yanyba mududu nangangi bukambijuyngka yalungi marda Krisjinmukuyngka.
EPH 6:19 Ngayu ngajakangka narrinya marda, janarri yanyba mududu nangangi Kudkanyi marda ngaki. Janarri ngajaka Kud, nyulu karunki ngana nanankanyi jangkurranyi, jalija ngayu karu yalunya yingkamuku. Janarri ngajaka Kud, nyulu yabimbiji ngana ngiruka karunkanyi yalunya. Jalija ngayu ngiruka nangangi, baki miku ngayiyi marrala karunkanyi nanda duja jangkurr nangangi Jisus Krayiskanyi. Nani ngayu ngajakangka narrinya, narri yanybiji mududu Kudkanyi ngaki barri.
EPH 6:20 Nganarri jingkijba, waki ngayi nangangi Jisus Krayiskanyi. Karuyi ngayu nanganginkanyi kunybanyi jangkurranyi kajana yajina. Nanijba barri ngayu jungku nayiba brisinyina. Kijijba yali ngaki jalu malumba nanganginyina jaluna, yingkana ngarrkadabawarranyina baki yingkana yurrngumba barri. Nani ngayu jungkuka kijiyudi, ngala yuwajiwa ngayu wakingka nangangi Kudkanyi. Ngayu karungka yalunya nangangi Jisus Krayiskanyi. Karungka ngayu yalunya ngarrkadabawarrmuku baki nanamuku jala ngana yidamba. Barriwa. Mili ngayu ngajakangka narrinya, janarri yanyba mududu Kudkanyi ngaki. Janarri ngajaka Kud ngaki, jangayu karu yalunya nangangi, yarrijbangangi ngani Jisus Krayiswanyi karunkanyi nanganginkanyi jangkurranyi. Nani barri ngayu ngajakangka narrinya, janarri yanyba mududu Kudkanyi ngaki.
EPH 6:21 Nanda nganinyi Dikikus, nyulu barrinani bababanyamba ngambala. Nyulu wakiwarr nangangi ngambalanginkanyi mambukanyi Jisus Krayiskanyi. Wakingka nyulu ngiruka nangangi. Janyulu yidamba narrinya, baki janyulu karu narrinya ngaki, yanka ngayu jungkuka.
EPH 6:22 Ngayu manjijbangka nanda Dikikus narrindurri, baki janyulu karu narrinya ngaki baki yalungi, Krisjinmukuyngka nayiba ngakindu. Jalija narri manku jangkurr nurrungi, baki janarri jungku mirnarrijba muwa. Janarri jungku ngiruka nangangi Kudkanyi marda.
EPH 6:23 Ngayu yanybaka mududu bulangi, ngambalanginkanyi Buwakaya Kudkanyi, baki ngambalanginkanyi mambukanyi Jisus Krayiskanyi. Ngayu yanybaka mududu bulangi narringi. Ngayu ngajakangka bulanya narringi, jabula wajba narrinya jungunkanyi mardumardu muwa, baki janarri maruka muwa yalungi bukambijuyngka Krisjinmukuyngka. Bababanyamba ngambalaka bukambiju jala maruka muwa nangangi Jisus Krayiskanyi, baki kuyu nangangi jangkurr.
EPH 6:24 Ngayu ngajakangka bulanya, jabula yabimba kunyba yaji bukambijuyngka jala maruka muwa nangangi, ngambalanginkanyi mambukanyi Jisus Krayiskanyi, jala maruka muwa nangangi yurrngumba barri, jala miku yalungka yangkalamba nanganbunanyi. Ngayu ngajakangka bulanya, jabula yabimba kunyba yaji yalungi. Barriwa barri, bukamba nayinda jangkurr narringi.
PHI 1:1 Nayinda ngayu Bul baki Dimudi, ngali wakiwarr nangangi Jisus Krayiskanyi. Ngali manjijba nayinda jangkurr narrindurri jala nanganginmuku jandanyimuku Kudkanyi. Ngali manjijba nayinda jangkurr narrindurri jala jungku nananyina yajina niji Bilibayi, jala bababanyamba narrinya Jisus Krayiswanyi. Nayinda jangkurr narringi mambukamuku jurjkanyi baki narringi wakiwarrmuku jurjkanyi.
PHI 1:2 Ngaliya yanybaka mududu bulangi, ngambalanginkanyi Buwakaya Kudkanyi, baki ngambalanginkanyi Mambukanyi Jisus Krayiskanyi. Ngaliya yanybaka mududu bulangi. Ngaliya ngajaka bulanya, jabula yabimba kunyba yaji narringi, baki janarri jungku mardumardu muwa.
PHI 1:3 Ngayu Bul, ngayu yarrijba nayinda jangkurr najana narringi, jala ngaka mankumanku narringi, baki ngayu karu ngaki Kud, ngayu mirnarrijbangka ngayu muwa nangangi. Mirnarrijbangka ngayu muwa nangangi, yarrijbangangi nyuli narrinya nanganginmuku jandanyimuku.
PHI 1:4 Yurrngumba ngayu mirnarrijba muwa jala ngayu yanyba mududu nangangi Kudkanyi narringi.
PHI 1:5 Yurrngumba ngayu mirnarrijba muwa, wakingangi narri ngakindu nangangi Jisus Krayiskanyi. Yurrngumba narri waki ngakindu nanamunanyi jali ngayu jalannga karu narrinya nanankanyi kunybanyi jangkurranyi nanganginkanyi Jisus Krayiskanyi. Yurrngumba nanamunanyi narri waki ngakindu, ngambala karuyi kajamuku nangangi Jisus Krayiskanyi. Yurrngumba narri karu yalunya nangangi baki yuwajiwa narri karu nanganginkanyi kunybanyi jangkurranyi.
PHI 1:6 Nanankardi barri, ngayu jingkijba Kud, nyuli yarrijba narrinya nanganginmuku jandanyimuku, baki janyulu lalanba narrinya, janyulu yabimba narrinya ngiruka nangangi. Ngayu jingkijba Kud, janyulu yabimba narrinya mili ngiruka baki mili ngiruka nangangi nanankurri jalija wijba Jisus Krayis nanginkurri wayka. Janyulu lalanba narrinya, baki janyulu yabimba narrinya mili ngiruka nangangi yurrngumba barri. Nanamanji jalija nyulu wijba, baki barriwa barri miku janyulu mili waki narrindu.
PHI 1:7 Mankumanku ngaka narringi yurrngumba barri. Kudanyu ngayu maruka muwa narringi, kandimbangangi nganarri, wakingangi narri malumba ngakindu. Baki nanankardi barri yabimbayi Kudwanyi kunyba yaji ngaki baki narringi marda. Kunyba yaji yabimbayi narringi baki ngaki marda. Ngana nyuli manjijba karunki yalunya nanankanyi kunybanyi jangkurranyi Jisus Krayiskanyi, baki narrinya marda narrinyi manjijba karunki yalunya nanamannga jangkurranyi. Mirnarrijba ngayu muwa barri, jala ngayu karu yalunya nanankanyi jangkurranyi. Karu ngayi yalunya nanankanyi jangkurranyi wabula barri, jali ngayu jilalajba kajayurri yajiyurri. Baki karu ngayi yalunya nanankanyi jangkurranyi marda, jali nganjalu karrinjarrijba walu yalundu, mambukamukunyina Rumkanyi. Karu ngayi yalunya mambukamuku Rumkanyi, nanamanji barri waluwa nganjali manjijba bayungu nanginkurri. Baki nanijba barri ngala ngayu jungku nayiba brisinyina, mili ngayu karu yalunya nanankanyi jangkurranyi.
PHI 1:8 Jingkijbangka ngana Kudwanyi, ngayu yanybaka duja jangkurranyi. Miku ngayimi jujijba. Duja ngayu yanybaka. Maruka ngayu muwa narringi kudanyu barri, jungkukangangi Jisus Krayis ngakinyina kurduluna. Nanankardi barri ngayu maruka muwa narringi, barrinani Jisus Krayis nyulu marukangka narringi.
PHI 1:9 Ngayu yanybaka mududu nangangi Kudkanyi narringi barri. Ngayu ngajakangka Kud narringi barri, janarri mili maruka muwa nangangi, baki mili yurrngumba barri. Jalija narri mili maruka muwa nangangi, baki janarri mili jingkijba jungunkanyi mardumardu muwa marda yalundu yurrngumba. Jayalu miku ngarrangarra muwa narringi, mikungangi narriyi yabimba balki, yalu jungunkanyi ngarrangarra muwa narringi. Nanankardi janarri jungku mardumardu muwa yalundu, jingkijbangangi narri Kud, marukangangi narri nangangi kudanyu. Baki janarri jungku kunyba kulaji marda nangangi Kudkanyi.
PHI 1:10 Baki jaliyi narri jungku kunyba kulaji, baki janarri jingkijba nanda jala kunyba yabimbikanyi. Janarri yabimba ngawamba nanda kunyba yaji. Baki baku barri jalija nyulu karrinjarrijba narrinya walu nangandu Jisus Krayiswanyi, baki janyulu yanyba narringi, miku narriyanyi yabimba balki yaji, ngala narri jungku kunyba nangangi.
PHI 1:11 Marda narrimi jungku kunyba nangangi yurrngumba barri. Mikuwali yingkawanyi yabimba narrinya jungunkanyi kunyba yurrngumba. Ngawamba narringinyi mambukawanyi Jisus Krayiswanyi, yuku nyulu yabimba narrinya jungunkanyi kunyba. Janarri yabimba kunyba yaji nangangi yurrngumba. Janarri wajba Kud kunybanyi jangkurranyi narringi, manjijbangangi nyuli nangangi jandanyi, janybikanyi nangka ngambalangi. Nanankardi barri narri mirnarrijba muwa nangangi Kudkanyi, jungkungangi janarri mili wanka nangandu baku barri.
PHI 1:12 Ngayu karungka narrinya, ngakinmuku bababanyambamuku ngayu. Yingkamukunyi yali yabimba balki yaji ngaki, milidimbangangi ngayi yalunya nanganginkanyi jangkurranyi Jisus Krayiskanyi. Yali yabimba balki yaji ngaki. Ngananjali linjumba. Ngananjali yarrijba brisinyina. Nanijba barri ngayu jungku brisinyina, nangangingangi Jisus Krayiskanyi. Ngala yuwajiwa ngayu milidimbaka yalunya nanganginkanyi kunybanyi jangkurranyi. Baki yuwajiwa kajamukunyi yalu mankuka nangangi jangkurr.
PHI 1:13 Kajamukunyi ngarrkadabawarrmukunyi ngananjalu lalanbaka brisinyina. Karungka ngayu yalunya nangangi Jisus Krayiskanyi. Karungka ngayu yalunya, baki nanamuku jala nganjalu yidamba, karungka ngayu yalunya marda nangangi Jisus Krayiskanyi. Ngananjalu jingkijba, ngayu jungku nayiba brisinyina, wakingangi ngayi nangangi Jisus Krayiskanyi.
PHI 1:14 Jungku ngayu nayiba brisinyina, ngala yuwajiwa ngayu karungka yalunya nangangi. Yurrngumba ngayu milidimbaka yalunya nanankanyi nanganginkanyi kunybanyi jangkurranyi. Miku ngayimi marrala milidimbikanyi yalunya, ngala ngayu jungku nayiba brisinyina. Miku ngayimi marrala. Kudiyamukunyi Krisjinmukunyi ngananjali jingkijba, miku ngayimi marrala milidimbikanyi yalunya. Miku ngayiyi marrala milidimbikanyi yalunya jalili yalu jungku nanginyina yajina. Baki nanankardi barri yalu marda milidimbaka yingkamuku nangangi Krisjinmukunyi. Kudanyu yalunjalu milidimbaka jangkurranyi Jisus Krayiskanyi. Miku yalimi marrala milidimbikanyi yalunya, jingkijbangangi ngananjalu, miku ngayimi marrala milidimbikanyi yalunya.
PHI 1:15 Ngala kudiyamuku yalungka ngamu mankumanku ngaki, nulijba ngayu jungunkanyi walkurra mambuka milidimbikanyi yaji. Nani yalungka ngamu mankumanku ngaki, baki nanankardi barri yalungka yanyba, “Nanda milidimbawarr Bul, nyulu jungkuka brisinyina. Miku nyuliyi walkurra mambuka milidimbikanyi yaji ngala nyulu jungkuka brisinyina. Jangayu milidimba yalunya nangangi Jisus Krayiskanyi. Jangayu kudanyu milidimba nangangi, baki jangayu walkurra mambuka milidimbikanyi yaji.” Nani yalungka yanyba.
PHI 1:16 Yalunjalu milidimbaka nanankanyi jangkurranyi, jingkijbangangi nganjalu, miku ngayimi jilalajba milidimbiji yalunya. Maruka yalu muwa ngaki kudanyu barri. Ngananjalu jingkijba, wakingka ngayu nangangi Kudkanyi, baki yalu marda wakingka ngaki. Yalu milidimbaka nanamuku jala miku ngayiyi milidimba yalunya, jungkungangi ngayu nayiba brisinyina. Nani barri yalunjalu kudanyu milidimbaka nangangi Jisus Krayiskanyi yingkamukunyi Krisjinmukunyi.
PHI 1:17 Baki nanankardi barri yalunjalu milidimbaka. Ngala miku yalunjalimi milidimba balkinyi jangkurranyi nangangi Jisus Krayiskanyi. Miku. Ngala yalunjalu milidimbaka kunybanyi duja jangkurranyi. Nani barri yalunjalu milidimbaka, nulijbangangi yalungka jungunkanyi walkurra mambuka yalungi Krisjinmukuyngka. Nulijba yalu yabimbikanyi kiji ngaki, ngala ngayu jungku nayiba brisinyina. Yalunjalu milidimbaka nanankanyi kunybanyi jangkurranyi, ngawambangangi yalu nulijba jungunkanyi mambukamuku narringi.
PHI 1:18 Ngala yuku nanda. Miku ngayimi balkijba muwa nanankanyi yajinyi. Miku yalimi milidimba balkinyi jangkurranyi. Bukambiju yalu, nanamuku jala yalu maruka muwa ngaki, baki nanamuku jala yalu miku maruka muwa ngaki, bukambijunyi yalunjalu milidimbaka kunybanyi jangkurranyi nangangi Jisus Krayiskanyi. Nanda jirrinyi barri jangkurr. Mirnarrijba ngayu muwa nanankanyi. Baki mili ngayu mirnarrijba muwa nanginkanyi marda. Yurrngumba narri yanyba mududu nangangi Kudkanyi ngaki barri, baki ngayu jingkijba Kud, nyulu mankuka narringi jangkurr. Nyulu mankuka narringi jangkurr baki janyulu yabimba nanda jala narri ngajaka Kud ngaki, baki jangayu mili ngiruka nangangi. Baki nanda Kunyba Ngarndu nangangi Jisus Krayiskanyi nyulu jungkuka ngakindu kurduluna, baki ngayu jungkuka ngiruka nangangi. Nanankardi barri ngayu jingkijba nayinda marda. Baku barri, jangayu yingijba nayinda brisin. Jangayu yingijba nayinda brisin, ngala yanka jangayu yingijba nayiba. Nanamuku mambukamuku Rumkanyi, yiningki janganjalu muningka manjijba brisinanyi. Ngala yiningki janganjalu kurdanba. Miku ngayiyi jingkijba yanka yaji. Ngala miku nanda jirrinyi ngaki. Jingkijba ngayu Kud, janyulu mili wankamba ngana jalija ngaka janyba. Jangayu mili jungku wanka nangandu yurrngumba. Nanda barri jirrinyi ngaki.
PHI 1:20 Nulijba ngayu ngayangayiykanyi nangangi, ngambalanginkanyi mambukanyi Jisus Krayiskanyi. Kudanyu ngayu nulijba ngayayangayiykanyi nangangi yurrngumba barri. Miku ngayiyi yurlwa nanankanyi jala nyulu nulijba ngaki yabimbikanyi. Kudanyu ngayu nulijba, ngayu jungunkanyi ngiruka nangangi yurrngumba barri. Baki miku ngayiyi marrala. Miku ngayiyi marrala, ngala ngayu jungku nayiba brisinyina. Nani barri jangayu jungku ngiruka nangangi Jisus Krayiskanyi. Jangayu ngiruka jungku nangangi, yabimbakangangi ngana ngiruka Kunybawanyi Ngarnduwanyi Kudkanyi. Ngana nyulu yabimbaka ngiruka. Baki yingkamukunyi janganjalu najba jungunkurri ngiruka, baki jayalungka yanyba ngaki, “Nyulu jungkuka ngiruka nangangi Jisus Krayiskanyi. Nanda Jisus Krayis, nyulu walkurra mambuka. Nyulu yabimbaka yalunya ngiruka jala yalu durrijba nangangi jangkurr. Nyulu walkurramirra mambuka.” Nani barri jayalungka yanyba ngaki, jayalu wajba Jisus Krayis kunybanyi jangkurranyi ngakinkanyi. Nani barri jayalungka yanyba, jaliyi ngayu jungku wankan yurrngumba, baki nani barri jayalungka yanyba, jaliyi ngaka janyba winyurruwa.
PHI 1:21 Ngawamba ngayu nulijba jungunkanyi nangandu, ngambalanginyina mambukana Jisus Krayisnyina. Ngawamba ngayu nulijba jungunkanyi nangandu. Ngala ngayu jungku nayiba wayka jambana, baki nyulu jungkuka ngakinyina kurduluna. Baki nanda kunyba ngaki barri. Ngala baku barri jalija ngaka janyba, baki jangayu mili jungku wanka nangandu kingkarri barri. Baki nanda barri mili kunyba ngaki, kunybamirra ngaki.
PHI 1:22 Ngala jaliyi ngayu mili jungku nayiba wayka, baki jangayu mili waki nangangi. Yiningki Jisus Krayis, nyulu nulijba ngaki mili wakinkanyi nangangi nayiba wayka. Ngala miku ngayimi jingkijba, wanyingkanyi ngaka nulijbangka, mili wakinkanyi nangangi kuna nayiba wayka, jungunkanyi kuna nangandu kingkarri.
PHI 1:23 Miku ngayimi jingkijba nanda jala ngaka nulijbangka. Kudanyu ngayu nulijbangka, jungunkanyi wanka nangandu kingkarri. Nanda barri kunyba ngaki, kunybamirra ngaki. Ngala yiningki barri marda ngayimi mili waki nangangi ngala ngayu yuwajiwa jungku nayi wayka.
PHI 1:24 Jaliyi ngayu mili waki nangangi nayiba, baki nanda kunyba barri narringi Krisjinmukuyngka. Nanda mili kunyba narringi, yukungangi ngayu mili waki nangangi Jisus Krayiskanyi. Yuku ngayu mili milidimba narrinya nangangi. Yuku ngayu yabimba narrinya jungunkanyi mili ngiruka nangangi barri.
PHI 1:25 Baki nanankardi barri ngayu jingkijba, janganjalu muningka manjijba brisinanyi. Baki jangayu mili milidimba narrinya, jungunkanyi ngiruka nangangi Jisus Krayiskanyi. Janarri mirnarrijba muwa, jalija narri jungku mili ngiruka baki mili ngiruka nangangi yurrngumba barri. Janarri mirnarrijba muwa, jalija narri jungku mili ngiruka nangangi nani.
PHI 1:26 Jalija ngayu mili jilajba narrindurri, baki janarri mirnarrijba muwa ngaki, milingangi jangayu milidimba narrinya jungunkanyi yurlurrmba nangangi Kudkanyi. Jangayu mili milidimba narrinya, durriykanyi ngambalangi mambuka Jisus Krayis. Nanankardi barri janarri mirnarrijba muwa ngaki, jingkijbangangi janarri mili nangangi jangkurr barri, jingkijbangangi janarri mili yurlurrmba nangangi Jisus Krayiskanyi, jala nyulu bababanyamba narrinya.
PHI 1:27 Marda narrimi jungku yurlurrmba nangangi Kudkanyi. Marda narrimi durrijba nanda kunyba jangkurr nangangi Jisus Krayiskanyi. Marda narrimi durrijba nangangi kunyba jangkurr yurrngumba barri. Baki jaliyi ngayu yidamba narrinya baki jungku narrindu barndana, baki jangayu jingkijba narrinya, narri ngayangayijbangka nanganginkanyi duja jangkurranyi. Ngala jaliyi ngayu miku yidamba narrinya, baki yingkamukunyi janganjalu karu nanamannga jangkurranyi narringi, narri ngayangayijbangka nanganginkanyi jangkurranyi. Narri jungkuka ngiruka nangangi. Narri malumba wakingka nangangi. Narri karungka yingkamuku yalunya nanganginkanyi kunybanyi jangkurranyi. Nani jangayu jingkijba narrinya.
PHI 1:28 Yingkamukunyi jayalu yabimba kiji narringi, ngala jaliyi narri jungku yurlurrmba nangangi Kudkanyi yurrngumba barri, baki janyulu marrimba narrinya mardarda Kudwanyi. Janyulu marrimba narrinya mardarda, jaliyi narri jungku yurlurrmba nangangi. Miku janarri marrala yalungi, jalija yalu yabimba kiji narringi. Miku janarri marrala yalungi. Baki nanamuku jala yabimba kiji narringi, jayalu jingkijba, miku narrinjaliyi wakaramba, ngala janarri narri wakaramba yalunya, nyulungangi ngiruka narringi Kud. Janyulu marrimba narrinya mardarda Kudwanyi, ngala jayalungka janyba. Nani janarri wakaramba yalunya.
PHI 1:29 Yabimbayi kunyba yaji narringi Kudwanyi, nyuli yarrijba narrinya wakiwarrmuku nangangi Jisus Krayiskanyi. Nyuli yarrijba narrinya, narri kuyunkanyi nanda jangkurr nangangi Jisus Krayiskanyi. Baki mili nyuli yarrijba narrinya, narri linjunkanyi mankanyi nangangi. Nanankardi barri narri jingkijba, janarri jungku mili wanka nangandu yurrngumba. Baki mili jayalu yabimba kiji narringi, jayalu linjumba narrinya mankanyi. Jaliyi narri jungku ngiruka nangangi Kudkanyi, jaliyi narri jungku ngiruka nangangi yurrngumba barri, jala narrinya linjumba, baki narri jingkijba, janarri wanka jungku nangandu yurrngumba barri.
PHI 1:30 Narri barri barrinani ngayu. Bukamba ngambala wakiwarrmuku nangangi Jisus Krayiskanyi. Yingkamukunyi yalili yabimba kiji ngaki, ngananjalili linjumba mankanyi. Baki nani barri yingkamukunyi yalili yabimbaka kiji narringi marda. Ngala narri jingkijbangka Kud, nyulu marukangka muwa ngambalangi. Ngayili waki kudanyu nangangi yurrngumba barri, baki narri marda, narrili waki kudanyu nangangi yurrngumba barri. Nanankardi barri jangambala mili jungku wanka nangandu yurrngumba barri. Barriwa.
PHI 2:1 Jala narri durrijba nanda yuwa nangangi Jisus Krayiskanyi, baki yanka narri jungku. Nyulu kuna yabimbaka narrinya ngiruka nangangi Jisus Krayiswanyi. Jungkuka kuna nanda Kunyba Ngarndu Kudkanyi narrindu kurduluna. Mirnarrijbangka kuna narri muwa, narri nuliykanyi yabimbikanyi narringka kunybanyi yajinyi. Nani kuna narri jungku. Ngala narri jingkijba, narri jungkuka nani jala narri durrijba Jisus Krayis. Narri jungkuka ngiruka nangangi. Nanda Kunyba Ngarndu Kudkanyi, nyulu jungkuka narrindu, baki narri nulijba yabimbikanyi narringka kunybanyi yajinyi.
PHI 2:2 Ngayu jingkijbangka narrinya jala durrijba Jisus Krayis, ngayu jingkijbangka narrinya, narri jungkuka nani. Jingkijbangka ngayu, narri jungkuka nani, jungkukangangi ngayu nani marda. Jangayu mirnarrijba muwa narringi jalija narri jungku nani, jalija narri jungku barrinani ngayu. Jangambalaka mankumanku nanamannga yajinyi. Jangambalaka maruka muwa. Jangambala jungku malumba, barrinani ngayu, barrinani narri, yabimbajangangi ngambalanya jungunkanyi nani Kunybawanyi Ngarnduwanyi Kudkanyi. Jangayu kudanyu mirnarrijba muwa narringi, jala ngayu jingkijba narrinya, narri jungkuka nani.
PHI 2:3 Marda narrimi miku yabimba yaji, nulijbangangi narri yalungi, yalungka mankumankunkanyi narringi, narri walkurra mambuka jurjkanyi. Marda narrimi miku nanankardi yabimba yaji yalungi. Ngala jala narri yabimba kunyba yaji yingkanyi, baki mikujiyi karu yalunya nanankanyi kunybanyi yajinyi. Mikujiyi karu yalunya nanankanyi jali narri yabimba. Marda nganyingkimi mankumanku, “Yingkamuku yalu jungku kunyba nangangi Jisus Krayiskanyi. Yalu mili kunyba ngaki. Yalu jungkuka mili yurlurrmba nangangi Kudkanyi.”
PHI 2:4 Mikujiyi yabimba nanda jala ngawamba kunyba nganyi. Ngala marda ninjimi yabimba nanda jala kunyba yalungi yingkamukuyngka, miku nanda jala ngawamba kunyba nganyi. Marda ninjimi jungku barrinani nanda wakiwarr yalungi.
PHI 2:5 Nani barri jungkuyi Jisus Krayis. Nyuli yabimba kunyba yaji yalungi yingkamukuyngka. Nyuli barrinani wakiwarr yalungi. Marda narrimi jungku barrinani nyulu. Marda narrimi brijba nayinda wangarr barrinani yalu brijba Krisjinmukunyi. Yalili brijba nayinda wangarr nangangi Jisus Krayiskanyi.
PHI 2:6 Nanda barri nyulili jungku barrinani Kud. Nyulili jungku malumba nangandu. Nangkili mankumanku nanamannga jangkurranyi. Nyulili yanyba nanamannga jangkurr barri. Ngala miku nangkiyanyi mankumanku, janangka yabimba walkurra barrinani Kud. Miku nangkiyanyi mankumanku nani.
PHI 2:7 Ngala nangki yabimba bayakarda, baki yabimba nyuli nayi barri. Karrala nyuli wayka jambarri, baki jungku nyuli nganinyi barrinani ngambala. Nyuli jandanyi nangangi Kudkanyi, ngala jungku nyuli wakiwarr ngambalangi. Miku nangkiyanyi yarrijba mambuka ngambalangi, ngala nangki bayakardamba. Nangki yarrijba wakiwarr ngambalangi baki nangangi, nanganginkanyi Buwakaya Kudkanyi. Nani barri nangki bayakardamba barri. Ngayangayijba nyuli nanganginkanyi jangkurranyi Buwakaya. Ngayangayijba nyuli nanganginkanyi jangkurranyi yurrngumba. Ngayangayijba nyuli nanankanyi jangkurranyi janybikanyi nangka ngambalangi. Baki janyba nangki wabangkarra kurndana ngambalangi barri. Nani barri nangki bayakardamba barri.
PHI 2:9 Baki nanankardi barri walkurrambayi Jisus Krayis Kudwanyi. Nanankardi barri mili wankambayi Jisus Krayis Kudwanyi, baki yanybayi Kud nangangi, “Nayinda ngaki jandanyi, nyulu walkurramirra mambuka yalungi. Nyulu wirimalaru yalungi bukambijuyngka wandijiyana.” Jayalu wajba Jisus Krayis kunybanyi jangkurranyi yalunginkanyi. Bukambijunyi wandijiyana jayalu wajba Jisus Krayis kunybanyi jangkurranyi. Yanjilmuku jala jungku lalijina, nganinyimuku baki jibarrimuku jala jungku jambana, baki wuwarrmuku junu, jayalu kunybanyi jangkurranyi wajba Jisus Krayis nanda jala jandanyi nangangi Kudkanyi, jala wirimalaru bukambijuyngka yalungi wandijiyana. Jayalungka yanyba, “Ngambala jingkijba Jisus Krayis, nyulu walkurra mambuka ngambalangi. Nyulu wirimalaru ngambalangi.” Nani barri jayalungka yanyba, baki nanankardi barri jayalu jingkijba Kud, nyulu jungkuka kunybamirra, nyulu walkurramirra mambuka. Nyulu yabimbaka kunyba yaji yalungi bukambijuyngka. Barriwa. Nani barri marda narrimi brijba.
PHI 2:12 Ngakinmuku kandimuku, jala ngayu maruka muwa narringi. Wabula barri, jali ngayu jungku nanaba Bilibayi narrindu, baki narri ngayangayijba ngakinkanyi jangkurranyi. Narri ngayangayijba ngakinkanyi jangkurranyi yurrngumba barri, baki nanda kunyba. Baki nanijba barri, ngala ngayu miku jungku narrindu, marda narrimi yuwajiwa ngayangayijba ngakinkanyi jangkurranyi. Jala narri yuwajiwa ngayangayijba ngakinkanyi jangkurranyi baki nanda kunybamirra. Wabula barri ngayi karu narrinya, narri ngayangayiji jangkurranyi Kudkanyi. Marda narrimi yuwajiwa ngayangayijba nanganginkanyi jangkurranyi. Marda narrimi miku yurlwa nanganginkanyi jangkurranyi. Ngala marda narrimi kudanyu ngayangayijba nanganginkanyi jangkurranyi yurrngumba barri. Marda narringkimi lalanba yurrngumba, marda narringkimi maruka muwa yurrngumba, baki janyulu marrimba narrinya mardarda Kudwanyi. Janyulu marrimba narrinya mardarda, baki janarri jungku wanka nangandu baku barri, jaliyi narringka wakimba nani barri.
PHI 2:13 Marda narringkimi wakimba nani, yabimbakangangi narrinya ngiruka Kudwanyi wakinkanyi nangangi. Yurrngumba nyulu yabimbaka narrinya ngiruka barri. Jaliyi narri nulijba durriykanyi Kud, baki janyulu yabimba narrinya ngiruka. Janarrinya yabimba ngiruka yabimbikanyi nanda jala nyulu nulijba narringi yabimbikanyi.
PHI 2:14 Marda narrimi mirnarrijba muwa, ngala narri waki nangangi Kudkanyi. Marda narrimi mirnarrijba muwa. Ngala marda narrimi miku jurlwa yalungi yingkamukuyngka. Marda narringkimi miku jakakajba, ngala marda narrimi mirnarrijba muwa yurrngumba barri, ngala narri waki nangangi Kudkanyi.
PHI 2:15 Baki janarri jungku kunyba nangangi Kudkanyi, janarri jungku yurlurrmba nangangi. Jaliyi narri jungku nani, baki narri barrinani kunyba bayamuku jala yalu ngayangayijba yalunginkanyi ngardanganjanyi. Yalu kunyba bayamuku. Nani yalu yabimbaka kunyba yaji. Ngala balkimuku bayamuku, miku yalimi ngayangayijba yalunginkanyi ngardanganjanyi. Balki yalu jungkuka. Nani barri yalu yabimbaka balki yaji. Narri barrinani kunyba bayamuku. Narri jungkuka yalundu balkimukunyina, ngala narri kunybamuku. Baki yingkamukunyi jayalu najba narrinya jungunkurri kunyba, ngayangayijbangangi narri nanankanyi kunybanyi jangkurranyi Jisus Krayiskanyi. Jayalu najba narrinya jungunkurri yurlurrmba nanganginkanyi yuwanyi.
PHI 2:16 Marda narrimi jungku nani barri. Marda narrimi marrimba nanda jangkurr nangangi Jisus Krayiskanyi, nangangi jangkurr jungunkanyi mili wanka. Marda narrimi kudanyu marrimba nangangi jangkurr mardarda narringinyina kurduluna, ngala narri milidimba yalunya. Jaliyi narri jungku yurlurrmba nangangi nani, baki jangayu mirnarrijba muwa narringi. Jangayu mirnarrijba muwa, mikungangi muningka ngayi milidimba narrinya. Narrinyi milidimba duja jangkurranyi, baki narri jungkuyi yurlurrmba nangangi Kudkanyi yurrngumba barri. Baki baku barri jalija wijba Jisus Krayis, janyulu yabimba kunyba yaji ngaki. Kunyba yaji janyulu yabimba ngaki, mardardangangi narri marrimba nanda jangkurr jali narrinya milidimba. Durrijba narri nanda jangkurr yurrngumba barri.
PHI 2:17 Narri jingkijba yalunya Jumuku, yalili wajba Kud barnyinyi. Yalili wajba Kud yiningki julakinyi, yiningki bulukinyi, yiningki jibkanyi. Waluku yalili karlba duka, bakili barlba ngulya. Bakili yalu bakarrijba nanda barnyi, munyurrijba barnyi yundu dungalana, niji Yalda. Nani barri yalili wajba Kud barnyinyi. Wabula barri nganarri kandimba, nganarri wajba dungalanyi, ngayu wudumbikanyi mama baki jumbala. Baki nanda barrinani narri wajba Kud yajinyi, barrinani yalili wajba Kud barnyinyi. Mirnarrijba narri muwa waykanyi ngana dungalanyi. Baki ngayu barri, muningka ngayu jungku barrinani nanda barnyi waykanyi Kud, kuyungangi narri nangangi jangkurr Kudkanyi. Mankumanku ngaka, yiningki jangaka janyba winyurruwa. Jaliyi jangananjalu kurdanba, baki nanda barrinani waykanyi Kud ngakinkanyi mankankanyi. Jaliyi jangananjalu kurdanba, baki miku ngayiyi balkijba muwa, ngala jangayu mirnarrijba muwa. Baki marda narrimi mirnarrijba muwa ngakindu marda.
PHI 2:18 Wabula barri nganarri kandimba, baki nanankardi marda narrimi mirnarrijba muwa jala ngayu mirnarrijba muwa. Miku ngayiyi balkijba muwa, ngala jangayu mirnarrijba muwa, baki nani barri marda narrimi mirnarrijba muwa ngakindu, jaliyi jangananjalu kurdanba. Barriwa.
PHI 2:19 Mankumanku ngaka, yiningki jangayu manjijba ngaki kandi Dimudi narrindurri. Jangayu manjijba Dimudi narrindurri, jaliyi nulijba Kud ngaki, manjiykanyi Dimudi narrindurri. Jaliyi nyulu yidamba narrinya, baki janyulu manjijba jangkurr ngakindurri. Jangana karu narringi, yanka narri jungku nangangi Jisus Krayiskanyi. Baki jangayu mirnarrijba muwa, jalija ngayu manku narringi, narri jungku yurlurrmba nangangi Jisus Krayiskanyi.
PHI 2:20 Nganarri jingkijba, maruka ngayu muwa narringi kudanyu barri. Baki Dimudi marda, nyulu marda marukangka muwa narringi kudanyu, barrinani ngayu. Nulijbangka nyulu yidambikanyi narrinya, jungunkanyi narrindu. Nulijbangka nyulu lalanbikanyi narrinya Krisjinmuku. Nulijbangka nyulu yabimbikanyi narrinya jungunkanyi mili ngiruka nangangi Kudkanyi.
PHI 2:21 Nulijbangka nyulu milidimbikanyi narrinya. Nulijbangka nyulu narringi jungunkanyi mili kunyba nangangi Kudkanyi. Ngala yingkamuku, miku yalimi nulijba lalanbikanyi yalunya Krisjinmuku. Ngawamba yalu nulijba, yalungka lalanbikanyi. Miku yalimi nulijba yabimbikanyi narrinya ngiruka nangangi Jisus Krayiskanyi.
PHI 2:22 Narri jingkijbangka nayinda Dimudi, nyulu kunyba wakiwarr nangangi Jisus Krayiskanyi. Kudanyu nyulu wakingka nangangi. Milidimbaka nyulu yalunya nanganginkanyi kunybanyi jangkurranyi yurrngumba barri. Maruka ngayu muwa nangangi. Baki narri marda marukangka muwa nangangi. Ngaliya Dimudi, malumba ngaliya wakiyi, barrinani nijanganjinyi baki jandanyi. Malumba ngaliya wakiyi nangangi Jisus Krayiskanyi. Ngaliya karuyi yalunya kajamuku nanganginkanyi kunybanyi jangkurranyi Jisus Krayiskanyi.
PHI 2:23 Nanankardi barri, nulijba ngayu manjiykanyi Dimudi karri narrindurri. Jangayu manjijba baku barri jalija ngaka jingkijba. Yiningki jangananjalu kurdanba, ngala yiningki jangananjalu muningka manjijba brisinanyi. Jalija ngaka jingkijba wanyimba jayalu ngaki, baki jangayu manjijba Dimudi narrindurri.
PHI 2:24 Ngala ngambalangi mambuka Jisus Krayis, nyulu mambuka ngaki, wanyimba jayalu ngaki. Yuku yalu yabimba ngaki ngawamba nanda jala nyulu nulijba yalungi yabimbikanyi ngaki. Nani ngayu jingkijba Jisus Krayis, baki nanankardi mankumanku ngaka, jangayu marda jilajba karri narrindurri, jangayu marda yidamba narrinya winyurruwa.
PHI 2:25 Ngayu manjijbangka Yibabrudidus narrindurri. Nyulu barrinani bababanyamba ngayu. Waluwa nyulili waki malumba ngakindu nangangi Kudkanyi. Ngaliya karuyi yalunya kunybanyi jangkurranyi nanganginkanyi Jisus Krayiskanyi. Ngaliya karuyi yalunya kajamuku nanganginkanyi jangkurranyi. Yuwajiwa ngali karuyi yalunya jala yingkamukunyi yali yabimba kiji ngalingi. Wujina narri manjijbayi Yibabrudidus bayungu ngakindurri, nyulu lalanbiji ngana, nyulu wakinki ngakindu nangangi Jisus Krayiskanyi. Miku ngayimi yabimba kudiya yaji ngala ngayu jungku nayiba brisinyina. Ngala narri manjijba Yibabrudidus, nyulu yabimbiji nanda yaji ngaki jala miku ngayimi yabimba. Narri manjijbayi nanda ngakindurri lalanbiji ngana, ngala nanijba barri ngayu manjijbangka narrindurri karri.
PHI 2:26 Narri mankuyi jangkurr nangangi, lunji nyuli, ngala nyuli jungku nayiba ngakindu, baki balkijba narri muwa nangangi. Baki Yibabrudidus barri, jali nyulu manku jangkurr narringi, narri balkijbayi muwa nangangi, baki nyulu nginduyi muwa narringi. Ngindu nyuli muwa narringi, baki nulijbangka nyulu wiykanyi narrindurri.
PHI 2:27 Yi, duja nanda jali narri manku nangangi, nyuli lunji. Lunji nyuli kudanyu barri. Barringa barri nangkiya janyba, ngala miku, baki yuku nyulu nanijba barri. Miku nyulimi yuwajiwa lunji, yabimbayingangi kunyba yaji nangangi Kudwanyi, kunymambayingangi. Nani barri yabimbayi Kudwanyi kunyba yaji nangangi baki ngaki marda, ngindungangi ngayi muwa nangangi. Kudanyu ngayi ngindu muwa nangangi. Ngala yabimbayi nanda ngiruka yaji nangangi Kudwanyi, baki yuku kunyba nangangi mankanyi nanijba barri.
PHI 2:28 Nanankardi barri ngayu nulijba manjiykanyi Yibabrudidus narrindurri, baki narrija najba jungunkurri kunyba mankanyi nangangi. Jalija narri najba kunyba mankanyi nangangi, baki janarri mirnarrijba muwa nangangi. Jalija narri mirnarrijba muwa nangangi, baki jangayu mirnarrijba muwa narringi marda.
PHI 2:29 Jalija nyulu wanbiya baki janarri maruka muwa nangangi. Marda narrimi kandimba, wakingangi nyulu kudanyu nangangi Kudkanyi. Nyulu baki narri bababanyamba narringka. Marda narrimi mirnarrijba muwa nangangi. Marda narrimi wajba nanda kunybanyi jangkurranyi. Nani barri marda narrimi wajba yalunya kunybanyi jangkurranyi. Marda narrimi wajba bukambiju yalunya jala yalu waki kudanyu nangangi Kudkanyi.
PHI 2:30 Marda narrimi wajba nanda kunybanyi jangkurranyi, mikungangi nyuliyanyi nulijba, lalanbikanyi nangka mankanyi nangangi, jungunkanyi kunyba mankanyi. Ngala nyuli nulijba wakinkanyi nangangi Jisus Krayiskanyi. Narri manjijbayi Yibabrudidus nanginkurri ngakindurri. Narri manjijbayi nanda lalanbiji ngana, mikungangi ngana narriyi lalanba, jungkungangi narri juju karru. Yi. Ngala ngana nyuli lalanba, baki barringa barri nangkiyala janyba. Ngala miku, kunybijbayi barri mankanyi. Marda narrimi wajba nanda kunybanyi jangkurranyi, kudanyungangi nyuli lalanba ngana narringi. Barriwa.
PHI 3:1 Baki mili nayinda jadunyi jangkurr ngayu yarrijba narringi, ngakinmuku bababanyamba ngambalaka. Marda narrimi mirnarrijba muwa, bababanyambangangi nyulu narrinya Jisus Krayiswanyi. Mili jangayu karu narrinya nanamannga jangkurranyi, jali ngayu karu narrinya wabula. Ngala miku narriyi balkijba muwa, jalija ngayu karu narrinya nanamannga jangkurranyi, jungkungangi janarri mardarda nangangi Kudkanyi, jaliyi narri durrijba nayinda jangkurr.
PHI 3:2 Najbawa narri nanamuku jala yalu jungku balki. Najbawa yalunya. Yalu balkimuku balkimirra. Kudanyu yalu karu narrinya, mardakimi yingkawanyi kaburrmba narrinya mankanyi. Yalu jungku balki jala yalu karu narrinya nani.
PHI 3:3 Jaliyi yalu kaburrmba narrinya mankanyi, baki mikuwali nanangini yabimba narrinya jungunkanyi yurlurrmba nangangi Kudkanyi. Miku narriyi jungku yurlurrmba nangangi, jungkungangi narri kaburrwaburr. Miku barri. Ngala ngambala Krisjinmuku, ngambala wajba Kud kunybanyi jangkurranyi ngambalanginkanyi, jungkukangangi nanda Kunyba Ngarndu Kudkanyi ngamandu kurduluna. Mirnarrijba ngambala muwa, bababanyambangangi nyulu ngambalanya Jisus Krayiswanyi. Ngambala jandanyimuku nangangi Kudkanyi, kuyungangi ngambala nanda jangkurr nanganginkanyi jandayngkanyi Jisus Krayiskanyi. Miku ngambalimi nanganginmuku jandanyimuku, yabimbangangi ngambala wangarr. Miku. Bababanyamba nyulu ngambalanya Jisus Krayiswanyi, baki nanankardi ngambala jingkijba, ngambala jandanyimuku nangangi Kudkanyi. Mikukimi wangarrwanyi yabimba ngambalanya jungunkanyi yurlurrmba nangangi. Miku.
PHI 3:4 Jalimi yuku nganinyi jungku yurlurrmba nangangi Kudkanyi, yabimbangangi nyulu kaja ngiruka wangarr, baki marda ngayimi jungku yurlurrmba nangangi yurrngumba. Marda ngayimi kudanyu jungku yurlurrmba nangangi, yabimbangangi ngayi kaja wangarr wabula.
PHI 3:5 Kaja wangarr ngayi yabimba wabula nayi barri. Jali ngayu buyingkinyi bardarda, jali ngayu jungku yingamali wik, baki yingkawanyi kaburrmbayi ngaki mankanyi. Ngayu Ju, ngaki yaji Yisrayil. Ngaki wankalanyi nijanganjinyi, niji nangangi Binjamin. Bukambiju jali jungku juju bayngkani nangandu, yalu marda Jumuku. Baki ngayu Barasi marda. Narri jingkijba yalunya Barisimuku, kudanyu yalu durrijba nanda yuwa nurrungi Jumukuyngka.
PHI 3:6 Baki ngayu marda, kudanyu ngayi durrijba nanda yuwa nurrungi Jumukuyngka. Kudanyu ngayi ngayangayijba nanankanyi yuwanyi. Baki nanankardi barri ngayi yabimba kiji yalungi Krisjinmukuyngka yurrngumba barri. Kaja kiji ngayi yabimba yalungi jali kuyu jangkurr nangangi Jisus Krayiskanyi. Nani barri kudanyu ngayu durrijbayi nanda yuwa nurrungi Jumukuyngka.
PHI 3:7 Nani barri ngamu ngayi jungku yurlurrmba nangangi Kudkanyi, durrijbangangi ngayi nurrungi yuwa Jumukuyngka, ngala miku. Ngala nanijba barri, barriwa barri bukamba nanda yuwa ngaki. Miku ngayimi mili durrijba nanda yuwa, ngala ngayu durrijba nanda buyingkinyi yuwa nangangi Jisus Krayiskanyi, ngayu kuyungka nangangi jangkurr.
PHI 3:8 Mirnarrijba ngayu muwa, jungkungangi ngayu jandanyi nangangi Kudkanyi, baki durrijbangangi ngayu Jisus Krayis. Nanankardi barri kudanyu ngayu jingkijba Jisus Krayis. Nayinda jirrinyi ngaki. Ngawamba nayinda jirrinyi ngaki, jingkiykanyi ngaki mambuka Jisus Krayis, jingkiykanyi nanda kudanyu barri. Mikuyaji yingkanyi jirrinyi ngaki barrinani nanda. Yabimba ngayu nanda jala jirrinyi ngaki. Jaliyi yingkawanyi yajiwanyi kurrkunba ngana jingkiykanyi Jisus Krayis, baki ngayu janyba nanda yingka ngakinbunanyi. Nanda yingka nanda barrinani kaka ngaki, baki ngayu janyba nanda ngakinbunanyi. Miku ngayimi nulijba yingkanyi yajinyi. Ngawamba ngayu nulijba jingkiykanyi Jisus Krayis. Ngayu nulijba nangangi, bababanyambikanyi nyulu ngana. Jingkijba ngayu, miku bababanyamba nyulimi ngana, jungkungangi ngayu yurlurrmba yuwana Jumukuyngka. Ngala bababanyamba nyulu ngana, jungkungangi ngayu yurlurrmba nangangi Kudkanyi, jala ngayu kuyu nangangi jangkurr Jisus Krayiskanyi. Jala ngayu jungku yurlurrmba nangangi nani barri, baki ngayu jingkijba Jisus Krayis yurrngumba barri.
PHI 3:10 Ngawamba ngayu nulijba jingkiykanyi Jisus Krayis. Kudanyu ngayu nulijba jingkiykanyi nanda. Yalu kurdanbayi nanda jandanyi nangangi Kudkanyi. Waluku yali linjumba mankanyi. Kudanyu yali linjumba mankanyi, baki yali kurdanba. Ngala yabimbayi ngiruka yaji nangangi Kudwanyi. Wankamba nyuli Jisus Krayis, baki nanankardi nyulu jungkuka kingkarri nangandu Kudnyina. Nyulu jungkuka ngiruka marda barrinani nangangi Buwakanya nyulu ngiruka barri. Baki ngayu marda, nulijba ngayu jungunkanyi ngiruka nangangi. Jaliyi ngananjalu linjumba, baki janyulu yabimba ngana ngiruka nangangi Jisus Krayiswanyi. Jangayu jungku ngiruka nangangi Jisus Krayiskanyi, barrinani jungkuka Jisus Krayis ngiruka nangangi Kudkanyi. Nulijba ngayu jungunkanyi, barrinani nganinyiyurru nangangi Sayidinkanyi, baki jangayu yurlwa nangangi. Ngala ngayu nulijba jungunkanyi ngiruka nangangi Jisus Krayiskanyi.
PHI 3:11 Jalija ngayu jungku ngiruka nangangi yurrngumba, baki ngayu nulijba nangangi Kudkanyi, nyulu wankambikanyi ngana jalija ngaka janyba. Nani barri jangayu jungku barrinani Jisus Krayis.
PHI 3:12 Ngala miku ngayimi yanyba, ngayu jungku kunyba nangangi Jisus Krayiskanyi yurrngumba barri. Miku ngayimi yanyba nani ngaki, jingkijbangangi ngaka, kudiyana ngayu jungku balki nangangi. Ngala ngayu nulijba jungunkanyi yurlurrmba nangangi. Yurrngumba ngayu nulijba jungunkanyi yurlurrmba nangangi, jingkijbangangi ngayu Kud, janyulu yabimba kunyba yaji ngaki. Kunyba yaji janyulu yabimba ngaki, jalija ngayu jungku kunyba nangangi Jisus Krayiskanyi. Janyulu yabimba kunyba yaji ngaki, jalija ngayu jungku mili barrinani nyulu, baki mili barrinani nyulu yurrngumba barri.
PHI 3:13 Miku ngakimi mankumanku, “Ngayu kunyba Krisjin, ngayu kunybamirra nangangi Jisus Krayiskanyi. Miku ngayimi mili jungku kunyba nangangi.” Miku ngakimi mankumanku nani, jingkijbangangi ngaka, miku ngayimi jungku kunyba nangangi yurrngumba. Miku barri. Ngala miku ngakimi mankumanku, wabuliyngkanyi yajinyi, yanka ngayi jungku balki nanamanji. Ngala ngaka mankumanku bakunyi yajinyi. Ngaka mankumanku yanka jangayu jungku baku barri, yanka jangayu jungku mili kunyba baki mili kunyba nangangi Jisus Krayiskanyi.
PHI 3:14 Nani barri ngaka mankumanku. Yarrijba ngana nangangi jandanyi Kudwanyi. Nanamanji barri Jisus Krayiswanyi, nyuli karu ngana, ngayu wakinki nangangi, baki nanankardi ngayu nulijba jungunkanyi mili barrinani nyulu Jisus Krayis. Nulijba ngayu yabimbikanyi nanda jalija yabimba ngana jungunkanyi mili barrinani nyulu. Nulijba ngayu jungunkanyi barrinani nyulu. Nulijba ngayu nangangi, bababanyamba nyulu ngana, baki nulijba ngayu jungunkanyi wankan nangandu baku barri. Nani ngayu nulijba, jungunkanyi mili barrinani nyulu yurrngumba barri.
PHI 3:15 Baki bukambiju ngambala Krisjinmuku, marda ngambalimi miku jardijba mardil kurdulu nangangi Jisus Krayiskanyi, ngala marda ngambalimi jardijba walkurra kurdulu barrinani nyulu ngambalangi mambuka. Marda ngambalimi jungku nani, baki marda ngambalimi nulijba jungunkanyi mili barrinani nyulu, baki mili barrinani nyulu yurrngumba barri. Ngala jaliyi narri miku nulijba jungunkanyi nani barri, baki janyulu minimba narrinya Kudwanyi. Janyulu minimba narrinya, narri nuliykanyi jungunkanyi barrinani nyulu Jisus Krayis.
PHI 3:16 Ngala barriwa barri nanda jangkurr ngayi yanyba. Ngambala jala jungku yurlurrmba nangangi Kudkanyi, jala jungku yurlurrmba nangangi yurrngumba wabulinyi nanginkurri, marda ngambalimi jungku mili yurlurrmba baki mili yurlurrmba nangangi yurrngumba barri. Barriwa.
PHI 3:17 Ngakinmuku bababanyamba ngayu narrinya. Marda narrimi yabimba nanamannga jala ngayu yabimba yaji. Marda nganarrimi durrijba, barrinani ngayu durrijbangka Jisus Krayis. Marda narrimi jungku kunyba nangangi Kudkanyi yurrngumba barri. Baki yingkamuku Krisjinmuku jala jungku yurlurrmba nangangi, marda narrimi durrijba yalunya marda, barrinani yalu durrijbangka Jisus Krayis.
PHI 3:18 Wabula ngayili karu narrinya, baki mili ngayu karungka narrinya. Kudanyu ngayu karungka narrinya. Kajamuku yalu jungku balki nangangi Jisus Krayiskanyi. Yalu jungku balki nangangi yurrngumba barri. Waluwa yalili durrijba Jisus Krayis, ngala nanijba barri yalu ngirra Jisus Krayis, jali nangka janyba kurndana ngambalanginkanyi balkinyi yajinyi. Miku yalimi durrijba Jisus Krayis, ngala ngirra yalu. Kudanyu ngayu nginduka muwa yalungi yangkalambangangi yalungki nanganbunanyi.
PHI 3:19 Baki nanankardi barri janyulu manjijba yalunya jangurri Yilyurri Jisus Krayiswanyi. Jalija yalungka janyba, baki jayalu jungku kurdan yurrngumba, nulijbangangi yalu yajinyi yalunginkanyi mankankanyi. Nulijba yalu dungalanyi baki kajanyi yajinyi yalunginkanyi mankankanyi, ngala miku yalimi nulijba durriykanyi Jisus Krayis. Marda yalimi manyirru yalunginkanyi balkinyi yajinyi jala yalu yabimba. Marda yalimi manyirru, ngala miku. Barrarrakijba yalungka nanankanyi balkinyi yajinyi jala yalu yabimba. Mankumanku yalungka yajinyi nanginyina yajina jambana, ngala miku yalungkimi mankumanku nangangi Kudkanyi.
PHI 3:20 Ngala ngambala Krisjinmuku, ngambala mungkijimuku nanankanyi yajinyi kingkarri. Ngambala yukumbaka nangangi Jisus Krayiskanyi, nyulu wiykanyi lalijinanyi nanginkurri wayka. Janyulu marrimba ngambalanya mardarda ngambalanginyi mambukawanyi Jisus Krayiswanyi.
PHI 3:21 Jalija nyulu wijba, baki janyulu wajba ngambalanya yingkanyi mankankanyi. Buyingkiyngkanyi mankankanyi jangambalanya wajba, barrinani nangangi mankanyi. Nayinda mankanyi ngambalangi, miku nayinda ngiruka. Mikukimi jungku wankan yurrngumba. Ngala ngambalangi buyingkinyi mankanyi, nanda jungkuja ngiruka, jungkuja mili wanka yurrngumba barri. Nani barri janyulu yabimba yaji ngambalangi, nyulungangi ngiruka. Ngirukamirra nyulu bukambijuyngka wandijiyana. Nyulu mambuka bukambijuyngka yajinyi nayiba jambana, baki kingkarri lalijina marda. Mambuka nyulu bukambijuyngka yajinyi. Barriwa.
PHI 4:1 Ngakinmuku bababanyamba ngayu narrinya. Kudanyu ngayu maruka muwa narringi. Ngurungurujba ngayu narringi, jungunkanyi narrindu barndana. Ngala ngayu mirnarrijba muwa narringi. Mirnarrijba ngayu muwa narringi, jungkungangi narri kunyba nangangi Jisus Krayiskanyi. Marda narrimi jungku ngiruka nangangi, ngambalanginkanyi mambukanyi. Marda narrimi jungku mili ngiruka nangangi yurrngumba barri.
PHI 4:2 Nimbala jibarriwuya, niji barri Yuwudiya baki Sindiki, jakakajba nimbalaka. Ngala kudanyu ngayu ngajakangka nimbalanya, wijba nimbalakiyi jakakajba. Janimbala malumba jungku. Janimbala jungku kandiwuya nangangi ngambalanginkanyi mambukanyi.
PHI 4:3 Baki ninji marda, ngaki kandi jali waki malumba ngakindu wabula, ngayu nulijba nganyi kandimbikanyi bulanya jibarriwuya. Marda ninjimi kurrkunba bulanya jakakaykanyi bulangka, baki jabula malumba jungku, jabulangka mardumardujba muwa. Wabula buli waki kudanyu ngakindu, karu buli yalunya kajamuku nanganginkanyi jangkurranyi Jisus Krayiskanyi. Baki nanda nganinyi, niji Klimin, baki yingkamuku Krisjinmuku, yali marda waki nangangi Jisus Krayiskanyi. Yali marda karu nanganginkanyi duja jangkurranyi. Yalu jala waki kudanyu nangangi nani, miku nyuliyi mamanumba yalunya Kudwanyi, ngala nyuli nijba niji yalunya najana. Nanamuku yalungi niji nanganginyina najana, janyulu wankamba yalunya baku Kudwanyi, yalu jungunkanyi wanka nangandu yurrngumba barri.
PHI 4:4 Ngayu yanybaka mududu nangangi Kudkanyi narringi. Ngayu ngajakangka Kud, janarri mirnarrijba muwa nangangi, nyulungangi bababanyamba narrinya Jisus Krayiswanyi. Baki mili ngayu yanyba narringi, ngayu nulijba narringi mirnarriykanyi muwa nangangi, bababanyambangangi nyulu narrinya yurrngumba barri.
PHI 4:5 Jaliyi yingkamukunyi yalu yabimba kiji narringi, jaliyi narrinya linjumba, baki marda narrimi miku yabimba kiji yalungi. Baki marda narrimi miku daba yalunya. Ngala marda narrimi jungku karda yalungi. Marda narrimi jungku mardumardu muwa yalungi, wijbangangi janyulu winyurruwa ngambalangi mambuka Jisus Krayis. Jaliyi narri jungku mardumardu muwa yalungi, jala yabimba kiji narringi, jaliyi narri miku daba yalunya, baki janyulu yabimba kunyba yaji narringi Jisus Krayiswanyi. Janyulu yabimba kunyba yaji narringi, jalija nyulu wijba.
PHI 4:6 Marda narrimi miku balkijba muwa yajinyi. Jaliyi narri jungku kijiyudi, baki marda narrimi miku balkijba muwa nanankanyi kijinyi. Miku narriyi jungku mardumardu muwa nangangi Jisus Krayiskanyi, jala narri balkijba muwa narringinkanyi yajinyi. Ngala marda narrimi ngajaka Kud nanankanyi yajinyi jala narri nulijba, barrinani mamanyi, baki jumbalanyi. Marda narrimi ngajaka Kud nanankanyi yajinyi. Baki janarri mirnarrijba muwa nangangi Kudkanyi, jingkijbangangi narri Kud, janyulu wajba narrinya nanankanyi jala narri nulijba. Marda narrimi mirnarrijba muwa nangangi, yabimbangangi nyulu narrinya jungunkanyi mardumardu muwa.
PHI 4:7 Jala narri jungku kijiyudi, baki yuwajiwa nyulu yabimbaka narrinya jungunkanyi mardumardu muwa Kudwanyi. Janarri mardumardu muwa nanankanyi kijinyi, Kudngangi. Miku ngambalimi jingkijba, yanka nyulu yabimbaka ngambalanya jungunkanyi mardumardu muwa, jala ngambala jungku kijiyudi. Miku ngambalimi jingkijba yanka barri. Ngala ngambala jingkijba, ngambala jungku mardumardu muwa, bababanyambangangi nyulu ngambalanya Jisus Krayiswanyi. Baki jangambala miku balkijba muwa nanankanyi kijinyi, ngala ngambalaja mardumardu muwa.
PHI 4:8 Nayinda jadunyi jangkurr ngayu karungka narrinya, ngakinmuku bababanyamba ngayu. Marda narringkimi miku mankumanku balkinyi yajinyi. Ngala marda narringkimi mankumanku ngawamba kunybanyi yajinyi yurrngumba barri. Marda narringkimi mankumanku duja jangkurranyi, baki yurlurrmba yajinyi barri. Marda narrimi jungku yurlurrmba nangangi Kudkanyi, marda yalungi nganinyimukuyngka. Nyulu mirnarrijbangka muwa Kud narringi, jala narringka mankumanku nani. Nani barri ngayi milidimba narrinya wabula. Ngayu milidimbayi narrinya, narringka mankumankunkanyi nani. Narri mankuyi ngaki jangkurr, baki nganarri najba yabimbikurri nanda kunyba yaji. Marda narrimi yabimba nanamannga yaji barrinani nganarri najbayi yabimbikurri nanda yaji. Jaliyi narringka mankumanku kunybanyi yajinyi yurrngumba barri, baki janarri yabimba kunyba yaji barrinani ngayu yabimba. Baki janyulu mirnarrijba muwa narringi Kud, janyulu wajba narrinya mardumardu muwa. Janarri jungku mardumardu muwa yurrngumba barri. Barriwa.
PHI 4:10 Ngala ngayu yuwajiwa jungku nayiba brisinyina, baki bababanyamba nyulu ngana Jisus Krayiswanyi, baki yuwajiwa ngayu wakingka nangangi. Mirnarrijba ngayu muwa narringi, manjijbangangi narri dungala ngakindurri. Ngayu jingkijbangka narrinya, nulijbayi narri lalanbikanyi ngana wabula barri. Nulijbayi narri waykanyi ngana dungalanyi, ngala miku nganarriyi wajba yajinyi nanamanji barri. Miku nganarriyi wajba nani. Ngala nanijba barri nganarri wajba dungalanyi, baki nanankardi ngayu mirnarrijba muwa narringi.
PHI 4:11 Wabula barri ngayi jungku mikuyaji dungalanyi wudumbikanyi ngaki yaji. Ngala ngayu jingkijba narrinya, miku nganarriya mamanumba. Ngala marda narrimi miku balkijba muwa ngaki, jingkijbangangi ngayu Kud, ngana nyulu lalanbaka yurrngumba. Mirnarrijba ngayu muwa, jala ngayu jungku mikuyaji dungalanyi, baki jala ngayu jungku dungalayudi. Mirnarrijba ngayu muwa yurrngumba barri, jingkijbangangi ngayu Kud, ngana nyulu lalanbaka yurrngumba barri.
PHI 4:12 Wabula barri kudiyana ngayili jungku mikuyaji mamanyi, mikuyaji jumbalanyi. Baki kudiyana ngayili jungku kajayudi mamayudi, baki jumbalayudi. Nani ngayili jungku wabula. Ngala ngana minimbayi nayi Kudwanyi, yuku ngayu mirnarrijba muwa yurrngumba barri, jala ngayu kajayudi yajiyudi, baki jala ngayu mikuyaji yajinyi. Yuku ngayu mirnarrijba muwa, jala ngayu wardijba muwa, baki jala ngayu birrkalanyi muwa. Miku ngayiyi balkijba muwa, ngala ngayu mirnarrijba muwa yurrngumba barri.
PHI 4:13 Ngayu mirnarrijbangka muwa, nyulungangi yabimbaka ngana ngiruka ngakinyi mambukawanyi Jisus Krayiswanyi. Ngana nyulu yabimbaka ngiruka, wakinkanyi nangangi. Jala ngayu jungku kijiyudi, baki jala ngayu jungku mikuyaji kijinyi, yurrngumba ngana yabimbaka ngiruka wakinkanyi nangangi barri.
PHI 4:14 Ngayu mirnarrijbangka muwa narringi, manjijbayingangi narri nanda dungala ngakindurri. Jungku ngayu nayiba brisinyina kijiyudi, baki narri nulijba lalanbikanyi nganarri. Baki nganarri wajbayi dungalanyi. Kudanyu ngayu mirnarrijbangka muwa narringi, lalanbayingangi nganarri nani barri.
PHI 4:15 Narri jala jungku nanaba Bilibayi, nganarri jingkijbangka, juju wabula barri jalannga jali ngayu jungku narringinyina walkurranyina yajina niji Masiduniya, bakili ngayi milidimba yalunya kunybanyi jangkurranyi nangangi Jisus Krayiskanyi. Baki jali ngayu barlba narrinbunanyi yajinanyi, nanamanji barri nganarri wajbayi dungalanyi. Narri Krisjinmuku nanaba Bilibayi, ngawamba narri wajbayi dungalanyi. Miku yaliya wajba yingkamukunyi, ngawamba narri. Narri mirnarrijbayi muwa ngaki, jali yalu kuyu nangangi jangkurr jali ngayu milidimba yalunya. Baki narri nginduyi muwa ngaki, jali yingkamukunyi yalu yabimba kiji ngaki.
PHI 4:16 Baki baku barri marda, jali ngayu jungku nanaba Disalunika, nanamanji marda narri manjijbayi dungala ngakindurri, baki mili dungala narri manjijbayi ngakindurri bayngkani barri.
PHI 4:17 Ngala miku ngayimi jungku nuliykanyi dungalanyi yurrngumba. Miku. Ngala narrinya jingkijbangka Kudwanyi, jali nganarri wajba dungalanyi. Jingkijba nyulu nanda dungala, baki nanankardi janyulu yabimba kunyba yaji narringi baku barri.
PHI 4:18 Narri manjijbayi Yibabrudidus ngakindurri, baki ngana nyuli wajba narringinkanyi dungalanyi marda yajinyi. Ngana wajbayi yajinyi jali narri manjijba. Nanijba barri ngayu jungku kajayudi dungalayudi marda yajiyudi. Miku ngayimi nulijba mili yajinyi. Jali nganarri wajba nanankanyi kajanyi yajinyi, baki nanda barrinani narri wajbayi Kud nanankanyi yajinyi, wakingangi ngayu nangangi. Baki nanankardi barri nyulu mirnarrijbangka muwa narringi Kud. Jala nyulu mirnarrijba muwa narringi, baki ngayu marda mirnarrijba ngayu muwa narringi.
PHI 4:19 Maruka nyulu muwa narringi Kud. Janyulu yabimba kunyba yaji narringi. Janyulu wajba narrinya nanankanyi jala narri nulijba, barrinani dungalanyi, barrinani jumbalanyi. Janyulu wajba narrinya nanankanyi yajinyi, nyulungangi mambuka bukambijuyngka yajinyi junu. Bababanyamba nyulu narrinya Jisus Krayiswanyi, baki nanankardi janyulu lalanba narrinya yurrngumba Kudwanyi.
PHI 4:20 Nayinda Kud nyulu ngambalangi Buwakanya. Nyulu wirimalaru bukambijuyngka wandijiyana. Nanankardi ngambala wajba Kud kunybanyi jangkurranyi ngambalangi. Barriwa barri.
PHI 4:21 Ngayu marda nanginmuku Krisjinmuku ngakindu, nurru manjijbangka jangkurr yalundurri, jala bababanyamba nyulu yalunya Jisus Krayiswanyi.
PHI 4:22 Bukambijunyi Krisjinmukunyi nayiba ngakindu yalu manjijbangka jangkurr narrindurri. Kudiyamuku ngarrkadabawarrmuku baki yingkamuku marda nanginyina barruwuna nangangi, walkurrayngka mambukanyi Rumkanyi, yalu marda Krisjinmuku. Yalu marda manjijbangka jangkurr narrindurri.
PHI 4:23 Nurru yanybaka mududu nangangi ngambalanginkanyi mambukanyi Jisus Krayiskanyi. Nurru ngajakangka Jisus Krayis, janyulu wajba narrinya nanganginkanyi mardumardu muwanyi. Barriwa barri. Bukamba nayinda jangkurr.
COL 1:1 Nayinda ngayu Bul, manjijba jali ngana Jisus Krayiswanyi. Yarrijba ngani Kudwanyi, baki manjijba ngani Jisus Krayiswanyi. Ngaliya manjijbangka nayinda jangkurr narrindurri, ngayu, marda Dimudiwanyi. Nyulu barrinani kanyiya ngambalangi. Ngaliya manjijbangka nayinda jangkurr narrindurri Krisjinmukuyngkurri jala narri jungku nananyina yajina Kulusayi. Wabula barri narri kuyuyi nangangi jangkurr Jisus Krayiskanyi, baki bababanyamba nyulu narrinya. Bababanyamba nyulu ngambalanya bukambiju Krisjinmuku wandijiyana. Ngaliya ngajakangka Kud narringi, nyulu yabimbiji kunyba yaji narringi. Ngaliya ngajakangka Kud narringi, narri jungunkanyi mardumardu muwa.
COL 1:3 Ngaliya yanybaka mududu nangangi Kudkanyi narringi barri. Yurrngumba ngaliya yanybaka mududu nangangi, Buwakaya. Nyulu Buwakanya ngamanginkanyi mambukanyi Jisus Krayiskanyi. Ngaliya mirnarrijba muwa nangangi, narringingangi.
COL 1:4 Yingkamukunyi yali karu ngalinya narringi, narri kuyunkanyi nangangi jangkurr Jisus Krayiskanyi, narri durriykanyi nangangi jangkurr yurrngumba barri. Ngalinya karuyi, narringka marukankanyi muwa marda. Baki nanankardi barri ngaliya mirnarrijba muwa narringi marda.
COL 1:5 Narri mankuyi nanda kunyba jangkurr nangangi Jisus Krayiskanyi. Nanangini duja jangkurrwanyi karungka narrinya nangangi Kudkanyi, janyulu marrimba yalunya mardarda, janyulu mili wankamba yalunya jalija yalungka janyba. Nani barri yabimbaja yaji Kudwanyi yalungi jala yalu kuyu nangangi jangkurr Jisus Krayiskanyi. Jalannga barri jali narri manku nanda kunyba jangkurr, baki narri kuyu nanda jangkurr, baki narri maruka muwa yalungi yingkamukuyngka marda. Nani barri narri durrijbayi nanda kunyba jangkurr nangangi Jisus Krayiskanyi barri.
COL 1:6 Nanda jangkurr nangangi Jisus Krayiskanyi, nanda kunyba jangkurr. Nanangini jangkurrwanyi karungka ngambalanya nangangi Kudkanyi. Yabimbayi ngiruka yaji ngambalangi Kudwanyi. Manjijba nyuli Jisus Krayis nanginkurri wayka jambarri, janybikanyi nangka ngambalanginkanyi balkinyi yajinyi. Baki mili wankambayi Jisus Krayis Kudwanyi. Nani nyuli yabimba nanda ngiruka yaji ngambalangi. Jalannga barri jali narri manku nanda jangkurr, baki ngawamba kujajarrawanyi narri kuyuyi nanda jangkurr. Ngala baku barri, mili yali kuyu nanda jangkurr, baki mili baku barri. Baki nanijba barri narri jala jungku Kulusayi, kajamukunyi narri kuyuyi nanda nangangi jangkurr. Marda wandijiyana barri, kajamukunyi yalu kuyuyi nanda nangangi jangkurr, wirdikudukudumukunyi wandijiyana.
COL 1:7 Nanangini Yibabraswanyi nyuli karu narrinya nanankanyi kunybanyi jangkurranyi. Nyuli karu narrinya nanankanyi ngirukanyi yajinyi jali yabimba Kudwanyi ngambalangi. Yi, nanda Yibabras, nyuli wakiwarr nangangi Jisus Krayiskanyi. Waki nyuli kudanyu nangangi, baki karu nyuli narrinya nanankanyi kunybanyi jangkurranyi. Nyulu kunyba nganinyi. Nyulu kunyba wakiwarr nangangi Jisus Krayiskanyi. Maruka ngaliya muwa nangangi kudanyu barri.
COL 1:8 Nyuli karu ngalinya narringi, narri marukangka muwa nangangi Kudkanyi. Jungkuka nanda Kunyba Ngarndu Kudkanyi narrindu, baki nanankardi barri narri marukangka muwa nangangi Kudkanyi baki yalungi yingkamukuyngka marda.
COL 1:9 Mankuyi ngaliya nangangi jangkurr narringi, baki yanybaka ngaliya mududu Kudkanyi narringi. Ngaliya ngajakangka Kud narringi, janyulu yabimba narrinya jingkiykanyi Kud. Baki janarri jingkijba nanda jala nulijba narringi Kud yabimbikanyi yaji. Nanda Kunyba Ngarndu Kudkanyi nyulu jungkuka narrindu, baki janyulu wajba narrinya kunybanyi kulajinyi, baki janarri jingkijba nanda jala nulijba narringi Kud yabimbikanyi yaji.
COL 1:10 Baki nanankardi barri janarri jungku yurlurrmba nangangi Kudkanyi. Yurrngumba barri janarri ngayangayijba nangangi Jisus Krayiskanyi. Janarri yabimba nanda jala nyulu nulijba narringi yabimbikanyi yaji. Janarri yabimba kunyba yaji yalung
COL 1:11 Baki ngaliya ngajakangka Kud nayi marda narringi. Janyulu yabimba narrinya ngiruka. Janarri jungku ngiruka nangangi yurrngumba barri. Jaliyi yingkamukunyi yalu yabimba kiji narringi, baki yuwajiwa janarri jungku ngiruka nangangi Kudkanyi. Janarri mirnarrijba muwa, jingkijbangangi narri Kud, janyulu yabimba narrinya ngiruka nangangi. Janarri jungku ngiruka yabimbikanyi nanda jala nulijba Kud narringi yabimbikanyi yaji. Baki janarri mirnarrijba muwa nangangi, ngambalanginkanyi Buwakaya Kudkanyi. Nani ngaliya ngajakangka Kud narringi. Nyulu barri ngambalangi Buwakanya, yarrijbangangi nyuli ngambalanya nanganginmuku jandanyimuku. Ngambalaja malumba jungku. Bukambiju Krisjinmuku wandijiyana, ngambala nanganginmuku jandanyimuku, baki janyulu mili wankamba ngambalanya, jungunkanyi nangandu kingkarri nanganginyina yajina yurrngumba barri. Mikuyaji balkinyi nananyina nanganginyina yajina.
COL 1:13 Nyulu marrimbaka ngambalanya mardarda Kudwanyi. Wabula barri ngambalili durrijba nanda balki yuwa nangangi Sayidinkanyi. Nyulili Sayidin ngambalangi mambuka, bakili ngambala jungku balkina yuwana Kudkanyi. Ngala jali ngambala kuyu nanda jangkurr nangangi Jisus Krayiskanyi, baki ngambala kuyuyi Kud ngambalangi mambuka. Nyuli manjmanjamba ngambalangi balki yaji Kudwanyi. Manjamanjamba nyuli ngambalangi balki yaji, janybangangi nangki Jisus Krayis nanankanyi balkinyi yajinyi. Baki nanijba barri ngambala jandanyimuku nangangi Kudkanyi, baki nyulu lalanbaka ngambalanya yurrngumba barri. Baki nanankardi barri marda ngambalimi karu Kud, ngambala mirnarrijbangka muwa nangangi barri. Barriwa.
COL 1:15 Mikukimi nganinyiwanyi najba Kud. Mikukimi najba. Ngala Jisus Krayis barri, nyuluwannga barrinani Kud, baki kajamukunyi yali najba Jisus Krayis jali nyulu jungku nayiba wayka jambana. Nyuluwannga barrinani Kud. Wabula kamambarra karuyi Jisus Krayis yabimbikanyi yaji Kudwanyi, baki yabimbayi bukamba nanda yaji Jisus Krayiswanyi. Yabimba nyuli bukamba yaji wandijiyana, jambana baki lalijina. Yabimba nyuli kamba baki yakarl baki warrawiji. Yabimba nyuli ngiruka yaji, baki mambukamuku. Karuyi Jisus Krayis yabimbikanyi yaji Kudwanyi, baki yabimba nyuli yaji wandijiyana Jisus Krayiswanyi. Yabimba nyuli bukamba yaji nangangi Kudkanyi. Baki nyuli yarrijba Jisus Krayis mambuka bukambijuyngka marda Kudwanyi.
COL 1:17 Yurrngumba wabula kamambarra jungkukili Jisus Krayis kingkarri nangandu Kudnyina, baki baku barri nyuli yabimba yaji. Baki nanijba barri yurrngumba nyulili jungku, lalanbakili bukamba nanda jalili nyulu yabimba. Nyuli ngiruka lalanbikanyi bukamba yaji nanijba barri. Barriwa.
COL 1:18 Nyulu barrinani kulaji mankankanyi. Nanda mankanyi kaja yaji nangangi, ngala nanda kulaji mambuka nanankanyi mankankanyi. Karungka mankanyi yabimbikanyi yaji kulajiwanyi, baki yabimbaka nanda yaji mankanyiwanyi. Ngambala Krisjinmuku, ngambala barrinani nanda mankanyi, baki Jisus Krayis, nyulu barrinani nanda kulaji. Nyulu mambuka ngambalangi Krisjinmukuyngka. Nyulu ngambalangi mambuka. Baki nyulu jandanyi nangangi Kudkanyi. Nyulu lirrka, jali wankamba mili Kudwanyi. Nyuluwarri lirrka jungunkanyi mili wanka yurrngumba kingkarri nangandu Kudnyina. Baki nyulu wirimalaru bukambijuyngka yajinyi.
COL 1:19 Jisus Krayis, nyulu jandanyi nangangi Kudkanyi. Ngawamba nyulu barrinani Kud. Mankumanku bulangka nanamannga jangkurr, yanyba bula nanamannga jangkurr. Baki yarrijba nyuli nangangi jandanyi wirimalaru Kudwanyi.
COL 1:20 Manjijba nyuli nangangi jandanyi nanginkurri wayka, baki janyba nangki nangangi jandanyi kurndana. Jungku nyuli kunyba yurrngumba barri ngala janyba nangki ngambalanginkanyi balkinyi yajinyi. Baki nanijba barri, jaliyi ngambala kuyu nangangi jangkurr, baki durrijba nangangi jangkurr, baki janyulu manjamanjamba ngambalangi balki yaji Kudwanyi. Janyulu manjamanjamba ngambalangi balki yaji, janybangangi nangki Jisus Krayis ngambalanginkanyi balkinyi yajinyi. Baki nanankardi barri ngambalaja malumba jungku marda Kud. Wabula barri marda ngambala marda Kud, jungku ngambalili yinini yinini, ngala nanijba barri ngambala jungkuka malumba nangandu Kudnyina. Wabula kamambarra yabimbayi bukamba yaji Kudwanyi. Yabimba nyuli bukamba yaji kunyba, ngala baku barri barimbayi yaji nganinyiwanyi. Barimba yali nanda jali yabimba Kudwanyi kunyba. Ngala janyulu mili kunymamba yaji Kudwanyi. Janyulu mili kunymamba bukamba yaji, janybangangi nangki nangangi jandanyi bukambijuyngka balkinyi yajinyi. Barriwa.
COL 1:21 Wabula barri miku narriyanyi jingkijba Kud. Narri mudumbanyi nangangi. Narri jungkuyi barrinani juju nanganbunanyi. Miku narriyanyi barrinani mungkijimuku nangangi, yabimbangangi narrili kaja balki yaji. Mankumanku narringkili balkinyi yajinyi, baki yabimba narrili kaja balki yaji.
COL 1:22 Ngala nanijba barri, janyba nangki Jisus Krayis kurndana, baki nanankardi barri manjamanjambayi narringi balki yaji Kudwanyi. Nanijba narri jungkuka yurlurrmba nangangi, baki nanankardi barri yarrijbayi narrinya nanganginmuku kandimuku Kudwanyi. Baki baku barri janarri jungku kingkarri nangandu, janarri kunyba jungku yurrngumba, mikuyaji balkinyi narrindu. Janarri jungku barrinani kudukudu, barrinani malaba nangangi.
COL 1:23 Bukamba nayinda janyulu yabimba narringi Kudwanyi. Janyulu yabimba nayinda narringi, jaliyi narri yuwajiwa kuyu nanda duja jangkurr nangangi Jisus Krayiskanyi, jaliyi narri jungku ngiruka nangangi yurrngumba barri. Marda narrimi miku manku yalungi jangkurr balkimukuyngka milidimbawarrayngka. Miku yalimi milidimba duja jangkurr nangangi Jisus Krayiskanyi. Marda narrimi miku manku yalungi balki jangkurr. Ngala marda narrimi mankuwa ngawamba nanda duja jangkurr nangangi Jisus Krayiskanyi. Marda narrimi mankuwa nangangi kunyba jangkurr, jali milidimba narrinya yingkawanyi. Ngayu Bul, ngayu wakiwarr nangangi Jisus Krayiskanyi, nyulingangi yarrijba ngana milidimbikanyi nanda kunyba jangkurr. Baki yingkamukunyi baki ngayu, nurru milidimbaka nanankanyi kunybanyi jangkurranyi. Nurru milidimbaka yalunya nanganginkanyi jangkurranyi wandijiyana. Marda narrimi miku mamanumba nanda duja jangkurr. Marda narrimi mankumankuwa nanda jangkurr yurrngumba, baki janarri jingkijba, janarri jungku mili wanka bayngkani jalija narringka janyba. Barriwa.
COL 1:24 Yingkamukunyi yali yabimba kiji ngaki. Ngananjali linjumba mankanyi, ngala miku ngayimi balkijba muwa. Ngayu mirnarrijbangka muwa nanankanyi. Karuyi ngambalanya Jisus Krayiswanyi. Karu nyuli ngambalanya, jayalu linjumba ngambalanya mankanyi Krisjinmuku. Jaliyi ngambala waki kudanyu nangangi, jaliyi ngambala milidimba yalunya nanganginkanyi jangkurranyi, baki nanamukunyi jala yalu ngirra Jisus Krayis, jayalu linjumba ngambalanya mankanyi. Nani nyuli karu ngambalanya Jisus Krayiswanyi. Mirnarrijbangka ngayu muwa wakinkanyi nangangi, baki ngayu jingkijbangka, janganjalu linjumba, kuyungangi ngayi yingkamuku nangandurri Jisus Krayisyurri. Waluwa nangki janyba Jisus Krayis, baki linjumba yali nangangi mankanyi. Kudanyu yali linjumba nangangi mankanyi, baki nani barri jayalu linjumba ngambalanya Krisjinmuku marda. Jisus Krayis nyulu barrinani kulaji, baki ngambala Krisjinmuku ngambala barrinani nanda mankanyi. Ngayu barrinani nanda yingamali nananyina mankanyina, malumba bukambijuyngka Krisjinmukuyngka. Ngananjali linjumba mankanyi narringingangi, baki ngayu mirnarrijbangka muwa narringi.
COL 1:25 Ngana yarrijbayi Kudwanyi, ngana nyuli yarrijba wakiwarr yalungi Krisjinmukuyngka. Baki ngana nyuli manjijba karunki yingkamuku nanganginkanyi jangkurranyi. Jala narri manku nangangi jangkurr, baki nanda kunyba.
COL 1:26 Wabula barri nyulili ngadijba nangangi jangkurr Kudwanyi. Miku nyuliyanyi karu nanankanyi jalija nyulu yabimba. Nyulili ngadijba nangangi jangkurr yurrngumba wabula barri. Ngala nanijba barri nyuli karu ngambalanya nanganginkanyi jangkurranyi. Nyuli minimba ngambalanya nanankanyi jalija nyulu yabimba.
COL 1:27 Nyuli minimba ngambalanya nanankanyi jalili wabula nyulu ngadijba. Nyuli minimba ngambalanya nayi barri. Janyulu yabimba kunyba yaji ngambalangi. Kunybamirra barri. Ngiruka yaji janyulu yabimba yalungi bukambijuyngka. Nanda jangkurr jalili nyulu wabula ngadijba, nanijba barri nyuli karu ngambalanya Kudwanyi. Karu nyuli ngambalanya nanganginkanyi jandayngkanyi Jisus Krayiskanyi, janyulu jungku ngambalandu kurduluna, baki janyulu bababanyamba ngambalanya jaliyi ngambala durrijba nangangi jangkurr. Janyulu jungku ngambalandu kurduluna, baki baku barri jangambala jungku kingkarri nangandu Kudnyina. Nani barri nyuli karu ngambalanya nanijba barri.
COL 1:28 Baki nanankardi barri ngambala karungka yalunya bukambiju nanankanyi jangkurranyi. Wajbayi ngambalanya kunybanyi kulajinyi Kudwanyi. Wajba nyuli ngambalanya kunybanyi kulajinyi jingkiykanyi Kud, baki milidimbikanyi yingkamuku nangangi. Ngambala milidimbaka yalunya nangangi Jisus Krayiskanyi. Ngambala milidimbaka yalunya nayi barri, janyba nangki Jisus Krayis ngambalanginkanyi balkinyi yajinyi, baki jaliyi ngambala kuyu nangangi jangkurr, baki janyulu mili wankamba ngambalanya Kudwanyi. Nani barri ngambala milidimbaka yalunya, nulijbangkangangi ngambala yalungi durriykanyi Jisus Krayis, baki jungunkanyi barrinani nyulu. Ngambala nulijbangka yalungi jungunkanyi mili barrinani nyulu, baki mili baki mili barrinani nyulu yurrngumba barri. Nani barri ngambala milidimba yalunya, nulijbangangi ngambala yalungi, jungunkanyi kingkarri nangandu Kudnyina. Jaliyi yalu kuyu nangangi jangkurr Jisus Krayiskanyi, jandanyi nangangi Kudkanyi, baki bababanyamba nyulu yalunya Jisus Krayiswanyi, baki jayalu jungku kingkarri nangandu Kudnyina yurrngumba barri.
COL 1:29 Nani ngayu wakingka kudanyu barri, karunkanyi yalunya nangangi Jisus Krayiskanyi. Baki nyulu yabimbaka ngana ngiruka Jisus Krayiswanyi. Ngana yabimbaka ngiruka milidimbikanyi yalunya nangangi. Nanankardi barri yuku ngayu waki kudanyu nangangi yurrngumba barri.
COL 2:1 Janga karu narrinya. Wakingka ngayu narringi. Kudanyu ngayu wakingka narringi, baki yalungi barri jala jungku nananyina yajina Layudisiya. Wakingka ngayu kudanyu yalungi baki yingkamukuyngka, jala ngananjalimi miku jingkijba. Jungku yalu kajana yajina, nanamuku jala ngananjalimi miku jingkijba. Wakingka ngayu kudanyu yalungi marda.
COL 2:2 Miku ngayimi nulijba narringi, narri birrirrangka muwa yalungi jala yalu ngirra Jisus Krayis. Miku ngayimi nulijba narringi, narri birrirrankanyi muwa yalungi, ngala ngayu nulijba narringi jungunkanyi ngiruka yalungi, baki nanankardi ngayu wakingka kudanyu narringi. Wakingka ngayu narringi yurrngumba barri, nulijbangangi ngayu narringi, narringka marukankanyi muwa. Janarri malumba jungku, marukangangi narringka muwa. Wakingka ngayu narringi, nulijbangangi ngayu narringi jingkiykanyi Jisus Krayis. Janarri jingkijba Jisus Krayis, baki nanankardi janarri jingkijba Kud marda.
COL 2:3 Baki Jisus Krayiswanyi, janyulu minimba narrinya nangangi Kudkanyi. Janyulu minimba narrinya nangangi. Baki janarri jingkijba Kud, nyulu jungkuka kunyba kulaji bukambijuyngka yajinyi. Nyulu jingkijbangka bukamba yaji, baki nyulu kunybamirra kulaji. Nani janyulu minimba narrinya, ngawamba jaliyi narri kuyu nangangi jangkurr Jisus Krayiskanyi. Baki nani barri janarri jingkijba Kud. Ngala jaliyi narri miku kuyu nangangi jangkurr Jisus Krayiskanyi, baki mikuwali Jisus Krayiswanyi minimba narrinya nangangi Kudkanyi. Miku narriyi jingkijba Kud, nyulu kunyba kulaji, nyulu jingkijbangka bukamba yaji. Miku narriyi jingkijba Kud nani barri, jaliyi narri miku kuyu nangangi jangkurr Jisus Krayiskanyi.
COL 2:4 Ngayu karungka narrinya nayi. Miku janarri manku yalungi jangkurr balkimukuyngka milidimbawarrayngka. Miku yalimi milidimba nanda duja jangkurr nangangi Jisus Krayiskanyi. Miku narriyi munyajba yingka jujambikanyi narrinya nanankanyi balkinyi jangkurranyi. Yalu nulijbangka narringi, narringka mankumankunkanyi nanda yalungi jangkurr, nanda kunyba barri. Miku narriyi kuyu yalungi jangkurr. Miku nanda duja jangkurr. Miku.
COL 2:5 Jungkuka ngayu nayiba brisinyina, ngala narri jungkuka nananyina yajina niji Kulusayi. Ngala mankumanku ngaka narringi yurrngumba barri. Mankumanku ngaka narringi kudanyu barri. Nanda barrinani muningka ngayu jungkuka narrindu barndana, barrinani muningka ngaki ngarndu jungkuka narrindu. Mirnarrijbangka ngayu muwa narringi, jingkijbangangi ngayu narrinya, narri jungkuka yurlurrmba nangangi Jisus Krayiskanyi, narri jungkuka ngiruka nangangi. Narri kuyuyi nangangi jangkurr, baki nanankardi narri jungkuka yurlurrmba nangangi yurrngumba barri.
COL 2:6 Narri kuyuyi nanda jangkurr nangangi Jisus Krayiskanyi, baki nanankardi barri marda narrimi yurrngumba jungku barrinani bababanyamba nyulu narrinya Jisus Krayiswanyi.
COL 2:7 Jungku janarri ngiruka nangangi. Janarri yabimba ngawamba nanda jala nyulu nulijbangka narringi yabimbikanyi yaji. Baki janarri jungku mili ngiruka nangangi. Janarri jungku mili ngiruka, baki mili ngiruka nangangi, kuyungangi narri nangangi jangkurr yurrngumba barri. Narri kuyuyi nanda jangkurr jali nyulu milidimba narrinya Yibabraswanyi. Marda narrimi mirnarrijba muwa nangangi Kudkanyi, yabimbangangi nyuli ngiruka yaji narringi.
COL 2:8 Janarri najbawa yalunya, nanamuku balkimuku milidimbawarrmuku. Miku yalimi milidimba narrinya nangangi Jisus Krayiskanyi. Waluwa narri manku jangkurr nangangi Jisus Krayiskanyi, nanamanji barri narri yabimbayi ngawamba nanda jali karu narrinya yijanwanyi yabimbikanyi yaji. Nanamuku yijanmuku jujambawarr, wabula yali narringi walkurramuku mambukamuku. Narri wakiwarr yalungi. Ngala narri yingijbayi yalunya. Ngala nanijba barri, jaliyi narri kuyu yalungi jangkurr balkimukuyngka milidimbawarrayngka, baki mili janarri jungku wakiwarr yalungi yijankanyi. Nanankardi barri, marda narrimi najbawa yalunya balkimuku milidimbawarrmuku.
COL 2:9 Jisus Krayis barri, nyulu jandanyi nangangi Kudkanyi. Nyulu nanamannga barrinani Kud. Yurrngumba wabulinyi yuwajiwa nyulu nanamannga barrinani Kud. Baki jali nangka birnandaba Jisus Krayiskanyi, jali nyulu jungku mankanyiyudi, nanamanji marda nyuli nanamannga barrinani Kud. Nyulu mambuka bukambijuyngka. Nyulu mambuka yijankanyi, marda ngirukanyi yajinyi lalijina. Nyulu wirimalaru bukambijuyngka yajinyi. Baki narri Krisjinmuku, nyulu jungkuka Jisus Krayis narrindu kurduluna. Bababanyamba nyulu narrinya, baki narri jungkuka ngiruka nangangingangi. Mikuwali yingkawanyi narrinya yabimba ngiruka, ngawamba nyulu. Narri jungkuka ngiruka nangangingangi.
COL 2:11 Jali narri kuyu nangangi jangkurr Jisus Krayiskanyi, jali narri durrijba nangangi jangkurr, baki nyuli yarrijba narrinya Jisus Krayiswanyi, bababanyamba nyulu narrinya kuyu. Miku narringkimi yarrijba bababanyamba nyulu narrinya. Ngala ngawamba Jisus Krayiswanyi yuku nyulu yarrijbangka narrinya nani barri. Baki nyulu narringi mambuka marda Jisus Krayis. Nanamuku balkimuku yijanmuku, marda ngiruka yaji lalijina, wabula yali narringi mambuka, ngala dulaba nyuli narrinya nanamunanyi Jisus Krayiswanyi. Baki miku yalimi mili narringi mambuka, ngala nyulu Jisus Krayis, nyulu narringi mambuka nanijba barri. Nanankardi barri yuku narringka kurrkunba yabimbikanyi balki yaji. Yuku narri jungku kunyba nangangi Kudkanyi.
COL 2:12 Jali narri kuyu nangangi jangkurr Kudkanyi, baki narrinya ngurrunbayi wabudana yingkawanyi, baki nanda barrinani narringki janyba. Narri jungkuka barrinani nganinyiyurru narringinkanyi wabuliyngkanyi mambukamukuyngka. Narri jungkuka barrinani nganinyiyurru yalungi. Ngala jali narri mili walajba wabudananyi, baki nanda barrinani narri walajba barrinani buyingkinyi nganinyimuku. Mili wankambayi Jisus Krayis Kudwanyi, baki nani barri jali yalu kingkarrumba narrinya wabudananyi, baki nanda barrinani nyuli mili wankamba narrinya Kudwanyi. Mili wankambayi narrinya, narri jungunkanyi buyingkinyi nganinyimuku nangangi Jisus Krayiskanyi.
COL 2:13 Wabula barri narri barrinani nganinyiyurru nangangi Kudkanyi, mikungangi narriyanyi jingkijba Kud, mikungangi narriyanyi durrijba nangangi yuwa. Jungkuyi narri balki nangangi. Narri ngurranyimuku nangangi baki nanganginkanyi yuwanyi. Nani narri jungkuyi barrinani nganinyiyurru nangangi. Ngala jali narri kuyu nanda jangkurr nangangi Jisus Krayiskanyi, baki nyuli manjamanjamba narringi balki yaji Kudwanyi. Baki nanijba barri narri jungku barrinani mili wankan nangangi, barrinani buyingkinyi nganinyimuku nangangi Jisus Krayiskanyi.
COL 2:14 Jali nangka janyba Jisus Krayis wabangkarra kurndana ngamanginkanyi balkinyi yajinyi, baki nanda barrinani nyuli kijijba ngambalangi balki yaji nananyina kurndana. Barrinani yalungki janyba nanda balki yaji ngambalangi. Janyba yalungki, baki barriwa barri bukamba nanda balki ngambalangi. Barriwa barri bukamba.
COL 2:15 Jali nangka janyba Jisus Krayis kurndana, baki nanda Sayidin marda nanganginmuku mungkijimuku, nanamuku balkimuku lalijina, ngamu daba yali wakara Jisus Krayis. Ngamu yali ngirukamirra, yali daba wakara Jisus Krayis. Ngala miku barri. Miku. Mili wankijbayi Jisus Krayis, baki nani barri nyulu minimbaka ngambalanya, nyulu barri ngirukamirra ngambalangi. Nyulu barri mili ngiruka yalungi, Sayidinkanyi marda nanganginmukuyngka mungkijimukuyngka. Nyuli daba yalunya wakara, nyulungangi mili ngiruka yalungi. Baki nani nyuli manyirrumba yalunya Jisus Krayiswanyi. Nani nyuli yalunya manyirrumba. Barriwa.
COL 2:16 Kudiyamuku yalu balkimuku milidimbawarrmuku. Yalu milidimbaka balkinyi jangkurranyi. Yalu karungka narrinya, narri yabimbikanyi kaja wangarr. Yalu yanybaka, marda narrimi yabimba nanamuku wangarr jalili yalu yabimba Jumukunyi. Marda narrimi yabimba yalungi wangarr. Ngala yalu balkimuku milidimbawarrmuku. Marda narrimi miku kuyu yalungi jangkurr. Marda narrimi yurlwa yalunginkanyi jangkurranyi jala yalu yanyba. Yalu milidimba nayi barri, kudiya mama yuku kunyba jarrkanyi, ngala kudiya mama balki jarrkanyi, baki kudiya kambana kudukudu barri yabimbikanyi yinini yinini wangarr. Marda narrimi yurlwa yalunginkanyi jangkurranyi. Nanda yuwa nangangi Musiskanyi, nanda yuwa yanybaka wangarranyi marda jarrkanyi yaji, ngala barriwa barri bukamba nanda yuwa narringi. Marda narrimi miku durrijba nanda yuwa, ngala marda narrimi durrijba nanda buyingkinyi yuwa nangangi Jisus Krayiskanyi.
COL 2:17 Nanda yuwa jali wajba Musis Kudwanyi, nanda yuwa yuku yalungi nanamanji wabula. Wajba nyuli Musis nanankanyi yuwanyi waluwa nyuli manjijba Jisus Krayis nanginkurri wayka. Ngala jali badajba Jisus Krayis, baki nyuli wajba ngambalanya buyingkiyngkanyi yuwanyi. Nyuli wajba ngambalanya buyingkiyngkanyi yuwanyi. Baki nanijba barri, barriwa barri bukamba nanda waluwinyi yuwa. Jala ngambala durrijba Jisus Krayis, baki ngambala durrijba nangangi buyingkinyi yuwa.
COL 2:18 Miku janarri kuyu yalungi jangkurr. Yalu balkimuku milidimbawarrmuku. Kudiyamuku muningka yalungka mankumanku, yalu walkurra mambuka. Muningka yalu yanyba, yalu buwarrajimbaka ngiruka yaji. Kudiyamuku yalu yanyba, marda narrimi wajba Yanjil kunybanyi jangkurranyi narringinkanyi. Marda narrimi wajba Yanjilmuku kunybanyi jangkurranyi, Kudngangi nyulu walkurramirra, baki miku narriyi yanyba nangangi. Miku narrimi wajba Kud kunybanyi jangkurranyi, ngala marda narrimi wajba Yanjilmuku kunybanyi jangkurranyi. Nani yalu milidimbaka narrinya balkinyi jangkurranyi. Yalu nulijbangka narringi, narringka mankumankunkanyi yalu walkurra mambuka nangangi Kudkanyi, ngala miku. Jala yalungka mankumanku nani, baki miku yalungkimi mankumanku nangangi Kudkanyi. Ngawamba yalungka mankumankuka, ngala miku nangangi Kudkanyi.
COL 2:19 Baki miku yalimi durrijba Jisus Krayis. Miku yalimi yarrijba Jisus Krayis yalungi mambuka. Miku yalimi barrinani mankanyi nangangi Jisus Krayiskanyi. Ngambala Krisjinmuku ngambala barrinani mankanyi nangangi, baki nyulu barrinani kulaji nanankanyi mankankanyi. Ngambala kajamuku, ngala ngambala malumba jungku barrinani yingamali mankanyi, baki nyulu barrinani kulaji ngambalangi. Barriwa. Jala jarrbangka kunyba mama jukawanyi, baki jardijbangka nyulu walkurra mankanyi, ngiruka barri. Nani barri jala ngambala durrijba Jisus Krayis kudanyu barri, baki ngambala jardijbangka ngiruka kurdulu nangangi. Ngambala jardijbangka walkurra nangangi Jisus Krayiskanyi. Jisus Krayis barri nyulu ngambalangi mambuka, nyulu milidimbaka ngambalanya nangangi Kudkanyi. Ngambala mili jingkijbangka Kud, milidimbakangangi nyulu ngambalanya mili yurrngumba Jisus Krayiswanyi. Barriwa.
COL 2:20 Wabula barri narrili ngayangayijba yalunginkanyi jangkurranyi yijanmukuyngka. Ngala nanijba barri, narri barrinani nganinyiyurru nanamukuyngka yijanmukuyngka. Miku narrimi mili ngayangayijba yalungi. Narri barrinani nganinyiyurru yalungi, ngala narri jungku wanka nangangi Jisus Krayiskanyi. Ngala wanyingkanyi narri nulijba jungunkanyi yingkana yuwana jali yalu milidimba narrinya nanamukunyi balkimukunyi. Wanyingkanyi narri nulijba durriykanyi yalungi yuwa.
COL 2:21 Nanda yalungi yuwa yanybaka, miku marrimbikanyi yingka yaji, miku jarrkanyi yingka mama. Nani barri nanda yuwa yanybaka. Wanyingkanyi narri nulijba ngayangayiykanyi nanankanyi yuwanyi. Wanyingkanyi barri.
COL 2:22 Ngala nanda yuwa, miku marrimbikanyi kudiya yaji, miku jarrkanyi kudiya mama, miku nanda jirrinyi yuwa narringi. Miku. Yanybayi nanda jangkurr ngawamba nganinyimuku. Miku nanda jirrinyi yuwa. Mikukimi nanangini yuwawanyi karu ngambalanya, ngambala jungunkanyi yurlurrmba nangangi Kudkanyi.
COL 2:23 Nanamukunyi jala yalu karu narrinya ngayangayiykanyi nanankanyi yuwanyi, yalu milidimbaka balki jangkurr. Yalu nulijbangka narringi narringka mankumankunkanyi yalungi nayi barri, “Nanamuku milidimbawarrmuku, yalu walkurramuku mambukamuku. Yalu kunyba kulaji. Marda ngambalimi durrijba yalungi jangkurr jarrkanyi mama, marda yabimbikanyi wangarr, marda waykanyi Yanjilmuku kunybanyi jangkurranyi, marda miku lalanbikanyi ngambalaka ngambalangi mankanyi. Marda ngambalimi durrijba nanda yalungi jangkurr.” Nani barri yalu nulijbangka narringi, narringka yanybikanyi yalungi. Ngala jaliyi narri durrijba yalungi jangkurr, baki miku narrimi jungku yurlurrmba nangangi Kudkanyi. Yuwajiwa narri jungku balki nangangi. Mikukimi nanangini yuwawanyi karu narrinya, narri jungunkanyi yurlurrmba nangangi Kudkanyi. Miku. Barriwa.
COL 3:1 Wabula barri narri jungkuyi barrinani nganinyiyurru nangangi Kudkanyi. Miku narriyanyi manku nangangi jangkurr. Ngala nanijba barri narri jungku barrinani wanka nangangi Jisus Krayiskanyi. Narri barrinani buyingkinyi nganinyi nangangi. Baki nanankardi barri marda narringkimi mankumanku kingkarriyngka yajinyi nanganginkanyi yurrngumba barri. Marda narringkimi mankumanku bulangi kingkarri lalijina, Kudkanyi baki Jisus Krayiskanyi. Marda narrimi ngawamba yabimba nanda jala kunyba bulangi. Marda narrimi jungku kunyba bulangi yurrngumba barri.
COL 3:2 Nani barri marda narringkimi mankumanku kingkarriyngka yajinyi. Marda narringkimi miku mankumanku yajinyi nayiba wayka jambana yurrngumba barri. Marda narringkimi miku kudanyu mankumanku yajinyi barrinani mamanyi baki dungalanyi baki yingkanyi yajinyi nayiba jambana wayka. Ngala marda narringkimi mankumanku kingkarriyngka yajinyi.
COL 3:3 Narri jungku barrinani nganinyiyurru nanankanyi wabuliyngka yuwanyi nuliykanyi kajanyi yajinyi baki yabimbikanyi balki yaji. Ngala narri jungku wankan nangangi Jisus Krayiskanyi. Miku narriyi najba bulanya, Kud marda Jisus Krayis, ngala narri jingkijbangka bulanya, bula marrimbaka narrinya mardarda yurrngumba barri Kudwanyi baki Jisus Krayiswanyi.
COL 3:4 Nyulu lalanbaka narrinya yurrngumba Jisus Krayiswanyi, baki jalija narringka janyba, baki mili janarri wanka jungku yurrngumba. Janarri jungku mili wanka nangandu kingkarri. Baku barri jalija nangka mili minimba yalungi bukambijuyngka, baki narri marda, janarri jungku nangandu. Nanamanji barri janyulu walkurra mambuka bukambijuyngka yajinyi, baki janarri jungku malumba nangandu. Janarri mirnarrijba muwa nangangi kudanyu barri.
COL 3:5 Nanankardi barri marda narrimi jungku barrinani nganinyiyurru bukamba balkinyi yajinyi. Marda narrimi yingijba nanda balki yaji wambu. Marda ninjimi miku kuluka yingkana, miku nganyinyina kayikayina. Marda narrimi miku kuliwijba kajanyi yajinyi baki dungalanyi. Jaliyi narri kuliwijba yajinyi, baki narri yurlwa nangangi Kudkanyi. Narri nulijba nanankanyi yajinyi, ngala miku narrimi nulijba nangangi Kudkanyi. Miku narrimi nulijba nanganginkanyi yajinyi.
COL 3:6 Jaliyi narringka miku kurrkunba jungunkanyi balki nani barri, baki janyulu ngarrangarra muwa narringi Kud. Janyulu kijiwijba narringi. Janyulu yabimba balki yaji narringi baku barri. Jalija nyulu karrinjarrijba narrinya walu nangandu, baki janyulu yanyba yabimbikanyi balki yaji narringi. Nani barri janyulu yabimba narringi, jaliyi narri miku ngayangayijba nanganginkanyi jangkurranyi, jaliyi narringka miku kurrkunba jungunkanyi balki nani barri.
COL 3:7 Wabula barri narrili jungku nani, waluwa narri kuyu nangangi jangkurr Jisus Krayiskanyi. Nanamanji barri narringkili mankumanku nanankanyi balkinyi yajinyi, narrili yabimba nanda balki yaji. Nanda balki yaji, nanda ngiruka narringi. Nani barri narrili jungku wabula.
COL 3:8 Ngala nanijba barri, marda narrimi barriwa yingijba nanda balki yaji. Marda narrimi miku ngarrangarra muwa yingkanyi. Marda narrimi miku ngirra yingka. Marda narrimi miku yanyba balki jangkurr yingkamukuyngka. Marda narrimi miku mijba yingka.
COL 3:9 Marda narrimi miku jujijba yingkamukuyngka. Marda narrimi miku jujijba yalungi, jungkukangangi narri barrinani buyingkinyi nganinyi. Barriwa barri bukamba nanda waluwinyi yuwa narringi, ngala narri durrijbangka nanda buyingkinyi yuwa nangangi Jisus Krayiskanyi. Yabimbayi bukamba yaji Kudwanyi, baki narrinya nyuli yabimba. Marda narrinya yabimbaka jungunkanyi kunyba nangangi yurrngumba barri. Narrinya yabimbaka jardiykanyi barrinani nyulu. Marda narrimi jardijba mili barrinani nyulu, baki mili yurrngumba barri, baki janarri jingkijba mili Kud. Janarri jingkijba mili Kud yurrngumba barri.
COL 3:11 Bukambiju ngambala Krisjinmuku, ngambala malumba jungku barrinani mungkijimuku. Miku ngambalimi Krisjinmuku jungku yinini yinini. Jumuku baki ngurranyimuku, ngambala malumba jungkuka. Kaburrwaburr baki nanamuku jala miku kaburrwaburr ngambala malumba jungkuka. Mambukamuku baki wakiwarrmuku ngambala malumba jungkuka. Miku ngambalimi Krisjinmuku jungku yinini yinini, ngala ngambala malumba jungkuka barrinani mungkijimuku, baki Jisus Krayis barri, nyulu ngambalangi buwanya, nyulu jungkuka ngamandu kurduluna. Barriwa.
COL 3:12 Narri barri nganinyimuku baki jibarrimuku nangangi Kudkanyi. Nyuli maruka muwa narringi, baki nyuli yarrijba narrinya, nanganginmirra. Nanankardi barri, marda narrimi jungku kunyba yalungi yingkamukuyngka. Marda narrimi kandimba yalunya yingkamuku. Marda narrimi yabimba kunyba yaji yalungi. Marda narringkimi miku yarrijba mili walkurra yingkamukuyngka. Ngala marda narrimi jungka kardarda yalungi.
COL 3:13 Jaliyi yingkawanyi yabimba balki yaji narringi, baki marda narrimi miku kijiwijba nangangi. Ngala marda narrimi manjamanjamba nanda balki yaji nangangi. Manjamanjambayi narringi balki yaji Kudwanyi, baki nanankardi barri marda narrimi manjamanjamba nanda balki yaji jala yingkawanyi yabimbayi narringi.
COL 3:14 Baki marda narringkimi maruka muwa. Jaliyi narringka maruka muwa, baki janarri malumba jungku mikuyaji kijinyi narrindu. Janarringka mardumardujba muwa, jaliyi narringka maruka muwa.
COL 3:15 Jaliyi narri jungku nani barri, baki janyulu wajba narrinya mardumardu muwanyi Jisus Krayiswanyi. Janarri miku ngarrangarra muwa, janarri miku balkijba muwa, wajbangangi narrinya mardumardu muwanyi Jisus Krayiswanyi. Yarrijbayi narrinya Kudwanyi, narri malumba jungunkanyi nanganginmuku jandanyimuku. Baki nanankardi barri marda narrimi mirnarrijba muwa nangangi Kudkanyi. Marda narrimi mirnarrijba muwa nangangi, wajbangangi narrinya mardumardu muwanyi.
COL 3:16 Nanda kunyba jangkurr nangangi Jisus Krayiskanyi, marda narrimi marrimba nanda jangkurr narringinyina kurduluna. Marda narringkimi milidimba nanganginkanyi jangkurranyi. Marda narrimi jungku kunyba kulaji milidimbikanyi narringka. Marda narrimi brijba wangarr nangangi Kudkanyi. Marda narrimi wajba Kud kunybanyi jangkurranyi. Marda narrimi mirnarrijba muwa nangangi yurrngumba barri.
COL 3:17 Marda narrimi jungku kunyba nangangi Jisus Krayiskanyi. Marda narringkimi mankumanku kunybanyi jangkurranyi nangangi. Marda narrimi yabimba ngawamba nanda jala nulijba Jisus Krayis narringi yabimbikanyi. Baki marda narrimi yanyba ngawamba nanda jala nyulu nulijba narringi yanybikanyi. Baki marda narrimi wajba Buwakanya Kud kunybanyi jangkurranyi yurrngumba barri. Barriwa.
COL 3:18 Narri Krisjinmuku jibarrimuku nawinganjayudi, marda ninjimi ngayangayijba nganyingkanyi nawinganjanyi. Marda ninjimi ngayangayijba nanganginkanyi jangkurranyi yurrngumba barri. Nani barri narri jungku yurlurrmba nangangi Kudkanyi. Barriwa.
COL 3:19 Baki narri nganinyimuku maninganjayudi, marda ninjimi maruka muwa nganyingkanyi maninganjanyi. Marda ninjimi kudanyu maruka muwa nangangi. Marda ninjimi miku ngirrwa nangangi, miku ninjiyi daba. Marda ninjimi kudanyu lalanba nganyi maninganja yurrngumba barri.
COL 3:20 Baki narri bayamuku, marda narrimi ngayangayijba bulangi, nganyingkanyi yarrijiyngkanyi baki nijanganjiyngkanyi. Marda narrimi ngayangayijba bulanginkanyi jangkurranyi, baki janyulu mirnarrijba muwa narringi Kud.
COL 3:21 Baki narri nijanganjinyimuku baki yarrijinyimuku, marda narrimi miku kudanyu ngirrwa yalungi narringinmukuyngka bayamukuyngka. Marda narrimi miku yabimba yalunya, yalu jungunkanyi ngarrangarra muwa narringi. Ngala marda narrimi kardarda ngirrwa yalungi, baki jayalu mirnarrijba muwa narringi. Jayalu mirnarrijba muwa ngayangayiykanyi narringinkanyi jangkurranyi.
COL 3:22 Baki narri wakiwarrmuku, marda narrimi ngayangayijba narringinkanyi mambukanyi. Marda narrimi waki kudanyu nangangi ngala nyulu karrinja narrindu lalanbijina wakinkurri, baki ngala nyuluja barlba, ngala narrija waki dadijba. Marda narrimi miku muningka ngayangayijba nangangi, nulijbangangi narri nangangi nyulu yanybikanyi narringi, narri jungkuja kunyba wakiwarr. Marda narrimi miku muningka ngayangayijba nangangi nanankardi, ngala marda narrimi ngayangayijba nangangi, marukangangi narri muwa nangangi Jisus Krayiskanyi. Narri nulijbangka ngayangayiykanyi ngambalanginkanyi mambukanyi Jisus Krayiskanyi, baki nani barri marda narrimi nulijba ngayangayiykanyi narringinkanyi mambukanyi wayka jambana.
COL 3:23 Jala narri waki nangangi Jisus Krayiskanyi, baki narri waki kudanyu nangangi. Baki nani barri marda narrimi kudanyu waki nangangi narringinkanyi mambukanyi nayiba wayka jambana. Jala narri waki narringinkanyi mambukanyi, baki nanda barrinani narri wakingka nangangi Jisus Krayiskanyi. Marda narrimi waki kudanyu nangangi barri, narringinkanyi mambukanyi nayiba wayka. Yiningki janyulu yabimba kunyba yaji narringi, yiningki miku. Ngala baku barri janyulu yabimba kunyba yaji narringi Jisus Krayiswanyi. Janyulu yabimba kunyba yaji narringi, nyulungangi narringi walkurra mambuka. Narri wakingka nangangi jala narri waki yingkanyi mambukanyi.
COL 3:25 Baku barri janyulu karrinjarrijba ngambalanya walu nangandu Kudwanyi. Janyulu karrinjarrijba ngambalanya, baki janyulu yanyba ngambalanginkanyi balkinyi yajinyi, jali ngambala yabimba. Ngala miku nyuliyi yanyba nayi barri, “Nimbala, mambuka baki wakiwarr, nimbala yabimbayi balki yaji. Nanamannga balki yaji nimbala yabimbayi. Baki nanankardi ninji wakiwarr, jangayu yabimba balki yaji nganyi. Ngala ninji mambuka, jangayu yabimba ngawamba bijal balki yaji nganyi, mambukangangi ninji.” Miku nyuliyi yanyba Kud nani. Miku. Bukambiju Krisjinmuku ngambala jandanyimuku nangangi Kudkanyi. Miku mili yingka yingkanyi walkurra. Miku. Janyulu yabimba nanamannga kunyba yaji bukambijuyngka yalungi, jala waki kudanyu nangangi. Baki janyulu yabimba nanamannga balki yaji yalungi, jala yabimba balki yaji nangangi, mambukanyi baki wakiwarrayngka. Nanamannga yaji janyulu yabimba yalungi. Barriwa.
COL 4:1 Baki narri mambukamuku, marda narrimi lalanba narringinmuku wakiwarrmuku. Marda narrimi jungku kunyba mambuka yalungi. Mankumankuwa narri Jisus Krayis barri, nyulu narringi mambuka jala jungku lalijina. Narri wakiwarrmuku nangangi. Nyulu barri lalanbaka narrinya, baki nani barri marda narrimi lalanba yalunya narringinmuku wakiwarrmuku. Barriwa.
COL 4:2 Lalanbawa narringka barri. Nanda wuwarr Sayidin, nyulu nulijbangka narringi jujambikanyi narrinya. Nyulu nulijbangka narringi, yabimbikanyi narrinya jungunkanyi balki nangangi Kudkanyi. Baki nanankardi barri, marda narringkimi lalanbawa nanankanyi Sayidinkanyi. Marda narrimi yanyba mududu nangangi Kudkanyi yurrngumba barri. Jaliyi narri yanyba mududu nangangi nani barri, baki janarringka lalanbawa nangangi Sayidinkanyi. Baki marda narrimi karu Kud, narri mirnarrijbangka muwa bukamba nanankanyi kunybanyi yajinyi jala nyulu yabimba narringi Kudwanyi. Marda narrimi yanyba mududu nangangi yurrngumba nani barri.
COL 4:3 Ngayu ngajaka narrinya, janarri yanyba mududu Kudkanyi nurrungi marda. Janarri ngajaka Kud, janyulu munyajba nurrunya milidimbiji yingkamuku nanganginkanyi jangkurranyi. Janurru karu yalunya nanankanyi jangkurranyi jali ngadijba Kudwanyi wabula. Janurru karu yalunya nangangi Jisus Krayiskanyi. Janarri ngajaka Kud nurrungi, janurru milidimba yalunya Jisus Krayiskanyi. Jungku ngayu nayiba brisinyina, milidimbangangi ngayi yalunya nangangi,
COL 4:4 baki mili jangayu milidimba yalunya nangangi. Janarri ngajaka Kud ngaki, jangayu kudanyu milidimba yalunya nanganginkanyi jangkurranyi, baki jayalu jingkijba nanda jangkurr. Jalija yalu manku ngaki jangkurr nangangi baki jayalu jingkijba ngaki jangkurr nangangi marda. Barriwa.
COL 4:5 Marda narrimi jungku kunyba kulaji nangangi Kudkanyi. Jala narri jungku yalundu jala miku yalimi Krisjinmuku, baki marda narrimi karu yalunya nangangi Jisus Krayiskanyi. Marda narrimi karu yalunya nangangi. Baki mankumankuwa narri nayi. Yalu najbawa narrinya Krisjinmuku. Jalija yalu najba narrinya jungunkurri kunyba yurrngumba barri, baki jayalu jingkijba narrinya, narri durrijba nanda jangkurr jala narri milidimba yalunya.
COL 4:6 Marda narrimi miku yanyba balki jangkurr kudiyana, ngala marda narrimi yanyba kunyba jangkurr yurrngumba barri. Jaliyi yalu yilikajba narrinya, wanyingkanyi narri durrijba Jisus Krayis, baki marda narrimi karu yalunya nangangi. Marda narrimi kardarda karu yalunya, yanka jayalu marda jungku yurlurrmba nangangi Kudkanyi jala yalu kuyu jangkurr nangangi Jisus Krayiskanyi. Barriwa.
COL 4:7 Nanda nganinyi Dikikus, nyulu barrinani bababanyamba ngambala. Nyulu wakiwarr nangangi, ngambalanginkanyi mambukanyi Jisus Krayiskanyi. Wakingka nyulu kudanyu nangangi. Janyulu yidamba narrinya, baki janyulu karu narrinya ngaki, yanka ngayu jungkuka. Ngayu manjijbangka nanda Dikikus narrindurri, baki janyulu karu narrinya ngaki baki yalungi Krisjinmukuyngka nayiba ngakindu. Jalija narri manku jangkurr nurrungi, baki janarri jungku mirnarrijba muwa. Janarri jungku ngiruka nangangi Kudkanyi marda.
COL 4:9 Nanda nganinyi Yunisimus, nyulu barrinani bababanyamba ngambala marda, jala ngambala maruka muwa nangangi kudanyu barri. Wabula nyulili jungku narrindu jurjina. Nanijba barri janyulu wijba narrindurri. Jabula Dikikus baki Yunisimus, jabula karu narrinya nanginyina yajina nayiba.
COL 4:10 Baki nanda Yarisdarkus, nyulu jungkuka nayiba ngakindu brisinyina. Nyulu manjijbangka jangkurr narrindurri. Baki yingkawanyi marda, nyulu manjijbangka jangkurr narrindurri. Nangangi niji Mak, marruwarra nyulu nangangi Barnabaskanyi. Wabula barri ngayi manjijba jangkurr narrindurri nangangi Makanyi. Ngajakayi narrinya lalanbiji nanda Mak jaliyi yidamba narrinya. Nyulu marda manjijbangka jangkurr narrindurri Makwanyi.
COL 4:11 Baki nanda Jujuwa, yingka niji nangangi Jusdus. Nyulu manjijbangka jangkurr narrindurri marda. Nanginmuku, Yarisdarkus, baki Mak, baki Jujuwa, yalu Jumuku, ngala yalu Krisjinmuku marda. Yalu wakingka nangangi Kudkanyi nayiba ngakindu. Mikuyaji yingkanyi yalungi Jumukuyngka jala yalu waki nayiba ngakindu, ngawamba nanamuku kujarra yingamali. Yalunjalili karu nangangi Kudkanyi, nyulu lalanbawarr. Yalili waki nayiba ngakindu, baki nanankardi ngayu jungku ngiruka wakinkanyi nangangi Kudkanyi.
COL 4:12 Baki nanda Yibabras jalili jungku ngakindu, nyulu marda manjijbangka jangkurr narrindurri nanganginmukuyngkurri mungkijimukuyngkurri. Nyulu marda wakiwarr nangangi Kudkanyi. Nyulili yanyba mududu nangangi Kudkanyi narringi. Kudanyu nyulu ngajakangka Kud narringi, janyulu yabimba narrinya jungunkanyi ngiruka nangangi. Janyulu yabimba narrinya kuyunkanyi nangangi jangkurr, durriykanyi nangangi jangkurr yurrngumba barri. Nyulu marda ngajakangka Kud narringi, janarri ngayangayijba nangangi Kudkanyi yurrngumba barri.
COL 4:13 Ngayu karungka narrinya nangangi Yibabraskanyi, nyulu wakiwarr nangangi Kudkanyi. Nyulu wakingka kudanyu narringi baki yalungi jalili jungku nananyina yajina Layudisiya, baki nananyina yajina Yirabulis. Kudanyu nyulu wakingka bukambijuyngka narringi. Barriwa.
COL 4:14 Baki kujarranyi bula mili manjijbangka jangkurr narrindurri. Nanda maralnguji ngambalangi mankankanyi niji nangangi Luk jala ngambala maruka muwa nangangi kudanyu barri, baki yingka Dimas. Bula marda manjijbangka jangkurr narrindurri.
COL 4:15 Nurru manjijbangka jangkurr yalundurri, bukambijuyngkurri Krisjinmukuyngkurri jala jungku nanaba Layudisiya. Nurru marda, nurru manjijbangka jangkurr nangandurri jibarriyurri, niji nangangi Nimba, baki yalundurri Krisjinmukuyngkurri jalili malumba jungku nanganginyina barndana. Malumba yalili jungku briykanyi yaji baki yanybikanyi mududu nangangi Kudkanyi.
COL 4:16 Ngayu karungka narrinya, marda narrimi yanyba nayinda jangkurr najana, jalija narri malumba jungku jurjina. Waluku barri janarri manku nayinda jangkurr, baki janarri manjijba nayinda naja yalundurri Krisjinmukuyngkurri jalili jungku nanaba Layudisiya. Jayalu yalu marda manku nayinda jangkurr. Baki yingka jangkurr najana ngayu manjijbangka yalundurri. Jayalu manku nanda jangkurr baki jayalu marda manjijba nanda naja narrindurri. Janarri manku nanda jangkurr yalunginyina najana marda.
COL 4:17 Ngayu ngajakangka narrinya, narri karunki Yarrkabus nanginkanyi jangkurranyi. Janarri yanyba nangangi nayi barri, “Marda ninjimi waki kudanyu nangangi Kudkanyi. Marda ninjimi yabimba bukamba nanda jali ninya karu Kudwanyi.” Nani barri marda narrimi karu nanda Yarrkabus.
COL 4:18 Nayi jadunyi jangkurr ngayu yarrijbangka jangkurr ngakinyina marnina. Ngayu manjijbangka nayinda ngaki jangkurr narrindurri. Ngayu ngajakangka narrinya, miku nganarrimi mamanumba. Mankumankuwa nganarri ngala ngayu jungku nayiba brisinyina. Baki ngayu ngajakangka Kud narringi, nyulu yabimbiji kaja kunyba yaji narringi. Barriwa barriwa bukamba nayinda jangkurr.
1TH 1:1 Nayinda nurru. Ngayu Paul, baki Silas, baki Timothy, nurru yarrijbangka nayinda jangkurr najana narringi, christianmukuyngka jalili narri jungku nananyina yajina niji Thessalonica. Nyulu narringi Buwakanya Kud, baki nyulu narringi mambuka Jesus Christ. Bula wirimalaru narringi barri. Nurru ngajakangka Kud, janyulu yabimba kunyba yaji narringi. Nurru ngajakangka Kud, janyulu yabimba narrinya, narri jungunkanyi mardumardu muwa nangangi.
1TH 1:2 Nurru wajbangka God nurrunginkanyi kunybanyi jangkurranyi narringingangi, narri durrijbangka nangangi jangkurr. Yurrngumba nurru ngajakangka God yajinyi narringi. Nurru ngajakangka Kud, nyuluja lalanbiji narrinya.
1TH 1:3 Nani barri nurru wajbangka Buwakanya God nurrunginkanyi kunybanyi jangkurranyi narringi, mankuwangangi nurru yaji narringi. Nurru mankuwa yaji narringi, narrili durrijba nangangi yuwa, narrili jungku yurlurrmba nangangi, narrili yabimba nanda yaji, jalili nyulu nulijba narringi yabimbikanyi yaji. Narrili waki kudanyu nangangi Jesus Christkanyi, marukangangi narri muwa nangangi kudanyu barri. Baki narrili jingkijba marda, baku barri janarri jungku kingkarri nangandu, kuyungangi narri nangangi jangkurr Jesus Christkanyi. Nani barri nurrili mankuwa yaji narringi.
1TH 1:4 Narri, bababanyamba ngambalaka. Nurru jingkijbangka narrinya, narri jingkijbangka Kud, nyuli yarrijba narrinya nanganginmuku jandanyimuku. Narri jingkijbangka Kud, nyulu marukangka muwa narringi, baki narrinya nyuli yarrijba nanganginmuku jandanyimuku.
1TH 1:5 Waluwa nurri karu narrinya nanganginkanyi jangkurranyi Jesus Christkanyi. Nurri karu narrinya nanganginkanyi kunybanyi jangkurranyi. Godanyunurri milidimba narrinya nangangi, yabimbangangi nurrunya ngiruka Kunybawanyi Ngarnduwanyi Kudkanyi. Nyuli yabimba nurrunya ngiruka milidimbikanyi narrinya marda. Baki jali narri manku nurrungi jangkurr, baki narri jingkijbayi, duja nanda jangkurr. Narri jingkijbangka nurrunya, yanka nurrili jungku narrindu nanamanji wabula. Nurru jungkuyi ngiruka nangangi Godkanyijali yalu yingkamukunyi wajba ngambalanya kijinyi. Nyuli milidimba nurrunya yajinyi ngamanginyi mambukawanyi Jesus Christwanyi. Nyuli milidimba nurrunya jungunkanyi yurlurrmba nangangi, baki nani nurri jungku narrindu. Narri najbayi nurrunya jungunkurri yurlurrmba nangangi, baki nani marda narri jungkuyi yurlurrmba nangangi. Yingkamukunyi, yali wajba narrinya kijinyi, jali narri kuyuyi nangangi jangkurr Jesus Christkanyi. Yali wajba narrinya kijinyi, ngala yuwajiwa narri mirnarrijba muwa nanankanyi jangkurranyi Jesus Christkanyi. Mirnarrijba narri muwa, jungkuyingangi nanda Kunyba Ngarndu Godkanyinarrindu kurduluna. Nyuli yabimba narrinya ngiruka nanankanyi kijinyi.
1TH 1:7 Nanankardi barri nanamuku christianmuku jalili yalu jungku narrindu, jalili yalu jungku nanankujarranyina walkurranyina yajina niji, Macedonia baki Achaia. Nanankardi barri yalu jungkuyi ngiruka nangangi Jesus Christkanyi marda. Manku yali jangkurr narringi, narri jungunkurri ngiruka jali yalu wajba narrinya kijinyi. Nani yalu mankuyi jangkurr narringi, baki nanankardi barri yalu marda jungkuyi ngiruka nangangi. Narri marda karuyi yalunya nangangi, ngamanginkanyi mambukanyi Jesus Christkanyi. Narri marda karuyi yalunya nangangi. Mili baki mili jali yalu jungku narrindu, kajamukunyi yali manku jangkurr nangangi Jesus Christkanyi narringingangi. Manku yali narringi, narri jungunkurri yurlurrmba nangangi Jesus Christkanyi. Baki kajamuku mili jalili yalu jungku yingkana yajina baki yingkana yajina wandijiyana, yalu marda mankuyi nanamannga jangkurr narringi. Miku nurriyanyi karu yalunya narringi, mankungangi yalu nanda jangkurr narringi yaluman barri. Jingkijba yali bukamba nanda yaji narringi.
1TH 1:9 Bukambiju jali yalu manku nanda jangkurr narringi, yali jingkijba marda, narri kandimbayi nurrunya jali nurru yidamba narrinya, narri mankuyi nurrungi jangkurr nangangi Jesus Christkanyi. Baki nanankardi barri narringki yangkalamba narringinbunanyi balkinanyi yuwananyi. Narringki yangkalamba narringinbunanyi kudmukunanyi, jalili yalu miku duja Kud. Narringki yangkalamba nangandurri Godyurri, jala nyulu duja jungku, jala nyulu wirimalaru, jala jungku wanka yurrngumba barri. Narringki yangkalamba nangandurri, baki nanijba barri narri jungkuka kunyba nangangi.
1TH 1:10 Narri yukumbaka nangangi, nanganginkanyi jandayngkanyi Jesus Christkanyi, jalija nyulu wijba kingkarrinya lalijinanyi wayka jambarri. Janyba nangki Jesus Christ, ngala mili wankambayi Godwanyi. Narri yukumbaka nangangi, jalija narrinya marrimba mardarda. Nanamanji barri baku, jalija nyulu karrinjarrijba yalunya bukambiju walu nangandu Godwanyi, jalija nyulu daba yalunya, baki janyulu marrimba narrinya mardarda Jesus Christwanyi. Barriwa.
1TH 2:1 Narri, bababanyamba ngambalaka, narri jingkijbangka nayi barri. Jali nurru yidamba narrinya, baki nanda kunyba narringi.
1TH 2:2 Waluwa nurri yidamba narrinya, baki nurri yidamba yalunya yingkamuku marda. Yidamba nurri nanamuku jalili yalu jungku nananyina yajina Philippi. Baki narri jingkijba marda, jali nurru yidamba yalunya, baki yalu wajbayi nurrunya kijinyi. Yalu linjumbayi nurrunya mankanyi, yalu yanybayi balki jangkurr nurrungi. Baki jali nurru jilajba mili bayungu narrindurri, baki kajamukunyi yali wajba nurrunya mili kijinyi. Ngala miku nurriyi marrala karunkanyi narrinya. Yuwajiwa nurri karu narrinya nangangi Jesus Christkanyi. Yuwajiwa nurri karu narrinya nangangi, yabimbayingangi nurrunya ngiruka Godwanyi, karunkanyi narrinya nangangi barri. Miku nurriyi marrala. Godanyunurri karu narrinya nanankanyi kunybanyi jangkurranyi nangangi Jesus Christkanyi. Barriwa.
1TH 2:3 Jali nurru milidimba narrinya nangangi Kudkanyi, baki miku nurrungkiyanyi mankumanku, janurrunjalu wajba yajinyi, milidimbangangi nurru yalunya. Baki marda miku nurriyanyi yanyba jujambawarr jangkurr. Miku nurriyanyi jujamba narrinya. Miku. Nurrungi jangkurr duja barri.
1TH 2:4 Yurrngumba barri jala nurru milidimbaka yalunya nangangi, baki nurru yanybaka nanda jangkurr jala nulijbangka God ngambalangi yanybikanyi nanda jangkurr. Mankumanku nangki God nurrungi, baki jingkijba nyuli nurrunya, nurru jungkuka kunyba nangangi, nurru jungkuka yurlurrmba milidimbikanyi nanganginkanyi kunybanyi jangkurranyi. Miku nurriyi marrala milidimbikanyi yalunya nangangi. Janurru milidimba yalunya ngawamba nanganginkanyi duja jangkurranyi. Nurru nulijbangka nangangi Kudkanyi, nyulu mirnarriykanyi muwa nurrungi. Miku nurrimi nulijba ngawamba yalungi nganinyimukuyngka yalu mirnarriykanyi muwa nurrungi. Miku. Ngala nurru nulijbangka nangangi Kudkanyi, nyulu mirnarriykanyi muwa nurrungi. Janyulu mirnarrijba muwa nurrungi, jalija nurru yabimba nanda jala nyulu nulijbangka nurrungi yabimbikanyi yaji.
1TH 2:5 Jingkijbangka nurrunya Godwanyi, nayinda barri duja jangkurr. Jali nurru milidimba narrinya nangangi, ngala miku nurriyanyi wajba narrinya muningka nurrunginkanyi kunybanyi jangkurranyi. Miku nurriyanyi muningka yanyba narringi, narri jungkuka kunyba yurrngumba barri. Baki miku nurriyanyi muningka milidimba narrinya, nurru wudumbiji dungala narrinbunanyi. Miku. Jingkijbangka nurrunya Godwanyi. Miku nurriyanyi nanankanyi milidimba narrinya.
1TH 2:6 Miku nurriyanyi nulijba narringi, narri waykanyi nurrunya narringinkanyi kunybanyi jangkurranyi. Miku. Baki miku nurriyanyi nulijba yalungi yingkamukuyngka, yalu waykanyi nurrunya yalunginkanyi kunybanyi jangkurranyi.
1TH 2:7 Manjijbayi nurrunya Jesus Christwanyi, karunki yalunya nanganginkanyi kunybanyi jangkurranyi. Baki nanankardi barri yuku nurriyanyi ngajaka narrinya dungalanyi marda mamanyi jali nurru milidimba narrinya. Yuku nurriyanyi ngajaka narrinya yajinyi, ngala miku nurriyanyi ngajaka narrinya yajinyi, jali nurru milidimba narrinya. Miku. Ngala nurri maruka muwa narringi, nurruja lalanba narrinya. Nanangini jibarriwanyi, nyulu lalanbaka nangangi bardarda, baki nani barri nurruja lalanba narrinya nanamanji barri. Miku nurriyanyi milidimba narrinya dungalanyi, ngala nurri milidimba narrinya kardarda jangkurranyi barri.
1TH 2:8 Godanyubarri nurri maruka muwa narringi, baki nanankardi nurri karu narrinya nanankanyi kunybanyi jangkurranyi Jesus Christkanyi. Yi. Godanyunurri maruka muwa narringi, baki nanankardi barri birrirrinja nurrungki narringi, janybikanyi nurrungka narringi. Yi. Birrirrinja nurrungki narringi, janybikanyi nurrungka narringi barri.
1TH 2:9 Narri, bababanyamba ngabalaka. Mankuwa narri nurrunya nanamanji barri jalili nurru milidimba narrinya. Mankuwa narri nurrunya. Waki nurri dungalanyi nanamanji barri. Godanyunurri waki kambana, baki mungana marda. Godanyunurri waki wudumbikanyi nurrungi dungala mamanyi. Miku nurriyanyi nulijba narringi, narri muningka waykanyi nurrunya dungalanyi baki mamanyi. Waki nurri wudumbikanyi nurrungi dungala, jalili narrinya milidimba kunybanyi jangkurranyi nangangi Kudkanyi. Barriwa.
1TH 2:10 Narri jingkijbangka nayinda jangkurr duja barri. Baki nyulu marda jingkijbangka Godwanyi. Narri jala kuyu nangangi jangkurr, jalili nurru jungku narrindu, baki miku nurriyanyi jungku balki, miku nurriyanyi yabimbabalki yaji narringi. Ngala nurrili jungku kunyba narrindu barri. Nurrili jungku yurlurrmba nangangi Kudkanyi.
1TH 2:11 Bakili nurri yabimba kunyba yaji marda narringi. Nanangini nijanganjinyiwanyi, nyulu yabimbaka kunyba yaji nangangi, nanganginkanyi jandayngkanyi. Nyulu lalanbaka nangangi jandanyi. Baki nani barri nurri marda. Nurrili yabimba kunyba yaji narringi. Nurrili lalanba narrinya marda.
1TH 2:12 Nurrili milidimba narrinya. Nurrili yabimba narrinya ngiruka, narri jungunkanyi yurlurrmba nangangi Jesus Christkanyi. Godanyunurrili karu narrinya, narri jungunkanyi kunybana yuwana nangangi Kudkanyi, baki janyulu mirnarrijba muwa narringi Kud. Nyuli yarrijba narrinya nanganginmuku jandanyimuku Godwanyi, baki nanankardi janarri jungku kingkarri nangandu baku barri. Nyulu nanda lalanbawarr narringi. Barriwa.
1TH 2:13 Nurru wajbangka God nurrunginkanyi kunybanyi jangkurranyi narringi marda, kuyungangi narri nangangi jangkurr. Jali nurru karu narrinya nanganginkanyi kunybanyi jangkurranyi, baki narri kuyuyi marda nanda jangkurr. Narri jingkijbayi, nanda jangkurr jali nurru karu narrinya, miku nanda ngawamba nurrungi jangkurr, ngala nanda dujanya nangangi jangkurr Kudkanyi. Baki nanankardi barri nyulu jungkuka God narringinyina kurduluna. Nyulu jungkuka yalundu bukambijunyina jala yalu kuyu nangangi jangkurr.
1TH 2:14 Narri, bababanyamba ngambalaka. Narri barrinani nanamuku christianmuku jala yalu Jewmuku, jala yalu jungku nananyina yajina karrurrinybana, niji Judea. Narri barrinani nanamuku Jewmuku, jali yalu kuyu nangangi jangkurr Kudkanyi, jali yalu durrijba Jesus Christ. Yingkamukunyi yali manku kiji yalungi, yalunginyi mungkijimukunyi. Baki nani marda yingkamukunyi yali manku kiji narringi marda, narringinyi mungkijimukunyi. Nani barri narri jungkuka barrinani yalu.
1TH 2:15 Wankalana barri nanamukunyi Jewmukunyi, yali manku kiji yalungi, jali yanyba jangkurr nangangi Kudkanyi. Yalunjali kurdanba. Baki wabula barri kudiyamukunyi Jewmukunyi, yali manku kiji nangangi Jesus Christkanyi, yali kurdanba barri. Baki nanijba barri yalu mankuka kiji nurrungi. Yalu nulijbangka kurdanbikanyi nurrunya marda. Yalu mankuka kiji yalungi jala yalu durrijba Kud. Yalu mankuka kiji yalungi bukambijuyngka. Ngala miku nyulimi mirnarrijba muwa yalungi Kud. Miku nyulimi mirnarrijba muwa yalungi.
1TH 2:16 Nurri karu yalunya, jali yalu miku nurrungi mungkijimuku, jali yalu ngurranyimuku nurrungi. Nurri karu yalunya nangangi Jesus Christkanyi, janyulu marrimba yalunya mardarda, jaliyi yalu kuyu nangangi jangkurr. Ngala jali nurru karu yalunya ngurranyimuku nani, baki nanginmukunyi balkimukunyi, yaliyanyi kurrkunba nurrunya. Yaliyanyi kurrkunba nurrunya karunkanyi yalunya nanankanyi jangkurranyi. Nani barri yalu mankuka kiji yalungi. Nanankardi barri yalu jungkuka balki nangangi Kudkanyi. Waluwa yali jungku bijal balki nangangi, ngala nanijba barri yalu jungkuka kudanyu balki nangangi, baki nyulu ngarrangarra muwa yalungi Kud. Godanyunyulu ngarrangarra muwa yalungi. Janyulu daba yalunya, jungkukangangi yalu balkimirra nangangi. Barriwa.
1TH 2:17 Narri barri, bababanyamba ngambalaka. Jali nurru mudamba narrinya, jali nurru barlba narrinbunanyi, baki ngindu nurrungki muwa narringi. Barlba nurri narrinbunanyi ngawamba marndakaja, ngala nurrungki nginduwa muwa narringi jali nurru yingijba narrinya. Ngala yuwajiwa nurru mankuwa narrinya. Nurru mankuwa narrinya yurrngumba barri. Godanyunurru nulijbangka narringi, yidambikanyi narrinya, ngala jilijbawa barri.
1TH 2:18 Nulijba nurrili wiykanyi langki narrindurri. Baki marda ngayu, kudanyu ngayili nulijba wiykanyi narrindurri, ngala jilijbawa barri. Kurrkunbayi nurrunya Satanwanyi. Nyuli kurrkunba nurrunya wiykanyi narrindurri.
1TH 2:19 Nulijba ngayili wiykanyi narrindurri, mirnarrijbangkangangi nurru muwa narringi. Kunyba narri nurrungi marda. Narri barrinani kandimuku nurrungi. Nurru mirnarrijbangka muwa narringi, jingkijbangangi nurru narrinya, yurrngumba janarri jungku ngiruka nangangi Jesus Christkanyi. Baku barri jalija wijba Jesus Christ, baki janurru yanyba nangangi. Janurru karu Jesus Christ narringi, nurru mirnarrijba muwa narringi, jungkukangangi narri ngiruka nangangi. Godanyunurru mirnarrijba muwa narringingangi, baki nani barri janurru karu Jesus Christ narringi, narri durrijbangkangangi nangangi jangkurr. Barriwa.
1TH 3:1 Ngurungurujba nurru narringi. Nurriyanyi wijba langki narrindurri yurrngumba barri. Godanyunurriyanyi wijba narrindurri, ngala miku nurriyi wijba. Baki mankumanku nurrungki, mili nurruja jungunkanyi nayiba kularra nanginyina barrawuyabarrawuyana, niji Athens, baki jungku nurri nayiba.
1TH 3:2 Ngala manjijba nurri Timothy langki barri narrindurri. Nanda Timothy, nyulu barrinani kanyiya nurrungi. Nyulu wakingka malumba nurrundu nangangi Kudkanyi. Nyulu marda karungka yalunya nanganginkanyi kunybanyi jangkurranyi Jesus Christkanyi. Nurri manjijba Timothy narrindurri, nyulu milidimbiji narrinya, nyulu yabimbiji narrinya jungunkanyi mili ngiruka nangangi Kudkanyi. Janarri jungku mili ngiruka nangangi, baki janarri mili kudanyu kuyu nangangi jangkurr.
1TH 3:3 Baki nanankardi barri janarringka miku yangkalamba nanganbunanyi Godnanyi. Janarringka miku yangkalamba nanganbunanyi jala yalu yingkamukunyi manku kiji narringi. Narri jingkijbangka Kud, nyulu munyajbangka yalunya mankunkurri kiji ngambalangi. Nyulu munyajbangka yalunya.
1TH 3:4 Narri mankuwa nanda jangkurr jali nurru karu narrinya kijinyi. Jali nurru jungku narrindu, baki nurri karu narrinya kijinyi, jalija badajba kiji nurrundurri baku. Baki narri jingkijbangka marda, nanda jangkurr nurrungi kijinyi, duja barri nanda jangkurr. Yalu mankuka kiji nurrungi barri. Yalu mankuka kiji nurrungi.
1TH 3:5 Balkijba ngayi muwa narringi. Godanyungayi balkijba muwa narringi, baki nanankardi barri ngayi manjijba Timothy narrindurri. Mankumanku ngaki narringi, yiningki nyulu balanjayi narrinya Satanwanyi. Yiningki narringki yangkalamba nanganbunanyi Godnanyi. Yiningki narri nanijba durrijbangka Satan. Nani barri ngayi balkijba muwa narringi. Jalimi narri mili durrijba Satan, baki muningka nurri waluwa karu narrinya nangangi Jesus Christkanyi. Jalimi narri mili durrijba Satan, baki narringka yangkalamba nurrunginbunanyi jangkurrnanyi. Ngala miku barri.
1TH 3:6 Yidambayi narrinya Timothywanyi, baki wijba nyuli langina nurrundurri. Nyuli karu nurrunya narringi, miku narringkiyanyi yangkalamba nanganbunanyi Godnanyi. Yuwajiwa narri jungkuka ngiruka nangangi. Yuwajiwa narri kuyungka nangangi jangkurr, marda narringka maruka muwa nangangi barri. Marda karuyi nurrunya Timothywanyi, narringka mankumanku kunybanyi yajinyi nurrungi yurrngumba barri. Narri ngurungurujbangka nurrungi barrinani nurru ngurungurujbangka narringi.
1TH 3:7 Karuyi nurrunya narringi Timothywanyi, yuwajiwa narri jungkuka ngiruka nangangi Kudkanyi, baki nurru mirnarrijbangka muwa narringi barri. Yingkamukunyi nayiba barri, yuwajiwa yalu mankuka kiji nurrungi, yuwajiwa yalu linjumbaka nurrunya, ngala nurru mirnarrijbangka muwa narringi. Mirnarrijbangka nurru muwa narringi, yuwajiwangangi narri jungkuka ngiruka nangangi Kudkanyi.
1TH 3:8 Waluku barri nurri balkijba muwa narringi, ngala karuyi nurrunya narringi Timothywanyi, baki nanijba barri nurru mirnarrijbangka muwa narringi, jungkukangangi narri yurlurrmba nanganginyina yuwana Jesus Christkanyi, baki nyulu bababanyamba narrinya Jesus Christwanyi.
1TH 3:9 Nurru wajbangka God nurrunginkanyi kunybanyi jangkurranyi. Godanyunurru wajbangka God kunybanyi jangkurranyi, mirnarrijbangkangangi nurru muwa narringi. Yurrngumba nurru mirnarrijbangka muwa narringi, yuwajiwangangi narri jungkuka yurlurrmba nangangi Jesus Christkanyi. Yuwajiwa narri jungkuka ngiruka nangangi barri.
1TH 3:10 Yurrngumba barri kambana baki mungana, nurru ngajakangka God yajinyi. Godanyunurru ngajakangka Kud, janurru jilajba langki yidambiji narrinya, baki janurru mili milidimba narrinya jangkurranyi nanganginkanyi Jesus Christkanyi. Jaliyi nurru mili milidimba narrinya nangangi, baki janarri mili jingkijba Jesus Christ, janarri mili durrijba nangangi jangkurr kudanyu barri. Barriwa.
1TH 3:11 Nurru ngajakangka bulanya, ngambalangi Buwakanya Kud, baki ngambalangi mambuka Jesus Christ. Nurru ngajakangka bulanya, jabula munyajba nurrunya yidambiji narrinya. Nurru ngajakangka bulanya, jabula manjijba nurrunya narrindurri.
1TH 3:12 Nurru ngajakangka Jesus Christ, janyulu yabimba narrinya, narringka marukankanyi muwa nangangi. Janarringka maruka muwa kudanyu barri, baki janarri maruka muwa yalungi marda bukambijuyngka. Janarri mili maruka muwa yalungi marda, baki mili yurrngumba barri. Nani barri nurru marukangka muwa narringi barri. Godanyunurru marukangka muwa narringi.
1TH 3:13 Jaliyi narri nani barri kudanyu maruka muwa yalungi, baki janarri jungku mili ngiruka kurdulu nangangi Kudkanyi, janarri jungku mili kunyba kurdulu nangangi, janarri barrinani kudukudu nangangi. Baki nanankardi barri mikuwali yingkawanyi karu God balkinyi jangkurranyi narringinkanyi, ngala janyulu karu God kunybanyi jangkurranyi narringi Jesus Christwanyi. Jalija wijba Jesus Christ wayka jambarri, baki bukambiju christianmuku, jayalu nangandu marda. Nanamanji barri janyulu karu God kunybanyi jangkurranyi narringi Jesus Christwanyi. Janyulu karu God narringi, narri jungunkanyi yurlurrmba nangangi, marukangangi narri muwa yalungi bukambijuyngka. Barriwa.
1TH 4:1 Narri, bababanyamba ngambalaka. Nayinda barri jadunyi jangkurr nurru yarrijbangka najana narringi. Nurri milidimba narrinya nanankanyi jala marda narrimi yabimba. Nurri milidimba narrinya, narri jungunkanyi yurlurrmba nangangi Kudkanyi. Nani barri nurri milidimba narrinya, nyulungangi ngambalangi mambuka Jesus Christ. Nyulu ngambalangi mambuka, baki nurru jingkijba Jesus Christ, nyulu nulijbangka nurrungi milidimbikanyi narrinya nani barri. Jaliyi narri jungku nani, jaliyi narri jungku yurlurrmba nangangi, baki mirnarrijbaja God muwa narringi. Nurru jingkijbangka narrinya, nani barri narri jungkuwa. Ngala kudanyu barri nurru karungka narrinya, marda narrimi jungku mili kunyba nangangi Kudkanyi. Marda narrimi mili yabimba kunyba yaji nangangi. Marda narrimi jungku mili yurlurrmba nangangi yurrngumba barri.
1TH 4:3 Nyulu nulijbangka God narringi, narri jungunkanyi barrinani kudukudu nangangi. Marda narrimi jungku yurlurrmba yuwana Kudkanyi. Marda narrimi miku barimba kuluka yingkana nganinyina baki jibarrina. Jaliyi narri barimba kuluka yingkana, baki nanda balki. Miku narriyi barrinani kudukudu nangangi Kudkanyi.
1TH 4:4 Narri nganinyimuku, marda ninjimi kuluka kunymamba nganyinyina maninganjana. Marda ninjimi lalanba nganyi maninganja. Marda narrimi mankumankuwa Kud, nyulu marda marukangka muwa nangangi nganyingkanyi maninganjanyi. Nanda nganyi maninganja nyulu marda kudukudu nangangi Kudkanyi, barrinani ninji kudukudu nangangi. Marda ninjimi miku kuluka kudanyu nangandu yurrngumba, nulijbangka nangangi yurrngumba barri. Ngala marda ninjimi kardarda kuluka nangandu. Nanamuku jala yalu durrijbangka Satan, miku yalimi kuluka kunymamba yalunginyina maninganjana. Miku yalimilalanba yalungi maninganja, baki nanda balki. Baki yalili kuluka yingkana jibarrina jala miku yalungi maninganja, baki nanda balkimirra.
1TH 4:6 Jaliyi narri christianmuku kuluka kunymamba ngawamba nganyinyina maninganjana, baki nanda kunyba. Miku janarri barimba nanda yuwa nangangi Godkanyikulukankanyi jibarrina. Janarri jungku yurlurrmba nanankanyi yuwanyi. Jaliyi narri miku kuluka yingkana jibarrina, baki miku janarri jayijba jibarri yingkanyi nganiyngkanyi, baki miku janarri manku kiji nangangi. Wabula barri nurri karu narrinya, baki mili nurru karungka narrinya, jaliyi narri barimba nanda yuwa kulukankanyi jibarrina, baki janyulu ngarrangarra muwa narringi Kud. Janyulu daba narrinya, jaliyi narri miku kudanyu lalanba nganyi maninganja, jaliyi narri miku jungku kunyba nangangi. Barriwa.
1TH 4:7 Yarrijbayi ngambalanya nanganginmuku jandanyimuku Godwanyi. Ngala miku nyuliyanyi yarrijba ngambalanya, ngambala jungunkanyi balki nangangi, ngambala barimbikanyi nangangi yuwa kulukankanyi yingkana. Nyuli yarrijba ngambalanya nanganginmuku jandanyimuku, ngambala jungunkanyi kunyba nangangi, ngambala jungunkanyi barrinani kudukudu nangangi.
1TH 4:8 Nanankardi barri, jaliyi narri miku kuyu nayinda jangkurr, jala nurru karungka narrinya, jaliyi narri miku kuyu nayinda jangkurr, baki narri yurlwangka miku nanda nurrunginkanyi jangkurranyi, ngala nanganginkanyi jangkurranyi Kudkanyi. Narri yurlwangka nanankanyi jangkurranyi jali wajba narrinya nanganginyi Kunybawanyi Ngarnduwanyi Kudkanyi. Barriwa.
1TH 4:9 Nurru jingkijbangka narrinya, narri marukangka muwa yalungi christianmukuyngka. Baki miku janurru mili karu narrinya marukankanyi muwa yalungi, milidimbayingangi narrinya Godwanyi. Nyulu milidimbayi narrinya, narri marukankanyi muwa yalungi.
1TH 4:10 Baki nani barri narri yabimbaka yaji. Narri marukangka muwa yalungi bukambijuyngka christianmukuyngka nananyina walkurranyina yajina Macedonia. Ngala mili yaji nurru kudanyu ngajakangka narrinya yabimbikanyi nanda yaji.
1TH 4:11 Nurru ngajakangka narrinya, janarri kudanyu balanja jungunkanyi mardumardu muwa. Janarri kudanyu balanja jungunkanyi barrinani kandimuku yalungi yingkamukuyngka. Janarri balanja yingiykanyi yingkamuku yalungi yuwa. Janarri miku yililikajba yalunya mamanyi marda dungalanyi, ngala janarri waki barri wudumbikanyi narringi yaji. Nani barri nurru marda wabula karuyi narrinya, narri jungunkanyi.
1TH 4:12 Jaliyi narri jungku nani yurrngumba barri, baki yingkamukunyi jala yalu miku christianmuku, jayalu jingkijba narrinya, narri kunybamuku. Jayalu jingkijba narrinya, miku narrimi yililikajba yalunya dungalanyi, ngala narri waki narringinkanyi yajinyi. Barriwa.
1TH 4:13 Narri, bababanyamba ngambalaka. Nurru nulijbangka narringi jingkiykanyi yaji yalungi, jalija yalungka janyba. Nurru nulijbangka narringi jingkiykanyi yalungi yaji, baki miku narriyi kudanyu ngindu muwa yalungi. Ngambala jingkijbangka yaji nangangi Jesus Christkanyi. Janyba nangki, baki mili wankijba nyuli. Wijba nyuli kingkarri nangandurri Godyurri. Baki nanankardi barri ngambala jingkijbangka yaji yalungi barri marda, jala yalu kuyu nangangi jangkurr Jesus Christkanyi. Ngambala jingkijbangka yaji yalungi. Jalija yalungka janyba, baki janyulu mili wankamba yalunya marda Godwanyi. Janyulu kuyu yalunya kingkarri jungunkanyi nangandu Jesus Christnyina. Nanankardi barri, marda narrimi miku kudanyu ngindu muwa yalungi. Ngala nanamuku jala yalu miku kuyu nangangi jangkurr Jesus Christkanyi, miku yalimi jingkijba jungunkanyi mili wanka nangandu Godnyina. Baki nanankardi barri kudanyu yalu ngindu muwa yalunginkanyi kuyuwananyi. Barriwa.
1TH 4:15 Nayinda jangkurr jala nurru milidimbaka narrinya, miku nayinda nurrungi jangkurr. Nayinda nangangi jangkurr, ngamanginkanyi mambukanyi Jesus Christkanyi. Jalija wijba Jesus Christ wayka nanginkurri jambarri, baki nanamuku christianmuku jalija yalu yuwajiwa wanka jungku wayka jambana nanamanji, miku yaliyi jilajba waluwa nanamukuyngka jali yalungka janyba wabula. Miku yaliyi jilajba waluwa yalungi.
1TH 4:16 Baku barri janyulu wijba Jesus Christ wayka nanginkurri. Nanamanji barri, waluku kayaja God kudanyu barri jirrinybikanyi yalunya. Waluku barri kayaja Kud, baki nanda mambuka yalungi angelmukuyngka, janyulu kaya marda yalungi, nanda angel. Jangambala manku walkurra nyiri, barrinani jala yalu janyba kingkarrinya rabunya, jala yalu balunba kudanyu barri. Jalija wijba Jesus Christ, baki nanamuku kuyuwanamuku jali yalu durrijba Jesus Christ, jayalu waluku kirrijba waluwa nangandurri. Jayalu kirrijba waluku barri mardamardambiji yalungka marda Jesus Christ.
1TH 4:17 Baki bayngkani barri ngambala, jala yuwajiwa jungku wanka nayiba jambana, jangambala marda kirrijba kingkarri nangandurri. Baki bukambiju ngambala christianmuku, nanamuku jali yalungka janyba waluwa, baki nanamuku jala yalu yuwajiwa wanka jungku, jangambalaka mardamardamba marda Jesus Christ kingkarri lalijina. Jangambala malumba jungku wanka nangandu Jesus Christnyina yurrngumba barri.
1TH 4:18 Nanankardi barri marda narrimi miku kudanyu ngindu muwa jala nangka janyba yingka christian narrindu. Ngala marda narrimi mankuwa nayinda jangkurr. Marda narringkimi yanybawa nanginkanyi jangkurranyi, baki janarri mardumardu muwa. Barriwa.
1TH 5:1 Ngala wanyimbala wijbaja Jesus Christ. Wanyimbala janyulu wijba wayka nanginkurri. Miku nurriyi karu narrinya. Miku nurriyi narrinya karu, mikungangi nurriyi jingkijba wanyimbala.
1TH 5:2 Narri jingkijbangka nayinda yaji. Baku barri janyulu duja wijba nanginkurri jambarri, ngala miku ngambaliyi jingkijba wanyimbala wijbaja. Miku ngambaliyi jingkijba wanyimbala. Mankumanku narringka maninjakunyi. Jalija nyulu ngankijba barndana nanda maninjaku maninjakuykanyi yaji, baki miku nyuliyi waluku karu yingkamuku wanyimbala janyulu maninjakujba yaji. Ngala kardarda nangka binanybaka mungana barri, jala mikuwali yingkawanyi najba. Baki miku nyuliyi jingkijba mungkijiwanyi nanankanyi barndanyi. Miku nyuliyi jingkijba wanyimbala badajbaja nanda maninjaku. Baki nani barri miku ngambaliyi jingkijba wanyimbala wijbaja Jesus Christ. Miku ngambaliyi jingkijba.
1TH 5:3 Nanamuku jala yalu miku christianmuku, yalungka barri yanybaka nayi barri, “Yuku ngambala jungku mardumardu muwa, mikuyajingangi kijinyi ngambalandu. Yuku ngambala mardumardu muwa yurrngumba barri.” Nani yalungka yanybaka, ngala dulu barri yalundurri badajbaja kiji. Dulu barri. Mankumanku narringka jibarrinyi. Jala nyulu ngawukuku barringa nangkaja birnandaykanyi bardardanyi, baki dulu barri janyulu badajba kiji nangandurri. Dulu nyulu linjumbaka muwa bardardawanyi. Baki nani barri marda, dulu barri badajbaja Jesus Christ, ngala miku ngambaliyi jingkijba wanyimbala. Dulu barri badajbaja Jesus Christ, baki janyulu manku kiji yalungi jala yalu miku kuyu nangangi jangkurr. Jungkuka yalu balki nangangi, baki nanankardi janyulu daba yalunya, jalija nyulu wijba.
1TH 5:4 Ngala narri christianmuku, miku narrimi jungku barrinani yalu jala miku yalimi jingkijba Kud. Miku yalimi kuyu nangangi jangkurr Jesus Christkanyi. Yalu jungkuka barrinani mungana yajina. Jala mungana yajina, baki miku ngambaliyi najba yingka, miku ngambaliyi jingkijba nanda jala nyulu yabimbaka. Yalu jungkuka barrinani mungana yajina. Miku yalimi jingkijba nanda jalija yabimba Jesus Christwanyi, nyulu wiykanyi. Baki nanankardi barri jayalu manmala barri jalija nyulu wijba. Jayalu kudanyu manmala nangangi nanamanji barri, mikungangi yalimi kuyu nangangi jangkurr. Ngala miku ngambaliyi jungku barrinani mungana yajina. Narri kuyungka nangangi jangkurr Jesus Christkanyi, baki narri jungkuka barrinani kambana yajina. Jala kambana yajina, baki yuku ngambala najba yaji. Yuku ngambala jingkijbangka nanda jala yingkawanyi yabimbaka. Narri jungkuka barrinani kambana yajina. Narri jingkijbangka Jesus Christ, nanda jalija nyulu yabimba. Narri jingkijbangka Jesus Christ, janyulu wijba baku barri.
1TH 5:6 Baki nanankardi barri marda ngambalakimi birrirrinja nangangi Jesus Christkanyi. Marda ngambalakimi birrirrinja nangangi jalija nyulu wijba. Marda ngambalimi jungku barrinani kambana yajina. Jala nyulu mungana yajina, baki miku yalungkimi birrirrinja yabimbikanyi yaji, ngala yalu kuluka barri. Ngala jala nyulu kambana yajina, baki yamininyi yalu jungku. Birrirrinja yalungka yabimbikanyi yaji. Baki nani barri marda ngambalimi jungku barrinani kambana yajina. Marda ngambalakimi birrirrinja nangangi Jesus Christkanyi. Marda ngambalakimi birrirrinja nangangi jalija nyulu wijba. Ngala miku ngambaliyi manmala. Miku ngambaliyi manmala jalija nyulu wijba. Jala ngambala yukumba nangangi wiykanyi, baki marda ngambalimi kuyu nangangi jangkurr Jesus Christkanyi, baki marda ngambalimi maruka muwa yalungi yingkamukuyngka. Jaliyi ngambala jungku nani barri, baki mikuwali linjumba ngambalanya kurdulu balkimukunyi. Miku yaliyi linjumba ngambalanya kurdulu, barrinani mikuwali linjumba mankanyi wuniwanyi, jala nyulu malankarri jumbala nangandu ngaluna, barrinani yanmarrankuna. Jaliyi ngambala munyajba nangangi jangkurr jungunkanyi ngamandu kurduluna, baki jaliyi ngambala maruka muwa yalungi, baki jangambala jungku yurlurrmba nangangi Kudkanyi, baki miku yaliyi linjumba ngambalanya kurdulu balkimukunyi. Baki ngambala jingkijbangka Jesus Christ, nyulu marrimbaka ngambalanya mardarda, jala ngambala kuyu nangangi jangkurr. Nyulu marrimbaka ngambalanya mardarda, barrinani jungkuka ngarrkadabawarr kulaji mardarda kalawunyi malankarrina kulabajarrana, baki mikuwali yingkawanyi daba nangangi kulaji. Nani barri marda nyulu marrimbaka ngambalanya mardarda Jesus Christwanyi, baki mikuwali yingkawanyi daba ngambalanya kurdulu.
1TH 5:9 Yarrijbayi ngambalanya nanganginmuku jandanyimuku Godwanyi. Miku ngambalanyiyanyi yarrijba, nyulu kijiwiykanyi ngambalangi, nyulu daykanyi ngambalanya, nyulu manjiykanyi ngambalanya wayka jangurri. Miku nyuliyanyi yarrijba ngambalanya nanankanyi. Ngala nyuli yarrijba ngambalanya, nyulu marrimbikanyi ngambalanya mardarda. Jala ngambala kuyu nangangi jangkurr Jesus Christkanyi, baki janyulu marrimba ngambalanya mardarda yurrngumba barri.
1TH 5:10 Ngambalangi mambuka Jesus Christ, nangki janyba ngambalangi. Janyba nangki ngamanginkanyi balkinyi yajinyi, baki nanankardi barri jangambala jungku mili wanka nangandu kingkarri yurrngumba barri. Yiningki jawuda ngambalangi, jangambalaka janyba waluwa janyulu wijba Jesus Christ. Yiningki jawuda ngambalangi, jangambala yuwajiwa jungku wanka nayiba jambana jalija nyulu wijba. Ngala jangambala jungku bukambiju malumba nangandu kingkarri, janybangangi nangki Jesus Christ ngambalangi.
1TH 5:11 Baki nanankardi barri nurru ngajakangka narrinya, marda narringkimi yabimba ngiruka yurrngumba barri. Marda narringkimi yabimba ngiruka jungunkanyi yurlurrmba nangangi Jesus Christkanyi. Yurrngumba barri marda narrimi jungku nani barri. Marda narringkimi yanyba nanankanyi jangkurranyi Kudkanyi, yabimbikanyi narringka jungunkanyi ngiruka nangangi. Nurru jingkijbangka narrinya, nani narrili yabimbawaka, baki nurru ngajakangka narrinya, yuwajiwa janarri jungku nani barri. Baki janarri jungku mili ngiruka, baki mili ngiruka nangangi yurrngumba barri. Barriwa.
1TH 5:12 Narri, bababanyamba ngambalaka, nurru ngajakangka narrinya. Godanyunurru ngajakangka narrinya, miku janarri yurlwa yalungi jala yalu milidimba narrinya nanganginkanyi jangkurranyi Kudkanyi. Marda narringkimi mankumanku kunymamba yalungi, yarrijbangangi yalunya milidimbikanyi yaji Godwanyi. Yalu milidimbaka narrinya, narri jungunkanyi yurlurrmba nangangi Kudkanyi.
1TH 5:13 Marda narrimi maruka muwa yalungi. Marda narringkimi mankumanku kunymamba, wakingangi yalu nangangi Kudkanyi. Baki marda narrimi jungku mardumardu muwa, mikuyaji kijinyi narrindu.
1TH 5:14 Godanyunurru karungka narrinya nanginkanyi jangkurranyi. Kudiyamuku yalu bunmalijba mankanyi. Miku yaliyi nulijba wakinkanyi. Marda narrimi karu yalunya, yalu barlkanyi wakinki. Kudiyamuku yalili marrala yurrngumba barri. Marda narrimi walkurramba yalunya. Kudiyamuku miku yalimi ngiruka jungunkanyi yurlurrmba nangangi Kudkanyi. Marda narrimi kandimba yalunya. Marda narrimi milidimba yalunya, yalu jungunkanyi ngiruka, yalu jungunkanyi yurlurrmba nangangi. Ngala marda narrimi miku kudanyu ngirrwa yalungi. Marda narrimi miku kijiwijba yalungi. Ngala marda narrimi milidimba yalunya kardarda jangkurranyi. Marda narrimi mardumardu muwa yalungi bukambijuyngka.
1TH 5:15 Jaliyi yingkawanyi wajba nganinyi kijinyi, baki marda narrimi karu nanda nganinyi, miku nyulu wiykunumbikanyi nanda kiji nangandurri yingkayurri. Ngala marda nyulimi yabimba kunyba yaji nangangi jali wajba kijinyi. Marda narringkimi yabimba kunyba yaji yurrngumba barri. Baki marda narrimi yabimba kunyba yaji yalungi bukambijuyngka marda.
1TH 5:16 Marda narrimi mirnarrijba muwa yurrngumba barri.
1TH 5:17 Baki marda narrimi yanyba mududu nangangi Godkanyiyurrngumba barri.
1TH 5:18 Yiningki narri jungkuka mardumardu muwa, mikuyaji kijinyi narrindu. Ngala yiningki narri jungku kijiyudi. Marda narrimi miku balkijba muwa nanankanyi kijinyi. Marda narrimi yuwajiwa mardumardu muwa. Marda narrimi wajba God narringinkanyi kunybanyi jangkurranyi yurrngumba barri, jala narri jungku mikuyaji kijinyi narrindu, baki jala narri jungku kijiyudi. Marda narrimi wajba God narringinkanyi kunyba jangkurranyi yurrngumba barri. Nani barri nyulu nulijbangka God narringi jungunkanyi yurrngumba barri. Nyulu nulijbangka narringi, narri mirnarriykanyi muwa nangangi Kudkanyi, narri yanybikanyi mududu nangangi Kudkanyi, narri jungunkanyi miku narriyi balkijba muwa kijinyi. Nani barri marda narrimi jungku yurrngumba barri, nyulungangi bababanyamba narrinya Jesus Christwanyi. Barriwa.
1TH 5:19 Jala yingkawanyi milidimbaka yalunya jangkurranyi Kudkanyi, baki jala yingka yanybaka, wajbayi jangkurr Godwanyi, baki marda narringkimi mankumanku nanankanyi jangkurranyi. Marda narringkimi kudanyu mankumanku nanankanyi jangkurranyi, balanjankanyi nanda jangkurr, jaliyi kunyba jangkurr, jaliyi balki jangkurr. Nanda jangkurr jala nyulu yanybaka, jaliyi nanda duja jangkurr nangangi Kudkanyi, baki munyajbakiyi nanda nganinyi yanybikanyi nanda jangkurr, dujangangi nanda jangkurr. Marda narrimi miku kurrkunba nanda nganinyi yanybikanyi nanda jangkurr. Marda narrimi miku kurrkunba, nyulu milidimbikanyi yalunya jangkurranyi Kudkanyi. Wajbangka nanda nganinyi jangkurranyi yanybikanyi Kunybawanyi Ngarnduwanyi Kudkanyi. Jaliyi narri kurrkunba nanda nganinyi yanybikanyi, baki nanda barrinani narri kurrkunbaka nanda Kunyba Ngarndu Kudkanyi. Baki marda narrimi miku kurrkunba nanda Kunyba Ngarndu Kudkanyi. Marda narrimi durrijba ngawamba kunyba jangkurr, miku balki jangkurr. Marda narrimi yingijba balki yaji. Marda narrimi yingijba barriwa barri bukamba nanda balki yaji. Barriwa.
1TH 5:23 Nyulu yabimbaka ngambalanya jungunkanyi mardumardu muwa Godwanyi. Nyulu yabimbaka ngambalanya jungunkanyi mardumardu muwa. Nurru ngajakangka Kud, janyulu yabimba narrinya jungunkanyi barrinani kudukudu nangangi. Yurrngumba barri marda narrimi jungku barrinani kudukudu nangangi. Nurru ngajakangka Kud, janarri jungku kunyba nani barri, janarri jungku kunyba kurdulu, baki janarri jungku kunyba mankanyi marda. Baki jalija nyulu wijba ngambalangi mambuka Jesus Christ, jalija nyulu wijba, baki mikuwali yingka yanyba nangangi Jesus Christkanyi narringi, narri jungkuyi balki nangangi Kudkanyi. Mikuwali yingka yanyba nani nangangi Jesus Christkanyi, jaliyi narri jungku kunyba, jaliyi narri jungku barrinani kudukudu nangangi yurrngumba barri.
1TH 5:24 Nyulu ngambalangi Buwakanya Kud. Nyuli yarrijba narrinya nanganginmuku jandanyimuku, baki yuku nyulu yabimbaka bukamba yaji. Yuku nyulu yabimbaka narrinya jungunkanyi kunyba, jungunkanyi yurlurrmba nangangi, dujangangi nangangi jangkurr. Yurrngumba nangangi jangkurr jungkuka duja. Miku nangkiyi yangkalamba God nanganbunanyi jangkurrnanyi. Janyulu yabimba nanda jali nyulu yanyba, janyulu yabimba.
1TH 5:25 Narri, bababanyamba ngambalaka. Nurru ngajakangka narrinya, janarri yanyba mududu nangangi Godkanyinurrungi marda. Janarri ngajaka God yajinyi nurrungi barri. Barriwa.
1TH 5:26 Nurru manjijbangka jangkurr yalundurri bukambijuyngkurri christianmukuyngkurri narrindu. Maruka nurru muwa yalungi. Yalu barrinani bababanyamba ngambalaka, bukambijungangi ngambala kanyiyamuku nangangi Jesus Christkanyi.
1TH 5:27 Godanyungayu ngajakangka narrinya, janarri yanyba nayinda jangkurr nanginyina najana yalungi. Janarri yanyba nayinda jangkurr yalungi bukambijuyngka christianmukuyngka narringinyina yajina. Janarri yanyba nayinda jangkurr yalungi, nyulungangi Jesus Christ nulijbangka yalungi, yalu mankunkanyi nayinda jangkurr.
1TH 5:28 Nurru ngajakangka ngambalangi mambuka Jesus Christ. Nurru ngajakangka Jesus Christ, janyulu yabimba kunyba yaji narringi. Yurrngumba janyulu yabimba kunyba yaji narringi. Barriwa barri. Bukamba nayinda jangkurr.
2TH 1:1 Nayinda nurru. Ngayu Paul, baki Silas, baki Timothy, nurru yarrijbangkanayinda jangkurr najana narringi. Nurru yarrijbangka nayinda jangkurr najananarringi christianmukuyngka, jalili narri jungku nananyina yajina, niji Thessalonica. Narri jandanyimuku nangangi Kudkanyi, ngambalanginkanyi Buwakaya Kingkarri. Baki ngambalangi mambuka Jesus Christ, nyulu bababanyambanarrinya.
2TH 1:2 Nurru ngajakangka bulanya, ngambalangi Buwakanya Kingkarri Kud, baki ngambalangi mambuka Jesus Christ. Nurru ngajakangka bulanya, jabula yabimba kunyba yaji narringi, jabula yabimba narrinya, narri jungunkanyi mardumardu muwa.
2TH 1:3 Narri, bababanyamba ngambalaka, nurru wajbangka God nurrunginkanyi kunybanyi jangkurranyi, kuyungangi narri nangangi jangkurr, marukangangi narringka muwa kudanyu barri. Mili narri kuyungka nangangi jangkurr Kudkanyi, baki mili baki mili yurrngumba barri. Baki mili narringka maruka muwa, baki mili, baki mili yurrngumba barri. Nanankardi barri nurru wajbangka Kud nurrunginkanyi kunybanyi jangkurranyi, narringingangi.
2TH 1:4 Baki nanankardi barri nurru karungka yalunya yingkamuku Christianmuku narringi. Nurru karungka yalunya yingkamuku christianmuku jalili yalu jungku kajana yajina lukuluku, jalili yalu jungku malumba kajana churchina. Kudanyu nurru karungka yalunya narringi, nani jalili narri jungku ngiruka nangangi Kudkanyi. Yingkamukunyi jalili yalu miku christianmuku, yalu wajbangka narrinya kijinyi, narrinjalu linjumba marda, ngala narri jungkuka ngiruka nangangi Kudkanyi. Narri jungkuka mili ngiruka, baki mili ngiruka nangangi yurrngumba barri. Nani barri nurru karungka yalunya yingkamuku christianmuku narringi. Nurru karungka yalunya, nurru mirnarrijbangka muwa narringi barri. Barriwa.
2TH 1:5 Nurru jingkijbangka narrinya. Yingkamukunyi, yalu wajbangka narrinya kijinyi, narrinjalu linjumbaka mankanyi. Ngala yuwajiwa narri jungkuka ngiruka nangangi Kudkanyi. Yuwajiwa narri durrijbangka nangangi jangkurr. Baki nanankardi barri nurru jingkijbangka Kud, janyulu yanyba kunyba jangkurr narringi baku barri, jalija nyulu karrinjarrijba narrinya walu nangandu. Nanamanji barri janyulu yanyba kunyba jangkurr narringi, janyulu yabimba kunyba yaji narringi, jingkijbangkangangi nyulu narrinya, narri jungkuka yurlurrmba nangangi nanijba barri. Janyulu yanyba kunyba jangkurr narringi, baki janyulu lalanba narrinya, mikungangi narringkimi yangkalamba nanganbunanyi, jala yalu wajba narrinya kijinyi. Miku narringkimi yangkalamba nanganbunanyi, ngala narri jungkuka ngiruka nangangi barri.
2TH 1:6 Jungkuka God yurlurrmba yurrngumba barri. Janyulu daba yalunya, jala yalu wajba narrinya kijinyi. Yalu wajbangka narrinya kijinyi, narrinjalu linjumba mankanyi, baki nanankardi barri janyulu wajba yalunya kijinyi Godwanyi. Janyulu linjumba yalunya marda.
2TH 1:7 Baki janyulu kurrkunba yalunya Godwanyi. Janyulu kurrkunba yalunya jalija yalu wajba narrinya mili kijinyi. Janyulu kurrkunba yalunya, jalija yalu wajba kijinyi narrinya, baki nurrunya marda. Nani barri janyulu dulaba nanda kiji ngamanbunanyi baku barri. Nanamanji barri jalija nyulu wijba ngambalangi mambuka Jesus Christ, baki janyulu dulaba nanda kiji ngamanbunanyi. Nanamanji barri jangambala najba Jesus Christ karralankurri kingkarrinya wayka, marda nanganginmuku angelmuku jayalu yalu marda nangandu. Nanganginmuku angelmuku, yalu ngiruka yabimbikanyi yaji nangangi. Jayalu marda karrala wayka nangandu. Marda walkurra jangu badajbaja nangandu marda, jalija nyulu wijba. Walkurra jangu badajbaja nangandu marda. Baki nanamuku barri, jalija yalu miku jingkijba Kud, jalija yalu yurlwa nangangi Kudkanyi, jalija yalungka yangkalamba nanganbunanyi, jalija yalu miku ngayangayijba nanganginkanyi kunybanyi jangkurranyi, ngamanginkanyi mambukanyi Jesus Christkanyi, nanamuku barri, janyulu bukamba yalunya Godwanyi. Janyulu manjijba yalunya nanganbunanyi.
2TH 1:9 Nani barri janyulu bukamba yalunya Godwanyi. Jayalu miku mili wankijba barri. Miku jayalu jungku mili wanka kingkarri nangandu ngamanginyina mambukana Jesus Christnyina. Nyulu wirimalaru ngambalangi. Nyulu walkurramirra. Nyulu ngirukamirra. Miku jayalu jungku mili wanka kingkarri nangandu, ngala janyulu manjijba yalunya. Janyulu manjijba yalunya juju barri nanganbunanyi. Baki miku yaliyi mili jingkijba Kud.
2TH 1:10 Jalija wijba Jesus Christ wayka nanginkurri, baki bukambijunyi ngambala christianmukunyi, jangambala wajba Jesus Christ ngamanginkanyi kunybanyi jangkurranyi. Jangambala wajba ngamanginkanyi kunybanyi jangkurranyi, nyulungangi walkurramirra, nyulungangi ngirukamirra. Baki janarri marda wajba Jesus Christ narringinkanyi kunybanyi jangkurranyi. Janarri narri marda wajba narringinkanyi kunybanyi jangkurranyi, kuyungangi narri nanda jangkurr, jali nurru karu narrinya nangangi Jesus Christkanyi. Barriwa.
2TH 1:11 Nulijbangka God narringi, narri jungunkanyi yurlurrmba nangangi, yarrijbayingangi narrinya nanganginmuku jandanyimuku Godwanyi. Baki narri barri, narri nulijbangka yabimbikanyi nanda kunyba yaji nangangi. Nulijba narri ngawamba jungunkanyi yurlurrmba nangangi. Yanyba nurru mududu nangangi Godkanyinarringi yurrngumba barri. Ngajaka nurru Kud, janyulu yabimba narrinya ngiruka. Janyulu yabimba narrinya ngiruka, jungunkanyi yurlurrmba nangangi. Jaliyi narri jungku yurlurrmba nangangi, baki janarri yabimba ngawamba nanda jala nyulu nulijbangka narringi yabimbikanyi yaji. Janarri yabimba ngawamba nanda jala nyulu nulijbangka narringi yabimbikanyi yaji, kuyungangi narri nangangi jangkurr. Nyulu barri ngiruka yabimbikanyi narrinya jungunkanyi yurlurrmba nangangi nani barri.
2TH 1:12 Nanankardi barri janarri wajba Jesus Christ narringinkanyi kunybanyi jangkurranyi. Janarri wajba ngambalangi mambuka Jesus Christ narringinkanyi kunybanyi jangkurranyi. Baki nani marda, janyulu wajba narrinya nanganginkanyi kunybanyi jangkurranyi. Janyulu marda wajba narrinya kunybanyi jangkurranyi. Nani barri jabula yabimba kunyba yaji narringi. Ngambalanginyi Godwanyi, baki ngambalanginyi mambukawanyi Jesus Christwanyi, jabula yabimba kunyba yaji narringi barri. Barriwa.
2TH 2:1 Marda yingkanyi jangkurranyi ngayu karungka narrinya nangangi, ngamanginkanyi mambukanyi Jesus Christkanyi. Yingkanyi jangkurranyi ngayu karungka narrinya, narri jingkiykanyi kudanyu barri. Narri jingkijbangka nayi barri. Baku barri janyulu wijba Jesus Christ. Janyulu wijba kingkarrinya, baki jangambala jilajba nangandurri. Jangambalaka mardamardamba marda Jesus Christ. Narri, bababanyamba ngambalaka, kudanyu ngayu karungka narrinya. Marda narrimi jingkijba yurlurrmba yaji nangangi Jesus Christkanyi jalija nyulu wijba. Marda narringkimi kudanyu mankumanku nanganginkanyi yajinyi, jingkiykanyi yaji nangangi. Kudiyanymuku yalu yanybaka nangangi Jesus Christkanyi, wijbayi nyulu, wijbayi. Nyulu jungkuka nayiba jambana nanijba barri. Yiningki narringka mankumanku nurrungi, nyuli wajba nurrunya nanankanyi jangkurranyi Godwanyi, nyuli wajba nurrunya nanankanyi jangkurranyi jala yalu yanybaka. Yiningki narringka mankumanku, nurru barri waluku yanybayi nanda jangkurr, nurru yarrijbayi nanda jangkurr najana. Marda narringkimi miku mankumanku nani barri. Miku nanda nangangi jangkurr Kudkanyi. Miku nurriyanyi yarrijba nanda jangkurr najana. Nanda jujambawarr jangkurr yalu yanybaka. Miku nyulimi jungku nayiba jambana nanijba barri. Miku.
2TH 2:3 Marda narrimi miku munyajba yingka jujambikurri narrinya nani barri, jilijbawangangi wijbayi Jesus Christ. Jilijbawa nyuli wijba kingkarrinya wayka. Nyulu yukumbaka nangangi, nanankanyi balkinyi jala ngirrawarr Kudkanyi. Waluku barri janyulu badajba nanda balkimirra, nanda ngirrawarr Kudkanyi, baki bayngkani barri janyulu wijba Jesus Christ. Waluku barri janyulu badajba nanda ngirrawarr Kudkanyi. Janyulu yabimba yalunya kajamuku, yalu kijiwiykanyi nangangi Kudkanyi, yalungka yangkalambikanyi nanganbunanyi Godnanyi. Nani barri jayalu jungku, baki jayalu yabimba nanda balki yaji jala yurlwangka God nanankanyi yajinyi. Baki nanamanji barri janangka minimba yalundurri nanda ngirrawarr. Janangka minimba yalundurri. Ngala janyulu daba wakara nanda ngirrawarr Godkanyi Godwanyi. Janyulu manjijba wayka jangurri Hellyurri.
2TH 2:4 Nanda ngirrawarr Kudkanyi, janyulu balkimirra. Janyulu balanja ngambalanya, kurrkunbikanyi ngambalanya waykanyi God ngamanginkanyi kunybanyi jangkurranyi. Janyulu balanja ngambalanya, kurrkunbikanyi ngambalanya. Baki yingkamuku, jala yalu wajba yalunginkanyi kunybanyi jangkurranyi nanamuku jala yalu miku duja Kud, janyulu balanja yalunya marda kurrkunbikanyi yalunya. Baki mili balki yaji janyulu yabimba. Janyulu ngankijba kalawuyngkurru nananyina walkurranyina churchina nanaba Jerusalem. Janyulu ngankijba kalawuyngkurru, baki janyulu balanja jujambikanyi yalunya nanaba barri. Janyulu yanyba, “Ngayu barri Kud. Dujanya ngayu narringi Kud.” Nani barri janyulu yanyba jujambawarr jangkurr yalungi. Barriwa.
2TH 2:5 Wabula barri jali ngayu jungku narrindu, baki ngayi karu narrinya nanginkanyi yajinyi. Marda narrimi mankumankuwa ngaki jangkurr.
2TH 2:6 Baki narri jingkijbangka nanda yingka barri, nanda kurrkunbawarr, nanijba barri nyulu kurrkunbaka nanda ngirrawarr Kudkanyi. Nyulu kurrkunbaka nanda ngirrawarr badaykurri. Ngala baku barri yanybaja Kud, “Barriwa barri. Miku ngayiyi munyajba nanda kurrkunbikanyi mili.” Baki janyulu munyajba nanda ngirrawarr Godkanyi Godwanyi. Janyulu munyajba nanda ngirrawarr minimbikanyi nangka yalundurri.
2TH 2:7 Nanda ngirrawarr Kudkanyi, nyulu nayiba barri jambana, nyulu wakingka nanijba barri. Kardarda nyulu wakingka nanijba barri, yabimbiji yalunya, yalu yurlwankanyi Kudkanyi. Nani nyulu wakingka nanijba barri, ngala miku nangkiyi minimba yalundurri. Jilijbawa. Miku nangkiyi nanijba minimba yalundurri, kurrkunbakangangi nanda ngirrawarr nanangini kurrkunbawarranyi. Nyulu kurrkunbaka nanda ngirrawarr Kudkanyi, baki miku nangkiyi nanijba minimba yalundurri. Ngala baku barri janyulu barlba nanda kurrkunbawarr. Janyulu dulaba nanda kurrkunbawarr Godwanyi.
2TH 2:8 Baki nanamanji barri janangka minimba yalundurri nanda ngirrawarr Kudkanyi. Janangka minimba yalundurri nanamanji barri. Baki janyulu yabimba nanda ngirrawarr ngiruka barri Satanwanyi. Janyulu yabimba ngiruka, nyulu yabimbikanyi ngiruka yaji. Baki janyulu yabimba kaja ngiruka yaji nanangini ngirrawarranyi. Janyulu jujamba yalunya marda. Janyulu yanyba jujambawarr jangkurr yalungi. Janyulu yanyba jujambawarr jangkurr yalungi balkimukuyngka, nanamukuyngka jalija yalu baku barri jungku kurdan yurrngumba barri. Janyulu yanyba jujambawarr jangkurr yalungi, baki jayalu kuyu nanda jangkurr. Janyulu yabimba yalunya kuyunkanyi nanda jujambawarr jangkurr Godwanyi. Janyulu yabimba yalunya kuyunkanyi nanda jujambawarr jangkurr, mikungangi yalimi kuyu nanda duja jangkurr nangangi Kudkanyi. Janyulu yabimba yalunya kuyunkanyi nanda jangkurr, baki jayalu kuyu nanda jujambawarr jangkurr. Baki bukambiju jala yalu miku kuyu nanda duja jangkurr nangangi Kudkanyi, jayalu mirnarrijba muwa. Jayalu mirnarrijba muwa jala yalu yabimba balki yaji yalungi. Yurrngumba barri jayalu mirnarrijba muwa nanankanyi balkinyi yajinyi jala yalu yabimba. Baki nanankardi barri janyulu daba yalunya Godwanyi. Janyulu daba yalunya, baki jayalu jungku kurdan yurrngumba barri. Ngala jaliyanyi yalu kuyu nangangi jangkurr Kudkanyi, baki nyuliyanyi marrimba yalunya mardarda Godwanyi, baki miku yaliyi jungku kurdan yurrngumba nanaba Hellnyina. Ngala miku yaliyanyi kuyu nangangi jangkurr. Yali kuyu nanda jangkurr nangangi ngirrawarrayngka. Ngala jalija nyulu wijba Jesus Christ, baki janyulu daba nanda balki ngirrawarr Kudkanyi. Janyulu daba wakara barri nanda ngirrawarr. Janyulu kurdanba nanda ngirrawarr, nyulu jungunkanyi kurdan yurrngumba barri. Barriwa.
2TH 2:13 Narri, bababanyamba ngambalaka. Nurru mirnarrijbangka muwa narringi. Yurrngumba nurru mirnarrijbangka muwa narringi. Baki nurru wajbangka Kud nurrunginkanyi kunybanyi jangkurranyi, marukangkangangi muwa God narringi. Yarrijbayi narrinya nanganginmuku jandanyimuku Godwanyi. Wabula barri kamambarra jali yabimba bukamba yaji Godwanyi, baki mankumanku nangki Kud narringi. Mankumanku nangki God narringi, janyulu yarrijba narrinya nanganginmuku jandanyimuku, janyulu marrimba narrinya mardarda. Baki nanangini Kunybawanyi Ngarnduwanyi Kudkanyi, janyulu yabimba narrinya barrinani kudukudu. Janyulu yabimba narrinya barrinani kudukudu nangangi Kudkanyi. Janyulu yabimba narrinya jungunkanyi mili ngiruka durriykanyi nangangi jangkurr, kuyungangi narri nanda duja jangkurr nangangi Kudkanyi. Nani barri mankumanku nangki Kud, janyulu yarrijba narrinya barri.
2TH 2:14 Nurru karuyi narrinya nanankanyi kunybanyi jangkurranyi nangangi Jesus Christkanyi. Nurru karuyi narrinya nangangi, baki nanankardi barri nyuli yarrijba narrinya nanganginmuku jandanyimuku Godwanyi. Janarri mirnarrijba muwa, nyulungangi walkurramirra, nyulungangi ngirukamirra, ngambalangi mambuka Jesus Christ. Nyulu barri ngirukamirra, baki ngambala marda ngiruka. Ngambala marda ngiruka, nyulungangi bababanyamba ngambalanya Jesus Christwanyi.
2TH 2:15 Narri, bababanyamba ngambalaka, nurru karungka narrinya. Marda narrimi kudanyu marrimba nayinda duja jangkurr. Marda narrimi miku mamanumba nayinda jangkurr, ngala marda narrimi kudanyu marrimba nayinda jangkurr narringinyina kurduluna yurrngumba barri. Nanda jangkurr jali nurru karu narrinya, baki nanda jangkurr jali nurru manjijba narrindurri najana, marda narrimi kudanyu marrimba nanda jangkurr yurrngumba barri. Marda narrimi jungku ngiruka nangangi Kudkanyi, baki mikuwali yingkawanyi dulaba nanda jangkurr narrinbunanyi. Barriwa.
2TH 2:16 Nurru yanybaka mududu bulangi ngamanginkanyi Buwakaya Kingkarri Kudkanyi, baki ngambalanginkanyi mambukanyi Jesus Christkanyi. Maruka buli muwa ngambalangi, baki nanankardi barri yabimba buli kunyba yaji ngambalangi. Yabimba buli ngambalanya, ngambala jungunkanyi ngiruka nangangi. Baki nanankardi barri, miku ngambaliyi marrala, jala yingkamukunyi yalu wajba ngambalanya kijinyi. Baki ngambala jingkijbangka Kud, janyulu marrimba ngambalanya mardarda barri, baki jangambala kirrijba kingkarri jungunkanyi wanka nangandu yurrngumba barri.
2TH 2:17 Nurru yanybaka mududu bulangi narringi. Nurru ngajakangka bulanya, jabula yabimba narrinya, miku narriyi marrala, ngala jabula yabimba narrinya jungunkanyi mili ngiruka barri. Janarri jungku ngiruka, narri yabimbikanyi kunyba yaji yurrngumba barri. Janarri jungku ngiruka marda, yanybikanyi kunyba jangkurr yurrngumba barri. Jalija bula yabimba narrinya mili ngiruka nani barri, baki miku narriyi marrala yabimbikanyi kunyba yaji yalungi, baki miku narriyi marrala yanybikanyi kunyba jangkurr yalungi. Nani barri nurru ngajakangka bulanya narringi. Barriwa.
2TH 3:1 Narri barri, bababanyamba ngambalaka. Nayinda barri jadunyi jangkurr nurru yarrijbangka najana narringi. Nurru ngajakangka narrinya, janarri yanyba mududu nangangi Godkanyinurrungi, baki janurru mili karu yalunya yingkamuku nanganginkanyi jangkurranyi, ngamanginkanyi mambukanyi Jesus Christkanyi. Janurru mili karu yalunya yingkana yajina, baki yingkana yajina. Baki kajamukunyi wandijiyana, jayalu kuyu nanda jangkurr, baki jayalu mirnarrijba muwa nanankanyi jangkurranyi. Narri kuyuyi nanda jangkurr, narri mirnarrijbayi muwa nanankanyi jangkurranyi, baki nani barri jayalu marda nanginmuku yingkamuku. Jayalu marda kuyu nanda jangkurr. Jayalu marda mirnarrijba muwa nanankanyi jangkurranyi.
2TH 3:2 Nurru ngajakangka narrinya, janarri yanyba mududu nangangi Kudkanyi nurrungi. Janarri ngajaka Kud, nyulu marrimbiji ngambalanya mardarda yalunbunanyi balkimukunanyi. Kajamuku yalu balkimuku, jala yalu miku kuyu nangangi jangkurr Jesus Christkanyi. Jayalu wajba ngambalanya kijinyi nanamukunyi balkimukunyi, ngala janarri ngajaka Kud, nyulu marrimbiji ngambalanya mardarda yalunbunanyi.
2TH 3:3 Jesus Christ, nyulu ngambalangi mambuka. Janyulu yabimba narrinya, jungunkanyi ngiruka nangangi, baki nanankardi barri janyulu marrimba narrinya mardarda yurrngumba barri. Baki miku nyuliyi wudumba narrinya nanangini balkiwanyi.
2TH 3:4 Ngambalanginyi mambukawanyi Jesus Christwanyi, nyulu yabimbaka nurrunya, nurru mirnarriykanyi muwa narringi. Nurru mirnarrijbangka muwa narringi, jingkijbangangi nurru narrinya, narri jungkuka yurlurrmba nangangi Kudkanyi. Nurru jingkijbangka narrinya, yuwajiwa narri yabimbaka nanda jala nurru karu narrinya yabimbikanyi yaji.
2TH 3:5 Nurru ngajakangka God narringi, janyulu milidimba narrinya. Janyulu milidimba narrinya, narri jingkiykanyi Kud, maruka nyulu muwa yalungi bukambijuyngka. Godanyunyulu marukangka muwa yalungi. Nurru ngajakangka Kud narringi, janarri jungku ngiruka nangangi Kudkanyi. Yurrngumba janarri jungku ngiruka nangangi, jala yingkamukunyi yalu wajba narrinya kijinyi. Nani barri jungkuyi Jesus Christ. Jungku nyuli ngiruka jali yalu yingkamukunyi wajba kijinyi barri. Baki nani barri janarri marda jungku ngiruka nangangi. Barriwa.
2TH 3:6 Narri barri, bababanyamba ngambalaka. Ngambalangi mambuka Jesus Christ, nyulu nulijbangka nurrungi, nurru jirrinybikanyi narrinya nanginkanyi jangkurranyi. Baki nurru jirrinybaka narrinya barri. Marda narrimi miku jungku yalundu jala yalu bunmalijba. Jawuda yalu bunmalijba. Miku yalimi ngayangayijba nanankanyi jangkurranyi jali nurru karu narrinya. Nanankardi barri marda narrimi miku jungku yalundu, ngala marda narrimi barlba nanamunanyi yalunbunanyi.
2TH 3:7 Narri barri, narri jingkijbangka nayi barri. Jali nurru jungku narrindu, baki miku nurriyanyi bunmalijba, baki miku nurriyanyi jungku yalundu, bunmalijbawarranyina. Ngala nurri waki kudanyu barri. Nurri waki kudanyu yurrngumba barri. Baki narri jingkijbangka marda, marda narrimi waki kudanyu barri. Marda narrimi waki kudanyu yurrngumba barri.
2TH 3:8 Jalili nurru jungku narrindu, bakili nurru waki kudanyu barri. Yurrngumba nurrili waki kudanyu barri, kambana baki mungana, wudumbikanyi dungala nurrungi. Miku narriyanyi wajba nurrunya mamanyi baki jumbalanyi, ngala nurri waki dungalanyi wudumbikanyi nurrungi yaji.
2TH 3:9 Nyuli yarrijba nurrunya milidimbawarr Godwanyi. Nyulu manjijbayi nurrunya milidimbikanyi nanganginkanyi kunybanyi jangkurranyi Jesus Christkanyi. Nanankardi barri yuku nurru ngajaka yalunya, yalu lalanbikanyi nurrunya, yuku nurru ngajaka yalunya, yalu waykanyi nurrunya mamanyi baki jumbalanyi. Nani barri marda yalimi wajba nurrunya yajinyi, manjijbangangi nurrunyi Godwanyi milidimbikanyi yalunya. Ngala miku nurriyanyi ngajaka yalunya yajinyi nurrungi, baki miku nurriyanyi ngajaka narrinya yajinyi, ngala nurri waki wudumbikanyi dungala nurrunginkanyi yajinyi. Nani barri nurri waki, baki nani barri marda narrimi waki wudumbikanyi narringi yaji. Marda narrimi waki narringinkanyi yajinyi, barrinani nurri waki nurrunginkanyi yajinyi.
2TH 3:10 Jalili nurru jungku narrindu, bakili nurru karu narrinya nanginkanyi jangkurranyi, “Jaliyi nganinyi miku nulijba wakinkanyi wudumbikanyi dungala nangangi, baki marda nyuliyi birrkalanyi jungku. Marda nyuliyi miku ngajaka yingka mamanyi baki jumbalanyi, jala nyulu bunmalijba mankanyi, jala miku nyulimi nulijba wakinkanyi.” Nani barri nurrili karu narrinya, jalili nurru nanamanji jungku wabula narrindu.
2TH 3:11 Nani barri nurru mili karungka narrinya, mankungangi nurru jangkurr narringi. Manku nurri jangkurr kudiyayngka miku yalimi waki. Kudiya narringi marda, bunmalijba mankanyi. Miku yalimi waki, ngala muningka yalu jungku yurrngumba barri, baki nanankardi barri muningka yalu manku kiji yalungi yingkamukuyngka. Marda yalimi miku manku kiji yalungi.
2TH 3:12 Ngambalanginyi mambukawanyi Jesus Christwanyi, nyulu karungka ngambalanya nanginkanyi jangkurranyi, baki nurru jirrinybaka yalunya. Marda yaliyi miku bunmalijba, ngala marda yalimi waki wudumbikanyi dungala yalungi. Jaliyi yalu waki, baki miku yaliyi manku kiji yalungi yingkamukuyngka. Ngala jayalu yabimba yalungi yaji, jayalu yalu marda jungku kunyba. Barriwa.
2TH 3:13 Narri barri, bababanyamba ngambalaka, marda narrimi yabimba kunyba yaji yurrngumba barri. Marda narrimi miku wuyalijba yabimbikanyi kunyba yaji, ngala marda narrimi yabimba kunyba yaji yurrngumba barri.
2TH 3:14 Yiningki jawudamukunyi, jayalu miku kuyu nayinda jangkurr. Yiningki jayalu yurlwa nanginkanyi jangkurranyi. Jaliyi yingka yurlwa nanginkanyi jangkurranyi, baki marda narrimi yurlwa nangangi. Marda narrimi miku mili jungku nangandu, baki yiningki janarri manyirrumba nanda nganinyi nani, baki janyulu kuyu nayinda jangkurr.
2TH 3:15 Ngala marda narrimi miku ngirra yalunya, jala yalu yurlwa nanginkanyi jangkurranyi. Marda narrimi miku ngirra yalunya. Ngala marda narrimi karu yalunya, yalu jungkuka balki, mikungangi yalimi kuyu nayinda jangkurr. Miku yalimi kuyu nayinda jangkurr, jala karu nurrunya Jesus Christwanyi. Marda yalungkimi yangkalamba jungunkanyi balki nanginkanyi jangkurranyi. Nani barri marda narrimi karu yalunya, ngala marda narrimi miku ngirra yalunya. Barriwa.
2TH 3:16 Nurru yanybaka mududu nangangi, ngamanginkanyi mambukanyi Jesus Christkanyi. Nurru ngajakangka Jesus Christ, janyulu yabimba narrinya jungunkanyi mardumardu muwa. Ngawamba yuku nyulu yabimbikanyi narrinya jungunkanyi mardumardu muwa. Baki nanankardi barri nurru ngajakangka Jesus Christ, janyulu yabimba narrinya jungunkanyi mardumardu muwa yurrngumba barri. Nurru ngajakangka Jesus Christ, janyulu jungku narrindu kurduluna yurrngumba barri.
2TH 3:17 Yingkawanyi nyuli yarrijba nayinda waluwa jangkurr ngaki najana, ngala nanijba barri ngayu Paul, ngayu yarrijbangka ngaki niji najana ngakinjudinyi marniyudinyi. Ngayu barri manjijbangka jangkurr narrindurri. Jalili ngayu manjijba jangkurr najana yalundurri yingkamukuyngkurri, baki nani barri ngayili yarrijba ngaki niji najana ngakinjudinyi marniyudinyi.
2TH 3:18 Ngayu ngajakangka ngambalangi mambuka Jesus Christ, janyulu yabimba kunyba yaji narringi. Barriwa barri. Bukamba nayinda jangkurr.
1TI 1:1 Ngayu, ngaki niji Bul. Ngayu yarrijbangka nayinda jangkurr nganyi, Dimudi. Ninji barrinani jandanyi ngaki, kuyungangi ninji jangkurr nangangi Jisus Krayiskanyi. Ngana buli manjijba, Kudwanyi marda Jisus Krayiswanyi. Ngana buli manjijba. Nyulu marrimbaka ngambalanya mardarda Kudwanyi. Nyulu marrimbaka ngambalanya mardarda yurrngumba. Baki Jisus Krayiswanyi, nyuli karu ngambalanya nangangi Kudkanyi. Karu nyuli ngambalanya Kudkanyi, baki nanda jangkurr nangangi duja. Ngana nyuli jirrinyba Kudwanyi. Jirrinybayi ngana, ngayu milidimbiji yalunya yingkamuku nangangi Jisus Krayiskanyi. Barriwa. Yanyba ngayu mududu bulangi, Kudkanyi marda Jisus Krayiskanyi. Ngajaka ngayu bulanya, janinji jungku mardumardu muwa. Jungku janinji mardumardu muwa, jingkijbangangi ninji bulanya, jabula yabimba kunyba yaji nganyi. Baki ninji jingkijba Kud, manjamanjamba nyuli nanda balki yaji, jali ninji yabimba wabula. Jingkijba ninji nani, baki nanankardi barri janinji jungku mardumardu muwa. Barriwa.
1TI 1:3 Wabula, jali ngayu barlba bayungu Masiduniyayurri, ninga ngajakayi yajinyi. Kudanyu ninga ngajakayi, janinji mili jungku nanaba karrurri Yibisus. Ninga ngajakayi, ninji kurrkunbiji nanamuku nganinyimuku, jali milidimba yinini jangkurr nangangi Jisus Krayiskanyi. Yalu milidimbayi yinini jangkurr, jujijbawarr jangkurr nangangi Jisus Krayiskanyi. Muningka yalungki yanyba yinini yuwanyi. Muningka yalungki yililikajba yingkanyi yajinyi, marda wankalanyi nganinymukuyngka. Muningka yalungki jakakajba nanankanyi yajinyi. Marda yalungkimi miku yanyba nani. Marda miku yalunjalimi milidimba nani. Kurrkunbakiyi yalunya milidimbikanyi nani. Jirrinybakiyi yalunya, ngawamba milidimbiji duja jangkurr nangangi Jisus Krayiskanyi. Barriwa.
1TI 1:5 Nyuli jirrinyba ngambalanya Jisus Krayiswanyi. Nyuli jirrinyba ngambalanya, milidimbiji ngawamba nangangi jangkurr. Karu nyuli ngambalanya, marukankanyi muwa yalungi yingkamukuyngka. Yuku ngambala maruka muwa yalungi, ngawamba jaliyi ngambala durrijba nangangi jangkurr Jisus Krayiskanyi. Yuku ngambala maruka muwa yalungi, jaliyi nyulu jungkuka ngamandu kurduluna. Baki ngambala jungkuka mardumardu muwa, kuyungangi ngambala nangangi jangkurr. Ngambala jungkuka mardumardu muwa, durrijbangangi ngambala nangangi jangkurr yurrngumba.
1TI 1:6 Kudiyawanyi nganinyiwanyi, yali mamanumba nanda jangkurr jali jirrinyba Jisus Krayiswanyi. Milidimbaka yalu yinini kajanyi jangkurranyi, yingkanyi yajinyi. Miku yalunjalimi milidimba ngawamba nanganginkanyi jangkurranyi, Jisus Krayiskanyi. Miku. Yangkalamba yalungki nanganbunanyi Jisus Krayisnanyi, baki muningka yalu milidimba yajinyi.
1TI 1:7 Nulijba yalu milidimbawarrmuku yuwanyi, nanda yuwa jali wajba Musis Kudwanyi. Nulijba yalu milidimbikanyi nanankanyi yuwanyi, ngala miku yalimi jingkijba nanda yuwa. Miku yaliyi milidimba kunybanyi jangkurranyi nanankanyi yuwanyi. Miku. Jala yalu karu yingkamuku nanankanyi yuwanyi, baki miku yalimi jingkijba nanda yuwa.
1TI 1:8 Nanda yuwa Musiskanyi, nanda kunyba yuwa. Karungka ngambalanya yuwawanyi, ngambala jungunkanyi kunyba nangangi Kudkanyi. Ngala kudiyawanyi miku yalimi milidimba nanankanyi yuwanyi kunymamba.
1TI 1:9 Wajba nyuli Musis nanankanyi yuwanyi Kudwanyi. Baki nyuli yarrijba nanda yuwa najana Kudkanyi Musiswanyi. Miku nyuliyanyi wajba yalunya nanankanyi yuwanyi, nanamuku jala yalu jungku kunyba nangangi Kudkanyi yurrngumba. Miku. Ngala nyuli wajba yalunya jala yalu jungku balki Kudkanyi. Jala mankuka yuwa nganinyiwanyi, baki nanangini yuwawanyi karungka nganinyi, nyulu jungkuka balki nangangi Kudkanyi. Wajba nyuli yalunya nanankanyi yuwanyi Kudwanyi. Wajba nyuli yuwanyi yalunya, nanamuku jala yalu yabimba balki yaji. Yingkamukunyi, nganinymukunyi baki jibarrimukunyi, miku yalimi jingkijba Kud. Miku yalimi ngayangayijba nangangi Kudkanyi. Yingkamuku yalu yanyba, “Mikuyaji Kudkanyi. Mikuyaji.” Yingkamukunyi, yalunjalu daba kurdanba yalungi buwakanya marda yalungi ngardanganja. Yingkamuku, yalu kuluka yingkana, miku nanganginmirra kayikayi. Yingkamuku, yingka nganinyi nyulu kuluka yingkana nganinyina barrinani maykarra. Yingkamuku, yingka jibarri nyulu kuluka yingkana jibarrina barrinani maykarra. Yingkamuku yali jilajba yingkayurri yajiyurri, yalunjalu maninjakujba kudiya mungkijimuku nanankanyi yajinyi, baki wiykunumba yalunginkurri yajiyurri. Wudumba yali nganinyimuku, yalu wakinkanyi yalungi, baki jibarrimuku maninganjamukuyngka yalungi. Yingkamuku, yalu jujijba, miku yalimi yanyba duja jangkurr. Barriwa. Kudukudu balki yaji yalu yabimba. Miku yalimi ngayangayijba yuwanyi Kudkanyi. Miku. Yurlwa yalu nanganginkanyi yuwanyi Kudkanyi. Yurlwa yalu nanankanyi yuwanyi jali wajba Kudwanyi. Yalu jungku balki kudanyu. Baki nanankardi barri nyuli wajba yalunya nanganginkanyi yuwanyi Kudwanyi. Barriwa.
1TI 1:11 Ngana nyuli milidimba Kudwanyi. Ngana milidimbayi nangangi Jisus Krayiskanyi, baki karuyi ngana, ngayu karunki yalunya bukambiju nanganginkanyi jangkurranyi. Baki yuku ngayu karungka yingkamuku nanankanyi jangkurranyi, jungunkanyi kunyba nangangi yurrngumba. Nayinda barri kunyba jangkurr. Nanangini jangkurrwanyi karungka ngambalanya jungunkanyi wanka yurrngumba jaliyi ngambala jungku kunybana yuwana Jisus Krayiskanyi. Barriwa.
1TI 1:12 Mirnarrijba ngayu muwa, yabimbangangi ngani ngiruka Jisus Krayiswanyi. Ngana yabimbayi ngiruka milidimbikanyi yingkamuku. Waki ngayu kudanyu, yabimbangangi ngani ngiruka Jisus Krayiswanyi, milidimbikanyi nanganginkanyi jangkurranyi.
1TI 1:13 Wabula barri, miku ngayiyanyi kuyu nangangi jangkurr, Jisus Krayiskanyi. Yanyba ngayi balki jangkurr nangangi. Mijba ngayi yalunya Jisus Krayiskanyi. Yanyba ngayi, miku nyulu jandanyi nangangi Kudkanyi. Yabimba ngayi kiji yalungi, jali yalu kuyu nangangi jangkurr. Daba ngayi yalunya. Yabimba ngayi nanda balki yaji, mikungangi ngayi kuyu nangangi jangkurr Jisus Krayiskanyi. Miku ngayiyanyi jingkijba Jisus, nyulu jandanyi nangangi Kudkanyi. Baki miku ngayiyanyi jingkijba, ngayu jungkuyi balki nangangi Kudkanyi. Ngala Kud, nyuli maruka muwa ngaki. Nyuli yabimba kunyba yaji ngaki. Ngana nyuli yarrijba, ngayu wakinki nangangi. Ngana nyuli milidimba Jisuskanyi, nyulu duja jandanyi nangangi Kudkanyi. Ngindu ngayi muwa, ngayu jungunkanyi balki nangangi Jisuskanyi. Baki nyuli manjamanjamba ngaki balki yaji Kudwanyi. Ngayu jingkijbayi Jisus Krayis, nyulu jandanyi nangangi Kudkanyi, baki ngayu kuyuyi nangangi jangkurr. Miku ngayiyanyi yurlwa nanganginkanyi jangkurranyi mili barri.
1TI 1:15 Mankukiyi nayinda jangkurr. Nayinda jangkurr duja. Manjijba nyuli Jisus nanginkurri jambarri Kudwanyi. Manjijba nyuli Jisus, nyulu marrimbiji yalunya mardarda, jali yalu jungku balkina yuwana. Yalu jali jungku balkina yuwana, jali yalu ngindu yalunginkanyi balkinyi yajinyi, baki nyuli manjamanjamba yalungi balki yaji Kudwanyi. Marrimba nyulu yalunya mardarda. Ngala ngayu barri, jungku ngayi balkimirra nangangi Jisus Krayiskanyi. Miku mili yingkakiya jungku balki nangangi Jisus Krayiskanyi barrinani ngayu.
1TI 1:16 Jungku ngayi nani barri, ngala nyuli yabimba kunyba yaji ngaki Kudwanyi. Kunyba yaji nyuli yabimba ngaki. Yabimba ngayili kaja balki yaji nangangi Jisus Krayiskanyi, ngala nyuli manjamanjamba ngaki balki yaji Kudwanyi. Nani barri nyuli minimba narrinya, yuku nyulu manjamanjambaka balki yaji yalungi yingkamukuyngka. Nanijba barri ngayu jungkuka kunyba nangangi Jisus Krayiskanyi, marukangangi nyuli muwa ngaki. Baki nani barri nyulu maruka muwa yalungi yingkamukuyngka, nganinymukuyngka marda jibarrimukuyngka. Jaliyi yalu kuyu nangangi jangkurr, baki janyulu manjamanjamba yalungi balki yaji marda. Baki janyulu wankamba yalunya baku, bayngkani jalija yalungka janyba. Jaliyi yalu kuyu nangangi yangkurr, jaliyi yalu durrijba nangangi jangkurr yurrngumba, baki janyulu wankamba yalunya yurrngumba barri.
1TI 1:17 Yanyba ngambala mududu nangangi Kudkanyi. Wajba ngambala Kud kunybanyi jangkurranyi. Nyulu walkurramirra mambuka ngambalangi. Mirnarrijba ngambala muwa nangangi. Jungkuka nyulu kunyba yurrngumba. Jungkuka nyulu wanka yurrngumba. Miku ngambaliyi najba Kud, ngala ngambala jingkijba, nyulu jungkuka wanka yurrngumba, nyulu walkurra mambuka ngambalangi. Marda yalimi bukambijunyi wajba Kud kunybanyi jangkurranyi yurrngumba. Marda yalimi jingkijba, nyulu walkurramirra mambuka yalungi. Barriwa.
1TI 1:18 Yarrijba ngayu nayinda walkurra jangkurr najana nganyi, Dimudi. Jungku ninji barrinani jandanyi ngaki. Jirrinyba ninga, mankuwakiyi nayinda jangkurr, jala ngayu yarrijba ninga nanginyina najana. Ninga nyuli yarrijba Kudwanyi, ninji wakinkanyi nangangi. Marda nganyingkimi mankumanku nanankanyi jangkurranyi. Jaliyi yalu yabimba kiji nganyi, baki marda ninjimi mankuwa nangangi Kudkanyi. Marda ninjimi mankuwa nanankanyi jangkurranyi, jali nyulu karu nurrunya nganyi, ninjija waki nangangi. Yarrijba ninga Kudwanyi, ninjija jungku wakiwarr nangangi. Jalija ninji mankuwa nayinda jangkurr, baki janinji mili waki kudanyu nangangi.
1TI 1:19 Marda ninjimi durrijba nangangi jangkurr Jisus Krayiskanyi yurrngumba. Nyulu jandanyi nangangi Kudkanyi. Marda ninjimi miku mamanumba nanganginkanyi jangkurranyi, ngala marda ninjimi mankuwa nangangi jangkurr, marda ninjimi marrimba nangangi jangkurr nganyinyina kulajina yurrngumba. Mankumankukiyi nganyingka nanganginkanyi jangkurranyi yurrngumba. Baki janinji jungku kunyba nangangi Jisus Krayiskanyi. Miku janganyingka yangkalamba nanganbunanyi.
1TI 1:20 Nanankujarra nganinyiwuya, bulangi niji, Yimanayiyus marda Yalisanda. Yangkalamba bulangki nanganbunanyi Jisus Krayisnanyi. Durrijba buli balkina yuwana nanijba barri. Manjijba ngayi bulanya jurjnanyi. Manjijba ngayi bulanya, yanybangangi buli balki jangkurr nangangi Kudkanyi. Yanyba buli, buli milidimba duja jangkurr, ngala jujijba buli. Miku nanda jangkurr duja. Jingkijba buli, marda bulimi miku yanyba balki jangkurr nani Kudkanyi. Manjijba ngayi bulanya jurjnanyi, durrijbangangi buli nanda balki wuwarr, Sayidin. Ngala yiningki jabulangka mili yangkalamba nanganbunanyi Sayidinanyi. Baki yiningki jabula mili wijba jurjyurri baku barri. Barriwa.
1TI 2:1 Ngayu karungka ninga nanginkanyi jangkurranyi. Kudanyu barri ngayu karungka ninga. Marda narrimi kudanyu yanyba mududu Kudkanyi. Marda narrimi yanyba mududu Kudkanyi yalungi yingkamukuyngka bukambijuyngka. Marda narrimi karu Kud, narri mirnarrijba muwa nangangi. Mirnarrijba narri muwa nangangi Kudkanyi, yabimbangangi nyulu kunyba yaji narringi. Marda narrimi karu Kud, narri mirnarrijba muwa nangangi, baki marda narrimi yanyba mududu Kudkanyi yalungi bukambijuyngka.
1TI 2:2 Marda narrimi yanyba mududu Kudkanyi yalungi mambukamukuyngka wandijiyana. Marda narrimi yanyba mududu Kudkanyi yalungi, mambukamukuyngka jurjkanyi, baki mambukamukuyngka Kubaminkanyi, baki mambukamukuyngka ngarrkadabawarrayngka. Marda narrimi yanyba mududu Kudkanyi yalungi, miku jayalu yabimba kiji yingkamukuyngka, baki jangambala jungku mardumardu muwa, mikuyaji kijinyi.
1TI 2:3 Nani barri jala ngambala yanyba mududu Kudkanyi yalungi mambukamukuyngka, marda yalungi bukambijuyngka, baki Kud nyulu mirnarrijba muwa ngambalangi. Nanda kunyba barri, yanybikanyi mududu Kudkanyi nani barri. Baki marrimbaka nyulu ngambalanya mardarda Kudwanyi. Mankuka nyulu nanda jangkurr, jala ngambala yanyba nangangi. Mirnarrijba nyulu muwa nanankanyi ngambalanginkanyi jangkurranyi.
1TI 2:4 Nulijba nyulu marrimbikanyi yalunya mardarda. Nulijba nyulu marrimbikanyi yalunya mardarda bukambiju, marda nganinymuku marda jibarrimuku. Jaliyi yalu manku nangangi duja jangkurr, jaliyi yalu kuyu nangangi duja jangkurr, baki janyulu marrimba yalunya mardarda.
1TI 2:5 Ngawamba yingamali nyulu duja Kud, miku yingkanyi. Wabula barri ngambala jungkuyi barrinani ngurranyimuku nangangi Kudkanyi, ngala Jisus Krayiswanyi nyulu yabimbaka ngambalanya jungunkanyi malumba nangandu Kudnyina. Ngawamba yingamalinyi nganinyiwanyi, Jisus Krayiswanyi, nyulu yabimbaka ngambalanya jungunkanyi malumba nangandu Kudnyina.
1TI 2:6 Ngala Jisus Krayis barri, janyba nangki, jungkungangi ngambala balkina yuwana Kudkanyi. Daba yali Jisus Krayis kurdanba, ngambalanginkanyingangi balkinyi yajinyi. Nanankardi barri, jaliyi ngambala durrijba nanda yuwa nangangi Jisus Krayiskanyi, baki janyulu marrimba ngambalanya mardarda Kudwanyi. Janyulu marrimba yalunya mardarda, bukambiju jala yalu durrijba nangangi jangkurr Jisus Krayiskanyi. Miku nyuliyanyi yabimba balki yaji Jisus Krayiswanyi. Miku. Ngala janyba nangki ngamanginkanyi balkinyi yajinyi. Janyba nangki Jisus Krayis, baki nanijba barri miku nyuliyi daba ngambalanya Kudwanyi. Miku nyuliyi daba ngambalanya ngamanginkanyi balkinyi yajinyi. Miku nyuliyi daba ngambalanya, janybangangi nangki Jisus Krayis ngamanginkanyi balkinyi yajinyi.
1TI 2:7 Baki manjijbayi ngana Kudwanyi. Manjijbayi ngana karunki yalunya jala yalu miku Jumuku, jala yalu ngurranyimuku ngaki. Manjijba ngani karunki yalunya nangangi Jisus Krayiskanyi. Karu ngayi yalunya Jisus Krayiskanyi, jali nangka janyba yalungi marda. Janyba nangki Jisus yalungi marda ngurranyimukuyngka, baki nanijba barri janyulu manjamanjamba yalungi balki yaji marda Kudwanyi, jaliyi yalu kuyu nangangi jangkurr. Nayinda jangkurr, karu jala ngayu yalunya marda, nayinda duja jangkurr. Nayinda jangkurr duja, yurlurrmba. Miku ngayimi jujijba. Ngaki jangkurr yurlurrmba. Barriwa.
1TI 2:8 Nulijba ngayu yalungi krisjinmukuyngka, yalu yanybikanyi mududu nangangi Kudkanyi. Bukambiju Krisjinmuku wandijiyana, marda yalimi yanyba mududu nangangi Kudkanyi. Jala yalu yanyba mududu nangangi, baki marda yalungkimi miku jakakajba. Marda yalimi miku ngarrangarra muwa jala yalu yanyba mududu Kudkanyi. Ngala marda yalimi jungku mardumardu muwa jala yalu yanyba mududu nangangi. Barriwa.
1TI 2:9 Karu janinga jibarrimukuyngka. Marda yalimi miku nulijba kajanyi kunybanyi jumbalanyi. Marda yalimi miku jungku barrinani barrarrakijba nangka. Marda yalimi miku jungku jirdi buyingkiyngkanyi jumbalanyi yurrngumba, ngala marda yalimi muningka jungku jumbalanyi.
1TI 2:10 Nanamuku jibarrimuku jala yalu nulijba jungunkanyi kunyba Krisjin, marda yalimi maruka muwa yalungi yingkamukuyngka. Marda yalimi yabimba kunyba yaji yingkamukuyngka yurrngumba. Baki jayalunya jingkijba Kudwanyi, yalu jungkuka kunyba nangangi, yabimbangangi yalu kunyba yaji yingkamukuyngka. Miku yalu kunyba, kajangangi yalungi kunyba jumbala. Miku. Yalu kunyba Krisjin, jala yalu yabimba kunyba yaji yingkamukuyngka.
1TI 2:11 Marda yalimi karda jungku jurjina, jibarrimuku. Marda yalimi manku nanda jangkurr nangangi Jisus Krayiskanyi. Marda yalimi kudanyu manku nangangi jangkurr, baki jayalu jingkijba nanda jangkurr nangangi. Marda yalimi mirnarrijba muwa jala yalu manku nanda jangkurr. Marda yalimi miku jungku barrinani walkurra mambuka jurjina, ngala marda yalimi karda jungku mankunkanyi jangkurr.
1TI 2:12 Mardakimi jibarrimuku miku jungku barrinani mambukamuku jurjkanyi. Ngala ngawamba nganinymuku, marda yalunjalimi milidimba jurjina. Ngala jibarrimuku, marda yalimi jungku kardarda jurjina.
1TI 2:13 Nani barri marda yalimi jungku karda, yabimbangangi nyuli nanda nganinyi waluwa jibarrinyi Kudwanyi. Waluku nyuli yabimba nanda nganinyi, niji nangangi Yadam, baki bayngkani nyuli yabimba jibarri, nangangi niji Yib. Waluwa nyuli yabimba nganinyi, baki bayngkani jibarri.
1TI 2:14 Baki baku barri yanybayi miya jibarrinyi, jujambayi jibarri nanangini miyawanyi. Waluku karuyi bulanya Kudwanyi, miku buliyi jarrba mama yingamalinanyi kurndananyi. Ngala jujambayi jibarri nanangini miyawanyi, baki nyuli jarrba nanda mama. Baki kamu barri nanangini nganinyiwanyi, marda nyuli jarrba nanda mama nanamunanyi kurndananyi. Miku nyuliyanyi jujamba nganinyi nanangini miyawanyi, ngala jarrbayi nanda mama nganinyiwanyi. Jingkijbayi, marda nyulimi miku jarrba mama, karuyingangi nganinyi Kudwanyi, miku jarrkanyi nanda mama. Jarrba buli mama, baki jingkijbayi, buli jungku balkina yuwana Kudkanyi. Barriwa. Yi, jujambayi nanda jibarri miyawanyi, baki nanankardi barri marda yalimi jungku karda jurjina jibarrimuku. Marda yalimi miku jungku barrinani mambukamuku yalungi nganinyimukuyngka.
1TI 2:15 Marda yalimi waki wayka barndana jibarrimuku. Marda yalungkimi binandaba bardardanyi. Marda yalimi jardiykunumba yalunginmuku bayamuku, marda yalunjalimi lalanba yurrngumba. Nani barri marda yalimi waki, baki marda yalimi maruka muwa nangangi Kudkanyi yurrngumba. Ngala marda yalimi miku nulijba jungunkanyi barrinani mambuka jurjkanyi. Miku. Jala yalunjalu lalanbawarr yalunginmuku bayamuku, baki milidimba yalunya nangangi Kudkanyi, baki jayalu jungku kunyba nangangi Kudkanyi. Baki marda yalimi yabimba kunyba yaji yingkamukuyngka marda. Baki jayalunya marrimba mardarda yurrngumba Kudwanyi. Barriwa.
1TI 3:1 Ngayu karungka ninga duja. Jala nganinyi nulijba jungunkanyi barrinani malbu jurjkanyi milidimbikanyi yalunya, baki nanda kunyba. Nanda kunyba, jala nganinyi nulijba jungunkanyi barrinani malbu jurjkanyi. Nanda malbu jurjkanyi, janyulu waki kudanyu nangangi Kudkanyi.
1TI 3:2 Nanda malbu jurjkanyi, marda nyulima jungku nani. Marda nyulimi jungku kunybana yuwana Kudkanyi yurrngumba. Marda nyulimi jungku jirdi ngawamba yingamliyngka maninganjanyi. Miku kaja maninganja nangangi, ngawamba yingamali. Marda nangkimi mankumanku kunybanyi yuwanyi yurrngumba, miku balkinyi yuwanyi. Marda nyulimi miku ngarrangarra muwa yingkanyi. Jala badajba yingkamuku krisjinmuku, jala yalu yidamba nanda jurj, baki marda nyulimi kuyu yalunya nanganginkurri barndarri malbuwanyi jurjkanyi. Marda nyulimi lalanba yalunya, jala yalu yidamba. Nanda malbu jurjkanyi, marda nyulimi yingkamuku nangangi Kudkanyi. Marda nyulimi kunyba milidimbawarr.
1TI 3:3 Nanda malbu jurjkanyi, marda nyulimi miku ngaraba kudukudu kamukamu. Marda nyulimi miku wanindijba kulaji. Miku. Marda nyulimi miku dabawarr. Marda nyulimi miku kuliwijba kajanyi dungalanyi. Marda nyulimi miku jungku nani nanda malbu jurjkanyi. Ngala marda nyulimi jungku mardumardu muwa yurrngumba.
1TI 3:4 Marda nyulimi jungku mambuka yalungi, jalili yalu jungku nanganginyina barndana. Marda nyulimi lalanba yalunya kudanyu barri. Marda nyulimi lalanba yalunya, milidimbijina yalunya, yalu jungunkanyi kunyba nangangi Kudkanyi. Baki marda nyulimi yabimba yalunya, yalu ngayangayiykanyi nanganginkanyi jangkurranyi. Marda yalimi yabimba bukamba yaji jala nyulu jirrinyba yalunya. Marda yalimi yabimba nanda yaji, jungkungangi nyulu kunyba nganinyi Kudkanyi. Marda yalimi ngayangayijba nanganginkanyi jangkurranyi, nyulungangi kunyba nganinyi nangangi Kudkanyi.
1TI 3:5 Nani barri, marda nyulimi lalanba yalunya, nangangi maninganja marda nanganginmuku jandanyimuku. Jaliyi nyulu miku lalanba yalunya, jaliyi nyulu miku milidimba yalunya, yalu ngayangayiykanyi nanganginkanyi jangkurranyi, baki yanka janyulu lalanba yalunya krisjinmuku nanganginyina jurjina. Yanka janyulu milidimba yalunya, yalu ngayangayiykanyi nanganginkanyi jangkurranyi Kudkanyi. Kudwanyi nyulu lalanbaka yalunya krisjinmuku, nanganginmuku jandanyimuku, baki nani barri nanangini malbuwanyi jurjkanyi, marda nyulimi lalanba yalunya krisjinmuku nanganginyina jurjina.
1TI 3:6 Nanamukunyi krisjinmukunyi, marda yalimi miku yarrijba buyingkinyi krisjin malbu yalungi. Miku. Jaliyi yalu yarrijba buyingkinyi krisjin malbu yalungi, baki yiningki janangka mankumanku, nyulu walkurra mambuka, yiningki janangka barrarrakijba. Nanda balki. Baki yiningki yanybaja Kud nangangi, nyulu jungkuka balkina yuwana. Nani barri wabula kamambarra yanybayi Kud nangangi Sayidinkanyi, nyulu jungkuyi balkina yuwana. Barriwa.
1TI 3:7 Jala narri yarrijba nganinyi malbu jurjkanyi, baki marda narrimi yarrijba nanda jala jungku kunyba yalungi bukambijuyngka. Yingkamuku jala yalu miku Krisjinmuku, jayalu ningkijba nanda malbu, baki marda yalimi jingkijba nyulu kunyba nganinyi. Marda narrimi yarrijba nanda jala yalungka mankumanku kunymamba nangangi, baki miku yaliyi jurlwa nanankanyi malbunyi. Nanda malbu jurjkanyi, marda nangkimi mankumanku Kudkanyi yurrngumba, baki miku janyulu manku nanda jangkurr nangangi Sayidinkanyi. Jalimi nyulu manku jangkurr nangangi Sayidinkanyi, baki yiningki nanangini Sayidinwanyi, janyulu jujamba nanda malbu. Baki nanangini malbuwanyi yiningki janyulu yabimba balki yaji, yiningki janangka yangkalamba nanganbunanyi Kudnanyi, jalimi nyulu manku jangkurr nangangi Sayidinkanyi. Nanankardi barri marda nangkimi mankumanku nangangi Kudkanyi yurrngumba barri. Barriwa.
1TI 3:8 Baki nanda jala nulijba wakiwarr jurjkanyi, marda nyulimi jungku kunyba nganinyi. Marda nyulimi yanyba ngawamba duja jangkurr. Baki yingkamukunyi jayalu jingkijba, miku nyulimi jujambawarr. Nanda wakiwarr jurjkanyi, marda nyulimi miku walkurra janyi, marda nyulimi miku yanybiji yingkanyi yalungi, mankunkanyi kiji. Ngala marda nyulimi yanyba yurlurrmba jangkurr yurrngumba. Marda nyulimi miku ngaraba kudukudu kamukamu. Marda nyulimi miku wanindijba kulaji. Miku. Baki marda nyulimi miku kuliwijba dungalanyi baki yajinyi.
1TI 3:9 Marda nyulimi kuyu jangkurr nangangi Kudkanyi yurrngumba. Marda nyulimi miku kuyu yingkanyi jangkurr. Miku. Marda nyulimi kuyu ngawamba nangangi jangkurr Kudkanyi. Nani barri marda nyulimi jungku nanda wakiwarr jurjkanyi.
1TI 3:10 Nanamuku Krisjinmuku jurjkanyi, marda yalungkimi mankumanku yalungi, jala yalu nulijba wakiwarr jurjkanyi. Marda yalungkimi kudanyu mankumanku yalungi, jaliyi yalu jungku kunybana yuwana Kudkanyi yurrngumba, jaliyi yalu durrijba nangangi jangkurr yurlurrmba. Marda yalimi balanja nganinyi nani, baki yuku barri jayalu yarrijba nanda nganinyi wakiwarr jurjkanyi, jaliyi nyulu kunyba jungku nangangi Kudkanyi. Barriwa.
1TI 3:11 Baki nanda maninganja nangangi jala wakiwarr jurjkanyi, marda nyulimi jungku kunyba jibarri. Marda nyulimi miku walkurra janyi. Marda nyulimi miku jurlwa yingkamukuyngka. Marda nyulimi miku ngaraba kudukudu kamukamu, mikuwali wanindijba kulaji. Nanda nangangi maninganja, marda nyulimi jungku jirdi kunybanyi kulajinyi nangangi Kudkanyi. Barriwa.
1TI 3:12 Nanda wakiwarr jurjkanyi, marda nyulimi jungku ngawamba yingamaliyngka jirdi maninganjanyi. Marda nyulimi jungku mambuka yalungi jalili yalu jungku nanganginyina barndana. Marda nyulimi lalanba yalunya kudanyu barri. Marda nyulimi lalanba yalunya milidimbijina yalunya, yalu jungunkanyi kunyba nangangi Kudkanyi.
1TI 3:13 Baki nanda wakiwarr jurjkanyi, marda nyulimi waki kudanyu. Baki yingkamukunyi, jala yalu najba nanda wakinkurri kudanyu, baki jayalu jingkijba nanda wakiwarr. Jayalu jingkijba nyulu wakingka kudanyu jurjkanyi, marda nangangi Kudkanyi. Jayalu jingkijba nanda wakiwarr, nyulu jungkuka kunyba. Baki nanankardi barri miku janyulu marrala milidimbikanyi yalunya nangangi Jisus Krayiskanyi. Ngala janyulu yanyba ngiruka jangkurr. Barriwa.
1TI 3:14 Nayimanji, ngala ngayu yarrijba nayinda jangkurr nganyi, nulijba ngayu jilaykanyi karri. Nulijba ngayu yidambikanyi ninga winyurru.
1TI 3:15 Ngala jaliyi ngayu miku jila nganyindurri winyurru, baki nangini najawanyi karuja ninga ngambalangi krisjinmukuyngka, yanka marda ngambalimi jungku nangangi Kudkanyi. Marda ngambalimi jungku kunyba nangangi yurrngumba, ngambalangangi jandanyimuku nangangi Kudkanyi. Nyulu ngambalangi Buwakanya, baki ngambala nangangimuku jandanyimuku. Nanankardi barri marda ngambalimi miku manku jujambawarr jangkurr, ngala marda ngambalimi kuyu ngawamba duja jangkurr nangangi Kudkanyi. Marda ngambalimi marrimba nangangi jangkurr mardarda.
1TI 3:16 Jingkijba ngambala nanda jangkurr nangangi Kudkanyi, nanda walkurra jangkurr, duja. Wabula kamambarra nanamukunyi wankalamukunyi, miku yaliyanyi jingkijba Kud. Ngala nyuli karu yalunya bijal jangkurranyi, baki baku barri mili nyuli karu yalunya jangkurranyi Kudwanyi. Baki mili baku nyuli manjijba nangangi jandanyi Jisus nanginkurri wayka. Badajbayi Jisus nanginkurri jambarri, baki kajamukunyi yali najba Jisus. Baki nanangini Kunybawanyi Ngarnduwanyi Kudkanyi, nyuli minimba ngambalanya Jisuskanyi. Minimbayi ngambalanya Jisuskanyi, ngawamba nyulu nanganginmirra jandanyi Kudkanyi. Baki nanamukunyi Yanjilmukunyi, yali najba nangangi jandanyi Jisus marda. Barriwa wiykunumbayi nangangi jandanyi kingkarri Kudwanyi, jungunki nangandu yurrngumba. Nayimanji kudiyamuku nganinyimuku yalu jilalajbangka lukuluku wandijiyana, yalu karungka bukambiju nangangi Jisus Krayiskanyi. Baki kajamukunyi yalu kuyungka jangkurr nangangi Jisus Krayiskanyi. Barriwa.
1TI 4:1 Nayinda Kunyba Ngarndu Kudkanyi, yanyba nyuli nayinda jangkurr, “Baku barri, kudiyamuku, jayalu balkimuku. Yalu mankuka yalungi balki jangkurr wuwarranyi. Miku yalimi milidimba duja nanankanyi jangkurranyi nanganginkanyi Jisus Krayiskanyi, ngala yalu milidimbaka nanankanyi jangkurranyi jali wajba yalunya nanamukunyi jujambawarranyi wuwarrmukunyi. Nani barri yalu milidimbaka balkinyi jangkurranyi. Jungku yalu balkimirra nangangi Kudkanyi, ngala miku yalungkimi yanyba muwa yalu jungku balki. Kudiyamuku Krisjinmuku, jalija yalu manku yalungi balki jangkurr, baki jayalu kuyu nanda jangkurr. Jayalu mamanumba nanda kunyba jangkurr nangangi Jisus Krayiskanyi. Miku jayalu mili durrijba nangangi jangkurr. Jayalungka yangkalamba nanganbunanyi Jisus Krayisnanyi, kuyungangi jayalu nanda balki jangkurr jali wajba wuwarrmukunyi.” Barriwa. Nani barri yanybaka Kunyba Ngarndu Kudkanyi, jayalu jungku balki nani baku barri.
1TI 4:3 Nanamuku balkimuku milidimbawarrmuku jala durrijba wuwarranyi jangkurr, miku yalimi milidimba yurlurrmba jangkurr. Milidimba yalunjalu yingkamuku, marda yalimi miku jungku maninganjayudi. Milidimba yalu mamanyi, marda yalimi miku jarrba kudiya mama. Nani barri yalunjalu milidimba balkinyi jangkurranyi. Miku yalimi milidimba yurlurrmba jangkurranyi mamanyi. Ngala yabimbayi mama junu jarrkanyi Kudwanyi. Miku yingka mama kunyba jarrkanyi, ngala yingka balki jarrkanyi. Miku. Yabimba nyuli bukamba yaji Kudwanyi. Jungkuka nyulu kunyba yurrngumba, baki yabimba nyuli bukamba yaji kunyba. Marda ngambalimi miku yanyba kudiyayngka mamanyi, miku nanda kunyba jarrkanyi. Yanybaka Kud, bukamba mama kunyba jarrkanyi, baki nanankardi marda ngambalimi yanyba mududu nangangi Kudkanyi mamanyi. Marda ngambalimi waluku yanyba mududu nangangi, baki yuku jangambala jarrba mama. Baki marda ngambalimi manku nangangi jangkurr marda. Marda ngambalimi karu Kud, ngambala mirnarrijba muwa nangangi, wajbangangi nyulu ngambalanya mamanyi. Baki nyulu mirnarrijba muwa Kud, jarrbangangi ngambala mama nangangi, jali nyulu yabimba. Barriwa.
1TI 4:6 Mikujiyi manku yalungi jangkurr, nanamukuyngka jujambawarrayngka. Mikujiyi manku yalungi jangkurr. Baki mikujiyi karu yingkamuku yalunginkanyi jangkurranyi. Nanda jangkurr yalungi, nanda balki. Ngala marda ninjimi jungku kunyba nangangi Kudkanyi, marda ninjimi durrijba nangangi yurlurrmba yuwa yurrngumba barri. Dimudi. Karukiyi nayinda jangkurr yalungi, Krisjinmukuyngka nganyinyina jurjina. Jalija ninji karu yalunya nanginkanyi jangkurranyi, baki janinji jungku kunyba wakiwarr nangangi Kudkanyi. Barriwa. Jala ninji jarrba kaja kunyba mama, baki ninji jungku ngiruka mankanyi. Nani barri, jala ninji manku yurlurrmba jangkurr Kudkanyi, baki janinji jungku ngiruka ngarndu nangangi Kudkanyi. Janinji jungku ngiruka ngarndu, jala ninji kuyu yurlurrmba jangkurr Kudkanyi, barrinani ninji ngiruka mankanyi jala ninji jarrba kunyba mama. Jungkuja ngarndu ngiruka Kudkanyi, jaliyi ninji durrijba nanda jangkurr Kudkanyi.
1TI 4:8 Jaliyi ninji jungku ngiruka mankanyi, baki nanda kunyba. Ngala jaliyi ninji jungku ngiruka ngarndu nangangi Kudkanyi, baki nanda kunybamirra. Jaliyi ninji jungku ngiruka ngarndu Kudkanyi, baki janinji durrijba nangangi jangkurr yurrngumba. Jaliyi ninji durrijba nangangi jangkurr yurrngumba, baki janinji jungku wanka nangandu Kudnyina yurrngumba jalija nganyingka janyba.
1TI 4:9 Nayinda jangkurr duja. Marda ninjimi kuyu nayinda jangkurr, jungkukangangi nayinda jangkurr yurlurrmba.
1TI 4:10 Yurrngumba ngambala waki nangangi Kudkanyi. Kudanyu ngambala waki nangangi, jingkijbangangi ngambala Kud, yuku nyulu marrimba bukambiju mardarda. Bukambiju, nganinyimuku, marda jibarrimuku, marda bayamuku, yuku nyulu marrimba yalunya mardarda. Baki ngambala jingkijba nayi, janyulu marrimba ngambalanya mardarda yurrngumba, jaliyi ngambala kuyu nangangi jangkurr. Nanankardi barri ngambala waki kudanyu nangangi Kudkanyi yurrngumba.
1TI 4:11 Karu ninga nanginkanyi ngirukanyi jangkurranyi. Milidimbakiyi yalunya nanginkanyi jangkurranyi jala ngayu yarrijba nayiba najana. Jilijba ninji malbungujba mankanyi, ngala ninji jungku malbu jurjkanyi. Jirrinybakiyi yalunya Krisjinmuku jurjkanyi, yalu durriykanyi nganyi jangkurr, yalu yabimbikanyi nanda jala ninji yabimba. Ninji malbu jurjkanyi, baki marda ninjimi milidimba yalunya. Jala yalu najba nanda jala ninji yabimba, baki jayalu jingkijba nanamannga marda yalimi yabimba nanamukunyi krisjinmukunyi. Marda yalimi jungku kunyba, barrinani ninji jungku kunyba nangangi Kudkanyi. Marda yalimi maruka muwa yingkamukuyngka, barrinani ninji maruka muwa yalungi bukambijuyngka. Marda yalimi kuyu nanda duja jangkurr Kudkanyi, barrinani ninji kuyu nangangi jangkurr. Marda yalimi yanyba kunyba jangkurr barrinani ninji yanyba kunyba jangkurr yalungi. Jirrinybakiyi yalunya, yalu durriykanyi ninya yurrngumba.
1TI 4:13 Ngala ninji yukumba ngaki, ngayu jilaykanyi nganyindurri, baki wakikiyi kudanyu nangangi Kudkanyi yurrngumba. Janinji karu yalunya duja jangkurranyi Kudkanyi. Janinji yanyba nanda jangkurr Kudkanyi najana yalungi. Janinji milidimba yalunya nanganginkanyi jangkurranyi.
1TI 4:14 Mikujiyi mamanumba nayinda. Wabula yali yarrijba marni nganyindu kulajina malbumalbuwanyi jurjkanyi, ngala yali ngajaka Kud nganyi. Yarrijba yali marni nganyindu kulajina, baki nanamuku, yanyba jali yalu jangkurr Kudkanyi, nyuli wajba yalunya jangkurranyi Kudwanyi. Nyuli wajba yalunya nanankanyi jangkurranyi nganyi, janinji jungku kunyba milidimbawarr, milidimbikanyi nanganginkanyi jangkurranyi. Baki nyuli manjijba nangangi Kunyba Ngarndu nganyindurri Kudwanyi, baki ninga yarrijba milidimbikanyi yingkamuku nangangi. Mikujiyi mamanumba nanda. Barriwa.
1TI 4:15 Marda ninjimi yabimba nanda kunyba yaji yurrngumba. Marda ninjimi durrijba nangangi jangkurr Kudkanyi, baki janinji jungku kunyba milidimbawarr. Baki yingkamukunyi, jayalu najba ninya jungunkurri mili kunyba nangangi Kudkanyi yurrngumba.
1TI 4:16 Lalanba nganyingkiyi nangangi Kudkanyi. Miku nganyingkiyi yangkalamba nanganbunanyi Kudnanyi. Milidimbakiyi kunyba jangkurr yurrngumba. Jaliyi ninji jungku nani, baki janinya marrimba mardarda Kudwanyi. Marrimbaja ninya mardarda baki yalunya jala manku nganyi jangkurr nangangi Kudkanyi. Janyulu marrimba yalunya mardarda marda, kuyungangi yalu nganyi jangkurr nangangi Kudkanyi. Baki janinji jungku wanka nangandu yurrngumba.
1TI 5:1 Marda ninjimi miku ngirrwa malbunyi jala nyulu jungku balkina yuwana Kudkanyi. Ngala marda ninjimi yanyba yili nangangi, barrinani ninji yanyba nganyingkanyi nijanganjiyngkanyi. Ngala marda ninjimi yili karu nanda malbu, nyulu jungkuka balkina yuwana Kudkanyi. Marda ninjimi ngakaja malbu, wijbakiyi jungku balki nangangi Kudkanyi. Mikujiyi ngirrwa nangangi, ngala yanybakiyi yili nangangi barrinani nijanganjiyngkanyi. Baki nanamuku nganinyimuku, jala jilijba malbungujba mankanyi, marda ninjimi yanyba yili yalungi marda, barrinani ninji yanyba nganyingkanyi buwanganjanyi. Jala yalu jungku balkina yuwana Kudkanyi, baki marda ninjimi yili karu yalunya, yalu jungkuka balki nangangi. Marda ninjimi miku ngirrwa yalungi, malbumalbunyi, baki nganinyimukuyngka. Marda ninjimi yili yanyba yalungi.
1TI 5:2 Baki nanamuku bardirdibardi, marda ninjimi yanyba yalungi, barrinani ninji yanyba nganyingkanyi ngardanganjanyi. Marda ninjimi miku yurlwa yalungi. Baki nanamuku jibarrimuku, marda ninjimi yanyba yili yalungi, barrinani ninji yanyba nganyingkanyi majunganjanyi. Marda ninjimi miku ngirrwa yalungi, jala yalu jungku balkina yuwana Kudkanyi, ngala marda ninjimi milidimba yalunya, jungunkanyi kunyba nangangi Kudkanyi. Barriwa.
1TI 5:3 Baki nanamuku jibarrimuku jala yalu miyajingujba, marda narrimi miku yurlwa yalungi krisjinmuku. Nanda jibarri miyaji jala mikuyaji kulunganjanyi nangangi lalanbikanyi, baki nanda miyaji jala mikuyaji ngardanganjanyi nangangi baki nijanganjinyi lalanbikanyi, nanda miyaji jala nyuluman jungku, marda narrimi lalanba.
1TI 5:4 Ngala nanda miyaji jala kulunganja nangangi nangandu, jala kukulimba nyulu nangandu, marda yalimi lalanba nanda miyaji jibarri. Nanda maykarra bula lalanba bulangi bayamuku, bula jardiykunumba yalunya. Baku barri jala bayamuku jardijba walkurra nganinyi baki jibarri, baki marda yalimi lalanba yalungi ngardanganja baki nijanganjinyi. Marda yalimi lalanba yalungi kukulinganja baki miminganja. Nani barri yanybaka Kud lalanbikanyi yalunya. Jala yalunjalu lalanba malbumalbu baki bardirdibardi, baki nyulu mirnarrijbangka muwa yalungi Kud. Baki yalu jungkuka kunyba nanganginyina yuwana.
1TI 5:5 Nanda krisjin jibarri, nanda miyaji jala mikuyaji lalanbikanyi nangangi, nyulu yanybaka mududu nangangi Kudkanyi yurrngumba. Nyulu ngajakangka Kud lalanbiji yurrngumba. Kambana baki mungana nyulu ngajakangka Kud nani, jingkijbangangi nyulu Kud, nyulu lalanbawarr.
1TI 5:6 Ngala nanda miyaji jibarri, jala nulijba kajanyi yajinyi, miku nyulimi nulijba durriykanyi Kud. Miku. Baki nyulu jungkuka balkina yuwana Kudkanyi. Nyulu nulijbangka kajanyi yajinyi, ngala miku nyulimi nulijba durriykanyi yuwanyi Kudkanyi. Miku.
1TI 5:7 Jala ninji jirrinyba yalunya nayi, baki yalu kuyu nganyi jangkurr, baki jayalu jungku kunyba. Baki mikuwali yingka jurlwa yalungi.
1TI 5:8 Nanangini kulunganjawanyi marda nyulimi lalanba nangangi ngardanganja jala miyaji. Jaliyi nyulu lalanba nangangi ngardanganja, baki mikuwali yingka jurlwa nangangi. Ngala jaliyi nyulu miku lalanba nangangi ngardanganja miyaji, baki nyulu jungkuka balkina yuwana Kudkanyi. Miku nyulimi kunyba krisjin, ngala nangka yangkalamba nanganginbunanyi jangkurrnanyi, baki nyulu jungkuka balkimirra.
1TI 5:9 Nanda miyaji, jala mikuyaji lalanbikanyi, marda ninjimi yarrijba nangangi niji najana, narri lalanbikanyi krisjinmukunyi. Marda ninjimi yarrijba nangangi niji najana, jaliyi nyulu bardibardi, jaliyi nyulu jungku 60 kindilkurrinyi. Ngala marda nyulimi jungku kunybana yuwana Kudkanyi, nanda miyaji. Marda nyulimi miku kuluka yingkana nganinyina.
1TI 5:10 Baki yingkamukunyi marda yalimi jingkijba nanda miyaji, nyulili jungku kunyba nangangi Kudkanyi yurrngumba. Nyuli jardiykunumba nanganginmuku kulunganja kunymamba yurrngumba. Nyulili yabimba kunyba yaji yalungi yingkamukuyngka yurrngumba. Nyulili lalanba yalunya krisjinmuku jala yidamba nangangi jurj, nyulili kuyu yalunya nanganginkurri barndarri jarrji mama. Nyulili kandimba yalunya kijiyudi. Nani barri marda nyulimi yabimba kunyba yaji yalungi yingkamukuyngka. Nanda miyaji jala jungku nani, marda narrimi yarrijba nangangi niji najana narri lalanbikanyi.
1TI 5:11 Ngala nanda miyaji, jala jilijba bardibardingujba mankanyi, mikujiyi yarrijba nangangi niji najana jurjkanyi. Yiningki waluku janyulu yanyba, nulijba nyulu wakinkanyi ngawamba nangangi Jisus Krayiskanyi, ngala baku barri yiningki janangka yangkalamba nanamunanyi jangkurrnanyi, wakinkanyi nangangi. Yiningki janangka yangkalamba nanamunanyi jangkurrnanyi, nulijbangangi nyulu nganiyngkanyi jamalunkanyi.
1TI 5:13 Nanda miyaji jala jilijba bardibardingujba, jala nyulu muningka jungku yurrngumba, baki janyulu bunmalijba mankanyi, jala nyulu miku waki. Jilalajbaja yingkarri barndarri, yingkarri barndarri. Janyulu walkurra janyi, ngala miku nyuliyi karu yalunya Kudkanyi.
1TI 5:14 Baki nanankardi barri, nanda miyaji jala jilijba bardibardingujba mankanyi, marda nyulimi jamalu yingka nganinyi. Marda nangkimi binandaba bayamukuyngka, baki lalanba yalunya. Marda nyulimi jungku barndana, yundijba mama marda. Jaliyi nyulu jungku nani, baki mikuwali yingkamuku jurlwa nangangi.
1TI 5:15 Ngayu karungka ninga yalungi miyajimukuyngka, kudiyangangi miyajimuku yalungki yangkalamba nanganbunanyi Jisus Krayisnanyi, durrijbangangi yali nanda wuwarr Sayidin. Barriwa.
1TI 5:16 Ngala nanda miyaji, jala jungku yiningki jirdi krisjin kulunganjanyi, yiningki jirdi krisjin kukulimba nyulu, marda yalimi yalu lalanba nanda miyaji. Jala nyulu jungku nani, jala yingka nangandu lalanbikanyi, marda yalimi lalanba nanda miyaji. Marda narrimi miku yarrijba nangangi niji najana jurjnyina. Marda narrimi jurjkanyi miku wajba nanda miyaji dungalanyi wudumbikanyi mama baki jumbala. Ngala nanganginmukunyi, marda yalimi lalanba nanda miyaji. Barriwa.
1TI 5:17 Kudiya malbumalbu jurjkanyi, yalu milidimba kunybanyi jangkurranyi yurrngumba. Yalunjalili milidimba Kudkanyi baki Jisus Krayiskanyi. Yalili waki kudanyu nangangi Kudkanyi. Nani yalili waki kudanyu nangangi Kudkanyi. Yalu yabimba walkurra yaji nangangi. Baki nanamuku krisjinmuku jurjkanyi, marda yalunjalimi wajba milidimbawarr dungalanyi. Marda yalunjalimi wajba kajanyi dungalanyi, wudumbikanyi mama baki jumbala. Marda yalunjalimi wajba milidimbawarr jurjkanyi dungalanyi.
1TI 5:18 Marda yalunjalimi wajba dungalanyi. Nanda jangkurr najana Kudkanyi yanybaka nayi, “Mikujiyi kurrkunba yarrama jarrkanyi karnba ngala nyulu wakingka. Yuku nyulu jarrba karnba ngala nyulu wakingka.” Baki yingka jangkurr najana Kudkanyi yanybaka, “Nanda jala waki yingkanyi, marda nyulimi wudumba dungala wakinkanyi.” Baki nani barri nanamannga nanda nganinyi jala waki nangangi Kudkanyi, mardakimi yingkamukunyi wajba dungalanyi, wudumbikanyi yaji nangangi. Barriwa.
1TI 5:19 Jaliyi yingkawanyi karu ninga malbunyi jurjkanyi, jala nyulu yabimbayi balki yaji nangangi Kudkanyi, baki mikujiyi kuyu nangangi jangkurr, jaliyi ngawamba yingamaliwanyi karu ninga malbunyi. Yuku jaliyi kujarranyi, jaliyi murrkuwanyi ninya karu nangangi. Yuku ninji kuyu yalungi jangkurr malbunyi.
1TI 5:20 Ngayu jirrinybaka ninga, jaliyi ninji jingkijba nanda malbu jungunkanyi balki nangangi Kudkanyi, baki marda ninjimi ngirrwa nangangi. Marda ninjimi karu nanganginkanyi balkinyi yajinyi. Marda ninjimi karu malbu jala yingkamuku yalu nganyindu. Marda yalimi nanaba nganyindu. Marda yalimi manku nganyi jangkurr, baki jayalu marrala, jayalu nulijba jungunkanyi kunyba nangangi Kudkanyi.
1TI 5:21 Marda ninjimi ngirrwa yalungi, jala yalu jungku balki nangangi Kudkanyi. Marda ninjimi ngirrwa nanamukuyngka. Ngala marda ninjimi miku ngirrwa yalungi kudiyayngka kudanyu, ngala kudiyayngka kardarda. Miku. Jaliyi ninji ngirrwa yalungi nani, baki nanda balki nangangi Kudkanyi. Ngala marda ninjimi ngirrwa yalungi bukambijuyngka nanamannga nanamukuyngka, jala yalu jungku balki nangangi Kudkanyi. Jala ninji ngirrwa yalungi, baki marda ninjimi mankuwa nayi. Baku barri janyulu karrinjarrijba yalunya walu nangandu Kudwanyi. Janyulu karrinjarrijba yalunya walu bulandu Kudnyina, baki Jisus Krayisnyina, baki walu yalundu Yanjilmukunyina. Janyulu karrinjarrijba yalunya, baki janyulu yanyba yalunginkanyi balkinyi yajinyi jali yalu yabimba. Marda ninjimi mankuwa nayi jala ninji ngirrwa yingkanyi nanganginkanyi balkinyi yajinyi. Barriwa.
1TI 5:22 Mikujiyi dulu yarrijba nganinyi malbu jurjkanyi. Mankumanku nganyingka nganiyngkanyi. Yanybakiyi mududu nangangi Kudkanyi nanankanyi nganiyngkanyi. Baki yuku jaliyi nyulu jungku kunyba yurrngumba, yuku ninji yarrijba malbu jurjkanyi. Ngala mikujiyi yarrijba dulu. Jaliyi ninji dulu yarrijba nanda malbu jurjkanyi, baki baku, jaliyi nyulu yabimba balki yaji, baki ninjiyi marda jungku balki. Ninjiyi marda jungku balki nanganginkanyi balkinyi yajinyi, mikungangi nganyingkiyanyi mankumanku kudanyu yarriykanyi nanda malbu jurjkanyi. Mikujiyi yabimba balki yaji. Jungkukiyi kunyba nangangi Kudkanyi yurrngumba.
1TI 5:23 Yingkamukunyi yalu yabimba balki yaji, baki winyurruwa jangambala jingkijba yalungi balki yaji. Ngala yingkamukunyi yalu yabimba balki yaji kardarda, baki ngawamba baku ngambala jingkijba yalungi balki yaji. Ngala nyulu jingkijbangka yalungi balki yaji, Kudwanyi, baki janyulu yanyba yalungi barrinani yanybaka mambuka kurdusnyina manjiykanyi yalunya. Janyulu yanyba yalunginkanyi balkinyi yajinyi Kud. Janyulu yanyba bukambijuyngka yalungi.
1TI 5:24 Baki barrinani nani nanamannga kunybanyi yajinyi. Yingkamukunyi yalu yabimba kunyba yaji, baki winyurruwa jangambala jingkijba yalungi kunyba yaji. Ngala yingkamukunyi yalu yabimba kunyba yaji yingkanyi. Kardarda yalu yabimba kunyba yalungi. Miku ngambalimi najba, miku ngambalimi jingkijba nanda jala yalu yabimba, ngala ngawamba baku barri ngambalaja jingkijba yalungi kunyba yaji. Baki nanankardi barri mikujiyi dulu yarrijba malbu jurjnyina. Mankumanku nganyingka nanankanyi nganiyngkanyi. Yanybakiyi mududu nanankanyi nganiyngkanyi. Barriwa. Miku nganyi mankanyi ngiruka. Kudiyana nganyi muwa balki. Wijbakiyi ngaraba ngawamba wabuda, ngala kudiyanakiyi ngaraba nanda ngilil krayibkanyi. Nanda kunyba jingkal nganyingkanyi muwanyi. Barriwa.
1TI 6:1 Nanangini mambukawanyi, nyuli wudumba nanganginmuku wakiwarrmuku dungalayudinyi. Yalu nanganginmirra wakiwarrmuku. Ngala nanda krisjin wakiwarr, marda nyulimi miku ngarrangarra muwa nanganginkanyi mambukanyi. Marda nyulimi miku yurlurrmba jungku. Nanda krisjin wakiwarr, marda nyulimi waki kudanyu nanganginkanyi mambukanyi. Marda nyulimi ngayangayijba nanganginkanyi jangkurranyi. Jala nyulu waki kudanyu nani, baki miku yalungkiyi yanyba yingkamuku, “Nanamuku krisjinmuku wakiwarr, miku yalu kunyba wakiwarr. Miku yalimi ngayangayijba jangkurranyi yalunginkanyi mambukanyi.” Miku yalungkiyi yanyba nani nanankanyi krisjinkanyi wakiwarrayngka, jaliyi nyulu waki kudanyu nanganginkanyi mambukanyi. Barriwa
1TI 6:2 Nanda mambuka jala krisjin, nyulu yabimbaka kunyba yaji yalungi nanganginmukuyngka wakiwarrmukuyngka, baki yalu mirnarrijbangka muwa nangangi. Miku nyulimi daba yalunya, ngala nyulu maruka muwa yalungi, nyulungangi yalungi buwanganja. Bukambiju yalu jandanyimuku nangangi Kudkanyi. Nanamuku wakiwarrmuku, marda yalimi waki kudanyu nanankanyi Krisjinkanyi mambukanyi. Marda yalimi miku bunmalijba, mikungangi nyulimi daba yalunya. Ngala marda yalimi waki mili kudanyu nangangi, nyulungangi kunyba yalungi, nyulungangi Krisjin marda. Dimudi, marda ninjimi milidimba yalunya, yalu jungunkanyi nani. Marda ninjimi milidimba yalunya bukamba jangkurranyi jala ninga karu.
1TI 6:3 Nayinda jangkurr ngaki duja yurlurrmba. Ngala kudiyamukunyi, miku yalunjalimi milidimba duja jangkurr nangangi, ngambalanginkanyi mambukanyi Jisus Krayiskanyi. Miku yalunjalimi milidimba nanamannga jangkurr barrinani nayi ngaki. Jala yalu milidimba yingka jangkurr, baki miku yalungi jangkurr duja. Miku yalimi milidimba duja jangkurr, mikungangi yalimi jingkijba bulanya Kud baki Jisus Krayis. Miku yalimi jingkijba bulanya. Miku yalungkimi mankumanku bulangi, ngala yalungka yalungkaman mankumanku yurrngumba, yalu walkurramuku nganinyimuku. Barrarrakijba yalungka yurrngumba. Nulijba yalu jakakaykanyi yalunya yingkamuku. Nulijba yalu yabimbikanyi kiji yalungi. Muningka yalu jakakajba yalunya jangkurranyi, baki nanankardi barri nanamuku yingkamuku yalungka marda muningka jakakajba jangkurranyi. Yalungka marda yabimba kijinyi. Yalungka ngarrangarra muwa. Yalu jurlwa yalungi yingkamukuyngka. Yalu mudumuku. Nanamuku balkimuku milidimbawarrmuku, yalu nulijba, yalu jurlwa yalungi yingkamukuyngka. Yalu mudumuku. Nanamuku balkimuku milidimbawarrmuku, yalu nulijba yalungi, miku durriykanyi nanda kunyba jangkurr nangangi Kudkanyi, ngala yalu nulijba yalungi durriykanyi yalunginmirra jangkurr, jala balki jangkurr, miku yurlurrmba. Mankumanku yalungka, jayalu wudumba kudukudu dungala milidimbikanyi yalunya. Yalu nulijba wudumbikanyi kudukudu dungala, baki nanankardi yalunjalu milidimba, ngala miku yalungi jangkurr duja, miku yurlurrmba. Barriwa.
1TI 6:6 Ngala nanda krisjin jala durrijba Kud yurrngumba yurlurrmba, mirnarrijba nyulu muwa. Nanda Kunyba Ngarndu Kudkanyi jungkuka nangandu mankanyina, baki miku nangkimi mankumanku yurrngumba. Jungkuka nyulu mardumardu muwa yurrngumba. Miku nangkimi mankumanku mili dungalanyi marda yajinyi.
1TI 6:7 Jala nangka binandaba bardardanyi, baki wanyi nanda bardarda kuyu nangandu. Jala walajba bardarda, baki mikuyaji yajinyi nangandu. Mikuyaji mamanyi. Mikuyaji dungalanyi. Nyuluman walajbangka. Baki baku barri jalija nyulu malbu, janangka janyba. Baki wanyi yaji janyulu kuyu nangandu. Mikukimi kuyu yaji nangangi nangandu jalija nangka janyba. Baki nanankardi barri marda ngambalimi mardumardu muwa jala mikuyaji kajanyi mamanyi marda dungalanyi ngamandu. Marda ngambalakimi miku mankumanku yajinyi.
1TI 6:8 Ngala jala ngambala jungku jirdi mamanyi baki jumbalanyi, baki marda ngambalimi mardumardujba muwa, miku nuliykanyi mili kajanyi yajinyi.
1TI 6:9 Jalili nganinyi nulijba kajanyi dungalanyi marda yajinyi, bakili nyulu waki yurrngumba wudumbikanyi dungala. Ngala miku nyuliyala yabimba yaji yingkanyi. Miku. Ngawamba nyulu nulijba kajanyi dungalanyi. Ngala nanangini wuwarrwanyi, Sayidinwanyi, janyulu balanja nanda, baki janyulu yabimba balki yaji wudumbikanyi mili dungala. Baki nanangini nganinyiwanyi janyulu mamanumba Kud, mamanumbaja nanganginmuku mungkijimuku marda. Ngawamba mankumanku nangka dungalanyi. Ngala baku barri jalija nangka janyba, miku nyuliyi jungku nangandu Kudnyina. Janyulu jungku wayka wuwarrina, Sayidinyina yabimbangangi nyuli yaji balki yurrngumba wudumbikanyi dungala. Barriwa.
1TI 6:10 Kajamuku yalili nulijba dungalanyi nani. Yalungkili mankumanku dungalanyi. Yalu yabimbaka balki yaji wudumbikanyi mili dungala. Yangkalamba yalungka nanganbunanyi Kudnanyi, mankumankungangi yalungka ngawamba dungalanyi. Miku yalungkimi mankumanku nangangi Kudkanyi. Ngala miku yalimi jungku mardumardu muwa, jala yalu nulijba mili kajanyi dungalanyi. Miku. Ngala yalu balkijba muwa yingkanyi yajinyi. Yalungka yabimba kijinyi jala yalungka yangkalamba nanganbunanyi Kudkanyi, jala yalungka mankumanku ngawamba dungalanyi. Nanankardi barri yalungka balkijba muwa nanankanyi kijinyi.
1TI 6:11 Ngala miku ninjimi nulijba nani barrinani yalu. Ninji jandanyi nangangi Kudkanyi. Marda ninjimi miku nulijba kajanyi yajinyi. Marda ninjimi jungku yurlurrmba nangangi Kudkanyi. Marda ninjimi nulijba yabimbikanyi nanda jala nulijba Kud nganyi yabimbikanyi. Marda ninjimi maruka muwa yalungi bukambijuyngka, yabimbikanyi kunyba yaji yalungi. Marda ninjimi dujanya jungku. Marda ninjimi yili yanyba yingkanyi. Marda ninjimi jungku nani yurrngumba.
1TI 6:12 Marda ninjimi yabimba bukamba yaji, nulijba jala Kud nganyi yabimbikanyi yaji. Jungkukiyi ngiruka nangangi Kudkanyi yurrngumba. Wakikiyi kudanyu nangangi yurrngumba. Kudanyukiyi durrijba nangangi yuwa yurrngumba, baki janinji jungku wankan nangandu yurrngumba. Wabula jali nganyingka yangkalamba nangandurri Kudyurri, jali ninji jungku krisjin, baki ngurrunba ningi yingkawanyi. Ngala najbayi ninya kajamukunyi ngurruliykurri. Nanamanji ninji karuyi yalunya ninji kuyungka jangkurr nangangi Jisus Krayiskanyi, baki yali manku nganyi jangkurr, ninji durriykanyi nangangi Jisus Krayiskanyi. Nanamanji ninji jingkijba, janinji jungku wanka nangandu Kudnyina yurrngumba.
1TI 6:13 Nyulu barri wankambaka yaji Kudwanyi. Ngawamba nyulu wankambaka bukamba yaji. Baki nyulu najbangka ngana yarriykurri nayi jangkurr najana, jala ninya jirrinyba. Marda Jisus Krayiswanyi, nyulu marda najbangka ngana yarriykurri nayi duja jangkurr najana. Wabula barri Jisus Krayis, nyuli karrinja walu nangandu, mambukana Kabaminkanyi, niji Bilad. Karrinjayi Jisus Krayis walu nangandu, baki yanyba nyuli ngawamba duja jangkurr nangangi. Baki jingkijbangka Jisus Krayiswanyi nayinda jangkurr najana, jala ninya jirrinyba, nayinda duja jangkurr.
1TI 6:14 Ngayangayijbakiyi nanankanyi yuwanyi nanganginkanyi Jisus Krayiskanyi yurrngumba barri. Miku nganyingkiyi yangkalamba nanamunanyi yuwananyi. Durrijbakiyi nangangi yuwa yurrngumba nanankurri jalija wijba ngambalangi mambuka Jisus Krayis nanginkurri yajiyurri.
1TI 6:15 Miku ngambaliyi jingkijba wanyimbala janyulu wijba. Ngala janyulu manjijba Jisus Krayis wayka jambarri Kudwanyi. Baki ngawamba Kudwanyi nyulu jingkijbangka wanyimbala wijbaja Jisus Krayis. Kud, nyulu walkurra mambuka ngambalangi, walkurramirra. Nyulu mambuka bukambijuyngka, wirdikudukudunyi, lalijina baki nayiba jambana. Miku yingka walkurra mambuka barrinani nyulu. Nyulu wirimalaru yalungi.
1TI 6:16 Ngawamba nyulu Kud miku nangkimi janyba. Yurrngumba nyulu jungkuka wanka. Yurrngumba nangandu barrinani kambana yajina, miku mungana. Ngala miku ngambaliyi jilajba nangandurri, nyulungangi kudukudu. Nanamukunyi wankalamukunyi, miku yaliyanyi najba Kud, baki ngambala jala jungku nanijba, miku ngambaliyi najba Kud. Ngala nyulu walkurramirra, nyulu kunybamirra, nyulu ngirukamirra. Barriwa.
1TI 6:17 Baki yingkanyi jangkurranyi ninga karu. Nanamuku jala yalu jungku jirdi kajanyi dungalanyi, marda jirdi kajanyi yajinyi, jirrinybakiyi yalunya, marda yalungkimi miku mankumanku yalunginkanyi yajinyi. Marda yalungkimi miku barrarrakijba, kajangangi yalungi yaji. Miku. Yuku yalu wudumba kudukudu yaji dungalana, ngala miku yalimi wudumba Kud dungalana. Miku. Marda yalimi maruka muwa nangangi Kudkanyi, jala wajba yalunya kajanyi yajinyi. Marda yalimi maruka muwa nangangi. Nyuli wajba ngambalanya bukamba yajinyi Kudwanyi, baki yuku ngambala yabijba muwa nanankanyi yajinyi, jala ngambalanya wajba Kudwanyi. Yuku ngambala yabijba muwa nanankanyi yajinyi.
1TI 6:18 Karukiyi yalunya. Marda yalimi yabimba kunyba yaji yingkamukuyngka yurrngumba. Marda yalunjalimi wajba dungalanyi jala yalu mikuyaji dungalanyi. Jala yalu yabimba nani yaji yingkamukuyngka, baki marukangka muwa yalungi Kud. Baki baku barri jayalu jungku wanka nangandu yurrngumba.
1TI 6:20 Dimudi. Kuyukiyi nayinda ngaki jangkurr. Mankuwakiyi nayinda jangkurr yurrngumba. Miku nganyingkiyi yangkalamba nanginbunanyi jangkurrnanyi. Baki mikujiyi manku yingka jangkurr, balki jangkurr jala yalu yanyba jujambawarr. Yalu yanybaka yalu jingkijbawarr, ngala miku yalimi jingkijba Kud. Yalungki yangkalamba nanganbunanyi Kudnanyi. Yalungka jakakajba jangkurranyi. Mikujiyi kuyu yalungi jangkurr. Barriwa. Yanyba ngayu mududu Kudkanyi nganyi. Ngajakangka Kud nganyi, nyulu yabimbiji kunyba kurdulu narringi. Barriwa bukamba nayinda jangkurr.
2TI 1:1 Ngayu, ngaki ninji Bul. Ngayu yarrijba nayi jangkurr najana nganyi, Dimudi. Ninji barrinani jandanyi ngaki. Maruka ngayu muwa nganyi kudanyu. Wabula karuyi Jisus Krayis ngaki Kudwanyi, baki manjijba ngani Jisus Krayiswanyi. Manjijba ngani karunkanyi yalunya jangkurranyi, jungunkanyi wanka nangandu Jisus Krayisnyina yurrngumba. Yanyba ngayu mududu bulangi, Kudkanyi marda Jisus Krayiskanyi. Ngajaka ngayu bulanya, janinji jungku mardumardu muwa. Jungku janinji mardumardu muwa, jingkijbangangi ninji bulanya, jabula yabimba kunyba yaji nganyi. Baki ninji jingkijba Kud, manjamanjamba nyuli nanda balki yaji jali ninji yabimba wabula. Jingkijba ninji nani, baki nanankardi barri janinji jungku mardumardu muwa. Barriwa.
2TI 1:3 Maruka ngayu muwa, wakingangi ngayu nangangi Kudkanyi. Maruka ngayu muwa, ngayungangi jingkijba ngaki yaji, ngayu yabimbaka nanda jala nyulu nulijba ngaki yabimbikanyi. Ngayu wakingka nangangi, barrinani ngambalangi wankalamuku yalili waki nangangi. Baki maruka ngayu muwa nangangi. Yanyba ngayu mududu Kudkanyi nganyi. Yanyba ngayu mududu nganyi yurrngumba, yalibala baki ngabungaburri.
2TI 1:4 Ngayu mankumankuwa, jali ngayu barlba nganyinbunanyi. Ngindu ninji muwa ngaki, jali ngayu barlba. Ngindu ninji ngaki mirlarryudi, yingijbangangi ningi. Ngurrungurrujba ngayu muwa nganyi yurrngumba, mungana baki kambana. Ngurrungurrujba ngayu muwa wiykanyi nganyindurri, baki jangayu yabijba muwa nganyi.
2TI 1:5 Ngayu mankumankuwaka nganyi, maruka ninji muwa bulangi Kudkanyi baki Jisus Krayiskanyi. Kudanyu ninji maruka muwa bulangi. Ninji jungkuka ngiruka bulangi marda. Nganyi kukulinganja, nangangi niji Luwis, baki nganyi ngardanganja, nangangi niji Yunis, bula marukangka muwa bulangi Kudkanyi baki Jisus Krayiskanyi. Nani barri ninji marda, ninji maruka muwa bulangi. Jingkijba ninga, ninji maruka muwa bulangi, ninji kuyungka bulangi jangkurr, Kudkanyi baki Jisus Krayiskanyi.
2TI 1:6 Mikujiyi mamanumba nayi. Nyulu yabimbaka ninya ngiruka Kudwanyi, wakinkanyi nangangi. Jali ngayu yarrijba ngaki marni nganyindu, baki yanyba ngayi mududu Kudkanyi nganyi, nanamanji barri nanda Kunyba Ngarndu Kudkanyi, nyulu jungkuyi nganyindu, nyuli yabimba ninya ngiruka wakinkanyi nangangi Kudkanyi. Baki nanankardi barri marda ninjimi miku manyirru. Wajbayi ngambalanya Kudwanyi, nanganginmuku wakiwarrmuku. Wajbayi ngambalanya nanganginkanyi Kunybanyi Ngarndunyi, baki mikukimi ngambalanya Ngarnduwanyi yabimbaka manyirrunkanyi. Miku. Ngambalanya yabimbaka ngiruka nangangi Kudkanyi Ngarnduwanyi. Ngambalanya yabimbaka marukankanyi muwa yingkamukuyngka. Ngambalanya yabimbaka ngiruka, ngambalaka kurrkunbikanyi jungunkanyi balkina yuwana.
2TI 1:8 Mikujiyi manyirru karunkanyi yingkamuku nangangi, ngambalanginkanyi mambukanyi, Jisus Krayiskanyi. Baki mikujiyi manyirru ngaki, jungkungangi ngayu brisinyina. Nanamuku jala miku yalimi kuyu nangangi jangkurr Jisus Krayiskanyi, jala ngirra Jisus Krayis, ngana yali yarrijba brisinyina, ngala miku yalimi ngaki mambuka. Miku. Ngala ngawamba nyulu ngaki mambuka, Jisus Krayis. Baki mikujiyi marrala, jaliyi ninyalu daba, milidimbangangi ninji jangkurr nangangi Jisus Krayiskanyi. Miku yalimi kuyu nangangi jangkurr Jisus Krayiskanyi. Mikujiyi marrala, nyulungangi ninyaja yabimba ngiruka nangangi Kudwanyi. Nyulu barri wankambawarr, baki ngambalanya yarrijbayi nanganginmuku. Ngala mikukiyanyi ngambalanya yarrijba nanganginmuku, ngambalangangi jungkuka kunybana nanganginyina yuwana. Miku ngambalanya yarrijbayi, nulijbangangi nyuli ngambalangi wakinkanyi nangangi. Nulijba nyuli ngambalangi, nanganginmukuyngka jandayngkanyi. Jala ngambala jungku kunyba nangangi, nanda kunyba, ngala miku nyuliyanyi yabimba nayinda kunyba yaji ngambalangi, jungkungangi ngambala kunyba nangangi. Miku. Ngala yabimba nyuli nanda kunyba yaji ngambalangi, nulijbangangi nyuli yabimbikanyi kunyba yaji ngambalangi. Baki bula, Kud baki Jisus Krayis, mirnarrijba bula muwa ngambalangi, jala bula yabimba kunyba yaji ngambalangi. Baki jingkijbayi bukamba yaji Kudwanyi. Jingkijba nyuli yaji wabula kamambarra, waluwa nyuli yabimba yaji, baki jamba baki kanja, waluwa nyuli yabimba nganinyi. Nanamanji wabula nyuli jingkijba, janyulu manjijba Jisus Krayis nanginkurri wayka, nyulu wankambikanyi ngambalanya yurrngumba.
2TI 1:10 Nyuli manjijba nanganginmirra jandanyi, baki ngambalanya milidimbayi jandanyiwanyi nangangi Kudkanyi. Milidimbayi ngambalanya nangangi, nanankanyi wankambawarrayngka. Baki janyba nangki Jisus Krayis ngambalangi. Janyba nangki ngambalanginkanyi balkinyi yajinyi. Baki nanankardi barri ngambala jingkijba, jangambala jungku mili wanka bayngkani jalija ngambalaka janyba. Jangambala mili wanka jungku, jalija ngambala durrijba Jisus Krayis. Miku ngambalakiyi janyba yurrngumba, jalija ngambala kuyu nanda kunyba jangkurr, jirrinyba jali ngambalanya Jisus Krayiswanyi. Jaliyi ngambala kuyu nangangi jangkurr, baki miku ngambaliyi jungku kurdan yurrngumba. Barriwa.
2TI 1:11 Yarrijbayi ngana Kudwanyi, ngayu karunkanyi yalunya yingkamuku kunybanyi jangkurranyi nanganginkanyi Jisus Krayiskanyi. Manjijba ngani milidimbikanyi yalunya nanankanyi jangkurranyi.
2TI 1:12 Baki nanankardi barri ngayu jungku nayiba brisinyina. Ngana yali yarrijba brisinyina, mikungangi yaliyanyi kuyu nanda jangkurr nangangi Jisus Krayiskanyi. Ngala miku ngayiyi manyirru, jungkungangi ngayu brisinyina. Miku ngayiyi manyirru, jingkijbangangi ngayu Kud, nyulu lalanbaka bukamba ngambalanya krisjinmuku. Jingkijba ngayu, milidimba ngayi yalunya nanganginkanyi duja jangkurranyi, baki miku yaliyi mamanumba nanda jangkurr. Nyulu lalanbaka nanda jangkurr Kudwanyi, baki kudiyamukunyi, miku jayalu mamanumba nanda nangangi jangkurr, kuyu jayalu nanda jangkurr. Jingkijba ngayu Kud, nyulu lalanbaka bukambiju, jala yalu durrijba nangangi jangkurr. Nyulu lalanba bukambiju, nanankurri jalija wijba Jisus Krayis nanginkurri.
2TI 1:13 Mankuwakiyi nanda jangkurr jali ninya milidimba. Mikujiyi mamanumba nanda jangkurr. Marda ninjimi milidimba yalunya ngawamba nanankanyi jangkurranyi, karu jali ninga. Marda ninjimi najbawa nayinda jangkurr nangangi Jisus Krayiskanyi yurrngumba. Marda ninjimi maruka muwa nangangi Jisus Krayiskanyi. Jaliyi ninji maruka muwa nangangi, baki kuyu nangangi jangkurr, baki janinji maruka muwa bukambijuyngka marda. Janinji maruka muwa yalungi, nyulungangi marukangka muwa yalungi bukambijuyngka.
2TI 1:14 Najbawakiyi nanda jangkurr nangangi Jisus Krayiskanyi. Najbawakiyi nangangi jangkurr nganyinyina kurduluna yurrngumba. Mikujiyi kuyu yingkanyi jangkurranyi. Miku. Marrimbakiyi nanda jangkurr nganyinyina kurduluna yurrngumba, jungkukangangi nanda Kunyba Ngarndu Kudkanyi nganyindu kurduluna yurrngumba. Barriwa.
2TI 1:15 Jingkijba ninji, ngakinmuku mungkijimuku jalili yalu jungku nananyina walkurranyina yajina Yasiya, nganjalu yingijbayi. Marrala yali. Miku nganjaliyanyi mili kandimba. Manyirru yali ngaki. Warriyaluku. Nanankujarra Bijilus baki Yirmujinis, bula marda, manyirru buli ngaki jilaykanyi ngakindurri brisinyina.
2TI 1:16 Ngala nanda yingka niji nangangi Yunisiburis, miku nyuliyanyi manyirru ngaki, jungkungangi ngayi brisinyina. Miku. Yuwajiwa nyuli yidamba ngana. Ngayu ngajakangka Kud lalanbiji nangangi maninganja baki nanganginmuku jandanyimuku. Ngayu ngajakangka Kud, nyulu yabimbikanyi kunyba yaji yalungi, yuwajiwangangi ngani kandimba Yunisiburiswanyi.
2TI 1:17 Miku nyuliyanyi manyirru ngaki. Miku. Ngala nyuli kujba ngaki. Jali nyulu wanbiya nayiba Rum, baki nyuli kujba ngaki kudanyu, baki wakarambayi ngana. Miku nyuliyanyi manyirru ngaki, jungkungangi ngayu brisinyina, ngala nyuli jila ngakindurri.
2TI 1:18 Ngajaka ngayu Kud, janyulu yabimba kunyba yaji nangangi Yunisiburiskanyi. Janyulu yabimba kunyba yaji nangangi nanamanji barri jalija nyulu jungku mili wanka nangandu Kudnyina. Jingkijba ninji nanda Yunisiburis, nyulu yabimbayi kunyba yaji ngaki wabula, jali ngayu jungku nanaba karru Yibisus, baki mili kunyba yaji nyuli yabimba ngaki nayiba Rum. Ngana yidambayi ngala ngayi jungku brisinyina. Kunyba nyuli jungku ngaki. Barriwa.
2TI 2:1 Dimudi, ninji barrinani ngaki jandanyi. Jungkukiyi ngiruka nangangi Jisus Krayiskanyi. Nyulu yabimbaka kaja kunyba yaji nganyi Jisus Krayiswanyi. Nyulu yabimbaka ninya ngiruka. Miku nyulu yabimbaka kunyba yaji nganyi, jungkungangi ninji kunyba. Ngala nyulu yabimbaka kunyba yaji nganyi, marukangkangangi nyulu muwa nganyi.
2TI 2:2 Ngayi milidimba ninga jangkurranyi nanganginkanyi Jisus Krayiskanyi. Kajamukunyi yali manku nanda jangkurr jali ninga milidimba. Marda ninjimi yarrijba kunyba krisjinmuku jungunkanyi malbu jurjkanyi, kunybamuku milidimbawarrmuku. Marda ninjimi milidimba yalunya nayimannga jangkurranyi. Baki jayalu baku milidimba yingkamuku nayimannga jangkurranyi nanganginkanyi Jisus Krayiskanyi. Nani barri yurrngumba.
2TI 2:3 Dimudi, ninji mambuka nanankanyi jurjkanyi nanaba karru Yibisus. Ngala Jisus Krayis, nyulu walkurra mambuka niyangi. Nyulu mambuka nganyi, baki ngaki. Wakikiyi kudanyu nangangi Jisus Krayiskanyi. Lalanbakiyi yalunya nganyinyina jurjina kudanyu barri. Ngala miku nganyingkiyi mankumanku nganyingkaman. Miku nganyingkiyi mankumanku, jaliyi ninji karu yalunya nangangi Jisus Krayiskanyi, baki yiningki jayalu ninya daba kudiyawanyi, yiningki janinya yarrijba brisinyina, barrinani nanganjali yarrijba. Miku nganyingkiyi mankumanku nani, ngala mankumanku nganyingkiyi wakinkanyi kudanyu nangangi Jisus Krayiskanyi, baki nganyingkanyi jurjkanyi.
2TI 2:4 Mankuwakiyi nanda yuwa nangangi Jisus Krayiskanyi. Jungkukiyi kunyba nanganginyina yuwana yurrngumba. Mikujiyi yabimba nanda jala balki nanganginyina yuwana. Durrijbakiyi nangangi yuwa yurlurrmba, baki janyulu mirnarrijba muwa nganyi.
2TI 2:5 Jalija ninji durrijba nanda yuwa nangangi Jisus Krayiskanyi, baki janyulu yabimba kunyba yaji nganyi. Janyulu kandimba ninya, jalija ninji jungku wanka nangandu yurrngumba.
2TI 2:6 Jala nganinyi wakingka kudanyu nanganginkanyi mambukanyi, baki nanangini mambukawanyi wajbangka kajanyi yajinyi, marda mamanyi, marda dungalanyi. Kajanyi yajinyi wajbangka nanda kunyba wakiwarr. Nani barri jala ninji waki kudanyu nangangi, niyanginkanyi mambukanyi, Jisus Krayiskanyi. Jala ninji waki kudanyu nangangi, baki janyulu lalanba ninya, janyulu wajba ninya kajanyi yajinyi.
2TI 2:7 Mankumanku nganyingka ngakinkanyi jangkurranyi, baki niyanginyi mambukawanyi, Jisus Krayiswanyi, janyulu wajba ninya kunybanyi kulajinyi jingkiykanyi ngaki jangkurr. Ninya janyulu wajba kunybanyi kulajinyi, baki janinji jingkijba bukamba jangkurr, milidimba jala ninga.
2TI 2:8 Mankuwakiyi niyangi mambuka Jisus Krayis. Nanda wankalanyi, Dayibid, nyulu barrinani wankalanyi nijanganjinyi nangangi Jisus Krayiskanyi. Mankuwakiyi Jisus Krayis. Janyba nangki, ngala mili wankambayi Kudwanyi. Nayinda jangkurr duja, bakili ngayu milidimba nanginkanyi jangkurranyi yalunya. Mankuwakiyi nayinda jangkurr yurrngumba.
2TI 2:9 Ngana yali yarrijba brisinyina, milidimbangangi ngayi nayinda jangkurr. Ngana kijijbayi kijbakijbayudinyi, baki miku ngayimi jilajba. Ngana kijijbayi, barrinani nanda balki nganinyi, nanda maninjaku, barrinani nanda kurdanbawarr. Ngala miku yalimi kijijba nanda jangkurr nangangi Kudkanyi. Miku yalimi kijijba nangangi jangkurr kijbakijbayudinyi. Yurrngumba ngambala karu yalunya nanganginkanyi jangkurranyi Kudkanyi.
2TI 2:10 Ngala yuku barri, mirnarrijba ngayu muwa, jala ngayu jungku nayiba brisinyina. Mirnarrijba ngayu muwa yalungi yingkamukuyngka jali yarrijba Kudwanyi nanganginmuku jandanyimuku. Nyulu wankambawarr Kud. Janyulu marrimba yalunya mardarda, janyulu wankamba yalunya baku jalija yalungka janyba, kuyungangi yalu nangangi jangkurr Jisus Krayiskanyi. Jayalu wanka jungku nangandu yurrngumba nananyina kunybana yajina Kudkanyi.
2TI 2:11 Nayinda jangkurr duja. Jaliyi yalu kurdanba ngambalanya, kuyungangi ngambala nangangi jangkurr Jisus Krayiskanyi, jaliyi ngambalaka janyba nani barri, baki jangambala mili jungku wanka nangandu Jisus Krayisnyina.
2TI 2:12 Jaliyi ngambala yuwaji durrijba Jisus Krayis yurrngumba barri ngala jayalu manku kiji ngambalangi, baki jangambala jungku wanka nangandu yurrngumba ngambalanginyina mambukana. Ngala jaliyi ngambalaka yangkalamba nanganbunanyi Jisus Krayisnanyi, jaliyi ngambala yanyba, miku ngambaliyi jingkijba Jisus, baki janyulu yanyba ngambalangi, miku nyulimi jingkijba ngambalanya, miku ngambalimi nanganginmuku jandanyimuku.
2TI 2:13 Jaliyi ngambala miku durrijba nangangi jangkurr Jisus Krayiskanyi, jaliyi ngambala miku maruka muwa nangangi kudanyu, ngala yuwajiwa nyulu marukangka muwa ngambalangi. Yuwajiwa nyulu marukangka muwa ngambalangi, mikungangi nangkiyi yangkalamba ngamanbunanyi. Jungkuka nyulu nanaba ngambalanginyina yulurrmba yuwana yurrngumba. Bukamba nayinda jangkurr duja.
2TI 2:14 Karukiyi yalunya krisjinmuku nganyinyina jurjina nanginkanyi jangkurranyi. Marda yalima miku mamanumba nayinda jangkurr. Karukiyi yalunya, mankuka yalungi jangkurr Kudwanyi, baki marda yalungkimi miku jakakajba jangkurranyi. Mikukimi nanangini jangkurrwanyi milidimba yingka. Ngawamba mankuka kiji yalungi jangkurrwanyi, jala yalungka jakakajba.
2TI 2:15 Wakikiyi kudanyu nangangi Kudkanyi yurrngumba. Milidimbakiyi ngawamba nanganginkanyi duja jangkurranyi, baki miku ninjiyi manyirru nangangi Kudkanyi. Miku ninjiyi manyirru nangangi, jingkijbangangi ninji, nyulu yabijba muwa nganyi. Yabijba nyulu muwa nganyi, yabimbangangi ninji nanda jala ninya karu Kudwanyi. Milidimba ninji nanganginkanyi duja jangkurranyi.
2TI 2:16 Mikujiyi muningka yanyba yinini jangkurr yalungi. Miku nanda jangkurr nangangi Kudkanyi. Miku. Mikujiyi jakakajba yalunya nani. Jaliyi ninji muningka jakakajba yalunya, baki mikukimi nganyinyi jangkurrwanyi milidimba yalunya nangangi Kudkanyi. Jaliyi ninji muningka jakakajba yalunya nani, baki jayalungka yangkalamba nanganbunanyi Kudkanyi. Jayalu mili durrijba yalunginyina yuwana. Ngala marda ninjimi karu yalunya duja jangkurranyi nanganginkanyi Kudkanyi.
2TI 2:17 Jala yingkawanyi milidimbaka balki jangkurr, baki waluku kujajarranyi yalu kuyu jangkurr, baki nanda dulu kajamukunyi yalu manku nanda jangkurr. Balkimbaka yalunya balkiwanyi jangkurrwanyi. Nanda balki jangkurr barrinani juwambi. Jala ninji jungku jirdi juwambinyi, jaliyi ninji miku yarrijba nanda jingkal, baki kudanyu nanda biwi nganyi. Waluku bayakarda jardijbangka, baki nanamunanyi walkurramba nangka dulu. Balkimbaka nanda barnyi juwambiwanyi. Baki nani barri nanda balki jangkurr jala milidimbaka yingkawanyi. Balkimbaka yalunya balkiwanyi jangkurrwanyi. Nanankujarra Yimanayiyus baki Bilidus, bula balkiwuya milidimbawarrwuya. Milidimba bula balki jangkurr, baki kajamukunyi yalu kuyungka nanda balki jangkurr.
2TI 2:18 Milidimba bula nanankanyi jangkurranyi jala miku jungku duja. Yanyba bula, miku ngambaliyi jungku wanka nangandu Jisus Krayisnyina bayngkani jalija ngambalaka janyba. Miku ngambaliyi wankijba. Baki kudiyamukunyi krisjinmukunyi yalu kuyungka nanda jujambawarr jangkurr, miku wankiykanyi mili. Kuyungka yalu nanda jujambawarr jangkurr, ngala miku yalimi kuyu nanda duja jangkurr, jala yanybayi Jisus Krayis wankiykanyi mili.
2TI 2:19 Muningka jangayu karu ninga nanginkanyi jangkurranyi. Yabimbayi ngiruka barrawu nganinyiwanyi. Yabimba nyuli barrawu yundu dungalana yajina, kunybana yajina yabimbikanyi barrawu yundu. Ngiruka nanda barrawu, jungkuyingangi kunybana dungalana yajina. Jali wirlku mali, baki yuwajiwa jungkuyi ngiruka nanda barrawu. Mikuwali dulaba barrawu maliwanyi, jungkuyingangi barrawu dungalana yajina. Nanda barrawu, nanda barrinani ngambala krisjinmuku. Baki nanda kunyba dungala yaji, nanda barrinani jangkurr nangangi Kudkanyi. Baki nanda mali, nanda barrinani nanamuku balkimuku jala yalu nulijba yangkalambikanyi ngambalanya nanganbunanyi Kudnanyi. Ngala miku yaliyi yangkalamba ngambalanya nanganbunanyi, jungkukangangi ngambala ngiruka nangangi Kudkanyi. Ngambala jungku ngiruka nangangi, durrijbangangi ngambala nangangi ngiruka jangkurr. Nanda jangkurr najana Kudkanyi, nanda jangkurr duja baki ngiruka yurrngumba. Nanangini wankalawanyi, niji Musis, yarrijba nyuli duja jangkurr najana Kudkanyi. Nayi nyuli yarrijba, “Nyulu jingkijbangka nanganginmuku jandanyimuku Kudwanyi. Jingkijbangka yalunya nanganginmirra.” Barriwa. Baki yingka mili wankalanyi, nangangi niji Yayisaya, yarrijba nyuli nayinda jangkurr najana Kudkanyi, “Jala nganinyi yanybaka, nyulu jandanyi nangangi Kudkanyi, baki miku nangkiyi yangkalamba nanganbunanyi Kudnanyi. Marda nyulimi yingijba nanda balki yuwa. Marda nyulimi jungku kunybana yuwana Kudkanyi yurrngumba.” Barriwa.
2TI 2:20 Kajamuku krisjinmuku wandijiyana, kudukudu. Yingkamuku yalu jungku ngiruka nangangi Kudkanyi, baki nyulu karungka yalunya yabimbikanyi ngiruka yaji nangangi. Ngala yingkamuku miku yalimi ngiruka nangangi Kudkanyi. Majabujba yalungi ngarndu nangangi Kudkanyi. Miku yalimi ngiruka yabimbikanyi ngiruka yaji nangangi, baki nanankardi barri nyulu karungka yalunya yabimbikanyi bayakarda yaji nangangi.
2TI 2:21 Jaliyi nganinyi yurlwa balkinyi jangkurranyi, jaliyi nyulu jungku yurlurrmba yuwana Kudkanyi yurrngumba, baki jingkijbangka nanda nganinyi Jisus Krayiswanyi. Jingkijba nyulu nanda nganinyi, janyulu kunyba wakiwarr nangangi Jisus Krayiskanyi. Janyulu kunyba wakiwarr nangangi, yurlwangangi janyulu yalungi balkimukuyngka milidimbawarrayngka.
2TI 2:22 Marda ninjimi jungku jirdi kunybanyi kulajinyi nangangi Kudkanyi. Marda ninjimi miku jungku barrinani kaburr. Miku nyulimi jungku jirdi kunybanyi kulajinyi. Miku nangkimi kudanyu mankumanku nanankanyi jalija nyulu yabimba, ngala wakun yabimbaka yaji jala nyulu nulijba yabimbikanyi. Marda ninjimi miku jungku nani. Marda ninjimi jungku jirdi kunybanyi kulajinyi nangangi Kudkanyi. Marda ninjimi jungku yurlurrmba nangangi. Marda ninjimi kuyu nangangi jangkurr yurrngumba. Marda ninjimi maruka muwa yalungi yingkamukuyngka. Marda ninjimi jungku mardumardu muwa yalungi. Marda ninjimi jungku mardumardu muwa yalungi jala maruka yalu muwa nangangi Jisus Krayiskanyi. Marda ninjimi maruka muwa yalungi kudanyu barri.
2TI 2:23 Baki mili ngayu yanyba nganyi. Mikujiyi muningka jakakajba yalunya. Miku. Jaliyi narringka jakakajba nani barri, baki manku ninji kiji.
2TI 2:24 Nanda wakiwarr nangangi mambukanyi Jisus Krayiskanyi, marda nyulimi miku jakakajbawarr. Marda nyulimi miku manku kiji yingkamukuyngka, ngala marda nyulimi yabimba kunyba yaji yalungi. Marda nyulimi milidimba yalunya yili jangkurranyi. Marda nyulimi manku yalungi jangkurr, jala yalu yanyba nangangi. Marda nyulimi miku ngirrwa yalungi kijina.
2TI 2:25 Ngala nanda kunyba wakiwarr nangangi Jisus Krayiskanyi, marda nyulimi karu yalunya jala yalu yanyba barimba. Marda nyulimi miku ngirrwa yalungi, ngala marda nyulimi karu yalunya yurlurrmba jangkurranyi. Baki yukumbaka Kud yalungi, yalu ngindunkanyi muwa yalunginkanyi balkinyi yajinyi, baki yuku jayalu jingkijba nanda duja jangkurr.
2TI 2:26 Jayalu jungku jirdi kunybanyi kulajinyi nangangi Kudkanyi. Jayalu miku manku nanda jangkurr nangangi Sayidinkanyi. Baki mikuwali mili Sayidinwanyi yabimba yalunya yabimbikanyi nangangi balki yaji. Miku jayalu mili manku nangangi jangkurr, jalija nyulu balanja yalunya Sayidinwanyi. Jayalu durrijba nanda yurlurrmba jangkurr nangangi Kudkanyi. Barriwa.
2TI 3:1 Mankuwakiyi nayinda jangkurr ngaki. Baku barri, waluwa wijbaja Jisus Krayis nanginkurri yajiyurri, yingkamukunyi balkimukunyi jayalu yabimba kiji. Kudukudu kiji jayalu yabimba bukambijuyngka.
2TI 3:2 Nanamanji barri nanamuku miku jayalu maruka muwa nangangi Kudkanyi, baki miku jayalu maruka muwa yalungi yingkamukuyngka. Ngala jayalu kuliwijba yajinyi marda dungalanyi. Jayalungka barrarrakijba. Jayalungka yarrijba walkurramuku mambukamuku yingkamukuyngka. Jayalu jilajba ngirrwanki yingkamukuyngka kudanyu barri. Jayalu yurlwa yalunginkanyi nijanganjiyngkanyi marda ngardanganjanyi. Miku yaliyi nulijba jingkiykanyi Kud. Miku.
2TI 3:3 Miku yaliyi kandimba yingkamuku. Jayalu yabimba balki yaji yalungi. Jayalu ngirrwa yalungi. Jayalunjalu daba kudiyanymuku. Jayalunjalu marranunumba, baki jayalu marrala kudanyu. Nanamukunyi balkimukunyi, jayalunjalu ngirra nanamuku kunybamuku.
2TI 3:4 Jayalu yanyba, “Nurru jungku dujanya”, ngala jayalu jujamba. Miku yaliyi dujanya. Jayalu yabimba yaji wakun. Miku jayalungka waluku mankumanku yabimbikanyi yajinyi. Wakun jayalu yabimba yaji. Jayalungka barrarrakijba. Jayalu yabimba nanda jala yalu nulijba yabimbikanyi, ngala miku jayalu yabimba nanda jala nulijba Kud yalungi yabimbikanyi. Miku.
2TI 3:5 Nanamuku balkimuku jayalu jila jurjyurri, jayalu yanyba mududu nangangi Kudkanyi, ngala miku yaliyi dujanya nangangi Kudkanyi. Miku yaliyi ngiruka nangangi Kudkanyi, ngala jayalu ngiruka nangangi Sayidinkanyi. Mikujiyi jungku yalundu balkimukunyina. Jujukiyi jilajba yalunbunanyi. Jayalu balkimba yingkamuku. Barriwa.
2TI 3:6 Marda kudiyamuku yalungi, balkimuku milidimbawarrmuku, yalu jilajba barndamukuyngkurri. Yalu yidamba jibarrimuku yalunginyina barndana. Yanyba yalu jibarrimukuyngka. Milidimba yalunjalu jujambawarrayngka jangkurranyi, baki kuyu yalungi jangkurr kudiyamukunyi jibarrimukunyi. Nanamuku jibarrimuku yalu mudujba. Yabimba yalu balki yaji. Nanankardi barri, jala yalungka yanyba muwa, baki jingkijba yalungka, yalu jungkuka balki nangangi Kudkanyi. Yurrngumba yalu manku balki jangkurr, jujambawarr jangkurr. Miku yalimi jingkijba duja jangkurr. Mudujba yalu nanamuku jibarrimuku.
2TI 3:8 Nanamuku balkimuku milidimbawarrmuku, yalu barrinani nanankujarra wankalawuya yarrbirrawuya, niji bulangi Jarnis baki Jambiris. Jungku buli kularra, nananyina yajina niji Yijib. Waki buli mambukanyi nanankanyi yajinyi. Jakakajba buli nanda nganinyi Kudkanyi Musis. Miku buliyanyi kurranja Musis, yarrbirrangangi buli nanankanyi mambukanyi kularra. Kuyu buli nanda kiji kularrinybarri. Baki nani barri nanamuku balkimuku milidimbawarr nangangi Sayidinkanyi marda. Miku yalunjalimi kurranja milidimbawarrmuku nangangi Kudkanyi. Miku. Milidimba yalu balki jangkurr, jala miku yurlurrmba nangangi Kudkanyi. Miku yalimi kunyba kulaji nangangi Kudkanyi, miku yalimi kuyu nangangi jangkurr, ngala yalu kuyu nanda jangkurr nangangi Sayidinkanyi. Yalu wakingka nangangi Sayidinkanyi.
2TI 3:9 Baki nanda balki milidimbawarr, yingkamukunyi, yalu kuyu nangangi jangkurr, ngala yingkamukunyi, yalu jingkijba nanda jujambawarr jangkurr. Yalunjalu jingkijba, yalu mudu. Yalu barrinani nanankujarra wankalawuya yarrbirrawuya jali jungku kularra. Nanankujarra buli mudu marda. Barriwa.
2TI 3:10 Ngala ninji Dimudi, jingkijba nganinji kudanyu. Ninji jingkijbangka nanda jangkurr, jala ngayu milidimba yalunya. Nganinji jingkijba barri, nulijba ngayu wakinkanyi kudanyu nangangi Jisus Krayiskanyi. Durrijba ngayu nangangi jangkurr, ngala miku ngayimi ngarrangarra muwa yalungi, jalimi yalu miku jingkijba nangangi duja jangkurr. Miku ngayimi ngirrwa yalungi, ngala ngayu yanyba yalungi yili. Maruka ngayu muwa yalungi yurrngumba.
2TI 3:11 Nganinji jingkijbangka, yingkamukunyi yali yabimba kiji ngaki, ngala yuwajiwa ngayi waki kudanyu nangangi Jisus Krayiskanyi. Miku ngayiyanyi marrala yalungi jali yalu yabimba kiji ngaki. Yuwajiwa ngayi milidimba yalunya yingkamuku. Kudiyana ngananjali daba, ngala miku ngakiyanyi kurrkunba yalungi milidimbikanyi yalunya. Yuwajiwa ngayi karu yalunya nangangi Jisus Krayiskanyi. Nganinji jingkijba nanankanyi balkinyi yajinyi, jali yalu yabimba ngaki karru yajina. Ngala ngayi jungku nanaba Yandiyuk, baki nganjali manjijba nanamunanyi yajinanyi. Ngala ngayi jungku nanaba Yikuniyum, baki nulijba yali kurdanbikanyi ngaki, ngala wirlku ngayi yalunbunanyi. Baki ngala ngayi jungku nanaba Lisdira, baki janyba yali dungala ngakindurri, nganjali wililijba danbiyurri barrawuyabarrawuyananyi. Ngamu ngaki barriwa janyba. Ngala niyanginyi mambukawanyi Jisus Krayiswanyi ngana marrimbayi mardarda yurrngumba. Ngana marrimbayi mardarda nananyina kajana kijina.
2TI 3:12 Jala nganinyi nulijba jungunkanyi kunyba nangangi Jisus Krayiskanyi, jala nyulu nulijba wakinkanyi kudanyu nangangi, baki yingkamukunyi jayalu yabimba kiji nangangi. Jayalu yabimba kiji nanankanyi jala nulijba jungunkanyi kunyba nangangi Jisus Krayiskanyi.
2TI 3:13 Ngala nanamukunyi balkimukunyi, miku yalimi yabimba kunyba yaji yalungi yingkamukuyngka. Jujamba yalunjalu. Nanamuku yalu jungkuka balki nangangi Jisus Krayiskanyi. Waluku yalu jungku balki bijal, ngala mili yalu jungku balki yurrngumba kudanyu barri. Baki nanamuku balkimuku, jujamba yalungka marda. Miku yalimi jingkijba jujakun jangkurr yalu yanyba. Ngamu kunyba jangkurr.
2TI 3:14 Ngala ninji barri Dimudi, marda ninjimi yabimba nanda kunyba yaji, milidimba jali ninya yingkamukunyi. Marda ninjimi jungku kunyba nangangi Jisus Krayiskanyi yurrngumba. Janinji durrijba nangangi jangkurr, kuyungangi ninji nangangi jangkurr. Ninji jingkijbangka nangangi jangkurr duja.
2TI 3:15 Ninji jingkijbangka nanda jangkurr jali ninya bula milidimba ninga, nganyinyi kukulinganjawanyi marda ngardanganjawanyi. Jala ninji juka, baki milidimba ninya bula jangkurranyi nananyina najana nangangi Kudkanyi. Nanangini jangkurrwanyi najana karungka ngambalanya, kuyunkanyi jangkurr nangangi Kudkanyi, karungka ngambalanya, yurlurrmba jungunkanyi nangangi Kudkanyi. Nanangini jangkurrwanyi karungka ngambalanya, marrimbikanyi ngambalanya mardarda Kudwanyi. Jala ngambala kuyu nangangi jangkurr Jisus Krayiskanyi, baki nyulu marrimbaka ngambalanya mardarda Kudwanyi.
2TI 3:16 Bukamba nanda jangkurr najana Kudkanyi, duja jangkurr nangangi. Nanamuku wankalamuku, jali yarrijba nanda jangkurr, miku yaliyanyi yarrijba yalunginmirra jangkurr. Miku. Yarrijba yali ngawamba nanda jangkurr jali yalunya karu Kudwanyi. Baki nanankardi barri nanangini jangkurrwanyi milidimbaka ngambalanya duja jangkurranyi. Nanangini jangkurrwanyi milidimbaka ngambalanya jungunkanyi kunyba nangangi Kudkanyi. Nanangini jangkurrwanyi minimbaka ngambalanya jala ngambala jungku balki nangangi Kudkanyi. Minimbalaka ngambalanya jangkurrwanyi, yangkalambikanyi ngambalaka nangandurri Kudyurri. Minimbaka ngambalanya jangkurrwanyi, jungunkanyi yurlurrmba nanganginyina yuwana. Nani minimbaka ngambalanya jangkurrwanyi Kudkanyi.
2TI 3:17 Baki nanankardi barri nanda milidimbawarr Kudkanyi, nyulu jingkijbangka nanda jangkurr najana Kudkanyi, walkurra ngiruka milidimbikanyi yalunya. Baki nanankardi barri birrirrinja nangka nanda milidimbawarr yabimbikanyi kunyba yaji nangangi Kudkanyi. Birrirrinja nangka wakinkanyi nangangi Kudkanyi. Barriwa.
2TI 4:1 Jingkijba ninji Jisus Krayiskanyi, nyulu lalanbawarr yalungi, jala durrijba nangangi yuwa. Janyulu wijba nanginkurri jambarri baku barri. Baki nanamanji barri janyulu karrinjarrijba bukambiju walu nangandu, nanamuku jala yalu yuwaji wanka nanamanji, baki nanamuku jala yalungki janyba waluwa. Janyulu karrinjarrijba bukambiju yalunya walu nangandu, barrinani kurdusnyina, baki janyulu nyalinyalimba yalunya, kudiya kingkarri, baki kudiya wayka. Nanamuku jala yalu jandanyimuku nangangi Kudkanyi, janyulu manjijba yalunya kingkarri nangandurri Kudyurri, jungunki wanka nangandu yurrngumba. Ngala nanamuku balkimuku janyulu manjijba yalunya wayka Yilyurri. Bula jingkijbangka nayinda jangkurr Kudwanyi, baki Jisus Krayiswanyi. Bula jingkijba nayinda walkurra jangkurr jala ninga jirrinyba. Jirrinyba ninga nayi kudanyu.
2TI 4:2 Milidimbakiyi yalunya jangkurranyi nangangi Jisus Krayiskanyi. Jungkukiyi ngiruka karunkanyi nanankanyi jangkurranyi yurrngumba. Miku nganyingkiyi yanyba nayi, “Miku jangayu karu nayinda nganinyi nangangi Jisus Krayiskanyi. Miku nangkimi birrirrinja nanankanyi jangkurranyi. Jangayu karu baku.” Miku nganyingkiyi yanyba nani, ngala barriwakiyi jirrinyba barri yalunya nangangi Jisus Krayiskanyi. Ngirrwakiyi yalungi, jala yalu miku jungku yurlurrmba nanganginyina yuwana. Baki ngirrwakiyi yalungi, nanamukuyngka balkimukuyngka milidimbawarrayngka. Milidimbakiyi yalunya jungunkanyi yurlurrmba nangangi Kudkanyi, baki jaliyi yalu ngayangayijba nanankanyi jangkurranyi, baki marda ninjimi minimba yalunya nanankanyi duja yuwanyi nangangi Kudkanyi. Ngala yilikiyi yanyba yalungi. Yilikiyi karu yalunya yurrngumba nanankanyi jangkurranyi. Barriwa.
2TI 4:3 Baku barri kajamukunyi, miku yaliyi manku nanda duja jangkurr, milidimba jali ngambalanya Jisus Krayiswanyi. Ngala jayalu mankumanku yinini jangkurr jala miku nanda duja jangkurr. Jayalunjalu yililikajba balkimuku milidimbawarrmuku milidimbikanyi yalunginkanyi jangkurranyi jala miku duja nanda jangkurr. Jayalu manku ngawamba nanda balki jangkurr jala yalu nulijba mankunkanyi nanda jangkurr. Miku jayalu manku nanda duja jangkurr. Jayalu yurlwa nanankanyi jangkurranyi.
2TI 4:4 Jayalungka yangkalamba nanamunanyi duja jangkurrnanyi. Jayalu manku ngawamba nanda jangkurr jala miku duja. Barriwa.
2TI 4:5 Ngala ninji Dimudi, marda ninjimi jungku jirdi kunybanyi kulajinyi nangangi Kudkanyi yurrngumba. Mikujiyi marrala jala badajba kiji nganyindurri. Kudiyamukunyi janinya yalu linjumba. Ngala janinji jungku ngiruka nanankanyi kijinyi. Ngala yuwajiwa janinji milidimba yalunya jangkurranyi nangangi Jisus Krayiskanyi. Baki mili janinji waki kudanyu nganyingkanyi jurjkanyi. Mili janinji lalanba yalunya Krisjinmuku nganyinyina jurjina. Barriwa.
2TI 4:6 Jingkijba ngayu, winyurruwa barri ngayuja yingijba nayinda jamba, jangananjalu kurdanba. Birrirrinja ngaka janybikanyi ngaka. Winyurruwa barri jangayu jilajba kingkarri jungunki nangandu Jisus Krayisnyina.
2TI 4:7 Waki ngayili kudanyu barri bulangi Kudkanyi baki Jisus Krayiskanyi. Yurrngumba ngayili waki kudanyu bulangi. Bukamba barri ngayi nanda yaji jali ngana bula karu. Marrimba ngayili nanda jangkurr nangangi Jisus Krayiskanyi mardarda. Maruka ngayili muwa nangangi yurrngumba. Miku ngakiyala yangkalamba nanganbunanyi. Miku. Jungku ngayili ngiruka nangangi yurrngumba barri.
2TI 4:8 Baki jingkijba ngayu Jisus Krayis, nyulu yurlurr ngaki. Janyulu yabimba kunyba yaji ngaki, wakingangi ngayili kudanyu nangangi. Jalija ngana karrinjarrijba walu nangandu, jangana wajba kunybanyi jangkurranyi, ngayangayijbangangi ngayili nanganginkanyi jangkurranyi yurrngumba. Nanamanji jangana wajba kunybanyi jangkurranyi, baki jayalunya wajba kunybanyi jangkurranyi, jali yalu waki kudanyu nangangi marda. Janyulu wajba ngambalanya kunybanyi jangkurranyi, jalija wijba nanginkurri. Jangambala mirnarrijba muwa nangangi, jalija wijba nanginkurri. Miku ngambaliyi marrala nangangi, jingkijbangangi ngambala, ngambala wakingka kudanyu nangangi, ngambala ngayangayijbangka nanganginkanyi jangkurranyi. Miku ngambaliyi marrala nangangi. Barriwa.
2TI 4:9 Maruka ngayu nganyi naykanyi nganinji. Jilajba janinji ngakindurri dulu manija.
2TI 4:10 Nanangini nganinyiwanyi Dimaswanyi, yingkijba ngani. Barlbayi ngakinbunanyi karri nanankurri yajiyurri niji Disalunika. Waluku nyuli maruka muwa nangangi Jisus Krayiskanyi, ngala baku nyuli maruka muwa yajinyi marda dungalanyi. Miku nyuliyi mili durrijba Jisus Krayis, warriyalukuwanyi. Nanankardi barri ngana yingijbayi. Barriwa. Nanda nganinyi Krisins, nyuli barlba nanginbunanyi ngakinbunanyi marda. Barlba nyuli karri nanankurri niji Kalajiya. Baki nanda Didus, marda nyuli marda barlba karri nanankurri niji Dalmadiya.
2TI 4:11 Ngala nayinda Luk, ngawamba nyulu yuwajiwa ngakindu. Mikuyaji yingkanyi. Ngawamba nyuluman ngakindu. Jalija ninji jilajba ngakindurri, baki kuyukiyi nanda marda Mak nanginkurri. Malumba jangaliya milidimba yalunya nangangi Jisus Krayiskanyi. Jangaliya kandimba yalunya Krisjinmuku nayiba.
2TI 4:12 Nanda nganinyi niji Tikikus, manjijba ngayi karri nanankurri niji Yibisus. Janyulu waki nanaba nangangi Kudkanyi.
2TI 4:13 Jali ngayu jilajba nanamumanyi yajinanyi Druwasnanyi, baki yingkijba ngayi ngaki danyan ngarrambawarr nanaba. Yingijbayi ngaki danyan nangandu Kabusnyina. Ninga ngajakangka, kuyukiyi nanda danyan nganyindu, jalija ninji jilajba nanginkurri. Baki marda ngaki burruburru kuyukiyi marda nanginkurri ngakindurri. Nulijba ngayu marda ngakinkanyi burruburrunyi. Barriwa.
2TI 4:14 Nanda nganinyi Yalisanda, wabula nyuli manku kiji ngaki. Ngala ngambalanginyi mambukawanyi Jisus Krayiswanyi, janyulu yabimba balki yaji nangangi baku. Janyulu daba barri, jungkungangi nyuli balkina yuwana nangangi Kudkanyi. Najbawakiyi nanda, baki mikuwali manku kiji nganyi. Miku nyulimi kuyu nanda jangkurr nangangi Jisus Krayiskanyi. Jakakajba ngani kudanyu, baki mili janyulu manku kiji nganyi. Ngala najbawakiyi nanda kudanyu barri.
2TI 4:16 Wabula barri, jali ngayu karu yalunya nangangi Jisus Krayiskanyi baki ngananjali yarrijba brisinyina. Jali ngayu karrinja walu yalundu kurdusnyina, baki mikuyaji kandinyi ngakindu. Miku nganiyi kurranja yingkawanyi. Bukamba yali barlba nanginbunanyi ngakinbunanyi. Ngala ngayu ngajakangka Kud, miku nyuliyi daba yalunya jali ngana yingijba. Ngala nyuli kurranja ngana mambukawanyi Jisus Krayiswanyi. Ngana yabimbayi ngiruka yanybikanyi yalungi mambukamukuyngka, jali yalu nulijba kurdanbikanyi ngana. Ngana lalanbayi Jisus Krayiswanyi. Ngana marrimbayi mardarda, baki miku ngana yaliyanyi daba. Ngana yabimbayi ngiruka karunkanyi nangangi duja jangkurr Kudkanyi. Baki kajamukunyi ngurranyimukunyi, yali manku nanda ngaki jangkurr.
2TI 4:18 Jingkijba ngayu mambuka Jisus Krayis, ngana marrimbaka mardarda yurrngumba. Ngana marrimbaka mardarda balkinanyi yajinanyi, baki jangana kuyu nangandurri baku. Jangana wankamba mili jungunki nangandu yurrngumba. Nyulu barri ngiruka lalanbawarr ngambalangi wirdikudukuduyngka. Nyulu barri walkurramirra mambuka bukambijuyngka ngambalangi wirdikudukuduyngka. Yurrngumba nyulu jungkuka nani, walkurramirra mambuka. Barriwa.
2TI 4:19 Manjijba ngayu jangkurr bulandurri maykarraynkkurri, niji bulangi Brisila baki Yakila. Maruka ngayu muwa bulangi. Baki manjijba ngayu jangkurr yalundurri, maninganjarri baki jandanyimukuyngkurri nangangi nganinyiyurruwa Yunisiburis.
2TI 4:20 Nanda nganinyi niji Yirasdus, ngayi yingijba nanaba karru Kurin. Wambu nyuli jungku nanaba ngala ngayi jilajba nanamunanyi. Baki nanda yingka, niji Drubimus, lunji nyuli kudanyu barri, ngala nurru nanaba Milidus. Yingijba ngayi Drubimus nanaba ngala ngayi barlba. Barriwa.
2TI 4:21 Nulijba ngayu nganyi jilaykanyi ngakindurri waluwa wurarawala. Yingkamuku nayiba ngakindu, jala yalu manjijba jangkurr nganyindurri. Niji yalungi, Yubulus, baki Budins, baki Linus, baki Kludiya. Maruka yalu muwa nganyi marda. Bukambijunyi Krisjinmukunyi nayiba manjijba yalu jangkurr nganyindurri.
2TI 4:22 Yanyba nurru mududu nangangi Jisus Krayiskanyi nganyi. Ngajaka nurru Jisus Krayis nganyi, nyulu jungunkanyi nganyinyina kurduluna yurrngumba. Yanyba nurru mududu Kudkanyi nganyi, nyulu lalanbikanyi narrinya yurrngumba. Barriwa barri. Bukamba nayinda jangkurr.
TIT 1:1 Nayinda ngayu Bul. Ngayu wakiwarr nangangi Kudkanyi. Ngayu nanda jali ngana manjijba Jisus Krayiswanyi. Wabula barri, waluwa yabimbayi bukamba yaji Kudwanyi, nanamanji nyuli yanyba, janyulu yarrijba kudiyamuku nanganginmuku jandanyimuku, baki janyulu marrimba yalunya mardarda. Mikukimi jujamba yaji Kudwanyi. Nani nyuli yanyba, jingkijbangangi nyuli, janyulu manjijba nangangi jandanyi nayiba wayka jambarri. Jingkijba nyuli, janyulu manjijba Jisus Krayis janybikanyi nangka bukambijuyngka ngambalanginkanyi balkinyi yajinyi. Nani barri nyuli jingkijba Kudwanyi, ngala jilijbawa nyuli karu yalunya yajinyi wankalamuku. Ngadijba nyuli nanda jangkurr nangandu. Ngala jali birrirrinja nangka Kud baki manjijba nyuli nangangi jandanyi nanginkurri wayka. Baki jaliyi ngambala durrijba nangangi jangkurr, baki janyulu yarrijba ngambalanya nanganginmuku jandanyimuku, baki janyulu nyulu mili wankamba ngambalanya baku Kudwanyi. Ngana yarrijbayi Kudwanyi marrimbawarranyi mardarda. Ngana yarrijbayi, ngayu milidimbiji yalunya jali nyulu yarrijba nanganginkanyi jandanyimuku. Ngana yarrijbayi karunki yalunya nanganginkanyi duja jangkurranyi. Baki ngana manjijbayi karunki yalunya nanganginkanyi jangkurranyi jala miku yangkalambikanyi nanda jangkurr.
TIT 1:4 Ngayu yarrijbangka nayinda jangkurr najana nganyi Didus. Ninji barrinani jandanyi ngaki. Nungkala malumba jungku barrinani barnangu, kuyungangi nungkala nanamannga jangkurr nangangi Jisus Krayiskanyi. Ngayu yanybaka mududu bulangi Kudkanyi niyanginkanyi Buwakaya, baki Jisus Krayiskanyi, marrimbawarrayngka mardarda. Ngayu ngajakangka bulanya, jabula yabimba kunyba yaji nganyi, baki janinji jungku mardumardu muwa bulangi.
TIT 1:5 Ninga yingijbayi nanaba nananyina waliyanguna niji Krid, ninji lalanbiji yalunya Krisjinmuku nanaba, baki ninji yarriji kudiya wakiwarrmuku jurjkanyi nanaba. Marda ninjimi mankuwa nanda jangkurr jali ninga karu nanamanji. Mili ngayu yarrijbangka nanginmannga jangkurr.
TIT 1:6 Jala ninji yarrijba nganinyi wakiwarr jurjkanyi, baki marda nyulimi kunyba nganinyi. Marda nyulimi jungku yurlurrmba nangangi Kudkanyi yurrngumba barri. Marda nyulimi jungku jirdi ngawamba yingamaliyngka maninganjanyi. Baki nangangimuku jandanyimuku, marda yalimi kuyu nangangi jangkurr Jisus Krayiskanyi. Baki marda yalimi ngayangayijba yalunginkanyi nijanganjiyngkanyi. Marda yalimi miku mudumuku.
TIT 1:7 Nanda malbu jurjkanyi, nyulu barrinani mambuka yalungi wakiwarrayngka jurjkanyi, baki nanankardi barri marda nyulimi jungku yurlurrmba nangangi Kudkanyi. Ngala marda nangkimi miku barrarrakijba, karunkanyi yalunya, nyulu yalungi mambuka. Marda nangkimi miku mankumanku, nyulu jirrinyi nganinyi. Baki marda nyulimi miku dulu ngarrangarra muwa yalungi. Marda nyulimi miku ngaraba kudukudu kamukamu baki wanindijbangka kulaji. Marda nyulimi miku daba yingka, baki marda nyulimi miku kuliwijba dungalanyi marda yajinyi. Marda nyulimi miku jungku nani barri.
TIT 1:8 Ngala jala yingkamukunyi yalu yidamba nangangi jurj, baki marda nyulimi lalanba yalunya. Marda nyulimi kuyu yalunya nanganginkurri barndarri, baki wajba yalunyimi mamanyi. Marda nyulimi maruka muwa ngawamba nanankanyi jala kunyba nangangi Kudkanyi. Marda nyulimi jungku yurlurrmba nangangi Kudkanyi marda yalungi yingkamukuyngka. Baki marda nangkimi kurrkunba yabimbikanyi balki yaji.
TIT 1:9 Nanda malbu jurjkanyi, marda nyulimi kuyu ngawamba nanda duja jangkurr nangangi Jisus Krayiskanyi. Marda nyulimi miku kuyu yingka jangkurr, ngawamba nangangi duja jangkurr. Baki yuku barri janyulu milidimba yalunya yingkamuku nanankanyi duja jangkurranyi, baki jayalu yalu jungku mili ngiruka nangangi Jisus Krayiskanyi. Yuku barri janyulu minimba yalunya nanankanyi yinini jangkurranyi jala miku duja. Yuku janyulu minimba yalunya yinini jangkurranyi, yalu yingiykanyi nanda jangkurr.
TIT 1:10 Kajamukunyi jalili durrijba nanda yuwa yalungi Jumukuyngka, yali kuyu nangangi jangkurr Jisus Krayiskanyi. Ngala nanijba barri kudiyamuku yalungi, yalu balkimuku milidimbiwarrmuku. Yalunjalu jujambaka Krisjinmuku. Nani yalunjalu milidimba balkinyi jangkurranyi. Nanamuku yalu mudumuku.
TIT 1:11 Kurrkunbakiyi yalunya yanybikanyi nani. Kurrkunbakiyi yalunya, jujambangangi yalunjalu kajamuku nanankanyi balkinyi jangkurranyi. Nijanganjinyi baki yarrijinyi, baki bulangi jandanyimuku, yalungka jakakajbangka nanankanyi jangkurranyi. Miku yalimi jingkijba, wanyi jangkurr duja, baki nanankardi yalungka jakakajbangka nanankanyi yingkanyi jangkurranyi. Muningka yalunjalu milidimba jangkurranyi nanamukunyi balkimukunyi. Muningka yalunjalu milidimba jangkurranyi, kuliwijbangangi yalu dungalanyi. Kuliwijba yalu wudumbikanyi kaja dungala milidimbikanyi yalunya.
TIT 1:12 Nanamuku jujambawarrmuku yalu mungkijimuku nanankanyi yajinyi niji Krid, jala ninji jungku nanaba. Wabula barri yingamali wankala yalungi barri jali jingkijbawarr, yanyba nyuli duja jangkurr. Karu nyuli jangkurranyi nanganginkanyi mungkijimukuyngka nayi barri, “Nganinyimuku baki jibarrimuku jala jungku Krid, yalu jujambawarrmuku. Kudanyu yalu jungku balki yurrngumba barri. Miku yalimi nulijba wakinkanyi. Ngawamba yalu nulijba jarrkanyi mama. Yalu balkimirra.” Nani nyuli yanyba nanganginkanyi mungkijimukuyngka. Barriwa. Marda ninjimi ngirrwa yalungi nanamukuyngka jujambawarrmukuyngka. Marda ninjimi kudanyu ngirrwa yalungi. Marda yalimi mankuwa ngawamba nanda duja jangkurr nangangi Jisus Krayiskanyi. Marda yalimi durrijba nanda nangangi jangkurr yurrngumba barri.
TIT 1:14 Marda ninjimi ngirrwa yalungi balkimukuyngka milidimbawarrmukuyngka, yalungi yaji Krid. Yalunjalu milidimba, marda yalimi durrijba nanda yuwa Jumukuyngka jali yalu wajba nganinyimukunyi. Marda yalimi durrijba nanda yuwa yalungi Jumukuyngka, miku nanda yuwa nangangi Kudkanyi. Nani barri yalunjalu milidimbaka. Nanamukunyi wankalamukunyi Jumukunyi jali miku yaliyanyi kuyu nanda duja jangkurr nangangi Kudkanyi, yalunjali wajba yinini yuwanyi. Yalunjali wajba yinini yuwanyi jala balki nanda yuwa. Baki nanankanyi balkinyi jangkurranyi yalunjalu milidimbaka nanamukunyi balkimukunyi. Marda ninjimi ngirrwa yalungi balkimukuyngka. Ngala marda ninjimi milidimba yalunya yingkamuku, marda yalimi miku manku nanda balki jangkurr. Barriwa.
TIT 1:15 Jaliyi nganinyi jungkuka kunyba yurrngumba, baki nyulu najbangka kunyba yaji, nangka mankumanku kunybanyi yajinyi. Ngala jaliyi nganinyi jungkuka balki yurrngumba, baki nyulu najbangka balki yaji, nangka mankumanku nanganginkanyi balkinyi yajinyi. Nani nyulu jungkuka, mikungangi nangkimi yanyba muwa kurrkunbikanyi nangka, jungunkanyi balki. Baki nanankardi nyulu jungkuka balki.
TIT 1:16 Nanamuku balkimuku milidimbawarrmuku, yalu yanyba, yalu jingkijba Kud, ngala miku. Jalimi yalu jingkijba Kud, baki miku yaliyi jungku balki nangangi. Ngala yalu jungkuka balki nangangi, yalungka mankumankuka balkinyi yajinyi yurrngumba barri. Yalu ngirrawarr. Miku yaliyi ngayangayijba yingkanyi, nanganginkanyi jangkurranyi. Miku yaliyi yabimba kunyba yaji, ngawamba balki yaji yurrngumba barri.
TIT 2:1 Ngala ninji barri Didus, marda ninjimi milidimba ngawamba nanda duja jangkurr nangangi Kudkanyi.
TIT 2:2 Marda ninjimi karu yalunya malbumalbu, yanka jayalu jungku nangangi Kudkanyi. Marda yalimi miku wandijba kulaji. Marda yalimi jungku jirdi kunybanyi kulajinyi. Marda yalungkimi kurrkunba jungunkanyi balki. Marda yalimi kuyu nanda jangkurr nangangi Kudkanyi yurrngumba barri. Marda yalimi maruka muwa yalungi yingkamukuyngka. Jala yingamukunyi yalu yabimba kiji yalungi, baki marda yalimi yuwajiwa jungku yurlurrmba nangangi Kudkanyi. Nani barri marda yalimi jungku malbumalbu jurjkanyi.
TIT 2:3 Baki nayi barri marda ninjimi karu yalunya, bardirdibardimuku. Marda yalimi kuyu nangangi jangkurr Kudkanyi. Marda yalimi jungku kunyba nangangi, baki jayalu dujanya jandanyimuku nangangi Kudkanyi. Marda yalimi miku wanindijba kulaji. Marda yalimi miku jungku jirdi walkurrayngka janyinyi. Ngala marda yalunjalimi milidimba kunybanyi jangkurranyi Kudkanyi bardirdibardimukunyi.
TIT 2:4 Marda yalunjalimi milidimba wurrumbarramuku, baki jibarrimuku, yalu marukankanyi muwa yalunginkanyi nawinganjanyi baki bayamukuyngka.
TIT 2:5 Marda yalunjalimi milidimba jibarrimuku, yalu jungunkanyi yurlurrmba yurrngumba, yalungka kurrkunbikanyi yabimbikanyi balki yaji. Marda yalunjalimi milidimba, yalu ngayangayiykanyi yalunginkanyi nawinganjanyi, yalu lalanbikanyi yalungi bayamuku, baki barnda yalungi. Jaliyi yalu jungku kunyba nani yurrngumba, baki mikuwali yingkamuku yanyba balki jangkurr ngambalangi Krisjinmukuyngka. Miku yaliyi yanyba ngambalangi, mikukimi Kudwanyi milidimba ngambalanya marukankanyi muwa ngambalaka, baki lalanbikanyi ngambalaka. Miku yaliyi yanyba nani, jaliyi jibarrimukunyi baki wurrumbarramukunyi yalu yabimba kunyba yaji nani yurrngumba barri. Barriwa.
TIT 2:6 Marda kaburrwaburr marda, marda ninjimi karu yalunya, jayalungka kurrkunba jungunkanyi balki nangangi Kudkanyi.
TIT 2:7 Baki ninji barri Didus, marda ninjimi jungku kunyba nangangi Jisus Krayiskanyi, marda ninjimi jungku yurlurrmba nangangi, marda ninjimi jungku ngiruka nangangi yurrngumba barri. Jayalu kaburrwaburrmukunyi najba ninga jungunkurri nani, baki jayalu nulijba jungunkanyi barrinani ninji jungku. Jayalu nulijba jungunkanyi kunyba nangangi Jisus Krayiskanyi marda. Baki nani marda, marda ninjimi jungku jala ninji milidimba yalunya.
TIT 2:8 Marda ninjimi yanyba ngawamba kunyba jangkurr, duja jangkurr. Jaliyi ninji yanyba nani, baki nanamukunyi jala ninyalu ngirra, baki miku yaliyi jurlwa nganyi. Miku yaliyi nganyi jurlwa, ngala jayalu manyirru jurlwankanyi nganyi, jaliyi ninji yanyba kunyba jangkurr yurrngumba barri. Barriwa.
TIT 2:9 Nanamuku wakiwarrmuku, marda yalimi ngayangayijba yalunginkanyi mambukanyi. Marda yalimi ngayangayijba nanganginkanyi jangkurranyi yurrngumba barri. Marda yalimi miku jakakajba nanda mambuka. Marda yalimi yabimba ngawamba kunyba yaji nangangi, baki nanda mambuka, janyulu mirnarrijba muwa yalungi.
TIT 2:10 Marda yalimi miku maninjakujba nangangi yaji. Miku. Ngala marda yalimi kudanyu waki nangangi. Marda yalimi jungku kunyba nangangi, baki yingkamukunyi jayalunjalu jingkijba, yalu kunyba wakiwarrmuku nangangi, durrijbangangi yalu nangangi jangkurr Kudkanyi. Yalu durrijbangka nanda jangkurr nangangi jala marrimbawarr mardarda. Barriwa.
TIT 2:11 Minimbayi ngambalanya Kudwanyi. Minimbayi ngambalanya, yanka yuku nyulu marrimbaka ngambalanya mardarda. Yabimba nyuli kunyba yaji ngambalangi, jali nyulu manjijba nangangi jandanyi, janybikanyi nangka ngambalangi. Janyba nangki ngambalangi bukambijuyngka wandijiyana.
TIT 2:12 Baki nanankardi barri, marda ngambalimi durrijba Kud yurrngumba barri. Marda ngambalimi miku mili durrijba nanda balki yuwa. Marda ngambalimi miku nulijba balkinyi yajinyi ngamanginkanyi mankankanyi. Ngala marda ngambalimi jungku yurlurrmba nangangi Kudkanyi. Marda ngambalakimi kurrkunba jungunkanyi balki. Marda ngambalimi jungku kunyba nangangi Kudkanyi, jala ngambala jungku yalundu jala yalu miku Krisjinmuku.
TIT 2:13 Marda ngambalimi jungku nani yurrngumba barri, ngala ngambala yukumba nangangi Jisus Krayiskanyi. Ngambala yukumbaka nangangi, janangka minimba ngambalangi. Ngambala yukumbaka nangangi, ngamanginkanyi wirimalarunyi, Jisus Krayiskanyi, jala marrimbawarr mardarda.
TIT 2:14 Janyba nangki Jisus Krayis ngambalangi, baki nanankardi nyulu manjamanjambaka ngambalangi balki yaji Kudwanyi, baki nyulu yabimbaka ngambalanya jungunkanyi yurlurrmba nangangi. Bababanyamba nyulu ngambalanya Jisus Krayiswanyi, baki kudanyu ngambala nulijba jungunkanyi kunyba nangangi.
TIT 2:15 Kudanyu barri ngayu jirrinyba ninya nanginkanyi jangkurranyi. Marda ninjimi milidimba yalunya bukamba nanginkanyi jangkurranyi. Marda ninjimi minimba yalunya, nyuli yarrijba ninya Kudwanyi, ninji ngiruka milidimbawarr nangangi. Baki nanankardi barri, marda ninjimi ngirrwa yalungi jala yalu jungku balki nangangi Kudkanyi, ngala marda ninjimi wajba kunybanyi jangkurranyi yalunya jala yalu jungku kunyba nangangi. Marda ninjimi minimba yalunya, nyuli yarrijba ninya, mambuka jurjkanyi Kudwanyi. Ninya nyuli yarrijba mambuka jurjkanyi nanaba Krid. Barriwa.
TIT 3:1 Marda ninjimi karu yalunya, Krisjinmuku nganyinyina jurjina, marda yalimi mankuwa, ngayangayiykanyi yalunginkanyi mambukanyi. Marda yalimi ngayangayijba nangangi marda, mambukanyi Kubaminkanyi. Marda yalungkimi birrirrinja, wakinkanyi yingkamukuyngka, yabimbikanyi kunyba yaji yalungi. Marda yalimi jungku nani yurrngumba barri.
TIT 3:2 Karukiyi yalunya marda, marda yalimi miku yanyba ngirrankanyi nanda yingka. Marda yalimi miku jurlwa yingkamukuyngka, ngala marda yalimi yanyba kunyba jangkurr yalungi. Marda yalimi jungku mardumardu muwa yalungi bukambijuyngka.
TIT 3:3 Marda ngambalimi miku mamanumba yanka ngambali jungku wabula, waluwa ngambali kuyu nanda jangkurr Jisus Krayiskanyi. Nanamanji barri ngambala mudumuku. Ngambala yabimbayi balki yaji nangangi Kudkanyi. Miku ngambaliyanyi jingkijba Kud. Miku ngambaliyanyi ngayangayijba nangangi. Yabimba ngambali balki yaji yalungi, ngamanginkanyi mungkijinyi. Yabimba ngambali kaja balki yaji, nulijba jali ngambala yabimbikanyi. Nulijba ngambali yajinyi jala yingkamukuyngka yaji yalungi. Yingkamukunyi yali ngirra ngambalanya, baki ngambala ngirrayi yalunya. Bukamba nanda balki yaji, nanda barrinani mambuka ngambalangi, ngambala barrinani wakiwarrmuku yalungi. Yalu kujanya ngambalangi nanamanji wabula.
TIT 3:4 Ngala marukayi muwa Kud ngambalangi. Nyulu nanda marrimbawarr mardarda. Yabimba nyuli kunyba yaji ngambalangi. Manjijba nyuli nangangi jandanyi, janybikanyi nangka ngambalangi.
TIT 3:5 Baki marrimbaka ngambalanya mardarda Jisus Krayiswanyi. Wabula barri miku ngambaliyanyi jungku kunyba nangangi, ngala yuwajiwa nyulu marrimbaka ngambalanya mardarda. Nyulu marrimbaka ngambalanya mardarda, marukangangi nyuli muwa ngambalangi. Marrimba nyulu ngambalanya mardarda, ngankijbayingangi nanda Kunyba Ngarndu Kudkanyi ngamandu kurduluna. Baki nanankardi barri ngambala jungkuyi barrinani nganinyiyurru nanankanyingangi balkinyi yajinyi jali ngambala yabimba. Ngala nanijba barri ngambala jungku wanka wakinkanyi nangangi Kudkanyi. Nanijba ngambala jungku barrinani likalika nangangi. Barrinani likalikamba ngambalanya Kunybawanyi Ngarnduwanyi Kudkanyi, likalikamba ngambalanya nanamunanyi balkinanyi yajinanyi, jali manjamanjamba nyulu ngambalangi balki yaji.
TIT 3:6 Yabimbayi kunyba ngiruka yaji ngambalangi Kudwanyi. Yawumba nyuli nangangi Kunyba Ngarndu ngamandu, kuyungangi ngambali nangangi jangkurr Jisus Krayiskanyi, nulijbangangi ngambali durriykanyi nangangi jangkurr Jisus Krayiskanyi. Nyulu nanda marrimbawarr mardarda.
TIT 3:7 Nani barri nyulu marrimbaka ngambalanya mardarda. Nanankardi barri ngambala jungku yurlurrmba nangangi Kudkanyi. Ngambala jungku yurlurrmba nangangi, baki ngambala jingkijba, jangambala jungku mili wanka nangandu baku barri.
TIT 3:8 Bukamba nayinda jangkurr duja barri. Nanamuku Krisjinmuku nganyinyina jurjina, yalu kuyu nanda jangkurr nangangi Kudkanyi. Ngayu nulijbangka nganyi, karunkanyi yalunya bukamba nanginkanyi ngakinkanyi jangkurranyi. Baki jayalu nulijba yabimbikanyi kunyba yaji yalungi yingkamukuyngka. Kunyba yaji jayalu nulijba yabimbikanyi yalungi bukambijuyngka, baki nanankardi yingkamuku, jayalu mirnarrijba muwa.
TIT 3:9 Ngala miku ninjiyi muningka jakakajba yalunya. Ngala miku ninjiyi muningka yanymimba yalungi wankalanyi mungkijimukuyngka. Miku ninjiyi kuliwijba yingkanyi nanganginkanyi jangkurranyi. Miku ninjiyi jakakajba yalunya nanankanyi yuwanyi Jumukuyngka. Miku ninjiyi muningka jakakajba nani barri yalunya.
TIT 3:10 Jaliyi yingkawanyi milidimbaka balkinyi jangkurranyi, jala miku duja jangkurr nangangi Jisus Krayiskanyi, baki marda ninjimi ngirrwa nangangi. Jaliyi nyulu milidimbaka balki jangkurr, baki yingkamukunyi jayalu kuyu nangangi jangkurr ngala yingkamuku jayalu yurlwa nanganginkanyi jangkurranyi. Jaliyi nyulu mili milidimba balkinyi, baki milikiyi ngirrwa nangangi. Marda ninjimi kujarraka ngirrwa nangangi kurrkunbiji nanda nganinyi yabimbikanyi kiji yalungi. Ngala jaliyi nyulu yuwajiwa milidimbaka yalunya balkinyi jangkurranyi, baki yingijbakiyi nanda nganinyi wambu. Ngala mikujiyi mili kandimba nanda.
TIT 3:11 Ninji jingkijbangka nanda nganinyi, nyulu balkimirra. Mikukimi jungku Kunyba Ngarndu Kudkanyi nangandu, jala nyulu milidimba balkinyi jangkurranyi nani barri, jala nyulu yabimba balki yaji marda. Yingkamukunyi jayalu najba nanda balki jala nyulu yabimbaka, baki jayalu marda jingkijba nanda nganinyi. Jayalu marda jingkijba, nyulu jungkuka balki nangangi Kudkanyi, baki miku nangangi jangkurr duja. Jayalu jingkijba nyulu jujambawarr, nyulu balkimirra. Barriwa.
TIT 3:12 Yiningki jangayu manjijba Yardimas narrindurri baku barri. Yiningki jangayu manjijba Dikikus narrindurri. Jangayu manjijba yingamali bulanya narrindurri, ngala jangayu barlba nanankurri yajiyurri niji Nikupulis. Jangayu jungku nanaba wurarawala. Baki nanankardi jangayu nulijba nganyi jilaykanyi nanankurri ngakindurri. Janganinji yidamba nanaba.
TIT 3:13 Nanda nganinyi niji Sinas, nyulu jingkijbawarr yuwanyi. Nyulu baki yingka nganinyi Yabulus jabula barlba narrinbunanyi, jabula jilalajba yingkayurri yajiyurri baki yingkayurri yajiyurri, milidimbikanyi jangkurranyi Kudkanyi. Ngayu nulijbangka narringi kandimbikanyi bulanya jala bula barlba narrinbunanyi. Narri Krisjinmuku, marda narrimi lalanba bulanya, marda narrimi wajba bulanya mamanyi baki jumbalanyi kuyunkanyi bulandu. Jala narri lalanba bulanya, baki nanda barrinani narri wakingka nangangi Kudkanyi. Nani barri jangambala waki nangangi Kudkanyi, jala ngambala lalanba nanamuku milidimbawarrmuku jala yidamba yalu ngambalanya. Nani barri ngambala wakingka nangangi Kudkanyi marda, jala ngambala lalanba yalunya jala milidimba jangkurranyi Kudkanyi.
TIT 3:15 Nanginmuku Krisjinmuku nayiba ngakindu, yalu manjijbangka jangkurr nganyindurri. Baki ngayu manjijbangka jangkurr yalundurri, bukambijuyngkurri Krisjinmukuyngkurri nanaba nganyindu Krid. Yalu kandimuku niyangi, kuyungangi yalu nangangi jangkurr Jisus Krayiskanyi. Ngayu ngajakangka Kud narringi, janyulu yabimba kunyba yaji narringi, janyulu kandimba narrinya yurrngumba barri. Barriwa barri. Bukamba nayinda jangkurr.
PHM 1:1 Nayinda ngayu, Bul. Jungkuka ngayu brisinyina Jisus Krayiskanyi. Milidimba ngayi yalunya Jisus Krayiskanyi, baki nanankardi ngayu jungkuka nayiba brisinyina. Yarrijba ngayu nayinda jangkurr nganyindurri Bilimun. Nanda mungkiji niyangi Dimudi, nyulu jungkuka nayiba ngakindu, ngala ngayu yarrijba nayinda jangkurr. Ngali manjijba nayinda jangkurr nganyindurri baki nangandurri nganyingkurri maninganjarri, nangangi niji Yabiya. Nayinda jangkurr nanankanyi marda, nangangi niji Yarrkabus. Nyulu jungkuka ngiruka Kudkanyi. Nyulu ngiruka nangangi Kudkanyi, barrinani ngarrkadabawarr nyulu ngiruka. Wabula barri bukamba ngambali, waki ngambali malumba nangangi Kudkanyi. Barriwa. Nayinda jangkurr yalungi marda, nanamuku Krisjinmuku, jala yalu jilalajba nganyingkurri barndarri, jala yalu yanyba mududu Kudkanyi, baki brijba wangarr nangangi Kudkanyi. Yanyba ngali mududu Kudkanyi narringi. Ngajaka ngala Kud narringi, janarri jungku mardumardu muwa, marrimbangangi narrinya mardarda Kudwanyi. Nanankujarra, ngambalangi Buwakanya Kud, baki ngambalangi mambuka Jisus Krayis, bula marukangka muwa ngambalangi. Bula marrimba ngambalanya mardarda. Barriwa.
PHM 1:4 Yanyba ngayu mududu Kudkanyi nganyi. Mirnarrijba ngayu muwa nganyi, marukangangi ninji muwa nangangi Kudkanyi. Nanankanyi yurrngumba ngayu yanyba kunyba jangkurr Kudkanyi nganyi, jala ngayu yanyba mududu nangangi Kudkanyi. Manku ngayi jangkurr nganyi. Durrijba ninji jangkurr Kudkanyi yurrngumba barri. Maruka ninji muwa nangangi Jisus Krayiskanyi, baki maruka ninji muwa yalungi bukambijuyngka Krisjinmukuyngka.
PHM 1:6 Baki mili ngayu yanyba mududu Kudkanyi nayi barri. Mirnarrijba ngayu muwa nganyi, yabimbangangi ninji kudukudu kunyba yaji yalungi yingkamukuyngka. Jala ninji yabimba nayinda kunyba yaji yalungi, baki janinji mili jingkijba Kud. Janinji mili jingkijba Kud, marukangangi ninji muwa nangangi Jisus Krayiskanyi, baki durrijba ninji nangangi yuwa yurrngumba. Nani janinji mili jingkijba Kud, jungkukangangi Jisus Krayis nganyindu kurduluna.
PHM 1:7 Ngaki kandi. Mirnarrijba ngayu muwa nganyi. Kudanyu ngayu mirnarrijba muwa nganyi, marukangangi ninji muwa nangangi Jisus Krayiskanyi, baki maruka ninji muwa yalungi bukambijuyngka Krisjinmukuyngka. Baki nanamuku Krisjinmuku, yalu mirnarrijba muwa nganyi, marukangangi ninji muwa yalungi. Nanankardi barri ngayu mirnarrijba muwa marda. Yabimba ninji yalunya ngiruka nangangi Jisus Krayiskanyi, marukangangi ninji muwa yalungi. Barriwa.
PHM 1:8 Yarrijba ngayu nayinda jangkurr najana nganyi nangangi, nanankanyi wakiwarrayngka nganyi, niji nangangi Yunisimus. Maruka ngayu muwa nangangi, barrinani nijanganjinyi marukangka muwa nanganginkanyi jandayngkanyi. Nani barri kudanyu ngayu maruka muwa nangangi. Ngayu ngajaka ninga nangangi. Nyuli yarrijba ngana milidimbawarrayngka Jisus Krayiswanyi, baki yuku ngayu jirrinyba ninga yabimbikanyi yaji. Yuku ngayu jirrinyba ninga, yarrijbangangi ngana mambuka yingkamukuyngka Krisjinmukuyngka Jisus Krayiswanyi. Ngala miku ningiyi jirrinyba nanankanyi nganiyngkanyi. Miku. Nguyulnguyul ngayu nganyi yanyba. Ngala ninga ngajaka, janinji kandimba nanda nganinyi. Kandimba janinji nanda nganyi wakiwarr. Miku ningiyi jirrinyba, marukangangi ngayu nganyi kudanyu barri. Manjijbayi ngana Jisus Krayiswanyi milidimbiji yalunya. Milidimba ngayi yalunya, baki nanankardi ngayu jungkuka brisinyina. Jala ngayi jungku brisinyina, baki nanda nganyi wakiwarr Yunisimus, jilajbayi ngakindu. Milidimba ngayi nanganginkanyi jangkurranyi Kudkanyi. Barriwa.
PHM 1:11 Nanda niji Yunisimus, nanda Krik yanyi barrinani, nanda jala yabimba kunyba yaji nganyi. Nanda Yunisimus, miku nyuliyanyi waki kudanyu nganyi wabula, miku nyuliyanyi nanda jali yabimba kunyba yaji nganyi. Ngala nanijba yuku nyulu yabimbaka kunyba yaji nganyi baki ngaki marda. Nyulu wakingka ngaki kudanyu nanijba barri.
PHM 1:12 Ngayu manjijba nganyindurri barriwa. Ngayuja manjijba nanda jala ngayu maruka muwa nangangi kudanyu barri. Wirlku nyuli nganyinbunanyi, ngala ninga karu, janyulu wijba nganyindurri. Wijba janyulu nganyindurri, nyulungangi nganyi wakiwarr, jali ninji wudumba dungalayudinyi. Nyulu nganyinmirra wakiwarr, wudumbayingangi ninji dungalayudinyi barrinani ninji wudumba yarrama dungalayudinyi.
PHM 1:13 Mirnarrijba ngayu muwa, jala nyulu jungkuka ngakindu. Jalimi mili jungku ngakindu, janyulu waki ngaki mili barri. Nyulu nganyi wakiwarr, baki jalimi nyulu mili waki ngaki nayiba brisinyina, baki nanda barrinani ninji wakingka ngaki, nyulungangi nganyi wakiwarr. Jungku ngayu nayiba brisinyina, milidimbangangi ngayi yalunya Jisus Krayiskanyi. Ngala miku nyuliyi jungku nayiba ngakindu. Jangayu manjijba nganyindurri, nyulungangi nganyi wakiwarr.
PHM 1:14 Ngala miku ngayiyi karu jungunkanyi nayiba ngakindu, nyulungangi nganyi wakiwarr. Miku ngayiyi karu jungunkanyi nayiba ngakindu. Ngawamba yuku ninji yanyba nangangi jungunkanyi ngakindu. Jaliyi ninji nulijba nangangi wakinkanyi mili ngaki, baki yuku, ngala mikuwali janinga ninga karu manjiykanyi nanda wakiwarr mili ngakindurri. Ngawamba yuku ninji karu nanda nani. Miku ngayu barri.
PHM 1:15 Yiningki nyuli wirlku nganyinbunanyi, nulijbayingangi Kud nangangi, jilaykanyi ngakindurri. Jilajba nyuli ngakindurri, baki kuyu nyuli nangangi jangkurr Jisus Krayiskanyi. Nanijba barri nyulu jandanyi Kudkanyi, baki ninji jandanyi Kudkanyi marda. Jalija nyulu wijba nganyindurri, yuwajiwa nyulu nganyi wakiwarr, ngala muningka nyulu nganyi kanyiya nanijba, nimbalangangi jandanyiwuya Kudkanyi. Ngambala jandanyimuku marda Kudkanyi.
PHM 1:17 Jaliyi nganinji kuyu nganyi kandi, baki janinji kandimba nayinda nganinyi, jalija nyulu wijba nganyindurri. Janinji kandimba nayinda nganyi wakiwarr, barrinani nganinji kandimba, jaliyi ngayu jila nganyindurri.
PHM 1:18 Jaliyi nyuli yabimba balki yaji nganyi, jaliyi nyuli maninjakujba yaji baki dungala, baki jangayu wajba ninga nanankanyi yajinyi baki dungalanyi. Jangayu yabimba kunyba yaji nganyi bayngkani barri.
PHM 1:19 Ngayu Bul, ngayu yarrijba nayinda jangkurr najana nganyi. Ngayu karu ninga kudanyu, janinga wajba nanankanyi yajinyi, jaliyi maninjakujba nganyi yaji nanangini nganyinyi wakiwarrwanyi. Baki janinga ngajaka, mamanumbiji nanda balki yaji, yabimba jali nyulu nganyi. Janinji mamanumba nangangi balki yaji, ngajakangangi ninga. Ngayu marukangka muwa nganyi kudanyu, nungkalangangi buwakula jandanyiwuya Kudkanyi. Marda nganinjimi mankuwa, karu ninga Jisus Krayiskanyi, baki kuyu ninji nangangi jangkurr. Ninji jandanyi Kudkanyi, karungangi ninga jangkurranyi Jisus Krayiskanyi. Yabimbakiyi nayinda yaji nanginkanyi nganiyngkanyi, nyulungangi Jisus Krayis mambuka nganyi. Jalija ninji kandimba nayinda nganinyi, baki jangayu mirnarrijba muwa nganyi kudanyu barri. Barriwa.
PHM 1:21 Jingkijba ninga, janinji yabimba nanda jala ninga ngajaka. Nanda janinji yabimba, baki mili kunyba yaji janinji yabimba. Barriwa.
PHM 1:22 Jalija nganjalu muningka manjijba brisinanyi, baki jangayu jila nganyindurri. Janinga yidamba. Ngajaka ninga, janinji yanyba mududu Kudkanyi ngaki, janganjalu manjijba brisinanyi. Jangayu jungku nganyindu marndakaja. Barriwa.
PHM 1:23 Nanda ngaki kandi, niji Yibabras, nyulu jungkuka nayiba ngakindu brisinyina. Jungku ngali brisinyina, wakingangi ngali Jisus Krayiskanyi. Nyulu manjijbangka jangkurr nganyindurri, nyulu marukangka muwa nganyi.
PHM 1:24 Baki nayi mungkijimuku nayiba ngakindu, yalu manjijbangka jangkurr nganyindurri marda. Yalu marukangka muwa nganyi. Niji yalungi Mak, baki Yarisdarkus, baki Dimas, baki Luk. Yalu wakingka ngakindu.
PHM 1:25 Ngayu yanybaka mududu nangangi ngamanginkanyi mambukanyi Jisus Krayiskanyi, janyulu jungku nganyindu kurduluna. Barriwa barri, bukamba nayinda jangkurr.
HEB 1:1 Narri barri. Wabula barri wankalana yanybayi Kud yalungi ngamanginkanyi wankalanyi mungkijimukuyngka, Jumukuyngka. Yanybayi Kud yalungi yanybawarrayngka nanganginkanyi jangkurranyi Kudkanyi. Nyuli wajba yalunya nanganginkanyi jangkurranyi, baki yalu barri karuyi yingkamuku nanankanyi jangkurranyi. Waluka barri yanybayi Kud yingkanyi, baki baku barri bayngkani nyuli yanyba yingkanyi, baki mili baku nyuli yanyba yingkanyi. Nani barri yalunjalili karu nanganginkanyi jangkurranyi Kudkanyi, yingkawanyi baki yingkawanyi baki yingkawanyi. Yalunjalili karu nanankanyi jangkurranyi jali wajba yalunya Kudwanyi, kananangka jangkurranyi. Nani barri waluku yanybayi Kud yalungi, yalunjalu karunki nanganginkanyi jangkurranyi.
HEB 1:2 Ngala nanijba barri manjijbayi nangangi jandanyi Kudwanyi, nyulu karunki ngambalanya nanganginkanyi jangkurranyi. Yi. Nyulu manjijbayi nanganginmirra jandanyi Jisus Krayis, karunki ngambalanya nanganginkanyi jangkurranyi. Wabula barri, kamambarra, jali mikuyaji yajinyi, baki karuyi nangangi jandanyi Kudwanyi, nyulu yabimbiji bukamba yaji, nyulu yabimbiji laliji baki jamba, baki wabuda, marda yaji bukamba. Karu nyuli nangangi jandanyi yabimbiji bukamba yaji, baki yabimbayi yaji nanganginyi jandanyiwanyi. Baki baku barri juju manjijbayi nangangi jandanyi wayka jambarri, nyulu karunki ngambalanya nanganginkanyi jangkurranyi. Baki mili barri baku juju janyulu yarrijba nangangi jandanyi wirimalaru bukambijuyngka yajinyi.
HEB 1:3 Nangangi jandanyi Jisus Krayis, nyulu nanamannga, barrinani Kud. Nyulu wirimalaru, barrinani Kud nyulu wirimalaru. Nyulu walkurramirra, nyulu ngirukamirra, barrinani Kud. Nyulu yanybaka jangkurr, baki nani barri nyulu lalanbaka bukamba yaji lalijina baki jambana, baki wabudana. Bukamba yaji nyulu lalanbaka yurrngumba barri, nanganginyi jandanyiwanyi. Baki mili yaji nyuli yabimba jandanyiwanyi. Janyba nangki kurndana. Janyba nangki ngamanginkanyi balkinyi yajinyi, baki nanankardi barri nyulu manjamanjambaka ngambalangi balki yaji Kudwanyi. Nani barri janyba nangki nangangi jandanyi, ngala mili nyuli wankijba. Kirrijba nyuli kingkarri lalijiyurri. Kirrijba nyuli kingkarri, baki nanijba nyulu jungkuka kingkarri nangandu Kudnyina, nanda jala wirimalaru bukambijuyngka yajinyi. Barriwa.
HEB 1:4 Nanamuku Yanjilmuku, jalili yalu wakiwarrmuku nangangi Kudkanyi, yalu walkurra nangangi Kudkanyi. Ngala nangangi jandanyi Jisus Krayis, nyulu mili walkurra yalungi Yanjilmukuyngka. Nyulu mili walkurra yalungi barri.
HEB 1:5 Yanybayi Kud kunyba jangkurr nanganginkanyi jandayngkanyi. Yanyba nyuli nayi barri, “Ninji barri, ninji ngaki jandanyi. Baki ngayu nganyi nijanganjinyi yurrngumba barri.” Barriwa. Baki yingka jangkurr yanybayi Kud nanganginkanyi jandayngkanyi. Yanyba nyuli nayi barri, “Yurrngumba barri jangayu nangangi nijanganjinyi. Yurrngumba barri janyulu ngakinmirra jandanyi.” Barriwa. Nani barri yanybayi Kud nanganginkanyi jandayngkanyi. Ngala miku nyuliyanyi yanyba nani barri yalungi Yanjilmukuyngka. Miku nyuliyanyi yanyba yalungi nani barri, mikungangi yalu walkurra barrinani nangangi jandanyi.
HEB 1:6 Baki mili yanybayi Kud nayi barri, “Bukambijunyi ngakinmukunyi Yanjilmukunyi, marda yalimi wajba ngaki jandanyi yalunginkanyi kunybanyi jangkurranyi. Marda yalimi yanyba mududu nangangi. Marda yalimi brijba nangangi.” Barriwa. Nani barri yanybayi Kud. Jalija mili manjijba nanganginmirra jandanyi Kudwanyi, jalija nyulu mili jungku wayka jambana, baki nani barri marda yalimi yabimba yaji nangangi Yanjilmukunyi. Nani barri marda yalimi yabimba yaji nangangi.
HEB 1:7 Ngala miku yaliyanyi Yanjilmuku barrinani nangangi jandanyi. Miku yaliyanyi. Jali yanyba Kud yalungi nanganginmukuyngka Yanjilmukuyngka, baki yanyba nyuli yingka jangkurr yalungi. Nayi nyuli yanyba jangkurr, “Nanginmuku Yanjilmuku, yalu wakiwarrmuku ngaki. Yalu walkurramuku Yanjilmuku, ngala yalu wakiwarrmuku ngaki. Yalu barrinani yunkurr. Yalu barrinani jangu. Yuku yalu yabimba ngiruka yaji Yanjilmukunyi. Yuku yalu yabimba ngiruka yaji barrinani yabimbaka ngiruka yaji yunkurrwanyi baki janguwanyi. Nani barri yuku yalu yabimba ngiruka yaji, ngala yalu wakiwarrmuku ngaki.” Barriwa. Nani barri yanybayi Kud yalungi Yanjilmukuyngka.
HEB 1:8 Ngala yanybayi Kud yingka jangkurr nanganginkanyi jandayngkanyi. “Ninji barri Kud, barrinani ngayu. Ninji barri wirimalaru yurrngumba barri. Wabula, baki nanijba, baki baku barri, yurrngumba ninji wirimalaru bukambijuyngka yajinyi wandijiyana. Ninji jungkuka yurlurrmba yurrngumba barri. Ninji barri yurlurrmba mambuka yalungi. Ninji wajbayi yalunya kunybanyi yuwanyi.
HEB 1:9 Ninji barri mirnarrijbangka muwa, jala yalu yabimbaka ngawamba kunyba yaji, ngala ninji nginduka muwa, jala yalu yabimbaka balki yaji. Ninji ngirrangka nanda balki yaji jala yalu yabimbaka. Nani barri ninji yurlurrmba mambuka yalungi. Baki nanankardi barri wabula waluwa ninya yarrijbayi wirimalaru yalungi bukambijuyngka. Miku ngayiyanyi yarrijba yingka wirimalaru, waluwa nganyi. Ngawamba ninya yarrijbayi wirimalaru. Ninya yarrijbayi mambuka bukambijuyngka yalungi, nganinyimukuyngka, jibarrimukuyngka baki Yanjilmukuyngka. Baki ninji barri mili walkurra bukambijuyngka yalungi.” Barriwa. Nani barri yanybayi Kud.
HEB 1:10 Jabarri yingka jangkurr yanybayi Kud nanganginkanyi jandayngkanyi, “Ninji barri walkurra mambuka. Wabula kamambarra, ninji yabimbayi bukamba yaji. Yabimba ninji laliji baki jamba. Bukamba yaji ninji yabimbayi wandijiyana.
HEB 1:11 Nanda yaji jali ninji yabimba, jayalu baku bukamba yaji. Ngala miku ninjiyi bukamba. Janinji yuwajiwa jungku wanka yurrngumba barri. Nanda jumbala yalungi, waluku barri nanda nyuli kunyba jumbala, ngala baku barri balkijbayi nanda jumbala, baki janyba yali. Ngala yali wudumba yingka jumbala buyingkinyi barri. Baki nani barri marda jayalu laliji baki jamba baki bukamba yaji jambana, jayalu marda balkijba barri. Jayalu marda balkijba, baki jangayu bukamba yalunya. Jangayu bukamba yalunya. Ngala jangayu yabimba buyingkinyi yaji, marda laliji marda jamba barri. Ngala ninji barri, miku ninjiyi bukamba. Janinji nanamannga mambuka yalungi yurrngumba barri.” Barriwa. Nani barri yanybayi Kud nanganginkanyi jandayngkanyi.
HEB 1:13 Yanybayi Kud nayinda jangkurr nangangi, nanganginkanyi jandayngkanyi, “Jungku ninji nayiba ngakinduwa. Kajamuku, jala miku yalimi maruka muwa nganyi, janinya yalu daba, ngala jangayu ngayu yalunya daba wakara barri. Jangayu wakaramba yalunya, jalija ngayu daba yalunya. Baki jayalu ninya jingkijba, ninji barri mambuka yalungi.” Nani barri yanybayi Kud. Ngala miku nyuliyanyi yanyba nanda jangkurr yalungi Yanjilmukuyngka. Miku. Ngala nyuli yanyba nanda jangkurr nangangi, nanganginkanyi jandayngkanyi Jisus Krayiskanyi.
HEB 1:14 Nanamuku Yanjilmuku, yalu kunybamuku wuwarrmuku jala yalu wakiwarrmuku nangangi Kudkanyi. Manjijbangka yalunya Kudwanyi. Nyulu manjijbangka yalunya yalundurri nganinyimukuyngkurri. Nyulu manjijbangka yalunya yalundurri, yalu wakinki yalundu nganinyimukunyina. Yalunjalu kandimbaka Yanjilmukunyi. Yalunjalu kandimbaka nanamuku jala marrimbaka mardarda Kudwanyi. Nanankardi barri jayalu jungku yurlurrmba nangangi Kudkanyi, nganinyimuku, jala yalunya kandimbaka Yanjilmukunyi. Barriwa.
HEB 2:1 Nanankardi barri marda ngambalimi marrimba nanda jangkurr nangangi Jisus Krayiskanyi. Marda ngambalimi kudanyu marrimba nangangi jangkurr ngamanginyina kurduluna. Marda ngambalimi miku mamanumba nanda jangkurr nangangi. Ngambala mankuyi nanda jangkurr nangangi Jisus Krayiskanyi jali milidimba ngambalanya yingkamukunyi. Ngambala mankuyi nanda duja jangkurr, baki marda ngambalimi miku mamanumba nanda jangkurr. Ngala marda ngambalimi kudanyu durrijba nanda jangkurr yurrngumba barri, baki jangambala jungku yurlurrmba nangangi yurrngumba barri.
HEB 2:2 Wankala barri nanamukunyi Yanjilmukunyi yali karu Musis baki yingkamuku yajinyi. Yalunjalu karuyi nanankanyi wankalanyi yuwanyi nanganginkanyi Kudkanyi. Baki nanda barri duja jangkurr. Nanamukunyi barri miku yaliyanyi durrijba nanda jangkurr, miku yaliyanyi ngayangayijba nanankanyi jangkurranyi, baki nanda balki. Nyuli daba yalunya Kudwanyi. Jali yalu miku ngayangayijba nanganginkanyi waluwiyngkanyi jangkurranyi, baki yabimbayi yurlurrmba yaji yalungi Kudwanyi. Nyuli daba yalunya. Ngala nayimanji barri ngambalanya karuyi buyingkiyngkanyi yuwanyi Jisus Krayiswanyi. Ngambalangi mambuka Jisus Krayis, nyuli yanyba nanda buyingkinyi yuwa, baki bayngkani barri yingkamuku jali yalu manku nangangi jangkurr, yalu barri karuyi ngambalanya nanankanyi jangkurranyi. Yalu barri jingkijbayi nanda duja jangkurr, baki yalu barri karuyi ngambalanya nanankanyi jangkurranyi, nanankanyi buyingkiyngkanyi yuwanyi nanganginkanyi Kudkanyi. Nanda waluwinyi yuwa, karuyi yalunya nanankanyi yuwanyi Yanjilmukunyi. Jali yalu miku ngayangayijba nanankanyi yuwanyi, baki dabayi yalunya Kudwanyi. Ngala nanda buyingkinyi yuwa, karuyi ngambalanya nanankanyi yuwanyi ngamanginyi mambukawanyi Jisus Krayiswanyi. Nanda buyingkinyi yuwa mili walkurra nanankanyi waluwiyngkanyi yuwanyi. Nanangini buyingkinyiwanyi yuwawanyi karungka ngambalanya nangangi Kudkanyi, nyulu marrimbaka ngambalanya mardarda yurrngumba barri. Jaliyi ngambala miku ngayangayijba nanankanyi buyingkiyngkanyi yuwanyi, jala ngamanya karu Jisus Krayiswanyi, baki nanda balki, balkimirra. Janyulu nyulu marda daba ngambalanya Kudwanyi. Nanamuku jali manjijba Jisus Krayiswanyi, yali karu ngambalanya nanankanyi buyingkiyngkanyi yuwanyi nanganginkanyi Jisus Krayiskanyi.
HEB 2:4 Jali yalu milidimba ngambalanya, baki yabimbayi ngiruka yaji yalungi Kudwanyi. Manjijbayi nangangi Kunyba Ngarndu yalundurri Kudwanyi, baki nyuli yabimba yalunya ngiruka Ngarnduwanyi, yalu yabimbikanyi ngiruka yaji. Nanankardi barri yali yabimba nanda yaji jali nulijba Kud yalungi yabimbikanyi yaji. Nani barri minimbayi ngambalanya Kudwanyi, nanda jangkurr jali yalu milidimba, nanda buyingkinyi yuwa, duja barri nanda jangkurr. Barriwa.
HEB 2:5 Baku barri jalija yabimba buyingkinyi yaji Kudwanyi, jalija nyulu yabimba buyingkinyi laliji baki jamba, baki janyulu yarrijba yingka mambuka bukambijuyngka nanankanyi yajinyi. Ngala miku janyulu yarrijba Yanjilmuku mambukamuku nanankanyi yajinyi. Miku. Ngala janyulu yarrijba nanganginmirra jandanyi Jisus Krayis. Janyulu yarrijba nanganginmirra jandanyi wirimalaru bukambijuyngka yajinyi wandijiyana. Miku jayalu mambukamuku yajinyi Yanjilmuku, ngala janyulu nyulu mambuka yajinyi Jisus Krayis barri.
HEB 2:6 Nanda jangkurr najana Kudkanyi yanybaka nayi barri, “Ninji Kud, ngala ngawamba yalu nganinyimuku. Ninji barri ngiruka. Ninji yabimbayi laliji baki yakarl baki warrawiji. Ngala nganinyimuku barri miku yalimi ngiruka. Ngawamba yalu bayakarda. Wanyingkanyi nganyingka mankumanku yalungi. Wanyingkanyi ninji lalanba yalunya. Ngawamba yalu bayakarda.
HEB 2:7 Ngala Ninji walkurrambayi yalunya. Ninji yabimbayi yalunya mambukamuku bayngkani yalundu Yanjilmukunyina. Ninji yabimbayi yalunya mambukamuku bukambijuyngka yajinyi jambana. Marda ninji yabimbayi kunyba yaji yalungi.” Barriwa. Nani barri yanybaka jangkurr najana Kudkanyi. Nanangini jangkurrwanyi karungka ngambalanya nangangi Kudkanyi, nyuli yarrijba nganinyimuku mambukamuku bukambijuyngka yajinyi jambana. Ngala jilijbawa nganinyimuku mambukamuku bukambijuyngka yajinyi jambana. Jilijbawa.
HEB 2:9 Ngala Jisus Krayis barri, jungku nyuli nayiba jambana. Badajba nyuli kingkarrinya, baki jungku nyuli nayiba jambana. Jungku nyuli nganinyi barrinani ngambala. Miku nangkiyanyi yarrijba Jisus Krayis walkurra barrinani Yanjilmuku. Jali nyulu jungku jambana, baki bayakarda nyuli. Nanamanji barri nanamuku Yanjilmuku, yali mili walkurra nangangi. Nyuli barri bayakarda, baki yali linjumba. Kudanyu yali linjumba nangangi mankanyi, baki nangki janyba. Nangki janyba ngamanginkanyi balkinyi yajinyi. Baki nanankardi barri mili wankambayi Jisus Krayis Kudwanyi. Walkurramba nyuli Jisus Krayis. Yabimba nyuli Jisus Krayis walkurra mambuka bukambijuyngka yajinyi jambana. Nyuli wirimalaru bukambijuyngka yalungi nganinyimukuyngka, jibarrimukuyngka, baki Yanjilmukuyngka. Barriwa.
HEB 2:10 Kud, nyulu ngirukamirra, baki nyulu lalanbaka bukamba yaji, marda nganinyimuku, marda jibarrimuku. Ngala nyuli munyajba yalunya yabimbikurri balki yaji nangangi Jisus Krayiskanyi. Nyuli munyajba yalunya, yalu linjumbikurri nangangi mankanyi. Nyuli munyajba yalunya yalu yabimbikurri balki yaji nangangi, ngala jungkuyi Jisus Krayis yurlurrmba nangangi Kudkanyi yurrngumba barri. Baki nanankardi barri nyulu jingkijbangka ngambalanya, baki nyulu ngiruka ngambalangi, marrimbikanyi ngambalanya mardarda. Nyulu barri lirrka jali nyulu kudanyu durrijba nangangi jangkurr Kudkanyi. Kajamukunyi yalu kuyungka nangangi jangkurr, yalu durrijbangka nangangi jangkurr, baki nyulu marrimbaka yalunya mardarda Jisus Krayiswanyi. Jala yalu kuyu nangangi jangkurr Jisus Krayiskanyi, baki nyulu manjamanjambaka yalungi balki yaji Kudwanyi, baki nyulu yarrijbangka yalunya barrinani malaba nangangi Kudkanyi. Baki nyulu yarrijbangka yalunya nanganginmuku jandanyimuku Kudwanyi. Yalu nanganginmuku jandanyimuku, barrinani Jisus Krayis, nyulu nangangi jandanyi Kudkanyi. Baki Kud nyulu nijanganjinyi yalungi bukambijuyngka jala yalu durrijba nangangi jangkurr, baki Jisus Krayis barri, nyulu mirnarrijba muwa kuyunkanyi yalunya nanganginmuku bababanyamba nyulu yalunya.
HEB 2:12 Nyulu yanybaka nayi barri, “Jangayu karu yalunya ngakinmuku kanyiyamuku. Jangayu karu yalunya nganyi, ninji barri kunybamirra, ninji barri ngiruka, ninji yabimbaka kaja ngiruka yaji. Jalija ngayu jungku yalundu, baki jangayu wajba ninya ngakinkanyi kunybanyi jangkurranyi.” Barriwa. Nani barri karungka ngambalanya nangangi Jisus Krayiskanyi jangkurrwanyi najana Kudkanyi.
HEB 2:13 Baki yingka jangkurr yanybaka Jisus Krayis, “Ngayu jingkijbangka Kud, janyulu yabimba nanda jali nyulu yanyba. Janyulu lalanba ngana.” Barriwa. Baki nyulu yanybaka nayinda jangkurr, marda, “Jangayu jungku nanaba yalundu, nanamukunyina jala yalu jandanyimuku nangangi Kudkanyi. Yarrijba ngani Kudwanyi, ngayuja lalanbiji yalunya. Yurrngumba barri jangayu lalanba yalunya nangangi Kudkanyi.” Barriwa. Nani barri karungka ngambalanya jangkurrwanyi najana Kudkanyi. Barriwa.
HEB 2:14 Nanangini Sayidinwanyi nyulu balanjaka yalunya. Nganinyimuku, baki jibarrimuku, bukambiju nyulu balanjaka yalunya. Nulijbangka Sayidin yalungi, yalu yabimbikanyi balki yaji. Jalija yalu yabimba balki yaji, baki nanankardi barri jayalungka janyba. Nanankardi barri balanjaka yalunya Sayidinwanyi, nulijbangangi nyulu yalungi, yalungka janybikanyi. Jaliyi yalu durrijba Sayidin, baki janyulu yalungi mambuka. Jayalungka janyba, baki jayalu jungku kurdan yurrngumba barri. Barriwa. Ngala nanamuku durrijbawarrmuku nangangi Kudkanyi, nyulu yarrijbangka yalunya nanganginmuku jandanyimuku Kudwanyi. Yalu nanganginmuku jandanyimuku, ngala yalu nganinyimuku baki jibarrimuku. Miku yalimi barrinani Yanjilmuku jala miku yalungkiyi janyba, Yanjilmuku. Miku yalimi barrinani Yanjilmuku, ngala yalu nganinyimuku. Ngala karralayi Jisus Krayis kingkarrinya wayka. Karrala nyuli wayka jambarri, baki jungku nyuli nganinyi ngarnduyudi barrinani ngambala, baki baku barri nangki janyba. Miku nyuliyanyi yabimba balki yaji, ngala nangki janyba ngamanginkanyi balkinyi yajinyi. Baki nanankardi barri ngambala, jandanyimuku nangangi Kudkanyi, miku ngambaliyi marrala janybikanyi ngambalaka. Miku ngambaliyi marrala janybikanyi ngambalaka, janybangangi nangki Jisus Krayis ngambalangi. Daba nyuli wakara nanda Sayidin, baki nanijba barri nanda Sayidin, miku nyuliyi mili ngambalangi mambuka. Miku nyuliyi mili ngambalangi mambuka. Jalija ngambalaka janyba, baki miku jangambala jungku kurdan yurrngumba barri, ngala jangambala jungku mili wanka barri, janybangangi nangki Jisus Krayis ngambalangi. Baki nani barri miku ngambaliyi marrala, janybikanyi ngambalaka. Nani barri nyulu kandimbaka ngambalanya, nanganginmuku jandanyimuku Kudwanyi. Baki ngambala jingkijba, duja barri nanda jangkurr. Ngambalanya nyulu kandimbaka Kudwanyi. Miku nyuliyi kandimba yalunya Yanjilmuku nani barri, ngala ngambalanya nyulu kandimbaka. Nanda jangkurr najana Kudkanyi yanybayi nayi barri, “Nyulu kandimbaka nanamuku jala yalu durrijba nangangi jangkurr Kudkanyi. Nanangini wankalanyi Yabrayamwanyi nyulu durrijbayi nangangi jangkurr Kudkanyi, baki kandimbayi Yabrayam Kudwanyi.” Barriwa. Baki nani barri janyulu kandimba ngambalanya marda, jala ngambala durrijba nangangi jangkurr.
HEB 2:17 Jali jungku Jisus Krayis jambana, baki miku nyuliyi jungku yinini yinini ngambalangi, ngala nyuli jungku malumba ngambalandu. Nyuli jungku barrinani nanamuku nanganginmuku kanyiyamuku, jali yalu kuyu nangangi jangkurr. Barriwa. Nyuli jungku barrinani nanda walkurra mambuka jurjkanyi. Nyuli jungku barrinani nanda walkurra mambuka yalunginkanyi wankalanyi jurjkanyi Jumukuyngka. Nanda walkurra mambuka jurjkanyi, nayi barri nyulili yabimba yaji. Nyulili waki nangangi Kudkanyi. Nyulili yanyba mududu nangangi Kudkanyi yalungi Jumukuyngka. Yingkamuku Jumuku yalili jilajba nangandurri, yalili kuyu yaji nangandurri, barrinani jib, baki buluki. Yalili kuyu nanda yaji nangandurri, bakili nyulu kurdanba, bakili nyulu dikarrijba nanda barnyi. Nyulili dikarrijba nanda barnyi nangangi Kudkanyi, ngala nyulili yanyba mududu nangangi Kudkanyi yalungi Jumukuyngka. Nyulili ngajaka Kud, nyulu manjamanjambiji nanda balki yaji, jali yalu yabimba. Nani barri nyulili yabimba yaji, nanangini walkurranyi mambukawanyi yalunginkanyi wankalanyi jurjkanyi Jumukuyngka. Baki nani barri marda Jisus Krayis, nyulu barrinani nanda walkurra mambuka yalunginkanyi jurjkanyi. Nyulu jungkuyi nganinyi jambana, baki waki nyuli nangangi Kudkanyi. Yabimba nyuli kunyba yaji ngambalangi. Baki nanijba barri nyulu jungkuka kingkarri nangandu Kudnyina. Nyulu yanybaka mududu nangangi Kudkanyi ngambalangi, baki nyulu ngajakangka Kud, nyulu manjamanjambiji ngambalangi balki yaji. Nani barri yuwajiwa nyulu yabimbaka kunyba yaji ngambalangi. Barriwa.
HEB 2:18 Ngala jungkuyi Jisus Krayis nayiba wayka jambana, baki balanjayi Jisus Krayis Sayidinwanyi. Balanja nyuli Jisus Krayis. Nulijba nyuli Jisus Krayiskanyi, nyulu yanybikanyi balki jangkurr, nyulu yabimbikanyi balki yaji nangangi Kudkanyi. Baki nanankardi barri jingkijbangka ngambalanya Jisus Krayiswanyi. Nyulu jingkijbangka ngambalanya, jala balanjaka ngambalanya Sayidinwanyi nanamannga nanijba barri. Nyulu jingkijbangka ngambalanya nani barri, baki nyulu kandimbaka ngambalanya, jala balanjaka ngambalanya Sayidinwanyi. Nyulu kandimbaka ngambalanya nani barri. Yingkamukunyi yali wajba Jisus Krayis kijinyi, yali linjumba Jisus Krayis, baki nanankardi barri nyulu jingkijbangka ngambalanya jala ngamanjalu wajba kijinyi. Nyulu jingkijbangka ngambalanya jala balanjaka ngambalanya Sayidinwanyi, jala ngamanjalu wajba kijinyi, baki nyulu kandimba ngambalanya. Barriwa.
HEB 3:1 Narri barri Krisjinmuku, jala narri bababanyamba ngambalaka, narri barri, jala narrinya marda yarrijba nanganginmuku jandanyimuku Kudwanyi, mankumanku narringka nangangi Jisus Krayiskanyi. Yarrijbayi Jisus Krayis Kudwanyi. Yarrijba nyuli Jisus Krayis barrinani nanda walkurra mambuka jurjkanyi. Nyulu walkurra mambuka ngambalangi barri Krisjinmukuyngka.
HEB 3:2 Nanda barri wankalanyi, niji Musis, nyulu ngayangayijbayi nangangi Kudkanyi. Nyulu ngayangayijbayi nangangi. Waki nyuli nangangi Kudkanyi, baki nyuli lalanba yalunya nanganginmuku mungkijimuku. Baki nani marda Jisus Krayis. Ngayangayijba nyuli nangangi Kudkanyi, nanankardi jali yarrijba Jisus Krayis wakinkanyi nangangi. Ngayangayijba nyuli nanganginkanyi jangkurranyi. Barriwa.
HEB 3:3 Mankumanku narringka nanginkanyi jala ngayu muningka yanyba. Yabimbayi barrawu nganinyiwanyi. Wudumba nyuli kaja kurnda, baki yabimba nyuli kunyba barrawu yingkanyi nganiyngkanyi. Baki mungkijiwanyi nanankanyi barrawunyi, wajba nyuli nanda nganinyi nanganginkanyi kunybanyi jangkurranyi, yabimbangangi nyuli kunyba barrawu nangangi. Miku nyuliyanyi wajba nanda barrawu nanganginkanyi kunybanyi jangkurranyi. Miku. Ngala nyuli wajba nanda nganinyi jali yabimba barrawu nangangi. Barriwa. Bukambiju ngambala jala kuyu nangangi jangkurr Kudkanyi, jala ngambala jandanyimuku nangangi Kudkanyi, ngambala barrinani nanda barrawu. Ngambala barrinani nanda barrawu, kuyungangi ngambali nangangi jangkurr Jisus Krayiskanyi. Ngambala kuyuyi nangangi jangkurr, baki nanankardi barri Jisus Krayis nyulu barrinani nanda jali nyulu yabimba nanda barrawu. Ngambala barrinani nanda kurndamuku nananyina barrawuna. Baki ngambalangi buwakanya Kud, nyulu barrinani nanda nganinyi, jala nyulu mungkiji nanankanyi barrawunyi. Nanda barri wankalanyi Musis, nyuli walkurra nganinyi nangangi Kudkanyi, nyuli wakiwarr nangangi Kudkanyi, ngala nyuli barrinani yingamali kurnda nananyina barrawuna jala yabimba nganinyiwanyi. Ngala Jisus Krayis barri, miku nyulimi barrinani kurnda barrawuna, ngala nyulu barrinani nanda nganinyi jali yabimba nanda barrawu nangangi Kudkanyi. Baki nani marda, nanda Musis, nyuli bijal walkurra nganinyi nangangi Kudkanyi, ngala Jisus Krayis barri, nyulu walkurramirra nangangi Kudkanyi. Jisus Krayis, nyulu mili walkurra nangangi Musiskanyi.
HEB 3:4 Jala ngambala najba barrawu, baki ngambala jingkijba, yabimbayi nanda barrawu yingkawanyi. Baki jala ngambala najba laliji baki kanja baki jamba, baki jingkijba ngambala, yabimbayi bukamba nanda yaji yingkawanyi. Nyulu barri yabimbayi nanda yaji Kudwanyi.
HEB 3:5 Nanangini Musiswanyi, kudanyu nyuli durrijba nangangi jangkurr Kudkanyi. Kudanyu nyuli ngayangayijba nangangi Kudkanyi, wakiwarrngangi nyuli nangangi Kudkanyi. Yanybayi Kud jangkurr nangangi Musiskanyi, baki karuyi yalunya nanankanyi jangkurranyi Musiswanyi. Nyulu karuyi yalunya nanganginmuku mungkijimuku nanankanyi jangkurranyi Kudkanyi. Karu nyuli yalunya, nanankanyi jalija yabimba Kudwanyi baku barri.
HEB 3:6 Durrijbayi jangkurr Kudkanyi Musiswanyi, baki wakiwarr nyuli nangangi Kudkanyi. Baki nani barri marda, durrijbayi jangkurr Kudkanyi Jisus Krayiswanyi. Kudanyu nyuli durrijba jangkurr Kudkanyi, ngala miku nyuliyanyi wakiwarr nangangi Kudkanyi barrinani Musis. Ngala nyuli jandanyi nangangi Kudkanyi. Nyulu wirimalaru bukambijuyngka yalungi nganinyimukuyngka jibarrimukuyngka, jala yalu kuyu nangangi jangkurr. Nyulu wirimalaru yalungi, barrinani Kud nyulu wirimalaru. Jaliyi ngambala ngayangayijba nanganginkanyi jangkurranyi Jisus Krayiskanyi, baki jangambala mirnarrijba muwa. Jaliyi ngambala jungku ngiruka, baki ngambala jingkijba Jisus Krayis, janyulu yabimba kunyba yaji ngambalangi. Janyulu mili wankamba ngambalanya, jalija ngambalaka janyba. Jangambala jungku mili wanka nangandu yurrngumba barri. Ngambala kanyiyamuku nangangi Jisus Krayiskanyi jala ngambalaja jungku ngiruka nangangi yurrngumba barri. Barriwa.
HEB 3:7 Yanybayi Kunyba Ngarndu Kudkanyi yalungi wankalamukuyngka. Karu nyuli yalunya nanginkanyi jangkurranyi, jalija yalu yarrijba najana Kudkanyi. Nayi barri nyuli yanyba, “Jala narri manku nanda jangkurr nangangi Kudkanyi, baki marda narrimi miku jardibirringujba muwa nanankanyi jangkurranyi. Marda narrimi miku jardibirringujba muwa, ngala marda narrimi kuyu nanda jangkurr. Nanamuku wankalamuku mungkijimuku narringi, jali yalu manku nangangi jangkurr Kudkanyi, baki yali jardibirringujba muwa nangangi. Yalungki kurrkunba nanankanyi jangkurranyi. Dulabayi yalunya Yijibnanyi Kudwanyi. Nyuli lalanba yalunya, jalili yalu jilalajba mangkurruna yajina yurrngumba barri. Kudanyu nyulili lalanba yalunya, ngala yali jardibirringujba muwa nangangi. Yalili ngirrwa nangangi Kudkanyi. Baki nani barri yalili balanja Kud, jalili yalu ngirrwa nangangi Kudkanyi yurrngumba barri. Marda narrimi miku jungku barrinani yalili jungku nanamuku wankalamuku mungkijimuku. Marda narrimi miku jardibirringujba muwa nangangi Kudkanyi.
HEB 3:9 Yanybayi Kud, ‘Nanamuku Jumuku, jalili yalu jungku mangkurruna yajina, bakili yalu najba nanda kaja ngiruka yaji jalili ngayu yabimba yalungi. Yurrngumba barri jalili yalu jungku nananyina mangkurruna yajina, 40 kindilkurrinyina yajina, bakili yalu najba nanda ngiruka yaji jalili ngayu yabimba yalungi. Ngala miku yaliyanyi ngayangayijba ngakinkanyi jangkurranyi. Yurrngumba barri yalili ngirrwa ngaki. Kudanyu yalili ngirrwa ngaki yurrngumba barri.
HEB 3:10 Baki nanankardi ngayi ngarrangarra muwa yalungi. Ngarrangarra ngayi muwa yalungi, baki yanyba ngayi nangangi Musiskanyi, “Nanginmuku Jumuku, yalungka yangkalambaka ngakinbunanyi. Yabimba ngayili kaja ngiruka yaji yalungi, ngala miku yalimi ngayangayijba ngakinkanyi jangkurranyi, ngala yalungka yangkalambaka ngakinbunanyi.” Barriwa.
HEB 3:11 Yi. Ngayi ngarrangarra muwa yalungi, baki karu ngayi Musis jangkurranyi miku nangkiyi yangkalamba. Yanyba ngayi nayi barri nangangi. “Nanginmuku Jumuku, yalu jardibirringujba muwa. Jardibirringujba yalu muwa yurrngumba barri. Miku yalimi ngayangayijba ngakinkanyi jangkurranyi. Baki nanankardi barri miku ngayiyi yalilijba yalunya nanankurri kunybarri yajiyurri langku. Miku ngayiyi munyajba yalunya ngankiykurri nananyina yajina langku. Miku yaliyi wuyalijba nanaba, ngala jayalu muningka jilalajba lukuluku nanginyina mangkurruna yajina. Jayalu muningka jilalajba lukuluku mangkurruna yajina nanankurri jalija yalungka janyba. Yi. Miku yaliyi wuyalijba nanaba kunybana yajina.” ’ ” Barriwa. Nani barri nanda Kunyba Ngarndu Kudkanyi yanybayi jangkurr jali yalu yarrijba najana Kudkanyi. Barriwa.
HEB 3:12 Narri barri Krisjinmuku, jala narri bababanyamba ngambalaka, marda narringkimi najbawa. Marda narrimi miku jungku balki kurdulu nangangi Kudkanyi. Marda narrimi miku yurlwa nanganginkanyi jangkurranyi. Marda narringkimi miku yangkalamba nanganbunanyi Kudnanyi, nanda jala jungkuka wanka yurrngumba. Marda narringkimi miku yangkalamba nanganbunanyi.
HEB 3:13 Marda narrimi miku munyajba Sayidin jujambikurri narrinya. Marda narrimi miku munyajba Sayidin, nyulu yabimbikurri narrinya, narri yabimbikanyi balki yaji. Ngala marda narringkimi yanyba kunyba jangkurr yurrngumba barri. Marda narringkimi yabimba kunyba yaji. Marda narringkimi lalanba yurrngumba barri nanankurri jalija wijba Jisus Krayis nanginkurri wayka jambarri. Nani barri marda narrimi jungku, bakiyi narrinya jujamba Sayidinwanyi. Barriwa.
HEB 3:14 Ngambala barri kanyiyamuku nangangi Jisus Krayiskanyi, nyulu ngambalangi buwanganja. Yurrngumba barri jangambala jungku nani barri, jaliyi ngambala kuyu nangangi jangkurr, jaliyi ngambala kudanyu durrijba nangangi jangkurr Jisus Krayiskanyi. Jalannga barri, jali ngambala kuyu nangangi jangkurr, baki ngambala jingkijbayi Jisus Krayis, janyulu marrimba ngambalanya mardarda. Marda ngambalimi miku mamanumba nanda yaji. Marda ngambalimi yurrngumba mankuwa Jisus Krayis, nyulu nanda marrimbawarr mardarda. Barriwa.
HEB 3:15 Nayi barri yanybaka jangkurr najana Kudkanyi. “Jala narri manku nanda jangkurr nangangi Kudkanyi, baki marda narrimi miku jardibirringujba muwa nanankanyi jangkurranyi. Marda narrimi miku jardibirringujba muwa, ngala marda narrimi kuyu nanda jangkurr. Nanamuku wankalamuku mungkijimuku narringi, jali yalu manku nangangi jangkurr Kudkanyi, baki yali jardibirringujba muwa nangangi Kudkanyi. Yalungki kurrkunba nanganginkanyi jangkurranyi.” Nani barri yanybayi jangkurr najana Kudkanyi.
HEB 3:16 Wanyinmuku yalu, jali yalungka kurrkunba ngayangayiykanyi nangangi Kudkanyi. Wanyinmuku yalu. Yalu nanamuku Jumuku jali lalanba yalunya Kudwanyi. Kuyuyi yalunya bayunguna Musiswanyi. Jali yalunya dulaba Musiswanyi nanamunanyi Yijibnanyi, baki lalanbayi yalunya Kudwanyi. Jali yalunya malijba ngarrkadabawarrmukunyi, wiykunumbikanyi yalunya nanankurri Yijibyurri, baki lalanbayi yalunya Kudwanyi kingkarrinya. Kurrkunba nyuli yalunya, nanamuku ngarrkadabawarrmuku Kudwanyi. Ngurrunba nyuli yalunya wabudana. Nani barri nyuli marrimba yalunya Jumuku mardarda. Ngala yalu barri, yalungki yangkalamba nanganbunanyi Kudnanyi. Yalungki kurrkunba ngayangayiykanyi nangangi Kudkanyi. Yurlwa yali nanganginkanyi jangkurranyi. Barriwa.
HEB 3:17 Wanyinmuku yalu jali ngarrangarra muwa Kud yalungi. Wanyinmuku yalu, jali nyulu ngarrangarra muwa yalungi yurrngumba 40 kindilkurrinyina yajina. Ngarrangarrayi Kud muwa yalungi jali yalungka yangkalamba nanganbunanyi, jali yalu yurlwa nanganginkanyi jangkurranyi, jali yalu yabimba balki yaji nangangi Kudkanyi. Baki nanankardi barri muningka yalili jilalajba lukuluku nananyina mangkurruna yajina 40 kindilkurrinyina yajina. Nanankardi barri yalili muningka jilalajba, bakili yalungka janyba, yingka baki yingka baki yingka. Bukambiju yalungki janyba nanaba mangkurruna yajina.
HEB 3:18 Yanybayi Kud nayinda jangkurr miku nangkiyi yangkalamba. Nayinda barri nyuli yanyba, “Nanamuku barri, miku yaliyi ngankijba nananyina yajina langku. Miku yaliyi ngankijba nananyina kunybana yajina. Miku ngayiyanyi munyajba yalunya wuyaliykurri nanaba. Miku yaliyi ngankijba nananyina kunybana yajina. Miku yaliyi wuyalijba nanaba.” Nani barri yanybayi Kud. Ngala wanyinmuku yalu, jali mikukiyanyi munyajba yalunya wuyaliykurri nanaba Kudwanyi. Wanyinmuku. Yalu nanamuku Jumuku, jali yalu miku ngayangayijba nangangi Kudkanyi, jali yalungka yangkalamba nanganbunanyi Kudnanyi, jali yalu yurlwa nangangi.
HEB 3:19 Ngambala jingkijbangka barri nayinda duja jangkurr. Miku yaliyi ngankijba nananyina kunybana yajina langku, kurrkunbayingangi yalunya Kudwanyi. Nyuli kurrkunba yalunya ngankiykanyi kalawuyngkurru, mikungangi yaliyanyi kuyu nangangi jangkurr Kudkanyi. Nanankardi barri yalili muningka jilalajba nananyina mangkurruna yajina 40 kindilkurrinyina, bakili yalungka bukamba janyba nanaba. Barriwa.
HEB 4:1 Wankalana barri yanybayi Kud jangkurr miku nangkiyi yangkalamba. Yanybayi Kud yalungi, jala yalu ngayangayijba nangangi, baki jayalu ngankijba kunybana yajina, baki jayalu wuyalijba nanaba. Nani barri yanybayi Kud wankalana. Baki yuwajiwa nanda jangkurr duja nanijba barri. Baki ngambala jingkijba Kud, janyulu munyajba ngambalanya ngankiykurri nananyina kunybana yajina kingkarri, baki nanaba jangambala wuyalijba barri. Ngala marda ngambalakimi najbawa. Marda ngambalimi yurrngumba ngayangayijba nanganginkanyi jangkurranyi Kudkanyi, bakiyi nyulu miku munyajba ngambalanya ngankiykurri nananyina yajina kingkarri, bakiyi nyulu miku munyajba ngambalanya wuyaliykurri nanaba. Yi. Marda ngambalakimi najbawa. Marda ngambalimi ngayangayijba nangangi Kudkanyi yurrngumba barri.
HEB 4:2 Ngambala mankuyi nanda kunyba jangkurr nangangi Kudkanyi, barrinani nanamukunyi wankalamukunyi, jali manku nangangi kunyba jangkurr wankalana barri. Ngala nanda jangkurr nangangi Kudkanyi, yalu wuyaliykanyi, miku nanda jangkurr yalungi wankalamukuyngka. Miku nanda jangkurr yalungi, mikungangi yaliyanyi kuyu nanda jangkurr, ngala yali yurlwa nanankanyi jangkurranyi. Miku yaliyanyi yanyba, “Nayinda jangkurr nangangi Kudkanyi duja barri. Ngambala jingkijbangka Kud, janyulu yabimba nanda jali nyulu yanyba, janyulu yabimba.” Miku yaliyanyi yanyba nani. Miku yaliyanyi nani kuyu nanda jangkurr nangangi, ngala yali yurlwa nanganginkanyi jangkurranyi. Baki nanankardi barri ngambala jingkijbangka barri, nanda jangkurr Kudkanyi yalu wuyaliykanyi, mikukiyanyi yanyba Kud nanda jangkurr yalungi barri.
HEB 4:3 Ngala ngambala barri, ngambala marda mankuyi nanda kunyba jangkurr nangangi Kudkanyi. Karuyi ngambalanya nanankanyi jangkurranyi Jisus Krayiswanyi. Baki ngambala barri, jala kuyu nangangi jangkurr, jangambala ngankijba nananyina kunybana yajina kingkarri, baki jangambala ngambala wuyalijba nanaba kingkarri. Nanda jangkurr Kudkanyi wuyaliykanyi, nanda duja jangkurr. Yanybayi Kud, “Nanginmuku Jumuku, yalu jardibirringujba muwa. Baki nanankardi barri ngayu ngarrangarrangka muwa yalungi. Miku yalimi ngayangayijba ngakinkanyi jangkurranyi. Baki nanankardi barri miku ngayiyi yalilijba yalunya nanankurri kunybarri yajiyurri langku. Miku ngayiyi munyajba yalunya ngankiykurri nanaba langku. Miku yaliyi wuyalijba nanaba kunybana yajina.” Barriwa. Wabula kamambarra yabimbayi bukamba yaji Kudwanyi. Yabimba nyuli laliji baki jamba baki wabuda, baki bukamba yaji. Yabimba nyuli bukamba yaji kajana kambana, 6 kambana. Yabimbayi bukamba yaji Kudwanyi, 6 kambana, baki munganawa nyuli wuyalijba. Wuyalijba nyuli munganawa barri.
HEB 4:4 Nanda jangkurr najana Kudkanyi yanybaka, nayi barri, “Yabimbayi bukamba yaji 6 kambana Kudwanyi, baki munganawa nyuli wuyalijba. Miku nyuliyanyi mili waki, ngala wuyalijba nyuli.” Barriwa.
HEB 4:5 Baki mili nanda jangkurr najana Kudkanyi yanybaka nayi barri. “Miku ngayiyi yalilijba yalunya nanankurri kunybarri yajiyurri langku. Miku ngayiyi munyajba yalunya ngankiykurri nanaba langku. Miku yaliyi wuyalijba nanaba.” Barriwa. Yanybayi Kud nanda jangkurr yalungi, narringinkanyi wankalanyi mungkijimukuyngka. Yanybayi Kud nanda kunyba jangkurr, yalu wuyaliykanyi nananyina kunybana yajina, ngala miku yaliyanyi kuyu nanda kunyba jangkurr. Miku yaliyanyi ngayangayijba nanganginkanyi jangkurranyi Kudkanyi. Baki nanankardi barri mikukiyanyi munyajba yalunya Kudwanyi, yalu ngankiykurri nanaba langku. Miku nyuliyanyi munyajba yalunya wuyaliykurri nanaba. Ngala yuwajiwa duja barri nanda jangkurr nangangi Kudkanyi, yalu wuyaliykanyi kunybana yajina. Miku yaliyanyi wuyalijba kunybana jambana, nanamuku wankalamuku, ngala yingkamuku jayalu wuyalijba kunybana jambana. Yingkamukunyi jayalu kuyu nangangi jangkurr Jisus Krayiskanyi, jayalu durrijba nangangi jangkurr, baki jayalu yalu wuyalijba kunybana yajina kingkarri barri.
HEB 4:7 Nanda wankalanyi mambuka yalungi Jumukuyngka, niji Musis, jali barri nangka janyba, baki yarrijbayi yingka mambuka yalungi bayngkani nangandu Kudwanyi. Yarrijba nyuli yingka mambuka yalungi, niji nangangi Jujuwa. Jandanyimuku baki kulunganjamuku yalungi, jali yalungka janyba mangkurruna yajina kularra, nyuli kuyu yalunya nanankurri kunybarri yajiyurri langku Jujuwawanyi. Yalu barri ngankijbayi nananyina kunybana yajina, jali wajba yalunya Kudwanyi. Ngankijba yali, ngala miku yaliyanyi wuyalijba nanaba. Miku. Jayijba yalili nanamuku mungkijimuku nanankanyi yajinyi. Miku yaliyanyi wuyalijba, ngala yurrngumba yalunjalili jayijba, wudumbikanyi nanda yaji yalunginmirra yaji. Baki mili baku barri juju, yingka wankalanyi mambuka, nangangi niji Dayibid. Yanybayi Kud nangangi, nayi barri, “Jala narri manku nanda jangkurr nangangi Kudkanyi, baki marda narrimi miku jardibirringujba muwa nanankanyi jangkurranyi. Marda narrimi miku jardibirringujba muwa, ngala marda narrimi kuyu nanda jangkurr.” Barriwa. Nani barri yanybayi Kud nangangi Dayibidkanyi, baki yarrijbayi nanda jangkurr najana Kudkanyi Dayibidwanyi.
HEB 4:9 Nanda barri duja jangkurr. Baki nanankardi barri ngambala jingkijbangka barri, nanamuku jala yalu kuyu nangangi jangkurr Kudkanyi, jala yalu jungku yurlurrmba nangangi, janyulu munyajba yalunya, ngankiykurri nanaba kunybana yajina. Janyulu munyajba yalunya, wuyaliykurri nanaba. Wuyalijbayi Kud, jali bukamba nyulu yabimbikanyi yaji, baki nani barri jayalu wuyalijba nanaba kingkarri nangandu Kudnyina.
HEB 4:10 Nanda jala munyajba wuyaliykurri Kudwanyi, janyulu wuyalijba barrinani nyulu wuyalijbayi Kud. Wakiyi barri Kud 6 kambana, baki jali nyulu bukamba yabimbikanyi yaji, baki wuyalijba nyuli. Baki nani barri nanda jalija wuyalijba kingkarri nangandu Kudnyina. Jalija nyulu bukamba wakinkanyi nangangi Kudkanyi, baki janyulu wuyalijba nanaba kingkarri nangandu yurrngumba barri.
HEB 4:11 Nanankardi barri, marda ngambalimi jungku yurlurrmba nangangi Kudkanyi yurrngumba barri. Marda ngambalimi kuyu nangangi jangkurr, marda ngambalimi durrijba nangangi jangkurr, baki marda ngambalakimi miku yangkalamba nanganbunanyi Kudnanyi. Jaliyi ngambala nani jungku yurlurrmba nangangi yurrngumba barri, baki munyajbaja ngambalanya Kudwanyi, ngambala wuyaliykurri nanganginyina yajina kingkarri. Ngala jaliyi ngambala miku jungku yurlurrmba nangangi Kudkanyi, baki miku nyuliyi munyajba ngambalanya wuyaliykurri nanaba kingkarri. Barriwa.
HEB 4:12 Nanda jangkurr nangangi Kudkanyi duja barri. Nanda jangkurr ngiruka marda. Nanda jangkurr barrinani jankunbijinyi jala wadankurru langkiya wilina baki kulaya. Jala ngarrkadaba yingka nganinyiwanyi nananjudinyi jankunbijinyiyudinyi, baki ngankijbangka jankunbijinyi juju kalawuyngkurru nangandu mankanyina. Baki nani barri nanda jangkurr nangangi Kudkanyi, barrinani nanda wadankurru jankunbijinyi. Jala ngambala manku nangangi jangkurr, baki miku ngambaliyi yurlwa nanankanyi jangkurranyi. Nangangi jangkurr ngankijbangka ngambalandu kalawuyngkurru kurduluna. Nangangi jangkurr ngiruka yabimbikanyi ngambalanya jungunkanyi yurlurrmba nangangi Kudkanyi. Nangangi jangkurr ngiruka yabimbikanyi ngambalanya, ngambalaka yanybikanyi muwa. Nangangi jangkurr ngiruka yabimbikanyi ngambalanya, ngambalaka mankumankunkanyi nanankanyi, jala ngambala nulijba yabimbikanyi yaji. Ngambalaka mankumankunkanyi, jaliyi nanda kunyba yaji, jaliyi nanda balki yaji. Nani barri nanda jangkurr nangangi Kudkanyi barrinani nanda jankunbijinyi jala wadankurru langkiya wilina baki kulaya.
HEB 4:13 Miku nangkiyi ngadijba nganinyi nanganbunanyi Kudnanyi. Baki miku nyuliyi ngadijba nangangi yaji nanganbunanyi. Najbangka bukamba yaji Kudwanyi. Jingkijbangka nyulu bukamba yaji. Nyulu jingkijbangka nanda jala ngambala yabimba. Nyulu jingkijbangka nanda jala ngambalaka mankumanku marda. Baki baku barri jalija nyulu bukamba yaji, baki janyulu karrinjarrijba bukambiju ngambalanya walu nangandu Kudwanyi. Barriwa.
HEB 4:14 Nanamukunyi Jumukunyi yalili yarrijba walkurra mambuka yalunginkanyi jurjkanyi. Ngala Jisus Krayis nyulu walkurra mambuka ngambalangi Krisjinmukuyngka. Nyulu walkurra mambuka jurjkanyi ngambalangi barri. Nyulu barrinani nanda walkurra mambuka jurjkanyi yalungi Jumukuyngka, ngala miku nyulimi jungku nayiba wayka jambana. Miku nyulimi walkurra mambuka jurjkanyi nayiba jambana. Miku barri. Ngala nyulu jungkuka kingkarri barri. Nyulu jungkuka kingkarri nangandu Kudnyina. Nanda mambuka jurjkanyi, nyulu walkurra nganinyi, ngala Jisus Krayis barri, nyulu mili walkurra nangangi. Nyulu mili walkurra nangangi, nyulungangi jandanyi nangangi Kudkanyi, baki nyulu jungkuka kingkarri nangandu barri. Baki nanankardi barri marda ngambalimi miku mamanumba nanda jangkurr nangangi Jisus Krayiskanyi. Marda ngambalimi kudanyu marrimba nangangi jangkurr yurrngumba barri. Ngambalaka nijarrijbangka Krisjinmuku, baki nanankardi barri marda ngambalimi kudanyu durrijba nangangi jangkurr. Marda ngambalimi yabimba nanda kunyba yaji, jali milidimba ngambalanya Jisus Krayiswanyi.
HEB 4:15 Wabula barri jali jungku Jisus Krayis wayka jambana, baki balanjayi Jisus Krayis Sayidinwanyi. Balanja nyuli Jisus Krayis, barrinani nyulu balanjaka ngambalanya nanijba barri. Balanja nyuli Jisus Krayis. Nulijba nyuli nangangi Jisus Krayiskanyi, nyulu yabimbikanyi balki yaji, ngala miku nyuliyanyi yabimba balki yaji Jisus Krayiswanyi. Miku nyuliyanyi durrijba jangkurr nangangi Sayidinkanyi, ngala nyuli jungku kunyba nangangi Kudkanyi yurrngumba barri. Baki nanankardi barri nyulu jingkijbangka ngambalanya, balanjaka ngambalanya marda Sayidinwanyi. Nyulu jingkijbangka ngambalanya, nulijbangka Sayidin ngambalangi, ngambala yabimbikanyi balki yaji. Nani barri nyulu jingkijbangka ngambalanya Jisus Krayiswanyi, miku ngambaliyi jungku ngiruka nangangi yurrngumba barri, baki ngindu nangka muwa ngambalangi. Baki nani barri nyulu nanda walkurra mambuka jurjkanyi ngambalangi. Nanda walkurra mambuka yalunginkanyi jurjkanyi Jumukuyngka, nyulu kandimbayi yalunya jali yalu kuyu barnyi nangandurri, nangangi Kudkanyi. Baki nani barri nyulu kandimbaka ngambalanya Jisus Krayiswanyi. Nyulu kandimbaka ngambalanya, jala ngambalanya balanjaka Sayidinwanyi. Ngala nyulu mili walkurra nanankanyi mambukanyi yalunginkanyi jurjkanyi Jumukuyngka. Jungkuyi nanda walkurra mambuka jurjkanyi wayka jambana, ngala nyulu jungkuka kingkarri nangandu Kudnyina nanda walkurra mambuka jurjkanyi ngambalangi barri.
HEB 4:16 Nanankardi barri marda ngambalimi miku marrala yanybikanyi mududu nangangi Kudkanyi. Ngala marda ngambalimi yanyba mududu nangangi. Marda ngambalimi ngajaka Kud, nyulu yabimbikanyi ngambalanya ngiruka, jala balanjaka ngambalanya Sayidinwanyi. Marda ngambalimi ngajaka Kud, nyulu yabimbikanyi ngambalanya ngiruka, mikungangi ngambaliyi ngiruka, barrinani nyulu jungkuka ngiruka Jisus Krayis. Miku ngambalimi ngiruka yabimbikanyi ngawamba kunyba yaji yurrngumba, barrinani nyulu yabimbayi kunyba yaji yurrngumba Jisus Krayiswanyi. Nani barri marda ngambalimi miku marrala yanybikanyi mududu nangangi Kudkanyi. Nyulu barri kunyba ngambalangi. Jaliyi ngambala ngajaka Kud, baki janyulu yabimba kunyba yaji ngambalangi, janyulu kandimba ngambalanya, jungunkanyi mili ngiruka baki mili ngiruka nangangi yurrngumba barri. Barriwa.
HEB 5:1 Jalili yarrijba buyingkinyi walkurra mambuka Kudwanyi, jalili nyulu yarrijba buyingkinyi walkurra mambuka yalunginkanyi jurjkanyi Jumukuyngka, bakili nyulu wudumba yingamali nganinyi yalungi. Nyulili yarrijba nanda nganinyi buyingkinyi walkurra mambuka jurjkanyi. Nanda walkurra mambuka jurjkanyi, janyulu waki nangangi Kudkanyi. Janyulu dikarrijba barnyi yalungi nangangi Kudkanyi, baki janyulu yanyba mududu nangangi Kudkanyi yalungi. Janyulu yanyba mududu nangangi Kudkanyi, jala yalu ngindu muwa yalunginkanyi balkinyi yajinyi. Nanamanji barri wabula wankalana jalili yalu ngindu muwa yalunginkanyi balkinyi yajinyi, baki miku yaliyanyi yanyba mududu nangangi Kudkanyi yaluman. Miku yaliyanyi ngajaka Kud, nyulu manjamanjambiji yalungi balki yaji. Miku. Ngala yalili jilajba nangandurri mambukarri jurjkanyi. Yalili kuyu barnyi nangandurri, bakili yalu ngajaka nanda walkurra mambuka, nyulu yanybiji mududu nangangi Kudkanyi yalungi, nyulu ngajakanyi Kud manjamanjambiji yalungi balki yaji. Nani barri yalili yabimba yaji nangangi Kudkanyi nanamanji barri, waluwa jungkuyi Jisus Krayis jambana, waluwa nangki janyba balkinyi yajinyi.
HEB 5:2 Bukambijunyi ngambala yabimbaka balki yaji, ngambala yabimbaka balki yaji kudiyana barri. Miku ngambaliyi jungku kunybana yuwana Kudkanyi yurrngumba barri. Baki nanda walkurra mambuka yalunginkanyi jurjkanyi, nyulu marda jungkuyi nani. Nyulu marda yabimbayi balki yaji kudiyana barri. Baki nanankardi barri nyulu jingkijbayi yalunya yingkamuku, miku yaliyanyi ngiruka yabimbikanyi ngawamba kunyba yaji yurrngumba barri, barrinani miku marda nyuliyanyi ngiruka yabimbikanyi ngawamba kunyba yaji yurrngumba barri. Kudiyana yalu yabimbayi balki yaji, barrinani kudiyana nyulu yabimbayi balki yaji. Baki nyuli kandimba yalunya, jali yalu kuyu barnyi nangandurri, nyulu waykanyi Kud. Miku nyuliyanyi ngirrwa yalungi, nanda walkurra mambuka jurjkanyi, ngala nyuli kandimba yalunya barri.
HEB 5:3 Nyuli wajba Kud yalunginkanyi barnyinyi. Nyuli dikarrijba nanda barnyi, ngala nyuli yanyba mududu nangangi Kudkanyi yalunginkanyi balkinyi yajinyi. Ngala kudiyana nyuli wajba Kud nanganginkanyi barnyinyi. Nyuli dikarrijba nanganginmirra barnyi, ngala nyuli yanyba mududu nangangi Kudkanyi nanganginkanyi balkinyi yajinyi. Nyuli nganinyi, barrinani yalu, baki nyuli wajba Kud barnyinyi nanganginkanyi balkinyi yajinyi marda. Barriwa.
HEB 5:4 Jalili yalu wudumba buyingkinyi walkurra mambuka yalunginkanyi jurjkanyi, baki miku nangkiyanyi yingamali walkurramba. Miku nangkiyanyi yarrijba walkurra mambuka jurjkanyi. Karukili yalunya Kudwanyi, bakili yalu yarrijba nanda nganinyi buyingkinyi walkurra mambuka yalungi. Miku nangkiyanyi nganinyi yarrijba walkurra mambuka, ngala karukili yalunya Kudwanyi. Barriwa. Nani barri nyuli yarrijba yaji wankalana Kudwanyi. Karu nyuli Musis, nanganginkanyi buwanganjanyi, niji Yaran. Karu nyuli Musis, nyuluja yarrijba nangangi buwanganja walkurra mambuka jurjkanyi. Barriwa.
HEB 5:5 Yanybayi Kud jangkurr yalungi nangangi Jisus Krayiskanyi, baki yali yarrijba nanda jangkurr najana Kudkanyi. Nayi barri yanybaka nanda jangkurr, “Ninji barri ngaki jandanyi. Ngayu nganyi nijanganjinyi.” Barriwa. Baki yingka jangkurr yanybayi Kud nanganginkanyi jandayngkanyi, “Jangayu yarrijba ninya walkurra mambuka yalungi, barrinani nanda wankalanyi walkurra mambuka jurjkanyi, niji nangangi Malkisadik, jali nyulu wankalanyi mungkiji nganyi. Jangayu yarrijba ninya walkurra mambuka jurjkanyi barrinani nyulu.” Barriwa. Nani barri yanybaka jangkurr najana Kudkanyi. Yarrijbayi nangangi jandanyi walkurra mambuka jurjkanyi Kudwanyi. Miku nangkiyanyi walkurramba Jisus Krayis. Miku nangkiyanyi yarrijba walkurra mambuka, ngala yarrijbayi Kudwanyi. Nanda wankalanyi walkurra mambuka jurjkanyi, niji Malkisadik, nyuli jirrinyi mambuka jurjkanyi nanamanji wankalana, jali jungku Yabrayam wanka jambana. Nyulu nanda walkurra mambuka jurjkanyi nanamanji barri. Baki yarrijbayi Jisus Krayis walkurra mambuka jurjkanyi Kudwanyi, barrinani nanda wankalanyi walkurra mambuka jurjkanyi niji Malkisadik. Nyulu yarrijbayi Jisus Krayis walkurra mambuka jurjkanyi barrinani nanda Malkisadik. Barriwa.
HEB 5:7 Jali jungku Jisus Krayis wayka jambana, baki miku nangkiyanyi walkurramba Jisus Krayis, nyulu jungunkanyi jirrinyi. Miku nangkiyanyi walkurramba, ngala nangki bayakardamba. Nyulu marukayi muwa nangangi Kudkanyi. Nani barri nyulu jungkuyi kunyba nangangi yurrngumba barri. Baki nyulu yanybayi mududu nangangi Kudkanyi yurrngumba barri. Mungana barri, jalija yalu munganawa kurdanba Jisus Krayis, baki jingkijbayi yalunya Jisus Krayiswanyi. Nyuli jingkijba yalunya, nulijba yali wudumbikanyi baki kurdanbikanyi. Ngala miku nyuliyanyi nulijba, nangka janybikanyi. Baki nyuli yanyba mududu nangangi Kudkanyi kudanyu barri. Ngajaka nyuli Kud, nyulu marrimbiji mardarda. Baki ngindu nangki muwa baki jirdi mirlarr, jali nyulu yanyba mududu nangangi Kudkanyi. Jingkijba nyuli Kud, nyulu ngiruka marrimbikanyi mardarda. Jaliyanyi nulijba Kud marrimbikanyi mardarda yalunbunanyi, baki yuku nyuliyanyi marrimba mardarda. Nanankardi barri ngajaka nyuli Kud, nyulu marrimbiji mardarda. Baki mankuyi nangangi jangkurr Kudwanyi, jungkungangi nyuli kunyba nangangi Kudkanyi. Nyuli manku nanda jangkurr jali ngajaka Jisus Krayiswanyi.
HEB 5:8 Jisus Krayis nyuli jandanyi nangangi Kudkanyi, ngala yingkamukunyi yali wajba kijinyi. Kudanyu yali linjumba Jisus Krayis. Ngala miku nyuliyanyi yurlwa nangangi Kudkanyi nanankanyi kijinyi, ngala yuwajiwa nyuli kuyu nangangi jangkurr Kudkanyi. Baki nanankardi barri ngambala jingkijba Jisus Krayis, yuwajiwa nyuli ngayangayijba nangangi Kudkanyi.
HEB 5:9 Ngala yali kurdanba Jisus Krayis. Munyajbayi yalunya kurdanbikurri Jisus Krayis Kudwanyi, janybangangi nangki Jisus Krayis ngamanginkanyi balkinyi yajinyi. Bukambijunyi ngambala barri, ngambala yabimbaka balki yaji, baki nanankardi barri marda ngambalakimi janyba. Ngala miku. Janyba nangki Jisus Krayis ngamanginkanyi balkinyi yajinyi, ngala mili wankambayi Jisus Krayis Kudwanyi. Mili wankijbayi Jisus Krayis, baki baku nyuli jungku kingkarri nangandu Kudnyina, nananyina jala jungku wirimalaru. Yi. Janyba nangki Jisus Krayis ngamanginkanyi balkinyi yajinyi, baki nanankardi barri nyulu marrimbaka ngambalanya mardarda Kudwanyi. Nyulu marrimbaka ngambalanya mardarda, jaliyi ngambala kuyu nangangi jangkurr, jaliyi ngambala ngayangayijba nanganginkanyi jangkurranyi. Janyulu marrimba ngambalanya mardarda, baki jangambala jungku mili wanka kingkarri nangandu, jalija ngambalaka janyba.
HEB 5:10 Karuyi Jisus Krayis Kudwanyi, nyuli yarrijba Jisus Krayis, walkurra mambuka jurjkanyi ngambalangi. Nyuli yarrijba Jisus Krayis, walkurra mambuka jurjkanyi, barrinani nanda wankalanyi walkurra mambuka jurjkanyi, niji Malkisadik. Barriwa.
HEB 5:11 Mili jangayu karu narrinya nangangi Jisus Krayiskanyi. Kajanyi jangkurranyi jangayu karu narrinya, ngala jayalu bijal jardibirri jangkurr narri jingkiykanyi. Jayalu bijal jardibirri jangkurr narri jingkiykanyi, mikungangi narrimi kunyba kulaji jingkiykanyi ngiruka yaji nangangi.
HEB 5:12 Narri mankuyi nanda kunyba jangkurr nangangi Jisus Krayiskanyi, ngala miku narrimi kudanyu jingkijba nanda jangkurr. Jingkijba narri ngawamba bijal jangkurr. Marda narrimi milidimbawarr nanankanyi jangkurranyi, ngala yuwajiwa narrinya milidimbaka yingkamukunyi. Ngawamba bijal narri jingkijbangka, baki nanankardi barri miku yaliyi milidimba narrinya ngirukanyi yajinyi nangangi Kudkanyi. Ngawamba narri jingkijbangka nanda waluwinyi jangkurr nangangi Jisus Krayiskanyi. Narri barrinani buyingkinyi bardarda jala ngaraba ngawamba ngamulu yurrngumba barri. Baki nanda waluwinyi jangkurr jala narri jingkijba, nanda barrinani nanda ngamulu jala ngaraba bardardawanyi. Ngala jalija nyulu ngaraba ngamulu yurrngumba bardardawanyi, baki janyulu jardijba mili ngiruka. Baki baku barri janyulu jardijba walkurra barri, baki janyulu jarrba barnyi. Narri barrinani nanda buyingkinyi bardarda, jala ngaraba ngawamba ngamulu. Narri jingkijbangka ngawamba nanda waluwinyi jangkurr nangangi Jisus Krayiskanyi. Miku narrimi jingkijba kudanyu yaji nangangi, ngawamba bijal yaji narri jingkijbangka nangangi. Nanda jala jingkijbangka ngawamba bijal yaji, miku nyulimi jingkijba wanyi yaji balki, baki wanyi yaji kunyba, nyulu yabimbikanyi. Baki miku nyulimi jingkijba jungunkanyi yurlurrmba nangangi Kudkanyi. Ngala jala nanda bardarda jardijba walkurra, baki nyulu jarrbangka barnyi marda. Baki nani marda nanda nganinyi jala nyulu jingkijbangka ngawamba nanda waluwinyi yaji nangangi Jisus Krayiskanyi. Jaliyi milidimba nanda nganinyi mili yajinyi yingkawanyi, jaliyi nyulu milidimba ngirukanyi yajinyi nangangi, baki janyulu jingkijba mili yaji nanangini nganinyiwanyi. Janyulu jingkijba mili ngiruka yaji nangangi Kudkanyi. Nanda ngiruka yaji nangangi Kudkanyi, nanda barrinani nanda barnyi jala jarrba nganinyiwanyi. Jingkijbangka ngiruka yaji nganinyiwanyi, baki nyulu jardijbangka barrinani walkurra nangangi Kudkanyi. Nyulu jungkuka ngiruka nangangi barri. Baki nyulu jingkijbangka, wanyi yaji balki, baki wanyi yaji kunyba, nyulu yabimbikanyi. Baki nyulu jingkijbangka jungunkanyi yurlurrmba nangangi Kudkanyi. Ngala narri barri barrinani nanda bardarda. Miku narrimi jingkijba ngiruka jangkurr nangangi Kudkanyi. Ngawamba nanda waluwinyi jangkurr narri jingkijba, baki nanankardi barri nayinda jangkurr bijal jardibirri narri jingkiykanyi. Barriwa.
HEB 6:1 Jali narri jalannga kuyu nanda jangkurr nangangi Jisus Krayiskanyi, baki nanda kunyba. Ngala marda narrimi jingkijba mili yaji nangangi. Marda narrimi jingkijba mili yaji, baki mili yaji nangangi yurrngumba barri. Marda narrimi manku mili jangkurr nangangi Jisus Krayiskanyi. Marda narrimi manku mili jangkurr yalungi milidimbawarrayngka, baki janarri jardijba mili ngiruka nangangi Jisus Krayiskanyi. Narri jingkijbangka, marda narringkimi miku mili yangkalamba nanankurri balkiyurri yajiyurri, jalili narri yabimba wabula.
HEB 6:2 Narri jingkijbangka nanda yaji jali yalu ngurrunba narrinya wabudana. Baki narri jingkijbangka jali yalungka yarrijba marni narrindu kulajina, minimbikanyi narrinya, jungkuka nanda Kunyba Ngarndu Kudkanyi narrindu kurduluna. Baki narri jingkijbangka, ngambala Krisjinmuku, jangambala mili wanka jungku kingkarri nangandu, jalija ngambalaka janyba. Baki mili narri jingkijbangka, jalija wijba Jisus Krayis wayka jambarri, baki janyulu karrinjarrijba yalunya bukambiju walu nangandu Kudwanyi, baki janyulu yanyba manjiykanyi yalunya. Janyulu yanyba manjiykanyi yalunya, kudiyanymuku kingkarri nangandurri Kudyurri, ngala kudiyanymuku wayka jangurri Yilyurri.
HEB 6:3 Narri jingkijbangka nanda yaji, ngala marda narrimi jingkijba mili yaji nangangi. Marda narrimi jingkijba mili yaji nangangi Kudkanyi. Jangayu milidimba narrinya mili yajinyi nangangi Kudkanyi, marda nangangi Jisus Krayiskanyi, marda nangangi Kunybanyi Ngarndunyi Kudkanyi. Ngayu ngajakangka Kud, jangana nyulu munyajba, ngayuja milidimba narrinya. Jangana munyajba milidimbikurri narrinya mili yajinyi yalungi.
HEB 6:4 Ngambala Krisjinmuku, ngambala yingijbayi nanda yuwa, jalili ngambala durrijba wabula. Ngambala yingijbayi nanda waluwinyi yuwa, ngala ngambala durrijbangka nanda buyingkinyi yuwa, jali minimba ngambalanya Kudwanyi. Nginduyi ngambala muwa ngamanginkanyi balkinyi yajinyi, baki manjamanjambayi nanda balki yaji Kudwanyi. Manjijba nyuli nangangi Kunyba Ngarndu ngamandurri, nyulu jungunkanyi ngamandu kurduluna. Nani barri ngambala Krisjinmuku jungku nanijba barri. Barriwa. Ngala kudiyanymuku barri, yabimbayi bukamba nanda yaji yalungi Kudwanyi, baki yalu durrijbayi nangangi jangkurr, ngala mili yalungki yangkalamba nanganbunanyi Kudnanyi. Yingijba yali nangangi yuwa, baki mili yalu durrijbangka nanda yalungi yuwa. Mili yalu durrijbangka nanda waluwinyi yuwa yalungi barri. Waluwa barri yali Krisjinmuku, yalu jingkijbayi nanda buyingkinyi jangkurr nangangi Jisus Krayiskanyi, yalu jingkijbayi nanda kunyba jangkurr, nanda duja jangkurr. Waluwa barri yalu jingkijbayi Kud, nyuli yabimba yalunya ngiruka, yalu yabimbikanyi kaja kunyba yaji. Yalu jingkijbayi Kud, nyulu yabimbayi bukamba nanda yaji yalungi, ngala yalungki mili yangkalamba nanganbunanyi. Yalungki mili yangkalamba nanganbunanyi Kudnanyi, marda nanganbunanyi Jisus Krayisnanyi, marda nanganbunanyi Kunybananyi Ngarndunanyi Kudkanyi. Nanda jala nangka mili yangkalamba nanganbunanyi Kudnanyi, baki mili nyulu durrijbangka Sayidin, baki nanda balkimirra nangangi. Nanda barrinani mili janyulu kurdanba jandanyi nangangi Kudkanyi nanangini barri. Barrinani janyulu mili ngarrkadaba Jisus Krayis kurndana, barrinani janyulu mili langandaba Jisus Krayis kurndana, baki jayalu ngirrikimba Jisus Krayis, jayalu kakalijba nangangi. Nanda jala mili nangka yangkalamba nanganbunanyi Kudnanyi nani barri, mikuwali yingkawanyi mili yangkalamba nanda nganinyi nangandurri Kudyurri. Mikuwali yingkawanyi yabimba nanda nganinyi, nyulu mili durriykanyi jangkurr nangangi Kudkanyi. Barriwa.
HEB 6:7 Mankumanku narringka nanginkanyi jangkurranyi. Yarrijbayi yami kunybana jambana nganinyiwanyi, baki manjijbayi janja Kudwanyi. Yirrbayi janja, baki jardijbayi nanda yami. Waluku jardijbayi wujurr bayakarda waykalinya, baki baku barri jardijbayi walkurra wanjirr mamayudi. Kunyba nanda mama yalu jarrkanyi barri. Manjijbayi janja Kudwanyi. Nyulu barri yabimbayi nanda yami jardiykanyi nyulu waykalinya walkurra. Nyulu yabimbayi yami jardiykanyi walkurra wanjirr mamayudi. Ngala yingka yaji nanda balki jamba. Manjijbayi janja Kudwanyi, ngala jardijbayi ngawamba nanda balki karnba nanaba, jala mikuyaji mamanyi nangandu. Baki yiningki jayalu bakarrijba nanda balki karnba. Yiningki yajbaja nanda karnba janguwanyi. Barriwa. Kudiyanymuku yalu barrinani nanda kunyba jamba, jala jardijba kunyba mama nangandu. Manjijbayi janja nanankurri Kudwanyi, baki jardijbayi kaja kunyba mama wanjirrina. Baki nani barri nyuli wajba yalunya nanganginkanyi kunybanyi jangkurranyi Kudwanyi. Nyuli wajba yalunya kunybanyi jangkurranyi, baki yali kuyu nanda jangkurr, baki yali yabimba kunyba yaji nangangi. Baki mirnarrijbayi Kud muwa yalungi, jali yalu yabimba kunyba yaji nangangi. Ngala kudiyanymuku, yalu barrinani nanda balki jamba, jali jardijba ngawamba balki karnba nanaba, mikuyaji mamanyi. Wajbayi yalunya nanganginkanyi kunybanyi jangkurranyi Kudwanyi, ngala yali yurlwa nanankanyi jangkurranyi. Miku yaliyanyi yabimba kunyba yaji nangangi Kudkanyi. Nani barri yalu barrinani nanda balki karnba jala mikuyaji mamanyi nangandu. Yali yabimba balki yaji yalungi yingkamukuyngka, baki nanankardi barri nyuli ngarrangarra muwa yalungi Kud. Yiningki jayalunya manjijba wayka jangurri Yilyurri. Barriwa.
HEB 6:9 Ngala narri barri ngakinmuku mungkijimuku, nurru jingkijbangka narrinya, miku narrimi barrinani nanda balki karnba, ngala narri barrinani nanda kunyba wanjirr jirdi kajanyi mamanyi. Baki nurru jingkijbangka Kud, janyulu yabimba kunyba yaji narringi, janyulu marrimba narrinya mardarda.
HEB 6:10 Kud, nyulu kunyba barri. Jaliyi narri jungku yurlurrmba nangangi, baki janyulu yabimba kunyba yaji narringi. Miku nyuliyi mamanumba narrinya nanankanyi jali narri yabimba. Narri marukayi muwa nangangi Kudkanyi, baki nanankardi barri narri marukayi muwa yalungi yingkamukuyngka, baki narri yabimbayi kunyba yaji yalungi barri. Miku nyuliyi mamanumba nanda kunyba yaji, jali narri yabimba yalungi, yingkamukuyngka Krisjinmukuyngka. Yuwajiwa narri yabimbaka kunyba yaji yalungi yurrngumba barri, baki yuwajiwa janyulu yabimba kunyba yaji narringi barri.
HEB 6:11 Nurru nulijbangka narringi, miku narringkiyi kurrkunba, jala narri yabimba kunyba yaji. Nurru nulijbangka narringi, yuwajiwa narri yabimbikanyi kunyba yaji. Kudanyu nurru nulijbangka narringi, narri yabimbikanyi mili kunyba yaji yurrngumba barri. Baki jaliyi narri jungku kunyba nangangi Kudkanyi nani barri, baki narri jingkijba yaji, janarri jungku nangandu Jisus Krayisnyina, jalija nyulu wijba.
HEB 6:12 Miku nurrimi nulijba narringi, narri bunmaliykanyi kurdulu nangangi Kudkanyi. Ngala nurru nulijbangka narringi, narri jungunkanyi mili yurlurrmba nangangi Kudkanyi. Nurru nulijbangka narringi, narri mili marukankanyi muwa yalungi, narri yabimbikanyi mili kunyba yaji yalungi barri. Marda narrimi barrinani nanamuku wankalamuku jalili yalu kuyu nangangi jangkurr yalunginyina kurduluna. Kudanyu yalili yabimba kunyba yaji yalungi yingkamukuyngka, ngala yalili yukumba nangangi Kudkanyi. Yalili yukumba nangangi Kudkanyi, nyulu yabimbikanyi nanda jali nyulu yanyba, janyulu yabimba. Baki nani barri, marda narrimi miku bunmalijba kurdulu, ngala marda narrimi kudanyu marrimba nangangi jangkurr narringinyina kurduluna. Jaliyi narri jungku nani barri, baki janarri baku jungku kingkarri nangandu Kudnyina. Barriwa.
HEB 6:13 Kud, nyulu wirimalaru bukambijuyngka wandijiyana. Mikuyaji yingkanyi walkurra barrinani nyulu. Mikuyaji yingkanyi jirrinyi barrinani nyulu. Jala yanybaka Kud jangkurr miku nangkiyi yangkalambikanyi, baki ngambala jingkijba Kud, janyulu yabimba nanda jali nyulu yanyba, janyulu yabimba. Yanybayi Kud nangangi, nanankanyi wankalanyi niji Yabrayam. Yanyba nyuli nayinda jangkurr nangangi, miku nangkiyi yangkalambikanyi. Yanybayi Kud, “Ngayu karungka ninya nanginkanyi jangkurranyi, miku yangkalambikanyi ngaka. Jangayu yabimba kunyba yaji nganyi. Janinji wudumba murimurimba ninji. Jayalu kudukudumuku juju barri bayngkani nganyindu.” Barriwa. Nani barri yanybayi Kud nangangi Yabrayamkanyi. Baki kuyuyi nanda jangkurr Yabrayamwanyi. Jingkijba nyuli Kud, janyulu yabimba nanda jali nyulu yanyba. Nanda Yabrayam, mikuyaji nyuli jandayngkanyi nanamanji barri, baki yukumba nyuli yurrngumba barri nanganginkanyi jandayngkanyi. Ngala miku nyuliyanyi balkijba muwa, jingkijbangangi nyuli Kud, janyulu yabimba nanda jala nyulu yanyba, janyulu yabimba. Jingkijbayi Yabrayamwanyi, baku barri janyulu wudumba jandanyi, baki janyulu wudumba murimurimba nyulu juju barri bayngkani nangandu. Baki wakara barri. Wudumbayi jandanyi Yabrayamwanyi juju barri baku. Jalili yanyba nganinyi jangkurr, miku nangkiyi yangkalambikanyi, baki yiningki nyulu yanybaka nayi barri, “Jangayu yabimba nayinda yaji nganyi. Ngayu yanybaka nayinda jangkurr nganyi, baki ngayu ngajakangka ngaki mambuka, nyulu mankunki nayinda ngaki jangkurr. Jangayu yabimba nayinda yaji nganyi.” Barriwa. Nani barri jalili yingka yanyba jangkurr yingkanyi, miku nangki yangkalambikanyi, baki nyulu ngajaka yingka mankunkanyi nanda jangkurr. Nyulili ngajaka yingka, jala mili walkurra bulangi, nyulu mankunkanyi nanda jangkurr bulangi, baki miku bulangkiyi baku jakakajba nanankanyi jangkurranyi. Mankuyi nanda jangkurr mambukawanyi, baki miku nyuliyi barlba nanankardi. Janyulu yabimba nanda yaji nanankanyi nganiyngkanyi. Ngala Kud, nyulu walkurra, wirimalaru, mikuyaji yingkanyi mili walkurra nangandu. Baki nanankardi barri miku nyuliyi ngajaka yingka mankunkanyi nangangi jangkurr, jala nyulu yanyba jangkurr, miku nangkiyi yangkalambikanyi. Miku nyuliyi ngajaka yingka mankunkanyi nangangi jangkurr, mikungangi yingka mili walkurra nangandu. Ngala jali nyulu yanyba jangkurr ngambalangi, baki nyuli nulijba ngambalangi jingkiykanyi Kud. Nyuli nulijba ngambalangi jingkiykanyi Kud, janyulu yabimba nanda jali nyulu yanyba janyulu yabimba, baki yanybayi Kud nayi barri, “Kudanyu ninga karungka nanginkanyi jangkurranyi, jangayu yabimba nanda yaji nganyi.” Nani barri yanybayi Kud, baki ngambala jingkijba, yuku ngambala kuyu nanda jangkurr jali yanyba Kud, dujangangi nanda jangkurr nangangi Kudkanyi. Mikuwali jujamba yaji Kudwanyi. Janyulu yabimba nanda jali nyulu yanyba, janyulu yabimba.
HEB 6:18 Baki nanankardi barri ngambala jingkijbangka nayi. Mikuwali jujamba yaji Kudwanyi. Yurrngumba nangangi jangkurr duja barri. Baki mili barri ngambala jingkijbangka Kud, duja barri nangangi jangkurr, mikuwalingangi yangkalamba nanda jangkurr Kudwanyi. Barriwa. Yanybayi Kud jangkurr miku nangkiyi yangkalambikanyi, janyulu marrimba ngambalanya mardarda. Janyulu marrimba ngambalanya mardarda, jaliyi ngambala jungku yurlurrmba nangangi. Baki ngambala jingkijbangka, duja nanda jangkurr, yanybangangi Kud duja jangkurr yurrngumba barri. Baki nanankardi barri ngambala mirnarrijbangka muwa, jingkijbangkangangi ngambala Kud, janyulu marrimba ngambalanya mardarda, baki baku jangambala jungku kingkarri nangandu yurrngumba barri. Barriwa.
HEB 6:19 Mankumanku narringka muwardanyi kanjana. Kijijba yalu dungala ngirukana kurulina, baki janyba yalu dungala wayka wabudarri. Jungkuka nanda dungala wayka jambana kalawuyngkurru wabudana, baki miku nangkiyi ngirringirrimba nanda muwarda. Marrimbaka nanda muwarda mardarda dungalawanyi kurulyudinyi. Kud, nyulu barrinani nanda dungala jala marrimbaka muwarda mardarda, baki nangangi jangkurr barrinani nanda kurul. Baki ngambala Krisjinmuku jala kudanyu durrijba nangangi jangkurr, ngambala barrinani nanda muwarda. Jala ngambala kudanyu marrimba nangangi jangkurr, jala ngambala kudanyu ngayangayijba nanganginkanyi jangkurranyi, baki nyulu marrimbaka ngambalanya mardarda Kudwanyi, barrinani marrimbaka muwarda mardarda dungalawanyi kurulyudinyi. Baki ngambala jingkijbangka Kud, nyulu marrimbaka ngambalanya mardarda, baki miku ngambalakiyi ngirringirrimba nanganbunanyi. Baki baku barri jangambala jungku kingkarri nangandu yurrngumba barri.
HEB 6:20 Janyba nangki Jisus Krayis kurndana, baki mili wankijba nyuli. Kirrijba nyuli kingkarri nangandurri Kudyurri waluwa ngambalangi. Nyulu jungkuka nangandu Kudnyina, baki nyulu yanybaka mududu Kudkanyi ngambalangi barri. Nyulu yarrijbayi Jisus Krayis walkurra mambuka jurjkanyi ngambalangi Kudwanyi. Yurrngumba nyulu walkurra mambuka jurjkanyi ngambalangi. Nyulu barrinani nanda wankalanyi walkurra mambuka jurjkanyi, niji Malkisadik, jali nyulu yanyba mududu nangangi Kudkanyi yalungi wankalamukuyngka. Nyulu yabimbaka nanamannga yaji Jisus Krayiswanyi, barrinani yabimbayi Malkisadikwanyi. Nanda Malkisadik nyuli barrinani wankalanyi mungkiji nangangi Jisus Krayiskanyi. Jisus Krayis nyulu nanda walkurra mambuka jurjkanyi ngambalangi. Nyulu jungkuka kingkarri nangandu Kudnyina, baki nyulu yanybaka mududu nangangi Kudkanyi ngambalangi barri. Barriwa.
HEB 7:1 Wankalana barri nanda malbu Yabrayam jungku nyuli nananyina walkurranyina yajina niji Kayinan. Ngala ngurranyimuku yalili jungku lukuluku nangandu. Kujarra baki kujarra mambukamuku yalungi baki yalunginmuku ngarrkadabawarrmuku, yali badajba nanankurri yajiyurri Kayinanyurri. Badajba yali, dabanki yalunya mungkijimuku nanankanyi yajinyi. Ngala badajbayi Yabrayam, baki nanganginmuku ngarrkadabawarrmuku baki yalunjali daba. Yalunjali daba wakara barri, baki wakarambayi yalunya Yabrayamwanyi. Baki wudumba nyuli kaja yaji yalunbunanyi. Jali wijba Yabrayam, baki jilajbayi nanda walkurra mambuka Malkisadik nangandurri. Nanda Malkisadik nyuli mambuka nanankanyi yajinyi niji Salim, baki nyuli walkurra mambuka nanganginkanyi jurjkanyi Kudkanyi, nanankanyi jali nyulu wirimalaru. Jilajbayi nanda mambuka nangandurri Yabrayamyurri, baki nyuli yanyba mududu nangangi Kudkanyi nangangi Yabrayamkanyi. Nyuli ngajaka Kud, nyulu yabimbiji kunyba yaji nangangi Yabrayamkanyi.
HEB 7:2 Baki Yabrayamwanyi nyuli wajba nanda walkurra mambuka yajinyi. Wajba nyuli nanda mambuka kudiyayngka nanankanyi yajinyi, jali nyulu dulaba yalunbunanyi, jali nyulu daba yalunya wakara. Nanda niji Malkisadik, nanda Ju yanyi, barrinani “Mambuka jungunkanyi yurlurrmba nangangi Kudkanyi.” Baki nanda Malkisadik, nyuli mambuka nanankanyi yajinyi niji Salim. Baki nanda niji Salim, nanda Ju yanyi barrinani “Jungunkanyi nyulu mardumardu muwa.” Nanankardi barri ngambala jingkijba nanda Malkisadik, nyulu mambuka jungunkanyi yurlurrmba nangangi Kudkanyi, baki nyulu mambuka jungunkanyi mardumardu muwa nangangi Kudkanyi. Barriwa.
HEB 7:3 Ngala wanyi nanda wankalanyi walkurra mambuka jurjkanyi, nanda Malkisadik. Wanyi nyuli. Mikukimi karu ngambalanya jangkurrwanyi najana Kudkanyi. Mikukimi karu ngambalanya kajanyi yajinyi nangangi. Mikukimi karu ngambalanya nanganginkanyi nijanganjiyngka, baki nanganginkanyi yarrijiyngkanyi. Baki mikukimi karu ngambalanya nanganginkanyi murimuringanjanyi baki nanganginkanyi miminganjanyi. Baki mikukimi karu ngambalanya nanangini jangkurrwanyi nangka janybikanyi. Ngawamba ngambala jingkijba yaji nangangi, nyulu jungunkanyi walkurra mambuka jurjkanyi nanamanji wankalana. Miku ngambalimi jingkijba, nangka janybikanyi. Baki nanda barrinani nyulu walkurra mambuka jurjkanyi yurrngumba barri. Baki nani barri nyulu barrinani Jisus Krayis, nanda jandanyi nangangi Kudkanyi, jala nyulu walkurra mambuka jurjkanyi ngambalangi yurrngumba barri.
HEB 7:4 Nayi barri narri jingkijbangka, nanda Malkisadik, nyuli walkurramirra mambuka. Nanangini Yabrayamwanyi, nyuli wajba Malkisadik kudiyayngka nanankanyi yajinyi jali nyulu wudumba nanda yaji yalunbunanyi ngurranyimukunanyi. Nyuli wajba Malkisadik kudiyayngka nanankanyi yajinyi, nyulungangi Malkisadik mili walkurra nangangi Yabrayamkanyi. Barriwa.
HEB 7:5 Juju barri bayngkani nangandu yarrijbayi Kudwanyi mambukamuku jurjkanyi yalungi Jumukuyngka. Yalunjalili nijarrijba nanamuku mambukamuku jurjkanyi “Libayimuku”, nyulungangi Libayi yalungi wankalanyi murimuringanja. Ngawamba yalu Libayimuku mambukamuku yalunginkanyi jurjkanyi yurrngumba barri nanginkurri nanijba barri. Nanamuku mungkijimuku, jali Libayi yalungi wankalanyi murimuringanja, ngawamba yali mambukamuku jurjkanyi yalungi Jumukuyngka. Barriwa. Nanamukunyi Jumukunyi yalili durrijba nanda waluwinyi yuwa jali wajba yalunya Musiswanyi. Nanda waluwinyi yuwa yanybayi, yalu waykanyi mambukamuku jurjkanyi yajinyi. Jayalu wajba mambukamuku jurjkanyi kudiyayngka yalunginkanyi yajinyi. Jalili yalu wudumba 10 dula, bakili yalu wajba mambukamuku jurjkanyi yingamali dula. Jalili yalu wudumba 10 jib, bakili yalu wajba mambukamuku jurjkanyi yingamali jib. Nani barri yalunjalili wajba mambukamuku jurjkanyi yajinyi. Bukamba nanamuku mambukamuku jurjkanyi, yalu barrinani murimurimba nyulu yalunya Yabrayamwanyi juju barri bayngkani nangandu. Nyulu nanda wankalanyi murimuringanja bukambijuyngka yalungi.
HEB 7:6 Yingkamukunyi yalunjalili wajba mambukamuku jurjkanyi kudiyayngka yajinyi barrinani wajbayi Malkisadik kudiyayngka yajinyi Yabrayamwanyi. Nanda Malkisadik, miku nyuli Libayi, ngala wajbayi Malkisadik yajinyi Yabrayamwanyi, nanankanyi yajinyi jali nyulu wudumba yalunbunanyi ngurranyimukunanyi. Wajbayi Malkisadik yajinyi Yabrayamwanyi, baki yanybayi Malkisadik mududu nangangi Kudkanyi nangangi Yabrayamkanyi. Ngajaka nyuli Kud, nyulu yabimbiji kunyba yaji nangangi Yabrayamkanyi. Yabrayam, nyuli walkurra nganinyi nangangi Kudkanyi, jali yanyba Kud jangkurr nangangi miku nangkiyi yangkalamba. Nani barri Yabrayam nyuli walkurra nganinyi nangangi Kudkanyi, ngala yanybayi Malkisadik mududu nangangi Kudkanyi nangangi Yabrayamkanyi.
HEB 7:7 Baki ngambala jingkijba, nanda jala yanybaka mududu nangangi Kudkanyi yingkanyi, nanda jala ngajakangka Kud, nyulu yabimbiji kunyba yaji nanankanyi yingkanyi, nyulu mili walkurra nanankanyi yingkanyi. Nyulu mili walkurra nanankanyi yingkanyi. Yanybayi Malkisadik mududu nangangi Kudkanyi nangangi Yabrayamkanyi. Ngajaka nyuli Kud, nyulu yabimbiji kunyba yaji nangangi Yabrayamkanyi, baki nani barri Malkisadik nyulu mili walkurra nangangi Yabrayamkanyi. Nyulu mili walkurra nangangi.
HEB 7:8 Nanamuku jalili yalu yurrngumba mambukamuku yalunginkanyi jurjkanyi Jumukuyngka, yali mungkijimuku, baki yali murimurimba nyulu yalunya Libayiwanyi bayngkani nangandu, nanda jali waluwinyi walkurra mambuka jurjkanyi yalungi Jumukuyngka. Ngala Libayi nyuli murimurimba nyulu Yabrayamwanyi. Nani barri Yabrayam nyuli wankalanyi murimuringanja bukambiju yalungi jalili yalu mambukamuku yalunginkanyi jurjkanyi Jumukuyngka, jalili yalu juju barri bayngkani nangandu Yabrayamnyina. Yingkamukunyi yalunjalili wajba mambuku jurjkanyi kudiyayngka yalunginkanyi yajinyi, barrinani wajbayi Malkisadik kudiyayngka yajinyi Yabrayamwanyi. Ngala nanda barrinani nanamuku mambukamuku jurjkanyi, barrinani yalu wajbayi Malkisadik yajinyi nanamanji barri, ngala yali jilijbawa yajinyi. Mikuyaji yalungi nanamanji jali wajba Malkisadik yajinyi Yabrayamwanyi, ngala nanda barrinani yalu marda wajbayi Malkisadik yajinyi, nyulungangi Yabrayam wankalanyi murimuringanja yalungi. Barriwa. Yalunjalili wajba mambukamuku jurjkanyi yajinyi, ngala nanda mambuka jurjkanyi ngawamba nyuli mambuka jurjkanyi murrkananyi, baki nangki janyba, baki yingka yali yarrijba mambuka jurjkanyi bayngkani nangandu. Nani barri nanamuku mambukamuku jurjkanyi, niji yalungi Libayimuku, yali nganinyimuku barrinani ngambala. Jalili yalu malbungujba mankanyi, bakili yalungka janyba. Ngala nanda Malkisadik, jali wajba yajinyi Yabrayamwanyi, mikukimi ngambalanya karu nangka janybikanyi jangkurrwanyi. Mikukimi ngambalanya karu nangangi Malkisadikanyi nangka janybikanyi jangkurrwanyi najana nangangi Kudkanyi. Barriwa.
HEB 7:11 Nanda yuwa jali wajba Musis Kudwanyi, nanda yuwa yarriykanyi mambukamuku jurjkanyi, nanda jirrinyi yuwa. Baki nanda Yarun nyuli waluwinyi walkurra mambuka yalunginkanyi jurjkanyi Jumukuyngka. Nanda Yarun nyuli murimurimba nyuli Libayiwanyi juju barri bayngkani nangandu. Nanda Yarun nyuli waluwinyi walkurra mambuka yalunginkanyi jurjkanyi, baki yingkamuku nanganginmuku murimurimba nyulu yalunya, yalu mambukamuku bayngkani nangandu. Nyulu Yarun wankalanyi murimuringanja yalungi. Yalu wakiyi nangangi Kudkanyi. Yalu yabimbayi nanda jala yalunya karu nanangini yuwawanyi Musiskanyi, ngala miku yalunjaliyi marrimba mardarda. Miku yalunjaliyi marrimba mardarda nanamuku Jumuku, mambukamukunyi jurjkanyi. Jalili yalu durrijba nanda yuwa nangangi Musiskanyi, baki mikuwali nanangini yuwawanyi kuyu yalunya kingkarri nangandu Kudyurri. Yi. Mikuwali marrimba yalunya mardarda mambukamukunyi jurjkanyi. Baki nanankardi barri manjijbayi yingka walkurra mambuka jurjkanyi Kudwanyi. Ngala miku nyulu walkurra mambuka jurjkanyi barrinani nanda Yarun, nanda waluwinyi walkurra mambuka yalunginkanyi jurjkanyi Jumukuyngka, jala durrijba yuwa nangangi Musiskanyi. Miku nyulu walkurra mambuka jurjkanyi barrinani nyulu, ngala nyulu walkurra mambuka jurjkanyi barrinani nanda wankalanyi walkurra mambuka jurjkanyi. Nyulu walkurra mambuka jurjkanyi barrinani nanda Malkisadik. Manjijbayi nangangi jandanyi Jisus Krayis Kudwanyi, baki yarrijba nyuli Jisus Krayis walkurra mambuka jurjkanyi ngambalangi, barrinani Malkisadik. Baki ngambala jingkijba barri, ngambalangi mambuka Jisus Krayis, miku nyulu mungkiji yalungi Libayimukuyngka. Mikukiyanyi Libayi wankalanyi murimuringanja nangangi Jisus Krayiskanyi. Ngala nanda yingka wankalanyi niji nangangi Juda, jali kanyiya nangangi Libayikanyi, nyuli wankalanyi murimuringanja nangangi Jisus Krayiskanyi. Nyuli mungkiji yalungi Judamukuyngka. Ngala miku yalimi Judamuku mambukamuku jurjkanyi. Miku nanda yalungi yaji. Ngawamba yalu Libayimuku, ngawamba yalu mambukamuku jurjkanyi. Jali wajba yalunya yuwanyi Musiswanyi, baki miku nyuliyanyi yanyba yalungi Judamukuyngka, yalu mambukamuku jurjkanyi. Ngawamba nyuli yanyba yalungi Libayimukuyngka, yalu mambukamuku jurjkanyi. Ngala miku nyuliyi Jisus Krayis mambuka jurjkanyi barrinani nanamuku Libayimuku. Yinini mambuka jurjkanyi nyulu. Nani barri wajbayi ngambalanya yinini walkurrayngka mambukanyi jurjkanyi Kudwanyi, baki nani barri nyuli wajba ngambalanya yinini yinini yuwanyi marda Kudwanyi. Wajbayi ngambalanya yinini yinini yuwanyi, jali nyulu yarrijba Jisus Krayis walkurra mambuka jurjkanyi ngambalangi. Barriwa.
HEB 7:15 Ngambala jingkijbangka barri, manjijbayi Jisus Krayis Kudwanyi. Yarrijba nyuli Jisus Krayis walkurra mambuka jurjkanyi, barrinani nanda wankalanyi walkurra mambuka jurjkanyi Malkisadik.
HEB 7:16 Nanda yingka waluwinyi mambuka yalunginkanyi jurjkanyi Jumukuyngka, nangangi niji Yarun. Baki nanganginmuku jandanyimuku, marda murimurimba nyulu yalunya, yalu marda mambukamuku jurjkanyi. Yali Libayimuku. Ngala yalungki janyba, yingka, baki baku yingka, baki baku yingka. Ngala bukambayi nanda yuwa Kudwanyi, yarriykanyi mambukamuku jurjkanyi. Bukamba nyuli nanda yuwa, baki yarrijba nyuli Jisus Krayis. Yarrijba nyuli Jisus Krayis walkurra mambuka jurjkanyi ngambalangi Kudwanyi. Baki nyulu jungkuka wanka yurrngumba barri nangandu Kudnyina. Miku nangkiyi janyba, ngala yurrngumba nyuluja wanka jungku.
HEB 7:17 Nanda jangkurr najana Kudkanyi yanybaka nangangi Jisus Krayiskanyi. Nayinda barri yanybaka jangkurr, “Janinji walkurra mambuka jurjkanyi barrinani nanda yingka walkurra mambuka jurjkanyi, niji Malkisadik. Nyulu barrinani wankalanyi mungkiji nganyi. Janinji walkurra mambuka jurjkanyi yurrngumba barri.” Duja barri nanda jangkurr najana Kudkanyi. Barriwa.
HEB 7:18 Wajbayi Musis nanankanyi yuwanyi Kudwanyi, ngala miku nanda yuwa ngiruka marrimbikanyi yalunya mardarda. Miku nanda yuwa ngiruka yabimbikanyi yalunya jungunkanyi mili wanka nangandu Kudnyina. Baki nanankardi barri manjijbayi nangangi jandanyi Kudwanyi, baki nyuli wajba ngambalanya buyingkiyngkanyi yuwanyi. Jaliyi ngambala kuyu nanda buyingkinyi yuwa, baki ngambala jingkijba Kud. Ngambala jingkijba Kud, jangambala jungku kandi nangangi Kudkanyi, janyulu marrimba ngambalanya mardarda, baki jangambala jungku mili wanka nangandu yurrngumba barri.
HEB 7:20 Baki yanybayi Kud yingka jangkurr, miku nangkiyi yangkalamba, baki nanda jangkurr najana Kudkanyi. Nayi barri nanda jangkurr najana Kudkanyi, “Yanybaka Kud jangkurr, miku nangkiyi yangkalamba. Yanybaka Kud nanganginkanyi jandayngkanyi Jisus Krayiskanyi, ‘Janinji walkurra mambuka jurjkanyi yalungi yurrngumba barri. Mikuyaji yingkanyi janyulu walkurra mambuka jurjkanyi bayngkani nganyindu. Ngawamba ninji walkurra mambuka jurjkanyi yurrngumba barri.’” Nanda jangkurr jali yanyba Kud nangangi Jisus Krayiskanyi, nanda kunybamirra jangkurr. Nanda jangkurr mili kunyba nanankanyi waluwiyngkanyi jangkurranyi. Nanda jangkurr mili kunyba nanankanyi waluwiyngkanyi jangkurranyi, yarriykanyi mambukamuku jurjkanyi. Barriwa. Yanybayi Kud nanda jangkurr nangangi Jisus Krayiskanyi. Baki nanankardi barri ngambala jingkijbangka Jisus Krayis, nyulu mili walkurra nanamukuyngka wankalamukuyngka mambukamukuyngka jurjkanyi. Nyulu mili walkurra yalungi. Barriwa.
HEB 7:23 Nanamuku wankalamuku mambukamuku jurjkanyi, nanamuku Libayimuku, kaja barri yalu. Miku yaliyanyi waki nangangi Kudkanyi yurrngumba, janybangangi yalungkili. Jalili yalungka janyba, baki yingkamuku bayngkani yalundu, yalili barri mambukamuku jurjkanyi, yalili waki nangangi Kudkanyi jurjina. Nani barri kajamuku yalili mambukamuku yalunginkanyi jurjkanyi Jumukuyngka.
HEB 7:24 Ngala Jisus Krayis barri, miku nangkiyi mili janyba. Nyulu jungkuka wanka yurrngumba barri, baki nyulu walkurra mambuka jurjkanyi ngambalangi yurrngumba barri. Mikuyaji yingkanyi walkurra mambuka jurjkanyi bayngkani nangandu. Baki nyulu wakingka nangangi Kudkanyi yurrngumba barri, mikungangi nangkiyi mili janyba.
HEB 7:25 Baki nanankardi barri, jala nganinyi kudanyu nulijbangka durriykanyi jangkurranyi nangangi Kudkanyi yurrngumba barri, baki yanybaka Jisus Krayis mududu nangangi Kudkanyi nanankanyi nganiyngkanyi. Nyulu ngajakangka Kud, nyulu manjamanjambiji nangangi balki yaji. Nani barri nyulu ngajakangka Kud nangangi, jungkungangi nyulu wanka yurrngumba nangandu Kudnyina. Nyulu jungkuka wanka nangandu Kudnyina yurrngumba, baki nyulu ngajakangka Kud yajinyi ngambalangi barri. Barriwa.
HEB 7:26 Ngambala jingkijbangka Jisus Krayis, nyulu walkurra mambuka jurjkanyi ngambalangi. Nyulu lalanbaka ngambalanya. Nyulu ngajakangka Kud ngambalangi, nyulu manjamanjambiji ngambalangi balki yaji Kudwanyi. Baki jangambala baku jungku mili wanka nangandu, nyulungangi walkurra mambuka jurjkanyi ngambalangi. Nyulu kudukudu nangangi Kudkanyi. Jali nyulu jungku wayka jambana, baki miku nyuliyanyi yabimba balki yaji. Miku yingamali balki yaji nyuliyanyi yabimba. Nanankardi barri nyulu kudukudu nangangi Kudkanyi, baki nyulu jungkuka nangandu Kudnyina yurrngumba barri.
HEB 7:27 Nanamuku walkurramuku mambukamuku yalunginkanyi jurjkanyi Jumukuyngka, yali nganinyimuku barrinani ngambala. Baki yali yabimba balki yaji barrinani ngambala yabimbaka balki yaji. Nanankardi barri nanda walkurra mambuka yalunginkanyi jurjkanyi, waluku nyuli wajba Kud barnyinyi nanganginkanyi balkinyi yajinyi, baki bayngkani nyuli wajba Kud barnyinyi yalunginkanyi balkinyi yajinyi, nanganginmukuyngka mungkijimukuyngka. Nani barri nyulili yabimba yaji yingkana kambana baki yingkana kambana. Yurrngumba barri nyulili waluku wajba Kud barnyinyi nanganginkanyi balkinyi yajinyi, baki bayngkani barri nyulili wajba Kud barnyinyi yalunginkanyi balkinyi yajinyi. Nyulili wajba Kud barnyinyi. Nyulili kurdanba nanda yaji, bakili nyulu dikarrijba nanda yaji nangangi Kudkanyi. Ngala mikukiyanyi yabimba balki yaji Jisus Krayiswanyi. Miku nyuliyanyi wajba Kud yajinyi nanganginkanyi balkinyi yajinyi, ngala nyuli wajba Kud yajinyi ngamanginkanyi balkinyi yajinyi. Ngala miku nyuliyanyi wajba Kud barnyinyi, ngala wajbayi Kud nanganginkanyi mankankanyi. Nyulu barrinani nanda barnyi jalili yalu wajba Kud. Nanamukunyi yingkamukunyi mambukamukunyi jurjkanyi, yalili wajba Kud barnyinyi balkinyi yajinyi, yingkana kambana baki yingkana kambana yurrngumba barri. Ngala wajbayi Kud nanganginkanyi mankankanyi Jisus Krayiswanyi, ngawamba barndaykamba. Janyba nangki Jisus Krayis barndaykamba bukambijuyngka yalunginkanyi balkinyi yajinyi wandijiyana. Janyba nangki yalungi, nanamukuyngka jalili yalu jungku wanka wabula barri, baki nanamukuyngka jala yalu jungku wanka nanijba barri, baki nanamukuyngka jalija yalu jungku wanka baku barri. Miku nangkiyi mili janyba Jisus Krayis yalunginkanyi balkinyi yajinyi. Ngawamba barndaykamba.
HEB 7:28 Nanda yuwa nangangi Musiskanyi yanybayi yarriykanyi yalunya mambukamuku jurjkanyi, baki yabimba yali nanda yaji. Yarrijba yalili nganinyimuku, mambukamuku yalunginkanyi jurjkanyi Jumukuyngka. Ngala nanijba barri nyulu yarrijbayi nangangi jandanyi walkurra mambuka jurjkanyi Kudwanyi. Yanybayi Kud ngiruka jangkurr, miku nangkiyi yangkalamba. Yanybayi Kud, janyulu yarrijba nangangi jandanyi, walkurra mambuka jurjkanyi. Baki yarrijba nyuli nangangi jandanyi walkurra mambuka jurjkanyi. Yalili yarrijba nganinyimuku, walkurra mambuka jurjkanyi ngala miku yaliyi jungku kunyba nangangi Kudkanyi yurrngumba barri. Kudiyana yalili barimba yaji nangangi Kudkanyi nanamukunyi mambukamukunyi jurjkanyi. Ngala miku nyuliyanyi barimba yaji nangangi Kudkanyi Jisus Krayiswanyi. Jungku nyuli kunyba nangangi Kudkanyi yurrngumba barri. Nyulu kunybamirra walkurra mambuka jurjkanyi ngambalangi yurrngumba barri. Barriwa.
HEB 8:1 Nurru karungka narrinya nanginkanyi duja jangkurranyi. Jisus Krayis, nyulu nanda walkurra mambuka jurjkanyi ngambalangi. Nyulu jungkuka kingkarri nangandu Kudnyina, ngamanginyina Buwakayu. Nyulu wirimalaru bayngkani nangandu Kudnyina. Nyulu jungkuka kingkarri nananyina malabana yajina lalijina. Nyulu walkurra mambuka jurjkanyi, ngala miku nyulimi jungku jurjina, nayiba wayka jambana. Miku nyulimi waki nangangi Kudkanyi nayiba jurjina, jali yabimba nganinyiwanyi. Ngala nyulu jungkuka kingkarri nangandu Kudnyina. Nyulu wakingka nangangi Kudkanyi nananyina malabana yajina kingkarri jali yabimba Kudwanyi.
HEB 8:3 Nanda walkurra mambuka yalunginkanyi jurjkanyi Jumukuyngka, nyulu jungkuka nayiba wayka jambana. Yarrijba yali nanda nganinyi walkurra mambuka jurjkanyi, nyulu waykanyi Kud barnyinyi, nyulu dikarriykanyi nanda barnyi nangangi Kudkanyi. Baki nani barri marda ngambalangi walkurra mambuka jurjkanyi Jisus Krayis. Nyulu wajbayi Kud yajinyi. Wajba nyuli Kud nanganginkanyi mankankanyi, jali nangka janyba kurndana ngambalangi.
HEB 8:4 Jalimi yuwajiwa jungku Jisus Krayis wayka jambana, baki miku nyuliyi walkurra mambuka jurjkanyi ngambalangi. Miku nyuliyi waki nangangi Kudkanyi jurjina barrinani yalu mambukamuku jurjkanyi, barrinani yalu waki nangangi Kudkanyi jurjina. Miku nyuliyi wajba Kud barnyinyi yalunginkanyi. Miku nyuliyi dikarrijba yalungi barnyi nangangi Kudkanyi. Miku nyuliyi yabimba nanda yaji ngambalangi barri, jalimi yuwajiwa nyulu jungku wayka jambana. Yalili yabimba nanda yaji yingkamukunyi mambukamukunyi jurjkanyi. Yalili yabimba nanda yaji jala yanybaka yuwa Musiskanyi, yalu yabimbikanyi yaji jurjina mambukamukunyi jurjkanyi. Nanankardi barri, jalimi yuwajiwa jungku Jisus Krayis wayka jambana, baki miku nyuliyi walkurra mambuka jurjkanyi ngambalangi.
HEB 8:5 Wankalana barri yanybayi Kud nangangi Musiskanyi, jali jungku Musis juju barri kingkarri kulawirana. Karu nyuli Musis, janyulu baku yabimba jurj Musiswanyi. Janyulu yabimba jurj, barrinani wardara. Ngala jayalu dabulimba, jayalu kijijba nanda yaji, baki jayalu kuyu yingkayurri yajiyurri. Jayalu nanaba yarrijba nanda jurj yalungi. Nani barri janyulu yabimba jurj nangangi Kudkanyi Musiswanyi. Baki baku barri mili yanybayi Kud nangangi Musiskanyi nayi barri, “Nanijba barri janinji yabimba nanda jurj jali ninga karu wabula, ngala ninji kulawirana. Jalija ninji yabimba nanda jurj, baki janinji yabimba bukamba nanda yaji jali ninya karu yabimbikanyi. Mikujiyi yabimba yingka yaji, ngawamba nanda jali ninga karu.” Barriwa. Baki yabimbayi nanda jurj nani barri Musiswanyi. Yabimba nyuli nanda barrawu, ngala jungkuyi barrawu barrinani nanda ngarndu. Nanda jurj barrinani nanda ngarndu nanankanyi dujanyi yajinyi nangangi Kudkanyi kingkarri lalijina. Nanda jurj barrinani kudukudu yaji nangangi Kudkanyi. Ngala nanda dujanya kudukudu yaji nangangi Kudkanyi kingkarri lalijina, jala jungkuka Kud nanaba yajina. Nanaba barri dujanya nanda kudukudu yaji nangangi Kudkanyi. Baki nanamuku mambukamuku jurjkanyi, yalu wakingka nangangi Kudkanyi nayiba wayka jambana, ngala nanda dujanya walkurra mambuka jurjkanyi, nyulu jungkuka kingkarri lalijina. Nyulu wakingka Jisus Krayis nanaba kudukuduna yajina nangangi Kudkanyi. Ngawamba nyulu nanda dujanya walkurra mambuka jurjkanyi.
HEB 8:6 Wankalana barri yanybayi Kud nangangi Musiskanyi. Yanyba nyuli jangkurr, miku nangkiyi yangkalamba. Nayi nyuli yanyba, “Jangayu ngayu narringi Kud, baki janarri narri ngakinmirra.” Nani barri yanybayi Kud. Baki baku barri nyuli wajba Musis yuwanyi. Nanda yuwa yanybayi yarriykanyi mambukamuku yalunginkanyi jurjkanyi Jumukuyngka. Nanamuku mambukamuku jurjkanyi, jayalu waki nangangi Kudkanyi jurjina. Nani barri nanda yuwa yanybayi. Ngala mikuwali yalunya nanangini yuwawanyi marrimba mardarda. Mikuwali. Ngala baku barri juju, yanybayi Kud yingka jangkurr, miku nangkiyi yangkalamba. Yanybayi Kud, janyulu manjijba nangangi jandanyi, baki janyulu marrimba yalunya mardarda, nanganginmuku nganinyimuku jandanyiwanyi. Nanda bayngkani jangkurr nangangi Kudkanyi, miku nangkiyi yangkalamba, nanda mili walkurra nanankanyi waluwiyngkanyi jangkurranyi nanganginkanyi Kudkanyi, miku nangkiyi yangkalamba. Nanda bayngkani jangkurr mili walkurra nanankanyi waluwiyngkanyi jangkurranyi. Jisus Krayis, nyulu walkurra mambuka jurjkanyi ngambalangi, baki nanijba barri nyulu jungkuka kingkarri nangandu Kudnyina, baki nyulu wakingka nangangi Kudkanyi. Nyulu yanybaka mududu nangangi Kudkanyi ngambalangi. Nyulu ngajakangka Kud, nyulu manjamanjambiji ngambalangi balki yaji. Nani barri nyulu wakingka nangangi Kudkanyi. Baki nanda yaji jala nyulu yabimbaka ngambalangi, nanda mili walkurra nanankanyi yajinyi jali yalu yabimba nanamukunyi wankalamukunyi mambukamukunyi jurjkanyi. Nanda jala nyulu yabimbaka mili walkurra nanankanyi yajinyi jali yalu yabimba mambukamukunyi jurjkanyi. Baki nanda bayngkani jangkurr jali yanyba Kud miku nangkiyi yangkalamba, nanda mili walkurra nanankanyi waluwiyngkanyi jangkurranyi, yanybakangangi nanda bayngkani jangkurr nanankanyi ngirukanyi yajinyi, jalija yabimba Kudwanyi ngambalangi.
HEB 8:8 Nanangini jangkurrwanyi najana Kudkanyi karungka ngambalanya nangangi Kudkanyi. Karungka ngambalanya nanankanyi jangkurranyi, jali yanyba Kud yalungi Jumukuyngka. Nayi nyuli yanyba yalungi, “Wabula wankalana ngayu dulabayi yalunya Jumuku nanamunanyi yajinanyi Yijibnanyi. Ngayu dulabayi yalunya nanamunanyi yajinanyi bayangarri, baki ngayu marrimbayi yalunya mardarda yalunbunanyi mungkijimukunanyi nanankanyi yajinyi. Ngayu karuyi yalunya, jangayu lalanba yalunya, jaliyi yalu kuyu ngaki jangkurr. Ngala miku yaliyanyi kuyu ngaki jangkurr. Miku yaliyanyi ngayangayijba ngakinkanyi jangkurranyi. Baki nanankardi barri miku ngayiyi marrimba yalunya mardarda, ngala ngayi yingijba yalunya yurrngumba barri. Ngala marndakaja barri jangayu yarrijba yinini jangkurr miku ngakiyi yangkalamba. Jangayu yarrijba yinini jangkurr yalungi nanamukuyngka Jumukuyngka, jalili yalu jungku nananyina yaji niji Yisrayil baki Juda.
HEB 8:10 Nayinda barri nanda yinini jangkurr jalija ngayu yarrijba bakunyi. Baku barri jangayu yarrijba ngaki yuwa yalundu kulajina. Jayalu manku ngaki jangkurr, baki jayalu marrimba nanda jangkurr yalunginyina kurduluna, baki jayalu durrijba nanda ngaki jangkurr. Jangayu ngayu yalungi Kud, baki jayalu yalu ngakinmirra. Jayalu durrijba ngaki jangkurr yurrngumba barri.
HEB 8:11 Nanamanji barri mikuwali yingka yanyba yingkanyi, marda nyulimi jingkijba Kud. Mikuwali yingka yanyba yingkanyi nani barri, janganangangi yalu jingkijba bukambijunyi. Jangana yalu jingkijba bukambijunyi walkurramukunyi baki bayakardamukunyi. Jangayu ngayu yalungi Kud bukambijuyngka.
HEB 8:12 Miku ngayiyi ngirrwa yalungi yalunginkanyi balkinyi yajinyi, ngala jangayu manjamanjamba nanda balki yaji jali yalu yabimba. Miku ngayiyi mili mankuwa nanda yalungi balki yaji.” Barriwa.
HEB 8:13 Nani barri yanybayi Kud, janyulu yarrijba buyingkinyi jangkurr, miku nangkiyi yangkalamba nanamunanyi. Baki nyulu karuyi ngambalanya nanankanyi buyingkiyngkanyi jangkurranyi Jisus Krayiswanyi. Nanda buyingkinyi jangkurr yanybaka nangangi Kudkanyi, janyulu marrimba ngambalanya mardarda, jaliyi ngambala kuyu nangangi jangkurr Kudkanyi. Yarrijbayi Kudwanyi nanda buyingkinyi jangkurr, miku nangki yangkalamba, bukambayingangi nanda waluwinyi jangkurr nangangi, miku nangkiyi yangkalamba. Marda yalimi miku durrijba nanda waluwinyi jangkurr, ngala marda yalimi durrijba nanda buyingkinyi jangkurr nangangi Kudkanyi, miku nangkiyi yangkalamba. Barriwa.
HEB 9:1 Nanda waluwinyi jangkurr nangangi Kudkanyi, miku nangkiyi yangkalamba, nanda jangkurr yanybayi nanankanyi wankalanyi walkurrayngka jurjkanyi yalungi Jumukuyngka. Karuyi yalunya Jumuku jangkurranyi Kudwanyi. Nanda jangkurr yanybayi, yalu yabimbikanyi yaji nangangi Kudkanyi, yalu yabimbikanyi walkurra jurj barrinani nanda wardara. Nanda jangkurr yanybayi nanankanyi yuwanyi jurjkanyi, nanankanyi yajinyi jala marda yalimi yabimba nanaba jurjina.
HEB 9:2 Baki yabimba yali nanda yaji nangangi Kudkanyi. Yabimba yali nanda jurj barrinani wardara, ngala langandaba yali yaji barrinani blanki lukuluku barri langkiya, bayinga, karriya, baki kulaya. Marda yingka blanki yalu langandabayi burrandi, yabimbikanyi kujarra yaji kalawuyngkurru, yingka karriya, baki yingka bayinga. Nani barri yalu yabimbayi nanda jurj nangangi Kudkanyi. Yalili nijarrijba nanda yaji karriya kalawuyngkurru “Malaba Yaji Nangangi Kudkanyi.” Nani barri yalili nijarrijba nanda yaji karriya. Marda yalili yarrijba yaji kalawuyngkurru nanaba yajina karriya. Yarrijba yalili mirnbi nanaba. Karrinjarrijba yalili nanda mirnbi yundu malankarrina yajina. Barriwa. Baki yarrijba yalili darladarla nanaba yajina kalawuyngkurru yarriykanyi damba yundu darladarlana. Yalili wajba Kud nanankanyi dambanyi, bakili yalu yarrijba yundu nananyina darladarlana. Barriwa. Ngala nanda yaji kalawuyngkurru bayinga barri, yalili nijarrijba nanda yaji “Kudanyu Malaba Yaji Nangangi Kudkanyi.” Nani barri yalili nijarrijba nanda yaji bayinga barri.
HEB 9:4 Marda yarrijba yalili yaji kalawuyngkurru nanaba yajina bayinga. Yarrijba yalili nanda yaji niji yalda nanaba kalawuyngkurru. Nayi barri yali yabimba nanda yalda. Wudumba yali kurnda, baki yabimba yali yaji barrinani darladarla. Makaba yali nanda kurnda dankurrdankurryudinyi malankarriyudinyi. Nani barri yali yabimba nanda yalda, baki yali yarrijba kalawuyngkurru bayinga yajina. Yalili yarrijba yukururu yundu nanaba darladarlana, bakili yalu bakarrijba yaji barrinani jirrki kalawuyngkurru nananyina yukururuna. Jalili yajba nanda jirrki, bakili banjawa kunyba kurdu. Barriwa barri. Baki yali yarrijba darladarla marda nanaba bayinga yajina. Nanda malaba darladarla nangangi Kudkanyi. Yalili nijarrijba nanda darladarla, “Darladarla Yarriykanyi Jangkurr Nangangi Kudkanyi, Miku Nangkiyi Yangkalamba.” Baki makaba yali nanda darladarla danbina dankurrdankurryudinyi malankarriyudinyi marda. Marda murrku yaji nananyina malabana darladarlana. Kujarra dungala nanaba kalawuyngkurru barri. Wajbayi Musis yuwanyi Kudwanyi. Wajba nyuli Musis jirriyngkanyi yuwanyi 10kanyi, yalu ngayangayiykanyi nanankanyi yuwanyi. Yarrijbayi nanda 10 yuwa dungalana Kudwanyi. Kurrijba nyuli nanda dungala, baki yarrijba nyuli nanda jangkurr kujarranyina dungalana. Kilimbayi nanankujarra dungalawuya Musiswanyi. Yarrijba nyuli nanaba malabana darladarlana. Barriwa. Marda yingka yaji nanaba kalawuyngkurru darladarlana, ridiridi barri. Nanda nangangi ridiridi Yarunkanyi, ngala nanda ridiridi nyulu wujurryudi. Nyulu yabimbayi nanda ridiridi jardiykanyi wujurr Kudwanyi. Nani barri nyuli milidimba yalunya Jumuku yajinyi Kudwanyi. Nani barri nyuli minimba yalunya nangangi Yarunkanyi, nyuli yarrijba Yarun walkurra mambuka jurjkanyi yalungi Kudwanyi. Nanda barri ridiridi nanaba kalawuyngkurru darladarlana. Barriwa. Marda yingka yaji nanaba barri, lingkanyma jirdi mamanyi kalawuyngkurru. Jalili yalu jilalajba lukuluku mangkurruna yajina Jumuku, bakili wawajba yalunya mamanyi Kudwanyi. Nyulili wawajba yalunya mamanyi, niji mana. Kudiyanymuku nanamannga mama nananyina lingkanymana jala kalawuyngkurru darladarlana. Nani barri nanda murrku yaji kalawuyngkurru nananyina malabana darladarlana nangangi Kudkanyi. Barriwa.
HEB 9:5 Marda yundu nananyina darladarlana yingka barri yaji. Yabimba yali kujarra yaji barrinani Yanjilwuya, bulangi jalu, jabula baba. Yingka jungkuyi langkiya wilina baki yingka kulaya wilina. Marda marrimba bulangki jalu, yingka karriya baki yingka bayinga. Nani barri yali yabimba kujarra yaji barrinani Yanjilwuya, jali bula jungku nanaba yundu darladarlana yurrngumba barri. Barriwa. Baki nanamukunyi Jumukunyi jayalu mankumankuwa Kud, baki jayalu mankumankuwa nanda yaji yundu darladarlana, nanda kudanyu malaba yaji nangangi Kudkanyi. Jayalu mankumankuwa Kud, nyulu jungkuka yalundu yurrngumba barri. Baki nanangini walkurrawanyi mambukawanyi jurjkanyi, janyulu bunyanyarrijba ngulya yundu nanaba malabana darladarlana. Nayi barri yalili yabimba yaji. Yalili kurdanba barnyi nangangi Kudkanyi, bakili nyulu kuyu nanda ngulya kalawuyngkurru jurjina, mambukawanyi jurjkanyi. Bakili nyulu bunyanyarrijba nanda ngulya yundu darladarlana. Jalili nyulu yabimba nanda yaji nani barri, baki mikuwali Kudwanyi mili mankuwa nanda balki yaji, jalili yalu yabimba Jumukunyi. Miku nyulili mili mankuwa nanda balki yaji yalungi. Barriwa. Ngala mili yaji nanaba nananyina jurjina Jumukuyngka, ngala miku ngayiyi karu narrinya mili nanankanyi yajinyi nanijba barri. Miku.
HEB 9:6 Nanamuku mambukamuku jurjkanyi nayinda barri yalungi yaji. Yalili ngankijba nanaba karriya yajina jurjina yurrngumba barri, wakinki nangangi Kudkanyi nanaba. Yingkana kambana baki yingkana kambana, yurrngumba yalili ngankijba nanaba yajina karriya, nananyina malabana yajina nangangi Kudkanyi. Ngala miku yaliyanyi ngankijba nanaba yajina bayinga barri. Miku yaliyanyi ngankijba nanaba kudanyu malabana yajina bayinga barri. Miku.
HEB 9:7 Ngala ngawamba nanda walkurra mambuka jurjkanyi, ngawamba nyuli ngankijba nanaba yajina bayinga nananyina kudanyu malabana yajina. Ngala miku nyuliyanyi ngankijba yurrngumba yingkana kambana baki yingkana kambana. Ngawamba nyuli ngankijba barndaykamba, ngala nangki bukamba janja. Ngala buyingka barri mikukiyanyi ngankijba. Ngala baku barri ngala nangki bukamba janja, baki mili nyuli ngankijba barndaykamba barri. Nani barri nyulili ngankijba nanda walkurra mambuka jurjkanyi bayinga yajina, ngawamba barndaykamba ngala nangki bukamba janja, baki mili barndaykamba ngala nangkaja bukamba janja baku barri. Nani barri nyulili yabimba yaji. Barriwa. Jalili nyulu ngankijba, bakili nyulu kuyu ngulya nangandu. Kurdanba nyulili barnyi nangangi Kudkanyi. Karlba nyulili duka. Wudumba nyulili ngulya yukururuyudinyi, bakili nyulu kuyu nanda ngulya nangandu jalili nyulu ngankijba nanaba kudanyu malabana yajina bayinga barri. Bunyanyarrijba nyulili nanda ngulya yundu nananyina malabana darladarlana nanaba. Nani barri nyulili yabimba yaji, baki nanankardi barri miku nyuliyanyi mili mankuwa nangangi balki yaji Kudwanyi. Miku nyuliyanyi mili mankuwa nanda balki yaji jali yalu yabimba Jumukunyi. Barriwa.
HEB 9:8 Milidimba ngambalanya yajinyi Kunybawanyi Ngarnduwanyi Kudkanyi. Nyulu milidimbaka ngambalanya nanankanyi waluwiyngkanyi yuwanyi, yalu yabimbikanyi yaji yalunginyina jurjina. Ngawamba nanda walkurra mambuka jurjkanyi, ngawamba nyuli ngankijba nanaba kudanyu malabana yajina bayinga barri. Miku yalili ngankijba yingkamuku. Miku. Baki nanda barrinani miku yaliyi jilajba nangandurri Kudyurri. Miku. Jalimi yuwajiwa nanda waluwinyi yuwa jungku nanijba barri, jalimi marda ngambalimi marda durrijba nanda waluwinyi yuwa, baki miku ngambalimi jilajba nangandurri Kudyurri. Ngala miku ngambalimi durrijba nanda waluwinyi yuwa. Bukamba nanda yuwa ngambalangi barri.
HEB 9:9 Nani barri milidimbaka ngambalanya Kunybawanyi Ngarnduwanyi Kudkanyi nanankanyi yajinyi jalili yalu yabimba yalunginyina jurjina. Baki ngambala jingkijbangka marda, jalili yalu wajba Kud barnyinyi, jalili nanangini walkurrawanyi mambukawanyi jurjkanyi, nyulu bunyanyarrijba nanda ngulya darladarlana nangangi Kudkanyi, baki yuwajiwa jingkijbayi yalunya Kudwanyi. Nyulu jingkijbayi yalunya, miku yaliyi jungku yurlurrmba nangangi Kudkanyi. Mikuwali nanangini barnyiwanyi, baki mikuwali nanangini ngulyawanyi yabimba yalunya, yalu jungunkanyi yurlurrmba nangangi Kudkanyi. Miku. Barriwa.
HEB 9:10 Wajbayi Musis yuwanyi Kudwanyi. Nanda yuwa yanybaka, nangka wakardaykanyi mankanyi. Marda yanybaka, miku yaliyi jarrba yingka barnyi, ngala yuku yalu jarrba yingka barnyi. Jaliyi yalu jungku kunyba nananyina yuwana, baki jayalu likalika mankanyi, jayalu jungku ngiruka mankanyi. Ngala yuwajiwa jayalu balki kurdulu nangangi Kudkanyi. Waluka barri wajbayi yalunya nanankanyi yuwanyi Kudwanyi. Jayalu ngayangayijba nanankanyi yuwanyi ngawamba nanankurri jalija wajba yalunya buyingkiyngkanyi yuwanyi Kudwanyi. Manjijbayi Jisus Krayis Kudwanyi, baki nyuli wajba ngambalanya nanankanyi buyingkiyngkanyi yuwanyi Jisus Krayiswanyi.
HEB 9:11 Badajbayi Jisus Krayis wayka jambarri. Nyuli wajba ngambalanya nanankanyi buyingkiyngkanyi yuwanyi. Baku barri nyuli kirrijba kingkarri, baki nanijba barri nyulu jungkuka kingkarri nangandu Kudnyina. Nyulu walkurra mambuka jurjkanyi ngambalangi nanijba barri. Nyulu wakingka nangangi Kudkanyi. Ngala miku nyulimi jungku nayiba wayka jambana. Miku nyulimi waki jurjina, jali yalu yabimba nganinyimukunyi. Miku. Ngala nyulu wakingka kingkarri lalijina nangandu Kudnyina. Nyulu mili jirrinyi walkurra mambuka yalungi mambukamukuyngka jurjkanyi, jala yalu jungku wayka jambana. Nyuli mili jirrinyi yalungi barri. Nyulu yabimbaka mili ngiruka yaji yalungi barri.
HEB 9:12 Janyba nangki Jisus Krayis kurndana ngambalangi. Ngarrkadaba yali mankanyi wilina. Baki jurrwayi ngulya nanganbunanyi mawarlnanyi wilina ngala nyuli langa kingkarri kurndana. Baku barri jali nyulu mili wankijba, baki kirrijba nyuli kingkarri nangandurri Kudyurri. Nanda barrinani nyuli ngankijba kalawuyngkurru nanaba walkurranyina jurjina, barrinani nyuli ngankijba kalawuyngkurru nanaba kudanyu malabana yajina bayinga barri. Ngala miku nyuliyanyi kuyu ngulya barnyinyi nangandu. Miku nyuliyanyi bunyanyarrijba ngulya barnyinyi yundu nananyina malabana darladarlana. Miku. Ngala jurrwayi nanganginmirra ngulya, baki nanda barrinani bunyanyarrijba nangangi ngulya nananyina darladarlana Jisus Krayiswanyi. Baki nanankardi barri ngambala jala kuyu nangangi jangkurr, jangambala jungku mili wanka nangandu barri. Janyulu marrimba ngambalanya mardarda yurrngumba barri.
HEB 9:13 Nanda wankalanyi yuwa jali wajba Musis Kudwanyi, nanda yuwa yanybayi nayi barri. Jali yalu yabimba balki yaji nangangi Kudkanyi, jali yalu jungku balki nangangi, jali yalu miku ngayangayijba nanganginkanyi yuwanyi, baki marda yalimi yabimba nayinda yaji nangangi Kudkanyi. Marda yalimi kuyu yaji walkurrayngkurri jurjyurri. Marda yalimi kuyu yiningki buluki, yiningki yukularri. Jayalu wajba nanda mambuka jurjkanyi nanankanyi yajinyi, baki nanangini mambukawanyi jurjkanyi, janyulu karlba nangangi duka. Janyulu wudumba ngulya, baki janyulu bunyanyarrijba nanda ngulya yundu yalundu barri, jali yalu kuyu yaji nangandurri. Barriwa. Baki nanangini mambukawanyi jurjkanyi janyulu wudumba bulungu buluki, baki janyulu dikarrijba nanda barnyi janguna. Baku barri janyulu wudumba julurr nanankanyi barnyinyi. Janyulu wudumba, baki janyulu bunyanyarrijba nanda julurr yalundu barri, jala yalu yabimba balki yaji nangangi Kudkanyi. Nani barri nanda yuwa yanybayi, yalu yabimbikanyi yaji, baki jayalu jungku barrinani likalika nangangi Kudkanyi.
HEB 9:14 Ngala yabimbayi mili jirrinyi yaji ngambalangi Jisus Krayiswanyi. Nyuli yabimba mili jirrinyi yaji ngambalangi. Jungku nyuli kunyba nangangi Kudkanyi yurrngumba barri. Miku nyuliyanyi yabimba balki yaji. Miku yingamali balki yaji nyuli yabimba. Ngala wajba nangki Jisus Krayis nangandurri Kudyurri. Janyba nangki ngamanginkanyi balkinyi yajinyi. Nani barri nyulu likalikambaka ngambalanya kurdulu jala ngambala kuyu nangangi jangkurr. Nanamuku buluki baki yukularri jalili yalu kurdanba nangangi Kudkanyi, miku yalungkiyanyi wajba nangandurri Kudyurri. Ngala nangka wajbayi Jisus Krayis nangandurri. Nanda barrinani wajbayi Kud nanganginkanyi mankankanyi nanganginyi ngarnduwanyi Jisus Krayiskanyi. Wajbayi Kud nanganginkanyi mankankanyi nanganginyi ngarnduwanyi bukambijuyngka ngamanginkanyi balkinyi yajinyi. Miku nangkiyanyi janyba nangangi ngarndu, jungkuyi wanka yurrngumba barri. Nanankardi barri jali nangka janyba Jisus Krayis kurndana, baki nangki janyba bukambijuyngka yalungi. Janyba nangki bukambijuyngka yalunginkanyi balkinyi yajinyi. Nanankardi barri ngambala mirnarrijba muwa nangangi Jisus Krayiskanyi, ngamanginkanyi walkurrayngka mambukanyi jurjkanyi. Ngambala mirnarrijba muwa nangangi, jingkijbangangi ngambala Kud, janyulu manjamanjamba ngambalangi balki yaji. Miku ngambalimi durrijba nanda wankalanyi yuwa wakardaykanyi ngambalaka, marda waykanyi Kud barnyinyi. Miku ngambalimi durrijba nanda wankalanyi yuwa, jingkijbangangi ngambala Jisus Krayis, nangki janyba ngambalanginkanyi balkinyi yajinyi. Barriwa.
HEB 9:15 Yanybayi Kud buyingkinyi jangkurr, miku nangkiyi yangkalamba barri. Yanyba nyuli nanda buyingkinyi jangkurr, janyulu marrimba ngambalanya mardarda Kudwanyi. Janyulu marrimba ngambalanya mardarda yurrngumba barri, janybangangi nangki Jisus Krayis ngamanginkanyi balkinyi yajinyi. Yanybayi Kud nanda buyingkinyi jangkurr ngambalangi, baki yalungi marda, nanamukuyngka jalili yalu jungku juju wabula. Yali jungku wanka waluwa nanankanyi buyingkiyngkanyi jangkurranyi Kudkanyi. Baki kujanya yalungi nanda nangangi waluwinyi jangkurr. Ngala yanybayi Kud nayinda buyingkinyi jangkurr yalungi marda. Yalunya marda marrimbaja mardarda. Baki nayinda buyingkinyi jangkurr duja ngambalangi nanijba marda, janybangangi nangki Jisus Krayis ngambalangi marda. Barriwa.
HEB 9:16 Manku narri nayinda jangkurr. Yarrijbayi jangkurr najana malbuwanyi. Nanda jangkurr yanybayi, jalija nangka janyba nanda malbu, baki yingkawanyi jali nangangi niji nananyina najana, janyulu nyulu wudumba nanda yaji malbunyi. Baki jali nangka janyba nanda malbu, baki nanganginyi mungkijimukunyi yali wajba nanda yingka nanganginkanyi yajinyi barrinani yanybayi jangkurr. Ngala miku yaliyanyi wajba yajinyi, jali yuwajiwa wanka nanda malbu. Yanybayi nanda jangkurr najana, janyulu wudumba nanda yaji, ngawamba jali nangka janyba nanda malbu. Barriwa.
HEB 9:18 Baki nani barri marda, nanda waluwinyi yuwa nangangi Kudkanyi miku nangkiyi yangkalamba. Wajbayi Musis nanankanyi waluwiyngkanyi yuwanyi Kudwanyi. Nanangini yuwawanyi karuyi yalunya yanka marda yalimi jungku yurlurrmba nangangi Kudkanyi. Wajbayi Musis nanankanyi waluwiyngkanyi yuwanyi Kudwanyi, baki karuyi bukambiju Jumuku nanankanyi yuwanyi Musiswanyi. Nyuli karu yalunya nanankanyi yuwanyi, ngala yali karrinja walu nangandu. Yali manku nanda yuwa, baki yali yanyba, jayalu durrijba nanda yuwa nangangi Kudkanyi, jayalu ngayangayijba nanankanyi yuwanyi, jayalu jungku kunyba nanankanyi yuwanyi. Nani barri yali yanyba bukambiju Jumuku, jayalu kuyu nanda waluwinyi yuwa nangangi Kudkanyi. Yarrijbayi bukamba nanda yuwa najana Musiswanyi, baki jirrinyba nyuli kudiyanymuku yalu kurdanbikanyi buluki marda yukularri, yalu karlkanyi duka. Wudumbayi nanda ngulya Musiswanyi. Bunyarrijba nyuli wabuda ngulyana, baki jidimba nyuli. Wudumba nyuli wanjirr, baki kijijba nyuli nanda wanjirr nganmarranjudinyi nyungkayudinyi jibkanyi. Yawumba nyuli wanjirr ngulyana baki bunyanyarrijba nyuli ngulya nananyina najana jangkurryudinyina. Baki bunyanyarrijba nyuli ngulya yalundu marda, bukambijunyina Jumukunyina.
HEB 9:20 Baki yanybayi Musis yalungi, “Najba narri nayinda ngulya. Karuyi ngana Kudwanyi, ngayu bunyanyarriykanyi nayinda ngulya narrindu nani barri. Baki nani barri jingkijbangka narrinya Kudwanyi. Nyulu jingkijba narrinya, narri kuyungka nayinda nangangi jangkurr, miku nangkiyi yangkalamba. Narri kuyungka nayinda jangkurr, jala jirrinyba narrinya ngayangayiykanyi Kudkanyi.” Barriwa.
HEB 9:21 Jabarri bunyanyarrijbayi ngulya yingkana yajina marda Musiswanyi. Bunyanyarrijba nyuli ngulya nananyina jurjina barrinani wardara. Baki bukambijunyina yajina kalawuyngkurru jurjina nyuli bunyanyarrijba ngulya nananyina yajina marda.
HEB 9:22 Nanda yuwa nangangi Kudkanyi yanybaka yalungi mambukamukuyngka jurjkanyi. Nanda yuwa yanybaka yalungi, marda yalimi bunyanyarrijba ngulya yalundu Jumukunyina baki nananyina jurjina, baki yajina kalawuyngkurru. Marda yalimi bunyanyarrijba ngulya yalundu, baki jayalu barrinani likalika nangangi Kudkanyi. Nani barri marda yalimi yabimba yaji, minimbiji yalungka yalu ngayangayijbangka nanganginkanyi yuwanyi Jumuku. Baki jali yingka jungku balki nangangi Kudkanyi, baki mamanumbayi nangangi balki yaji Kudwanyi, ngawamba jali nyulu kuyu barnyi nangandurri Kudyurri. Karlbayi duka yingkawanyi, kurdanbayi, baki jurrwayi ngulya. Mamanumbayi nangangi balki yaji Kudwanyi, ngawamba jali nyulu yabimba yaji nani barri. Barriwa.
HEB 9:23 Nani barri yalili bunyanyarrijba nanda ngulya nanganginyina yajina Kudkanyi, baki nani barri yalili jungku barrinani likalika nangangi Kudkanyi. Nanda walkurra jurj, baki nanda yaji kalawuyngkurru, nanda malaba yaji nangangi Kudkanyi, ngala nanda dujanya malaba yaji nangangi Kudkanyi, nanda dujanya malaba yaji nangangi kingkarri barri nangandu lalijina. Ngala janyba nangki Jisus Krayis ngambalangi. Janyba nangki ngamanginkanyi balkinyi yajinyi. Baki nanankardi barri jaliyi ngambala kuyu nangangi jangkurr, baki janyulu likalikamba ngambalanya kurdulu Kudwanyi. Jangambala jungku likalika kurdulu nangangi, baki jangambala jungku kingkarri nangandu yurrngumba barri. Barriwa. Nanda walkurra mambuka yalunginkanyi jurjkanyi Jumukuyngka, nyulili ngankijba kalawuyngkurru nanaba kudanyu malabana yajina jurjkanyi. Ngala miku nyuliyanyi ngankijba kudanyu malabana yajina jurjkanyi yurrngumba barri. Ngawamba barndaykamba ngala nangki bukamba janja, baki mili barndaykamba juju baku barri ngala nangki bukamba janja. Mikukiyanyi munyajba mambuka ngankiykurri yurrngumba Kudwanyi. Jalili ngankijba nanda walkurra mambuka jurjkanyi, bakili nyulu kuyu ngulya bulukinyi nangandu. Nyulili wajba Kud nanankanyi ngulyanyi, minimbiji Kud, nyulu nginduyi muwa nanganginkanyi balkinyi yajinyi, baki yalu Jumuku, yalu nginduyi muwa yalunginkanyi balkinyi yajinyi. Ngala Jisus Krayis barri, miku nyuliyanyi ngankijba nananyina kudanyu malabana yajina nayiba wayka jambana. Miku nyuliyanyi ngankijba kudanyu malabana yajina jali yabimba nganinyiwanyi. Nanda dujanya kudanyu malaba yaji kingkarri barri nangandu Kudnyina. Ngankijbayi Jisus Krayis nananyina dujanya kudanyu malabana yajina, jali nyulu kirrijba kingkarri nangandurri Kudyurri. Baki nyulu yanybaka nangangi Kudkanyi ngambalangi barri. Nyulu ngajakangka Kud, nyulu manjamanjambiji ngambalangi balki yaji. Barriwa. Jali ngankijba Jisus Krayis nanaba kingkarri, baki nanda barrinani wajba nangki mankanyi nangandurri Kudyurri. Ngala miku nangkiyanyi wajba mankanyi yurrngumba barri mili baki mili, baki mili. Ngawamba barndaykamba nangki wajba mankanyi nangandurri Kudyurri. Jalimi nangka wajba mankanyi nangandurri, mili baki mili baki mili, baki yalimi yabimba kiji nangangi yurrngumba, mili baki mili baki mili, yalimi linjumba mankanyi, yalimi kurdanba mankanyi mili baki mili baki mili. Ngala miku barri, miku. Ngawamba barndaykamba nangki wajba mankanyi nangandurri Kudyurri. Barndaykamba nangki wajba mankanyi nangandurri Kudyurri bukambijuyngka yalunginkanyi balkinyi yajinyi. Nanamukuyngka jali yalu jungku wankalana baki wabula barri, nanamukuyngka jala yalu jungku nanijba barri, baki nanamukuyngka jalija yalu jungku baku barri, barndaykamba nangki wajba mankanyi nangandurri Kudyurri yalunginkanyi balkinyi yajinyi. Barriwa.
HEB 9:27 Bukambiju ngambala wandijiyana, jangambalaka janyba barndaykamba barri. Jangambalaka janyba, baki janyulu karrinjarrijba ngambalanya walu nangandu Kudwanyi. Baki janyulu yanyba nanankanyi yajinyi jali ngambala yabimba wabula barri. Baki janyulu yanyba manjiykanyi ngambalanya, kudiya kingkarri nangandurri, baki kudiya wayka jangurri. Yi. Jangambalaka janyba barndaykamba barri.
HEB 9:28 Baki nani barri nangki janyba Jisus Krayis barndaykamba barri. Wajba nangki mankanyi nangandurri Kudyurri ngamanginkanyi balkinyi yajinyi, bukambijuyngka barri. Yabimbaka ngambala kaja balki yaji, baki nanankardi barri marda ngambalakimi janyba. Ngala miku barri. Janyba nangki Jisus Krayis ngambalanyi barri. Ngala baku barri janyulu mili wijba Jisus Krayis wayka jambarri. Janyulu mili wijba, ngala miku yaliyi mili kurdanba. Miku. Ngala janyulu mili wijba, marrimbiji ngambalanya mardarda barri. Ngambalanya jala nanganginmirra bababanyamba nyulu, ngambalanya jala ngambala yukumbaka nangangi, janyulu marrimba ngambalanya mardarda, jalija nyulu wijba kingkarrinya. Barriwa.
HEB 10:1 Nanangini yuwawanyi jali wajba Musis Kudwanyi, nanangini yuwawanyi minimbayi yalunya ngawamba bijalanyi yajinyi nanganginkanyi Kudkanyi. Mikukiyanyi minimba yalunya bukambijuyngka yajinyi, jalija yabimba Kudwanyi baku barri. Nayinda barri yaji yabimbayi baku barri Kudwanyi. Nyuli manjijba nangangi jandanyi Jisus Krayis wayka jambarri, janybikanyi nangka ngambalangi. Mikukiyanyi minimba yalunya nanangini waluwinyiwanyi yuwawanyi bukambijuyngka yajinyi nanganginkanyi Kudkanyi. Ngawamba bijalanyi nanganginkanyi yajinyi. Nanamuku Jumuku yalili jilajba yalunginkurri walkurrayngkurri jurjyurri yurrngumba barri, jali nangka bukamba janja yingkana murrkana, baki baku mili yingkana murrkana, baki baku mili yingkana murrkana. Yalili jilajba yurrngumba nani barri, waykanyi Kud barnyinyi. Yalu jingkijbayi, yali jungku balki nangangi Kudkanyi, yali yabimba balki yaji nangangi, baki nanankardi barri yali wajba Kud barnyinyi. Ngala mikuwali nanangini barnyiwanyi yabimba yalunya jungunkanyi yurlurrmba nangangi Kudkanyi. Miku.
HEB 10:2 Yali wajba Kud barnyinyi yalunginkanyi balkinyi yajinyi, ngala mikukiyanyi manjamanjamba yalungi balki yaji Kudwanyi. Ngawamba nyuli mamanumba nanda balki yaji. Yali wajba Kud barnyinyi yalunginkanyi balkinyi yajinyi, ngala yali jingkijba Kud, miku nyuliyanyi najba yalunya, yalu jungunkurri yurlurrmba nangangi Kudkanyi. Baki nanankardi barri yuwajiwa yalungki yanyba muwa nanankanyi yalunginkanyi balkinyi yajinyi. Baki nanankardi barri miku yaliyanyi kurrkunba waykanyi Kud barnyinyi. Jaliyanyi najba yalunya Kudwanyi, yalu jungunkurri yurlurrmba nangangi, baki miku yaliyanyi mili wajba Kud barnyinyi yalunginkanyi balkinyi yajinyi.
HEB 10:3 Ngala miku nyuliyanyi najba yalunya jungunkurri yurlurrmba nangangi. Baki yuwajiwa barri yalili wajba Kud barnyinyi, baki yuwajiwa barri yalili mankumankuwa yalungi balki yaji. Yurrngumba yalili wajba Kud barnyinyi jali nangka bukamba janja, yingkana murrkana, baki baku mili yingkana murrkana, baki baku mili yingkana murrkana.
HEB 10:4 Yalili kurdanba barnyi, baki yalu bunyanyarrijba nanda ngulya yalungi mambukamukunyi. Ngala mikuwali manjamanjamba yalungi balki yaji nanangini ngulyawanyi. Mikuwali ngulyawanyi yabimba yalunya, duja yalu jungunkanyi kunyba nangangi Kudkanyi. Miku.
HEB 10:5 Baki nanankardi barri jali birrirrinja nangka Jisus Krayis karralankanyi wayka jambarri, jali barringa barri nyulu jungkuja bardarda wayka jambarri, baki yanyba nyuli nangangi Kudkanyi. Nayi yanybayi Jisus Krayis nangangi Kudkanyi nanamanji barri, “Miku ninjimi nulijba yalungi, yalu waykanyi ninya barnyinyi. Miku ninjimi nulijba yalungi, yalu kurdanbikanyi nanda barnyi nganyi. Ngala janganinji manjijba wayka yalundurri. Jangayu ngayu jungku yalundu mankanyiyudi.
HEB 10:6 Miku ninjimi mirnarrijba muwa yalungi jala yalu dikarrijba barnyi nanaba walkurranyina jurjina. Miku ninjiyi mirnarrijba muwa yalungi, jala yalu kurdanba barnyi nganyi, ninji mamanumbikanyi yalungi balki yaji. Miku ninjiyi mirnarrijba muwa yalungi, jala yalu yabimba nani barri.
HEB 10:7 Ngala ngayu yanybayi nayi nganyi, ‘Ninji Kud, ngayu jungkuka nayiba. Jangayu yabimba nanda jala ninji nulijba ngaki yabimbikanyi yaji. Jangayu yabimba nanda jala nganyi jangkurr najana yanybaka, jangayu yabimba yaji.’” Barriwa. Nani barri yanybayi Jisus Krayis nangangi Kudkanyi.
HEB 10:8 Waluku yanybayi Jisus Krayis, “Miku ninjimi nulijba yalungi, yalu waykanyi ninya barnyinyi. Miku ninjimi nulijba yalungi, yalu kurdanbikanyi nanda barnyi nganyi. Miku ninjiyi nulijba yalungi, yalu dikarriykanyi barnyi. Miku ninjiyi nulijba yalungi, yalu dikarriykanyi barnyi, ninji mamanumbikanyi yalungi balki yaji. Miku ninjiyi nulijba yalungi, yalu yabimbikanyi yaji nani barri.” Nani barri yanybayi Jisus Krayis nangangi Kudkanyi, ngala nyuli jingkijba, karuyi yalunya yabimbikanyi nanda yaji nanangini waluwinyiwanyi yuwawanyi.
HEB 10:9 Baki mili yanybayi Jisus Krayis nangangi Kudkanyi, “Ninji Kud, ngayu jungkuka nayiba. Jangayu yabimba nanda jala ninji nulijba ngaki yabimbikanyi yaji.” Nani barri nyuli yanyba. Baki nanankardi barri manjijbayi nangangi jandanyi Kudwanyi. Manjijba nyuli nangangi jandanyi, janybikanyi nangka kurndana ngamanginkanyi balkinyi yajinyi. Nani barri bukambayi nanda waluwinyi yuwa Kudwanyi. Nani nyuli bukamba nanda waluwinyi yuwa jali wajba Musis Kudwanyi. Janyba nangki Jisus Krayis, baki nanankardi barri marda yalimi miku mili wajba Kud barnyinyi. Marda yalimi miku mili kurdanba barnyi nangangi Kudkanyi, janybangangi nangki Jisus Krayis yalungi barri. Nani barri bukambayi nanda yaji waykanyi Kud barnyinyi, dikarriykanyi barnyi nangangi Kudkanyi. Bukambayi nanda yaji barri.
HEB 10:10 Yabimbayi Jisus Krayiswanyi nanda jali nulijba Kud nangangi yabimbikanyi yaji. Wajba nangki mankanyi nangandurri Kudyurri. Kurdanba yali Jisus Krayis, baki nanankardi barri manjamanjambaka ngambalangi balki yaji Kudwanyi. Baki ngambala jungkuka likalika kurdulu nangangi Kudkanyi. Janyba nangki Jisus Krayis ngawamba barndaykamba ngamanginkanyi balkinyi yajinyi. Miku nangkiyi mili janyba ngamanginkanyi balkinyi yajinyi. Miku. Barriwa.
HEB 10:11 Nanamuku mambukamuku yalunginkanyi walkurrayngka jurjkanyi, yalili waki nananyina jurjina yurrngumba barri, yingkana kambana, baki yingkana kambana, baki yingkana kambana. Yurrngumba yalili kurdanba nanda barnyi, jalili yalunjalu wajba yingkamukunyi. Yurrngumba yalili kurdanba nanda barnyi nangangi Kudkanyi. Ngala jalili yalu kurdanba nanda barnyi, baki mikukiyanyi manjamanjamba yalungi balki yaji Kudwanyi. Miku nyuliyanyi manjamanjamba yalungi balki yaji. Ngawamba nyuli mamanumba yalungi balki yaji. Yi. Nanamukunyi mambukamukunyi jurjkanyi yalili wajba Kud barnyinyi yurrngumba barri.
HEB 10:12 Ngala Jisus Krayis barri, ngawamba barndaykamba nangki wajba mankanyi, yalu kurdanbikanyi. Ngawamba barndaykamba barri. Baki nanankardi barri manjamanjambaka ngambalangi balki yaji Kudwanyi. Nyulu manjamanjambaka bukambijuyngka ngambalangi balki yaji, nanda balki jala ngambala yabimba nanijba, baki baku barri. Nyulu manjamanjambaka ngambalangi balki yaji yurrngumba barri, janybangangi nangki Jisus Krayis barndaykamba ngambalangi barri. Nanijba barri nyulu jungkuka kingkarri nangandu Kudnyina.
HEB 10:13 Kajamuku barri, miku yalimi maruka muwa nangangi Jisus Krayiskanyi, ngala janyulu daba yalunya Kudwanyi. Janyulu daba yalunya wakara barri. Janyulu wakaramba yalunya, jalija nyulu daba yalunya. Baki jayalu jingkijba Jisus Krayis, nyulu yalungi mambuka. Jungkuka Jisus Krayis kingkarri nangandu Kudnyina. Nyulu yukumbaka nangangi Kudkanyi nanankurri barri jalija nyulu daba yalunya wakara barri.
HEB 10:14 Kurdanba yali Jisus Krayis. Wajba nangki Jisus Krayis mankanyi nangandurri Kudyurri, baki yali kurdanba. Baki nanankardi barri yuku ngambala jungku yurlurrmba nangangi Kudkanyi. Ngambala jungkuka likalika kurdulu nangangi Kudkanyi, janybangangi nangki Jisus Krayis ngamanginkanyi balkinyi yajinyi. Nanijba barri nyulu manjamanjambaka nanda balki yaji ngambalangi, jala ngambala durrijba nangangi jangkurr Jisus Krayiskanyi, baki jangambala jungku yurlurrmba nangangi Kudkanyi yurrngumba barri.
HEB 10:15 Karungka ngambalanya jangkurranyi nanangini Kunybawanyi Ngarnduwanyi Kudkanyi. Nyulu karungka ngambalanya nanganginkanyi jangkurranyi Kudkanyi. Waluku barri yanybayi Kud nayinda jangkurr miku nangkiyi yangkalamba.
HEB 10:16 “Nayinda barri yinini jangkurr, jalija ngayu yarrijba bakunyi. Baku barri jangayu yarrijba ngaki yuwa yalundu kulajina. Jayalu manku ngaki jangkurr, baki jayalu marrimba nanda jangkurr yalunginyina kurduluna, baki jayalu durrijba nanda ngaki jangkurr.” Barriwa.
HEB 10:17 Baki mili jangkurr yanybayi Kud nayi barri. “Jangayu manjamanjamba nanda balki yaji jali yalu yabimba. Miku ngayiyi mili mankuwa nanda yalungi balki yaji.” Barriwa.
HEB 10:18 Nani barri yanybayi Kud. Janyulu manjamanjamba ngambalangi balki yaji, janybangangi nangki Jisus Krayis ngambalangi. Nanankardi barri marda yalimi miku mili wajba Kud barnyinyi. Marda yalimi miku mili kurdanba barnyi nangangi Kudkanyi. Janyba nangki Jisus Krayis yalungi marda. Yuku nyulu manjamanjambaka yalungi balki yaji marda. Barriwa barri bukamba nanda yuwa, yalu waykanyi Kud barnyinyi yalunginkanyi balkinyi yajinyi. Barriwa barri, bukamba nanda yuwa nanijba barri. Barriwa.
HEB 10:19 Janyba nangki Jisus Krayis ngamanginkanyi balkinyi yajinyi, baki nanankardi barri yuku ngambalaja jilajba kingkarri nangandu. Yuku ngambalaja jungku kingkarri bulandu Kudnyina baki Jisus Krayisnyina. Yuku ngambalaja jungku kingkarri bulandu, yukungangi ngambala dujanya jungku yurlurrmba nangangi Kudkanyi. Janyba nangki Jisus Krayis ngambalangi, baki nanankardi barri yuku ngambalaja kirrijba kingkarri nangandurri Kudyurri, jungunki nangandu mardarda kingkarri. Wabula barri, miku ngambaliyi kirrijba kingkarri nangandurri, barrinani miku yaliyi ngankijba Jumuku nananyina kudanyu malabana yajina bayinga. Miku yaliyi ngankijba nananyina kudanyu malabana yajina bayinga yalunginyina jurjina. Langayi nanda blanki murumbikanyi nanda yaji bayinga. Nani barri wabula miku ngambaliyi kirrijba kingkarri nangandurri Kudyurri, ngala nanijba barri yuku ngambalaja kirrijba nangandurri. Nanda barrinani bakarrawijbayi nanda blanki Jisus Krayiswanyi, jali nangka janyba ngambalangi. Barrinani bakarrawijba nyuli nanda blanki, ngambala ngankiykanyi nananyina kudanyu malabana yajina, jali nyulu wajba Kud nanganginkanyi mankankanyi Jisus Krayiswanyi. Yuku ngambala nanijba kirrijba kingkarri nangandurri Kudyurri. Nanda barrinani yuku ngambalaja ngankijba nananyina kudanyu malabana yajina nanganginkanyi Kudkanyi.
HEB 10:21 Baki nanda Jisus Krayis, nyulu nanda walkurra mambuka jurjkanyi ngambalangi kingkarri lalijina. Nyulu wakingka nangangi Kudkanyi nananyina kudanyu malabana yajina nanaba kingkarri.
HEB 10:22 Nanankardi barri marda ngambalimi miku manyirru jilaykanyi nangandurri Kudyurri, ngala marda ngambalimi jilajba yurlurrmba nangandurri. Ngambala jingkijbangka, nangangi jangkurr duja barri. Ngambala jungkuka likalika kurdulu nangangi Kudkanyi. Miku ngambalakimi yanyba muwa ngamanginkanyi balkinyi yajinyi, jingkijbangangi ngambala, ngambala jungunkanyi yurlurrmba nangangi Kudkanyi, jala ngambala kuyu nangangi duja jangkurr. Nanankardi barri yuku ngambala jilajba yurlurrmba nangandurri. Baki ngambala jungkuka likalika kurdulu nangangi Kudkanyi. Jali ngambala wakardaba mankanyi likalika wabudana, baki ngambala jungkuka likalika mankanyi. Baki nani barri ngambala jungkuka likalika kurdulu nangangi Kudkanyi. Barriwa.
HEB 10:23 Ngambala jingkijbangka nanda jangkurr nangangi Kudkanyi, duja barri nanda nangangi jangkurr. Miku nyuliyi jujamba yaji Kudwanyi. Miku. Jali wajba ngambalanya Kudwanyi nanankanyi buyingkiyngkanyi jangkurranyi, miku nangkiyi yangkalambikanyi, jali ngambalanya wajba nanankanyi buyingkiyngkanyi jangkurranyi, baki yanybayi Kud, janyulu yabimba yaji ngambalangi. Ngambala jingkijbangka Kud, janyulu yabimba nanda jali nyulu yanyba, janyulu yabimba. Marda ngambalimi mankuwa nangangi jangkurr yurrngumba barri. Marda ngambalimi marrimba nangangi jangkurr ngamanginyina kurduluna yurrngumba barri.
HEB 10:24 Nanankardi barri marda ngambalakimi kandimba. Marda ngambalakimi karu, yanka ngambalaja jungku nangangi Kudkanyi. Marda ngambalakimi maruka muwa. Marda ngambalimi yabimba ngawamba kunyba yaji yalungi yingkamukuyngka. Marda ngambalimi kandimba yalunya yurrngumba barri.
HEB 10:25 Jalannga barri jalili narri jungku Krisjinmuku, bakili narri jilajba jungunki malumba. Narrili malumba jungku yanybikanyi narringka nangangi Kudkanyi. Nani barri kudiyanymuku yuwajiwa narri jungku nanaba yajina, ngala kudiyanymuku, miku narrimi mili malumba jungku nani barri, yanybikanyi narringka nangangi. Marda ngambalimi malumba jungku yurrngumba barri. Marda ngambalikimi kandimba nangangi Kudkanyi, baki yuku ngambalaja jungku yurlurrmba nangangi Kudkanyi. Nani barri marda ngambalimi malumba jungku yurrngumba barri, jingkijbangangi ngambala Jisus Krayis, janyulu wijba wayka jambarri baku barri. Barriwa.
HEB 10:26 Ngambala durrijbangka nanda jangkurr bulangi Kudkanyi baki Jisus Krayiskanyi. Baki ngambala jingkijbangka nanda jangkurr duja barri. Nanankardi barri marda ngambalakimi kurrkunba yabimbikanyi balki yaji. Jaliyi ngambalaka miku kurrkunba, jaliyi ngambala yuwajiwa mili yabimba balki yaji, baki muningka nangki janyba Jisus Krayis ngambalangi barri. Muningka nangki janyba ngambalangi barri. Miku nyuliyi manjamanjamba ngambalangi balki yaji Kudwanyi, jaliyi ngambala jingkijba, nanda balki yaji yabimbikanyi, ngala yuwajiwa ngambala yabimba nanda balki yaji. Miku nyuliyi manjamanjamba ngambalangi balki yaji, jaliyi ngambala miku kuyu nangangi jangkurr Jisus Krayiskanyi.
HEB 10:27 Jaliyi yingka jungku balki nangangi Kudkanyi nani barri, baki ngambala jingkijba Kud, miku nyuliyi manjamanjamba nangangi balki yaji Kudwanyi. Jaliyi nyulu jungku balki nangangi Kudkanyi nani barri, baki marda nyulimi marrala yajinyi. Marda nyulimi kudanyu marrala yajinyi, jingkijbangangi ngambala Jisus Krayis, baku barri janyulu wijba nanginkurri, baki janyulu yanyba nanankanyi nangangi, baki janyulu manjijba nanda nganinyi wayka jangurri Yilyurri. Yajbaja yalunya janguwanyi, jala yalu miku ngayangayijba nanganginkanyi jangkurranyi Kudkanyi. Yajbaja yalunya janguwanyi. Nani barri janyulu yabimba yaji ngambalangi, jaliyi ngambalaka miku kurrkunba yabimbikanyi balki yaji, jaliyi ngambala yuwajiwa mili yabimba balki yaji.
HEB 10:28 Nanda yuwa nangangi Musiskanyi yanybayi, yalu kurdanbikanyi nanda nganinyi jali nyulu jungku balki nanankanyi yuwanyi Musiskanyi. Waluku barri jayalu wudumba kujarra nganinyiwuya yanybikanyi nanankanyi balkinyi yajinyi. Jayalu wudumba kujarra jali bula najba nanda nganinyi yabimbikurri balki yaji nanankanyi yuwanyi. Jabula karu nanganginkanyi balkinyi yajinyi. Jali manku bulangi jangkurr malbuwanyi, baki janyulu yanyba kurdanbikanyi nanda nganinyi. Jayalu kuyu, baki jayalu kurdanba barri. Nani barri yanybayi nanda yuwa nangangi Musiskanyi, jali yingka jungku balki nanankanyi yuwanyi. Yanybayi nanda yuwa, yalu kurdanbiji nanda. Barriwa.
HEB 10:29 Jaliyi yalu kurdanba nanda nganinyi, jali nyulu jungku balki nanankanyi yuwanyi Musiskanyi, ngala wanyi yaji mardakimi yabimba Kudwanyi nangangi, jala nyulu kudanyu yurlwa nangangi Jisus Krayiskanyi, nanankanyi jala jandanyi nangangi Kudkanyi. Jisus Krayis, nyulu mili walkurra nanankanyi yuwanyi Musiskanyi. Wanyimbaja Kud nanankanyi nganiyngkanyi jala nyulu kudanyu yurlwa nanankanyi buyingkiyngkanyi jangkurranyi Kudkanyi, jala nyulu kudanyu yurlwa buyingkiyngkanyi jangkurranyi, miku nangkiyi yangkalamba. Nanda buyingkinyi jangkurr yanybaka nangangi Jisus Krayiskanyi, nangka janybikanyi ngambalanginkanyi balkinyi yajinyi. Ngala miku nanda jirrinyi yaji nangangi, nanankanyi jala nyulu yurlwa nanankanyi yajinyi. Wanyimbaja Kud nangangi, jala nyulu yurlwa nanankanyi Kunybanyi Ngarndunyi Kudkanyi, jala nyulu yanybaka balki jangkurr nangangi. Mankumanku narringka nanankanyi nganiyngkanyi. Nanda yuwa nangangi Musiskanyi yanybayi yalu kurdanbikanyi nanda nganinyi jala nyulu jungku balki nanankanyi yuwanyi. Ngala wanyimbaja Kud nanankanyi jala nyulu kudanyu yurlwa yalungi, nangangi Kudkanyi, baki nangangi Jisus Krayiskanyi, baki nangangi Kunybanyi Ngarndunyi Kudkanyi. Wanyimbaja Kud nangangi barri. Janyulu yabimba mili balki yaji nangangi. Mili balki yaji janyulu yabimba nangangi barri.
HEB 10:30 Ngambala jingkijbangka nanda jangkurr najana Kudkanyi. Ngambala jingkijbangka barri, yanybayi Kud, “Ngayu barri mambuka yanybikanyi yalungi barrinani kurdusnyina. Jangayu karrinjarrijba yalunya walu ngakindu, baki nanamuku jali yalu miku ngayangayijba ngakinkanyi jangkurranyi, jangayu daba yalunya. Jangayu daba yalunya kudanyu barri.” Barriwa. Jabarri mili nyuli yanyba, “Ngayu mambuka Kud, jangayu karrinjarrijba yalunya bukambiju walu ngakindu, baki jangayu yanyba yalungi. Jangayu yanyba nanankanyi jalija ngayu yabimba yaji yalungi.” Barriwa.
HEB 10:31 Nanankardi barri jaliyi ngambala yurlwa nanganginkanyi jangkurranyi, baki marda ngambalimi marrala nangangi Kudkanyi. Marda ngambalimi kudanyu marrala nangangi, jaliyi ngambala miku kuyu nangangi jangkurr, jaliyi ngambala miku balanja jungunkanyi yurlurrmba nangangi. Nyulu walkurramirra Kud, nyulu ngirukamirra. Jaliyi ngambala yurlwa nanganginkanyi jangkurranyi, baki ngambala jingkijba Kud, janyulu daba ngambalanya kudanyu barri.
HEB 10:32 Marda narrimi mankumankuwa yanka narrili jungku waluka barri. Jalannga barri jalili narri kuyu nangangi jangkurr Jisus Krayiskanyi, baki yingkamukunyi narrinjalili wajba kijinyi. Narrinjalili wajba kijinyi, ngala miku narringkiyanyi yangkalamba nanganbunanyi Kudnanyi. Miku narringkiyanyi yangkalamba nanganbunanyi, nanankardi kijinyi.
HEB 10:33 Kudiyana yalili yanyba balki jangkurr narringi barri. Kudiyana yalili ngirrwa narringi walu yalundu yingkamukunyina, yalili wajba narrinya kijinyi. Yalili linjumba narrinya mankanyi. Baki kudiyana barri, narrili najba yalunya waykurri yalunya yingkamuku Krisjinmuku kijinyi. Narrili najba yalunya, yalunjalu waykurri kijinyi, bakili narri nulijba jungunkanyi malumba yalundu nanamukunyina Krisjinmukunyina. Mirnarrijba narrili muwa jungunkanyi narri yalundu, kandimbikanyi yalunya nanankanyi kijinyi.
HEB 10:34 Jalili yalu yarrijba yingkamuku Krisjinmuku brisinyina, bakili narri kandimba yalunya. Narrili kandimba yalunya, jalili yalu jungku brisinyina. Kudiyana barri yalili jarimba narringi yaji. Bakili yalu yingkijba narrinya kudiyana mikuyaji mamanyi, mikuyaji dungalanyi. Ngala yuwajiwa narrili mirnarrijba muwa yajinyi, jingkijbangangi narrili Jisus Krayis, nyulu lalanbaka narrinya yurrngumba barri. Baki baku barri janyulu marrimba narrinya mardarda yurrngumba barri kingkarri nangandu.
HEB 10:35 Miku narriyi marrala yajinyi, jingkijbangangi narri Kud, nangangi jangkurr duja barri. Jaliyi narri kudanyu durrijba nangangi jangkurr, baki janyulu yabimba kunyba yaji narringi barri. Baku barri janyulu kuyu narrinya kingkarri, jungunkanyi nangandu yurrngumba barri.
HEB 10:36 Miku narriyi balkijba muwa, jalija narrinjalu wajba nanankanyi kijinyi. Narri jingkijbangka Kud, baku barri janyulu yabimba nanda kunyba yaji narringi. Nyulu nulijbangka narringi, miku narriyi balkijba muwa. Ngala nyulu nulijbangka narringi, narri yukumbikanyi nangangi, narri jungunkanyi ngiruka nangangi, baki janyulu yabimba nanda jali nyulu yanyba, janyulu yabimba yaji narringi barri.
HEB 10:37 Nanda jangkurr najana Kudkanyi yanybaka nangangi Jisus Krayiskanyi. Nayinda barri nanda jangkurr. “Bijal barri baku janyulu badajba. Miku nyuliyi yukumba yurrngumba barri. Janyulu wijba marndakaja.
HEB 10:38 Baki nanamuku jala yalu jungku yurlurrmba ngaki, jala yalu kuyu ngaki jangkurr, jayalu jungku wanka yurrngumba barri. Ngala nanda jala nangka yangkalamba ngakinbunanyi, miku ngayiyi mirnarrijba muwa nangangi, ngala jangayu yurlwa muwa nangangi.” Barriwa.
HEB 10:39 Nani barri yanybayi Kud. Jaliyi ngambalaka yangkalamba nanganbunanyi Kudnanyi, baki miku nyuliyi marrimba ngambalanya mardarda. Miku nyuliyi kuyu ngambalanya kingkarri nangandurri, jalija ngambalaka janyba. Ngala miku ngambalakiyi yangkalamba nanganbunanyi. Miku. Ngambala kuyungka nangangi jangkurr Kudkanyi. Ngambala durrijbangka nangangi jangkurr yurrngumba barri. Baki nanankardi barri ngambala jingkijbangka Kud, janyulu marrimba ngambalanya mardarda yurrngumba barri. Barriwa.
HEB 11:1 Jala ngambala kuyungka nangangi jangkurr Kudkanyi, baki ngambala jingkijbangka Kud, janyulu yabimba kunyba yaji ngambalangi, janyulu marrimba ngambalanya mardarda kingkarri barri nangandu. Miku ngambaliyi najba Kud. Baki miku ngambaliyi najba nanda kunyba yaji kingkarri, ngala ngambala jingkijbangka barri, nanda jangkurr nangangi duja. Baki nanankardi barri ngambala kuyungka nangangi jangkurr. Baki ngambala jingkijbangka Kud, janyulu yabimba nanda jali nyulu yanyba janyulu yabimba yaji.
HEB 11:2 Kudiyanymukunyi wankalamukunyi yali kuyu nangangi jangkurr Kudkanyi, baki mirnarrijbayi Kud muwa yalungi barri. Nyuli mirnarrijba muwa yalungi. Yanybayi Kud yalungi, janyulu yabimba yaji yalungi juju barri baku yalungi murrkana. Ngala miku yaliyanyi najba Kud yabimbikurri nanda yaji. Jilijbawa. Ngala jingkijba yali Kud, dujamba janyulu yabimba nanda yaji baku barri. Yali kuyu nangangi jangkurr, yali ngayangayijba nanganginkanyi jangkurranyi, baki nanankardi barri mirnarrijbayi Kud muwa yalungi barri. Barriwa.
HEB 11:3 Miku ngambaliyanyi najba Kud yabimbikurri yaji wabula kamambarra. Miku ngambaliyanyi najba Kud yabimbikurri jamba baki kanja baki bukamba yaji junu. Ngala ngambala jingkijbangka Kud, nyuli yabimba bukamba nanda yaji. Jali mikuyaji yajinyi, baki yanybayi Kud jangkurr, baki walajbayi bukamba yaji. Barriwa.
HEB 11:4 Mankumankuwa narri nanamuku wankalamuku jalili yalu kuyu nangangi jangkurr Kudkanyi. Nyulu karungka ngambalanya yalungi Kudwanyi nanganginyina najana. Karungka ngambalanya yalungi, yingkanyi baki yingkanyi baki yingkanyi. Karungka ngambalanya yalungi, jali yalu kuyu jangkurr nangangi Kudkanyi, jali yalu jingkijba Kud, janyulu yabimba nanda yaji jali nyulu yanyba janyulu yabimba. Jangayu karu narrinya yalungi wankalamukuyngka. Nanda lirrka nganinyi jali yabimba Kudwanyi, kujarra jandanyi nangangi. Nanda lirrka jandanyi nangangi, nangangi niji Kayin, baki nanda burrandinyi jandanyi nangangi, nangangi niji Yabil. Nyuli kuyu nangangi jangkurr Kudkanyi burrandiwanyi, Yabilwanyi. Kuyu nyuli jangkurr nangangi Kudkanyi, baki wajba nyuli Kud yajinyi. Jingkijba nyuli Kud, nyuli dujanya, baki kuyu nyuli nangangi jangkurr Kudkanyi. Baki nanankardi barri nyuli wajba Kud kunybanyi yajinyi. Ngala nanangini lirrkawanyi Kayinwanyi, miku nyuliyanyi wajba Kud kunybanyi yajinyi. Ngawamba nyuli wajba Kud bijal kunybanyi yajinyi, ngala nanangini burrandiwanyi Yabilwanyi, nyuli wajba Kud kudanyu kunybanyi yajinyi. Baki nanankanyi barri mirnarrijbayi Kud muwa nangangi barri burrandiyngkanyi. Mirnarrijba nyuli muwa nangangi Yabilkanyi, wajbangangi nyuli kudanyu kunybanyi yajinyi. Barriwa. Nanda jangkurr najana nangangi Kudkanyi yanybaka nangangi Yabilkanyi, baki nani barri ngambala jingkijbangka Yabil, nyuli kuyu jangkurr nangangi Kudkanyi, nyuli jungku yurlurrmba kudanyu nangangi barri. Marda ngambalimi mankumankuwa Yabil baki marda ngambalimi jungku nani nangangi Kudkanyi marda. Barriwa.
HEB 11:5 Baki yingka wankala barri, jali nyulu jungka bijal juju bayngkani nangandu Yabilnyina, nangangi niji Yinuk. Nyuli jingkijba Kud, nyuli dujanya, baki nyuli kuyu nangangi jangkurr yurrngumba barri. Nanankardi barri mirnarrijbayi Kud muwa nangangi Yinukanyi, baki nyuli kandimba Yinuk. Baki nanankardi barri mikukiyanyi munyajba Yinuk janybikurri nangka Kudwanyi. Miku. Ngala kuyu nyuli Yinuk kingkarri jungunki nangandu lalijina. Miku nangkiyanyi janyba nanda Yinuk, ngala kuyuyi kingkarri nangandu Kudwanyi. Nanganginmuku, kujba yalungki nangangi, ngala miku yaliyi wakaramba nangangi mankanyi. Barriwa.
HEB 11:6 Mikukimi mirnarrijba muwa Kud nangangi jala mikukimi kuyu nangangi jangkurr. Ngala nyulu mirnarrijbangka muwa nangangi, jala nyulu jingkijbangka Kud, nyulu barri dujanya Kud, baki nyulu kuyungka nangangi jangkurr Kudkanyi. Jaliyi ngambala nulijba Kud, nyulu mirnarriykanyi muwa ngambalangi barri, baki marda ngambalimi jingkijba Kud, nyulu dujanya Kud. Marda ngambalimi jingkijba Kud, janyulu yabimba kunyba yaji ngambalangi, jala ngambala kudanyu kuyu nangangi jangkurr yurrngumba barri. Barriwa.
HEB 11:7 Jabarri yingka wankala, nangangi niji Nuwa. Yanybayi Kud nangangi Nuwanyi. Karu nyuli Nuwa, baku barri juju janyulu manjijba walkurra mali ngurrunbikanyi yalunya. Baki jirrinyba nyuli Nuwa, nyulu yabimbiji walkurra muwarda. Jingkijbayi Kud Nuwawanyi, nyuli dujanya, baki yabimbayi muwarda Nuwawanyi. Yuwajiwa duku yaji, mikuyaji janjanyi, ngala kuyuyi nangangi jangkurr Kudkanyi Nuwawanyi, baki yabimba nyuli nanda walkurra muwarda. Yabimba nyuli nanda muwarda dukuna yajina, karuyingangi Nuwa Kudwanyi nyulu yabimbikanyi muwarda. Nanankardi barri jali wirlku nanda walkurra mali, baki marrimbayi Nuwa mardarda muwardana Kudwanyi. Nuwa baki nangangi maninganja, baki nanganginmuku murrku jandanyimuku, baki yalungi maninganjamuku, marrimbayi yalunya mardarda muwardana Kudwanyi. Ngala yingkamukunyi, miku yaliyanyi kuyu nangangi jangkurr Kudkanyi, baki yali ngurrulijba wabudana bukambiju. Yi. Marrimbayi Nuwa mardarda Kudwanyi, jungkungangi nyuli yurlurrmba nangangi Kudkanyi, jali nyulu kuyu nangangi jangkurr Kudkanyi. Barriwa.
HEB 11:8 Jabarri yingka wankala, nangangi niji Yabrayam. Yanybayi Kud nangangi Yabrayamkanyi. Karu nyuli Yabrayam, janyulu yingijba nanda yaji jali nyulu jardijba nanaba yajina, baki janyulu jilajba bayungu barri. Yanybayi Kud nangangi, janyulu wajba Yabrayam yingkanyi yajinyi juju barri bayungu. Baki kuyuyi nanda jangkurr nangangi Kudkanyi Yabrayamwanyi. Jingkijba nyuli Kud, janyulu yabimba nanda jali nyulu yanyba, janyulu yabimba yaji. Baki yingijbayi nangangi yaji Yabrayamwanyi, baki barlba nyuli bayungu. Ngala miku nyuliyanyi jingkijba nanda yaji bayungu, baki miku nyuliyanyi jingkijba yaji wanjawa nyulu jilajbangka.
HEB 11:9 Ngala ngayangayijba nyuli nanankanyi jangkurranyi Kudkanyi, baki barlba nyuli juju bayungu. Barlba nyuli juju barri bayungu yingkarri yajiyurri, baki jungku nyuli nanaba. Miku nyuliyanyi wijba nanganginkurri yajiyurri. Yuwajiwa nyuli jungku nananyina yajina bayungu, ngala nyuli ngurranyi nananyina yajina yurrngumba barri. Miku nyuliyanyi yabimba barrawu nananyina yajina, ngala nyulili jungku wardarana, bakili nyulu jilalajba nananyina yajina yurrngumba barri. Baki nangangi jandanyi niji Yayisak, baki nangangi murimurimba nyulu, niji Jakib, bulili marda jilalajba nananyina yajina bayngkani barri nangandu. Buli marda ngurranyiwuya nanankanyi yajinyi. Ngala yanybayi Kud nangangi Yabrayamkanyi, nanankanyi yajinyi. Karu nyuli Yabrayam, janyulu wajba yalunya nanankanyi yajinyi, janyulu wajba yalunya nanankanyi yajinyi, nanganginmuku murimurimba nyulu yalunya juju barri bayngkani nangandu. Jayalu mungkijimuku nanankanyi yajinyi. Janyulu yalunginmirra yaji barri.
HEB 11:10 Ngala mirnarrijbayi Yabrayam muwa, ngala nyuli jungku ngurranyi nananyina yajina. Mirnarrijba nyuli muwa, kuyungangi nyuli jangkurr nangangi Kudkanyi. Jingkijba nyuli Kud, baku barri janyulu wajba Yabrayam yajinyi Kudwanyi. Janyulu kuyu Yabrayam kingkarri lalijiyurri, nanganginkurri yajiyurri Kudkanyi. Janyulu mungkiji nanankanyi yajinyi kingkarri jala nangangi yaji Kudkanyi. Barriwa.
HEB 11:11 Nanda Yabrayam nyuli malbu, baki nangangi maninganja niji Sara, nyuli bardibardi. Mikuyaji jandayngkanyi bulangi. Ngala karuyi Yabrayam Kudwanyi, janyulu wudumba kajamuku murimurimba nyulu yalunya juju barri bayngkani nangandu. Kuyuyi nanda jangkurr Yabrayamwanyi. Jingkijba nyuli Kud, nangangi jangkurr duja barri. Kuyuyi jangkurr Kudkanyi Yabrayamwanyi, baki nanankardi barri yabimbayi yaji nangangi Kudwanyi. Nanda Yabrayam kudanyu nyuli malbungujba mankanyi, baki nangangi maninganja Sara nyuli bardibardingujba mankanyi. Ngala yabimbayi ngiruka yaji bulangi Kudwanyi, kuyungangi buli jangkurr nangangi Kudkanyi, Yabrayamwanyi baki Sarawanyi. Yabimbayi ngiruka yaji bulangi Kudwanyi, baki ngawakuku nyuli nanda bardibardi, baki birnandaba nangki jukanyi bardardanyi. Jali nyulu jardijba walkurra nanda juka, baki nyuli wudumba maninganja nangangi, baki jandanyiwuya. Nani barri baku barri juju, yali kajamuku barri jali yalu barrinani murimurimba nyulu yalunya Yabrayamwanyi juju barri bayngkani nangandu. Yali wirdikudukudumuku, barrinani nanamuku wirdikudukudumuku warrawiji kingkarri lalijina. Yali wirdikudukudumuku barrinani nanamuku wirdikudukudumuku mundarrmuku. Barriwa.
HEB 11:13 Nanamukunyi wankalamukunyi Yabrayamwanyi, Sarawanyi, Yayisawanyi, baki Jakibwanyi, yali kuyu nanda jangkurr nangangi Kudkanyi. Yali jingkijba Kud, janyulu yabimba nanda jali nyulu yanyba, janyulu yabimba yaji. Yanybayi Kud, janyulu wajba yalunya nanankanyi yajinyi bayungu, baki juju barri baku nyuli wajba yalunya nanankanyi yajinyi. Nyuli wajba yalunya nanankanyi yajinyi, nanamuku kajamuku jali yalu jungku juju barri bayngkani yalundu. Yalu jungkuyi mungkijimuku nanankanyi yajinyi. Ngala nanamukunyi lirrkamukunyi, miku yalunjaliyanyi najba jungunkurri mungkijimuku nanankanyi yajinyi. Ngala yali jingkijba Kud, baku barri janyulu wajba yalunya nanankanyi yajinyi. Yalili jilalajba nananyina yajina, ngala baku janyulu yalunginmirra yaji. Yalunjalili karu yingkamuku, yali ngurranyimuku nanankanyi yajinyi, muningka yalili jilalajba nananyina yajina.
HEB 11:14 Nani barri yalunjalili minimba, yalu nulijbangka yingkanyi yajinyi. Yalu nulijbangka yingkanyi yajinyi, janyulu yalunginmirra yaji kingkarri nangandu Kudnyina.
HEB 11:15 Miku yaliyanyi ngurungurujba nanankanyi yajinyi karru, jali yalu yingijba wabula. Miku yaliyanyi nulijba wiykanyi nanankurri. Jaliyanyi yali nulijba wiykanyi, baki yuku yaliyanyi wijba karri. Ngala miku yaliyanyi nulijba wiykanyi.
HEB 11:16 Ngala yali ngurungurujba yingkanyi yajinyi kingkarri barri, jala mili kunyba yaji, jala nangangi yaji Kudkanyi. Yali nulijba jungunkanyi kingkarri nangandu Kudnyina. Baki nanankardi barri mikukiyanyi Kud manyirru yalungi, ngala nyuli mirnarrijba muwa yalungi kudanyu barri. Nyuli mirnarrijba muwa yalungi, jali yalu yanyba nangangi, nyuli yalungi Kud. Nyuli mirnarrijba muwa yalungi, baki janyulu kuyu yalunya kingkarri nanganginkurri yajiyurri. Nanda yaji kingkarri janyulu yalunginmirra yaji, baki jayalu jungku nanaba nangandu yurrngumba barri. Barriwa.
HEB 11:17 Baki mili barri, jangayu karu narrinya nangangi Yabrayamkanyi. Birnandaba nangki jukanyi nangangi maninganja Sara, baki nijarrijba buli nanda bardarda Yayisak. Baki karuyi Yabrayam nanankanyi jukanyi Kudwanyi. Jalija nyulu jardijba walkurra, baki janyulu wudumba jandanyiwuya Yayisakwanyi, baki janyulu wudumba murimurimba nyulu yalunya. Barriwa. Nani barri janyulu wudumba kajamuku murimurimba nyulu yalunya Yabrayamwanyi juju barri bayngkani nangandu. Nani barri janyulu wudumba kajamuku yalunya, barrinani karuyi Yabrayam wabula Kudwanyi. Barriwa. Jali jardijba nangangi jandanyi Yayisak walkurra juka, baki mili yanybayi Kud nangangi Yabrayamkanyi. Karu nyuli Yabrayam, janyulu wajba Kud nanganginkanyi jandayngkanyi, janyulu kurdanba nanda juka dungalana yajina, niji Yalda. Nani barri janyulu yabimba yaji, barrinani jalili yalu wajba Kud barnyinyi. Kuyuyi nangangi jangkurr Yabrayamwanyi. Ngayangayijba nyuli nanankanyi jangkurranyi Kudkanyi. Wudumba nyuli nangangi jandanyi, kijijba nyuli, baki yarrijba nyuli dungalana yajina kurdanbikanyi nanda juka. Nani barri yabimbayi yaji Yabrayamwanyi, jingkijbangangi nyuli Kud, nyuli ngirukamirra. Jaliyi nyulu kurdanba nangangi jandanyi Yabrayamwanyi, baki yuku janyulu mili wankamba juka Kudwanyi. Nanankardi barri nyuli kuyu nangangi jangkurr Kudkanyi. Nyuli yabimba nanda jali karu Kudwanyi. Kijijba nyuli nanda juka dungalana, baki marrimba nyuli nanda majaja karlbiji nangangi jandanyi. Ngala kurrkunbayi Yabrayam Kudwanyi, baki miku nyuliyanyi karlba. Barriwa. Miyakijbayi Kud Yabrayamkanyi, jaliyi nyulu kudanyu maruka muwa nangangi Kudkanyi, jaliyi nyulu maruka muwa nangangi Kudkanyi mili kudanyu nanganginkanyi jandayngkanyi. Baki nanankardi nyuli karu Yabrayam nyulu kurdanbiji nangangi jandanyi. Barringa barri nyuliyanyi kurdanba, ngala kurrkunbayi Kudwanyi. Baki nanda barrinani mili wankambayi nanda juka Kudwanyi. Barriwa.
HEB 11:20 Jali nanda Yayisak malbungujba mankanyi, baki wudumba nyuli jandanyiwuya. Niji bulangi Yisu baki Jakib. Baki yanyba nyuli mududu nangangi Kudkanyi bulangi barri. Ngajaka nyuli Kud, nyulu yabimbiji kunyba yaji bulangi. Kuyu nyuli nanda jangkurr nangangi Kudkanyi Yayisakwanyi, baki nanankardi barri nyuli jingkijba Kud, janyulu yabimba kunyba yaji bulangi, baki yalungi marda, nanganginmukuyngka murimurimba nyulu yalunya juju barri bayngkani nangandu. Barriwa.
HEB 11:21 Baki nanda barri Jakib, kajamuku nanganginmuku jandanyimuku. Jali nyulu malbungujba mankanyi, baki wudumba nyuli kujarra murimurimba nyuli bulanya. Bulangi nijanganjinyi, nangangi niji Jusib, jala nyuli jandanyi nangangi Jakibkanyi. Nanda Jakib nyuli malbumirra. Jilajba nyuli ridiridiyudi. Nyuli darrangka nanaba ridiridina, ngala nyuli yanyba mududu nangangi Kudkanyi. Yanyba nyuli mududu nangangi Kudkanyi bulangi barri murimurimba nyuli bulanya. Ngajaka nyuli Kud, nyulu yabimbiji kunyba yaji bulangi. Kuyu nyuli jangkurr nangangi Kudkanyi. Baki nanankanyi barri nyuli jingkijba Kud, janyulu yabimba kunyba yaji bulangi, janyulu lalanba bulanya yurrngumba barri. Barriwa.
HEB 11:22 Baki nanda yingka Jusib, jali nyulu malbungujba mankanyi, baki nyuli jungku nanaba yajina mili bayungu, niji Yijib. Nyulu marda kuyuyi nanda jangkurr nangangi Kudkanyi. Nyulu jingkijbayi Kud, nangangi jangkurr duja barri. Juju barri wabula yanybayi Kud nangangi Yabrayamkanyi, janyulu wajba yalunya nanankanyi yajinyi bayinga Kudwanyi. Janyulu wajba nanankanyi yajinyi yalunya murimurimba nyulu yalunya juju barri bayngkani nangandu Yabrayamnyina. Nani barri yanybayi Kud nangangi Yabrayamkanyi wabula barri. Kuyuyi nanda jangkurr Jusibwanyi. Jingkijba nyuli Kud, baku barri janyulu wajba yalunya nanankanyi yajinyi bayinga. Baki nanankardi barri jali nyulu malbungujba mankanyi, baki nyuli yanyba nanankanyi yajinyi bayinga. Yanyba nyuli, baku barri jayalu yingijba nanda yaji Yijib, jayalu jilajba nanankurri yajiyurri. Baki nyuli karu yalunya, jalija yalu barlba, baki jayalu wiykunumba nanda nguli nangangi yalundu. Barriwa.
HEB 11:23 Baku barri juju yuwajiwa yali jungku nananyina yajina mili bayungu Yijib. Yali kajamuku barri wirdikudukudumuku, ngala yuwajiwa yalu ngurranyimuku nananyina yajina. Niji yalungi nanamanji barri Jumuku. Ngala nanda mambuka nanankanyi yajinyi nyuli marrala yalungi. Yiningki jayalunjalu daba wakara nanganginmuku mungkijimuku. Nanankardi barri nyuli jirrinyba yalunya, yalu kurdanbiji bukambiju buyingkinyi bardardamuku, jala yalu jukamuku. Maykarrawuyanyi barri, wudumba buli buyingkinyi juka bardarda, niji nangangi Musis. Baki najba buli, nyuli kunyba bardarda, kunybamirra. Ngala miku buliyanyi ngayangayijba nanankanyi jangkurranyi mambukanyi. Miku buliyanyi kurdanba nanda bardarda, ngala ngadijba buli nanda bardarda. Ngadijba buli bardarda bulanginyina barndana murrkunyina yakarlina. Kuyu buli jangkurr nangangi Kudkanyi. Jingkijba buli Kud, janyulu lalanba bulangi bardarda. Nanankardi barri miku buliyanyi marrala yurlwankanyi nanankanyi jangkurranyi kurdanbikanyi nanda bardarda. Barriwa.
HEB 11:24 Ngala wakarambayi nanda bardarda Musis jibarriwanyi. Nyuli jandanyi nangangi, nanankanyi mambukanyi jali nyulu jirrinyba yalunya kurdanbikanyi bardarda. Wakarambayi nanda bardarda nanangini jibarriwanyi, baki maruka nyuli muwa nangangi. Kuyu nyulu bardarda, baki jardiykunumba nyuli nanda juka barrinani nanda nanganginmirra kulunganja. Ngala jali nyulu jardijba walkurra nganinyi, baki najbayi nanganginmuku mungkijimuku Jumuku Musiswanyi. Najbayi yalunya wakiwarrmuku, ngala yalunginmuku mambukamuku yali balkimuku. Wajuba yalunjalili, baki daba yalunjalili. Yalili yabimba balki yaji yalungi barri, nanganginmukuyngka mungkijimukuyngka Musiskanyi. Miku nyuliyanyi jungku yalundu Jumukunyina, ngala nyuli jingkijba nanamuku Jumuku, yali nanganginmuku mungkijimuku. Nyuli marda Ju. Nyulu marda kuyuyi nanda jangkurr nangangi Kudkanyi Musiswanyi. Nyulu durrijbayi nanda nangangi jangkurr. Nanda jibarri jali nyulu jardijba Musis, nyuli yanyba nangangi Musiskanyi, nyuli nanganginmirra jandanyi, nyuli mungkiji yalungi Yijibmukuyngka. Ngala mikukiyanyi nulijba Musis jungunkanyi mungkiji yalungi Yijibmukuyngka. Ngala nyuli nulijba yalungi, yalu jingkiykanyi nangangi, nyuli mungkiji yalungi Jumukuyngka. Jingkijbayi Kud Musiswanyi, marukayi muwa Kud yalungi Jumukuyngka. Baki marukayi muwa Musis nangangi Kudkanyi. Kuyu nyuli nangangi jangkurr Kudkanyi Musiswanyi. Nulijba nyuli jungunkanyi yurlurrmba nangangi Kudkanyi. Nulijba nyuli kandimbikanyi yalunya nanganginmuku mungkijimuku Jumuku. Baki jingkijba nyuli, jaliyi nyulu yurlwa yalungi, nanganginmukuyngka mungkijimukuyngka, jaliyi nyulu mili jungku yalundu Yijibmukunyina, barrinani nyuli mungkiji yalungi, baki jayalu yabimba kunyba yaji nangangi Yijibmukunyi. Jayalu wajba kajanyi yajinyi, jayalu yarrijba Musis walkurra mambuka yalungi. Marda jingkijba nyuli, jaliyi nyulu kandimba yalunya Jumuku, baki jayalu wajba kijinyi mambukamukunyi Yijibkanyi. Jayalu kudanyu kakalijba nangangi. Jayalu linjumba nangangi mankanyi, barrinani yalunjalili linjumba Jumuku. Nani barri jayalu yabimba yaji nangangi, barrinani baku yali yabimba yaji nangangi Jisus Krayiskanyi. Ngala jaliyi nyulu miku kandimba yalunya, nanganginmuku mungkijimuku, baki janyulu jungku balki nangangi Kudkanyi. Janyulu jungku balki nangangi. Ngala miku nyuliyi mili jungku barrinani mungkiji yalungi Yijibmukuyngka. Miku nyuliyi mili yurlwa yalungi Jumukuyngka. Janyulu kandimba yalunya nanganginmuku mungkijimuku Jumuku. Yuku jayalu wajba kijinyi. Yuku jayalu kudanyu kakalijba nangangi, ngala janyulu jungku kunyba nangangi Kudkanyi. Janyulu kandimba yalunya Jumuku. Baki nani barri nyuli yabimba, jingkijbangangi nyuli Kud, janyulu yabimba kunyba yaji nangangi baku barri Kudwanyi. Janyulu yabimba kunyba yaji nangangi, jaliyi nyulu kandimba yalunya Jumuku Musiswanyi. Barriwa.
HEB 11:27 Ngala nanda walkurra mambuka Yijibkanyi, nyuli ngarrangarra muwa nangangi Musiskanyi. Kudanyu nyuli ngarrangarra muwa nangangi, baki barlbayi Musis nanamunanyi yajinanyi. Barlba nyuli karri. Kuyu nyuli nanda jangkurr nangangi Kudkanyi, baki miku nyuliyanyi marrala nangangi nanankanyi mambukanyi Yijibkanyi. Miku nyuliyanyi marrala nangangi, jingkijbangangi nyuli Kud, janyulu lalanba yurrngumba Kudwanyi. Durrijba nyuli Kud, barrinani nyuli najba Kud jilaykurri walu nangandu barri. Miku nangkiyanyi yangkalamba nanganbunanyi Kudnanyi. Kudanyu nyuli durrijba Kud yurrngumba barri.
HEB 11:28 Baku barri juju wijbayi Musis bayungu Yijibyurri. Manjijbayi Musis bayungu Kudwanyi. Janyulu nyulu Musis mambuka yalungi Jumukuyngka. Wijbayi Musis, baki mili yanybayi Kud nangangi. Karu nyuli Musis, janyulu yabimba ngiruka yaji nanaba Yijib Kudwanyi. Janyulu kurdanba yalunya bukambiju lirrkamuku jandanyimuku jukamuku yalundu nanaba Yijib. Nanda walkurra mambuka Yijibkanyi, miku nyuliyanyi kuyu jangkurr nangangi Kudkanyi. Miku nyuliyala munyajba yalunya Jumuku, yalu jilaykurri nanganbunanyi yajinanyi. Miku nyuliyala munyajba yalunya jilaykurri, ngala kurrkunba nyuli yalunya. Baki nanankardi barri janyulu kurdanba yalunya lirrkamuku jukamuku Kudwanyi. Janyulu manjijba yingamali Yanjil kurdanbiji yalunya bukambiju yingamalina mungana. Janyulu ngankijba yingkana barndana, baki yingkana barndana, baki yingkana barndana, baki janyulu kurdanba bukambiju lirrkamuku jukamuku Yanjilwanyi. Niji nangangi “Yanjil Kurdanbawarr.” Ngala karuyi Musis Kudwanyi, janyulu jirrinyba nangangimuku mungkijimuku Jumuku Musiswanyi. Janyulu jirrinyba yalunya, jayalu wudumba bulungu jib. Jayalu kurdanba, baki jayalu namba lukuluku nanaba bardawana nananyina nanganginyina ngulyana. Jayalu namba kujarranyina wilina baki yundu barri bardawana yalunginyina barrawuna. Jalija najba ngulya bardawana nanangini Yanjilwanyi, baki miku nyuliyi ngankijba kalawuyngkurru, miku nyuliyi kurdanba lirrka juka nanaba kalawuyngkurru. Janyulu kangandijba nanaba barrawuna, ngulyangangi. Nani barri karuyi Musis jirrinybikanyi yalunya Kudwanyi. Kuyuyi nanda jangkurr nangangi Kudkanyi Musiswanyi. Baki jirrinyba nyuli yalunya Jumuku, yalu nambiji lukuluku yalunginyina bardawana ngulyayudinyi. Nani barri yali yabimba yaji Jumukunyi, baki kangandijbayi nanda Yanjil Kurdanbawarr yalunginyina barndana. Kangandijbayi Yanjil nananyina mungana barri. Baki yali nijarrijba nanda mungana “Kangandijbayi Barrawuna Yajinyi”, kangandijbayingangi nanda Yanjil yalunginyina barndana. Nani barri kuyuyi jangkurr nangangi Kudkanyi Musiswanyi, baki yabimba nyuli nanda jali karu nyulu yabimbikanyi Kudwanyi. Barriwa.
HEB 11:29 Nanamunanyi munganawunyi yajiwunyi jali kangandijba Yanjil, baki barlba yali Jumuku nanamunanyi yajinanyi Yijibnanyi. Kuyuyi yalunya karri Musiswanyi. Wanbiya yali kanjana muluna wabudana. Niji nangangi “Nganmarra Kanja.” Jirrinybayi Musis Kudwanyi, janyulu kuyu yalunya Jumuku wayka kanjarri, jayalu burrijba nanda wabuda. Yali kuyu nanda jangkurr nangangi Kudkanyi nanamukunyi Jumukunyi. Yali kuyu nangangi jangkurr, baki yali durrijba Musis wayka kanjarri. Yandarrambayi nanda kanja Kudwanyi, baki yali burrijba dukana yajina, baki mili yali walajba karrurrinybana bukambiju. Ngala malijbayi yalunjalu ngarrkadabawarrmukunyi Yijibkanyi. Karrala yali wayka burriykanyi dukana yajina, ngala wiykunumbayi wabuda Kudwanyi, baki ngurrulijba yali wabudana bukambiju.
HEB 11:30 Jabarri baku barri juju, janyba nangki Musis, baki yingka barri, nangangi niji Jujuwa, nyuli buyingkinyi mambuka yalungi barri. Nyuli kuyu yalunya Jumuku nanankurri yajiyurri jali yanyba Kud yalungi, janyulu yalunginmirra yaji. Ngala mungkijimuku nanankanyi yajinyi, yali jungku kajana barrawuyabarrawuyana. Yabimba yali walkurra ngiruka barriki lukuluku barri dungalayudinyi. Juju barri kingkarri nanda barriki, baki mikuwali ngankijba yingkamuku daji yalunya. Jungku yali Jumuku bundu yingkana barrawuyabarrawuyana niji Jiriku. Yanybayi Kud nangangi Jujuwakanyi. Karu nyuli Jujuwa, nyuluja kuyu yalunya Jumuku lukuluku nananyina barrikina. Jayalu jilalajba lukuluku, baki jayalu wijba yalunginkurri barndarri. Jabarri munganawa barri mili jayalu jilalajba lukuluku, baki jayalu wijba barndarri. Nani barri jayalu yabimba yaji. Barriwa. Baki kuyu yali nanda jangkurr nangangi Kudkanyi Jumukunyi, baki yabimba yali nanda jali karu yalunya yabimbikanyi yaji Kudwanyi. Jilalajba yali lukuluku nananyina barrikina yurrngumba 7 kambana, baki dalyambayi nanda walkurra barriki Kudwanyi. Ngankijba yali Jumuku, baki daba yalunjali mungkijimuku nanankanyi yajinyi. Daba yalunjali wakara barri. Nani barri yalunjali wakaramba. Kuyu yali nanda jangkurr nangangi Kudkanyi Jumukunyi, baki nanankardi barri dalyambayi nanda barriki yalungi Kudwanyi. Barriwa.
HEB 11:31 Wujina barri waluwa yali jilalajba lukuluku nananyina barrikina, baki manjijbayi kujarra nganinyiwuya Jujuwawanyi. Manjijba nyuli bulanya, ningkiji nanda barrawuyabarrawuya. Nulijbayi Jujuwa jingkiykanyi nanda yaji marda yalunya nanaba kalawuyngkurru. Jabula najba nanda yaji, baki jabula karu Jujuwa nanankanyi yajinyi. Kardarda buli ngankijba bardawana, baki binanyba buli naji yaji. Ngala najbayi bulanya yingkawanyi, baki kujbayi bulangi ngarrkadabawarrmuku kurdanbiji bulanya. Ngala kandimbayi bulanya jibarriwanyi. Ngadijbayi bulanya nanganginyina barndana. Nyuli balki jibarri. Waluwa nyuli kuluka yingkana nganinyina, baki yingkana nganinyina. Ngala nyuli jingkijba Kud, janyulu wajba yalunya Jumuku nanankanyi yajinyi. Nanankardi barri nyuli marrimba bulanya mardarda yalunbunanyi. Baki nanankardi barri jali dalyamba nanda barriki Kudwanyi, baki nyuli marrimba nanda jibarri mardarda, baki miku yaliyanyi kurdanba nanda jibarri. Marrimbayi jibarri mardarda Kudwanyi, jingkijbangangi nyuli Kud, nyulu dujanya Kud, baki nyulu ngiruka barri. Barriwa.
HEB 11:32 Jabarri baku barri kajamukunyi yali kuyu nangangi jangkurr Kudkanyi, yingkawanyi baki yingkawanyi, baki yingkawanyi. Kuyu yali nangangi jangkurr, durrijba yali nangangi yuwa, baki nanankardi barri yalu marda yabimbayi ngiruka yaji nangangi Kudkanyi. Nayinda kudiya yalungi niji, Kidiyun baki Barak, Samsun baki Jibida, Dayibid baki Samiyul. Baki nanamukunyi jali yalu yanyba jangkurr nangangi Kudkanyi, yalu marda yabimbayi ngiruka yaji nangangi barri. Bukambijunyi yali kuyu jangkurr nangangi Kudkanyi, yali ngayangayijba nanganginkanyi jangkurranyi, baki nanankardi barri yabimbayi kunybingkawanyi, baki yingkawanyi. Kuyu yali nangangi jangkurr, durrijba yali nangangi yuwa, baki nanankardi barri yalu marda yabim yali nanda jangkurr nangangi Kudkanyi, ngayangayijba yali nanganginkanyi jangkurranyi, baki nanankardi barri wajbayi yalunya yajinyi jambanyi Kudwanyi, yalu jungunkanyi nananyina yajina. Nyuli wajba yalunya nanankanyi nanamannga yajinyi jali wabula nyulu yanyba, janyulu wajba yalunya yajinyi. Yingkamukunyi barri yali kurrkunba nanamuku yanimal jarrbawarr, niji layin. Yali kurrkunba nanamuku yanimalmuku jarrkanyi yalunya.
HEB 11:34 Yingkamukunyi yali mungamba walkurra jangu. Yingkamuku barri marrimbayi yalunya mardarda Kudwanyi jali balanja kurdanbikanyi yalunya ngurranyimukunyi. Yingkamuku yali majabujba mankanyi, ngala ngirukamba yalunya mankanyi Kudwanyi, baki yalunjali daba wakara barri. Kajamuku ngurranyimuku ngarrkadabawarrmuku yalunjali daba wakara barri.
HEB 11:35 Yingkawuyanyi jibarriwuyanyi bula marda kuyuyi jangkurr nangangi Kudkanyi. Bula jingkijbayi Kud, nyulu ngiruka yabimbikanyi ngiruka yaji. Janyba bulangki, kulunganjawuya bulangi, yingka waluwa, baki baku yingka bayngkani barri. Jali bulangka janyba kulunganjawuya bulangi, baki buli ngajaka Kud, nyulu wankambiji bulanya. Nani barri buli ngajaka Kud, kuyungangi buli nangangi jangkurr Kudkanyi. Baki wankambayi bulanya kulunganjawuya Kudwanyi, waluwa yingka, baki baku yingka bayngkani. Barriwa. Ngala yingkamukunyi barri, kuyu yali jangkurr nangangi Kudkanyi. Durrijba yali nangangi jangkurr, baki ngala yali jungku kijiyudi. Nanamukunyi jali yalu ngirra Kud, yali wudumba kudiya yalunya jali yalu kuyu jangkurr nangangi Kudkanyi. Yalunjali wudumba. Yalunjali karu, jaliyi yalungki yangkalamba nanganbunanyi Kudnanyi, baki yuku jayalunya muningka manjijba yalunginkurri barndarri. Ngala miku yalungkiyanyi yangkalamba nanganbunanyi, ngala yali yanyba, jayalu kudanyu durrijba Kud yurrngumba barri. Baki nanankardi barri nanamukunyi ngirrawarrmukunyi, yalunjali wudumba, nanamuku jali yalu maruka muwa nangangi Kudkanyi, jali yalu kuyu nangangi jangkurr. Yalunjali linjumba mankanyi kudanyu barri. Yalunjali kurdanba. Ngala yali mirnarrijba muwa, janybikanyi yalungka nani barri, jingkijbangangi yali Kud, janyulu mili wankamba yalunya, jayalu jungku mili wanka nangandu kingkarri yurrngumba barri.
HEB 11:36 Jabarri nanamukunyi jali yalu ngirra Kud, yalunjali wudumba nanamuku, jali yalu kuyu nangangi jangkurr Kudkanyi. Yingkamuku yalunjali ngirrkimba, yalunjali wajuba, yalunjali kijijba kijbakijbayudinyi, yalunjali janyba brisinyina.
HEB 11:37 Ngala yingkamuku barri yalunjali daba dungalayudinyi, yalunjali kurdanba dungalayudinyi. Yingkamuku barri yalunjali jaralyarlmba. Yingkamuku barri yalunjali karlba wunanybalanjudinyi jankunbijinyiyudinyi. Yalunjali karlba, baki yalunjali kurdanba barri. Ngala nanamukunyi jali yalu ngirra Kud, yalunjali ngirra yingkamuku marda. Yalunjali ngirra nanamuku jali yalu kuyu jangkurr nangangi Kudkanyi. Yalunjali wajba kijinyi. Yalunjali malijba yalunbunanyi barndananyi. Ngala mirnarrijbayi muwa Kud yalungi, jali yalu kuyu nangangi jangkurr. Nyuli mirnarrijba muwa yalungi barri. Ngala miku nyuliyanyi mirnarrijba muwa yalungi, jali yalu ngirra Kud, jali yalunjalu wajba kijinyi. Yalunjali malijba yalunbunanyi barndananyi, bakili yalu muningka jilalajba mangkurruna yajina, baki dungalana yajina. Yalili jungku bardawana jambana marda, baki kumayanguna. Ngawamba waba jumbala yalungi. Mikuyaji dungalanyi yalundu, bakili yalu wudumba waba jibkanyi baki yukularrinyi yalungi jumbala. Yalili birrkalanyi jungku yurrngumba barri. Mikuyaji dungalanyi, mikuyaji mamanyi yalundu. Barriwa.
HEB 11:39 Ngala mirnarrijbayi muwa Kud yalungi barri nanamukuyngka wankalamukuyngka. Kudanyu nyuli mirnarrijba muwa yalungi, kuyungangi yalili nangangi jangkurr yurrngumba barri. Miku yalungkiyanyi yangkalamba nanganbunanyi. Miku. Ngurungurujba yali nanankanyi kunybanyi yajinyi kingkarri barri, ngala miku yaliyanyi jungku nanaba. Jilijbawa janyulu kuyu yalunya nanankurri yajiyurri Kudwanyi.
HEB 11:40 Ngala jingkijbangka Kudwanyi nanda yaji jalija nyulu yabimba yalungi, baki ngambalangi marda. Baku barri janyulu wudumba yalunya Jisus Krayiswanyi. Janyulu wudumba yalunya, nanamuku kunybamuku jalili yalu maruka muwa nangangi Kudkanyi, jalili yalu ngayangayijba nangangi. Baki janyulu wudumba ngambalanya marda. Janyulu dalburrijba bukambiju ngambalanya, baki janyulu kuyu ngambalanya kingkarri lalijiyurri. Baki yurrngumba jangambala jungku nangandu barri kingkarri. Barriwa.
HEB 12:1 Ngambala barri, marda ngambalimi mankumankuwa yalunya, nanamuku wankalamuku jali yalu kuyu nangangi jangkurr Kudkanyi. Marda ngambalimi mankumankuwa yalunya. Yali ngayangayijba nanganginkanyi jangkurranyi Kudkanyi, jingkijbangangi yali Kud, janyulu yabimba nanda jali nyulu yanyba, janyulu yabimba yaji. Nanankardi barri marda ngambalimi barriwa yingijba nanda balki yaji jala ngambala yabimba. Marda ngambalimi barriwa janyba bukamba nanda balki yaji ngamanbunanyi kurdulunanyi. Nanangini balkiwanyi ngambalanya ngirukamba kurdulu, baki miku ngambalimi kudanyu durrijba nangangi jangkurr Kudkanyi. Marda ngambalimi barriwa janyba nanda balki ngamanbunanyi, baki marda ngambalimi jungku yurlurrmba nangangi Kudkanyi. Marda ngambalimi yabimba kunyba yaji nangangi. Baki marda ngambalimi yurrngumba jungku ngiruka nangangi Kudkanyi, barrinani nanamuku wankalamuku yalu barri jungkuyi ngiruka nangangi.
HEB 12:2 Marda ngambalimi mankumankuwa ngambalangi mambuka Jisus Krayis. Marda ngambalimi kudanyu durrijba nangangi jangkurr yurrngumba barri. Nyulu barri lirrka minimbikanyi ngambalanya nangangi Kudkanyi. Nyulu lirrka minimbikanyi ngambalanya nangangi Kudkanyi, nyulu nanda marrimbawarr mardarda. Jaliyi ngambala kuyu nangangi jangkurr, jaliyi ngambala durrijba nangangi jangkurr yurrngumba barri, baki janyulu yabimba ngambalanya jardiykanyi mili ngiruka nangangi Kudkanyi yurrngumba barri. Nani barri jangambala jardijba mili ngiruka nangangi barri. Baki jangambala jingkijba marda, baku barri jangambala jungku mili wanka nangandu barri, baki janyulu marrimba ngambalanya mardarda nangandu Kudwanyi. Jali jungku Jisus Krayis wayka jambana, baki marrimba yali, baki kuyu yali kurdanbiji barri. Ngala jaliyanyi jujamba yaji Jisus Krayiswanyi, jaliyanyi nyulu yanyba, miku nyulu nanda marrimbawarr mardarda jali manjijba Kudwanyi, baki miku yaliyanyi kurdanbikanyi. Miku. Ngala miku nyuliyanyi jujamba yaji, baki nanankardi barri yalu wajbayi Jisus Krayis kijinyi. Yalu ngirrikimbayi, yalu kakalijbayi nangangi, baki yalu kurdanbayi barri. Nani barri nyuli yalunya munyajba Jisus Krayiswanyi. Munyajbayi yalunya yabimbikurri nanda yaji nangangi, mankumankungangi nangki Jisus Krayis ngambalangi barri. Mankumanku nangki ngambalangi, nyulu marrimbikanyi ngambalanya mardarda baku barri. Nanankardi barri mirnarrijbayi Jisus Krayis muwa, mankumankunkanyi nangki baku yajinyi, baki nyuli munyajba yalunya kurdanbikurri. Baki nanankardi barri nanijba nyulu jungkuka kingkarri nangandu Kudnyina. Nyulu walkurra mambuka bayngkani nangandu barri. Barriwa.
HEB 12:3 Mankumanku narringka nangangi Jisus Krayiskanyi. Ngirra yali Jisus Krayis nanamukunyi Jumukunyi. Yali jungku balki nangangi Kudkanyi, baki yali ngirra Jisus Krayis. Mankumankuwa narringka nangangi Jisus Krayiskanyi. Yuwajiwa yali ngirra Jisus Krayis, baki jayalu kurdanba, ngala jungkuyi Jisus Krayis ngiruka nangangi Kudkanyi yurrngumba barri. Baki nani barri yalu ngirra ngambalanya marda kajamukunyi. Yalu yabimbaka balki yaji ngambalangi barri. Ngala marda ngambalakimi miku yangkalamba nanganbunanyi Kudnanyi. Ngala marda ngambalimi jungku ngiruka nangangi, barrinani jungkuyi Jisus Krayis ngiruka nangangi Kudkanyi yurrngumba barri.
HEB 12:4 Yalu ngirra narrinya kajamukunyi, barrinani yali ngirra Jisus Krayis waluwa barri, baki jayalu kurdanba. Yalu ngirra narrinya, ngala jilijbawa yalu nulijbangka kurdanbikanyi narrinya. Yalu wajbangka narrinya kijinyi, ngala kudanyu narri balanjaka jungunkanyi ngiruka nangangi Kudkanyi.
HEB 12:5 Marda narrimi mankumankuwa nanda jangkurr najana Kudkanyi. Yanybaka Kud nayinda jangkurr narringi barri, nanganginmukuyngka jandanyimukuyngka, “Narri ngakinmuku jandanyimuku. Marda narrimi marrimba nayinda ngaki jangkurr narringinyina kurduluna. Ngayu barri Kud. Jaliyi narri jungku balki ngaki, baki miku ngayiyi yabimba kunyba yaji narringi, ngala jangayu daba narrinya. Ngala marda narrimi miku balkijba muwa, jalija ngayu daba narrinya. Jangayu daba narrinya, ngawamba jalija narri jungku balki ngaki.
HEB 12:6 Nani barri jangayu yabimba yaji narringi, marukangangi ngayu muwa narringi. Narri ngakinmuku jandanyimuku. Jangayu daba narrinya baki janarri janyba nanda balki narrindunanyi, baki janarri jungku yurlurrmba ngaki yurrngumba barri.” Barriwa. Marda narrimi mankumankuwa nanda nangangi jangkurr Kudkanyi.
HEB 12:7 Nanangini barri jala nyulu kunyba nijanganjinyi, nyulu dabangka yalunya nanganginmuku jandanyimuku. Nyulu yalunya dabangka, jala yalu jungku balki nangangi, jala yalu miku ngayangayijba nanganginkanyi jangkurranyi. Nyulu dabangka yalunya, marukangangi nyulu muwa yalungi barri. Nyulu dabangka yalunya, nulijbangangi nyulu yalungi, yalu jungunkanyi kunyba nangangi, yalu jungunkanyi yurlurrmba nanankanyi yuwanyi. Ngala jaliyi nyulu miku daba yalunya, jala yalu jungku balki, baki miku nyulimi maruka muwa yalungi, baki miku nyulimi nulijba yalungi yalu jungunkanyi kunyba, yalu jungunkanyi yurlurrmba yuwanyi barri. Baki nani barri narrinya dabangka Kudwanyi. Nyulu munyajbangka yalunya, waykurri narrinya kijinyi. Nani barri narrinya dabangka Kudwanyi, nulijbangangi nyulu narringi, narri jungunkanyi kunyba, narri jungunkanyi yurlurrmba nangangi Kudkanyi. Marukangka Kud muwa narringi kudanyu barri, narringangi nanganginmuku jandanyimuku. Jala yalu wajba narrinya kijinyi, baki marda narrimi kurrkunba nanda kiji. Marda narrimi kurrkunba nanda kiji. Marda narrimi mardumardu muwa nanankanyi kijinyi, jingkijbangangi narri Buwakanya Kingkarri, janyulu yabimba narrinya ngiruka nangangi barri. Miku narrinyimi daba Kudwanyi, ngarrangarrangangi nyulu muwa narringi, ngirrangangi nyulu narrinya. Miku. Dabangka narrinya, yabimbiji narrinyaja jungunkanyi kunyba nanganginyina yuwanyi, jungunkanyi yurlurrmba nangangi. Dabangka narrinya, yabimbiji narrinyaja jungunkanyi mili ngiruka nangangi barri Buwakaya Kingkarri. Jaliyi nyulu miku daba narrinya Kudwanyi, baki narri jingkijba, miku narrimi dujanya nanganginmuku jandanyimuku Kudkanyi.
HEB 12:9 Wabula barri jali ninji juka, baki dabayi ninya nganyinyi nijanganjinyiwanyi. Ninya nyuli daba yabimbikanyi ninya jungunkanyi yurlurrmba yuwanyi. Baki nanankardi barri ninjija ngayangayijba nganyingkanyi nijanganjiyngkanyi. Ngala Kud mili nyulu walkurra nangangi nganyingkanyi nijanganjiyngkanyi. Nyulu mili walkurra nangangi barri. Marda ngambalimi kudanyu ngayangayijba nangangi barri Kudkanyi. Ngambala jingkijbangka Kud, nyulu ngambalangi Buwakanya Kingkarri. Baki marda ngambalimi ngayangayijba nangangi, jingkijbangangi ngambala Kud, baku barri janyulu mili wankamba ngambalanya barri.
HEB 12:10 Dabayi ninya nganyinyi nijanganjinyiwanyi, ngala ninji juka. Baki miku ninjiyanyi mirnarrijba muwa jali ninya daba. Miku. Ngala miku ninjiyanyi juka yurrngumba barri. Jardijba ninji walkurra nganinyi, baki miku nyuliyanyi mili daba ninya nganyinyi nijanganjinyiwanyi. Nani barri miku ninyiyanyi daba yurrngumba barri nijanganjinyiwanyi. Ngawamba ngala nyulu kujajarra janjawala ninyi daba ngala ninji juka. Baki nani barri nyulu ngambalanya dabangka Kudwanyi. Nyulu munyajbangka yalunya, yalu waykurri ngambalanya kijinyi. Yalu wajbayi ngambalanya wabulinyi kijinyi, baki nanankardi barri ngambala jardijbangka mili ngiruka baki mili ngiruka nangangi. Nanankardi barri ngambala jungkuka mili yurlurrmba nangangi barri. Baki nanankardi barri ngambala jungkuka mardumardu muwa nangangi barri Kudkanyi. Ngala miku jangambalanya daba yurrngumba Kudwanyi. Baku barri jangambala jungku mikuyaji kijinyi ngambalangi. Jangambala jungku kingkarri nangandu Kudnyina. Yurrngumba barri jangambala mirnarrijba muwa, jungunkanyi kingkarri nangandu barri. Barriwa.
HEB 12:12 Ngayu karungka narrinya nanginkanyi jangkurranyi. Jala badajba kiji narrindurri, baki marda narrimi miku balkijba muwa nanankanyi kijinyi. Ngala marda narrimi jungku ngiruka, nanankanyi kijinyi. Marda narrimi jungku mili ngiruka baki mili ngiruka nangangi Kudkanyi yurrngumba barri nanankanyi kijinyi.
HEB 12:13 Marda narrimi mankumankuwa Jisus Krayis. Marda narrimi durrijba nangangi yuwa yurrngumba barri. Marda narrimi mamanumba nanda waluwinyi yuwa narringi. Barriwa barri bukamba nanda waluwinyi yuwa narringi barri. Marda narrimi yurlurrmba durrijba nanda buyingkinyi yuwa nangangi Jisus Krayiskanyi. Kudiyanymuku yalu majabujba kurdulu nangangi Kudkanyi. Ngawamba yalu jungkuka bijal ngiruka nangangi Jisus Krayiskanyi. Bijal yali durrijba nangangi yuwa Jisus Krayiskanyi, ngala banganumba yali, baki mili yalu durrijba nanda waluwinyi yuwa yalungi barri. Ngala baku barri mili jayalu banganumba nangandurri Jisus Krayisyurri, mili jayalu durrijba nangangi yuwa. Nani barri yalu majabujba kurdulu, yalu durrijbangka waluku yingka yuwa, baki bayngkani yingka yuwa. Ngala jaliyi narri jungku ngiruka nangangi Jisus Krayiskanyi, jaliyi narri kudanyu durrijba nangangi yuwa yurrngumba barri, baki janarri ngirukamba yalunya kurdulu. Janarri ngirukamba yalunya kurdulu, yalu durriykanyi nangangi yuwa Jisus Krayiskanyi yurrngumba barri. Jayalu najba narrinya jungunkanyi kunyba nanganginyina yuwana, baki jayalu jingkijba, yuku jayalu yalu marda jungku kunyba nanganginyina yuwana. Barriwa.
HEB 12:14 Marda narrimi dadijba jungku ngiruka nangangi Kudkanyi. Marda narri miku wajba yingka Krisjin kijinyi, ngala marda narrimi jungku mardumardu muwa yalungi bukambijuyngka Krisjinmukuyngka. Jaliyi narri miku jungku mardumardu muwa, baki dula barri janarringka wajba kijinyi. Baki nanamuku jala yalu majabujba kurdulu nangangi Kudkanyi, yiningki jayalungka yangkalamba nanganbunanyi Kudnanyi, jaliyi narri jungku kijiyudi. Marda narrimi jungku yurlurrmba nangangi Kudkanyi, barrinani narri malaba nangangi barri. Jaliyi narri jungku nani barri, baki narri jingkijba Kud, janyulu kandimba narrinya yurrngumba barri.
HEB 12:15 Marda narringkimi najbawa. Narri jingkijbangka Kud, nyulu kandimbaka narrinya, baki nanankardi barri marda narringkimi miku yangkalamba nanganbunanyi Kudnanyi. Jala ngambala yarrijba lamurra mamana baki balkimbaka bukamba nanda mama lamurrawanyi. Baki nani barri jaliyi balki nganinyi jungkuka narrindu, baki nyulu balkimbaka yingkamuku marda. Baki nani barri jaliyi yangkalamba nangka yingka nanganbunanyi Kudnanyi, baki wajba janarrinya kijinyi marda nanangini barri. Yiningki janyulu yabimba yingka nangka mankumankunkanyi balkinyi yajinyi. Yiningki janyulu yabimba nanda yingka nangka yangkalambikanyi nanganbunanyi Kudnanyi.
HEB 12:16 Yingka wankalanyi, nangangi niji Yisu. Kujba nyuli barnyinyi munjimunji. Jali nyulu wijba barndarri, baki birrkalijba nyuli kudanyu barri. Najba nyuli nangangi kanyiya jirdi kunyunyunyi mamanyi, baki ngajaka nyuli, “Janganinji wajba mamanyi. Janganinji wajba, baki jangayu munyajba ninya wudumbikurri kunyba yaji nanganbunanyi Kudnanyi. Marda ngayimi wudumba nanda kunyba yaji nanganbunanyi, ngala janinya munyajba wudumbikurri, jaliyi nganinji wajba nanginkanyi mamanyi.” Barriwa. Nanamanji barri wankalana yalili ngajaka Kud yajinyi nijanganjimukunyi. Yalili ngajaka Kud, nyulu yabimbiji kunyba yaji yalunginkanyi lirrkanyi jandayngkanyi. Nanda Yisu nyuli lirrka jandanyi nangangi Jakibkanyi, ngala miku nanda jirrinyi yaji nangangi, wudumbikanyi kunyba yaji nanganbunanyi Kudnanyi. Miku nanda jirrinyi yaji nangangi. Ngala ngawamba mamanyi nanganginkanyi mankankanyi, ngawamba nanankanyi jirrinyi yaji nangangi. Baki nanankardi barri nyuli karu nangangi kanyiya, yuku barri janyulu kanyiyawanyi wudumba nanda yaji nanganbunanyi Kudnanyi. Marda narrimi miku jungku barrinani nanda wankalanyi Yisu. Marda narrimi miku kudanyu nulijba yajinyi narringinkanyi mankankanyi barrinani mamanyi baki dungalanyi. Ngala marda narrimi kudanyu nulijba nanankanyi kunybanyi yajinyi nanganbunanyi Kudnanyi.
HEB 12:17 Baku barri nanda nijanganjinyi nangangi Yisukanyi, nyuli yanyba mududu nangangi Kudkanyi. Nyuli ngajaka Kud, nyulu yabimbiji kunyba yaji nanganginkanyi jandayngkanyi, ngala miku nanganginkanyi lirrkanyi jandayngkanyi, ngala nanganginkanyi burrandiyngkanyi jandayngkanyi. Ngala nanda lirrka jandanyi Yisu, balkijba nyuli muwa. Kudanyu nyuli balkijba muwa mirlarryudi, nulijbangangi nyuli wudumbikanyi kunyba yaji nanganbunanyi Kudnanyi, ngala yurlwayi Kud nangangi. Mikukiyanyi yabimba kunyba yaji nangangi Kudwanyi. Wabula barri nyuli yurlwa wudumbikanyi yaji nanganbunanyi Kudnanyi, baki yurlwayi Kud nangangi barri. Barriwa.
HEB 12:18 Wankalana barri, jali kuyu yalunya Jumuku bayunguna Musiswanyi, baki wanbiya yali kulawirana niji Sinayi. Karrinja yali wayka wilina nanaba kulawirana, baki minimba nangki Kud yalundurri. Murumbayi bukamba yaji kukurduwanyi ngaluwanyi, baki jungku yali barrinani mungana yajina. Miku yaliyi najba yaji. Baki manjijbayi walkurra jangu kulawirarri Kudwanyi. Baki manjijba nyuli walkurra yunkurr, marda ngajarr. Baki manku yali walkurra nyiri, barrinani jala yalu janyba kingkarrinya rabunya, jala yalu balunba kudanyu barri. Baki manku yali Kud yanybikurri. Manku yali Kud yanybikurri yalungi, baki marrala yali. Kudanyu yali marrala jali yalu manku Kud yanybikurri yalungi. Yanybayi Kud nayi barri yalungi. “Miku narriyi karrinja nayiba kulawirrana. Miku narriyi marrimba marniyudinyi. Miku yaliyi karrinja kulawirana yanimal junu, bajangu baki buluki baki jib. Miku yaliyi karrinja kulawirana. Jaliyi yingka karrinja kulawirana, baki janarri daba. Janarri kurdanba nanda yanimal dungalayudinyi.” Barriwa. Nani barri yanybayi Kud, baki marrala yali kudanyu barri. Baki karu yali Musis, “Jaliyi nurru mili manku Kud yanybikurri nurrungi, baki janurrungka janyba bukambiju. Marrala nurru nangangi. Janinji ngajaka Kud nurrungi, nyuluja yanybiji ngawamba nganyi, miku nurrungi barri.” Nani barri yali yanyba nangangi Musiskanyi. Baki nyulu marda marralayi Musis, baki yanyba nyuli, “Marrala ngayu kudanyu barri. Birrirra ngayu mankanyi.” Nani nyuli yanyba. Ngala ngambala Krisjinmuku, miku ngambalimi barrinani nanamuku wankalamuku Jumuku, jali yalu marrala nangangi Kudkanyi. Miku ngambaliyi marrala nangangi Kudkanyi.
HEB 12:22 Ngala ngambala mirnarrijbangka muwa nangangi, jingkijbangangi ngambala Kud, baku barri jangambala najba Kud. Jangambala jungku mili wanka kingkarri nangandu. Jangambala jungku mili wanka nananyina yajina lalijina, jalili yalu jungku kajamuku Yanjilmuku. Yalili nijarrijba nanda yaji nangangi Kudkanyi lalijina, “Jirusalim Kingkarri.” Baki yingka niji nanankanyi yajinyi lalijina, “Siyun.”
HEB 12:23 Ngambala Krisjinmuku, ngambala mirnarrijbangka muwa, kirrijbangangi jangambala kingkarri, jungunkanyi ngambala nangandu Kudnyina. Yarrijbayi ngambalanya nanganginmuku jandanyimuku Kudwanyi. Baki nyuli yarrijba ngambalangi niji najana, jungkungangi ngambala yurlurrmba nangangi barri. Jingkijbangka ngambalanya Kudwanyi, ngambala kuyungka nangangi jangkurr Jisus Krayiskanyi. Baku barri janyulu karrinjarrijba ngambalanya walu nangandu Kudwanyi, baki janyulu yanyba manjiykanyi ngambalanya. Baki ngambala jingkijbangka Kud, janyulu manjijba ngambalanya kingkarri jungunkanyi nangandu barri. Jangambala jungku kingkarri malumba yalundu barri, nanamukunyina jali yalu kuyu nangangi jangkurr Kudkanyi, ngala yalungki janyba waluwa barri. Yali kirrijba kingkarri nangandurri Kudyurri waluwa ngambalangi. Jangambala jungku kingkarri malumba yalundu barri. Barriwa.
HEB 12:24 Narri jingkijbangka nanda jangkurr bulangi wankalawuyayngka buwakulayngka. Nanda lirrka nangangi niji Kayin, baki nanda yingka nangangi niji Yabil. Ngala yabimbayi balki yaji nanganginkanyi kanyiyanyi buwanganjawanyi. Daba nyuli, baki kurdanbayi, baki jurrwayi nangangi ngulya jambana. Nanda barrinani jali najba nanda ngulya yingkawanyi, baki kayayi ngulya nangandurri. Kayayi ngulya, “Kurdanbayi ngana ngakinyi buwanganjawanyi. Kurdanbayi barri. Ngala kurdanbakiyi ngaki buwanganja. Kurdanbakiyi, nyulungangi kurdanbayi ngana.” Barriwa. Baki nani barri marda kurdanba yali Jisus Krayis Jumukunyi, baki jurrwayi nangangi ngulya. Ngala mikukiyanyi kaya nangangi ngulya yingkanyi, nyulu kurdanbiji yalunya, jali yalu kurdanba. Mikukiyanyi kaya nangangi ngulya nani barri. Ngala janyba nangki Jisus Krayis ngambalangi barri, baki nanankardi barri nyulu wajbayi ngambalanya nanganginkanyi buyingkiyngkanyi yuwanyi Kudwanyi. Jaliyi ngambala ngindu muwa ngambalangi balkinyi yajinyi, jaliyi ngambala kuyu nangangi jangkurr Jisus Krayiskanyi, baki janyulu manjamanjamba ngambalangi balki yaji Kudwanyi, baki jangambala jandanyimuku nanganginmuku Kudkanyi. Barriwa.
HEB 12:25 Narri barri, najbawa narringka, bakiyi narri yurlwa nanganginkanyi jangkurranyi Kudkanyi. Marda narrimi miku yurlwa nanganginkanyi jangkurranyi. Wabula barri wankalana, kudiyanymuku nanamuku Jumuku, yali yurlwa nanankanyi jangkurranyi Kudkanyi, jali karu yalunya Musiswanyi. Miku yaliyanyi ngayangayijba nanankanyi jangkurranyi, baki nanankardi barri dabayi yalunya Kudwanyi. Miku yalungkiyi ngadijba nanganbunanyi. Miku yaliyi wirlku nanganbunanyi. Nyuli daba yalunya, yurlwangangi yali nanganginkanyi jangkurranyi. Baki ngambala barri, ngambala marda mankuyi nangangi jangkurr. Dabayi yalunya wankalamuku Kudwanyi, jali yalu yurlwa nanankanyi jangkurranyi jali yalunya karu Musiswanyi. Ngala jaliyi ngambala yurlwa nanankanyi jangkurranyi jali ngamanya karu Jisus Krayiswanyi, baki janyulu daba ngambalanya kudanyu barri. Miku ngambalakiyi ngadijba nanganbunanyi. Miku ngambaliyi wirlku nanganbunanyi. Janyulu ngambalanya daba kudanyu barri, jaliyi ngambala yurlwa nanganginkanyi jangkurranyi.
HEB 12:26 Jali yanyba Kud yalungi wankalamukuyngka Jumukuyngka, ngala yalu karrinja wilina nanaba kulawirrana niji Sinayi, jali yanyba Kud yalungi, baki kulbayi jamba. Kulbayi jamba kudanyu barri, jali yanyba Kud yalungi. Ngala nanijba barri yanybaka Kud nayinda barri jangkurr, miku nangkiyi yangkalamba. Yanybaka Kud nayi barri, “Mili barndaykamba jangayu wayawayamba jamba barri wandijiyana. Mili barndaykamba jangayu wayawayamba jamba, baki laliji marda.” Nani barri yanybaka Kud.
HEB 12:27 Nanda jangkurr nangangi Kudkanyi duja barri. Mili barndaykamba kulbaja jamba wandijiyana. Baki nanamanji barri janyulu bukamba yaji Kudwanyi. Janyulu bukamba jamba marda laliji, marda bukamba yaji marda nanamanji barri, jalija nyulu wayawayamba jamba baki laliji Kudwanyi. Ngala nanamuku barri jala yalu kuyu nangangi jangkurr, miku yalunyiyi bukamba, ngala janyulu marrimba yalunya mardarda Kudwanyi. Janyulu marrimba yalunya mardarda kingkarri nangandu barri. Barriwa.
HEB 12:28 Marda ngambalimi mirnarrijba muwa, jingkijbangangi ngambala Kud, janyulu marrimba ngambalanya mardarda. Marda ngambalimi yanyba mududu nangangi. Marda ngambalimi wajba Kud ngambalanginkanyi kunybanyi jangkurranyi. Marda ngambalimi mankumankuwa Kud, nyulu kudukudu, nyulu walkurramirra, nyulu ngirukamirra, nyulu wirimalaru ngambalangi. Marda ngambalimi mankumankuwa Kud nani barri, jala ngambala yanyba mududu nangangi, jala ngambala wajba Kud ngamanginkanyi kunybanyi jangkurranyi. Baki janyulu mirnarrijba muwa Kud ngambalangi barri.
HEB 12:29 Ngala jaliyi ngambala miku ngayangayijba nangangi Kudkanyi, jaliyi ngambala miku jungku yurlurrmba nangangi, baki janyulu bukamba ngambalanya Kudwanyi. Jala nyulu yajba janguwanyi kurnda, baki nyulu bukambaka nanda kurnda. Mikuyaji kurndanyi. Baki nani barri janyulu bukamba ngambalanya Kudwanyi, jaliyi ngambala yurlwa nanganginkanyi jangkurranyi. Barriwa.
HEB 13:1 Marda narringkimi yuwajiwa maruka muwa. Bukambiju ngambala Krisjinmuku, ngambala kanyiyamuku nangangi Jisus Krayiskanyi, nyulu ngambalangi buwakanya. Baki nanankardi barri marda narringkimi maruka muwa.
HEB 13:2 Marda narrimi kandimba yalunya ngurranyimuku jala yalu yidamba narrinya. Marda narrimi kuyu yalunya narringinkurri barndarri. Barndaykamba barri jali jungku nanda wankalanyi Yabrayam nanganginyina barndana, baki yidamba yali Yabrayam ngurranyimukunyi. Kandimbayi yalunya Yabrayamwanyi. Yakanajba nyuli yalunya, ngamu nganinyimuku, ngala baku barri nyuli jingkijba yalunya, yalu Yanjilmuku. Jabarri nani barri baku yingkawanyi najbayi Yanjil, jabarri baku barri yingkawanyi. Baki nani barri marda narrimi kandimba yalunya ngurranyimuku. Barriwa.
HEB 13:3 Marda narrimi mankumankuwa yalunya jala yalu jungku brisinyina. Baki marda narrimi mankumankuwa yalunya, jala yalu jungku jirdi walkurrayngka kijinyi barri. Jalimi narri jungku brisinyina, jalimi narri jungku jirdi walkurrayngka kijinyi, baki narrimi nulijba yalungi yingkamukuyngka Krisjinmukuyngka, yalu kandimbikanyi narrinya barri. Baki nani barri marda narrimi kandimba yalunya barri. Marda narrimi yabimba kunyba yaji yalungi, jala yalu jungku brisinyina. Barriwa.
HEB 13:4 Nimbala maykarra, marda nimbalimi yabimba yurlurrmba yaji. Ninji barri, nangangi maninganja, marda ninjimi yurlwa yingkanyi nganiyngkanyi, marda ninjimi jungku yurlurrmba nangandu nganyinyina nawinganjana yurrngumba barri. Baki ninji barri nangangi nawinganja, marda ninjimi yurlwa yingkanyi jibarrinyi, ngala marda ninjimi jungku yurlurrmba nangandu nganyinyina maninganjana yurrngumba barri. Nani barri marda nimbalimi yabimba yurlurrmba yaji, jingkijbangangi nimbala Kud, janyulu karrinjarrijba bukambiju ngambalanya walu nangandu Kudwanyi. Baki nanamuku jala yalu miku yurlwa yingkanyi, jala yalu kuluka yingkana, janyulu karrinjarrijba yalunya marda walu nangandu, baki janyulu daba yalunya Kudwanyi. Janyulu daba yalunya kudanyu barri, yurlwangangi yalu nanganginkanyi jangkurranyi maykarrayngka. Barriwa.
HEB 13:5 Marda narringkimi miku yurrngumba mankumanku dungalanyi. Marda narrimi miku kuliwijba dungalanyi. Jaliyi ngawamba bijal dungala nganyindu, baki marda ninjimi mirnarrijba muwa. Marda ninjimi mirnarrijba muwa nanankanyi bijalanyi dungalanyi, yanybakangangi jangkurr najana Kudkanyi nayi barri, “Miku ngayiyi yingijba narrinya. Jangayu jungku narrindu yurrngumba barri, baki jangayu lalanba narrinya.” Nani barri yanybayi Kud. Marda narrimi mankumankuwa nanda nangangi jangkurr, jala ngawamba bijal dungala narrindu.
HEB 13:6 Wankalana barri yarrijbayi jangkurr najana Kudkanyi nganinyiwanyi. Nayinda nangangi jangkurr. “Ngana kandimbaka Kudwanyi. Nyulu lalanbawarr ngaki. Nyulu ngana lalanbaka. Baki nanankardi barri miku ngayiyi marrala yajinyi. Mikuwali yingkawanyi yabimba balki yaji ngaki, nganangangi lalanbaka Kudwanyi. Jala ngana lalanbaka Kudwanyi, baki mikuwali yabimba balki yaji ngaki yingkawanyi.” Barriwa. Nani barri yanybayi nanda wankala. Baki nani barri, marda ngambalimi mankumankuwa Kud, nyulu lalanbaka ngambalanya yurrngumba barri, baki marda ngambalimi miku marrala yalungi yingkamukuyngka.
HEB 13:7 Marda narrimi mankumankuwa yalunya, jali yalu narringi mambukamuku waluwa barri. Yali karu narrinya nanankanyi jangkurranyi nanganginkanyi Kudkanyi. Marda narrimi mankumankuwa yalunya, yanka yalili jungku yurlurrmba nangangi Jisus Krayiskanyi. Yurrngumba barri yalili jungku yurlurrmba nangangi nanankurri jali yalungka janyba. Miku yalungkiyanyi yangkalamba nanganbunanyi Jisus Krayisnanyi jali yalu jungku kijiyudi. Yalili jingkijba Jisus Krayis, janyulu marrimba yalunya mardarda yurrngumba kingkarri nangandu barri. Marda narrimi mankumankuwa nanamuku narringinmuku mambukamuku, yanka yalili jungku. Baki marda narrimi jungku yurlurrmba nangangi Kudkanyi yurrngumba barri.
HEB 13:8 Janyba yalungki nanamuku mambukamuku, ngala Jisus Krayis barri nyulu jungkuka wanka yurrngumba barri. Yurrngumba nyulu jungkuka wanka kingkarri nangandu Kudnyina. Miku nangkiyi mili janyba. Baki nyulu nanamannga wabula, baki nanijba, baki baku barri juju. Nanamannga nyulu jungkuka yurrngumba barri. Yurrngumba nyulu jungkuka bukambijuyngka. Baki nangangi jangkurr jungkuka duja yurrngumba barri. Yurrngumba nangangi jangkurr nanamannga yalungi barri bukambijuyngka.
HEB 13:9 Marda narrimi mankumankuwa nanda jangkurr jali yalu milidimba narrinya. Jaliyi narri durrijba nanda yalungi jangkurr nangangi Jisus Krayiskanyi, baki janarri jungku yurlurrmba nangangi Kudkanyi, baki janyulu yabimba narrinya ngiruka nangangi. Marda narrimi miku kuyu yinini jangkurr. Jaliyi narri durrijba yinini jangkurr, baki miku narriyi jungku yurlurrmba nangangi Kudkanyi. Nanda wankalanyi yuwa yanybayi wakardaykanyi narringka mankanyi, baki jarrkanyi yingka mama, ngala miku jarrkanyi yingka mama. Ngala barriwa barri bukamba nanda yuwa narringi. Mikukimi nanangini yuwawanyi marrimba narrinya mardarda. Miku. Ngala jaliyi narri durrijba nanda buyingkinyi yuwa nangangi Jisus Krayiskanyi, baki janyulu marrimba narrinya mardarda barri.
HEB 13:10 Wankala barri wajbayi Musis yuwanyi Kudwanyi. Nyuli wajba Musis nanankanyi yuwanyi, yalu dikarriykanyi barnyi nangangi Kudkanyi. Baki yali yabimba nanda yuwa yurrngumba barri barndaykamba jali nangka bukamba janja, baki mili baku barri barndaykamba jali nangka bukamba janja. Nyulili wudumba barnyi nanangini walkurrawanyi mambukawanyi jurjkanyi. Nyulili wudumba barnyi, bakili nyulu kurdanba nangangi Kudkanyi. Nyulili wudumba ngulya, bakili nyulu kuyu nanda ngulya kalawuyngkurru nanaba kudanyu malabana yajina jurjina. Nyulili bunyanyarrijba ngulya yajina nanaba barri. Jalili nyulu yabimba yaji nani barri, baki mikukiyanyi mili mankuwa yalungi balki yaji Kudwanyi. Miku nyuliyanyi mili mankuwa nanda balki yaji, jali yalu yabimba Jumukunyi. Nani barri janyba nangki nanda barnyi yalunginkanyi balkinyi yajinyi. Barriwa. Nyulili kuyu nanda ngulya kalawuyngkurru jurjina mambukawanyi jurjkanyi, ngala nanda mankanyi barri, yalili kuyu danbiyurri. Yalili kuyu nanda mankanyi danbiyurri barrikina lukuluku nananyina barrawuyabarrawuyana, bakili yalu dikarrijba nanda mankanyi. Yalili munyurrmba mankanyi. Miku yaliyanyi jarrba nanda barnyi mambukamukunyi jurjkanyi. Miku yaliyanyi jarrba, malabangangi nanda barnyi nangangi Kudkanyi. Mikukiyanyi munyajba yalunya jarrkurri barnyi Kudwanyi. Nani barri jirrinybayi Musis Kudwanyi, yalu yabimbiji yaji yurrngumba barri jali nangka bukamba janja, baki mili baku jali nangka bukamba janja. Ngala jingkijbayi Kudwanyi nanda jalija nyulu yabimba baku barri. Janyulu manjijba nangangi jandanyi Jisus Krayis wayka jambarri. Baki janangka janyba Jisus Krayis ngamanginkanyi balkinyi yajinyi barrinani janyba nangki nanda barnyi yalunginkanyi balkinyi yajinyi. Yalili kuyu nanda mankanyi danbiyurri barrikina lukuluku nananyina yajina munyurrmbikanyi, baki nani barri marda yali kuyu Jisus Krayis danbiyurri barrikina lukuluku nananyina barrawuyabarrawuyana kurdanbikanyi barri. Janyba nangki Jisus Krayis danbina barrikina. Jali nangka janyba, baki jurrwayi nangangi ngulya, baki nani barri nyuli bukamba nanda yuwa kurdanbikanyi barnyi nangangi Kudkanyi. Bukamba nyuli nanda yuwa. Baki marda yalimi miku kurdanba barnyi nangangi Kudkanyi. Marda yalimi miku kurdanba barnyi nangangi, janybangangi nangki Jisus Krayis ngamanginkanyi balkinyi yajinyi, bukambijuyngka wandijiyana. Barriwa.
HEB 13:13 Nanda walkurra jurj yalungi Jumukuyngka, nanda kalawuyngkurru nananyina barrikina, baki yalili yabimba waluwinyi yuwa nanaba jurjina. Ngala yali kurdanba Jisus Krayis danbina barrikina. Marda ngambalimi barriwa yingijba nanda yuwa kurdanbikanyi barnyi nangangi Kudkanyi. Jaliyi ngambala barriwa yingijba nanda yuwa, baki nanda barrinani ngambala yingijbangka nanda walkurra jurj, barrinani ngambala jilajbangka danbiyurri nangandurri Jisus Krayisyurri jungunkanyi nangandu. Yali ngirrikimba Jisus Krayis. Yali kakalijba nangangi. Yali daba, baki yali linjumba kudanyu barri. Baki yuku barri jayalu yabimba nanamannga yaji ngambalangi barri. Marda ngambalimi munyajba yalunya kakaliykurri ngamanjalu, daykurri ngamanjalu, linjumbikurri ngamanjalu. Yuku jayalu yabimba nanamannga yaji ngambalangi barrinani yali yabimba yaji nangangi Jisus Krayiskanyi waluwa barri.
HEB 13:14 Marda ngambalimi miku balkijba muwa, jaliyi ngamanjalu linjumba nani barri. Jaliyi yalu yabimba nanda balki yaji ngambalangi barri, baki marda ngambalimi miku balkijba muwa, jingkijbangangi ngambala, miku ngambaliyi jungku wanka nayiba wayka jambana yurrngumba. Miku. Ngala ngambala ngurungurujbangka nanankanyi yingkanyi yajinyi lalijina. Ngambala ngurungurujbangka nanankanyi yingkanyi yajinyi jalija ngambala jungku baku barri kingkarri nangandu Kudnyina.
HEB 13:15 Miku ngambalimi wajba Kud barnyinyi nanijba barri, ngala ngambala wajbangka Kud ngamanginkanyi kunybanyi jangkurranyi. Ngambala yanybaka mududu nangangi Kudkanyi. Ngambala karungka Kud, ngambala mirnarrijba muwa nangangi, janybangangi nangki Jisus Krayis ngamanginkanyi balkinyi yajinyi. Baki nanankardi barri ngambala likalika kurdulu nangangi Kudkanyi nanijba barri. Baki ngambala karungka yalunya yingkamuku nangangi Jisus Krayiskanyi, nyulu ngambalangi mambuka, nyulu ngambalangi wirimalaru.
HEB 13:16 Marda narrimi miku mamanumba yabimbikanyi kunyba yaji yalungi yingkamukuyngka. Marda narrimi kandimba yalunya yurrngumba barri. Jalija narrinya najba Kudwanyi, kandimbikurri yalunya, yabimbikurri kunyba yaji yalungi, baki janyulu nyulu mirnarrijba muwa narringi barri. Wabula barri, waluwa nangki janyba Jisus Krayis, baki nanamuku Jumukunyi, yalu wajbayi Kud barnyinyi, baki nyuli mirnarrijba muwa yalungi. Ngala nanijba barri nyulu mirnarrijba muwa ngambalangi jala ngambala kandimba yalunya yingkamuku, jala ngambala yabimba kunyba yaji yalungi. Baki nanda barrinani ngambala yabimbaka nanda yaji nangangi Kudkanyi, jala ngambala yabimba kunyba yaji yalungi barri. Barriwa.
HEB 13:17 Marda narrimi ngayangayijba yalungi barri, mambukamukuyngka narringinkanyi jurjkanyi. Yalu lalanbaka narrinya. Yalu najbawa narrinya yurrngumba barri. Nani barri yalu kandimbaka narrinya, yalu milidimbaka narrinya, narri jungunkanyi yurlurrmba nangangi Kudkanyi. Nani barri yalu lalanbaka narrinya, jingkijbangangi yalu, baku barri jayalu karrinja walu nangandu Kudnyina, baki jayalu karu Kud, yanka narri jungku jali yalu narringi mambukamuku. Jaliyi narri ngayangayijba yalungi, baki jayalu mirnarrijba muwa, ngala yalu lalanba narrinya mambukamukunyi jurjkanyi. Ngala jaliyi narri miku ngayangayijba yalungi, baki yuwajiwa jayalu lalanba narrinya, ngala miku narriyi jardijba mili ngiruka nangangi Kudkanyi. Jayalu balkijba muwa narringi, ngala yaluja lalanbawa narrinya. Ngala miku yaliyi kudanyu kandimba narrinya, jaliyi narri miku ngayangayijba yalungi barri. Baki miku narriyi jardijba mili ngiruka nangangi Kudkanyi. Barriwa.
HEB 13:18 Marda narrimi yanyba mududu nangangi Kudkanyi ngaki yurrngumba barri. Ngayu jingkijbangka yaji, ngayu jungkuka ngiruka nangangi Kudkanyi, yanybangangi ngaka muwa, ngayu jungkuka yurlurrmba nangangi Kudkanyi. Baki nanginmuku ngakindu, yalu marda jungkuka barrinani ngayu. Marda narrimi yanyba mududu nangangi Kudkanyi yalungi marda. Nurru nulijbangka yabimbikanyi ngawamba nanda jala nulijbangka Kud nurrungi yabimbikanyi yaji. Yurrngumba nurru nulijbangka, yabimbikanyi ngawamba nanda kunyba yaji jala nyulu nulijba.
HEB 13:19 Kudanyu ngayu ngajakangka narrinya, narri yanybiji mududu nangangi Kudkanyi ngaki barri. Janarri ngajaka Kud ngaki, jangana nyulu mili manjijba narrindurri marndakaja barri. Jangayu mili yidamba narrinya. Barriwa.
HEB 13:20 Mili wankambayi ngambalangi mambuka Kudwanyi. Jali nangka Jisus Krayis, baki mili wankambayi Kudwanyi. Jisus Krayis, nyulu nanda walkurra lalanbawarr ngambalangi. Nanangini nganinyiwanyi, nyulu lalanbaka nanganginmuku jibmuku, baki nani barri nyulu lalanbaka ngambalanya Krisjinmuku Jisus Krayiswanyi. Janyba nangki ngambalangi, baki nanankardi barri ngambala jingkijba Jisus Krayis, baku barri janyulu marrimba ngambalanya mardarda yurrngumba barri kingkarri nangandu. Ngambala yanybaka mududu nangangi Kudkanyi, jala nyulu yabimbaka ngambalanya jungunkanyi mardumardu muwa nangangi. Ngambala ngajakangka bulanya, Kud baki Jisus Krayis, jabula bula yabimba narrinya jungunkanyi ngiruka bulangi. Jabula yabimba narrinya jungunkanyi ngiruka, baki janarri yabimba bukamba nanda jala bula nulijba narringi yabimbikanyi yaji. Ngambala wajbangka Jisus Krayis ngamanginkanyi kunybanyi jangkurranyi, nyulungangi wirimalaru bukambijuyngka yalungi Krisjinmukuyngka wandijiyana yurrngumba barri. Barriwa.
HEB 13:22 Ngakinmuku bababanyamba ngambalaka, kudanyu ngayu ngajakangka narrinya, narri mankunki nayinda jangkurr, narringka mankumankunki nanginkanyi jangkurranyi. Yarrijba ngayi nayinda jangkurr najana narringi, baki janarri mirnarrijba muwa nanginkanyi jangkurranyi. Jaliyi narringka kudanyu mankumanku nanginkanyi jangkurranyi, baki janarri jungku mili ngiruka nangangi Kudkanyi. Miku nayinda kaja jangkurr ngayu yarrijba najana narringi barri. Ngawamba kujajarra.
HEB 13:23 Ngambalangi bababanyamba ngambalaka, Dimudi, nyulu jungkuyi brisinyina, ngala yali muningka manjijba barri. Jaliyi nyulu wanbiya ngakindu marndakaja barri, baki jangayu kuyu ngakindu, jalija ngayu yidamba narrinya barri.
HEB 13:24 Nurru manjijbangka jangkurr yalundurri, mambukamukuyngkurri narringinkanyi jurjkanyi, baki bukambijuyngkurri Krisjinmukuyngkurri narrindu. Baki yalu marda manjijbangka jangkurr narrindurri bukambijunyi Krisjinmukunyi jalili yalu jungku nananyina yajina niji Yidali. Yalu marda manjijbangka jangkurr narrindurri.
HEB 13:25 Nurru ngajakangka Kud, nyulu yabimbiji kunyba yaji narringi barri. Yurrngumba janyulu yabimba kunyba yaji narringi. Barriwa barri. Bukamba nayinda jangkurr.
JAM 1:1 Nanama narri. Ngaki niji Jayims. Ngayu waki bulangi, Kudkanyi baki mambukanyi Jisus Krayiskanyi. Ngayu wakiwarr bulangi. Ngayu yarrijba nayinda jangkurr narringi wandijiyana, jala durrijba jangkurr Kudkanyi. Nayinda jangkurr narringi wandijiyana jala durrijba jangkurr Kudkanyi.
JAM 1:2 Yingkamukunyi, jayalu yabimba kiji narringi. Kudukudu kiji, yinini yinini kiji jayalu yabimba narringi. Warriyaluku. Nanangini kijiwanyi balanja narrinya. Marda narringkimi mankumanku nanankanyi kijinyi. Marda narringkimi mankumanku. Nani barri jalija narringka mankumanku nanankanyi kijinyi, baki marda narrimi jingkijba Kud, janyulu yabimba narrinya ngiruka nangangi. Jalija narri jingkijba nani Kudkanyi, baki janarri yurlurrmba jila nananyina yuwana Kudkanyi. Marda narrimi yabijba muwa nanankanyi kijinyi. Marda narrimi kudanyu yabijba muwa, jingkijbangangi narri Kud, janyulu yabimba narrinya ngiruka nangangi. Jaliyi narri ngayangayijba Kudkanyi yurrngumba, baki miku narriyi wirlku nanamunanyi kijinanyi. Miku narringkiyi yangkalamba nanganbunanyi Kudnanyi, nyulungangi yabimbaja narrinya ngiruka nanankanyi kijinyi. Jala yingkamukunyi yalu yabimba kiji narringi, yalu nulijba narringi mamanumbikanyi Kud. Ngala marda narrimi miku mamanumba Kud. Marda narrimi mili kuyu nangangi jangkurr yurrngumba. Marda narrimi durrijba nangangi jangkurr yurrngumba, baki janyulu yabimba narrinya jungunkanyi ngiruka nangangi yurrngumba. Jalija yalu yabimba kiji narringi, marda narringkimi mankumanku yuwanyi Kudkanyi yurrngumba, marda narrimi durrijba nanda yuwa Kudkanyi yurrngumba. Nani barri jala yalu yabimba kiji narringi, baki marda narrimi yabijba muwa, Kudkanyingangi. Janyulu yabimba narrinya ngiruka nangangi, baki mili ngiruka, baki mili ngiruka nangangi yurrngumba. Barriwa.
JAM 1:5 Marda narrimi jingkijba yuwa nangangi Kudkanyi. Marda narrimi jungku maralnguji nangangi, jirdi kunybanyi kulajinyi. Marda narrimi yililikajba Kud yurrngumba kunybanyi kulajinyi, baki janyulu yabimba narrinya maralnguji, jingkiykanyi nangangi yuwa, jungunkanyi kunybana nanganginyina yuwana. Miku narringkimi yabimba maralnguji jingkiykanyi nangangi yuwa. Miku. Ngala ngawamba yuku nyulu yabimba narrinya maralnguji nanganginkanyi yuwanyi Kudwanyi. Ngawamba nyulu yingamali. Jalija narri yililikajba Kud, baki janyulu milidimba narrinya yurrngumba. Mikuwali ngirrwa narringi, jalija narri yililikajba. Janyulu kandimba narrinya. Nyulu nulijba narringi jungunkanyi yurlurrmba nanganginyina yuwana. Marda narrimi yililikajba Kud, baki janyulu yabimba narrinya maralnguji, jingkiykanyi nangangi yuwa.
JAM 1:6 Ngala jala narri yanyba mududu Kudkanyi, jala narri yililikajba Kud, nyulu yabimbiji narrinya maralnguji, jala narri yililikajba Kud, jingkiykanyi nangangi yuwa, baki marda narrimi jingkijba Kud, janyulu jananganja narrinya, janyulu yabimba nanda jala narri yilikajba. Marda narringkimi miku mankumanku Kudkanyi, yiningki janyulu yabimba yaji narringi, yiningki miku. Marda narringkimi miku mankumanku nani nangangi Kudkanyi. Marda narrimi jingkijba Kud, nyulu duja. Janyulu yabimba nanda yaji jala narri ngajaka yajinyi. Ngala, jala narringka mankumanku Kudkanyi, yiningki janyulu yabimba nanda jala narri ngajaka, yiningki miku, baki nanda balki. Marda narringkimi miku mankumanku nani nangangi Kudkanyi. Mankumanku narringka lakululunyi kanjana. Yingkawanyi yunkurrwanyi jakajbangka lakululu langki, ngala bayngkani yingkawanyi yunkurrwanyi jakajbangka lakululu kula. Wirlkungka lakululu waluku langki baki bayngkani kula. Nanda nganinyi jala ngajaka Kud yajinyi, ngala mankumanku nangka Kudkanyi, yiningki janyulu yabimba nanda yaji, yiningki miku. Nanda nganinyi, nyulu barrinani nanda lakululu jala jakajba yunkurrwanyi waluku langki baki bayngkani kula. Nanda nganinyi nangka mankumanku yinini yinini Kudkanyi. Miku nyulimi jingkijba Kud, nyulu yanybaka yurlurrmba yurrngumba. Miku.
JAM 1:7 Nanangini nganinyiwanyi, miku nyulimi durrijba yuwa nangangi Kudkanyi yurrngumba. Kudiyana nyulu nulijbangka durriykanyi yuwa Kudkanyi, ngala kudiyana nyulu nulijbangka durriykanyi nanganginmirra yuwa. Nyulu ngajaka Kud karunki yuwa Kudkanyi, ngala miku nyulimi durrijba nanda yuwa Kudkanyi yurrngumba. Jala nganinyi jungkuka nani, baki marda nyulimi jingkijba Kud, mikuwali Kudwanyi wajba nanankanyi yajinyi jala nyulu ngajaka yajinyi. Miku. Barriwa.
JAM 1:9 Nanda bayakarda nganinyi jala mikuyaji yajinyi, miku nyulu bayakarda nganinyi Kudkanyi. Miku. Nyulu jandanyi Kudkanyi. Ngala nanda nganinyi jirdi kajanyi yajinyi, jala nangka mankumanku, nyulu walkurra nganinyi, kajangangi nangangi yaji, miku nyulu walkurra nganinyi Kudkanyi. Miku nyulu walkurra nganinyi Kudkanyi, nanankanyi kajanyi yajinyi nangangi. Miku. Nyulu barrinani nanda jal, jala jardijba wanjirrina. Walajbangka nanda jal, baki jungkuka marndakaja, ngala yajbangka kambawanyi nanda jal, baki dukujbangka. Janyba nangka nanda jal, baki yirrbangka jambarri bukamba wayka. Nani barri nanda nganinyi jirdi kajanyi yajinyi. Janangka janyba, baki miku nanda kaja yaji mili nangangi. Miku. Nanda nganinyi jala mikuyaji yajinyi, nyulu jandanyi Kudkanyi, baki nanda nganinyi jirdi kajanyi yajinyi, nyulu jandanyi Kudkanyi marda. Malumba bula jungku jandanyiwuya nangangi Kudkanyi. Barriwa.
JAM 1:12 Jalija kiji narrindu, jalija balanja narrinya kijiwanyi, baki janarri yabijba muwa. Janarri yabijba muwa Kudkanyingangi. Janyulu yabimba narrinya ngiruka wakarambikanyi nanankanyi kijinyi. Baki janarri mirnarrijba muwa, jingkijbangangi narri Kud, janyulu wajba narrinya walkurrayngka yajinyi, janyulu wankamba narrinya mili jungunkanyi nangandu yurrngumba. Janarri jingkijba Kud, janyulu yabimba nanda yaji narringi, karungangi nyuli narrinya, janyulu wankamba yalunya mili. Janyulu wankamba yalunya jala maruka muwa nangangi, jala ngayangayijba nanganginkanyi jangkurranyi. Nangangi jangkurr duja.
JAM 1:13 Marda narrimi miku yanyba nayi, “Nyuli wajba ngana nanginkanyi kijinyi Kudwanyi.” Marda narrimi miku yanyba nani nangangi Kudkanyi. Mikuwali Kudwanyi wajba ngambalanya kijinyi. Miku nyulimi yabimba kiji ngambalangi. Baki mikuwali yalu yingkamukunyi yabimba kiji nangangi Kudkanyi. Mikuwali yingkamukunyi wajba Kud kijinyi balanjankanyi Kud. Miku.
JAM 1:14 Ngala jala nanangini kijiwanyi balanjaka nganinyi, baki nanda nganinyi nyulu nulijbangka yabimbikanyi balki yaji nangangi Kudkanyi. Nulijbangka nyulu yabimbikanyi nanda jala balkina yuwana Kudkanyi. Nani barri jaliyi nganinyiwanyi najba jibarri jala yingkanyi nganiyngkanyi maninganja, baki nyulu nulijba nanankanyi jibarrinyi nanganginkanyi maninganjanyi. Jaliyi nyulu nulijba nanankanyi jibarrinyi, baki yiningki janyulu daba nanda nawinganja nangangi jibarrinyi kurdanba, baki kuyuja nanda jibarri, janyulu nangangi barri maninganja yurrngumba. Jaliyi nyulu yabimba yaji nani, baki nanda balki. Kurdanba nyuli nanda yingka nganinyi, baki wudumbayi nangangi jibarri. Yabimba nyuli balki yuwa nangangi Kudkanyi. Balkimirra. Nani barri jala nganinyi nulijba balkinyi yajinyi, baki nyulu jungkuka balkina yuwana nangangi Kudkanyi jala nyulu yabimba nanda balki yaji. Wajba nangki kijinyi barri. Mikuwali wajba kijinyi Kudwanyi, ngala nangka nangki wajba kijinyi.
JAM 1:16 Manku narri nayinda duja jangkurr nangangi Kudkanyi. Mikujiyi manku yingka jangkurr jala miku duja. Manku narri nayinda duja jangkurr nangangi.
JAM 1:17 Bukamba yaji jala kunyba ngambalangi, nyulu manjijbangka nanda yaji ngambalangi kingkarrinya Kudwanyi. Miku nyulimi manjijba balki yaji ngambalangi. Miku. Miku nangkimi yangkalamba Kud ngamanbunanyi. Nyulu wajbangka ngambalanya kunybanyi yajinyi Kudwanyi. Miku nyulimi wajba ngambalanya waluku kunybanyi yajinyi, ngala bayngkani balkinyi yajinyi. Miku. Bukamba kunyba yaji badajbangka kingkarrinya. Badajbangka kingkarrinya ngamandurri nanganbunanyi Buwakayananyi. Yurrngumba nyulu wajba ngambalanya kunybanyi yajinyi, miku balkinyi yajinyi. Barriwa. Mankumanku nangki Kud, yanybayi, janyulu yabimba yaji, baki barriwa yabimba nyuli bukamba yaji wandijiyana. Yabimba nyuli kamba marda yakarl, laliji marda jamba, marda kanja nyuli yabimba ngambalangi. Bukamba yaji wandijiyana yabimbayi Kudwanyi wabula kamambarra, ngala nyuli mikuyaji yajinyi nanamanji. Marda nganinyi nyuli yabimba. Yanybayi Kud janyulu yabimba nganinyi, baki nanda jangkurr nangangi duja. Yabimbayi nganinyimuku Kudwanyi. Yalu nanganginmuku jandanyimuku. Barriwa.
JAM 1:19 Ngakinmuku mungkijimuku. Marda narrimi jingkijba nayinda jangkurr. Marda narrimi mankuwa kudanyu nayinda jangkurr nangangi Kudkanyi. Ngala marda narrimi miku dulu karu yalunya yingkamuku nanganginkanyi jangkurranyi. Marda narringkimi kudanyu mankumanku nanankanyi jangkurranyi Kudkanyi. Marda narrimi waluku jingkijba nanda jangkurr nangangi, baki yuku bayngkani narri karu yalunya nanankanyi jangkurranyi nangangi. Baki marda narrimi miku dulu ngarrangarra muwa nangangi yingkanyi.
JAM 1:20 Jaliyi narri ngarrangarra muwa, baki miku narringkimi mankumanku yurlurrmba yajinyi nangangi Kudkanyi. Miku narrimi durrijba nanda yuwa nangangi Kudkanyi.
JAM 1:21 Kudiyana narri yuwajiwa jungku balkina yuwana Kudkanyi nangangi. Marda narrimi yingkijba nanda balki yuwa, barriwa barri bukamba. Marda narrimi yabimba ngawamba nanda yaji jala kunyba nangangi Kudkanyi. Marda narrimi miku jungku balkina yuwana Kudkanyi. Marda narrimi manku nanda jangkurr nangangi Kudkanyi. Marda narringkimi miku mankumanku, narri maralnguji yuwanyi Kudkanyi, ngala marda narrimi kudanyu manku nangangi jangkurr. Marda narrimi ngayangayijba nanankanyi jangkurranyi nangangi Kudkanyi yurrngumba, baki janarrinya marrimba mardarda Kudwanyi.
JAM 1:22 Jala narri manku nanda jangkurr Kudkanyi, baki marda narrimi miku muningka jungku. Marda narringkimi mankumanku nanankanyi jangkurranyi. Marda narrimi yabimba nanda jala karu narrinya yabimbikanyi Kudwanyi. Marda narrimi miku muningka manku nanda jangkurr. Marda narrimi ngayangayijba nanankanyi nanganginkanyi jangkurranyi.
JAM 1:23 Jala nganinyiwanyi muningka mankuka nanda jangkurr nangangi Kudkanyi, ngala miku nyulimi ngayangayijba nanankanyi jangkurranyi, baki nyulu barrinani nanda nganinyi jala najba nangka wali wabudana.
JAM 1:24 Najba nangka wali wabudana, baki barlba nyulu wabudananyi, ngala nangka mamanumba wali. Miku nangkimi mankuwa wali. Nani barri nanda nganinyi jala muningka mankuka jangkurr Kudkanyi, ngala miku nyulimi ngayangayijba nanankanyi jangkurranyi, ngala nyulu mamanumbaka nanda jangkurr nangangi Kudkanyi.
JAM 1:25 Ngala jala nganinyiwanyi mankuka kunyba jangkurr Kudkanyi manjamanjambikanyi nangangi balki yaji, jala nyulu mankuka nanda jangkurr, baki ngayangayijba nyulu nanankanyi jangkurranyi yurrngumba, jala nyulu yabimba nanda jala karu Kudwanyi yabimbiji, baki Kud marukangka muwa nangangi. Marukangka Kud muwa nangangi, durrijbangangi nyulu nanda kunyba yuwa nangangi Kudkanyi. Janyulu yabimba kunyba yaji nangangi Kudwanyi.
JAM 1:26 Mankumanku nangka nganinyi, nyulu kunyba nganinyi, nyulu jungkuka yurlurrmba yuwana nangangi Kudkanyi. Ngala jaliyi nanda nganinyi yanybaka balki jangkurr, jardibirri jangkurr, jaliyi miku nangkimi kurrkunba yanybikanyi nani, baki miku nyulimi jungku yurlurrmba nangangi Kudkanyi. Ngamu nyulu durrijba yuwa nangangi Kudkanyi, ngala miku. Miku nyulimi durrijba yuwa nangangi Kudkanyi, jala nyulu yanyba balki jangkurr. Miku nangkimi mambuka nanganginkanyi janyinyi.
JAM 1:27 Ngala nanda jala kunyba nangangi Kudkanyi, jala jungkuka yurlurrmba nanganginyina yuwana Buwakaya Kudkanyi, nanangini nganinyiwanyi nyulu lalanbaka yalunya yingkamuku Krisjinmuku. Jala yingkamukunyi yalu yabimba kiji yalungi Krisjinmukuyngka, baki nanda jala jungkuka yurlurrmba yuwanyi Kudkanyi, nyulu lalanbaka yalunya. Nyulu kandimbaka yalunya. Miku nyulimi jungku balkina yuwana Kudkanyi. Nyulu ngayangayijba nangangi Kudkanyi yurrngumba. Barriwa.
JAM 2:1 Narri mungkijimuku, mankukiyi nayinda jangkurr. Narri kuyu nangangi jangkurr Jisus Krayiskanyi. Nanda Jisus Krayis nyulu walkurra mambuka, barrinani Kud. Bukambiju Krisjinmuku, nganinyimuku baki jibarrimuku, bukambiju yalu jandanyimuku Kudkanyi. Miku kudiya walkurra Kudkanyi, ngala kudiya bayakarda nangangi. Miku. Baki narri, mikujiyi yarrijba kudiya mili walkurra yingkamukuyngka. Jaliyi narri maruka muwa nangangi Jisus Krayiskanyi, jaliyi narri durrijba nangangi yuwa, baki marda narrimi jingkijba Kud, nyulu marukangka muwa bukambijuyngka yalungi, nganinyimukuyngka baki jibarrimukuyngka. Miku nyulimi maruka muwa nayi, yingkamukuyngka bijal, ngala yingkamukuyngka kudanyu. Miku nyulimi maruka muwa nani yalungi. Ngala nyulu marukangka muwa yalungi bukambijuyngka nanamannga.
JAM 2:2 Jala narri jila jurjyurri, yiningki yingkamuku jirdi kunybanyi jumbalanyi, marda jirdi kanjanyi dungalanyi, yiningki yalu jilajba jurjyurri. Ngala yiningki yingkamuku yalu jilajba jurjyurri jirdi balkinyi jumbalanyi, baki mikuyaji dungalanyi yalungi. Miku narringkiyi narringka yanyba, nayinda nganinyi jirdi kunybanyi jumbalanyi, nyulu walkurra Krisjin mambuka, kajangangi nangangi dungala. Baki mikujiyi yanyba nangangi, “Kabukawa. Jungkukiyi nayiba waluwa nanginyina darladarlana.” Mikujiyi yanyba nani nangangi, jirdi kunybanyi jumbalanyi, baki jirdi kajanyi dungalanyi. Ngala nanda yingka nganinyi, jirdi balkinyi jumbalanyi, mikujiyi yanyba nangangi, “Jungkukiyi nayiba bayngkani jambana.” Mikujiyi yanyba nani nangangi, jirdi balkinyi jumbalanyi. Miku nyulimi najba yalungi jumbala Kudwanyi. Miku nyulimi najba kudiya jirdi kunybanyi jumbalanyi, ngala kudiya jirdi balkinyi jumbalanyi. Miku nangkimi yanyba, “Nanda nyulu walkurra Krisjin, kunybayudingangi jumbalayudi, ngala nanda yingka, miku nyulu walkurra Krisjin, balkiyudingangi jumbalayudi.” Miku nangkimi yanyba Kud nani. Nyulu marukangka muwa yalungi bukambijuyngka nanamannga.
JAM 2:4 Jaliyi narringka mankumanku nani, baki narringka yanyba, “Ngayu jingkijba Kud, nyulu yarrijba nayinda nganinyi walkurra, ngala nanda yingka nganinyi nyulu yarrijba bayakarda.” Jaliyi narringka mankumanku nani, baki nanda balki. Ngala miku narriyi jingkijba yanka yarrijbangka nganinyi Kudwanyi. Ngawamba yuku nyulu jingkijba nani Kudwanyi, baki miku nyulimi najba yalungi dungala, jala nyulu yarrijba yalunya. Marda narrimi miku yarrijba yingka Krisjin mili walkurra waluwa yingkanyi, kajangangi nangangi dungala. Jaliyi narri yarrijba yingka mili walkurra waluwa yingkanyi, baki nanda balki.
JAM 2:5 Mankukiyi nayinda jangkurr, ngakinmuku mungkijimuku. Nanamuku jirdi balkinyi jumbalanyi, baki mikuyaji dungalanyi, marukangka Kud muwa yalungi. Miku yalimi nulijba kajanyi dungalanyi marda yajinyi, jingkijbangangi yalu Kud nyulu marukangka muwa yalungi, nyulu lalanbaka yalunya. Miku yalimi nulijba kajanyi yajinyi, lalanbakangangi yalunya Kudwanyi, baki yalu durrijba nangangi yuwa. Kuyu yali nangangi jangkurr, baki yalu durrijbangka nanda jangkurr nangangi, yarrijbayingangi yalunya Kudwanyi. Ngala miku narriyanyi mankuwa Kudkanyi, nyuli yarrijba yalunya nangangi, baki janyulu lalanba yalunya yurrngumba. Miku narriyanyi mankuwa Kudkanyi nani. Ngala yingkamuku jala miku yalu Krisjinmuku jirdi kunybanyi jumbalanyi baki jirdi kajanyi dungalanyi, yalu yabimbaka kiji nanamukuyngka jala mikuyaji dungalanyi. Yalu yabimbaka kiji yalungi.
JAM 2:7 Ngala nanamuku jirdi kajanyi dungalanyi, yalu jungku balki Kudkanyi jala yalu yabimba kiji yalungi Krisjinmukuyngka. Baki jala yalu yabimba kiji yalungi, baki nanda barrinani yalu yabimba kiji nangangi Jisus Krayiskanyi, jala jandanyi nangangi Kudkanyi. Nanda balki kudanyu barri. Barriwa.
JAM 2:8 Nanda walkurra yuwa ngambalangi, jandanyimukuyngka nangangi Kudkanyi wandijiyana. Nanda walkurra yuwa jali karu ngambalanya Jisus Krayiswanyi, nanda yuwa yanybaka nayi, “Marda narrimi maruka muwa yalungi bukambijuyngka, barrinani narringka maruka muwa.” Nanda barri walkurra yuwa ngambalangi. Jaliyi narri ngayangayijba nanankanyi yuwanyi yurrngumba, baki narri jungku kunyba nangangi Kudkanyi.
JAM 2:9 Ngala jaliyi narri yarrijba nanamuku jirdi kajanyi dungalanyi waluwa yalundu jala mikuyaji dungalanyi, baki miku narrimi maruka muwa yalungi bukambijuyngka nanamannga. Miku narrimi maruka muwa yalungi jala mikuyaji dungalanyi. Narri jungku balkina yuwana nangangi Kudkanyi, jaliyi miku narrimi ngayangayijba nanankanyi yuwanyi marukankanyi yalungi bukambijuyngka. Narri jungku balki nanankanyi walkurrayngka yuwanyi nangangi Kudkanyi.
JAM 2:10 Yiningki nganyingka yanyba, “Ngala ngayu ngayu ngayangayijba nanamukuyngka yingkamukuyngka yuwanyi nangangi Kudkanyi yurrngumba. Ngayangayijba ngayu yingkamukuyngka yuwanyi yurrngumba.” Ngala miku nanda duja jangkurr. Jaliyi ninji yurlwa yingamaliyngka jangkurranyi, jala jirrinyba ninya Kudwanyi, baki ninji jungku balki bukambijuyngka yuwanyi nangangi Kudkanyi.
JAM 2:11 Wajbayi ngambalanya nanganginkanyi yuwanyi Kudwanyi. Yanyba nyuli nayi, “Marda ninjimi miku kuluka yingkana jibarrina jala miku nganyi maninganja.” Baki yingka. “Marda ninjimi miku kurdanba nganinyi.” Jaliyi ninji ngayangayijba nanankanyi yuwanyi, miku kulukankanyi yingkana jibarrina, ngala ninji yurlwa nanankanyi yingkanyi yuwanyi kurdanbikanyi nganinyi, baki nanda balki. Ninji jungku balkina yuwana nangangi Kudkanyi, jaliyi ninji kurdanba nganinyi, ngala ninji ngayangayijba nanamukuyngka yingkanyi yuwanyi.
JAM 2:12 Marda ninjimi yanyba kunyba jangkurr yurrngumba. Marda ninjimi yabimba nanda yaji jala yurlurrmba yuwanyi Kudkanyi yurrngumba. Marda ninjimi jingkijba, bukamba nangki nanda yingka waluwa yuwa nganyi. Dulaba ninya nanamunanyi yuwananyi Kudwanyi, jala ninji kuyu jangkurr nangangi Jisus Krayiskanyi. Baki Kudwanyi, nyulu manjamanjambaka nanda balki yaji jali ninji yabimba wabula. Baki nanangini Kunybawanyi Ngarnduwanyi nangangi Kudkanyi, janyulu kandimba ninga, jala ninji ngayangayijba nanankanyi yuwanyi Kudkanyi nangangi.
JAM 2:13 Marda ninjimi yabimba kunyba yaji yingkamukuyngka. Marda ninjimi kandimba yalunya. Jaliyi nganinyiwanyi yabimba balki yaji nganyi, baki marda ninjimi mamanumba nanda balki yaji nangangi, barrinani Kudwanyi mamanumbaka nganyi balki yaji, jala nyulu manjamanjamba nanda balki yaji nganyi. Nani barri jaliyi ninji mamanumba nanda balki yaji, yabimba jali yingkawanyi nganyi, baki janyulu manjamanjamba nganyi balki yaji marda Kudwanyi. Barriwa.
JAM 2:14 Ngakinmuku mungkijimuku. Manku narri nayinda ngaki jangkurr. Jaliyi nganinyi yanyba, nyulu kuyungka jangkurr Kudkanyi, nyulu durrijbangka yuwa nangangi Kudkanyi, jaliyi nganinyi yanyba nani, ngala miku nyulimi maruka muwa yingkamukuyngka, miku nyulimi kandimba yalunya, miku nyulimi yabimba kunyba yaji yalungi, baki miku nyulimi durrijba nangangi Kudkanyi yurrngumba. Jala nyulu miku durrijba yuwa nangangi Kudkanyi, baki miku nyulimi marrimba nanda mardarda Kudwanyi. Miku janyulu wanka jungku nangandu Kudnyina bayngkani jalija nangka janyba. Jaliyi narri nulijba Kudkanyi, nyulu wankambikanyi narrinya baku, jungunkanyi nangandu yurrngumba, baki marda narrimi durrijba nangangi yuwa yurrngumba. Marda narrimi kandimba yingkamuku. Marda narrimi maruka muwa yalungi. Marda narrimi yabimba kunyba yaji yalungi yurrngumba, barrinani narri nulijba Kudkanyi, nyulu yabimbikanyi kunyba yaji narringi. Marda narrimi yabimba yaji nani, jaliyi narri nulijba Kudkanyi, nyulu wankambikanyi narrinya baku.
JAM 2:15 Yiningki yingka Krisjin, nyulu jungkuka mikuyaji blankinyi wurarawala, baki mikuyaji mamanyi, baki yingamali narringi yanybaka nangangi, “Barriwa barlbakiyi, baki jarrbakiyi mama. Ngaramba nganyingkaja mungana.” Ngala mikuwali nanangini jangkurrwanyi mamba nangangi muwa, mikuwali nanangini jangkurrwanyi ngaramba nganinyi mungana. Jaliyi nyulu yanyba nani, ngala miku nyulimi wajba nganinyi mamanyi baki blankinyi, baki miku nyulimi ngayangayijba nanankanyi yuwanyi nangangi Kudkanyi, marukankanyi yingkamukuyngka.
JAM 2:17 Nani barri jaliyi narri yanyba narri kuyu jangkurr Kudkanyi, ngala miku narrimi ngayangayijba yuwanyi nangangi Kudkanyi, baki narringka jujamba. Miku narrimi kuyu nangangi jangkurr. Narri jungku balkina yuwana nangangi Kudkanyi. Jaliyi narri maruka muwa yingkamukuyngka, baki muningka janarri wajba yalunya yajinyi, barrinani mamanyi jala yalu birrkalijba.
JAM 2:18 Yiningki nganinyi yanybaka, “Yingkawanyi nyulu kuyu jangkurr Kudkanyi, nyulu jandanyi Kudkanyi, ngala yingkawanyi nyulu kandimba yalunya, nyulu yabimbaka kunyba yaji yalungi.” Ngala ngayu karungka narrinya kudanyu, jala nganinyiwanyi kuyungka jangkurr Kudkanyi, baki nyulu kandimbaka yalunya marda. Jala nyulu kuyungka jangkurr Kudkanyi, baki muningka janyulu yabimba kunyba yaji yalungi, marukangangi nyulu muwa nangangi Kudkanyi. Nani barri ngayu marda, jala narri najba nanda kunyba yaji, yabimba jala ngayu yingkamukuyngka, baki narri jingkijba, ngayu kuyu jangkurr Kudkanyi, ngayu durrijba nangangi yuwa.
JAM 2:19 Jingkijba ninji kuna, ngawamba yingamali nyuluma Kud, miku yingka. Ngawamba nyuluma yingamali Kud ngambalangi. Jaliyi ninji jingkijba nani, baki nanda kunyba. Ngala wuwarrmukunyi, marda yalu jingkijba nani Kudkanyi. Marda yalu jingkijba nangangi, ngawamba nyuluma yingamali Kud, miku yingka nyulu Kud. Nani yalu jingkijba Kudkanyi wuwarrmukunyi, baki yalu marrala. Marrala yalu kudanyu nangangi Kudkanyi.
JAM 2:20 Ngala jaliyi ninji muningka yanyba nayi, “Ngayu jingkijbangka Kud, ngawamba nyuluma Kud, miku yingka nyulu Kud”, baki warriyaluku. Baki miku ninjiyala jingkijba Kud. Jaliyi ninji muningka yanyba nani, baki miku ninjimi jungku yurlurrmba nangangi Kudkanyi. Miku ninyiyi wankamba Kudwanyi bayngkani, jalija nganyingka janyba. Marda ninjimi kuyu jangkurr nangangi Kudkanyi. Marda ninjimi durrijba nangangi yuwa, baki janinji jandanyi Kudkanyi. Marda ninjimi jingkijba, nanda jala muningka yanybaka, nyulu kuyungka jangkurr nangangi Kudkanyi, ngala miku nyulimi yabimba kunyba yaji yingkamukuyngka, miku nyulimi duja kuyu jangkurr nangangi Kudkanyi.
JAM 2:21 Ngambalangi wankalanyi nijanganjinyi Yabrayam, nyuli kuyu jangkurr nangangi Kudkanyi, nyuli durrijba nangangi jangkurr. Yanybayi Kud nangangi Yabrayamkanyi. Karu nyuli Yabrayam, nyulu waji Kud nanganginkanyi jandayngkanyi. Baki ngayangayijba nyuli nangangi Kudkanyi. Wajba nyuli Kud nanganginkanyi jandayngkanyi Yayisakanyi. Baki nanankardi ngambala jingkijba Yabrayam, nyuli jungku yurlurrmba nangangi Kudkanyi, ngayangayijbangangi nyuli jangkurranyi Kudkanyi.
JAM 2:22 Marda narrimi jingkijba Yabrayam, nyuli kuyu jangkurr Kudkanyi, baki nanankardi nyuli ngayangayijba nanankanyi jangkurranyi, jali jirrinyba Kudwanyi nangangi jangkurr.
JAM 2:23 Nani barri nanda jangkurr najana Kudkanyi yanybaka, “Nyuli kuyu jangkurr nangangi Kudkanyi Yabrayamwanyi, baki nyuli jungku yurlurrmba nangangi Kudkanyi.” Baki yingka mili jangkurr najana Kudkanyi, karungka jangkurrwanyi Yabrayamkanyi. “Nijarrijba nyuli Yabrayam Kudwanyi, nijarrijbayi “Kandi nangangi Kudkanyi.’”’
JAM 2:24 Baki nanda jibarri Rayab, jali jungku wankalana, nyuli balki jibarri, nyulili kuluka kajana nganinyina. Ngala nyuli ngadijba bulanya, nanankujarra nganinyiwuya, jali manjijba Jujuwawanyi. Nyuli ngadijba bulanya nanganginyina barndana, ngala nanganginmuku mungkijimuku, yali kujba bulangi. Baki kamu nyuli manjijba bulanya yingkana yubalina. Jingkijba nyuli Kud, ngawamba nyuluma nanda Kud. Baki nanankardi nyuli marrimba bulanya mardarda. Mikuwali yingkawanyi bulanya marrimba. Nani barri nanda jibarri nangki yangkalamba nangandurri Kudyurri. Nyuli waki Kudkanyi marda. Nyuli jungku yurlurrmba nangangi Kudkanyi nanda jibarri. Nanankujarra wankalawuya, nganinyi Yabrayam baki jibarri Rayab, buli jungku yurlurrmba Kudkanyi, buli waki Kudkanyi, kuyungangi buli nangangi jangkurr Kudkanyi.
JAM 2:26 Jala narri kuyu jangkurr Kudkanyi, baki marda narrimi durrijba nangangi jangkurr, marda narrimi waki Kudkanyi. Jala narri jungku yurlurrmba Kudkanyi, baki narri yabimba bukamba yaji, jirrinyba jala narrinya Kudwanyi. Ngala jaliyi narri yanyba, narri kuyu jangkurr Kudkanyi, ngala miku narrimi waki Kudkanyi, baki narri barrinani nganinyiyurru. Miku nangkiyi ngirringirrimba nganinyiyurru mankanyi. Miku nyuliyi waki. Miku nyuliyi ngayangayijba jangkurranyi Kudkanyi. Jaliyi narri miku waki Kudkanyi, baki narri barrinani nanda nganinyiyurru. Barriwa.
JAM 3:1 Ngawamba kudiyanymuku ngambala milidimbawarrmuku. Miku bukambiju milidimbawarrmuku. Miku. Ngawamba kudiyanymuku. Ngambala jala milidimba yalunya, marda ngambalimi durrijba yuwa Kudkanyi, marda ngambalimi kudanyu durrijba nangangi yuwa, milidimbangangi ngambala yalunya durriykanyi nangangi yuwa. Jaliyi ngambala miku jungku kunybana yuwana Kudkanyi yurrngumba, ngala ngambala milidimba yalunya jungunki kunybana nanganginyina yuwana, baki nanda balki. Miku nyuliyi yabijba muwa ngambalangi Kud.
JAM 3:2 Ngala miku ngambalimi jungku yurlurrmba yuwana Kudkanyi yurrngumba. Kudiyana ngambala yanyba balki jangkurr. Kudiyana ngambala jungku barimba yuwana Kudkanyi. Jaliyi nganinyi yanybaka kunyba jangkurr yurrngumba, jaliyi nyulu jungkuka kunybamirra Kudkanyi yurrngumba, baki miku yingka jungkuka mili kunyba nangangi. Ngambala yanyba jangkurr janyina. Marda ngambalimi lalanba ngambalangi janyi. Marda ngambalakimi miku yabimba janyi yanybikanyi balki jangkurr. Jaliyi ngambalaka mankumanku balkinyi yajinyi, baki ngambala yanyba balki yaji, ngambala yabimba balki yaji marda. Marda ngambalakimi kurrkunba janyi yanybikanyi balki jangkurr.
JAM 3:3 Mankumanku narringka yarramanyi. Ngambala yarrijba malankarri janyina yarramana, baki ngambala yangkalamba nanda yarrama janyina karri. Nanda yarrama mankanyi jilajbangka nanankurri jala ngambala yangkalamba kulaji malankarriyudinyi janyi. Yuku ngambala yabimba nanda yarrama, nyulu ngayangayiykanyi ngambalangi. Janyulu jila nanankurri jala ngambala nulijba jilaykanyi nanankurri. Barriwa.
JAM 3:4 Baki mili mankumanku narringka wayanyi. Kudiya waya, yalu walkurramirra. Baki jululumbaka yalunya kanjana walkurranyi yunkurrwanyi. Ngala mambukawanyi wayanyi yuku nyulu yangkalambaka nanda waya babilayudinyi bunyina. Nanda babila bayakarda, ngala yuku nyulu yangkalamba nanda waya karri babilayudinyi. Nanda waya jilajbaja nanankurri jala mambuka nulijba wayanyi jilaykanyi nanankurri.
JAM 3:5 Nani barri nanangini malankarriwanyi janyina yarramana yangkalambaka yarrama mankanyi karri, baki bayungu. Nani barri nanangini babilawanyi yangkalambaka waya karri baki bayungu. Baki nani barri nanda jangkurr jala yanyba nganinyi janyi. Nanda jangkurr yiningki walkurra jangkurr, yuku jangkurrwanyi yabimbaka yingka nganinyi yabimbikanyi yaji. Barriwa. Baki nanda kunbuyurl, nanda bayakarda jangu, ngala jala nganinyiwanyi bakarrijba karnba, baki winyurru walkurra nanda jangu, yajbangka walkurra yaji.
JAM 3:6 Nanda nganinyi janyi, barrinani nanda jangu. Janyiwanyi yabimbaka kiji mankankanyi, jala yanybaka janyi balki jangkurr. Nanangini janyiwanyi yabimbaka kiji mankankanyi yurrngumba, jala nyulu juka, jala nyulu jardijba nganinyi, jala nyulu jardijba malbu. Yurrngumba janyiwanyi yabimbaka kiji mankankanyi. Nanda bayakarda jangu, baki walkurrambaka, yajbangka walkurra yaji. Nani barri nanda janyi bayakarda, ngala yabimbaka kudukudu kiji nangangi, baki yingkamukuyngka. Nanda janyi barrinani jangu. Nanda Sayidin, nyulu mambuka nanankanyi yajinyi Yilkanyi, jala yajba jangu yurrngumba, baki nyuli mambuka janyinyi jala yabimba kiji janyiwanyi.
JAM 3:7 Yuku nganinyiwanyi kurrkunbaka yanimal junu, baki julaki, baki miya, baki kaku. Yuku nyulu kurrkunba yalunya.
JAM 3:8 Ngala mikuwali nganinyiwanyi kurrkunbaka nangangi janyi. Nanda janyi barrinani ngulwa yilarryudi. Jala bijba nganinyi ngulwawanyi, baki nyulu kurdanba nanda nganinyi. Nani barri nanda balki jangkurr jala yanyba janyi, yalu barrinani yilarr, yalu yabimba kiji yingkamukuyngka, kudiyana yalu kurdanba nganinyi.
JAM 3:9 Jala yanybaka nganinyi mududu Kudkanyi, baki nyulu yanybaka kunyba jangkurr Buwakaya Kingkarri. Yanybaka nyulu kunyba jangkurr janyiyudinyi. Ngala nyulu yanybaka balki jangkurr yingkanyi. Nyulu yanybaka balki jangkurr nananjudinyi nanamannga janyiyudinyi. Nyulu yanybaka balki jangkurr nangangi jali yabimba Kudwanyi. Yabimbayi nganinyi Kudwanyi barrinani nyulu, ngala yanybaka nganinyi balki jangkurr yingkanyi. Nanda balki. Marda miku ngambalimi yanyba balki jangkurr nangangi, yabimba jali Kudwanyi barrinani nyulu.
JAM 3:10 Ngakinmuku mungkijimuku. Marda ngambalimi miku yanyba kunyba jangkurr Kudkanyi baki balki jangkurr nganinyimukuyngka. Marda ngambalimi miku yanyba kunyba jangkurr baki balki jangkurr nananjudi nanamannga janyiyudi. Marda ngambalimi miku yanyba nani. Marda ngambalimi yanyba ngawamba kunyba jangkurr yurrngumba.
JAM 3:11 Mikuwali jiwilwanyi manjijba kunyba wabuda, baki balki wabuda malumba. Mikuwali manjijba kunyba baki balki wabuda malumba. Miku yinini yinini wabuda nanamunanyi yingamalinanyi jiwilnanyi.
JAM 3:12 Ngakinmuku mungkijimuku. Mikuwali karlawanyiwanyi jardiykunumba bikabaji mama, baki mikuwali kumukujbawanyi jardiykunumba karlawanyi mama. Miku. Miku yinini yinini mama yingamalinanyi darrankunanyi. Baki nanda kanja, ngawamba ngarrawa wabuda nanaba. Miku kunyba wabuda ngaraykanyi. Ngala nganyi janyi yanybaka yinini yinini jangkurr, yanybaka kunyba jangkurr baki balki jangkurr. Nanda balki. Barriwa.
JAM 3:13 Mankumanku nganyingka nayi kuna, “Ngayu jungku maralnguji Kudkanyi, jirdi kunybanyi kulajinyi.” Jaliyi nganyingka mankumanku nani, baki mardakimi yingkamukunyi manku nganyi kunyba jangkurr, marda yalimi najba nganyi kunyba yaji, jala ninji yabimba. Marda nganyingkimi miku walkurramba yingkamukuyngka, ngala marda ninjimi yarrijba walkurra Kud nganyi yurrngumba.
JAM 3:14 Ngala jaliyi ninji nguwajba yingkamukuyngka, jaliyi ninji nulijba walkurrambikanyi nganyingka yalungi, baki miku ninjimi maralnguji Kudkanyi. Jaliyi ninji yabimba yaji nani, baki nganyingka barrarrakijba. Jaliyi ninji jujijba duja yajinyi, baki nanda barrinani ninji maralnguji nangangi Sayidinkanyi.
JAM 3:15 Nganyingka mankumankuka, ninji maralnguji, ngala miku ninjimi maralnguji. Miku ninji kunybayudi kulajiyudi. Miku ninjimi maralnguji Kudkanyi. Miku nyulimi wajba ninya kunybanyi kulajinyi. Nulijbangka ninji durriykanyi nganyinmirra yuwa. Yurlwa ninji yuwanyi Kudkanyi. Jala ninji yurlwa yuwanyi Kudkanyi, baki nanangini mambukawanyi wuwarranyi Sayidinwanyi, nyulu yabimbaka ninya durriykanyi nangangi yuwa Sayidinkanyi.
JAM 3:16 Jala nganinyiwanyi durrijbangka yuwa Sayidinkanyi, baki nyulu nguwajbangka yingkamukuyngka. Nulijbangka nyulu yalungi, jungunkanyi nyulu walkurra mambuka yalungi. Ngala jala nyulu jungkuka nani, baki nyulu barimbaka yaji, nyulu yabimbaka yinini yinini balki yaji.
JAM 3:17 Jala nganinyi maralnguji Kudkanyi, jala wajba nganinyi kunybanyi kulajinyi Kudwanyi, baki nanda nganinyi nyulu jungkuka kunybamirra, nyulu jungkuka mardumardu muwa, nyulu kandi bukambijuyngka. Miku nyulimi yabimba kiji yingkamukuyngka. Ngala nyulu yabimbaka yalungi yaji jala yalu ngajaka. Lalanbaka nyulu yalunya jala kijiyudi. Kandimbaka nyulu yalunya. Wakingka nyulu kudanyu nangangi Kudkanyi yurrngumba. Miku nyulimi yarrijba yingkamuku walkurra, ngala yingkamuku bayakarda. Marukangka nyulu muwa yalungi bukambijuyngka nanamannga. Nani barri yabimbaka nganinyiwanyi jala maralnguji nangangi Buwakaya kingkarri.
JAM 3:18 Yabimbaka nanda kunyba yaji nganinyiwanyi, jala nyulu jungkuka mardumardu muwa nangangi Kudkanyi. Jala yingkamukunyi najba nanda nganinyi yabimbikurri kunyba yaji, baki yalu marda nulijba jungunkanyi kunyba. Barriwa.
JAM 4:1 Narringka dabangka. Narringka jakakajbangka. Yurrngumba narri nulijbangka yajinyi. Yinini yinini yajinyi narri nulijbangka mankankanyi, barrinani kudukudu mama baki jumbala narringi. Jala narri nulijba yajinyi nani, baki miku narri jungunkanyi kunyba nangangi Kudkanyi. Jala narri nulijbangka yajinyi nani, baki narri yabimba kiji narringi.
JAM 4:2 Narri nulijbangka nanankanyi yajinyi, baki narri kurdanba yingka wudumbiji nanda yaji. Narri nulijbangka nanankanyi yajinyi, baki narringka daba wudumbiji nanda yaji. Miku nanda jungunkanyi kunyba nangangi Kudkanyi. Jaliyi narri nulijba yajinyi jala kunyba, baki marda narrimi ngajaka Kud nanankanyi yajinyi. Ngala miku narrimi ngajaka Kud yajinyi, baki miku narrimi wudumba nanda kunyba yaji.
JAM 4:3 Yiningki narri ngajaka Kud yajinyi, ngala miku narrimi wudumba nanda yaji. Miku narrimi wudumba nanda yaji, ngajakangangi narri yajinyi jala miku kunyba narringi.
JAM 4:4 Narri balkimuku. Narri barrinani jibarri jali yingkijba nangangi nawinganja jungunki yingkana nganinyina. Yangkalamba nangki nanganbunanyi nawinganjananyi. Nani narringka yangkalamba nanganbunanyi Kudnanyi. Jala narri miku nulijba nanankanyi kunybanyi yajinyi, jala narrinya wajba Kudwanyi, baki miku narrimi kandimuku Kudkanyi. Jala narri nulijba nanankanyi balkinyi yajinyi, baki nanda barrinani narri ngirrawarr Kudkanyi.
JAM 4:5 Mankumanku narringka nanginkanyi jangkurranyi najana Kudkanyi, “Nguwajbangka Kud. Nyuli yawumba nangangi Kunyba Ngarndu ngamanbu. Nyulu nulijbangka ngambalangi nanganginmirra jandayngkanyi. Miku nyulimi nulijba ngambalangi, ngambalaka yangkalambikanyi nanganbunanyi. Nguwajbangka Kud ngambalangi.” Duja nanda jangkurr. Jala narri nulijba balkinyi yajinyi kudanyu barri, ngala ngawamba bijal narri nulijbangka Kudkanyi, baki nguwajbangka Kud nanankanyi balkinyi yajinyi.
JAM 4:6 Baki mili nanda naja Kudkanyi yanybaka, “Mikukimi Kudwanyi kandimba nanda jala nangka mankumanku, nyulu walkurra. Miku nyulimi kandimba nanda jala nangka maruka muwa kudanyu, ngala ngawamba bijal nyulu maruka muwa Kudkanyi. Miku nyulimi kandimba nanda. Ngala nyulu kandimba nanda jala nangka mankumanku nyulu bayakarda nangangi Kudkanyi. Nyulu kandimbaka nanda jala nulijbangka Kudkanyi, nyulu marrimbikanyi nanda mardarda.” Nani yanybaka naja Kudkanyi.
JAM 4:7 Birrirrinja narringka, narri ngayangayiykanyi nangangi Kudkanyi. Yarrijbakiyi Kud narringi mambuka yurrngumba. Yurlwakiyi nanankanyi wuwarranyi Sayidinkanyi. Wijbakiyi durrijba nangangi yuwa, baki janyulu barlba narrinbunanyi. Janyulu yingijba narrinya Sayidinwanyi jaliyi narri miku mili durrijba nangangi yuwa.
JAM 4:8 Birrirrinja narringka Kudkanyi. Mankukiyi nangangi jangkurr, baki janyulu yanyba narringi, janyulu jungku narrinbu yurrngumba. Ningkijba narringkiyi nanankanyi yajinyi jala narri yabimba. Wijbakiyi yabimba nanda balki yaji. Ngindukiyi muwa nanankanyi balkinyi yajinyi. Narri nulijba durriykanyi yuwa nangangi Kudkanyi, ngala yuwajiwa narri durrijba narringinmirra yuwa. Jungkukiyi kunyba Kudkanyi. Durrijbakiyi nangangi yuwa yurrngumba. Miku narriyi durrijba kujarra yuwa, ngawamba yingamali.
JAM 4:9 Ngindukiyi muwa narringinkanyi balkinyi yajinyi. Ngindukiyi muwa kudanyu mirlarryudi. Wijbakiyi kakalijba yaji, baki mankumanku narringkiyi narringinkanyi balkinyi yajinyi, baki miku janarri mili yabijba muwa. Janarri ngindu muwa, jungkungangi narri balki nangangi Kudkanyi.
JAM 4:10 Miku narrimi walkurra nganinyimuku. Miku narrimi walkurra mambukamuku. Muningka narri jungku. Marda narringkimi mankumanku, narri bayakarda nangangi Jisus Krayiskanyi, baki janyulu kandimba narrinya. Janyulu yabimba kunyba yaji narringi.
JAM 4:11 Mikujiyi jurlwa yalungi, narringinmukuyngka mungkijimukuyngka. Nanda balki. Marda miku narrimi yanyba yingkanyi, nyulu jungkuka balki Kudkanyi. Jaliyi narri yanyba nani, baki narri jungku balki nanankanyi yuwanyi marukankanyi yingkamukuyngka. Jaliyi narri yanyba nani, baki nanda barrinani narri yanyba yuwanyi nangangi Kudkanyi, miku nanda kunyba yuwa.
JAM 4:12 Mikuwali nganinyi yanyba yingkanyi, nyulu jungkuka balkina yuwana. Mikuwali nganinyi yanyba nani yingkanyi. Ngala ngawamba Kud, ngawamba nyulu yanybaka yingkanyi, nyulu jungkuka balkina yuwana. Wajbayi ngambalanya nanankanyi yuwanyi Kudwanyi, baki ngawamba nyulu yanybaka jala ngambala barimba nanda nangangi yuwa. Miku ngambaliyi yanyba nani yingkanyi. Ngawamba nyulu yanybaka, janyulu wankamba nanda yurrngumba. Ngawamba nyulu yanybaka yingkanyi, janangka janyba yurrngumba. Nanankardi marda narrimi jingkijba nayi. Marda nangkimi miku yabimba nganinyi barrinani Kud yanybikanyi yingkamukuyngka, yalunginkanyi balkinyi yajinyi. Marda nangkimi miku yabimba barrinani Kud yanybikanyi nani. Barriwa.
JAM 4:13 Baki nayinda yingka jangkurr ngaki, mankukiyi. Yabimbayi jamba Kudwanyi wabula kamambarra. Jungkuyi nayinda jamba yurrngumba nanamunanyi. Ngala miku narriyi jungku nayiba jambana yurrngumba nani. Mankumanku narringka kangulkinyi. Makabangka jamba kangulkiwanyi ngala nyulu kambalingijbangka yaji, ngala winyurruwa janyulu mikujba yaji kangulkinyi. Nani barri narri jungku jambana ngawamba marndakaja. Winyurruwa janarri mikujba yaji. Ngala jawuda narri yanyba nayi, “Yiningki kamu, yiningki munganawa jangayu barlba bayungu nanankurri yajiyurri. Jangayu jungku nanaba yingamali kindilkurrinyi. Jangayu wajba yajinyi dungalanyi, baki jangayu wudumba dungala, kudukudu dungala.” Nani jawuda narri yanyba.
JAM 4:15 Ngala miku narrimi jingkijba kamunyi baki bakunyi. Marda narrimi miku yanyba nani yabimbikanyi yaji. Ngala marda narrimi yanyba nayi, “Jalija nulijba Kud ngaki, baki jangayu yabimba nayinda, jangayu jilajba nanankurri.” Marda narrimi yanyba nani.
JAM 4:16 Ngala narri barrarrakijba. Yanyba narringka walkurra jangkurr. Ngala miku narriyi karu nanankanyi yajinyi jaliyi narri yabimba baku. Miku narrimi jingkijba yaji bakunyi nani. Yiningki janarringka janyba. Ngawamba nyulu jingkijbangka yaji bakunyi Kudwanyi. Jaliyi narri yanyba nani, baki narri yurlwa nangangi Kudkanyi. Nanda balki. Barriwa.
JAM 4:17 Nanda jala jingkijba yabimbikanyi kunyba yaji, ngala miku nyulimi yabimba nanda kunyba yaji, baki nanda balki. Yurlwangka nyulu nangangi Kudkanyi. Jungkuka nyulu balkina yuwana nangangi Kudkanyi. Barriwa.
JAM 5:1 Ngayu yarrijba nayinda jangkurr narringi jirdi kajanyi yajinyi. Kudukudu kiji badajbaja narrinburri. Narri kijiwijbangka yajinyi, baki dungalanyi. Narri jungku jirdi kajanyi yajinyi, jirdi kajanyi dungalanyi. Narri wudumba yalunya wakinkanyi narringi. Narri jirrinybaka yalunya karlkanyi narringi karnba. Yalu karlbangka narringi karnba, ngala narri wajba yalunya ngawamba bijalanyi dungalanyi wakinkanyi. Miku narrimi wajba kudanyu dungalanyi. Marrimba narri kudiya yalungi dungala narrindu. Baki nanankardi yalu nginduka muwa, nanamuku wakiwarrmuku. Yalu nginduka muwa, baki mankuka yalunya ngindunkurri Kudwanyi. Mankuka yalunya ngindunkurri, marrimbangangi narri kudiya yalungi dungala. Nani barri narri wudumba kaja dungala, baki kaja yaji barrinani kunyba jumbala. Ngala nanda kaja yaji ngujbulijbaja baku. Jarrbaja narringi jumbala mawuwanyi. Baki ngujbulijbaja narringi mankanyi marda. Wudumba narri kaja dungala baki kaja yaji bakunyi, ngala miku janarri wanka jungku baku. Ngujbulijbaja narringi mankanyi marda narringi yaji bukamba.
JAM 5:5 Narri jungkuka mirnarrijba muwa nanankanyi kajanyi yajinyi, ngala miku narrimi jingkijba Kud. Janyulu karrinjarrijba narrinya baku walu nangandu, baki janyulu yanyba narringi, narri jungku balkina yuwana Kudkanyi. Narri kijiwijbayi yajinyi. Narri maninjakujbayi yalungi dungala. Baki nanankardi janarringka janyba yurrngumba.
JAM 5:6 Ngala nanamuku jala yalu jungku yurlurrmba Kudkanyi, narri yanyba yalungi, marda yalungkimi janyba. Narri kurdanba yalunya, jali jungku kunyba nangangi Kudkanyi. Narri mili ngiruka yalungi, baki miku yalungkiyi kurrkunba narringi. Barriwa.
JAM 5:7 Yukumbakiyi Kudkanyi. Mikujiyi ngindu muwa yajinyi. Jungkukiyi karda. Miku nyulimi yabimba yaji dulu Kudwanyi. Miku nyulimi dulu karrinjarrijba yalunya walu nangandu, jala yalu yabimba balki yaji. Yukumbaka nyulu yalungi. Nanamuku balkimuku yiningki jayalu baku ngindu muwa yalunginkanyi balkinyi yajinyi, baki janyulu manjamanjamba yalungi balki yaji Kudwanyi. Jala nganinyiwanyi yarrijbangka mama yami jambana, miku dulu nanda wanjirr jardijba walkurra. Yarrijbangka yami jambana nganinyiwanyi, baki baku yirrbaja janja. Jala nangka bukamba janja jala yirrba, baki jardijbangka walkurra nanda wanjirr mamayudi. Ngala nanda nganinyi, yukumbaka nyulu mamanyi. Jingkijbangka nyulu, miku dulu jardijbangka mama, baki yukumbaka nyulu nanankanyi mamanyi. Baki nani barri marda narrimi yukumba Kudkanyi. Miku nyulimi yabimba yaji dulu Kudwanyi, ngala baku janyulu yanyba yalungi, jala yalu miku ngindu muwa yalunginkanyi balkinyi yajinyi, janyulu yanyba yalungi, jayalungka janyba.
JAM 5:8 Jungku narri ngiruka nangangi Jisus Krayiskanyi, baki janyulu wijba nanginkurri baku.
JAM 5:9 Miku narringkiyi jakakajba. Miku narringkiyi ngirrwa. Nanda balki. Jaliyi narri yabimba yaji nani, baki baku yanybaja Jisus Krayis narringi, jaliyi narri jungku balkina nanganginyina yuwana. Nani janyulu yanyba, jalija nyulu wijba.
JAM 5:10 Marda narrimi karda jungku bakunyi, yukumbikanyi nangangi Kudkanyi. Marda narrimi karda jungku, jala yalu yabimba kiji narringi. Marda narrimi karda jungku, barrinani nanamuku wankalamuku jali yanyba jangkurr Kudkanyi, barrinani yali karda jungku jali yingkamukunyi yabimbayi kiji yalungi.
JAM 5:11 Nanamuku wankalamuku, yali maruka muwa nangangi Kudkanyi. Yali kuyu nangangi jangkurr. Yali jungku ngiruka Kudkanyi yurrngumba. Narri mankuyi nanda jangkurr najana Kudkanyi, jala karu ngambalanya nangangi, nanankanyi wankalanyi, niji Jub. Yukumba nyuli Kudkanyi. Jungku nyuli ngiruka Kudkanyi. Manjijbayi kiji nangandurri Sayidinwanyi, ngala miku nangkiyanyi yangkalamba nanganbunanyi Kudnanyi. Kuyu nyuli jangkurr Kudkanyi, jungku nyuli yurlurrmba nangangi yurrngumba. Baki nani barri marda narrimi jingkijba Kud, nyulu kandimbaka narrinya jala narri jungku ngiruka nangangi. Marda narrimi jingkijba nani Kudkanyi, nyulungangi kunyba. Yabimbaka nyulu kunyba yaji narringi, jala narri jungku kijiyudi. Barriwa.
JAM 5:12 Jala narri nulijba yanybikanyi ngiruka jangkurr miku yangkalambikanyi, ngawamba yanybaka nayi, “Yi. Jangayu jila nanankurri.” Baki yingka jangkurr barrinani nayi, “Yi. Jangayu yabimba nanda yaji.” Yanybakiyi nayi, “Miku jangayu jila nanankurri.” “Miku jangayu yabimba nanda yaji.” Nanikiyi yanyba ngiruka jangkurr miku yangkalambikanyi. Ngala mikujiyi yanyba nayi, “Ngayu ngajakangka Kud, nyulu mankunkanyi nayinda ngiruka jankurr ngaki miku yangkalambikanyi, Yi. Jangayu yabimba nanda yaji.” Mikujiyi ngajaka Kud nani jala narri yanyba jangkurr miku yangkalambikanyi. Nanda balki.
JAM 5:13 Jaliyi nganinyi jungku kijiyudi, baki nyulu balkijba muwa nanankanyi kijinyi, baki marda nyulimi yanyba mududu Kudkanyi. Barriwa. Jaliyi nganinyi yabijba muwa, baki marda nyulimi yanyba kunyba jangkurr nangangi Kudkanyi. Marda nyulimi brijba nangangi Kudkanyi. Barriwa.
JAM 5:14 Jaliyi nganinyi lunjika kudanyu, baki marda nyulimi ngajaka yalunya malbumalbu, jala jungku ngiruka Kudkanyi. Marda nyulimi ngajaka yalunya jilaykanyi nangandurri. Jayalu yanyba mududu Kudkanyi nangangi. Jayalu yarrijba nanda yaji barrinani kungu nangandu kulajina, baki ngajaka Kud, nyulu kunymambiji nanda nganinyi, nyulungangi ngiruka mambuka Kud.
JAM 5:15 Jayalu yanyba mududu Kudkanyi, baki janyulu manku yalungi jangkurr. Janyulu kunymamba nanda nganinyi jala lunji. Janyulu kunymamba nanda nganinyi Kudwanyi, baki jaliyi nanda nganinyi jungkuka balkina yuwana Kudkanyi, janyulu manjamanjamba nangangi balki yaji Kudwanyi. Nani barri jala yalu yanyba mududu Kudkanyi, janyulu kunymamba nanda nganinyi mankanyi, baki janyulu manjamanjamba nangangi balki yaji marda Kudwanyi.
JAM 5:16 Marda narringkimi karu nanankanyi balkinyi yajinyi jala narri yabimba. Marda narringkimi yanyba mududu Kudkanyi, baki janyulu manjamanjamba nanda balki yaji narringi. Jaliyi narri jungku yurlurrmba nangangi Kudkanyi, baki janyulu manku narringi jangkurr jala narri yanyba mududu nangangi yurrngumba. Jaliyi narri yurlurrmba jungku nangangi, janyulu yabimba nanda yaji jala narri ngajaka.
JAM 5:17 Nanda wankalanyi, niji Yilayija, nyuli jungku kunyba Kudkanyi. Nyuli nganinyi barrinani ngambala, ngala nyuli yanyba mududu Kudkanyi kudanyu. Yanyba nyuli mududu Kudkanyi, ngajaka nyuli Kud, kurrkunbiji janja yurrngumba. Nani barri nyuli yanyba mududu Kudkanyi, baki mikuyaji janjanyi yirrbayi. Mikuyaji janjanyi kujarra yingamali janjawala baki bijal mili. Mikukiyanyi yirrba janja yurrngumba nanamanji.
JAM 5:18 Ngala baku mili yanybayi nanda Yilayija mududu Kudkanyi, yanyba nyuli janjanyi. Jananganjayi Kudwanyi. Manjijbayi janja. Yirrbayi janja jambana, baki mili jardijbayi karnba baki mama. Barriwa.
JAM 5:19 Ngakinmuku mungkijimuku. Jaliyi nganinyi kurrkunba durriykanyi yuwa Kudkanyi marndakaja, jaliyi nangka yangkalamba nanganbunanyi Kudnanyi, baki marda narrimi yanyba nangangi nani. Marda narrimi minimba nanda nganinyi, janangka mili yangkalamba nangandurri Kudyurri, janyulu mili durrijba yuwa nangangi Kudkanyi. Nani barri marda narrimi wiykunumba nanda nganinyi Kudkanyi.
JAM 5:20 Baki nanda nganinyi, jali jungku balki Kudkanyi marndakaja, marda nyulimi jingkijba Kud, janyulu manjamanjamba nangangi balki yaji. Janyulu manjamanjamba nangangi balki yaji, jaliyi nanda nganinyi mili nangka yangkalamba nangandurri Kudyurri. Barriwa. Jala nganinyiwanyi yabimbaka balki yaji, baki baku bayngkani barri kaja balki yaji yabimbaja, kudiya nyulu, kudiya yingkamukunyi nanamunanyi yingamalinanyi balkinanyi yajinanyi. Waluku yingamali balki yaji, ngala bayngkani kaja balki yaji. Nani barri jaliyi narri yangkalamba nanda nganinyi nangandurri Kudyurri, baki janarri kurrkunba nanda kaja balki yaji. Miku nangkiyi janyba nanda nganinyi yurrngumba, ngala janyulu marrimba nanda mardarda Kudwanyi. Barriwa barri, bukamba nayinda jangkurr.
1PE 1:1 Nayinda ngayu. Ngaki niji Bida, nanda jali ngana manjijba Jisus Krayiswanyi. Ngayu yarrijbangka nayinda jangkurr najana. Ngayu manjijbangka nayinda jangkurr narrindurri jalili narri jungku kajana yajina, Bundus baki Kalajiya baki Kabadusiya, baki Yasiya, baki Bidiniya. Narri Krisjinmuku, narri jungkuka kajana yajina, baki yarrijbayi narrinya Kudwanyi nanganginmuku jandanyimuku. Narri jungkuka kajana yajina, ngala baku barri janarri jungku kingkarri nangandu. Nanaba janyulu narringi yaji.
1PE 1:2 Wabula kamambarra ngambalangi Buwakanya Kud, nangki mankumanku yajinyi. Mankumanku nangki narringi, baku barri juju janarri jungku nayiba jambana. Mankumanku nangki Kud narringi, janyulu yarrijba narrinya nanganginmuku jandanyimuku. Manjijbayi Kudwanyi nangangi Kunyba Ngarndu ngamandurri, nyulu jungunkanyi ngambalandu kurduluna. Baki yabimbaka ngambalanya ngiruka Ngarnduwanyi, ngambala ngayangayiykanyi nanganginkanyi jangkurranyi Jisus Krayiskanyi. Baki jala ngambala kuyu nangangi jangkurr, baki nyulu yarrijbangka ngambalanya nanganginmuku jandanyimuku Kudwanyi, nyulu manjamanjambaka ngambalangi balki yaji. Jala ngambala ngindu muwa ngamanginkanyi balkinyi yajinyi, baki nyulu manjamanjambaka ngambalangi balki yaji, nangangingangi Jisus Krayiskanyi. Janyba nangki Jisus Krayis wabangkarra kurndana ngamanginkanyi balkinyi yajinyi. Ngayu ngajakangka Kud narringi, janyulu yabimba kaja kunyba yaji narringi, baki janarri jungku mardumardu muwa nangangi Kudkanyi, baki yalungi yingkamukuyngka marda.
1PE 1:3 Ngambala jungkuka mirnarrijba muwa. Ngambala wajbangka Kud ngamanginkanyi kunybanyi jangkurranyi. Nyulu Buwakanya nangangi, ngambalanginkanyi mambukanyi Jisus Krayiskanyi. Yabimba nyuli kunyba yaji ngambalangi Kudwanyi. Kunybamirra yaji nyuli yabimba ngambalangi, jali nyulu manjijba nangangi jandanyi wayka jambarri. Manjijba nyuli Jisus Krayis janybikanyi nangka ngambalangi. Janyba nangki Jisus Krayis ngambalangi, baki mili wankijbayi. Baki nanankardi barri ngambala jingkijbangka nayi, jangambala mili wankijba marda. Ngambala jingkijbangka barri, jangambala jungku mili wanka nangandu kingkarri, kuyungangi ngambala nangangi jangkurr Jisus Krayiskanyi. Jali ngambala kuyu nangangi jangkurr, baki ngambalaki yangkalamba nangandurri. Baki nanankardi barri ngambala jungku barrinani yinini nganinyimuku, barrinani buyingkinyi nganinyimuku nangangi. Jala nangka birnandaba jibarri bardardanyi, baki nanda buyingkinyi bardarda. Baki nani barri ngambala jungku barrinani nanda buyingkinyi nganinyi nangangi Kudkanyi.
1PE 1:4 Yanybaka Kud, janyulu yabimba yaji ngambalangi, baki ngambala jingkijba Kud, janyulu yabimba nanda jali nyulu yanyba, janyulu yabimba. Nayi barri janyulu yabimba nanda yaji ngambalangi, jali nyulu yanyba yabimbikanyi. Janyulu marrimba ngambalanya mardarda yurrngumba barri Kudwanyi. Janyulu marrimba ngambalanya mardarda kingkarri nangandu, nanganginyina kunybana yajina lalijina. Janyulu marrimba ngambalanya mardarda kingkarri nangandu nanamanji baku, jalija nyulu bukamba yaji. Jalija bukamba yaji Kudwanyi, baki janarri nanaba nangandu, janarri najba nanda jalija nyulu yabimba.
1PE 1:6 Nanankardi barri kudanyu narri mirnarrijba muwa. Yiningki narri jungkuka kijiyudi. Yiningki janarrinyalu linjumba kudiyamukunyi. Yiningki jayalu manku kiji narringi. Jala narri jungkuka nani, baki yuwajiwa narri mirnarrijba muwa, jingkijbangangi narri nayi barri. Narri jandanyimuku nangangi Kudkanyi, baki janarri jungku mili wanka nangandu kingkarri yurrngumba barri. Kudiya narri jungkuka kijiyudi nanijba barri, ngala nanda kiji jala jungku narrindu marndakaja, ngala janarri yurrngumba jungku nangandu kingkarri, baki nanankardi barri narri mirnarrijbangka muwa.
1PE 1:7 Kudiyana barri munyajbangka yalunya yingkamuku Kudwanyi. Nyulu munyajbangka yalunya waykurri narrinya kijinyi. Nani barri nyulu balanjaka narrinya Kudwanyi. Nyulu balanjaka narrinya jala yalu wajba narrinya kijinyi. Marda narringkimi mankumanku nangangi Jisus Krayiskanyi. Marda narrimi mankumankuwa nangangi jangkurr yurrngumba barri, baki janarri jungku mili ngiruka nangangi barri. Jaliyi narri jungku ngiruka nangangi jala narri kijiyudi, baki baku barri janyulu wajba narrinya nanganginkanyi kunybanyi jangkurranyi Jisus Krayiswanyi. Nyulu walkurramirra ngambalangi barri. Miku yingka walkurra barrinani nyulu. Yingkamukunyi jayalu wajba Jisus Krayis yalunginkanyi kunybanyi jangkurranyi, mikungangi narringkiyanyi yangkalamba nanganbunanyi jali yalu yingkamukunyi manku kiji narringi. Jaliyi narringka yangkalamba nanganbunanyi, jungkungangi narri kijiyudi, baki miku narrimi kuyu kudanyu nangangi jangkurr. Ngala jaliyi narri kudanyu marrimba nangangi jangkurr yurrngumba, baki yuwajiwa narri jungkuka ngiruka nangangi. Baki mikuwali kijiwanyi yabimba narrinya, narringka yangkalambikanyi nanganbunanyi.
1PE 1:8 Narri marukangka muwa nangangi Jisus Krayiskanyi, ngala miku narriyanyi najba nangangi mankanyi jali nyulu wanka jungku nayiba wayka jambana. Mikumirra. Ngala narri kuyuyi nangangi jangkurr. Baki nanijba marda miku narriyi najba Jisus Krayis mankanyi, ngala narri mirnarrijba muwa nangangi. Kudanyu narri mirnarrijbangka muwa nangangi.
1PE 1:9 Yurrngumba barri narri mirnarrijba muwa nani barri, kuyungangi narri nangangi jangkurr. Narri kuyungka nangangi jangkurr, baki nanankardi nyulu marrimbaka narrinya mardarda yurrngumba barri. Nyulu marrimbaka narrinya mardarda, baki baku barri narringi ngarndu jungkuja kingkarri nangandu. Barriwa.
1PE 1:10 Wabula wankalana, nanamuku wankalamuku jali yalu yanyba jangkurr nangangi Kudkanyi, wajbayi yalunya jangkurranyi Kunybawanyi Ngarnduwanyi Kudkanyi. Nyuli wajba yalunya jangkurranyi nangangi Jisus Krayiskanyi, janyulu jilajba wayka jambarri. Yanyba yali nanda jangkurr wankalamuku. Karu yalunjali nangangi Jisus Krayiskanyi, janyulu yabimba kunyba yaji narringi, janyulu marrimba narrinya mardarda. Narri jala ngurranyimuku nurrungi Jumukuyngka, nanda jangkurr Kudkanyi yanybaka narringi, janyulu narrinya marda marrimba mardarda ngurranyimuku. Janarrinya marda marrimba. Nanamuku wankalamuku, nulijba yali jingkiykanyi yaji nangangi Jisus Krayiskanyi. Nulijba yali jingkiykanyi nangangi yaji. Ningkijba yali jangkurr najana Kudkanyi. Ningkijba yali nanda jangkurr, jingkiykanyi wanyimbala janyulu badajba. Ngala mikukiyanyi yanyba Kud wanyimbala janyulu manjijba Jisus Krayis. Mikukiyanyi karu yalunya jangkurrwanyi wanyimbala janyulu badajba. Ngala yanybayi jangkurr nangangi, jayalu linjumba yingkamukunyi. Jayalu linjumba kudanyu barri, ngala baku barri yabimbaja kunyba yaji nangangi Kudwanyi. Nani barri yanybayi jangkurr najana Kudkanyi nangangi.
1PE 1:12 Nanamuku wankalamuku yalungki mankumanku nanankanyi jangkurranyi jali yalu yanyba. Yalungki mankumanku nanankanyi jangkurranyi jali wajba yalunya Kudwanyi. Jali yalu yanyba nanda jangkurr nangangi Kudkanyi, nanankanyi yajinyi jalija yabimba Kudwanyi, baki yali jingkijba Kud. Yali jingkijba Kud, miku janyulu yabimba nanda yaji nanamanji jali yalu jungku wanka barri. Miku. Ngala janyulu yabimba nanda yaji baku barri. Nanda jangkurr yanybayi bakunyi yajinyi, jalija nangka janyba Jisus Krayis ngambalangi barri. Yalungi jangkurr narringi nanijba barri. Yingkamukunyi yali karu narrinya nangangi. Manjijbayi nangangi Kunyba Ngarndu yalundurri Kudwanyi, baki yalu karuyi narrinya nangangi. Yalu karuyi narrinya nanankanyi kunybanyi jangkurranyi nanganginkanyi Jisus Krayiskanyi. Baki nanamukunyi Yanjilmukunyi kingkarri lalijina, yalu najbangka yaji kingkarrinyi. Yalu marda nulijbangka jingkiykanyi Kud. Yalu nulijbangka jingkiykanyi Kud, nanda jalija nyulu yabimba narringi barri. Yalu marda Yanjilmukunyi jingkijbangka narrinya, narrili kuyu nangangi jangkurr Jisus Krayiskanyi, narrili kuyu nangangi yuwa. Nani barri yalu jingkijbangka narrinya, baki yalu marda mirnarrijbangka muwa narringi.
1PE 1:13 Manku narri nayinda jangkurr. Marda narringkimi mankumanku nangangi Jisus Krayiskanyi. Marda narringkimi kudanyu mankumanku nangangi barri. Marda narringkimi mankumanku nangangi Jisus Krayiskanyi, jalija narri jungku kingkarri nangandu baku. Jaliyi narri yabimba nanda jala nanganginyi jangkurrwanyi karungka narrinya yabimbikanyi, baki nanda kunyba. Baki janyulu yabimba kunyba yaji narringi baku barri jalija narri najba Jisus Krayis.
1PE 1:14 Wabula barri jalili narringka yanyba yabimbikanyi balki yaji, baki narrili manku nanda jangkurr. Miku narringkiyanyi kurrkunba ngalu, yabimbikanyi nanda balki yaji. Ngala nanijba barri narri jandanyimuku nangangi Kudkanyi, baki marda narringkimi kurrkunba ngalu yabimbikanyi balki yaji. Marda narrimi ngayangayijba nanganginkanyi jangkurranyi yurrngumba barri. Narri jandanyimuku nangangi Kudkanyi, baki marda narrimi ngayangayijba nangangi yurrngumba barri. Marda narrimi miku yabimba balki yaji barrinani narrili yabimba wabula.
1PE 1:15 Yabimbayi kunyba yaji narringi Kudwanyi jali nyulu yarrijba narrinya nanganginmuku jandanyimuku. Baki nanankardi barri marda narrimi yabimba ngawamba kunyba yaji barrinani nyulu yabimbaka. Yanybayi Kud nayinda jangkurr nanganginyina najana, “Marda narrimi jungku barrinani ngayu jungku. Ngayu kudukudu. Miku ngayimi jungku balki, ngala ngayu jungkuka kunyba yurrngumba barri. Baki narri barrinani kudukudu ngaki. Marda narrimi miku jungku balki, ngala marda narrimi jungku kunyba yurrngumba barri.” Nani barri yanybayi Kud, baki nani barri marda narrimi jungku barrinani kudukudu nangangi. Marda narrimi jungku kunyba nangangi. Marda narrimi yabimba ngawamba kunyba yaji yurrngumba barri. Barriwa.
1PE 1:17 Narri ngajakangka Kud yajinyi, baki nyulu jananganjaka narrinya, nyulu yabimbaka nanda jala narri ngajaka. Nyulu narringi Buwakanya Kingkarri. Jaliyi narri durrijba nangangi jangkurr, jaliyi narri ngayangayijba nanganginkanyi jangkurranyi yurrngumba barri, baki janyulu yabimba kunyba yaji narringi. Janyulu yabimba nanamannga kunyba yaji bukambijuyngka. Miku nyulimi yanyba nayi barri, “Nanda nganinyi, nyulu walkurra, jangayu yabimba kaja kunyba yaji nangangi. Ngala yingka nganinyi ngawamba nyulu bayakarda nganinyi, jangayu yabimba ngawamba bijal kunyba yaji nangangi.” Mikuwali yanyba Kud nani barri. Ngala nyulu yabimbaka nanamannga kunyba yaji yingkanyi baki yingkanyi jala yalu ngajaka Kud yajinyi. Narri jingkijbangka Kud, janyulu karrinjarrijba bukambiju walu nangandu baku barri, baki nanankardi barri marda narringkimi najbawa, marda narrimi ngayangayijba nangangi yurrngumba barri. Barriwa.
1PE 1:18 Jaliyi nganinyi jungku balkina yuwana, baki jayalu kuyu nanda nganinyi nanankurri kurdusyurri. Jayalu karrinjarrijba nanda balki nganinyi kurdusnyina, baki jayalu yarrijba brisinyina. Ngala jaliyi yingkawanyi wajba mambuka kajanyi dungalanyi, baki yuku jayalu muningka wudumba nanda nganinyi brisinanyi. Yuku jayalu muningka wudumba, jala yingkawanyi wajba kajanyi dungalanyi. Wabula barri narrili durrijba narringi wankalanyi yuwa, jalili yalu karu narrinya wankalamukunyi. Narrili durrijba yalungi yuwa, ngala miku nanda kunyba yuwa durriykanyi.
1PE 1:19 Ngala wudumbayi narrinya nanamunanyi yuwananyi Jisus Krayiswanyi. Nyuli wudumba narrinya, ngala miku nyuliyanyi wajba yingka dungalanyi wudumbikanyi narrinya, ngala nangki janyba wabangkarra kurndana. Nani nyuli wudumba narrinya. Baki nanankardi barri, janyulu manjamanjamba narringi balki yaji Kudwanyi. Janyulu manjamanjamba narringi balki yaji, jaliyi narri kuyu nangangi jangkurr Jisus Krayiskanyi, jaliyi narri durrijba nangangi buyingkinyi yuwa, janybangangi nangki Jisus Krayis narringkanyi balkinyi yajinyi. Wabula barri wankalana yalili wajba Kud yajinyi, jalili yalu jungku balki nangangi Jumuku. Jalili yalu ngindu muwa yalunginkanyi balkinyi yajinyi, bakili yalu wudumba bulungu jibkanyi. Wudumba yalili kunyba bulungu, kunybamirra, jala mikuyaji balkinyi nangandu. Yalili wudumba kunyba bulungu, bakili kurdanba barri. Bakili dikarrijba nanda bulungu nangangi Kudkanyi. Nani barri yalili wajba Kud bulungunyi. Jisus Krayis barri, nyulu barrinani nanda bulungu jali yalu wajba Kud. Nyulu kunybamirra. Jungku nyuli kunybana yuwana Kudkanyi. Mikuyaji balkinyi nangandu. Ngala janyba nangki wabangkarra kurndana narringinkanyi balkinyi yajinyi. Manjamanjambayi narringi balki yaji Kudwanyi, janybangangi nangki Jisus Krayis narringi. Nani barri nyuli yabimba yaji narringi. Miku nyuliyanyi wajba yingka dungalanyi narringi, ngala nangki janyba narringi.
1PE 1:20 Wabula kamambarra, waluwa nyuli yabimba nayinda jamba marda yaji junu, nanamanji barri wabula jingkijbayi Kudwanyi nanda jalija nyulu yabimba. Yarrijba nyuli nangangi jandanyi yabimbikanyi yaji nangangi. Baku barri juju janyulu minimba yalunya nanganginkanyi jandayngkanyi, janyulu manjijba nangangi jandanyi wayka jambarri. Janyulu manjijba nangangi jandanyi janybikanyi nangka narringinkanyi balkinyi yajinyi. Nani barri yarrijbayi nangangi jandanyi Kudwanyi. Baki yabimbayi nanda yaji Kudwanyi. Manjijba nyuli nangangi jandanyi wayka jambarri, baki janyba nangki Jisus Krayis narringinkanyi balkinyi yajinyi.
1PE 1:21 Janyba nangki Jisus Krayis narringi, baki wankijba nyuli mili. Baki nanankardi barri narri kuyungka nangangi jangkurr Kudkanyi. Mili wankambayi Jisus Krayis Kudwanyi, baki nanijba barri nyulu jungkuka kingkarri nangandu Kudnyina. Yarrijbayi Jisus Krayis wirimalaru ngambalangi Kudwanyi. Narri kuyungka nangangi jangkurr, baki narri jingkijbangka Kud, janyulu mili wankamba narrinya. Janyulu mili wankamba narrinya, narri jungunkanyi kingkarri nangandu. Nani barri narri jingkijbangka Kud, janyulu wankamba narrinya, wankambangangi nyuli Jisus Krayis waluwa barri. Barriwa.
1PE 1:22 Nanijba barri narri jungkuka yurlurrmba nangangi Kudkanyi. Narri jungkuka likalika kurdulu nangangi barri. Narri kuyuyi nangangi duja jangkurr, narri ngayangayijbayi nanankanyi jangkurranyi. Narri jungkuyi yurlurrmba nangangi Kudkanyi, ngayangayijbangangi narri nanganginkanyi jangkurranyi. Nanankardi barri marda narrimi ngayangayijba nanankanyi jangkurranyi jali milidimba ngambalanya Jisus Krayiswanyi. Nanijba barri narri marukangka muwa yalungi bukambijuyngka jala yalu kuyu nangangi jangkurr. Marda narrimi miku yabimba balki yaji yalungi yingkamukuyngka, ngala marda narrimi kudanyu maruka muwa yalungi yurrngumba barri.
1PE 1:23 Nanijba barri narri jungkuka barrinani buyingkinyi nganinyimuku. Jala nangka birnandaba bardardanyi, baki buyingkinyi nanda bardarda. Baki nani barri jali narri kuyu nanda jangkurr nangangi Kudkanyi, baki narringki yangkalamba nangandurri, baki narri jungkuyi barrinani buyingkinyi nganinyimuku nangangi Kudkanyi. Nyulu narringi Buwakanya, kuyungangi narri nangangi jangkurr. Nangangi jangkurr jungkuka duja yurrngumba barri. Mikuwali yingkawanyi yangkalamba nanda jangkurr, jungkuka duja yurrngumba barri. Janarri jungku mili wanka yurrngumba barri, kuyungangi narri nanda duja jangkurr nangangi Kudkanyi.
1PE 1:24 Nanda jangkurr najana Kudkanyi yanybaka nayi barri, “Bukambiju yalu barrinani karnba. Walajbangka wuju baki jardijbangka jalyudi. Ngala marndakaja dukujbangka nanda jal, baki janyba nangka nanda karnba. Baki nani marda nganinyimuku baki jibarrimuku. Jungkuka yalu marndakaja nayiba jambana, marda yalungka marda janyba.
1PE 1:25 Ngala nanda jangkurr nangangi Kudkanyi, miku nangkiyi janyba. Nangangi jangkurr jungkuka yurrngumba barri. Nangangi jangkurr jungkuka kunyba, jungkuka duja barri yalu mankunkanyi, marda durriykanyi.” Nani barri yanybaka jangkurr najana Kudkanyi. Waluwa nurri karu narrinya nanankanyi kunybanyi jangkurranyi jala miku nangkiyi janyba. Nurri karu narrinya nanamannga jangkurranyi nanganginkanyi Kudkanyi. Barriwa.
1PE 2:1 Marda narrimi yurrngumba jungku yurlurrmba nangangi Kudkanyi. Marda narrimi miku yabimba balki yaji yingkanyi. Marda narrimi miku nulijba yingkanyi, nangka mankumankunkanyi narringi, narri jungku yurlurrmba, ngala narrija kardarda yabimba balki yaji narringi. Marda narrimi miku ngurrunajba yingka. Marda narrimi miku yanyba balki jangkurr yingkanyi nangangi barri. Marda narrimi yingijba barriwa barri bukamba nanda balki yaji. Marda narrimi jungku yurlurrmba nangangi Kudkanyi.
1PE 2:2 Nanda buyingkinyi bardarda, nyulu nulijbangka ngamulunyi yurrngumba barri. Ngarabangka ngamulu, baki nyulu jardijbangka walkurra baki ngiruka marda. Baki nani barri narri marda. Jala narri yurrngumba manku nanda jangkurr nangangi Kudkanyi, jala narri yurrngumba durrijba nangangi jangkurr, baki janarri jardijba walkurra nangangi, janarri jungku ngiruka nangangi. Nanda ngamulu kunyba bardardanyi, baki nani marda nanda jangkurr nangangi Kudkanyi, nanda kunyba narringi. Jalili narri durrijba nangangi jangkurr, baki janarri jungku ngiruka nangangi, baki janyulu marrimba narrinya mardarda Kudwanyi.
1PE 2:3 Nanda jangkurr najana Kudkanyi yanybaka nayi barri, “Narri jingkijbangka Kud, nyulili yabimba kunyba yaji narringi. Waluwa barri, miku narriyanyi jingkijba nani nangangi Kudkanyi, ngala nanijba barri narri jingkijbangka Kud, nyulili yabimba kunyba yaji narringi.” Barriwa.
1PE 2:4 Marda yingka jangkurr najana Kudkanyi yanybaka nayi barri, “Yarrijba ngayi kunyba nganinyi, baki baku barri jangayu manjijba wayka jambarri. Jangayu manjijba nanankurri yajiyurri niji Siyun, jala yalungi yaji Jumukuyngka. Yarrijba ngayi nanda nganinyi lalanbawarr mardarda. Janyulu jungku ngiruka barrinani nanda ngiruka kurnda yundukula barrawuna. Jangayu manjijba nanda nganinyi wayka jambarri, baki janyulu jungku nanaba jambana. Bukambiju jala yalu kuyu nangangi jangkurr, jayalu mirnarrijba muwa nangangi. Baki miku nyuliyi manyirrumba yalunya.” Barriwa. Nani barri nanda jangkurr yanybaka. Jisus Krayis barri, nyulu kunybamirra narringi. Ngala yingkamuku yalungki yangkalamba nanganbunanyi. Yali yurlwa nanganginkanyi jangkurranyi. Nanda jangkurr najana Kudkanyi yanybaka nayi barri, “Jali yalu yabimba barrawu, baki miku yaliyanyi nulijba yingamaliyngka kurndanyi. Ngala janyba yali nanda kurnda. Ngala baku barri yingkawanyi nyuli yabimba barrawu nangangi Kudkanyi. Wudumba nyuli nanda kurnda jali yalu janyba, baki yarrijba nyuli yundukula nananyina barrawuna Kudkanyi. Nanda jirrinyi kurnda nanganginyina barrawuna.” Jisus Krayis barri, nyulu barrinani nanda jirrinyi kurnda ngambalangi barri jala kuyu nangangi jangkurr. Ngala nanamuku jala yalu yurlwa nanganginkanyi jangkurranyi, yalu barrinani nanamuku jali janyba nanda jirrinyi kurnda. Barriwa. Marda narrimi durrijba Jisus Krayis. Yarrijbayi nanda nganinyi mambuka ngambalangi Kudwanyi, nanda jala nanganginmirra jandanyi. Yarrijba nyuli nanda nganinyi mambuka ngambalangi. Ngala kajamuku jayalu yurlwa nangangi, jayalungka yangkalamba nanganbunanyi. Ngala narri barri, marda narrimi durrijba nangangi jangkurr kudanyu barri, baki janyulu lalanba narrinya. Nyulu jungkuka ngiruka barrinani nanda ngiruka kurnda yundukula barrawuna. Baki narri barri, narri barrinani kajamuku kurndamuku nananyina barrawuna. Narri barrinani kajamuku kurndamuku nanganginyina barrawuna Kudkanyi. Nyulu jungkuka wanka yurrngumba barri, baki nani barri nyulu yabimbaka narrinya marda jungunkanyi wanka yurrngumba barri. Marda narrimi yarrijba Jisus Krayis walkurra mambuka narringi. Marda narrimi waki kudanyu nangangi, narringangi barrinani kudukudu nangangi barri. Marda narrimi yurrngumba ngayangayijba nanganginkanyi jangkurranyi. Marda narrimi wajba Jisus Krayis narringinkanyi kunybanyi jangkurranyi, baki marda narrimi jungku yurlurrmba nangangi yurrngumba barri.
1PE 2:8 Marda yingka jangkurr najana Kudkanyi yanybaka nangangi Jisus Krayiskanyi, “Nanda jali manjijba Kudwanyi, nyulu barrinani dungala. Nyulu barrinani walkurra dungala yubarlina. Jaliyi nganinyi jilajba yubarlina, baki janyulu damulijba nukami dungalana, baki janyulu yirrba. Yabimbaja kiji nangangi dungalawanyi, baki janyulu yirrba wayka.” Nani barri yanybaka jangkurr najana Kudkanyi. Nanda jala yirrba wayka dungalana, nyulu barrinani yalu jala yalungka yangkalamba nanganbunanyi Jisus Krayisnanyi, jala yalu yurlwa nanganginkanyi jangkurranyi. Baki nanankardi barri janyulu yabimba kiji yalungi Kudwanyi. Janyulu daba yalunya barri, mikungangi yaliyanyi kuyu nangangi jangkurr Jisus Krayiskanyi.
1PE 2:9 Ngala narri barri, yarrijbayi narrinya nanganginmuku jandanyimuku Kudwanyi. Narri barrinani mungkijimuku nangangi Kudkanyi. Nyulu nanda lalanbawarr mardarda narringi. Nyulu barri wirimalaru yalungi bukambijuyngka wandijiyana. Narri walkurramuku nangangi, baki nyuli yarrijba narrinya karunkanyi yalunya yingkamuku nanganginkanyi jangkurranyi. Wabula barri miku narriyanyi jingkijba Kud, ngala nanijba barri narri kuyungka nangangi jangkurr, baki nyulu yabimbaka kunyba yaji narringi Kudwanyi. Narri jingkijbangka Kud, baki nanankardi barri narri durrijbangka nangangi yuwa. Jala nganinyi jilajba mungana, baki miku nyuliyi najba yaji. Mungijbangka yaji nangangi. Ngala jaliyi nyulu kuyu mirnbi nangandu, baki yuku nyulu najbaja yaji jilaykanyi. Wabula barri waluwa narri kuyu nangangi jangkurr Kudkanyi, narri barrinani nanda nganinyi jala jilajba mungana yajina. Ngala nanijba barri narri durrijbangka nangangi yuwa, baki narri barrinani nanda nganinyi jala jilajba mirnbiyudi. Nyulu najbangka yaji jilaykanyi, baki narri barri, narri jingkijbangka Kud, narri jingkijbangka jungunkanyi yurlurrmba nangangi.
1PE 2:10 Wabula barri miku narriyanyi jingkijba Kud, miku narriyanyi jandanyimuku nangangi. Miku narriyanyi jingkijba nanda kunyba yaji, jala nyulu yuku yabimba yaji narringi. Ngala nanijba barri narri jingkijbangka Kud, yabimba nyuli kunyba yaji narringi, jali nyulu yarrijba narrinya nanganginmuku jandanyimuku. Barriwa.
1PE 2:11 Narri ngakinmuku kandimuku jala ngayu kudanyu maruka muwa narringi. Narrili jungku yalundu narringinmukunyina munkijimukunyina jalili yalu miku krisjinmuku. Narrili jungku yalundu, ngala miku yalimi dujanya narringinmuku mungkijimuku, ngala yalu barrinani ngurranyimuku narringi. Ngala narri dujanya barri mungkijimuku nangangi Kudkanyi. Kudanyu barri ngayu karungka narrinya, jala nganyingka yanyba yabimbikanyi balki yaji, baki miku ninjiyi manku nanda jangkurr. Kurrkunba nganyingkiyi ngalu yabimbikanyi nanda balki yaji. Miku ninjiyi jungku balki nangangi Kudkanyi. Miku ninjiyi mili yabimba nanda balki yaji, jalili wabula narri yabimba. Ngala jala nganyingka yanyba yabimbikanyi kunyba yaji, baki marda ninjimi mankuwa nanda jangkurr, baki marda ninjimi yabimba nanda kunyba yaji. Marda narrimi jungku kunyba nangangi Kudkanyi. Marda narrimi yabimba kunyba yaji nangangi barri.
1PE 2:12 Jawuda jala yalu miku krisjinmuku, yiningki jayalu yanyba balki jangkurr yingkamukuyngka narringi. Jayalunjalu karu narringi, narri jungkuyi balkina yuwana, narri yabimbayi balki yaji. Ngala jaliyi narri kudanyu durrijba nanda yuwa nangangi Kudkanyi, baki yingkamukunyi jayalu najba narrinya jungunkurri kunyba, jayalu najba narrinya yabimbikurri kunyba yaji. Nani barri jayalu najba narrinya, baki janarrinya yalu jingkijba, narri kunybamuku. Baki baku barri jalija nyulu karrinjarrijba yalunya walu nangandu Kudwanyi, baki jayalu wajba Kud yalunginkanyi kunybanyi jangkurranyi narringingangi. Barriwa.
1PE 2:13 Nayi barri marda narrimi jungku. Marda narrimi ngayangayijba nanganginkanyi jangkurranyi, narringinkanyi walkurrayngka mambukanyi, niji Sisa. Nyulu walkurra mambuka yalungi kajana yajina, baki nyuli yarrijba yingkamuku, yalu mambukamuku bayngkani nangandu. Yingka nyuli yarrijba Kabamin mambuka yingkana yajina, baki yingka nyuli yarrijba Kabamin mambuka yingkana yajina, ngala Sisa barri, nyulu walkurramirra mambuka bukambijuyngka yalungi. Nyuli yarrijba yalunya mambukamuku bayngkani nangandu, yalu lalanbikanyi yaji. Jala yingkawanyi yabimbaka balki yaji, baki jayalu kuyu nanda nganinyi nangandurri mambukarri. Jayalu karrinjarrijba walu nangandu mambukana, baki janyulu ngirrwa nangangi, janyulu daba nanda balki nganinyi. Ngala jala yingkawanyi nyulu yabimbaka kunyba yaji, baki jayalu kuyu nanda marda nangandurri mambukarri, baki janyulu wajba nanda nganinyi nanganginkanyi kunybanyi jangkurranyi mambukawanyi. Nani jayalu lalanba yaji nangangi walkurrayngka mambukanyi Sisakanyi. Barriwa. Marda narrimi jungku kunymamba nanganginyina yuwana walkurranyina mambukana. Baki marda narrimi jungku kunymamba nanganginyina yuwana, nananyina mambukana jala narringinyina yajina. Nyuli yarrijba yalunya mambukamuku Kudwanyi, baki nanankardi barri marda narrimi ngayangayijba yalunginkanyi jangkurranyi.
1PE 2:15 Marda narrimi jungku yurlurrmba nangangi Kudkanyi yurrngumba barri. Jawudamuku yalu mudumuku. Miku yalimi jingkijba Kud. Yalili yanyba narringi, narri jungku balki. Ngala jala yalu najba narrinya jungunkurri yurlurrmba nangangi Kudkanyi, baki jayalu jingkijba. Jayalu jingkijba, miku yalungi jangkurr duja. Jayalu najba nanda kunyba yaji jala narri yabimba, baki jayalu jingkijba, yalungi jangkurr narringi jujambawarr jangkurr. Baki miku jayalu mili yanyba narringi, narri jungkuka balki.
1PE 2:16 Marda narrimi jungku kunyba yurrngumba barri. Marda narrimi ngayangayijba nanankanyi yuwanyi Kabaminkanyi. Marda narrimi ngayangayijba nanankanyi yuwanyi. Ngala nanamuku Kabamin mambukamuku, miku yalimi narringi wirimalaru. Ngala ngawamba Kud, nyulu wirimalaru narringi. Marda narrimi jungku yurlurrmba nanganginyina yuwana yurrngumba barri. Baki marda narrimi miku yabimba balki yaji, baki ngadijba nanda balki yalunbunanyi. Baki marda narrimi mankuwa nayi marda, nanamuku Kabamin mambukamuku, yalu narringi mambukamuku, ngawambangangi yarrijbayi yalunya mambukamuku Kudwanyi. Marda narrimi ngayangayijba yalunginkanyi jangkurranyi, yarrijbayingangi yalunya Kudwanyi mambukamuku narringi. Marda narrimi jingkijba Kud, nyulu narringi wirimalaru, baki marda narrimi ngayangayijba nanganginkanyi yuwanyi yurrngumba barri. Narri wakiwarrmuku nangangi, nulijbangangi narri wakinkanyi nangangi.
1PE 2:17 Marda narrimi maruka muwa yalungi krisjinmukuyngka. Marda narrimi lalanba yalunya. Marda narrimi maruka muwa yalungi barrinani narri maruka muwa narringinkanyi mungkijimukuyngka. Baki marda narrimi maruka muwa yalungi bukambijuyngka marda. Marda narrimi miku yurlwa yalungi, ngala marda narrimi yabimba kunyba yaji yalungi. Marda narringkimi najbawa nangangi Kudkanyi, jingkijbangangi narri Kud, janyulu karrinjarrijba bukambiju walu nangandu baku barri. Baki marda narrimi ngayangayijba nanganginkanyi yuwanyi, walkurrayngka kabaminkanyi mambukanyi niji Sisa. Barriwa.
1PE 2:18 Jawuda narringi, narri wakiwarrmuku. Marda narrimi miku yurlwa nanganginkanyi jangkurranyi, nganyingkanyi mambukanyi, ngala marda narrimi ngayangayijba nanganginkanyi jangkurranyi yurrngumba barri. Jaliyi narri waki nangangi, kunybanyi mambukanyi, baki marda narrimi ngayangayijba nanganginkanyi jangkurranyi. Ngala jaliyi nyulu balki mambuka, baki yuwajiwa barri marda narrimi ngayangayijba nanganginkanyi jangkurranyi.
1PE 2:19 Jaliyi narri jungku kunyba nganyingkanyi mambukanyi yurrngumba barri, baki janyulu mirnarrijba muwa Kud narringi. Janyulu mirnarrijba muwa narringi, baki janyulu yabimba kunyba yaji narringi. Jaliyi narri waki nangangi balkinyi mambukanyi, baki yiningki janarrinya daba. Ngala marda ninjimi yuwajiwa jungku kunyba nangangi, jingkijbangangi narri Kud, nyulu nulijbangka narringi, narri jungunkanyi kunymamba narringinkanyi mambukanyi. Jaliyi narri jungku kunymamba nangangi, narringinkanyi balkinyi mambukanyi, baki janyulu yabimba kunyba yaji narringi Kudwanyi.
1PE 2:20 Ngala jaliyi narri jungku balki nangangi narringinkanyi mambukanyi, baki yiningki janarrinya daba. Ngala marda narrimi miku ngarrangarra muwa nangangi, dabangangi narrinya, narringangi jungkuyi balki nangangi. Ngala jaliyi narrinya daba, ngala miku narriyanyi jungku balki nangangi, baki yuwajiwa barri marda narrimi miku ngarrangarra muwa nangangi. Jaliyi narri jungku mardumardu muwa nangangi, jala nyulu muningka daba narrinya, baki janyulu mirnarrijba muwa Kud narringi. Janyulu kudanyu mirnarrijba muwa narringi.
1PE 2:21 Mankuwa narri Kud. Nyuli yarrijba narrinya nanganginmuku jandanyimuku. Baki mankuwa narri Jisus Krayis marda. Bababanyamba nyulu narrinya. Yingkamukunyi yali daba Jisus Krayis, linjumba yali kudanyu barri, kurdanba yali. Janyba nangki Jisus Krayis ngambalangi barri. Ngala miku nyuliyanyi nanankardi jungku ngarrangarra muwa yalungi. Miku. Baki nani barri marda narrimi jungku marda. Marda narrimi miku ngarrangarra muwa yalungi mambukamukuyngka jala narrinya daba. Marda narrimi yurrngumba jungku barrinani nyuli jungku Jisus Krayis.
1PE 2:22 Miku nyuliyanyi jungku balki, ngala yurrngumba nyuli jungku yurlurrmba nangangi Kudkanyi. Miku nyuliyanyi yabimba balki yaji. Miku nyuliyanyi jujamba yaji. Miku yaliyanyi manku Jisus Krayis yanybikurri balki jangkurr. Miku.
1PE 2:23 Jali yingkamuku yalu yanyba balki jangkurr nangangi, baki miku nyuliyanyi jananganja yalunya balkinyi jangkurranyi. Jali yalu daba Jisus Krayis, baki miku nyuliyanyi yanyba yalungi, jayalunya daba Kudwanyi. Miku nyuliyanyi yanyba nani yalungi, jali yalu daba, ngala wajba nangki nangangi Kudkanyi. Nyuli jingkijba Kud, nyulu jungkuka yurlurrmba nangangi yurrngumba barri. Nyuli jingkijba Kud, janyulu minimba yalunya nangangi Jisus Krayiskanyi, nyulu jungkuka kunyba yurrngumba barri. Nanankardi barri nangki wajba nangangi Kudkanyi, jali yalu yabimba kiji nangangi.
1PE 2:24 Ngambala yabimbaka balki yaji bukambijunyi. Kaja balki yaji ngambala yabimbaka, baki marda nyulimi daba ngambalanya Kudwanyi. Marda nyulimi linjumba ngambalanya mankanyi. Marda ngambalakimi janyba, jungkungangi ngambala balki nangangi barri. Ngala miku. Janyba nangki Jisus Krayis ngamanginkanyi balkinyi yajinyi. Yali linjumba Jisus Krayis mankanyi kudanyu barri. Baki janyba nangki wabangkarra kurndana ngambalangi barri. Jaliyi ngambala ngayangayijba nanganginkanyi jangkurranyi, baki janyulu manjamanjamba ngambalangi balki yaji Kudwanyi. Miku ngambalanyiyi daba Kudwanyi, janybangangi nangki Jisus Krayis ngambalangi barri. Nanankardi barri marda ngambalakimi yangkalamba ngamanbunanyi balkinanyi yajinanyi. Marda ngambalakimi yangkalamba nangandurri Jisus Krayisyurri, baki marda ngambalimi jungku yurlurrmba nangangi barri.
1PE 2:25 Nanamuku jibmuku, yalu jilalajbangka, baki jarrba yalu karnba. Ngala kudiyana yalu yakika munjimunji. Ngala jilajbangka nanda lalanbawarr jibkanyi, nyulu wakarambaja yalunya, baki wiykunumbaja barrikiyurri kalawuyngkurru. Wabula barri narri barrinani jib jala yakika, jala mikuyaji lalanbawarrayngka lalanbikanyi yalunya. Mikuyaji nangangi lalanbikanyi narrinya. Ngala nanijba barri nyulu lalanbaka narrinya Jisus Krayiswanyi. Kudanyu barri nyulu lalanbaka narrinya, baki miku narriyi jungku barrinani yakika. Nyulu wiykunumbaka narrinya nangandurri Kudyurri. Nyulu kurrkunbaka narrinya jungunkurri balki nangangi Kudkanyi. Nyulu kunyba lalanbawarr narringi. Barriwa.
1PE 3:1 Narri ngayangayijba nanankanyi nganyingkanyi mambukanyi, baki nani marda narri jibarrimuku, marda narrimi ngayangayijba nanankanyi nganyingkanyi nawinganjanyi. Jaliyi nganyi nawinganja, miku nyulimi krisjin, baki yuwajiwa barri marda ninjimi ngayangayijba nganyingkanyi nawinganjanyi. Marda ninjimi jungku yurlurrmba nangangi Kudkanyi yurrngumba barri. Jala nanangini nawinganjawanyi najbangka nangangi maninganja jungunkurri yurlurrmba yurrngumba, baki yiningki janyulu marda kuyu nangangi jangkurr Kudkanyi. Nanda maninganja barri, marda nyulimi miku yanymimba nanankanyi nawinganjanyi nangangi Kudkanyi, ngala marda nyulimi jungku kunyba nangangi Kudkanyi. Jalija nyulu najba nangangi maninganja jungunkurri kunyba nawinganjawanyi, baki janyulu jingkijba, nangangi maninganja jungkuka kunyba, kuyungkangangi nyulu nangangi jangkurr Kudkanyi.
1PE 3:3 Narri jibarrimuku, marda narringkimi miku mankumanku nanijba, “Jangaka kunymamba mankanyi baki nyungka, yalu naykanyi ngana. Janga wajba kajanyi dungalanyi wudumbikanyi kunyba jumbala baki murranymurrany. Janga jungku kunybayudi jumbalayudi baki murranymurranyudi.” Marda narringkimi miku mankumanku nani. Miku nyulimi ningkijba nganyi mankanyi baki jumbala Kudwanyi. Miku nyulimi nulijba nganyi, ninji jungunkanyi jirdi kunybanyi jumbalanyi. Balkijbaja nanda jumbala baku barri. Ngala nyulu nulijbangka nganyi, ninji jungunkanyi kunyba nanganginyina yuwana. Nyulu nulijbangka nganyi, ninji marukankanyi muwa yalungi yingkamukuyngka, ninji yanybikanyi kardarda jangkurr yalungi, ninji lalanbikanyi yalunya. Nani barri nyulu nulijbangka nganyi jungunkanyi. Baki janyulu kudanyu maruka muwa nganyi, jaliyi ninji jungku nani barri.
1PE 3:5 Wabula barri kamambarra, jawuda jibarrimuku jali durrijba nangangi yuwa Kudkanyi, yali jungku kunyba nani nangangi. Yali jingkijba Kud, janyulu yabimba nanda jali nyulu yanyba janyulu yabimba. Yali kuyu nangangi jangkurr kudanyu barri, baki nanankardi yali ngayangayijba yalunginkanyi nawinganjanyi. Baki nyuli mirnarrijba muwa Kud yalungi kudanyu barri, jali yalu jungku kunyba nani barri nangangi.
1PE 3:6 Nanda wankalanyi jibarri niji Sara, nyuli jungku nani barri. Nyuli jungku kunyba nangangi Kudkanyi. Nyuli maninganja nanankanyi wankalanyi niji Yabrayam. Nyuli ngayangayijba nanganginkanyi jangkurranyi, nyuli mirnarrijba muwa nangangi, baki jali nyulu yanyba nangangi, baki nyuli nijarrijba “Mambuka”. Narri maninganjamuku yalungi, marda narrimi ngayangayijba narringinkanyi nawinganjanyi nani marda. Marda narrimi miku marrala yajinyi, ngala marda narrimi jungku kunyba nangangi narringinkanyi nawinganjanyi, barrinani jungkuyi Sara kunyba nangangi Yabrayamkanyi. Barriwa.
1PE 3:7 Baki ninji nawinganja nangangi, ninji jingkijbangka yalunya jibarrimuku, miku yalimi ngiruka mankanyi barrinani nganinyimuku. Marda ninjimi lalanba nganyi maninganja. Marda ninjimi maruka muwa nangangi yurrngumba barri. Nimbala maykarra, jaliyi nimbala jungku malumba nani barri, baki janimbala jandanyiwuya nangangi Kudkanyi, janimbala jungku mili wanka nangangi Kudkanyi yurrngumba barri. Ngala ninji nawinganja, jaliyi ninji miku jungku kunyba nganyingkanyi maninganjanyi nani barri, baki miku nyuliyi manku nganyi jangkurr Kudwanyi. Miku nyuliyi manku nganyi jangkurr jalija ninji yanyba mududu nangangi. Barriwa.
1PE 3:8 Baki yingka jangkurr ngayu yanybaka narringi. Narri Krisjinmuku, marda narrimi malumba jungku barrinani mungkijimuku. Marda narringkimi maruka muwa. Marda narringkimi lalanba barrinani narri lalanba yalunya narringinmuku mungkijimuku. Marda narringkimi miku barrarrakijba. Jaliyi yingkawanyi muningka yabimba balki yaji nganyi, baki marda ninjimi miku yabimba balki yaji nangangi. Jaliyi yingka nyulu ngarrangarra muwa nganyi, baki marda ninjimi miku ngarrangarra muwa nangangi. Ngala marda ninjimi yabimba ngawamba kunyba yaji nangangi yurrngumba barri. Baki marda ninjimi yanyba mududu nangangi Kudkanyi nanankanyi yingkanyi. Marda ninjimi ngajaka Kud, nyulu yabimbiji kunyba yaji nangangi marda. Marda ninjimi ngajaka Kud nani nangangi, yarrijbangangi narrinya Kudwanyi, narri yabimbikanyi kunyba yaji yalungi bukambijuyngka. Jaliyi narri jungku nani, baki janyulu yabimba kunyba yaji narringi marda Kudwanyi.
1PE 3:10 Nanda jangkurr najana Kudkanyi yanybaka nayi barri, “Nanda jala nulijbangka jungunkanyi wanka yurrngumba nanankanyi jala malbungujba mankanyi, baki bardibardingujba mankanyi, nanda jala nulijbangka jungunkanyi mirnarrijba muwa yurrngumba barri, baki marda nyulimi miku yanyba balki jangkurr yingkanyi. Marda nyulimi miku yanyba jujambawarr jangkurr. Marda nangkimi kurrkunba yanybikanyi balki nani barri.
1PE 3:11 Marda nangkimi yangkalamba nanamunanyi balkinanyi yajinanyi. Marda nyulimi miku mili yabimba balki yaji, ngala marda nyulimi yabimba kunyba yaji yalungi yurrngumba barri. Marda nyulimi miku jakakajba yalunya, ngala marda nyulimi yurrngumba jungku mardumardu muwa yalungi.
1PE 3:12 Marda nyulimi jungku nani barri, lalanbakangangi Kudwanyi. Nyulu lalanbaka yalunya jala yalu jungku yurlurrmba nangangi. Jala nyulu yanybaka mududu nangangi Kudkanyi, baki mankuka nangangi jangkurr Kudwanyi, baki nyulu yabimbaka yaji nangangi marda. Nyulu yabimbaka nanda yaji jala ngajaka nanangini nganinyiwanyi. Ngala jaliyi nangka yangkalamba nanganbunanyi Kudnanyi, baki miku nyuliyi manku nyulu yanybikurri nangangi Kudwanyi. Miku nyuliyi yabimba yaji nangangi.” Nani barri nanda jangkurr najana Kudkanyi yanybaka.
1PE 3:13 Jaliyi narri jungku yurlurrmba nangangi Kudkanyi yurrngumba barri, baki janyulu lalanba narrinya yurrngumba. Yiningki jayalu manku kiji narringi, yiningki janarrinya linjumba, ngala marda narrimi miku marrala yalungi, marda narrimi miku balkijba muwa yajinyi. Marda narrimi yuwajiwa jungku kunyba yalungi, baki janarri mirnarrijba muwa.
1PE 3:15 Marda narrimi ngayangayijba nangangi, narringinkanyi mambukanyi Jisus Krayiskanyi. Marda narringkimi mankumanku nangangi Jisus Krayiskanyi. Marda narrimi wajba Jisus Krayis narringinkanyi kunybanyi jangkurranyi, nyulungangi narringi wirimalaru. Jaliyi yingkawanyi ngajaka narrinya, yanka narri jingkijba Jisus Krayis, janyulu lalanba narrinya, jaliyi yingkawanyi ngajaka narrinya nani, baki marda narrimi karu yajinyi. Marda narrimi karu nangangi Jisus Krayiskanyi, bababanyamba nyulu narrinya, kuyungangi narri nangangi jangkurr. Baki nanankardi barri janarri baku jungku kingkarri nangandu yurrngumba barri. Nani barri marda narrimi karu.
1PE 3:16 Ngala marda narrimi yanyba kardarda jangkurr nangangi. Marda narrimi miku ngirrwa nangangi, marda narrimi miku jakakajba, ngala marda narrimi yanyba kardarda jangkurr nangangi. Jaliyi yingka yanyba balki jangkurr yingkanyi nganyingkanyi, baki marda ninjimi miku yanyba balki jangkurr yingkanyi nanganginkanyi. Marda ninjimi miku yanyba balki jangkurr nanganginkanyi nani barri. Nganyingka yanybaka muwa, ninji jungkuka kunyba, jaliyi ninji miku yanyba balki nani. Jaliyi yingka yanyba balki jangkurr yingkanyi nganyingkanyi, ngala ngawamba ninji yanyba kunyba jangkurr nangangi, baki janinji jungku mardumardu muwa. Janinji mardumardu muwa, jingkijbangangi ninji yalunya, baku barri jayalu manyiru yajinyi. Jayalu manyiru nanankanyi balkinyi jangkurranyi jali yalu yanyba nganyi. Jayalu manyiru nanankanyi balkinyi jangkurranyi, jalija yalu najba ninya jungunkurri kunyba yurrngumba, durrijbangangi ninji nangangi jangkurr Jisus Krayiskanyi.
1PE 3:17 Jaliyi yingkamukunyi yalu linjumba ninya, baki yiningki janyulu miku kurrkunba yalunya Kudwanyi. Yiningki janyulu munyajba yalunya linjumbikurri ninya. Jayalu linjumba ninya, baki nanankardi janinji jungku mili ngiruka nangangi Kudkanyi. Janinji jungku mili ngiruka baki mili ngiruka nangangi yurrngumba barri. Ngala jaliyi yalu linjumba ninya, yabimbangangi ninji balki yaji yalungi, baki mikuwali nanangini kijiwanyi yabimba ninya jungunkanyi mili ngiruka nangangi Kudkanyi. Nanda daburrdaburr yaji nganyi. Barriwa.
1PE 3:18 Miku nyuliyanyi yabimba balki yaji Jisus Krayiswanyi. Miku yingamali balki yaji. Yurrngumba nyuli jungku kunyba nangangi Kudkanyi, ngala nangki janyba kurndana ngamanginkanyi balkinyi yajinyi. Janyba nangki bukambijuyngka ngamanginkanyi balkinyi yajinyi. Ngawamba barndaykamba nangki janyba ngamanginkanyi balkinyi yajinyi. Miku nangkiyanyi mili janyba. Jali nyulu kurdan, baki nangangi ngarndu jilajbayi yingkayurri yajiyurri. Jungkuyi nangangi ngarndu nananyina yajina jalili yalu jungku ngarndumuku yalungi kuyuwananyi. Nanaba barri jungkuyi nangangi ngarndu, baki nyuli karu yalunya yingkamuku ngarndumuku nangangi Kudkanyi, nyulu lalanbawarr mardarda. Barriwa. Baki nanankardi janyulu kuyu narrinya nangandurri Kudyurri Jisus Krayiswanyi. Janyulu kuyu narrinya nangandurri Kudyurri bayngkani jalija narringka janyba. Janarri jungku kingkarri nangandu barri.
1PE 3:20 Nanda wankalanyi ninji Nuwa, nyuli jungku yurlurrmba nangangi Kudkanyi, baki karuyi Nuwa Kudwanyi, nyulu yabimbiji muwarda. Baki yabimbayi walkurra muwarda Nuwawanyi. Waki nyuli yurrngumba barri, yingkana kindilkurrinyina, baki yingkana kindilkurrinyina. Kajana kindilkurrinyina nyuli waki, baki yukumbayi Kud nangangi, ngala nyuli yabimba nanda muwarda. Ngala nyuli yabimba muwarda, baki karu nyuli yalunya balkimuku nangangi Kudkanyi Nuwawanyi. Nyuli karu yalunya nangangi Kudkanyi, janyulu manjijba walkurra mali, baki jayalu ngurrulijba malina. Jayalungka janyba malina, jaliyi yalu miku kuyu nangangi jangkurr Kudkanyi, jaliyi yalu miku ngindu muwa yalunginkanyi balkinyi yajinyi. Ngala miku yaliyanyi kuyu nangangi jangkurr Kudkanyi. Miku. Jali bukamba barri nanda muwarda, baki ngankijbayi Nuwa muwardana, baki jawuda nangandu, nangangi maninganja, baki nanganginmuku murrku jandanyimuku, baki yalunginmuku maninganjamuku. Ngawamba yali ngankijba muwardana, 8 barri. Baki marrimbayi yalunya mardarda muwardana Kudwanyi, ngala nyuli manjijba walkurra mali. Ngala nanamuku balkimuku yali ngurrulijba malina. Baki yalunginmuku ngarndumuku jilajbayi nanankurri yajiyurri ngarndunyi. Nanaba yalili jungku ngarndumuku. Jilajbayi Jisus ngarndu yalundurri, baki karu nyuli yalunya nangangi Kudkanyi. Karu nyuli yalunya nangangi Kudkanyi, nyulu nanda lalanbawarr mardarda. Nanaba nyuli jungku marndakaja, baki mili wankambayi Jisus Kudwanyi, nyulu jungunkanyi nangandu. Barriwa.
1PE 3:21 Marda ngambalimi mankuwa yalunya nanamuku wankalamuku jali yalu miku kuyu nangangi jangkurr Nuwanyi, baki nanankardi yalungki janyba. Ngala ngambala kuyungka nangangi jangkurr Jisus Krayiskanyi, baki nanankardi jangambala jungku wanka nangandu kingkarri. Baki nani barri ngambala jingkijbangka Kud, nyulu nanda lalanbawarr mardarda. Nyuli mili wankamba Jisus Krayis Kudwanyi, baki nani marda janyulu mili wankamba ngambalanya marda. Janyba nangki Jisus Krayis ngambalangi. Janyba nangki ngamanginkanyi balkinyi yajinyi. Baki nanankardi barri jaliyi ngambala kuyu nangangi jangkurr, baki janyulu marrimba ngambalanya mardarda Kudwanyi. Jala ngamanjalu ngurrunba wabudana, baki ngambala mili walajba wabudananyi. Baki nani barri jali nangki janyba Jisus Krayis, baki mili wankambayi Jisus Krayis Kudwanyi. Baki nani barri jala ngamanjalu ngurrunba wabudana, baki miku nanda barrinani ngambalaka wakardaba mankanyi, ngala nanda barrinani ngambalaka wakardaba kurdulu nangangi Kudkanyi. Baki jala ngambala walajba wabudananyi, baki nanda barrinani jala ngambalaka yangkalamba ngamanbunanyi balkinanyi yajinanyi, baki ngambala jungkuka mili wanka nangangi Kudkanyi. Mankumanku narringka nangangi Nuwanyi. Miku nyuliyanyi ngurrulijba malina, ngala marrimbayi Nuwa mardarda Kudwanyi. Baki jali ngamanjalu ngurrunba wabudana, baki ngambala mili walajbayi wabudananyi. Nanda barrinani marrimbaka ngambalanya mardarda Kudwanyi, baki miku ngambalakiyi janyba yurrngumba barri. Miku ngambaliyi jungku kurdan yurrngumba barri.
1PE 3:22 Jisus Krayis barri, nyulu jungkuka wanka kingkarri nangandu Kudnyina. Yarrijbayi Jisus Krayis wirimalaru Kudwanyi. Nyulu wirimalaru ngambalangi, baki yalungi marda Yanjilmukuyngka, baki yalungi kunybamuku ngarndumuku jalili yalu jungku lalijina. Nyulu wirimalaru bukambijuyngka yalungi. Barriwa.
1PE 4:1 Linjumba yali Jisus Krayis mankanyi. Kudanyu yali linjumba mankanyi, baki yali kurdanba. Marda narrimi mankumankuwa Jisus Krayis yurrngumba barri, baki marda narringkimi yangkalamba bukambijunanyi balkinanyi yajinanyi. Marda narringkimi yangkalamba yalunbunanyi, janybangangi nangki Jisus Krayis narringinkanyi balkinyi yajinyi. Jungkuka Jisus Krayis mili wanka barri, baki marda narrimi marda jungku barrinani mili wanka, yabimbikanyi ngawamba kunyba yaji. Jala nganyingka yanyba yabimbikanyi balki yaji, baki marda ninjimi miku mankuwa nanda jangkurr, ngala marda nganyingkimi kurrkunba ngalu yabimbikanyi nanda balki yaji. Marda narrimi yabimba ngawamba nanda jala nulijbangka Kud narringi yabimbikanyi yaji.
1PE 4:3 Wabula narrili yabimba kaja balki yaji. Nanamanji barri miku narriyanyi jingkijba Kud, baki narri jungkuyi balkina nanganginyina yuwana. Narrili kuluka yingkana jalili miku nganyi kayikayi. Narrili ngaraba kaja kamukamu. Jalili narri malumba jungku, bakili narri jarrba kaja mama, narrili ngaraba kaja kamukamu. Narrili wanindijba kulaji, bakili narri yanyba balki jangkurr. Narrili yanyba mududu nanankanyi yajinyi, jala miku duja Kud. Narrili wajba nanda narringinkanyi kunybanyi jangkurranyi, nanda jala miku duja Kud. Nani barri narrili jungku balki nanamanji. Marda narrimi miku jungku nani nanijba barri.
1PE 4:4 Nanamuku jala miku yalimi jingkijba Kud, yalu manmalangka narringi. Manmalangka yalu narringi, mikungangi narrimi jungku malumba yalundu nanijba barri. Miku narrimi jungku malumba yalundu, jala yalu yabimba balki yaji. Wabula barri narrili jungku yalundu, jalili yalu yabimba nanda balki yaji, ngala nanijba barri narri jungkuka kunyba barri. Miku narrimi yabimba mili balki yaji yalundu. Baki nanankardi barri yalu jakakajbangka narrinya, yalu yanybaka balki jangkurr narringi.
1PE 4:5 Ngala baku barri janyulu karrinjarrijba yalunya Kudwanyi. Janyulu karrinjarrijba bukambiju yalunya walu nangandu barrinani kurdusnyina. Janyulu karrinjarrijba yalunya walu nangandu, nanamuku jali yalungka janyba waluwa, baki nanamuku jala yalu yuwajiwa jungku wanka nanamanji barri. Janyulu karrinjarrijba yalunya walu nangandu, baki janyulu ngajaka yalunya, wanyingkanyi yalu jungku balki. Ngala miku jayalu jingkijba wanyi jangkurr jananganjanyi. Miku. Nani barri janyulu baku barri ngajaka yalunya yalunginkanyi balkinyi yajinyi, baki janyulu ngirrwa yalungi.
1PE 4:6 Nanankardi barri yanybayi Jisus Krayis yalungi ngarndumukuyngka, jali yalungka janyba. Nyuli karu yalunya nanankanyi kunybanyi jangkurranyi nanganginkanyi Kudkanyi. Janyba yalungki, baki jungkuyi yalunginmuku ngarndumuku yajina ngarndunyi. Janyba yalungki, baki ngambala marda jangambalaka janyba marda. Janyba yalungki, ngala baku barri yalunginyi ngarndumukunyi mankuyi nanda kunyba jangkurr nangangi Jisus Krayiskanyi, baki nanijba barri yuku yalu jungku mili wanka barrinani nyulu jungkuka wanka Kud. Barriwa.
1PE 4:7 Marndakaja barri wijbaja Jisus Krayis, baki nanamanji barri bukambaja yaji. Marda narrimi miku muningka jungku ngala narri yukumba nangangi. Marda narringkimi miku kurrkunba wakinkanyi nangangi Kudkanyi, ngala marda narringkimi kurrkunba yabimbikanyi balki yaji. Marda narrimi jungku jirdi kunybanyi kulajinyi nangangi Kudkanyi. Marda narringkimi najbawa, marda narrimi yuwajiwa jungku yurlurrmba nangangi Kudkanyi. Jaliyi narri jungku nani barri, baki yuku narri yanyba mududu nangangi Kudkanyi.
1PE 4:8 Nayinda barri jirrinyi yaji narri yabimbikanyi. Marda narrimi kudanyu maruka muwa yalungi krisjinmukuyngka. Jaliyi narringka maruka muwa nani barri, baki janyulu manjamanjamba narringi balki yaji Kudwanyi. Janyulu manjamanjamba nanda kaja balki yaji, jala narri yabimba.
1PE 4:9 Marda narrimi kandimba yalunya, yingkamuku krisjinmuku. Marda narrimi ngajaka yalunya, yalu jungunkanyi narrindu, narringinyina barndana. Marda narrimi kudanyu kandimba yalunya, baki lalanba yalunya. Marda narrimi miku manjijba yalunya narringinbunanyi barndananyi, ngala marda narrimi lalanba yalunya.
1PE 4:10 Yabimbayi narrinya ngiruka Kudwanyi, narri yabimbikanyi yinini yinini yaji nangangi. Yingkamuku nyuli yabimba yalunya ngiruka, yalu milidimbikanyi yaji. Yingkamuku nyuli yabimba yalunya ngiruka, yalu jungunkanyi mambukamuku jurjkanyi. Yingkamuku nyuli yabimba yalunya ngiruka, yalu karunkanyi yalunya nanganginkanyi kunybanyi jangkurranyi Jisus Krayiskanyi. Nani nyuli yabimba yalunya ngiruka, yalu wakinkanyi nangangi. Marda narrimi waki nani nangangi yurrngumba barri. Jaliyi ninya yabimba ngiruka lalanbikanyi yalunya, baki marda ninjimi kudanyu lalanba yalunya yurrngumba barri. Jaliyi nyulu yabimba ninya ngiruka milidimbikanyi yalunya jurjina, baki marda ninjimi kudanyu milidimba yalunya nanganginkanyi jangkurranyi Kudkanyi. Jaliyi nyulu yabimba ninya ngiruka lalanbikanyi yalunya, baki marda ninjimi kudanyu lalanba yalunya. Nani barri yabimbayi narrinya ngiruka Kudwanyi. Nyuli yabimba narrinya ngiruka, narri yabimbikanyi yinini yinini yaji. Baki janarri yabimba yinini yinini kunyba yaji yalungi yingkamukuyngka. Jaliyi ninji waki nani nangangi Kudkanyi, baki bukambijunyi jangambala wajba Kud ngamanginkanyi kunybanyi jangkurranyi. Jangambala wajba Kud kunybanyi jangkurranyi, nyulungangi yabimbayi ninya ngiruka wakinkanyi nani nangangi. Nyuli yabimba ninya ngiruka, bababanyambangangi nyulu ninya Jisus Krayiswanyi. Ngambala wajbangka Kud ngamanginkanyi kunybanyi jangkurranyi, nyulungangi wirimalaru ngambalangi, nyulungangi ngirukamirra ngambalangi yurrngumba barri. Mikuyaji yingkanyi barrinani nyulu. Duja barri nayinda jangkurr. Barriwa.
1PE 4:12 Ngakinmuku bababanyamba ngambalaka, jala ngayu maruka muwa narringi. Marda narrimi miku manmala yajinyi. Marda narrimi miku manmala jala yingkamukunyi yalu yabimba kiji narringi. Munyajbangka yalunya Kudwanyi. Nyulu munyajbangka yalunya balanjankanyi kajamuku krisjinmuku nani, baki nanankardi kijinanyi janarri jardijba mili ngiruka nangangi. Janarri jardijba mili ngiruka nangangi jalija narrinya yalu balanja, jalija yalu yabimba kiji narringi, jalija yalu narrinya linjumba.
1PE 4:13 Marda narringkimi mankumanku nangangi Jisus Krayiskanyi. Linjumba yali Jisus Krayis kudanyu barri, baki kurdanba yali. Marda narrimi mirnarrijba muwa jala yalu yabimba kiji narringi, jala yalu yanyba balki jangkurr narringi, durrijbangangi narri Jisus Krayis. Marda narrimi mirnarrijba muwa, jungkungangi narri barrinani nyulu jungkuyi. Jayalu yabimba nanamannga balki yaji narringi barrinani yali yabimba nangangi. Nanankardi barri marda narrimi mirnarrijba muwa, jungkukangangi nanda Kunyba Ngarndu nangangi Kudkanyi narrindu kurduluna. Nyulu yabimbaka narrinya ngiruka Kunybawanyi Ngarnduwanyi, jala yalu balanja narrinya, jala yalu yabimba kiji narringi. Baki baku barri jalija wijba Jisus Krayis nanginkurri jambarri, baki janarri kudanyu mirnarrijba muwa. Janarri kudanyu mirnarrijba muwa, durrijbangangi narri Jisus Krayis kudanyu barri.
1PE 4:15 Jaliyi narri jungku balki, baki jayalu yabimba balki yaji narringi, jayalu daba narrinya. Jaliyi ninji kurdanba yingka, jaliyi ninji maninjakujba yaji yingkanyi, jaliyi ninji jilajba nanankurri jala miku nanda nganyi yaji, baki ninya jayalu daba. Jaliyi ninji jungku balki nani barri, baki marda ninyalimi daba. Ngala jaliyi ninji miku jungku balki nani yalu daykanyi ninya, ngala yuwajiwa ninyalu dabangka, ninjingangi Krisjin, baki marda ninjimi miku manyiru. Marda ninjimi miku manyiru, ngala marda ninjimi wajba Kud nganyingkanyi kunybanyi jangkurranyi. Marda ninjimi wajba Kud nganyingkanyi kunybanyi jangkurranyi, nyulungangi yarrijbayi ninya durriykanyi Jisus Krayis. Barriwa.
1PE 4:17 Marndakaja barri janyulu karrinjarrijba ngambalanya walu nangandu Kudwanyi. Janyulu karrinjarrijba bukambiju ngambalanya walu nangandu, baki janyulu yanyba nanankanyi jalija nyulu yabimba ngambalangi. Waluku barri janyulu yanyba ngambalangi Krisjinmukuyngka, yanka barri ngambala jungkuyi nangangi barri. Baki bayngkani janyulu yanyba yalungi jala yalu miku Krisjinmuku. Baki ngambalaja jingkijba Kud, janyulu daba yalunya, jalili yalu miku jungku yurlurrmba nangangi, jalili yalu miku kuyu nangangi jangkurr. Janyulu daba yalunya barri.
1PE 4:18 Nanda jangkurr najana Kudkanyi yanybaka nayi barri, “Nanda jardibirri yaji, yalu jungunkanyi yurlurrmba nangangi Kudkanyi. Jardibirri nanda yalungi. Ngala jaliyi yalu jungku yurlurrmba nangangi, baki janyulu marrimba yalunya mardarda. Ngala jaliyi yalu miku jungku yurlurrmba nangangi, baki nanda balki yalungi. Nanda barri balki yalungi jalili yalu jungku balki nanganginyina yuwana. Miku janyulu marrimba yalunya mardarda Kudwanyi. Miku.” Nani barri yanybaka jangkurr najana Kudkanyi.
1PE 4:19 Yiningki yingkamukunyi jayalu yabimba kiji narringi, yiningki jayalu linjumba narrinya, jungkungangi narri yurlurrmba nangangi Kudkanyi. Jalija nyulu munyajba yalunya Kudwanyi, yalu dabankurri narrinya, baki janarri jungku mili ngiruka, baki mili ngiruka nangangi. Jalija narrinya yalu daba, baki marda narrimi yuwajiwa jungku kunyba nanganginyina yuwana, jingkijbangangi narri Kud. Narri jingkijbangka Kud, jalija nyulu yanyba yabimbikanyi yaji, baki janyulu yabimba nanda yaji. Miku nyuliyi yangkalamba nangangi jangkurr. Yabimbayi narrinya Kudwanyi, baki janyulu marrimba narrinya mardarda. Baki baku barri janarri jungku mili wanka kingkarri nangandu. Barriwa.
1PE 5:1 Ngayu barri malbu jurjkanyi. Jungku ngayi nangandu Jisus Krayisnyina jali nyulu jungku jambana. Jilalajba ngayi nangandu. Najba ngayi jali yalu linjumba Jisus Krayis. Najba ngayi jali nangka janyba kurndana. Baki baku barri jangayu jungku nangandu jalija minimba yalunya nangangi Jisus Krayiskanyi Kudwanyi. Janyulu minimba yalunya nangangi Jisus Krayiskanyi, nyulu wirimalaru yalungi, barrinani Kud nyulu wirimalaru yalungi. Ngayu jala malbu jurjkanyi, kudanyu ngayu karungka narrinya malbumalbu jurjkanyi, marda narrimi lalanba yalunya krisjinmuku narringinyina jurjina. Marda narrimi mirnarrijba muwa jala narri lalanba yalunya. Nani barri nyulu nulijbangka Kud narringi lalanbikanyi yalunya. Marda narrimi waki nani nangangi, nulijbangkangangi narri nangangi wakinkanyi nangangi. Ngala marda narrimi miku waki nangangi, nulijbangkangangi narri wudumbikanyi kaja dungala yalunbunanyi krisjinmukunanyi. Marda narrimi miku waki nani barri, muningka nulijbangka dungalanyi.
1PE 5:3 Marda narrimi miku ngirrwa yalungi jurjina. Marda narrimi miku ngirrwa yalungi barrinani walkurra mambuka ngirrwangka. Ngala marda narrimi lalanba yalunya, marukangangi narri muwa yalungi. Nani barri marda narrimi waki nangangi Kudkanyi. Jala yalu najba narrinya wakinkurri, marukangangi narri muwa yalungi, baki jayalu marda mirnarrijba muwa wakinkanyi nangangi Kudkanyi.
1PE 5:4 Baki jalija nyulu wijba Jisus Krayis, nanda walkurra lalanbawarr, jalija nyulu wijba wayka nanginkurri jambarri, baki janyulu mirnarrijba muwa narringi. Janyulu mirnarrijba muwa narringi, jaliyi narri lalanba yalunya kudanyu barri, jaliyi narri maruka muwa yalungi. Baki nanankardi barri janyulu maruka muwa narringi marda, baki janyulu yabimba kunyba yaji narringi, janarri jungku kingkarri nangandu yurrngumba barri. Barriwa.
1PE 5:5 Baki narri nganinyimuku baki kaburrwaburr jurjina, marda narrimi jungku barrinani yalu jungku malbumalbu jurjina. Marda narrimi ngayangayijba yalunginkanyi jangkurranyi. Narri bukambiju marda narrimi miku barrarrakijba yajinyi. Marda narringkimi miku yarrijba walkurra yalungi yingkamukuyngka, ngala marda narrimi waki yalungi. Nanda jangkurr najana Kudkanyi yanybaka nayi barri, “Nangka yangkalambaka Kud yalunbunanyi jaliyi yalu barrakijarramuku, jaliyi yalungka walkurramba waluwa yingkamukuyngka. Ngala nangka yangkalambaka yalundurri, jala yalungka bayakardamba, jala yalu mirnarrijba muwa wakinkanyi yalungi yingkamukuyngka. Nyulu yabimbaka kunyba yaji yalungi barri.” Nani barri yanybaka jangkurr najana Kudkanyi.
1PE 5:6 Marda narringkimi bayakardamba nangangi Kudkanyi. Nyulu ngiruka lalanbawarr. Jaliyi narri jungku bayakarda nani nangangi, baki baku barri janyulu walkurramba narrinya. Janarri mili walkurra yalungi, jala yalu nanijba yabimba kiji narringi.
1PE 5:7 Marda narrimi miku balkijba muwa jala narri kijiyudi, ngala marda narrimi yanyba mududu nangangi Kudkanyi nanankanyi kijinyi, baki janyulu dulaba nanda kiji narrinbunanyi. Baki janarri jungku mardumardu muwa nanankanyi kijinyi, jingkijbangangi narri Kud, kudanyu nyulu lalanbaka narrinya yurrngumba barri. Barriwa.
1PE 5:8 Ngala marda narrimi najbawa nanda Sayidin. Marda narringkimi birrirrinja nangangi, baki miku nyuliyi yangkalamba narrinya nanganbunanyi Jisus Krayisnanyi. Nanangini Sayidinwanyi, nyulu yabimbaka kiji narringi. Nyulu yabimbaka yalunya yingkamuku linjumbikanyi narrinya. Nani barri nyulu yabimbaka kiji narringi. Nyulu nulijbangka yangkalambikanyi narrinya nanganbunanyi Jisus Krayisnanyi. Nyulu nulijbangka marrimbikanyi narrinya. Nyulu barrinani mardumbarra, marrimba jala yaji. Nyulu nulijbangka marrimbikanyi narrinya. Nanankardi barri marda narrimi najbawa nanda Sayidin.
1PE 5:9 Jala nyulu yabimbaka kiji narringi, baki miku narriyi marrala nangangi, ngala janarri yurlwa nangangi. Janyulu balanja narrinya, ngala narringkaja yangkalamba nanganbunanyi Sayidinanyi. Janarri miku kuyu nangangi jujambawarr jangkurr, jingkijbangkangangi narri Kud, janyulu lalanba narrinya kudanyu barri. Baki narri jingkijbangka yalunya krisjinmuku jala yalu jungku yingkana yajina baki yingkana yajina wandijiyana. Narri jingkijbangka yalunya, yalu marda jungkuka kijiyudi, barrinani narri jungkuka kijiyudi.
1PE 5:10 Jayalu yabimba kiji narringi yingkamukunyi, jayalu linjumba narrinya, ngala marndakaja barri janyulu yabimba kunyba yaji narringi Kudwanyi. Nyulu ngambalangi wirimalaru, baki janyulu yabimba narrinya ngiruka nangangi. Baki miku narringkiyi yangkalamba nanganbunanyi. Nyuli yarrijba narrinya jungunkanyi kingkarri nangandu. Janarri jungku kingkarri nangandu, nyulungangi bababanyamba narrinya Jisus Krayiswanyi.
1PE 5:11 Ngambala wajbangka Kud ngamanginkanyi kunybanyi jangkurranyi, nyulungangi ngirukamirra, nyulungangi ngambalangi wirimalaru. Nyulu wirimalaru bukambijuyngka yajinyi yurrngumba barri. Duja barri nayinda jangkurr. Barriwa.
1PE 5:12 Ngawamba kujajarra jangkurr ngayu manjijbangka narrindurri. Nanangini Silaswanyi, nyulu yarrijbangka nayinda ngaki jangkurr najana. Nyulu kunyba nganinyi. Nyulu barrinani bababanyamba ngalingka. Ngayu jingkijbangka Silas, nyulu jungkuka yurlurrmba yurrngumba barri. Ngayu manjijbangka nayinda jangkurr narrindurri, nulijbangangi ngayu narringi, narri mirnarriykanyi muwa nangangi Kudkanyi. Nayinda duja jangkurr. Munyajbangka yalunya Kudwanyi, yalu yabimbiji kiji narringi, baki janarri jungku mili ngiruka nangangi. Nani barri nyulu yabimbaka kunyba yaji narringi Kudwanyi. Marda narrimi jungku ngiruka nangangi yurrngumba barri.
1PE 5:13 Nanamukunyi jalili yalu malumba jungku jurjina nananyina yajina niji Babilun, yalu manjijbangka jangkurr narrindurri. Yarrijbayi yalunya Krisjinmuku Kudwanyi, barrinani narrinya yarrijbayi Krisjinmuku Kudwanyi. Yalu barrinani mungkijimuku narringi. Baki nanangini yingkawanyi Makwanyi, nyulu marda manjijbangka jangkurr narrindurri. Kudanyu ngayu marukangka muwa nangangi. Nyulu barrinani jandanyi ngaki.
1PE 5:14 Jalija narri yidamba yalunya yingkamuku Krisjinmuku, baki marda narrimi minimba yalunya, narri marukangka muwa yalungi. Yanyba ngayu mududu nangangi Jisus Krayiskanyi, jala nyulu bababanyamba narrinya. Ngajaka ngayu Jisus Krayis, janyulu yabimba narrinya jungunkanyi mardumardu muwa. Barriwa barri. Bukamba nayinda jangkurr.
2PE 1:1 Nayinda ngayu. Ngaki niji Sayimin Bida, jala ngayu yarrijbangka nayinda jangkurr najana. Ngayu wakiwarr nangangi Jisus Krayiskanyi. Ngana nyuli manjijba Jisus Krayiswanyi, ngayu wakinki nangangi. Ngayu yarrijbangka nayinda jangkurr najana narringi, jali narri kuyu nangangi jangkurr Jisus Krayiskanyi. Bukambijuyngka ngambalangi jala kuyu nangangi jangkurr, nyulu yabimbaka nanamannga kunyba yaji ngambalangi. Nyulu yabimbaka kunyba yaji bukambijuyngka ngambalangi, jala ngambala kuyu nangangi jangkurr. Nani nyulu yabimbaka ngambalangi Jisus Krayiswanyi, jungkukangangi nyulu yurlurrmba bukambijuyngka ngambalangi. Nyulu ngambalangi Kud. Nyulu marda nanda marrimbawarr mardarda.
2PE 1:2 Narri jingkijbangka Kud, baki narri jingkijbangka ngambalangi mambuka Jisus Krayis marda. Baki nanankardi barri nurru yanybaka mududu nangangi Kudkanyi narringi. Ngajaka nurru Kud, janyulu yabimba kaja kunyba yaji narringi. Janyulu yabimba narrinya, narrija jungunkanyi malumba mardumardu muwa. Nani barri nurru ngajaka Kud narringi.
2PE 1:3 Jala ngambala jingkijba Jisus Krayis, jala ngambala durrijba nangangi jangkurr yurrngumba barri, baki yuku ngambala jardijba ngiruka barrinani nyulu ngiruka Jisus Krayis. Nyulu ngirukamirra. Nyulu ngirukamirra yabimbikanyi bukamba yaji ngambalangi, baki nanankardi barri yuku nyulu yabimba ngambalanya ngiruka durriykanyi nangangi jangkurr. Yuku nyulu yabimba ngambalanya ngiruka jungunkanyi yurlurrmba nanganginyina yuwana. Jala ngambala jingkijba Jisus Krayis, jala ngambala jungku yurlurrmba nangangi, baki jangambala yabimba kunyba yaji, barrinani nyulu yabimbaka kunyba yaji Jisus Krayiswanyi.
2PE 1:4 Wabula barri yanybayi Jisus Krayis, janyulu wajba ngambalanya yajinyi. Janyulu yabimba ngambalanya ngiruka barrinani nyulu ngiruka. Yanybayi Jisus Krayis, janyulu wajba ngambalanya kunybanyi yajinyi, ngambala jungunkanyi wanka yurrngumba, ngambala jungunkanyi yurlurrmba nangangi. Jala ngambala kudanyu jingkijba Jisus Krayis, baki nyulu yabimbaka nanda yaji yanyba jali nyulu, janyulu yabimba. Nyulu yabimbaka ngambalanya ngiruka, ngambala jungunkanyi yurlurrmba nangangi. Nanankardi barri jangambala kudanyu jingkijba Jisus Krayis. Jangambala jingkijba Jisus Krayis mili baki mili yurrngumba, baki jangambala jungku mili yurlurrmba nangangi yurrungumba barri. Jala ngambala jungku nani barri, jala ngambala jungku ngiruka barri, durriykanyi nangangi yuwa, baki jangambala miku jungku balki. Miku jangambala jungku balki barrinani nanda yingkamuku jala yalu jungku balki. Miku jangambala jungku balki, ngala jangambala jardijba mili barrinani nyulu Jisus Krayis, bababanyambangangi nyulu ngambalanya. Jungkuka yalu balki barri, mikungangi yalimi durrijba nangangi yuwa Kudkanyi. Yabimbaka yalu ngawamba nanda balki yaji jala yalu nulijba yabimbikanyi. Nanankardi barri jayalungka janyba, baki jayalu jungku kurdan yurrngumba barri.
2PE 1:5 Nanankardi barri, narri jala kuyu nangangi jangkurr Jisus Krayiskanyi, marda narrimi kudanyu nulijba jardiykanyi barrinani Jisus Krayis narringinyina kurduluna. Marda narrimi nulijba jardiykanyi mili barrinani nyulu, baki mili yurrngumba barri. Marda narrimi jungku kunyba nangangi, baki janarri yabimba kunyba yaji yalungi yingkamukuyngka marda. Marda narrimi jungku jirdi kunybanyi kulajinyi nangangi Jisus Krayiskanyi, baki janarri jingkijba Jisus Krayis. Janarri jingkijba mili nangangi baki mili nangangi yurrngumba barri.
2PE 1:6 Jala narri jungku jirdi kunybanyi kulajinyi nangangi, jala narri jingkijba yingka kunyba yaji, yingka balki yaji, baki janarri jingkijba ngawamba yabimbiji nanda kunyba yaji. Jala narri jungku jirdi kunybanyi kulajinyi, baki janarri jingkijba, narringka kurrkunbikanyi yabimbiji balki yaji. Marda narrimi yabimbawa kunyba yaji yurrngumba barri. Jala narri yabimbawa kunyba yaji yurrngumba, baki narri jungkuka barrinani Jisus Krayis. Narri jungkuka mili barrinani nyulu, baki mili yurrngumba barri.
2PE 1:7 Jala narri jungku mili barrinani nyulu Jisus Krayis, baki janarri yabimba kunyba yaji yalungi yingkamukuyngka. Jala narri yabimba kunyba yaji yalungi nani barri, baki janarri maruka muwa yalungi yingkamukuyngka marda. Nanankardi barri marda narrimi yabimbawa kunyba yaji yurrngumba barri.
2PE 1:8 Jala narri jungku mili nani baki mili nani yurrngumba barri, baki janarri jungkuwa jirdi kunybanyi kulajinyi nangangi yurrngumba barri, janarri jungku mili barrinani nyulu, baki mili yurrngumba barri. Nanankardi barri janarri yabimba ngawamba nanda yaji jala nyulu ngambalangi mambuka Jisus Krayis, janarri yabimba ngawamba nanda yaji jala nyulu nulijbangka narringi yabimbikanyi nanda yaji.
2PE 1:9 Jaliyi narri jungku yurlurrmba nangangi Jisus Krayiskanyi, baki nanda kunyba, kunybamirra. Ngala jaliyi narri miku jungku yurlurrmba nangangi, jaliyi narri miku jungku jirdi kunybanyi kulajinyi nangangi, jaliyi narri miku jardijba mili barrinani nyulu, baki nanda balki. Janarri mamanumba nanda yaji jali yabimba Jisus Krayiswanyi narringi. Janarri mamanumba, jali nyulu manjamanjamba narringi balki yaji nanamanji jali narri jalannga kuyu nangangi jangkurr. Barriwa.
2PE 1:10 Nanankardi barri marda narrimi kudanyu nulijba durriykanyi Jisus Krayis. Jaliyi narri dadijba jungku yurlurrmba nangangi yurrngumba barri, baki janarringka miku yangkalamba nanganbunanyi, ngala janarri jungku jandanyimuku nangangi Kudkanyi yurrngumba barri. Baku barri jalija narringka janyba, baki janarri jungku mili wanka yurrngumba kingkarri bulandu, Kudnyina baki Jisus Krayisnyina. Baki nyulu Jisus Krayis, janyulu jungku mirnarrijba muwa narringi, jalija narri jungku nangandu kingkarri lalijina. Janyulu mirnarrijba muwa narringi, jungkungangi narri ngiruka nangangi Jisus Krayiskanyi. Nyulu ngambalangi mambuka, baki nyulu marrimbawarr mardarda ngambalangi. Janarri jungku mili wanka yurrngumba nanaba lalijina, mikuwalingangi bukamba nanda yaji nangangi kingkarri.
2PE 1:12 Ngayu jingkijbangka narrinya, narri jingkijbangka bukamba nayinda jangkurr jala ngayu yarrijba najana narringi. Narri jingkijbangka nayinda jangkurr. Ngala yurrngumba barri jangayu mili karu narrinya nanginkanyi jangkurranyi. Marda narrimi miku mamanumba nayinda jangkurr, dujangangi nayinda jangkurr. Narri jingkijbangka nayinda duja barri jangkurr.
2PE 1:13 Jala ngayu mili karu narrinya nanginkanyi jangkurranyi, baki nanda kunyba, baki miku janarri mamanumba nayinda jangkurr. Yurrngumba barri jala ngayu jungku wanka nayiba wayka jambana, baki jangayu karu narrinya, janarri mankuwa nayinda jangkurr.
2PE 1:14 Nanijba ngayu yarrijbangka nayinda jangkurr najana narringi, nyulungangi karu ngani ngambalanginyi mambukawanyi Jisus Krayiswanyi. Ngana nyuli karu ngaki, ngayu mankunkanyi yabimba. Ngana nyuli karu ngaki, marndakaja barri jangaka janyba ngaki mankanyi, ngala ngaki ngarndu barri jungkuja mili wanka nangandu kingkarri yurrngumba barri.
2PE 1:15 Nanamanji barri jalija ngaka janyba, baki yuwajiwa nayinda jangkurr janarri najba najana. Janarri najba nayinda jangkurr jala karungka narrinya nangangi, ngamanginkanyi mambukanyi Jisus Krayiskanyi. Janarri najba nayinda jangkurr najana, baki yurrngumba barri janarri mankumankuwa nayinda jangkurr. Barriwa.
2PE 1:16 Karu nurri narrinya nangangi Jisus Krayiskanyi, ngala miku nurriyanyi muningka yanyba narringi, miku nurriyanyi jujamba narrinya. Jilalajba nurri nangandu. Najba nurri Jisus Krayis yabimbikurri yaji, baki karu nurri narrinya nanginkanyi duja jangkurranyi nangangi ngambalanginkanyi mambukanyi. Karu nurri narrinya nangangi, nyulu walkurramirra, ngiruka ngambalangi. Nurri karu narrinya, janyulu mili wijba wayka jambarri. Jalija nyulu wijba, baki janyulu jungku barrinani nyuli wabula jungku, nanamanji jali nyulu jungku kulawirana, jali yangkalamba nangka mankanyi, jali bilirrba mankanyi nangangi. Ngawamba nurru najbayi Jisus nani nanamanji kulawirana. Ngayu baki Jun baki Jayims, nurru najbayi Jisus Krayis bilirrkurri mankanyi. Baki manku nurri Kud yanybikurri nangangi nanaba. Yanybayi Kud kunyba jangkurr nangangi Jisus Krayiskanyi. Yanyba nyuli nayi barri, “Nayinda Jisus, nyulu ngakinmirra jandanyi. Maruka ngayu muwa nangangi kudanyu barri.” Nani barri yanybayi Kud jali nurru jungku yundu kulawirana. Barriwa.
2PE 1:19 Nanamuku wankalamuku jali yalu yarrijba jangkurr najana Kudkanyi, yali yarrijba nayinda jangkurr nangangi Jisus Krayiskanyi. Yalungi jangkurr yanybaka nangangi, janyulu badajba, baki janangka janyba wabangkarra kurndana, nyulu marrimbawarr mardarda bukambijuyngka yalungi jala yalu kuyu nangangi jangkurr. Nani barri yalungi jangkurr yanybaka nangangi. Baki ngambala jingkijba nanda jangkurr yalungi duja barri. Marda narrimi mankuwa nanda yalungi jangkurr. Jala mungana yajina barri, baki mikuwali najba yaji nganinyiwanyi. Miku nyuliyi najba yaji, baki nyulu kuyungka mirnbi nangandu. Baki minimbaka yaji nangangi mirnbiwanyi. Ngala jala kambalingijba yaji, baki walajbangka kamba karrina. Baki miku nyulimi mili kuyu mirnbi nangandu, baki yuku nyulu najba yaji kambana. Baki nani barri bukambiju nganinyimuku wandijiyana, yalu jungkuka barrinani mungana yajina. Ngala manjijbayi nangangi jangkurr yalundurri Kudwanyi. Nyuli wajba kudiya wankalamuku nanganginkanyi jangkurranyi, baki yalunjali karu nanankanyi jangkurranyi. Nanda jangkurr barrinani mirnbi minimbikanyi yalunya nangangi Kudkanyi. Marda ngambalimi yuwajiwa kuyu nanda yalungi jangkurr nanijba barri. Barriwa. Ngala jalija wijba Jisus Krayis kingkarrinya, baki nanda barrinani kambana yajina ngambalangi. Jisus Krayis nyulu barrinani nanda kamba jala walajba. Wijbaja Jisus Krayis, baki janyulu minimba ngambalanya bukamba yaji. Barriwa.
2PE 1:20 Nanamuku wankalamuku jali yalu yanyba jangkurr nangangi Kudkanyi, miku yaliyanyi yanyba yalunginkanyi jangkurranyi. Miku yalungkiyanyi waluku mankumanku nanankanyi jangkurranyi jalija yalu yanyba. Miku. Ngala nanda Kunyba Ngarndu nangangi Kudkanyi, nyuli jungku yalundu kurduluna, baki nyuli karu yalunya nanankanyi jangkurranyi jali yalu yanyba. Miku nanda yalungi jangkurr, ngala nanda nangangi jangkurr Kudkanyi, jali karu yalunya Kunybawanyi Ngarnduwanyi Kudkanyi. Barriwa.
2PE 2:1 Ngala jawuda wankalamuku, yali jujambawarr. Miku yaliyanyi yanyba ngawamba nanda jangkurr nangangi Kudkanyi. Yanyba yali yalungi jangkurr, ngala yalunjali karu nanankanyi jangkurranyi, nanda nangangi jangkurr Kudkanyi. Ngala miku nanda nangangi jangkurr Kudkanyi, ngala nanda yalungi jangkurr. Yali jujambawarrmuku nanamuku wankalamuku jali yalu yanyba nanda jangkurr. Baki nani barri nanijba marda. Jawuda jujambawarrmuku yalu jungkuka narrindu marda. Yalu yanybaka narringi, yalu milidimbaka narrinya jangkurranyi Kudkanyi, ngala miku. Yalu jujambawarrmuku. Miku nanda nangangi jangkurr Kudkanyi, ngala nanda yalungi jangkurr jala yalu milidimba narrinya. Waluku barri yali kuyu nangangi jangkurr Jisus Krayiskanyi. Nyulu wirimalaru jali nangka janyba yalunginkanyi balkinyi yajinyi. Waluku yali kuyu nangangi jangkurr, ngala bayngkani barri yali mamanumba nanda jangkurr nangangi, baki nanijba barri yalu yanybaka jujambawarr jangkurr. Waluku barri nyuli marrimba yalunya mardarda Jisus Krayiswanyi, ngala nanijba barri miku nyulimi marrimba yalunya mardarda, yanybangangi yalu jujambawarr jangkurr. Baki nanankardi barri janyulu bukamba yalunya Kudwanyi, baki jayalu jungku kurdan yurrngumba barri. Baki nani marda nanamuku jala yalu kuyu nanda jujambawarr jangkurr, janyulu bukamba yalunya marda Kudwanyi.
2PE 2:2 Baki nanamuku jujambawarrmuku, jawudamukunyi krisjinmukunyi, jayalu najba yalunya jungunkurri balki, baki jayalu marda yabimba nanamannga balki yaji. Nanankardi barri yingkamuku jayalungka yanyba yalungi krisjinmukuyngka, marda yalu jungkuka balki, yabimba yalu kaja balki yaji. Nani barri jayalungka yanyba, jungkukangangi yalu balki nanamuku jujambawarrmuku milidimbawarrmuku. Yurrngumba yalili yabimba balki yaji.
2PE 2:3 Kuliwijbangka yalu dungalanyi. Muningka barri yalunjalu milidimbaka yalunginkanyi jangkurranyi, wudumbiji kaja dungala. Nulijba yalu narringi, narri waykanyi yalunya dungalanyi, jala yalu milidimba narrinya. Ngala karuyi ngambalanya yalungi nanamukunyi wankalamukunyi jali yanyba jangkurr nangangi Kudkanyi. Karuyi ngamanjalu balkimukuyngka milidimbawarrayngka. Marda karuyi ngambalanya nanankanyi balkinyi yajinyi, jalija yabimba Kudwanyi yalungi. Janyulu yabimba balki yaji yalungi, jungkungangi yalu balki nangangi. Janyulu manjijba yalunya wayka Yilyurri. Barriwa.
2PE 2:4 Nanamuku balkimuku Yanjilmuku jali yalu jungku balkina yuwana Kudkanyi, nyuli manjijba yalunya nanankurri mungarri yajiyurri. Barrinani nyuli kijijba yalunya nanaba, baki miku yaliyi walajba. Nanijba barri yalu jungkuka nanaba mungana yajina, baki baku barri jalija nyulu karrinjarrijba yalunya walu nangandu Kudwanyi, nanamanji barri janyulu manjijba yalunya wayka Yilyurri. Barriwa.
2PE 2:5 Nanda wankalanyi Nuwa baki nanganginmuku murrku jandanyimuku, baki yalungi maninganjamuku, yali 8 barri nganinyimuku baki jibarrimuku. Ngawamba yalu jungkuyi kunyba nangangi Kudkanyi. Ngala yingkamuku bukambiju yalu jungkuyi balki nangangi Kudkanyi. Baki nanankardi barri manjijbayi walkurra mali yalundurri Kudwanyi. Manjijba nyuli mali, baki ngurrunbayi yalunya maliwanyi. Ngala nanamuku kunybamuku, nyuli marrimba yalunya mardarda Kudwanyi. Marrimba nyuli yalunya mardarda, milidimbangangi nyuli Nuwawanyi jangkurranyi Kudkanyi. Kudanyu nyuli milidimba yalunya jangkurranyi Kudkanyi. Barriwa.
2PE 2:6 Jabarri yingkamuku wankalamuku yali jungku nanankuyanyina barrawuyabarrawuyana, yaji niji Sudum baki Kumurra. Yali balkimuku, baki nanankardi barri manjijbayi jangu yalundurri Kudwanyi. Manjijbayi jangu Kudwanyi, baki bakarrijbayi yalunya bukambiju janguwanyi. Nani barri bukambayi yalunya Kudwanyi. Yingkamuku jali yalu jungku nananyina yajina, najba yalu nanda yaji jali yabimba Kudwanyi. Baki nani barri nyuli minimba yalunya, jayalungka marda janyba, jaliyi yalu mili jungku balki nangangi Kudkanyi.
2PE 2:7 Jala bukambayi yalunya Kudwanyi janguyudinyi, baki yingka nyuli marrimba mardarda, nangangi niji Lud. Nyuli kunyba nganinyi. Nyuli kardikardimba nyulu Yabrayamwanyi. Jungkukili Lud nananyina yajina niji Sudum, ngala nyulili ngirukijba muwa, najbangangi nyuli yalunya jungunkurri balki yurrngumba. Najba nyuli yalungi balki yaji, baki manku nyuli jangkurr yalunginkanyi balkinyi yajinyi, baki ngirukijbayi muwa yalungi balkimukuyngka. Ngala marrimbayi Lud mardarda Kudwanyi, mikungangi nyuli jungku balki barrinani yalu jungkuyi balki. Barriwa.
2PE 2:9 Nani barri dabayi yalunya balkimuku Kudwanyi. Daba nyuli yalunya Yanjilmuku, baki nganinyimuku baki jibarrimuku. Yingkamuku nyuli manjijba yalunya mungarri yajiyurri, yingkamuku nyuli ngurrunba yalunya maliyudinyi, yingkamuku nyuli bakarrijba yalunya janguyudinyi. Nani barri nyuli daba yalunya, ngala yingkawuya, Nuwa baki Lud, nyuli marrimba bulanya mardarda barri. Nyuli marrimba bulanya mardarda, ngala nyuli daba yalunya yingkamuku, baki nanankardi barri ngambala jingkijbangka Kud, yuku nyulu lalanba yalunya jalili yalu nanijba jungku kunyba nanganginyina yuwana. Yuku nyulu marrimba yalunya mardarda, baki nanankardi barri miku yaliyi kuyu nanda jujambawarr jangkurr, miku yaliyi durrijba nanda balki jangkurr. Baki ngambala jingkijbangka nayi marda nangangi Kudkanyi. Baku barri janyulu daba yalunya bukambiju jala yalu jungku balki nangangi. Janyulu manjijba yalunya marda wayka jangurri Yilyurri. Nayinda barri duja jangkurr. Nanamukunyi balkimukunyi yalu yabimbaka nanda balki yaji jala yalu nulijba yabimbikanyi yaji. Barimba yalu kuluka yingkana. Yalu yurlwangka yalungi mambukamukuyngka jurjkanyi. Yalu yurlwangka nangangi Kudkanyi marda. Yalungka barrarrakijba kudanyu barri. Balkinyi jangkurranyi yalu karungka narrinya nangangi Kudkanyi. Balkimirra. Nanamuku balkimuku yalu jungkuka nani barri. Baki nanankardi barri janyulu manjijba yalunya Kudwanyi. Janyulu manjijba yalunya wayka jangurri Yilyurri. Nayinda barri duja jangkurr.
2PE 2:11 Ngala nanamukunyi Yanjilmukunyi miku yalimi karu Kud balkinyi jangkurranyi nanginmukuyngka balkimukuyngka. Miku. Yalu Yanjilmuku mili walkurra yalungi nganinyimukuyngka, ngala miku yalimi yanyba balki jangkurr nangangi Kudkanyi yalungi, nanginmukuyngka balkimukuyngka. Yalu jungku kunyba yurrngumba Yanjilmuku, miku yalimi karu Kud balkinyi jangkurranyi yingkamukuyngka.
2PE 2:12 Ngala nanginmuku balkimuku milidimbawarrmuku, yalu yanybaka balki jangkurr nangangi Kudkanyi. Yalu yanybaka balki jangkurr nanankanyi jala yalu miku jingkiykanyi. Yalu jungkuka barrinani yanimal jala daba nganinyiwanyi, jala nyulu kurdanba. Miku nangkimi mankumanku yajinyi nanda yanimal, miku nyulimi jingkijba yaji, ngala muningka nyulu yabimbaka yaji. Baki nani barri yalu jungkuka nanginmuku balkimuku marda. Miku yalungkimi mankumanku nanankanyi balkinyi yajinyi jala yalu yabimba. Muningka yalu yabimbaka balki yaji. Nani barri yalu barrinani yanimal, baki nanankardi barri jayalungka janyba, barrinani nangka janybaka yanimal kurdan yurrngumba barri. Jayalungka janyba, ngala miku jayalu jungku mili wanka yurrngumba barri, ngala jayalu marda jungku kurdan yurrngumba barri.
2PE 2:13 Yali yabimba balki yaji yalungi yingkamukuyngka, baki nani barri janyulu yabimba balki yaji yalungi marda Kudwanyi. Barriwa. Nanamuku jujambawarrmuku, jala yalu jungku malumba yalundu yingkamukunyina Krisjinmukunyina, jala yalu jarrba mama malumba barri, baki yalu kuliwijba mamanyi baki kamukamunyi. Jungku yalu mudu kulaji. Nani barri yalu jungku balkina yuwana nangangi Kudkanyi. Ngawamba yalu jungku yalundu Krisjinmukunyina jarrkanyi mama yalundu, kuliwijbangangi yalu mamanyi baki kamukamunyi. Mirnarrijba yalu muwa jarrkanyi yalundu nani barri. Nani barri yalu yabimba balki yaji mungana, baki kambana marda, jala yalunjalu najba yingkamukunyi. Miku yaliyi manyiru yalunginkanyi balkinyi yajinyi, ngala marda narrimi manyiru yalungingangi, nanankanyi balkinyi yajinyi jala yalu yabimba.
2PE 2:14 Baki yalu yabimbaka mili balki yaji marda. Jala yalu jungku yalundu Krisjinmukunyina, jala yalu jarrba yaji yalundu, baki yalu najba jibarrimuku baki wurrumbarramuku. Mankumanku yalungka kulukankanyi yalundu. Mankumanku yalungka kulukankanyi yalundu kambana marda. Yalunjalu jujamba jibarrimuku, yalu kulukankanyi yalundu barrinani maykarra. Jujamba yalunjalu nanamuku jibarrimuku jala yalu miku jungku ngiruka nangangi Kudkanyi. Nani barri yalu kuliwijba bukamba balkinyi yajinyi. Jala yalu yabimba balki yaji nani barri, baki yalu nulijba yabimbikanyi mili balki yaji, baki mili barri. Baki nanankardi barri jayalungka janyba. Nanamuku Krisjinmuku, jala yalu miku jungku ngiruka nangangi Kudkanyi, yiningki jayalu durrijba nanamuku balkimuku, yiningki jayalu marda yabimba nanamannga balki yaji.
2PE 2:15 Nanda wankalanyi Balam, nangangi nijanganjinyi, nangangi niji Biyurr. Nanda Balam nyuli marda jungku balki barrinani yalu jungkuka balki. Yabimba nyuli balki yaji wudumbiji dungala. Mirnarrijba nyuli muwa jali nyulu wudumba dungala yabimbikanyi nanda balki yaji. Baki nani barri nanginmuku marda. Yalu yabimbaka balki yaji wudumbikanyi dungala. Miku yalimi jungku yurlurrmba nangangi Kudkanyi. Miku.
2PE 2:16 Nanangini wankalanyi Balamwanyi, yabimba nyuli balki yaji, jali nyulu jilajba yanybiji balki jangkurr dungalanyi, baki jilajba nyuli yirrikirrina. Baki yanybayi nanda yirrikirri nangangi. Yanybayi yirrikirri nanda jangkurr barrinani nanda nganinyi yanybaka, yabimbayingangi yirrikirri yanybikanyi Kudwanyi. Ngirrwayi yirrikirri nangangi. Ngirrwayi nangangi, jilajbangkangangi nyulu yanybiji balki jangkurr yalungi nangangi Kudkanyi. Baki nanankardi barri miku nyuliyi yanyba Balam nanda balki jangkurr yalungi. Nani barri kurrkunbayi nanda nganinyi Kudwanyi. Kurrkunba nyuli Balam yanybiji nanda balki jangkurr. Barriwa.
2PE 2:17 Manku narri nayinda jangkurr jalija muningka ngayu yanyba. Jala nganinyi warinjijba, baki nyulu jilajbangka jiwilyurri ngaraji wabuda. Ngala jaliyi nyulu najba mikuyaji wabudanyi, baki nyulu wijbangka jiwilnanyi. Yuwajiwa nyulu warinjijbangka. Baki nani barri narri jilajbangka jurjyurri mankunki jangkurr yalungi milidimbawarrayngka. Narri jilajbangka jurjyurri jingkiykanyi mili yaji nangangi Kudkanyi. Ngala jaliyi narri manku jangkurr yalungi balkimukuyngka milidimbawarrayngka, baki narri barrinani nanda nganinyi jala miku wakaramba wabuda jiwilina. Wijba nyuli jiwilnanyi, ngala yuwajiwa nyuli warinjijba. Jala narri jilajba jurjyurri, baki miku narrimi manku jangkurr nangangi Kudkanyi, miku narrimi jingkijba mili yaji nangangi. Narri nulijbangka mankunkanyi jangkurr nangangi Kudkanyi, ngala miku narrimi manku nangangi jangkurr, mikungangi yaliyi milidimba narrinya nangangi Kudkanyi. Nanamuku balkimuku milidimbawarrmuku, yalu barrinani nanda duku jiwil. Barriwa. Baki mili jangkurr jangayu muningka yanyba yalungi balkimukuyngka. Murumbayi yaji kangulkiwanyi, ngala badajbayi yunkurr karrina. Warrmbayi kangulki yunkurrwanyi, baki mikuyaji kangulkinyi. Barriwa. Nanda balki jangkurr yalungi balkimukuyngka milidimbawarrayngka, yalungi balki jangkurr barrinani kangulki. Mikukiyanyi wambu jungku nanda kangulki, manjijbayi kangulki yunkurrwanyi. Baki nani barri mikuwali wambu jungku yalungi balki jangkurr narrindu, jungkukangangi nanda duja jangkurr nangangi Kudkanyi narrindu. Manjijbayi kangulki yunkurrwanyi, baki nani barri nanganginyi duja jangkurrwanyi manjijbangka yalungi balki jangkurr narrinbunanyi. Ngawamba nangangi jangkurr wambu jungkuka narrindu kurduluna. Barriwa. Nanamuku balkimuku, janyulu yabimba balki yaji yalungi Kudwanyi. Janyulu yabimba balki yaji yalungi, milidimbangangi yalu balki jangkurr. Janyulu manjijba yalunya nanankurri mungarri yajiyurri, jala mikuyaji kambanyi nanaba. Jayalu jungku ngirukana mungana yajina. Barriwa.
2PE 2:18 Nanamuku balkimuku yalu yanyba jujambawarr jangkurr narringi. Yalu yanybaka mudu jangkurr jala miku narrimi jingkijba yalungi jangkurr. Yalu milidimbaka narrinya, yuku narri yabimba bukamba yaji, kunyba yaji, baki balki yaji, barrinani nulijbangka jibarrinyi. Yuku narri yabimba bukamba yaji nani, manjamanjambajangangi nanda balki yaji Kudwanyi. Nani yalu milidimbaka narrinya. Ngala jawudamuku yalu buyingkinyimuku krisjinmuku. Jilijbawa yalu kudanyu jingkijba Jisus Krayis. Ngawamba bayakardanyi yajinyi yalu jingkijba nangangi. Yalu nginduyi muwa yalunginkanyi balkinyi yajinyi, yalungki yangkalamba nangandurri Jisus Krayisyurri, ngala miku yalimi kudanyu jingkijba Jisus Krayis. Baki nanankardi barri yalu kuyungka nanda jujambawarr jangkurr, baki yalungka mankumankunkanyi yuku yalu mili yabimba balki yaji.
2PE 2:19 Nanamuku balkimuku milidimbawarrmuku, yalu yanybaka mikuyaji mambukanyi narringi, mikuyaji yuwanyi narri durriykanyi. Nani yalu yanybaka. Ngala marda narrimi jingkijba yalunya, nanda wuwarr Sayidin, nyulu yalungi mambuka jala yalu yabimba balki yaji nani barri. Yalu durrijbangka nangangi yuwa.
2PE 2:20 Yingkawanyi nganinyiwanyi, miku nyuliyanyi manku jangkurr nangangi Kudkanyi, baki nanankardi barri miku nyuliyanyi durrijba nanda jangkurr, ngala nyuli durrijba nanda jangkurr nangangi Sayidinkanyi, baki nanda balki. Miku nyuliyi jungku yurlurrmba nangangi Kudkanyi. Ngala yingka nganinyi barri, waluwa nyuli durrijba jangkurr nangangi Sayidinkanyi, ngala bayngkani barri nyuli manku nanda jangkurr nangangi Jisus Krayiskanyi, baki nangki yangkalamba nangandurri, ngamanginkurri mambukarri Jisus Krayisyurri, jala marrimbawarr mardarda. Bayngkani barri nangki yangkalamba nangandurri. Nanda barri nganinyi, jaliyi nyulu baku yurlwa nanankanyi jangkurranyi Kudkanyi, jaliyi nangka mili yangkalamba nangandurri Sayidinyurri, jaliyi nyulu mili durrijba jangkurr nangangi Sayidinkanyi, baki nanda balki, balkimirra. Jungkuka nyulu mili balki nanankanyi jala yurrngumba durrijba jangkurr nangangi Sayidinkanyi. Jungkuka nyulu mili balki nangangi. Nanda nganinyi jali mili yangkalamba nangka nangandurri Sayidinyurri, miku nyuliyi mili jungku yurlurrmba nangangi Kudkanyi. Yabimbaja balki yaji nangangi Kudwanyi. Balkimirra yaji janyulu yabimba nangangi, jalija nangka janyba. Barriwa.
2PE 2:22 Nanamuku wankalamuku barri yalili yanyba nayinda jangkurr. “Jala jarrba balki barnyi bajanguwanyi, baki nyulu balunba. Ngala kamu janyulu wijba nanankurri balkiyurri yajiyurri. Mili janyulu jarrba nanamannga barnyi.” Nani yalili yanyba barri wankalamuku. Baki mili jangkurr yalili yanyba nayi barri. “Jala wakardaba bikibiki nganinyiwanyi, baki wijbaja bikibiki janjarri. Mili nyulu jungkuja janjayudi.” Nani barri yalili yanyba wankalamuku. Ngayu karungka narrinya. Jala nganinyi wijbangka nangandurri Sayidinyurri, baki nyulu barrinani nanda bajangu jala wijbangka nanankurri barnyiyurri jali waluwa nyulu balunba. Jala nganinyiwanyi mili kuyungka jangkurr nangangi Sayidinkanyi, baki mili nyulu jungkuka balki nangangi Kudkanyi, baki nyulu barrinani nanda bikibiki jala wijba janjarri, jala mili jungku balki janjayudi. Yangkalambayi ngambalaka nangandurri Kudyurri. Manjamanjambayi ngambalangi balki yaji Kudwanyi. Marda ngambalakimi najbawa, marda ngambalimi miku wijba nangandurri Sayidinyurri. Marda ngambalakimi najbawa kudanyu barri nangangi. Barriwa.
2PE 3:1 Ngayu manjijbangka nayinda jangkurr najana narrindurri, jala ngayu kudanyu maruka muwa narringi. Wabula barri ngayi manjijba yingka jangkurr najana narrindurri. Manjijba ngayi nanda jangkurr wabula barri, baki nanijba ngayu manjijbangka nayinda jangkurr, nulijbangangi ngayu narringi, narri mankuwankanyi yaji. Ngayu nulijbangka narringi mankuwankanyi, marda narringkimi mankumanku kunybanyi yajinyi. Marda narringkimi mankumanku kunybanyi yajinyi yurrngumba barri.
2PE 3:2 Ngayu nulijbangka narringi, narri mankuwankanyi nanda jangkurr nangangi Kudkanyi, jali yalu yanyba wankalamuku. Yarrijbayi yalunya Kudwanyi, yalu yanybiji yaji nangangi, baki yarrijba yali nanda jangkurr najana Kudkanyi. Marda narrimi mankuwa nanda yalungi jangkurr. Baki marda narrimi mankuwa nanda jangkurr marda, nanda jangkurr jali jirrinyba ngambalanya Jisus Krayiswanyi. Nyulu ngambalangi mambuka Jisus Krayis, nyulu nanda marrimbawarr mardarda, baki nyuli manjijba nurrunya karunki narrinya nanganginkanyi jangkurranyi. Nanamukunyi wankalamukunyi, jali yalu yanyba jangkurr nangangi Kudkanyi, yali karu narrinya nanginmukuyngka balkimukuyngka milidimbawarrayngka. Yali karu narrinya nanginmukuyngka, narrija najbawa yalunya. Nani barri yali karu narrinya yalungi. Baki Jisus Krayiswanyi nyuli marda jirrinyba nurrunya jali nyulu manjijba. Nyuli marda jirrinyba nurrunya, nurru milidimbikanyi nanamannga jangkurr yalungi balkimukuyngka. Karu nyuli nurrunya, jayalu kakalijba nanganginkanyi jangkurranyi, ngala jayalu yanyba jangkurr jala miku duja. Jayalu yabimba kaja balki yaji jala yalu nulijba yabimbikanyi nanda yaji. Marda narrimi mankuwa nanda jangkurr jala karungka narrinya nanginmukuyngka balkimukuyngka.
2PE 3:4 Nanginmuku balkimuku milidimbawarrmuku, yalu yanybaka nayinda barri jangkurr. “Yanybayi Jisus Krayis, janyulu wijba nanginkurri jambarri. Janyulu wijba, baki janyulu barriwa bukamba yaji marda jamba. Ngala miku nanda duja jangkurr, nyulu wiykanyi, nyulu bukambikanyi yaji. Miku nanda duja jangkurr. Yuwajiwa jungkuka nayinda jamba. Wabula kamambarra ngambalangi wankalamuku mungkijimuku yalungki janyba, baki yalunginmuku jandanyimuku yalungki marda janyba. Baki mili baki mili bayngkani yalundu, yalungki marda janyba, ngala yuwajiwa jungkuka nayinda jamba. Yuwajiwa jungkuka barrinani wabula jalili yalu jungku jambana wankalamuku. Yuwajiwa jungkuka nanginmannga jamba, jali yabimba Kudwanyi nanamanji wabula jali nyulu yabimba bukamba yaji. Yuwajiwa jungkuka jamba nanijba. Baki yuwajiwa jungkuja nanginmannga jamba baku barri juju bayngkani jalija ngambalaka janyba. Mikuwali bukamba nayinda jamba baku barri. Miku. Nanda jangkurr nangangi Jisus Krayiskanyi, janyulu wijba, baki janyulu barriwa bukamba yaji, miku nanda duja jangkurr.” Nani barri yalu yanybaka nanamuku balkimuku milidimbawarrmuku. Nani barri yalu milidimbaka balki jangkurr.
2PE 3:5 Ngala jala yalu yanyba nanda jangkurr, baki yalu mamanumba Kud. Mamanumba yalu nanda jali yabimba Kudwanyi. Yabimba nyuli bukamba yaji. Yanybayi Kud jangkurr yabimbikanyi yaji, baki yabimba nyuli yaji. Yabimba nyuli laliji kingkarri, baki jamba wandijiyana. Waluku barri nyuli yabimba kanja, baki bayngkani nyuli yabimba jamba kanjananyi. Walajbayi jamba kanjananyi. Baki yabimbayi janja marda Kudwanyi. Yirrbayi janja baki jardijbayi yaji jambana.
2PE 3:6 Ngala baku barri juju, yanybayi Kud jangkurr kurdanbikanyi bukamba yaji jambana. Manjijba nyuli walkurra janja. Walajbayi walkurra mali, baki murumbayi bukamba jamba maliwanyi. Baki ngurrulijba yali malina, nganinyimuku baki jibarrimuku, baki yanimalmuku. Bukambiju yali ngurrulijba malina. Ngala ngawamba kujajarra nyuli marrimba yalunya mardarda Kudwanyi. Jungku yali mardarda kalawuyngkurru walkurranyina muwardana, baki kujajarra yanimalmuku marda julakimuku yalundu marda. Ngala kajamuku barri yanybayi Kud jangkurr bukambikanyi yalunya, baki ngurrulijba yali malina. Barriwa.
2PE 3:7 Ngala nanamanji maliwunyi, yanybayi Kud yingka jangkurr, janyulu mili lalanba yaji jambana. Nganinyimuku, jibarrimuku, baki yanimal junu, janyulu mili lalanba yalunya yurrngumba nanankardi baku barri jalija nyulu bukamba yaji. Nanamanji barri janyulu manjijba jangu, baki bakarrijbaja bukamba yaji janguwanyi. Bakarrijbaja bukamba yaji lalijina baki jambana. Bukambaja yaji nanamannga. Nanamanji barri janyulu karrinjarrijba bukambiju walu nangandu Kudwanyi. Nanamuku jala yalu miku kuyu nangangi jangkurr, jala yalu miku durrijba nangangi yuwa, bakarrijbaja yalunya janguwanyi. Nani barri janyulu bukamba yalunya nanamuku balkimuku, marda laliji marda jamba. Ngala janyulu yabimba buyingkinyi jamba kingkarri nangandu, baki nanamuku jala yalu durrijba nangangi yuwa, jayalu jungku nanaba kingkarri nangandu yurrngumba barri. Barriwa.
2PE 3:8 Narri jala ngayu kudanyu maruka muwa narringi, marda narrimi miku mamanumba nayi yaji. Jungkuyi Kud yurrngumba wabulinyinanyi kamambarra. Jungku nyuli wanka waluwa barri nayinda jamba, waluwa nyuli yabimba nganinyimuku baki yanimalmuku. Juju barri wabula wankalana nyuli jungku wanka. Ngala ngambala barri, miku ngambalimi jungku wanka juju barrinani nyulu jungkuka wanka juju barri. Miku. Nanda nganinyi, jala malbungujba mankanyi nangangi, ngambala yanybaka nangangi, nyulu jungkuyi wabulinyi wanka. Ngala nanda buyingkinyi bardarda, ngambala yanybaka nangangi, nyulu jungkuyi wanka ngawamba jalannga. Ngala miku nanda wabulinyi yajinyi nangangi Kudkanyi, miku nanda jalannga yajinyi nangangi. Miku nangkiyi mankumanku Kud nani barri. Mikuyaji wabuliyngkanyi, mikuyaji jalannga yajinyi nangandu. Mankumanku nangka Kud yinini yajinyi.
2PE 3:9 Yanybayi Kud, janyulu daba yalunya balkimuku, janyulu manjijba yalunya jangurri, ngala miku nyulimi dulu yabimba nanda yaji yalungi. Yukumbaka Kud yalungi jibarrimukuyngka baki nganinyimukuyngka. Yukumbaka Kud yalungi wabulinyi, marukangangi nyulu muwa yalungi. Nulijbangka nyulu yalungi, yalu mankunkanyi nangangi jangkurr. Miku nyulimi nulijba manjiykanyi yalunya jangurri, ngala nyulu nulijbangka yalungi, yalu ngindunkanyi muwa yalunginkanyi balkinyi yajinyi, baki janyulu manjamanjamba yalungi balki yaji Kudwanyi, janyulu marrimba yalunya mardarda. Nanankardi barri miku nyulimi dulu yabimba nanda jali nyulu yanyba, janyulu yabimba. Baki nanankardi barri jilijbawa nyulu bukamba nayi yaji.
2PE 3:10 Ngala baku barri janyulu yabimba nanda yaji yalungi, janyulu karrinjarrijba yalunya bukambiju walu nangandu, ngala miku ngambaliyi jingkijba wanyimbalajaki. Miku ngambaliyi jingkijba wanyimbala janyulu karrinjarrijba yalunya walu nangandu. Jaliyi maninjaku ngankijba barndana maninjakuykanyi yaji, baki kardarda nangka binanyba kalawuyngkurru. Ngala miku ngambaliyi jingkijba wanyimbala janyulu badajba maninjakuykanyi yaji. Baki nani barri miku ngambaliyi jingkijba wanyimbala janyulu karrinjarrijba yalunya walu nangandu Kudwanyi. Baki miku ngambaliyi jingkijba wanyimbala janyulu bukamba yaji Kudwanyi. Ngala jalija bukamba laliji barri, baki ngurrwaja yaji kudanyu barri. Marda bakarrijbaja bukamba yaji janguwanyi, marda kamba, marda yakarl, marda warrawiji, marda laliji, marda jamba. Bakarrijbaja kudanyu yaji janguwanyi, nanamanji jalija bukamba yaji Kudwanyi.
2PE 3:11 Nanankardi barri, yanka barri marda narrimi jungku nanijba. Marda narrimi jungku yurlurrmba nanganginyina yuwana Kudkanyi. Marda narrimi jungku yurlurrmba nangangi barrinani dujanya jandanyimuku nangangi, barrinani kudukudu nangangi.
2PE 3:12 Marda narrimi jungku yurlurrmba nangangi nani barri. Marda narrimi milidimba yalunya yingkamuku nangangi marda. Jaliyi ngambala krisjinmuku jungku nani barri, jaliyi ngambala milidimba yalunya nanganginkanyi jangkurranyi Kudkanyi, baki janyulu bukamba yaji mili winyurru Kudwanyi. Baki jangambala jungku kingkarri nangandu mili winyurru marda. Bakarrijbaja bukamba yaji nanamanji janguwanyi. Bakarrijbaja bukamba yaji lalijina, yakarl, baki kamba, baki warrawiji marda.
2PE 3:13 Yanybayi Kud jangkurr miku yangkalambikanyi, janyulu yabimba buyingkinyi laliji baki jamba. Baki ngambala jingkijbangka Kud, janyulu yabimba nanda yaji, janyulu yabimba buyingkinyi laliji baki jamba. Baki nanaba barri ngambala bukambiju jala jungku yurlurrmba nangangi, ngawamba jangambala jungku nanaba nangandu yurrngumba barri. Ngala nanijba barri ngambala yukumbaka nangangi Kudkanyi. Ngambala yukumbaka nanankanyi jalija nyulu yabimba. Barriwa.
2PE 3:14 Ngakinmuku mungkijimuku, ngala narri yukumbaka nangangi Kudkanyi, nyulu yabimbikanyi nanda yaji, baki marda narrili kudanyu balanja jungunkanyi kunymamba nangangi Kudkanyi. Marda narrimi yabimba ngawamba kunyba yaji yurrngumba, baki janarri jungku mardumardu muwa nangangi Kudkanyi. Marda narrimi yurrngumba balanja jungunkanyi kunymamba nani nangangi Kudkanyi.
2PE 3:15 Mankuwa narri nayinda. Yukumbaka Kud yajinyi yurrngumba barri. Nyulu yukumbaka ngambalangi, ngambalaka yangkalambikanyi nangandurri, ngambala ngayangayiykanyi nanganginkanyi jangkurranyi, baki janyulu marrimba ngambalanya mardarda. Nani barri yukumbaka Kud ngambalangi. Marda ngambalangi mungkiji Bul, nyulu marda yanybayi nani barri. Nyulu marda yarrijbayi nanginmannga jangkurr najana. Nanda barri Bul, jala ngambala kudanyu maruka muwa nangangi, wajbayi Bul kunybanyi kulajinyi Kudwanyi. Nyuli wajba Bul kunybanyi jangkurranyi, nyulu karunki narrinya nangangi Kudkanyi. Baki nyulu marda karungka narrinya nanginmannga jangkurranyi.
2PE 3:16 Yarrijbayi kaja jangkurr najana Bulwanyi. Baki manjijba nyuli yingka jangkurr yingkamukuyngkurri, baki yingka jangkurr yingkamukuyngkurri. Kaja jangkurr nyulili manjijba yalundurri. Nyuli manjijba nanginmannga jangkurr barrinani ngayu manjijbangka narrindurri. Kudiya nangangi jangkurr jardibirri ngambala jingkiykanyi. Jardibirri yalu jingkiykanyi, baki nanankardi barri kudiyamuku yalu yanyba nanankanyi jangkurranyi Bulkanyi, nanda yinini jangkurr. Yalu yangkalamba nangangi jangkurr Bulkanyi, mikungangi yalimi jungku jirdi kunybanyi kulajinyi jingkiykanyi nangangi jangkurr Bulkanyi. Yalu yangkalambaka nanda nangangi jangkurr, baki nani marda yalu yangkalambaka nanda yingka jangkurr najana Kudkanyi. Miku yalimi milidimba narrinya duja jangkurranyi. Miku yalimi duja karu narrinya nanankanyi jangkurranyi nanganginkanyi Bulkanyi, baki yalunginkanyi nanamukuyngka wankalamukuyngka jali yarrijba jangkurr Kudkanyi najana. Miku yalimi karu narrinya yalunginkanyi duja jangkurranyi. Miku. Baki nanda balki. Baki nanankardi barri jayalungka janyba. Baki jayalu jungku kurdan yurrngumba barri, mikungangi yalimi duja karu narrinya yalunginkanyi jangkurranyi, Bulkanyi baki wankalamukuyngka. Barriwa.
2PE 3:17 Narri jala ngayu kudanyu maruka muwa narringi, karu nurri narrinya yalungi nanamukuyngka balkimukuyngka milidimbawarrayngka. Ngayu marda Bulwanyi, marda nanamukunyi wankalamukunyi, nurru karuyi narrinya yalungi. Marda narringkimi najbawa yalungi. Marda narrimi miku kuyu yalungi balki jangkurr. Jaliyi narri kuyu yalungi jangkurr, jaliyi narri jungku balki barrinani yalu jungkuka balki, baki miku janarri jandanyimuku nangangi Kudkanyi. Baki miku janarri jungku mili wanka nangandu baku barri.
2PE 3:18 Ngala marda narrimi jingkijba Jisus Krayis, ngambalangi mambuka jala nyulu marrimbawarr mardarda. Marda narrimi mili jingkijba, baki mili yurrngumba barri. Jala narri nulijba jingkiykanyi mili, baki janyulu milidimba narrinya nangangi. Jala narri jingkijba mili baki mili nanganginkanyi jangkurranyi, baki janyulu yabimba kunyba yaji narringi Jisus Krayiswanyi. Janyulu yabimba kunyba yaji narringi. Ngambala wajbangka Jisus Krayis ngamanginkanyi kunybanyi jangkurranyi. Yurrngumba ngambala wajbangka Jisus Krayis ngamanginkanyi kunybanyi jangkurranyi. Nyulu ngambalangi wirimalaru yurrngumba barri. Nanijba, baki baku barri yurrngumba nyulu ngambalangi wirimalaru. Baki nyulu jungkuka wanka nangandu Kudnyina yurrngumba barri. Duja barri nayinda jangkurr. Barriwa barri. Bukamba nayinda jangkurr.
1JO 1:1 Ngayu, niji ngaki Jun, ngayu yarrijbangka nayinda jangkurr narringi. Ngayu karungka narrinya nangangi Jisus Krayiskanyi. Wabula barri, kamambarra barrabarruji, jali mikuyaji jambanyi, mikuyaji wabudanyi, nanamanji kamambarra, nyulili jungku nangandu Kudnyina. Nanda barri nyulili jungku kingkarri nangandu Kudnyina, nanda jali karu jangkurranyi nangangi Kudkanyi. Wabula barri, jali nyulu karrala wayka nanginkurri jambarri, manku nurri nangangi jangkurr, baki najba nurri mankanyi nangangi yamiyudinyi. Marrimba nurri mankanyi nangangi, marniyudinyi. Nyuli yanyba jangkurr nangangi Kudkanyi wankiykanyi mili. Ngayu karungka narrinya nangangi.
1JO 1:2 Mirnajimba nangki Jisus mankanyi, jali nyulu karrala wayka jambarri, baki najba nurri mankanyi yamiyudinyi. Najba nurri Jisus, jali nyulu jungku nurrundu, baki nanankardi barri nurru karungka narrinya nangangi barri. Ngayu karungka narrinya nangangi jala wanka jungku yurrngumba. Wabula kamambarra nyuli jungku nangandu Kudnyina, ngala mirnajimba nangki Jisus nurrungi.
1JO 1:3 Yi. Najba nurri Jisus yabimbikurri ngiruka yaji. Manku nurri nangangi jangkurr, baki nanankardi barri ngayu karungka narrinya nangangi. Jaliyi narri kuyu nayinda jangkurr, baki jangambala malumba jungku, jangambalaka mirnarrijba muwa malumba. Nani barri ngambala jungku malumba bulandu Buwakayu marda nanganginyina jandanyina Jisus Krayisnyina. Ngambala barrinani jandanyimuku nangangi Kudkanyi. Kuyu ngambala yingamali jangkurr nangangi Buwakaya. Mirnarrijba ngambalaka muwa.
1JO 1:4 Ngayu yarrijbangka nayinda jangkurr najana narringi jungunkanyi malumba bulandu Kudnyina marda Jisus Krayisnyina. Jaliyi narri durrijba nanda jangkurr Kudkanyi, baki ngayangayijba janarri nanankanyi jangkurranyi, baki jangambala malumbiju mirnarrijba muwa nangangi kudanyu barri. Barriwa.
1JO 1:5 Mankukiyi nayinda jangkurr nangangi Jisus Krayiskanyi. Nanda Jisus Krayis, nyulu jandanyi Kudkanyi. Nyuli milidimba nurrunya Kudkanyi, baki nurru karungka narrinya nanamannga jangkurranyi. Kud, nyulu barrinani mirnbi. Yurrngumba nyulu barrinani mirnbi. Nanangini mirnbiwanyi minimbaka yaji yurrngumba, baki nani barri Kud nangka minimbaka ngambalangi. Minimbaka nangka ngambalangi, nyulu jungkuka yurlurrmba. Mikuyaji balkinyi nangandu. Nani nyulu barrinani mirnbi.
1JO 1:6 Jaliyi ngambala yanyba, ngambala jingkijba Kud, ngambala jungku nangandu yurrngumba, baki marda ngambalimi durrijba nangangi yuwa, marda ngambalimi yabimba nanda yaji jala ngambalanya karu Kudwanyi. Jaliyi ngambala durrijba nangangi yuwa, baki nanda barrinani ngambala durrijba yubarl kambana. Yuku ngambala najba yaji jilaykanyi kambana. Barriwa. Jaliyi ngambala yanyba, ngambala jingkijba Kud, ngala miku ngambalimi durrijba nangangi yuwa, ngala ngambala jungku balkina yuwana Kudkanyi, baki jujijba ngambala. Ngambala jujijba. Miku ngambalimi jingkijba Kud, miku ngambalimi durrijba nangangi yuwa. Nanda barrinani ngambala jilajba mungana, jala miku ngambalimi najba nanda yubarl jilaykanyi.
1JO 1:7 Ngala jaliyi ngambala jungku kunybana yuwana Kudkanyi yurrngumba barri, baki nanda barrinani ngambala jilajba yubarlina kambana, jala minimbaka yaji kambawanyi. Jaliyi ngambala jungku kunybana yuwana Kudkanyi, baki jingkijba ngambala Kud. Jingkijba ngambala nangangi Jandanyi Jisus Krayis marda. Ngambala jungku malumbiju, ngambalaka mirnarrijba muwa yanybikanyi ngambalaka malumba. Barriwa. Ngala ngambala jungku nani, jaliyi ngambala barimba yaji Kudkanyi, baki janyulu manjamanjamba ngambalangi balki yaji Kudwanyi. Janyulu manjamanjamba nanda balki yaji, janybangangi nangki Jisus ngambalangi, ngambalanginkanyi balkinyi yajinyi. Barriwa.
1JO 1:8 Jaliyi ngambala yanyba, miku ngambalimi yabimba balki yaji, miku ngambalimi barimba yuwa Kudkanyi, baki jujamba ngambalaka. Miku ngambalimi yanyba duja jangkurr. Jujamba ngambalaka barri.
1JO 1:9 Ngala jaliyi ngambala karu Kud ngamanginkanyi balkinyi yajinyi, yabimba jala ngambala, jaliyi ngambala ngindu nanankanyi balkinyi yajinyi, baki janyulu manjamanjamba nanda balki yaji ngambalangi Kudwanyi. Janyulu yabimba nanda jali nyulu karu, janyulu manjamanjamba nanda balki yaji. Miku janyulu mankuwa nanda balki yaji mili. Baki mili jangambala jungku kunybana yuwana Kudkanyi.
1JO 1:10 Nanda naja Kudkanyi yanybaka, miku ngambaliyi jungku kunybana nanganginyina yuwana yurrngumba barri. Ngala jaliyi ngambala yanyba, miku ngambalimi barimba nangangi yuwa, ngambala jungku kunybana yuwana Kudkanyi yurrngumba, jaliyi ngambala yanyba nani, baki ngambala yurlwa nanankanyi jangkurranyi najana Kudkanyi. Jaliyi ngambala yanyba nani, baki nanda barrinani ngambala yanyba Kudkanyi, nyulu jujijbangka. Jujambawarr jangkurr nyulu yanybaka ngambalangi. Ngala mikuwali jujamba yaji Kudwanyi. Miku ngambaliyi jungku kunybana yuwana yurrngumba. Jingkijbangka ngambalanya Kudwanyi, miku ngambaliyi jungku kunybana yuwana yurrngumba. Barriwa.
1JO 2:1 Maruka muwa narringi, barrinani narri ngakinmuku bayamuku. Yarrijba ngayu nayinda jangkurr najana narringi, milidimbikanyi narrinya. Miku nurrimi nulijba narringi barimbikanyi yuwa Kudkanyi. Miku. Kud, ngindu nyulu muwa jala narri yabimba balki yaji. Ngindu nyulu muwa kudanyu barri. Ngala jaliyi narri yabimba balki yaji, baki Jisus Krayiswanyi jala narrinya kandimba, janyulu ngajaka Buwakanya narringi. Janyulu ngajaka Buwakanya, nyulu manjamanjambiji nanda balki yaji narringi. Nanda Jisus Krayis, nyulu jungkuka kunyba, yurlurrmba yurrngumba barri. Baki janyulu ngajaka Kud, nyulu manjamanjambiji nanda balki yaji narringi, jala narri ngindu nanankanyi balkinyi yajinyi.
1JO 2:2 Jala ngambala barimba yuwa Kudkanyi, baki janyulu manjamanjamba ngambalangi balki yaji Kudwanyi. Nanda Jisus, janyba nangki kurndana. Langandaba yali Jisus kurndana, barrinani yalili langandaba nanamuku jalili yabimba balki yaji, barrinani yalili langandaba maninjaku, baki nanda kurdanbawarr. Nani yali langandaba Jisus. Ngala miku nyuliyanyi barimba yuwa Kudkanyi. Miku nyuliyanyi yabimba balki yaji. Miku yingamali. Barriwa. Jala ngambala yabimba balki yaji, baki mardakimi yanyba Kud ngambalangi, marda ngambalakimi janyba. Ngala miku. Miku nyulimi yanyba nani ngambalangi, janybangangi nangki Jisus Krayis nanankanyi yajinyi balkinyi, jala ngambala yabimba. Baki janyulu manjamanjamba nanda ngambalangi balki yaji Kudwanyi, jaliyi ngambala ngindu muwa nanankanyi balkinyi yajinyi. Baki Jisus Krayiswanyi, janyulu ngajaka Kud manjamanjambiji nanda balki yaji, janybangangi nangki Jisus Krayis ngambalanginkanyi balkinyi yajinyi. Janyba nangki Jisus Krayis ngambalanginkanyi balkinyi yajinyi, baki yalunginkanyi balkinyi yajinyi, bukambijuyngka wandijiyana. Janyba nangki bukambijuyngka. Nani barri manjamanjambaja balki yaji bukambijuyngka Kudwanyi, jala nyulu ngajaka Kud Jisus Krayiswanyi.
1JO 2:3 Jaliyi ngambala ngayangayijba nanankanyi yuwanyi jali jirrinyba ngambalanya Kudwanyi, baki ngambala jingkijba Kud. Jingkijba ngambala Kud, jaliyi ngambala ngayangayijba nanganginkanyi jangkurranyi.
1JO 2:4 Jaliyi yanyba nganinyi, “Yi. Ngayu jingkijba Kud.” Jaliyi nyulu yanyba nani, ngala miku nyulimi ngayangayijba nanankanyi jangkurranyi Kudkanyi, baki jujijbangka nyulu. Miku nyulimi yanyba duja jangkurr. Miku nyulimi jingkijba Kud.
1JO 2:5 Ngala nanda nganinyi jala yanyba nyulu jingkijba Kud, jaliyi nyulu ngayangayijba jangkurranyi Kudkanyi, baki nyulu marukangka muwa Kudkanyi. Nanda jala ngayangayijba jangkurranyi Kudkanyi, kudanyu nyulu marukangka muwa Kudkanyi barri. Baki nani barri ngambala jingkijba Kud, nyulu jungkuka ngambalandu kurduluna. Jaliyi ngambala yanyba, jungkuka Kud ngambalandu kurduluna, baki marda ngambalimi jungku kunybana yuwana Kudkanyi. Marda ngambalimi jungku kunyba nanganginyina yuwana, barrinani Jisus Krayis, barrinani nyuli jungku kunybana yuwana Kudkanyi. Barriwa.
1JO 2:7 Ngakinmuku mungkijimuku. Miku ngayimi yarrijba buyingkinyi yuwa narringi. Miku. Ngala ngayu yarrijba nanamannga yuwa, manku jali narri wabula. Manku narri nanamannga yuwa wabula, nanamanji jali narri kuyu nangangi jangkurr Jisus Krayiskanyi. Yarrijba ngayu nanamannga yuwa, karu jali nurrunya Jisus Krayiswanyi. Nayinda nangangi yuwa, marda ngambalakimi maruka muwa, barrinani nyulu marukangka muwa ngambalangi. Manku narri nanda nangangi yuwa wabulinyi.
1JO 2:8 Ngala mili ngayu karungka narrinya nanamannga yuwanyi jala duja. Nyulu marukangka muwa ngambalangi Jisus Krayis, baki karu nyulu ngambalangi, marda ngambalaka maruka muwa bukambiju. Nanda jala maruka muwa nanganginkanyi mungkijinyi, nyulu durrijbangka nanda yuwa yurlurrmba Jisus Krayiskanyi. Nanda barrinani nyulu jilajbangka kambana yajina. Nanangini mirnbiwanyi minimbaka yaji, baki mikuwali damalijba kambana yajina. Jisus Krayis, nyulu barrinani kamba. Nyulu minimbaka ngambalanya nanankanyi yuwanyi yurlurrmba, jilaykanyi yurlurrmba. Nyulu minimbaka ngambalanya, ngambala marukankanyi muwa yingkamukuyngka. Barriwa. Nanda jala yanyba, nyulu jilajbangka kambana yajina, jala yanyba nyulu durrijbangka yuwa Jisus Krayiskanyi, ngala nyulu ngirrangka nangangi mungkiji, miku nyulimi durrijba yuwa Jisus Krayiskanyi. Nyulu jilajbangka barrinani mungana yajina. Miku nyulimi jingkijba wanjawa nyulu jilajbangka. Miku nyulimi minimba nanganginkanyi yuwanyi Jisus Krayiswanyi. Baki mikukimi nanangini durrijba yuwa yurlurrmba Jisus Krayiskanyi. Nanda jala ngirra nangangi mungkiji, nyulu barrinani nanda nganinyi jala mikukimi durrijba yubarl mungana yajina. Barriwa.
1JO 2:12 Yarrijba ngayu nayinda jangkurr narringi, jungku jali Krisjinmuku wulaninyi. Jungku narri barrinani bayamuku nangangi Kudkanyi. Ngala nanijba narri jingkijba Kud, nyulu ngambalangi Buwakanya. Manjamanjamba nyuli narringi balki yaji, Kudwanyi. Manjamanjambayi narringi balki yaji, kuyungangi narri jangkurr nangangi Jisus Krayiskanyi. Barriwa. Yarrijba ngayu nayinda jangkurr narringi, jungku jali Krisjinmuku yurrngumba wabulinyi. Jungku narri barrinani nganinymuku nangangi Kudkanyi, jingkijbangangi narri Kud yurrngumba wabulinyi. Kudanyu narri jingkijba Kud, jungkungangi narri Krisjinmuku yurrngumba wabulinyi. Barriwa. Yarrijba ngayu nayinda jangkurr narringi, jungku jali Krisjinmuku yurrngumba wujininyi. Jungku narri barrinani kaburrwaburr nangangi Kudkanyi. Manjamanjambayi narringi balki yaji Kudwanyi, baki narri durrijba nangangi jangkurr wujininyi yurrngumba barri. Jungku narri ngiruka Kudkanyi. Balanja nyuli narrinya nanangini mambukawanyi Sayidinwanyi. Nulijba nyulu narringi yabimbikanyi balki yaji, ngala narri yurlwa nangangi. Daba narri wakara. Yurlwa narri nangangi. Durrijba narri nangangi jangkurr Kudkanyi yurrngumba barri. Jungku narri ngiruka, jingkijbangangi narri nangangi jangkurr Kudkanyi. Barriwa.
1JO 2:15 Durrijbakiyi nangangi yuwa Kudkanyi. Mikujiyi durrijba nanamuku jala miku yalimi durrijba yuwa Kudkanyi. Yalu jungku balkina yuwana Kudkanyi. Mikujiyi nani jungku, barrinani yalu. Jaliyi narri durrijba nanamuku, baki miku narrimi maruka muwa nangangi Buwakaya. Marda narrimi kunybijba nangangi Buwakaya yurrngumba barri. Yalu nulijba kajanyi yajinyi. Miku yalimi nulijba nangangi Kudkanyi.
1JO 2:16 Marda miku narrimi maruka muwa yajinyi, barrinani dungalanyi, barrinani yingkanyi nanganginkanyi kayikayinyi, barrinani yabimbikanyi balki yaji yingkamukuyngka. Marda miku narrimi maruka muwa nuliykanyi yajinyi jala miku narringinmirra yaji. Marda miku narringkimi barrarrakijba. Marda miku narringkimi mankumanku, narri jungku barrinani walkurra mambuka bukambijuyngka. Jaliyi narri yabimba yaji nani, baki miku narriyi durrijba nangangi yuwa Buwakaya. Nani barri yalu jungku, jala yalu miku marukankanyi muwa nangangi Buwakaya, ngala yalungka maruka muwa yalungi.
1JO 2:17 Marda miku narrimi jungku barrinani yalu, janybangangi jayalungka. Jayalungka janyba, ngala jaliyi narri durrijba nangangi yuwa nangangi Kudkanyi, baki janyulu wankamba narrinya mili Kudwanyi. Jaliyi narri maruka muwa Kudkanyi, baki durrijba nangangi yuwa, baki janarri jungku wanka nangandu Kudnyina yurrngumba barri. Barriwa.
1JO 2:18 Ngakinmuku mungkijimuku. Karu nyuli narrinya Jisus Krayiswanyi. Karuyi narrinya nanankanyi jujambawarrayngka, jalija badajba. Janyulu badajba nanda yingka, baki janangka yanyba nyulu Krayis. Ngala miku janyulu Krayis. Janyulu ngirrawarr nangangi Jisus Krayiskanyi. Nani barri karuyi narrinya Jisus Krayiswanyi, baki nurru marda, karu nurri narrinya nanankanyi ngirrawarrayngka. Kajamuku ngirrawarrmuku Jisus Krayiskanyi, yali badajba. Baki winyurru barri nanda yingka badajbaja, nanda walkurra ngirrawarr Jisus Krayiskanyi. Kaja ngirrawarrmuku yali badajba, baki ngambala jingkijba nanda walkurra ngirrawarr, janyulu badajba winyurru marda.
1JO 2:19 Wabula barri, nanamuku ngirrawarrmuku, yalili jungku ngambalandu Krisjinmukunyina, ngala yali barlba ngambalanbunanyi. Miku yaliyanyi duja Krisjinmuku, baki yali yingijba ngambalanya. Yingijbayi ngambalanya, mikungangi yalu duja Krisjinmuku. Jaliyanyi yalu jungku ngiruka nangangi Jisus Krayiskanyi, baki yaliyanyi yuwaji jungku ngiruka ngambalandu Krisjinmukunyina. Ngala yali yingijba ngambalanya, baki ngambala jingkijba yalunya, miku yalu duja Krisjinmuku.
1JO 2:20 Ngala narri jingkijba nanda duja jangkurr, manjijbayingangi Jisus Krayiswanyi nanda Kunyba Ngarndu Kudkanyi narrindurri. Jungkuka nyulu narrindu mankanyina, nanda Kunyba Ngarndu Kudkanyi, baki nanijba barri narri jingkijba nanda jala duja.
1JO 2:21 Yarrijba ngayu nayinda jangkurr narringi, jingkijbangangi narri nanda jala duja. Miku nyulimi jujijbawarr Kud. Miku. Karungka nyulu duja jangkurr yurrngumba. Ngala nanda mambuka wuwarranyi, nyulu jujijbangka yurrngumba. Baki nyulu karungka yingkamuku, yalu jujambiji narrinya.
1JO 2:22 Wanyi nanda jujijbawarr, jala jujamba narrinya. Wanyi. Nyulu nanda jala karu narrinya Jisuskanyi, miku nyulimi Krayis. Nanda jala karu narrinya nani, nyulu jujijbawarr. Miku nangangi jangkurr duja. Nyulu ngirrawarr Krayiskanyi. Yangkalamba nangki bulanbunanyi Buwakanyananyi marda Jandanyinanyi. Miku nyulimi mili durrijba kunyba yuwa Kudkanyi.
1JO 2:23 Nanda jala miku nyulimi kuyu jangkurr Jandayngkanyi, baki miku nyulimi kuyu nangangi jangkurr Buwakayu. Ngala nanda jala kuyu jangkurr Jandayngkanyi, baki nyulu kuyu jangkurr Buwakaya marda. Jaliyi nyulu jingkijbangka Jandanyi, baki nyulu jingkijbangka Buwakaya marda. Barriwa.
1JO 2:24 Marda narringkimi yurrngumba mankumanku nanankanyi jangkurranyi, jali nurru karu narrinya wabula. Nurru, jali manjijba Jisus Krayiswanyi, nurru karu narrinya duja jangkurranyi Jisus Krayiskanyi. Jaliyi narringka mankumanku nanankanyi jangkurranyi, karu jali nurru narrinya wabula barri, jaliyi narringka mankumanku nanankanyi jangkurranyi, baki janarri jingkijba bulanya, Jandanyi marda Buwakanya, baki janarri jungku bulandu, janarri yanyba bulangi.
1JO 2:25 Jaliyi narri durrijba bulangi yuwa yurrngumba, baki janarri jungku bulandu yurrngumba. Janarri jungku wanka bulandu yurrngumba barri. Nani barri karuyi ngambalanya Jisus Krayiswanyi.
1JO 2:26 Yarrijba ngayu nayinda jangkurr narringi. Karu ngayu narrinya yalungi, nanamukuyngka jala nulijba jujambikanyi narrinya. Yalu ngirrawarrmuku Jisus Krayiskanyi. Nulijba yalu narringi jungunkanyi balkina yuwana Kudkanyi. Yarrijba ngayu nayinda jangkurr karunki narrinya yalungi.
1JO 2:27 Ngala nyuli yawumba nanda Kunyba Ngarndu Kudkanyi narrindurri mankanyiyurri Jisus Krayiswanyi. Wajba nyuli narrinya nanganginkanyi Kunybanyi Ngarndunyi. Ngala nangangi Ngarndu jungkuka narrindu, janyulu milidimba narrinya. Karu narrinya janyulu nanankanyi duja jangkurranyi. Jaliyi yingkamukunyi yalu jujamba narrinya, baki nanangini Ngarnduwanyi, janyulu karu narrinya duja jangkurranyi. Yurrngumba janyulu milidimba narrinya bukamba duja jangkurranyi. Miku nyulimi milidimba balkinyi jangkurranyi. Miku. Baki jaliyi narri ngayangayijba nanganginkanyi jangkurranyi, baki janarri jungku kandimuku Jisus Krayiskanyi yurrngumba barri. Barriwa.
1JO 2:28 Ngakinmuku mungkijimuku. Marda narrimi jungku kandimuku nangangi Jisus Krayiskanyi yurrngumba. Baki miku janarri marrala yajinyi jalija nyulu badajba wayka nanginkurri. Miku janarri manyirru nangangi, jungkukangangi narri kunyba nangangi. Janyulu mili wijba nanginkurri yajiyurri bayngkani baku.
1JO 2:29 Jingkijba narri Jisus Krayis, kunyba nyulu jungku, yurlurr yurrngumba barri. Jingkijba narri Jisus Krayis, baki marda narrimi jingkijba nayinda jangkurr marda. Jaliyi narri jungku kunybana yuwana Kudkanyi, baki janyulu maruka muwa narringi. Janarri jungku barrinani bayamuku nangangi Kudkanyi. Barriwa.
1JO 3:1 Jandanyimuku Kudkanyi. Marukangka nyulu muwa ngambalangi Kud. Kudanyu nyulu marukangka muwa ngambalangi, nanganginmukuyngka jandanyimukuyngka. Nani barri, nyulu nijarrijba ngambalanya. Jungku ngambala barrinani nanganginmuku jandanyimuku. Ngala nanamukunyi yingkamukunyi jala yalu miku durrijba yuwa Kudkanyi, miku yalimi jingkijba ngambalanya. Miku yalimi jingkijba ngambalanya, ngambala jandanyimuku Kudkanyi, mikungangi yalimi jingkijba Kud.
1JO 3:2 Ngakinmuku mungkijimuku. Nayimanji barri ngambala jungku jandanyimuku Kudkanyi. Baki ngambala jingkijba, jangambala jungku barrinani Jisus Krayis baku barri, jalija nyulu wijba nanginkurri jambarri. Nanamanji barri jangambala jungku yingkayudi mankanyiyudi. Janyulu wajba ngambalanya yingkanyi mankankanyi. Baki nanda yingka mankanyi ngambalangi, nanda barrinani nangangi mankanyi Jisus Krayiskanyi. Miku ngambalimi nanijba jingkijba nanda buyingkinyi mankanyi ngambalangi, ngala nayi ngambala jingkijba, jangambala jungku barrinani Jisus Krayis. Jangambala najba nanda yingka mankanyi nangangi Jisus Krayiskanyi, jalija nyulu wijba, baki jingkijba ngambala, jangambala jungku barrinani nyulu.
1JO 3:3 Jangambala mirnarrijba muwa jalija nyulu wijba kingkarrinya. Jangambala mirnarrijba muwa nanamanji barri. Baki nanijba ngambala jungku kunybana yuwana Kudkanyi, nulijbangangi ngambala jungunkanyi barrinani Jisus Krayis. Durrijba ngambala nangangi kunyba yuwa, nulijbangangi ngambala jungunkanyi barrinani nyulu, jalija nyulu wijba.
1JO 3:4 Jaliyi ngambala yabimba balki yaji, baki ngambala jungku balkina yuwana nangangi Kudkanyi. Jaliyi ngambala jungku balki nanganginyina yuwana, baki ngambala barimba nanda yuwa Kudkanyi.
1JO 3:5 Jingkijba narri Jisus Krayis barri, badajba nyuli kingkarrinya janybikanyi nangka ngambalangi. Yabimba ngambala balki yaji, baki marda ngambalakimi janyba, jungkungangi ngambala balkina yuwana Kudkanyi. Ngala janyba nangki Jisus Krayis, baki miku ngambalakiyi janyba. Jala ngambala ngindu ngamangnkanyi balkinyi yajinyi, baki manjamanjambaka nanda balki yaji ngambalangi Kudwanyi. Janyba nangki Jisus Krayis ngambalangi, ngala miku nyuliyanyi yabimba balki yaji. Miku. Jungku nyuli kunybana yuwana Kudkanyi yurrngumba barri.
1JO 3:6 Baki nanda jala jungkuka kandi nangangi Jisus Krayiskanyi, miku nyulimi yabimba balki yaji yurrngumba. Miku. Miku nyulimi barimba yuwa Kudkanyi yurrngumba barri. Jungkuka nyulu kunyba nangangi Jisus Krayiskanyi. Ngala nanda jala jungkuka balkina yuwana Kudkanyi yurrngumba barri, baki miku nyulimi kandi nangangi Jisus Krayiskanyi. Miku nyulimi najba Jisus Krayis, baki miku nyulimi jingkijba Jisus Krayis. Miku. Barriwa.
1JO 3:7 Narri, jandanyimuku Kudkanyi. Yingkamuku jala miku yalimi jandanyi Kudkanyi, nulijba yalu jujambikanyi narrinya. Ngala mikujiyi manku yalungi jangkurr. Miku. Jala narri yabimba kunyba yaji, baki narri jungku yurlurrmba yuwana Kudkanyi, barrinani nanda Jisus Krayis, nyulu jungkuka yurlurrmba kunybana yuwana Kudkanyi yurrngumba barri.
1JO 3:8 Ngala jaliyi narri yabimba balki yaji yurrngumba, baki narri jungku barrinani jandanyimuku nangangi Sayidinkanyi. Nanda Sayidin, nyulu mambuka wuwarranyi. Janarri jungku barrinani nanganginmuku jandanyimuku, jaliyi narri yabimba balki yaji yurrngumba. Jungku nyulili balkina yuwana yurrngumba wabulinyi. Wankalana baki nanijba barri, yurrngumba nyulili yabimba balki yaji Kudkanyi. Ngala manjijba nyuli nangangi Jandanyi Kudwanyi. Manjijba nyuli Jisus Krayis dabanki wakara nanda mambuka wuwarranyi, kurrkunbiji nangangi balki yaji. Baki jayalu yurlwa Sayidinkanyi, nanamuku jandanyimuku Kudkanyi.
1JO 3:9 Jala narri jungku jandanyimuku Kudkanyi, baki miku narriyi yabimba balki yaji yurrngumba. Miku narriyi yabimba balki yaji yurrngumba, jungkungangi narri jandanyimuku nangangi Kudkanyi. Miku narriyi yabimba balki yaji yurrngumba, Kudngangi nyulu narringi Buwakanya.
1JO 3:10 Nani barri ngambala jingkijba yalunya jala jandanyimuku Kudkanyi. Ngala yalu, yabimba jala yalu balki yaji yurrngumba, yalu jandanyimuku nangangi Sayidinkanyi. Miku yalimi jandanyimuku Kudkanyi, yabimbangangi yalu balki yaji yurrngumba. Miku yalimi maruka muwa yingkamukuyngka. Baki jala miku yalimi maruka muwa yingkamukuyngka, baki miku yalimi jungku kunybana yuwana Kudkanyi. Miku yaliyi nangangi jandanyimuku Kudkanyi. Barriwa.
1JO 3:11 Karu nurri narrinya wabula nanginkanyi jangkurranyi. Marda ngambalakimi maruka muwa. Manku narri nanda jangkurr wabulinyi.
1JO 3:12 Mikujiyi jungku barrinani nanda wankala jali jungku barrabarruji. Nangangi niji Kayin. Nanangini Kayinwanyi kurdanbayi nangangi kanyiya, baki nyuli jungku barrinani jandanyi Sayidinkanyi. Nyuli kurdanbawarr. Nyuli kurdanba nangangi kanyiya. Wanyingkanyi nyuli kurdanba nangangi kanyiya. Kurdanba nyuli nangangi kanyiya, kijiwijbayingangi kanyiyanyi, nanganginkanyi jali yabimba kunyba yaji yurrngumba. Ngala nanangini Kayinwanyi, yabimbayi nanda balki yaji yurrngumba. Kijiwijba nyuli nanganginkanyi kanyiyanyi, jungkungangi nangangi kanyiya kunyba Kudkanyi. Ngala nanda Kayin, miku nyuliyanyi jungku kunyba barrinani nangangi kanyiya. Baki nanankardi nyuli kurdanba nangangi kanyiya. Barriwa.
1JO 3:13 Miku narrimi manmala, ngakinmuku mungkijimuku. Yingkamuku, jalimi yalu miku maruka muwa Kudkanyi, yalu ngirrangka narrinya. Ngala mikujiyi manmala, jala yalu ngirrangka narrinya.
1JO 3:14 Ngala ngambala jingkijba, jungku ngambala jandanyimuku nangangi Kudkanyi, marukangangi ngambala muwa yalungi yingkamukuyngka. Jungkuka ngambala nangandu Kudnyina, baki nyulu yanybaka ngambalangi, baki ngambala yanyba nangangi barri. Nyulu ngambalangi Buwakanya, marukangangi ngambala muwa yalungi yingkamukuyngka. Baki ngambala jingkijba, jangambala jungku wanka mili nangandu Kudnyina yurrngumba. Ngala nanamuku yingkamuku, miku yalimi maruka muwa ngambalangi, mikungangi yalimi maruka muwa nangangi Kudkanyi. Ngirra ngamanjalu, baki miku yalimi jingkijba Kud, mikungangi nyulu yalungi Buwakanya, baki miku jayalu jungku mili wanka nangandu Kudnyina yurrngumba. Barriwa.
1JO 3:15 Jaliyi nganinyiwanyi kurdanba yingka, baki nanda balki. Miku nyulimi maruka muwa Kudkanyi. Miku nyulimi jandanyi Kudkanyi. Baki jaliyi nganinyiwanyi ngirra yingka, baki nanda balki marda. Miku nyulimi jandanyi Kudkanyi jala nyulu ngirra yingka. Jaliyi nganinyiwanyi ngirra yingka, baki nanda barrinani nyulu nulijba kurdanbikanyi nanda yingka. Yanybaka Kud nangangi, nyulu kurdanbawarr. Miku nyulimi jungku nangandu Kudnyina.
1JO 3:16 Jingkijba ngambala Jisus Krayis, maruka nyuli muwa ngambalangi kudanyu barri. Maruka nyuli muwa ngambalangi, baki janyba nangki ngambalangi, ngamanginkanyi balkinyi yajinyi. Nani barri, marda ngambalakimi janyba yalungi, yingkamukuyngka.
1JO 3:17 Jaliyi nganinyi jungku kajayudi dungalayudi, ngala nangangi mungkiji jungkuka mikuyaji dungalanyi, baki marda nyulimi wajba nangangi mungkiji dungalanyi. Ngala jaliyi miku nyulu wajba dungalanyi, baki miku nyulimi maruka muwa nanankanyi mungkijinyi. Baki miku nyulimi maruka muwa Kudkanyi, jalimi miku maruka muwa nanganginkanyi mungkijinyi.
1JO 3:18 Ngakinmuku mungkijimuku. Jaliyi ngambala maruka muwa nganiyngkanyi baki marda ngambalimi yabimba kunyba yaji nanankanyi nganiyngkanyi. Marda miku ngambalimi muningka yanyba, “Maruka ngayu muwa nganyi.” Marda ngambalimi miku muningka yanyba nani nangangi, ngala marda ngambalimi yabimba kunyba yaji nangangi, jala ngambala maruka muwa nangangi. Barriwa.
1JO 3:19 Jingkijba ngambala, ngambala jungkuka yurlurrmba Kudkanyi jala ngambala maruka muwa yalungi yingkamukuyngka, baki miku ngambaliyi marrala nangangi Kudkanyi. Jungku ngambala mardumardu muwa,
1JO 3:20 jingkijbangangi ngambala nayi. Jala ngambalaka yanyba muwa, yiningki ngayu jungku barimba Kudkanyi, yiningki miku, baki marda ngambalakimi mankumanku Kudkanyi. Nyulumirra walkurra ngambalangi. Jingkijbangka nyulu bukamba yaji. Jingkijbangka nyulu ngambalanya. Jingkijbangka nyulu nanda yaji jala ngambala yabimba, baki jala ngambalaka mankumanku. Jingkijbangka nyulu ngambalanya, maruka ngambala muwa yalungi, baki maruka ngambala muwa nangangi. Jingkijbangka nyulu bukamba nayinda, baki nanankardi ngambala jungku mardumardu muwa.
1JO 3:21 Baki jingkijba ngambalaka, ngambala jandanyimuku nangangi Kudkanyi, baki nyulu ngambalangi Buwakanya, jungkukangangi ngambala mardumardu muwa, jala ngambalaka yanyba muwa.
1JO 3:22 Jala ngambala ngajaka Kud yajinyi, baki nyulu wajba ngambalanya nanankanyi yajinyi, ngajaka jala ngambala. Wajba nyulu ngambalanya yajinyi, ngayangayijbangangi ngambala nanankanyi jangkurranyi, jirrinyba jala nyulu ngambalanya. Ngayangayijba ngambala Kudkanyi, baki jungkuka nyulu mirnarrijba muwa ngambalangi.
1JO 3:23 Nayinda jangkurr nyuli jirrinyba ngambalanya Jisus Krayiswanyi, marda ngambalimi kuyu nangangi jangkurr Jisus Krayiskanyi, nyulu Jandanyi nangangi Kudkanyi. Baki mili nyuli jirrinynba ngambalanya, marda ngambalakimi maruka muwa. Nani nyuli jirrinyba ngambalanya.
1JO 3:24 Jala ngambala ngayangayijba nanankanyi jangkurranyi, baki jungkuka Kud ngambalandu. Nyulu jungkuka ngambalandu, marda ngambala jungkuka nangandu Kudnyina. Nanda ngambala jingkijba, yawumbayingangi nangangi Kunyba Ngarndu ngambalandu Kudwanyi. Barriwa.
1JO 4:1 Ngakinmuku kandimuku. Kudiyamuku yanyba yalungki, nanda Kunyba Ngarndu Kudkanyi jungkuka yalundu, ngala yalu jujambawarr. Karu yalu yingkamuku nayi, “Nurruja yanyba nangangi jangkurr Kudkanyi.” Jilalajba yalu wandijiyana. Karu yalunjalu nayi, “Nurruja yanyba nangangi jangkurr Kudkanyi.” Nani yalunjalu karu, ngala yalu jujambawarr. Miku yalungi jangkurr duja. Yalu jujambawarr. Mikujiyi kuyu nanda jangkurr, yanyba jala yalungka. Ngala balanjakiyi yalunya jingkiykanyi nanda jangkurr, jaliyi yalu jungku duja. Balanjakiyi yalunya, jaliyi yalu jungku duja.
1JO 4:2 Balanjakiyi yalunya. Yiningki jungkuka nanda Kunyba Ngarndu Kudkanyi yalundu, yiningki miku. Nayi barri marda narrimi balanja yalunya. Nanda jala yanybaka Jisuskanyi, nanda nganinyi Jisus, nyulu Krayis, manjijba jali Kudwanyi, nanda jala yanyba nani, baki jingkijba narri, jungkuka nanda Kunyba Ngarndu Kudkanyi nangandu.
1JO 4:3 Ngala nanda jala yanybaka Jisuskanyi, miku nyulu Krayis, miku nyulu nanda jali manjijba Kudwanyi, nanda jala yanybaka nani barri, narri jingkijba, mikukimi jungku Kunyba Ngarndu Kudkanyi nangandu. Jujijbangka nanda, mikungangi jungkukimi nanda Kunyba Ngarndu Kudkanyi nangandu. Ngala nanda ngarndu jala jungku nangandu, nanda nangangi ngarndu Sayidinkanyi. Yanybayi Jisus nanankanyi balkinyi ngarndunyi, janyulu badajba, baki badajbayi nanda balki ngarndu. Jungkuka nyulu yalundu mankanyina, nanamukunyina jujambawarranyina.
1JO 4:4 Ngala narri jungkuka jandanyimuku Kudkanyi. Jungkuka nanda Kunyba Ngarndu Kudkanyi narrindu, baki narri ngiruka. Ngiruka narri jungku nangangi Kudkanyi. Ngala yalu jala jungku balkiyudi ngarnduyudi, miku yalimi jungku ngiruka Kudkanyi. Ngawamba yalu jungkuka ngiruka nganiyngkanyi. Jungkuka Kud mili ngiruka Sayidinkanyi, baki nanankanyi narri mili ngiruka yalungi, baki daba yalunya wakara.
1JO 4:5 Ngawamba yalu jingkijba yaji jambana, miku Kudkanyi, baki yanyba yalu yajinyi nayiba jambana. Yanyba yalu yajinyi, nulijba jala yalu, barrinani mamanyi, barrinani dungalanyi. Nani barri yalu yanyba, baki yingkamukunyi, manku yalu nanda jangkurr, nulijba yalu nanankanyi yajinyi marda, marukangangi yalu muwa nanankanyi yajinyi.
1JO 4:6 Ngala ngambala jungkuka jandanyimuku Kudkanyi, baki ngambala jingkijba Kud. Baki nanamuku jala yalu jingkijba Kud, manku yalu ngambalangi jangkurr. Jala yalu manku ngambalangi jangkurr, baki jingkijba ngambala yalunya, jungkuka nanda Kunyba Ngarndu Kudkanyi yalundu mankanyina. Ngala nanamuku jala yalu miku jingkijba Kud, miku yalimi manku ngambalangi jangkurr, baki nanankardi ngambala jingkijba yalunya, nanda balki ngarndu jungkuka yalundu mankanyina. Barriwa.
1JO 4:7 Ngakinmuku kandimuku. Marda ngambalakimi maruka muwa. Marda ngambalakimi maruka muwa, marukangkangangi muwa ngambalangi Kud. Jaliyi ngambala jingkijba Kud, jaliyi ngambala jandanyimuku nangangi, baki jangambalaka maruka muwa. Jangambalaka maruka muwa, barrinani nyulu marukangka muwa ngambalangi.
1JO 4:8 Ngala jaliyi miku ngambalakimi maruka muwa, baki miku ngambaliyi jingkijba Kud, miku ngambaliyi jungku jandanyimuku nangangi Kudkanyi. Miku ngambaliyi ngayangayijba nanganginkanyi jangkurranyi, karungangi nyulu ngambalanya, marda ngambalakimi maruka muwa. Jingkijba ngambala Kud, nyulu marukangka muwa ngambalangi.
1JO 4:9 Nani barri ngambala jingkijba Kud, manjijbangangi nyuli nangangi Jandanyi nanginkurri jambarri. Ngawamba yingamali nangangi Jandanyi, mikuyaji yingkanyi, ngala manjijba nyuli nangangi Jandanyi. Miku nyulimi nulijba ngambalangi jungunkanyi kurdan yurrngumba. Miku. Manjijba nyuli nangangi Jandanyi, janybikanyi nangka ngamanginkanyi balkinyi yajinyi. Janyba nangki Jisus Krayis ngamanginkanyi balkinyi yajinyi, baki yuku ngambala jungku wanka nangandu Kudnyina yurrngumba. Yuku ngambala jungku wanka yurrngumba, marukangangi nyuli ngambalangi muwa Kud. Nani barri nyuli maruka muwa ngambalangi. Waluku nyuli maruka muwa ngambalangi, baki manjijbayi nangangi jandanyi janybikanyi nangka ngambalangi. Baki yuku ngambala jungku wanka nangandu Kudnyina yurrngumba. Barriwa.
1JO 4:11 Ngakinmuku mungkijimuku. Nani barri nyuli maruka muwa ngambalangi Kud. Marda ngambalakimi maruka muwa nani, nyulungangi marukangka muwa ngambalangi.
1JO 4:12 Mikukiyanyi nganinyiwanyi najba Kud. Miku. Ngala jaliyi ngambalaka maruka muwa, baki nyulu jungkuka ngambalandu kurduluna yurrngumba. Baki yuku ngambala maruka muwa yalungi yingkamukuyngka. Yuku ngambala maruka muwa kudanyu yalungi, jungkukangangi nyulu ngambalandu kurduluna.
1JO 4:13 Nayi barri ngambala jingkijba Kud, nyulu jungkuka yurrngumba ngambalandu, baki ngambala jungkuka nangandu yurrngumba. Jingkijba ngambala nani barri, yawumbangangi nyuli nangangi Kunyba Ngarndu kalawunyi ngambalandu mankanyina. Nani barri nyulu jungkuka ngambalandu, baki marda ngambala jungkuka nangandu.
1JO 4:14 Baki nurru barri, najba nurrili nanda Jandanyi nangangi Kudkanyi. Najba nurrili, bakili karu nurri yingkamuku nangangi. Karu nurrili yalunya Jandayngkanyi, manjijba jali Kudwanyi. Manjijba nyuli nangangi Jandanyi Jisus, nyulu marrimbikanyi mardarda bukambiju wandijiyana.
1JO 4:15 Jala nganinyi yanyba nayi barri, “Jingkijba ngayu nanda nganinyi Jisus, nyulu Jandanyi nangangi Kudkanyi. Jandanyi nyulu nangangi Kudkanyi.” Jala nganinyi yanyba nani, baki jungkuka Kud nangandu kurduluna, baki nyulu jungkuka nangandu Kudnyina kurduluna.
1JO 4:16 Baki ngambala, jingkijba ngambala Kud, nyulu marukangka muwa ngambalangi. Jingkijba ngambala nanda duja. Kudanyu nyulu marukangka muwa ngambalangi, jala ngambala maruka muwa nangangi. Baki jungkuka Kud ngambalandu kurdurluna, baki ngambala jungkuka nangandu Kudnyina kurduluna.
1JO 4:17 Yuku ngambala maruka muwa yalungi yingkamukuyngka, marukangkangangi muwa ngambalangi Kud. Yuku ngambala maruka muwa yalungi, jungkukangangi Kunyba Ngarndu Kudkanyi ngambalandu mankanyina. Baki miku ngambaliyi marrala. Baku barri, jalija nyulu wijba Jisus Krayis, baki miku ngambaliyi marrala. Miku ngambaliyi marrala, jalija nyulu karrinjarrijba ngambalanya walu nangandu. Miku ngambaliyi marrala, yanybangangi janyulu nyulu ngambalangi, ngambala wankiykanyi mili nangandu. Jaliyi ngambala maruka muwa Kudkanyi yurrngumba, jaliyi ngambala ngayangayijba nanganginkanyi jangkurranyi, baki miku ngambaliyi marrala, jalija ngambala karrinja walu nangandu. Miku ngambaliyi marrala, miku, marukangkangangi muwa ngambalangi Kud, baki marukangka ngambala muwa yalungi yingkamukuyngka. Ngala nanda jala miku maruka muwa Kudkanyi, jala miku maruka muwa yingkamukuyngka, janyulu nyulu marrala, jalija wijba Jisus Krayis. Janyulu marrala, jalija nyulu karrinja walu nangandu Jisus Krayisnyina. Barriwa.
1JO 4:19 Marukangka ngambalaka muwa, walukungangi Kud, nyulu marukangka muwa ngambalangi yurrngumba wabulinyi.
1JO 4:20 Jaliyi yanyba nganinyi, nyulu marukangka muwa Kudkanyi, ngala nyulu ngirra nangangi mungkiji, baki jujijbangka nyulu. Jaliyi nyulu maruka muwa Kudkanyi, baki miku nyuliyi ngirra nangangi mungkiji. Jaliyi nyulu ngirra nangangi mungkiji, baki miku nyuliyi maruka muwa Kudkanyi. Jaliyi miku nyulimi maruka muwa nanganginkanyi mungkijinyi, jala nyulu najba, baki yanka nyulu maruka muwa Kudkanyi, jala miku nyulimi najba. Miku nyuliyi maruka muwa Kudkanyi, jaliyi miku nyulimi maruka muwa nanganginkanyi mungkijinyi. Barriwa.
1JO 4:21 Nayi nyuli jirrinyba ngambalanya Jisus Krayiswanyi, “Jaliyi ninji maruka muwa Kudkanyi, baki marukakiyi muwa nganyingkanyi mungkijinyi marda.” Nani barri nyuli jirrinyba ngambalanya Jisus Krayiswanyi, ngambala marukankanyi muwa yalungi yingkamukuyngka. Barriwa.
1JO 5:1 Nanda jala jingkijbangka Jisus, nyulu Krayis, baki yurrngumba nyulu jungkuka Jandanyi nangangi Kudkanyi. Nanda jala marukangka muwa Buwakaya, baki nyulu marukangka muwa nanganginkanyi Jandayngkanyi marda. Jala nyulu marukangka muwa Buwakaya Kudkanyi, baki nyulu marukangka muwa bukambijuyngka, nanganginkanyi jandayngkanyi Kudkanyi.
1JO 5:2 Jala ngambala maruka muwa Kudkanyi, baki ngambala ngayangayijba nanganginkanyi jangkurranyi, jala nyulu jirrinyba ngambalanya. Jala ngambala yabimba nanda yaji jala nyulu jirrinyba ngambalanya, baki ngambala maruka muwa yalungi, nanganginkanyi jandayngkanyi. Miku nyulimi jirrinyba ngambalanya yabimbikanyi jardibirri yaji. Miku. Yuku ngambala yabimba bukamba yaji, jirrinyba jala nyulu ngambalanya.
1JO 5:4 Jirrinybaka ngambalanya jangkurranyi Kudwanyi, baki yuku ngambala ngayangayijba nanganginkanyi jangkurranyi. Yuku ngambala ngayangayijba, jingkijbangangi ngambala Kud, nyuli yawumba nangangi Kunyba Ngarndu ngambalandu. Jala ngambala jungku Kunybayudi Ngarnduyudi, baki yuku ngambala ngayangayijba nanganginkanyi jangkurranyi. Baki yurlwa ngambala yalungi, nanamukuyngka balkimukuyngka milidimbawarrayngka. Yurlwa ngambala yalungi, jungkungangi ngambala mili ngiruka yalungi Kunybayudi Ngarnduyudi. Yuku ngambala jungku mili ngiruka yalungi, jingkijbangangi ngambala Jisus, nyulu Jandanyi Kudkanyi. Barriwa.
1JO 5:6 Nanda Jisus Krayis, nyulu nanda jali manjijba Kudwanyi. Nyulu nanda jali ngurrunba wabudana Junwanyi Ngurrunbawarranyi. Nyulu nanda jali nangka janyba kurndana. Nyulu nanda Jandanyi nangangi Kudkanyi yurrngumba. Mikukiyanyi yarrijba nangangi Jandanyi Kudwanyi nanamanji jali ngurrunba Jisus wabudana Junwanyi. Miku. Miku nyuliyanyi yarrijba nangangi Jandanyi nanamanji. Yurrngumba nyuli Jandanyi Kudkanyi bardardanji. Manjijba nyuli nanda Jisus marrimbikanyi nyuli ngambalanya mardarda bukambiju. Janyba nangki kurndana, ngala wankambayi mili nanda Kudwanyi. Jungkuka nyulu wanka nangandu Kudnyina yurrngumba, nyulungangi Jandanyi Kudkanyi.
1JO 5:7 Nyuli yawumba nangangi Kunyba Ngarndu ngambalandu Kudwanyi, baki nanangini Ngarnduwanyi karungka ngambalanya duja jangkurranyi. Nyulu karungka ngambalanya Jisuskanyi, nyulu Krayis, nyulu Jandanyi Kudkanyi. Murrkuwanyi yajiwanyi, yalu minimbaka ngambalanya Jisuskanyi, nyulu Jandanyi Kudkanyi. Minimbaka yalu ngambalanya Jisuskanyi. Nanangini Kunybawanyi Ngarnduwanyi Kudkanyi, nyulu karungka ngambalanya Jisuskanyi. Marda jali nyulu ngurrunba Jisus wabudana Junwanyi Ngurrunbawarranyi, baki nanamanji Kudwanyi, nyuli karu yalunya Jisuskanyi, nyulu nangangi Jandanyi. Marda jali nangka janyba Jisus, baki mili wankijba nyuli. Nanangini ngirukawanyi yajiwanyi karungka ngambalanya Jisuskanyi, nyulu Jandanyi Kudkanyi. Kujarra yingamali yaji yalu yanybaka nanamannga jangkurranyi nangangi Jisuskanyi, nyulu Jandanyi Kudkanyi. Wabula nyulili jungku nangandu Kudnyina, baki manjijbayi Jisus bardardanji wayka jambarri Kudwanyi, baki baku barri wijbayi Jisus kingkarri nangandurri Kudyurri. Baki nanankanyi jingkijba ngambala Jisus, nyulu Jandanyi Kudkanyi.
1JO 5:9 Jaliyi ngamanya karu yajinyi nganinyiwanyi, baki yiningki ngambaliyi kuyu nangangi jangkurr, yiningki miku. Ngala jaliyi Kudwanyi ngamanya karu yajinyi, baki kuyu ngambala nanda jangkurr nangangi, jingkijbangangi ngambala nanda jangkurr duja Kudkanyi. Miku nyulimi jujijbawarr. Duja nanda jangkurr nangangi. Baki Kudwanyi ngambalanyi karu Jisuskanyi, nanda Jisus nyulu nangangi Jandanyi. Ngala jaliyi miku kuyu nanda jangkurr Kudkanyi nganinyiwanyi, baki nanda barrinani nyulu yanybaka Kudkanyi, nyulu jujijbawarr. Nanda balki jangkurr, jingkijbangangi ngambala Kud miku nyulimi jujijbawarr. Marda ngambalimi kuyu nanda jangkurr Kudkanyi. Nanda Jisus, yurrngumba nyulu nangangi Jandanyi Kudkanyi.
1JO 5:11 Baki nayi ngambala jingkijba barri, Kudwanyi nyulu wankamba ngambalanya yurrngumba. Nanijba ngambala jungku wankan nayiba jambana, ngambala nanganginmuku jandanyimuku. Yurrngumba ngambala nanganginmuku jandanyimuku, nanijba baki baku barri. Bayngkani jalija ngambalaka janyba, baki mili jangambala jungku wanka nangandu kingkarri Kudnyina, baki yuwaji jangambala nanganginmuku jandanyimuku. Nani barri nanijba baki baku yurrngumba ngambalaja nangangimuku jandanyimuku, jaliyi ngambala kuyu nangangi jangkurr Jisus Krayiskanyi. Jaliyi ngambala kuyu nangangi jangkurr Jisus Krayiskanyi, jaliyi ngambala durrijba Jisus Krayis yurrngumba, baki jangambala wanka jungku nangandu yurrngumba. Ngala jaliyi miku ngambalimi durrijba Jisus Krayis, nanda Jandanyi Kudkanyi, baki miku ngambaliyi jungku wanka nangandu yurrngumba. Miku. Miku ngambaliyi wanka jungku nangandu yurrngumba. Barriwa.
1JO 5:13 Ngayu karungka narrinya nanganginkanyi jangkurranyi Jisus Krayiskanyi. Jaliyi narri jingkijba Jisus Krayis, nyulu Jandanyi Kudkanyi, jaliyi narri kuyu nangangi jangkurr, baki narri jingkijba, janarri jungku wanka yurrngumba barri.
1JO 5:14 Baki ngambala jingkijba nayi barri, jaliyi ngambala jandanyimuku Kudkanyi, baki nyulu mankuka ngambalangi jangkurr, jala ngambala yanyba mududu nangangi Kudkanyi. Mankuka nyulu ngambalangi jangkurr. Baki jaliyi ngambala ngayangayijba nanganginkanyi jangkurranyi, jaliyi ngambala durrijba Kud, baki janyulu yabimba nanda yaji, ngajaka jala ngambala yajinyi. Ngala marda ngambalimi jingkijba Kud. Marda ngambalimi jingkijba nanda jala nyulu nulijba ngambalangi yabimbikanyi. Jaliyi ngambala jingkijba nani, baki janyulu yabimba nanda jala ngambala ngajaka Kud yabimbikanyi.
1JO 5:15 Nayinda jangkurr duja. Jingkijba ngambala nayinda jangkurr. Mankuka ngambalangi jangkurr Kudwanyi, jala ngambala ngajaka yajinyi. Janyulu yabimba nanda jala ngambala ngajaka yajinyi. Barriwa.
1JO 5:16 Jaliyi narri najba yingka Krisjin jungunkurri balkina yuwana, baki marda narrimi yanyba mududu Kudkanyi nangangi, baki janyulu manjamanjamba nanda balki Kudwanyi. Marda narrimi yanyba mududu Kudkanyi, jala yingka Krisjin jungkuka balkina yuwana Kudkanyi. Baki janyulu mili jungku kunyba Kudkanyi, janyulu mili wanka jungku Kudkanyi. Ngala jaliyi Krisjinwanyi yabimbaka balki yaji, daykanyi Kudwanyi kurdanba, baki miku nyuliyi manjamanjamba nanda balki yaji nangangi Kudwanyi. Miku. Nanda balki yaji daykanyi Kudwanyi kurdanba, nanda nayi barri. Ngambala jingkijba nanda Kunyba Ngarndu Kudkanyi, nyulu jungkuka yurlurrmba yurrngumba, nyulu yanybaka yurlurrmba jangkurr yurrngumba barri. Ngala jaliyi nganinyiwanyi mijba Kunyba Ngarndu Kudkanyi, baki nyulu yabimbaka balki yaji, daykanyi Kudwanyi kurdanba yurrngumba barri. Jaliyi Krisjinwanyi yabimba nanda balki yaji miykanyi Kunyba Ngarndu Kudkanyi, baki miku nyuliyi mili wanka jungku nangandu Kudnyina yurrngumba. Mikujiyi yanyba mududu Kudkanyi nanankanyi nganiyngkanyi. Mikuwali manjamanjamba nangangi balki yaji miykanyi Kudwanyi. Miku.
1JO 5:17 Jaliyi ngambala yabimba balki yaji, baki ngambala jungku balkina yuwana Kudkanyi. Ngala janyulu manjamanjamba nanda balki yaji ngambalangi Kudwanyi, jaliyi ngambala ngindu ngamanginkanyi balkinyi yajinyi. Jangambala mili wanka jungku baku. Ngala ngawamba nanda yingamali balki yaji miykanyi Kunyba Ngarndu Kudkanyi, miku nyuliyi mamanumba Kudwanyi. Kurdanbaja nanda Kudwanyi. Janyulu jungku kurdan yurrngumba barri. Barriwa.
1JO 5:18 Jingkijba ngambala, jala ngambala jandanyimuku nangangi Kudkanyi, baki miku ngambaliyi jungku balkina yuwana Kudkanyi yurrngumba barri. Miku. Miku ngambaliyi yabimba balki yaji yurrngumba, marrimbangangi ngambalanya mardarda Kudwanyi. Nyulu marrimbaka ngambalanya mardarda, baki miku ngambaliyi manku nanda balki jangkurr nangangi Sayidinkanyi. Yurlwa ngambala nangangi, jala ngamanya karu yabimbikanyi balki yaji. Marrimbaka ngambalanya mardarda Kudwanyi, baki miku ngambaliyi manku nanda mambuka wuwarranyi Sayidin.
1JO 5:19 Baki mili ngambala jingkijba nayi barri. Nanda Sayidin, nyulu jungkuka mambuka bukambijuyngka yalungi wandijiyana, ngala miku nyulimi jungku mambuka ngambalangi Krisjinmukuyngka. Miku. Ngala nyulu Kud ngambalangi mambuka. Miku Sayidin. Barriwa.
1JO 5:20 Marda jingkijba ngambala, nanda Jandanyi Kudkanyi, badajba nyuli kingkarrinya. Karu nyuli ngambalanya Kudkanyi, baki nanijba ngambala jingkijbawarrmuku Kudkanyi. Jingkijba ngambala Kud, ngawamba nyulu duja Kud, baki nyulu jungkuka ngamandu kurduluna, Jisusngangi, nyulu jungkuka ngamandu kurduluna. Jala bula jungku ngamandu kurduluna yurrngumba, baki ngambala jungkuka wanka nangandu Kudnyina yurrngumba. Barriwa.
1JO 5:21 Ngakinmuku mungkijimuku, jala ngayu maruka muwa narringi kudanyu, marda narringkimi marrimba mardarda. Mikujiyi durrijba yingkamuku yijan, jala miku duja. Mikujiyi durrijba yalungi yuwa. Marda narringkimi marrimba mardarda Kudkanyi. Barriwa barri. Bukamba nayinda jangkurr.
2JO 1:1 Ngayu malbu Jun, ngayu. Ngayu yarrijba nayinda jangkurr narringi, jala ngayu maruka narringi kudanyu. Maruka ngayu muwa narringi barrinani narri ngakinmuku jandanyimuku. Marda yingkamuku, yalu marukangka muwa narringi marda. Yingkamuku jala jingkijba nanda duja jangkurr Jisus Krayiskanyi, yalu marukangka muwa narringi, jingkijbangangi ngambala nanda duja jangkurr. Miku ngambaliyi mamanumba nanda jangkurr duja. Miku. Jangambala mankuwa yurrngumba.
2JO 1:3 Yanyba ngayu mududu Kudkanyi nayinda jangkurr ngambalangi. Ngajaka ngayu bulanya, Kud, Buwakanya Kingkarri, baki Jisus Krayis, Jandanyi Buwakayu. Ngajaka ngayu bulanya, jabula lalanba ngambalanya, jabula yabimba kunyba yaji ngambalangi. Ngajaka ngayu, jabula marrimba ngambalanya mardarda yurrngumba, baki jangambala jungku mardumardu muwa. Ngajaka ngayu bulanya nani, jingkijbangangi ngayu, ngambalaka marukangka muwa. Ngambala jala jungku yurlurrmba, jala jungku duja Jisus Krayiskanyi, marda ngambalaka marukangka muwa. Barriwa.
2JO 1:4 Mirnarrijba ngayu muwa, jingkijbangangi ngayu kudiyamuku narrinya. Kudiyamuku, narri durrijbangka nanda yurlurrmba yuwa Kudkanyi. Jirrinyba nyuli ngambalanya, Buwakayu, ngambala durriji nangangi yuwa yurlurrmba Buwakaya. Nani nyuli jirrinyba ngambalanya, baki mirnarrijba ngayu muwa, jingkijbangangi ngayu kudiyamuku narrinya, narri jungku nani barri.
2JO 1:5 Ngakinmuku mungkijimuku. Kudanyu ngayu karungka narrinya, marda ngambalakimi maruka muwa. Miku nayinda buyingkinyi jangkurr, yarrijba jala ngayu narrinya. Miku nayinda buyingkinyi jangkurr, ngala nayinda jangkurr ngamandu wabulinyi jali jungku Jisus ngamandu. Jirrinyba nyuli ngambalanya, marda ngambalakimi maruka muwa.
2JO 1:6 Jala ngambala ngayangayijba nanankanyi jangkurranyi Kudkanyi, baki ngambalaka maruka muwa. Marda ngambalimi maruka muwa nangangi Kudkanyi, baki marda ngambalimi maruka muwa yalungi yingkamukuyngka. Nani barri, marda ngambalimi maruka muwa yurrngumba. Nani nyuli jirrinyba ngambalanya wabulinyi Jisuswanyi. Nyuli jirrinyba ngambalanya nani marukankanyi muwa. Jala ngambalaka maruka muwa yurrngumba, baki ngambala durrijba nangangi jangkurr, jirrinyba jali nyulu ngambalanya.
2JO 1:7 Kajamuku nganinyimuku jujijbawarr, yali jilalajba lukuluku wandijiyana. Karu yali yingkamuku, jilijba wanbiyayi nanda Krayis kingkarrinya Kudnanyi. Jilijba nyulu jungkuka jambana mankanyiyudi. Ngala jujijba yali. Karu yali yingkamuku Jisuskanyi, miku nyuli Krayis, miku nyuli Jandanyi Kudkanyi, ngala ngawamba jujijba yali. Ngala jingkijba ngambala Jisus, nyulu Jandanyi Kudkanyi yurrngumba. Ngala yalu, miku yaliyanyi yanyba nani, yalu jujambawarr jali ngirra Krayis.
2JO 1:8 Ngala najbawa narringkiyi, bakiyi narri mamanumba nanda yaji, yabimba jalija narringi Kudwanyi. Janyulu yabimba kaja yaji narringi, jaliyi waki narri nangangi. Ngala yurlwakiyi nanankanyi balkinyi jangkurranyi yalunginkanyi. Yalu balkimuku milidimbawarrmuku jala jujamba narrinya Jisuskanyi. Yanyba yalu Jisuskanyi, miku nyulu Krayis, miku nyuli manjijba Jisus kingkarrinya Kudwanyi. Najbawa narringkiyi. Yurlwakiyi yalungi. Baki janyulu yabimba kaja yaji narringi Kudwanyi, jaliyi narri waki kudanyu nangangi. Barriwa.
2JO 1:9 Nanamukunyi yingkamukunyi yalu milidimba balki jangkurr Jisuskanyi, miku duja, a kaja yaji narringi, jaliyi waki narri nangangi. Ngala yurlwakiyi nanankanyi balkinyi jangkurranyi yalunginkanyi. Yalu balka nani, miku nyulimi jingkijba Kud. Mikukimi jungku Kud nangandu kurduluna, miku. Ngala nanda jala karungka duja jangkurranyi Jisus Krayiskanyi, jingkijbangka nyulu Kud. Jungkuka bula nangandu kurduluna. Jungkuka Buwakanya baki nangangi Jandanyi nangandu kurduluna.
2JO 1:10 Jaliyi badajba balki milidimbawarr narrindurri, baki mikujiyi kandimba nanda. Mikujiyi kuyu nanda nganinyi narringinkurri barndarri jungunki narrindu. Mikujiyi yanyba nangangi nayi, “Yanyba ngayu mududu Kudkanyi, ngajaka ngayu Kud nganyi, janinji jungku mardumardu muwa.” Mikujiyi yanyba nani nangangi. Jaliyi narri yanyba nangangi nani, baki narri kurranja nanganginkanyi balkinyi jangkurranyi jala nyulu milidimba narrinya. Narri kurranja nangangi.
2JO 1:12 Mili kaja jangkurr yanyba ngayimi narringi, ngala miku ngayiyi yarrijba bukamba nanda jangkurr nanijba. Miku ngayiyi yarrijba mili jangkurr nanginyina najana, jilajbangangi jangayu narringinkurri jurjyurri. Ngayimi yidamba narrinya jurjina baku. Jaliyi ngayu yidamba narrinya, baki jangambalaka yanyba, jangambalaka mirnarrijba muwa. Barriwa.
2JO 1:13 Bukamba yalu nayiba ngakindu jurjina, yalu manjijba jangkurr narrindurri, yalu maruka muwa narringi. Barriwa barri, bukamba nayinda jangkurr.
3JO 1:1 Ngayu malbu Jun, ngayu yarrijba nayinda jangkurr nganyi, niji Kayus. Ninji kandi ngaki, maruka jala ngayu muwa nganyi kudanyu.
3JO 1:2 Ngaki kandi. Yanyba ngayu mududu Kudkanyi nganyi. Ngajaka ngayu Kud nganyi, janyulu yabimba kunyba yaji nganyi. Mili ngayu ngajaka Kud nganyi, janyulu marrimba ninga, baki janinji jungku kunyba mankanyi, ngiruka. Jingkijba ninga, kunyba nganyi ngarndu, ngiruka nangangi Kudkanyi yurrngumba. Ngayangayijba ninji nanganginkanyi jangkurranyi yurrngumba barri. Jingkijba ngayu nani nganyi. Barriwa.
3JO 1:3 Wanbiya yali nayiba kudiyamuku krisjinmuku. Karu yali nurrunya, ninji jungkuka kunyba marda duja yurrngumba. Karu yali nurrunya nanankanyi jangkurranyi nganyi, baki mirnarrijba ngayi muwa kudanyu jali ngayu manku nanda jangkurr. Jingkijba ninga, ninji durrijba nanda duja jangkurr Kudkanyi yurrngumba barri.
3JO 1:4 Mirnarrijba ngayu muwa kudanyu jala ngayu manku jangkurr ngakinmukuyngka mungkijinyi, jala yalu durrijba nanda duja jangkurr Kudkanyi yurrngumba. Yurrngumba ngayu mirnarrijba muwa yalungi, jala ngayu manku nani yalungi. Barriwa.
3JO 1:5 Ngaki kandi. Maruka ngayu muwa nganyi kudanyu barri. Jungku ninji ngiruka yalungi jurjina. Waki ninji kudanyu yalungi Krisjinmukuyngka, jungku jala yalu nganyinyina jurjkina. Yabimba ninji kunyba yaji yalungi, baki yabimba ninji kunyba yaji yalungi ngurranyimukuyngka marda. Waki ninji kudanyu Kudkanyi nani barri, durrijbangangi ninji nangangi yuwa Kudkanyi.
3JO 1:6 Marda yali ngurranyimukunyi, karu yali nurrunya marda nganyi, ninji jungku ngiruka, ninji waki kudanyu Kudkanyi yurrngumba, kuyungangi ninji jangkurr Kudkanyi, marukangangi ninji muwa Kudkanyi. Karu yalunjali Krisjinmuku nanginyina jurjnyina nganyi, kudanyu ninji maruka muwa yalungi bukambijuyngka jandanyimukuyngka Kudkanyi. Barriwa. Nanamuku ngurranyimuku jala jilalajba, jala mililidimba jangkurranyi Kudkanyi, ngajaka ningi yalungi, ninji yabimbiji kunyba yaji yalungi. Jalija yalu barlba nganyinbunanyi, mili yingkayurri yajiyurri, baki janinji wajba yalunya mamanyi, baki jumbalanyi. Jala ninji yabimba kunyba yalungi nani baki janyulu mirnarrijba muwa nganyi Kud.
3JO 1:7 Nanamuku milidimbawarrmuku, yalu barlbayi yalunginanyi yajinanyi. Jilalajba yali juju wakinki nangangi Jisus Krayiskanyi, karunki yingkamuku nangangi. Yingkamukunyi Krisjinmukunyi, yalunjali wajba yajinyi. Baki nanamukunyi milidimbawarranyi, kuyu yali nanda yaji. Ngala miku yaliyanyi kuyu yaji yalunbunanyi jala miku Krisjinmuku. Ngawamba yalu kuyu yaji yalunbunanyi Krisjinmukunanyi.
3JO 1:8 Ngambala Krisjinmuku, marda ngambalimi kandimba yalunya milidimbawarrmuku. Marda ngambalimi wajba yalunya yajinyi, barrinani dungalanyi, barrinani mamanyi. Marda ngambalimi ngajaka yalunya, yalu jungunki ngamanginyina barndana. Nani barri marda ngambalimi yabimba yaji yalungi. Jala ngambala yabimba yaji nani yalungi, baki ngambala kandimba yalunya, ngambala waki malumba yalundu Kudkanyi. Nani ngambala waki malumba yalundu, jala yalu milidimba duja jangkurranyi Kudkanyi. Barriwa.
3JO 1:9 Wabula, ngayi yarrijba jangkurr najana narringi nganyinyina jurjnyina. Ngala nanda nganinyi, niji Diyudribis, miku nyuliyanyi ngayangayijba ngakinkanyi jangkurranyi. Yurlwa nyuli ngakinkanyi jangkurranyi najana. Maruka nangka muwa, nanda nganinyi. Mankumanku nangka, nyulu barri walkurra mambuka nanankanyi jurjkanyi. Miku nyuliyanyi kuyu ngaki jangkurr, ngala yurlwa nyuli ngakinkanyi jangkurranyi najana.
3JO 1:10 Jalija ngayu barlba narrindurri, baki jangayu yanyba narringi nanankanyi yajinyi, yabimba jali nyulu. Jangayu yanyba nanganginkanyi yajinyi. Yanyba nyuli balki jangkurr ngaki. Jurlwa nyuli kudanyu ngaki. Jujijba nyuli kudanyu ngaki. Baki mili balki yaji nyulu yabimbaka. Miku nyulimi kandimba yalunya yingkamuku Krisjinmuku, jala yalu jilajba narringinkurri jurjyurri. Miku nyulimi kandimba yalunya jala yidamba narrinya jurjnyina. Baki mili balki yaji nyulu yabimbaka. Kurrkunbaka nyulu narrinya marda, jala narri kandimba yalunya, yidamba jala narrinya. Nyulu kurrkunbaka narrinya marda. Baki jala narrimi kandimba yalunya, baki nyulu manjijba narrinya jurjnanyi. Nanda balki kudanyumirra. Marda miku nyulimi kurrkunba narrinya, marda miku nyulimi manjijba narrinya jurjnanyi.
3JO 1:11 Ngaki kandi. Marda miku ninjimi yabimba balki yaji nani barri. Marda ninjimi miku yabimba balki yaji barrinani nyulu yabimbaka. Marda ninjimi yabimba kunyba yaji yurrngumba. Baki nani barri, janinji jungku kunyba Kudkanyi. Baki janinji jungku barrinani jandanyi Kudkanyi. Ngala jaliyi ninji yabimba balki yaji, baki miku ninjimi jingkijba Kud. Miku ninjimi jungku barrinani jandanyi Kudkanyi. Barriwa.
3JO 1:12 Ngala nanda yingka nganinyi, niji nangangi Dimidriyus, bukambiju, yalu yanyba kunyba jangkurr nangangi. Nyulu yanybaka duja jangkurr. Nyulu jungkuka yurlurrmba Kudkanyi. Jingkijba ngayu nanda nganinyi marda, nyulu jungkuka kunybana yuwana Kudkanyi. Baki jingkijba ninji ngaki jangkurr, nayinda jangkurr duja. Barriwa.
3JO 1:13 Mili kaja jangkurr ngayimi karu ninga, ngala miku ngayiyi yarrijba nayinda jangkurr najana.
3JO 1:14 Nulijbangka ngayu nganyi, yidamba janinga winyurru, baki nanamanja janiyangka yanyba jangkurranyi. Barriwa.
3JO 1:15 Marda ninjimi jungku mardumardu muwa. Bukamba nganyi mungkijimuku nayiba, yalu manjijba jangkurr nganyindurri, yalu maruka muwa nganyi. Baki nurru manjijbangka jangkurr yalundurri, nurrunginkurri mungkijiyurri nanaba nganyindu. Barriwa barri, bukamba nayinda jangkurr.
JUD 1:1 Nayinda ngayu. Ngaki niji Jud. Ngayu kanyiya nangangi Jayimskanyi. Baki ngayu wakiwarr nangangi Jisus Krayiskanyi. Ngayu manjijbangka nayinda jangkurr narrindurri, jala narri jandanyimuku nangangi Kudkanyi. Nyulu yarrijbayi narrinya nanganginmuku jandanyimuku Kudwanyi. Nyulu ngambalangi Buwakanya kingkarri, nyulu marukangka muwa narringi. Baki nanangini Jisus Krayiswanyi, nyulu lalanbaka narrinya yurrngumba barri.
JUD 1:2 Ngayu ngajakangka bulanya Kud baki Jisus Krayis. Ngayu ngajakangka bulanya, jabula yabimba kunyba yaji narringi, jabula yabimba narrinya, narri jungunkanyi mardumardu muwa bulangi. Marda ngayu ngajakangka bulanya, jabula kudanyu maruka muwa narringi. Ngayu ngajakangka bulanya, jabula yabimba yaji nani narringi. Baki nanankardi janarri yabimba kunyba yaji yalungi yingkamukuyngka, janarri jungku mardumardu muwa yalungi, janarri maruka muwa yalungi marda. Barriwa.
JUD 1:3 Ngakinmuku mungkijimuku. Wabula ngayiyanyi manjijba jangkurr narrindurri. Ngayiyanyi karu narrinya nangangi Jisus Krayiskanyi, nyulu marrimbaka ngambalanya krisjinmuku, nyulu marrimbaka ngambalanya mardarda yurrngumba. Nani ngayiyanyi manjijba jangkurr narrindurri, baki nanijba ngayu yarrijbangka jangkurr narringi. Ngala ngayu yarrijbangka yingka jangkurr narringi. Yingka jangkurr ngayu yarrijbangka narringi. Nanamukunyi jali manjijba Jisus Krayiswanyi, yali karu ngambalanya nanganginkanyi jangkurranyi Jisus Krayiskanyi. Baki ngayu marda karungka narrinya nanankanyi jangkurranyi. Marda narrimi kudanyu marrimba nanda jangkurr nangangi Jisus Krayiskanyi. Marda narrimi mankuwa nanda jangkurr yurrngumba barri. Marda narrimi miku manku yinini jangkurr, ngawamba nanda jangkurr jali karu yalunya Jisus Krayiswanyi. Marda narrimi jungku ngiruka marrimbikanyi nanda jangkurr. Marda narrimi jungku ngiruka nani barri, nulijbangkangangi yalu yingkamuku linjumbikanyi narrinya. Jayalu linjumba narrinya, mikungangi narrimi kuyu yalungi jangkurr. Ngawamba narri kuyungka nanda jangkurr nangangi Jisus Krayiskanyi. Narri jungkuka ngiruka nangangi.
JUD 1:4 Marda narrimi marrimba ngawamba nanda jangkurr nangangi Jisus Krayiskanyi. Yingkamukunyi yalu milidimbaka yinini jangkurr. Yalu milidimbaka balki jangkurr. Jalannga barri jali yalu jungku narrindu, baki yali yanyba narringi, “Nurru marda kuyungka nangangi jangkurr Jisus Krayiskanyi.” Nani yali yanyba narringi, ngala yali jujamba narrinya. Yalu jungkuka narrindu krisjinmukunyina, ngala miku narrinjalimi milidimba duja jangkurranyi. Nanamuku wankalamuku jali yarrijba jangkurr Kudkanyi najana, yali yarrijba nanda jangkurr karunki ngambalanya yalungi nanamukuyngka balkimukuyngka milidimbawarrayngka. Nanda jangkurr yanybaka, “Jayalu jungku narrindu, ngala jayalu milidimba balki jangkurr.” Nanamuku balkimuku yalu yanybaka, yalu dujanya jandanyimuku nangangi Kudkanyi ngala jujijba yalili. Yalili yanyba balki jangkurr, baki nanankardi barri janyulu daba yalunya Kudwanyi. Yalili yanyba nayi barri, “Yuku barri ngambala yabimbaka balki yaji. Yuku ngambala yabimbaka kaja balki yaji, manjamanjambajangangi Kudwanyi nanda kaja balki yaji.” Ngala nanda balki jangkurr. Marda ngambalimi nulijba yabimbikanyi kunyba yaji, miku balki yaji. Baki yingka jangkurr yalili yanyba nayi barri, “Jisus Krayis, miku nyulu dujanya jandanyi nangangi Kudkanyi. Miku nyulu dujanya nangangi jandanyi. Miku nyulu nanamannga barrinani Kud. Miku.” Jala yalu yanyba nani barri, baki nanda barrinani yalu yanybaka bulangi Kudkanyi baki Jisus Krayiskanyi, barrinani yalu yanybaka bulangi, miku bula wirimalaruwuya bukambijuyngka yajinyi wandijiyana. Ngala miku yalungi jangkurr kunyba. Yalu jujijbawarr. Yalungi jangkurr balkimirra. Barriwa.
JUD 1:5 Narri jingkijbangka nayinda yaji nangangi Kudkanyi. Wabula kamambarra nyuli yalilijba nanamuku wankalamuku Jumuku. Nyuli yalilijba yalunya bayunguna Yijibnanyi, baki nyuli lalanba yalunya kudanyu barri. Jali malijba yalunjalu ngarrkadabawarrmukunyi mambukanyi Yijibkanyi, baki miku yalunjaliyi wudumba, miku yalunjaliyi marrimba, marrimbangangi yalunya mardarda Kudwanyi. Nani nyuli lalanba yalunya Jumuku. Ngala baku barri kudiyanymuku Jumuku, wirlku yali. Miku yaliyanyi durrijba nanda jangkurr nangangi Kudkanyi. Yurlwa yali Kudkanyi, baki dabayi yalunya Kudwanyi. Kurdanba nyuli yalunya, mikungangi yaliyanyi kuyu nangangi jangkurr.
JUD 1:6 Marda narrimi mankuwa nayi marda. Kudiyanymuku Yanjilmuku, jalili yalu waki nangangi Kudkanyi, yalu marda yurlwayi nangangi Kudkanyi. Miku yaliyala waki nangangi Kudkanyi, ngala yaliyanyi jungku mambukamuku nangandu. Baki nanda balki. Baki nanankardi barri nyuli kijijba yalunya Kudwanyi. Kijijba nyuli yalunya kijbakijbana, baki nyuli manjijba yalunya mungarri yajiyurri. Nanaba yalu jungkuka yurrngumba barri. Yalu yukumbaka nangangi Kudkanyi mungana yajina. Nanaba yalu yukumbaka nangangi nanankurri jalija nyulu karrinjarrijba yalunya bukambiju walu nangandu Kudwanyi, baki janyulu yanyba yalunginkanyi balkinyi yajinyi. Barriwa.
JUD 1:7 Marda mankuwakiyi yalunya, nanamuku wankalamuku jalili yalu jungku nanankujarranyina barrawuyabarrawuyana, niji Sudum baki Kumurra, baki nanamuku jalili yalu jungku lukuluku nananyina yajina. Nanamuku wankalamuku yalili jungku balki nanganginyina yuwana Kudkanyi. Yabimba yalili nanamannga balki yaji barrinani yabimbayi nanamukunyi balkimukunyi Yanjilmukunyi. Nanamuku wankalamuku, yalili jungku balki nayi barri. Yingka nganinyi nyuli kuluka yingkana nganinyina barrinani maykarra, baki yingka jibarri nyuli kuluka yingkana jibarrina barrinani maykarra. Kaja balki yaji yali yabimba nani, baki nanankardi barri nyuli daba yalunya marda Kudwanyi. Manjijba nyuli jangu yalunginkurri yajiyurri, baki bakarrijbayi yaji bukamba janguwanyi. Bakarrijbayi yalunya marda, nganinyimuku, jibarrimuku, baki yalungi yaji marda. Nani barri nyuli bukamba nanda yaji Kudwanyi, baki nani marda janyulu bukamba yalunya jala miku yalimi ngayangayijba nanganginkanyi jangkurranyi. Janyulu manjijba yalunya wayka jangurri Yilyurri. Barriwa.
JUD 1:8 Baki nani barri marda nanginmuku balkimuku milidimbawarrmuku, yalu marda yurlwangka nanganginkanyi jangkurranyi Kudkanyi. Miku yalimi maruka muwa nangangi Kudkanyi. Miku yalimi ngayangayijba nanganginkanyi yuwanyi, ngala yalu yabimbaka yalunginkanyi yuwanyi. Baki yalu yabimbaka kaja balki yaji. Barimba yalu kuluka yingkana barrinani nanamuku yingkamuku. Buwarrajimba yalu yaji, baki nanankardi yalu yanyba, nanda kunyba kulukankanyi nani barri. Ngala balki nanda yaji jala yalu yabimba. Miku yalimi yarrijba Kud yalunginkanyi mambukanyi, ngala yalu yurlwangka nangangi Kudkanyi. Baki yalu yurlwangka yalungi marda, nanamukuyngka kunybamukuyngka Yanjilmukuyngka. Yalu yurlwangka yalungi marda. Yalu yanybaka balki jangkurr yalungi Yanjilmukuyngka.
JUD 1:9 Nanda mambuka yalungi Yanjilmukuyngka, nangangi niji Mayikil. Nyulu kunyba Yanjil, kunybamirra. Jali nangka janyba nanda wankalanyi mambuka Musis, baki manjijbayi nanda Yanjil nangandurri Kudwanyi. Nyulu manjijbayi nanda Yanjil Mayikil nangandurri mankanyiyurri Musiskanyi, makaykanyi nanda mankanyi. Ngala jilajbayi Sayidin marda nangandurri mankanyiyurri. Baki jakakajba bulangki. Jakakajba bulangki nanankanyi mankankanyi, wanyi mambuka mankankanyi kuyunkanyi makaji. Jakajbayi Sayidin Mayikilwanyi, ngala miku nyuliyanyi yanyba balki jangkurr nangangi Sayidinkanyi. Ngala yanyba nyuli nangangi Sayidinkanyi, “Miku ngayiyi ngayu ngirrwa nganyi. Ngawamba janyulu nyulu ngirrwa nganyi Kud.” Nanda mambuka Yanjilkanyi, miku nyuliyanyi yanyba balki jangkurr nangangi Sayidinkanyi, nanda jala jungku balki.
JUD 1:10 Ngala nanginmuku balkimuku milidimbawarrmuku, yalu yanybaka balki jangkurr yalungi Yanjilmukuyngka. Yalu yanybaka balki jangkurr yalungi Yanjilmukuyngka, jala yalu kunybamuku. Nanginmukunyi barri, miku yalimi jingkijba kudiya yaji. Miku yalimi jingkijba yalunya Yanjilmuku, ngala yalu yanyba balki jangkurr yalungi Yanjilmukuyngka. Ngala miku yalimi jungku kunyba barrinani nanamuku Yanjilmuku, ngala yalu jungku barrinani nanda yanimal. Nanda yanimal miku nangkimi mankumanku nanganginkanyi yajinyi. Muningka nyulu yabimbaka yaji. Nyulu nulijbangka mamanyi yurrngumba barri. Nyulu nulijbangka kulukankanyi yingkana, baki yingkana yurrngumba barri. Baki nani marda nanginmuku yalu nulijbangka kajanyi kunybanyi mamanyi, yalu nulijbangka kulukankanyi yingkana, baki yingkana. Nani barri yalu jungku barrinani yanimal, yalu yabimbaka kaja balki yaji. Yalunginyi kajawanyi balkiwanyi yajiwanyi bukambaja yalunjalu, yangkalambangangi yalungki nanganbunanyi Kudnanyi.
JUD 1:11 Yalu balkimirra. Yalu jungkuka barrinani nanda wankalanyi nganinyi niji Kayin, jali nyulu balki nganinyi. Miku nyuliyanyi maruka muwa nanganginkanyi kanyiyanyi, ngala nyuli kurdanba nanda nangangi kanyiya. Marda miku nyuliyanyi maruka muwa nangangi Kudkanyi. Baki nani barri marda yalu jungku. Miku yalimi maruka muwa yalungi barri, yingkamukuyngka. Miku yalimi ngayangayijba nangangi Kudkanyi. Barriwa. Baki nanda yingka wankalanyi, niji Balam, nyulu marda jungkuyi balki nangangi Kudkanyi. Kuliwijba nyuli dungalanyi. Yingkamukunyi, yali wajba Balam dungalanyi, jali nyulu milidimba yalunya yajinyi, ngala nyuli karu yalunya balkinyi jangkurranyi. Baki nani barri nanginmuku balkimuku milidimbawarrmuku, yalu marda kuliwijba dungalanyi. Yalu marda wudumbaka dungala milidimbikanyi balkinyi jangkurranyi. Barriwa. Baki yingka mili wankalanyi, nangangi niji Kura. Miku nyuliyanyi ngayangayijba nanankanyi jangkurranyi bulangi, Musiskanyi baki Yarankanyi. Yarrijbayi bulanya mambukawuya Kudwanyi, ngala nyuli yurlwa bulangi. Baki nanankardi barri bukambayi Kura Kudwanyi. Janyba nangki. Baki nani barri nanginmuku balkimuku milidimbawarrmuku, yalu marda yurlwangka yalungi, mambukamukuyngka jurjkanyi. Yalu marda yurlwangka yalungi, jali yarrijba Kudwanyi. Baki bukambaja yalunya marda Kudwanyi.
JUD 1:12 Nanginmuku balkimuku milidimbawarrmuku, yalu jungku balkimirra. Jala yalu jungku malumba yalundu yingkamukunyina Krisjinmukunyina, jala yalu jarrba mama yalundu barri, baki yalu kuliwijba mamanyi baki kamukamunyi. Miku yalimi manyiru yalunginkanyi balkinyi yajinyi, ngala marda narrimi manyiru yalungingangi, nanankanyi balkinyi yajinyi jala yalu yabimba. Miku yalimi nulijba lalanbikanyi yalunya Krisjinmuku. Miku yalimi nulijba milidimbikanyi kunybanyi jangkurranyi. Ngawamba yalu nulijba wudumbikanyi kaja kunyba yaji yalungi. Yalu barrinani nanda ngalu jala walajba ngala nyulu dukujba yaji. Janybaka ngalu yunkurrwanyi. Ngamu yirrbaja janja, ngala miku. Mikuyaji wabudanyi ngaluna bindaykanyi yaji. Baki nani barri nanginmuku nganinyimuku. Ngamu yalu milidimba kunyba jangkurr, ngala miku. Mikuyaji kunybanyi jangkurranyi yalundu. Barriwa. Baki mili barri, yalu barrinani bikabaji, jala mikuyaji mamanyi nangandu janjawala. Mikuyaji mamanyi jala nangandu, yalu jarrkanyi. Nanda landurr nangangi jambana dalyawijbayi. Janyba nangki nanda bikabaji, baki dukujbayi. Mikuwali jardijba mili mama. Miku. Baki nani barri nanginmuku balkimuku, yalu barrinani nanda duku kurnda. Miku yalunjaliyi milidimba kunybanyi jangkurranyi. Barriwa.
JUD 1:13 Baki mili barri. Yalu barrinani jabula malina. Jala wirlkungka mali dungangalana yajina, baki jabulaba nangka yaji marda dunbu. Ngala nyulu yingkijba nanda dunbu wilina karnarrana maliwanyi. Baki nani barri, nanginmuku balkimuku yalu barrinani nanda jabula, baki nanda balki yaji jala yalu yabimba, nanda barrinani nanda dunbu jala yingijba maliwanyi wilina karnarrana. Ngambala najba nanda dunbu karnarrana, baki nani marda ngambala najba nanda balki yaji jala yalu yabimba balkimukunyi. Barriwa. Baki mili barri. Yalu barrinani nanda baribari. Muningka yalili yanyba baribarinyi, barlbangka baribari juju barri bayungu, baki jungkuka nginymulnginymulina yajina. Manjijbangka baribari nanankurri Kudwanyi. Nyulu marrimbaka yalunya nanaba nginymulnginymulina yajina yurrngumba barri. Baki nani barri nanginmuku balkimuku, janyulu manjijba yalunya marda nginymulnginyulyurri yajiyurri Kudwanyi. Janyulu marrimba yalunya nanaba nginymulnginymulina yajina yurrngumba barri. Barriwa.
JUD 1:14 Yingka wankalanyi nganinyi, nangangi niji Yinuk. Nyulu yarrijbayi jangkurr Kudkanyi najana. Jungku nyuli juju wabula, ngala nyuli marda karu ngambalanya nanginmukuyngka balkimukuyngka milidimbawarrayngka. Nangangi jangkurr yanybaka nayi, “Najbakiyi. Nanda walkurra mambuka jilajbangka. Baki kajamuku nanganginmuku Yanjilmuku, yalu jilajbangka nangandu marda.
JUD 1:15 Nyulu jilajbangka, baki janyulu karrinjarrijba bukambiju walu nangandu. Janyulu yanyba yalunginkanyi balkinyi yajinyi jali yalu yabimba. Baki janyulu yanyba nanankanyi jardibirrinyi jangkurranyi jali yalu yanyba. Nanamuku jali yalu yurlwa nangangi Kudkanyi, janyulu yanyba yalunginkanyi balkinyi yajinyi. Janyulu yanyba manjiykanyi yalunya wayka jangurri.” Barriwa. Nani barri yanybayi nanda wankalanyi.
JUD 1:16 Nanginmukunyi balkimukunyi, jakakajba yalu Kud baki yingkamuku jurjkanyi. Jakakajba yalunjalu bukambijuyngka yajinyi. Yalu nulijbangka ngawamba yalunginkanyi balkinyi yajinyi. Yalungka yanyba, yalu walkurramuku nganinyimuku, ngala yalu yabimbaka nanda balki yaji jala yalu nulijba yabimbikanyi nanda yaji. Miku yalimi yabimba kunyba yaji yalungi yingkamukuyngka. Yalunjalu wajbangka yingkamuku kunybanyi jangkurranyi yalunginkanyi, nulijbangangi yalu yalungi nanamukuyngka, yalu yabimbikanyi kunyba yaji yalungi. Barriwa.
JUD 1:17 Ngala narri barri, ngakinmuku mungkijimuku jala ngayu marukangka muwa narringi, marda narrimi mankuwa nanda jangkurr, jali yalu yanyba, nanamuku jali manjijba mambukawanyi Jisus Krayiswanyi. Marda narrimi mankuwa yalungi kunyba jangkurr.
JUD 1:18 Yanyba yali nayinda jangkurr, “Baku barri yingkamuku, jayalu jilajba narrindurri, jayalu kakalijba nanankanyi jangkurranyi nanganginkanyi Jisus Krayiskanyi. Jayalu kakalijba nanganginkanyi jangkurranyi jali nurru milidimba narrinya. Jayalunjalu kakalijba marda, yalunya jala nulijba durriykanyi nanganginkanyi jangkurranyi. Jayalu nulijba yabimbikanyi kaja balki yaji.” Nani barri yali yanyba. Barriwa.
JUD 1:19 Ngala miku nyulimi nyulu jungku yalundu kurduluna, nanda Kunyba Ngarndu Kudkanyi. Miku. Miku yalimi durrijba nangangi yuwa, ngala yalu durrijba yalungi yuwa. Yalu yabimbaka ngawamba nanda jala yalu nulijba yabimbikanyi yaji. Mankumanku yalungka, yalu walkurramuku nangangi Kudkanyi, baki jungkuka yalu nyubana, miku malumba yalundu yingkamukunyina Krisjinmukunyina.
JUD 1:20 Ngala narri barri, ngakinmuku mungkijimuku jala ngayu maruka muwa narringi, marda narrimi yuwajiwa durrijba nanda jangkurr nangangi Kudkanyi. Marda narrimi yurrngumba jungku yurlurrmba nanganginyina yuwana, baki janarri mili jingkijba Kud, baki mili baki mili. Marda narrimi ngajaka nanda Kunyba Ngarndu Kudkanyi, nyulu karunki narrinya jangkurranyi, jala narri yanyba mududu nangangi Kudkanyi.
JUD 1:21 Marda narrimi yurrngumba durrijba nanda yuwa nangangi Kudkanyi, baki janyulu maruka muwa narringi yurrngumba barri. Baki baku barri jalija narringka janyba, baki janyulu yabimba kunyba yaji narringi Jisus Krayiswanyi. Janyulu yabimba narrinya, narri jungunkanyi mili wanka kingkarri bulandu, Kudnyina baki Jisus Krayisnyina. Barriwa.
JUD 1:22 Yingkamukunyi, miku yalimi jingkijba wanyi yuwa jayalu durrijba. Yiningki jayalu durrijba yuwa nangangi Jisus Krayiskanyi, yiningki jayalu durrijba yalunginkanyi wankalanyi yuwanyi. Miku yalimi jingkijba wanyi yuwa durriykanyi. Marda narrimi kudanyu maruka muwa yalungi. Marda narrimi miku ngirrwa yalungi, ngala marda narrimi kudanyu milidimba yalunya nangangi Jisus Krayiskanyi.
JUD 1:23 Yingkamuku barri, miku yalungkimi mankumanku nangangi Jisus Krayiskanyi. Durrijba yalu yalunginkanyi yuwanyi yurrngumba barri. Marda narrimi kudanyu milidimba yalunya marda, baki kudiyamukunyi, jayalu kuyu nanda jangkurr nangangi Jisus Krayiskanyi. Jaliyi yali miku kuyu nangangi jangkurr, baki warriyaluku, janyulu baku manjijba yalunya wayka jangurri Kudwanyi. Janyulu manjijba yalunya wayka jangurri Yilyurri baku barri jalija yalungka janyba. Ngala jaliyi yalu kuyu nangangi jangkurr Jisus Krayiskanyi, baki janyulu marrimba yalunya mardarda yurrngumba. Barriwa. Ngala yingkamuku, yalu jungkuka balkina yuwana nangangi Jisus Krayiskanyi. Kudanyu yalu jungkuka balki nangangi. Marda narrimi maruka muwa yalungi marda, marda narrimi milidimba yalunya marda, ngala marda narringkimi najbawa. Jaliyi narringka miku najbawa, baki yiningki janarri yabimba nanamannga balki yaji barrinani yalu yabimbaka. Yiningki janarringka yangkalamba nanganbunanyi Jisus Krayisnanyi. Marda narringkimi najbawa, ngala narri milidimbaka yalunya. Barriwa.
JUD 1:24 Ngambala wajbangka Kud ngamanginkanyi kunybanyi jangkurranyi, nyulungangi walkurramirra, nyulungangi ngirukamirra, nyulungangi wirimalaru. Yuku nyulu manjamanjamba bukambijuyngka ngambalangi balki yaji, yuku nyulu yabimba ngambalanya jungunkanyi likalika kurdulu nangangi, jungunkanyi mili wanka kingkarri nangandu. Baki jangambala mirnarrijba muwa nangangi barri. Yuku nyulu yabimba ngambalanya jungunkanyi ngiruka nangangi, baki miku ngambaliyi yabimba balki yaji. Yuku nyulu marrimba ngambalanya mardarda. Yuku nyulu yabimba bukamba nayinda yaji ngambalangi, janybangangi nangki ngambalangi mambuka Jisus Krayis ngambalangi barri. Ngambala wajbangka Kud ngamanginkanyi kunybanyi jangkurranyi, yukungangi nyulu yabimbaka bukamba yaji. Ngambala wajbangka Kud ngamanginkanyi kunybanyi jangkurranyi, nyulungangi walkurramirra, nyulungangi ngirukamirra, nyulungangi ngambalangi wirimalaru. Nani nyulu jungkuka yurrngumba barri, wabula, baki nanijba, baki baku barri. Yurrngumba nyulu jungkuka nani barri ngambalangi. Duja barri nayinda jangkurr. Barriwa barri. Bukamba nayinda jangkurr.
