PSA 1:1 Aminu wai aminde wamu dua gwaamuke, gatu waaminda kepi tawake tasikaing kaknga dua tasike, gatu Anutue masa wam yake tasikaing aminkat dua yukengu, waapata asiknga bakngawik.
PSA 1:2 Aminu waapata Anututane mama wamde asiknga bakngake, gatu mama wamu waakngae zikaane gatu gunzit tapane ba tapduknga wena asinggan natanggamatake tasinggak.
PSA 1:3 Aminu waapa katapdaka binga yangga kwaimune kwaiwan tapdukngane buya aawan tatakngita dua kupiakaing binga sanga kuupbam aminu waapata tasinggau take siknga buya asaakgak.
PSA 1:4 Sike waiaknga tawake tasikaing aminu unza dua. Tambam tapunde ooi gotda puyapakunggak binga dakngake buyana dua aawik.
PSA 1:5 Dakngake wai aminu waakwakga Anutue kaine wamu yawan take dua siwik. Siwan waaminda amin nomande banakan katang gatake yutnanga dua.
PSA 1:6 Dasingge? Anututa aminu kepi noman tawake tasikaing aminde asiknga bakngake kakuya tasinggak. Siwan ngana aminu waiaknga tawake tasikaingu sanga kuupbam tasiwik ba puya takngatu tasiwanu take sinanga dua.
PSA 2:1 Dasingge katum aminu dongu kuupbamdane nanata sanga yamandet taknga tasinangge natake yandekaing? Dasingge aminu waakwakga sanga sanga tasinangge natake wamu moo yandekaing?
PSA 2:2 Kingu kepna kepna yuaingga amak tasinangge tandakngakaing. Tandakngake waaminda natdetdeu takngatukan natake Buyambam tapatane umana tasiwan maiwikge kepie tawakaing. Gatu aminu tapatu Anututa tasiwan ita aminu kuupbam kakuya tasiwik kapa dakngakuu, King yuaingga aminu waapatane umana kuut tasiwan maiwikge kepi tawakaing.
PSA 2:3 Tawake waaminda anzing yakaing, “Ita ninu panggaganuwawa yuamangge nindane katakngin unekan wambuu waitdetna. Gatu ita nau takngatuta kepinin unekan wapbuu sandetna,” ngang yakaing.
PSA 2:4 Unzing yawan kake Anutu yekaune Kingu kopsa yuak kapata ayanimike sapdut wam yaninggak.
PSA 2:5 Yanike ita musiaatang toknga siknga natayamuke wamu kekeknga siknga aknga yaninggak. Yanike itane kaanga akngata tasiwan asiknga gwaukaing.
PSA 2:6 Ngan, ita wamu kekeknga siknga waaknga anzing yanikut, “Nata aminu tapatu King dakngawikge aapa gwa yawa yuak. Nata nina tewa Saion kep komune yuak. Ninane tawan takwan daka unin.”
PSA 2:7 Siwan Kingu waapata anzing yakut, “Apmanu nata wamu Buyambam tapata nanikuunin yakapit. Ita na King dakngawitde natake anzing nanikut, ‘Ga natane waaknga. Nata gatane nangga dakngake yuat.
PSA 2:8 Gata na nanikwaiwinu katum aminu kuupbam keu kaukaut nana aminu gae gamit. Gama gata aminu kepna kepna nana kuupbam kakuya tasiya.
PSA 2:9 Kakuya tasike gata musipbaatangu waaminde butaya natake katakga kekeknga sikngaapata kayuya. Kayuke gata waaminu pake matekmateknga zipbuya. Unzing aminda gapma kwatan gwen zipbukaing binga,’ ngang nanikut.”
PSA 2:10 Siwan wamu waaknga natake ginu King aminda maak gwaang pake yuyukza tapan nomatayok. Ngan, ginu kepna kepna yuainggane tupan amin, ginda wamu aaknga natake, Yako, ngang natake akgwautnong.
PSA 2:11 Ginda Anutuekan akgwauke ie gepbiatang koyutnong. Koyuke ie asatnake ngana ie gatu apbaknganong.
PSA 2:12 Ginda itane waakngae asinimbaknganong. Ita musiptok ginde natapsak. Dasingge, ita musiptou zaat natandaman ginda akumning. Siwan ngana aminu Anutue gepbiatang koyukengu, waakwakga apbaknganing.
PSA 3:1 Buyambam tapa, natane iwana kwaapzang singgak. Ngan. Aminu kwaapzangga na tasiwa maiwitde tasikaing.
PSA 3:2 Tasike waaminda nae anzing nanikaing, “Asikaya Anututa ga gatangamik,” ngang yakaing.
PSA 3:3 Siwan ngana, Anutu, ga tiunggu amakgane dakata binga dakngake na takusopunggayak. Gata na takusopuke tasiwi natane umana buyambam siwawan nata akekekake yuat.
PSA 3:4 Siwan Anututa na gatangamikge ayatawanggat. Ita enane siknga tawanu inane dakane yuke nata wamu yanggau atnatangamunggak. Natangamuke na take gatangamunggak.
PSA 3:5 Siwan zikaane na dapuna peke apepbotanggat. Pesika gatuna enake na take yuat. Dasingge, Anututa na kakuya katak siknga nanduyuak.
PSA 3:6 Natane iwana 10,000-nu kepna kepna nanata umutnawakaing. Umutnawawa ngana nata ie dua gwaukgat.
PSA 3:7 Buyambam tapana, ga natane Anutuna. Gata apuke na gatangamuyo. Gatangamuke natane iwana atzipso. Ngan, itane gena zipmanziya.
PSA 3:8 Buyambam tapata ninu sandeke papan meya takngatu dua kanim. Buyambam tapa, ninu gikane amindabamde kakuya take pasiwi takekan yutnim.
PSA 4:1 Anutu, gata natane Anutu noman sikngaapanin. Nata musipmaatang meya siknga nataat. Sike nata ga gatangamiyakge natake gae ganiwa gata nae wam natake gatangamuyo. Gatangamuke gata na musipmane meya nataat taknga sandekngamuyo. Sandekngamuke gata nae musip kwikwik natangamuke tumuk wamae maak papso.
PSA 4:2 Ginu kuupbam! Tapduu datdasing binga ginda natane umana yaitapaakusiwan natane umana kopsa akngata wena siwik? Tapduu datdasing binga sanga kem taknga akngae natanggamataning? Tapduu datdasing binga ginda kem taknga inata inata tawake tasining?
PSA 4:3 Ginda wamu aaknga katak siknga natapnong. Aminu Buyambam tapae gepbiatang koyuaingu, waaminu inae yawan yuaing. Siwan nata ie ininggamatawawa, ita nata yanggau atnatapik.
PSA 4:4 Ginda musip tok natapning kopatangu ginda wai tasinanga aknga apbitanong. Tapduu dapunza petnangge tasikaing komune ginda natdetdetza ba musipzaatang nataingu katak natake genza asuumutnong.
PSA 4:5 Ginda sanga inata inata Buyambam tapata take nataak takngakan take imunong. Imuke ie banip siknga sinong.
PSA 4:6 Siwan aminbamda yakwaik wamu yumdekan anzing yakaing, “Mamin tapataka ninu take gatanimik?” Buyambam tapa, gata ninde musip kwikwik natanimuke gatanimuyo.
PSA 4:7 Siakan. Tapduu nanamu wit gatu wain ngang yanikaingga puyane buyana kwaapzang aawanu aminbamda kake apbakngakaing. Siwan ngana baknga baknga aknga nae musipatang tekuyakga itane bakngananga akngana ayapbikut.
PSA 4:8 Buyambam tapa, gatakan nanduyuwawi na take yuke sanga tapatue dua gwaumbit. Dua gwauke tapduu nata dapun pekgat komune zaat pepbotanggat.
PSA 5:1 Buyambam tapa, natane tumuk wamae maak pangamuyo. Natane natdetdetnane yangapuke natanggamatanggat takngae natapso.
PSA 5:2 Ga natane kinga, siwan natane Anutuna. Tapduu na gata gatamiakge natake tumuk wam ganinggat komune maak gwaang panggamuyo.
PSA 5:3 Buyambam tapa, tembana bamu asinggan nata tumuk wamu gae ganinggat. Ganiwawa kuku gunzitda akonggak. Ge gata yapii yake naniwiakge maak pake yuat.
PSA 5:4 Anutu, ga sanga waiakngae take dua nataayak. Aminu waiaknga tasikaing amikat gaat gatake yutnanga dua.
PSA 5:5 Gata yamandet tasikaing aminu kapewi gae nomune yutnanga dua. Wena siknga. Siwan gata waiaknga tasikaing aminde semna siknga nataayak.
PSA 5:6 Gata kem wam yakaingu kuupbam apasiwi maikaing. Siwan amin zipmake kem wam yakaing aminde toknga siknga nataayak.
PSA 5:7 Siwan ngana gata nae musip kwikwik siknga natangamunggayak. Unzingge nata yotdane take akopit. Yot takwan gwende kanggamatake munu puke ganimbakngawit.
PSA 5:8 Anutu, iwanata nutnangge tasikaing. Ge gata kepina tanomanuwi gatane yuyukga noman taknga tawambit. Tawamba noman taknga gata take nataak kakngane gata tupan kuke nanitake kuyo.
PSA 5:9 Sike iwana waakwakga siakan wamu takngatusimu dua siknga genane yakaing. Dua yake aminu kundu pasiwa maining gekan nataaing. Siwan kem wamu atdopan yuke yakaing. Yake tanzit wam yanike tasiwa maikaing.
PSA 5:10 Sike Anutu, gata yake waaminde wamna natake toknga take yamuyo. Yamuke tasiwi waaminda natdetdeu gutonga nataaing kakngata pasiwan sopunong. Waaminda gae yamandet tasike waiaknga buyambam tasikaing, gae nomune dua yutningge yanikwasiwi maa siknga kunong.
PSA 5:11 Siwan ngana aminu kuupbamu gae gepbiatang koke yuaing aminu take nataaingu waaminda apbakngake kap gwaang taike yutning. Gata take siknga kakuya tasinggayakge aminu kuupbamda gae asiknga bakngake gatane umanda yatangenakaing.
PSA 5:12 Buyambam tapa, gata aminu gae wam natake tasikaing aminde take natayamuke sanga takekan tasiyamunggayak. Gata tuyunggu amin kotnanggak san binga dakngake pakotnanggayak. Katak siknga pakotnawi take yuaing.
PSA 6:1 Buyambam tapa, gata nae kaanga natangamunggayak ngana na kaanga ma naniwim. Ga nae musiptok nataayak ngana gata na ma tasiwi maiwam.
PSA 6:2 Buyambam tapa, na kekekngana wena singgak. Unzingge gata nae butaya natapso. Natane gupma tuyuknga siknga singgak. Ge gata na tasiwi take gatu yuwit.
PSA 6:3 Natane musipmaatangu meya buyambam siknga. Siwan ngana Buyambam tapa, ga dasing? Tapduu datdasing nandutewi musipmaatang meya buyak yuwit?
PSA 6:4 Buyambam tapa, gata gatuka na tapi na dua kupit. Gata nae musip kwikwiu asinggan asinggan natangamuke gatangami nata take yuwit.
PSA 6:5 Aminu gwa kumbingga gae musiaatangu natdetnanga dua. Akungwake paku keu yuaing komunetanu gae umanda kopsa akngae dua yatangenakaing.
PSA 6:6 Nata gae yake yake yuwawa natane kekekngana wena singgak. Siwan zikaambamu asinggan kumzang kwanamu siwawa apekgat komu kai yangganata tasiwan bukatanggak. Ngan, natane buka gwena yanggakan singgak.
PSA 6:7 Natane iwana kwaapzang siknga. Unzingge na musipmaatang meya siknga natake kwanamu sike sike yuat. Kwanama siwa kainata zukngawan nata sanga tapatu katak kananga dua singgak.
PSA 6:8 Nata Buyambam tapae sitawamba gwa natangamuk. Ge ginu sanga waiaknga tasikaing aminu, napmake kukanong.
PSA 6:9 Nata Buyambam tapae yatawamba ita na gatangamikge gwa natangamuk. Ngan, ita tumuk wama gwa natak.
PSA 6:10 Natane iwanata meya buyak yuke nangaakan natapning ngangu nata atnataat. Nangaakan natake maaknga siknga natapning. Maaknga natake zeetgaman na napmake kuke datdaptake sukuning.
PSA 7:1 Anutu, Buyambam tapana, nata gae apuke iwanata nandupnang ngang natake kusopunggat. Kusopuwa gata gatangami aminu atnawaningga dua nutapan kupit. Ngan, gata na tapi nata meya dua papit.
PSA 7:2 Gata na dua tapinu iwanata kaap zongu laion ngang yanikaing binga dakngake amin gup yatdakngakaing binga na tasiwa maiwit. Ngan, waaminda kaitake keu komdune takuuwan aminu tapatuta na dua nanduke tapik.
PSA 7:3 Anutu, Buyambam tapana, sike na sanga wai takngatu apba tasikum, ba dasing? Ie na dua nataat.
PSA 7:4 Ba nata notna tapatue tanzit ba tasikum. Tasike kem wamu unin ba inikum. Siwan gatu nata iwana moo siknga ba tasiwa maikut.
PSA 7:5 Ayok, gata iwana kapewi na nawake tanggaganutnong. Na take nainggamuke natane gupma yainggamutake tasiwan kepdakane moo peke maiwik.
PSA 7:6 Anutu, natane iwanata musiptou amau nae tasinangge yakaing. Siwan gata waaminde musiptou natayamuke na gatangami meya dua kawit. Anutuna, ga nomana akngaekan nataayak. Unzingge gata enake waamindane amak wamna katak usanziyo. Usanzike kepi noman takngakan tawake na gatangamuyo.
PSA 7:7 Aminu apu unekan yuaingu gae wesim apuke takumbasinong. Siwan gata enane siknga yuke waaminu kayuyo.
PSA 7:8 Buyambam tapa, gata aminu dongu kuupbam usanzikgayak. Buyambam tapa, ga umanda kopsa siknga apanin. Gata na usanzike nandupi nata kepi noman takngaat gatu take siknga akngaat nganggan tasinggat taknga kake na usanzike take ngang naniyo.
PSA 7:9 Anutu, ga nomana sikngaapa. Gata aminbamda natdetdetnane gatu musiane nataaing kaknga usanzikgayak. Unzingge gata wai amindane musiptok natake wai tasikaing taknganane apasiwi wena sinong. Siwan gata noman aminu gatayami waaminu kekeknga yutnong.
PSA 7:10 Siwan natane tuyunggu Anutu unin. Ita nae kuyana tasinggak kapanin. Ita aminu ie wam natake tawakaingu papan takekan yutnong.
PSA 7:11 Anututa wamu noman gan usanzike wamu noman gan yanggak kapanin. Siwan gunzit bam asinggan ita waiaknga tasiya aminde musia toknga siknga natake yaipakepunggak.
PSA 7:12 Sike wai aminda musia dua tapan tekwambanu Anututa bainatna yasiwan tokngaaning. Siwan gatu kweemna mitake amak tasinangge tandakngawik.
PSA 7:13 Ita sanga amak tasike amin yapan kumningge gwa pandakngakut. Itane sakuu katapna kaya kaikgauni. Ita sakuu waapa apa wai amin yapan kumningge gwa pandakngakut.
PSA 7:14 Dasingge, wai aminda waiakngakan tasinangge natake natdetdetna gwa natapan yuaing. Ita sanga wai takngatu takngatu tasinangge tandakngake tasiwawa buyana asaawik. Buyana asaawan waaminda wai siknga meya buyak yutning.
PSA 7:15 Siakan. Aminu gapma buyambamu dakatu kwaiwa aminu kundu undang pukuwa papikge kwaikuu gapma wandakaatangu ina pimake pukuwik.
PSA 7:16 Ngan, gutonga ina tasinggak kakngata ina usukwatapik. Siwan amak wamu aminu kundue tasinangge yawik kakngata tapan tekwamban ina tasiwan maiwik.
PSA 7:17 Ngan, natapnong! Anutu waapa nomana sikngaapa. Unzingge nata ie gaak wamu ininggat. Nata Anutu enane siknga yuak kapae kau taike umana yatangenawit.
PSA 8:1 Anutu, ga nindane Buyambam tapanin. Gatane umanda aknga kopsa siknga yuak ngangu keu kuupbam kokomune anggaman singgak. Siwan gatane umanda buyambam taknga ena kakaa komune kuut tapan sopunggak.
PSA 8:2 Siwan gata natake waatdakaat engangkat kuutda gatane umanda yatangenatningge yawi kekekakut. Yawi kekekawan damanu kekeknga siknga gatane iwandaat gatu gae wam sapdukaing aminkatde kepi wamake umuyamunggayak.
PSA 8:3 Sike gata ena kakaa komu tasike tekuyakat gatu yekap gwen gatu yekapdaak ngangu pasike enane pewi yuaingu nata kake anzing nataat.
PSA 8:4 “Ninu aminu dasing binga ge gata ninde natanggamatanggayak? Ninu sanga yumdekan binga. Dasingge gata ninde kakuya tasinggayak?”
PSA 8:5 Gata ninu tumuke ninu umanin yapangenake pasiwi umaninu kaya dakngakamang. Siwan ngana angelatane umana akngata nindane umanin ayapbikaing.
PSA 8:6 Siwan gata ninu sanga bamu gika pasike pekuyau kakuya ninda pasinimde nipmambi yuamang. Siwan sanga kuupbamu pekuyau ninu aminde gepbiatang koke yuaing.
PSA 8:7 Ngan. Sipsip gatu ikwawa gaman gatu kaap zongu zongaatang yuaing.
PSA 8:8 Siwan gatu kwaiu engatangan bepmakaing. Gatu nambis gwene nana pis, gatu sanga bamu yangga gwekatang sukukaingu, wa kuupbamda ninde gepbiatang yuaing.
PSA 8:9 Anutu, ga nindane Buyambam tapanin. Gatane umanda aknga kopsa siknga yuak ngangu keu kuupbam kokomune anggaman singgak.
PSA 9:1 Anutu, natane musipmaatangu gae gaak wam ganinangge take siknga nataat. Nata aminu kuupbam gata puya kekeknga aknga aknga pasikuyakge yaninangge nataat.
PSA 9:2 Nata gae natake nata kau apbakngananga aknga tainggat. Anutu kopsa sikngaapa, nata umanda kopsa siknga akngae kau taike umanda yatangenawit.
PSA 9:3 Dasingge, natane iwanata ga ganduke waakwakga atdatakukaing. Datakuke kaikane pimake waakwau kuupbam kungwakaing.
PSA 9:4 Gata wamu noman gan usanziwi waaminda kungwakaing. Gata natane yuyuknga usanziwi wamu yawiu natane wamu noman gan siwik.
PSA 9:5 Ngan, gata katum aminde kaanga wam yanikuyak. Yanike gata wai aminu gwa pasiwi maiking. Siakan, gata waamindane umana aknga gatukande dotdonguwi aminu tapatuta waamindane umana dua siknga natapik.
PSA 9:6 Gata iwanu gwa pasiwi maikingu ina unzing asinggan asinggan yutning. Anutu, gata waamindane yotbam gapma gapma gwa pasiwi maikingge aminu kuupbamda waaminde apbotake gatu natapnanga dua.
PSA 9:7 Siwan Buyambamtapa Kingu asinggan asinggan yuwik. Yuke ita wam usanzitnangge natake gwa tandakngake yuak.
PSA 9:8 Ita aminu kuupbam noman siknga kayuak. Ngan, inane noman takngane aminu yuaingu kuupbam yuyuknga saak usanziwik.
PSA 9:9 Buyambamtapa you kekeknga gwenduta binga yuak. Aminu kundu iwanata meya yamukaingu, waaminu ie kuke iatang koke kusopuke take yutning.
PSA 9:10 Buyambam tapa, gata aminu gae apukaingu masa dua yamunggayak. Unzingge aminu gatane yapiie atnataaing ganu gae gepbiatang koyutning.
PSA 9:11 Buyambam tapata King siknga Saion yotbam gapmane yuakge ginu kuupbamda ie kau taike umana aknga yatangenatnong. Yatangenake dongu kuupbamde puya buyambamu ita pasikutde yanikapnong.
PSA 9:12 Buyambam tapa, aminu amin zipa kungwakaing aminde yake toknga yamunggak kapata atnatanggamatanggak. Sike kwanamu ie sikainggengu maaknga dua umukusinggak. Dua umukusiwan aminu aminda toknga aknga yamukaing aminde yake toknga yamunggak.
PSA 9:13 Siwan Buyambam tapa, iwanata meya nae namukaingge kayo. Na akupitde dapaknga gwa siwan ngana gata nae musip kwikwik natangamuke na tapi take yuwit.
PSA 9:14 Unzingge nata sanga kuupbam gata tasikuyakge yanitakuke gatane umanda yatangenawit. Yatangenake nata Saion yotbam gapmane gwambok gwaune yuke gata na takuyakge apbakngake yanikapit.
PSA 9:15 Sike katum aminda kepdakaatang gapma nin panggaganuwikge kwaiking ngana waaminda ina pimaking. Siakan. Waaminda yapapna nin panangge kaiwan dandakaking. Kaiwan dandakawan ngana yapapnata ina pakut.
PSA 9:16 Anututa inane yuyuknga waaminde tapduu wam yakaing komune yeuyamunggak. Unzingge wai aminda aminu kundu pasiwan mainingge pasikaing ngana Anututa tasiwan sanga wanda tapan tekwamban ina pasiwan maikaing.
PSA 9:17 Wai aminu kuupbamda gwa kumbing aminda yuaing komune paku yutning. Ngan, aminu Anutue masa imukaingu wa kuupbam waomunekan paku yutning.
PSA 9:18 Siwan ngana asingganu Anututa aminu sangaapana wenae dua botawik. Ngan, aminu wa meyambam pake yuaingga Anutue banip siwan ita gatayamikge kayutning. Kayuwawan ita moo dua kapewan yutning.
PSA 9:19 Siwan Anutu, ga apso. Gata aminu dua kapewi gae yamandet tasining. Gata katum aminu pasiwi wam yananga komune yuwawa gata waamindane yuyuknga usanziyo.
PSA 9:20 Buyambam tapa, gata pasiwi waaminu asiknga gwautnong. Gata pasiwi aminu kuupbam anzing natapnong, “Ninu amindakan sanga moo binga yuamang.”
PSA 10:1 Buyambam tapa, ga dasingge napmake paku maa yuayak? Ga dasingge tapduu nata meya kaat komune na napmake paku kusopunggayak?
PSA 10:2 Wai aminda yamandet sike kekekngana wena aminu apasiwan mainingge yawakaing. Yawake aminu wa kekekngana wena aminu panggaganutnangge natake gapma kwaiwan undang pukuning.
PSA 10:3 Wai aminda yamandet sike sanga wai musiaatang nataak kaknga tawake tasinggak. Tawake tasike aminu sangabamde geengukgak kapa apbaknganggak. Apbakngake ita Buyambamtapa inisapduke ie masa imunggak.
PSA 10:4 Masa imuke na kopsaapa yuat ngang musiane moo siknga nataak. Natake Buyambam tapae dua natapan singgak. Aho. Natdetdetnaatangu Anutue dua siknga nataak.
PSA 10:5 Sike sangabamu ita pasinggau takekan singgak. Buyambam tapa, ita gae natdetdetde mateknga sipaa dua nataak. Siwan ita sapdut wamu iwanae ayanggak.
PSA 10:6 Itanu anzing nataak, “Na kekeknga yuat. Sanga tapatuta dua siknga kwasiwik,” ngang nataak. Siwan, “Nata meya dua kawit. Aho, asinggan asinggan musipma tatanga natake yuwit,” ngang yanggak.
PSA 10:7 Ita wamu wai yake aminu kundue asinggan yanisapdukgak. Yanisapduke ita kem wam gatu gwaut wamu aminu kundue yanikapmanggak. Siakan, ita wamu waiaknga aknga yake gutonga kwaapzang pasinangge yanggak.
PSA 10:8 Gatu itakan yotgapma kwaimune kusopuke yuwawan aminu noman amin tapata apan tanguwan kupikge natake yuak. Siakan, ita akusopuke kayuwawan aminu tapatu tapatuta apa kake zipan kumningge kayuak.
PSA 10:9 Unzing kaap zongu laion ngang yanikaingga ganangiatang kusopuke kayuaing binga kayuak. Siwan akusopuke kekekngana wena amin panggaganutnangge kayuak. Ita yapapnaatang panggagunuke kaipake kunggak.
PSA 10:10 Ita ayaitapakusike yuwawan aminu kekekngana wena aminu zaatgaman maikaing. Siakan, wai aminu waapatane kekeknganata ayapbikgak.
PSA 10:11 Ayapbike ita anzing nataak, “Anututa gutonga nata pasinggatdenu nangaakan dua nataak. Ita na dua nanduyuak. Kai gwa dopusangakutde nandupnanga dua.”
PSA 10:12 Buyambam tapa, ga apso. Anutu, apuke gata wai aminu waakwau atasiwi mainong. Sike gata aminu meya pakaing aminde dua botawim.
PSA 10:13 Siwan wai aminu waapata gae masa gamuke musiaatangu anzing nataak, “Nata gutonga tasinggatde Anututa meya yake dua namik.” Dasingge, aminu waapa gae dua ba gwauke yuak?
PSA 10:14 Siwan ngana wai aminu waapata wai takngatu takngatu pasiwan aminu kunduta meya pake maike yuwawan gata katak akaayak. Akake gata toknga ba meya aminu kunduta kaaingu gata kake waaminu gatayamunangge atandaknganggayak. Ngan, ga sangana wena aminu gae gepbiatang koke yuwawanu gata asinggan gatayamunggayak. Siakan, aminu nana gwa kumbuu kekekngana wena apaya gata gatangamunggayak.
PSA 10:15 Gata wai amindane kataknga puke kekekngana pasiwi sopunong. Pasiwi sopuwan kotim tasike waiaknga waaminda tasikaingu gatu dua tasiwan kaya.
PSA 10:16 Buyambamtapa Kingu asinggan asinggan yuwik. Yuke ita katum aminu inane kep komune yuke ie masa imukaingu yanikwasiwan kuke gatukande wena sining.
PSA 10:17 Buyambam tapa, gata aminu meya takngatu takngatu pake yuainggane tumuk wamnae atnataayak. Wamna natake gata musia papi kekekanong.
PSA 10:18 Siwan wai aminda meya takngatu takngatu toitoitde yaman musiane meya nataaingu gata akgatayamunggayak. Gatayami aminu kepdakane nanata gatu waaminu dua pasiwan gwautning.
PSA 11:1 Na Buyambam tapae gepbiatang koyuwawa ita na akgatangamik. Asikaya ga apbotake ba unzingu naninggayak? “Ga tawandakane datakunggayo. Unzing kwaiu gwenduta akgwauke datakunggak bingan.”
PSA 11:2 Dasingge? Wai aminda kweemna mitake sakutna pake aminu noman yuaingu zikaane akusopuke yamnangge tasikaing.
PSA 11:3 Tasike aminu kuupbamda kepi noman taknga gatu dua tasiwanu aminu kepi noman tawake tasinggak kapata dasing siwik?
PSA 11:4 Buyambamtapa yekaune king kapa yuak. Ngan, king kapa yuke aminu kuupbamu kainata akaak. Kake sanga kuupbam tasikaingu usanzikgak.
PSA 11:5 Buyambam tapata aminu noman usanzikgak. Siwan ngana ita inane mama wam sandeke amak tasinangge take siknga nataing aminde asiknga bitanggak.
PSA 11:6 Siwan ita katau toknga siknga aknga wai aminde tukngwayapbimban yasiwik. Sike waiaknga tasikainggane buyana unin.
PSA 11:7 Dasingge? Anututa ina kepi noman takngakan tasinggaunin. Siwan ita kepi noman tawake katak siknga usanzikgak kakngae take siknga nataak. Ge aminu ie wam tawake tasikaingu itane nomna akaning.
PSA 12:1 Buyambam tapa, gata na gatangamuyo. Dasingge, aminu gae gen gwaamukgau tapatu dua yuak. Gatu aminu gae banip singgau tapatu tawamba maik. Siwan gata na dua nandutewi banip dua sikaing aminkat gatake yutnim.
PSA 12:2 Siakan. Aminbamda notna notna kem yanikaing. Ita waaminu kaa wam yanike tanzit pasikaing.
PSA 12:3 Buyambam tapa, gata kaa wam yakainggu, gena umumso. Gatu yamandet aminu kuut gena umumso.
PSA 12:4 Waaminda anzing yakaing, “Ninda wam yake sanga inanatap tasike aminbam yapbitnim. Aminu tapatuta ninu ninindakngananga dua. Wena. Ninu maminda kakuya tasinggak?”
PSA 12:5 Siwan waaminda aminu kekekngana wena amin gatu sangana wena amin yaipakepukaing. Yaipakepuke yanisapduwawa meya pake yuaing. Siwan ngana Buyambam tapata anzing yanggak, “Nata enake aminu meya unzing pakaingu takekan yutningge nata kakuya tasiwit,” ngang yanggak.
PSA 12:6 Buyambam tapatane wamu kuupbam siakan gan. Itane wamu take siknga, unzing suu gwendu silwa ngang yanikaingu katap gwene tapduu katau kuutmusa gatu kautdu gweyaa ngang sawan dopna wena siknga singgak binga.
PSA 12:7 Buyambam tapa, ninu kakuya katak pasiyo. Ninu kakuya asinggan katak pasiyo. Asinggan asinggan gata pasiwawi wai aminda ninu dua pasiwan mainim.
PSA 12:8 Dasingge, tapduu aminu kuupbamda sanga waiakngae natapan takekan siwanu wai aminda tendeknga wena yamandet sike kepi kepi sukuke tawamban sandekgak.
PSA 13:1 Buyambam tapa, zaapduknga gata nae gatuka natapsa? Asikaya gata nae asinggan asinggan apbotanggayak, ba dasing? Tapduu zagwene na nandutewi gatane nomba takusopunggayau gatu gandupit?
PSA 13:2 Tapduu zagwene gata meya nata musipmaatangu gwaamukgat taknga sandekngamuya? Kwakngaom ba zikaa datdasing siwana musipmaatang meya nataau yuwik? Tapduu zagwene gata gatangami na iwande gepbiatang yuwau teke gatu dua yuwit?
PSA 13:3 Buyambam tapa, ga natane Anutuna. Ga nae asiknga natanggamatake natane tumuk wamae natapso. Natake gata gatangami nata dua kupit.
PSA 13:4 Gatangami dua kupa kake iwanata anzingu dua yaning, “Ninda i gwa yapbikamang,” ngangu dua yaning. Aho, iwanata dua yake nata pimambitde dua baknganing.
PSA 13:5 Siwan ngana gata musip kwikwiu nae asinggan natangamuya ngangu atnataat. Siwan gata na gatuka tapi take yuatde apbaknganggat.
PSA 13:6 Ngan, nata kau Buyambam tapatane umana yatangenatnanggengu ataiwit. Dasingge, ita nae take siknga tasingamukut.
PSA 14:1 Katum aminu natdetdetna wena aminda inae anzing yakaing, “Anutu dua yuak,” ngang yakaing. Aminu waakwau wai amin siknga. Waaminda sanga wai siknga takngakan tasikaing. Waaminkat nana tapatuta sanga nomanu takngatu dua tasinggak.
PSA 14:2 Buyambam tapata yekaune yuke aminu kuupbamde pakepusang ninduak. Ninduke aminu natdetdeu noman pake Anutue tawakaing aminde yawanggak.
PSA 14:3 Siwan ita waaminde yawanggak ngana wena kaak. Kuupbamda kepi noman taknga gwa teking. Aminu wai siknga. Aminu tapatuta sanga nomanu takngatu dua tasinggak. Wena siknga.
PSA 14:4 Aminu wa waiaknga tasikaingu sanga nomana akngae dua ba natdetning? Waaminda poyak napan puyukgak binga natane aminabamu zipa puyukgak. Siwan Buyambam tapata gatayaman waiaknga teningge tumuk wampaa dua inikaing.
PSA 14:5 Tumuk wamu dua inikengu waaminu asiknga gwautning. Dasingge, Anutu inane wam natake tawakaing aminkat gatake yuak.
PSA 14:6 Sike ginu wai aminda sangana wena amindane kepi umukusike tasiwan meya buyak yuaing. Siwan ngana Buyambam tapata sangana wena. Waaminu kakuya tasinggak.
PSA 14:7 Siwan Anututa Saion nana aminu tapatu initewan apu Isrel nana gatu papan takekan yutningge take siknga nataat. Tapduu Buyambam tapata aminabam gatayaman take yutning komune aminu Jakopdane dongune nana apbaknganong. Ngan, Isrel nanata musipgwaang siknga natake yutnong.
PSA 15:1 Buyambam tapa, mamin amin tapata gae yotda buyambam gwene koke yuwik? Ngan, mamin amin tapata gikane tawanu Saion dakane pakuyuwik?
PSA 15:2 Aminu tapatuta kepi nomana aknga asinggan tasiwik. Tasike gatu siakan wamu asinggan yake tasinggak kapata gae yotdane yuwik.
PSA 15:3 Siwan ita aminu kundutane umana takeaknga dua yaipapaakusinggak. Ita notnae wai takngatu dua tasiyamunggak. Siwan ita sapdut wam yawan natakge dua yanggak.
PSA 15:4 Sike waapata aminu Anututa masa yamukut aminde apbitanggak. Bitake ita aminu Anututane wamna natake tawakaing kaknga yakapan apbaknganing. Siwan ita wamu ina yanggak kaknga atasinggak. Tasiyuuk meya ie apan kakengu ita nangaakan dua natapik.
PSA 15:5 Siwan ita kapewan aminu kunduta apu sanga moo yamikge iniwanu ayamunggak. Ge yake pakapu imanu sikopnae dua yaniwan imukaing. Siwan aminu tapatuta aminu gutongana wena apae kot yakut. Yawan aminu wa yake pakapu imanu sikopnae dua yanikut tapata moning pake gutongana wena apa kautde moo tewikge inindatdauwan mainggak. Siwan aminu tapatuta kepi waaknga tawambiu dua pimapik.
PSA 16:1 Anutu, gata na nanduyuwawi nata take yuwit. Dasingge, iwanata na dua nuwan maiwitde nata gatane gepbiatang koke yuat.
PSA 16:2 Nata Buyambam tapae anzing inikum, “Ga natane Buyambam tapana. Sanga nomana nata pake yuwau kuupbam gae kataunetakan apukaing,” ngang inikum.
PSA 16:3 Sike aminu Anututanen, kuupbam take siknga. Na waaminde asiknga baknganggat.
PSA 16:4 Sike aminu anutu pupuknga apaapae tumuk yaninangge natake isapmake kukaingu meya kwaapzang gwaamutning. Gatu na iat dua gatake yuke amindane daknga anutu pupukngae yamunim. Aho, waamindane anutu pupuknganae umana dua yake tumuk wamu nata ie dua yaniwit.
PSA 16:5 Buyambam tapa, gata sanga take siknga takngatu takngatu nae gwa namukuyak. Nami pake nata take yuat taknga gae kataune yuaunin.
PSA 16:6 Nata sanga nomanomana kuupbamu gae kataunekan panggat. Siakan siknga. Sanga wa kuupbamde iaknga siknga natake ie apbaknganggat.
PSA 16:7 Nata Buyambam tapatane umana yatangenawit. Dasingge, ita na nanindamuke tanomanukgaunin. Ngan, zikaane natdetdet panggat takngata atnanindamukgak.
PSA 16:8 Asingganu Buyambam tapata nae wesim yuak ngang nataat. Ita wesim yuke nae kekeknga atnamunggak. Unzingge na aminu tapatuta dua tasiwan gwauke dandana yamutning.
PSA 16:9 Unzingge musipmane natapa take siknga singgak. Siwan natane waung ngaaya asiknga baknganggak. Unzing na mateknga simpaa sanga tapatue dua gwaumbit.
PSA 16:10 Dasingge, gata na dua nandutewi aminu gwa kupsa amindane kep komune paku yuwit. Aho, gata dua nandutewi na aminu gikane matmaune yuke kapanga siwit.
PSA 16:11 Gata gika kepi kayuk take yutnanga aknga nae yeikngamukuyak. Gata nae wesim yuwi na kumzang siknga bakngawit. Gata wesim yuke gatangami natane musipmaatangu asinggan asinggan bakngawit.
PSA 17:1 Buyambam tapa, nata gae yanggawanggatde natapso. Nata aminu gutonga aknga tawake temapa naniwan maiwikge ganinggat. Tumuk wamu nata kemu dua ganinggat. Unzingge gata maak pangamiyakge nataat.
PSA 17:2 Gata gatangami nata wamyak gwene wamu yawiu ayapbimbit. Dasingge, gata yuyuu noman takngaenu katak siknga atnataayak.
PSA 17:3 Gata natane musipmaatang nataat taknga atnataayak. Natake gata zikaane apu nata natdetdetnane nataat taknga usanzike tasinggayak. Tasiwi siwan sanga wai takngatu kawi maiwik. Dasingge, natdetdeu gutonga takngatu musipmaatangu dua natake yuat.
PSA 17:4 Nata wamu wai takngatu aminu kunduta yakaing binga genaneta dua yanggat. Wena siknga. Nata gatane wamu kekeknga take wamu wai takngatu dua siknga yanggawanggat. Siwan aminu amin kundu zipa kumningge nataaing amindane kepie masa yamunggat.
PSA 17:5 Asingganu nata gatane kepi aknganekan sukunggat. Sukuke natane kepina kepi gwatdu kunangge songu dua yaikum.
PSA 17:6 Anutu, gata natane tumuk wama yanggatde natake akgatangamuyo. Unzingge nata tumuu gae yanggat. Gata maak pake natane tumuk wammae natapso.
PSA 17:7 Anutu, ga nindane gatakgatak kapanin, gikane musip kwikwiu buyambam takngaka ninde yeutnimuyo. Gata aminu gae wesim yuke iwanae akusopukaingu, gatuka papi take yutning.
PSA 17:8 Na gikane kaikata kakuya noman siknga tasinggak binga nakaya unzakan tasiyo. Na taakga mateknga piatang kopa usikwatapmanggak binga takusopuyo.
PSA 17:9 Takusopuwawi wai aminda nae iwana siknga dakngake na nuwa kupitde natake na umupbasitnawawa kake gata na usikwatapi waaminda na dua tasiwa maiwit.
PSA 17:10 Waamindane musipna zikaa siwan aminu kundue take dua natayamukaing. Dua natayamuke nindane umaninu kopsa ngang natake yamandet wam yakaing.
PSA 17:11 Waaminda natane kepi tanga kake na nawake nanduke umupbasitnawakaing. Umupbasitnawake na kumzang nanduyake na tanggaganuke kepdakane yaitakepukaing.
PSA 17:12 Waaminu kaap zongu laionda tomna natake kaapna zipnangge tasinggak binga. Ngan, waaminu laionda muna puke kusopuke kayuak binga.
PSA 17:13 Buyambam tapa, gata apu natane iwanaat amake waaminu yaipakepso. Gata amakgane bainatda take waaminkat amake na wai amindane kataune sandeke tapso.
PSA 17:14 Siakan, Buyambam tapa, gata na gikane kekekngakaneta gatangamuyo. Siwan na waaminda dua tasiwan maiwit. Sike waaminda sanga kepdakane nanakan papan dopan yuaing. Waamindane kekeknganane sandeke tapso. Siwan aminu gata musip gwaang natayamunggayak aminu tomna natapning, ngana gata gatayami tomna wena siwik. Tomna wena siwan waamindane waatdakanata sangae dua dapmake yutning. Dua dapmake yuke waakwakgane bapuna masan aatning aminu sangae dua dapmake yutning.
PSA 17:15 Siwan gata na katak usanzike nandupi noman siwik. Noman siwan, nata gatane nomba masande asiknga gandupit. Ngan, tapduknga nata kungwake dapuna binga pesika gatuna enawit komune nata natapa ga naat gatake yuamak ngang natake na apbakngawit.
PSA 18:1 Anutu, na gae banip gwaang siknga nataat. Gata na atapi kekekanggat.
PSA 18:2 Buyambam tapana damanu kekeknga gwenu unin. Sike i suu gwenduta binga, na takusopunggak. Sike ita na iwanae katune sandeke tanggak kapanin. Sike natane Anutuna suu kekeknga gwendu binga, nata ie kuke iwanae akusopunggat. Buyambam tapana tiunggu daka binga, ita na iwanae atakusopunggak. Siwan na inane kekeknga akngane sandeke tapan na kekeknga yuat. Sike i natane damanu kekeknga gwena unin.
PSA 18:3 Buyambam tapatane umana kopsa aknga unin. Nata ie tumuk wam iniwa gatangaman natane iwanata dua tasiwan maiwit.
PSA 18:4 Na akupitde wesimu asikum. Sike wa nau takngatuta binga kekeknga wamanggaganuwan yukum. Siwan wai aminda na nuwa maiwitde kumzang tasikaing. Gatu wa tasikaingu yanggabam gwendane sambuyata binga enake na usukwatapik.
PSA 18:5 Ngan, nau takngatuta binga kekeknga wamanggaganuwan nata kupitde wesim sikum. Ngan, bungep pasike kaap zong pakaing binga na nuwan kupitde dapaknga siwan datakunanga dua sikum.
PSA 18:6 Na meya waakwak natake Buyambam tapae sitawakum. Na Anutunata akgatangamikge natake nata ie tumuk wam inikum. Ita inane yotna buyambam gwene yuke natane tumuk wama natapbut. Ngan, ita natane tumuk wama maakngata natapbut.
PSA 18:7 Siwan, Buyambam tapata musia toknga natane iwanae natapbut. Natapan miamunu buyambam siawan, tawan dakandaka ama yapiatangu ayamuke yuking.
PSA 18:8 Ngan, musia toknga natapan kupan taknga Buyambam tapatane nomna ganang epuwawan gatu katau genaatangga akoke sangabamu kwaapzang yasiking. Ngan, ita musia toknga natake tasiwan katapaimu mumuyang buyak genaneta epu kuking.
PSA 18:9 Ita minga musa kwasiwan kuwan yekau teke epuke minga zikaa musa tasiwan inane kepinae gepbiatang yukut.
PSA 18:10 Unzing angela tapatuta binga gwaamuke bepmake apbut. Sike wa apunggau got taknga kwaitdane pia kaamangga binga Anutu masene teke zeetgaman bepmake takapbut.
PSA 18:11 Ita tasiwan zikaandaka sel you gwendu binga dakngawan undang kusopukut. Ngan, sopatane minga zikaa kaamang bingata takusopukut.
PSA 18:12 Siwana undangga kakaa siknga aknga sikut. Siwan minga musaatangga kakaa aknga uneta epbing. Epuwawa yapasikga asiwawan gatu zambum mupewan epbing.
PSA 18:13 Buyambamtapa yekaune yuke gakngatda binga kaapmapa kumzang yakut. Ngan, waapa kopsa siknga apata kaapmapa wamna yakapan aminu kepna kepna nana kuupbamda atnatapbing.
PSA 18:14 Ita sakutda yamawawan iwana gwatdu gwatdu datakuking. Ngan, ita tasiwan yapasiu kekeknga siknga sakutna dakngawan iwana yamnangge pasiwan gwatdu gwatdu datakuking.
PSA 18:15 Buyambam tapa, gata iwandae kaanga yanike nombata tasiwi gou kekeknga puyawawan yanggabam gwenu ikopewan pimaking. Ikopewan pimapan keu yanggabam amunane kutakngi yuak kaknga anggaman sikut. Sike yanggabam gwenu gatukande zakngakut. Zakngawan sanga kundu kepdaka tapan kekekanggau kakaa siking.
PSA 18:16 Ita yekaune yuke kataknga tewan epan na gatuna takut. Na yanggabam gwenda asusukwatapan ngana ita na akaiwan akopbum.
PSA 18:17 Natane iwana kekeknga siknga. Ge nata yapbitnanga dua. Siwan ngana Buyambam tapata na iwanae kataune sandeke takut.
PSA 18:18 Ngan, nata tapduu wai yukum komune iwanata nae apu amak tasiking. Siwan ngana Buyambam tapata na akgatangamukut.
PSA 18:19 Ita gatangamuke nanitakuwan nata keu aanggaman komune take yukum. Sanga gwautnanga aknga wena sikut. Dasingge, ita nae musip gwaang natangamuke na gatuna takut.
PSA 18:20 Nata gutonga takngatu dua tasiwa nanduke Anututa naenu take tasikut. Ngan, nata kepi noman taknga tawamba nanduke Buyambam tapata sanga gwaamu kwaapzang namukut.
PSA 18:21 Nata Buyambam tapatane mama wamu take tawakum. Nata Anutunae masa dua imukum. Aho, wai waaknga dua tasikum.
PSA 18:22 Ngan, nata asinggan itane mama wamdekan natanggamatakum. Siwan nata itane wamu take akngae yamandeu dua sikum.
PSA 18:23 Unzingge ita atnataak. Na ie gutonga takngatu wena. Nata kepi sukukumu katak siknga tanggwaukum. Gutonga takngatu tasiat nganggen.
PSA 18:24 Buyambam tapata natane noman taknganae natayukut. Natangamuke yake yuyuu take aknga namukut. Minae, nata ie kaine dundumna yukum.
PSA 18:25 Buyambam tapa, aminu tapatuta masa gae dua gamanu gakaa yake gata masa dua imiyak. Sike aminu tapatuta noman takngakan tawake tasike gutonga takngatu dua tasiwanu, gataaya yake ie noman takngakan tasingamunggayak.
PSA 18:26 Sike aminu tapatuta noman akngaekan ba tawambanu, gata noman taknga yake tasinggamuya. Siwan ngana aminu tapatuta gutonga aknga tawake tasiwanu, gata kepi waakngae yapii katak siknga kake yake meya aknga asiimunggayak.
PSA 18:27 Gata aminu ninu kopsa amin dua dakngake yuamang ngang yakaing aminu apanggayak. Sike kundu ninu kopsa amin dakngake yuamang ngang yake umana yapangenakaing aminu, gata umana ayaipakepunggayak.
PSA 18:28 Buyambam tapa, gata kakaa aknga namunggayak. Ngan, Anututa zikaa naatang yuak kaknga atawamban kunggak.
PSA 18:29 Anutu, gata akgatangaminu nata amak tasike iwana ayaipakepu pewit. Ngan, Anututa kekeknga namanu nata damanu yot gapma takumbasikuu ayatupit.
PSA 18:30 Anututane yuyuknga aknga take siknga siwan noman gan. Sike ita sanga takngatu tasinangge yanggau, siakan gan siknga yanggak. Gatu Buyambamtapa tiunggu amak tasiya daka binga. Ita aminu ie kukaingu akgatayamuke iwanata dua kaningge apakusopunggak.
PSA 18:31 Buyambam tapakan i Anutu siknga. Asikaya Anutu tapatuat ba dasing? Ita ninu suu buyambam gwenduta binga wamambasinggak.
PSA 18:32 Anututakan tasiwan na kekeknga yuat. Gatu ita kepi sukunggau kuut gatangamuke nanduyuawan kepi noman akngane sukunggat.
PSA 18:33 Ita katak siknga nanduyuwawan na dua pimanggat. Unzing kaap zongga tawan dakandakaatang sukuke kepi katak kake sukuaing binga.
PSA 18:34 Gatu ita amak tasinanga akngae nanindamukgak. Unzing tasiwan kataknga kekeknga siwana kweemu kekeknga siknga kaiwa dandakawik.
PSA 18:35 Buyambam tapa, gata na gatangami nata tiunggu take iwana ayapbimbit. Unzing gata iwanda ayapbikgayak. Gata katakga siaapane tapi kekeknga yuat. Siakan, gata na gatangami aminu kuupbamde kaine umana kaapa dakngake yuat.
PSA 18:36 Gata kepi nata sukunggat tapa tanomanuwi kepi waapane kuke saweknga dua nuwan pimanggat.
PSA 18:37 Siwan nata iwana zipnangge yawake panggagunukum. Sike iwana waakwau atzipa kumbing. Nata kuutgan zipa puyuwan iwana tapatu wena kakenga teke yotna kukum.
PSA 18:38 Ngan, nata kuutgan zipa kepinae gepbiatang pimake kuupbam dua enaking.
PSA 18:39 Gata kekeknga amak tasiwitde namukuyak. Sike gata iwana nae kataune pewi nata waaminu ayapbikum.
PSA 18:40 Gata pasiwi natane iwana mase nae namuking. Siwan ngana nae kaanga nataaingge apasiwa maiking.
PSA 18:41 Waakwakga notnae yawa apu gatayamuningge yawan ngana aminu tapatu undang dua yukut. Ita Buyambam tapae yawa apu gatayamikge yawan ngana ie dua natapbut.
PSA 18:42 Nata pasiwa gatukande muyuu gotda apu puyapan kukaing binga dakngaking. Nata yanikwasiwa iwana ngwaik kanzangu mupewa kukaing binga dakngake moo yuking.
PSA 18:43 Siwan ngana tapduu aminu kundu natane dongune nanata nutnangge tasiking komune gata gatangami na dua tasiwa maikum. Gata nandutewi yamandet aminu dongu takngatutane tupan amintapa dakngake aminu kayuat. Sike aminu kundu nata dua nataau, apmanu nae gepbiatang koyuaing.
PSA 18:44 Aminu kunduta kepna kepna nana aminda natane umana kopsa akngae natake natane wama gwaamuke nae gwauke munu kuut nae pukaing.
PSA 18:45 Puke kekekngana wena siwan ita yotbamdane damanu kekeknga siknga gwen gwen peke yamuyamuiike nae apukaing.
PSA 18:46 Buyambamtapa asinggan yuwawik. Ita suu buyambam gwenduta binga na wamambasiwik. Wamambasike na tapan take yuwit. Unzingge ninda itane umana yatangenatnim.
PSA 18:47 Anututa waiaknga nae tasikaingu iwanae yake meya yamukut. Siwan ita aminu dongu kepna kepna nana nae gepbiatang yutningge pewan yuking.
PSA 18:48 Siwan ita na iwande kataune sandeke takut. Siakan siknga Buyambam tapa, gata nae umana kopsa aknga iwanatane kaine namukuyak. Gata gatangami aminu amak tasikaingga na dua nuwan kumbum.
PSA 18:49 Unzingge Buyambam tapa, nata gatane umanda aminu takngatu takngatue banakan yuke yatangenawit. Siwan nata kau takngatui kuut taike umanda yatangenawit.
PSA 18:50 Buyambam tapata na, Devit, King kapa dakngawitde yakut. Unzingge asingganu ita tasiwan iwana asiknga yapbikgat. Ita tendeknga wena musip gwaang nae natangamunggak. Ita natane dongu masan aatningu ina unzakan musip gwaang natake gatayamik.
PSA 19:1 Ena kakaa komune nana sangabamu kaamangga Anutu tupan sikngaapa ngang yeutnimukaing. Sanga kuupbamu ena kakaa komune yuaingga puya noman taknga ita tasikut ngang yeutnimukaing.
PSA 19:2 Siwan tapduk bamu sanga waakwakga ie atninikapmakaing. Siwan gatu zikaane kuut natdetdeu kekeknga yeutnimukaing.
PSA 19:3 Sike aminu kepna kepna nana aminda wamu inata inata yakaing ngana sanga waakngatane wamu aminu kuupbamda atnataaing.
PSA 19:4 Siwan sanga waakngaatdane wamu yotna yotna kuupbam tawamban sandekgak. Ngan, wamna waakngata kepna kepna kuupbam tawamban sandekgak. Sike ena kakaa komune Anututa sel you gwendu gunzitde mitapbut.
PSA 19:5 Gunzitda kepmanu aminda maatna tanangge apbakngake yotna teke epu kunggak binga epu kunggak. Epuke inane kepinane kunggak. Unzing aminu asisapnangge tandakngake apbaknganggak binga.
PSA 19:6 Gunzitda ena kakaa komu kwaimune kuke uneta kautdu saak kunggak. Siwan sanga tapatuta itane tokngana akngae kusopunanga dua.
PSA 19:7 Mama wamu Buyambam tapatane taknga noman siknga. Siwan Buyambam tapatane wamda ninde banip tangenakgak. Siwan ninu mama wamu Buyambam tapatane takngae banip siknga sikamang. Sike ita natdetdeu nomanu aminu natdetdetna matekngae ayamunggak.
PSA 19:8 Buyambam tapatane mama wamu nomana siknga. Siwan wamu waakngata nindane musipmin pangenawan apbakngakamang. Siwan Buyambam tapatane mama wamu kakaa aknga binga. Ita gataniman katak kaamang.
PSA 19:9 Siwan aminu tapatuta ie munu puke ininggau ita kepi noman takngakan tasinggak. Tasiwawan kepi nomanu waaknga asinggan asinggan yuwik. Ngan. Ita mama wamu kuupbam tasinimde nininggau wamu waaknga siakan siwan noman siknga.
PSA 19:10 Siwan golmanitane buyana buyambam siknga. Siwan ngana Buyambam tapatane mama wamda golmani ayapbikgak. Siwan hani kaaya siknga. Siwan ngana itane mama wamda hani ayapbikgak.
PSA 19:11 Mama wamu gatane akngata na gikane puya amindae gwaut wam naninggak. Naniwan natake nata gatane mama wamba tawanggatde gata natane yuyuknga tasiwi take siknga singgak.
PSA 19:12 Siwan ngana maminda inane gutonganae kuupbam nataak? Na gutonga kundu tasikumde apbotake na ie dua nataat. Unzingge gata natane gutonga waakngana sandeke tasiwi na gae kaikane dundumna siwit.
PSA 19:13 Na gatane puya aminda. Ge gata na kakuya katak siknga nanduyuwi nata waiaknga dua tasiwit. Gata waiaknga dua katewi na nanduyuwik. Unzingge nata noman yuke gutonga buyambamu takngatu dua tasiwit.
PSA 19:14 Natane wama gatu natane natdetdetna gae kaikane take siwik ngang nataat. Buyambam tapa, natane keu akusopunanga komu ga siwan akgatangamunggayak kapa ga.
PSA 20:1 Tapduu gwendune ga King kapata musipbaatang meya natapinu, Buyambam tapata akgatanggamikge nataamang. Jekopdane Anutunata apme ganduyuwik.
PSA 20:2 Sike ita yot takwana Saion yuak gapmaneta ga gatanggamuke kekekanggamikge nataamang.
PSA 20:3 Ninda sanga take siknga ita ie imuking kakngae take natapikge nataamang. Ngan, sanga ginda ie imunangge natake katap gwene sayae take natapikge nataamang.
PSA 20:4 Sike Anututa sangabamu gata nataau, akgamikge take nataamang. Ngan, nata puyambamu gata tasinangge natapiyau ita gatanggaman tasiwiyakge nataamang.
PSA 20:5 Unzingge gata amak tasike gwa yapbimbinu, ninda wa yapbimbiakgengu ninda apbaknganim. Apbakngake Anututane umana aknga enane siknga yatangenatnim. Siwan ninda take Buyambam tapata gatane tumuk wambae kuupbam natake unzing gatanggamikge nataamang.
PSA 20:6 Apmanu na gwa nataat. Buyambam tapata aminu Kingu ina yawan yukut tapa gatuna gatangaman take yuak. Ita yot takwana yekap komune yuke tumuk wamu King kapata ininggau atnataak. Natake itane kekeknga akngane gatangaman amau tasike yapbikgak.
PSA 20:7 Aminu kundu amak amnangge natake sanga pake amak kekeknga siknga amakaingu umana karis ngang yanikaingge banip takaing. Siwan kundu amak kumzang siknga amnangge natake hos gwegwen pake amakaingge banip takaing. Siwan ngana ninu Anutu, Buyambam tapanindane umana aknganae banip takamang.
PSA 20:8 Sike aminu waakwau apimake wena siknga sining. Siwan ngana ninu asenake kekeknga yutnim.
PSA 20:9 Buyambam tapa, gata nindane King kapaninu gatangami iwana yapbunzok. Ninda tumuk wamu gae yananu gata akgatanimuyo.
PSA 21:1 Buyambam tapa, King kapa gata kekeknga imukuyakge gae apbaknganggak. Ita amak tasiwan gata gatangami iwana ayapbikgakge gae asiknga baknganggak.
PSA 21:2 Sanga ita musiaatang take nataau gata gwa imukuyak. Ngan, sangae ganikuu dua kotnake gwa imukuyak.
PSA 21:3 Ita gae apan gata gaak wam inike sanga take siknga aknga imukuyak. Sanga imuke ita King dakngawikge natake gata Kinggane kupna gwaam siknga golmonita tasiya gwapakngane gwapungamukuyak.
PSA 21:4 Ita kayuk yutnanga akngae ganiwan gata asiimukuyak. Siwan kayuk yutnanga waaknga tasiwi mamaya siknga asinggan yuwik.
PSA 21:5 Gata gatangami ita iwana kuupbam yapbike umana enane siknga kopsa apa dakngake yuak. Ngan, gata umana kopsa takngaat gatu kekeknga akngaat gata gika imukuyak.
PSA 21:6 Gata ie take siknga tasingamunggayak. Siwan siakan siknga, gata unzingu asinggan asinggan tasinggayak. Ga iat gatake wesim yuwawi musia tatanga siknga singgak.
PSA 21:7 Siwan kingu waapata Buyambam tapae banip tanggak. Anutu enane siknga apata, King kapae musip kwikwiu asinggan natangamuke tasiwan ita kekeknga yuwik.
PSA 21:8 Ngan, ga king kapata iwanda kuupbam panggaganuwiyak. Panggaganuke aminu gae apbitakaing aminu kauutde peya.
PSA 21:9 Gatu ga kakaa komune apukengu gata iwanda pasiwi sopuning. Unzing katapda sangabam yasiwan kungwakaing binga. Siakan, Buyambam tapata musia toknga natayamuke waaminu yaipapaakusike katapda kuupbam sapewan yasining. Unzing aminu tapatuta sanga ngok guyangukgak binga.
PSA 21:10 Siwan ga king kapa, iwandatane waatdakana kuupbam zipi kumning. Ngan, gata wenagom pasiwi waatdaka waakwau keu andakane wena sining.
PSA 21:11 Waaminda natdeu pake gatu wamu yandeke gae wai tasinangge yaning. Siwan ngana waaminda ga gapbitnanga dua siwik.
PSA 21:12 Dasingge, gata sakutdata yamake pasiwi kake atdatakuning.
PSA 21:13 Buyambam tapa, gata kekeknga buyak api umanda buyambam siknga siyok. Siwana ninda kau taike gatane kekeknga akngakae yatangenatnim.
PSA 22:1 Anutuna! Natane Anutuna! Dasingge na napmanggayak? Dasingge gata na dua siknga gatangamunggayak? Dasingge gata kwanamu nata gae sikgat takngae maau dua siknga panggayak?
PSA 22:2 Anutu, nata gae gunzit tapane yanggawanggat. Siwan gatu zikaane kuut yanggawake na dua yuwa takanggak. Siwan ngana gata yake nae wamu dua natanggamunggayak.
PSA 22:3 Siwan ngana, ga dundumna siknga apaunin. Siwan gata tupan siknga apa, enane siknga yuwayaunin. Ge Isrel nana aminda gatane umanda yatangenakaing.
PSA 22:4 Tupa siknga nindane bapuninda gae banip siking. Waaminda gae banip siwa gata papi take yuking.
PSA 22:5 Siwan waaminda gae yanggawawa gata iwande kataune sandeke pakuyak. Waaminda gae banip siknga siking. Siwan gae musiane meya dua natapbing.
PSA 22:6 Siwan ngana na sanga yumdekanu kundu binga yuat. Unzing na gomou mateknga kep ganangkatang yuaing binga yuat. Siwan aminbamda sapdut wam nanike nae masa namukaing.
PSA 22:7 Aminu kuupbamda na nanduke, “Gataaa,” ngang nanimikaing. Waaminda nae yembi tengamuke nanisapduke gwapaknga makaikaing.
PSA 22:8 Siwan waaminda anzing yakaing, “Ita Buyambam tapae baniu asinggakge asikaya Buyambam tapata gatuna tapik? Buyambam tapata ie take nataakge ita apba sandekngaman take siwik,” ngang yakaing.
PSA 22:9 Unzing yakaing ngana, Anutu, gata gika siknga na mingae musip ganang katang tapi aake take apbum. Apa gatangami ngwamu nakum komune kakuya tasikuyak.
PSA 22:10 Na mingata tangaiwan baniu gae sikumuneta apu apman apunggak. Mingata kayuk siknga takuune ga natane Anutuna yukuyak.
PSA 22:11 Sike gata na ma napmambim. Dasingge, meya apmanu nae apukaing. Na aminu gatangamunanga tapatu wena.
PSA 22:12 Sike unzing. Ikwawa gamanu wawi gwengwenda binga na nandusatnake umupbasikaing. Ngan, ikwawa gamanu wawi kekekngana kaya, siwan wa gwengwenu keu Basan komune nanata na umutnawakaing.
PSA 22:13 Sike wa unzing, laion gwengwenda ainggamatake kumzang yayuk kaana wetzukuke na nasinangge natake gena akngakaing.
PSA 22:14 Sike natane kekekngana kuupbam gwa isangepunggak. Unzing yangga moo tukngwamba kuke zakngakaing binga. Siwan kwatanatane ngwaknga ngwakngana kuupbam gwa ziwa yuking. Unzingge natane musipma tuyuknga siknga siwan kekekananga dua. Unzing kaanata puke dauyapmakaing binga.
PSA 22:15 Sike natane kekeknga akngana gwa isangepunggak. Unzing dopangu pupuknga sike pukaing binga. Sike natane guyaknga kupia siknga gwa singgak. Siwan yembina kuut genane gwa gatanggak. Gata na tasiwi nata paa siknga gatukande kungwanggat.
PSA 22:16 Siwan wai aminu waakwakga na keu kuupbam nawake umupbasikaing. Unzing kamunda kaap zong umuyawakaing binga. Sike natane kataknga gatu kepina ngangu genata namukaing.
PSA 22:17 Siwan natane gupma kwatanakan singgak. Siwan waaminda kumzang nanduyuke nata wai siwitde apbakngakaing.
PSA 22:18 Sike waaminda natane taukngae kas binga tasike usanzike natane tauknga, “Mamindaka tapik,” ngang natake tasike sandu sandu inandek inandek pakaing.
PSA 22:19 Siwan ngana, Buyambam tapa, maa yuke na ma nandutewim. Gata na kekekangamunggayak kapanin. Gata zet apu gatangamuyo.
PSA 22:20 Siwan na gata katak tapi waaminda na bainatda dua nuwa kupit. Gata na tapi aminu kamun binga waakwakga na dua nasiwa kupit.
PSA 22:21 Gata na tapi waaminda na laionda kaap zong nakaing binga nutnangge tasiwa maiwik. Sike waaminu ikwawa gamanu zong dakngake yuaingga binga kom nata namnangge tasikaing. Siwan ngana gata waakwakge kataune sandeke gatuka na tapso.
PSA 22:22 Gata unzing tasiwinu nata notnabamde gatane umanda buyambamu yanikapit. Sike tapduu miti kanangge unekan yutningune na banakan kuke gae siknga inata kundu natapit.
PSA 22:23 Ginu Anututane donga, ginda ie gwangat natapnong. Ngan, ginu Jekopdane donga, ginda itane umana yatangenatnong. Ngan, ginu Isrel aminde donga, ginda ie akgwautnong.
PSA 22:24 Dasingge? Ita meya buyak yuaing aminde masa dua yamunggak. Gatu waaminda meya pakaingge ita natapan sanga moo binga dua singgak. Ita waaminu peke paku maa dua yuak. Aho. Ita waamindane tumuk wamna natake akgatayamunggak.
PSA 22:25 Sike miti kanangge unekan yutning gwene nata gatane umandakan yatangenawit. Sike wamu sangabamu nata pasiwitde yawa kekekakut taknga aminu gae akgwaukaing aminde kaine atasiwit.
PSA 22:26 Siwan sangana wena aminu nanamu napa musia gitnaning. Sike aminu Anutue yatawakaingu itane umana ayatangenatning. Na Anututa tasiwan waaminu take asinggan asinggan yutningge nataat.
PSA 22:27 Sike aminu keune nana kuupbamu musia papatekngwamban Anutue natanggamataning. Natake gatu ie apning. Ngan, aminu kuupbamda munu puke inimbaknganing.
PSA 22:28 Dasingge? Buyambamtapa King kapa yuke ita aminu kuupbam kakuya pasinggak.
PSA 22:29 Siwan sangaapana kaya aminu kuupbamu kuutda munu puke inimbaknganing. Sike aminu akumnangge dapaknga sikaingu kayuu yutnanga dua. Waaminu kuupbamda munu puke Anutue inimbaknganing.
PSA 22:30 Sike aminu masan aatning aminda itane puya tasingamuning. Siwan waaminda Anututane umana aknga aminu masan aatningge yanikapning.
PSA 22:31 Yanikapmake aminu wa tupa dua aakingu gwa aawanu yanike Anutu nomana siknga apa unin ngang yanining.
PSA 23:1 Buyambam tapa, gata kakuya na nanduyuayak kapanin. Unzingge nata sanga tapatue dapnanga dua.
PSA 23:2 Ita na tasiwan zongazonga kaya noman komune pekgat. Siwan ita na yangga mateknga kuma zipmakaingune nanitakuwan nata tangoke yuwa takanggak.
PSA 23:3 Sike ita nae kekeknga kayuk namunggak. Namuke ita na kepi noman tapaapane nanitake kunggak. Unzing ita tupa tasinangge yakut taknga tawake tasinggak.
PSA 23:4 Anutu, nata damene zikaa dakaatang kuke ngana gata gatangami akumnanga akngae nata dua gwaumbit. Dasingge? Ga naat gatake yuamak. Nata ga gandupa gusou sipsipde kakuya tasikaingga pakaing kapaapa apanggayak. Unzing kake natane musipma kwikwikngata yuwit. Nata wai sinanga dua.
PSA 23:5 Gata natane nanama take siknga keu aanggaman komune pandaknganggayak. Siwan natane iwanata moo nanduke sanga takngatu tasinanga dua. Ge, gata naat nasimde apbakngake naninggayak. Gata nanamu nae kwaapzang siknga pewi dopan namunggayak.
PSA 23:6 Gata nae banip gwaang natake sanga take akngakan tasingamunggayakge tapduk bamu nata kayuk yuwawa gata nae musip kwikwiu asinggan natangamuya. Unzingge nata yotdane asinggan asinggan yuwit.
PSA 24:1 Keu andakaat gatu sangabamu ane yuaingu wa kuupbam Buyambam tapatanekan. Kepna kepna gatu aminu yotna yotna yuaingu wa kuut itanekan.
PSA 24:2 Ita keu andaka tasikuu yangga amaakatang yuwawan engatangan tasike tekut. Ngan, keu andaka tasikutdane yapii gwenu yanggabam gwende banakan tasikut.
PSA 24:3 Mamin amin tapata tawanu Anututa yuak dakane take kopik? Wena. Sike mamin amin tapata Anututane you takwan buyambam gwenu yuaune take koke yuwik? Wena siknga.
PSA 24:4 Aminu tapatuta waiaknga dua tasike musiaatangu gutongana wena, gatu anutu pupukngae munu dua puwik, siwan kem wamde enandang ngangu notnaapa dua yaninggak.
PSA 24:5 Aminu waapae Buyambam tapata take tasingamik. Ngan, Anututa aminu waapa meyana sandekgak. Siwan ita anzing iniwik, “Ga amin noman,” ngang iniwan iwanata wamu yananga dua.
PSA 24:6 Aminu unzing kapatanu Anutue musiane natanggamatakaing. Unzing aminda Anutu Jekopda banip sikut tapae wesimu akukaing.
PSA 24:7 Ginu gwambok gwakgwau ginu zitnong. Ginu gwambou tupa siknga nana, ginu gatukande zitnong. Kingu tupan tapa undang kopikge zikngamunong.
PSA 24:8 Sike Kingu tupan tapa mamin? Tupan tapa Anutu awiapa unin. Waapa kekekngana buyambam siknga. Siwan amak tasikengu ita iwana ayapbikgak.
PSA 24:9 Ginu gwambok gwakgwau ginu zitnong. Ginu gwambou tupa siknga nana, ginu gatukande zitnong. Kingu tupan tapa undang kopikge zikngamunong.
PSA 24:10 Sike Kingu tupan tapa mamin? Tupan tapa Anutu kekeknga siknga apa unin. Wa awiapa Kingu tupan tapa unin.
PSA 25:1 Buyambam tapa, nata apmanu gae tumuk wamu ganinggat.
PSA 25:2 Ga natane Anutuna. Nata gaekan baniu singgat. Gata gatangamuke iwana dua kapewi na napbimban maakawit. Gata iwana dua kapewi na yaitakepuke waaminda baknganing.
PSA 25:3 Sike aminu gae banip sikaingu gata iwana dua kapewi yapbimban maakaning. Wena. Aminu kem yake tanziu yumdekan tasikaingu waamindakan waiaknga tasikaingge natake apmaakaning.
PSA 25:4 Buyambam tapa, gata kepi gikane take akngaka yeikngami kawit. Ngan, gata gikane kepi noman taknga nanindamumso.
PSA 25:5 Gata siakan wamu gikane aknga tawambitde nanindamumso. Dasingge, ga natane Anutuna. Gata na tapi iwanata dua napbitning. Sike tapdukbam asinggan asinggan gata gatangamiyakge gae ganduyuat.
PSA 25:6 Buyambam tapa, gikane natdetdetdaatangu musip kwikwikat gatu butaya akngaatde natapso. Gata waaknga tupata tasitakakopbuyaknga gatu apman kaa atasinggayak.
PSA 25:7 Anutu, gata waiakngaat gatu yamandet takngaat waatdakane yuke tasikumde ma natapim. Ga Anutu butaya akngatane toiknga apa. Siwan ga, Buyambam tapa, gata take siknga asinggan yuke nae natake musip kwikwiu natangamunggayak.
PSA 25:8 Buyambamtapa take siwan noman sikngaapa. Ge ita waiaknga tasikaing aminu yanimbitake iekan tawaningge yanindamukgak.
PSA 25:9 Ita noman takngane ie gepbiatang yuke inane umana dua yatangenakaingu yanipake kunggak. Kuke itakan kepi noman takngakan tawaningge yanindamukgak.
PSA 25:10 Aminu Anututa wamu yawan kekekakut taknga gatu mama wamna ngang tawakaing aminde Anututa musia kwikwiknga akngana dua sandeke asinggan asinggan natayamik.
PSA 25:11 Anutu, gikane wamba yawi kekekakut taknga tawake nata meya kwaapzangu tasikumu sandekngamuyo. Siwan sandekngamuke tasiwi gatane umanda kopsa siwik.
PSA 25:12 Mamin aminda Buyambam tapae gwaukaing? Aminu wa Buyambam tapae gwauke Buyambam tapatane wamna tawambanu, Anututa kepi nomantapa yeuyamik. Yeuyaman waapane kuninggen.
PSA 25:13 Unzing aminu sanga sanga kwaapzang pake take siknga yutning. Take yuke waamindane waatdakana masande keu andakane take yutning.
PSA 25:14 Anututa notna ngangu aminu ie gepbiatang koyuaingge nataak. Siwan ita kepi noman takngna tawaningge yanindamukgak.
PSA 25:15 Tapdukbamu Anututa gatangamikge kayuat. Sike na yapap gwekatang binga yuwa sanga kunduta tasiwan maiyak ngang natake na gatuna tanggak.
PSA 25:16 Anutu, gata nae gatuka apuke musip kwikwiu natangamuyo. Dasingge, na ninatakan yuke meya takngatu takngatu akaat.
PSA 25:17 Nata musipmaatang meya nataat taknga gata sandekngamuyo. Sandekngami musipma kwikwiknga yuwik. Gata gatangami meyata na dua tasiwan maiwit.
PSA 25:18 Sike natetdet naatangu nata meya takngatu takngatu natake yuatde natapso. Natake waina kuupbam sandekngamuyo.
PSA 25:19 Gata natane iwana kwaapzang siknga singgakge kayo. Nae kundusim paa take dua nataaing. Wena siknga.
PSA 25:20 Gata na gatuka take na kakuya katak tasiyo. Siwan iwanata na dua tasiwa maakawit. Gata katak nanduyuwayakge nata gae apunggat.
PSA 25:21 Nata gae banip singgat. Unzingge nata sanga take tasinggat takngana gatu noman tasinggat takngana ngang papi kekekawa waakngaatda gatangaman asinggan yuwit.
PSA 25:22 Anutu, gata ninu Isrel nana kuupbam papso. Siwan meya takngatu takngatuta ninu dua pasiwan mainim.
PSA 26:1 Buyambam tapa, nata noman takngakan tasinggat. Tasike baniu kuupbam gaekan singgat. Unzingge gata tasiwi iwanata nandupa take siwan na yumdakan temapa naninanga dua siwik.
PSA 26:2 Anutu, gata kakapmake na tasiwi siyok. Gata natane musipma gatu natdetdetna ngang usanziyo.
PSA 26:3 Minae? Gata asinggan musip gwaang natangamunggayak kakngae natanggamatake nata gatane wamu noman takngakan asinggan tawanggat.
PSA 26:4 Na aminu wai aminkat dua sukukamang. Gatu kem wam yakaing aminkat kaya dua sukukamang.
PSA 26:5 Na wai aminu unekan gatake yuaing ngang kakengu une kunangge apbitanggat. Sike wai aminkau naat dua gatake yuamang.
PSA 26:6 Buyambam tapa, na gutongana wena ngang natake kataknga ga yeikgamunangge saiukgat. Saiuke nata gatane alta dakane kumbasike munu pukgat.
PSA 26:7 Munu puke nata kap takngatu taike gae gaak ganiwit. Ganike nata aminu kuupbam puya gata noman taknga tasinggayakge yanikapit.
PSA 26:8 Buyambam tapa, nata gatane yot gwendae take siknga nataat. You gatane wagwene umanda kopsa aknga undang yuak.
PSA 26:9 Tapduu gata wai aminu gatukande pasiwi maining komune natane kayuk yuat takngana ma tasiwi sopuwan. Gata na ma nuwi kupam, notnaapa zipan kungwakaing aminkaun.
PSA 26:10 Waaminu waiaknga asinggan tasikaing. Tasike moningu kundu aminu wam usanzikaingge asinggan yamukaing. Yamuke kaa wam yanindatdaiwan waiakngae yake meya takngatu dua yamuning.
PSA 26:11 Siwan ngana na noman takngakan tasinggat. Gata nae musip kwikwik natangamuke na gatuka tapso.
PSA 26:12 Na keu noman komune dandamake kekeknga yuat. Nata aminu unekan yutning komune banakan yuke Anututane umana yatangenawit.
PSA 27:1 Buyambamtapa natane kakaana siwan ita na gatangamunggak kapanin. Buyambam tapatakan na nanduyuke kekekangamunggak. Unzingge na sanga tapatue dua gwaukgat.
PSA 27:2 Sike wai aminda wesim apuke na nanisapdutnangge ba nataaing. Natake na nutnangge ba tasining. Tapduu unzing tasining komune waamindane kepina sanga kunduta yapan waakwakga apimaning.
PSA 27:3 Siwan amak aminu buyambamda apu na nutnangge yupbasiwanu nata dua gwaumbit. Ngan, iwanata apan naat amakengu na Anutue banip singgat takngae natapa kekekawik.
PSA 27:4 Nata Buyambamtapa sanga tapatuekan ininggamatanggat. Inike nata take siknga ita unzing tasiwikge nataat. Nata inikwaike nata itane you buyambam gwene yusika kupit. Sike na ita nae take tasinggakge nata ie apbakngawit. Siwan nata iniwa ita kepi noman taknga yeikngamik.
PSA 27:5 Sike sanga wai takngatu nae apanu ita na inane yotnaatang takusopuwik. Ita gwambok yapuke take siknga takusopuwik. Takusopuke ita na suu buyambam siknga gwendune engatangan napmamban iwanata nutnanga dua siwik.
PSA 27:6 Unzingge na iwanata na umupbasining ngana ayapbimbit. Siwan nata apbakngake kumzang yanggamatake sanga imukaing binga Anutue yotnane tasiwit. Tasike nata kap taike umana yatangenawit.
PSA 27:7 Buyambam tapa, tapduu nata ga ganiwit komune gata nae musip kwikwik natangamuyo. Gata natane tumuk wama natake gatangamuyo.
PSA 27:8 Sike nata musipmaatangu gae anzing nataat, “Nata gae asaapit.” Unzingge Buyambam tapa, nata gae asaapit.
PSA 27:9 Sike gata nae ma kusopuwim. Gata nae masaka ma namim. Na gatane puya aminda. Nae kaanga natake ma nanikwasiwim. Anutu, ga natane gatak gatak kapana. Ge gata na ma napmambim.
PSA 27:10 Siwan mingananata nae masa apba namusan, ngana Buyambam tapata na take apme nanduyuwik.
PSA 27:11 Buyambam tapa, gata sanga nata tasiwitde take nataayak kaknga nanindamumbi tasiwit. Na iwana kwaapzang siknga yuaingge kepi noman tapane nanitake kuyo.
PSA 27:12 Sike gata dua kapewi iwanata na taning. Sike waaminda kem wam yake na atnutnangge yakaing.
PSA 27:13 Siwan nata anzing natapa kekekanggak. Masande Anututa aminu inane take siknga toimban nata kayuk yuke kawit.
PSA 27:14 Siwan gata Buyambam tapae banip sike kekeknga yuyo. Yuke musipbaatang natapi kekekayok. Kekekawan Buyambam tapata gatanggamikge natayuyo.
PSA 28:1 Buyambam tapa, ga natane gatak gatak kapana. Nata gae yanggawake sikgawaawa maak pake natangamuyo. Sike gata natane tumuk wama natake sanga takngatu dua tasiwinu, na akupsa amin binga dakngawit.
PSA 28:2 Siwan nata tapduu akgatangamiyakge yawanu, gata natane tumuk wamae natapso. Sike nata tumuk wamu yayuk kataknga tangenake yotdae katapmiyuk tumuk wamu yanggau natapso.
PSA 28:3 Sike aminu kunduta notnaapae kaaya wam yanikaing, ngana natdetdeu wai musiane doke yuaing. Siwan gata naat gatu wai aminu waakwakat ma kaipakapapuke nisipim.
PSA 28:4 Gata waaminu waiaknga tasikaingu pandambanuyo. Waiaknganae buyana inandek inandek asiknga yamuyo. Ngan, waaminde toknga siknga yamuke asiknga pandambanuke pasiwi mainong.
PSA 28:5 Sike waaminu puya buyambamu Buyambam tapata tasikutde dua natapasikaing. Unzingge ita waaminu pandambanuke gatukande pasiwan sopuning. Siwan ita waaminu gatuna dua gatayamik.
PSA 28:6 Siwan nata Buyambam tapatane umana yatangenakgat. Dasingge, nae musip kwikwik natangamikge natake ie tumuk wam yatawaawa gwa natapbut.
PSA 28:7 Anututa ina siknga na kekekngamuke kakuya tasike wamanapmanggak. Nata ie banip siwa Buyambam tapata na akgatangamunggak. Ge nata ie asiknga baknganggat. Bakngake nata kap taike umana yatangenakgat.
PSA 28:8 Buyambam tapata inane aminu kuupbam kekekayamunggak. Siwan ita aminu tapatu yawan king dakngakut tapa akgatangamuke gatuna tanggak. Buyambamtapa damanu kekeknga siknga gwen binga unin.
PSA 28:9 Anutu, gikane aminda meya akngana sandeyamuyo. Sandeyamuke waaminde sanga take aknga tasiyamuyo. Sike gata waamindane kuyana dakngake katak siknga kakuya asinggan asinggan kayuyo.
PSA 29:1 Siwan ginu angela kekekngasa kaya amin, ginda Buyambam tapatane umana yatangenatnong. Yatangenake itane umana kopsa gatu kekekngana ngangge apbaknganong.
PSA 29:2 Buyambam tapatane umana kopsa aknganae yatangenatnong. Sike ita takwan siknga inata siknga yuakge natake ginda munu puke inimbaknganong.
PSA 29:3 Buyambam tapata wamu yawan aminu yanggabam gwenu kwaimune yupbasikaingu kuupbamda natapning. Anutu umana kopsaapa ge ita wamu kekeknga ena kakaa komune gakngatda binga kaapmapa yawan yanggabam gwenu tawamban sandekgak.
PSA 29:4 Buyambam tapata yanggamatanggak kaknga kekekngana buyambam siknga. Aminu kuupbamda nataawa Anutu kopsa siknga apata yawanu waaminu ie akgwautning.
PSA 29:5 Buyambam tapata yanggamatawanu katau buyambam siknga dakandaka apuke pimakaing. Sike Anututa katau buyambam wa dakandaka Lebanon nana pasiwan pukaing.
PSA 29:6 Sike ita tasiwan tawanu Lebanon nana dakandaka miamunda tasiwan pukapmake dekaing. Siwan tawanu Hermon ngang inikaing daka miamunda tasiwan pukapmake dekgak.
PSA 29:7 Buyambam tapata yawan yapasik siwan mingata kakaa singgak.
PSA 29:8 Siwan ita yanggamatawanu itane guyakngi natake keu zongana wena komu ayamukgak. Ngan, ita keu zongana wena komu Kedes ngang inikaingu tasiwan miyamunu buyambam siknga singgak.
PSA 29:9 Buyambam tapata yawan katau kekeknga siknga dakandaka apmakwapmimban wai sikaing. Siwan katau kuupbamdane tatakngi tapduu gwendunekan kuupbam pimapa katap dakandaka tapetakan yuking. Siwan Buyambam tapae yotnane yuaingu kuupbamda anzing yanggamataking, “Anutu umana kopsaapa,” ngang yaking.
PSA 29:10 Buyambam tapata King kapa yuke yanggabam gwenu kuupbam kuyana kayuak. Ita King kapa asinggan asinggan yuwawik.
PSA 29:11 Buyambam tapata inane aminabamu kekekayamunggak. Ita inane aminabam gatayaman musip kwikwik natayutning.
PSA 30:1 Buyambam tapa, gata na gwa take iwana dua kapewi na tasiwa maiwa nanduke bakngaking. Unzingge nata gatane umanda kumzang yatangenawit.
PSA 30:2 Buyambam tapa, ga natane Anutuna. Nata wamu gata akgatangamiakge yanggawa gata na tasiwi maitna wena sikut.
PSA 30:3 Buyambam tapa, na paa kumbum siwan ngana gata matmat komuneta na gatuka takuyak. Ngan, nata akupsa aminda yuaing komune dua pukuwitde natake gata na gatuka takuyak.
PSA 30:4 Ginu aminu Anututane aminabam, ginda kau itane umana yatangenake tainong.
PSA 30:5 Sike ita kaanga tapduu dapaknga siknga natanimunggak. Natake ngana ita ninde musia kwikwiknga tapduu ninda kayuk yuamang komune natanimunggak. Kai yangganinu zikaane apimakaing. Siwan ngana tembana ninu gatu apbaknganim.
PSA 30:6 Tupa nata ninane kekeknganane yuke meya takngatu nae dua apik, ngang natake anzing yakum, “Sanga tapatuta na ikomban pimananga dua,” ngang yakum.
PSA 30:7 Siwan ngana, Buyambam tapa, tapduu ga nae take siknga natangamukuyak komune gata na tasiwi kekekake yukum. Unzing, daman gwenda tawan dakane kekeknga yuak binga. Siwan ngana tapduu gata na napmake akusopukuyak komune na gwaut takngata na asiknga tanggaganukut.
PSA 30:8 Buyambam tapa, nata gae yanggawakum. Ngan, Buyambam tapata nae butaya natapikge natake nata kekeknga siknga yanggawakum.
PSA 30:9 Sike nata akupanu sanga nomanu dasing bingata aawik? Sike nata akungwake matmaune kuwanu sanga waakngata mamin gatangamik? Aminu gwa kumbingga gatane umanda apme yatangenatning ba dasing? Asikaya waaminda asingganu gata waaminde take tasiyamukuyak kakngae yakapning ba dasing? Wena. Dua yakapning.
PSA 30:10 Buyambam tapa, gata nae natapso. Natake nae musip kwikwik natangamuyo. Buyambam tapa, gata na gatangamuyo.
PSA 30:11 Gatangamuke gata musipma kwanam siknggat taknga gwa sandekngamuke tasiwi nata kau apbakngake tainggat. Tupa na meya siknga natayukum ngana nata kwanam sikum takngae yake tasiwi natane musipmaatang asiknga baknganggat.
PSA 30:12 Unzingge nata gena dua umumbit. Aho, nata musipmaatangu kau umanda yatangenatnangge ataiwit. Buyambam tapa, ga natane Anutuna. Nata gae gaak wamu asinggan asinggan ganimbakngawit.
PSA 31:1 Buyambam tapa, nata gatane gepbiatang koke kusopuwawa gata iwana dua kapewi na tasiwa maike maakawit. Ga dundumna siknga apa, gata na gatuka tapi nata wai dua siwit.
PSA 31:2 Gata nae wam natake na zeetgaman gatuka tapso. Ga tawanu buyambamu supna kaya daka binga yuayakge nata undang kusopuwit. Siwan gata na katak siknga wamanapmambi take yuwawa iwanata na dua tasiwa maiwit.
PSA 31:3 Ga unzing nata akusopunanga tapa binga siwan gata na kakuya tasinggayak. Gata tupan kuke na nanitake kepi noman takngane nanitakuyo. Unzing gika tupa gwa yakuyak kaknga tawake tasinggayak.
PSA 31:4 Sike iwanata yapapna tewa nata undang pukuwa na tanangge tasikaing. Gata na asiknga kakuya tasiwi nata meya waaknga dua papit. Dasingge, ga nata akusopunggat tapa gakan.
PSA 31:5 Nata ninane waunga gatane katakgane teat. Buyambam tapa, ga Anutu sanga noman takngakan tasinggayaunin, gata na gatuka tapso.
PSA 31:6 Sike nata aminu anutu pupukngae yanindatakaingge apbitanggat. Siwan ngana na Buyambam tapae banip singgat.
PSA 31:7 Sike gata nae butaya asinggan natangamunggayak. Unzingge nata gae apbaknganggat. Dasingge, gata meya natapbum taknga akakuyak. Ngan, gata natane musipmaatang meya takngatu takngatu natapbumu atnatapbuyak.
PSA 31:8 Gata iwana dua kapewi waaminda na kaautde dua taking. Gata na gatangami na keu kakaa komune take yuat.
PSA 31:9 Buyambam tapa, na meya buyambamu kaya. Unzingge nata kwanamu kumzang sikgawa kainata atzukngaing. Siwan kwatana tuyuknga singgakge gata nae musip kwikwik natangamuyo.
PSA 31:10 Siwan musipmane meya nataat takngata na kayuk yutnanga aknga atzipmandaknganggak. Na kwanamu asinggan sike na tapduu mamaya yutnanga dua singgak. Na meya buyambam siknga. Unzingge natane kekekngana wena singgak. Siwan natane kwatana kuupbam atuyukakaing.
PSA 31:11 Sike iwanata na atnanisapdukaing. Siwan notna take yuamangga nae masa namukaing. Sike nata kepiapane kuwawa na nandupnangge bitake kusopukaing.
PSA 31:12 Sike aminu kuupbamda nae gwa botaking. Unzing na aminu akupa kwaike botakaing binga yukum. Na unzing gapma gwegwenda atapan mukaing binga sikum.
PSA 31:13 Dasingge, nata nataawa iwana kwaapzangga nae sapdut wam nanikaing. Siwan gatu kaut kaut yuke na tasiwa gwaumbitde kumzang tasikaing. Sike gatu unekan yuke wamu yawan kekekawan na tasiwa maiwitde yakaing. Waaminda atnuwa kupitde yakaing.
PSA 31:14 Siwan ngana undanga. Buyambam tapa, nata gae banip singgat. Sike, “Ga natane Anutuna,” ngang yanggat.
PSA 31:15 Sike asingganu nata gae kataune yuat. Gata na iwanae kataune gatu aminu na nawakaingge kataune sandeke tapso. Waaminda na tasiwa maiyat.
PSA 31:16 Na gatane puya aminda. Unzingge gata nanduyuke musip kwikwik natangamuyo. Gata nae musip kwikwik asinggan asinggan natangamuke na iwanatane kataune sandeke tapso.
PSA 31:17 Buyambam tapa, nata gae yangawawa gata gatangamuyo. Gatangamuke iwana ma kapewi waaminda na napbimbam. Sike gata kapewi wai aminda apmaakaning. Maakake waaminda gena kusiwan yusika matmat gwene pukuning.
PSA 31:18 Sike waaminu yamandet sike sapdut wam yakaing. Siwan wamu waiaknga amin nomande yanikaing. Waaminu kem wamban yakaing. Unzing tasikaingge natake gata waaminu pasiwi maiwa waamindane gena tupakande pasiwi kusinong.
PSA 31:19 Sike gata puya take siknga aknga tasike gae gepbiatang yuaing aminu akgatayamunggayak. Ngan, puya aaknga aminde kaine aminu gae gepbiatang yuaingge tasiyamuya.
PSA 31:20 Gata waaminu gika yuayak komune inengan pakusopunggayak. Pakusopuwawi aminda wam yawan kekekawan zipnangge tasiwa maiwik. Gata aminu gae gepbiatang yuaing aminu katak siknga pakusopunggayak. Siwan iwanata wamu waiaknga yaningga waaminu dua pasiwan maining.
PSA 31:21 Tupanu iwanata na nutnangge nawake natane yotgapma yupbasiking. Yupbasiwawa ngana ita nae musip gwaang siknga natangamuke inane kekekngata gatangaman nata take yuat. Unzingge Buyambam tapatane umana yatangenatnong.
PSA 31:22 Buyambam tapa, tupa na iwana waakwau asiknga kagwauke anzing yakum, “Na apba nanikwasiwa na gae wesimu dua ba yuat,” ngang yakum. Siwan ngana gata natane wam natake gata na akgatangamukuyak.
PSA 31:23 Siwan aminu Anututane aminabam, ginda ie take siknga natapnong. Dasingge, ita aminu ie wam natake tawakaingu akgatayamunggak. Sike ngana aminu yamandet sikaingge yake toknga kapzang ayamunggak.
PSA 31:24 Ginu aminu kuupbamu Buyambam tapae banip sikaingu ginda kekeknga yutnong. Yuke musipzane asinggan natapa kekekayok.
PSA 32:1 Sike aminu tapatu Anututa gutongana kake wai waakngana sandekngamanu aminu waapata apbakngayok. Ngan, Anututa waiaknga waakwau pasiwan sopuwan dua siknga natapikge apbakngayok
PSA 32:2 Siwan aminu tapatu waiaknga tasinggau Buyambam tapata yawan aminu waapatane gutongana apmanu wena siwanu aminu waapata apbakngayok. Musiaatangu kem taknga aknga dua natake tawanggak kapanin.
PSA 32:3 Nata wamu takngatusimu dua yayuuk zikaane gatu gunzit tapane ngangu kwanamu kumzang sikum. Unzing siwawa natane gupma apatdekut.
PSA 32:4 Dasingge, gunzit tapane gatu zikaane gata meya takngatu takngatu namuwawi natane kekekngana kuupbam wena sikut. Unzing gunzitda kepdaka isiwan wawaakgak binga sikum.
PSA 32:5 Masande nata waiakngana gae yakapbum. Nata waiakngana dua takusopukum. Sike nata anzing yakum, “Nata waiakangana kuupbam Buyambam tapae yakapit,” ngang yake nata yakapa gata waiakngana kuupbam asandekngamukuyak.
PSA 32:6 Unzingge aminu kuupbamu ga gawakaingu apmanu waaminda tumuk wam ganinong. Sike meya aknga buyambam ba siwik, unzing yanggata buyambam paptake amin kaitake kunggak binga siwanu, meya akngata waaminu dua pasiwan maining. Wena Siknga!
PSA 32:7 Ga natane akusopunggat tapana siknga. Nata undang kusopuwa gata na kakuya tasiwi meya akngata na dua tasiwan pimapit. Gata na meya akngane pimambanu gata na atanggayak. Anzing tasinggayakge nata apbakngake kau kumzang tainggat.
PSA 32:8 Buyambam tapata anzing yanggak, “Nata ga katak siknga ganindamuke nata kepiapa yeikgama waapane asiknga kuyo. Siwan nata ganindamuke natdetdetda tapa kakaawan nata ga kakuya tasiwit.
PSA 32:9 Gata ikwawa gamanu hos ba dongki binga dua dakngawim. Sike ikwawa wa gweayau natdetdetna wena. Unzingge gata ainu napna mamaya dakau genane peyo. Peke nap takngaat peke panomanuwawi wanggwak kuson. Sike gata unzing dua tasiwinu gata natapiak kaknga dua tawasan.”
PSA 32:10 Siwan meya takngatu takngatu wai aminde asaapik. Siwan ngana aminu Buyambam tapae banip siknga sikaing aminde kakuya noman tasinggak.
PSA 32:11 Ginu aminu noman yuaing amin, ginda Buyambam tapae musip gwaang natangamuke sanga kuupbamu noman ita tasinggak kakngae inimbaknganong. Ginu aminu kuupbam Anutue kaine noman gan natake yuaingga, apbakngake umana yatangenatnong.
PSA 33:1 Ginu aminu noman taknga tawake tasikaingu ginda sangabamu Buyambam tapata tasinggakge apbaknganong. Siwan ginu Anututane wamna natake tawakaing aminu ginda Anututane umana yatangenatnong. Sanga waaknga aminu nomana aknga tawakaingga tasikaing.
PSA 33:2 Kau noman nomana kulele tanguke taike Anututane umana yatangenatnong. Ngan, ginu kulele napna katau kuut musaatna kaya daka tanguke kau noman nomana tainong.
PSA 33:3 Taike kau kayuk takngatu ie tainong. Taike gita tanguke kau noman nomana siknga taiyuuk ie apbakngake kumzang siknga tainong.
PSA 33:4 Buyambam tapatane wamu kuupbam siakan siknga. Ita puya takngatu takngatu tasinggak kaknga kuupbamu kepi nomana takngakan tawake tasinggak.
PSA 33:5 Buyambam tapata aminu sanga nomana aknga tasikaing kakngae apbaknganggak. Ngan, aminu wam usanziwan noman singgak kakngae apbaknganggak. Sike asingganu Buyambam tapata aminde take natake akgatayamunggak kakngata kepna kepna tawanban sandekgak.
PSA 33:6 Siwan Anututa wamban yawan, gunzit gwen gatu yekap gwen gatu yekapdaak ngangu ena kakaa komune aake yuking. Siwan gatu ita wamban yawan sanga kuupbam ena kakaa komune aaking.
PSA 33:7 Ita yanggabam gwenu iniwan paku ina saak yukut. Unzing aminda yangga sospenu gwendunekan zikaing binga. Sike ita tasiwan yanggabam gwenu kutakngi kaya amunandang siknga siwan ina saak une yuak.
PSA 33:8 Sike aminu kepdakane nana kuupbamda Buyambam tapae akgwautnong. Ngan, aminu kuupbam kepna kepna nana aminda akgwauke ie gepbiatang koyutnong.
PSA 33:9 Dasingge, ita wamban yawan keu andaka yukut. Siwan ita wamu yawan sanga kuupbamu aake yuking.
PSA 33:10 Buyambam tapata natdetdeu kepna kepna nana amindane pasiwan sopukaing. Sike aminda sanga takngatu tasinangge yandekaingu ita kepi asumuyaman waaminda tasiwa mainggak.
PSA 33:11 Siwan ngana Buyambam tapata sanga takngatu tasinangge yawan buyana asaake kekeknga asinggan yuak. Ita natetdeu sanga takngatu takngatu tasinangge natdekgau natdetdeu waaknga kekeknga asinggan asinggan yuak.
PSA 33:12 Siwan Anututa dongu inae yawan yuaing aminda apbaknganong. Dasingge, dongu waakwau Buyambam tapata inae yawan yuaingge, waaminda apbaknganong.
PSA 33:13 Anutu yekaune yuke enaneta amunane kaak. Ita aminu kuupbam kaak.
PSA 33:14 Ita King kapa yotnane yuke enaneta keune nana aminu kuupbamde kaak.
PSA 33:15 Sike ita ina siknga aminu kuupbamdane natdetdetna papan kakaakgak. Siwan sanga kuupbamu waaminda tasikaingu kuut siknga akaak.
PSA 33:16 Kingu tapatuta amau tasike iwana yawamban kukaingu kekeknga amak aminu buyambamde kekekngane dua yapbikgak. Amak aminda iwana inane kekekngane dua yapbikgak.
PSA 33:17 Siwan ikwawa gamanu hos ngang yanikaing gwegwenda amak amin gatayaman amake yapbitnanga dua. Amak aminu amak tasike tuyukawanu hosdane kekeknganata gatayamunanga dua.
PSA 33:18 Siwan ngana natapnong. Buyambam tapata aminu ie gepbiatang yuaingu kakuya apasinggak. Ngan, aminu Buyambam tapata musip kwikwiu asinggan asinggan natayamikge banip sikaing aminu ita asinggan kakuya apasinggak.
PSA 33:19 Ita kakuya tasiwanu, waaminda dua kumning. Siwan tom tapduk gwegwene ita nanam yaman nake dua kumning.
PSA 33:20 Ninda yuwatna Buyambam tapata gatanimik. Buyambam tapatakan ninu akgatanimunggak. Ita tuyunggu amakgane daka binga yuak ngang natake ninda undang kusopunim.
PSA 33:21 Ninda umana noman siknga akngae banip siknga sikamang. Unzingge ninda ie apbakngakamang.
PSA 33:22 Buyambam tapa, ninda banip sike gata gatanimiakge yuamang. Gata ninde musip kwikwiu asinggan asinggan natanimuyo.
PSA 34:1 Siwan nata Anutue asinggan inimbakngawit. Asinggan nata itane umana yatangenawit.
PSA 34:2 Nata Anututa gatangamukutde ie apbakngawit. Sike aminu meya pakaingga wamu nata apbakngake yawit takngae natake musip gwaang siknga natapnong.
PSA 34:3 Ninda Anututane umana buyambam takngae yakapna. Ninda itane umana yatangenatna.
PSA 34:4 Nata tumuk wamu Buyambamtapa iniwa ita akgatangamuke tumuk wama atnatapbut. Ita gwaut taknga nata nataau kuupbam asandekngamukut. Unzingge nata musip kwikwik natake yuat.
PSA 34:5 Aminu kuupbam meyana kaya siwan ngana waaminda Buyambam tapae banip sike apbakngakaing. Unzingge waamindane banip sikaing kakngana wai dua siwik.
PSA 34:6 Aminu sangana wena apaapa Buyambam tapae tumuk wam iniwa ita natake meya wa kaking kaknga aknga kuupbam sandeyamukut.
PSA 34:7 Angela Buyambam tapatane tapata aminu Buyambam tapae gepbiatang yuaing aminde inengan yuak. Yuke ita gatayamuwawan meya takngatuta dua pasiwan maining.
PSA 34:8 Buyambam tapata ninde take siknga tasinggak. Ginda tasiwa siwan kake Buyambam tapae take siknga natapning. Siwan aminu tapatuta Buyambam tapae gepbiaatang koke kusopuke take yuwik.
PSA 34:9 Ginu aminu Buyambam tapatane, ginu kuupbam ie akgwauke yutnong. Dasingge? Aminu Buyambam tapae akgwauke ie gepbiatang yuaing aminu sanga tapatue dua dapmakaing.
PSA 34:10 Sike kaap zongu laion gwengwenu kaapnae yawamba maiwanu tomnata yuke atuyukaning. Siwan ngana waaminda Buyambam tapae tawakaingu, ita sanga take akngae dua dapmakaing.
PSA 34:11 Waatdakana, ginda nae siknga apuke maak gwaang pake wamu nata yawiu natapnong. Apa nata ginu danindamumba Anutue akgwauke itane gepbiatang asinggan koyutnong.
PSA 34:12 Siwan gata kayuk yutnanga takngaka take siwikge nataayak? Siwan gata kayuu mamaya siknga yuya. Yuke gatu gata take yuke apbakngnaya?
PSA 34:13 Sike gata unzing yutnangge natakengu, ayok. Gata wamu waiaknga dua yawim. Siwan gatuka kem wamu dua yawim.
PSA 34:14 Gata waiaknga masa imuke noman takngakan tawamso. Sike aminu kunduat musipza gwendukan teke noman takngae akekekake tawamso.
PSA 34:15 Buyambam tapata aminu noman yuaingu ita akayuke tumuk wamnae maak panggak.
PSA 34:16 Sike wai aminde Buyambam tapata asiknga bitanggak. Apbitake ita atzipan kupa aminda waaminde apbotaning.
PSA 34:17 Siwan aminu noman yuaingga Buyambam tapae tumuk wam iniwanu ita atnataak. Natake ita gatayaman waaminu meyata dua yapbikgak.
PSA 34:18 Anututa aminu musiaatang meya nataaing aminde inengan yuak. Ngan, ita banip sikaing aminu meya papanu, ita akgatayamunggak.
PSA 34:19 Meya kwaapzangga amin nomande apba apning, ngana Buyambam tapata gatayaman meya waakwakga pasiwan dua pimaning.
PSA 34:20 Siakan. Ita dua pimamban Buyambam tapata take siknga kayuak. Kayuwawan waapatane kwatai tapatu dua puwik.
PSA 34:21 Sanga wai kunduta wai aminu atzipa kumning. Siwan ngana Buyambam tapata amin nomande iwana dakngakaing aminu apasiwan maining.
PSA 34:22 Buyambam tapata puya aminakan papan kayuk yutning. Siwan aminu kuupbamda ie gepbiatang koyuaingu dua ginikaning. Wena siknga.
PSA 35:1 Buyambam tapa, gata aminu naat amakamang aminu gaat amnong. Gata aminu nutnangge tasikaingge yake gata atzipso.
PSA 35:2 Gata amak taukgaat gatu tiunggukaat ngang pake apu gatangamuyo.
PSA 35:3 Gatu sakutdaat sandundaat pake aminu na nawakaing aminkat amnong. Gata anzing naniyo, “Na ga gatanggamunggat tapanin,” ngang naniyo.
PSA 35:4 Waaminda na atnutapan kupitde tasikaing. Siwan nata nataau gata amak gwekatang ayapbike pasiwi pimake maakanong. Waaminda na tasiwan maiwikge yandekaing. Gata yawake waaminu pasiwi asiknga datdaptanong.
PSA 35:5 Buyambam tapa, gatane angelakata wai aminu yanikwasiwan andatakunong. Unzing got takngata zongatane dapandapa puyapan kukaing binga.
PSA 35:6 Gatane angelakata ayawamban kunong. Yawamban kuwawa itane kepiapana tasiwan zikaa siwan saweknga siyok.
PSA 35:7 Nata gutonga takngatu iatang dua tasikum. Siwan ngana ita yapapna na tasiwan maiwitde takusopukaing. Siwan gapma dakatu nata pimake pukuwitde kwaiking.
PSA 35:8 Siwan tapduu gwendune dua nataawa apasiwan mainanga akngata papsok. Siwan yapapna na tapikge teking gwenu gata tasiwi ina papsok. Gatu gapma kwaiking dakaatang kaa ina pimake pukunong.
PSA 35:9 Buyambam tapata unzing gatangaman kakengu musipmaatangu apbakngawit. Ngan, ita na tapan take yuat takngae natake nata musip gwaang natangamit.
PSA 35:10 Natangamuke banip gwaang wamu anzing yawit, “Buyambam tapa, ga binga tapatu dua yuak. Siwan gata kekekngana wena aminu take siknga gatayamunggayak. Unzing tasiwi aminu kekekngana kayata waaminu dua pasiwan maining.”
PSA 35:11 Sike kem aminda nae wai takngatu dua tasikum ngana kumzang temanggaganupa nanikaing.
PSA 35:12 Sike natanu waaminde takeakngakan tasiyamunggat. Siwan ngana yake itanu waiaknga nae tasikaing. Unzing tasiwan kake musipmaatangu meya siknga nataat.
PSA 35:13 Siwan ngana nata yake waaminde unzing dua tasinggat. Wena siknga. Tapduu gwenduine waaminu mait siwawa kake butaya siknga asinggan nataat. Natake butaya tauksan tamaggat. Butaya natake nanam tomda yuwa waakngata meya namunggak. Siwan nata tumuk wam yawa ngana gata dua gatayamukuyak.
PSA 35:14 Dua gatayami kake nata waaminde butaya notnaapae ba paana ba uyapnae nataaing binga natayamunggat. Sike nata kepi sukuke aminu tapatuta mingae akupan butaya natake kwanam sikgak binga nataat. Nata musipmane meya siknga natake kwanam sikgak binga natayuat.
PSA 35:15 Siwan ngana nata meya pakum tapduk gwekatangu waaminu unekan yuke apbakngaking. Na dua natawa waaminda unekan yuke nae uman yaitakepnangge yaking. Aminu kundu nata dua kaatda nae wamu atemapa yake yuatakaknga wena naniking.
PSA 35:16 Sike waaminda masa wamu kumzang nanike nae meya namuking. Ngan, waaminda masa wam siknga nanike nae apbitake nomna zipbutnanga siking.
PSA 35:17 Buyambam tapa, unzing tasiwa tapduu datdasing kapeya? Gata na tapi waaminda na dua tasiwan maiwit. Waaminu kaap zongu laionda kaapna yasiwan kupan nanggak binga tasike na nutapan kupitde tasikaing. Unzingge na gata ie kataune sandeke tapso.
PSA 35:18 Gata unzing tasiwinu nata gae gaak kaknga dongu inata inata apu unekan yutningune yawit. Siakande siknga. Nata gatane umanda aknga aminbamde banakan yuke yatangenawit.
PSA 35:19 Sike aminu kunduta nae iwana yumdekan sikaing. Gata ma kapewi bakngake na naitakepning. Nae musip maiu yumdekan natangamukaing. Unzingge gata dua kapewi meya nata papitde baknganing.
PSA 35:20 Sike gatu wamu kundusim paa nomanu takngatu notnaapaat katak yutnangge dua yakaing. Pout tasike wamu kundu yakaingu aminu nomanu kem wam yanike pasiwan mainingge yakaing.
PSA 35:21 Gatu waamindakan wamu akaapmapa anzing temapa nanikaing, “Siakande siknga. Ninda akganduatna waiaknga tasikuyak,” ngang nanikaing.
PSA 35:22 Siwan ngana Buyambam tapa, gata waaminu gwa kaak. Unzingge genda ma umukusike yuwim. Buyambam tapa, gata na ma napmake keu maa komdune kuke yuwim.
PSA 35:23 Ga Anutu siwan natane Buyambam tapana. Gata enake apu na gatangamuyo. Enake wamu nata yanggau yakapmake papi kekekanong.
PSA 35:24 Anutu, Buyambam tapana, gata noman takngakan tasinggayak. Gata gatangami iwanata aminu waapa noman takngakan tawanggaunin ngang natdetning. Gata dua kapewi nata maiwa nanduke baknganing.
PSA 35:25 Gata dua kapewi wamu inae anzingu yaning, “Take siknga, sanga ninda tasinangge natamangu gwa tasina buya unin asaakgak,” ngangun. Gata dua kapewi anzingu yaning, “Ninda waapa gwa tasina mainggak,” ngangun.
PSA 35:26 Sike aminu wa meya nata kaatdenu apbakngakaing aminde gata pasiwi apmaakawa natdetdetna panggutokayo. Sike waaminda inane umana aknga yapangenakaingu wa na tasiwan maiwikge. Unzingge gata pasiwi umana wena akwak dakngake apmaakanong.
PSA 35:27 Sike ngana aminu kunduta nae amin noman ngang natapningu, gata pasiwi apbakngake musip gwaang natake kapzang yanggamatanong. Asingganu waaminda anzing yanong, “Buyambamtapa wa tupan amintapa, ita puya amina noman yuwan kake apbaknganggak.”
PSA 35:28 Unzingge gatane noman takngaka yakapmake umanda aknga kwakngaom gatu zikaane ngang asinggan yatangenawit.
PSA 36:1 Nata wamu takngatu wai aminda tasikaing kakngae musipmaatang nataat. Aminu unzing kapata Anutue kundusim paa dua gwaukgak. Wena siknga. Ita Anutue masa imunggak.
PSA 36:2 Siwan aminu wa binga inae natapan kopsa siwan anzing nataak: Na aminu nomana siknga. Anututa waiaknga tasinggau dua kakapmake wam yawitde dua yawik.
PSA 36:3 Asinggan siknga aminu waapa waiaknga tasinangge yayuuk aminu kundu kem wam yaninggak. Itane natdetdet naatangu noman taknga tasinanggengu wena.
PSA 36:4 Sike tapdu apekgak komune waapa waiaknga tasinangge kepie natdekgak. Waapa kepi waiapakan tawanangge natanggamatanggak. Natanggamatake waiakngaenu masa dua imunggak.
PSA 36:5 Buyambam tapa, gata butaya natanimunggayak kaknga mateknga dua. Waaknga buyambam siknga. Ngan, gata nin gatanimunangge yawi kekekakut taknga sandetnanga dua.
PSA 36:6 Gata sanga noman nomana tasinggayak kaknga buyambam siknga. Waaknga enane siknga. Anututane tawan dakandaka binga. Sike ninda masande wam yanimde gata noman taknga tawambiakgane yapii ninda natdetnanga dua. Wa amandang siknga. Unzing yanggabam gwenu amandang siknga yuak binga. Buyambam tapa, gata aminkat gatu kaap zongkat ngang kakuya pasiwi take yuamang.
PSA 36:7 Anutu, gata ninde musip gwaangu asinggan asinggan natanimuggayak. Ninda ie natapna take siknga singgak. Siwan aminu umana kaya apaat gatu umana wenaat ngang gae apuke gae gepbiatang koyuke sopukaing.
PSA 36:8 Sike gatane yotda atangu nanamu kwaapzang siknga. Unzingge aminbamu undang koke nanamde dua dapmakaing. Gatane sanga take siknga wa kwaapzang yuaing. Unzing yangga buyambamu tapatu binga. Siwan gata atangopningge yamunggayak.
PSA 36:9 Ga sangabamda kayuk yuainggane yapii gika. Siwan gatu kakaatane yapii gika. Ninda kakaa waaknga ga anganggan takamang. Siwan take yuamang.
PSA 36:10 Asingganu gata aminu gae atnataaing aminde take siknga natayamuyo. Ngan, gata kepi noman takngane tawake aminu kepi noman tawakaingu asiknga gatayami take yutning.
PSA 36:11 Nata nataau gata yamandet aminu dua kapewi na nainggamutningge nataat. Siwan gata wai aminu dua kapewi na nanikwasining.
PSA 36:12 Kanong. Wai aminu kepdakane pimake yuaing. Waakwau gatu enatnanga dua.
PSA 37:1 Gata nangaakanu sanga wai aminda tasikaingge ma natapim. Gatu gata waiaknga tasikaing amindane sangaapanae musipmaiu ma natapim.
PSA 37:2 Dasingge? Tapduu matekngasim yukengu wai aminu zongazongata kupiakaing binga sining, ba katau dakatutane tatakngita kupiakaing binga kungwake pimaning.
PSA 37:3 Gata Anutuekan banip siknga siyo. Sike noman takngakan tasiyo. Unzing tasikengu gata take asinggan kepbane yuya. Siwan sanga tapatuta ga dua tasiwan maiya.
PSA 37:4 Gata Buyambam tapaekan bakngayo. Bakngawi sanga gata nataau ita asiknga gamik.
PSA 37:5 Gata kayuk yutnanga akngaka Buyambam tapae kataune teyo. Baniu ie kekeknga siwi ita akgatanggamik.
PSA 37:6 Gatanggaman gatane takeakngaka gunzitdane waenga aknga binga anggaman yuwik. Ngan, gatane noman takngaka itakan tasiwan aanggaman siknga aminbamde kaine siwik. Unzing gunzitda banakan pakapu yuwan kakaa siknga singgak binga.
PSA 37:7 Gata Buyambam tapae wesim kuke wepda yuyo. Gatu musip kwikwik yuke kayuwi ita apme gatanggamik. Gata aminu waiaknga takngatu takngatu tasiwawa buyana aawan sanga noman nomana kwaapzang pakaing aminde ma geenguwim. Siakan siknga, gatane natdetdetda atangu sanga waaminda wa pakaingge nangaakanu ma natake unzingu ma tasiwim.
PSA 37:8 Gata kaanga dua natake gata musiptok nataayak taknga ateyo. Gata sangabamde nangaakanu dua natake gatu ma satnawim. Sanga waakngata ga waiakngaatangu ganitakuwan atasia.
PSA 37:9 Unzingge wai aminu gatukande wai asining. Siwan ngana aminu Buyambam tapae banip sike waaminu kepna teyamukut komune take yutning.
PSA 37:10 Tupae dua, zeetgaman wai aminu gatukande wena siknga sining. Gata ayuaing komune kuke ngana aminu waakwakge yawambi maining.
PSA 37:11 Siwan ngana aminu inane umana yatangenatningge take dua nataaing aminde keu kuupbam ayamik. Ayaman amau wena siwa take siknga yutning.
PSA 37:12 Wai aminda natdetdet naatangu amin noman tapa tasiwa maiwikge kaanga natangamunggak. Natangamuke gena sambuke yuak.
PSA 37:13 Siwan ngana Buyambamtapa atnataak. Tapduu gwenduta apik. Apan tapduu wagwene wai aminu gatukande wena asining. Unzingge Buyambam tapata waaminu ayanimikgak.
PSA 37:14 Gatu wai aminda bainatna kaiwan akopan gatu kweemna kaiwan dandakawan sangaapana wena gatu sangaapae dapmakaing amin yamnangge tasikaing. Ngan, waaminda aminu noman taknga tawakaingunin zipa kumningge tasikaing.
PSA 37:15 Siwan ngana bainatnata inane musipna yamning. Siwan kweemna aputning.
PSA 37:16 Sanga mateknga noman amin tapata peyuakganu sanga wai aminda kwaapzang pake yuaingu ayapbikgak.
PSA 37:17 Dasingge? Buyambam tapata wai amindane kekekngana pasiwan sopukaing. Siawan noman aminu kakuya katak kayuak.
PSA 37:18 Buyambam tapata aminu ie wam gwaamuke tawakaingu katak kayuak. Unzingge sanga Anututa yamunggau asinggan pake yutning.
PSA 37:19 Tapduu wai opatangu meya takngatu dua kaning. Sike tapduu gwendu tom tapduk. Siwan ngana noman aminu nanamna kwaapzang. Waaminu dua dapning.
PSA 37:20 Siwan ngana wai aminu kuupbam gatukande wena asining. Buyambam tapatane iwana wena asining. Unzing zongazongatane tapuyata pimake butakaing binga. Siakan siknga, waaminu kupan takngata matekngasim yuke zeetgaman kuwan wena singgak binga sining.
PSA 37:21 Wai aminda sanga kundu moo pakaing ngana yake dua yamukaing. Siwan ngana noman amintapa takeakngakan tasike notnaapae sangabamu moo aminu kundue yamunggak.
PSA 37:22 Sike Buyambam tapata wamu takeaknga yaniwan nataaing amindakan kepdakane take yutning. Siwan ngana aminu Buyambam tapata meya paningge yanggau ayanikwasiwik.
PSA 37:23 Sike Buyambam tapata aminu tapatutane yuyukngae take natakengu ita akekekangaman kepi noman kunggak.
PSA 37:24 Aminu waapa apimake ngana meya dua kawik. Aho, Buyambam tapata katakngine take tangenawan kekeknga gatu yuwik.
PSA 37:25 Tupa na wawi matek ngana apmanu aminuake gwasit. Siwan ngana nata kawanu Anututa amin nomanu tapatue masa dua imunggak. Gatu amin nomanu tapatutane waatdakanata nanamu yamuningge dua yawan kaat. Wena siknga.
PSA 37:26 Asingganu aminu nomana apata musip kwikwik natayamuke sanga kwaapzang aminu kundue yamunggak. Yaman kake itane waakngata minga nana pasiwan apbakngakaing.
PSA 37:27 Gata waiaknga kuupbamde masa yamuyo. Yamuke noman takngakan tasiyo. Unzing tasikengu keu andakane take asinggan yuya.
PSA 37:28 Dasingge, Buyambam tapata aminu noman taknga tasikaing aminde take nataak. Sike aminu ie banip singgau sopuningge dua nataak. Aho, ita asingganu waaminu kakuya tasiwawan kepi noman takngane kukaing. Siwan ngana ita tasiwan wai amindane waatdakana apmea aatningu wai siknga asining.
PSA 37:29 Sike noman aminu keu Anututa yaman paking komune asinggan yutning.
PSA 37:30 Noman amin tapa natdetdetna take siwan wamu take akngakan yakapmanggak Wamu noman takngaekan yanggak.
PSA 37:31 Anututane mama wamu itane musiaatang yuak. Yuwawan ita Anutue wam tawake dua tewik. Siakan, ita sukuke kepi saweknga apane dua pimapik.
PSA 37:32 Sike wai aminda akusopuke noman amin tapa apae wamayuaing. Wamayuke kepi atzipa kumningge yawakaing.
PSA 37:33 Siwan ngana Buyambam tapata amin nomanu dua kapewan wai aminda zipa kumning. Wena siknga. Sike wai aminda wam yak gwene takoke temapa ba yaning ngana Buyambam tapata noman aminu inaekan dua kapewik.
PSA 37:34 Gata Buyambam tapae banip sike natanggamatake tumuk wam inike itane kepi noman takngakan tawamso. Gata unzing tasiwinu umanda kopsa aknga akgamik. Siwan keu ita yakut komu atake yuya. Yuke kaawi ita wai aminu apasiwan maining.
PSA 37:35 Nata wai aminu tapatu musiptok asinggan natake kekekngana bamban tapa kakum. Siwan ita aminu ayapbikgak. Unzing katau dakatu baka binga buyambam takake katap notna yapbike yuaing binga.
PSA 37:36 Siwan ngana masande nata wagwak saak kukum. Siwan ngana aminu waapa undang dua yukut. Aminu waapae atawamba maikut. Siwan dua kakum. Wena siknga.
PSA 37:37 Gata aminu gutonga takngatue dua nataaing aminde natapso. Natake amin noman tapatane yuyuknga kake natdeyo. Aminu tapatu kumanggaman yuwiu, take asinggan yuwik.
PSA 37:38 Sike ngana Buyambam tapata waiaknga tasikaing aminu asiknga pasiwan maining. Gatu itane bapuna kuupbam masande apasiwan sopuning.
PSA 37:39 Buyambam tapata amin nomanu apake akgatayamik. Tapduu meya kaaing gwene waaminda ie isapmake kuwa ita kakuya pasinggak.
PSA 37:40 Waaminda ie baniu asikaing. Unzingge ita waaminu akgatayamunggak. Gatayamuke wai aminde kataune yuaingu asandeke inae papan take yuaing.
PSA 38:1 Buyambam tapa, gata musiptou nae natayak kakngane nae kaanga ma natapim. Ga musiptou nae natayak kakngane na ma tasiwi maiwan.
PSA 38:2 Gata na sakutdata siakande siknga nambuyuak. Siwan katakgata kekeknga nutewi pimakum.
PSA 38:3 Gata nae kaanga natapi na maiu waiaknga singgat. Sike nata waiaknga tasiwawa natane gupmaapa kekekngana wena singgak.
PSA 38:4 Gutonga tasikum takngae na meya siknga nataat. Siwan meya waakngata na gwa usikwatanapmakut. Sike gutongana waaknga sanga sanga gwaamumba meya siknga sikaing binga. Nata gutonga wa dambu siknga tasikum.
PSA 38:5 Sike wata natane gupmaatang nana kwaapzang siwan kapanga siknga sikaing. Nata gutonga siknga tasikum. Unzing sanga waaknga nae apbut.
PSA 38:6 Sike musip maatangu meya buyambam siknga yuak. Siwan na apmainggat. Siwan tapdukbam butaya natake kwanam asinggan sikgat.
PSA 38:7 Natane gupma toknga siknga katapda binga nasinggak. Siwan na maiu buyambam siknga mainggat.
PSA 38:8 Nata asiknga tuyukake wai siknga yuat. Unzing sanga tapatuta na kekeknga siknga nutapaakusinggak binga. Siwan musipmaatang natapa wai siknga siwan nata tokngabam pake yanggamatanggat.
PSA 38:9 Buyambam tapa, nata musip maatang kekeknga nataat taknga ga atnataayak. Natane musipma kwanamu kumzang sikgak. Sike wa sikgau gae kaikane kusopuknga dua.
PSA 38:10 Sike natane wam nanang puya kekeknga siknga pasinggak. Siwan natane kekekngana kuupbam wena siknga singgak. Siwan natane kaina atzikaawan katak kananga dua singgak.
PSA 38:11 Siwan aminu notnabam nae wesim apnangge apbitakaing. Natane watana kanangge apbitakaing. Siwan natane dongaaya maa yuaing.
PSA 38:12 Siwan aminu atnutapan kupitde nataaing aminda yapapna ba bungepna ngangu na tanggaganuwikge pandakngake peaing. Peke waaminda na tasiwan maiwitde wamu wai yakaing. Siwan asinggan nae waiaknga tasingamuningge nataaing.
PSA 38:13 Sike na katum amin gena kusia apa binga yuke wam yakaingu dua nataat. Sike wam yananga dua singgak.
PSA 38:14 Sike na aminu tapatu wamu dua yanggaak binga. Unzingge wamu yake dua yaninggat.
PSA 38:15 Siwan ngana Buyambam tapa, na gae banip singgat. Buyambam tapa, ga natane Anutuna, tumuk wamu nata ganinggau gata natake gatangamuyo.
PSA 38:16 Na tumuk wamu gae anzing ganikum. Gata natane wama dua kapewi wa tasining takngae baknganing. Ita mateknga pimamba gata waaminu dua kapewi yamandeu sike baknganing.
PSA 38:17 Dasingge, na paa siknga pimanggat. Siwan na musipmaatangu toknga asinggan nataat.
PSA 38:18 Nata gae gutongana yakapmanggat. Siwan nata waiaknga gwa tasikumde butaya nataat.
PSA 38:19 Natane iwana kekekngana kaya aminu buyambam. Aminbamda nae musiptou yumdekan natangamukaing.
PSA 38:20 Sike natanu ie takeakngakan tasiyamunggat. Siwan ngana ita nae yake waiaknga tasikaing. Siwan na takeakngakan tasike tawamba natake ita nanisapdukaing.
PSA 38:21 Buyambam tapa, na ma napmambim. Natane Anutuna, na napmake maa ma yuwim.
PSA 38:22 Buyambam tapa, ga aminu na gatangamunggayak kapanin. Gata na zaat gatangamuyo.
PSA 39:1 Na nina anzingu gwa yakum. Na sanga kuupbam tasiwitdenu katak kayuwit. Ninane genaneta gutonga wamu dua yawit. Ngan, wai aminu nae wesim yuwanu na wamu takngatu dua yawit.
PSA 39:2 Unzingge na gena asumukum. Umuke wamu takngatu dua yakum. Siwan nata wamu sanga takeakngae kuut dua yakum. Siwan ngana musip maatangu meya aknga buyambam siknga sikut.
PSA 39:3 Siwan musip maatang nangayakan natapbum. Nina atnataawakan musip maatang wai siknga sikut. Unzing siwan na gena umutnanga dua. Aho, wamu kundu ayakum.
PSA 39:4 Nata Anutu anzing inikwaikum, Buyambam tapa, na kayuk yuwitdane nakanu datdasing yuaing? Na zaapduknga kupit? Asikaya natane kayuk yutnanga akngana dapaknga ba? Gata naniwi natapit, ngang inikum.
PSA 39:5 Gata tasiwi nata tapduu dapaknga siknga yuke akupit. Sike tapduu nata kayuk yuwit taknga gae kaine sanga moo binga singgak. Aminu kuupbam kayuk yuaing kaknga kawi got taknga binga singgak. Unzing, aminu tapatuta waunga genaneta puyapan kuke wena singgak binga.
PSA 39:6 Aminu kuupbam gunzit siwan katapdane wee kepdakane kaamang binga. Sike waaminu puyambam pasike sanga kwaapzang pakaing. Siwan ngana puyambamu pasikaingu buyana wena singgak. Sike aminbamda sangabam pandakngake unekan peaing. Siwan ngana akupanu sanga wa maminda papik?
PSA 39:7 Siwan ngana Buyambam tapa, na apmanu sanga mina bingae kayuat? Wena. Na baniu gae sike gata gatangamiakgekan yuat.
PSA 39:8 Gata na gatuka take waiakngana kuupbam sandekngamuyo. Sike gata yamandotdong tasikaing aminu dua kapewi na sapdut wamu naniwam.
PSA 39:9 Siwan ngana na wamu dua yawit. Na gena asiknga umumbit. Dasingge, gika siknga meya aknga nae namukyak.
PSA 39:10 Sike na gatuka ma tasiwi maiwam. Gata meya unzing nami na paa kumbum.
PSA 39:11 Aminu wai tasikaingge gata kaanga yanike meya yake ayamunggayak. Siwan gata sangasanga kwaapzangge take nataaingu gata apasiwi sopukaing. Unzing gwakgwakga tauk san napan wai singgak binga. Siakan siknga. Aminu kuupbamu waung kaknga genaneta puyapan akokunggak binga sikaing.
PSA 39:12 Buyambam tapa, natane tumuk wamae natapso. Na gata gatangamiyakge natake gae ganiwa maak gwaang pangamuyo. Sike nata gae ganiwawa maakga ma umumbim. Ga atnataayak. Na keu andakane gaat tapduu opak siknga yuamak ngana na aminu maa tapatu binga yuke kungapunggat. Sike na bapunata yuking binga. Iaya keu andakane tapduu dapaknga sikngakan yuking.
PSA 39:13 Nae meya kumzang ma namim. Gata na atnandutewi musip gwaangu gatu natapit. Siwana na gatukande masande kungwake keu andaka gatukande tewit.
PSA 40:1 Nata Buyambam tapata gatangamikge natayukum. Siwan ita musip kwikwik natangamuke tumuk wamae natapbut.
PSA 40:2 Na unzing aminu tapatu gapma mamaya siknga dakaatang pukuke akumnanga yuak binga yukum. Siwan ngana Buyambam tapata kaiwan akopbum. Na ngwayuk kanzang gwekatang asiknga tanggaganuwan yukum. Siwan ngana ita kaiwan akopa keu supna kaya komune napmamban kekeknga gatu kukum.
PSA 40:3 Siwan gatu ita kau kayuu takngatu taiwitde nanikut. Kau waaknga Anutu ninda banip sikamang kapae umana yatangenatnanga. Siwan nata kau waaknga taiwa aminbamda na nanduke akgwauke Anutue banip sining.
PSA 40:4 Aminu Anutue banip singgak kapa apbakngayok. Aminu unzing kapa yamandet aminkat dua gatake sukukaing. Siwan ita Buyambamtapa dua teke anutu pupukngae munu dua pukgak. Wena siknga.
PSA 40:5 Anutu, Buyambam tapana, gata puya nomanu kwaapzang nin gatanimunangge tasikuyak. Aminu ga binga tapatu wena. Gata asiknga yapbikuyak. Sike nata gae wamu amin yanike puya gata tasinggayakge gatu natdetdet takngakaatde yaniwiu mateknga dua. Mate! Sanga wa kwaapzang siknga. Gata sangabamu nin gatanimunangge pekuyau kendetnanga dua.
PSA 40:6 Siwan gata kaau kuupbam atzipmake katap sawa yasisopuwa waiaknganin sandewiyakge tasikaking kakngae ga apbitakuyak. Siwan ngana gata nae banip tangenawi maak gwaknga kwapan gae wam tawake tasinggat.
PSA 40:7 Tasike anzing yakum, “Ayok. Anutu, na gae gwa aput.” Dasingge, tupa nata apitde wamu buk gomune matakut takngae natake yakum.
PSA 40:8 Anutuna, na gatane mama wamba banipmaatang natapa kekekawan gae banip tawanangge take siknga nataat.
PSA 40:9 Buyambam tapa, nata gatane wamu takeaknga aminbamde ayanikapmanggat. Yanikapmake, Buyambam tapata ninu gatuna apanggak ngang yaninggat. Sike Buyambam tapana, gata wamu wa yanikapmanggatde atnataayak. Nata wamu waaknga asinggan yakapitde nata gena dua umuke yuwit.
PSA 40:10 Nata sanga gata noman nomana tasinggayak kaknga musipmaatangu dua takusopunggat. Aho. Gata wamu yawi kekekakut saak tawake na gatu takuyakge ayanikapmanggat. Siwan gata aminbamde musip gwaang natake gata kepi noman taknga siknga tawake tawanggayakge nata wamu waaknga aminu mitie unekan yuaingune dua takusopunggat. Wena. Nata ayaninggat.
PSA 40:11 Buyambam tapa, na atnataat. Musip kwikwiu gatane aknga nae natangamunangge ma kotnawim. Wena! Gata nae butaya asinggan nataayak. Gata nae take natangamuke gata wam noman takngaka tawanggayak. Waaknga tawake gata na kakuya asinggan tasinggayak.
PSA 40:12 Meya kwaapzang siknga nae apan nata natdetnanga dua singgak. Gutonga aknga nata tasinggat takngata na atnutapan pimake kawa sananga dua singgak. Gutonga aknga kwaapzang sikngata natane gwapak danggama ayapbikgak. Siwan natane musipma tuyuknga siwan na kekekananga dua singgak.
PSA 40:13 Buyambam tapa, gata na gatuka tapso. Gata zet apu gatangamuyo.
PSA 40:14 Aminu kunduta na nuwan kupitde tasikaing. Ge gata aminu wa na nutnangge tasikaingu yaipapaakusike pasiwi datdaptake asiknga maakaning. Siwan waaminu na tasiwa maiwitde apbakngakaingu yanikwasiwi kuwa umana kopsa yuaingu gata asandepakepso.
PSA 40:15 Sandepakepuke waaminu masa wamu nae yakaingu gata pasiwi kepi gutonga tasikaingge apmaakake asiknga satnanong.
PSA 40:16 Siwan aminu gae apukaingga musip gwaang natake gae apbakngake yutnong. Sike aminbamu gata pakuyakge asiknga bakngake yutnong. Bakngake yuke waaminda anzing yaning, “Buyambamtapa tupan sikngaapa,” ngang yaning.
PSA 40:17 Siwan ngana na kekekngana wena. Ge nata nina gatangamunanga dua. Siwan ngana ga Buyambam tapa, gata nae atnatapso. Anutuna, gika siknga gatangamuke tanawawi yuwit. Yuwawa na zet gatangamuke mooka ma nandutewim.
PSA 41:1 Aminu tapatuta umana wena aminde natake gatayamiu, waapa apbakngayok. Buyambam tapata meya ie asapan ngana ita akgatangamik.
PSA 41:2 Buyambam tapata kakuya tasike tapan kekeknga sike kayuk takekan yuwik. Yuke Buyambam tapata tasiwan kepnane takekan yuwik. Yuwan Buyambam tapata iwana dua kapewan apu waapa tasiwan maiwik.
PSA 41:3 Sike aminu waapa mait ba siwanu, Buyambam tapata akayuwik. Ita maitna sandekngaman maitna wena siwan kekeknga gatu yuwik.
PSA 41:4 Siwan na nina anzing yakum, “Buyambam tapa, nata waiaknga gae tasikum. Siwan ngana gata nae musip kwikwik natangamuyo. Natake maitna sandekngamuyo,” ngang yakum.
PSA 41:5 Sike natane iwanata musip maik natangamuke anzing yakaing, “Asikaya mait sike akupik gamu take siwan umana sopuwan ninda ie apbotanim,” ngang yakaing.
PSA 41:6 Iwana waakwakga apu nandukengu kem tanzit wam nanikaing. Waakwakga nae sapdut wam yakaing. Siwan waaminda kepman epu kukenga sapdut wamu waaknga kepna kepna yanitakukaing.
PSA 41:7 Sike iwanambamu nae asiknga bitakaingu natane maitnae kusopuknga wam yakaing. Waaminda nataaingu sanga wai sikngata tasiwan mainanggenggak ngang nataaing.
PSA 41:8 Waaminda anzing yakaing, “Sanga wai siknga tasiwan wai waapa gwa tapan maiu buyambam sikut. Waapa gatu dua enawik. Wena. Waapa akupik,” ngang yakaing.
PSA 41:9 Sike na notna tapatu kaya. Waapaa natane notna siknga. Siwan waapa nanamu naat nakamak. Siwan ngana waapaaya kepina tangenake na nainggamunangge tasinggak.
PSA 41:10 Siwan ngana Buyambam tapa, gata nae musip kwikwik natangamuke maitna sandekngamuyo. Sandekngamina nata yake waaminda ina tasikaing kaknga tasiwit.
PSA 41:11 Sike natane iwanata dua naitakepu napmakaing. Dua naitakepuke napmamban kake na gata nae take siknga natangamunggayak ngangu atnataat.
PSA 41:12 Na kepi noman gan sukuwa nanduke gata na kakuya tasinggayak. Siwan na gae wesim yukgawambitde na katakga asinggan yutzimde takuyak.
PSA 41:13 Buyambam tapatane umana ninda initangenatnim. Sike waapa Isrel nanatane Anutuna. Siwan dongu masan aatningu waamin kaya ina unzakan tasining.
PSA 42:1 Kaap zongu guyaknga kupiawan yanggae isapmake kuke yangga matekngane tangokaing. Ina unzakan, Anutu, na isapmake kuke gae wesim siknga yuwitde take siknga nataat.
PSA 42:2 Anutu, ga kayuk asinggan yuak kapanin. Na gae take siknga nataat. Unzing aminu tapatu guyaknga kupiawan yangga tangopnangge nataak binga. Siwan zaapduk nata gae kuke nata gae munu puwit?
PSA 42:3 Asingganu aminbamda anzing nanikaing, “Gatane Anutuka zendang yuak?” Unzing naniwa na kwanamu asinggan sikgat. Siwan kwakngaom gatu zikaane ngangu nanam asinggan nanggat. Unzing binga, kai yanggana gunzit tapane gatu zikaane ngang epukaing.
PSA 42:4 Na tapduu tupa take yukum komde nataat. Natapa musipmaatang meya singgak. Tupa na aminbampat unekan sukukumang. Siwan na tupan kuke yanipake Anutue yot gwene pake kukum. Ninu unzing kuyuuk ataibakngake kap taiyuuk Anutue gaak inikumang. Inike ninu unekan yuke tapdukngane munu puke inimbakngakumang.
PSA 42:5 Dasingge na meya musipmaatang asingganu nataat? Dasingge na musipmaatang apbinga kasatnanggat? Nata Anutue banip sike kayuwawa ita gatangamik. Sike i Anutuna ge ita akgatangamunggaunin. Unzingge na itane umana gatu yatangenawit.
PSA 42:6 Anutu, nata musipmaatangu meya siknga nataat. Sike na yangga Jordan tapatane kautdu saak yuat. Gatu tawanu Hermon gatu Miza ngang komune yuke gae natanggamatanggat.
PSA 42:7 Gata tasiwi yanggabam gwenu gapma amunandang siknga yuakga gatu uneta amunane siknga yuak gwenda yanggamatanggak. Siwan yangga suptangan zipmake guyakngi muke amundang pukunggak. Pukuke yangga waanga gakngae buyambam yanggak. Gata tasiwi yanggabam gwenu sambui enake kunggak. Kuke kepdaka yanggabam gwenda usukwatapmanggak. Ina unzakan, meya naangan peyaakga na usukwatapmanggak.
PSA 42:8 Siwan ngana Buyambam tapata nae musip kwikwiu gunzit tapane natangamikge nataat. Natake zikaane nata musip gwaang natake kap taike gaak wam iniwit. Inike nata Anutue kayuk yutnanga aknga namunggakge tumuk wam iniwit.
PSA 42:9 Anututa kekeknga nae atnamunggaunin. Siwan ngana nata anzing ininggat, “Dasingge gata nae botanggayak? Dasingge gata natane iwana kapewi na naitakepu tewan na musipmaatang meyambamu panggat?”
PSA 42:10 Asingganu iwanata wamu wai nae anzing yakaing, “Gatane Anutuka apmanu zendang yuak?” Wamu waaknga yakaingu sakutda gupmaapaatang binga napan kumnanga nataat.
PSA 42:11 Dasingge na musipmaatang meyambamu asinggan panggat? Dasingge musipma apbinga kasatnanggak? Na Anutuekan banip sike yuwawa ita akgatangamik. Sike i Anutuna ge ita akgatangamunggaunin. Unzingge nata itane umana apmea yatangenawit.
PSA 43:1 Anutu, aminu gae masa gamukaingga na naitakepu tenangge tasikaing. Gata na asiknga gatangamuke aminu dongu waomune nanatane wamna waiaknga atzipbuyamuyo. Unzing tasiwi nata puya noma nomana tasinggat taknga waaminde yeuyamuyo. Sike kem wam yake tanzit asinggan tasikaing aminu yuyuknga take dua. Gata na gatangamuke waaminde kataune na sandeke tapso.
PSA 43:2 Sike ga natane kekekatna ge nata gae apukenga meya dua kawit. Siwan ngana dasingge ga nae masa namunggayak? Dasingge gata kapewi iwanata na naitakepu tewa meyambamu musipmaatang na pake sukunggat?
PSA 43:3 Gata wamu siakan taknga kakaa binga pewi apu kepi yeikngamuyok. Yeikngaman kepi katak kake na Saionde noman kuwit. Wa tawanu gikane dakanin. Siwana nata you gika yuwaak gwene kuwit.
PSA 43:4 Unzingge Anutu, na gatane alta dakane wesim kuwit. Dasingge? Gata tasiwi na musip gwaang natake apbaknganggat. Sike ga natane Anutuna, nata gwameming daka take tanguwa gakngae noman yawik. Siwana nata kap taike gatane umanda akngae yatangenawit.
PSA 43:5 Siwan dasingge na musipmaatang meyambamu asinggan panggat? Dasingge musipma apbinga kasatnanggak? Na Anutuekan banip sike yuwawa ita akgatangamik. Sike i Anutuna, ge ita na akgatangamunggaunin. Unzingge nata itane umana gatu yatangenawit.
PSA 44:1 Anutu, nindane bapuninda puya kekeknga gata tupa siknga pasikuyakge niniking, kepdakane yuking komune. Niniwan nisa siknga wamu waaknga gwa natapbumang.
PSA 44:2 Gata gika siknga kekekngakata dongu takngatui yanikwasiwi kuwawan kepna pake nindane bapuninde yamukuyak. Siwan une kekeknga yuking. Ngan, gata dongu waakngata waiaknga tasikingge yake meya yamukuyak. Siwan ngana nindane bapunin gatayami take siknga yuking.
PSA 44:3 Siwana bapuninda asaambing. Siwan ngana keu waomu amak tasike dua taking. Asikaya inane kekeknganata gatayaman amau tasike yapbiking? Wena. Gata waaminde take siknga natapbuyak. Unzingge ga waaminkat gatake yuke kakaa yamukuyak. Yamuke gikane kekeknga aknganeta iwana yapbikuyak.
PSA 44:4 Ga kingkapa, siwan natane Anutuna. Gata yawi Jekopdane dongata amau tasike iwana yapbitning.
PSA 44:5 Gatane kekeknga aknganeta iwaninu yawapena kukaing. Gata ninkatang yuwawi aminu ninkat amakamangu yaipapaakusikamang.
PSA 44:6 Na kweem ba sakutna kaya ngana na baniu sanga wanda gatangaman amau apme tasiwit ngangu dua nataat. Na gwauya kuut kaya siwan ngana nata amau tasiwawa ita dua gatangamik.
PSA 44:7 Wena. Gata siknga gatanimi amau tasike iwaninda ninu dua nipbiking. Wena. Gaat gatu iat ngang amake gata ayapbikuyak.
PSA 44:8 Anutu, gata take siknga gatanimiyakge natake ganimbakngakamang. Ganimbakngake asingganu ninda gatane umanda yatangenakamang.
PSA 44:9 Siwan ngana apmanu dasing? Gata ninu masa gwa nimuke ninu iwaninde kaine tasiwi upeekamang. Siwan apmau ga nindane amak aminkat gatuka amakge dua gatake kukaing.
PSA 44:10 Gata unzing tasiwi ninu iwanin kagwauke datakukumang. Datakuwatna ita apu nindane sangaapanin paking.
PSA 44:11 Gata ninu sipsip gwengwen yasikaing binga nisipan kumnimde nindupekuyak. Nindupewawi kepmine yuatna ngana ninikwasikuyak. Ninikwasiwi ninu unda undang kuke paku dongu kundue banakan yuamang.
PSA 44:12 Gata ninu gikane amindabamu nindupewi dongu kundutane puya amina moo dakngakamang. Siwan ita ga buyana matekngata usiking. Gata supzainu buyambam dua pakuyak.
PSA 44:13 Gata ninu unzing pasiwi dongu kundu ninde wesim yuaingga sapdut wam ninikaing. Ngan, aminu kunduta atninimike maaknga wam ninikaing.
PSA 44:14 Gata pasiwi enake ie ninu dongu kunduta maaknga umaninu yakaing. Sanga kundu ninkatang aawan kakengu kumzang siknga ninimikaing.
PSA 44:15 Nina natapa wai asinggan siwan na maaknga siknga nataat.
PSA 44:16 Dasingge? Aminu kunduta sapdut wam nanike wamu waiaknga nanikaing. Sike kaawanu iwanaat gatu aminu kunduatda waiaknga yake nae tasinangge nataaing.
PSA 44:17 Anutu, ninu gae dua botakumang. Aho! Gatane pasap wamba ninu dua yamasandemang. Siwan ngana sanga wa ninkatang apbut.
PSA 44:18 Ninu gae masa dua gamuke gatu gatane kepiakngaka dua tekumang.
PSA 44:19 Siwan ngana gata ninu amina wena, kaap zonggakan yuaing komune pasiwi maikumang. Siwan ninu zikaa siknga dakata usikwatanimukuyak.
PSA 44:20 Ninda Anutue gwamba botakumang? Botake tumuk wamu anutu pupukngae ba yanim?
PSA 44:21 Gatanu atnatapiak. Anututa natdetdeu ninde musipatang kusopuke yuaingu atnataak.
PSA 44:22 Anutu, ninu gatane amindabamda yuamang. Unzingge ninu tapdukbam asinggan nisipa kungwakamang. Iwaninda ninu nindupanu sipsip binga atnisipan kumnimdekan.
PSA 44:23 Buyambam tapa, ga enayo. Dasingge ga dapunu pekgayak? Ga enayo. Gata masa asingganu ninde ma nimim.
PSA 44:24 Dasingge ga ninde kusopunggayak? Aminda ninde wai pasiwa ninu meyambam pake yuamang. Ninda meya wa pakamangge dua botawim.
PSA 44:25 Ninu kepatang pimakamang. Siwan gupminu gwa kupsa amindane gupnata binga pekaing.
PSA 44:26 Anutu, gata enake apu gatanimuyo. Ga butaya natanimunggayakapanin ge gata gatuka papi ninu dua kumnim.
PSA 45:1 Natane natdetdetna atangu wamu takeaknga aknga kwaapzang yuaing. Kau takngatu natake getangan king kapae iniwitde nataat. Natane gena penu aminu pepa matanggau take apata matanggak binga.
PSA 45:2 Ga aminu sikngaapa. Aminu tapatu ga binga dua yuak. Gata wamu yanggau Anututa gatanggaman takeakngakan yanggayak. Dasingge, ita ga asinggan asinggan take tasinggamik.
PSA 45:3 Ga kingu kekeknga sikngaapa. Siwan umanda kopsa aknga enane siknga yuak. Unzing ga taau gwaam gwaamu kwaapzang take wamanggayak binga. Siwan gata gwauyaka pandakngake amak tasinangge tandakngayo.
PSA 45:4 Ga Kingu tupan tapa, umanda kayaapa yuayak. Gata ikwawa gamanu hos gwene pukwike kuku amak tasike yapbikgaunin. Gata kuku amau tasinggaau wa noman amin gatayamunangge tasiyo. Tasiwi kepi noman tapa tawaningge. Ngan, inane umana dua yatangenatningge. Gata amau kekeknga siknga tasiwi wai aminda ganduke gwauya siknga natapnong.
PSA 45:5 Gatane sakutda paanga siknga, siwan ita iwanda siakande yamningge tasiyo. Gata amak tasike yapbimbi gae gepbiatang koyutnong.
PSA 45:6 Anutu, ga king kapa dakngake asinggan asinggan yuayak. Gata amindabamu kepi noman taknganekan kayuayak.
PSA 45:7 Ga sanga noman takngaekan gwaam siknga natake waiakngae ga asiknga bitanggayak. Unzingge gikane Anutukata yangga wel taknga gwapakgane tukngwanggamuke tasiwan umanda kaapa dakngakuyak. Siwan ita tasiwan gata notda yapbike umanda kopsa apa dakngake apbakngakuyak.
PSA 45:8 Sike gatane taukga aknga sanga kapanga kaa tasiwi taukga kapanga kaa siknga singgak. Siwan king kapatane yotna sanga kwaknga siknga dundumna siknga tasigwaanguke kap taikaing. Siwan kau waaknga taiwawa gata baknganggayak.
PSA 45:9 Sike king kapa apatane yapanaat gatu maya kundu gata tasiwi umana kaya dakngakingkat yuaing. Sike katakga kwanaapane maya gata maatdae takuyak kapata dandamake yuak. Ita tauknga sanga golmani ngang yanikaingu you gapmandu Ofir gapmane nanata pasikingunin pasikut.
PSA 45:10 Ga maya mateu king kapa apbae tanangge nataau, gata nae wam gwaamuke anzing natapso. Gata aminu yotda yuaingge apbotayo. Gatu gikandak notda sikngae kuut botayo.
PSA 45:11 Gata unzing tasiwi king kapata ganduke maya aapa take siknga ngang natanggamunggak. Waapa gatane buyambam tapaka, unzingge gata itane wam gwaamumso.
PSA 45:12 Sike aminu Tair yotbam gapmane nanata sanga kundu gae gamunangge pakapning. Ngan, sanganambambanu waakwakge gata musip gwaang natayamiyakge sanga sanga gae gamuning.
PSA 45:13 Maya mateu kinggane waapa yotna inatakan pekgak gwekatang yuwan kana gwaam siknga singgak. Sike tauknga sanga tretgol ngang yanikaingga pasikaingunin pasike yuak.
PSA 45:14 Sike tauknga waaknga kunzi inata inata pasiking. Siwana kuupbamda maya waapa kingge takuuning. Siwan gatu maat matek notna apa apa iat gatake masene tawamba kuning.
PSA 45:15 Waakwakga apbakngake musip gwaangu kuutnata natake king kapatane yotna buyambam gwekatangu kopning.
PSA 45:16 Sike ga king kapa, masande gatane waakga kwaapzang siwik. Siwana itaa gatane bapuka tupa aaking ge tangge yutning. Waakga waakwau umana kaa siwan waakwakga aminu kepna kepna yuaingunin kayutning.
PSA 45:17 Nata gatane umanda kopsa aknga yakapa aminu apmea aatningga masande gae asinggan natayutning. Unzing tasike aminu kepna kepna yuaingga gae umanu asinggan asinggan yatangenatning.
PSA 46:1 Anutu ninda akusopunanga apa unin. Sike ita ninu asinggan papan kekekakamang. Ita kaawan ninu meya takngatuta ba papan kakengu inengan yutniwake gatanimunangge atandakngake yuak.
PSA 46:2 Unzingge sanga takngatuta aawan kanimdenu dua gwautnim. Keu andaka miamunda tasiwan take dewik ba take pukapik. Siawan tawan dakandaka puke yanggabam gwende banakan katang pimapan kakengu ninda ie dua gwautnim.
PSA 46:3 Siwan yanggabam gwenda pongza siknga tapmake unda undang kuwawan aapban gwen siwik. Siwan yanggabam gwenda gatu saasaa sike tawanu kuupbam pamakaiwik. Siwan ngana undanga. Ninda dua gwautnim.
PSA 46:4 Anututane yotna gapma wa Anutu enane siknga yuak kapata inae gwa yawan yuak. Yangga buyambamu tapatu wa gapmae banakan zipmanggak. Siwan aminu banip siata yangga waapane apbakngake yuaing.
PSA 46:5 Anutu yotbamu wanggapmane yuak. Unzingge itane yotbam gapma wai sinanga dua. Keu dua kwakaawan Anututa akgatangamik.
PSA 46:6 Siwan aminu kepna kepna nanata asatnake ina amning. Siwan aminu waakwakat gatu king kapanaat apimaning. Siwana Anututa akaapmapa yawan keu andaka aknguyukake sopuwik.
PSA 46:7 Buyambamtapa kekekngana bamban tapa nikat yuamang. Jekopdane Anutunae ninda kuke undang kusopunim.
PSA 46:8 Ayok! Ginda Buyambam tapata puya pasinggak kaknga kanong. Ginda musipzane Buyambam tapata sanga takngatu takngatu kepdakane tasinggaunin kaning.
PSA 46:9 Sike amau kepna kepna tasikaingu ita tasiwan amak kaknga akupan wena siknga singgak. Ita kweemna gatu sakutna ngang aputdakngake tiungguna kuut kuupbam katap patang sapewan yasikaing.
PSA 46:10 Ita anzing yanggak, “Ginu amau gatusa ma tasiwam. Ginda nae anzing siknga natapnong. Na Anutu siknga. Na enane siknga yuwa aminbamu nae gepbiatang koyutning. Sike kepna kepna yutake kukaing amindane na tupan siknga apa yuat,” ngang yanggak.
PSA 46:11 Buyambamtapa kekekngana bamban tapa nikat yuamang. Ninda Jekopdane Anutunae kuke undang kusopunim.
PSA 47:1 Ginu aminu kuupbam apbakngake katakza wesinong. Bakngake ginda asainggamatake kaau pangenawan kuwan taike Anututane umana aknga yatangenatnong.
PSA 47:2 Dasingge, ninda Buyambam tapae asiknga gwautnim. Buyambamtapa waapa enane siknga yuak. Ita kingu tupantapa yuke aminbamu kepna kepna yuaingu kakuya tasinggak.
PSA 47:3 Ita dongu kundutane umana kuupbam sandepakepuke pasiwan ninu enane yuamang. Ngan, ita tasiwan dongu kundu ninde gepbiatang koyuaing.
PSA 47:4 Anututa keu komdu yawan yuwan ninde gwa nimukut. Ninu Jekopdane donga, Anututa musip gwaangu ninde natanimunggak. Siwan keu waomde apbakngake yuamang.
PSA 47:5 Anutu yotna yekaune gwa kopbut. Sike tapduu Buyambam tapata wa kopbut gwene aminu apbakngake kumzang ainggamatake pumu kuut puyapbing.
PSA 47:6 Ayok, ninda kau pangenake taike Buyambam tapatane umana yatangenatnim. Ninda nisane kingu waapae apbakngake kau tainim.
PSA 47:7 Dasingge, Anutu king siknga yuke kepna kepna kuupbam kayuak. Ninda unzingge kau taike umana aknga ayatangenatnim.
PSA 47:8 Anutu king siknga yuke dongu aminu kuupbam kayuak. Ita king kapa ge inane sia king dakanane pukwike yuak.
PSA 47:9 Sike amindane tupan amin tapaapa aminu Abrahamdane Anutuna tawakaingkat unekan gatake yuaing. Dasingge, kingu kepna kepna nana kuupbamu aminu Anututanekan. Ita king tupan tapa enane siknga yuak kapanin.
PSA 48:1 Buyambamtapa umana kopsa apa yuak. Ninda tawanu Anututane dakane kopna. Koke itane yotbam gapmaatang kopna. Koke ninda itane umana kumzang yatangenatnim.
PSA 48:2 Sike Anututane tawanu wandaka enane siknga yuwan kana take siknga singgak. Siwan aminu kepna kepna yuaingga tawanu Saion wandakae take siknga nataaing. Tawanu wandakane Anutu kopsa apatane umana yuak. Siwan yotbamu wanggapma kingu tupan tapatane.
PSA 48:3 Sike Anutu yot gapmabamu damanu kekeknga siknga gwegwende yuke aminu amak tapduk kopatangu akgatayamunggak. Unzing gatayaman you kekeknga gwegwende banakan katang take yuaing.
PSA 48:4 Tupa king takwakga Saionde amnangge tasiking. Waakwakga unekan yuke yotbamu wanggapmane inengan apbing.
PSA 48:5 Waaminu kuku yotbam wanggapma kake zeetgaman akasatnaking. Kasatnake asiknga gwauke waakwau atdatakuking.
PSA 48:6 Datakuke dandai kumzang yamuking. Dandai yamumban atdatakukingu wa unzing mayata engang bokngitnangge toknga nataaing binga sikut.
PSA 48:7 Anutu, gata tasiwi gou buyambamu gunzitda akonggak kopatangga apbut. Apuke yotbamu Tarsis nanatane sipna buyambam gwegwenu apasiwan maiking.
PSA 48:8 Ninu sanga wa Anututa tupa siknga tasikutdane wamu yawan atnatapbumang. Gatu apmaat kaa tasiwan gatunin kakumang. Ninu Buyambam tapatane yotbam gapmane yukumang. Anutu nindane apan, wa Anutu kekekngana kuupbam kayakan. Sike nindeaan sanga waaknga tasikut. Anututa yotbam gapma gwa tapan kekekakutde yotna gapma asinggan yuwik.
PSA 48:9 Anutu, ninu gatane miti yot buyambam gwekatang yuamang. Yuke ninu ga ninde butaya asinggan natanimunggayak kakngae natanggamatakamang.
PSA 48:10 Sike kepna kepna yuaingu aminu kuupbamda gatane umanda ayatangenakaing. Gatu aminu zendang zendangga yuaingu gatane umanda akngae apbakngakaing. Gata aminu kuupbam noman taknganekan kayuak.
PSA 48:11 Unzingge aminu tawanu Saion dakane yuaingu kuupbam apbaknganing. Gata aminu kuupbam noman taknganekan usanzikgaak. Unzingge aminu yotbamu Juda komune nanata asiknga baknganing.
PSA 48:12 Ginda kepi kepi tawanu Saion dakane sukunong. Gatu damanu yot wanggapma takumbasikuune kuyuuk you kundu mamaya gwegwenu you wa gapma tasiwan kekeknga singgau kendetnong.
PSA 48:13 Ginda Saiondane damanu kekeknga siknga gwegwende katak siknga natapnong. You kekeknga gwegwende kuut katak kanong. Kakenga aminu masan aatningu ginda yanikapnong.
PSA 48:14 Ginda anzingu take yanining, Anutu waapata kakuya ninu tasike asinggan asinggan ninduyuak kapanin. Ge asinggan asingganu ita tupan kuke kepi ninde yeutnimunggak.
PSA 49:1 Ginu aminu kuupbam, natapnong. Ginu aminu kuupbam kepna kepna yuaingga maak gwaang pake natane wamde natapnong.
PSA 49:2 Ginu umanza kaya aminkat umanza wena aminkat gatu sangabamna kayaat sangana wenaat ginu wamu aaknga katak natapnong.
PSA 49:3 Natane genanetanu wamu musip kwikwikganekan yanggat. Unzingge nata wamu take akngakan daniwawa natdetdet damikgen.
PSA 49:4 Na tuwang wamu kundu gambok daniwit. Gatu gwameming daka tanguyuuk tuwang wamdane yapii daniwit.
PSA 49:5 Aminu kunduta na takumbasike tasiwa maiwitde tasikaing. Siwan ngana nata waaminde dua gwaumbit.
PSA 49:6 Sike waaminda ninu moninginbam bande apme kekekanimik ngang nataaing. Natake ninu sanganin bamban ngang wamu kaapmapa yakaing.
PSA 49:7 Ninu atnataamang. Aminu tapatuta notna dua kupikge natake inane moningata usinanga dua. Aho. Ita Anutue kayuk asinggan asinggan yutnanga akngana moningga usinanga dua. Wena siknga.
PSA 49:8 Dasingge? Amin usinanga aknga buyana enane siknga. Sanga wa usinanga dua.
PSA 49:9 Aminda Anutu dua usiwan kayuk yutnanga aknga iman kayuu asinggan yuke dua kupik.
PSA 49:10 Ninu kuupbamda akaamang. Ngan, natdetdet aminu akungwakaing. Sike yamandotdong aminkat gatu katum aminkau akungwakaing. Waaminu kungwake moninga ba sangana ngang pewa aminu kunduta paning.
PSA 49:11 Tupa aminu waakwau kepna kake aminu kuupbamda keu waamindane ngang natapbing. Siwan ngana apmanu aminda kupan kwaiya gapma yotna binga dakngawan une asinggan asinggan yutning.
PSA 49:12 Aminu umana kaya akwau kungwak kakngata yapbitnanga dua. Siwan waaminu kaap zongga kungwakaing binga kumning.
PSA 49:13 Sanga unzing kaknga aminu baniu ineakan sike sanga panggaganukaing gekan apik. Siwan aminu kunduta waamindane wamna take natake tawaning. Sike aminu waakwakge sanga unzing kaknga asapik.
PSA 49:14 Anututa waakwau sipsipda binga kungwake paku gwakumbingga yuaing komune yutningge yawan yuaing. Siwan kungwak kakngata kuyana ita kayuwik. Tembana aminu noman nomana aminda aminu waakwau kayutning. Sike ngana yotna take siknga apekaing gwegwen peke epanu gupna gatukande bukana sikaing. Siwanu wa gwa kupsa aminda yuaing komune yuaing.
PSA 49:15 Siwan ngana Anututa na atapik. Atapan gwa kupsa aminda yuaing komune nana kekeknga akngata na tanggaganutnanga dua. Aho. Ita na tapan naat iat gatake asinggan asinggan yutzim.
PSA 49:16 Sike aminu tapatu moninga kwaapzang ba siwik. Siwan yotna buyambam gwendu mitapik. Mitake sangabamu paku undang pewik. Undanga. Ga ie nangaakan ma natapim.
PSA 49:17 Ga atnataayak. Masande waapa akupik. Siwan sanga tapatu dua take inaat kusan. Sangana kuupbam dua pake akupsa aminda yuaing komune kuwik.
PSA 49:18 Sike tapduu kayuk yukut komunenu sangana waakwakge apbakngakut. Ita puya kekeknga pasike sangabam pakut. Siwan aminda yake aapa take siknga, ngang yaking.
PSA 49:19 Siwan ngana undanga. Waapa akungwakengu paku bapunaat gunzitdane kakaa gatuna dua kaaing komune yutning.
PSA 49:20 Aminu umana kaya akwau kungwak kakngata yapbitnanga dua. Siwan waaminu kaap zongga kungwakaing binga kumning.
PSA 50:1 Anutu kekekngana bamban tapa. Waapa nindane Buyambam tapanin. Ita apmanu aminu kuupbamde yayawanggak. Tupanu keu gunzitda akonggak komuneta kuku gunzitda pukunggak komune ita aminu kepna kepna yuaingunin yayawanggak.
PSA 50:2 Anutu you Saion gapmane yuak. Yotbamu wanggapma take siknga siwan dundumna siknga. Siwan Anututane kakaa aknga anggaman yuak.
PSA 50:3 Anututa ninde asapik. Sike waapa dua wikake yuke apik. Wena siknga. Katap gwenu sangabam yasiwan kumnanga tupan kuwik. Sike gotkat sopaat kumzang siknga unin takumbasiuuk apik.
PSA 50:4 Ita aminu yekapat gatu kepdakane nana yayawaawan apa waamindane yuyuknga katak siknga usanziwik.
PSA 50:5 Anututa anzing yanggak, “Natane aminabam, nae apan unekan yutnim. Gikat gatu naat pasap taknga tasinangge natake ginda kaau nae pasap waaknga tapan kekekawikge namuking,” ngang yanggak.
PSA 50:6 Siwan sanga yekapatang yuaingga yeutniman kake ninda Anutu noman sikngaapa ngang nataamang. Dasingge, Anutu ina amin usanzikgak kapanin.
PSA 50:7 Siwan Anututa yanggak, “Ginu natane aminabam, natapnong. Na ginde wamu kaa. Ginu Isrel amin, nata ginu kotde pakuwa yaningge nataat. Nakan, na Anutu siknga. Na gindane Anutusa.
PSA 50:8 Ginda sanga nae namukainggenu kaanga dua daninggat. Wena. Asingganu nata danduwawa sanga nae namunangge natakengu katapatang sake namuwawa kake take nataat.
PSA 50:9 Sike ngana natanu kao wawigwen ba meme wawi gwenu damanzane panangge dua nataat. Ie nata dua dapmanggat. Wena.
PSA 50:10 Kaap zongu zongaatang yuaingkat gatu kao tawan dakandakaatang yuaingu, wa kuupbam natanekan.
PSA 50:11 Kwait gwegwen, kaapzong gatu gwakgwau sakganang tangaatang sukukaingu, wa kuupbam natanekan.
PSA 50:12 Sike na tomma natakengu nata dua danikapa natapning. Wena. Kepdakaat gatu sanga une yuaingu, wa kuupbam natanekan.
PSA 50:13 Asikaya na kao wawi gwendane gamanggamai apba nanggat? Asikaya na meme wawi gwendane daknga apba tangokgat, ba? Wena!
PSA 50:14 Ateke ginda na Anutue gaak gwaang naninong. Wa sanga unzing kaknga ginda nae namunangge gwa yakingu na Anutu enane siknga yuat tapae ginda wa atnamunong.
PSA 50:15 Ginda unzing tasiwawa meya takngatuta apan kakengu ginda nae take yaning. Yawa nata ginu asiknga gatandamit. Gatandama ginda natane umana yatangenatnong.”
PSA 50:16 Siwan ngana wai aminde Anututa anzing yaninggak, “Ginda dasingge natane mama wama kuupbamde yakaing? Gatu, minae natane pasap wama yakaing,” ngang yaninggak.
PSA 50:17 “Nata gin panomanuwitde dua nataaing. Asingganu ginda nae wam yamasandekaing.
PSA 50:18 Ginda kukwa amin kake notza dakngawan yuaing. Gatu ginu mayata apna sandekgak ba wawita maatna sandeke yasewa yumdekan tasikaing aminkat sukukaing.
PSA 50:19 Ginu genza dakaneta wamu waiaknga ba kem wamu asinggan yakaing.
PSA 50:20 Gatu ginda notzaapa kot yaningge pakukaing. Pakuke waaminde ginda masa wam yanikaing. Sike ginda sapdut wamu minggatane waakngae inisapdukaing.
PSA 50:21 Ginda unzing tasiwa danduke ngana na wamu takngatu dua yakum. Unzingge ginda naenu ninkat unzakan yuamang ngang nataaing. Siwan ngana wena siknga. Nata apmanu kaanga danike pasiwa kotde wamu aanggaman yaning.
PSA 50:22 Ginu aminu nae masa namukaingu ginu natapnong. Ginu ina unzakan yuwan kakengu nata ginu apasiwa maining. Siwan aminu tapatuta ginu gatu pananga dua.
PSA 50:23 Aminu tapatuta nae gaak nanike sanga kundu binga namiu, waapata natane umana ayatangenakgak. Sike natanu aminu nae wam tawakaingu, nata waaminu gatuna apapit.”
PSA 51:1 Anutu, ga butaya akngatane yapii. Siwan gata nae musip kwikwik natangamuyo. Ga musip kwikwikga buyambamu kayaapa. Unzingge gata waiakngana kuupbam sandekngamuyo.
PSA 51:2 Gata tasiwi natane waiakngana kaikane sandewi wena siyok. Unzing nata yangga sauwa wasapma wena singgak binga. Ngan. Gata natane waiakngana kuupbam sandekngami nata amin nomanda yuwit.
PSA 51:3 Na atnataat. Nata gutonga aknga aknga asinggan pasinggat. Unzingge waakwau pasinggatde botananga dua singgak.
PSA 51:4 Nata waiaknga wa pasikumu gaekan pasikum. Ngan. Nata wai takngatu takngatu wa tasikumu gae kaikane tasikum. Unzingge gata kepi noman takngakan tawake na usanzike kaanga wam naniwinu siakan siwik.
PSA 51:5 Ga atnatayak, tapduu mingata na tangaikut gwene na aminu waiaknga tasiya amin dakngakum. Sike musipganang yukum patangu na waiaknga tasiya amin dakngake yukum.
PSA 51:6 Siwan ngana ga nata wamu siakan takngakan asiknga tawambitde natayak. Unzingge na gata natdetdetda noman taknganin nanindamumbiyakge nataat.
PSA 51:7 Gata natane waiakngana sandekngami nata dundumna amin dakngake yuwit. Gata yanggata binga saukngami aminu wasapna wena siknga binga dakngake yuwit. Dakngake yuwawa natane waiakngana gatane kaikane wena siknga siwik.
PSA 51:8 Gata musipma tasiwi apbakngayok. Siakan siknga! Gata nae waiaknganae meya namukuyak. Namuke natane kwatana zipmanggamumbi apuking ngana gata na tasiwi kwatana waapa apata gatuna take siwanu nata apbakngawit.
PSA 51:9 Gata waiaknga tasikumde undang gatuka ma kawim. Siwan gata natane gutongana kuupbam asandekngamuyo.
PSA 51:10 Anutu, gata natane musipma tangenawi na musipma kayuk ba dundumna siwikge nataat. Gata natane waunga tangenake na waungu kayukapa naatang tengami nata gaekan natanggamatawa kekekayok.
PSA 51:11 Siwan gata na ma nanikwasiwi kuwam. Waungu takwan gataneapa naatang yuau gata ma kaiwi kuwan.
PSA 51:12 Tupa gata na takuyakge apbakngakum. Ge apman kaya gata na gatuka tapi nata gatuna apbakngawit. Gata gatuka tasike natane musipma tangenawi nata gae wam tawamba kekekawan tasiwitden.
PSA 51:13 Nata gae wam tawake aminu waiaknga tasikaingu yanindamumba waaminda gatane kepi noman takngaka kakapmake gae gatuna apning.
PSA 51:14 Anutu, ga Anutu na takuyak tapanin, gata musip kwikwik natangamuke ma nuwi kupam. Unzing tasingami nata gae kap taike gata nae nomana aknga tasikuyak takngae natake kap taiwit.
PSA 51:15 Buyambam tapa, gata na gatangami nata wam takngatu yakapmake gatane umanda aknga yatangenawit.
PSA 51:16 Nata kaau gwendu takapuke gae yamuyamuk binga tasiwitde take natapinu nata asiknga takapuke akgamit ngana gata ie take dua nataayak. Siakan. Nata kaau gwendu tanguke yamuyamuk binga tasiwa katapda isisopubanu gata dua bakngawiyak.
PSA 51:17 Ayok, Anutu! Nata ninae natapa epan nata gae gepbiatang koyuwit. Sike wa natane yamuyamuk takngana binga. Na atnataat. Gata aminu tapatuta inane waiaknganae meya natake umana inane aknga natapan epik. Natapan epan kake gata wa apae masa dua siknga imiyak.
PSA 51:18 Siwan gata gika nataak kakngane aminu gatayami Saion yot gapmane takekan yutnong. Gata gatuka damanu Jerusalem yot gapmane gwenu gatuka tangenayo.
PSA 51:19 Unzingge tapduu aomune amindabamu kepi noman taknga tawake gae ofa takekan gamuning. Gamuke aminu waakwakgane ofa inata inata katapda kuutgan yasikaing. Ngan, ikwawa gamanu wawi gwengwenu akgamunangge natake gatane alta dakane sawan yasiwan gamukaing.
PSA 52:1 Ga kekeknga sikngaapa, ga minae ainggamatake waiaknga Anututane aminabamde tasikuyakge baknganggaak? Asingganu Anututa waaminde musip kwikwik natayamunggak.
PSA 52:2 Ga kem amin, gatane genda daka resa toknga siknga daka binga. Tapdukbamu gata aminu kundu tanzit pasiwi mainingge nataayak.
PSA 52:3 Ga takeakngae dua nataayak. Aho. Ga waiakngaekan nataayak. Ga siakan wamgan yanangge dua nataayak. Ga kem wamgan yanangge nataayak.
PSA 52:4 Ga kem amintapa. Ga wamu aminu kundu pasiwan maikaing takngaekan nataayak.
PSA 52:5 Siwan ngana natapso. Anututa ga asiknga tasiwan maiwiyak. Ita ga tanggaganuke ganikwasiwan yotda teke kuya. Siwana ita tasiwan ga gatukande sopuke keu andakane gatuka dua yuya.
PSA 52:6 Sike noman aminda sanga waakngakan aawan kakengu akgwautning. Siwan waaminda akganimike gae anzing yaning,
PSA 52:7 Kanong! Aminu aapa Anututa gatangamuke tapan kekekawikge dua natapbut. Ita baniu kekeknga siknga sangaapana buyambamdekan natapbut. Gatu, waiaknga nata tasike take apme yuwit, ngang natapbut.
PSA 52:8 Siwan ngana na unzing dua. Na Anututane you buyambam gwene katau dakatu oliv ngang yanikaingu nakanu buyambam siknga kayuk yuakga binga yuat. Na baniu Anututa musip kwikwiu asinggan asinggan natangamunggak gekan asinggan asinggan natake yuwit.
PSA 52:9 Anutu, gata na gatangamukuyakge nata gae umanda kopsa akngae asinggan ganimbakngawit. Siwan gikane amindabamdane kaine nata umanda yatangenake anzing yawit, “Anututa sanga take siknga aknga nae tasingamunggak,” ngang yawit.
PSA 53:1 Katum aminda inae anzing yakaing, Anutu wena. Dua yuak ngang yakaing. Aminu waakwau wa wai siknga. Ita tasikaingu waiakngakan tasikaing. Iat nana tapatuta take takngatu dua tasinggak.
PSA 53:2 Anutu yekaune yuke pakepusa amin ninduyuak. Ita wa tasinggau aminu kundu natdeu noman taknga tawake Anutue natdet paningge tasinggak.
PSA 53:3 Siwan ngana wena. Aminu kuupbam kepi noman taknga gwa teking. Kuupbam ina unzakan, aminu wai siknga akwak. Iat nana tapatuta nomanu takngatu dua tasinggak. Wena siknga.
PSA 53:4 Anututa anzing yanggak, “Aminu waiaknga tasikaingu asikaya natdetdetna wena ba? Waaminda natane aminabamu poyak binga napan puyukaing. Tasike nae tumuk wamu dua nanikaing.
PSA 53:5 Siwan ngana waaminda kumzang siknga gwauking. Sike tupa unzingu dua gwauking. Wena siknga. Siwan ngana gautnanga tapatu wena.” Dasingge, Anututa waaminde natapan wai siknga sikut. Siwan ita gindane iwanza waakwau kuupbam siknga zipan puyuwan kwate awesike kaukaut mupewan kuking. Ita wai aminu gwa usanzikutde waaminu asiknga pasiwan maiking.
PSA 53:6 Sike nata take siknga nataau, Anututa Saion nana tapatu iniwan apu ninu Isrel nana gatu papikge nataat. Sike tapduknga Anututa gatayaman take yutning gwene Jakopdane donga apbaknganong. Ngan, Isrel nana aminda musip gwaang natapnong.
PSA 54:1 Anutu, gikane kekeknga aknganeta na wai amindane katakngine sandeke gatuka tapso. Gikane kekekngaka buyambam taknganeta tasiwi iwanata nandupa take siyok.
PSA 54:2 Anutu, gata natane tumuk wamna natapiakge nataat. Nata wamu yawitde maak gwaang papso.
PSA 54:3 Aminu yamandet sikaingga apu na nutnangge tasikaing. Aminu waakwakga nuwa kupitde tasikaing. Aminu waakwakga kawanu Anutu sanga yumdekanu tapatu binga singgak.
PSA 54:4 Siwan ngana Anututa ina siknga na gatangamunggak. Siakande siknga. Na Buyambam tapata kakuya tasiwawan na take yuat.
PSA 54:5 Nata take aminu waakwau nanisapdukaingga kaawa sanga waiaknga tasiking kakngata panggaganuwikge nataat. Anutu, gata na dua napmake iwana gata wenagom pasiyo.
PSA 54:6 Buyambam tapa, nata sanga ofa ngang yaya gae gamunangge siknga nataat. Gatane umanda take siknga. Unzingge nata umanda yatangenawit.
PSA 54:7 Ita na gatangamuke meya nae apbingga na dua tasiwan maikum. Sike nata kawawa natane iwana yapbiban kakum.
PSA 55:1 Anutu, gata natane tumuk wamae natapso. Nata gae sikgawamba maakga nae ma umukngamim.
PSA 55:2 Asiknga gata tumuk wama natangamuyo. Natangamuke yake naniyo.
PSA 55:3 Natane iwanata na tasiwan maiwitde wamu kekeknga yakaing. Yake waaminda kumzang nanduyake dua tewan nanduyuaing. Unzingge musipmaatangu natapa take dua singgak. Na musipmaiu atnataat. Dasingge, waaminda musiptou nae kwaapzang natangamuke kaanga nanikaing. Meya akngata na tasiwan gatukande mainanggenggat.
PSA 55:4 Na meya wesim akupitde waakwakge asiknga gwaukgat. Siwan waakngata tasiwan musipmaatangu meya nataat.
PSA 55:5 Ngan, na asiknga gwaumba gupmaapa kumzang tepan yamukgak. Gwaut takngata na atnaitakepunggak.
PSA 55:6 Ayok! Nata anzing yakum, “Butaya, na piana kwaitdane binga kaa gamun. Manggamu bepmake kuke paku keu komdune yuwa takawan.
PSA 55:7 Nata bepmake maa siknga paku amina wena komune gatukande yuwam.
PSA 55:8 Nata zaatgaman bepmake kuke gotde gatu sopaatde ngang gwauke kusopuwan.”
PSA 55:9 Nata kaawa aminu yumdekan yot gapmaatang amakaing. Unzingge Buyambam tapa, gata wamu yaningu pasiwi buyami siwan pasiwi sopunong.
PSA 55:10 Sike kwakngaom ba zikaane supda temake tasibasiking gapmane engatangan sukukaing. Gatu you wanggapmane nanata gutonga ba waiaknga tasikaingunin.
PSA 55:11 Sike you wanggapma atangganu aminu kunduta kuku aminkat gatu sangaapanaat ngang yumdekan pasiwan maikaing. Sike gatu kepi banakan yuaingune ba paut tasikaing komune waamindakan notnaapa yanisapduke sanga wai tasiyamunangge natake yakaing.
PSA 55:12 Sike iwanata wamu waiaknga apba naniwik. Undanga, na meya take gwaamumbit. Sike iwanata enake na apba tasiwan maiwitde yawik. Undanga, na kusopuwa meya waaknga nae dua apik.
PSA 55:13 Siwan ngana iwana wena. Gakan. Nata gandupa notna siknga singgak. Siwan ngana tapitekngwamban iwana dakngake wai waaknga tasingamunggayak.
PSA 55:14 Tupa niu unekan sukuke wamu yanggatake sukukumak. Sukuyuuk aminu kunduat Anutue yot gwenu kwaimune sukukumak.
PSA 55:15 Gata katewi kungwak kakngae dua nataaing ngana waakngata iwana apu papsok. Papan ninu kayuk take yuamang ngang yakaing ngana nata nataau gapmaatang gwa kupsa aminda yuaing katang pukuningge nataat. Dasingge, aminu waakwakga yotnaatang yuke waiaknga kundu pasikaing.
PSA 55:16 Sike na Anutu yatawamba ita gatangamunggak. Siwana ita na gatu tanggak.
PSA 55:17 Sike tembana gatu kepmaom gatu zikaane kuut, meyata tasiwan mainggatde sitawanggat. Siwan ita nae tumuu atnataak.
PSA 55:18 Aminbamda nae amak tasikaing. Siwan ngana na meya dua kaat. Dasingge, Anututa nanduyuke na gatuna nanitakapunggak.
PSA 55:19 Anutu tupa siknga king kapa binga yukut. Ge apman kaya ina unzakan king kapa ayuak. Sike ita nae tumuk wama natake ita gakngau iwanata amak gwekatang tasikaing kaknga natake ayapbimbik. Waakwau ie dua gwaukaing. Dua gwauke musia dua tapatekngamban kepi wai tawakaingu dua siknga tening.
PSA 55:20 Natane notna siknga amau inane notna akwakat amakaing. Sike wamu minaka tasinangge tupa waakwakat yawan kekekakuu, ina gwa zipbukut.
PSA 55:21 Sike genanetanu wamu kaa siknga yanggak. Siwan ngana baniatangu amak tasinangge nataak. Wamu yanggakga tasiwan ninu musip kwikwik yuamang. Siwan ngana wamna toknga siknga bainat dakatane genaaknga binga, ninu ita nisipmanggak.
PSA 55:22 Siwan ngana gata meya gwaamumbiyau, wa gata Buyambam tapatane katakngine peyo. Pewi ita gwaamuke ga tapan kekekaya. Sike ita dua kapewan sanga takngatuta noman aminu pasiwan maining.
PSA 55:23 Siwan ngana Anutu, ga amin wai tasikaing aminu kaipakepi gapma gupna bukataning gapmane pukunong. Aminu amin zipnangge tasikaing amikat gatu aminu tanzit tasikaing amikatda tapduknga wena dua siawan ngana waakwau akumning. Siwan ngana ninan, gae baniu kekeknga asinggan siwit.
PSA 56:1 Anutu, aminda na nawake nutnangge tasikaing. Asingganu iwanata nainggamukaing. Sanga wa tasingamukaingu kake gata musip kwikwik natangamuyo.
PSA 56:2 Sike tembanata kuku bangae siknga, iwanata sapdut wam nanisapduke nawakaing. Aminbamu inae umana yatangenake nutnangge tasikaing.
PSA 56:3 Siwan ngana Anutu enane siknga yuak kapa, tapduu gwendune nata sanga tapatue gwaukengu gae baniu kekeknga siwit.
PSA 56:4 Na Anutue banip singgat. Ie banip sike itane siakan wam takngae take siknga natake natanggamatanggat. Na Anutue banip singgatde aminda nae mina binga takngatu tasiwa maiwit takngae dua gwaumbit.
PSA 56:5 Sangabamu nata atasinangge yawa natake iwanata wamu waaknga tapatekngwamban inata siknga singgak. Asingganu kepi zaaknga tawake tasina maiwik, ngang nataaing.
PSA 56:6 Natake waaminu unekan yuke akusopuke yuaing. Kepi nata sukunggau katak siknga kakenga na nutapan kupitde tasikaing.
PSA 56:7 Anutu, nae waiaknga tasikaingge gata yake meya buyambam yamuyo. Gata musiptok natayamuke waaminu ayapbike yaipakepso.
PSA 56:8 Meya gwaamuke nata musipmaik nataau, ga atnatapinaa kwanamu sike yuat. Unzingge gata waakngae atnatanggamatayuuk, gikane buk gopatangu gwa matakuyak.
PSA 56:9 Anutu, nata gae tumuk wam yawanu gata tasiwi iwanata masa namuke datakuning. Datakuwa kake gata gatangamunangge tasinggaak ngang natapit.
PSA 56:10 Na Anututane wamna asiknga baknganggat. Ngan, Buyambam tapatane wamna yatangenanggat.
PSA 56:11 Na Anutue banip sike ita wamu yawan kekekakut takngae natanggamatanggat. Unzingge sanga tapatue dua gwaumbit. Dua gwaumba aminda nae mina binga takngatu tasiwa maiwit? Wena.
PSA 56:12 Anutu, nata sanga tupa tasinangge yawa kekekakut taknga nata atasiwit. Unzingge nata gae gaak siknga ganike ofa takngatu gaak wamma saak natake tasiwit.
PSA 56:13 Anutu, gata na gwa takuyakge na dua kumbum. Gata gatangami iwanata dua naitakepbing. Unzing Anutu, nata gaat asinggan gatake sukukamak. Siwan kakaa akngakata gatangaman kayuk yutnanga akngane sukuwit.
PSA 57:1 Anutu, gata musip kwikwik natangamuyo. Nata gae kuwa gata na nanduyuwiakge nataat. Na gaat yuke na take yuwit. Unzing taak matekga mingatane piatang kusopuke amaakatang take yuaing binga. Na unzing binga sike yuwawa sanga na tasiwan mainanga wena sining.
PSA 57:2 Na Anutu enane siknga yuak kapae yatawamba gatangamikge yanggat. Ita musiaatang nae natake tasingamik kaknga atasiwik kapanin.
PSA 57:3 Ita yekaune yuke natane tumuk wamma natake na gatuna tapik. Siwan ita na tasiwan maiwitde nawakainingu ita kaanga siknga yaniwik. Anututa na take siknga natangamuke asinggan na dua napmanggak. Wena siknga.
PSA 57:4 Na aminu kundu kaap zongu laion ngang yanikaingge banakan binga pekgat. Sike waaminda amin yasinangge tandakngakaing. Sike waaminda gena paanga siknga, unzing gwawaya ba sakut binga. Sike yembina bainatdane gena toknga aknga kaamang binga.
PSA 57:5 Anutu, nata take aminu gatane umanda kopsa siknga aknga asiknga yatangenatningge nataat. Gatane kekekngaka kepna kepna yuaingge aanggaman yeuyami gae natapa ga tupantapa siwan enane siknga yuak ngang natapning.
PSA 57:6 Sike iwanata na tanggaganuwikge yapapna peking. Unzingge meya buyambamda na asiknga tasiwan maikum. Nata kepi kunggaune gapma kwaiking, nata undang pukuke kupitde. Siwan ngana na dua pukukum. Aho. Gapma wa daka dakaatangu ina pukuke kumbing.
PSA 57:7 Anutu, natane musipmaatangu gae baniu nata kekeknga singgat. Ngan, nata baniu kuupbam gaekan singgat. Siwan nata gae kap taike umanda yatangenawit.
PSA 57:8 Na dapunu pekgau ateke enawit. Enake nata gwamemingu gitaat gatu kuleleat zipit. Gakngau waaknga tasiwawa kawakawik.
PSA 57:9 Buyambam tapa, nata gaak wamu ganiwiu dongu kundue banakan yuke ganiwit. Nata aminu kuupbamu kepna kepna yuaingge kuke umanda yatangenawit.
PSA 57:10 Sike gata nindenu take siknga nataayak kaknga buyambam siknga. Ninde musip kwikwik wa nataayak kaknga tuwanguke kananu mamayana yekaunekan siwik. Asingganu gata wamba takeakngakan tawanggaak. Sike ninde tapdukbamu takeaknga tasinggaakge kendetnanu mamayana minga musa ena kakaa komune yuaunekan siwik.
PSA 57:11 Anutu, nata take gatane umanda aminbamda enane siknga yatangenatningge nataat. Gatu gatane kekeknga akngaka kuut aminu kepna kepna yuaingge aanggaman yeuyamuyo. Yeuyami gatane umanda akngaenu natapan kopsa siwik.
PSA 58:1 Ginu gwapakngi amin, ginu wam yak gwene wamu noman takngakan yakaingunin ba? Asikaya ginu aminbamdane wamu katak siknga usanzikaing? Wena siknga.
PSA 58:2 Natdetdet zaatangu waiakngakan tasinangge natapan kekekanggak. Siwan ginda aminu kepna kepna yuaing amin kuupbam zipa maikaing.
PSA 58:3 Sike wai aminda kepi sukukaingu kuupbam kepi take aknga ateke sukukaing. Sike tapduu engangu kayuk aakaing komuneta apu apmanu kweknga sike yuaingu, waiaknga tasike kem wamban yakaing.
PSA 58:4 Wamu yakaingu unzing gomokgane genaatang marasinu waiaknga yuak binga. Sike waakwakga maakngi atzaangukaing. Unzing gomokga maakngi kusiwan wamu dua nataaing binga.
PSA 58:5 Gomou waaknga natdetdeu toikngatane wamu dua nataak. Unzing gakngat taknga tasiwan gomou kunduta natake enake taiwikgen. Sike natdetdet amin tapata benggo noman siknga apuyapan ngana, gomou waapa wamna dua natapik.
PSA 58:6 Anutu, gata wai aminu waakwau pasiwi mainong. Buyambam tapa, waaminda kaap zongu laionda amak tasikaing binga tasikaing. Unzingge gena zipmanzike kuupbam gatukande ukgwiyamuyo.
PSA 58:7 Waaminu yanggata zipmake kusika kep ganang pukuke sopunggak binga sopunong. Waaminu kweemna katakga pake sakut kaike mutningu sakutna tundunga siyok.
PSA 58:8 Sike gatu waaminu gapanda kepdakane kungwake kapanga sike sopukaing binga kuut sinong. Gatu engangga mingae musiaatang kungwakaing binga kuut sinong. Masande mingata tangaiwanu gunzit gwenu dua kawik.
PSA 58:9 Zaatgaman Anututa waaminu apasiwan maining. Unzing aminda katap matek dakandaka pasiwan pimakaing binga. Waaminu kayuk yuwawan Anututa musiptok natake sambasamba binga mumba kuning.
PSA 58:10 Sike amin nomanda wai aminu Anututa pasiwan maiwan kakengu apbaknganing. Siwana noman aminda wai amindane dak kakngane kepina sautning.
PSA 58:11 Siwana aminu kunduta gatu anzing yaning, Siakande siknga, Anututa take aminde buyana nomana siknga yamunggak. Siakan siknga, Anutu ayuak. Sike ita aminbamu wam yaning komune asusanzikgak ngang yaning.
PSA 59:1 Natane Anutuna, gata na iwanae kataune sandeke gatuka tapso. Gata na kakuya tasiwi waaminda na dua tasiwan maiwit.
PSA 59:2 Gata na waiaknga tasikaing amindane katakngane sandeyo. Sandeke tapi nutnangge nataaing aminda dua nuwan kupit.
PSA 59:3 Buyambam tapa, kayo. Waakwakga na nuwan kupitde kusopukaing. Nata sanga takngatu waaminde dua siknga tasikum. Siwan ngana wai aminu kitatoknga waakwau amak tasike nutnangge unekan yuaing.
PSA 59:4 Buyambam tapa, na gutonga takngatu dua tasiyamukum. Siwan ngana waaminu zeetgaman kuke na nutnangge tandakngakaing. Nutnangge tandakngawa kake gata enake gatangamuyo.
PSA 59:5 Buyambam tapa, ga Anutu kekekngaka bamban. Ga Isrel amindane Anutuna. Gata aminu gae masa gamukaingu zeetgaman apuke meya aminu dongu wa kuupbamde yake yamuyo. Yamuke waaminde butaya ma natayamim.
PSA 59:6 Sike zikaane waaminda yotbam gapmane apuke daman gwen kumbasiyuuk, kamunda binga ainggamatakaing.
PSA 59:7 Natapso. Waamindane wamna wai siknga siwan genaneta suyapbikaing. Unzing bainat taknga gena toknga aknga suyapbikaing binga. Siwan ngana anzing yakaing, “Maminda ninda yanimu natapning?”
PSA 59:8 Siwan ngana Buyambam tapa, gata waaminde asiknga ayanimikgayak. Gata sapdut wamu aminu wa kuupbam kepna kepna yuaingunin yaninggaak.
PSA 59:9 Gatakan na tapi kekekaawan kakuya gatu tasinggaak kapanin. Anutu, nata iwanae gwauke gae apuke gatane gepbiatang koke yukgamuke kusopuwit.
PSA 59:10 Sike gata nae take siknga nataayak kapanin. Anututa nae tupan kuwawan nata apmea kuwawa ita gatangamik. Gatangaman na aminu nanisapdukaingu ayapbimbit.
PSA 59:11 Buyambam tapa, ga nin ninduyuayak kapanin. Gata waamin ma zipi kumnong. Dasingge? Zipi kupanu natane aminabamda sanga waakngae botaning. Gikane kekeknga aknganetakan iwaninu yanikwasiwi unda undang kuwa pasiwi mainong.
PSA 59:12 Asingganu genata wamu wai yake waiaknga tasinangge yakaingunin. Undanga, kapewi yamandeu sike gatane umandaenu asapduke kemu asinggan yakaingge meya panong.
PSA 59:13 Unzingge gata musiptok natake atzipso. Gata wai aminu waakwau pasiwi wena siknga sinong. Gata unzing tasiwi Anutu Jekopdane donga kayuak kapanin ngang aminu kepna kepna yuaingga natapning.
PSA 59:14 Sike zikaanen, waaminda yotbam gapmane asaapuke kamunda binga aiyuuk kumbasikaing.
PSA 59:15 Sike wa kungapuke tasikaingu nanamde yawakaing. Yawake musipna dua gitnawanu kumzang siknga ainggamatakaing.
PSA 59:16 Siwan ngana natanu gatane kekeknga akngakae kau taiwit. Ngan, tembana tapduu kuupbam nata kau kapzang taike nae asinggan natanggamatanggayakge natake taiwit. Dasingge, tupa meya takngatu takngatu nae apbing. Siwan ngana gata kakuya katak siknga tasike gata nae damangwen binga dakngawi yuat.
PSA 59:17 Anutu, gakan, ga natane kekekngaapana. Nata kap takngatu taike umanda yatangenawitde nataat. Anutu, gata nae take siknga nataayak. Sike ga natane damanu kekeknga gwenu unin.
PSA 60:1 Anutu, gata ninu atnipmakuyak. Nipmambi ninda amau tasike dua yapbikumang. Gata ninde kaanga kaa siwan unzingu tasikuyak. Siwan ngana apmanu gatuka apuke ninu gatanimi take yutnim.
PSA 60:2 Gata tasiwi nindane keu andaka miamun sikut. Siwan kepda puwan ganangi buyambam sikut. Apmanu keu anggwenu wai kuupbam asinangge saasaa singgak. Unzingge gatuka tapi nomatayok.
PSA 60:3 Gata gikane amindabamde meya kwaapzangu gwa nimukuyak. Unzing gata wain yangga aknga binga nimuke tasiwi tangopbumang. Tangopna puyuwana ninu katum siknga dakngakumang.
PSA 60:4 Siwan ngana gata tauu plek sandu tangenayo. Siwan aminu gae gepbiatang yuaingga iwana kagwauke datakuke tauu wasane kuke take yutning.
PSA 60:5 Gatanu ninde take siknga nataayak. Natake gikane kekeknga buyambam taknganeta gatanimuke ninu gatuka papso. Siwana ninu take yutnim.
PSA 60:6 Sike Anututa yotnane yuke anzing yakut, “Nata amak tasike gwa yapbikum. Unzingge nata apbakngake Sekem kep kopat gatu Sukot kep kopat ngang inikaing komu amunane yuak kopat usanzike aminabamde yamit,” ngang yakut.
PSA 60:7 “Gileat kep kopat gatu Manase kep kopat wa natane, sike Efraim kep komde natapa natane kapa kupma binga singgak. Siwan Juda kep komu kinggane gusoknga binga ngang nataat.
PSA 60:8 Sike Moap kep komu nata dopangbamu yanggane saukgat gwen binga ngang nataat. Siwan Idom kep komu natane kep kom dakngawikge natake kepi tauknga keu waomune mumba kunggak. Siwana nata amak tasike Filistia aminu yapbimbit. Yapbike keu waomde apbakngake asainggamatawit.”
PSA 60:9 Anutu, na maminda you kekeknga damanda tasibasia gapmane nanitake kuwik? Ngan, maminda Idom kep waomune nanitake kuwik?
PSA 60:10 Anutu, gata ninde masa gwa nimukuyak ba dasing? Gata nindane amak aminu dua gatayamuya ba dasing?
PSA 60:11 Ngan, gata nin gatanimi ninda iwaninde amnim. Dasingge, aminda gatak gatak tasining kaknga wa sanga moo.
PSA 60:12 Sike Anututa akgatanimanu amak tasike iwaninu ninda ayapbitnim. Ita ina nindane iwaninu ayaipakepik.
PSA 61:1 Anutu, nata gae yanggawamba natapso. Natane tumuk wamae maak gwaang papso.
PSA 61:2 Na yotna teke maa siknga kuyuke gata gatangamiakge yanggawanggat. Yanggawa musipmaatangu meya siknga nataat. Unzingge gata nanitake sup buyambam siknga kusopuknga komdune napmambi iwanata na dua tasiwan maiwit.
PSA 61:3 Dasingge, ga natane damanu kekeknga gwenunin. Unzingge iwanata na dua tasiwan maiwit.
PSA 61:4 Na gatane yotda gwene yusika kupitde take siknga nataat. Ngan, nata gae gepbiatang kusopunangge nataat. Unzing taakgane matekngata mingatane pia amaakatang koke take siknga yuaing binga.
PSA 61:5 Anutu, nata sanga kuupbamde gae kaikane yawa kekekakingu wa gata gwa natapbuyak. Sanga gata aminu gae gwaukaing aminde yamunangge natake yawi kekekakut kaknga nae gwa namukuyak.
PSA 61:6 Gata na king kapa nandutewi nakanu kwaapzang kayuu yuwit. Gika nandutewi keu andakane mamaya yuwit.
PSA 61:7 Anutu, gatu na nandutewi na king kapa kaikane mamaya asinggan yuwit. Gata ne take siknga natangamunggayak. Unzingge asinggan katak nanduyuyo.
PSA 61:8 Sike gata unzing tasiwinu tapdukbamu nata tupa wamu kundu yawa kekekakingu atawambit. Atawake nata kap taike umanda asinggan asinggan yatangenawit.
PSA 62:1 Na baniu kekeknga Anutu waapaekan singgat. Sike waapatakan na gatuna tapan na kayuu yuat.
PSA 62:2 Waapatakan na kuyana yuke gatangamunggak. Ngan, ita natane damanu kekeknga gwenu unin. Unzingge na amau tasike ngana dua pimambit. Wena siknga.
PSA 62:3 Tapduu datdasing binga amau gikat naat amake tasiwan maiwit? Sike ginda nataaingu na damanu gwenduta binga puke pimake gatukande waitdotdongukgak binga siwit.
PSA 62:4 Na umana kopsaapa, siwan ngana natane umana kopsa waaknga atasiwan maiwikge tasikaing. Ginu kem wamde take siknga nataaing. Ginda wamu geyangga yake takeaknga Anututa nae take tasiwikge yakapmakaing. Siwan ngana musip zaatangu ginda anzing yakaing, “Ninda nataamangu Anututa asiknga tasiwan maiwik,” ngang yakaing.
PSA 62:5 Na Anutu awiapaekan baniu kekeknga singgat. Gatu itakan gatangamikge kayuat.
PSA 62:6 Sike waapatakan na kuyana yuke gatangamunggak. Ngan, waapa natane damanu kekekngaapa unin. Unzingge na amau atasike ngana dua pimapit. Wena siknga.
PSA 62:7 Gatu Anutu waapatakan na gatuna take umana kopsa aknga namunggak. Natane kuyana kekeknga sikngaapa unin. Sike Anutu natane damanu kekeknga gwenu unin, ge iwanata na dua tasiwan maiwit.
PSA 62:8 Ginu natane donga, Anutue baniu asinggan sinong. Ginda meya kuupbam musipzaatang pakaing ba natdetdetzaatang nataaingu iekan yakapnong. Dasingge, ninda iekan kuke take yutnim.
PSA 62:9 Sike aminu moo amin genaneta waung kaknga moo siknga puyapna kunggak binga. Gatu aminu kundu umana kaya ngana sanga moo yuaing binga. Sike waakwau sanga meyana wena apa binga. Siwan ngana geninde waung kaknga meyana kaya.
PSA 62:10 Ginda anzingu ma natapam. Tanziu tasike amindane sanga papsa gatu sanga kukae papsa akngaat take ngang natake ninu sanganin bamban, ngangu natapnanga dua. Sike moning zaat gatu sangasaat kwaapzang siwanu, musipzaatangu sanga nindane kekeknganinu unin ngangu ma natapam.
PSA 62:11 Asingganu nata nataawa Anututa wamu takngatu yakut. Ngan. Wamu takngaya anzing yawan natapbum. “Na Anutu, na kekekngana bamban tapa,” ngang yakut.
PSA 62:12 Gatu anzing yakut, “Asingganu nata aminu kuupbamde take siknga nataat.” Unzingge, Buyambam tapa, gata buya ninu amindabamde nimunggau yuyuk yuamang kaknga kake nimunggayak.
PSA 63:1 Anutu, ga natane Anutuna. Nata ga gandupnangge kekeknga tasike gawanggat. Siwan naat gaat yutzimnde take siknga nataat. Ngan, naat gaat unekan gatake yutnangge natapa kekeknga siknga singgak. Sike wa unzing aminu keu wawaa yanggana wena komune yuke ita guyaknga kupiakgak binga.
PSA 63:2 Nata ga yotdane koke gandupa gata kekekngaka buyambam takngakayat gatu umanda kopsa yuayak kaknga ngang yeikngami kakum.
PSA 63:3 Kepdakane kayuk yutnanga aknga take ngana gatane musip kwikwik kakngaka gwaam siknga. Unzingge nata gatane umanda yatangenawit.
PSA 63:4 Siwan nata ga ganimbakngake gatane umanda yatangenake yusika nata akupit. Sike nata ninane kataknga tangenake gae ganimbakngake tumuk wamu ganiwit.
PSA 63:5 Siwan nata natapa take siknga siwik. Unzing aminda nanamu take siknga napik binga. Siwan ita napan atgitnawik. Sike nata apbakngake gatane umanda yatangenake kap taiwit.
PSA 63:6 Siwan tapduu nata dapuna pekgat komune gae atnatanggamatanggat. Sike zikaane kuut gaekan natanggamatanggat.
PSA 63:7 Dasingge, gata na asinggan gatangamunggayak. Na gae wesim yuwau wa unzing, taak matekga mingae piyaatang kopa usikwatanggak binga. Siwan nata gae gepbiatang yuke kau apbakngananga tainggat.
PSA 63:8 Na gaat unekan gatake unekan sukukamak. Ngan, na gaat sukuke gatane kekeknga akngakata na kakuya take siknga tasinggayak.
PSA 63:9 Siwan aminda na nutapa kupitde tasikaingu pimake apmaining. Ge waaminda akupsa aminde kep komune kuning.
PSA 63:10 Sike waaminu amak tasike akumning. Siwan kamun zongga gupna apu atnaning.
PSA 63:11 Sike na king kapa. Nata Anutue apbakngawit. Siwan aminu Anututane umande yawan kekekawan ie tawanangge nataaingu waaminda asiknga inimbaknganing. Siwan ngana Anututa aminu kem wam yakainggane gena asumumban kumakan yutning.
PSA 64:1 Anutu, na meyana buyambam. Gata natane tumuk wamae maak papso. Na iwanae akgwaukgat. Gata gatangami iwanata na dua nuwan kupit.
PSA 64:2 Wai aminda na tasiwan maiwitde kepie tawakaing. Tawake unekan yuke nutnangge natake wamu yakaing. Unzingge gata kakuya tasiwi wai aminda na dua tasiwan maiwit.
PSA 64:3 Waamindane gena bainatdane gena toknga siknga dakata binga nukgak. Siwan wamu waiaknga yakaingu nae temanggaganukaing. Unzing kweemna kaike gatu sakutna amin yamnangge kaikaing binga.
PSA 64:4 Waakwau undang kusopuke sakutna noman amindekan mukaing. Sike waakwau dua gwauke zeetgaman mukaing.
PSA 64:5 Sike wai aminu waakwau inae natapa kekekawan wai waaknga atasinangge nataaing. Sike wamu yakaingu keu komduatang yapapna pewan aminu kundu panggaganutningge nataaing. Siwan gatu anzing nataaing, Yapapminu kusopuknga siknga. Aminu tapatuta yapapminu kananga dua, ngang nataaing.
PSA 64:6 Siwan gatu waaminu waiaknga kunduat tasinangge wamu yandekaing. Yandeke anzing yakaing, “Ninu sanga takngatu tasinangge kepi takeakanga gwa natapna kekekakut,” ngang yakaing. Sike, “Sanga wa tasinangge natapbumangu aminu tapatuta dua kakapik,” ngang yakaing. Siakan siknga, aminde natdetdetnane ba musiane yuwik kaknga kakapnanga dua. Siwan waaminda waiaknga tasiningge kepi aknga aknga katak siknga nataaing.
PSA 64:7 Siwan ngana Anututanu, sakutnata yapik. Yapan zeetgaman mait sike kumning.
PSA 64:8 Gatu aminu tapatu tasiwan maiwikge yawan natakengu Anututa yake tasiwan wamu wa yakaing kakngata waamin yapan maining. Siwan aminda kake kumzang yanimike gwapaknga makaitning.
PSA 64:9 Sike aminbamda kake Anutue akgwautning. Siwana Anututa sanga wa tasikutde natdetdetnane asinggan natayuke yanikapning.
PSA 64:10 Sike noman aminu kuupbamda Buyambam tapae apbaknganong. Bakngake ie kuke waiakngae iatang koke kusopunong. Iat yuke noman aminu Buyambam tapatane umana yatangenatnong.
PSA 65:1 Anutu, ninu Saion yot gapmane yuke umanda ninda yatangenatnim. Siwana ninda sanga tupa yana kekekakuu kuupbam tasinim.
PSA 65:2 Gata nindane tumuk wamin atnataayak kapanin, ninu aminu kuupbam gae asiknga kunim.
PSA 65:3 Gutonga ninda tasikamangu kumzang siknga niipakepbing. Siwan ngana gata gutonga nindane asandetnimuya.
PSA 65:4 Sike aminu gika yawi yuwan yotdane pake konggayau, waaminu apbaknganing. Gikane yotda wagwekatangu sanga nomana kwaapzang yuaing. Sanga kwaapzangu kake ie musip gwaang siknga natake yuamang.
PSA 65:5 Anutu, gata gika siknga ninu gatu papi ninu take siknga yuamang. Gata tumuk waminde maak panggayak. Natake puya nin panangge tasikuyak kakngae natake asatnakamang. Sike aminu maa maa kepna kepna yuaingu, gae baniu kekeknga sikaing. Sike yanggabamu kaukaut yuaingga gae baniu kekeknga sikaing.
PSA 65:6 Gikane kekeknga aknganeta tasiwi tawan dakandaka enake tangine yuking. Gatane kekekngaka buyambam siknga.
PSA 65:7 Gatu gatakan yanggabam gwenu tasiwi kuma yuak. Ngan, sambui enake tanguwan tapmanggau tasiwi kuma yuak. Ngan, aminda amak ba tasikaing kaya tasiwi wena asinggak.
PSA 65:8 Gata sanga waakwak tasiwi kake aminbamu maa maa yuaing aminda gae akgwaukaing. Sike gunzitda akonggauneta kuku gunzitda pukunggaune yuaingga sanga kuupbamu gata tasinggayaunin kake yanggamatake gae apbakngakaing.
PSA 65:9 Gata kepdaka daka katak siknga kayuke sopa kepi waakngane pewi epukaing. Siwan kepdaka tasiwi kayana kwaapzang siwan nanam zakga take siknga enakaing. Anutu, gata yangga kuupbam kepna kepna pekuyau dua zakngakaing. Yangga wanda pasiwan nanamu kwaapzang aawan aminbamda pake nakaing. Sike puya waaknga gata gika tasikuyaunin.
PSA 65:10 Gata sopa nindane puyanine kwaapzang pewi pimakaing. Pimake kepatang pukukaing. Sopa yanggata kepdaka tanguwan wikawan nanamu take enakaing.
PSA 65:11 Gata ninde take tasinimuke tasiwi nanamu kwaapzang aakaing. Gata keu komduine kukengu waomune nanamu kwaapzang aakainga kaya.
PSA 65:12 Sike keu komdu kepban sangana wena, moo siknga yukut. Siwan ngana apmanu ikwawa gaman ba sipsip gwegwenu zongazonga keu waomune kwaapzang akokaing kom kake undang doke yuaing. Sike gatu puya kwaapzangu tawan dakandakaatang yuaingu kake apbakngakaing.
PSA 65:13 Sike sipsiu kwaapzang sikngata zongazonga kwaapzang ngang kaya komune doke yuaing. Sike gatu wit ngang yanikaingu gapmene ba tawan dakandakae banakan katang akoke doke yuaing. Siwan sanga wa kuupbamda apbakngakaing.
PSA 66:1 Ginu kuupbam kepna kepna yuaingga apbakngake apaa siknga yake Anututane umana yatangenatnong.
PSA 66:2 Sike kap taike itane umana kopsa akngae yakapnong. Itane umana kopsa aknga enane siknga yatangenatnong.
PSA 66:3 Anutu anzing ininong, “Sanga kuupbam gata pasinggaunin kake ie kumzang gwaukamang. Gatane kekekngaka buyambam siknga. Unzingge gatane iwanda asiknga gwauke gae kaikane munu pukaing.
PSA 66:4 Aminu kepna kepna yuaingga gae munu pukaing. Puke gae kap taike gatane umanda yatangenakaing.”
PSA 66:5 Ginda apuke sanga Anututa pasikuu kanong. Apuke sanga buyambam taknga aknga aminde tasiyamukuu kana inata siknga singgak.
PSA 66:6 Ita tasiwan yanggabam gwenu atzakngawan kep dakakan sikut. Siwan nindane bapuninu yangga ganzik binga waapane kuking. Unzingge ninda sanga wa tasikut takngae natake baknganim.
PSA 66:7 Sike i kekekngana buyambam, siwan ita king kapa siwan aminbamu asinggan asinggan kayuak. Unzing aminu kunduta Anutue yamandet sinang ngangge.
PSA 66:8 Ginu dongu kuupbam, ginu Anutunindane umana asiknga yatangenatnong. Ginda Anututane umana yatangenawan aminbamda natapnong.
PSA 66:9 Dasingge, ita ninduyuwawan ninu kayuu yukumang. Yuwatna ita dua nindupewan kepi saweknga apane pimakumang.
PSA 66:10 Anutu, gata ninu gwa panziwi sikumang. Unzing aminda silwa ngang yanikaingu katap gwene sawa dapandapana wena siwan kwakwaknga inatakan yuwik binga.
PSA 66:11 Gata nindupewi aminda ninu yapapnane gwa panggaganuking. Panggaganuwa gata meya ninde buyambam gwa penimukuyak.
PSA 66:12 Siwan gata nindane iwanin kapewi ita ninu ayainggamuking. Siwan unzing ninu katapatang yaike gatu yangga paptawan ngana yangga waapane yaikumang binga. Siwan ngana apmanu gata nin keu take noman komune gwa pakapbuyak.
PSA 66:13 Sanga wa nata gae apakapit. Ngan, nata kaau kuut yotdane pakapuke gae katapatang kuutgan sawit.
PSA 66:14 Dasingge? Meya nae apan sanga katapatang kuutgan sawa kapanga kaya aknga singgau gae ganimbakngawitde natake gamunangge yawa kekekakut.
PSA 66:15 Sike kaau siuknga buyambam gwegwenu alta dakane sake gae gamit. Siwan gatu sipsiu wawi gwegwen sawa itane kapangana takeaknga gae apan natapsa. Gatu ikwawa gamanu wawi gwegwenkat memeat kuut pake gae gamunangge asawit.
PSA 66:16 Ginu aminu Anutue gwaukaing aminda apuke natane wamu natapnong. Nata sangabamu Anututa pasike akgatangamukutdane wamu daniwa natapnong.
PSA 66:17 Tupa nata ita gatangamukutde yatawakum. Yatawake ie tandakngake kap taike umana yatangenakum.
PSA 66:18 Sike nata waiakngae musipmaatangu sanga moo ngang take siknga natapbum gamu Buyambam tapata natane tumuk wama dua natapan.
PSA 66:19 Siwan ngana Anututa natane wama gwa natapbut. Siakan siknga, ita natane tumuk wama gwa natapbut.
PSA 66:20 Nata Anututane umana yatangenawit. Dasingge, ita tumuk wamae masa dua namukut. Siwan butaya aknga nae natangamukuu dua sandekut.
PSA 67:1 Nata nataau Anututa butaya natanimuke ninde take pasiikge nataat. Ngan, nata nataau pakapu ninduke nin gatanimikge nataat.
PSA 67:2 Unzingge gatane noman takngaka kepna kepna yuaing aminda akakapning. Unzing tasiwi kuupbamda gandukapmake ninu ita apme papik ngang natapning.
PSA 67:3 Anutu, nata nataau aminbamda gae apbakngake umanda yatangenatningge nataat. Ngan, nata nataau aminu kuupbam kepna kepna nana umanda yatangenatningge nataat.
PSA 67:4 Gata aminbamu wam yaning komune noman takngane kuupbam usanzia, sike aminu kepna kepna yuke kepi sukukaingu gata kepi noman takngane panomanukgayak. Unzingge nata nataau aminbamda musip gwaang natake apbakngananga kap tainingge nataat.
PSA 67:5 Anutu, nata nataau aminbamda gae apbakngake umanda yatangenatningge nataat. Ngan, nata nataau aminu kuupbam kepna kepna nana umanda yatangenatningge nataat.
PSA 67:6 Dasingge, nanamu nindane kepmine kwaapzang aawan kakumang. Siwan Anutu, wa nisane Anutunin, ita ninu take pasikut.
PSA 67:7 Siakan siknga, Anututa ninu take pasikut. Take pasiwawan kake aminu kepna kepna yuaingu ie gepbiatang koyutnong.
PSA 68:1 Nata nataau Anututa zaat enake apuke inane iwana yanikwasiwan kuningge nataat. Ngan, nata nataau aminu Anutue iwana dakngakaingu asiknga teke datakunong.
PSA 68:2 Sike nata nataau got takngata apu kupan taknga puyapan kunggak binga Anututa ina unzakan iwana yanikwasiwan kuningge nataat. Gatu kandel ngang yanikaing gomu katapda isiwan akngwikake yangga daknganggak. Ina unzakan, nata nataau wai aminu Anutue kaine ngwiknga unzing siningge nataat.
PSA 68:3 Siwan ngana nata nataau amin nomanu apbakngake Anutue kaine musip gwaang natake yutningge nataat. Natake waaminda asiknga bakngake yutningge nataat.
PSA 68:4 Nin Anutue kap taike umana aknga yatangenatna. Sike i minga musaatang pukwike aminbamu kayuak kapata apikge kepiapana tana nomatawik. Itane umana Buyambam tapa, ge ginda ie kaine apbaknganong.
PSA 68:5 Anutu inane yotna gapmane yuak. Yuke waatdaka nana gwa kupsatane kayuak. Unzing, waamindane nana binga. Gatu itakan maya apna gwa kupsa kuut kayuke gatayamunggak kapanin.
PSA 68:6 Sike gatu aminu inatakan yuaingge donga yaman undang take yutning. Siwan itakan kautde yuaing aminu sandepewan yotna paku take yutning. Siwan ngana yamandet sikaing aminu yaniwan paku keu gunzit toknga siknga yasinggak komune yutning.
PSA 68:7 Anutu, tupa ga tupan kuke gikane amindabamu yanipakapuke keu amina wena komune gaat waaminkat ngang payawawi sukuking.
PSA 68:8 Sike tapduu waomune Sainai tawandakane miamun sikut. Siwan sopabam takut. Dasingge, Anutu, ga gwa apuyak. Siakan siknga, Isrel nanatane Anutuna, ga gwa api sopa wa tawan miamunu wa sikut.
PSA 68:9 Anutu, gata sopa take siknga gikane kepdakakae tasiwi takut. Tasiwi sopa tawan keu wai daka ngana gatu take sikut.
PSA 68:10 Gikane amindabamda yot gapma gapma keu andakane mitapbing. Ga take sikngaapa. Siwan gata nanamu sangana wena aminde yamukuyak.
PSA 68:11 Buyambam tapata aminabamde wamna yaman aminu kwaapzangga wamu waaknga taku yakapbing.
PSA 68:12 Sike wamu waaknga anzing, “King kapaapaat gatu amak aminaat kuupbam gwa datakuking. Siwan maya yotna yukingga sanga wawita amak gwene pakingu usanzike paking.
PSA 68:13 Ginda amak tasinangge natake keu komdu kuke zikaane katap sake undang dapuna petning. Siwan mayata tauknga gitza siknga silwa gatu gol ngang yaniata pasia pasike kawa take siknga kwait danggam binga sikut. Gupnaapa waenga silwa binga siwan pia sayau waenga goldane kaamang binga gupnaapa unzing sikut.”
PSA 68:14 Sike Anutu kekekngana bamban tapata tawanu Solmon ngang inikaing dakane king tapatu tapatu yanikwasiwan kaut kaut datakuking. Unzing sopa zambam ngang yanikaingu tawanu wandakane kaut kaut tasiwan takut.
PSA 68:15 Tawanu Basan kep komune yuaing dakandaka buyambam siknga. Siwan wandakandakane tawa tawanu buyambam siknga.
PSA 68:16 Ginu tawanu Basan kep komune dakandaka tawa tawanu buyambam siknga, ginu dasingge tawanu dakatu Anututa yutnangge yawan yukut dakae sanga moo binga ngangu kake nataaing? Sike Buyambam tapata tawanu wandakane asinggan asinggan yuwik.
PSA 68:17 Buyambam tapata tawanu Sinai daka teke apu inane yotna buyambam gwekatang kopbut. Sike wa apiu amak amina kwaapzang siknga tekwanziu karis ngang yanikaingu kekeknga amakgane gwegwene yuwa yanipakapuke iat gatake kopbing.
PSA 68:18 Anutu, tapduu gata tawanu enane siknga dakane kopbuyak komune gata kaaut aminu dongu buyambam siknga papi iat gatake kuking. Siwan gata yamandet aminu sangana gae moo gamukingu payamukuyak. Pake ga Anutu, Buyambamtapa yuayak kapaninu tawanu waandakane yutnangge natake tasikuyak.
PSA 68:19 Ninda Buyambam tapatane umana yatangenatnim. Tapdukbamu yuamangu ita nindane meyaninu pakotnake panggak. Ngan, Anututa ninu gatuna papan take yutnim.
PSA 68:20 Nisane Anutuninu waapata gatanimuwawan ninu take yuamang. Anutu, Buyambam tapaninu nindane toiknginda, unzing gatanimuke nin papan ninda dua kumnim.
PSA 68:21 Siakan siknga, Anututa iwana gatukande pasiwan maining. Dasingge, waaminu waiaknga asinggan tawake tasikaing.
PSA 68:22 Sike Buyambam tapata anzing yanggak, “Gindane iwanza Basan kep komune pakapu yuaingu unenana dua. Sike apmea gindane iwanza yanipakapit. Sike yanggabam gwekatang ama kutakngine siknga ba yuaingu, wa unzing, keu maa siknga komune datakuke yuaing binga, wa nata apme pakapit.
PSA 68:23 Siwan ginda iwanza kumzang siknga zipmake kepisata daknga yaiyuk kamunzata iwanzatane daknga takekan ingwamuke naning.”
PSA 68:24 Anutu siwan king kapana, gata amau wagwenu tasike yapbike apbakngawi aminbamda kaut kaut yuke ganduwawan gaat amindabampat gatake apukaing. Aminu kunduta ganduwawan gaat amindabampat apu yotdabam patang kokaing.
PSA 68:25 Sike aminu gaat gatake apukaingu kunduta kap taikaingu gae tupan kukaing. Siwan gwamemingu kundumaman pakaingu masan apukaing. Sike gatu maya matekga wakumu mateknga dakandakasimu yamayuuk apukaing.
PSA 68:26 Sike kap taknga anzing taikaing, Ninu Anututane aminabam, ninu unekan gwa yuamangge Anututane umana yatangenatna. Ninu Isrel nana amin, ninda Buyambam tapanindane umana yatangenatna.
PSA 68:27 Sike Benjamindane donga mateknga apaatzimu tupan kukaing. Siwan Judatane tupan amin gatu aminu Juda nana kuut Benjamindane donga pake yawakaing. Siwan tupan aminu Sebulun gatu Naptali tane ngangu masan yawakaing.
PSA 68:28 Anutu, gata kekekngaka ninde yeutnimuyo. Tupa kekeknga waakngakaneta gatanimukuyak.
PSA 68:29 Sike kingga wamu kundu gatane yotdabamu Jerusalem nana gwende natake ga ganimbakngangge sangaapa kundu moo pakapu gamuning.
PSA 68:30 Gata kaap zong gwenu pitam gatang yangga napnapna kaya komune yuak gwenu kaanga iniyo. Ngan, gata aminu wa kau wawi gwegwen ba mateknga gwegwenda binga tasikaing aminu kaanga yaniyo. Kaanga yaniwawina munu gae puke silwa ngang yanikaingu inane pake gamuning. Sike aminu wa amak tangenake tasinangge take siknga nataaing aminu ayanikwasiwi datakunong.
PSA 68:31 Siwan kingu Isip kep komune nanaapata wam yak amin yaniwan Jerusalem kuke gata puya ita tasiwik kakngae natapningge kuning. Siawan Itiopia nanata gae kataknga tangenake tumuk wam ganining.
PSA 68:32 Ginu aminu dongu kundu kundu yuaingu, ginda Anutue kap taike umana yatangenatnong. Ngan, Buyambam tapae umana yatangenake kap tainong.
PSA 68:33 Sike i ena yekaune kepi sukunggak. Yekau wagwenu tupa siknga yukut. Natapnong. Anututa wamu kekeknga yatewan apunggak.
PSA 68:34 Unzingge ginu aminu kepna kepna yuaingga itane kekekngana buyambam takngae yakapnong. Sike i Isrel amindane king tapana. Nindanu itane kekekngana ena yekap gwene tasinggak kaknga ninda akanim.
PSA 68:35 Isrel nanatane Anutuna yotnabamnane yuaunin, ge ninda ie asiknga gwaukamang. Ita aminabamde kekeknga buyambam yamunggak. Anututane umana yatangenatnong.
PSA 69:1 Anutu, na gatangamuyo. Yangga guyaknganekan gwa akok.
PSA 69:2 Na ngwayuk kanzang buyambam gwekatang pukunggat. Sike keu kekeknga wena ge une yaiwa maik. Na yangga gapmaapaatang pukuwa apaptake apu na usikwatapnangge tasinggak.
PSA 69:3 Anutu, nata ganike ganike yuwawa kekekngana wena singgak. Siwan guyakngata akupiawan kaina toknga. Dasingge, nata gatangamiyakge tupa yawa ngana dua gatangami yuwa mainggak.
PSA 69:4 Sike aminda nae yumdekan iwana dakngakaing. Waakwau kwaapzang siknga. Natane gwapak danggama ita gwa yapbiking. Sike iwanata kem yake yapiina wena nutapan kupitde akekekakaing. Na itane sanga tapatu kukae dua pakum, ngana kemu kwaapzang siknga yake temanggaganuke nanikaing. Kem taknga yawan ninane sanga kundu yamukum.
PSA 69:5 Anutu, ga nae gwa natapbuyak. Na gutongaapa. Natane waina gae kaikane kusopuknga dua yuaing.
PSA 69:6 Buyambam tapa, ga Anutu kekekngaka bamban tapa, gata dua nandutewi nata wai kundu tasiwa gae banip sikaingga maaknga natapning. Ninu Isrel nana amindane Anutunin, gata dua nandutewi sanga kundu pasiwa munu gae pukaing aminde kunduta yanisapdutning.
PSA 69:7 Nata ga gawamba aminu kunduta na sapdut wam naniwawan na apmaakanggat.
PSA 69:8 Gatu ninane notnata nandupanu na dongu takngatune nana singgak. Sike ninane dongata nandupanu na aminu you maa siknga gapmandune nana singgak.
PSA 69:9 Dasingge? Nata yotdae take siknga nataat. Unzingge nata puya kekeknga tasiwa yotda wagwenu take yuwikge tasinggat. Siwan aminda gae ganisapduwa sapdut wamu waaknga naanganu apimanggak.
PSA 69:10 Na kwanam sike nina nanam nananggengu ayandaknganggat. Sike wa tasinggau gae kaikane isangepsa amin dakngake yuwitde tasinggat. Siwan ngana na aminbamda nanisapdukaing.
PSA 69:11 Na butaya tauknga atapa ngana aminda wamu waiaknga nanike sapdut wamu kuut nanikaing.
PSA 69:12 Siwan tupan aminu kundu unekan yukengu nae wamu ayakaing. Sike aminda yangga wainu toknga aknga tangoke atdatdaptakengu kau kundu taikingu atnanisapduyuuk taiking.
PSA 69:13 Siwan ngana undanga, natanu ga Buyambam tapaekan, tumuu ganiwit. Anutu, gata na musip gwaang natangamunggayakge ganinggat. Unzingu gata wa tasinggau nae take siknga natangamuke tanangge gwa yawi kekekakut.
PSA 69:14 Gata na ngwayuk kanzang gwekatang yuwa nanduke apu tapi na wagwekatang dua pukusopuwit. Gata kakuya na tasiwawi iwanata na dua tasiwan maiwit. Unzing, yangga paptake na dua usukwatapik binga gatangamuyo.
PSA 69:15 Gata na dua nandutewi yanggata paptake apu tapik. Gatu dua nandutewi yangga gapma gwekatang pukuwa, kupsa akngata tangganguwan, kupsa aminda yuaing komune pukuwit.
PSA 69:16 Buyambam tapa, asingganu gata nae take siknga natangamunggaak kaknga wa take siknga. Unzingge tumuk wamu ganinggau natake gatangamuyo. Sike gatu nae musip kwikwiu buyambam siknga natangamunggaakge apmanu apuke na gatangamuyo.
PSA 69:17 Sike na gikane puya aminda, unzingge ga nae ma kusopuwim. Na meya buyambamu kaya. Unzingge tumuk wamu ganinggau natake zaat apu yake gatangamuyo.
PSA 69:18 Gatu nae inengan apuke gata na tapso. Gata na iwanatane katakngane sandeke tapso.
PSA 69:19 Sike aminu na nanisapdukaingu gata atnataayak. Gatu itakan umana takepan maakawanu ga atnataayak.
PSA 69:20 Wamu wai wa nanikaingga natdetdetna atasiwan mainggak. Siwan musipmaatangu meyambam natake na kekekngana wena singgak. Na aminu kunduta butaya apme ba natangamuning ngang natapbum ngana tapatuta dua gatangamukut. Gatu aminu kunduta musipma tapan kekekawikge wamu take takngatu apme ba nanining ngang natapbum ngana wena.
PSA 69:21 Na tomma natapbum ngana marasinu gawaknga nanamde tukngwake unin namuking. Gatu guyaknga kupiawan ngana yangga wainu toknga guyaknga nasinanga aknga tangopitde namuking.
PSA 69:22 Sike nata nataau aminu waakwakga nanambam peke unekan yuke nanangge baknganing, ngana tapduu wagwenu sanga wa tasiking kakngata yake bungepda binga papikge nataat. Unzing yapapbam gwenda kaap zongu gwendu tanggak ba gapma dakaatang pukunggak binga.
PSA 69:23 Nata nataau kaina atzikaawan gatuna dua kaningge nataat. Gatu mase gutokake sukuke noman dua dandamake sukuningge nataat.
PSA 69:24 Gata kaanga kekeknga natayamuke meya yamuyo. Gikane musiptok takngata unin asiknga papan gatukande wena sinong.
PSA 69:25 Sike nata nataau yotna gapma yuaingu yotnagomu moo yuwikge nataat. Gatu aminu tapatu sel yotna gwekatangu dua yuwikge nataat.
PSA 69:26 Dasingge, aminu waiaknga tasiwan yake meya tupa yamukuyau wai aminda waakwau gatuna pasiwan maikaing. Sike kundu gupnaapatang toknga yamukuyau, wai aminda sapdut wam yanike meya unekan yamukaing.
PSA 69:27 Sike wai aminu waakwakgane waiaknganae ma botawim. Siwan dua kapewi gatane dongga atang apan unekanu yuwam.
PSA 69:28 Ngan, gata itane umana kayuk yutnanga buk gopatangu atdotdonguyo. Sike itane umanaat gatu noman amindane umanaat unekanu ma matawim.
PSA 69:29 Sike na meya pake toknga buyambam panggat. Anutu, nata nataau gata na gatuka take na noman siknga kayuwiakge nataat.
PSA 69:30 Sike nata kap taike Anututane umana yatangenawit. Gatu gaak inike umana kopsa akngae kuut yakapit.
PSA 69:31 Siwan nata sanga wa tasiwa kake Buyambam tapata take aknga natangamik. Siwan ngana nata kau wawi gwenu ie imunangge natake katap patang sawa kapangana take siknga siwik ngana ita take siknga dua natapik. Ngan, kau wagwenu kepinaat komnaat ngang imanu ita take siknga dua natapik.
PSA 69:32 Sike meya pakaing aminda sanga wa kake waaminda apbaknganing. Sike nata nataau aminu Anutue mun puke gaak inikaingu musia tatanga natake kekeknga gatu paningge nataat.
PSA 69:33 Buyambam tapatanu sanga kundue dapmake iniwanu akgatayamunggak. Ngan, itane amina kundu kauutde ba pewan yuainggeat dua botanggak.
PSA 69:34 Aminu yekap gwene ba kepna kepna yuaingkat gatu yanggabam gwen ba pis undang yuaingkat, ginu kuupbamda Anututane umana yatangenatnong.
PSA 69:35 Dasingge, Anututa Saion nana gatuna iwanae kataune sandeke pake Judatane yotbam gapmanggapma gatu mitapik. Ita unzing tasiwana Anututane aminabamda you wanggapma gapmana pake yuke keu wandaka inae gatukande taning.
PSA 69:36 Anututane puya aminatane bapunata keu wandaka ataning. Atake Anutue gwaam siknga nataaingga keu waomune gatukande asinggan yutning.
PSA 70:1 Anutu, na gatuka asiknga tapso. Buyambam tapa, ga zaat apuke na gatangamuyo.
PSA 70:2 Aminu kunduta na nutapan kupitde tasikaing. Siwan nata nataau gata natdetdetda pakepuke pasiwi botake apmaakaningge nataat. Sike aminu kunduta meya nata panggatdenu apbakngakaing. Gata asiknga yanikwasiwi kuwa gatu yaipakepi umana wena amin daknganingge nataat.
PSA 70:3 Aminu na nanisapduke, “Apa! Gataaa,” ngang nanikaing. Siwan nata nataau waaminda kumzang siknga maakake dasingga yuyuknga yuaingu kake kasatnaningge nataat.
PSA 70:4 Siwan ngana nata nataau aminu gae kukaingu waaminda musip gwaang natanggamuke gae apbaknganingge nataat. Sike aminu kuupbam gata gwa pakuyakga puya aknga tasiyamukuyakge natanggamatake asingganu gae anzing yaning, “Anutu tupan tapa unin,” ngang yaningge nataat.
PSA 70:5 Anutu, na kekekngana wena. Sike na sangaapae dapmake nina gatangamunanga dua. Unzingge gata nae zaatgaman apso. Buyambam tapa, na gika siknga gatangamuke gatuka takuyak. Unzingge ga paiunga ma siwim. Na zaatgaman gata gatangamuyo.
PSA 71:1 Buyambam tapa, nata gae gepbiatang yuwawa gata gatangami iwanata na dua tasiwan maiwit. Gata dua kapewi na napbitning.
PSA 71:2 Ga noman siknga apa. Unzingge gata na gatangamuke na iwanae kataune sandeke gika gatu tapso. Gata tumuk wamae maak pake na gatuka tapso.
PSA 71:3 Ga natane suu buyambam kekeknga gwendu binga dakngake yuyo. Yuwawi na gae gepbiatang akopa gata na kakuya tasiyo. Dasingge, na gaekan apuke na kusopuwit. Gata siknga gatangami na take yuwit.
PSA 71:4 Natane Anutuna, na wai aminde kataune sandeke tapso. Sike waakwau kekeknga siknga siwan yuyuknga wai siknga.
PSA 71:5 Dasingge? Buyambam tapa, na gaekan baniu singgat. Sike na waatdaka yukum komuneta gae baniu sikum. Siwan baniu wa sikumu apmaat kaa baniu asike yuat.
PSA 71:6 Asingganu na gae kataune yuke kepi sukunggat. Mingata tangaikut komuneta kakuya tasinggawi apu apman apunggak. Unzingge nata gatane umanda asinggan yatangenawit.
PSA 71:7 Sike aminbamda meya takngatu takngatu nata kakumu akaaingunin. Kake sanga unzing siknga ninde ba apik, ngang atnataaing. Siwan ngana gatakan na kekeknga siknga kakuya tasinggaak.
PSA 71:8 Tapduk bamu nata gae umanda yatangenake gatane umanda kopsa aknga aminbamde yanikapmanggat.
PSA 71:9 Tapduknga na aminuake siwa kekekngana asisangepanu gata na masa ma namuke napmambim.
PSA 71:10 Dasingge, iwanata nutapan kupitde unekan yuke na tasiwan maiwitde wamu yandeking.
PSA 71:11 Waaminda anzing yaking, “Anututa masa gwa imuke kukutde kake ninda tawake tanggaganutna. Aminu tapatu andangu dua yuuknga gatangamik,” ngang yaking.
PSA 71:12 Ayok, Anutu, gata nae maa ma yuwim. Anutuna, gata zaat siknga apuke gatangamuyo.
PSA 71:13 Nata nataau aminu nae temanggaganupa nanikaingu gata yaipakepuke pasiwi sopuningge nataat. Ngan, waaminda na tasiwan maiwitde tasikaing. Unzingge nata nataau gata natdetdetna pasiwi botake maaknga siknga natapningge nataat.
PSA 71:14 Siwan ngana na gae banip sike asingganu gata gatangamiakgekan ganduyuwit. Sike natanu gatane umanda buyambam siknga yatangenawit.
PSA 71:15 Sike natane genanetanu gata noman taknga tasinggaakge aminbam yanikapit. Gatu gata sangabamu pasikuyak kakngae nangaakan nataat. Siwan ngana undanga. Tapdukbamu gata na takuyakge yaniwit.
PSA 71:16 Anutu, Buyambam tapa, natanu gatane kekekngaka buyambam takngae natake nata umanda ayatangenawit. Sike natanu anzing yakapit, Buyambam tapakan noman tapa unin, ngang yakapit.
PSA 71:17 Anutu, gata tupa na waatdakane nanindamukuyau apu apman kaa unzakan, ge apmanu gata sanga nomanomana tasikuyakge yanikapmanggat.
PSA 71:18 Sike na apmanu aminuake gwa siwa gwapak danggama kwakngakan gwen singgak. Siwan ngana Anutu, gata na ma napmambim. Gaat naat unekan yuke nata gatane kekekngaka buyambam takngae aminu masan aatning aminde yanikapit.
PSA 71:19 Anutu, gatane noman takngaka buyambam siknga enane siknga konggak. Kopan apmanu waaknga aminbamde kaine aanggaman siknga yuak. Sike gata puya buyambam siknga tasikuyak kapanin. Keu andakane nana tapatu ga binga dua yuak. Wena. Gata kuupbam yapbikuyak.
PSA 71:20 Gata tasiwi na meya wai siknga takngatu takngatu apa kakum. Siwan ngana na atnataat, gatanu na gatu tapi kekekawit. Unzing na gapma kupsa aminda yuaing katangga binga yuwawa na gatuka tangenawiyak.
PSA 71:21 Siwan gata tasiwi natane umana aknga buyambam siknga siwik. Siawan natane musipma tasiwi kwikwiknga gatu siyok.
PSA 71:22 Sike nata gita daka tanguyuk gatane umanda yatangenawit. Natane Anutuna, gata wamu tupa yawi kekekakut taknga tawake tasinggayak. Unzingge nata gatane umanda yatangenawit. Isrel nanatane Anutuna, nata gita tanguyuuk kap taike umanda yatangenawit.
PSA 71:23 Yatangenake kapza taiyuuk apbakngawit. Kaau wa taiwiu gae taiwit. Dasingge, gata na gwa takuyak.
PSA 71:24 Unzingge gata noman taknga tasinggaakge aminbamu genaneta tapduu gwendu tembanata kuku bangee yanikapit. Dasingge, aminda na tasiwan maiwitde tasiking, ngana gata waaminu yaipakepuke pasiwi apmaakaking.
PSA 72:1 Anutu, gata King kapa gikane nomana akngaka katak siknga inindamumso. Siwana aminu wam yanangge apningu katak siknga usanziwik. Ga wamu nomana akngakan yanggayaunin. Unzingge gata kingu waapa gatangami ita wamu noman gan usanziwik.
PSA 72:2 Siwan ita gikane amindabamu meya akaing aminu noman taknganekan kakuya tasiwik.
PSA 72:3 Gata tasiwi puya ita pasining katangu sanga kwaapzangga takekan aatning. Ngan, gata tasiwi waaminda noman taknga asinggan tawake tasining.
PSA 72:4 Sike King kapata meya pakaing amindane meyana katak panomanuwik. Panomanuke ita aminu sangaapae dapmakainggane waatdakana akgatayamik. Gatayamuke ita aminu notnaapa pasiwan mainingge tasining aminu yake ayaipakepu pewik.
PSA 72:5 Sike tapduu gunzit ba yekap ngang kakaa asisiyuwawat, gikane amindabamda umandaaknga yatengatnake tasitakuningge nataat.
PSA 72:6 Ngan, gata tasiwi Kingu waapa aminu gwaam tapa dakngawik. Siwan itane nomanaaknga sopata puyaatang pimake pasiwan nanamda takekan akokaing binga siwik.
PSA 72:7 Sike tapduu ita kayuk yuwik kopatangu aminbamda itane noman taknganakan tawaning. Gatu yekau kakaa asisiyuwawan sanga kwaapzangga take aatning.
PSA 72:8 Siwan ita King kapa yuke aminbamu yanggabam gwene wesim yuaingkat gatu yanggabam gwene maa siknga yuaingkat kakuya tasiwik. Siwan itane kepna yangga Yufretis tapaneta tuwanguke kuku kepna kepna kuwan sandewik.
PSA 72:9 Sike aminu zongana wena kepbanu saibumbumna kaya komune yuaingu Kingu waapatane gepbiatanggan koyutning. Koyuwawan itane iwana kepdakaatang pimake yutning.
PSA 72:10 Siwan Kingu Spen nanaapaat gatu Kingu yanggabamda ngwapbasiwan keu mateknga banakan yuaingune nanaatda musip gwaangge sanga kundu ie imuning. Siwan Kingu Arebia nanaapaat gatu Kingu Seba nanaapaatda ie takis pakapu imusan.
PSA 72:11 Kingu kuupbamda waapae munu puke inimbaknganing. Siwan aminu kepna kepna yuaingu kuupbamda itane puya pasingamuning.
PSA 72:12 Dasingge, Kingu waapa sangana wenata iniwanu ita akgatayamik. Ngan, aminu wa sangaapae atdapmakaing aminu kunduta dua gatayamanu, ita ina akgatayamik.
PSA 72:13 Ita aminu kekekngana wena siwan sangaapae dapmake yuwan kake butaya atnatayamunggaunin. Sike aminu sangana wena aminu dua kumningge ita gatuna apapik.
PSA 72:14 Sike wai aminda yaipapaakusike waaminu pandambanutnangge tasiwanu ita waaminu gatu apapik. Ita waaminde take siknga natayamuke unzingu tasiyamik.
PSA 72:15 Nata nataau Kingu waapa tapduu mamaya yuwikge nataat. Yuwawan Arebia nana aminda gol moni ie moo imuningge nataat. Siwan aminbamda Anutue tumuk wam iniwawan ita Kingu waapa asinggan gatangamikge nataat. Siwan tumuk wamu waaknga Anututa tasiwan King kapa take yuwikge ininingge nataat.
PSA 72:16 Sike nata nataau rais gatu wit ngangu kwaapzangga aminbamdane puya naatangu take akopningge nataat. Pakap dakakane takekan aatningge nataat. Unzing Lebanon kep komune akokaing binga. Siwan buyana kwaapzang aake keu kuupbam daka dakane doke yutningge nataat. Unzing zonga zonga kwaapzangga kepna kepna akoke tapan sopunggak binga.
PSA 72:17 Siwan nata nataau aminbamda Kingu waapatane umanae dua botaningge nataat. Dua botake tapdukbamu gunzit gwenda asinggan ena yekaune akowawan waaminda kingu waapae umana yatangenatningge nataat. Siwan aminu dongu kuupbamu Kingu waapata take siknga gatayamik. Siwan waaminda yake waapae wamu take siknga aknga aknga asinining.
PSA 72:18 Anutu, Isrel amindane Buyambam tapanatane umana yatangenatnong. Anutu waapata inatakan sanga takekan pasinggak.
PSA 72:19 Itane umana takeaknga asinggan asinggan yatangenatnong. Siwan nata nataau itane umana kopsa aknga kepna kepna kuupbam tawamban sandewikge nataat.
PSA 72:20 Tumuk wamu Devit, Jesitane waakngata, yakuu anin puyukgak.
PSA 73:1 Anututa Isrel nana aminde take siknga pasinggak. Ngan, Anututa amin musip patang kawan noman gan siwanu ita take pasinggak.
PSA 73:2 Siwan ngana na waiakngaatang paa siknga pimakum. Wa unzing kepi naatang saweknga binga siwan pimake banip singgat takngana tenanga singgak.
PSA 73:3 Dasingge, nata kawanu wai aminu sangana bamban takwak siwan na yamandet aminu waakwakgane sangaapanae geengukum.
PSA 73:4 Sike waaminu meya takngatu dua kaaing. Aho, waaminu gupnaatangu toknga dua pake gupna kekeknga, siwan takekan yuaing.
PSA 73:5 Waaminu meya aminu kunduta pakaing binga dua kaaing. Sike aminu kundu meya takngatu takngatu pakaing, siwan ngana meya wa ninu kuupbamda kaamangu wa dua apukaing.
PSA 73:6 Unzingge waaminda inane umana aknga yapangenakaing. Unzing gupnaapa moo pasibakngake inae apbakngake yuaing. Bakngake yuke aminu kundu yumdekan zipmake pasiwa maikaing.
PSA 73:7 Sike musipnaatangu sanga yamandet taknga tasinangge nataaingunin tasikaing. Ngan, natetdetnaatangu sanga waiaknga tasinangge nataaingunin tasiwa buyambam siknga singgak.
PSA 73:8 Gatu waamindakan kundu sapdut wam yanike waiaknga pasiyamunangge yakaingunin. Sike waakwau yamandet siknga siwan kepi takngatu kake aminu kundu pasiwan mainingge yakaingunin.
PSA 73:9 Waakwakgakan Anutu yekaune yuak kapaaya asinisapdukaing. Sike waakwakgakan inane umana aknga yapangenake aminbamda waakwakga nataaing kaknga tawaningge akekekakaing.
PSA 73:10 Unzingge Anututane aminabamda yamandet sikaing amindane wamna tawaningge yanikaing.
PSA 73:11 Sike wai amindanu anzing yakaing, “Sanga ninda tasinim taknga Anututa natapnanga dua. Anutu enane siknga yuak kapatanu sanga ninda tasinim taknga kakapikge kepi wena,” ngang yakaing.
PSA 73:12 Siwan wai aminda tasikaingu anzing. Waaminu meya takngatu dua kaaing. Dua kake sanga buyambam pakaing, siwan ngana sangana kunduat panangge tasikaing.
PSA 73:13 Na ninae akgwaumba musipma noman gan yukut. Siwan wai takngatui dua tasikum. Asikaya wa buyana dua aakut ba dasing?
PSA 73:14 Dasingge, Anutu, gata nae toknga kwakngaom gatu zikaane ngang namukuyak. Sike tembana tapduu kuut toknga gatane namukuyak.
PSA 73:15 Sike nata wamu takngatu takngatu wai aminda yakaing kaknga yakum gamu, manggamu nata amindabamu ayuaing aminde kem yanike tanzit tasiwam.
PSA 73:16 Siwan nata nangaakan natake wai aminda tasikaing takngae yapii kanangge tasiwa maiwan meya natapbum.
PSA 73:17 Nata tasitakuusika nata Anututane yotnane kopbum. Koke yuwawa natane natdetdetna kakaa sikut. Siwan waomunea sanga wai aminde aawik takngaenu natapbum.
PSA 73:18 Gata pasiwi waaminu kepi saweknga sikngaapane kukaing. Kuwawa gata pasiwi pimake gatukande maining.
PSA 73:19 Zeetgaman siknga waakwau maiking. Sike kungwau waaknga wai siknga kundu.
PSA 73:20 Buyambam tapa, wa mainingu aminu tapatuta mia kaaknga tembana enawan mia waaknga wena zet siknga singgak binga. Ngan, gata aminu waakwau natapi sanga mia kawa wena singgak binga siwik.
PSA 73:21 Sike nata musip maik natake musipmaatangu wai siknga natapbum.
PSA 73:22 Wai natake natane natdetdetna upeet sikut, siwan gatane yuyuk kakngakae dua natapbum. Nata sanga kaikane yumdekan tasinggau, unzing kaap zongga dua natdekaing binga tasinggat.
PSA 73:23 Siwan ngana na gaat asinggan yuamak. Yuke gata katakngane tanggayaunin.
PSA 73:24 Gata wamu take aknga yuyuknga tanomanuwitde atnaninggayak. Ge masande gata na tapi yekaune yutzim.
PSA 73:25 Sike yekapatangu mamin tapatu yuaknga na kakuya tasiwik? Aminu tapatu wena. Gakan siknga gandupa yuayak. Ayok, Anutu, na gae siknga nataat. Na sanga kepdakanenanae nataau wa unzing gae siknga nataat binga dua.
PSA 73:26 Sike gupma ba natdetdetna kekekngana wena siwanu, ayok, Anutu, ga natane kekekngaapana unin. Ga naat yuke gae natapa take siknga siwan asinggan asinggan yuwik.
PSA 73:27 Siakan siknga. Aminbamu gae masa gamukengu wena gatukande sining. Sike aminu kundu tupa gawaking ngana apmanu akgapmaking aminu gata wa pasiwi mainingunin.
PSA 73:28 Siwan ngana na, na gae wesim yuke kawa take singgak. Anutu, Buyambam tapa, ga natane daman gwen siknga dakngake yuayak. Ge nata sanga gata tasinggaakge kuupbam yakapit.
PSA 74:1 Anutu, dasingge gata masa ninde nimukuyak? Ninu amindabamu gatane sipsip gwengwen binga ninduyak ngana gata kaanga asinggan natanimuya?
PSA 74:2 Gata ninu amindabamde gatuka natanimuyo. Tupa siknga nindane bapuninu amindabamu gikae papi yuking. Gika dongu waakngane nana aminu gatayamuke iwande katakngane papi gikane dongga dakngake yuking. Sike dongu waakwakga tawanu Saion dakane yukingu tupa yukuyakge natapso.
PSA 74:3 Sike nindane iwaninda apuke sangabamu you gatane buyambam gwene yuaingu gwa pasiwan maiking. Unzingge gika apu sanga wa maike yuaingge kayo.
PSA 74:4 Gatane iwandata apu yotda gwa take yanggamatake tandotdonguke tasiking. Sike gatane sanga waaminda pake tangie inane sanga tuwanga kaya peking.
PSA 74:5 Gatu katap sanu gikane yotda gwekatang yuaingu sandun pake kuku katap yapundu pasikaing binga unzing pasiking.
PSA 74:6 Sike katap sanu tuwanga gatu kunzi kunzina kaya pasike peya waaminda apuke sandunda mateknga gatu hama buyambamu sanga kekeknga zipmapukaing gwegwenda ngangga zipmakapbing.
PSA 74:7 Zipmakapmakenga gatane yotda gwekaa katapda satewan isikut. Katapda satewan isiwawa you take siknga gikae yutnangge yawi yukut gwen tasiwan wai siknga maikut.
PSA 74:8 Sike waaminda musiaatangu ninu asiknga yaipakepnangge natapbing. Unzingge miti you kuupbamu ninde keune yuaingu sapewan yasiking.
PSA 74:9 Sike tuwangu gata tupa ninde yeutnimukuyak ngana apmanu dua yeutnimi tuwangu wa binga dua kaamang. Siwan apmanu yakapsa aminu tapatu nikat dua yuamang. Unzingge nikat nana tapatuta meya wa kaamanggane tapduknga wena siwikgane dua nataak.
PSA 74:10 Anutu, tapdukbamu yutnimu iwaninda sapdut wamu unzing ganikaning? Siwan wamu wai gae umandae asingganu unzing yakaning?
PSA 74:11 Dasingge gata gatanimunanga dua? Dasingge ga moo siknga yuke waaminu yake dua pasiwi maining?
PSA 74:12 Siwan ngana Anutu, tupa siknga ga nindane King kapanin dakngake yukuyak. Siwan apman kaa ga nindane king kapa yuayak. Unzingge gata asinggan gatanimuke nin gatuka papi amak gwekatang meya dua pakamang.
PSA 74:13 Sike gikane kekeknga akngane yanggabam gwenu wesiwi kaukaut paku yukumayak. Siwana gata Isip nana aminbamu pasiwi maiking. Pasiwi maikingu wa unzing pis buyambam siknga gwendu yanggabam gwene nana binga pasiwi maiking.
PSA 74:14 Ngan, gata pukpuu buyambamu tapatane gwapaknga wesikuyak. Siwan gata itane gupnaapa kaap zongu saibumbum kwaimune yuaingge yami naking.
PSA 74:15 Sike gata tasiwi yangga kepbanang katangga akoke zipmake kuking. Siwan yangga buyambam tapaapa gika pasiwi kuupbam atzakngaking.
PSA 74:16 Gata kakaa akngaat gatu zikaa dakaat pasikuyak. Siwan gunzitkat gatu yekapat ngangu enane pekuyak.
PSA 74:17 Siwan tuwangu yanggabamdane kwaimtapa takngai binga gwa tekuyak. Sike gunzit tapduk gatu sopa tapduk ngang nakanu gwendu gwenduatang siwikge gwa tekuyak.
PSA 74:18 Buyambam tapa, ga ma siknga botawim. Iwandata gae sapdut wamu asinggan yakaing. Waaminu katum binga, ge gae natapanu sanga moo binga singgak.
PSA 74:19 Sike gikane aminda kekekngana wena. Unzingge gata dua nindupewi iwaninu waakwakga ninu pasiwan mainim. Ninu gikane amindabamu iwaninda asiknga pasiwa maikamang. Ge gata ninde ma siknga botawim.
PSA 74:20 Sike keu kuupbam ninda yuamang kokopatangu, amak kaknga yumdekan tasikaing. Unzingge wamu gata ninu amindabamde yawi kekekakut takngae ma botawim.
PSA 74:21 Gata dua kapewi wai aminda aminu kundu yainggamuke pasiwa datakuke maakaning. Sike nata nataau gata sangaapae dapmakaingunin gatayami gatane umanda ayatangenatningge nataat.
PSA 74:22 Anutu, gata apuke wamu kekeknga aknga iwandae yaniyo. Sike tapdukbamu gae sapdut wamu yamandet aminda yakaingu atnatayuyo.
PSA 74:23 Sike iwandatanu asainggamatake ga akganisapdukaing. Ita kapzang siknga asinggan ainggamatakaing kaknga natake moo ma yuwim. Anutu, gata gakngat buyambam iwanda waakwakga tasikaing kaknganae ma botawim.
PSA 75:1 Anutu, ninda gae gaak kaknga akganikamang. Akganike umanda asinggan yatangenakamang. Yatangenake gatane umanda kopsa akngae yakapmakamang. Aminbamda sanga inata inata take siknga gata pasikuyakge yakaing.
PSA 75:2 Anututa anzing yakut, “Nata wam yaningge tapduk gwenu gwa yawa yukut. Sike nata wa usanziwiu noman gan. Gutonga dua siwik,” ngang yakut.
PSA 75:3 Siwan anzing yakut, “Kepdakata saasitakuwan aminu une yuaingga tanggaganuwa kekeknga yuwik.
PSA 75:4 Nata yamandotdong aminu anzing yaninggat, ‘Ginu yamandeu ma siwam.’ Sike gatu wai aminu anzing yaninggat, ‘Ginda gisane umanza ma yapangenawam.
PSA 75:5 Ginu gisane kekeknga akngasae ma bakngawam. Siwan ma yanggamatake na sapdut wamu ma naniwam.’”
PSA 75:6 Sike aminu tapatutane umana takekopnanga aminu tapatu gunzitda akonggak katang ba gunzitda pukunggak katang ba amunggwak ba aigwak ngangu wena.
PSA 75:7 Anutu awiapatakan nindane yuyuknginu usanzikgak. Itanu aminu tapatutane umana atakepuke tapatutane umana atakekonggak.
PSA 75:8 Sike Buyambam tapata kau gomdu wainu toknga aknga tukngwamban dopan takut. Ita yangga waaknga wai aminu kuupbamde tukngwayaman tangopa puyuwik. Ina unzakan wai aminu Anutue kaine siknga wamu yaning ngana, gatukande siknga wena sining.
PSA 75:9 Siwan ngana nata Jekopdane Anutunae umana asinggan yakapit. Yakapmake nata kau kumzang taike umana buyambam siknga yatangenawit.
PSA 75:10 Sike Anututanu wai amindane kekekngana apasiwan sopuning. Siwan ngana noman amindenu kekeknga buyambam siknga yamik.
PSA 76:1 Sike Juda amindanu Anutue atnataaing. Ngan, Isrel amindanu umana kopsa akngae natake yatangenakaing.
PSA 76:2 Sike itane yotna gwenu Jerusalem yot gapmane yuak. Ita tawanu Saion dakane asinggan yuak.
PSA 76:3 Ita waomune yuke iwanatane sakut ba tiunggu gatu gwauyana ngang zipbukut. Ngan, Anututa sanga amakgane kuut siknga gwa pasiwan maiking.
PSA 76:4 Anutu, gatane umanda kopsa siknga siwan ga kakaa akngane yuwaak. Tawanu buyambam dakandaka enane yuaing. Siwan ngana gatane umanda kopsa siknga akngata ayapbikgak. Tawanu wa dakandakane kaap zong gwengwenu buyambam siknga yuaing.
PSA 76:5 Sike aminu kunduta amak aminu kekeknga akwakgane sangana gwa sandeking. Sike amak aminu waakwau gwa kumbing. Unzingge aminu tapatu amak aminu waakwakge dongune nanata kataknga tangenatnanga dua.
PSA 76:6 Siwan Jekopdane Anutuna, gata kaanga yaniwi hos gwegwekat aminu hos tangan pukwikingkat kuupbam gwa kungwake kepdakane kuma yuaing.
PSA 76:7 Siwan ngana Anutu, aminu gae asiknga gwaukaing. Unzingge gata kaanga yaniwinu mamin amin tapata gae kaikane dandamake yuwik? Aminu tapatuta yutnanga dua.
PSA 76:8 Ga yekaune yuke gata wam yaningge natapi kekekawan waaminbamdane wamna gwa usanzikuyak. Usanziwi aminu kuupbamda asiknga gwauke wamu dua yaking.
PSA 76:9 Sike tapduu waomune gata amindane wam usanzitnangge enakuyak. Enake gata aminu meya kaaingu kuupbam gatuka panangge tasikuyak.
PSA 76:10 Gata aminu kundue musiptok nataayak, siwan ngana musiptou waakngata tasiwan aminu kunduta gatane umanda ayatangenatning. Sike aminu musiptou gatane akngata dua pasiwan maikingu gae munu apuke ganining.
PSA 76:11 Sike ga wamu takngatu Anutu, Buyambam tapakae yawi kekekawiu waaknga atawamso. Nata nataau aminu kuupbamda Buyambam tapae akgwauke sanga ie apakapuke imuningge nataat.
PSA 76:12 Sike gwapaknga amin yamandet sikaingu ayaipakepunggak. Kingu kepna kepna yuaingga ie asiknga gwaukaing.
PSA 77:1 Nata Anutue kapzang siknga yatawakum. Ngan, ita natane tumuk wamma natapikge yatawakum.
PSA 77:2 Sike meya tapduk siwan nata tumuk wamu Buyambam tapae yakum. Yake nata zikaa kuupbam tumuk wamu asinikum. Siwan ngana musip kwikwik taknga dua takum.
PSA 77:3 Na Anutue natanggamataawanu musipmaatangu kwanam sikut. Atnatayuwawa gan musipmaatangu meya sikut.
PSA 77:4 Anutu, gata dua nandutewi dapuna pekum. Natapanu natane musipmaatangu meya siknga sikut. Unzingge na wamu yananga dua.
PSA 77:5 Sike natdetnaatangu tapduu tupa siknga nanae natapbum. Siakan siknga, na nakan bamu apu napbikingge gatuna natapbum.
PSA 77:6 Sike zikaane nata natdetdetbam pake yukum. Yuke tupa kap taisika tasikum takngae asinggan natayukum. Natayuke natdetdetbam pake ninae anzing yakwaikum.
PSA 77:7 Asikaya Buyambam tapata masa asinggan ba namik? Ba asikaya nae apmea take dua ba natangamik?
PSA 77:8 Gatu nae butaya tupa natangamukut taknga apmanu dua ba natangamik? Wamu yawan kekekakut taknga gwamba pimakut, ba dasing?
PSA 77:9 Asikaya Anutu ninde gwa ba botakutde musip kwikwiu dua natanimik? Ba kaanga akngata ba musip kwikwik kaknga umukut?
PSA 77:10 Sike meya waakngae natake nata anzing natapbum, Asikaya Anutu enane siknga yuak kapata natapan siwan apba napmakut. Unzingge na sanga waakngae natake iniwit.
PSA 77:11 Apmanu Anututa puya buyambam taknga aknga pasikutde gatu natapit. Ngan, nata sanga buyambam inata inata tupa pasikuyakge gatuna natatakuuwit.
PSA 77:12 Nata sangabamu pasikuyakge natapasiwit. Gata puya kekeknga pasikuyak, ge nata iatdeat kuut natapit.
PSA 77:13 Anutu, gatane yuyukga take siwan noman gan siknga. Sike anutu pupuknga tapatuat gaat ina unzakan dua. Gata anutu pupuknga waakwau asiknga yapbikuyak.
PSA 77:14 Anutu, ga awia apatakan, sanga duya takngatu takngatu pasinggayak. Sike gata kekekngaka buyambam taknga aminu kepna kepna yukingu kuupbamde yeuyamunggayak.
PSA 77:15 Gikane kekeknga waakngane amindabamu gatuka pakuyak. Sike wa pakuyau Jekopat gatu Josepatdane bapuna masan aakingunin pakuyak.
PSA 77:16 Anutu, tupa yangga anga anga ganduke akgwauking. Gwauke yanggabam gwenu miamun sitakukut. Ngan, keu yanggabam amakatangu kutakngi komune yuaingu saasitakukut.
PSA 77:17 Sike sopa enandangga buyambam siknga taawan gakngat gwekaa buyambam siknga kaapmapa yakut. Yaawan yapasik kaa kuwan apan kuupbam sikut.
PSA 77:18 Gata tasiwi gakngat gwenu got taknga pinggu yemi dakngakutde banakan katang yakut. Sike yapasikga siwan kepna kepna kuupbam kakaa sikut. Siwan kepdaka ayamuyamu yuuk yukut.
PSA 77:19 Gata yanggabam gwene banakan kukuyak. Ngan, gatane kepiapaka yanggabam gwende banakan yuak. Siwan ngana kepi tangga aminu tapatuta kananga dua singgak.
PSA 77:20 Siwan ga tupan kayuke kuwawi gatane amindabamda masan gawaking. Gata puya waaknga Moses kat gatu Aron katde yamukuyak, siwan waapaatda kakuya pasikumayak.
PSA 78:1 Ginu natane aminabam, nata wamu danindamutnangge natat taknga daniwa katak natapnong. Ginu maak pake wamu nata yananggenggatde natapnong.
PSA 78:2 Nata tuwang wamu gin daninangge nataat. Nata sanga inata inata tupata apu apman kusopuknga yuaingge daniwa natapnong.
PSA 78:3 Tupa bapuninda sanga wande gwa niniwa natapbumang. Siwan ninu gwa natake atnatayuamang.
PSA 78:4 Nindane waatdakaninda natapningge wamu waaknga dua takusopunim. Aho. Ninda engangu kayuu aatning kaa ayaninim. Ninda Anututane kekeknganae puya kekeknga pasike duya takngatu takngatu pasikutde ngang yaninim.
PSA 78:5 Anututa mama wamu aminu Isrel nanae yamukut. Ngan, wamu wa dongu Jekopdane bapunae yanikut, waaminda atawaningge. Ita bapuninu tupa anzing yanikut, “Ginda waatdakasa katak siknga natane mama wama kuupbam yanindamutnong.”
PSA 78:6 Siwan waatdaka masan aatning kaa atnatapning. Natake waaminda gatu inane waaknga aatningunin yanining.
PSA 78:7 Sike unzing tasiwanu dongu waakwakaa Anutue baniu asining. Banip sike sanga wa pasikutde dua botaning. Siwana itane mama wamu kuutgan tawaning.
PSA 78:8 Asikaya waaminu bapunata tasiking takngakan tasinang. Sike waakwakgane bapuna yamandet sike Anututane wamu ayamasandeking. Siwan ie baniu kekeknga dua siking. Gatu itane wam takngaaya asinggan dua tawaking.
PSA 78:9 Tupa Efraim nana kweem gatu sakut ngang pake amnangge tandakngaking. Ngana tapduu waomune amak kaknga buyambam siwan kake atdatakuking.
PSA 78:10 Aminu waakwau Anututane pasap wam taknga dua tawaking. Siwan mama wam takngaaya dua tawaking.
PSA 78:11 Sike sanga ita pasikutde apbotaking. Siwan duya takngatui waaminde kaine yeuyamukut kaa kuut abotaking.
PSA 78:12 Siwan bapunatane kaine Anututa duya takngatu keu Soan yot gapma Isip kep komu yuwaune tasikut.
PSA 78:13 Ita yanggabam gwenu wesiwan kaukaut kuwan daman binga dakngawan Isrel nana banakan tapane yanipakapbut.
PSA 78:14 Sike gunzit tapane i minga musiaatang yuke ita waaminde tupan kukut. Gatu zikaane katap gwendane kakaa akngaatang yuke tupanu ita kukut.
PSA 78:15 Gatu ita sanga wena kepban komune kuke sup gwegwen zipan yangga buyambam siknga apaapata undangga akopbut. Akopan waakwakga tangopan take sikut.
PSA 78:16 Ita tasiwan yangga sup ganang katangga akoke yangga buyambamu mekngan katangga akoke zipmakaing binga zipbut.
PSA 78:17 Siwan ngana waaminda waiaknga Anutu enane siknga yuak kapae tasiking. Sike wa tasikingu sangana wena kepban komune yuke yamandeu tasiking.
PSA 78:18 Waaminda Anutu tanzike anzing tasiking. Sike waaminda nanamu napan take siknga singgak kapa Anututa yamikge kumzang yanggamataking.
PSA 78:19 Waaminda Anutue sapdut wamu anzing yaking, “Asikaya Anututa ninde nanamu kepban kopatang kwaapzang siknga apme nimik ba dasing,” ngang yaking.
PSA 78:20 Siakan, ita sup gwen tanguwan yangga buyambamu undangga akopbing. Siwan ngana dasingge? Ita ninu aminabamde poyak kat gatu kaap kat apme ba nimik, ba dasing?
PSA 78:21 Ayok. Buyambam tapata waamindane wamna natake kaanga siknga natapbut. Kaanga natake ita katau enandangga Jekopdane dongge tewan epbut. Sike Isrel nana aminde kaanga natapbut taknga kuku buyambam siknga sikut.
PSA 78:22 Dasingge, waakwau Anutue baniu dua siking. Siwan anzing natapbing, “Apmea ba gataniman take yutnim, ba dasing?”
PSA 78:23 Siwan ngana undanga, ita enandangge yawan yekap gwenu gwambok binga zikut.
PSA 78:24 Ziwan nanamu Mana ngang yania pewan kepdakane pimapa pake naking. Sike wa nakingu nanamu yekaune nana yaman naking.
PSA 78:25 Sike nanamu wa angelatane nanam yamukut. Anututa nanamu kwaapzang yaman napa takekan sikut.
PSA 78:26 Siwana masande ita tasiwan got taknga gunzitda akonggak katangga puyapbut. Siwan inane kekeknga aknganekan tasiwan got taknga amunzingga puyapbut.
PSA 78:27 Puyawawa itakan tasiwan kwait gwegwenu kwaapzang siknga waaminde banakan kepdane kupopong binga ba saisai yanggabam gwende kwaimune kaamang bingata pimaking.
PSA 78:28 Anututa kwaiu yot gapma banakan pewan epbing. Epuke sel yotna ayuking gwegwene yupbasiking.
PSA 78:29 Unzing kwaapzang siknga ge napan musia akgitnaking. Sike sanga wa Anutue sitawanggawan yamukut.
PSA 78:30 Sike waakwau undang atnayuking. Waaminda dua napan puyuwan
PSA 78:31 Anututa musiptok natake aminu kekekngana kaya atzipan kumbing. Sike wa kumbingu wawi mateu Isrel nana take siknga tapaapata kumbing.
PSA 78:32 Anututa duya takngatui waaminde apasiwan kake ngana waiaknga kumzang tasike Anutue baniu dua siking.
PSA 78:33 Unzingge ita waaminu pasiwan sanga pasiking kakngata buyana dua aawan yutake kusika akumbing. Ngan, ita aminu waakwakge pasiwan asiknga gwauke yutake kusika kumbing.
PSA 78:34 Sike Anututa aminu kundu atzipan kumbing. Kupa kake dua kumbing aminu musia kapzang tapatekwamban ie apuke tumuk wamu kekeknga iniking.
PSA 78:35 Inike gatu anzing natdeking, Anutu nin ninduyuak kapanin. Anutu enane siknga yuak kapa nin gatanimunggaunin ngang natapbing.
PSA 78:36 Siwan ngana masande kem yake gatu geyangga ie yumdekan yaking.
PSA 78:37 Sike waaminda ie wamu dua gwaamuking. Dua tawake pasap wamu iat tasiking kaknga atzipbuking.
PSA 78:38 Siwan ngana Anututa musip kwikwik natayamuke waiakngana asandeyamukut. Sandeyamuke dua pasiwan maiking. Ita asinggan gatu gatu kaanga natapbut taknga ateke musiptok kaknga dua natayaman buyambam siknga dua sikut.
PSA 78:39 Itanu waaminde anzing natayamukut. Waakwau aminu gupnakan yuke akumnanga unin. Ngan, waakwau got takngata apuke kunggak binga.
PSA 78:40 Sike tapdukbamu sangana wena kepban komune yukingu yamandet tasike ie wamu gatu gatu ayamasandeking. Ayamasandeke tapduk bamu tasiwawa kake Anututa musiaatangu meyambam natapbut.
PSA 78:41 Sike Isrel nana aminda tanzit taknga Anutue tasikingu dua teking. Anutu waapa kepi dundumna takngakan tawake tasinggak kapanin. Waaminda tanzit taknga ie tasiwawa musiaatangu meya natapbut.
PSA 78:42 Waaminda kekeknga buyambamu Anututa tasikut takngae dua natdeking. Tupa siknga tapduu ita iwanae kataune sandeke pakutde dua natapbing.
PSA 78:43 Sike tapduu waomune ita duya takngatu takngatu Soan kep komu, Isip kep komu yuwaune tasikut.
PSA 78:44 Anututa yangga tapan tekwamban tasiwan dak siwa Isipnana aminda tangopnanga dua sikut.
PSA 78:45 Gatu itakan ingut kat gwapbam pat kwaapzang siknga pewan waaminde kuking. Kuke ingutda ayasiwawan gwapbamda sanga puya naatang nana kwaapzang pasiwa maiking.
PSA 78:46 Siwan Anututa gatu gwakgwak kat apmak kat pewan apu sanga puyanaatang akopbingunin nayamuking.
PSA 78:47 Ita sopa zambum pewan epu wainu tapunu apasiwan maiking. Siwan aisda katau baap dakandaka pasiwan maiking.
PSA 78:48 Sike sopa zambumu buyambamda epuwawa yapasik sike ikwawa gamankat sipsipnaat atzipan kungwayamuking.
PSA 78:49 Ngan, ita kaanga kumzang siknga natayamuke waaminde meyambam yamukut. Yamuke angelana yanipewan kuku pasiwa meya buyambam paking.
PSA 78:50 Ita musiaatang toknga natayamuke waaminu dua kapekut. Aho. Ita maiu buyambam takngatu tewan apu zipan yumdekan kungwa takuking.
PSA 78:51 Sike dongu Isip nanatane waaknga tupan tapaapa kuutgan zipan kumbing. Ngan, dongu Hamdane waaknga zipan kumbing.
PSA 78:52 Siwan ngana ita unzing sipsip kayuya apa dakngake tupan kuke aminabamu yanipake kuke kayukut. Sike keu sangana wena komune kukingu kepi ita yeuyamukut.
PSA 78:53 Waaminu yanipake kuwan take yuke dua gwauking. Siwan ngana yanggabam gwenu kaukaut yukutda apu iwana asusikwatapbut.
PSA 78:54 Ngan, ita yanipake pakapu keu inane komune pakapbut. Sike keu waomu ita kataknga kekeknga siakan tapata keu kekeknga akngananeta takut komune gatu apbing.
PSA 78:55 Keu waomune apuke dongu kundune nana ita yanikwasipewa kuwawa inane dongata pakapu yuking. Pakapu yuwana ita keu usanzike dongu Isrel nanae yamutakukut. Siwana yotna mitake une take yuking.
PSA 78:56 Siwan ngana masande Isrel nana aminda apmea aakingga Anutu enane siknga apae tanziyuuk ie yamandet tasike itane mama wamna dua tawaking.
PSA 78:57 Sike waakwakga yamandet siyuuk ie wamu sandeking. Unzing bapunata tupa tasiking taknga binga tasiking. Waakwau unzing kweem dakata gutonga siwan sakut daka song mumsa binga.
PSA 78:58 Waaminda alta gwenu anutu pupukngae kundu pasiwawa kake Anututa musiptok waaminde natayamukut. Ngan, anutu pupukngatane tuwanga pasiwawa kake Anutu musiaatangu wai natapbut.
PSA 78:59 Anututa waaminda tasikingunin kake musiane toknga siknga natayamukut. Natake ita Isrel nana aminde masa siknga yamukut.
PSA 78:60 Siwan yotna gwenu tupa yaniwan amin banakan mitapbing. Siwan sel yot takwana Silo kep komune mitapbing wagwenu masa imuke atekut.
PSA 78:61 Sike Anututa kapewan itane pukit takwan pasap wamna kaa wagwenu iwanata apu taking. Sike pukit takwanu wagwen kake Isrel nana aminda natake Anututane kekekngana gatu kakaa buyambamu nomnane yuak kaknga anggwene yuak ngang natapbing.
PSA 78:62 Ita inane aminabamde kaanga natayamuke kapewan iwanata asinggan apu zipa kumbing.
PSA 78:63 Sike wawi matek takwau amak gwene katapda yasiwan kungwakaing binga kumbing. Siwan maya mateu wawi apna pananga wena sikut.
PSA 78:64 Gatu iwanata apu aminu yot takwande puya pasiking aminu atzipan kumbing. Atzipa kupa maatnata butaya siknga natake ngana kwanamu sitnanga dua sikut.
PSA 78:65 Siwana Buyambamtapa asenakut. Unzing aminu apekgauneta enakgak binga. Gatu unzing aminu kekeknga apata yangga toknga aknga kwaapzang tangoke datdaptake dapuna peke zet enakgak binga.
PSA 78:66 Siwan ita iwanaat amake yawapewan kuking. Ita asiknga yapbimban maaknga siknga natapbing. Natake gatu amnangge dua tasiking.
PSA 78:67 Siwana ita Josepdane dongatane bapunae masa yamukut. Siwan Efraimdane dongae kuut panangge dua yakut.
PSA 78:68 Siwan ngana ita dongu Judatane dongaat gatu tawanu Saion dakaat yawan yuking, sike tawanu wa dakae take siknga nataak.
PSA 78:69 Sike inane yot takwan gwenu mitapan you kekeknga siknga sikut. Unzing tawan dakatu binga. Siwan ita tasiwan yotna gwenu kekeknga asinggan asinggan yuak. Unzing kepdaka tasiwan kekeknga siknga yuak binga.
PSA 78:70 Siwana Anututa Deviu puya aminae takut. Sike Daviu waapata sipsiu buyambam gatu mateknga ngang kayukut.
PSA 78:71 Siwana Anututa Isrel nana amindane king kapana dakngawikge tekut. Tewana Anututane aminabamu kakuya ita pasikut.
PSA 78:72 Devitda puyana waakngaekan natanggamatake aminbamu kepi noman gan tawake kakuya take pasikut. Sike ita tupan amintapa dakngake take siknga kayukut.
PSA 79:1 Anutu, aminu dongu kundune nana amake keu gata ninu amindabamde nimukuyak kopatang gwa apbing. Apuke yot takwan gwenu gikae yawi yukuu gwa tasiwa maikut. Siwan Jerusalem yot gapma tasiwa wai siknga sikut. Tasiwa maiwan you wagwegwenu waitdeking.
PSA 79:2 Sike katewa gikane puya amin zipa kumbinggane gupna apaapa kwaitkat gatu kaap zong ngangga apu naking.
PSA 79:3 Waaminda gikane aminda zipa kupa daknga tukngwake Jerusalem yot gapmaatang yanggata binga zipbut. Sike aminu tapatu dua yukutna itane gupna pake kwaiwik.
PSA 79:4 Sike ninde aminu wesim yukingga sapdut wam ninike apmiyuuk gatu atninisapduking.
PSA 79:5 Buyambam tapa, gata ninde kaanga nataau mamayasim yuya ba dasing? Asikaya gata kaanga nataau katapda binga isikoke dua kupik, ba dasing?
PSA 79:6 Asikaya gata kaanga aminu munu dua puke ganikaingge natayamuyo. Ngan, aminu kepna kepna wa yuaingu gae masa gamukaingunin.
PSA 79:7 Dasingge, dongu waakwakga ninu Jekopdane donga notninu kundu atzipa kumbing. Kupan nindane kepmin kaa asiknga pasiwan maiking.
PSA 79:8 Nindane bapuninda waiaknga tasikingge ie toknga ma nimim. Apmanu gata ninde musip kwikwik natanimuyo. Dasingge, ninda meya buyak yuke kumnangge dapaknga singgak.
PSA 79:9 Anutu, ga Anutu, nin pakuyak kapanin. Gikane umanda kopsa akngae natake ninu gatanimuyo. Ninu gika gatuka pake waininu kuupbam sandetnimuyo.
PSA 79:10 Dasingge aminu kepna kepna yuaingga ninu anzingu ninikwaikaing, “Gindane Anutusa zandang yuak,” ngangun. Aminda nisipa notninu kundu daknga tukngwakingge gata yake toknga dongu waakwakge yami kanimde nataamang. Dasingge, wai aminda gatane puya aminda zipa kumbing.
PSA 79:11 Gata kaut aminda kwanamu gae sitningge natapso. Sike gikane kekekngaka buyambam taknganeta aminu iwanata atzipan kumningge yakingu gatuka papso.
PSA 79:12 Sike iwanu waakwakga ga akganisapduking. Unzingge Buyambam tapa, gata yake waiaknga tasikingge meya katau kuutmusa gatu kautdu takngayat ngang yamuyo.
PSA 79:13 Gata unzing tasiwina ninu gikane amindabamda unzing sipsipbata binga gae gaak wamu asinggan asinggan ganinim. Siwan nindane bapuninu masan aatningga, gae unzakan umanda ayatangenatning.
PSA 80:1 Ninu Isrel aminu ninukuya tasinggayak kapa, gata ninu Josepdane dongune nana kepi noman tapane panomanuwawi yuamang. Unzing gatane sipsip matekga kayuayak binga. Ge ninda gae yanggawaatna maak panimuyo. Gata king kapa yot takwan siknga gwekatang angela kekeknga apaapa yuaingune banakan yuayak. Yuke kakaa akngakata ninde apsok.
PSA 80:2 Apan ninu Efraimde dongaat gatu Benjaminde dongaat gatu Manase nganggane dongae kakaa waaknga aanggaman tasiwi kanim. Ngan, kekeknga buyambamu waakngaka ninde yeutnimuke apu gatanimi ninda take yutnim.
PSA 80:3 Anutu, gata ninde butaya natanimuke ninu gatuka gikae ninipakapso. Pakapuke ninu ninduyuke gatanimi ninda wena dua sinim.
PSA 80:4 Anutu, ga kekekngakabamban tapa. Tapduu datdasing gatane amindabamu gae tumuk wamu ganiwawa ngana gata kaanga natayamuya?
PSA 80:5 Gata tasiwi ninu kwanambam sike kai yangga ninu nanam gatu yangga ngang binga nake ba tangoke yuamang.
PSA 80:6 Gata aminu dongu kundu kundune nana kapewi ninde wesim yuke amak wam yake nindane kep tanangge yakaing. Yake iwaninu waakwakga masa wam ninike atninimikaing.
PSA 80:7 Anutu, ga kekekngaka bamban tapa, gata ninu dua nindupeke gatane kekeknga akngakata paniwambi ninda dua upeeke wena dua sinim.
PSA 80:8 Siwan tupa gata wain nap taknga Isip kep komune take takapbuyak. Takapuke gata aminu dongu kundune nana keu waomune ayanikwasiwi kuwana gata wain nap taknga waamindane kep komune kwaikuyak.
PSA 80:9 Kwainangge natake gata keu wandaka tapi kakaawan gwa kwaikuyak. Kwaiwi takake waapatane muyakngita puku taawan wa apa buyambam siknga takake keu kuupbam gepa tasikut.
PSA 80:10 Siwan wain nap waapatane kaingata tawanu kuupbam gatu katau buyambamu kundu kuut usikwatapbut.
PSA 80:11 Sike nau waapatane kaingata kuke nambis buyambamu Mediterenian gatu yangga buyambam tapatu Yufretis ngang yanikainggane kwaimune kuking.
PSA 80:12 Siwan ngana dasingge gata damanu wain puyae wamambasikingu gwenu waitdekuyak? Ge aminu kepiapane kuyuk kake buya kukwae pakaing.
PSA 80:13 Siwan ikwawa zongga apu ayainggamuwawa gatu kaap zongga atnakaing.
PSA 80:14 Anutu, ga kekekngaka bamban tapa, gata ninde gatuka natapso. Ga yekaune yuayakge enaneta ninde nindupso. Ninduke epu gatanimuke ninduyuyo. Dasingge, ninu gatane wain nap takngata binga yuamang.
PSA 80:15 Gata gikane kekekngane ninu nanam zak binga kwaikuyak. Ge epu gatanimuyo. Ninu wain gumbang gaka binga gika pasiwi kekekakumang.
PSA 80:16 Siwan ngana nindane iwaninda nau waaknga pasike katap patang gwa saking. Ngan, gata kaanga ninu amindabamde natake pasiwi mainim.
PSA 80:17 Siwan ngana nata nataau aminu umana kopsa amin katau siapanekane yuaingu katakgata papi kekekaningge nataat. Aminu waakwau gata gwa papi waakga binga dakngaking.
PSA 80:18 Siwan gata unzing tasiwinu, ninda ga dua gapmake kunim. Aho, gata gatanimi ninu take yutnim. Siwan ninda tumuk wam ganinim.
PSA 80:19 Anutu, ga kekekngaka bamban tapa, gata ninu dua nindupeke gatane kekeknga akngakata paniwambi ninda dua upeeke wena dua sinim.
PSA 81:1 Anutu nin gatanimunggak kapae apbakngake yatawanong. Kap taike Anutu wa ninu Jekopde dongatane Anutuninde yatawake umana yatangenatnong.
PSA 81:2 Gita ba kulele zipa gakngae noman yawan kap taknga tainong.
PSA 81:3 Sike tapduu buyambam gwene yekau yeik gwenda akoke kuku yapii gwen singgak komune pum puyapnong.
PSA 81:4 Waaknga ninu Isrel nana amindane mama wam taknga unin. Anutu Jekopdane apata mama wamu waaknga ninde nimukut.
PSA 81:5 Sike tupa Anutu amak tasinangge Isip kukut komune mama wamu waaknga ninu Isrel nana amindane bapuninde yamukut. Sike keu waomune nana aminda wamu yawawa natake ninda guyaknga dua natapbumang.
PSA 81:6 Siwan ita anzing yakut, “Nata sanga meya kuupbam gwaamnane yukingu gwa sandekum. Siwan nata yandupewa puyatane basket gwegwena kepdakane sandepeking.
PSA 81:7 Sike tapduu ginu meya buyambam paking komune nae yanawaking. Yanawamban nata gatandama ginda take yuking. Na ena kakaa gakngatda yanggakge banakan kusopuke yuat komuneta tumuk wamu yakingu natake gatandamukum. Siwan ginda yangga gapma Meriba ngang iniking komune yuwawa nata tanziu pasikum.
PSA 81:8 Natane aminabam, daniwa natapnong! Nata wamu kekeknga aknga ginde gwaut wam daniwit. Ginu Isrel amin, natane wamu ginda natapningge take siknga nataat.
PSA 81:9 Ginu dongu kundutane anutu pupukngana ma yawambam. Siwan ginu anutu pupuknga tapatue munu ma puwam. Ginda munu awia apaekan putnong.
PSA 81:10 Nakan na Buyambam tapasa, na gindane Anutusa. Natakan ginu Isip kep komune pake danipakapbum. Ginu genza akngawa nata nanamu genzeetang pewit.
PSA 81:11 Siwan ngana natane aminabamu natane wamu natapnangge apbitaking. Siakande siknga, Isrel nanata natane wamu tawanangge dua tasiking.
PSA 81:12 Unzingge nata kapewa yamandet takngana tawake tasiking. Tasike sanga ina natapbing kakngakan tawake tasiking.
PSA 81:13 Sike ninane aminabamu natane wam natapningge take siknga nataat. Siwan nata Isrel nana aminda na baniu asinggan tawaningge nataat.
PSA 81:14 Sike unzing tasiwanu, nata zeetgaman iwana ayaipapakusiwit. Yaipapaakusike waaminkat amake nata asiknga yapbimbit.
PSA 81:15 Yapbimba aminu na Buyambamtapa yuatde apbitakaingu nae asiknga gwauke munu nae putning. Siwan asingganu nata meya yamuwawa kaning.
PSA 81:16 Siwan ngana nata ginu nanamu wit ngang yanikaingunin damunangge nataat. Nata iningok dama napan musipza atdopikge nataat.”
PSA 82:1 Anututa yekaune pout buyambam gwekatang tupan tapa dakngake yuak. Sike aminu buyambamu wam usanzikaing aminda wamna usanzitnangge apuke unekan yuwawa Anututa aminu kuupbamdane wamna usanzikgaak.
PSA 82:2 Ita anzing yanggak, “Ginu wam yak gwene koke kem wam yake wamu dua yawan nomatakaing. Asikaya wai aminu ginda kaa wam yanikaingunin.
PSA 82:3 Ginda waatdaka kundu nana gwa kupsa aminu gatayamunong. Waaminda sangana wena yuaingu gatayamunong. Siwan aminu kundu meya gwaamuke take dua yuaing aminu kuut take pasiyamunong.
PSA 82:4 Sike aminu kundu wai yuke sangae dapmakaingu ginda waaminu wai aminde kataune sandeke panong.
PSA 82:5 Natdetdetna wena, siwan katum siknga. Kepi zikaa dakaatang sukukaingunin. Unzingge sangabamdane yapii aanggaman dua kake nangaakan natake aminu kuupbamda noman taknga dua tawakaing. Unzing miamunda buyambam siknga singgak binga.
PSA 82:6 Nata anzing yanikum, Ginu aminu tupan siknga apa apa anutu binga yuaing. ‘Ginu Anutu enane siknga yuak kapatane waaknga.’
PSA 82:7 Siwan ngana ginda aminda akungwakaing binga kumning. Siwan gindane kayuk yutnanga akngasa wena asiwik. Unzing king tapa apatane kayuk yutnanga aknganata wena sining binga.”
PSA 82:8 Anutu, gata enake apu aminu kepna kepna yuaingu kayuke usanziyo. Unzing waaminu kuupbam gikanekan.
PSA 83:1 Anutu, ga genda dua umuke kuma yuwim. Ga moo ma pukuyuke yuwim. Ga moo ma yuwim.
PSA 83:2 Kayo. Gatane iwandata amak kaknga tangenakainggen. Aminu gae apbitakaingga gae yamandet sikaing.
PSA 83:3 Sike waakwau akusopuke gatane aminda pasiwan mainingge yandekaing. Gata aminu waakwau kakuya katak pasinggaayak ngana iwanata unekan yuke pasiwan mainingge yakaing.
PSA 83:4 Waaminda anzing yakaing, “Ayom! Ninda Isrel nana wena aknga pasinim. Siwan aminu kunduta waaminde umanae gatu dua natapning.”
PSA 83:5 Sike waaknga tasinangge wamu takngatukan yakaing. Siwan waakwau notna notna dakngake ga ayaitakepnangge tasikaing.
PSA 83:6 Aminu wamu waaknga yakaingu wa Idom kep komune nana gatu Ismael kem komune nana gatu Moap kep komune nana gatu Itakri kep komune nana gatu
PSA 83:7 Gebal kep komune nana gatu Amon kep komune nana gatu Amelek kep komune nana gatu Filistia kep komune nana gatu you gapmandu Tair yot gapmane yuaingu ngangga notna notna dakngake gae masa gamunangge natake pasap taknga tasikaing.
PSA 83:8 Sike dongu kekeknga Siria kep komune nana kuut unekan iat gatake yuke Lotdane bapuna waakwau gatayamukaing.
PSA 83:9 Siwan gata tupa aminu keu Midian komune nana aminde tasikuyak takngakan waakwakgea tasiyo. Ngan, gata aminu Sisera gatu Jambin yangga buyambamu Kison tapane yukumayakge tasikuyak takngakan tasiyo.
PSA 83:10 Tapduu waomune gata waaminu Endor yotbam gapmane pasiwi maiwan gupna kepdakane yumdekan yuke apbukataking.
PSA 83:11 Gata amak amindane tupan tapaapa meya tupa Orep nana gatu Sep nana ngangge yamukuyak binga yamuyo. Gata tupan gwapaknga amin pasiwi umana wena Sebaat gatu Salmunaat sikumaak binga sinong.
PSA 83:12 Sike waakwakga anzing yaking, “Ninda Anututane kepna atana nisane dakngawik,” ngang yaking.
PSA 83:13 Natane Anutuna, gata kupopongga enakaing binga yanikwasiwi unda unda kunong. Gata ooi akwau got takngata puyapamapan kukaing binga unzing yanikwasiyo.
PSA 83:14 Sike katap gwenu sak kangaatang itzikgak. Siwan tawanu saknga kayaatangu katau buyambam isinggak.
PSA 83:15 Ina unzakan, gata sopa buyambam tewi epu take waakwau yawamban atdatakuning. Siwan gata got taknga tasiwi kekeknga siknga puyake pasiwan akgwautnong.
PSA 83:16 Buyambamtapa, gata aminu waakwau yaipakepi apmaakanong. Siwan ga gawananggengu atnatapning.
PSA 83:17 Nata nataau gata ayapbimbi waakwakga gae asinggan gwautning. Gata pasiwi maakawana waakwau zipi kumnong.
PSA 83:18 Nata nataau gata waaminde unzing tasiwina waaminda apme natdetning. Ga gika siknga, ga Buyambam tapa, siwan ga Anutu enane siknga yuak. Yuke kepna kepna kuupbam kakuya tasinggak ngangu natapning.
PSA 84:1 Buyambamtapa, kekekngaka bamban tapa, gatane yotdae take siknga nataat.
PSA 84:2 Nata une siknga yuwitde musip gwaang siknga nataat. Nata natdetdetnaatang gae yotdane asiknga yutnangge nataat. Siwan gupma san gatu natdetdetna kuupbam ngangga gae apbakngake kap tainggat. Anutu kayuk yuwaak kapae.
PSA 84:3 Buyambam tapa, ga kekekngaka bamban tapa, ga natane King siwan ga natane Anutuna. Sike kwaiu mateknga gwegwensimu gatane altakane yotna wesim mitake musia peaing.
PSA 84:4 Sike aminu gatane yotdane yuaingu, waaminu musip gwaang siknga nataaing. Ngan, waaminda asinggan kap taike umanda yatangenakaing.
PSA 84:5 Mamin amindaka gatane kekeknga akngaka take tawanu Saion dakane siknga kopnangge take siknga nataaingu, waaminda asinggan baknganing.
PSA 84:6 Undang kopnangge kosika ama keu sangana wena gapmekan komune kukaing kopatangu, yangga gapma kwaapzang. Ge sopa tembana tawanu yangga gapma wa daka daka atdotakakokaing.
PSA 84:7 Sike waakwau kepi akuyuk kekeknga pakaing. Kekeknga pake Saion kunangge kuku aminu kuupbamdane Anutuna une yuwawan kaning.
PSA 84:8 Anutu, Buyambam tapa, ga Anutu kekekngaka bamban tapa, natane tumuk wamae natapso. Ga Jekopdane Anutuna, maak gwaang pake natane wamu natapso.
PSA 84:9 Buyambam tapa, gata tewi king kapa dakngawan gata ie take siknga tasingamuyo. Kingu waapata ninu pakotnake kakuya katak siknga pasinggak. Unzing tiunggu sasanda amak aminu amak tapduk pakotnakaing binga. Gata ie take tasingamuyo.
PSA 84:10 Sike nata tapduu gwendukan siknga yotdane yuwiu, wa you gapmandune yutnanga aknga tapduu 1,000-nu asiknga yapbimbik. Na Anutunatane yotna gwendane gwambok gwaune yutnangge nataat. Sike wai amindane yotnane yutnanggengu apbitanggat.
PSA 84:11 Dasingge, Buyambamtapa ninde nindukuya tasike kakaa nimunggak kapanin. Ita musip kwikwik natanimuke umaninu kopsa nimunggak. Sike sanga take kundu aminu noman sukukaing amindenu Buyambam tapata yamunangge dua kotnanggak.
PSA 84:12 Anutu, kekekngaka bamban tapa, aminu gae banip sikaingu waaminu asinggan baknganing.
PSA 85:1 Buyambam tapa, gata aminu gikane kepba komune yukingge musipba kwikwiknga natayamukuyak. Ngan, ninu Jakopdane donga gata gatu gatanimi take yukumang.
PSA 85:2 Gata gikane amindabamu yuainggane waiakngana sandeyamukuyak. Ngan, gata gutonga tasikingu sandeyamukuyak.
PSA 85:3 Gata gatane musiptou tekuyak. Siakan, gata musiptou atnatayamukuyak ngana apmanu wena.
PSA 85:4 Anutu, ga nin pakuyak kapanin. Apmanu ninu gikae ninipakapso. Gata kaanga ma natanimim.
PSA 85:5 Gata kaanga ninde asinggan natanimuya? Kaanga ninde natanimunggaak kaknga wena dua siwik, ba?
PSA 85:6 Gata nindane kayuk yutnanga aknga gatuka tapi kekekayok. Siwana ninu gikane amindabamda apbakngake umanda yatangenatnim.
PSA 85:7 Buyambam tapa, gata ninde take asinggan natanimunggayak kakngaka yeutnimi kanim. Yeutnimi kana gata ninu papi take yutnim.
PSA 85:8 Nata maaknga tewa kuwan Anutu Buyambam tapata wamu dasingga yawikge maak papit. Ita musip kwikwik niman ninu itane aminda take yutnimde yanggak. Unzing waiaknga tupa tasikumang katang gatu dua kunanun.
PSA 85:9 Siakan siknga, ita amin ie mun puke gatu ie banip tawakaingu apanangge gwa tandaknganggak. Tandakngake tasike papan kuupbamda kawa nindane kep komune itane umana buyambam siwik.
PSA 85:10 Tapduu waomunea aminda notnaapae take natayamuke ie take akngakan pasiyamuning. Siwana musip kwikwik takngane unekan noman gan yutning.
PSA 85:11 Keu andakane yuyuuk kepi noman taknga tawanimu, kepi noman tawanggak kapa yekaune yuak kapata pakepusa nindupik.
PSA 85:12 Sike Buyambam tapata gatanimuwawan yutnim kopatangu sanga ninda tasinimu takekan siwik. Siwan kepminu nanamu kwaapzang aatning.
PSA 85:13 Buyambam tapata amin pasiwan kepi noman taknga tawaningu wa kepi ita apnanga taknga tandakngangamuning.
PSA 86:1 Buyambam tapa, na kekekngana wena, ge nata nina gatangamunanga dua. Unzingge gata natane tumuk wamu take natangamuke gatangamuyo.
PSA 86:2 Sike na gatuka tapi na dua kupit. Dasingge? Nata gatane puya aminda yuke gae baniu asinggat. Sike nata ga akgawanggat.
PSA 86:3 Anutu, ga natane Anutuna. Nata tapdukbamu kwakngaom gatu zikaane ngangu nata gae tumuk wamu ganinggat. Ganiwawa gata musip kwikwiu nae natangamuyo.
PSA 86:4 Buyambam tapa, na gikane puya amindae musipma tasiwi apbakngayok. Dasingge? Na tumuk wamu gaekan yanggat.
PSA 86:5 Buyambam tapa, ga amindatdat binga yuayak, ge gata nindane waiaknganinu asandekgaak kapanin. Sike gata aminu gae tumuk wam ganikaingge asiknga baknganggayak.
PSA 86:6 Buyambam tapa, nata gae tumuk wam ganiwa gata maak gwaang pake natane tumuk wamu natapso. Gata na akgatangamiyakge natake yanggatde tumuk wama natapso.
PSA 86:7 Tapduu nata gae yanggat komune gata akgatangamunggayak. Unzingge, tapdukbamu nata meya pakengu nata gae tumuk wamu ayanggat.
PSA 86:8 Buyambam tapa, anutu ga binga tapatu dua yuak. Gata anutu kuupbam ayapbikgayak. Siwan aminu tapatuta puya gata tasinggayak binga dua tasiwik.
PSA 86:9 Sike aminu dongu kuupbamu gata pasikuyau waaminda kuke gae munu puke gatane umanda yatangenatning. Yatangenawawa umandaa kopsa siknga siwik.
PSA 86:10 Dasingge? Ga kekekngaka bamban tapa. Siwan gata gikatakan duya takngatu takngatu gwaam gwaamu tasinggayak. Ga Anutu siknga awia tapatukan.
PSA 86:11 Buyambam tapa, gata sanga nata tasiwitde take nataayak kaknga na katak siknga nanindamumso. Nanindamuwawi nata asingganu gae banip takngakan tawambit. Gata natane musipma tangenawi natdetdeu takngaaya dua siknga natapit. Dua natake nata gae natanggamatake gatane puya aknga asinggan tasiwit.
PSA 86:12 Anutu, natane Buyambam tapana, nata musip gwaangu buyambam siknga natanggamunggat. Natake nata gatane umanda kopsa yuak kaknga asinggan asinggan yatangenawit.
PSA 86:13 Dasingge? Asingganu gata nae take siknga natangamunggayak. Natangamuke gata akumnanga akngane sandeke tapi nata aminu gwa kumbingga yuaing komune dua pukuwit.
PSA 86:14 Anutu, apmanu yamandet aminu kunduta apu na nutnangge tasikaing. Sike wai aminu waakwau musip kwikwiu dua natake poot tasike na nuwa kupitde yakaing. Sike waaminu gatane wamu dua tawake gae wamu asandekaing.
PSA 86:15 Siwan ngana Buyambamtapa, butaya buyambam siknga gata natangamunggayak. Unzingge gata kaanga zet dua naninggayak. Sike gata nae gwaam siknga natangamunggayak. Natake gikane wamu takngatu takngatu yanggau atawanggayak.
PSA 86:16 Gata nae apuke butaya natangamuyo. Ngan, na puya aminda unzing mingata puya aminda tasikut binga tasinggatde kekekangamuke gatuka tapso.
PSA 86:17 Buyambam tapa, nata sanga gata musipbaatangu butaya natangamunggayak kakngatane tuwang yeikngamuyo. Yeikngami natane iwanata kake gata gatangamuke tapi kekekanggat ngang natapning. Natake waaminda inane waiaknganae asiknga maakaning.
PSA 87:1 Anututa yotna inane gapma tawanu inane dakane tasike tekut.
PSA 87:2 Buyambam tapata you gapmandu gapmandu Jakopde donga une yuaingge take nataak ngana Jerusalemdenu take siknga nataak.
PSA 87:3 Sike Anututane yotbam gapmane aminu yuaingu, ginda anzing natapnong. Anututa puya noma nomana gikatang pasinggakgen.
PSA 87:4 Siwan Anututa anzing yakut, “Nata aminu nae wam tawakaingunin matawit tapduk kopatangu, nata Isip nanaat gatu Bambilon nanaatdane umana matawit. Siwana nata Filistia nanaat gatu Tair nanaat gatu Itiopia nanaat ngangge umana matawit. Siwan anzing yawit, ‘Iyaaya Zaionkat nana,’” ngang yawit.
PSA 87:5 Siakan. Nata Sionde anzing yawit, “Aminu tapatu kake aapa komdune nana pakapuyuke ane nana dakngakut. Sike aminu tapatu kake, ‘Aapa kuut wanggapmane nana,’ ngang yawit. Siwana Anutu enane sikngaapata, you wanggapma gatu ina tangenake tasiwan kekenga siwik.”
PSA 87:6 Buyambam tapata dongu kundu kundune nana amindane umana matawik. Matake, “Aminu aapa Jerusalem nanaunin,” ngang matawik.
PSA 87:7 Sike amin Jerusalem yuaingga kap taike apbaknganing. Bakngake anzing yaning, “Jerusalem, ga sanga noma nomana ninda peyuamanggane yapii ga,” ngang yake taining.
PSA 88:1 Anutu, Buyambamtapa, ga na gatangamunggayak kapanin. Nata kwakngaom gatu zikaane kuut gata gatangamiakge yanggawanggat.
PSA 88:2 Natane tumuk wamae natapso. Na gatangamiakge yawitde maak papso.
PSA 88:3 Dasingge? Nae meya kwaapzang apan yapii waakngae kupitde wesim singgak.
PSA 88:4 Na aminu kuupbamda kumnangge dapaknga sikaing bingakan. Natane kekekngana wena. Na tuyuknga gwasit.
PSA 88:5 Sike na gwa napmambi na gwa kumbing aminkat yuamang. Na unzing aminu tapatuta aminu tapatu tanguwan kumbutna gapmaatang yuak binga. Na unzing aminu kundue asiknga botakuyak binga. Botake gatu dua gatayamunggayak binga yuat.
PSA 88:6 Gata na gapma daka amunane siknga kwaitakepu teya komune gwa mumbi pukukum. Siwan na amunane gatukande zikaa siknga kopatang yuat.
PSA 88:7 Gatane musiptok kakngata na asiknga naitakepu napmanggak. Unzing yanggabamdane sambuita binga enake usukwatapan yuat.
PSA 88:8 Siwan gata tasiwi ninane yanggatak notnata nae masa gwa namuking. Gata na sanga gawaknga tapatu binga tasiwi aminda nae asiknga bitakaing. Siwan waakngata na kaautde binga tanggaganuwan kunanga dua.
PSA 88:9 Nata meya gwaamumba kainata maiwat nata katak kananga dua singgak. Unzingge tapdukbamu gae tumuk wamu akgatangamiakge ganinggat. Ngan, nata tumuk wam yayuu kataknga tangenake ganinggat.
PSA 88:10 Gata duya takngatu gwa kumbing amin gatayamikge tasinggaak, ba? Asikaya gwa kumbing aminda enake gatane umanda ayatangenakaing?
PSA 88:11 Sike asikaya aminu gapmaatang pekaingga gae take siknga natanimunggaunin ngangu ayakaing? Sike keu wai sinanga komune yuke gata katak kayukuyak komde ayakaing, ba wena?
PSA 88:12 Sike asikaya aminu keu zikaa komune yuaingga duya takngatui pasiwawi akaaing? Siwan aminu wai sinanga komune yuaingga gatane noman takngaka akaaing, ba wena?
PSA 88:13 Buyambam tapa, nata gae akgatangamiakge ayanggawanggat. Sike tembana kuupbam tumuk wamu gae asinggan yanggat.
PSA 88:14 Siwan ngana Buyambam tapa, dasingge gata masa nae namunggayak? Dasingge siknga gata nae kusopunggayak?
PSA 88:15 Sike tupa waatdaka yukumuneta apu apmanu na toknga gwaamuke akupitde dapaknga singgak. Gata nae meya nami waaknga tasiwan kwatana tuyuknga siwan na meya buyak siknga yuat.
PSA 88:16 Buyambam tapa, gatane musiptok kakngata na gwa usukwatapbut. Gata na atnuke gatukande siknga tasiwi maikum.
PSA 88:17 Gata unzingu kwakngaom gatu zikaane ngang tasiwawi meya asinggan kaat. Siwan meya waakwau na umupbasikaingu wa unzing, yanggata paptake keu kuupbam usikwatanggak binga singgak.
PSA 88:18 Sike gata tasiwi natane dongaat gatu notna siknga apaapa ngangga gwa napmake kuking. Unzingge apmanu zikaa dakata yanggatak notna binga dakngawan yuat.
PSA 89:1 Buyambamtapa, nata kau asinggan gatane butaya wamde yanggak kaknga asinggan taiwit. Siwan asingganu nata wamu yanggaak kaknga teke gatu takngatu dua yanggayakge yakapit. Yanikapa bapuna masa masa aatningga atnatapning.
PSA 89:2 Nata yanikapmake gata ninde musip gwaangu asinggan asinggan natanimunggayakge yaniwit. Sike gatane siakan wam taknga tapatekwan binga dua singgakge yaniwit. Ngan, wamu waaknga ena kakaa komda kekeknga yuak binga yuak.
PSA 89:3 Gata anzing yakuyak, “Nata aminu tapatu gwa yawa yukut. Siwan pasap wam taknga iat yata kekekakut. Ngan, nata wamu takngatu puya amina Devitde gwa yawa kekekakut.”
PSA 89:4 Siwan nata anzing inikum, “Masande aminu gatane dongune nana aatningu kuut kingu dakngake yutning. Sike asingganu gatane dongune nana tapatu tasiwa king dakngake yuwik.”
PSA 89:5 Buyambam tapa, angela yekaune yuaingga noma nomana tasikuyakge kau taikaing. Taike ita gatane umanda yatangenakaing. Sike waakwakga kap taknga taikaingu gata siakan wam takngakan tawanggayakge taikaing.
PSA 89:6 Dasingge, Buyambam tapa, aminu yekaune tapatu ga binga tapatu wena. Siwan angela kuut unzakan, ga binga tapatu wena.
PSA 89:7 Sike angelata paut tasikengu gae akgwaukaing. Siwan angela wa kuupbamda ga takumbasike gae akgwaukaing.
PSA 89:8 Buyambam tapa, ga Anutu kekekngaka bamban tapa, aminu tapatu kekeknga buyambamu gata pake yuayak binga wena. Sike ga wamu ayanggayak takngakan asinggan tawanggayak. Ga tapatekwana kaya dua daknganggayak.
PSA 89:9 Siwan gata yanggabamu kekekngana kaya gwenu kayuak. Sike sambuita enawanu gata yawi kuma siknga yuak.
PSA 89:10 Gata Isip nana amindane kekekngana kuupbam gwa zipbuke pasiwi maiking. Siwan gikane kekeknga aknganeta iwanda gwa yapbike yanikwasiwi datakuking.
PSA 89:11 Sike yekapat gatu kepdakaat ngangu gikanekan. Gata kepdaka tasike sangabamu undang yuaing kaya pasike pekuyak.
PSA 89:12 Siwan gatakan keu kuupbam pasike tekuyak. Tawanu Tabor dakaat gatu Hermon dakaat ngang aminda taikaing binga umandae apbakngake gae kap taikamayak.
PSA 89:13 Gatane kekekngaka buyambam siknga. Kekekngaka inata siknga kundu yuak.
PSA 89:14 Gata king kapa yuke aminu kuupbam noman takngane kayuwayak. Sike aminu wam yot gwene usanzikgayak kaya noman gan tasinggayak. Gata amin kuupbamde take natayamuke wamu ayanggayak takngakan asinggan tawake ga tapatekwan ba dua singgayak.
PSA 89:15 Sike aminbamda umanda yatangenakaingu apbaknganing. Aminbamda gae wesim kuke sukukaingu wa unzing kakaa akngane sukukaing. Siwan waaminda apbaknganing.
PSA 89:16 Sike waaminu umanda kopsa akngae kwakngaom gatu zikaane ngangu apbakngake yatangenakaing. Ngan, gata puya noman nomana akngakan ie tasinggayakge kan natanggamatake apbakngakaing.
PSA 89:17 Dasingge, gata ninu kekekanimi umaninda kopsa aknga siwan ninda asiknga bakngakamang. Ngan, gata musip kwikwik natanimuke gatanimuwawi ninda kekekake amak kaknga yapikamang.
PSA 89:18 Siakan. Gata gika nindane kuyanin yuak kapa yawi yuak. Ngan, ga ninu Isrel amindane Anutunin, gata king kapa ninde nimunangge yawi yuak.
PSA 89:19 Tupa siknga gata mia takngatu puya aminda sikngae yamukuyak. Yamuke anzing yanikuyak, “Nata amak aminu tupan sikngaapa gwa yawa yukut. Siwan nata kinggane kupna gwapakngine gwapungamukum. Nata aminbamde banakan take waapa tewa king kapa yuak.
PSA 89:20 Ngan, nata Deviu king kapa dakngawikge wel gwapakngane tukwamba gindane king kapasa dakngakut. Natane puya amin tapanan.
PSA 89:21 Unzingge natane kekekngana iat gatake asinggan yuwik. Sike nata kekekangama kekeknga yuwik.
PSA 89:22 Sike iwanata amak tasike i yapbitnanga dua. Aho, wai aminda dua tasiwa maiwik.
PSA 89:23 Siwan nata itane iwana yainggamumbit. Ngan, aminu waakwau ie apbitaningu atzipa kumning.
PSA 89:24 Sike ie nata take natangamuke iat gatake asinggan yutzim. Sike kaawa iat iwanaat amak tasiwan kakengu nata tasiwa iwana ayapbimbik.
PSA 89:25 Siwan kepna imiu yanggabamu Mediterenian gweneta kuku yangga buyambam tapatu Yufretis ngang inikaingune sandewik.
PSA 89:26 Sike ita nae naninggamatake anzing yawik, ‘Ga natane nana. Siwan natane Buyambam tapana. Gata nae kakuya tasike asinggan gatangamunggayak,’ ngang yawik.
PSA 89:27 Siwana nata yawa waaknga tupan tapa dakngake kingu kepna kepna yuaingu kuupbam yapbimbik.
PSA 89:28 Sike nata ie take siknga asinggan natangamit. Siwana nata pasap wamu takngatu ie tasiwa pasap taknga nit katang asinggan asinggan yuwik.
PSA 89:29 Ngan, aminu itane dongane nana tapatuta kingu asinggan dakngawik. Siwan itane dongane nana kingu waapata Isrel nana aminu asinggan kayuwik. Unzing sanga ena kakaa komune yuaingu asinggan yuaing binga.
PSA 89:30 Siwan ngana itane bapuna masan aatningga natane mama wama ayama sandeke,
PSA 89:31 natane noman taknga dua ba tawaning, ba natane wamae masa imuke mama wama dua ba tawaning.
PSA 89:32 Ayok! Nata wai aknganae natapa kuwan nata meya yake yamit. Siwan nata gutongana tasikaingge natake atzipmake toknga yamit.
PSA 89:33 Siwan ngana tapduu waomune Devitde dongge take siknga natangamit, tendeknga wena. Sike natanu i dua teke, wamu ie yawa kekekakut taknga dua tewit.
PSA 89:34 Sike nata pasap wam taknga iat tasikumau dua zipbuwit. Siwan tapatekwan wamu takngatu wamaatangu genaneta dua yawit.
PSA 89:35 Na Anutu noman takngakan tasinggat tapanin. Na waakngae natapa siwan wamu waaknga yawa kekekakut. Nata sipdukan yawa wamu waaknga asinggan asinggan yuwik. Wamu kekeknga waaknga anzing, nata Deviu kemu dua iniwit.
PSA 89:36 Sike wamu inikumu itane bapuna wena dua sining. Waakwau asinggan yutning. Siwan gunzitda yuak binga itane dongata aminbamdane tupan tapaapa dakngake komdubam siknga unzing kayutning.
PSA 89:37 Sike waakwaau asinggan yutning. Unzing yakau kakaa nimunggakga aminbam yeuyaman natane wama siakan gan siwikgen siking.”
PSA 89:38 Siwan ngana apmanu kingu gika yawi yukut tapae kaanga natangamunggayak. Kaanga natangamuke gata i gwa teke masa imunggayak.
PSA 89:39 Sike wamu takngatu puya amindaat yawat kekekakut taknga gwa sandekgayak. Sandeke kinggane kup daka gwapungamukuyau gwa sandeke kepdakane mumbi wasap sikut.
PSA 89:40 Gata itane damanu yotbam gapmae tasibasikuu gwa zipbuke yotna kekeknga gwegwenu apasiwi maiking.
PSA 89:41 Sike aminbamde wagwak saak kuke sangana kakengu kukwae apakaingunin. Kukwae pake notna iat wesim yuaingga sapdut wamu inikaing.
PSA 89:42 Ngan, gata itane iwana akapewi amak tasike ayapbiking. Siwan gata pasiwi musip gwaang natapbing.
PSA 89:43 Gata tasiwi itane amak amina dua kekekake ambing. Siwan amak tasikaing ngana gata dua gatangami tiuukake apimakut.
PSA 89:44 Gata umana kopsa king ngang iniking kaknga sandewi umana waaknga gatu dua yuak. Dua yuke aminu gatu dua kayuak.
PSA 89:45 Gata tasiwi aminuake zet siknga siwan maaknga buyambam takngata usukwatapbut.
PSA 89:46 Buyambam tapa, ga ninde tape mamayasim kusopuya? Ba asinggan? Gatane musiptok taknga katap gwen binga tokngaake tapduknga dasing yuwik?
PSA 89:47 Buyambam tapa, butaya gata ninu tapduu dapaknga yuamang aminde natapso. Gata ninu tumukuyak. Siwan ngana ninu kuupbam akungwake asopunim.
PSA 89:48 Maminda asinggan asinggan yuke dua kupik? Maminda kekeknga yuke aminda kupan kwaipeaing komune dua kuwik? Unzing binga aminu tapatu wena. Wena siknga.
PSA 89:49 Buyambam tapa, sike dasing? Apmanu ninde take dua nataayak ba? Sike wamu kundu na Devitde musipba kwikwiknga asinggan natangamiyakge yawi kekekakuu dasing?
PSA 89:50 Buyambam tapa, gata na puya amin tapakae natanggamatayo. Aminda nae sapdut wam nanikaing. Sike na waiaknga aknga katum aminu kunduta nanikaingunin gwaamuke yuat.
PSA 89:51 Buyambam tapa, gata na king kapa dakngake yuwitde napmakuyak. Siwan ngana natane iwanata nae wamu waiaknga aknga nanikaing. Sike keu kuupbam nata kunggat komune wamu waiaknga aknga atnanikaing.
PSA 89:52 Ninda Buyambam tapatane umana asinggan asinggan yatangenatnim.
PSA 90:1 Buyambamtapa, ga nindane yotnin siknga binga yuayak. Ge tupa nindane bapunin kaya gaat gatake yuking. Ge apmanu nikaya unzakan yuamang.
PSA 90:2 Siwan Anutu, ga asinggan asinggan yuayak. Tupa yukuyak ngang masan kaa ayuya. Sike tapduu tawanu kuupbam wena siwan gata sangabamu kepdakane nana dua yawi yuking komune ga ayukuyak.
PSA 90:3 Gata amin pasiwi akungwake gatu keek dakngakaing. Siwan gata anzing yakuyak, “Ginu aminu keune nana akungwake gatusa keek daknganong,” ngang yakuyak.
PSA 90:4 Sike nindane natdetdetdanine nataamangu, nakanu 1,000-nu kwaapzang siknga ngana gata kawi tapduu gwendukan binga singgak. Siwan tapduu wa zeetgaman akuwan wena singgak. Unzing kwep kwakake gwanzokut binga siwan gatu amak aminda iwanae gwauke zikaane tapduu dapaknga wamayuke kuwawan notna tapatuta ie tangge apunggak binga singgak.
PSA 90:5 Gata tasiwi aminu kuupbamda kungwakaing. Kungwake wena sikaing.
PSA 90:6 Wa unzing, zongazonga tembana kana kayuk siknga siwan tapuya kana zitziknga siknga sikaing binga singgak. Siwan ngana bangee kananu akupiakaing.
PSA 90:7 Gata ninde kaanga natanimunggayakge ninu pasiwi maikamang. Gata ninde musipba toknga natanimunggayakge ninu gae asiknga gwaukamang.
PSA 90:8 Gata nindane waiaknganinu kuupbam akaayak. Ngan, waiaknga ninda akusopuke tasikamangu wa gata aanggaman peke akakapmanggayak.
PSA 90:9 Kaanga gata nataayak kaknga tapduu ninda keune yutnanga komu atzipmandaknganggayak. Siakan siknga, nindane tapduu zeetgaman wena sikaing. Siwan ninda meya buyak yuke waung kaknga sipdukan yana konggak binga.
PSA 90:10 Sike ninda nakanu 70 ngang gan kayuk yutnanga. Sike ninda kekeknganinu kaya gamu nakanu 80 ayutnam. Siwan ngana nakanu kuupbamu wa yuamangu ninda puya tokngabam tasike meyakan kaamang. Kaatna nakanu wa kuupbam zeetgaman wena siwa nikaya kuut akumna wena singgak.
PSA 90:11 Siwan mamin amin tapata gata musiptok siknga natake sanga kekeknga tasinggayakge natapan kakaa siwik? Wena. Dasingge? Gatane musiptou toknga siknga singgak. Siwan aminda gae asiknga gwautnanga aknga buyambam siknga siwik.
PSA 90:12 Gata ninu katak ninindamumbinu ninda tapduu kepdakane mamaya yutnanga dua ngangu apme natapnim. Unzing siwanu ninda sanga waakngae natapna kakaa siwik.
PSA 90:13 Buyambam tapa, tapduu datdasing gatane musiptok kakngaka yuwik? Gata musiptok kakngaka teke ninu gikane puya amindae butaya natanimuyo.
PSA 90:14 Gata ninde butaya siknga asinggan nataayak. Siwan ninu gata butaya wa natanimunggayak kakngata tembana bamu banimuwawan yutnim. Unzingge asinggan ninu kayuk yuamangge ninda apbakngake musip gwaang natapnim.
PSA 90:15 Tupa gata tapdukbamu meya ninde atnimukuyak. Unzingge gata apmanu apbakngananga aknga nimuyo. Unzing nakanu kwaapzangu wai yukumangge tangge.
PSA 90:16 Gata gikane puya pasinggayak kaknga ninu gikane puya amindae yeitnimuyo. Gatane kekeknga noman akngaka nindane bapuninde yeuyamuyo.
PSA 90:17 Buyambamtapa, ga nindane Anutunin. Gata ninde musip kwikwik natanimuke ninde take pasiyo. Siwan sanga kuupbamu ninda tasinimu takekan siwik. Siakan siknga. Gata sangabamu ninda tasinimu tapi kekekawan takekan yutning.
PSA 91:1 Aminu tapatuta Anutu enane siknga yuak kapae kuwan, Anututa kakuya tasiwikge. Siwan Anutu kekekngana bamban tapae inengan siknga yuwawan Anututa usikwatapik.
PSA 91:2 Siwan aminu waapata Buyambamtapa anzing iniwik, “Gata na takotnake na gata katak nanduyuwayak. Ga natane Anutuna. Nata gae baniu asinggat.”
PSA 91:3 Siakan siknga, Anututa ga katak ganduyuwanu aminu kunduta gutnangge natake bungep pasining ngana ga dua tasiwan maiya. Siwan ga atakotnawanu maiu wai akwakga ga dua taning.
PSA 91:4 Ita ga katak usikwatapik. Unzing taau minga gwenda mateknga piata usikwatapmanggak binga. Ngan, ina unzakan ga Buyambam tapatane pia sayatde gepbiatang kusopuwi ita ga ganduyuwik. Sike i akganduyutnanga akngae kemu dua yanggak. Unzingge ga Buyambam tapaat yutzon. Unzing aminda amakgane tiunggu sande maseatang kusopunggak binga.
PSA 91:5 Sike zikaanen, sanga wai tapatue dua gwaumza. Siwan kwakngaomun, sanga takngatuta zeetgaman apu ga tasiwan maiwiakge dua gwaumza.
PSA 91:6 Sike gatu zikaane maiu buyambamu takngatuta apan kakengu dua gwaumza. Ina unzakan, sanga wai takngatuta gunzitbam tapane gata maiwiakge apan kakengu dua gwaumza.
PSA 91:7 Sike amak aminda aminu 1,000-nu zipa gae wesim kumning. Siwan 10,000-da katakga siapa saak kumning. Kupanu undanga. Sanga kumnanga aknga gaenganu dua apik.
PSA 91:8 Unzingge dua gwauke gika kaawinu Anututa waiaknga wai aminda tasikingge yake meya ayamik.
PSA 91:9 Ga Anutue kuke sanga waiakngae akusopunggayaunin, siwan Anutu enane sikngaapata ga ganduyuak kapanin.
PSA 91:10 Ngan, ita ga tapan takekan yuwi sanga waita gae apnanga dua. Siwan maiu buyambamu takngatu gae yotdane wesimu kunanga dua.
PSA 91:11 Dasingge, Buyambam tapata puya angelanae yaman kepi kuupbamu sukuwiyau ita gandutning.
PSA 91:12 Siwan angelata katakngata ga tapa kenzomba sup gwene dua tepsa.
PSA 91:13 Siwana gata kaap zongu laion gatu gomok waiaknga ngang yainggamumza. Ngan, kaap zongu gumbanga laion gwekat gomou buyambamu waiakngaat yaipapaakusiwi dua gasisan.
PSA 91:14 Anututa anzing yanggak, “Nata aminu nae siknga nataaingu apapit. Ngan, aminu nae katak siknga nataaingu nata katak siknga kayuwit.
PSA 91:15 Sike tapduu aminda nae tumuk wam yaningu nata atnatayamit. Sike meya takngatu waaminde apanu na iat yutnim. Iat gatake yuke waaminu apake umana kopsa yamit.
PSA 91:16 Siwana nata kayuk yutnanga aknga yamuke isapakopa tapduu mamaya yutning. Yuwawa nata gatuna papa naat gatake yutnim.”
PSA 92:1 Buyambamtapa, ga Anutu enane sikngaapa. Nata kap taike umanda yatangenawitde natapa take siknga singgak.
PSA 92:2 Sike tembana tapduu kuupbam gata nae siknga nataayakge natake umanda yatangenawitde natapa take singgak. Siwan zikaane kuupbamu asinggan nanduyuwayak kakngae yakapitde natapa take singgak.
PSA 92:3 Nata gita daka tanguwa gakngae take yawan
PSA 92:4 Dasingge? Gata nae puya kekeknga tasikuyakge natapa kuwan nata musip gwaang siknga natakengu nata apbakngake kap gae tainggamunggat.
PSA 92:5 Buyambamtapa, gata puya buyambam siknga pasinggayak. Gatane natdetdetda buyambam siknga.
PSA 92:6 Sike aminu natdetdetna wena amindanu wai aminu zonga zonga taketa akopning binga ngangu natdetnanga dua.
PSA 92:7 Ngan, waiaknga tasikaing aminu sangabam pake take yutning. Siwan ngana gata waaminu gatukande pasiwi maining.
PSA 92:8 Dasingge, Buyambamtapa, gika siknga king kapa asinggan asinggan yuayak.
PSA 92:9 Ninu atnataamang. Aminu gatane iwanda dakngakaingu waakwau akumning. Ngan, waiaknga tasikaing aminu kuupbamu gata ayaipakepu peya.
PSA 92:10 Siwan ngana gata nae kekeknga buyambam namukuyak. Unzing kekeknga ikwawa gamanu wawi gwendane binga. Gata nae take tasikuyakge na asiknga baknganggat.
PSA 92:11 Sike natane iwana pasiwi maiwanu kainata gwa kakum. Siwan gata iwana yapbimbi datakuke kwanamu sikingu maakngata atnatapbum.
PSA 92:12 Siwan ngana amin noman aminu take siknga, zanggwa dakandakata buya buyambam aakaing binga yutning. Unzing katau buyambam sida ngang yanikaingu tawanu Lebanon komune nana dakandakata buyambam siknga takakaing binga.
PSA 92:13 Noman aminu waakwau Buyambam tapatane yot gwekatang katau gwa kwaiwan yuking binga yutning. Katau wa dakandaka Anutunindane yotnaatangu take siknga akokaing.
PSA 92:14 Sike katau wa dakandaka damana gwa sike ngana tapuya awasike yuaing. Katau waakwau kekeknga yuke dua kupiakaing. Itane tatakngi gwegwenga asinggan yuke buyana aatning. Unzing, aminu noman aminu aminuake sining ngana kekekake yutning.
PSA 92:15 Kekekake yuke kepi waakngata aminu anzing yeuyamuning, “Buyambamtapa noman siknga. Na gatangamunangge akekekangamunggak. Itane gutongana wena. Wena siknga.”
PSA 93:1 Buyambamtapata king kapa yuak. Aminu kuupbam kayuak. Itane umana kopsa siknga aknga tauk ina usikwatanggak binga. Ngan, kekekngana buyambam siknga. Ita keu andaka tasiwan kekeknga siknga tangine yuak.
PSA 93:2 Buyambamtapa, tapduu sangabamu dua aake yuking komune ga ayukuyak. Ga asinggan asinggan yuayak. Yuke King kapa asinggan asinggan yuayak.
PSA 93:3 Buyambamtapa, yanggabam gwenu amunandang siknga gakngau kumzang gakngau yanggak. Kekeknga siknga yanggak.
PSA 93:4 Yanggabam gwenda gakngau yanggau wa mateknga dua. Siwan yanggabam gwendane sambuya enake gakngae kekeknga taku tangukgak. Siwan ngana gatane kekekngaka buyambam siknga.
PSA 93:5 Sike gatane mama wamba kuupbam asinggan asinggan yuaing. Siakan siknga. Buyambamtapa, gatane yotda siknga asinggan asinggan yuak.
PSA 94:1 Buyambamtapa, ga Anutu, gae waiaknga tasikaing aminu meya yake ayamunggayak. Sike apmanu gata kaanga nataayak kakngaka waaminde yeuyamuyo.
PSA 94:2 Gata tasiwi amin kuupbamda gatane kaikane wam yaning. Gata apman apuke yamandet aminda waiaknga tasikaingge yake meya yamuyo.
PSA 94:3 Tapduu mamaya yuak ge wai aminu yuyukngae bakngake yutning? Buyambamtapa, tapduknga mamaya yuak, ba? Tapduu datdasing binga yuakge yamandet aminu waiaknga tasikaingge baknganing?
PSA 94:4 Tapduu datdasing binga yuakge wai aminda waiaknga tasiningge yamandet dakngake bakaning?
PSA 94:5 Buyambamtapa, gatane amindabamu waaminda apasiwan maiwan meya buyambam yamukaingunin.
PSA 94:6 Sike waaminda maya apna gwa kumbingunin zipan kungwakaing. Zipan kupan waatdaka minganana gwa kumbingu kuut zipan kungwakaing. Zipan kupan aminu maa nana ngana pakapu inengan yuaingu iat kuut zipan kungwaikaing.
PSA 94:7 Siwan anzing yakaing, “Buyambam tapata ninu dua ninduak. Anutu Isrel amindane apata sanga ninda tasikamang kaknga kake ngana undanga ngang nataak,” ngang yakaing.
PSA 94:8 Ginu natane aminabam, dasingge ginda kepi yumdekan taknga unzingu tasikaing? Ginu katum amin, zaapduk ngaya natdetning?
PSA 94:9 Anututa nindane maaknginu pasikut. Unzingge asikaya ita dua natapik, ba? Siwan Anututa nindane kaininu pasikut. Asikaya ina dua kaak, ba?
PSA 94:10 Ita amin kuupbam kayuak. Ayok! Asikaya ita waakwau dua papanomataning, ba? Siwan waapa aminu kuupbamdane yanindamumsa apa. Asikaya i natdetdetna wena ba?
PSA 94:11 Buyambam tapatanu aminu kuupbamdane natdetdetna atnataak. Sanga kuupbam ita tasinangge natapningu buya dua aawik ngang atnataak.
PSA 94:12 Buyambamtapa, gata aminu tapatu gikane mama wamba inindamumbinu aminu waapata apbakngayok.
PSA 94:13 Gata unzingu wa tasinggaau wa ie yuwatakak imunggak. Imi waapa meya kundu dua kawik. Siwawan wai aminu kungwake kupsa aminda yuaing komune kuning.
PSA 94:14 Dasingge, Buyambam tapata inane aminabamu dua kapewik. Siakande siknga, ita aminabamu masa dua yamik.
PSA 94:15 Sike masande noman aminda wam yaning kopatangu yawan kuku noman gan siwik. Siwan noman aminda take ngang natake wamu nomanu waaknga tawaning.
PSA 94:16 Maminda enake na gatangamuke wai aminu yaipakepu pewik? Maminda enake na gatangaman gutonga tasia aminda nutnangge natake tasiwa maiwik?
PSA 94:17 Sike Anututa dua gatangamukut gamu, asikaya kupsa aminda keu yuaing kopatang na zaatgaman gwa pewam.
PSA 94:18 Na anzing yakum, “Kepina saweknga. Na gwa pimananggenggat,” ngang yakum. Siwan ngana wena. Buyambam tapa, gata butaya siknga natangamuke na tapi nata waiakngaatang dua pimakum.
PSA 94:19 Sike na musipmaatang meya natake sangabamde natanggamatanggat kopatangu gata tasiwi musipma kwikwiknga yuwan apbaknganggat.
PSA 94:20 Ga gwapaknga aminu kawi wai siwanu puya iat dua gatake pasikaing. Waakwakga mama wamu ina peke yawan kekekawan aminu waiaknga tasiningge yanikaing.
PSA 94:21 Sike waakwau unekan yuke noman amin pasiwan mainingge yandekaing. Siwan gutonga dua tasikaing ngana temapa yanikaing. Yanike zipa kumninggen.
PSA 94:22 Siwan ngana Buyambamtapa, na gatangamunangge asiknga kekekanggaunin. Ngan, Anutunata na kakuya take tasiwawan ie kuke kusopuke yuat.
PSA 94:23 Siwan nana waakwau waiaknga kwaapzang tasiking. Unzingge yake gutonganae meya apme yamik. Ita waiaknganae natapan kuwan ita apme zipan kumning. Unin, Anutu, Buyambam tapaninda, gatukande siknga pasiwan maining.
PSA 95:1 Ginu apnong! Ninda apbakngake kau Buyambam tapatane umana yatangenatnangge taina. Ninda Anutu kekeknga siknga apata ninu gatu pakutde natake ninda kap taike ie ainggamatake apbaknganim.
PSA 95:2 Ninda ie inengan kuke musip gwaang kaknga inina. Ninda kau kundu taike bakngake itane umana yatangenatna.
PSA 95:3 Dasingge? Buyambamtapa i Anutu kekeknga siknga apa. Ita Kingu kekekngaapa yuke ita anutu pupuknga kuupbam ayapbike enane siknga yuak.
PSA 95:4 Ita kepna kepna kuupbam kayuak. Amunandang siknga gapmene yuainguneta kuku gatu tawanune enane siknga yuaingu kuut kayuak.
PSA 95:5 Ita ina siknga kepdakaat gatu yanggabam gwekat pasike pekut. Unzingge ina kayuak.
PSA 95:6 Ginu apnong. Ninda gwapaknginu gwetake inimbakngana, Buyambam tapata ninu pasikutde. Ayok, inimbakngake ninda ie wesim kuke munu putna.
PSA 95:7 Dasingge? Anutu i ninu kuupbamdane apa. Ita ina ninu kakuya tasike ninu sipsip binga ninduyuak. Ninduyuke ita ninde sanga kuupbam atnimunggak. Unzingge ginda ie wam natapnong.
PSA 95:8 Buyambam tapata anzing yakut, “Ginda musipza kekeknga ma wamakusiwam. Unzing tupa bapusaat Moseskat keu komdu umana Meriba gatu Masa ngang inikaing komu sanga wena kepban komune tasiking bingan.
PSA 95:9 Waaminda keu waomune yuke puya nata kekeknga pasikumu kakapbing ngana na tanzit tasiwa sikut.
PSA 95:10 Tanzit tasiwawa nata musipmaiu waaminde natayuwawa kuku nakanu 40 sikut. Unzingge nata anzing yakum, ‘Musipnaatangu nae dua nataing. Asingganu kepi nata teyamukum tapa ateaing.’
PSA 95:11 Unzingge nata musiptok natake waaminu nata anzing yanikum, ‘Ginda you ayuwan takananga komu ginde damunangge natat ngana dua dama koke yuwatakawik,’ ngang yakum.”
PSA 96:1 Ginda kau kayuk kaknga aknga Buyambam tapae tainong. Ginu kepna kepna nana aminu kuupbam sikngata Buyambam tapae kau tainong.
PSA 96:2 Kau Buyambam tapae tainong. Taike itane umana yatangenatnong! Tapduk tapduk ginda aminbamu anzing yanikapnong. Buyambam tapata inane aminu panggakge yanikapnong.
PSA 96:3 Ginda itane umana kopsa akngae aminu kepna kepna nana dongu kuupbamde yanikapnong. Yanikapmake puya gwaang gwangu buyambamu ita tasinggakge yanikapnong.
PSA 96:4 Dasingge? Buyambamtapa umana kopsaapa. Ge ninda umana kumzang siknga yatangenatnim. Sike anutu pupuknga wa Buyambamtapa binga dua. Unzingge ninda ie gepbiatang koyutnim.
PSA 96:5 Dasingge? Anutu pupuknga aminu dongu kundutane, wa Anutu siknga dua. Siwan ngana Buyambamtapa sangabamu ena kakaa komune nana pasike pekut tapa unin.
PSA 96:6 Buyambam tapata inane yotnane yuke umana kopsa siknga king kapa yuak. Siwan ita kekeknga akngatane toiknga. Siwan sanga gwaamgwaamde toiknga.
PSA 96:7 Ginu aminu kuupbamda itane umana kopsa akngaat gatu kekeknganaat ngangge apbakngake yatangenatnong.
PSA 96:8 Ginda Buyambam tapatane umana kopsa akngae yatangenatnong. Sanga kundu ie imunangge pake yotnane kopnong.
PSA 96:9 Ginu aminu kuupbamda Buyambamtapa takwan yuak kapae munu puke inimbaknganong. Inimbakngake ginda ie akgwauke dandansa yamutnong.
PSA 96:10 Sike ginda aminu keu komdu komdune nana kuupbamu anzing yaninong, “Buyambamtapa king kapa yuak.” Siwan ita kepdaka tapan kekekawan saa sinanga dua. Masande Buyambam tapata kepi noman takngane wam usanzike aminbamu yuyuknga yuaing kakngane usanziwik.
PSA 96:11 Sanga kakaa komune nanaat gatu aminu kepna kepna nanaat ngangu ginda apbaknganong. Yanggabam gwen gatu sangabamu gaatang yuaingu kuutda gakngatbam tasike ayanggamatanong.
PSA 96:12 Puya anga kuupbam gatu nanamu kuupbamu gaatang yuaingu ginu kuupbamda apbaknganong. Siwana katau zongaatang nana kuupbamda kau apbakngake tainong.
PSA 96:13 Dasingge, Buyambam tapata apuke aminu kepna kepna nana kuupbamdane wam usanzitnangge apik. Siwan ita aminu kuupbam kepi noman takngane usanzike tasiwik. Tasike siakan wam takngane usanziwik.
PSA 97:1 Buyambamtapa kingu tupan tapa. Kepdaka ga asiknga bakngayo. Sike ginu keu yangga banakan yuaing dakandakasimu musip gwaang natapnong.
PSA 97:2 Minga gatu zikaa aknga ngangga Anutu banakan yuwawan atakumbasikamayak. Atakumbasiwawat ita kepi noman takngane tawake aminu usanzike kayuak.
PSA 97:3 Iwanata takumbasiwawa ngana ita tasiwan katapda tupan isitakuke iwana yasipuyukgak.
PSA 97:4 Siwan ita tasiwan yapasik gatu siwawan kepdaka kakaa singgak. Siwan kepdakata waenga waaknga kake asatnakaing.
PSA 97:5 Anutu waapa aminu kepna kepna nana aminu kuupbamdane Buyambam tapa. Siwan Anututa apan kake tawanu dauyapmake yangga binga dakngakaing.
PSA 97:6 Siwan sanga ena kakaa komune yuaingga itane yuyuknga noman takngae yeuyaman kake aminu kuupbamda umana kayaapa ngang nataaing
PSA 97:7 Siwan aminu anutu pupukngae munu puke inike umana yapangenakaingu waaminu asiknga maakaning. Anutu pupuknga wa kuupbamda Anutue gwetake munu putning.
PSA 97:8 Munu puwan kake Saion nana aminu kuupbam gatu yotbamu Juda nana apbakngakaing. Ngan, aminu Juda kep komune yuaingu kuupbamda banip gwaangu gatane kot natake apbakngakaing.
PSA 97:9 Buyambam tapa, ga Anutu enane siknga apa, kekekngaka bamban tapa, gata keu kuupbam kakuya tasinggayak. Ga umanda kopsaapa siwan gata anutu pupuknga kuupbam ayapbikgayak.
PSA 97:10 Buyambam tapata aminu waiaknga tasinangge dua nataaing aminde take siknga natayamunggak. Ita kakuya inane noman aminabamu katak kayuke toknga amindane kataune sandepakapuke kayuak.
PSA 97:11 Sandepakapuke amin nomande Anututa kakaa aknga ayamuke pasiwan musip gwaang natake waaminu apbakngakaing.
PSA 97:12 Ginu amin noman, ginda Buyambam tapae apbaknganong. Bakngake ie gaak wam ininong. Takeaknga gatu noman siknga aknga ngangu Anutu waapatakan tasinggakge apbaknganong.
PSA 98:1 Ninda kau kayuu takngatu Buyambam tapae tainim. Dasingge, ita duya inata inata take siknga pasinggak. Pasike inane kekekngana buyambamu yuyuknga takwan takngane tasike ita amau ayapbikgak.
PSA 98:2 Buyambam tapata amak tasike yapbikutde gwa yakapbut. Yakapmake ita noman nomana tasike aminabamu gatuna sendeke pakut taknga yeuyaman aminu kepna kepna nana kuupbamda kaking.
PSA 98:3 Siakan, ita wamu ina yawan kekekakut takngae natake Isrel nana aminde butaya natayamuke dua kapekut. Dua kapewan aminu kepna kepna nana kuupbamda kawawa Anutuninda amau tasike yapbike ninu gatuna pakut.
PSA 98:4 Ginu aminu kepna kepna nanata kap taike Buyambam tapae apbaknganong! Siwan musip gwaang kap taike itane umana ayatangenatnong!
PSA 98:5 Yatangenake ginda gita tanguke kap taike Buyambam tapae umana aknga yatangenatnong. Yatangenake gita tanguwa gakngae take siknga siyok.
PSA 98:6 Siwan pum gatu benggo ngang puyake ayanggamatake Buyambamtapa king kapaninde apbaknganong.
PSA 98:7 Siwan nata nataau yanggabam gwenu gaat pis gatu sanga bamu gaatang yuaingu ginda kapzang yanggamataningge nataat. Siwan kepdaka, ga gatu sanga gaeatang yuaingu kuupbamda kap tainingge nataat.
PSA 98:8 Siwan yangga atzipmakaing kapaapa ginda aminda kataknga wesikaing binga wesiningge nataat. Sike ginu tawanu kuupbamda, ginda Anutue kaine kap taike asiknga baknganingge nataat.
PSA 98:9 Nata nataau Buyambam tapae kaine kap tainingge nataat. Dasingge? Ita apuke aminu kepna kepna nana kuupbam kot yake usanziwik. Usanzike aminu kuupbam noman takngane usanziwan siakan siknga siwik.
PSA 99:1 Buyambamtapa king kapa yuak. Yuakge aminbamda ie ayamuke gwautnong. Ita sia king dakane pukwiwan angela kautkaut yukumayak. Siwan kepdaka miamun siwikge nataat.
PSA 99:2 Sike Buyambamtapa kekekngana buyambam siknga keu Saion komune yuak. Ita umana kopsa siknga akngane aminu kepna kepna nana kuupbam kayuak.
PSA 99:3 Siwana umana kopsa waakngae gwauke yatangenatnong. Anutu waapa noman takngakan tasinggaunin. Anutu waapa noman taknga gatu takeaknga ngang kuupbam tasinggaunin.
PSA 99:4 Kingu kekekngaapa, ga noman takngaekan take siknga nataayak. Ngan, gata ninu Isrel nana aminu sanga take gatu noman taknga ngang tasinimde nimukuyak. Nimi ninda atawakamang.
PSA 99:5 Ginda Buyambam tapatane umana asiknga yatangenatnong. Wa nisane Anutunin. Ginda ie wesim kuke munu putnong. Sike Anutu waapa noman takngakan tawanggak kapanin.
PSA 99:6 Sike Moses gatu Aron ngangu Buyambam tapatane pris tapaat dakngake yukumayak. Siwan Samuel kaya Anutue mun puke inikaing aminkat nana tapatu waaminda Buyambam tapae tumuk wam iniwawa tumuk wamna atnatapbut.
PSA 99:7 Natake ita minga buyambam musaatang yuke waaminde yanikut. Siwan waaminda mama wamu wa Anututa yamukuu kuupbam tawaking.
PSA 99:8 Anutu, nindane Buyambam tapanin, gata amindabamdane tumuk wamna atnatapbuyak. Sike waiaknganin sandetnimunggayakge atnataamang. Siwan ngana gutonga tasikingge yake meya ayamukuyak.
PSA 99:9 Anututane umana yatangenatnong. Buyambam tapaninden. Siwan munu inane tawandakane putnong. Anutu, Buyambam tapanin, wa Anutu noman takngakan tasinggak kapanin.
PSA 100:1 Ginu aminu kepna kepna yuaingu, ginda Anutue apbakngananga kap tainong.
PSA 100:2 Ginda Buyambam tapae musip gwaang natangamuke puya ie pasingamunong. Ginu kau apbakngananga taknga aknga taike ie wesim kunong.
PSA 100:3 Ginda Buyambam tapae natapa kekekayok. Ita Anutu siknga awiapa unin. Sike waapatakan ninu tumuke nipmakut. Unzingge ninu inane siknga. Ninu inane aminabam. Ngan, ninu itane sipsipna binga dakngake yuamang.
PSA 100:4 Ginda itane yotna gwene koke gaak inike umana yatangenatnong. Gaak inike tasiwa umana kopsa siwik.
PSA 100:5 Sike Buyambamtapa sanga take akngakan tasinggaunin. Asingganu ita ninde musip gwaang natanimunggak. Ita inane siakan wam takngana asinggan asinggan tawanggak.
PSA 101:1 Buyambamtapa, nata kau takngatu gae musip gwaangge natake taiwit. Siwan gata kepi noman tawake wam usanzikgayakge natake kau tainangge nataat. Buyambamtapa, nata gae natake kau waaknga tainanggenggat.
PSA 101:2 Nata noman takngakan tawambit. Buyambamtapa, zaapduknga gata apu na gatangamuya? Gatangamuwawi nata noman takngakan yotnane yuke sukuwit.
PSA 101:3 Sike nata sanga wai takngatue natapa take ngangu dua siwik. Wena siknga. Nata sanga aminu Anutue masa imuke tasikaing kakngae asiknga bitanggat. Sanga wai waaknga dua siknga tawambit.
PSA 101:4 Nata aminu musiaatang sanga waie nataingu teke ie maa siknga yuwit. Ngan, waiaknga aknga gatukande teke ie dua siknga natapit.
PSA 101:5 Nata aminu kusopuke notnaapae inisapdukgak kapa asiknga tasiwa maiwan wamu gatuna yananga dua siwik. Siwan yamandet aminu dua kapewa yutning.
PSA 101:6 Sike na Anutue natake tawakaing aminkat gatake yotnane yutnim. Siwan aminu take aknga asinggan tasikaingu, waamindakan natane puya pasining.
PSA 101:7 Sike kem aminu yotna buyambam gwekatang dua yutning. Kem aminu waakwau natane nomnane dua yutning. Wena siknga.
PSA 101:8 Siwan tapdukbamu nata wai aminu ninde kep kopatang yuaingu apasiwa gena umutning. Nata aminu waiaknga tasikaingu yanikwasiwa kuke waaminda Buyambam tapae yotbam gapmane gatu yutnanga dua.
PSA 102:1 Buyambam tapa, nata tumuk wamu gae yawa natapso. Gata gatangamiyakge natake gae yanggat taknga natangamuyo.
PSA 102:2 Siakan. Meya buyambamda nae apan kakengu ga nae ma kusopuwim. Sike nata tumuk wamu gae yawanu gata maak pake natane wama natake zet gatangamuyo.
PSA 102:3 Dasingge, natane kayuk yutnanga aknga katap sawa kupan takngata enake mateknga yuke asopukaing binga. Siwan natane gupma toknga katapaim binga. Katap yasiwan katapaimu toknga sikaingunin.
PSA 102:4 Siwan Anutu, ga nandutewi meya takngatu kakumu wa unzing, zongazongata akupiakaing binga sikum. Siwan natane musipmaatangu nanamu natapnanga dua sikut.
PSA 102:5 Na meya natake nata kumzang siknga yanggamatanggat. Siwan natane gupma suyuknga dua. Na kwatanakan tapata yuat.
PSA 102:6 Na wai siknga kwaiu taa gwenduta keu nanamna wena komune yuak binga nata yuat. Yuke kwaiu zikaane sukunggau gwenduta binga ninatakan yuat.
PSA 102:7 Siwan na apekgat komune pewa ngana kaina petnanga dua singgak. Butaya! Na ninatakan kwaiu gwenduta inatakan yot dum tangan yuak binga yuat.
PSA 102:8 Sike gunzit tapane gatu zikaane ngangu iwanata aminu kundu ayanisapdukaing. Siwan waaminda masa wam yanike natane umana aknga yake Anututa na tasiwan meya pakum taknga tawake tasiwa waaminu meya paningge yakaing.
PSA 102:9 Nata muyuu nanama binga nake kai yanggana puke kapmane yangga tangokgat gopatang pukuwa tangokgat.
PSA 102:10 Dasingge? Gata nae kaanga buyambam siknga natangamuke na take samba samba binga mutewi kunggat.
PSA 102:11 Na kayuu dapaknga siknga yuat. Unzing gunzitda bangee pukunggak binga. Siwan na zongazonga akupiakaingga binga yuat.
PSA 102:12 Siwan ngana, Buyambamtapa, ga king kapa asinggan yuayak. Sike aminbamu masan aatningga gaenu atnatapning.
PSA 102:13 Sike tapduknga gata butaya natapnanga gwa singgak. Ngan, apmanu butaya natapnanga tapduk. Apmanu gata apuke Saion yotbam gapmae musip kwikwik natangamuke gatangamuyo.
PSA 102:14 Saion yotbam gapma you bumi wai gwa sikut. Siwan ngana gatane puya amindata you wa gapmatane samba sambae take siknga nataaing. Apmanu wai gwa siwan ngana kupapongu ayuakge butaya siknga nataaing.
PSA 102:15 Aminu dongu kuupbamda Buyambam tapae akgwauke ie gepbiatang yutning. Ngan, Buyambamtapa, kingu kuupbamu kepna kepna nanata gatane umanda kopsa siknga akngakae akgwautning.
PSA 102:16 Masande Anututa Saion yotbam gapma gatu tangenakengu ita inane kekekngana aminu kuupbamde ayeuyamik.
PSA 102:17 Siwana inane aminabamda upeeke tumuk wamu iniwa ita maak papik. Tupa waaminu sandepewan moo yuking ngana gatu ita waamindane tumuk wamnae masa dua yamik.
PSA 102:18 Nata nataau wamu takngatu buk gomune apmataningge nataat. Ge bapuninu dongu masan aatningga wamu waakngae natake waaminda Buyambam tapatane umana ayatangenatningge nataat.
PSA 102:19 Wamu anzing mataning, “Buyambamtapa enane yuke amunandang kakut. Ita yekaune yuke amuna kepdaka akakut.
PSA 102:20 Kake ita nataawan iwanata aminu kundu papa kaautde pewa yuke meya pakaingga kwanam siwa natapbut. Natake ita waaminu kotda akumningge gwa yawan kekekakut ngana sandeyaman kepman pukuke dua kumning.”
PSA 102:21 Zaion nana aminda Buyambam tapatane umana yakapning. Ngan, yakapmake Jerusalem nana waaminda gaak wamu ie inining.
PSA 102:22 Inike aminu kepna kepna nanaat gatu kingaat Jerusalem yot gapmane unekan yuke Buyambam tapae munu putning.
PSA 102:23 Nata waatdaka kekekngaapa kayuk yuwawa Buyambam tapata kekekngana atasiwan maikut. Unzingge nata kayuu mamaya yutnanga dua. Ita natane tapduknga dapaknga takepbut.
PSA 102:24 Dapaknga takepan kake nata anzing inikum, “Anutuna, ga asinggan asinggan yuayak. Gata apmanu na ma tapim. Na aminuake dua. Na kekekngaapa yuat.
PSA 102:25 Tupa siknga gata keu andaka tasike tekuyak. Siwan gikane katakga ena kakaa komune sanga bamu une yuaingu gika siknga pasike pekuyak.
PSA 102:26 Ena kakaa kopat kepat wena siknga asisan. Siwan ngana ga asinggan asinggan yuya. Sanga waapaau taukga bumi sikaing binga sisan. Siwan gata sanga waapaau kake aminda tauknga bumi siwa peke kayuk pasikaing binga gata sanga waapaau pasiwi gatukande sopuke gatu dua yutzan.
PSA 102:27 Sike ngana ga tendekga wena. Asinggan asinggan yuke gae tapduu wena dua siwik.
PSA 102:28 Unzingge gata nindane waatdakaninu kakuya pasiwawi take yutning. Yuke waakwakgane bapuna masan aatningu gata gatayami gaat waakwakat asinggan gatake yutning.”
PSA 103:1 Nata Buyambam tapatane umana asiknga yatangenawit. Ngan, nata gupmasan natdetdetnaatang gatu musipmaatang Buyambam tapatane umana take akngae asiknga yatangenawit.
PSA 103:2 Nata Buyambam tapatane umana asiknga yatangenawit. Yatangenake ita nae sanga takeaknga kwaapzang siknga tasingamukutde dua botawit.
PSA 103:3 Sike natane waina kuupbam ita gatu gatu asandekgaunin, gatu maitna kuupbam asinggan sandekngamunggak.
PSA 103:4 Nata sipdu sipdune kumnangge dapaknga sikum ngana Buyambam tapata na gatu tapan na dua kumbum. Ita musip kwikwik natangamuke nae butaya buyambam natangamunggaunin.
PSA 103:5 Na tapdukbamu keu andakane yuau, Buyambam tapata tendeknga wena sangabam nae naman takekan singgak. Ita unzing tasiwan na kekekngaapa gatuna dakngake yuat. Unzing tinggigi gwenda kekeknga yuak binga yuat.
PSA 103:6 Buyambam tapata noman taknga tawake aminu kunduta aminde meya aknga yaman pakingu akgatayamunggak. Gatayamuke gatu pangenawan take yuaing.
PSA 103:7 Sike tupa Anututa sanga kundu tasinangge natapbutde Moses inikut. Siwan ita puya kekeknga aknga aknga pasikuu Isrel nanae yeuyamukut.
PSA 103:8 Buyambam tapata butayambam natanimuke musip kwikwiu asinggan natanimunggak. Sike musiptou zaat dua natanimuke ninde musip gwaang natanimunggayak.
PSA 103:9 Gatu ita temapan ninike ninde asinggan dua natanimunggak. Aho, itane musiptok takngan mamayambam dua yuak.
PSA 103:10 Sike ninda waiaknga tasikamangge buyana wai apananga. Siwan ngana waiaknga tasikamanggane buyana wai wa dua nimunggak. Ninda waiaknga kwaapzang tasikumang. Siwan meya yake buyambam atnimunanga ngana unzingu dua tasinggak.
PSA 103:11 Sike aminu ie akgwaukaingu waaminde musip gwaang siknga natayamunggak. Ita musip kwikwiu wa natayamunggau, buyambam siknga. Ena yekap gweneta kepdakane binga.
PSA 103:12 Sike gunzitda akonggak kopat apukunggak kopat wesim dua. Wa maa siknga. Ina unzakan, Anututa waiaknganinu sandetniman waiaknganinu maa siknga yuak.
PSA 103:13 Nanata waatdakanae butaya natayamunggak. Ina unzakan, Buyambam tapata ie gwaukaing aminde butaya natayamunggak.
PSA 103:14 Ita ninu keek pake tumukut. Unzingge ita nindenu keek ngangu atnataak.
PSA 103:15 Sike ninu amindane kayuk yutnanga aknganinu dapaknga siknga zonga zongata yuaing binga. Ninu zonga zongatane palawa gwenduta binga dapaknga yuke akumnim.
PSA 103:16 Got takngata puyake saasaa tasiwan palawa gwenu apimapan aminda ayuak kopatangu wena kaaing.
PSA 103:17 Siwan ngana Buyambam tapata musip kwikwiu aminu ie gepbiatang koyuaingge asinggan asinggan natayamunggak. Siwan ita sanga noman taknga bapuna gatu bapunatane waaknga ngang masan aatningge kuut tasiyamik.
PSA 103:18 Sike waaminda Buyambam tapatane pasap wam gatu mama wamna kuutgan tawambanu, ayok, musip kwikwiu aminu waaminde asinggan asinggan natayamunggak.
PSA 103:19 Buyambam tapata king kapa yekaune yuak. Sike i sanga kuupbamdane toiknga unin.
PSA 103:20 Sike ginu Buyambam tapatane angelana kuupbam, ginu kekekngasa buyambam. Ginu itane wam tawakaingunin. Tawake itane wamde maak gwaang pakaing. Unzingge ginda Buyambam tapatane umana yatangenatnong.
PSA 103:21 Ginu Buyambam tapatane puya amina, ginu yekaune yuke ita nataak kaknga tawakaing. Ge ginda itane umana yatangenatnong.
PSA 103:22 Ginu sangabamu Buyambam tapata pasikuu, kepna kepna yuaing. Siwan ina siknga gindane King kapa yuak. Buyambam tapatane umana yatangenatnong. Siwan na kaya itane umana asiknga yatangenawit.
PSA 104:1 Nata Buyambam tapatane umana asiknga yatangenawit. Anutu, Buyambam tapana, ga enane siknga. Ga Kingu tupan tapa siwan umanda kopsa.
PSA 104:2 Gata gikane kakaa akngata usukwatapmanggayak. Unzing aminda gupnaapa taukga usukwatapmanggak binga. Gata yekap gwekat gatu yekap daau kuupbam ngang pewi yuaing. Unzing aminda sel yot gwenu mitake nau baklain takngata wapan yuak binga.
PSA 104:3 Sike gikane yotda yangga enandang yekaune yuak komune engatangan mitapbuyak gwene yuayak. Siwan minga musa gatane karisnda binga, got takngata apu ganitakuunggak.
PSA 104:4 Gata tasiwi got takngata gikane wam taknga takuunggak. Siwan gata tasiwi katap mumuyangga puya amina binga dakngakaing.
PSA 104:5 Sike gata keu andaka tangine tekuyak. Tewi kepdaka kekeknga siknga yuak. Ita kundusimu isakunanga dua. Wena siknga.
PSA 104:6 Gata yanggabam gwenu tewi yuke kepdaka tauk sandu bingata usukwatapbut. Siwan yanggata tawanu kuupbam usukwatapbut.
PSA 104:7 Siwan ngana masande gata yanggabam gwende wamu kekeknga aknga yawi atdatakukut. Yanggabam gwenda nataawan gata apaa siknga yawi gatukande datakukut.
PSA 104:8 Datakuke yanggabam gwenda tawanu engatangan kokenga teke gapme gwendune pukukut. Siwan yangga wagwenu gapme waomune yuwikge yakuyakge apmanu waomune unzing yuak.
PSA 104:9 Gata tuwangu gwa tekuyakgengu yangga gwenda tuwangu wa tekuyau yatupnanga dua. Unzingge yangga wagwenda tawanu kuupbam gatu usukwatapnanga dua.
PSA 104:10 Sike ita tasiwan yangga kep ganang akoke tawan katangga zipmake gapme gwene pukukaing. Sike wa pukukaingu tawan dakandakata kaukaut yuwawa yangga waapa apata banakan noman pukukaing.
PSA 104:11 Siwan kaap zongu yangga waangane atangokaing. Sike dongki zong dakngake yuaingga tangopa guyakngi gatu dua kupiakaing.
PSA 104:12 Sike kwaitda yotna katau yangga kwaimune akopsa dakandakane mitakaing. Mitake katap kaingune yuke wamna yakaing.
PSA 104:13 Ga yotda enane nana gapmane yuke sopa tawan katang pewi epukaing. Epuwawa gata tasiwi buyana asaakgak.
PSA 104:14 Gata zonga zonga tasiwi akopa kau gwegwenda une naningge. Siwan sanga inata inata ninu aminda kwaikamang kaya, gata pasiwi enake buya aawan une pake nakamang.
PSA 104:15 Siwan ninda nau wain taknga kwaike yangga toknga aknga tangopnangge tasinim. Tangoke musipmin katang apbaknganim. Sike katau oliv dakatane buyana yangga aknga pake nomine pasina waenga siwik. Gatu ninda wit tapun kwaike poyau uneta pasike nana gupmin tapa gatanimik.
PSA 104:16 Sike sopata epanu katau Lebanon nana dakandaka yangga buyambam pakaing. Katap dakandaka wa Buyambam tapata ina kwaikut.
PSA 104:17 Siwan katau wa dakandakane kwaitda yotna une mitakaing. Siwan kwaiu kang gwengwenda yotna katau baka dakandakane mitakaing.
PSA 104:18 Sike tawanu mamaya dakandaka wa meme zong gwegwenda sukukaingunin. Siwan ngwasanda ena tawanu buyambam dakandakatane sup ganang katang kusopukaingunin.
PSA 104:19 Anututa yekap gwen tasike tekuu wa kakaa nimuke puya tapduu inata inata yeutnimunggak. Sike gunziu apukunggakgane tapduknga ina nataak.
PSA 104:20 Gata tasiwi zikaa daka singgak. Siwan zikaane kaap zongu sukukaing.
PSA 104:21 Sike laiondane mateknga kaap zongge yawake kumzang ainggamatakaing. Ita wa yakaingu kaapna gata yamiakge yakaing.
PSA 104:22 Gunzitda gwa akopanu ganangine gatu kuke pekaing.
PSA 104:23 Siwan aminu enake kuku puyana pasiwawa gunziu une pukunggak.
PSA 104:24 Buyambamtapa, gata sangabam pasikuyak. Ga natdetdetda bambande sanga wa kuupbam pasikuyak. Sangabamu wa pasikuyau keu andakane asiknga doke yuaing.
PSA 104:25 Sike yanggabam gwenu buyambam siknga. Siwan pis buyambam dakandaka gatu mateknga dakandakasimpat sanga kunduat undang yuaing. Ninda natdeke kendetnanga dua.
PSA 104:26 Siwan sip gwegwenda yanggaangan kungapukaing. Sike pis buyambam siknga daka tupa tasikuyau, iaya yanggabam gwekatang kungapuke paakoke tasinggak.
PSA 104:27 Sike sanga kuupbamda tomna nataaing kopatangu, gata nanamna yamiakge ganduyuaing.
PSA 104:28 Siwana nanamna une yami nakaing. Gatakan siknga yami nake musia doke yuaing.
PSA 104:29 Sike gata masa yaminu waakwau akgwaukaing. Itane waunga kaiwi kuwanu, akungwake kep gatu dakngakaing.
PSA 104:30 Sike gata waungga yaminu waakwau kayuk yuaing. Gata sangabamu pasikuyau pasiwi kayuk dakngake keu andakane yuaing.
PSA 104:31 Unzingge nata nataau Buyambam tapatane umana kopsa aknga asinggan asinggan yuwikge nataat. Siwana Buyambam tapata sangabamu pasike pekutde apbakngawikge nataat.
PSA 104:32 Ita kepdaka kawanu kepdaka ayamukgak. Ita katakngata tawan dakandakane wasiwanu kupan taknga undangga enakaing.
PSA 104:33 Sike na tapduu kayuk yuat komune nata kap taknga aknga Buyambam tapae taiwit. Nata kap taknga aknga Anutunae taike umana yatangenake yusika kupit.
PSA 104:34 Nata nataau Anututa sanga musipmaatang natanggamatake ie apbakngawit takngae natapan take siwikge nata kap taike apbakngawit.
PSA 104:35 Nata nataau wai aminu kuupbamu kepdakane wena siningge nataat. Ngan, aminu waiaknga tasikaingu wena siknga siningge nataat. Sike nata Buyambam tapatane umana asiknga yatangenawit. Buyambam tapatane umana yatangenatnong.
PSA 105:1 Ginda Buyambam tapatane umana yake yanggamatake gaak wam ininong. Siwan ginda puya buyambamu ita tasikutde kepna kepna nana aminu kuupbam yanikapnong.
PSA 105:2 Ginda kau takngatui apbakngake taike itane umana yatangenatnong. Siwan ginda sanga gwaam gwaamu pasikut takngae yanikapnong.
PSA 105:3 Ginda apbakngake umana yatangenawa umana kopsa siwik. Sike Buyambam tapatane aminabamda apbaknganong.
PSA 105:4 Asingganu ginda Buyambam tapae wesim kuke gin papan kekekawan gatandamikge inikwaitnong.
PSA 105:5 Ginda puya kekeknga Buyambam tapata tasikutde gatu duya takngatu takngatu tasikutde natdetnong. Ita aminu katak kayuke toiknggakge ginda kuut natdetnong.
PSA 105:6 Ngan. Ginu Abrahamdane bapuna. Waapa Buyambam tapatane puya amina. Ginu Jekopdane donga, ginu Buyambam tapata inae natake yawan yuaing.
PSA 105:7 Sike Buyambamtapa, wa nindane Anutunin. Waapata aminu keu andakane nana kuupbam katak siknga kayuak.
PSA 105:8 Ita pasap wamu takngatu nikatde yawan asinggan yuwikge yakut. Siwan pasap wamu waakngae asinggan natayuwik.
PSA 105:9 Pasap waaknga tupa Abrahampat yawat yukut. Siwan ita pasap wamu waakngakan Aisakge ina yawan kekekakut saak Anututa ina tawanangge yakut.
PSA 105:10 Gatu wamu waakngakan Jekopde iniwan kekekakut. Waapa Isrel amindane bapuna, siwan pasap wamu wa yawan yukut taknga asinggan yuwik.
PSA 105:11 Buyambam tapata pasap wamu waakngae anzing yakut, “Nata Kenan kep komu gae gamit. Siwan keu wandaka gaat gatu gikane donggaatde yuwik.”
PSA 105:12 Tupa Isrel nana aminu dongu mateknga siknga. Pakapuyut amin dakngake yuking. Siakan, waaminda Kenan kep komune pakapuyuke dongu mateknga siknga yuking.
PSA 105:13 Sike waakwau kepnane dua wikake yuking. Keu komduneta komdune kukaking. Kingu tapatutane kep komune matekngasim yuke enak teke gatu kingu tapatutane kep komune kukaking.
PSA 105:14 Siwan ngana Buyambam tapata dua kapewan aminu kunduta pasiwan maiking. Wena. Ita akgatayamuke kingu kaanga yanikutde dua pasiwan maiking.
PSA 105:15 Sike ita kingu waakwau anzing yanikut, “Nata waaminu natane puya pasingamuningge yawa yuking. Ginda waaminde wai takngatu ma tasiwam. Siwan ginda gatu natane yakapsa amina kuut ma pasiwa maiwan. Ma siknga tasiwam.”
PSA 105:16 Buyambam tapata tasiwan nanamu kuupbam sopuwan tomda yuking.
PSA 105:17 Siwan masande Josepdane notnata katewa aminda Josep usiwa waamindane puya aminu moo tapatu dakngakut. Siakan, Buyambam tapata Josep initewan tupan kuke Isip kep komune paku yukut.
PSA 105:18 Waaminda sen taknga akngata kepi kekeknga wapa toknga isiking. Siwan gatu ainu buyambamu guyakngane mapapukukaingu gwendu wambing.
PSA 105:19 Ita meya takngatu takngatu unzing pake yuwawan wamu Buyambam tapata Josepde tupa yakuu buya aakut.
PSA 105:20 Siwana Joseu kaautde tewan yukuu Isipdane king kapata aminu tapatu initewan kuku sandekut. Sike kingu waapa aminbamdane tupan siknga apa. Sike ita Joseu kaautde yukuu tewan epuukut.
PSA 105:21 Siwan king kapata Joseu inane puya aminu tupan tapa dakngawikge yawan yukut. Yawan Josepda sanga kuupbam Kinggane you buyambam siknga gwekatang yuking kaknga kakuya tasikut.
PSA 105:22 Puya unzing tasike ita inane natdetdetnane kinggane puya gwapak amin yanindamukut. Yanindamuke ita aminu kundu king kapae natdetdet imuya takwaunin yanindamukut.
PSA 105:23 Siwan masana Isreldane donga Jekou paku Isip yuking. Ngan, Jekopda apuke pakapuyut amin dakngake keu waomune yukut.
PSA 105:24 Siwan masande Buyambam tapata inane aminabam gatayaman waatdakana kwaapzang aaking. Aawan kake iwanata yapbitnanga dua sikut.
PSA 105:25 Siwan ita tasiwan Isip nanata itane aminabamde asiknga bitaking. Bitake Isip nanata itane puya amina waakwau pasiwan mainingge kepie tawaking.
PSA 105:26 Siwan masande Buyambam tapata Moses, inane puya amina, gatu Aron, inae yawan yukut tapaat ngang yanipewan Isip kep komune kukumayak.
PSA 105:27 Sike waapaatda Anututane puya pasikumayak. Pasike duya takngatui Isip nanata kaningge keu waomune tasikumayak.
PSA 105:28 Tasiwawat Anututa zikaa aknga tewan apu kepna usukwatapbut. Dasingge, Isip nanata itane wamu ayamasandeking.
PSA 105:29 Waamindane yanggana kuupbam ita papan tekwamba dak sike pis kuupbam atzipa kumbing.
PSA 105:30 Sike gwakbamda kwaapzang sike kepna itakan tapan sopukut. Gatu kinggane yotna buyambam gwekatang kuut koke yuking.
PSA 105:31 Anututa yawan ingut moo gatu atnisikaing ngangga kwaapzang sike kepna kuupbam gatu yotna ngang tapa sopukut.
PSA 105:32 Sike ita sopa siknga dua kepnaatangu tasiwan takut. Ita tasiwan sopa zambum gatu yapasik ngang epan kaking.
PSA 105:33 Ita nau wain taknga aknga gatu katau baap dakandaka apasiwan maiyamuking. Siwan ita katapna keu waomune yuaingu asukgwisaangukut.
PSA 105:34 Sike ita wamban yawan apmakga apbing. Datdasingga apbingu natdetnanga dua. Siwan aminda kendetnanga dua.
PSA 105:35 Apmau waakwakga sanga kuupbamdane tatakngi atnaking. Siwan nanamzau Isip nanata kwaikingu kuupbam atnaking.
PSA 105:36 Siwan Anututa Isip nanatane waaknga tupan tapaapa dongu inandek inandekgane atzipa kumbing.
PSA 105:37 Siwan masande ita Isrel nana yanipake kuwan Isip kep komu teke kuking. Waaminda sikasika keu waomune nanata silwa ba gol ngang pasikingunin yaman pake kuking. Kuke Isrel nana kuupbam takekan yuking. Aminu tapatu meya dua pake pimanggut.
PSA 105:38 Sike Isip nanatanu Isrel nana aminde akgwauking. Unzingge Isrel nana kaawan gwa kuwanu asiknga bakngaking.
PSA 105:39 Anututa Isrel nana amin kayutnangge natake minga musatu engatangan yawan yuke aminabam usukwatapbut. Siwan zikaane katau buyambam gwen tewan yuke isikakaa yamukut.
PSA 105:40 Siwan masande waaminda nanam yamikge iniwan ita kwait pewan apa naking. Gatu ita poyak yekaune nana ie yamukut. Yaman napa musia atdopbing.
PSA 105:41 Siwana ita tasiwan suu buyambam dakaatangga yangga epbut. Yangga buyambam waanga pimake zipmake sangana wena kepban komune kukut. Unzing yangga buyambamu tapatu zongangaatangga zipmake pukunggak binga.
PSA 105:42 Siakan. Ita wamu takngatu tupa puya amin tapana Abrahamde kekeknga yawan kekekakut takngae natanggamatake sanga wa kuupbam tasikut.
PSA 105:43 Ngan, aminabamu ita yanipake kukut. Kuke apbakngake taitake kuking. Sike waaminu inae gwa yawan yukingge asainggamatake apbakngayuuk kepi kuking.
PSA 105:44 Siwan ita dongu kundune nana amindane kepna waaminde yamukut. Yamuke ita kapewan puya anga angana kuut paking.
PSA 105:45 Sike ita Isrel nana aminde wa tasikuu, ita ie wamu kuupbam tawake mama wampaa kuupbam tawaningge natake tasikut. Unzingge Buyambam tapatane umana yatangenatnong.
PSA 106:1 Buyambam tapatane umana yatangenatnong. Buyambam tapata sanga takekan tasinggak kakngae natake ginda ie gaak wam inimbaknganong. Dasingge, ita ginde gwangau asinggan asinggan natandamunggak.
PSA 106:2 Mamin amin tapata sanga kekekngata pasikutde wamu yawik? Aminu tapatuta sanga waaknga kuupbamde yananga dua. Ngan, mamin amin tapata sanga kuupbamu ita takeaknga aknga pasinggak kaknga yanikapan natake umana yatangenawik? Sanga wa kuupbamde natdeke yananga dua.
PSA 106:3 Sike aminu itane wamu usanzike kepi noma nomana tawake asinggan asinggan noman takngakan tasiningu, waakwakga apbaknganong.
PSA 106:4 Buyambamtapa, gata amin gikane akgatayamunggayak tapduk gwekatangu naatdeat kuut natapso. Natake apapiak gwekatangu naat kuut papso.
PSA 106:5 Papi gatane amindabamu take siknga yutningge nataat. Yuke aminu waakwau sanga take akekan pawawa kake naat waaminkat baknganim. Natake naat aminu gatane dongga dakngake yuaingkat baknganim.
PSA 106:6 Sike ninda waiaknga gwa tasikumang. Unzing tupa bapuninda tasiking binga. Siakande siknga. Ninda wai tasikumang.
PSA 106:7 Nindane bapuninu Isip yuking kopatangu gata duya buyambamu pasikuyakge dua natdeking. Aho, gata tapdukbam gatayamuke waaminde musip gwaang siknga natayamukuyak kaknga atnatapbing. Ngana waakngae apbotaking. Apbotake yangga Ret Si gwende kwaimune kundoke gae yamandet siking.
PSA 106:8 Siwan ngana Buyambam tapata kekekngana buyambam taknga yeuyamunangge natapbut. Unzingge wamu ina yawan kekekakut takngae natake ita gatuna papan meya dua paking.
PSA 106:9 Ita wamu kekeknga yanggabamu Ret Si gwende iniwan apmatawan kaut kaut kuwat kepibam tapa dakngakut. Unzing siwan ita amin yanipake kuwan yangga zipbuke aminda akuyaapane binga kuking.
PSA 106:10 Yanipake kuke ita iwana aminde kataune sandeke pakut. Sandeke papan iwanata dua pasiwan maiking.
PSA 106:11 Siwan yangga gwenda iwana usukwatapan akumbing. Aminu tapatu kayuu dua yukut.
PSA 106:12 Buyambam tapata unzing tasiwan inane aminabamda pasap wamu yawan kekekakut takngae banip siking. Banip sike kap taike umana yatangenaking.
PSA 106:13 Siwan ngana zeetgaman waaminda sanga Buyambam tapata tasikutde apbotaking. Sike Anututane wam gamok dua take natdeking. Aho. Waaminda sanga inae natdetdeu nekan natake tasiking.
PSA 106:14 Sike keu sangana wena kopatangu musipnaatangu nanamu inata kundue kekeknga siknga natapbing. Natake Anutu tanziking.
PSA 106:15 Waaminda Anutu inikaiwa sanga waapa ayamukut. Siwan ngana maiu buyambam taknga kuut yamukut.
PSA 106:16 Sike keu sangana wena komune yuke aminu kunduta Moseskat Aronkatde musiane atemna natayamuking. Aminu waapaau Buyambam tapatane puya amina.
PSA 106:17 Siwana gapma buyambam daka kwamake pukuwan une Datan gatu Ambiram gatu itane donga ngang gapmaatang pukuwan apu bupmakusike waakwau usukwatapbut.
PSA 106:18 Siwan katau enandangga epuke wai aminu waakwau yawakingu ayasiwan kumbing.
PSA 106:19 Siwan waaminu tawanu Horeb dakane yuke ikwawa gamande wee gwendu golda tasiking. Tasike anutu pupukngana waapae munu puking.
PSA 106:20 Sike waakwakga wee wa ikwawa gamanu zonga zonga nanggakgane tasike ie munu puking. Waaknga tasike Anututane umana kopsa aknga yaitakepu teke ie munu dua puking.
PSA 106:21 Anututa puya kekeknga siknga Isip kep komune tasikut. Tasike ita Isrel nana aminu Isip nana aminde kataune sandeke pakut.
PSA 106:22 Ngan, Anututa puya buyambam siknga Isip komune pasikut. Ngan, ita duya takngatu takngatu dongu Ham nana amindane kep komune tasikut. Pasike yanggabamu Ret Si gwene sanga inata siknga tasikut. Tasiwan aminu kuupbamda kasatnaking. Siwan ngana Isrel nana aminda ie apbotaking.
PSA 106:23 Siwana Anututa inane aminabamu apasiwan mainingge yakut. Yawan ngana Moses, puya aminu Anututa ina yawan yukut tapata Anutue kaine yukut. Yuke Isrel nana gatayamuke Anututane musiptok kaknga asumukut. Siwan Anututa dua pasiwan maiking.
PSA 106:24 Sike keu take komu yamukutde apbitaking. Dasingge, Anututa wamu takngatu yawan kekekakutde siakan ngang dua natapbing.
PSA 106:25 Aminu waakwau sel yotnane yuyuk Anutue musiaatang kaanga natake wam yaking. Yake Buyambam tapatane wamu dua gwaamuking.
PSA 106:26 Siwana Anututa wamu kekeknga aknga yaniwan kekekakut. Yanike ita waaminu keu sangana wena supban komune kumningge yanikut.
PSA 106:27 Yake bapuna masan aatningu ayanikwasinangge yakut. Yanikwasiwan paku dongu takngatue banakan yutning. Yuke waomune aminde keune kumningge yawan kekekakut.
PSA 106:28 Masande waomune yuke Peor yot gapmane anutu pupuknga Bal ngang inia apae munu puking. Munu puke anutu pupuknga kayuk dua yutnangae ofa yamukingu atnaking.
PSA 106:29 Sanga waaknga tasiwa Buyambamtapa kaanga natapbut. Natake tasiwan maiu buyambam wai takngatu waaminde apbut.
PSA 106:30 Apan ngana Finiasda enake waiaknga tasiking aminu kaanga yaniwan maiu buyambam waaknga wena sikut.
PSA 106:31 Apmanu aomune ninda itane noman takngae natayuamang. Sike masan masan kaya, aminu kuupbamda atnatayutning.
PSA 106:32 Sike gatu Isrel nanata yangga Meriba apane yuke sanga wai tasiwan Anututa kake kaanga natapbut. Siwan gutonga wa tasiking kakngae Mosesda meya pakut.
PSA 106:33 Waaminda tasiwa kake Mosesda musiane wai siknga natake wamda dopan wamu noman dua yakut.
PSA 106:34 Sike waakwakga dongu komdu komdune nana katum aminu Buyambam tapata atzipan kumningge yakut ngana dua zipa kumbing.
PSA 106:35 Dua zipa kupa Isrel nanata waamindane maya kundu maatnae paking. Papa maya wa pakingga apna yanipakuwa waiakngana tawakaingunin tawaking.
PSA 106:36 Siwan waaminda gatu anutu pupuknganae mun puking. Siwan munu wa puking kakngata waaminu panggaganuwan wai siking.
PSA 106:37 Waakwakga waaknga gatu yapana ngang anutu pupuknganae ofa binga yamunangge natake zipa kumbing.
PSA 106:38 Sike wa tasikingu inane waaknga siknga ba yapana siknga zipbing. Sike waatdakana wa gutonga takngatu dua tasiking. Siwan ngana zipa kupan Kenandane anutu pupuknganae yamuking. Siwan itane dakngata tasiwan kepdaka Anutue kaine wai sikut.
PSA 106:39 Sike gutonga ina wa tasiking takngata tasiwan waakwau Anutue kaine wai siking. Sike Anutue masa imuke waaminda dua tawaking.
PSA 106:40 Siwan Buyambam tapata aminu inane waakwakge kaanga siknga natayamukut. Natayamuke inane amina ngana ie musia meya siknga natayamukut.
PSA 106:41 Meya natayamuke ita akapewan dongu kunduta yapbike kakuya pasiking. Unzingge iwanae gepbiatang koyuke ie kataune yuking.
PSA 106:42 Siwan iwanata meya waaminde kwaapzang yamuking. Yaman waaminde gepbiatang kekeknga siknga yuking.
PSA 106:43 Ngana tapduk gwendu gwendu Buyambam tapata inane aminabamu akgatayamukut. Siwan ngana inae banip tawake yamandet siyuuk ie wamu ayamasandeking. Waiaknga kwaapzang tasikingge take dua yuking.
PSA 106:44 Siwan ngana Buyambam tapae tumuk wam yawanu tumuk wamnae maau apakut. Maau pake meya buyambam pake yukingge butaya natayamukut.
PSA 106:45 Ita butaya siknga natayamuke pasap wamu tupa yaniwan kekekakutde gatuna natapan sikut. Siwan musia tapatekngwamban musip kwikwik natayamuke natdetdet naatangu meya wa asinggan paningge apbitakut.
PSA 106:46 Ita iwanatane natdetdetna pangenawan Isrel nana panggaganuwa yuking aminde butaya natayamuking.
PSA 106:47 Siwan Anutu, nindane Buyambam tapanin, gata ninu dongu kundue kataune yuamangge asiknga sandeke papso. Sandeke pake unekan nipmake nisane kepmine gatu ninipakapso. Unzing tasiwina ninda gatane umanda kopsa akngae natake gaak wam ganinim. Unzingge ninda apbakngake umanda yatangenatnim.
PSA 106:48 Ninda Anututane umana yatangenatna. Ninu Isrel amindane Buyambam tapanin, apman gatu masan kaya asinggan asinggan yuwik. Siwan aminu kuupbamda anzing yanong, “Un siakan.” Buyambam tapatane umana yatangenatnong.
PSA 107:1 Ninda Buyambam tapae gaau asiknga ininim. Dasingge, waapa take sikngaapa. Asinggan asinggan ninde butaya siknga natanimunggak.
PSA 107:2 Ginu aminu kuupbam, Buyambam tapata ginu iwanzae kataune sandeke pakut. Unzingge ginda Buyambam tapatane umana yatangenatnong.
PSA 107:3 Ita ginu iwanza keu komduine pakuu gunzitda akonggaune nana gatu gunzitda pukunggaune nana gatu enagwak saak nana gatu amunggwak nana ngangu waamindane kataune sandeke pakut.
PSA 107:4 Sike kundu sangana wena kepban komune yumdekan kuke kepie tawaking. Tawake ngana kepi tapatu yotbam gapmane kunanga dua kaking.
PSA 107:5 Waakwau tomna siknga natake guyakngi yanggae kupiawan akumningge dapaknga siking.
PSA 107:6 Sike waakwau upeeke unzing yuyuuk Buyambam tapae yatawaking. Yatawamba natake ita take siknga aknga tasike gatayamuke meya kakingu asandeyamukut.
PSA 107:7 Ita kepi noman takngane yanipake kuwawan yotbamu gapmandune kundoke wanggapmane yuking.
PSA 107:8 Unzingge nata natapa waaminda Buyambam tapae gaak ininingge nataat. Asingganu ita butaya natayamuke duya takngatu takngatu aminu kuupbamde tasike gatayamukutde gaak ininingge nataat.
PSA 107:9 Dasingge, ita aminu guyakngi kupiakaingu yangga yaman tangopa take singgak. Siwan ita nanambamu tomna nataaingge yaman napa musia akgitnakaing.
PSA 107:10 Sike aminu kundu kaautde pekingu paku zikaa siknga komduatang peking. Aminda sen taknga akngata wamayamuke paku kaautde peke meya buyambam yamuking.
PSA 107:11 Dasingge, waakwau Anutu kekekngana bamban tapatane wam takngae yamandet siking. Ngan, enane siknga yuak kapatane wamna yamasandeking.
PSA 107:12 Yamasandewawa ita puya kekeknga siknga yamuwawan musiaatangu meyambam natapbing. Meyambamu wa natapbing kakngata zipan pimapa aminu gatayamunanga wena sikut.
PSA 107:13 Sike waakwau unzing upeeke yuyuuk Buyambam tapae yatawaking. Yatawamba natake ita take siknga aknga tasike gatayamuke meya kakingu sandeyamukut.
PSA 107:14 Sandeyamuke Buyambam tapata papan zikaa dakaatang yukingu ateke apbing. Siwan sen takngata wamayamukingu ita asandeyaman kaautde gatu dua yuking.
PSA 107:15 Unzingge nata natapa waaminda Buyambam tapae gaak ininingge nataat. Asingganu ita butaya natayamuke duya takngatu takngatu aminu kuupbamde tasike gatayamukutde gaak ininingge nataat.
PSA 107:16 Dasingge, sanga kekeknga siknga bras ngang yania gwambok dakandaka aminda pasia, ita atzipbukut. Siwan damanu ainu kekeknga dakandakata pasia ngana awesiwan pukuking.
PSA 107:17 Siwan aminu kundu yamandet sike gena dua gwaamuke waiaknga tasikingge waakwau meya paking.
PSA 107:18 Pake nanam nananggengu apbitaking. Apbitake kumningge dapaknga sikut.
PSA 107:19 Sike waakwau unzing peeke yuyuuk Buyambam tapae yatawaking. Yatawamba natake ita take siknga aknga tasike gatayamuke meya kakingu sandeyamukut.
PSA 107:20 Sandeyamuke ita yake gupnaapa pasiwan take gatu siking. Unzing wa kupsa amin binga gatu pangenake pakut.
PSA 107:21 Unzingge nata natapa waaminda Buyambam tapae gaak ininingge nataat. Asingganu ita butaya natayamuke duya takngatu takngatu aminu kuupbamde tasike gatayamukutde gaak ininingge nataat.
PSA 107:22 Siwan waaminda kau tainingu sanga Anutue imunanga aknga binga taike musip gwaangu puya buyambam pasikutde natake inimbaknganingge nataat.
PSA 107:23 Siwan aminu kundu sipgwen tanggakgane kuyanae yuaingu yanggabam gwene kuke kepna kepna kuyuuk sanganambamban daknganangge aminbamde sanga paku yamuyuuk tasikaing.
PSA 107:24 Aminu waakwakga sanga Buyambam tapata tasikuu akaking. Waakwakga sanga inata kundu yanggabam gwene tasikuu akaking.
PSA 107:25 Dasingge, Buyambam tapata yawan gou buyambam puyapbut. Puyake tasiwan yanggabam gwenda sambui buyambam siknga enakut.
PSA 107:26 Unzing tasiwan sip gwegwenu enane siknga koke amunandang siknga pukuking. Unzing siwan sipdane kuyana yuaingu wai asinangge kamang ngang natake gwauya siknga natapbing.
PSA 107:27 Unzing natake sip tangan aminu yangga toknga aknga tangoke datdap takaingga binga datdap take sukuking. Sukuke sip gwenu gatangamunangge takngatu natapnanga dua sikut.
PSA 107:28 Sike waakwau unzing upeeke yuyuuk Buyambam tapae yatawaking. Yatawamba natake ita take siknga aknga tasike gatayamuke meya wa kakingu sandeyamukut.
PSA 107:29 Ita tasiwan got taknga atzakngawan, yangga gwenu kuma yukut.
PSA 107:30 Sike waaminda kawanu yangga gwenu kuma yuwan kake waakwau asiknga bakngaking. Siwan Buyambam tapata yot gapma yangga kwaimune kunangge natapbing gwene yanipake kukut.
PSA 107:31 Unzingge nata nataau waaminda Buyambam tapae gaak ininingge nataat. Asingganu ita butaya natayamuke ita duya takngatu takngatu aminu kuupbamde tasike gatayamukutde gaak ininingge nataat.
PSA 107:32 Sike waaminda Anututane aminabampat unekan yukengu itane umana kopsa akngae ayakapningge nataat. Waaminkat gatu gwapakngi aminkat unekan yuke waaminda itane umana yatangenatningge nataat.
PSA 107:33 Sike Buyambam tapatanu yangga buyambam tapaapa pasiwan atzakngaking. Siwan ita yawan yangga keu andakane yuaingu wena siking.
PSA 107:34 Ita tasiwan keu kaana kaya daka tapan tekwamban panga kaya daka sikut. Siwan sanga waomune dua akopning. Aminu keu waomune yuaingu waiaknga tasiwa Buyambam tapata meya waaknga waaminde yamukut.
PSA 107:35 Sike ita tasiwan yangga sanga wena kepban kopatangga akopbing. Akoke keu waomune zipmake kuking.
PSA 107:36 Siwana ita aminu nanamde atdapbing aminu yaniwan keu waomune yuke yotbam gapma mitake une yuking.
PSA 107:37 Waaminda keu waomune yuke nanam zak kwaike wain tapunu kuut kwaiking. Siwan uneta nanampat wainkat ngangu kwaapzang paking.
PSA 107:38 Buyambam tapata aminabamu take siknga pasiyamukut. Siwan ita tasiwan engangu kwaapzang aawawan ikwawa gamanu kwaapzang aaking.
PSA 107:39 Siwana aminu waakwau isapukuwan iwanata amak gwene yapbike asiknga yaipakepuke toknga yaman wai sike meya natayuke maakaking.
PSA 107:40 Sike Buyambam tapata tupan aminu pasiwan umana wena sikaing kapanin. Ita pasiwan waaminda keu kepina wena kopatang yumdekan sukuking.
PSA 107:41 Siwan ngana aminu sangana wena wai yuaingu, ita akgatayaman meyana wena siwan itane waatdakana kwaapzang sipsip binga siking.
PSA 107:42 Siwan noman aminda unzing kakengu musip gwaang nataaing. Siwan ngana wai aminda kakengu wamu takngatu dua yaning. Aho, waaminu gena asumutning.
PSA 107:43 Ayok, aminu tapatu natdetdeu noman pake yuak kapata katak siknga sanga wa kuupbamde natapsok. Natake Buyambam tapata take siknga asinggan tasinimunggak kakngae natake yuyok.
PSA 108:1 Anutu, natane musipmaatangu nata gae baniu kekeknga singgat. Siwan nata apmanu kau kumzang taike umanda yatangenawit.
PSA 108:2 Nata gita gatu kulele tanguwit. Tanguwawa kwakawik.
PSA 108:3 Buyambam tapa, nata dongu kundune nana banakan yuke gaak ganinangge nataat. Ngan, nata gae natake aminbamde banakan yuke kap taiwit.
PSA 108:4 Dasingge, gata ninde take siknga natanimunggayak. Sike ninda kana gata take natanimunggaau waaknga ena yekap gwenekan singgak. Asingganu ga takekan gatanimunggayak. Sike ninda tapdukbamu gata ninde take tasinimunggayau waaknga kendetna ena yekaunekan siwik.
PSA 108:5 Anutu, nata nataau gatane umanda enane siknga yatangenatningge nataat. Ngan, gatane kekeknga buyambam siknga akngaka aminu kepna kepna yuaingge aanggaman yeuyami gatane umanda kopsa akngae natapning.
PSA 108:6 Gata ninde take siknga nataayak. Siwan ninu kekeknga akngakata gatanimuke papi takekan yutnim.
PSA 108:7 Sike Anututa yotna buyambam gwene yuke anzing yakut, “Nata amak kaknga gwa yapbike apbaknganggat. Apbakngake nata Sekem kep komune nana amindane kepna gatu gapme Sukot kep komune yuak gwen ngangu ninane aminabamde usanzike yamit.
PSA 108:8 Keu Gileat kopkat gatu keu Manase kopkat wa natane. Sike keu Epraim komu amak amindane kupna kekeknga siknga binga nata gwapunggat. Siwan Juda kep komu kinggane gusoknga binga tanggat.
PSA 108:9 Siwan Moap kep komu dopangu nata yangga saikgat gwen binga singgak. Sike aminu tapatu keu komdu inae tanangge natake kepi tauknga waomune mumban kunggak kaknga tawake Idom kep komune nata kepi tauknga mumba kunggak. Sike nata Filistia kep komune amak tasike waakwak yapbike nata apbakngake aibakngawit.”
PSA 108:10 Anutu, mamin amin tapata yotbamu damanu kekeknga tasiya yot gapmaatang nanitake kuwik? Siwan mamin amin tapata Idomu nanitake kuwik?
PSA 108:11 Anutu, gata ninde masa gwa nimukuyak? Nimuke nindane amak amin ninu dua gatayamuya? Siwan ngana gata waomune nanitake kuya?
PSA 108:12 Gata nin gatanimi ninda iwaninkat amnim. Dasingge, amindane gatakgatak taknga sanga yumdekan siknga.
PSA 108:13 Sike Anututa akgatanimanu ninda amak tasike ayapbitnim. Ita ina siknga nindane iwaninu yaipakepik.
PSA 109:1 Anutu, nata gatane umanda ayatangenakgat. Gata kuma ma yuwim.
PSA 109:2 Dasingge, wai aminu kem yakaing aminda nae atsapdukaing. Sapduke nae iwana dakngake sapdut wam nanikaing.
PSA 109:3 Nae musiptok natake wamu wai siknga aknga moo yakaing. Wamu wa yakainggane yapiina wena.
PSA 109:4 Nata waaminde take natake gatayamiakge tumuk wam yanggat. Siwan ngana nae take dua nataaing.
PSA 109:5 Nata waaminde takeaknga tasiyama ngana yake waiaknga nae tasikaing. Nata waaminde take siknga natayamukum. Siwan ngana waaminda nae take dua nataaing.
PSA 109:6 Unzingge gata wai aminu tapatu katewi ita iwanatane wamu wam yot gwene usanziyok. Siwan inane iwana tapatuta wam yawikge takekuwik.
PSA 109:7 Sike wam yot gwene wam natapik kapata aminu waapa gutongana kaya ngang natake waapa initewan kaautde kuwik. Sike waapata tumuk wam yanggau waiaknga siwikge nataat.
PSA 109:8 Siwan nata nataau tupan aminu waapa zeetgaman kupikge nataat. Kupan aminu tapatuta ie tangge tapikge nataat.
PSA 109:9 Siwan aminu waapa akupan waaknga nana wena toitoit dakngawa mingata apna wena kombakombat dakngawikge nataat.
PSA 109:10 Siwan waatdakana yotna bumi siwan datdai siknga yutningge nataat. Siwan aminda yanikwasiwa yotna wai wa gwenu yuaingu teke kuning.
PSA 109:11 Sike aminu waapa aminu tapatutane sanga kundu moo apba pakut. Pakutna kakengu aminu waaminde sangana moo imukut tapata apu kepnaat sangaapanaat kuupbam papikge nataat. Siwan aminu you gapmandune nana ita puya tasike sangabamu usike pekuu apu akaipakuningge nataat.
PSA 109:12 Aminu tapatuta waapae musip kwikwiu dua natangamikge nataat. Itane waatdakana toitoit dakngakingge aminu tapatuta butaya natayamuningge dua nataat.
PSA 109:13 Nata waapatane waaknga asiknga kumningge nataat. Kupan aminu masan aatningga waapatane umanae dua natapning.
PSA 109:14 Buyambam tapata waiaknga itane bapunata tupa tasikingge natayuwikge nataat. Siwan ita mingatane waiakngana ma sandekngaman.
PSA 109:15 Buyambam tapata waakwakgane waiaknganae asinggan natayamik. Natayamuke tasiwan aminda itane dongae gatukande botaningge nataat.
PSA 109:16 Dasingge, aminu waapata notnaapae musip kwikwiu dua natayamukut. Wena. Ita aminu sangana wena gatu sangaapae dapmakaing amin gatu meya pakaing aminde ngangu iwana dakngakut. Dakngake atzipan kumbing.
PSA 109:17 Ita tupa wamu waiaknga aminu kunduta meya paningge yakut. Siwan ngana ina meya papikge nataat. Sike ita Anutu inikwaiwan aminu kundu take gatayamikge dua natapbut. Unzingge, aminu waapa Anututane kwikwiknga aknga dua siknga papikge nataat.
PSA 109:18 Tapdukbamu ita wamu yanggau aminu kunduta meya paningge yanggak. Siwan wamu waaknga tauknga pasinggak binga singgak. Siwan wamu waaknga inane gupna apaatang yanggata binga pukukut. Pukuke itane kwatai atang kaana akngata binga kukut.
PSA 109:19 Siwan wamu inane waakngata taukga usikwatanggak binga siwikge nataat. Siwan musipna simbu akngata wamanggak binga siwikge nataat.
PSA 109:20 Unzingge Buyambam tapata aminu nae temapa nanikaingge meya yamikge nataat. Dasingge, wamu wai siknga waaknga nae nanikaing.
PSA 109:21 Siwan Anutu, Buyambam tapana, gata na gatangamiakge nataat. Unzing gika gwa yawi kekekakut saak. Gatane umanda takeaknga siwan gata nae butaya asinggan nataayak. Unzingge gata na asiknga tapso.
PSA 109:22 Dasingge, na sangana wena siknga yuke moo siknga yuat. Moo yuke natapa wai siknga singgak.
PSA 109:23 Na bangee gunzitda apukunangge siwawan weenata kunggak binga kunangge singgat. Na unzing gwakgwau got takngata apu puyatakunggak binga.
PSA 109:24 Sike nanam nanangge nina ayandakngawa muna kekekngana wena singgak. Na gupmaapa apatdewan kwatana gatukande atuyukaing.
PSA 109:25 Unzing siwa kake aminbamda nae atemapa nanikaing. Nanike waaminda gwapaknga makaiyuuk atnanimikaing.
PSA 109:26 Anutu, Buyambam tapana, gata nae butaya asinggan natangamunggayak. Natake gatangamuke gata na gatuka tapso.
PSA 109:27 Sike gata na take gatangaminu natane iwanata atnatdetningge yeuyamuyo. Yeuyami Anutu akgatangamunggak kapanin ngang natapning.
PSA 109:28 Waaminda “Anututa aminu waapa atasiwan maiyok,” ngangu apba yaning. Yawan ngana gata nae takekan tasiya. Gata aminu nae wai wa tasikaingu ayaipakepi maakanong. Siwan na gikane puya aminda, musip gwaang natapit.
PSA 109:29 Sike natane iwanata nae atemapa yakaingge maaknga buyambam paningge nataat. Maaknga waakngata aminu gatukande usikwatapik. Usikwatapan aminbamda maaknga waaknga natapningu aanggaman take kaning.
PSA 109:30 Siwan ngana nata asainggamatake Buyambamtapa gaak wam inimbakngawit. Sike aminbamu unekan yuke mun puke ininangge tasiwawa nakaya itane umana ayatangenawit.
PSA 109:31 Dasingge, ita sangana wena waamin gatayamuke kakuya pasinggak. Kakuya pasiwan aminda wam yot gwene yaningge dua yanipakoke akumningge wamu dua yaning.
PSA 110:1 Buyambam tapata natane tupan tapana anzing inikut, “Ga umanda kopsa apa, gata nae apu natane kataknga siaapane pukuyuwawi nata tasiwa gatane iwanda gae gepbiatang koyutning.”
PSA 110:2 Buyambam tapata tasiwan gata Saion yot gapmane yuke ga tasiwan yotgapma gapma kwaapzang kayuya. Siwan gata iwanda kuut kayuya.
PSA 110:3 Tapduu gata iwandaat amnangge natapinu, gikane aminda apuke gatanggamuke waaminda amakge masa wamu dua yaning. Siwan umana kopsa siknga akngane yuke waaminda kekeknga kayuk kaknga paning. Siwan kekeknga waaknga unzing, tapdukbamu gunzit dua akowawan sopa daiu yuak binga kekekngana gatu paning. Ina unzakan, gakaa kekeknga kayuu tapdukbamu asinggan papsa.
PSA 110:4 Buyambam tapata wamu takngatu gae anzing gwa yawan kekekakut, “Gata pris tapa asinggan asinggan yuya. Siwan ga Melkisedek binga apa dakngaya. Anututane puya pasikut tapa yukutna nataamang. Ge Buyambamtapa wamu siakan yake wamu ina yanggau dua sandekgak. Siwan wamna asinggan yuwik.
PSA 110:5 Buyambamtapa gaat yuke kekekanggamik. Tapduu ita musiptok natapik komune ita amau kingu komdu komdune nanaat amake ayapbike yaipapaakusike yainggamambik.
PSA 110:6 Ita kepna kepna nana aminu usanziwik. Usanzike gutonga aminda tasikingge yake meya yamik. Sike amak tasining komune aminu kwaapzang zipa kumning. Siwan ita gatu kingat kuut kepna kepna nana ayapbike yaipapaakusike yainggamambik.
PSA 110:7 Ita kepiapane kuke yangga wesim zipmanggak kapane tangopik. Tangoke ita kekeknga pake amau kekeknga tasike ayapbimbik.”
PSA 111:1 Buyambam tapatane umana yatangenatnong. Nata Buyambam tapae gwaam siknga natangamuke asiknga inimbakngawit. Ngan, aminu kepi noman takngane sukukaing aminu unekan gatake yutning komune yuke nata asinimbakngawit.
PSA 111:2 Buyambamtapa puyana take siknga pasinggak. Aminu puya Buyambam tapata pasinggakge take nataaing aminda puya wa ita pasinggak kakngae katak natake yutnong.
PSA 111:3 Siwan ita king kapa yuke sangabamu pasinggakga inane umana aknga yatangenawa take siknga singgak. Sike itane noman takngana asinggan asinggan yuwik.
PSA 111:4 Buyambam tapata amindane natdetdetna pangenawan waaminda noman taknga tasinggakge asinggan asinggan natayutning. Asinggan siknga Buyambam tapata ninde musip kwikwik natanimuke ninde butaya natayuak.
PSA 111:5 Natayuke ita nanamu asinggan aminu ie akgwaukaing aminde yamunggak. Ita wam taknga yaniwan kekekakut takngae asinggan asinggan natayuke ita dua siknga botanggak.
PSA 111:6 Ita aminu kundutane kepna inane aminde yamukut. Puya waaknga tasike inane kekeknga akngana waaminde yeuyamukut.
PSA 111:7 Ita sanga siakan gan tasike kepi noman gan tawake tasinggak. Tasike ita inane pasap wamda yanggak kaknga natake ninu ie banip sinanga.
PSA 111:8 Ita wamu wa yake tekuu noman siknga asinggan asinggan yuwik. Ngan, ita mama wamu wa yakut taknga asinggan yuwik.
PSA 111:9 Siwan ita aminu inae gwa pakuu akgatayamukut. Sike ita pasap wamu aminu waakwakge yaniwan kekekakut takngae natake yawan wamu waaknga asinggan asinggan yuwik. Unzingge itane umana kopsa akngae natake umana waaknga inata siknga ngang natake akgwauke ie gepbiatang koyuaing.
PSA 111:10 Sike aminu tapatuta natdetdet amin daknganangge natakengu waapata Buyambam tapae akgwaumsok. Sike wa akgwaukgak kakngata amindane musia pangenawan natdetdet amin dakngawik. Unzingge ninda itane umana asinggan asinggan yatangenatnim.
PSA 112:1 Buyambam tapatane umana yatangenatnong. Mamin aminu tapatuta Buyambam tapae akgwauke itane mama wam tawanangge take siknga natapiu Anututa take tasingamik.
PSA 112:2 Itane waatdakaa aminde kaine umana kaya dakngake yutning. Ngan, aminu waapa noman yuwiu Anututa waapatane donga take pasiyamik.
PSA 112:3 Siwan aminu waapatane dongu moni kwaapzang paning. Siwan aminu wa apatane kepi noman takngana asinggan asinggan yuwik.
PSA 112:4 Siwan aminu noman tapatanu aminde musip kwikwik gatu butaya ngang natayamuke kepi noman takngane sukunggak. Sukuke zikaa dakane ba kuwik. Kuwawan kakaa akngata apuke take aminu waapa akgatangamik.
PSA 112:5 Aminu tapatuta sangaapana dua kotnake aminu kundu kapewan itane sanga moo paning. Sike aminu waapae sanga take aknga ie asapik. Aminu kundutane wamna usanziwan noman siwik kapae.
PSA 112:6 Siwan amin nomanu waapa pimananga dua. Siwan aminda kake aminu waapae dua botaning.
PSA 112:7 Siwan ita meya takngatu zandangga aakgakge yawan natakengu dua gwaumbik. Aho, ita Buyambam tapae banip sike ie natapan kekekawik.
PSA 112:8 Natapan kekekawan ita musip kwikwik natayuke nangaakan dua natake gwauya dua natapik. Gwauya dua natake ita iwana yapbimban datakuwawa kawik.
PSA 112:9 Ita sangana wena aminde sanga kwaapzang yamunggak. Siwan noman takngana asinggan asinggan tasiwik. Tasiwan kake aminu kunduta umana kayaapa ngang natake umana yatangenatning.
PSA 112:10 Yatangenawawa ngana wai aminda kake musia meya natapning. Waaminda musipmaiu amin nomande nataaing, ngana ita masande atasingupeewik. Ngan, ita gen gakngat tasiwik.
PSA 113:1 Ginu Buyambam tapatane umana yatangenatnong. Ginu puya aminu Buyambam tapatane, itane umana yatangenatnong
PSA 113:2 Nata nataau Buyambam tapatane umanae apbaknganingge nataat. Apman gatu masande kuut natayutnong.
PSA 113:3 Gunzitda akonggauneta kuku gatu gunzitda pukunggaaune ginu aminu kuupbamda Buyambam tapatane umana asiknga yatangenatningge nataat.
PSA 113:4 Buyambam tapata aminu kuupbam kakuya pasinggak. Umana kopsa akngnanata sanga yekaune yuaingu kuupbam ayapbikgak.
PSA 113:5 Aminu tapatu Anutu Buyambam tapanin binga wena. Waapa enane siknga yuke sanga kuupbam kayuak.
PSA 113:6 Sike enane siknga yuke ita yekap gatu kepat ngang unekan amunandang yuwawat pakepusang kaak.
PSA 113:7 Ita sangana wena amin gatayaman ita gatu dua tasingupeeke takekan yuaing. Ita sangae dapmakaing aminu waakwau katak gatayaman takekan pake yuaing.
PSA 113:8 Siwan ita waaminu pewan tupan tapae banakan yuke natapa umana kopsa siknga singgak. Siwan waamindane dongune tupan amin tapaapat yuaing.
PSA 113:9 Siwan ita maya waak songge yuaingu take pasinggak. Pasiwan maya waakwakga minga dakngake engangu kundu betake asiknga bakngakaing. Siakan. Buyambam tapatane umana yatangenatnong.
PSA 114:1 Tupa Isrel nana aminda Isip teke kuking. Ngan, Jekopdane dongga wamna inata yakinggane kep kom teke kuking.
PSA 114:2 Sike aminu Juda nana dongu Buyambam tapatane yot takwana binga dakngaking. Ngan, Isrel nana dongu Buyambam tapatane aminabam dakngawan Anututa kayukut.
PSA 114:3 Yangga Ret Si gwenu ita kawan asisakukut. Siwan yangga Jordan tapa kautdu kuma yuwan kautdu atzakngakut.
PSA 114:4 Sike Anututa natapan siwan tawanu buyambam dakandaka memeta binga paapaapbing. Siwan tawanu mateknga dakandakasimu sipsipda binga paapaapbing.
PSA 114:5 Ga yanggabam gwen, sanga minata aawan kake isakuyak? Sike yangga Jordan tapa, dasingge ga gatu dua zipbuyak?
PSA 114:6 Sike ginu tawanu buyambam dakandaka, dasingge ginu memeta binga paapbing? Siwan ginu mateknga dakandakasimu dasingge sipsipda binga paapbing?
PSA 114:7 Ga kepdaka, Buyambam tapata apanu ayamumso. Ngan, Jekopdane Anutunata gwa apanu ga ayamumso.
PSA 114:8 Sike ita tasiwan sup gwenu yangga gapan gwen dakngakut. Ngan, ita suu kekeknga siknga gwenu tasiwan yangga buyambam tanga zipbut.
PSA 115:1 Anutu, gata nindane umaninu ma yapangenawim. Gata ninde butaya siknga asinggan natanimuke gata ninu dua nipmanggayak. Unzingge ninda gatane umanda kopsa akngae natake gaekan yatangenatnim.
PSA 115:2 Dasingge dongu takngatuine nanata ninde anzingu ninikwaikaing, “Gindane Anutusa zandang yuak?”
PSA 115:3 Nisane Anutuninu yekaune yuak. Sike ita sanga takngatu tasinanggengu atasiwik gekan.
PSA 115:4 Sike ngana dongu waakngatane anutuna inata. Ngan, waamindane anutu pupukngana silwa gatu gol ngangga pasikaing. Waaminda katakngata pasikaing.
PSA 115:5 Waamindane anutu pupukngana gena kaya, siwan ngana wamu dua yakaing. Kaina kaya ngana dua kaaing.
PSA 115:6 Waakwau maaknga kaya ngana wamu dua nataaing. Gatu nomna kaya siwan ngana sanapuke kapanga natapnanga dua.
PSA 115:7 Gatu katakngi kaya siwan ngana sanga kundu pananga dua. Siwan kepi kuut kaya siwan ngana kepi kunanga dua. Siwan gatu wam gakngau guyakngaatang ba yake tasinanga dua.
PSA 115:8 Sike aminu anutu pupuknga wa pasikaing takwau anutu pupuknga ina pasikaing binga daknganing. Siwan aminu ie banip sikaingu wa bingakan daknganing.
PSA 115:9 Ginu Isrel nana amin, ginu baniu Buyambam tapaekan sinong. Ita ginu akgatandamuke danduyuak.
PSA 115:10 Ginu Arondane dongune yuaingu, ginu Buyambam tapaekan baniu sinong. Ita ginu akgatandamuke danduyuak.
PSA 115:11 Ginu aminu Buyambam tapaekan gwaukaingu, ginu ie banip sinong. Wa awiapatakan gatandamuke danduyuak.
PSA 115:12 Buyambam tapata ninde asinggan natayuak. Natayuke ninde take pasinimik. Ita Isreldane dongune nana take pasiwik. Ngan, Arondane dongune nana kuupbam take pasiwik.
PSA 115:13 Buyambam tapata aminu ie akgwaukaingu kuupbam take pasiwik. Unzing aminu umana kaya gatu umana wena kuutgan take pasiwik.
PSA 115:14 Sike nata nataau Buyambam tapata ginde gatu bapusa masan aatningge, waatdaka kwaapzang damikge nataat.
PSA 115:15 Buyambamtapa yekapat kepkat pasikut tapa unin. Ita ginu take siknga pasiwikge nataat.
PSA 115:16 Sike yekau enane siknga yuau wa Anututane kepna. Siwan ngana ita keu andaka ninu kepdakane nana aminde nimukut.
PSA 115:17 Sike aminu akungwakaingu wa yotnane kuke kuma siknga yutning. Siwan Buyambam tapatane umana dua yatangenatning.
PSA 115:18 Siwan ngana ninu ayuamangu, gaak kaknga Buyambam tapae apman gatu masan kaya asinggan asinggan inimbaknganim. Buyambam tapatane umana yatangenatnong.
PSA 116:1 Siakande siknga Buyambamtapa nata yanggat taknga atnatangamukut. Unzing tasinggakge nata ie take siknga nataat. Siakan siknga, nata tumuk wam yake ita butaya natangamikge iniwa ita atnatangamukut.
PSA 116:2 Ngan, natane tumuk wamu kuupbam ininggau atnatangamunggak. Unzingge nata kayuk yuwit komune asinggan ininggamatawit.
PSA 116:3 Sike tupa kungwak kakngata napda binga wamanapmanggut. Wamanapmamban natdetdetna tewa aminu gwa kumbingga yuaing komde kukut. Kuwan wa natapbum takngata tasiwan na kumzang siknga gwauke nangaakan natapbum.
PSA 116:4 Unzingge nata Buyambam tapae anzing inikum, “Buyambam tapa, nata gae yanggawanggatde gata na gatuka atapso. Na kupsat,” ngang inikum.
PSA 116:5 Buyambam tapata ninde musip kwikwik natake ninde take pasinggak. Anutuninu ninde butaya natanimunggak.
PSA 116:6 Buyambam tapata aminu kundu kekekake yutnanga dua aminu ita akgatayamunggak. Ina unzakan, tupa nata upeeke yuwawa na ita gatuna takut.
PSA 116:7 Ge apmanu nata musipma kwikwiknga natake yuwatakawikge nataat. Dasingge? Buyambam tapata na take siknga nanduyuak.
PSA 116:8 Dasingge? Buyambam tapa, gata na gatuka tapi nata dua kumbum. Ngan, gata natane kai yanggana pasiwi kuwa gata na nanduyuwi nata dua pimakum.
PSA 116:9 Unzingge nata aminu kayuk yuaingkat gatake sukunim. Siwan na Buyambam tapae kaine sukuwitde nanduyak.
PSA 116:10 Siwan nata banip sike anzing yakum, “Meya buyambam siknga akngata na usikwatapmanggak.” Unzing yakum ngana nata Anutue banip sikum.
PSA 116:11 Na usikwatapan akgwauke nata gatuna anzing yakum, Aminu kuupbamda kem wam asinggan yakaing.
PSA 116:12 Siwan Buyambam tapata nae take siknga tasinggak. Siwan ngana sanga nata yake ie mina binga imit?
PSA 116:13 Anututa na gwa takut takngae take siknga natake sanga waakngae yatangenawit. Buyambam tapata na gwa takutde gaak wam iniwit.
PSA 116:14 Sike tapduu itane aminabamda unekan pakapu yutning komune nata yawa kekekakut taknga atasining.
PSA 116:15 Siwan Anututane aminu tapatu akupan kakengu ita sanga mooi ngangu dua nataak. Aho. Ita inane aminde butaya siknga natayamunggak.
PSA 116:16 Buyambam tapa, siakande siknga na gatane puya aminda dakngake puya gatane akngaka apasinggat. Unzing tupa mingata pasikut binga. Gata nau na wambingu waikngami take yuat.
PSA 116:17 Siwan nata gae musip gwaang natanggamunggat taknga ofana binga gamunggat. Gamuke nata gae tumuk wam ganiwit.
PSA 116:18 Siwan nata wamu tupa gae yawa kekekakut taknga nata apmanu gatane amindabamde kaine sanga waaknga atasiwit.
PSA 116:19 Ngan, Anututane yotbam gwekatang yuke sanga waaknga atasiwit, you Jerusalem yuak gwekatangun. Siakan. Buyambam tapatane umana yatangenatnim.
PSA 117:1 Ginu kepna kepna nana aminu kuupbamda, Buyambam tapatane umana yatangenatnong. Ngan, ginu dongu takngatu takngatuine nana aminu kuupbamda, Buyambam tapatane umana yatangenatnong.
PSA 117:2 Ita ninde take siknga asinggan asinggan nataniman buyambam singgak. Sike ita wamu yanggak kaknga asinggan asinggan tawake tasinggak. Buyambam tapatane umana yatangenatnong.
PSA 118:1 Buyambam tapata ninde takeaknga tasinggakge gaak wam ininim. Asinggan asinggan ita ninde musip kwikwik siknga natanimunggakge natake inimbaknganim.
PSA 118:2 Nata nataau Isrel nanata anzing siknga yaning, “Ita ninde butaya siknga asinggan asinggan natanimunggak,” ngang yaningge nataat
PSA 118:3 Siwan aminu Arondane dongune nanata anzing yaning, “Ita ninde butaya siknga asinggan asinggan natanimunggak,” ngang yaningge nataat.
PSA 118:4 Ngan, aminu kuupbam Buyambam tapae gwaukaingga anzing yaning, “Ita ninde butaya siknga asinggan asinggan natanimunggak,” ngang yaningge nataat.
PSA 118:5 Na meya buyambamu takngatu kake Buyambam tapae tumuk wam inikum. Iniwa natake ita meya waaknga gatukande sandekngamukut.
PSA 118:6 Buyambamtapa naat gatake yuamakge aminda nae sanga wai takngatu dua tasining. Asikaya aminu tapatuta sanga wai takngatu nae ba tasiwik? Unzingge na dua gwaumbit.
PSA 118:7 Buyambamtapa naat gatake yuamak. Siwan ita na gatangamunggak kapanin. Unzingge nata iwana yaipakepu peke pasiwa maining.
PSA 118:8 Siwan Buyambam tapae ninda banip sinimu take siknga. Siwan ngana ninda aminde baniu sinimu take dua siwik.
PSA 118:9 Ninda baniu Buyambam tapae sinimu take siknga. Siwan ngana ninda baniu kingge sinimu take dua siwik.
PSA 118:10 Natane iwana kepna kepna nana aminu kwaapzangga na takumbasiking. Siwan ngana Buyambam tapatane kekeknga akngane nata atzipa puyukut.
PSA 118:11 Waaminda kaukaut takumbasiking. Siwan ngana Buyambam tapatane kekeknga akngane nata atzipa kumbing.
PSA 118:12 Ita na ingutbam kwaapzangga binga takumbasiking. Siwan ngana zaat siknga katap gwenu sak tangaatang isike kungwanggak binga kumbing. Buyambam tapatane umana akngane nata atzipa kumbing.
PSA 118:13 Iat amak kaknga kekeknga siknga naat ambumang. Siwan na paa pimakum. Siwan ngana Buyambam tapata akgatangamukut.
PSA 118:14 Buyambamtapa na kekekangamunggak kapanin. Siwan na ie bakngake kap taknga taingamunggat. Ita na ina siknga gatangamunggak.
PSA 118:15 Aminu kepi noma nomanae tawakaing aminu waakwakga yotnaatang yuke iwana ayapbikingge natake bakngake kap taikaing. Kau wa taikaingu anzing, Buyambam tapata kekekake sanga kekeknga aknga aknga tasikut.
PSA 118:16 Buyambamtapa kekekngana bamban. Buyambam tapata kekekake sanga kekeknga aknga aknga tasikut.
PSA 118:17 Na zet dua kupit. Aho. Nata kayuk yuke Buyambam tapata sanga pasikutde yakapit.
PSA 118:18 Buyambam tapata waiaknganae natake meya buyambam atnamukut. Siwan ngana dua nandutewan kumbum.
PSA 118:19 Sike gwambou aminu noma nomana tasikaingga take kopnanga gwau zitnong. Siwan nata undang koke Buyambam tapatane umana yatangenawit.
PSA 118:20 Gwambou anggwau Buyambam tapatane noman amindakan take kopning.
PSA 118:21 Buyambam tapa, gata tumuk wama natake gatangamuke na gatuka tapi take yuat. Unzingge nata umanda yatangenawit.
PSA 118:22 Siwan kamundata yot gwendu supda tasike suu gwendu natapan wai ngang siwan kwasikingu, apmanu suu wagwenu kawan suu tupan gwen siwan yotgwen tapan kekekanggak.
PSA 118:23 Buyambam tapata ina yawan sanga waapa aakut. Waapa aawan kake natapna take siknga singgak.
PSA 118:24 Siwan Buyambam tapata sanga waaknga aawikge tasikut. Unzingge ninda asiknga bakngake ie musip gwaang natapnim.
PSA 118:25 Buyambam tapa, ninu gatuka papso. Gata gatanimi sanga kuupbam ninda tasinimu takekan sining.
PSA 118:26 Siwan ga Buyambam tapae umande apinu Buyambam tapata gae apbakngawik. Siwan ninda Buyambam tapatane yotna gwene yuke inimbakngakanim.
PSA 118:27 Buyambamtapa awiapa Anutu siknga unin. Ita ninu kakuya take siknga pasiwan ninu itane kakaa akngane take yuamang. Siwan, ginda musip gwaang natake katap kaing pake alta dakane kuke takumbasinong.
PSA 118:28 Ga natane Anutuna, unzingge nata gaak wam yake ganimbakngawit. Ga natane Anutuna, unzingge nata gatane umanda yatangenawit.
PSA 118:29 Buyambam tapata sanga take akngakan tasinggakge gaak wam ininong. Ita ninde take siknga natanimunggak kaknga wena dua siwik.
PSA 119:1 Aminu kunduta noman gan sukuke gutonga takngatu dua tasikaingu Anututa sanga takeaknga pasiyamik. Ngan, Buyambam tapatane mama wamnakan tawakaingu Anututa sanga takeaknga pasiyamik.
PSA 119:2 Aminu Anututane mama wamu kuupbam asiknga tawakaingu take aknga pasiyamik. Waaminda Anutue kuke iat yutnangge take siknga nataaing.
PSA 119:3 Siakande siknga, aminu waakwau waiaknga dua tawakaing. Waakwau kepi Buyambam tapatane aknganekan sukukaing.
PSA 119:4 Gata mama wamba kuutgan ninde gwa nimukuyak. Nimuke gata natayau, ninu akgwauke mama wamu kuupbam katak siknga tawanimde natayak.
PSA 119:5 Nata nataau nata kekekake gatane mama wamba asinggan tawambitde nataat.
PSA 119:6 Unzingge na gatane mama wamba akngaekan siknga nataat. Natake maaknga kundusim ngakaya dua natapit.
PSA 119:7 Sike nata gatane mama wamba noman takngakae natatakuwa siwan gatane umanda aknga ayatangenawit.
PSA 119:8 Nata gatane mama wamba katak siknga tawambit. Unzingge gata na ma siknga napmambim.
PSA 119:9 Dasing siknga wawi matek tapata noman taknganekan sukuwik? Ita gatane wamba katak tawakengu nomangan sukuwik.
PSA 119:10 Na natdetdeu takngatukan tanggat. Siwan Anutue kuke iat yutnangge take siknga natat. Siwan gata gatangami nata gatane mama wamba dua tewit.
PSA 119:11 Sike nata waiaknga gae dua tasiwitde natake gatane wamba natdetdetnane kekeknga gwa natapa yukut.
PSA 119:12 Buyambam tapa, nata gatane umanda yatangenakgat. Sike gatane mama wamba noman takwau asiknga nanindamumso.
PSA 119:13 Nata aminu kuupbam gata mama wamu ninikapbuyau nata ayaninggat
PSA 119:14 Na gatane wam tawanangge asiknga baknganggat. Unzing aminda moningge ba sanga gwaam gwaamde bakngakaing binga.
PSA 119:15 Nata natdetdetnane sanga nata tasiwitde yakuyak kat, gatu wamu nimukuyak kat katak siknga natapnangge natake tasinggat.
PSA 119:16 Na gatane mama wamde iaknga siknga nataat. Nata wamu waakngae dua siknga botawit.
PSA 119:17 Gata nae take siknga tasiwi na gikane puya aminda kayuk yuyuuk gatane wamba tawambit.
PSA 119:18 Gata natane natdetdetna tapi kakaawan nata wamu take aknga aknga inata kundu mama wambaatang yuaingu natdewit.
PSA 119:19 Sike na pakapuyut amin tapa, keu andakane asinggan dua yuwit. Unzingge gata mama wamba nae ma takusopuwim.
PSA 119:20 Nata musipmaatangu gatane yuyuk noman takngae tapdukbamu asinggan tawanangge take siknga nataat.
PSA 119:21 Sike aminu kunduta gatane mama wambae masa imuke inae natdet tawakaing. Siwan gata yamandet aminu sanga take akngata ie dua apikge natake waakwau kaanga yaniyo.
PSA 119:22 Sike waaminda nae sapdut wam nanisapduwawa kake gata gatangami gatuna wamu waaknga yananga dua siwik. Dasingge, na gatane mama wamba atawanggat. Ge gata ma kapewi wamu unzaaknga nae ma yawam.
PSA 119:23 Sike tupan aminu nae sapdut wam yaningge unekan yuke wamu yakaing. Siwan ngana undanga, na gatane puya aminda, nata gatane mama wamba noman takngae asinggan natanggamatawit.
PSA 119:24 Na wamu kepi aknga asukunggat taknganin tapa nomatawikge nanikuyak kakngae take siknga nataat. Gatane wambata asinggan nanindamukgak.
PSA 119:25 Na aminda atnaitakepu tewa kepdakaatang wai siknga pekgat. Siwan ngana gata ayawi kekekakut saak tangenake na tapi kekekawit.
PSA 119:26 Sike na yuyuuk taknganae kuupbam gwa ganikum. Siwan gata yake gwa nanikuyak. Gata nae mama wamba kuupbam nanindamumso.
PSA 119:27 Gatane mama wamba natdewitde nanindamumso. Siwana nata duya takngatu takngatu gata tasikuyak kakngae natanggamatawit.
PSA 119:28 Sike na musipmaatangu meya siknga nataat. Gata ayawi kekekakut saak tapi kekekawit.
PSA 119:29 Gata nanduyuwi nata kem wam taknga ba tanzit taknga dua tasiwit. Gata mama wam takngaka tawake nae butaya natangamuyo.
PSA 119:30 Sike na gatane siakan wam tawambitde gwa yawa kekekakut. Asingganu gatane mama wambae atnatayuat.
PSA 119:31 Buyambam tapa, wamu gata nae namukuyak kaknga asinggan tawanggat. Unzingge gata sanga tapatu dua katewi aminu tapatuta tasiwan maakawit.
PSA 119:32 Nata zaatgaman gikane wamba tawambit. Dasingge, gata meya musipmaatang yukingu gwa sandekuyak.
PSA 119:33 Buyambam tapa, gata na mama wamba katak siknga tawambitde nanindamumso. Nanindamumbi nata asinggan tasitakuusika kupit.
PSA 119:34 Gata nae natdetdeu noman siknga naminu nata apme tawambit. Nata musipma tewa gatane mama wambae kuwan kuutgan tawambit.
PSA 119:35 Gata kepina tanomanuwi nata kepi mama wambata yanggak saak sukuwit. Dasingge, na mama wamu waakngae natapa take siknga singgak.
PSA 119:36 Gata musipma tangenawi nata wamba waaknga tawananggengu take natapit. Natake sanga kwaapzangbam papitde dua natapa kuwik.
PSA 119:37 Gata gatangami sanga yapiina wena, moo akngae masa yamit. Gika ayawi kekekakut taknga saak na katak toimso.
PSA 119:38 Na gikane puya amin tapaka gae akgwaukgatde wamu gika naniwi kekekakut taknga saak tasiyo.
PSA 119:39 Sike aminu kunduta nandupa aminu waiapa siwik kakngae apbitanggat. Siwan sanga waaknga sandekngami take siwik. Dasingge, gatane mama wambae natapa take siknga singgak.
PSA 119:40 Na gatane mama wamba kuutgan tawambitde take siknga nataat. Gatane yuyukga noman gan siknga. Unzingge kayuk yutnanga aknga gata namuyo.
PSA 119:41 Buyambam tapa, gata nae take siknga natangamunggayak kaknga yeikngamuyo. Yeikngamuke na gatuka tapso. Unzing tasinangge gwa yawi kekekakut.
PSA 119:42 Na gata unzing gatangami aminu atnanisapdutningu yake yaniwit. Dasingge, na gatane wam takngae banip singgat.
PSA 119:43 Gata gikane siakan wam takngaka genane ma sandewim. Dasingge, na gatane wamu noman takngae baniu asinggat.
PSA 119:44 Sike nata gatane mama wamba asinggan tawambit. Ngan, asinggan asinggan tawambit.
PSA 119:45 Na gatane wam taknga natdetnangge tawanggat. Unzingge waiakngata dua umukngaman na meya dua kake takekan sukuwit.
PSA 119:46 Siwan nata king takwau gatane wam takngae yanikapit. Na unzing tasiwa aminu kunduta na maakawitde tasiwa maiwik.
PSA 119:47 Dasingge, na gatane mama wamde natapa take siknga singgak. Siwan mama wamu waaknga tawanangge musip gwaang nataat.
PSA 119:48 Sike na gatane mama wam takngaka yatangenakgat. Gatane mama wambae natapa take siknga singgak. Siwan nata asingganu gatane mama wamu waakngae natanggamatanggat.
PSA 119:49 Gata gatuka wamu tupa nae yawi kekekakut takngae natapso. Na puya aminda. Wamu waakngata musipma tangenawan nata wamu yawi kekekakut takngae banip singgat.
PSA 119:50 Sike tapduu meya kaya sikut kopatangu na musip kwikwik takum. Dasingge, ayawi kekekakut takngata kayuk yutnanga aknga inata kundu namukut.
PSA 119:51 Sike yamandet aminda sapdut wamu wai siknga tendeknga wena nanikaing. Siwan ngana na gatane mama wamde masa dua imunggat.
PSA 119:52 Buyambam tapa, na mama wamu tupa siknga namukuyak takngae natayuat. Sike wamu waakngae natake musipmaatang kwikwiknga nataat.
PSA 119:53 Sike nata kaawanu yamandet aminda gatane mama wamba gwa peking. Pewa kake nata musipma toknga siknga nataat.
PSA 119:54 Sike keu andakane yukuuk gatane mama wamde natake kap taiwit.
PSA 119:55 Buyambam tapa, na zikaane gatane umandae atnatayuat. Natayuke gatane mama wamba tawanggat.
PSA 119:56 Gatane mama wamu nata kuutgan tawanggat. Ngan, gatane wamu waaknga asinggan asinggan apbakngake gwaamukgat.
PSA 119:57 Buyambam tapa, ga naat yuke gae natapa take siknga singgak. Nata gae anzing yawa kekekakut, “Nata itane mama wamu kuutgan tawambit,” ngang yakum.
PSA 119:58 Gata musip kwikwiu nae namiyakge kekeknga siknga ganikwaikgat. Dasingge, gika unzing tasinangge gwa yawi kekekakut.
PSA 119:59 Na kepi sukunggatde atnatapasinggat. Unzingge apmanu gae mama wam tawambitde gwa yawa kekekanggak.
PSA 119:60 Sike na moo dua yuwit. Gatane mama wamu zet tawambit.
PSA 119:61 Na wai aminda napda wamake inane waiakngaatang nanitake kunangge tasikaing. Siwan ngana na gatane mama wamde dua botawit.
PSA 119:62 Sike petakumat dakaatangu na asenake gatane mama wamu noman takngae natake ganimbaknganggat.
PSA 119:63 Na gae akgwauke mama wamba tawakaing aminkat naat notna notna yuamang.
PSA 119:64 Buyambam tapa, ga keu andakane yuaing aminu kuupbamde take siknga nataayak. Gikane mama wamu kuupbam siknga nanindamumso.
PSA 119:65 Buyambam tapa, gata nae takeaknga tasinggayak. Na puya amin tapakaen. Gika wamu ayawi kekekakut taknga saak tasingamunggayak.
PSA 119:66 Na gatane mama wamu kuupbamde banip siknga singgat. Unzingge gata nanindamumbi natdetdeu take aknga pake sanga kuupbam katak usanziwit.
PSA 119:67 Tupa gata nae kepi yeikngamukuyau atekum. Teke kuwa nanduke gata meya takngatu takngatu atnamukuyak. Nami kake apmau nata gatane wamu atawanggat.
PSA 119:68 Sike ga take siknga. Ge sanga gata tasinggayak kakngae natapa take singgak. Siwan gata mama wamba katak siknga nanindamumso.
PSA 119:69 Sike yamandet aminda kem wamu kwaapzang nanisapduking. Siwan ngana na natdetdeu takngatu wena. Na gatane mama wamba asiknga tawambit.
PSA 119:70 Aminu waakwau natdetdeu butaya aknga takngatusimu wena. Sike ngana na gatane mama wamde siknga nataat.
PSA 119:71 Gata meya aknga namukuyakge natapa take singgak. Dasingge? Meya waakngata gatangaman mama wambae take siknga natdekum.
PSA 119:72 Na moningu buyambam siknga panangge take dua nataat. Siwan ngana gatane mama wambae take siknga nataat.
PSA 119:73 Sike na gika siknga katakgata tumukuyak. Siwan gata natdetdet nami gikane mama wambae kuutgan natdewit.
PSA 119:74 Siwan nata natapa aminu gae akgwaukaingu na nanduke waakwau apbaknganingge nataat. Dasingge, na gika wamu yawi kekekakut takngae banip singgat.
PSA 119:75 Buyambam tapa, na atnataat. Gatane mama wamba noman gan siknga. Sike gata meya nae namukuyau gata asinggan gatangamunangge natake tasikuyak.
PSA 119:76 Sike nata nataau gata nae musip kwikwik natangamunggayak kakngata musipma tapan kekekanggakge nataat. Dasingge? Wamu gata na puya amin tapakae wa yakuyau atasinggayak.
PSA 119:77 Gata apmanu nae butaya natangamuyo. Natangami kayuk yutnanga akngana atapit. Dasingge, na gatane mama wamde natapa take siknga singgak.
PSA 119:78 Sike yamandet aminu kunduta yumdekan nae yawa maiwitde tasingamuking. Unzingge nata nataau aminu waakwau apmaakaningge nataat. Siwan ngana na, na gatane mama wamde asinggan natayuwit.
PSA 119:79 Aminu gae akgwaukaingkat gatu gatane mama wambae nataaing aminkat nae apa notna notna daknganimde nataat.
PSA 119:80 Gata gatangami gikane mama wamu siakande siknga tawambitde nataat. Tawamba nanduke aminu kunduta na maakawitde tasiwa maiwikge nataat.
PSA 119:81 Sike na gata tapiakge ganduyuwawa kekekngana tuyuknga gwasik. Ngana na wamu gata yawi kekekakut taknga tawambiyakge banip siknga singgat.
PSA 119:82 Na wamu gika yawi kekekakut takngae natake ganduyuwawa kaina toknga nasikaing. Siwan anzing yanggat, “Zaapduknga natane musipma tasiwan wikawik,” ngang yanggat.
PSA 119:83 Sike na memetane gupna yangga zikaingu kupan takngata tasiwan bumi siwan mumba kuwa maikaing binga mainggat. Siwan ngana gatane mama wamde dua botanggat.
PSA 119:84 Tapduu datdasing ganduyuwawit? Siwan zaapduknga gata na puya amindae wai tasikaing aminde meya yake yamuya?
PSA 119:85 Sike yamandet aminu gatane mama wamba dua tawakaing. Dua tawake ita gapma kundu nata une pimapitde kusopuknga kwaikaing.
PSA 119:86 Gatane mama wamba kuupbam wa sanga ninda ie banip sinanga taknganin. Siwan ngana aminu kunduta nae kem wam moo siknga yake tasiwan mainggat. Unzingge gata gatangamuyo.
PSA 119:87 Sike na nutapan kupitde gwa dapakakut. Siwan ngana gatane mama wamba dua tekum.
PSA 119:88 Gata nae take siknga asinggan natangamunggayak. Siwan gata na katak nanduyuwi na zaat dua kupit. Dua kungwake nata gatane mama wamu kuutgan tawambit.
PSA 119:89 Buyambam tapa, gatane wamu asinggan asinggan yuwik. Wamu waaknga yekaune kekeknga yuak.
PSA 119:90 Gata wamu yawi kekekakut taknga asinggan asinggan tawanggayak. Gata kepdaka tangine tekuyak. Siwan waomune unzing yuke dua isakunggak.
PSA 119:91 Mama wamu gata tupa yakuyau apman kaya unzing yuak. Ngan, sanga kuupbamda gikae banip tawakaing.
PSA 119:92 Sike nata mama wamu gatane akngae take dua ba natapbum gamu, nata meya takngatu takngatu kakum gwekatangu gwa kupam.
PSA 119:93 Nata gatane mama wamba dua pewit. Dasingge, na unin tawamba gata tasiwi na kayuk yuat.
PSA 119:94 Sike na gikanekan. Unzingge gata na tapso. Gatane wamu asinggan tawanangge tasinggat.
PSA 119:95 Wai aminu na nutapan kupitde undang kusopuke yuaing. Siwan ngana na gatane mama wambae natapa kuwan nata ie nangaakan dua nataat.
PSA 119:96 Na apmanu gwa nataat. Sanga take tapatu wena. Siwan ngana gatane mama wamba take siknga. Take akngana kwaapzang siknga. Sangabamu ita gwa yapbikut.
PSA 119:97 Na gatane mama wamde take siknga nataat. Na ie kwakngaom gatu zikaane ngang ie natanggamatanggat.
PSA 119:98 Gatane mama wam takngakata tasiwan na natdetdetna bamban sikngaapa dakngake iwanatane natdetdetna ayapbike yuat. Dasingge, wamu waakngaat naat gatake yuamak.
PSA 119:99 Nata gatane mama wam taknga atawanggat. Siwan wamu wa tawanggat takngata tasiwan na natdetdetna bamban sikngaapa dakngake aminu nanindamukaing amindane natdetdetna ayapbike yuat.
PSA 119:100 Natane natdetdeu kwekngatane natdetdetna gwa yapbikut. Dasingge, na gatane mama wamu noman takngakan tawanggat.
PSA 119:101 Sike na kepi waiaknga tawanangge natapit gamu nata asisakuwam. Dasingge, na gatane wam takngakan tawambitde nataat.
PSA 119:102 Gikane wam taknga gika siknga nanindamukuyak. Unzingge wamu waaknga dua tekum.
PSA 119:103 Sike iningou genane napanu kaa singgak. Siwan ngana gatane wamu kaa siknga.
PSA 119:104 Gatane mama wambata natdetdeu take namunggak. Unzingge waiaknga kuupbamde asiknga bitanggat.
PSA 119:105 Sike gatane wam taknga lam gwenda binga gatangaman kepi noman sukuwit. Ita kakaa kepiapa yeikngaman kuwit.
PSA 119:106 Sike na gatane wamu noman taknga kuupbam tawambitde gwa yawa kekekakut. Unzingu apme tasiwit.
PSA 119:107 Buyambam tapa, natapso. Na meya buyambam takngata usukwatapbut. Unzingge gika gwa yawi kekekakut taknga tasiwi na kayuk yuwit.
PSA 119:108 Buyambam tapa, nata gae ganimbaknganggat takngae natapi take siyok. Siwan gata mama wamba nanindamumso.
PSA 119:109 Sike na asinggan kumnangge tandakngawa dapaknga singgak. Siwan ngana mama wambae dua botanggat.
PSA 119:110 Aminu wai akwau na tanggaganutnangge yapapna kaiwan dandakawan yuaing. Siwan ngana na gatane wam taknga dua tewit.
PSA 119:111 Na gatane wam taknga dumza siknga asinggan asinggan tanggaganukgat. Sike wamu waakngata tasiwan musip gwaang natake asiknga baknganggat.
PSA 119:112 Na gatane mama wamu kuupbam tawanangge gwa natapa kekekanggak. Mama wamba tawake yusika kupit.
PSA 119:113 Sike na musia gweaya nataing aminde take dua nataat. Ngana mama wambae take siknga nataat.
PSA 119:114 Ga natane kakuya tasinggayak kapana ga unin. Siwan natane damanu kekeknga gwena ga unin. Siwan na gika yawi kekekakut takngae banip singgat.
PSA 119:115 Ginu waiaknga tasiya amin, na napmanong. Na Anutunatane mama wamna tawanangge nataat.
PSA 119:116 Sike gata kekekangami kayuk yuwitde gwa yawi kekekakut. Wa yawi kekekakutde gae banip singgat. Gatangami gae banip singgat taknganata pimamsak.
PSA 119:117 Gata katakngane tapinu na take apme yuwit. Siwana nata maak gwaangu gatane wam takngae tewa kuwan nata asinggan tawambit.
PSA 119:118 Sike aminu gatane mama wam taknga teaingu gata masa yamunggayak. Itane natdetdet gwaangu waiaknga tasinangge nataaingu moo siknga kuning.
PSA 119:119 Gata aminu wai tasikaing takwau kuupbamde natapinu wai sipisipi binga singgak. Siwan waaminu mupewi kuning. Unzingge na gatane wam takngae siknga nataat.
PSA 119:120 Sike na gae asiknga gwaumba gupma apa atepan yamukgak. Na gaat wam yananga komde natapa siwan ie akgwaukgat.
PSA 119:121 Nata take akngaat gatu noman takngaat ngang tasikum. Unzingge gata na dua napmambi iwanata tasiwan maiwit.
PSA 119:122 Gata na gatangamiakge yawi kekekawikge nataat. Na gikane puya aminda. Gata yamandet aminu dua kapewi meya nae namuning.
PSA 119:123 Na gata wai aminde kataune sandeke tapiakge natake kai take yuwa yuwa mainggak. Unzing tasinangge tupa gika gwa yawi kekekakut.
PSA 119:124 Gata nae butaya natangamuyo. Natangamuke gika siakan wam taknga katak siknga nanindamumso.
PSA 119:125 Sike na gikane puya aminda. Unzingge natdetdeu gata nami gikane wam takngae natdewit.
PSA 119:126 Buyambam tapa, aminbamda gatane mama wamu ayamasandekaing. Unzingge gata ie meya yamunangge tasiyo.
PSA 119:127 Na gatane mama wambae take siknga nataat. Sike na golmani ngang yanikaingge take dua nataat. Siakan. Gol kundu noman siknga ngana ie take siknga dua nataat. Aho. Na gatane wamba akngae siknga nataat.
PSA 119:128 Ngan, na gatane mama wamu kuupbamde natapa nomangan singgak. Unzingge na kepi gutonga aknga kuupbamde dua siknga nataat.
PSA 119:129 Gatane wamu take siknga. Unzingge nata kuupbam tawanggat.
PSA 119:130 Aminu tapatu gatane wamde natdetdetna buyambam duaapa inindamubanu waapata gatane wamdane yapii natapanu, kakaa aknga musiaatang atapik. Ngan, wamu waaknga natdetna wenaapa natdetdet imunggak.
PSA 119:131 Nata mama wamde take siknga nataat. Siwan musipmaatangu atawambitde siknga enakgak.
PSA 119:132 Gata nae apuke musip kwikwik natangamuyo. Sike aminu gae umandae take siknga nataaing aminde unzingu atasinggayak.
PSA 119:133 Gata na kakuya tasiwi na waiakngaatang dua pimambit. Unzing tupa gika tasinangge gwa yawi kekekakut. Gata waiaknga dua katewi napbimban.
PSA 119:134 Sike na gata gatuka tapso. Siwan aminu na naitakepu tenangge tasikingga na dua tasiwan maiwit. Siwana nata gatane wamban tawambit.
PSA 119:135 Gata nae wesim yuke mama wamde kuupbam nanindamumso. Siwan mama wamba kuutgan nanindamuke nanduyuyo.
PSA 119:136 Sike kai yanggana kwaapzang apukaing. Dasingge, aminbamda gatane mama wamu dua tawakaing.
PSA 119:137 Buyambam tapa, ga noman sikngaapa. Siwan gatane mama wambaaya kuupbam noman gan siknga.
PSA 119:138 Sike mama wamu ninde nimukuyau wa kuupbam noman siwan take siknga.
PSA 119:139 Natane iwana gatane wamba akngae dua nataaing. Unzingge natane musipmaatangu katap gwenda binga isikopan kwatan siknga singgak.
PSA 119:140 Gata wamba yawi kekekakuu siakan siknga. Siwan nata gwa tasiwa sikut. Unzingge na, puya amin tapakata, wamu waaknga yawi kekekakutde take siknga nataat.
PSA 119:141 Sike na aminu moo apa, ge aminbamda na sapdut wam nanikaing. Siwan ngana na gatane mama wambae dua botanggat.
PSA 119:142 Natane musipmaatangu gatane sanga noman nomana aknga asinggan asinggan yuwik. Sike gatane mama wamba kuupbam siakan siknga.
PSA 119:143 Sike meya nae kwaapzangga apukaing. Siwan ngana na gatane mama wambae apbaknganggat.
PSA 119:144 Gatane mama wamu asinggan asinggan noman yuak. Gata gatangami nata natdetdet wamu waakngae natdeke kayuu ayuwit.
PSA 119:145 Buyambam tapa, na musipma tewa gaekan kuwan tumuk wamu kekeknga siknga ganinggat. Natane tumuk wamae natapso. Siwan nata gatane wamu kuupbam tawambit.
PSA 119:146 Apmanu nata gae yanggamatanggat. Gata na tapi nata gatane mama wamba tawambit.
PSA 119:147 Katak dua kwakawawan gata gatangamiakge tumuk wamu ganinggat. Sike na gika yawi kekekakut takngae baniu kekeknga singgat.
PSA 119:148 Sike zikaane kaina kekeknga siwan dapuna katak dua pekgat. Asinggan siknga gata wamu nae yawi kekekakut takngae natanggamatanggat.
PSA 119:149 Buyambam tapa, gata nae asinggan take natangamuke tumuk wamae maau apanggayak. Ngan, gata mama wamu yakuyak saak na kakuya tasiwawi na kayuu yuwit.
PSA 119:150 Sike aminu natdetdeu wai pake na tasiwan maiwitde inenganu gwa apuing. Waaminu gatane mama wamu dua tawake maa siknga yuaing.
PSA 119:151 Siwan ngana, Buyambam tapa, ga nae wesim yuayak. Sike gatane mama wamu siakan gan siknga.
PSA 119:152 Na tupa siknga gatane wamu atnatapbum. Wamu waaknga yakuyau asinggan asinggan yuak ngang nataat.
PSA 119:153 Gata nandupi na meya takngatu kaya singgak. Unzingge gata meya waaknga sandekngamuyo. Dasingge, na gatane mama wamde dua botanggat.
PSA 119:154 Gata na wam yot gwene gata gatangamuke tapi take yuwit. Unzing tasinangge gika gwa yawi kekekakut.
PSA 119:155 Sike wai aminu gatane mama wamba noman taknga dua tawakaing. Unzingge waakwau gata dua papsa.
PSA 119:156 Buyambam tapa, gatane musip kwikwik takngaka buyambam siknga. Gata na tapiakge gwa yawi kekekakut. Unzingge gata waaknga atasiwiakge nataat.
PSA 119:157 Sike aminbamda iwana dakngake tasiwa maiwitde nataaing. Siwan ngana na gatane siakan wam taknga dua teat.
PSA 119:158 Siwan aminu kundu kaawa banip sia aknga ayamasandewanu, nata waakwakge apbitake masa yamunggat. Dasingge, waakwau gatane wamu dua tawakaing.
PSA 119:159 Gata na nandupso. Na gatane mama wamde take siknga nataat. Gata nae take siknga nataayakge gata na asiknga tapso.
PSA 119:160 Gatane wambatane yapii aknga, wamu siakan taknga unin. Ngan, gatane mama wamba nomanu waaknga asinggan asinggan yuak.
PSA 119:161 Sike tupan aminda na wai tasikaingunin, siwan wa tasikainggane yapii wena. Siwan waaminde dua kagwaukgat. Siwan ngana gae wamdekan natanggamatanggat.
PSA 119:162 Na wamu gata yawi kekekakutde asiknga baknganggat. Unzing aminu tapatuta sanga kwaapzang pake baknganggak binga.
PSA 119:163 Na sanga kem taknga akngae apbitake musipmaatangu ie wai ngang nataat. Ngana gatane mama wambaekan take ngangu nataat.
PSA 119:164 Gunziu gwendune tapduu katau kuut musa siwan kautdu gweaya ngangu nata gatane mama wamu noman taknga yakuyakge gaak siknga ganinggaunin.
PSA 119:165 Sike aminu gatane mama wamde take siknga nataaingu, waakwau wikake take siknga yuaing. Unzingge sanga tapatuta dua pasiwan pimaning.
PSA 119:166 Buyambam tapa, na gata gatu tapiakge ganduyuat. Sike na gika yakuyak kaknga tasinggat.
PSA 119:167 Na gatane mama wamu kuupbam atawanggat. Dasingge, na mama wamu waakwakge take siknga nataat.
PSA 119:168 Sike na gatane mama wam gatu gatane pasap wam ngang kuupbam tawanggat. Dasingge, gata natane yuyukngae kuutgan akaayak.
PSA 119:169 Buyambam tapa, gata na gatangamiakge yawa natapso. Gata natdetdeu take namuya. Unzing tupa gika gwa naniwi kekekakut taknga.
PSA 119:170 Sike maakga tumuk wamma ganiwitde tewi apsok. Tewi apan na gika atanangge tupa gwa yakuyak saak gatu tapso.
PSA 119:171 Gata mama wamba kuut sikngae atnanindamukgayak. Unzingge nata umanda asinggan yatangenawit.
PSA 119:172 Nata kau takngatu mama wambae taiwit. Dasingge, gatane mama wamba noman gan siknga.
PSA 119:173 Na gatane mama wamu atawanggat. Unzingge gata gatangamunangge asinggan tandakngayo.
PSA 119:174 Buyambam tapa, natane musipmaatang gata na tapiakge kwanamu sikgak. Siwan na mama wambae natake apbaknganggat.
PSA 119:175 Gata kayuk yutnanga aknga atnamuyo. Namina nata gatane umanda yatangenawit. Sike na gatane wam takngata na kekekangamikge nataat.
PSA 119:176 Sike na kepi noman taknga sipsip gwenda ginikakut binga tekum. Unzingge gata asiknga apu nae nawamso. Puya aminda tapakaen. Dasingge, na gikan mama wamba dua teat.
PSA 120:1 Meya takngatuta nae apanu na Buyambam tapae yatawanggat. Yatawamba ita tumuk wamma natake gatangamunggak.
PSA 120:2 Sike tumuk wamu anzing yanggat, “Buyambam tapa, gatangamuyo. Aminu kunduta kem wamu nae yake na tandambanutnang,” ngang yanggat.
PSA 120:3 Ginu kem amin, Anututa ginde mina binga tasiwik? Ita meya dasing binga damik?
PSA 120:4 Sike itanu amak amindane sakutnata dapik. Siwan katapaimu toknga siknga take dasipa maining.
PSA 120:5 Na gin banakan wai yuat. Sike wai wa yuwau keu komdu Mesek gatu Kedarde banakan binga yupmainggat.
PSA 120:6 Na tupata amin noman yutnangge dua sikaingkat yukumang. Siwan tapduu mamaya siknga siwan na meya nataat.
PSA 120:7 Sike nata nomangan yutnangge nataat. Siwan nata noman yutnimde yaniwa nataaing ngana waaminda amak tasinangge yakaing.
PSA 121:1 Nata tawan dakandakaatang katakunggat. Siwan ngana aminu na gatangamunanga apa zandangga apan kawit?
PSA 121:2 Buyambam tapata yekapat kepat pasike pekut tapanin. Ita ina siknga na gatangamunggak.
PSA 121:3 Sike ita ga dua gandutewan pimamsa. Waapa dapuna dua pekgak, ga atoikgak kapanin.
PSA 121:4 Siakan! Ita Isrel nana amin toike waapa dapunu dua pekgak. Wena siknga.
PSA 121:5 Buyambam tapata ga kakuya tasinggak. Ita gae wesim yuke gepa binga dakngake ganduyuak. Ita gepa binga gae wesim dakngake yuak.
PSA 121:6 Sike gunzitda ga toknga siknga dua gasiwik. Siwan zikaane yekapda akoke ga dua tasiwan maiya.
PSA 121:7 Buyambam tapata ga kakuya tasiwawan sanga waita ga dua tasiwan maiwiyak. Ngan, ita gae kakuya tasike ganduyuwik.
PSA 121:8 Sike gata yotda teke kuwinu Buyambam tapata ga kakuya atasiwik. Ge gatuka asapinu ita ga kakuya atasiwik. Apman gatu masan masanu asinggan ganduyuwik.
PSA 122:1 Naat aminu kundu Buyambam tapatane yotna buyambam gwene kuna ngang nanikingkat unekan gatake kuke musip gwaang siknga natapbumang.
PSA 122:2 Siwan Jerusalemu gwa kundoke itane daman gwen yapbike yoon saak yuamang.
PSA 122:3 Sike Jerusalem yot gapmane yot gwegwenu wesim wesim mitapbing.
PSA 122:4 Isreldane dongu Buyambam tapae gaak ininangge une kokaing. Tupa gata unzing tasiningge gwa yaniwi kekekakut.
PSA 122:5 Sike you wam yaya wagwekatangu kingu Devitdane dongune nanata undang yuke wamu natake papan nomatakaing.
PSA 122:6 Ginu tumuk wam yake Jerusalem nanata kwikwiknga yutningge yanong. Ginda anzing yanong, “Aminbamu Jerusalemde take siknga nataaingu take yutning,” ngang yanong.
PSA 122:7 Yake aminu damanda takumbasiwan Jerusalem patang banakan yutningu amaknga wena take yutningge tumuk wam yanong. Ngan, king kapaat gatu tupan aminu une nana ngangu take yutning.
PSA 122:8 Na notnaat gatu akgatangamukaing katde natake nata Jerusalemde anzing yawit, “Ga amaknga wena take yuyo,” ngang yawit.
PSA 122:9 Na Anutu, Buyambam tapanindane yotna buyambam gwende natanggamatake nata tumuk wam yawa you wanggapmatane sangabamu takekan yutning.
PSA 123:1 Buyambam tapa, gata king kapa yekaune yuwi nata ga ganduke banip singgat.
PSA 123:2 Puya aminu wawi tapaapata aminu puya gwapak yuakge kake banip siwawa, gatu maya apaapata aminu puya gwapak dakngake yuak kapae kake banip sikaing. Ina unzakan, nin kaya baniu Buyambam tapa, nindane Anutunin dekan, sikamang. Sike ita musip kwikwik natanimikge kai takamang.
PSA 123:3 Buyambam tapa, gata musip kwikwiu ninde natapso. Ngan, gata musip kwikwiu ninde asiknga natanimuyo. Dasingge, aminu kunduta ninde asinggan ninisapdukaking.
PSA 123:4 Sike sangana bambanda ninde sapdut wamu tupata ninitakakopbing. Siwawan yamandet aminda asinggan niipakepukaing.
PSA 124:1 Ginu Isrel nana amin, ginda wamu anzing yanong, “Buyambam tapata dua gatanimunggak gamu dasing siwan?
PSA 124:2 Sike Buyambam tapata dua gatanimukut gamu musiptok natapbing takngane ninu asiknga pasiwa mainam.
PSA 124:3 Ngan. Tupa, aminda musiptou ninde natanimuke amau ninkatang tasiking.
PSA 124:4 Sike manggamu yanggata binga paptake apu ninu pakuuwan, ba yanggata binga paku sopuwan.
PSA 124:5 Siwan apaptakuu kekeknga waakngata manggamu ninu kaipake kuwan gwa kumnam. Siwan ngana wena.
PSA 124:6 Unzingge ninda Buyambamtapa gaak kaknga asiknga inimbaknganim. Ita ninu dua nindupewan iwaninda nisipa kumbumang.
PSA 124:7 Ninu kwait gwenda bungeu yapundu aminu tapatuta tasike tekutna kake bepmake kukut binga peke kukumang. Sike yapau wagwenu gwa dakngakutde ninu undangga akoke kukumang.
PSA 124:8 Buyambam tapa, yekapat gatu kepat pasike pekut tapata, ninu ina gatanimunggak.”
PSA 125:1 Sike aminu Buyambam tapae banip sikaingu, waaminu tawanu Saion daka binga. Tawanu wandaka miyamunu dua siknga singgak. Kekeknga siknga yuak.
PSA 125:2 Sike tawanu Jerusalem takumbasike yuaing. Ina unzakan, apman gatu masande Buyambam tapata aminabamu unzakan pakubasike kakuya pasiwik.
PSA 125:3 Anututane aminabamdane kepna wai aminda asinggan dua kayutningunin. Sike unzing tasiwanu asikaya Anututane aminabamu puya waiaknga atasiningunin.
PSA 125:4 Buyambam tapa, gata takeakngaka take amindae atasiyamuyo. Waaminu gikane mama wamu atawakaing.
PSA 125:5 Siwan ngana aminu kundu kepi gutonga aknga aknga tawake gatane noman taknga ateaingu Buyambam tapata yanikwasiwan kuning. Waaminkat gatu aminu inane waiakngana tawakaingkat yanikwasiwan kuning. Isrel nana aminda musip kwikwik takngane yutnong.
PSA 126:1 Aminu kunduta kauutde pewan maikumang. Siwan ngana tapduu Buyambam tapata Saion gatu ninipakapbut kopatangu ninda anzing natapbumang. Mia moo ba kaamang ngang natapbumang.
PSA 126:2 Unzingge ninda minu kumzang mikumang. Mike kap taiyuuk kumzang bakngakumang. Siwan katum aminu kepna kepna nana aminda kake anzing yaking, “Buyambam tapata Isrel nana gatayamunangge puya buyambam siknga tasikut,” ngang yaking.
PSA 126:3 Siakande siknga. Buyambam tapata nin gatanimunangge puya buyambam siknga tasikut. Unzingge ninu musip gwaang siknga nataamang.
PSA 126:4 Buyambam tapa, gata ninu tupa yukumang binga apman kaya ina unzakan yutnimde gata gatanimuyo. Sike wa unzing gapma zongaatang nana wawaa siwan ngana keu waomune yangga apaapa akoke zipmake kukaing binga siyok.
PSA 126:5 Sike aminu kwanamna siyuuk nanam zak kwainingu, waakwau damana gwa siningu kuku apbakngake pakapuyuuk kap taining.
PSA 126:6 Siakande siknga. Aminu kwanamna siyuuk nanam zaknga utnake kwaiwiu, masande nanamu damana gwa siningu kuku utnake ataibakngayuuk pakapik.
PSA 127:1 Buyambam tapata you dua mitapanu kamundata apme mitapnangge tasiwan maiwik. Ina unzakan, Buyambam tapata you gapmandu kakuya dua tasiwanu, kakuya tasikaingga moo apme kayutning.
PSA 127:2 Siwan ninda tembana enake puya toknga tasikana kuku zikaa siwan moni gatu nanam ngang pakamang. Ngana asikaya ninda toknga bamu moo ba tasikamang? Dasingge? Anututa yuwatakau aminu ie take siknga nataaingge ayamunggak.
PSA 127:3 Anututa ninde take tasinimuke ninde waatdaka musip gwaangge moo nimunggak. Ngan, waatdaka wa nimunggau Anututa kwikwiknga take siknga akngana ninde natanimuke nimunggak.
PSA 127:4 Sike aminu tapatutane waaknga wawiapa wa unzing amak aminu tapatuta sakuu katakngata panggak binga.
PSA 127:5 Siwan aminu tapatu waaknga wawi kwaapzang siwanu, ita apbakngayok. Dasingge, waaknga waakwakga nanoknga iwanaat kot yakaing komune yawanu, apme gatangamuke yaning. Gatangama nanokngata kou yawiu wai dua siwik.
PSA 128:1 Aminu Buyambam tapae akgwauke ie wam tawakaingu waaminda apbaknganong.
PSA 128:2 Unzingge puya pasiwawi buyana une aawan kake nanam ba moni pake sanga dapmanggaau usiya. Siwan sanga gata tasiwiyau takekan siwan kake ga apbakngaya.
PSA 128:3 Gatane maatda yotdane yuyuuk ita nap takngatu tapuyana asinggan aakaing binga siwik. Siwan gatane waatdakaka olivdane zakngita binga tebol dakane pukwike nanam nakaing komune takumbasining.
PSA 128:4 Siakande siknga. Aminu Buyambam tapae wam gwaamuke tawambiu, sanga take siknga aknga unzing binga papik.
PSA 128:5 Buyambamtapa Saion yuak kapata ga take apme tasiwikge take nataat. Ga keu andakane yuwiak kopatangu sanga Jerusalem nana kawi take siknga siningge take nataat.
PSA 128:6 Sike ga tape mamayasim yuke bapuka masan aatningu akawiakge nataat. Isrel nana musip kwikwik kakngane take yutningge nataat.
PSA 129:1 Nata natapanu ginu Isrel nana aminu inandek inandek anzing yaning, “Tupa waatdaka apa yukuuyauneta apu apman iwanata na atasiwan mainggat,” ngang yawiyakge nataat.
PSA 129:2 Ngan, ga anzing yayo, “Tupa waatdaka yukumune iwanata na atasiwan maikum,” ngang apman kaya ina unzakan. Siwan ngana dua napbiking, ngang yawiyakge nataat.
PSA 129:3 Sike nap takngata ngwipzang siknga ipmapa nuwan masanaatang gupma atdakngaking. Siwan wata mamaya aknga siwa puya ganzik binga sikaing.
PSA 129:4 Siwan ngana Buyambamtapa noman siknga. Ita na gatangamuke nau na tanggaganukut taknga apasiwaike wai aminde kataune gwa sandeke takut.
PSA 129:5 Sike nata aminu Saionde iwana dakngakaingunin yapbitnimde nataat. Yapbike yawapena apmaakake yotna datakuning.
PSA 129:6 Nata natapa waakwau zongazonga yot dum tapane akokaing binga siningge nataat. Zongazonga waakwau keu wena komune yuke zet siknga kupiakaing.
PSA 129:7 Aminu tapatuta zongazonga wa unekanu dua pakapu peak. Aho, unekanu dua wamake gwaamupake kuwik.
PSA 129:8 Sike aminu wai waakwau inengan kuke anzingu dua yawam, “Buyambam tapata ginde apme pasiwan take sining. Sike Buyambam tapae umande danina sanga takeakngatakan ginde apning,” ngang kayan ma yawam.
PSA 130:1 Buyambam tapa, na meyambam pake nata gae yanggamatanggat.
PSA 130:2 Buyambam tapa, nata gae kwanam sikgawanggatde natapso. Gata butaya natangamuke gatangamiakge yanggatde maak papso.
PSA 130:3 Sike gata nindane waiaknganin kendewiak kopatangu mamin amin tapata wam yananga tapduk gwene kekekake gapbimbik? Wena.
PSA 130:4 Siwan ngana gata nindane waiaknganinu asandekgayak. Unzingge ninda gae asiknga gwautnim.
PSA 130:5 Sike na Buyambam tapata siknga gatangamikge take siknga nataat. Unzingge na ie kayuat. Sike na itane wam takngae baniu asinggat.
PSA 130:6 Aminu kakuya zikaane tasikaing aminda tapduk gwenu zet kwakawikge natayuwawa semna singgak. Siwan na Buyambam tapaekan kayuat. Siwan ita gatangamikge siknga natayuwawa semna siknga singgak.
PSA 130:7 Ginu Isrel amin, ginda baniu Buyambam tapae asiknga sinong. Dasingge, ita ginde asingganu take siknga natandamunggak. Sike ita gatandamuwawan meya takngatuta asingganu dua pasiwan mainingge nataak.
PSA 130:8 Ita inane aminabamu apme papik. Wa ninu Isrel nana unin. Ita ninu pakenga waiaknganinu kuukgan sandetnimik.
PSA 131:1 Buyambam tapa, na yamandet taknga tasikumu gwa teke musipmaatangu umana nina dua yatangenakgat. Aho, na aminu kundue natapa moo aminu unin ngangu dua nataat. Siwan na natdetdet buyambam pakaing aminda nataaing kaknga binga na dua nataat. Dua natake sanga nangaakande dua nataatde kuut ina unzakan.
PSA 131:2 Siwan ngana na take yuke musip kwikwikgan pake yuat. Na unzing engangu mingae kataune kwikwiknga pekgak binga. Ngan, natane musipma kwikwiknga unzing yuak.
PSA 131:3 Ginu Isrel amin, ginu Buyambam tapae banip sinong. Apman gatu masan yutnim kaya ina unzakan.
PSA 132:1 Buyambam tapa, gata Devitde meya kuupbamu ita kakutde dua botawim.
PSA 132:2 Devitda wamu takngatu Anutue natake yawan kekekakut. Ngan, ita Isrel amindane kekeknga sikngaapae natake wamu waaknga yawan kekekakut.
PSA 132:3 Ita anzing yakut, “Na yotnane dua koke paku dua siknga pewit.
PSA 132:4 Aho, na dua yuwa takawan dapunu pewit. Wena siknga.
PSA 132:5 Tupanu you gwendu Buyambam tapata une yuwik gwende gambok tawake kawit. Anutu kekeknga Isrel nana apa paku undang yuwik. Siwan na masan yuwa takawik.”
PSA 132:6 Sike ninu Epratah yot gapmane yuke pukit takwanu buyambam tapatane gwende natapbumang. Sike ninda kawatna Jardane kep komune yuwawan kakumang komune yukut.
PSA 132:7 Ninda Buyambam tapatane you buyambam gwene kuna. Ninda wesim kuke ayuak komune munu puke gwetake gaau inina, ngang yawa natapbumang.
PSA 132:8 Buyambam tapa, ga enake apuke keu yuwi takananga komune pukuyuyo. Sike gatane pukit takwanu gikane kekekngaka undang yuau une yuke apso.
PSA 132:9 Nata natapa gata pris gikane apaapata tauknga pasike nomanu asinggan asinggan tasiningge nataat. Nomanu waaknga unzing, tauk take pasikaing binga. Sike gikane aminbamda yanggamatake baknganingge nataat.
PSA 132:10 Buyambam tapa, gata Devit tapi tupan amin tapaka dakngakut. Siwan gikane puya amindae natake masa ma imim.
PSA 132:11 Buyambam tapata tupa wamu kekeknga takngatu Devitde yawan kekekakuu dua sandewik. Siwan wamu anzing yakut, “Nata tasiwa gatane dongune nana tapatuta king dakngawik. Kingu waapata gae tangge yuwik,” ngang yakut.
PSA 132:12 “Sike gatane waakga akwau nata yawa kekekakut taknga tawake gatu mama wamu nata yamukum taknga tawambanu, itane waaknga masan aatning kaya king daknganing. Ina unzakan masan kaya unzakan siwik,” ngang yawan kekekakut.
PSA 132:13 Dasingge, Buyambam tapata Saionu natane yotbam gapmana ngangu gwa yawan yukut. Unzingge ita waomune asinggan yutnangge nataak.
PSA 132:14 Ita anzing yakut, “Na yotbam anggapmane asinggan asinggan yuwit. Nata you anggapma king kapa yuwitde gwa yakum,” ngang yakut.
PSA 132:15 Sike nata sanga kwaapzang you Saion gapmane nanae yama waakwau sangae dua dapning. Ngan, nanamu kundu atdapmakaingge yama akgitnawan yutning.
PSA 132:16 Siwan nata pris Sion yuaing aminde puya yama aminbamu gatuna apanggat takngae aminbam yanikapning. Siwana natane aminabamu wanggapmane nana apbakngake kap taining.
PSA 132:17 Nata Devitdane dongune nana tapatu tapa ita kingu you wa gapmane dakngake yuak. Siwan itane dongu puya aakngae tangge songa dua siwik.
PSA 132:18 Siwan nata tasiwa itane iwana maaknga siknga natapning. Siwan ngana ita king kapa yuke kekekanggak kakngata buyambam siknga siwik.
PSA 133:1 Aminu notna notna dakngake aminda unekan take yuke musipna gwendukan teke notna siknga daknganingu, wa take siknga.
PSA 133:2 Sanga waaknga unzing, katau oliv dakane yangga waenga kaya aknga Arondane gwapakngane tukngwaking binga. Tukngwamban aamnane epuke gen danggamna mamaya aknganeta pimake tauknga nomna dakngane pukukut.
PSA 133:3 Sike sanga musipna gwendukan yutnanga aknga wa unzing, yekap piokga tawanu Hermon dakane gatu tawanu Saion dakane pimakaing binga. Dasingge, keu waomune Buyambam tapata musia gwendukan teke yuaingu take pasinggak. Pasike ita kayuk asinggan asinggan yutnanga akngana ayamunggak.
PSA 134:1 Ginu Buyambam tapatane puya amina kuupbam, itane you buyambam gwene zikaane puya pasikaingu, ginda itane umana asiknga initangenatnong.
PSA 134:2 Ginda itane you buyambam gwekatang yuke katakza tangenayuuk tumuk wamu kekeknga yake itane umana initangenatnong.
PSA 134:3 Buyambam tapata yekapat kepat pasikut. Nata natapa waapata Saion dakane yuke ginde take pasiwikge nataat.
PSA 135:1 Buyambam tapatane umana yatangenatnong. Ginu Buyambam tapatane puya amina, ginda itane umana initangenatnong.
PSA 135:2 Ginu Buyambam tapatane you buyambam gwende yuke puyana pasikaingu, wa Anutunindane you buyambam gwene yuke umana initangenatnong.
PSA 135:3 Itane umana yatangenatnong. Dasingge, ita ninde take siknga pasinggak. Ita ninde musip kwikwik natanimunggak. Unzingge ninda kap taike itane umana yatangenatnim.
PSA 135:4 Sike Buyambam tapata Jekop inae yawan yukut. Ngan, Isrel nana aminu Anututane donga siknga.
PSA 135:5 Nata natapanu Buyambamtapa umana kopsa siknga. Sike ita anutu pupuknga ayapbike enane siknga yuak.
PSA 135:6 Buyambam tapata sanga minaka takngatu yekaune gatu keune gatu yanggabam gwene ba yanggabam gwende kutakngine tasinangge natakengu ita atasinggak.
PSA 135:7 Ita sopa tawikge minga kepna kepna kuupbam tasiwan aakgak. Siwan ita tasiwan yapasik siwawan sopa tanggak. Siwan gatu ita tasiwan got takngata gwatdu gwatdu puyatake kunggak.
PSA 135:8 Ngan, Isip kep komune ita Isip nanatane waaknga tupan tapaapa atzipa kumbing. Siwan gatu kaapdane ngang zipa kumbing.
PSA 135:9 Siwan Isip kep komune duya takngatu takngatu tasiwan king kapaat gatu tupan aminaatda kawawa kekekngana une yeuyamukut.
PSA 135:10 Siwana ita keu kundune nana pasiwan maiking. Ngan, kingu kekeknga apaapa atzipa kumbing.
PSA 135:11 Ngan, ita Sihon tanguwan kumbut. Kingu waapa Amor nana amindane. Gatu Ok, Basan nanatane king kapa, gatu Kenan kep komune nana kingu kuupbam zipa kumbing.
PSA 135:12 Siwan ita kingu waakwakgane kepna pake inane aminabamde yamukut. Wa Isrel nana unin.
PSA 135:13 Buyambam tapa, asingganu aminbamda gae natapanu Anutu siakan tapa unin ngang nataing. Siwan masan aatning kaya gae waakngakan natapning.
PSA 135:14 Dasingge, Buyambam tapata aminabam gatayaman kepi noman taknga tawake tasining. Tasiwawa kake aminu kundu iwana akwak ngana waakwakge natapa amin noman siwik. Unzingge ita inane puya aminae butaya natayamik.
PSA 135:15 Sike katum aminda anutu pupukngana silwaat gatu gol katda pasiking. Aminu waakwakga anutu pupukngana katakngita tumuke pasipeking.
PSA 135:16 Sike anutu pupuknga waakwau gena kaya, ngana wamu yananga dua. Siwan kaina kaya, siwan ngana sanga kananga dua.
PSA 135:17 Siwan waakwau maaknga kaya, siwan ngana sanga natapnanga dua. Siwan nomna ganang yawan kopnanga dua.
PSA 135:18 Aminu anutu pupuknga wa pasike peke baniu sanga wande sikaingu, anutu pupuknga waakwak binga daknganing.
PSA 135:19 Ginu aminu Isrel nana, Buyambam tapatane umana yatangenatnong. Ginu Buyambam tapatane prisnan, Buyambam tapatane umana yatangenatnong.
PSA 135:20 Ginu dongu Liwai tanen, Buyambam tapatane umana yatangenatnong. Ginu Buyambam tapae akgwaukaing aminun, itane umana yatangenatnong.
PSA 135:21 Ginu aminu Saion yuaingun, wa Jerusalem. Buyambamtapa you wanggapmane yuak kapanin. Itane umana yatangenatnong.
PSA 136:1 Ginda Buyambam tapae asiknga inimbaknganong. Dasingge? Ita take siknga tasinggak kapanin. Asinggan asinggan siknga ita ginde musip gwaang siknga natandamuke yuak.
PSA 136:2 Ginda Buyambam tapae asiknga inimbaknganong. Ita anutu pupuknga apaapa gwa yapbikut. Asinggan asinggan ita ginde musip gwaang siknga natandamuke yuak.
PSA 136:3 Ginda Buyambam tapae asiknga inimbaknganong. Waapa aminu tupan tapa apatane Buyambam tapana unin. Asinggan asinggan ita ninde musip gwaang siknga natanimuke yuak.
PSA 136:4 Wa awiaapatakan duya buyambam takngatu takngatu asinggan asinggan pasinggak kapanin. Asinggan asinggan ita ninde musip gwaang siknga natanimuke yuak.
PSA 136:5 Inane natdetdetnaneta ena yekap gwekat gatu sanga wagwene yuaingkat pasike pekut. Asinggan asinggan ita ninde musip gwaang siknga natanimuke yuak.
PSA 136:6 Ita kepdaka engatangan tasike teke gatu yangga amaakatang pasike pekutde natake inimbaknganong. Asinggan asinggan ita ninde musip gwaang siknga natanimuke yuak.
PSA 136:7 Ita gunzit gatu yekau zikaane kakaa nimunggak gwen ngang pasike pekut. Asinggan asinggan ita ninde musip gwaang siknga natanimuke yuak.
PSA 136:8 Ita gunzit tasiwan akwakanggak ge kuyana yuak. Asinggan asinggan ita ninde musip gwaang siknga natanimuke yuak.
PSA 136:9 Ita tasiwan yekap gatu yekapdaak ngang zikaa dakatane kakuya tasinggak. Asinggan asinggan ita ninde musip gwaang siknga natanimuke yuak.
PSA 136:10 Ita engangu waatdaka Isip kep komune nanatane tupan tapa apa zipa kumbing. Asinggan asinggan ita ninde musip gwaang siknga natanimuke yuak.
PSA 136:11 Ita Isrel nana aminbamu yanipakapan Isip kepkom teke apbing. Asinggan asinggan ita ninde musip gwaang siknga natanimuke yuak.
PSA 136:12 Ngan, inane kekeknga akngananeta waaminu yanipakapbut. Asinggan asinggan ita ninde musip gwaang siknga natanimuke yuak.
PSA 136:13 Ita tasiwan yanggabamu Ret Si gwenu kaukaut wesiwan kukut. Asinggan asinggan ita ninde musip gwaang siknga natanimuke yuak.
PSA 136:14 Ita tupan kuke aminabamu yanipakapan yanggabamu wagwende banakan kuking. Asinggan asinggan ita ninde musip gwaang siknga natanimuke yuak.
PSA 136:15 Ita tasiwan kingu Isip nana apa gatu itane amak amina ngang yangga tangoke kuupbam kumbing. Asinggan asinggan ita ninde musip gwaang siknga natanimuke yuak.
PSA 136:16 Ita tupan kuwawan inane amina keu sanga wena kepban komune tawaking. Asinggan asinggan ita ninde musip gwaang siknga natanimuke yuak.
PSA 136:17 Ita kingu kekeknga yukingu atzipa kumbing. Asinggan asinggan ita ninde musip gwaang siknga natanimuke yuak.
PSA 136:18 Ngan, ita kingu umana kaya apaapa atzipa kumbing. Asinggan asinggan ita ninde musip gwaang siknga natanimuke yuak.
PSA 136:19 Ita Kingu Sihon, Amor yot gapmane nana apa atanguwan kumbut. Asinggan asinggan ita ninde musip gwaang siknga natanimuke yuak.
PSA 136:20 Ita kingu Ok, Basan yot gapmane nana apa tanguwan kumbut. Asinggan asinggan ita ninde musip gwaang siknga natanimuke yuak.
PSA 136:21 Ita kingu waakwakgane kepna kaiwa kuwan inane aminabamde yamukut. Asinggan asinggan ita ninde musip gwaang siknga natanimuke yuak.
PSA 136:22 Ita keu wandaka kaiwan kuwan Isrel nana inane puya amin takwakge yamukut. Asinggan asinggan ita ninde musip gwaang siknga natanimuke yuak.
PSA 136:23 Sike tapduu ninu moo amin yukumang komune ita ninde dua botakut. Asinggan asinggan ita ninde musip gwaang siknga natanimuke yuak.
PSA 136:24 Ita iwaninde kataune kaiwa kuwan pakut. Asinggan asinggan ita ninde musip gwaang siknga natanimuke yuak.
PSA 136:25 Ita aminde gatu kaap zongge ngang kuutde yamunggak. Asinggan asinggan ita ninde musip gwaang siknga natanimuke yuak.
PSA 136:26 Ginda Anutu yekaune yuak kapae asiknga inimbaknganong. Asinggan asinggan ita ninde musip gwaang siknga natanimuke yuak.
PSA 137:1 Ninu keu Babilon komdane yangga kwaimune pukuyuke natdetdet ninu tena Saionde kuwan kwanam sikumang.
PSA 137:2 Sike gitaninu ninda katau wesim yuaing dakandakane mitapekumang.
PSA 137:3 Dasingge, aminu kaautde nipmakingga anzing yaking, “Ginda kap taike pasiwa ninda take natapnimde tainong,” ngang yaking. Ngan, aminu meya waaknga nimukingga anzing yaking, “Kau takngatu Saion nana tainong,” ngang yaking.
PSA 137:4 Siwan ngana Buyambam tapatane kapna dasingge ninda amindane kep komune yuke tainim? Dua siknga tainim.
PSA 137:5 Jerusalem, nata gae apbotanangge dua siknga nataat. Siwan ngana gae apbotawit gamu nata gita atanguwa wai siwik.
PSA 137:6 Jerusalem, nata gae dua ba natapanu, yembinata gatak gatak siwik. Ngan, nata gae musip gwaang siknga dua natapanu guyakngata akupiawan kau takngatu gatu tainanga dua siwik.
PSA 137:7 Buyambam tapa, tapduu iwanata Jerusalem nana yapbiking komune Idom nanata yaking kakngae natapso. Waaminda anzing yanggamataking, “Jerusalemdane yotna kuupbam waitdeke kuut siknga pasina maining,” ngang yaking.
PSA 137:8 Babilon nana aminu natapnong. Aminda ginu asiknga pasiwa maining. Ngan, aminu tapatuta waiaknga ginda ninde tasiking taknga yake waakngakan ginde tasiwiu, aminu waapa apbakngayok.
PSA 137:9 Ngan, aminu gatane engangga pake sup tangan mumba pimake wai siknga zipiu waapata apbakngayok.
PSA 138:1 Buyambam tapa, natane musipmaatang gae gaak wam ganiwitde asiknga kekekanggat. Sike aminu tupan tapaapa yekaune yuaingu kuupbamde kaine nata kau gatane umande yatangenatnangge taiwit.
PSA 138:2 Sike nata muna gatane you buyambam gwende nom saak puke gatane umanda yatangenawit. Dasingge, gata nae take siknga asinggan natangamuke gata sanga tasinangge yawi kekekakut takngakan asinggan tawanggayak. Ngan, gata tasiwi gikane umanda gatu gikane wam ngangu sanga tupan siking.
PSA 138:3 Siwan tapduu nata gae yakum komune gata natane tumuk wama atnatapbuyak. Natake gata gikane kekekngaka nae nami nata kekeknga siknga yuat.
PSA 138:4 Buyambam tapa, nata nataau kingu kepna kepna nana kuupbamda tapduu gatane wamba natapning komune gatane umanda ayatangenatningge nataat.
PSA 138:5 Yatangenake waakwakga kau kepi gata tawake tasinggayakge natake kap tainong. Dasingge, ga umanda kopsa siknga apanin.
PSA 138:6 Buyambamtapa enane siknga apa, siwan ngana aminu yamandeu dua sikaingge gatayamunangge natayak. Siwan ngana ita yamandet aminu peke maa siknga yuke kaak.
PSA 138:7 Sike meya buyambam takngane sukuwanu gata na kakuya tasiwi nata take yuat. Sike iwana aminda nae musiptok nataing ngana gata waaminu atzipmanggayak. Zipmake gikane kekekngane na gatuka tanggayak.
PSA 138:8 Buyambam tapa, gata sanga kuupbamu nae tasinangge yawi kekekakuu gata atasiya ngang natapa kekekanggak. Siwan gata nae asinggan asinggan take siknga natangamunggayak. Sike puya gika pangenakuyau apasiwi dua pimaningge nataat.
PSA 139:1 Buyambam tapa, gata natane musipma gwa usanzike nae asiknga nataayak.
PSA 139:2 Siakan. Sanga nata tasinggau kuupbamu gata atnataayak. Ngan, nata pukuyuwit ba dandam tangan yuwit siwan ngana gata keu komdune maa yukengu sanga tasinangge nataau atnataayak.
PSA 139:3 Ngan, nata epuke kuwit ba dapuna petnangge tasiwit, siwan ngana gata natane yuyuknga kuupbam atnataayak.
PSA 139:4 Buyambam tapa, nata wamu takngatu ba yanangge tasiwanu wamu waaknga gata gambok nataayak.
PSA 139:5 Natake gata na zaneka kuwawanu gata nandukakaike na gikane kekeknga akngane nanduyuwayak.
PSA 139:6 Siwan gatane natdetdetda unzing wa nataayak kaknga enane siknga. Siwan natane natdetdetna ayapbikgak.
PSA 139:7 Siwan nata zane kuke gatane waung kapaka yuwau tewit? Ngan, nata zane datakuke gae kusopuwit?
PSA 139:8 Sike nata yekaune akoke yuwiu, ga yekaune ayuayak. Gatu nata aminu gwa kumbingga yuaingune paku yuwiu gakaya waomune ayuayak.
PSA 139:9 Siwan nata tembana siknga enake kwaitda binga bepmake maa siknga yanggabam gwene kautdu saak komune ba kuwit, ba paku gunzitda akonggaune ba pukunggaune ba kuwit. Ga waomune kuut ayuayak.
PSA 139:10 Ga waomuneaya ayuke kepina tanomanuke gata na katakgata take akgatangamuya.
PSA 139:11 Sike nata gatu anzing ba yawit, “Zikaandakata na takusopuwik. Siwan kakaa gunzitdaneta na takumbasiwanu wa zikaandaka siwik,” ngang yawit.
PSA 139:12 Siwan ngana undanga, gata zikaa wandaka kawi zikaa daka kakaa gunzitda binga isinggak. Zikaandaka kawi kupakupan gunzitda tasinggak binga singgak. Dasingge, zikaandaka gatu kakaa aknga ngangu gae kaine ina unzakan.
PSA 139:13 Siwan gata sanga natane gupma apaatang yuaingu kuupbam gata pasikuyak. Sike gata na mingae musipnaatang yukum komune, natane gupmaat gatu kwatana ngang gata pasike peke tanomanukuyak.
PSA 139:14 Siakan. Duya kekeknga takngatu takngatu pasikuyak binga. Unzingge nata gatane umanda ayatangenakgat. Sangabamu gata pasikuyau inata siknga siwan gwaam siknga. Siwan nata sanga waakngae katak siknga atnataat.
PSA 139:15 Sike tapduu na mingae musipnaatang yukum komune natane gupma ba kwatana kuut gikane kaikane kusopuknga dua yukut. Ngan. Nata mingatane musiaatang kusopuke wepda wepda takakumu gata kaawi kwatana unekan apuke ngwakapan kakuyak.
PSA 139:16 Gata na mingata dua tangaiwawanu gata na atnandupbuyak. Nata keu andakane dua apuwawa nae buu gikane gopatangu nata keu andakane tapdukbamu yuwitde gwa matakuyak.
PSA 139:17 Anutu, gatane natdetdetdae natapa sanga gwaam siknga singgak. Gatane natdetdetda mateknga dua, siwan nata natdetdetdae kepi tawake natdetnanga dua.
PSA 139:18 Sike nata sanga gata nataaunin kendetnangge tasiwanu, saisai yanggabam gwende kwaimune yuaing binga siwik. Kendetnanga dua singgak. Siwan, tapduu nata dapun pesika enakgaunen, gaat naat kuut yuamak.
PSA 139:19 Anutu, nata wai aminu atzipi kumningge nataat. Ngan, ginu aminu amak tasike amin zipa kungwakaing aminu napmake kunong.
PSA 139:20 Aminu waakwakga gae wamu waiaknga yakaing. Ngan, gae umandae wamu wai aknga aknga yakaing.
PSA 139:21 Buyambam tapa, nata aminu gae apbitakaing aminde nakaya apbitanggat. Siwan aminda gae yamandet sikaingge nata musipmaik natayamunggat.
PSA 139:22 Siakande siknga, nata waaminde asiknga bitanggat. Nata waaminu kawa natane iwana singgak.
PSA 139:23 Anutu, gata na katak siknga natdetdetna gatu musipmaatang yuaingu usanzike kayo. Tanzit tasike nata nangaakan nataau kuupbam usanzike kayo.
PSA 139:24 Na katak siknga usanziyo, sanga tasiwa aminda nandupa wai siwik kaknga kundu natdetdet naatang yutnang. Kake gata na nanitakuwi kepi kayuu asinggan yutnanga akngane sukuwit.
PSA 140:1 Buyambam tapa, gata na akgatangami wai aminda dua tasiwan maiwit. Ngan, gata na kakuya katak tasike ma kapewi amak tasikaing aminda na nutning.
PSA 140:2 Asingganu waakwau musiaatangu sanga waiaknga tasinangge nataaing. Ngan, gunzitbamu waakwakga kaanga wamu aminu kunduta amningge yakaing.
PSA 140:3 Waamindane wamna gomokgane gena paanga siknga binga. Sike wamu amin pasiwan mainanga waamindane genaatang doke yuak. Unzing marasinu gomou waiakngatane genane yuak kaknga binga.
PSA 140:4 Buyambam tapa, gata na kakuya katak tasiwinu wai amindane kekeknganata na napbitnanga dua. Ngan, gata na wamanapmambi aminu amak tasikaingga na tasiwan pimapitde yakaingu, nae sanga takngatu dua tasining.
PSA 140:5 Sike yamandet aminu waakwakga na tanggaganutnangge natake yapapna pasike kusopuknga peaing. Ngan, yapapna wa ngwayoknga pasike yuaing. Siwan sanga bungep binga pasike kepiapane nae kaap zong binga umukusipa tasikaing.
PSA 140:6 Buyambam tapa, nata anzing ganinggat, “Ga natane Anutuna. Nata wam yanggat takngae natake gatangamuyo,” ngang ganinggat.
PSA 140:7 Buyambam tapa, natane Anutuna, gata na akekekake takuyak. Ngan, amak tapduk kopatangu gata na kakuya take siknga tasinggayak kapanin. Tasiwi gwapakngane nutnanga dua sikut.
PSA 140:8 Buyambam tapa, gata ma kapewi sanga wai aminda tasinangge nataaingu tasiwam. Ngan, ita waiaknga tasinangge yandekingu ma siknga kapewi tasiwam. Sanga waaknga yamandet amin dakngakaing.
PSA 140:9 Gata tasiwi aminu na nutnangge natake na umupbasikaingga wamu meya nae apik kakngae yakaingu inae apik.
PSA 140:10 Ngan, gata kapewi aminu kunduta katap paimu pewa iangan engatangan pimaning. Ngan, kapewi aminu kunduta waakwau pake mumba katapatang pukuning. Ngan, gapma buyambam dakaatang pukuke gatu dua akopning.
PSA 140:11 Sike gata dua kapewi sapdut wamu aminu kunduta yakaingu siakanu siwik. Ngan, kapewi sanga waita amak tasiya aminu tawamba kake pasiwa maining.
PSA 140:12 Buyambam tapata aminu sangana wena akgatayamuke tapduu wam yananga gwene tasiwan wamna noman siwik ngang nataat. Ngan, ita aminu sangae dapmakainggengu gatayaman aminu kunduta wamu yumdekan temapa yakingu take dua siwik.
PSA 140:13 Sike noman amindanu gatane umanda ayatangenatning. Ngan, waaminu gatane kaine take yutning.
PSA 141:1 Buyambam tapa, nata apmanu ga ganinggat. Ganiwa natake gata na apu gatangamuyo. Nata gae ganiwanu gata natane tumuk wama natapso.
PSA 141:2 Natane tumuk wamma anzing, sanga sawa kupana akopan kapanga gwaam takngata binga apan tapiakge nataat. Ngan, nata gae tumuk yake kataknga tangenakgat takngae natapi ofa zikaane tasikaing binga singgak.
PSA 141:3 Buyambam tapa, gata natane gena daka kakuya katak tasiyo. Ngan, nata wamu yawiu katak kayuyo.
PSA 141:4 Gata natane musipma gwenu dua nandutewi waiaknga tasinangge enawan na wai aminkat unekan napmambi waiaknga kundu tasinim. Ngan, dua nandutewi naat iat unekan yuke nanamu kaya siknga kuupbamde saningu kuutda nanim.
PSA 141:5 Sike aminu noman tapata waiaknga dua tasiwitde na nuwan kakengu nata ie natapa waapata sanga take tasingamunggak kapanin ngang natapit. Ngan, ita na kaanga naniwan natakengu sanga takekan tasinggak ngang natapit. Siwan unzing wel yangga gwapangane tukwamban puwawan umana tangenakgak binga. Ita kaanga naninangge ba nutnangge natapan kake ma tasiwim ngangu dua siknga iniwit. Siwan ngana nata Anutue aminu wai pasiwan mainingge tumuk wamu asinggan ininggat. Waiaknga tasikaingge meya yamikgen.
PSA 141:6 Meya wa yamiyau aminu waakwakgane tupan tapaapa pake damedakane mupewan pukuwanu, wai aminu waakwakga apme natdetning. Natane wamma siakan gan yakum ngangun.
PSA 141:7 Siwana waaminda anzing yaning, “Aminda nindane kwatanin paku amin kwaikaing gapmane mupewa kuning. Unzing aminda kep kwaik take kep daka wesiwan kaukaut mumba kukaing binga.”
PSA 141:8 Siwan ngana Buyambam tapa, awiapatakan aminbam kayuak kapanin, na kainata gae kasatnanggat. Kasatnawa gata na kakuya take tasike na dua nandutewi kupit.
PSA 141:9 Gata na tanawambi yapapna wai aminda pasike pakusopukaingga na dua tapik. Ngan, gata dua kapewi wai aminda bungep pasikaingga tapan.
PSA 141:10 Gata pasiwi inane bungepnata wai aminu waakwau panggaganuyok. Sike na wena. Na kepi takekan sukuwa sanga wai takngatuta dua tasiwan maiwit.
PSA 142:1 Na Buyambam tapata gatangamikge kumzang yanggamatanggat. Ngan, na ita butaya natake gatangamikge kekeknga ininggamatanggat.
PSA 142:2 Nata nangaakan nataat takngae gatu meya kuupbam nae apukaing ngangge ininggat.
PSA 142:3 Sike musipmaatang natapa meya siwan na apmainanggenggat ngang natakengu, Buyambam tapa, gata minaka tasiwitde atnataayak ngang nataat. Sike kepi nata kunanga gwakatangu bungeu gwa tasike takusopuking.
PSA 142:4 Nata ninae wesim kaat. Kawa ngana aminu tapatu dua yuuknga gatangamik. Aminu tapatu dua yuuknga kakuya nae tasiwik. Siwan aminu tapatu nae butaya natangamuke gatangamunangge nataau wena.
PSA 142:5 Unzingge, Buyambam tapa, nata gae yanggau gata akgatangamiakge yanggat. Gatakan na kakuya tasinggayak kapanin. Sike kayuk yuwit kopatangu gatakan siknga naat yutzimde nataat.
PSA 142:6 Gata gatangamiakge sikgatde natapso. Dasingge, natane musipmaatangu meya siknga. Aminu na tasiwan mainggat takwau kekeknga siknga. Nata waakwau yapbitnanga dua. Unzingge gata na ie kataune sandeke tapso.
PSA 142:7 Gata na meya waaknga kaaune sandeke tapi na take yuwit. Unzingge gatane amindabamu unekan gwa yuwan kakengu gatane umanda yatangenawit. Minae, gata nae take tasikuyak.
PSA 143:1 Buyambam tapa, natane tumuk wamma gata natapiakge nataat. Maakga tewi kwanamu nata singgatde apsok. Ga noman siknga siwan puya noman gan asinggan pasinggayak. Unzingge natane tumuk wamma asiknga natake gatangamuyo.
PSA 143:2 Gata na gikane puya aminu ma usanziwim. Wam yananga tapduk gwenen. Dasingge, aminu tapatu gutongana wena gae kaikane nomanganu yuwiu katasiwi maiwik. Wena.
PSA 143:3 Natane iwanata gwa nawake naitakepu teaing. Ita na kaautde keu zikaa siknga dakaatang napmanggak. Siwan na aminu tupa siknga kumbuu tapatuta binga yuat.
PSA 143:4 Unzingge natane natdetdetna apmaiwan meya bam siknga pake yuat.
PSA 143:5 Sike apmanu sanga tupa aakingge gatu nataat. Siwan nata sanga pasikuyakge gatu puya take siknga aknga ngang pasikuyakge nataat.
PSA 143:6 Nata gae tumuk wam yanggat. Yake musipmaatangu gae take siknga nataat. Unzing aminu tapatutane guyakngaatang kupia siwan yangga tangopnangge nataak binga.
PSA 143:7 Buyambam tapa, gata natane tumuk wamma apman natapso. Dasingge, natane banip singgat takngana dapaknga wai sinanggenggak. Gata naenu ma kusopuwim. Unzing tasinggawi na kungwake gwa kumbing aminda yuaing komune kuyat.
PSA 143:8 Sike na gae baniu asinggat. Unzingge tembana siknga gata tasiwi gatane butaya buyambam takngae gatuna natapit. Na gaekan tumuk wamu ganiawa natake gata kepi yeikngami nata ga gawambit.
PSA 143:9 Buyambam tapa, na gatane gepbiatang koke kusopukgat. Kusopuwawa na iwanatane katakngane sandeke tapso.
PSA 143:10 Sike ga natane Anutuna. Gata na nanindamumbi gika nataayak taknga tawambitde nataat. Gatane Waung kapata na tanomanuwan kepi noman tapa tawambitde nataat.
PSA 143:11 Buyambam tapa, gata na asiknga tapiakge gika gwa yawi kekekakut. Ga take sikngaapa. Unzingge meya nae kwaapzang napmamban kake meya waaknga sandeke na tapso.
PSA 143:12 Gata nae take siknga nataayak. Natake gata iwanaat gatu na tasiwan maikum kat zipi kumning. Minae, na gikane puya aminda.
PSA 144:1 Nata Anututane umana yatangenakgat. Na nanduyutnanggengu yatangenakgat. Ita gatangaman nata kataknga tandakngake iwanaat amnangge tasiwa take singgak.
PSA 144:2 Ita nae musia kwikwiknga natake kakuya tasinggak kapanin. Siwan na ita asinggan tanawanggak. Sike na iatang kusopuwa ita na tanggak. Ita na take tasiwan na take yuat. Siwan ita tasiwan aminu kundu nae gepbiatang koyuaing.
PSA 144:3 Buyambam tapa, ninu amin mina binga, ge gata ninde natanimunggayak? Ninu unzing sanga moo binga. Dasingge gata ninde nangaakan natanimunggayak?
PSA 144:4 Ninu unzing waungga genine awiasip akonggak binga. Ninu tapduu dapaknga yuamang. Unzing amindane wee gunzitda tasiwan matekngasim yuke sopunggak binga.
PSA 144:5 Buyambam tapa, gata yekap gwenu yawi zike kuwan epsok. Epuke gata katakgata tawan dakandakane wasiwi kupanu buyambam gwen enayok.
PSA 144:6 Siwan gata yapasik tasiwi kake natane iwana unda undang kunong. Ngan, gata sakutda muke pasiwi datakunong.
PSA 144:7 Gata katakga tewi epuke na kaiwi akopit. Siwana na yangga gapma buyambam gwekatang yuwau gata na tapi take yuwit. Sike na aminde kataune kekeknga yuwau gata sandeke na tapso.
PSA 144:8 Sike aminu waakwau wamu siakan gan dua yakaing. Waakwau kem gan yake asinggan tanzit taknga tasikaing.
PSA 144:9 Anutu, apman nata kau kayuu takngatu tangenake tainanggenggat. Kau wa taiwiu gita tanguke gae taiwit.
PSA 144:10 Sike gata king gatayaminu amak tasike iwana ayapbikaing. Siwan na Deviu gika napmambi iwanata paipda nutnangge tasiwan maiwik. Gikane puya amin tapakan.
PSA 144:11 Siwan iwanatane gena kem wamu atdokaing. Waakwau kem gan yake asinggan tanzit taknga tasikaing. Siwan ngana gata na ie kataaune sandeke tapso.
PSA 144:12 Sandeke tapi ninda natamangu nindane waatdaka wawi mateu katau dakatuta binga kekeknga takaning. Siwan nindane yapaninu take takake kunzi kunzi kinggane yotna gwaam siknga pasibasikaing binga takaning.
PSA 144:13 Gatu nindane puyaninkatangu nanamu kwaapzang siwan you nanam peamang gwegwen kaya akgitnaning. Siwan nindane sipsipmin kaya waakzau buyambam siknga sinimuning.
PSA 144:14 Siwan nindane ikwawa gamanin kaya waakzau buyambam sike gwendu wai dua sike gwendu dua kupik. Siwan aminu tapatuta you gwendune koke aminu kaiwan kuwan ganggatanguwik. Wena siknga. Ninu wawi ba maya tapatu meya ba toknga pakengu kepiapa atang kwanamu dua siwik.
PSA 144:15 Sike dongu takngatuta sanga gwaam gwaamu anzing pakengu apbaknganong. Siwan gatu Buyambam tapa Anutunin ngang kawan yuwan iaya apbaknganong.
PSA 145:1 Anutu, gata natane king kapana. Nata umanda kopsa akngae ayakapit. Siwan asinggan asinggan nata gatane umandae yatangenawit.
PSA 145:2 Nata kwep apman gae akganimbakngawit. Siwan asinggan asinggan nata gatane umandae yatangenawit.
PSA 145:3 Buyambam tapa umana akopsa ge ninda umana kopsa waakngae buyambam siknga yatangenatnim. Sike waapa enane siknga ge ninda umana kopsa waakngae kuupbam natdetnanga dua. Ninu natdetdetninu dapaknga.
PSA 145:4 Anutu, sike aminu apman yuaingga yakapmak kaknga dongu masan aatninguninde sanga gata pasikuyakge yaniwan ita gatane umanda yatangenatning. Siwan puya buyambamu tasikuyakge wamu yatake kuning.
PSA 145:5 Sike amindanu gatane kekekngaka akngaenu ayaning. Gata gae king kapa ngangun. Siwan ninanu gatane puya take aknga akngaekan natapasiwit.
PSA 145:6 Siwan aminbamda puya kekeknga taknga aknga pasikuyakge yatake kuning. Sike natanu gatane umanda kopsa akngae yakapit.
PSA 145:7 Ita gatane take akngakae yatake kuyuuk gatu musip kwikwik takngakae natake kap taning.
PSA 145:8 Buyambam tapata ninde butaya natanimuke itakan musip kwikwik natanimunggak. Sike ita kaanga zaat dua yake ita butaya ninde asinggan natanimunggak.
PSA 145:9 Ita take aknga aminbamde tasike musip kwikwiu sangabamu pasike pekutde nataak.
PSA 145:10 Buyambam tapa, gata sangabamu pasike pekuyakga gatane umanda ayatangenatning. Siwawan gikane amindabamda ganimbaknganing.
PSA 145:11 Sike ita umanda kopsa akngae kepna kepna kayuwayaune yaning. Yake gatane kekekngaka buyambam takngae yatake kuning.
PSA 145:12 Yatake kuwawa amin kuupbamda puya buyambam taknga tasikuyakge natapning. Siwan gatu gae kingu kekekngaapa yuak ngang kaya kuut natapning. Natake umandae natapan buyambam siknga siwik.
PSA 145:13 Sike ga king kapa yuke aminu kuupbam kakuya asinggan asinggan pasiya. Gata aminbam asinggan asinggan kayuya. I takngatu dua teak. I sanga tasike tekut takngae musia siwik.
PSA 145:14 Sike ita aminu meya pakaingu akgatayamuke gatu aminu kunduta yaipakepu peyaingu ita gatuna yapangenakgak.
PSA 145:15 Anutu, sanga kayuk yuaingu kai gaekan tapan tomna ba nataaingu nanamna tapdukngane yamunggayak.
PSA 145:16 Ita nanamu kuupbamde yami takekan yutningge.
PSA 145:17 Anutu waapa noman takngakan tawake sangabamu tasinggak katangu ninde musip kwikwik natanimunggak.
PSA 145:18 Sike mamin amindaka musia ie siknga tewa kuwan unin yatawakaingu ita pakapu iatang wesim yuak.
PSA 145:19 Siwan mamin amindaka ie akgwaubanu ita sanga wa aminde ayamunggak. Sike kwanamu ie sikaingu ita atnatake gatuna waakwau panggak.
PSA 145:20 Ita amin ie siknga nataaingu ita katak siknga kayuak. Siwan ngana ita aminu waiaknga tasikaingu apasiwan maining.
PSA 145:21 Sike na Buyambam tapatane umana asinggan yatangenawit. Siwan ginu sangabamu ita pasikuu, gikaa itane umana asinggan asinggan initangenatnong.
PSA 146:1 Anututane umana yatangenatnong. Nata ninaaya itane umana yatangenawit.
PSA 146:2 Tapduu asinggan kayuk yuwiu itane umana ayatangenawit. Ngan, nata kaau Anututane umana yatangenatnanga kan taisika kupit.
PSA 146:3 Tupan aminu akumnanga apa apa, sike wa aminda na dua gatangamuke taning. Unzingge gata ie baniu dua siwim.
PSA 146:4 Tapduu akumning kopatangu wa aminu kep ganang pukuning. Siwan tapduu wa amindane uyungata teke kuning komune gwa kumbingga wamu sanga kundu tasinangge yakingu buyana wena siwik.
PSA 146:5 Siwan Jekopda Anutue banip sikut. Siwan aminu tapatu Anutu waapae banip siwan ita gatangamukut tapata apbakngayok. Siwan gatu aminu waapa Anutu Buyambam tapae natapan kekekawik apata apbakngayok.
PSA 146:6 Siwan Anutu waapa sanga ena yekapgwen keu andaka gatu yanggabam gwen gatu sangabam undang yuaingu pasike pekut tapanin. Ngan, Anutu waapata wamu ayanggak saak asinggan asinggan tasinggak.
PSA 146:7 Ita amin iwande gepbiatang koyuke tasingupeekaingu akgatayamunggak. Gatayamuke ita aminu waakwau nanam tomde yuaingge ayamunggak. Sike Buyambam tapata kautde yuaingu sandepakepan kautde dua yuting.
PSA 146:8 Siwan gatu ita tasiwan kai akusia aminu gatuna akaaing. Siwan meya takngatu takngatuta apu pasiwan maikaingu asandeyamunggak. Buyambam tapata amin noman yuaing aminde apbaknganggak.
PSA 146:9 Sike ita aminu komduine nana nindane keunin yuaingu ita kakuya apasinggak. Siwan gatu ita maya apna gwa kumbingu kakuya tasike gatayamunggak. Siwan waatdaka nana gwa kumbingu kuut gatayamunggak. Siwan ngana ita wai amindane natdetdetna apasiwan maikaing.
PSA 146:10 Buyambam tapa king dakngake asinggan asinggan yuwik. Ginu amin Saion nana, gindane Anutusa king dakngake asinggan asinggan yuwik. Ginda Buyambam tapae apbaknganong.
PSA 147:1 Buyambam tapatane umana yatangenatnong. Ninda kap taike Anututane umana yatangenake apbakngakamang. Ninda itane umana kopsa akngae yatangenatnimu take siwan noman gan siwik.
PSA 147:2 Sike Buyambam tapata Jerusalemu gatu mitake inane aminabamu iwanata kaipake keu maa siknga yuak komune kuke pekingu gatu pakapunggak.
PSA 147:3 Ita aminbamu apasiwan nomatakaing. Unzing meyata natdetdetna pasiwan maikaingun. Gatu watana kuut wamayamunggak.
PSA 147:4 Sike ita yekap daau datdasingga ngangu gwa yawan yukut. Siwan ita yekap daau umana gwendu gwendu ayaninggak.
PSA 147:5 Buyambam tapaninu umana kopsa siwan kekeknga kuupbam kayakan. Ninda itane natdetdetna tuwangutnanga dua.
PSA 147:6 Sike ita aminu inane umana dua yapangenakaingu ita wa amindane umana ayapangenakgak. Siwan ngana wai aminu ita kapzang siknga yaipakepu peak.
PSA 147:7 Buyambam tapae kap taike umana yatangenatnong. Gita dakandaka zipna gakngae noman ayawan Anutuninde ininim.
PSA 147:8 Sike ita tasiwan minga aknga ena kakaa komune yuak. Yuwana sopa tewan epu zongazonga pasiwan tawan dakandakane akokaing.
PSA 147:9 Ita nanamu ikwawa gaman gwegwende kuut yamunggak. Sike gatu kombunananggane matekngata ba yawan kaya ie nanamu ayamunggak.
PSA 147:10 Sike Buyambam tapa hos kekeknga gwegwende gatu aminu kekeknga apapae dua baknganggak. Aho.
PSA 147:11 Aminu ie akgwaukaing amindekan baknganggak. Ita butaya asinggan natayamunggakge banip sikaing amindekan baknganggak.
PSA 147:12 Ginu Jerusalem nana amin, Buyambam tapatane umana initangenatnong. Ginu Saion nana amin, Anutusatane umana initangenatnong.
PSA 147:13 Dasingge, ita damandane gwambok gwakgwau apapan kekekakaing. Ga Jerusalemdanen. Siwan ita gatane amindabamu take gatayamunggak.
PSA 147:14 Ita gindane kepza kayuak. Kayuke gindane witza pasiwan puyasa atang take siknga akopa pake napa musipza dokaing.
PSA 147:15 Sike ita wamu takngatu ba yawanu, zaat gaman siknga wamu waaknga yekau tepuke keu andakane epunggak.
PSA 147:16 Ita sopa zambamu kwaapzang pewan epuke kepdaka usukwatapmanggak.
PSA 147:17 Sike itakan wa sopa zambamu kwaapzang siknga sup tapaunu yanggabam gwende kwaimune kaamang binga pewan epukaing. Ita tasiwana kep komu kwamana siknga siwan aminda kwaman taknga kung ngangu ininanga dua.
PSA 147:18 Siwana ita wamu gatu yawan sopa zambamu yangga daknganggak. Ita got taknga tangenawan got takngata yangga tasiwan zipmake kunggak.
PSA 147:19 Sike ita wamu Jekopde yanikapmanggak. Ngan, itane mama wam Isrel nanae yanikapmanggak.
PSA 147:20 Sike waaknga aminu kundue dua tasinggak. Aminu waakwau itane mama wamu dua nataaing. Ginda Buyambam tapatane umana yatangenatnong.
PSA 148:1 Buyambam tapatane umana yatangenatnong. Ginu kuupbamu yekaune enane yuaingga Buyambam tapatane umana yatangenatnong.
PSA 148:2 Ginu angela kuupbamda, itane umana yatangenatnong. Ngan, aminu yekaune nana kuupbamda ita umana yatenganatnong.
PSA 148:3 Siwan gunzitkat gatu yekap gwen ngangga itane umana yatangenake gatu yekapdaau yasikaing ngangga itane umana yatangenatnong.
PSA 148:4 Sike yekau enane sikngata itane umana yatangenatnong. Siwan yangga ena kaa komune yuaingga itane umana yatangenatnong.
PSA 148:5 Sanga wa kuupbamda Buyambam tapatane umana yatangenatnong. Dasingge? Ita ina yawan aake yuaing.
PSA 148:6 Ita yawan waakwau ina ayuaingune yutakuuke yuaing. Siwan wamu wa yakuu yawan kekekawan sandetnanga dua.
PSA 148:7 Buyambam tapatane wamu atawakaing ngangu ginda Buyambam tapatane umana yatangenatnong. Sike ginu pis buyambam gatu sanga yanggabam gwenu kutakngane amunandang siknga yuaing gatu yapasiu mingane kakaakgak.
PSA 148:8 Gatu yangga ais binga gatu minga kuut gatu gou kekeknga puyakaing.
PSA 148:9 Sike ginu tawanu buyambam gatu ginu tawanu mateknga, gatu katau buya asaaking, gatu katau zongaatang nana, gatu kaau kuupbamu aminda kayuaing,
PSA 148:10 gatu kaap zong, gatu kau mateknga, gatu kwait ngangu ginda Buyambam tapatane umana yatangenatnong.
PSA 148:11 Siwan ginu king gatu amin kepna kepna nana kuupbam, gatu kinggane waaknga tupan tapa apa kuupbam,
PSA 148:12 gatu tupan amin gatu wawi matek, gatu maya matek, gatu aminuake, gatu waatdaka ginu kuupbamda Buyambam tapatane umana yatangenatnong.
PSA 148:13 Siakande siknga. Kuupbamda Buyambam tapatane umana yatangenatnong. Dasingge? Umana kopsa itane akngata aminu kuupbam umana kaya ngana ita asiknga ayapbikut. Sike ninda yekapat kepat ngangu kana enane siknga sikaing ngana umana kopsa itane akngata ayapbikgak.
PSA 148:14 Sike ita Isrel aminde take siknga natayamunggak. Sike ita wa aminu inane papan kekekake yuaingunin. Unzingge wa aminda itane umana ayatangenakaing. Buyambam tapatane umana yatangenatnong.
PSA 149:1 Buyambam tapatane umana yatangenatnong. Ginda ie kau kayuk taknga aknga tainong. Taike amin asingganu unin tawakaing aminun, ginda itane umana gaak inikaing tapduk komune initangenatnong.
PSA 149:2 Ginu Isrel nana amin, ginu musip gwaangu Anututa gin pasikutde natangamunong. Ginu Saion nana amin, ginda king kapasae apbaknganong.
PSA 149:3 Ginda ataibakngake umana yatangenatnong. Ginda wakum gatu garamut gatu gita ngang zipmake itane umana yatangenatnong.
PSA 149:4 Dasingge, Buyambam tapata aminabamde take siknga nataak. Natake aminu inae natapan kopsa dua siwan yuaingu ita ayapangenakgak. Pangenawan ita amak ba tasikengu ita iwana ayapbikaing.
PSA 149:5 Anututane aminabamda gwa yapbikengu apbakngakaing. Unzingge dapuna petnangge natake gwa yukengu kau apbakngananga taknga aknga take taining.
PSA 149:6 Ita take ainggamatake Anutue inimbakngake gwauyana gena toknga akwau katakngata panggaganutning.
PSA 149:7 Panggaganuke dongu kunduat amau tasike gatukande pasiwan maining.
PSA 149:8 Pasiwan maiwan ita kingaat gatu tupan aminu panggaganuke senu ainda tasiyata wamapening.
PSA 149:9 Siwan ita aminu waakwau tokngabam yamuning. Unzing Anututa gwa yakut. Sike Anututane aminabamdanu iwana ina unzakan yapbitakakopning. Buyambam tapatane umana initangenatnong.
PSA 150:1 Ginda Buyambam tapa inimbaknganong. Ginu Anututane yotna gwekatang koyuke umana aknga yatangenatnong. Ginu yekaune enane yuaingga ie inimbaknganong.
PSA 150:2 Sike ita puya kekeknga akngata pasikut takngae natake itane umana yatangenatnong. Sike ginu ita tupan sikngaapa yuke umana kopsa sikngaapa ngang natake itane umana yatangenatnong.
PSA 150:3 Ginda pum puyake umana yatangenake gatu gita zipmake umana yatangenatnong.
PSA 150:4 Gatu wakum zipmayuuk kap taike umana yatangenake gatu gita zipmayuuk kekngagom puyake umana yatangenatnong.
PSA 150:5 Gatu dopangu bras ngang yanikainunin zipmaawa gakngae kuwawan Buyambam tapatane umana yatangenatnong. Ngan, dopangu bras gwenu tanguwa gakngae kapzang yaawan Buyambam tapatane umana yatangenatnong.
PSA 150:6 Ginu sanga kayuk yuaingu kuupbamda, Buyambam tapatane umana yatangenatnong. Buyambam tapae inimbaknganong.
MAT 1:1 Sike aminu aakwau Jesu Kraisdane bamnatane umana. Jesu Devit tupa siknga kumbut tapatane donga, siwan Devitda Ebraham tupa siknga kumbut tapatane zakngi.
MAT 1:2 Ebrahamu Aisakgane nana. Sike Aisakga Jekopdane nana. Siwan Jekopda Judaat gatu itane uyapna bapatdane nana.
MAT 1:3 Sike Sudatane waaknga Pereskat Saraat. Sike waapaatdane minga Tema. Siwan Peresda Hesrondane nana. Sike Hesronda Ramdane nana.
MAT 1:4 Siwan Ramda Aminadapdane nana. Siwan Aminadapda Nasondane nana. Siwan Nasonda Salmondane nana.
MAT 1:5 Sike Salmonda Boasdane nana. Sike minga umana Repah. Siwan Boasda Obetdane nana, sike minga Rut. Siwan Obetda Jesitane nana.
MAT 1:6 Siwan Jesita Devitane nana. Siwan Devitda Solomondane nana. Sike itane minga tupa Yuriatane maatna dakngakut.
MAT 1:7 Siwan Solomonda Riaboamdane nana. Siwan Riaboamda Abaisatane nana. Siwan Abaisata Esatane nana.
MAT 1:8 Siwan Esata Jihosafatdane nana. Siwan Jihosafatda Joramdane nana. Siwan Joramda Usaiatane nana.
MAT 1:9 Siwan Usaiata Jotamdane nana. Siwan Jotamda Ehasdane nana. Siwan Ehasda Hesekaiatane nana.
MAT 1:10 Siwan Hesekaiata Manasatane nana. Siwan Manasata Emosdane nana. Siwan Emosda Josaiatane nana.
MAT 1:11 Siwan Josaiata Jekonaiaat uyapna bamdane nana. Sike tapduu waomune iwanata apu Isrel nana zipmake kaipake keu Bebilon komune kaipakuking.
MAT 1:12 Sike wa kaipakukingga aminu Bebilonu kaipakuwana Jekonaiatane engangu tapatu aawan umana Siatiel ngang iniking. Siwan Siatielda Serababeldane nana.
MAT 1:13 Siwan Serababelda Abaiatdane nana. Siwan Abaiatda Elaiakimdane nana. Siwan Elaiakimda Esotane nana.
MAT 1:14 Siwan Esota Sedokgane nana. Siwan Sedokga Ekimdane nana. Siwan Ekimda Elaiatdane nana.
MAT 1:15 Siwan Elaiatda Eliesatane nana. Siwan Eliesata Matandane nana. Siwan Matanda Jekopdane nana. Siwan Jekopda Josepdane nana.
MAT 1:16 Siwan Josepda Mariatane apna. Siwan Mariata Jesu tangaiwan umana Krais ngang inikaing.
MAT 1:17 Unzingge Ebrahamdane dongata waakzak sike sitakunggawan apu apu banakan katangu aminu buyambam siknga dakngawana masan siknga Devitda aakut. Siwan Devitdane dongata waakzak sike sitakunggawan apu apu banakan katangu ina unzakan aminu buyambam siknga dakngawana masan siknga Bebilon kep komune nana aminda apu kaipakuking. Kaipakuwa yuke wa aminda waakzak sitakunggawan apu apu banakan katangu ina unzakan aminu buyambam siknga dakngawana masan siknga aminu tapatu Anututa tapan akgatanimunangaapa dakngake aakut. Anututa waapa takutde natake umana Krais ngang inikamang.
MAT 1:18 Siwan Josepda Maria maatnae tapikge gwa yawan ngana dua takut. Tapduknga atapikge gwenu dapaknga siwan Anututane Waung Kapata tasiwan Mariata musiaapa siwan kaking.
MAT 1:19 Kawa ngana Josepda aminu nomanaapa yuke wepda inikwasiwa kuwik ngang natapbut. Mariata maaknga dua natapikge ngang natake
MAT 1:20 dapun peke mia takngatu kakut. Kawawan Anututane angelata apu anzing inikut. Josep. Devitdane dongune aakuyak kapa. Maatdae tapiyakge nangaakan ma natapim. Take tapso ngang inikut. Inike Anututane Waung Kapata tasiwan musiaapa sikut.
MAT 1:21 Siwan apmea engangu wawiapatu tangaiwik ngang inikut. Tangaiwana umana Jesu ngang iniyo. Dasingge? Ita aminabamu waiakngae gepbiatang dua yutningge gatayamik ngang inikut.
MAT 1:22 Siwan tupa siknga Anututa wamu takngatu ayanikapsa aminu tapatu iniwan natake ita anzing yanikapbut,
MAT 1:23 “Maya mateu tapatu wawi tapatue dua kukut tapata musiaapa siwik. Sike engangu wawi wa tangaiwik kapatane umana Emanyuel. Tana tekwamban, ‘Anutu nikat gatake yuamang,’ ngang inining.” Ngang wa yakapbut taknga buya unin siwikge natake angelata Josep unzing inikut.
MAT 1:24 Iniwan natake Josepda enake angelata wamu wa inikut taknga tasikut.
MAT 1:25 Maria takut ngana iat gatake dua peke yuwawat waaknga tangaiwan Josepda umana Jesu ngang inikut.
MAT 2:1 Siwan Herotda tupan tapa yukut gwekatang Jesuta Betlehem yot gapma Judia kep komune yuak gapmane aakut. Aawana natdetdetna kaya aminu gunzitde yapiiatangga Jerusalem apu anzing yaking.
MAT 2:2 Engangu kayukapa Judia amindane buyambam tapa dakngawik kapa zandang yuak? Ninu itane yekapdaak gwenu gunzitde yapiiatang yuke kake gwa aakut ngang natake apu ninu waapa inimbaknganangge apukamang ngang yaniking.
MAT 2:3 Siwan buyambam tapa Herotda natake asatnawan aminbamu Jerusalem nana kuupbam asatnaking.
MAT 2:4 Siwan Herotda Anutue yot takwan gwene pasiya amindane takeakwakat gatu mama wam yanindamumsa amikat yayawamban unekan apa anzing yanikwaikut, “Anututa tapan Krais dakngawik kapata zandang aawik,” ngang yanikwaikut.
MAT 2:5 Yanikwaiwan yake anzing iniking. “Betlehem yot gapma Judia kep komu yuaune aawik,” ngang iniking. “Dasingge, ayanikapsa aminda anzing mataking,
MAT 2:6 ‘Ginu Betlehem nana Judia kep komdane yot gapmabamu ginu dua dapbitning. Wena siknga. Sike gikatnana tapatuta apuke natane amina Isrel nanae kuyana yuwik,’ ngang mataking,” ngang take aminu waakwakga Herotde unzing iniking.
MAT 2:7 Unzingge Herotda wepda siknga aminu gunzitde yapiiatang nana amin yayawamban apa anzing yanikwaikut. Yekapdaau wagwenu zaapduk apan kaking ngang yaniwan yake anggaman iniwa natapbut.
MAT 2:8 Natakenga kemu anzing yanikut. Ginu kuke engangu waapa kakengu ginda wamu nae takapa nakaya kuke inimbakngawit ngang yanipewan kuking.
MAT 2:9 Kuwawa yekapdaau wagwenu tupa gunzitde yapiiatang yuke kakingu ita tupan kuwawan tawatake kuwawa paku you engang kapata yukut gwene tuwanguke enane yukut.
MAT 2:10 Yekapdaakga yuwan kake musip gwaang natake
MAT 2:11 yoakatang koke engakat minga Mariaat kake umana yatangenatnangge natake akgwetake inimbakngake yakngaatang zike sanga kundu ie imuking. Mani buyambam gatu sanga planggane inuknga binga wa manina buyambamda usiking. Siwan katau dakatutane inuknga kapanga take siknga singgak. Siwan manina buyambam sikngata usikingkat imuking.
MAT 2:12 Imukenga dapun peke mia kawawa Anututa anzing yanikut. Herotde gatusa ma kuwam ngang yaniwan natake enake kepi tapatu tawake gatuna yotna kuking.
MAT 2:13 Siwan aminu waakwakga gwa kuwana Josepda mia takngatu kawawan angelata anggaman singaawan kakut. Kaawan waapata anzing inikut. “Enat! Tupantapa Herotda engang waapa tangutenangge natake apmaatzim tawambik. Ge ga enake engakat mingaat papi Isip kep komune datakunong. Datakuke undang yuwawa apmea nata daniwa ginu gatu ane apnong,” ngang inikut.
MAT 2:14 Iniwan natake Josepda enake engakat mingaat papan zikaane Isip kuking.
MAT 2:15 Kuke undang yuwawa tupa siknga Anututane wamna yanikapbut tapata apmea aawikge wam taknga anzing yakut. “Waakngata Isip yuak. Yatawamba apik,” ngang yakut. Sike wa yakut taknga buya unin aakut. Siwan waakwakga Isip kuke yuwawa masande Herotda kumbut.
MAT 2:16 Siwan Josepda engakat mingaat pake Betlehem teke datakuwana Herotda kaawan natdetdetna kaya aminda kem tasiwa kake musiaatang toknga siknga natapbut. Natake natdetdetna kayata kuminamu wagwenu tupa kakingge tapduknga gwende gatu natapbut. Natake Betlehem nana amindane waatdaka nakanu gweaat gwenduat dua kaking aminu zipa puyuwikge amina yanipewan kuku zipa kumbing.
MAT 2:17 Zipa puyuwan wamu takngatu tupa siknga Jeremaiata Anututane wam take yanikapbut taknga siakande buya unin aakut. Sike ita wamu anzing yakapbut.
MAT 2:18 “Rama yot gapmane nana aminda nataawa kwanam kumzang siknga siwan natapning. Reselta waakngae kwanam siwawan kake bitang ngang iniwa maikut. Dasingge? Waakngata wena gwa siking.” Jeremaiata wamu wa yakut taknga gunziu wagwene siakande buya unin aakut.
MAT 2:19 Siwan Herotda akupana Josepda Isip yusika mia takngatu kakut. Kawawan angelata anggaman apan kakut. Apan kaawan ita anzing inikut.
MAT 2:20 “Enat. Waatdaka tangutenangge tasikut amin tapa gwa kumbutde waatdakaat mingaat pake Isrel kep komune kopso,” ngang inikut.
MAT 2:21 Iniwan Josepda natake enake waatdakaat mingaat pake Isrel kep komune kopbut.
MAT 2:22 Undang koke yuwawan aminu tapatuta anzing inikut. Akeleas Herotdane waakngata nanae tangge yuke Judia aminde tupantapa dakngake yuak ngang iniwan natapbut. Natake undang kopnangge gwauya natapbut. Gwauya natake yusika zikaa gwendune mia takngatu kaawan Anututa gwaut wam iniwan natapbut. Iniwan natake enake papan Galili kep komune kuking.
MAT 2:23 Kusika you gapmandu umana Nasaret ngang inikaing gapmane kuke yuwawa Nasaret nanaapa ngang Jesue yaking. Ge wamu takngatu tupa siknga Anututane wam yanikapbing aminda yaking kaknga siakande buya unin aakut. Wa aminda anzing yakapbing. Nasaret nanaapa ngang ie yaning ngang yakapbing.
MAT 3:1 Tapduu waomune Jonu yangga sauyamuya apata keu amina wena Judia kep kautdu saak komune yuke ita wamu tuwanguke yanikapbut.
MAT 3:2 Ita asinggan anzing yakut, “Ginda musipza tapa tekwamsok. Tapduknga Anututane amin panangge tasinggak kakngata apnangge dapaknga gwa singgak,” ngang yakut.
MAT 3:3 Jonu waapae Anututa yawan natake wamu ayanikapsa aminu Aisaiata anzing matakut, “Aminu tapatu keu amina wena komune yuke anzing yanggamatanggak. ‘Takeapatane kepina tandaknganong. Buyambam tapatane kepina tanomanutnong,’ ngang yanggamatanggak,” ngang Aisaiata matakut.
MAT 3:4 Siwan Jonda tauknga kaau gwendu kamel ngang inikainggane danggamita tasikingunin taukngae tasike simbuna tambut. Siwan ita nanamde apmakat iningokat nakut.
MAT 3:5 Sike tapduu waomune you Jerusalem gapmanenana gatu keu Judia komunenana kuupbam gatu aminu you Jodan yanggaapa kaukaut saak yuaing gapma gapmane nana kuupbamda Jonde kuking.
MAT 3:6 Kuke waiakngana yakapa Jonda yangga Jodanu waapane sauyamukut.
MAT 3:7 Siwan Judianana aminda miti wamu inata takngatu natake dongu takngaaya dakngake yukinggane dongu takngatu Ferisi amin ngang yaniking. Siwan dongu takngatu Sadyusi amin ngang yaniking. Siwan dongu wa takngaakatnana aminu buyambamda yangga sauyamikge apuwawa kake Jonda anzing yanikut, “Gomokga amin yasiwan kungwakaing binga ginda unzing pasikaing. Dasingge? Anututane musia toknga aknga yapbitnangge datakuke nata yangga sautdamitde apukaing? Aminu tapatuta toknga wa masan apik kakngae daniwan natake datakukaing ba dasing?” ngang yanikut.
MAT 3:8 “Ginda Ebrahamdane dongune aake yuaing ngana sanga takngatuekan dapmakaing. Musipza tapa tekwamban waiakngasae masa yamuke yuaing kakngata anggaman siwan kanimde pasinong,” ngang yanikut.
MAT 3:9 “Suu ayuaing gwegwenu sanga moo binga ngana Anututa tasiwan supda Ebrahamdane donga dakngananga. Siwan ginda wamu anzingu ma yawam. ‘A! Ninu Ebrahamdane dongune aake yuamang. Yuwatna Anututa nindupan aminu noman aminda yuaing ngang ninduak,’ ngangu ma yawam. ‘Ninduakge dasingge musipminu tana tekwambik,’ ngangu ma yawam,” ngang yanikut.
MAT 3:10 “Sike katau yapii buyak patzitnangge natake sandunu katapdakae yapiine gwa tekut binga Anututa nin usanzitnangge natake gwa takakngake yuak. Buya take dua aawan kake sandunda patzike katapbapatang muban yasiwik,” ngang yanikut.
MAT 3:11 “Ginda musipza tapa tekwanggak kakngata siakan siwan kanimde yangga sautdamunggat. Sike apmanu nata gambok enake puya aaknga tasiwawa masande aminu tapatuta enake puya tasiwik. Sike aminu waapatane kekeknga aknganata na atnapbikut. Unzing siwan na aminu umana wenaapa yuatde ita apan kake nata inike, ‘Kepi taukga papa sanggamuut,’ ngang ininangge apmaakanggat. Sike ita Anututane Waung Kapa initewan apu musipza pangenake ginu katapda isindudumukgak binga tasindamik,” ngang yanikut.
MAT 3:12 “Sike kep kwaipuknga katakngine take nanam tapun kwaidotdonguke undang muban kopa ooya puyapakuwawan buyata gatu buka gwene pimamba pake pakapu nanam tapunde yotgwene peaing binga ginu usanzitdamik. Buya pekanga ooya kwaamuke katau dua kungwake asinggan isinggak gwekatang muban yasining,” ngang yanikut.
MAT 3:13 Sike tapduu wagwene Jesuta Galili kep komu teke yangga Jodan tapane kuwan Jonda yangga saukngamikge kukut.
MAT 3:14 Siwan ngana Jonda isapimamsa wam yake anzing inikut, “Na gata yangga take siknga saukngamunanga ngana ga dasingge nata yangga saukgamitde nae apunggayak,” ngang inikut.
MAT 3:15 Iniwan ngana yake anzing inikut. “Undanga. Apmanu nata wa ganinggat taknga tasiyo. Sike nitda unzing tasikengu puya kuupbam nomanakan Anututa ninikut taknga tasisim,” ngang iniwan Jonda ie wam gwaamuke yangga saukngamukut.
MAT 3:16 Yangga saukngamana Jesuta yanggaatangga akoke kawawan zetgaman enandangu kakaa siwan Anutue Waungga kwaiu kombunananga ngang yanikamang gwenda binga epuke Jesue apu tangene pakuyukut.
MAT 3:17 Pakuyuwawan enandangga wamu takngatu anzing yakut, “Aminu waapa natane waaknga. Na ie take siknga natangamuke ie musip gwaang natangamunggat,” ngang yakut.
MAT 4:1 Siwan Setdenda Jesu inindatdauwikge Waung Kapata keu amina wena komune initakukut.
MAT 4:2 Kuke nanamu dua nake yusika sande katau kuut musa kautdu musane gwenduat kake tomna natake yuwawan ninindatdaukgak kapata apbut.
MAT 4:3 Apuke Jesu anzing inikut, “Ga Anutue waak kakengu sup anggwegwen yaniwi poyak dakngawa napso,” ngang inikut.
MAT 4:4 Iniwan ngana yake anzing inikut. “Wamu takngatu Anututane wampatang anzing matakut, ‘Nanamdakan keunenana amin gatayaman kayuk yutnanga dua. Yusikangu akumning. Siwan ngana Anututa wamu takngatu takngatu yakut taknga gwaamukengu dua kumning,’ ngang matakut takngae natake sup gwegwenu dua yaniwit,” ngang inikut.
MAT 4:5 Iniwana Setenda Jesu take Jerusalem yot takwan gapmane koke Anututane yot takwan gwene engatangan koke dumtapane yukumayak.
MAT 4:6 Yusika Setenda Jesu anzing inikut, “Anututane wampatang anzing matakut. ‘Anututa angelana yaniwan katakngita ga tapa kenzomba supgwene dua tepsa,’ ngang matakut takngae natake aneta paapi unzing gatanggama kake ga Anututane waaknga siknga ngang natapa siakan siwik,” ngang inikut.
MAT 4:7 Iniwan ngana yake anzing inikut, “Anututane wampatang wamu takngatuat anzing matakut, ‘Gata Anutu Buyambam tapa ma tasiwi siwan,’ ngang matakut takngae natake dua paapit,” ngang inikut.
MAT 4:8 Ngang iniwan Setenda Jesu tapan tawanu mamaya siknga dakatune enane siknga kopbumayak. Koke sangabam yeukngaman Jesuta kawawan take aminu kuupbam kepna kepna yutakuwawa kakut. Kawawan take waakwakge aminabamda wa aminde gepbiatang yutakuwawa umana asenawawa kakut.
MAT 4:9 Kawawan Setenda anzing inikut, “Gata nae gepbiatang koyuke nanimbakngawinu nata tasinggama akaayak kaknga kuupbamda gae gepbiatang koyutning,” ngang inikut.
MAT 4:10 Iniwan natake Jesuta yake anzing inikut, “Anututane wampatang wamu takngatu anzing matakut, ‘Anutu Buyambam tapae inimbakngake ie puyaekan natake tasingamuyo,’ ngang matakut takngae natake dua ganimbakngawit,” ngang inikut. Unzing inike “Seten! Ga napmake kungga,” ngang inikut.
MAT 4:11 Ngang iniwan natake i teke kuwana angelata apu Jesu gatangamuking.
MAT 4:12 Siwan “Jonu tanggaganuke kaautde teking,” ngang yawa Jesuta natake Judia kep kom teke Galili kep komune kukut.
MAT 4:13 Kuke Nasaret yot gapma teke paku Kapeneam yot gapmane yukut. Sike Kapeneam yot gapma yangga gapan kwaimune Sebyulandane dongaat Naftalitane dongaatda tupa siknga yuking saak yuak.
MAT 4:14 Unzing Anutue wamu takngatu ayanikapsaapa Aisaiata yanikapmake anzing yakut,
MAT 4:15 “Keu Sebyulan nanaat gatu Naftali nanaat kepi yanggagapande kuya Jodan kautdu saak aminu dongu kundune nana Anutue dua nataaing amin ngana Galili kep komune yuya aminu zikaandakatang yuaing.
MAT 4:16 Wa aminda kakaa buyambam taknga gwa kaaing. Sike aminbam zikaa akumnangaatang yukingge waenga sike kakaa yamukut,” ngang Aisaiata yakapbut taknga buya unin aakut.
MAT 4:17 Sike tapduu waomune Jesuta tuwanguke wam yake anzing yakapbut, “Ginu musipza tapa tekwamsok! Tapduknga Anututa amin panangge tasinggak kakngata apnangge dapaknga gwa singgak,” ngang yanikut.
MAT 4:18 Siwan Jesuta yangga gapan Galili kwaimune kusika aminu tapaaya uyapnaat paanaat kakut. Tapatu Saimon Pita ngang inikaing kapaat uyapna Endruatda asinggan pis kaike mani ita pakakumayak. Siwan yapapna yangga gapan katang mukgawat kakut.
MAT 4:19 Kake Jesuta waapaau anzing yanikut, “Giu apu na nawambat nata danindamuba pis wa kaikamayak binga aminu papat natane pandetna daknganingge danindamumbit,” ngang yanikut.
MAT 4:20 Yaniwan waapaau zetgaman yapapna peke kuku tawambat kuking.
MAT 4:21 Tawambat kusika gatu kawawan aminu inawaanda undang yuwawa kakut. Jems Sebeditane waaknga uyapna Jonkat kakut. Kaawan waapaatda dopangbam gwene nana Sebediatda unekan gatake yuke yapapna paibupmake yuwawa kakut.
MAT 4:22 Kake waakngaapaat yayawamban zetgaman dopangbapat nanaat peke kuku Jesu tawakumayak.
MAT 4:23 Siwan Jesuat itane pandetnaatda Galili keu kuupbam pasitakuke ita aminu kuupbam inane miti yotnane koke yanikut. Yanike wamu takeaknga ngang yake Anututa amin panangge tasinggak kakngae wam yake sangabamda gupnaapa aminbam pasiwan maikingu sandeyamukut.
MAT 4:24 Yanike sandeyamuwawan natake wam yatakuwawa Siria kep komune kuut tawamban sandewan aminbamu maitna inata inata sikingu ie pakapbing. Tokngabam paking amin gatu waung waita papan datdaptaking amin gatu aminu apimake kumzang yamukaing amin gatu aminu kwatai gatukande kupsa amin ngang ie pakapa pasiyaman take siking.
MAT 4:25 Siwan aminbamu Galili nanaat kautdu yot gapma katak kuut musaatda yuaing saak nanaat Jerusalem nanaat Judia kep komune nanaat Jodan yanggaapa kautdu saak nanaatda kuku Jesu tawaking.
MAT 5:1 Aminbamda tawawa kake Jesuta baku dakane koke pukwiwana pandetnata ie kuking.
MAT 5:2 Ie kuwana anzing yanindamukut.
MAT 5:3 “Mamin amindaka Anutue kuna gataniman ngang baniaatang natake kukaingu Anututa aminu waakwakat gatake yutning. Dasingge? Anututa amin panangge tasinggak kakngae gepbiatang yuaing.
MAT 5:4 Mamin amindaka waiaknganae kwanam sikaingu Anututa aminu waakwakat gatake yutning. Dasingge? Anututa sandeyaman nomana yutning.
MAT 5:5 Mamin amindaka inae umande buyambamtapa dua daknganingge natapningu Anututa aminu waakwakat gatake yutning. Aminu unzing natapning aminde sanga tupa yamunangge yakut taknga Anututa siakande yaman pake apbakngake yutning.
MAT 5:6 Mamin amindaka takeaknga tasinangge musiaatang toknga siknga nataaingu Anututa aminu waakwakat gatake yutning. Dasingge? Musiaatang takekan siwik.
MAT 5:7 Mamin amindaka musiaatang kwikwiknga nataaingu Anututa aminu waakwakat gatake yutning. Dasingge? Anututa wa aminde toknga dua yamik.
MAT 5:8 Mamin amindaka musiaatang wasap wena aminu Anututa aminu waakwakat gatake yutning. Dasingge? Wa amikat Anutuat unekan gatake yutning.
MAT 5:9 Mamin amindaka amakaknga yandakngakaingu Anututa aminu waakwakat gatake yutning. Dasingge? Anututa natane waaknga ngang yaniwik.
MAT 5:10 Anutue wamde banip siya aminde banip dua siya aminda toknga yama paningu Anututa aminu waakwakat gatake yutning. Toknga yama paning ngana aminu waakwakga Anututa amin panangge tasinggak kakngae gepbiatang koyuke apbaknganing.
MAT 5:11 “Ginu pandetna yuwawa danduke kunduta sapdut wam danisapduke toknga aknga damuke wamu inata inata takngatu takngatu ginde kem yaning.
MAT 5:12 Tupa siknga Anututane wam yanikapsa aminde toknga unzakan yamukaking. Toknga unzing damuwawa ngana banipzaatang apbakngake yutnong. Dasingge? Anututa takeaknga enandangu ginde atdamik,” ngang yanikut.
MAT 5:13 “Siwan pangga pasiwan nanamu kaya singgak binga ginda aminbamu gikat gatake yutning amindane musia pangenawa wa aminda musia tapa tekwamban amin noman daknganing. Siwan ngana pangu sipna siwanu dasingga tasina kayana gatu siwik? Wena. Pangu kaayana wena sipna gwa singgakge muban kuwan aminda apu yainggamuning.
MAT 5:14 “Siwan gunziu waengata kuwan kepna kepna nana aminda kakaa akngane yuaing. Sike gikaya ina unzakan. Ginda pasiwa keune nana aminda kakaa akngane yutning.
MAT 5:15 Siwan lam gwen gatake dopang gwenda dua usikwatakamang. Lam gwen gatapna isikakaawan itane tangine tena kakaa aknganata yot wagwen tawamban sandewik.
MAT 5:16 Ina unzakan. Aminbamda ginda take tasikaing kakngasa kakaa aknga binga siwan danduke Nanza enandang yuak kapae inimbaknganing,” ngang Jesuta pandetna yaniwan natapbing.
MAT 5:17 “Sike ginda anzing ma natapam. Nata apuke Mosesdane mama wam gatu ayanikapsa amikatde wam yandaknganangge dua apbum. Wena. Nata apuke tasiwa wamu wa yaking kaknga buya unin aawikge natake apbum,” ngang yakut.
MAT 5:18 “Nata siakande siknga daninggat. Tapduknga yekapat kepat wena dua siwik gwekatangu Mosesdane mama wamu kautdu mateknga takngatusimu wena sinanga dua. Sike mama wamdane buyana aawana mama wamu waaknga tening,” ngang yanikut.
MAT 5:19 “Unzingge aminu tapatuta mama wamu takngatusim yandakngake aminda sandetningge yanindamubanu tapduknga Anututa aminbam usanziwik gwene ita Anutuat gatake yuwik ngana waapatane umana pimapan umana wenaapa binga dakngake yuwik. Sike aminda mama wam tawake aminbamde musia pangenawan tawambanu tapduknga Anututa aminbam usanziwik gwene waapata umana kaya dakngake yuwik,” ngang yanikut.
MAT 5:20 “Siakande daninggat. Ginda Mosesde mama wamu yanindamumsa amikat Ferisi amikatda Anutue kepi katak tawakaing kaknga dua yapbike katak siknga tasikengu Anututa amin panangge tasinggak kakngae gepbiatang kopnanga dua siwik,” ngang yanikut.
MAT 5:21 “Sike Anututa aminu tupa siknga yuking aminde anzing yanikut, ‘Aminu tapatuta amin tanguwan kupan takuwa wam yayok,’ ngang yanikut taknga ginda gwa natapbing.
MAT 5:22 Ngana nata ginu daniwa natapnong. Aminu tapatuta notnae bania toknga natangamanu takuwa wam yayok. Gatu aminu tapatu notnae inisapduwik kapa takuwa wam yayok. Gatu aminu tapatu notnae bania toknga natake ga katum ngang iniwik kapa katapbapatang pukunangaapa dakngawik.
MAT 5:23 “Siwan gikatnana tapatuta sangana Anutue imunangge natake yot takwan gwene pakopik. Pakoke sanga apbotakut taknga gatuna natapik. O! Nata notnae wai takngatu tasingamukum. Wai waaknga tasiwa nae wai nataak ngang natapik.
MAT 5:24 Unzing natakengu sangana Anutue imunangge pakopiu undang peke kuyok. Kuke notnae take tasingaman ie take siwana gatuna apuke sangana Anutue imuyok.
MAT 5:25 “Siwan aminu tapatuta apu gikatnana tapatu wamna yawikge apu takuwanu waapaatda kepiapane kuyuk wam kwikwik iniwan baniaatang kwikwiknga aknga natangamuke wam yawikge dua takuwik. Sike unzing dua iniwanu waapata takuwan wamu ayawik. Ayawan wam usanziwikapata yawan taukdapakga kaaut yotde tewik.
MAT 5:26 Undang tewan yusika buya tupakande imukenga epu kuwik,” ngang Jesuta yanikut.
MAT 5:27 “Sike ginu wamu aaknga tupa siknga bamsa yanikut taknga gwa natapbing, ‘Gata yasewa ma tasiwim.’
MAT 5:28 Unzing yanikut ngana nata anzing daniwa natapnong. ‘Aminu tapatuta maya tapatu kake maya waapae musia enawanu ita musiaatangu yasewaapa gwa daknganggak,’ ngang natapnangge,” ngang yanikut.
MAT 5:29 “Sike kaika siya saak nana gwenda tasiwan ga waiakngaatang pimakengu akwagike mutewi kuyok. Sike gupba kautdu wena siwan waiakngaatang dua pimapi tokngabam pakaing kopatangu dua muba kuwi take siwik. Siwan kaika dua kwagiwi ita tasiwan pimapinu gupba kutapa muban kuwan wai siwik,” ngang yanikut.
MAT 5:30 “Sike katakga siyaapata tasiwan ga waiakngatang pimakengu gata apasindakngake mumso. Sike gupba kautdu wena siwan dua pimakengu tokngabam papsa kopatangu dua kuwi take siwik. Siwan ngana dua pasindakngake undang pimapinu gupba kutapa toknga wa papsa kopatang kuwan wai siwik,” ngang yanikut.
MAT 5:31 “Tupa siknga wamu takngatu anzing yaking, ‘Aminu tapatuta maatna sandetnangge natakengu pepa maya sandeke yawan kekekawan yamukaingu sandu imuyo.’ Unzing yaking ngana
MAT 5:32 nata daniwa natapnong. Aminda maatna yasewa dua tasiwan moo sandewan kuwan wawi tapatuta maatnae tapik. Tapanu wa sandekut tapata tasiwan, ‘Maya waapata yasewaapa daknganggak,’ ngang natapnong. Siwan wawita maya wa inikwasikut tapa takengu, ‘Ita yasewaapa dakngake yuak,’ ngang natapnong,” ngang yanikut.
MAT 5:33 “Sike wamu takngatu bamin yaniwan ginda gwa natapbing kaknga anzing, ‘Ginda kem wamu takngatu yawa kekekawanu masande isapmamsa wamu ma yawam. Sike ginda sanga takngatu tasinangge natake siakande siknga yawa kekekawanu siakande siknga Buyambam tapae kaine atasinong.’
MAT 5:34 Unzing yanikut ngana nata daniwa natapnong. Ginda wamu takngatu yawa kekekakut taknga dua sandetningge natake kekeknga wam takngatu ma yawa kekekawan. Wena siknga. Ginda Anututa enandang yuak ngang natayuke wamu takngatu yawa kekekawikge natake, ‘Siakan enandang,’ ngang ma yawam.
MAT 5:35 Siwan ginda kepdakae yake wamu takngatu ma yawa kekekawan. Wena. Kepdaka Anututa kunggaunin. Siwan Jerusalemu Buyambam tapatane yotbam gapma ngang natayuke ginda Jerusalemde umana yake wamu takngatu yawa kekekawikge ma yawam. Wena.
MAT 5:36 Siwan ginda gwapakzae ma katapmike wamu takngatu yawa kekekawan. Wena. Ginda gwapak danggamza tasiwa kwaknga ba zikaa sinanga dua.
MAT 5:37 Sike wamu takngatu kekekawikge natake mamaya ngwakngake yakainggane yapii Seten ngang natayuke ginda siakan ba aho nganggan yanong,” ngang yanikut.
MAT 5:38 “Ginda wamu tupa siknga ngang yakut taknga atnataaing. ‘Kaika tasiwan wai siwanu yake kaina tasiwi wai siyok. Sike genda zipmanziwanu yake gena zipmanziyo,’ ngang yakut.
MAT 5:39 Ngana apmanu nata daniwa natapnong. Ginda aminu ginde wai tasindamanu waapa yake wai ma tasingamam. Wena. Sike aminu tapatuta aamba kautdu wesiwanu katewi aamba gatu kautduat wesiyok.
MAT 5:40 Sike gata aminu tapatutane sanga tasiwi maiwan kake siotda tapikge natake wam yawiyakge yawanu gatane got taukga kuut ie imuyo.
MAT 5:41 Sike amak aminu tapatuta yake yaknga gwaamumbi kusande asiknga kekekake you gapmandune kusande yawanu kusika you wanggapma kuyapbike you gapmandune kuson.
MAT 5:42 Sike aminu tapatuta gatane sanga tapatu tanangge yawanu gata banip gwaang natangamuke asimuyo. Sike aminu tapatuta sangaka nami pakuke gatu pakapuke apmea gama ngang ganiwanu gata asimuyo,” ngang yakut.
MAT 5:43 “Ginda wamu tupa yaking kaknga gwa natapbing. ‘Gata aminu gae wesim yuwik kapae musip gwaang natangamuke iwandae musipba toknga natangamuyo,’ ngang yaking.
MAT 5:44 Ngana nata daniwa natapnong. Ginda musip gwaangu iwanzae natayamunong. Siwan ginda tumuk wamu Anutu iniwa natake aminu ginde wai pasindamukaingge gatayamik,” ngang yanikut.
MAT 5:45 “Unzingge ginda Nanza enandang yuak kapata asinggan pasinggak kaknga pasike itane waaknga daknganing. Ita gunzitna tasiwan enane wai amikat gatu take amikatde akopan ita sopa tasiwan amin nomankat aminu waiatde kuut tanggak.
MAT 5:46 Sike ginda aminu musip gwaangu ginde natandamukaing amindekan ginda yake musip gwaang natayamukengu ginda buya mina binga paning? Wena. Kait pasiyuk takis papsa aminda unzingu atasikaing.
MAT 5:47 Siwan ginda notzaekan gaak wam yanikengu ginda aminu kundu sanga mina bingae yapbitning? Wena. Aminu Anutue dua nataaing amin kaya unzingu atasikaing.
MAT 5:48 Unzingge ginu Nanza enandang yuak kapata noman siknga yuak kaknga binga gikaya noman siknga yutnong,” ngang yakut.
MAT 6:1 “Ginu gwautnong. Ginda sangaaknga takeakesa aminde kaine pasiwa kaningge ma pasiwam. Sike ginda unzing tasikengu buyasa Nanza enandang yuak kapae dua paning,” ngang yakut.
MAT 6:2 “Sike gata sanga aminu sangaapana wenae gatayamunangge natakengu gata apaa ma yayawambim. Aminu pum yanggak kapa iniwi puyapan natake apu gandupning binga unzingu gena gwakngaana kaya aminda aminbamda umana pangenatningge natake miti yot katang ba kepiapane yuke yamuke pasikaing. Nata siakande siknga daninggat. Wa amindane umana pangenawawa gatayamukinggane buyana unin paking. Enandang yuak kapata sanga takngatuat yake dua yamik,” ngang yanikut.
MAT 6:3 “Sike gata sangaapana wena amin gatayamunanggengu puya gatane butaya waaknga akusopuke yuwan notda sikngaapata dua natapan masande Nanggata yake gae akgamik,” ngang yanikut.
MAT 6:5 “Sike tapduknga ginda tumuk wam yaning gwekatangu unzing kem aminda yakaing kaknga ma tasiwam. Wa aminu aminda kaningge miti yot katang ba kepinomdakane dandam tangan yuke tumuk wam yanangge asiknga bakngakaing. Nata siakande siknga daninggat. Wa aminu umana pangenawawa buyana unin gwa paking.
MAT 6:6 Sike tapduknga gata tumuk wam yananggengu gata yotdaatang koke gwabokga yapuke Nangga kusopuknga unzaatang yuak kapae tumuk wam iniwi sanga kusopukngaatang ininggayau atnatake akgamik,” ngang yanikut.
MAT 6:7 “Sike ginda tumuk wam yaning gwekatangu wamu takngatu takngatu yumdekanu katum aminda anutu pupuknga ngang yanikaing binga ma yawam. Wa aminda wamu nangaakan yana ita natapik ngang natake
MAT 6:8 tasikaing kaknga ma tasiwam. Sike Anutu gindane Nanzata sanga kuupbam ginda dapmakaingu ie dua yakaing kopatangu atnataak.
MAT 6:9 “Sike ginda tumuk wamu anzing yanong, ‘Nanin. Gata enandang yuayak. Gatane umanda yatangenatningge nataamang.
MAT 6:10 Gata amin panangge tasinggayak kakngata ninde asapsok. Asapan gatane banip enandang nana aminda tawakaing binga ninu kepdakane yuamang aminda unzakan tawanim.
MAT 6:11 Apmanu nanaminu tapduu anggwene dapmakamangu nimuyo.
MAT 6:12 Aminda ninde waiaknga pasinima sandeyamukamang binga gata waiaknganinu sandetnimuyo.
MAT 6:13 Siwan gata sanga nin pasiwan sinimde ma ninipakuwim. Sike gata nin gatanimi Setenda ninu dua pasiwa mainim.’
MAT 6:14 Unzingge nata ginu daniwa natapnong. Ginda aminu kundutane waina sandeyamanu Nanza enandang yuak kapata gindane waiakngasa asandetdamik.
MAT 6:15 Siwan ginda aminu kundutane waiakngana dua sandeyamanu Nanzataaya gindane waiakngasa dua sandetdamik,” ngang yanikut.
MAT 6:16 “Sike ginda Anutuekan natayutnangge natake nanam teke dua nake yukengu aminu inane umanaaknga tangenawan buyambam siwikge pasiya aminda binga ma tasiwam. Wa aminda nanam dua nake yuke nomna maiwan aminbamda kake nanam dua nake yuaing ngang kake umana yatangenatningge tasikaing kaknga ma tasiwam. Nata ginu siakande siknga daninggat. Wa aminu kake yanimbakngake tasiwa buyana unin gwa paking.
MAT 6:17 Ngana ginda Anutuekan natayutnangge natake nanam teke dua nake yukengu ginu asinggan tasike yuaing kakngakan tasinong. Wel yanggata gwapakzane pasike nomzane kuut pasike nomza iaknga siwa yutnong.
MAT 6:18 Unzingge aminda Anutuekan natayuke nanam teke yuaing ngangu dua dandupning. Nanza akusopuke yuak kapatakan ie atnataak. Atnatake Nanzata sanga akusopuke tasikaingu akake sanga take siknga atdamik,” ngang yanikut.
MAT 6:19 “Ginda sanga takeakesa keu andakane gisae ma tandakngawam. Keu andakane gwakgwakga nanggamuwawa sangaapa koknga kwake apasiwa maiwawa kuka aminda papa waiwa koke kukae pakaing.
MAT 6:20 Sike ginda sanga takesa enandang penong. Enandangu gwakgwakga nanggamunu dua sikaing. Sangaapa koknga kwake dua pasiwan maikaing. Kuka aminda dua papa waiwa koke kukae pakaing. Wena.
MAT 6:21 Keu gindane sangaapasa take sikngata yuaing komde ginda musipzaatang natanggamataning,” ngang yakut.
MAT 6:22 “Kaikata gupbatane kakaa sike kaikata take yuwanu kakaa akngane yuke take kuya.
MAT 6:23 Sike kaikata wai siwanu zikaa dakaatang wasiyawake yuya. Unzingge kakaa akngaatangu yuwiyau waaknga apbinga zikaawanu zikaa waakngata zikaa siknga singgamik,” ngang yakut.
MAT 6:24 “Siwan aminu tapatuta puya toiu tapaayae genu unekan bokngan gwaamutnanga dua. Unzing tasikengu ita tapatue take natake tapatue wai natangamik. Sike tapatue banip gwaang natangamuke tapatue semna natangamik. Ina unzakan ginda Anutue nataaing kakngaat sangaapa buyambam panangge nataaing kakngaat unekan bokngan pake pasiwa meya siwik,” ngang yanikut.
MAT 6:25 “Unzingge nata ginu daniwa natapnong. Ginda kayuk yutnangaakngasae nangaakan ma natapam. Ninu mina nake tangoke dua kumnim ngang nangaakan ma natapam. Dasingge? Kayuk yutnangaakngasa atdamukut tapata nanamza kuut atdamik. Siwan gupza atasikut tapata taukza kuut atdamik,” ngang yanikut.
MAT 6:26 “Ginda kwaiu atugwegwenu kanong. Nanam zak dua kwaike paku yotnaatangu dua peaing ngana Nanza enandang yuak kapata nanamu ayaman nakaing. Sike Anutue kaine ginda kwaiu gatukande yapbike yuaing.
MAT 6:27 Sike gikatnana tapatuta natagwaanguke apmea tapduknga dua kupik gwenu kundusipat dua isatakopik,” ngang yanikut.
MAT 6:28 “Siwan ginu dasingge taukge nangaakan natanggamatakaing? Zongazonga akoke tapuya aawan kana take siknga singgakge ginda natapa siyok. Zongazongata puya dua tasike tauknga dua bupmake tasikaing ngana zuyuknga kana take siknga singgak.
MAT 6:29 Siwan bapunindane buyambamtapa Solomon ngang inikamang kapatane umana buyambam siknga siwan sangaapana tuyuknga dua sikut. Ita gupna take siknga tasibakngakut takngae natapna take singgak. Siwan ngana tapuya aake awaiwan kana take siknga siwan Solomondane tauk gwaam yapbiban kaamang,” ngang yanikut.
MAT 6:30 “Siwan zongazonga puyaangaatang apman akoke yuaingu kwepna zike katapatang saning. Sike zongazongata mani dua pasikaing ngana Anututa tasiwan kana take singgak. Siwan ngana Anututa gataniman dua dapnim ngang ginda dua natapa kekekawan
MAT 6:31 nangaakan natake anzing yakaing, ‘Ninu nanaminu zane nanim,’ ngang yake, ‘Yangganin ninu zane tangopnim? Tauknginu zane panim,’ ngang yakaing.
MAT 6:32 Sanga wa aminu dongu kundune nana Anutue dua nataingga asinggan asinggan panangge yakaingunin. Nanza enandang yuak kapata dandupan ginda aminu sanga wa apananga aminda yuaing ngang danduak.
MAT 6:33 Unzingge sanga wa kepdakane nanae nangaakan ma natapam. Anututa amin panangge tasinggak kakngae natanggamatake itane kepina katak tasinong. Ginda unzing tasiwanu Anututa sanga kepdakane nana atdamik,” ngang yanikut.
MAT 6:34 “Siwan kwep apik kakngae meya ma natapam. Siwan meya kwep kanim takngaat apman kaamang kakngaat unekan peke natapna meya singgak. Siwan kweu meya takngatu ba kanim ngangu ma natanggamatawam,” ngang yanikut.
MAT 7:1 “Ginda wamu katak dua natake aminu usanzike ma inisapduwam. Anututa yake gin usanzitdamuyak.
MAT 7:2 Sanga ginda aminde usanziyamukaing kakngasa kake Anututa ina unzakan yake gikaya usanziwik. Siwan sanga amindane usanziyamukaing binga ina unzakan Anututa usanzike yake damik.
MAT 7:3 “Dasingge dapandapa mateknga notdae kaine yuwan kake nata kwagiwa akopan ngang inike ngana katap sanu gikane kaikane yuak sande dua nataayak binga tasinggayak? Tasike notdata waiaknga mateknga tasiwan kake ngana gikane waiaknga buyambam tasinggayak kaknga takusopunggayak.
MAT 7:5 Ga kem amin. Tupanu katau buyambam sanu kaikane yuak sanu kwagiwi akopana masande gata katak siknga kake dapandapa notdae kaine yuau kwagikngamuyo,” ngang yanikut.
MAT 7:6 “Siwan ginda Anututane sanga takwanu Anutue masa gwa imuking aminde ma yamam. Yama tapa tekwamban kamunda binga gisa dasipnang. Siwan ginda sanga takeakesa wai pasiya aminde ma yamam. Yama kake ikwawata binga wa yamuningu yainggamunang,” ngang yakut.
MAT 7:7 “Ginda Anutue tumuk wam iniwanu ita sanga ginda dapmakaingu ginde atdamik. Ginda sangae tawake dapmakaingu akaning. Ginda yot gwekatang kopnangge natake yawanu Anututa ginde gwabou atzitdamik,” ngang yanikut.
MAT 7:8 “Mamin amindaka Anutue tumuk wam inikaingu wa aminu sanga apaning. Siwan mamin amindaka sangae atawakengu wa aminda akaning. Sike mamin amindaka kepman yuke yoakatang kopnangge wam yakaingu wa aminde atziyamik,” ngang yakut.
MAT 7:9 “Sike aminu gikatnana tapatutane waakngata nanae skon imikge yawanu nanata suu gwendu imik ba dasing? Wena.
MAT 7:10 Sike waakngata nana baambu imikge yawanu nanata gomou wai takngatu imik ba dasing? Iaya wena.
MAT 7:11 Unzingge ginu wai pasiya amin dakngake yuaing ngana waakzae sanga take siknga yamukaing. Siwan Nanin enandang yuak kapae inikaingu damunangge apmeptawik ba dasing? Wena,” ngang yanikut.
MAT 7:12 “Sanga kuupbam aminbamda ginde tasindamuning kakngae natake ginda gamok tupan tasiyamunong. Tasiwa wa Mosesdane mama wapat ayanikapsa aminde wapatda buya unin aawik,” ngang yakut.
MAT 7:13 “Ginda gwabou mateknga gwatzipatang kopnong. Siwan kepi tapatu ngwayokngaapa. Sike aminbamda kepi ngwayoknga waapane kukaingu wena sining.
MAT 7:14 Sike gwabou kayuk yutnangae kopsa gwau gitna siwan kepi kayuk yutnangatane kwatan siknga. Siwan aminu tapatu tapatutakan kepi waapa akaaing,” ngang yakut.
MAT 7:15 “Sike kem aminu kunduta apmea apuke kait wam daniwa ma natapam. Kait wam danike pasiwa mainingge apning. Apuke yawan ginda natake notnin ngang natapning ngana kamunda kaap yasikaing binga apu pasiwan unzing sining.
MAT 7:16 Danike aminu waakwakga puya takngatu takngatu pasiwa kake waakwakge kem amin ngang ginu anggaman natapning. Ginda atnataaing. Wain tapunda bombing kakngane dua aakainggen. Siwan katap tapunu gwendu umana pik ngang yakamang. Siwan zongazonga paanga kayata pik tapunu dua aakaing.
MAT 7:17 Ina unzakan katau dakatuta buya take siknga aawan kake katau wandaka take siknga ngang yakamang.
MAT 7:18 Siwan katau dakatuta buya wai aawan kake katau wandaka take dua. Songandakae buyana aatnanga dua singgak. Siwan katau dakatu songandakata buyana take aatnanga dua singgak.
MAT 7:19 Siwan katau dakatuta buyana take dua aawan kake patzitning. Patzike katapatang saning.
MAT 7:20 Unzambinga gwa danit. Aminu waakwakga puya pasiwan buyana aawan kaning. Kake aminu wa take siwan aminu wa wai ngang ginda anggaman natapning,” ngang yakut.
MAT 7:21 “Siwan kunduta, ‘Kuyanin! Kuyanin,’ ngang nanike ngana siakan siknga dua nataaing. Kautdu kem yakaing. Siwan Anututa gwaboknga unzing yaya aminde ziyamunanga dua. Siwan Nanin enandang yuak kapatane banip tawananu Anututa gwaboknga zitnimik.
MAT 7:22 Tapduknga Anututa amin usanziwik gwekatangu aminu buyambamda anzing nanining, ‘Kuyanin! Kuyanin! Gata ninipewi kuke gatane wam takeaknga ngang yanikapbumang. Ninipewi kuke waung waiakwak yanikwasike puya kekeknga takngatu takngatu buyambam pasikumang. Pasina dua nindupbuyak ba dasing,’ ngang nanining.
MAT 7:23 Naniwa ngana yake anzing yaniwit, ‘Ginu kukakut. Ginu natane amin dua dakngaking. Ginu aminu wai,’ ngang yaniwit,” ngang Jesuta yanikut.
MAT 7:24 “Sike mamin amindaka nata wa daninggat taknga natake tasikengu ita anzing binga dakngawik. Aminu tapatu natdetdetna nomanaapa binga. Siwan ita yotna supda tepan kusiwan mitapbut.
MAT 7:25 Mitapan sopata tawan yangga apaptawawan gotda kekeknga puyapan ngana you wagwenu dua pimakut. Dasingge? You wagwendane simenu suu buyambam gwegwene kep ganang katang kekeknga siknga tapan kekekakut.
MAT 7:26 Sike aminda natane wamu waaknga natake dua tasikengu ita anzing binga dakngawik. Katum aminu tapatuta yotna saisai dakanekan mitapbut.
MAT 7:27 Siwan sopa ataawan yangga apaptawawan gotda kekeknga puyapan you wagwenu apimakut. Ngan, ita asiknga pimakut!”
MAT 7:28 Jesuta wamu waaknga yawan puyuwana aminbamda natake asatnaking.
MAT 7:29 Dasingge? Ita mama wam yanindamumsa aminda binga dua yanindamukut. Wena. Ita kekekngana kayaapa yuakge ninindamukgak ngang natapbing.
MAT 8:1 Siwan Jesuta tawandaka teke pukuwawan aminbamda kuku tawaking.
MAT 8:2 Tawawa ngana aminu tapatu watana kekeknga sikut tapata inengan apuke muna puke gwetake inimbakngake anzing inikut. Buyambam tapana. Gata take natakengu na tasingami gupma dudumna siwa ngang iniwan
MAT 8:3 natake katakngita wasiyuk anzing inikut, “Nata gatane gupba dudumna siwikge nataat,” ngang iniwan watana kekeknga wa zetgaman wena sikut.
MAT 8:4 Siwan Jesuta wamu kekeknga anzing inikut, “Gata katak siknga gwaumso. Gata kuke aminu tapatu sanga wa tasinggamunggatde ma iniwim. Ngana gata aminu Anutue yot takwan gwene pasiya aminde kuke gupba yeuyamuyo. Yeuyamuke gupba take singgakge sangaka Anutue imuyo. Unzing Mosesde mama wamda tupa yakut taknga sangaka imi ganduke wataka wena gwa sik ngang yawan aminbamda natapning,” ngang inike initewan kukut.
MAT 8:5 Siwan Jesuat ninu pandetnaatda Kapaneam yot gapmane kopna amak aminu 100-dane tupan tapata apuke anzing ininggamatakut,
MAT 8:6 “Buyambamtapa. Natane puya amina mait sike yoakatang yuak. Itane kwatai gatukande kupan tokngabam natayuak,” ngang iniwan,
MAT 8:7 “Nata kuke tasiwa take apme siwik,” ngang inikut.
MAT 8:8 Iniwan ngana yake anzing inikut, “Buyambamtapa. Na aminu nomanaapa dua ngang inike yotnaatangu dasingge akopsa? Gata wamban yawi natane puya aminata maitna wena siwan,” ngang inikut.
MAT 8:9 “Dasingge? Na aminu natane buyambam tapatane gepbiatangu ayuat. Sike nakaya natane amak amina nae gepbiatang yuaikat nana tapatu initewa kuke puya tasiwikge iniwa ita akunggak. Sike amina tapatu, ‘Apso,’ ngang iniwanu ita asapunggak. Sike nata puya amina puya takngatu tasiwikge iniwanu ita atasinggak,” ngang inikut.
MAT 8:10 Iniwan natake Jesuta asatnakut. Asatnake aminbamu i tawaking aminde anzing yanikut, “Nata ginu daniwa natapnong. Isrel nana aminu tapatu baniu aminu aapata nae natangamunggak binga tapatu wena kaat,” ngang yanikut.
MAT 8:11 “Siakande daninggat. Aminbamu kaukaut yuaing amikat Ebrahapat Aisakat Jekopat ngang apuke uneken gatake yuke aminu Anututa papan itane aminabam dakngake yuaikat gatake yuke nanamu naning,” ngang yanikut.
MAT 8:12 “Sike aminu tupan Anututa panangge tasike yakut takwau Anututa yanikwasiwan kepman siknga zikaa dakatang kuning. Ugwak saak kuke musia toknga asinggan natanggamatake kwanam sike tokngabam pake kaakake yutning,” ngang yanikut.
MAT 8:13 Yaniwan puyawana amak amindane buyambamtapa anzing inikut, “Sanga tasinggamitde natapi kekekak kakngakan buya unzing singgamik. Ge kunggayo,” ngang iniwan kuwawan puya aminata take sikut.
MAT 8:14 Siwan Jesuta yoakatang koke kawan Pitata maatnatane minga mait natapan gupna toknga siwan pekgawan kakut.
MAT 8:15 Kake katakngita wasiwan mait taknga tewan kuwan enake Jesue nanam tandakngakut.
MAT 8:16 Siwan bangee aminu waung waita paking aminu pake Jesue pakapbing. Pakapa yake waung wai wa yanikwasiwan kuwa mait aminu kuupbam maitna sandeyamukut.
MAT 8:17 Unzingge wamu takngatu ayanikapsa Aisaiata anzing matakut, “Nindane maitninu takngatu takngatu kuupbam sandetnimukut,” ngang wa matakut taknga buya unin aakut.
MAT 8:18 Siwan Jesuta kawawan aminbamda yupbasiwa kake pandetna anzing yanikut, “Kuwa ninda yangga gapan gwenu kautdu saak kuna,” ngang yaniwan kunangge tasiwawa
MAT 8:19 mama wam yanindamumsa aminu tapatuta wesim apu anzing inikut, “Yanindamumsaapa. You kuupbam gata kuwiyak gapma gapmane naat kuut kusim,” ngang inikut.
MAT 8:20 Iniwan yake anzing inikut, “Kaap zongu yotna kaya siwan kwaiu kuut yotna kaya. Siwan ngana na aminbamdane notnaapa dakngake yuat tapa yotna apetnanga gwendu wena,” ngang inikut.
MAT 8:21 Siwan pandetna tapatuta anzing inikut, “Aana. Gata nandutewi nata kuke nana gamok kwaiwit,” ngang iniwan
MAT 8:22 yake anzing inikut, “Undanga. Kumnanga aminda kupsa amin notna apme kwaining. Sike ga apu na nawamso,” ngang inikut.
MAT 8:23 Siwan Jesuta dopangbam gwene kopan kake pandetna kuut undang kopbing.
MAT 8:24 Koke kuwawa gou buyambam puyapan yanggabam gwenu sambuya asenaawan yanggata dopangbam gwenu atdopnangge sikut. Siwan Jesu dapuna pewawan
MAT 8:25 kuku tanguwa enawan anzing iniking, “Aanin. Gata ninu gatanimuyo. Kumnanggekamang,” ngang iniking.
MAT 8:26 Iniwa yake anzing yanikut, “Dasingge ginu gwaukaing? Nata sandewitde natapa dua kekekawan gwauke unzingu yakaing ba dasing,” ngang yanike enake gokat yangga sambuyaatde kanga yakut. Yawan gotda zakngawan yangga sambuya enakuu zetgaman kuma siknga yuwan
MAT 8:27 kake pandetnata nangaakan natake anzing yaking, “Aminu aapa inata kundu. Ita yawan gokat yanggaatda zakngawat kaamang,” ngang yaking.
MAT 8:28 Siwan yangga gapan gwenu kautdu saak Gadaratane kep komune kuking. Undang kundopa aminu tapaaya waung waita musiaatang pukuke papa aminu waapaatda zong siknga dakngake matmat gapmane yuwawat aminu tapatuta keu waopatang kunanga dua sikut. Siwan aminu waapaatda matmau wanggapmaneta apuke Jesu kake
MAT 8:29 apaa siknga anzing inikumayak, “Anututane waaknga! Gata ninde dasing tasinimuya? Apmanu tapduu dua siwawan ngana gata apuke ninde toknga nimunangge apunggayak ba dasing,” ngang inikumayak.
MAT 8:30 Iniwat ikwawa takwakgu maa sim yuke nanam nake
MAT 8:31 yuwawa kake waung waiakwakga yanggamatake Jesu anzing iniking, “Gata ninu atninikwasikengu gata ninipewi ninu kuku ikwawa waakwakgane musiaatang pukuke panim,” ngang iniwa
MAT 8:32 yanikwasike, “Ginu kukakut,” ngang yaniwan aminu waapaat peke kuku ikwawa waakwak pukuke paking. Pukuke papa ikwawa waakwau kekeknga siknga isapmake kuku dameatang pimake puku yangga gapanu wagwene pimake yangga tangoke akumbing.
MAT 8:33 Siwan ikwawa wa toikaingga kake atdatakuke kuku yot gapmane kuke wamu wa kuupbam sanga aminu waapau waung waita pakingu yanikwasiwan kuke tasiwa kaking kakngae yaniking.
MAT 8:34 Yaniwa natake you wanggapmane nana aminu kuupbamda apu Jesue tawake kake kepna teke komduatang kuwikge ininggamataking.
MAT 9:1 Ininggamatawawa dopangbamu gwendu yangga gwene kwaimtapane yukut. Yuwan Jesuta une kopan taku kautdu kwaimtapane taku tekut. Teke yotna kukut.
MAT 9:2 Kuke yuwawan mait aminu tapatu kwatai gatukande gwa kumbing kapa notnata Jesue bek gwene teke gwaamutakuking. Gwaamutakuke Jesuta maitna apme sandekngamik ngang natapa kekekakut taknga kake Jesuta mait sikut tapa anzing inikut, “Waatdakana! Waiakngaka gwa sandekgamunggat.
MAT 9:3 “Banipbaatang tatanga natapso,” ngang inikut. Iniwan natake aminu Mosesdane mama wam yanindamumsa aminu kunduta anzing yaking, “Waapata Anutue umana aknga tasiwan maiwikge yanggak,” ngang wepda yaking.
MAT 9:4 Wepda yawa ngana Jesuta wamu wa baniaatang natapbing kaknga anggaman natake anzing yanikwaikut, “Ginu minae banipzaatang wai nataaing?
MAT 9:5 ‘Waiakngana gwa sandekngamutde gatu maitna sandekngamuke ga enake kungga,’ ngang iniwa ginda kake dasing natapning? Puya zaaknga kwanga siknga tasinanga?
MAT 9:6 Siwan na aminbamde notnaapa dakngake keune epu yuke amindane waiakngana sandeyamitde nanitewan apbum taknga nata take tasiwa ginda kake natdetningge tasiwa kanong,” ngang yanikut. Yanike aminu kwatai kumbing kapa anzing inikut, “Enake bek gwenu gika gwaamutake yotda takungga,” ngang inikut.
MAT 9:7 Iniwan maitna wena siwan aminu waapata enake yotna ina gwaamutakukut.
MAT 9:8 Gwaamutakuwawan kake Anututa kekekngana aminu tapatue iman tasiwan kaamang ngang kuupbamda natake Anutue akgwauke inimbakngaking.
MAT 9:9 Siwan Jesuta uneta apu nanduwawan na aminu takis panggat tapa umana Matyu ngang nanikaing. Nata takis mani peainggane opis gwene pukwike pawawa nanduke anzing nanikut, “Ga pandetna dakngawiyakge apu nawamso,” ngang naniwan enake kuku tawakum.
MAT 9:10 Siwan masande nata Jesuat pandetnaat yayawamba yotnane akopa yuke nanam nawatna kait pasiyuk takis papsa amikat wai takngatu takngatu pasiya amikatda natane yotnane koke pukwike nikat gatake yuke nanam nakumang.
MAT 9:11 Nanam nawatna Judia aminu kundu Mosesde mama wam nangaakan gwaamumsa aminu Ferisi ngang yaniking. Iatnana kunduta ninduke ninu Jesutane pandetna anzing ninikwaiking, “Dasingge aanzaat takis kukae papsa amikat waiaknga pasiya amikatda unekan yuke nanamu nakaing?”
MAT 9:12 Ngang ninikwaiwa Jesuta wamu waaknga natake tuwang wamu takngatu anzing yanikut, “Aminu maitna wenata doktae dua kukaing. Aho. Maitna kaya amindakan doktae kukaing,” ngang yanikut.
MAT 9:13 “Anututane wapatang anzing yakut, ‘Nata sanga upat binga namuningge bitanggat. Na musipza kwikwiknga notzae natayamuningge take nataat,’ ngang yakut. Sike ginu wa yakut takngae kuke natdetdet panong,” ngang yanikut. “Nata apuke amin noman yuamang ngang yakaing amin yayawamba musia tapa tekwambikge dua apbum. Aho. Nata waiakngana kaya amin yayawamba apuke musia papa tekwambikge natake apbum,” ngang yanikut.
MAT 9:14 Tapduu waomune Jondane pandetnata Jesue apuke anzing iniking, “Dasingge nikat Ferisi amikatda tapduknga Anutuekan natanggamatake nanamu teke dua nake yuamang. Siwan ngana gatane pandetda nananu dua teke asinggan nakaing,” ngang inikwaiking.
MAT 9:15 Inikwaiwa ita tuwang wamu kundu anzing yanikut. “Aminu tapatuta maatna tanangge natake iat notnaat gatake yuke musia meya natapning ba dasing? Wena. Ngana masande aminu maya tapiu waapa takuwa notna wa amikat dua gatake yukengu tapduu waomune wa aminu notnae musia meya natake nanam teke dua nake tomda yutning,” ngang yanikut.
MAT 9:16 “Sike aminu tapatuta tauu kayuk sanzim take tauknga bumi awesikuu ganangi dua bupik. Wena. Unzing tasiwanu tauu ganangi bupiu wa sanda goopan gatu awesiwan ganangi buyambam siwik.
MAT 9:17 Siwan aminu tapatuta wain yangga kayuk kaknga toknga akngana kaya wa memenggane gupna yanggaumande dauke bupbingu bumi gopatang dua tukngwamban pukuwik. Wena. Unzing tasiwanu memenggane gupna wagomu atdakngawan wain yangga kepdakane tukngwapimapa memenggane gupna wagomu wai asiwik. Ngana wain yangga kayuk kaknga memenggane gupna kayuk gopatang tukngwamban pukuwan sanga wa kuutda take yutzan,” ngang yanikut.
MAT 9:18 Jesuta wamu waaknga ayayuwawan take aminu tapatuta inengan apuke ie kataknga puke inimbakngake anzing inikut, “Natane yapana apmatzim siknga gwa kungwak. Ngana gata apuke katakga wasiwi gatu gweawan,” ngang
MAT 9:19 iniwan natake Jesuta waapa tawamban kuwawat pandetna iat gatake kuking.
MAT 9:20 Kuwawa maya tapatu yekapna sike asinggan daknga pake yuwawan nakanu 12 gwa yapbikut. Maya waapata Jesutane masene inengan siknga kuke ina musiane anzing natapbut. Nata katakngatakan taukngane wasiwa maitna wena siwik ngang natake apu Jesutane tauknga nomna saasaaknga wanganekan wasikut.
MAT 9:22 Wasiwan ngana tapan tekwamban kake anzing inikut, “Yapana. Meya ma natapim. Nata gatanggamitde natapi siakan siwan tasiyak kakngata maitda tanguwan wena gwa singgak,” ngang yawan tapduu waomsimunekan gatu take sikut.
MAT 9:23 Siwan Jesuta take aminu waapatane yotnane kundoke kaawan aminda keknga gom puyaawa aminbamda gwa kumbut tapae natake kwanam kumzang siawa gakngatbam siwan kake
MAT 9:24 Jesuta anzing yanikut, “Ginu teke kunong. Maya waapasimu gatukande dua kungwak. Dapuna pekgak,” ngang yawan natake
MAT 9:25 kumzang inimiking. Miba kake yanikwasiwan kepman kuwana Jesuta yoakatang koke maya mateu waapasimdane katakngine tapan gatuna asenakut.
MAT 9:26 Siwan wamu waaknga ugwak saak yuaingge yatakuking.
MAT 9:27 Siwan Jesuta you wanggapma teke kuwawan aminu kai wai siya tapaata tawayuk anzing yanggamatakumayak, “Ga Devitdane dongane aakuyak kapa. Nitde butaya natanimuyo,” ngang inikumayak.
MAT 9:28 Inike tawawawat yoakatang kopan kai wai waapaau inengan apat Jesuta anzing yanikut, “Gitda sanga waaknga tasiniman kainitda take sining ngang nanduke nanikamayak ba dasing,” ngang yawan, “Buyambamtapa ngan,” ngang iniwat
MAT 9:29 katakngita kaine wasike anzing yakut, “Tasiniman take sinimik ngang nanduke nanimayak kakngakan gitde sindamuyok,”
MAT 9:30 ngang yaniwan kaina gatuna kakumayak. Kake yuwawat Jesuta kekeknga siknga yandakngake anzing yanikut, “Sanga sindamuk kakngae ma yaniwat. Aminu tapatuta natapsak,” ngang yaniwan
MAT 9:31 natake ngana epu kepman kuke ie wamu aminu ugwak saaknanae keu kuupbam yakapbumayak.
MAT 9:32 Sike aminu waapaau akunangge siwawat aminu waung waita tapan gena kusiya tapatu takapa Jesue apbut.
MAT 9:33 Apan kake waung wai wa inikwasiwan kuwan gena kusikut tapata wamu ayawan kake aminbamda nangaakan natake anzing yaking, “Tupa anza binga kundu Isrel kep komune dua siwan kakumang,” ngang yawa
MAT 9:34 ngana Ferisi aminda anzing yaking, “Ita waung wai kekeknga waung wai akwakgane tupan tapatane kekeknga aknganane yanikwasiwan kukaing,” ngang yaking.
MAT 9:35 Siwan Jesuta yotbam gapma gapma gatu yot matek gapma gapmane inandek inandek kuke miti yotnane koke yanindamukut. Wamu takeaknga Anututa amin panangge tasinggak kakngae wam yanikapmake mait aminu pasiyaman kuupbamda take siking.
MAT 9:36 Sike aminu buyambamda natdetdetna buyami siwan sipsip takwau toiknga wena dakngake yuaingga binga yumdekan siknga yuwawa kake butaya natayamukut.
MAT 9:37 Butaya natayamuke ita ninu pandetna tuwang wamu takngatu anzing ninikut, “Nanamu buyambam siknga puyaangatangu gwa yukaing ngana buya papsa aminu kwaapzang gua.
MAT 9:38 Unzingge ginda ayukawa buya papsa amindane toikngae iniwa natake puya aminu kundu yanipewan kuku nanamna pake pengamunong,” ngang ninikut.
MAT 10:1 Siwan Jesuta pandetna katau kuut musaat kepianganu tapaaya ngang yaniwamban apna kekeknga aknga waung wai yanikwasitnimde nimukut. Nimuke mait aminu maitna sandeyamuke upeke yuya aminu tasiyamuna take siningge nimukut.
MAT 10:2 Puya aminatane umaninu anzing. Saimon umana takngatu Pita siwan uyapna Endru. Siwan Jemskat uyapna Jonkat Sebeditane waaknga.
MAT 10:3 Siwan Filip gatu Tomas gatu Matyu na takis panggakapanin. Siwan Jems Alfiasdane waaknga gatu Tadias
MAT 10:4 siwan Saimon kekekngaapa ngang inikumang. Siwan Judas Iskeriot yot gapmane nanaapata Jesu iwanae yeuyamukut tapa.
MAT 10:5 Siwan Jesuta ninu aminu katau kuut musa kepianganu tapaaya ngangge anzing ninikut, “Ginu aminu dongu kundune nana Anutue dua nataaing aminde ma kuwam. Siwan ginda Samariae yotbam gapmane ma kopam. Wena!
MAT 10:6 Ginu Isrel nana aminu toiknga teke datakuke upeke yuya amindekan kunong.
MAT 10:7 Tapduknga Anututa amin panangge tasinggak kakngata apnangge dapaknga gwa singgak ngang yaninong,” ngang ninikut.
MAT 10:8 “Ginda mait aminu maitna sandeyamuke akupsa aminu pangenatnong. Siwan wata kekeknga siya pasiwa dudumna siwa waung wai yanikwasitnong. Kekeknga aknga ginda pake yake buyata dua usiing. Unzingge ginda sanga wa pasiyamuke ginda yake buya nimunong ngang dua yanike ie mani ma papam,” ngang ninikut.
MAT 10:9 “Ginda manisa tatakngi san ba kwaknga san ba gamana san ba simbu yakzaatangu ma pake kuwam.
MAT 10:10 Ginda yakza gatu taukza gomayana kaya ba kepi taukza gatu gusokza ma papam. Wena. Puya aminda sangae dapanu ayamunanga,” ngang ninikut.
MAT 10:11 “Sike ginda yotbamu gapmandune ba yot mateu gapmandune kukengu katak siknga kanong. Mamin amin tapataka you wanggapmane nana aminda ginu yotnane pakunangge yawan aminu nomana ngang katak siknga kakenga iat kopnong. Siwan gikat aminu waapaat yusika you wanggapma tenangge natakengu you wagwenu teke kunong.
MAT 10:12 Sike ginu you gwendune pakopan kokengu ginda you wagwene nana aminde gaak wam Anututane kwikwiknga aknganata ginde yutdamuyok ngang yaninong.
MAT 10:13 Yaniwa you wagwene nana aminda natapa take siwanu kwikwiknga aknga pake yutning. Sike ngana gaak wamu waaknga yaniwa natapa take dua siwanu musip kwikwiu wa gatusa pake yutnong,” ngang ninikut.
MAT 10:14 “Sike aminu tapatuta ginu yotnane pakunangge apbitake ginde wamu dua natapanu you wagwen ba yotbamu wanggapma teke kuke yemi kaikza zipa pimapa kunong.
MAT 10:15 Nata siakande siknga ginu daninggat. Tapduknga aminbam usanziwik gwekatangu meya Sodom nana amikat Gomora nana amikatda paning binga dua yotbamu wanggapmane nana aminda paning,” ngang ninikut.
MAT 10:16 “Natapnong. Nata danipewa kuningu wa sipsipda kaap zongge banakan yuaing binga kuning. Kusika ginda gomokga aminda nisipnang ngang natake sukukaing binga natake kuke tasinong. Siwan kombunanangga kwikwiknga yuaing kaknga binga tasinong,” ngang ninikut.
MAT 10:17 “Ginda aminde katak siknga gwautnong. Ginu pake kaunsilnae pakuwa wam yaning. Siwan ginu miti yotnaatang ipmapa dasipning.
MAT 10:18 Sike wa aminu natane umana tanguwa pimapikge natake ginu panggaganuke aminu buyambam tapaapae pakuning. Pakuwa ginda nae wamu aminu wa buyambam takwakat dongu kundune nana Anutue dua nataaing aminde kainae yanikapning,” ngang ninikut.
MAT 10:19 “Sike ginu wam yaningge pakuwanu ginu nangaakan anzing ma natapam. Ninda wamu dasing yanim? Ninda wamu yake zaaknga ininim? Wena. Tapduu waomunekan Anututa wamu ginda yaningge aknga yeutdamik.
MAT 10:20 Gisatakan wamu dua yaning. Wena. Nanzatane Waungga ginde genzane yakapik,” ngang ninikut.
MAT 10:21 “Sike aminda uyapna wam yawikge takuwan tanguwa kupik. Siwan nanata waakngae unzakan tasiwik. Siwan waakngata minga nanae iwan dakngake pakuwan zipa kumning.
MAT 10:22 Sike ginda natane umana aknganae gepbiatang yuwawa danduke ginde musia zikaa siknga natandamuning. Natandamuke tasinggawa gikatnana mamin amin tapata kekekake yuwawan tanguwa kupiu kayuk yutnanga aknga pake asinggan yuwik.
MAT 10:23 Sike ginda zikaa natake you gapmandune wai tasindamanu ginu datang you gapmandune kunong. Nata ginu siakande siknga daninggat. Ginda Isreldane yot gapmane puya dua pasiwa puyuwawan na aminbamdane notnaapata asapit,” ngang ninikut.
MAT 10:24 “Sike waatdakata ayanindamukgak kapa yapbitnanga dua. Siwan puya aminda kuyanae yuak kapa yapbitnanga dua.
MAT 10:25 Sike waatdaka asinindamukgak kapa binga dakngawanu take siwik. Siwan puya aminda kuyanae yuak kapa binga dakngawanu iaya take siwik. Sike dongu takngatutane tupan tapae umana Bielsebul waung waiakwakgane tupan tapa ngang nanisapdukengu ginu naat nanatane umanza yake kumzang siknga danisapdutning,” ngang ninikut.
MAT 10:26 “Unzingge ginu aminde ma gwaubam. Sangabamu nata danindamukgat taknga akusopuke yuwan masande anggaman siwa kaning.
MAT 10:27 Wamu nata sisip tangan daninggau ginda yanggamatawa natapning.
MAT 10:28 Ginu aminu gupzasan dasipa kupana kayuk asinggan yutnanga akngasata wena siwikge tasiwa maiwan tasindamuning aminde ma gwaubam. Wena. Sike ginu Anututa gupza zipan kupa uyungza yanipewan katapbapatang pukuwa unzingu gupzaat uyungzaat pasiwan maiwan tasindamik kapae gwautnong,” ngang ninikut.
MAT 10:29 “Aminda kwaiu gweayasimu mani gamana sandusimdakan usikaing. Ngana Nanzata dua katewanu kwaiu mateknga wa binga gwendusimu kungwake kepdakane pimananga dua.
MAT 10:30 Ina unzakan ita dua dandupewanu ginu wai sinanga dua. Gwapakdanggamza kuut gwa kendeke ginu katak toimbikge natake
MAT 10:31 ginu ma gwaubam. Ita dandupan ginda kwait mateu ayapbiba danduak,” ngang ninikut.
MAT 10:32 “Aminu tapatuta natane uman aminbamde kaine yakapiu nakaya aminu waapatane umana Nanae kaine enandangu ayakapit.
MAT 10:33 Sike aminu tapatuta nae masa aminbamde kaine namiu nakaya aminu waapae Nana enandang yuak kapae kaine masa asimit,” ngang ninikut.
MAT 10:34 “Nata apuke amau kepdakane kuupbam zipbutnangge apbum ngang ginda ma natapam.
MAT 10:35 Na apuke amak zipmandaknganangge dua apbum. Wena. Nata amak tasinangge apbum. Na apuke tasiwa iwan daknganing. Tasiwa waaknga apata nanae iwan dakngawan yapanata mingae iwan dakngawan ainata apekngae iwan dakngawan
MAT 10:36 you gwendune nanakanda iwan iwan dakngake yutning.
MAT 10:37 “Sike aminu tapatuta nana mingae take siknga natake nae takesim natakengu natane notna dakngake yutnanga dua. Sike nanata waaknga ba yapanae take siknga natake nae takesim natakengu natane notna dakngake yutnanga dua.
MAT 10:38 Siwan aminu tapatu iwanata meya takngatu takngatu ima amin saamdakane kupikge gwauke na dua nawakengu natane notna dakngake yutnanga dua.
MAT 10:39 Sike aminu tapatuta inane kayuk yutnanga akngae tawambanu itane kayuk yutnanga akngana wena singamik. Sike aminu tapatuta nae natake puyana tasingaman kake aminda tasiwa maiwanu ita kayuk yutnanga akngana atapik,” ngang ninikut.
MAT 10:40 “Sike aminu tapatuta ginu take siknga toikengu nakaya take siknga toikgak kapa unin. Siwan aminu tapatuta nae take siknga tasikengu Anutu atnanitewan apbum tapae kuut take siknga tasingamik kapa unin.
MAT 10:41 Sike aminu tapatuta ayanikapsa tapatuta apan kake take siknga toikengu buyana ayanikapsa aminda papik kakngakan papik. Sike aminu tapatuta kawawan aminu nomana tapatuta apan kake take siknga takengu buyana amin nomanu waapata papik kakngakan papik.
MAT 10:42 Sike aminu tapatuta natane aminaatnana aminu umana wenaapa gatangamuke yangga gokgoya kap gomune iman tangopiu waapatane buyana wena sinanga dua. Siakande buyana apapik,” ngang inikut.
MAT 11:1 Siwan Jesuta wamu waaknga ninu pandetna 12-de ninindamuban puyuwana you wanggapma teke you ugwak saak nanae kuke aminbam yanindamuke itane wamna yanikut.
MAT 11:2 Sike Jonda kaautde yuke natawawan Kraisda puya kuupbam pasinggak kakngae niwa natake pandetna kundu yanipewan Jesue kuking.
MAT 11:3 Kuke anzing inikwaiking, “Ga aminu Anututa initewan apikge yanikapsa aminda tupa siknga ngang yaking kapa ga unin? Ba ninu tapatue kayutnim ba dasing,” ngang iniking.
MAT 11:4 Iniwa yake anzing yanikut, “Ginda kuke Jonu sangabamu ginda natake kaaingge kuut ininong,” ngang yanikut.
MAT 11:5 “Kai wai siya aminu gatu kaaing. Siwan kepi wai siya aminu gatuna kepi akukaing. Siwan gupnane wata kekeknga siya aminu gupna dudumna gatu sikaing. Siwan maaknga kusiya aminu wamu gatu nataaing. Siwan kupsa aminu gatu enaawa Anututane wamu take aknga aminu sangana wena aminde yanikapa nataaing,” ngang yanikut.
MAT 11:6 “Siwan nata puya waaknga pasiwawa aminu tapatuta nae natapan kekekawiu waapata apbakngayok,” ngang yanikut.
MAT 11:7 Yaniwan natake kuwana Jesuta aminbamu Jonde anzing yanikut, “Tupa ginu keu amina wena komune kuke ginda sanga mina binga kanangge kuking? Ba ginda kuke komamu tapatu gotda puyapan saa siwan sanga yumdekanu waaknga kanangge kuking ba dasing? Wena.
MAT 11:8 Ginu kuke sanga mina binga kanangge kuking? Ginu kuke kawawa aminu tapatuta tauknga takeake pasiwan kanangge kuking ba dasing? Aminu tauknga takeake pasikaingu aminu buyambam tapaapae yotnane yuaing,” ngang yanikut.
MAT 11:9 “Ngana dasingge ginu kuking? Ginu kuke yanikapsa aminu tapatu kanangge kuking ba dasing? Ngan. Nata daniwa natapnong. Aminu waapa ayanikapsaapa. Siwan ita yanikapsa aminu kuupbam yapbikut tapa,” ngang yanikut.
MAT 11:10 “Aminu waapae Anututane wapatang anzing matakut, ‘Natapso. Nata nae wam yakapikge aminu tapatu initewa gae tupan kuke ita gatane kepika tanomanukgamik,’ ngang matakut.
MAT 11:11 Siwan nata siakande siknga daninggat. Jonu yangga sauyamukut tapata keunenana kuupbam yapbikut. Ngana aminu Anututa papan itane aminabam dakngake yuaikat nana tapatu umana mateknga sikngata Jonu ayapbikut.
MAT 11:12 Tapduknga Jonu yangga sauyamukut tapata yukuuneta apu apman aminda Anututa amin panangge tasinggak kakngae gepbiatang kopnangge natake gitnagitnauke kokaingga binga tasikaing.
MAT 11:13 Sike ayanikapsa amikat Moseskatda wamu tupa siknga yakapbing kakngata yutake apu Jonda puyana tangenakut gwene apbut.
MAT 11:14 Sike ginda wamu waaknga atnatapnanggengu atnatapnong. Jonda apu puyana tangenawan, ‘Ilaijata gatuna apik,’ ngang tupa siknga ngang yakapbing kakngata yutake apu buyana unin aakut.
MAT 11:15 Aminu maaknga kaya kakengu wamu waaknga natapsok,” ngang yakut.
MAT 11:16 “Sike nata ginu tapduk ayuamang komunenana mina bingae tuwanguke yawit? Ginu waatdaka binga yot kekep tapane yuke waatdaka kundue anzing yanikaing,
MAT 11:17 ‘Ninda kekngagom puyapna ngana ginu tainangge apbitakaing. Ninda butaya kap taina ngana ginu kwanam sitnangge apbitakaing,’ ngang yanikaing.
MAT 11:18 Sike Jonda apuke dua nake wain taknga dua tangopan kake ginda, ‘Waunga waiapata tapan pasikut,’ ngang yakaing.
MAT 11:19 Siwan na aminbamdane notnaapa dakngake apuke nanam nake tangoke tasiwa ginda nanduke anzing yakaing, ‘Kanong. Aminu aapa nanamu kumzang nake wain yanggaaya kumzang tangokgak. Siwan ita kait pasiyuk takis papsa amikat gatu wai takngatu takngatu pasiya amikatdane notna dakngake yuak,’ ngang ginda nae unzing yakaing. Ngana Anututane natdetdetnata buya take siknga aawan kana sanga nomana siknga singgak,” ngang yanikut.
MAT 11:20 Sike yot gapma Jesuta duya takngatui pasikut gapma gapmane nanata musia dua tapa tekwanggutde natake Jesuta kaanga anzing yanikut,
MAT 11:21 “Ginu Korasin nana! Tokngabam paning. Ginu Betsainda nana! Tokngabam paning. Aminu taptuta duya takngatu Taiaat Sodom yot gapmaaune nata yotza tasikum binga tasikut gamu tupa siknga Taiaat Sodom nanaatda musia tapa tekwamban meya siknga natake bek saau taukge binga wamake muyup gwene yuwam,” ngang yanikut.
MAT 11:22 “Sike nata daniwa natapnong. Tapduknga Anututa aminbam usanziwik gwekatangu meya Taiaat Saidon nanaatda paning binga dua unenana aminda paning,” ngang yanikut.
MAT 11:23 “Sike Kapaneam nana aminda inane umana yatangenawa enane siknga kopik ba dasing? Wena. Anututa you wanggapmane nana amin kaipakapan katap bapatang pukuning. Sike aminu tapatuta duya takngatu Sodom gapmane nata ginde yotzane tasikum binga tasikut gamu apmanu Sodom nana ayuwawam,” ngang yanikut.
MAT 11:24 “Ngana nata daninggat. Tapduknga amin usanziwik gwekatangu meya Sodom nanatane meya ginda kaning binga dua,” ngang yanikut.
MAT 11:25 Siwan tapduk wagwene Jesuta tumuk wamu takngatu anzing inikut, “Nana. Sanga enandang yuak kakngaat keune yuak kakngaatdane toiknga, ga natdetdetda takusopuwi aminu natdetdeninu kaya ngang yakaing aminda dua natapbing ngana wamde gepbiatang yuke pasikaing aminde yeuyami natdetdetda akaaing.
MAT 11:26 Ngan, Nana. Gata unzing yeuyamunangge take natapbuyakge ganimbaknganggat,” ngangu tumuk wamu waaknga ngang inikut.
MAT 11:27 Inikenga aminabam anzing ninikut, “Natane Nanata naniwan nata sanga kuupbamde toiknga dakngake yuat. Siwan naat gaat nana waaknga yuamak ngang nataamak. Natake yuwatda ngana keunenanata nindupa nana waaknga dakngake yuamayak ngang dua ninduaing. Nitdakan unzing nataamak. Natake ngana aminu kunduta Anutu anzing yuak ngang anggaman natapningge take natapit. Take natake yeuyama waakwakgakan atnatapning,” ngang ninikut.
MAT 11:28 “Siwan mama wam nangaakan pasike kwatan siknga natapsa aminu kuupbam natane gepbiatang akopnong. Akopa nata gatandama ginu yuwatakanong.
MAT 11:29 Na musipma kwikwikngata yuke puya meya dua damit.
MAT 11:30 Siwan natane gen gwaamuke yuwawa danindamuba ginu musipzaatang kwanga natayuwatning,” ngang Jesuta ninikut.
MAT 12:1 Siwan yuwatakak tapduk gwendune Jesuat ninu pandetnaatda puyaangane banakan kukumang. Kusika tomin natake poyakgane tapuya zukundakngake ooya pasina pimapa buya nake kukumang.
MAT 12:2 Nayuk kuwatna Ferisi aminu kunduta ninduke Jesu kaanga anzing iniking, “Natapso! Tapduk yuwatakak gwene puya dua tasinimde mama wamda ayandaknganggak ngana pandetdata sandeke pasiwawa dua kayak ba dasing,” ngang iniking.
MAT 12:3 Iniwa yake anzing yanikut, “Baminu Devitda tupa siknga tasikut takngae wamu ginda akendeking gamu unzingu dua yawam. Natawa yanggau iat aminaatda tomna natake
MAT 12:4 Devitda Anututane yot takwan gwene koke poyau Anutue nomune yuaingu pakut. Poyau wa pekingu moo aminda nananga dua ngana Anutue yot takwan gwene pasiya amindakan naning. Ngana Devitda pake atnake kundu inane aminae yaman naking ngang wa matakut takngae ginu apbotake yakaing ba dasing?
MAT 12:5 Gatuna Anutue yot takwan gwene pasiya aminu asinggan tapduk yuwatakak gwene Anutue yotgwene koke puyana apasiyuk yuwatakakgane mama wamu asandekaing ngana maaknga dua nataaing. Puya unzing pasiyuk maaknga dua natapningge wamu tupa matakut taknga ginu dua kendeke natapbing ba dasing? Siakan daninggat.
MAT 12:6 Anutue yot takwan gwende natapna take siknga singgak ngana andang yuau wagwenu ayapbikgak.
MAT 12:7 Anututa wamu yakut taknga buk gopatang anzing matakut. Sanga take sikngaaknga namuningge undang natayuk musipza kwikwiknga natapningge take siknga nataat ngang yawan matakut. Siwan ginu wa matakutde yapii atnatapbing gamu pandetnata maaknga wenaaknga pasiwawa kake wai tasikaing ngang dua yawam.
MAT 12:8 Na aminbamde notnaapa dakngake yuwatakak tapduk gwene tasikaing kakngae kuyana yuat,” ngang Jesuta yaniwan natapbing.
MAT 12:9 Siwan Jesuta puya waanga teke unenanatane miti yotnane kopbut.
MAT 12:10 Kopan aminu tapatu itane katakngi boopmiwanga akgoptawan apmatekakut tapata yukut. Sike Ferisi aminu kunduta Jesuta wam yawikge natake azing inikwaiking, “Ninda mait aminu yuwatakak tapduk gwene maitna sandeyamuke mama wam sandetnim ba dasing,” ngang iniking.
MAT 12:11 Iniwa azing yanikut, “Gikatnana tapatuta sipsipna kaya siwanu sipsipna gwenduta yuwatakak tapduk gwene gapmaatang pimapanu toikngata sipsipna wagwenu dua kaitakakopik ba dasing?
MAT 12:12 “Siwan ngana aminda sipsip asiknga yapbikut. Unzingge yuwatakak tapduk gwene sanga take tasike wamu dua sandetnim,” ngang yanike
MAT 12:13 aminu waapa anzing inikut, “Katakga tapi kwangawan,” ngang iniwan tapan kwangawan gatuna take kautduapa binga sikut.
MAT 12:14 Siwan ngana Ferisi aminda enake kepman pukuke paut tasike wamu atanguwa kupikge wam yaking.
MAT 12:15 Yawa ngana Jesuta wamu waaknga natake you wanggapma teke kuwawan aminbamda kuku tawaking. Tawawawa mait aminu maitna kuupbam sandeyamuke
MAT 12:16 kekeknga yandakngake inae anggaman dua yakapningge yanikut.
MAT 12:17 Unzingge wamu takngatu Aisaia ayanikapsaapata yakut taknga buya unin aakgak. Ita anzing yakut,
MAT 12:18 “Anututa nanikut taknga ginde daniwa natapnong. ‘Aminu waapa nata gwa tapa natane puya amina dakngake yuak. Nata ie take siknga natake ie musip gwaang natangamunggat. Natane Waungata musipna tangenawan nata aminu noman usanziwit taknga dongu kundune nana Anutue dua nataaing aminde yanikapik.
MAT 12:19 Ita dua yanganuke dua yanggamatawan ie wamu kepibam tapane dua natapning ngang yawa kakum.
MAT 12:20 Siwan aminu tapatuta pimanangge dapaknga siwan komam tapatu apaa siknga puwa yuak kapa binga kake gatukande dua putdakngawik. Sike lamdane wik kaknga kundusim isinggak kaknga binga kake gatukande dua tangutapan kupik. Ita unzing atasiyuke tasinggawan wamu noman siknga akngata enake ayapbimbik.
MAT 12:21 Ayapbiban aminu dongu kundune nana Anutue dua nataaingga ie apbakngake kayutning ngang Anututa naniwan natapbum,’ ngang Aisaiata yakut,” ngang Jesuta yanikut.
MAT 12:22 Tapduu waomune aminu tapatu waung waiapata tapan kainaat genaatda gwan kusiking. Siwan ie takapa Jesuta tasiwan gatuna wam yake kaina gatu kakut.
MAT 12:23 Siwan aminbamda asatnake anzing yaking, “Aminu aapa baminu Devitde dongune aawik,” ngang yake, “Ie apbakngake kayuamang kapa anin ba dasing,” ngang yaking.
MAT 12:24 Ngang yawa natake Ferisi aminu kunduta anzing yaking, “Ita wa yanikwasikgau waung wai Bielsebul waung wai tupan tapatane kekeknga akngane yanikwasikgak,” ngang yaking.
MAT 12:25 Yawa natdetdetnaatang natapbing kaknga anggaman kake Jesuta anzing yanikut, “Aminu keu komdune nana buyambamu tapatue gepbiatang yuaingga enake dongu takngaaya yuke amning. Amapanu buyambam tapata kekeknga yutnanga aknganata wai siwik. Sike aminu yot gapmane nana ba you gwendunekan nanata enake dongu takngaaya yuke amapanu you wanggapmane nana ba you wagwene nana ba kekeknga yutnanga dua,” ngang yanikut.
MAT 12:26 “Sike Setendane amina dongu takngaaya yuke amake Seten inikwasiwanu kekeknga yutnanga aknganata wai siwik,” ngang yanikut.
MAT 12:27 “Siwan, ‘Bielsebulda gatanggaman waung wai yanikwasinggayak,’ ngang ginda nae yawa natake danikwaikgat. Maminda gikatnana gatayaman waung wai yanikwasikaing? Unzingge gikat nanata tasikaing kakngata gisae wam usanziwan gutonga siwik,” ngang yanikut.
MAT 12:28 “Sike Anututane Waung Kapata gatangaman waung wai yanikwasiwa kuwa ginda natdeke tapduknga Anututa amin panangge tasinggak kakngata ninde gwa apbut ngang natapnong!
MAT 12:29 “Sike aminu tapatuta Setendane yotnaatang moo siknga koke aminbamu ita pakut takwau sandepewan kunanga dua. Wena. Ita Seten tanguke napda gamok wamakenga ita take sandepewan kuning,” ngang yanikut.
MAT 12:30 “Aminu dua gatangamuke tasiwiu natane iwana. Aminu naat unekan gatake dua yuke pasisim tapata tasiwan apasinggat takngata apmaiwik.
MAT 12:31 Unzingge nata ginu daniwa natapnong. Anututa waiakngana ba sapdut wamu yaningu asandeyamik. Ngana Waung Takwande sapdut wamu yaningu wai waakngana Anututa dua sandeyamik.
MAT 12:32 Siwan aminda na aminbamdane notnaapae wamu wai yawiu Anututa wai waakngana asandekngamik. Ngana aminda Anututane Waung Kapae sapdut wam yawiu Anututa wai waakngana dua sandekngamik. Tapduu ayuamang komune dua sandekngamik. Gatu masan kaya dua sandekngaman asinggan asinggan yuwik,” ngang yakut.
MAT 12:33 “Sike katau dakatu buyana take aawan kake katau takedaka ngang kaamang. Sike buyana wai aawan kake katau take dua ngang yakamang.
MAT 12:34 Ginu gomou waita genata yasiwa kumningga binga tasike genzata wamu wai yawa natake aminu take dua ngang danduamang. Siwan aminde genata wamu inata inata musiaatang doke yuwau yakaing.
MAT 12:35 Sike aminu noman tapae musiaatangu natdetdet nomana natayuau yawan sanga takekan anggaman siwa kaamang. Sike aminu waiapae musiaatangu natdetdet wai natayuau yawan sanga wai anggaman siwan kaamang,” ngang yanikut.
MAT 12:36 “Ngana nata ginu daniwa natapnong. Sapdut wamu kuupbamu yumdekan yakaingu Anututa tapduknga aminbam usanziwik gwenea wamu waaknga usanziwik,” ngang yakut.
MAT 12:37 “Sike gikae wamde Anututa, ‘Ga amin noman,’ ngang ganiwik ba, ‘Ga aminu wai,’ ngang ganiwik,” ngang yakut.
MAT 12:38 Yawan natake mama wam yanindamumsa amikat Ferisi aminu kunduatda anzing iniking, “Yanindamumsaapa. Ninu gata duya takngatu tasiwi kake Anutuat gatake tasikamayak ngang gandupnim,” ngang iniking.
MAT 12:39 Iniwa ngana yake anzing yanikut, “Ginu tapduknga ayuamang komune nana aminda banipzaatang Anutue asinggan meya natake duya takngatu kanangge nanikaing ngana nata duya takngatu dua yeutdamit. Sike duya Jona ayanikapsa apata tupa siknga tasikut takngakan binga kaning,” ngang yanikut.
MAT 12:40 “Pis buyambam dakata Jona kake ngok tamuban musiaatangu gunziu gweaat gwenduat ngang yuwawana gatuna ngwatutekut. Ina unzakan na aminbamdane notnaapa dakngake yuat tapata kep ganang katangu gunziu gweaat gwenduat yuwit,” ngang yanikut.
MAT 12:41 “Sike Jonata kuke Nineva yot gapmanenana amin yaniwan natake musia tapa tekwanggut. Unzingge Anututa tapduk aminbam usanziwik gwekatangu Ninevanana aminda enake ginu apman ayuamang komunenana amindane waiakngasa yakapning. Ngana aminu ayuak kapata Jona ayapbike yuak,” ngang yanikut.
MAT 12:42 “Tapduknga Anututa aminbam usanziwik gwene maya tapatu amunzing nana aminde takeapa yuke wam yake ginu tapduk apman ayuamang komunenana amindane waiakngasa yakapik. Dasingge? Maya buyambamu waapata keu maa sikngata apuke nataawan Solomonda natdetdetna nomana siknga yawan natapnangge apbut. Ngana aminu ayuak kapata Solomonu ayapbike yuak,” ngang yanikut.
MAT 12:43 “Sike waung waiapata aminu tapatu takut tapa inikwasiwa aminu waapa teke kuke keu kupia kopatang kuke keu take komdu kake yuwatakanangge apmeptake waung wai waapata anzing yakut,
MAT 12:44 ‘Nata tupa yukum tapane gatuna kuwit,’ ngang yake gatuna kuke kaawan aminu waapa you gwendu dapandapa gwa kwaamuke tanomanuking binga kakut.
MAT 12:45 Kake kuku gatu waung wai kunduat katau kautdu musaat gatu kautdu tapaaya ngang papan waung wai waakwakga gawaknga aknga buyambam siknga tasikaingunin pakut. Papan iat apuke aminu waapa tapa tupa aminu waapa waisim yukut ngana apmanu wai siknga yuak. Sike sanga waakngatakan ginu wai aminu tapduk ayuamang komune nanae asapik,” ngang yanikut.
MAT 12:46 Jesuta wamu waaknga ayayuwawan itane mingaat uyapnaatda apu kepman yuke ininangge yaking.
MAT 12:47 Yawa natake aminu tapatuta Jesu anzing inikut, “Natapso. Minggaat uyapbaatda kepman katang yuke gae yakaing,” ngang iniwan
MAT 12:48 Jesuta yake anzing inikut, “Natane mingaat uyapmaat akaat taknga ngang ganiwa natapso,” ngang inikut.
MAT 12:49 Inike pandetna katakngata yeuyuk ninikut, “Minga gatu uyapma ngang yaninggat aminu anin,” ngang yanikut.
MAT 12:50 “Siwan aminda natane Nana enane yuak kapatane banip tawaningu natane minga ba uyapma ba samina ngang yaniwit,” ngang ninikut.
MAT 13:1 Siwan tapduu wagwene Jesuta yotgwen teke epu kepman kuke paku yangga gapan gwene kwaimune pukwikut.
MAT 13:2 Pukwiwawan aminu buyambam sikngata apu yupbasike tasiwawa kake dopangbamu gwendune koke yanindamutnangge pukwikut. Pukwiwawan aminbamda yanggabam gwenu kwaimtapane yuwawa
MAT 13:3 tuwang wamu takngatu takngatu yanike wamu buyambam anzing yanikut, “Natapnong! Aminu tapatuta nanam zak pake paku puyaangatang muban pimaking.
MAT 13:4 Muban zakngi kundu kepiapane pimapa apu kwaitda atnaking.
MAT 13:5 Sike zakngi kundu keu suu amaakatang yuwa kaiu engatangan mateknga siknga yuaing kopatang pimapa zuna zetgaman akopbing.
MAT 13:6 Akopa ngana gunzitda akoke yasiwan zuna wa muyakngi wena siwan kungwake akupiaking.
MAT 13:7 Siwan zakngi kundu muban babam yapiatang pimakingu babamda akoke zakngi wa asusikwatapbut.
MAT 13:8 Siwan ngana zakngi keu take komune pimakingu buyana buyambam mateknga ngang aaking.
MAT 13:9 Aminu maaknga kaya kakengu wamu waaknga natapsok,” ngang yanikut.
MAT 13:10 Siwan ninu pandetnata Jesue kuke anzing inikumang,
MAT 13:11 “Dasingge gata tuwang wamu yaninggayak,” ngang inina yake anzing ninikut, “Anututa amin panangge tasinggak kakngae yapii akusopuke yuau anggaman daniwitde Anututa nandutewan nata ginu daninggat. Siwan ngana aminu aakwau wena,” ngang ninikut.
MAT 13:12 “Sike aminu tapatuta natdetdet nomana papanu Anututa ie natdetdet kunduat asimusaanguwan buyambam siknga papik. Sike aminu tapatuta natdetdet nomana panangge bitakengu natdetdetna gwa pakuu akaiwan kuwik.
MAT 13:13 ‘Kainata akake ngana yapii dua kaaing. Siwan maakngata wamu atnatake ngana katak siknga dua natagwaangukaing.’
MAT 13:14 Unzingge aminu waakwakga unzing tasiwa wamu takngatu Aisaia ayanikapsa apata yakuu buya unin aakut. Ita anzing yakut, ‘Ginda wamu atnatake ngana waakngatane yapii katak dua natapning. Sike ginda akatasike ngana sanga kundu dua kaning.
MAT 13:15 Aminu waakwakga maaknga kapanga ge itane wamu katak dua nataaing. Siwan kai gwa dopukusiking. Kainata sanga kake maakngata wam natake musiaatangu wamdane yapii katak natake tapa tekwamban nae apa nata pasiyama take siningge bitake unzing pasikaing,’ ngang Aisaiata yakut taknga buya unin aakut.”
MAT 13:16 “Ngana ginu apbaknganong. Kaisata sanga gwa kake maakzata wamu atnataaing.
MAT 13:17 Nata ginu siakande siknga daninggat. Tupa siknga ayanikapsa amikat aminu nomana amikatda take siknga sanga akanangge natapbing ngana dua kakingu ginda apmanu akaaing. Ginda wamu nataaing kaknga atnatapnangge take siknga natapbing ngana dua natapbing,” ngang ninikut.
MAT 13:18 “Ginda tuwang wamu aminu tapatuta nanam zau puyaangane mukutde yapii daniwa natapnong.
MAT 13:19 Aminbamda wamu Anututa amin panangge tasinggak kakngae wamu atnatake ngana ie katak dua nataaing. Setenda wa aminde apuke zetgaman wamu takeaknga Anututa musiaatang teyamunggak kaknga sandeyamunggak. Sike zakngi wa kepiapane pimakinggane yapii unin.
MAT 13:20 Sike zakngi kundu suptangan pimakingu wa anzing. Aminu tapatuta Anututane wam yaniwan wam natake zetgaman take natake zetgaman apbakngake takaing.
MAT 13:21 Ngana muyakngi dua pukunggak. Wena. Ita tapduu mateknga siknga yuke masande aminu kunduta Anutue wam tanguwa pimapikge natake meya aminu waakwakge yamuke waiaknga tasiyama zetgaman pimakaing.
MAT 13:22 Siwan zakngi kundu babam yapiiatang pimakingu wa anzing. Aminda wamu take siknga natapbing ngana kepdakane nana meyaat gatu sangaapana buyambam siknga panangge nataaing kakngaatda Anutue wamu yaitapakusiwan buyana atnanga dua,” ngang ninikut.
MAT 13:23 “Sike tapuya keu take komune pimakingu wa anzing. Aminda wamu natake katak natagwaangukaing. Siwan wa aminda buyana buyambam mateknga ngang aakaing,” ngang ninikut.
MAT 13:24 Siwan Jesuta tuwang wamu takngatuat yake anzing yakut, “Anututa amin panangge tasinggak kaknga anzing. Aminu tapatuta poyak tapunu take siknga pake puyanaatang muban kuking.
MAT 13:25 Ngana dapuna peking gwekatangu iwanata apuke zongazonga waitane tapuya poyak tapunde banakan katang muban kuking.
MAT 13:26 Siwan masande poyau wa akoke buya aawan kawa ngana zongazonga waiat kuut undanggan yuwan kaking.
MAT 13:27 “Kake puya aminda puya toikge kuke anzing iniking, ‘Buyambamtapa. Ninu gata poyak tapunu takekan ba puyakaatang mukuyak ngang natapbumang. Dasingge zongazonga wai buyak akokaing,’ ngang iniwa
MAT 13:28 yake, ‘Iwana tapatuta tasikut,’ ngang yaniwan yake anzing iniking, ‘Kuke atzitnimde natayak ba,’ ngang iniwa,
MAT 13:29 ‘Aho. Ginda zongazonga wai zike poyakat kuut zitnang,’ ngang yanikut.
MAT 13:30 ‘Ginda kapewa kuutda akowawat tapduknga buya detnanga komunea puya waaknga pasiya aminu anzing yaniwit, Ginda zongazonga wai gamok zike unekan wamandakngapenong. Katapatang saningge. Sike poyau natane nanam yot gwene paku penong,’ ngang yaniwit,” ngang ninikut.
MAT 13:31 Siwan Jesuta tuwang wamu takngatuat aminbamu anzing yanikut, “Anututa amin panangge tasinggak kaknga anzing. Nanam tapunu gwendu mateknga siknga yuak. Umana mastet ngang inikamang. Tapuya kundu mateknga siwan ngana wagwenzimu mateknga siknga. Siwan aminu tapatuta nanam tapunu wagwenzimu take puyanane yapuban zuna akoke buyambam sike kainga tapmake buyambam siwik. Siwan nanam tapunu kundutane zunandakata buyambam kokaing ngana wandakata buyambam siknga kopik. Kopana kwaitda apu kaingane yotna pasike yutning,” ngang Jesuta yanikut.
MAT 13:33 Siwan Jesuta tuwang wamu takngatuat anzing yanikut, “Anututa amin panangge tasinggak kaknga anzing. Poyakga paptawan sawikge sanga umana yis ngang inikamang. Siwan maya tapatuta poyak sanangge natake yis mateknga pake palaua banakan katang pamuban tawamban sandewan palaua kuupbamda paptawik ngang,” Jesuta yanikut.
MAT 13:34 Siwan aminbam yaninangge natake Jesuta asinggan asinggan tuwang wam takngatu takngatu yanikut. Sipdune tuwang wam teke anggaman dua yanikut.
MAT 13:35 Siwan tupa siknga Anutue wam yanikapsa tapatuta yakut takngata buyana aawikge natake Jesuta unzing yanikut, “Siwan yakapsa apata Anutue wam takngatu maakngita natake anzing tematekut, ‘Tapduknga kep dua tasike tekum gwekatang wamu takngatu banipmaatang takusopukumu yaniwit ngana tuwang wamban yaniwit ngang yawan kakum,’ ngang yakapsa aminda tematekut,” ngang Jesuta yanikut.
MAT 13:36 Siwan Jesuta wamu waaknga yawan puyuwan aminbam peke yoan koke yuwawan ninu pandetnata ie kuke anzing inikumang, “Tuwang wamu zongazonga waita puyaangatang akopbingge yapii ninu niniyo,” ngang inina
MAT 13:37 yake anzing ninikut, “Aminda nanam zau take siknga puyaangatang mukuu wa na. Aminbamdane notnaapa.
MAT 13:38 Siwan puya wa keu kuupbam. Sike nanam zau take siknga wa aminu Anututa papan itane aminabam dakngake yuaingunin. Sike zongazonga wai wa Setendane donga.
MAT 13:39 Sike iwana zongazonga tapunu wai mukuu wa Seten. Sike tapduknga buya detnanga komu wa tapduknga ayuamang komda asandewik.
MAT 13:40 “Sike zongazonga wai zike katapatang sakingu wa unzing, tapduknga sandewik gwekatang ina unzakan tasining.
MAT 13:41 Na aminbamdane notnaapa dakngake angelana yanipewa kuke aminu Anututa papan aminabam dakngake yuaikat nana pasiwan maikaingu apake gatu aminbamda waiaknga pasikaingu kuut paning. Pake Anutue kekeknga aknga gepbiatang dua yutningge ayanikwasiwa katap bapatang kuning.
MAT 13:42 Katau wagwene kuke kwanamna kumzang sike kaakake yutning.
MAT 13:43 Tapduu waomune aminu nomanata Nanatane kekeknga aknga gepbiatang yuke gunzitda binga waenga zike yutning. Aminu maaknga kaya kakengu wamu waaknga natapsok,” ngang ninikut.
MAT 13:44 “Anututa amin panangge tasinggak kaknga anzing. Aminu tapatuta keu komduatang kwaike sangaapa inata kundu take siknga kep ganang katang kakut. Kake baniaatang take siknga natake gatu usikwatake kukut. Kuke inane sangaapana aminde yaman manita usiwa puyuwan mani pake keu sanga wa usikwatapbut komu kuke manita usikut,” ngang ninikut.
MAT 13:45 “Siwan gatuna daniwit. Anututa amin panangge tasinggak kaknga anzing. Usiwam yot toiknga tapatuta sangaapana usinangge natake bimbinu take siknga yanggabam nana kanangge kukut.
MAT 13:46 Kuke tawake tawake bimbinu inata kundu manina buyambam sikngata usinanga gwendu kawan take siknga sikut. Siwan kuku sangaapana kuupbam aminde yaman usiwa puyuwan manina kwaapzang pake kuku bimbinu wagwenu usikut,” ngang Jesuta ninikut.
MAT 13:47 “Gatuna enandang nanata amin panangge tasinggak kaknga anzing. Aminda pis panangge natake yapapna yanggagapan katang muba kuwan pis inata inata kaikaing binga.
MAT 13:48 Yapap gwenu gitnawana kwaimune kaitakakoke apukwike pis take dakandaka dopangu gwendune butupeke pis wai apmutning.
MAT 13:49 Sike tapduknga ayuamang komda asandewik gwene ina unzakan siwik. Angelata apuke waiaknga pasiya amikat amin nomakatda unekan gatake yuwawa kake usanzike wai aminu pake yanikwasiwa
MAT 13:50 katap bapatang pukuning. Pukuke undang yuke kwanamu kumzang sike kaakake yutning,” ngang ninikut.
MAT 13:51 Siwan Jesuta anzing ninikwaikut, “Ginda wamu wa kuupbamdane yapii atnataaing ba dasing,” ngang niniwan, “Ngan,” ngang yana
MAT 13:52 yake anzing ninikut, “Unzingge mama wam yanindamumsa amikatnana tapututa natane pandetna dakngake Anututa amin panangge tasinggak kakngae gepbiatang yuwik kapata yot gwende toiknga binga yuwik. Yot toikga sangaapana peak gwene koke sangaapa kayuk sikngaat tupananaat pake pakepu yamik. Ina unzakan aminu waapata wamu tupan natapbut takngaat masan natapbut takngaat musiaatangga enawan yaniwik,” ngang ninikut.
MAT 13:53 Siwan Jesuta tuwang wamu waaknga yawan puyuwana you wanggapma teke
MAT 13:54 yotna siknga kukut. Undang kuke Anutue wamu miti yotnaatang koke yaniwan asatnake anzing yaking, “Natdetdetna buyambam pake yake duya takngatu pasinggak ngangu ita wa zane pakut?
MAT 13:55 Aminu waapa aminu katapsan usike sangabam pasinggak kapatane waaknga dua ba dasing? Sike Maria minga dua ba dasing? Sike Jems gatu Josep gatu Saimon gatu Judas ngangu itane uyapna dua ba dasing,” ngang yaking.
MAT 13:56 “Siwan itane samina kuupbam nikat dua yuamang ba dasing? Sike sanga wa kuupbamu zane pakut?”
MAT 13:57 Unzing yake semna natangama ngana yake anzing yanikut, “Ayanikapsa aminde aminu umana kaya ngang yotna yotna nana aminda natayamukaing ngana wa aminda yotna siknga yuwa inaat nana aminda umana wena akwak ngang natayamukaing. Siwan gatu inapaanu yotna gwendunekan nana aminda kuut umana wena akwak ngang natayamukaing.”
MAT 13:58 Siwan you wanggapmane nana aminda ie banip meya natapa kake duya kwaapzang you wanggapmane dua tasikut.
MAT 14:1 Siwan tapduu waomune Herotda Gavmanu tupan tapa dakngake yuwawan Jesuta puya tasiwan natapbut.
MAT 14:2 Natake puya amina anzing yanikut, “Aminu wa Jonu yangga sauyamukut tapata gatuna matmat katangga enake puya kekeknga wa pasiwan kaamang,” ngang yanikut.
MAT 14:3 Sike tupa Herotda maya tapatu umana Herodias. Uyapna Filipdane maatna ngana kaiwan kuwan maatnae takut. Tapan natake Jonda Herot anzing inikut, “Gata maya aapa tapi take dua singgak,” ngang gatu gatu iniwan Herotda Jonu tanggaganuke napda wamake kaautde tekut. Teke atangutnangge natapan ngana aminbamda Jonde ayanikapsaapa ngang natapbingge akgwauke dua tanguwan kumbut.
MAT 14:6 Sike tapduu gwendune tapduknga mingata tangaikut gwende natake nanam sake nake iat aminu kunduatda unekan gatake yuwawa Herodiasdane yapanata apu wakumu wa aminda yukingu banakan inatakan taiwawan kake Herotda take siknga natapbut.
MAT 14:7 Natake siakan ngang yawan kekekawan maya waapa anzing inikut. Gata nae sangaapatu gamitde naniwinu nata akgamit ngang iniwan kekekawan natake
MAT 14:8 maya waapatane mingata natdetdet iman pake anzing yakut, “Gata Jonu yangga sauyamukut tapatane gwapakngi dopangu gwendune teke ane nae namuyo,” ngang yawan
MAT 14:9 buyambam tapatane musia meya sikut. Ngana aminu iat gatake yuke nakinggane kaine wamu siakan ngang yawan gwa kekekakutde natake ayanggak kaknga tasinong ngang yake
MAT 14:10 amina yanipewan kaaut yot gwene kuke Jondane guyakngi mataking.
MAT 14:11 Matake gwapaknga dopangu gwendune teke takapu maya mateu waapae ima take mingae taku imukut.
MAT 14:12 Siwan Jondane pandetnata apu gupnasanu taku kwaikenga kuku Jesu iniking.
MAT 14:13 Siwan Jesuta you wanggapma teke dopangbamu gwendu take kautdu saak amina wena kopatang inatakan kukut. Kuwawan aminbamda undang kukut ngang natake yot gapma gapma peke kuku kwaimtapa tawatake kuking.
MAT 14:14 Tawatake kuwawa kwaimune kuke kaawan aminbamu asapa kakut. Kake butaya natake mait aminu maitna sandeyamukut.
MAT 14:15 Sike bangee ninu itane pandetnata ie kuku anzing inikumang, “Keu akomu aminu wena siwan gunzit kaya gwa pukunggak. Unzingge gata aminbamu yanipewi you gapmanduine kuku nanamna undang usiut,” ngang inina
MAT 14:16 ngana yake anzing ninikut, “Dasingge kuningge yakaing? Gisa nanamu yamunong,” ngang niniwan
MAT 14:17 yake inikumang, “Ninu andangu nanamu buyambamda dua yuaing. Poyau katau kautdu musaat pis dakaaya nganggakan yuaing,” ngang inina
MAT 14:18 natake, “Nae ane pakapnong,” ngang ninike
MAT 14:19 aminbamu wa yukingu yaniwan zongazongane pukwiking. Pukwiwawa poyau wa katau kautdu musa gatu pis wandakaat ngang pake enandang pakusang kake inimbakngakenga nanamu wa puke pandetnae niman pake yamuna naking.
MAT 14:20 Yamuna kuupbamda napa musia gitnawa kaiknga yukingu ninu pandetnata butuke sapat yau katau kuut musaat kepianganu gweayane pamuna dopbing.
MAT 14:21 Sike wawi nanam nakingu 5,000. Sike maya waatdaka ngangu dua kendeking.
MAT 14:22 Sike Jesuta pandetna nininggamatawan dopangbam gwene koke ninda gamok yangga gapan gwenu kautdu saak kunimde niniwan kuwatna ina aminbamu wa yanipewan kuking.
MAT 14:23 Yanipewan kuwana inatakan baku baku dakane tumuk wam yanangge kopbut. Koke bangee inatakan undang yuwawan
MAT 14:24 ninda dopangbam gwenu take yangga gapan gwene banakan gwa kukumang. Kuwatna gou buyambam siknga nomin katangga apuyawawan yangga sambuya asenawawan
MAT 14:25 akwakanangge dapaknga siwan ngana zikaa ayuwawan Jesuta yangga gapan gwene engatangan yaitake apu ninde apan
MAT 14:26 kake asatnake a kongu tapatu ngang yake akgwauke kumzang ainggamatakumang.
MAT 14:27 Ainggamatana ngana zetgaman anzing ninikut, “Musipza gitnata yutnong. Nata nina siknga apunggat. Ginu ma gwaubam,” ngang ninikut.
MAT 14:28 Siwan Pitata yake anzing inikut, “Aana. Siakande ga gandukengu gata na naniwi nata yanggaangan gae yaitake kuwa,” ngang inikut.
MAT 14:29 Iniwan Jesuta, “Asapin,” ngang iniwan dopangbam gwen teke yanggaangan yaitake Jesue kukut.
MAT 14:30 Kusika ngana gotda puyapan kake akgwauke yanggaatang pukunangge sike yanggamatake, “Aana. Gata gatangamuyo,” ngang inikut.
MAT 14:31 Iniwan zetgaman katakngita tanggaganuke anzing inikut, “Ganiwa natapi takesim sik ngana dasingge dua natapi kekekak,” ngang inikut.
MAT 14:32 Siwan dopangbam gwene kopat gotda atzakngawan
MAT 14:33 kake ninu dopangbam gwene yukumangu ie inimbakngake, “Siakande siknga ga Anututane waaknga,” ngang inikumang.
MAT 14:34 Sike yangga gapan gwenu kwaimune gwa kukenga kuku Genesaret kep komune kundopbumang.
MAT 14:35 Kundopnana aminu ugwak saak nana aminda ie Jesu ngangu atnatake wamu you wesim yuaingge yatewa kuwan mait aminu kuupbam ie pakapbing.
MAT 14:36 Pakapuke ininggamatake ita kapewan mait aminda katakngita Jesutane tauknga nomna saasaakngi wangane wasiningge iniking. Iniwa kapewan katakngitakan taukngane wasiking aminu kuupbamda gatuna take siking.
MAT 15:1 Siwan tapduu waomune Ferisi aminu kunduat gatu mama wam yanindamumsa amikatda Jerusalem yot gapma teke Jesue apu anzing iniking,
MAT 15:2 “Dasingge tapduknga nanam nanangge ngana pandetdata kataknga dua saukaing? Wamu bapuninda nimuking kaknga unin zipmandakngakaing,” ngang iniking.
MAT 15:3 Iniwa yake anzing yanikut, “Dasingge ginu sanga gisane taknga tawake Anututane mama wamu zipbukaing?
MAT 15:4 Anututa anzing yakut, ‘Gata nangga minggae gepbiatang yuyo. Sike aminda nana mingae sapdut wam yaniwanu atanguwa kupsok,’ ngang Anututa yakut.
MAT 15:5 Ngana ginda anzing yakaing, ‘Aminu tapatuta nana minga gatayamunangge mani kundu kaya ngana mani wa Anutue imunangge gwa yakum ngang yawanu
MAT 15:6 nana minga pasiwan take sisande undanga ngang yakaing. Sanga waaknga pasike Anutue mama wam zipbuke gisane sanga akngakan tangenakaing.’
MAT 15:7 Ginu kem amin! Ayanikapsaapa Aisaiata ginu noman siknga tuwanguke anzing yakut.
MAT 15:8 ‘Aminu wa natane umana genatakan yatangenakaing. Sike musiaatangu nae maa siknga yuaing.
MAT 15:9 Wa aminu aminde mama wam yake Anututane wam ngang yakaing. Unzingge wa aminu nae moo siknga kem nanimbakngakaing,’ ngang Aisaiata yakut,” ngang Jesuta yanikut.
MAT 15:10 Siwan Jesuta yayawamban aminbamda apa anzing yanikut, “Ginu natake katak siknga natdetnong.
MAT 15:11 Sanga napa genaatang konggakga dua pasiwan aminu wai amin dakngakaing. Aho. Sanga genaatang yusika kepman epukaingga pasiwan aminu wai amin dakngakaing,” ngang yanikut.
MAT 15:12 Yaniwan natake ninu pandetnata kuku anzing inikumang, “Wamu waaknga yawi natake Ferisi aminda gae musia toknga nataaing. Ga gwa natayak ba dasing,” ngang inina
MAT 15:13 yake tuwang wamu takngatu anzing ninikut, “Natane Nana enandang yuke puyanaatang sangabamu ina dua kwaiwan ina akokaingu ita muyakngi buyak atziwik.
MAT 15:14 Ginu kapewa yutnong. Aminu kai kusiya amin tapata kai kusiyae kepi yeukngamunangge tasiwanu kuut tapaatda gapmaatang pimatzan,” ngang ninikut.
MAT 15:15 Niniwan natake Pitata yake anzing inikut, “Gata wamu yake aminu wai amin dakngakaing ngang niniyak kakngae yapii yawi ninda natapna,” ngang iniwan yake anzing yakut,
MAT 15:16 “Nata asinggan ganiwa ngana natdetdetdaatang gitna dua pake yuayak ba dasing?
MAT 15:17 Sangabamu genaatang koke napayutnaatang pukuwan musiata kotdekatang muban pukukaing ngang dua nataaing ba dasing?
MAT 15:18 Sike sanga musiaatangga akoke genaatangga epukaingga pasiwan aminu wai amin dakngakaing.
MAT 15:19 Sanga musiaatang natdetdet gutonga takngatu takngatu natake amin zipmakaing ba yasewa pasikaing ba kukae pakaing ba wam yaningge kuku kem wam yakaing ba sapdut wam yakaing.
MAT 15:20 Ngangu unzing tasikengu aminu wai amin dakngakaing. Sike aminu katakngi dua sauke nanam pake nakengu aminu wai amin dua dakngakaing,” ngang inikut.
MAT 15:21 Siwan Jesuta uneta enake keu komdune kukut. Keu wakomune you gapmaya yuamayau umana Taiaat Saidonkat ngang yanikaing.
MAT 15:22 Siwan Jesuta keu wakomune kundopan keu komdu umana Kenan ngang yakaing. Wakomune nana maya tapatuta apu anzing inikut, “Buyambamtapa. Bamin Devitdane dongane aakuyak kapa ga. Nae butaya natapso. Waung waita natane yapana tapan yapanata mainggak,” ngang inikut.
MAT 15:23 Iniwan ngana yake dua inikut. Dua iniwan kake Jesutane pandetnata apu kekeknga anzing inikumang, “Maya waapata asinggan niwayuk nininggakawan natapna meya singgak. Siwan initewi kuwan,” ngang inikumang.
MAT 15:24 Inina yake pandetna anzing ninikut, “Sipsip kunduta ina banipda siwa kuwawa toikngata yayawamban mainggak. Siwan Isrel nana aminda sipsip wa bingata yuaing. Unzing yuwawa Anututa nanitewan Isrel nana amindekan apbum,” ngang ninikut.
MAT 15:25 Niniwan ngana maya waapasimda ie kuku butaya wam natake muna puke inimbakngake anzing inikut, “Kuyana. Gatangamuyo,” ngang inikut.
MAT 15:26 Iniwan ngana Jesuta, “Isrel nana asinggan gatayamunggat taknga aminu wambingae iwanae dua tasiwit ngang natake tuwang wamu takngatu anzing yakut, ‘Waatdakatane nanamu kamunde dua yamunangge,’ ngang yakut.”
MAT 15:27 Yawan maya waapasimda baniaatang anzing natapbut. Isrel nana aminda nandupa kamun binga singgat. Siwan ngana Jesuta Isrel nana aminde gatayamunggak kaknga unzambinga gatanggamikge take nataat ngang natake tuwang wamu takngatu anzing inikut, “Kuyana. Siakan yanggayak ngana waatdakata nawawa kaikngata pimawawa kamunda nakaing binga tasingami natapa siakan siwik,” ngang inikut.
MAT 15:28 Iniwan yake anzing inikut, “O maya apa. Ga nae natapi kekekak kakngata kekeknga siknga singgakge wa nataak kakngakan tasinggamunggat,” ngang inikut. Ngang iniwan maya waapasimdane yapanata tapduknga wa inikut komsimunekan zetgaman take sikut.
MAT 15:29 Siwan Jesuta you wanggapma teke yangga gapanu Galili kwaimune kusika baku dakane koke pukwiwawan
MAT 15:30 aminbamda ie apbing. Apuke kepi wai siya amikat kai kusiya amikat kwatai gutokaya amikat gena kusiya amikat gatu mait aminu inata kunduat ngang pake ie apbing. Pakapu Jesuta yukut komune pewa kake sandeyamuke tasiyaman take siwa
MAT 15:31 aminbamda kaking. Kawawa gena kusiya aminu wam yawawa kwatai gutonga siya aminu take siwawa kepi wai siya aminu akuwawa kai akusiya aminu gatuna kawawa ngang kake nangaakan natak. Anutu ninu Isrel nana amindane kuyaninde umana yatangenaking.
MAT 15:32 Siwan Jesuta pandetna yaniwamban apna anzing ninikut, “Aminbamu tapduu gweaat gwenduat naat gwa yutna sandewan ngana nanamna wena. Ie butaya natake tomda yusika kuningge apbitanggat. Kusika kainata dandambong siwa kepiapane pimanang,” ngang niniwan
MAT 15:33 anzing inikumang, “Andangu aminu wena. Ninda nanamu zane pake aminbamu anzing takwakge yamunangge,” ngang inina
MAT 15:34 ita yake anzing ninikut, “Ginu poyau datdasing paing,” ngang niniwan ninu, “Katau kautdu musa kautdu gomaat gatu pis dakaat nganggan pamang,” ngang inikumang.
MAT 15:35 Inina ita yaniwan aminu wa kepdakane pukwiking.
MAT 15:36 Pukwiwawa poyau wa katau kautdu musa gatu kautdu gomaya pis wa kuut pake Anutu inimbakngake puke niman pake usanzike aminu wa yukingge yamukumang.
MAT 15:37 Yamuna napa musia gitnawa kaiknga napa yukingu unekan peke sapat yau katau kautdu musa gatu kautdu musane gweaya ngang pamuna dopbing.
MAT 15:38 Siwan wawi nanam nakingu 4, 000. Sike maya waatdaka ngangu dua kendekumang.
MAT 15:39 Siwan Jesuta wa aminu yanipewan kuwana dopangbam gwene koke kautdu saak yot Manggandan gapmata yuak saak kukut.
MAT 16:1 Siwan Ferisi amikat Sadyusi amikatda apu Jesu tasiwa siwikge natake duya takngatu Anututa Jesu kawan take singgakge tuwangu tasiwan kanangge yaking.
MAT 16:2 Yawa ngana yake anzing yanikut, “Bangee mingandakata gamana siwan kake ginda anzing yakaing, ‘Gamana siwan apmanu tapduu take sinanggenggak,’ ngang yakaing.
MAT 16:3 Sike gatu tembana gunzitda akopnangge siwan mingata gamana sike gatuna zikaa siwan kake ginda anzing yakaing, ‘Enandangu gamana siwan apmanu gotda apuyapan gatu sopa atawik,’ ngang yakaing. Ngan. Ginda tuwangu enandang nana kake ginda katak usanzikaing. Ngana ginda tapduu apman yuamang komdane tuwangu katak dua kake usanzikaing.
MAT 16:4 Ginu wai siknga. Ginu Anutue gen dua gwaamukaingga duya kanangge yakaing. Ngana nata duya takngatu dua tasiwa kaning. Ginda duya ayanikapbut tapa Jona ngang iniking kapata tupa siknga tasikut bingakan kaning,” ngang yanike wa aminu apeke kukut.
MAT 16:5 Siwan Jesutane pandetnata yangga gapan gwenu gwa yatupmake kuke ngana poyakat pakapnangge apbotakumang.
MAT 16:6 Siwan Jesuta tuwang wamu takngatu anzing ninikut, “Ginu katak siknga gwautnong. Ginu sanga Ferisi amikat Sadyusi amikatda pake pasiwa poyakga paptakaing kakngae gwautnong,” ngang niniwan,
MAT 16:7 “Ninu poyau dua pakapbumangge yanggak,” ngang nisa yakumang.
MAT 16:8 Yana natake ita anzing ninikut, “Ginda nae banip dua natapa kekeknga siwan kaat. Dasingge ninu poyau wena ngang yakaing?
MAT 16:9 Asinggan daniwa ngana ginu natdetdetzaatang gitna dua pake yuaing ba dasing? Ginu poyau katau kautdu musakanu 5,000 aminda nakingge ginu gwa botakingge yakaing ba dasing? Sapat yau datdasing pamukingge apbotake yakaing?
MAT 16:10 Siwan ginu poyau katau kuut musa kautdu gomaya ngangu aminu 4,000-da nakingge ginu gwa botakingge yakaing? Sapat yau datdasing pamukingge apbotake yakaing?
MAT 16:11 Nata danike poyakge dua natake daniwa ngana dasingge poyakgekan nataaing? Ginda Ferisi amikat Sadyusi amikatda kaitaknga pasikaingge gwautnong,” ngang niniwan,
MAT 16:12 “Ita sanga poyakat sawa paptakaingge dua ninik ngang natapbumang. Aho. Ferisi amikat Sadyusi amikatde wamde gwautnimde ninik,” ngang natapbumang.
MAT 16:13 Siwan Jesuta Filip gavmanu buyambam tapata tupa Sisaria yot gapma yukuune wesim kukut. Kuke pandetna anzing ninikwaikut, “Aminda na aminbamdane notnaapae dasing yakaing,” ngang ninikwaiwan
MAT 16:14 anzing inikumang, “Aminu kunduta gae, ‘Jonu yangga sauyamukut tapa,’ ngang yakaing. Siwan kunduta, ‘Ilaija tupa siknga ngang yakapbut tapa,’ ngang yakaing. Siwan kunduta, ‘Yanikapsa aminu tupa siknga yukut tapatu Jeremaia ba ayanikapsa tapatu,’ ngang yakaing,” ngang inina
MAT 16:15 anzing ninikut, “Sike gisa nae dasing yakaing,” ngang niniwan
MAT 16:16 Saimon Pitata yake anzing inikut, “Anututa ga tapan gata Krais gatanimik kapa dakngake Anutu kayuk asinggan yuak kapatane waaknga ga,” ngang iniwan
MAT 16:17 yake anzing inikut, “Saimon, Jonatane waaknga. Aminu keunenana tapatuta dua wamu waaknga gae yeukgamuk. Aho. Nana enane siknga yuak kapata yeukgaman kake yanggayakge apbakngayo,” ngang inikut.
MAT 16:18 “Siwan nata ganinggat. Ga umanda Pita. Unzing yapii gata kekeknga sup gwenda binga yuayak. Sike suu wagwene engatangan tasiwa natane amin takwakga kekeknga yuwawa katap bamdane kekeknga akngata dua yaitapaakusiwik,” ngang inikut.
MAT 16:19 “Nata kekeknga aknga gwabokziu enandang kopnanga daka binga gae gamit. Gama pake sanga Anututa enandang yuke gwa ayandakngakut takngakan kepdakane yandakngayo. Sike sanga Anututa enandang kapewan tasikaing kakngakan kepdakane kapewi tasining,” ngang inikut.
MAT 16:20 Inikenga wamu kekeknga pandetna ninike aminu tapatu Anututa tapan Kraistapa dakngake yuak ngangu dua ininimde ninindakngakut.
MAT 16:21 Siwan tapduu wagwenuneta Jesuta pandetna tuwanguke Jerusalem gapmane asiknga kopikge anggaman ninikut. Undang kopan ninu Judia amindane take amikat gatu Anututane yot takwan gwene pasiya amindane take akwakat gatu mama wam yanindamumsa amikatda ie meya takngatu takngatu imuning. Imuke yawa tanguwa kungwake gatu tapduu gweaat gwenduat gwene gatu enawikge wamu anggaman ninikut.
MAT 16:22 Niniwan natake Pitata take kwaim saak taku tuwanguke kaanga anzing inikut, “Aana. Anututa musia kwikwiknga natanggamuke gatanggaman meya wa gae dua apan,” ngang iniwan
MAT 16:23 ita tapan tekwamban yake anzing inikut, “Gata iwana dakngawi ganduke ganinggat. Na napbimbi ayanggat taknga tasingamuning,” ngang inikut. “Gata Anututane banip dua natdeyak. Wena. Gata aminde natdetdet natake kepina umukngamunggayak,” ngang inikut.
MAT 16:24 Inikenga pandetna anzing ninikut, “Aminu tapatuta na nawanangge natakengu inane banip tawanangge nataak kaknga undang teke iwanata amin saamdakane na nuwa kupit binga kumnangge dua gwauke meyana gwaamuke na nawamsok.
MAT 16:25 Sike aminu tapatuta nae natake tasiwawan aminu kunduta semna natangamuke tanguwa kupanu ita gatuna kayuk yuwik kakngana atake asinggan yuwik.
MAT 16:26 Sike aminu tapatuta sangaapana buyambam siknga papik. Pake ngana masande akupanu sanga wa pakut takwakga dasing gatangamik? Wena. Sike sanga dasitna bingata kayuk yutnanga akngana wena sikuu gatuna tanangge muke usiwik? Wena.
MAT 16:27 Na aminbamdane notnaapa dakngake yuat tapata Nanatane kakaa akngane yuke angelanaat naat kuut apnim gwene nata sanga yake aminbamde sanga atasiking kaknga yamit.
MAT 16:28 Nata siakande siknga daninggat. Aminu ayuaingu kundu dua kumning gwekatangu na aminbamdane notnaapa buyambamtapa dakngake apa nandupning,” ngang ninikut.
MAT 17:1 Siwan gunziu katak kuut musa gatu kautdu gwendukan kawa sandewana Jesuta Pitaat Jemskat uyapna Jonkat nganggan pake ita tawanu mamaya siknga dakatune yanipakoke aminu wena inatakan yuking.
MAT 17:2 Yusika kaawa Jesuta aminu inata kundu dakngawan kainata kaking. Kawawa nomnata gunzit binga waenga siwan taukngata kwaknga sike waenga siwan kananga dua siking.
MAT 17:3 Kaawa bamin akumbing katangga Moseskat Ilaijaatda anggaman siwat Jesuat iat unekan gatake yuke wam yaking. Yawawa Pitaat Jemskat Jonkatda kaking.
MAT 17:4 Kake Pitata Jesu anzing inikut, “Buyambam tapana. Ninu ane take siknga yumang. Siwan gata take natapinu nata gepa gweaat gwenduat ane pasiwit. Gwendu gae. Gwendu Mosesde. Gwendu Ilaijae ngang pasiwit,”
MAT 17:5 ngang yayuwawan undang yuking aminu minga kwaknga dakatuta apu wamakusikut. Wamakusike yuwawan minga wandakaatangga wamu takngatu Anututa anzing yawan natapbing, “Waapa natane waaknga. Waapae na musipmaatang apbaknganggat. Na i kawa take siknga singgak. Siwan ginda itane gen gwaamutnong,” ngang yawan natapbing.
MAT 17:6 Siwan wamu waaknga natake pandetnata gwauya siknga natake kepatang pimaking.
MAT 17:7 Pimake yuwawa Jesuta apu katakngita wasike anzing yanikut, “Enatnong. Gwauya nataaing kaknga atenong,” ngang yanikut,
MAT 17:8 Yaniwan aminu waapaau akginikawat Jesutakan yuwan kaking.
MAT 17:9 Siwan apmea tawanu wandakaatangga epusika Jesuta pandetna waakwau anzing yanindakngakut, “Sanga apmaatzimu wa kaing kakngae aminu tapatu ma iniwam. Na aminbamde notnaapata apmea kungwake enawanaa sanga wa kaing kakngae yaninong,” ngang yanindakngakut.
MAT 17:10 Unzing yaniwan yake anzing inikwaiking, “Dasingge mama wam yanindamumsa aminda yake, ‘Ilaijata gamok apana aminu Anututa tapan Krais gatanimuyaapa dakngake apik,’ ngangu yaking,” ngang inikwaiwa
MAT 17:11 yake anzing yanikut, “Ngan siakan. Ilaijata apuke sanga kuupbam tanomanuwik ngang noman yakaing.
MAT 17:12 Ngana nata daniwa natapnong. Ilaijata gwa apan kake ngana ie dua natake inae banip tawake ie sanga inata inata gwa tasingamuke tanguwa kumbut. Ina unzakan na aminbamdane notnaapa nae tasingamuning,” ngang yanikut.
MAT 17:13 Jesuta unzing yaniwan ita Jonu yangga sauyamukut tapae yanggak ngang natdeking.
MAT 17:14 Siwan kusika aminbamda yukingune gatunin kundopna aminu tapatuta kuku ie muna puke
MAT 17:15 anzing inikut, “Buyambamtapa. Gata natane waakngae butaya natangamuyo. Datdaptake kumnangge singgak kakngata tasiwan gupna wai siknga singgak. Sike tapduk tapduk katapatang gatu yanggaatang ngang pimanggak.
MAT 17:16 Siwan nata take pandetdae takuwa ngana tasiwa take dua sikut,” ngang inikut.
MAT 17:17 Iniwan yake anzing inikut, “Ginu Anutue natapa siakan dua siwan yamandet sikaing amin! Na gikat gatake yuke asinggan asinggan dandupewa ginda meyaaknga nama gwaamuba take dua siwik. Ginda waapa nae ane takapnong,” ngang yawan takapa
MAT 17:18 waung waiapa kaanga iniwan waatdaka waapa teke kuwan zetgaman maitna wena sikut.
MAT 17:19 Siwan masande Jesuta inatakan yuwan pandetnata kuku anzing inikumang, “Dasingge ninda waung wai waapa inikwasitnangge tasina maikut,” ngang inina
MAT 17:20 ita anzing ninikut, “Ginda Anututa gataniman inikwasitna kuwik ngang natapa kekeknga dua siwanu ginda take inikwasitnanga dua. Ngan. Nata siakande siknga daninggat. Anututa gataniman tasingamuna take siwik ngang ginda natapa kekekanggak kakngata sanga mateknga siknga katau mastetde tapun binga gamu tawanu andakata kautdu saak kuwikge yawanu ita undang akuwik. Ginda unzing natapa kekekngasim siwanu sangabam pasinanggengu apasiwa siakan siwik.
MAT 17:21 (Siwan waung wai a binga yanikwasitnanga kepi takngatukan. Tumuk wam yake Anutuekan natayuke nanam teke dua nayuk yanikwasiwa kuwik. Kepi takngatuat wena,” ngang ninikut.)
MAT 17:22 Siwan keu Galili kopatang unekan gatake kusika Jesuta pandetna anzing ninikut, “Aminda na aminbamdane notnaapa aminde yaman
MAT 17:23 take nuwan kungwake tapduu gweaat gwenduat gwene gatu enawit,” ngang niniwan musiminu meya siknga natapbumang.
MAT 17:24 Siwan masande you Kapaneam gapmane kundopna miti yotdane takis papsa aminda Pitae apu anzing iniking, “Gin danindamukgak kapata miti yotdane takis apmukgak ba dasing,” ngang inikwaiwa,
MAT 17:25 “Ngan,” ngang yanike yoakatang kopan kake Jesuta wam gamok yake anzing inikwaikut, “Saimon, ga dasing nataayak? Aminu buyambam takwau kepdakanenana aminda takis mamindane pakaing? Inaatnana amindane ba pakaing ba dongu kundutane ba dasing,” ngang inikwaiwan,
MAT 17:26 “Dongu kundutane,” ngang yakut. Yawan yake anzing inikut, “Unzingge inaatnana aminda takis mutnanga dua.
MAT 17:27 Niu Anutuat nana amin ngana ninda tasina musia toknga natanimunang. Ga yangga gapan gwene kuke pis kaitnangge huk mumbi kuwan pis tupan kaiwiyak gaka gena tapi akngawan mani sandu undang kawiyau take taku niu kuutde wasan yamuyo,” ngang inikut.
MAT 18:1 Siwan tapduu waomune pandetnata kuku Jesu anzing inikumang, “Maminda aminu kundu yapbike Anututa amin panangge tasinggak kakngae gepbiatang yuaing amindane buyambam tapa dakngake yuak,” ngang inina
MAT 18:2 natake waatdaka tapatusim yatawamban apan banakan tekut.
MAT 18:3 Teke anzing yakut, “Nata siakande siknga daninggat. Ginda musipza tapa tekwamban buyambam tapa yutnanga akngae masa imuke waatdaka aapa binga dua dakngakengu ginda Anututa amin panangge tasinggak kakngae gepbiatang yutnanga akngane dua siknga kopning.
MAT 18:4 Sike aminu tapatuta inae umana wenaapa waatdaka aapasim binga dakngakengu aminu waapata aminu kundu Anututa amin panangge tasinggak kakngae gepbiatang yutningge yapbimbik.
MAT 18:5 “Sike aminu tapatuta nae natanggamatake waatdaka umana wena tapatusimu aapasim binga gatangamiu waapata na kuut gatangamunggak kapa unin,” ngang ninikut.
MAT 18:6 “Siwan ngana aminu tapatuta tasiwan aminu umana wena tapatu nae natapan kekekanggau aakwakat nana tapatuta pimapanu aminu wa atasiwan pimapik kapata tokngabam papik. Siwan suu buyambamu gwendu guyakngane wamake yanggabam gwene muba pukuke kupik gamu wai waaknga dua tasike toknga buyambamu dua papan,” ngang ninikut.
MAT 18:7 “Aminda pasiwa aminu waiakngaatang pimakaingge tokngabamu apaning. Siakan. Wai waaknga asapik. Ngana aminu wai waaknga tangenake tasiningga tokngabamu apaning,” ngang ninikut.
MAT 18:8 “Sike gatane katakgata ba kepikata ba tasiwan ga waiakngaatang pimakengu gata patdakngake mumbi kuwan take siwik. Patdakngake wai waakngaatang dua pimake kayuk kaknga pake yuwiyak gamu wai siknga dua siwim. Siwan dua patdakngake katakga tapa ba kepika tapaayata tasiwat ga pimapi katau dua kungwanggak gwekatang muba kuwi wai siknga siwik.
MAT 18:9 Sike kaikata tasiwan ga waiakngaatang pimakengu akwagike mumso. Akwagike wai waakngaatang dua pimake ga kayuk kaknga pake asinggan yuwiyak gamu wai siknga dua siwim. Sike kaika gweaya siwan tasiwan gata pimapi katapbapatang muba kuwi wai siknga siwik,” ngang ninikut.
MAT 18:10 “Siwan ginu katak siknga gwautnong. Dasingge? Ginda waatdaka mateu a yumdekan ngang natapnang. Wena. Daniwa natapnong. Enandangu angela wa amin kayuaingu asinggan Nana enandang yuak kapaat unekan gatake yuaing.
MAT 18:11 (Dasingge? Na aminbamdane notnaapa dakngake aminu waiakngaatang pimamsa amin gatayamunangge apbum.”)
MAT 18:12 “Ginu dasing nataaing? Aminu tapatutane sipsipna 100-da yuaing, ngang sipsipna gwendu wena siwanu toikngata dua tawambik ba dasing? Wena. Ita 99-nu tawandakane peke kuku sipsipna wena wa sikut gwende tawambik.
MAT 18:13 Nata siakande siknga daninggat. Tawake kakengu sipsipna wagwende take siknga natapik. Sike sipsipna 99-nu wena dua sikingge take siknga dua natapik.
MAT 18:14 Ina unzakan, Nanza enandang yuak kapata waatdaka akwakzipat nana tapatuta pimake kayuk yutnanga aknga dua pake wena siwan kake take dua natapik,” ngang ninikut.
MAT 18:15 “Sike notdata gae wai tasinggamanu gata kuwi gisatakan yuke waiaknganae iniyo. Iniwi gae wam natapanu iwan dua dakngake yutzan.
MAT 18:16 Sike ita gae wamu dua natapanu gata aminu tapatu ba tapaaya papi ginu kuutda yuke wamu waaknga natapnong. Natawawa gitda yawat aminu tapaaya ba tapaat tapatuatda wamu waaknga natake tanomunuwa kekekawik.
MAT 18:17 Siwan ngana aminu waakwakge wamu dua natapanu gata miti yot gwendune gikaat kokaing aminde yaniyo. Sike ita aminu waakwakge wamu asandewanu gata aminu waapa dongu inatanana ba kait pasiyuk takis papsa amin binga daknganggak ngang kayo.
MAT 18:18 “Nata siakande siknga daninggat. Anututa enandangu gwa yandakngakut takngakan ginda kepdakane yandaknganong. Sike sangabamu Anututa enandangu gwa kapewan pasikaing kakngakan ginda kepdakane kapewa pasinong.
MAT 18:19 “Siwan nata gatu siakande siknga daninggat. Aminu gikatnana tapaayata musia takngatukan sanga tapatue natake waapaatda tumuk wamu sanga unin tanangge yasanu Nana enandang yuak kapata aminu waapaatde ayamik.
MAT 18:20 Ngan. Sike aminu tapaaya ba tapaat tapatuatda natane umanae natake unekan gatake yutningu nata wa aminde banakan yuwit,” ngang ninikut.
MAT 18:21 Unzing niniwana Pitata kuku Jesu anzing inikwaikut, “Aana. Notnata gatu gatu wai tasingamanu datdasing sandekngamit? Gatu gatu katak kuut musa kautdu sipmaat sandekngamit ba datdasing,” ngang inikwaikut.
MAT 18:22 Inikwaiwan Jesuta yake anzing inikut, “Gatu gatu katak kuut musa kautdu sipmaat sandekngamuyo ngang dua ganiwit. Anzing ganiwit. Aminu 25-dane katakngi kepi binga tapdukbam asinggan gatu gatu kosangayuk sandekngamuyo.
MAT 18:23 “Siwan Anututa amin panangge tasinggak kaknga anzing. Take aminu tapatuta aminata sanga moo pakinggane tuwanga tapatakakut.
MAT 18:24 Tapatakanangge yawan tapatuta mani buyambam siknga (K10,000,000) yake imikge takapbing.
MAT 18:25 Takapa ngana waapata mani wena. Yake imunangge apmeptakut. Apmeptawan takeapanata anzing yakut, ‘Mamin tapataka aminu aapaat maatnaat waaknga yapanaat sangaapanaat manita usinangge natakengu mani naman papa siakan siwik,’ ngang yakut.
MAT 18:26 “Ngang yawan natake aminu waapata muna puke inimbakngake anzing inindatapbut, ‘Toknga ma natangamim. Apmea yake gama sandewik,’ ngang inindatapbut.
MAT 18:27 Inindatapan butaya natangamuke sandekngamukut.
MAT 18:28 “Sandekngamuke initewan kuke waapasimda notna tapatu puya takngatukan tasike yukumayak kapa kakut. Kake waapata mani mateknga ngang yake imikge inikut. Inike guyakngaatang panggamuyuk mani yake, ‘Nam! Nam,’ ngang inikut.
MAT 18:29 “Guyakngaatang panggamuyuk iniwawan kepdakane pimake, ‘Toknga ma natangamim. Apmea gamit,’
MAT 18:30 ngang inikut. Iniwan ngana toknga natake kaaut yotde tewan yusika mani yake imukenga yotna kuwik ngang yawan kekekakut.
MAT 18:31 Yawan kekekawan kake notna kunduta baniaatang meya siknga natapbing. Natake kuku puya toiknga puya aminda waapa unzing tasiwan kakumang ngang iniking.
MAT 18:32 “Iniwa natake puya toikga puya aminu waapa yatawamban apan anzing inikut, ‘Ga puya aminu wai sikngaapa. Gata nanindatapi buyambam siknga sandekgamukum.
MAT 18:33 Nata gae butaya natanggamukum taknga tawakuyak gamu notdae butaya natangamim,’ ngang inikut.
MAT 18:34 Inikenga musia toknga natake aminu toknga imuningge tewan kuke yuke sangae yake kuupbam imana waitdetewan kuwik.
MAT 18:35 “Sike meya dua natake ginu kuupbamda notzatane waiakngana siakande siknga inandek inandek dua sandeyamanu natane Nana enandang yuak kapata ina unzakan ginde yake tasindamik,” ngang ninikut.
MAT 19:1 Siwan Jesuta wamu wa yawan puyawana Galili kep teke Judia keu Jodan yanggaapata wesiwan kautdu saak yuaing aminde kukut.
MAT 19:2 Undang kuwan aminbamu unenanata tawawawa maitna sandeyamukut.
MAT 19:3 Siwan Ferisi aminu kunduta ie apuke tasiwa siwikge apuke kunduta anzing inikwaiking, “Aminu tapatuta maatna inikwasiwan kuwanu Mosesde mama wamu asandewik ba dasing,” ngang inikwaiwa
MAT 19:4 ita yake anzing yanikut, “Anutu tupa siknga amin tumukut tapata aminu wawiat mayaat ngang tumukut. Tumuke ita anzing yakut, ‘Unzingge wawita nana minga peke kuwan maatnaat gatake unekan yuke sanga tapatukan binga dakngake yutzan,’ ngang yakut taknga dua kendeking ba dasing?
MAT 19:6 Unzingge waapaatda tapaaya binga dua yutzan. Wena. Waapaatda sanga tapatukan binga dakngake yutzan. Unzingge sanga Anututa unekan gwa tapan gatapbuu aminda zipmandakngake sandetnanga dua,” ngang yanikut.
MAT 19:7 Yaniwan yake anzing iniking, “Mosesda mama wamu takngatu ninde nimukut. Aminda maatna inikwasitnangge natakengu pepa maya zipmandakngake sandekaingu sandu ie imuke inikawasiwan kuwik ngangu dasingge nimukut,” ngang inikwaiking.
MAT 19:8 Inikwaiwa yake anzing yanikut, “Mosesda yamandet ngang bapusae natake ita kapewan maya yanikwasikaing. Ngana Anututa amin tumukut gwene sanga waaknga wena.
MAT 19:9 Nata anzing daniwa natapnong. Aminu tapatutane maatnata yasewa dua tasiwan ngana apnata inikwasike maya kayuk tapanu wawi waapata yasewaapa daknganggak ngang natapnangge,” ngang yanikut.
MAT 19:10 Siwan ninu pandetnata anzing inikumang, “Wawita maatna inikwasiwikge kepi unzing siwanu wawita maya dua tapan take siwik,” ngang inina
MAT 19:11 ita yake anzing ninikut, “Aminu kuupbamda dua wamu ginda wa yaing kaknga taning. Wena. Anututa aminu kundue ayamik amindakan wamu waaknga taning.
MAT 19:12 Aminu inata inata aminu maya dua paning. Wawi kundu mingata bokngikinguneta maya panangge dua nataaing. Siwan wawi kundutane gupna matawan maya panangge dua natapning. Siwan aminu kundu Anututa amin panangge tasinggak kakngae puya pasinangge natake maya paningge ayandakngakaing. Aminda wamu aaknga natapnanggengu take natapsok,” ngang ninikut.
MAT 19:13 Siwan aminu kunduta waatdaka pake ie pakapbing. Jesuta katakngita wasike wam kwikwik yaniwikge pakapa ngana pandetnata kaanga yanina
MAT 19:14 natake Jesuta anzing ninikut, “Ginu kapewa waatdaka nae apnong. Ginda ma yanindakngawam. Aho. Aminda waatdaka aakwakga nae nangaakan dua nataaing binga daknganingu Anututa amin panangge tasinggak kakngae gepbiatang yuaikat nana aminu unin,” ngang ninike
MAT 19:15 wasiyuk wam kwikwik yaniwan puyuwana peke kukut.
MAT 19:16 Siwan aminu tapatuta Jesue apuke anzing inikut, “Yanindamumsaapa. Nata sanga take zaaknga tasike kayuk yutnanga aknga pake kayuk asinggan asinggan yuwit,” ngang inikwaiwan
MAT 19:17 yake anzing inikut, “Dasingge gata sanga take siknga akngae naninggayak? Tapatutakan take siknga. Sike gata kayuk yutnanga aknga tananggengu gata Mosesdane mama wamu kuupbam tawamso,” ngang iniwan,
MAT 19:18 “Mama wamu zaaknga tawambit,” ngang inikwaikut. Inikwaiwan yake anzing inikut, “Mama wamu anzing mataking, ‘Gata aminu ma zipim. Yasewa ma tasiwim. Kukae ma papim. Amin notdae kemu ma yaniwim.
MAT 19:19 Nangga minggae wam gwaamuke ie gepbiatang yuyo. Siwan aminu gae wesim yuak kapae butaya natangamuyo. Unzing gikae gupba wai dua siwikge natake butaya nataayak binga,’ ngang mataking,” ngang inikut.
MAT 19:20 Iniwan ita yake anzing inikut, “Mama wamu wa kuupbam asinggan tawanggat. Ngana na dasing bingae dapmanggat,” ngang iniwan
MAT 19:21 yake anzing inikut, “Gata kayuk yutnangge take natakengu ga kuke sangaka yami usiwa manina pake sangana wena aminde yamuyo. Unzing tasiwinu take siknga kayuk yutnanga akngaka enandang yukgamuwawan ga apu na nawamso,” ngang iniwan
MAT 19:22 natake musia meya siknga siwan kukut. Dasingge? Itane sangaapana buyambam.
MAT 19:23 Unzingge ita kuwawan kake Jesuta pandetna anzing ninikut, “Nata siakande siknga daninggat. Aminu sangana buyambamda sanga Anututa amin panangge tasinggak kakngae gepbiatang kopnanggengu kwatan siknga tasike kopik.
MAT 19:24 Gatuna daniwa natapnong. Ikwawa gamanda tauk bupmakge ganangiatang kopnanggengu ita kwatanu aminu sangana buyambamu kayata Anutue kekeknga aknga gepbiatang kopnangge tasining binga dua,” ngang ninikut.
MAT 19:25 Niniwan natake kumzang satnake anzing yakumang, “Unzingge maminda kayuu asinggan yuwik,” ngang yana Jesuta noman siknga nindunggamatake anzing ninikut,
MAT 19:26 “Aminda unzingu tasinanga dua. Ngana Anututa sangabamu atasinanga,” ngang niniwan,
MAT 19:27 Pitata yake anzing inikut, “Natapso. Ninda sangabamin peke ga gawakamang. Unzingge ninda mina binga panim,” ngang iniwan
MAT 19:28 natake anzing ninikut, “Nata siakande siknga daninggat. Masande na aminbamdane notnaapata buyambamtapa enane siknga yuke wama yawa kekekawik. Siwan tapduu wagwene sangabamu kayuk dakngake yuwawa ginu na nawakaingu gikaya buyambam tapatane kekeknga aknga pake aminu Isrel nana dongu 12 usanzitning,” ngang ninikut.
MAT 19:29 “Siwan aminbamu natane umanae yanikapnangge natake yotna ba uyapna ba samina ba nana ba minga ba waaknga ba puyana peningu sanga buyambam siknga ie tangge yake pake kayuk yutnanga aknga pake kayuk asinggan asinggan yutning.
MAT 19:30 Ngana aminu kundu tupan amin yuaingu masan amin daknganing. Siwan aminu kundu masan amin yuaingu tupan amin daknganing,” ngang ninikut.
MAT 20:1 “Anututa amin panangge tasinggak kaknga anzing. Puya toikga tembana siknga enake aminu kundu panangge kukut. Wain tapunde puyaangane pasiningge pake anzing yanikut,
MAT 20:2 ‘Gunziu anggwene puya pasiwa puyuwana mani sandu sandu damit,’ ngang yaniwan, ‘Ayom undang nimuyo,’ ngang iniking. Iniwa puya toikga yanipewan kuku wain tapunde puyaangane pasingamuking.
MAT 20:3 “Puya pasingamuwawa puya toikga yuke kawawan gunzitda akoke gwa wekawan kakut. Kake gatuna aminu kunduat panangge natake kuke yawatakusika aminu kundu sanga usikaing komune moo yuwawa kakut.
MAT 20:4 Kake anzing yanikut, ‘Ginu kuku wain tapunde puya anganane kuke pasinong. Puya pasiwa mani noman damit,’ ngang yaniwan kuke puyanane pasingamuking.
MAT 20:5 Puya pasingamuwawa puya toikga yusika kepmaom siwan kuku bangee gunziu apukunangge dandam enaawan unzakan tasikut.
MAT 20:6 “Siwan kuku bangee siknga siwawan ita gatuna sanga usikaing komune kuke kawawan aminu kundu moo yuwawa kakut. Kake kaanga anzing yanikut, ‘Ginu dasingge gunziu anggwekatang anekan moo siknga yuaing,’
MAT 20:7 ngang yaniwan yake anzing iniking, ‘Tapatuta puya takngatu dua niman ie moo yuamang,’ ngang iniwa, ‘Ginu wain tapunde puya anganane kunong,’ ngang yanipewan kuke puyana pasingamuking.
MAT 20:8 “Puya pasingamuwawa kep gwazowan puya toikga puyae kuyana yuak kapa anzing inikut, ‘Puya amina yayawambi apa mani yamuyo. Bangee apuing aminu tupan yayawambi apa mani tupan yami puyuwana tupan apuingge mani masan yamuyo,’ ngang iniwan tasikut.
MAT 20:9 Tasike yayawamban bangee apbingga mani panangge apa kuyana yuak kapata mani sandu sandu yaman paking.
MAT 20:10 Yaman pake kuwawa tembana siknga apbingga mani panangge gatuna apbing. Apuke kawa bangee apbing aminde sandu sandu yamuwawan kaking. Kake ninu sandu sandu unzambinga dua panim. Ninu kwaapzang panim ngang musiaatang natapbing. Natapa ngana kuyana yuak kapata mani sandu sandu yaman paking.
MAT 20:11 Yaman pake musia toknga natake puya toikapa kaanga anzing iniking,
MAT 20:12 ‘Masan apuingga tapduknga dapakngakan puya pasiing. Siwan ninu tembana siknga puya buyambam pasiwatna gunzitda toknga siknga nisiwawan pasimang. Siwan ngana masan apuikat nikat nindupi puyaninu unzakan binga siwan nimunggayak,’ ngang kaanga iniking. Iniwa puya toikga yake anzing yanikut, ‘Waatdakana. Na wai dua ginde tasindamunggat. Ginu puya pasiwa nata mani sandu sandu damit ngang tembana gwa danit. Daniwa ginu ayom undang nimuyo ngang dua ba yaing?
MAT 20:14 Gwa yamangge manisa pake kunong. Apmea apuikat gikat mani buya kundukan damunangge nataat.
MAT 20:15 Ginu dasing nataaing? Nata sanga natane pake ninae banipda tasiwa ga wai tasinggayak ngang naniwanu gutonga siwik. Puya mateknga pasiwa gunziu kuk gwendane yama kake ginu dasingge meyambam nataaing,’ ngang puya toikga unzing yanikwaikut.
MAT 20:16 Siwan tuwang wamu waakngae yapii anzing. Aminu tapatuta umana engatangan yuak ngang natapik ngana gatuna pimapik. Siwan aminu tapatuta umana amunandang yuak ngang natapik ngana gatuna kopik.” Jesuta wamu waaknga ngang ninikut.
MAT 20:17 Siwan Jesuta Jerusalem gapmane kopnangge natake ninu pandetna katau kuut musaat kepianganu tapaaya nganggan papan kukumang. Kepiapane kusika Jesuta anzing ninikut.
MAT 20:18 Natapnong. Apmanu Jerusalem kopna na aminbamdane notnaapa Anutue yot takwan gwene pasikaing amikat mama wam yanindamumsa amikatde yamuning. Yama wam yawitde yake wamu na nutnangge yawan kekekawan
MAT 20:19 dongu kundune nana Anutue dua nataaing aminde yamuning. Yama sapdut wam nanike ipmapa nuke amin saamdakane nuwa kupit. Nuwa kungwakenga tapduu gweaat gwenduat gwene gatuna enawit ngang ninikut.
MAT 20:20 Siwan Sebeditane waaknga tapaatkat gatu waapaatdane mingaatda Jesue inimbaknganangge apbing. Apuke mingata kepdakane gwetake gatangamikge iniwan
MAT 20:21 yake anzing inikut, “Gata minae nataayak,” ngang iniwan Jesue anzing inikut, “Gata yake masande buyambamtapa dakngawiyak gwene natane waaknga aapau gaat gatake inengan yuke umana kaya dakngake yutzan. Tapatu katakga siyaapane yuwan tapatu katakga kwanaapane yuyok,” ngang inikut.
MAT 20:22 Iniwan ita yake anzing yanikut, “Ginda sanga wa yake nanikaingge katak dua nataaing. Gitda meya nata wa kawit takngata gitde apan kake ngana gitda undang dua ba pimatzan ba dasing,” ngang yaniwan, “Ngan, nitda dua pimatzim,” ngang iniwat
MAT 20:23 yake anzing yanikut, “Gitda meya nata kawit taknga akasan. Ngana Anututa dua naniwan kapewa kataknga siyaapane ba kwanaapane ngangu yuke tasan. Aho. Kekeknga waaknga aminu tapaayae Nanata gwa tandakngake teyamukut tapaatdakan tasan,” ngang yanikut.
MAT 20:24 Yaniwan natake ninu pandetna katau kuut musaatda nikatnana waapaatde kaanga yanisapdukumang.
MAT 20:25 Yanisapduwatna ngana Jesuta yaniwamban kuna anzing ninikut, “Ginu atnataaing. Aminu buyambam tapaapa dongu kundune nana Anutue dua nataaing aminda yaipapaakusike enane yuke amina wa aminde wam tawaningge kumzang kekekakaing.
MAT 20:26 Ngana ginda unzingu ma tasiwam. Wena. Gikatnana tapatuta buyambam tapasa dakngananggengu ita gin gatandamuyaapa dakngayok,” ngang ninikut.
MAT 20:27 “Siwan gikatnana tapatuta ginde tupan tapasa dakngananggengu ita puya aminza dakngayok.
MAT 20:28 Na aminbamdane notnaapaaya unzakan. Nata apa aminda nae puya pasingamuningge dua apbum. Wena. Apuke puya tasike amin gatayamunangge apbum. Apuke kungwayamit takngata iwana zipmake yawamba kuwa aminbam sandeke papitde apbum,” ngang ninikut.
MAT 20:29 Siwan Jeriko yot gapma teke kuwatna aminu buyambamda Jesu tawaking.
MAT 20:30 Tawake kuwawa aminu kai wai sikumayau tapaaya kepiapane pukwike yuwawat Jesuta apu kuwan natake wamu apaa yanggamatake anzing yakumayak, “Buyambamtapa. Ga Devitdane dongune aakuyak kapa. Gata nitde butaya natapso,” ngang inikumayak.
MAT 20:31 Iniwat aminbamda kuma yutzande wamu kekeknga yaniwa ngana apaya yanggamatake anzing yakumayak, “Buyambamtapa. Ga Devitdane dongune aakuyak kapa. Gata nitde butaya natapso,” ngang yawat
MAT 20:32 natake Jesuta yuke apaa anzing yanikut, “Giu nata gitde dasing tasindamitde natamayak,” ngang yaniwan,
MAT 20:33 “Buyambamtapa. Niu kainiu take tasinimiyakge nataamak,” ngang inikumayak.
MAT 20:34 Iniwat waapaatde butaya natake kainane wasiwan zetgaman kaina gatu kawat Jesuat gatake kukumang.
MAT 21:1 Siwan Jerusalem gapma wesim kundoke yot Betfasi gapma tawanu Oliv daka yuaune kuke Jesuta pandetna tapaaya
MAT 21:2 anzing yanikut, “Gitda you atugapmasimu kaamayaune kopzon. Koke zetgaman gitda ikwawa gamana gwendu napda tewatanguwan mateknga kuut wamapeninga kake gitda waike nae pakapzon.
MAT 21:3 Sike aminu tapatuta wamu takngatu daniwanu anzing inison, ‘Buyambam tapata anggweyatde puya kaya,’ ngang iniwat zetgaman danipewan pakapzon,” ngang yanipewan kukumayak.
MAT 21:4 Sanga wa tasikumayak kakngae wamu ayanikapsa aminu tapatuta anzing yakut,
MAT 21:5 “Ginda aminu you Saion gapmanenana anzing yaninong, ‘Kanong! Buyambam tapasata ginde apunggak. Ita inane umana dua tangenakgak kapa dakngake ikwawa gaman gwene engatangan pukwike apunggak. Ita engatangan ikwawa gaman sangaapa papsa gwene pukwike apunggak,’” ngang yanikapsa aminda yakut taknga buya unin aakut.
MAT 21:6 Siwan pandetna waapaau Jesuta yanikut taknga tasikumayak.
MAT 21:7 Ikwawa gamanu matekngaat mingaat pakapat tauknga kundu ikwawa gamande masene pewat Jesuta engatangan koke pukwikut.
MAT 21:8 Pukwike apuwawan aminbamda Buyambam tapana initakuningge natake got tauknga kepiapane usiwa kunduta zagwa tatak matake kepiapane usiking.
MAT 21:9 Siwan aminbamu kundu tupan kuwawa kundu masan apuyuk anzing yanggammataking, “Devitdane dongune aakut tapata apan kana take siknga singgak. Umana tangenatnong! Anutu enane yuak kapata kawan take siknga singgak,” ngang yaking.
MAT 21:10 Yake tasiwawa Jesuta Jerusalem gapmane kopan aminu you wanggapmanenana kuupbamda asatnake anzing yaking, “Aminu aapa mamin,” ngang yawa
MAT 21:11 aminbamu kepi kukingga anzing yaking, “Ita Jesu, ayanikapsaapa Nasaret gapma Galili kep komu yuaune nanaapa,” ngang yaking.
MAT 21:12 Siwan Jesuta Anututane yot takwan gwende daman katang koke kawawan aminbamu mani kaitnangge tasiwawa kaka yanikwasiwan kuwawa tebona mani sanis tasikingu pangenapamapan kuwa sia apukwike kwait gwegwen yaman manita usikingu kuut pangenapamapan kuwa
MAT 21:13 ita anzing yanikut, “Anututane wapatang anzing matakut, ‘Natane yot gwenu tumuk wam yaningge yot ngang yaning,’ ngang matakut. Ngana ginda tasiwa kuka aminde yot gwen binga daknganggak,” ngang yanikut.
MAT 21:14 Siwan Jesuta you wagwende daman gwekatang yuwawan aminu kundu kai kusiya gatu kepi wai siya ngangga ie apa take pasiyamukut.
MAT 21:15 Pasiyamuwawan ngana Anutue yot takwan gwene pasiya amindane take akwakat mama wam yanindamumsa amikatda duya takngatu takngatu pasikuunin kaking. Kawawa waatdakata you wagwende daman gwekatang yuke anzing yanggamataking, “Devitdane dongune aakut tapata apan take siknga singgak,” ngang yawa natake musia toknga natake anzing iniking,
MAT 21:16 “Ga wamu wa yakaing kaknga atnatayak ba dasing,” ngang iniwa Jesuta anzing yanikut, “Ngan, na gwan natat. Sike Anututane wapatang anzing matakut, ‘Gata yanindamumbi waatdakaat engakatda umanda yatangenakaing,’ ngang matakuu dua kendekingge nanikaing ba dasing,” ngang yanikut.
MAT 21:17 Yanikenga peke epu yot gapma kepman kuke paku zikaa wagwene Betani yot gapmane kuke dapuna wanggapmane pekut.
MAT 21:18 Siwan tembana Jesuta Jerusalem gapmane gatuna kuke tomna natapbut.
MAT 21:19 Tomna natake kawan katau baau dakatu kepiapane yuwan kake kukut. Ngana tapuya kaya dua. Wena. Tatakngikan kakut. Kake baau wandaka anzing inikut, “Ga buya gatuka ma aawim. Wena siknga,” ngang yawan zetgaman baau wandakata akumbut.
MAT 21:20 Kungwake kupiawan kake pandetnata asatnake, “Dasingge baapdaka zetgaman kupiakgak,” ngang yakumang.
MAT 21:21 Yana yake anzing ninikut, “Nata siakande siknga daninggat. Ginu Anutue natapa meya dua siwanu ginda nata katau baapdakae tasinggat taknga atasining. Siwan ginda unukan dua tasining. Aho. Puya buyambamu atasining. Sike ginda tawanu andakata zike yanggabam gwene isakuwikge yawa kekekawanu itaaya unzing atasiwik,” ngang ninikut.
MAT 21:22 “Sike ginda Anututa gatanimik ngang natapa kekekawan tumuk wam iniwanu sangabamu apanangge natake yaningu apaning,” ngang ninikut.
MAT 21:23 Siwan Jesuta Anututane yot takwan gwende daman gwekatang koke aminbam yanindamukut. Yanindamuke yawawan Anututane yot takwan gwene pasiya amindane take akwakat gatu Judia amindane take amikatda ie apu anzing iniking, “Ga maminda tapan sanga waaknga pasinggayak,” ngang iniwa
MAT 21:24 yake anzing yanikut, “Nakaya wamu takngatu ginu danikwaiwit. Danikwaiwa yake atnaniwanu nakaya maminda tapan puya waaknga pasinggatde daniwit,” ngang yanikut.
MAT 21:25 “Jonda aminbamu yangga sauyamukut taknga enandang nanae sanga ba aminde sanga ba dasing,” ngang yanikwaiwan natake ina anzing yaking, “Ninda, ‘Enandang nanae sanga,’ ngang yananu, ‘Dasingge ginu baniu ie dua sike yuaing,’ ngang niniwik.
MAT 21:26 Sike ninda, ‘Aminde sanga,’ ngang yanangge gwaukamang. Unzing yananu aminu kuupbam Jonde ayanikapsaapa ngang nataaingga nisipnang,”
MAT 21:27 ngang natake yake anzing iniking, “Ninu Jonde dua nataamang,” ngang iniwa anzing yanikut, “Nakaya ginu puya waaknga na maminda tapan apu pasinggatde dua daniwit,” ngang yanikut.
MAT 21:28 “Ginda dasing nataaing? Aminu tapatuat gatu itane waaknga tapaat unekan gatake yuking. Yusika nanata waaknga tupan tapae anzing inikut, ‘Waaknga. Ga gunziu anggwene kuke wain tapunde puyaangane pasingamuyo,’ ngang iniwan,
MAT 21:29 ‘Dua kuwit,’ ngang inike ngana mateknga kundusim yukenga musia tapan tekwamban kuke pasingamukut.
MAT 21:30 “Siwan nanata waaknga masan tapae unzakan iniwan akuwit,” ngang inike ngana dua kukut.
MAT 21:31 “Siwan tuwang wamu waaknga daniwa natake banipzaatang dasing nataaing? Aminu waapaakatnana mamin tapata nanae wam gwaamuke tasikut,” ngang Jesuta yanikwaiwan, “Tupan tapa,” ngang iniking. Iniwa yake anzing yanikut, “Siakande daninggat. Kait pasiyuk takis papsa amin takwakat yasewa pasiya amikatda waiakngana teke Anutue gen gwaamuke Anutue daman katangu tupanu waakwakga kopning.
MAT 21:32 Siwan Jonda noman siknga tasiningge kepiaknga danikapan ngana ginu wamna natapa siakan dua sikut. Ginda natapa siakan dua siwan ngana kait pasiyuk takis papsa amikat yasewa tasiya amikatda Jonde wamna natapa siakan sikut. Siakan siwan kake ngana ginu musipza dua tapa tekwamban wamnae siakan dua natayuaing,” ngang Jesuta unzing yanikut.
MAT 21:33 “Ginu tuwang wamu takngatuat natapnong. Aminu tapatuta kepna buyambam siwan wain tapunde puyana pasike kwaike awamabasikut. Awamabasike puya banakan katangu wain tapun yainggamuwawa yanggata pukuke dopikge gapma kwaike you mamaya siknga kuka aminde kayutnangge mitapbut. Mitapan puyuwan puya waanga aminu kundue kataune yaman kayukngamuwawa buya aawan deke usanzike kautdu gisae pake kautdu ninae namunong ngang yanike ita keu maa siknga komdune kukut.
MAT 21:34 Kuke yuwawan wain tapun detnanga tapduknga dapaknga siwan tapuya kundu panangge natake puya amina kundu tapatu tapatu yanipewan kuwawa
MAT 21:35 puyanae pasikaingga pake tapatu moo tangupbapbauke tapatu atangutapa kupan tapatu supda tanguwa kumbut.
MAT 21:36 Siwan puya toikga puya amina kunduat aminu buyambam yanipewan kuwawa ina unzakan pasiyamuking.
MAT 21:37 Pasiyama natake anzing yakut, ‘Natane waakngae wamu apme natapning,’ ngang yake inane waaknga ngang initewan kukut.
MAT 21:38 “Kuke wesim kuwawan kake ina anzing yaking, ‘Aminu aapata nanatane kwatangi apmea papik. Ayok. Tangutna kupan puya angana ninda tana,’ ngang yaking.
MAT 21:39 Ngang yake waapa tangutawamba kepman kuwan tangutapa kumbut.
MAT 21:40 “Ge ginu dasing nataaing? Masande puya toikga apuke aminu puyangane pasikaingge dasing pasiwik,” ngang yanikwaiwan
MAT 21:41 anzing iniking, “Bania toknga siknga natake aminu wai waakwau yake atzipan kupa wain tapunde puya waanga aminu kundu buya detnanga tapduk gwene deke ie asimuningge yaman kayutning,” ngang iniking.
MAT 21:42 Iniwa yake anzing yanikut, “Anututane wapatang wamu takngatu anzing matakut, ‘Suu gwendu yot mitapsa aminda kake wai pupuknga ngang yake mutewa kukuu wagwenu yotde tepa kusiwan yot gwen tapan kekekanggak. Buyambam tapata sanga waaknga tasiwan kake asatnakamang,’ ngang matakuu dua kendeking ba dasing?
MAT 21:43 “Unzingge nata daninggat. Anututa amin panangge tasinggak kaknga ginde kaiwan kundaman dongu Anututa kekeknga gepbiatang yutnanga akngatane puya pasiwa buya asaakgak takwakge ayamik,” ngang yanikut.
MAT 21:44 (“Sike aminu yotdane sanga wandakane engatangan pimakengu zipmandakngawan matek mateknga sining. Sike sanga wandakata aminu tapatu pimake tangutapakusiwan aminu waapa asuupamapa kuning,” ngang yanikut.)
MAT 21:45 Siwan Anutue yot takwan gwene pasiya amindane takeakwakat Ferisi amikatda Jesuta tuwang wamu wa yakut taknga natake atnatdeking. Ita ninde tuwanguke yanggak ngang natapbing.
MAT 21:46 Natake Jesu tanggaganutnangge natake ngana aminbamda Jesue ayanikapsaapa ngang natapa kekekakutde akgwauking.
MAT 22:1 Siwan Jesuta gatuna aminbam tuwang wamu anzing yanikut,
MAT 22:2 “Anututa amin panangge tasinggak kaknga anzing. Keu komdunenana amindane tupan tapatane waakngata maya kayuk tanangge yakut. Yawan nana tupan tapata nanamu sandama apu nanong ngang yanike nanamu buyambam sayamukut.
MAT 22:3 Sayamuke amina yanipewan kuke amin bamu, ‘Apu nanong,’ ngang yaniwa ngana apbitaking.
MAT 22:4 “Siwan natake take waapata amina kunduat anzing yanikut, ‘Ginda kuke aminu apbitaking aminu anzing yaninong, Na ikwawa gamanu wawiat ikwawa gaman mateknga suyukngaat gwan zipmat. Zipmake minaka minakabam gwan tandakngat. Waakngata maatna tapikge apu nanong, ngang yaninong,’ ngang yanikut.
MAT 22:5 “Yaniwan aminata kuke unzakan yaniwa natake ngana yake dua yaniking. Yake dua yanike tapatuta puyanane kuwawan tapatuta inane usiwamyotnane kukut.
MAT 22:6 Siwan kunduta unzakan kuking. Kuwawa ngana kundu tupan tapatane puya amina panggaganuke atzipa kumbing.
MAT 22:7 Atzipa kupa natake tupan aminu waapata baniaatang toknga siknga natake inane amak amina yanipewan kuke zipa kumbing aminu yake zipa kumbing. Zipa kupa yotna katapda sawa yasiwan puyukut.
MAT 22:8 “Yasiwan puyuwana tupan aminu waapata amina anzing yanikut, ‘Maatna tapikge sanga gwan tandakngakum ngana apu nanong,’ ngang yaniwa bitaking aminde yapii anggaman kawa wai siknga singgak.
MAT 22:9 Siwan ginu kepiapane kuke kaawa aminu kunduta apa kake, ‘Apu nanong, ngang yaninong,’ ngang yanikut.
MAT 22:10 Yaniwan natake amina kepiapane kuke aminu wai ba take ba unzakan aminu nanam naningge yaniwan unekan apbing. Apa maatna tapikge you akopbing gwenu akgitnakut.
MAT 22:11 “Siwan tupan aminu waapata unekan apbing aminu kanangge natake apbut. Apu kawan wawi tapatuta undang yuwan kakut. Kawan wawi waapata tauu kayukgomu dua mapapukuwan kopbutna kake akasatnakut.
MAT 22:12 Akasatnake wawi waapa anzing inikwaikut, ‘Notna. Dasingge tauu kayuk gomu gamukumu teke anggwekatangu akoyak,’ ngang inikwaiwan yake ininangge natake ngana apmeptakut.
MAT 22:13 “Apmeptawan kake tupan aminu waapata puya amina anzing yanikut, ‘Waapatane katakngiat kepinaat napda wamake kepman mutewa zikaa sikngaatang kuke kwanam sike kaakake asinggan yuwawik,’ ngang yanikut.”
MAT 22:14 Siwan Jesuta tuwang wamu waaknga ngang yanikenga anzing yanikut, “Anututa aminu buyambam yayawanggak ngana aminu tapatu tapatukan papan aminabam daknganing,” ngang Jesuta unzing yaniwan natapbing.
MAT 22:15 Yaniwan natake Ferisi aminu waakwakga kuke paut tasiking. Paut tasike unzing inina Jesuta yake ninike undang pimapan wamu yanim ngang yaking.
MAT 22:16 Yakenga waakwakgane pandetna kunduat Herotde wamna natapsa aminu kunduat yanipewa kuking. Yanipewa kuke tapatuta Jesu anzing inikut, “Ninindamumsaapa. Gata kewam dua nininggayak ngang natapna siakande singgak. Gata Anutue kepi tawanim taknga siakande siknga ngang ninindamuke yawa naninang ngang natake dua gwaukgayak.
MAT 22:17 Siwan ganikwaitna banipbaatang natake waakngakan niniyo. Ninu Judia nana aminda gavmanu Sisae takis mani imukenga ninda Anutue mama wam sandetnim ba dasing,” ngang inikwaiking.
MAT 22:18 Inikwaiwa natake waakwakga wai tasingamunangge natake nanikwaikaing ngang Jesuta baniaatang natapbut. Natake yake anzing yanikut, “Ginda dasingge na tanzitnangge tasikaing? Ginu genza gwakngayasa kaya amin.
MAT 22:19 Takis mani sandu yeukngama kawit,” ngang yaniwan sandu ie imuking.
MAT 22:20 Ima take anzing yanikwaikut, “Mani asanu weenaat gatu umanau mamindane matakinga kaaing,” ngang yanikwaiwan yake,
MAT 22:21 “Sisatane,” ngang iniking. Iniwa yake anzing yanikut, “Sisatane sanga Sisae imunong. Siwan Anututane sanga Anutue imunong,” ngang yanikut.
MAT 22:22 Yaniwan natake kuutda asatnake i teke kuking.
MAT 22:23 Tapduu wagwenekan aminu akungwakengu uyunga dua enakaing ngang yaya aminu Sadyusi ngang yanikaing. Siwan Sadyusi aminu wa kunduta Jesue apu anzing inikwaiking,
MAT 22:24 “Yanindamumsaapa. Mosesda ninde baminde wamu takngatu tupa siknga anzing yakut. Aminu tapatu maatna take ngana waaknga wena siwan yusika akupanu uyapnata maya kombakobau waapa take ita paanae tangge waaknga tangamuyok ngang yakut.
MAT 22:25 Sike tupa inaakwau katau kautdu musa kautdu tapaaya ngangga nikat gatake yukumang. Siwan tupan tapata maatna take yusika ngana waaknga wena siwan akumbut. Kupana uyapnata maatna waapa take
MAT 22:26 masanu waapaaya unzakan sikut. Siwan banakan tapata kuut unzakan tasiwan masan nana amindaaya unzakan tasiking.
MAT 22:27 Tasike kuupbam kupana masan siknga maya waapa kuut akumbut.
MAT 22:28 Sike gata niniyo. Tapduknga kupsa aminda enatning gwene maya waapa katau kautdu musa kautdu tapaayata takingge waakwakatnana mamin tapatane maatna dakngawik? Ga atnatayak. Kuupbamda taking,” ngang iniking.
MAT 22:29 Siwan Jesuta yake anzing yanikut, “Ginda Anututane wamu tupa siknga mataking kaknga dua nataaing. Siwan ginu Anututane kekeknga aknga kuut dua natake wamu gutonga yakaing.
MAT 22:30 Sike tapduknga akupsa aminda gatu enatning gwene maya wawita angela enandang nana binga dakngake maatnae ba apnae dua kuning. Wena.
MAT 22:31 Ngana akupsa aminda gatu enatningge wamu nata ginu danikwaiwit. Ginda wamu Anututa danikut taknga dua kendeking ba dasing? Ita anzing yakut,
MAT 22:32 ‘Na Ebrahamdane Anutuna, gatu Aisakgane Anutuna, gatu Jekopdane Anutuna,’ ngang yakut. Ge Anutu akupsa aminde Anutuna dua. Wena. Kayuk yuya aminde Anutuna,” ngang yanikut.
MAT 22:33 Yaniwan natake aminbamda itane wamde asatnaking.
MAT 22:34 Siwan Sadyusi aminda yake Jesu ininangge natake meptawa kake Ferisi aminu kunduta unekan kuking.
MAT 22:35 Unekan kuke iatnana tapatu Mosesde mama wam Yanindamumsa aminu tapatuta Jesu tasiwan siwikge anzing inikwaikut,
MAT 22:36 “Ninindamumsaapa. Mosesdane mama wamu zaakngata mama wamu kuupbamdane tupan siknga aknga daknganggak,” ngang inikwaikut.
MAT 22:37 Inikwaiwan Jesuta yake anzing inikut, “Anutu Buyambam tapakae banipbaatang gwaam siknga natake musipbaatang take siknga natangamuke natdetdetdaatang asinggan asinggan Anutue natanggamatayo.
MAT 22:38 Mama wamdane tupan siknga aknga unin.
MAT 22:39 Siwan mama wamu uneta unesim yuak kaknga anin. ‘Gae wesim yuak kapae butaya natangamuyo. Unzing gikae gupba wai dua siwikge natake butaya nataayak binga.’
MAT 22:40 Mama wamu wa kuut takngaat tasiwinu Moseskat ayanikapsa amikatdane wamu yakingu buya unin aawik,” ngang inikut.
MAT 22:41 Siwan Ferisi aminu kunduta unekan apuke yuwawa Jesuta anzing yanikwaikut,
MAT 22:42 “Ginu Anututa tapan Krais dakngake yuak kapae dasing nataaing? Waapa mamindane dongane aakut,” ngang yanikwaiwan yake, “Devitdane dongane aakut,” ngang iniwa
MAT 22:43 anzing yanikut, “Ayok. Dasingge Waung Takwan Tapata Devitdane musia tangenawan Devitda, ‘Buyambam tapana,’ ngang inike anzing yakut,
MAT 22:44 ‘Buyambam tapata natane buyambam tapana anzing inikut, Ga umanda kayaapa dakngake yuayakge natane kataknga siyaapane yuwawi nata iwanda panggaganuke pewa gae gepbiaatang koyutning,’ ngang inikut.
MAT 22:45 Devitda ina, ‘Buyambam tapana,’ ngang inikut. Ngang dasingge ginda ita Devitdane dongane aakut nganggan yakaing,” ngang yanikut.
MAT 22:46 Yaniwan natake tapatuta Jesutane wamu yake ininanga dua sikut. Siwan tapduu wagwene tuwanguke masande yakwaik wamu ie takngatu gatu inikwaitnangge akgwauking.
MAT 23:1 Siwan masande Jesuta wamu aminbampat pandetnaat anzing ninikut,
MAT 23:2 “Mama wam yanindamumsa amikat gatu Ferisi amikatda Mosesde mama wam yake tangenakut tapae tangge yuaing.
MAT 23:3 Unzingge wamu kuupbam ginde damukuu natake tawanong. Ngana sanga tasikaing kaknga kake ginda ma tawambam. Wena. Wamu kwaapzang yake ngana ina wamu wa yakaing kaknga dua tawakaing.
MAT 23:4 Siwan wa aminu mama wamu nangaakan wamaknga meya siknga wamakaing binga aminde gwaamnane peyamuke ngana ina kataknga boopmita meya wa yamukaingu dua gatayamukaing.
MAT 23:5 “Sike sangabamu aminu waakwakga tasikaingu kake aminu dudumna ngang yaningge tasikaing. Ngan. Aminu waakwakga katasiu mama wam mataking kaknga ngwayoknga san papakopa damawamnae wamake tumuk wam yanangge natake asinggan pasikaing. Sike tauknga nomna saasaaknga mamaya siknga pasikaing.
MAT 23:6 Sike nanam nananggengu pomu tupan sanekan yutnangge nataaing. Siwan tupan gan miti yot katang yutnangge nataing.
MAT 23:7 Sike sanga usikaing komune gaak wam umana kaya amin ayanindamumsaapa ngang yaniningge take nataaing.
MAT 23:8 “Ngana aminda gindane umanza yatangenake ayanindamumsaapa ngangu daniningge take ma natapam. Wena. Gin danindamukgau awia tapatukan. Siwan ginu kuupbam notna dakngake yutnong.
MAT 23:9 Siwan keu andakane yuke aminu tapatutane umana yatangenake Toikngin ngang ma inimbakngawam. Wena. Gindane Toikza enandang yuau awia tapatukan.
MAT 23:10 Siwan aminda takeapa ngang daniningge take ma natapam. Wena. Gindane take aminza awia tapatukan. Waapa Anututa tapan Krais dakngake yuaunin.
MAT 23:11 Ngana gikat nana tapatuta gindane buyambam tapasata ginde puya pasindamuke yuyok.
MAT 23:12 Aminu tapatuta inane umana tangenawiu itane umana apimapik. Sike aminu tapatuta inane umanae yumdekan ngang natapiu umana buyambam siwik,” ngang ninikut.
MAT 23:13 “Ginu mama wam yanindamumsa amikat Ferisi amikat ginu genza gwakngayasa kaya! Ginda toknga aknga apaning! Ginda Anututa amin panangge tasinggak kakngae gwabou aminbamde nomune yapukaing. Gisa undangu dua koke aminda kopnangge tasiwa ngana ginda dua kapewa kokaing,” ngang yanikut.
MAT 23:14 (“Ginu mama wam yanindamumsa amikat gatu Ferisi amikat ginu genza gwakngayasa kaya aminu toknga aknga apaning! Ginda maya kombakobatdane yotna kaiwa kuwa tumuk wamu mamaya siknga wai waakngasa takusopunangge yakaing. Unzingge ginda toknga siknga paning,” ngang yanikut.)
MAT 23:15 “Ginu mama wam yanindamumsa amikat Ferisi amikat ginu toknga aknga apaning. Ginu genza gwakngayasa kaya amin! Ginda aminu tapatu tapan pandetza dakngawikge natake yanggabam gwene kuke kepdakane kuke aminu tapatu tapa gindane pandetza dakngake katap bapatang kunanga amin gisa binga daknganggak. Ngana ginda tasiwa aminu waapa waiaknga tasike ginu atdapbikgak,” ngang yanikut.
MAT 23:16 “Ginu kaisa akusiya aminu toknga apaning. Kaisa wai siwa ngana kepi yeuyamunangge tasike anzing yakaing, ‘Aminu tapatuta wamu siakan ngang yanangge natake yot takwan gwende umana yawan natake undanga,’ ngang yakaing. Ngana aminu tapatuta aminda gol sake pakapu yot takwan gwene pewa gatakukingge yake, ‘Siakan,’ ngang yakengu, ‘Ita ayawan kekekawik kaknga tasiyok,’ ngang yakaing.
MAT 23:17 Ginu katukatum! Kaisa akusiya amin! Gol sake pakapu Anututane yot takwan gwene pewa gatakukingu takwan daknganggak. Siwan gol pewa gatakukingu wa sasanda yot takwan gwenu yapbike sanga buyambam siknga singgak ba dasing? Wena.
MAT 23:18 Siwan ginda anzing yakaing, ‘Aminu tapatuta sangana Anutue imuke buka pengamukaing gwende umana yake, Siakan, ngang yawanu wa sanga moi kundu. Ngana ita sanga wa Anutue imuke pengamukaing kakngae umana yake, Siakan, ngang yakengu ayawan kekekawik kaknga siakande tasiwik,’ ngang yakaing.
MAT 23:19 Ginu kaisa akusiya amin! Buka gwenu sangana Anutue imuke pengamukaingu takwan daknganggak. Siwan sanga Anutue imukaing kakngata buka wagwenu ayapbikgak ba dasing? Wena.
MAT 23:20 Unzingge buka gwenu sanga Anutue imukaing gwende umana yake siakan ngang yakengu wamna sangabamu une yuaingge kuut yawan kekekawik.
MAT 23:21 Siwan aminda yot takwan gwende umana yake siakan ngang yakengu wamna yot takwan gwendeat gatu Anutu you wagwene yuak kapae kuut yawan kekekawik.
MAT 23:22 Siwan aminu tapatuta enandang Anututa yuak komde umana yake siakan ngang yawanu wamna Anututa kekeknga akngane yuak kakngaat gatu Anutu kekeknga apaatde yawan kekekawik.
MAT 23:23 “Ginu mama wam yanindamumsa amikat gatu Ferisi amikat ngangu ginda toknga aknga apaning! Ginu genza gwakngayasa kaya amin! Ginda iyaknga kuupbam puyanenana katau kuut musaat pake usanzike kasam gatu tabapmensam gatu gwapda ngang usanzike kendewa kuku mingandaka singgakgan Anutue imuke mama wamu kwanga aknga tawake tasikaing. Ngana ginda wamu meya kananga aknga gwa teking. Unzing wamu nomana akngane amin usanzitnanga aknga gatu sanga kwikwiknga akngaat gatu Anutue natapa kekeknga siya aknga kuut gwa teking. Sike mama wamu wa meya kananga aknga dua teke sanga katau minga dakakan imanu take siwik,” ngang yanikut.
MAT 23:24 “Ginu kaisa kusiyata aminde kepi yeuyamunangge tasikaing! Ginda inguingutda yangga akngane yuwa kake kwaipamaba kuwa tangokaing binga tasikaing ngana ikwawa gamanda yangga akngane yuwan kake ngana ngok pamukaing binga tasikaing.
MAT 23:25 “Ginu mama wam yanindamumsa amikat Ferisi amikat ginda toknga aknga apaning! Ginu genza gwakngayasa kaya amin! Ginda bapusatane wam tawake kapzaat dopangzau kepmangan saukaing ngana sangaapa panangge toknga natake ginda gwaut wam yayuk mani pake kait pasike mani pakaing kakngatakan banipzaatang dokgak,” ngang yanikut.
MAT 23:26 “Ginu Ferisi aminu kaisa akusiya amin! Tupanu kapza amaakatangu sauwana kepman saakaya dudumna kuut siwik.
MAT 23:27 “Ginu mama wam yanindamumsa amikat Ferisi amikat ginda toknga aknga apaning! Ginu genza gwakngayasa kaya amin! Ginu unzing matmat gapma penu kwaknga gwenda pasikaing binga. Kepmanu kana dudumna siknga singgak ngana amaakatangu amindane kwataiat gatu apbukatanggakat ngang undang doke yuak.
MAT 23:28 Gikaya wa bingata yuaing. Aminda danduke amin noman ngang nataaing. Ngana banipzaatangu sanga kem wam gatu mama wam sandekaing kakngatakan doke yuak,” ngang yanikut.
MAT 23:29 “Ginu mama wam yanindamumsa amikat Ferisi amikat ginda toknga aknga apaning! Ginu genza gwakngayasa kaya amin! Ginda anzing yakaing, ‘Ninda tupa siknga bapuninda yuking komune yukumang gamu ninda ayanikapsa amin zipningge dua gatayamunam,’ ngang yake ayanikapsa aminu wa noman amin takwakge apbakngane matmatna tanomunuke tupa kwaiking komune yot matek mitake sanga kawa take siwikge sanga tasikaing.
MAT 23:31 Wamu wa yake tasikaing kakngata gisae yapii yakapmakaing. Ginu ayanikapsa amin zipbinggane zakngi.
MAT 23:32 Ayok. Ginda bapusata tuwanguke tasiking kaknga undang tasiwa puyuyok!
MAT 23:33 “Ginu gomok binga dandugwaukaingge Anututa ginu katap bapatang dua dapmambikge dasing tasining? Wena.
MAT 23:34 Siwan nata daninggat. Nata yanikapsaat natdetdetna kayaat Mosesde mama wam danindamumsa amikat ginde yanipewa kuning. Yanipewa ginde kuke daniwa natake ngana ginu iatnana kundu amin saamdakane zipa kumning. Siwan kundu moo zipa kumning. Siwan kundu kaipakapu miti yot gwene koke ipmapa zipmake kundu toknga takngatu takngatu yamuke yot gapma inandek tawatakuwawa yot gapma gapma inandek kuning.
MAT 23:35 Siwan tupa siknga aminu take aminu buyambam bapusata wai zipa kumbing. Yakap siknga Ebel tanguwa kupan kuku masande Sekaraia Berekaiatane waaknga bamzata Anutue yot takwan gwenu kautdu yuwan kaap Anutue imunangge wasau kautdu saak yuwan banakan komune tanguwa kumbut. Aminu take amin waakwak wai zipa kupa Anututa toknga akngana atzipbing aminde yamik kaknga atdamik.
MAT 23:36 Siakande daninggat. Zipa kumbinggane waiaknga ginu apmanu ayuamang komune nana aminda tokngabam apake kaning,” ngang Jesuta yanikut.
MAT 23:37 “Jerusalem nana! Jerusalem nana! Anututa yanikapsaat kuwikngaat yanipewan kuwawa ngana ginda asinggan inandek inandek supda zipa kungwakaing. Ginde butaya natake taau minga gwenda gwauya wam yawan matekngata apa piata usikwatapan amakatang yuaing binga ginu Jerusalem nana gatu gatu yandawamba ngana ginda apbitake yuaing.
MAT 23:38 Unzingge Anututa dapmake kuwan ginu gisatakan gatukande moo siknga yutning.
MAT 23:39 Siwan daniwa natapnong. Ginda na gatusa dua nandupning. Tapduknga ginu Buyambam tapaninda initewan apunggak ngang nanimbakngake yaning gwekatang gatusa nandupning,” ngang Jesuta yaniwan natapbing.
MAT 24:1 Siwan Jesuta Anututane yot takwan gwen teke kuwawan pandetnata yot wagwende daman gwene yot matek gwegwenu supda mitapbingu yeukngamunangge ie kukumang.
MAT 24:2 Siwan ngana ita gamok anzing ninikut, “Ginda sanga a kuupbam akaing ba dasing? Nata siakande daninggat. Sup yot anggwegwenu mitapbinggane suu gwendu amak aminda dua katewa sup notna gwendune engetanganu dua yuwik. Kuupbam zipbuke muba pimaning,” ngang ninikut.
MAT 24:3 Siwan Jesuta tawanu Oliv dakane yuwawan pandetnatakan ie kuku anzing inikumang, “Gata ninu niniyo. Zaapduknga sanga waakngata apik? Tuwangu zaakngata gamok apan kake ninda natdetnim. Gata gatu api tapduknga ayuamang gwenda wena siwikgen,” ngang inikwaikumang.
MAT 24:4 Inikwaitna yake anzing ninikut, “Ginu gwautnong. Aminu tapatuta ginu kem daniyak.
MAT 24:5 Aminu tapatuta enake apu natane umana yake anzing yaning. Anututa na tapan Krais dakngake gatandamuyaapa yuat ngang kem yawik. Ina unzakan sipdu sipdune aminu tapatu tapatuta enake apu wamu waakngakan kem yaning. Ina unzakan tasitakuwawa aminbamda kem wamu waaknga natapa siakan siwik.
MAT 24:6 Sike ginda nataawa keu komdune amak tasiwawa natapning. Gatu nataawa amnangge yawa natake ma satnawam. Sanga waakngata gamok apik ngana tapduknga wena siwik kakngatane tuwangu unin dua.
MAT 24:7 Siwan keu komduine nana aminda amau buyambam tasike amatakuning. Sike keu komdui tomna buyambam siknga natapning. Siwan miyamunu kepna kepna sining.
MAT 24:8 Sanga wa kuupbamu anzing. Toknga gamok mayaata engang tangaiwikge isinggak binga,” ngang ninikut.
MAT 24:9 “Tapduu waomune ginu aminde yama panggaganuke meya takngatu takngatu damuke kundu dasipa kumning. Unzing tasindamuwawa ngana natane umana gitna take yuwawa aminbamda ginde semna siknga natandamuning.
MAT 24:10 Siwan tapduu waomune aminbamda nae natapa kekekakut takngana tewa pimapan nae umanae yuaikatnana iwande kataune yamuke semna natayamuning.
MAT 24:11 Siwan aminu kundu Anututane ayanikapsa amin binga ngana kem amin dakngake wa aminda enake aminbamu kem yaniwa natapa siakan siwan undang pimaning.
MAT 24:12 Sike waiaknga buyambam siknga tasiwawa aminbamda banip gwaang nataaing kaknga atewa pimapik.
MAT 24:13 Ngana mamin amindaka kekeknga yuke meya waakngaatang dua pimake yuwiu yutningu tapduknga asandewik gwene Anututa kayuk yutnanga aknga wa aminde ayamik.
MAT 24:14 Siwan wamu Anututa amin panangge tasinggak kakngae wamu take aaknga keu kuupbam yakapa aminu kuupbamda maakngita natapana tapduknga asandewik,” ngang ninikut.
MAT 24:15 “Siwan ginda kawawa sanga wai siknga tupa yanikapsa aminu Daniel ngang iniking kapata tupa siknga ie yakuu kep takwan kopatang tasinanga dua ngana undang tasike yuwawan kaning ngang yanikut. (Siwan na wamu aaknga matanggat tapata anzing natake matanggat. Aminda wamu waaknga kendekengu katak siknga natapsok.)
MAT 24:16 Siwan tapduu wagwene aminu Judia kep komune yuaingu datang tawandakane kopnong.
MAT 24:17 Sike aminu yotna engatangan gwene yuwiu epu yoakatang koke sangana pananga dua.
MAT 24:18 Siwan aminu puyanane yuwiu yotna kuke got tauknga tanangge kunanga dua.
MAT 24:19 Sike maya musia kaa ba maya engangge ngwam yaman nakaingu tapduu wagwene meya buyak yutning.
MAT 24:20 Siwan tapduknga ginda atdatakuning gwende natake tumuk wam yake got tapduk siwik komune dua datakuningge gatu yuwatakak tapduk gwendune dua datakuningge kuut tumuk wam yanong.
MAT 24:21 Tapduu wagwene meya buyambam siknga siwik. Tapduknga kep tasike tekuuneta apu apmanu kuut meya wa binga takngatu tupa dua apbut. Siwan masan kaya meya wa binga wena.
MAT 24:22 Sike Anututa tapduknga wagwenu dapaknga dua isatakepikge yakut gamu aminbamu wena asiwan. Ngana Anututa papan aminabam dakngake yuya aminde natake tapduu wagwen dapaknga isatakepik.
MAT 24:23 Sike tapduu wagwene aminu tapatuta anzing daniwik, ‘Kanong! Krais gatanimuya apata andang yuak, ba ita atunzing yuak,’ ngang yawanu ginu, ‘Siakan,’ ngang ma natapam.
MAT 24:24 Sike, ‘Anututa na tapan Krais dakngake yuat,’ ngang kem yaya amikat, ‘Anututa na tapan ayanikapsa amin dakngake daniwa natapnong,’ ngang kem yaya amikatda enake duya kekeknga siknga takngatu takngatu pasining. Pasiwawa kake aminu buyambamda pimatning. Siwan aminu Anututa papan inane aminabama dakngake yuya amindaaya kuut siakan ngang natake undang pimatningge panziwa maiwik.
MAT 24:25 Natapnong! Nata ie gwa danit.
MAT 24:26 “Unzingge aminda anzing ba danining. Kanong! Ita atu amina wena kopatang yuak ngang daniwanu ugwak saau ma kuwam. Siwan gatu anzing ba yaning. Kanong! Ita you anggwekatang yuak ngang daniwanu siakan ngang ma natapam.
MAT 24:27 Ginu atnataaing. Tapduknga yapasikga siwanu kakaa waaknga gunzitda akonggak katangga kakaatake kuku gunzitda pukunggak katang kuwan aminu kuupbamda kaning. Siwan ina unzakan. Aminu kuupbamda kawawa na aminbamde notnaapa dakngake apit taknga anggaman kaning.
MAT 24:28 Keu akupsa aminda gupnata yuaing komune tinggigita asapu doke yuaing,” ngang ninikut.
MAT 24:29 “Tapduu wagwene meyambamu wa wena siwana zetgaman keunenana aminda meya takngatu takngatu kaning. Gunzitda zikaandaka siwan yekau kakaa dua siwan yekapdaau ena kakaa banakan komune nana saa sike deke pimapa kaning.
MAT 24:30 “Siwan tuwangu na aminbamde notnaapa dakngake yuat tapatane ena banakan komune siwan aminbamu keunenana aminda kawawa nata umana buyambam siwan kekekngana buyambam siknga aknganane yuke minga musatune yuke epa na nandugwautning.
MAT 24:31 Nandugwauke yuwawa nata pumu kumzang puyake angelana yanipewa kuke aminu Anututa papan aminabam dakngake yuaingu kepna kepna nana kuku pake pakapu unekan pening,” ngang ninikut.
MAT 24:32 “Ginda katau baapdaka kake natdetnong. Kainga yanggana kaya siwan tatakngi kayuk akopa kake anzingu atnatdekaing, ‘Apmanu kep takawan gunzitda isiwikge tapduknga gwa singgak,’ ngang yakaing.
MAT 24:33 Ina unzakan. Masande kawawa sanga wa kuupbam apa kakengu ginda atnatdetnong. Nata apitde tapduknga gwa dapakanggak. Aminu tapatuta yoakatang kopnangge apuke gwabok gwaune yuak binga tapduknga gwa dapakanggak,” ngang yanikut.
MAT 24:34 “Siakande siknga nata daninggat. Tapduk ayuamang komunenana aminda dua kumning gwene sanga wa kuupbam asapik.
MAT 24:35 Sanga kuupbam ena kakaa banakan komune yuaikat gatu kepdakane nana kuut wena asinanga ngana natane wama wena dua siwik,” ngang ninikut.
MAT 24:36 “Siwan aminu tapatuta tapduknga nata apitde dua nataak. Angela enandang nanaaya dua nataaing. Na Anututane waakngaaya dua nataat. Nanatakan ie atnataak.
MAT 24:37 Sanga Noata yukut komune nana aminda tasiking kakngakan tapduknga na aminbamde notnaapa dakngake yuat tapata gatu apit gwene tasining.
MAT 24:38 Tupa yangga buyambamu dua paptakut gwene aminu waakwakga nake tangoke maatna pake tasiwawa Noata dopangbam gwene kopbut.
MAT 24:39 Sike wa aminu dua natake unzakan tasike yuwawa yanggabamu apaptake apu aminu wa kuupbam zipa kumbing. Sike na aminbamde notnaapa dakngake yuat tapata apit gwene ina unzakan tasining.
MAT 24:40 Aminu tapaaya puyaangane yuwawat Anututa tapatu take tapatu atewik.
MAT 24:41 Sike maya tapaaya poyakge palaua pake tasiwawat Anututa tapatu take tapatu atewik.
MAT 24:42 “Unzingge ginu katak siknga tandakngake yutnong! Na gindane buyambam tapasata apitde tapduknga ginu dua nataaing.
MAT 24:43 Daniwa natanggamatanong! Tupanu yot toikga zaapduknga zikaane kuka aminda apikge katak natakengu ita tandakngake yuke dua katewan kuka aminu waapata yotna waike yotnaatang kopik.
MAT 24:44 Unzingge gikaya tandaknganong. Na aminbamde notnaapa dakngake yuat tapa tapduk gwendune ginda dua apik ngang natapning gwene asapit,” ngang ninikut.
MAT 24:45 “Sike puya aminu mamin tapata puyana pasiwan kake natdetdetna nomantapa ge puyanae katak siknga kayuak ngang ie yanim? Puya toikga puya aminu waapa tapan puya aminu kundu kayuke tapdukngane nanam yamikge asinggan yamik.
MAT 24:46 Siwan masande puya toikga gatu apuke kawan puya amina waapa wamu tupa inikut taknga tasiwik ngang kawanu puya aminu waapata apbakngayok ngang yakut.
MAT 24:47 Nata siakande siknga daninggat. Puya amina waapa sangana kuupbamde kuyana yuwikge tewik.
MAT 24:48 Siwan ngana puya aminu waapata wai amin dakngake yukengu musiaatang anzing natapik, ‘Natane buyambam tapanata zet gatu dua apik,’
MAT 24:49 ngang natake puya amin notna zipmake aminu atdatdaptaning amikat nake tangopning.
MAT 24:50 Siwan puya aminu waapatane buyambam tapanata gatu apik ngang dua natake puya aminu waapata kayuke tapduu ie dua natapik gwene asapik.
MAT 24:51 Apuke puya amina waapa gatukande siknga atasiwan maiwik. Initewan kuke gena gwakngaayana kaya aminu toknga pakaikat yutning. Undang yuke kwanamna kumzang sike kaakake yutning,” ngang ninikut.
MAT 25:1 “Siwan tapduu wagwene sanga Anututa amin panangge tasinggak kakngata maya katau kuut musaatda tasiking kaknga binga dakngake yuwik. Aminu tapatuta maatna take nanambam naningge amin bam yayawamban natake maya waakwau lamna pake kuke ie kayuking.
MAT 25:2 Siwan katau kautdu musa natdetdetna wena. Sike kautdu musa natdetdetna kaya.
MAT 25:3 Maya natdetdetna wena lamna apaking ngana kerosinkat dua pakapbing.
MAT 25:4 Sike maya natdetdetna kaya kerosina botol gopatang tukwaba pukuwan lamna buyak pakapbing.
MAT 25:5 Siwan aminu maatna pananga apata zet dua apan kake maya mateu kuupbam dapuna natake tuyuknga siwan apeking.
MAT 25:6 “Apeke yuwawa petakumat dakane wamu takngatu anzing yakut, ‘Aminu maatna gwa takut tapata asapunggak! Ginu apu kawa iat gatake yutnong,’ ngang yakut.
MAT 25:7 “Yawan maya mateu waakwau kuupbam enake lamna pandakngaking.
MAT 25:8 Pandakngake maya natdetna wenata natdetdetna kaya anzing yaniking, ‘Gindane kerosinza kautdu ninde nimunong. Nindane laminu akumnangge sikaing,’ ngang yaniwa
MAT 25:9 ngana maya natdetdetna kayata anzing yaniking, ‘Aho! Kerosinu buyambam dua. Ginde damukengu atdapnim. Ginu usiwam yot kuke gisa usinong,’ ngang yaniwa
MAT 25:10 waakwau usinangge akuwawa aminu maatna gwa takut tapata asapbut. Apan maya atandakngakingu iat gatake yoakatang nanambamu maya tapan sakingunin nanangge koke gwabou gitna yapukusiking.
MAT 25:11 “Koke gitna yapukusiwana maya mateu kerosin usinangge kukingu apu anzing yaking, ‘Buyambamtapa! Buyambamtapa! Gata gwabou ninde zitnimung,’ ngang iniwawa
MAT 25:12 ngana ita yake anzing yanikut, ‘Nata siakande siknga daninggat. Ginde dua nataat,’ ngang yanikut.
MAT 25:13 “Ina unzakan. Ginda tapduknga nata apit gwende dua natake katak siknga tandaknganong,” ngang ninikut.
MAT 25:14 “Sike sanga tapduk wagwene siwan kaning kaknga aminu tapatuta keu maa siknga komdune kuwik binga. Ita puya amina yayawamban apa inane sangaapa wa aminde katakngane yamukut.
MAT 25:15 Yamuke wa amindane natdetdet gatu kekekngana inandek inandek usanzike mani yamukut. Aminu tapatue 5,000 Kina imuke tapatue 2,000 Kina imuke tapatue 1,000 Kina imukut.
MAT 25:16 Unzing tasike kuwana aminu 5,000 Kina pakut tapata zetgaman puya tasike isakoke gatu 5,000 Kina kunduat pakut.
MAT 25:17 Siwan aminu 2,000 Kina pakut tapaaya puya tasike isakoke gatu 2,000 Kina kunduat pakut.
MAT 25:18 Siwan ngana aminu 1,000 Kina pakut tapata paku gapma kwaike mani wa buyambam tapanatane undang pakusopukut.
MAT 25:19 “Siwan puya toik waapata undang yusika tapduu mamaya siknga sandewana gatuna apuke, ‘Apnong. Siwan wamu yana takuwan,’ ngang yakut.
MAT 25:20 Yawan aminu 5,000 Kina isakoke pakuu pakapuke anzing yakut, ‘Buyambamtapa. Gata 5,000 Kina namukuyau kayo. Nata puya tasike 5,000 Kina kunduat isakoke pakum,’ ngang inikut.
MAT 25:21 “Iniwan yake anzing inikut, ‘Ga puya aminu take siknga. Gata take siknga tasikuyak. Gata sanga matekngae katak siknga kayukuyakge nata gapmaba sangabamde kuyana yuyo. Gata api naat unekan yuke bakngake yutzim,’ ngang inikut.
MAT 25:22 “Siwan aminu 2,000 Kina pakut tapaaya apu anzing yakut, ‘Buyambamtapa. Gata 2,000 Kina namukuyau kayo. Nata puya tasike 2,000 Kina isakoke pakum,’ ngang inikut.
MAT 25:23 “Iniwan yake anzing inikut, ‘Ga puya aminu take siknga. Gata take siknga tasikuyak. Gata sanga matekngae katak siknga kayukuyakge nata gapmaba sanga buyambamde kuyana yuyo. Ga api naat unekan gatake yuke bakngasim,’ ngang inikut.
MAT 25:24 “Siwan aminu 1,000 Kina pakut tapaaya asapu anzing inikut, ‘Buyambamtapa. Nata gae aminu tokngaapa ngang nataat. Keu kautdu saau aminu tapatuta nanam zak mukgau waangane gata buya apanggayak.
MAT 25:25 Unzingge na gae akgwauke gatane 1,000 Kinaka paku kepatang kwaipakusopukum. Gatane manika ana. Gika papso,’ ngang inikut.
MAT 25:26 “Iniwan ngana yake kaanga anzing inikut, ‘Ga kamun siknga apa! Aminu tapatuta keu komdune nanam zak mukgau nata apanggat ngangu siakande nataayak ba dasing?
MAT 25:27 Unzing natake dasingge gata natane manina mani yot gwekatangu dua pekuyak? Unzing pekuyak gamu nata gatuna apuke natane maninaat gatu isakoke penikat papam,’ ngang inikut.
MAT 25:28 “‘Ayok, ginda 1,000 Kina wa kaiwa kuwan aminu 10,000 Kinana kayaapae imunong.
MAT 25:29 Dasingge? Aminbamda sanga apaningu nata kunduat wa aminde ayamit. Siwan ngana aminu tapatuta sanga dua papikge sanga mateknga ita papiu nata akaiwa kuning.
MAT 25:30 Siwan puya aminu dangenau waapa ginda inikwasiwa epu kepman siknga zikaa dakaatang kuke kwanamu kumzang sike kaakake yuaing kopatang yuwik,’ ngang yakut,” ngangu Jesuta wamu waaknga ngang ninikut.
MAT 25:31 “Siwan masande na aminbamde notnaapa dakngake yuat tapata kekeknga akngana buyak apit. Naat angela kuupbapatda apnim tapduk gwene na buyambamtapa dakngake kekeknga aknganane yuwit.
MAT 25:32 Yuwawa aminu kuupbamda nae nomane pakapu yutning. Yuwawa nata usanzike dongu takngaa pewa ikwawa kayuak kapata usanzike sipsip kautdu saak peke memengu kautdu saak peyak binga usanzike pewit.
MAT 25:33 Peke aminu take amin takwau siyaapa saak sipsip binga peke aminu wai amin takwau kwana saak memeng binga pewit.
MAT 25:34 “Pekenga buyambamtapa yuke aminu siyaapa saak yutningu anzing yaniwit, ‘Ginu natane Nanata banip kwikwik natandamunggak aminu apnong. Tupa siknga kepat yekapat dua tasike tekut gwekatang Anututa amin panangge tasinggak kaknga ginde gwan tandakngatekut. Kekeknga gepbiatang yutnanga waaknga ginda apu tanong,’ ngang yaniwit.
MAT 25:35 Dasingge? Tupa na tomda yuwawa ginda nanamu nae atnamuking. Nata yanggae natapa ginda yangga namuking. Nata amin yotde apa ginda nanitake yotzane takuking.
MAT 25:36 Nata kwangga yuwawa ginda tauu nae namuking. Nata mait siwa ginda na toiking. Nata kaautde yuwawa ginda apu na atnandupbing,” ngang yaniwit.
MAT 25:37 “Yaniwa yake anzing nanining, ‘Buyambamtapa. Zaapduk ninda ganduwatna ga tomba natapi ninda nanamu gae gamukumang? Siwan zaapduk ga yanggae natapi ninda yangga gae gamukumang?
MAT 25:38 Sike zaapduk ninda ga ganduwatna gata amin yotde api ninda ganitake yotninu takukumang? Siwan zaapduk ninda ga ganduwatna gata kwangga yuwi ninda gae tauu gamukumang?
MAT 25:39 Sike zaapduk ninda ganduwatna ga mait sike ba kaautde yuwawi ninda kuke gandupbumang,’ ngang nanining.
MAT 25:40 “Naniwa nata buyambamtapa yuke yake anzing yaniwit, ‘Nata siakande siknga daninggat. Sanga ginda notna umana wena apasimde tasikingu sanga wa kuupbam nae tasingamukaing ngang dandupbum,’ ngang yaniwit.
MAT 25:41 “Unzing yanike aminu kundu kwana saak yutningu anzing yaniwit, ‘Ginu toknga pananga amin! Ginu na napmake katau dua kungwanggak gwenu Anututa tandakngatekuu Setenkat puya aminaatda kuke toknga apaning gwene kunong.
MAT 25:42 Dasingge? Tupa na tomda yuwawa ginda nanamu dua namuking. Nata yanggae natapa ginda yangga nae dua namuking.
MAT 25:43 Nata amin yotde apa ginda na yotza dua nanitakuking. Nata kwangga yuwa ginda nae tauu dua namuking. Nata mait sike ba kaautde yuwawa ginda apu na dua nandupbing,’ ngang yaniwit.
MAT 25:44 “Unzing yawana yake anzing nanining, ‘Buyambamtapa. Zaapduk ninda ganduwatna ga tomba ba yanggae natapi ba gata amin yotde api ba ga kwangga yuwawi ba ga mait sike ba ga kaautde yuwawi ninda gae take dua tasinggamukumang,’ ngang naniwa
MAT 25:45 yake anzing yaniwit, ‘Nata siakande siknga daninggat. Sanga ginda aminu umana wenaapae dua tasingamukingu sanga wa kuupbam naeaya dua tasingamukaing ngang dandupbum,’ ngang yaniwit.
MAT 25:46 “Yaniwa wa aminu kuku toknga asinggan pake yutning. Ngana amin nomanu paku kayuk asinggan asinggan yutning,” ngang ninikut.
MAT 26:1 Siwan Jesuta wamu wa kuupbam yawan puyuwana ninu pandetna anzing ninikut,
MAT 26:2 “Ginu atnataaing. Gunziu gweaya kana sandewana Pasova yuwatakak tapduk takwan gwenu kanim. Siwana na aminbamde notnaapa dakngake yuat tapa aminda yeuyama amin saamdakane nutning,” ngang ninikut.
MAT 26:3 Siwan tapduu waomune Anutue yot takwan gwene pasiya amindane takeakwakat mama wam yanindamumsa amikat gatu Judia amindane take amikatda Anutue yot takwan gwene pasiya aminde tupan tapa umana Kaiafas ngang iniking. Itane yotnane paut tasiking.
MAT 26:4 Wamu Jesu kem kusopuke inike tanggaganuke tanguwa kupikge wam yake
MAT 26:5 anzing yaking, “Ninda tapduk takwan gwende nanamu buyambam sake nakamang gwene sanga dua tasinim. Tasina aminbamda enake amak tasinang,” ngang yaking.
MAT 26:6 Siwan Jesuta Betani yot gapmane aminu wata kekeknga sikut tapa gwan sandekngamukut tapa Saimon ngang iniking kapae yotnane yukut.
MAT 26:7 Yuwawan maya tapatu wel gwendu manina buyambam sikngata usikuu botonu gomdu supda tasikwaapa kuku gomdusipatang tukngwamban pukuku tekngatusim takapbut. Takapuke Jesuta nanamu atnayuwawan gwapakngane wel yangga wa tukngwangamukut.
MAT 26:8 Tukngwangaman kake ninu pandetnata musipminu toknga natake nisa anzing yakumang, “Dasingge wel yangga wagwenu moo siknga tukngwanggak?
MAT 26:9 Wel yangga wagwenu yamuna kunduta usiwa manina buyambam siknga pake sangana wena aminde yamunanga,” ngang yakumang.
MAT 26:10 Unzing yana Jesuta anzing ninikut, “Dasingge ginda maya waapae meya imukaing? Ita sanga take sikngaaknga tasingamunggak.
MAT 26:11 Sike sangaapana wena aminu gikat gatake yutning. Tapdukbamu ginda gatayamunanggengu take tasining. Ngana na, gikat gatake asinggan dua yutnim.
MAT 26:12 Mayata wel yangga gupmane tukngwanggau ita sanga wa tasinggau matmat katang pukuwitde tandaknganggak.
MAT 26:13 Nata siakande siknga daninggat. Keu kuupbam natane wama take waaknga ngang yakapning komune sanga maya aapata tasingamunggak kakngae kuut yakapa ie kuut natanggamataning,” ngang ninikut.
MAT 26:14 Siwan tapduu waomune pandetna 12-pat nana tapatu umana Judas, Iskeriot yot gapmane nanaapa. Ita Anutue yot takwan gwene pasiya amindane takeakwakge kuke anzing yanikut,
MAT 26:15 “Ginda mani datdasing nae nama nata nina aminu waapa ginde katakzane yeutdamit,” ngang yaniwan mani silwa sasan 30 ngang kendeke imuking.
MAT 26:16 Ima pake tapduu waomune tuwanguke tapduknga Jesu wa aminde kataune yeuyamik gwen kanangge tasikut.
MAT 26:17 Siwan tapduk takwanu wagwene sanga poyakat sawa paptakaingu teke poyau moo sake nake yukinggane gunziu tupan gwene ninu pandetnata kuku Jesue anzing inikumang, “Gata ninu Pasova tapduk gwende nanamu zane tandakngana nanim,” ngang inikwaitna
MAT 26:18 yake anzing ninikut, “Ginda yot Jerusalem gapmane koke aminu tapatue kuke anzing ininong, ‘Ayanindamumsa apata anzing yak. Natane tapduknga akupitde dapaknga gwa singgak. Naat pandetnaatda Pasova tapduk gwende nanamu gatane yotdane nanim ngang yak,’ ngang ininong.”
MAT 26:19 Siwan Jesuta ninikut taknga tasike Pasova tapduk gwende nanamu tandakngakumang.
MAT 26:20 Siwan bangee nanam nanangge natake iat pandetna katau kuut musa gatu kepianganu tapaaya ngangga apukwikumang.
MAT 26:21 Pukwike atnayuwatna anzing ninikut, “Nata siakande siknga daninggat. Gikatnana tapatuta na natane iwanae yeuyamik,” ngang niniwan
MAT 26:22 musipminu meya siknga natake tapatu tapatuta inandek inandek inikwaikumang, “Buyambamtapa. Na ba dasing,” ngang inina
MAT 26:23 yake anzing ninikut, “Aminu waapa dopang gwekatangu katakngiu kuutda wasikamak kapata na yeuyamik.
MAT 26:24 Ngan, na aminbamde notnaapae Anututane wapatang matakut takngakan singamik. Ngana aminu ayeuyamik kapata toknga apapik. Mingata dua bokngikut gamu take siwan,” ngang yawan
MAT 26:25 Judas ayeuyamik kapata yake anzing inikut, “Aana. Na ba dasing,” ngang iniwan yake inikut, “Gika unin yanggayak,” ngang inikut.
MAT 26:26 Siwan atnayuwatna Jesuta poyak pake Anutu inimbakngake apuke pandetnae nimuke anzing ninikut, “Ginda pake nanong. A natane gupma,” ngang ninikut.
MAT 26:27 Niniwan pake poyau wa nana puyuwana kap wainu gomdu take Anutu inimbakngakenga nimuke anzing ninikut, “Ginu kuupbamda anggomune tangopnong.
MAT 26:28 Sanga wa natane daknga. Nata kungwake daknga tungwaba Anututa wamu kwikwiknga kayuk kaknga yawan kekekawik. Nata kungwake daknga tukngwaba Anututa banip zikaa akngana tapan tekwamban aminbamdane waiakngana sandeyamikge tukngwambit.
MAT 26:29 Daniwa natapnong. Apman gatu masan ngangu wain yangga aknga dua tangoke yusika kuku tapduknga Anututa amin panangge tasinggak kaknga buya aawik gwene gikat gatake wain yangga kayuk kaknga tangopit,” ngang niniwan tangoke
MAT 26:30 kau takngatu taikenga epu kepman kuke tawanu Oliv dakane kopbumang.
MAT 26:31 Siwan koyuk anzing ninikut, “Anututane wapatang anzing matakut, ‘Nata aminu sipsipde toiknga tanguwa kupan sipsipnata unda undang datakuning ngang matakuu zikaa anggwene buya unin asaawik. Aminda na nuwa kake ginda nae natapa kekekakut takngata apimapik.’
MAT 26:32 Nuwa kungwake yusika gatu gweake nata gamok ginde Galili kuwit,” ngang niniwan
MAT 26:33 Pitata yake anzing inikut, “Guwa kupi ganduke kuupbamda pimatning ngana na unzing dua pimapit,” ngang inikut.
MAT 26:34 Iniwan yake anzing inikut, “Nata siakande siknga ganinggat. Zikaa anggwene taakga wamu dua yawawan gata natane umana sipmaat sipduat takusopuwiyak,” ngang inikut.
MAT 26:35 Iniwan yake anzing inikut, “Nata gaat kuut nisipa kumzimde yawanu nata gatane umanda dua takusopuwit. Wena siknga,” ngang yawan pandetna kuupbamda unzakan yakumang.
MAT 26:36 Siwan Jesuat ninu pandetnaatda keu Getsemani ngang inikaing komune kukumang. Kukenga pandetna anzing ninikut, “Ginu ane pukwike yuwawa nata atune kuke tumuk wam yawit,” ngang ninike
MAT 26:37 Pitaat gatu Sebeditane waakngaapaat ngang papan kuking. Kundusim kuke meya siknga natake
MAT 26:38 anzing yanikut, “Nata meya siknga natake akupanu take sinanga,” ngang yanikut. “Na kuke tumuk wam iniwawa ginu ane yuke gikaya kayuk yutnong,” ngang yanikut.
MAT 26:39 Yanikenga kundusim kuke nomda pimake tumuk wamu anzing yakut, “O Nana! Take siwanu meya wa kawit taknga sandekngamuyo. Ngana gata nae banip ma tawambim. Aho. Gata gikae banip tawamso,” ngang yakut.
MAT 26:40 Yekenga pandetnae gatu apuke kawan dapuna pekgawa kakut. Kake Pita anzing inikut, “Dasing? Nata yuwawa gikaya kundusim kayuk yutnanga dua ba dasing?
MAT 26:41 Ginda kayuk yuke tumuk wam yanong. Sanga gin pasiwa sinangata ginde apsak. Siakan. Banipzaatang kayuk yutnangge nataaing ngana ginda tuyuknga natake pekaing,” ngang yanikut.
MAT 26:42 Yanikenga gatu kuke tumuk wamu anzing yakut, “Nana. Meya wa kawit taknga napbitnanga dua siwanu nata akawit. Gikae banipban tawamso,” ngang yake
MAT 26:43 gatu apuke kawan dapunae siwan kai tuyuknga siwa apekgawa kakut.
MAT 26:44 Kake gatu peke kuke tumuk wamu sipduat yawan sipmaat sipduat dakngakut. Tumuk wamu tupan yakut takngakan yakut.
MAT 26:45 Siwan masande gatu apuke pandetna anzing yanikut, “Ginu gatu gatu danit ngana dapunza asinggan peke yuwatakakaing ba dasing? Natapnong! Tapduknga na aminbamde notna dakngake yuat tapa wai aminde katakngane yeuyamuningge gwa singgak.
MAT 26:46 Ginu enawa kuna. Kanong! Aminu ayeuyamik kapata gwa apunggak,” ngang yanikut.
MAT 26:47 Siwan Jesuta wamu waaknga ayayuwawan pandetna 12-pat nana tapatu umana Judas. Iat aminbampat gatake apuke paip gatu zagwa ngang pake apbing. Anutue yot takwan gwene pasiya amindane takeakwakat gatu Judia amindane take amikatda yanipewa apbing.
MAT 26:48 Siwan aminu ayeuyamunanga apata tuwangu takngatu wa aminde tupa yamuke anzing yakut, “Nata aminu asinimbakngawit tapa Jesu unin. Ginda waapa atanggaganutnong,” ngang yakut taknga tasinangge natake
MAT 26:49 zetgaman Jesue apuke anzing yakut, “Zikaane Aana,” ngang inimbakngakut.
MAT 26:50 Inimbakngawan Jesuta anzing inikut, “Notna. Sanga tasinangge natake apuyau zetgaman tasiyo,” ngang iniwan wa aminu inengan apu Jesu katakngita take tanggaganuking.
MAT 26:51 Tanggaganuwa aminu Jesuat yukumakatnana tapatuta paipna kaitakakoke Anutue yot takwan gwene pasiya aminde tupan tapatane puya amina maaknga patdewan pimapan
MAT 26:52 kake Jesuta anzing inikut, “Paipba tangine teyo. Aminu kuupbamda paipda amningu paipde akumning.
MAT 26:53 Ga dua ba nataayak? Nata Nanae iniwa angela buyambam siknga 72,000 zetgaman yanipewan apu gatangamuning ngang dua natake paipbata amnangge tasinggayak ba dasing?
MAT 26:54 Sike ngana nata angelae iniwa apu gatangamanu Anutue wamu nata kupitde mataking kaknga buyana dasing aawik? Wena,” ngang inikut.
MAT 26:55 Inikenga aminbamu anzing yanikut, “Ginu na tanangge apuke paip gatu zagwa ngang pake ginda kuka aminu tapatu wamnangge apukaing ba dasing? Tapduk bamu nata Anututane yot takwan gwene yuke aminbam yanindamuba nanduke ngana ginda na dua tanggaganukaing.
MAT 26:56 Ngana ayanikapsa aminda tupa siknga ngang yakapbingu buyana asaawik. Unzingge sanga wa kuupbamu apunggak,” ngang yanikut. Yaniwana pandetna kuupbamda Jesu ateke datakukumang.
MAT 26:57 Sike aminu Jesu tanggaganukingga take Anutue yot takwan gwene pasiya amindane tupantapa umana Kaiafas. Itane yotnane takuking. Siwan mama wam yanindamumsa amikat gatu Judia amindane take amikau pauu atasike yuwawa undang takuwawa
MAT 26:58 Pitata masa masa kuyawakut. Kuyawake kuku Anutue yot takwan gwene pasiya aminde tupan tapatane yot daman gwene kopan taukdapakat yuking. Siwan Jesue dasingga tasingamuning ngang natake ita kayukut.
MAT 26:59 Siwan Anutue yot takwan gwene pasiya amindane takeakwakat gatu sios kaunsil amikatda aminu Jesue kem wam yawat tanguwa kupikapaande yawaking.
MAT 26:60 Yawawawa aminbamda apuke temanggagunuke yake wamu inata yawa atangutningge wamu buya kundukan dua siwan masande aminu tapaayata apbumayak.
MAT 26:61 Apuke waapaatda wamu takngatukan anzing yakumayak, “Aminu aapata anzing yawan kakumak, ‘Nata Anututane yot takwan gwenu waike tapduu gweaat gwenduatdekan gatuna mitapit,’ ngang yawan kakumak,” ngang yakumayak.
MAT 26:62 Yawat natake Anututane yot takwan gwene pasiya amindane tupan tapata enake Jesu anzing inikut, “Gata wamu takngatu yake yananga dua ba dasing? Dasingge wamu waaknga gae yakamayak,” ngang iniwan
MAT 26:63 ngana wamu dua yakut. Yake dua iniwan kake tupan aminu waapata anzing inikut, “Nata siakande siknga Anutu kayuk yuak kapae umande ganikwaiwa gata asiknga ngang niniyo! Ga Anututa tapan Kraistapa dakngake Anututane waaknga yuayak ngang kakengu gata niniwi natapnim,” ngang iniwan
MAT 26:64 yake anzing inikut, “Gika gwa yanggayak. Ngana nata daninggat. Apman gatu masan ngang ginda nanduwawa na aminbamde notna dakngake yuat tapata Anutue kataknga siyaapa kekeknga kuupbamu kayaapane yuke minga musane yuke asepuwawa nandupning,” ngang inikut.
MAT 26:65 Unzing iniwan natake tupan aminu waapata bania toknga siknga natake tauknga wetzukuke anzing yakut, “Ita Anutune umana akngana yaitapaakusinggak. Ninda ie wam yakapningge aminu kunduat dua yayawanim. Wena. Ita Anutue umana akngana gwa yaitapaakusiwan nataamang.
MAT 26:66 Ginu wamu wa usanzike dasing nataaing,” ngang yawan yake, “Ita akumnanga aknga yanggak,” ngang yaking.
MAT 26:67 Yake aapda Jesue nomna suyapbike atanguking. Siwan kunduta aamna wesike
MAT 26:68 anzing iniking, “Ga Anututa tapan Krais dakngake ayanikapsa apa yuayaknga kakengu mamin amin tapata gukgakge umana yayo,” ngang iniking.
MAT 26:69 Siwan Pitata kepman yuke yot daman gwene pukwiwawan puya aminu maya tapatuta kuku anzing inikut, “Gakaya Jesu Galili kep komune nanaapaat yuaing,” ngang inikut.
MAT 26:70 Iniwan ngana Pitata tawak yake aminu kuupbamde kaine anzing yakut, “Na wamu gata wa yanggayak kaknga dua nataat,” ngang inikut.
MAT 26:71 Inike yusika kepman paku damandane gwabok gwaune kepman kuke yuawan maya tapatuta kake aminu inengan yukingu anzing yanikut, “Aminu aapa Jesu Nasaret yot gapmane nana apaat yuaing,” ngang yanikut.
MAT 26:72 Yaniwan natake Pitata gatu siakan siknga ngang tawak wam yake, “Na aminu aapae dua nataat,” ngang yakut.
MAT 26:73 Siwan masande kundusim yuke kuku aminu kunduta Pita anzing iniking, “Siakande siknga. Aminu gaapa dongu waakwakatnana. Gatane wamba yawi natapna guyakga Galili nanaapata yanggayak ngang nataamang,” ngang iniwa
MAT 26:74 apaa siknga anzing yakut, “Siakande dua daniwa Anututa tokngabam atnamanu noman siwik. Na aminu waapae dua nataat. Wena siknga,” ngang yawana taakga wamu yakut.
MAT 26:75 Yawan Pitata wamu tupa Jesuta inikut takngae anzing natdekut. Taakga wamu dua yawawan gata sipmaat sipduat nae dua nataat ngang yaya ngang inikut takngae natdeke epu kepman kuke kwanamu kumzang sikut.
MAT 27:1 Siwan akwakawan Anutue yot takwan gwene pasiya amindane takeakwau kuupbapat gatu Judia amindane takeakwakatda Jesu tanguwa kupikge wamu yaking.
MAT 27:2 Yake napda wamake taku aminu tupantapa Pailatde imuking.
MAT 27:3 Siwan Judas Jesu yeuyamukuu waapata kawawan Jesue wam yaitapakusike tokngabam imuke tasiwawa kakut. Tasiwawa kake butaya natake mani 30 silwa pakuu gatuna Anutue yot takwan gwene pasiya amindane takeakwakat gatu Judia amindane take amikatde yamunangge
MAT 27:4 pakuke anzing yanikut, “Nata waiaknga tasikum. Nata aminu gutongana wenaapa yeutdamukumde ita kupik,” ngang yaniwan ngana yake anzing iniking, “Ninde sanga dua. Gikae sanga,” ngang iniwa natake
MAT 27:5 mani wa Anututane yot takwan gwene mupewan kuwa kuke nap wasinangge kukut.
MAT 27:6 Kuwawan mani wa pake anzing yaking, “Mani a amin tangutna kupikgane pake miti yotde maniat undanggan pena take dua siwik,” ngang yaking.
MAT 27:7 Yake paut tasike wamu takngatu yawa kekekawan mani wa pake keu gapma pasikaingu komdu yotna maa nana aminde matmatnae usiking.
MAT 27:8 Unzingge keu waomu umana Akeldama tana tekwamban dak tukngwambikge mani imukingga keu usiking kom ngang inikingu apman kaya asinikamang.
MAT 27:9 Sanga unzingu wa sikut takngae ayanikapsaapa Jeremaiata Anututane wamu takngatu yake tupa siknga anzing yakut, “Isrel nana kunduta aminu waapa tanggaganutnangge natake, ‘Mani silwa 30 ngang gamuna ninde yeutnimuyo,’ ngang yake imukingu pake
MAT 27:10 Anututa nanikut takngakan tasike keu gapma pasikaingu komdu usiking,” ngang Jeremaiata yakut taknga buya unin aakut.
MAT 27:11 Siwan Jesu aminu tupan tapae kaine tewa yuwan anzing inikwaikut, “Ga Judia amindane buyambamtapa ba dasing,” ngang inikwaiwan, “Gika unzing unin yanggayak,” ngang inikut.
MAT 27:12 Inike yuwawan Anutue yot takwan gwene puya pasiya amindane takeakwakat gatu Judia amindane take amikatda kem wamu ie yawawa ngana wamu takngatu yake dua yaniwan
MAT 27:13 kake Pailatda anzing inikut, “Gata wambamu gae wa yakaingu dua natayak ba dasing,” ngang iniwan
MAT 27:14 ngana wamu takngatu Pailatde yake dua inikut. Dua iniwan kake nangaakan natapbut.
MAT 27:15 Sike nakanu kuupbam tapduk takwanu wa binga gwene aminu tupan tapata kaaut aminu tapatu asandetewan kunggak. Aminbamda aminu tapatu sandetewan kuwikge umana yawanu Pailatda aminu waapakan sandetewan kunggak.
MAT 27:16 Siwan tapduu waomune aminu wai siknga tapatu umana Barabas ngang iniking kapata kaautde yukut.
MAT 27:17 Siwan ie natake aminbamda unekan pakapu yuwana Pailatda anzing yanikut, “Ginu nata mamin sandetewa kuwikge nataaing? Nata Barabas sandewit ba Jesu umana Krais ngang inikaing kapanin sandetewa kuwik ba dasing,” ngang yanikut.
MAT 27:18 Sike Pailatda natapan Jesue semna natangamuke wamu ita yawikge takapuing ngang anggaman natake wamu waaknga ngang yanikut.
MAT 27:19 Yanike wam yake usanziya komune yuwawan maatnata wamu takngatu anzing tewan apbut, “Gata sanga takngatu amin nomanu waapae ma tasiwim. Zikaane mia aminu waapae kake meya siknga natat,” ngang inikut.
MAT 27:20 Siwan Anutue yot takwan gwene puya pasiya amindane takeakwakat gatu Judia amindane take amikatda aminbam yanindatdaukgawa yanggamatake Pailatda Barabas sandetewan kuwan Jesu tanguwa kupikge iniking.
MAT 27:21 Iniwa natake gatuna anzing yanikut, “Aminu ayuamayak kapaakatnana mamin tapa sandetewa kuwikge nataaing,” ngang yaniwan yake, “Barabas,” ngang yaking.
MAT 27:22 Yawa yake anzing yanikut, “Waapa sandetewa kuwanu Jesu umana Krais ngang inikaing kapae nata dasing tasiwit,” ngang yaniwan kuupbamda anzing yaking, “Amin saamdakane tanguyo,” ngang yawa
MAT 27:23 Pailatda anzing yakut, “Dasingge? Ita gutonga dasing kaknga tasikut,” ngang yaniwan ngana apaya siknga yanggamatake, “Amin saamdakane tanguyo,” ngang yaking.
MAT 27:24 Siwan Pailatda kawawan itane wamu take dua siwan amau buyambamda enatnangge siwan kake yangga kundu pake aminu waakwakge kaine tuwangu takngatu tasinangge natake kataknga sauke anzing yakut, “Na ie dau wena. Gisae sanga,” ngang yanikut.
MAT 27:25 Yaniwan kuupbamda yake anzing iniking, “Ie dau nisae gatu nindane waaknginkatde apik,” ngang iniking.
MAT 27:26 Iniwa natake Pailatda Barabas sandetewan kuwan amina yaniwan Jesu ipmapa tanguke amak aminde kataune amin saamdakane tangutningge yaman taking.
MAT 27:27 Siwan Pailatdane amak aminu kunduta Jesu Pailatde yotnane takoke amak aminu waakwakatnana kuupbamda ie kuke doke yuking.
MAT 27:28 Siwan itane tauknga sandeke tauu gamana sandu buyambam tapatane binga tasingamuking.
MAT 27:29 Tasingamuke nau bombingga gwasike gwapakngane kupnae buyambam tapatane binga gwapungamuking. Gwapungamuke pitamu tapatu kataknga siapane iman buyambam tapata binga take yuwawan inengan kuku muna puke ie sapdut wamu anzing iniking, “Judia amindane buyambamtapa! Gata asinggan asinggan yuyo,” ngang inike
MAT 27:30 aapda suyapbike pitamu wa iman takut tapa take gwapakngiatang tanguking.
MAT 27:31 Siwan sapdut wamu wa iniwa puyuwana tauknga wa sanu sandeke inane tauknga gatu pasingamuke take amin saamdakane tangutnangge takuking.
MAT 27:32 Siwan take kusika aminu Sairini yot gapmanenana tapatu itane umana Saimon ngang iniking kapata apan iniyapike Jesutane amin saamdaka ima gwaamutake kukut.
MAT 27:33 Siwan keu komdu umana Golgota ngang inikaing. Sike tana tekwamban anzing yanim. Gapak gwikgwit kep ngang yanim.
MAT 27:34 Sike keu wakomune kundoke wainu kundu marasinu kaknga kunduat tasikingu Jesue iman tangopan gupna bakawan toknga siknga dua natapikge iman tangopan siwan dua tangopbut.
MAT 27:35 Siwan amin saamdakane tangukenga kat binga tasike itane tauknga usanzike panangge tasiking.
MAT 27:36 Tasike usanzike pakenga pukwike ie kayuking.
MAT 27:37 Sike wamu tangutningge yawa kekekakut taknga matake amin saamdaka nomnane tuptake wamu waaknga tanguking. Anzing mataking, “Aminu aapa Jesu Judia amindane buyambamtapa,” ngang mataking.
MAT 27:38 Sike Jesu tangukingune wesim kuka aminu tapaat kuut zipbing. Tapatu siyaapa saak tanguke tapatu kwanaapa saak tanguking.
MAT 27:39 Siwan aminda kungapuyuk kake gwapakngi makaike ie sapdut wamu anzing iniking,
MAT 27:40 “Aminu gaapa Anututane yot takwan waike tapduu gweaat gwenduatdekan mitanggaunin. Gika gatanggamuyok! Sike ga Anututane waaknga kakengu amin saamdaka take ep,” ngang iniking.
MAT 27:41 Iniwa Anutue yot takwan gwene pasiya amindane takeakwakat gatu mama wam yanindamumsa amikat gatu Judia amindane take amikatda sapdut wamu anzing yaking,
MAT 27:42 “Ita aminu kundu akgatayamukut ngana inae gatangamunanga dua,” ngang yake tapatekwa wamu takngatu anzing yaking, “Ita ninu Isrel amindane buyambam tapata yuak. Ayok. Ita amin saamdaka teke epana ninu ie natapna kekekawik.
MAT 27:43 Ita Anutue natapan kekekawan, ‘Na Anutue waak,’ ngang yakut. Ayok. Anututa ie take natakengu apman gatangaman epan,” ngang yaking.
MAT 27:44 Yawa aminu zipmake sangana kukae panangge tasikumayak kapaau Jesuat wesim zipbing tapaatdaaya kuut sapdut wamu waakngakan yakumayak.
MAT 27:45 Sike kepmaom zikaa keu kuupbam sike kuku bangee siwan
MAT 27:46 Jesuta inae wam tangan apaa anzing yakut, “Ilai, Ilai, lema sabaktani,” ngang yakuu tana tekwamban, “Anutuna! Anutuna! Dasingge gata na napmambi yuat,” ngang yakut.
MAT 27:47 Yawan ngana aminu kundu inengan yukingu wamu waaknga natake anzing yaking, “Aminu aapa Ilaija tupa siknga nana yanikapsa apae yatawanggak,” ngang yaking.
MAT 27:48 Siwan zetgaman aminu wa yukikat nana tapatuta isapmake kuku yanggabam gwenenana misa papaanga kaya wangatu take takapu wain yangga kapanga sikut takngane tewan bukatawan wa pitamu tapatune ukgouke Jesuta atangopikge imukut.
MAT 27:49 Iman ngana kunduta, “Teng,” ngang inike, “Kayutna siwik. Ilaijata apu apmeba gatangamik ba dasing,” ngang yaking.
MAT 27:50 Siwan Jesuta gatuna wamu apaa yake weenata asakowan akumbut.
MAT 27:51 Siwan tapduu waomunekan tauu Anututane yot takwan gwene mitapa pimakut sanu enaneta wesiwan amunane epu dewan saaya dakngawan miyamun siwan suu buyambamu atapa
MAT 27:52 kepda pukapa matmat gapma gapma kwangga yuwawa Anututane aminabamu tupa gwa kumbingu asenaking.
MAT 27:53 Asenake masande Jesuta gatu enawana matmat gapma gapma peke Jerusalem gapmane koke anggaman siwa aminbamda kaking.
MAT 27:54 Siwan amak aminu tupan tapaat iat gatake yukikatda Jesue kayuke kawawa miyamun siwan kawawa sangabamu siwan kumzang siknga gwauke anzing yaking, “Siakande siknga! Aminu aapa Anututane waaknga,” ngang yaking.
MAT 27:55 Sike maya buyambamda Jesuta dua kumbut gwene i tawake keu Galili komu teke i gatangamunangge apbingu wesim wesim yuke katasiking.
MAT 27:56 Sike maya waakwau yukikat nana tapatu umana Maria Magdala yot gapmane nanaapa. Siwan tapatu Maria Jemskat Josepatdane minga. Siwan tapatu Sebeditane waakngaapatdane minga ngangga katasike yuking.
MAT 27:57 Siwan bangee aminu tapatu buyana babantapa umana Josep. Arimatia yot gapmane nanaapata Jesutane pandetna apata
MAT 27:58 Pailatde kuku inikwaike Jesutane gupnasan tanangge inikut. Iniwan natake Pailatda amina yaniwan Jesutane gupnasan ie imuking.
MAT 27:59 Siwan Josepda gupna take tauu kwaknga dudumna siknga sanda tapan kopan
MAT 27:60 matmat inane kayuu supgapbau suu buyambam dakaatang tasikut dakane teke suu buyambamu gwendu ikomban apu supgapbatde gwabokgwak umukusiwan akukut.
MAT 27:61 Unzing tasiwawan maya tapaaya Maria Magdala nanaapaat gatu itane tangeatda supgapbaune wesim pukwike kayukumayak.
MAT 27:62 Sike kwep tapduknga yuwatakak gwendane sanga gwa tandakngaking gwekatangu Anutue yot takwan gwene pasiya amindane takeakwakat gatu Ferisi amikatda Pailatde kundoke
MAT 27:63 anzing iniking, “Buyambamtapa. Ninda wamu takngatu kem aminu waapata kayuk yuke yakut takngae natanggamatakamang kaknga ngang ganinim. Ita anzing yakut, ‘Tapduu gweaat gwenduat yukenga na gatuna enawit,’ ngang yakut.
MAT 27:64 Unzingge gata yawi matmat gwene yuke katak siknga tapduu gweaat gwenduat kayutnong. Pandetnata apu gupnasanu kukae take aminbamu anzing yanining. Ita matmat gapmaneta gatu enak ngang yaninang. Kemu masan nana akngata kemu tupan nana aknga yapbimsak,” ngang iniking.
MAT 27:65 Iniwa yake anzing yanikut, “Ginda aminu akayutnanga kundu pake yanipewa kuke katak siknga matmat gapma kayutnong,” ngang yaniwan
MAT 27:66 kuke matmat gapmane tuwangu sup gwene pasap tasike amak aminu kundu akayutningge peking.
MAT 28:1 Siwan yuwatakak tapduk gwenu gwa sandewan kepda kwakawana sande tembana siknga Maria Magdala yot gapmane nanaapaat gatu itane tangenaatda enake matmat supgapbat kom kanangge kukumayak.
MAT 28:2 Kuwawat ngana miyamunu buyambam siwan Anututane angelata enane sikngaatangga epu sup gwen ikotakweke wagwene engatangan pukwikut.
MAT 28:3 Pukwike yuwawan nomna yapasik binga waenga siknga siwan tauknga kwaknga siknga sikut.
MAT 28:4 Siwan amak aminu akayuking aminda kagwauke dandai kumzang yamuba kupsa amin binga dakngaking.
MAT 28:5 Dakngake yuwawa maya waapaatda apat angelata anzing yanikut, “Ma gwaubat. Jesu amin saamdakane tanguwa kumbut tapae apukamayak ngang danduat.
MAT 28:6 Waapata andang dua. Kungwake gatuna gweawit ngang yakut takngakan gwa gweak. Apu ita yukut komu kason.
MAT 28:7 Kake zetzet kuku kumbut katangga gweake ita gamok kuke Galili kep komune kunggak. Undang kuke kanong ngang pandetna yanison. Unukan,” ngang yanikut.
MAT 28:8 Yaniwan natake kumzang gwauke zetgaman matmat wagwenu teke ngana baniaatang apbakngayuk pandetna nininangge isapmake apbumayak.
MAT 28:9 Isapmake apuwawat Jesuta wesim apu gaak wam yanikut. Gaak wam yaniwan natake waapaatda Jesue kepine katakngata take inimbakngakumayak.
MAT 28:10 Siwan Jesuta, “Ma gwaubat,” ngang yanikut. “Kuku Galili kep komune kuke undang nandupnong ngang notna yanison,” ngang yaniwan natapbumayak.
MAT 28:11 Siwan maya wa tapaau akuwawat amak aminu kundu matmat gwene kayukingu gatuna yot gapmane kuke Anutue yot takwan gwene pasikaing amindane takeakwau sangabamu matmat gwene kakingge yaniking.
MAT 28:12 Yaniwa natake aminu waakwakat gatu Judia amindane take amikatda paut tasike wamu takngatu yaking. Yake mani buyambam amak aminde yamuke
MAT 28:13 anzing yaniking, “Ginda mani wa pake anzing yanong, ‘Pandetnata zikaane apuke ninu apewatna gupna gwa takuing,’ ngang yanong.
MAT 28:14 Sike aminu tupan tapata wamu waaknga natapanu ninda wamu kunduat apme inina ginu meyasa wena siwik,” ngang yaniking.
MAT 28:15 Unzingge amak aminu mani wa pake wamu waakngakan Judia aminde yatakuking. Yatakuke wamu waaknga yanggawa kekekawan apu apmanu kuut ayuak.
MAT 28:16 Siwan ninu pandetna aminu katau kuut musaat kepianganu tapatuatda Galili kep komune kuke tawanu Jesuta tupa ninikut dakane kopbumang.
MAT 28:17 Koke undang Jesu kake inimbakngake ngana nikatnana kunduta baniaatang natapa siakan dua sikut.
MAT 28:18 Siwan Jesuta apuke wamu takngatu anzing ninikut, “Anututa kekeknga kuupbam nae gwa naman enandang yuaikat keune nanaatde takeapa dakngake yuke daniwa natapnong.
MAT 28:19 Ginu kepna kepna kuwa sandewan unenana yaniwa natake banip sike natane pandetna daknganong. Pandetna dakngawana Nanaat na itane waakngaat gatu Anututane Waung Takwan tapaatde umaninde yangga sauyamuke
MAT 28:20 nata wamu gwan danindamukum taknga kuupbam natake tasiningge yanindamutnong. Siwan unzing tasiyuk naat gikat gatake asinggan asinggan yuwatna kuku tapduk ayuamang gwenu sandewik kopatang unekan yutnim,” ngang Jesuta ninikut.
MAR 1:1 Jesu Krais Anututane waakngaapata yake tasikutde wamu takeaknga anzing.
MAR 1:2 Anutue wamu ayanikapsa apata yake ita apuke yake tasiwik ngang tupa siknga matakut taknga Jesuta unin apuke yake tasiwan buya unin aakut. Aisaiata anzing matakut, “Natapnong. Nata aminu nae wama takuwikge iniwa ita gae gamok tupan kuke gatane kepika tandakngawik.
MAR 1:3 Aminu tapatu keu amina wena komune yuke anzing yanggamatanggak, ‘Buyambam tapata apnangge yawan kepina tandakngakamang binga Anututa initewan apik kapae natake tandaknganong,’ ngang yanggamatanggak,” ngang Aisaiata matakut.
MAR 1:4 Wamu wa matakut takngatane buyana unin. Jonu yangga sauyamuyaapa dakngake keu amina wena komune yukut. Yuke wamu aminu musia tapan tekwamban yangga sauyamikge yanikut.
MAR 1:5 Siwan Judia kep komune nana kuupbam gatu Jerusalem yot gapmane nana kuut Jonde kuking. Kuke waiakngana yakapa Jonda yangga Jodan tapane sauyamukut.
MAR 1:6 Siwan Jonu tauknga kaap gwendu kamel ngang inikainggane danggamita tasikingunin tasikut. Siwan ita simbuna goyanga gwene wambut. Siwan ita apmakat gatu iningokat nakut.
MAR 1:7 Siwan ita wamu anzing yakapbut, “Apmanu nata gamok enake puya aaknga tasiwawa masande aminu tapatuta enake puya tasiwik. Sike aminu waapatane kekeknga akngata na atnapbikut. Unzing siwan na aminu umana wenaapa yuatde gwetake gatanggamuke kepi taukga sandekgama ngang ininangge apmaakanggat.
MAR 1:8 Nata yanggatakan sautdamunggat. Ngana ita initewan Anututane Waung Takwan tapata apu kekeknga akngana daman katapda isinggak kaknga binga musipza enawik,” ngang yanikut.
MAR 1:9 Siwan tapduu wagwene Jesuta Nasaret gapma Galili kep komune yuwau teke Jonda yukut komune kundopan Jonda yangga Jodan tapane saukngamukut.
MAR 1:10 Saukngamana zetgaman yangga teke akoke kawawan enandangu kakaa siwan Waungga kwaiu kombunanang ngang yanikamang gwenda binga epuke Jesue apu paku tangene pakuyuwan kakut.
MAR 1:11 Kawawan enandangga wamu takngatu anzing yakut, “Ga natane waaknga. Na gae take siknga natanggamuke na gae musip gwaang natanggamunggat,” ngang yakut.
MAR 1:12 Siwan zetgaman Waungga Jesu keu amina wena komune iniyapiban kukut.
MAR 1:13 Iniyapiban ita undang kuke kaap zokat tapduu 40 yuwawa Setenda inindatdauwana angelata apu gatangamuking.
MAR 1:14 Siwan Jonu tanggaganuke kaautde tewana Jesuta Galili kep komune kuke Anututane wamu takeaknga anzing yanikut,
MAR 1:15 “Anututa sanga aawikge tapduknga tekut gwenu dapaknga gwa singgak. Siwan tapduknga Anututa amin panangge tasinggak kakngata apnangge dapaknga gwa singgak. Ginu musipza tapa tekwamban wamu take aakngae siakan ngang natapnong,” ngang yanikut.
MAR 1:16 Jesuta yangga gapan Galili gwenu kwaimune kusika kawawan Saimonkat uyapna Endruatda asinggan pis kaike mani ita pakakumayak. Siwan yapapna yangga gapan katang mukgawat kakut.
MAR 1:17 Kake Jesuta aminu waapaau anzing yanikut, “Giu apu na nawambat nata danindamuba pis wa kaikamayak binga aminu papat natane pandetna daknganingge danindamumbit,” ngang yanikut.
MAR 1:18 Yaniwan waapaau zetgaman yapapna peke kuku tawambat kuking.
MAR 1:19 Siwan ita gatu kundusim kusika kawawan Sebeditane waaknga Jemskat gatu uyapna Jonkatda dopangbam gwene yuke yapapna paibupmake yuwawat kakut.
MAR 1:20 Kake waapaat yayawamban nanaat puya aminaatda dopangbam gwene yuwawa undang peke waapaau kuwat Jesuta tupan pakut tapaakat unekan gatake Jesuat kuking.
MAR 1:21 Siwan yot Kapaneam gapmane kuking. Siwan ita yuwatakak tapduk gwene miti yot katang koke wam yanikut.
MAR 1:22 Yanike Mosesdane mama wam yanindamumsa aminda binga dua yanikut. Aho. Ita aminu kekekngana kaya apata binga yaniwawan natake asiknga satnaking.
MAR 1:23 Siwan aminu tapatu waung wai tapatuta takut. Sike waapata miti yot katang yuke kumzang yanggamatake anzing yakut,
MAR 1:24 “A! Ga Jesu! Nasaret yot gapmane nanaapa! Ga ninde dasing tasinimunangge apunggayak ngang yanggamatake gata apu ninu apasiwi mainimde ba apunggayak? Nata gae Anututane aminu dudumnaapa ngangu gae atnataat,” ngang inikut.
MAR 1:25 Iniwan ngana Jesuta kaanga inike anzing yakut, “Ga genda umuke aminu waapa teke kung,” ngang iniwan
MAR 1:26 waung wai waapata aminu waapa kumzang makaike ainggamatake aminu waapa tekut.
MAR 1:27 Teke kuwan kuupbamda kasatnake ina banakan anzing yaking, “Sanga a mina binga? Miti wamu kayuk kaknga yanggak. Wa kekekngana kaya. Ge ita waung waie wamu yaniwan ie gen gwaamukaing,” ngang yaking.
MAR 1:28 Unzingge ita tasikut takngae yake Galili keu kuupbam zetgaman yatakuking.
MAR 1:29 Siwan miti yot gwen teke epu kepman kuke gatu Jesuat pandetnaatda kuku Saimonkat gatu Endruatdane yotnane kopbing. Siwan Jemskat Jonkat kuut kopbing.
MAR 1:30 Siwan Saimonda maatnatane minga mait natapan gupna toknga siwan pekut. Siwan zetgaman ie Jesu iniking.
MAR 1:31 Iniwa ie kuke katakngine take tangenawan mait taknga tewan kuwan ita nanam tandakngayaman naking.
MAR 1:32 Siwan bangee gunziu apukuwan unenanata mait amikat gatu maya wawi waung waita pakingu kuut ie pakapbing.
MAR 1:33 Pakapuke you wanggapmane nana aminu kuupbamda gwabok gwaune wesim apundoke yuking.
MAR 1:34 Yuwawa maya wawi kwaapzang maitna inata inata sikingu sandeyamuke waung wai kwaapzang yanikwasiwan kuking. Sike waung waita ie atnataing. Atnatake ie yanike Anututane kuwikngaapa ngang dua yaningge ayanindakngakut.
MAR 1:35 Siwan tembana siknga ngana dua kwakawan ita enake epu kepman kuke amina wena saau komduatang kuke tumuk wam yake yukut.
MAR 1:36 Yayuwawan Saimonkat notnabapat iat pekikatda enake Jesu kawa maiwan i tawaking.
MAR 1:37 Tawataku kakenga anzing iniking, “Aminu kuupbamda gae gawakaing,” ngang iniking.
MAR 1:38 Iniwa ita anzing yanikut, “Undanga. Ninda you wesim yuaingge kuna. Nata wa aminde kuut wam yaniwitde natake apbum,” ngang yanikut.
MAR 1:39 Siwan iat pandetnaatda Galili keu kuupbam pasitakuke ita aminu kuupbam inane miti yotnane koke yanike waung wai yanikwasiwan kuwawa pasikut.
MAR 1:40 Siwan aminu tapatu watana kekeknga sikuu tapatuta ie apuke muna puke Jesu anzing inikut, “Gata take natakengu na tasingami gupma dudumna siwan,” ngang inikut.
MAR 1:41 Iniwan butaya siknga natangamuke katakngita wasiyuk anzing inikut, “Nata gatane gupba dudumna siwikge nataat,” ngang inikut.
MAR 1:42 Ngang iniwan watana kekeknga wa zetgaman wena sikut.
MAR 1:43 Siwan Jesuta wamu kekeknga anzing inikut,
MAR 1:44 “Katak siknga gwaumso. Gata kuke aminu tapatu sanga wa tasinggamunggatde ma iniwim. Ngana gatu aminu Anutue yot takwan gwene pasiya aminde kuke gupba yeuyamuyo. Yeuyamuke gupba take singgakge sangaka Anutue imuyo. Unzing Mosesde mama wamda tupa yakut taknga tasike sangaka imi ganduke wataka wena gwa sik ngang yawa aminbamda natapning,” ngang inike initewan kukut.
MAR 1:45 Kuke ngana wamu aminbamu gatu gatu yaniwan yotna yotna kuyuk wamu waaknga yatakuking. Yatakuwawa natake asinggan asinggan ie kuke doke umuba Jesuta you gapmandune anggaman kuwikge apmeptakut. Apmeptake keu amina wena komunekan yuwawan aminu kepna kepna nanata ie asinggan kuking.
MAR 2:1 Tapduu kundu kawa sandewana ita Kapaneam yot gapmane gatu kukut. Kuke yuwawan ie aminu notna kundue yoakatang yuak ngang natapbing.
MAR 2:2 Natake aminbamda kuke doke yuwa yot gwenu akgitnakut. Akgitnawan gwabok gwaune gitnagitnauke yuwawa Jesuta wamna yanikut.
MAR 2:3 Yaniyuwawan mait aminu tapatu kwatai gatukande gwa kumbing. Siwan aminu tapaat tapaatda gwaamutakapuke
MAR 2:4 keu aminbamda umuke yuwawa Jesue wesim takapnanga dua sikut. Unzingge wa aminda yotangan dumtapane takoke dumu Jesuta yukut saak papa waiwa buka mait aminda pekut gwen buyak napda tatawaawa pukukut.
MAR 2:5 Siwan Jesuta apme maitna sandekngamik ngang natapa kekekakut taknga kake mait sikut tapa anzing inikut, “Waaknga. Nata waiakngaka gwa sandekgamunggat,” ngang inikut.
MAR 2:6 Iniwan ngana Mosesde mama wam yanindamumsa aminu kunduta apukwike yakingga musiaatang anzing natapbing,
MAR 2:7 “Dasingge aminu aapata unzingu yanggak? Ita Anutue umana aknga tasiwan maiwikge yanggak. Aminu tapatuta waiaknga sandetnanga dua. Wa Anutu awiaapatane puyana,” ngang sapdukngamuke yaking.
MAR 2:8 Sike Jesuta natdetdetnaatang wamu wa natapbing kaknga natake anzing yanikut, “Dasingge ginu musipzaatangu natdetdeu waaknga nataaing?
MAR 2:9 ‘Waiakngana gwa sandekngamutde gatu maitna sandekngamuke gata enake gatane pimaka pake kunggayo,’ ngang iniwa ginda kake dasing natapning? Puya zaaknga kwanga siknga tasinanga,” ngang yanikut.
MAR 2:10 “Yanike na aminbamde notnaapa dakngake keune epu yuke amindane waiakngana sandeyamitde nanitewan apbum taknga nata take tasiwa ginda kake natdetningge tasiwa kanong,” ngang yanikut. Yanike aminu kwatai kumbing kapa anzing inikut,
MAR 2:11 “Enake bek gwenu gika gwaamutake takungga,” ngang inikut.
MAR 2:12 Iniwan natake aminu kuupbamde kaine enake ita bek gwenu zetgaman take kuwawan aminbamda akasatnaking. Kasatnake Anutue umana yatangenake anzing yaking, “Tupa ninda sanga ambinga takngatu dua kakumang,” ngang yaking.
MAR 2:13 Siwan Jesuta gatuna yangga gapanu Galili gwene kuke yuwawan aminbamda ie upbaap kungapuwawa Anutue wam yanikut.
MAR 2:14 Siwan keu wakom teke ita kusika kawawan Liwai Alfiasdane waaknga takis papsa apata takis mani peainggane opis gwene pukwike pawawan kakut. Kake anzing inikut, “Ga pandetna dakngawiyakge apu nawamso,” ngang iniwan ita enake kuku tawakut.
MAR 2:15 Siwan masande Liwaita Jesuat pandetnaat yayawamban yotnane kopa yuke nanam naking. Siwan moo aminu kunduat gatu kait pasiyuk takis papsa amikat yanikwasiwa kepman yuaing amikatnana kunduta Jesu asinggan tawaking. Wa tawakikat nana kunduta iat pandetnaat gatake nanam nake yuking.
MAR 2:16 Unekan gatake yuke nanam nake yuwawa Judianana aminda miti wamu inata takngatu natake dongu takngaaya dakngake yukinggane dongu takngatu Ferisi ngang yanikikat nana kundu Mosesde mama wam yanindamumsa aminu kunduta kuku Jesutane pandetna anzing yaniking, “Dasingge Jesuta nanamu moo aminu kunduat gatu takis papsa amikat yanikwasitna kepman yuaing amikat gatake yuke nakaing,” ngang yanikwaiking.
MAR 2:17 Yanikwaiwa Jesuta wamu waaknga natake tuwang wamu takngatu anzing yanikut, “Aminu maitna wenata doktae dua kukaing. Aho. Maitna kaya amindakan doktae kukaing. Sike tuwang wamu waakngatane yapii anzing. Nata apuke amin noman yuamang ngang yakaing amin yayawamba musia papa tekwambikge dua apbum. Aho. Nata apuke waiakngana kaya amin yayawamba apuke musia papa tekwambikge natake apbum,” ngang yanikut.
MAR 2:18 Sike tapduu gwendune Jondane pandetnaat gatu Ferisi amikatda tapduknga kayane nanam teke Anutuekan natake tumuk wamban yake tasiking. Tasike yuwawa aminu kunduta kuku Jesu anzing iniking, “Dasingge Jondane pandetnaat gatu Ferisi amikatdane pandetnaatda tapduknga kayane nanam teke tumuk wam yake tasikaing ngana gatane pandetda nanamu asinggan nake tasikaing ngang,” iniking.
MAR 2:19 Iniwa yake tuwang wamu takngatu anzing yanikut, “Aminu kundutane notna tapatuta maatna tapik gwekatang wa tapik kapaat iat notnaat gatake yuke nanamu tenanga dua. Wena,” ngang yanikut. “Aminu maatna tanangaapa iat gatake yukengu nanamu dua teke yutning.
MAR 2:20 Sike ngana masande aminu maya tapiu waapa takuwa notna wa amikat dua gatake yukengu tapduu waomune wa aminu notnae musia meya natake nanam teke dua nake tomda yutning,” ngang yanikut.
MAR 2:21 “Siwan aminu tapatuta taau kayuk sanzim take tauknga bumi awesikuu ganangi dua bupik. Wena. Sike unzing tasiwanu tauu ganangi bupiu wa sanda goopan gatu awesiwan ganangi buyambam siwik,” ngang yanikut.
MAR 2:22 “Siwan aminu tapatuta wain yangga kayuk kaknga toknga akngana kaya wa memenggane gupna yanggaumande dauke bupbingu bumi gopatang dua tukngwamban pukuwik. Wena. “Sike unzing tasiwanu wain yangga kayuk kakngatane waung kakngata isiwan gupna bumi wagomu atdakngawik. Atdakngawan wain yangga kepdakane tukngwapimapa memenggane gupna wagomu wai siwik. Sike wain yangga kayuk kaknga memenggane gupna kayuk gomune tukngwamban pukuwan take siwik,” ngang yanikut.
MAR 2:23 Siwan yuwatakak tapduk gwendune Jesuat pandetnaatda puyaangane banakan kuke pandetnata poyakgane tapuya kundu zukundakngake ooya pasiwa pimaawa kuking.
MAR 2:24 Kuke tasiwawa kake Ferisi aminu kunduta Jesu kaanga anzing iniking, “Natapso. Yuwatakak tapduk gwene puya dua tasinimde mama wamda ayandaknganggak ngana dasingge pandetdata puya pasikaing,” ngang iniwa
MAR 2:25 yake anzing yanikut, “Ginda baminu Devitda sanga tupa siknga tasikut takngae wamu akendeking gamu unzingu dua yawam. Nata wa yanggau iat aminaatda tomna natake
MAR 2:26 aminu tapatu umana Abaia ngang iniking. Ita Anutue yot takwan gwene pasike yukuune Devitda Anututane you wagwene koke poyau Anutue nomune pewa yuaingu Abaiata katewan pake nakut. Poyau wa pekingu moo aminda nananga dua ngana Anutue yot takwan gwene pasiya amindakan naning. Ngana Devitda pake atnake kundu inane aminae yaman naking ngang wa matakut takngae ginu apbotake yakaing ba dasing,” ngang yanikut.
MAR 2:27 “Anututa aminu yuwatakak tapduk gwendane mama wam gwaamuke tasiningge natake dua tumukut. Aho. Ita yuwatakak tapduk gwenu amin gatayamikge tekut.
MAR 2:28 Unzingge na aminbamde notnaapa dakngake sangabamdane kuyana yuke gatu puya yuwatakak tapduk gwene pasikaing kakngae kuutde kuyana yuat,” ngang yanikut.
MAR 3:1 Siwan Jesuta miti yot gwene gatuna kopbut. Kopan aminu tapatu itane katakngi boopmiwanga akgoptawan apmatekakut tapata undang yuwawan
MAR 3:2 aminu wa yukingga Jesue kem wam yaningge katasiking. Katasike asikaya Jesuta yuwatakak tapduk gwene aminu waapa take ba tasingamik ngang natake kayuking.
MAR 3:3 Kayuwawa ita katakngi wai sikut tapa anzing inikut, “Gata banakan yuyo,” ngang inikenga
MAR 3:4 aminbamde anzing yanikut, “Mosesda mama wapatang dasing matakut? Ninda sanga takeaknga yuwatakak tapduk gwene take tasinim ba ninda waiaknga tasinim? Ninda amin gatayamuna take yutning ba ninda atzipna kumning? Mama wapatang dasing matakut,” ngang yaniwan ngana wamu yake dua iniking.
MAR 3:5 Dua inike kuma yuwawa musia kekeknga siwan yamandet dakngakaing ngang katakuke musia toknga natayamuke musia meya natapbut. Natake aminu waapa anzing inikut, “Katakga tapi kwangawan,” ngang iniwan tapan kwangawan kataknga take gatu sikut.
MAR 3:6 Siwan zetgaman Ferisi aminda enake kepman kuking. Kuke Herotdane aminaat unekan gatake paut tasiking. Tasike Jesu tanguwa kupikge wam yaking.
MAR 3:7 Siwan Jesuat pandetnaatda you wa gapma teke yangga gapanu Galili ngang inikaing gwene kuking. Siwan aminbamu keu Galili komune nanaat gatu Judia kep komune nanaat
MAR 3:8 gatu you Jerusalem gapmane nanaat gatu keu Idumia komune nanaat gatu yangga Jodan tapa kautdu saak yuaing amin gatu kautdu Taia gatu Saidon ngang yanikaing gapmaaune wesim yuaing aminu kuutda Jesuta sanga tasikut takngae natake ie kuking.
MAR 3:9 Siwan aminu buyambam sikngata apuwawa kake na tapakusinang ngang natake Jesuta pandetna anzing yanikut. Dopangbamu gwendu tandakngawa nata une kopa ngang yanikut.
MAR 3:10 Dasingge? Tupa ita maya wawi kwaapzang take pasiyaman kake maitna kaya aminu maitna wena siningge katakngita wasinangge natake apu yupbasiking.
MAR 3:11 Sike tapdukbam asinggan apu yupbasike yuwawa waung waita paking aminda i kake ie muna puke anzing yanggamatakaking, “Ga Anututane waaknga,” ngang yanggamatakaking kaknga
MAR 3:12 anggaman dua yakapningge ita wamu kekeknga asinggan yanindakngakut.
MAR 3:13 Siwan Jesuta bakubaku dakane koke aminbam kawan siwan kundutane umana yake yayawamban apbing.
MAR 3:14 Apana wa aminu katau kuut musaat kepianganu tapaaya ngang pakut. Iat gatake yutningge natake pakut. Pake yanipewan kuke wamna yaniningge natake pakut.
MAR 3:15 Ita kekeknga akngana yaman waung wai yanikwasitningge natake
MAR 3:16 aminu wa katau kuut musaat kepianganu tapaaya ngangu wa pakutdane umana anzing. Saimon umana takngatu Pita ngang iniking.
MAR 3:17 Gatu Sebeditane waaknga tapaaya umana Jems gatu uyapna Jon ngang yaniking. Aminu waapaatde umana takngatu Boanesis ngang yaniking. Sike umana waakngatane yapii anzing. Gakngatda binga kapmapa yakamayak kapaat ngang yaniking.
MAR 3:18 Gatu Endru, gatu Filip, gatu Batolomyu, gatu Matyu, gatu Tomas, gatu Jems Alfiasdane waaknga. Gatu Tadias, gatu Saimon umana takngatu Selot ngang iniking. Sike umana waaknga tana tekwamban musia enawan puya kekeknga iwana yapbitnangge pasikaing amikatnana tapatu ngang iniking.
MAR 3:19 Gatu Judas Iskeriot yot gapmane nana waapata Jesu iwande yeuyamukut tapa.
MAR 3:20 Jesuta yotna kuwana aminbamda wamna natake maitna sandeyamikge apu yupbasiwawa Jesuat pandetnaatda nanam nananga dua sikut.
MAR 3:21 Siwan Jesutane uyapnata wamu waaknga natake, “Ita atdatdaptake pasinggak,” ngang yake iniwa kuningge apbing.
MAR 3:22 Siwan mama wam yanindamumsa aminu kundu you Jerusalem gapmaneta epbingga kake anzing yaking, “Bielsebul waung waitane tupan tapata Jesu tapan datdaptanggak ngang yaking. Ita waung wai tupan tapatane kekeknga akngane waung wai yanikwasiwan kukaing,” ngang yaking,
MAR 3:23 Ngang yawa natake Jesuta yayawamban apana tuwang wamu kundu anzing yanikut, “Setenda ina inikwasitnanga dua,” ngang yanikut.
MAR 3:24 “Sike aminu keu komdune nana aminda enake dongu takngaya yuke amapanu keu waomune nana aminda kekeknga yutnanga dua.
MAR 3:25 Siwan aminu you gwendune nana aminda enake dongu takngaya yuke amapanu you wagwene nana aminda kekeknga yutnanga dua,” ngang yanikut.
MAR 3:26 “Siwan Setenda inane dongae iwan dakngawanu ita kekeknga yutnanga dua. Aho! Ita wena asiwik,” ngang yanikut.
MAR 3:27 “Sike aminu tapatuta Setendane yotnaatang moo siknga koke aminbamu ita pakut takwau sandepewan kunanga dua. Wena. Ita Seten gamok tanguke napda wamakenga ita take sandepewan kuning,” ngang yanikut.
MAR 3:28 “Nata siakande siknga daninggat. Wai takngatu takngatu tasikaingu asandeyamunangae kepi kaya. Siwan sapdut wamu asinggan yakaingu kuut asandeyamunangae kepi kaya,” ngang yanikut.
MAR 3:29 “Sike ngana aminda sapdut wamu Anututane Waung Takwan Tapae yaningu Anututa wai waakngana dua sandeyaman yutakuning. Sandeyamunangae kepi wena,” ngang yanikut.
MAR 3:30 Dasingge? Aminu kunduta yake, “Waung waita tapan datdaptake pasinggak,” ngang inisapduke yawa natake Jesuta unzing yanikut.
MAR 3:31 Wamu waaknga ayayuwawan mingaat uyapnaatda apu kepman yuke ie yatawaking.
MAR 3:32 Yatawamba ngana aminbamu Jesu tembasike yukikatnana kunduta anzing iniking, “Natapso. Minggaat uyapbaatda kepman katang yuke gae yanggawakaing,” ngang iniking.
MAR 3:33 Iniwa yake anzing yanikut, “Minga uyapma ngang yaninggat aminde daniwa natapnong,” ngang yake
MAR 3:34 wa yupbasikingu katakuke katapmiyuk anzing yakut, “Minga gatu uyapma ngang yaninggat aminu anin,” ngang yanikut.
MAR 3:35 “Aminda Anutue banip tawaningu, ‘Uyapma gatu samina gatu minga,’ ngang yaniwit,” ngang yanikut.
MAR 4:1 Jesuta yanindamutnangge natake yangga gapanu Galili gwenu kwaimune gatu kuke tuwanguke yaniwawan aminbamda ie apundopbing. Apundoke akgitnagitnauke ikotawamba keu ayutnanga wena siwan dopangbamu yangga gapan gwene yukuu gwendune koke une pukwikut. Pukwike yanindamutnangge tasiwan kake aminbamda yangga kwaimune yuking.
MAR 4:2 Siwan ita wamu kwaapzang tuwang wamban yanike anzing yanikut,
MAR 4:3 “Nata ginu daniwa natapnong! Aminu tapatuta nanam zak pake paku puyaangaatang muban pimaking.
MAR 4:4 Ita muban kuke zakngi kundu kepiapane pimakingu kwaitda apu naking.
MAR 4:5 Siwan zakngi kundu keu suu amaakatang yuwa kaiu engatangan mateknga siknga yuaing kopatang pimapa zuna zetgaman akopbing.
MAR 4:6 Akopa ngana gunzitda akoke yasiwan zuna wa muyakngi wena siwan kungwake akupiaking.
MAR 4:7 Siwan zakngi kundu babam yapiatang pimakingu babamda enake asusikwatapa buya dua aaking.
MAR 4:8 Siwan zakngi kundu keu take komune pimake buyambam takake aaking. Kundu buya matekngasim aaking siwan kundu buyambam aaking siwan kundu buyambam siknga aaking,” ngang yanikenga
MAR 4:9 anzing yanikut, “Mamin aminda maakngi kaya kakengu wamu ayanggat taknga natapsok,” ngang yanikut.
MAR 4:10 Masande Jesuta inatakan yuwawan pandetna 12-pat nana amikat gatu aminu kundu iat gatake yuking amikat kuutda tuwang wamu wa yanikut takngae inikwaiking.
MAR 4:11 Inikwaiwa ita yake anzing yanikut, “Anututa amin panangge tasinggak kakngae yapii akusopuke yuau anggaman daniwitde Anututa nandutewan nata daninggat. Siwan yanikapsa aminu tapatuta Anutue wamu takngatu anzing matakut, ‘Kainata akake ngana sanga tapatu dua binga kaaing. Wamu maakngita atnatake ngana yapiie dua nataaing. Dua natake musia dua tapa tekwamban waiakngana dua sandeyamit,’ ngang Anututane wamu waaknga tupa siknga ngang yakapsa aminu tapatuta matakut taknga buya apmanu unin aakgak. Nata wamu kuupbam tuwang wamban aminu kepman yuaing aminde yaniwa nataaing,” ngang yanikut.
MAR 4:13 Siwan Jesuta anzing yanikwaikut, “Ginda tuwang wamu waakngae dua natdekengu nata tuwang wamu takngatu takngatu daniwa apme natdetning?
MAR 4:14 Aminu nanam zak muban kuking kapa Anutue wam yaninggak kapanin.
MAR 4:15 Siwan nanam zau kundu kepiapane pimakingu anzing. Wamu yaniwan maakngita atnataaing siwan ngana tapduu waomunekan Setenda apuke wamu wa musiaatang pakaing kaknga asandeyamunggak,” ngang yanikut.
MAR 4:16 “Siwan nanam zau kundu keu supna kaya komune pimakingu anzing. Aminu tapatuta Anututane wam yaniwan natake zetgaman apbakngake takaing.
MAR 4:17 Siwan ngana wa aminu nanam zakge zuna muyakngi wena siwan zetgaman kupiakaing binga. Tapduu mateknga siknga yusika apimakaing. Aminda Anutue wam taknga tanguwa pimapikge natake maya wawi wamu ataking aminde meya yama banip siking kaknga zetgaman tewan pimanggak,” ngang yanikut.
MAR 4:18 “Siwan zakngi kundu babam yapiiatang pimakingu anzing. Wamu yaniwan atnataaing.
MAR 4:19 Siwan ngana sanga meya siwan nangaakan nataamang kakngaat gatu sanga buyambam siknga panangge kem wa nataaing kakngaat gatu sangabamu inata inatae iaknga nataaing kakngaatda Anutue wamu yaitapaakusiwa wamu wa atnatapbing kakngata buya dua aakgak,” ngang yanikut.
MAR 4:20 “Sike zakngi kundu keu take komune pimakingu anzing. Wam yaniwan natake take tanggaganuwa buya asaakgak. Aminu wamu waaknga nataaing amikatnana kunduta tasiwa buyana matekngasim aakgak siwan kunduta tasiwa buyana buyambam aakgak sike kunduta tasiwa buyana buyambam siknga aakgak,” ngang yanikut.
MAR 4:21 Siwan Jesuta wam yake tuwang wamu takngaaya anzing yanikut, “Aminda lam gwen sake takapuke gapma gwende gepbiatang ba buka gwende gepbiatang tenangge natake takapik ba dasing? Wena. Ita buka gwene tewik.
MAR 4:22 Sanga apmea pangenapakwewan kaning ngang natake pakusopukamang. Siwan apmea yanikapnimde natake wamu takusopukamang.
MAR 4:23 Aminu maakngi kaya kakengu wamu waaknga natapsok,” ngang yanikut.
MAR 4:24 “Wamu ginda natapbing kaknga katak siknga natdetnong! Wamu wa natdekaing kaknga buyambam ba mateknga pakinga kakengu ina unzakan dua paning. Kunduat isakoyamik.
MAR 4:25 Sike aminu tapatuta natdetdet gwa pakuu Anututa kunduat asimik. Siwan ngana aminu tapatu dua pakutna kakengu Anututa natdetdet mateknga ita pakuu akaiwan kungamik,” ngang yanikut.
MAR 4:26 Siwan ita yake tuwang wamu takngatu anzing yanikut, “Anututa amin panangge tasinggak kaknga aminu tapatuta nanam zau kepdakane muban kukaing binga.
MAR 4:27 Muban kuwana zikaa kuupbam aminu waapa dapuna peke kwakngaomu ita enake kawawan nanam zau wa akoke buyambam takawa kake ngana kepda anzing tasiwan akokaing ngangge yapii anggaman dua nataak.
MAR 4:28 Kepdakata tanguwan baptake nanam zakgane zuna akopana buya aawik. Tupanu nayoksan sike kopan tatakngita waiwik. Siwan masande buya suyuke takaning.
MAR 4:29 Takakenga damana siwan kake aminu wa muban kuking kapata buya pananga tapduu gwa singgak ngang natake paip take patziwik,” ngang yanikut.
MAR 4:30 Siwan tuwang wamu takngatuat anzing yakut, “Anututa amin panangge tasinggak kaknga mina bingae tuwanguke yawa natapnim? Siwan ie tuwang wamu mina bingae yawa natapnim?
MAR 4:31 Wa anzing. Katau dakatu umana mastet ngang inikamangge tapuya wa nanamu akwaikamangu kuupbamde tapuya binga dua. Wena. Wa mateknga siknga.
MAR 4:32 Aminda mastetdane zakngi kwaiwanu akoke koke buyambam daka takake nanam zau kunduta mamaya kokaing ngana mastet dakata takake kuupbam ayapbimbik. Sike kainga buyambam siwan kwaitda apu yotna kaingane tasike ayutning,” ngang yakut.
MAR 4:33 Jesuta yake tuwang wamu tupanu gwa yakut taknga binga ina unzakan gatu kunduat yanikut. Wamu aaknga apme natdetning ngang baniaatang natake waakngakan yanikut.
MAR 4:34 Ita wamu takngatu anggaman dua yanikut. Wena. Ita tuwang wamban yakut. Siwan tapduknga pandetnaatdakan iat gatake yuking gwene ita tuwang wamu wa kuupbamdane yapii yanikut.
MAR 4:35 Siwan tapduu wagwene bangee ita pandetna anzing yanikut, “Ninda yangga gapan gwenu kautdu saak kuna,”
MAR 4:36 ngang yawan aminbamu waakwau peke dopangbamu Jesuta gwa pukwikut gwene koke iat kuut tapa kuking. Tapa kuwawa aminu kunduta dopangbamu kunduat papa wa amikat kuking.
MAR 4:37 Kuwawa gou buyambam sikngata apan yangga sambuya enake dopang bampatang pukuwa yanggata dopangbam gwene dopnangge sikut.
MAR 4:38 Siwan Jesu dopangbam gwenu maseatang yuke pilo gwendune dapuna peawan tanguwa enawan anzing iniking, “Yanindamumsaapa! Dakpaknga siknga ninu kumnanggekamang. Siwan ngana butaya dua natanimuke dapunu pekgayak,” ngang iniwa
MAR 4:39 asenake got takngae kaanga yake yangga sambuyae atzakngayo ngang yawan gotda zakngawan yangga sambuya enakuu zetgaman kuma siknga yukut.
MAR 4:40 Siwan ita pandetna kaanga anzing yanikut, “Dasingge ginu unzingu gwaukaing? Ginda nae natapa kekeknga dua siwan dandupa meya singgak,” ngang yaniwan
MAR 4:41 kumzang siknga gwauke ina banakan anzing yaking, “Aminu aapa mamin? Ge ita yawan gotkat yanggaatda zakngawat kaamang,” ngang yaking.
MAR 5:1 Siwan yangga gapanu kautdu saak kuke Gerasa amindane kep komune kundopbing.
MAR 5:2 Kundoke Jesuta dopangbam gwenu tewana aminu tapatu waung waita tapan
MAR 5:3 matmat gapma gapmane yumdekan yusika pekgak. Sike aminu tapatuta tanggaganutnanga dua. Sike nau takngataa wamatenanga dua.
MAR 5:4 Sike tapduk bamu asinggan nap takngata katakngaat baangaat wapa ngana apapan dakngawan kunggak. Ita kekeknga siknga siwan aminu tapatuta tanggaganutnanga dua.
MAR 5:5 Sike asinggan gunzitapane gatu zikaane ngangu ita matmat gapmane yuke bakubaku dakane kungapuyuk kumzang ainggamatake inane gupna supda matanggak. Siwan Jesuta keu wandakane kundopan
MAR 5:6 ita kawawan Jesu maa yuwan kake ita matmat gapma teke asisapmake apan kake anzing inikut, “Ga waung waiapa. Aminu waapa teng,” ngang iniwan ngana apu butaya wam ininangge ie muna pukut. Puke wamu kumzang apaa yanggamatake kekeknga siknga anzing inikut, “Jesu. Ga Anutu enane siknga yuak kapatane waaknga. Gata nae dasing tasiya,” ngang yake usake apaa siknga anzing yakut, “Gata nae toknga ma siknga namim,” ngang inikut.
MAR 5:9 Iniwan yake, “Umanda mamin,” ngang inikwaiwan natake, “Natane umana Aminbam, Ninu kwaapzang.”
MAR 5:10 Inike, “Gata ninu ma ninipewi keu andaka teke komduatang kunim,” ngang waung waita ininggamataking.
MAR 5:11 Sike ikwawa buyambamu takwakgu 2,000-da wesim bakundakane zongazonga nake yuwawa
MAR 5:12 kake waung waita Jesu anzing iniking, “Gata ninu ninipewi kuke ikwawa waakwak panim,” ngang iniwa
MAR 5:13 ita, “Take. Kunong,” ngang yawan waung waita aminu waapa teke kuku ikwawa waakwak paking. Papa ikwawa 2,000-nu waakwau atdatdaptake kekeknga siknga isapmake kuku dameatang pimake yangga gapan katang pimake yangga tangoke akumbing.
MAR 5:14 Siwan aminu ikwawa wa toikaingga kake atdatakuke aminda wamu yot gapmanenana gatu kaukaut yuaikatde yatakuking. Yatakuwawa natake kuke sanga wa sikut taknga kaking.
MAR 5:15 Kake Jesue kuke kawawa aminu wa tupa waung wai kwaapzangga tapa datdaptakut tapata tauknga tasike natdetdetna nomana siwan apukwike yuwawan kake akagwauking.
MAR 5:16 Akagwauke yuwawa waung waita tapa datdaptakut tapata take siwan ikwawa akwau akupa kaking aminda yaniwa natapbing.
MAR 5:17 Yaniwa natake Jesu wamu kekeknga kepna teke komduatang kuwikge ininggamataking.
MAR 5:18 Ininggamatawa Jesuta dopangbam gwene koke tasiwawan kake aminu waung waita takut tapata, “Na gaat kuut kusim,” ngang Jesu iniwan
MAR 5:19 “Gaat dua kusim,” ngang inike yake anzing inikut, “Gata yotda kuke dongu gikaat nana aminde kuke sangabamu Anutu Buyambam tapata butaya natanggamuke tasinggamukge yaniyo,” ngang iniwan
MAR 5:20 aminu waapa akukut. Kuke keu wakomune yot gapma gapma katau kuut musaat yuaingune kuke sanga Jesuta tasingamukutde yanitakuwan natake aminu kuupbamda nangaakan natapbing.
MAR 5:21 Siwan Jesuta gatu dopangbam gwene koke yangga gapanu gatu kautdu saak kunangge natake kuking. Ita kautdu saak kuke yangga kwaimune yuwawan aminbamda kuke ie doke yuking.
MAR 5:22 Doke yuwawa miti yotde kuyana kayuau tapatu umana Jairas ngang iniking. Ita Jesu kake butaya wam ininangge kuku muna Jesue kepine puke
MAR 5:23 wamu kekeknga Jesu anzing inikut, “Natane yapamatekngata kumnangge dapaknga singgak. Gata apu katakgata wasiwi ita take siwan,” ngang iniwan
MAR 5:24 Jesuta iat gatake kuwawat aminbamda kuku tawake yuwa akgitnakut.
MAR 5:25 Tawake akgitnawa maya tapatu ita yekapna sike dau asinggan pake nakanu 12 gwa yuwan sandewan
MAR 5:26 dokta kwaapzangga maitna sandetnangge natake tasingamuwawa gupnane tokngabam natake buyana wa aminde yaman puyuwan ngana itane maitna takesimu dua sikut. Wena. Maitna buyambam sikut.
MAR 5:27 Sike maya waapata natawawan Jesuta gwa apuk ngang yawa natake nata katakngata itane tauknganekan wasikengu nata take siwit ngang natapbut. Natake kuku ngwekngweke aminbamu waakwakge banakan koke Jesue maseatang kuke katakngita Jesutane tauknga wasikut.
MAR 5:29 Wasiwan zetgaman daknga atzakngawan gupnaatang natapan maiu waaknga ateke kuwan natapbut.
MAR 5:30 Siwan wasiwan Jesuta natapan itane kekeknga aknganata aminu tapatu gatangaman natapbut. Natake aminbamde banakan tapan tekwamban anzing yakut, “Maminda katakngita taukngane wasik,” ngang yawan
MAR 5:31 pandetnata anzing iniking, “Gata kayo. Aminbamu gae apundoke yuwawa kake ngana, ‘Maminda katakngita na wasik,’ ngang yanggayak,” ngang iniking.
MAR 5:32 Iniwa ngana Jesuta katakuke maminda waaknga tasik ngang natake katakukut.
MAR 5:33 Katakuwawan maya waapa sanga ie singamukut takngae atnatake akgwauke dandai yamuking. Dandai yamuwawa kuke Jesue nomune muna puke sangabamu singamukutde anggaman yakapbut.
MAR 5:34 Yakapan Jesuta anzing inikut, “Yapana. Gata nae natapi kekeknga singgak kakngata maitda sandekgamuk. Musipba kwikwiknga natake kunggayo. Gatane maitda wena gwa singgak,” ngang inikut.
MAR 5:35 Siwan Jesuta wamu waaknga ngang iniyuwawan aminu kundu miti yotde kuyana yuak kapatane yotnane yuaingu kunduta apu anzing iniking, “Gatane yapaka gwa kungwak. Dasingge gata puya kwatan siknga ayanindamumsa apae imunggayak,” ngang iniking.
MAR 5:36 Iniwa ngana Jesuta wamu wa yaking kakngae maau dua pake natake miti yotde kayuakapa Jairas anzing inikut, “Ga nangaakan ma natapim. Gata nae natapi kekekayok,” ngang inikut.
MAR 5:37 Inikenga dua kapewan aminbamu iat kuking. Pita gatu Jems gatu Jon Jemsdane uyapna nganggakan iat kuking.
MAR 5:38 Kuke kuku aminu take waapatane yotnane kundoke natawawan kwanamu kumzang siwawa gakngat buyambam siwan
MAR 5:39 natake ita yoakatang koke anzing yanikut, “Dasingge ginu kwanamu sike gakngatbamu tasikaing? Waatdaka aapata gatukande dua kungwak. Ita dapuna pekgak,” ngang yanikut.
MAR 5:40 Yaniwan natake minu kumzang inimiba ngana aminbamu ayanikwasiwan epu kepman kuking. Kuwana waatdakatane minga nanaat gatu pandetna wa tapaat tapatuat nganggan papan you waatdakata pekut gwene kopbing.
MAR 5:41 Koke ita waatdakatane katakngane take inane wam tangan, “Talita kumi,” ngang inikut taknga tana tekwamban, “Maya matekapa. Nata ganiwa asenayo,” ngang inikut.
MAR 5:42 Iniwan zetgaman maya mateu waapasimu asenake yot gwene tuwanguke kumbasike kukut. Gwa takake nakanu 12 gwa kawan sandekut. Siwan unzing tasiwan kake kumzang satnaking.
MAR 5:43 Siwan Jesuta wamu kekeknga anzing yanikut. Ginda aminu tapatu sanga a kaaingge ma iniwam ngang yanike nanamu kundu maya mateu waapasimde imusande yanikut.
MAR 6:1 Jesuta you wanggapma teke yotna siknga kunangge kuwawan pandetnata iat gatapa kuking.
MAR 6:2 Sike yuwatakak tapduk gwene ita miti yot gwene koke Anutue wam yanikut. Yaniwan natake aminbamda asatnake anzing yaking, “Aminu aapa wamu waaknga zane takut,” ngang yaking. “Natdetdetna wa nataak kaknga inata kundu,” ngang yaking. “Dasingge ita duya takngatu takngatu pasinggak,” ngang yake,
MAR 6:3 “Aminu waapa katapsan usike sangabam pasinggakge natake kamda ngang dua inikaing ba dasing,” ngang yaking. “Ita Mariatane waaknga siwan ita Jems gatu Josis gatu Judas gatu Saimon nganggane paana. Sike itane samina ane nikat gatake yuamang,” ngang yake ie semna natangamuking.
MAR 6:4 Siwan ngana Jesuta anzing yanikut, “Yotna yotna nana aminda ayanikapsa aminu tapatue umana kaapa ngang unzing nataaing. Ngana yotna siknga yuwan inaatnana aminda umana wenaapa ngang natangamukaing,” ngang yanikut.
MAR 6:5 Siwan ita duya takngatu you wanggapmane tasinanga dua sikut. Ita mait aminu tapatu tapatukan katakngita wasike take pasiyamukut.
MAR 6:6 Siwan unenanata ie natapa kekeknga dua siwan kake nangaakan natapbut. Natake you ugwak saak yuaing gapma gapmane kuke Anutue wamu aminbamde yanitakukut.
MAR 6:7 Siwan ita pandetna katau kuut musaat kepianganu tapaaya ngang yayawamban apana ita tapaaya tapaana kaya yanipewan kuningge yake kekeknga aknga wa aminde waung wai yanikwasiwa kuningge yamukut.
MAR 6:8 Yamuke anzing yanikut, “Ginu sanga tapatu kepi kunangge natake gusokzakan panong,” ngang yanikut. “Ginu nanam ba yakza ba ma papam. Mani yakza tumaekan panong.
MAR 6:9 Sike ginu kepi taukza take pasining ngana siotza gomayana kaya ma pasiwam. Gomdukan tasinong,” ngang yanikut.
MAR 6:10 “Ginda you gapmandune kundopa unenana tapatuta yotnaatang pakopanu you wagwenekan yutnong. Yusika masande you wanggapma tenangge natekengu you wagwen teke kunong.
MAR 6:11 Sike ginu you gapmanduine kuwa unenana aminda ginu yotnaatangu dua pakoke ginde wamu dua natapanu ginda you wanggapma teke yemi kaikza zipa pimapa kake wai waaknganae anggaman natapning,” ngang yake yanipewan kuke
MAR 6:12 pandetna waakwau wamu, “Ginu musipza tapa tekwamsok,” ngang yanitakuking.
MAR 6:13 Yanitakuke waung wai kwaapzang yanikwasiwa kuwawa wel yangga botol gopatangga mait aminde gupnane tukngwake pasiyamuke maitna sandeyamuking.
MAR 6:14 Sike Herot tupan tapata natapan puya waaknga pasitakuwawa Jesutane umana keu kuupbam tawamban sandewan natapbut. Natapan aminu kunduta anzing yaking, “Jonu yangga sauyamukut tapata matmat gapmaneta gatu enake duya takngatu takngatu unzingu pasinggak,” ngang yawa natapbut.
MAR 6:15 Siwan aminu kunduta yake, “Ilaija ayanikapsaapa kayuk yuwan Anututa takopbut tapata enandangga epuke pasinggak,” ngang yaking. Siwan aminu kunduta yake, “Ayanikapsa tapatuta pasinggak,” ngang yaking. “Unzing ayanikapsa aminu tupa siknga yuke pasikakikat nana tapatu binga,” ngang yawa
MAR 6:16 natake Herotda anzing yakut, “Tupa nata yanipewa Jondane guyaknga matawa kumbut tapata gatu ba enake pasinggak,” ngang yakut.
MAR 6:17 Sike tupa Herotda uyapna Filipdane maatna umana Herodias ngang iniking kapa kaiwan kuwan maatnae takut.
MAR 6:18 Siwan Jonda Herot anzing inikut, “Gata uyapbatane maatna tapi kawa take dua singgak,” ngang inikut.
MAR 6:19 Iniwan wamu waaknga natake Herodiasda Jonde semna siknga natake atanguwan kupikge natapbut.
MAR 6:20 Siwan ngana Herotda Jonu amin noman gatu Anututane amintapa ngang natake wai tasingamunangge akgwaukut. Akgwauke tapatuta dua tanguwan kupikge ita katak siknga kayutnangge natake amina kundu yanipewan kuku Jon tanggaganuke nap takngata wamake kaautde tewa yuwawan Herodiasda tangutnangge apmeptakut. Siwan Jonda wamu takngatu takngatu iniwan natake Herotda musiane meya natapbut. Natake ngana ita Jonde wam natapnangge take siknga natapbut.
MAR 6:21 Sike masande Herodiasda Jon tanguwan kupikge kepi takngatu anzing kakut. Herotda tapduknga mingata tangaikut gwende natake yawan nanamu buyambam saking. Sawa ita nanamu buyambamu wa sakingu yaman take aminu gavmande puya gatangamuke pasiya amikat gatu amak aminu tupan takwakat gatu take aminu Galili kep komune nanaatda apa unekan gatake yuke naking.
MAR 6:22 Nake yuwawa Herodiasdane yapanata aminu waakwau banakan koke wakumu inatakan taiwa nanduke geenguke ngang tapik ngang natake kuke taikut. Taiwawan kake Herotkat aminu iat gatake yuke naking amikatda take siknga natapbing. Siwan Herotda maya mateu waapa anzing inikut, “Gata sanga minaka tanangge natakengu gata nae naniwinu nata gae akgamit,” ngang inikut.
MAR 6:23 Inike, “Siakande siknga akgamit,” ngang yake anzing inikut, “Gata nae sanga tapatu gamitde yawinu akgamit. Sike gata natane sangabamu kautdu gae gamitde yawinu nata akgamit,” ngang inikut.
MAR 6:24 Iniwan natake maya mateu waapata epu kepman kuke minga Herodias inike, “Nata sanga mina binga tapitde iniwit,” ngang inikwaiwan Herodiasda yake anzing inikut, “Gata, ‘Jonu yangga sauyamukut tapatane guyaknga matawan kupana gwapaknga dopangu gwendune teke nae namuyo,’ ngang Herot iniyo,” ngang inikut.
MAR 6:25 Siwan maya mateu waapata zetgaman Herotde kuku anzing inikut, “Apmaatzim Jonu yangga sauyamukut tapatane gwapaknga dopangu gwendune teke nae namuyo,” ngang inikut.
MAR 6:26 Ita unzing iniwan natake musia meya natapbut. Ngana ita siakan siknga ngang gwa yawan kekekawan aminu iat gatake yuke naking aminda gwa natapbing. Unzingge ita gwa yawan kekekakut takngae isapmamsa wam yanangge dua natake maya waapatane wamna zipbutnangge dua natapbut.
MAR 6:27 Siwan zetgaman amak aminu tapatu initewan Jondane gwapaknga takapnangge kukut. Kuke kaaut yot gwene kuke Jondane guyakngi matake
MAR 6:28 gwapaknga dopangu gwendune teke takapuke maya matekapae imukut. Iman take taku mingae imukut.
MAR 6:29 Siwan Jondane pandetnata ie wam natake kuku gupnaapa take taku matmat gapmane kwaiking.
MAR 6:30 Siwan yanipewan kuke puya pasiking aminda gatu apuke Jesu iniking. Puya takngatu takngatu pasikingge wamu inike wamu kuupbam aminbamde yanikingge kuut iniking.
MAR 6:31 Iniwawa aminbamu wamna natake maitna sandeyamikge apu tanggaganuwa Jesuat pandetnaatda nanamu nananga dua sikut. Siwan Jesuta pandetna anzing yanikut, “Ninda nisatakan keu amina wena komduatang kuke ninu kundusimu yutna takawan,” ngang yaniwan dopangbam gwen take kuking.
MAR 6:33 Take kuwawa kake aminbamda ie Jesu ngangu atnatapbing. Atnatake yot gapma gapmane nana kuupbamda isapmake kuke keu Jesuta kunangge natake kukut komune wa aminda gamok kundopbing.
MAR 6:34 Kundoke yuwawa Jesuta kwaimune kuke kaawan aminu buyambam sikngata undang yuwa kakut. Kake wa aminu sipsip kayuya aminu wena bingata yuwa kake butaya natayamuke tuwanguke wamu buyambam yanikut.
MAR 6:35 Yaniyuwawan gunzitda apukunangge siwan pandetnata ie kuke anzing iniking, “Keu akomu amina wena. Siwan gunziu apukunanggenggak.
MAR 6:36 Gata aminbamu yanipewi kukakut. Yanipewi unda undang kuke yot gapma gapmane kundoke nanamna undang usike naut,” ngang iniking.
MAR 6:37 Iniwa ngana, “Nanamu gisa yamunong,” ngang yake yanikut. Siwan anzing iniking, “Gata ninda 200 Kina pake kuku nanam usiyamunanu take dua siwik,” ngang iniwa,
MAR 6:38 “Ginu poyau datdasing paing,” ngang yanikwaikut. “Ginu kuke kanong,” ngang yaniwan natake kakenga anzing iniking, “Ninu poyau katau kautdu musa gatu pis dakaaya nganggan pamang,” ngang iniwa,
MAR 6:39 aminu kuupbam zatzapdakane wa aminu dongu gwendu gwendu yutakuningge yaniwan
MAR 6:40 wa aminu apukwiking. Aminu dongu kundu 100-da yuking siwan kundu 50 ngangga yuking.
MAR 6:41 Unzing yuwawa ita poyau wa katau kuut musaat gatu pis wa dakaat ngang pake enandang pakusang kake tumuk wam inimbakngakut. Siwan ita poyak puke pandetnae yaman usanziyama aminbamda naking. Siwan ina unzakan pis wa dakaat kaya puke yamukut.
MAR 6:42 Siwan kuupbamda napa musia gitnawa
MAR 6:43 poyau kaiknga kuupbam gatu pis ngangu ayukingu pandetnata butuke sapat yau katau kuut musaat kepianganu gweaya ngang pamuba dopbing.
MAR 6:44 Sike wawi poyak nakingu 5,000.
MAR 6:45 Siwan Jesuta pandetna yaninggamatake Betsainda yot gapma yangga gapan kwaimune yuak gapmane gamok kuningge yaniwan dopangbam gwene koke kuwawa ina aminbam yanipewan kuking.
MAR 6:46 Ita aminbamu yanipewan kuwana baku baku dakane koke tumuk wam yake yuwawan
MAR 6:47 bangee dopangbam wagwenu yangga gapan banakan yuwawan Jesuta inatakan kwaimune yukut.
MAR 6:48 Yuke kawawan gotda puyayapbiban kawawan pandetnata puya kekeknga siknga kwaike kunangge tasiking. Tasiwawa akwakanangge dapaknga siwan Jesuta yangga gwene engatangan yaitake kuku dopangbamu wagwende kuke ayapbitnangge tasikut.
MAR 6:49 Siwan pandetna kuupbamda kawawa ita engatangan yangga gapan gwene yaitake apuwawan kagwauke kongga ba apunggak ngang natake ainggamataking.
MAR 6:50 Ainggamatawa zetgaman Jesuta anzing yanikut, “Musipza gitnata yutnong. Nata siknga apunggat. Ginu ma gwaubam,”
MAR 6:51 ngang yanike dopangbam gwene koke wa amikat yuwan gotda anzakngakut. Siwan musia kukumuk akoyambing.
MAR 6:52 Sike tupa wa aminu poyau Jesuta putzukuke aminbamde yaman nawawa kaking ngana musia kekekngata yuke Jesutane yapii katak dua natdeke yuking.
MAR 6:53 Siwan yangga gapan kwaimune kuke Genesaret kep komune kundoke dopangbam gwenu awamateking.
MAR 6:54 Awamatewawa kake une nana aminda ie atnatdeke
MAR 6:55 isapmake kuke mait aminu you ugwak saak nana aminu Jesuta you gapmandune ba zaneka yuwawan atnataaingge mait aminu buka gwegwene peke gwaamupake ie pakuking.
MAR 6:56 Siwan you ayukut gapmane ba keu ayukut komune ba Jesuta zandangga yukuune mait aminu yokekep tapane pakuke peking. Peke butaya wam yanggamatake Jesuta kapewan mait aminda katakngita tauknga nomna saasaakngi wangane wasiningge iniking. Siwan aminu katakngita wasikingu kuupbamda gatuna take siking.
MAR 7:1 Siwan Ferisi aminu kunduat gatu mama wam yanindamumsa aminu kundu Jerusalem teke pukukikatda Jesue kuke yupbasiking.
MAR 7:2 Yupbasike kawawa pandetnata kataknga gamok dua sauke nanamu atnawawa kake mititane kepi takngatu unin zipmandakngakaing ngang natapbing.
MAR 7:3 Wa natapbing kakngatane yapii anzing. Moo aminu kuupbapat gatu Ferisi amikatda bapunata tupa siknga miti yaking kaknga tawakaing. Tawake waiaknga tasikaingu katakngane gwa gatakuk ngang natake saupamaba kuningge natake kataknga tupanu saukenga nanamu nakaing. Dua saukengu dua naning.
MAR 7:4 Sike wa aminu kekeu nanam usikaing komuneta apuke waiakngana saupamaba kuningge natake yangga saukenga nanamu nakaing. Sike wa aminu sanga takngatui bapunatane pakingu buyambam atawakaing. Tawake kapna gatu dopanga gatu gapmana ngangu asaukaing.
MAR 7:5 Unzingge Ferisi amikat mama wam yanindamumsa amikatda Jesu anzing inikwaiking, “Dasingge gatane pandetdata kataknga dua sauke ngana nanamu nake bapuninda tasikaking kaknga dua tawakaing,” ngang iniking.
MAR 7:6 Iniwa yake anzing yanikut, “Ayanikapsaapa Aisaiata ginu kem amin ngangu noman siknga ngang yake wamu anzing matakut, ‘Aminu waakwakgane musia nae maa siknga yuwawan natane umana gena dakatakan yatangenakaing.
MAR 7:7 Sike wa aminu nae kem siknga tanziyuk nanimbakngake mama wamu kepdakane nana amindane yanindamuyuk wamu waaknga Anututane ngang kem yanikaing,’ ngang Aisaiata tupa siknga matakut.
MAR 7:8 Ginu Anutue mama wamu teke aminde sanga akngakan tanggaganukaing,” ngang yanikut.
MAR 7:9 “Ginu Anutue mama wam zipbuke gisaneaknga tasinangge kepi takngatu anzing tasikaing.
MAR 7:10 Mosesda anzing yakut, ‘Gata nangga minggae gepbiatang yuyo,’ ngang yakut. ‘Aminda nana mingae sapdut wam yaniwanu atanguwa kupsok,’ ngang yakut.
MAR 7:11 Siwan ngana ginda anzing yakaing, ‘Aminu tapatu sangana nana minga gatayamikge kaya ngana sanga wa Anutue imunangge gwa yakum ngang yakengu
MAR 7:12 ita nana mingae take ma pasiyaman,’ ngang ginda unzing yakaing.
MAR 7:13 Yake ginu sanga bapusatane taking kaknga tawake pandetzae yanindamukaing. Unzingge ginda Anutue wamu atzipbukaing. Siwan ginda sangabamu unzing tasikaing,” ngang yanikut.
MAR 7:14 Siwan Jesuta aminbamu gatu yayawamban apana ita anzing yanikut, “Ginu kuupbamda nae wam natake natdetnong,” ngang yanikut.
MAR 7:15 “Aminu tapatuta sanga tapatu napan ie musiaatang pukuwiu ita tasiwan aminu waapa wai amin dua dakngawik. Wena. Sike sanga baniaatang nataak kakngata tasiwan aminu wai amin dakngawik,” ngang yanikut.
MAR 7:16 (“Aminu maakngi kaya kakengu wamu waaknga natapsok,” ngang yanikut.)
MAR 7:17 Siwan ita aminu waakwak peke yotna koke yuwawan pandetnata tuwang wamu waakngae yapiie inikwaiwa
MAR 7:18 ita anzing yanikut, “Gikaya natdetdetza wena ba dasing? Sangabamu napan aminde musiaatang pukuwiu ita natdetdetnaatang dua pukuwik. Aho. Napayutnaatang pukuke yusika masande kotdekatang pukunggak. Unzingge sanga wa bingata tasiwan aminu wai amin dua dakngawik ngang ie dua natake wamdane yapiie nanikwaiing ba dasing,” ngang yanikut. Wamu waaknga yawan natake nanamu kuupbam yuaingu tapatu dua nanimde aminu tapatuta ninindakngananga dua siwik. Take nanim ngang natapbing.
MAR 7:20 Siwan ita anzing yakut, “Sanga aminde musiaatang nataak kakngata tasiwan aminu wai amin dakngakaing,” ngang yanikut.
MAR 7:21 “Sanga aminde musiaatang yuke musiaatangga akowawa tasikaing kaknga anzing. Musiaatang wai takngatu takngatue nataaing. Yasewa tasinangge nataaing gatu kuka panangge nataaing gatu amin tangutenangge nataaing gatu
MAR 7:22 amindane sangae geengukaing. Siwan waiaknga inata inata pasikaing. Kem yakaing gatu kamunda binga pake yawakaing gatu ita sangaapana kayaapa ba umana kayaapa dakngake napbimsak ngang natake ie semna nataaing. Gatu sapdut wam yakaing gatu inae umana tangenakaing gatu yamandet sikaing gatu sanga wai buyambam tasikaing.
MAR 7:23 Sanga wa wai kuupbam aminde musiaatang yuke musiaatangga akopa yake tasikaing kakngata pasiwan aminu wai amin dakngakaing,” ngang yanikut.
MAR 7:24 Siwan Jesuta enake you wanggapma teke kautdu Taia yot gapmae kep saak kuke you gwenduatang koke yukut. Aminu tapatuta ie andang yuak ngang dua natapikge natake wepda yukut. Siwan ngana ita kusopuke yutnanga dua. Wena.
MAR 7:25 Undang yuak ngang yawa natake zetgaman maya tapatu Judianana dua. Sike itane yapana waung waita takut. Tapan dataptake yuwawan mingata kuke butaya wam ininangge muna Jesue kepine pukut.
MAR 7:26 Maya waapa Grik wamu ayakaing amikatnana tapatu. Ita Finisia kep komu Siria kep komune yuaune nana tapatu. Ita muna puke Jesue waung waita yapana takuunin inikwasiwikge inimatakut.
MAR 7:27 Inimatawan yake tuwang wamu takngatu anzing inikut, “Ninda nanamu waatdakatane pake kamunde yamuna napanu noman dua siwik. Ninda nanamu waatdakae gamok yamunim,” ngang inikut.
MAR 7:28 Siwan ngana mayata yake tuwang wamu takngatu anzing inikut, “Buyambamtapa. Gata siakande yanggayak. Kamunde gamok dua yama naning ngana kamunu nanam kaiu waatdakata napa kaiknga pimakaingu kamunda apu atnakaing,” ngang inikut.
MAR 7:29 Iniwan yake anzing inikut, “Gata unzing yanggayakge waung wai yapaka takutapa gwa inikwasiwa kunggak. Ge yotda kunggayo,” ngang inikut.
MAR 7:30 Siwan ita gatuna yotna kuke kawawan waung wai gwa teke kuwan yapanata buka gwene take pekgawan kakut.
MAR 7:31 Siwan Jesuta gatu enake Taia yot gapmae kep saak teke Saidon yot gapma banakan kukut. Kuke keu komdu Dekapolis yot gapma katak kuut musaatda yuaing saak banakan kuke yangga gapan Galili gwene kundopbut.
MAR 7:32 Kundopan aminu tapatu maakngi akusiwa yembita meya sikut tapa Jesue takapuke aminu waapa kataknga wasiwikge inimataking.
MAR 7:33 Inimatawa aminu waapa take aminbam peke paku inatakan yukumayak. Yuke Jesuta kataknga aminu waapatane maakngine wasike aapna suke katakngita yembine wasikut.
MAR 7:34 Wasike pakusang enandanga kake kekeknga yawasawa kwata wam yakut. Yake ita inane wam tangan anzing yakut, “Efata,” ngang yakut. Wamu waakngatane yapii anzing, “Ga maakga akwapan gatu yambikata atatakayok,” ngang inikut.
MAR 7:35 Iniwan maaknga akwapan yambina tatakawan wamu take yakut.
MAR 7:36 Siwan sanga wa kaking aminda sanga ie aminu tapatu dua ininingge kekeknga siknga ngang yanindakngakut. Siwan ngana wena. Wa aminu akekekake wamu waaknga aminbam yaninangge iaknga siknga natake yatakuking.
MAR 7:37 Yatakuwawa natake aminbamda kumzang satnake anzing yaking, “Sanga kuupbam ita tasiu takekan tasinggak. Ita tasiwan maaknga kusiya aminda wam nataawa gena kusiya aminda wamu ayakaing,” ngang yaking.
MAR 8:1 Tapduu waomune aminbamu gatu Jesue kuku dopbing. Doke yuwawa nanamu wena siwan kake Jesuta pandetna yayawamban apa anzing yanikut,
MAR 8:2 “Nata aminu aakwakge butaya nataat. Tapduu gweaat gwenduat naat gwa yutna sandewan nanamna napa puyuwan
MAR 8:3 tomda yuwawa nata yotna yanipewa kukengu kaita dandambong siwa kepiapane pimatning. Kundu maa sikngata apbing,” ngang yanikut.
MAR 8:4 Yaniwan pandetnata yake anzing iniking, “Keu akomu aminu wena. Sike ninda poyau zane pake nanamu aminbamu aakwakge yamuna naning,” ngang iniwa,
MAR 8:5 “Ginu poyau datdasing paing,” ngang yanikwaikut. Yanikwaiwan, “Ninu poyau katau kuut musa kautdu gomaya ngang pamang,” ngang iniking.
MAR 8:6 Iniwa natake ita aminbam yaniwan kepdakane pukwike yuwawa ita poyau wa katau kuut musa kautdu gomaya ngang pake Anutu inimbakngake puke pandetnae yaman pake usanziyama aminbamda naking.
MAR 8:7 Siwan pandetnata pis dakatu dakatu kaya. Siwan ita pake Anutu inimbakngake puke pandetnae yamuke yaniwan pis wa kuut usanziyama naking.
MAR 8:8 Siwan napa take siwan kaiknga yukingu unekan peke sapat yau katau kuut musa kautdu gweaya ngang pamuba dopbing.
MAR 8:9 Sike maya wawi waakwau buyambam siknga 4,000. Napa take siwan Jesuta ayanipewan kuwawa
MAR 8:10 iat pandetnaatda dopangbam gwene koke Dalmanuta kep saak kuking.
MAR 8:11 Undang kundoke yuwawa Ferisi aminu kunduta Jesu tasiwa siwikge natake kuku inike gata duya takngatu tasiwi kake Anututa gae take natanggamunggak ngang natapnim ngang iniwa Jesuat yanganuking.
MAR 8:12 Yanganuwawa Jesuta meya natake yawasawan yanike dasingge ginu tapduu ayuamang komune nana aminda duya kanangge yakaing ngang yanikut. Nata siakande siknga daninggat. Nata duya takngatu dua tasiwa kaning. Wena siknga ngang yanikut.
MAR 8:13 Yanikenga wa amin peke dopangbam gwene gatu koke yangga gapan kautdu saak iat pandetnaat kuking.
MAR 8:14 Yangga gwene kunangge tasike pandetnata apbotake nanamu kundu dua pakuking. Poyau gomdukan take dopangbam gwene koke kuking.
MAR 8:15 Kuyuk Jesuta natake Ferisi aminda kem yanike kait tasikaing kakngae natake ita gwaut wamu anzing yanikut, “Ginu katak siknga gwautnong,” ngang yanikut. “Ginu Ferisi amikat Herotdane amikatda sanga poyakat sawa paptanggak kakngae gwautnong,” ngang yaniwan
MAR 8:16 natake ina anzing yaking, “Ninu poyau wena. Unzingge ita yanggak,” ngang yaking.
MAR 8:17 Yawa Jesuta natapan poyakgekan natayuke Ferisitane kait takngae dua natake yakaing ngang atnatake ita kaanga anzing yanikut, “Dasingge gisa wamu yake ninu poyau wena ngang yumdekanu unzingu yakaing? Nata poyakge dua danit. Wena. Ginu natdetdetza anggaman dua siwan dua natdeke yuaing,” ngang yanikut.
MAR 8:18 “Ginu kaisa kaya ngana ginda sanga tapatu dua kaaing ba dasing? Ginu maakza kaya ngana wamu dua nataaing ba dasing? Ginu nanduwawa sanga tasiwa kaking ngana gwa botaking ba dasing,” ngang yanikut.
MAR 8:19 “Nata poyau 5,000 aminde puke yama napa ginda poyau kaiknga yukingu sapat yau datdasing pamuking,” ngang yaniwan, “Katau kuut musaat kepianganu gweaya,” ngang iniking.
MAR 8:20 Iniwa natake gatu yanikut, “Nata poyau katau kuut musa kautduanganu gomaya ngang aminu 4,000-de putzukuke yama napa ginda kaiknga yukingu sapat yau datdasing pamuking,” ngang yaniwan, “Katau kuut musa kautdu gweaya,” ngang iniwa
MAR 8:21 natake, “Ginu dua natdeing ba dasing,” ngang yanikut.
MAR 8:22 Siwan Jesuat pandetnaatda dopangbam gwene kusika Betsaida yot gapmane kundopa aminu kai akusiya tapatu ie takapuke Jesuta katakngita wasiwikge iniking.
MAR 8:23 Iniwa natake Jesuta kai akusiya waapatane katakngine take yotde kwaim saak takukut. Takuke aapna kaine suke katakngita wasike anzing inikwaikut, “Gata sanga akayak ba dasing,” ngang inikwaiwan
MAR 8:24 kake anzing yakut, “Nata aminu kundu kawa katap dakandaka binga siwan akuwawa kaat,” ngang yakut.
MAR 8:25 Ngang yawan katakngi kaine gatu wasiwan aminu waapata anggaman kanangge natake kanggamatawan take siwan sangabamu anggaman kakut.
MAR 8:26 Siwan Jesuta yotna initewan kuwikge anzing inikut, “Gata you anggapmaatangu ma kopim,” ngang inikut.
MAR 8:27 Siwan Jesuat pandetnaatda enake you wanggapma teke kautdu Sisaria Filipai yot gapmae kep saak yot gapma gapma yuaingune kuking. Siwan kepiapane kusika ita pandetna anzing yanikwaikut, “Aminda nae dasing yakaing,” ngang yanikwaiwan
MAR 8:28 yake anzing iniking, “Kunduta gae ‘Jonu yangga sauyamukut tapa’ ngang yakaing. Siwan kunduta gae ‘Ilaija ayanikapbut tapa Anututa tupa siknga kayukapa takopbut. Ita enandangga gatu epuke pasinggak’ ngang yakaing. Siwan kunduta gae ‘ayanikapsa tapatu tupa siknga kumbut ngana apmanu gatu gweake pasinggak’ ngang yawa kakumang,” ngang yaking.
MAR 8:29 Yawa yake, “Gisa nae dasing yakaing,” ngang yanikwaiwan Pitata yake anzing inikut, “Ga Anututa tapan gata Krais gatanimuyaapa dakngake yuwi gaduat,” ngang inikut.
MAR 8:30 Iniwan natake aminu tapatu wamu waaknga dua ininingge ayanindakngakut.
MAR 8:31 Siwan kepiapane kusika ita tuwanguke anzing yanindamukut. Na aminbamde notnaapata meya takngatu takngatu papit ngang yakut. Ninu Judia amindane take amikat gatu Anutue yot takwan gwene pasiya amindane takeakwakat gatu Mosesde mama wam yanindamumsa amikatda nae semna natangamuke yawa nuwa kupit. Kungwake tapduu gweaat gwenduat yukenga gatu enawit ngang
MAR 8:32 wamu waaknga yake anggaman siknga yakapbut. Yakapan natake Pitata Jesu kwaim saak takuke inatakan yuke gata toknga waakngata gae apikge ma yawim ngang kaanga inikut.
MAR 8:33 Iniwan Jesuta tapan tekwamban pandetnabamu undang yuwawa kake Pita kaanga anzing inikut, “Gata iwana dakngawi ganduke ganinggat. Na napbimbi ayanggat taknga tasingamuning,” ngang inikut. “Gata Anutue natdetdet taknga dua natayak. Wena. Gata aminde natdetdet takngakan natake yanggayak,” ngang inikut.
MAR 8:34 Siwan ita aminbampat gatu pandetnaat yayawamban ie apana anzing yanikut, “Aminu tapatuta na nawanangge natakengu inane banip tawanangge nataak kaknga undang teke iwanata amin saamdakane na nuwa kupit binga kumnangge dua gwauke meyana gwaamuke na nawamsok,” ngang yanikut.
MAR 8:35 “Sike aminu tapatuta kayuk yuak kaknga gitna tanangge natakengu waapata akupik. Siwan ngana aminu tapatuta nae natanggamatake gatu natane wama takeaknga ngang yanikapnangge natake tasiwawan aminu kunduta semna natangamuke tanguwa kupanu ita gatuna kayuk yuwik kakngana atake asinggan yuwik,” ngang yanikut.
MAR 8:36 “Sike aminu tapatuta sangaapana buyambam siknga papik. Pake ngana masande akupanu sangana wa pakut takwakga dasing gatangamik? Wena.
MAR 8:37 Sike sanga dasitna bingata kayuk yutnanga akngana wena sikuu gatuna tanangge muke usiwik? Wena,” ngang yanikut.
MAR 8:38 “Tapduknga ayuamang komune nana aminda wai takngatu takngatu tasike Anutue asinggan dua natanggamatake ie masa imuke gawaknga aknga pasikaing. Sike wa pasikaing amikatnana tapatuta nae masa namanu nata tapduknga na aminbamde notnaapaat Anututane angelanaat gatu Nanatane kakaa akngane yuke apnim gwene nata aminu waapae unzakan yuke masa asimit,” ngang yanikut.
MAR 9:1 Siwan wamu waaknga yakenga Jesuta anzing yanikut, “Nata siakande siknga daninggat. Aminu ayuaingu kundu dua kumning gwene kawawa tapduknga Anututa amin panangge tasinggak kakngata apan kaning,” ngang yanikut.
MAR 9:2 Siwan masande tapduu katau kuut musa kautduanganu gwendu ngang kawa sandewana Jesuta Pitaat Jems gatu Jon nganggan pake ita tawanu mamaya siknga dakatune yanipakopbut. Yaniwan koke yuwawa Jesuta aminu inata kundu dakngawan kainata kaking.
MAR 9:3 Kawawa itane tauknga kwaknga siknga siwan waenga siknga sikut. Aminu keunenana tapatuta tauknga tasiwan kwaknga unzingu sinanga dua.
MAR 9:4 Siwan kawawa baminu akumbing katangga Ilaijaat Moseskatda anggaman siwat kaking. Kawawa waapaatda Jesuat wamu yaking.
MAR 9:5 Yawawa kake Pitata Jesu anzing inikut, “Aana. Ninu ane take siknga yuamang. Nindupewi ninda gepa gweaat gwenduat mitapnim. Gwendu gae siwan gwendu Mosesde siwan gwendu Ilaijae,” ngang inikut.
MAR 9:6 Dasingge wa aminu akgwauking. Akgwauke Pitata wamu zaaknga yawit ngang natapan maiwan wamu waaknga yakut.
MAR 9:7 Yawan minga dakatuta apu wamakusiwan wamu takngatu minga ganang katangga anzing yakut. Aminu waapa natane waaknga. Nata ie take siknga nataat. Siwan ginda itane gen gwaamutnong ngang yawan
MAR 9:8 natake zetgaman katakuke ngana aminu tapatu dua kaking. Jesu awiapatakan wa amikat yuking.
MAR 9:9 Siwan tawandaka ateke pukuyuk Jesuta wamu kekeknga anzing yanikut. Sanga ginda wa kaingge ie aminu tapatu ginda ma iniwam. Kuku tapduknga na aminbamde notnaapa matmat katangga gatu enawit gwenea yaninong ngang yanikut.
MAR 9:10 Siwan wamu waaknga gitna take natagwaanguke ina anzing yaking. Wamu matmat teke enawikge yanggau waakngae yapii dasing ngang yake
MAR 9:11 anzing inikwaiking, “Dasingge mama wam yanindamumsa aminda yake, ‘Ilaijata gamok apana aminu Anututa tapan Krais gatanimuyaapa dakngake masan apik,’ ngangu yakaing,” ngang inikwaiwa
MAR 9:12 yake anzing yanikut, “‘Ilaijata gamok apuke sanga kuupbam tanomanuwik,’ ngang siakande yakaing. Ngana nata daniwa natapnong. Ilaijata gwa apbut. Apan kake Judianana aminda inae banip tawake sanga wai takngatu takngatu ie tasingamuke tanguwa kupan wamu tupa yakapbut taknga buyana unin aawan kakumang,” ngang yanikut. “Siwan ngana wamu takngatu yakapsa aminu tapatuta na aminbamde notnaapae natake aminda masa namuyuk tokngabam nae namuning ngang tupa siknga matakut taknga buyana dua aawik ba dasing nataaing,” ngang yanikut.
MAR 9:14 Siwan Jesuat pandetna waakwakatda tawandakaneta epuke pandetna kunduta yuking komune kundoke kawawa aminbamda pandetna waakwau yupbasiwawa Mosesde mama wam yanindamumsa aminu kunduat wa pandetnaat yanganuwawa kaking.
MAR 9:15 Sike apunggawa kake aminbamu wa yukingga asatnake ie isapmake kuke gaak wam iniking.
MAR 9:16 Siwan ita pandetna anzing yanikwaikut, “Ginu wa amikat minae yakaing,” ngang yawan
MAR 9:17 aminu tapatu aminbamu wa yukikatnana tapatuta Jesue yake anzing inikut, “Yanindamumsaapa. Natane waaknga waung waita tapan gena kusiwan nata gae takaput,” ngang inikut.
MAR 9:18 “Tapduk bamu asinggan waung wai waapata kekeknga tapan kepdakane pimamban aapna kwakngata genane akopa ita gena sambuwawan gupna gatukande akekekanggak. Siwan nata pandetda waung wai waapa inikwasitningge yaniwa ngana tasinanga dua,” ngang inikut.
MAR 9:19 Iniwan natake ita aminbam anzing yanikut, “Ginu Anutue natapa siakan dua siwan yamandet sikaing amin! Na gikat gatake yuke asinggan dandupewa ginda meya aknga nama gwaamuba take dua siwik. Ginda waatdaka waapa nae takapnong,” ngang yanikut.
MAR 9:20 Ngang yaniwan waatdaka waapa ie takapuwawa waung waita Jesu kake zetgaman waatdaka waapa tandambanuwan kepdakane pimake mukwaiwan aapna kwakngata genane akopbing.
MAR 9:21 Unzing tasiwan kake Jesuta itane nana anzing inikwaikut, “Tapduu datdasing ita unzingu sike yuak,” ngang iniwan, “Tupa siknga ita engang yukuune,” ngang inikut.
MAR 9:22 “Siwan tapduk asinggan waung wai waapata tasiwan maiwikge natake katap gwekatang gatu yanggaatang ngang muban pukunggak. Ngana gata sandekngamunanga take kakengu ninde butaya natake gatanimuyo,” ngang inikut.
MAR 9:23 Iniwan yake anzing inikut, “Aminu Anutue natapan kekeknga singgak kapata sanga kuupbam tasinanggengu take tasinanga ngang natayak gamu unzingu dua naniwim,” ngang inikut.
MAR 9:24 Iniwan zetgaman nana waapata anzing yakut, “Na Anutue natapa kekeknga singgak ngana kekeknga siknga siwikge gatangamuyo,” ngang inikut.
MAR 9:25 Iniyuwawan aminbamda ie isapmake apu yupbasinangge tasiwa kake ita waung wai waapa kaanga anzing inikut, “Ga waungu waatdaka aapa tapi genaat maakngaat kusikut tapa nata ga ganinggat. Gata waatdaka aapa teng! Teke gata gatuka i ma tapim,” ngang iniwan
MAR 9:26 waung wai waapata kumzang ainggamatayuk waatdaka waapa kumzang tandambanuke ateke kukut. Kuwana waatdaka waapata kupsaapa yuwawan kake aminbamda, “Gwa kungwanggak,” ngang yaking.
MAR 9:27 Siwan ngana Jesuta katakngine take tangenawan ita dandam yukut.
MAR 9:28 Siwan masande Jesuta yoakatang kopana pandetnatakan undang koke anzing inikwaiking, “Dasingge ninda waung wai waapa inikwasitnanga dua,” ngang iniwa
MAR 9:29 ita yake anzing yanikut, “Tumuk wamu dua yakengu waung wai inikwasitnanga dua,” ngang yanikut.
MAR 9:30 Siwan you wanggapma teke kusika Galili kep komune iat pandetnaatda unekan gatake kuwawa pandetna yanindamutnangge natake ita undang yuak ngang aminu tapatuta dua natapikge natake kuking. Kuyuk anzing yanikut, “Aminu tapatuta na aminbamdane notnaapa aminde yaman nuwa kupit. Kungwake tapduu gweaat gwenduat yuke gatu gweawit,” ngang yanikut.
MAR 9:32 Siwan ngana wamu waakngatane yapii anggaman dua natake inikwaitnangge akgwauking.
MAR 9:33 Siwan Kapaneam yot gapmane kundoke yoakatang kokenga Jesuta pandetna anzing yanikwaikut, “Kepiapane apuyuk ginu wamu dasing kaknga yaing,” ngang yanikwaiwan
MAR 9:34 ngana ininangge meptake wamna wena. Kuma yuking. Dasingge? Kepiapane apuyuk wa aminda, “Ninu itane pandetnaat nana mamin tapata nindane buyambam tapa yuak,” ngang yake yanganuking.
MAR 9:35 Siwan ita pukwike pandetna katau kuut musaat kepianganu tapaaya yayawamban apana ita anzing yanikut, “Aminu tapatuta tupan tapa yutnanggengu ita masan siknga yuke aminu kuupbam gatayamunangge yuyok,” ngang yanikut.
MAR 9:36 Yanikenga ita waatdaka tapatusimu katakngata take takapuke banakan teke betayuk anzing yanikut,
MAR 9:37 “Aminu tapatuta nae natanggamatake waatdaka umana wena tapatusimu aapasim binga gatangamiu waapata na kuut gatangamunggak kapa unin. Siwan aminda na gatangamiu waapata natane Nana atnanitewan apbum tapae kuut gatangamunggak kapa unin,” ngang yanikut.
MAR 9:38 Siwan Jonda anzing inikut, “Yanindamumsaapa. Ninda kawatna aminu tapatuta yake, ‘Jesuta na gatangamunggak,’ ngang yayuk waung wai yanikwasiwan kuwa kake nikatnana duaapa ngang natake ninda asinindakngakumang,” ngang iniwan
MAR 9:39 yake anzing yanikut, “Ginda waapa ma inindakngawam. Aminu tapatuta nae umana yayuk duya takngatu tasikengu ita nae sapdut wamu zetgaman dua yawik.
MAR 9:40 Aminu ninda pimanimde dua natake tasinggak kapa nindane notnin daknganggak.
MAR 9:41 Sike aminu tapatuta gin danduke Anututa tapan Krais gatanimuyaapa dakngake yuak kapaat gatu itane pandetnaat gatayama ngang natake yangga kap gomune ginde daman atangopning. Unzing tasiwanu Anututa sanga tapatu aminu waapae siakande siknga ngang yake asimik,” ngang yanikut.
MAR 9:42 “Sike aminu tapatuta tasiwan aminu umana wena tapatu nae natapan kekekanggau aakwakat nana tapatuta pimapanu aminu wa atasiwan pimakut tapata tokngabam papik. Siwan suu buyambamu gwendu guyakngane wamake yanggabam gwene muba pukuke kupik gamu wai waaknga dua tasike toknga buyambamu dua papan,” ngang yanikut.
MAR 9:43 “Sike gatane katakgata tasiwan ga waiakngaatang pimakengu gata apatdakngake mumbi kuwan take siwik. Apatdakngake mumbi kuwan katakga tapatukan siwan wai waakngaatang dua pimake kayuk yuwiyak kaknga take yukengu wai dua siwiyak. Sike ga katakga dua patdakngawi tapaaya siwan wai waakngaatang pimakengu ga katau dua kungwake asinggan isiyuak gwekatang kuwi wai siknga siwik,” ngang yanikut.
MAR 9:44 (Sike keu waopatangu binda nake dua kungwakaing. Siwan katapda asinggan yasinggak.)
MAR 9:45 “Siwan gatane kepikata tasiwan ga waiakngaatang pimakengu gata apatdakngake mumbi kuwan take siwik. Siwan gatane kepika tapatukan siwan wai waakngaatang dua pimake gata kayuk yuwiyak kaknga take yukengu wai dua siwiyak. Sike kepika dua patdakngawi tapaaya siwan wai waakngaatang pimakengu ga katapatang muba kuwi wai siknga siwik,” ngang yanikut.
MAR 9:46 (Sike keu waopatangu binda nake dua kungwakaing. Siwan katapda asinggan yasinggak.)
MAR 9:47 “Sike gatu gatane kaikata tasiwan ga waiakngaatang pimakengu gata akwagike mumbi kuwan take siwik. Siwan ga kaika gwendukan siwan wai waakngaatang dua pimake gata Anututa amin panangge tasinggak kakngae gepbiatang koke yukengu wai dua siwiyak. Sike ga kaika dua kwagiwi gweaya siwan wai waakngaatang pimakengu katapatang muba kuwi wai siknga siwik,” ngang yanikut.
MAR 9:48 “Sike keu waopatangu binda nake dua kungwakaing. Siwan katapda asinggan yasinggak,” ngang yanikut.
MAR 9:49 “Sike wamu wa yanggat taknga tasikengu pangu pasiwan nanamu kaa siknga singgak bingata ginu nomana siknga yutning.
MAR 9:50 “Pangu sanga take siknga. Ngana panggane kaa taknga sipna siwanu ginda take dasing tasiwa kaa gatu siwik? Wena. Siwan ginu sanga noman yutnanga aknga banipzaatang yuwan ginu notzaat take siknga yanggatake yutnong,” ngang yakut.
MAR 10:1 Siwan Jesuta enake keu waomu teke kuku Judia keu Jodan yangga apata wesiwan kautdu saak yuaing aminde kukut. Kuwan aminbamda kake ie kuku doke yuking. Doke yupbasiwawa ita asinggan tasinggak kaknga tasike Anutue wam yanikapbut.
MAR 10:2 Siwan Ferisi aminu kunduta i tasiwa siwikge natake ie kuke anzing inikwaiking, “Aminu tapatuta maatna inikwasiwan kuwanu Mosesde mama wamu asandewik ba dasing,” ngang inikwaiwa
MAR 10:3 yake anzing yanikut, “Mosesda mama wamu dasing matakut taknga akendekaing,” ngang yaniwan
MAR 10:4 anzing yaking, “Mosesda aminda pepa maya sandekaingu sandu take matake maya take sandewik,” ngang iniking.
MAR 10:5 Iniwa yake anzing yanikut, “Mosesda natake aminu yamandet sikaing amin ngang natayamuke mama wamu waaknga matakut.
MAR 10:6 Tupa siknga Anututa sangabam tasike ita aminu wawiat mayaat ngang tumukut.
MAR 10:7 Unzingge wawita nana minga peke kuwan maatnaat gatake unekan yutzan.
MAR 10:8 Yuke waapaatda tapaaya binga dua yutzan. Wena. Waapaatda sanga tapatukan binga dakngake yutzan.
MAR 10:9 Unzingge sanga Anututa gwa tapan gatapbuu aminda zipmandakngake sandetnanga dua,” ngang yanikut.
MAR 10:10 Siwan masande iat pandetnaatda yotnane koke pandetnata wamu waakngae inikwaiwa
MAR 10:11 ita anzing yanikut, “Aminu tapatuta maatna sandeke gatu tapatu tapiu wawi waapata yasewaapa daknganggak,” ngang yanikut.
MAR 10:12 “Sike maya tapatuta apna teke wawi tapatu takengu maya waapata yasewaapa daknganggak,” ngang yanikut.
MAR 10:13 Siwan waatdaka mateu ita katakngita wasiyuk wam kwikwik yaniwikge pakapbing. Pakapa kake ngana pandetnata kaanga yaniwa
MAR 10:14 kake Jesuta musia wai natayamuke anzing yanikut, “Ginu kapewa waatdaka mateu nae apnong. Ginda ma yanindakngawam. Aho. Aminda waatdaka aakwakga nae nangaakan dua nataaing binga daknganingu Anututa amin panangge tasinggak kakngae gepbiatang yuaikatnana aminu unin,” ngang yanikut.
MAR 10:15 “Nata siakande siknga daninggat. Aminu tapatuta Anututa amin panangge tasinggak kakngae gepbiatang kopnangge ngana waatdaka binga dua dakngakengu ita undangu kopnanga dua. Wena siknga,” ngang yanikut.
MAR 10:16 Yanikenga waatdaka waakwak inandek inandek betayuk wam kwikwik yamukut.
MAR 10:17 Siwan Jesuta enake kuwawan aminu tapatuta ie isapmake kuku ie muna puke anzing inikwaikut, “Yanindamumsa noman tapa. Nata dasing tasike kayuk yutnanga aknga pake kayuk asinggan asinggan yuwit,” ngang inikwaiwan
MAR 10:18 yake anzing inikut, “Dasingge gata, ‘Yanindamumsa noman tapa,’ ngangu naninggayak? Anutu awiapatakan noman tapa yuak.
MAR 10:19 Gata mama wamu anzingu atnataayak. ‘Gata aminu ma zipim. Gata yasewa ma tasiwim. Gata kukae ma papim. Gata amin notdae kemu ma yaniwim. Gata kait pasiyuk amindane sanga ma papim. Gata nangga minggae wam gwaamuke ie gepbiatang yuyo,’ ngangu atnataayak,” ngang inikut.
MAR 10:20 Iniwan yake anzing inikut, “Yanindamumsaapa. Na tapduknga waatdaka yukum gweneta apu apman na mama wamu wa kuupbam tawamba sandekgak,” ngang inikut.
MAR 10:21 Iniwan katasike ie musip gwaang natake Jesuta anzing inikut, “Ga sanga tapatuekan dapmanggayak. Ga kuke sangaka kuupbam aminde yami usinong. Usike mani gama pake sangaapana wena aminde yami puyuwan take siknga kayuk yuwiyak kakngaka enandang yukgamuwawan pandetna daknawi naat gaat kusim,” ngang inikut.
MAR 10:22 Iniwan wamu waaknga natake nomna maiwan musia meya siwan ateke kukut. Dasingge? Itane sangaapana buyambam siknga.
MAR 10:23 Ita kuwawan Jesuta pandetnabam katakuke anzing yanikut, “Anututa amin panangge tasinggak kakngae gepbiatang kopnanggengu aminu sangana babanda tasiwa maiwik,” ngang yaniwan
MAR 10:24 natake asatnaking. Siwan ngana wamu yake anzing yanikut, “Waatdakana! Anututa amin panangge tasinggak kakngae gepbiatang kopnanggengu aminda kwatan siknga tasining.
MAR 10:25 Ikwawa gamanda tauk bupmakge ganangiatang kopnanggengu ita kwatanu aminu sangana buyambamu kayata Anututane kekeknga aknganane kopnangge tasining binga dua,” ngang yaniwan
MAR 10:26 natake ngana kumzang satnake ina anzing yaking, “Unzing kakengu maminda kayuk yutnanga aknga pake asinggan yuwik,” ngang yawa
MAR 10:27 Jesuta asiknga kanggamatake anzing yakut, “Aminda unzingu tasinanga dua ngana Anututa sangabamu tasinangge natakengu atasiwik. Ita gatayaman moo amikat gatu aminu sangaapanababan takwakatda kayuk yutnanga aknga pake yutning,” ngang yanikut.
MAR 10:28 Siwan Pitata yake wamu takngatu anzing inikut, “Natapso! Ninu sangabamin peke gaat unekan gatake sukukamangga kayuk yutnim taknga apanim ba dasing,” ngang inikwaikut.
MAR 10:29 Inikwaiwan yake anzing yanikut, “Nata siakande siknga daninggat. Mamin amin takwakgaka nae natanggamatake gatu wama takeaknga ngang yanikapnangge natake yotna ba uyapna ba paana ba samina ba minga ba nana ba waatdakana ba puyana peke kuke natane puyana pasiwanu
MAR 10:30 Anututa yake sangabamu isakoke kwaapzang 100 binga ayamik ngang yanikut. Sike wa aminu dua kumning gwekatangu Anututa yake you buyambam gatu uyapna buyambam gatu paana buyambam gatu samina buyambam gatu minga buyambam gatu nana buyambam gatu waatdakana buyambam gatu puyana buyambam yaman paning. Siwan aminu nae masa namukaing aminu kunduta aminu nae natanggamatake natane puya tasitakuning aminde toknga takngatu takngatu yama paning ngana masande wa aminda kayuk yutnanga aknga pake kayuk asinggan asinggan yutning,” ngang yanikut.
MAR 10:31 “Sike aminu tupan takwak dakngake yuaingu kunduta apu masan amin daknganing. Siwan aminu umana wenaakwak dakngake yuaingu kunduta apu tupan amin daknganing,” ngang yanikut.
MAR 10:32 Siwan kepiapane kusika Jerusalem kopnangge kuking. Kusika Jesuta gamok pandetna peke tupan kuwawan kake dasingga natake nipmake kunggak ngang natake pandetnata nangaakan natayuke musia meya buyak kuwawa kake aminbamu ayawaking amikaya unzakan natapbing. Unzing natake kuwawa Jesuta pandetna katau kuut musaat kepianganu tapaaya ngang pake tuwanguke sanga ie apik kakngae wam yake
MAR 10:33 anzing yanikut, “Natapnong. Apmanu ninu Jerusalem kopnim. Koke aminu tapatuta na aminbamde notnaapa dakngake yuat tapa Anutue yot takwan gwene pasiya amikat gatu mama wam yanindamumsa amikatde kataune yamik. Yaman napmake wamu atnuningge wam yawa kekekawan dongu kundune nana Anutue dua nataaing aminde yamuning.
MAR 10:34 Yama sapdut wam nanike aapda sutnapbike ipmapa nuke nuwa kupit. Kungwake tapduu gweaat gwenduat yukenga gatu enawit,” ngang yanikut.
MAR 10:35 Siwan kepiapane kusika Sebeditane waaknga tapaaya umana Jems gatu Jon ngang yaniking kapaatda notnabam peke Jesu ininangge kuke anzing inikumayak, “Yanindamumsaapa. Nitde sanga takngatu tasinimiyakge natamak,” ngang iniwat
MAR 10:36 yake, “Giu nata gitde dasing kaknga tasindamitde natamayak,” ngang yanikwaikut.
MAR 10:37 Yanikwaiwan yake anzing inikumayak, “Masande ga enane siknga buyambam tapa dakngake yuke gata nit papi nitda umaniu kaya dakngake gaat gatake unekan yutnim. Tapatu katakga siyaapane yuwan tapatu katakga kwanaapane yuwik,” ngang inikumayak.
MAR 10:38 Iniwat ngana yake anzing yanikut, “Giu sanga atnanimayak kakngae katak dua natamayak. Meya nata wa kawit takngata gitde apan kake ngana gitda undang dua ba pimatzang ba dasing,” ngang yanikut.
MAR 10:39 Yaniwan, “Ngan nitda dua pimatzim,” ngang yake iniwat yake anzing yanikut, “Siakan. Meya nata kawit taknga gitdaaya waaknga akasan.
MAR 10:40 Siwan ngana Anututa dua naniwan kapewa aminu tapaata kataknga siyaapane ba kataknga kwanaapane ngangu yuke tasan. Aho. Kekeknga waaknga aminu tapaae Anututa gwa tandakngake teyamukut tapaatdakan tasan,” ngang yanikut.
MAR 10:41 Siwan pandetna katau kuut musaatda wamu waaknga natake waapaatde bania toknga natayamuwawa
MAR 10:42 ngana Jesuta yayawamban ie apa anzing yanikut, “Ginu atnataaing. Aminu buyambam tapa apa dongu kundune nana Anutue dua nataaing aminda yaipapakusike enane yuaing. Siwan aminu buyambam tapa apatane aminabamda wa aminde wam tawaningge kumzang kekekakaing.
MAR 10:43 Ngana ginda unzingu ma tasiwam. Wena. Aminu gikatnana tapatuta ginde buyambam tapasa dakngananggengu ita gin gatandamuyaapa dakngayok.
MAR 10:44 Siwan aminu ginde tupan tapasa dakngananggengu ita puya aminza dakngayok.
MAR 10:45 Dasingge? Na aminbamde notnaapa dakngake yuat tapa aminda nae puya pasingamuningge dua apbum. Wena. Apuke puya tasike amin gatayamunangge natake apbum. Apuke kungwayamit takngata iwana zipmake yawamba kuwa aminbam sandeke papitde apbum,” ngang yanikut.
MAR 10:46 Siwan Jeriko yot gapmane kundoke gatu teke iat pandetnaat gatu aminbampatda unekan gatake kuking. Gatake kuwawa aminu tapatu kai kukgweat kusikumayau tapatu umana Batimias ngang iniking. Timiasdane waaknga. Ita kepi kwaimune pukwike aminde mani imuningge yayawanggak.
MAR 10:47 Yayawake natawawan tapatuta yake Jesu Nasaret nanaapata apunggak ngang yawan natake apaa anzing yanggamatakut, “Jesu! Ga nindane Buyambamtapa. Ga Devitdane dongune aakuyak kapa. Gata nae butaya natapso,” ngang yawan
MAR 10:48 aminbamda, “Ga genda umukusing,” ngang kaanga iniwa natake ngana ita apaa siknga yanggamatake, “Devitdane dongune aakuyak kapa. Gata nae butaya natapso,” ngang yakut.
MAR 10:49 Yawan natake Jesuta pakapu yuke, “Ginda yatawamba apan,” ngang yaniwan natake kai kusikuu waapa yatawake anzing iniking, “Musipba kekeknga siyok. Gae yanggawanggak. Enat!” ngang iniwa
MAR 10:50 ita got tauknga waike mutewan kuwan pupzang enake Jesue kukut.
MAR 10:51 Siwan Jesuta anzing inikut, “Ga nata dasing tasinggamitde natayak,” ngang inikwaiwan natake ita yake, “Aana. Na kaina take tasingamiyakge nataat,” ngang inikut.
MAR 10:52 Iniwan yake anzing inikut, “Ga undang kunggayo. Musipbaatang nae natapi kekekak kakngata gatanggaman kaika take gwa sikamayak,” ngang iniwan zetgaman kaina kukgweat take siwat ita gatuna kake Jesu tawamban kuking.
MAR 11:1 Siwan kusika Jerusalem wesim kundoke you Betfasi gapmaat Betani gapmaatda tawanu Oliv daka gepbine yuamayak gapmaaune kundoke Jesuta pandetna tapaaya yanipewan kusande
MAR 11:2 natake anzing yanikut, “Gitda you wesimu atugapmasimu kaamayaune kuke you wanggapmane koke zetgaman ikwawa gamanu aminu tapatuta masene dua pukwikuu gwendu napda tewatanguwan wamateinga kasan. Kake waike takapzon.
MAR 11:3 Sike aminu tapatuta danduke, ‘Dasingge gitda unzingu tasikamayak,’ ngang daniwanu gitda anzing inison, ‘Buyambam tapata anggwende puya kaya siwan ita zetgaman gatu apme tewan apik,’ ngang inison,” ngang yanipewan kukumayak.
MAR 11:4 Yanipewan kuke ikwawa gamanu gubanga gwendu kakumayak. Kawawat toikngata you gwendutane gwabok gwaune wamatewa kepman kepiapa wesim yuwawan kake nap taknga awaikumayak.
MAR 11:5 Awaiwawat aminu kundu wesim yukingga kake anzing yaniking, “Giu dasing tasinangge ikwawa gamanu wagwenu waikamayak,” ngang yaniwa
MAR 11:6 wamu Jesuta yakut taknga ngang yanikumayak. Yaniwat natake kapewa
MAR 11:7 ikwawa gamanu gubanga wagwenu Jesue takukumayak. Siwan waapaatda tauknga kundu masene pewat Jesuta une pukwike kukut.
MAR 11:8 Kuwawan aminbamda kake Buyambam tapana initakuningge natake got tauknga kepiapane usiking. Siwan kunduta puyane kuke katap kaing patdeke kepiapane usiking.
MAR 11:9 Siwan aminbamu kundu tupan kuwawa kundu masan apuyuk anzing yanggamataking, “Umana yatangetnatnong! Anututa initewan apan kana take siknga singgak,” ngang yaking.
MAR 11:10 “Bamindane tupan tapa Devitda kayukut taknga gatu tangenake ninduyuwik kapa Anututa gatangamuyok. Enane siknga yuak kapatane umana yatangetnatnong,” ngang yaking.
MAR 11:11 Siwan Jesu Jerusalem kundoke Anututane yot takwan gwene koke sanga kuupbamde katakuwan puyuwan gunzitda apukunangge dapaknga siwan kake kepman epuke you wanggapma teke iat pandetna katau kuut musaat kepianganu tapaaya ngakatda Betani yot gapmane kuking.
MAR 11:12 Siwan tembana Betani yot gapma teke Jerusalem gatu kopnangge kepiapane kusika Jesu tomna natapbut.
MAR 11:13 Natake kawan baau dakatu maasim tatakngi buyambam yuwan kakut. Kake ita inengan buyana kundu kanangge kukut. Kuke kawan ngana buya wena kakut. Tatakngikan kakut. Dasingge? Tapduknga baap dakata buya aatnanga tapduk dua sikut.
MAR 11:14 Siwan Jesuta bania toknga natake baau wandakae anzing yakut, “Ga buyaka gatu masande ma aawim. Wena siknga,” ngang yawan pandetnata wamu waaknga natapbing.
MAR 11:15 Siwan Jerusalem kundoke Jesuta Anututane yot takwan gwene koke kawawan aminu sangaapa yot gwene pakoke pewa apu usiwawa kake aminu wa tasikingu kuupbam yanikwasiwan kepman epuwawa ita tebo wa aminda manina sanis pasiking amindane pangenapamapan kuwa ita aminu kwait usiningge apukwike tasiking amindane sia kuut pangenapamapan kuking.
MAR 11:16 Siwan ita dua kapewan sangabamu pake Anututane yot gwekatang kopbing. Unzing yanindakngake
MAR 11:17 anzing yakut, “Anutue wamda anzing yakut, ‘Natane yotna dongu kuupbamda tumuk wam naniningge yot gwen yuak,’ ngang yakut. Ngana ginda tasiwa kuka aminde yot gwen binga daknganggak,” ngang yakut.
MAR 11:18 Siwan Anutue yot takwan gwene pasiya amindane takeakwakat mama wam yanindamumsa amikatda wamu waaknga natake tuwanguke kepi takngatu Jesu tanguwa kupikge kanangge tasiking. Dasingge? Aminbamda itane wam natapa musia asenawan kake Jesue akgwauking.
MAR 11:19 Siwan bangee Jesuat pandetnaatda Jerusalem teke kuking.
MAR 11:20 Siwan tembana kepiapane kusika kawa katau baau wa inikut dakata gwa kupiakutna kaking. Tatakngiat muyakngi kuut gwa kupiakutna
MAR 11:21 kake Pitata anzing inikut, “Aana. Kayo. Katau baapdaka gata kweu buya dua aawikge inikuyak dakata gwa kupiak,” ngang iniwan
MAR 11:22 yake anzing yanikut, “Ginda Anutue natapa kekeknga siyok.
MAR 11:23 Siakande daninggat. Aminu tapatuta musiane takngaaya dua natapik. Wena siknga. Ita baniaatang anzing natapik. Siakan. Nata yawa buya asaawik ngang natapan kekeknga siknga siwanu ita tawanu andaka enake yanggabam gwene isakuwikge yawanu sanga aminu waapata ayawik kaknga siakande buya asiwik,” ngang yanikut.
MAR 11:24 “Siakande daninggat. Ginda tumuk wam yake sanga tapatu siwikge yaning kakngae natake Anututa sanga waaknga atasinimunggak ngang natapa kekekawanu sanga wa ginda ayaning kaknga asiwik,” ngang yanikut.
MAR 11:25 “Siwan ginda tumuk wam yayuk wai takngatu aminu tapatuta ginde tasindamukut takngae natake banipzaatang sandekngamunong. Sandekngama gindane Nanza enandang yuak kapata gindane waiakngasa ina unzakan asandetdamik,” ngang yanikut.
MAR 11:26 (“Siwan ngana ginda aminu kundutane waiakngana dua sandewanu gindane Nanza enandang yuak kapata gindane waisa dua sandewik,” ngang yanikut.)
MAR 11:27 Siwan kepiapane kusika Jerusalem yot gapmane gatu kodopbing. Kodoke Jesuta Anututane yot takwan gwekatang koke sukuwawan Anutue yot takwan gwene pasiya amindane takeakwakat gatu mama wam yanindamumsa amikat gatu Judia amindane take amikatda ie kuke
MAR 11:28 anzing iniking, “Ga maminda tapan sanga waaknga tasinggayak,” ngang inikwaiking. “Maminda ga tapan puya waaknga pasinggayak,” ngang inikwaiwa
MAR 11:29 yake anzing yanikut, “Nakaya wamu takngatu gin danikwaiwit. Sike ginda nae wamu yake atnaniwanu nakaya maminda na tapan puya waaknga pasinggatde daniwit.
MAR 11:30 Jonda aminbamu yangga sauyamukut taknga enandang nanae sanga ba aminde sanga ba dasing? Ginda yake naninong,” ngang yanikut.
MAR 11:31 Yaniwan natake ina anzing yaking, “Ninda, ‘Enandang nanae sanga,’ ngang yananu ita anzing yake niniwik, ‘Dasingge ginu ie siakan ngang dua natapbing,’ ngang niniwik.
MAR 11:32 Sike ninda, ‘Aminde sanga,’ ngang yanangge apmeptakamang,” ngang yaking. Dasingge? Aminu kuupbamda Jonde natake ayanikapsaapa siakande siknga ngang natapa kake wa aminu siakan dua ngang yanangge akgwauking.
MAR 11:33 Akgwauke Jesu yake, “Ninu dua nataamang,” ngang iniwa yake Jesuta, “Nakaya ginu puya waaknga na maminda tapan apu pasinggatde dua daniwit,” ngang yanikut.
MAR 12:1 Siwan Jesuta tuwang wamu kundu yanike anzing yakut, “Aminu tapatuta wain tapunde puya kwaike wamambasike wain tapun yainggamuwawa yanggata pukuke dopikge gapma kwaike you mamaya siknga kuka aminde kayutnangge mitapbut. Unzing tasiwan puyuwana ita puya waanga aminu kundue kataune yaman kayukngamuwawa buya aawan deke usanzike kautdu gisae pake kautdu ninae namunong ngang yanike ita keu maa siknga komdune kukut.
MAR 12:2 Kuke yuwawan wain tapun detnanga tapduknga gwa siwan natake ita puya amina tapatu initewan ita aminu wain tapunde puya pasiya aminde kukut.
MAR 12:3 Kuwan ngana aminu waapa tanggaganuke kumzang tanguke inikwasiwa moo siknga kukut.
MAR 12:4 Siwan ita puya amina tapatuat initewan kundopan waapaaya gwapakngine tanguke wai siknga tasingamuking.
MAR 12:5 Siwan ita puya amina tapatuat initewan kukut. Siwan wa aminda waapaaya atanguwa kumbut. Siwan ita puya amina kwaapzang inandek inandek yanipewan kuwawa ngana wa aminda kundu zipmake yawamba kuwawa kundu atzipa kumbing,” ngang yanikut.
MAR 12:6 “Siwan ita waaknga awia tapatukan ie musip gwaang nataak. Siwan masan siknga ita anzing yakut, ‘Wa masan siknga ita aminu natane waakngae wamu apme natapning,’ ngang yake waaknga waapa initewan puya pasikaing aminde kukut.
MAR 12:7 “Kuke kuwawan kake ngana aminu puya pasikaingga ina anzing yaking, ‘Aminu aapata nanatane kwatangi kuupbam papik,’ ngang yaking, ‘Ninda tangutna kupan puya aanga nisae tana,’ ngang yake
MAR 12:8 take tanguwa kupana gupnaapa puyaangane kepman mutewa kukut,” ngang yanikut.
MAR 12:9 “Tuwang wamu waakngae danikwaiwit. Wain tapunde puya waangatane toikngata dasing tasiwik? Ita apuke aminu puyaangane pasiya aminu atzipa kupana ita puya waanga aminu kundue yamik,” ngang yanikut.
MAR 12:10 “Anutue wapatang wamu takngatu anzing yakut, ‘Suu gwendu yot mitapsa aminda kake wai pupuknga ngang yake mutewa kukuu wagwenu yotde tepa kusiwan yot gwen tapan kekekanggak.
MAR 12:11 Anutu Buyambam tapata sanga waaknga tasiwan kake asatnakamang,’ ngang yakut taknga ginda dua binga kendeking aminda nanikaing,” ngang yanikut.
MAR 12:12 Yaniwan natake, “Tuwang wamu waaknga ninde yanggak,” ngang natake Jesu tanggaganutnangge natapbing ngana aminbamde akgwauke i ateke kuking.
MAR 12:13 Siwan wa aminda Ferisi aminu kundu gatu Herotdane aminabapat Jesue yanipewa kuke Jesu tanzitna pimapikge wam kuke inina ngang natake kuking.
MAR 12:14 Kuke anzing iniking, “Yanindamumsaapa. Ga siakan wamde toiknga ngang nataamang. Siwan gata ninindamuke yawa naninang ngang natake dua gwaukgayak. Wena. Siakan wamban gata maya wawi Anututa take nataak kakngakan yanindamukgayak. Ga dasing nataayak? Ninu Judianana aminda takis mani gavmanu Sisae imukengu ninda Anutue mama wam sandetnim ba dasing,” ngang iniking.
MAR 12:15 Iniwa ngana Jesuta wa amindane kem takngana atnatake anzing yanikut, “Ginda dasingge na tanzitnangge tasikaing? Mani sandu nae takapa kawit,” ngang yaniwan
MAR 12:16 mani sandu takapu ima take anzing yanikwaikut, “Mani asanu weenaat gatu umanaau mamindane matakinga kaaing,” ngang yanikwaiwan yake, “Sisatane,” ngang iniking.
MAR 12:17 Iniwa yake anzing yanikut, “Sanga Sisatane wa ginda Sisae imunong. Siwan Anututane sanga ginda Anutue imunong,” ngang yaniwan natake, “Ita pimapikge tanzike tasina mainggak,” ngang natake nangaakan natapbing.
MAR 12:18 Siwan, “Aminu akungwakengu uyunga dua enakaing,” ngang yaya aminu Sadyusi ngang yanikaing. Siwan Sadyusi aminu wa kunduta Jesue kuke anzing inikwaiking,
MAR 12:19 “Yanindamumsaapa. Mosesda ninde baminde wamu takngatu tupa siknga anzing matakut, ‘Aminu tapatuta maatna take ngana waaknga wena siwan yusika akupanu maya kombakobau waapa wawi waapatane uyapnata take waaknga paanae tangge tangamuyok,’ ngang matakut.
MAR 12:20 Sike inaakwau katau kuut musa kautdu tapaaya ngangga yuking. Sike tupan tapata maya take ngana waaknga wena siwan ita akumbut.
MAR 12:21 Siwan uyapna masan tapata maya waapa take ngana waaknga wena siwan akumbut. Siwan uyapna banakan tapataaya unzakan tasikut.
MAR 12:22 Unzakan inaakwau wa kuupbamda maya waapa taking. Siwan waakwau waaknga wena siwan akumbing. Siwan masan siknga maya waapaaya akumbut.
MAR 12:23 Sike masande kupsa aminda enatningu tapduu wagwene maya waapa maminde maatna dakngawik? Ga atnataayak. Inaakwau wa kuupbamda tapa waakwakge maatna dakngakut,” ngang iniking.
MAR 12:24 Iniwa yake anzing yanikut, “Ginu Anututane wamu apmataking kakngaat gatu Anututane kekeknganaatde dua natake wamu gutongang yakaing.
MAR 12:25 Tapduknga akupsa aminda matmat gapmaneta gatu enatning gwene maya wawita angela enandang nana binga dakngake maatnae ba apnae dua kuning,” ngang yanikut.
MAR 12:26 “Siwan ngana Mosesda bukatangu wamu takngatu katapdakasimu katapda isikutde matakut taknga ginda kendeke atnatdeking gamu, ‘Akupsa aminda gatu dua enatning,’ ngang dua yawam. Wamu waaknga matake Anututa Moses inikut taknga tupa siknga Mosesda anzing matakut, ‘Na Ebrahamdane Anutuna gatu Aisakgane Anutuna siwan gatu Jekopdane Anutuna,’ ngang matakut.
MAR 12:27 Siwan Anutu akupsa amindane Anutuna dua. Wena. Ita Anutu kayuk yuaing amindane Anutuna ngang dua natake ginda wamu gutonga siknga,” ngang yanikut.
MAR 12:28 Siwan wamu waaknga ngang yaniyuwawan mama wam yanindamumsa tapatuta apuke nataawan yanganuwa natapbut. Nataawan Jesuta wamu yake yaniwan natapan take siknga siwan ita Jesu anzing inikwaikut, “Mosesdane mama wamu zaakngata mama wamu kuupbamdane tupan siknga aknga daknganggak,” ngang inikwaiwan
MAR 12:29 yake anzing inikut, “Mama wamdane tupan siknga aknga anin, ‘Ginu Isrel nana! Ginda natapnong! Anutu Buyambamu nisane awia waapatakan ita Buyambam tapa.
MAR 12:30 Siwan gata Anutu Buyambam tapakae banipbaatang gwaam siknga natake musipbaatang ie take siknga natangamuke natdetdetdaatang asinggan asinggan natanggamatake kekeknga akngaka kuupbam ie imuyo,’ ngang inikut.
MAR 12:31 Siwan mama wamu uneta unesim yuak kaknga anin, ‘Gata aminu gae wesim yuak kapae butaya natangamuyo. Unzing gikae gupba wai dua siwikge natake butaya nataayak binga.’ Sike mama wamu wa takngaaya Mosesdane mama wamu kuupbamdane tupan takngaat dakngake yuamayak,” ngang inikut.
MAR 12:32 Iniwan natake mama wam yanindamumsa aminu waapata yake anzing inikut, “Yanindamumsaapa. Gata take siknga yanggayak. Ngan, siakan. Anutu awiaapatakan buyambam tapa. Siwan tapatu wena.
MAR 12:33 Ngan. Ninda ie banipmikatang gwaam siknga natangamuke natdetdetnikatang asinggan asinggan natangamuke nindane kekeknga aknganinu kuupbam asimunim. Siwan aminu ninde wesim yuak kapae butaya natangamunim. Unzing nisae butaya nataamang binga. Sike ninda mama wamu wa tawanimde yanggayak kakngaatda tupan siknga akngaat dakngake yuamayak. Unzing yuamayakge sanga Mosesda matakut takngae natake kaap matake Anutue imunangge natake kataune gatukande sawa yasikuningu kuupbam gatu sanga inata kunduat Anutue imukamangu yumdekan binga yuaing,” ngang inikut.
MAR 12:34 Iniwan nataawan aminu waapata wamu yake natdetdetna nomanata binga yawan natake Jesuta yake anzing inikut, “Anututa amin panangge tasinggak kakngae gepbiatang kopnangge gata wesim yuayak,” ngang inikut. Iniwan natake aminbamda Jesu wamu kunduat inikwaitnangge akgwauking.
MAR 12:35 Jesuta Anututane yot takwan gwene yuke aminbam yanike anzing yakut, “Dasingge mama wam yanindamumsa aminda anzingu yakaing, ‘Aminu Anututa tapan Krais gatanimuyaapa dakngake yuwikge yakaing kapae Devitdane dongune aawik,’ ngang yakaing.
MAR 12:36 Anututane Waung Takwan Tapata Devitdane musia tangenawan Devitda anzing yakut, ‘Anutu Buyambam tapata buyambam tapana anzing inikut. Gata umanda kayaapa dakngake yuayakge natane kataknga siyaapane pukwike yuwawi nata iwanda panggaganuke pewa gae gepbiatang koyutning,’ ngang iniwan natapbum,” ngang yakut.
MAR 12:37 “Siwan Anututa tapan Krais gatanimuyaapae natake Devitda, ‘Buyambam tapa,’ ngang inikut. Siwan dasingge wa aminu ie natake buyambam tapa ngang dua iniyuk Devitdane dongune aawikapa nganggan inikaing,” ngang yaniwan natake aminu wa yukingga apbakngaking.
MAR 12:38 Siwan Jesuta yanindamuke anzing yanikut, “Ginu mama wam yanindamumsa aminde gwautnong. Wa aminu tauknga mamaya siknga tupan amindane binga wamake kukaing. Kuke sanga usikaing kep komune sukuwawa aminbamda kake umana yapangenake gaak wam yaniningge take siknga nataaing.
MAR 12:39 Sike miti yot gwene aminbamde kaine yutnangge nataaing. Sike sia nanam tapduu tupan dakandakanekan yutnangge nataaing.
MAR 12:40 Sike maya kombakobau apna akupsatane yot kwaamupa pakaingunin. Siwan wa aminu tumuk wamu mamaya waiakngana takusopunangge kem yakaingge wam yaning tapduk gwene toknga buyambam siknga apaning,” ngang yanikut.
MAR 12:41 Siwan Jesuta mani Anutue mukaing gwene wesim pukwike kawawan aminbamda apu manina pukwit gwekatang pamuwawa kakut. Kawawan sanganambaban aminda manina buyambam siknga pamuking.
MAR 12:42 Siwan maya kombakobau sangana wena tapatu apna gwa kumbut tapata apuke manina gamana mateknga saasimban pamuban kakut.
MAR 12:43 Pamuban kake Jesuta pandetna yayawamban apa anzing yanikut, “Nata ginu siakande siknga daninggat. Kombakobau sangana wena. Apna akumbuu aapata manina buyambam siknga muke aminbamu maninababanda Anutue imukaingu ayapbikgak.
MAR 12:44 Aminu wa kuupbamda manina kwaapzang ngana akotnake mateknga sikngakan pakapu Anutue imukaing. Ngana maya waapa asiknga dapmake ngana ita manina kuupbam muban sangaapana wena singgak,” ngang yanikut.
MAR 13:1 Siwan Jesuta Anutue yot takwan gwen teke kepman epuwawan pandetna tapatuta anzing inikut, “Yanindamumsaapa. Yot takwan gwen gatu you takeake suu buyambam inata kunduta mitambingu kayo,” ngang inikut.
MAR 13:2 Iniwan yake anzing inikut, “Gata you buyambamu anggwegwen kake nangaakan natake yanggayak ba dasing? Apmea amak aminda suu gwendu dua katewa sup notna gwendune engetanganu dua yuwik. Kuupbam zipbuke muba pimaning,” ngang inikut.
MAR 13:3 Siwan Jerusalem yot gapma teke pukuke Jesuat pandetnaatda tawanu Oliv dakane koke uneta Anutue yot takwan gwenu kautdu saak yuwan kaking. Kawawa Jesuta pukwike yuwawan Pita gatu Jems gatu Jon gatu Endru nganggakan ie kuke anzing inikwaiking,
MAR 13:4 “Gata ninu niniyo. Zaapduknga sanga wa niniyak kakngata aawik? Tuwanga zaakngata gamok apan kake sanga wa apikge dapaknga gwa singgak ngang ninu natdetnim,” ngang iniwa
MAR 13:5 yake anzing yanikut, “Ginu gwautnong. Aminu tapatuta ginu panziyak.
MAR 13:6 Aminu tapatuta enake apu natane umana Krais gatandamuyaapa ngang yake na aminu waapanin ngang kem danike panziwik. Ina unzakan sipdu sipdune aminu tapatu tapatuta enake apu wamu waakngakan kem yaning. Ina unzakan tasitakuwawa aminbamda kem wamu waaknga natapa siakan siwik,” ngang yanikut.
MAR 13:7 “Siwan masande ginda natawawa, ‘Amau wesim amakaing,’ ngang yawa natakengu ginu nangaakan ma natapam. Siwan amau amnangge yawa natakengu ginu ma satnawam. Sanga wa asaawik ngana tapduknga zet dua sandewik,” ngang yanikut.
MAR 13:8 “Aminu dongu takngatuta enake dongu takngatuat amning. Siwan aminu buyambamu tapatutane dongata enake amau aminu buyambamu tapatutane dongaat amning. Sike keu komduiatangu miyamun bam sining. Siwan nanamna wena siwan tomnabam natayutning. Sanga wa asaawa ngana tapduknga zet dua sandewik. Unzing mayata engang tangaiwikge toknga gamok nataak binga,” ngang yanikut.
MAR 13:9 “Gisae katak siknga tagwautnong. Aminda ginu kaunsilnae pakuwa wam yaning. Siwan aminu kunduta ginu miti yot gwekatang pakoke ipmapa dasipning. Siwan aminu kunduta nae umana tanguwa pimapikge tasike ginu paku buyambam tapaapae kaine dapmaning. Dapmaba ginda nae wamu takeaknga ngang yaninong.
MAR 13:10 Dasingge? Aminu kuupbamda nae wamu takeaknga gamok natapana tapduknga asandewik,” ngang yanikut.
MAR 13:11 “Siwan tapduknga ginu pakuwa wam yaningge yawanu ginu nangaakan natake ninda wamu zaaknga ngang yanim ngang ma natapam. Wena. Wamu kuupbam Anututa tapduu waomzimunekan atdamiu ginda wamu waakngakan yaninong. Anututane Waung Takwan Tapata wamu takngatu takngatu yeutdaman gisatakan dua yanining,” ngang yanikut.
MAR 13:12 “Sike paanata uyapna wam yaningge yawa zipa kumning.
MAR 13:13 Siwan ginda natane gepbiatang yuwawa danduke semna siknga natandamuning. Ngana mamin amindaka kekeknga yuke meya waakngaatang dua pimake yutningu tapduknga asandewik gwene Anututa kayuk yutnanga aknga wa aminde ayamik,” ngang yanikut.
MAR 13:14 “Siwan ginda kawawa, ‘Sanga wai siknga,’ ngang yakuu kep takwan kopatang tasinanga dua ngana ita undang tasike yuwawan kaning,” ngang yanikut. “Siwan aminda wamu waaknga kendekengu katak siknga natdeyok. Tapduknga sanga wai siknga wa yakuu unzing yuwik gwene aminu Judia kep komune yuaingu datang tawan dakane kopnong.
MAR 13:15 Siwan aminu yotna engatangan gwene yuwiu epu yoakatang sangaapana pananggengu ma kopan.
MAR 13:16 Siwan aminu puyane yuwiu got tauknga tananggengu yotna gatu ma kuwan.
MAR 13:17 Tapduu wagwene maya waak musipna kaya gatu engangge ngawam yaman nakaing aminda meya buyak yutning.
MAR 13:18 Siwan tapduknga ginda atdatakuning gwende natake sanga wa ginde got tapduk gwene dua aawikge tumuk wam yanong.
MAR 13:19 Tapduu wagwene meya buyambam siknga siwik. Tapduknga Anututa kep tasike tekuuneta apu apmanu kuut meya wa binga takngatu tupa dua apbut. Siwan masan kaya meya wa binga wena.
MAR 13:20 Siwan Buyambam tapata tapduu wagwenu dapaknga dua isatakepikge yakut gamu aminbamu wena asiwam. Ngana ita aminu kundu papan aminabam dakngake yuaingge butaya natake ita tapduu wagwenu dapaknga isatakepikge gwa yakut.
MAR 13:21 Sike tapduu waomune aminu tapatuta anzing daniwik, ‘Kanong! Krais gatanimuya apata andang yuak ngang daniwan natapning. Ba kanong! Atunzing yuak,’ ngang daniwan natake ginu, ‘Siakan,’ ngang ma natapam.
MAR 13:22 Sike aminu kunduta apuke panzike anzing yaning, ‘Na Krais. Gatandamuya apata yuat,’ ngang kem yaning. Siwan kunduta yake, ‘Anututa nanitewan yakapsaapa dakngake apu daniwa natapnong,’ ngang kem yaning. Yake duya takngatu takngatu pasiwawa kake Anututa papan aminabam dakngake yuaingga siakan ngang natapningge panziwa ngana dua pimatning.
MAR 13:23 Unzingge ginu gwautnong. Nata sanga wa kuupbamda dua apning gwene gwa daniwa natake gisae tagwautnong,” ngang yanikut.
MAR 13:24 “Meya buyambamu wa wena siwana meya takngatu takngatu akaning. ‘Gunzitda zikaa daka siwan yekau kakaa dua siwawan
MAR 13:25 yekapdaau ena kakaa banakan komune nana saa sike deke pimapa kaning.’
MAR 13:26 “Siwan tapduu waomune kawawa na aminbamde notnaapa dakngake yuat tapata umana buyambam siknga siwan kekekngana buyambam siknga aknganane yuke minga musatune yuke epa na nandugwautning,” ngang yanikut.
MAR 13:27 “Siwan tapduu waomune nata angelana yanipewa kuke aminu Anututa papan inane aminabam dakngake yuaingu kepna kepna nana kuku pake pakapu unekan pening,” ngang yanikut.
MAR 13:28 “Ginda katau baapdaka kake natdetnong. Tapduknga kainga yangga kaya siwan tatakngi kayukga akopan kake ginda anzingu atnatdekaing. Gunzitda isiwikge tapduknga gwa singgak.
MAR 13:29 Siwan ina unzakan masande kawawa meya wa daninggat takngata apan kake ginda atnatdetnong. Na aminbamde notnaapata apitde tapduknga gwa dapakanggak. Aminu tapatuta yoakatang kopnangge apuke gwabok gwaune yuak binga tapduknga gwa dapakanggak,” ngang yanikut.
MAR 13:30 “Nata siakande daninggat. Aminbamu tapduknga ayuamang komune nana aminda dua kumning gwene sanga wa kuupbamu asapik.
MAR 13:31 Sanga kuupbam ena kakaa banakan komune yuaikat gatu kepdakane nana kuut wena asinanga ngana natane wama wena dua siwik,” ngang yakut.
MAR 13:32 “Siwan aminu tapatuta tapduknga wagwende dua nataak. Angela enandang nanaaya kuut dua nataaing. Na itane waakngaaya ie dua nataat. Nanatakan ie atnataak ngang yanikut.
MAR 13:33 Ginu wa zaapduknga apikge dua natake katak kayuke tandakngake yutnong.
MAR 13:34 Wa unzing. Aminu tapatuta yotna teke komduatang kuwik. Ita puya amina sangaapana kayutningge yanike puya usanzike inandek inandek yamik. Yamuke aminu gwabok gwaune kayuwik kapa yot toikga katak siknga kayuwikge iniwik,” ngang yanikut.
MAR 13:35 “Ina unzakan ginu katak siknga kayuke tandaknganong. Ginu dua nataaing. Zaapduknga na yot toikga apitden. Nata bangee apit ba petakumat dakane ba tapduknga taakga yawik komune ba tembana apit. Ie ginu dua nataaing.
MAR 13:36 Zetgaman apuke dandupa ginu dapunza petnang.
MAR 13:37 Wamu wa nata daninggat taknga nata aminu kuupbam yaninggat. Ginu kayuke tandakngake yutnong,” ngang yanikut.
MAR 14:1 Ge tapduu gweaya yuwa sandewana tapduk takwanu angelata tupa siknga Isrel nana amin yapbike Isipnana amin zipan kumbingge natake yuwatakak tapduk takwanu Pasova ngang yakaing gwenu akaningge siwan poyau dua paptaya nakaing gwenu atdapakakut. Siwan Anutue yot takwan gwene pasiya amindane takeakwakat gatu mama wam yanindamumsa amikatda paut tasike Jesu tanzike tanggaganuke tanguwa kupikge wam yake
MAR 14:2 anzing yaking, “Ninda sanga wa tapduk takwan gwene dua tasinim. Tasina aminbamda enake amak tasinang,” ngang yaking.
MAR 14:3 Siwan aminu tapatu umana Saimon ngang iniking. Tupa ita wata kekeknga sikutapanin. Siwan Jesuta Betani yot gapmane yuke aminu waapatane yotnane kopbut. Koke iatnanaat nanam nanangge natake pukwike yuwawan maya tapatuta apbut. Apuke yangga kapanga kaya take siknga takngatu umana nart ngang yanikaingu manina buyambam sikngata usikuu botonu gomdu supda tasikwaapa kukuu gomdusipatang tukngwamban pukukuu tekngatusim takapbut. Siwan ita botonu wa gomu zipbuke yangga kapanga kaya take waaknga Jesue gwapakngane tukngwangamukut.
MAR 14:4 Tukngwangamuwawan ngana aminu kundu you wagwene yukingga kake musia wai natake ina anzing yaking, “Dasingge yangga kapanga kaya take siknga aknga moo siknga tukngwanggak?
MAR 14:5 Ninda yangga waaknga aminde yamuna aminu kunduta 300 Kina nimuke usiwa pake aminu sangaapana wena aminde yamunam,” ngang yake maya waapa inisapduking.
MAR 14:6 Siwan ngana Jesuta anzing yanikut, “Ginu maya waapa katenong. Ie meya ma imam! Ita nae sanga take siknga tasingamunggak,” ngang yanikut.
MAR 14:7 “Sike sangaapana wena aminu gikat gatake yutning. Tapdukbamu ginda gatayamunanggengu take tasining. Ngana na. Na gikat asinggan dua yutnim,” ngang yanikut.
MAR 14:8 “Sanga mayata take tasinanga aknga unin tasinggak. Ita yangga kapanga kaya take aknga gupmane tukngwangamunggau sanga gwa kupsa aminde gupnasane dotdonguke tandakngakaing kaknga waapata tasike nata dua kungwake kayuk yuwawa nae tasingamunggak.
MAR 14:9 Nata siakande daninggat. Keu kuupbam nae wamu takeaknga yakapning kopatangu maya aapata tasinggak kakngae kuut yanikapa natapning,” ngang yanikut.
MAR 14:10 Tapduu waomune pandetna 12-pat nana tapatu umana Judas Iskeriot yot gapmane nanaapa. Ita Jesu yeuyamikge natake Anutue yot takwan gwene pasiya amindane takeakwakge kukut.
MAR 14:11 Kuke yaniwan natake apbakngake mani kundu imuningge yawa kekekakut. Siwan Jundasda tuwanguke kepi takngatu kake tapduu gwendune wa aminde katakngane yamikge tawakut.
MAR 14:12 Siwan tapduu yuwatakak tupanu poyau dua paptaya napsa gwenda apbut. Sike tapduu wagwene Judianana aminda Pasova yuwatakak tapduk takwan gwende natake sipsip matek zipmake sake nakaing. Siwan pandetnata tapduknga wagwen kanangge natake Jesu anzing inikwaiking, “Gata ninu poyakat sipsip matekat zane tandakngana nanimde natayak,” ngang iniwa
MAR 14:13 yake pandetna tapaaya yanipewan kusande anzing yanikut, “Gitda Jerusalem yot gapmane koke kawawat wawi tapatu yangga gapma gwendu gwaamutakapan kake tawazon,” ngang yanikut.
MAR 14:14 “Ita you gwenduatang kopan kake gitda yot toiu anzing inisan, ‘Yanindamumsa apata anzing yak. Gata nae you gwendu naat pandetnaatda Pasova yuwatakak tapduk gwende nanam nanimde yot gwenu katekuyau zandang yuak ngang yak,’ ngang iniwat
MAR 14:15 ita you bokngan mitapbingu buyambamu gwendu engatangan yuak gwenu yeutdaman kason. Wagwene tebo gatu sia ngangu gwa pandakngake pekingu wagwene gitda nanaminu tandakngason,” ngang yanikut.
MAR 14:16 Yanike yanipewan kuke waapau yot gapmane kundoke Jesuta ayanikut taknga kake Pasova tapduk gwende nanamu tandakngakumayak.
MAR 14:17 Siwan bangee Jesuat pandetna katau kuut musaat kepianganu tapaaya nganggakan kuku you wagwene kopbing.
MAR 14:18 Koke tebodakane pukwike nanamu atnake yuwawa Jesuta anzing yakut, “Nata siakande siknga daninggat. Aminu gikatnana tapatuta na natane iwanae yeuyamik,” ngang yaniwan
MAR 14:19 pandetna musia meya natake tuwanguke ie inandek inandek inikwaiking, “Na ba dasing,” ngang inikwaiwa
MAR 14:20 anzing yanikut, “Waapa ginu katau kuut musaat kepianganu tapaat nana dopang anggwene naat nakamau tapatuta atasiwik,” ngang yanikut.
MAR 14:21 “Na aminbamde notna dakngake yuat tapata akupa Anututane wapatang matakut taknga buya unin aawik. Ngana na yeuyamik kapata toknga siknga apapik. Mingata aminu waapa dua tangaikut gamun,” ngang yanikut.
MAR 14:22 Wa aminu atnayuwawa Jesuta poyau gomdu take Anutu inimbakngakenga apuke ginda pake nanong ngang yanikut. Sanga wa kake ginda natane gupma ngang natapnong ngang yake yaman natakuking.
MAR 14:23 Siwan ita kap wainu gomdu take Anutu inimbakngake yaman tangotakuking.
MAR 14:24 Siwan ita anzing yanikut, “Sanga wa natake daknga. Nata kungwake daknga tukngwaba Anututane wam kwikwiu kayuk kakngata kekekawik. Nata kungwake daknga tukngwaba Anututa inane musia zikaa ginde nataak kaknga tapa tekwamban aminbamde waiakngana sandeyamikge tukngwambit,” ngang yanikut.
MAR 14:25 “Nata siakande daninggat. Nata wain tapunde yanggaaknga gatu dua tangoke yusika kuku tapduknga Anututa amin panangge tasinggak kaknga buya aawik gwene nata wain yangga inata kundu tangopit,” ngang yaniwan puyuwan
MAR 14:26 kau takngatu taike kepman epuke pukuke tawanu Oliv dakane kopbing.
MAR 14:27 Kepiapane koyuk Jesuta anzing yanikut, “Ginda nae banip sikaing kaknga tewa pimapan yakapsa aminda Anututane wamu takngatu matakut taknga buya unin asaawik. Ita anzing matakut, ‘Anututa kapewan akayuak kapa tanguwa kupan sipsipna kuupbamda unda undang datakuning,’ ngang matakut.
MAR 14:28 Ngana nata gatu gweake tupanu nata gamok ginde Galili kep komune kuwit,” ngang yanikut.
MAR 14:29 Siwan Pitata anzing inikut, “Aminbamda gae banip sikaing kaknga tewa pimapik ngana nata gae banip singgat taknga dua teke yuwit,” ngang iniwan
MAR 14:30 yake anzing inikut, “Nata siakande ganinggat. Apmanu zikaa anggwene taakga sipmaya dua yawawan gata natane umana sipmaat sipduat takusopuwiyak,” ngang inikut.
MAR 14:31 Iniwan ngana Pitata yake kekekenga siknga anzing inikut, “Na gaat kuut kumzimde yawanu nata gatane umanda dua takusopuwit. Wena siknga,” ngang yawan pandetna kuupbamda unzakan yaking.
MAR 14:32 Siwan kepiapane kusika keu Getsemani ngang inikaing komune kundoke Jesuta pandetna anzing yanikut, “Ginu ane pukwike yuwawa nata atune kuke tumuk wam yawit,” ngang yanike
MAR 14:33 ita Pita Jems gatu Jon ngang papan iat gatake kuking. Kusika ngana ita meya siknga natake
MAR 14:34 anzing yanikut, “Nata meya siknga natake akupanu take sinanga,” ngang yanikut. “Ginu ane yuke kayuk yutnong,” ngang yanike
MAR 14:35 kundusim kuke kepdakane pimake tumuk wam yakut. Anututa take natapanu meya akawik kakngata ayapbimbikge natake
MAR 14:36 tumuk wamu anzing yakut, “O nan! Gata sanga kuupbam atasinangaapa. Gata meya wa kawit taknga asandekngamuyo. Ngana ga nae banip ma tawambim. Aho. Gata gikae banip tawamso,” ngang yakut.
MAR 14:37 Unzing yakenga ita akuke kawan pandetna wa tapaat tapatuatda dapuna pekgawa kakut. Kake Pita anzing inikut, “Saimon. Kayuk yuwiyakge ganit ngana dapunda pekgayak? Gata tapduu komdusimu yuke kayuk yutnanga dua ba dasing,” ngang inikut.
MAR 14:38 “Ginu kayuk yuke tumuk wam yanong. Sanga gin pasiwa sinangata ginde apsak. Siakan. Banipzaatang kayuk yutnangge nataaing ngana ginda tuyuknga natake pekaing,” ngang yanikut.
MAR 14:39 Yanikenga ita gatuna kuke tumuk wam yakut. Tumuk wamu tupan yakut takngakan gatuna yawan puyuwana
MAR 14:40 ita gatuna pandetnae apuke kawan dapunae siwan kai tuyuknga siwa apekgawa kakut. Siwan wa aminu yake ininangge apbotake yuking.
MAR 14:41 Siwan Jesuta gatuna kuke tumuk wam yakenga apan sipmaat sipduaat dakngakut. Siwan apuke kawan apekgawa kake anzing yanikut, “Ginu gatu gatu danit ngana dapunza asinggan peke ayuwatakakaing ba dasing? Gwa pekaingge enake kanong. Tapduknga na aminbamde notna dakngake yuat tapa wai aminde katakngane yeuyamuningge gwa singgak.
MAR 14:42 Ginu enawa kuna. Kanong! Aminu na yeuyamik kapata gwa apunggak,” ngang yanikut.
MAR 14:43 Siwan Jesuta wamu waaknga ayayuwawan pandetna 12-pat nana tapatu umana Judas. Iat aminbampat gatake apuke paip gatu zagwa ngang pake apbing. Wa apbing aminu Anutue yot takwan gwene pasiya amindane takeakwakat gatu mama wam yanindamumsa amin gatu Judia amindane take amin ngangga yanipewa apbing.
MAR 14:44 Siwan aminu Jesu wa aminde kataune yeuyamik kapata tuwangu takngatu wa aminde tupa yamuke anzing yanikut, “Nata aminu asinimbakngawit tapa Jesu unin. Ginda waapa tanggaganuke take siknga take takunong,” ngang tupa yanikut.
MAR 14:45 Siwan Judasda apuke Jesue zetgaman kuke aana ngang inimbakngawan kake take tanggaganuking.
MAR 14:47 Siwan aminu Jesuat yukikatnana tapatuta paipna kaitakakoke Anutue yot takwan gwene pasiya tupan tapatane puya aminatane maaknga patdetewan pimakut.
MAR 14:48 Siwan Jesuta wa apbing aminu anzing yanikut. “Dasingge ginu na apu tanangge natake paip gatu zagwa ngang pake kuka aminu tapatu binga tanangge apukaing?
MAR 14:49 Tapdukbamu na gikat Anututane yot takwan gwene yuke nata ginu danindamuwawa ngana ginda na dua tanggaganutnangge tasiking. Ngana Anututane wamda tupa siknga nae yakut taknga buyana asaawikge kepi umutnanga dua,” ngang yanikut.
MAR 14:50 Siwan pandetna kuupbamda teke atdatakuking.
MAR 14:51 Siwan aminu wawi mateu tapatu tauknga kwaknga sandukan gupnane wamake Jesuat yukikatnana tapatu tanggaganutnangge tasiwa
MAR 14:52 ngana ita tauknga kwakngasan katakngane teke kwanggaapa datakukut.
MAR 14:53 Siwan Jesu take Anutue yot takwan gwene pasiya amindane tupan tapae takuke tewa Anutue yot takwan gwene pasiya amindane takeakwakat gatu Judia amindane take amin gatu mama wam yanindamumsa amin ngangga undang apundopbing.
MAR 14:54 Siwan Pitata masa masa kuyawake kuku Anutue yot takwan gwene pasiya aminde tupan tapatane yot daman gwene kopbut. Kopan iat taukdapakat unekan gatake yuke katap aike yuking.
MAR 14:55 Siwan Anutue yot takwan gwene pasiya amindane tupan tapaat gatu sios kaunsil kuupbapatda aminu tapaaya yayawamba apu wamu sanga Jesuta tasikutde wamu buya kundukan yawat kake tanguwa kupikge aminde yawaking. Siwan ngana yawamba maikut.
MAR 14:56 Aminbamda temanggaganuke yaking siwan ngana wa yakikat nana tapaatane wamna buya kundukan dua sikut.
MAR 14:57 Siwan aminu kunduta temanggaganuke anzing yaking,
MAR 14:58 “Ninda natawatna ita anzing yakut, ‘Anututane yot takwanu aminda apmitapbing gwenu waitdeke tapduu gweaat gwenduatdekan nata gwendu mitapit ngana nata katakngata dua mitapit,’ ngang yawan kakumang,” ngang yaking.
MAR 14:59 Ngana wamu wa yaking kakngaaya buya kundukan dua sikut.
MAR 14:60 Siwan Anutue yot takwan gwene pasiya amindane tupan tapata enake banakan yuke Jesu anzing inikwaikut, “Gata wamu takngatu yake yananga dua ba dasing? Dasingge wamu waaknga gae yakaing,” ngang iniwan
MAR 14:61 ngana kuma yuke wamu takngatu yake ie dua inikut. Dua iniwan kake waapata gatu anzing inikwaikut, “Ga Anututa tapan Krais gatanimuyaapa dakngake asinimbakngakamang kapatane waakngaapa yuayak ngang kakengu gata niniwi natapnim,” ngang iniwan
MAR 14:62 yake, “Aminu waapa na unin,” ngang inikut. “Siwan ginda nanduwawa na aminbamde notna dakngake yuat tapata Anutue kataknga siyaapa kekeknga kuupbamu kayaapane yuke minga musane yuke asepuwawa nandupning,” ngang iniwan
MAR 14:63 natake waapata bania toknga siknga natake tauknga wetzukuke anzing yakut, “Ninda aminu kunduat dua ie wam yakapningge yayawanim. Wena.
MAR 14:64 Ita Anutue umana yaitapaakusiwan kaamangge ginu dasing nataaing,” ngang yawan kuupbamda wamu akumnanga aknga yanggak ngang yawa kekekakut.
MAR 14:65 Siwan aminu kunduta aapda suyapbikngamuwawa kunduta kai taukga wamakusike kataknga putumuke tanguke anzing iniking, “Gata ayanikapsaapa kakengu yayo. Maminda gukgakgen,” ngang inisapduwawa tauk dapakga aamna wesiking.
MAR 14:66 Siwan Pita kepman kekep komune yot daman gwene yoan saak yukut. Yuwawan puya aminu maya tapatu Anutue yot takwan gwene pasiya aminde tupan tapae pasingamunggau tapatuta apu kawawan
MAR 14:67 Pitata katap ainggawan kakut. Kake ie siknga kanggamatake anzing inikut, “Gakaya Jesu Nasaret nanaapaat yuaing,” ngang iniwan
MAR 14:68 ngana Pitata tawak wam yake anzing inikut, “Na dua nataat. Na gata wamu wa yanggayak kaknga yapii dua nataat,” ngang inikenga kepman kunangge yot damande gwabok gwaune wesim kuwawan taau gwenduta ayakut.
MAR 14:69 Siwan maya puya aminu waapata aminu wesim yukingu anzing yanikut, “Aminu aapata aminu waapaat nana tapatu,” ngang yanikut.
MAR 14:70 Siwan ngana Pitata gatuna tawak yakut. Siwan kundusim yuke aminu wesim yukingga gatu Pita anzing iniking, “Siakan siknga. Aminu gaapa wa amikat nana tapatu. Ga Galili nana tapatu,” ngang iniwa
MAR 14:71 ngana Pitata apaa siknga anzing yakut, “Siakande siknga. Nata yawa Anututa natapan kem siwanu tokngabam namuyak. Na aminu ginda wa yakaing kapae na dua nataat,”
MAR 14:72 ngang yayuwawan taakga gatu sipduat yakut. Yawan natake Pitata wamu Jesu anzing inikut takngae gatu natdekut, “Taakga sipmaya dua yawawan gata sipmaat sipduat nae yake ie dua nataat ngang yawiyak,” ngang inikut takngae gatu natdeke kwanamu kumzang sikut.
MAR 15:1 Siwan tembana siknga kwakaawana Anutue yot takwan gwene pasiya amindane takeakwakat gatu Judia amindane take amikat gatu mama wam yanindamumsa amikat gatu sios kaunsil kuupbapatda paut tasike yawa Jesu napda wamake taku Pailatde imuking.
MAR 15:2 Siwan Pailatda anzing inikwaikut, “Ga Judia amindane buyambam tapa ba dasing,” ngang inikwaiwan Jesuta yake, “Gika unzing unin yanggayak,” ngang inikut.
MAR 15:3 Siwan Anutue yot takwan gwene pasiya amindane takeakwakga kem wamu ie kumzang yaking.
MAR 15:4 Siwan Pailatda gatu inikwaikut, “Gata wamu yake takngatu dua yaya ba dasing? Gae wamu buyambamu yawawa natake ngana yake dua yaniya,” ngang iniwan ngana
MAR 15:5 Jesuta wamu yake takngatu dua yawan kake Pailatda asatnakut.
MAR 15:6 Nakanu kuupbam tapduk takwanu unzing gwene Judianana aminda kaaut aminu tapatue umana yawanu Pailatda aminu waapakan sandewan kunggak.
MAR 15:7 Siwan tapduu waomune aminu tapatu umana Barabas. Ita aminu gavmakat ambing amikat kaautde pasiking. Wa aminu amak tasike aminu kundu atzipa kumbing.
MAR 15:8 Siwan aminbamda kuke Pailatde asinggan atasinggak kaknga tasiwikge iniwa
MAR 15:9 Pailatda yake anzing yanikut, “Ginu nata ginu Judianana amindane buyambam tapasa sandetewa kuwikge nataaing ba dasing,” ngang yanikut.
MAR 15:10 Dasingge? Ita anzing atnatapbut, “Anutue yot takwan gwene pasiya amindane takeakwakga Jesue semna natangamuke wamna yawikge takapuing,” ngang anggaman natake wamu waaknga yanikut.
MAR 15:11 Siwan ngana Anutue yot takwan gwene pasiya amindane takeakwakga aminbamdane musia pangenawa Pailatda Barabas sandetewan kuwikge yaking.
MAR 15:12 Yawa ngana Pailatda gatu anzing yanikut, “Unzingge nata aminu aapae dasing tasiwit. Ginda Judianana, ‘Amindane buyambam tapa,’ ngang yakaing kapan,” ngang yaniwan
MAR 15:13 yake gatu yanggamatake, “Amin saamdakane tanguyo,” ngang yaking.
MAR 15:14 Yawa ngana Pailatda anzing yanikut, “Dasingge? Ita wai dasing kaknga tasikut,” ngang yaniwan ngana, “Amin saamdakane tanguyo!” ngang kumzang yanggamatawawa
MAR 15:15 Pailatda aminbamdane musia yanigokgosanangge natake Barabas sandetewan kuwawan ita Jesu amak aminde kataune yaman ipmapa tanguke amin saamdakane tangutningge yamukut.
MAR 15:16 Siwan Jesu take gavmande yot daman gwene takokenga amak aminu waakwakatnana kuupbam yayawamba apbing.
MAR 15:17 Apana tauu gamana sandu buyambam tapatane binga tasingamuking. Tasingamuke nau bobingga gwasike gwapakngane tupan tapatane kupna binga gwapungamuking.
MAR 15:18 Gwapungamukenga kem tanziyuk umana yatangenake anzing yaking, “Judia amindane buyambam tapa! Gata asinggan asinggan yuyo,” ngang inike
MAR 15:19 gwapaknga pitamu tapatuta tanguke aapda suyapbikngamuke kem tanziyuk muna puke tasibakngaking.
MAR 15:20 Siwan sapdut wamu wa iniwa puyuwana tauu gamana sanu sandeke inane tauknga gatu pasingamuke take amin saamdakane tangutnangge takuking.
MAR 15:21 Takuke kuwawa aminu tapatu Sairini yot gamane nana tapatu umana Saimon ngang iniking. Sike waapata Alesandaat gatu Rufuskatdane nana. Ita puyaneta apu yot gapmane kopnangge apbut. Apan iniyepike Jesutane amin saamdaka ima gwaamutake kukut.
MAR 15:22 Ita gwaamutake kuwawan Jesu take keu komdu umana Golgota ngang inikaing. Sike tana tekwamban anzing yanim. Gwapak gwikgwit kep ngang yanim. Undang kundoke
MAR 15:23 Jesu wain yangga aknga marasinu kunduat tasikingu iman tangopan gupna bakawan toknga siknga dua papikge iman ngana dua tangopbut.
MAR 15:24 Siwan wa aminda amin saamdakane tangukenga kat binga tasike itane tauknga usanzike panangge tasiking.
MAR 15:25 Sike sanga wa tembana tasike gunzitda akoke awekawawan Jesu amin saamdakane tanguking.
MAR 15:26 Siwan wamu ayake tanguking kaknga anzing mataking, “Judia amindane buyambam tapanin.”
MAR 15:27 Sike Jesue wesimu aminu kukae papsa aminu tapaaya ngang amin saam dakaayane zipbing. Tapatu siyaapa saak tanguke tapatu kwanaapa saak tanguking.
MAR 15:28 (Unzingge Anututane wamu takngatu tupa siknga matakut taknga buya unin aakut. Wamu waaknga anzing, “Wa aminda kawawa iat wai amikat unekan gatake yuwawa kaking,” ngang matakut.)
MAR 15:29 Siwan aminu kunduta kungapuyuk kake gwapakngi makaike ie sapdut wamu anzing iniking, “Ayok! Ga Anututane yot takwan gwen waike tapduu gweaat gwenduatdekan mitanggaunin.
MAR 15:30 Ga gika gatanggamuke amin saamdaka teke ep,” ngang inisapduking.
MAR 15:31 Inisapduwawa Anututane yot takwan gwene pasiya amindane takeakwakat gatu mama wam yanindamumsa amindaya unekan gatake yuke sapdut wam ina banakan anzing yaking, “Ita aminu kunduekan gatayamukut ngana ina gatangamunanga dua.
MAR 15:32 Anututa tapan Krais ninu Isrel amindane buyambam tapa. Ita amin saamdaka teke epan ninda kake siakan ngang natapnim,” ngang yaking. Siwan aminu Jesuat wesim zipbing tapaatdaaya kuut sapdut wamu asinikumayak.
MAR 15:33 Sike kepmaum zikaandaka sike keu kuupbam usikwatapan kuku bangee gunziu dandam enaawan
MAR 15:34 Jesuta apaa inane wam tangan anzing yakut, “Ilai Ilai lama sabaktani,” ngang yakut. Wamu waaknga tana tekwamban anzing yanim, “Anutuna! Anutuna! Dasingge gata na napmambi yuat,” ngang yawan
MAR 15:35 aminu kundu inengan yukingga natake anzing yaking, “Natapnong! Ita Ilaija aminu tupa siknga ayanikapsa dakngake yukut tapae yatawanggak,” ngang yawa
MAR 15:36 aminu tapatuta isapmake kuku yanggabam gwene nana misa wangatu take wain yangga kapanga sikut takngane tewan bukatawan wa pitamu tapatune ukgauke wa Jesuta atangopikge imuyuk anzing yakut, “Kayutna siwik. Ilaijata apu sandeke apme ba takepik,” ngang yakut.
MAR 15:37 Siwan Jesuta apaa gatu yake akumbut.
MAR 15:38 Siwan tauu buyambam sanu Anututane yot takwan gwene mitapa pimakut sanu enaneta wesiwan amunane epu dewan saaya dakngakut.
MAR 15:39 Siwan amak aminu tupan tapata Jesu tanguking komune yuke kawawan ita unzing kupan kake anzing yakut, “Siakan siknga. Aminu aapa Anututane waaknga,” ngang yakut.
MAR 15:40 Siwan maya kunduta wesim wesim yuke katasiking. Wa katasikikat nana tapatu umana Maria Magdala yot gapmane nanaapa. Siwan tapatu itane tange Maria Jems masan tapaat gatu Josiskatdane minga gatu tapatu umana Salomi ngang iniking.
MAR 15:41 Tupa Jesu Galili yukuune maya wa tapaat tapatuat iat gatake yuke gatangamuking. Siwan maya waakwakat gatu maya kundu Jesuat gatake Jerusalem kopbing amikatda unekan gatake yuke katasiking.
MAR 15:42 Siwan aminu tapatu umana Josep ngang iniking.
MAR 15:43 Ita Arimatia yot gapmane nana waapa sios kaunsil aminu tapatu. Siwan umana take siknga. Waapata tapduknga Anututa amin panangge tasinggak kakngata apikge akayuak. Siwan kwepna yuwatakak tapduk gwenu apikge apmanu sangaapa tandakngananga tapduk ngang natake bangee siwana Josepda bania gitna siwan ita Pailatde kuke Jesutane gupnasan tanangge yakut.
MAR 15:44 Kuke yawan Pailatda nangaakan natake, “Ita gwan kungwak ba dasing,” ngang yake amak aminu tupan tapa yatawamban apan anzing inikwaikut, “Jesuta gwa kungwak ba dasing,” ngang inikwaiwan
MAR 15:45 yake, “Gwa kungwak,” ngang iniwan natakenga Josepda gupnasan tapikge inikut.
MAR 15:46 Iniwan Josepda kuku tauu kwaknga sandu usike takapu Jesutane gupnasan takepuke tauk kwakga tapa kopan supgapbau matmatde tasiking dakane tekut. Teke Josepda suu gwendu ikomban apu sup gapbatde ganangi umukusikut.
MAR 15:47 Ikoban apu umukusiwawan maya tapaaya umana Maria Magdala yot gapmane nanaapaat gatu itane tange Maria Jems gatu Josisdane mingaatda undang yuke kayuwawat supgapbau wandakane Jesutane gupnasanu Josepda undang tewan kakumayak.
MAR 16:1 Siwan yuwatakak tapduk gwenu kawa sandewana gunziu pukuwan atzikaawawan maya wa tapaat gatu Salomi ngangga Jesutane gupnane pasiwa dua bukatawikge natake kuku wel yangga kapanga kaya take siknga aknga usiking.
MAR 16:2 Usike pewa kwakawan sande tembana gunzitda akopana sanga wa pake supgapbat dakane kuyuk
MAR 16:3 ina anzing yaking, “Maminda ninu gatanimuke supgwenu supgapbatde umukusikut gwenu ikomban kuwik,” ngang yaking.
MAR 16:4 Yake kawawa ngana suu wagwenu gwa ikoba kukutna kaking. Sike suu wagwenu buyambam gwen.
MAR 16:5 Siwan maya waakwau supgapbau wandakane kuke kawawa wawi mateu tapatu siyaapa saak yuwawan kaking. Kawawa wawi waapata tauknga mamaya kwaknga tasike yuwawan akasatnaking.
MAR 16:6 Akasatnawa ita anzing yanikut, “Ginu ma satnawam. Na atnatat. Ginu Jesu Nasaret nanaapa amin saamdakane tanguwa kumbut tapae kanangge apukaing. Ita gwa enak! Andang dua yuak! Ateking komde kanong.
MAR 16:7 Kake ginda kuke Pita ininong. Inike pandetna kuupbam anzing yaninong. Jesuta gamok Galili kep komune kunggak. Siwan ginda undang kuke kanong. Unzing ita tupa gwa danikut taknga binga enake kunggak ngang yaninong,” ngang yanikut.
MAR 16:8 Siwan maya waakwau akgwauke dandai yamuba musia kukumuk akoyapa supgapbau wandaka teke kepman epuke datakuking. Datakuke ngana wamu takngatu aminu tapatue dua iniking.
MAR 16:9 Siwan Jesuta sande wagwene tembana siknga gatuna kayuk enake Maria Magdala yot gapmane nanaapae gamok anggaman apan kakut. Maya waapa tupa Jesuta waung wai katau kuut musa kautdu tapaaya ngang yanikwasikngamukut tapanin.
MAR 16:10 Siwan Mariata kakenga kuku aminu Jesuat gatake sukuking aminda butaya natake kwanamna sike yuking aminde kukut.
MAR 16:11 Kuke anzing yanikut. Jesu kayuk yuwawan nata gwa kat ngang yanikut. Siwan wa aminu wamu waaknga natake siakan ngang dua natapbing.
MAR 16:12 Siwan masande pandetna tapaaya Jerusalem yot gapma teke kepiapane kukumayak. Kuwawat Jesuta inata kundu sike waapaatde anggaman kundopan kakumayak.
MAR 16:13 Kake waapaatda kuku pandetna kundue wamu waaknga yakapbumayak. Siwan ngana wa aminu waapaatde wam natake siakan ngang dua natapbing.
MAR 16:14 Siwan masande pandetna katau kuut musaat kepianganu tapatu ngang pukwike nanam naking. Nawawa Jesuta une anggaman apan kaking. Apan kawawa ita wa aminu aminbamda kawawa ita gatuna kayuk enakutde yaniwa ngana yamandet sike siakan ngang dua natapbing kakngae kaanga yanikut.
MAR 16:15 Yanikenga anzing yanikut, “Ginu kepna kepna kuke wamu takeaknga aminu kuupbam yaninong.
MAR 16:16 Yaniwa mamin amin takwakga nae wama natapa siakan siwan yangga sautningu kayuk yutning kaknga apaning. Ngana aminu nae natapa kekeknga dua siwiu wena asining,” ngang yanikut.
MAR 16:17 “Sike Anututa aminu nae wam natapa siakan siwiu gatayaman duya takngatu takngatu pasining. Sike nata papa nae aminabam dakngake waung wai ayanikwasitning,” ngang yanikut. Sike wamu inata kundu tupa dua natdeking ngana ina yaning.
MAR 16:18 Sike wa aminda gomou amin yasikaing kapa katakga yum pake ngana, “Wai dua sining,” ngang yanikut. “Sike sanga aminu atzipa kupsa tangopanu sanga ita dua pasiwan maining. Sike katakga mait amin wasiwa gatu take sining,” ngang yanikut.
MAR 16:19 Siwan Buyambam tapa Jesuta wamu yawan puyuwana Anututa i take enandang takopbut. Takopan ita kekekngana kayaapa dakngake Anututane kataknga siyaapane yuak.
MAR 16:20 Siwan pandetnata akuke wamu keu kuupbam yanikapbing. Siwan Jesu Buyambam tapata gatayaman wamu yanike duya takngatu takngatu pasiwawa aminbamda kake natapa wamna siakan sikut.
LUK 1:1 Sanga takngatu takngatu nin banakan apa kainata kake ninindamuking. Tapduknga waakngata apbut gwenuneta kake ninindamuking kakngae natake aminu buyambamda gwan mataking. Siwan buyambam tapa, Tiofilas, gata wamu wa mataking kakngae gwa natapbuyak. Siwan sanga wa mataking kakngae tupa siknganeta katak natake tanomanuke naaya matanangge natapbum. Natake wamu waakngakan noman siknga matanggama kendeke tupa gwa natapbuyak kaknga natapi siakan siwikge matanggamunggat.
LUK 1:5 Siwan Herotda Judia kep komune nanatane aminu tupan tapa yukut gwene aminu tapatu umana Sekaraia ngang iniking. Ita Anutue yot takwan gwene pasiya aminu tapatu Abaisatane donga yukut. Siwan maatna umana Ilisabet ngang iniking. Ita Erondane dongune aake yukut.
LUK 1:6 Siwan waapaatda Anututane mama wamu kuupbam katak siknga tasike Anutue kainae aminu dudumnata yukumayak.
LUK 1:7 Aminu dudumnata yuke ngana mayata waaknga yapana dua bokngike songa yukut. Yusika waapaatda aminuake sikumayak.
LUK 1:8 Siwan Anututane yot takwan gwene pasiya aminda usanzike puyana unzing unzing ngang yake pake pasikaking. Siwan Abaisatane donga tapduknga kayane puya pasikaking. Siwan Abaisatane donga tapduknga kayane puya pasiwawa Sekaraia tapan ita yot takwan gwene koke sanga Anutuekan natake sawan kupan akopan natapan kapanga
LUK 1:10 take siknga siwawan aminbamda kepman yuke tumuk wam Anutue inike yuking.
LUK 1:11 Inike yuwawa angela tapatuta apuke buka kupanda konggak gwene siyaapane yuwan Sekaraiata kakut.
LUK 1:12 Kake nangaakan natake gwaukut.
LUK 1:13 Gwauban, “Sekaraia. Magwaumbim,” ngang inikut. “Anutu asinggan iniwi natake tasiwan maatdata engangu wawi tapatu tangaiwik. Tangaiwan umana Jon ngang iniyo.
LUK 1:14 Inike musipba tatanga natapiyak. Natake yuwawi aminbamda waakgata aawan natake take siknga natapning,” ngang inikut.
LUK 1:15 “Dasingge? Waapata Anututane kaine umana kayaapa dakngawik. Yangga toknga aknga takngatu dua tangopik. Ita aawik gwenuneta Anututane Waung Takwan Tapata gatangamuke kekekangamik.
LUK 1:16 Kekekangaman ita tasiwana Isrel nana aminu buyambamda Anutue gepbiatang koyutning,” ngang inikut.
LUK 1:17 “Tupa siknga Anutue wam yakapsa aminu Ilaijata kekeknga siknga tasikut binga Anututane kwiiknga dakngake kekeknga aknganane pasiwik. Pasike waaknga nanata kuma yuaing kaknga zipbuke pakapu unekan pewik. Sike ita pasiwan yamandet pasiya aminda kwikwiknga yuya amindane natdetdetna nomana gatu pake yutning. Siwan ita pasike yaniwan aminbamda tanomanuke Buyambam tapata apikge yutning,” ngang inikut.
LUK 1:18 Iniwan natake Sekaraiata yake angela anzing inikut, “Nata aminuake gwasinggat. Maatnaaya aminuake yuakge dasipna wamu wa naninggayak kaknga natapa siakan siwik,” ngang inikut.
LUK 1:19 Iniwan yake anzing inikut, “Na Gebriel. Nata Anutue kaine asinggan yuatde nata apu wamu wa takeaknga ngang ganiwitde nanitewan apunggat.
LUK 1:20 Apuke ganiwa natapi siakan dua singgakge nata ganinggat. Gwa ganinggat takngata dua apik gwekatang gata genda kusiwan wam yanangge apbotake yuwiyak. Siwan wa ganinggat takngata tapdukngane siakande buya aawik,” ngang inikut.
LUK 1:21 Iniwawan aminbamda kepman yuke ita zet dua epan kake nangaakan natapbing.
LUK 1:22 Natake yuwawa masande kepman epuke wam yaninangge apbotake yuwan kake mia takngatu yot takwan gwekatang ba kak ngang natapbing. Natake yuwawa ita katakngita tuwanggan tasike gena kusiwan yukut.
LUK 1:23 Sike puya apasikaing kakngane inane tapdukngata apan pasiwan puyuwana yotna kukut.
LUK 1:24 Yotna kuke yuwawan maatnata musia sikut. Siwan anzing yakut, “Nata tapduknga mamaya yuwawa apmandekan Buyambam tapata gatangaman maaknga natapbum taknga wena singgak,” ngang yakut. Yake yekau katak kuut musa yotnaatang gatukande yukut.
LUK 1:26 Siwan Ilisabetda musia sike yekau katak kuut musaat kautdu gwenduat yukut. Tapduk wagwene Anututa Gebriel initewan kuke you gapmandu umana Nasaret ngang iniking. Galili kep komune yuak.
LUK 1:27 Maya mateu tapatu umana Maria ngang iniking. Siwan wawi tapatu umana Josep ngang iniking. Ita buyambam tapa Devitdane dongune aakut tapa. Siwan wawi waapata maya waapasimu maatnae tapikge gwa yaking ngana
LUK 1:28 dua takut gwekatang angela waapata apu Maria gaak wamu anzing inikut, “Kwikwiknga akngane yuyo. Buyambam tapaat gaat unekan gatake yuke banip gwaang natanggamunggak,” ngang inikut.
LUK 1:29 Iniwan natake dasingge gaak wamu waaknga na naninggak ngang natake meya siknga natayukut.
LUK 1:30 Natayuwan angelata inikut, “Maria! Ma gwaumbim. Anututa gandupan take sikut.
LUK 1:31 Siwan ganiwa natapso. Gata kayaapa sike engangu wawi tapatu tangaiwiyak. Tangaike umana Jesu ngang iniyo.
LUK 1:32 Waapata aminu buyambam tapa dakngawan enane siknga yuak kapatane waaknga ngang inining. Siwan bamna Devitda buyambam tapa yuke tasikakut binga waapata dakngake tasiwikge Anutu buyambam tapaninda tapan tasiwik.
LUK 1:33 Tasike Jekopdane dongune aakingu kuupbamde takeapa dakngake asinggan yuwawik. Yuwawan kekeknga akngata asinggan asinggan yuwik,” ngang inikut.
LUK 1:34 Iniwan Mariata yake anzing inikut, “Dasipna tangaiwit? Apmae dua kukum,” ngang iniwan
LUK 1:35 yake anzing inikut, “Anututane Waung Kapata gae apuke enane siknga yuak kapatane kekeknga aknganata tasinggaman engangu tapatu tangaiwiyak. Wa tangaiwiyak kapae inike Anutu enane siknga yuak kapatane waaknga ngang inining,” ngang inikut. “Gaat llisabetkat dongu unekan yuamayak. Siwan waapata aminuake ngana wawi tapatu musiaatang yuak.
LUK 1:36 Musia siwan yekau katak kuut musaat kautdu gwenduat ngang gwa yuak. Enganga wena songaapa ngang iniking ngana kayapa gwa singgak.
LUK 1:37 Anututa sangabamu atasinangge natakengu atasiwik,” ngang inikut.
LUK 1:38 Iniwan Mariata yake anzing inikut, “Ayok. Nata Buyambam tapanindane gepbiatang yuwawa gata naninggayak kakngata singaman take siwik,” ngang iniwan angela waapata teke kukut.
LUK 1:39 Siwan tapduk waomune Mariata tandakngake zetgaman kuke tawandaka dakatang kopbut. Koke you gapmandu Judia kep komune yuak gapmane kundoke
LUK 1:40 Sekaraiatane yot gwene koke gaak wamu Ilisabet inikut.
LUK 1:41 Iniwan engangu musiane yukut tapata sasaa siwan natayuwawan Anututane Waung Kapata kekeknga aknganata musia tangenawan
LUK 1:42 Ilisabetda yake anzing yanggamatakut, “Gata maya kuupbam yapbike yuayak. Engangu musipbaatang yuak kapa take siknga.
LUK 1:43 Ge gata Buyambam tapanatane minga ngana Anututa kwikwiknga natanggamuke tasinggaman gata take siknga nae apunggayak.
LUK 1:44 Gata gaak wamu waaknga ngang naniwi maakngata natake yuwawa engangu musipmaatang yuak kapata iaknga binga natake sasaa singgak.
LUK 1:45 Siwan buyambam tapata ganiwan natapi siakan sikutde apbakngayo,” ngang inikut.
LUK 1:46 Siwan Mariata anzing yakut, “Nata Buyambam tapanindane umana akngana yatangenakgat.
LUK 1:47 Anutu na gatangamunggak kapae banip gwaang nataat.
LUK 1:48 Natane umana akngana wena ngana nata itane puyana pasike yuwawa atnandupbut. Nanduke tasingaman aminbamu tapduknga apmanu ayuamang komune nanaat apmea yutning amikatda nae apbaknganggak kapa ngang yaning.
LUK 1:49 Dasingge? Kekekngana Kayaapata sanga buyambam pasingamukut. Itane uman takwan takngae yumdekan yananga dua.
LUK 1:50 Waapata ie akgwaukaingu tapduk tapduk yuaingge banip kwikwik natayamunggak.
LUK 1:51 Ita kekeknga aknganata tasike aminu inane umana tangenake minaka tasinangge nataaingu zipmawawan atdatakuking.
LUK 1:52 Ita buyambam tapa dakngake enane yuya aminda pimatningge tasike umana wenaapa yuya aminu tangenakut.
LUK 1:53 Ita tomna natake yuya aminde sanga take siknga yamuke sangaapana kaya aminde sanga dua yamuke yanipewan moo siknga kuking.
LUK 1:54 Ita bania kwikwiknga aknganae bamin yanike dua yanigokgosakut.
LUK 1:55 Ebrahapat ie dongune masan siknga aake yuamang amikat dua ninigokgosake Isrel nana puya amina dakngake yuamang aminu akgatanimukut.”
LUK 1:56 Ngangu Mariata wamu waaknga yakenga bautna Ilisabetkat gatake yuke yekau gweaat gwenduat kawat sandewana yotna gatu kukut.
LUK 1:57 Siwan tapduknga Ilisabetda engang tangaiwik gwenu gwan dapakawan engangu wawiapa tangaikut.
LUK 1:58 Tangaiwana itane aminabamda Buyambam tapata natangamunggak kaknga unin aawan kake apbakngaking.
LUK 1:59 Sike tapduknga katau kautdu musaat kautdu gweaat yukenga kepi asinggan tasikaking kaknga tawake enganggane gupna matanangge apuke umana Sekaraia ngangu nanatane umana ininangge yaking.
LUK 1:60 Yawa ngana mingata anzing yakut,
LUK 1:61 “Aho. Umana Jon ngang ininim,” ngang yakut.
LUK 1:62 Yawan anzing iniking, “Apa. Namakga ba gaatnana tapatutane umana unzingu wena,” ngang iniking. Siwan tasike tasike katakngita tuwangakan tasike nanata umana iniwikge tasiking.
LUK 1:63 Tasiwawa ita tuwangakan wam matananga sandu takapningge tasiwan takapa ita anzing matakut, “Umana Jon,” ngang matawan notnabamu nangaakan natapbing.
LUK 1:64 Siwan zetgaman Sekaraiatane gena take siwan ita wam yake Anutue umana yatangenakut.
LUK 1:65 Siwan itane notna yotna gapmandune nanakanda kake akgwauking. Siwan sangabamu wa sikutde wamu Judia keu kuupbam tawan katang yuaingge yatakuwawa natapbing.
LUK 1:66 Siwan Buyambam tapatane kekeknga aknga iat gatake yuamayak kakngatane buya unin aawan kake musiane nangaakan natake anzing yaking, “Masande engangu waapa dasing binga yuwik,” ngang natapbing.
LUK 1:67 Siwan Anututane Waung Kapata Jondane nana Sekaraiae musia tangenawan ita ayanikapsa aminda yakaing binga wamu takngatu anzing yakut,
LUK 1:68 “Anutu ninu Isrel nanatane Buyambam tapanindane umana yatangenatna. Ninu Anututane aminabam ita apuke gatanimunggak. Gatanimuke iwanin zipmake yawamban yotna gatu kuningge gatanimunggak.
LUK 1:69 Anututane aminu tapatu nindane baminu umana Devit. Itane dongune aakuu tapatu Anututa tapan nin gatanimik.
LUK 1:70 Tupa siknga Anututa wamu takngatu yake yanikapsa amin yaniwan natake anzing yaking,
LUK 1:71 ‘Aminu akgatanimik kapata apu iwanin zipmake yawamban kuning,’ ngang yanikapsa aminda yaking.
LUK 1:72 Aminu wa gatanimik kapata apu tasiwan Anututa nindane baminde butaya natake gatayamikge yawan kekekakut takngae dua botawik. Asiknga gatanimik.
LUK 1:73 Anututa yake nindane baminu Ebrahamde wamu anzing iniwan kekekakut,
LUK 1:74 Iwanda zipmake yawamba kuning ngang iniwan kekekakut takngakan tasiniman inimbakngake gwaut buyak dua yutnim.
LUK 1:75 Unzing yusika tapduk dua kunim gwekatang ninda Anutue kaine noman siknga yusikanga apmea kumnim.
LUK 1:76 Siwan engang! Ga takawi aminbamda gae yake enane siknga yuak kapatane yanikapsa amin tapa ngangu gae yaning. Sike ga Buyambam tapae tupan kuke itane kepina tandakngaya.
LUK 1:77 Gata kepina tandakngake Buyambam tapanindane aminabamu wamu takngatu anzing yaniya. ‘Nata waiakngasa sandetdama iwanzae gepbiatang yutnanga dua,’ ngang yaniya.
LUK 1:78 Siwan Anututa musia kwikwiknga nataniman kwakanangge siwan saamda muke zikaa aknga tawamban sandewan kwakawan kaamang. Ina unzakan tapduknga Anututa akgatanimik gwenu
LUK 1:79 gata kuku tasike aminu akumnanga aknga gepbiatang yuya aminde kakaa yeuyamuya. Siwan kepdakane yuwatna musip kwikwikge kepi yeutnimi kanim,” ngang Sekaraiata waaknga Jonde natake unzing yakapbut.
LUK 1:80 Sike masande engangu Jonu waapata takake natdetdetna pake aminu noman musia gitnaapa dakngake yukut. Yusika tapduknga puyana dua tangenawan Isrel aminda kainata anggaman dua kaking gwekatangu keu amina wena komune yukut.
LUK 2:1 Tapduk wagwene gavmanu tupan sikngaapa i binga tapatu wena. Umana Onggastas ngang iniking. Inane aminabamda takis mutningge umana matanangge
LUK 2:2 ita yawan tuwanguke umana paking. Siwan tupan aminu tapatu umana Sairinias ngang iniking. Ita Siria kep komune tupan tapa dakngake yuwawan aminbamdane umana mataking.
LUK 2:3 Umana matanangge yawan aminu kuupbamda bamnatane kep komune kuwa umana undang paking.
LUK 2:4 Siwan Josepda dongu Devitdane dongune aakut tapa. Unzingge yot gapma Nasaret Galili kep komune yuak gapma teke uneta Judia kep komune kopbut. Koke Betlehem yot Devitda tupa siknga yukut gapmane kukut.
LUK 2:5 Maria musia kayaapane apnaat umana paningge kukumayak.
LUK 2:6 Kusika kundoke you wanggapmane yuwawat engangu dangem tapana tangaitnangge natake wawiapa tangaikut. You apetnanga gwenu gwa gitnawan kake kuke tangaike tauk sanda tapan kopan ikwawa gamande dopang gwekatang tewan yukut.
LUK 2:8 Siwan aminu kundu unenana kunduta sipsip toike you wesim peke zikaane kayuking.
LUK 2:9 Kayuwawa Anututane angelata anggaman apan wa aminda kawawa Anututane kakaa aknganata waenga siknga siwan akagwauking.
LUK 2:10 Akagwauwa ngana angelata ginu ma gwaubam ngang yanikut, “Natapnong. Nata wamu take siknga aknga takapunggat,” ngang yanikut. “Aminbamda wamu waaknga natake musiane iaknga natake apbakngake yutning,” ngang yanikut.
LUK 2:11 “Tapduk anggwene Devitdane yot gapmane maya tapatuta engangu gwa tangaik. Aminu waapata ginu kuupbam gatandamik. Buyambam tapa Krais ngang ininangge,” ngang yanikut.
LUK 2:12 “Tuwangu ginda kake natdetningge daniwa natapnong. Ginda engangu tapatu taukga tapan kopan ikwawa gamandane dopangaatang tewan pewik ngang kake wamu wa daninggat taknga siakan ngang natapnong,” ngang yanikut.
LUK 2:13 Angelata unzing yaniwawan zetgaman angela kwaapzang enandang nanata anggaman apuke angela waapaat gatake yuking. Yuke Anututane umana anzing yatangenaking,
LUK 2:14 “Anututane umana enane siknga singgak. Siwan Anututa kep aminde musip gwaang natayamunggak kakwakngata musip kwikwik natake yutning,” ngang yatangenaking.
LUK 2:15 Siwan angelata wa amin peke enandang kopana sipsip toik aminu anzing yaking, “Ayok. Betlehem kuke sanga wa singgakge Buyambam tapata ninik kaknga kanim,” ngang yaking.
LUK 2:16 Yake sipsipna undang peke zetgaman kuke you wanggapmane kundoke Josepat Mariaatda undang yuwat kaking. Kawawa engang kapata sipsip gamandane dopang gwekatang peawan kaking.
LUK 2:17 Kakenga wamu Buyambam tapata engangu waapae yaniwan natapbingu une yaniking!
LUK 2:18 Yanike peke aminbam yanitakuwa natake aminbamda wamu sipsip toikga yaking kakngae nangaakan natapbing.
LUK 2:19 Siwan ngana Mariata wamu wa kuupbam musiane gitna pake natayukut.
LUK 2:20 Natake yuwawan toikga gatu kuke Anutu inimbakngaking. Angelata yaniwan natake kuke kaking kakngae inimbakngayuk kuking.
LUK 2:21 Siwan tapduu katau kuut musa kautdu gweaat gwenduat kawa puyuwana enganggane gupna mataking. Matakenga ita mingae musip ganang dua yuwawan angelata umana yakut takngae natake umana Jesu ngang inikut.
LUK 2:22 Siwan Anututane wapatang tupa siknga anzing matakut, “Waaknga dangem tapana aawiu Anututane sanga ngang yaninong. Yanike waapa takapuke Anutue nomune imunong,” ngang matakut. “Sangasa kwait suyuknga gweaya ba gubanga gweaya pakapuke Anutue imunong,” ngang matakut. Siwan mingata pasap wam takngatu gepbiatang kundusim yuke tapduknga kawan sandewan minga nanata Anututane mama wapatang matakut taknga tasinangge natake engang take Anutue nomune imunangge Jerusalem gapmane kopbumayak.
LUK 2:25 Siwan aminu tapatu umana Simion ngang iniking. Ita Jerusalem gapmane yukut. Aminu nomantapa asinggan asinggan baniaatangu Anutue nataak. Isrel nana gatayamik kapae natayuakut. Natayuwawan Anututane Waung Kapata gatangamukut.
LUK 2:26 Gatangamuke tupa inikut taknga natapbut. Ga zet dua kupiyak. Tapatuta apmea apu ginu Isrel nana gatandamik ngang Take apata tupa gwa yakut. Aminu waapata apan kakenga kupiyak ngang Waung Kapata inikut.
LUK 2:27 Inike sipdune Waung Kapata gatu iniwan Simionda Anututane yot takwan gwene kopbut. Koke kawawan mingananata Jesu betake Mosesdane mama wapatang tupa siknga Anututa yakut taknga engangu waapa tasingamunangge natake takopbumayak.
LUK 2:28 Takopat Simionda Jesu kake betayuk Anutue umana anzing yatangenakut,
LUK 2:29 “Take apana wamu tupa naniwi kekekakut taknga buya anin tasiwi kaat. Na gatane puya aminda yuat siwan gata akupitde take ngang yawi nata akupanu meya sinanga dua.
LUK 2:30 Gata initewi gatanimik kapata gwa apan kaat.
LUK 2:31 Aminu kuupbamde kaine tasiyak.
LUK 2:32 Tasiwi ita apu dongu kundune nana Anutue dua nataaing aminu kakaa akngaka yeuyamunangge gwa apunggak. Apuke gatane aminda Isrel nana amindane umana buyambam siwikge apan kainata kaat, waapan,” ngang wamu waaknga Simionda Anutu inimbakngayuk Jesu betake yukut.
LUK 2:33 Siwan Jesutane minga nanata wamu Simionda Jesue yawan natake musiane nangaakan natapbumayak.
LUK 2:34 Natake yuwawat Simion waapata wam kwikwik yake Maria anzing inikut, “Anututa engangu aapa tapan pasiwan Isrel aminu kunduta apimaning. Siwan ita gatayaman buyambamda nomana yutning. Ita tuwang dakatu tasiwan kake aminbamda inisapdutning.
LUK 2:35 Siwan aminbamdane natdetdetna wai ngang anggaman siwik. Siwan kake waakgae butaya siknga natapiyak kaknga unzing. Paipda binga banipbaatang mapik,” ngang Simionda inikut.
LUK 2:36 Wam yakapsa aminu maya tapatu umana Ana ngang iniking. Itane nana Panuel Asetane dongune aakutapa. Sike waapa aminuake siknga apa. Tupa ita apna tapan nakanu katau kuut musa kautdu gweaakan ngang apnaat yukumayak.
LUK 2:37 Yuwawat apnata kupan inatakan kobatapa yukut. Yuke itane nakanu 84. Kake Anututane yot takwan gwenu dua teke kukut. Ita Anutue umana yatangenake nanamde bitake tumuk wam yake kwakngaom gatu zikaane ngang pasinggak.
LUK 2:38 Pasike yuwawan Simionda wamu waaknga Maria iniwawan Ana waapata inengan kuke engangu Jesu waapa kake Anutu inimbakngakut. Inimbakngayuk Anututa Jerusalem nanatane iwana zipmake yayawamban kuningge apbakngake yuya aminde engangu waapae yanikut, Anata.
LUK 2:39 Siwan sanga kuupbam Anutue mama wamda yakut binga tasiwat puyuwana gatuna Galili kep komune yotna Nasaret gapmane Jesutane minga nanata kukumayak.
LUK 2:40 Kuke yuwawat engangu Jesu waapata une yuke buyambam takake aminu kekeknga dakngakut. Ita natdetdetna buyambam siknga siwan Anututa gatangaman yukut.
LUK 2:41 Tupa siknga angelata Isrel nana yapbike Isipnana amin zipan kumbingge natake yuwatakak tapduk takwanu Pasova ngang yakaing gwen kanangge natake Jesutane minga nanata nakanbamu asinggan asinggan Jerusalem kokakumayak.
LUK 2:42 Siwan Jesuta nakanu katak kuut musaat kepianganu gweaat kawan sandewana iat minga nanaatda gatuna kopbing.
LUK 2:43 Koke tapduk takwanu wagwenu kawa sandewana yotna gatu pukunangge kukumayak. Kuwawat ngana waatdaka Jesu apata Jerusalem yuwawan minga nanaat aminbampat kepiapane kusika
LUK 2:44 minga nanata Jesu dua kake ngana nikat kukamang ngang baniaatang natapbumayak. Natake gunziu gwendune kusika petnangge tasikumayak. Tasike notna banakan katang Jesue tawambat maiwana
LUK 2:45 Jerusalem gatu koke Jesue tawatake kopbumayak.
LUK 2:46 Koke gunziu gweaat gwenduat tawasika Anututane yot takwan gwekatang kakumayak. Kawawat Jesuta yanindamumsa aminde banakan katang pukwike waakwakgane wamna natake yake yakwaik wamu takngatu takngatu yanikwaiwan minga nanata kakumayak.
LUK 2:47 Kake yuwawat Jesuta yake yanike wamu takngatu yanikwaiwan natdetdetna buyambam siwan kake nangaakan natake Jesutane minga nanata asatnakumayak.
LUK 2:48 Asatnake mingata anzing inikut, “Waaknga. Nanggaat naatda gae gawanda maiwan meya siknga nataamak. Dasingge nitde unzingu tasikuyak,” ngang inikut.
LUK 2:49 Iniwan Jesuta yake anzing inikut, “Dasingge nawakamayak? Ita nanatane yot gwene yuak ngang dua nataamayak ba dasing,” ngang yanikut.
LUK 2:50 Yaniwan ngana wamu waakngae yapii katak dua natdekumayak.
LUK 2:51 Siwan Jesuta minga nanaat gatapan pukuke Nasaret yot gapmane kundopbing. Kundoke yusika minga nanatane wam asinggan gwaamuke yukut. Gwaamuke yuawan mingata sangabamu wa kakut taknga musiane gitna pake natayukut.
LUK 2:52 Natayuawan Jesuta atakawawan natdetdetna buyambam sikut. Siwan aminu kunduta kawa take siknga sikut. Siwan Anututaaya kawan ina unzakan take siknga sikut.
LUK 3:1 Siwan gavmanu tupan tapa umana Taibirias ngang iniking. Waapa nakanu katau kuut musa gatu kepianganu kautdu musa kake aminabam kayukut gwene Pailatda aminu tupan tapa Judia kep komune yukut. Siwan Herotda Galili amindane tupan tapa yuawan uyapna Filipda Itulai kep komuneta Talakoniti kep kopatde tupan tapa yuawan Lusanita keu Abilini komune tupan tapa yukut.
LUK 3:2 Siwan tapaaya Anututane yot takwan gwene pasiya amindane take aminu umana Anas gatu Kaiafas ngang yaniking kapaatda yukumayak. Sike aminu take waakwakga yuwawa Sekariatane waaknga Jonda keu amina wena komune kuke yuawan Anututa inae wam taknga ngang iniwan natapbut.
LUK 3:3 Iniwan natake enake Jodan yangga kautdu tapane yuaingge kuke Anutue wam yawan natake musia tapa tekwamban Anututa waiakngana sandewan yangga sauyamunangge yanikut.
LUK 3:4 Siwan wa tasikut takngae yanikapsa aminu Aisaia ngang iniking kapata tupa siknga buk gopatang anzing matakut, “Aminu tapatu keu amina wena komune yuke anzing yanggamatanggak, ‘Buyambam tapatane kepina tanomanuke tasiwa noman siyok.
LUK 3:5 Siwan ganzik usikwatake tawanu buyambam gatu mateknga ngang kwaipuke kepi gutonga tanomanuke kepi bamu supna kaya kuut tanomanuwa take siyok.
LUK 3:6 Unzing tasiwa Anututa gatanimik kaknga ninu keune nana aminda kanim,’ ngang yanggamatanggak” ngang matakut.
LUK 3:7 Siwan aminbamda Jonda yangga sauyamikge apa kake tapatekwa wamu anzing yanikut, “Gomokga amin yasiwan kungwakaing binga ginda unzing pasikaing. Dasingge Anututane musia toknga aknga yapbitnangge datakuke nata yangga sautdamitde apukaing? Aminu tapatuta toknga wa masan apik kakngae daniwan natake datakukaing ba dasing.
LUK 3:8 Ginda Ebrahamdane dongune aake yuaing ngana sanga takngatuekan dapmakaing. Musipza tapa tekwamban waiakngasae masa yamuke yuaing kakngata anggaman siwan kanimde pasinong. Suu ayuaing gwegwenu sanga moo binga ngana Anututa tasiwan supda Ebrahamedane donga dakngananga. Siwan ginu wamu anzing ma yawam, ‘A! Ninu Ebrahamdane dongune aake yuamang. Yuwatna Anututa nindupan aminu noman aminda yuaing ngang ninduak. Ninduakge dasingge musipminu tana tekwambik,’ ngangu ma yawam.
LUK 3:9 Yapii buyak patzitnangge natake sandunu katapdakae yapiine gwa tekut binga Anututa nin usanzitnangge natake gwa tandakngake yuak. Buya take dua aawan kake sandunda patzike katap bapatang muban yasiwik,” ngang yanikut.
LUK 3:10 Ita unzing yaniwan natake aminbamda anzing inikwaiking, “Niniwi natapna siakan singgakge ninda dasing tasinim,” ngang inikwaiking.
LUK 3:11 Inikwaiwa yake anzing yanikut, “Aminu tapatu siotna gomaya kakengu gomdu notna wenaapae imuyok. Siwan aminu tapatu nanamna kaya kakengu ina unzakan tasiyok,” ngang yanikut.
LUK 3:12 Yaniwan takis papsa aminu kunduaya yangga sauyamikge apuke, “Ninindamumsapa! Ninda dasing tasinim,” ngang iniking.
LUK 3:13 Iniwa ita yake anzing yanikut, “Ginu kaunsilda yawikakngakan panong. Amindane manina kundu kukae ma papam,” ngang yanikut.
LUK 3:14 Yaniwan amak aminu kunduaya apu anzing inikwaiking, “Nikaya dasing tasinim,” ngang iniwa yake anzing yanikut, “Ginda amindane sangana tanangge natake ma tanguke tapam. Amindane sanga kem wam yanike ma papam. Nisane mani gwa pakamang ngang yake banip sinong,” ngang yanikut.
LUK 3:15 Ngang yaniwan natapa musia enawan Jonde nangaakan natake ie Krais Anututa tapan gatanimik kapanin ba ngang natapbing.
LUK 3:16 Unzing natake yuwawa ita anzing yanikut, “Nata puya pasiwa nanduke Kraistapa ngang ma naniwam. Yanggatakan sautdamunggat ngana masande aminu tapatuta apik. Itane kekeknga aknganata na atnapbikut. Unzing siwan na aminu umana wenaapa yuatde nata kepi taukga sandekgama ngang ininangge apmaakanggat. Ita initewan Anututane Waung Kapata apu musipza pangenake ginu katapda isindudumukgak binga tasindamik.
LUK 3:17 Siwan aminu tapatuta kep kwaipuknga katakngine take nanam tapun kwaidotdonguke muban kopa ooya puyapakuwawan buyata gatu buka gwene pimapa pake pakapu nanam tapunde yot gwene peak binga ginu usanziwik. Buya pekenga ooya kwaaimuke katau dua kungwake asinggan isinggak gwekatang muban yasining,” ngang yanikut.
LUK 3:18 Yanike Jonda wamu takngatu takngatu yaniwan musia enawan Anututane wamu takeaknga ngang yaniwan aminbamda natapbing.
LUK 3:19 Siwan Herot tupan aminu waapatane uyapna Filipdane maatna Herodias ngang inikaingkapa kaiwan kuwan maatnae tapan Jonda kuke waiaknga tupa tasikutdeat kaanga inikut.
LUK 3:20 Iniwan musia toknga natake Jonu kaautde tewan yuwawan Herotda waina waakngaat tasiwan waiakngana buyambam sikut.
LUK 3:21 Siwan Jonu kaautde dua kukut gwekatangu aminbamu ie kukingu yangga sauyaman teke kuwawa Jesuta apan Jonda yangga saukngamukut. Saukngaman puyuwan Jesuta tumuk wam yawawan enandangu kakaa siwan
LUK 3:22 Anututane Waung Kapata epan kawawan kwaiu gwendu kombunanang ngang yanikamang gwenda binga epuke Jesue apu paku tangene pakuyuwawan enandangga wamu takngatu anzing yakut, “Ga natane waaknga. Na gae take siknga natanggamuke na gae musip gwaang natanggamunggat,” ngang yakut.
LUK 3:23 Tapduknga Jesuta Anututane puya tuwanguke pasikut komune ita nakan 30 gwa yuke pasiwan aminbamda kake Josepdane waaknga ngang natapbing. Siwan Josepdane nana Ilai.
LUK 3:24 Siwan Ilaitane nana Matat. Matatdane nana Liwai. Liwaitane nana Melkai. Melkaitane nana Janai. Janaitane nana Josep.
LUK 3:25 Josepdane nana Matataias. Matataiasdane nana Emos. Emosdane nana Neam. Neamdane nana Eslai. Eslaitane nana Nanggai.
LUK 3:26 Nanggaitane nana Meat. Meatdane nana Matataias. Matataiasdane nana Semen. Semendane nana Josek. Josekgane nana Joda.
LUK 3:27 Jodatane nana Joanan. Joanandane nana Resa. Resatane nana Serababel. Serababeldane nana Siatiel. Siatieldane nana Nerai.
LUK 3:28 Neraitane nana Melkai. Melkaitane nana Edai. Edaitane nana Kosam. Kosamdane nana Elmedam. Elmedamdane nana Ea.
LUK 3:29 Eatane nana Josua. Josuatane nana Eliesa. Eliesatane nana Jorim. Jorimdane nana Matat. Matatdane nana Liwai.
LUK 3:30 Liwaitane nana Simion. Simiondane nana Juda. Judatane nana Josep. Josepdane nana Jonam. Jonamdane nana Elaiakim.
LUK 3:31 Elaiakimdane nana Melia. Meliatane nana Mena. Menatane nana Matata. Matatatane nana Netan. Netandane nana Devit.
LUK 3:32 Devitdane nana Jesi. Jesitane nana Obet. Obetdane nana Boas. Boasdane nana Salmon. Salmondane nana Nason.
LUK 3:33 Nasondane nana Aminandap. Aminandapdane nana Admin. Admindane nana Anai. Anaitane nana Hesron. Hesrondane nana Peres. Peresdane nana Juda.
LUK 3:34 Judatane nana Jekop. Jekopdane nana Aisak. Aisakgane nana Ebraham. Ebrahamdane nana Tera. Teratane nana Neho.
LUK 3:35 Nehotane nana Serak. Serakgane nana Riyu. Riyutane nana Pelek. Pelekgane nana Iba. Ibatane nana Sila.
LUK 3:36 Silatane nana Kenan. Kenandane nana Afaksat. Afaksatdane nana Sem. Semdane nana Noa. Noatane nana Lemek.
LUK 3:37 Lemekgane nana Metusala. Metusalatane nana Inok. Inokgane nana Jeret. Jeretdane nana Mahalalil. Mahalalildane nana Kenan.
LUK 3:38 Kenandane nana Inos. Inosdane nana Set. Setdane nana Adam. Adamdane nana Anutu.
LUK 4:1 Siwan Anututane Waung Kapata apu Jesu kekekangaman yangga Jodan tapa tewan keu amina wena komune Waungga initakukut.
LUK 4:2 Kuke zikaat kwakngaopat 40 ngang yuawan iwanin tapata inindatdaukut. Tapduk mamaya wa yukut kopatangu Jesuta nanamu dua nake tomna natake yuwawan sandewan
LUK 4:3 iwaninda anzing inikut, “Ga Anutue waak kakengu sup anggwen iniwi poyak dakngawan napso,” ngang inikut.
LUK 4:4 Iniwan Jesuta yake anzing inikut, “Wamu takngatu Anututane wapatang anzing yakut, ‘Nanamdakan keune nana aminu gatayaman kayuk yutnanga dua. Yusikangu akumning,’ ngang matakut takngae natake supgwenu dua iniwit,” ngang inikut.
LUK 4:5 Siwan waapata tapan tawanu mamaya dakatune kopbumayak. Koke iwaninu waapata zetgaman yeukngaman kawawan take aminu kuupbamda kepna kepna yutakuwawa kakut. Kawawan take aminabamda wa aminde gepbiatang yutakuwawa kakut.
LUK 4:6 Kaawan gatu inikut, “Kekeknga wa kaayak kaknga kuupbam gikae gama gatane umanda buyambam siwik. Kekeknga waaknga kuupbam tupa ninae naman pakumu nata aminu tapatue imunanggengu nata ie asimit,” ngang inikut.
LUK 4:7 Inike, “Gata nae gepbiatang koyuke nanimbakngawinu kekeknga aknga kuupbam gikane dakngawik,” ngang inikut.
LUK 4:8 Iniwan natake Jesuta yake anzing inikut, “Anututane wapatang wamu takngatu anzing matakut, ‘Anutu Buyambam tapae inimbakngake ie puyaekan natake tasingamuyo,’ ngang matakut takngae natake dua ganimbakngawit,” ngang inikut.
LUK 4:9 Siwan waapata Jesu tapan Jerusalem gapmane kukumayak. Kuke tapan Anututane yot takwan gwene engatangan koke dum tapane yukumayak. Yuke anzing inikut, “Ga Anututane waaknga siakan kakengu aneta kepdakane paapso.
LUK 4:10 Dasingge? Anututane wapatang anzing matakut, ‘Ita angelana yaniwan apu katak siknga gatanggamuning,’ ngang matakut.
LUK 4:11 Siwan wamu takngatuat anzing matakut, ‘Ita katakngata tapa suu gwendune kensomba dua tepsa,’ ngang matakut takngae natake undang paapso,” ngang inikut.
LUK 4:12 Iniwan yake anzing inikut, “Anututane wapatang anzing yakut, ‘Gata Anutu Buyambam tapa ma tasiwi siwan,’ ngang yakut takngae natake dua paapit,” ngang inikut.
LUK 4:13 Iniwan iwaninu waapata inindatdauwan puyuwana Jesu teke kuke gatu tapduk gwendune inindatdautnangge natayukut.
LUK 4:14 Siwan Waung Kapata kekeknganata gatangaman Jesuta gatu Galili kep komune kuwan ie wamu yatakuwa keu waomunenana kuupbamda natapbing.
LUK 4:15 Natake yuwawa ita asinggan miti yot katang koke yanindamuwawan natake aminbamda itane umana aknga yatangenaking.
LUK 4:16 Siwan Jesuta Nasaret yot gapmane yuke buyambam takakut gapmane gatuna kukut. Kuke yuwatakak tapduk gwene miti yot gwekatang kopbut. Koke mitiaknga kendeyamunangge natake dandam tangan enake yuwan kake buk ayanikapbut tapa Aisaiata tupa siknga matakut gomu Jesue imukut. Iman take tapan waiwan wamu takngatu anzing tematekutna kake kendewan natapbing,
LUK 4:18 “Anututane Waung Kapata kekekangaman nata wamu takeaknga sangaapana wena aminde yaniwitde na nanikut. Nanike anzing yaniwitde nanitewan kukum. Siwan kai wai siya aminu kaina take siningge yaniwit. Siwan take apata meya wam yaman pake yuaing amin gatayamuke sandeyama kuningge tasiwit.
LUK 4:19 Tasike Anututa itane amina gatayamikge tapduk gwende yanikapit,”
LUK 4:20 ngang unzing tematekutna kendekenga gatu tapan kopan taku buu wagomu akayukut tapae imuke pukwikut. Imuke pukwiwawan miti you wagwene yuking aminda ie kai kekekngata kayuking.
LUK 4:21 Ie kayuwawa kake anzing yanikut, “Gunziu anggwene Anututane wam a tematekutna maakzata nataing kaknga buyana siakande unin aakgak,” ngang yaniwan natapbing.
LUK 4:22 Yaniwan natake wamu wa yakut takngae musip gwaang natake ie musiane nangaakan natake anzing yaking, “Dasing! Aminu waapa Josepdane waaknga ba,” ngang yaking.
LUK 4:23 Yawa natake anzing yanikut, “Siakande siknga daninggat. Ginda nae wamu anzing ba yaning, ‘Sanga Kapaneam yot gapmane tasikuyak kaknga ninu gwa natapbumang. Unzakan ane yotda siknga tasiyo,’ ngang nanduke nae tuwang wamu anzing ba yaning. Dokta apa gikae gupba tapi takayok ngang ba yaning,” ngang yanikut.
LUK 4:24 Yanike anzing yanikut, “Siakande siknga ginu daninggat. Aminbamda yanikapsa aminu tapatuta yawan itane yotna nanata ie wamu dua natapning,” ngang yanikut.
LUK 4:25 “Nata siakande siknga daninggat. Ilaijata tupa yukut gwene nakanu gweaat gwenduat gatu yekau katau kuut musa kautdu gwenduat yuke sopaat yekap piokatda dua pimapan Isrel nanata tom tapduk yuking. Tapduk wa yuking gwene Isrel nana maya kombakobau buyambamda yuking.
LUK 4:26 Yuwawa Anututa Ilaija initewan kuke kombakobau kundu yapbike Saidon kep komune kuke Sarefat yot gapmane kuke kombakobau tapatutane yotnane koke gatangamukut.
LUK 4:27 Ina unzakan yanikapsa amin Ilaisata yukut gwene Isrel nana aminbamda wata kekeknga siknga sike yuwawa ngana wa amindane tapatu watana takaningge Ilaiasata dua tasiyamukut. Neamanu Siria kep komune nana tapatakan watana takaningge tasingamukut,” ngang Jesuta yanikut.
LUK 4:28 Yaniwan miti yot gwekatang yuking aminda wamu waaknga natake musia toknga natangamuking.
LUK 4:29 Natake enake Jesu katakngata take you wanggapmatane damedakane mutnangge takuking.
LUK 4:30 Takuwawa ngana ita akginikake kuwawan mutnangge natake ngana tawamba maikut.
LUK 4:31 Siwan ita Kapaneam yot gapma Galili kep komune yuak gapmane pukuke yuwatakak tapduk gwene miti yot gwekatang koke aminbam yanikut.
LUK 4:32 Yaniwawan natake asatnaking. Dasingge? Ita Anutue kekeknga akngane yawan kawa kekeknga akngana inata kundu sikut.
LUK 4:33 Siwan aminu tapatu waung wai tapatuta takut. Sike waapata miti yot katang yuke kumzang yanggamatake anzing yakut,
LUK 4:34 “A! Ga Jesu! Nasaret nanaapa! Ga ninde dasing tasinimunangge apunggayak,” ngang yanggamatake, “Gata apu ninu apasiwi mainimde ba apunggayak? Nata gae Anututane aminu dudumnaapa ngangu gae atnataat,” ngang inikut.
LUK 4:35 Iniwan ngana Jesuta kaanga inike anzing yakut, “Ga genda umuke aminu waapa teke kung,” ngang iniwan waung waiapata aminu waapa ikomban aminbamde kaine banakan kepdakane pimapan teke kuwan aminu waapata wai dua sikut.
LUK 4:36 Siwan aminbamu wa yukingga asatnake anzing yaking, “Jesu waapata wamu aminu kekekngana kayapa dakngake waung wai yanikwasiwan kukaing ngang yaking. Wamna inata kundu singgak,” ngang yaking.
LUK 4:37 Yake Jesue wamu waaknga yatakuwa aminu keu waomune yuaingga natapbing.
LUK 4:38 Siwan Jesuta enake miti yot wagwen teke kuku Saimondane yotnane koke kaawan Saimonda maatnatane minga mait natake gupna toknga siknga siwan yuwawan apu kunduta Jesu inike maitna sandekngamikge iniking.
LUK 4:39 Iniwa natake kuke mait sikut tapae wesim yuke maitna sandekngaman mait taknga tewan kuwan enake nanam tandakngayamukut.
LUK 4:40 Tandakngayamuwawan gunzitda pukuwawan aminu maiu inata inata siking aminu notnata Jesue pakapa ita katakngita mait aminu maya wawi kuupbam inandek inandek wasike maitna sandeyaman gupna take siking.
LUK 4:41 Siwan waung wai takwakga aminu kuupbam peke kuking aminde kaanga yanike dua kapewan yaking. Dasingge? Ie Krais ngang natake yanggamatake Jesu anzing iniking, “Ga Anututane waaknga,” ngang iniking.
LUK 4:42 Siwan keu kwakanangge dapaknga siwawan Kapaneam yot gapma teke Jesuta amina wena komdune kuwan aminbamda ie tawake kake, “Ma nipmake kuwim,” ngang iniking.
LUK 4:43 Iniwa ngana ita yake anzing yanikut, “Nata yotna yotna kuke Anututa amin panangge tasinggak kakngae wamu takeakngae yanike pasiwitde nanitewan kepdakane epbum,” ngang yanikut.
LUK 4:44 Unzing yaniwan natapana peke Jesuta Judia kep komune kuke miti yotnaatang koke yanikut.
LUK 5:1 Siwan tapduu gwendune Jesuta yangga gapan Genesaret kwaimune yuwawan aminbamda ie apuke Anutue wam natapnangge akgitnagitnauke apbing.
LUK 5:2 Apa kake kaawan dopangbamu mateknga gweaya yangga kwaimune saisaindakane yuwawat toikngata pis pakainggane yapapna yangga sauke yuwawa kakut.
LUK 5:3 Kake dopangbamu gwendu Saimondane gwene koke iniwan temangusiwan pukuke yangga banakan mateknga kundusim kuwan wagwene pukwike wamu takngatu aminbamu wa apbingge yanikut.
LUK 5:4 Siwan wamu yaniwan puyuwana Saimon inike, “Dopangbam gwenu take yangga banakan takuke yapapza muke pis kundu kaitnong,” ngang inikut.
LUK 5:5 Iniwan Saimonda yake anzing inikut, “Yanindamumsaapa. Apmanu zikaa anggwene puya kekeknga tasina maik ngana gata unzing nininggayakge gatunin kuke yapapmin mutna,” ngang inikut.
LUK 5:6 Inike yapapna muke pis buyambam kaiwa yapapna atdaknganangge sikut.
LUK 5:7 Siwan notna dopangbamu gwendune yukingga apu gatayamuningge tuwangu tasiwa apa pis wa dopangbamu gweayane pamuba pisda meya siwan dopangbamu wa gweaatda yanggaatang pukunangge sikumayak.
LUK 5:8 Siwawat Saimon Pitata pis buyambamu wa kake Jesue kepine gwetake anzing inikut, “Buyambamtapana. Na wai amin. Na napmake kunggayo,” ngang inikut.
LUK 5:9 Ita pis buyambamu wa kaike asatnawan aminu iat gatake yukingu kuutda kumzang satnaking.
LUK 5:10 Siwan Sebeditane waaknga Jemskat Jonkatda Saimondane notna waapaakaya kake asatnakumayak. Satnawat Jesuta Saimonu anzing inikut, “Nangaakan ma natapim. Masande gata aminbamu pis wa kaiyak binga tapduk anggweneta tuwanguke patakopso,” ngang inikut.
LUK 5:11 Iniwan kwaimune kuke dopangbamna kwaim tapane kaipakweke sangabamna peke Jesuat gatake tawamba kuking.
LUK 5:12 Siwan you gapmandune yuke kaawan aminu tapatu watana kekeknga siknga siwan gupna tapan sopukutna kaawan aminu waapata Jesue kepine gwetake anzing inikut, “Buyambamtapa. Gata take natakengu na tasingami gupma dudumna siwan,” ngang inikut.
LUK 5:13 Iniwan natake Jesuta katakngita wasiyuk anzing inikut, “Nata gatane gupba dudumna siwikge nataat,” ngang iniwan watana kekeknga wa zetgaman wena sikut.
LUK 5:14 Siwan Jesuta wamu kekeknga anzing inikut, “Katak siknga gwaumso. Gata kuke aminu tapatu sanga wa tasinggamunggatde ma iniwim. Ngana gata aminu Anutue yot takwan gwene pasiya aminde kuke gupba yeuyamuyo. Yeuyamuke gupba take singgakge sangaka Anutue imuyo. Unzing Mosesde mama wamda tupa yakut taknga tasike sangaka imi ganduke wataka wena gwa sik ngang yawa aminbamda natapning,” ngang inike initewan kukut.
LUK 5:15 Unzing inikut ngana sanga wa Jesuta tasikutde yatakuwa natake aminbamda apuke ie wam natake maitna sandeyamikge apbing.
LUK 5:16 Apuwawa ngana asinggan asinggan keu aminu wena komune kuke tumuk wamu Anutue yake inikut, Jesuta.
LUK 5:17 Siwan ita aminbam yanindamuke yuwawan Ferisi amindane miti wam natake gepbiatang yuya aminu kundu gatu Mosesda mama wam yanindamumsa aminu kundu ngang undang yuking. Wa aminda Galili kep komunenana gatu Judia kep komunenana gatu Jerusalem gapmanenana ngangga apbing. Siwan Jesuta mait aminu pasiwan maitna wena take siningge Buyambam tapanindane kekeknganata gatangaman yuak.
LUK 5:18 Yuwawan aminu kunduta mait aminu tapatu kwatai gatukande kumbing kapa buka gwene teke gwaamutakapuke yoakatang takoke Jesuta yukut komune wesim tenangge tasiking.
LUK 5:19 Tasike ngana aminbamda yuwa you gitna siwan mait aminu waapa yoakatang takopnanga dua sikut. Siwan yot tangan takoke papa kwapa maitna kayaapa buka gwen buyak napda tatawawawa amin bamu yukingune banakan puku Jesutane nomnane yukut.
LUK 5:20 Pukuke nomnane yuwawan wa aminda maitna Jesuta apme sandekngamik ngang natapa kekekakut taknga kake mait amin tapa anzing inikut, “Notna. Nata waiakngaka gwa sandekgamunggat,” ngang inikut.
LUK 5:21 Ngang iniwan Ferisi amindane dongaat mama wam yanindamumsa amikatda kake baniaatang anzing natapbing, “Aminu waapa mamin? Aminu kepdakane nanata waiaknga sandetnanga dua. Anututakan sandewan siakan siwik. Siwan ngana waapata anzingu inik, ‘Gawaknga akngaka sandekgamunggat,’ ngang iniwan Anututane umana aknga tasiwan mainggak,” ngang sapdukngamuke natapbing.
LUK 5:22 Natake yuwawa Jesuta wamu wa natapbing kaknga anggaman kake anzing yanikut, “Dasingge ginu musipzaatang nangaakan nataing,” ngang yanikut. “Ginu dasing nataaing?
LUK 5:23 ‘Waiakngana gwa sandekngamutde gatu maitna sandekngamuke ga enake kunggayo,’ ngang iniwa ginda kake dasing natapning? Puya zaaknga kwanga siknga tasinanga?
LUK 5:24 Siwan na aminbamde notnaapa dakngake keune epu yuke amindane waiakngana sandeyamitde nanitewan apbum taknga nata take tasiwa ginda kake natdetningge tasiwa kanong,” ngang yanike aminu kwatai kumbing kapa anzing inikut, “Ganiwa natapso. Enake buka gwenu gika gwaamutake yotda takungga,” ngang iniwan
LUK 5:25 maitna wena siwan aminu waapata zetgaman aminu wa yuking aminde kaine enake apekuu wagwenu take yotnae Anututane umana yatangenayuk kukut.
LUK 5:26 Kuwawan aminbamda kake asatnake Anutue umana yatangenake musiane nangaakan natake, “Apmanu sanga inata takngatu tasiwan kamang,” ngang yaking.
LUK 5:27 Masande Jesuta kusika takis papsa aminu tapatu umana Liwai ngang iniking. Ita takis mani peainggane opis gwene pukwike pawawan kakut. Kake anzing inikut, “Ga pandetna dakngawiyakge apu nawamso,” ngang inikut.
LUK 5:28 Iniwan enake sangana kuupbam peke ita kuku Jesu tawakut.
LUK 5:29 Sike banip gwaang natake Jesue nanamu buyambam sakut. Sake Jesuat pandetnaat iat gatake yuke gatu aminu kait pasiyuk takis papsa amin gatu aminu kunduat gatake yuke nanamu wa naking.
LUK 5:30 Nawawa kake Ferisi amikat gatu mama wam yanindamumsa amin takwakatda Jesutane pandetnae anzing yanikwaiking, “Dasingge gikat takis kukae papsa amikat gatu wai takngatu takngatu pasiya amikat gatake yuke nanamu nakaing,” ngang yanikwaiking.
LUK 5:31 Yanikwaiwa ngana Jesuta tuwang wamu takngatu yake anzing yanikut, “Aminu maitna wenata doktae dua kukaing. Aho. Maitna kaya amindakan doktae kukaing,” ngang yanikut.
LUK 5:32 “Sike tuwang wamu waakngatane yapii anzing. Nata apuke aminu noman yuamang yakaing amin yayawamba musia papa tekwambikge dua apbum. Aho. Nata apuke waiakngana kaya amin yayawamba apuke musia papa tekwambikge natake apbum,” ngang yanikut.
LUK 5:33 Yaniwan natake Jesu yake anzing iniking, “Jondane pandetnata tapduknga kayane nanam teke Anutuekan natake tumuk wamban yake yuaing. Siwan Ferisi amindane dongata unzakan tasikaing. Ngana gatane pandetdata asinggan nanamu nake tangokaing,” ngang iniking.
LUK 5:34 Iniwa Jesuta yake tuwang wamu takngatu anzing yanikut, “Gindane notza tapatuta maatna tapik gwekatang wa tapik kapaat iat notnaat gatake yuke nanamu tenanga dua.
LUK 5:35 Ngana masande aminu maya tapiu waapa takuwa notna wa amikat dua gatake yukengu tapduu waomune wa aminu notnae musia meya natake nanam teke dua nake tomda yutning,” ngang yanikut.
LUK 5:36 Siwan Jesuta tuwang wamu takngatu anzing yanikut, “Aminu tapatuta tauknga bumi awesikut san take tauu kayuk san matake dua bupik. Unzing tasiwanu tauu kayuu wasanzimda akgoopmake kaiwan kuwan tauu bumi wasanu ganangi buyambam wesiwan tauu kayuk sanu matakuu take dua siwik.
LUK 5:37 Siwan aminu tapatuta wain yangga kayuk kaknga toknga akngana kaya wa memenggane gupna yanggaumande dauke bupbingu bumi gopatang dua tukngwamban pukuwik. Unzing tasiwanu wain yangga kayukgane waung kakngata isiwan memenggane gupna bumi wagomu atuyukake atdakngawik. Dakngawan wain yangga kepdakane tukngwapimapa memenggane gupna wagomu wai siwik.
LUK 5:38 Sike wain yangga kayuk kaknga memenggane gupna kayuk gomune tukngwamban pukuwan sanga wa kuutda take yutzan,” ngang yanikut.
LUK 5:39 “Siwan gatu aminu tapatuta wain yangga tupanana aknga gwa tangokengu kayuk kakngae apbitake anzing yawik, ‘Wainu tupanana take siknga,’ ngang yawik.” Ngang tuwang wamu waaknga yaniwan natapbing.
LUK 6:1 Siwan yuwatakak tapduu gwendune Jesuat pandetnaatda puyaangane banakan kuke pandetnata poyakgane tapuya zukundakngake ooya pasiwa pimapa buya atnayuk kuking.
LUK 6:2 Unzing tasiwawa kake Ferisi aminu kunduta kaanga anzing yaniking, “Yuwatakak tapduk gwene puya dua tasinimde mama wamda ayandaknganggak ngana ginu dasingge puya pasikaing,” ngang yaniwa
LUK 6:3 natake Jesuta yake anzing yanikut, “Baminu Devitda sanga tupa siknga tasikut takngae wamu ginda akendeking gamu unzingu dua yawam. Tapduk wagwene iat aminaatda tomna natake
LUK 6:4 Devitda Anututane yot takwan gwekatang koke poyau Anutue nomune asinggan pewa yuaingu apakut. Poyau wa pekingu moo aminda nananga dua ngana Anutue yot takwan gwene pasiya amindakan naning. Ngana Devitda pake atnake kundu inane aminae yaman naking ngang wa matakut takngae ginu apbotake yakaing ba dasing,” ngang yanikut.
LUK 6:5 “Na aminbamdane notnaapa dakngake sangabamdane kuyana yuke gatu puya yuwatakak tapduk gwene pasikaing kakngae kuutde kuyana yuat,” ngang yanikut.
LUK 6:6 Siwan yuwatakak tapduk gwendune Jesuta miti yot katang koke aminbamu wam yanike kawawan aminu tapatu katakngi siyaapa akgoptawan boopmi wanga apmatekakut tapata yuwan kakut.
LUK 6:7 Siwan mama wam yanindamumsa amikat gatu Ferisi amindane dongaatda Jesue kem wam yaningge kayuke yuwatakak tapduk gwene apba gatangamik ngang natake Jesuta tasiwan kanangge kai ie kekekngata katasiking.
LUK 6:8 Katasiwawa ngana ita wa amindane natdetdetna kake aminu kwatai apmatekakut tapa anzing inikut, “Ga enake banakan yuyo,” ngang iniwan enake banakan yukut.
LUK 6:9 Yuwan Jesuta anzing yanikut, “Nata danikwaiwit,” ngang yake anzing yakut, “Mosesde mama wapatang dasing matakut? Sanga takeaknga yuwatakak tapduk gwene take ba tasinim ba sanga waiaknga tasinim? Amin gatangamuna take yuwik ba atasina maiwik,” ngang yanikut.
LUK 6:10 Yanike aminu wa yukingge katakuke aminu waapa anzing inikut, “Katakga tapi kwangayok,” ngang iniwan unzing tasiwan katakngi take gatu sikut.
LUK 6:11 Take siwan kake wa katasiking aminda musia toknga siknga natake, “Ninda Jesue dasing tasinim,” ngang yaking.
LUK 6:12 Siwan tapduk waomune Jesuta tumuk wam yanangge natake bakubaku dakane koke tumuk wam Anutue inike zikaa wagwene yake yuwawan kuku akwakakut.
LUK 6:13 Kwakawan gunzitda akopana pandetna yayawamban apa yanike katau kuut musaat kepianganu tapaakan pakut. Pake yanipewan kuke puyana pasike kwiiknga daknganingge pake Aposel ngang yanikut.
LUK 6:14 Tapatu Saimon ngana umana takngatu Pita ngang inikut. Tapatu Endru Saimondane uyapna. Tapatu Jems. Tapatu Jon. Tapatu Filip. Tapatu Batolomyu.
LUK 6:15 Tapatu Matyu. Tapatu Tomas. Tapatu Jems Alfiasdane waaknga. Tapatu Saimon Selot ngang inikaing.
LUK 6:16 Tapatu Jemsdane waaknga Judas. Tapatu Judas Iskeriot yot gapmane nanaapa. Ita masande kait tasike yeuyaman amak aminda Jesu taking.
LUK 6:17 Siwan uneta Jesuat pandetnaatda gatake pukuke kuku keu dudumna komdune yuwawa aminbamu yotna yotna Judia kep komune nana gatu Jerusalem gapmanenana gatu yanggabam gwenu kwaimune you gapmaaya Taia gatu Saidon ngang yanikaing gapmaaune nana aminu kuutda undang yuking.
LUK 6:18 Wa aminu apuke ie wam natapnangge apbing. Apa kundu maitna sandeyamikge apa aminu waung wai takwakga papa datdaptakingu pasiwan take siking.
LUK 6:19 Kekeknganata pasiwan kuupbamda take siwa kake aminbamda katakngita wasinangge tasiking.
LUK 6:20 Siwan Jesuta pandetna katakuke anzing yanikut, “Ginu sangaapasa wenata apbaknganong. Dasingge? Sangana wena akwakga Anututa amin panangge tasinggak kakngae gepbiatang yuaing.
LUK 6:21 Ginu aminu tomsa nataingu apbaknganong. Dasingge? Masana tasindaman natapa musipzaatang take siwik. Ginu kwanam sike yuaing aminu apbaknganong. Dasingge? Masande apmitning.
LUK 6:22 Ginda na aminbamdane notnaapa nawamba danduke aminbamda musia zikaa natandamuke masa damuke danisapduke umanza aknga wai siknga yawa natake ngana apbaknganong,” ngang yanikut.
LUK 6:23 “Siwan unzing ginde tasindama kake apbakngake gupza tangupbaknganong. Dasingge? Tupa bamnata unzakan yanikapsa aminde pasiyamukaking binga tasindamuwawa ginu enandang koke sanga take siknga pake yutning.
LUK 6:24 Sike mamin amin takwau sangaapana buyambamu kayata gwautnong! Dasingge? Sanga masan pake yutnanga akngana gwa pake yuaing.
LUK 6:25 Siwan ginu nanam napa gitnawan yuaingu gwautnong! Masande gatusa tomsa natapning. Ginu apbakngake minsa mikaingu gwautong! Masande kwanam siwa kai yanggasa pimaning.
LUK 6:26 Aminbamda gindane umanza pangenawa kake ginu gwautnong! Tupa bapunata unzing kem wam yanikapsa aminde umana pangenakaking,” ngang yanikut.
LUK 6:27 “Ngana nata daniwa nae gena gwaamukaingga natapnong. Ginda iwanzae musip gwaang natayamunong. Aminu ginde musia toknga natapningge ginda takekan tasiyamunong ngang yanikut.
LUK 6:28 Aminu kunduta gin pasiwa mainingge yaning kaknga teke ginda yake wam kwikwik yaninong. Aminu kunduta gin danisapduwanu ginda Anutu iniwa natake kwikwiknga aknganata gatayamik.
LUK 6:29 Aminu tapatuta aamba kautdu wesiwanu katewi gatu kautduat wesiyok. Sike aminu tapatuta gatane got taukga kaiwan kuwan tapanu siotda tapikge kaanga ma yandakngawim,” ngang yanikut.
LUK 6:30 “Aminu tapatuta gatane sanga tapatu tanangge yawanu gata take imuyo. Sike aminu tapatuta gatane sangaka papanu gata wamu kekeknga yawi gatu gamikge ma iniwim.
LUK 6:31 Sanga aknga tasindamuningge take natake ginda gamok kuke waakngakan tasiyamunong,” ngang yanikut.
LUK 6:32 “Aminu musip gwaangu ginde natandamukaing amindekan ginda yake musip gwaang natayamanu Anututa kawan take siwik. Gikat waiaknga pasiya amikatda waakngakan pasikaing. Notna musip gwaang natayamukaingge yake musip gwaangu atnatayamukaing.
LUK 6:33 Sike aminu ginde takeaknga tasindamukaing amindekan yake tasiyamanu Anututa kawan takesim siwik. Wai amin kaya waakngakan atasikaing,” ngang yanikut.
LUK 6:34 “Siwan sangasa aminde yamuke yake apmea namuning ngang natapanu Anututa kawan takesim siwik. Waiaknga pasiya aminu kuut notnae sangana ayamukaing. Yamuke unzakan apanangge natake unzakan tasikaing.
LUK 6:35 Ginda iwansae musip gwaang natayamuke sangasa yamuke yake damuningge meya ma natapam. Ie meya dua natakengu sangaapasa buyambam pake Anutu enane siknga yuak kapatane waaknga dakngake yutning. Ita musip gwaang aminu dua inimbakngakaingge natayamuke wai aminde kuut unzakan natayamunggak. Nanzata butaya ginde nataak binga
LUK 6:36 ginda aminde butaya natayamunong,” ngang yanikut.
LUK 6:37 “Siwan ginda wamu katak dua natake aminu usanzike ma inisapduwam. Anututa yake gin usanzitdamuyak. Ginda usanzike toknga paningge ma yawam. Anututa usanzitdamuke toknga aknga damuyak. Siwan ginda amindane waiakngana sandeyama Anututa gindane waiakngasa asandetdamik,” ngang yanikut.
LUK 6:38 “Ginda sanga aminde yamunong. Yama Anututa sanga ginde damik. Ginde take siknga damuke pamuban dopa makaiwa pukuwa gatu kunduat pamuban doke akopimapa ginde damik. Sanga ginda aminde yamukaing binga Anututa unzakan ginde damik,” ngang yanikut.
LUK 6:39 Siwan Jesuta tuwang wamu takngatuat anzing yanikut, “Aminu tapatu kaina kuut gweaat wai gwa sikumayak kapata kai wai sikuu tapatu take apme initakuwik ba dasing? Aho. Kuut tapaatda gapmaatang pimanzan,” ngang yanikut. Yanike tuwang wamu takngatuat anzing yanikut,
LUK 6:40 “Pandetnata aana yambitnanga dua. Ita skul tasiwan puyuwana yanindamusaapa binga dakngawik,” ngang yanikut. Yanike gatu ita tuwang wamu takngatuat anzing yanikut,
LUK 6:41 “Dasingge dapandapa mateknga notdae kaine yuwan kake, ‘Nata kwagiwa akopan,’ ngang inike ngana katap sanu gikane kaikane yuak sande dua nataayak binga tasinggayak? Tasike notdata waiaknga mateknga tasiwan kake ngana gikane waiakngaka buyambamu tasinggayak kaknga takusopunggayak. Ga kem amin. Tupanu katau buyambam sanu gikae kaikane yuak sanu kwagiwi akopana masande gata katak siknga kake dapandapa notdae kaine yuau kwagikngamuyo,” ngang yanikut.
LUK 6:43 “Katau take dakata buyana wai atnanga dua. Ina unzakan katau wai dakata buyana take atnanga dua.
LUK 6:44 Aminda katap tapunu kainata kakenga natdeke katau andaka take ba wai ngang yaning. Sike aminda baap tapunu bobing takngane dua kake dekaing. Siwan aminda waindane tapuya katau wai paanga kaya dakane dua kake dekaing.
LUK 6:45 Aminu nomana apata natdetdetna noman siknga musiaatang natayuke sanga take akngakan tasinggak. Sike aminu wai apata natdetdet wai pake musiane natayuke waiaknga tasinggak. Natdetdetna gutonga musiaatang kusopuke yuaingu genata ayakapmakaing,” ngang yanikut.
LUK 6:46 “Dasingge ginda nae, ‘Buyambamtapa! Buyambamtapa’ ngang nanike ngana ginda nae wamu dua gwaamukaing?
LUK 6:47 Mamin amindaka nae apuke nae wam natake nae gen tawambik? Sanga ita tasiwik kakngae yawa ginda natapnong.
LUK 6:48 Aminu waapa anzing. Aminu tapatuta yot mitapbut binga. Ita gapma mamaya siknga kwaike simen tasike gapmaatang pamuban pukuwa yotdane gwak pamuban pukuwa simenda tapan gitnawan you engatangan gwak kangan mitapbut. Mitapan masande yanggata paptake apu tanguwan ngana dua pimakut. Dasingge? Aminu waapata yotna kekeknga mitapbut.
LUK 6:49 Sike aminu tapatuta nae wam natake ngana dua tawambik. Ita anzing. Aminu tapatuta you kep dakanekan mitake simenu yotdane gwak tapan kekekawikge dua tasiwanu masande yanggata paptake apu tanguwan zetgaman pimake wai siknga siwik.” Ngang Jesuta tuwang wamu waaknga ngang yanikut.
LUK 7:1 Jesuta wamu waaknga aminbam yaniwan puyuwana ita Kapaneam yot gapmane kukut.
LUK 7:2 Kuke kaawan amak amindane puya amina maitna kaapae musip gwaang natangamunggak. Ngang waapa mait sike kumnangge dapaknga sikut.
LUK 7:3 Siwan amak aminu tupan tapata Jesue natake Judia amindane takeakwak yanipewan kuke Jesu iniwa apuke maitna sandekngamikge yanipewan kuking.
LUK 7:4 Kuke wa aminda Jesue apuke anzing apaa iniking, “Ita aminu nomantapa. Ge take gatangamuyo,” ngang iniking.
LUK 7:5 “Ita ninu Judia aminde musip gwaang natanimunggak. Ita nindane miti yot gwen mitapnimde manina atnimukut,” ngang iniking.
LUK 7:6 Iniwan natake Jesuta iat gatake kuking. Kuke yot wesim kuwawa amak aminda notna kundu yanipewan kepiapane umutakuke ininangge kuke itane wamna anzing iniking, “Buyambamtapa. Na aminu nomanaapa dua ngang inike yotnaatangu dasingge akopsa?
LUK 7:7 Na aminu nomanaapa dua. Unzingge nata gae kuwitde natapa meya singgak ngana gata wamban yawi natane puya aminata maitna wena siwan,” ngang inikut.
LUK 7:8 “Dasingge? Na aminu natane buyambam tapanae gepbiatangu ayuat. Sike nakaya natane amak amina nae gepbiatang yuaikatnana tapatu initewa kuke puya tasiwikge iniwa ita akunggak. Sike amina tapatu, ‘Apso,’ ngang iniwanu ita asapunggak. Sike nata puya amina puya takngatu tasiwikge iniwanu ita atasinggak. Unzingge wamban yawi take siwikge tupan tapata ninipewan apuke ganikamang,” ngang iniking.
LUK 7:9 Iniwa wamu waaknga natake Jesuta aminu waapae asatnakut. Asatnake tapan tekwamban aminbamu i tawaking aminde anzing yanikut, “Nata ginu daniwa natapnong. Isrel nana aminu tapatu baniu aminu aapata nae natangamunggak binga tapatu wena kaat,” ngang yanikut.
LUK 7:10 Yaniwan amak amin tapata aminu wa yanipewan kukingu gatuna yotna kuke kawa mait sikut tapa maitna wena siwan take siknga yuwawan kaking.
LUK 7:11 Siwan mateknga kundusim yusika Jesuta kuke you gapmandu umana Nen ngang inikaing gapmane kukut. Siwan iat pandetnaat aminu kunduatda unekan gatake you wanggapmane kuking.
LUK 7:12 Kusika you wanggapmane wesim kuke kawawa maya tapatuta engangu wawi tapatukan tangaiwan apna yusika akumbut. Kupan engangu waapa buyambam takake yusika waapata akumbut. Kupan kwainangge natake gwaamutakuwawa Jesuta kakut.
LUK 7:13 Kaawan amibapat iat gatake kuwawa kake Kuyaninu Jesuta baniaatang butaya siknga natangamuke, “Ga kwanamu ma siwim,” ngang inikut.
LUK 7:14 Inikenga kuku katakngata buka gwen takut. Tapan akgwaamuking aminda une yuwawa Jesuta yake, “Waatdaka, gaapa ganinggat. Enat,” ngang inikut.
LUK 7:15 Iniwan akumbut tapata gatu gweake apekuuneta enake wamu ayakut. Siwan Jesuta waapa mingae iman kake
LUK 7:16 aminu kuupbamda kumzang kagwauke Anutu inimbakngake anzing yaking, “Anututane wam ninikapsa aminu tapatuta gwa enake kekeknga siknga yuak. Siwan Anututa ninu inane aminae dua botake akgatanimunggak,” ngang yaking.
LUK 7:17 Ngang yawa Jesuta sanga wa tasikut takngae yatakuwawa Judia nana amikat kaut kaut yuaing aminu kuupbapatda natapbing.
LUK 7:18 Siwan Jondane pandetnata sanga wa kake Jon iniking.
LUK 7:19 Iniwa natake Jonda pandetna tapaaya yayawamban apat yanipewan wamu takngatu take kuke Jesu Buyambamtapa inisande anzing yanikut, “Ga aminu Anututa initewan apikge yanikapsa aminda tupa siknga ngang yakingkapa ga unin? Ba ninu tapatue kayutnim ba dasing ngang inison,” ngang yaniwan natake Jesue kukumayak.
LUK 7:20 Kuke kusika aminu waapaatda Jesue kundoke anzing inikumayak, “Jonu yangga sauyamukut tapata ninipewan niu gae apukamak. Sike ita anzing ganikwaitzimde ninik. Ga aminu asapikge yaking kapanin ba ninu tapatu masana apikge ninu ie kayutnim ba dasing,” ngang inikumayak.
LUK 7:21 Iniwat natake tapduk wagwene Jesuta maitna inata inata siking aminu sandeyamukut. Ita waung wai kwaapzang sandepewan kuwa kai wai siking aminu pasiwan gatuna take kaking.
LUK 7:22 Siwan Jesuta yake anzing yanikut, “Gitda kuke sanga wa kake natamayakge Jonu inison, ‘Ita pasiwan kai wai siya aminu gatuna kaaing. Siwan kepi wai siya aminu gatuna kepi akukaing. Siwan gupnane wata kekeknga siya aminu gupna dudumna gatu sikaing. Siwan maaknga kusiya aminu wamu gatu nataaing. Siwan kupsa aminu gatu enaawa Anututane wamu takeaknga aminu sangana wena aminde yanikapa nataing,’ ngang inison.”
LUK 7:23 “Siwan nata puya waaknga pasiwawa aminu tapatuta nae natapan kekekawiu waapata apbakngayok,” ngang yanikut.
LUK 7:24 Yaniwan natake aminu waapaatda kuwawatna Jesuta aminbamu Jonde yanike anzing yanikut, “Tupa ginu keu aminu wena komune kuke ginda sanga mina binga kanangge kuking? Ba ginda kuke komamu tapatu gotda puyapan saa siwan sanga yumdekanu waaknga kanangge kuking ba dasing? Wena.
LUK 7:25 Ginu kuke sanga mina binga kanangge kuking? Ba ginu kuke kawawa aminu tapatuta tauknga takeake pasiwan kanangge kuking ba dasing? Wena. Aminu tauknga takeake pasikaingu aminu buyambam tapaapae yotnane yuaing,” ngang yanikut.
LUK 7:26 “Sike ginu sanga mina binga kanangge kuking? Ginu kuke yanikapsa aminu tapatu kanangge kuking ba dasing? Ngan. Nata daniwa natapnong. Aminu waapa ayanikapsaapa. Siwan ita yanikapsa aminu kuupbam yapbikut tapa.
LUK 7:27 Aminu waapae Anututane wapatang anzing matakut, ‘Natapso. Nata nae wam yakapikge aminu tapatu initewa gae tupan kuke ita gatane kepika tanomanukgamik,’ ngang matakut.
LUK 7:28 Nata daniwa natapnong. Aminbamu kepdakane nana kuupbamu Jonda ayapbikut ngana aminu Anututa papan inane aminabam dakngake yuaikat nana tapatu umana mateknga sikngata Jonu waapa ayapbikut,” ngang yanikut.
LUK 7:29 Siwan Jondane wamu tupa natapbing aminu gatu takis papsa amikat aminbampatda anzing yaking. Siakan. Anututane sanga aknga take siknga ngang yawa Jonda yangga sauyamukut.
LUK 7:30 Siwan ngana Ferisi amikat mama wam yanindamumsa amikatda Anutue kepi nomana aknga yeuyamukutde masa imuking. Ima kake Jonda yangga dua sauyamukut.
LUK 7:31 Siwan Jesuta anzing yakut, “Nata aminu tapduu ninda ayuamang komune nanae sanga mina bingae tuwanguke yawit? Wa aminda dasing binga?
LUK 7:32 Wa aminu anzing. Waatdakata binga yot kekeptapane yuke waatdaka kundue kumzang yanggamatake anzing yanikaing, ‘Ninda kekngagom puyapna ngana ginu tainangge apbitakaing. Ninda butaya kap taina ngana ginu kwanam sitnangge apbitakaing,’ ngang yanikaing.
LUK 7:33 Jonu yangga sauyamunggak kapata apuke ita nanamu asinggan dua nake wain yangga aknga dua tangoke yuwan kake ginda, ‘Waung waiapata tapan pasinggak,’ ngang yaking.
LUK 7:34 Sike apmanu na aminbamdane notnaapa dakngake apuke nanam nake tangoke tasiwa ginda nanduke anzing yakaing, ‘Kanong! Aminu aapata nanamu kumzang nake wain yanggaaya kumzang tangokgak. Siwan ita kait pasiyuk takis papsa amikat gatu wai takngatu takngatu pasiya amikatde notna dakngake yuak,’ ngang ginda nae unzing yakaing.
LUK 7:35 Ngana Anututane natdetdetna nomana pake yuya aminda natdetdet nomana waaknga yeuyaman kake siakan ngang nataing,” ngang yanikut.
LUK 7:36 Siwan tapduu gwendune Ferisi aminu tapatuta gata api nikat gatake yuke nanamu nanim ngang Jesu iniwan yotnaatang koke iat gatake yuke nanam naking.
LUK 7:37 Nawawa maya tapatu you wanggapmane nanata asinggan asinggan waiaknga pasikakut. Siwan Jesuat Ferisi amikatda nanam nawawa aminu tapatuta yawan maya waapata natake yangga inata kundu kapanga take siknga tekngatu takapu you wagwene koke Jesu maseatang yukut.
LUK 7:38 Yuke ie musip gwaang natayuk kwanam siwawan kwanamnata pimake Jesutane kepine pimakut. Kepine pimawawan waapata gwapat danggamita pasiwa kuwa kepina bupbuyake yangga kapanga kaya take siknga wa takapbut teknga tukngwake kepina saukngamukut.
LUK 7:39 Kepine yangga saukngaman kake aminu Jesu yotnaatang initakopbut tapata baniaatang anzing natapbut, “Jesu aapata Anututane yanikapsa amintapa gamu maya wa gupnane wasinggak kapa aminu waiapa ngang natake inikwasiwan kuwan,” ngang natapbut.
LUK 7:40 Baniaatang unzing natapan ngana Jesuta anzing inikut, “Saimon. Wamu takngatu ganinangge nataat,” ngang iniwan, “Aana. Undang naniwi natapit,” ngang yake inikut.
LUK 7:41 Iniwan Jesuta tuwang wamu takngatu anzing inikut, “Aminu tapatu beng kayuak kapata mani buyambam siknga 500 ngang aminu tapatue imuke buya mateknga 50 ngang aminu tapatue imik.
LUK 7:42 Siwan aminu waapaatda masande upeke yuke yake imunanga dua siwik. Yake imunanga dua siwan kake aminu wa ayamukut tapata sandeyamik. Ge tuwang wamu waaknga natake banipbaatang dasing nataayak. Buyambam siknga sandekngaman ie banip gwaang siknga natapik ba mateknga sandekngaman ie banip gwaang siknga natapik,” ngang inikwaikut.
LUK 7:43 Ngang inikwaiwan Saimonda, “Buyambam siknga sandekngamik kapanin ngang nataat,” ngang inikut. Iniwan, “Noman yanggayak,” ngang inike
LUK 7:44 Jesuta tapan tekngwamban maya waapa kake ngana Saimon inikut, “Maya aapata tasiwan gwa kayak ba dasing? Nata yotdaatang akopa ngana notna siknga ngang dua natake kepina yangga sauwitde yangga tekngatu dua namuyak ngana maya aapata kepinane kwanam yangganata saukngamuke gwapat danggamnata pasiwa kukaing.
LUK 7:45 Siwan gata dua tasibakngayak ngana maya aapata kepina tendeknga wena bupbuyak.
LUK 7:46 Siwan gwapakngane wel yangga takngatu dua tukngwangamuyak ngana maya aapata yangga kapanga take sikngaakngata kepinane saukngamunggak.
LUK 7:47 Unzing tasiwan kake ganinggat. Maya aapatane waiakngana tuyuknga dua ngana nae banip gwaang siknga natake tasingaman kake waiakngana sandekngamunggat. Siwan ngana waiakngana matekngakan ngang natapik kapa sandekngamanu nae banip gwaang siknga dua natapik,” ngang inikut.
LUK 7:48 Inike maya waapa anzing inikut, “Waiakngaka gwa sandekgamunggat,” ngang inikut.
LUK 7:49 Siwan iat gatake naking aminda kake asatnake anzing yaking, “Anutu binga dakngake sandekgamunggat ngang ininggak,” ngang inisapduking.
LUK 7:50 Inisapduwa ngana Jesuta maya waapa anzing inikut, “Nae natapi kekeknga singgak kakngata gatanggaman waiakngakata wena gwa singgak. Banipba kwikwiknga natake kunggayo,” ngang inikut.
LUK 8:1 Siwan Jesuta mateknga kundusim yukenga yotbam gapma gapmane gatu yot matek gapma gapmasimune kuut kuke Anututa amin panangge tasinggak kakngae wamu takeakngae aminbam yaniwan natapbing. Sike itane pandetna katau kuut musaat kepianganu tapaatda iat gatake kuking.
LUK 8:2 Siwan maya kundu tupa Jesuta waung wai yanikwasiyaman kuking amikat gatu maitna sandeyamukuu kunduatda Jesuat gatake kuking. Gatu Maria Magdala yot gapmane nanaapa tupa waung wai katau kuut musa kautdu dakane tapaaya yanikwasikngaman kuking kapaat kuut kuking.
LUK 8:3 Siwan aminu tapatu umana Susa ngang iniking. Ita Herotdane sangabamde kuyana yuak kapatane maatna umana Joana ngang iniking. Iat maya tapatu umana Susana ngang iniking. Iat gatu maya kunduat gatake iat kuke maya waakwakga Jesuat pandetnaat gatayamunangge natake sangaapana yamuking.
LUK 8:4 Siwan aminu yotna yotna nana buyambamda Jesue kuking. Kuwa Jesuta tuwang wamu takngatu anzing yanikut,
LUK 8:5 “Aminu tapatuta nanam zak pasiwa pimaningge puyane kukut. Kuke puyanane kusika zakngi kundu katakngita muban pimaking. Muban zakngi kunduta sabaapane pimamba aminda kungapuke zakngi dua kake ayainggamuking. Yainggamuwawa kwaitda apu atnapa puyukut.
LUK 8:6 Siwan gatu zakngi kundu muban pimake amaakatangu supna kaya ngana engetanganu kaiu mateknga siknga yuaing komune pimaking. Pimake yusika zuna apmea akopbing. Akoke ngana muyakngita pukutake kekeknga dua siwan zunata akupiaking.
LUK 8:7 Siwan gatu zakngi kundu muban pimakingu babamdane yapiatang pimaking. Pimake yuwawa babamda apmea akoke nanam zakgane zuna apapakusiking.
LUK 8:8 Siwan gatu zakngi kundu muban keu takedakane pimaking. Pimake yusika akoke buyana buyambam siknga aaking,” ngang tuwang wamu waaknga ngang yanike Jesuta apaa anzing yaninggamatakut, “Mamin aminda maakngi kaya kakengu wamu ayanggat taknga natapsok,” ngang yaninggamatakut.
LUK 8:9 Ngang yaninggamatawan natapa yapii anggaman dua siwan kake pandetnata inikwaiking.
LUK 8:10 Inikwaiwa yake anzing yanikut, “Anututa amin panangge tasinggak kakngae yapii akusopuke yuau anggaman daniwitde Anututa nandutewan nata daninggat. Sike aminu kunduta tuwang wamban natake baniaatang nangaakan natapningge Anututa take nataak. Take natapan aminu kunduta Anutue wam maakngita natake ngana dua binga natake yutning.”
LUK 8:11 “Siwan tuwang wamu waakngatane yapii daniwa natapnong. Zakngi muban pimaking ngang danit takngae anzing natapnangge. Aminu tapatuta Anututane wam yaniwan natapning.
LUK 8:12 Siwan zakngi kundu muban sabaapane pimaking ngang danit takngae anzing natapnangge. Aminu kunduta Anututane wam maakngita natapa ngana Setenda apu wamu waaknga musiaatang sandeyamunggak. Sandeyaman aminu waakwakga musiaatang siakan ngang dua natapning. Dua natapa Anututa baniane toknga natake waiaknganae tokngabam yaman paning.
LUK 8:13 “Siwan zakngi kundu muban supna kaya komune engatangan pimaking ngang danit takngae anzing natapnangge. Aminu tapatuta Anututane wam yaniwan natake apbakngake takaing ngana tapatuta apu yanindatdauwan Anutue masa imuning. Nanam zau muyakngi kepatang dua tapan buya dua aakgak binga aminda unzing yutning.
LUK 8:14 “Siwan zakngi kundu muban babam yapiatang pimaking ngang danit takngae anzing natapnangge. Aminu kunduta Anututane wam maakngita natapning. Natake ngana meya takngatu takngatu kaning ba sangaapa buyambam siknga panangge take natapning ba gupnane sanga mina minaka take siwikge tasining. Unzing tasiyuk Anututane wam yaitapakusiwa buyana dua aakgak.
LUK 8:15 “Siwan zakngi kundu muban keu take komune pimaking ngang danit takngae anzing natapnangge. Aminu kunduta Anututane wam maakngita natake musiaatang siakan ngang natake wamna katak gwaamuke kekekake pasiwa nanam zau buyana aatning,” ngang Jesuta unzing yanikut.
LUK 8:16 “Siwan aminda aakatap gatake dopang gwende gepbiatangu dua teke gatu buka gwende gepbiatangu dua teaing. Wena. Buka gwene engatangan tewa isikakaawan aminu yoakatang kopningu kakaa apane kopning.
LUK 8:17 Siwan sanga bamu akusopuke yuwa kananga dua singgau masande anggaman siwa kanim. Sanga bamu akusopuke yuwa natdetnanga dua singgau masande anggaman siwa atnatdetnim.
LUK 8:18 Siwan ginu katak siknga gwautnong. Ginda wamu katak natapnong. Mamin amindaka natdetdetna nomana pake yuwawa Anututa natdetdetna kunduat ayamik. Sike mamin amindaka buyami natake natdetdetninu gwa pakamang ngang gutonga yawanu natdetdetna wa paking kaknga Anututa akaiwan kuyamik,” ngang yanikut.
LUK 8:19 Siwan tapduk wagwene Jesutane uyapnaat mingaatda ie kuking. Kuwa ngana aminbamda yuwa gitna siwan Jesuta yukut komune wesim apnanga dua sikut.
LUK 8:20 Siwan aminu tapatuta anzing inikut, “Minggaat uyapbaatda kepman katang yuke ga gandupnangge pakapu undang yuaing,” ngang inikut.
LUK 8:21 Iniwan natake ngana yake anzing yanikut, “Aminu Anutue wam natake tawaningu natane minga gatu uyapma ngang yaniwit,” ngang yanikut.
LUK 8:22 Siwan tapduu gwendune Jesuat pandetnaatda dopangbamu gwendune koke anzing yanikut, “Yangga gapan gwenu kautdu saak kuna,” ngang yaniwan kuking.
LUK 8:23 Dopangbam gwen take akuwawa Jesuta dapuna peawan gotbamda yangga gapan gwene pupzang puyapbut. Puyapan yangga suyungga dopangbam gwekatang pukuwawan dopnangge siwan yanggaatang pukunangge sikut.
LUK 8:24 Siwan pandetnata kuku Jesu tanguwa enawan anzing iniking, “Aanin! Aanin! Kumnangge kamang,” ngang iniwa enake yawan gotda zakngawan yangga sambuya enakuu zetgaman kuma yukut.
LUK 8:25 Yuwawan Jesuta anzing yanikut, “Ginda nae natapa kekekakut taknga dasingge tewa pimanggak,” ngang yaniwan akgwauke nangaakan natake ina anzing yaking, “Aminu aapa mamin? Ge wamu yawan gotda wena siwan yangga sambuyata kuma yuwan kaamang,” ngang yaking.
LUK 8:26 Masande iat pandetnaatda Gegesa kep komune kuking. Sike Galili kep kautdu saak yuwan yangga gapanu Galili gwenu banakan yuwan Gegesa keu kautdu saak yuak komune kuking.
LUK 8:27 Kuke Jesuta dopangbam gwen teke epu kwaimune kuke kaawan aminu you wanggapmane nana tapatuta ie apbut. Waung wai kunduta aminu waapa tapa tupa siknga yutakapbut kopatang tauknga dua wamake ita you gwendunekan dua yuke matmat gapmanekan yuak. Asinggan waung waita tapa aminbamda asinggan kayuke nau kekekngata wapa ngana ita apapan dakngawa waung wai waakwakga tapa keu aminu wena komune asinggan kunggak. Aminu waapata Jesu kake inengan kuke Jesue kepine nomda pimake yanggamatake anzing inikut, “Jesu! Ga Anutu enane siknga yuak kapatane waaknga. Gata nae dasing tasinangge apunggayak? Na nutnangge ma natapim. Nae toknga ma namim,” ngang yanggamatake ininggamatakut. Dasingge? Jesuta waung wai gwa yaniwan aminu waapa teke kuningge yaniwan aminu waapata ininggamatakut.
LUK 8:30 Ininggamatawan Jesuta, “Umanda mamin,” ngang iniwan, “Ninu aminu buyambam,” ngang inikut. Dasingge? Waungu wai kwaapzangga aminu waapa taking.
LUK 8:31 Sike waungu wai waakwakga Jesu anzing yake ininggamataking, “Gata gapma bapatang pukuke toknga panimde ma ninikwasiwim,” ngang iniking.
LUK 8:32 Iniwa ikwawa takwakgu wesim yuke nanam nake yuwawa kake waungu waita yanggamatake anzing yaking, “Gata take ninipewi kuku ikwawa waakwak panim,” ngang iniwa Jesuta, “Ayok,” ngang yanikut.
LUK 8:33 Yaniwan aminu waapa teke kuku ikwawa waakwak papa ikwawa waakwau zetgaman isapmake kuku dameatang pimake puku yangga gapan gwene pukuke yangga tangoke akumbing.
LUK 8:34 Siwan ikwawa toikaingga unzing kake atdatakuke sanga wa kakingu aminbamu yot gapmane kuku yaniwa yatakuwa aminu kaukaut yuaingga natapbing.
LUK 8:35 Natake aminbamda wa sikut taknga kanangge kuking. Jesue kuke aminu waapa kawa waungu waiakwakga gwa teke kukinga kaking. Kawawa tauknga tamake natdetdetna anggaman siwan Jesuta yukut komune inengan kepine yuwawan kake akgwauking.
LUK 8:36 Akgwauke yuwawa waungu waita aminu waapa takingu yanikwasiwan kuwawa aminu waapata take siwan kakingga ie wamu yatakuking.
LUK 8:37 Yatakuwawa aminbamu Gegesa kep komune nana aminda natake kumzang gwauke Jesu anzing iniking. Ga ninu nipmake kungga ngang iniking. Iniwa natake Jesuta dopangbam gwene koke gatuna Galili kep komune kunangge tasikut.
LUK 8:38 Tasiwawan kake aminu waungu waita teking kapata Jesu anzing ininggamatakut, “Naat kuut kusim,” ngang ininggamatawan yake anzing inikut,
LUK 8:39 “Aho! Ga yotda kuke sangabamu Anututa tasinggamuk kakngae yaniwi natapnong,” ngang inike initewan kuke aminbamu yotbam gapmane nana amin yanike sanga Jesuta tasingamukutde wamu yanitakuwan natapbing.
LUK 8:40 Siwan aminu kuupbamda Jesue natayuwawa ita Galili kep komune gatu kuwan kake apbakngaking.
LUK 8:41 Apbakngake yuwawa aminu tapatu umana Jairas ngang iniking ita miti yotde kuyana yukut. Itane yapana awia tapatukan nakanu katau kuut musaat kepianganu gweaakan yuke mait sike kumnangge dapaknga sikut. Siwan nanata kuke Jesue kepine nomda pimake anzing ininggamatakut, “Gata yotnane apso,” ngang ininggamatawan Jesuat iat gatake kukumayak. Kuwawat aminbamda akgitnagitnauke iat gatake kuking.
LUK 8:43 Kuwawa maya tapatu yekapna sike daknga asinggan pake nakanu katau kuut musaat kepianganu gweaya gwa kawan sandewan yuawan ngana aminu kunduta maitna waaknga sandekngamunangge tasiwa maikut.
LUK 8:44 Maya waapata Jesue masene kuke katakngita tauknga nomna saasaakngi wanganekan wasikut. Ita unzing tasiwan dakngata zakngawan wena sikut.
LUK 8:45 Siwan Jesuta, “Maminda taukngane katakngita wasik,” ngang yawan aminbamda, “Ninu wena,” ngang yawawa Pitata anzing inikut, “Aana! Aminbamda yuke gae yupbasiwa gitnawan taukgane ba guing ba dasing,” ngang inikut.
LUK 8:46 Siwan ngana yake anzing inikut, “Aminu tapatuta katakngita awasik ngang natapa natane kekeknganata aminu tapatu gatangamuk ngang nataat,” ngang inikut.
LUK 8:47 Iniwan maya waapata natake ita tasikut taknga takusopunanga dua siwan kake dandai yamuba kuku Jesue nomnane pimake aminbamde kaine wamu katakngita wasikutde yapii yake ita anzing inikut, “Maitna zetgaman wena siwan kaat,” ngang inikut.
LUK 8:48 Iniwan yake anzing inikut, “Yapana. Nae natapi kekeknga singgak kakngata gatanggaman maitda wena singgakge musipba kwikwikngata yotda kunggayo,” ngang inikut.
LUK 8:49 Unzing iniyuwawan wa aminu kuyana yuak kapatane yot gwenune yuau tapatuta apuke, “Yanindamumsaapa, kwatanu ma iniwi apan. Yapakata gwa kungwak,” ngang inikut.
LUK 8:50 Iniwan Jesuta natake Jairas anzing inikut, “Ga meya ma natapim. Nae natapi kekeknga siwanu yapakata gatuna apme gweawik,” ngang inikut.
LUK 8:51 Inike aminu waapatane yotnane kuke moo aminu dua kapewan kopbing. Pitaat Jonkat Jems gatu nana minga nganggan papan wa amikat Jesuatdakan kopbing.
LUK 8:52 Siwan aminu kuupbamda waatdaka waapae butaya natake kwanam sike yuwawa kake Jesuta anzing yanikut, “Ginda kwanamza ma siwam. Ita gatukande dua kungwak. Dapuna pekgak,” ngang yanikut.
LUK 8:53 Yaniwan kumzang inimike, “Gwa kungwak kapae dasingge yanggak,” ngang yaking.
LUK 8:54 Siwan ngana Jesuta maya matekapa katakngine take wamu apaa anzing inikut, “Yapana! Enat,” ngang inikut.
LUK 8:55 Iniwan zetgaman uyungata apu gupnaatang pukuwan gweake enawan Jesuta nanamu kundu ima napikge yanikut.
LUK 8:56 Yaniwan nana mingata asatnawat ngana Jesuta wamu kekeknga ngang yake aminu kundu sanga nata tasiwa kamayakge ma yaniwat ngang yanindakngakut.
LUK 9:1 Siwan ita pandetna katau kuut musaat kepianganu tapaaya yayawamban apa kekeknga aknga yaman waung wai yanikwasike maiu takngatu takngatu sandeyamuningge natake yamukut.
LUK 9:2 Yamuke wamu Anututa amin panangge tasinggak kakngae wam yanike gatuna maitna kaya amin sandeyamuningge yanikut.
LUK 9:3 Yanike anzing yanikut, “Ginda sangasa ma pake kuwam. Ginda gusokza ba yakza ba nanamza ba manisa ba siotza gomayana kaya ma papam,” ngang yanikut.
LUK 9:4 “Sike ginda kuwawa aminu tapatuta yotnaatang pakopanu ginda you wagwenekan yukenga masande you gapmandune nana amin yaninangge natake you wagwenu teke kunong,” ngang yanikut.
LUK 9:5 “Sike ginu kuwa aminu you gapmandune nana aminda dua pakopanu you wanggapma teke kuyuk yemi kaikza zipa pimapa kake wai pasiyamumang ngang natake gwautning,” ngang yanikut.
LUK 9:6 Yanike yanipewan kuke yotna yotna kuupbam kuke Anututane wamu takeaknga ngang yanike maitna yotna yotna nana kuupbamdane sandeyamuking.
LUK 9:7 Siwan Herot aminu tupan tapata sangabamu Jesuta pasiwan natapbut. Natake, “Jonda akumbut katangga gatuna gweake pasinggak,” ngang aminu kunduta yawa natapbut.
LUK 9:8 Siwan kunduta, “Ilaijata enandangga gatu epuke pasinggak,” ngang yawa kunduta, “Yanikapsa aminu tupanana tapatuta gatu gweake pasinggak,” ngang yawa Herotda natapan yapii buyami sikut.
LUK 9:9 Siwan Herotda yake, “Nata tupa yanipewa kuke Jondane guyaknga gwa mataking,” ngang yakut. “Sike aminu waapa maminde wamu inata kundu yanggak,” ngang yake Jesu kainata kanangge take siknga natake tawake ngana dua kakut.
LUK 9:10 Siwan Jesuta pandetna yanipewan kukingu gatu apuke sangabamu tasikingge wam iniking. Iniwa natake pandetna waakwak papan aminbam peke inatakan you gapmandu umana Betsainda ngang inikaing gapmane kuking.
LUK 9:11 Kuwawa masande yawa aminbamda natake masene kuku yawake kundopa kake apbakngake Anututa amin panangge tasinggak kakngae gepbiatang yuwawa Anututa pasiyamikge wamu yanike maitna kaya aminu maitna sandeyamukut.
LUK 9:12 Yanike sandeyamuwawan bangee pandetnata ie kuku anzing iniking, “Keu ayuamang kopatangu nanamu wena siwan amin kaya nanamu yamunanga wena,” ngang iniking. “Aminu wa yanipewi yotna yotna kuke undang peke nanamna undang pake naut,” ngang iniking.
LUK 9:13 Iniwa ngana yake anzing yanikut, “Nanamu gisa yamunong,” ngang yanikut. Siwan wawi buyambam 5,000-da yuwawa kake anzing yaking, “Ninu nanaminu buyambam dua. Poyau katau kuut musakan siwan pis dakaaya nganggakan yuaing. Pake yamuna take dua siwik. Sike ga dasing natayak? Ninda usiwam yot kuke aminu buyambamu waakwakge nanamu usiyamunimde nataayak ba dasing,” ngang iniking.
LUK 9:14 Ngang iniwa yake anzing yanikut, “Ginda yaniwa kepdakane aminu 50, 50 ngang usanzike inana pukwitningge yaninong,”
LUK 9:15 ngang yaniwan natake unzing tasike yaniwa pukwiking.
LUK 9:16 Pukwiwawa Jesuta poyau wa katau kuut musa gatu pis dakaaya ngang katakngita pake pakusang enandang kake Anutue inimbakngakenga nanamu wa puke pandetnae yaman pake usanziyama aminbamu waakwakga naking.
LUK 9:17 Yama napa musia gitnawa kaiknga yukingu butuke pandetnata sapayau katau kuut musaat kepianganu dakaaya ngang pamuba dopbing.
LUK 9:18 Siwan sipdune Jesuat pandetnaatda unekan gatake yuke Jesuta tumuk wamu Anutu inikut. Iniwan puyuwana pandetna anzing yanikwaikut, “Aminda nae dasing yakaing,” ngang yanikwaikut.
LUK 9:19 Yanikwaiwan yake anzing iniking, “‘Jonu yangga sauyamuke kumbut tapata gatu gweake ita pasinggak,’ ngang gae yawa kakumang. Siwan kunduta, ‘Ilaija Anutue wam tupa siknga ngang yanikapbut tapa Anututa kayukapa takopbut. Ita enaneta gatu epuke pasinggak,’ ngang gae yawa kakumang. Siwan kunduta, ‘Anutue wam yanikapbuu tapatuta tupa siknga kumbut ngana apmanu gatu gweake pasinggak,’ ngang gae yawa kakumang,” ngang pandetnata Jesu yake iniking.
LUK 9:20 Iniwa natake ita gatu yanikwaikut, “Siakan. Ngana ginda nae dasing yakaing,” ngang yanikwaiwan natake Pitata yake anzing inikut, “Anututa ga tapan gatanimuyaapanin dakngake yuayak ngang ganduke umanda Krais ngang ganinggat,” ngang inikut.
LUK 9:21 Iniwan natake wamu waaknga ie dua yaniwa natapningge Jesuta yanindakngakut.
LUK 9:22 Wa yanindakngakut takngatane yapii Jesuta anzing yanikut, “Na aminbamdane notnaapa dakngake yuat tapata meya takngatu takngatu papit. Siwan Judia amindane take amikat gatu Anutue yot takwan gwene pasiya amindane takeakwakat Mosesde mama wam yanindamumsa amikatda nae semna natangamuke yawa nuwa kupit. Nuwa kungwake tapduu gweaat gwenduat gwene Anututa yawan gatu gweawit,” ngang yanikut.
LUK 9:23 Yanike aminbamu anzing yanikut, “Aminu tapatuta natane amina daknganangge natakengu inane banip tawanangge nataak kaknga undang teke iwanata amin saamdakane na nuwa kupit binga kumnangge dua gwauke meyana gwaamuke asinggan na nawamsok.
LUK 9:24 Aminu tapatuta kayuk yuak kaknga gitna tanangge natakengu waapata akupik. Sike aminu tapatuta nae natanggamatake tasiwawan aminu kunduta semna natangamuke tanguwa kupanu ita gatuna kayuk yuwik kakngana atake asinggan yuwik,” ngang yanikut.
LUK 9:25 “Aminu tapatuta sangaapana buyambam siknga papik. Pake ngana masande akupanu sangana wa pakut takwakga dasing gatangamik? Wena.
LUK 9:26 Sike aminu tapatu nae masa namuke natake wam yakapnangge apmaakawanu na aminbamdane notnaapataaya masande waapae masa yake asimit. Na umana kaya buyambam tapa dakngake Nana Anutuat angelaatdane kakaa aknganane apuke aminu waapae masa yake asimit,” ngang yanikut.
LUK 9:27 “Nata siakande siknga daninggat. Aminu ayuaingu kundu dua kungwake yuke kawawa tapduknga Anututa amin panangge tasinggak gwenda apan kaning,” ngang yanikut.
LUK 9:28 Jesuta wamu waaknga yakenga masande tapduu katau kuut musa kautdu gweaat gwenduat kawa sandewana Pitaat Jonkat gatu Jems nganggan pake tawanu dakatune tumuk wam yawikge natake yanipakopbut.
LUK 9:29 Yanipakoke tumuk wam yake yuwawan nomna inata kundu sikut. Siwan tauknga kwaknga siknga siwan waenga dakngakut.
LUK 9:30 Dakngake yuwawan aminu tapaaya akumbumayak katangga anggaman siwat kaking.
LUK 9:31 Kawawa kakaa aknganane apbumayak. Aminu waapaau umana Moses gatu ayanikapsaapa Ilaija ngang yanikingu waapaatda apuke Jesuta Jerusalem yot gapmane kupikge wam inikumayak. Ita unzing kupikge Anututa initewan epbutde wamu waakngae inikumayak.
LUK 9:32 Iniwawat Pitaat notna apaatdane kai dapuna siwan ngana dua peke Jesuta kakaa aknganane yuwan kake aminu waapaatda Jesuat unekan yuwat kaking.
LUK 9:33 Kawawa aminu waapaatda Jesu teke kunangge siwat kake Pitata anzing inikut, “Aana! Ninu take siknga ane yumangge gepa gweaat gwenduat mitapna. Gwendu gae. Gwendu Mosesde. Siwan gwendu Ilaijae,” ngang Pitata buyami natake wamu waaknga inikut.
LUK 9:34 Wamu waaknga ayayuwawan minga dakatuta apu wamakusiwan akgwauking.
LUK 9:35 Akgwauke yuwawa wamu takngatu minga ganang katangga anzing yakut, “Aminu waapa natane waaknga. Nata tapa pasinggak. Siwan ginda itane gen gwaamutnong,” ngang yakut.
LUK 9:36 Wamu waaknga yawan puyuwana kaawa Jesutakan yuwan kaking. Sike kuma yuke tapduk waapatangu aminu tapatu sanga wa kakingge dua yaniking.
LUK 9:37 Siwan tembana tawan dakaneta epana aminbamda Jesue tawatake kepine apbing.
LUK 9:38 Apuwawa aminu wa apbing amikatnana tapatuta yanggamatake anzing ininggamatakut, “Yanindamumsaapa! Waaknga kake gatangamuyo. Natane waaknga awia tapatukan.
LUK 9:39 Siwan waung waiapata sipdu sipdune tanggaganuwan zetgaman yanggamatawan wai siknga tandambanuwan aapna kwaknga genane akopa tasiwan maiwan ngana waung waiapata zetgaman dua teke kunggak,” ngang inikut.
LUK 9:40 “Siwan nata pandetda yaninggawa ngana waung waiapa sandetnangge tasiwa maikut,” ngang inikut.
LUK 9:41 Iniwan yake anzing inikut, “O ginu Anutue natapa siakan dua siwan yamandet sikaing amin! Na gikat gatake yuke asinggan dandupewa ginda meya aknga nama gwaamuba take dua siwik,” ngang yanike, “waakga takapso,” ngang inikut.
LUK 9:42 Iniwan takapan ngana waung waiapata kumzang tandambanuke muban pimake tasiwan maiwan kake Jesuta waung waiapa kaanga inikwasiwan kuwana maitna wena sikut. Siwan iniwan waatdaka waapa nanae gatu kukut.
LUK 9:43 Gatu kuwan kake aminu kuupbamda Anututane kekeknga akngana kake asatnaking. Siwan nangaakan natake sangabamu ita tasikutde asatnake yuwawa Jesuta pandetna anzing yanikut,
LUK 9:44 “Ginu maak gwaang pake wamu aaknga natapnong. Masande na aminbamdane notna dakngake yuat tapa iwande yama na tanggaganutning,” ngang yanikut.
LUK 9:45 Yaniwan ngana wamu waaknga yapii akusopuwan natapa anggaman dua siwan wamu waakngae inikwaitnangge akgwauke apmeptaking.
LUK 9:46 Siwan Jesutane pandetnata wamu takngatu nikatnana mamin amintapata nindane buyambam tapa dakngake yuak ngang ina banakan unzing yake yanganuking.
LUK 9:47 Siwan Jesuta wamu wa musiaatang natapbing kaknga anggaman natake waatdaka tapatusim takapu banakan teke anzing yanikut,
LUK 9:48 “Aminu tapatuta waatdaka ambingata nae gen gwaamuban kake apbaknganggak kapata nae notna dakngawan kaat. Siwan aminda nae apbaknganggak kapata aminu na nanitewan apbum tapae notna dakngawan kaat. Sike aminu gikat nana tapatu umana wena ngang inikaing kapata gindane tupan tapa yuak ngang nataat,” ngang yanikut.
LUK 9:49 Siwan Jonda Jesu anzing inikut, “Aana. Ninda kawatna aminu tapatuta gae umandae waung wai yanikwasiwan kuwa ngana ita nikat dua gatake yuke gawakamang. Unzingge ninda ma yanikwasiwi kuwam ngang yandakngakumang,” ngang inikut.
LUK 9:50 Iniwan ngana yake anzing inikut, “Ginda ma inindakngawam. Aminu tapatuta ginu dua danisapduke pasiwanu waapa gindane notza,” ngang inikut.
LUK 9:51 Siwan tapduknga Anututa Jesu enane gatu initakopikge tapduknga natapan dapaknga gwa siwan kake Jesuta Jerusalem kunangge natapbut.
LUK 9:52 Jerusalem kunangge natapan kekekawan Jesuta amina yanipewan ita gamok kuking. Kuke Sameria kep komune kundoke you gapmandune kuke yaniking. Ginda tanomanuwa Jesuta ane akoke pewik ngang yaniking.
LUK 9:53 Ngang yaniwa ngana Jerusalem apmea kopnangge Jesuta natapan kekekakut takngae you wanggapmane nana aminda natake ie apbitaking.
LUK 9:54 Ie apbitawa kake pandetna tapaaya Jemskat Jonkatda Jesu anzing inikumayak, “Aanit. Katap mumuyangga enandangga epu you anggapmane nana amin yasiwan kumningge take ba yasim,” ngang inikumayak.
LUK 9:55 Iniwat Jesuta tapan tekwamban kaanga yanikut.
LUK 9:56 Kaanga yanike you gapmandune kunangge natake pandetnaat kuking.
LUK 9:57 Kepiapane kuwawa aminu tapatuta Jesu anzing inikut, “You kuupbam gata kuwiyak gapma gapmane naat kuut kusim,” ngang inikut.
LUK 9:58 Iniwan yake anzing inikut, “Kaap zongu yotna kaya siwan kwaiu kuut yotna kaya. Siwan ngana na aminbamdane notna dakngake yuat tapa yotna apetnanga gwendu wena,” ngang inikut.
LUK 9:59 Inike aminu tapatu anzing inikut, “Ga apu nawamso,” ngang iniwan ngana yake anzing inikut, “Aana. Gata nandutewi nata kuke nana gamok kwaiwit,” ngang inikut.
LUK 9:60 Iniwan yake anzing inikut, “Undanga. Kumnanga aminda kupsa amin notna apme kwaining ngana ga kuke wamu Anututa amin panangge tasinggak kakngae wam yanikapso,” ngang inikut.
LUK 9:61 Iniwan aminu tapatuta apu anzing inikut, “Buyambam tapa. Na ga gawanangge natat ngana gata nandutewi nata kuke notnabamu katakngi ipa,” ngang inikut.
LUK 9:62 Iniwan yake anzing inikut, “Aminu tapatuta puya inata takngatu tuwanguke ngana puya tupa tasikut takngae natanggamatakengu Anutue damanaatang kopnanga dua,” ngang inikut.
LUK 10:1 Siwan masande Jesuta pandetna kunduat 70 pakut. Pake you ita masande kunangge natapbut gapma gapmane yanipewan kuking.
LUK 10:2 Yanipewan kuningge tasike tuwang wamu takngatu anzing yanikut, “Nanamu buyambam siknga puyaangaatang gwa yukaing ngana puya aminu apananga mateknga siknga. Unzingge ginda gwa yukawa papsa amindane toiknga tumuk wam iniwa natake puya amina kunduat yanipewan kuke nanamu pake unekan pengamuning,” ngang yanikut.
LUK 10:3 “Ginda undang kunong. Nata danipewa kuke sipsip matekga binga kamunu tokngae banakan katang yutning,” ngang yanikut.
LUK 10:4 “Sike ginda manisaat yakzaat dua pake kepi taukza gomayana kaya dua pake kusika kepiapane aminu kundu kake gaak wam mamaya ma yanike zetzet kunong,” ngang yanikut.
LUK 10:5 “Sike aminu tapatuta yotnaatang gin pakopanu tupanu gaak wamu anzing yaninong. Anututa ginde musip kwikwik natandamunggak ngang yanike kopnong,” ngang yanikut.
LUK 10:6 “Sike aminu tapatuta you wagwene musip kwikwik wa yanining kaknga natake apbakngakengu wam kwikwiu waaknga musiaatang natake yuwik. Sike ngana aminu musip kwikwiu waakngae bitake yuwanu ginda wam kwikwiu wa yanining kaknga gisatakan natake kunong,” ngang yanikut.
LUK 10:7 “Sike ginu yotnaatang pakopanu you wagwenekan yuke nanamu wa aminda damuninggan nake tangopnong. Dasingge? Puya aminu buyana apananga ngang yakamang. Siwan ginu you inandekganu ma kongepam,” ngang yanikut.
LUK 10:8 “Siwan ginu you gapmandune kuwawa une nanata ginu yotnaatang pakopanu ginda nanamu wa aminda usanzitdamuninggan nanong,” ngang yanikut.
LUK 10:9 “Sike ginda aminu maitna kaya you wanggapmane nana maitna sandeyamuke ginda anzing yaninong, ‘Anututa amin panangge tasinggak kakngata ginde apnangge dapaknga gwa singgak,’ ngang yaninong,” ngang yanikut.
LUK 10:10 “Sike ginda you gapmandune kuwa unenana aminda apu ginu yotnaatang dua danipakopanu ginu you wanggapmatane kepiapane yuke ginda anzing yaninong,
LUK 10:11 ‘Dapandapa you anggapmasatane yeminine gatakuingu ninda yemi kaikngin zipna pimapa kake ginda katak siknga natapnong. Anututa amin panangge tasinggak kakngata paya gatandaman itane gepbiatang koyuaing,’ ngang yaninong,” ngang yanikut.
LUK 10:12 “Nata daniwa natapnong. Masande tapdukga sandewik gwekatangu Sodom nana aminda meya buyambamu takngatu kaning ngana you wa gapmane nana aminda meya wa kaning binga dua kaning,” ngang yanikut.
LUK 10:13 “Masande Anututa ginu Korasinnana amikat Betsaindanana amikatde toknga damik ngang natake butaya siknga natandamunggat. Dasingge? Nata duya takngatu takngatu yotza tasikum binga tupa siknga ngang yakapsa aminu tapatuta Taia yot gapmane gatu Saidon yot gapmane ngang tasikut gamu you wa gapmaaune nana aminu gawaknga siknga ngana zetgaman musia tapa tekwamban. Muyupda gupnane dotdonguke pukwike tasiwawa musia tapa tekwanggut takngata anggaman siwan kanam,” ngang yanikut.
LUK 10:14 “Tapduknga Anututa aminbam usanziwik gwekatangu meya Taiaat Saidon nanaatda paning binga dua unenana aminda paning,” ngang yanikut.
LUK 10:15 “Siwan Kapaneam nana aminda inane umana yatangenawa enane siknga kopik ba dasing? Wena. Anututa you wanggapmane nana aminu kaipakapan katap bapatang apukuning,” ngang yanikut.
LUK 10:16 Yanikenga pandetna anzing yanikut, “Aminu tapatuta ginde wam natapan kake aminu waapata nae wama atnataak kapa unin ngang natangamit. Sike aminu tapatuta ginde wamu dua natake masa daman kake nae masa namunggak kapa unin ngang natangamit. Siwan aminu tapatuta nae masa naman kake atnanitewan apbum tapae masa imunggak kapa unin ngang natapit,” ngang yanikut.
LUK 10:17 Masande aminu 70 yanipewan kukingu gatuna apuke apbakngake anzing iniking, “Buyambam tapanin! Ninda gatane umandae yanikwasitna waung waiakwakga ninde wam atnatake kuking,” ngang iniking.
LUK 10:18 Iniwa yake anzing yanikut, “Ginda waung waiakwak yanikwasiwa kuwa Seten yapbike itane kekeknga akngana tasiwa maiwan kawawa enandangga pupzang gaman pimake epuwawan kakum,” ngang yanikut.
LUK 10:19 “Natapnong. Nata kekeknga akngana ginde gwa damukumde ginda apme gomou amin yasikapaat tung sakat yaipapaakusike tasikengu dua maike iwanza kekekngana kaya kuut yapbitning,” ngang yanikut.
LUK 10:20 “Sike ginda, ‘Waung waita ninde wam natake akgwaamukaing,’ ngang natake ginu ma bakngawam. Wena. Anututa umanza enandang gwa matakut ngang natake apbaknganong,” ngang yanikut.
LUK 10:21 Tapduk waomune Waung Kapata Jesue musip tangenawan apbakngake Jesuta Anutu anzing inikut, “O Nan. Ga kepat enandangkatdane buyambam tapa. Nata ga ganimbaknganggat. Pandetnata kekeknga akngakae pasikaingge yapii natdetdetninu kaya ngang yaya aminde gata takusopuke natdetdetninu mateknga ngang yaya aminde yeuyamunggayak. Ngan Nana. Gata take natake unzing tasinggayakge ganimbaknganggat,” ngang inikut.
LUK 10:22 Inikenga aminbamu anzing yanikut, “Natane Nanata naniwan nata sanga kuupbamde toiknga dakngake yuat. Siwan aminu tapatuta na Anutue waak ngang nae yapii dua nataak. Nanatakan ie atnataak. Siwan aminu tapatuta Nanatane yapii dua nataak. Na itane waakngatakan nataat. Siwan aminu na itane waakngata Nanatane yapii yeuyama kake wa amin kaya anggaman atnataing,” ngang yanikut.
LUK 10:23 Ngang yaniwana Jesuat pandetnaatdakan yuke tapan tekwamban anzing yanikut, “Daniwa natapnong. Tupa siknga aminu ayanikapsa amikat gatu aminu buyambam tapaapa kwaapzangga sanga ginda apmanu akaaingu akanangge tasike ngana dua kaking. Siwan wamu apmanu ginda atnataing kaknga natapnangge tasike ngana dua natapbing. Ngang unzingge daniwa natapnong. Aminda sanga ginda akaaingu aminu kunduta kakengu apbaknganing,” ngang yanikut.
LUK 10:25 Siwan Mosesde mama wam yanindamumsa aminu tapatuta dandam tangan enake yukut. Yuke Jesu tasiwa siwik ngang natake Jesu anzing inikwaikut, “Aanin. Dasing tasiwa Anututa nanduke tasingaman kekeknga gatukande yuwawit,” ngang inikwaikut.
LUK 10:26 Inikwaiwan Jesuta yake anzing inikwaikut, “Mosesde mama wapatang dasing kendekuyak,” ngang inikwaikut.
LUK 10:27 Inikwaiwan yake inikut, “Mosesde mama wapatang anzing kendekum, ‘Kuyasa Anutue banipzaatang gwaam siknga natake musipzaatang ie take siknga natake kekeknga akngasa kuupbam ie imuke natdetdetzaatang asinggan asinggan natanggamatanong. Gatusa banipzaatang gisae musip gwaang nataaing kaknga binga mamin aminda ginde wesim yuaing takwakge musip gwaang natayamunong.’ Ngangu Mosesdane mama wapatang unzing kendekum,” ngang inikut.
LUK 10:28 Iniwan Jesuta yake anzing inikut, “Noman siknga yanggayak. Unzakan tasike yusikangu gatukande kekeknga yuwiyak,” ngang inikut.
LUK 10:29 Iniwan waapata mama wamu waaknga katak dua tawanggakge umanata pimapsak ngang natake gatu inikwaikut, “Nae wesim yuaing takwau mamin,” ngang inikwaikut.
LUK 10:30 Inikwaiwan Jesuta tuwang wamu takngatu yake anzing inikut, “Judia nana aminu tapatuta Jeriko yot gapmane pukunangge natake Jerusalem yot gapma teke pukukut. Kepiapane pukuwawan kuka aminu kunduta apu tanguke itane sangaapana kuupbam pangamuking. Tanguke pangamuke kuwana waapata kumnangge dapaknga sikut.
LUK 10:31 Siwawan Judia nana Anutue yot takwan gwene pasiya aminu tapatuta kepiapane kusika aminu waapa kawawan kumnangge dapaknga singgawan kakut. Kake ngana kwaim saak yapbike kukut.
LUK 10:32 Yapbike kuwawana Liwaitane dongane aakut tapatu miti puya pasinggak aminu tapatuta kepiapane kusika waapa kakut. Kake inenan kuke waapa kake kwaim saak yapbike kukut. Anutue yot takwan gwene pasiya aminu gwa yapbike kuwawan waapaya kuke ina unzakan yapbike kukut.
LUK 10:33 Yapbike kuwawana aminu tapatu iwan nana aminu tapatu Sameria kep komune nana waapata kepiapane kukut. Kusika waapa kake baniaatang butaya siknga natapbut.
LUK 10:34 Butaya natake inengan kuke marasin tukngwamban pukuwan watana wamangamukut. Watana wamangamuke ikwawa gamandane masene takweke tapan kusika pakapuyut you gwendu kake undang kopbumayak. Undang koke Sameria nana aminda katak kayuwawan kepda
LUK 10:35 kwakawan enake yot toikge mani saaya imukut. Imuke anzing inikut, ‘Aminu aapa toimso. Ita take yuwikge toisika sanga usingamunangge natake buyaka mumsa. Ge apmea nata gatu apuke yake akgamit,’ ngang inikut.
LUK 10:36 “Ge tuwang wamu waaknga natake ga dasing nataayak,” ngang Jesuta inikwaikut. “Aminu tapaat tapatuat wa kukinggane mamin tapata aminu waiakwakga tanguteking kapa kake nata ie inengan yuatapa ngang natapbut,” ngang inikwaikut.
LUK 10:37 Inikwaiwan yake anzing inikut, “Butaya natake gatangamukut tapanin,” ngang inikut. Iniwan yake anzing inikut, “Siakan. Ga kaya kuke unzakan tasiyo. Tasikengu kayuk asinggan yuwiyak,” ngang inikut.
LUK 10:38 Siwan kepiapane kusika Jesuat pandetnaatda you gapmandune kopbing. Kopa maya tapatu umana Mata ngang iniking. Ita kake papan yotnaatang kopbing.
LUK 10:39 Koke waapatane uyapna umana Maria ngang iniking. Ita apu Jesue wam katak siknga natapnangge natake kepine pukwike natayukut.
LUK 10:40 Natayuwawan ngana paana Matata nanamde sangae natayuk puya pasiyuk musiaatang nangaakan natapbut. Natake Jesue kuku anzing inikut, “Uyapmata napmake dua gatangaman natakan nanamu tandakngawa take singgak ba dasing? Iniwi apu gatangaman,” ngang inikut.
LUK 10:41 Iniwan ngana Jesuta yake anzing inikut, “Mata. Mata. Ga mina sangabamde nangaakan natapi ganduat.
LUK 10:42 Puya takngatuekan nataayak gamu take siwan. Uyapbata puya waakngae natake yuwawan teng ngang ininanga dua siwik,” ngang inikut.
LUK 11:1 Siwan tapduu gwendune keu komduatang yuke Jesuta tumuk wam yawan puyuwana pandetna tapatuta anzing inikut, “Aana. Gata ninu tumuk wam yanimde ninindamumso. Unzing tupa Jonda pandetna yanindamukut binga nikaya ninindamumso,” ngang inikut.
LUK 11:2 Iniwan ita anzing yanikut, “Ginda tumuk wam yananggengu anzing yanong, ‘Nanin. Gatane umanda asinggan tangenatna enane siknga yuwawan tapduknga gata amin panangge tasinggayak gwenda apsok.
LUK 11:3 Toike ninda nanamu dapmakamangu tapduk tapduk asinggan nimuyo.
LUK 11:4 Ninda waiaknga pasinimukaing amindane waiakngana sandeyamukamang binga ninda waiaknga tasikamang kaknganinu sandetnimuyo. Gata dua nindupewi iwaninda ninu pasiwa sining,’ ngang yanong,” ngang yanikut.
LUK 11:5 Yanikenga tuwang wamu takngatu anzing yanikut, “Aminu gikatnana tapatu notna kaya ngang petakumat dakane kuke notna waapa anzing inikut, ‘Notna. Nanamu gomaat gomduat namuyo,’ ngang inikut.
LUK 11:6 ‘Natane notna tapatu nae apan nanamu ita nananga wena siwan apunggat,’ ngang inikut.
LUK 11:7 “Iniwan notna waapata yoakatangga yake anzing inikut, ‘Gata kwatanu ma naniwim. Gwabou gitna gwa yapuke naat waakngaatda dapuninu gwa pemangge nata enake sanga gamunanga dua,’ ngang inikut.
LUK 11:8 Inikutde ginda natapa dasing singgak? Nata daniwa natapnong. Ita aminu waapae notna ngang natake ngana dua enake imik. Aho. Aminu waapata sangae gatu gatu ininggamatanggawan natake ita enake sanga kuupbam aminu waapata dapiu asimik.
LUK 11:9 “Siwan nata daniwa natapnong. Ginda Anutu iniwa ita sanga ginda dapmakaingu atdamik. Ginda sangae yawakengu ginda dapmakaingu akaing. Ginda kepman yuke yoakatang kopnangge wam yawanu Anututa ginde gwabou atzitdamik,” ngang yanikut.
LUK 11:10 “Mamin amindaka Anutu inikaingu wa aminu sanga apaning. Siwan mamin amindaka sangae yawakaingu wa aminu akaning. Siwan mamin amindaka yoakatang kopnangge wam yakaing aminde atziyamik.
LUK 11:11 “Sike gikatnana tapatutane waakngata nana pis gomdu imikge iniwanu nanata gomou wai takngatu imik ba dasing? Wena.
LUK 11:12 Sike waakngata nanae taak musip gwendu imikge iniwanu nanata tungu tokngaapatu imik ba dasing? Iaya wena.
LUK 11:13 Ginda wai pasiya amin dakngake yuaing ngana waatdakasae sanga take aknga ayamukaing. Siwan mamin aminda Naninde inane Waung Kapa yamikge iniwanu yamunangge apmeptawik ba dasing? Wena,” ngang yanikut.
LUK 11:14 Siwan waung wai tapatuta wawi tapatu tapan datdaptake wamu yananga dua siwan Jesuta waung wai waapa sandetewan kukut. Sandetewan kuwana wawi waapata wamu take yakut. Wamu yawan aminbamda kake asatnaking.
LUK 11:15 Kake satnake aminu kunduta anzing yaking, “Waung wai takwakgane buyambam tapa Bielsebulkat Jesuat gatake yuke Jesuta waung waiakwak sandepewan kukaing,” ngang yaking.
LUK 11:16 Ngang yawa aminu kunduta Jesu tasina siwik ngang baniaatang natake, “Gata duya takngatu tasiwi kake gaat Bielsebulkat dua gatake yuke pasikamayak ngang natapnim,” ngang iniking.
LUK 11:17 Iniwa natake wamu musiaatang natapbing kakngae Jesuta natake anzing yanikut, “Take tapatutane waatdakanata banakan matake kaut kaut yuke asamapanu take waapatane umana apimapan kekeknga yutnanga dua siwik.
LUK 11:18 Siwan ina unzakan Setendane waatdakanata banakan matake kaut kaut yuke asamapanu Setenda dasing tasike kekeknga asinggan asinggan yuwik? Aho. Kekeknga yutnanga dua.
LUK 11:19 Siwan naat Bielsebulkatda gatake yuke waung waiakwak sandepeta kukaing gamu gindane waatdakasaat Anutuat gatake yuke waung waiakwak sandepewa kukaing ngangu dua yawam.
LUK 11:20 Siwan nata Anututane kekeknga aknganata waung waiakwak sandepewa kukaingge anzing natapnong. Tapduknga Anututa amin panangge tasinggak gwenda gwa apunggak ngang unzing banipzaatang natapnong.
LUK 11:21 “Siwan aminu kekeknga apata amakge sanga pake yotnane wamayuwik. Yotnane awamayuwawan itane sanga kuupbam takekan yutning.
LUK 11:22 Yuwawa ngana aminu tapatu kekeknga siknga apata apu tanguke ayapbimbik. Siwan awamayukut tapata amakge sanganae natdeke yuwawan kekeknga siknga waapata ayapbike amakge sangana kuupbam pake waapatane sangaapana buyambam pake notnae yamik.
LUK 11:23 “Siwan mamin amindaka naat dua gatake panangge tasikengu wa amin takwak yanikwasiwa kuning binga naat dua gatake yuke pasikengu waakwakga natane iwana daknganing.
LUK 11:24 “Siwan waung waita aminu tapatu teke kuke ita keu yanggana wena komune kuke yuwatakananga komde tawamban maiwik. Tawamban maiwana, ‘Aminu wa teke kukut tapae tangane gatuna kuwit,’ ngang natapik.
LUK 11:25 Ngang natake kuke aminu waapata nomana gwa siwan yuak ngang kawik.
LUK 11:26 Kake gatuna kuke waung wai siknga takwak katau kuut musa kautdu tapaat kake papan apuke aminu waapa gatu taning. Siwan aminu waapata tupa wai yukut ngana waung wai waakwakga gatu tapa wai siknga yuwik.” Ngang Jesuta wamu waaknga yaniwan natapbing.
LUK 11:27 Yaniwan natake maya tapatuta aminbamde banakan yuke wamu apaa yake anzing inikut, “Maya ga bokngike ngwamna gamukut tapae natapa take siknga singgak,” ngang inikut.
LUK 11:28 Iniwan natake ngana Jesuta yake anzing inikut, “Unzing gua. Anutue wam maakngita natake take gwaamumsa aminu amin gwaangu unin ngang natapnangge,” ngang inikut.
LUK 11:29 Siwan aminbamda unekan apuke gitna gitnauke yuwawa Jesuta anzing yanikut, “Aminu tapduk ayuamang komune nana kunduta aminu wai amin dakngake yuaing. Yuke Anututa tuwangu yeutniman kake ita gatanggaman tasinggayak ngang anggaman siwan kanim ngang nanikaing ngana tuwangu takngatu dua yeuyama kaning. Ayanikapsa Jona ngang iniking kapata tuwang tupa siknga tasikut takngakan kaning,” ngang yanikut.
LUK 11:30 “Tupa siknga Jonata tasiwan Nineva yot gapmane nana aminda kake Anututa tasiyamukutdane tuwangu unin kaking. Ina unzakan na aminbamdane notnaapa dakngake tasiwa aminu tapduk ayuamang komune nana kuupbamda nanduke Anututa tasiyamukutdane tuwangu unin kaning,” ngang yanikut.
LUK 11:31 “Siwan tupa siknga maya tapatu keu maa siknga komune nanatane buyambam tapa dakngake yukut. Dakngake yuke Solomonda natdetdetna take siknga aknga yawan natapnangge natake keu maa siknga ayukut komuneta kwatan siknga apbut ngana apmanu sanga Solomondane natdetdetna yapbikuu andang yuakge ginda masa imuwawa kake masande Anututa aminbam usanziwan maya waapata noman siwan ngana ginu aminu tapduk ayuamang komune nana usanziwan toknga paning,” ngang yanikut.
LUK 11:32 “Tapduknga Anututa aminbam usanziwik gwekatangu aminu Nineva nana usanziwan take siwa ngana aminu tapduk ayuamang komune nana usanziwan toknga paning. Dasingge? Nineva nana aminda wamu Jonata yakapbut takngae natake musia tapa tekwanggut ngana apmanu ginda sanga Jona yapikutde masa imukaing,” ngang yanikut.
LUK 11:33 “Aminda aakatau gatake gapma dakaatang tamunanga dua ba dopangga usikwatapnanga dua. Wena. Anggaman tewa aminu yoakatang akoke kakaa waaknga akaning.
LUK 11:34 Gatane kaika gupbatane kakaa sike kaika gatane take siknga kakengu kakaa akngane yuke take kuya. Sike kaikata wai siwanu zikaa dakatang wasiyawake yuya.
LUK 11:35 Unzingge katak siknga gwaumso. Kakaa gaatangu wa yuak kakngata zikaa singgamuyak.
LUK 11:36 Sike gatane gupba kakaa kuupbam take siwan gupba kautdu mateknga zikaa dua siwanu gupba kakaa kuupbam yukgamik. Unzing aakatapdane kakaata isikopan kakaakgak binga,” ngang yanikut.
LUK 11:37 Jesuta wamu waaknga yawan puyuwana Ferisi aminu tapatuta yatawamban apan nanamu iat gatake nasande iniwan yoakatang koke pukwikumayak.
LUK 11:38 Pukwiwawat Ferisi aminu waapata kawawan Jesuta nanam nanangge ngana katakngi yangga dua sauke napan kake mitie kepi takngatu unin sandekgak ngang kake nangaakan natapbut.
LUK 11:39 Natapan ngana Jesuta anzing inikut, “Ginu Ferisi aminu kapza gatu dopangza ngangu kepman gan saukaing binga ginda sangasa pasiwawa kana take singgak ngana musipzaatang kait pasikaing kakngasatakan doke yuak,” ngang inikut.
LUK 11:40 “Ginu katum amin. Anututa sanga gupminu engetanganu tapan takawan ngana banipmikatangu dua tapan takanggak ngang nataaing ba dasing?
LUK 11:41 Sike sangaapae atdapmakaingge banip siyamuke gatayamunong. Ginda unzing tasiwanu gupzatane sanga engatangan dudumna siwik,” ngang inikut.
LUK 11:42 “Ngana ginu Ferisi aminu tagwautnong. Ginda kasamu katau kuut musaat pake usanzike gomdu Anutue imukaing. Imuke sanga kunduat gwapda tapun ba kutan ba tabapmensam ngang pake usanzike unzakan imukaing ngana ginu kepi nomana siknga aknga ayapbike gatu Anutue musip gwaang dua nataing. Sike ginda sangasa Anutue imukaing kaknga dua teke aminde musip gwaang natake wamna nomana siknga usanziyamunong,” ngang inikut.
LUK 11:43 “Anututa masande ginu Ferisi aminde toknga damik. Dasingge? Ginda aminde nomune miti yot katang yutnangge nataing. Sike gatusa aminbamda paut gwene gaak wam danike umanza tangenatningge nataing,” ngang inikut.
LUK 11:44 “Anututa toknga aknga atdamik. Dasingge? Matmat gapma kepganang katang kusopuke yuwan kananga dua siwan ginda kapanga aknga andangu wena ngang natake kepisa engatangan yainggamuke kukaing binga ginda matmat wa gapma binga yuaing,” ngang inikut.
LUK 11:45 Iniwan natake mama wam yanindamumsa aminu tapatuta anzing inikut, “Ninindamumsaapa. Gata unzing yake wamu waaknga ninde kuut sapdut nimunggayak,” ngang inikut.
LUK 11:46 Iniwan yake anzing inikut, “Masande Anututa Ferisi amikat ginu mama wam yanindamumsa amikatde toknga atdamik. Dasingge? Ginda mama wamu nangaakan aminbamde peyamuwawa kwatan siknga gwaamukaing. Siwan ngana gisa katakza boopmi tapatu undang dua teke meya wa pakaingge dua gatayamukaing,” ngang inikut.
LUK 11:47 “Anututa toknga aknga atdamik. Dasingge? Tupa siknga gindane bapusata ayanikapsa aminu zipa kupa ginda suut gapmane tanomanuyamukaing.
LUK 11:48 Sanga waakngae ginda bapusatane wai waaknganae yakapmake gindane musipza take gawaknga waaknganae natayamukaing. Bapusata ayanikapsa aminu zipa kupa ginda suut gapmana mina mina tanomanuyamukaing ngang inikut.
LUK 11:49 Unzingge Anututa natdetdetna nomana pake anzing gwa yakut, ‘Nata ayanikapsa amikat kwiikngaat yanipewa ie kuwa aminda enake wa aminu toknga yamunangge yawamba datakuwawa kundu atzipa kumning,’ ngang yakut.
LUK 11:50 Ayanikapsa aminu tupa sikngata zipmanggawa apu tapduk ayuamang kopatang apunggak,” ngang inikut.
LUK 11:51 “Tupa Ebel tanguwa kupan uneta apu Sekaraiata yukut komune apan iaya atanguwa kumbut. Ita Anututane yot takwan gwekat gatu Anutue sanga imukaking kopatda kaukaut yuwat kekep komune banakan yuwan tanguwa kumbut. Siwan meya wa kuupbam aminu tapduk ayuamang komune nanae yuyamik. Ngan nata gin daninggat. Wai waaknga kuupbam aminu apman ayuamang komune nanae yuyamik,” ngang inikut.
LUK 11:52 “Anututa ginu mama wam yanindamumsa aminde toknga aknga atdamik. Dasingge? Ginda gwabok ziu Anututane kepie natdetnanga daka gwa mukingge gisa gwabou zike kopnanga dua. Siwan ginda aminu kundue kepi akopnanga asumuyamukaing,” ngang inikut.
LUK 11:53 Sike Jesuta you wagwen teke epu kepman kuwawan mama wam yanindamumsa amikat Ferisi amikatda kem wam Jesue yanangge kekeknga tasike wamu inata inata ie yake tasiwa siwikge paut tasike yuking.
LUK 11:54 Yusika katak siknga kayuwawa wamu takngatu inae genaneta yawan natake wamu waaknganeta kem yake tangutnangge tasiking.
LUK 12:1 Aminu buyambamu kwaapzang sikngata yuwa gitna siknga siwan notnata aminu kundue kepi ayainanga yuwawa kake Jesuta pandetna gamok anzing yanikut, “Ginu Ferisi amindane sanga aknganae gwautnong. Waiakngana dua kakapningge kem wam yakaing kakngae daninggat.
LUK 12:2 Sangabamu akusopuke yuaingu masande anggaman sining. Sike sangabamu awamakusiwa yuaingu masande akaning.
LUK 12:3 Unzingge wamu kuupbam zikaa dakaatang yakaingu aminbamda gunzitapane natapning. Siwan wamu kuupbam yoakatang wepda siknga ngang yaningu masande yanggamatawawa natapning,” ngang yanikut.
LUK 12:4 “Natane notnabam. Nata anzing daniwa natapnong. Ginda gupzasan dasipa kumning aminde ma gwaubam. Dasipa kupa masande sanga takngatu dua tasindamunangae ma gwaubam.
LUK 12:5 Sike aminu akagwautningge tapa nata yeutdama kanong. Ginda aminu aapata dasipan kupana masande aminu waapa kekekngana kayaapa ge ginu pake katap bapatang muban kuning. Ngan. Nata gin daninggatde ginda aminu waapaekan gwautnong.
LUK 12:6 “Ginu atnataing. Aminu kunduta kwait mateu katau kautdu musakande manina gamana saasim muke usikaing ngana Anututa kwaiu mateknga unzambinga gwendusimdekanu dua botanggak.
LUK 12:7 Sike Anututa sangabamu anggaman atnataak. Gindane gwapak danggamza kuupbam gwa kendekutde ginda atdasipa kumning aminde ma gwaubam. Gikatnana tapatuta kwait mateu kwaapzanggane manina gwa yapbiban ita ginde dua botawik,” ngang yanikut.
LUK 12:8 “Siwan nata anzing daniwa natapnong. Aminu tapatuta natane kekeknga akngana gepbiatang yuke pasike nae umana asinggan yakapanu nakaya aminbamdane notnaapa dakngake aminu waapatane umana Anutue kaine ayakapit.
LUK 12:9 Sike ngana aminu tapatu nae aminbamde kaine masa namanu nakaya ina unzakan Anutue kaine masa asimit.
LUK 12:10 Siwan aminu tapatuta na aminbamdane notnaapae nanisapduwiu Anututa wai waakngana asandekngamik. Sike ngana aminu tapatuta Anututane Waung Kapae inisapduwiu Anututa wai waakngana dua sandekngamik.
LUK 12:11 “Sike aminda ginu kaipake miti yot gwene pakoke ba gavmande ba aminu buyambam tapaapae kaine pakoke daniwanu ginu akgwauke nangaakan natake ninda yake dasing yanike ninda wamu zaaknga ngang yaninim ngangu ma natapam.
LUK 12:12 Tapduknga unzing natapning komzipatangu Anututane Waung Kapata wamu ginda yaniningge taknga une yeutdamik,” ngang yanikut.
LUK 12:13 Yaniwan aminu aminbamu waakwakat nana tapatuta Jesu anzing inikut, “Yanindamusaapa. Gata natane paana iniwi ita kwatangi usanzike kautdu nae naman,” ngang inikut.
LUK 12:14 Iniwan ngana yake anzing inikut, “Dasingge unzingu yanggayak? Mamin tapata na aminu buyambam tapa wam usanziwitde yakut? Wena,” ngang inikut.
LUK 12:15 Inike gatu aminbamu wa yukingge anzing yanikut, “Ginu waapata nanik kakngae gwauke sangasa buyambam panangge ma natapam. Aminu sangana buyambam kakengu sanganata gatangaman kayuk yutnanga dua,” ngang yanikut.
LUK 12:16 Yanikenga tuwang wamu takngatu anzing yanikut, “Aminu sangabamna kaya apatane puyanane buya buyambam aaking.
LUK 12:17 Aawa kake aminu waapata musiaatang anzing natapbut, ‘Nata dasing tasiwit? Nata yotna mateknga siwan gitnae nanama pake zane pewit?’
LUK 12:18 Ngang natake anzing yakut, ‘Nata anzing tasiwit. Nata nanam you mateknga waike gatu you buyambam gwegwen mitake nanamaat gatu sangana nomana pake you wa gwegwekatang pewit,’ ngang yakut.
LUK 12:19 ‘Pekenga ninae musipmaatang anzing yawit. Natane sangana take siknga kwaapzangge gatangaman nakanu kwaapzang yuwit. Ge apmanu yuwa takawan nake tangoke apbakngake yuwit ngang yawit,’ ngang yakut.
LUK 12:20 “Yawan ngana Anututa aminu waapa anzing inikut, ‘Ga katukatum. Apmanu zikaa anggwenekan ga akupiyak. Kupina sangabamu wa tandakngateyau maminda papik? Gata dua papiyak,’ ngang inikut.
LUK 12:21 “Ina unzakan aminbamu inane sangana buyambam pandamuke pasikaing aminu Anutue kaine atdapning,” ngang yanikut.
LUK 12:22 Yanikenga Jesuta pandetna anzing yanikut, “Unzingge nata daniwa natapnong. Ginda kayuk yutnanga akngae nangaakan ma natapam. Ninu mina nake dua kumnim ba gupminde sanga minata usikwatake kwangga dua yutnim ngang nangaakan ma natapam.
LUK 12:23 Dasingge? Kayuk yutnanga akngasa atdamukut tapata gatu nanamu atdamik. Siwan gupza tumukut tapata gatu taukza atdamik,” ngang yanikut.
LUK 12:24 “Ginda tinggigita yuaingge atnataaing? Kwaiu kuupbamda nanamu dua kwaike kundu paku yotnaatangu dua peaing. Sike nanam yotna wena ngana Anututa nanamu ayamuke atoikgak. Sike Anutue kaine ginda kwaiu gatukande asiknga yapbiking,” ngang yanikut.
LUK 12:25 “Sike gikatnana tapatuta natanggamatake apme tapduknga kayuk yutnanga aknga kundusipat isatakopik ba dasing? Wena.
LUK 12:26 Sike ginda sanga mateknga unzing tasinanga dua siwanu dasingge ginda sanga kundue nangaakanu nataing?
LUK 12:27 “Ginda zongazonga tapunde kanong. Tapuya ita kwaknga dua kwapmike taukaya dua pasikaing ngana nata daniwa natapnong. Tupa Solomonda sangasanga noman siknga tasikut ngana take siknga zongazonga tapunu apmaat nana wa binga dua,” ngang yanikut.
LUK 12:28 “Sike zongazonga puyaangaatang apman akoke yuaingu kwepna zike katapatang saning. Sike zongazonga mani pananga dua moo akokaingu Anututa tasiwan kana take singgak. Unzingge ginda katak siknga natapnong. O ginu aminbam! Anututa gatandamikge dua natapa kekekawan sangae nangaakan natapsa aminu Anututa toitnangge take siknga nataak,” ngang yanikut.
LUK 12:29 “Unzingge ginu nangaakan ma natake mina nake minaka tangopnim ngang natake ginu nangaakan ma natapam.
LUK 12:30 Katum aminu kepna kepna nanata sangabam panangge pasikaing ngana Nanzata sanga wa dapmakaingge natake ginu atoimbik.
LUK 12:31 Unzingge Anututa amin panangge tasinggak kakngae natanggamatakamang kakngata sangaapae nangaakan nataamang kaknga yapbikgak ngang natake yuwawa sanga wa dapningu ginde atdamik,” ngang yanikut.
LUK 12:32 “Ginu sipsip matek binga gin takwakzimu ma gwaubam. Nanzata danipewan kekeknga aknganaatang take kopningge wamu gwa yawan kekekakut.
LUK 12:33 Ginda sangasa kuupbam aminde yaman usiwa manina pake sanganae atdapmakaingge yama ita gatayamik. Unzing tasikengu ginda sangasa buyambamu sanga dua maikaing komune enandang tepuwa enandangu kuka aminda kukae dua papa gwakgwakga sangaapa dua nanggamuke pasiwan maikaing.
LUK 12:34 Sike gindane sangasa nomana pewa kukaing komunekan ginda musipzaatang asinggan gwangat natayutning,” ngang yanikut.
LUK 12:35 “Sike wawi tapatuta maatna kayuk tanangge natake kuwan iat notna bapatda unekan gatake yuke nanamu buyambam sake naking. Sake nake yuwawa puya aminata tauknga dapaknga puwan akopan simbuna gitna siknga wamake aakatapna gatake toikngata apikge natake yuking. Yuwawa ita apuke wamu yawan zetzet gwabok zikngamuking. Ge ginu unzakan nae yukngamunong.
LUK 12:37 Puya toikngata apuke kawan aminata dapuna dua petninga kake take siknga natapik. Ge siakande daninggat. Aminata dua petninga kake banip gwaang natayamuke nanamu usanziyaman naning.
LUK 12:38 Siwan toikngata petakumat kopatang ba apik. Ba keu damana siawan taau tupan yawik tapduu waopatang ba apik. Apuke kawawan aminabamda dapuna dua petninga kake kaa wam yaniwan apbaknganing.
LUK 12:39 Siwan gatu anzing daniwa katak siknga natapnong. Kuka aminu tapduknga apnanga gwenu katak natake dua pewan gwaboknga zike koke kuka pananga dua siwik.
LUK 12:40 Ina unzakan ginu nae yutnong. Apman dua ba apik ngang natake yuwawa ngana na aminbamdane notnaapata tapduk wagwekatang asapit,” ngang Jesuta pandetna yaniwan natapbing.
LUK 12:41 Ngang yaniwan natake Pitata anzing inikwaikut, “Nindekan natake tuwang wamu waaknga yayak ba aminbamde kuut natake yayak ba dasing,” ngang inikwaikut.
LUK 12:42 Inikwaiwan Jesuta yake anzing inikut, “Puya amina tapatuta dua mandakake natdetdetna anggaman natake noman pasiwik. Puya noman pasike yuwawan kake puya toikga inike puya aminde kuyana gata kayuyo ngang iniwik. Gata kuyana yuke sangaapa papsa komunekan usanzike yami panong ngang iniwik.
LUK 12:43 Iniwan natake puya aminu waapata unzakan noman pasike yuwawanu puya toikga gatu apuke kake iniwan take siwik.
LUK 12:44 Siwan siakande daninggat. Puya aminu waapata toikngatane sangaapa kuupbamde kuyana yuwikge iniwan apbakngawik.
LUK 12:45 Siwan ngana puya aminu tapatuta baniaatang anzing ba natapik, ‘Puya toikngata zetzet dua apunggak,’ ngang natapik. Natakengu puya amin maya wawi kuut atzipik. Atzipmake nanamdekan natayusika yangga toknga aknga tangoke datdaptawik.
LUK 12:46 Datdaptake apmanu toikngata dua apik ngang yawik gwekatang toikngata apik. Apuke toknga imuke inikwasitewan kuke yamandet amin yanikwasiwan paku yuaing komune kuke yuwik.
LUK 12:47 “Siwan puya toikngatane banip anggaman natake ngana ie gen dua gwaamuke toikngata apikge dua tandakngawik. Dua tandakngake yuwawan apu kake toknga tanguwik.
LUK 12:48 Siwan ngana puya toikngatane banip anggaman dua natake wamangu dua tasiwanu toikngata apu kake wepdakan tanguwik. Siwan puyatane natdetdet buyambamu imukengu yake tangie puya buyambam pasingamuyo,” ngang iniwik. Ngang Jesuta Pita yake unzing inikut.
LUK 12:49 “Nata epuke katau banakan sawa yasiwan kaukaut kukaing binga epu aminbam zipmandaknganangge apbum. Siwan katapda gwa sawa isinggak gamu take siknga siwan ngang nataat.
LUK 12:50 Nata meya takngatu meya siknga kawitde nanitewan epbum. Epuke tapduk meya wa kawit gwende yuke nangaakan natayuat.
LUK 12:51 Ginda nae epuke amak kaknga yandakawan wena siwik ngang ba nataiing? Wena. Nata daniwa natapnong. Na apuke aminbam zipmandaknganangge epbum,” ngang yanikut.
LUK 12:52 “Tapduk apman yuamanguneta kuku masande yutnim komune aminu katau kautdu musatakan you gwendunekan yuaingu zipmandakngake tapaat tapatuatda aminu tapaae iwan iwan dakngake yutning.
LUK 12:53 Sike zipmandakngawa nanaat waakngaatda iwan dakngake yutzan. Sike mingaat yapanaatda iwan dakngake yutzan. Sike apekngaat ainaatda iwan iwan dakngake yutzan,” ngang yanikut.
LUK 12:54 Siwan Jesuta aminbamu anzing yanikut, “Ginda kawawa minga gunzitda pukunggak katangga apan kake zetgaman ginda anzing yakaing. Sopa atananggenggak ngang yawawa siakande siknga sopa atanggak.
LUK 12:55 Siwan ginda kawawa gou kekeknga kautdu saak nanata puyapan kake ginda anzing yakaing. Gunziu toknga isinanggenggak ngang yawawa siakande siknga unzingu asinggak ngang yanikut.
LUK 12:56 Ginu kem amin. Ginda kepat yekapatde sanga kake natdekaing ngana dasingge ginda sanga apmaat nana aknga katak siknga dua kaaing,” ngang yanikut.
LUK 12:57 “Dasingge gisa katak siknga dua natagwaanguke sanga wa take ngang dua natake minae dua tasikaing ngang yanikut.
LUK 12:58 Sike aminu tapatuta ga takuwan wam yawiyakge tapan kepiapane kukengu aminu waapaat wamu tanomanuke yawat takayok. Ita kaitake wam usanzikgak kapae imuyak. Iman ita gatu taukdapakge yaman taukdapakga take kaaut yot gwekatang gapmanang.
LUK 12:59 Nata ganiwa natapso. Gata kaaut yot gwenu zetgaman tenanga dua. Tupanu kuupbam usiwi puyuwana kaaut yot gwenu teke kuyo,” ngang yanikut.
LUK 13:1 “Tapduk waomune aminu kunduta kuku Jesu Galilinana kundue anzing iniking. Sangana Anutue imunangge tasiwawa ngana Pailatda amina yanipewan kuku zipa kumbing ngang iniking.
LUK 13:2 Iniwa yake anzing yanikut. Ginda aminu Galili nana waakwakga Galili nana kundu ayapbiking ngang ba nataing? Wa aminu waiakngana buyambam ngang ba nataaing? Siwan yapii meya wa pakinggane unin ngang nataaing ba dasing?
LUK 13:3 Nata siakande siknga daniwa natapnong. Wena siknga. Sike ginda musipza dua tapa tekwambanu ginu kuupbam unzakan wena asining,” ngang yanikut.
LUK 13:4 “Siwan aminu 18-nu you Siloam gapma wesim yukuu gwenduta pimake zipa kumbing. Wa kumbing amindane waiaknganata aminu kundu Jerusalem yuainggane waiakngana yapbike kumbing ngang ba nataing ba dasing?
LUK 13:5 Nata siakande siknga daninggat. Wena siknga. Sike ginu musipza dua tapa tekwambanu ginu kuupbam ina unzakan wena asining,” ngang yanikut.
LUK 13:6 Siwan Jesuta tuwang wamu takngatu anzing yakut, “Aminu tapatuta baau dakatu wain tapunde puya angaatang akopan kake buyana gwan ba aak ngang natake kuke ngana wena kakut.
LUK 13:7 Kake puyaanga pasinggak kapa anzing inikut, ‘Natapso. Nakanu gweaat gwenduat apuke baap andaka kawa ngana buyana dua aakgakge gata apatziyo. Dasingge? Katau wandakatane muyakngita kuke nanamu kwaiyatane yapii kaipanggak,’ ngang inikut.
LUK 13:8 “Iniwan natake yake anzing inikut, ‘Buyambam tapa. Tewi nakanu anggwekat yuawan nata yapii daka tapa kakaawan kep kwaipuke tabatabakat kwaidotdonguke tasiwa siwik.
LUK 13:9 Sike nakanu gwendune apmeba buya aawik. Sike wena siwan kakengu undang naniwi apatziwit,’ ngang inikut.”
LUK 13:10 Siwan yuwatakak tapduk gwene Jesuta miti you gwenduatang koke wam yanikut.
LUK 13:11 Yaniwawan maya tapatu waung wai tapatuta tapan masetane kwatai apata akgutokawan maya waapata usiusip sukuke nakanu 18-nu gwa kawan sandekut.
LUK 13:12 Ita undang yuwawan Jesuta kake yatawamban apan anzing inikut, “Mayapa. Nata maitda gwa sandekgamunggat,” ngang inikut.
LUK 13:13 Inike katakngi tangene wasiwan zetgaman maitna wena siwan ita noman gatu yuke Anutue umana yatangenakut.
LUK 13:14 Siwan ngana aminu miti you wagwen kayuak kapata maya waapatane maitna yuwatakak tapduk gwene sandekngaman kake musia toknga natake aminbamu anzing yanikut, “Tapduknga puya pasinanga katau kuutmusa kautdu gwendukan. Sike ginda maitza sandetdamikge natakengu puya tapdukatang apnong. Sike ginda sanga waakngae natakengu yuwatakak tapduk gwene ma apam,” ngang yanikut.
LUK 13:15 Siwan Buyambam tapata yake anzing yanikut, “Ginu genza gwakngaayasa kaya amin. Yuwatakak gwene ginu kuupbamda ikwawa gamande yotnane kuke zike kaipake yangga tangopningge pakukaing,” ngang yanikut.
LUK 13:16 “Sike maya aapa Ebrahamde zakngi tapatu siwan Setenda tanggaganuwan nakanu 18-nu gwa yukut. Unzingge nata yuwatakak tapduk gwene nau wa wambut taknga waitdewa kake dasingge musipza toknga nataaing,” ngang yanikut.
LUK 13:17 Unzing yaniwan natake musia toknga natangamukingga apmaakawawa aminu kuupbamda ita puya nomana waaknga tasikutde apbakngaking.
LUK 13:18 Siwan Jesuta gatu anzing yakut, “Anututa amin panangge tasinggak kaknga dasing binga siwan nata mina bingae tuwanguke yawit?
LUK 13:19 Wa unzing. Katau dakatu mastet ngang yanikamang. Sike aminu tapatuta mastet dakatane tapuya pake puyanane kwaikut. Ngang masande katapdaka binga takawan kwaitda apu yotna kaingane mitake yuking,” ngang yakut.
LUK 13:20 Siwan gatu ita anzing yakut, “Nata Anututa amin panangge tasinggak kaknga mina bingae tuwanguke yawit?
LUK 13:21 Sanga poyakat sakaing binga. Maya tapatuta sanga wa poyau buyambam sikngaat pake undanggan kwaidotdonguke tewan masande kana sanga ita poyak gwekatang tawamban sandewan apaptawan kaamang binga Anututa kekeknga aknganae gepbiatang ninda yuwatna unzing pasinimunggak,” ngang yakut.
LUK 13:22 Siwan Jesuta wam yanitake yotbam gapma gapmane gatu yot matek gapma gapmanzimune kuut kuke gatuna Jerusalem kunangge kukut.
LUK 13:23 Kuwawan aminu tapatuta anzing inikut, “Buyambam tapa. Anututa aminu kayuk yutnanga tapatu tapatukan ba papik ba dasing,” ngang iniwan Jesuta tuwang wamu gwabokge anzing yanikut,
LUK 13:24 “Ginda gwabou mateknga gwak zipatangu Anututa yuak komune kopningge kwatanza kekekngata tasinong. Nata daniwa natapnong. Aminbamda undang akopnangge natake ngana tasiwa maiwik,” ngang yanikut.
LUK 13:25 “Sike yot toikga enake gwabokgwau gwa yapukusiwanu ginda pakapu kepman yuke wamu anzing yaning, ‘Buyambam tapa. Enake gwabok gwau zitnimung,’ ngang iniwa ita yake anzing daniwik, ‘Ginu zane nana,’ ngang daniwik.
LUK 13:26 “Daniwana ginda yake anzing inining, ‘Apa! Nikat gaat unekan gatake nanam nake tangopbumang. Sike gata nindane yot gapmane yuke ninindamumbi natapbumang,’ ngang inining.
LUK 13:27 “Iniwa ngana yake anzing yawik, ‘Ginu zane nana? Ginu kuupbam napmake kukakut,’ ngang yake danikwasiwik,” ngang Jesuta unzing yanikut.
LUK 13:28 “Sike ginda kawawa Ebrahapat Aisakat Jekopat gatu ayanikapsa aminu kuutda Anutuat gatake yuwa kawawa ngana ginu danikwasiwa kuke kepman yuke ginu kwanamza kumzang sike kaakake yutnong,” ngang yanikut.
LUK 13:29 “Siwan aminu kaukaut nanata apuke Anutuat gatake yuke pukwike nanamu undang naning,” ngang yanikut.
LUK 13:30 “Siakan. Aminu kundu apmanu masakatang apukaingu wa aminda gamok tupan kuning. Sike aminu kundu apmanu tupan kukaingu gatu apu masan siknga kuning,” ngang yanikut.
LUK 13:31 Tapduu waomunekan Ferisi aminu kunduta kuku Jesu anzing iniking, “Gata you anggapma teke keu komdune datakungga. Herotda akgutapan kupiyakge yak,” ngang iniking.
LUK 13:32 Iniwa yake anzing yanikut, “Kem pasiya aminu Herot waapae kuke anzing ininong, ‘Apmanu waung wai yanikwasiwa kuwawa mait amindane maitna sandeyamunggat. Gatu kwepna unzakan tasiwit. Gatuna tupa natapbum taknga yewana tasiwa puyuwik,’ ngang daniwa natake kuke ininong,” ngang yanikut.
LUK 13:33 “Sike apman gatu kwep gatu yewan ngangu kunangge natapbum gapma gapmane akuwit. Dasingge? Wa aminda ayanikapsa tapatu you gapmandune tanguwa kupanu asatnananga. Ngana Jerusalem gapmane tanguwa kupanu atasikaing kakngane tasikaing ngang yake dua satnaning,” ngang yanikut.
LUK 13:34 “O Jerusalem. Jerusalem. Gindane bamsata ayanikapsa aminu asinggan zipa kungwakaing. Siwan ginda Anututa aminu ginde yanipewan kukaingu supda zipmakaing. Sike tapduk bamu asinggan nata aminza unekan peke taau gwenduta mateknga piya sanda usikwatanggak binga tasinangge yawa ngana ginda apbitakaing,” ngang yanikut.
LUK 13:35 “Daniwa natapnong. Anututa gindane yot gapmasa gwa teakge nata daniwa natapnong. Tapduknga ginda, ‘Buyambam tapanindane umana aknganae apunggak kapae inimbakngakamang,’ ngang dua yaning gwekatang ginda na dua nandupning,” ngang yanikut.
LUK 14:1 Siwan yuwatakak tapduk gwendune Judia nana amindane takeapa Ferisiat nana aminu tapatuta Jesu anzing inikut, “Gata api nanamu naat nasim,” ngang inikutde Jesuta apan iat gatake yotnaatang kopbumayak. Koke nawawat aminu kunduta Jesu katasiking.
LUK 14:2 Katasiwawa aminu tangeta papatakingu tapatuta Jesue nomnane yuwan kakut.
LUK 14:3 Kake Mosesde mama wam yanindamumsa amikat Ferisi amikatde Jesuta anzing yanikwaikut, “Ginu dasing nataaing? Yuwatakak tapduk gwene aminu tapatuta mait takngatu ma sandewan ngang Mosesda mama wamnaatang yakut ba dasing,” ngang yanikwaikut.
LUK 14:4 Yanikwaiwan ngana kuupbamda kuma yuking. Kuma yuwawa kake Jesuta aminu wa mait sikut tapa katakngata take maitna sandekngaman take sikut. Take siwan gwan! Kunggayo ngang initewan kukut.
LUK 14:5 Initewan kuwana Jesuta aminbamu anzing yanikwaikut, “Gikatnana tapatu waaknga ba ikwawa gamana kaya. Sike ita yuwatakak tapduk gwene gapma dakatu yanggana kayane pimapik. Pimake yuwawan nana ba toikngata yuwatakak tapduk gwendane pasap wam sandeyat ngang natake dua gatangamik ba mama wamde dua natake zetzet kuke kaitakakopik ba ginu dasing nataaing,” ngang yanikwaikut.
LUK 14:6 Ngang yanikwaiwan yake ininangge natake apmeptaking.
LUK 14:7 Siwan Jesuta aminu nanam nanangge apbingu kawawan wa aminu umana kaya daknganangge natake pomu tupan sanekan nanam toikat yutnangge tasiwawa kake tuwang wamu takngatu anzing yanikut,
LUK 14:8 “Aminu tapatuta maatna kayuk take gae nanam napiyakge yanggawamban kukengu pomu tupan sane dua pukwiwim. Maatna kayuk tapik kapata aminu umana kaya gatane umanda ayapbikuu tapatu yatawambik,” ngang yanikut.
LUK 14:9 “Unzing kakengu aminu ayandawambik kapata apu anzing ba ganiwik, ‘Gata sia tupan asanu aminu aapae imung,’ ngang ganiwanu ga maaknga siknga natake ga paku masan katang siknga pukwiwiyak.
LUK 14:10 Sike aminu tapatuta yanggawamban kuwi nanam nasande yawanu ga paku masankatang siknga pukwiyo. Unzing tasiwinu ayanggawambik kapata apu anzing ganiwik. Notna. Kundusim akoke nata yut komune wesim pukwiyo ngang ganiwanu ga aminbamu wa yuke nanam naningge kaine umanda kaya dakngawiyak,” ngang yanikut.
LUK 14:11 “Aminu tapatuta inane umana atangenawiu Anututa tasiwan apimapik. Sike aminu tapatuta inane umana dua tangenawiu Anututa enane siknga tangenawik,” ngang yanikut.
LUK 14:12 Siwan Jesuta aminu nanam nasande yatawamban apbut tapa anzing inikut, “Gata nanamu kepmaum ba bangee ba sakengu gata notda ba paaka ba dongu gikaatnana ba aminu sangaapana buyambamu yotza unenanakanu ma yayawambim. Dasingge? Wa aminda masande yake yanggawamba kuke yotnane nanamu iat yake akgaman napsa,” ngang inikut.
LUK 14:13 “Sike gata nanamu buyambam sakengu aminu sangaapana wena ba kepi wai siya ba kai kusiya amin yayawamso ngang inikut.
LUK 14:14 Wa aminda nanamu yake sanggamunanga dua. Siwan masande Anututa sanga yake apme amin nomanda suut gapmane gatu enatning gwekatangu akgamik. Akgaman pake apbakngawiyak,” ngang inikut.
LUK 14:15 Siwan aminu wa apuke nakikatnana aminu tapatuta wamu waaknga natake Jesu anzing inikut, “Aminu nanamu Anutuat gatake yuke nasan tapata apbakngawik,” ngang inikut.
LUK 14:16 Iniwan ngana Jesuta tuwang wamu takngatu anzing inikut, “Aminu tapatuta nanamu buyambam sake aminu buyambamda apningge wamu yatewan kukut.
LUK 14:17 Yatewan kuwana nanam naningge tapduknga gwa siwan kake puya amina initewan kuke aminu tupa yayawakutde anzing yanikut, ‘Ginu apnong. Sangabamu gwa tandakngatek,’ ngang yanikut.
LUK 14:18 “Yaniwan ngana aminu kuupbamda tapatu tapatuta isapmamsa wamu anzing dua kuningge iniking, ‘Aminu tupan tapata na apmaatzim siknga keu komdu usikum. Ge na ie kuke kawit. Nandutewi dua kuwit,’ ngang inikut.
LUK 14:19 “Sike tapatuta anzing inikut, ‘Na apmaatzim siknga ikwawa gamanu puya pasinangge katau kuut musaat usikum. Ge kuke tasiwa siwikge nandutewi dua kuwit,’ ngang inikut.
LUK 14:20 “Sike tapatuta anzing inikut, ‘Na apmaatzim siknga maatna kayuk takumde na kunanga dua,’ ngang inikut.
LUK 14:21 “Iniwan natake puya aminu waapata gatuna kuke buyambam tapa wamu wa yake inikingu iniwan natake musia toknga natake puya amina anzing inikut, ‘Ga zetgaman yotbamu anggapmatane kepi buyambam gatu mateknga tapaapane kuke sangana wena amikat kai kusiya amikat kepi wai siya amikat ngang papi apu yotnaatang akopnong,’ ngang inikut.
LUK 14:22 “Iniwan natake puya aminata tasiwan puyuwana anzing inikut, ‘Buyambam tapa. Nata gae wam gwaamuke unzing tasiwa ngana sia dakatui moo yuaing,’ ngang inikut.
LUK 14:23 “Iniwan buyambam tapata puya amina anzing inikut, ‘Ga kepibam gatu puya daman tapaapane kuke aminbam kaipakakopi yotna akgitnawik,’ ngang inikut.
LUK 14:24 Inike bania toknga natake gatu inikut, ‘Aminbamu tupa yayawakumu natane nanama nananga dua,’ ngang inikut,” ngang Jesuta yanikut.
LUK 14:25 Siwan aminu buyambamda Jesuat gatake kusika tapan tekwamban anzing yanikut,
LUK 14:26 “Aminu tapatuta nae apnangge natakengu nae banip gwaang natangamunggak kakngata itane nana minga maatna waaknga paana samina gatu inane kayuk yuak kakngae ngang banip gwaang natayamunggak kaknga dua yapbibanu ita natane pandetna dakngananga dua,” ngang yanikut.
LUK 14:27 “Sike aminu tapatuta apu nawanangge natake natane umana akngae meya pake amin saamdakane tanguwa kupikge natake ngana dua gwaamukengu ita natane pandetna dua dakngawik,” ngang yanikut.
LUK 14:28 “Dasing? Gikatnana tapatuta you gwendu mitapnangge natake pukwike you wagwendane maninae katak siknga natagwanguke, ‘Na manina kaya, ge nata take mitapit,’ ngang natapik ba dasing?
LUK 14:29 Sike ita tupanu unzing dua tasikengu masande simen gan tasike you wagwendane minamina kuupbam wena siwanu aminda kake aminu buya mitapik kapae asinimitning.
LUK 14:30 Asinimike anzing yaning, ‘Aminu waapata you anggwenu mitake ngana tasiwan maikut,’ ngang yaning,” ngang yanikut.
LUK 14:31 “Sike aminu buyambamu tapatuta buyambam aminu tapatuat amnangge natakengu apukwike katak siknga anzing natagwanguwik. Natane amak amina 10 tausen gan. Siwan aminu iwana waapatane amak amina 20 tausen. Ngang katak siknga natagwanguke ba amak tasike yawapewa kuwa dua ba yapbitning ngang natakengu dua amning,” ngang yanikut.
LUK 14:32 “Sike natapan take dua siwanu itane iwana maa yuwawa aminu kundu yanipewan kuke wamu amau dua tasiningge yawan kupik.
LUK 14:33 Ina unzakan ginda natagwangutnong. Aminu gikatnana tapatu sangabamnae masa dua imuke undanga ngang dua natakengu aminu waapata natane pandetna daknganangge apmeptawik,” ngang yanikut.
LUK 14:34 “Pangu take siknga ngana pangga asiptawanu ninda dasing tasina take kaa siknga gatu siwik? Wena.
LUK 14:35 Pangu asiptawanu puya angatang tabatabat binga kwaidotdongutna keu kaayana kaya dua siwik. Wena. Siwan sabambupat undang gan pena dua gatangamik. Puyana wena. Moo siknga mutna kuning. “Aminu maakngi kaya kakengu wam waaknga natapsok,” ngang yanikut.
LUK 15:1 Aminu kait pasike takis papsa amikat wai aminu kunduat yanikwasiwa kepman yuya aminda Jesutane wam natapnangge natake inengan kuking.
LUK 15:2 Kuwawa kake Ferisi amikat mama wam yanindamumsa amikatda sapdut wamu anzing yaking, “Aminu aapa waiakngana kaya amikat notna dakngake nanamu iat gatake nakaing,” ngang yaking.
LUK 15:3 Ngang yawa Jesuta tuwang wamu takngatu anzing yanikut,
LUK 15:4 “Aminu gikatnana tapatutane sipsipna 100-da ba yuaing. Ngang gwendu wena ba siwanu toikngata 99 pewan komduatang yuwawa kuke wena sikut gwende tawasika ngana dua kawik.
LUK 15:5 Dua kake tawasika kakenga asiknga bakngake gwaamnane teke gwaamutakuwik.
LUK 15:6 Gwaamutake kusika yotna kundoke inane donga gatu aminu yotna nana ngang yayawamban apa anzing yaniwik, ‘Natane sipsipma gwenduta wena gwa sikut ngana tawataku gatu gwa tatde ninu kuupbamda apbaknganim,’ ngang yaniwik.
LUK 15:7 Unzingge nata ginu daniwa natapnong. Ina unzakan. Enandangu 99 aminu nomana siknga yuwanu musia tapa tekwambikge wamu yananga dua. Enandang nana aminda aminu waakwakge takesim natapning. Sike waiakngana kaya aminu tapatuta musia tapan tekwambanu musip gwaangu enandang nana aminda natangamuning,” ngang yanikut.
LUK 15:8 “Sike maya tapatu manina katau kuut musaau kaya ngana sandu wena siwanu aakatap gatake yotna mina mina kuupbam kwaamuke katak siknga tawake kake tapik.
LUK 15:9 Takenga ita notnabam gatu yotna nana ngang yayawamban apa anzing yaniwik, ‘Natane manina sandu wena gwa sikut ngana apmanu tawasika gwa tatde gikat naat apbaknganim,’ ngang yaniwik.
LUK 15:10 Unzingge nata ginu daniwa natapnong. Ina unzakan. Anututane angelata aminu waiakngana kaya tapatuta musia tapan tekwambanu apbaknganing,” ngang yanikut.
LUK 15:11 Sike Jesuta tuwang wamu takngatuat anzing yanikut, “Wawi tapatu waaknga tapaaya kaya.
LUK 15:12 Siwan uyapnata nanaapa anzing inikut, ‘Nan. Kwatangi kungwapewiyau kautdu ninae papitde nanikuyau apmanu tupakande nami papit,’ ngang iniwan nanata sangaapana usanzike kautdu ie imukut.
LUK 15:13 “Iman pake kundusim yusika waapasimda sangaapana kuupbam aminde yaman usiwa puyuwan manina pake keu maa siknga komdune kukut. Kusika une kundoke minaka minaka take siknga kake manina ie moo muban puyukut.
LUK 15:14 Muban puyuwan waomune nana tom tapduk sikut. Siwan waapasimda upeke yuke mani panangge natake puyae tawakut.
LUK 15:15 Puyae tawake yaniwawan aminu tapatuta puya iman pasingamukut. Pasingamuke ikwawa toike daman katang koke nanam yamuwawan naking.
LUK 15:16 Yaman nawawa waapasimu tomna siknga natake ikwawatane nanam napikge take siknga natapbut ngana tapatuta nanamu ie dua iman tomda buyak toike yukut.
LUK 15:17 “Dua ima tomda buyak toike yusika natdetdetna anggaman siwan anzing yakut, ‘Nanatane puya amin takwakga nanamu buyambam napa maiwan peaing. Napa maiwan peawa ngana na itane waaknga ane yuke toma siknga natake kumnangge singgat.
LUK 15:18 Ge keu akom teke nanae kuke anzing iniwit. Nan. Gaat Anutuatdane kaisane na gawaknga aknga tasikumde waaknga ngang ma naniwim.
LUK 15:19 Puya aminda dakngawitde naniwinu take siwik ngang unzing iniwit,’ ngang yakut.
LUK 15:20 Ngang yakenga enake nanae kukut. “Kuwawan nanata kawawan maasim apan kake nanata baniaatang butaya siknga natapbut. Natake isapmake kuke waapasim betake tangupbakngake aamna kumzang bupbuyakut.
LUK 15:21 “Siwan waaknga waapasimda anzing inikut, ‘Nan. Gaat Anututatdane kaisane na gawaknga aknga tasikumde waaknga ngang ma naniwim,’ ngang inikut.
LUK 15:22 “Ngang iniwan ngana nanata puya aminae anzing yanikut, ‘Zetgaman kuku tauu gwaam siknga pakapu mapapukungama katasip tapakongaman kepi tauk pasingamunong.
LUK 15:23 Sike ikwawa gamanu suyuknga gwen takapu tangutapa kupan matanong. Matake sawa nanim.
LUK 15:24 Waakngaapasimu gwa ba kumbut ngang natapbum ngana gwa kaatde banip gwaang natake nanamu buyambam sake nanim,’ ngang yanikut. Yaniwan natake musia tatanga natake unzing tasiking.
LUK 15:25 “Unzing tasiwawa waaknga tupan tapata puyaneta you wesim apuke nataawan kap taiwawa natapbut.
LUK 15:26 Natake puya aminu tapatu yatawamban apan, ‘Dasingge taikaing,’ ngang inikwaikut.
LUK 15:27 Inikwaiwan yake anzing inikut, ‘Uyapbata gwa apuk. Ita wai dua sike take yusika apan kake nanggata ikwawa gamanu mateknga suyuknga gwen tanguke matak,’ ngang inikut.
LUK 15:28 “Iniwan natake musia toknga natake yoakatang kopnangge apbitakut. Kopnangge bitake yuwawan nanata epuke kopikge iniwan ngana
LUK 15:29 yake anzing inikut, ‘Na nakanu buyambam puyaka pasinggamukum. Wamba gatukande gwaamukum. Siwan naat notnaatda unekan apuke banipmin take siknga natapnimde ga kaap mateknga gwendusim paya dua namukuyak.
LUK 15:30 Siwan waakga waapasimda kuke maat petnangge natake sangaka muban puyuwana apuk. Apan kake ikwawa gamanu suyuknga gwenu ie tanguke matayak,’ ngang inikut.
LUK 15:31 “Iniwan yake anzing inikut, ‘Waaknga. Gaat naatda asinggan gatake yuamak. Siwan sangana kuupbamu gikae.
LUK 15:32 Siwan uyapbata gwa kumbut ngang natapbum ngana gatu kake banipminu iaknga siknga dua natake tasinim gamu noman dua siwik,’ ngang iniwan natapbut.”
LUK 16:1 Siwan Jesuta pandetna tuwang wamu takngatu anzing yanikut, “Aminu sangabamna kaya tapatutane puyanae kuyanae kayuwau tapatu kaya ngana aminu kunduta sangana kaya waapae kuke wamu anzing iniking, ‘Gatane kuyakae yuak kapata sangaka moo siknga mupewan kukaing,’ ngang iniking.
LUK 16:2 Iniwa natake waapa yatawamban apan anzing inikut, ‘Dasingge wamu takngatu gae yawa natat. Natane sanga kayuayakge yapii yawi natapit. Gata gatuka kuyanae yutnanga dua,’ ngang inikut.
LUK 16:3 Iniwan natake aminu waapata musiane anzing natapbut, ‘Sangabamna kayaapata nanikwasiwanu kuke na puyae kwatan tawambit. Na kwatana kekekngana wena ge keu kwaiputnanga dua siwik. Siwan aminu kundue nanamde yayawananga dua. Maaknga ngang natapit.
LUK 16:4 Sike nata kepi takngatu kawa nomatawan tasiwawa apba nanikwasiwanu aminda take na yotnaatang takopning,’ ngang natapbut.
LUK 16:5 “Natake aminbamu sangabamu kaya apatane sanga moo pakingge yayawamban apa aminu tupan apbut tapa anzing inikwaikut, ‘Ga sanga yake imiyakge moo pakuyau datdasing,’ ngang inikwaiwan,
LUK 16:6 ‘Na yangga aknga dram gogomu 100 pakum,’ ngang yawan natake, ‘Ga pakapu zetgaman pukwike pepa moo pakuyakgane san take yake imunangatane namba dotdonguke 50 kan matayo,’ ngang inikut.
LUK 16:7 Siwan tapatuta apan anzing inikwaikut, ‘Gatane sanga moo pakuyau datdasing,’ ngang iniwan, ‘Natane beu poyakgane 100 pakum,’ ngang iniwan, ‘Gata pepa sanga moo pakuyakgane san take namba dotdonguke 80 kan matayo,’ ngang inikut.
LUK 16:8 “Siwan masande sangabamna kayaapata kuyanae yuwau kemu wa tasikut tapatane umana tangenake natdetdetna kayata binga tasinggak ngang yakut. Siwan Anutuatnana dua aminda iat nanaatde unzing tasike natdetdetna kaya dakngakaing. Dakngake kepi takngatu kawa nomatawan tasike dua pimaningge tasikaingu waaknga aminu kakaa takngane nanata dua tasikaing ngang yakut.
LUK 16:9 Nata daniwa natapnong. Keu andakane nana aminda wai pasiyuk mani pakaingga ginda tasiwa sangae dapsa aminda ginde notza daknganing. Siwan manisata gatandamunanga dua siwik gwekatang ginu pake paku you asinggan yuak gwene dapmamban yutning,” ngang yakut.
LUK 16:10 “Aminu tapatuta sanga mateu katak siknga kayukengu masande ina unzakan sanga buyambamu akayuwik. Sike aminu tapatuta sanga matekngae kait tasike kayukengu ita sanga buyambamu ina unzakan kait tasike kayuwik.
LUK 16:11 Sike ginda keu andakane nana aminda wai pasiyuk buya pakaingge katak dua kayuwanu maminda sanga takesiknga daman kayutning? Wena.
LUK 16:12 Sike ginda amindane sanga katak dua kayuwanu maminda sanga enandang tendamukuu ginde damik? Wena.
LUK 16:13 Puya aminu tapatuta aminu buyambamu tapatutane puyana unekan bokngan pananga dua. Ita tapatue banip gwaang natangamuke tapatue semna natangamik. Ginda Anutue nataaing kakngaat gatu mani panangge nataaing kakngaat unekan papanu take sinanga dua,” ngang yakut.
LUK 16:14 Siwan Ferisi aminda mani panangge take siknga nataing aminda Jesuta wamu kuupbamu wa yakuu natake nomna maiwa yuking.
LUK 16:15 Yuwawa ngana Jesuta anzing yanikut, “Ginda aminde kaine nomana tasiwa danduke nomana amin ngang natandamukaing. Siwan ngana Anututa ginde musipatangu akaak. Gindane sanga aminda tangenakaingu Anututa kawan wai siknga singgak,” ngang yanikut.
LUK 16:16 “Sike Mosesdane mama wam takngaat gatu ayanikapsa aminde wapatda yutake apu Jonda yukut komune apbut. Siwan ngana Jonda yukut komuneta apu apmanu nata wamu take aknga Anututa amin panangge tasinggak kakngae wam yanike yotna yotna yatakuwa sandewan aminbamda sanga waaknga tanangge akekekakaing.
LUK 16:17 Siakan ngana kwatan pasiwanu kepat enane yuaikatda wena siwik. Siwan kwatan siknga pasiwa ngana mama wapatang tuwangu matakingu mateknga takngatusimu wena sinanga dua,” ngang yanikut.
LUK 16:18 “Ina unzakan aminu tapatuta maatna bitake gatu tapatu ba takengu ita kukae kaitake sukunggak kapa daknganggak. Sike aminu tapatuta maya tapatu apnata apbitakut tapa takengu unzakan kukae kaitake sukunggak kapa daknganggak,” ngang yakut.
LUK 16:19 “Tupa aminu sangabamna kaya tapatuta yukut. Ngang ita tauknga asinggan dudumna siknga papan pukuwa tapdukbamu asinggan nanamna take sikngakan nakakut.
LUK 16:20 Sike itane yotna gwabok gwaune aminu tapatu yuakut. Itane umana Lasaras ngang iniking. Waapa watawatata gupnaapa atapan sopukut.
LUK 16:21 Siwan ita nanamu sangana kaya waapata nawawan kaiknga pimaningunin napikge natapbut. Siwan kamunda apu yembita watana asingwamuking.
LUK 16:22 “Sike yusika masande sangana wena waapasimu akupan apu angelata uyunga take taku tewa Ebrahampat yuwawat masande sangabamna kaya waapaaya akupan kwaiwa
LUK 16:23 tupakande siknga katapbamu isikonggakatang kuke tokngabam pake enandang pakusang kawawan Ebrahamda maa siknga yuwawan Lasarasda iat gatake yuwawat kakut.
LUK 16:24 Kake anzing inikut, ‘Bapuna Ebraham. Nae butaya natangamuke Lasaras initewi apu katakngi boopmi dakasimda yanggaatang nomnasim temake apu yembinaatang tasiwan wikangaman. Na ane yuke tokngabam nataat,’ ngang inikut.
LUK 16:25 Iniwan natake ngana yake anzing inikut, ‘Bapuna. Katak siknga natapso. Tupa ga kayuk yuke sangaka nomana gwa pakuyak. Sike Lasarasda sanga kuupbam wai pakut ngana apmanu keu akomune musia kwikwikngata yuwawan gata tokngabam panggayak.
LUK 16:26 Unzing yuamangge gatu ganiwa natapso. Anututa gapma buyambamu tapatu tekutde aminu ane yuaingga yatupmake ginde kunanga dua. Siwan ugwak saak nana aminda ninde apnanga dua,’ ngang inikut.
LUK 16:27 “Iniwan natake yake anzing ininggamatakut, ‘Bapuna. Unzing naniwi natake nata ganiwa gata Lasaras initewi nanatane yotnane kuyok.
LUK 16:28 Natane uyapma katau kautdu musatakan undang yuaingge Lasarasda kuke gwaut wamu kekeknga ngang yaniyok. Ane tokngabam papsa kopatangu apnang,’ ngang inikut.
LUK 16:29 “Iniwan natake ngana yake anzing inikut, ‘Moseskat ayanikapsa aminkatdane wamu undang. Ge apme natapning,’ ngang inikut.
LUK 16:30 “Iniwan natake ita yake anzing inikut, ‘Aho. Bapuna unzing dua. Akupsa aminu tapatuta gatu enake kuke yaniwanu uyapmata musia atapa tekwambik,’ ngang inikut.
LUK 16:31 “Iniwan yake anzing inikut, ‘Moseskat ayanikapsa amikatdane wamna dua natakengu aminu akupsa tapatuta gatu enake yaniwanu siakan ngang natake baniu dua sining,’ ngang inikut,” ngang Jesuta yanikut.
LUK 17:1 Siwan Jesuta pandetna anzing yanikut, “Mina minaka sangabamda apuke pasiwa aminbamda waiakngaatang pimatning ngana aminu kepi yeuyamik kapata tokngabamu apapik,” ngang yakut.
LUK 17:2 “Ita waiaknga waatdaka matekge banakan tasiwan undang pimapanu toknga siknga pake wai siknga yuwik. Siwan sup buyambam gwenu guyakngane wamake yanggabam gwekatang muba pukuke kupik gamu toknga siknga dua papan. Ita unzing gwa kungwakengu kepi waaknga dua yeuyaman pimatning,” ngang yanikut.
LUK 17:3 “Sike ginu gisae gwautnong. Uyapbata wai tasiwanu kaanga iniwi ita musia tapan tekwambanu gata waiakngana sandekngamuyo.
LUK 17:4 Sike ita tapduu gwendunekan waiaknga katau kuut musa kautdu sipmaat tasinggamuke gatu ita musia tapan tekwamban tapduu katau kuut musa kautdu sipmaya ngang gae apuke musipma gwan tapa tekwak ngang ganiwanu waiakngana sandekngamuyo,” ngang yanikut.
LUK 17:5 Siwan pandetnata Jesu anzing iniking, “Gata gatanimi ninda Anutue natapna kekekanggak kakngata kekeknga siwan,” ngang iniking.
LUK 17:6 Iniwa natake anzing yanikut, “Ginda Anutue natapa kekeknga singgak kakngasata kekekngasim siwanu ginda katau andaka yapiine zike kuwikge yawa zike kuke gatu yanggabam gwene akopikge yawanu buya asaawik. Katap tapunu kundu umana mastet ngang yanikaingu iaya ina unzakan. Mateknga siknga ngana kwaiwa takake buyana tuyuknga dua aatning,” ngang yanikut.
LUK 17:7 “Sike gikatnana mamin tapataneka puya amina tapatu kep kwaipuke ba ikwawa toikenga gatu yotna apan kuyanata anzing ba iniwik, ‘Zetgaman apu pukwike nanamba nang,’ ngang ba iniwik.
LUK 17:8 Wena. Sike ita anzing iniwik, ‘Gata nanama tandakngake ga simbuka wamake gata nanama zike pakapi nata gamok nake tangopana gata masande nake tangopso,’ ngang iniwik.
LUK 17:9 Iniwik taknga tasiwan kake aminu waapata puya amina asinibakngawik ba dasing? Wena,” ngang yanikut.
LUK 17:10 “Sike gikaya ina unzakan. Ginda puya kuupbam Anututa damukuu atasiwa puyuwanu ginda anzing yanong, ‘Ninu puya aminu take siknga dua. Ninda puya atnimukut takngakan tasimang,’ ngang yanong,” ngang yanikut.
LUK 17:11 Siwan Jerusalem kunangge natake Jesuta kepiapane kukut. Kusika Sameria kep komu kautdu saak yuwan Galili kep komu kautdu saak yuamayak komaatde banakan komune kukut.
LUK 17:12 Kusika you gapmandune kundoke kawan wawi watana kekeknga siya aminu katau kuut musaatda apuwawa kakut.
LUK 17:13 Kawan waakwakga inengan yuke kumzang anzing iniking, “Jesu! Buyambam tapanin! Ninde butaya natapso,” ngang iniking.
LUK 17:14 Iniwa Jesuta kake anzing yanikut, “Anutue yot takwan gwene pasiya aminde kunong. Kuwa danduke watasa wena singgakge wam yawa aminbamda natapning,” ngang yanikut.
LUK 17:15 Yaniwan natake kusika watana wena siwa gupna dudumna siking. Siwan waakwakga undang kuwawa ngana wa amikat nana tapatuta watana wena singgak ngang kake tapan tekwamban notna peke Jesue gatu kukut. Kusika Anutue kumzang inimbakngakut.
LUK 17:16 Inimbakngake kuke Jesue ina unzakan inimbakngakut. Siwan aminu waapa Sameria kep komune nana Judia aminde iwana tapatu.
LUK 17:17 Siwan Jesuta anzing inikut, “Aminu katak kuut musaatda watana wena siing. Siwan gatakan apu nanimbakngawawi ngana notda bamda zandang kukaing.
LUK 17:18 Aminu katau kuut musa kautdu tapaat tapaatda watana wena sike ngana Anutu inimbaknganangge bitake dua apuing. Siwan ga iwan nana apatakan apunggayak,” ngang inikut.
LUK 17:19 Inike gatu waapa anzing inikut, “Gata Anutue natapi kekekanggak kakngakata gatanggaman wataka wena singgakge kunggayo,” ngang inikut.
LUK 17:20 Siwan Ferisi aminda anzing inikwaiking, “Zaapduknga Anututa amin panangge tasinggak kakngata ninde apik,” ngang inikwaiwa Jesuta yake anzing yanikut, “Tapduknga Anututa amin panangge tasinggak gwendane tuwangu anggaman dua siwan aminbamda kainata dua kaning,” ngang yanikut.
LUK 17:21 “Anututa amin panangge tasinggak kakngata ginde banakan yuke pasiwawan kake ngana kanong. Andang yuak. Ba kanong. Atunzing yuak ngang yananga dua,” ngang yanikut.
LUK 17:22 Siwan pandetna anzing yanikut, “Masande apmea kanim kopatang ginda nata aminbamdane notna dakngake gunziu gwendune apu yutdama nandupnangge toknga siknga natapnong. Natake ngana dua nandupning,” ngang yanikut.
LUK 17:23 “Sike aminu kunduta anzing danining, ‘Ita atunzing yuak,’ ngang danining ba, ‘Andang yuak,’ ngang daniwanu siakan ngang ma natapam,” ngang yanikut.
LUK 17:24 “Sike yapasikgane kakaa akngata ena banakan komune isikakake tawamban sandekgak binga na aminbamdane notna apata ina unzakan tapduknga asapit gwekatangu anggamande siknga asapit.
LUK 17:25 Sike aminu tapduk ayuamang komune nana aminda nanikwasiwa tokngabamu papana tapduknga Anututa gin danduyuwik gwenu asapik.
LUK 17:26 “Siwan sanga Noata yukut komune tasiking kakngakan na aminbamde notna apata apit tapduk gweneaya unzakan tasining.
LUK 17:27 Wa aminu nake tangoke gatu maatna kayuk pake tasiwawa Noata dopangbam gwekatang kopana yanggata paptake apu doke aminu kuupbam zipa puyukut.
LUK 17:28 “Tapduknga nata apit gweneaya ina unzakan. Lotda yukut komuneaya nanamna nake tangoke sangaapa usike sangana aminu kundue yama usiwawa puyana pasike yotna mitapbing.
LUK 17:29 Unzing tasike yuwawa ngana Lotda you Sodom gapma teke kukut gwenekan enandangga katapat supatda sopata binga pimake aminu kuupbam pasiwan maiking.
LUK 17:30 “Sike ina unzakan na aminbamdane notaapa anggaman apa nandupning gwekatang kaya. Asinggan tasikaing kakngakan tasiwawa asapit.
LUK 17:31 Siwan tapduu wagwene yotna engatangan yuwik kapata epuke sangana yoakatang koke tananga dua. Ina unzakan. Aminu tapatu puyanane ba yuwiknga gatu yotnae kunanga dua.
LUK 17:32 Ginda Lotdane maatnata tapan tekwamban yotnae kakut takngae katak siknga natanggamatake yotza ma kuwam.
LUK 17:33 Aminu tapatuta kayuk yuke sangana tasinggakge natanggamatawanu kayuk yutnanga aknga wena asiwik. Sike kayuk yutnanga akngana dua kotnakengu kayuk ayuwik.
LUK 17:34 Nata ginu daniwa natapnong. Tapduk waopatangu aminu tapaata tau sandunekan dapun pewawat Anututa wa petzan kat nana tapatu take tapatu atewik.
LUK 17:35 Sike maya tapaata poyak sanangge tasiwawat Anututa tapatukan take tapatu atewik.
LUK 17:36 (Siwan aminu tapaata puyaangane unekan yuke pasiwawat Anututa tapatukan take tapatu atewik),” ngang yanikut.
LUK 17:37 Yaniwan wamu waaknga natake pandetnata anzing inikwaiking, “Aanin. Sanga wa yanggayau buya keu zomune awan kanim,” ngang iniwa yake tuwang wamu takngatu anzing yanikut, “Keu minaka tapatuta bukatake yuak komune tinggigita apu une atdokaing,” ngang yanikut.
LUK 18:1 Siwan Jesuta tuwang wamu takngatu yanindamuban asinggan tumuk wam yake semna dua natapningge anzing yanikut,
LUK 18:2 “You gapmandune nana aminu tapatuta wam natake usanzikgak kapa dakngake yuke Anutue dua gwauke aminu yumdekan pandambanuke nangaakan dua nataak.
LUK 18:3 Ngang maya kombakobau tapatu you wanggapmane yuak ngang asinggan aminu waapae kuke anzing ininggak, ‘Iwanata atnutnangge tasinggakge wam yawitde gatangamuyo,’ ngang inikut.
LUK 18:4 “Iniwan natake ngana tupanu dua gatangamunangge natapbut. Ngana masande asinggan ininggamatanggawan anzing natapbut, ‘Ei! Na Anutue dua gwauke amindeaya dua natanggamatanggat,
LUK 18:5 ngana kombakobau waapata wamna asinggan apu naninggamatanggak. Undanga. Wam yawikge gatangama. Masande asinggan apunggawan tangana nasinang,’ ngang natapbut,” ngang yanikut.
LUK 18:6 Yanike Jesu Buyambam tapata anzing yanikut, “Ginda wam usanzikgau wai waapata natapbut takngae natdetnong.
LUK 18:7 Sike dasing? Anututane amina yuaingga ie gaak wamu tapduk tapduu kwakngaom gatu zikaane asinggan iniwanu Anututa wam yaningge dua gatayamik ba dasing? Sike ita zetgaman dua gatayamik ba dasing? Wena.
LUK 18:8 Nata daniwa natapnong. Ita zetgaman gatayamik. Sike na aminbamdane notna apata apit gwekatangu keunenana aminu kunduta nae natapa kekekawik aminda dua ba yutning,” ngang yanikut.
LUK 18:9 Aminu kunduta baniaatang anzing natapbing, “Nindakan dudumna amin yuwatna buyambamda wai amin yuaing,” ngang natapa kekekakut. Siwan Jesuta ie natake tuwang wamu takngatu anzing yanikut,
LUK 18:10 “Aminu tapaata tumuk wam yanangge natake Anutue yot gwene kopbumayak. Koke aminu tapatu Ferisi amin tapata na dudumna yuat ngang natapbut. Siwan tapatu kait pasiyuk takis pakut tapata yukut.
LUK 18:11 Siwan Ferisi aminu waapata koke kuupbamda kaningge dandam tangan yuke tumuk wamu anzing yakut, ‘O Anutu. Aminu kuupbamda sangaapana buyambam panangge toknga natake pasikaing. Pasike kewam yake maa kukapakaing. Siwan aminu aapata kait pasiyuk takis panggak. Siwan aminbamda unzakan pasikaing ngana na aminu inata kundu yuatde ganimbaknganggat.
LUK 18:12 Na miti aminu nomanaapa dakngake asinggan kosangayuk sande gwendune gunziu gweaane nanam teke dua nake gae natanggamatanggat. Sike puya pasike mani pake katau kuut musa gatu kautdu saat saat ngangu ninae pake sandu gae gamunggat,’ ngang yakut.
LUK 18:13 “Yawawan aminu takis papsa aminu waiaknganae baniane meya siknga natake tumuk wam yakaing komune dua yuke maya yuke tumuk wamu anzing yakut, ‘O Anutu. Na waiakngana asinggan tasinggat ngana banipbaatang toknga ma natangamim,’ ngang inikut.
LUK 18:14 “Unzingge nata siakande daninggat. Wai aminu waapata Anutue kainane amin nomanda yotna kukut. Siwan Ferisi aminu waapata tumuk wamu yakenga yotna umana wena dakngake kukut. Siwan mamin amindaka umana buyambam siwikge tasiwan Anututa tasiwan waapata apimapik. Siwan ngana mamin amindaka na umana wena. Ge take amunandang yuwit ngang natapiu Anututa tasingaman umana buyambam siwik,” ngang yanikut.
LUK 18:15 Siwan waatdaka mateu Jesuta katakngita wasiyuk wam kwikwik yaniwikge pakapa kake pandetnata kaanga yaniking.
LUK 18:16 Kaanga yaniwawa ngana Jesuta waatdaka yayawamban inengan apa anzing yanikut, “Waatdaka kapewa nae apnong. Ginda ma yanindakngawam. Aho. Aminda waatdaka aakwakga nae nangaakan dua nataaing binga daknganingu Anututa amin panangge tasinggak kakngae gepbiatang yuaikat nana aminu unin.
LUK 18:17 Nata siakande siknga daninggat. Aminu tapatuta Anutue gepbiatang kopnangge natake ngana ie nangaakan natake waatdakata nataing binga dua natakengu undang kopnanga dua,” ngang yanikut.
LUK 18:18 Siwan take aminu tapatuta Jesu anzing inikwaikut, “Take siknga yanindamumsaapa. Na dasing tasike kayuk yutnanga aknga pake kayuk asinggan asinggan yuwit,” ngang inikwaikut.
LUK 18:19 Inikwaiwan yake anzing inikut, “Dasingge takeapa ngang naninggayak? Anutu awia tapatakan takeapa unin,” ngang inikut.
LUK 18:20 “Sike gata mama wamu atnataayak. Gata maya kukae kaitake masukuwim. Aminu ma zipim. Kukae ma papim. Amin notdae kemu ma yaniwim. Nangga minggae wam gwaamuke ie gepbiatang yuyo,” ngang inikut.
LUK 18:21 Iniwan natake yake anzing inikut, “Tapduknga waatdaka yukum komuneta apu apman ngangu mama wamu waaknga gwa tawamba sandekut,” ngang inikut.
LUK 18:22 Iniwan natake yake anzing inikut, “Ga sanga takngatuekan dapmanggayakge gata sangaapaka aminde yami usiwa manina pake sangaapana wena aminde yamuyo. Unzing tasiwinu take siknga kayuk yutnanga akngaka enandang yukgamuwawan gata apu na nawamso,” ngang inikut.
LUK 18:23 Iniwan natake ita musiane meya siknga natapbut. Dasingge? Ita sangana bambantapa.
LUK 18:24 Meya siknga natayuwawan kake anzing yakut, “Anututa amin panangge tasinggak kakngae gepbiatang kopnangge natake aminu sangana babanda kwatan siknga tasike kopning,” ngang yakut.
LUK 18:25 “Sike ikwawata tauk bupmakgane ganangiatang kopnanggengu ita kwatanu aminu sangana buyambamu kayata Anutue gepbiatang kopnangge tasining binga dua,” ngang yakut.
LUK 18:26 Yawan natake aminu kunduta anzing yaking, “Unzing kakengu mamin amin tapata kayuu asinggan asinggan yuwik,” ngang yawa
LUK 18:27 Jesuta anzing yanikut, “Sanga aminda atasiwa maiwiu Anututa atasiwik,” ngang yanikut.
LUK 18:28 Yaniwan natake Pitata anzing inikut, “Ninda yotnin gatu sanganin kuupbam peke ga gawakamangu ninda kopna maiwik ba dasing,” ngang inikwaikut.
LUK 18:29 Inikwaiwan yake anzing yanikut, “Nata siakande siknga daniwa natapnong. Aminbamu Anututa amin panangge tasinggak kakngae gepbiatang koyuwawa kayuwik kakngae natake yotna gatu maatna gatu minga gatu waaknga ngang pening.
LUK 18:30 Peke pasiwawa yake sanga buyambam siknga Anututa tapduk ayuamang kopatangu ayamuke masande kayuk asinggan asinggan yutnanga aknga ayamik,” ngang yanikut.
LUK 18:31 Siwan Jesuta kepiapane kusika pandetna katau kuut musaat kepianganu tapaaya papan pandetnaat iat gatake inatakan kuking. Kuke Jesuta anzing yanikut, “Wamu tupa siknga ayanikapsa aminda Anutue wamu kundu na aminbamdane notnae yaking kakngata tapduknga ninda Jerusalem kopnim gwekatang buya unin aawik.
LUK 18:32 Kopna aminu kunduta na tanggaganuke dongu kundune nana Anutue dua nataaing aminde yamuning. Yama take tasiak tasike wai wai pasike aapda sutnapbike
LUK 18:33 ipmapa nuke tasisikanga apmea nuwa kupit. Kungwake gunziu gweaat gwenduat kawa sandewana gatuna enawit,” ngang yanikut.
LUK 18:34 Yaniwan maakngita natapa ngana wamu waakngata kusopuwan musiaatang dasingga nininggak ngang natapbing.
LUK 18:35 Siwan kepiapane kusika Jeriko yot gapmane kundopnangge dapaknga sike kuwawa aminu tapatu kai kukgweat kusikumayau tapatuta upeeke yuke manie yayawake yusika kepi kwaimune pukwikut.
LUK 18:36 Pukwike natawawan aminbamda yapbitnangge apuyuk gakngat tasiwawa natake, “Mina tasikaing,” ngang yanikwaikut.
LUK 18:37 Yanikwaiwan, “Jesu Nasaret nana apata gapbitnangge kunggak,” ngang iniking.
LUK 18:38 Iniwa natake anzing yanggamatakut, “Jesu! Ga nindane buyambamtapa! Ga Devitdane dongune aakuyak kapa! Nae butaya natapso,” ngang yanggamatakut.
LUK 18:39 Yanggamatawan ngana tupan apbing aminda kaanga inike, “Maak” ngang iniking. Iniwa ngana waapasimda kumzang yanggamatakut, “Jesu! Ga nindane buyambamtapa! Devitdane dongune aakuyak kapa! Nae butaya natapso,” ngang yanggamatakut.
LUK 18:40 Yanggamatawan natake, “Apsok,” ngang Jesuta yakut.
LUK 18:41 Yawan apana, “Dasing tasinggamitde nataayak,” ngang inikwaikut. Inikwaiwan yake anzing inikut, “Buyambamtapa. Kaina take tasingamiyakge nataat,” ngang inikut.
LUK 18:42 Iniwan natake, “Kaika take siyok. Musipbaatang nae natapi kekekak kakngata gatanggaman kaikata take gwa sikamayak,” ngang inikut.
LUK 18:43 Iniwan zetgaman kaina kukgweat take siwat waapata Jesue masene tawakut. Tawayuk Anutu inimbakngawan aminbamda kake Anututane umana yatangenaking.
LUK 19:1 Siwan Jesuta Jeriko yot gapma kuyapbike kunangge tasiwawan aminu tapatu umana Sakias ngang inikaing.
LUK 19:2 Ita takis papsa amindane tupan tapa dakngake yuke ita sangana bamban tapa dakngake yuak.
LUK 19:3 Sike ita Jesu katak siknga kanangge natake ngana aminu dapakngae aminda umukusiwa Jesu kananga dua sikut.
LUK 19:4 Siwan tupan isapmake kuku katau dakatune Jesuta apan kanangge kopbut.
LUK 19:5 Koke yuwawan Jesuta inengan apuke enandang pakusang kake anzing inikut, “Sakias. Zetgaman epso. Apmanu gatane yotdane yutzimde nataat,” ngang inikut.
LUK 19:6 Iniwan zetgaman epuke musip gwaang natayuk Jesu tapan yotnane kopbumayak.
LUK 19:7 Siwan aminbamda unin kake sapdut wamu anzing yaking, “Ita paku waiaknga pasiya aminde yotnaatang yuwatakanangge kunggak,” ngang yaking.
LUK 19:8 Siwan Sakiasda dandam tangan yuke Jesu Buyambam tapa anzing inikut, “Buyambam tapa. Apmanu sangana usanzike kaukaut peke kautdu sangana wena aminde yamuke kautdu aminu kait tasiyuk payamukum aminde yake sipmaat sipmaat yamit,” ngang inikut.
LUK 19:9 Iniwan yake anzing inikut, “Unzing yawi natapa Anututa kayuk yutnanga akngana ginu you anggwenenana aminde daman pake yuaing ngang kaat,” ngang inikut. Inike anzing yakut, “Aminu waapata Ebrahamdane zakngi yuke bapunata Anutue wam natapan siakan sikut taknga tasike Ebrahamdane zakngi siknga daknganggak,” ngang yakut.
LUK 19:10 “Na aminbamdane notnaapa dakngake apuke kayuk yutnanga akngae asupeekaing amin yawake kake gatayamunangge apbum,” ngang yakut.
LUK 19:11 Siwan Jesuta Jerusalem wesim kundopan wamu wa natapbing aminda anzing natapbing. Apmaatzim siknga ba Anututa amin panangge tasinggak kakngata anggaman siwan kanim ngang natapbingge tuwang wamu takngatuat anzing yanikut,
LUK 19:12 “Aminu keu komdune nana amindane tupan siknga apata aminu umana kaya tapatu tewan buyambam tapa dakngake itane aminabam kayuwikge yatawamban kukut.
LUK 19:13 Yatawamban kunangge natake aminu waapata puya amina katau kuut musaat yayawamban apa manina 20 Kina aminu waakwakge inandek inandek yamutakuke ita anzing yanikut, ‘Mani a pake kuke puya pasike manisa isakoke pawawa nata kuke gatuna apit,’ ngang yanikut.
LUK 19:14 “Yanike kuwawan itane aminabamda aminu tupan siknga apae wamu anzing tewa kukut, ‘Ninu aminu waapata ninduwikge apbitakamang,’ ngang tewa kukut.
LUK 19:15 “Ngana wamu wa tewa apbut takngae dua natake aminu waapa tewan ita buyambam tapa dakngakut. Dakngake ita masande gatu apuke anzing yakut, ‘Aminu tupa nata mani yamukumu yayawamba apuke yawa natapa. Mani yamukumu puya pasike isakoke datdasingga aminu kuupbamda paking,’ ngang yakut.
LUK 19:16 “Yawan aminu tupan apbut tapata anzing inikut, ‘Buyambam tapa. Nata manika 20 Kina namukuyakga puya pasike isakoke 200 Kina gwa pakum,’ ngang inikut.
LUK 19:17 “Iniwan ita anzing inikut, ‘Ga puya aminu take siknga. Ge puya nomana tasike sanga mateu gata katak siknga kayuakge nata ganiwa yotbamu katau kuut musaat gapma gapmae buyambam tapa dakngake kayuyo,’ ngang inikut.
LUK 19:18 “Siwan masan tapata apu anzing inikut, ‘Buyambam tapa. 20 Kina namukuyakga puya pasike isakoke 100 Kina gwa pakum,’ ngang inikut.
LUK 19:19 “Iniwan anzing inikut, ‘Nata gapmaba yotbamu katau kautdu musakan gapma gapmae buyambam tapa dakngake yuyo,’ ngang inikut.
LUK 19:20 “Siwan tapatuta apu anzing inikut, ‘Buyambam tapa. Gatane 20 Kina ana yuaing. Nata tauk pipitda wamandakngake penggamukum.
LUK 19:21 Dasingge? Nata gandupa ga toknga amin singgayak. Sanga aminu kunduta peaingu gata apanggayak. Sike nanamu kunduta kwaikaingu apanggayakge na gae akgwaukum,’ ngang inikut.
LUK 19:22 “Iniwan yake anzing inikut, ‘Ga puya aminu wai siknga. Gikane wambata yawi usanzikgamit. Ga siakande siknga. Na tokngaapa ngang natayak. Sike sanga aminu kunduta peaingu nata wa apake nanamu kunduta kwaikaingu nata apanggat ngang natake yayak.
LUK 19:23 Sike dasingge natane manina mani yot gwekatangu dua pekuyak? Siwan nata gatuna apuke natane manina isakoke penikat papam,’ ngang inikut.
LUK 19:24 “Inike ita aminu inengan yukingu anzing yanikut, ‘Ginda 20 Kina wa sandekngamuke aminu 200 Kinana kaya apae imunong,’ ngang yanikut.
LUK 19:25 “Yaniwan yake anzing iniking, ‘Buyambam tapa. Aminu waapa 200 Kina kaya,’ ngang yawa
LUK 19:26 ita anzing yakut, ‘Nata daniwa natapnong. Aminu kuupbamda sanga paningu nata kunduat ayamit. Sike aminu tapatuta sanga dua pake mateknga unukan papiu nata wa asandekngamit,’ ngang yakut.
LUK 19:27 ‘Sike natane iwanata na buyambam tapa dakngawitde apbitakingu ginda ane kaipakapu kainane zipa kumbut,’ ngang yanikut.” Ngang Jesuta tuwang wamu waaknga unzing yanikut.
LUK 19:28 Siwan Jesuta wamu waaknga yanikenga ita gamok Jerusalem gapmane kopnangge kopbut.
LUK 19:29 Kosika you Betfasiat gatu Betani gapmaatda tawanu Oliv daka gepbine yuamayak gapmaune kundoke ita pandetna tapaaya yanipewan kusande natake anzing yanikut,
LUK 19:30 “Gitda you atunggapma yuaune kuke kaawat ikwawa gamanu gubanga gwendu tupa aminu tapatuta dua pukwikut gwenu napda tewatanguwan wamateinga kake waike takapzon ngang yanikut.
LUK 19:31 Sike aminu tapatuta, ‘Dasingge ikwawa gamanu wagwenu waikamayak,’ ngang danikwaiwanu gitda anzing inison, ‘Buyambam tapata anggwende puya kaya,’ ngang inison,” ngang yanikut.
LUK 19:32 Yanikenga yanipewan kuke waapatda sangabamu Jesuta yanikut binga kakumayak.
LUK 19:33 Kake ikwawa gaman wamatekinggane nap taknga awaiwawat toikngata waapaau anzing yaniking, “Dasingge gitda ikwawa gamanu wagwenu waikamayak,” ngang yaniking.
LUK 19:34 Yaniwa, “Buyambam tapata anggwende puya kaya,” ngang yanikumayak.
LUK 19:35 Yaniwat, “Take,” ngang yaniwa ikwawa gamanu wagwenu Jesue takapuke tauknga kundu ikwawa gamande maseapane pewat Jesuta engatangan koke pukwikut.
LUK 19:36 Pukwike ikwawa gamanu wagwene yuke kuwawan Buyambam tapana initakuningge natake aminbamda got tauknga kepiapane usiking.
LUK 19:37 Ita Jerusalem gapma inengan apuke kepi kautdu tawanu Oliv daka saak teke pukunangge siking. Siwan pandetna kuupbamu apbakngake Jesuta duya kuupbamu tasiwan kakingge natake apaa yake Anutue umana yatangenaking.
LUK 19:38 Yatangenayuk anzing yaking, “Anutue nindane Buyambam tapaninda initewan takeapanin dakngake apunggak kapae inimbakngakamang. Enandang nana aminda musip kwikwik pake yutnong. Yuwawa enane yuak kapatane umana enane siknga tangenatna,” ngang yaking.
LUK 19:39 Siwan Ferisi aminu kundu aminu buyambamu wa yukingge banakan katang yukinga Jesu anzing iniking, “Yanindamusaapa. Pandetda gata kaanga yaniyo,” ngang iniking.
LUK 19:40 Iniwa ita yake anzing yanikut, “Nata daniwa natapnong. Aminu aakwakga gena umukusiwa suu anggwegwenda apme danining,” ngang yanikut.
LUK 19:41 Jesuta kepiapane Jerusalem kake kepi banakan kwanam sikut. Une nana aminde natake meya siknga natake kwanam sikut.
LUK 19:42 Kwanam sike anzing yakut, “Apmau ginda banip kwikwik nataaing gamu atawambam ngana ginda dua kaaing. Tapduknga Anututa gatandamunangge apu yutdamukut gwende ginu dua natapbing. Dua nataaingge Anututa yawan apmea meya takngatuta ginde apik.
LUK 19:43 Apan amak aminda gapma kwaiwa kumbasiwan undang kusopuke kepisa umuke dasipning.
LUK 19:44 Dasipmake ginu maya wawi waatdaka kuupbam dasipa puyuwik. Dasipa puyuwan yotza waipamaba kuwa wena siwik. Siwan ginu Anututa gatandamikge tapduknga atnatake tasiking gamu meya unzing dua papam,” ngang yakut.
LUK 19:45 Yakenga Jesuta Jerusalem kundoke Anutue yot takwan gwene kopbut. Koke kawawan aminbamu mani kaitnangge tasiwawa kake yanikwasiyuk anzing yanikut,
LUK 19:46 “Anutue buk gopatang anzing yakut, ‘Natane yot gwenu tumuk wam yaningge yot ngang yaning,’ ngang yakut ngana ginda tasiwa kuka aminde yot gwen binga daknganggak,” ngang yanikut.
LUK 19:47 Sike asinggan kosangayuk Jesuta Anutue yot takwan gwene koke yanindamukut. Yanindamuwawan ngana Anutue yot takwan gwene pasiya amindane takeakwakat Mosesde mama wam yanindamumsa amikat Judia amindane take akwakngaatda Jesu tanguwa kupikge kepi tawaking.
LUK 19:48 Tanguwa kupikge kepi tawawawa ngana Jesuta yawan aminbamda wa yakut taknga natapnangge take siknga natapbing. Unzingge aminu waakwau Jesu tangutningge kepi wena sikut. Zagwak kuke tangutnim ngang natake apmeptaking.
LUK 20:1 Tapduu gwendune Jesuta Anututane yot takwan gwene koke aminbamu wamu takeaknga ngang yaniwawan Anututane yot takwan gwene pasiya amindane takeakwakat gatu mama wam yanindamumsa amikat gatu Judia amindane take amin takwakatda ie apbing.
LUK 20:2 Apuke anzing iniking, “Gata ninu niniwi natapnim. Puya waaknga maminda ga tapan puya waaknga pasinggayak,” ngang inikwaiwa kunduta, “Mamin tapata ganitewan apu pasinggayak,” ngang iniking.
LUK 20:3 Iniwa yake anzing yanikut, “Nataya wamu takngatu gin danikwaiwa ginda naniwa natapit,” ngang yake anzing yakut,
LUK 20:4 “Jonda yangga sauyamukut taknga enandang nanae sanga ba aminde sanga ba dasing,” ngang yanikwaikut.
LUK 20:5 Yanikwaiwan natake ina anzing yaking, “Ninda, ‘Sanga enandang nana,’ ngang yananu, ‘Dasingge ginu wamu waakngae siakan ngang dua natapbing,’ ngang niniwik.
LUK 20:6 Sike gatu, ‘Amindane sanga,’ ngang dua yanim. Aminbamda, ‘Jonde ayanikapsa,’ ngang natake banip sikaing aminda supda ninu nisipnang,” ngang yaking.
LUK 20:7 Unzingge Jesu yake anzing iniking, “Ninu Jonda yangga zopatangga sauyamukutde apbotakamang,” ngang iniking.
LUK 20:8 Iniwa Jesuta anzing yanikut, “Nakaya ginu puya waaknga na maminda tapan apu pasinggatde dua daniwit,” ngang yanikut.
LUK 20:9 Siwan Jesuta tuwang wamu aminbamu anzing yanikut, “Aminu tapatuta wain tapunde puyana tangatu kwaipeke ita aminu kundue kataune yaman kayukngamuwawa buya aawa deke usanzike kautdu gisae pake kautdu ninae namunong ngang yanike ita keu maa siknga komdune kukut.
LUK 20:10 Kuke yuwawan wain tapun detnanga tapduknga gwa siwan natake ita puya amina tapatu initewan kukut. Kuke aminu puya wa pasingamukaingge kuwan wain tapunu kundu ie ima pakapikge natake initewan kuwan ngana wa aminda enake waapasimu atanguke moo siknga ngang inikwasiwa kukut.
LUK 20:11 Siwan gatu puya amina tapatuat initewan kuwan ngana waapaya tanguke tasiwa maiwan moo siknga ngang inikwasiwa kukut.
LUK 20:12 Siwan gatu tapatuat initewan kuwan ngana waapaya kuut tanguke kepman mutewa epu kukut,” ngang yanikut.
LUK 20:13 “Unzing tasiwa kake puya toikga anzing yakut, ‘Nata dasing tasiwit? Natane waakngae musip gwaang nataat tapa initewa kuwan kake ie wamu apme ba natapning,’ ngang yakut.
LUK 20:14 “Sike puyanae pasingamukaingga kawawa waakngata kuwan kake ina anzing yaking, ‘Aminu aapata masande nanatane kwatangi kuupbam papik kapata apunggak. Tangutna kupan puyaanga nisae tana,’ ngang yake
LUK 20:15 waaknga waapa take puyaanga kepman muba kuwan tangutapa kumbut. “Tangutapa kupan natake wain tapunde puya toikga aminu waakwakge dasing tasiwik,” ngang Jesuta yanikwaikut. Yanikwaike gatu anzing yanikut,
LUK 20:16 “Ita apu puya pasikaing aminu waakwau atzipa kupa wain tapunde puya waanga aminu kundue ba yamik,” ngang yawan natake, “Ye! Wai yanggak,” ngang yaking.
LUK 20:17 Yawa natake Jesuta wa amin kanggamatake yake anzing yanikut, “Unzing yakaingge danikwaiwit. Wamu takngatu Anututane wapatang anzing matakut, ‘Suu gwendu yot mitapsa aminda kake wai pupuknga ngang yake mutewa kukuu wagwenu yotde tepa kusiwan yot gwen tapan kekekanggak,’ ngang matakutde yapii dasing,” ngang yanikut.
LUK 20:18 “Siwan aminu tapatuta yotdane sanga waapane pimakengu gupna atdakngawik. Sike sanga waapata apimake aminu tapatu gatukande zipmakapik,” ngang yanikut.
LUK 20:19 Yaniwan natake mama wam yanindamumsa amikat Anutue yot takwan gwene pasiya amikatde Jesuta tuwang wamu waaknga nisae yanggak ngang natake zetgaman Jesu tanggaganutnangge tasike ngana gatu aminbamde akgwauking.
LUK 20:20 Jesu tanggaganutnangge natake ie kayuke aminu kundu yanipewa kuku wepda kaking. Kake ninu aminu nomana ngang yake i inane wamde tanggaganuke kiau buyambam tapae katakngine imunangge natake tasiking.
LUK 20:21 Tasike anzing inikwaiking, “Yanindamusaapa. Ninda natapna gatane wamu siakan singgak. Siwan gata wamu noman gan yanindamuke yawa naninang ngang natake dua gwaukgayak. Wena. Gata sanga wamu siakan gan yanindamukgayak,” ngang iniking.
LUK 20:22 “Sike gata dasing nataayak? Ninu Judia nana aminda gavmanu Sisae takis mani imukengu ninda Anutue mama wam sandetnim ba dasing,” ngang inikwaiking.
LUK 20:23 Inikwaiwa ngana kemu wa tasiking kaknga gwa kake yake anzing yanikut,
LUK 20:24 “Mani sandu nae yeukngama kawa,” ngang yawan yeukngama kake, “Mani asanu weenaat gatu umanaau mamindane matakingga kaaing,” ngang yanikwaiwan, “Sisatane,” ngang yaking.
LUK 20:25 Yawa anzing yanikut, “Sisatane sanga Sisae imuke Anututane sanga Anutue imunong,” ngang yanikut.
LUK 20:26 Ngang wamu waaknga ngang yaniwan natake aminbamdane kaine tanggaganutnangge apmeptaking. Wamu wa yake yanikut takngae nangaakan natake gena umukusike kuma yuking.
LUK 20:27 Siwan aminu akungwakengu uyunga dua enakaing ngang yaya aminu Sadyusi ngang yanikaing. Siwan Sadyusi aminu wa kunduta Jesue kuke anzing inikwaiking,
LUK 20:28 “Yanindamumsaapa. Mosesda ninde baminde wamu takngatu tupa siknga anzing matakut, ‘Aminu tapatuta maatna take ngana waaknga wena siwan yusika akupanu itane uyapnata maya kombakobau waapa maatnae tapsok. Take paanae tangge waaknga tangamuyok,’ ngang matanimukut takngae natake ganikwaitnangge nataamang.
LUK 20:29 Aminu nana tapatukandane waaknga inaakwau katau kautdu musa gatu kautdu tapaaya ngang yuainga paana tupan tapata maatna take ngana waaknga wena siwan yusika moo kumbut. Siwan masan tapataya ina unzakan moo siknga takut.
LUK 20:30 Siwan uyapna banakan tapataaya kuut unzakan tasikut.
LUK 20:31 Siwan aminu katau kuut musa kautduanganu tapaaya ngangu aminu waakwakga ina unzakan maya waapa take ngana waaknga dua pake yusika kuupbamda akumbing.
LUK 20:32 Siwan masande maya waapa kuut akumbut.
LUK 20:33 Sike tapduknga akupsa aminda enatning gwekatangu maya waapa aminu katau kuut musa kautdu tapaata takingge gatu enakengu mamindane maatna dakngawik,” ngang iniking.
LUK 20:34 Iniwa yake anzing yanikut, “Aminbamu tapduu ayuamang komune nana aminda maatna apakaing.
LUK 20:35 Sike Anututa kapewan enake masande kayuk yutningu maatnae ba apnae dua kuning.
LUK 20:36 Aminu waakwau Anututa yawan enake Anutue waaknga siknga dakngake angelata asinggan asinggan yuaing binga yuke gatu dua kumning.
LUK 20:37 Sike akupsa aminda enakaing ngang natapnimde Mosesda yeutnimukut. Wamu katau mateknga dakasimu katapda isiwan kakutde matakut takngaatang Mosesda anzing yakut, ‘Anutu Ebrahampat Aisakat Jekopatdane Anutuna,’ ngang yakut.
LUK 20:38 Siwan ngana Anutu akupsa amindane Anutuna dua. Wena. Ita Anutu kayuk yuaing amindane Anutuna. Unzingge Anutu inimbakngake kayuk yuaing amindane yapiina unin,” ngang yanikut.
LUK 20:39 Yaniwan natake mama wam yanindamumsa aminu kunduta akgwauke yakwaik wamu takngatuat inikwaitnangge apmeptake anzing iniking, “Yanindamumsaapa. Gata noman siknga yanggayak,” ngang iniking.
LUK 20:41 Iniwa natake anzing yanikut, “Dasingge aminu, ‘Anututa tapan Krais dakngake yuak kapa Devitdane dongune aakut tapa,’ ngang yakaing ngang papatekwa wam yanikut.
LUK 20:42 Sike Devitda miti kap matanangge natake anzing matakut, ‘Buyambam tapata natane Buyambam tapana anzing inikut, “Gata umanda kayaapa dakngake yuayakge natane kataknga siya apane pukwiyo,” ngang inikut.
LUK 20:43 “Enane siknga yuke pukwiwawi nata iwanda panggaganuke pewa gae gepbiatang koyutning,” ngang inikut,’ ngang Devitda matakut.
LUK 20:44 Sike Devitda Buyambam tapana ngang ie yakut ngana ginda dasingge ita Devitda Buyambam tapa ngang dua yake ita Devitdane dongune aakut tapa ngang yakaing,” ngang yanikut.
LUK 20:45 Siwan aminbamda yuke Jesue wam natake yuwawa pandetna anzing yanikut,
LUK 20:46 “Ginu mama wam yanindamumsa aminde gwautnong. Mama wam yanindamumsaa aminu waakwau tauknga mamaya siknga buyambam tapaapata binga wamake kuwa kake aminda gaak wam yaniningge take nataaing. Take natake miti yot gwene koke aminde nomune pukwitnangge nataaing. Siwan gatu aminbampat unekan gatake nanam nananggengu sia tupan dakanekan pukwike yuwawa umana pangenatningge nataaing.
LUK 20:47 Aminu waakwakga maya kombakobatde nin binga dua ngang natake kait pasiyuk yotna pake tumuk wamu mamaya siknga waiakngana usikwatapikge kem yakaingga meya buyambam siknga paning,” ngang yanikut.
LUK 21:1 Yanike Jesuta yuke katakuwawan aminu sangabamna kaya aminda kuke manina Anutue imunangge natake apu manina pukwit gwekatang pamuking.
LUK 21:2 Pamuwawa kawawan maya kombakobau sangana wena tapatuta apuke manina mateknga gamana saasimban pamukut.
LUK 21:3 Pamuban kake anzing yakut, “Nata ginu siakande siknga daninggat. Aminbamu manina kwaapzang ngana akotnake mateknga sikngakan pakapu Anutue imukaing. Sike maya kombakobau waapata asiknga dapmake ngana manina kuupbam muban sangaapana wena siwan wa pamukaing aminu kuupbam ayapbikgak,” ngang yanikut.
LUK 21:5 Aminu kunduta Anututane yot takwan gwen kake suu inata kundu mitapbingu kake sangana aminbamda Anutue imukingu pake tasigwangukinga kake yawawa natake Jesuta anzing yanikut,
LUK 21:6 “Sangabamu ayuwa ginda kaaingu tapduu gwendune amak aminda suu gwendu dua katewa sup notna gwendune engetanganu dua yuwik. Kuupbam zipbuke muba pimaning,” ngang yanikut.
LUK 21:7 Ngang yaniwan natake kunduta anzing inikwaiking, “Yanindamusaapa. Tapduu zagwene sanga wa yanggayakge tuwangu zaakngata siwan kake wamu wa yanggayak kaknga buya gwa aatnanggenggak ngangu natapnim,” ngang iniking.
LUK 21:8 Iniwa yake anzing yanikut, “Ginu katak siknga gwautnong. Aminda kem daninang. Aminu tapatuta enake, ‘Natane umana Krais gatandamuyaapa,’ ngang yake anzing yawik, ‘Na aminu waapanin,’ ngang yawik. Gatu kunduta, ‘Tapduu dapaknga gwa singgak,’ ngang yaning. Ina unzakan sipdu sipdune aminu tapatu tapatuta enake kem wamu waakngakan yaning. Ina unzakan tasitakuwawa aminbamda kem wamu waaknga natapa siakan siwik. Siwan ginu wa aminu kuku ma yawambam.
LUK 21:9 Ginda nataawa aminbamda undang amakaing ba undang ainggamatakaing ngang yawawa natapning. Siwan ngana ginu natake wena siwik kakngatane tuwang unin dua. Aho. Sanga waakngata tupan gamok apana masande tapduknga wenga gwenu asapik,” ngang yanikut.
LUK 21:10 “Aminu kunduta enake amau aminu kunduat tasiwawa keu komdune nana amikat keu komdunenana amikatda amning.
LUK 21:11 Sike miyamunu buyambam siknga kepna kepna siwawan keu komduine nana aminda tomda yuwawa aminbamda maitbam sining. Sike enandang pakusang kawawa tuwanga inata siknga kundu sike inata inata siwa kake ginu akgwautning,” ngang yanikut.
LUK 21:12 “Sanga wa kuupbam dua apik gwekatang aminda ginu panggaganuke dasipmake pasiwa maining. Pasiwa maiwa ginu miti yot katang pakopa wam yake kaaut yot katang dapmaning. Dapmake natane uman takngata pimapikge ginu kaipake aminu buyambamde kaine wam yaningge pakuning.
LUK 21:13 Sike tapduu waomune ginda nae wam yaniningge kepi unin dakngawik.
LUK 21:14 Unzingge wamu ayaninanga aknga dua natagwangutnim ngang banipzaatang natapa kekekayok.
LUK 21:15 Sike ninae wamu genzane yakapmake natdetdet nomana damit. Dama natake yaniwawa gindane iwanzata yaitapaakusinangge apmeptake ginde wamu sapdutnangge apmeptaning.
LUK 21:16 Siwan nanza mingza gatu notza gatu mingza buyakanda iwanza yaniwa apu pake kundu ginde banakan zipa kumning.
LUK 21:17 Siwan natane umana ginda atake yuwawa natake aminu kuupbamda ginde semna siknga natandamuning
LUK 21:18 ngana gindane gupza dua pasiwa maiwa gwapak danggamza takngatusipaya wena sinanga dua.
LUK 21:19 Siwan ginda kekeknga yukengu kayuk yutnanga akngasa gatusa ataning,” ngang yanikut.
LUK 21:20 “Siwan masande kawawa amak aminda apu Jerusalem yot gapma yupbasiwawa kake ginda yotbam gapma tasiwa maiwikge dapaknga gwa singgak ngang natapnong.
LUK 21:21 Tapduu wagwene aminu Judia kep komune yuaingu datang tawan dakane kopnong. Gatu kundu Jerusalem gapmaatang yuaingu epu keu komdune datakunong. Gatu kepman saak yuaingu kumnangge yot gapmaatangu ma kopam.
LUK 21:22 Tapduu wagwene waiaknganae Anututa yake yaman wamu ie Anututane buk gopatang tupa siknga matakingu buya unin aawik.
LUK 21:23 Sike maya waak musipna kaya gatu maya waakngae ngwamna yamukaingge butaya siknga. Anututane musia toknga akngana Judia kep komune nana aminda kake wai siknga yutning.
LUK 21:24 Sike paiu gena tokngata zipmake aminu dongu kundune nana Anutue dua nataaingga panggaganuke kaipaku kepna kepna pening. Sike wa aminda Jerusalem yot gapma waitdeke yainggamuke yuwawa tapduknga iwaninu waakwakga kekeknga yutning gwenu kawa sandewana teke kuning,” ngang yanikut.
LUK 21:25 “Siwan gunzitkat yekap gwekat yekapdaakatda inata siknga kundu siwawa yanggabam gwenda sambuya enake gakngatbam siwawan kake aminbamu kepna kepna yuaing aminda akgwauke nangaakan natapning.
LUK 21:26 Sike sanga kepdakane apnangge siwan kake aminbamda akgwauke wai siknga yuwawa yekapdaakat sanga enandang nanaatda saa siwawa kake kumnangge kagwautning.
LUK 21:27 Kagwauke yuwawa na aminbamdane notna apata umana buyambam siknga siwan kekekngana buyambam siknga aknganane yuke minga musatune yuke epa nandugwautning.
LUK 21:28 Siwan masande sanga wa tuwanguke siwawanu ginu yuke pakusang kanong. Anututa iwanza zipmake yawamban kuwa ginu sandeke papik kakngata apikge unin singgak ngang natapnong,” ngang yanikut.
LUK 21:29 Siwan Jesuta tuwang wamu takngatu anzing yanikut, “Ginda katau baapdakaat gatu katau inata kunduatde kanong.
LUK 21:30 Kawa tatakngi kayukga akopan kakengu ginu Judia nana aminda gunzitda isiwikge tapduknga gwa singgak ngang asinggan yakaing.
LUK 21:31 Sike ina unzakan. Sanga wa kakengu tapduknga Anututa amin panangge tasinggak kakngata apnangge dapaknga gwa singgak ngang natapnong.
LUK 21:32 “Nata siakande siknga daninggat. Aminbamu tapduk ayuamang komune nana aminda dua kumning gwekatangu sanga wa kuupbam buya aawan kaning.
LUK 21:33 Sanga kuupbam ena kakaa banakan komune yuaikat gatu kepdakane nana kuut wena sinanga ngana natane wamu wena dua siwik,” ngang yanikut.
LUK 21:34 “Sike ginu katak siknga gwautnong. Ginu yumdekan asinggan tangoke datdaptake gupdane sangae nangaakan natapnang. Sanga waakngae natanggamatawanu tapduknga nata gatuna apit gwekatangu bungepda kaau zetgaman zipmakaing binga nata apit.
LUK 21:35 Tapduknga wagwenu aminbamu kepna kepnanana kuupbamde apik.
LUK 21:36 Ginda tapduk tapduk asinggan tandakngake Anutue tumuk wam iniwa natake ginde kekeknga akngana daman ginda sangabamu wa apiu yapbike na aminbamdane notna apae nomune take siknga yutning,” ngang yanikut.
LUK 21:37 Siwan tapduk bamu Jesuta Anututane yot takwan gwene pakoke yanindamukut. Sike zikaane ita tawanu Oliv ngang inikaing dakane sipdu sipdu kokakut.
LUK 21:38 Sike aminbamda tembana siknga enake Anutue yot takwan gwene Jesue wam natapnangge kuking.
LUK 22:1 Siwan tapduknga poyau dua paptawan sake nakaing gwenu Pasova ngang yakaing gwenda dapakakut.
LUK 22:2 Dapakawan Anututane yot takwan gwene pasiya amikat mama wam yanindamumsa amikatda aminbamde gwauke anzing yaking. Ninda Jesu dasing tasike tangutnim ngang yaking.
LUK 22:3 Siwan aminu tapatu umana Judas Iskeriot yot gapmane nana ngang inikaingu waapa Jesutane pandetna 12-pat nana tapatu ngana Setenda musia tangenakut.
LUK 22:4 Tangenawan ita Anututane yot takwan gwene pasiya amindane takeakwakat gatu yot takwanu wa gwende kayuya amikatde kuke wamu yatapatakawan Jesu yeuyamikge natake kuke yanikut.
LUK 22:5 Kuke wamu yawan kekekawan mani kundu imunangge yaking.
LUK 22:6 Yawa Judasda take ngang yanike kepi takngatu kake Jesu yeuyamunangge tasike tapduu gwendune aminbampat dua yutning gwekatang yeuyamunangge natapbut.
LUK 22:7 Tapduknga poyau dua paptaya nakaing kopatangu Pasova yuwatakak tapduk takwan gwende natake sipsip matek zipmanangge dapaknga gwa siwana Jesuta Pitaat Jonkat anzing yanikut,
LUK 22:8 “Gitda kuke Pasova tapduk gwende nanam nanimde tandakngawat ninda undang nanim,” ngang yanikut.
LUK 22:9 Yaniwan waapaatda anzing inikumayak, “Gata nitda zane tandakngasimde natayak,” ngang inikwaiwat
LUK 22:10 yake anzing yanikut, “Natapzon. Gitda yot gapmane kuwawat wawi tapatuta yangga gapma gwene zike gwaamutakapuwawan kake gitda waapa tawake kuku you ita kopik gwekatang kopzon.
LUK 22:11 Koke yot toikge anzing inison, ‘Yanindamumsa apata you gwendu naat pandetnaatda Pasova tapduk takwan gwende natake nanam nanimde yot gwenu katekuyau zandang yuak,’ ngang waaknga inison.
LUK 22:12 Iniwat you buyambamu gwendu enandang yuak gwene tebol gatu siana kaya gwendu yeutdaman gitda nanaminu undang tandakngason,” ngang yanike yanipewan kukumayak.
LUK 22:13 Yanipewan kuke sanga Jesuta ayanikut binga kake undang tapduk takwanu wagwende nanam naningge tandakngakumayak.
LUK 22:14 Tandakngawat puyuwana tapduknga atnananga siwan pandetnaat iatda tebol dakane apukwiking.
LUK 22:15 Apukwike ita anzing yanikut, “Nata toknga apmea papit takngae natake apmanu Pasova tapduk gwendane nanamu gikat gamok nanangge take siknga nataat.
LUK 22:16 Nata ginu daniwa natapnong. Nata nanamu tapduk anggwendane gatu dua nake yusika kuku tapduknga Anututa amin panangge tasinggak kakngata buya aawik gwenea sanga a tasikamang kakngatane buya siknga aawana gatuna napit,” ngang yanikut.
LUK 22:17 Yanike kau yanggana kaya gomdu take Anutue inimbakngakenga anzing yanikut, “Ginu a pake tangotakunong.
LUK 22:18 Nata ginu daniwa natapnong. Apman gatu masande ngangu nata wain taknga gikat dua tangoke yusika kuku tapduknga Anututa amin panangge tasinggak kaknga buya aawik gwene gatuna tangopit,” ngang yanikut.
LUK 22:19 Yanikenga poyak pake Anutue inimbakngake apuke pandetnae yamuke anzing yanikut, “Sanga a kake ginda natane gupma ngang natapnong. Nata gin gatandamunangge natake gupma Anutue imit takngae natake poyau wa nayuk naekan natanggamatanong,” ngang yanikut.
LUK 22:20 Yaniwan napa puyuwana kau wain yangga atangopbing gomune tukngwamban pukuwan gatu ina unzakan yamuke anzing yanikut, “Kau anggomune wain yangga aknga Anututa wam kwikwik gatu yawan nomatawan kekekawikgane tuwangu unin. Nata gatandamunangge natake ginde tangge kungwandamuke daknga tukngwaba wamu waaknga kekekawik.
LUK 22:21 Sike kanong. Aminu na iwanae yeuyamik kapata naat pukwike nakamak.
LUK 22:22 Na aminbamdane notnaapa dakngake Anututa nanitewan kupitde apbum ngana aminu waapa iwanae yeuyamik kapata toknga siknga papik,” ngang yanikut.
LUK 22:23 Ngang yaniwan natake ina anzing yatakuking, “Nikatnana mamin tapataka sanga waaknga tasiwikge yanggak,” ngang yaking.
LUK 22:24 Siwan pandetnata wamu takngatu tangenake ie yanganuke anzing yaking, “Nikatnana mamin tapata tupan tapa dakngake ninde yuak,” ngang yaking.
LUK 22:25 Yawawa ngana Jesuta anzing yanikut, “Kepna kepnanana amindane buyambam takwakga kekekngana kaya amin dakngake kayuke kepina tanomanuwawa gatanimukaing takwak ngang yakaing.
LUK 22:26 Sike ginu unzingu tasinanga dua. Wena. Aminu tapatuta ginde buyambam tapa yukengu ita umana wena waatdaka binga dakngayok. Siwan gindane aminu tupan tapasa puya amin binga dakngake gatandamunangge yuyok.
LUK 22:27 Maminda buyambam tapa? Nanam nanangge pukwikgak kapanin ba puya aminda nanam zike pakapu imunggak kapanin? Aminu wa nanam nanangge pukwiwiu waapatakan buyambam tapa. Ngana na gin banakan puya amin dakngake gatandamunanga apata yuat.
LUK 22:28 Tupa nae meya takngatu takngatu apuwawa kake ngana ginu pandetnata dua napmake kuking.
LUK 22:29 Siwan Nanata amin panangge tasinggak kakngae puya nae gwa namukutde ina unzakan. Nata gin dapmaba ginda
LUK 22:30 nata kekekngaapa dakngake tasiwit kopatang naat nake tangopnim. Sike ginda Isrel nana amindane dongu katau kuut musaat kepianganu takngaat aminbam usanziya amin dakngake pasining,” ngang yanikut.
LUK 22:31 “Saimon! Saimon! Gata natapso! Setenda gin tasiwan siningge gwa yawan natake Anututa katekut. Unzing gotda nanamdane ooya puyapakuuwan buyata ayuaing binga gin pasiwan siningge yakut.
LUK 22:32 Ita yawan katewan ngana nata tumuk wamu ga gatanggamikge gwa yat. Gata Anutue natapi kekeknga singgak kakngata wena siyak. Siwan masande ga tapi tekwamban apuke gata notda papi kekekanong,” ngang iniwan,
LUK 22:33 “Apa! Aana. Nata kaautde gaat kusimde na gwa tandakngake gatu gaat kuut kumzimde kuut tandakngat,” ngang inikut.
LUK 22:34 Iniwan yake anzing inikut, “Pita. Nata ganiwa natapso. Apmanu zikaa anggwene taakga sipmaat sipduat dua yawawan gata na Jesue dua nataat ngang yawiyak,” ngang inikut.
LUK 22:35 Siwan Jesuta anzing yanikut, “Tupa nata danipewa kuke manisa ba yakza ba kepi taukza dua pake tapduu wa kuking kopatangu sangae atdapbing ba dasing,” ngang yaniwan, “Wena,” ngang yaking.
LUK 22:36 “Sike apmanu aminu tapatu mani yak gwenzimna kaya kakengu apake yakza siknga kuut panong. Sike aminu tapatu paipna wena kakengu got taukza aminde yama usike mani dama pake paipza usinong,” ngang yanikut.
LUK 22:37 “Dasingge? Tupa siknga ngang yakapsa aminda anzing matakut, ‘Iat wai amikat unekan zipbing,’ ngang matakutde nata daniwa natapnong. Wamu waaknga sanga nata papanu buya siknga unin aawik. Sike wamu kuupbam nae Anututane wapatang matakuu apmanu buya unin aatnanggenggak,” ngang yanikut.
LUK 22:38 Yaniwan, “Aanin. Gata kayo. Ninu paipminu dakaana kaya ana,” ngang iniwa, “Take,” ngang yanikut.
LUK 22:39 Siwan Jesuta kepman epu kuke tawanu Oliv dakane kopbut. Unzing asinggan tasinggak kaknga tawake kowawan pandetnata kuku tawaking.
LUK 22:40 Siwan kusika keu wa komune kundokenga anzing yanikut, “Ginda tumuk wam yanong. Sanga gin pasiwa sinangata ginde apsak,” ngang yanikut.
LUK 22:41 Ngang yanike peke kundusim kuke muna puke tumuk wamu anzing yakut,
LUK 22:42 “Nana. Gata take natakengu meya wa kawit taknga sandekngamuyo ngana gata nae banip ma tawambim. Aho. Gikae banip tawamso,” ngang yawana
LUK 22:43 angela enandangnana tapatuta anggaman sike kakekangamukut.
LUK 22:44 Kekekangamuke yuwawan Jesuta meya siknga natake tumuk wamu kekeknga siknga yanggamatawawan itane nepgamanda dakga binga kepdakane pimaking.
LUK 22:45 Pimawawa wamu yawan puyuwana gatu dandam tangan yuke pandetnae gatu apuke kawan musia meya natake dapuna pekgawa kakut.
LUK 22:46 Kake ita anzing yanikut, “Dasingge ginu pekaing? Enake ginu tumuk wam yanong. Sanga gin pasiwa sinangata ginde apsak,” ngang yanikut.
LUK 22:47 Siwan Jesuta wamu waaknga ayayuwawan pandetna 12-pat nana tapatu Judasda aminbam papan iat gatake ita tupan apu inengan Jesuta yukut komune apu gaak wam ininangge apbut.
LUK 22:48 Inengan apan ngana Jesuta anzing inikut, “Judas. Gata na aminbamdane notnaapa gaak wam nanike iwanae yeuyamunangge apunggayak ba dasing,” ngang inikut.
LUK 22:49 Sike pandetna Jesuat gatake yukingga sanga wa kake anzing yaking, “Aanin. Gata take ngang yawinu ninda paipda zipna,” ngang yake
LUK 22:50 pandetna tapatuta Anutue yot takwan gwene pasiya amindane tupan tapatane puya amina tapatu paipda maakngi siya saaknana daka apatdewan pimakut.
LUK 22:51 Patdewan pimapan kake, “Tenong,” ngang Jesuta yanike aminu waapae maakngine katakngita gatuna wasiwan take sikut.
LUK 22:52 Siwan Jesuta Anutue yot takwan gwene pasiya amindane tupan takwakat gatu yot takwan gwen kayuya amikat gatu Judia amindane take akwakat wa apuke tanggaganutnangge apbingu anzing yanikut, “Asikaya ginu paip gatu zagwa ngang pake apu kuka aminu tapatu tanangge apukaing.
LUK 22:53 Tapduk bamu na gikat Anututane yot takwan gwene yuwawa ngana ginda na dua tanggaganutnangge tasikaing ngana apmanu ginda tapduknga Anututa tekut gwene tasiwawa zikaa akngatane kekeknganata enane siknga singgak,” ngang yanikut.
LUK 22:54 Siwan wamu waaknga yawan puyuwana tanggaganuke takuke kuku Anututane yot takwan gwene pasiya aminu tupan tapae yotnane takowawa Pitata masa masa kuyawakut.
LUK 22:55 Siwan katau kepman sake aike pukwiwawa Pita kuut wa amikat gatake undang pukwiking.
LUK 22:56 Pukwike katau wagwene yukingu maya puya aminu tapatuta Pitae katasike anzing yakut, “Aminu aapaat iat gatake yuaing,” ngang yakut.
LUK 22:57 Yawan ngana Pitata tawak yake anzing yakut, “Maya! Na ie dua nataat,” ngang inikut.
LUK 22:58 Siwan masande mateknga kundusim yusika wawi tapatuta apu anzing inikut, “Gakaya iatnana tapatu,” ngang iniwan ngana Pitata, “Na ie dua nataat,” ngang yakut.
LUK 22:59 Siwan gatu mateknga kundusim yuke gatu wawi tapatuta wamu kekeknga ngang yake anzing inikut, “Siakande siknga! Aminu aapa iat gatake yuaing. Ita Galili kep komune nana amin,” ngang yakut.
LUK 22:60 Yawan ngana Pitata anzing yakut, “Wamu gata wa yanggayak kaknga na dua nataat,” ngang yawawan taakga wamu ayakut.
LUK 22:61 Yawan Aanata tapan tekwamban Pita kawan wamu anzing inikut taknga natdekut, “Zikaa anggwene taakga wamu dua yawawan gata sipmaat sipduat, ‘Na Jesue dua nataat,’ ngang yawiyak,” ngang inikut taknga natdekut.
LUK 22:62 Natdeke epu daman gweneta kepman kuke kwanamu kumzang sikut.
LUK 22:63 Siwan aminu Jesu kayuking aminda inisapduke tanguking.
LUK 22:64 Tangutnangge tasike kai taukga wamatapakusike anzing inikwaiking, “Gata ayanikapsa amin tapa kakengu maminda gukgakge umana yayo,” ngang
LUK 22:65 inike sapdut wamu takngatu takngatu inisapduking.
LUK 22:66 Inisapduke yuwawa kwakawan Isrel nana take amin takwakga unekan apbing. Anututane yot takwan gwene pasiya aminde takeakwakat mama wam yanindamumsa amikatda paut tasiwawa Jesu take wa aminde takuke anzing iniking,
LUK 22:67 “Gata ninu niniyo. Anututa ga tapan Krais dakngake yuayak ngang kakengu niniyo,” ngang iniwa yake anzing yanikut, “Nata atdaniwa ngana ginu natapa siakan dua siwik.
LUK 22:68 Sike nata wamu kundu danikwaiwanu yake dua nanining.
LUK 22:69 Sike apmanuneta aminbamdane notna apata Anutue kataknga siyaapane kekekngana kayaapane yuwik,” ngang yanikut.
LUK 22:70 Yaniwan kuupbamda anzing yaking, “Unzingge ga Anutue waak ba dasing,” ngang yawa, “Gisa unin yakaing. Na unin,” ngang yanikut.
LUK 22:71 Yaniwan anzing yaking, “Wamu zaakngaat natapnim? Inae genaneta wamu wai waaknga yawan ninu gwa natamang,” ngang yaking.
LUK 23:1 Siwan kuupbamda enake i take Pailatde takuke
LUK 23:2 temanggaganuke anzing yaking, “Ninda kawatna aminu aapata keu ayuamang komune nana amindane musia pangenake gavmankat amningge yanike Sisae takis imunimde ayandakngake anzing yanggak, ‘Anututa na tapan Krais akgatandamuya apa dakngake yuke na buyambam tapa,’ ngang yanggak,” ngang yaking.
LUK 23:3 Yawa natake Pailatda anzing inikwaikut, “Ga Judia amindane buyambam tapa ba dasing,” ngang iniwan, “Gika unzing unin yanggayak,” ngang inikut.
LUK 23:4 Siwan Pailatda Anutue yot takwan gwene pasiya amindane tupan takwakat aminu kuupbapat anzing yanikut, “Nata aminu aapatane wai takngatu dua kat,” ngang yanikut.
LUK 23:5 Yaniwan ngana wamu apaa anzing yaking, “Ita wamu aminbam yaniwan musia enawan amningge yatakuke Galili kep komuneta tuwanguke sanga waaknga tasinggawan apu apman kuut apunggak,” ngang yaking.
LUK 23:6 Siwan Pailatda wamu waaknga natake anzing yanikwaikut, “Aminu aapa Galili kep komune nanaapa ba dasing,” ngang yanikut.
LUK 23:7 Yaniwan, “Unin,” ngang iniwa natake, “Jesuta kautdu saak Herotda kayuak saaknana,” ngang natake initewan Herotde kukut. Tapduu waomune Herotda Jerusalem gapmane yukutde initewan kukut.
LUK 23:8 Initewan kuwan Jesu kake Herotda asiknga bakngakut. Ie wam natake ngana tapduu mamaya siknga i kanangge natake Jesuta duya takngatu tasiwan kanangge natapbut.
LUK 23:9 Unzingge Herotda sangabamde inikwaiwan ngana yake wamu takngatu dua inikut.
LUK 23:10 Dua iniwawan Anutue yot takwan gwene pasiya amindane take akwakat gatu mama wam yanindamumsa amikatda pakapu wesim yuke sapdut wamu toknga siknga ngang yaking.
LUK 23:11 Yawawa Herotkat amak aminaatda Jesue semna natake inisapduke tauu sandu kunzi kunzina kaya take siknga san take ie wamangamuke gatu Pailatde initewan kukut.
LUK 23:12 Sike tupa Herotkat Pailatkatda iwan dakngake yukumayak ngana tapduu wagwene notna dakngakumayak.
LUK 23:13 Siwan Pailatda Anutue yot takwan gwene pasiya amindane take akwakat gatu Judia nana amindane tupan takwakat gatu aminbampat ngang yayawamban apa
LUK 23:14 anzing yanikut, “Ginda aminu aapa nae takapuke aminu aapata, ‘Yaniwawan aminbamdane musia enawan amnangge tasikaing,’ ngang yaing ngana nata ginde nomzane wamu gutonga takngatu ginda sanga wa yaingge inikwaiwa ngana meya wena singgak,” ngang yanikut.
LUK 23:15 “Herotdaya ina unzakan kawan maiwan gatu ninde tewan apunggakge daniwa natapnong. Aminu aapa sanga wai takngatu dua tasikutde ninda tangutna kupik.
LUK 23:16 Unzingge nata moo ipmapa tanguke tewa kunggawan,” ngang yanikut.
LUK 23:17 (Sike kepi takngatu anzing tasikaking. Tapduk takwanu wagwene asinggan Judia nana aminda kaaut aminu tapatutane umana yawa Pailatda waapa sandetewan kunggak.)
LUK 23:18 Sike aminu kuupbamda apaa yanggamatake anzing yaking, “Aminu waapa tanguwi kupan Barabas sandetewi ninde apan,” ngang yaking.
LUK 23:19 Sike Barabas waapata you wa gapmane gavmankat amake aminu tapatu tanguwan kupan kaautde teking.
LUK 23:20 Siwan Pailatda wamu gatu Jesu sandetewan kuwikge yanikut.
LUK 23:21 Yaniwan ngana anzing yanggamataking, “Amin saamdakane tanguyo! Amin saamdakane tanguyo,” ngang yaking.
LUK 23:22 Yawawa gatu sipmaat sipduat yanikut, “Dasingge? Aminu aapata wai dasing kaknga tasikut? Nata kawa wai takngatu wena siwan ngana ninda tangutna kupik? Unzingge nata moo ipmapa tanguke sandetewa kunggawan,” ngang yanikut.
LUK 23:23 Yaniwan ngana akekekake kumzang yanggamatake amin saamdakane tanguwikge yake Pailatde wamu ayaitapaakusiking.
LUK 23:24 Unzingge Pailatda aminu waakwakge wam tawanangge yawan kekekakut.
LUK 23:25 Aminu gavmankat amake amin tanguwan kupan kaautde tekingu waapa sandetewan kuwikge yawa natake Pailatda tewan kuwan wa aminda ina banipda siwan iniking kaknga tasiningge kapewan tasiking.
LUK 23:26 Kapewan tasike Jesu take kusika aminu tapatu umana Saimon ngang iniking. Ita Sairini yot gapmane nanaapa. Apmaatzim siknga puya atangga apuke yot gapmaatang kopnangge apan iniyapike Jesutane amin saamdaka ima gwaamuke kuku Jesu tawakut.
LUK 23:27 Siwan aminu buyambamda tawayuk maya buyambamda kwanam siyuk tawaking.
LUK 23:28 Tawawawa Jesuta tapan tekwamban anzing yanikut, “Ginu maya Jerusalem nana. Nae kwanamu ma siwam. Gisaat waakzaatde kwanamza sitnong.
LUK 23:29 Masande tapduu gwenduta apan anzing yaning, ‘Maya waak songge yuke waakngae ngwamu dua yamukaingu apbaknganing,’ ngang yaning.
LUK 23:30 Tapduu wagwene tawan daka dakae anzing yaning, ‘Engatangan ninde take pimake nin usikwatapning gamu take siwan,’” ngang yaning.
LUK 23:31 “Apmanu sanga waaknga na waiakngana wena apae tasike masande ginu waiakngasa kaya aminde dasing tasining,” ngang Jesuta unzing yanikut.
LUK 23:32 Sike aminu tapaaya wai tasikumayakge Jesuat waapaakat unekan zipnangge pakuking.
LUK 23:33 Pake kusika keu komdu umana gwapak gwikgwit kep ngang inikaing komune kundoke i tanguke aminu waina kaya waapaau kuut zipmake tapatu Jesue katakngi siyaapa saak tanguke tapatu kwana saak tanguking.
LUK 23:34 Unzing zipa yusika Jesuta anzing yakut, “Nan. Aminu atnukaing amindane waiakngana sandeyamuyo. Wa aminda buyami natake wai waaknga tasikaing,” ngang yakut. Siwan amak aminu atzipbing aminda kat binga tasike itane tauknga usanzike panangge tasiking.
LUK 23:35 Siwan aminbamda inengan yuke katasiwawa Judia nanatane take aminda Jesu anzing inisapduking, “Aapata aminu kundu akgatayamunggak. Sike siakande Anututa tapan Krais akgatanimuyaapa dakngake yuaknga kakengu ina gatangaman,” ngang yaking.
LUK 23:36 Yawa amak aminu kuutda inisapduke inengan apu wain yangga kapanga sikut taknga imunangge tasike
LUK 23:37 anzing iniking, “Gaapa siakande Judia nana amindane buyambam tapa kakengu gika gatanggamuyok,” ngang iniking.
LUK 23:38 Siwan wamu takngatu amin saamdaka nomnane anzing matake tanguwan isinggangganukut, “Aminu aapa Judia nana amindane buyambam tapa,” ngang mataking.
LUK 23:39 Sike aminu wai aminu tapaaya zipbikatnana tapatuta Jesu anzing inisapdukut, “Asikaya ga Krais akgatanimuyaapa? Unzing kakengu gika gatanggamuke niu kuut gatanimuyo,” ngang inikut.
LUK 23:40 Siwan ngana wai amin notna tapatuta natake kaanga anzing inikut, “Meya gata payak binga aminu aapata papan kake ga Anutue dua gwauke unzingu yanggayak ba dasing?
LUK 23:41 Meya nitda pakamak kaknga nisa waiaknga tasikumakge noman pakamak. Ngana aminu aapa wai takngatu dua tasikut,” ngang inikut.
LUK 23:42 Inike ita Jesu anzing inikut, “Jesu. Tapduknga gata buyambam tapa dakngawiyak gwene nae kuut natapso,” ngang inikut.
LUK 23:43 Iniwan yake anzing inikut, “Nata siakande siknga ganinggat. Apmanu gaat naat keu ayuwatakakaing komune yutnanggekamak,” ngang inikut.
LUK 23:44 Siwan gunziu banakan siknga yuwawan gunzitda akupan zikaandaka keu kuupbam sike kuku gunzitda pukunangge dandam enakgak komune gatu kakaakut.
LUK 23:45 Siwan gunzitda akungwake yuwawan tauu buyambam sanu Anutue yot takwan gwende gwabok gwaune mitapbingu wasanu gatukande ina wesiwan saa dakngakut.
LUK 23:46 Siwan Jesuta apaa siknga anzing yakut, “Nan! Natane uyunga gae katakgane teat,” ngang yake akumbut.
LUK 23:47 Siwan amak amindane tupan tapata sanga wa kake Anutue umana yatangenake anzing yakut, “Siakande siknga! Aminu aapa nomana sikngaapa,” ngang yakut.
LUK 23:48 Sike aminbamu apu kanangge apbingga sanga wa siwan kake bania meya siknga natake gatuna yotna kuking.
LUK 23:49 Kuwawa Jesutane notnabapat maya kunduat Galili kep komuneta enake tawatakapbingga maasim yuke sanga wa kuupbam kaking.
LUK 23:50 Siwan Judia nana aminu tapatu umana Josep ngang iniking. Ita yotbamu Arimatia gapmane nana apa. Sike waapa aminu nomanaapa. Siwan ita sios kaunsil dakngake yukut.
LUK 23:51 Sike kaunsil kunduta sanga wa Jesue tasiking kakngae ita take ngang dua yakut. Aho. Anututa amin panangge tasinggak kakngata apikge natayuak kapanin.
LUK 23:52 Aminu waapata Pailatde kuke Jesutane gupna tanangge inikut.
LUK 23:53 Iniwan katewan Jesutane gupna takepuke tauknga kwaknga sanduta tapan kopan supgapbau dakatu tupa aminu tapatu undangu dua teking dakaatang tekut.
LUK 23:54 Sike tapduu wagwene sanga tapduk takwan gwendane tandakngawawa yuwatakak tapduk gwenu atdapakakut.
LUK 23:55 Atdapakawawan maya kunduta tapduknga Jesuta dua kumbut gwekatang keu Galili komuneta enake Jesu tawaking. Siwan Josepda Jesue gupnasanu supgapbat dakaatang tenangge kuke supgapbat wandakane kawawa Josepda Jesue gupna unzing tewan kaking.
LUK 23:56 Kawa puyuwana gatuna yotna kuke gupnatane sanga kapanga take siknga pandakngaking. Pandakngawa puyuwana yuwatakak tapduk gwende pasap wam takngae natake ayuwatakaking.
LUK 24:1 Siwan tapduk yuwatakau wa gwenu yuwa sandewana Sande enake sanga kapanga take siknga tupan pandakngakingu apake maya waakwau supgapbau wandakane kuking.
LUK 24:2 Kuke kawawa supsanu supgapbatde umukusiking gwenu ikoba kuwan kwangga yuwan kaking.
LUK 24:3 Kake kuke ngana Jesu Buyambam tapatane gupna wena kaking.
LUK 24:4 Wena kake nangaakan natake apbotake yuke kawawa aminu tapaata inengan yukumayak ngang kawa taukngata waenga siknga zikumayak.
LUK 24:5 Ziwawat kake akgwauke akgwetake kepdakatang katasiwa ngana aminu waapaatda anzing yanikumayak, “Ginda dasingge aminu kayuk yuak kapae kupsa aminde kepatang tawakaing? Ita andang dua yuak. Ita gwa enak,” ngang yanikumayak.
LUK 24:6 “Sike wamu ita tupa Galili kep komune yuke
LUK 24:7 anzing danikut, ‘Na aminbamdane notnaapa wai aminde yama take amin saamdakane nuwa kungwake tapduu gweaat gwenduat yukenga gatu enawit,’ ngang danikut. Wamu waakngae natdetnong,” ngang yanikumayak.
LUK 24:8 Yaniwat wamu Jesuta tupa wa yanikut takngae natdeke
LUK 24:9 supgapbat gwen teke gatu yotna kuke Jesutane pandetna katau kuut musa kepianganu tapatuat gatu aminabamu kuutde sangabamu wa kakingge yaniking.
LUK 24:10 Siwan Maria Magdala yot gapmane nanaapaat gatu Joanaat gatu Maria Jemsdane mingaat ngangga yuking. Siwan gatu maya kunduat gatake yukingga wamu waaknga Jesutane kwikngae yamuking.
LUK 24:11 Yama ngana kem ninikaing ngang natake wamu waakngae siakan ngang dua natapbing.
LUK 24:12 Natapa ngana Pitata enake isapmake kuke supgapbat gwekatang koke gwetake kawan taukgakan yuwawa kake gatuna epuke yotna kuke sanga wa sikutde nangaakan natapbut.
LUK 24:13 Siwan tapduu wagwenekan aminu pandetnaat nana tapaata enake you mateknga gapmandusimu Emeas ngang inikaingge kepiapane kukumayak. Kepi waapa Jerusalem teke Emeas kunanggengu kuwatna gunzitda akoke awekawik.
LUK 24:14 Sike waapaatda kuyuk sangabamu wa sikutde yatakukumayak. Waapaatda yayuk iniwan ganiwan tasitakuwawat
LUK 24:15 Jesuta ina inengan apan waapaakat gatake kuke
LUK 24:16 ngana ie Jesu ngang dua natapbumayak.
LUK 24:17 Siwan kusika Jesuta waapaau anzing yanikut, “Giu wamu dasing kakngae yatakapukamayak,” ngang yanikwaiwan
LUK 24:18 aminu tapatu umana Kliopas. Ita yake anzing inikut, “Aminu yotna yotna nana kuupbamda Jerusalem patang yuwawa ga awiaapatakan sanga wa tapduu apman kopatang Jerusalem sikutde dua natayak,” ngang inikut.
LUK 24:19 Iniwan Jesuta anzing yanikwaikut, “Wamu dasing kaknga,” ngang yanikwaiwan, “Sanga wa Jesu Nasaret nana apae tasiking,” ngang inikumayak. “Ita ayanikapsaapa. Ge puya kekeknga tasike wamu kekeknga ngang yake Anutue kaine gatu aminbamde kaine tasikut.
LUK 24:20 Tasiwan ngana Anutue yot takwan gwene pasiya amindane take akwakat gatu take amikatda gavmande yama gavmanda amin saamdakane tangutningge wam yawa kekekawan amin saamdakane tanguking.
LUK 24:21 Sike tupa ninda aminu waapata Isrel nana gatayamik ngang natapbumang ngana apmanu sanga waaknga siwan tapduu gweaat gwenduat gwa yuamang.
LUK 24:22 Siwan apmanu nikatnana maya kunduta tembana siknga supgapbat dakane kuke
LUK 24:23 itane gupna dua kake apu anzing yaing, ‘Ninda angela kundu kana anzing niniing. Ita kayuk yuak ngang yawa apu niniwa ninu asatnamang,’ ngang inikumayak.
LUK 24:24 Siwan nikatnana kunduta supgapbat dakane kuke ngana maata yaing kakngakan kake i wena kaing,” ngang inikumayak.
LUK 24:25 Iniwat yake anzing yanikut, “O giu natdetdetza wena? Gitdane musipza kwanga siknga ge wamu ayanikapsa aminda yaking kakngae siakan ngang dua natamayak.
LUK 24:26 Gitda dasingge dua natamayak. Aminu Krais dakngake yuak kapata meya waaknga gamok pakenga umana buyambam taknga masande papik,” ngangu yanikut.
LUK 24:27 Yanike Anututane wapatang wamu inae yakapbuu Moseskat ayanikapsa amikatda matakingu uneta apu wamu kuupbamde yapii yanikut.
LUK 24:28 Yanitakusika you waapaatda kukumayak gapmane kundoke ngana Jesuta asinggan kunangge tasikut.
LUK 24:29 Siwan ngana waapaatda, “Ma kuwim,” ngang inike, “Api nikat ane yuwatna,” ngang inikumayak. Inike, “Keu gwa gwazokgak,” ngang iniwat waapaakat gatake yoakatang koke yuking.
LUK 24:30 Siwan masande nanam nanangge tasiwa Jesuat aminu waapaakatda pukwike ita nanam pake tumuk wam yake usanzike yamukut.
LUK 24:31 Ita unzing tasiwan kai kakaawan natdewawat ngana ita akuwan waapaatda dua kake anzing yakumayak,
LUK 24:32 “Ninda kepiapane apuyuk ita Anututane wamde yapii nitde niniwan nitdane musipmiu asenak,” ngang yakumayak.
LUK 24:33 Unzing yake tapduu waomzimunekan enake gatuna Jerusalem kuke pandetna katau kuut musa gatu kepianganu tapatuat gatu notna kunduat paut tasinggawa kakumayak.
LUK 24:34 Kake yuwawat wa aminda waapaau anzing yaniking, “Siakande siknga Aaninu gwa enak. Saimonda gwa kak,” ngang yaniking.
LUK 24:35 Yaniwa natake waapaatda sangabamu kepiapane kakumayakge yanike anzing yakumayak, “Ita poyak putdaknganiman kake O Jesu gwa apuk ngang unzing natamak,” ngang yanikumayak.
LUK 24:36 Siwan wamu waaknga yayuwawa Jesuta ina pakapu wa aminde banakan yuwan
LUK 24:37 kake kumzang satnake akagwauke kongu tapatu ba ngang yaking.
LUK 24:38 Yawa ngana ita anzing yanikut, “Ginu dasingge nandugwauke satnake musipzaatang nangaakanu nataaing?
LUK 24:39 Katakngaat gatu kepinaatde kanong. Nata nina siknga yuat. Katakzata gupmane wasike kanong. Kongu sapbiat kwataiat na nanduaing binga dua,” ngang yanikut.
LUK 24:40 (Yanike katakngiat kepiat yeuyamukut.)
LUK 24:41 Siwan apbakngake ngana musiane siakan ngang dua natake nangaakan natapa ita anzing yanikut, “Ginu nanamu kundu andangu kaya ba dasing,” ngang yaniwan
LUK 24:42 pis sakingu kautdu ima
LUK 24:43 pake napan kaking.
LUK 24:44 Siwan ita anzing yanikut, “Na tupa gikat gatake yukengu nata ginu anzingu gwa danikum. Wamu kuupbam Mosesde mama wapatang gatu ayanikapsa aminde wam gatu miti kap buk gopatangu wamu nae mataking wa kuupbam buya asiknga aawik ngang danikumde yapii daniwa natapnong.”
LUK 24:45 Ngang yanike wamu waaknga anggaman natapningge kakaa akngana baniaatang teyamukut.
LUK 24:46 Teyamuke anzing yanikut, “Anututane wapatang anzing mataking, ‘Aminu Anututa tapan Krais akgatanimuyaapa dakngake yuak kapata tokngabamu pakenga tapduu gweaat gwenduat gwene matmat katangga enawik.
LUK 24:47 Enawana ie umande wamu Jerusalem tuwanguke kuke aminu kuupbamde yanikapa natake musia tapa tekwambana Anututa waiakngana sandeyamik,’ ngang mataking.
LUK 24:48 Siwan ginda sanga wa kuupbamu kaisata gwa kakingga wamu waaknga ngang yaninong.
LUK 24:49 Natapnong. Sanga Nanata damunangge yakuu apme nata waapa initewa ginde asepik. Ngana dua epik gwekatang ginda yotbamu anggapmanekan yuwawa enandang nanatane kekeknga akngana ginde epana kuke yaninong,” ngang yanikut.
LUK 24:50 Siwan ita Betani yot gapmane pakuke katakngi tangenake wam kwikwiu ayamuyuwawan
LUK 24:51 Anututa kaitake enandang takopbut.
LUK 24:52 Enandang wa takopana aminu gatuna Jerusalem kuke asiknga bakngake
LUK 24:53 tapdukbamu asinggan Anututane yot takwan gwene yuke Anutue umana yatangenaking.
JOH 1:1 Kepat sangabamu enane yuaikat dua tasike tekut gwene aminu tapatu umana Wam Taknga ngang Anututa inikut. Iat Anutuatda gatake yukumayak. Ge waapaatdane yapiina buya kundukan.
JOH 1:2 Siwan yakap sikngaatang unekan gatake yukumayak.
JOH 1:3 Ge Anututa mina mina inatakan dua tasikut. Anutuat iat gatake yukumayak kapa iniwan waapata natake minaka sanga sanga tasike tekut.
JOH 1:4 Tasike teke ita kayuk yutnanga akngae toiknga dakngake yukut. Yuke ita kakaa aknga aminde takepbut.
JOH 1:5 Takepan kakaa waakngata zikaa akngaatang isike kekeknga isiwawan zikaa akngata tanguwan kupikge tasiwan maiwan kakaa akngata kekekake yuak.
JOH 1:6 Siwan keune nana tapatu umana Jon ngang iniking. Anututa iniwan enake kakaa waakngae yaninangge tasikut. Tasike kakaa waakngae yanikut taknga natapa siakan siwikge yanikut.
JOH 1:8 Jon inata. Kakaa waaknga inata. Siwan Jonda kakaa waakngae yanikapbut.
JOH 1:9 Siwan umana Wam Taknga ngang inikut tapata siakan siknga kakaa akngane yukut. Ge kakaa waakngata keu andakane epu isitakuwawan kuupbamda kaking.
JOH 1:10 Epu waapata keu andakane yukut. Siwan tupa Anututa iniwan natake ita keu andakaat sangabapat pasike pekut ngana aminbamda kambotaking.
JOH 1:11 Siwan waapata inane kepdakane apan bapuna tapatukan ngana unenana aminda dua iniking.
JOH 1:12 Sike nikat nana kunduta ie natake Anututa initewan apbut tapa unin ngang natake gaak wam inikumang. Ie natapna kekekawan inina natake Anututa umanin yawan ninu itane waaknga dakngake yuamang.
JOH 1:13 Ge minginda ninu bokngiwa Anutue waaknga dakngakumang ngangu dua yakamang. Gatu ita waak zak siwat aake Anutue waaknga dakngakumang ngang dua yakamang. Anututakan yawan ie waaknga dakngakumang.
JOH 1:14 Siwan umana Wam Taknga ngang inikut tapata amin dakngake nin banakan katang yuwawan take sikngaapa ngang kakumang. Ita Anututane waaknga buyakan tapata yukut. Ge take sikngaapa yuwikge Nanata yakut. Siwan musiane kwikwiknga wapat siakan wapat dopan yukut.
JOH 1:15 Siwan Jonda ie natake anzing yanggamatakut, “Aminu aapae tupa unzing gwa yakum, ‘Nata tupan gamok apana aminu tapatuta masande apik. Ita napbike yuak,’ ngang gwa yakum. Dasingge? Nata dua aakum gwene ita tupan gwa yukut.” Ngangu wamu waaknga Jonda yanggamatakut.
JOH 1:16 Siwan musiane kwikwiknga wam takngatakan dopan ita asinggan asinggan gatanimunggak.
JOH 1:17 Ge Anututa yawan Mosesda tupanu mama wamdekan yanikut ngana masande Anututa gatu yawan Jesu Kraisda kwikwiknga wam takngaat siakan wam takngaatde ninikut.
JOH 1:18 Siwan aminu keunenana tapatuta Anutu kainata dua kakut. Tapduu ayuamang kopatang kaya unzakan dua kaamang. Itane waaknga buyakan tapa Nanaat gatake yuamayakga Anutue yakapan natapbumang.
JOH 1:19 Sike Judia nana amindane tupan takwakga wam yake Anutue yot takwan gwene pasiya aminu kunduat gatu wa amindane puya amin notna Liwaitane dongune aaking aminu kunduat ngang yanipewa kuke Jerusalem yot gapma teke kuku Jonu anzing inikwaiking, “Ga mamin tapa,” ngang iniking.
JOH 1:20 Siwan Jonda yake wamu dua takusopuke anzing yakapbut, “Aminu Anututa tapan Krais gatanimuyaapa dakngake apik aminu na waapanin dua,” ngang yanikut.
JOH 1:21 Yaniwan yake anzing inikwaiking, “Ga puya dasing kaknga pasinggayak amin tapata apbuyak. Ilaijata gamok apikge yaking kapa ga unin ba dasing,” ngang iniwa ita yake, “Aho,” ngang yanikut. Ngang yaniwan yake anzing inikwaiking, “Ga ayanikapsaapa Mosesda tupa siknga ngang yakut tapae kayuamang kapanin ba dasing,” ngang iniking. Iniwa ita yake, “Wena,” ngang yanikut.
JOH 1:22 Yaniwan yake anzing iniking, “Ga mamintapa? Ninda wamu yake zaaknga ninu atninipewa apumangge yaninim. Gata gikae dasing yawiyak,” ngang inikwaiwa
JOH 1:23 ita yake anzing yanikut, “Nata pasiwa ayanikapsa Aisaiata wamu takngatu matakuu buya unin aakgak. Siwan anzing matakut, ‘Aminu tapatuta keu amina wena komune yuke wamu takngatu anzing yanggamatanggak. Buyambam tapatane kepina tanomanutnong!’ Ngangu wamu wa matakut taknga na unin apuke pasinggat,” ngang yanikut.
JOH 1:24 Siwan Judia nana aminda miti wamu inata takngatu natake dongu takngaaya dakngake yukinggane dongu takngatu Ferisi ngang yaniking. Siwan aminu wa Jesue apbing takwau Ferisiat nana.
JOH 1:25 Siwan wa aminda anzing inikwaiking, “Ga Krais gatanimuyaapa dua. Siwan gatu ga Ilaija dua. Siwan ga ayanikapsa waapanin dua. Sike ga maminda ganitewan apu aminu yangga sauyamunggayak,” ngang inikwaiking.
JOH 1:26 Inikwaiwa ita anzing yanikut, “Nata aminu yanggata sauyamunggat. Ngana aminu tapatu ginda ie dua nataaing kapata gin banakan yuak.
JOH 1:27 Aminu waapa nae masanane apunggak. Apan kake na aminu umana wenaapa yuke gwetake nata gatane kepi taukga waikgama ngang ininangge maaknga nataat,” ngang yanikut.
JOH 1:28 Wamu waaknga Betani yot gapma yangga Jodan tapa kautdu saak yuak gapmae yangga apane yaking. Sike keu waomune Jonda aminu yangga sauyamukut.
JOH 1:29 Siwan tembana Jonda kawawan Jesuta apuwawan kake anzing yakut, “Ninda sipsip matek tangutna kupan matake Anutue imunangge kataune gatukande sana yasikuwa waiaknganinde tokngaaknga paniman kake Anututa sanga wa imukumang amindane waiaknganin sandetnimunggak. Ina unzakan Anututa waiaknganin sandetnimunanga kepi tasinangge natake aminu wa apunggau tapan apuke sipsip matek wa tangutna kupik gwen bingata waiaknganinde toknga aknga panimik kapa unin. Ita tasiwan Anututa aminbamu keune nanatane waiakngana sandeyamik.
JOH 1:30 Aminu aapae nata tupa yakumunin. Aminu tapatu masanane apunggak. Ita natane tupan tapana. Dasingge? Nata dua aakum gwene ita gwa yukut.
JOH 1:31 Nata nina ie dua nataat. Ngana nata aminu yangga sauyamuwawa ginu aminu waapa tupa yakumunin ngang anggaman natapningge apbum,” ngang yakut.
JOH 1:32 Siwan Jonda sanga tupa kainata kakut takngae anzing yakapbut, “Nata kawawa Waung Kapata enandang teke epuke kwaiu kombunanang ngang yanikamang gwenda binga epan kakum. Epan kawawa ita paku ie gupnane yuwawan kakum ngang yakapbut.
JOH 1:33 Nata nina ie dua nataat. Ngana na nanitewan apuke yangga sauyamukum tapata anzing nanikut, ‘Gata kawawi Anututane Waung Kapata epuke aminu tapatu tapan kawiyak kapata maya wawie Waung Kapa ita yaman ita kekekayamuke musia pangenawik kapanin. Pangenawan itane kekeknga akngae gepbiatang koyutning,’ ngang naniwan natapbum.
JOH 1:34 Sanga wa nina kake aminu waapa Anututane waaknga ngang gwa yakapmat,” ngangu Jonda unzing yakut.
JOH 1:35 Siwan kweu Jonda pandetna tapaat gatake yuke
JOH 1:36 Jonda kawawan Jesuta kuwan kake Jonda anzing yakut, “Kanong! Aminu wa apunggau Anututa tapan apuke sipsip matek tanguwan kungwanggak gwen bingata waiaknga ninde toknga aknga panimik kapa unin,” ngang yakut.
JOH 1:37 Ngang yawan pandetna waapaatda kuku Jesu tawakumayak.
JOH 1:38 Tawake kuwawat Jesuta tapan tekwamban waapaau kake anzing yanikut, “Gitda dasing natake nawakamayak,” ngang yaniwan yake waapaatda anzing inikumayak, “Rabai. Ga you zagwene yuayak,” ngang inikwaikumayak. Sike ninda umana Rabai ngangu waaknga tana tekwamban anzing yanim, “Aana.”
JOH 1:39 Siwan ita waapaau yanike, “Giu apu kason,” ngang yanikut. Ayaniwan waapaatda kuke you ita yukut gwenu kakumayak. Siwan bangee gwa siwan kake gunziu wagwene waapaau iat gatake yuking.
JOH 1:40 Siwan Endru, Saimon Pitatane uyapna, waapata aminu Jonde wam natake kuku Jesu tawakumayau tapatu.
JOH 1:41 Ita kuku paana Saimon gamok tawataku kake anzing inikut, “Nitda Mesaia apa gwa kamak,” ngang inikut. Sike ninda wamu Mesaia ngangu waaknga anzing tana tekwamban yanim. Anututa tapan Krais gatanimuyaapa.
JOH 1:42 Siwan Endruta initake Jesue takukut. Takuwan Jesuta kake anzing inikut, “Ga Saimon, Jondane waaknga. Masande umanda Sifas ngang ganining,” ngang inikut. Sike ninda umana waaknga tana tekwamban anzing yanim. Pita siwan yapii supgwen ngang yakamang.
JOH 1:43 Siwan Jesuta keu Galili komune kunangge natapbut. Natake Filip tawataku kake, “Ga naat kuut kusim,” ngang inikut.
JOH 1:44 Siwan Filipda Betsaida nana tapatu siwan Endruat Pitaatda you wanggapmane nanakan.
JOH 1:45 Siwan Filipda Nataniel tawataku kake anzing inikut, “Tupa siknga Mosesda aminu tapatue natake mama wapatang matatekut. Siwan yanikapsa aminu kuupbamda aminu waapae matateking kapa gwa kakumang. Umana Jesu ngang inikingu waapa Nasaret yot gapmane nana. Josepde waak,” ngang inikut.
JOH 1:46 Iniwan Natanielda, “A! Nasaret yot gapmaneta sanga mina takeakngata apik,” ngang iniwan, “Apa! Apuke kayo,” ngang Filipda iniwan kukumayak.
JOH 1:47 Kuke Natanielda apuawan Jesuta kake Isrel nana waapata musiaatang kewamu takngatu dua nataak ngang yawan
JOH 1:48 natake Natanielda anzing inikwaikut, “Dasing siknga natane yapii kayak,” ngang inikwaiwan Jesuta yake inikut, “Tapduknga Filipda nae dua ganik gwene baapdaka yapiine yuwawi gandut,” ngang inikut.
JOH 1:49 Iniwan, “Aanin! Ga Anutue waak! Ga ninu Isrel nana amindane takeapanin dakngake yuayak,” ngang Natanielda yake inikut.
JOH 1:50 Iniwan yake anzing inikut, “Gata baapdaka yapiine yuwawi gandut ngang ganiwa nae natapi kekeknga singgakge masande nata puya kekeknga tasiwa kawiyak kakngata wamu wa ganinggat taknga yapbimbik,” ngang inikut.
JOH 1:51 Inike Jesuta gatu yanikut, “Siakande daninggat. Ginda kawa ena banakan komda dakngake kuwan na aminbamdane notnaapa dakngake yuwawa Anututane angelata enandangga nae epuke kopa kaning,” ngang yanikut.
JOH 2:1 Siwan tapduu gweaat gwenduat yuwa sandewana aminu tapatuta Kena yot gapma Galili kep komu yuaune maya tapatu maatnae takut. Siwan Jesutane mingata aminu wa maya takut tapatane yotnane.
JOH 2:2 Siwan wa aminda Jesuat pandetnaat yayawamba apu kataknga ipat kaningge yayawaking.
JOH 2:3 Siwan aminbamda nanam nake tangoke wain yangga aknga tangopa puyuwan mingata Jesue, “Wainu puyuwan wena gwa singgak,” ngang inikut.
JOH 2:4 Iniwan yake anzing inikut, “Minga! Unzingu ma naniwim. Gatane sanga dua. Natane tapduknga dua dapakakge unzingu ma naniwim,” ngang inikut.
JOH 2:5 Iniwan ngana mingata puya aminu anzing yanikut, “Ita wamu takngatu ginde atdaniwik kakngakan tasinong,” ngang yanikut.
JOH 2:6 Siwan gapma supda pasikwaapakukingu katau kautdu musaat kautdu gwendu ngang Judia nana aminda inane miti akngatane kepi takngatu tawake tasikaing kakngae natake yangga zike sautningge natake undang pakapu peking. Sike gapma wa buyambam siknga gwegwen. Siwan bakeu 10 ba 15 ngang yangga zike gapma buyambamu wa gwendunekanu tukwaba dopnanga.
JOH 2:7 Siwan Jesuta puya aminu unenana anzing yanikut, “Yangga zike gapma anggwegwen tukwaba dopnong,” ngang yanikut. Yaniwan kuku yangga zike pakapu gapma wa gwegwekatang tukwaba genanekan dopbing.
JOH 2:8 Tukwaba dopana ita anzing yanikut, “Yangga kundu uneta zike paku nanam kuyae yuak kapae imunong,” ngang yaniwan zike pakuke imuking.
JOH 2:9 Pakuke ima ita napan siwan yanggata wain dakngawan tangoke ngana yapiie apbotake zane paing ngang natapbut. Ngana puya aminu yangga ziking amindakan atnatapbing. Siwan nanam kuyae yukut tapata aminu maatna takut tapa yatawamban apbut.
JOH 2:10 Apana ita anzing inikut, “Aminbamda wainu takeaknga gamok usanzikaing. Siwan masande aminu buyambamu tangopa puyuwana gatu wainu wai binga une usanzikaing. Ngana ga wainu takeaknga kotnake teyaknga apmaatzim yanipewi takapukaing,” ngang inikut.
JOH 2:11 Sike wa duya tupan taknga Jesuta Kena yot gapma Galili kep komu yuaune tasikut. Tasiwan umana buyambam siknga kayaapa ngang kake ninu pandetnata ie natapna kekeknga sikut.
JOH 2:12 Siwan sanga wa maya takut taknga tasiwa puyuwawana Jesuat mingaat gatu uyapnaat gatu pandetna ngangga Kapaneam yot gapmane pukukumang. Pukuke tapduu kundu you wanggapmane yukumang.
JOH 2:13 Siwan Judia nana aminda tapduk takwanu angelata tupa siknga Isrel nana amin yapbike Isip nana amin zipan kumbingge natake yuwatakak tapduk takwanu Pasova ngang yakaing gwenu akaningge dapaknga sikut. Siwan Jesuta Jerusalem yot gapmane koke kawawan
JOH 2:14 Anutue yot takwan gwene ikwawa gamakat sipsipat kwaikat pakapu yama manita usike Anutue imuningge tasiwawa kakut. Kawawan Romnanatane mani silwa sanis pasike yot takwandane mani silwa yake imanggaman tasiwawa kakut.
JOH 2:15 Kake nau takngatu takngatu unekan komuke zipnangge yake yanikwasiwan aminda ikwawa gamakat sipsipat pake kepman epu pake kuking. Epuke kuwawa Jesuta imanggaman tasiking amindane manina tukwamban kuwawa tebona pangenapamapan kuking.
JOH 2:16 Unzing tasiyuk anzing yanikut, “Ginu kwait usiningge yakaing aminu kwaitza pake kunong. Ginda tasiwawa Nanatane yot gwenu usiwam yot gwen binga dakngawan kawa take dua singgak. Teke kukakut,” ngang yanikut.
JOH 2:17 Yanike tasiwawan wamu takngatu tupa siknga Anutue wapatang tematekuu ninu pandetnata gatu anzing natapbumang, “Gatane yot takwan gwenda take yuwikge iaknga siknga nataat takngata banipmaatang katapda binga nasinggak,” ngang matakut takngae gatu natdekumang.
JOH 2:18 Siwan ngana Judia nana amindane take akwakga unin kake anzing iniking, “Gata duya dasing kaknga tasiwi kake Anututa gandutewan puya waaknga pasinggayakge natdetnim,” ngang iniking.
JOH 2:19 Iniwa ita yake anzing yanikut, “Ginda yot takwanu anggwenu waiwanu tapduu gweaat gwenduatdekan nata gatu tangenawit.”
JOH 2:20 Ngang yaniwan yake tapatekwa wamu anzing iniking, “You anggwenu tangenake tasiwawa nakanu 46 ayapbikut ngana gata tapduu gweaat gwenduatdekan tangenake mitapsa,” ngang iniking.
JOH 2:21 Ngana yot takwan gwende Jesuta wa yakuu wa tuwang wamu inane gupnae natake yakut.
JOH 2:22 Unzingge masande Anututa matmat gapmaneta Jesu gatu tangenawan pandetnata wamu tupa wa yakut takngae gatunin natdekumang. Siwan Anutue wamu mataking kakngaat gatu Jesuta wamu wa yakut takngaatde natapna siakan sikut.
JOH 2:23 Siwan Jesuta Jerusalem yot gapmane yuwatakak tapduk takwanu Pasova ngang yaking gwene yukut. Yuwawan aminbamu duya takngatu takngatu ita pasiwawa kaking. Kake ie Anututa initewan apu Krais gatanimuyaapa dakngake apu pasinggak ngang natapa siakan sikut.
JOH 2:24 Siwan ngana Jesuta wa aminde natake baniaatang takngaaya natapsa amin ngang kagwauke aminu waakwakat dua yutnim ngang natapbut.
JOH 2:25 Dasingge? Ita aminu kuupbamde yapii atnataak. Ita natdetdetde atdapan kake aminu tapatuta aminde yapiie dua inindamumbik. Wena. Ina aminde musiaatang kake atnatdekgak.
JOH 3:1 Aminu tapatu umana Nikodimas ngang iniking. Aminu waapa Ferisi amikat nana tapatu siwan Judia nana amindane take aminu tapatu.
JOH 3:2 Aminu waapa zikaane Jesue apuke anzing inikut, “Yanindamumsaapa. Ninu atnataamang. Anututa ganitewan ga yanindamumsaapa dakngake apbuyak. Sike Anututa aminu tapatuat dua gatake yukengu ita duya gata wa tasinggayak binga dua tasiwik,” ngang inikut.
JOH 3:3 Iniwan yake tuwang wamu takngatu anzing inikut, “Nata siakande siknga ganinggat. Enandang nanata aminu tapatu gatu aawikge tasiwanu waapata Anututa amin panangge tasinggak kakngae gepbiatang dua kopik,” ngang inikut.
JOH 3:4 Iniwan ita yake anzing inikut, “Dasingge aminu tapatuta aminuake gwa dakngake ita gatu aawik? Ita gatu mingae musipatang kopan mingata gatu tangaitnanga dua,” ngang inikut.
JOH 3:5 Iniwan yake anzing inikut, “Nata siakande siknga ganinggat. Aminu tapatuta musia dua tapan tekwamban yangga dua sauke mayata engang tangaiwan kayukapa aakgak binga Waungga aminu waapae musia dua tangenawan kayuk dua dakngakengu ita Anututa amin panangge tasinggak kakngae gepbiatang kopnanga dua.
JOH 3:6 Sanga aminda tangaiwiu wa gupban keune nana sanga. Siwan ngana sanga Waungga tangenawiu wa enandang nanae sanga.
JOH 3:7 Gata wamu nata ganinggat takngae nangaakan ma natapim. Ginu yanggaat Waungkatda unzing dua gatandaman kayuu gatu dua dakngakengu Anutue gepbiatang kopnanga dua.
JOH 3:8 Got takngata puyatake unda undang kuwawan ga gakngaikan natake ngana wa zandanggaka enake apuke gatu zagwakga kunggakge ga dua nataayak. Ina unzakan. Aminu kuupbam Waungga musia pangenawan kayuk dakngake yuaing amindane yapii kananga dua ngana aminu waakwau apasikaing kaknga akaning,” ngang inikut.
JOH 3:9 Iniwan Nikodimasda yake anzing inikut, “Sanga wa dasing binga siwik,” ngang iniwan
JOH 3:10 yake anzing inikut, “Dasing? Ga Isrel aminu ayanindamukgayak ngana ga wamu waaknga anggaman dua nataayak?
JOH 3:11 Nata siakande siknga ganinggat. Ninu wamu sanga atnataamang kakngae yake sanga akaamang kakngae yakapmakamang. Siwan ngana ginu Ferisi aminu wamu ninda wa yakapmakamang kakngae ginda natapa siakan dua singgak.
JOH 3:12 Siwan nata sanga keune nanae daniwa ginda ie natapa siakan dua siwanu sanga enandang nanae daniwa ginda ie natapa siakan dua siwik.
JOH 3:13 Aminu tapatuta enandangu dua kopbut. Na aminbamdane notna dakngake yuat tapa enandangga epbum tapatakan sanga enandang nanae atnataat. Natake daniwa ngana ginda natapa siakan dua singgak.
JOH 3:14 Tupa siknga gomokga aminbamu keu amina wena komune yasiwawa kungwawa kunduta kumnangge dapaknga siking ngana Mosesda gomokapa tandaike katapdakane gwasike tangenake kwaiwan pukukut tapa katasiking aminda dua kumbing. Ina unzakan na aminbamdane notna dakngake yuat tapaaya amin saamdakane nuke tangenatning.
JOH 3:15 Tangenawa aminbamu nae natake Anututa initewan apbutapa unin ngang natapa kekeknga siwiu wa aminda kayuk yutning kaknga pake kayuk asinggan asinggan yutning,” ngang inikut.
JOH 3:16 “Ngan. Anutue waaknga awiapatakan yuak. Ngana Anututa aminbamu kepdakane nana aminde butaya siknga natayamukut. Butaya siknga natayamuke waaknga awia waapa dua kotnakut. Dua kotnake keune nana aminda wena siningge dua natapbut. Aho. Aminu itane waaknga awia waapae natapa kekekawiu wa aminda wena dua sike kayuk yutnanga aknga pake asinggan asinggan yutningge take natake dua kotnakut.
JOH 3:17 Anututa dua kotnake itane waaknga ngang initewan keune epuke ita amin usanzike toknga yamuyaapa binga dakngake dua tasiwikge initewan epbut. Wena. Ita initewan epuke wa amin papan kayuk asinggan asinggan yutningge epbut.
JOH 3:18 Aminu ie natapa siakan siwiu wamu wena. Sike aminu ie natapa siakan dua siwiu wamu kaa. Dasingge? Ita aminu waapa kake Anututane waaknga ngang dua natapa kekekakut.
JOH 3:19 Sike aminu waakwakga wai tasikaing kakngae yaningge wamu anzing. Kakaa akngata kepdakane gwa epan kake ngana ie dua natapbing. Wena. Keune nana aminbamda waiakngakan pasike zikaa akngae banip gwaang natapbing.
JOH 3:20 Aminu waiaknga tasikaing aminda kakaa akngae iwan dakngakaing. Wa aminda wai pasikamang kaknganinu anggaman siyak ngang natake kakaa akngane dua apukaing.
JOH 3:21 Ngana aminu sanga siakan taknga tasiwiu ita kakaa akngane asapunggak. Ita Anututane gen gwaamuyuk puyana pasinggak ngang anggaman siwan kaningge apunggak.”
JOH 3:22 Siwan Jesuat ninu pandetnaatda Judia kep komune kukumang. Kuke iat ninu pandetnaatda unekan gatake yuke ninu pandetnata yangga maya wawi sauyamukumang.
JOH 3:23 Yangga sauyamuwatna Jon kaa maya wawi Inon kep kom Selim yot gapma yuaune yangga sauyamuke yukut. Sike keu wakomune yangga kwaapzangga yuaing. Siwan maya wawita kuke yangga paking.
JOH 3:24 Sike Herotda Jonu kaautde dua tekut gwene kuking.
JOH 3:25 Siwan Jondane pandetnaat gatu Judia nana tapatuatda wamu takngatue yanganuking. Miti puya tasiyuk yangga saukaingge wam yanganuking.
JOH 3:26 Siwan pandetnata Jonde kuku toknga wamu anzing iniking, “Yanindamumsaapa. Aminu waapa tupa gaat Jodan tapa kautdu saak yuke gata ie wam yakapbuyau yangga maya wawi sauyamuwawan aminbamda ie kukaing,” ngang iniking.
JOH 3:27 Iniwa Jonda yake anzing yanikut, “Anututa aminu tapatu dua gatangamanu puya tasinggak kakngata take dua siwik. Sike ita gatangamanu puyana take siknga siwik.
JOH 3:28 Ginu wamu nata tupa wa yakum taknga gwa natapbing. Na Anututa tapan Krais gatandamuyaapa dua dakngake yuat. Wena. Siwan ngana Anututa nanitewan tupanu nata gamok gatanimuya apae tupan apbum.
JOH 3:29 Sanga wa daninggat takngae tuwang wamu takngatu anzing daniwa natapnong. Aminu tapatuta maya takengu maya waapa aminu atapik kapatane maatna. Siwan itane notnabamda maatna kaya apae apbaknganing. Ina unzakan apmanu aminu wa ginda nanikaing kapata umana kayaapa dakngawikge take siknga nataat. Sike natane umana apimapanu take siwik,” ngang yanikut.
JOH 3:31 “Aminu enandangga epbut tapata sangabamu ayapbikgak. Sike aminu kepdakane nana aminda wamu sanga keune nanaekan yakaing. Sike aminu enandangga epbuu sangabamu ayapbike yuak.
JOH 3:32 Ita wamu sanga akakut takngaat atnatapbut takngaatde yakapan ngana aminu kuupbamda natapa siakan dua singgak.
JOH 3:33 Sike mamin amindaka itane wam natapan siakan siwik kakngata tasiwan Anututa siakan gan yanggak ngang anggaman siwik.
JOH 3:34 Aminu Anututa initewan apbuu waapata Anutue wam yakapmanggak. Dasingge? Anututa banip gwaang buyak natangamuke Waunga gatukande asimukut.
JOH 3:35 Nanata musip gwaangu itane waaknga natake sanga kuupbam ie kataune imukut.
JOH 3:36 Aminu Anututane waakngae natapan siakan siwiu waapata kayuu asinggan asinggan yuwik. Sike aminu waakngae genu dua tawambiu ita kayuk yuwik kaknga dua tapik. Wena. Anututa musia toknga asinggan asinggan natangamik.” Ngangu Jonda wamu waaknga yanikut.
JOH 4:1 Siwan tapduu waomune Ferisi aminda wamu takngatu anzing natapbing. Jesuta pake yangga aminu kwaapzang sauyamuke ita Jonu ayapbikgak ngang natapbing.
JOH 4:2 Siwan ngana Jesuta ina dua yangga sauyamukut. Ninu itane pandetnatakan yangga sauyamukumang.
JOH 4:3 Siwan Jesuta unzing tasiwan Ferisi aminda gwa nataaing ngang natake ita Judia kep teke Galili kep komune gatuna kukut.
JOH 4:4 Siwan kepi ita wa kukut tapa Sameria kep komde banakan kukut.
JOH 4:5 Siwan kepi waapane kuku you Sameria kep komune yuau gapmandune kundopbut. Sike you wanggapmatane umana Saika ngang inikaing. You wanggapma keu wesim Jekopda waaknga Josepde tupa siknga imukut komune yuak.
JOH 4:6 Sike yangga zitnangge gapma tupa Jekopda tasikuu wa keu wa komune yuak. Siwan Jesuta kusika gatok natake yangga gapma wandakane wesim pukwikut. Wa unzing kepmaom gunzitapane yukut.
JOH 4:7 Siwan pandetnata you wanggapmane nanam usinangge kuwatna maya Sameria nana tapatu yangga zitnangge apbut. Apana Jesuta anzing inikut, “Yangga nami tangopa,” ngang inikut.
JOH 4:9 Iniwan ngana maya Sameria nana waapata yake anzing inikut, “Ga Judia nana amin. Siwan maya naapa Sameria nana. Dasingge gata yangga nami tangopa ngang naninggayak,” ngang inikut. Dasingge? Judia nana aminu Sameria nanaau unekan dua sukukaing.
JOH 4:10 Siwan Jesuta yake anzing inikut, “Ga sanga Anututa gamunangge nataak kakngae atnatayak gamu unzingu dua naniwim,” ngang inikut. Inike tuwang wamu takngatu anzing inikut, “‘Yangga nami tangopa,’ ngang ganiwa gata nae atnatayak gamu sanga wa Anututa gamunangge nataak kaknga nata gae gamitde namuyo ngangu atnaniwim. Unzing naniyak gamu nata yangga yangakoke zimanggak kapane nana zike gae akgamam,” ngang inikut.
JOH 4:11 Iniwan mayata yake anzing inikut, “Buyambam tapa! Ga baketda wena siwan yangga gapma andaka gapma siknga. Siwan gata dasing tasike yangga gapmandakane yangakoke doke yuak gakane zike namuya.
JOH 4:12 Nisane bapuninu Jekopda yangga gapma andaka tupa siknga kwaike ina gatu itane waaknga gatu ikwawa gaman gatu sipsip ngangga anggwene tangopbing. Siwan apmanu ninu itane dongune aakumang aminu kuutda atangokamang. Sike gata Jekop ayapbike yangga yangakonggak gwene nana atnamuya ba dasing,” ngang inikut.
JOH 4:13 Iniwan Jesuta yake anzing inikut, “Aminbamu yangga andakane tangopningu gatuna yanggae natapning.
JOH 4:14 Sike ngana aminu tapatu nata yangga wa imit taknga tangopiu tapduk bamu masande ita gatu yanggae dua natapik. Wena. Sike yangga nata wa imit taknga tangopanu yangga dapunda yangakonggak binga itane musiaatang tasiwan ita kayuk yuwik kaknga pake asinggan asinggan yuwik,” ngang inikut.
JOH 4:15 Ngang iniwan mayata yake anzing inikut, “Buyambam tapa! Gata yangga waaknga nae nami tangoke masande na yanggae dua natapit. Siwan na gatu ane yangga zitnangge dua apit,” ngang inikut.
JOH 4:16 Iniwan Jesuta yake anzing inikut, “Gata kuku apbae yatawakenga ga gatuka ane apso,” ngang iniwan,
JOH 4:17 “Na apma wena,” ngang yawan Jesuta inikut, “Gata na apma wena ngang siakande siknga yanggayak.
JOH 4:18 Dasingge? Tupa ga apbae wawi katau kautdu musakan gwa pakuyak. Siwan apmanu gaat wawi tapatuatda yasewa akngaekan tasike yuamayak. Waapa gatane apba siknga dua. Gatane wamu waaknga siakan,” ngang inikut.
JOH 4:19 Iniwan yake anzing inikut, “Buyambam tapa! Ga ayanikapsa amin tapa ngang gwa nataat.
JOH 4:20 Sike ninu Sameria nana amindane bapuninu tawanu andakane koke yuke Anutue gwetake nanamu ie sangamukaking. Ngana ginu Judia nana aminda yake keu aminda Anutue gwetake nanamu ie sangamunanga komu Jerusalem yot gapmanekan yuak ngang yakaing,” ngang inikut.
JOH 4:21 Ngang iniwan yake anzing inikut, “Mayapa. Ganiwa natapi siakan siyok. Masande ginda tawanu andakaat Jerusalem yot gapmaneat ngangu dua koke sanga Anutue sangamuning. Wena.
JOH 4:22 Ginu asinimbakngakaing kapae katak gua nataaing. Siwan ngana ninu asinimbakngakamang kapae atnataamang. Dasingge? Anututa aminbam gatayaman sanga kayuk yutnanga aknga paning kaknga ninu Judia nana aminda tangenatnim.
JOH 4:23 Ngana masande aminbamda baniaatangu Nanin Anutue siakande siknga ngang inimbaknganing. Ngan. Tapduknga unzing inimbaknganing gwenu gwa apunggak ngang inikut. Aminu unzing inimbaknganingu Naninda yawake kanangge pasinggak.
JOH 4:24 Aminda Anutu kananga dua. Siwan gatu tananga dua. Sanga got takngata binga yuakge aminu ie inimbakngananggengu baniaatang siakande siknga ngang inimbakngayok,” ngang inikut.
JOH 4:25 Ngang iniwan mayata yake anzing inikut, “Na atnataat. Anututa tapan Mesaia gatanimuya apata asapik. Aminu kunduta Grik wam tangan ie Krais ngang inikaing. Sike tapduknga asapik gwene ita sanga kuupbamde ninikapik,” ngang inikut.
JOH 4:26 Iniwan ita yake, “Aminu waapa na unin. Gaat wamu yakamak,” ngang inikut.
JOH 4:27 Ita unzing yayuwawan ninu pandetnata gatu apbumang. Apu kawatna wamu iat maya waapaat yawawat kake nangaakan natapbumang. Siwan ngana aminu nikatnana tapatuta, “Gata mina binga tanangge natake ininggayak,” ngang maya waapae dua inikut. Ba “Dasingge ga iat yakamayak,” ngang dua Jesue inikut. Wena.
JOH 4:28 Siwan maya waapata itane yangga gapma gwena undang teke gatuna yot gapmane kuke anzing yanikut,
JOH 4:29 “Ginu apu aminu tapatu kanong. Ita nata sanga kuupbamu tupa tasikumde nanik.
JOH 4:30 Waapa Anututa tapan Krais gatanimuyaapa ba,” ngang yaniwan natake you wanggapma teke Jesue kuking.
JOH 4:31 Kepiapane apuwawa ninu pandetnata Jesu anzing inikumang, “Yanindamumsaapa. Ga nanamba napso,” ngang inina
JOH 4:32 ngana ita yake anzing ninikut, “Natane nanama ginda dua kaaingu kundu kaya,” ngang ninikut.
JOH 4:33 Niniwan pandetnata nisa anzing yakumang, “Aminu tapatuta ba nanamu pakapu iman nakge yanggak ba dasing,” ngang yakumang.
JOH 4:34 Yana Jesuta tuwang wamu takngatu anzing ninikut, “Na atnanitewan apbum tapae banip tawanggat takngata nanam napa gupmasan tapan kekekangamunggak binga singamunggak. Singaman nata itane puya tasiwa puyuwik,” ngang ninikut.
JOH 4:35 “Ginu anzing yakaing, ‘Yekau gweaat gweaat kana sandewana tapduknga nanamu buya detnanga siwik,’ ngang yakaing. Siwan ngana ginda kumbasike puya angaangae kanong. Buya atdetnanga gwa sikaing.
JOH 4:36 Aminu buya detnangge pasiwiu ita manina apapik. Nanamu buya deke pakapu unekan pening binga aminbam yanipakapa natane pandetna dakngake kayuk yutning kaknga pake asinggan asinggan yutning. Unzingge aminu nanam kwaiwik kapaat gatu nanamu buya dewik kapau kuut tapaatda apbakngasan.
JOH 4:37 Unzingge wamu asinggan yakamang kaknga siakan singgak, ‘Aminu tapatuta puya pasike kwaiwan ngana aminu tapatuta buya dewik,’ ngang yakamang.
JOH 4:38 Puya amina kunduta aminbamu gwa yaniwa natapbing. Siwan ginu aminu wa gwa yaniwa natapbikatnana kundu natane aminabam daknganingge danipewa kuku kwatan dua tasike yanipakapning,” ngang ninikut.
JOH 4:39 Wamu waaknga ngang niniyuwawan maya waapatane wam natake aminu wanggapmane nana aminda Jesue natake Anututa initewan apbut tapa unin ngang natapa kekekakut.
JOH 4:40 Jesue natapa kekekawan ie kuke anzing iniking, “Ga ma kuwim. Nikat yutnim,” ngang iniking. Iniwa ita tapduu gweaya you wanggapmane yukut.
JOH 4:41 Yuke aminbam yaniwawan natake aminu kunduat ie natapa kekeknga sikut.
JOH 4:42 Siwan wa aminda maya waapa anzing iniking, “Tupanu ninu gae wamban natake ninu aminu waapae natapna kekeknga sikut. Siwan ngana apmanu nisa siknga ie wam natake ninu atnataamang. Aminu waapatakan aminbamu keune nana kuupbam ita gatayaman kayuk yutning kaknga taning kapanin,” ngang iniking.
JOH 4:43 Siwan tapduu wa gweaya yuwan sandewana Jesuta you wanggapma teke Galili kep komune kunangge natake
JOH 4:44 Jesuta wamu ina anzing yakut, “Ayanikapsa amintapa kepna siknga komune umana wena,” ngang yake undang kukut.
JOH 4:45 Kepiapane kusika Galili kep komune kundopan unenana aminda kake ie apbakngaking. Dasingge? Wa amin kaya yuwatakak tapduk takwanu Pasova gwende Jerusalem kuke ita sangabamu tapduk wagwene tasiwawan akaking.
JOH 4:46 Siwan Galili kep komu banakan kusika Jesuta Kena yot gapmane kundopbut. Sike you wanggapmane ita tupa duya takngatu tasiwan yangga akngata wain tupunde yangga dakngawan kaking. Siwan you wanggapmane gatuna kuke yuwawan aminu gavmandane puya amina tapatu Kapaneam yot gapmane yukut tapatane waaknga mait sikut.
JOH 4:47 Siwan aminu waapata nataawan Jesuta Judia kep komuneta apu Galili kep komune gwa apan natapbut. Siwan waakngata kumnangge dapaknga siwan kake aminu waapata Kena yot gapmane koke Jesue kukut. Jesue kuke, “Ga waakngatane maitna sandekngamuyo,” ngang inikut.
JOH 4:48 Iniwan ngana yake anzing inikut, “Ginu duya takngatu takngatu dua kakengu Anututa gatangaman pasinggat takngae siakan ngang dua natapning,” ngang inikut.
JOH 4:49 Iniwan yake, “Gata epso. Waakngata kupsak,” ngang inikut.
JOH 4:50 Iniwan yake, “Nata maitna gwa sandekngama take singgakge kunggayo,” ngang inikut. Iniwan aminu waapata natapan siakan siwan yotna gatu kukut.
JOH 4:51 Kepiapane kuwawan itane puya aminata ininangge apbing. Apuke, “Waatdakakata take gwa singgak,” ngang iniking.
JOH 4:52 Iniwa yake, “Zaapduk ita take sikut,” ngang yanikwaiwan, “Kweu kepmaom,” ngang iniking.
JOH 4:53 Iniwa natake baniaatang anzing natapbut, “Wa tapduknga waomzimune Jesuta yake, ‘Waakgata take siwik,’ ngang nanikut,” ngang natapbut. Natake ita Jesue natake Anututa initewan apbut tapa unin ngang natapan siakan sikut. Siwan itane dongata unzakan natapbing.
JOH 4:54 Siwan Jesuta Judia kep komuneta Galili kep komune apbut gwekatang duya waaknga tasiwan takngaaya dakngakut. Tupa duya takngatu keu wakomunekan tasikut.
JOH 5:1 Siwan apmea Judia nana aminda Anutue natake nanam buyambam sake naning gwende natake Jesuta Jerusalem kopbut.
JOH 5:2 Siwan Jerusalem gapmaatang yangga gapanu gwendu umana Betesda ngang iniking. Siwan yotdane daman gwende gwabo gwatdu umana Sipsipde Gwabok ngang inikingune ita yangga gapanu wagwenu kwaimune yukut. Siwan yangga gapanu wagwene you gepae yewatakakge tasiwa kumbasiwan banakanu gwendu mitapbing.
JOH 5:3 Siwan gepa you wagwene aminbam mait aminu kai wai siya amin kepina wai siya amin kwatana kekeknga siya amin ngang unekan yuking.
JOH 5:4 Ge sipdune sipdune Anutue angela tapatuta apu yangga gwekatang pukuke tasiwan saa singgak. Saa siwan kake mait aminu tupan yangga gwene pukuwik kapatane maitna wena siwik. Siwan saa siawan mait aminu waakwakga pukunangge yuking.
JOH 5:5 Siwan mait aminu tapatu nakanu buyambam 38 ngang undang gwa yuwan sandekut.
JOH 5:6 Yuwan sandewan Jesuta kake waapata nakanu buyambam siknga gwa yukut ngang natake anzing inikwaikut, “Ga gupba take siwikge nataayak ba dasing,” ngang inikwaiwan
JOH 5:7 yake anzing inikut, “Take nataat ngana tapduknga yanggata saa singgak gwene nata yaikopsiune pukuwawa aminu tapatuta dua napbikbikge aminu akgatangamunanga wena,” ngang inikut.
JOH 5:8 Iniwan Jesuta yake, “Ga enake pimaka take kungga,” ngang iniwan
JOH 5:9 zetgaman maitna wena siwan pimana take kukut. Siwan tapduk wagwenu yuwatakak tapduk.
JOH 5:10 Ge maitna wena siwan pimana take kuwawan kake Judia nana amindane takeakwakaa anzing iniking, “Pimaka ma take kuwim. Apmanu yuwatakak tapduk gwen kaamang.”
JOH 5:11 Ngang iniwa yake anzing yanikut, “Gupma take tasingamuk kapata pimaka take kungga ngang naniwan tasinggat,” ngang yanikut.
JOH 5:12 Unzing yaniwan yake anzing inikwaiking, “Mamin amin tapata ga gatane pimaka pake kunggayo ngang ganik,” ngang inikwaiking.
JOH 5:13 Siwan ngana aminu wa take sikut tapa ie dua natapbut. Dasingge? Aminbamda yangga gapanu wagwene yuking aminde banakan kuke Jesuta kusopuwan dua kakut.
JOH 5:14 Siwan masande Jesuta aminu waapa Anutue yot takwan gwene kake anzing inikut, “Natapso! Apmanu ga take gwa siyak. Gata waiakngaka gatuka ma tasiwim. Gatu meya buyambamu takngatuta gae apsak,” ngang inikut.
JOH 5:15 Iniwan natake ita kuke Judia nana amindane takeakwau anzing yanikut, “Aminu na tasingaman take sikum tapa Jesu,” ngang yanikut.
JOH 5:16 Siwan Jesuta sanga wambinga yuwatakak tapduk gwene asinggan pasiwawan Judia nana amindane takeakwau ie wai tasingamuking.
JOH 5:17 Siwan ngana Jesuta yake anzing yanikut, “Natane Nanata puya apasinggawan apu apman apunggak. Ge nakaya puya apasiwit,” ngang yanikut.
JOH 5:18 Ngang yaniwan Judia nana amindane take waakwau anzing natapbing. Ita mama wamu yuwatakak tapduk gwendane zipbukgak. Zipbuke Anutu inane nana siknga ngang yanggak. Siwan wamu waaknga ngang yake ita Anutu binga dakngananggenggak ngang natapbing. Unzing natake Jesu tanguwa kupikge take siknga natapbing.
JOH 5:19 Siwan Jesuta wamu takngatu anzing yanikut, “Nata siakande siknga daninggat. Ninae banip tawake dua tasiwit. Nanata tasiwan kake waakngakan tasiwit. Na itane waaknga yuke ita tasinggak kakngakan tasiwit.
JOH 5:20 Na ie waakngae banip gwaang natangamuke tasinggak kaknga kuupbam yeukngaman kaat. Ge sanga apmea yeukngaman tasiwit taknga sanga tupa tasiwa gwa kaking kaknga yapbiban ginu akasatnaning.
JOH 5:21 Nanata aminu gwa kumbing aminu gatu pangenawan kayuk yutning. Ina unzakan. Nata kayuk yutnanga aknga aminu tapatue imunanggengu aminu waapae asimit.
JOH 5:22 Ge Nanata aminu dua usanzikgak. Wena. Na itane waaknga ita nandutewan natakan aminu kuupbam usanziwit.
JOH 5:23 Siwan aminu kuupbamda Anutue inimbakngakaing. Ina unzakan. Na ie waakngae umana yatangenatningge Nanata naniwan nata aminu kuupbam usanziwa Nanata inatakan dua usanziwik. Naat kuut usanzitzim. Aminu tapatuta na Anutue waakngae umana dua yatangenawiu waapata Nana na nanitewan apbum tapatane umana kuut dua yatangenawik kapa unin.
JOH 5:24 “Siakande siknga daninggat. Aminu tapatuta natane wam natake aminu atnanitewan apbum tapae natapan kekekawiu waapata kayuk yuwik kaknga pake asinggan asinggan yuwik. Aminu waapata waiakngane kupik kaknga teke kayuk yutnanga aknga gwa pake yuak. Pake yuwawan amin usanziwit gwene ie wamu wena.
JOH 5:25 Siakande siknga nata daninggat. Tapduu gwendune aminu zikaa akngaatang yuaingu na Anututane waakngae wam natapning. Siwan aminu wamu wa atnatapning aminda kayuk yutning kaknga apaning. Ngan. Tapduk wa paning gwenu gwa dapakanggak.
JOH 5:26 Sike Nanin Anututa kayuk yutnanga akngatane yapii. Siwan ita kekeknga akngana na itane waakngae atnamukut. Atnaman nakaya ina unzakan kayuk yutnanga akngatane yapii yuat.
JOH 5:27 Nata aminbamde notna dakngake yuwawa Nanata nandutewan aminbam usanziwit.
JOH 5:28 “Wamu waaknga daniwa natake ginu nangaakan ma natapam. Tapduk gwendune aminbamu matmat gapmane yuaingga natane wam natapning.
JOH 5:29 Natane wam natake matmat gapmaneta gatu enake epu kepman kuning. Sike aminu sanga takeaknga tasikingu wa aminu enake kayuk yutnanga aknga pake asinggan asinggan yutning. Sike waiaknga pasiking aminu gatu enake toknga aknga asinggan asinggan pake yutning,” ngang yanikut.
JOH 5:30 “Nata sanga takngatu ninae banipda siwan tasinanga dua. Aminu na nanitewan apbum tapae banip tawake nata aminbam usanziwa noman gan siwik.
JOH 5:31 “Sike na awiapatakan ninae wam yakapanu take dua siwik.
JOH 5:32 Sike tapatuta nae wamu kuut ayakapmanggak. Wamu wa yakapmanggak kakngae natapa siakan singgak.
JOH 5:33 “Tupa ginda aminu kundu Jonde yanipewa kuking. Yanipewa kuke natawawa nae wamu siakan taknga Jonda yakapan natapbing.
JOH 5:34 Na aminda nae yapii yakapikge dua natanggamatanggat. Wena. Ngana nata ginu sanga kayuk yutnanga aknga paningge natake nata wamu waaknga daninggat.
JOH 5:35 Jonu waapata danike tasikut taknga lamda binga isikoke kakaa sikut. Siwan ginda kakaa waakngane dapaknga siknga bakngaking.
JOH 5:36 “Siwan ngana sanga Jon yapbikuu waakngata natane yapii yakapmanggak. Puya kuupbam Nanata nae namukuu nata puya waaknga tasiwawa nanduke Nanin Anututa initewan apbut tapa unin ngang anggaman nataaing.
JOH 5:37 Siwan Nanin Anutu wa nanitewan apbum tapata natane yapii gwa yakapbut. Siwan ngana ginu itane wamu kundusimpaa dua nataaing. Wena siknga. Ginda ie nomu dua kaking.
JOH 5:38 Siwan na nanitewan apuke daniwa ngana ginda natapa siakan dua singgak. Siwan Nanin Anututane wamnaaya gitna dua pake yuaing.
JOH 5:39 Ginu anzing nataaing. Anutue wamu mataking kaknga gatukande tasike undang kayuk yutnanga aknga pake kayuk asinggan asinggan yutnim ngang nataaing. Unzingge natdetdet waaknga noman siknga panangge natake ginu wamu wa yakapsa aminda mataking kaknga asinggan kendeke tasikaing. Siwan ngana wamu wa mataking kakngata nae yapii yakapmanggak.
JOH 5:40 Yakapan ngana ginu kayuk yutning kaknga tanangge natake ngana nae dua apukaing,” ngang yanikut.
JOH 5:41 “Aminda natane umana yatangenatningge dua nataat.
JOH 5:42 Siwan ngana na ginde atnataat. Ginu Anutue banip gwaang dua natangamukaing.
JOH 5:43 Na Nanata nanitewan apbum ngana ginda nandupa take dua singgak. Sike aminu tapatuta ina apiu ginda itane wam natapning.
JOH 5:44 Ginu notzata umanza yatangenawa take nataing ngana Anutu awiapatakan umanza yatangenatnangge tasindamunggak kakngae masa imukaing. Unzingge ginda nae natapa siakan dua singgak.
JOH 5:45 “Siwan ngana nata ginda wai tasiking ngangu Nanae dua iniwit. Wena. Unzingu ma natapam. Ginda wai tasiking ngang yawikapa Moses unin. Mama wamu aminu waapata matakut takngae natake ginda akgatanimik ngang nataaing kaknganin.
JOH 5:46 Sike ginu Mosesde mama wam natapa siakan sikut gamu ginu nae wapaya natapa siakan siwan. Dasingge? Ita nae yapii yakapmake matakut.
JOH 5:47 Siwan ngana ginu wamu ita matakut takngae natapa siakan dua singgakge natane wam natapa siakan dua singgak,” ngang yanikut.
JOH 6:1 Siwan Jesuta duya takngatu takngatu pasiyuk mait aminde maitna sandeyamukut.
JOH 6:2 Sandeyamuwawan aminbamda kake ie tawaking. Siwan Galili yangga gapanu umana takngatu Taibirias ngang inikaing. Yangga gapanu wagwene dobangbamu gwendu take kwaimune kautdu saak kukut. Kuke iat ninu pandetnaatda unekan gatake kukumang.
JOH 6:3 Kuke bakubaku dakane koke undang pukwikumang.
JOH 6:4 Siwan Judia nana aminda yuwatakak tapduk takwanu Pasova ngang yakaing gwenu kaningge atdapakakut. Dapakawan aminbamda kepiapane kuwawa
JOH 6:5 Jesuta undang pukwike kawawan aminbamda ie apa kakut. Kake aminu waakwakga nanam naningge anzing tasiwit ngang musiaatang natapbut. Natake ngana nata Filip tasiwa siwik ngang natake anzing inikwaikut, “Aminu buyambamu wa apukaingga nanam naningge zaneka usike yamunim ngang,” inikwaikut.
JOH 6:7 Inikwaiwan yake anzing inikut, “Manininu 200 Kinata nanam usike yamuna napa take dua siwik,” ngang inikut.
JOH 6:8 Iniwan pandetnaatnana tapatu umana Endru ngang inikamang. Waapa Saimon Pitatane uyapna. Siwan ita anzing yakut,
JOH 6:9 “Waatdaka tapatusimda poyau mateknga katau kuut musakan gatu pis kundu ngang pake yuwan kat. Siwan ngana nanamu wa mateknga siknga. Aminbamde yamuna siakan dua siwik,” ngang yakut.
JOH 6:10 Ngang yawan Jesuta anzing yakut, “Aminbamu yaniwa pukwitnong,” ngang yawan ninu pandetnata yanina pukwiking. Siwan kekeu wa pukwiking komune zonga zonga buyambam siknga. Sike wa yuking aminu kendewa mateknga dua. Buyambam siknga sikut. Wawita 5,000-da yuking.
JOH 6:11 Siwan Jesuta poyau katau kuut musa wa pake Anutu inimbakngakut. Anutu inimbakngakenga aminu wa pukwiking aminde usanzike ninu pandetna niniwan pake yamutakukumang. Yamutakuwatna ita pis pake ina unzakan tasiwan aminbamda napa take sikut.
JOH 6:12 Nanggawa musia gitnawana Jesuta ninu pandetna anzing ninikut, “Kaiknga kwaapzang butuke mateknga gwendusimu ma tewam,” ngang ninikut.
JOH 6:13 Niniwan aminbamda nawawa kaiknga pimakingu ninda butuke sapa yau katau kuut musaat kepianganu gweaya ngang pamuna dopbing.
JOH 6:14 Pamuna dopa aminbamda kake, “Duya takngatu tasinggak,” ngang natapbing. Natake musiaatang anzing natapbing, “Tupa siknga Anutue wapatang wamu takngatu anzing matakut, ‘Anutue wam yanikapsa aminu tapatuta apmea apik,’ ngang yake matakut taknga aminu aapa unin apunggak,” ngang yaking.
JOH 6:15 Ngang yake i tanggaganuke umana yatangenawa buyambam tapana dakngawikge tasinangge yawa natapbut. Jesuta wamu wa yaking kaknga natake apbitakut. Apbitake kusopuke inatakan bakubaku dakane kukut.
JOH 6:16 Siwan bangee ninu Jesutane pandetnata bakubakundaka teke yangga gapan gwene pukukumang.
JOH 6:17 Pukuke Kapaneam yot gapmane kunangge natake dopangbam gwene koke yangga gapan gwene kukumang. Yangga gwene kuwatna zikaa gwa siwan ngana Jesuta ninde dua apbut.
JOH 6:18 Siwan gotda kekeknga puyaawan yangga sambuya asenakut.
JOH 6:19 Asenaawan ninu yangga gwene maa komdusim kukumang. Kuwatna Jesuta yangga gapan gwene engatangan yaitake apusika dopangbam gwene wesim apundopbut. Apundopan kake ninda asiknga gwaukumang.
JOH 6:20 Siwan ngana ita anzing ninikut, “Nata nina siknga apunggat. Ginu ma gwaubam,” ngang ninikut.
JOH 6:21 Unzing niniwana ninu i take dopangbam gwene takakopnangge dua gwaukumang. Siwan zetgaman dopangbam gwenu you akunangge natapbumang gapmane kundopbut.
JOH 6:22 Siwan tembana aminbamu yangga gapanu kautdu saak yukingga anzing natapbing. Kweu dopangbamu gwendukan andang yukut. Siwan Jesuta pandetnaat dua gatake dopangbamu wagwene kukut. Wena. Pandetnatakan dopangbamu wagwene kuking ngang natapbing.
JOH 6:23 Siwan ngana aminu kundu Taibirias yot gapmane nana aminda dopang bamna pake keu Jesuta poyakge gaak wam yake yaman naking komune wesim apbing.
JOH 6:24 Apuke aminbamda Jesuat ninu pandetnaatde nindupa maiwan dopangbam gwegwene gatuna koke Jesue tawatakuke Kapaneam yot gapmane kautdu saak kuking.
JOH 6:25 Siwan yangga gapan kautdu saak Jesu tawataku kake anzing inikwaiking, “Yanindamumsaapa. Ga ane zaapduk apbuyak,” ngang iniwa
JOH 6:26 yake anzing yanikut, “Siakande siknga daninggat. Nata kweu duya takngatu tasiwa ginu poyau unin napa musipza gitnakutde natake ginu nanamu gatu nanangge nae nawatakapukaing. Ngana nata tasiwa nanduke Anututa initewan apuke pasinggak ngang dua natake nae nawatakapukaing. Wena.
JOH 6:27 Ginu nanamu napa wena siya panangge nangaakan ma natake tasiwam. Aho. Ginu nanamu napa dua puyutnanga akngae tawataku kake nayuk kayuk yutning kaknga pake asinggan asinggan yutnong. Nanin Anututa nandutewan nanamu wa binga na aminbamde notna dakngake yuat tapata ginde damit,” ngang yanikut.
JOH 6:28 Ngang yaniwan yake anzing inikwaiking, “Ninda dasing tasina Anututa nindupan take siwik,” ngang inikwaiwa
JOH 6:29 yake anzing yanikut, “Ginu Anututa nanitewan apbum tapae natapa siakan siwanu Anututa dandupan take siwik,” ngang yanikut.
JOH 6:30 Ngang yaniwan yake anzing iniking, “Gata duya zaaknga tasiwi ninu kake Anututa ganitewan apuke tasinggayak ngang natapna siakan siwik? Ga mina puya aknga tasiwi kanim?
JOH 6:31 Nindane baminda nanamu enandang nana keu amina wena komune yuke naking. Wa nakingge natake Anutue wapatang wamu takngatu anzing matakut, ‘Ita nanamu enandang nana wa aminde yaman naking,’ ngang matakut.”
JOH 6:32 Ngangu wamu waaknga ngang iniwa ita yake anzing yanikut, “Nata siakande siknga daninggat. Nanamu enandang nana ginde bamzae yamukut tapa Moses unin dua. Wena. Natane Nanata nanam siknga enandang nana ginde damunggak.
JOH 6:33 Nanamu Anututa wa damukuu enandang teke epuke kayuk yutning kaknga kep aminde yamunggak,” ngang yanikut.
JOH 6:34 Ngang yaniwan yake anzing iniking, “Buyambam tapa! Gata nanamu wa ninde asinggan nimuyo,” ngang iniking.
JOH 6:35 Iniwa yake anzing yanikut, “Nanamu wa yanggau nata nina siknga unin. Nata tasiyama aminbamda kayuk yutning kaknga apake yutning. Aminu tapatuta nae apiu waapata tomna dua nataaing binga ba yangga tangopnangge dua nataaing binga sanga tapatu tanangge natake dua natanggamatawik. Wena.
JOH 6:36 Siwan ngana nata gwa danit. Ginda na atnanduke ngana ginu Anututa nanitewan apbumde dua nataaing.
JOH 6:37 Aminu natane aminabam daknganingge natane Nanata papiu wa aminda nae apning. Siwan aminu tapatuta nae apiu nata waapa dua inikwasiwit. Wena siknga.
JOH 6:38 Na enandang teke epuke ninae banip tawanangge dua epbum. Wena. Na epuke aminu atnanitewan epbum tapae banip tawanangge epbum.
JOH 6:39 Sike na atnanitewan epbum tapae baniu anzing. Aminu maya wawi aminabam daknganingge ita pakuu wa aminu nata katak toiba tapatuta wena dua siwik. Siwan nata tapduknga sandewik gwene akumbing katangga gatuna pangenawit.
JOH 6:40 Nanatane baniu anzing yuak. Aminu kuupbamda na nanduke Anutue waakapa ngang nae natapa kekekawiu wa aminda kayuk yutning kaknga pake kayuk asinggan asinggan yutning. Siwan nata tapduknga sandewik gwene akumbing katangga gatuna pangenawit,” ngang yanikut.
JOH 6:41 Siwan Judia nana kunduta natawawa Jesuta tuwang wamu takngatu yake nanamu wa enandang teke epbuu nata unin ngang yawan natapbing. Wamu waaknga natake ie numunumu yake
JOH 6:42 ina anzing yaking, “Dasingge? Aminu aapa Jesu. Josepdane waaknga. Ninu itane nanamingae atnataamang. Dasingge ita anzingu yanggak, Na enandang teke epbum ngangun,” ngang sapduke yaking.
JOH 6:43 Unzing sapduwawa Jesuta anzing yanikut, “Ginu wamu gisa banakan numunumu yake ma yawam.
JOH 6:44 Nana na nanitewan epbum tapata aminu tapatu dua kaitakapanu nae apnanga dua. Sike akaipakapan apning aminu nata tapduknga sandewik gwene akumbing katangga gatuna pangenawit.
JOH 6:45 Wamu ayanikapsa aminda buk katang anzing mataking, ‘Anututa aminu kuupbam yanindamumbik,’ ngang mataking. Aminu kuupbam Nanata yanindamuban natake natdetdet pakaingu waakwakga nae asapukaing.
JOH 6:46 Wamu waaknga natake aminu tapatuta natane Nana akawawan inindamukut ngangu ma natapam. Wena. Na Anutuat yusika epbum tapatakan Nana akakum.
JOH 6:47 Nata siakande siknga daninggat. Aminu wamu wa yanggat takngae natapan siakan singgau waapata sanga kayuk yutnanga aknga apanggak kapanin.
JOH 6:48 Siwan ginda nanam napa kekekandaman kekeknga yuaing binga nata sanga kayuk yutnanga aknga aminde yama pake kayuk asinggan yutning.
JOH 6:49 Tupa siknga gindane bamzata keu amina wena komune yusika nanamu enandang nana Anututa asinggan yaman nakaking ngana wa aminda gwa kumbing.
JOH 6:50 Ngana nanamu enandang teke epbuu aminu tapatuta unin napiu waapata dua kupik.
JOH 6:51 Sike nanamu wa enandang teke epbuu wa Anututa aminde yaman pake kayuk asinggan yutningu wa na unin. Sike aminu tapatuta unin nakengu kayuk asinggan yuwik. Siwan nanamu wa nata aminu kepdakane nana aminde yama naningu wa natane gupma. Siwan aminda nanamu unin naningu kayuk asinggan asinggan yutning,” ngang yanikut.
JOH 6:52 Unzing yaniwan natake Judia nana aminu waakwau ina yanganuke tapatekwa wamu anzing yaking, “Asikaya aminu aapata itane gupna niman nanimde yanggak,” ngang yaking.
JOH 6:53 Ngang yawa Jesuta tuwang wamu takngatu anzing yanikut, “Nata siakande siknga daninggat. Ginu na aminbamde notna dakngake yuat tapatane gupma dua nake daknga dua tangokengu ginu kayuk asinggan asinggan yutnanga dua.
JOH 6:54 Sike aminu natane gupma nake gatu natane daknga tangopiu waapata kayuk asinggan asinggan yuwik. Yuwawan nata tapduknga asandewik gwene akupik katangga gatuna tangenawit.
JOH 6:55 Dasingge? Natane gupma wa nanam siknga. Siwan natane daknga sanga take siknga atangopnanga.
JOH 6:56 Aminu natane gupma nake gatu natane daknga tangopiu nata iatang gatake yuwa unekan sukusim.
JOH 6:57 Siwan natane Nana kayuk asinggan yuak kapata na nanitewan epbum. Siwan ita kayuk yutnanga akngana atnaman pake yuat. Ina unzakan aminu na gitna tapiu waapae nata kayuk yutnanga aknga natane asima take kayuk asinggan asinggan yuwik.
JOH 6:58 Wa nanamu enandang teke epbut. Sike nanamu wa tupa bamzata nake yusika kumbing binga dua. Aho. Aminda nanamu unin napiu waapata kayuk asinggan asinggan yuwik,” ngang yanikut.
JOH 6:59 Jesuta miti you Kapaneam yot gapmane nana gwene koke yanindamuke wamu waaknga ngang yanikut.
JOH 6:60 Siwan Jesue wamu waaknga natake pandetna kunduta wepda anzing yakumang, “Wamu waaknga natapna siakan dua singgak. Mamin tapataka wamu waaknga natapan siakan siwik,” ngang sisip tangan yakumang.
JOH 6:61 Sisip tangan yana ngana semna wamu waakngae natake Jesuta anzing ninikut, “Ginu wamu waaknga natake apimanangge sikaing ngang danduat.
JOH 6:62 Na aminbamdane notnaapa dakngake yuat. Sike keu tupa yukum komune gatuna kowawa nandukengu ginu dasing natapning,” ngang ninikut.
JOH 6:63 “Kayuk yutnanga akngae yapii Waung Takwanu unin. Ge gupmae danit takngata dua gatandamik. Wena. Wamu wa danit taknga kekekngana kaya. Wamu waakngata akgatandaman ginda kayuk yutnanga aknga pake yutning.
JOH 6:64 Siwan ngana gikatnana kunduta wamu waakngae natapa siakan dua singgak,” ngang ninikut. Siwan tapduknga aminbamda itane wamna tupan natapbing gwenuneta Jesuta aminbamu baniaatang usanzike aminu waakwakga nae natapa siakan dua siwik. Siwan aminu waakwakga nae natapa siakan siwak ngang anggaman natapbut. Natake aminu iwande yaman taning kapae anggaman natapbut.
JOH 6:65 Siwan Jesuta gatuna anzing ninikut, “Gikatnana kunduta wamu wa danit taknga natapa siakan dua singgak ngang danduke tupa anzing gwa danikum. Natane Nanata aminu tapatu dua kaitakapanu nae dua apik,” ngang ninikut.
JOH 6:66 Siwan wamu waaknga ngang niniwan natake ninu pandetna bamda i teke iat dua gatake sukukumang.
JOH 6:67 Siwan Jesuta ninu pandetna aminu 12-de anzing ninikwaikut, “Ginu kuut napmake kunangge nataaing ba dasing,” ngang ninikwaiwan
JOH 6:68 Saimon Pitata yake anzing inikut, “Ga gapmake ninu mamin tapae kunim? Gatakan asinggan asinggan kayuk yutnim takngae wam pake yuayak.
JOH 6:69 Gata Anutue amin dudumnaapa yuayak ngang natake ninda ga gandupna siakan singgak,” ngang inikut.
JOH 6:70 Ngang iniwan yake anzing ninikut, “Nata ninatakan ginu pakum ngana gikatnana tapatuta iwana dakngake yuak,” ngang ninikut.
JOH 6:71 Siwan aminu wa yakut tapa Judas unin. Ita Saimon Iskeriot yot gapmane nanaapatane waaknga. Judas waapa ninu pandetna 12-pat nana tapatuta masande Jesu iwande yaman tanggaganuking.
JOH 7:1 Siwan masande Judia nana amindane takeakwau atanguwa kupikge tasiwawa Jesuta Judia kep komune kunangge apbitakut. Undang kunangge apbitake ita Galili kep komu banakan sukukut.
JOH 7:2 Siwan tapduk takwanu Judia nana aminda tupa bapuninda yotna gepa binga mitake yuaking ngang ie natake tapduk takwanu gwendu Jerusalem gapmane kaningge atdapakakut.
JOH 7:3 Atdapakawan natake uyapnata anzing iniking, “Gata you anggapma teke Judia kep komune kuke pandetda bamda gandupa duya takngatu takngatu pasiwi kaning.
JOH 7:4 Aminu tapatu amin bamda kaningge natakengu ita sanga kusopukngaatang dua tasinggak. Sike gata sanga unin tasinanggengu aminu kuupbamde kaine anggaman yuke tasiyo,” ngang iniking.
JOH 7:5 Sike itane uyapnata ie natake Anututa tapan pasinggak ngang natapa siakan dua siwan unzingu yaking.
JOH 7:6 Unzing iniwa ita yake anzing yanikut, “Tapduknga nata unzing tasiwitde dua dapakak. Ngana tapduknga ginu apasikaing gwenu wena sinanga dua.
JOH 7:7 Sike kepdakane nana aminda ginde iwanza dua daknganing. Ngana nata sanga waiaknga tasikaingge yaniwawa iwana dakngake yuaing.
JOH 7:8 Gisa kuke tapduk takwanu wagwenu kanong. Ngang apmanu na tapduk takwanu wagwende dua kuwit. Natane tapduknga dua dapakak,” ngang yanikut.
JOH 7:9 Ita uyapna unzing yanikenga Galili kep komune yukut.
JOH 7:10 Siwan uyapnata tapduk takwan kanangge natake Jerusalem yot gapmane kopana masande iyaa koke ngana anggaman dua kopbut. Ita apbinga kusopuke kopan
JOH 7:11 Judia nana aminda tapduk takwanu wagwene Jesue tawatakuke aminu waapa zandang yuak ngang yaking.
JOH 7:12 Siwan aminbamda ie numunumu sisip yake aminu kunduta, “Ita aminu noman tapa,” ngang yawa kunduta, “Aho. Ita aminbam panzikgak,” ngang yaking.
JOH 7:13 Unzing yawawa ngana Judia nana amindane takeakwakge akgwauke aminu tapatuta ie wamu anggaman dua yakut.
JOH 7:14 Siwan tapduk takwanu wa yuking gwenu banakan kopatang Jesuta Anututane yot takwan gwene koke aminbam yanindamukut.
JOH 7:15 Yanindamuwawan Judia nana aminda nangaakan natake anzing yaking, “Dasing aminu aapata buu kendekgak? Ita papia you dua tasikut nganan,” ngang yaking.
JOH 7:16 Unzing yawa Jesuta yake anzing yanikut, “Wamu nata wa daninggat taknga nata ninane dua. Aho. Wamu waaknga na atnanitewan apbum tapatane.
JOH 7:17 Sike aminu tapatuta Anutue gen gwaamutnangge natapiu waapata wamu nata ayanggat takngae natake wam waaknga Anututa yanggak ngang anggaman natapik. Jesuta inae natdendetnata siwan yanggak ngang dua natapik.
JOH 7:18 Aminu ina banipda natake yawiu waapata inane umana buyambam siwikge take nataak kapanin. Ngana aminu tapatuta aminu asinitewan apbut tapae umana yatangenawiu waapata aminu noman siknga. Wai takngatu dua tasiwik.
JOH 7:19 Tupa siknga Mosesda ginde bamzae mama wam yamukut. Ngana gikat nana tapatuta mama wamu waaknga dua tawake tasike ginda na atnuwa kupitde tasikaing,” ngang yanikut.
JOH 7:20 Yaniwan yake anzing iniking, “Waung wai tapatuta ga tapan datdaptake unzingu yanggayak. Maminda ga gutnangge tasinggak? Wena,” ngang iniwa yake anzing yanikut,
JOH 7:21 “Nata duya takngatu yuwatakak tapduk gwene tasikumde ginu kuupbamda nangaakan nataaing.
JOH 7:22 Mosesda ginde gupza mataningge yakut taknga Mosesda tupan dua tangenakut. Wena. Sanga waaknga bamzata tupa siknga tangenaking. Ngana ginda waakzatane gupna yuwatakak tapduk gwene matakaing.
JOH 7:23 Ginu Mosesdane mama wamu sandetnam ngang yake ginda waakzatane gupna yuwatakak tapduk gwene matakaing. Ngana nata yuwatakak tapduk gwene aminu tapatutane gupna take tasingama kake ginu mama wam sandeyaapa ngang nanduke nae musipza toknga unzingu wai nataing.
JOH 7:24 Yapii katak dua natakengu yumdekan ma usanzike yawam. Ginda sangabamu kepi noman takngane usanzitnong,” ngang yanikut.
JOH 7:25 Siwan Jerusalem nana kunduta anzing yaking, “Dasingge? Aminu aapa atanguwa kupikapanin.
JOH 7:26 Ita dua kusopuke wamu aminbam yaniwawan ngana aminu tapatuta sapdut wamu takngatu ie dua ininggak ngang yaking. Take aminda atnatake Anututa tapan Krais gatanimuyaapa unin ngang natapa siakan singgak gamu dua inindakngawam.
JOH 7:27 Ngana ninu aminu waapatane yotnae atnataamang. Siwan ngana Anututa tapan Krais dakngake apik kapata asapan kake aminu tapatuta itane yotnae dua natapik,” ngang yaking.
JOH 7:28 Siwan Jesuta Anututane yot takwan gwene yuke aminbam yanindamuke anzing yanggamatakut, “Ginu nae atnataaing. Siwan ginu natane yotnae atnataaing! Ngana ninae banipda natake dua apbum. Wena. Atnanitewan apbum tapata siakande yuak. Siwan ngana ginu ie dua nataaing.
JOH 7:29 Nata ninatakan ie atnataat. Dasingge? Na iat gatake yusika ita na nanitewan apbum,” ngang yanggamatakut.
JOH 7:30 Unzing yanggamatawan natake kaautde tenangge tasike ngana itane tapduknga dua sikutde tanggaganutnangge apmeptaking.
JOH 7:31 Tanggaganutnangge tasiwawa ngana aminu buyambamda ie natapa kekekawan anzing yaking, “Aminu Anututa tapan Krais gatanimuyaapa dakngake apu duya kwaapzang tasike aminu aapa dua yapbimbik,” ngang yaking.
JOH 7:32 Siwan Ferisi aminu kunduta nataawa aminbamda numunumu yake sisip tangan wamu waaknga Jesue yawa natapbing. Natake Anutue yot takwan gwene pasiya amindane takeakwakat gatu Ferisi amikatda puya amina yanipewa kuku i kaautde teningge kuking.
JOH 7:33 Kuke kundopa kake Jesuta anzing yakut, “Tapduu mateknga siknga na gikat yuke na gatuna aminu wa atnanitewan apbum tapae kuwit.
JOH 7:34 Undang kuke yuwawa ginda nae nawaba maiwik. Keu nata kuke ayuwit komune ginda kunanga dua,” ngang yakut.
JOH 7:35 Yawan Judia nana aminda ina anzing sapduke yaking, “Ita zagwak kuwan ninda dua kanim? Asikaya nindane notninbamu maa siknga Grik aminde kep komune yuaing aminde kuke Grik amin yanindamutnangge yanggak ba dasing.
JOH 7:36 Ita anzing ninikut, ‘Ginda nae nawaba maiwik,’ ngang yakut. Yake gatu anzing ninikut, ‘Ginu keu nata kuke yuwit komune kunanga dua,’ ngang wamu wa yakut takngatane yapii dasing,” ngang yaking.
JOH 7:37 Siwan tapduk takwanu wa gwendane wenga gwenu wa tapduk takwanu buyambam gwen. Sike tapduu wagwene Jesuta dandam tangan yuke tuwang wamu takngatu apaa anzing yakut, “Aminu tapatu yanggae natakengu nae apuke yangga tangopsok.
JOH 7:38 Wa Anutue wapatang tupa siknga tuwang wamu takngatu anzing mataking, ‘Mamin amindaka nae natake Anututa tapan gatanimuyaapa dakngake apbut ngang natapa kekekawanu yangga buyambam tapaapata binga itane musiaatang yangakoke zipmake kuning,’ ngang mataking,” ngang yanggamatakut.
JOH 7:39 Ita wamu wa yakut taknga Waung Kapae natake yakut. Waungu waapa aminu Jesue natake Anututa tapan gatanimuyaapa dakngake apbut ngang nataaing aminde Anututa apmea yamik kapanin. Sike Jesuta dua kungwake gatu gweake enane kopbutde Waung Kapa yamikge tapduknga dua dapakakut.
JOH 7:40 Siwan aminu kunduta wamu waaknga natake anzing yaking, “Siakande siknga. Aminu aapa ayanikapsa aminu tapatu. Ita gamok apana Krais akgatanimuya apata masan apik kapanin,” ngang yaking.
JOH 7:41 Siwan kunduta anzing yaking, “Aminu waapa Anututa tapan Krais dakngake apik kapanin,” ngang yaking. Siwan ngana kunduta anzing yaking, “Krais gatanimuyaapa Galili kep komuneta apikge ayakapsa aminda dua natake yaking. Wena.
JOH 7:42 Krais waapa dongu Devitkat nana. Siwan ita Betlehem yot gapma Judia kep komune yuak gapmane aawik. You wa gapma tupa Devitda une yukut. Yakapsa aminda unzing mataking,” ngang yaking.
JOH 7:43 Unzingge Jesue natake dongu takngaaya dakngake
JOH 7:44 aminu kunduta kaautde i tenangge tasiking. Tasike tanggaganutnangge natapbing ngana kekekngana wena siwan tanangge apmeptaking.
JOH 7:45 Tanangge apmeptake puya aminu waakwakga gatuna ayanipewa kuking aminde kuking. Kuke kundopa Anutue yot takwan gwene pasiya amindane take aminu waakwakat gatu Ferisi amikatda anzing yaniking, “Dasingge ginda i dua takapukaing,” ngang yanikwaiwa
JOH 7:46 yake anzing yaniking, “Tupa aminu tapatuta wamu aminu waapata yanggak binga dua yakut,” ngang yaniking.
JOH 7:47 Yaniwana Ferisi aminda yake anzing yaniking, “Ita gikaa panzike atdaniwan natake unzingu ninikaing.
JOH 7:48 Sike ninu take amikat gatu Ferisi amikatnana tapatuta Jesue natapan siakan dua singgak. Wena.
JOH 7:49 Ngana aminbamu waakwau Mosesde mama wamde katak dua natake aminu waapae tawakaingu Anutue kaine wai gwa sike yuaing,” ngang sapduke yaking.
JOH 7:50 Siwan aminu waakwakat nana tapatu umana Nikodimas ngang iniking kapata tupa Jesue kukut tapata anzing yanikut,
JOH 7:51 “Nindane mama wamda aminu yumdekan usanzitnimde dua yanggak. Wena. Ninda ie wamu natakenga ninda sanga ita tasikutde katak siknga natakenga usanzitnim,” ngang yanikut.
JOH 7:52 Siwan wa aminda yake tapatekwa wamu anzing iniking, “Gakaa Galili nana aminu tapatu ba ge unzingu yanggayak? Anututane wamu katak siknga kendeke ayanikapsa tapatuta Galili kep komuneta apikge mataking kaknga tawambi maiwik. Unzingu wena. Dua mataking,” ngang iniking.
JOH 7:53 Siwan aminu kuupbam yotna yotna kuking.
JOH 8:1 Kuwawa ngana Jesu tawanu Oliv dakane kopbut.
JOH 8:2 Siwan tembana siknga ita gatuna Anutue yot takwan gwene kukut. Kundopan aminu maya wawi kuupbamda ie apundopa ita pukwike yanindamukut.
JOH 8:3 Pukwike yanindamuwawan mama wam yanindamumsa amikat gatu Ferisi amikatda maya tapatuta yasewa tasiwawan kake tanggaganuking kapa ie takapbing. Takapuke mayapa banakan teke
JOH 8:4 Jesu anzing iniking, “Yanindamumsaapa. Maya aapata yasewa tasiwan kake tanggaganuking.
JOH 8:5 Sike mama wapatangu Mosesda yake ninda maya ambingae supda zipnimde yakut. Sike ga. Gata dasing yawiyak,” ngang iniking.
JOH 8:6 Sike wa aminu i tasiwa siwan ita wamu takngatu dasingga yawan natake take takuwa wam yawikge tasike iniking. Iniwa ngana Jesuta gwetake katakngita kepdakane matakut.
JOH 8:7 Unzing matayuwawan asinggan asinggan inikwaiking. Inikwaiwawa ita enake anzing yanikut, “Aminu gikatnana tapatu waiakngana wena kakengu ita suu tupan gwenu maya aapae muke tanguyok,” ngang yanikut.
JOH 8:8 Unzing yanikenga gatuna gwetake kepdakane matakut.
JOH 8:9 Matayuwawan aminu kuupbam waiaknganinu kaya ngang natake tapatu tapatu epu kepman kuking. Aminuaketa gamok kuwawa kundu masan kuking. Jesu ateke kuwawa ita inatakan yuwawan maya waapa ie nomune yukut.
JOH 8:10 Siwan Jesuta enake maya waapa anzing inikut, “Mayapa. Aminu zandang yuaing? Aminu gae wam temapa yaing aminu wena kaat,” ngang iniwan
JOH 8:11 yake, “Ngan, Buyambam tapa. Wena. Gwa kukaing,” ngang inikut. Iniwan yake anzing inikut, “Nakaya gae wamu yananga wena. Gata kuke masande waiaknga gatuka ma tasiwim,” ngang iniwan akukut.
JOH 8:12 Siwan Jesuta aminbamu gatu anzing yanikut, “Na. Na kakaa aknga kepdakane nana aminde yamuyaapa dakngake yuat. Aminu na nawambiu waapata zikaa dakaatang dua sukuwik. Wena. Gunzitda isiwan kekekake enakaing binga aminu kakaa nata wa yamunggat takngane yuwiu kayuk yutnanga aknga pake asinggan asinggan yuwik,” ngang yanikut.
JOH 8:13 Ngang yaniwan Ferisi aminda yake anzing iniking, “Ga gikae wam yakapi natapna siakan dua singgak,” ngang iniking.
JOH 8:14 Iniwa ita yake anzing yanikut, “Na ninane wam siakande siknga ngang yakapmanggat. Ngana na keu komdune yusikanga uneta apbum. Sike na keu waomune nana siknga ge keu wakomde atnataat. Siwan keu akuwitde komu na atnataat. Sike na ninane wam yakapa siakan singgak. Ngana ginu natane yotna sikngae dua nataaing. Siwan na keu nata akuwit komde ginu dua nataaing.
JOH 8:15 Ginu yapii katak dua kake kaisatakan kake aminu usanzikaing. Na. Na unzingu aminu tapatu dua usanzikgat.
JOH 8:16 Sike ngana nata amin usanzikengu nata nomana siknga usanziwit. Dasingge? Nata ninatakan dua usanzikgat. Aho. Nanda na atnanitewan apbum tapata naat gatake yuke aminu usanzikamak.
JOH 8:17 Sike Mosesde mama wapatangu wamu takngatu anzing matakut, ‘Aminu tapatutakan yawan natapna kem ba ba siakan ba ngang natapnim siwan ngana aminu tapaata wamu buya takngatukan yawat natapna siakan siwik,’ ngang matakut.
JOH 8:18 Nata wamu ninae yakapmanggat. Siwan Nanda na atnanitewan apbum tapataaya nae wamu ayakapan niu wamu buya takngatukan yamakge siakan singgak,” ngang yanikut.
JOH 8:19 Unzing yaniwan yake anzing iniking, “Gatane nanggata zandang yuak,” ngang inikwaiwa ita yake anzing yanikut, “Ginu nae dua nataaing. Siwan ginu Nanae kuut dua nataaing. Ginda nae atnataaing gamu ginde natane Nanae kuut atnatapam,” ngang yanikut.
JOH 8:20 Ita wamu waaknga ngang yake aminbamu Anutue yot takwan gwene you mani pamukaing gwene yuke yanindamukut. Yanindamuwawan tapduknga ita akupikge dua siwan aminu tapatuta dua tanggaganuke kaautde tekut. Wena.
JOH 8:21 Siwan Jesuta gatuna anzing yanikut, “Na akuwawa ginda nae nandupa maiwan ginu akupa waiakngasa ayutdamik. Waiakngasa yutdaman ginu keu nata kuwit komune kunanga dua,” ngang yanikut.
JOH 8:22 Unzing yawan Judia nana aminu waakwau ina anzing yaking, “Ita dasing yake ginu keu nata kuwit komune kunanga dua ngang yanggak? Asikaya ita ina ba tanguwan kupikge yanggak ba,” ngang yaking.
JOH 8:23 Yawa ita yake anzing yanikut, “Ginu ane nana ngana na enandang nana. Ginu keu andakane nana. Na keu andakane nana dua.
JOH 8:24 Unzingge ginu kupanu waiakngasa ayutdamik ngang gwa danit. Sike ginu na atdanitapanin ngang dua natanggamatakengu ginu akupa gindane waiakngasa ayutdamik,” ngang yanikut.
JOH 8:25 Unzing yaniwan yake, “Ga mamin amin tapa,” ngang inikwaiking. Inikwaiwa ita anzing yanikut, “Na aminu tupa atdanikumu waapata yuat.
JOH 8:26 Na wamu kwaapzang nata sanga ginu wai tasikaing kakngae yake toknga paningge usanziwit. Ngana na atnanitewan apbum tapata wamu siakan gan naniwan natapbumu nata aminu kepdakane nana aminde yaninggat,” ngang yakut.
JOH 8:27 Unzing yawan natake Nanin Anutue nininggak ngang dua natapbingge
JOH 8:28 Jesuta anzing yanikut, “Masande ginda na aminbamde notna dakngake yuat tapa na nuke tangenatning. Sike tapduu waomune ginu nae natake na atdanit tapanin ngang natdetning. Unzing natdeke na sanga nina banipda siwan dua tasinggat. Wena. Na wamu Nanata yeukngamunggak kakngakan yakapmanggat ngang natdetning.
JOH 8:29 Nanda na atnanitewan apbum tapata naat gatake yuamak. Ita na dua napmamban nata ninatakan dua yuat. Wena. Sike asinggan asinggan nata Nanda take nataak kakngakan tasinggat,” ngang yanikut.
JOH 8:30 Ita unzing yaniwan aminu kwaapzangga ie natake Anututa tapan gatanimuyaapa dakngake apbut tapa unin ngang natapa kekekakut.
JOH 8:31 Siwan Judia nana aminu kundu ie natapa kekekakuu wa aminu Jesuta anzing yanikut, “Wamu atdaninggat takngae gepbiatang yukengu ginu natane pandetna dakngawa siakan siwik.
JOH 8:32 Siwan ginu siakan wamu anggaman natdeke yuwawa siakan wamu waakngata gatandamuke sanga gin panggaganuwan yuaing kakngane sandetdaman noman gan yutning,” ngang yanikut.
JOH 8:33 Unzing yaniwan natake yake anzing iniking, “Ninu Ebrahamdane dongune aake yuamangge aminu tapatuta ninu dua panggaganuwan meya buyak dua yuamang. Wena. Ngana sandetdaman noman gan yutning ngang dasingge nininggayak,” ngang inikwaiking.
JOH 8:34 Inikwaiwa yake anzing yanikut, “Siakande siknga daniwa natapnong. Aminda wai pasikaing kaknganata panggaganuwan meya buyak yutning.
JOH 8:35 Aminu wa tanggaganuwan meya buyak yuwik kapata wa takut tapatane dongaatang gatukande dua yuwik. Wena. Ngana aminu wa takut tapatane waakngata ie dongaatang gatukande yuwik.
JOH 8:36 Siwan na Nandane waakngata gatandamuke ginu sandetdamanu ginu noman gan yuwa siakan siwik.
JOH 8:37 Na atnataat. Ginu Ebrahamdane dongune aake yuaing. Ngana natane wamu ginde musipzaatangu dua yuakge ginda na nuwa kupitde tasikaing.
JOH 8:38 Nata Nanaat unekan gatake yuke kakum takngae yakapmanggat. Siwan ngana ginu sanga bamzatane aknga tawake tasikaing,” ngang yanikut.
JOH 8:39 Wamu waaknga ngang yaniwan yake anzing iniking, “Nindane baminu Ebraham,” ngang iniwa yake anzing yanikut, “Siakande ginu Ebrahamdane dongune aaking gamu ginda sanga Ebrahamda tasikut taknga tasiwam.
JOH 8:40 Nata siakan wamu kuupbam Anututa yawan natapbumu waakngakan nata ayakapbum. Siwan ngana ginda na atnuwa kupitde tasikaing. Ebrahamda unzingu aminu nomanu tapatu tanguwa kupikge dua tasikut.
JOH 8:41 Ginu sanga gisane nanzatane aknga tawake tasikaing,” ngang yanikut. Unzing yaniwan yake anzing iniking, “Ninu mingata yasewa tasike engang bokngikgak aminda binga dua yuamang. Ninu bapuninu awia tapatutanekan sanga aknga tawake tasikamang. Nanin Anutu unin,” ngang iniking.
JOH 8:42 Iniwa yake anzing yanikut, “Siakande Anutu gindane nanza gamu ginda nae musip gwaang natapam. Dasingge? Na Anutuat yusika apbum. Ninae banipda siwan dua apbum. Aho. Anututa nanitewan apbum.
JOH 8:43 Dasingge ginu nae wama katak siknga dua natdekaing? Nae semna natangamuke nae wama natapnangge ginu apbitakaing.
JOH 8:44 Ginu Setendane donga yuke itane sanga aknga tawanangge kekekake tasikaing. Tupa siknga ita pasikut takngakan apmanu kuut apasinggak. Pasike ita aminu atzipa kupa sanga siakan taknga dua tawanggak. Dasingge? Sanga siakan taknga ie musipatangu dua yuak. Sike kem wamu ita asinggan yanggak. Ita kem amin. Siwan ita kem wamdane toiknga sikngaapa.
JOH 8:45 Siwan ngana na wamu siakan wam yakapa ginda natapa siakan dua singgak.
JOH 8:46 Gikatnana tapatuta nanisapduke ga kem tasinggayak ngang naniwanu siakan dua siwik. Na kemu takngatu dua tasikum. Siakan wam daninggat ngana ginu dasingge musipzaatang siakan ngang dua nataaing?
JOH 8:47 Aminu tapatuta Anutue waaknga dakngakengu ita Anutue genu akgwaamumbik. Siwan ngana ginu Anutue waak dua dakngakingge ginu itane gena dua gwaamukaing,” ngang yanikut.
JOH 8:48 Unzing yaniwan yake anzing inisapduking, “Ga Sameria kep komune nana gawaknga amin tapa. Unzingge Waung waiapata ga tapan datdaptake wamu waaknga yanggayak ngang ninda yana siakan singgak,” ngang sapduke iniking.
JOH 8:49 Sapduke iniwa ita yake anzing yanikut, “A! Unzing dua! Waung waiapata na dua takut. Sike na Nanatane umana tangenawawa ngana ginu natane umana apimapikge nanisapdukaing.
JOH 8:50 Na ninae umana dua tangenakgat. Wena. Natane umana tangenakgak kapa ayuak. Ita ninu usanziwik kapanin.
JOH 8:51 Siakande siknga daniwa natapnong. Aminu tapatuta natane gen gwaamukengu ita kekeknga asinggan yusika dua kupik,” ngang yanikut.
JOH 8:52 Yaniwan yake anzing iniking, “Unzing niniwi natake waung waiapata ga tapan siakande ganduamang. Tupa siknga Ebrahamda Anutue gen gwaamuke ngana ita akumbut. Siwan Anutue wam yanikapbing aminu kuut akumbing. Siwan ngana gata yake tapatuta gena gwaamukengu ita dua kupik ngang dasingge yanggayak?
JOH 8:53 Asikaya gata baminu Ebrahamu tupa siknga kumbut tapa ayapbikgayak ba? Asikaya gata Anutue wam yanikapbing aminu akumbing kakwau ayapbikgayak ba dasing? Ga dasing binga daknganangge yanggayak,” ngang sapduke iniking.
JOH 8:54 Unzing iniwa yake anzing yanikut, “Na ninae umana tangenake tasinggat gamu umana wenaapa dakngawam. Nanda natane umana tangenakgak. Ginda ie yake Anutunin ngang inikaing kapanin.
JOH 8:55 Ginu waapae dua nataaing ngana nata ie atnataat. Sike na waapae dua nataat ngang kem yanggat gamu nakaya kem aminu gin binga dakngawam. Sike ngana siakande ie atnatake ie genu akgwaamunggat.
JOH 8:56 Baminu Ebrahamda tapduknga nata apu tasiwit gwen kawikge natake apbakngakut. Sike tapduk wagwenu gwa kake iaknga siknga natapbut,” ngang yanikut.
JOH 8:57 Yaniwan yake anzing inisapduking, “Nakanu 50 dua kawi sandewan ngana gata Ebrahamu akakuyakge yanggayak ba dasing,” ngang yawa,
JOH 8:58 “Aho,” ngang yake anzing yanikut, “Nata siakande siknga daniwa natapnong. Ebrahamda dua aakut komune nata ayukum,” ngang yanikut.
JOH 8:59 Ngang yaniwan natake ita Anutu binga daknganangge yanggak ngang natake supda tanguwa kupikge natapbing. Natake sup pake kawa ngana Jesuta aminbamde banakan ginikake yot takwan gwen teke kepman epu kuwawan tangutnangge tawaba maikut.
JOH 9:1 Siwan Jesuta akusika ita aminu kai kusiya tapatu kakut. Mingata kai akusiyaapa tangaikut.
JOH 9:2 Siwan ninu Jesutane pandetnata anzing inikwaikumang, “Yanindamumsaapa. Maminda waiaknga tasiwan mingata kai akusiyaapa tangaikut? Aminu aapata waiaknga ina tasikut takngata tanguwan unzing aakut? Ba itane nana mingata waiaknga tasikumayak kakngata tanguwan kai kusiyaapa tangaikut ba dasing,” ngang inikumang.
JOH 9:3 Inikwaitna ita yake anzing ninikut, “Aminu aapata waiaknga tasikut ba nana mingata waiaknga tasikumayak kakngata tanguwan kai kusiyaapa dakngake aakut ngangu yananga dua. Sanga wa sikuu Anututa kekeknga aknganata aminu aapa gatangamik kaknga anggaman kaningge unzingu sikut.
JOH 9:4 Ninu kayuk yusika Anutu na nanitewan apbum tapatane puyana pasike yutnim. Sike na akungwakengu unzingu tasinanga dua siwik.
JOH 9:5 Tapduknga nata kepdakane yuat kopatangu nata kakaa aknga kepdakane nana aminde ayamunggat,” ngang ninikut.
JOH 9:6 Ita unzing yake baapna kepdakane suke baapna kaikat undanggan tasike kaiu wa musa aminu waapae kaine dotdongukut.
JOH 9:7 Dotdonguke, “Ga kuke yangga gapanu Siloam gwene sauyo,” ngang inikut. Siwan ninda umana waaknga tana tekwamban. Initewan kukut gwen ngang yakamang. Siwan ita kuke saukut. Sauke gatuna kaina akake apbut.
JOH 9:8 Siwan aminu yotna nanaat aminu kunduatda aminu waapa tupa kawawa ita aminbamu manie yayawakut tapa kake anzing yaking, “Dasing? Asikaya aminu aapa yuke aminu mani imuningge yayawanggak kapanin,” ngang yaking.
JOH 9:9 Yawa kunduta anzing yaking, “Ngan. Aminu waapanin,” ngang yawa kunduta, “Aho. Ita aminu waapa binga. Ngana aapa inata tapatu,” ngang yaking. Siwan aminu waapata yake, “Na waapanin,” ngang yakut.
JOH 9:10 Yawan natake anzing inikwaiking, “Dasing sike gatane kaika take simayak,” ngang iniking.
JOH 9:11 Iniwa ita yake anzing yanikut, “Aminu tapatu umana Jesu ngang inikaing. Ita kaiu yanggaat kwaidotdonguke natane kainane pasingamuke anzing nanik. Ga yangga gapanu Siloam gwene kuke sauyo ngang nanik. Unzing naniwan na kuke asaut. Sauwana natane kaina kukgweat take siwat nata gatuna akaat,” ngang yanikut.
JOH 9:12 Yaniwan yake anzing inikwaiking, “Aminu waapa zandang yuak,” ngang iniwa ita yake, “Na dua nataat,” ngang yanikut.
JOH 9:13 Unzing yaniwan aminu waapa take Ferisi aminde takuking.
JOH 9:14 Sike tapduu wagwenu yuwatakak tapduk gwene Jesuta kaiu nguyuknga musa tasike aminu waapatane kaina take tasingamukut.
JOH 9:15 Unzingge Ferisi aminda gatu inikwaiking, “Dasingge kaika kukgweat take singgamumayak,” ngang inikwaiwa ita anzing yanikut, “Ita kaiu nguyuknga musa kainane tasingaman na kuke yangga sauwa natane kaina take siwat akat,” ngang yanikut.
JOH 9:16 Unzing yaniwan Ferisi aminu waakwakatnana kunduta ina anzing yaking, “Anututa dua aminu waapa initewan apbut. Ita yuwatakak tapduk gwende mama wamu dua tawanggak,” ngang yaking. Siwan ngana kunduta anzing yaking, “Aminu waiakngana kayata duya inata inata unzingu dua tasiwik,” ngang yaking. Siwan wa aminda yanganuke dongu takngaaya dakngaking.
JOH 9:17 Dongu takngaaya dakngake aminu waapa gatu anzing inikwaiking, “Aminu waapa gatane kaika take tasinggamuk kapa gata ie dasing nataayak,” ngang inikwaiwa ita yake, “Aayanikapsaapa ngang nataat,” ngang yanikut.
JOH 9:18 Siakan tupa aminu waapa kai akusiya ngana apmanu kaina akaak. Siwan ngana Judia nana amindane take waakwau baniu dua sike aminu kaina akakuu waapatane nana minga yayawamba apbumayak.
JOH 9:19 Yayawamba apatna anzing yanikwaiking, “Asikaya aminu aapa gitdane waakza ba dasing,” ngang yanikwaiking. “Mingata kai kusiya buyak tangaikut ngang yasan ba dasing,” ngang yanikwaiking. “Dasingge ita apmanu kaina gatuna kaak,” ngang yanikwaiwa
JOH 9:20 nana mingata yake anzing yakumayak, “Aminu aapa nitdane waakngit. Siwan mingata tangaiwan kai akusiyaapa aakut. Ie niu atnataamak.
JOH 9:21 Ngana apmanu kaina dasingga siwan kaakge niu dua nataamak. Siwan maminda kaina take tasingamuk ie aya niu dua natamak. Ginda ina inikwaitnong. Ita buyambamu gwa takanggak. Ita inane wamu apme daniwik,” ngang yanikumayak.
JOH 9:22 Itane nana mingata Judia nana amindane takeakwakge akgwauke unzingu yakumayak. Sike aminu take waakwau wamu takngatu anzing gwa yawa kekekakut. Aminu tapatuta Jesue yake Anututa tapan Krais gatanimuyaapa dakngake apbut ngang yakapanu miti yot gwene inikwasitna kepman kuwik ngang yawa kekekakut.
JOH 9:23 Wamu wa yawa kekekakutde natake nana mingata akwauke, “Ita buyambamu gwa takakut. Gisa ina inikwaitnong,” ngang yanikumayak.
JOH 9:24 Siwan aminu kai tasingaman gatu kakuu waapata gatuna apikge yatawaba apan anzing iniking, “Siakande siknga ngang niniyo. Anututa toknga aknga gamuyak. Aminu waapa waiaknga tasiyaapa ngang anggaman gwa kaamang. Ita gatanggamunanga akngana wena,” ngang iniking.
JOH 9:25 Iniwa ita yake anzing yanikut, “Ita waiaknga tasiyaapa ba yuak ba dasingga yuak. Ie nata dua nataat. Siwan ngana kaina akusiya tasingaman kainata take gwa sikamayak nganggekan atnataat,” ngang yanikut.
JOH 9:26 Yaniwan yake anzing inikwaiking, “Dasing tasinggaman kaikata take simayak,” ngang iniwa
JOH 9:27 ita yake anzing yanikut, “Gwa daniwa natake ngana siakan ngang dua nataing. Dasingge gatusa natapnangge nanikaing? Asikaya gatuna daniwa natake itane pandetna daknganangge nanikaing,” ngang yanikut.
JOH 9:28 Yaniwan natake sapdukngamuke anzing iniking, “Gata itane pandetna ngana ninu Mosesdane pandetna.
JOH 9:29 Anututa Moses asinikut ngang atnataamang ngana aminu waapa maminda initewan apbut? Ita zandangga apbut? Ninu ie dua nataamang,” ngang iniking.
JOH 9:30 Iniwa ita yake anzing yanikut, “Wamu aaknga ngang naniwa natapa inata kundu singgak. Ginu itane yotna dua nataaing ngana ita tasingaman kainata take simayak.
JOH 9:31 Waiaknga tasiya apata iniwanu Anututa dua gatangaman duya takngatu tasinanga dua siwik ngang atnataamang ngana aminu tapatuta Anutue banip sike ie gen gwaamumbik. Unzing tasikengu tumuk wam iniwanu Anututa natake gatangamik ngangu atnataamang.
JOH 9:32 Siwan kai kusiyaapa tangaikuu tasingaman kaina take sikumayak ngangu dua natapbumang. Tupa sanga waaknga dua aawan kaking ngana apman gan kaamang.
JOH 9:33 Aminu waapa Anututa dua initewan apbut gamu sanga tapatu dua tasiwan,” ngang yanikut.
JOH 9:34 Yaniwan yake anzing inisapduking, “Ga minggata waiaknga tasike tangaiwan aakuyak ngana gata kepi noman ninindamutnangge yanggayak,” ngang iniking. Inikenga aminu waapa inikwasiwa epu kepman kukut.
JOH 9:35 Inikwasiwa epu kepman gwa kukut ngang Jesuta natake aminu waapa tawataku kake kusopuknga wam yake anzing inikwaikut, “Ga aminu aminbamde notnaapa dakngake yuak kapae natapi kekeknga singgak ba dasing,” ngang inikwaikut.
JOH 9:36 Inikwaiwan yake anzing inikut, “Aminu waapa mamin? Gata naniwinu na atnatapa kekekawik,” ngang inikut.
JOH 9:37 Iniwan yake, “Aminu waapa gwa kayak. Waapa akganinggak kapanin,” ngang inikut.
JOH 9:38 Iniwan, “Buyambam tapa! Gae natapa siakan singgak,” ngang yake inimbakngake tasikut.
JOH 9:39 Siwan Jesuta anzing yakut, “Aminbam usanzitnangge kepdakane epbum. Epuke aminu kai kusiya take tasiyama kaning. Sike kaininu take ngang yaya aminda masa namuke zikaa akngaatang kai kusiya amin binga daknganingge epbum,” ngang yakut.
JOH 9:40 Unzing yawan Ferisi aminu kundu wesim yukingga wamu waaknga natake, “Dasingge kaininde wai ngang nininggayak,” ngang inikwaiking.
JOH 9:41 Inikwaiwa yake anzing yanikut, “Kaisata wai sikaing gamu ginu meya buyak dua yuwam ngana ninu take akaamang ngang yakaingge meyasa buyak yuaing,” ngang yanikut.
JOH 10:1 Siwan Jesuta tuwang wamu takngatu anzing yanikut, “Siakande siknga nata daninggat. Mamin amindaka sipsipde gwabok gwaune kopnangge bitake damanu kautdu saak yatupiu waapata kuka amin.
JOH 10:2 Ngana aminu gwabok gwaune konggau ita sipsipdane toikngaapa unin.
JOH 10:3 Sipsipde gwabok gwaune kayuak kapata sipsipde toikngata apan kake gwabou atzikngamik. Atzikngaman koke sipsipnatane umana yawawan sipsipnata ie wamna atnataaing. Ita sipsipnatane umana yake yayawamban apu masene tawake epu kepman kukaing.
JOH 10:4 Ita inane sipsipna kuupbam kepman epu yanipakukenga tupanu ita gamok kunggak. Ita gamok kuwawan sipsipda ie wamu atnatake i kuku tawakaing.
JOH 10:5 Sike aminu tapatue dua kuku tawakaing. Wena. Toikngin dua ngang natakengu teke atdatakuning. Dasingge? Aminu kundue wamna dua nataaing.”
JOH 10:6 Jesuta tuwang wamu waaknga aminbam yaniwan ngana wamu waakngatane yapiie apbotaking.
JOH 10:7 Wamnatane yapiie apbotake yuwawa Jesuta gatuna anzing yanikut, “Nata ginu siakande siknga daninggat. Nata nina siknga sipsipde gwabok gwak binga yuat.
JOH 10:8 Aminu kuupbam nae tupan apbingu wa kuka amin siwan sangaapa kaiwa kukaing binga aminu unin. Siwan ngana sipsipda wa aminde wamu dua natapbing.
JOH 10:9 Nata nina gwabok gwak binga yuat. Sike aminu tapatuta Anututane daman katang kopnangge natake nae apanu nata gatangama koke kayuk yutnanga aknga pake noman siknga yuwik. Yusika kungapuke sanga tapatue dua dapik.
JOH 10:10 Kuka aminu apu sipsiu kukae pake zipa kupa pasiwan mainingge apik. Sanga waakngaekan natake apik. Ngana na. Nata kayuk yutning kaknga paningge apbum. Kayuk yutning kaknga kwaapzang pake yutningge apbum.
JOH 10:11 “Sipsip toiu tapatuta sipsipna katak siknga toike yuke kawawan kaap zongu gwenduta apan kawik. Kake musiaatang kupsat ngang dua natake kaau toknga wagwen tanguke tawamban datakuwik. Siwan ita musiaatang unzing natake tasiwik kaknga binga tasinggat.
JOH 10:12 Siwan ngana sipsip toikgane puya aminda kayuke kawawan kaau toknga gwenduta apan kawik. Kake sipsiu natane dua. Akumningge undanga ngang natake peke atdatakuwik. Datakuwana kaau toknga wagwenda apu sipsip zipik. Zipmawawan kunduta inana datakuwawa kundu zipan kumning.
JOH 10:14 “Siwan na sipsipna katak siknga toikgak kapata binga tasinggat. Tasiwawa Anututa nae atnataak. Siwan nata ie atnataat. Ina unzakan aminu nata toikgat takwakge nata atnatapa aminu waakwakga nae kuut atnataaing. Siwan nata kungayamitde dua bitake
JOH 10:16 apme aminu kundu kaipakapa damanaatang kopa toiba nae gen gwaamutning. Gwaamusika donga takngaaya dua dakngake toiknga tapaae gena dua gwaamutning. Natane aminda donga takngatukan yuke toiknga tapatue wamban gwaamutning.
JOH 10:17 Nata kungwakenga gatuna enawitde natake nata kapewa aminbamda atnuwa kupit takngae natake Nanata nae banip gwaang natangamunggak.
JOH 10:18 Na nina natake kapewa atnuwa kupit. Aminu tapatuta ina banipda siwan dua nuwan kupit. Wena. Natane Nanata naniwan natake nata kapewa atnuwa kungwake gatuna enawit,” ngang yanikut.
JOH 10:19 Judia nana aminda wamu waaknga natake dongu takngaaya gatu dakngake yuking.
JOH 10:20 Aminu kwaapzangga anzing yaking, “Waung waita tapan ita datdaptake yanggak. Dasingge ginu ie wamu nataaing,” ngang sapduke yaking.
JOH 10:21 Siwan kunduta anzing yaking, “Wamu waaknga waung waita tapan datdaptanggak kapatane dua. Asikaya waung waita aminu kai akusiya pasiyaman take apme sining ba dasing,” ngang yaking.
JOH 10:22 Siwan Jerusalem gapmane tapduk takwan gwenu asikut. Tapduu wagwenu tupa Anutue yot takwan gwende gwabok gatu zikingge natake tasikainggane tapduk gwen. Tapduk wagwene got tapduk.
JOH 10:23 Siwan Jesuta Anutue yot takwan gwenu yoakatang palanda tupa Solomonda mitapbut tapane kepi sukukut.
JOH 10:24 Kepi sukuwawan Judia nana aminu kunduta apu ie yupbasike anzing iniking, “Ga mamin ngang nangaakan natake asinggan yuwatna asikaya gata anggamanu dua niniya? Ga Anututa tapan Krais gatanimuyaapa kakengu gata ninu anggaman niniyo,” ngang iniking.
JOH 10:25 Iniwa yake anzing yanikut, “Nata ginu gwa daniwa ngana ginu siakan ngang dua nataing. Puya kuupbam nata tasinggau Nanda naniwan tasinggat takngata nae yapii anggaman yeutdaman
JOH 10:26 ngana ginu natane sipsip takwakat nana dua dakngake baniu dua sikaing.
JOH 10:27 Natane sipsipma ninae wamu atnataaing. Siwan nata ie atnataat. Siwan aminu waakwau na nawaba
JOH 10:28 nata kayuk yutnanga aknga yama pake kayuk asinggan asinggan yutning kakngana wena dua siwik. Wena siknga. Aminu tapatuta aminu waakwau kaiwan kunanga dua.
JOH 10:29 Nanata nandutewan nata aminu waakwau papa natane aminabam dakngake yuaing. Siwan Nanda kekeknga siknga yuke sanga kuupbam ayapbike aminu waakwau toiban aminu tapatuta waakwau kaiwan kunanga dua.
JOH 10:30 Naat Nankau niu sanga tapatukan binga dakngake yuamak,” ngang yanikut.
JOH 10:31 Unzing yaniwan Judia nana aminda supda tanguwa kupikge natake sup pake yuking.
JOH 10:32 Sup pake yuwawa ngana Jesuta anzing yanikut, “Natane Nanata naniwan puya take siknga kwaapzang pasiwawa ginda gwa kaing. Ginu puya zaakngae natake na supda nuwa kupitde tasikaing,” ngang yanikut.
JOH 10:33 Ngang yaniwan yake anzing iniking, “Ninu puya take takngatue natake dua ninda ga supda gutnangge tasikamang. Wena. Ga Anutu dua. Ga amin sikngaapa! Ngana gata na Anutu ngang gandupnimde nininggayak. Unzing nininggayak kakngae natake gae Anututane umana yaitapaakusike tasinggak ngang natake ga gutnangge tasikamang,” ngang iniking.
JOH 10:34 Iniwa yake anzing yanikut, “Yakapsa aminu tapatuta wamu tupa siknga Anututa amin usanziya aminde yanikut taknga anzing matakut, ‘Nata anzing gwa yakum. Ginu kekekngasa kaya amin Anutu binga dakngake yuaing ngang gwa yakum,’ ngang matakut.
JOH 10:35 Siwan Anutue wapatang mataking kaknga siakan siwan ie ma sapduwam.
JOH 10:36 Tupa Anututa wamna yamukut takwau ginu kekekngasa kayaakwak Anutu binga ngang yanikut. Wamu wa yanikut takngae natake daninggat. Na Anututa take nanitewan kepdakane epbum tapata yake na Anutue waak ngang yakum. Wamu wa yakum takngae ma sapduwam. Ginda unzing yake gata Anutue umana yaitapakusinggayakge gutna ngang ma yawam.
JOH 10:37 Sike na Nandane puya dua pasiwa kakengu ginda nae wamu siakan ngang ma natapam.
JOH 10:38 Ngana na itane puya atasinggat. Atasiwawa ginu nae wamu siakan ngang dua natakengu ginu puya nata tasinggat takngae natapa siakan siyok. Unzingge ginda natdetdet pake katak siknga anzing natdetnong. Nanda naat gatake yuke gatangaman nitda unekan sukukamak,” ngang yanikut.
JOH 10:39 Wamu waaknga ngang yaniwana kaautde tenangge tasiwa ngana ita ayapbike kukut.
JOH 10:40 Ayapbike kuke yangga Jodan tapa yaikut. Yaike kuku keu Jonda tupa aminu yangga sauyamukut komune kuke undang yuakat.
JOH 10:41 Siwan aminbamda ie apuke anzing yaking, “Siakan. Jonda duya takngatu dua tasikut. Ngana wamu kuupbam Jonda aminu aapae yakuu wa siakan siknga,” ngang yaking.
JOH 10:42 Yake ugwak saau aminu buyambamda ie natake Anututa initewan gatanimuyaapa dakngake apbut ngang natapa kekekakut.
JOH 11:1 Siwan aminu maitna kaya tapatu umana Lasaras ngang iniking. Betani yot gapmane nanaapa. Itane samina tapaaya umana Maria gatu Mata ngang yaniking. Iat gatake yuke Betani yot gapmane yuking.
JOH 11:2 Siwan Maria waapa masande yangga kapanga take siknga aknga pake Jesutane kepine saukngamukut tapanin. Saukngamuke inane gwapak danggamnata pasiwa kuwa kupia sikut. Itane nokgana Lasarasda mait sikut.
JOH 11:3 Siwan maiu buyambam siwan saminata wamu takngatu Jesue tewat kuwan anzing inikumayak, “Aanit. Nokganiu gata banip gwaang natangamunggayak kapata mait singgak.”
JOH 11:4 Ngang wamu waaknga tewat kuwan Jesuta natake anzing yakut, “Ita akupikge maiu waakngata dua tapan mainggak. Anututane umana akngata asenawikge waapa tapan mainggak. Na Anutue waaknga yuat tapae umana akngata kuut ina unzakan asenawik,” ngang yakut. Sike Jesuta wa yakut taknga aminu waapa mait sike akumbut katanga gatu tangenawan kake itane umana yatangenawa buyambam siwikge natake yakut.
JOH 11:5 Siwan Jesuta Mataat itane uyapnaat gatu waapaatdane nokgana Lasaraskatde banip gwaang natayamukut.
JOH 11:6 Siwan ngana wamu waaknga natakenga ita gunziu gweaat gwenduat keu wa yukut komune yukut.
JOH 11:7 Yukenga ita yake ninu pandetna, “Judia kep komune gatunin kuna,” ngang ninikut.
JOH 11:8 Ngang niniwan, “Aanin. Judia nana aminda akgutnangge tupa dua tasiking ge gatuka kunangge yanggayak,” ngang inikumang.
JOH 11:9 Inina ita kayuk yuak kakngae natake kwakngaomde tuwanguke anzing ninikut, “Tapduu gwendu kukgwen kakaa yuwik. Aminu tapatuta kakaa akngane sukukengu sanga gupna tasiwan mainanga kake ayapbimbik.
JOH 11:10 Siwan ngana zikaa dakane sukukengu gupnatane kakaa akngana wena siwanu akezake pimapik,” ngang ninikut.
JOH 11:11 Unzing ninikenga tuwang wamu takngatu anzing yakut, “Lasaras notninda dapuna gwa pekgak ngana nata kuke tanguwa enawik,” ngang ninikut.
JOH 11:12 Unzing niniwan yake anzing inikumang, “Aanin. Ita dapuna pek gamu take siwan,” ngang inikumang.
JOH 11:13 Siwan ngana Jesuta tuwang wam yake Lasarasda akumbutde natake yakut ngana ninu, “Dapuna moo pekgakge yanggak,” ngang natapbumang.
JOH 11:14 Unzingge Jesuta anggaman anzing ninikut, “Lasarasda gwa kumbut.
JOH 11:15 Sike na ginde natake na tapduu waomune iat dua yukumde apbaknganggat. Unzingge na kuke tasiwa kake ginu nae natake Anututa tapan pasinggak ngang nataaing kakngata kekeknga siknga siwik,” ngang ninikut. Ninike, “Ginu enawa ie kuna,” ngang ninikut.
JOH 11:16 Unzing yawan Tomas umana takngatu Didimas ngang inikumang. Umana wa tana tekwamban bokngan aakumayakat nana tapatu. Sike aminu waapata ninu anzing ninikut, “Ayok. Ninu iat gatake kuwatna nisipa kumna,” ngang yakut.
JOH 11:17 Siwan Jesuta teke kepiapane kusika you wanggapmane kundoke natawawan Lasaras matmat katangu gwa kwaiwa tapduu gweaat gweaat ngang gwa yuak ngang yawa natapbut.
JOH 11:18 Sike Betani yot gapma Jerusalemu wesim binga yuak.
JOH 11:19 Siwan Judia nana aminbamda Mataat Mariatde kuke waapaatda nokganae butaya natayuwawat musia pasiwa wikasande kuking.
JOH 11:20 Siwan Jesuta kepiapane apuwawan kunduta kake yawa Matata natapbut. Natake ita ie kuwawan ngana Mariata yot gwenekan yukut.
JOH 11:21 Siwan Matata Jesue kundoke anzing inikut, “Aana. Ga ane yukuyak gamu nitdane nokganitda dua kupan
JOH 11:22 ngana gata Anutu sanga takngatu tasiwikge iniwinu atasiwik ngang nataat,” ngang inikut.
JOH 11:23 Iniwan yake, “Nokgasata gatuna enawik,” ngang inikut. Ngang iniwan yake anzing inikut,
JOH 11:24 “Tapduknga sandewik gwekatang aminu kuupbapat iat gatake enatning ngang atnataat,” ngang inikut.
JOH 11:25 Iniwan anzing inikut, “Asenake kayuk gatu yutning kakngae yapii na. Mamin amindaka nae natake Anututa tapan pasinggak ngang natapa kekekawiu akungwakengu gatuna enake kayuk asinggan asinggan yuwik.
JOH 11:26 Siwan mamin amindaka kayuk yusika nae natapa kekekawiu gatukande kumnanga dua. Wamu waaknga yawa natapi siakan dua ba singgak,” ngang inikut.
JOH 11:27 Iniwan ita yake anzing inikut, “Aana. Natapa siakan singgak. Ga Anututa tapan Krais gatanimuyaapa dakngake Anutue waaknga kepdakane epikge yakapsa aminda tupa siknga ngang yaking kapa ga unin,” ngang inikut.
JOH 11:28 Matata unzing yake kuku uyapna Maria yatawakut. Yatawamban apan wamu wepda anzing inikut, “Ayanindamumsaapa gwa apuke gae yanggawanggak,” ngang inikut.
JOH 11:29 Iniwan natake ita zetgaman enake Jesue kukut.
JOH 11:30 Jesuta yot gapmane dua apbut. Ita tupanu Matata kakut komune yuwawan undang kukut.
JOH 11:31 Sike Judia nana aminu Mariaat gatake itane yotnaatang yuke itane musia tasiwa wikawikge tasike kawawa ita zetgaman enake epu kepman kuwan kaking. Kake maya waapata matmat gwene kuke kwanam sitnangge ba kunggak ngang natake tawatakuking.
JOH 11:32 Tawatakuwawa Mariata Jesuta yukut komune apu Jesu kake kepine gwetake anzing inikut, “Buyambam tapa! Gata ane yukuyak gamu nokganata dua kupan,” ngang inikut.
JOH 11:33 Ngang iniwan Jesuta kawan ita kwanam siwan kake Judia nana aminu iat gatake apbing amin kaya kwanamu asiwawa kakut. Kake ita musiaatang butaya siknga natapan guyakngi gekapan
JOH 11:34 butaya wam yayuk, “Zandang teking,” ngang yaniwan, “Buyambamtapa! Gata apu kayo,” ngang iniking.
JOH 11:35 Unzing iniwa natake Jesuta kwanamu asikut.
JOH 11:36 Kwanamu asiwawan kake wa yukingga anzing yaking, “Ita musip gwaangu kumzang natangamunggakge kwanamu singgak,” ngang yaking.
JOH 11:37 Siwan ngana kunduta anzing yaking, “Ita aminu kai akusikingu pasiwa take siking kapanin. Asikaya ita aminu aapa akgatangamukut gamu dua kupan,” ngang sapduke yaking.
JOH 11:38 Siwan Jesuta musiane gatu butaya wam yake matmat gapmane kukut. Sike matmau supgapbau dakatu gwa kupsa aminu undang tenangge kwaikinggane ganangi umukusinangge suu buyambam gwen ikoba apu umukusikut.
JOH 11:39 Siwan Jesuta yake, “Ginda suu anggwenu ikotakwenong,” ngang yanikut. Yaniwan Matata anzing inikut, “Buyambam tapa! Ita kupan tapduu gweaat gweaat gwa yuke kapanga wai siknga gwa sik ngana apbotake unzingu yanggayak,” ngang inikut.
JOH 11:40 Iniwan yake anzing inikut, “Dasing? Tupanu nata ga ganike gata nae natake Anututa tapan pasinggak ngang natapi kekeknga siwanu gata kawawi Anututane umana akngata asenawan kawiyak ngang gwa ganit ngana apbotake unzingu yanggayak,” ngang inikut.
JOH 11:41 Siwan sup gwenu ikotakweking. Ikotakwewana Jesuta enandang kake tumuk wamu anzing yakut, “Nan! Gata natane tumuk wamu gwa natayakge ganimbaknganggat.
JOH 11:42 Gata natane tumuk wama asinggan nataayak ngangu atnataat. Ngana na aminu ayuaingga nae natake gata nanitewi apbum ngang natapa siakan siwikge natake nata wamu waaknga yanggat,” ngang yakut.
JOH 11:43 Ita unzing yakenga apaa anzing yakut, “Lasaras! Enake epso,” ngang yawan
JOH 11:44 aminu wa akupsa sikut tapata enake kepman epbut. Kepiat katakngiat banis takngata wamakusiking buyak epbut. Nomna tauk kakngata basingamuking buyak epbut. Unzing epan Jesuta yake, “Tauk kaknga waike tewa kunggawan,” ngang yaniwan unzing tasiking.
JOH 11:45 Siwan Judia nana buyambamu Mariae apbing aminda sanga wa kake Anututa tapan gatanimuyaapa dakngake apu pasinggak ngang natapa kekekakut.
JOH 11:46 Siwan ngana kunduta Ferisi aminde kuke sanga Jesuta wa tasikutde yaniking.
JOH 11:47 Yaniwa natake Anutue yot takwan gwene pasiya amindane takeakwakat gatu Ferisi amikatda sios kaunsil takwau yayawamba apa anzing yaniking, “Ninda dasing tasinim? Aminu waapata duya kwaapzang pasinggak.
JOH 11:48 Sike ninda katena ita unzakan tasiwanu aminu kuupbamda ie natake Anututa initewan apu gatanimunggakapa unin ngang natapa kekeknga siwik. Siwan Rom nana aminda nipbitnang ngang natake enake nindane yot takwan gwen tasiwa maiwan nikatnana amin zipmake kepminu gatukande pake yutning,” ngang yaking.
JOH 11:49 Yawa ngana wa amikat nana tapatu umana Kaiafas ngang iniking. Ita nakanu wagwene Anututane yot takwan gwene pasiya amindane tupan tapa dakngake yukut. Ita anzing yanikut, “Ginu sanga tapatue dua nataaing.
JOH 11:50 Aminu tapatutakan aminbamde tangge kungwayamanu ginda take yutning. Ngana unzing dua kupanu iwaninda nikatnana zipa kupa ginda wai yutning ngangu ginu dua nataaing,” ngang yanikut.
JOH 11:51 Ita unzingu ina banipda siwan dua yakut. Aho. Ita nakanu wagwene Anutue yot takwan gwene pasiya amindane tupan tapa yuwan Waungga bania tangenawan ayanikapsa wamu Jesuta kungwake Judia nana amin gatayamikge yakut.
JOH 11:52 Yake ita paku kungwake Judia nanakan gatayamikge dua yakut. Aho. Ita kungwake aminu Anututane waaknga dakngake kepna kepna yutakuningu dongu takngatukan daknganingge gatayamuke tasiwikge yakut.
JOH 11:53 Siwan wa aminu tapduu wagwene tuwanguke wamu Jesu tanguwa kupikge yaking.
JOH 11:54 Unzingge Jesuta anggamanu Judia nana aminde banakanu gatu kepi dua sukukut. Ita you wanggapma teke keu amina wena komdu Efraim yot gapma wesim yuak gapmane kukut. Undang kuke ita you wanggapmane ninu pandetnaat yukumang.
JOH 11:55 Siwan Judia nana aminda yuwatakak tapduk takwanu Pasova ngang yakaing gwenu akaningge atdapakakut. Tapduknga wagwenu atdapakawan aminbamu yotna yotna nana aminda Jerusalem koke kepi sukuking kakngana nomana siyamikge tandaknganangge kopbing.
JOH 11:56 Jerusalem koke Jesue katakuke Anutue yot takwan gwende yoakatang yuke ina anzing yaking, “Ginu dasing nataaing? Asikaya ita tapduk takwanu anggwenu dua ba apu kawik,” ngang yaking.
JOH 11:57 Sike Anutue yot takwan gwene pasiya aminde takeakwakat gatu Ferisi amikatda anzingu gwa yaking, “Aminu tapatuta ie zandangga yuwan kakengu apu niniwan kuke tanggaganuke kaautde tenim,” ngang yaking.
JOH 12:1 Siwan tapduu katau kuut musa kautdu gwenduat kana sandewana yuwatakak tapduk Pasova gwen kanim ngang natake Jesuat nikatda Betani yot gapmane kukumang. Tupa wanggapmane nana aminu tapatu umana Lasaras ngang iniking. Jesuta waapasimu akumbut katangga gatu tangenakut.
JOH 12:2 Siwan wanggapmane kuwatna ninduke nanamu buyambam sanimuking. Sanimuke Matata usanzitniman Lasaraskat Jesuta nikatda gatake yuke nanamu wa nakumang.
JOH 12:3 Nawatna Mariata yangga kapanga kaya take siknga takngatu umana nart ngang yanikaingu manina buyambam sikngata usikuu tekngatusim takapu Jesue kepine tukngwamban pukukut. Tukngwamban pukuwan Mariata gwapak danggamnata pasiwa kuking. Siwan yangga waakngatane kapanga take siknga akngata you wagwene tawamban sandekut.
JOH 12:4 Tawamban sandewan natake Jesue pandetna tapatu umana Judas Iskeriot yot gapmane nanaapa ngang inikumang. Ita Jesu iwan aminde yaman tanggaganutningge natayuak kapata kapanga waaknga natake anzing yakut,
JOH 12:5 “Yangga waaknga aminde yaman usiwa buyana 300 Kina pake usanzike sangaapana wena aminde yamuk gamun,” ngang yakut.
JOH 12:6 Unzing yake ngana ita baniaatang sangaapana wena akwakge butaya dua natayumuke yakut. Aho. Jesuat pandetnaatdane manina yakgwende kayuakapa yuke undang pamukaing kaknga asinggan kuka panangge tasinggakge yakut.
JOH 12:7 Yawan Jesuta yake anzing inikut, “Gata maya waapa kateyo. Tapduk nata kupa kwaining gwende natake yangga aaknga tekut.
JOH 12:8 Siwan sangaapana wena aminu gaat gatake yutning. Unzingge tapduk bamu gata gatayamunanggengu take tasiya. Ngana na. Na gaat gatake asinggan dua yutzim,” ngang inikut.
JOH 12:9 Siwan Judia nana aminu buyambamda natake Jesuta you anggapmane yuak ngang natake ie apbing. Apu Jesukan kanangge dua apbing. Aho. Tupa Jesuta Lasaras matmat gapmaneta tangenakut tapae natake iat kuut kanangge apbing.
JOH 12:10 Apu kake aminu buyambamda Jesue gatanimuya apanin ngang natapa kekekawan takeakwakngae apbitaking. Apbitake tasiwa Anutue yot takwan gwene pasiya aminde takeakwakga natake Lasaras kaya tanguwa kupikge wam yawa kekekakut.
JOH 12:12 Siwan kwepna aminu buyambamda apu yuwatakak tapduk takwanu pasova gwen kanangge Jerusalem yot gapmane kopbingga natake Jesuta asapunggak ngang natapbing.
JOH 12:13 Wamu waaknga natake buyambam tapata apan gaak wam inikaing binga aknga Jesu ininangge tasiking. Tasike zagwatatak deke gwaamupake kuking. Kusika musiaatang iaknga siknga natake anzing yanggamataking, “Anutu nindane Buyambam tapaninda initewan apu ninu Isrel nana amindane tupan tapa dakngake apunggak kapae inimbaknganong,” ngang yaking.
JOH 12:14 Unzing yanggamatawawa Jesuta dongki mateu gwendu take masene koyuke kukut. Sike tupa siknga aminu tapatuta Anutue wamu takngatu Jerusalem gapmane nana aminde natake anzing matakut,
JOH 12:15 “O Saion nana! Ginu ma gwaubam! Tupan tapasata ginde asapunggak! Dongki mateu gwendu take masene koyuke ginde asapunggak,” ngang matakut.
JOH 12:16 Siwan Jesuta kuwawan ninu pandetnata wamu wa matakut taknga buya unin aakgak ngang dua natapbumang. Dua natake yuwatna Jesuta kungwake gatuna enake enane kopana wamu waaknga natdekumang. Natdeke aminbamda zagwa tatak deke wamu yanggamatake tasiking kakngae gatunin natdekumang.
JOH 12:17 Siwan aminbamu Jesuta Lasaras yatawake kumbut katangga gatuna tangenawan kaking aminda sanga wa kaking kakngae yaniking.
JOH 12:18 Aminbam yaniwawa ita duya wa tasikut takngae natake Jesue apbakngake ie kuking.
JOH 12:19 Kuke zagwatatak deke yanggamatake tasiwawa Ferisi aminda kake ina anzing yaking, “Tangutna kupikge tasikamang kakngata gwa pimanggak. Aminu kuupbamda ie masene tawakaing,” ngang yaking.
JOH 12:20 Siwan yuwatakak tapduk takwanu wagwenu kake Anutu inimbaknganangge natake aminu Grik kep komune nana kunduta apu Jerusalem gapmane yuking.
JOH 12:21 Apu yusika Filip kake iniking. Filip waapa Betsaida yot gapma Galili kep komu yuaune nanaapa. Ie kuke, “Jesu kanangge nataamang,” ngang iniking.
JOH 12:22 Iniwa natake ita kuku Endru wamu waaknga ngang inikut. Iniwan aminu waapaatda kuku Jesu inikumayak.
JOH 12:23 Iniwat natake ngana anzing yakut, “Tapduknga gwa singgak. Na aminbamde notnaapa dakngake yuat tapa umana buyambamu kayaapa dakngawit gwenu gwa singgak.
JOH 12:24 Siakande siknga daninggat. Nanam zau gwendu kepatang yapuban kepda tanguwan baptake zuna akopan buyana buyambamu asaawik. Siwan ngana dua yapuban baptawanu moo yuke buyana aatnanga dua.
JOH 12:25 Ina unzakan aminu tapatuta gupnae sanga take siknga yuke dua maiwikge iaknga siknga natake tasiwanu sangana apmaiwik. Ngana gupnae sangae unzingu dua natanggamatawanu sangana dua maiwan aminu waapata kayuk asinggan asinggan yuwik.
JOH 12:26 Siwan aminu tapatuta natane puyana tasinangge take natakengu iat naat ukgatap sukusim. Unzing tasikengu keu nata yuwit komune aminu wa natane puyana pasingamunggak kapaat naat unekan gatake yutzim. Unekan gatake yuwatda Nanata aminu waapatane umana yatangenawik,” ngang yakut.
JOH 12:27 “Na nangaakan natake yuat. Siwan nata dasing yawit? Asikaya nata anzing yawit, ‘Nana! Gata meya takngatu nae apikge wa singgau sandekngamuyo,’ ngang yawit ba dasing? Wena. Nata unzing dua yawit. Na meya waaknga kawitde natake apbum.
JOH 12:28 Nan! Gata take tasiwi gatane umanda buyambam siyok!” Jesuta unzing yawan wamu takngatu enandang yuakapata anzing yakut, “Nata natane umana tasiwa buyambamu gwa sikut. Siwan nata gatu tasiwa buyambam siknga siwik,” ngang yakut.
JOH 12:29 Yawan aminbamu inengan yukingga wamu waaknga natake anzing yaking, “Gakngau gwenduta yanggak ngang yawa kunduta angela tapatuta ininggak,” ngang yaking.
JOH 12:30 Unzing yawawa Jesuta yake anzing yanikut, “Wamu aaknga na gatangamikge dua yanggak. Wena. Waaknga yanggau gin gatandamikge yanggak.
JOH 12:31 Tapduknga Anututa aminbamu keu andakane nana usanziwik gwenu gwa singgak. Siwan Anututa aminbam usanzike aminu tapatu keu andakane nanata ie wam natake ie gen gwaamukaing kapa yapbike inikwasiwan kuwik.
JOH 12:32 Masande na nuke tangenawana nata aminu kuupbamu ninae kaipakapit,” ngang yakut.
JOH 12:33 Ita unzingu wa yakuu amin saamdakane tanguwa akupikge tuwanguke yakut.
JOH 12:34 Unzing yawan aminbampat yanganuke anzing iniking, “Ninu wamu takngatu Anututane wapatangu anzing nininggak. Anututa tapan Krais gatanimuyaapa dakngake apik kapata asinggan asinggan yuwik. Siwan ngana ga dasingge gata anzingu yanggayak? Aminda aminbamde notnaapa dakngake yuak kapa tanguke tangenatning ngang yanggayak. Aminbamde notna wa dakngake yuak kapa mamin,” ngang iniking.
JOH 12:35 Iniwa ita anzing yanikut, “Tapduu mateknga siknga kakaa akngata gikat gatake yutning. Apmanu kakaa akngata gikat gatake yuaing gwekatang ginda kakaa akngane kepi sukunong. Zikaatdamuyak. Aminu zikaandakane sukukengu ita zaneka kunggakge dua nataak.
JOH 12:36 Apmanu kakaa akngata gikat gatake yuaing gwekatang ginda kakaa waaknga damunggak kapae natapa kekeknga siyok. Natapa kekekawan ginu kakaa akngane sukukaing amin daknganing,” ngang yanikut. Siwan Jesuta wamu waaknga ngang yakenga ita wa amin peke kuke kusopukut.
JOH 12:37 Wa aminda kawawa ita duya kwaapzang pasiwawan kake ngana ie natake Anututa tapan pasinggak ngang natapa siakan dua sikut.
JOH 12:38 Unzingge ayanikapsa aminu Aisaiata wamu takngatu tupa siknga matakut taknga buya unin aakut. Aisaiata anzing matakut, “Buyambam tapa! Maminda nindane wamde baniu sikut? Wena. Buyambam tapata kekekngana maminde yeukngaman kaking? Wena,” ngang matakut.
JOH 12:39 Siwan aminbamda natapa siakan dua siwan wamu wa Aisaiata matakut taknga buya unin aakut. Sike ita wamu takngatuat anzing matakut,
JOH 12:40 “Ita tasiyaman kai kusiya amin dakngaking. Ita tasiyaman yamandet siya amin dakngaking. Kainata sanga katak kake musiane anggaman natdeke musia tapa tekwambanu maminda take tasiyamik? Gata yamunanga wena.” Wamu wa matakut taknga buya unin aakut.
JOH 12:41 Aisaiata baniaatang natake Jesuta aminu umana buyambamu kayaapa dakngake yuwik kakngae natake wamu waaknga ie yakut.
JOH 12:42 Unzing matakut taknga buya aawan aminu buyambamda Jesue natapa siakan sikut. Siwan Judia nana amindane take amikatnana aminu buyambamda ie natapa siakan sikut. Siwan ngana wa aminu Ferisi aminde akgwauke miti yot gwene ninikwasitnang ngang natake Jesue natapa siakan sikut takngana atakusopuking.
JOH 12:43 Wa aminu Anututa umana pangenawikge asiknga dua bakngaking. Wena. Aminda umana pangenatningge asiknga bakngake baniaatang wa Jesue natapbing kaknga dua yakapbing.
JOH 12:44 Siwan Jesuta apaa yake aminbamu anzing yanikut, “Aminu tapatu nae natake Anututa initewan apu pasinggak ngang natapan siakan siwiu ita naekan dua nataak. Aho. Ita na nanitewan apbum tapae natapan kekekanggak kapanin.
JOH 12:45 Sike na nanduau waapata aminu na nanitewan apbum tapa kuut akaak kapanin.
JOH 12:46 Mamin amindaka nae natapa siakan siwiu wa aminda zikaa aknga teke kakaa akngaatang yutningge natake na kepdakane epbum.
JOH 12:47 “Aminu tapatuta nae wamu baakngita natake ngana dua gwaamumbiu nata dua usanzike inikwasiwa kuwik. Wena. Aminbam usanzike yanikwasiwa kuningge dua natake na kepdakane epbum. Aho. Akgatayamunangge epbum.
JOH 12:48 Mamin amindaka nae masa namuke nae wamde apbitawiu usanziwik kakngata undang yukngamunggak. Wamu nina banipda siwan dua daninggat. Aho. Nanda nanitewan epbum tapata naniwan natapbum takngakan daninggat. Sike wamu waaknga daniwa yamandet sining kakngata tapduknga sandewik gwene ginu usanzike danikwasiwan kuning.
JOH 12:50 Siwan keune nana aminda kayuk asinggan asinggan yutning kakngae yapii wamu wa Nanata atnaninggak kaknga unin ngang natapa siakan singgak. Unzing natapa siakan siwan na Nanata atnaninggak kakngakan daninggat,” ngang yanikut.
JOH 13:1 Siwan yuwatakak tapduk Pasova gwenu gwa dapakaawan Jesuta anzing atnatapbut. Tapduknga keu andaka teke Nanae kuwitde gwenu gwa dapakanggak ngang natapbut. Siwan ita aminabamu keu andakane yuaingge banip gwaang natayamukut. Banip gwaang gatukande natake yutakusika ita akumbut.
JOH 13:2 Siwan bangee tapduk Pasova gwende nanamu atnayuwawa Setenda Judas Iskeriot nana Saimondane waaknga apae musia tangenawan ita Jesu iwande yamikge natapbut.
JOH 13:3 Siwan Jesuta nanamu atnayuk Nanata sanga kuupbam inae katakngane imuke initewan apbutde ita Anutue gatuna kuwikge natapbut.
JOH 13:4 Unzing natake Jesuta nanam teke asenakut. Asenake got tauknga sandeteke taul sandu take atambut.
JOH 13:5 Ita unzing tasike yangga dopangu gwendune tukngwake pandetnatane kepi yangga sautnimuke taul atambut sanda pasiwa kuking.
JOH 13:6 Unzing sautnimutakuke Saimon Pitae apan Pitata anzing inikut, “Buyambam tapa. Asikaya gata natane kepina sauya,” ngang inikut.
JOH 13:7 Iniwan yake anzing inikut, “Sanga nata tasinggat takngae yapii gata apmanu dua natdeyak. Ngana masande gata atnatdeya,” ngang inikut.
JOH 13:8 Iniwan yake, “Gata natane kepina ma saukngamim. Na asiknga bitanggat,” ngang inikut. Iniwan yake inike, “Nata ga dua saukgamanu ga naat gatake yutnanga dua,” ngang inikut.
JOH 13:9 Iniwan yake anzing inikut, “Aana. Natane kepinakan ma saukngamim. Gata kataknga gatu gwapaknga ngang kuut saukngamuyo,” ngang inikut.
JOH 13:10 Iniwan ita anzing inikut, “Aminu gupna kuutapa gwa saukengu dudumna siwik. Siwan ita yotna kuku kepinakan sauwik. Gupna kuutapa gatuna dua sauwik. Siwan ginu dudumna gwa yuaing ngana gikatnana tapatuta dudumna dua yuak,” ngang inikut.
JOH 13:11 Wamu waaknga ngang yake aminu waapata ie iwan aminde yeuyamikge natake gikatnana tapatuta dudumna dua yuak ngang inikut.
JOH 13:12 Siwan Jesuta kepininu sautnimukenga ita got tauknga tasike gatuna pukwike anzing ninikut, “Asikaya ginu sanga nata wa ginde tasindamunggat takngae yapiie atnataaing?
JOH 13:13 Ginda na ayanindamumsa apa ngang nanike buyambam tapa ngang nanikaing. Sike unzingu ginda take yakaing.
JOH 13:14 Na buyambam tapasa siwan na ayanindamumsa apa yuke ngana natane umana dua tangenake gindane kepisa sautdamunggatde natake gikaya notzatane kepi asauyamuke umanza dua tangenawam.
JOH 13:15 Nata kepi ginde yeutdamunggat. Ge gikaya kepi waakngakan nata ginde tasindamunggat binga tasinong.
JOH 13:16 Siakande siknga daninggat. Puya aminda buyambam tapana yapbike enane yutnanga dua. Siwan aminu puya takngatune kukengu ita aminu asinitewan kukut tapa yapbike enane dua yuwik.
JOH 13:17 Ginu wamu waaknga natake ginda kepi atasindamunggat taknga tawake tasikengu ginu apbakngake yutning,” ngang ninikut.
JOH 13:18 “Nata ginu kuupbamde dua yat. Na aminu nina papa yuaingge atnataat. Ngana aminu Anutue wam yanikapbuu tapatuta tupa siknga yuke wamu takngatu anzing matakut, ‘Aminu nanamu naat nasim tapata masa namukut,’ ngang matakut taknga buya unin aawik.
JOH 13:19 Sike wamu wa daninggat taknga apmea buya aawikge daninggat. Unzing daniwa natake yuwawa sanga wa asaawan kake ginu nae natake na atdanikum tapanin ngang natdetning.
JOH 13:20 Siakande siknga daninggat. Mamin amindaka aminu nata initewa kuwik kapa gaak wam inike ie take siknga tasiwiu aminu waapata nae kuut gaak wam nanike take siknga tasingamik kapanin. Siwan aminu na gaak wam naniwiu ita Nana na nanitewan apbum tapa gaak wam inike take tasingamik kapanin,” ngang ninikut.
JOH 13:21 Jesuta unzing yawan puyuwan baniaatang meya siknga natake anzing ninikut, “Nata siakande siknga daninggat. Aminu gikatnana tapatuta na natane iwanae yeuyamik.”
JOH 13:22 Ita unzing yawan ninu pandetnata natake ita maminde yanggak ngang natapbumang ngang natake inandek inandek nisa kawa kawan tasikumang.
JOH 13:23 Tasiwatna pandetna tapatu Jesuta ie take siknga nataakapa Jesuta yukut komune wesim siknga yukut.
JOH 13:24 Yuwawan Pitata gwapaknga makaike tuwangakan tasike inikwaiwikge inikut.
JOH 13:25 Siwan pandetna waapata Jesue inengan siknga gwetake anzing inikut, “Aana. Gata maminde yanggayak,” ngang iniwan
JOH 13:26 yake anzing inikut, “Nata poyau kautdu nanam yangga akngaatang tepa wikawan ie imit tapanin,” ngang yake poyau undang temake take Judas Saimondane waaknga Iskeriot yot gapmane nana apae imukut.
JOH 13:27 Iman papana Setenda i takut. Siwan Jesuta Judas anzing inikut, “Sanga gata tasinangge natayau gata zetgaman tasiyo,” ngang inikut.
JOH 13:28 Iniwan ninu apukwikumakatnana aminu wamu Jesuta Judas wa inikut takngae yapii dua natapbumang.
JOH 13:29 Kunduta Judasda mani pukwit gwende kayuak kapa ngang natapbumang. Siwan Jesuta tapduk takwan gwende nanam usiwikge ininggak ngang natapbumang. Ba sanga aminu sangaapana wenae yamikge ininggak ngang natapbumang.
JOH 13:30 Siwan Judasda nanam dapau wa iman takenga zetgaman ita epu kepman kukut. Sike keu zikaa gwa sikut.
JOH 13:31 Siwan Judasda kepman epu kuke kuwawana ita tasiwik kakngae natake Jesuta anzing ninikut, “Na aminbamdane notnaapa dakngake pasiwawa apmau opatang natane umana akngata gwa enake yuak. Gwa enake yuwawan nata tasiwa Anututane umana aknga yatangenatning.
JOH 13:32 Siwan Anututa apmaatzim nae tasingaman natane umana aknganata buyambam siwan kaning,” ngang ninikut.
JOH 13:33 “Waatdakana! Mateknga kundusim gikat gatake yukenga dapmake kuwana na nandupnangge natake ngana ginda nae nawaba maiwik. Judia kep komunenana aminu kundu gwa yanikum takngakan daninggat. Akuwit komu ginda apmau opatang kunanga dua.
JOH 13:34 “Ginu kunanga dua ngana mama wamu inata takngatu daniwa natapnong. Nata ginde musip gwaang natandamunggat binga ginda gisae unzakan musip gwaang natayutnong.
JOH 13:35 Ginda gisae musip gwaang natayuwawanu aminbamda danduke Jesue aminabam ngang natapning ngang ninikut.”
JOH 13:36 Unzing niniwana Saimon Pitata yake, “Aana. Gata zane kuya,” ngang inikwaiwan yake anzing inikut, “Keu nata akuwit komde gata apmau une kunanga dua. Ngana masande gata une kuwiyak,” ngang inikut.
JOH 13:37 Iniwan yake anzing inikut, “Aana. Dasingge apmanu naat kuut dua kusim? Gitna siknga yutzimde natake atnuwanu undanga,” ngang inikut.
JOH 13:38 Iniwan ita yake anzing ninikut, “Gitna siknga yutzimde natake atnuwanu undanga ngang kem yanggayak. Siakande siknga ganinggat. Taakga dua yawawan gata natane umana sipmaat sipduat takusopuwiyak,” ngang inikut.
JOH 14:1 Siwan Jesuta gatuna anzing ninikut, “Musipzaatang nangaakan ma natapam. Ginu Anutue natapa siakan singgak. Siwan ina unzakan nae kuut natapnong.
JOH 14:2 Nanatane yot gwekatang you kwaapzang siknga gwendu gwenduta yuaing. Unzing wena gamu nata dua daniwam.
JOH 14:3 Nata undang koke ginde tandakngakenga gatuna asepit. Epuke ginu danipakopa naat gatake asinggan asinggan yutnim.
JOH 14:4 Sike nata keu akuwit komde kepi gisa atnataaing,” ngang ninikut.
JOH 14:5 Ngang niniwan Tomasda yake anzing inikut, “Aanin. Ninu buyami natake gata keu kuwiyak komde dua nataamang. Sike nisa undang kunimde kepi tawana maiwik,” ngang inikut.
JOH 14:6 Iniwan yake anzing inikut, “Nata ginu danipakuwa kuke undang kunim. Sike siakan wamde yapii na. Siwan ginu kayuk yutning kaknga atdama kayuk asinggan yutning. Siwan nata aminu tapatu dua initakuwanu ita kuke Nande dua kuwik. Ita inatakan undang kunanga dua.
JOH 14:7 Sike ginu nae katak natapbing gamu ginu natane Nanae kuut atnatapam. Ginu apman tuwanguke ie atnataaing. Siwan ginda Nana gwa kaking,” ngang ninikut.
JOH 14:8 Unzing niniwan Filipda yake anzing inikut, “Aana. Gata Nangga ninde yeutnimi kake sanga tapatuatde dua ganinim,” ngang inikut.
JOH 14:9 Ngang iniwan yake anzing inikut, “Filip. Tapduk mamaya na gikat gatake gwa yuamang. Siwan ga nae katak natapbuyak gamu unzingu dua yawim. Aminu na nanduak kapata Nana gwa kakut. Dasingge gata, ‘Nangga ninde yeutnimi kanim,’ ngang naninggayak?
JOH 14:10 Asikaya ga nae natake iat Nankat unekan gatake yuamayak ngang dua ba nataayak? Wamu nata ginde damunggat taknga nata nina banipda natake dua daninggat. Aho. Nana naat unekan gatake yuamak kapata nae banip tangenawan nata wamu yake itane puyana pasinggat.
JOH 14:11 Naat Nankat unekan gatake yuamak ngang daninggat taknga natake ginu siakan ngang natapnong. Sike wena kakengu ginda puya takngatu takngatu nata pasinggatde natake wamu wa daninggat takngae siakan ngang natapnong.
JOH 14:12 Siakande siknga daninggat. Aminu nae natake Anututa tapan pasinggak ngang natapan siakan siwiu waapata puya nangaakanu nata pasinggau itaaya unzakan pasiwik. Siwan nata Nanae kuke yuwawa ginda nae natake iat Anutuat unekan gatake yuamayak ngang natapa siakan siwanu sanga kuupbamde tumuk wam yaningu nata atasindamit. Atasindama ginu puya pasinggat taknga atnapbitning. Unzing tasiwa kake aminbamda Nanatane umana aknga yatangenatning.
JOH 14:14 Sike ginda naekan natanggamatake sanga takngatue naniwanu nata atasindamit,” ngang ninikut.
JOH 14:15 “Ginda nae banip gwaang natangamukengu natane gena akgwaamutning.
JOH 14:16 Sike siakan wam takngatane yapii Anututane Waung Kapa unin. Ita gatandamuyaapa dakngake asinggan yuwik. Siwan na dapmake kuke Nana iniwa ita Waungu wa gatandamuyaapa initewan ginde asapik. Initewan apuke gikat gatake asinggan asinggan yutning. Unekan gatake yuwawa ngana aminu Anutue natapa siakan dua singgak aminda Waung waapae dua natake kainata dua kake ie natapa siakan dua siwik. Siakan dua siwan ngana Waungu waapata gikat gatake unekan yuwawa ginda ie atnataaing. Atnatake yuwawa iat gikat asinggan unekan gatake sukuning.
JOH 14:18 Nata ginu dapmake kuwawa ginda toitoitda binga dua yutning. Wena. Ginu dapmake kuke gatuna ginde asapit.
JOH 14:19 Mateknga kundusim yukenga na dapmake kuwawa aminu Anutue natapa siakan dua singgak aminda gatuna dua nandupning. Aminu waakwakatnana aminda na dua nanduke yuwawa ngana ginda atnandupning. Ginda atnandupa nata kayuk yuke ginda kayuk yutning kaknga atdama kayuk asinggan asinggan yutning.
JOH 14:20 Siwan tapduknga Waung Kapata ginde apik gwekatang ginu nae atnatdetning. Naat Nanaatda buyakan taknga yuamak ngang anggaman siwan ginda kaning. Kake naat gikat gatake unekan sukukamang ngang natdetning.
JOH 14:21 Ge aminu tapatuta nae banip gwaang natangamukengu natane genu akgwaamumbik. Akgwaamuban kake naat Nanaatda aminu waapae banip gwaang natangamusim. Natangamuke nata anggaman apa atnandupik,” ngang ninikut.
JOH 14:22 Jesuta unzing niniwan aminu nikatnana tapatu umana Judas ngang inikumang. Judas Iskeriot yot gapmane nana apatane tange tapatu. Ita Jesu anzing inikut, “Aana. Dasingge gata ninde apnangge nataayak ngana gata anggamanu gae natapa siakan dua singgak aminde dua apsa,” ngang inikwaikut.
JOH 14:23 Inikwaiwan yake anzing inikut, “Aminu nae musip gwaang natakengu ita natane gena katak siknga gwaamumbik. Gena gwaamuban kake natane Nanata aminu waapae musip gwaang natangamik. Siwan naat Nanaatda ie apda iat gatake asinggan asinggan yutnim.
JOH 14:24 Aminu nae musip gwaangu dua natapiu ita natane gena dua gwaamumbik. Siwan wamu wa daniwa ginda nataaing kaknga wa nata ninane dua. Wamu waaknga Nana na atnanitewan apbum tapatane,” ngang ninikut.
JOH 14:25 “Na gikat gatake yuyuk nata ginu unzingu danit.
JOH 14:26 Ngana nata Nana iniwa ita inane Waung Kapa gin gatandamik kapa initewan ginde asapik. Initewan apuke danindamuke ginde natdetdetza pangenawan ginda wamu kuupbam nata daniwa yusika apbotaningu gatusa natdetning.
JOH 14:27 Nata ginu atdapmambitde natake gatandama ginu nangaakan dua natapning. Gatandama ginu nata musipma gitna nataat takngakan natapnong. Aminu Anutue baniu dua siking aminda unzingu gatandamunanga dua. Ginda musipzaatang nangaakan ma natapam. Siwan ginu ma gwaubam,” ngang ninikut.
JOH 14:28 “Ginu wamu nata anzing gwa daniwa nataing, ‘Nata gin dapmake akuwit. Kuke na gatuna ginde asapit,’ ngang gwa daniwa nataing. Sike ginda nae musip gwaang natapbing gamu ginu nata Nanae kuwitde apbakngawam. Dasingge? Nanata buyambam tapa sike na atnapbike yuak.
JOH 14:29 Siwan nata ginu dua dapmake kuke apman unekan gatake yuamang komune wamu waaknga gwa danit. Unzingu gwa danit taknga masande buya aawan kake ginda natapa siakan siwik.
JOH 14:30 Nata wamu buyambamu gikat dua yanim. Dasingge? Sanga keu andakane nana akngatane tupan tapata asapunggak. Ita sanga takngatu nae tasinanga dua.
JOH 14:31 Ngana ita na tasiwan siwan aminbamda kake nata Nande musip gwaang natake Nanda atnaninggak kakngakan tasinggat ngang anggaman natdetning,” ngang ninike, “Ginu enawa kuna,” ngang ninikut.
JOH 15:1 Siwan Jesuta wamu takngatuat anzing ninikut, “Nau wain takngae toikngata kake kainga tapatuta buyana dua aawan kake apmatawik. Siwan kainga tapatuta mamaya siknga siwan buyana katak dua aawan kake matawan somasoman sike buyana buyambam wesim aatning. Ina unzakan Nanata nau wain takngae toiknga binga. Siwan na nau wain taknga binga. Siwan natane aminabamda kainga binga. Siwan kainga tapatuta buyana dua aawan ba mamaya siknga siwan Nanda apmatawik.
JOH 15:3 Siwan kainga matawan kaikasike buyana buyambam aakaing binga wamu wa gwa danikum takngata wasapza gwa sandetdaman yuaing.
JOH 15:4 Yusika banipzaatang nae asinggan natanggamatanong. Unzing tasiwanu naat gikat gatake unekan sukunim. Sike kainga tapatu matawan inatakan yuwanu buyana dua aawik ngana unzing buyak kwabat yuwanu buyana asaawik. Ina unzakan. Ginu nae dua natanggamatawanu buyasa dua aawik.
JOH 15:5 “Na nau wain taknga binga. Siwan ginu kainga binga. Siwan gikatnana tapatuta nae asinggan natanggamatawanu naat iat gatake unekan sukuwatda buyana buyambam aawik. Siwan ngana inatakan yukengu buyana dua aawik.
JOH 15:6 Kainga kunduta buyana dua aawa kake toikngata matake muban kuke kupia siwa butuke katapatang muban yasining. Ina unzakan aminu tapatuta nae asinggan dua natanggamatawanu inikwasiwan kuwan wai siwik.
JOH 15:7 Ginda nae asinggan natanggamatake wamu wa gwa danikum taknga gitna pake yukengu tumuk wam yake Anututa sanga takngatu tasindamikge take natake ginda iniwa buya asaawik.
JOH 15:8 Buyasa asawan aminbamda kake ginu natane pandetna siakande dakngake pasikaing ngang anggaman siwan kaning. Kawawa natane Nanatane umana aknganata buyambam yuak ngang natapning.
JOH 15:9 “Nanda nae musip gwaang nataak. Ina unzakan nata ginde musip gwaang nataat. Asinggan ginde musip gwaang natandamunggat takngae gepbiatang yutnong.
JOH 15:10 Sike nata Nanae gena asinggan gwaamuba ita nae musip gwaang natangamunggak. Siwan ginda ina unzakan natane gena gwaamubanu nata ginde musip gwaang asinggan natandamit.
JOH 15:11 Nanata nae banip gwaang natangamunggakge apbaknganggat. Siwan ginda ina unzakan apbaknganingge natake wamu waaknga daninggat. Ginda kumzang apbaknganingge natake nata wamu waaknga ginde daninggat.
JOH 15:12 Ginda anzing tasinong. Nata ginde musip gwaang natandamunggat binga ginda musip gwaangu gitatnanae natayamunong.
JOH 15:13 Sike aminu tapatuta notna gatayamunangge tasisika akupiu waapa sanga takngatuta yapbitnanga dua.
JOH 15:14 Sike ginu natane wama wa daninggat taknga tasiwanu nata danduke ginu natane notna ngang daniwit.
JOH 15:15 Puya aminata sanga take apanata tasinggak kaknga dua nataak. Ina unzakan nata ginu puya amina ngang tupa danikum ngana apman gatu apmea ngangu unzing dua daniwit. Wena. Wamu kuupbam Nanda naniwan natapbumu ginu gwa daniwa nataingge nata ginu notna ngang daninggat.
JOH 15:16 Ginda gisa na aanzae dua taking. Aho. Nata ginu ninae papa pandetna dakngawa nata ginu puyae dapmaba ginda kuke tasiwa buya aawikge natake ginu pakum. Ginda kuke tasiwa buya aawiu asinggan asinggan yuwikge natake ginu pakum. Nata ginu papa aminabam dakngake kuku tasiwa buya aawan ginda Nanae tumuk wam kuupbam inining kaknga ita ginde atdamik.
JOH 15:17 Nata mama wamu anzing damunggat. Ginda musip gwaangu gikatnanae natayamunong.”
JOH 15:18 “Sike aminu Anutue semna nataaing aminda ginde semna atnatapning. Semna natandaman kake ginda anzing natapnong. Wa aminda tupanu nae gamok semna natapbing.
JOH 15:19 Sike ginda Anutue semna nataaikatnana gamu wa aminda ginu inane notnae take natandamam. Ngana ginu waakwakatnana dua. Wena. Nata ginu ninae papa ginda Anutue semna nataaing amin notza gwa peking. Peke naat gatake unekan sukukamangge aminu wa Anutue semna nataaing aminda ginde semna natandamukaing.
JOH 15:20 Wamu nata tupa anzing danikum, ‘Puya aminda take apana yapbitnanga dua,’ ngang danikum taknga katak siknga natanggamatanong. Aminu wa na nutnangge tasikaing aminda gikaya dasipnangge atasining. Sike wa aminda natane wama atawakaing gamu ginde wamu atawabam.
JOH 15:21 Ngana wa aminu na nanitewan apbum tapae dua natake ginu natane aminabam dakngake yuaing ngang danduke ginde semna natake dasipnangge tasining.
JOH 15:22 Sike nata dua apuke wa aminde wamu dua yamukum gamu wa aminu wai wa Anutue semna nataaing kakngana anggaman dua siwan. Ngana apmanu gwa yaniwa natake masa nae nama kepi waiakngana takusopunanga wena.
JOH 15:23 Aminu nae semna natangamiu ita Nanae kuut semna natangamunggak kapanin.
JOH 15:24 Sike puya inata inata tupa aminu kunduta dua tasiking kaknga nata dua tasiwa nandupbing gamu wa aminu waiakngana wena. Ngana apmanu wa aminu duya takngatu takngatu pasikumu gwa kaking. Kake ngana naat Nanaatde semna natanimukaing.
JOH 15:25 Ngana sanga wa tasikaing kakngae wamu takngatu Anututane wapatang yakapsa aminda tupa siknga mataking kaknga buyana asaakgak. Wamu waaknga anzing. Wa aminu nae semna moo siknga natangamuking ngang mataking kaknga buya unin aakgak.
JOH 15:26 “Siwan ngana Waungu gin gatandamik kapaat Nanaatda unekan gatake yuamayak. Siwan nata Nanae kuke initewa ginde apuke siakan wamdekan daniwik. Waung Kapata apu danike natane yapii ayakapik.
JOH 15:27 Siwan tupa na puya tuwanguke tasiwawa ginu naat gatake unekan yuwatna apu apman apunggak. Unzing yukumangge Waungga ginde apan ginu natane yapii ayakapning,” ngang ninikut.
JOH 16:1 “Siwan nata danike aminda ginde semna natake tasindama ginda pimanang ngang natake nata wamu waaknga daninggat.
JOH 16:2 Sike wa aminda ginu miti yotde danikwasitning. Siwan masande aminu ginu atdasipa kumning aminda sapdut wam yake Anututane puya take siknga tasikamang ngang yaning.
JOH 16:3 Wa aminu naat Nanaatde katak siknga dua natake ginu atdasipa kumning.
JOH 16:4 Siwan masande sanga waaknga aawan ginu gatusa natake ita sanga waakngae tupa atninikut ngang natdetningge natake apmanu ie daninggat. Wamu waaknga tupanu nata dua danikum. Naat gikat unekan gatake yukumang komune unzingu dua danikum. Wena.”
JOH 16:5 “Sike ngana apmanu na atnanitewan apbum tapae gatuna kuwitde natake daninggat. Unzing daniwa ngana, ‘Ga zane kuya,’ ngangu ginda dua nanikwaikaing.
JOH 16:6 Siwan na akuwitde natake daniwa musipzaatang meya siknga natapa danduat.
JOH 16:7 Ginda ie meya nataaing ngana siakande daniwa natapnong. Nata dua dapmake kuwanu Waungu wa akgatandamik kapata ginde dua apik. Siwan nata undang kuke Waungu waapa initewa apu gatandamuke yuwik. Nata dua kuwit gamu wa akgatandamik kapata dua apan.
JOH 16:8 Siwan ngana ita apuke keune nana aminda sanga usanzike sanga waaknga take tasinim siwan ngana sanga waaknga wai. Unzingu dua tasinim ngang yakaing kaknga Anututa usanzike unzingu gutonga yakaing ngang yawan siakan siwan anggaman kaningge Waungga tasiwik.
JOH 16:9 Wa aminu nae natake Anututa initewan apu pasinggak ngang dua nataaing kaknga Waungga usanzike wai tasikaing ngang yawik.
JOH 16:10 Siwan nata ginu dapmake Nanae kuwanu ginda gatusa dua nandupning. Na undang kuke yuwawa Anututa nandupan take singgak kaknga Waungga yeuyaman kaning.
JOH 16:11 Sike aminu Anutue semna nataaingga Setendane wamna natake ie gen gwaamukaing kapa nata yapbike inikwasiwa kuwikapa Anututa usanzike toknga imunangge tupa gwa yakut taknga Waungga yanikapan natapning.
JOH 16:12 “Siwan wamu kwaapzang nata gin daninangge natat. Ngana apman daniwanu ginda tananga dua.
JOH 16:13 Ngana Waungu wa siakan wamdekan yanggak kapata apuke ginu siakan wamu kuupbam atdaniwan natapning. Ita wamu ina banipda siwan natake dua yawik. Wena. Wamu Nanda yawan nataak kakngakan ayakapik. Siwana ita ginu sanga masan apningge daniwik.
JOH 16:14 Sike ita nae wama take ginde danikapan natane umana aknganata enane kopik.
JOH 16:15 Sanga kuupbamu Nanata yanggak kakngakan nata yake Waungga natane wama take ginde danikapikge daninggat,” ngang ninikut.
JOH 16:16 “Ge ginda mateknga kundusim yusika nawaba maiwik. Nawaba maiwan mateknga kundusim yukenga atnandupning,” ngang ninikut.
JOH 16:17 Unzing niniwan aminu nikatnana kunduta anzing yakumang, “Dasingge nininggak? Mateknga kundusim yusika nawaba maiwan mateknga kundusim yukenga gatu atnandupning ngangu dasingge nininggak? Sike nata Nande kuwa unzingu siwik ngangu dasingge nininggak.
JOH 16:18 Ngang yake wamu wa mateknga kundusim ngang nininggak kaknga anggaman dua singgak. Yapii dasing,” ngang yakumang.
JOH 16:19 Unzing yake yakwaik wamu takngatu inikwaitnangge tasiwatna ngana ninduke anzing ninikut, “Ginda wamu dasing kakngae yanganukaing? Nata danike mateknga kundusim yusika ginda dua nandupning. Sike mateknga kundusim yukenga gatu nandupning ngang danit takngae yanganukaing.
JOH 16:20 Siakande siknga daniwa natapnong. Ginda masande meya takngatu takngatu kake kwanamu kumzang sitning ngana aminu Anutue masa imukaing aminda musia tatanga natapning. Ginda meya buyak yuwawa ngana meya waakngasata masande wena siwan apbaknganing.
JOH 16:21 Ginu maya musia kayaapa binga. Maya waapata musia siwan yusika engangu asaawikge dapaknga siwan anzing natapik. Apmaatzim toknga aknga engangge natapit ngang natake meya buyak yuwik. Sike meya buyak yuwawan mingata engakapa tangaiwana meya waakngana sandewan musia tatanga natapik.
JOH 16:22 Ngang ginda ina unzakan yutning. Apmanu ginu musipzaatang meya nataaing ngana tapduknga nata gatuna gin dandupit gwekatang meya waakngasa sandewan ginda apbaknganing.
JOH 16:23 Apbakngake ginda sanga tapatue dua nanikwaitning. Nata siakande siknga daninggat. Ginda tumuk wamu Nande inike sanga tapatu damikge yawanu ginu natane gen gwaamukaing ngang danduke ita ginde atasindamik.
JOH 16:24 Ginu nae natake Anututa initewan apu pasinggak ngang natapa siakan singgakge tumuk wam inina Anututa atasinimik ngangu tupa ginu dua natake tasiking. Ngana apmanu ginda unzing iniwanu ita atasindaman ginu asiknga baknganing.”
JOH 16:25 “Nata wamu wa tuwang wam tangan daninggat. Ngana masande nata tuwang wamu gatu ginu dua daniwit. Wena. Nata anggaman siknga ngang yake ginu Nande daniwit.
JOH 16:26 Unzing daniwa natake ginda natane umanae natanggamatayuk tumuk wamu ayaning. Ginda unzing yawa natake nata ginde banip gwaang natake gatandamunangge nataat ngana tumuk wamu gindane take nata Nanae ininangge dua natapit. Wena.
JOH 16:27 Nanda kuut ginde banip gwaang natandamuke ita gatandamik. Dasingge? Ginda nae natake na Nanaat yusika apbumde natapa siakan siwan ginda nae banip gwaang natangamukaing.
JOH 16:28 Tupa na Nanaat gatake yukumak. Siwan nata i teke kepdakane epbum. Sike apmanu na kepdaka teke gatuna Nande kuwit,” ngang ninikut.
JOH 16:29 Unzing niniwan yake anzing inikumang, “Unin! Apmanu gata anggaman yake tuwang wam dua yanggayak.
JOH 16:30 Unzing yawi natake gata aminda akganikwaitningge gamok dua kayuayak. Wena. Gata yakwaik wamu kuupbam ganikwaitnangge nataamang kakngae atnataayak ngangu atnataamang. Unzingge ninda gae natake gata Anutuat yusika apbuyak ngang natapna siakan singgak,” ngang inikumang.
JOH 16:31 Unzing inina ita yake anzing ninikut, “Apmanu ginu banip sikaingge yakaing ngana nata daniwa natapnong.
JOH 16:32 Tapduu aminda ginu kuupbam tapatu tapatu dawaba ginu na napmake undaundang kuke yotza kuwawa na ninatakan awiaapa yuwitde gwa dapakanggak. Ngan. Gwa apunggak. Siwan ngana na awiaapatakan dua yuwit. Wena. Nanda naat gatake yutzim.
JOH 16:33 “Nata gikat gatake unekan sukuwatna ginu dawaba undaundang kuning gwekatang nangaakan dua natake yutningge natake nata wamu waaknga daninggat. Kepdakane yusika ginu meya takngatu takngatu kaning. Ngana gindane musipza kekeknga yuyok. Nata iwaninu kepdakane nana gwa yapbikgat,” ngang ninikut.
JOH 17:1 Jesuta unzing niniwan puyuwan ita enandang kake anzing yakut, “Nana. Tapduu gwan singgak. Gata aminu kuupbamde tupan tapa napmambi yuke umanda enane siknga yatangenake gata aminu kaipakapi nae apbing aminde nata sanga kayuk yutning kaknga yamit. Unzing yama pake asinggan asinggan yutning.
JOH 17:3 Ga awiaapa ga Anutu siknga. Siwan na Jesu. Gata na nanitewi apuke Krais aminbam gatayamuyaapa dakngake yuat. Siwan aminu nitde katak nataaing amindakan kayuk yutnanga aknga pake asinggan asinggan yutning aminu unin.
JOH 17:4 Nata puya nae nami tasiwitde namukuyak kaknga gwan tasiwa puyuwan na gatane umanda aknga unin tangenakum.
JOH 17:5 “O nan. Tupa kepdaka dua aawawan naat gaat unekan gatake yuwatda natane umana aknganata buyambam sike yukut. Sike apmanu naat gaat gatake unekan gatunit yutzim. Unzing yuwatda gata umana akngana gatuka tangenawi buyambam siyok. Unzing tupa sikut binga.
JOH 17:6 “Siwan nata gatane yapii aminu gika kaipakapi aminu gae masa gamukaing amin notna peke nae apbing aminde gwa yanikapbum. Aminu waakwau gikane. Siwan gata wa aminu kaipakapi nae gwa apbing. Nae apuke gae wamu katak siknga tawakaing.
JOH 17:7 Gatane genda unzing gwaamuke gata na napmambi nata umana kayaapa dakngake pasinggat taknga kake sanga wa kuupbam gatane akngata apan pasinggatde pandetnata atnataaing.
JOH 17:8 “Dasingge? Wamu kuupbam gata namukuyak kaknga nata yama pake siakande siknga anzing nataaing. Tupa na gaat yusika na apbum. Siwan gata na nanitewi apbumde natapa siakan singgak.
JOH 17:9 Nata tumuk wamu wa amin gatayamunangge ganinggat. Nata tumuk wamu aminu gae masa gamukaikat nana aminu gatayamunangge dua ganinggat. Aho. Nata tumuk wamu aminu wa gika kaipakapi nae apbing amin gatayamunangge ganinggat. Dasingge? Wa aminu gikane.
JOH 17:10 “Siwan natane amina kuupbamda gatane aminda dakngake yuaing. Siwan gatane aminda kuupbam wa natane. Siwan wa aminda natane umana yatangenakaing.
JOH 17:11 Siwan na apmanu kepdaka teke gae kuwawa ngana aminu waakwau ane yutning. O Nan. Noman sikngaapa. Gata wa aminu gatane kekeknga akngakata toimso. Naat gaat musipmiu takngatukan natake yuamak. Ina unzakan aminu waakwau musia takngatukan natake yutningge gatane kekeknga akngaka nae yeukngami kakum takngata toimso.
JOH 17:12 Tapduknga na wa amikat yuamangu na gatane kekeknga akngakata toikgat. Nata katak siknga kayuwawa aminu tapatu wena dua sikut. Pandetna tapatu wena sinanga tapatakan napmake wena siwikge gwa dapakanggak. Wa gatane wamu yakapsa aminda tupa siknga mataking kaknga buyana unin aawikge dapakanggak.
JOH 17:13 “Siwan apmanu na gae kunggat. Siwan nata kepdakane yuat komune wamu waaknga ngang yake nata apbaknganggat takngae natake wa aminda ina unzakan asiknga baknganingge yanggat.
JOH 17:14 Gatane wamu nata wa aminde yama gitna pake aminu gae masa gamukaing amin notna peke yuaing. Na kuut nata gae masa gamukaikat nana tapatu dua yuat. Unzingge aminu wa gae semna nataikat nana aminda natane aminabamu waakwakge semna nataaing.
JOH 17:15 Nata tumuk wamu gata natane aminabam keu andakane sandeke papiakge dua yanggat. Aho. Nata tumuk wamu gata toimbi aminu waiapata dua pasiwan mainingge yanggat.
JOH 17:16 Wa aminu gae semna nataaikat nana aminda dua yuaing. Sike na kuut. Unzing natanggamukaing amikatnana dua.
JOH 17:17 Gatane wamu siakan yanggayak kaknga kuupbam wa aminde asinggan yami pake gatane amindabam daknganong.
JOH 17:18 Tupa gata na nanitewi nata apuke aminbamde banakan yuat. Ina unzakan. Nata aminabamu yanipewa kuke aminbamde banakan yutning.
JOH 17:19 Siwan nata natane aminabam gatayamunangge natake nata gae amin siknga dakngake yuwitde yanggat. Unzing yake aminu waakwakga gatane siakan wam gwaamuke, wa aminu kuut gae amin siknga daknganingge natake yanggat.
JOH 17:20 “Ngana na tumuk wamu aminu waakwakgan gatayamunangge dua yat. Aho. Nata tumuk wamu yake aminda wa aminde wam natake Anututa tapan pasinggak kapa unin ngang nae natapa siakan siwik amikat kuut gatayamunangge yanggat.
JOH 17:21 Nata aminu wa kuupbam musia takngatukan natake yutningge nataat. O Nana. Gata naatang yuwi naat gatake unekan sukukamak. Ina unzakan. Nata wa aminu nikat gatake unekan sukunimde nataat. Unzing sukuwatna aminu gae masa gamukaing aminda natake gata na nanitewi apbumde natapa siakan siwik.
JOH 17:22 Siwan gaat naat musipmiu takngatukan natake yuamak. Sike natane aminabamu nitda musipmiu takngatukan natayuamak binga natayutningge nataat. Unzing natake gata nae umana buyambamu wa atnamukuyak kaknga wa aminde gwa yeuyamukum. Yeuyama kake musia takngatukan natayutning.
JOH 17:23 Nata wa amikat yutna gata na ataang yuwi wa aminu musia takngatukan siknga natake yutningge nataat. Musia takngatukan natake yuwawa kake aminu gae semna nataaing aminda natake gata na nanitewi apbumde natapa siakan siwik. Siwan gata natane aminabamde musip gwaang nataayak ngang natapa siakan siwikge nataat.
JOH 17:24 “O Nan. Nata aminu gata kaipakapi nae apbing aminu naat keu nata yuwit komune yutnimde nataat. Nata wa aminu natane umana buyambam gata wa namukuyak kaknga natapningge nataat. Tupa keu dua aawawan tapduu waomune gata nae musip gwaang natangamuke umana buyambamu waaknga nae namukuyak.
JOH 17:25 “O Nana. Noman sikngaapa. Aminu kuupbamda gae dua nataaing. Ngana nata gae atnataat. Siwan aminabamu aakwak kaya atnataaing. Gata na nanitewi apbumden.
JOH 17:26 Nata gatane yapii wa aminde gwa yanikapbum. Siwan wa aminda ga nae musip gwaang natangamunggayak kakngae baniaatang natake yuwawa naat wa amikat gatake unekan yutnimde natake nata gatuna gatane yapii yanikapit.” Ngang Jesuta tumuk wamu waaknga ngang yakut.
JOH 18:1 Jesuta tumuk wamu waaknga yawan puyuwana iat ninu pandetnaatda kuku yangga Kidrondane ganzikapa yatupbumang. Keu katau Oliv daka daka kwaiking komu kautdu saak yuwan Jesuat ninu pandetnaatda keu wakomu banakan katang kopbumang.
JOH 18:2 Sike Judas aminu Jesu iwande yeuyamuyaapa itaaya keu wakomde atnataak. Dasingge? Tapduk bamu asinggan Jesuat nikat unekan gatake yuke keu wakomune kuke yuakumang.
JOH 18:3 Unzingge Judasda amak aminu kundu gatu Anutue yot takwan gwene kayuya aminu kundu ngang papan keu wakomune apbing. Aminu wa apbingu Anutue yot takwan gwene pasiya amindane take akwakat gatu Ferisi amikatda yanipewa apbing. Apuke lam gwegwen gatu baakatap gatapakapuke sanga amakgane pake apbing.
JOH 18:4 Siwan Jesuta sangabamu ie apiu atnatapbut. Atnatake kawawan aminu waakwau apa kake ita inengan kuke anzing yanikut, “Ginu maminde tawakaing,” ngang yanikwaiwan
JOH 18:5 yake, “Ninu Jesu Nasaret nana apae apu tawakamang,” ngang iniwa yake, “Waapa nakan,” ngang yanikut. Siwan Judas aminu ayeuyamuyaapa iat gatake yuking.
JOH 18:6 Siwan Jesuta, “waapa nakan,” ngang yaniwan wa aminu asisakuke kepdakane pimaking.
JOH 18:7 Pimake yuwawa Jesuta gatuna yake, “Ginu maminde tawakaing,” ngang yanikwaiwan yake, “Jesu Nasaret nana apae tawakamang,” ngang iniking.
JOH 18:8 Iniwa ita yake anzing yanikut, “Nata ginu danike, ‘Waapa nakan,’ ngang gwa danit. Sike ginu nae nawakengu aminu aakwau kapewa kukakut.”
JOH 18:9 Ita wamu wa yake tumuk wamu takngatu tupa yakut taknga buya aawikge yakut. Sike tupa anzing yakut, “Aminu gata kaipakapi nae apbikat nana tapatuta wena dua sikut,” ngang yakut. Siwan, “Ginu aakwau kapewa kukakut,” ngang yawan
JOH 18:10 Saimon Pitata paipna kaya siwan ita paipna kaitakakoke Anutue yot takwan gwene pasiya aminde tupan tapatane puya amina tanguke baaknga katakngi siyaapa saak nanandaka patdewan pimakut. Puya aminu waapa umana Malkas ngang iniking.
JOH 18:11 Siwan Jesuta Pita anzing inikut, “Paipba tangine gatu tamumso. Nata meya Nanata nanitewan apuke kanangge apbum taknga akawit,” ngang inikut.
JOH 18:12 Unzing iniwana amak amikat gatu iat gatake apbingga Jesu tanggaganuke napda wambing.
JOH 18:13 Napda wamake Anasde gamok takuking. Sike aminu waapa Kaiafas nakanu wagwene Anututane yot takwan gwene pasiya aminde tupan tapatane yepme.
JOH 18:14 Siwan Kaiafas waapata tupa Judia aminu anzing yanikut. Aminu tapatutakan aminbamde tangge kungwayamik ngang yakut tapanin.
JOH 18:15 Siwan Jesu Anasde takuwawa Saimon Pitaat naatda Jesu tawakumak. Sike Anas waapata nae atnataakge naat Jesuat Anasdane yotde daman gwekatang kopbumak.
JOH 18:16 Undang koke ngana Pitata gwabok gwaune wesim yuwawan nata kuku maya gwabok gwakge kayuak kapa inike Pita daman gwekatang initakakopbut.
JOH 18:17 Initakakopan maya gwabok gwaune kayuak kapata Pita anzing inikut, “Asikaya gakaya aminu waapatane pandetna,” ngang iniwan yake, “Aho na dua,” ngang inikut.
JOH 18:18 Siwan puya amikat gatu akayuya amikatda got natake katau gwendu sake katap aiking. Siwan Pitaaya wa amikat yuke katap aikut.
JOH 18:19 Siwan Anasda Jesu pandetnae gatu wamu ita aminbam yanindamukutde inikwaikut.
JOH 18:20 Inikwaiwan yake anzing inikut, “Nata wa aminu wamu anggaman asinggan yamukum. Asinggan nata aminbamu miti yot gwene gatu Anutue yot takwan gwene Judia aminda unekan apuke kekepna yuaing komune yanindamukum. Nata wamu takngatu kusopuknga atangu dua yakum.
JOH 18:21 Dasingge gata na nanikwaikgayak? Gata aminu wamu waaknga natapbing amin yanikwaiyo. Wa aminu wamu nata yakum taknga atnataaing,” ngang inikut.
JOH 18:22 Ita unzing yawan kayuya aminu tapatu une wesim yukutna waapata Jesutane amna wesike anzing inikut, “Gata wamu yake Anutue yot takwan gwene pasiya aminde tupan tapae unzingu ininggayak ba dasing,” ngang inikut.
JOH 18:23 Iniwan yake anzing inikut, “Nata wamu wai yawanu gata wamu wai waaknga ngang yakapso. Sike nata wamu noman taknga yawa ngana gata dasingge na nukgayak,” ngang inikut.
JOH 18:24 Iniwan napda Jesu wambingu unzing yuwawan Anasda yanipewan Anutue yot takwan gwene pasiya amindane tupan tapa Kaiafasde takuking.
JOH 18:25 Yanipewan Kaiafasde takuwawa ngana Saimon Pitata dandam tangan yuke katap aike yukut. Aike yuwawan aminu undang yukingga anzing iniking, “Asikaya gakaya itane pandetna ba,” ngang iniwa ita umana takusopuke, “Na dua,” ngang yakut.
JOH 18:26 Unzing yawan Anutue yot takwan gwene pasiya aminde tupan tapatane puya aminu tapatu Pitata baaknga patdekut tapaat nana tapatuta anzing inikut, “Siakan siknga! Nata ga ganduwawa iat puyaangane yuwawat gandut,” ngang iniwan
JOH 18:27 gatuna yake, “Aho,” ngang yakut. Yawan zetgaman taakga wamu ayakut.
JOH 18:28 Siwan tembana siknga wa aminu Jesu take Kaiafas teke i take gavmanu tupan tapae yotnane takuking. Takuke ina dua gavmanu tupan tapae yot katangu kopbing. Wa aminu anzing natapbing. Tupan tapata ninu Judia amikatnana dua siwan ninda itane yotnaatang kokengu pasapmin zipbuke ninu Pasova tupduk takwan gwende nanamu nananga dua siwik ngang natapbing.
JOH 18:29 Unzing natake kepman yuwawa Pailatda wa aminde kepman epuke anzing yanikut, “Ginda aminu aapae wamu dasing yanangge takapukaing,” ngang yanikut.
JOH 18:30 Yaniwan yake anzing iniking, “Aminu aapa waiaknga dua tasikut gamu ninda i gae dua takapnam,” ngang iniking.
JOH 18:31 Iniwa ita yake anzing yanikut, “Gisatakan yawa kumnanga aknga dasingge nae takapukaing,” ngang yanikut. Yaniwan yake anzing iniking, “Ninda gavmandane mama wam sandeke aminu aapa dua tangutna kupik ngang natake gae takapukamang,” ngang iniking.
JOH 18:32 Iniwa tupa Jesuta wamu ina dasingga akupik kakngae yakut taknga buya unin aatnangge singgak.
JOH 18:33 Siwan wamu waaknga ngang iniwa Pailatda gatuna gavmandane yot gwene koke Jesu yatawamban akopan anzing inikwaikut, “Ga Judia amindane buyambam tapa ba dasing,” ngang inikwaiwan
JOH 18:34 yake anzing inikwaikut, “Asikaya gika natake wamu waaknga yanggak? Ba aminu tapatuta unzingu nae ganiwan natake naninggayak,” ngang inikwaikut.
JOH 18:35 Inikwaiwan yake anzing inikut, “Na aminu Judia nana gamu unzingu dua ganiwam. Gikaat nana amikat gatu Anutue yot takwan gwene pasiya aminde take akwakatda ga nae takapuing. Gata wai dasing kaknga tasikuyak,” ngang inikut.
JOH 18:36 Iniwan ita yake anzing inikut, “Aminbamu keu andakane nana aminda dua yawa kekekawan na buyambam tapa dakngakum. Wena. Unzing gamu Judia nana aminda na gae dua napmaningge aminabapat amnam. Siwan ngana nata tupan tapa dakngawitde keu ayuamang komune nana aminda na dua tangenaking. Wena,” ngang inikut.
JOH 18:37 Iniwan ita yake, “Ga aminu buyambamu tapatu ba dasing,” ngang inikwaiwan yake anzing inikut, “Gika unzing unin yanggayak. Na buyambam tapa. Na siakan wam yakapitde natake keu andakane epuke aakum. Aminu kuupbam wamu siakan wam tawakaingu nae wamu atnataaing,” ngang inikut.
JOH 18:38 Iniwan Pailatda natake aminu kepdakane nana tapatuta siakan wam ngang yananga dua ngang natake Jesue anzing inisapdukut, “Siakan wamu wa dasing binga,” ngang inikut. Ita unzing yake kepmanu gatu Judia aminde epuke anzing yanikut, “Nata wai takngatu itane kawa wena singgak.
JOH 18:39 Ngana na gindane sanga aknga tawake ginda aminu kaaut yotde yuaikat nana tapatue umana naniwa sandetewa kuwik Pasova tapduk takwan gwenen. Unzingge asikaya ginu Judia amindane buyambam tapasa sandetewa kuwikge take ba nataaing,” ngang yanikut.
JOH 18:40 Yaniwan yake, “Aho! Gata Barabas sandetewi kuyok,” ngang yanggamataking. Sike Barabas waapa amin zipmake amindane sangaapa kaiwa kuwa panggak kapanin.
JOH 19:1 Unzing yanggamatawa Pailatda amak amina yaniwan Jesu take ipmapa tanguking.
JOH 19:2 Tanguke nau bobingga gwasike gwapakngane tupan tapatane kupna binga gwapungamuking. Gwapungamuke tauu gamana sandu buyambam tapatane binga tasingamuking.
JOH 19:3 Tasingamuke ie apu kem tanziyuk gaak wam inike, “Judia amindane buyambam tapanin,” ngang iniyuk amna wesiking.
JOH 19:4 Unzing tasiwawa Pailatda gatuna epu kepman kuke anzing yanikut, “Nata natapa ita wai takngatu dua tasikut ngang nataat takngae ginda natdetningge nata kepman takepa kanong,” ngang yaniwana
JOH 19:5 Jesuta kepman epuke bobingga gwasike tasingamukingu wa gwapakngane yuwawan tauu gamana wa sakaya unzing yuwawan epbut. Epana Pailatda yake, “Aminu aapae kanong,” ngang yanikut.
JOH 19:6 Jesuta unzing kepman epan kake yot takwan gwene pasiya aminde takeakwakat gatu akayuya amikatda kake yanggamatake amin saamdakane tanguyo! Amin saamdakane tanguyo ngang yaking. Yawawa Pailatda yake anzing yanikut, “Ginda gisa take amin saamdakane tangutnong. Nata itane gutongana takngatu kawa wena singgakge nata dua tanguwit,” ngang yanikut.
JOH 19:7 Yaniwan ngana yake anzing iniking, “Nindane mama wamu takngatu kaya. Sike mama wamu waakngata anzing yanggak, ‘Aminu waapata yake na Anututane waaknga siknga ngang yakutde asiknga tangutna kupik,’ ngang yanggak,” ngang iniking.
JOH 19:8 Iniwa wamu waaknga natake asiknga gwaukut.
JOH 19:9 Asiknga gwauke gavman yot gwekatang gatuna koke ita Jesu inike, “Ga zane nana apata apuyak,” ngang inikwaikut. Siwan ngana Jesuta wamu yake dua inikut.
JOH 19:10 Dua iniwan kake ita anzing inikut, “Dasingge? Gata nae wamu dua naniya? Na kekekngana kayaapa. Ge ga akgapmaba kuwiyakge bitakengu amin saamdakane akgutnanga. Asikaya gata ie dua natake wamu takngatu yake dua naninggayak,” ngang inikut.
JOH 19:11 Iniwan yake anzing inikut, “Anutu enandang nana apata gae kekeknga dua gamanu ga kekekngaka wena siwan gata nae sanga tapatu tasingamunanga dua. Unzingge aminu na gae kataune tekut tapatane waiaknganata gatane waiakngaka ayapbike buyambam siknga singgak,” ngang inikut.
JOH 19:12 Iniwan wamu waaknga natake ita kepie tawake sandetewan kuwikge asiknga tasikut. Siwan ngana Judia aminda anzing yanggamataking, “Gata aminu waapa asandetewi kuwanu gata Sisatane notna dua, gan! Aminda inae buyambam tapa ngang yakengu ita Sisatane iwana dakngawik,” ngang yaking.
JOH 19:13 Yawa natake ita Jesu kepman gatuna takepbut. Takepuke buka supda temake tasiking komu umana Hibru wam tangan Gabata ngang inikaingu waomune wam usanzikgak gakane siandakane pukwikut.
JOH 19:14 Tapduk wa gwenu Pasova tapduk takwan gwendane sanga tandakngaking. Sike kepmaomu atdapakawan Pailatda Jesu takepuke pukwikut. Judia aminu anzing yanikut, “Gindane buyambam tapasa kanong,” ngang yaniwan ngana
JOH 19:15 yake anzing yanggamataking, “Atanguyo! Atanguyo! Amin saamdakane tanguyo,” ngang yaking. Yawawa yake anzing yanikut, “Gindane buyambam tapasa ngana ginu nata amin saamdakane tanguwitde nataaing?” Ngang yaniwan Anutue yot takwan gwene pasikaing aminde takeakwakga anzing yaking, “Ninu buyambaminu tapatu wena! Sisa awia waapakan,” ngang yawa
JOH 19:16 Pailatda Jesu amin saamdakane tangutningge yawan kekekakut.
JOH 19:17 Unzingge amak aminda Jesu tapa ita inane amin saamdaka gwaamukut. Gwaamutakuke yot gapma teke keu komdu umana gwapak gwikgwit ngang inikaing komune kukut. Sike Hibru wam tanganu Golgota ngang inikaing.
JOH 19:18 Sike keu waomune i amin saamdakane tanguking. Siwan wawi tapaaya kuut iat gatake kaukaut zipbing. Siwan Jesu banakan tanguking.
JOH 19:19 Siwan Pailatda wamu takngatu anzing matakut, “Jesu Nasaret nanaapa. Judia amindane buyambam tapa,” ngang matakut. Matake Hibru wam tangan gatu Rom nanatane wam tangan gatu Grik wam tangan matakut. Wamu wa matakut san take amin saamdakane tanguwan gatapbut. Sike keu wa Jesu tanguking komu you Jerusalem gapma wesim. Unzingge Judia aminu buyambamda wamu waaknga kendeking.
JOH 19:21 Kendeke Anutue yot takwan gwene pasiya amindane takeakwakga kuke Pailat anzing iniking, “Gata wamu wa matake ‘Judia amindane buyambam tapa,’ ngang matayak kaknga dotdonguke wamu takngatu anzing matayo, ‘Aminu aapata na Judia amindane buyambam tapa ngang yakut tapa anin,’ ngang matayo,” ngang iniking.
JOH 19:22 Iniwa yake anzing yanikut, “Wamu nata gwa matat taknga unzing yuwik,” ngang yaniwan kekekakut.
JOH 19:23 Siwan amak aminu tapaat tapaatda Jesu take amin saamdakane tangukenga itane tauknga panangge natake usanzike sandu sandu ba gomdu gomdu paking. Sike itane siotna kuut paking. Siwan ngana siotna kukgom mamaya aknga apmapa pukunanga gom kake wesinangge apbitaking.
JOH 19:24 Apbitake anzing yaking, “Ninda anggomu dua wesinim. Aho. Ninda kat binga tasike nikat nana tapatutakan tapikge tasinim,” ngang yake unzing tasiking siwan Anututane wamu takngatu yakapsa aminu tapatuta tupa siknga ie anzing matakut, “Wa aminda natane tauknga usanzike pake kat binga tasike aminu tapatuta natane siotna takut,” ngang matakut taknga unin tasiwa buya aakut.
JOH 19:25 Siwan Jesu tangukingu amin saamdaka wesimu Jesutane mingata une yukut. Iat maya tapaat tapatuatda unekan gatake yuking. Wa yukingu Mariatane uyapna gatu paanatane tange tapatu umana Maria ngang iniking. Ita wawi tapatu umana Klopas ngang inikinggane maatna. Siwan maya tapatu Magdala yot gapmane nanaapa umana Maria ngang iniking kapaaya kuut unekan gatake yuking. Maya waakwau Jesutane amin saamdakane wesim yuking.
JOH 19:26 Yuwawa Jesuta kawawan mingaat pandetna tapatu ie take siknga nataak kapaatda wesim yukumayak. Wesim yuwawat kake Jesuta minga anzing inikut, “Ming! Wawi waapa gata waakgae tapso,” ngang inike
JOH 19:27 ita pandetna waapa inike, “Natane minga gata minggae tapso,” ngang inikut. Siwan wa inikut tapa na unin. Siwan tapduu wagwene nata Maria take yotnane takuke kayukum.
JOH 19:28 Siwana Jesuta anzingu atnatapbut. Itane puyana kuupbam gwa tasiwan puyukgak ngangun. Siwan Anututane wamu matakingu buyana asaawikge ita anzing yakut, “Na yanggae nataat,” ngang yawan
JOH 19:29 dopangu gwendu wain yangga kapanga gwa sikut taknga atdopan teking. Siwan wa aminda yanggabam gwene nana misa musatu take yangga waakngane tewa dopbut. Siwan pitamu tapatune ukgaoke Jesutane genane tewa kopbut.
JOH 19:30 Tewa kopan Jesuta yangga waaknga bupbuyake tangokenga, “Gwan tasiwa puyukgak,” ngang yakut. Ita unzing yake akgwetawan weenata asakowan akumbut.
JOH 19:31 Sike tapduu wagwenu Pasova yuwatakak tapduk takwan gwende sangaapa tandakngaking. Siwan yuwatakau wagwenu buyambam siknga gwen ngang natake Judia amindane takeakwakga akupsatane gupna yuwatakak tapduu wagwene amin saamdakane yutningge apbitaking. Apbitake Pailat inike kepi zipmapuke gupna sandetningge iniking.
JOH 19:32 Iniwa ita yanipewan amak aminda kuke aminu Jesuat zipbing kapaatdane kepi zipbuking.
JOH 19:33 Zipbukenga Jesue kuke ngana gwa kumbutna kake Jesutane kepi dua zipmapuking.
JOH 19:34 Siwan ngana amak aminu tapatuta ngikngiknga saak gwawayata makut. Mapan zetgaman dakaat yanggaatda epbing.
JOH 19:35 Siwan na wamu aaknga matanggat tapata unin kainata kakum taknga matawa siakan singgak. Siwan siakan wamu waaknga kendeke ginda Jesue natake Anututa tapan akgatanimuyaapa dakngake yuak ngang natapa kekeknga siwikge matanggat.
JOH 19:36 Siwan Anututane wamu takngatu tupa siknga ayanikapsa apata anzing matakut, “Aminda itane kwatai tapatu dua zipmaputning,” ngang matakut taknga buyana unin aakut.
JOH 19:37 Siwan wamu takngatuat anzing, “Aminda aminu wa making kapa katasining,” ngang matakut takngaau buyana unin aakut.
JOH 19:38 Siwana aminu tapatu umana Josep ngang iniking. Ita Arimatia yot gapmane nanaapa. Siwan ita Pailatde kuke Jesutane gupnasan tapikge natake inikut. Josep waapa Jesutane wamna atnatapbikat nana tapatu ngana ita Judia amindane takeakwakge akgwauke Jesue banip singgak kaknga atakusopukut. Sike Pailatda katewan ita kuku Jesutane gupnasan sandeke takepbut.
JOH 19:39 Iat Nikodimas aminu tupa zikaane ita Jesue apbut tapaatda sandeke takepbumayak. Siwan Nikodimas waapata katau dakaaya umana mel gatu alo ngang yanikainggane inuknga kupiawan pekingu pake aiwa pimapa undanggan kwaidotdonguke Jesue gupnane pasiwat kapanga take siwikge pakapbut. Itane meyana 75 ngang buyambam.
JOH 19:40 Siwan aminu waapaatda Jesutane gupna sandeke takepuke sanga wa kapanga take siknga akngata gupnane dotdonguke taukga tapat kopbut. Unzing Judia nana aminda amin kwainangge tasikaing binga.
JOH 19:41 Sike keu Jesu amin saamdakane tanguking komune zonga zonga tapuya take siknga kwaike kayuaing komu wesim yuak. Siwan keu wakomune tupa supgapbau dakatu akupsa aminu undang teningge kwaiking. Siwan ngana supgapbau wandakane aminu tapatu undangu dua teking.
JOH 19:42 Siwan tapduu wagwenu Judia nana aminu Pasova tapduk takwan gwende tandakngaking. Unzingge aminu waapaatda gupnasanu supgapbau wesimu wandakaatang tekumayak.
JOH 20:1 Siwan tapduu wagwenu kawa sandewana Sande tembana siknga enake Maria Magdala yot gapmane nana apata zikaa akngaaknga matmat kep komune kukut. Undang kuke kawan supgwenu supgapbatde umukusikut gwenu gwa ikoba kukutna kakut.
JOH 20:2 Kake isapmake Saimon Pitaat gatu pandetna waapa Jesuta ie take siknga natapbut tapaatde kukut. Kuke waapaau anzing yanikut, “Aminda buyambam tapaninu supgapbat gwene apu gwa take kuing. Siwan zandangga taku teing,” ngang yanikut.
JOH 20:3 Yaniwan Pitaat gatu pandetna waapaatda yot gapma teke matmat kep komune kukumayak.
JOH 20:4 Waapaatda unekan isapmake kukumayak ngana pandetna waapata isapmake Pita yapbike ita gamok kukut. Siwan ita gamok supgapbat dakane kundoke
JOH 20:5 apbungoke gwetake katasike kawan taukgakan yuwawa kakut. Kake ngana ita dua koke yuwawan
JOH 20:6 Saimon Pitata ie masan apuke isapmake supgapbat dakaatang akopbut. Akoke kawawan taukgakan yuwawa kakut.
JOH 20:7 Kake tauu sanduaya akakut. Sike wa sanu Jesutane gwapaknga wamakusiking. Sike tauu wa sanu tauu kunduat dua yuwawan kakut. Wena. Aminda tapa goopan kautdu saak inata komune tekut.
JOH 20:8 Unzing kake yuwawan pandetna waapa supgapbat dakane ita gamok kukut tapaaya kuut akopbut. Akoke ita unin kake Jesuta akumbut katangga gatuna gweak ngang natapan siakan sikut.
JOH 20:9 Sike Anutue wapatang wamu takngatu Jesu akumbut katangga gatuna enawikge yakut takngae tupa katak gua natdekumang.
JOH 20:10 Siwan pandetna wa tapaau yotna gatuna kukumayak.
JOH 20:11 Siwan Maria supgapbat daka wesim yuke kwanamna siyuk yukut. Kwanamu asiyuk apbungoke gwetake katasiwawan
JOH 20:12 angela tapaaya tauknga kwaknga siknga. Waapaatda tupa Jesutane gupnata yukut komune yuwawat kakut. Kawawan tapatuta gwapakngata yukut saak yuwan tapatu kepita yukut saak yuwawat kakut.
JOH 20:13 Kawawan angela waapaatda Maria anzing inikumayak, “Mayapa. Ga dasingge kwanamu sikgayak,” ngang iniwat yake anzing yanikut, “Aminda natane buyambam tapana taku zaneka teing,” ngang natake, “Na ateing komde apbotanggat,” ngang yanikut.
JOH 20:14 Ita unzing yake tapan tekwamban Jesu undang yuwan kake ngana a Jesu ngang dua natapbut.
JOH 20:15 Siwan Jesuta anzing inikut, “Mayaapa. Ga dasingge kwanamu sikgayak? Ga maminde tawanggayak,” ngang inikwaiwan natake aminu waapa puyae kayuak kapanin ngang natake anzing inikut, “Gata Buyambam tapana takuyaknga kakengu gata keu ateyak komde na atnaniwi nata akgwaamutakuwit,” ngang inikut.
JOH 20:16 Iniwan Jesuta yake, “Maria,” ngang iniwan Mariata tapan tekwamban Hibru wam tangan anzing inikut, “Rabonai. Siwan umana waaknga tana tekwamban aana,” ngang inikut.
JOH 20:17 Inike tanggaganuke yuwawan ngana yake anzing inikut, “Gata napmamso. Na enandangu Nanae dua kot. Siwan ngana gata natane notnae kuke anzing yaniyo, ‘Na enandangu naat gikatde Nanin Anutuninde konggat,’ ngang gata kuke yaniyo,” ngang inikut.
JOH 20:18 Iniwan natake ita apuke ninu pandetna ninike, “Nata Buyambam tapaninu gwa kat,” ngang ninike ita wamu Jesuta inikut taknga ngang ninikut.
JOH 20:19 Sike pandetnata Judia aminde takeakwakge akgwauke you ayukumang gwendane gwabou ayapukusikumang. Sike gunzitda Sande wagwene apukuwana Jesuta pakapu nin banakan yuke anzing ninikut, “Ginu musipzaatang nangaakan ma natayuwam,” ngang ninikut.
JOH 20:20 Ita unzing ninike katakngi gatu ngikngiknga ngang ninde yeutniman kake aanin ngang natake apbakngakumang.
JOH 20:21 Siwan Jesuta gatu anzing ninikut, “Ginu musipzaatang nangaakan ma natayuwam. Nanata na nanitewan apbum. Ina unzakan nata ginu danipewa kunong.”
JOH 20:22 Unzing ninike puyanipbike anzing ninikut, “Ginda katewa Anututane Waung Kapata musipzaatang pukuke dapmambik.
JOH 20:23 Dapmamban ginda mamin amindane waiakngana asinggan natangamanu wai waakngana gatukande yuyamik,” ngang ninikut.
JOH 20:24 Siwan tapduknga Jesuta pandetnae apbut gwene pandetna 12-pat nana tapatu umana Tomas siwan itane umana takngatu bokngan aakumayakat nana tapatu ngang iniking. Ita nikat dua gatake yukumang.
JOH 20:25 Unzingge ninda masande kake, “Ninda aaninu gwa kamang,” ngang inikumang. Inina ngana yake anzing ninikut, “Nata tapmanggane tuwangu katakngine dua kake gatu nata kataknga gwaikngane undang dua wasike gatu kataknga ngikngikngane gwawayata making komune dua tamukengu nata baniu dua siwit! Wena siknga,” ngang yakut.
JOH 20:26 Siwan masande tapduu katau kautdu musa kautdu gweaat gwenduat ngang kana puyuwana Tomaskat nikat unekan gatake yoakatang yukumang. Yuke gwabou kuupbam gitna yapukusike yuwatna Jesuta pakapu nin banakan yuke anzing ninikut, “Ginu musipzaatang nangaakan ma natayuwam,” ngang ninike
JOH 20:27 ita Tomas anzing inikut, “Natane kataknga kake nilda nuking komu gatane katakga gwaikngane wasiyo. Wasikenga katakga katapmike ngikngikngane gwawayata making komune tamuke gata banipba meya nataayak kaknga teke nae banip siyo,”
JOH 20:28 ngang iniwan yake, “Aana,” ngang yake gatu, “Anutuna,” ngang inikut.
JOH 20:29 Iniwan yake anzing inikut, “Ga na nandukenga baniu singgayak. Ngana aminu na dua nanduke banip siningu aminu waakwau kumzang apbaknganing,” ngang inikut.
JOH 20:30 Siwan Jesuta duya inata kundu pasiwawan kakumangu nata wa kuupbam dua buu anggopatangu matanggat.
JOH 20:31 Ngana nata a gwan matanggau wa ginda kendeke Jesue natake Anututane waaknga siknga ngang initewan apu gatanimuyaapa dakngake pasikut tapa unin ngang ginda natapa siakan siwikge natake matanggat. Ginda unzingu Jesue banip sike kayuk yutnanga aknga ataningge natake matanggat.
JOH 21:1 Siwan masande Jesuta yangga gapanu Taibrias gwende apuke gatuna anggaman siwan kakumang kakngae wamu anzing.
JOH 21:2 Saimon Pita gatu Tomas sike itane umana takngatu bokngan aakumayakat nana tapatu siwan Nataniel you gapmandu Kena Galili kep komune yuak gapmane nana siwan naat paanaat nitdane naniu tapatukan umana Sebedi ngang inikamang. Sike nikat gatu Jesutane pandetna tapaaya ngangga unekan gatake yukumang.
JOH 21:3 Yusika Saimon Pitata yake, “Na kuke pis kaiwit,” ngang yawan, “Nikaa gaat kuut kunim,” ngang yakumang. Unzing yake ninu kuke dopangbam gwene koke ngana zikaa wagwene pis dakatusimpaa dua kaikumang.
JOH 21:4 Dua kaike yuwatna gunzitda akopnangge siwawan Jesuta pakapu yangga gapan gwene kwaim tapane yukut. Yuwawan kake ngana ninu wa Jesu ngang dua natapbumang.
JOH 21:5 Siwan Jesuta yake, “Waaknga! Asikaya ginu pis kundu apaing,” ngang ninikwaiwan yake, “Wena,” ngang inikumang.
JOH 21:6 Inina ita anzing ninikut, “Ginda yapapza katakza siyaapa saak mutnong. Muke ginda pis kundu apme paning,” ngang niniwan yapapmin mutna pukukut. Mutna pukuwan pis dakandaka kwaapzang siknga pake yapapminu kaitakakopnanga dua sikut.
JOH 21:7 Sike nata kake, “Waapa Aanin,” ngang Pita iniwa natake ita Jesue zetgaman kunangge natake tauknga ateke puya tasikutsan wamake yanggaatang paapukukut.
JOH 21:8 Paapukuke kuwawan yangga gapande kwaim tapa maa siknga dua siwan ninu dopangbam gwene yukumangu piskat yapapat unzing buyak kaipakapbumang.
JOH 21:9 Kaipakapuke kusika yangga kwaimune kundoke kawatna ita katap sake yuwawan kakumang. Kawatna piskat poyakat katap gwene yuwa kakumang.
JOH 21:10 Kawatna Jesuta anzing ninikut, “Pis apmanu ginda paingu wa kundu pakapnong,” ngang niniwan
JOH 21:11 Saimon Pitata dopangbam gwene koke yapap gwenu yangga gapanu kwaim tapane kaitakapbut. Sike pis buyambamu yapap gwene puku dopbingu wa unzing 153. Wa kwaapzang siknga siwan ngana yapap gwenu dua sipdakut.
JOH 21:12 Siwan Jesuta yake, “Ginu apu nanamu nanong,” ngang ninikut. Niniwan ninda, “Aminu waapa Aanin,” ngang anggaman natapbumang. Unzingge nikat nana tapatuta ga mamin ngang dua ininangge natapbut.
JOH 21:13 Siwan Jesuta apu poyakat piskat pake niman pake nakumang.
JOH 21:14 Siwan Jesu matmat gapmaneta enake sipmaya anggaman siwan gwa kakumang. Siwan apmanu gatunin kana sipmaat sipduat sikut.
JOH 21:15 Siwan ninu nanamu nana puyuwana Jesuta Saimon Pita anzing inikut, “Saimon! Jondane waaknga! Asikaya gata aminu aakwau ayapbike gata nae musip gwaangu buyambam siknga nataayak ba dasing,” ngang inikwaiwan yake anzing inikut, “Ngan. Aana. Na gae take nataat taknga gata atnataayak,” ngang inikut. Iniwan yake anzing inikut, “Toikngata nanamu sipsipnae yamukaing binga gata aminu nae banip sikaing amin toimso,” ngang inikut.
JOH 21:16 Siwan sipduat gatu anzing inikut, “Saimon. Jondane waaknga! Asikaya ga nae musip gwaang nataayak ba wena,” ngang inikwaiwan yake anzing inikut, “Ngan. Aana. Na gae take nataat taknga gata atnataayak,” ngang iniwan yake anzing inikut, “Gata aminu nae banip sikaing amin kayuyo,” ngang inikut.
JOH 21:17 Siwan sipduat iniwan sipmaat sipduat dakngawan anzing inikwaikut, “Saimon. Jondane waaknga! Asikaya ga nae take nataayak,” ngang iniwan Pitata musia meya sipduat asikaya ga nae take nataayak ngang iniwan sipmaat sipduat dakngawan meya natake anzing inikut, “Aana. Gata sangabamde atnataayak. Na gae take nataat taknga gata atnataayak,” ngang iniwan yake anzing inikut, “Gata natane aminabam toimso,” ngang inikenga anzing inikut,
JOH 21:18 “Siakande siknga nata ga ganinggat. Tupa ga wawi matek yuke gata simbuka gika wamake gata keu gika kunangge natapbuyak komune kukuyak. Ngana masande ga aminuake sike gata katakga tangenawi aminu tapatuta simbuka wamake ita take keu gata dua kunangge natapiyak komune takuwik,” ngang inikut.
JOH 21:19 Jesuta unzing inikut takngae yapii anzing. Masande Pita akupikge aminu Jesue semna nataaing aminda tanggaganuke tanguwa kupik kakngae yakut. Pitata unzingu wa Jesue umana akngae tanguwa kumbut takngae natake Anutue umana yatangenatning. Unzingge Jesuta ie natake tuwanguke wamu waaknga ngang yakut. Ita unzing yake, “Gata na nawamso,” ngang Pita inikut.
JOH 21:20 Wamu waaknga Jesuta iniwawan Pitata tapan tekwamban nata masa masa kuke yuwawa nandupbut. Na pandetna Jesuta take siknga natangamunggak kapa na nandupbut. Sike tupa nanam nake nata Jesu wesim yuke inike, “Aana. Maminda ga iwande yeuyamik,” ngang inikwaikum.
JOH 21:21 Siwan Pitata nanduke Jesu anzing inikwaikut, “Aminu aapae sanga dasing kaknga singamik,” ngang iniwan
JOH 21:22 yake anzing inikut, “Nata natapanu ita kayuk yuwawan nata kuke gatu apitde take natapanu asikaya wa gae sanga? Ga na nawamso,” ngang inikut.
JOH 21:23 Unzingge wamu takngatu yatakuwawan Jesutane aminabamda anzing natapbing. Pandetna aapata dua kupik. Siwan ngana wamu Jesuta dua kupikge natake dua inikut. Aho. Ita anzing yakut, “Nata take natapanu ita kayuk yuwawan nata kuke gatu apitde take natapanu asikaya wa gae sanga,” nganggan yakut.
JOH 21:24 Sike pandetna waapa na unin. Sike apmanu nata wamu waaknga ngang yakapmake matanggat. Siwan wamu nata yakapmanggat taknga natapna siakan singgak.
JOH 21:25 Sike sanga kunduaya buyambam Jesuta tasikut. Sike aminda wa kuupbam takngatu takngatu mataning gamu buu wa mataningu kwaapzang siknga siwan unekan pakapu pena keu kuupbam akgitnawan ngang nataat. Unukan.
ACT 1:1 Notna Tiofilas. Tupa Jesuta puyana pasike natdetdeu buyambam yanindamukut. Yanindamuke itane wamna yaniningge yanipewan kuning aminde umana yakut. Yawan waakwau aposel amin ngang yaniking. Siwan Jesuta puyana pasiwan puyuwana Anututa enandang takopbut. Siwan puya wa pasikut takngaat wamna yanindamukut takngaatde natake buu yakap matakum sakatang gwa matakum. Siwan Jesuta toknga bam pake kungwake gatu enake tapduu 40 ngang yukut. Yusika gatu gatu ina yeuyaman aposel aminda kawa siakande siknga sikut. Siwan Waung Takwanda Jesu kekekangamuke yuawan aposel aminda tasiningge take natapbut taknga Jesuta yanikut. Yanike Anututa inane kekeknga aknganata usikwatanipmamban ie gepbiatang yutnimde yaniwan natake Jesuta akumbut katangga enake kayuk yuak ngang aposel aminda natapa siakan siknga sikut.
ACT 1:4 Siwan sipdune Jesuat aposel amikat yuking gwekatang ita anzing yanikut, “Jerusalemu ma teke kuwam. Dua kuke yuwawa sanga tupa danikum taknga Nana Anututa atdamik. Nanata yake atdamit ngang gwa yawan kekekakut.
ACT 1:5 Siwan tupa Jonda yanggata sauyamukakut ngana tapduu mateknga yukenga Anututa yawan Waung Takwanda epu kekekandamik,” ngang Jesuta aposel amin yanikut.
ACT 1:6 Siwan sipdune aposel aminda unekan apuke Jesu anzing inikwaiking, “Tupa siknga ninu Isrel amindane buyambam tapata bamin toiwawan takekan yuking. Siwan tupa sikut takngata gatu siwikge gatuka apme tasiya ba dasing? Gata nindane buyambam tapa dakngake aminu maa nanatane kekeknga akngane gepbiatang yuamang kaknga sandetnimuya ba dasing,” ngang inikwaiking.
ACT 1:7 Inikwaiwa Jesuta yake anzing yanikut, “Nanata sanga takngatu takngatu tasinangge natake tapduknga ina banipda siwan gwa yakut. Gwa yake ngana ginu dua daniwan ginu tapduknga atasiwik gwende dua natapning. Dua natapning ngana nata wamu takngatu daniwa natapnong.
ACT 1:8 Waung Takwanda musipzaatang pukuke papan kekekaning. Papan kekekake ginda kuke sangabamu nata pasikum takngae yaninong. Yanike Jerusalem ba Judia kep komune ba Sameria kep komune ba maa siknga kepna kepna kuke yaniwa sandeyok,” ngang Jesuta yanikut.
ACT 1:9 Yaniwan kawawa kosika minga ganang katang kopan mingata takusopuwan aminu waakwakga kawa maikut.
ACT 1:10 Enandang kanggamatawa maiwan yuwawa aminu tauknga kwaknga tapaaya anggaman siwat kaking.
ACT 1:11 Kawa anzing yanikumayak, “O Galili nana! Dasingge yekapatang kayuaing? Anututa Jesu gin banakan katangga enandang gwatakopan kaaing. Ginda anggaman kawawa takonggak siwan Jesu waapata gatu anggaman ina unzakan epik,” ngang yanikumayak.
ACT 1:12 Yaniwatna aminu waakwakga pakau dakatune yuking. Sike pakau wa dakane katau Oliv dakandaka kwaiking. Siwan pakau wandakaneta enake gatu Jerusalem kuking. Siwan pakau wandaka Jerusalem yot gapma inengan yuak.
ACT 1:13 Siwan aminu waakwakga Jerusalem kundoke you gwendu engatangan tasiking gwene asinggan kokaking gwene kopbing. Sike you wagwene aminu buyambamu wa kopbinggane umana Pita Jon Jems Endru Filip Tomas Batolomyu Matyu Jems Alfiasdane waaknga gatu Saimon yawa enak singgak amin tapa gatu Judas Jemsdane waaknga ngangga unekan yuking.
ACT 1:14 Waakwakat maya kunduat Jesue minga Mariaat Jesue uyapnaatda musia buya takngatukan natake unekan gatake yuke asinggan tumuk wam Anutu iniking.
ACT 1:15 Siwan aminu wa unekan gatake yuking aminu mateknga dua sikut. Aminu 120 ngangga yuking.
ACT 1:16 Yuwawa sipdune Pitata banakan katang enake anzing yanikut, “Mate notna! Aminu tapatu umana Judas ngang inikumang kapatane umana Jesuta yawan waapaat nikat Jesuat gatake yuke puya pasikumang. Pasisika ngana waapata kepi yeuyaman apu Jesu kaautde takuking. Siwan tupa siknga Waung Takwanda Devitde musia tangenawan ita Anutue wamu takngatu buk gopatang matakut. Siwan wamu wa matakut takngata buyana gwa aakut.
ACT 1:18 “Aminu waapata sanga wai tasiyuk mani kundu pakut. Siwan mani wa pakuu kunduta pake keu komdu usiking. Siwan Judas waapata keu waomune kuke pimamban musiata tapan koknga akngata ako pimapan akumbut.
ACT 1:19 Kupan Jerusalem nana aminda natake keu wakomdane umana Akeldama siwan tapa tekwamban keu daknga kaya kom ngang inikaing.
ACT 1:20 “Siwan Anutue kap taikamangge buk gopatangu wamu takngatu Devitda tupa siknga ie natake anzing matakut, ‘Waapata yuak komu yot pupuk dakngake yuwik. Tapatuta undang yutnanga dua siyok.’ Siwan gatu sipdune anzing matakut, ‘Waapata puya pasikut takngae aminu tapatuta ie tangge yuke pasiyok,’ ngang matakut.”
ACT 1:21 “Siwan tapduknga Jonda yakap siknga yanggata sauyaman Jesuat nikat yukumang gwekatang aminu kunduat nikat gatake yukumang. Yuwatna apmea Jesuta enandang kopbut. Siwan Devitda unzing matakutde natake ninda aminu wa nikat gatake yukumakat nana tapatutane umana yanim. Yana waapaat nikatda unekan gatake yuke Jesuta kumbut katangga enake gatu kayuk yuak ngang aminbam yanike yuwatnim.” Pitata enake wamu waaknga ngang yanikut.
ACT 1:23 Yaniwan aminu tapaatane umana yaking. Aminu tapatu umana takngaat takngatuat iniking. Umana takngatu Josep takngatu Basabas takngatu Jastas ngang iniking. Siwan tapatu umana Mataias ngang iniking.
ACT 1:24 Siwan aminu waapaau pakenga tumuk wamu Anutue anzing iniking, “O Kuyanin. Judasda aposel amin dakngakut taknga teke wai aknganae toknga papik komune gwa kukut. Siwan aminu kuupbamda baniaatang nataaing kaknga gata anggaman akaayak. Kake aminu aapakat nana tapatutane umana yeutnimi kanim. Yeutnimi kana ita aminu waapatane tangge yuwik,” ngang iniking.
ACT 1:26 Inikenga sanga kat binga tasike tuwanga une kake Anututa Mataias tanangge yeutnimunggak ngang kaking. Kake aminu waapata aposel amin daknganggak ngang yaking. Yawa iat aposel aminu 11-kat unekan gatake yuking.
ACT 2:1 Siwan sande katau kuutmusa kautdu gweaya kawa puyuwana sande buyambamu gwendu umana Pentikos ngang iniking. Sande wagwene Jesuat nana aminu kuupbamda you gwendune koke unekan gatake yuking.
ACT 2:2 Yuwawa gakngatda yekapatang siwan natapbing. Natawawa gou buyambamdane gakngat binga siwan natapbing. Natapa gakngau waakngata you wa yuking gwekatang epu buyambam sikut.
ACT 2:3 Siwan aminu waakwakga kawawa sanga katap mumuyang bingata anggaman siwan kaking. Anggaman siwan kawawa wesike kaukaut kuwa kaking. Kawawa katap mumuyangga binga sanga ita apu wesike aminu waakwakge gupnane takngatu takngatu yuke yasikopbing. Yasikopa Waung Takwanda aminu kuupbamdane musiaatang pukuke papan kekekaking.
ACT 2:4 Papan kekekake aminu waakwakga wamu inata inata tupa dua natapbing kaknga ngang yaking.
ACT 2:5 Siwan tupa siknga Judia nana aminu buyambamda kepna kepna kuke pakapuyut amin dakngake yuking. Dakngake yukingkat nana aminu Anutue wam gwaamuke yukingu wa aminda tapduk wagwene kepna kepna wa kuke yukinguneta Jerusalem apbing.
ACT 2:6 Apuke yuwawa gakngau waakngata siwan natake aminbamda unekan apbing. Apuke natapa Jesue aminda wamnane wamnane yatake kuwa natapbing.
ACT 2:7 Natake asatnake nangaakan natake anzing yaking, “Wamu wa yakaing aminu kuupbamda Galili nana amin ngana dasingge wamine wamine yawa nataamang?
ACT 2:9 Ninu kepna kepna nana aminda anekan apuke yuamang. Siwan nikat nana kundu Patia kep komune nana. Kundu Midia kep komune nana. Kundu Ilam kep komune nana ngangga yuamang. Siwan kundu Mesopotemia kep komune nana. Kundu Judia kep komune nana. Kundu Kapadosia kep komune nana ngangga yuamang. Siwan kundu Pontas kep komune nana. Kundu Esia kep komune nana.
ACT 2:10 “Kundu Frisia kep komune nana. Kundu Pamfilia kep komune nana. Kundu Isip kep komune nana ngangga yuamang. Siwan kundu Libia kep Sairini kep inengan yuak komune nana ngangga yuamang. Siwan kundu Rom yot gapmane nana ngangga yuamang.
ACT 2:11 Siwan kunduta Judia nana dua aake ngana Mosesdane mama wam natake gwaamuke notnin dakngake yuaing. Siwan kundu Krit kep komune nana. Kundu Arebia kep komune nana ngangga yuamang. Siwan ngana aminu waakwakga wamine wamine Anututa puya kekeknga pasikut takngae yawa nataamang.” Wamu waaknga aminbamda unekan apu yuke yaking.
ACT 2:12 Yake asatnake nangaakan natake anzing yaking, “E mate! Sanga wa tasike yakaing kakngae yapii dasing natapnangge,” ngang yaking.
ACT 2:13 Siwan ngana aminu kunduta yanisapduke anzing yaking, “A! Aminu aakwakga yangga toknga takngatu tangoke datdap takaing,” ngang yaking.
ACT 2:14 Siwan ngana aposel aminu katau kuut musaat gatu kepianganu tapatuatda unekan gatake yuke Pitata dandam tangan yuke wa apbing aminu wamu apaa anzing yanikut, “Mate! Judia amin! Jerusalem yuaing aminu kuupbam daniwa natapnong!
ACT 2:15 Ginu ninde natake yangga takngatu tangoke datdap takaing ngang ma niniwam. Yangga toknga aknga tangoke dua datdap takamang. Wena. Dasingge? Ninu apmaau tembana yuamang. Aminu tembana yangga toknga dua tangokaing ngangu atnataamang.
ACT 2:16 Siwan aminu Anutue wam yanikapbuu tapatu umana Joel ngang iniking. Waapata sanga apmanu akaamang kakngae natake tupa siknga Anutue wamu anzing matakut,
ACT 2:17 ‘Anututa anzing yawan kakum. Tapduknga wengane anzing tasiwit. Nata Waunga ginu kuupbamde damit. Dama waakzaat yapasaatda sanga apmea sining kaknga anggaman natake yanikapning. Siwan wawi kekeknga aminda mia takngatu takngatu akaning. Siwan aminuake gwa siya aminu kuutda mia akaning.
ACT 2:18 Siakan! Tapduu apmea siwik gwekatang natane puya amina maya wawi kuutde natane Waunga ayamit. Yama apmea sining kaknga anggaman natake yanikapning.
ACT 2:19 Siwan nata duya takngatu takngatu banakan pasiwa katap mumuyangga isiwawan kupanda enane kowawan kuutda akaning. Kawawa kepdakane duya kekeknga takngatu takngatu pasiwit. Pasiwawa dakga epuwawan kuutda kake Anututa kekeknga siknga yuak ngang natapning.
ACT 2:20 Natapa gunzitda zikaa siwan yekapda gamana dak binga siwan kaning. Siwan tapduknga na gindane kuyasata dua apit gwene sanga waaknga akaning.
ACT 2:21 Kake kumnam ngang natake akgwauke nae nanindatapningu waiakngana sandeyama takekan yutning. Wamu waaknga Anututa yawan natapbum,’ ngang Joelda unzing matakut.
ACT 2:22 “Siwan mate! Isrel nana amin! Daniwa natapnong! Anututa Jesu Nasaret nanaapa kekekangaman duya takngatu takngatu pasike puya kekeknga pasikut. Unzing pasike gin banakan katang pasiwawan ginda kaisata kake Anututa initewan apu pasinggak ngangu ginda anggamanu gwakaking.
ACT 2:23 Siwan Anututa wamu tupa yakut taknga tawake apmaau aminu kunduta Jesu take kaitakapu ginde damuking. Dama Jesu ginda take tangutningge yawa kekekawan wai aminda Jesu tapmangga amin saamdakane tanguwa kumbut.
ACT 2:24 Kumbut ngana gatu gweawikge kepi umutnanga dua siwan Anututa akumbut katangga gatu tangenakut.
ACT 2:25 Siwan tupa siknga Devitda Anutue wamu takngatu natake anzing matakut, ‘Nata kawawa Kuyanata asinggan asinggan naat gatake yuamak. Yuwatda meya takngatu nae apanu asandekngamik.
ACT 2:26 Unzing na toikgakge banipmaatang tatanga nataat. Natake kumzang inimbaknganggat. Sike na akumnanga amin dakngake yuat ngana kungwake gatu asenawit ngang natapa siakan singgak.
ACT 2:27 Nata akupanu gata na dua napmake kuwawi wena gatukande dua siwit. Na gatane waakgata yuwa gata nae apbakngake gatangami natane gupmata dua bukatawik ngang natapa siakan singgak.
ACT 2:28 Gata yeukngami nata kayuk yuwitde kepi aknga gwa kakum. Kawa gaat naat unekan gatake yuwatda banipma tatanga siknga siwik,’ ngang natake Devitda matakut.
ACT 2:29 “Siwan mate notnabam. Deviu wamu waaknga matakut takngae anggaman daniwa natapnong. Bamindane take apanata yusikanga kupan kwaiking. Siwan akwaiking komu andang yuwawan asinggan kaamang.
ACT 2:30 Siwan Deviu Anutue wam natake yanikapbuu waapata yusika Anututa wamu takngatu iniwan kekekakut takngae natapbut. Natapan anzing inikut, ‘Apmea nata yawa gatane zakngi tapatuta enake Isrel amindane takeapa dakngake yuwik,’ ngang iniwan kekekakut.
ACT 2:31 Iniwan kekekawan Anututa apmea sanga waaknga tasiwik ngang Devitda natapan kekekakut. Natapan kekekawan apmea apik kapata apu kungwake gatu gweawik kakngae natake Devitda wamu takngatu anzing matakut, ‘Akumbut ngana ie gatukande dua bitake kuwawan yuke gupnata dua bukatakut,’ ngang matakut.
ACT 2:32 Siwan Jesu waapata kupana Anututa gatu tangenawan ninda kaininda kana siakan sikut. Siwan ninu waakngae yanike yuamang.
ACT 2:33 Siwan tangenake Jesue umana buyambam siwikge Anututa yawan umana kayaapa dakngake Anututane kataknga siya apane yuak. Yuwawan Anututa apmea anzing tasiwit ngang tupa yawan kekekakut taknga gwa tasikut. Tasike Waung Takwana Jesue tengamukut. Siwan apmanu nata wamnane wamnane daniwa ginu kake nataaing kakngatane yepii unin. Jesuta Waung Takwana niman banipmikatang pukuke papan tasina ninduaing.
ACT 2:34 Siwan Devitda, ‘Kungwake gatuna dua gweakut,’ ngang natake wamu waaknga inae natake dua matakut ngang anggaman singgak. Siwan sipdune Devitda wamu takngatu anzing matakut, ‘Buyambam tapata natane kuyana anzing inikut. Apu kataknga siya apanane pukwiwi umanda buyambam siwik.
ACT 2:35 Siwan aminu ga gapbitnangge amakaing aminu gae gepbiatang yutningge tasinggamit ngang inikut,’ ngang Devitda unzing matakut.
ACT 2:36 “Siwana Isrel nana aminu kuutde daniwa natapnong. Gisa genda yawa kunduta Jesu waapa amin saamdakane tapmangga tanguwa kumbut. Tanguwa kumbut ngana Anututa waapa tapan Krais akgatanimuya apanin dakngake apu nindane Buyambam tapanin yuak,” ngang Pitata unzing yanikut.
ACT 2:37 Pitata wamu waaknga ngang yaniwan aminbamu waakwakga natapa baniaatang meya siknga sikut. Siwan Pita waapaat gatu aposel amin notnaatda unzing yuwawa aminbamu waakwakga anzing yanikwaiking, “Mate! Ie dasing tasinim,” ngang yanikwaiking.
ACT 2:38 Yanikwaiwa Pitata yake anzing yanikut, “Ginu inandek inandek waiakngasae masa imana Jesu Kraisdane umanae yangga sautdamuningge tasinong. Siwan Anututa waiakngasa sandetdamikge tasinong. Tasiwa Anututa Waung Kapana tendaman banipzaatang pukuke papan kekekaning.
ACT 2:39 Siwan gatu gindane waakzaat yapasaat gatu aminu maa nanaat ngangge tendamit ngang daniwan kekekakut. Siwan Anututa yayawamban mamin amindaka apanu Waunga teyamik,” ngang Pitata unzing yanikut.
ACT 2:40 Yanike wamu takngatu takngatu yaninggamatakut. Yaninggamatake wamu anzing yakut, “Ginu banip sikengu aminbamda wai amin dakngake yuaing aminde masa yamunong. Waakwakat gatake yusika wa amindane meyana ginda pake kumnang,” ngang yanikut.
ACT 2:41 Yaniwan aminu buyambamda natake wamu waakngae banip siking. Siwan aminu gunziu wagwene banip siking aminda kuwa Jesuat nana amikat gatake yuking. Sike wa gatake yuking aminu buyambam siknga 3,000-da baniu siking.
ACT 2:42 Siwana yangga sauyamuba aposel amindane wam natake asinggan asinggan natdeke gwaamuking. Gwaamuke yusika bania buya takngatukan natake yuking. Yuke nanamu unekan pakapuke aminu tapatutane yotnane pakoke nakaking. Sike sipdune tapatutane yotnane koke nakaking. Ina unzakan tasiyuk nanamu napa puyuwana masande nanam takwan nake Anutue tumuk wamu asinggan asinggan iniking.
ACT 2:43 Siwan Anututa aposel amin kekekayaman duya takngatu takngatu pasiking. Pasiwawa aminu kuupbamda akagwauking.
ACT 2:44 Siwan aminu Jesue natapa kekekakut aminda notna Jesutane aminde sanganinu takekan yamunim ngang baniaatang natapbing.
ACT 2:45 Natake aminu tapatuta sangae dapmake yuwawan kakengu sangana pewa kunduta apu usuwa mani pake aminu sangae dapbing aminde usanzike yama takekan siking.
ACT 2:46 Siwan musia buya takngatukan natake gunzitbamu asinggan asinggan Anutue yot takwan gwene koke inindatapbing. Sike nanamu asinggan asinggan yotna yotna koke unekan gatake naking. Nake nanam takwan nake apbakngake yuking.
ACT 2:47 Yusika Anutu inimbakngawawa aminu you wanggapmane nana aminda kawa take sikut. Kawa take siwan gunzitbamu asinggan asinggan aminu kunduat Jesue natapa kekeknga sikut. Siwan aminu Anututa inae pake waiaknganae dua zipan kumning aminda Jesue amina dakngawa buyambam sikut.
ACT 3:1 Siwan gunzitbamu asinggan asinggan gunziu dandam enawan Judia nana aminda tumuk wam yanangge Anutue yot takwan gwene koke asinggan kosangayuk tasiking. Siwan tapduu gwendune Pitaat Jonkatda undang kopnangge tasiwat,
ACT 3:2 aminu tapatuta gwabok gwakge kwaipatang yukut. Siwan gwabou wagwakgane umana gwabou take siknga gwak ngang iniking. Siwan tapduknga aminu waapata asaakut gwene kepita tapa tekwamban kepi kunangge apmeptakut. Kepi kunangge apmeptawawan asinggan kosangayuk notnata gwaamutakapuke gwabok gwau kwaimune tewa yukut. Yuke kawawan aminu kunduta Anutue you wagwene kopnangge tasiwawa kake mani mateknga nae namukenga kopnong ngang yaninggakakut.
ACT 3:3 Siwan aminu waapata kawawan Pitaat Jonkatda kopnangge tasiwat kake nae namuson ngang yaninggakake
ACT 3:4 tasiwan kake waapaatda kanggamatake Pitata, “Nindupso,” ngang inikut.
ACT 3:5 Iniwan waapata kake, “Asikaya sanga nae apba namusan,” ngang natake baniaatang apbakngakut.
ACT 3:6 Apbakngawan ngana Pitata anzing inikut, “Manina wena ngana gatanggamunanga take. Jesu Krais Nasaret nana apatane kekeknga akngane ganinggat. Ga enake kepi kung,” ngang inikut.
ACT 3:7 Inikenga kataknga siyaapane take tangenawan zetgaman kepinaat ketapunaatda take sikut.
ACT 3:8 Take siwan waapata kekeknga enake dandam tangan yukut. Yuke waapaakat unekan gatake yot takwanu wagwene kopbing. Koke apaayuk Anutu asiknga ngang inimbakngakut.
ACT 3:9 Inimbakngake kusika wamu take siknga wam yawawan aminbamda kaking.
ACT 3:10 Kake O! Aminu aapa tupa sanga nae namunong namunong ngang nininggakakut tapanin. Ita gwabou take siknga gwaune kwaipatang pukwike yuwawan kaamang kapanin ngang yaking. Yake ita take gwa singgak ngang natake asatnake nangaakan natapbing.
ACT 3:11 Natapa aminu waapata Pitaat Jonkat gatake yusika yot takwandane gapaapae umana Solomondane gapaapa ngang yaking. Une yuking. Yuwawa aminbamda asatnake unekan isapmake kuking.
ACT 3:12 Isapmake kuke unekan yuwa kake Pitata anzing yanikut, “Notna. Isrel nana amin! Aminu waapata take siwan kake ginda dasingge nangaakan natake satnakaing? Ginda dasingge nindunggamatakaing? Ginu dasing nataaing? Nisae kekeknga akngata tasita aminu aapa take singgak? Ba niu aminu dudumna siknga amin yuamakge tasita aminu waapata take sike kunggak? Ba ginu dasing nataaing?
ACT 3:13 “Nata ginde daniwa natapnong! Anututa Ebrahapat Aisakat Jekopat ngangge kuyana yukut. Anutu wa baminde kuyana yakut tapata aminu puya amina dakngake yukut tapa umana Jesu ngang inikamang. Itane umana akngana tangenawan umana buyambam siknga sikut. Umana buyambam sikut ngana ginda waapa kaitakopa wamna yawikge teking. Kaitakoke tewa Pailatda Jesu tewan kuwikge musiaatang natayuwawan ngana ginda masa imuking.
ACT 3:14 Ginda masa aminu dudumna siknga yukut tapae imuke aminu buya amin tanguwan kumbut tapa kaaut yot gwene yukut. Wa amin tanguwan kumbut tapata yotna gatu kuwikge ginda Pailat iniking. Pailatda zikngaman epu kepman kuwikge iniking.
ACT 3:15 Inike gisae genda aminu kayuk yutnanga akngae toikngaapa tanguwa kumbut. Ngana Anututa akumbut katangga gatu tangenawan nitda kainitda kake niu sanga waakngae yanikamak.
ACT 3:16 “Siwan nitda Jesue natapda kekeknga singgakge Jesuta aminu aapa tasingaman kepina take siwan kaamang. Ginda aminu waapa gwa kawa yuakut. Siwan nitda Jesue natapda kekekawan aminu waapata take gwa siwan kaaing.
ACT 3:17 “Siakan notnabam! Gikat gatu aminu take akwakzaatda Jesu tanguwa kumbut ngana ginda aminu waapae dua natake apbotake tasiking ngang kakum.
ACT 3:18 Siwan tupa siknga tapduknga gwa nipbikut gwene Anututa yaniwan Anutue wam yanikapbing aminda natake aminu Anututa tapan Krais akgatanimuyaapa dakngake kepdakane epuke toknga papik ngang yaniking. Siwan Anututa tasiwan wamu wa yaking kaknga buya aawan Jesuta apuke toknga unzing papan kakumang.
ACT 3:19 Unzingge ginu musipza tapa tekwamsok. Tapa tekwamban Anutuekan natanggamatawanu Anututa waiakngasa asandetdamik.
ACT 3:20 “Siwan apmau Anututa baniaatang kwikwiknga natanimikge kepi gwa tasinimukut. Tasinimuke kepi waaknga yeutnimuke gataniman ninu yuwatakak tapduk binga yuke banipmikatang tatanga siknga natapnim. Siwan tupa siknga Anututa aminu tapatuta apik ngang yakut taknga buya aawan Krais akgatanimuyaapa dakngake apan umana Jesu ngang inikamang.
ACT 3:21 Ita enandang gatu koke yuwawan Anutue wam yanikapbing aminu tupa siknga ngang yake sanga apmea sining ngang yaking kakngata aawik.
ACT 3:22 “Dasingge? Tupa siknga Mosesda Isrel nana aminu anzing yanikut, ‘Nata Anutue wam danikapitde Anututa natane umana yake nanitewan apbum. Ngang unzambinga apmea aminu tapatu Anutue wam danikapikge Anututa gin banakan yuwikge apa umana yake initewan apik. Apuke wamu takngatu takngatu zakngisae yaniwan natapning.
ACT 3:23 Siwan aminu wa yanikapik kapata wamu takngatu yaniwan natake tapatuta yamandet siwanu Anututa waapa tanguwan kupik,’ ngang unzing Mosesda yanikut.
ACT 3:24 “Siakan! Aminu tapatu Anutue wam yakapsa aminu tapatu tupa apbut tapatane umana Samuel ngang iniking. Waapata yanikapmake tasiwawan aminu tapatuta ie tangge enake waapata yanikapbut. Aminu kuutda ina unzakan yatakuking. Siwan aminu ayanikapbing aminu kuutda apmaau sanga takngatu takngatu siwa kaamang kakngae natake yaking.
ACT 3:25 Siwan wamu wa yaking kakngata apmanu ginde gwa sindamunggak. Siwan tupa siknga tapduknga gwa nipbikut gwene Anututa wamu takngatu Ebraham iniwan kekekawan anzing inikut, ‘Apmea gatane dongune aawiu tapatuta tasiwan aminu kuupbamda take yutning,’ ngang inikut. Siwan wamu wa inikut taknga buya gwa aawan kakumang.
ACT 3:26 Buya aawan Anututa aminu tapatu tapan puya amina dakngawan ginda waiakngasae masa imuningge Anututa aminu waapa initewan kuke ginu Judia nana aminde gamok apbut.” Ngangu wamu waaknga Pitata aminbam yanikut.
ACT 4:1 Wamu waaknga ngang yaniwawan aminu Anutue yot takwan gwene pasiya aminu kundu gatu aminu taukdapak aminu Anutue yot takwan gwende kayuya amindane tupan tapaat gatu Sadyusi aminde mitina natapsa aminu kundu ngangga natapbing.
ACT 4:2 Natawawa Anututa Jesu akumbut katangga tangenakut takngata yeutniman aminu gwa kumbingga apme gatu gweatning ngang natapna siakan siyok ngang aminbam yaniwawan natapbing. Natake bania toknga siknga natake
ACT 4:3 Pitaat Jonkat panggaganuke keu gwa singgak. Kwepna wamu yasan ngang yake pako kaautde pewa pekumayak.
ACT 4:4 Pewat ngana aminu buyambamda Pitatane wam natapa siakan sikut. Siwan aminu natapa siakan sikuu aminu buyambam siknga (5,000) sikut.
ACT 4:5 Siwan Judia nana amindane take akwakat gatu Anutue wam yanindamumsa amikat gatu Anutue puya pasiya aminde takeapa umana Anas ngang iniking. Iat Kaiafaskat Jonkat Aleksandaat gatu Anutue puya pasiya aminde takeapatane notna ngangga Jerusalem yot gapmane yuke tembana unekan kuking.
ACT 4:7 Unekan kuke yayawamba Pitaat Jonkatda apu banakan yukumayak. Banakan yuwawat aminu waakwakga anzing yanikwaiking, “Gitda kekeknga dasing kakngata aminu wa kepi wai sikut tapa gatangamat take sikut? Gitda mamindane umana akngae tasikumayak,” ngang yanikwaiking.
ACT 4:8 Yanikwaiwa Anututane Waung Kapata Pitatane musia tapan kekekake Pitata yake anzing yanikut, “Ginu take aminu kuupbam daniwa natapnong.
ACT 4:9 Ginda aminu kepi wai sikut tapae natake nitda gatangamukumakge ninike gitda dasing tasiwat take sikut ngang ninikwaikaingge daniwa
ACT 4:10 gikat Isrel nana aminu kuupbapatda natapnong. Jesu Krais Nasaret yot gapmane nanaapa gisae genda yawa amin saamdakane tanguwa kupan ngana Anututa gatu tangenakut. Waapata aminu aapa tasingaman kepina take siwan ginde nomzane dandam tangan yuak.
ACT 4:11 Siwan wamu takngatu Anutue wapatang tupa siknga matakut taknga buya aawan ginda Jesu tanguwa kumbut. Sike wamu waaknga anzing, ‘Aminu kunduta you gwendu mitake yotde sanga tapatu take kawa gutonga siwan mutewa kukut. Ngana masande sanga wa mutewa kukut tapata yot gwenu tapan kekekawan wa aminda kawa take siknga sikut.’
ACT 4:12 Siwan ninu waiaknganinde toknga panimde kepi umutnimikge apae umana yanangge natake Anututa tapatue umana dua yakut. Aho. Jesue uman gan yawan Jesutakan kepi waapa umutnimuyaapa dakngake yuak.” Ngang wamu waaknga Pitaat Jonkatda yaniwat natapbing.
ACT 4:13 Waapaatda banakan yuke dua gwauke yaniwawat natake aminu waapaatda moo amin papia you dua tasikumayak ngana wamu waaknga ngang ninikamayak ngang natake pauu wagwene yuking aminda nangaakan natapbing. Nangaakan natasika, “O! Aminu waapaatda Jesuat gatake yuya amin,” ngang anggaman natapbing.
ACT 4:14 Natake aminu kepi take sikut tapata wesim yuwan kaking. Kake Pitaat Jonkatde kaanga yaninangge natake apmeptaking.
ACT 4:15 Apmeptake kepman kukakun ngang yanipewa kepman kuwawat paut tasiking.
ACT 4:16 Paut tasike anzing yaking, “Waapaatde dasing tasinim? Anututa kekekayaman duya takngatu tasiwat aminu Jerusalem yuaingga anggaman gwa kakingge wamu waaknga takusopunanga dua siwik.
ACT 4:17 Siwan ngana ninda wamu waaknga ma yatakuwam ngang yaninim. Yanike giu aminu tapatu Jesu waapae ma iniwat ngang yaninim,” ngang yaking.
ACT 4:18 Yakenga gitda akopbun ngang yayawamba waapaatda kopbumayak.
ACT 4:19 Kopat yanike giu Jesue ma yaniwat ngang kaanga yaniking. Kaanga yaniwana waapaatda yake anzing yanikumayak, “Ginu dasing nataaing? Nitda ginde gen gwaamutda Anututa nindupan take siwik? Ba Anutue gen gwaamutda nindupan take siwik ba dasing nataaing?
ACT 4:20 Jesuta wamu takngatu takngatu yawan natapbumak kakngaat gatu sanga ita tasiwan kakumak kakngaat ngangu aminbam yanisim. Tenanga dua singgak,” ngang yanikumayak.
ACT 4:21 Siwan aminu kepi take sikut tapata nakanu 40 ngang yapbikut. Yapbike aminuake gwa sikut ngana Anututa gatangaman take siwan kake aminbamda Anutue inimbakngaking. Inimbakngawawa aminu pauu wagwen tasiking aminda aminbamde akagwauke waapaau kaautde penangge ba zipnangge apmeptaking. Apmeptake kaanga yanikenga yotza kukakun ngang yanipewa kukumayak.
ACT 4:23 Yanipewa kepman kuke notnae kukumayak. Kuke wamu aminu wa paut tasiking aminda yaniking kaknga ngang yanikumayak.
ACT 4:24 Yaniwat notnata natake musia takngatukan natake tumuk wamu Anutu anzing inindatapbing, “O Kuyanin! Yekapat kepat yanggabapat sanga minaka minaka kuut tasike tekuyak kapa.
ACT 4:25 Gata yawi waunggata Deviu nindane baminda tupa siknga yuke gatane puya aminda yukut tapatane musia tangenawi ita wamu takngatu anzing natake matakut, ‘Kepna kepna nana aminda musiaatang toknga siknga yumdekanu dasingge nataaing? Kepna kepna nana aminda anzing tasinim ngang yake ngana tasinangge apmeptaking.
ACT 4:26 Keune nana amindane take akwakga enake amnangge unekan kuking. Buyambam takwakga unekan kuke Anutuat gatu aminu Anututa tapan Krais akgatanimuya apanin dakngake yuak kapaat kuut zipnangge paut tasiking,’ ngang wamu waaknga Devitda matakut.
ACT 4:27 “Siwan wamu wa matakut takngata you anggapmane siakande sikut. Siwan gata aminu wa dudumnaapa Jesuta puya takngatu tasiwikge natake gata tapi ita akgatanimuya apanin dakngake yuak. Ngana ninu Isrel nana amindane tupan tapaninu Herot gatu Pontias Pailat gatu aminu dongu takngatuine nana amin gatu Isrel nana amin ngangga musia takngatukan natake unekan binga gatake yuaing. Yuke sanga kuupbam gata gika banipda siwan yakuyak kakngakan tasinangge nataaing. Natake Jesu waapa yapbitnangge tasikaing.
ACT 4:29 Siwan apmanu wa aminda kaanga wam niniing kaknga natake gata gatanimi ninda gatane puya aminda yuke aminu waakwakge dua kagwauke
ACT 4:30 gatane wam takngaka aminbam yaninim. Yanina gata aminbam gatayamuke maiu takngatu takngatu sandeyamuyo. Sandeyami ninda aminu wa dudumnaapa Jesutane kekeknga akngane duya takngatu takngatu pasiwatna aminbamda kake Anututa pasinggak ngang anggaman kaning.”
ACT 4:31 Tumuk wamu waaknga Anutu iniwana you unekan gatake wa yuking gwenu saa sikut. Saa siwan Anututane Waung Kapata musiaatang pukuke papan kekekake wa aminda Anutue wamu aminbam yaninangge dua gwauking.
ACT 4:32 Siwan aminu Jesuat nana aminu kuupbamda musia takngatukan natake unekan binga gatake yuking. Yuke sangaapana kayata sangana dua kotnake aminu sangae dapsa aminde yamuking.
ACT 4:33 Sike aposel aminda aminbamde dua kagwauke wamu Buyambam tapaninu Jesuta kungwake gatu gweakut taknga ngang yaniwa buya aakut. Buya aawan Anututa gatayaman aminbamda take siknga natayamuking.
ACT 4:34 Siwan Jesuat nana aminu kundu sangaapana kaya aminda kepna kaya ba yotna gwegwenu kwaapzang. Ge wa aminda aminbam yayawamba apu sangaapana usiwa mani pake aposel aminde yamuking. Yama aposel aminda aminu sangae dapbing aminu Jesuat nana aminde usanzike yamuking. Usanzike yamuwawa Jesue aminabapat nana aminu tapatuta sanga tapatue dua dapbut. Takekan yuking.
ACT 4:36 Siwan aminu tapatu umana Josep ngang iniking ngana aposel aminda umana Banabas ngang iniking. Siwan umana Banabas ngang inikingu waaknga tapan tekwamban musia papan kekekakaing kapa ngang iniking. Waapata Saipras kep komune nanaapa. Ita Jekopdane waaknga Liwaitane dongune aakut tapa.
ACT 4:37 Sike waapata kepna usiningge yawan aminu tapatuta usiwan manina pake aposel aminde yamukut.
ACT 5:1 Siwan ngana aminu tapatu umana Ananaias. Siwan gatu itane maatna umana Sapaira ngang yaniking. Waapaatda kepna usiningge yawat tapatuta apuke usikut.
ACT 5:2 Usiwan mani pake kautdu nisae pake kautdukan aposel aminde yamusim ngang wepdakan kusopuke yakumayak. Yake Ananaiasda kautdukan pakapu aposel aminde yamukut.
ACT 5:3 Yaman ngana Pitata anzing inikut, “Kepde mani gatukande gama ngang naninggayak ngana kautdukan namunggaya. Setenda gatane musipba tapan gata Anututane Waung Kapae nomune kem tasinggayak.
ACT 5:4 Aminu tapatuta kepba dua usiwan gikane siknga dakngakut. Siwan waapata kepba usike mani gae gaman mani gikane dakngakut. Dakngawan kautdu kotnake kautdukan nimunangge natake gata kautdukan damunggat ngang niniyak gamu take siwan. Ngana gata dasingge kemu musipbaatang unzingu natapbuyak. Gata kemu nindekan nininangge natapbuyak ngana kem wamu waaknga Anutue nomune yuke iniyak,” ngang iniwan,
ACT 5:5 Ananaiasda kungwake kepatang pimakut.
ACT 5:6 Siwan sanga wa sikut takngae natake kuutda kumzang gwauking. Siwan aminu kekeknga yuking aminda enake gupna taukga wamake gwaamutakuke kwaiking.
ACT 5:7 Kwaiwawa waapatane maatnata yuke apmata kem wamu inane akngae kungwak ngang dua natake yusika apbut.
ACT 5:8 Apan Pitata anzing inikwaikut, “Kepde mani gitda unzing pakumayak ba dasing,” ngang inikwaiwan, “Ngan unzing pakumak,” ngang inikut.
ACT 5:9 Iniwan yake anzing inikut, “Gitda natake nitda kem tasita Waung Takwanda dua ba nindupik ngang natake tasita siwik ngang giu dasingge natapbumayak? Aminu gatane apba kwaiing aminda gwabok gwaune gwa apukaingge kepi gakngau natapso. Waakwakga ga gwaamutakuke kwaining,” ngang inikut.
ACT 5:10 Iniwan akungwake pimakut. Akungwake pimapana apu gwaamutakuke apnaat unekan kwaiking.
ACT 5:11 Kwaiwa Jesuat nana amikat gatu aminu wamu waaknga natapbing aminu kuupbamda kumzang gwauking.
ACT 5:12 Siwan aposel aminda duya takngatu takngatu pasiwawa aminu kuupbamda kake Anututa puya waaknga pasinggak ngang natapbing. Siwan Jesuat nana aminda musia takngatukan natake paut tasinangge asinggan asinggan Anutue yot takwan gwene koke Solomonde gapane yuking.
ACT 5:13 Yuwawa aminu kunduat iat yutnangge akgwauking. Gwauke ngana Jesuat nana aminu kawa take siknga sikut.
ACT 5:14 Siwan aminu maya wawi kuutda Jesue natake waapata Buyambam tapanin ngang natapa kekekawan buyambam siking.
ACT 5:15 Siwan Pitata you wanggapmaatang sukuwawan kake mait siking amin gwaamupakapbing. Gwaamupakapuke Pitata apu maitna sandeyamik ba itane uyungata apu maitna sandeyamik ngang natake kepi banakan peking.
ACT 5:16 Siwan you kundu Jerusalem yot gapmane wesim yuaing gapma gapmane nana aminda notna mait amikat gatu aminu waungu waiakwakga papa dandaptaking amikat ngang gwaamupakapbing. Gwaamupakapa kake aposel aminda aminu kuupbamde maitna sandeyamuke waungu waiakwau kuupbam yanikwasiwa kuking.
ACT 5:17 Siwan Anutue puya pasiya aminde takeapaat iat gatake yuking aminu Sadyusi amindane mitina natapsa aminu kunduat ngangga kake aposel aminda nipbitnang ngang natake musiaatang wa aminde zikaa siknga natapbing.
ACT 5:18 Zikaa natake wa aminu kaautde pewa peking.
ACT 5:19 Pewa ngana zikaane Jesutane angelata apu gwabok ziyamuke koke yanipewan epu kepman kuking. Ziyamuke angelata anzing yanikut,
ACT 5:20 “Ginda Anutue yot takwan gwene koke aminbamu sanga kayuk yutnanga akngae wam yaninong,” ngang yanikut.
ACT 5:21 Yaniwan natake kepman epuke yuwawa keu akwakawan Anutue yot gwene koke yanindamuking. Siwan Anutue puya pasiya aminde takeapaat gatu aminu iat gatake yukikatda yayawamba Isrel nana amindane takeakwakga unekan apbing.
ACT 5:22 Apuke aminu kunduta kaautde yuking amin pakapningge aminu kundu yanipewan kuking. Kuke yawamba maiwan gatu apu anzing yaniking,
ACT 5:23 “Kuke kana kaautde gwabok gwau gitna gwa tepa kusiknga kamang. Kake gwabok gwaune kayuya aminda takekan kayuwawa kamang. Kake ngana yot gwene koke aposel aminde kana maik,” ngang yaniking.
ACT 5:24 Yaniwa natake aminu Anutue yotde kayuya amindane takeapaat gatu Anutue puya pasiya aminde take akwakatda nangaakan natapbing. Natake gatu masande dasingga siwik ngang natapbing.
ACT 5:25 Siwan aminu tapatuta apu anzing yanikut, “Aminu kaautde pewa yuking aminda Anutue yot takwan gwene yuke aminbam yanindamukaing,” ngang yanikut.
ACT 5:26 Yaniwan natake akayuya aminde takeapaat aminaatda kuku wam yaningge yanipakopbing. Dua zipmake kaipakuking. Aho. Aminbamda supda nisipnang ngang natake sawana dua yanike yanipakopbing.
ACT 5:27 Yanipakapuke sios kaunsilde nomune peking. Pewa yuwawa Anutue puya pasiya amindane takeapata aminu waakwau anzing yanikut,
ACT 5:28 “Ninda kaanga siknga ginde gwa yandakngakumang ngana ginda wam takngasa yatakuwa Jerusalem nana aminu kuupbamda atnataaing. Siwan ginda tasike gisae gende yawa Jesu tanguwa kumbut ngang natanimuningge natake tasikaing,” ngang yanikut.
ACT 5:29 Yaniwan Pitata aposel amin notnaat gatake yuke anzing yanikut, “Ninda aminde genu gwaamutnanga dua. Anutue genga gwaamutnim.
ACT 5:30 Ginda yawa kekekawan Jesu take amin saamdakane tanguwa kumbut ngana Anutu baminde kuyanae yuakut tapata gatu tangenakut.
ACT 5:31 Tangenake ita Jesue umana buyambam siknga siwikge yawan take apanin dakngakut. Dakngake yuke ninu Isrel nana aminda nindane waiaknganinde masa imunimde gatanimunangge yuak. Gataniman ninda musipmin tana tekwamban wai aknganin sandetnimik.
ACT 5:32 Siwan ninde sanga wa tasiniman kaininda kakumang kaknga aminbamde yanikapmakamang. Anututane Waung Kapata gataniman yanikapmakamang. Waungu waapa Anututa aminu inane gen gwaamukaing aminde yamunggak kapanin.”
ACT 5:33 Siwan Pitata wamu waaknga ngang yaniwan natake sios kaunsil aminda baniaatang toknga siknga natake aposel amin zipa kumningge yaking.
ACT 5:34 Yake ngana aminu tapatu kaunsil amikat nana tapatu umana Gameliel ngang iniking. Ita Ferisi aminde mitina tawake tasikut tapa Mosesdane mama wam yanindamumsa amin dakngake yuwan kuutda waapae natapa take siknga sikut. Siwan waapata enake yuke aposel aminda kepman kuke mateknga kundusim yutningge yakut.
ACT 5:35 Yawan kepman kuke yuwawa waapata sios kaunsil amin notnae anzing yanikut, “Notna Isrel nana! Waakwakge katak natakenga tasinim.
ACT 5:36 “Tupa aminu tapatu umana Tiuda ngang iniking. Ita enake umana buyambam sikwikge tasikut. Tasiwawan aminu buyambam siknga 400-da iat gatake yuaking ngana gavmanda waapa tanguwan kupan aminu iat gatake yuking aminda atdatakuwawa wamu buya dua aakut.
ACT 5:37 Siwan masana Galili kep komune nana tapatu umana Judas ngang iniking. Tapduknga gavmanda yotna yotna nana amindane umana kuupbam tematekut gwene waapata enake yawan kunduta ie tawaking. Ie wam tawamba ngana waapata kupana ie wam tawaking aminda atdatakuwawa wamu buya dua aakut.
ACT 5:38 Siwan apmanu ina unzakan kana siwik. Aminu waakwakge kepi ma umuyamam. Aminde banip natakengu aminu waakwau apimaning.
ACT 5:39 Siwan ngana Anututa puya waaknga tangenawanu ninu yapbitnanga dua siwik. Siwan puya waaknga yapbitnangge tasinanu Anututa na nukaing ngang ba nindupik.” Ngang wamu waaknga Gamelielda yaniwan natapbing.
ACT 5:40 Yaniwan natake waaknga tasina ngang yaking. Yake yayawamba aposel aminda gatu kopbing. Kopa ngana kayata zipmake Jesutane umanae dua yaningge kekeknga yandakngaking.
ACT 5:41 Yandakngake yanipewa kuking. Kusika aposel aminda anzing yaking, “Take takwakga Jesue maaknga ngang niniwa natamang ngana ninu Jesue gen gwaamutna kekekawan Anututa nindupan take singgak,” ngang yake aposel aminu akuyuk baniaatang tatanga siknga natapbing.
ACT 5:42 Sike gunzitbamu asinggan asinggan Anutue yot takwan gwene koke gatu wa aminda inane yotna gwegwene koke aminbam yanike pandeking. Pandeke aminu Anututa tapan akgatanimuya apa dakngake apan kake umana Krais ngang inikamang ngang yaniwa natapbing.
ACT 6:1 Siwan tapduu wagwekatang Jesue pandetna aminu buyambam siking. Buyambam siwan pandetna kundu Judia nana amin ngana Grik kep komune yuke Grik aminde wam natake gatu apbing. Siwan ngana kunduta Grik aminde wamu dua natake inane wamban natapbing. Siwan Grik aminde wam natapbing aminda kawawa aposel aminda aminu sangae dapmakaing aminde sanga usanziyama kaking. Kake, “Ninu Grik aminde wam yakamanggane maya kombakobatde sanga katak dua yamukaing,” ngang yaking. Yawa ie yake Grik aminde wamu dua natapbing amikat ayanganuking.
ACT 6:2 Ayanganuwawa aposel aminda natake Jesue pandetna yayawamba kuutda unekan apbing. Apa aposel aminu katau kuut musaat kepianganu tapaata aminu anzing yaniking, “Ninu Anutue wam yaninimde puya teke sangae dapmakaing aminde usanziyamuna take dua siwik.
ACT 6:3 Siwan gin banakan yuaing aminu katau kuut musa kautdu tapaaya ngangu amin noman natdetdetna kaya Waung Takwanda kekekayamunggak ngang kake umana yanong. Yawa waakwakga sangae dapmakaing aminde usanziyamuke pasining.
ACT 6:4 Pasiwawa ninu tumuk wamu Anutu inike aminbamde Anutue wam yanike pasiyuwatnim,” ngang yaniwa natapbing.
ACT 6:5 Yaniwa kuutda natapa take sikut. Take siwan amindane umana anzing yaking: Tapatu Stiven ngang iniking. Ita Jesue natapan kekeknga siknga siwan Waung Takwanda baniaatang pukuke kekekangaman yukut. Siwan tapatu Filip, tapatu Prokoras, tapatu Naikena, tapatu Taimon, tapatu Pamenas, tapatu Nikolas you Antiok gapmane nana ngana Judia nana amindane miti wam takngae baniu ita sikut. Ngangu umana unzing yaking.
ACT 6:6 Yakenga aminu waakwau aposel aminde nomune pewa aposel aminda puya waaknga yama tasiyutningge katakngita gwapakngane wasiyuk Anutue tumuk wam iniking.
ACT 6:7 Siwan Anutue wam yatakuwan sandewan aminu Jerusalem nanata buyambamda Jesue pandetna dakngaking. Dakngake moo amikat Anutue puya pasiya aminu buyambapatda Jesue natapa kekekakut.
ACT 6:8 Siwan Anututa Stivende musip gwaang natake kekekangaman ita duya takngatu takngatu pasiwawan kake aminu kuupbamda natake Anututa puya waaknga pasinggak ngang anggaman natapbing.
ACT 6:9 Siwan tupa aminu Judia nana kundu iwanata apuke panggaganuke Sairini yot gapmaat gatu Aleksandria yot gapmaat ngang aminu une pake kuking. Siwan kundu Silisia kep gatu Esia kep komaaune pake kuking. Pake kuwa yusika waakzak sitake apunggawan sandeke yanipewan kepna gatu kuking. Kuke wa aminda inane miti yot gwene unekan kokaking. Siwan aminu waakwakga Stiven inisapduwa iat yanganuking.
ACT 6:10 Yanganuwawa Waung Takwanda Stivendane musia tapan kekekawan natdetdetna buyambam pake ita yake yaniwan yanganuke yake ininangge apmeptaking.
ACT 6:11 Ininangge apmeptake aminu kundu yake, “Ginu kewamu anzing yanong,” ngang wepdakan kusopuke yaniking. Yaniwa natake, “Stivenda Anutuat Moseskatde yanisapduwan kakumang,” ngang yatakuwa aminu kuupbamda natapbing.
ACT 6:12 Natake aminbampat gatu take takwakngaat gatu Mosesdane mama wam yanindamumsa amikatda enake apu Stiven tanggaganuking. Tanggaganuke sios kaunsil aminde nomune tewa yukut.
ACT 6:13 Tewa yuwawan aminu wa teking aminda aminu kundu pake, “Kemu anzing ginda yanong,” ngang yaniking. Yaniwa natake kewamu anzing yaking, “Aminu waapata yot takwanu anggwekat gatu Mosesdane mama wapatde sapdut wamu asinggan kosangayuk yanggak.
ACT 6:14 Yake Jesu Nasaret nana apata yot takwanu anggwen waitdeke wamu Mosesdane tawake pasikamang kaknga tapan tekwanggak ngang kakumang,” ngang kem yaking.
ACT 6:15 Wamu waaknga yawa natake sios kaunsil aminda Stiven katasiking. Katasiwawa Stivendane nomna waenga siwan kake angela tapatu binga ngang natapbing.
ACT 7:1 Natake yuwawa ngana aminu Anututane puya pasiya amindane takeapata yake, “Siakande yakaing ba dasing,” ngang Stiven inikwaikut.
ACT 7:2 Inikwaiwan yake wamu takngatu anzing yanikut, “Mate notna! Aminu buyambam takwaknga. Nata ginde daniwa natapnong! Tapduknga nindane baminu Ebrahamda Heran kep komune dua kukut gwene Mesopotemia kep komune yuwawan Anutu enane siknga yuak kapata ie kuke anggaman yuwan Ebrahamda kakut.
ACT 7:3 Kawawan Anututa anzing inikut, ‘Gata kepba teke dongga peke kuyo. Kusika keu komdu yeukgamit komune paku yuyom,’ ngang inikut.
ACT 7:4 “Iniwan natake ita Kaldia kep komune yukut ngana teke pakapu Heran kep komune kuke yukut. Undang yuwawan itane nana apata une kumbut. Nanata kupana Anututa, ‘Undang kungga,’ ngang Ebraham inikut. Iniwan natake uneta pakapu keu ayuamang komune apundopbut.
ACT 7:5 Apundopan ngana Anututa keu komdusimu dua imukut. Dua imuke ngana zaknginae yamikge iniwan kekekakut. Iniwan kekekawan ngana tapduu wagwene Ebrahamda engangu wena sikut.
ACT 7:6 Siwan, ‘Ebrahamde zakngita amindane kep kopatang pakapuyutda apmea yutning,’ ngang Anututa unzing yakut. Yake, ‘Une nana aminda aminu Ebrahamdane dongune aawik aminde puya toknga yama gwaamuke ngana buyana dua pake nakanu tape mamaya siknga (400) yutning,’ ngang yakut.
ACT 7:7 Yutning ngang yake ngana, ‘Nata une nana amin usanzike toknga ngang yake yamit,’ ngang yakut. Toknga yamana Ebrahamdane dongata keu wandaka teke keu ninda yuamang komune paku yuke Anutue umana yatangenatningge Anututa yakut.
ACT 7:8 “Siwan, ‘Anututa wamna naniwan kekekanggak,’ ngang Ebrahamda natanggamatawikge, ‘Gatane wawie gupnane tuwang matayo,’ ngang Anututa iniwan inane gupnane matakut. Siwan masande Ebrahamdane waaknga umana Aisak ngang inikut tapata gunziu katau kuut musa kautdu gweaat gwenduat yukenga itane gupnane tuwang matakut. Siwan masande Aisakgane waaknga umana Jekop ngang inikut tapata aakut. Siwan masande Jekopdane maatna nindane baminu katau kuut musaat kepianganu tapaat ngang pangaikut.
ACT 7:9 “Siwan Jekopdane waakngata gwa takake Josepde baniaatang zikaa natake iwanda usiningge imuke buya paking. Buya papana iwanu waakwakga Josep take Isip kep komune kuking.
ACT 7:10 Kuke yuwawa Anututa Josep gatangamuke iwandane katakngane sandekut. Sandeke tasiwan Isip nana amindane takeapa Fero ngang iniking. Josepda natdetdetna kaya ngang kake ie musip gwaang natapbut. Natake ita yawan Josepda Isip nana amindane takeapana dakngakut. Dakngake Ferotane aminabamde kuyana yukut.
ACT 7:11 “Yuwawan masande Isip kep kopat gatu Kenan kep kopatdane puyanaatangu nanamu wena siwan Ebrahamdane zakngi aaking aminda nanamde yawamba maikut.
ACT 7:12 Yawamba maiwan nanamu Isip kep komune kaya ngang yawa natake Jekopda waakngabam yanipewan kuking.
ACT 7:13 Kuwawana Josepda ina yeuyaman paanaat uyapnaatda Josep ngang anggaman kaking. Kawa Ferota Josepdane paana uyapna kakut.
ACT 7:14 Siwan Josepda yayawamban nana Jekopat aminabapatda ie kuking. Wa kuking aminu buyambam siknga (75) sikut.
ACT 7:15 Kuke yusika Jekopda keu wakomune kumbut. Kupana masande nindane baminu kuut kumbing.
ACT 7:16 Kupa notnata gwaamupake Sikem kep komune paku kwaiking. Tupa siknga Ebrahamda Hemotane waakngae mani yamuke keu wandaka usikut.
ACT 7:17 “Siwan tupa siknga Anututa inike, ‘Nata keu wandaka gatane donggae yamit,’ ngang Ebraham iniwan kekekakut takngata masan siknga siakande buya aawikge wesim sikut. Siwan Ebrahamdane dongata Isip kep komune yusika waakzak sitake sitake apunggawan aminu buyambam siking.
ACT 7:18 Buyambam siwana masan siknga aminu tapatuta Isip nana amindane takeapana dakngakut. Aminu waapata natake Josepda tupa siknga yuke tasikut takngae dua natapbut.
ACT 7:19 Dua natake nindane bamin takusopuke yapbitnangge natake engang bokngike yangga apane muban kuwa kumning ngang yaniwan kekekakut.
ACT 7:20 “Siwan tapduu wagwekatang Mosesda aawan Anututa kawan take siknga sikut. Siwan mingata takusopuke Moses yekau gweaat gwenduat katak toikut.
ACT 7:21 Toisikanga taku tewan yukut. Yuwawan Ferotane yapanata kake takut. Take minga dakngake toiban takakut.
ACT 7:22 Takawawan Isip nana amindane natdetdetna kuupbam inindamuba natapbut. Natake Mosesda wamu takngatu yanangge ba puya takngatu tasinangge dua gwauke kekeknga pasikut.
ACT 7:23 “Sike ita nakanu buyambam 40 ngang kawan sandewana notnabamu Isrel nana amin kanangge baniaatang natapbut.
ACT 7:24 Natake kuke kawan Isip nana tapatuta Isrel nana aminu tapatu tasiwan maiwan kakut. Kake Mosesda notna gatangamuke Isip nana waapa yake tanguwan kumbut.
ACT 7:25 Tunguwan kupan Mosesda baniaatang anzing natapbut. Nata aminu waapa tanguwa kupan kake notnabamda anzing ba natapning, ‘O! Anututa Moses kekekangaman ita meya ninda kaamang kaknga sandetnimunangge natake ba tasinggak,’ ngang ba natapning ngangu Mosesda ina baniaatang unzing natapbut. Natapan ngana notnabamda unzing dua natapbing.
ACT 7:26 Siwan tembana enake Isrel nana aminu tapaata ayanganuwat kake kwikwiknga natapzande natake Mosesda anzing yanikut, ‘Notna! Gitda notna notna yuamayak. Notna yuke minae amakamayak,’ ngang yanikwaikut.
ACT 7:27 “Yanikwaiwan ngana aminu notnae tupanu wai tasikut tapata Moses ikomban kuwan anzing inikwaikut, ‘Maminda ganiwan nindane kuyanin yuke nin usanziya amin dakngakuyak?
ACT 7:28 Kweu gata Isip nana tapatu tanguwi kumbut binga gata na nutnangge nataayak ba dasing,’ ngang yake inikwaikut.
ACT 7:29 Yake inikwaiwan ita datakuke Midian kep komune kuke pakapuyut dakngake yukut. Undang yusika maya une nana tapan waaknga tapaaya pangaikut.
ACT 7:30 “Pangaiwan Mosesda undang yuke nakanu buyambam 40 ngang kawan sandewana sipdune kupapatang tawanu dakatu umana Sainai ngang iniking. Tawanu wandakane kuwawan angela tapatuta kuku katau mateknga dakatusimune kusopuknga yuwan Mosesda kawawan katau wandaka katapda tapan kopan isiwan ngana dua puke pimapan kakut.
ACT 7:31 Kake baniaatang nangaakan natapbut. Natake katak siknga kanangge natake wesim kukut. Kuke kawawan Anututa anzing inikut,
ACT 7:32 ‘Gatane bamba Ebrahapat Aisakat Jekopatde Anutuna yuat,’ ngang inikut. Iniwan natake kanangge akgwauke dandaiyamukut.
ACT 7:33 Dandaiyamuban yuwawan Anututa anzing inikut, ‘Gata keu takwan komune yuayakge kepi taukga sandeke teyo.
ACT 7:34 Natane aminabamu Isip kep komune yusika meya siknga pake kwatan wam yawawa atnatapbum. Natake nata meya aknga akaaing kaknga sandetnangge kepdakane eput. Epu nata ganitewa gata enake Isip kep komune kuyo,’ ngang inikut.
ACT 7:35 “Siwan ngana baminu Isrel nana aminda Moses waapae masa imuke sapdut wamu anzing inisapduking, ‘Maminda ga ganitewan apu nindane buyambam tapanin dakngake nindane wamin usanzitnangge apbuyak,’ ngang iniking. Ngana Anututa yawan angelana tapatu katau mateknga dakasimune yuwan kakut tapata masana gatangamuke initewan kuke Isrel nana aminu waakwakgane takeapa dakngake gatayamukut.
ACT 7:36 Initewan kuke waapata duya takngatu takngatu Isip kep komune pasike yangga gwenu umana Gamana gwen ngang inikaing. Wagwenu kwaipatang pasike Isip kep kom teke i tupan kuwawan Isrel nana aminda masene tawaking. Tawake kupapatang nakanu buyambam siknga 40 ngang yuwawa Mosesda undang duya takngatu takngatu pasiwan kaking.
ACT 7:37 “Siwan Mosesda sipdune anzing yanikut, ‘Anututa naniwan itane wamna danikapmanggat tapa dakngake yuat. Siwan ina unzakan Anututa gikat nana tapatu apmea iniwan ita enake Anutue wam danikapsaapa dakngawik,’ ngang yanikut.
ACT 7:38 Ngan. Moses waapata Isrel nana amikat gatake keu amina wena komune yuking. Yuwawa angela tapatuta tawanu Sainai dakane iniwan natake ita Anututane wamu waaknga baminde yanikapbut. Siwan wamu waakngata yutake apu ninde apuke nin papan kekekake kayuk yutnimde natake ita Mosesde imukut.
ACT 7:39 “Iman ngana baminda Moses ikoba kuwan wamna gwaamutnangge bitaking.
ACT 7:40 Bitake Isip kep komune gatu kunangge natake Mosesdane paana umana Eron ngang iniking kapae anzing iniking, ‘Mosesda Isip kep komu teke tupan kuwawan ninda masene tawakumang ngana apmanu waapata zane kuk? Wena kamangge gata anutu pupuknga tasinimi ita tupan kuwawan ninda masene tawake Isip kep komune gatu kunim,’ ngang iniking.
ACT 7:41 Iniwa tapduk wagwekatang ikwawa gaman matekngge wee gwen tasiking. Tasike tumuk wam inindatanangge natake nanamu takeake pakapu unekan peke anutu pupuknga waapae saking. Sake baniaatang tatanga siknga natapbing.
ACT 7:42 Natapa kake Anututa masa yaman waakwakga gunzit yekap yekapdak ngangge natake nindane anutunin ngang natake yanindatakaking. Sanga wa tasikaking kakngae natake masa wamu takngatu yakapsa aminu tapatu iniwan natake ita anzing matakut, ‘O Isrel nana! Gindane bamsata keu amina wena komune yuke nakanu buyambamu 40 ngang yuking. Yusika ikwawa gamanu gwendu nae dua saking.
ACT 7:43 Aho. Ikwawa gaman matekge wee gwen tasike anutu pupuknga umana Molok ngang iniking. Itane yot takwan tasike itane wee gwenu you wagwene tewa yukut. Yuwawan yekapdaakge wee gwen tasike anutu pupuknga umana Refan ngang iniking. Inike ie tumuk wamu waapaatde yanindatakaking. Yanindatake tasiwawa kake Anututa yake nata gin danikawa sipewa maa siknga kuke Bebilon kep komu akuyapbike maa siknga kunong ngang daniwit.’ Ngang wamu waaknga aminu ayanikapbut tapata natake matakut.
ACT 7:44 “Siwan baminda keu amina wena komune yuwawa Anututa Mosesde inike, ‘Gata yot takwanu gwendu tauu kekeknga sanda anzing mitapso,’ ngang inikut. Inike yotde tuwanga yeukngaman kake unzakan mitapbut. Mitapana Anututa you wagwene koyuke bamin yanikakut.
ACT 7:45 Siwan Anututa bamin gatayamuke Kenan kep komune nana amin yanikwasipewan kuwa Josuata baminde takeapana dakngakut. Iat bamikatda unekan gatake amake une nana yawamba keu waomu ateke kuwawa wa aminda inae taking. Take Anutue yot takwanu wagwen waitdeke gwaamutakapbing. Gwaamutakapuke gatu mitapa yuwawan masan siknga Devitda aakut. Aake buyambam takake Isrel nana amindane takeapa dakngakut. Dakngake tasiwan Anututa kawan take siknga sikut.
ACT 7:46 Siwan Devitda natake nata Anutue yot takwanu gwendu tasingama Anutu Jekopdane kuyanae yukut tapata you wagwene koyuwik ngang baniaatang natapbut. Natake unzing tasiwit ba dasing ngang Anutu inikwaikut.
ACT 7:47 Inikwaiwan ngana aho ngang iniwan waaknga umana Solomon ngang iniking kapata Anutue yot takwan tasikut.
ACT 7:48 “Tasiwan ngana enane siknga yuak kapata yot aminda tasiking gwene yutnanga dua ngang natake aminu Anututane wam yanikapbut tapata wamu takngatu anzing matakut,
ACT 7:49 ‘Anututa anzing yawan kakum. Nata yekaune takeapa yuke pukwike yuat. Pukwike kepina kepdakane yainggangganukgat. Siwan ginu yot gwen tasingamanu wagwene nata yuwatakananga dua.
ACT 7:50 Asikaya nata katakngata sanga kuupbam dua tasike tekum? Ngang Anututa unzing yawan kakum,’ ngang matakut.
ACT 7:51 “Siwan ginu yamandet dakngake yuke katum aminde banip tawakaing. Ginu asinggan asinggan Waung Takwande masa imukaing. Unzing bamsata tasikaking kaknga binga tasikaing.
ACT 7:52 Tupa siknga aminu Anutue wam yanikapbing aminu kuupbam bamsata toknga yamukaking. Dudumna apata apmea apik ngang yanikapa natake ngana bamsata atzipa kumbing. Siwan aminu dudumna apa apik kapata gwa apan kake ngana ginda take wamna yawikge takuke ginda kem yawa aminda tanguwa kumbut.
ACT 7:53 Siwan Anututane mama wamu angelata gin danikut ngana ginda dua gwaamukaing.”
ACT 7:54 Ngang wamu waaknga Stivenda yaniwan natake aminu kuupbamda baniaatang toknga siknga natake asamnangge natake gena yasiwa tuptaking.
ACT 7:55 Gena yasiwa tuptawawa ngana Waung Takwanda Stivendane baniaatang pukuke kekekangaman ita kai pakusang enandang kakut. Kake Anututane kakaa aknga kake Jesuta kekekngaapa dakngake Anutue kataknga siyaapane yuwan kakut.
ACT 7:56 Kake anzing yakut, “Kawa enandangu kaukaut wesiwan kuwan kawa Jesu Krais aminbamdane notnaapa dakngakut tapata kekeknga akngane Anutue kataknga siyaapane yuwan kaat,” ngang yakut.
ACT 7:57 Yawan natake wamna natapnangge asiknga bitaking. Bitake kumzang yanggamatake maakngi umuke tangutnangge natapbing. Natake isapmake ie kuking. Kuke tanggaganuke
ACT 7:58 gwaamutaku sabasaba binga yotde kwaipatang mutewa kukut. Mutewa kuwan sup muke supda tanguwawa wawi mateu tapatu umana Sol ngang iniking. Ita yuke kawan sup mutnangge natake tauknga asitdoke Solde kepi kepiapane peking.
ACT 7:59 Pewa ita kayuwawan supda tanguking. Tanguwawa Stivenda tumuk wamu Anutue anzing yakut, “Kuyana Jesu! Na napmambi gae kopit,” ngang inikut.
ACT 7:60 Inike putumuke anzing yanggamatakut, “Kuyana! Aminu supda nukaingge yake toknga ma yamim,” ngang yake undang kumbut.
ACT 8:1 Kupan Solda kawan take sikut. Tapduu wagwekatang aminu kunduta tuwanguke Jesue aminu Jerusalem nanae tokngabam yamuke pasiwa maiking. Unzing pasiwawa Jesuat nana aminu kuupbamda gwatdu gwatdu datakuke Judia kep komune gatu Sameria kep komune ngang kuking. Kuwawa Jesutane kwiiknga aposel ngang yanikingu Jerusalem patang yuking.
ACT 8:2 Siwan aminu kundu Anutue natapbingga Stivenu atanguwa kumbut tapae kwanam gwaanga sike kwaiking.
ACT 8:3 Kwaiwawa Solda Jesue amin zipnangge kekeknga pasikut. Pasike Jesue amin dakngaking aminde yotna yotna koke panggaganuke kaipakepuke paku kaautde pekut.
ACT 8:4 Siwan aminu gwatdu gwatdu datakukingga kuke you gapmandu gapmandune kundoke Jesuta tasikut takngae wam yanikapbing.
ACT 8:5 Siwan Filipda Sameria yot gapmane pukuke, “Anututa tapan Jesuta Krais gatanimuyaapa dakngake yuak kapanin,” ngang yanikut.
ACT 8:6 Yaniwan aminbamda Filipde wamu katak siknga natapbing. Natawawa ita duya takngatu takngatu tasiwawan kaking.
ACT 8:7 Kawawa aminbamu waungu waita papan datdaptake yuaingu sandepewan yanggamatake peke kuking. Siwan aminu kwatai akumbing ba kepi wai sikingu pasiyaman take siking.
ACT 8:8 Unzing pasiyaman aminbamu you wanggapmane nana aminda musip gwaang natake apbakngaking.
ACT 8:9 Siwan aminu tapatu you wanggapmane nana umana Saimon ngang iniking. Ita tupa wamu asinggan anzing yakut, “Na umana kayaapa,” ngang yayuk gaam payamuke iak pasiwan you wanggapmane nana aminda kake nangaakan natapbing.
ACT 8:10 Siwan aminu umana kaya ba umana wena kuupbamda Saimonde wam natapnangge kekeknga natake anzing yaking, “Aminu aapa Anutue kekekngane kaya,” ngang yake, “Kekekngana buyambam siknga kayaapa,” ngang iniking.
ACT 8:11 Siwan aminu waapata tapduk tapdukbamu asinggan gaam payamuke sanga inata kundu tasiwawan kake nangaakan natayuking. Nangaakan natake ie wam natapnangge kekeknga siknga natapbing.
ACT 8:12 Siwan ngana Anututa inane kekeknga aknganata usikwata nipmamban ie gepbiatang yutnimde wam kwikwiu Filipda yanike Jesu Kraisde umana yaniwan natake maya wawiatda natapa siakan siwan yangga sauyamukut.
ACT 8:13 Siwan Saimon kaya natapan kekekawan yangga saukngaman Filipat unekan gatake yukumayak. Yuke kawawan Pilipda Anutue kekeknga aknga duya takngatu takngatu tasiwawan kake musia enakut.
ACT 8:14 Siwan Jesue kwiiknga aminu aposel ngang yanikakingu Jerusalem yuke Sameria kep komune nana aminda Anutue wamu gwa natapa kekekawan natake Pitaat Jonkat yanipewan wa aminde pukukumayak.
ACT 8:15 Pukuke kawat tapduknga dua pukukumayak gwene keu waopatang aminu yuaing aminu yangga Jesue uman takngae gwa sauyamukut ngana Waung Takwanda dua papan kekeknga dua siking. Dua papan kekekawan kake aminu waapaatda
ACT 8:17 katakngi gwapakngane wasike tumuk wamu Anutu iniwawat Waung Kapata pakut.
ACT 8:18 Siwan Saimonda kawawan Pitaat Jonkatda katakngi gwapakngane wasiwawat Waung Takwanda papan kekekawan kake mani pake kuku yeuyamuke anzing yanikut,
ACT 8:19 “Gitda kekeknga waaknga nae namat nata katakngata kusiane wasiwanu Waung Takwanda papan kekekaning,” ngang yanikut.
ACT 8:20 Yaniwana Pitata anzing inikut, “Ga sanga Anututa moo nimunggak kaknga usinangge yanggayakge gata manika pake katap bapatang pukuyo.
ACT 8:21 Anutue kaine ga musipba taketa dua yuayakge nitda pasikamak kaknga gae sanga dua.
ACT 8:22 Sanga waaknga natapbuyau gatukande bitateke Buyambam tapae waiakngaka natapbuyau sandekgamikge tumuk wam iniyo.
ACT 8:23 Gata aminbam yanindatdauwi gatane wai waakngata ga tanggaganukgak,” ngang inikumayak.
ACT 8:24 Iniwat Saimonda yake anzing yanikut, “Gitda Buyambam tapae tumuk wam iniwat meya atnanimayau takngatu dua kawit,” ngang yanikut.
ACT 8:25 Siwan aposel aminu waapaatda aminu waapa teke Takeapae wam une nana amin yaniwat puyuwana peke gatuna Jerusalem kukumayak. Kepine kuyuk Sameria kep komune yot matek gapma gapmasimune Jesue wamu take waaknga ngang yanitakukumayak.
ACT 8:26 Siwan yanitakuwawat angela tapatuta kuku Filip anzing inikut, “Tandakngake enake kuke amugwak kepiapa Jerusalemda Gesa yot gapmae pukukakingu bumiapa tawamso,” ngang iniwan
ACT 8:27 tandakngake pukukut. Amina wena opatang kepi waapane ita Itiopia kep komune nana aminu tapatu yotnae kunggawan kakut. Waapa kakuu puya Itiopia nana amindane gavmanu tupan tapa ina wam tanganu Kandesi ngang iniking. Itane sangaapana kayuaumin. Ita Jerusalemu Anutu inimbaknganangge kopbuuneta pukukut. Sanga daakgane binga wangane pukwiwan ikwawa gamanda kaitakekuwawan kakut. Kawawan ita wamu yakapsa amin Aisaiata Anututa iniwan matakuunin kendetake pukukut.
ACT 8:29 Kendetake pukuwawan Waung Takwanda Filipde anzing inikut, “Kuke ikwawa gamanda wa kaikgak wangane inengan yuyo,” ngang iniwan
ACT 8:30 Filipda isapmake kuke natawawan wamu ayakapsa aminu Aisaiata matakuunin kendetakapan natapbut. Natake anzing inikwaikut, “Wa kendekgayak kaknga asikaya kendeke atnatdekgayak,” ngang inikwaiwan yake ita anzing inikut, “Dasing natdewit?
ACT 8:31 Wamdane yapii aminu tapatuta dua yeukngamanun,” ngang yake iniwan Filipda ikwawa gamanda kaikut wangane kopan unekan yukumayak.
ACT 8:32 Anututane wamu wa matakutna kendekut taknga anzing, “Siwan aminda sipsip tangutnangge take kuwawa sipsipda kuma yuwik. Ina unzakan aminu waapa tangutnangge take kuking ngana wamu takngatu dua yakut.
ACT 8:33 Siwan aminda sipsipdane danggami matawanu wamna dua yawik. Ina unzakan aminu waapata wamu dua yakut. Aminu waita umana takepuke noman taknga ateke gutonga aknga yawa nomatakut. Aminu waapa tanguwa kungwake kepdakane yutnanga dua sikut. Siwan aminu wai waakwakga tasiking kakngae kuupbamu maminda katak siknga natdeke yawik? Wena. Yawan buyambam siknga singgawan atewik.” Ngang unzing matakutna kendekut.
ACT 8:34 Kendeke Filip anzing inikut, “Gata naniyo. Mamin tapae siknga ngang yakapsa aminda unzingu matakut? Inae ba aminu tapatue,” ngang inikwaikut.
ACT 8:35 Inikwaiwan Filipda yake Jesue inikut. Anutue wamu waakngae tupan inike uneta Jesuta yake tasikut takngae inikapbut.
ACT 8:36 Inikapmawawan kaipake kunggawan keu yanggana kaya komdune kundopbumayak. Kundoke aminu wa kayuak kapata anzing inikut, “Yangga ana. Na yangga saukngamiyakge asikaya sanga tapatuta umumbik,” ngang inikut.
ACT 8:37 (Ngang iniwan Filipda inikut, “Jesue banipbaatang natapi siakan siknga siwanu yangga saukgama,” ngang iniwan yake, “Ngan. Na Jesu Kraisde natake Anutue waaknga ngang natapa kekekak,” ngang inikut.)
ACT 8:38 Inike sanga akaipakukut wanga atasiwan yukut. Siwan Filipat akayuak kapaatda epu yanggaatang pukuke Filipda yangga saukngamukut.
ACT 8:39 Saukngaman yangga gwekatangga akokenga Anutue Waungga Filip take kuwan kawan maiwan ngana apbakngatake kukut.
ACT 8:40 Kuwawan Waungga Filip tapan ita kuku Asdot yot gapmaatang kundoke yotna yotna kuke Anutue wamu takeaknga yanitake kuku Sisaria yot gapmane kundopbut.
ACT 9:1 Siwan Solda Jesue aminabam pasiwan maiwa zipan kumningge kekeknga natake yakut. Yake kuku
ACT 9:2 Anututane yot takwan gwene pasiya amindane tupan tapa iniwan pas sandu sandu Judia nana amindane miti yotde take akwau you Damaskas gapmane yuaingge matayamuke imukut. Solda kuku Damaskas nana Jesu Buyambam tapaninde kepi tawake tasiya aminu kaya kakengu apanggaganuke pake Jerusalem pakuwikge matakut. Matake ie iman pake kukut. Kuku you wanggapmane kundopnangge inengan siknga kuwawan enandangga kakaa aknga waenga siknga siwan maakake kepdakane pimakut. Pimake natawawan wamdakan anzing inikut, “Sol! Sol! Dasingge tasiwi mainanggenggat,” ngang iniwan
ACT 9:5 yake, “Buyambamtapa! Ga mamin,” ngang inikwaiwan, “Na Jesu. Gata tasiwi mainggat tapanin.
ACT 9:6 Enake yot gapmaatang kopso. Kopina aminu tapatuta sanga gata tasiwiyakge ganiwik,” ngang inikut.
ACT 9:7 Siwan aminu Solkat sukuking aminda wam takngakan natake ngana buya yakut tapa dua kaking. Dua kake dandamake wam yanangge apbotake yuking.
ACT 9:8 Unzing yuwawa Solda apimakuuneta enake kaina zike kawan ngana kaina zikaa siwat iat gatake sukuking aminda kataknganeta ipmatake Damaskas katang take kopbing.
ACT 9:9 Paku une tapduu gweaat gwenduat dua kawasawan yukut. Yuke nanam ba yangga ngangu dua nake tangopbut.
ACT 9:10 Siwan unzing yuwawan aminu tapatu Damaskas yot gapmane nana tapatu umana Ananaias ngang iniking. Aminu wa Jesuat nana tapatuta mia kawawan Buyambam tapaninda inike, “Ananaias,” ngangu umana iniwan, “Buyambam tapa! Na an,” ngang yake iniwan anzing inikut,
ACT 9:11 “Enake kepi tapatu umana Noman tapa ngang inikaing kapa tawamso. Tawatake kuku aminu tapatu umana Judas ngang inikainggane yot gwene kayo. Undang aminu tapatu Tasas nana umana Sol ngang inikaing. Ita undang yuke tumuk wam yake yuak.
ACT 9:12 Ita mia kake ganduwawan gata koke katakga tangene kainata akawan saningge wasiwi gandupbut,” ngang inikut.
ACT 9:13 Iniwan Ananaiasda yake anzing inikut, “Buyambam tapa! Aminu waapata gatane aminda Jerusalem yuaingge tokngabam yamukutde aminbamda gwa naniwa natapbum.
ACT 9:14 Aminu yot takwan gwene pasiya amindane take akwakga gwa yawa kekekawan ninu gatane amindabam panggaganutnangge apuk,” ngang iniwan
ACT 9:15 yake anzing inikut, “A! Kuyo. Nata nae pasiwikge gwa tapa nomatawan pasike nae wama yanikapan dongu inata takngatu takngatune nana aminda natapning. Ita yanikapan aminu take akwakaya atnatapning. Isrel nana kuut natapningge yanikapik.
ACT 9:16 Nata ninae puya pasike meya takngatu takngatu papikge apmea yeukngamit,” ngang inikut.
ACT 9:17 Siwan mia waaknga kake Ananaiasda enake kuku you wa inikut gwene koke katakngita tangene wasiyuk anzing inikut, “Notna Sol. Jesu Buyambam tapata gika kepi kukuyak kapane tasiwan gwa kakuyak kapata na kaika akawi sawan Waung Takwanda kekekanggaman yuwiyakge nanitewan apunggat,” ngang inikut.
ACT 9:18 Iniwan Solde kaiatangga pisdane zaangata binga zetgaman pimapa gatu kakut. Kake enawan Jesue umana akngae natake yangga saukngamukut.
ACT 9:19 Yangga saukngamana nanam nake kekekngana gatu pakut. Siwan Solda tapduu kundu you Damaskas gapmane Jesue aminabapat yuking.
ACT 9:20 Une yuyuk zetgaman Judia amindane miti yot gwegwene koke Jesue yanike Jesu Anutue waak ngang yanikut.
ACT 9:21 Yaniwan natapbingga asatnake ina anzing yakwaiking, “Aminu aapata dua Jerusalem gapmane aminu Jesue amin dakngakingu zipan kumbing? Zipmake apu panggaganuke amin Anutue yot takwan gwene pasiya aminde tupan yuaingge dua pake kunangge apuk,” ngang yakwaike asatnaking.
ACT 9:22 Siwan unzing yawawa ngana Solda kekeknga aknga pake Jesue yaniwan Anututa tapan wa amin tapa Krais ngang ininangge ngang yaniwan kekekawan natake aminu Judia nana gatu Damaskas yot gapmane yukingga nangaakan natapbing.
ACT 9:23 Siwan tapdukbam Solda yuwawan notna Judia nana aminda iwana dakngake paut tasike Sol tangutapa kupikge yawa kekekakut.
ACT 9:24 Yawa kekekawan tangutnangge kwakngaom zikaane ngangu kuut yot gapmatane daman gwende gwabokbam gwaune kayuking. Kayuwawa Solkat inane pandetnaatda kakapbing.
ACT 9:25 Kakapmake natake pandetnata zikaane damanu supda wapan basikut wangane take koke kandayakbam gwekatang pukwiwan napda wamake tatawawawa kepdakane kepman pukuyaikut.
ACT 9:26 Pukuke uneta Jerusalem kuku Jesue aminabapat gatake yutnangge tasikut. Tasiwan ngana akagwauke ie aapa Jesuat nana ngangu dua natapbing.
ACT 9:27 Natapa Banabasda kake Sol take Jesue kwiiknga aposel ngang yanikamangge initake kukut. Initake kukenga ina Solda kepiapane Jesu kakutde gatu wamu inikutde ba kuku Jesue dua maakake Damaskas yot gapmane nana amin yanikutde yanikapbut.
ACT 9:28 Yanikapan Jerusalem gapmane Solda aposelkat unekan gatake yuke
ACT 9:29 dua maakake Jesue aminbam yanikapnangge dua gwaukut. Musia gitnata yuke yanikapan ngana Judia nana kundu Grik wamu yakikat nana kunduat inisapduke yanganuke atangutnangge kepie tawaking.
ACT 9:30 Tawawawa ngana kakapmake natake notnata Sol take you Sisaria gapmane pukuke uneta tewa yotna Tasas gapmane kukut.
ACT 9:31 Siwan Jesuat nana aminu Judia gatu Galili gatu Sameria kep kokomune nana aminda gwauya aknga teke nangaakan dua natapbing. Takekan natayuke Jesu Buyambam tapaninde gepbiatang yuwawa Waung Takwanda musia papan kekekaking. Papan kekekake Jesutane puya aknga take siknga tangenake tasiking. Tangenake tasiwawa aminu Jesue amin dakngakingu apunggawa apunggawa buyambam sikut.
ACT 9:32 Siwan Pitata kepna kepna tawamban sandewan kuku you Lida gapmane pukukut. Pukukenga aminu Jesue amina dakngakingu une nana amikat gatake yuking.
ACT 9:33 You wanggapmane yuke aminu tapatu umana Inias ngang iniking. Waapa kwatai gatukande tuyukawan nakanu katau kuut musa kautdune gweaat gwenduat ngangu dapun gan pekut.
ACT 9:34 Pekgawan kake Pitata anzing inikut, “Inias! Jesu Kraisda maitda sandekgamunggakge enake a pekgayak komu usitapi takawan,” ngang inikut. Iniwan zetgaman enawan
ACT 9:35 aminbamu Lida nanaat Seron yot gapmaaune nanaatda kake musia tapa tekwamban Buyambam tapanindane amina dakngake yuking.
ACT 9:36 Siwan maya Jopa yot gapmane nana tapatu Jesue amina dakngakuu umana Tabita ngang iniking siwan tana tekwamban Grik wam taknganu Dokas ngang iniking. Maya waapata aminu sangaapae dapanu asinggan asinggan gatayamukakut.
ACT 9:37 Gatayamusika sipdune mait sike akupan gupnasanu yanggata saukngamuke taku you engatangan gwene teking.
ACT 9:38 Taku teke you Jopa gapmaneta Lida yot gapmae natapa maa siknga dua sikut. Siwan Jesue aminabamu Jopa yot gapmane nana aminda natapa Pitae Lida yot gapmane yuwan natapbing. Natake notna tapaaya yanipewa kuke anzing inindatapbumayak, “Gata payunga ma yuwim! Zetgaman ninde apso,” ngang iniwat kuku yawakut.
ACT 9:39 Kuke kundopan take Tabitata kupan gupna wanga taku teking gwekatang initake kopbing. Kopa maya kombakobatda pakapu Pitae yupbasike kwanam siking. Kwanam siyuk Dokasda tauk gogomu maya wawie papapukuknga kayuk yuke bupbuunin yeukngamuking.
ACT 9:40 Yeukngama kakenga aminu kuupbam yanipewan epu kuwa muna puke tumuk wamu Anutu inikut. Inikenga tapan tekwamban akumbut tapa anzing inikut, “Tabita! Enat,” ngang iniwan maya waapata gweake kai zike Pita kake pangenak yukut.
ACT 9:41 Pangenak yuwan Pitata katakngane take tangenakut. Tangenake Jesuat nana amin gatu kombakobau undang yukingu ngang yayawamban apa Dokas waapa yeuyaman kayuu gwa gweakutna kaking.
ACT 9:42 Yeuyaman kake ie wamu Jopa yot gapmane yatakuwa sandewan aminbamda natapbing. Natake aminu buyambamda Jesue natapa kekekakut.
ACT 9:43 Siwan Pitata you wa gapmane tapduu kwaapzang yukut. Wa yukuu aminu tapatu umana Saimon ngang iniking kapaat yukumayak. Wa yukumayak kapata ikwawa gamandane gupda simbu ba kepi tauk pasiyuk manina kaiyuk yukut.
ACT 10:1 Aminu tapatu umana Konilias ngang iniking. Ita Sisaria yot gapmane yukut. Ita amak aminu Itali kep komune nana 100-dane tupan tapa dakngake yukut.
ACT 10:2 Yuke Anutue natapan kekekawan maatnaat waatdakanaat kuutda Anutue akgwauke yuking. Yuke aminu sangaapana wena yukingu mani buyambam yamuke gatayamuyuk tumuk wamu asinggan asinggan Anutue inikut.
ACT 10:3 Siwan tapduu gwendune bangee 3 kilokge waomune mia kawawan Anutue angelana tapatuta yotnaatang koke inike, “Konilias,” ngang iniwan natake
ACT 10:4 katasiyuk gwauya siknga natake anzing inikut, “Buyambam tapa! Mina,” ngang iniwan angelata anzing inikut, “Tumuk wamu yayuk aminu atdapmakaingu gatayamuke tasiwawi Anututa gandupan take singgakge ganinggat.
ACT 10:5 Apmanu aminu kundu yanipewi Jopa yot gapmane kunong. Kuku aminu tapatu umana Saimon ngang inikaing. Ie tawanong. Umana takngatu Pita ngang inikaing. Ge waapa yatawambi apsok.
ACT 10:6 Aminu waapata tangetane yotnane yuak. Yot toiu waapa sangana ikwawa gamandane gupnata pasinggaunin. Itane yotna yanggabamde kwaim tapane yuak,” ngang inikut.
ACT 10:7 Unzing iniwan puyuwan initeke kuwana Koniliasda puya amina tapaaya gatu amak aminu asinggan iat gatake pasingamukikat nana tapatu Anutue natapan kekekanggak kapa ngang yayawamban apbing.
ACT 10:8 Apa wa mia kakut taknga katak siknga ngang yanikut. Yaniwan puyuwan yanipewan Jopa yot gapmane kuking.
ACT 10:9 Siwan kusika kusika kepine peking. Pekinga tembana enake kundusipat kuwawa you Jopa gapma inengan sikut. Inengan unzing siwan kuwawa kepmaom Pitata you engatangan gwene tumuk wam yanangge kopbut.
ACT 10:10 Koke yake ngana tomna natake yuwawan yoakatangu nanamu apandakngawawa Pitata mia takngatu kakut.
ACT 10:11 Kawawan enandang kakaa siwan undangga tauu buyambamu sandu takopan nomna dakandaka peyaneta tatawawan epbut.
ACT 10:12 Tauu wasanu epan Pitata kawawan banakan katangu kaau kundumamanda yuking. Gomokat kwaikat kuut yuwawa kakut.
ACT 10:13 Kawawan wamdakan anzing inikut, “Pita! Gata enake kaau wa zipmake sake nang,” ngang inikut.
ACT 10:14 Iniwan natake ngana Pitata yake anzing inikut, “Buyambam tapa! Dua siknga napit. Tupata sanga Mosesde mama wapatang yandakngakuu nata bitake dua napa sikut,” ngang iniwan ngana
ACT 10:15 gatu wamdakan sipduat anzing inikut, “Sanga Anututa gandutewan tasiwiyak kakngae ma bitawim,” ngang inikut.
ACT 10:16 Inike unzakanu sipmaat sipduat iniwan puyuwan enandang zetgaman tauu wa sanu gatuna kaiwan kowawan kakut.
ACT 10:17 Kake Pitata nangaakan natake anzing yakut, “Mia wa kaatdane yapii dasing siknga,” ngang natake yuwawana aminu Koniliasda yanipewan kukingu kundopbing. Kundoke yanikwaitake kusika Saimonde yot gwen kake paku gwabokgakane dandamake
ACT 10:18 yuke anzing yaking, “Aminu maata apan gaat gatake yuamayak kapa Saimon umana takngatu Pita ngang inikaing kapa undang?”
ACT 10:19 Ngang yawawa Pitata mia taknga kakutde natanggamatawawan Waung Takwanda anzing inikut, “Natapso! Aminu tapaat tapatuatda gae gawakaing.
ACT 10:20 Ge enake pukuwi gaat kunong. Nangaakan ma natapim. Nata nina yanipewa apuing,” ngang inikut.
ACT 10:21 Iniwan natake Pitata enake aminu waakwakge pukukut. Pukuke kake anzing yanikut, “Aminu ginda tawakaing kapa na. Sike ginu dasingge apuing,” ngang yanikwaikut.
ACT 10:22 Yanikwaiwan yake anzing iniking, “Ninu Konilias amak aminu 100-dane tupan tapa yuakga ninipewan apumang. Konilias waapa aminu noman tapa. Anutue akgwaukgaunin. Aminu Judia nana kuupbamda ie noman tapa ngang yakaingunin. Sike Anutue angela tapatuta yanggawamban kuku wamu kundu yawi natapikge iniwan ninipewan apumang,” ngang iniking.
ACT 10:23 Iniwa natake Pitata yoan pakopbut. Pakoke zikaa wagwenu ita toiban peking. Ngang tembana enake aminu wa pekikat unekan gatake kuking. Kunangge tasiwawa you wanggapmane nana Jesue notna dakngaking amin kunduat iat gatake kuking.
ACT 10:24 Siwan kusika pewa kwakawan tembana enake kuke Sisaria yot gapmane kundopbing. Siwan Koniliasda Pitata apikge natayuke yapautyut notna yayawamban pakapu inae yotnanekan koke Pitae kayuking.
ACT 10:25 Kayuwawa Pitata kuku yoan kopnangge tasiwan Koniliasda epuke muna puke kaine pimake Pitae umana Anututane binga yatangenakut.
ACT 10:26 Yatangenawan ngana Pitata inike, “Enat! Nakaya kepdakane nanaapa ga bingakan,” ngang inikut.
ACT 10:27 Inike wamu asiniwawa yoakatang kopbumayak. Siwan iat gatake apbing amikatda kopbing. Koke ngana aminu buyambamda pakapu unekan gwa yukinga kake
ACT 10:28 anzing yanikut, “Gisa atnataaing. Pasap wamu kekeknga siknga yuwakgen. Ninu Judia nana tapatuat aminu dongu inata nanaat unekan gatake dua yutnimden ngana Anututa nanike nata aminu tapatue dua bitake semna dua natangamitde nanikut.
ACT 10:29 Unzingge na yanawambi natake dua sandeke zetgaman aput. Ge danikwaiwit. Dasingge nae yanawakuyak,” ngang inikwaikut. Inikwaiwan Koniliasda yake anzing inikut,
ACT 10:30 “Tapduu anzing komune binga sanga takngatu nae singaman kawa tapduu gweaat gwenduat gwa kuk. Waomune bangee 3 klou yotnaatang tumuk wam yake yuwawa aminu tapatuta pakapu noma saak yukut. Wa pakapu yukut tapa tauknga waenga siknga ziwan yuke anzing nanikut,
ACT 10:31 ‘Konilias! Anututa tumuk wamba gwa natanggamuk. Natanggamuke sangabamu atdapmakaingge yamunggayak kakngae atnataak.
ACT 10:32 Ge aminu kundu yanipewi Jopa yot gapmane kuku aminu tapatu umana Saimon ngang inikaing. Umana takngatu Pita ngang inikaingu waapae yatawamso. Waapa you Saimon ngang tapatu inikainggane yotnane yuak. Yot toiu waapa sangana ikwawa gamande gupda pasinggaunin. Pasike yanggabamde kwaim tapane yuak,’ ngang nanikut.
ACT 10:33 Naniwan zaatgaman aminu gae yanipewa kuke ganiwa gata take siknga apuyak. Ge ninu Buyambam tapaninda wamu nin niniwiyakge ganikuunin niniwi natapnimde ninu pakapu yuamang,” ngang Pita inikut.
ACT 10:34 Siwan yawana Pitata yake anzing inikut, “Siakan siknga apmanu gwa kaat. Anututa aminu kundue take nataak kaknga aminu kundue dua yapbikgak. Wena!
ACT 10:35 Aminu tapatu keu zakneka nana tapatuta Anutue akgwauke nomana takngakan tasike yuwikge take natangamunggak.
ACT 10:36 Ginu atnataaing. Anututa ninu Isrel nanae wamu takngatu Jesu Kraisda tasiniman Anutue notna gatu dakngake yutnimde wam taknga ninde tewan apbut. Ita aminbamdane Buyambam tapa.
ACT 10:37 Tupa Jonda wamu yangga sautningge yaniwan puyuwawan wamu waaknga Galili kep komune aake Judia kep komu kuut takut.
ACT 10:38 Wamu waaknga anzing, ‘Anututa Jesu Nasaret nana kateke Waung Takwakat kekeknga aknganaat kuut asimukut. Asiman yotna yotna kuke aminbam gatayamukut. Anutuat iat gatake yuke aminu Setenda pasiwan maikinga pasiwat takaking.’
ACT 10:39 “Ge ninda nisae keu Judia kep kopatang gatu Jerusalem yot gapmaatang sangabamu pasikut taknga kaininda kakumang. Kawatna aminu waapa amin saamdakane tanguwa kumbut.
ACT 10:40 Tanguwa kumbut ngana tapduu gweaat gwenduat yuke Anututa akumbut katangga tangenake yeutniman anggaman kakumang.
ACT 10:41 Kana ngana Anututa dua kapewan aminbamu Judia nana aminda kaking. Wena. Ninu gatuna gweake yukut komune iat gatake yuke nanam nake tangopbumang aminu ninu Anututa papan ita gatuna gweakut takngae yanikamang. Nindekan yeutniman ninda waaknga kakumang.
ACT 10:42 Kake aminbam yanike wamu noman siknga anzing yanikamang. Anututa ina aminu kayuk yuaing amikat gatu akumbing amikat ngang usanziwikge aminu awia waapakan tekut.
ACT 10:43 Aminu waapa tekutde Anutue wamu tupa siknga ngang yakapbing aminda anzing yaking, ‘Aminu waapae natake Anututa tapan pasinggak kapanin ngang natapa siakan siwiu waikngana Anututa asandeyamik,’ ngang mataking,” ngangu Pitata yanikut.
ACT 10:44 Siwan Pitata wamu waaknga ayaniwawan Waung Takwanda aminbamu wamu waaknga natapbinggane baniaatang pukuke papan kaking.
ACT 10:45 Kawawa Waungga bania pangenawan aminu kuupbam keu komdune nana ngana wamna inata inata yaking. Yayuk Anutue umana yatengawawa kaking. Kake aminu Judia nana Jesue natapa kekekakut takwau Pitaat gatake apbingga kasatnake anzing yaking, “Anututa Waunga musip gwaangge Judia nanaekan nimunggak ngang natapbumang ngana kawatna aminu keu komdune nanae kuut yaman kaamang,” ngang yaking. Yawa Pitata anzing yakut,
ACT 10:47 “Ninde tupanu Waung Takwanu atnimukut ngana ina unzakan aminu aakwakge yaman kake mamin tapata ninindakngawan yangga dua sauyamunim? Wena,” ngang yake
ACT 10:48 yaniwan Jesu Kraisde umande yangga sauyamuking. Siwan aminu waakwakga Pitata iat gatake tapduu kundusim yutningge iniking.
ACT 11:1 Siwan Jesue kwiiknga aposel ngang yanikamang amikat gatu Jesue notna dakngake yuya aminu Judia kep komune yukingga natawawa aminu Judia nana amin duaaya Anutue wamu gwa natake taking ngang natapbing.
ACT 11:2 Natake yuwawa sipdune Pitata Jerusalem yot gapmane kopbut. Kopan kake Judia nana kundu Jesue notna dakngake ngana gupna matanangge kekeknga nataaingga anzing inisapduking,
ACT 11:3 “Dasingge gata aminu gupna dua matakinggane yotnane kuke nanamu iat naking,” ngang iniking.
ACT 11:4 Siwan ngana Pitata sanga kuupbam aakut takngae yanikapmake anzing yakut,
ACT 11:5 “Nata Jopa yot gapmane yuke tumuk wam yake mia takngatu kakum. Kawawa sanga enandangge tauu buyambam siknga sandu tapakopan nomna dakandaka peyaneta tatawawawa nae epbut.
ACT 11:6 Epan katak natapnangge tauk banakan katang kake kaau kundumaman kakum. Kaapzong gatu gomok ba kwait gwegwen ngang kakum.
ACT 11:7 Kake natawawa wamdakan anzing nanikut, ‘Pita. Enake kaau zipmake sake nang,’ ngang naniwan natapbum.
ACT 11:8 “Siwan ngana nata, ‘Buyambam tapa! Dua siknga napit,’ ngang inikum. ‘Tupata sanga Mosesde mama wapatang yandakngakuu dua siknga genaatang kopbut,’ ngang inikum.
ACT 11:9 “Ngana wamdakan enandangga sipduat anzing nanikut, ‘Sanga Anututa gandutewan tasiwiyak kakngae natake Anututa ayandakngakut ngang yawim’ ngang na naniwan natapbum.
ACT 11:10 Natawawa unzakanu sipmaat sipduat siwan kawawa sanga kuupbam enandang gatuna kaiwan kowawan kakum.
ACT 11:11 “Kawana zetgaman wawi tapaat tapatuatda apbing. Ninda yukumang komune. Aminu tapatu Sisaria yot gapmane yuak kapata nae yanipewan apbing.
ACT 11:12 Apa Waung Takwanda anzing nanikut, ‘Gaat kunong. Nangaakan ma natapim,’ ngang naniwan notna Jesuat nana aminu katau kuut musa kautdune tapatu ngakatda gatake kukumang. Kuke aminu tapatu umana Konilias ngang inikinggane yotnaatang kopbumang.
ACT 11:13 Kopna angela tapatu yotnaatang kawan inikut taknga anzing ninikut, ‘Aminu yanipewi Jopa kuku Saimon iniwan apsok. Umana takngatu Pita,’ ngang inikaing kapanin.
ACT 11:14 ‘Ita apukenga wamu kundu daniwik. Wa daniwik kakngata gatandaman ginu waakga yapaka ngangu ginu kuut paanda gatukande dua maining,’ ngang nanikut.
ACT 11:15 “Naniwan natake tuwanguke yawawa Waung Takwanda ie tupanu nin papan kekekakumang kakngakan aminu waakwakaya papan kekekaking.
ACT 11:16 Papan kekekawa kake wamu tupa Jesuta ninikut taknga anzing natdekum. Jonda aminu yanggatakan sauyamukut ngana nata initewa, ‘Waung Takwanda banipzaatang pukuke papik,’ ngang ninikut takngae natdekum.
ACT 11:17 Tupa ninda Jesu Kraisde natake Buyambam tapanin ngangu ie banip sike yuwatna Anututa gatanimuke yawan Waung Takwanda nin papan kekekakumang. Ge ina unzakan aminu keu komdune nanaaya gatayamuke yawan Waung Takwanda papan kekekawa kake dasing tasike Anututa pasinggak kaknga sandekngamit? Wena,” ngang Pitata yakut.
ACT 11:18 Yawan natake wamu wena siwan Anutue uman yatangenake anzing yaking, “Anututa kapewan aminu ninu Judia nana binga dua amin ngana musia tapa tekwamban waiakngana bitateke kayuk asinggan yutnanga aknga take yutning,” ngang yaking.
ACT 11:19 Siwan tupa Stiven tanguwa kupana Judia nana aminda tuwanguke Jesuat nana aminu pasiwa maiking. Pasiwa maiwa datang gwatdu gwatdu kuking. Kuke kundu maa siknga Finisia kep komune kuwawa kundu Saipras keu yangga banakan yuak komune kuwawa gatu kundu Antiok yot gapmane kuking. Kuke ngana Jesue wamu aminu keu komduine nana aminde dua yanikapbing. Kakgan sike notna Judia nana kepna kepna wa kokomume yuaing amindekan yanikapbing.
ACT 11:20 Siwan ngana Jesue aminu Saipras nana gatu kundu Sairini kep komune nana ngangga datang kuke Antiok gapmane kundopbing. Kundoke Judia nana amin duaaya wamu takeaknga Jesu Buyambam tapata yuak kakngae yaniking.
ACT 11:21 Yaniwawa Buyambam tapata kekeknga akngnata gatayaman aminu kwaapzangga Buyambam tapae natapa kekekawan Jesue amina dakngaking.
ACT 11:22 Siwan sanga wa Antiok yot gapma tasiking kakngae natake Jesue aminu Jerusalem nana aminda Banabas initewa une kukut.
ACT 11:23 Kusika kundoke Anututa musip gwaangge gatayamuke tasiyaman kake apbakngakut. Bakngake musia tapa kekekawan Buyambam tapa wesim asinggan yutawaningge yanikut.
ACT 11:24 Siwan Banabas waapa aminu nomanaapa. Waung Takwan tapata baniaatang pukuke asinggan take yuwawan ita Jesue natapan kekeknga siknga sikut. Siwan aminu buyambamda Buyambam tapaninu Jesutane saakgan kuku gatapbing.
ACT 11:25 Gatapa kake Banabasda Solde tawanangge Tasas yot gapmane kukut.
ACT 11:26 Kuku kake tapan Antiok kukumayak. Kuke Antiok nana Jesue amikat unekan gatake yuke nakanu gwendu kaking. Nakanu wagwene yuyuk Banabaskat Solkatda aminu kwaapzang Anutue wam yanindamukumayak. Siwan Antiok yot gapmane nana aminda Jesue aminabamde sapduyamuke Kraiskat nana amin ngang dangem siknga umana waaknga tuwanguke yaniking.
ACT 11:27 Siwan tapduu waopatang Anutue yanikapsa aminu kundu Jerusalem yot gapma teke uneta Antiok yot gapmane epbing.
ACT 11:28 Wa epbikat nana tapatu umana Anggabas ngang iniking. Ita Waung Kapata kekeknganata tapan yake tom tapduu buyambam siknga kepna kepna siwikge yakapbut. Masande aminu tupan tapa umana Klodias ngang iniking kapata kayukut gwene tom tapduu wagwenu apbut.
ACT 11:29 Siwan wamu waaknga ngang yakapan natake Jesuat nana aminda notna Judia kep komune yuaing amin gatayamunangge yaking. Yake inandek inandek mani apmang usanzike yaman pakaing kaknga yamunangge yaking.
ACT 11:30 Yake unekan peke Banabaskat Solkatde yamuke yanipewa mani Jesuat nanatane tupan amin takwau Judia kep komune yuaingge paku yamukumayak.
ACT 12:1 Siwan tapduu waopatang tupan tapa Herotda Jesuat nana aminu kundu pasiwan maiking.
ACT 12:2 Pasiwan maiwa ita amak amina yanipewan paipna take Jonda paana Jems tanguwa kumbut.
ACT 12:3 Tanguwa kupan kake Judia nana aminda Herotde apbakngaking. Bakngawa kake ita Pita atanggaganukut. Judia nana aminda yuwatakak tapduk mamaya kake poyak sawa dua paptawan nake tasikaking tapduk gwene banakan kopatang Pita tanggaganuke kaautde tekut.
ACT 12:4 Tewan yuwan amak aminu 16-da kayutningge pekut. Pewan usanzike dongu takngaat takngaat dakngake kayuking. Dongu takngatuatangu aminu tapaat tapaat ngang yuwa takngatuatangu tapaat tapaat ngang yuking. Unzing yuke kayuwawa Herotda anzing natapbut. Yuwatakak tapduu Pasova ngang yakaing gwenu kawa sandewana masande wamu yawikge Pita take aminbamde kaine epu takuwa akupikge yawa kekekawan akupikge natapbut.
ACT 12:5 Natake Pita tewan kaaut yot katanggan kayuking. Kayuwawa nganu Jesuat nana aminda Anututa gatangamikge tumuk wamu kekeknga siknga ngang yaking.
ACT 12:6 Siwan zikaane Herotda Pita wam yawikge dua take takukut komune Pita senu takngaata wamake tewa kaaut yot katang amak aminu tapaae banakan gan dapuna pekut. Pewawan amak aminu kunduta gwabok bam gwaune yuke kayuking.
ACT 12:7 Kayuwawa Buyambam tapae angelanata apan kakaa kaaut yot katang sikut. Siwan angelata Pita tanguke anzing inikut, “Zet enat,” ngang iniwan senu kuut takngaat awamangamuking kakngaatda waipimakumayak.
ACT 12:8 Waipimambat anzing inikut, “Simbuka wamake kepi taukga pasing,” ngang iniwan unzing tasikut. Tasiwan, “Got taukga tasike na nawamso,” ngang iniwan
ACT 12:9 tasike you wagwenu ateke angela apa tawamban epu kepman kukumayak. Angelata siakande Pita epu take kuwan ngana Pitata dua natdekut. Dua natdeke mia ba kaat ngang natapbut.
ACT 12:10 Natake epu kuke amak amin tupan tapa ayapbike masan tapa kuut ayapbikumayak. Yapbike kuku ain gwabok gakane kundopbumayak. Wandaka tekengu kepman epu yot gapmane akukaingunin. Kuwawat gwabou wandaka ina ziyamukut. Ziyaman epu kepman kuke kuku initake kepi mateknga kundusim kukenga angelata Pita teke zetgaman kuwana
ACT 12:11 Pita natdetdetna anggaman sikut. Siwana anzing yakut, “Apmanu gwan siknga nataat. Buyambam tapata angelana initewan apu na Herotde kataknganeta gatu Judia nana aminda na nutnangge natangamukaing kaknganeta sandetakapunggak.”
ACT 12:12 Unzing natakenga Jonu umana takngatu Mak ngang iniking kapatane minga Mariatane yotnane kukut. Aminbamu pakapu tumuk wamu you wagwekatang yaking.
ACT 12:13 Yawawa Pitata kuku gwabok gwaune kepman yuke gakngat tasiwan maya tapatu umana Roda ngang iniking. Ita gakngat natake gwabok zitnangge apbut.
ACT 12:14 Apu Pitae guyakngi natake bakngake zikngamunangge botake teke isapmake kuku iat gatake yuking aminu anzing yanikut, “Pitata kepman katang yuak,” ngang yaniwan
ACT 12:15 yake, “Ga datdap wam yanggayak,” ngang iniwa ngana kekeknga anzing yakut, “Aho! Siakan siknga amunzing yuak,” ngang yawan ngana inike, “Wa wenata apuke tasiwan yanggayak,” ngang iniking.
ACT 12:16 Siwan ngana Pitata asinggan gakngat tasiyuwawan gwabok zike akasatnaking.
ACT 12:17 Akasatnawa ngana Pitata katakngita gena umutningge tuwangu tasikenga Buyambam tapata kaaut yot katangga initake epukuut takngae wam yanikut. Yanikenga anzing yanikut, “Gindaya Jems gatu Jesuat nana kuupbam atdaninggat taknga ngang yaninong,” ngang yanike kepman epukuke gatu keu komdune kukut.
ACT 12:18 Siwan tembana gunzitda akopan amak aminda Pita wena kake kumzang asatnake yuking.
ACT 12:19 Yuwawa Herotda Pitae yatawamban maiwan amak aminu wamu buyambam yanikwaiwan maiwan amak aminu atzipmapapan kumningge yakut. Yake ita Judia kep kom teke pakepu you Sisaria yot gapmane yukut.
ACT 12:20 Siwan Herotda bania zikaa kumzang siknga aminu yot Taia gatu Saidon gapmaaune nana aminde natapbut. Natapan you wanggapmaaune nana aminda unekan gatake Herotde kuking. Kuke puya aminu tapatu umana Blastas ngang iniking. Ita you Herotda dapuna pekgak gwende kayukut tapanin. Iat wam yatapan takawana Herotda bania zikaya natayamunggak kakngae yawa kupikge yaking. Sike aminu une nana aminda nanamu buyambamu keu Herotda kayuak gakane kuke usike nakaking kakngae natake wamu waaknga ngang yaking.
ACT 12:21 Siwan tasitawanggawa Herotda tapduknga ayakut gwene tauknga gwaam siknga tupan tapaapata pasikaing gogom pasike wam yawan kekekanggak komune pukwike wamu takngatu aminu wa apbingge yanikut.
ACT 12:22 Yaniwan natake aminbamda kemu anzing iniking, “Moo aminu tapatuta binga dua nininggak. Anutu tapatuta nininggak,” ngang yaking.
ACT 12:23 Yawa Herotda apbakngake Anutue tangge yutnangge dua bitake inane umana aknga tangenawawan waomzimune Anutue angela tapatuta apu Herot tanguwan kanikanimda isinggawa akumbut.
ACT 12:24 Siwan Buyambam tapanindane wamu yotna yotna yatakuwawa aminbamda natapbing.
ACT 12:25 Siwan Banabaskat Solkatda mani pake Jerusalem kuke yamat puyuwan aminu tapatu umana Jon gatu umana takngatu Mak ngang iniking. Unin tapat Antiok yot gapma ateke apbumayak gapmane gatu kuking.
ACT 13:1 Siwan Jesuat nana aminu Antiok yot gapmane yukikat nana kundu Anutue wam yanindamumsa amin dakngake yuke aminbam yanikapbing. Wa amindane umana Banabas siwan Simion umana takngatu Zikaa apa siwan aminu tapatu Sairini kep komune nana umana Lusias siwan tapatu Herot tupan tapata yukut tapatane yotnane yuke takakut tapa umana Maneyen siwan tapatu Sol ngangu waakwakga yuking.
ACT 13:2 Siwan Jesuat nana aminu waakwakga unekan gatake yuke Buyambam tapaninde gwetake tumuk wam yayuk nanam teke dua naking. Dua nake yuwawana Waung Takwanda anzing yanikut, “Nata Banabaskat Solkat papa puya takngatu pasisande natake ginda kapewa kuku pasisan,” ngang yanikut.
ACT 13:3 Yaniwan nanam teke dua nake yuke tumuk wamu yakenga puya waaknga yama pasisande katakngi gwapakngane wasike yanipewan kukumayak.
ACT 13:4 Siwan wa kukumayau Waung Takwanda yanipewan kukumayak. Kunangge tasiwawat aminu tapatu umana Jon ngang iniking. Umana takngatu Mak ngang iniking. Ita gatayamikge iat gatake kuking. Kuke pukuke Selusia yot gapmane kundopbing. Kundoke sip tangan Saipras keu yangga banakan yuak komune kuking.
ACT 13:5 Undang kuke Salamis yot gapmane kuking. Kuke notna Judia nana paku you wanggapmane yukinggane miti yot gwene koke Anututane wamu yanikapbing.
ACT 13:6 Siwan Saipras keu wa yangga banakan yuak kom tawamba sandewan Pefos yot gapmane kundopbing. Kundopa ngana aminu tapatu Judia kep komune nana umana Ba-Jisas ngang iniking. Ita gaamu awamayuk iak pasikakut tapanin. Ita kem yake, “Anututane wam yakapsaapa na,” ngang yanike tasikakut.
ACT 13:7 Siwan wa tasikakut tapaat gatu aminu keu wakomde tupan tapaatda notna dakngake yukumayak. Aminu wa kayuak kapa umana Sesias Polas ngang iniking. Ita natdetdetna bamban tapa. Ge Anutue wam natapnangge Banabaskat Solkat yayawakut.
ACT 13:8 Yayawamban apu iniwawat ngana gaam gatu iak ngang pasinggak kakngae natake natdetdetna kayaapa ngang natake umana takngatu Grik wam tangan Elimas ngang iniking. Ita tupan tapata baniu dua siwikge inindakngakut.
ACT 13:9 Inindakngake tasiwawan Sol umana takngatu Pol ngang kuut iniking. Itane baniaatang Waung Takwanda pukuke tapan wa inindaknganggak kapa kanggamatake anzing inikut,
ACT 13:10 “Ga Setendane kwiikngaapa. Ga sanga takeakngae iwana daknganggayak kapa. Ga kem wam yake asinggan asinggan tanzikgayak. Anutu Buyambam tapata sanga noman tasinggak kaknga gata asinggan zipbukgayak kaknga dua tenangge nataaunin.
ACT 13:11 Ge natapso. Apmanu Buyambam tapaninda gutnanggenggak. Guwan kaikata zikaawan kepi kunanga dua. Siwan komdusim yusika gatu take siwik,” ngang Polda unzing iniwan zetgaman kai kuut gweaat zikaakumayak. Kaina zikaawat apmaatde binga amin papan kaitake tukuningge wasiyawanggut.
ACT 13:12 Unzing siwan tupan tapata kake musia enakut. Buyambam tapatane wam taknga yayuk duya waaknga tasiwan kasatnake Jesue banip sikut.
ACT 13:13 Siwan Polkat aminu iat sukukikatda Pefos yot gapma teke uneta sip tangan Pamfilia kep komune kuke you gapmandu umana Pega ngang inikaing. You wanggapmane kundopbing. Kundoke ngana Jonu peke gatu Jerusalem kukut.
ACT 13:14 Ita kuwawan Pega yot gapma teke kepidupi kusika Antiok yot gapma Pisidia kep komune yuak gapmane kundopbumayak. Kundoke notna Judia nana aminda paku you wa gapmane yukinggane miti yotnane koke pukwikumayak. Miti kaning gwenunin.
ACT 13:15 Pukwike yuwawat miti yot wagwene pasinggak kapata miti wamu takngatu kendewan puyuwana aminu tapatu initewan kuke anzing yanikut, “Notna. Gitda wamu takngatu ninde musip papa kekekananga wamu kaya kakengu take ninison,” ngang yanikut.
ACT 13:16 Yaniwan Polda enake katakngita tuwanga tasiyuk anzing yanikut,
ACT 13:17 “Anutu ninu Isrel amindane baminu tupa siknga papan aminu buyambam siknga dakngaking kakngae yawa natapnim. Ginu keu ayuamang komune nana Anutue gwaukaing amin gatu Isrel nana pakapu andang yuaing amin daniwa natapnong. Baminda Isip kep komune kuke pakapuyut amin dakngake yuking. Unzing yuwawa Anututa papan aminu buyambam siknga dakngaking. Dakngake yuwawa Anututa kekeknga akngata sandepewan keu wakom teke
ACT 13:18 keu amina wena komune kuking. Undang kuke yuwawa Anututa toiwawan nakanu 40 ngang sikut.
ACT 13:19 Siwana pakapu Anututa gatayaman Kenan kep komune kuke keu wa komune yuking aminu dongu katau kuut musa kautdu takngaaya zipa kumbing. Zipa kupa Anututa keu wandaka baminde yaman paking. Yaman pake kep toik dakngake nakanu 450 ngangu une yuking.
ACT 13:20 Yuwawa wam yawa kupsa aminu kundu Anututa yaman Isrel nana amin kayuking. Tasitake kayuwawa kuku tapduu ayakapsa aminu Samuelda aakut gwen katang apbut.
ACT 13:21 “Siwan Samuel waapata kayuke tasiwawan iat nana tapatu tupan tapa keu komduine nana binga dakngake kayuwikge yawa kekekakut. Yawa kekekawana Anututa yake aminu tapatu umana Kis ngang inikinggane waaknga tapatu umana Sol ngang iniking kapa yaman tupan tapa dakngawan wam yawa kupsa aminda tasiking kaknga waomune wena sikut. Siwan ita wa aminde tangge yukut. Sol waapa Benjamindane dongune aakut tapatu. Yaman ita tupan tapa dakngake Isrel nana nakanu 40-kan kayukut.
ACT 13:22 Kayuwawan ngana Anututa gatu sandeke Devit yamukut. Yamuke Devitde anzing yanikut, ‘Jesitane waakngaapa Devit kawa ita nata sanga take nataat takngakan tawambik ngang kake ie take nataat,’ ngang yanikut.
ACT 13:23 “Sike ita tupa atasinangge yakut taknga gwa tasikut. Tasike aminu Deviu waapatane dongune aawiu tapatu nin gatanimik. Sike ninde wa nimunangge yakut taknga buya gwa aakut. Wa nimunangge yakut tapa umana Jesu ngang inikamang kapa unin.
ACT 13:24 Siwan tupanu Jesuta puyana dua tangenakut gwene Jonda Isrel nana aminu musia papa tekwamban yangga sautningge yanikapbut.
ACT 13:25 Jonu waapa puyana pasiwan puyuwikge dapaknga siwan kake anzing yanikut, ‘Ginda nae natapa aminu Anututa niman ninde apik kapae yutawakamang kapanin ngang nataaing ngana nata aminu wa yutawakaing kapanin dua. Aminu waapata masande puyana tangenawik. Siwan ita umana kayaapa dakngawan nata gatangamunangge natake kepi taukga sandekgama ngang ininangge maakanggat,’ ngangu Jonda yanikapbut.
ACT 13:26 “Siwan ninu kuupbam notna Ebrahamdane donga ba gatu dongu inata nana Anutue akgwaukamang amin. Ninde siknga natake gatanimunangge tasikut takngae Anututa wamu ninde tewan apbut.
ACT 13:27 Siwan aminu Jerusalem nana moo amikat take amikat ngangga Jesu kake ngana waapa gatanimuya apanin ngangu dua natapbing. Wa aminda Anutue wamu tupa siknga ngang yakapbing aminda matatekingu yuwatakak tapduk gwene asinggan kendeke tawake ngana yapii dua nataaing. Yapii dua natake Jesu tanguwa kupikge wam yawa kekekawan wamu wa ayakapsa aminda tupa siknga matateking kaknga buya unin aakut.
ACT 13:28 Wai takngatu ita dua tasiwan kake ngana moo siknga tanguwa kupikge Pailatde yanggamatake iniking.
ACT 13:29 Iniwa kapewan tupa siknga Anutue wam yakapbingga unzing tasiningge tematekingu tasiwa puyuwana notnata amin saamdakaneta sandeke takepu supgapbat dakatuatang teking.
ACT 13:30 Unzing teking ngana Anututa gatu tangenakut.
ACT 13:31 Tangenawan aminu iat sukuke Galili kep komuneta Jerusalem kopbing aminbamda tapduk sipdu sipdu asinggan kaking. Kake Judia aminde ie wamu yanikapmake tasikaing.
ACT 13:32 “Siwan nitda wamu takeaknga ginu anzing danikamak. Sanga tapatu tupa Anututa gatanimunangge natake bamin yaniwan kekekakut taknga gwa tasinimukut. Tasinimuke Jesu tangenawan gatanimuyaapa dakngake apbut ngang yanikut.
ACT 13:33 Kap taikamangge buk gopatang kau namba 2-aknga taikamangga anzing yanggak, ‘Apmanu nata ga tangenawa Kayuyaapa dakngake yuayak.’
ACT 13:34 Siwan Anututa Jesu akumbut katangga tangenawan kekeknga asinggan asinggan yusika dua bukatawik ngang daninggat taknga natake wamu takngatu Anututa yakutde natake yawa natapnim. Anututa anzing yakut, ‘Nata Devit inike sanga take siknga tasinangge yawa kekekakut taknga atasindamit,’ ngang yakut.
ACT 13:35 Siwan ina unzakan kau takngatuat taikamangga anzing yanggak, ‘Gata aminu gatane puya asinggan pasinggak kapa dua katewi gapmaatang bukatawik,’ ngang kau waaknga taikamang.
ACT 13:36 “Ge atnataamang. Wamu waaknga Devitde dua natake yakutden. Devitda puya Anutue bania take tasiwikge natapbut taknga tawake tasiwan puyuwana akumbut. Akupan keu bapunabam kwaiking katang kwaiwa iaya undanggan bukatakut.
ACT 13:37 Apbukatakut ngana aminu wa Anututa akumbut katangga tangenakut tapa dua bukatakut.
ACT 13:38 Unzingge notnabam. Daniwa katak natapnong. Jesu waapata ginu wai tasikaing kakngasa asandetdamuyaapa dakngake yuak.
ACT 13:39 Ge ginda Mosesde mama wam tawamba Anututa danduke ngana waiakngasa sandetdamunangge dua natapik. Siwan ngana mamin amindaka Jesue natapa Anututa initewan gatanimuyaapa dakngake apbut ngang natapa kekekawik amin Anututa kake waiakngana asandeyamik.
ACT 13:40 Unzingge katak gwautnong. Sike tupa siknga Anutue wamu yakapsa aminda matakut taknga ginde apsak. Siwan anzing matakut,
ACT 13:41 ‘Daniwa natapnong. Ginu sapdut wam yakaing aminu ayuaing komune yuke nata sanga tapatu atasiwit. Atasiwa kake ginda nangaakan natake ngana banipzaatang siakan ngangu dua natapning. Aminu tapatuta yeutdamanu baniu dua sining. Baniu dua sike undang kumnong,’ ngang matakut.”
ACT 13:42 Siwan unzing yaniwan puyuwan Polkat Banabaskatda kepman epu kunangge tasiwawat aminbamda anzing yaniking, “Gitda yuwatakak gatu ateengan gwene wamu waaknga gatu ninison,” ngang yaniking.
ACT 13:43 Yaniwan miti yot gwenu teke kuupbam epu kukenga aminbam Judia nana gatu aminu kepman nana Judia nana amindane miti wamde banip siking amikat Polkat Banabaskat unekan gatake kuking. Siwan Polkat Banabaskatda yanike Anututa puya butaya natake tasinimukut takngae banip gwaang natayutningge yanikumayak.
ACT 13:44 Siwan yuwatakak tapduu ateengan gwene aminu buyambamu you wanggapmane nana kuupbamu unekan Anutue wam natapnangge apbing.
ACT 13:45 Apa ngana Judia nana aminda kawawa maya wawi kwaapzang sikngata apu yuwawa kaking. Kake musia ie siknga maiking. Maiwa wamu Polda yanikut taknga zipbuke kaitakepu teke inisapduke yaking.
ACT 13:46 Unzing yawa kake Polkat Banabaskatda kekeknga yuke anzing yanikumayak, “Siakan siknga Anututa ninipewan apu itane wamu Judia nana ginde gamok damukumak ngana ginda dua tawake tasikaing. Unzing tasike kayuk gatukande asinggan yutnanga aknga dua taning kakngata anggaman siwan kaamang. Siwan nitda ginu dapmake aminu kepman nanae kusimde Buyambam tapaninda wamu takngatu tupa siknga ngang yakapsa aminda matakut taknga anzing nimukut,
ACT 13:47 ‘Nata ga tapa kepman yuaing amin gatayami kakaa akngane yutning. Nata ga tapa gata keu komduine nana gatayami kayuk asinggan yutning kaknga taning,’ ngang wamu waaknga ngang ninikut.”
ACT 13:48 Wamu waaknga ngang yaniwan aminu kepman nana aminda natake bania iaknga natake Anutue wamde apbakngaking. Bakngake Anututa kayuk asinggan asinggan yutningge yakut takwau banip siking.
ACT 13:49 Siwan Take apae wamu keu waopatang gwatdu kukut.
ACT 13:50 Kuwawan ngana Judia nana aminda yanikamayau kepman nana ngana Anutue akgwauking amin gatu wawi umana kaya aminu you wanggapmane nana musia pangenawa Polkat Banabaskat pasimaiking. Pasimaike keu waomune ayanikwasiking.
ACT 13:51 Yanikwasiwa kunangge tasike yemi kaiknga zipat pimapa Antiok peke uneta Aikoniam yot gapmane kukumayak.
ACT 13:52 Kuwawat Jesue pandetna Antiok yukinggane musiaatang Anututane Waung Kapata pukuke papan wa aminda asiknga bakngake yuking.
ACT 14:1 Siwan Polkat Banabaskatda yot Aikoniam gapmane kundopat sanga Antiok yot gapmaatang sikut takngakan undang sikut. Judia nana amindane miti yoakatang koke wamu take siknga yaniwat aminbamu Judia nana ba gatu Grik nana ngangu natapa siakan sikut.
ACT 14:2 Siakan siwan ngana aminu Judia nana kundu banip dua sikingga kepman nana musia pangenawa musia Jesuat nana aminde toknga natayamuking.
ACT 14:3 Toknga unzing natapa ngana Polkat Banabaskatda kekeknga yuke Aikoniamu mamaya yukumayak. Yuke wamu kekeknga siknga yanike Buyambam tapaninda butaya natanimuke tasikut takngae yawawat Buyambam tapaninda musia papa kekekawan Anutue kekeknga aknganata duya takngatu takngatu pasikumayak. Unzing papa kekekayaman tasiwatda kake Anutue wamu ayanikumayak kakngae natapa siakan sikut.
ACT 14:4 Siwan ngana maya wawi you wanggapmane nana aminda waitdeke dongu takngaaya dakngaking. Dakngake dongu takngatu Polkat Banabaskat gatayamuwawan takngatu Judia nana amin gatayamuwawan ngang tasiking.
ACT 14:5 Tasike masande kepman nana amikat gatu Judia amin gatu takena ngangga enake Polkat Banabaskat supda zipan kumzande natapbing.
ACT 14:6 Unzing natapa kake Polkat Banabaskatda peke yot gapmanggapma Likionia kep komune yuaing gapma gapmane kukumayak. You gapmandu umana Listra gatu gapmandu Debi ngang yanikaing. You wa gapmaaunekan dua kukumayak. Yot mateu yot bamu wanggamaatde yukgwasikaingge kuut akukumayak.
ACT 14:7 Yotna yotna wa sukuke Anututane wamu take aknga ngang yaniyuk tasikumayak.
ACT 14:8 Siwan aminu tapatu kepita maikutde Listra yot gapmane pukwike yukut. Tupa mingae musipganang yuke unzing kepi maiwana tangaikut. Tangaikuuneta kepi dua siknga kuwan sikut.
ACT 14:9 Siwan kepi maikuu waapata natawawan Polda wamu aminbam yaniwan natapbut. Natawawan yake Polda kepi maikuu waapa kanggamatakut. Kanggamatake kawan aminu waapata natake baniu gwa sikutna kake wa nataak kakngata meyana asandekngamunanga ngang natapbut.
ACT 14:10 Natake Polda anzing inikut, “Enake dandam tangan kekeknga yuyo,” ngang inikut. Iniwan pupzang gaman enake kepi asukukut.
ACT 14:11 Asukuwawan maya wawi kwaapzangga kawawa Polda sanga waaknga tasiwan kake Likionia wam tangan yanggamatake anzing yaking, “Aminu aapaau Anutu ngana amin siknga dakngake ninde epbumayak,” ngang yaking.
ACT 14:12 Yake Banabas kake anutu pupuknga tapatu umana Sus ngang iniking. Ita apunggak ngang natake umana Sus ngang iniking. Inike Polde wam yanggak kapa ngang kake anutu pupuknga tapatu umana Hemis ngang iniking. Ita apunggak ngang natake umana Hemis ngang iniking.
ACT 14:13 Siwan Susdane yot takwan gwenu yot wanggapma wesim yukut. Ge you wagwen kayuak kapata kake apbakngake kuku ikwawa gamanu wawi kundu gatu palawana take siknga guyakngane bungatayamunangge pake yot gapmatane gwabok bamune pakapbut. Itakan dua sike maya wawi kuupbamda apuke Banabaskat Polkatde upat tasinangge tasiking.
ACT 14:14 Siwan ngana Banabas gatu Pol ngangga sanga waakngae bania meya siknga natake tauknga awesiwat epan dewan isapmake paku aminbamde banakan yuke anzing yakumayak,
ACT 14:15 “Ginu unzingu ma tasiwam. Nikaya kepdakane nana amin siknga gin bingakan. Ge nitda apu wamu takeaknga danike ginda upau wai wa tasikaing kaknga teke musipza tapa tekwamban Anutu kayuk asinggan yuak kapaekan natapningge danikamak. Anutu waapata yekap ba kep ba gatu yanggabam gwen ba gatu sanga bamu yekapatang kepatang ba gatu yanggabapatang yuaing ngangu pasike pekut tapanin.
ACT 14:16 Ita tupa siknga kakgan siwan kepna kepna nana aminda ina banipda siwan sukuking.
ACT 14:17 Ngana gatukandekan dua kusopukut. Aho. Ninu aminu asinggan toikgak. Enane yuke sopa ninde pewan epukaing. Epu tasiwan nanamu nomanu kwaapzangu aakaing. Aawa ginu natapa take siwan musipza takawan yuaing,” ngangu yanikumayak.
ACT 14:18 Wamu unzing yanike yandaknganangge natake kwatanbam yaninggawat wikawan aminbamda yamuyamuk tasinangge natapbing kaknga ateking.
ACT 14:19 Siwan tasiwawat ngana Judia nana Antiok gapmane yukikat nana kundu gatu Aikoniam nana ngangga apuke aminbamde musia papa tekwaba sup pake muke Pol tanguking. Tanguke ita gwa kungwak ngang natake gupna kaitake epu yot gapma teke kuku kepman teking.
ACT 14:20 Teke kuwawa aminu Jesue pandetna dakngaking aminda apu tapan kopbut. Tapa kopan Polda gatu enake gatu yot gapmaatang kopbut. Koke yuwawan kwakawana Banabaskat Debi yot gapmane kukumayak.
ACT 14:21 Siwan Debi kuku aminu you wanggapmane nana miti yaniwat kwaapzangga Jesue pandetna dakngaking. Dakngawana gatu masande Listra kuke gatu Aikoniam gatu Antiok ngangu kukumayak.
ACT 14:22 Kuku Jesuat nana dakngaking aminu une nana yaninggamatake musia papat kekekawan anzing yanikumayak, “Ginda Jesue natapa siakan sikut taknga kekeknga take yutnong. Anutue gepbiatang kopnanggekamang ngana tupanu dua koyuk kepi meyana kaya tapane gamok kunim,” ngang yanikumayak.
ACT 14:23 Yanike Jesuat nana aminu you gapmanduine nana kayuya amina kundu yake peyamukumayak. Yapeyamuke Anutuekan natanggamatanangge natake nanam teke dua nayuk tumuk wam yakumayak. Yake aminu wa Jesuat nana dakngaking aminda Buyambam tapaninde gwa natapa kekekakutde tumuk wamu Jesue pengamat toimbikge yakumayak.
ACT 14:24 Siwan Banabaskat Polkat Pisidia kep komune sukusika kuku Pamfilia kep komune kundopbumayak.
ACT 14:25 Kundoke Pega yot gapmane kuke wam takngana une nana amin yanikumayak. Yanike teke uneta Atelia yot gapmane pukuke
ACT 14:26 uneta Antiok yot gapmane gatu kunangge sip tangan kukumayak. Tupa Jesuat nana Antiok you wanggapmane yuking aminda tumuk wam yake Anututa butaya natayamuke Banabaskat Polkat katak toimbikge yake puya waaknga tasisande yanipewa kukumayak. Sike puya waaknga pasiwat puyuwan gatu apbumayak.
ACT 14:27 Antiok apuke Jesuat nana you wanggapmane yuking amin yayawakumayak. Yayawambat apa Anututa gatayaman kuku puya tasikumayakge yanikumayak. Yanike Anututa gwabok ziyaman maya wawi kepman nana aminda Jesue natake gatanimuya apanin ngang gwa natapbing ngang yanikumayak.
ACT 14:28 Yaniwat puyuwan une Jesuat nana amikat gatake yuke mamaya yuking.
ACT 15:1 Siwan yuwawa ngana aminu kundu Judia kep komuneta epuke wamu Jesuat nana aminu anzing yanindamuking, “Ginu Mosesda yawan baminda tasikaking kaknga dua tawake gupza dua matandaman yutninga kakengu Anututa waiakngasa dua sandetdamanu kayuk yutning kaknga pananga dua,” ngang yaniking.
ACT 15:2 Unzing yaniwa Polkat Banabaskatda bania zikaya siknga natayamat kumzang yanganuking. Yanganuke yatapa takawana yake Polkat Banabaskat gatu aminu kunduat ngang Jerusalem kopa Jesue kwiiknga aposel ngang yanikaikat gatu aminu Jesue puya kayuya aminu yukikat wamu waaknga yatapa takawikge yaking.
ACT 15:3 Yawana aminu Jesuat nana aminda yanipewa kopbing. Dua kondoyuk keu Finisia komune sukuke gatu Sameria kep komune sukuke une nana amin yaniking. Yanike kepman aminu buyambamda Anutue wam natake musia papa tekwamban Jesuat nana aminu gwa dakngake yuaing ngang yanitake kuking. Yanitake kuwawa aminu Jesuat nana aminu keu wa komayaune yuaingga natake asiknga apbakngaking.
ACT 15:4 Siwan yanitake kuku Jerusalem kundopbing. Kundopa aminu aposel ngang yanikaikat gatu aminu Jesue puya kayuya amin yukikat gatu moo amindaaya gaak wam yaniking. Unzing yaniwana Polkat Banabaskatda yanike sanga tapatu tapatu Anututa gatayaman pasikumayakge yanikumayak.
ACT 15:5 Yaniwat ngana aminu Jesue banip sikikat nana kundu Ferisi amikat nana pauu wagwene yukingga enake anzing yaking, “Kepman nana aminda Jesue banip sikingu gupna apmatayamunong. Matayamuke Mosesde mama wamu katak tawaningge yaninong,” ngang yaking.
ACT 15:6 Siwan ngana aminu aposel ngang yanikaing amikat gatu aminu akayuya amikatda aminbam peke unekan apuke wamu waaknga ngang yanikingunin yatapa takawikge tasiking.
ACT 15:7 Tasike wambamu gwa yamapan kuwana Pitata enake anzing yanikut, “Mate notna! Ginu atnataaing. Tupa Anututa puya usanzike nimukutden. Unzing usanzike nata wamu take aknga kuku kepman nana yaniwa natake iaya Jesue natake akgatanimuya apanin ngang natapa kekekawikge yakut.
ACT 15:8 Anutu maya wawie musipnaatang akake atnataak kapata ina na kepman nana aminde musipma take nataat ngangu yeutnimunangge tasike kepman nanaeaya Waung Takwanu ninde nimukut takngakan yamukut.
ACT 15:9 Sike ninde inata taknga dua tasike ie inata taknga dua tasikut. “Aho. Jesue natake gatanimuya apanin ngang natapa kekekawan Anututa kake wasau musiaatang doke yuaunin sandeyamuke musia papan kwakayamukut.
ACT 15:10 Sike tupa baminu yuking gatu apmanu nisaaya kwatanbam tasike Mosesde mama wam tawake ngana katak dua tasike undang pimakamang. Siwan sanga wa kwatanbam tasikamang kaknga kepman nana Jesue pandetna dakngake yuaing aminda tasiningge dua yanim. Unzing tasike ginda asikaya Anutu tasiwa siwikge yakaing.
ACT 15:11 Unzingu ma tasiwam. Jesu Buyambam tapaninda kepman nana aminde butaya natake gatayaman toknga waiaknganae dua paning ngangu atnataamang. Sike ninu Judia nanaeaya butaya nataniman toknga dua panim ngangu natapna siakan singgak.”
ACT 15:12 Siwan Pitata unzing yawan pauu wa tasiking aminda wamu takngatusim paya dua yaking. Dua yake maak pake natawawa Banabaskat Polkatda yanike Anututa gatayaman kuke kepman nanae banakan katang yuke duya takngatu takngatu pasikumayakge yaniwat natapbing.
ACT 15:13 Yaniwat puyuwana Jemsda enake anzing yakut, “Mate notna! Wamu takngatusim daniwa natapnong.
ACT 15:14 Saimonda ninike Anututa aminu kepman yuaing aminu gamok gatayamukut gwene aminu unenana kundu papan itane aminabam dakngake yuaingge gwa ninik.
ACT 15:15 Siwan tupa siknga aminu Anutue wam yakapbingga wamu buya takngatukan yake anzing mataking,
ACT 15:16 Buyambam tapaninda anzing yakut, ‘Masande nata ginu gatu gatandamuke Devitdane dongu takeakwakga tasike yukinga pimakut taknga gatuna tangenawit. You pupuknga gwenda pimakut bingata yuwawan nata gatu mitapit.
ACT 15:17 Unzingu tasiwa dongu inata aminu kuupbamda nae apnangge tasining. Aminu kepna kepna nana nata ninae gwa pakum aminda nae apnangge tasining.
ACT 15:18 Wamu waaknga Buyambam tapanin tupa sikngata ie yanikut tapata unzing yanggak,’ ngang mataking.
ACT 15:19 “Siwan unzingge nata anzing nataat. Aminu kepman nanata musia papa tekwaba Anutue kukingge puya kwatanbam dua yamunim.
ACT 15:20 Aho. Teke pas sandu matake kaau anutu pupukngae upat yamukaingu dua naningge ba yasewa tasikaingge yandaknganim. Gatu kaau aminda guyakngane wapa kupik ba gatu dak ngangu dua sake naningge yandaknganim ngang yakut.
ACT 15:21 Ninu atnataamang. Tupa sikngata apu apman apunggak. Yotna yotnaatangu yuwatakak gwene miti yoakatang koke asinggan Mosesde wam kendewa atnataainggen,” ngang yakut.
ACT 15:22 Siwan aminu aposel ngang yanikaing amikat gatu aminu akayuya amikat gatu moo amin ngangga wamu takngatukan yake iatnana aminu tapaata Polkat Banabaskat Antiok kuningge paking. Tapatu umana takngaaya. Takngatu Judas gatu umana takngatu Basabas ngang iniking. Iat kuningge tapatu umana Sailas ngang iniking. Judaskat Sailaskat wa tapaayau Jesue aminda kawanu aminu noman amin tapaat sikamayaunin.
ACT 15:23 Ge pas sandu matake aminu waakwakge yamuke yanipewan kuking. Siwan pas wasanu matakingu anzing mataking, “Notna! Pas asanu ginu kepman amikat nana Jesue natake gatanimuya apanin ngang natapa kekekawan Antiok yot Siria kep komune yuak gapmane nana gatu Siria kep komune gatu Silisia kep komune yuaingge matakamang. “Ninu aposel ngang ninikaing amikat gatu aminu Jesutane puya kayuya amin dakngake yuamangga notza dakngake yuke ginde matakamang.
ACT 15:24 “Ninu atnatapbumang. Aminu nikat nana kunduta kuku ginu wamnata tasiwa satnakinggen. Wa tasikingu ninda dua yanina tasiking ngana tasiwa nangaakan nataaing. Ginda unzing natapa wamu waaknga ninde apan natapbumang.
ACT 15:25 Natake ninu paut tasike wamu yatapna takawan aminu tapaaya pake yanipena ginde kusande gwa yakumang. Aminu wa tapaat notnin siknga Banabaskat Polkat ngangu yanipena kusande yakumang.
ACT 15:26 Banabaskat Polkat wa tapaayau Jesu Krais Take apaninde umana tangenake kumnangge dua gwaukumayak.
ACT 15:27 Unzingge notnin siknga wa tapaat gatu Judas gatu Sailas ngangu ginde apningge yana yuaing. Judas gatu Sailas wa yanipena kusan tapaatda genaneta siknga danisan.
ACT 15:28 Waung Takwakat nikat unekan gatake yuke wamu takngatukan anzing yakumang. Sanga kwatanbam tasiningge dua daninim ngang yakumangge anzing tawake yutnong.
ACT 15:29 Kaau kep kwatande upau yamukaingu ma napam. Gatu kaau guyakngane wapa kupsaaya dua napam. Unzing tawake yasewa tasikaing kaknga teke noman gan yutnong. Unzing tasike sanga waaknga tawake yutninga kakengu take siknga yutnong. Unukan.” Ngang mataking.
ACT 15:30 Siwan unzing matake yama take Antiok yot gapmane pukuking. Pukuke undang kundoke aminu Jesuat nana aminu yayawamba unekan apa pas sanu take pukukingu yamuking.
ACT 15:31 Yama take wamu pas sakatang matakingu kendeke apbakngaking.
ACT 15:32 Bakngawa Judaskat Sailaskat Anutue wam yakapsa aminu tapaatda notnabamu Jesue amin dakngaking aminde wamu noman siknga kundu yanike musia papat kekekaking.
ACT 15:33 Musia papat kekekawa Antiok yot gapmane tapduu mamayasim yukumayak. Yuwatna Jesuat nana you wanggapmane yukingga gaak wam yanike aminu ayanipewan epbumayakge kopzande yaniking.
ACT 15:34 Yaniwa ngana Sailasda ina musipda siwan Antiok gatu yukut. Yuwawan Judasdakan kopbut.
ACT 15:35 Kowawan Polkat Banabaskat Antiok tapduu mamaya yukumayak. Yuke iat aminu yotoiu kunduatda aminu une nanae. Takeapanindane wamu yanindamuke aminbam yaniking.
ACT 15:36 Siwan yanike une mamayasim yukenga Polda Banabas anzing inikut, “Niu tupa kuke yot bamune Take apae wamu yanikapmatake kukumak gapma gapmane kuke kasim. Une nana Jesue aminu dakngaking aminda dasingga yuaingge kuke kata,” ngang inikut.
ACT 15:37 Iniwan Banabasda natake Jon tapan kuningge natake yakut. Jonu waapa umana takngatu Mak ngang inikaking.
ACT 15:38 Banabasda unzing natake iniwan ngana Polda anzing yakut, “Aminu waapa yanggayau tupa Pamfilia kep komune nipmamban nisatakan kuke puya tasikumakge dua tata kunim,” ngang inikut.
ACT 15:39 Iniwan kuma yukumayak. Yuke Banabasda Mak ba Jon ngang inikaking kapa tapan sip tangan Saipras kep yangga banakan yuak komune kukumayak.
ACT 15:40 Kuwawat Polda Sailas tapan Jesuat nana aminda gaak wamu yanike Anutue kataknga pengamuke yanipewa kukumayak.
ACT 15:41 Yanipewa kuke keu komaaya Siria kep gatu Silisia kep ngang yanikaing komayaune kuyuk yanitakukumayak. Yanitakuwawat Polda Jesue aminabam keu wa komayaune yuaing amindane musia papan kekekaking.
ACT 16:1 Siwan puya tasitakuke kuku you gapmaaya Debi yot gatu Listra yot ngang yanikaing gapmayaune kukumayak. Undang kuke Jesuat nana aminu tapatu umana Timoti ngang iniking. Itane minga Judia kep komune nanaapa. Sike ita Jesue banip sike yuak. Siwan itane nana Grik kep komune nanaapa.
ACT 16:2 Siwan you gapmaaya Listra gatu Aikoniam yot ngang yanikaing gapmayaune nana aminda yake Timoti waapa amin gwaang ngang yaking.
ACT 16:3 Yawa Polda Timotie naat gatake kunanga ngang musip gwaang natapbut. Natapan ngana Judia nana you wanggapmaaune yuaingga atnatapbing. Timotie nana Grik kep komune nana aminden. Unzingge Polda Timoti take Judia nana aminda ie semna natangamunanga ngang natake sanga Judia nana aminda atasikaking kaknga tawake gupna matangamukut.
ACT 16:4 Matangamuke take yot gapma gapmane kuke wamu tupa aminu aposel ngang yanikaking amikat gatu aminu akayuya amin yuaikatda aminu kepman nana amin yaniningge Jerusalem yawa kekekakut taknga Jesue banip siking aminu yaniking. Yanike wamu waaknga tawake yutningge yaniking.
ACT 16:5 Yaniwa wa yaniking kakngata Jesue aminabamde banip papan kekekaking. Papan kekekawa aminu kunduat gunzitbamu asinggan asinggan kwaapzang apuke Jesue natake gatanimuya apanin ngang natapa kekekakut takwakga buyambam siknga sikut.
ACT 16:6 Siwan uneta paku keu komaya Frisia kep gatu Galesia kep ngang yanikaing komaaune kuking. Kuwa Waung Takwanda dua kapewan Anutue wamu Esia kep komune yakapbing.
ACT 16:7 Siwan uneta paku Misia kep komdane mak kakngane kuke Bitinia kep komune kunangge tasiking. Tasiwa ngana Jesue Waung Kapata umuyamukut.
ACT 16:8 Umuyaman Misia kep kom yapbike Troas yot gapmane pukuking.
ACT 16:9 Troas kundoke zikaane yuke Polda mia takngatu anzing kakut. Aminu tapatu Masedonia kep komune nanata inengan yuke kekeknga anzing inikut, “Apu Masedonia kep komune gatanimuyo,” ngang inike yuwan kakut.
ACT 16:10 Kawana ninu une kuku wamu take aknga ngang yanikapnimde Anututa ninik ngang natapbumang. Natake Masedonia kep komune zetgaman kunangge pandakngakumang.
ACT 16:11 Siwan ninu Troas teke sip gwekatang koke kusika keu komdu yangga banakan yuak kom Samotres ngang inikaing komune kundopbumang. Kundoke petna kwakawan kusika you gapmandu umana Niapolis ngang inikaing gapmane kundopbumang.
ACT 16:12 Kundoke uneta kepidupi kuku you gapmandu umana Filipai ngang inikaing. Une kundopbumang. Siwan Masedonia kep komune yot gapma gapma buyambam yuking ngana you wanggapmata you matek matekngae kuyana yuakut. Siwan you wanggapmane amak aminu buyambamda maa nana kep komdu umana Rom ngang inikaing komune paku Filipai yuking.
ACT 16:13 Siwan ninu you wanggapmane yusikanga yuwatakak tapduu gwendune you wanggapma teke yangga apane pukuke kwaimune kukumang. Kusika Judia nana aminu kunduta tumuk wam Anutu ininangge unekan apu yuaing komde tawakumang. Tawake kawatna maya kunduta unekan yuwa kake iat pukwike yanikumang.
ACT 16:14 Yanina natapbinggane tapatu umana Lidia ngang iniking. Itane yotna Taiataira. Siwan waapatane puya anzing. Tauk gamana siknga yaman usikaing. Siwan ita asinggan asinggan Anutue inindatake yukut. Siwan Polda yawan waapata natapan Anututa bania tangenawan baniane siakan ngang natapbut.
ACT 16:15 Natapan itane yot gwekatang yuking aminu kuupbapat iat yangga sauyamukut. Sauyamana maya waapata anzing ninikut, “Ginu nandupa na Buyambam Tapaninde siakande siknga baniu siwa nandukengu yotna gwekatang kopa naat yutnim,” ngang niniwan kekekakut.
ACT 16:16 Siwan tapduu gwendune tumuk wam yananga komune kunangge kukumang. Kuwatna maya mateu tapatu puya moo kwatan siknga imuke kayukingu tapatuta kepiapane nindupbut. Maya mateu waapa datdapna kayaapa ge yukengu wamu kusopuknga ngana ayakapmanggaunin. Maya mateu waapata datdap siwan wamu takngatu takngatu inikwaikakingunin. Inikwaiwanana datdapda maya waapae genaneta wamu buya siknga ngang yakapmakakut. Unzing yakapmayamuwawan take maya mateu waapa toipmaikakingu mani buyambam siknga pakaking.
ACT 16:17 Maya mateu waapa Polkat nikat niwakut. Niwake ninde asinggan siknga anzing yanggamatakut, “Aminu aakwau Anutu enane siknga yuak kapatane puya amina. Aminu aakwakga kayuk asinggan yutnanga akngae ninikaing,” ngang yakut.
ACT 16:18 Unzingu gunzitbamu asinggan asinggan niwayuk yanggamatawan Polda semna siknga natapbut. Natake tapan tekwamban datdapna kayaapa yuke waapa anzing inikut, “Nata Kraisde umande ganinggat. Maya waapa teke kungga,” ngang inikut. Iniwan datdap tapata maya mateu waapa zaatgaman teke kukut.
ACT 16:19 Teke kuwawan maya matek kayukingga kawa mani pakaingge kepi gwa sopukutna kake Polkat Sailaskat apanggaganuking. Panggaganuke kaipake aminu yotde akayuya dakngake yuaingge pake paut tasikaing komune pake kuking.
ACT 16:20 Pakuke anzing yaniking, “Aminu aapaau Judia nana. Siwan you anggapmane apuke wai takngatu takngatu pasimayak.
ACT 16:21 Sanga kundu ninu Rom nana aminda dua natake dua pake yawananga yakapmamayak,” ngang yaking.
ACT 16:22 Yawawa maya wawi moo amindaaya Polkat Sailaskatdekan temanggaganuke yaking. Yanggawa akayuya aminda tauknga waitdeyamuking. Waitdeyamuke nap takngata ipmapa zipningge yaking.
ACT 16:23 Yawa nap takngata ipmapa zipmapa kaautde pakuking. Pakuke kaaut yot gwen kayukut tapa Polkat Sailaskatde kai kekeknga siknga tapikge iniking.
ACT 16:24 Wamu kekeknga siknga unzing iniwa natake paku yoyan siknga koke katapsanu kepi wamakusinangge pasikingga wamakusiyamukenga epuke gwabou gitna tepan kusikut.
ACT 16:25 Siwan unzing petakumat dakane Polkat Sailaskatda tumuk wamu yake Anutue kapna taikumayak. Taiwawat kaaut amin notna kuupbamda atnatayuking.
ACT 16:26 Natayuwawa miyamunu zetgaman sikut. Sike kaaut yot gwendane gwak daka daka papan taiking. Papan taiwawan kaut yot gwendane gwabok gaka daka ina zipamaba kuking. Zipamaba kuwawa kaautde yuking aminu senda kuupbam wamapeking ngana ina waipimaking. Waipimamba ngana dua epu datang kuking.
ACT 16:27 Aho. Unzing yuwawa aminu akayukut tapata enake kaautde gwabok gakandaka kwangga yuwa kakut. Kake kaautde yuking aminu kuupbam epu gwan ba kuing ngang natake paip takngana kaiwan akopan ina make kumnangge tasiwan
ACT 16:28 ngana Polda kake anzing yanggamatakut, “Ae! Gupba ma tasiwi maiwan. Ninu kuupbam andang yuamang,” ngang yakut.
ACT 16:29 Yawan natake aakatapdekan yateke kaaut yot katang isapmake kopbut. Koke gwauke dandai yamuban Polkat Sailaskatda yukumayak komune pimakut.
ACT 16:30 Pimake gatuna enake epu kepman pake kukenga anzing yanikut, “Na dasing tasiwa Anututa gatangaman waiaknganae dua kupit,” ngang yanikwaikut.
ACT 16:31 Unzing yanikwaiwan yake anzing inikumayak, “Jesu Buyambam tapaninde natake gatangamuyaapa unin ngang natapi kekekayok. Unzing natapi kekekawanu kayuk asinggan yuwiyak kaknga Anututa akgamik. Waakga yapaka kuut paan unzakan natapa kekekawanu kayuk yutning kaknga iaya apaning.”
ACT 16:32 Ngangu wamu waaknga ngang inike Buyambam tapaninde wamu iat gatu aminu yotnane yuking amikat yanikumayak.
ACT 16:33 Yaniwatna zikaa wagwenekan watana nap takngata zipa dakngakinggane daknga yangga sauyamukut. Sauyamana waaknga yapana kuutpaanda Jesue banip gwa sikingu yangga sauyamukumayak.
ACT 16:34 Sauyamatna Polkat Sailaskat pake yotnane pakoke nanam unzanziyaman nakumayak. Nawawat waaknga yapana kuut paanda natake Anututa undang yuak ngang natapa kekeknga sikut takngae natake asiknga apbakngaking.
ACT 16:35 Apbakngake yuwawa akwakakut. Kwakawan yotde kayuaingga yake, “Aminu wa tapaaya sandepewa kuson,” ngang yake taukdapak kundu yanipewa apu kaaut yotde kayukut tapa wamu waakngakan iniking.
ACT 16:36 Iniwa natake ita kuku Pol anzing inikut, “Take aminda take dapmaba kusande yaing ge kaautde dua yutzan sike take musipza wikawan kumakan kukason,” ngang yanikut.
ACT 16:37 Siwan unzing yaniwan ngana Polda taukdapau anzing yanikut, “Naat Sailaskat Rom nana ngana wamu noman siknga takngatu dua yake wainiu aaknganin ngangu dua kake ngana aminbamde kaine moo siknga ipmapa nisipmake kaautde nipmaking. Siwan ngana apmanu asikaya akusopuke ninikwasitnangge tasikaing? Aho. Dua siknga kusim. Ane siknga yuwatda apu ina siknga epu niu pake sandepewa kusim,” ngang yanikut.
ACT 16:38 Ngang yaniwana taukdapakga wamu waaknga take yot toikge kuke wamu wa Polda yakut takngakan yaniking. Yaniwa niu aminu Rom nana ngang yakumayak kaknga natake akgwauking.
ACT 16:39 Akgwauke kuku, “O ninda wai siknga tasikumang,” ngang yaninggakake epu pake kuking. Epu kepman kukenga you wanggapma teke kusande yaniking.
ACT 16:40 Yaniwa kaautde yukumayau teke Lidiatane yot gwende kukumayak. Kuke notna Jesuat nana aminu kake musia papat kekekawana peke akukumayak.
ACT 17:1 Siwan Filipai yot gapma teke kusika Amfipolis yot gapma yapbike kuku Apolonia yot gapmaaya ayapbike Tesalonaika yot gapmane kundopbumayak. You wa Tesalonaika gapmaatangu miti you Judia nana amindane gwendu kaya.
ACT 17:2 Ge Polda atasinggak kaknga tawake tasike miti you wagwekatang tapdukngane kopbut. Koke yuwatakak tapduu gweaat gwenduat ngang katangu ita yanike Anututane wamda anzing yanggak ngang yanikut.
ACT 17:3 Yanike Anututa aminu tapatu tapan Krais gatanimuyaapa dakngake apik kapata kungwake enawikge yakapsa aminda tupa siknga mataking ngang yeuyamuke yanikut. Yanike, “Aminu wa Anututa tapan Krais gatanimuyaapa dakngake apik kapa daninggau Jesu unin,” ngang yaniwan natapbing!
ACT 17:4 Yaniwan natake aminu maya wawi kundu Judia nana aminda siakan ngang natapa kekekawan kuke Polkat Sailaskat gatapa tasiking. Siwan aminu Grik nana Anutue akgwaukingu kundu gatu maya buyambamu umana kayaakwau kuutda siakan ngang natake Polkat Sailaskat gatapa tasiking.
ACT 17:5 Gatapa tasiwawa ngana Judia nana aminu banip dua siking aminda kake semna natayamuking. Natayamuke aminu waiaknga tasikaing amin patakuke yapapa aminu kwaapzang sikut. Siwan you wanggapmane nana kuupbamdane musia enawan kuku Polkat Sailaskat yawake tasike Jesonde yot gwenu atapa basikut. Tapa basiwan koko Polkat Sailaskat kaipakepuke zipnangge koko ngana yawamba maiking.
ACT 17:6 Yawamba maiwan peke yotoiu Jeson gatu Jesuat nana kundu ngang unekan pake you wanggapmatane tupan tapae kaipake kuking. Kuke wamu temapa anzing iniking, “Aminu kepna kepna kuke waiaknga tasitakukaing aminda pakapu you ayuamang gapmane apundopa Jesonda yotnane pakopbut.
ACT 17:7 Siwan Sisa tupan tapanindane wamu dua gwaamuke atzipbukaingunin. Atzipbuke Sisa tupan tapanin awia tapatukan yuak ngana aminu tupan amin tapatuat umana Jesu ngang inikaing. Ita ayuak ngang yakaing,” ngang iniking.
ACT 17:8 Iniwa yot kayuak kapaat gatu aminbamu kuutda meya siknga natake asatnaking.
ACT 17:9 Asatnake yot kayuak kapata usanzike baiim opis tasikenga epukuning ngang yaniwan Jesonkat notnaatda manita opis usike epu kuking.
ACT 17:10 Siwan zikaa wagwenekan notna Jesuat nana aminda Polkat Sailaskat yanipewa Beria yot gapmane kukumayak. Kuku kundoke Judia nana amindane miti yot katang tapdukngane kopbumayak.
ACT 17:11 Siwan Judia nana aminu une yuaingu Tesalonaika nana aminda mayaknga umuke tasiking kaknga binga dua tasiking. Aho. Beria nana aminda maaknga pake yuking. Maak pake yuwawa miti wamu yaniwat natake takesiknga natapbing. Natake Anutue wamu tupa siknga ngang yakapsa aminda mataking kaknga gunzitbam asinggan asinggan siakan yakamayak ngang yakengu asinggan kendeking.
ACT 17:12 Unzing natake kendeke natapa siakan sikut. Judia nana aminu buyambam gatu aminu Grik nana umana kayaakwak mayaat wawiat ngangga siakan ngang natapa kekekawan aminu kwaapzang sikut.
ACT 17:13 Unzing siwawa Judia nana Tesalonaika yot gapmane yukingga natapa Polda kuku Beria yot gapmane Jesue wam yaninggak ngang natapbing. Natake Tesalonaika teke Beria kuking. Kuke aminu unenana yaniwa bania enawa Pol tangutnangge tasiking.
ACT 17:14 Tangutnangge tasiwawa ngana notna Jesuat nana aminda Pol zetgaman initewa yanggabamde kwaim tapane pukukut. Pukuwawan ngana Sailaskat Timotiatda Beria yot gapmane yukumayak.
ACT 17:15 Yuwawat aminu Pol take kukingu take Atens yot gapmane taku teking. Taku teke gatu Beria kunangge tasiwa Polda yake, “Ginu kuku Sailaskat Timotiat yanipewa nae zetgaman apzon,” ngang yaniwan teke kuking.
ACT 17:16 Siwan Polda Sailaskat Timotiatde you Atens gapmane yuke kawawan anutu pupuknga kwaapzang siknga tasikinga kake musia maikut.
ACT 17:17 Musia maiwan miti yot katang koke wamu Judia nanaat gatu aminu kepman nana Anutue muna puke inindatakaikat ngangu yaniwan ngana ie asapdukngamuking. Sike kwep apman paut tasikaing kokomune aminu une apuke yuaingu wa amikaya kuut yanikut.
ACT 17:18 Siwan aminu dongu takngaaya umana Epikurian taknga gatu Stoik taknga ngang yaniking takngaau natdetdet inata aknga tawake tasiking. Sike sipdune dongu wa takngaakat nana kunduta apu Polde sapdukngamuke anzing yaking, “Aminu wa tapdukbam asinggan yanggak kapata wamu dasing kaknga yanangge yanggak,” ngang yaking. Yawawa gatu kunduta anzing yaking, “Asikaya anutu kundu you gapmanduine nanatane wam ba yanggak,” ngang yaking. Sike Polda wamu Jesue yanike ita akungwake gatuna gweakutde yanikut takngae natake unzingge anutu yot gapmanduine nanatane wam takngae natake yanggak ngang yaking.
ACT 17:19 Yasika Pol take kaunsilde take kuking. Kuke anzing inikwaiking, “Ninu wamu dangem siknga dua nataamangu gata yanggayak kaknga natapnim.
ACT 17:20 Wamu gata yanggayak kaknga natapna inata kundu siwan asatnakamang. Satnake siwan wamu waakngatane yapii siknga natapnangge nataamang,” ngang iniking.
ACT 17:21 Sike aminu Atens nana gatu maata pakapu Atens yuakingu sanga takngatu tangatu dua tasikaking. Tapduk bamu yuakingu yuke wamu kayukgan yake gatu kayukgan natake yuakingunin. Unzingge natapa siwan wamu Polda yakut takngae yapii siknga natapnangge inikwaiking.
ACT 17:22 Inikwaiwa Polda wa aminde kaunsilnae kaine anzing yakut, “Ginu Atens nana dandupa sanga kuupbam gitza siknga tasiwa kaat.
ACT 17:23 You ginda ayuaing gapma tapa sopuban keu muna puke yanindatakaing kokomu gwa kakum. Kake komdune sek gomduta yutnanga komune anzing matakinga kakum. Upau anutu umana dua nataamangu tapatue andang imunangge ngang mataking. Sike ginda dua natake moo siknga ngang inindatakaingu nata apmanu ie wamu daniwa nataaing,” ngang yanikut.
ACT 17:24 “Anutu waapata kepdaka tasike teke sanga kuupbam kepdakane yuaing kaya itakan tasikut. Kepat enane yuaikatdane toiknga Anutu buyambamu waapakan. Sike Anutu waapa yot takwanu amindakan mitakaing gwekatangu dua yuak.
ACT 17:25 Sangae dua dapmanggak. Dua dapan kake aminu tapatuta katakngata gatangamunanga dua. Anututa kayuk yutnimde gatanimuke Waung Kakngana ba sanga kuupbam ngangu aminbamde yamunggak.
ACT 17:26 Sike ita tasiwan aminbamu bapuna tapatutanetakan zakngi aake dongu inata inata siwan usanzike keu anggwene pewan kundekut. Unzing pewan kundewa tapduknga anzing siknga ayutnim komde yawan yuamang. Sike keu ayutnim komde tuwanga kuut yawan yuamangu wa tupata natapan yukut.
ACT 17:27 Unzing yuke Anutue tawaningge ina tupakande yawan yukut. Tawamba noman siwanu tatawataku Anutu akaning. Tatawatakuke kanim ngana Anututa maa dua yuak. Ninde wesim siknga yuak.
ACT 17:28 Unzing yuakge ninu kayuk yuke sukuke yuamang. Unzing natdetdetna bambanu gikatnana kunduta anzing gwa yaking, ‘Nikaya itane waaknga siknga dakngake yuamang.’
ACT 17:29 “Siakan! Ninu Anutue waatdakana. Ge Anutue natapa aminu datdetdetna bamganda sek tasinangge natake katapgom pake pasike ba gol ba silwa pake sake pasike ba supgwen pake temanggasitakoopa sek dakngakaing unin kake Anutu anin ngang ma natapam.
ACT 17:30 Tupa aminu katak dua natake sekge yanindatawanu Anututa kake kakgan sikut. Kakgan sikut ngana apmanu aminu kuupbam yotna yotna yuaingu anzing yaninggak, ‘Ginu musipza tapa tekngwamsok,’ ngang yaninggak.
ACT 17:31 Tapduu gwendu gwa yawan yukut gwene apme epu aminbamu noman gan usanziwik. Wa usanziwiu aminu tapatu Anututa tapan tapduu gwa tekut gwene aminu wa takut tapata usanziwik kakngae natapna siakan siwikge natake aminu wa usanziwiu akumbut katangga gatu tangenakut,” ngangu Polda yanikut.
ACT 17:32 Yaniwan natake aminu tapatuta akungwake enakut ngang yanikut takngae kupsaapa dasing enawik ngang yake sapdut yaking. Yawawa ngana kunduta yake, “Sipdune wamba gatu yawi natapnim,” ngang iniking.
ACT 17:33 Iniwa ngana Polda paut tasikaing amin peke akukut.
ACT 17:34 Kuwawan ngana aminu kundu Pol tawake Jesue natake gatanimuya apanin ngang natapa kekekakut. Unzing natapa kekekakuu tapatu kaunsil amikat nana umana Daionisias ngang iniking. Sike tapatu maya tapa umana Damaris ngang iniking. Tapaayakan dua sike aminu kunduatda unzingu baniu siking.
ACT 18:1 Siwan Polda Atens yot gapma teke uneta Korin yot gapmane kukut.
ACT 18:2 Kuku aminu Judia nanaapa Pontas kep komune nana tapatu umana Akwila ngang iniking. Sike maatna Prisilaat Itali kep kom teke uneta apbumayak. Wa apbumayau aminu tupan tapa Klodiasda yake, “Ginu Judia nana ane Rom yot gapmane ma yuwam,” ngang yake yanikwasiwan teke apbumayak. Apuke yuwatna kuke Polda kanangge kukut.
ACT 18:3 Puya amin notna ge kuwan unekan gatake yuke puya pasiking. Mani kaitnangge seldaka matake bupbing. Siwan yotnane takopat unekan gatake yuke unzing pasiking.
ACT 18:4 Pasike yuyuk yuwatakak tapduk gwene Polda Judia nana amindane miti yot katang asinggan kopbut. Koke yanike notna Judia nana gatu Grik nana aminda siakan ngang natapnanga akngae pasike yaniwan musia enatning ngang yake yukut.
ACT 18:5 Siwan unzing yuwawa masande Sailaskat Timotiatda Masedonia kep kom teke uneta epbumayak. Epuke kawawat Polda notna Judia nana yaninangge take siknga natake Jesu Anututa tapan Krais gatanimuyaapa dakngake puyana tasikutde kwep apman yaniwawan kakumayak.
ACT 18:6 Unzing yaniwan ngana yake wamu wa asapdukngama yemi kaiknga atzipan pimambana anzing yanikut, “Ginu waiakngasae toknga pakengu gisae sanga. Nae sanga dua. Ge na apmanu aminu kepman nanae kuwit,” ngang yanikut.
ACT 18:7 Yanike aminu wa peke aminu kepman nana tapatuta yotnaatang takopan undang yanike yukut. Sike aminu waapa umana Tisias Jastas ngang iniking. Ita Anutue inindatanggaunin. Itane yotna Judia nana amindane miti yot gwene wesim siknga yuak.
ACT 18:8 Siwan miti you wagwende kayuya aminu umana Krispas ngang iniking. Iat ina paakatda Jesu Buyambam tapaninde natake akgatanimuya apanin ngang natapa kekekakut. Siwawan aminu Korin yot gapmane nana aminu kwaapzangga Polde wam natake siakan ngang natapa kekekawan yangga sauyamuking.
ACT 18:9 Siwan zikaa gwendune Polda mia takngatu kakut. Kawawan Buyambam tapaninda anzing inikut, “Ma siknga gwaumbim. Dua gwauke genda ma umumbim. Sike wama asinggan yanikapso.
ACT 18:10 Na gaat yutzim. Yuwatda aminu tapatuta enake ga tasiwan mainanga dua. Aminu buyambamu you anggapmaatangu papa nae aminabam daknganing,” ngang inikut.
ACT 18:11 Iniwan mia waaknga kake you wanggapmane nakanu gwendu gatu kautdu ngang yuke aminu unenana Anutue wam yanindamukut.
ACT 18:12 Siwan yanindamuwawan waopatang aminu tapatu umana Galio ngang iniking. Ita Akaia kep Polda yukut komune nana aminde tupan tapa dakngakut. Dakngawana Judia nana aminu kunduta enake Polde iwana dakngaking. Dakngake Polda wam yawikge take tupan tapae takuking.
ACT 18:13 Takuke anzing iniking, “Aminu aapata ninu Anutue inindatake nindane pasap wam sandetnimde ninindatdaukgak,” ngang iniking.
ACT 18:14 Iniwa Polda Galio asininangge tasiwan ngana Galiota Judia nana amin anzing yanikut, “Aminu aapata wai takngatu tasikut gamu wamza atnatapam.
ACT 18:15 Sike apu sanga mitiakngasae yanganuke yakaingu nata dua usanziwit. Gisa tapa takayok,” ngang yanikut.
ACT 18:16 Yanike ayanikwasiwan kuwawa you wanggapmane nana aminda Judia nana amindane miti yot gwende kayuya aminu umana Sostenis ngang iniking. Aminu waapa tanggaganupa wesipa wam usanzikgakomune tanguking. Wesipa tanguwa Galiota kake ngana kakgan sike yukut.
ACT 18:18 Siwan Polda Korin yot gapmane mamayasim yukut. Yusika notna Jesuat nana aminu gaak wam yanike sip gwendu Siria kep komune kunangge tasikut gwene koke kukut. Inatakan dua kukut. Sike Prisila gatu apna Akwila ngangga unekan gatake kuking. Siwan dua kuking komune Senkria yot gapmane yuke Polda sanga tapatu Judia nana aminda miti aknganane asinggan tasikaking kaknga tawake wamu takngatu yawan kekekawana kusia kwaipuya pasikut.
ACT 18:19 Pasikenga teke kuking. Kusika Efesas yot gapmane kundopbing. Kundoke Polda tapdukngane Judia nana amindane miti yot katang koke wamu yanikut.
ACT 18:20 Yaniwan paut tasike yusika Judia nana aminda une mamaya yuwikge iniking. Iniwa ngana wa aminde ie wamu dua tawake
ACT 18:21 kunangge tasike gaak wam yanike anzing yakut, “Anututa gatuna asaapitde yawana nata ginde apit,” ngang yanipeke sip gwene koke Efesas yot gapma teke kuwawan Prisilaat apna Akwilaatda undang yukumayak.
ACT 18:22 Yuwawat kusika paku sip gwenu Sisaria yot gapmane kundoke une yukut. Yuwawan Polda epuke koko Jesue aminabamu Jerusalem yot gapmane yuking aminu yanimbakngakut. Yanimbakngapeke Antiok yot gapmane pukukut.
ACT 18:23 Siwan pakepu Antiok yot gapmane mamayasim yukenga teke kukut. Teke kepdakane keu komaya Galesia kep gatu Frisia kep komune ngang kukut. Undang sukuke notna Jesuat nana aminu kake musia papan kekekaking.
ACT 18:24 Siwan Judia nana aminu tapatu Aleksandria yot gapmane aakuu tapatu pakapu Efesas yot gapmane yukut. Umana Apolos ngang iniking. Ita Anutue wamu yakapsa aminda tupa siknga mataking kaknga katak siknga nataakut. Sike wamu noman gan yakakut.
ACT 18:25 Aminu kunduta noman inindamuba musia enawan aminbamu yanindamunangge take siknga natake yanikut. Yanike aminbamu sanga Jesuta tasikutde noman siknga ngang yanikakut. Yanike ngana Jonda yangga sauyamukut takngaekan atnataakut.
ACT 18:26 Sike ita dua gwauke Judia nana aminde miti yot katang koke wamu yanikut. Yaniwan Prisilaat apna Akwilaatda natake Apolos take yotnane takoke Anututane kepi noman siknga aknga yeukngamukumayak.
ACT 18:27 Yeukngamat puyuwana ita Akaia keu komune yatupmake kunangge yakut. Kunangge yawan notna Jesuat nana aminu Efesas yukingga kuke musia tapa kekekawan pas sandu notna Jesuat nana aminu Akaia kep komune yuaingge Apolosda apanu katak toitnong ngang mataking. Siwan teke uneta yanggabam yatupmake Akaia kep komune kundopbut. Kundoke aminu unenana Anututa butaya natake gatayaman Jesue natake akgatanimuya apanin ngang natapa kekekakut takwak kake Apolosda katak siknga gatayamukut.
ACT 18:28 Gatayamuwawan Judia nana aminda sapdut wamu takngatu takngatu yaking. Yawa ngana Apolosda kekeknga siknga wamu gutong gutongang yakingu aminde kaine atzipmapapaakusikut. Anutue wamu tupa siknga ngang yakapsata mataking kaknga kendeke getanganggan yanike Jesu Anututa tapan Krais gatanimuyaapa dakngake pasikut tapa unin ngang yeuyamukut.
ACT 19:1 Siwan Apolosda Korin yot gapmane yuwawan Polda puya pasitakuke tawan katang kongepuke sukusika you Efesas gapmane kundopbut. Kundoke Jesue pandetna aminu kundu undang yuwawa kakut.
ACT 19:2 Kake anzing yanikwaikut, “Tupa ginu Jesue natake baniu ie siwa Waung Takwanda banipzaatang pukuke papan musipza enaking ba dasing,” ngang yanikut. Yaniwan, “Aho. Waung Takwan Tapata yuakge dua nataamang,” ngang iniking.
ACT 19:3 Iniwa yake anzing yanikut, “Unzing ngana dasing kakngae natake yangga sautdamuking,” ngang yanikwaiwan, “Ninu wamu Jonda yakut takngae natapna yangga sautnimuking,” ngang iniking.
ACT 19:4 Iniwa yake anzing yanikut, “Tupa Jonda yanike aminu musia papa tekngwamban yangga sauyamikge yanikut. Yanike aminu masande apik kapae natake gatanimuyaapa unin ngang natapa kekeknga siwikge yanikut. Sike aminu waapa Jesu,” ngang yanikut.
ACT 19:5 Wamu waaknga natake Jesue natapa siakan siwan Buyambam tapaninde umana aknganae natake yangga sauyamukut.
ACT 19:6 Sauyamuke Polda katakngi kusiane wasiyuk tumuk wam yake Anututa gatayamikge yawawan Waung Takwanda musiaatang pukuke papan musia enawan aminda wamu dua nataaing ngana keu komduine nana amindane wam yamapa kukut. Yake Anutue wam tupa siknga ngang yakapbing takwakga binga yamapa kukut.
ACT 19:7 Aminu wa yamapa kukuu katau kuut musaat gatu kepianganu tapaaya ngangga yamapa kukut.
ACT 19:8 Siwan Polda musia gitna yuke miti you notna Judia nana amindane gwene koke Anututa itane kekeknga aknganata panipmamban yutnim ngangge yanikut. Yekau gweaat gwenduat ngangu yuwatakak gwene asinggan yaniwawa ngana asapdukngamuking.
ACT 19:9 Yaniwan sapdukngamuke kunduta asiknga bitake banip dua sike paut wa tasiking komune Buyambam tapaninde kepi tawake tasikumang kakngae wamu sapdukngamuking. Unzing sapdukngama Polda pandetna dakngakingu papan akuking. Kuke kwep apman aminu tapatu umana Tiranas ngang iniking. Ita you ayanindamukakut gwene koke wamu undang yanindamukut.
ACT 19:10 Yanindamuwawan nakanu gweaya sikut. Siwan aminu kep wa komune yukingu notna Judia nana amikat gatu keu waomune nana amikatda Buyambam tapaninde wam taknga atnatapbing.
ACT 19:11 Siwan Anututa kekeknga aknganata Pol gatangaman duya takngatu takngatu pasikut.
ACT 19:12 Pasiwawan aminda pakapu tauk sasanzim ba puya tauk gogom ba ngangu Polde gupnane wasiking. Wasike aminu mait sikingge pake kuwa maitna wena siking. Siwawa waungu wai musiaatang pukuke pakingu epu tupakande kuking.
ACT 19:13 Siwan Judia nana aminu katau kuut musa kautdune tapaat nana tapatu umana Siva ngang iniking. Sike Siva waapa Judia nana amindane miti puyae tupan tapa dakngake yukut. Siwan aminu waakwakga asinggan sukuke waungu wai aminde musiaatang pukuke pakingu sandeyamuking. Sike sipdune waungu wai tapatu sandetnangge tasike Jesue umana akngane inikwasitnangge anzing iniking, “Aminu umana Polda Jesu ngang wam yake wamnaaya yakapmanggak kapae kekeknga akngane ganikamang,” ngang yayuk tasiking.
ACT 19:15 Tasinggawa ngana waungu wai waapata anzing yanikut, “Jesue na atnataat. Na Poldeaya atnataat. Sike ginu mamin,” ngang yanikwaikut.
ACT 19:16 Yanikwaikenga aminu wa musiaatang pukuke takut tapata aminu waakwak papan kopan wesipa boom takngaaknga zipmapa tauknga wesiyamukut. Wesiyaman you wagwenu teke kwangga datang kuking.
ACT 19:17 Unzing tasiwan datang kuwawa aminu Efesas yot gapmane yukingu Judia nanaat Grik nanaatda natake Anutue akgwaupmapan kukut. Gwauke unetaya Jesu Buyambam tapaninde umana aknga yatangenawa buyambam siknga sikut.
ACT 19:18 Aminu kwaapzangga Jesue natake gatanimuya apanin ngang natapa kekeknga sikuu sanga sanga pake apuke gutongana tasikakingge yakapa puyukut.
ACT 19:19 Kundu gaam wamawawa kundu gom zipmawawa kundu kona ba iak ba pitatapa pasiwawa ngang tasikakingu aminbamde kaine pakapu buu waiaknga pasinangge natdeke matakaking gogom pakapu wesipa saking. Wa wesipa sakinggane buyana usikingu sandu sandusim kendekgawa koko K50,000 sikut.
ACT 19:20 Siwana Buyambam tapanindane wam takngata buyambam sitakuke kekeknga siknga sikut.
ACT 19:21 Siwan masande Polda akunangge natapan kekekakut. Natake kep komaya Masedonia kep gatu Akaia kep ngang yanikaing komaane sukutake kuku uneta Jerusalem kunangge natapan kekekakut. Natake anzing yakut, “Jerusalem kukenga Rom yot gapmane asiknga kuwit,” ngang yakut.
ACT 19:22 Ngang yake aminu tapaaya Timoti gatu Irastas gatangamukamayau waapaau tupan yanipewan Masedonia kep komune kukumayak. Yanipewan kuwawat Polda inatakan Esia kep komune mamayasim yukut.
ACT 19:23 Yuwawan aminu buyambamu Buyambam tapaninde kepi akngae iwana dakngawa sanga meya siknga tapatuta apbut.
ACT 19:24 Ge aminu tapatu umana Dimitrias ngang iniking. Ita suu waenga kaya silwa ngang yanikamangunin pake sawan nguyukawa anutu pupuknga tapatu umana Atemis ngang iniking. Anutu waapatane yot takwan gwende wee uneta pasikakut. Pasiwan kekekawa paku pewawan manita usikaking. Unzing pasiwawan aminu natdetdetna babanda iat gatake puya waakngakan pasikingga uneta mani buyambam siknga pakaking.
ACT 19:25 Ge aminu waapata aminu buyambamu wa gatangamukikat gatu puya buya takngatukan pasikikat ngangu unekan yayawamban apbing. Apana anzing yanikut, “Mate. Atnataaing. Manibaminu puya nisa apasikamang uneta pakamang.
ACT 19:26 Sike Polda aminbam yanike, ‘Anutu kataknginda pasikamangu anutu siknga dua,’ ngang yanikut. Yanike maya wawi kwaapzang pake musia papan tekwaba Efesas yot gapmane gatu Esia keu kwaapzang komune tasitake sukukut. Gisa gwa kake nataaing.
ACT 19:27 Sike wamu waakngata sitakuke kuwawanu ninu puya pasikamang kakngae sapdukngamuning ngangge natagwauke daninggat. Sapdukngamuke Atemis anutu kekeknga siknga apanindane yot takwan kawa moo gwen binga siwik. Sike ninu Esia kep komune yuamang gatu aminu kepna kepna nana amindaaya ie gwetake inindatakamang kapatane umana akngata apmainangge singgak,” ngang yanikut.
ACT 19:28 Yaniwan musia enawan, “Atemis, ninu Efasas nana aminda inindatakamang kapatane umana akngana yatangenatnong,” ngang yake apaa siknga ngang yaking.
ACT 19:29 Apaa siknga yanggamatamapa kuwan you wanggapmane nana kuupbamu bania enawan nangaakan natake aminu tapatu Gaias gatu tapatu Aristakas ngang yaniking. Sike waapaau Masedonia nana Polkat gatake sukuking tapaaunin panggaganuke paut tasikaing komune kaipakuking.
ACT 19:30 Unzing kaipakuwawa Polda kake aminbamde kaine kunangge tasikut. Tasiwan ngana Jesuat nana aminda inimbitaking.
ACT 19:31 Siwan aminu kundu Esia kep komune nana amindane tupan takwau Polde notna. Ge Polde wam tewa kuwan anzing iniking, “Ga gutnang! Paut tasikaing komune ma siknga kuwim,” ngang iniking.
ACT 19:32 Siwan aminbamu apaa siknga yanggamatakingu apbotake kundu wamu takngatu yake yawawa kundu wamu takngatu yake yawawa ngang tasike apbotake apaa yaking.
ACT 19:33 Apaa yake yuwawa Judia nana aminu tapatu umana Aleksanda ngang inikingu Judia nana aminda ikotewa banakan pukuwan kake kunduta pautde wam yakapa unin ngang yaking. Yawawa ngana Aleksandata wam kwikwik yaninangge enake tasikut.
ACT 19:34 Tasiwan ngana Judia amindane nomna kake ninu Efesas nana aminda Atemis inindatakamang ngang natake umana kumzang yatangenake unekan apaa yanggamatake komdubam (2 aua) yayuking.
ACT 19:35 Yayuwawa you wanggapmane nana amindane tupan tapata yaniwan taningge natake kuma yuwawa anzing yanikut, “Efesas nana amin! Aminu kepna kepna nana aminda atnataaing. Ninu ane nana aminda tasike Atemis kekeknga siknga apatane yot takwan gwen kayuamang. Gatu sup takwan itane weena enandangga pimakuu wagwekat kuut kayuamang ngangu atnataaing.
ACT 19:36 Sike aminu tapatuta ie kem ngangu yananga dua. Ge teke kuma yutnong ngang yanikut. Katak siknga dua natagwaangukengu ma tasiwam.
ACT 19:37 Kanong! Aminu aapaau sanga nindane yot takwan gwekatang tapatu kukae dua take ba Atemis anutuninu dua sapdukngamukumayak ngana ginda kaipakapuing,” ngang yanikut.
ACT 19:38 “Sike Dimitriaskat gatu iat gatake puya pasikaikatda aminu tapatue natapa wai siwanu wam usanzikgak kapae kuke une yatapa kupsok.
ACT 19:39 Yatapa kungaawan wamu kunduaya kaya siwanu paut buyambam gwene yatapa kupsok.
ACT 19:40 Ninu yapiina wenae wamu apaa siknga ngang yake apmanu yanggamatakana meya takngatu ninde apsak. Siwan pauu wai siknga tasimangge ninikwaiwanu yaninanga dua siwik.”
ACT 19:41 Ngang yanike yanikwasipewan kuking.
ACT 20:1 Unzing yanikwasipewan kuwawa wamu ayanggamatamapa kukuu waaknga wena siwana Polda aminu Jesue amina dakngakingu yayawamban unekan apbing. Apa wam yanike musia papan kekekaking. Musia papan kekekawana gaak wam yanipeke Masedonia kep komune kunangge kukut.
ACT 20:2 Kuke kepna kepna sukuke wamu yanike notna Jesuat nana aminu musia papan kekekaking. Yanitake kusika Grik kepdakane kundopbut.
ACT 20:3 Kundoke undang yekau gweaat gwenduat yukut. Yuke gatu uneta sip tangan Siria kepdakane kunangge natapbut. Kunangge tasiwan ngana Judia nana keu wakomune yuaingga Pol atangutapa kupikge wepdakan yasopuking. Yasopuwawa ngana Polda kakapmake nutnang ngang natake Masedonia kep komune gatu sukunangge natapbut.
ACT 20:4 Natapan aminu kundu umana anzing yanikumang. Tapatu umana Sopata ngang inikumang. Ita Beria yot gapmane nanaapa. Sike nana Piras. Gatu Tesalonaika yot gapmane nana tapaaya. Tapatu umana Aristakas tapatu Sekandas ngang yanikumang. Gatu tapatu umana Gaias. Debi yot gapmane nanaapa. Gatu tapatu umana Timoti gatu Esia kepdakane nana tapaaya. Tapatu Tikikas tapatu Trofimas ngangga
ACT 20:5 tapenda Masedonia kep kom yapbike paku ninde Troas yot gapmane yuking.
ACT 20:6 Undang yuwawa Judia nana aminda yuwatakak tapduk takwan gwene poyau dua paptawan sake naking gwenu kawa sandewana ninu Filipai yot gapma teke sip tangan Troas kunangge kukumang. Kusika kuwatna gunziu katak kuut musa dakngawa Troas yot gapmane kundopbumang. Kundoke tapenda kukingunin kana une sande gwendu yukumang.
ACT 20:7 Siwan Salale bangee nanam nanangge unekan apu yukumang. Aminbamu apunggawana Polda wamu yanikut. Yanike kwepna yot anggapma teke kuwit ngang natake wamu yaninggawan kuku petakumat daka undang sikut.
ACT 20:8 Siwan you wam yanikut gwenu you engatangan mitapbing gwene lamu kwaapzang pewa yasiking. Yasiwawa wamu yanikut.
ACT 20:9 Yaniwawan aminu tapatu umana Yutikas ngang iniking. Ita windo buyambam gwaune pukwike dapuna pekut. Pesika pepbotake enane siknga gweneta you gweaaya ayapbike takepu amane tangukut. Pimamban epuku kupsaapa tangenaking.
ACT 20:10 Tangenawa maiwan tewa Polda puku akumbut tapae zetgaman kuke apbetakut. Betayuk yake aminda kwanam sike yuwawa, “Bitanong. Kayuk yuak,” ngang yanikut.
ACT 20:11 Yanike paut tasiking gwene gatu kopbut. Koke nanamu nakekekake gatuna wamu mamaya siknga ngang yanikut. Yaninggawan yaninggawan une kwakawana peke akukut.
ACT 20:12 Kuwawan waatdaka akumbut tapata gweake kayuk yuwan atakuke apbakngaking.
ACT 20:13 Siwan Polda Troas teke uneta kep dakane Asos yot gapmane kunangge natake niniwan ninu Pol teke sip tangan tapenda you wanggapmane kukumang.
ACT 20:14 Kuke undang kundopna nindupan tana sip tangan Mitilini yot gapmane kukumang.
ACT 20:15 Kundoke uneta kuwatna kwakawan enake kusika kuwatna kwakawan enake Kaios kepdaka wesimzim kuke yapbike kusika kuwatna kwakawan enake Semos kep dakane kundopbumang.
ACT 20:16 Kundoke uneta kuwatna kwakawan enake kusika kusika Mailitas yot gapmane kundopbumang. Kundokengu Polda Efesas ayapbimbit ngangu atnatapbut. Efesas ayapbike Esia kep dakane yusika tapdukngata yapbiban masan kunangge apbitakut. Zetzet siknga kuke Jerusalem kundoke tapduu Pentikos yuwatakak gwenu une kanangge take siknga natapbut.
ACT 20:17 Unzing kunangge natake Polda wamu tewan kuwan Efesas nana Jesue aminabamde kayuaing aminda apningge yakut.
ACT 20:18 Yawan natake apana anzing yanikut, “Tupa nata Esia kep andakane yakap siknga apbum gwene puya gin banakan tasikum takngae atnataaing.
ACT 20:19 Sike ninae uman dua tangenake puya amin tapatu Buyambam tapanindane dakngake puyana pasiyuwawa aminu Judia nana aminu kunduta na nutnangge yasopuke tasiwawa na meya buyak yukum.
ACT 20:20 Sike ngana wamu takngatu akgatandamiu takngatusimu ginu daniwitde dua bitakum. Sike aminbamda unekan apa ba yotza gwegwekatang koke danindamumbitde dua bitakum.
ACT 20:21 Dua bitake ginu notna Judia nana amikat dongu kepman nana amikat ngangu danike waiaknganae bitake musipza papa tekwamban Jesu Buyambam tapaninde natake Anututa tapan Krais gatanimuya apanin ngang natapa kekekayok ngang daninggamatakum.
ACT 20:22 “Siwan apmanu Anututane Waung Kapata naniwan kekekawan nata Jerusalem kunangge tasinggat. Tasike undang kuke kundopit gwene sanga nae singamik kakngae dua nataat.
ACT 20:23 Ie anggaman dua nataat ngana yotna yotna sukuwawa Anututane Waung Kapata yeukngamuke meya takngatu takngatu kaut yot gatu napda ga wamnangge tasining ngangu nanikapmanggak.
ACT 20:24 Siwan ngana nata kumnangge dua gwaukgat. Aho. Jesu Buyambam tapaninda puya takngatu namuke Anututa ninde butaya natake akgatanimukut takngae yaniwitde nanikut. Siwan puya wa namukut taknga tasike wamu take waaknga ngang yaniwa sandewikge banipmaatang take siknga nataat.
ACT 20:25 “Unzing natake nata ginde banakan sukuke daninggamatakum. Danike Anututane kekeknga aknganata usikwatanipmambik kakngae atdanikum. Siwan ngana apmea ginda gatusa dua nandupningge
ACT 20:26 siakande siknga gunziu anggwene anzing daniwa natapnong. Aminu gikat nana tapatuta waiaknganae toknga papanu nae sanga dua.
ACT 20:27 Aho. Anutue wam gatakande danikapnangge dua bitake gwa danikum.
ACT 20:28 Ge ginda gisae katak tagwautnong. Tagwauke aminu kundu Anutue Waung Kapata papan aminabam dakngaking aminu sipsip binga toitnong. Aminu waakwau Jesuta kungwake daknga tukngawanggut takngata gatayaman itane aminabam dakngake yuaingu katak toitnong.
ACT 20:29 “Ge nata gin dapmake kuwawa aminu kunduta ginde banakan katang kopning. Kaap zongga kaap zong notna isinggawan isinggawan undang kupik. Ina unzakan. Aminu waakwau apuke danindatdauwawa ginda apimaning ngangge natagwauke daninggat.
ACT 20:30 Siwan apmea aminu gisaat nana kundu Jesue banip gwa siking ngana masa imuke atdanindatdauwa ginu Jesuat nana dakngakaing aminu kunduta donga dakngawa kaiwa kuning ngangge natagwaukgat.
ACT 20:31 Unzingge ginda katak tagwautnong. Siwan nata nakanu gweaat gwenduat gikat gatake yuke kwakngaom gatu zikaane kuupbam asinggan daninggamatakum. Daninggamatake banipmaatang ginu dua bitaningge take siknga natake kwanam siyuk danindamuke tasikum takngae take siknga natanggamatake tagwautnong.
ACT 20:32 “Siwan nata ginu Anutue pengama ita ginu danduyuke toiwawan wam kwikwik kaknganata aminu ita papan inane aminabam dakngake yuaing amikat gikat gatandaman kekeknga asinggan asinggan yutning.
ACT 20:33 Siwan nata gikat gatake yusika aminu tapatutane manina ba tauknga ba tanangge dua natapbum.
ACT 20:34 Aho. Sanga tapatue dapmakengu nata puya pasike uneta mani kaike aminbamu naat sukukumangge yama takekan yukumang ngangu atnataaing.
ACT 20:35 Unzing pasike ginda puya kwatan pasiyuk aminu atdapmake yuaing amin gatayamuningge yeutdamukum. Unzing gatayamuke wamu takngatu Jesu Buyambam tapaninda yake, ‘Aminda niman pana take siwik ngana ninda yamuna papan take siknga siwik,’ ngang yakut takngae asinggan natanggamatake unzingu gatayamunong.”
ACT 20:36 Siwan wamu waaknga ngang yaniwan puyuwana iat aminbamu waakwakatda muna puke tumuk wam yaking.
ACT 20:37 Yakenga kwanamu siyuk Pol apbetake tasiking.
ACT 20:38 Tasike wamu takngatu ita yanike, “Ginda gatusa dua na nandupning,” ngang yakut takngae natapa meya siknga sikut. Siwan kaitake sip gwene kopikge takuking.
ACT 21:1 Siwan ninu meya siknga natake sandetnangge bitake ngana puya kaya siwan gaak wam yanike aminu waakwau peke kukumang. Kuke sip tangan kuke tupakande Kos kep yangga banakan yuak dakane kundoke uneta akuwatna zikaake kwakawan kusika Ros kep yangga banakan yuak dakane kuut kundoke uneta kusika Patara yot gapmane kukumang.
ACT 21:2 Undang kundoke siu gwendu kawatna Finisia kep komune kunangge tasikut. Tasiwan wagwene kopna pake kukut.
ACT 21:3 Kuwawan Saipras keu yangga banakan yuak dakane wesim kuke kawatna kwana saak yuwawan kuyapbikumang. Kuyapbike kusika Siria kep komune kukumang. Siria kuku yapbike paku sip undang kuke yot Taia gapmane kundoke sip sangaapa pakuunin penangge yukut.
ACT 21:4 Yuke peawa ninu epuuku aminu Jesuat nana dakngaking aminu you wanggapmane yukingu kana unekan gatake yuke tapduu katak kuut musa kautdune gweaat ngang yukumang. Yuwatna Waung Takwanda aminu yot toikge musia pangenawan tangutnang ngang natake Pol Jerusalemu dua kuwikge asinimbitaking.
ACT 21:5 Asinimbitawa ngana sangaapa pewa puyuwan gatu kunangge tasiwan ninu notnin peke akukumang. Kunangge tasina aminu wa maya wawi waatdakana buyakga ninu yanggabam gwene ninipake pukuking. Pukuwa kwaim tapane muna puke tumuk wam yakumang. Yakenga gaak wam yanike
ACT 21:6 ninu sip tangan kopbumang. Kopna i ninipeke yotnae gatu kuking.
ACT 21:7 Kuwawa ninda sip tangan kopna Taia tupakande kuke you wanggapma teke kusika kuku Tolemes yot gapmane kundopbumang. Undang kundoke notninu Jesuat nana aminu unenana kana tapduu gwendu unekan gatake yukumang.
ACT 21:8 Yukumanga enake you wanggapma teke kuku Sisaria yot gapmane kundopbumang. Kundoke aminu tapatu umana Filip ngang iniking kapata Jesue wam yanikapmakakut. Sike Jerusalem yot gapmaatangu aminu nanamde dapbing amin kayutningge natake aminu katau kuut musa kautdune tapaaya nganggane umana yakikat nana tapatu. Ita ninu yotnane pakopan iat gatake yukumang.
ACT 21:9 Siwan itane yapana tapaat tapaatda apnae dua kukingga Anutue wam yakapbing unin. Siwan iat gatake yuke Sisaria yot gapmane tapduu mamayasim yukumang.
ACT 21:10 Yuwatna Anutue wam yakapsa aminu tapatu umana Anggabas ngang iniking. Ita Judia kep komuneta ninde apbut.
ACT 21:11 Apuke Poldane simbu taknga take inane kepina kataknga kuut wambut. Wamakenga anzing yakut, “Anututane Waung Kapata anzing yanggak, ‘Simbu toik kapata Jerusalem kopanu Judia nana aminda tanggaganupa anzing wamake aminu kepman nana aminde yamuning,’ ngang naniwan natapbum,” ngang yakapbut.
ACT 21:12 Unzing yakapan natake nikat gatu yot toikatda Pol Jerusalemu dua kopikge kwanam siyuk asiinimbitakumang.
ACT 21:13 Inimbitana ngana anzing ninikut, “Ginu dasingge kwanamu sitnawake natane natdetdetna tasiwa mainggak. Na kaautde yutnangge dua gwaukgat. Sike Jerusalem kopa ninu Jesuat nana amindane iwaninda atnuwan kupitde dua gwaunggat,” ngang ninikut.
ACT 21:14 Niniwan kekekawan kake ninda inimbitana maiwan undang tekumang. Teke, “Buyambam tapanindane banipda siwanu apme tasiwik,” ngang yakumang.
ACT 21:15 Siwan tapduk mamayasim you wanggapmane yuwatna sandewana sangaapa tandakngake Jerusalemu kopbumang.
ACT 21:16 Kopnangge tasina Jesuat nana aminu you wanggapmane nana kunduta gatapa kopbumang. Kopna ninu ninipake kundoke aminu tapatu umana Neson ngang iniking. Ita yotnane ninu pakopan yutnim gwende ninipakuwa undang kundopbumang. Neson waapa Saipras kepdakane nanaapa. Ita Jesuat nana aminu tupa dakngakut tapa.
ACT 21:17 Siwan ninu Jerusalem kundopna notnin Jesuat nana aminda ninduke apbakngake paking.
ACT 21:18 Papa pekumanga enake Jemsde kunangge tasina Pol kaya kuut nikat gatapan kukumang. Jems waapa take amin notnaat unekan gatake yuwawa kukumang.
ACT 21:19 Kuna Polda gaak wam yanikenga kepman nana kepna kepna ayuaing komune kuke puya pasiwawan Anututane kekeknga aknganata gatangaman pasikutde wam katak siknga ngang yaniwan natapbing.
ACT 21:20 Yaniwan natake Anutue umana yatangenaking. Yatangenake anzing iniking, “Notnin tapasim. Gika atnataayak. Judia nana aminbamda Jesue banip sike yuainggen. Sike aminu waakwau Mosesde mama wam tawananggengu kekeknga siknga nataaingunin.
ACT 21:21 Unzing natapa ngana kunduta gae anzing yaniking, ‘Polda kuke Judia nana aminu paku kepman nanae banakan yuaingu Mosesde mama wamu ateningge yaninggaunin. Yanike sanga tupa yawake tasikaking kaknga teke waatdakana gupna dua matake sanga tapatu tapatu dua yawaningge yaninggaunin,’ ngang yaniking.
ACT 21:22 Sike gata gwa apbuyak ngang atnatapningge dasing tasina gae semna dua natandamuning ngang natake
ACT 21:23 sanga ninda ganinanggekamang taknga tasiyo. Nikat nana aminu tapaat tapaat ngangga sanga tapatu Anutue tasinangge natake wamu gwan yawa kekekak.
ACT 21:24 “Siwan gata ninu Mosesdane miti akngae kepi tawake Anutue kaine aminu dudumna sinimde tasikamang kaknga tawake aminu aakwakat unekan gatake yuwi tasinong. Tasike gata gatayamunangge mani Anutue peyami kusia kwaapuya pasiwa aminbamda danduke kepi waaknga tawake gwa tasiwa puyukutde natake atdanimbaknganing. Danimbakngake wamu gae ganiking kakngae kawa kem wam siwik. Unetaya Mosesde mama wamu tawanggayak geaya kake natdetning.
ACT 21:25 Sike aminu kepman nana Jesue banip sike yuaingu wamu nisa yana kekekakut takngae pas gwan yamukumang. Yamuke kaau kep tapae yamunangge zipningu dua nake gatu dak ba dua nake ba gatu kaap guyakngane wapa kumningu dua nake yasewa dua tasike yutningge gwan yanikumang,” ngang iniking.
ACT 21:26 Iniwa Polda aminu wa tapaat tapaat ngang papan pekinga enake aminu waakwakat unekan gatake yuke kepi waaknga tawake tasiking. Unzing tasike Anutue yot takwan gwene kopbut. Koke you wagwendane take aminu anzing yanikut, “Tapduu katau kuut musa kautdune gweaat kana sandewana kepi atawake tasikamang kaknga tasina puyuwana sanga Anutue peyamit,” ngang yanikut.
ACT 21:27 Siwan tapduu katau kuut musa kautdune gweaya ngangu kawa sandetnangge siwawana aminu Judia nana aminu paku Esia kep komune yuke uneta apbing aminda kawawa Polda Anututane yot takwan gwene yuwan kaking. Kake aminbam yanindatdaukgawa musia enawa Pol tanggaganuking.
ACT 21:28 Tanggaganuke apaa anzing yanggamataking, “Ae! Apu gatanimunong! Aminu aapa kepna kepna sukuke aminbam yanike ninu Isrel aminde asapdutnimuke Mosesde mama wam gatu Anutue yot takwanu anggwen ngangge sapdut wam yanggak. Unzing sapduke kundumaman tasinggaunin. Tasike aminu kepman nana amin pake Anutue yot takwan gwene apakonggaunin. Pakoke yot takwan gwendane pasap wamu atzipbukut,” ngang yaking.
ACT 21:29 Sike aminu tapatu Efesas nanaapa umana Trofimas ngang iniking. Iat Polkatda unekan gatake yot kekep tapaatang sukuwat kaking. Kake yot takwan gwene apba initake kopbut ngang natake yot takwan gwendane pasap wamu atzipbukut ngang yaking.
ACT 21:30 Unzingu apaa siknga yanggamatamapa kuwan unenana aminda natake unekan apbing. Apu yuke Pol yot takwan gwene yukuu tanggaganupa kepman take puke yot gwendane gwabou kuupbam yapukusiking.
ACT 21:31 Gwabou yapukusikenga Pol wesipa tanguwawa wamu Rom nana amak amindane tupan tapae wamu anzing yatewan kukut, “Jerusalem nanata aminu tapatu undang wesipa tangukaing,” ngang yatewan kukut.
ACT 21:32 Yatewan kuwan natake amina kundu papan isapmake pukuking. Isapmake pukuwawa kake Pol tangukingu undang teke unin kayuking.
ACT 21:33 Kayuwawa amak aminu waapata kuku Pol tanggaganukut. Tanggaganuke amina yaniwan senu takngaata wamatekenga aminbamu anzing yanikwaikut, “Aminu aapa mamin? Ita wai dasing kaknga tasikut?”
ACT 21:34 Ngang yanikwaiwan aminu pakapu yupbasikingga wamu takngatukan dua yaking. Sike kundu wamu takngatu yawawa kundu wamu takngatu yawawa ngang tasike gakngatbam tasimapa kukut. Tasiwawa yapii siknga natapnanga dua sikut. Siwan amak aminda amina yaniwan Pol take yotnaatang initake kopningge yanikut.
ACT 21:35 Yaniwan initake yaikop dakane kundopa ngana aminbamda yawake Pol tangutningge kekeknga siknga yaking. Yanggamatake, “Tangutna! Tangutna,” ngangu apaa yanggamatamapa kuwan amak aminda, “Tangutnang,” ngang yake akgwaamutake yotnaatang takopbing.
ACT 21:37 Amak aminda Pol take yotnaatang takopnangge gwaamutake kowawa Polda tupan tapa Grik wam tangan anzing inikwaikut, “Wamu takngatu take ba ganiwit,” ngang iniwan yake anzing inikut, “Grik wamu atnataayak?
ACT 21:38 Nata gae natake Isip nana tapatuta tupa amnangge natake aminu buyambam yaniwan musia enawan aminu 4,000-da amakgane sanga pake keu amina wena komune kuke ninu Rom nana amin nipbitnangge tandakngaking unin ba ngang gae natat,” ngang inikut.
ACT 21:39 Iniwan Polda anzing inikut, “Na Judia nana tapatu. Na you Tasas gapma Silisia kep komune yuak gapmane aakum. Sike you wanggapma umana kaya. Ge aminbamde wamu takngatu yamunangge nataat,” ngang inikut.
ACT 21:40 Iniwan katewan Polda yaikopdakane yainggangganuke yuke wamu yaninangge tasiwan kake maak paking. Maak pawawa Hibru wam tangan anzing yanikut,
ACT 22:1 “Mate notna! Wamu nae temapa yakaing kaknga daniwa natapnong,” ngang yanike Hibru wamu Judia nana amindane wam tangan yanikut.
ACT 22:2 Yaniwan natake wamu takngatusim paya dua siknga ngang yake kuma siknga yuking. Yuwawa anzing yanikut,
ACT 22:3 “Na Judia nanaapa. Mingata paku you Tasas gapma Silisia kep komune yuak gapmane yuke tangaikut. Ngana uneta pakapu you Jerusalem anggapma yuamangune na toiban takakum. Takake Gamelielda pandetna dakngake Mosesde mama wam baminda tawake tasikaking kaknga katak siknga ngang nanindamukut. Ita unzing nanindamukutde Anutue kepi waaknga tawanangge iaknga siknga natapbum. Sike nata dandupa gikaya ina unzakan tawanangge iaknga siknga nataaing ngang danduat.
ACT 22:4 Sike nata unzing tawake aminu kepi wa apmanu nata tawake tasinggat taknga tawaking aminu kupsae zipnangge natapbum. Natake maya wawi kwaapzang panggaganuke kaautde paku pekum.
ACT 22:5 Kem dua. Aminu yot takwan gwende puya pasiya amindane tupan tapa gatu sios kaunsil aminu kuutda atnataaing. Siakan yanggak ngangu ayaning. Sike aminu waakwakga ina pas kundu aminu Judia nana aminu paku Damaskas yot gapmane yuaingunin papitde mataking. Matake nama nata take kepi waapa tawake yuaing aminu senda wamake pakapnangge kukum. Kuke Jerusalem pakapu toknga yamunangge unzing tasikum.”
ACT 22:6 “Siwan nata kepiapane kusika kusika Damaskas yot gapma wesimu kuwawa gunziu banakan yuwawan kukum. Kuwawa enandangga zetgaman kakaa takngatu gunzi waengga binga nae apan undang pimakum.
ACT 22:7 Pimake aminu tapatu dua kawawa ngana wamdakan anzing nanikut, ‘Sol! Sol! Na dasingge tasiwi mainanggenggat,’ ngang nanikut.
ACT 22:8 Naniwan yake anzing inikum, ‘Takeapa! Ga mamin,’ ngang iniwa yake anzing nanikut, ‘Na Jesu Nasaret nanaapa. Na gata tasiwi mainanggenggat,’ ngang nanikut.
ACT 22:9 Unzing naniwan natawawa ngana aminu naat kukumangga wamu wa atnanikut taknga dua natake waenga wa sikut takngakan akaking.
ACT 22:10 “Siwan anzing inikum, ‘Buyambamtapa! Na apmanu mina tasiwitde nataayak,’ ngang inikwaiwa ita anzing nanikut, ‘Enake you Damaskas gapmane kuyo. Kuwina you wanggapmane nana tapatuta puya nata gae yawa yukutde ganiwik,’ ngang nanikut.
ACT 22:11 Ngang naniwan waenga wa sikut takngata kaina gwan tasiwan maikutde kake kunanga dua siwan notna akukumangga napmatake Damaskas take kuking.
ACT 22:12 “Take kopnana aminu tapatu umana Ananaias ngang iniking. Ita Mosesde mama wamu katak siknga tawakakuunin. Ge Judia nana aminu paku Damaskas yot gapmane yuaingga kakengu amin noman tapa ngang yakakingunin.
ACT 22:13 Ita nae apuke anzing nanikut, ‘Notna Sol! Kaika kawi sanong,’ ngang yawan zetgaman kawasawa atnanikuu waapa kakum.
ACT 22:14 “Kawawa anzing nanikut, ‘Anutu baminbamda inindatakaking tapata ga tapan ina banipda nataak kakngae katak natdewiyakge takut. Sike aminu Nomantapa kepiapane kaikata kawawi wamu genaneta siknga yawan natapiyakge ga takut.
ACT 22:15 Unzing kake wamna natake aminbam yanike sanga wa akake gatu wamu wa atnatapbuyak kaknga ngang yanikapiyakge takut.
ACT 22:16 Ge mamaya siknga ma yuwim. Tumuk wam yake Jesuta gatanggamuke waiakngaka sandekgamikge iniwina yangga saukgamit,’ ngang naniwan waaknga tasikum.”
ACT 22:17 “Siwan masande na Damaskasda Jerusalemu gatu apbum. Apuke tumuk wamu Anutue yot takwan gwene yakum. Yasika mia takngatu kakum.
ACT 22:18 Kawawa Buyambam tapaninda anzing nanikut, ‘Zetgaman Jerusalemu teke kung. Sike ane yuke wamu natane yawinu maak dua pake dua natapning,’ ngang naniwan
ACT 22:19 yake anzing inikum, ‘Buyambam tapa! Tupa nata aminu gae banip sikingu koko miti yot katang koke pake wesipa zipmake kaautde pekumde atnataing.
ACT 22:20 Unukan dua sike aminu tapatu umana Stiven ngang iniking. Ita gae wamba yanikapbut tapa tanguwawa na inengan yuke apbakngake atangukinggane got tauk gogomna kayuwawa tangutapa kumbut,’ ngang inikum.
ACT 22:21 Iniwa ngana ita yake, ‘Kuyo,’ ngang nanike, ‘Nata ga maa siknga kuwiyakge ganitewa aminu kepman nana aminde kuwiyak,’ ngang nanikut.”
ACT 22:22 Siwan wamu waaknga Polda yaninggawan yaninggawan kepman nana aminde kuwikge yawan natake apaa yanggamatamapa kuwan Pol tangutapa kupan. Aminu aapa, “Kayuk yutnanga dua,” ngang yanggamataking.
ACT 22:23 Ngang yake got tauknga sandeke pake ipmawesike yanggamatake bania toknga siknga natake muyup muyup kwaipa pake enandang muking.
ACT 22:24 Muke tasiwawa amak aminde tupan tapata amina yaniwan Pol take yotnaatang take kopbing. Take kopa awesipa tangupa wamdane yapiie inikwaitningge yanikut.
ACT 22:25 Aminbamda unzing yanggamatakingge yapiie natapnangge Pol tupakande wamateke ipmapa tangutnangge tasiwawa ngana Polda kawawan aminu amak amin kayuau tapatuta undang yuwawan kake anzing inikut, “Gata aminu Rom nana tapatu dua takopan wamna dua yawanu moo siknga ipmapa tanguwi take siwik? Unzingu moo siknga wesipa nuke ninu Rom nana amindane mama wam zipbuya,” ngang inikut.
ACT 22:26 Iniwan natake kuku amak aminde tupan tapa anzing inikut, “Aminu waapa Rom nana amin ngana wesipa tanguwitde naniyak,” ngang inikut.
ACT 22:27 Iniwan apu Pol anzing inikwaikut, “Ga Rom nana amin tapa,” ngang inikwaiwan Polda, “Ngan,” ngang inikut.
ACT 22:28 Iniwan yake anzing inikut, “Na keu komdune nanaapa ngana maningu kwaapzang siknga mukenga Rom nana amin tapa dakngakum,” ngang inikut. Iniwan anzing inikut, “Na mingata Rom tangaitnapmakutde na Rom nana amin tapa,”
ACT 22:29 ngang iniwan aminu Pol inikwaike wesipa tangutnangge tasiking aminda akgwauke zetzet i teke kuking. Siwan aminu wa amak aminde tupan tapata natapan ita Rom nana aminu tapatu ngana nata wamateningge yanit ngang natake iaya akgwaukut.
ACT 22:30 Sike ita natapan Judia nana aminda yake Pol tangutenangge yaking kakngae yapiie katak natapnangge natapbut. Natake pewan kwakawan enake Pol senda wambingge waiteningge yakenga aminu Anutue yot takwan gwene pasiya amindane takeakwakat gatu notnabam sios kaunsil amikat kuupbam ngangge paut tasiningge yayawakut. Yayawamban apa Pol takepu nomnane banakan tekut.
ACT 23:1 Takepu tewan Polda sios kaunsil aminu kanggamatake anzing yanikut, “Mate notna! Na Anutue kaine noman sukunggawa apu apman apan musipmaatang take siknga nataat. Sike natapa sanga tapatu gutonga dua sik,”
ACT 23:2 ngang yaniwan aminu Anutue yot takwan gwene pasiya amindane tupan tapa umana Ananaias ngang iniking. Ita aminu Polde wesim yukingga Pol genane tangutningge yanikut.
ACT 23:3 Unzing yaniwan natake Polda anzing inikut, “Gata mama wamu tawanangge tasike wamu nata yawit taknga usanzike yuayak ngana gika mama wamu zipbuke nutningge yaninggayakge Anututa akguwik,” ngang inikut.
ACT 23:4 Iniwan aminu Polde wesim yukingga anzing iniking, “Asikaya ga Anutue yot takwan gwene pasiya amindane tupan tapae inisapdukgayak,” ngang iniking.
ACT 23:5 Iniwa ita yake anzing yanikut, “Mate notna. Na atnataat. Anutue wapatang yakapsa aminda anzing matakut, ‘Aminu tupan tapae ma inisapduwim,’ ngang matakutden. Siwan aminu waapae natake Anutue yot takwan gwene pasiya amindane tupan tapa ngang dua natake wamu waaknga yat,” ngang yanikut.
ACT 23:6 Unzing yanikenga ita kawawan aminu wa paut tasiking aminu dongu takngaata yuking. Aminu kundu Sadyusi sike aminu kundu Ferisi ngang kake apaa anzing yanikut, “Mate notna! Na Ferisi amikat nanaapa. Na Ferisi aminu tapatutane waak. Ge na aminu akungwake gatu gweatning kakngae banip singgatde na takuwa wam yawitde tasinawakaing,”
ACT 23:7 ngang yanggamatawan aminu Ferisiat nana amikat gatu Sadyusiat amikatda yanganuke paut gwenu tasikingune usanzike dongu takngaaya yuking.
ACT 23:8 Sike dongu Sadyusiat nana aminda yake aminu kungwakengu dua enakaing ngang yake angela ba Waung ba ngangu wena ngang yakakingunin. Siwan dongu Ferisiat nana aminda yake sanga wa kuupbam kaya ngang yakaking unin.
ACT 23:9 Unzing nataakingge tasike usanzike yake apaa yanggamatamapa kuwan aminu Ferisiat nana kundu mama wamu yanindamumsa aminda kekeknga siknga yuke anzing yaking, “Aminu aapatane gutonga takngatusim tawana siknga mainggak. Asikaya waungu tapatuta ba angela tapatuta ba wamu inikut,” ngang yaking.
ACT 23:10 Unzing yawawa kumzang yanganuke tasiwawa amak amindane tupan tapata kayuke aminu paut tasikingga Pol katakngine take kaukautda kaiwa kaiwa tasiwan dakngayak ngang natagwauke amina yanipewan puku Pol kaiwa kuwan take taku yotnaatang takopbing.
ACT 23:11 Takoke kayuwawa kwakawan gatu zikaane Buyambam tapaninda Polde wesim pakapu yuke anzing inikut, “Pol! Musipba gitnata yuyo. Ane Jerusalemu nae wamu kekeknga siknga yakapmayak. Ge kuku Rom yot gapmane kuke ina unzakan yanikapso,” ngang inikut.
ACT 23:12 Siwan kwakawan Judia nana aminda pakapu unekan yuke Pol tangutnangge yasopuking. Yasopuke Pol asiknga tangutana kupik ngang yawa kekekakut. Sike dua tangukengu nanamu dua nake yangga dua tangopnim. Tangukenga nanamu nake tangoke yutnim ngang yawa kekekakut.
ACT 23:13 Siwan aminu wa yakingu tapaakan dua. Aho! 40-neta enagwak ngang aminu unzing takwakga wamu waaknga yasopuking.
ACT 23:14 Yasopuke kuke Anutue yot takwan gwende puya pasiya amindane tupan takwakat aminu akeakwakat anzing yaniking, “Ninu, ‘Pol zetgaman tangutena kupan kakenga nanamu nanim,’ ngang yana kekeknga siknga sikut.
ACT 23:15 Ge gikat sios kaunsilkatda tanzike wamu takngatu amak amindane tupan tapae tewa kuwan ita Pol initake epan wamu itane katak siknga natapningge wamu tewa kopsok. Tewa kowawan ninu tupakande kepine tandakngake yuwatna epu ane ginde dua apuawan tangutena kupik,” ngang yaniking.
ACT 23:16 Siwan wamu Pol tangutnangge unzingu wa yasopuking kakngae Poldane taana tapasimda kakapbut. Kakapmake kuku amak amindane yotnaatang koko oknga Pol, “Ga gutnangge unzing yawa natat,” ngang inikut.
ACT 23:17 Iniwan natake okngata amak aminu akayuau tapatu yatawamban apan anzing inikut, “Taana aapasimu take tupan tapakae take kuyo. Wamu takngatu unin ininangge nataak,” ngang inikut.
ACT 23:18 Iniwan taana take tupan tapae take kuke anzing inikut, “Waatdaka aapasimu wamu gae takngatusimu kaya siwan kaaut aminu Polda yanawamban kuwa gae takapitde naniwan initakapunggat,” ngang inikut.
ACT 23:19 Iniwan natake waatdaka waapasimu katakngane tapan paku inatakan komdune yukumayak. Yuke anzing inikwaikut, “Wamu dasing kaknga ngang naninangge yawi ganitakapuing,” ngang inikut.
ACT 23:20 Iniwan yake anzing inikut, “Judia nana amindane takeakwakga wamu gwan yatapa nomatak. Nomatawan ga ganiwa Pol take sios kaunsilde kwep take pukuwiyakge yaing. Wa aminda kem yake Pol takepan wamu ita yanggakge yapiie inikwaitna yawan natapnim ngang yaing.
ACT 23:21 Unzing yaing ngana yawa ita yaning kaknga gata ma tawambim. Aminu takwakgu 40-neta enagwak aminu unzing takwakga Pol tangutnangge kepiapane gwa umukusike yuaing. Gata Pol initewi pukuwikge take ngang yawi natakenga paku kepine usiyutningge gwa yandeking. Aminu waakwakga nanamu dua siknga nake gatu yanggaaya dua siknga tangoke yusika Pol tangutapa kupan kakenga nanam nake yangga tangopnangge yaing,” ngang Polde taana apasimda inikut.
ACT 23:22 Iniwan natake yake anzing inikut, “Aminu tapatu wamu aaknga ngang naniyakge ma siknga ngang iniwim,” ngang inike initewan epu kukut.
ACT 23:23 Initewan epu kunangge tasiwan amak aminu tapaaya yayawamban apbumayak. Apat anzing yanikut, “Gitda amak aminu buyambamu zikaane tapduu paut tasiya komune Sisaria yot gapmane kuningge kapeson. Amak aminu 200 gatu amak aminu 70-ta ikwawa gamande maseapane yuke kukaing amin gatu aminu 200-da gwawaya pake yuaing amin ngangu kapewat tandakngake yutnong.
ACT 23:24 Sike Pol kaya akuwikge ikwawa gamanu kundu iatde kapeson. Sike noman siknga taku Pol keu akomde tupan amin yuke kayuak kapa umana Filiks ngang inikamang. Waapae katakngane tenong,” ngang yanikut.
ACT 23:25 Yaniwan puyuwana ita pas sandu anzing matakut,
ACT 23:26 “Na Klodias Lisias. “Nata Filiks umana kayaapa keu akomde gavmanu tupan tapa yuke ninduyuak kapaninde matanggat.
ACT 23:27 “Notna. Aminu aapa Judia nana aminda tanggaganuke atangutapa kupikge tasiking. Tasiwawa ngana nata ie Rom nana amin tapatu ngang natake naat amak aminaatda kuku tangutnangge tasiwawa banakan kaitna kukut.
ACT 23:28 Sike masande ita tasiwan tangutnangge tasiking kakngae yake yapii siknga natapnangge take sios kaunsilnae takukum.
ACT 23:29 Takuke kawanu sanga wai takngatu wena sikut. Sike mama wamu inane siknga takngatue natapa siwan tangutnangge tasikinga sikut. Ge tangutnanga dua ba kaautde ba tenanga dua.
ACT 23:30 Sike nae wamu takngatu apmanu anzing apan natat. Judia nana aminda wamu takngatu aminu aapa tangutnangge undang yasopuking. Unzing yasopuking kakngae kakapmake nata zetgaman gae tewa apunggak. Apuawan aminu buya atangutnangge yaking aminda apu buya unzing siknga tasiwan tangutnangge yakumang ngang ganiningge yanikum. Ge apu ganiwa gika natapso,” ngang pas sandu unzing matakut.
ACT 23:31 Unzing matake yaman wam gwaamuke amak aminda Pol take zikaanekan taku Antipatris yot gapmane teking.
ACT 23:32 Teke yuwawa kwakawan amak aminda Pol une teke yotna ateke apbingune gatu kuking. Kuwawa amak aminu ikwawa gamande maseapane yuke kukinggakan Pol initake Sisaria yot gapmane kuking.
ACT 23:33 Kuke taku pas Klodias Lisiasda matakut sanu Filiksde imuking. Imuke Pol kaya iniwa pakapu kaine yukut.
ACT 23:34 Yuwawan pas sanu kendekenga Pol anzing inikwaikut, “Ga zapdakane siknga nanaapa,” ngang inikwaiwan yake, “Na Silisia kepdakane nanaapa,” ngang inikut.
ACT 23:35 Iniwan yake anzing inikut, “Ga ane yuwawi aminu akgutnangge yakingga apana wamu yawi usanziwit,” ngang inike yawan Pol taku Herot keu wakomde tupan amin tapa yuke kayukut tapatane yotnaatang kaautde teke kayuking.
ACT 24:1 Siwan gunziu katak kuut musa kawa sandewana aminu Anutue yot takwan gwene puya pasiya amindane tupan tapa umana Ananaias ngang iniking. Iat aminu Judia nana amindane take akwakat gatu aminu tapatu umana Tetalas ngang iniking. Ita wam temapa yanggau waapaat kuut epbing. Epuke gavmanu tupan amin yuke kayuak kapa Filiks inike unzingge siknga Pol tangutnangge tasikumang ngang iniking.
ACT 24:2 Iniwa ita Pol yatawamban apbut. Apana Tetalasda yapii siknga yanangge tasikut. Tasike anzing inikut, “Umanda kayaapa keu akomde tupan amin yuke kayuayak kapanin. Gata ninu nomana siknga ninduyuawi amau wena siwan yotna yotnane sanga buyambamda tupa waisikingu anzing papa takanong ngangu ninikuyakge apmanu katak yuke ie apbakngakamang.
ACT 24:3 Bakngake gae musip gwaang nataamang.
ACT 24:4 Siwan unzing ngana yawawa mamaya siwan kwatan siwik. Ge maak pake yuwawi ninda natake apumang kakngae ganiwa natapso.
ACT 24:5 “Aminu aapa ninda kana wai takngatu takngatu asinggan siknga tasinggaunin. Tasike yotna yotna sukuke ninu Judia nana aminu paku kepna kepna ayuamang komune kuke tasimapan kuwan musia enawan song amakaingunin. Ge ita aminu Nasaret nana apatane pandetna dakngake nin nindumbitakaing amindane tupan tapana dakngake yuak.
ACT 24:6 Ge sipdu yot takwanindane pasap zipbutnangge tasiwan ngana kake atanggaganukumang. (Tanggaganuke nindane mama wamu atzipbukutna kake atangutnangge tasikumang.
ACT 24:7 Tasiwatna ngana amak aminde tupan tapa Lisiasda apu kumzang kekekake kaiwan kukut.
ACT 24:8 Kaiwan kuwan takenga aminu buya tangutnangge tasikingu gae kaikane apningge yakut.) Ge aminu aapa gika inikwaiwi ina genaneta ninda wamu temapa inikamang kakngae yawan natapso.” Ngangu Tetalasda wamu unzing inikut.
ACT 24:9 Unzing iniyuwawan Judia nana amindaaya temangusipa Poldekan wamu waaknga ngang ganinggau siakan gan ngang yaking.
ACT 24:10 Siwan Poldekan temangusipa yawa puyuwana Filiksda Polde tuwangakan tasiwan enake wamu anzing inikut, “Gata keu ayuamang komde tupan amin yuke ninduyuwawi nakanu buyambam gwa singgakge natake nanikwaiwi wama ganinangge musipmaatang take siknga nataat.
ACT 24:11 Ngana atemangusipa yakaingunin yanikwaiwi gamu anzing ganiwam. Nae i Jerusalemu koke Anutue gwetake inindatake tasinangge kopbum. Kopa yuwatna kuku gunziu katau kuut musaat kepine gweaat ngangu gwa nipbik ngang ganining.
ACT 24:12 Sike naat Judia nana tapatuatda dua siknga yanganuwatda yot takwan gwene nindupbing. Wena. Unekan dua sike paut tasikaing komune ba yot gapmane ba ngang zimpaya dua siknga wai takngatu tasiwa bania enaking. Wainata wena siknga.
ACT 24:13 Ge wamu nae atemangusipa yakaing kakngae yapii wena. Yawa maiwik.
ACT 24:14 “Ge wamu takngatu anzing danikapnangge nataat. Nata Anutu bamindane tapaekan gwetake inindatanggat takngae aminu aakwau natake nata Jesu Buyambam tapana ngang yake tasiwa nanduke wai tasinggayak ngang nanisapdukaing. Kepi waaknga tawake tasike Mosesdane mama wam gatu Anutue wamu tupa siknga ngang yakapbing aminda mataking kakngae banip asinggat.
ACT 24:15 Banip sike Anututa kupsa amin nomanu akupsa amikat gatu wai amikat kuut ngang akumbing katangga pangenawikge banip sike ie natayuat. Siwan aminu aakwau ina unzakan iekan natayuaing.
ACT 24:16 Unzing natayuke nata Anutue kaine gatu aminde kaine noman amin siknga dakngake yutnangge kwep apman musipma tapa kekekawawan yuat.
ACT 24:17 “Siwan na kepma teke keu komdune paku nakanu kundu undang kakenga gatu ane notnae apbum. Notna manie dapmake yuaing aminde mani pakapuke yamuke gatu sangana Anutue imunangge apbum.
ACT 24:18 Apuke uneta tasike kepi takngatu Anututa nindupan dudumna sinimde tawake asinggan tasikamang kaknga tawake tasikum. Tawake tasike yot takwan gwene yuwawa nandupbing. Wa nandupbingu aminu kunduat dua yuke gakngau dua siknga tasikana nindupbing. Wena.
ACT 24:19 Sike ninatakan kuma siknga yuwawa ngana aminu Judia nana kundu paku Esia kep komune yusika uneta apu nandupbing. Nanduke na tanggaganukingga zikaa nae kaya kakengu ane gae nombane apuke, ‘A! Unzingge siknga tanggaganukumang,’ ngangu ganinggawam.
ACT 24:20 Sike wena siwanu aminu akganinangge apuingga nutnangge tasike taku sios kaunsiltane nomune napmake gutonga natane kundu akakinga kakengu apme ganining.
ACT 24:21 Asikaya yapii takngatukan. Tupa nata ninatakan sios kaunsil aminde banakan enake anzing yakum, ‘Na banip Anututa aminu akumbingunin pangenawikge singgat takngae natake na tanggaganuke nutnangge tasikaing,’ ngang yakum. Ge apmanu wama ganiwa nataayak,” ngang tupan tapa Filiksde Polda unzing inikut.
ACT 24:22 Siwan Filiksda kepi wa Polda tawake tasinggak kakngae katak siknga natake Judia aminu yanike, “Tenong! Apmea,” ngang yanikut. “Amak aminde tupan tapa Lisiasda epana wamza tapa takandamik,” ngang yanikut.
ACT 24:23 Yanike aminu Pol kayukut tapa kaautde teke kayuwikge inikut. Kekeknga siknga dua yapukusingamikge inikut. Sike teyuke tewan kwikwiknga yuwawan gatu notnata ba sanga imunangge tasiwanu take tewan imuningge inikut.
ACT 24:24 Siwan tapduk kundu kawa sandewana Filikskat maatna umana Drusila ngang iniking. Ita Judia nanaapa. Ge iat gatake apuke Filiksda Polde apuke wamna kundu iniwan natapikge yatawakut. Yatawamban apuke wamu yake Jesu Anututa tapan Krais akgatanimuyaapa unin ngang natapan siakan siwikge iniwan natapbut.
ACT 24:25 Inike kep noman tawake tasiwikge inikut. Inike inae katak siknga tagwaumbikge inikut. Gatu masande Anututa waiaknganin usanzike toknga ngang yake atnimikge inikut. Iniwan natake Filiksda akgwauke, “Kungga,” ngang inikut. “Sike masande tapduu kaya siwana yanggawamba apso,” ngang inikut.
ACT 24:26 Inike Polda mani kundu apme ba namanu sandetewa kuwik ngang natake teyukut. Unzing natake sipdu sipdune asinggan Polde yatawamban apu wamu takngatu takngatu iniwan natapbut ngana mani dua siknga imukut.
ACT 24:27 Siwan unzing tasike yuawan nakanu gweaya kawa sandewana aminu tapatu umana Posias Festas ngang iniking. Ita Filiksde tangge yukut. Ie tangge yutnangge tasiwan Filiksda Judia nana aminu yanindatdautnangge natake Pol dua sandetewan kaayutde ayukut.
ACT 25:1 Siwan Festasda keu waomune apu tupan tapa dakngake yuwan tapduu gweaat gwenduat kawan sandewana Sisaria yot gapma teke uneta Jerusalem kopbut.
ACT 25:2 Kopan kake Anutue yot takwan gwene puya pasiya aminde tupan takwakat gatu aminu Judia kep komde take amina ngangga apu Polde temapa yake kekeknga siknga Festas iniking.
ACT 25:3 Pol kepiapane umuyuke tangutapa kupikge yasopuke anzing iniking, “Gata nin gatanimuyo. Gatanimuke Pol tewi Jerusalem apsok,” ngang iniking.
ACT 25:4 Iniwa yake Festasda anzing yanikut, “Polda kaautde Sisaria yot gapmane yuak. Ge nata kundusim yusika une kuwit.
ACT 25:5 Kuwawa take aminzaat take naat gatake sukunim. Pukuke aminu Pol waapatane gutonga kundu kaya kakengu gutonga akngana anin siknga nangu kainane naninong,” ngang yanikut.
ACT 25:6 Siwan yanike une tapduu une katak kuut musa gatu kautdune gweaat gwenduat ba katau kuut musaat ngang unzing yukenga Sisaria gatu pukukut. Pukuke pewan kwakawan paku keu wamu usanzikgak komune pukwikut. Pukwike Pol takapningge yaniwan
ACT 25:7 takapana Judia nana aminu Jerusalemda epbing takwakga pakapu Polde wesimban yuking. Yuke wamu meyakan Polde temapa yaking. Temapa yawawa ngana Festasda natapan yapii wena sikut.
ACT 25:8 Siwan Polda yake anzing yakut, “Ninu Judia nana amindane mama wamu takngatu nata dua zipbukum. Sike Anutue yot takwande pasau takngatu dua zipbukum. Sike gutonga takngatusimu Sisa tupan tapaninde dua tasiwa maikut. Wena siknga,” ngang yakut.
ACT 25:9 Ngang yawan Festas tasiwan Judia nana aminda ie apbaknganingge Pol anzing inikut, “Asikaya ga Jerusalemu apba kopnangge nataayak. Unzing kakengu wamba taku Jerusalem yawi natapit,” ngang inikut.
ACT 25:10 Iniwan yake anzing inikut, “Undang kopnangge dua nataat. Gavmanu tupan amin yuke nin ninduyuak kapata ga tapan wam usanziya amin dakngake yuwawi wamu nae wa temapa yakaing kaknga gika usanziwiyakge nataat. Sike gika atnataayak. Na gutonga takngatu notna Judia nana aminde dua tasikumden.
ACT 25:11 Sike gutonga takngatu atasikum gamu take nuwa kupam. Sike wamu nae atemapa yakaingu wa siakan dua siwanu na nutningge Judia nana aminde katakngane yamunanga dua. Unzingge tupan amin yuke nin ninduyuak kapa Rom yot gapmane yuak kapata wama natapikge nataat,” ngang inikut.
ACT 25:12 Ngang iniwan Festasda natake Pol teke aminu iat gatake keu waomune kayuaing aminu yayawamban apa paut tasiking. Tasike yatapa nomatawana Festasda Pol anzing inikut, “Ayok. Wamba yawi gavmanu tupan tapaninu Rom yot gapmane yuak kapata natapikge yayakge take kuku yawi itaya natapsok,” ngang inikut.
ACT 25:13 Siwan masande tupan aminu tapatu umana Agripa ngang iniking. Iat samina umana Benaisia ngang iniking. Iat Festas kanangge Sisaria yot gapmane apbumayak.
ACT 25:14 Apuke pakapu tapduu mamaya yukumayak. Yuwawat Festasda Polde natake Agripa anzing inikut, “Aminu tapatu andang yuak. Tupa Filiksda kaautde tewan yuak.
ACT 25:15 Waapae na tupa Jerusalem kuke yuwawa aminu yot takwan gwene pasiya amindane tupan takwakat gatu aminu Judia nana aminde take amikatda wamu ie temapa yaking. Yake nata toknga takngatu imitde naniking.
ACT 25:16 “Naniwa yake anzing yanikum, ‘Ninu Rom nana aminda toknga takngatu aminu tapatue moo siknga dua imukamang. Wamu wa ie temapa yakaing aminde kaine dua yuke wamna yake dua yawanu ninda usanzike toknga takngatu imunanga dua,’ ngang yanikum.
ACT 25:17 Unzing yanike peke gatuna apbum. Apuke yuwawa aminu waakwakga apana dua yuwa takakut. Sike enake paku nata wam yakaingge yot gwene yuke aminu waapa takapningge yakum.
ACT 25:18 Yawa takapa aminu buya temapa yakingga nanike wamu aminu waapae temapa yaking. Temapa yake ngana ita wai takngatu anzing ba tasikut ngang ninae moo natapbum takngae dua yaking. Wena.
ACT 25:19 Wamu yake inane miti akngae gutonga tasikutde yaking. Yake aminu tapatu umana Jesu ngang inikaing. Ita gwa kumbut ngana Polda yake ita kayuk yuak ngang yawan kekekawan yanganuke wamu ie temapa yawa kakum.
ACT 25:20 Yawa kake na apbotake kepi dasing kaknga tasiwa yapii anggaman siwan kake noman gan usanziwit ngang natapbum. Unzing botake Pol anzing inikwaikum, ‘Gata dasing nataayak. Wamba atemapa yakaingu taku Jerusalem wamba yawi natapitde nataayak,’ ngang inikum.
ACT 25:21 Iniwa Polda yake, ‘Na nanduyuke nanitewi kuwa tupan tapa Rom yot gapmane yuak kapaninda wama yatapa takangamik,’ ngang nanikut. Naniwan natake kaautde yuwikge yakum. Yake masandea aminu tupan siknga aminu waapaninde tewa kuwikge yakum.”
ACT 25:22 Ngang Festasda Agripa iniwan yake anzing inikut, “Nata nina wamu aminu waapatane wamna natapnangge nataat,” ngang iniwan, “Ayok, kwepna natapso,” ngang inikut.
ACT 25:23 Siwan pewa kwakawana Agripaat Benaisiaatda inane umana tangenatnangge tauknga gwaam siknga tupan tapaapata pasikaingunin pasike paut tasikaking gwene amak aminde take amin takwakat gatu aminu umana kaya you wanggapmane nana amikat ngangga kopbing. Kopa kake Festasda amina yaniwan takapbing.
ACT 25:24 Takapa Festasda anzing yakut, “Agripa tupan aminu yuke ninduyuayak kapanin. Gatu notninu nikat gatake ayuamangga aminu aapa akaamang. Aminu Judia nana aminda Jerusalemu nae naniking. Nanike gatuna ane apuke ie wamu atemapa yaking. Temapa yake apaa yanggamatake tangutapa kupikge yaking.
ACT 25:25 Yawawa ngana gutonga akumnanga takngatu wena siwan kakum. Siwan ina yake aminu nindane tupan aminu Rom yot gapmane yuke nin ninduak kapata wamna yawan natapikge yakut. Yawan akuwikge gwan natapa yukut.
ACT 25:26 Natapa yuwan ngana wamu takngatu ie temapa yakaing kakngae siakan dua siwan natake takenin tapae pas sandu matake tewa kunanga dua singgak. Unzingge nata aminu aapa gae takapa aminu nikat gatake yuamangga akaamang. Takapuke wamna usanzike ita kaautde yuakge yapii anggaman siwan kanim. Kake wamu waaknga pas sakatangu matawit. Unzingge Agripa take apanin. Kaikane takapa gika usanzike yawi natapnim.
ACT 25:27 Sike ita kaautde yuwikgane yapii anggaman temapa yawa tekum ngangu dua matake tewa iat dua kuwan natapanu take dua siwik,” ngang yakut.
ACT 26:1 Siwan Agripata Pol anzing inikut, “Wamba take yaya,” ngang iniwan katakngata tuwang tasiyuk wamna anzing yakut,
ACT 26:2 “Take apana. Wama nombane yanangge natapa take siknga singgak. Ge wamu notna Judia nana aminda nae temapa yaking kakngae yake yananggenggat.
ACT 26:3 Gika atnataayak. Ninu Judia nana aminda kepi takngatu takngatu tawake tasike wamu takngatu takngatu yake yanganuke tasikamanggen. Sike nata wama ganiwa natapiyakge take siknga nataat. Ge wama ganiwa natake semna ma natapim. Wikake yuwawi ganiwit,” ngang inikut.
ACT 26:4 “Aminu Judia nana aminda atnataaing. Tupata na waatdakaneta daak kep komune yuke gatu pakapu Jerusalem yot gapmane yuke kepi tawake tasike apmanu yutakapunggatden.
ACT 26:5 Sike nata Ferisiat nana amin dakngake nindane mitie kepi tupata noman siknga tawakumde ngangu tupata atnataaing. Asikaya wamu wa nataaing kaknga apme ba yakapning.
ACT 26:6 Siwan wamu takngatu Anututa yake ninu Judia nana aminu gatanimunangge baminde yaniwan kekekakut. Wamu wa yaniwan kekekakut taknga buyana asaawikge natayuatde wamu nae temapa yakaing.
ACT 26:7 Sike notna Judia nana kuupbamda zikaane gatu kwakngaom ngang kwepapman Anutuekan natake inindatake sanga Anututa tupa yawan yukut takngata buya aawikge natayuaing. Unzing natayuwawa na kaya kuut unzakan natayuat ngana notna Judia nana aminda wamu waakngae temapa yakaing.
ACT 26:8 Ginu Judia nana amin ngana dasingge ginda natake Anututa aminu akupsa pangenakgak kakngae natapa siakan dua singgak,” ngang yanikut.
ACT 26:9 “Tupa nata sanga takngatu takngatu tasike Jesu Nasaret nana apatane umana tasiwa maiwikge natapa kekekakut.
ACT 26:10 Unzing natake Jerusalem yot gapmane yuke umana tasiwa maikut. Tasiwa maiwan aminu Anutue yot takwan gwene pasiya aminde takeakwakga nandutewa aminu Jesuat nana amin dakngake yuaingu panggaganuke kaautde pewa yuking. Yuwawa taketa zipa kumningge yawa natake apbakngake take zipnong ngang yakum.
ACT 26:11 Sike you gapmanduine kuke miti yot gwene Jesue amina dakngaking aminu kundu undang yuwa kake asinggan asinggan tasiwa maiking. Unzing tasike Jesue inisapdutningge kwatanbam tasike musipma toknga siknga siwan zipmake pasiwa mainingge pasike you nisane kep komune yuaing gapma gapmane gatu you keu komduine yuaing gapma gapmane kuut kuke zipmake yukum.”
ACT 26:12 “Siwan musipma toknga unzing natake aminu Anutue yot takwan gwene pasiya aminde takeakwakga nanitewa Damaskas yot gapmane kukum.
ACT 26:13 Kuke kepiapane kuwawa gunziu banakan gan yuwawan kusika kawawa enandangga kakaa takngatu waenga siknga gunzit binga dua siwan kake naat aminu kundu papa kukumangga apmaakakumang.
ACT 26:14 Maakake kepdakane pimake nata aminu tapatu dua kawawa ngana wamdakan Hibru wam tangan anzing nanikut, ‘Sol! Sol! Na dasingge tasiwi mainanggenggat? Nata tanomanukgawamba ngana dasingge bitake kekekake gika tasiwi mainggak,’ ngang nanikut.
ACT 26:15 “Ngang naniwan, ‘Takeapa! Ga mamin,’ ngang iniwa, ‘Na Jesu,’ ngang nanike, ‘Gata na tasiwi mainggatapanin. Sike unzing tasinggayak ngana enake dandamake yuyo. Nata apmanu ga tapa puya amina dakngawiyakge apunggat.
ACT 26:16 Ge puyana takngatu gama apmanu wa na nanduayak kaknga gatu masande sanga tapatu tapatu yeukgamit taknga aminbamde yanikapso.
ACT 26:17 Nata ganitewa kuke notda Judia nana aminde kuke yanikapmake tasiwawi gatu ganitewa kuke aminu dongu keu komduine nana aminde yanikapmake tasiwawi katakngane apme sandewit.
ACT 26:18 Na ganitewa kuku aminu kepman nana zikaa atang yuke pasikaing aminu yanikapi natake zikaa aknga teke kakaa akngane apning. Apuke Anutuekan yuke Setendane kekeknga akngae apbotake tening. Teke nae natapa kekeknga siwan kake Anututa waiakngana apme sandeyamik. Sandeyaman aminu tupa Anututa papan aminabam dakngake yuaing amikat unekan gatake yutning,’ ngang unzing nanikut.”
ACT 26:19 “Siwan wamu waaknga enandangga nanikut takngakan atasikum.
ACT 26:20 Waakngakan tasike tupan siknga tuwanguke Damaskas you gwan kukum gapmane yuke aminu unenana gamok yanikum. Yanike uneta Jerusalem yot gapmane kuke aminu unenana amin yanikum. Jerusalemu nana yanikenga uneta you Judia kep komune yuaing gapma gapmane kuke gatu aminu kepman nana amin keu komduine nanaaya yanisukukum. Yanisukuke wamu anzing yanikum, ‘Ginu musipza tapa tekwamban waiaknga tawake tasikaing kakngae masa imuke Anutuekan kuwa puyuyok. Kuwa puyuwan kepi kayuk tawake Anutue gwa kuwa puyukut takngata anggaman siwikge tasinong,’ ngang yanisukukum.
ACT 26:21 “Nata nina unzing siknga tasiwawa notna Judia nana aminda nae semna siknga natake na yot takwan gwene tanggaganupa atnutapa kupitde tasiking.
ACT 26:22 Tasiwawa ngana Anututa ina gatangaman yuwawa apu apman apunggak. Apan pakapu kaisane yuke wama take aminde kaine gatu moo aminde kaine ngangu yawa nataamang. Sike aminu tupa siknga Anutue wam yakapbing amikat gatu Moses ngangga yake sanga tapatu apmea anzing apik ngang yaking kakngaekan natake yanggat.
ACT 26:23 Aminu tupa yakingga anzing yaking, ‘Aminu Anututa tapan Krais gatanimuya apanin dakngake apik kapa aminda tangutapa toknga pake kungwake gatuna enake aminu moita kungwake unzakan enatningge kepi kayuk kapa tasiwik. Tasike ninu aminu kuupbam Judia nana amikat gatu kepman nana amikatda kakaa akngane yutnimde kepi yeutniman kanim,’ ngang yaking kakngaekan natake yanisukukum,” ngang inikut.
ACT 26:24 Siwan Polda unzing yake yuwawan Festasda apaa Pol anzing inikut, “Pol! Ga akatuptake yasukunggayak. Asikaya ga natdetdeu kwaapzang pake pasike botake unzingu yanggayak,” ngang inikut.
ACT 26:25 Iniwan yake anzing inikut, “Buyambam tapa! Na dua katuptat. Wena siknga! Na wamu siakan siknga yanggat,” ngang Festas inikenga ita Agripa anzing inikut,
ACT 26:26 “Takeapana! Sanga waakngae ganinangge dua gwaukgat. Gata sanga wa kuupbamu atnataayak. Sanga wa ganinggat taknga anggaman aakinggen. Sike ganinangge dua maakat.
ACT 26:27 Siwan asikaya ga wamu tupa siknga Anutue wam yakapbing aminda yaking kakngae natapi siakan ba singgak? Gata atnatapi siakan singgaknga atnataat,” ngang inikut.
ACT 26:28 Iniwan yake anzing inikut, “Gata nanindatdauwi zetgaman Jesuat nana amin dakngawitde yanggayak,” ngang inikut. Iniwan yake anzing inikut,
ACT 26:29 “Zetgaman ba wepda ngang gata gika banipda siwan dakngawiyakge apbaknganggat. Ngana Anutue tumuk wamu anzing yanggat. Na ga gatu aminu wam yawa nataing ngangu kuupbamda nina binga daknganingge nataat. Natake senu a na wamateing kakngakan gikat yutningge dua nataat,” ngang yakut.
ACT 26:30 Yake bitawan tupan amin takwau Agripa gatu Festas gatu Benaisi gatu amin mooi kundu une yuking kuut siknga enake epu kuking.
ACT 26:31 Epu kuke taku inatakan anzing yaking, “Aminu waapa wai akumnanga ba kaautde yutnanga ba takngatu tasikut dua,” ngang yake
ACT 26:32 Agripata Festas anzing inikut, “Aminu waapa aminu tupan tapaninu Rom yot gapmane yuke ninduyuak kapata wamna natapikge dua yakut gamu take tewi kuwan,” ngang inikut.
ACT 27:1 Siwan gavmanda yandamuke ninu Itali kep kom Rom yot gapmane yuak komune sip gwen take kunimde natake Polkat gatu kaaut notna kundu ngangu pake aminu amak amin 100 kayuau tapatutane katakngane pengama Rom pake kuwikge imuking. Amak aminu waapa umana Julias ngang iniking. Ita amak amindane dongu musatu aminu tupan sikngaapa umana Ogastas ngang inikinggane gen gwaamukaikat nana tapatu.
ACT 27:2 Yandamuke kaaut amin ima pake siu gwendu Adramitiam you gapmane nana amindane gwenu take you Esia kep komune yuaing gapma gapmane kunangge gwa tandakngake yukut gwene kopbumang. Koke undang kukumang. Kuke aminu tapatu umana Aristakas ngang inikumang. Ita Tesalonaika yot Masedonia kep komune yuak gapmane nanaapa. Ita nikat gatapan kukumang.
ACT 27:3 Kusika kuwatna kwakawan Saidon yot gapmane kundopbumang. Kundopna Juliasda Polde butaya natangamuke katewan Polda notnae kuwan nanam ba sanga unzingu take gatangamuking.
ACT 27:4 Siwan Saidon teke uneta kunangge tasina ngana gotda puyatake akukumang saakatangga apbut. Apuwawan paku Saipras keu yangga banakan yuak dakata umuban kautdu saak kukumang.
ACT 27:5 Kusika kusika keu komaya Silisia kep gatu Pamfilia kep ngang yanikaing komaat kuyapbike Maira yot Lisia kep komune yuak gapmane kundopbumang.
ACT 27:6 Kundoke amak aminu waapata yanikwaisika siu gwendu Aleksandria yot gapmane nana amindane gwenu take Itali kep komune kunangge tasinggawa kakut. Kake ninu ninipake kuwan siu wagwene kopbumang.
ACT 27:7 Kopna kuke ngana gotda unzakan apuwawan wikake siknga kuwatna tapduu kundu atnipbikut. Nipbiban kusika Naindas keu yangga banakan yuak komune wesimu kukumang. Kuwatna gotda sipde nomna saak kekeknga siknga puyapan akukumang saak kunangge apmeptake kautdu saak kukumang. Kusika Krit keu yangga banakan yuak komune kundoke kautdu Salmoni ngang inikaing saak kuke yapbike kukumang. Kuke keu wandakata umuban kautdu saau wikake siknga kukumang.
ACT 27:8 Kusika kautdu saak keu komdu umana Gotna Wena Take Yuaing Kom ngang inikaing komune kundopbumang. Keu wakomune you gapmandu umana Lasia ngang inikaing gapma wesim yuakuunin.
ACT 27:9 Siwan keu waomune yuwatna tapduu kwaapzang nipbikut. Nipbiban yuwatna tapduu yangga bam gwene kusika upetnanga gwenda apbut.
ACT 27:10 Apan Polda kake aminu anzing yanikut, “Mate. Apmanu akunimna kakengu meya kanim. Kake tasina sangabaminu kundu yangga bapatang pukuning. Sike sangatakan pukuning ngangu ma natapam. Nisaaya asopunanga ngang nataat,” ngang yanikut.
ACT 27:11 Yaniwan ngana aminu siu wagwen tanggak kapaat gatu toikngaatda yake amak aminu waapa inindatdauwat wamna gwaamuban Polde wamu asapdukngamuking.
ACT 27:12 Sapdukngamuke keu waomu gotda asinggan puyawawan sip gwenu teyutnanga dua ngang natake aminbamda keu waomu ateke kunangge yanggatapbing. Yanggatapa ngana tapatu tapatutakan apbitaking. Siwan ngana yanggatake keu ayuamang kom teke yanggabam gwene kuwatna gotbamu kekeknga siknga dua apuwawan kusika kautdu Finiks ngang inikaing saak kuke keu andakata umuban takekan yuwatna gotbamda undang puyake bitawana kunim ngang yanggatake yuking.
ACT 27:13 Yanggatake yuwana gou kwikwiknga siknga puyapbut. Puyapa gwa yakumang kaknga apme kunim ngang yake sanga sip gwen tanggaganuwan yuak gaka kaiwa asakopan gotde gwauke Krit kep komde kwaim tapa tawatake kukumang.
ACT 27:14 Kuke mamaya dua kuwatna gotda kekeknga siknga pupupzang puyapan keu wa akunangge akukumang dakane kunangge apmeptakumang.
ACT 27:15 Meptake yuwatna gotda puyatawamban sip gwenda dambu kukut. Kekeknga siknga puyatawamban kuwan gatu tana tekwananga dua siwan unda tena kukut.
ACT 27:16 Kuwawan kuku keu yanggabam gwene mateknga dakatusimu umana Koda ngang inikaing dakata umuban kautdu saak kukumang. Kuke dopangbamu sipda asinggan kaitakunggak gwen zimu puya aminda kwatanbam pasike kaitakapuke wamakusiking.
ACT 27:17 Wamakusiwan yanggata sipgwenu zipmawaiwan kumnam ngang yake napda sip gwenu gitna wambing. Gitna wamake gotda puyatawamban kusika dua kake dain ganang katang kuke tanguwan wai siwan kumnam ngang natagwauke tauk daka daka katap tapaapane mitapbingu awaitdepeking. Waitdepeke unda tewa puyatawamban kukut.
ACT 27:18 Gotda kumzang puyanipbiwawan gatu yanggabamde sambuyata gwenda enake akwainipbiwawan kukumang. Kuwatna kwakawan sangaapa sipda pakuwikge pamukingu tuwanguke apmuking.
ACT 27:19 Muba puyuwan kuwatna akwakawan tapduu gweaat gwenduat sikuu wagwene sangaapa sipdane puya tasikainggane sanga katakngata pake muking.
ACT 27:20 Muba puyuwan ngana gotda kumzang asinggan puyanipbikut. Puyanipbiwawan kusika keu dakatu dua kakumang. Dua kake mingata wamakusiwan gunzit gatu yekapdaak ngangu dua kake kuwatna tapduu mamaya atnipbikut. Dua kake katasina mainggawan keu komdune apme kundopnim ngangu dua natapbumang. Sike teke akumnanggekan natapbumang.
ACT 27:21 Siwan unzing natake nanamu dua nake komdubam yukumang. Yuwatna Polda kake enake anzing yanikut, “Mate notna! Tupa nata Krit yuke danikum taknga tawake yukumang gamu meya akaamang kaknga dua kanam.
ACT 27:22 Siakan ngana apmanu musipza gitnata yutnong. Aminu nikat nana tapatu dua siknga kupik. Dua kupik ngana sip gwendakan siakan apmea maiwan yanggaatang pukuwik.
ACT 27:23 Na zikaa anggwene kawawa Anutu asinindatake gena gwaamukgat tapatane angelana tapatuta nae apuke anzing nanik,
ACT 27:24 ‘Pol! Magwaumbim. Paku tupan amin Rom yot gapmane yuak kapa wamba iniwi natapsok. Ge ganiwa natapso. Anututa gae banip gwaang natanggamuke aminbamu gaat sip gwene gatake yuaingu gatayaman dua kumning,’ ngang nanik.
ACT 27:25 Ge mate notna! Unzing nanikge musipza gitnata yutnong. Na Anutue angelanata atnanik kaknga buya asaawik ngang natapa siakan singgak.
ACT 27:26 Unzing aawik ngana gotda puyanipbiwawan kuwatna sipgwenda kusika keu yangga banakan yuau dakatusimde kwaim tapa tanguwan keu wandakane yutnim,” ngang yanikut.
ACT 27:27 Siwan gotda sip gwenu puyatawamban kuwatna sande gweaya atnipbiban kusika yangga bamu gwendu umana Edria ngang inikamang. Yangga wagwene banakan gotda puyatawamban kuwatna sipde puya aminda natawawa keu dakatune wesimu gwa ba apumang ngang natapbing.
ACT 27:28 Natake nap takngane sanga meya siknga une wamanggaganuke tewa pukuwan nap taknga ngwakngamuban kepdaka maa siknga dua tuwangu 120 nganggan kaking. Kake gatu kundusim kuke gatu muking. Muke kawa tuwangu 90 nganggan kaking.
ACT 27:29 Kake dain ganang katang tanguwan sipda wai siyak ngang natake akgwauking. Akgwauke sipdane mase saak kuke sanga sip gwen tanggaganuwan yuak dakaat dakaat ngang tatawamban yanggaatang pukuke sip gwenu ita tanggaganuking. Tanggaganuwa yuwawan zetgaman kwakawan ngang natake meya buyak natayuking.
ACT 27:30 Unzing natayuwawa aminu siu wagwene pasikingu atdatang kunangge natapbing. Natake kemaema tasike sanga sip gwen tanggaganuwa yuak dakandaka pake sipde nomna saak kaya mutna ngang kem yake dopangbamu tupa wama kusikut gwenu waike tatawamba pukukut.
ACT 27:31 Tatawamba pukuwan ngana Polda yake amak aminu kayuak kapaat aminu iat gatake pasikaing takwau anzing yanikut, “Aminu waakwakga siu anggwenu ateke kuwanu ginu kuupbamda akumning,” ngang yanikut.
ACT 27:32 Yaniwan natake nap taknga patdakngawa dopangbam gwenzimu yangga gwene tapataiwan gotda puyatakukut.
ACT 27:33 Siwan kwakanangge dapakawan Polda aminu siu wagwene yukingu nanamu kundu naningge yanindatdauke anzing yanikut, “Komdubamu musipmin taknga kuyup kuyupzang akoyambing kaknga dua wikak. Dua wikawan nanam paya dua nakumang. Dua nake yuwatna kuku tapduu katau kuut musaat kepianganu gweaat gweaat ngangu gwa nipbikut.
ACT 27:34 Ge nanamu kundu tupakande nanong. Nake kekekanong. Ge natapnong. Nikat nana tapatuta dua siknga kupik. Gwapat danggamza takngatusim paya dua maiwik.”
ACT 27:35 Ngang yanike aminbamde kaine poyau gomdu take Anutue inimbakngake putdakngake atnakut.
ACT 27:36 Nawawan aminbamu waakwakga kake musia pewa wikawa naking.
ACT 27:37 Siwan ninu aminu siu wagwene yukumangu buyambam siknga 276 ngangga yukumang.
ACT 27:38 Sike nanam nana musipminu gitna siwana puya aminda sip gwenda meptake amunandang siknga dua pukuke dain daka dua tanguwikge natake nanam zau sipda pakuwikge pamukingu bek buyak yanggaatang mupewa pukuking.
ACT 27:39 Mupewa pukuwa yuwatna kwakawan tasipangu keu dua kakingu dakatune kukinga kaking. Kake yangga saakgan dainu wena komune kuke kuku saisai gwaam siknga dakane kopnanga kaking.
ACT 27:40 Kake sanga sip gwen tanggaganuwa yuak dakandaka pewa pukukingu kuningge natake tupakande patdakngawa pukuking. Pukuwana gatu sip gwenu stia atanomanuwawan kunggak dakaau napda tupa wambing ngana gatu waiking. Waiteke gotda puya tawamban kuke atu saisai gwaam daka akakingune kopikge sipdane nomna saak tauk dakandaka paku mitapbing. Mitapa puyatawamban kuke ngana
ACT 27:41 kumzang siknga kuku dain ganang katang tanguke nomna tapa undang usiban kopbut. Koke kekekawan gatu mase gomu yanggabamda enake zipbusaangukut.
ACT 27:42 Zipbusaanguwan amak amin takwakga yake kaaut aminda gamok yanggaatang suwim tasike datakunang ngang yake kupsae zipnangge yaking.
ACT 27:43 Yawa ngana amak aminde tupan tapata Pol gatangamunangge ayanimbitakut. Yanimbitake aminu suwimu atasike nataakingga gamok paapukuke engatangan yanggaatang kuke saisai dakane kundopningge yanikut.
ACT 27:44 Yanike gatu aminu suwimu dua tasike nataaingga katap san sanzim ba sip gwendane katap dapak dapak yanggata zibusaangukut sasan pake waangan koyuke kuningge yanikut. Yaniwan wamna gwaamuke aminu kuupbamda takekan kwaim tapane kopbing.
ACT 28:1 Siwan kopna keu wandakasimune nana aminda keu andaka Molta ngang inikamang ngang niniking.
ACT 28:2 Siwan sopa tawan kep gwenu got siknga sikut. Unzing siwan aminu keu wandakane nanata ninu katak siknga toiking. Sopa tawan katap sake ninipaku une nipmaba aikumang.
ACT 28:3 Ninipake paku nipmaba Polda enake katap saanu kundu butuke katapatang sakut. Sawan gomou takngatu amiyasik takngata katap saan takwak katang yukutna katapda isitawamban epuke epu Polde katakngine isike ataawasikut.
ACT 28:4 Taawasiwan aminbamu keu wandakane nanata kaking. Kake anzing yaking, “Asikaya aminu aapa aminu kundu atzipbut. Zipbut ngana yangga gwene dua kumbut. Ngana sanga wai tasikut takngae kupikge gomokga isinggak,” ngang yaking.
ACT 28:5 Yawawa ngana Polda meya dua sike gomok taknga makaitamamban katapatang puku isikut.
ACT 28:6 Isiwan kake katakngi apba paptawik ba zetgaman apba kupik ngang natake kayuwawa ngana noman gan yukut. Dua kungwake ba meya takngatu dua papan kaking. Kake musia tapatekwamban yake aminu aapa kep kwatanu tapatu ba ngang yaking.
ACT 28:7 Siwan keu ayukumang komune keu komdu wesim yuak. Sike keu wa Molta ngang iniking dakane nana aminde take apana umana Pablias ngang iniking. Ita keu wa komdane toiknga unin. Ge aminu waapata ninipaku yotnane nipmamban tapduu gweaat gwenduat ngangu iat gatake yukumang. Yuke ninu katak siknga toikut.
ACT 28:8 Siwan aminu wa yukumang kapatane nanata maitna kokok siyuk gupna toknga sikut. Siwan natake Polda kuku Anutue tumuk wam yayuk katakngata tangene wasiwan maitna wena sikut.
ACT 28:9 Unzing tasiwan kake keu wandakasimune nana aminu mait sikingga iekan apbing. Apa maitna sandeyaman wena siking.
ACT 28:10 Siwan Polda unzing tasiwawan kake apbakngake sanga kwaapzang pakapu tematamunimuking. Siwan keu wandakane yuwatna yekau gweaat gwenduat gwa nipbiban ninda peke kunangge tasina sanga paku nanimde gatu sanga kundu yanggabam gwene kusika dapnang ngang natake atnimuking.
ACT 28:11 Siwan teke kunangge natake kawatna siu gwendu Aleksandria yot gapmane nana amindane gwenu gotbamda puyake bitawana wagwenu akunangge tasiwan kakumang. Kake wagwene kopna pake kukut. Siwan anutu pupuknga tapatu umana Sus ngang inikakinggane waaknga bokngan aakumayak ngang yanikaking. Ge waaknga waapaatdane weena sip wagwende nomnandakane pasike tasiking.
ACT 28:12 Sike sip wagwene kopna pake kuwan kuku Sairakyus yot gapmane kundoke une tapduu gweaat gwenduat ngang yukumang.
ACT 28:13 Yukumanga you wanggapma teke uneta kuku Risiam yot gapmane kundopbumang. Kundoke yuwatna kwakawan gotda sipgwende maseatangga puyapbut. Puyatawamban kuwatna tapduu gweaya nipbibana Pyutiopai yot gapmane kundopbumang.
ACT 28:14 Kundoke sip gwenu teke epuke notninu Jesuat nana aminu kundu kakumang. Kana ninu sande gwendu iat gatake yutnimde nininggakake ninu yotnane pakopa yukumang. Yusika you wanggapma teke uneta kepindupi Rom yot gapmane kukumang.
ACT 28:15 Kuwatna notninu Jesuat nana aminu Rom yot gapmane yukingga ninde unzing apukaing ngang natake kepine nindupa kunimde apu kunduta yot gapmandu umana Apias Maket ngang inikaing gapmane nindupbing. Gatu kunduta you gapmandu umana Usiwamu You Gweaat Gwenduat ngang inikaing gapmane ako nindupbing. Nindupa Polda kake bakngake Anutu inimbakngakenga musia pewan wikawan natapbut.
ACT 28:16 Natapan kuku Rom yot gapmane kundopna aminu tupan tapata katewan Polda you gwendune inatakan yuwan amak aminu tapatuta kayukut.
ACT 28:17 Kayuwawan tapduu gweaat gwenduat kawan puyuwana Polda yake Judia nana aminda paku you wanggapmane yuaing aminde takeakwau yayawakut. Yayawamban unekan apana ita anzing yanikut, “Mate notna! Na sanga ninu Judia nana amindane umanin tasiwa maiwikge takngatu dua tasikum sike kepi baminda tasikaking kaknga atawake tasikamangu zipbutnangge dua tasikum. Unzing dua tasiwa ngana Jerusalemu moo siknga na tanggaganuke Rom nana aminde katakngane yamuking.
ACT 28:18 Yama napmaba wama Rom nana aminde kaine yawa gutonga takngatu wena sikut. Siwan moo siknga kupsae nutnangge dua natapbing. Natake napmaba epu akuwitde tasiking.
ACT 28:19 Tasiwa ngana Judia nana aminda asapduking. Sapduwa na kepina wena siknga sikut. Kepi wena unzing siwan teke gatu wama yawa Sisata natapikge yanikum. Sike ninae notnae wamu takngatu dua temapa dua yanangge yakum.
ACT 28:20 Ge wamu aaknga yandawamba apa danduke daniwitde yandawat. Ge ninu Isrel nana aminda natake aminu akgatanimuya apata apik kapae atnatayutawakamang. Ge aminu waapaekan natake yanisukukum takngae natake Judia nana aminda yawa kekekawan kataknga senu aakngata wambing,” ngang yanikut.
ACT 28:21 Yaniwan natake yake anzing iniking, “Aminu Judia nana tapatuta gae wamu dua temapa yake pas sandu gae dua matake nimukut. Gatu aminu tapatu Judia kep komune teke uneta apbikat nana tapatuta apu gae wamu wai takngatu dua niniwan natapbumang.
ACT 28:22 Ngana apmanu ga natdetdetdaatang dasing nataayak ge unin gendaneta siknga ngang niniwi natapnimde natamang. Sike nisa atnataamang. Kepi wa gata tawake tasinggayak kakngae aminbamda atemna wam yakainggen,” ngang iniking.
ACT 28:23 Inike sipdune pautde you Polda yukut gwene apnangge yandamuking. Yandamukinga tapduu ayaking gwenda apan aminbamda apu yuking. Tembana apbing ngana yuwawa yuwawa kuku gunziu apukukut. Wa yuking bamu yuke Polda wamde yapii katak siknga yaniwan natapbing. Yanike Anututa itane kekeknga aknganata wamanipmamban ie gepbiatang yutnimde yanikwaapzawan kukut. Yanike musia papan tekwamban Jesue natake Anututa tapan Krais akgatanimuya apanin ngang natapa siakan siwikge tasike Mosesda mama wamna matakut takngae yanike gatu tupa Anutue wam yakapbing aminda mataking kakngaat pakapu unekan peke yanikut.
ACT 28:24 Yaniwan natake kunduta natapa siakan sikut. Siawa kunduta asapduking.
ACT 28:25 Sapduwa yanganuke tasitake kuking. Siwan dua kunangge tasike ngana kuwawa Polda wamu takngatuat anzing yanikut, “Anututane Waung Kapata wamu siakan siknga ngang iniwan natake wamu yakapsa aminu Aisaiata genaneta baminu anzing yanikut,
ACT 28:26 ‘Kuku aminu gikat nana aminu anzing yaniyo, “Ginu kwep apman asinggan wamu natake ngana yapii dua siknga natdetning. Dua natdeke gatu sanga takngatu takngatu katasike ngana yapii dua siknga kaning.
ACT 28:27 Sike aminu waakwakgane natdetdetna dapaknga siknga. Maaknga ina gwan yamakusiking. Yamakusike kaina gwan wamakusiking. Sike unzing dua tasiking gamu natake kake gwan natdewam. Natdeke apa waiakngana sandeyamuke maitna sandeyamam,” ngangu Aisaiata ngang Anututane wamu takngatu unzing matakut,’ ngang yanikut.
ACT 28:28 “Ge daniwa natapnong. Ginda unzing sapduwawa wamu wa matakut taknga buya unin aakgakge wamu wa Anututa ninu gatanimuke waiaknganin sandetnimik kaknga aminu kepman nana aminde Anututa gwan tewan kukutna apme natapning,” ngang yanikut.
ACT 28:29 (Yanike bitawan Judia nana aminda teke kuke taku ina kumzang yanganuke kuking.)
ACT 28:30 Siwan Polda nakanu gweaya you ina manita usikut gwene yukut. Yuawan aminu unin kanangge apbingu apa yotnane pakopbut.
ACT 28:31 Pakoke yuke Anutue wam natake ie Anututa itane kekeknga aknganata usikwatanipmamban gepbiatang yutningge yanike gatu Takeapa Jesu Anututa tapan Krais gatanimuya apanindane wamu kuut tawake yanindamukut. Unzing yake yanindamuke tasiwawan ngana aminu tapatuta puya waaknga tewikge dua siknga ngang inimbitakut.
ROM 1:1 Na Pol Jesu Kraisdane puya amina dakngake yuat. Anututa na tapan nata wamu takeaknga Anututa nimukut taknga aminbam yanikapitde na takut. Unzingge na aposel amin dakngake yuat.
ROM 1:2 Tupa siknga Anututa wamu take waaknga yawan itane amina ayanikapsa aminda natake Anututane wamu take waaknga mataking.
ROM 1:3 Anututa wamu take waaknga yake inane waaknga siknga tapan ita Krais akgatanimuyaapa dakngawikge yakut. Sike waaknga waapa Buyambam tapaninu Jesu unin. Sike waaknga waapata nisae gup dakngakuu Devit ninu Isrel nana aminde bamindane buyambam tapa dakngake yukut tapatane waakngata waakzak sitake sitake kunggawan apu apu engangu tapatuta aakut. Aake buyambam takake yuwawan kunduta tanguwa kumbut. Tanguwa kupan ngana Anututa inane kekeknga aknganata akumbut katangga tangenake yeutniman ninda Anututane waakapa unin kakumang. Ita aminu dudumna siknga Anutu binga dakngake yuwan kakumang.
ROM 1:5 Siwan Anututa yawan Jesuta na take itane puyana tasiwitde takut. Nata aminu yotna yotna nana aminde kuke yanikapmake musia papa nomatawa Jesue natapa kekekawan itane gen gwaamuke tasiningge na takut.
ROM 1:6 Unzingge nae aposel amin tapa ngang nanikaing. Sike gikaya Rom yot gapmane nana aminu Anututa ginu papan Jesu Kraisdane aminabam daknganingge pakut aminde kuwit. Kuke nata musipza papa kekekaningge natake ita na takut.
ROM 1:7 Ita unzingu na takutde nata pas asanu ginu Rom yot gapmane yuaing aminde matandamunggat. Anututa gin yandawamban ginda itane aminabam dakngake yuwawa ita ginde musip gwaang natandamunggak. Nata ginde anzing nataat. Nanin Anutuat gatu Buyambam tapaninu Jesu Kraiskatda ginde kwikwiknga natandamuke gindane musipza pasiwat musipza kwikwikngata yutnong.
ROM 1:8 Wamu tupan taknga anzing daninangge nataat. Aminu yotna yotna nana aminda ginde natake ginda Jesue natapa kekeknga singgak ngang nataaing. Unzingge nata ginu kuupbamde natake Anutue inimbaknganggat. Inimbakngake nata gaak wamu Jesu Kraisde iniwa ita take Anutue ininggak.
ROM 1:9 Siwan nata Anututane puya tasinangge iaknga siknga nataat. Natake wamu take itane waakngata tasikut taknga aminbamde yanikapmanggat. Sike Anututa nae atnataak. Nata asinggan ginde natanggamatake tumuk wamu Anutue ininggat.
ROM 1:10 Iniwa ita kepi tasingaman nata ginde kuwitde natake ininggat.
ROM 1:11 Ngan. Nata gin dandupnangge take siknga nataat. Gin danduke nata gindane musipza papa kekekaningge natake dandupnangge nataat.
ROM 1:12 Sike nata gin gatandamuke nata musipza papa kekekawa ginda Jesue natapa kekekanggak kakngata buyambam siwik. Siwan ginda na gatangamuke ginda musipma tapa kekekawan nata Jesue natapa kekeknga singgak kakngaaya buyambam siwik.
ROM 1:13 Siakan notnabam. Jesuta na tapan nata wamu take waaknga aminbam yanikapitde na takut. Aminu kuupbam keu ninda ayuamang komune nana amikat gatu keu komduine nana amikat ngangge kuke yanikapitde na takut. Aminu natdetdetna kaya amikat gatu natdetdetna wena amikatde kuke yanikapitde na takut. Unzingge nata Anututane wamu takeaknga ginu Rom yot gapmane nana aminde kuut danikapnangge iaknga siknga nataat. Nata aminu you ginda yuaing gapmane nana aminu kundue pasiyama buya aawan Jesue aminabam daknganingge nataat. Unzing nata aminu keu komdu komdune nana aminde gwa pasiyamukum binga pasinangge nataat ngana nata ginde kuwitde kepi wena. Ginda sanga waakngae ma botawam.
ROM 1:16 Ngan. Nata Anututane wamu takeaknga yanikapnangge dua maakanggat. Dasingge? Wamu take nata yanikapmanggau waaknga Anututane kekeknga aknga unin. Wamu waakngata aminu kuupbamdane musia papan nomatawik. Judia kep komune nana amindane musia gamok papan nomatawa gatu aminu keu komduine nana amindane musia papa nomataning. Papa nomatawa aminda wamu take waakngae natapa siakan siwiu wa aminda Anutue kuwa Anututa waiakngana sandeyamik.
ROM 1:17 Siwan wamu take waakngata kepi takngatu aminda Anutue nomune gitna yutningge kepi yeutnimunggak. Ninda Jesue natapna kekekawanu Anututa nindupan take siwik ngang yeutniman ninda kepi waakngakan tawana siakan siwik. Wa unzing Anututane wam ayanikapsa aminu tapatuta wamu takngatu anzing matakut. Aminu tapatu Anutue natapan kekekawiu Anututa kawan take siwan waapata kayuu asinggan asinggan yuwik ngang matakut. Unzingge nata wamu waaknga yanikapnangge dua maakanggat. Aminbam gatayamunanga.
ROM 1:18 Siwan Anututa kepi wa yeutnimukut takngae yapii anzing. Anutu enandang yuak kapata aminu kepdakane nana Anutue masa imuke sanga wai takngatu takngatu tasiyuke Anutu siknga apatane sanga yaitapakusikaing aminde musia toknga natayamunggak.
ROM 1:19 Dasingge? Tupa siknga Anututa sanga kuupbam tasike tekut takngata yeutniman Anututa Anutu siknga kekekngana kaya ngangu anggaman siyamukut. Anututa sanga waaknga yeuyaman anggaman kake sanga Anututane kundu aminda akananga aknga gwa kaking. Sanga kuupbam Anututa tasike tekut taknga kake wa aminda Anutue natake ita Anutu siknga kekekngana kaya apa ngang natapbing. Anggaman natake ngana yamandet sikaingge wa aminda wamu ayaning ngana apmeptake wamu yananga dua siwik.
ROM 1:21 Wa aminda Anutue natake ita ayuak ngang natake ngana itane umana dua yatangenake Anutu siknga unin ngangu dua inimbakngaking. Aho. Wa aminda sanga yapiina wena yumdekan takngae natake sanga katumda tasikaing kaknga tawake tasikaing.
ROM 1:22 Wa aminda katum binga dakngake ngana ninda natdetdetninu buyambam ngang yake yamandet sikaing.
ROM 1:23 Sike wa aminda masa Anutu kekeknga siknga asinggan asinggan yuwik kapae imukaing. Imuke musip gwaangu sanga pupuknga amin wee ba kwait ba kaap ba gomokge weena pandaike pekingge natayamuke yanindatakaing.
ROM 1:24 Unzingge wa aminu Anututa bitapewan wa aminda sanga waiaknga ina banipda siwan tawake tasiking. Tasike wa aminda sanga maakngana kaya aknga tasiwawa umana pimaking.
ROM 1:25 Sike aminu waakwakga masa Anututane siakan wam takngae imuking. Imuke musip gwaangu anutu pupukngae natayamuking. Natayamuke sangabamu Anututa tasike tekut takngae yanindatake wa aminda Anutu sangabamdane yapii apae masa imuking. Ngana ninda Anutu waapae asinggan asinggan inimbaknganim. Siakan.
ROM 1:26 Unzingge wa aminu Anututa bitapewan sanga musia enayaaknga tawake tasiking. Tasike mayata sanga nomana apnae kunanga aknga teke sanga gutonga aknga tawake tasiking.
ROM 1:27 Siwan wawaiaya sanga nomana maya papsa aknga teke musia toknga katapda binga enakgak kaknga tawake tasiking. Tasike wawitakan ngana sanga yasewa wa tasiking kakngata gupna pasiwan maiwa toknga aknga waiaknganae unin paking.
ROM 1:28 Wa aminda Anutue masa imuke undanga ngang natapbingge Anututa wa aminu bitapewan sanga maakngana kaya aknga tawake tasiking.
ROM 1:29 Tasike wa aminda sanga nomana dua aknga asinggan tasiwawa buyambam siknga sikut. Sike yasewa tasike notna pasiwa maiwa notnae sangaapanae geenguke musia wai natake musia zikaa siwan amin zipa kupa yumdekan yanganuke iwan dakngake sapdut wamu ayawawa waiakngana buyambam siknga singgak.
ROM 1:30 Siwan wa aminda aminu kundutane umana pasiwa mainingge yake Anutue atemna natake yamandet sike sanga wai kayuk kaknga tangenake nana mingatane wamu asandekaing.
ROM 1:31 Sandeke sanga yapiina wena yumdekan takngae natake apiapit wam yake inapaande yumdekanu musip gwaang dua natayamuke musia zikaa siknga natake aminu tapatue butaya dua natayamukaing.
ROM 1:32 Wa aminda Anututane mama wamu atnataaing. Aminu sanga wai waaknga binga tasining aminda Anutue nomune take dua yutninggen. Wamu waaknga atnataaing ngana undanga. Wa aminda sanga wai waaknga inatakan dua tasikaing. Aho. Aminu kundu sanga wai waaknga kuutda tasikaing aminde apbakngakaing.
ROM 2:1 Unzingge aminu gikat nana tapatuta aminu tapatu anzing ba iniwik, “Gata sanga wai waaknga tasike gata aminu wai amin dakngake yuayak,” ngang iniwik. Aminda wamu waaknga iniwi waapata inane waiakngana takusopunanga dua siwan ita aminu wai aminu kuut dakngake wamna yanangge ngana apmeptawik.
ROM 2:2 Sike ninda atnataamang. Anututa sanga nomana tasike aminu sanga wai wa nata daninggat taknga tawake tasikaing amin usanzike toknga aknga yake yaman noman siwikgen.
ROM 2:3 Siwan aminu tapatuta ba sanga waiaknga gata tasinggayak kakngakan tasiwik. Waapata unzing tasiwan kakengu gata inike ga waiaknga tasinggayak ngang iniwiyak. Gata unzing inikengu asikaya waiakngakata kusopuwan Anututa nandupan take singgak ngang nataayak?
ROM 2:4 Siwan Anututa gae natake gata musipba tapi tekwamban waiakngakae masa imiyakge natake ita musip kwikwik natanggamunggak. Natanggamuke yusika ita kakgan sike gandutewan waiakngaka tawake tasinggayak. Ita tapduu mamaya siknga kakgan sike yuak ngangu gata dua ba nataayak? Dua natake gata musip kwikwiu Anututa natanggamunggak kakngae masa imuke undanga ngang nataayak.
ROM 2:5 Undanga ngang natake gata yamandet sike musipba tapi tekwamban waiakngakae masa imunangge dua nataayak. Unzingge tapduknga Anututa aminbamu nomana siknga usanzike toknga yake waiaknganae yamik gwene gata toknga siknga papsa.
ROM 2:6 Anututa kawawan aminu kuupbamda sanga atasikaing kaknga kake usanzike natapan gutongana wena siwanu wa aminda takekan yutning. Sike ita usanzike natapan wai siwanu wa aminda toknga pake yutning. Ita usanzike tasiwan noman siknga siwik.
ROM 2:7 Siwan aminu kunduta sanga takeaknga tawake tasikaing. Tawake tasike semna dua natake wa aminda sanga Anututa apbakngake umana asiknga yapangenake kayuu asinggan yutnanga aknga yamikge natanggamatake tasikaing. Tasiwawa Anututa sanga wa aminda iat gatake kayuk asinggan asinggan yutning kaknga ayamik.
ROM 2:8 Siwan ngana aminu kunduta yamandet sike Anututane siakan wamde masa imukaing. Masa imuke wa aminda sanga waiakngakan tawake tasikaing. Tasiwawa Anututa masande aminu waakwakge toknga siknga yaman pake yutning.
ROM 2:9 Siwan aminu sanga waiaknga tawake tasiningu wa aminu kuupbamda masande toknga siknga pake yutning. Aminu keu komduine nana sanga waiaknga tawake tasiningu wa aminda toknga apaning. Siwan ngana aminu Judia kep komune nana sanga waiaknga tawake tasiningu wa aminda yapbike toknga buyambam siknga pake yutning.
ROM 2:10 Siwan ngana aminu sanga takeaknga tawake tasiningu wa aminu kuupbamde Anututa musia kwikwiknga natayamuke wa amindane umana yapangenawan takekan asinggan yutning. Aminu keu komduine nana sanga takeaknga tawake tasiningu wa amindane umana yapangenawik. Siwan ngana aminu Judia kep komune nana sanga takeaknga tawake tasiningu wa amindane umana enane siknga yapenganawik.
ROM 2:11 Ngan. Anututa aminu kuupbamde buya takngatukan usanziwik. Usanzike inaat nana aminde dua kotnake waiaknga tasikaing aminu keu komduine nana amikat gatu Judia kep komune nana amikat kuutde toknga ayamik. Yamuke inaat nana dua keu komduine nana aminu takeaknga tasikaing aminde masa dua yamuke aminu Judia kep komune nana amikat gatu keu komduine nana amikat kuutdane umana yapangenawik.
ROM 2:12 Aminu Mosesdane mama wamu dua natapbing aminda apbotake waiakngana tasikaing. Wa aminda waiaknganae toknga apaning. Siwan aminu Mosesdane mama wamu asinggan nataaing aminda yamandet sike mama wamu waaknga sandekaing. Wa aminu kuutda toknga apaning.
ROM 2:13 Sike aminu Mosesdane mama wamu maakngita nataaing aminda Anutue nomune aminu noman amin dua dakngake yutning. Aho. Aminu mama wamu waaknga tawake tasikaing aminda Anutue nomune aminu noman amin dakngake gitna yutning.
ROM 2:14 Sike aminu Judia kep komune nana amin dua ngana keu komduine nana aminda Mosesdane mama wamu dua natapbing. Dua natake ngana wa aminda sanga noman mama wamu waakngata yanggak kaknga ina banipda siwan tasining. Sanga nomana aknga unzing tasiwawa ninda kana wa aminda inane mama wamu kaya ngangu anggaman singgak.
ROM 2:15 Anututane mama wamu aminu waakwakgane musiaatang aawan natake tasikaing. Wa aminda sanga atasikaing kaknga ina musiaatang usanzike takngatu take takngatu wai ngang nataaing. Natapa Anututane mama wamu wa amindane musiaatang unin aawan natake tasikaing.
ROM 2:16 Siwan tapduknga Anututa yawan Jesu Kraisda aminu kuupbam usanzike tasiwik gwene sanga aminda musiaatang usanzike natake tasikaing kakngae natapik. Natake sanga aminu kuupbamda kusopuknga tasikaing kaknga usanziwan noman siknga siwik. Unzing nata Anututane wamu takeaknga yanikapmake Jesuta aminu kuupbam usanziwik ngang yaninggat taknga buyana unin aawik.
ROM 2:17 Siwan ngana aminu nikat nana tapatu tapatuta ninu Judia nana amindane umanin taknga yapangenatnangge natake wamu takngatu anzing ba yakaing. Anututa nindane bamin papan itane aminabam dakngaking. Dakngake yuwawa Anututa yawan Mosesda mama wamna yamukut. Siwam wamu wa baminde yamukut takngata apu ninde apbut. Wamu waakngata ninde apbutde ninu Judia nana aminda Anutue nomune nomana yutnim ngang ba yakaing.
ROM 2:18 Aminu kunduta danindamuwawa ginda Mosesdane mama wamu kuupbam gwa nataing. Natake ginda Anutue baniu atnataaing. Natake ginda sanga kuupbam usanzike natapa takngatu take singgak kakngaekan apbakngakaing.
ROM 2:19 Ginda mama wamu waakngae natake ita yeutniman kepi gutonga aknga gatu kepi nomana aknga anggaman kaamang. Kake ninda aminu keu komduine nana aminu sanga waiaknga tawake tasikaing amin gatayamuke ninda wa amindane musia pana nomataning. Ninda aminu natdetdetna wena amin yanindamutnim ngang ba yakaing.
ROM 2:21 Ngan. Ginda aminu buyambamu ayanindamukaing ngana dasingge gisae musipza dua tapa nomatanggak? Ginda aminu kukae dua paningge yanindamukaing ngana asikaya ginda kukae dua pakaing?
ROM 2:22 Ginda yanindamuke ginda yasewa ma tasiwam ngang yanikaing ngana asikaya ginda yasewa dua tasikaing? Ginda anutu pupukngae atemna nataaing ngana asikaya ginda sanga Anutue imunanga aknga kotnake dua imukaing?
ROM 2:23 Ginda gisane umanza yapangenake Anututane mama wamda ninu Judia nana aminde gwa apbut ngang yake ngana asikaya ginda mama wamu waaknga asandekaing ba dasing? Sandeke Anututane umana akngana tasiwa mainggak.
ROM 2:24 Ngana aminu ayanikapsa tapatuta Anututane wamu takngatu tupa siknga anzing matakut, “Ginu Judia nana aminda tasiwawa danduke aminu keu komduine nana aminda Anutue inisapdukaing,” ngang matakut taknga buyana unin aakgak.
ROM 2:25 Siakan. Aminda gupza matandama ginda aminu Judia nana amin dakngaking. Dakngake ginda gupminu gwa matanimuking ngang natake mama wamu kuupbam tawake tasiwanu take siwik. Siwan ngana ginda mama wamu waaknga sandekengu ginda gupza dua binga mataking amin dakngake Anutue nomune take dua yutning.
ROM 2:26 Siwan ngana aminu tapatu keu komdune nana amindane gupna dua mataningu waapata ninu aminu Judia nana amikat dua gatake yutnim. Ngana waapata mama wamu waaknga tawake tasiwanu asikaya Anututa waapae natapan take dua siwik? Ita aminu gupna gwa matangamuking kapa binga dakngawan Anututa kawan take siwik.
ROM 2:27 Siwan ginu mama wamu Mosesda tupa siknga matakut takngata ginde apbut. Ginde apan gupza matandama ginda Judia nana amin dakngake yuaing ngana ginda mama wamu waaknga asandekaing. Siwan ngana aminu kepna kepna nana gupna dua matayamukingu wa aminda ina banipda siwan mama wamu Mosesda matakut taknga tawake tasikaing. Unzingge wa aminda ginu Judia nana amin usanzike natapa take dua siwik.
ROM 2:28 Siwan aminu Anutue amin siknga dakngake yuak kapa mamin? Asikaya aminu gupna tupa matangama Judia nana amin dakngake gupna san gan tabakngake na Anutue amin ngang yanggak kapanin?
ROM 2:29 Aho. Sanga Judia nana aminda Mosesdane mama wam tawake gupna matakaing kakngata tasiwan aminu Anututane amin siknga dua dakngawik. Wena. Aminu musiaatangu waiaknganae bitake ita musiagwen tapan nomatawiu waapata Anututane amin siknga dakngawik. Siwan aminu waapatane umana aminda dua yatangenatning ngana Anututa ayatangenawik.
ROM 3:1 Siwan ninda dasing natapnim? Ninu Judia nana aminda aminu kundu dua ba yapbikamang? Ba sanga gupmin matakamang kakngata buyana dua ba aakgak. Aake sanga waakngata ninu Judia nana aminu dua ba gatanimunggak?
ROM 3:2 Aho. Sanga takeaknga kwaapzangga aake gatanima aminu kuupbam asiknga yapbike yuamang. Sanga take tupan taknga aake gatanimunggak kaknga anzing. Anututa inane wamna ninu Judia nana amindekan tupa siknga atnimukut.
ROM 3:3 Siakan. Atnimukut ngana aminu kunduta wamu waaknga dua tawake tasiking. Ngana ie dasing yanim? Asikaya sanga wai waaknga aminu waakwakga tasiking kakngae natanggamatake Anututa wamu tupa yawan kekekakut taknga apba sandewik? Aho.
ROM 3:4 Wena siknga. Anututa siakan wamu asinggan yanggak ngana aminda kem tasikaing. Unzing wamu takngatu Anututane wam yanikapsa aminu tapatuta tupa siknga anzing matakut, “Aminda gatane wamu kuupbam usanzike natapa siakan siwik. Gata wamba yawi usanzike natapa wamba wena siwik,” ngang matakut.
ROM 3:5 Siwan ninda dasing yanim? Ninu Judia nana aminda sanga waiaknganinu dua tasikamang gamu Anututa sanga nomana aknga asinggan tasinggak kakngata anggaman dua siwan ngang yanim ba dasing? Aho. Asikaya ninda yake ninda waiaknga tasikamang kakngatane buya aawan aminbamda itane umana aknga yatangenakaing ngana ita toknga waiaknganinde yake ninde niman pana nomana dua siwik ngang yanim? Nata aminda yakaing kakngakan tawake wamu waaknga yawa gutonga siknga singgak.
ROM 3:6 Aho. Unzing gua. Anututa ninu Judia nana aminde toknga yake nomana dua nimik gamu ita aminu kepna kepna nana amindane wamna katak dua usanziwan.
ROM 3:7 Siwan aminu tapatuta anzing ba yawik, “Nata kem taknga tasiwa kake Anututa wamu tupa yawan kekekakut taknga tawake toknga yake namik. Namuke ita nomana aknga tasike toknga yake imunggak ngang natake aminbamda itane umana aknga asiknga yatangenatning. Nata kem taknga dua tasikum gamu Anututane umana akngana dua yatangenawam ngang ba yawik. Yake Anututa dasingge natane wama usanzike natapan take dua siwik,” ngang ba yawik.
ROM 3:8 Aminu kunduta nae temapa yake anzing yakaing, “Polda yake ninda waiaknganin tasina Anututa toknga yake niman kake aminbamda itane umana aknga yatangenawa take siwik,” ngang yanindamukgak ngang nae sapdut wamu unzing yaking. Sike wa amindane wam usanzike Anututa natapan take dua siwan ita toknga yake yaman noman siwik.
ROM 3:9 Siwan dasing natapnim? Asikaya Anututa ninu Judia nana amindane wamin usanzike natapan take siwik ngana keu komduine nana amindane wamna usanzike natapan take dua ba siwik? Wena siknga. Nata gwa yawa natapbumang. Waiakngata ninu kuupbam Judia nana amikat gatu Judia nana dua yuaing amikat usikwatanipmakut.
ROM 3:10 Unzing Anututane wam yanikapsa aminu tapatuta wamu takngatu anzing matakut, “Aminu tapatuta Anutue nomune aminu noman tapa dua dakngake yuak. Wena siknga.
ROM 3:11 Aminu natdetdetna kaya tapatu wena. Aminu Anutue kunangge nataau tapatu wena.
ROM 3:12 Aminu kuupbamda Anututane kepi gwa teking. Aminu kuupbamda songa sikaing. Aminu sanga takeaknga tasinggau tapatu wena. Tapatu wena siknga.
ROM 3:13 Aminu kuupbamda wamu kapanga aknga asinggan yake aminda bukatake kapanga akoke aminbam pasiwan maikaing binga tasikaing. Aminu kuupbamda kem wamu asinggan yake gomokga amin yasiwan maikaing binga tasikaing.
ROM 3:14 Aminu kuupbamda musia zikaa natake kaanga wamu asinggan yakaing.
ROM 3:15 Bania toknga zetgaman natake amin zipa kungwakaing.
ROM 3:16 Asinggan sangaapa kwaapzang pasiwa maiwa meya aknga aminbamde yama buyambam singgak.
ROM 3:17 Kepi musia kwikwiknga aminde natayamunanga akngae dua tawake tasikaing.
ROM 3:18 Anutue dua natake ie dua gwaukaing.” Ngangu wamu waaknga tupa matakut.
ROM 3:19 Sike ninda atnataamang. Aminu tapatuta Anututane wamu kuupbam tawake tasiwik gamu waapata Anutue nomune take yuwan. Ngana Anututane wamu waakngata ninde nisane waiaknganin yeutnimunggak. Yeutniman kake ninda waminu yanangge apmeptanim. Sike Anututa natake aminu ita mama wamna yamukut amindane waiaknganata anggaman siwan wamna yanangge apmeptaningge natake ita mama wamna yamukut. Unzingge aminu kuupbamu kepna kepna nana aminda Anututane nomune yuke wamna yanangge apmeptaning.
ROM 3:21 Ngan. Tupa Anututa mama wamna ayamukut. Siwan ngana apmaau ita gatanimuke aminda itane nomune gitna yutnangae kepi yeutniman kakumang. Mosesdane mama wamda kepi waaknga dua yeutnimukut. Aho. Aminu Anututane wam yanikapbing aminda kepi wa yaking kakngata yutake apu ninde kuut apbut.
ROM 3:22 Sike wamu waaknga anzing. Aminu kuupbam Jesu Kraisde natapa kekeknga siwik aminda Anutue nomune gitna yutning. Ngan. Anututa aminu tapatue dua gwauke kuupbamde buya takngatukan usanziwik. Dasingge? Aminu kuupbam Judia nana amikat gatu keu komduine nana amikat ngangga waiakngana tawake tasiwawa Anututa kawan take dua singgak. Siwan ngana aminda Jesu Kraisde natapa kekeknga siwiu Anututa kawan take siwan wa aminda Anutue nomune gitna yutning.
ROM 3:24 Ngan. Anututa ina banipda siwan aminu kuupbamde butaya natayamukut. Butaya natayamuke ita tasiwan Jesu Kraisda aminbamdane nomune kungwake daknga tukngwakut. Ita aminu kuupbamde tangge kungwayaman kake Anututa musia toknga natayamukut taknga atekut. Siwan aminda Jesue natake ita unzing gatanimuke kungwaniman Anututa gwa wikake yuak ngang natapa kekekawanu wa aminda Anutue nomune aminu noman amin dakngake yutning. Ngan. Anututa sanga waaknga tasinimuke nata noman aknga tasinggat ngang yeutnimunangge natake tasikut. Dasingge? Tupa Anututa tapduu mamaya siknga amindane waiaknganae kakgan sike zetgaman yake toknga dua yamukut. Ngana apmaau Anututa aminu sanga Jesuta gatanimuke tasikut takngae natapa kekekaning aminde natake wa aminda waiaknga dua binga tasiking amin dakngake yuaing ngang nataak. Sanga waaknga tasike nata sanga nomanaaknga atasinggat ngang yeutnimunangge natake tasikut.
ROM 3:27 Siwan asikaya ninda nisane umanin yapangenatnim? Aho. Kepi wena. Sike sanga dasing kakngata kepi waaknga umutnimunggak? Asikaya ninda sanga mama wamu katak tawake tasikamang kakngata kepi waaknga umutnimunggak ba dasing? Aho. Sanga ninda Jesue natapna kekekanggak kakngata kepi umutniman ninda nisane umaninu Anutue nomune yapangenatnanga dua.
ROM 3:28 Dasingge? Ninda anzing natapna kekekanggak. Aminda mama wamu katak siknga tawake tasiwiu Anututa aminu waapae aminu noman tapa ngang dua natapik. Aho. Anututa aminu Jesue natapan kekekawiu waapaekan natake aminu noman tapa daknganggak ngang natapik.
ROM 3:29 Siwan asikaya ninu Judia nana aminda Anutue kuna take siwan ngana aminu keu komduine nana aminda ie kunanga dua ba dasing? Wena siknga. Aminu kuupbamda Anutue take kuning.
ROM 3:30 Ita aminu kuupbamdane Anutuna awia tapatukan. Sike ninu Judia nana gupmin matakamang aminda Jesue natapna kekekawiu Anututa ninde natake aminu noman amin ngang natapik. Siwan ina unzakan aminu keu komduine nana gupna dua mataking aminda Jesue natapa kekekawiu wa aminde natake aminu noman amin ngang natapik.
ROM 3:31 Siwan ginda anzing ma natapam. Ninda Jesue natapna kekekawanu mama wamde masa take imuke yaitapakusinim ngangu ma natapam. Aho. Mama wam takngatane buya aawan ninda Jesue natapna kekekawik.
ROM 4:1 Siwan ninda Ebrahamu ninu Judia nana amindane bamin siknga apae dasing yanim?
ROM 4:2 Sike Ebrahamda kepi nomana aknga tawake tasikut takngae natake aminu noman tapa daknganggak ngang Anututa natapanu Ebrahamu waapata inane umana take yatangenawik. Ngana ita Anutue nomune yatangenatnanga dua. Aho.
ROM 4:3 Aminu Anutue wam yanikapsa aminu tapatuta wamu takngatu anzing matakut, “Ebrahamda Anututane wamde natapan siakan sikut takngae natake Anututa waapae aminu noman tapa daknganggak ngang natapbut,” ngang tupa siknga matakut.
ROM 4:4 Ninda atnataamang. Aminda puya pasiwiu waapata mani apapik. Pake puya toikga nae butaya natake gatangamunangge natake moo siknga namunggak ngang dua natapik. Aho. Puya pasipakapbumde namunggak ngang natapik.
ROM 4:5 Ina unzakan. Aminu tapatuta Anutue nomune amin noman tapa daknganangge ba natapik. Natake waapata Anutue natake Anutu ninu wai aminde butaya natake gatanimunggak kapata tasike ninda moo siknga aminu noman amin daknganimde kepi tasinimunggak ngang natapik. Natake waapata puya takngatu tasinangge dua natake ngana ita Anutue natapan kekekawanu Anututa aminu waapae natake aminu noman tapa daknganggak ngang natapik.
ROM 4:6 Siwan aminu tapatuta puya takngatu aminu noman tapa Anutue nomune dakngawik kaknga dua tasiwik. Dua tasike ngana ita Anutue natapan kekekawanu Anututa aminu waapae apbakngake aminu noman tapa daknganggak ngang natapik. Siwan aminu waapata asiknga bakngawik kakngae natake baminu Devitda tupa siknga wamu takngatu Anutue wapatang anzing matakut,
ROM 4:7 “Aminu Anututa waiakngana sandeyamukut aminda asiknga bakngakaing. Sandeyaman wena gwa sikut aminda asiknga bakngakaing.
ROM 4:8 Aminu Anututa waiaknangae dua natanggamatanggak aminda asiknga bakngakaing,” ngang matakut.
ROM 4:9 Sike wamu wa Devitda matakut takngae natake dasing yanim? Asikaya ninu Judia nana gupmin matakamang amindakan waiaknganinu wena sikutde apbakngakamang? Aho. Ninu Judia nana amikat gatu aminu keu komduine nana aminu kuutda apbaknganim. Ngan. Ebrahamda Anututane wamde natapan siakan siwan ita aminu noman tapa Anutue nomune dakngakut ngangu gwa yawa nataamang.
ROM 4:10 Siwan Ebrahamu dasing yuwawan Anututa ie natapan aminu noman tapa sikut? Asikaya ita gupna apmatake yukut ba dasing? Aho. Tapduknga Anututa mama wamna dua yaman natake gupna dua matakaking gwene Anututa Ebrahamde natapan aminu noman tapa sikut.
ROM 4:11 Anututa ie natapan aminu noman tapa siwana masande Anututa iniwan Ebrahamda ita ina gamok gupna matakut. Sike gupna wa matakut takngata tuwangu takngatu binga sikut. Sike tuwangu waakngata yeutniman ninda natake Ebrahamda gupna dua matakuu tapduu waomune ita Anutue natapan kekeknga siwan Anutue nomune aminu noman tapa dakngakut ngang nataamang. Siwan aminu kepi waaknga tawake gupna dua matake ngana Anutue natapa kekekawiu wa aminda Anutue nomune aminu noman amin dakngake yuaing. Sike wa aminda Ebrahamde natake nindane bamin sikngaapa ngang natake take inikaing.
ROM 4:12 Siwan ninu gupmin matakamang aminu kuutda Ebrahamu nindane bamin sikngaapa ngang inikamang. Ngana sanga gupna apmataking kakngaekan natake Ebrahamu bamin ngang ininanga dua. Aho. Aminu gupna mataking aminu kepi Ebrahamda gupna dua matakuu tapduu waomune ita Anutue natapan kekekakut taknga tawake tasiningu wa aminda Ebrahamde natake nindane bamin sikngaapa ngang take inining.
ROM 4:13 Siwan Anututa Ebraham inike, “Aminu gatane dongune aatning aminda yutake kuning aminda keu kuupbamu apme taning,” ngang iniwan kekekakut. Sike ninda dasing natapnim? Asikaya Anututa wamu waaknga yake Ebrahamda mama wamu katak siknga tawake tasikut takngae natake yawan kekekakut ba dasing? Aho. Ebrahamda Anutue natapan kekekakut takngae natake aminu waapa aminu noman tapa daknganggak ngang natapbut. Natake Anututa wamu waaknga inikut.
ROM 4:14 Siwan asikaya wamu waaknga buya aawan aminu mama wam tawake tasikaing amindakan keu kuupbamu paning? Aho. Wa amindakan papanu sanga Anutue natapna kekekanggak kaknga buya dua aawik. Buya dua aawanu wamu wa Anututa yawan kekekakut takngata songa siwik.
ROM 4:15 Ninda atnataamang. Aminu mama wamu atnataaing aminda mama wamu waaknga sandewanu sanga toknga akngata yuyamunggakgen. Siwan ngana aminu mama wamu dua yamukut aminde natake mama wamu asandekaing ngang yananga dua.
ROM 4:16 Unzingge Anututa ninde butaya natake gatanimunangge natapbut. Natake ninda ie natapna kekekawanu ita ninduke aminu noman amin ngang natapik. Ninu mama wam tawake tasikamang amikat gatu aminu mama wamu waakngae dua natapbing amikat ngangga sanga wa Ebrahamda Anutue natapan kekekakut taknga tawakengu ninda Anutue nomune aminu noman amin daknganim. Dakngakengu ninu kuupbamda Ebrahamdane zakngi dakngake yutnim. Yuwatna wamu tupa Anututa Ebraham iniwan kekekakut takngata yutake apu ninu Anutue natapna kekeknga singgak aminde siakande siknga apik.
ROM 4:17 Siwan Anututa wamu takngatu Ebraham inikut takngae natake aminu tapatuta anzing matakut, “Nata tasiwa aminu keu komduine nana aminda gae natake nindane bamin sikngaapa ngang yaning,” ngang matakut. Siwan wamu wa Anututa yawan kekekakut taknga buya aawan Anutu Ebrahamda ie natapan kekekakuu waapaekan ninda natapna kekekawik. Natapna kekekawan ninduke Anututa Ebrahamdane zakngi dakngakaing ngang ninduak. Anutu waapata gwa kupsa amin pangenawan kayuu gatu yutning. Gatu ita sanga dua aakut takngae natake yawan sanga waakngata asaawik.
ROM 4:18 Ngan. Anututa Ebraham iniwan kekekakut taknga buyana aawikge kepi wena sikut ngana Ebrahamda wamu waakngae natapan siakan sikut. Siwan ita sanga waakngata aawikge apbakngake natayukut. Ebrahamda unzing tasikutde aminu keu komduine nana aminda ie nindane bamin sikngaapa ngang nataaing. Sike wamu Anututa inike, “Gatane zakngikata yutake kunggawan buyambam siknga siwik,” ngang inikut taknga buya unin aakut.
ROM 4:19 Sike Ebrahamda nakanu buyambam siknga 100 binga ba kawan sandewan gatu maatna Sera waapata aminuake sikut. Siwan sanga wa takngaae natake ngana ita Anututane wamde natapan kekekakut takngata dua tuyukakut.
ROM 4:20 Dua tuyukake ita Anutue nangaakan dua natake wamu wa Anututa tupa iniwan kekekakut takngae natake musia takngaaya dua natapbut. Aho. Ita natake Anututa take wamu ina yawan kekekakut taknga tawake tasiwan buyana asawik ngang natapan kekekakut. Natapan kekekawan ita Anututane umana aknga yatangenake Anutue natapan kekekawan buyambam siknga sikut.
ROM 4:22 Unzingge wamu takngatu Anututane wapatang aminu tapatuta anzing matakut, “Ebrahamda Anutue natapan kekekawan Anututa ie natake aminu noman tapa daknganggak,” ngang matakut.
ROM 4:23 Siwan wamu waaknga Ebrahamde natake matakut. Sike ngana iekan dua matakut.
ROM 4:24 Aho. Anututane wam yakapsa aminu wamu waaknga matakuu waapata nindeat matakut. Sike Anututa ninde natake ita kapewan aminda Buyambam tapaninu Jesu tanguwa kungwake nindane waiaknganinde kungwanimukut tapa akumbut katangga tangenakut. Tangenake nin gatanimunangge natake ita ninda aminu noman amin inane nomune daknganimde kepi unin tasinimukut.
ROM 5:1 Siwan sanga Buyambam tapaninu Jesu Kraisda nin gatanimuke tasikut takngae natake ninda Jesue natapna kekekanggak. Unzingge Anututa ninde natake amin noman dakngake yuaing ngang nataak. Natake sanga Jesuta tasinimukut takngata nin gataniman Anututa ninde musip kwikwik natanimuke yuak.
ROM 5:2 Siwan ninda Jesue natapna kekekanggak kakngae natake Jesuta nin gatanimuke kepi tasiniman ninda Anututane kwikwiknga akngae gepbiatang kopbumang. Koke yusika ninda natake Anutu kekeknga siknga yuak kapata nindane umanin yapangenawan ninda iat gatake asinggan yutnim takngae apbakngake natayuamang.
ROM 5:3 Sike sanga waakngaekan dua bakngakamang. Aho. Ninda natake sanga aminda Jesue iwana dakngake meya takngatu takngatu ninde nimukaing kakngae apbakngakamang. Ninda atnataamang. Meya takngatu takngatu ninde apukaing kakngata nindane musipminu papa kekekawik. Kekekawan ninda Jesuat gitna gatake yutnim.
ROM 5:4 Sike ninda kekekake yusika meya takngatuat kakengu ninda kayuk kaknga ngang dua natapnim. Gwan natdekumang ngang natapnim. Natake ninda dua pimanim ngang natake kekekake natayutnim.
ROM 5:5 Sike sanga wa natayuamang kaknga buya asaawik. Buya aawana ninda sanga waakngae maaknga dua panim. Dasingge? Anututa inane Waung Kapa ninde niman ita musipmin papan kekekanggak. Papan kekekawan ninda sanga Anututa ninde butaya natanimunggak kakngae natapna buyambam siknga singgak.
ROM 5:6 Siwan ninda Anutue nomune gitna yutnimde kepi tawana maiwawan Jesuta tapduknga Anututa yakut gwene ninu wai aminde tangge kungwanimukut.
ROM 5:7 Siwan ninda atnataamang. Aminu noman apae tangge aminu tapatuta kumnangge natapan take siknga dua siwikgen. Siwan ngana ita kekekakengu aminu take waapae apba kungwangamik.
ROM 5:8 Siwan ngana Anututa sanga butaya ninde natanimunggak kaknga yeutnimunangge natapbut. Yeutnimunangge natake ita yawan Kraisda apuke ninda wai amin dakngake yuwatna ita ninde tangge kungwanimukut.
ROM 5:9 Kungwanimuke daknga tukngwakut takngata nin gatanimuke kepi ninda Anutue nomune aminu noman amin daknganimde kepi tasinimukut. Siwan asikaya Jesuta dua gatanimuke kepi Anututa nindane waiaknganinde toknga yake nimikge kepi dua ba umutnimik? Wena siknga.
ROM 5:10 Ninda atnataamang. Ninda tupa Anutue iwana dakngake yukumang ngana Anututa yawan inane waakngata ninde tangge kungwanimukut. Ita kungwaniman Anututa ninde musip kwikwik natanimunggak. Ita musip kwikwik natayuwawan asikaya Jesu akumbut katangga gatuna gweakut tapata dua gataniman ninda Anutue nomune gitna asinggan asinggan dua ba yutnim? Wena siknga.
ROM 5:11 Ita akgataniman Anututa ninde musip kwikwik natanimunggak. Unzingge ninda Anutue asiknga inimbakngakamang.
ROM 5:12 Siwan ninda atnataamang. Aminu tapatuta yakap siknga sanga wai takngatu tasikut. Sike sanga wa tasikut takngata yutake apu apu aminu kuupbam pakut. Papan aminu kuupbamda waiaknga tawake tasiyuk kungwawa kwaitakapukaing.
ROM 5:13 Ninu atnataamang. Anututa mama wamna Mosesde dua iniwawan tapduu waomune aminda waiaknga atasikaking ngana mama wamu wena siwan wa aminda asandeke wai tasiking ngang yananga dua.
ROM 5:14 Ngana aminda kupa kwaikaing kakngata tapduknga Adamda yukut komuneta apu tapduknga Anututa Mosesde mama wamna inikut komune apbut. Siwan sanga waakngata aminu kuupbam panggaganuwan kuupbamda kungwawa kwaitakapukaing. Ngan. Anututa mama wamu takngatu Adam inikut taknga Adamda asandekut. Siwan Anututa mama wamu Adamda sandekut taknga aminbamde dua yaman mama wamu waaknga dua sandeking. Ngana waiaknga inata inata tasikingge aminu kuupbamda akungwawa kwaitakapukaing. Siwan ninda natake waiaknga aminu tapatuta tasikut takngata yutake apu aminu buyambam papan kungwawa kwaitakapukaing ngang natapna siakan singgak. Siwan Anututa ina banipda ninde butaya natake yakut. Yawan aminu Jesu Krais waapata musip kwikwik natanimuke tasikut takngata yutake apu aminu buyambam papik. Siwan ninda sanga waakngae natapna siakan siknga singgak. Sike ninda sanga Adamda tangenakut takngaat gatu sanga Jesuta masande tangenakut takngaat usanzike natapna sanga wa takngaata yutake apu aminu buyambam papat ngana buyana inata inata aakaing ngang nataamang. Unzingge ninda Adamda tasikut takngae natakengu ninda aminu wa masan apbut tapata tasikut taknga kuut bokngan binga nataamang.
ROM 5:16 Sike buya sanga Anututa ina banipda siwan moo siknga tasinimukut taknga buya aawan gatu sanga Adamda tasikut takngaaya kuut buya aawan kake sanga wa kuut takngaat usanzike natapna buya kundukan dua singgak. Aho. Aminu waapata sanga wai takngatu tasiwan buya aawan sanga toknga pananga akngata aminu buyambamde yuyamunggak. Siwan ngana aminu buyambamda waiaknga kwaapzang tasiwawa Anututa ina banipda siwan musip kwikwik natayamuke tasiwan waiakngana wena singgak.
ROM 5:17 Ngan. Aminu tapatu Adam waapata sanga wai takngatu tasiwan buya aawan yutake apuwawan aminu kuupbamda kungwawa kwaitakapukaing. Sanga waakngae natapna siakan singgak. Siwan ngana aminu tapatu Jesu Krais waapata tasiwan buya siakande siknga asaawik. Buya aawan Anututa ina banipda siwan ninde butaya natanimukut. Natanimuke ita musip kwikwik nataak kakngane kepi ninda inane nomune amin noman daknganimde kepi tasinimukut. Siwan aminu kepi waakngae apbakngake taningu wa aminda aminu Jesu Krais waapaat gatake unekan kayuk asinggan asinggan yutning.
ROM 5:18 Siakan. Sanga wai takngatu tasiwan buya aawan sanga toknga pananga aknga aminu kuupbamde yuyamunggak. Ina unzakan Jesuta sanga noman takngatu tasiwan buya aawan sanga Anutue nomune amin noman dakngake kayuk asinggan yutnanga aknga aminu kuupbamde yuyamunggak.
ROM 5:19 Ngan. Aminu tapatuta yamandet sike mama wam sandekut takngata yutake apu aminu kuupbamde apbut. Apan Anutue nomune aminu waita yuaing. Siwan ngana aminu tapatuta wam gwaamuke tasikut takngata yutake apu aminu kuupbamde apbut. Unzing apbutde aminu kunduta Anutue nomune noman dakngake yutning.
ROM 5:20 Siwan aminda apbotake waiakngana tawake tasiwawa Anututa mama wamna yamukut. Yaman natake ngana yamandet sike sandewawa waiakngana buyambam sikut. Buyambam siwan ngana Anututa musip kwikwik natanimunggak kakngata buyambam siknga sike waiaknganinu kwaapzang ngana asandetnimunanga.
ROM 5:21 Siwan sanga wai waakngata yutake apu aminu kuupbam panggaganuwan kungwawa kwaitakapukaing. Ina unzakan Anututa ninde butaya natanimuke gatanimukut takngata yutake apu aminu buyambam panggaganukgak. Nin panggaganuwan ninda amin noman Anutue nomune dakngake yuamang. Yuke sanga Buyambam tapaninu Jesu Kraisda tasinimukut takngae gepbiatang yuke ninda kayuk asinggan asinggan yutnim.
ROM 6:1 Unzingge ninda dasing yanim? Asikaya ninda waiaknganin tawake tasiwatna Anututa musip kwikwik natanimunggak kakngata buyambam siwik ba dasing?
ROM 6:2 Wena siknga. Ninu atnataamang. Aminu tapatuta akungwakengu sanga kayuk yuke asinggan tasikakut taknga teke dua tawambikge atnataamang. Ina unzakan ninu Jesutane amina dakngake waiakngae banakan katang yukumang ngana gwa teke epu kepman kuke yuamang aminda sanga wai tupa tasikumang kaknga gatu dua tawake tasinim. Wena siknga.
ROM 6:3 Ginu atnataaing. Ninu Jesue natake aminda yangga sautnimukingu sanga Jesuta ninde tangge kungwanimukut takngata ninu kuupbamdane musipmin papan nomataking. Musipmin papan nomatawa ninda Jesuat gatake musipminu takngatukan natake unekan binga yuamang.
ROM 6:4 Siwan Jesuta akupana sanga aminda itane gupnasan kwaiking kakngata tasiwan ita gwa kumbut ngang anggaman sikut. Ina unzakan sanga aminda ninu yangga sautnimuking kakngata tasiwan ninda Jesuat gatake yuamang ngang anggaman siwan sanga waakngata kekeknga sikut. Siwan Jesutane Nana apata inane kekeknga aknganata Krais akumbut katangga tangenawan gweake ita kayuk asinggan yuwawik. Ina unzakan ninda kepi kayuk kaknga tawake tasinimde natake aminda yangga sautnimuking.
ROM 6:5 Ninu atnataamang. Sanga Jesuta kungwanimukut takngata yutake apu nin papan ninda waiakngae banakan katang yukumang ngana gwa teke epu kepman kuke yuamang. Ina unzakan sanga Jesuta akumbut katangga enake kayuk yuak kakngata nin papan ninda waiaknga teke epu kepman kuke kepi kayuk kakngae apbakngake tawake tasinim.
ROM 6:6 Ninu atnataamang. Aminu gwa kupanu ita wamna yawikge takopnanga dua. Siwan musia gatu dua enawan ita kayuk yuke waiaknga tasikakut taknga gatu tawake tasinanga dua. Ina unzakan. Tupa ninda Jesuat dua gatake yukumang gwene sanga wai musia enayaaknga tawake tasikumang. Siwan sanga wa tawake tasikumang kaknga sanga Jesuta amin saamdakane kungwanimukut takngata tangutapan kumbutde musipminu gatu dua enawan tasinim. Dua enawan tasiwatna waiakngata ninu gatu dua panggaganuwik.
ROM 6:8 Siakan. Ninu atnataamang. Anututa Krais akumbut katangga tangenawan sanga akumbut takngata gatu tanggaganutnanga dua. Wena. Ita kayuk asinggan asinggan yuwawik. Ina unzakan. Aminda Krais tanguwa kupan nindane waiaknganinu kuut gwa kumbut ngang natake ninda sanga musia enayaaknga gatu tawanangge dua natapnim. Dua natake ninda Jesuat gatake kayuk asinggan asinggan yutnim.
ROM 6:10 Siwan ita kungwake aminu kuupbamdane waiakngana sandeyaman puyuwikge kepi tasikut. Tasike ita gatuna waiaknganinde kumnangge dua natapik. Aho. Ita kayuk asinggan asinggan yuke Anutuekan natanggamatake tasiwik.
ROM 6:11 Siwan ina unzakan ginda Jesu Kraiskat gatake musipza takngatukan natapnong. Natake ninda sanga musia enayaaknga gatu tawanangge gwa bitakumang ngang natapa kekeknga siyok. Siwan Anutuekan natanggamatake tasinong.
ROM 6:12 Siakan. Ginda waiaknga dua katewa waiakngata ginu panggaganuwan sanga musia enakaing kaknga tawake tasining.
ROM 6:13 Ginda kagwauke waiakngata ginu dua panggaganuwikge gwautnong. Gwauke sanga musia enakaing kaknga dua tawake katakzaat genzat musipzaatang gatu natdetdetzaatang gatu maakzata nataaing kakngaat gatu kaisata akaaing kakngaat ngangu wai wa kuupbamu ma tasiwam. Wena siknga. Ginda yamandet dua sike Anutue gepbiatang koyuke ie banip tawake tasinong. Tasike sanga nomana akngakan tasike yutnong. Asikaya ginda waiakngasae kumnanga akngaakatang yuking ngana dua teke epu kepman kuke yuaing ba dasing?
ROM 6:14 Aho. Ginda gwa teke epu kepman kuke kayuk asinggan yutnanga aknga gwa take yuaing. Yusika ginu Anututa musip kwikwik natanimuke sanga ninde tasinimukut takngae gepbiatang yuaing. Yuke ginda mama wamu asinggan sandekaing kakngae gepbiatang yuking ngana gwa teke epu kepman kuke yuaing.
ROM 6:15 Unzingge ninda dasing tasinim? Ninda mama wam taknga gwa teke sanga Anututa musip kwikwik natanimunggak kakngae gepbiatang ayuamang. Yuke asikaya ninda sanga wai takngatu takngatu take tasinim? Wena siknga.
ROM 6:16 Ginu atnataaing. Ginu aminu tapatutane banip tawake ie gepbiatang koke yukengu ginda aminu wa itane genu gwaamukaing kapae puya amina dakngake yutning. Ina unzakan ginda waiaknga tawake tasikengu ginda waiakngae gepbiatang koyuke itane puya amina daknganing. Dakngake waiaknga tasiyuk kumning. Ngana ginda Anutue gen gwaamukengu ginda itane gepbiatang koyuke Anutue nomune amin nomanda yutning.
ROM 6:17 Siakan. Tupa ginda sanga waiakngae gepbiatang yuking ngana ginda gwa teking. Teke Anututane wam atdanindamuking kakngakan tawanangge iaknga siknga natake tasikaing. Unzingge ninda Anutue asiknga inimbakngakamang.
ROM 6:18 Ngan. Ginda waiakngae gepbiatang yuking ngana Anututa ginu gwa sandewan ginda sanga nomana akngae gepbiatang yuaing.
ROM 6:19 Ge nata ginde natake gindane natdetdetza dapakngae gatandamunangge natapbum. Natake sanga asinggan kaamang kakngae tuwanguke nata yake ginda sanga takngatue gepbiatang yuaing ngang daninggat. Siakan. Tupa ginda waiaknga katewa waiakngata ginu panggaganuwan ginda yamandet sike sanga wai takngatu takngatu asinggan pasiwawa buyambam siknga sikut. Siwan ngana apmanu ginda nomana aknga katewa nomana akngata ginu panggaganuwan wam gwaamuke sanga take akngakan tawake tasinong.
ROM 6:20 Siwan ginda waiakngae puya amin dakngake yuwawa sanga take akngata ginu dua panggaganukut.
ROM 6:21 Dua panggaganuwawan sanga ginda waiaknga tasikaking kakngae apmanu maaknga nataaing kaknga buya dasing binga aakut? Buya aawan sanga akumnanga akngata yutdamukut.
ROM 6:22 Siwan apmanu Jesuta gatandamuke waiakngata ginu panggaganukut taknga sandewan ginda Anutue puya amina dakngake yuaing. Dakngake puyana pasiwawa buya aawan ginda Anutue nomune gitnata yutning. Yuke kayuk asinggan asinggan yutning.
ROM 6:23 Ngan. Waiakngana tasiwawa buya aawan akumning. Ngana Jesu Kraisda gataniman Anututa ninde butaya natanimuke sanga moo siknga tasikut taknga buya aawan ninda Anutuat gatake asinggan asinggan unekan yutnim.
ROM 7:1 Ngan mate notnabam. Ginu mama wam taknga atnataaing. Mama wamda ninu kayuk yuamang aminde ninitakapunggak kaknga atnataaing.
ROM 7:2 Sike maya tapatuta apnae kuwan apnata kayuk yuwawan mayata bitake teke kukengu mama wamda yakut taknga meya papik. Siwan ngana apnata akupanu mama wamda yakut taknga maya waapata apna kayuk kapae kuwikge kepi dua umukngamik.
ROM 7:3 Aho. Apnata kupanu maya waapata apna kayuk kapae kukengu mama wamu dua sandewik. Siwan ngana apnata kayuk yuwawan mama wamda yakut takngae natake maya waapata wawi tapatue dua kuwik. Sike mayata yamandet sike wawi tapatue kukengu ita yasewaapa dakngawik.
ROM 7:4 Siwan mate notnabam. Ina unzakan. Mama wamda ginu dua danduyuak. Dasingge? Sanga waiaknga ninda tasikumang kakngata nindane apmin binga dakngawan nikat gatake yukumang. Ngana Jesuta kungwanimuke sanga wai waaknga tangutapan kumbut. Sike sanga wa tanguwan kumbut taknga mayata apna apata akupan apnae kayuk kapae kunggak binga ninda aminu kayuk kapae kunim. Sike aminu wa ie kunim tapa Krais Anututa akumbut katangga tangenakut tapanin. Siwan ninda iat gatake unekan yuwatna musipmin papan nomatawan ninda Anutue natanggamatake kepi nomana aknga tawake tasinim.
ROM 7:5 Ngan. Tupa ninda sanga wai musia enaya akngakan tawake tasiwatna mama wamda musipmin pangenawan wamu ma tasiwam ngang ninikut taknga zetgaman sandetnangge natapbumang. Sandetnangge natake tasina buya aawan akumananga akngata yutnimukut.
ROM 7:6 Siwan mama wamda nin ninduyuke ninu panggaganuwan yukumang ngana apmanu mayata apna apata akupan apna kayuk kapae kuwikge mama wamu waakngata dua yandaknganggak binga ninu mama wamda dua panggaganukgak. Unzingge ninda mama wamde gepbiatang yuke kepi nomana aknga kwatan siknga tasikumang kaknga teke ninda kepi nomana aknga musipmikatang iaknga siknga natake tawanangge tasikamang.
ROM 7:7 Unzingge ninda dasing yanim? Asikaya mama wamu sanga wai ba dasing? Wena siknga. Sike mama wamda natane waiakngana dua yeikngamunggak gamu nata ie dua natdewam. Mama wamda yake, “Gata aminu kundutane sangaapanae ma geenguwim,” ngang dua yanggak gamu sanga nata sangaapanae geengukgat takngae natake sanga wai tasinggat ngang dua natapam.
ROM 7:8 Ngan. Mama wamu wena gamu ninda waiaknganinu dua kanam. Ngana mama wamda yawan waiakngata musipma tangenawan nata yamandet sike sanga waiaknga kwaapzang tasinggat takngata anggaman singgak.
ROM 7:9 Siwan tupa na mama wamu wena ba ngang natake nata take yuat ngang musipmaatang natapbum. Sike mama wamda na tanggaganuwan waiaknganata anggaman siwan kake nata akumnanga akngane yuat ngang natapa meya siknga sikut.
ROM 7:10 Siwan mama wamda gatangaman nata sanga nomana aknga tawake tasike takekan yuwit ngang natapbum. Ngana mama wam taknga buya aawan nata akumnanga akngane yuat ngang natapbum.
ROM 7:11 Ngan. Mama wamda yawan waiakngata musipma tangenawan nata akumnanga akngane yuat ngang natapbum.
ROM 7:12 Unzingge ninda anzing natapnim. Mama wamu sanga wai dua. Aho. Mama wamu take siknga. Ita Anututane kepi nomana siknga aknga ayeutnimunggak.
ROM 7:13 Siwan ninda dasing yanim? Asikaya sanga take waakngata na tasiwan maikum ba dasing? Wena siknga. Waiakngata na tasiwan maike nata akumnanga akngane yukum. Waiakngata natane musipma tangenawan nata mama wam sandekum. Sandeke tasiwa buya aawan akumnanga akngane yukum. Yuke natane waiaknganae natake sanga wa wai ngang anggaman natapbum. Sike mama wamda waiaknganin yeutniman kake ninda waiaknganinde natapna buyambam siknga singgak.
ROM 7:14 Siwan ninda atnataamang. Mama wamu Anututane sanga nomana aknga ngang nataamang. Ngana ninda musia enayaaknga tawake tasiwatna waiakngata nin panggaganukgak.
ROM 7:15 Ngan. Nata sanga waiaknga tasinggatde natake sanga dasing kakngata musipma tangenawan tasinggat ngang nataat. Sanga nomana aknga nata atasinangge nataat ngana waaknga dua tawake tasinggat. Sike sanga waiaknga nata tasinangge apbitanggau atasinggat.
ROM 7:16 Siwan nata sanga atasinggat takngae natake sanga wa wai ngang natakengu nata mama wamda sanga waakngae yake nomana yandaknganggak ngang natapit.
ROM 7:17 Siwan wai waaknga nina banipda dua siwan tasinggat. Aho. Waiakngata musipma tangenawan tasinggat.
ROM 7:18 Na atnataat. Nata tupa Jesuat dua gatake yuke musipmaatangu sanga takeakngae dua natapbum takngata ayuak. Yuwawan apmanu nata Jesuat gatake yuke sanga nomana aknga tasinangge nataat ngana kepi wena.
ROM 7:19 Siwan sanga takeaknga nata atasinangge nataau waaknga dua tasinggat. Siwan sanga waiaknga tasinangge apbitanggau waaknga nata atasinggat.
ROM 7:20 Unzingge nata anzing nataat. Sanga wai waaknga nata apbitake ngana atasinggau waaknga nata nina banipda dua siwan tasinggat. Aho. Waiakngata musipma tangenawan tasinggat.
ROM 7:21 Unzingge nata sanga takngatu na nanduyuak kakngata undang yuwan kaat. Sanga waaknga anzing. Nata sanga takeaknga tasinangge natawawa waiakngata natane musipma tangenakgak.
ROM 7:22 Siakan. Nata musipmaatangu Anutue mama wamde take siknga nataat
ROM 7:23 ngana waiakngata na nanduyuke tanggaganuwan kaat. Waiakngata nanduyuau waakngata tasike sanga nata musipmaatangu Anutue mama wam tawanangge nataat taknga tasiwan mainggak. Tasiwan maiwan waiakngata na nanduyuke tanggaganuwan nata sanga musia enakaing kakngae banakan katang yuat.
ROM 7:24 E! Na kepi wena. Nangaakan natayuat. Maminda gatangamuke sanga nata akumnanga akngae banakan katang yuat taknga sandekngamik?
ROM 7:25 Ngan. Na musipmaatang nata Anutue mama wam tawanangge nataat ngana waiakngata na nanduyuke tanggaganuwan waiaknge tawake tasinggat. Siwan ngana Buyambam tapaninu Jesu Kraisda sanga waaknga asandekngamik ngang natapa kekawan nata Anutue asiknga inimbaknganggat.
ROM 8:1 Unzingge ninda Jesu Kraiskat gatake yuamangu Anututa nindane waiaknganinde toknga yake dua nimik.
ROM 8:2 Aho. Anututane Waung Kapa ninu Jesu Kraiskat gatake yuamang aminde sanga kayuk yutnanga aknga nimunggak kapata akgatanimunggak. Gatanimuke waiakngata nin ninduyuwan buya aawan sanga akumnanga akngata ninde yutnimunggak kaknga asandetnimunggak.
ROM 8:3 Ngan. Mama wamda waiakngatane kekeknga aknga tanguwan pimananga dua. Dasingge? Waiakngata kekekake musipmin pangenawan ninda mama wam sandeke aminu wai amin dakngakamang. Ngana Anututa kepi tasinimukut. Tasike ita inane waaknga initewan apu ita nin binga dakngakut. Dakngake ngana waiaknganinu asinggan tasikamang kaknga dua tawake tasike ita nindane waiaknganinde kungwanimukut. Kungwaniman Anututa ninde musip kwikwik natanimuke waiakngatane kekeknga aknga tanguwan pimakut.
ROM 8:4 Anututa ninde natake ninda mama wamna tawake tasinimde natake ita sanga waaknga tanguwan pimakut. Tanguwan pimapan Anututane Waung Kapata musipmin pangenawan ninda sanga musia enaya akngae bitateke tasikamangu Anututa ninde natapan take singgak.
ROM 8:5 Ngan. Aminu sanga musia enaya akngane sukukaing aminda ina banipda siwan nataaing kakngaekan natanggamatakaing. Siwan ngana aminu Anututane Waung Kapata yawan natake sukukaing aminda Waungu waapatane banipde natanggamatakaing.
ROM 8:6 Siwan aminu sanga ina banipda siwan nataaing kakngaekan natanggamatakaingu wa aminde sanga akumnanga akngata yuyamunggak. Ngana aminu Waung Kapatane banipde natanggamatakaingu wa aminde sanga kayuk yutnanga akngata yuyamunggak. Yuyaman wa aminda musip kwikwik kakngane yuaing.
ROM 8:7 Dasingge? Aminu sanga ina banipda siwan nataaing kakngaekan natanggamatakaingu wa aminda Anututane mama wamu tawananga dua. Aho. Wa aminda wam sandeke Anutue iwana dakngake yuaing.
ROM 8:8 Ngan. Aminu sanga ina banipda siwan nataaing kakngaekan natake sukuyuk sanga nomana aknga Anututa kawan take sinanga takngatu tasinanga dua.
ROM 8:9 Siakan. Ngana ginda sanga gisa banipda siwan nataaing kakngaekan dua natake sukukaing. Aho. Ginu Anututane Waung Kapata papan itane banip tawake taikaing. Siwan Waungu Kraisda nimukut tapata aminu tapatu dua tapanu aminu waapata Jesue amina dua dakngawik.
ROM 8:10 Ngana Kraisda gin pakengu ita gatandaman ginda Anutue nomune amin noman dakngake kayuk asinggan yutnong. Ngana ginda waiakngasa tasikingge ginda akupa gupzasan kwaining kaknga dua yapbitning. Akumning.
ROM 8:11 Ngan. Anututa Jesu akumbut katangga gatu tangenakut tapatane Waung Kapata gin papanu Anutu waapata yawan inane Waung Kapa gin pakut tapata tasike ginda akupa kwaining ngana ita gindane gupzasanu gatu pangenawan ginda kayuu gatu yutning.
ROM 8:12 Unzingge mate notnabam. Ninda sanga musia enaya akngane sukunim gamu take dua siwan.
ROM 8:13 Ngan. Ginda sanga musia enaya akngane sukuwanu sanga akumnanga akngata ayutdamik. Ngana ginda Anutue Waung Kapatane wam gwaamuke sanga ina banipda siwan nataaing kaknga tanguwa kupanu ginda take siknga asinggan yutning.
ROM 8:14 Ginu atnataaing. Aminu Waungga musia papan nomatawan noman gan tasikaing aminda Anututane waaknga dakngake yuaing.
ROM 8:15 Ngan. Waunga ninda wa takumang kapata nin pasiwan ninda Anutue natake nisipsak ngangu dua gwautnim. Aho. Waungga nin pasiwan ninda Anutue natake ita nin papan itane waaknga dakngake yuamang ngang natake ninda Anutue, “Nan! Nan,” ngang inikamang.
ROM 8:16 Iniwatna Waungga nindane musipmin pangenawan ninda natake ninu Anututane waaknga ngang natapna kekekanggak.
ROM 8:17 Sike ninu Anututane waaknga dakngake yuamang aminda sanga Anututa ninde penimukuu apanim. Sanga wa Kraisde pengaman Kraisda pakut taknga ninu kuut panim. Ninda sanga meyaaknga Jesuta pakut binga nikaya unzakan pake yuwatna Anututa umanin yapangenawik. Ita Jesutane umanaaknga enane siknga yatakngenakut binga nindane umanin kuut ina unzakan yapangenawik.
ROM 8:18 Siwan nata anzing nataat. Sanga masande Anututa nindane umanin yapangenawan asiknga bakngake yutnim taknga buyambam siknga kanim. Kake ninda meya apman kaamang kakngae natapna buyambam dua siwik.
ROM 8:19 Siakan. Tupa siknga Anututa ina banipda siwan natake ita sanga tasike pekuu tapduknga mamaya siknga dua yutningge pekut. Pewan kekeknga yutnanga dua. Dasingge? Apmea gatayama tapduknga mamaya asinggan yutning ngang natake pekut.
ROM 8:21 Natake peke ita apmea akgatayaman kekeknga asinggan yutning. Unzing ninu Anututane waaknga dakngake yuamang aminda kayuk asinggan yutnim binga yutning. Unzingge sanga kuupbam Anututa tasike pekuu tapduknga ninu Anututane waaknga dakngake yuamang amindane umanin yapangenake Anututa aminbam yeuyaman kaning gwende apbakngake kayuaing.
ROM 8:22 Ngan. Ninu atnataamang. Masande Anututa sanga ninda itane waaknga dakngake yuamang kaknga buya aawan ita ninu sanga akumnanga akngane yuamang kaknga sandetnimik. Sike Anututa inane Waung Kapa ninde niman ita musipmin pangenakgak. Ita musipmin pangenawan ninda sanga Anututa apmea sandetnimiu waakngae natapna kekeknga singgak. Natapna kekekawan sanga waaknga ninde tasinimikge iaknga siknga natake natanggamatake kayuamang. Siwan sanga Anututa tasike pekuu kuupbam kuut ina unzakan sanga waakngae kayuaing.
ROM 8:24 Ngan. Ninda Anutue natake ita ninu gatanimikge iaknga natapbumang. Natake kayuwatna ita waiaknganin sandetnimukut. Siwan ninu dasing natapnim? Sanga ninda kayuwatna apan gwa kakumang kakngae asikaya ninda kayuke yutnim? Aho. Gwa kakengu ninda ie dua kayutnim. Wena.
ROM 8:25 Ngana sanga ninda dua kakumang kaknga tanangge natakengu ninda kekeknga siknga sanga waapae natake kayutnim.
ROM 8:26 Sike Waungga ninu tuyuknga aminu akgatanimunggak. Gatanimunggakge ninda Anutue inindatapnangge natake tumuk wamu dasing kaknga yana take siwik ngang natagwaanguke yuwatna Waungga gatanimunggak. Gatanimuke ita tasiwan tumuk wamu ninda gentangan yananga dua aknga musipmikatang natdeke yutnim.
ROM 8:27 Waungga Anutue banip tawake ninu Anutue aminabam dakngake yuamang amin gatanimuke ita sanga ninda gentangan yananga dua akngae natake Anutu ininggak. Iniwan Anutu sanga ninda musipmikatang nataamang kaknga anggaman kaak kapata wamu Waungga ininggak kakngae yapii atnataak.
ROM 8:28 Ngan. Ninu atnataamang. Anututa natake ninda itane aminabam daknganimde natake ninu yaniwamban ie kukumang aminda musip gwaangu Anutue natangamukamang. Natake sanga ninde apa kaamang kaknga meya ba kwanga ba kake yuwatna Anututa tasiwan sanga wa kuupbamda akgatanimukaing.
ROM 8:29 Dasingge? Anututa tupa siknga musip gwaangu ninde natake itane aminabam daknganimde ninu pakut. Ninu inane waaknga siknga apata nomana siknga yuak binga yutnimde natake ninu pakut. Pake itane waakngata aminu buyambamdane paana tupan tapa dakngake yuwikge Anututa ninu pakut.
ROM 8:30 Ngan. Ninu Anututa pakut aminu ita yaniwamban apbumang. Yaniwamban apnana ita amin noman ngang ninikut. Ninike ita nindane umanin yapangenawan iat gatake yutnimde gwa yawan kekekanggak.
ROM 8:31 Siwan ninda wamu waaknga natake dasing yanim? Anututa nin gataniman iwaninda nin pasiwan mainimde apmeptanim.
ROM 8:32 Asikaya Anututa dua katewan itane waaknga awia tapatukan ninde tangge kungwanimukut? Aho. Ita initewan apuke ninu kuupbamde tangge kungwanimukut. Ita unzing initewan apbutde natake asikaya Anututa sanga kuupbam ninda inane nomune take yutnimde aknga dua ba tasinimik? Aho. Atasinimik.
ROM 8:33 Asikaya ninu Anututa papan inane aminabam dakngake yuamang aminde aminu tapatuta Anutue nomune yuke wai tasiking ngang temangusipa yawik? Aho. Anututa ina amin noman ngang gwa niniwan aminu tapatuta ninde temangusipa yananga dua.
ROM 8:34 Maminda ninu waiaknganinde toknga panimde yawik? Wena. Jesu Kraisda ninde tangge kungwaniman Anututa akumbut katangga gatu tangenakut. Tangenake umana enane siknga tangenawan ita Anutuat gatake yuke ninde wam yawat takanggak.
ROM 8:35 Sike sanga mina bingata ninu Kraisda butaya natanimunggak kakngane sandewik? Asikaya meya takngatuta ninu sandewik? Ninda nangaakan natapnim taknga ba aminda Jesue iwana dakngake ninu pasiwan mainim taknga ba ninu tomin natapnim taknga ba taukge ba sangaapae atdapnim taknga ba sanga waita nin pasiwa mainimde tasiwik kaknga ba nisipa kumnim taknga ba sanga wa kuupbamda ninu Jesuta butaya natanimunggak kakngane sandewik? Wena siknga.
ROM 8:36 Sanga waakngae wamu takngatu Anututane wapatang ayanikapsa aminu tapatuta Anutue inikut taknga anzing matakut, “Ninda gatane amindabam dakngake yuwatna iwaninda tapdukbam asinggan nisipnangge tasikaing. Tasike ninu nindupa sipsip gwegwen zipa kupa nakaing binga singgak,” ngang matakut.
ROM 8:37 Siwan ngana sanga waakngata ninu Jesuta butaya natanimunggak kakngane sandetnanga dua. Aho. Ninda meya waakngae banakan katang yuwatna Jesu ninde butaya natanimuke ninde tangge kungwanimukut tapata akgatanimik. Ita ninu gatanimuke kekeknga aknganata nindane musipmin papan kekekake sanga waaknga kuupbam asiknga ayapbitnim.
ROM 8:38 Ngan. Nata anzing natapa siakan singgak. Anututa ninde butaya natanimukut taknga Jesuta yeutnimukut. Sike ninu butaya aknga Jesuta gwa yeutnimukut. Sike ninu butaya aknga Jesuta wa yeutnimukut takngane sanga tapatuta sandetnanga dua. Wena siknga. Ninda kayuk yutnim ba akumnim takngata ninu sandetnanga dua. Gatu angela tapatu ba gavmandane tupan tapanata ninu sandetnanga dua. Gatu datdapda ninu sandetnanga dua. Gatu sanga apman ninde apukaing ba sanga masan aatning kakngata dua sandewik.
ROM 8:39 Sanga enandang nanaat gatu sanga amunandang nanaat ba sanga tapatu Anututa tasike tekuu tapatuta ninu sandetnanga dua. Wena. Anututa ninde butaya natanimukut taknga Buyambam tapaninu Jesu Kraisda yeutniman kakumang kakngane sanga tapatuta ninu sandetnanga wena. Dua siknga sandewik.
ROM 9:1 Nata Kraiskat gatake yuatde nata siakan wamu takngatu daniwa natapnong.
ROM 9:2 Nata musipmaatang meya siknga asinggan natake yuat. Kem dua. Aho. Anututane Waung Kapata musipma tangenawan nata wamu wa yanggat takngae natapa siakan singgak.
ROM 9:3 Ngan. Sike kepi kaya gamu nata Anutu iniwa ita na nanikwasiwan kuke nata Kraiskat dua gatake yuwawa natane notnabamu Isrel nana aminda Anutue nomune nae tangge yutning.
ROM 9:4 Siwan nindane baminu Anututa papan aminabamu tupa siknga dakngaking. Dakngake Anututa wa amikat gatake yuking. Sike Anututa gatayamunangge natake ita wam kwikwik yaniwan kekekakut. Yaniwan kekekawan masande wa amindane waakzak sitake apu apu masan aaking aminde ita mama wamna yamukut. Yamuke ita kepi kayuk wa aminda inindatapningge kepiaknga yeuyaman kaking. Sike Anututa wa aminde sanga apmea siyaman take yutning kakngae wam yaniwan kekekakut.
ROM 9:5 Siwan nindane baminu Ebrahamdane waaknga Aisak ngang inikinggane waaknga Jekop ngang inikingu waapatane waakngabamda waakzak sitake sitake apu apu apmanu ninu Judia nana aminu buyambam sike yuamang. Siwan aminu akgatanimunggak kapae Krais ngang inikamangu waapata nisa gup pake nikat nana tapatu dakngake aakut. Wa aakut tapa Anutu siknga enane siknga yuak kapanin. Ge ninda waapatane umana asinggan asinggan yatangenatnim. Siakan.
ROM 9:6 Siwan nata wamu waaknga yake wamu Anututa baminde yaniwan kekekakut taknga buya dua aakut ngang dua natake yanggat. Aho. Aminu Jekopdane waakngabamu Anututa pakut aminda waakzak sitake apu apmanu ayuaingu wa aminu kundu kake Anututa natane aminabam dua ngang nataak.
ROM 9:7 Sike Anututa wamu takngatu Ebrahamde anzing inikut, “Waakga Aisakgane waakngata waakzak sitakuning amin gan nata ninae papit,” ngang inikut. Siwan ngana aminu Ebrahamdane waakzak sitakukaingu sanga Ebrahamda tasike wamu Anututa iniwan kekekakut takngae natapan siakan sikut taknga dua tawake tasikaing aminu Anututa dua pakut.
ROM 9:8 Dua papan Anututane aminabam dua dakngake yuaing. Aho. Ninu sanga wa Ebrahamda Anututane wamde natapan siakan sikut taknga tawake tasikamang amin gan Anututa nin papan yuamang.
ROM 9:9 Sike wamu Anututa iniwan kekekakuu waaknga anzing inikut. Nata tapduknga gwa tekum gwene gatuna apa engangu wawi tapatu gatane maatda Serata tangaiwik kapa apu kawit ngang inikut.
ROM 9:10 Sike sanga waaknga bingakan nindane baminu Aisakgane maatna Rebekae singamukut. Rebekata musia siwan engangu wawi tapaaya bokngan aakumayak. Sike nana awia tapatukan.
ROM 9:11 Sike waaknga wa tapaau dua aake sanga tapatu takeaknga ba waiaknga ba dua tasike yuwawat Anututa minga waapa anzing inikut, “Tupan aawik kapata masan aawik kapae gepbiatang yuwik,” ngang inikut. Wamu waaknga iniwan sanga Anututa ina banipda siwan natake ina usanzike aminu inae papan yuaing kakngata anggaman siwikge inikut. Asikaya Anututa puya nomana aknga aminda tasikut takngae apbakngake waapa tapan yuak? Wena siknga.
ROM 9:13 Siwan ayanikapsa aminu tapatuta wamu Anututa yakut taknga anzing matakut, “Nata musip gwaangu Jekopde natangamunggat ngana na Isoe semna natangamunggat,” ngang wamu Anututa wa yakut taknga buyana unin aawan kakumang.
ROM 9:14 Unzingge ninda dasing yanim? “Anututa ina banipda siwan natake ina usanzike aminu inae papan noman dua sikut,” ngang yanim ba dasing? Aho. Unzing yananga dua.
ROM 9:15 Anututa wamu takngatu Mosesde anzing inikut, “Nata aminu tapatue butaya natangamunangge natakengu nata ie butaya natapit. Nata aminu tapatue musip kwikwik natangamunangge natakengu nata ie musip kwikwik natapit,” ngang yakut.
ROM 9:16 Unzing yakut takngae dasing natapnim? Asikaya aminu ina banipda siwan natake puya kwatan tasiwiu waapae Anututa butaya natake aminu waapa inae tapan yuwik? Aho. Anututa ina butaya natake tapik.
ROM 9:17 Ngan. Ayanikapsa aminu tapatuta Anututane wamu takngatu Mosesda aminu Isip nana amindane tupan tapa Fero ngang iniking kapae inikut taknga anzing matakut, “Nata ga tapa gata tupan tapa dakngake yuayak. Yuke gata tasiwi natane kekeknga aknganata anggaman siwik. Anggaman siwan kake aminda umana akngana yatakuwa sandewikge natake nata tasiwa gata wama dua gwaamuke tasinggayak,” ngang inikut.
ROM 9:18 Unzingge ninu atnataamang. Anututa aminu tapatue butaya natangamunangge natakengu ita take akgatangamik. Sike ita aminu tapatue butaya natangamunangge dua natakengu ita dua gatangaman aminu waapata yamandet dakngake yuwik.
ROM 9:19 Siwan aminu gikat nana tapatuta yake anzing ba naniwik, “Anututa ninde butaya dua natake ita ninu dua gataniman ninda yamandet dakngake tasinanu ita dasingge ninde temapa niniwik? Asikaya aminu tapatuta sanga Anututa natake tasingamunggak kaknga asandewik? Aho. Sandetnanga dua,” ngang ba naniwik.
ROM 9:20 Unzing naniwanu nata, “Aho. Gata kem natake yanggayak,” ngang yake iniwit. Sike ga mamin? Asikaya gata Anututane tupan tapa dakngake inisapdutnangge nataayak? Aho. Anutu akgapmamban aakuyak kapae inisapduke, “Gata dasingge unzingu na napmakuyak,” ngang yananga dua.
ROM 9:21 Asikaya gapma gwen tumukgak kapata ina banipda siwan natake dua tasiwik? Tasike ita kaiu dakatu take gapma gweaya pasiwik. Pasike ita gwendu tumuban dudumna siwan kake aminda ie apbaknganing. Siwan gapma gwenduat sabasaba pamukanangge natake tumuban kake asikaya aminu tapatuta kaanga iniwik? Wena.
ROM 9:22 Asikaya ga sanga waakngae katak dua ba nataayak? Anututa inane musia toknga wai aminde nataak kakngaat gatu itane kekeknga aknganaat ngangu aminbamde yeuyamunangge natapbut. Natake aminu toknga paningge ita tupa siknga pakut amindane waiaknganae kakgan sike kayuwan tapduu mamaya siknga singgak.
ROM 9:23 Dasingge? Ita ninde butaya siknga natanimunggak kaknga aminbamde yeuyamunangge natapbut. Natake ninde musia kwikwiknga natanimunggak kakngane yutnimde natake ita ninu pake ninu Judia nana kundukan dua yaniwakut. Aho. Ita keu komduine nana kunduat kuut yayawakut.
ROM 9:25 Siwan sanga waakngaekan natake ayanikapsa aminu tapatu umana Hosia ngang iniking kapata wamu Anututa yakut taknga anzing matakut, “Aminu natane aminabam dua dakngake yuaingu wa aminde nata yanike, ‘Natane aminabam,’ ngang yaniwit. Aminu nata musip gwaangu dua natayamukumu wa aminde musip gwaangu atnatayamit,” ngang matakut.
ROM 9:26 Gatu, “Keu komdune yuwawa nata yanike, ‘Ginu natane aminabam dua,’ ngang yanikum ngana keu waomunekan yusika na Anutu siknga apatane aminabam dakngake yutning.”
ROM 9:27 Siwan Aisaia ayanikapsa apata notna Isrel nana aminde yake anzing yanikapbut, “Ninu Isrel nana aminda buyambam siknga dakngake saisai yanggabam gwene nana binga sikamang. Ngana Anututa aminu kepdakane nana aminde waiaknganae yake toknga yamikge yakut taknga tasitamaba kuwik. Tasitamaba kuwan ita Isrel nana aminu matekngakan pasiwa maining kakngane sandewik.”
ROM 9:29 Siwan Aisaiata wamu takngatuat ie anzing yanikapbut, “Anutu sanga kuupbamdane toikngaapata aminu nikat nana mateknga dua sandekut gamu ninda aminu you Sodom gapma gatu you Gomora gapmane nana Anututa zipan puyukut amin binga dakngake yutnam,” ngang yakapbut.
ROM 9:30 Unzingge ninda dasing yanim? Ninda anzing yanim. Aminu Isrel nana dua ngana keu komduine nana aminu Anutue nomune amin noman daknganangge dua natapbingu wa amikat nana kunduta Jesue natapa kekekanggak. Jesue natapa kekekawan kake Anututa amin noman ngang yaninggak.
ROM 9:31 Siwan ngana aminu Isrel nana aminda Anutue nomune take yutnangge natake Mosesdane mama wamu kwatan tawake tasiking. Kwatan tawake tasiking ngana asinggan sandeke pimake amin noman dua dakngaking.
ROM 9:32 Dasingge amin noman dua dakngaking? Wa aminda kem natake ninda puya nomana akngakan tasiwatna Anututa nindupan take siwik ngang natake mama wamu kwatan tawake tasiking. Tawake tasike ngana wa aminda Jesue natake undanga ngang natake Anutue nomune amin noman dua dakngaking. Wa aminda sup gwene kensomna yamake pimakaing binga pimaking.
ROM 9:33 Ngan. Ayanikapsa aminu tapatuta wamu Anututa tuwang wam yakut takngae natake anzing matakut, “Suu gwendu nata Sion kep komune tewiu wagwene aminda kensomna yamake pimaning. Ngana aminda unzing dua pimake aminu tapatu nata suu wagwen binga tewiu waapae natapan kekekawiu aminu waapata ie kem ngang dua natapik,” ngang matakut.
ROM 10:1 Mate notnabam. Nata musipmaatangu take siknga natake Anututa notna Isrel nana aminu gatayamuke toknga paning kakngane sandewikge natake tumuk wamu asinggan ininggat.
ROM 10:2 Dasingge? Nata wa aminde katak siknga nataat. Wa aminda Anutuekan natanggamatake itane kepi tawanangge asiknga kekekakaing ngana natdetdetna dapaknga singgak.
ROM 10:3 Ngan. Anututa kepi takngatukan ninda itane nomune amin noman daknganim taknga tenimuke inane waakngaapa initewan apu ninde tangge kungwanimukut. Ngana kepi wa Anututa tenimukut takngae masa imuke wa aminda Anutue nomune take yutnangge natake mama wamu katak siknga tawake tasiking ngana buyana dua aakut.
ROM 10:4 Ninu atnataamang. Wa aminda Anutue nomune amin noman daknganangge natake mama wamu katak siknga tawake tasiking. Ngana Kraisda kepi waaknga Anutue nomune amin noman daknganangge natake tawake tasiking kaknga gwa tekut. Teke ita kepi kayuk kaknga teniman aminu kepi waaknga tawake Jesue natapa kekekawiu kuupbamda Anutue nomune amin noman dakngake yutning.
ROM 10:5 Siwan Mosesda kepi Anutue nomune amin noman dakngananga akngae natake anzing matakut, “Aminda sanga kuupbam mama wamda yanggak kaknga katak siknga asinggan tawake tasiwik gamu waapata Anutue nomune gitna asinggan yuwan,” ngang matakut.
ROM 10:6 Ngana aminu tapatuta yake ninda Anutue nomune amin noman daknganangge natakengu ninda Jesue natapna kekekayok ngang yawiu waapata anzing niniwik, “Ginda musipzaatang anzing ma natapam, ‘Aminu tapatuta enane koke Krais tawake kake initakepik gamu ita gataniman ninda amin noman dakngake yutnam,’ ngangu ma natapam.
ROM 10:7 Ba ‘Aminu tapatuta aminu gwa kumbing aminda yuaing komune kuke Krais uneta initakapik gamu ninda take yutnam,’ ngangu ma natapam,” ngang niniwik.
ROM 10:8 Ngan. Amin waapata anzing niniwik, “Wamu ninda aminbamde yanikapmake ginda Jesue natapa kekekayok ngang yanikamang kaknga ginda musipzaatang atnataaing. Sike ginda wamu waaknga ayakaing,” ngang niniwik.
ROM 10:9 Siwan wamu waaknga anzing. Gata musipbaatang natake Anututa Jesu akumbut katangga tangenakut takngae natapi siakan siwan Jesu waapae natane Buyambam tapana ngang yakapinu Anututa gatane waiakngaka asandekgamik.
ROM 10:10 Ngan. Aminu musiaatangu Jesue natapan siakan siwanu Anututa kawan amin noman siwik. Sike aminu waapata Jesue natake Buyambam tapana ngang yakapanu Anututa waiakngana asandekngamik.
ROM 10:11 Siwan wamu takngatu Anututane wapatangu anzing yuak, “Aminu ie natapan kekekawiu waapata masande ie kem ngang dua natapik. Wena.”
ROM 10:12 Siwan ninu atnataamang. Ninu Judia nana amikat gatu keu komduine nana amikat Anutue nomune buya kundukan yuamang. Yuwatna ita ninu kuupbamdane aminu buyambam tapaninda yuak. Yuke ita aminu inindatakaing aminu kuupbamde musip kwikwiu asiknga natayamunggak.
ROM 10:13 Ngan. “Aminu Anutue inindatakaing aminu kuupbam gatayamuke waiakngana sandeyamik.”
ROM 10:14 Siakan ngana aminu Anutue natapa kekeknga dua siwiu asikaya wa aminda ie inindatapning? Siwan aminu ie wamu dua natapbingu asikaya wa aminda Anutue natapa siakan siwik? Siwan aminu tapatuta wa aminde dua kuke wamu dua yanikapanu wa aminda Anututane wamu dasing natapning?
ROM 10:15 Siwan aminu tapatu Anututa dua take initewan apanu asikaya aminu waapata itane wamu ayanikapik? Aho. Ita gwa yanipewan apbing. Wamu takngatu Anututane wapatangu anzing yuak, “Aminu Anututane wamu takeaknga takapuwawa kana take siknga singgak,” ngang matakut.
ROM 10:16 Siwan ngana wamu takeaknga aminu kundutakan take tawake tasikaing. Ngan. Aisaia ayanikapsa apata ie natake Anutue wapatang wamu takngatu anzing matakut, “Buyambam tapana! Aminu matekngatakan wamu ninu yanikapsa aminda yanikapbumang kakngae natapa siakan sikut,” ngang matakut.
ROM 10:17 Siwan wamu Aisaiata matakuu waakngata yeutniman ninda anzing nataamang. Kraisda nin pake ninipewan apuke itane wamu sanga ita yake tasikut taknga yanikapmakamang. Ninda yanikapna aminu maakngita nataaikat nana kunduta Jesue natapa kekekanggak.
ROM 10:18 Siwan asikaya aminu kunduta wamu waaknga dua ba natapbing ngangu ninda yananga dua. Aho. Kuupbamda atnatapbingge wamu Anutue wapatang yanikapsa aminu tapatuta anzing matakut, “Wamu wa aminda yanikapbingu waaknga yatakuwa sandekgak. Wamu wa aminda yanikapbingu waakngata kepna kepna tawamban sandekgak,” ngang matakut.
ROM 10:19 Siwan wamu Anututa sanga apmea aawikge yakut taknga ninu Isrel nana amindane baminde atnatake ngana natapa buyami sikut ngangu yananga dua. Aho. Atnatdeking. Mosesda sanga wa apmea aawik kakngae natake wamu takngatu Anututa yawan natake anzing matakut, “Nata aminu kepman nana dakngake yuaing amin gatayama kake ginda wa aminde semna natayamuning. Nata tasiwa aminu katum amin ngang nataaing aminde ginda toknga natayamuning,” ngang matakut.
ROM 10:20 Siwan masande Aisaita wamu takngatu Anututa yawan natapbut taknga natapan kusiwan anzing yakut, “Aminu na nawanangge dua natapbingu wa aminda na gwa nandupbing. Aminu na nandupnangge dua yakingu wa aminde nata anggaman apbum,” ngang matakut.
ROM 10:21 Wamu waaknga Anututa kepman nana dakngakaing aminde natake yakut ngana Isrel nana aminde natake ita wamu takngatu anzing yakut, “Tapduu mamaya siknga aminu yamandet sike nae masa namukaingu wa aminu nata yayawamba apningge natake nata kataknga katapmike yuat,” ngang yakut.
ROM 11:1 Unzing yakut takngae natake ninda dasing natapnim? Asikaya Isrel nana aminu ita papan itane aminabam dakngaking aminu Anututa gatukande yanikwasipewan kuking ba dasing? Wena siknga! Ginu nae gwa ba botakaing? Na Isrel nana aminu tapatu. Na Benjamin Ebrahamdane zakngi apatane dongune aakumde gwa ba botakaing?
ROM 11:2 Anututa aminu ita tupa siknga pakut aminu dua sandepewan kuking. Wena. Asikaya ginda wamu takngatu Ilaijata Anutue inike notna Isrel nana aminde temapa yakut takngae dua ba natapbing? Wamu wa yakut taknga Anutue wapatang anzing matakut,
ROM 11:3 “Buyambam tapana! Wa aminda gatane aminu ayanikapsa amin zipa kupa sanga gamunangge takapuke gae penggamuking komu awaitdeking. Siwan aminu gae ganindatakaing aminda wena gwa sikaing. Na awia tapatutakan ayuwawa ngana wa aminda nutnangge tasikaing,” ngang yakut.
ROM 11:4 Sike ginda wamu Anututa yake inikut taknga dua ba natapbing? Ita anzing inikut, “Aminu buyambamu 7,000-da naat gatake yuamangu wa aminda anutu pupuknga umana Beal ngang inikaing kapae nomune muna dua puke inindatake yuaing. Sike wa yuaing aminu nata dua yanikwasipewa kuking,” ngang inikut.
ROM 11:5 Siwan apmanu tapduu ayuamang komuneaya kuut aminu kautdu Anututa ina banipda siwan natake butaya natayamuke papan yuaing.
ROM 11:6 Ngan. Ita ina banipda siwan butaya natayamuke papan yuaing ngang natakengu ninda anzing dua natapnim. Wa aminda mama wamu katak siknga tawake tasiwawa Anututa kawan amin noman siwan ita papan yuaing ngangu dua natapnim. Aho. Ita unzing pakut gamu ita ina banipda siwan wa aminde butaya natayamuke pakut ngang yananu kem siwik.
ROM 11:7 Unzingge ninda dasing natapnim? Aminu Isrel nana aminda Anutue nomune amin noman daknganangge natake ngana tasiwa buya dua aakut ngang natapnim. Ngan. Aminu kautdu Anututa pakuu wa aminda amin noman dakngake yuaing ngana kautdu Anututa kapewan yamandet sike yuaing.
ROM 11:8 Sanga waaknga aawikge natake ayanikapsa aminu tapatuta Anututane wapatang wamu takngatu anzing matakut, “Wa aminda yamandet siwa Anututa kapewan semna semna nataaking. Sike semna semna wa nataaking kakngata yutake apu apmanu kuut Isrel nanata katum binga dakngake yuaing,” ngang matakut.
ROM 11:9 Siwan Devitda kuut sanga waakngaekan natake wamu takngatu anzing matakut, “Sanga wa aminda ie apbakngake tasikaing kakngata pasiwan maining. Unzing kaap gwenda apbakngake kusika epusik ba bungep ba dua kake ngana undang kopan tanguwan kupik binga tasikaing. Tasiwa buya aawan Anututa wa aminde toknga aknga waiaknganae yaman paning.
ROM 11:10 Wa aminda kawa sanga take singgak ngana sanga waaknga tawake tasike undang maining. Maike sanga meya akngata panggaganuwan asinggan asinggan yutning,” ngang matakut.
ROM 11:11 Wamu wa matakut takngae natake ninda dasing natapnim? Asikaya aminu Judia nana Jesue masa imuke pimakingu wa Anututa gatukande yanikwasipewan kuking? Wena siknga! Wa aminda pimapa kake Anututa aminu keu komduine nana kundu papan aminabam daknganingge tasinggak. Tasiwan kake Isrel nana wa pimaking aminda aminu wa panggak aminde toknga natayamukaing.
ROM 11:12 Siakan. Aminda sanga waakngae masa ima kake Anututa aminbamu kepna kepna nana gatayaman itane aminabam dakngake take siknga yutning. Sike Anututa aminu wa pimaking amin sandeke kepna kepna nana papan takekan yutning. Unzingge ninu atnataamang. Isrel nana kuupbamda masande Anutue gepbiatang gatu kopanu sanga take siknga aknga aminu kuupbamu kepna kepna nanae siyamik.
ROM 11:13 Siwan ginu atnataaing. Anututa na take nata ginu Judia nana dua dakngake yuaing aminde kuke wamna danikapitde na tapan aposel amin ngang nanikaing. Unzingge nata natane notna Isrel nana amindane musia pangenawa Jesue aminabam daknganingge natake nata puya Anututa na take namukut takngae apbakngake take siknga tasinangge nataat.
ROM 11:15 Ngan. Anututa wa amin yanikwasipewan kuwawa aminu keu komduine nana amindane musia papan tekwamban Anutue kukaing. Siwan ngana aminu ayanikwasiwan kuking aminda tapa tekwamban apu Jesue gepbiatang kopa kakengu ninda natake aminu wena siking aminda akumbing katangga gatu enakaing binga ngang natapnim.
ROM 11:16 Sike Anututa nindane baminu tupa siknga papan itane aminabam dakngake yuking. Unzingge ninu wa amindane dongune aakumang amindaaya kuut Anutue aminabam dakngake yuamang. Unzing ninda sanga Anutue imunangge natakengu nanam pake usanzike kautdu imunim binga yuaing. Imuke asikaya nanamu kautdu ninda Anutue dua imukumangu wa kuut Anututane sanga dua ba dakngawik? Aho. Kuupbam Anututane. Siwan katau dakatu Anutue imunangge yananu asikaya katau wandakatane muyakngiaya Anutue sanga dua ba dakngawik? Aho. Katau wandakatane muyakngi kuut Anututane sanga dakngawik.
ROM 11:17 Siwan ngana aminu Judia nana kunduta Jesue masa imuke undang pimapa yanikwasiwa kuking. Unzing katau oliv ngang inikamangu dakatu aminda kwaikuu wandakatane kainga kundu kupiawa toikngata patdeke muban kukaing binga yanikwasiwan kuking. Siwan ginu Judia nana amin dua ngana keu komduine nana kunduta Jesue kuke Anututane aminabam dakngake yuaing. Unzing katau oliv ngang inikamangu zong gakatane kainga pasike takapu katau wa kwaikut dakane ngwakngake wamanggaganuwan takambupmake gweawan buya aakgak binga aminu keu komduine nana aminda Anutue aminabam dakngakaing. Dakngawa muyakngita yangga kaiwan katau oliv dakane kopan takake buya aakaing binga wa aminda ninu Anututa tupa siknga pakut amindane dongune aakumakat gatake yuamang. Yuke sanga Anututa baminde yaniwan kekekakut takngata yutake apunggawan wa amikat nikat kuutda panim.
ROM 11:18 Unzingge ginda natake Judia nana kainga patdeke muban kuking binga Jesue masa imuke pimapa yanikwasipewan kuking ngana ninda Anutuat gatake yuamang ngang natake ma bakngawam. Asikaya katap dakatane kaingata yangga kaiwan muyakngine pukuwan kuke buyambam sikaing binga ginda tasiwa ninu Judia nana amindane baminda Anututane aminabam dakngaking? Aho. Sanga nindane baminde Anututa yaniwan kekekakut takngata yutake apunggawan ginda takengu gindane umanza yapangenatnanga dua.
ROM 11:19 Siwan ginda anzing ba yake nanining, “Siakan ngana Anututa ninde apbakngake panangge natake wa aminu kainga kupiawa patdeke muban kukaing binga ita yanikwasipewan kuwawa ita ninu keu komdune nana amin papan ninda wa aminde tangge yuamang,” ngang ba nanining.
ROM 11:20 Ngan. Kautdu unin. Wa aminda Anututane wamde natapa siakan dua sikutde Anututa kainga patdeke muban kukaing binga yanikwasipewan kuking. Siwan kautdu anzing. Ginda Anututane wamde natapa siakan singgakge ginda Anutue nomune gitna yuaing. Unzingge ginda umanza ma yatangenawam. Aho. Ginda dua pimaningge tagwautnong. Anututa danikwasiyak.
ROM 11:21 Ngan. Aminu tupan pakut aminda pimakingu Anututa butaya dua natayamuke yanikwasipewan kuking. Ina unzakan. Ginda pimapa ita danikwasiyak.
ROM 11:22 Siakan. Wamu waaknga natake Anututa toknga aknga aminu masa imukaing aminde ayamunggak ngang nataamang. Natake Anututa ginde ita butaya natandamunggak kakngane yuwanu take gatandamik ngang nataamang. Ngana ginda ie masa imanu Anututa atdanikwasipewan kuning.
ROM 11:23 Danikwasiwan kuwawa aminu wa gwa pimakikat nana kunduta tapa tekwamban sanga wa masa imuking kaknga bitatewanu Anututa gatuna papan itane aminabamu gatu daknganing. Unzing kainga kupiawa patdeke muban kukingu gatu takapuke katau wandakane ngwakngake wamanggaganuwan takambupmake gweawik binga papan aminabamu gatu dakngake yutning. Ngan. Anututa kekekngana kayaapa yuke sanga waaknga tasiwan take siwik.
ROM 11:24 Siwan ginda aminu Anututa tupa pakut amikat nana dua ngana ita gin papan itane amina dakngake yuaing. Unzing katau oliv daka ngang inikamangu zong gakatane kainga ngana pasike takapu katau olivdaka tupa kwaike kayuak dakane ngwakngake wamanggaganukut binga ita gin pakut. Asikaya aminu tupa pakut ngana gwa teke kukingu wa aminda gatuna apanu panangge dua ba natapik? Aho. Asiknga panangge natapik.
ROM 11:25 Mate notnabam. Nata ginu wamu kusopuknga akngae natapningge nataat. Wamu waaknga daniwa natake ginda natdetdetninu buyambam siwan ninda Anutue kukumang ngangu dua natapning. Unzing dua natapningge natake nata wamu kusopuknga waaknga daniwa natapnong. Aminu Isrel nana kautdu katum amin binga dakngake Jesue masa imukaing. Imuwawa aminu keu komduine nana aminda Anutue gepbiatang kopning.
ROM 11:26 Kowawa Isrel nana aminu kuupbam Anututa gatayaman tapa tekwamban Jesue kuning. Ngan. Wamu takngatu Anututa yawan ayanikapsa aminu tapatuta natake anzing matakut, “Aminu akgatandamuya apata you Siaon gapmaneta apuke Jekopdane dongune aaking amindane musia panomanuwik.”
ROM 11:27 “Panomanuwan wamu tupa nata wa amindane bamnae yaniwa kekekakut taknga buya aawan waiakngana sandeyamit,” ngang matakut.
ROM 11:28 Siwan Isrel nana aminu waakwakga wamu nata Jesue yanikapbum takngae masa imuke tasiwawa Anututa wa aminde iwana dakngakut. Dakngawan nata ginu keu komduine nana aminde kuke danikapbum. Ngana Anututa aminu wa masa imukainggane bamna tupa siknga papan itane aminabam dakngake yuaking. Unzingge ita wa pakut amindane dongune aaking aminde butaya natayamunggak.
ROM 11:29 Siwan aminu butaya natayamuke yayawamban apbing aminde natake Anututa musia dua tapan tekwamban gatukande yanikwasipewan kuning.
ROM 11:30 Ginu atnataaing. Tupa ginda yamandet sike Anutue masa imuking. Ngana Isrel nana aminda Anutue wam sandeke tasiwawa Anututa ginu keu komduine nana aminde butaya natandamuke tasindaman ginda Jesue gepbiatang koke yuaing.
ROM 11:31 Yuwawa ngana Isrel nana aminda Anututane wamu Jesue yanikapbum takngae masa imukaing. Imuwawa Anututa ginde butaya natandamuke tasindamukut binga ita wa aminde butaya natayamik.
ROM 11:32 Ngan. Anututa tasiwan sanga ninu kuupbamda yamandet sike wamna sandeke tasikamang kakngata anggaman singgak. Siwan ninu kuupbamda wamin yanangge apmeptake yuwatna Anututa ninde butaya natanimunggak.
ROM 11:33 E! Anututa ninde butaya natanimunggak kaknga mateknga dua! Ita natdetdetna buyambamu kayaapa! Ita sanga kuupbamde anggaman atnataak! Anggaman natake sanga ita tasinggak kaknga akake ngana baniaatang natake tasinggak kaknga kusopuknga siwan ninda natdetnanga dua.
ROM 11:34 Ngan. Asikaya sanga Anututa musiaatang nataak kaknga aminu tapatuta atnataak? Natake iat gatake yuke wamu yawat takakut? Wena siknga.
ROM 11:35 Asikaya aminu tapatuta sangaapana Anutue imuke Anututa yake apme namik ngang natake sanga imukut? Wena siknga.
ROM 11:36 Dasingge? Anutu awia tapatutakan sanga kuupbam ina banipda siwan natake tasike pekutde itane umana enane siknga yuak. Ngan. Ninda itane umana akngana asinggan asinggan yatangenatnim. Siakan.
ROM 12:1 Ngan mate notnabam. Nata sanga Anututa ninde butaya natanimukut takngae natake nata wamu takngatu daniwa natapnong. Ginda Anutue apbakngake ie kunong. Ie kuke katewa ita ginu papan itane gepbiatang koke gatukande yutnong. Yuke puyana asinggan tasike Anutue banip asinggan tawake tasinong. Sanga unzing tasiningu waaknga gupde sanga dua. Aho. Sanga waaknga musipzae sanga siwan ginda tasiwa danduke Anututa natapan take siwik.
ROM 12:2 Siwan ginda sanga aminu Jesue masa imukaing aminda wai takngatu takngatu pasikaing kaknga ma tawake tasiwam. Wena. Anututa musipza papan nomatawa ginda Anutue banip tawake sanga nomana siknga aknga Anututa kawan take singgak kakngakan tawake tasinong.
ROM 12:3 Siwan Anututa musip kwikwiu nae natangamuke na tapan nata itane puyana pasike ginu kuupbam daninggat. Ginda Jesue natapa kekekawan Anututane puya inata inata tasingamuningge natake Anututa gatandamuke natdetdeu ginde inandek inandek damukut. Siwan ginda natdetdeu ita damukuu waakngae natake na natdetna baban tapa ngang ma natapam. Aho. Anututa natdetdeu waaknga nae naman tasinggat nganggan natake umanza yapangenatnangge ma natapam.
ROM 12:4 Ginu atnataaing. Gupminu dakatukan ngana kataknginda sanga tananga siwan kaininda sanga kananga siwan kepininda kepiapane kunanga siwan geninda wamu ayananga.
ROM 12:5 Siwan ina unzakan ninda Kraiskat gatake aminu buyambam dakngake yuamang ngana toiknginu awia tapatutakan yuak. Yuwan ninu kuupbamda dongu takngatukan dakngake yuamang. Unzing kepinin katakngin gwapakngin ngangu inata inata dua yuaing. Unekan ngwakngake yuwa kana amintapa daknganggak binga ninu kuupbamda dongu takngatukan dakngake yuamang.
ROM 12:6 Dongu takngatukan ngana Anututa ninde natdetdeu inata inata niman ninu inandek inandek puya takngatu takngatu tasikamang. Tasiwatna Anututa natake aminu tapatuta wamna yanikapikge natake ita natdetdet imuke musia tangenawan ayanikapik. Yanikapmake ita Jesue natapan kekekanggak kakngata buyambam siwanu aminu waapata asinggan yanikapsok.
ROM 12:7 Siwan Anututa natake aminu tapatuta notna gatayamikge natake ita natdetdet imuke musia tangenawan aminu waapata notnabam gatayamuyok. Ngan. Aminu tapatuta yanindamumbikge natake Anututa musia tangenawan aminu waapata yanindamumsok.
ROM 12:8 Siwan aminu tapatuta notnatane musia papan kekekaningge natake Anututa waapatane musia tangenawan aminu waapata aminbamdane musia papan kekekanong. Siwan aminu sangaapae dapmakaing aminde sangaapana yamikge Anututa musia tangenawan aminu waapata dua kotnake katak yamuyok. Siwan Anututa natdetdet imuke kayuyaapa dakngawikge natake musia tangenawan aminu waapata semna semna dua natake puya waaknga tasiyok. Siwan Anututa musia tangenawan aminu maike yuaing aminde butaya natayamiu waapata iaknga siknga natake puya waaknga tasiyok.
ROM 12:9 Ngan. Ginda notzae musip gwaang nataamang ngangu genzatakan ma yawam. Aho. Musipzaatangu kuut natapa kekekawan yanong. Sike sanga waiakngae masa imuke sanga take akngakan tawake tasinong.
ROM 12:10 Sike ginda notza Jesuat nana aminde natapa dongu takngatukan dakngawan ie musip gwaang natayamunong. Natayamuke ginda notzatane umana yapangenatnangge iaknga siknga natake tasinong.
ROM 12:11 Tasike puya kekeknga tasike tuyuknga natake ma tewa pimapan. Aho. Jesu Buyambam tapaninde natanggamatake musipzaatang toknga siknga natake puyana kekeknga pasingamunong.
ROM 12:12 Pasingamuke wamu ita tupa yawan kekekakut taknga buya aawan kaningge kayuke apbakngake yutnong. Yuwawa aminu Jesue iwana dakngake meya takngatu takngatu ginde damuwawa ngana ginda kekekake gitna take ma tewa pimapan. Aho. Ginda asinggan Anutue inindatake tumuk wam yanong.
ROM 12:13 Sike notza Jesuat nana aminu sangaapae dapmakaing aminde ginda gatayamunong. Gatayamuke aminu you gapmanduneta apningu yotzaatang pakoke ginda take toitnong.
ROM 12:14 Siwan aminu Jesue iwana dakngake gin pasiwa maikaing aminde natake Anututa wa amin pasiwan mainingge wamu ma yawam. Aho. Anututa gatayamikge natake tumuk wam ininong.
ROM 12:15 Sike aminu apbakngakaing amikat gatake yuke ginu kuupbamda apbaknganong. Siwan aminu meya siknga natake kwanam sikaing amikat gatake yuke kwanam sitnong.
ROM 12:16 Sike ginda sanga gisae gupzae take siknga natake tasikaing kakngakan notzae waakngae natake tasiyamunong. Aminu umana wena apae natake na binga dua ngang dua natake aminu waapaat gatake yutnangge ma bitawam. Sike aminu gikat nana tapatuta natake na natdetdetna babantapa ngang ma natapan.
ROM 12:17 Siwan aminu tapatuta ga tasiwan maiwinu gata yake tasiwi maiwikge natapnangge ma tasiwim. Aho. Ginda sanga aminda kawa noman singgak kakngakan tawake tasinong.
ROM 12:18 Sike ginda aminu kuupbapat gatake musipza kwikwikngakan natake yutningge kepi kakengu ginda wikake yutnong.
ROM 12:19 Siakan notna. Ginda yake yake ma amapam. Aho. Ginda wikake yuwawa Anutu awia tapatutakan toknga yake yamik. Unzing Anututa wamu takngatu yawan natake ayanikapsa aminu tapatuta anzing matakut, “Natakan yake toknga aknga wai aminde ayamit,” ngang matakut.
ROM 12:20 Siwan ginda yake yake dua amake Anututane wapatang wamu takngatu matakut taknga tawake anzing tasinong, “Iwandata tomna natapan kakengu gata nanamba imi napsok. Ba ita yanggae natapan kakengu gata yangga akngaka imi tangopsok. Unzing iwandata aakatap gatapnangge apan gata katap paimu buyambamu gapma gwene kwaipamuke imi gwapakngane gwaputakuke ita wai gae tasinggamunggak kakngae natapan meya siwik. Siwan gata gatangami ita waiakngana gae tasinggamunggak kakngae meya natake bitatewik.”
ROM 12:21 Ngan. Ginda yake yake amnanga akngae gepbiatang yuking ngana teke kepman epu kunong. Kuke iwanzae musipza kwikwiknga natake gatayamuke waiaknga yaitapaakusinong.
ROM 13:1 Ninu atnataamang. Gavman aminu ina dua gavmanu dakngake yuaing. Aho. Anututa ina katakngata pake pewan gavman amin dakngakaing. Unzingge ginu kuupbamda gavmande gepbiatang yutnong.
ROM 13:2 Aminu gavmande wam sandewiu waapata toknga apapik. Dasingge? Ita sanga Anututa pekut takngae masa imuke itane wamna sandekut.
ROM 13:3 Sike aminu take akngakan tasikaing aminda natake gavmanda toknga ba nimik ngang dua natapning. Aho. Aminu wai tasikaing amindakan ie gwautning. Siwan gata gavmande gwautnangge apbitakengu gata sanga take akngakan tasiyo. Tasiwi aminu gavman dakngake yuak kapata Anututane puya amin dakngake ga gatanggamunangge natapik. Natake gata sanga takeaknga tasiwinu ita gandupan take siwik. Siwan ngana gavmanu waapata Anututane puya tasike wai aminde toknga aknga ayamik. Asikaya ita moo siknga yuwikge natake Anututa aminu waapa take tewan gavman amin dakngake yuak? Aho. Gata sanga wai aknga tasikengu gata gavmande gwaumso.
ROM 13:5 Ngan. Ninda natake Anututa toknga aknga namuyak ngang natake gwauke gatu sanga ninda tasikumang kakngae musipminu enawan meya siknga natapnam ngang natake ninda gavmande gepbiatang yutnim.
ROM 13:6 Yuke ninda takis mani mukamang. Dasingge? Aminu gavmanu waakwakga puyana tasinangge akekekake Anututane puyana pasikaing.
ROM 13:7 Pasike takis dasing kakngae yawa natake ginda katak mutnong. Muke ginu gavmanu ie gepbiatang yutnangaapa dakngawiu ie gepbiatang koyutnong.
ROM 13:8 Ginda sanga yake imunanga moo pakingge natake tapdukngane zet yake imunong. Sike ginda notzae asinggan butaya natayamunong. Ninu atnataamang. Mama wamda yanggak kaknga buya aawan ninda notninde butaya natayamunim.
ROM 13:9 Ngan. Mosesdane mama wamu kundu anzing, “Yasewa ma tasiwam. Aminu ma zipam. Sangaapa kukae ma papam. Sangaapae ma geenguwam.” Siwan mama wamu takngatu Anututa Mosesde imukut taknga mama wamu kuupbamdane tupan taknga daknganggak kaknga anzing, “Ginda aminu ginde wesim yuak kapae butaya natangamunong.”
ROM 13:10 Siakan. Aminu tapatuta aminu wesim yuak kapae butaya natangamunggau waapata aminu waapae sanga wai takngatu dua siknga tasingamik. Wena. Ita butaya natangamuke tasiwawan mama wamu Mosesdane aknga buyana unin aawan ita mama wamu takngatusimu dua sandewik.
ROM 13:11 Ginu tapduu apmanu ninda ayuamang komde ginda atnataaing. Unzingge ginda sanga wa daninggat taknga katak tawake tasinong. Ngan. Tapduu ninda yakap siknga Jesue natapna kekekakut komune natapna tapduknga Jesuta gatuna apikge dapaknga sikut. Siwan ngana yuwatna nakanu kundu nipbibana apmanu apikge dapaknga siknga gwa singgak. Unzingge ginda enake waiakngasae masa imuke kepi nomana akngane sukunong.
ROM 13:12 Tapduknga ita apik gwenu dapaknga gwa singgak. Unzing kepda kwakawan kake gunzitda akopnanggenggak ngang yakamang binga ita apikge dapaknga gwa singgak. Unzingge ninda sanga zikaa dakaatang nana aknga teke sanga kakaa akngaatang nana aknga gitna pake yutnim. Yuke ninda sanga waiaknga yaitapakusinangge asiknga kekekanim.
ROM 13:13 Kekekake ninda kepi nomana sukunim. Unzing aminu gunzit tapane sanga kuupbamda kawa take singgak kakngakan tasikaing binga tasinim. Tasike ninda yangga toknga aknga dua tangoke datdaptake gatu sanga yasewa aknga dua tasinim. Sike ninda aminu kundutane sanga apanae dua geenguke gatu ninda dua yanganutnim.
ROM 13:14 Aho. Ginda Buyambam tapaninu Jesu Kraiskat gatake musipza takngatukan natake ie banip tawake tasinong. Tasike sanga wai musia enaya aknga tawanangge ma natapam.
ROM 14:1 Aminu tapatuta Jesue natapan kekekawan ngana Jesutane kepi katak dua natapiu waapa ginda take ginde banakan takopnong. Takoke ginda sanga wa katak dua nataak kakngae natake kaanga ma iniwam.
ROM 14:2 Ninu atnataamang. Aminu Jesuat nana tapatuta natake sanga kundu takwan dua ngang natake aminu waapata nanapat kaapat atnanggak. Ngana aminu tapatuta Jesue banip tawanangge natake ngana natdetdetna dapaknga siwan ita nanamban nanggak. Aminda anutu pupukngae inindatake kaau ie imuking kakngae natake ita kaau apbitake nanamban nanggak.
ROM 14:3 Siwan gata nanapat kaapat nakengu aminu kaau dua nanggau waapae gata ma inimimbim. Sike gata kaap bitake nanamban nakengu aminu nanapat kaapat atnanggau waapae gata ma inisapduwim. Aho. Aminu waapaat gaat kuut Anututa papan itane amina dakngake yuamayak.
ROM 14:4 Asikaya Anututa ga take ganitewan apuke gata Anututane puya aminae wam usanziwiyakge apbuyak? Wena siknga. Anutu awia tapatutakan inane puya amindane musia papan nomatawa tapatue ga wai tasinggayak ngang inike gatu tapatue ga take tasinggayak ngang iniwik. Ngana aminu waapa Buyambam tapaninda ina kekekangaman ita kekeknga yuke Jesue masa dua imuke pimapik. Wena.
ROM 14:5 Ngan. Aminu tapatuta Anutue natanggamatake tapduu gwendue natapan buyambam siknga siwan tapduu kundu ayapbimbik. Siwan ngana aminu tapatuta Anutue natanggamatake tapduu kuupbamde natapan buya kundukan siwik. Siwan ginu kuupbamda kepi wa takngaaya tawakaingu kake takngatu wai ba takngatu take ba ngang natake nangaakan ma natapam. Aho. Ginda kepi gisa tawakaing kakngae natake takekan ngang natapnong.
ROM 14:6 Aminu tapatuta tapduu gwendue natapan buyambam siwiu waapata Buyambam tapanindane umana yatangenatnangge natake tasiwan kana take siwik. Siwan aminu nanapat kaapat kuut nanggau waapata Buyambam tapanindane umana aknga yatangenatnangge natake ie inimbakngake napan kana take siwik. Siwan aminu kaap bitake nanamban nanggau waapaaya kuut Buyambam tapanindane umana aknga yatangenatnangge natake ie inimbakngake nanggak.
ROM 14:7 Ninu atnataamang. Ninda nisae banipda siwan natake kayuk yutnim ba akumnim ngangu yananga dua.
ROM 14:8 Aho. Ninda kayuk yukengu ninda Buyambam tapaninu Jesue gepbiatang yutnim. Siwan ngana ninda akungwakengu ninda itane gepbiatang yuke kumnim.
ROM 14:9 Sike Kraisda natake aminu gwa kumbing amin gatu kayuk yuamang aminde Buyambam tapa daknganangge natake ita kungwake gatuna gweake enakut.
ROM 14:10 Siwan gata dasingge kepi notdata tawake tasinggak kakngae natake inisapdukgayak ba inimikgayak? Asikaya ninu kuupbamda Anutue nomune yuke waamin dua ba yanim? Aho. Ninu kuupbamda ayanimde natake
ROM 14:11 Anututa yawan ayanikapsa aminu tapatuta natake anzing matakut, “Buyambam tapaninda anzing yawan kekekakut. ‘Aminu kuupbamda nae gepbiatang koyuke muna puke nae nanimbakngake ga Anutu siknga ngang nanining,’ ngang matakut.”
ROM 14:12 Ngan. Ninu atnataamang. Ninu kuupbam inandek inandek Anutue nomune yuke sanga kuupbam ninda tasikumang kaknga inikapnim.
ROM 14:13 Unzingge ninda notninde musipminu wai dua natayamunim. Aho. Ninda natake sanga notninda pimananga aknga tasinangge asiknga bitanim.
ROM 14:14 Buyambam tapaninu Jesuta na nanindamuban nata katak siknga anzing nataat. Aminu tapatuta kaau nanangge natapan wai siwan ngana aminu waapata napanu Anututa kawan take dua siwik. Siwan Anututa ina banipda siwan natake kaap ba nanamde natapan takekan siwik.
ROM 14:15 Siwan gata sanga notdata kawan wai singgak kaknga tawake napi gandupan aminu waapatane natdetdetna tasiwi maiwan ita sanga waakngae nangaakan natapik. Unzing tasiwi maiwan gata sanga notdae musip gwaang natayamunanga akngane dua sukunggayak. Sike gata kaap nanggayak kakngae natapan aminu waapa Kraisda ie tangge kungwangamukut tapatane natdetdetnata apmaiwik.
ROM 14:16 Sike gata sanga natapi take singgak kaknga tasiwi notdata gandupan wai siwanu gata sanga waaknga bitateyo.
ROM 14:17 Dasingge? Ninda Anututane kekeknga akngae gepbiatang koyuke ninda sanga nake ba tangopnim takngae dua natanggamatanim. Aho. Ninda sanga nomana aknga tawake musip kwikwik notninde natayamuna Anututane Waung Kapata musipmin papan ninda apbakngake yutnim.
ROM 14:18 Aminu tapatuta Anutue natanggamatake sanga waaknga ie tasingamiu Anututa aminu waapae natapan take siwik. Siwan aminda aminu waapae natapa aminu nomanaapa dakngawik.
ROM 14:19 Unzingge ninda musipminu takngatukan natapnimde iaknga siknga natake tasinim. Tasike ninda notnindane musia pana kekekaningge take siknga natake tasinim.
ROM 14:20 Tasike ninda nanamde ba kaapde ba dua natanggamatake nake Anututane puya dua tasina maiwik. Ninu atnataamang. Nanapat kaapat kuut takekan ngana gata napi ganduke natdetdetna tasiwan maiwanu take dua siwik.
ROM 14:21 Siwan gata kaap nake ba wain yangga tangoke ba sanga takngatu tasiwi notdata ganduke natdetdetna tasiwan maiwanu gata sanga waaknga gatuka ma tasiwim. Aho. Sanga waaknga gatukande apbitateyo.
ROM 14:22 Siwan gata sanga takngatu tasinangge natapi take siwanu musipbaatang sanga waaknga gitna take gata Anutue kaine tasiwi take siwik. Ngana sanga waaknga notdata ganduwawanu ma tasiwim. Siwan aminu tapatuta sanga takngatue natapan take siwan enake tasikengu waapata nangaakan dua natake musiaatang takekan ngang natakengu aminu waapata apbakngake tasiwik.
ROM 14:23 Siwan ngana aminu tapatuta natake nata kaap napanu Anututa nandupan take siwik ba take dua siwik ba ngang natapik. Natake ita nangaakan natake kaap napanu Anututa aminu waapae natapan take dua siwik. Dasingge? Aminu waapata musiaatangu dua natapan kekekawan nakut. Ngan. Ninda natake sanga takngatu tasina ninduke Anututa take dua ba natapik ngang natake ninda nangaakan natake ngana sanga waaknga tasinim. Tasinanu Anututa nindupan wai siwik.
ROM 15:1 Siwan ninu sanga Anututa take nataak kaknga anggaman natake nangaakan dua natake yuamang aminda sanga nisae banipda siwan nataamang kaknga dua tawake tasinim. Aho. Ninda aminu Anutue banip tawanangge natake ngana ie nangaakan natake tasikaing aminde kaanga dua yaninim. Kaanga dua yanike sanga waaknga tasinangge nangaakan natake teaing kaknga ninu kuutda atenim.
ROM 15:2 Teke aminu nikat gatake yuamang aminde banip tawake tasike ninu kuupbam inandek inandek wa amindane musia pana kekekaning.
ROM 15:3 Ninu atnataamang. Kraisda inane banip dua tawakut. Aho. Ita dua tawakut takngae natake ayanikapsa aminu tapatuta tupa siknga wamu takngatu Anutue wapatang anzing matakut, “Wa aminda sapdut wamu ga ganisapdukaing aminda naatde kuut nanisapdukaing,” ngang matakut.
ROM 15:4 Ngan. Wamu kuupbam ayanikapsa aminda tupa siknga natake matakingu waaknga ninu masan yuamang amin ninindamutnangge natake mataking. Matake wamu wa mataking kakngata nindane musipmin papan kekekanimde natake mataking. Papan kekekake ninda natake Anututa apmea gatanimikge kayutnim.
ROM 15:5 Sike Anutu nindane musipmin papan kekekakamang kapata ginu take gatandaman ginda Jesu Kraisde banip tawake notzae musip kwikwiknga natayamuke yutnong.
ROM 15:6 Yuke ginda musipza takngatukan natake Anututane umana aknga yatangenatnong. Anutu waapa Buyambam tapaninu Jesu Kraisdane Anutuna siwan itane Nana.
ROM 15:7 Unzingge ginda natake Kraisda ginda aminabam dakngake yuaing ngang natake ginda aminu gikat gatake yuaing aminde semna dua natayamuke tasiwa Anututane umana aknganata buyambam siknga siyok.
ROM 15:8 Ginu atnataaing. Kraisda Anututane puya amina dakngake ninu Judia nana gupmin matakamang amin gatanimunangge dakngakut. Gatanimuke wamu Anututa tupa siknga nindane baminde yaniwan kekekakut taknga buya aawikge tasikut. Ita wamu waakngatane buya tasiwan aawan
ROM 15:9 aminu Judia nana dua ngana keu komduine nana aminda natake sanga Anututa wa aminde butaya natake tasiyamukut takngae natake apbakngake Anututane umana akngana yatangenatningge natake tasikut. Unzing wamu takngatu tupa siknga ayanikapsa aminu tapatuta Anututane wapatang anzing matakut, “Unzingge nata aminu keu komduine nana amikat gatake yuke gae ganimbaknganim. Ganimbakngake gatane umanda kap taike yatangenatnim,” ngang matakut.
ROM 15:10 Siwan sanga waakngaekan natake yakapsa aminu tapatuta wamu takngatu anzing matakut, “Ginu Judia nana dua ngana keu komduine nana amin! Ginda aminu Anututa pakut amikat gatake yuke apbakngake yutnong,” ngang matakut.
ROM 15:11 Siwan wamu takngatuat aminu tapatuta anzing matakut, “Ginu keu komduine nana aminda Buyambam tapanindane umana akngana yatangenatnong. Ngan. Aminu kuupbamda itane umana aknga tasiwa buyambam siknga siyok,” ngang matakut.
ROM 15:12 Siwan wamu takngatuat Aisaia ayanikapsa amin tapata anzing matakut, “Aminu Devitdane nana umana Jesi ngang inikinggane dongune aminu tapatu aawiu waapata enake aminu keu komduine nana amindane buyambamtapa dakngawik. Dakngawan wa aminda ie apbakngake aminu waapata apu gatayamikge kayutning,” ngang matakut.
ROM 15:13 Siakan. Nata tumuk wam iniwa Anututa gindane musipza pangenawan ginda ie apbakngake ita akgatandamikge kayutnong. Kayuke ie natapa kekekawan Anututa gatandaman ginda asiknga bakngake musipza kwikwiknga notzae natayamunong. Natayama Anututane Waung Kapata inane kekeknga aknganata gindane musipza papan kekekanong. Kekekawa ginda natake sanga Anututa yakut taknga buya aawikge natapa kekekawan kayutnong.
ROM 15:14 Sike mate notnabam. Na atnataat. Ginda notzae takekan natayamuke tasikaing kakngata buyambam singgak. Notza take natayamuke ginda natdetdet pake gindane notza noman siknga yanindamukaing ngang nataat.
ROM 15:15 Sike Anututa na tapan nata Jesu Kraisdane puya amina dakngake ginu keu komduine nana amin gatandamitde natake na takut. Tapan nata gin gatandamuke Anututane wamu takeakngana danikapmanggat. Danikapa Anututane Waung Kapata gin pasiwan ginda Anutue nomune amin noman daknganingge natake ita na takut. Unzing aminu Anututane yot takwan gwene pasiya aminda sanga Anutue ima Anututa kawan take singgak kaknga binga tasinggat. Tasike nata natapa kusiwan wamu waaknga danike ginda gatusa natdetningge natake matanggat.
ROM 15:17 Unzingge nata Jesu Kraiskat gatake yuke ita na gatangaman puya Anutue pasingamunggat takngae natake apbaknganggat.
ROM 15:18 Apbakngake sanga Kraisda na gatangaman tasikum takngaekan natake yakapit. Ita na gatangaman nata aminu keu komduine nana amin yanindamuba natapbing. Natawawa nata kepi nomana akngane sukuwawa nanduke wa aminda Anutue gepbiatang koyuaing.
ROM 15:19 Ita gatangaman nata yanindamuwawa itane Waung Kapata inane kekeknga aknganata gatangaman nata duya takngatu takngatu pasike Anututa gatangaman pasinggat ngang natapningge pasikum. Pasike nata you Jerusalem gapmaneta tuwanguke nata wamu takeaknga Kraisda gatanimukut taknga yanikapmake keu kuupbam tawamba sandewan keu Ilirikam komune kuut kukum.
ROM 15:20 Kuke aminu Kraisde umana dua natapbing amindekan kuke yanikapnangge natake tasikum. Tasike aminu tapatuta kuke puya tuwanguke tasikut taknga nata tawake tasiwa puyuwikge apbitanggat.
ROM 15:21 Unzing wamu takngatu Anututane wapatang aminu ayanikapsa tapatuta anzing matakut, “Aminu tupa ie dua yanikapa natapbingu wa aminda itane wamu atnatapning. Ngan. Aminu tupa dua natapbingga katak siknga natdetning,” ngang matakut.
ROM 15:22 Siwan puya waaknga nata tasitakuke ginde kunangge tapduk bam asinggan natapbum ngana puya buyambamda na tapan kepi wena sikut.
ROM 15:23 Siwan ngana apmanu keu ayuat komune puya pasiwa sandewan puya anggwak saau wena. Siwan nakanu kwaapzang nata ginde kunangge take siknga nataat.
ROM 15:24 Unzingge masanu nata keu Spen komune kunangge natake nata apu gin gamok dandukenga undang kuwit. Siwan nata apa gikat gatake mateknga kundusim yutnim. Yukenga ginda na gatangamuke nata kepiapane kusika sangae dua dapitde natake ginda sanga kundu gatangamunong. Gatangamuke ginda Spen kep komde kepiapae na nanitakunong.
ROM 15:25 Ngana aminu Jesuat nana Masedonia kep gatu Akaia kep komaaune nana aminda natake notna Jesuat nana aminu Jerusalem yot gapmane yuaing aminda sangae atdapmakaing ngang natapbing. Natake notna gatayamunangge natake wa aminda manina unekan muba buyambamu gwa sikutde nata mani wa mukingu pake Jerusalem kuke wa aminde yamit.
ROM 15:27 Siakan. Wa aminda notna gatayamunangge take siknga natake sanga yake yake tasikamang binga tasiking. Ninda atnataamang. Aminu Judia nana aminda sanga Jesuta gatayamukut takngae natake yanitakuwawa aminu keu wa komaaune nana aminda natake apbakngaking. Apbakngake wa aminda yake Judia nana aminu gupdane sanga gatayamunangge natake tasiking kakngae natapa take siknga singgak.
ROM 15:28 Siwan nata mani wa mukingu pake yama puyuwana nata ginde kuke dandukenga gatu dapmake Spen kep komune kuwit.
ROM 15:29 Siwan na atnataat. Nata ginde kundopa Kraisda naat gikat gatake yuke ita gatanimuke musipmin papan kekekawa take siknga yutnim.
ROM 15:30 Mate notnabam. Ginda Buyambam tapaninu Jesu Kraisdane umana aknga buyambam siwikge take natapa Waung Kapata gindane musipza pangenawan ginda musip gwaang Jesuat naatde natanimuke tumuk wam yawa Anututa na gatangamik.
ROM 15:31 Ginda tumuk wamu kekeknga iniwa Anututa na aminu Judia kep komune yuaing aminde kataune sandewik. Siwan ginda iniwa ita inane aminabamu Jerusalem yuaing amin gatayaman nata mani wa gatayamunangge yamit takngae take natapning.
ROM 15:32 Siwan Anututa nandutewanu nata apbakngake ginde kuwa gikat gatake yuke nata natapa wikawan yuwit.
ROM 15:33 Sike nata tumuk wam iniwa Anutu ninde musip kwikwik natanimunggak kapata gikat gatake unekan yutnong. Siakan.
ROM 16:1 Maya tapatu umana Fimbie ngang inikamang kapa aminu Jesuat nana Senkria yot gapmane yuaing aminda tapa maya waapata Jesue puya amin dakngake yuak. Ninda waapae saminin ngang inikamang.
ROM 16:2 Ita aminu kwaapzang gatayamuke na kuut gatangamukut. Unzingge maya waapata apan kakengu ginda natake ninu Buyambam tapanindane aminabam dakngake yuamang aminde dongune nana tapatu ngang natapnong. Natake aminu gisane dongune nana aminde take natayamuke katak toikaing binga ginda maya waapae take natangamuke toitnong. Toike ita sanga tapatue meya natapanu ginda katak gatangamunong.
ROM 16:3 Siwan wawi tapatu umana Akwila siwan gatu itane maatna umana Prisila ngang yanikamang. Waapaatda tupa naat gatake yuke ninda Jesu Kraisdane puya tasitakuwatna waapaatda aminda nit nisipnang ngang dua natake na gatangamunangge tasikumayak. Unzingge nata ninatakan dua waapaatde yanimbaknganggat. Aho. Aminu keu komduine nana Anututane aminabam dakngake yuaingu kuupbamu kuutda waapaaatde ayanimbakngakamang. Siwan ginda natane gaak wama aminu waapaatde yamunong.
ROM 16:5 Siwan aminu Anutue inindatapnangge natake aminu waapaatdane yot gwene unekan gatake asinggan kokaing amindeaya natane gaak wama yamunong. Gatu aminu tapatu umana Epinitas ngang inikamang. Ita Esia kep komune nana aminde tupan Kraisde natapan kekekakut tapa. Nata ie musip gwaang natangamunggat. Ginda waapaaya kuut gaak wamu imunong.
ROM 16:6 Siwan maya tapatu umana Maria ngang inikamang. Ita puya kwatan siknga gin gatandamunangge tasikut. Ginda maya waapaaya kuut natane gaak wama imunong.
ROM 16:7 Gatu aminu tapaaya umana Andronaikas gatu Junias ngang yanikamang. Naat waapaakatdane bapuninu buya kundukan. Siwan sipdune aminu Jesue iwana dakngake yuaing aminda naat waapaakat panggaganuke kaautde nipmaba yukumang. Aminu Jesutane aposel amin dakngake yuaing aminda waapaatdane umana atnataaing. Sike nata Jesue masa imuwawa waapaatda Jesue amina dakngake yuwawat na masana Jesue amina dakngakum. Ginda waapaatde kuut natane gaak wama yamunong.
ROM 16:8 Gatu aminu tapatu umana Amplietas ngang inikamang. Ita Jesutane amina dakngake yuakge nata ie musip gwaang siknga natangamunggat. Ginda waapae kuut natane gaak wama imunong.
ROM 16:9 Gatu gaak wama ginda aminu tapatu umana Eban ngang inikamang kapa kuut imunong. Waapata puya amin notnin dakngake Kraisdane puyana pasinggak. Siwan aminu tapatu umana Stekis ngang inikamang. Nata ie musip gwaang siknga natangamunggat. Siwan ginda natane gaak wama waapae kuut imunong.
ROM 16:10 Gatu aminu tapatu umana Apelis ngang inikamang. Iwanata natdetdetna tasiwa maiwikge natake tasiwawa ngana ita kekekake Kraisdekan natanggamatake yuak. Ginda natane gaak wamu waapae kuut imunong. Gatu gaak wama aminu Aristobyulaskat gatake itane yotnane yuaing aminde ginda yamunong.
ROM 16:11 Gatu aminu tapatu umana Herodion ngang inikamang. Naat iat bapuninu buya kundukan. Waapae kuut ginda gaak wama imunong. Gatu aminu Nasisaskat gatake Buyambam tapanindane aminabam dakngake itane yotnane yuaing aminde natane gaak wama yamunong.
ROM 16:12 Gatu maya tapaaya umana Traifina gatu Traifosa ngang yanikamang. Waapaatda Buyambam tapanindane puyana kwatan tasikamayak. Waapaakat kuutde gaak wama yamunong. Gatu maya tapatu umana Pesis ngang inikamang. Ita amin gwaang. Buyambam tapaninde puya kwatan tasingamunggak. Waapae kuut gaak wama imunong.
ROM 16:13 Gatu aminu tapatu umana Rufas ngang inikamang. Ita Buyambam tapaninde natanggamatake tasike umana kayaapa dakngake yuak. Waapaat itane mingaat kuutde gaak wama yamunong. Itane minga waapae natapa natane minga daknganggak.
ROM 16:14 Gatu ginda natane gaak wama aminu kundu umana Asinkritas gatu Fligon gatu Hemis gatu Patrobas gatu Hemas gatu notninbamu wa amikat gatake yuaing aminde yamunong.
ROM 16:15 Gatu aminu tapatu umana Filologas siwan gatu itane maatna umana Julia ngang yanikamang. Gatu tapatu umana Nerias siwan gatu itane samina umana Olimpas ngang yanikamang. Gatu aminu Anututane aminabam dakngake aminu waakwakat gatake yuaing amikatde kuut ginda gaak wama yamunong.
ROM 16:16 Sike ginda notza Jesuat nana dakngake yuaing aminde takekan natayamuke kataknga ipnong. Sike aminu Kraisdane aminabam dakngake anggwak saak yuaing aminda ginde gaak wamna danikaing.
ROM 16:17 Mate notnabam. Aminu kunduta Anututane wamu ginda gwa natapa kekekakut taknga sandeke kem wam danindamukaingge ginda wa aminde gwautnong. Danindamuba ginda yanganuke dongu takngaaya daknganang. Wa aminde masa yamunong.
ROM 16:18 Sike wa aminda puya Buyambam tapaninu Kraisdane puya akngane dua tasikaing. Aho. Wa aminu inae gupde banip takngakan tawakaing. Tawake wamu kaa siknga yake yanindatdauwawa aminu ie dua gwaukaing aminda natake ngana natapa kem dua singgak.
ROM 16:19 Siwan ngana ginda Anututane siakan wam takngae natake atawake tasikaing kakngae natake aminu Jesue amina dakngake yuaing aminda sanga waaknga yatakuwawa aminu kuupbamda nataaing. Unzingge nata ginde natake apbaknganggat. Siwan ngana ginda sanga takeakngae katak siknga natake gatu kem wamu wa danindatdaukaing kakngae masa imuningge nata take nataat.
ROM 16:20 Ginda sanga waaknga tasike yuwawa Anutu ninde musip kwikwik natanimunggak kapata gatandamuke ita Setenu tangutamamban pimapan ginda yaitapaakusike yapbitning. Siwan nata tumuk wam iniwa musip kwikwiu Buyambam tapaninu Jesu Kraisda natanimunggak kakngata gikat gatake yuyok notna Isrel nana aminde.
ROM 16:21 Natane puya amin notna umana Timoti ngang inikamang. Gatu aminu kundu umana Lusias gatu Jeson gatu Sosipata ngang yanikamangu naat waakwakat bapuninu buya kundukan. Wa aminda gaak wamna ginde yatewa kunggak.
ROM 16:22 Siwan na Tetias. Nata wamu pas asane matanggat taknga Polde genaneta yawan natake matanggat. Nata Jesuat nana amin dakngake yuatde nata gaak wama ginde yatewa kunggak.
ROM 16:23 Siwan aminu tapatu umana Gaias ngang inikamang. Ita na take inane yotnane takoke na toiban yuat. Sike ita aminbamu Jesuat nana dakngake yuaing amin pake yotnane pakopan unekan yuke Anutue inindatakaing. Waapata gaak wamna ginde yatewan kunggak. Siwan aminu tapatu umana Erastas ngang inikamang. Ita you anggapmane nana aminda takis mani muba kayuak kapanin. Waapataaya gaak wamna ginde yatewan kunggak. Siwan notninu umana Kwotas ngang inikamang. Itaaya kuut gaak wamna ginde yatewan kunggak.
ROM 16:24 Nata tumuk wam iniwa musip kwikwiu Buyambam tapaninu Jesu Kraisda ninde natanimunggak kakngata gikat gatake yuyok. Siakan.
ROM 16:25 Anututa inane kekeknga aknganata gin papan kekekaning. Unzing wamu takeaknga Jesu Kraisda tasikut takngae natake nata yanikapmanggat binga Anututa gin papan kekekaning. Wamu waaknga Anututa tupa ina takusopuke yuwawan tapduu mamaya siknga siwana
ROM 16:26 ita aminu kundu pake wamu waaknga yeuyamukut. Yeuyaman kake wa aminda wamu waaknga aminbamde yanikapmake buk gopatang mataking. Matawa Anutu asinggan yuwawik kapata yake aminu kuupbam kepna kepna nana aminda wamu waaknga anggakan natake musiaatang natapa siakan siwan gwaamutningge yakut.
ROM 16:27 Sike Anutu waapa natdetdetna babanu kaya awia waapakan. Ninda sanga Jesu Kraisda tasinimukut takngae natake ninda apbakngake Anutu waapatane umana aknga asinggan asinggan yatangenatnim. Siakan.
1CO 1:1 Na Pol. Anututa ina banipda siwan natake yawan Jesu Kraisda na take itane kwiiknga dakngawitde na takut. Siwan aminu tapatu umana Sostenis ngang inikamang. Naat iat Jesue amina dakngake notna notna dakngake yuamak. Sike nitda pas asanu matake
1CO 1:2 ginu Anututane aminabam dakngake yuaingu Korin yot gapmane nana aminde matandamukamak. Jesu Kraisda ginde tangge kungwandaman Anututa ginde natake ginu amin noman daknganingge natake ita ginu yandawamban ginda ie kuwa ita inae papan ginda amin noman dakngake yuaing. Gikat gatu kepna kepna nana kuutda Jesu Krais nikat gatu wa amikatdane Buyambam tapanin yatawakaingu kuupbamu Anututa papan itane amin noman dakngake yuaing.
1CO 1:3 Siwan nata tumuk wam iniwa Nanin Anutuat gatu Buyambam tapaninu Jesu Kraiskatda ginde kwikwiknga natandamuke gindane musipza pasiwat kwikwikngata yutnong.
1CO 1:4 Nata ginde natake tapdukbamu asinggan Anutue inimbaknganggat. Dasingge? Jesu Kraisda gindane musipza pangenawan ginda sanga buyambamde natdeke yuaingge nata Anutue inimbaknganggat.
1CO 1:5 Tupa nata sanga Kraisda ninde tasinimukut takngae natake gin banakan koke nata ginde danikapbum. Danikapa ginda natake gitna take yuaing. Yuwawa Jesu Kraisda gindane musipza pangenawan ginda sanga buyambamde natdeke Anututane wamu buyambam yanikapmake tasikaing.
1CO 1:7 Tasike ginda natake Buyambam tapaninu Jesu Kraisda gatuna apikge apbakngake kayuaing. Kayuke ginda sanga Anututa tasike itane aminabamdane musia pangenawan sanga buyambamde natdeke tasikaingu takngatue dua botake ginda kuupbam natdeke tasikaing.
1CO 1:8 Tasiwawa Buyambam tapaninu Jesu Kraisda gin papan kekekawan yuwawa ita gatuna apuke dudupan amin noman siwan wamu ginde temapa yananga dua siwik.
1CO 1:9 Siwan Anututa gin yandawamban ginda kuwa itane waaknga Jesu Krais nindane Buyambam tapanikat gatake unekan binga yuaing.
1CO 1:10 Siwan mate notnabam. Nata kekeknga Buyambam tapaninu Jesu Kraisdane kekeknga akngae gepbiatang yuke wamu takngatu nata daniwa natake tawanong. Ginu kuupbamda paut tasike wamza yatapa takayok. Ginda wambam yake yanganuke dongu takngaaya ma dakngawam. Ginda musipza takngatukan natake yutnong.
1CO 1:11 Ngan. Notnabam. Aminu Klowiat gatake yuaing aminda na nanike ginda ayanganuke dongu inata inata dakngake yuaing ngang naniwa natapbum.
1CO 1:12 Wamu wa naniwa natapbumu anzing. Ginu kuupbamda wamu inata inata yake kunduta anzing yakaing, “Ninu Poldane pandetna,” ngang yawa kunduta, “A! Ninu Apolosdane pandetna,” ngang yakaing. Yawa ngana kunduta yake, “Ninu Sifasdane pandetna,” ngang yawa kunduta, “A! Ninu Kraisdane pandetna,” ngang yakaing.
1CO 1:13 E mate! Asikaya Kraisda ina wesike aminu tapaat tapaat dakngake pasinggak ba dasing? Ba aminda na amin saamdakane nuwa nata ginde tangge kungwandamukum ba dasing? Ba ginu natane umana akngae natake yangga sautdamuking ba dasing? Wena siknga.
1CO 1:14 Nata gikat nana tapaakan umana Krispas gatu Gaias ngang yanikaing kapaat gan yangga sauyamukum ngang nataat. Aminu buyambam dua sauyamukum ngang natake apbaknganggat.
1CO 1:15 Sike aminu buyambam yangga sauyamukum gamu ginda yake yangga sautniman ninda aminu Polkat nana amin dakngakumang ngang yawam.
1CO 1:16 Aminu tapatu umana Stefanas ngang inikaing kapaat nana ina paande kuut yangga sauyamukum. Siwan nata aminu tapatuat kuut yangga apba saukngamukum ngana apbotanggat.
1CO 1:17 Dasing? Asikaya Kraisda na take nanitewan apuke aminbamu yangga sauyamitde nanitewan apbum? Aho. Ita na wamu takeaknga yanikapitde na nanitewan apbum. Nata wamu take waaknga yanikapnangge natake aminu inane natdetdetnae natake buya aknga undang yuwawan kaa wam yakaing amin binga dua dakngake yaninggat. Aho. Nata sanga Kraisda gatanimuke amin saamdakane ninde tangge kungwanimukut taknga songa siyak ngang natake amindane natdetdetna usanzike nata wikake yaninggat.
1CO 1:18 Siakan. Wamu take waaknga Jesuta nin gatanimuke amin saamdakane ninde tangge kungwanimukut takngae natake nata yanikapa natake aminu Anututa gatayamuke waiaknganae toknga paning kakngane sandewan ie kuking aminda natake anzing yakaing. Wamu take waakngata Anututane kekeknga akngana ninde yeutniman anggaman kaamang ngang yakaing. Siwan ngana aminu waiaknganae toknga paning aminda natake ga atdatdaptake kem wam yanggayak ngang nanikaing.
1CO 1:19 Sike aminu wamu wa binga yakaing aminde natake Anututa wamu takngatu yawan ayanikapsa aminu tapatuta Anututane wapatang anzing matakut, “Nata aminu natdetdetna babanu kaya akwakgane natdetdetna pasiwa maining. Nata aminu kakaa siknga nataaing amindane kepi umuyama tasiwa buya dua aawik,” ngang matakut.
1CO 1:20 Dasingge? Aminu kepdakane nana natdetdetna babanu kaya akwakga aminbam gatayama takekan asinggan yutningge tasiwa ngana buya dua aakgak. Buya dua aawan ngana Anututa ina tasiwan buya asaakgak. Unzingge ninda natake aminu natdetdetna babanu kaya akwakga gwa pimaking ngang nataamang. Ngan. Mama wamde katak siknga natdekaing amikat gatu aminu amindane natdetdetna papa nomatakaing amikat ngangga gwa pimaking ngang nataamang.
1CO 1:21 Siakan. Aminu kundu natdetdetna kaya ngana Anutu natdetdetna babanu kaya awia waapatakan yuak. Unzing yuak ngana wa aminda natake sanga Anututa natdetdetnata natdeke tasinggak kakngae natapa gutonga singgak. Siwan aminu kundu kekekngana kaya ngana Anututa wa aminu ayapbike kekeknga sikngaapa yuak. Ita unzing yuak ngana aminda natake sanga Anututa inane kekeknga aknganata tasinggak kakngae natapa tuyuknga singgak. Siakan. Aminu Judia kep komune nana aminda anzing nanikaing. Gata duya takngatu tasiwi kakengu ninu Anututa ga ganitewan apu nininggayak ngang natake gatane wamba natapna siakan siwik ngang nanikaing. Siwan aminu Judia nana dua ngana keu komduine nana aminda anzing nanikaing. Wamu wa gata nininggayak kakngatane yapii siknga anggaman kakengu ninda gatane wamba natapna siakan siwik ngang nanikaing. Wamu waaknga unzing nanikaing ngana ninu aposel amin dakngake yuamang aminda wam yanikapmake aminu Anututa tapan akgatanimuyaapa dakngake apan aminda tanggaganuke amin saamdakane tanguwa kumbut tapaekan natake yanikamang. Wamu waaknga yanina natake aminu Judia kep komune nana aminda natapa kem siknga singgak. Siwan aminu Judia nana dua ngana keu komduine nana aminda wamu wa yanikamang kakngae natake ginu atdatdaptake kem yakaing ngang ninikaing. Wamu waaknga unzing niniwawa ngana aminu Anututa yayawamban ie kuke itane aminabam dakngake yuaing aminu Judia kep komune nana amikat gatu keu komduine nana aminu kuutda natake anzing yakaing. Kraisda nin gatanimunangge natake Anututane kekeknga akngaat natdetdetna buyambapat yeutniman kaamang ngang yakaing. Siakan. Anututa inane natdetdetnata natdeke aminde tasiyaman wa aminda inane natdetdetnata natdeke Anutu dua yuak ngang kem nataaing. Kem natake aminu kunduta wamu wa ninda yanikapmakamang kakngae natapa gutonga singgak. Siwan ngana aminu nindane wamde natapa siakan siwiu wa aminu Anututa gatayamunangge take siknga nataak. Natake ita wa aminu toknga waiaknganae paning kakngane asandewik. Unzingge nata wamu take waaknga yanikapnangge natake nata amindane natdetdetna usanzike wikake yaninggat.
1CO 1:26 Siakan notnabam. Anututa gin yandawamban ginda ie kuke itane aminabam dakngake yuaing ngana ita ginu dua yandawakut gwene ginu dasing yuking? Asikaya ginu kuupbamda aminu natdetdetza babanu kaya akwak dakngake yuking ba dasing? Ba ginda aminu kekekngasa kaya akwak dakngake yuking ba dasing? Ba ginda aminu umanza kaya akwak dakngake yuking ba dasing? Aho. Gikat nana tapatu tapatutakan natdetdetna kaya ba kekekngana kaya ba umana kaya amin dakngake yuking.
1CO 1:27 Ngan. Ginda unzing yuwawa aminda dandupa aminu moo amin sikut ngana Anututa ginu inae papan ginda itane aminabam dakngake yuaing. Ita ginu pake aminu natdetdetna babanu kaya amin bitapeke pasiyaman aminu wa natdetdetna kaya akwakga pimake maakaningge natake ginu inae pakut. Aminda dandupa tuyuknga sikut ngana Anututa ginu inae pake aminu kekekngana kaya amin bitapeke pasiyaman aminu wa kekekngana kaya akwakga pimake maakaningge natake ginu inae pakut.
1CO 1:28 Aminu umana wena aminde kepdakane nana aminda ayanimikaing ngana Anututa natake aminu umana kaya aminda pimake maakaningge take natapbut. Take natake ita aminu umana wena kundu inae pakut. Ngan. Anututa natake aminu take amin dakngake yuaing aminda pimaningge natake ita aminu umana wena aminu inae pakut.
1CO 1:29 Unzingge aminu tapatuta Anutue nomune yuke ita inane umana aknga yatangenatnanga dua. Wena siknga.
1CO 1:30 Siwan ngana Anututa Jesu Krais tapan ita ninde tangge kungwanimukut. Ita kungwanimukut takngane ita Anututane natdetdetna buyambamu ninde yeutnimukut. Yeutniman kake ninu anzing nataamang. Jesuta gataniman ninda Anutue nomune amin noman dakngake yutnimde Anututa i tapan tasinimunggak ngang nataamang. Sike Jesuta nindane musipmin papan nomatawa kepi nomana sukunimde natake Anututa i tapan tasinimunggak ngang nataamang. Sike Jesuta ninu waiakngatane kekeknga akngane sandewikge natake Anututa i tapan tasinimunggak ngang nataamang. Natake ginda Jesuat gatake yuwawa Anututa danduke ginda kayuk asinggan yutningge tasindaman yuaing. Yuke ginda gisae umanza yapangenatnanga dua. Wena.
1CO 1:31 “Aminu tapatuta apbaknganangge natakengu ita sanga Buyambam tapaninda tasinimukut takngaekan natake bakngayok,” ngang matakut.
1CO 2:1 Siwan mate notnabam. Tupa na ginde kuke Anututane wamu takeaknga ginde danikapbum. Danikapmake nata aminu natdetdetna babanu kaya amin binga dua dakngake gindane natdetdetza usanzike wikake danindamukum.
1CO 2:2 Nata ginde kunangge natake natane musipmaatangu nata anzing natapbum. Tapduknga na ginde banakan yuwit gwene nata wamu kundue dua natake yanikapit. Wena. Nata Jesu Kraisdekan natake yanikapit. Wamu ita amin saamdakane kungwanimukut takngaekan yanikapit ngang natapa kekekakut.
1CO 2:3 Sike nata ginde kuke aminu kekekngana kayaapa binga dua dakngake yukum. Aho. Nata nangaakan natake wamde puya tasiwa buya dua ba aawik ngang natake ngana akekekake nata katak siknga natdeke tasiwa buya apme ba aawik ngang natake tasikum.
1CO 2:4 Unzing natake wamu nata ginde danikapbumu waaknga aminu kunduta kaa wam yanangge natake buya aknga undang yuwawan yakaing amin binga dua dakngake danikum. Aho. Nata wam danikapmake Anutue Waung Kapatane kekeknga akngane yuke danikum.
1CO 2:5 Ngan. Nata ginde natake gindane musipza amindane natdetdetnata pangenawan ginda Anutue natapa kekekawikge dua natake danikum. Aho. Anututane kekeknga aknganata gindane musipza pangenawan ginda ie banip siningge natake nata Anutue Waung Kapatane kekeknga akngane yuke danikapbum.
1CO 2:6 Siakan. Ninda aminu Anutue kekekngae natake yuaikat gatake yuke amindane natdetdetnae dua natake yanikapmakamang. Aho. Ninda Anututane natdetdetdekan natake yanikamang. Yanike natdetdeu wa tupan aminu tapduu ayuamang komune nana amindane dua. Aminu waakwau apmea wena asining amindane natdetdetde natake dua yanikamang. Aho.
1CO 2:7 Ninu Anututane natdetdeu ita tupa takusopukut takngae natake yanikapmakamang. Natdetdeu wa Anututa keu dua tasikut gwene ita natake ninda ie kuke iat gatake take siknga yutnimde yakut.
1CO 2:8 Siwan ngana aminu tupan tapaapa tapduknga ninda ayuamang komune nana aminda natdetdeu waakngae dua siknga nataaing. Wena. Sike wa aminu atnatapbing gamu Buyambam tapaninu umana enane siknga yuak kapa amin saamdakane dua tanguwa kupan.
1CO 2:9 Ngana wamu takngatu Anutue wapatang ayanikapsa aminu tapatuta matakut taknga buya unin aakut. Wamu waaknga anzing matakut, “Sanga kainata dua kake gatu maakngita dua natake gatu musiaatang dua natapbing kakngae Anututa natake aminu inae musip gwaang natangamukaingge tandakngayamukut,” ngang matakut.
1CO 2:10 Wamu waaknga buya aawan Anututa natdetdeu wa ita tupa takusopuwan yukut taknga ninde yeutnimukut. Ita yawan inane Waung Kapata natdetdeu waaknga yeutnimukut. Ngan. Itane Waung Kapata sanga Anututa musiaatang nataau kuupbamu atnataak. Siwan natdetdeu Anututa pakusopuwan yuaing kaknga kuut atnataak.
1CO 2:11 Ninu atnataamang. Aminu tapatuta sanga notnata musiaatang nataak kakngae natapnanga dua. Wena. Sanga waakngae notnata inatakan atnataak. Ina unzakan aminu tapatuta sanga Anututa musiaatang nataak kakngae natapnanga dua. Aho. Anututane Waung Kapatakan atnataak.
1CO 2:12 Siwan ninu natdetdeu aminda inane musiaatang nataaing kaknga dua takumang. Aho. Anututa inane Waung Kapa ninde atniman takumang. Inane Waunga waapa nimuke ninda natdetdeu Anututa nimunangge yakut taknga kuupbamu atnatapnimde natake nimukut.
1CO 2:13 Siwan ninda natdetdeu wa Anututa nimunangge yakut takngae natake yanikapmakamang. Yanikapmake ninda amindane natdetdetde natake dua yakamang. Aho. Ninda natdetdeu Waungu wa Anututa atnimukut tapata ninindamukgak kakngaekan natake yanikamang. Ngan. Waungu waapata musipmin pangenawan itane natdetdetdekan natanggamatake aminbam yanikapmakamang.
1CO 2:14 Siwan ngana aminu Anutue dua nataaing aminda wamu wa Anututane Waung Kapata nimunggak kakngae natapa gutonga siwan ie masa imukaing. Dasingge? Wa amindane musia Waungu waapata apangenakut gamu wamu waakngae natapa siakan siwan.
1CO 2:15 Ngana Waungga aminu tapatutane musia tangenawanu aminu waapata wamu wa kuupbam usanzike natapan siakan siwik. Siwan aminu kunduta aminu waapatane natdetdetna usanzike natapa wai siwiu waakwakge nata natapa moo binga singgak.
1CO 2:16 Sike wamu takngatu Anutue wapatang ayanikapsa aminu tapatuta matukut taknga buya unin aakgak. Ita anzing matakut, “Natdetdeu Buyambam tapanindane mamin aminda natake itane natdetdetna tapan nomatawik? Wena,” ngang matakut. Siwan ngana Waung Kapata nindane musipmin pangenawan ninda natdetdeu Kraisda nataak kakngae atnataamang.
1CO 3:1 Siwan mate notna. Tapduknga nata gikat gatake yukumang gwene nata gin danduke ginde Anutue kekeknga dua natake yuaing amin ngang natapbum. Ngan. Ginda aminu kayuk kakwau Anutue kepi tuwanguke tawake tasikaing binga Anutue banip sikaing kakngata tuyuknga singgak ngang natapbum. Ngang natake natdetdetza usanzike nata wepda siknga engang yanindamukaing binga danikum.
1CO 3:2 Mingata engangu ngwam nakaing aminde nanamu kekeknga yamunanga dua. Ina unzakan nata ginu wamu kwanga binga natdetnanga aminda yuaing ngang natake nata wamu kekeknga wam dua danindamukum. Aho. Ginda natdetdetza dua tanomuwawa wamu kekeknga wam daniwanu dua natdetning ngang natake nata wikake danikum. Tupa ginda natdetdetza dua tanomanuke yuking kakngata yutake apu apman apunggak.
1CO 3:3 Siwan ginda sanga gisae musipzaatang enayaaknga tawake tasikaing. Tasike ginda musipza wai notzae natake ayanganukaing. Sike ginda sanga wa tasikaing kakngae natake dasing yanim? Asikaya ginda sanga musipzaatang enayaaknga tawake tasiking kakngane yusika teke epu kepmanu gwa kuking ba dasing? Aho. Ginda sanga waaknga dua teke sanga aminu Anutue dua natake tasikaing kakngane sukukaing.
1CO 3:4 Ngan. Aminu gikat nana kunduta yake, “Ninu Poldane pandetna dakngake yuamang,” ngang yawa kunduta, “Ninu Apolosdane pandetna dakngake yuamang,” ngang yakaing. Unzingge ninu dasing yanim? Asikaya ginda Anututane sanga akngae natanggamatake tasikaing ba dasing? Aho. Aminde sangaekan natake tasikaing.
1CO 3:5 Siwan ginu dasing natake wamu waaknga yakaing? Apolos waapa mina binga? Siwan na Pol. Na mina binga? Niu puya amin gan ngangu ginda dua ba natake wamu waaknga yakaing? Buyambam tapaninda puya inana nitde niman puya waakngakan pasitakuke daniwatda natake ginda Anutue natapa kekekanggak.
1CO 3:6 Puya aminu tapatuta nanam zak yapuke kuwawan ngana sopa dua tawan kake notna tapatuta apuke yangga tukngwambik. Siwan Anututa pasiwan enake buya aakaing. Ina unzakan tupanu nata ginde kuke Anutue wam danindamukum. Danindamuke gin dapmake kuwawa Apolosda apuke gin danindamukut.
1CO 3:7 Sike ie dasing yanim? Asikaya nitdane umanit takngata buyambam siknga sikamayak ba dasing? Aho. Anutu wa apasiwan enake buya aawik kapatane umanakan yatangenatnanga.
1CO 3:8 Niu puya amin gan. Sike ninu atnataamang. Aminu nanam zak yapunggak kapaat gatu yangga tukngwanggak kapaatda puya amin notna dakngake puya pasikamayak. Puya pasiwawat puya toikga usanzike mani katak yaman pasan.
1CO 3:9 Ina unzakan niu puya amin notna dakngake Anututane puya pasikamak. Siwan aminda puyane kuke nanam zak yapukaing. Ina unzakan nitda puya tasitakuwatda Anututa pasiwan buya aawan ginda itane aminabam dakngake yuaing. Siwan ginu Anututane yotna binga. Ita ina mitanggak gwen binga dakngake yuaing.
1CO 3:10 Ninu atnataamang. Aminu tapatuta gwak gaka kwaiwan puyuwana aminu kunduta you engatangan gwau wa dakandakane tasikaing. Ina unzakan Anututa na tapan na yot mitapsa amindane tupan tapa natdetdetna kayaapa binga dakngakum. Siwan nata puya gin banakan tuwanguke tangenakum. Unzing aminu tapatuta yot gwak kwainggak binga tuwanguke tasikum. Nata tasiwa puyuwana aminu kunduta apuke you engatangan tasinggak binga puya amin notnata apasikaing. Sike aminu puya waaknga pasikaingu katak siknga natake pasinong.
1CO 3:11 Ginu atnataaing. You wa gwenu Anututa ina mitanggak gwende gwak siknga daka ita gwa kwaikuu wa Jesu Krais unin. Sike gatu aminu tapatuta you wagwen tasinangge natakengu ita gwau wandaka ukgwike mutewan kuwawan gatu gwau inata daka kwainanga dua. Wena.
1CO 3:12 Sike aminda yot gwau wandaka engatangan tasinangge nataaikat nana kunduta sanga kekeknga siknga pakapu mitapning. Aminda gol ba silwa ba suu kundu mani buyambam sikngata usinanga gwegwen pakapu yot gwene sangasanga tasigwaangukaing binga tasining. Siwan kunduta sanga pupuknga pakapu mitapning. Aminda katau pupuknga ba babam tatak ba sak ngang pakapu tasikaing binga tasining.
1CO 3:13 Siwan puya wa inandek inandek tasikaing kakngata tapduknga Jesuta nin usanzitnimunangge epik gwene anggaman siwik. Ngan. You gwendu katapda isisopuwanu sanga kekeknga sikngatakan yutning. Ina unzakan ita usanzike tasiwan puya take ba wai ngang anggaman siwan kanim.
1CO 3:14 Siwan sanga aminu tapatuta gwau wandaka engatangan tasiwik kaknga katapda dua isiwanu Anututa puya waaknga tasikutde natake sanga yake asimik.
1CO 3:15 Siwan ngana katapda sanga aminu tapatuta tasikut taknga isisopuwanu Anututa sanga yake imunanga aknga akaiwan kungamik. Kaiwan kungaman moo siknga yuwik ngana Anututa puya amina waapa gatangaman ita Anutuat gatake kayuk asinggan yuwik. Ngana aminu katapda paa siknga isiwan kumbut tapa binga dakngake yuwik.
1CO 3:16 Siwan ginu Anututane yotna binga. Ita ayuak gwen binga dakngake yuaing. Siwan itane Waung Kapata gin banakan ayuak. Asikaya ginu ie dua nataaing ba dasing?
1CO 3:17 Sike aminu tapatuta Anututane yot takwanu wagwen tasiwan maiwiu Anututa aminu waapa atasiwan maiwik. Siakan. You wagwenu takwan dua gamu waapata take tasiwan maiwan. Siwan ginu yot takwanu Anututa undang yuak gwen binga dakngake yuaing.
1CO 3:18 Siwan aminu gikat nana tapatuta sanga musia enayaaknga tawake tasinggak kakngae natake nata natdetdetna kayaapa dakngake tasinggat ngang kem natapsak. Ngana ita unzing natakengu natdetdeu waaknga ateyok. Ateke ita natdetdetna kayaapa binga dakngawik.
1CO 3:19 Dasingge? Natdetdeu aminu Anutue masa imukaing aminda natake tawake tasikaingu Anututa natapan gutonga singgak. Unzing singgak kakngae natake ayanikapsa aminu tapatuta wamu takngatu Anutue wapatang anzing matakut, “Aminu kunduta natdetdetninu buyambam ngang natake tasiwawa ngana Anututa wa aminu apanggaganuwan sanga wa tasinangge nataaing kaknga buya dua aakgak,” ngang matakut.
1CO 3:20 Siwan wamu takngatuat Anutue wapatang anzing yuak, “Aminu kunduta natake nindane natdetdetninu buyambam ngang natake ngana inane natdetdetna buyambamu waaknga tawake tasiwa buya dua aakgak,” ngangu Anututa atnataak.
1CO 3:21 Unzingge ginda sanga aminu tapatuta gin danindamukut takngae natake itane umana enane siknga ma tangenawam. Wena. Puya aminu kuupbamu Anututa ginde natake papan yuaing.
1CO 3:22 Ita ginde natake na Pol gatu Apolos gatu Sifas ngang pakut. Sike ginde natake ita keu kuupbam tasike tekut. Ngan. Ita ginde natake pasiwan buya aawan ninda kayuk yutnim ba akumnim ba sanga apmanu ninde sinimukaing ba apmea sinimuning. Sanga kuupbam ita ginde natake pasinggak.
1CO 3:23 Dasingge? Ginu Kraisdane gepbiatang koke yuaing. Siwan Krais waapata Anututane gepbiatang yuak.
1CO 4:1 Siwan ginda naat gatu Apoloskatde natake Kraisdane puya amina dakngake yuamayak ngang natapnong. Anututane kusopuknga wamde kuyana dakngake yuamayak ngang natapnong.
1CO 4:2 Siwan ginda atnataaing. Puya toikga aminu kundu papan puyae kuyana dakngake yuaingu puya toiu waapata kawawan wa aminda katak siknga dua tagwauke itane genu dua gwaamumba kakengu ita natapan take dua siwik.
1CO 4:3 Siwan gin ba aminu tapatuta puya nata tasinggat taknga usanziwanu nata ie natapa sanga moo binga siwik. Ngan. Nakaya puya ninane aknga nina dua usanzikgat. Wena.
1CO 4:4 Siakan. Nata puya gin banakan koke pasiyuk sanga gutongana wena ngang yanggatde Anututa na nandupan amin noman siwik ngangu yananga dua. Aho. Na usanziwik kapa Buyambam tapaninu unin.
1CO 4:5 Unzingge tapduknga Jesuta gatu apik gwenu dua apuwawan ginda puya nitda pasikamak kaknga ma usanzike tasiwam. Aho. Tapduk wagwene ita apu sangabamu zikaa akngane kusopuke yuaingu pake kakaa akngane pewan anggaman sining. Siwan sanga kuupbam ninda musipmikatang nataamangu pasiwan anggaman sining. Ngan. Tapduk waomune ninu kuupbam inandek inandek Anututa nomana siknga usanzike umaninu yapangenawik. Yapangenake kundutane umana enane siknga yapangenawik.
1CO 4:6 Siwan mate notna. Nata gin danindamutnangge natake moo tuwanguke naat Apoloskatde yake ngana aminu kundue natake wamu waaknga yanggat. Yake sanga nitda nisane umanit yatangenatnangge dua yakamak kaknga tawake tasiningge yanggat. Siwan ginda kepi waaknga tawake wamu Anutue wapatang matakut taknga tawake tasiningge natake yanggat. Sike ginu wamu waaknga tawake ginda yamandet wamu dua yake gisane umanza ma yapangenawam. Dua yapangenake ginda puya aminu tapatue apbakngake itane umana yatangenake ngana puya aminu tapatutane umana ayaitapaakusinangge ma tasiwan.
1CO 4:7 Asikaya aminu tapatuta gikat nana tapatu kawan inata kundu singgak ba dasing? Ba ginda aminu kundu yapbitnanga akngae yapii Anutu dua ba dasing? Aho. Ita tasindaman ginda ayapbitning. Unzingge ginu dasingge gisane umanza yapangenake ninda nisane kekeknga akngata yapbike yuamang ngangu yakaing?
1CO 4:8 Ginu dasing nataaing? Ginda natake ninu Anutue natdetdeu kuupbam gwa pake yuamang. Sike natdetdeu takngatue dua dapmakamang ngang ba nataaing? Nitda gin dapmake kuwatda ginda niu atnipbike aminu buyambam tapaapa binga dakngake yuaing ba dasing? Aho. Ginda buyambam tapaapa binga dakngake yuaing gamu nata take natapam. Ngan. Unzing yuaing gamu nikaya buyambam tapaapa binga dakngake gikat gatake yutnam.
1CO 4:9 Sike anzing nataat. Taukdapakga aminu wai amin panggaganuke kaipakapuke ita gambok kuwawa wai aminu waakwakga masan apukaing. Sike kaipakapuke aminbamde kaine pewa yuwawa kaaing. Kawa moo amin binga siwan wa aminu atzipa kungwawa kaaing. Ina unzakan. Anututa ninu papan itane kwiiknga dakngake yuamangu aminbamde kaine nipmamban ninu kumnanga aminu wa taukdapakge masane apukaing amin binga dakngake yuamang. Yuwatna angelaat gatu amikat kuutda nindupa moo amin binga singgak.
1CO 4:10 Siwan ninda Kraisdane wam take yanikapmakamangge aminbamda ninde natapa katum amin singgak. Siwan ginda gisae natake ninu Kraisdane aminabam dakngake yuamangu natdetdetninu buyambam pake yuamang ngang nataaing. Ngan. Aminda nin nindupa aminu kekekngana wena amin singgak. Siwan ngana ginda gisae natake ninu kekeknga yuamang ngang nataaing. Siwan gindane umanza aminda yapangenakaing ngana nindane umaninu ayaipapaakusikaing.
1CO 4:11 Yaipapaakusiwawa ninu tupata gatu apu tapduu apmanu ayuamang komune kuut apan ninu Jesue kwiiknga dakngake yuamangu tomda yuke yanggae gatu taukge kuut dapmake yuamang. Sike aminda ninu katakngi putumuke ninu yumdekan nisipmakaing. Siwan ninu keu take yutna takananga komdu wena.
1CO 4:12 Ninu sanga tapatue dapnam ngang natake gupde puya kwatan siknga pasikamang. Siwan aminda ninde sapdut wam ninike ninisapduwawa ngana ninda wa amin gatayamunangge natake wam kwikwik yake yanikamang. Gatu aminu Jesue iwana dakngake yuaingga nin pasiwa mainimde pasiwawa ninda wikake toknga yake yamunangge natake dua tasikamang.
1CO 4:13 Ngan. Aminda nindane umanin yaipapaakusiwawa ngana ninda wa aminu wam kwikwik yanina bitateke gatu wai dua natanimuningge yanikamang. Sike ninu tupa gatu tapduu apmanu ayuamang komune kuut aminda ninduke sangana wena songa ngang natake ninisapduke ninde semna natanimukaing.
1CO 4:14 Siwan wamu waaknga ginda maakaningge natake dua matandamunggat. Aho. Nata ginde natake natane waaknga binga musip gwaang siknga natandamuke natdetdetza tapa takawikge natake matanggat.
1CO 4:15 Ginu atnataaing. Aminu kwaapzangga Kraisdane wamu gin toike danindamukaing ngana aminu tapatutakan gindane aanza siknga dakngake yuak. Ngan. Na awiaapatakan Jesu Kraisdane wamu takeaknga yakap siknga danindamumba musipza tapa tekwamban ginda itane aminabam dakngaking.
1CO 4:16 Unzingge ginu kepi na gindane aanzata asinggan tawake tasinggat taknga katak siknga tawake tasinong.
1CO 4:17 Sike ginda kepi waaknga tawake tasiningge natake nata Timoti initewa ginde kuwikge gwa inikum. Sike aminu waapa nata inindamuba ita musia tapa tekwamban Buyambam tapaninde amina dakngake kekeknga siknga yuakge natake nata ie banip siknga singgat. Siwan nata Kraisdane gepbiatang koyuke kepi kayuk nata tawake tasinggat taknga kepna kepna kuke nata aminbamu Jesue amina dakngake yuaingu kuupbamu yanindamukgat. Sike wamu wa nata yanindamukgat taknga katak siknga natake Timoti waapata ginde kuke gindane musipza pangenawan gatusa natdetning.
1CO 4:18 Siwan na atnataat. Wamu waaknga kendeke aminu gikat nana kunduta yamandet sike anzing yaning. Polda ninde apnangge gwauke aminu waapa initewan apbut ngang yaning.
1CO 4:19 Siwan ngana unzing yawanu take dua siwik. Ngan. Buyambam tapaninda nandutewanu nata ginde zetgaman kuwit. Ginde kuke aminu wa yamandet sisukukaingu usanzike natapa wamna yapiina wena moo binga siwik. Siwan Anututa inane kekeknga aknganata wa amindane musia pangenawan ie kekeknga yuke pasikaing ba dasing ngang usanzike natapa siwik.
1CO 4:20 Dasingge? Aminda wamban yawanu sanga Anututa aminu inae panangge tasinggak kakngata songa siwik. Siwan ngana ninda Anututane kekeknga aknganane yuke tasinanu sanga waaknga buya asaawik.
1CO 4:21 Siwan ginu sanga zaakngae take nataaing? Nata ginde kuke kaanga danike musipza papa nomatawikge take nataaing? Ba nata wikake ginde butaya natandamuke ginde kuwitde take nataaing ba dasing?
1CO 5:1 Wamu takngatu aminbamda natake naniking kakngae natake daninggat. Aminu gikat nana tapatuta yasewa aknga inata kundu tasike yuakge yakaing. Aminu waapata maya tapatu nanatane maatna ngana ita maatnae take yuak. Sike sanga wa bingata Jesue aminabamde banakanu tupa dua apbut. Siwan gatu aminu Anutue dua nataaing amikat nana tapatuta sanga wai wa binga dua siknga tasikut. Wena siknga.
1CO 5:2 Siwan ginda sanga waakngae natake ngana yamandeu asiyuaing. Asingu ginda yamandet taknga bitateke musipzaatangu aminu waapae meya siknga natangamunong. Natangamuke asinikwasitewa kuke kepman epu kukut gamu take siwan.
1CO 5:3 Siakan. Nata gikat gatake dua yuamang. Aho. Nata ginde maa yuat ngana ginde asinggan natanggamatanggat. Sike sanga wa ita wai siknga tasinggak kakngae natake nata Buyambam tapaninu Jesutane umana akngane gwa usanzikum. Nata gikat gatake yuamang gamu nata natane genata wamu waaknga daniwam. Siwan ginu paut tasiwawa kekeknga Buyambam tapaninu Jesutane aknganata gindane musipza pangenawan sanga wa nata musipmaatang nataat takngae natanggamatake ginda tawake tasinong.
1CO 5:5 Tasike ginda aminu waapa inikwasike Setende katakngine tewa gupna take tasiwan maiwik. Tasiwan maiwan ngana tapduknga Buyambam tapaninda gatu apik gwene aminu waapa Anututa gatangamuke akumnanga aknga sandekngaman kayuk yuwik.
1CO 5:6 Siwan ginda aminu waapae natake musipminu ie kwikwiknga natake katena tasinggak ngang yake ginda gisae umanza yapangenawa take dua singgak. Ginu sanga poyakat sawa ita tasiwan paptakaingge dua nataaing? Sanga wa poyakat sawa paptanggau mateknga siknga take poyau buyambam siknga banakan peke kwaidotdonguwanu poyau wa kuupbamda apaptawik. Ina unzakan sanga wai wa tasinggak kakngata yutake apu ginu kuupbam papsak ngang natake ginda waapa inikwasitnong.
1CO 5:7 Unzing ninu Judia nana aminda tapduk takwan siknga Pasova gwen kanangge natake tasikamang binga tasinong. Tapduk takwanu wagwen kanangge natake ninda sanga poyakat sawa paptanggau wa tupa nana mutena kuwana tapduu wa gwenu kanim. Kake poyau kayuu dua paptakaingunin pake nanim. Ina unzakan ginda wai aminu waapa inikwasiwa kuwawan ginda kepi nomana akngakan gatu tuwanguke tasinong. Ginu atnataaing. Pasova tapduk wagwene yot takwan gwene pasiya aminda tapdukbamu asinggan sipsip mateu gwendu kaitakapuke tanguwa kupan kake Anututa ninu inane aminabamdane waiaknganinu asandetnimunggak. Ina unzakan Kraisda ninde tangge kungwaniman kake Anututa waiaknganinu asandetnimukut. Unzingge ginda aminu waiakngasa wena aminu gwa dakngake yuaing.
1CO 5:8 Yuke Pasova tapduu wagwen kaningge natake sanga wa poyakat sawa paptanggau teke poyau moo sawa dua paptanggaunin nakaing. Siwan sanga wa teaing kakngae natake tuwanguke yanggat. Ginda sanga wai kuupbamu apbitatenong. Bitateke musipzaatang sanga noman gan natanggamatake Anutue kepi katak siknga tawake tasinong.
1CO 5:9 Siwan pas sandu tupa nata ginde matandamukum patangu nata matake ginu aminu yasewa aknga tasikaing amikat gatake dua sukuwam ngang danikum.
1CO 5:10 Sike wamu wa danikumu nata aminu kepman nana Anutue dua nataaingu wa aminda waiaknga pasikaingge natake dua yakum. Aho. Wa aminu kundu yasewa tasikaing. Sike kundu sanga aminu kundutane kake geenguke ba kukae pakaing. Gatu kundu anutu pupukngae inindetakaing. Siwan wa amin bingae natake dua danikum. Aho. Ginda wa amikat gatake dua sukunangge natakengu ginda kepdaka gatukande teke enandang kopning. Aho. Nata ie natake dua danikum. Wena.
1CO 5:11 Wamu wa nata ginde matandamukumu anzing. Ginda aminu tapatue natake ita ninu Jesuat nana tapatu ngang natake ie notnin ngang yakaing ngana waapata yasewa tasiwik. Ba ita sanga aminu kundutane kake geenguwik. Ba ita anutu pupukngae inindetapik. Ba ita sapdut wam yawik. Ba ita yangga toknga aknga tangoke datdaptawik. Ba ita amindane sanga kukae papik. Ita sanga wai waaknga tasiwan kakengu ginda iat gatake ma sukuwam. Gatu iat ma gatake yuke nanamu napam. Wena siknga.
1CO 5:12 Siakan. Nata aminu kepman nana amin usanziwitde natake dua Anututa na takut. Ngana ginda aminu gikat nana amin usanzitningge take natake puya waaknga Anututa ginde atdamukut.
1CO 5:13 Ngan. Aminu kepman nana wa Anututa ina usanziwik ngana ginda aminu wai wa ginde banakanu wa yuak kapa usanzike inikwasitnong.
1CO 6:1 Siwan aminu ginu Jesuat nana tapatuta aminu tapatue wamu kaya siwanu ita dasingge kuku aminu Anutue dua nataaing aminde kaine wamu yawik? Aminu waapa sanga waaknga tasike maaknga dua natapik ba dasing? Asingu ita Anutue aminabamdane kaine yayok.
1CO 6:2 Ngan. Ninu Anututane aminabamda aminu kuupbam apmea usanzitnim ngana asikaya ginu ie dua nataaing? Ngan. Ginda apme aminu kuupbam usanzitning. Sike dasing yanim? Asikaya ginda wamu mateknga wa binga apmanu usanzitnanga dua ba dasing?
1CO 6:3 Siwan ninda angelatane wamu kuut usanzitnim ngana ginu ie dua ba nataaing? Ngan. Sike dasing yanim? Asikaya ninda wamu mateknga kepdakane nana amindane usanzitnanga dua ba dasing? Take usanzitnim.
1CO 6:4 Siwan ginda wamu kaya kakengu dasingge ginda kuku kepman nana aminde kaine yakaing? Asikaya ninu Jesuat nana aminda wa amindane umana yapangenakamang ba dasing? Wena siknga.
1CO 6:5 Nata wamu wa yanggau ginda apmaakaningge natake yanggat. Ginu dasing nataaing? Aminu gikat nana tapatuta wamna kaya kakengu ita kuku gikat nana natdetdetna kayaapae kaine yawanu usanzitnanga dua siwik ba dasing? Asikaya aminu tapatu gin banakan yuke wam usanzitnanga tapatu wena singgak ba dasing?
1CO 6:6 Ginda wena ngang natake aminu tapatuta notna kaitakoke wamna aminu Anutue masa imukaing aminde kaine yanggak. Unzingu ginda take dua tasikaing.
1CO 6:7 Ngan. Ginu notza Jesuat nana aminda wam yaningge natake yakaing kakngata ginu apasiwan pimakaing. Ngan. Ginda akekekake sangasa kotnake wai tasikaing. Asingu ginda kapewa wa aminda ginu wai tasindamuke gindane sanga panzike kaiwa kunong.
1CO 6:8 Ngana ginda gisa aminu Jesuat nana amin ngana akekekake ginda wai pasiyamuke notzatane sanga panzike kaiwa kukaing.
1CO 6:9 Ginu sanga Anututa aminu inae panangge tasinggak kakngae katak dua ba nataaing? Aminu sanga waiaknga pasikaingu wa aminda sanga wa Anututa tasinggak kakngae gepbiatangu dua kopning. Wena. Ginu ie musipzaatangu kem ngangu ma natapam. Aminu yasewa tasikaing aminda undangu kopnanga dua. Gatu aminu anutu pupukngae gepbiatang yuaing amin ba wawita sanga maata tasikaing kaknga tawake tasikaing amin ba wawitakan ngana sanga maakngana kaya aknga wawi notnaat gatake pasikaing amin ngangga Anutue gepbiatangu dua kopning.
1CO 6:10 Gatu aminu kuka amin siwan sanga aminu kundutane kake ie geenguke tasikaing amin gatu aminu yangga toknga aknga asinggan tangoke datdaptakaing ngangga dua kopning. Siwan gatu aminu sapdut wam yakaing amin gatu aminu sanga kundutane tanangge asamake kaiwa kuyamukaing amin ngangga sanga Anututa aminu inae panangge tasinggak kaknga tananga dua.
1CO 6:11 Siwan aminu gikat gatake yuaingu kunduta tupa aminu wai wa binga dakngake yuking. Ngana Anutunindane Waung Kapata musipza papan nomatawa ginu sanga Buyambam tapaninu Jesu Kraisda ninde tasinimukut takngae banip siking. Ginu ie banip sikingge Anututa ginu inae papan ginu itane aminabam dakngaking. Dakngake ginu itane nomune amin noman dakngake kepi nomana akngane sukuningge natake ita waiakngasa sandetdamukut.
1CO 6:12 Siwan aminu tapatuta anzing ba yawik, “Sanga kuupbamu musipmaatang enayaaknga take tasiwit,” ngang ba yawik. Yawan siakan siwik ngana sanga kundu tasina buya aawan sanga akgatanimunanga akngata dua apik. Ngan. Wamu wa sanga kuupbam take tasiwit ngang yakaing kakngae natapna siakan singgak ngana nata dua katewa sanga waakngata na tanggaganuwik. Wena siknga.
1CO 6:13 Siwan aminu tapatuta musia enayaaknga tawanangge natapiu waapata anzing ba yawik, “Nanamu aminde napayutnae sanga. Siwan amindane napayutna nanamde sanga,” ngang ba yawik. Yawanu siakan siwik ngana Anututa sanga wa kuut pasiwan wena sisan. Unzingge ninu anzing yanim, “Nindane gupminu yasewa akngae sanga dua. Aho. Ninu Anutue sanga. Siwan ita nin toiban kepi nomana aknga tawake tasinim.”
1CO 6:14 Sike Anututa inane kekeknga akngane Buyambam tapaninu Jesu akumbut katangga gatu tangenakut. Ina unzakan ita ninu akumnim patangga gatu pangenawik.
1CO 6:15 Ginu Kraisdane amina dakngake yuaingu itane katakngi ba kepi binga dakngake yuaing ngana ginda ie dua ba nataaing? Sike nata Kraisdane katakngi patdakngake takapu maya yasewa apatane gupnane ngwakngake tasiwanu take siwik ba dasing? Wena siknga!
1CO 6:16 Wawi tapatuta enake maya yasewa tasinggak kapaat gatake yutzanu aminu wa tapaatda aminu tapaaya ngana sanga tapatukan binga dakngasan. Asikaya ginu ie dua nataaing ba dasing? Ngan. Unzing wamu takngatu Anutue wapatang anzing matakut. Aminu wa tapaatda sanga tapatukan binga dakngake yutzan ngang matakut.
1CO 6:17 Siakan ngana aminu Buyambam tapaninu Jesuat gatake yutzanu waapata iat musia takngatukan natake unekan binga gatake yutzan.
1CO 6:18 Unzingge ginda sanga yasewa aknga tasikaingge akagwautnong. Ninu atnataamang. Waiaknga aminda pasikaingu kuupbamu buya aawan aminu wai wa pasikainggane gupna dua pasiwan maining. Ngana aminda yasewa aknga tasiwiu waapata inane gupna tasiwan maiwik.
1CO 6:19 Siakan. Ginu Anutue yot takwan gwen binga dakngake yuaing ngana ginda ie dua nataaing ba dasing? Ngan. Anututane Waunga ita ginde damukuu waapata gindane musipzaatang pukuke papan ginu itane you Anututa ayuak gwen binga dakngake yuaing. Ngan. Ginu Anututane amina dakngake sanga gisane musipza enaya akngakan tawake tasinanga dua.
1CO 6:20 Aho. Aminda sanga manita usikuu ita inae tapik. Ina unzakan Anututa ginu inae papan ginda itane amina nomana siknga dakngake yuaing. Unzingge ginda sanga itane umana yatangenatnanga aknga tawake tasinong.
1CO 7:1 Siwan nata wamu ginda pas sakatang nae matangamuking kakngae natake yake daniwit. Aminda maya tapatu maatnae dua tapan kakengu ita sanga nomana aknga tawake tasinggak ngang natapnong.
1CO 7:2 Siakan ngana ginda sanga yasewa akngata nin papsak ngang natakengu ginu inandek inandek maatza take paning. Siwan mayata inandek inandek apnae take kuning.
1CO 7:3 Sike apnata maatnaat yutzande iniwanu mayata gupna kotnake ma bitawan. Gatu maatnata apnaat yutzande iniwanu wawita gupna kotnake ma bitawan.
1CO 7:4 Dasingge? Apnatane wamu maatnata gwaamuke inane gupna dua kotnawan. Siwan maatnatane wamu apnata gwaamuke inane gupna dua kotnawan.
1CO 7:5 Ngan. Ginda kepi waaknga tasinong. Siwan ngana sipdune apnaat maatnaatda musia takngatukan natake tapduu mateknga moo yuke tumuk wam yawa take siwik. Siwan tapduknga tumuk wam yakaing gwenu kawa sandewana gatuna yutzan. Setenda gin danindetdauke gindane musipza pangenawan ginda yasewa akngane pimanang.
1CO 7:6 Siwan wamu nata wa yanggau ginda ie nanikwaiking kakngae natake yake danike nata gin dandupewa tasiningge yanggat. Ngana wamu wa yanggau Anutue mama wam binga dua. Wena.
1CO 7:7 Siwan ngana nata maya wawi kuupbam nina binga dakngake yutningge take nataat. Take natake ngana nata anzing nataat. Anututa natdetdeu inata inata aminu kuupbamde inandek inandek yamukutde aminu kunduta maya panangge dua nataaing. Siwan sanga aminu kunduta maya panangge take nataaing.
1CO 7:8 Siwan gatu wamu takngatu maya wawi apna maatna wena aminde natake yawit. Apna maatna dua dakngake yuaing amikat gatu kombakobat dakngake yuaingu kuutde natake yawit. Wa aminu na binga inatakan yuwanu take siwik.
1CO 7:9 Siwan ngana wa aminu musia gwenu katak kayutnangge apmeptakengu yasewa akngae gwauke take apna maatna paning. Wa amindane musia enawa yasewa tasinangge natapa musiaatang katapda binga yasiyak. Asingu apna maatna take panong.
1CO 7:10 Sike maya wawi apna maatna gwa paking aminde natake nata mama wamu takngatu daniwa natapnong. Sike nata sanga nina banipda siwan natake dua daninggat. Aho. Mama wamu Buyambam tapaninda yakut takngae natake daninggat. Sike mama wamu waaknga anzing. Mayata apna ma teke kuwan.
1CO 7:11 Sike ita apna atekengu ita moona yuyok. Sike ita moona yutnangge bitakengu ita gatuna apna atekut tapae gatuna kuyok. Siwan apnataaya kuut maatna ma inikwaiwan.
1CO 7:12 Sike aminu apna maatna dua pake yuaing aminde natake nata wamu takngatu nina banipda siwan natake daninggat. Sike wamu aaknga Buyambam tapaninda dua yakut ngana nata nina anzing nataat. Notninu Jesuat nana tapatutane maatnata Jesue masa iman kekekawan ngana ita apnaat yutzande dua bitawanu apnata ma inikwasiwan.
1CO 7:13 Ina unzakan. Maya tapatutane apnata Jesue masa iman kekekawan ngana ita maatnaat yutzande dua bitawanu maatnata apna ma teke kuwan.
1CO 7:14 Anututa katewan maatnaat yutzan. Ina unzakan. Maatnata Jesue masa imunggak ngana ita apnaat yutnangge dua bitanggakge Anututa katewan apnaat yutzam. Sanga meya takngatu wena. Siwan ngana Anututa dua kapewan yuamayak gamu waaknga yapanae natake kepman nana amin ngang natapam. Sike ita kapewan yuwawat waaknga yapanata kepman nana amin binga dua dakngake yutning.
1CO 7:15 Siwan ngana apnata Jesue masa imuyaapa dakngake ita maatna inikwasitnangge natakengu take inikwasiwik. Ina unzakan maatnata Jesue masa imuyaapa dakngake ita apna tenangge natakengu take teke kuwik. Siwan apnata unzing inikwasiwanu maatnata teke kunangge ma bitawan. Aho. Inikwasiwan teke kuwiu mama wamu wa nata yake maya papsa aknga ma sandewam ngang yanggat taknga maatna waapata dua sandewik. Ina unzakan maatnata apna unzing teke kuwanu apnata akatewan kuyok. Dasingge? Ateke kuwanu apnata mama wamu waaknga sandekut ngangu yananga dua. Aho. Itane wamna wena. Sike ninu atnataamang. Anututa ninu musip kwikwik kakngane yutnimde natake ita ninu inae pakut.
1CO 7:16 Siwan ninda dasing natapnim? Asikaya mayata apna gatangaman musia tapan tekwamban Anututa akumnanga aknga sandekngamik ba dasing? Ba apnata maatna gatangaman musia tapan tekwambik ba dasing? Ninu ie dua nataamang.
1CO 7:17 Siwan tapduknga Anututa ginu kuupbam inandek inandek inae panangge yandawamban ie kuking gwene ginda sanga tupa nana kwaapzang pasikaking. Siwan sanga wa tupa tasikakingu kundukan ginda bitapenong. Ngan. Aminu gikat nana tapatuta aminu gupna matakaikat nana tapatu dakngake yukuu Anututa inae tanangge yatawamban ie kukut. Kuke waapata sanga wa inane gupna mataking kakngae natake dua maakawan. Dua maakake sanga wa ma takusopuwan. Ina unzakan aminu tapatu Anututa inae tanangge yatawamban ie kukut ngana itane gupna dua mataking. Waapata gupna mataningge dua natapan. Wena. Nata mama wamu waaknga aminu Anututane aminabam dakngake yuaingge kuke yamunggaunin.
1CO 7:19 Sanga gupna matake Judia nana aminda Anutue aminabam dakngananga akngae natake Anututa natapan buya wena singgak. Sike ita sanga aminu keu komduine nana aminda gupna unzingu dua matakaing kakngaaya kuutde undanga ngang nataak. Siwan ngana sanga Anututa ina banipda siwan nataak kaknga tawake tasiya aknga wa buya siknga unin.
1CO 7:20 Unzingge tapduknga Anututa ginu inandek inandek inae panangge yandawamban ie kuking gwene ginda sanga tupa nana kwaapzang tasikaking. Siwan sanga wa tupa ginda tasikaking kaknga kundukan bitapenong. Ngan.
1CO 7:21 Aminu gikat nana tapatu puya toikngata gitna siknga tanggaganuwan puya buyana wena pasiyuwawan Anututa inae tanangge yatawamban ie kukuu waapata puya waakngae nangaakan dua natapan. Sike ngana ita puya waaknga tenanga kepi kaya siwanu asingu ita puya waaknga take teke kuyok.
1CO 7:22 Siwan ninu atnataamang. Aminu tapatuta puya waaknga tasiwawan Anututa inae tanangge yatawamban ie kuwiu Buyambam tapaninda waiakngana sandekngaman waapata itane amina dakngake yuwik. Sike ina unzakan. Aminu tapatuta ina banipda siwan natake puya buyana kaya pasiyuwawan Anututa inae tanangge yatawamban ie kuwiu waapa Kraisda gitna siknga tapan itane puya amina dakngake yuwik.
1CO 7:23 Siwan aminda sanga manita usikuu ita inae tapik. Ina unzakan Anututa ginu inane panangge natake yawan Jesuta ninde tangge kungwanimukutde ginda itane amina dakngake yuaing. Unzingge ginda dua katewa sanga kepdakane nana akngata Anututane katakngine ginu kaiwan kuning.
1CO 7:24 Siakan mate notna. Ginu puya dasing kaknga tasiyuwawa Anututa ginu inae panangge yandawamban ie kuking. Sike puya waakngae nangaakan ma natapam. Aho. Ginda Anutuat gatake yuke puya waakngakan tasike yutnong.
1CO 7:25 Siwan sanga apna maatna dua paking aminde ginda nanikwaikingu waakngae Buyambam tapaninda wamu takngatu dua yakut. Sike ngana ita nae musip kwikwik natangamuke na tapan itane kwiiknga dakngake wamu nata nina natake daniwit takngae ginda natapa siakan siyok.
1CO 7:26 Siwan nata anzing nataat. Tapduu apmanu ninda ayuamang komune meya buyambam sikngata ninde apnangge gwa dapakanggak. Unzingge aminu maatna gwa takuu waapata maatna ma sandewan. Gatu aminu maatna wenaapata maatna tanangge ma natapan.
1CO 7:28 Siwan ngana apna maatna papsa akngae natake sanga waiaknga ngang yananga dua. Wena. Sanga wa take aknga ngana aminu apna maatna paningu wa aminde meya buyambam sikngata apan gupde sanga akngae butaya natake yutning. Sike nata sanga waakngata ginde apikge bitake wamu waaknga daninggat.
1CO 7:29 Siakan mate notna. Nata daniwa natapnong. Tapduu dapaknga gwa singgak. Siwan aminu maatna kaya aminda unzing maatna wena bingata yuke maatnae sangae nangaakan dua natake Anutue sangae natanggamatanong.
1CO 7:30 Sike aminu butaya natake kwanam sikaingu wa aminda Anutue sangae natanggamatake kwanam sikaing kaknga undang teke aminu kwanamu dua sikaing amin binga dakngake yutnong. Siwan ina unzakan aminu apbakngakaingu wa aminda sanga apbakngakaing kaknga teke dua binga bakngakaing amin binga dakngake yutnong. Siwan aminu sangaapa manita usikaingu wa aminda sanga kunduat panangge dua natapam.
1CO 7:31 Ngan. Aminu sanga kepdakane nana akngae bakngake pakaingu wa aminda sanga waakngae asiknga bakngake kwaapzang panangge dua natapam. Ninu atnataamang. Sanga kepdakane nana asinggan kaamang kaknga wena sinanggenggak. Wena siwan inata kundu dakngawik.
1CO 7:32 Sike nata ginde natake ginu sanga kwaapzangge natanggamatake ie nangaakan natapningge apbitanggat. Apbitake nata anzing nataat. Aminu maatna dua takuu ita natake Buyambam tapaninda ie take natangamikge natake itane sanga akngaekan asinggan natayuwik.
1CO 7:33 Siwan ngana aminu maatna kayaapata natake maatnata ie take natangamikge natanggamatake sanga Buyambam tapatane akngaekan dua natapik. Aho. Ita sanga kepdakane nana aknga kuutde natayuwik. Unzingge ita musiaatang nangaakan natapik. Siwan mayata apna dua takuu ita sanga Buyambam tapatane akngaekan asinggan natanggamatake ie kekeknga yuwik. Sike ngana maya apnae gwa kukut tapata natake apnata ie take natangamikge natanggamatake sanga kepdakane nana akngae natayuwik.
1CO 7:35 Siwan wamu nata yanggau wa nata ginu take yutningge kepi umutdamunangge natake dua daninggat. Aho. Nata gin gatandama kepi nomana akngane sukuningge natake yanggat. Nata gin gatandama ginu Buyambam tapaninde kekeknga siknga yuke itane sangaekan natanggamatake yutningge natake wamu waaknga daninggat.
1CO 7:36 Sike aminu tapatuta maya mateu inae yawa yukut tapae natapan musia katapda binga enayaaknga katak tagwautnanga dua siwanu ita take maatnae tapsok. Tapan kake ita waiaknga tasikut ngangu yananga dua. Wena.
1CO 7:37 Siwan ngana maya mateu waapatane dongata tapikge dua kekekawanu undanga. Ita take dua tapik. Ita musiaatangu dua tapikge natapan kekekawan maya mateu waapae sanga musia enayaaknga katak tagwaukengu ita dua tapan take siwik.
1CO 7:38 Unzingge aminda maatna takengu ita sanga takeaknga tasiwik. Siwan ngana aminda maatna dua takengu ita sanga take siknga tasiwik.
1CO 7:39 Siwan apnata kayuk yusika dua kungwake yuwawan itane maatnata iat gitna siknga gatake yutzon. Sike ngana apnata akupanu maatna waapata wawi tapatu apna kayuk kapae kunanggengu ita ie take kuwik. Meya wena ngana ita aminu Jesuat nana tapatuekan kuyok. Kepman nana aminde maatna ma dakngawan.
1CO 7:40 Ngana nata nina maya kombakobatde anzing nataat. Asingu ita moona yuyok. Moona yukengu ita asiknga bakngawik. Siwan wamu waaknga yake nata Anututane Waung Kapaat musipminu takngatukan nataamak ngang nata nina natake daninggat.
1CO 8:1 Siwan nata kaau aminda anutu pupukngae yamukaing kakngae natake daniwit. Wamu ginda nanike ninu kuupbamda sanga waakngae yapii anggaman atnataamang ngang yaking kakngae natapa siakan singgak. Ngan. Ninu natdetdetninu kaya ngana natdetdetninda pasiwan ninu yamandet sinim. Siwan ngana sanga ninda notninde butaya natayamuya akngata ninu pasiwan ninda Anutue kekeknga yutnim.
1CO 8:2 Sike aminu tapatuta ina na sanga tapatue gwa nataat ngang natapiu waapata sanga waakngae katak siknga dua nataak kapanin.
1CO 8:3 Ngana aminda Anutue musip gwaang natangamiu Anututa aminu waapae natapan itane amina dakngawik.
1CO 8:4 Siwan wamu wa nanikingu sanga kaau anutu pupukngae yamukaingunin nakaingge natake ie anzing nataat. Wamu ginda nanike anutu pupuknga wa sanga siakan taknga dua ngang naniwa noman singgak. Siwan Anutu siknga kwaapzang dua. Aho. Anutu siknga awia tapatutakan yuak ngangu ninu atnataamang.
1CO 8:5 Sike ngana aminda sanga kwaapzangge anutunin ngang yanikaing. Ngan. Sanga kwaapzangge buyambam tapanin ngang yanikaing. Sanga wa yanikaingu kundu kepdakane nana.
1CO 8:6 Sike kundu enandang nana. Siwan ngana ninda ie undanga ngang natake Anutu awia tapatuekan nataamangu wa Nanin Anutu. Ita sangabamdane yapii. Siwan ninu iekan natanggamatake tasiyuamang. Sike ninda natake Buyambamu awia tapatuekan nataamangu wa Jesu Krais. Ita Anutue gen gwaamuke sanga kuupbam tasike tekut. Sike ita nin gatanimuke papan nomatawa ninu itane gepbiatang koke yuamang.
1CO 8:7 Siwan ngana aminu gikat nana kunduta natdetdeu wa ninda natake anutu pupuknga sanga siakan taknga dua ngang nataamang kakngae natapa siakan dua singgak. Aho. Wa aminda Jesue amina dua dakngake sanga anutu pupukngae gepbiatang tupa yuking. Yuke kaau anutu pupukngae yamukingunin nake anutu pupukngae natanggamatake naking. Sike sanga wa gwa teke kepman epu kuke yuaing ngana kaau wa yamukaingge natake anutu pupukngae sanga na natapa kekeknga singgak. Siwan wa aminda Anutue kekeknga dua natake ngana kaau anutu pupukngae yamukaingunin nake musiaatang nangaakan nataaing.
1CO 8:8 Siwan ngana sanga ninda nakamang kakngata ninu ninipake Anutue wesimu kunanga dua. Aho. Ninda kaau wa yamukaingu dua nake tasinanu nindane umaninu Anutue kaine dua pimapik. Sike ninda atnake tasinanu nindane umaninu dua enawik. Wena.
1CO 8:9 Siwan ngana ginu tagwautnong. Ginda kaau wa yamukaingunin nananggengu notza Jesuat nana sanga waakngae nangaakan nataaing aminde natake kaau wa nana ninduke wa aminda pimananga ngang natake ma napam.
1CO 8:10 Dasingge? Aminu ginu natdetdetza kaya akwakat nana tapatuta anutu pupukngatane yot takwan gwene koke pukwike nawawan notna Jesuat nana tapatuta kake ngana ita ina unzakan napikge nangaakan natapik. Nangaakan natake kawawan ngana notnata nawawan kake ita dasing tasiwik? Ita undanga ngang natake napik.
1CO 8:11 Siakan. Ita nake pimake anutu pupukngae gepbiatang gatuna kopik. Siwan aminu wa natdetdetna kayaapata kaau wa nake notna wa anutu pupukngae nangaakan nataak kapae dua natake aminu Kraisda ie tangge kungwangamukut tapatane natdetdetna tasiwan maiwik.
1CO 8:12 Sike ginda notza Jesuat nana Anutue kekeknga dua nataaing aminu sanga wai tasike wa amindane musia pasiwa maikaing. Siwan sanga waaknga tasiyuk ginda Kraisde wai tasingamukaing.
1CO 8:13 Unzingge nata anzing nataat. Nata kaap nawawa nanduke notna Jesuat nana tapatuta pimapanu nata notna waapata pimapsak ngang natake kaau gatuna dua siknga napit.
1CO 9:1 Siwan ginu nae dasing nataaing? Asikaya sanga tapatuta na tanggaganuwan nata ninae banipda siwan natake tasinanga dua ba dasing nataaing? Asikaya na Jesuta dua tapan itane kwiiknga dua dakngake yuat ba dasing nataaing? Asikaya nata Buyambam tapaninu Jesu natane kainata dua kakum ba dasing? Asikaya nata puya pasiwawa Buyambam tapaninda tasiwan buya aakuu wa gin dua ba dasing?
1CO 9:2 Sike aminu kunduta nae natapa Jesuta na dua tapan itane kwiiknga dua dakngakumna kakengu undanga. Ginu atnataaing. Nata ginde kuke tasiwa buya aawan ginu Jesue amina dakngake yuaing. Sike ginda Jesue amina dakngake yuaing kakngata yeutniman sanga Jesuta na tapan itane kwiiknga dakngake yuat taknga anggaman siwan kaamang.
1CO 9:3 Siwan aminu gikat nana kunduta sanga nata tasinggat taknga usanzike wam yawitde yakaing aminde yake nata anzing yaninggat.
1CO 9:4 Asikaya ninda puya tasike aminu ayanindamukamang aminda gatanimuke nanam ba yangga ngangu ninde nima pake ninda dua nake tangopnimde Anututa ninu atninindekngakut ba dasing?
1CO 9:5 Siwan aminu kundu Pitaat gatu notna Jesutane kwiiknga dakngake yuaikat gatu Jesutane uyapnaat kuutda maatna pake yuaing. Ngan. Maya Jesuat nana amin maatnae pake iat gatake puya pasitakuke kepna kepna kukaing. Unzing tasikaing ngana asikaya Anututa naat Banabas katdakan sanga waaknga dua tasisimde ninindekngakut ba dasing?
1CO 9:6 Asikaya Anututa niu dua nindupewan nitdakan puya gupdane aknga dua teke tasisim ba dasing? Wena.
1CO 9:7 Siwan ninu atnataamang. Aminda gavmandane amak amina dakngawiu waapata puya waaknga moo siknga dua tasike inane nanam ba tauknga ba amakgane sanga ina dua usiwik. Wena. Gatu aminda wain tapunu kwaiwiu asikaya aminu tapatuta dua katewan waapata buya aatningu wa papik ba dasing? Gatu aminu memeng toikgak kapata memenggane ngwamna tangopnangge natapanu asikaya aminu tapatuta dua katewan tangopik ba dasing? Wena siknga.
1CO 9:8 Sike wamu nata yanggau wa nata nina banipda siwan natake dua yanggat. Aho. Mama wamu Anututa Moses iniwan natake yakut takngaekan natake yanggat.
1CO 9:9 Wamu waaknga Mosesda mama wapatang anzing matakut, “Ginu ikwawa gamanza kaipakapuke puya nanam tapun yainggamunanga aknga pasiwawa ginda gena wamakusike nanam tapanu kundu napsak ngang natake ma tasiwam,” ngang matakut. Siwan mama wamu wa yakuu asikaya Anututa ikwawa gamandekan butaya natayamuke yakut ba dasing?
1CO 9:10 Ba ita nikat kuutde natake yakut? Ngan. Wamu waaknga Anututa nikat kuutde natake yakut. Siwan ninu atnataamang. Aminda keu puyaangane kwaipuwiu waapata nanam zak kwaiwan akoke buya aawan papit ngang natake tasinggak. Gatu aminu nanam tapun pasiwan gotda oya puyapakuwawan tasinggak kapata buya kundu nata ninae papit ngang natake tasinggak.
1CO 9:11 Ina unzakan ninda puya tasike gin gatandamuna buya aawan ginda sanga take siknga Anutue kepi tawake tasinanga aknga pake yuaing. Unzingge ginda yake sanga gupmin gatanimunanga ninde nimukengu ginu dasing natapning? Asikaya ninda puya mateknga tasike ngana buya buyambam panim ba dasing?
1CO 9:12 Sike aminu kunduta ginde banakan yuke danindamuke ginda sanga gupna gatayamunanga aknga yamuningge kekekake yakaing. Yawa ginda asinggan yama noman singgak. Siwan asikaya nitda akekekake ginda nitde nimunong ngang ginu danita wai siwik ba dasing? Aho. Niu wa amin yapbike ginda sanga kwaapzang nitde pasim gamu noman siknga siwan. Ngana nitda dua siknga kekekake wamu waaknga danikumak. Aho. Nitda wamu take Kraisdane aknga buya dua aayak ngang natake nitda nisae atagwaukumak. Tagwauke nitde wam nininang ngang natake ginda sanga gupmin gatanimunanga nitde nimuningge dua danikumak. Aho. Asingu nitda sangaapae dapmake meya buyak yutzim ngang natake nitda dua danikumak.
1CO 9:13 Siwan ninu atnataamang. Aminu Anutue yot takwan gwene pasikaing aminda kaap ba nanam ngangu aminu kunduta pakapu Anutue imukaingu apake nakaing. Ngan. Aminda yot takwande puya pasikaingu nanamu yot takwandane pake nakaing ngana ginu ie dua ba nataaing?
1CO 9:14 Ina unzakan Buyambam tapaninda mama wamu takngatu anzing tekut. Aminu puya tasike wamu takeaknga yanikapnanga aknga pasikaingu wa aminu sanga gupna gatayamunanga apaning. Siwan aminu wamna nataaing aminda gatayamuke ayaman paningge yakut.
1CO 9:15 Siwan ngana nata sanga wa puya aminda take pananga aknga panangge dua natapbum. Wena. Siwan nata wamu wa matanggau nata sanga panangge natake dua yanggat. Aho. Nata miti puya tasike aminde kataune gupde sanga dua panggat takngae natake apbaknganggat. Siwan aminu tapatuta gupde sanga nae naman pakengu sanga wa nata gupde sanga panangge apbitake tasinggat takngata pimapanu wai siwik. Asingu nata akupa gamu takesim siwan.
1CO 9:16 Sike nata Jesue wamu take aknga yanikapmanggatde natake nata ninane umana yatangenatnanga dua. Aho. Dasingge? Nata dua yanikapmake tasiwitde kepi wena. Ngan. Nata wamu wa take aknga dua yanikapmake tasiwanu Anututa musia toknga natangamuke na atasiwan maiwit.
1CO 9:17 Sike nata nina banipda siwan puya waaknga tasinggat gamu nata buya apapam. Siwan puya waaknga nata nina tasinangge dua natake yuwawa Anututa na take puya waaknga nae namukut.
1CO 9:18 Unzingge nata buya mina binga papit? Puya tasiyuke nata sanga gupma gatangamunanga aknga dua papit. Aho. Nata puya tasike wamu take aknga yanitakuke gupde sanga namuningge yaninggat gamu noman siwan. Ngana nata ie dua yaninggatde apbaknganggat. Sike sanga wa nata apbaknganggat takngae natapa buya binga singgak.
1CO 9:19 Siakan. Nata sanga aminu tapatuta ina banipda siwan nataak kakngae gepbiatang dua yuat. Wena. Ngana nata nina banipda siwan natake nata aminu kuupbamda ina banipda siwan nataaing kaknga tawake tasinggat. Sike nata sanga waaknga dua tawake tasinggat gamu nata aminu buyambamu Jesue amina daknganingge pananga dua. Ngana unzing tasike nata aminu buyambam panangge tasinggat.
1CO 9:20 Tasike nata notna Judia kep komune nana amin panangge natake nata kepi nisane aknga tawake tasinggat. Ngan. Aminda Mosesdane mama wam takngae gepbiatang yuaing amin panangge natake nata aminu waakwakat gatake yuke kepi wa aminda tawake tasikaing kaknga tawake tasinggat. Tasike ngana nata ninae musipmaatangu mama wamu waakngae gepbiatang yutnangge dua nataat.
1CO 9:21 Sike aminu kepman nana Mosesdane mama wamde gepbiatangu dua kopbing amin panangge natake nata sanga wa aminda nae semna natapning kaknga teke puya tasinggat. Unzing tasinggat ngana nata Anutue gen gwaamutnangge dua bitanggat. Aho. Nata Kraisde gepbiatang yuke tasinggat.
1CO 9:22 Sike aminu Jesue amina dakngake ngana Anutue nangaakan natake pimanangge dapaknga sikaingu nata papa kekekaningge nataat. Natake nata sanga wa aminda nae semna dua natapning kaknga teke puya tasinggat. Nata kepi waaknga tawake aminu inata inata yuaing ngana kuupbamde kaine nata amin noman dakngake aminu kundu gatayamunggat. Nata gatayamuke wa aminu sanga waiaknganae akumning kakngane sandetnangge tasinggat.
1CO 9:23 Nata puya unzingu wa tasinggau aminu buyambamda Jesue wamu takeaknga natapningge natake tasinggat. Gatu naat aminu kunduatda wamu wa takeakngata gataniman take yutnimde natake tasinggat.
1CO 9:24 Siwan aminda tasiak tasike resis tasike aminu kuupbamda asisapmake kukaing ngana aminu tapatutakan yapbiban sanga ie imukaingge ginu atnataaing. Sike ginda aminu wa ayapbiban sanga ima tanggak kapa binga dakngake tasinong.
1CO 9:25 Siwan aminu wa sanga akupiawik kaknga tanangge isapmake kukaingu kuupbamda tandakngakaing. Tandakngake tasike wa aminda sanga ina banipda siwan nataaing kaknga yaitapaakusikaing. Kwatai akekekake inae sanga katak tagwauke pimamsat ngang natake tasikaing. Ngan. Wa aminda sanga akupiatnanga akngakan tanangge tasikaing ngana ninda sanga dua kupiawik kaknga tanangge natake tasikamang.
1CO 9:26 Siwan na. Nata aminu makgakane isapmake kunangge apbotasukuke tasinggak kapa binga dua dakngake tasinggat. Aho. Nata musipmaatangu anggaman natdeke tasinggat. Sike nata aminu katakngi putumuke iwana song tangukgak kapa binga dua dakngake tasinggat. Aho. Nata buya siknga tangukgak kapa binga dakngake tasinggat.
1CO 9:27 Ngan. Nata sanga musipma enayaaknga yaitapaakusike sanga nina banipda siwan nataat taknga apbitake teat. Nata wamu takeaknga aminbamde yanikapmake tasike ngana nata sanga waiaknga dua yapbike pimamsat ngang natake nata kepi nomana aknga tawake puya kekeknga tasinggat.
1CO 10:1 Siwan mate notna. Na ginda sanga nindane baminda tasikaking kakngae natdetningge natake ie daniwa natapnong. Nindane baminu kuupbamda minga musa Anututa yanipakunangge natake teyamukut musa gepbiatang yuking. Yuwawa yanipakuwawan kusika wa aminda yanggabam gwen yatupbing.
1CO 10:2 Ngan. Mosesda yanipakuwawan wa aminda minga musa gepbiatang yuke yanggabam gwen yatupmake kukingu wa aminda Mosesdane pandetna unin dakngaking.
1CO 10:3 Siwan wa aminu kuupbamda nanamu Anututa enandangga teyamukuunin naking.
1CO 10:4 Gatu yangga wa Anututa yamukuunin tangopbing. Ngan. Wa aminu yangga tangopbingu suu gwendu Anututa Moses iniwan ita tanguwan sup ganang katangga yangga akoke zipmake kuwawan tangoke yuking. Siwan yangga wa akopbinggane yapii Krais unin. Sike ita wa amikat gatake kuking.
1CO 10:5 Ngan. Wa amikat gatake kuke ngana wa aminde Anututa musia toknga natayamukut. Ninu atnataamang. Wa aminda keu amina wena komune kuke yuwawa Anututa pasiwan maiking. Aminu tapatu tapatuekan toknga dua natayamukut. Aho. Ita aminu kuupbamu wa apasiwan maiking.
1CO 10:6 Siwan ninda sanga wa baminde apbingge natake ninda atagwautnimde apbing. Ngan. Ninu sanga waiaknga wa aminda tawake tasikaking kaknga tasinangge dua natapnimde apbing.
1CO 10:7 Sike ginu sanga wa aminda tasike anutu pupukngae gepbiatang koke tasiking kaknga ma tawake tasiwam. Sanga wa tasiking kakngae natake aminu tapatuta Anutue wapatang anzing matakut, “Wa aminu anutu pupukngae natanggamatake pukwike nanamu nake yangga aknga tangopbing. Sike gatu enake sanga kusopuknga wam yake tasiak tasina ngang yake ngana yasewa tasiking.”
1CO 10:8 Siwan sanga wai waaknga tasiwawa kake Anututa aminu kundu yaniwan apu wa aminu kuupbam gunziu gwendunekan zipa 23,000-da kumbing. Sike ninu sanga wai waaknga dua tasinim.
1CO 10:9 Aho. Ninda Anutu dua tasina siwik. Unzing wa amikat nana kunduta sanga waiaknga tasike Anutu tasiwa sikut binga dua tasinim. Wa aminda Anutu tasiwa sikut ngana Anututa yawan gomokga apu yasiwa akumbing.
1CO 10:10 Gatu ninda Anutue atemna natake dua inisapdutnim. Unzing wa amikat nana kunduta Anutue semna natake inisapduking binga ninda dua tasinim. Sapdut wam iniwawa Anututa angelana tapatu initewan kuke ita wa aminu atzipan kumbing.
1CO 10:11 Siwan sanga waaknga aminu waakwakge apbingu natdetdeu ninu aminu masan aake yuamang aminda pake tagwautnimde apbing. Siwan ninu tapduknga wengane aake yuamang aminda gwaut wam natapnimde Anututa tasiwan aminu tapatuta sanga wa apbing kakngae natake Anutue wapatang matakut.
1CO 10:12 Sike wamu waakngae natake ginu tagwautnong. Aminu tapatuta natake nata sanga waiaknga wa aminda tasiking kakngane dua siknga pimapit ngang yawiu waapata pimamsat ngang natake tagwaumsok.
1CO 10:13 Siwan sanga aminda asinggan panzike yanindetdaukaing kakngatakan ginde apukaing. Ngan. Sanga amin yanindetdaukaing kaknga inata kunduta dua ginu panggaganukaing. Wena. Siwan aminda ginu atdanindetdautning ngana Anutu gin gatandamuya apata dua kapewan sanga wa gin danindetdautning kakngata ginu dapbitning. Aho. Ita akgatandamuke kepi takngatu ginde atasindamik. Ngan. Ginda akekekake sanga wai waakngaatang dua pimaningge kepi ginde atasindamik.
1CO 10:14 Siwan mate notna. Nata ginde musip gwaang natandamuke ginde daninggat. Ginda sanga anutu pupukngae gepbiatang yutnanga akngae masa imuke atdatakunong.
1CO 10:15 Nata wamu wa daninggau nata ginde natapa aminu natdetdetza kaya siwan daninggat. Siwan ginda gisa natane wam usanzike natapnong.
1CO 10:16 Sike ginu dasing nataaing? Ninu Jesue natanggamatake kau gomdu take Anutue umana yatangenake tumuk wam yakamang. Sike ninu kau wagomuneta tangotakukamangu asikaya ninda sanga Kraisda tasike ninde tangge kungwanimuke daknga tukngwake tasikut takngae gepbiatangu dua yuamang ba dasing? Gatu ninda poyak puke nakamangu asikaya ninda sanga Kraisda ninde kungwanimukut takngae gepbiatangu dua yuamang ba dasing?
1CO 10:17 Ninu poyau gomdukan puke ninu kuupbamda nakamang. Unzingge ninu kuupbamda dongu takngatukan binga dakngake yuamang.
1CO 10:18 Siakan. Nata sanga ninu Isrel nana aminda tasikamang kakngae natake daniwa natapnong. Ninda kaap ba nanamu Anutue imukamang. Sike aminu sanga wa imukamangunin pake nakaingu asikaya wa aminda atnakengu Anutue gepbiatangu dua kopning ba dasing?
1CO 10:19 Siwan nata wamu waaknga daniwa natapa dasing singgak? Asikaya nata yake kaau anutu pupukngae yamukaingu wa sanga buya siknga ngang natake yanggat ba dasing? Ba anutu pupukngata buya siknga unin ngang natake yanggat ba dasing?
1CO 10:20 Aho. Unzing dua natake nata yanggat. Wena. Siwan sanga aminu Anutue masa imukaing aminda anutu pupukngae yamukaingu sanga wa Anutue dua imukaing. Aho. Wa aminda apbotake waungu Setendane dongune nana akwakge yamukaing. Siwan nata ginde natake ginda Setendane dongune nanaat gatake yutningge apbitake daninggat.
1CO 10:21 Sike ginu yangga kau Buyambam tapanindane gomune tangokengu ginda tapa tekwamban anutu pupukngae kuke inimbakngake yangga kau itane gomune tangopanu Anututa kake ginda Setende kap gomune tangokaing ngang natapik. Siwan nanam ba kaau Buyambam tapatane nakengu ginda nanam ba kaau Setendane ma napam.
1CO 10:22 Asikaya ninda sanga wa takngaau kuut bokngan pake tasina Buyambam tapata ninde musia wai natapanu undanga ngang natake tasinim ba dasing? Asikaya ninda akekekake Anutu ayapbitnim ba dasing? Wena siknga.
1CO 10:23 Siakan. Wamu wa ginda nanike, “Ninda sanga nisa banipda siwan tasinangge natapnimu wa kuupbam take tasinim,” ngang yaking kakngae natapa siakan singgak. Siwan ngana sanga wa tasinimu kunduta notninu dua gatayamuning. Ngan. Sanga wa kuupbamu ninda atasinanggengu ninda take tasinim.
1CO 10:24 Siwan ginda sanga gisa gatandamunanga akngaekan ma natanggamatake tasiwam. Aho. Ginda sanga notza gatayamunanga akngaat kuutde natanggamatake tasinong.
1CO 10:25 Sike sanga waaknga tasike kaau kuupbamu usiwam yot gwene peaingu wa ginda take usike nanong. Kaau wa peaingunin usinanggengu ginda anutu pupukngae apba yamuking ngangu ma natake yanikwaiwam. Aho. Ginda kaau wa peaingu asusike sake nananggengu ginda take usike musipzaatangu nangaakan dua natapam.
1CO 10:26 Siwan ninu atnataamang, “Keu kuupbamu Buyambam tapanindane sanga. Sike sanga kuupbamu keune aakaingu wa itane sanga dakngake yuaing.”
1CO 10:27 Unzingge aminu Anutue masa imunggau tapatuta ga Jesuat nana tapatue banip sike gaat nanam nasande yanggawambik. Yanggawamban gata akunanggengu take kuyo. Kuwi nanamu aminu waapata gamiu wa take napso. Ita gaman kake anutu pupukngae apba yamukingunin namunggak ngang natake ngana dua inikwaike take napso.
1CO 10:28 Sike ngana aminu tapatuta ganike, “Kaau wa anutu pupukngae yamuking,” ngang yawik. Yawan natakengu kaau wa dua napim.
1CO 10:29 Ngan. Aminu wamu waaknga ganikapik kapa gatamunangge natake sanga nangaakan natapnanga akngae gwauke dua napim. Sike nata wamu wa yanggau nata natake gata musipbaatang kaau wa gamunggakge nangaakan natapiyakge dua natake yanggat. Aho. Gata kaau wa napi ganduke aminu wamu waaknga ganikapik kapata nangaakan natapsak ngang natake yanggat siwan aminu tapatuta anzing ba nanikwaiwik. Dasingge aminu tapatuta sanga nata take tasinanga aknga usanzike natapan wai siyak ngang natake nata sanga take waaknga teke dua tasiwit?
1CO 10:30 Nata Anutue inimbakngake nawawa nanduke asikaya aminu tapatuta nae take nanisapduwik ba dasing?
1CO 10:31 Sike wamu waakngae natake nata yake ginu anzing daninggat. Ginda sanga kuupbam atasiningu kaap ba nanam nake ba yangga tangoke ba puya takngatu tasinanggengu ginda natake ninu sanga waaknga tasina ninduke aminda Anutue umana yatangenatning ngang natake tasinong.
1CO 10:32 Tasike ginu aminu Judia nana gatu keu komduine nana aminu kuutde natake ninda tasina pimanang ngang natake tasinong. Gatu aminu Anutue aminabam dakngake yuaing aminu kuutde natake dua pimaningge kepi tawake tasinong.
1CO 10:33 Unzing nata tasike aminu kuupbamda nandupa take siwikge kepi tawake tasinggat binga ginda tasinong. Ngan. Nata kepi wa tasinggat taknga nata sanga na gatangamunanga akngae natanggamatake dua tasinggat. Aho. Nata puya pasike aminu kwaapzang gatayama wa aminu Anututa pake sanga akumnanga akngane sandewikge tasinggat.
1CO 11:1 Nata kepi waaknga tawake tasinggau Kraisda tuwanguke tasikut. Siwan nakaya kepi waakngakan tawake tasinggat. Ge gikaya kepi wa nata tawake tasinggat takngane sukunong.
1CO 11:2 Nata ginde musipmaatangu apbakngake tasinggau ginda nae asinggan natanggamatake wamu nata tupa danindamukumu wa ginda gitna pake yuaingge nata gindane umanza yapangenakgat.
1CO 11:3 Sike ngana nata wamu takngatuat daniwa natapnong. Aminu kuupbamdane tupan tapa wa Krais unin. Sike mayata inane apnae gepbiatang yuaing. Sike Kraisda Anutue gepbiatang yuak.
1CO 11:4 Unzingge nata anzing nataat. Aminu tapatuta tumuk wam yawik. Ba Anututa itane musia tangenawan ita Anutue wamu takngatu yanikapik. Ita wamu waaknga yake ngana ita kupna dua ukgwike unzing buyak yuke yakengu ita inane umana tasiwan pimapik ngang nataat.
1CO 11:5 Sike maya tapatuta tumuk wam yake ba Anutue wam yanikapik. Ita yake ngana taukga dua omikusike yakengu ita inane umana tasiwan pimapik. Unzing gwapakngi patzike kwaapuya pasiyama maakake yuaing binga ita maakawik.
1CO 11:6 Sike ngana maya tapatu tauknga omikusinangge apbitawanu itane gwapatdagamna patzike kwaapuya pasingamunong. Siwan ita sanga waakngae natake maaknga natapsat ngang natakengu ita taukga omikusiyok.
1CO 11:7 Sike ngana Anututa tupa siknga wawi tapatu tumuke tewan wawita itane gepbiatang koyuke sanga kuupbamde kuyana dakngakut. Unzing Anututa sanga kuupbamdane yapii dakngake yuak binga wawita kuyana dakngakut. Unzingge wawi tapatuta tumuk wam yake ba Anutue wam yanikapnangge natakengu ita kupna asukgwike yayok. Siwan Anututa maya tapatu tumuke tewan ita wawie gepbiatang yukut.
1CO 11:8 Dasingge? Anututa maya tapatu tumutnangge natake ita wawi apatane kwatai take maya tapatu tumukut. Ita mayatane kwatai take wawiapa dua tumukut. Wena.
1CO 11:9 Anututa natake wawita maya gatangamik ngang natake dua wawiapa tumukut. Aho. Ita natake mayata wawi gatangamik ngang natake maya tumukut.
1CO 11:10 Unzingge mayata tumuk wam yanangge natake ba Anutue wam yanikapnangge natakengu ita taukga omikusiyok. Sike dua omikusiyuk yawan kakengu waapata yamandet sike wawi yapbitnangge tasinggak ngang natapning. Siwan mayata natake nata yamandet tasiwa angelata nae musia wai natapnang ngang natake wawie gepbiatang yuak kaknga dua teke taukga omikusiyok.
1CO 11:11 Siakan ngana anzing natapnim. Buyambam tapaninda natake mayata inatakan yukengu ita waak songge yuwik. Siwan wawita inatakan yukengu ita waaknga wena songaapa dakngawik ngang nataak.
1CO 11:12 Siwan ninu atnataamang. Tupa siknga Anututa wawitane kwatai take maya tapatu tumukut. Siwan ngana apmanu mayata engang pangaiwa wawita unin aakaing. Sike Anutu sanga wa kuupbamdane yapii unin.
1CO 11:13 Siwan wamu waaknga ginda gisa usanzitnong. Usanzike ginda dasing nataaing? Asikaya maya tapatuta taukga dua omike ngana Anutue tumuk wam iniwan take siwik ba dasing?
1CO 11:14 Aminu kuupbamda natake wawi tapatutane gwapatdagamna mamaya siwanu wa amindane umana aknganata apimapik ngang nataaing.
1CO 11:15 Siwan ngana mayatane gwapatdagamna mamaya siwanu wa Anututa tasiwan sanga mayata omikusinanga aknga binga daknganggak. Unzingge ninu kuupbamda mayatane gwapatdagamna mamayae apbakngakamang.
1CO 11:16 Siwan aminu tapatu yamandet sike sanga waakngae wamu buyambam yanangge natakengu ita atnatapsok. Naat gatu Anutue aminabam dakngake yuaingu kepna kepna nana kuupbamda kepi wa daninggat takngakan tawake tasikamang.
1CO 11:17 Siwan wamu takngatuat nata ginde daniwa natapnong. Ginu miti kanangge unekan apu tasike ngana sanga wai takngatu tasikaing kakngae natake nata ginde musipma wai nataat. Natake mama wamu takngatu daninangge nataat.
1CO 11:18 Wamu tupan taknga aminu kunduta apu nanikingu wa ginu miti kanangge natake unekan apukaing ngana ginda yanganuke dongu inata inata dakngake yuaing ngang naniking. Sike nata wamu waaknga natapa kautdu kem siwan gatu kautdu siakan singgak.
1CO 11:19 Siwan sanga ginu dongu takngatu takngatu dakngake wamu ayanganukaingu wa moo dua aakgak. Aho. Ginu ayanganuwawa aminu gikat nana kundue Anututa natapan take singgak. Siwan ginda natake ita wa aminde take nataak ngang anggaman natapningge take nataak. Natake Anututa gin dandupewan yanganukaing.
1CO 11:20 Sike tapduknga ginu miti kanangge natake unekan apukaing gwene ginu nanam takwanu nakaingu wa Buyambam tapaninde sanga binga dua daknganggak. Wena.
1CO 11:21 Sike ginu atnataaing. Ginu kuupbam inandek inandek zetzet tasike gisane nanam pake nakaing. Nawawa ngana kunduta nanamde dapmake tomnata yuaing. Siwan kunduta yangga toknga aknga kwaapzang tangoke atdatdaptakaing.
1CO 11:22 Siwan ginu dasing nataaing? Asikaya ginu yotza wena? Ge une yuke gisane nanamza nake tangopnanga dua ba dasing? Ba ginda aminu Anutue amina dakngake yuaingge natapa sanga moo binga singgak ba dasing? Ngan. Ie natapa sanga moo binga siwan ginda notza kundu nanamde atdapmake yuaingu apasiwa mayakakaing. Siwan nata ie dasing daniwit? Asikaya nata gindane umanza yapangenawit ba dasing? Wena siknga.
1CO 11:23 Siwan wamu Buyambam tapaninda tupa nanikut takngaekan natake nata ginde gwa damukum ngana gatuna daniwa natapnong. Tapduknga Judasda Jesu iwanae kataune tekuu zikaa wagwenekan Buyambam tapaninu Jesuta pandetnaat gatake yuke nanam naking? Nake ita poyau gomdu take
1CO 11:24 Anutue inimbakngake apukut. Puke usanziyamuke ita pandetnae anzing yanikut, “Poyau nata ginde aputdamunggat gomde ginda natapa natane sapbina siyok. Siwan ginda asinggan poyak puke nayuk nae natanggamatanong,” ngang yanikut.
1CO 11:25 Sike iat wa amikatda nanamu napa puyuwana ita kap wainu yanggana kaya gomdu take anzing yanikut, “Kau anggomune wain yangga aknga Anututa wam kwikwiu gatu yawan nomatawan kekekawikgane tuwangu unin. Siwan tapduknga ginda nata kau anggomune ginde dama tangokaing kaknga tawake tasining gwene ginda tasiyuk nae natanggamatanong,” ngang yanikut.
1CO 11:26 Siwan ita poyau wagom puke usanziyamuke gatu kau wagom yaman nake tangopbing kaknga tawake tasiyuk ginda wamu takngatu anzing yanong. Buyambam tapaninda ninde tangge kungwanimukut ngang yake ie natanggamatanong. Natanggamatake tasiwawa kuku ita tapduknga gatuna apik gwene kuyok.
1CO 11:27 Unzingge aminu tapatuta sanga waakngatane yapiie katak siknga dua natagwaanguke ngana ita poyau wa nake ba kau wagom take tangopiu waapae wamna kaya siwik. Dasingge? Ita aminda Buyambam tapaninde semna natake tanguwa kungwake daknga tukngwakut taknga tawake tasinggak kapa unin.
1CO 11:28 Siwan aminu inane musia katak siknga usanzikwaapan kuwana ita poyau wa nake gatu kau wagomu take tangopsok.
1CO 11:29 Ita unzingu musia katak dua usanzikwaapan kuwan nake tangopiu waapae Anututa natapan wai siwik. Dasingge? Ita poyakat gatu kau wagopatde natake sanga Buyambam tapanindane ngangu anggaman dua natake ita moo siknga nake tangopik.
1CO 11:30 Sike sanga waaknga tasike aminu gikat nana kunduta mait sike gwa kumbing.
1CO 11:31 Siwan ninda musipminu katak siknga usanzikamang gamu meya waakngata ninde dua apan.
1CO 11:32 Siwan ngana Buyambam tapaninda sanga aminu ie masa imukaingga tasikaing kaknga usanzike natapan wai siwik. Siwan ita wa aminu apasiwan maining. Sike ngana ninda wa amikat gatake yuwatna ninu kuupbam pasiwan mainimde dua nataak. Aho. Anututa sanga ninda tasikamang kaknga usanzike natapan wai siwanu ita nindane musipmin papan nomatawikge natake meya takngatu atnimik. Nimuke ngana ita ninu dua pasiwan mainim.
1CO 11:33 Siwan mate notnabam. Wamu waakngae natake anzing tasinong. Tapduknga ginu nanam nanangge unekan apuke tasining gwene ginda notza kundue kayuke nanamu zetzet ginda gamok ma napam.
1CO 11:34 Sike aminu tapatuta tomna siknga natakengu ita inane yotnaatang yuke napsok. Ginda unekan apuke nanam nawawa Anututa danduke natapan wai siyak. Siwan nata wamu kautdu ayuau wa masande nata ginde apukenga tanomanuwit.
1CO 12:1 Siwan mate notnabam. Wamu takngatuat ayuwan daninangge nataat. Ginu sanga Waung Kapata ninde tasinimunggak kakngae dua botaningge natake daniwit.
1CO 12:2 Ginu atnataaing. Tapduknga ginu Anutue amina dua dakngake yuking gwene aminu kunduta gin panzike kaipakapa anutu pupukngata wamna yananga dua ngana ginda itane gen gwaamuke botasukukaking.
1CO 12:3 Unzingge nata ginde natake wamu takngatu ginda katak natdetningge natake daniwa natapnong. Anututane Waung Kapata aminu tapatutane musia tangenawanu waapata Jesue semna natake ita wai siwikge dua yawik. Wena. Siwan Waung Kapata aminu tapatutane musia dua tangenawanu waapata Jesue apbakngake ita natane Buyambam tapana dakngake yuak ngangu yananga dua.
1CO 12:4 Siwan Waungu awia tapatukan ngana ita amindane musia pangenawan inandek inandek natdetdeu inata inata pake puya inata inata pasikaing.
1CO 12:5 Ngan. Puya inata inata ngana puya toiu awia tapatukan.
1CO 12:6 Puya inata inata pasikaing ngana Anutu awia tapatukan puya wa pasikainggane yapii unin.
1CO 12:7 Sike Waung Kapata nindane musipmin pangenake ninda notnin gatayamunimde natake tasiniman ninu kuupbamda inandek inandek puya tasikamang.
1CO 12:8 Sike Waung Kapata aminu tapatutane musia tangenawan waapata natdetdeu nomana aknga natdeke yaniwik. Siwan Waungu Waapatakan aminu tapatutane musia tangenawan aminu waapata Anututane sanga katak siknga natdeke yanindamumbik.
1CO 12:9 Sike Waungu waapatakan aminu tapatutane musia tangenawan ita Anutue natapan kekeknga siwan puya tasiwik. Sike Waungu waapata tapatutane musia tangenawan ita amindane maitna sandeyamik.
1CO 12:10 Sike tapatuta duya takngatu takngatu tasiwik. Sike aminu tapatuta Anutue wam yanikapmake notnatane musia papan kekekaning. Sike tapatuta sanga aminda tasikaing kaknga usanzike natapan yapii anggaman siwik. Siwan ita natake sanga waaknga Anututa dua tangenakgak ngang yake sanga waaknga Setenda tangenakgak ngang yawan noman siwik. Siwan aminu tapatutane musia Waungga tangenawan ita wamu inata kundu yapii dua nataak ngana ita moo genanetakan yawik. Sike tapatutane musia tangenawan ita wamu wa inata kundu notnata yawan natake ie yapii natdeke yaniwik.
1CO 12:11 Siwan sanga wa kuupbam Waungu Tapatutakan pangenakgak. Ita pangenake sanga ina banipda siwan natake ita puya usanziyaman aminu kuupbamda inandek inandek puya inata inata pasikaing.
1CO 12:12 Siwan ninu atnataamang. Amindane gupnae sanga kwaapzang ngana gupna awia tapatukan dakngake yuak. Sike ina unzakan ninu Kraisdane aminabam dakngake yuamangu kwaapzang ngana ninda dongu takngatukan dakngake yuamang.
1CO 12:13 Dasingge? Ninu kuupbam Judia kep komune nana ba keu komduine nana aminu umana wena ba umana kaya ngangu kuut yangga sautnima ninda dongu takngatukan dakngake yuamang. Ngan. Ninu kuupbam Waungu awia tapatutakan nindane musipmikatang pukuke papan yuamang.
1CO 12:14 Siwan ninu atnataamang. Amindane gupnae sanga kautdukan dua. Aho. Gupnae sanga kwaapzang siknga dakngake yuaing.
1CO 12:15 Sike nata anzing nataat. Asikaya natane kepinata wam yake, “Na kataknga dua dakngake yuatde na itane gupnae sanga kautdu dua dakngake yuat,” ngang yawanu siakan siwik ba dasing? Wena. Natane kepinata natane gupmae sanga kautduta yuak.
1CO 12:16 Sike natane maakngata anzing ba yawik, “Na itane kaina dua dakngake yuatde na itane gupnae sanga kautdu dua dakngake yuat,” ngang yawanu siakan siwik ba dasing? Wena.
1CO 12:17 Sike amindane gupnae sanga kwaapzangu kaikan binga dakngakengu ita wamu dasing natapik? Siwan aminu tapatuta mayakngakan binga dakngakengu ita kapanga dasing natapik? Natapnanga dua.
1CO 12:18 Siwan ngana Anututa ina banipda siwan natake amindane gupna tumukut. Tumuke gupnae sanga kautdu kautdu kuupbam tanomanuke tasike pewan nindane gupmine yuaing.
1CO 12:19 Siakan ngana ita gupmindane sanga kautdukan tumukut gamu kana amin tapa binga dua siwan. Wena.
1CO 12:20 Sike gupmindane sanga kwaapzang ngana kana gupminu tapatukan daknganggak.
1CO 12:21 Siwan ninu atnataamang. Kai gwenduta katakngi anzing ba iniwik, “Ga wena gamu nata ninatakan take yuwam,” ngang yawanu siakan dua siwik. Siwan gwapakngataaya kuutda kepi inike, “Ga wena gamu take siwan,” ngangu ininanga dua.
1CO 12:22 Wena. Ninda nindane gupminde sanga kautdu wena gamu take dua yutnam. Wena siknga.
1CO 12:23 Sike gupminu kutapa tasigwaangukamang. Sike gupminde sanga kautdue maaknga natapnanga siwanu wa ninda katak siknga pakotnakamang.
1CO 12:24 Ngana gupminde sanga kautdu maaknga natapnanga dua wa ninda pakotnanangge dua nataamang. Ngan. Anututa amin tumuke ita gupnae sanga kwaapzang unekan peke tumukgawan amintapa dakngawan noman siknga sikut. Siwan Anututa nindane gupmindane sanga kautdu wena gamu take dua tasigwaangutning ngang natanimuke ita gupmindane sanga tanomanuke tasikut.
1CO 12:25 Ita unzingu wa tumukuu gupnata wesike inana yutningge dua natake tumukut. Aho. Sanga kwaapzang inandek inandek gupna kautdu gatangamikge natake tumukut.
1CO 12:26 Unzingge gupmindane sanga kautduta wai siwanu kwaapzangga wai sining. Sike ninda gupminu kautdu tasigwaangutnanu gupminu kwaapzangga takekan yutning.
1CO 12:27 Siwan ina unzakan. Ginu kuupbam inandek inandek Kraisdane gupnae sanga kautdu kautdu binga dakngake yuaing.
1CO 12:28 Ngan. Anututa ginu inane aminabam dakngake yuaikat nana kundu papan puya inata inata pasikaing. Tupanu aminu kunduta Jesutane kwiiknga dakngake pasikaingu umana aposel ngang yanikamang. Siwan kunduta Anutue wam yanikapsa amin dakngake pasikaing. Sike kunduta Anutue wam yanindamukaing. Gatu kunduta duya takngatu takngatu pasikaing ba amindane maitna sandeyamukaing ba notna gatayamukaing ba kayuya amin dakngake pasikaing ba wamu inata kundu yapii dua nataaing kangane yakaing.
1CO 12:29 Siwan ninu dasing natapnim? Asikaya aminu kuupbamda Jesue kwiiknga dakngake pasikaing ba dasing? Ba kuupbamda Anutue wam yanikapmakaing? Ba kuupbamda duya takngatu takngatu pasikaing?
1CO 12:30 Ba kuupbamda amindane maitna sandeyamukaing? Ba kuupbamda wamu inata kundu yapii dua nataaing kangane yakaing? Ba kuupbamda wamu wa yakaing kaknga natake tapa tekwamban itane yapiie yanikaing ba dasing? Wena siknga.
1CO 12:31 Siwan Anututa sanga wa tasikaingu kuupbam usanzike natapan kundu take siwa kundu take siknga sikaing. Sike ginda puya take siknga aknga Waung Kapata gin kekekandaman tasiningge natanggamatanong. Siwan nata wamu takngatuat danike kepi takngatu sanga wa kuupbam yapbike yuak kaknga yeutdamit.
1CO 13:1 Waung Kapata natane musipma tangenawan nata amindane wamnane wamnane yake gatu angelatane wamnane yakengu nata musipmaatangu aminde butaya dua natayamit gamu nata sanga moo binga dakngawam. Wamu wa yawit takngata sanga moo siknga dopang kwatan binga dakngake yuwik.
1CO 13:2 Siwan Waungga natane musipma tangenawan nata sanga apmea apik kakngae natdeke yanike gatu nata wamu Anututa takusopukut takngae natdeke nata natdetdeu buyambam siknga pake gatu Anutue natapa kekeknga siknga siwan duya kwaapzang pasinanga aknga takengu nata musipmaatangu aminde butaya dua natapit gamu nata sanga moo siknga binga dakngawam.
1CO 13:3 Sike nata ninane sanga kuupbam usanzike aminu sangaapana wenae yamuke gatu nata kapewa iwanata ninane gupma take katapatang sawa nasiwan maiwit ngana tupanu nata aminde butaya dua natapbum gamu sanga take takngatuta nae dua singaman.
1CO 13:4 Aminda aminu kundue musiaatangu butaya natayamunggau waapata musip kwikwik natayuke amin gatayamik. Ita musia zikaa dua natayamuke itane umana ina dua yatangenawik.
1CO 13:5 Ngan. Aminu butaya natayamunggak kapata inane umana dua yatangenake amindane umana dua yaipapaakusiwik. Ita sanga ina banipda siwan nataak kakngaekan dua natanggamatake gatu musia toknga zet dua natake sanga aminda ie wai tasingamukaing kakngae dua natayuwik.
1CO 13:6 Ita waiaknga aminda tasikaing kakngae dua bakngawik. Aho. Ita sanga take akngaekan apbakngawik.
1CO 13:7 Ngan. Aminu notnae butaya natayamunggak kapata sanga meya aknga kakengu ita akekekake dua pimapik. Aho. Ita aminde natake waapata waiakngana teke aminu noman amin dakngawikge natayuke sanga apmea takekan siwikge natayuwik.
1CO 13:8 Siwan sanga aminde butaya natayamunanga aknga Anututa dua sandewan wena siwik. Aho. Asinggan asinggan yuwik ngana apmea sanga Waungga amindane musia pangenawan Anutue wam yanikapmakaing kaknga Anututa sandeke tasiwan wena siwik. Siwan sanga aminda wamu inata kundu yapii dua nataaing kangane yakaingu wa sandewan wena siwik. Sike natdetdetna buyambamu wa natake yuaing kakngaat kuut Anututa sandewan wena siwik.
1CO 13:9 Dasingge? Sanga ninda natdekamangu wa ninda kautdukan nataamang. Sike wamu ninda yanikapmakamangu wa ninda Anutue wamu kautdukan natdeke yanikamang.
1CO 13:10 Ngana apmea sanga buya siknga akngata asaapik. Asapana sanga wa ninda kautdukan natake tasikamang kakngata wena binga siwik.
1CO 13:11 Siakan. Tupa nata waatdaka matek yukum gwene nata wamu waatdakata yakaing kakngaekan natake yakum. Ngan. Nata natdetdeu waatdakata nataaing kaknga natake sangabamde natapbum. Sike ngana nata buyambam takake aminu kekekngana kayaapa dakngakenga nata sanga wa waatdakata natake tasikaing kaknga atekum.
1CO 13:12 Siwan tapduu ayuamang komune ninu Anutue sanga anggaman siknga dua kaamang. Unzing aminda glas sandu take inane uyunga kake ngana ita nomna siknga dua kaak. Uyungakan kaak binga ninda buya siknga dua kaamang. Sike ngana apmea tapduknga sanga buya sikngata asapik gwene ninda anggaman siknga kanim. Siwan apmaau nata ie kautdukan nataat ngana apmea nata katak siknga ie natapit. Unzing Anututa natane sangae katak siknga nataak binga nata itane sangae natapit.
1CO 13:13 Siwan puya Anututa sandewiu wa wena siwanu puya takngaat takngatuatda kekeknga yutning. Sike puya wa yutningu anzing. Aminda Anutue natapa kekeknga singgak kaknga gatu sanga takeaknga apmea apikge natayuaing kaknga gatu aminde butaya natayamukaing kaknga ngangga ayutning. Siwan sanga wa takngaat takngatuatda sanga takekan ngana sanga wa aminde butaya natayamuya aknga sanga take siknga.
1CO 14:1 Siwan ginda sanga aminde butaya natayamunanga aknga tawake tasinangge take siknga natapnong. Natake puya takngatu takngatu Waung Kapata musipza pangenawan tasikaing kaknga tasinangge take siknga natapnong. Ngan. Puya wa kuupbam pasinangge natake ngana puya Anutue wamu takngatu natake yanikapsa aknga tasinangge take siknga natapnong.
1CO 14:2 Dasingge? Aminu tapatu Waungga itane musia tangenawan wamu inata kundu yapii dua nataak ngana genaneta yawanu wamu waakngata aminu tapatu dua gatangamik. Aho. Ita Anutue inimbakngake yawan notna tapatuta wamu waakngae yapii dua natapik. Wena. Ita kusopuknga wam yake ngana natdetdetnaatangu yapii dua natake genata moo yawik.
1CO 14:3 Siwan ngana aminu tapatuta Anutue wamu takngatu natake yanikapiu waapatane wamnata amindane musia papan kekekake wa aminda Anutue kekeknga yutning.
1CO 14:4 Sike aminu tapatu Waungga itane musia tangenawan ita wamu inata kundu yapii dua nataak kangan yawiu waapatane wamnata inane musipna tapan kekekanggak. Ngana aminu Anutue wamu takngatu natake yanikapiu waapatane wamnata aminu Jesue aminabam dakngake yuainggane musia papan kekekakaing.
1CO 14:5 Na ginu kuupbamda wamu wa Waungga amindane musia pangenawan yakaing binga yaningge take nataat. Ngana nata ginda Anutue wamu takngatu natake yanikapningge take siknga nataat. Dasingge? Aminda wamu inata kundu yapii dua nataak kangan yawiu ita puya take tasinggak ngana aminda Anutue wamu takngatu natake yanikapiu waapata puya take siknga tasinggak. Ngan. Aminu wamu inata kundu yapii dua nataak ngana genatakan yanggak kapata amunandang zim binga yuak. Ngana notna tapatu Waung Kapata itane musia tangenawan kusopuknga wamu waakngatane yapii natdeke yaniwan wamu waakngata Jesue aminabamdane musia papan kekekawanu puya wa take siknga siwik.
1CO 14:6 Ngan. Mate notnabam. Nata ginde kuke ngana Waungga natane musipma tangenawan wamu yapii nata dua nataat tangan daniwit gamu wamu waakngata ginu dua gatandaman. Ngan. Nata wamu takngatu Anututa yeikngaman natapbum taknga dua daniwit. Ba nata sanga Anututane akngae natdeke ngana dua daniwit. Ba wamu takngatu Anututa naniwan natapbumu dua danikapit. Ba ginda Anutue wamu takngatu anggaman natdetningge natake ngana dua daniwit. Aho. Nata wamu wa yapii ginda natapnanga dua akngane yawanu asikaya wamu waakngata ginu akgatandamik ba dasing? Wena siknga.
1CO 14:7 Ina unzakan. Benggo ba gita ngangga wamna ina yananga dua. Siwan aminu tapatuta kap takngae guyakngi katak dua tawake benggo puyapanu buyami natapning. Sike gita tanguwawan buyami natake kau dasing kaknga tainangge tasinggak ngang natapning.
1CO 14:8 Siwan aminu tapatuta pum puyake ngana amak tasinangge puyakaing kaknga katak dua puyapanu asikaya aminu tapatuta amak tasinangge atandakngawik ba dasing?
1CO 14:9 Gikaya ina unzakan. Ginda wamu inata kundu yapii dua nataaing ngana genzatakan yawanu asikaya aminu tapatuta wamu waakngae yapii atnatapik ba dasing? Aho. Gindane wamzata sanga moo siknga binga dakngawik.
1CO 14:10 Sike ninu atnataamang. Aminu kepna kepna nana aminda wamnane wamnane yakaing. Sike wamu kuupbamu wa yakaingu yapiina kaya.
1CO 14:11 Siwan ngana aminu tapatuta ina wam tangan yawan natake ngana nata yapii dua natapanu ita nae natapan na dongu inata kundune nana amin dakngawit. Siwan nakaya aminu waapae natapa dongu kundune nana dakngawik.
1CO 14:12 Unzingge nata ginde anzing nataat. Ginda puya wa Waung Kapata gindane musipza pangenawan tasikaing kakngae apbakngakaing. Ge ginu puya waaknga tasinangge take siknga nataaing aminda puya ginda pasiwa Anutue aminabamda kekeknga yutning kaknga tasinangge natapa kekekayok.
1CO 14:13 Unzingge aminu tapatu itane musia Waung Kapata tangenawan wamu inata kundu yapii dua nataak ngana genatakan yawiu ita Anutue tumuk wam inindetapan Anututa wamu waakngatane yapii yeikngaman natake yanikapsok.
1CO 14:14 Siwan nata anzing nataat. Nata wamu inata kundu yapii dua nataat ngana genatakan yake tumuk wamu Anutue inikengu nata musipmaatangu tumuk wamu take siknga yanggat ngana natdetdetnaatangu wamu waakngatane yapii dua nataat.
1CO 14:15 Sike nata dasing tasiwit? Nata anzing tasiwit. Nata tumuk wamu natane natdetdetnaatangu itane yapii nata atnataau wa take yawit. Gatu wamu inata kundu yapii dua nataat tangan tumuk wamu take yawit. Sike nata kau takngatu natane natdetdetnaatangu yapii nata atnataau take taiwit. Gatu kau takngatu wamu inata kundu yapii dua nataat tanganu take taiwit.
1CO 14:16 Sike ninda unzingu dua tasikengu ninda Anutue umana yatangenake wamu yapii dua nataamang kangan yananu asikaya aminu wamu waakngatane yapii dua natapiu tapatuta siakan ngang yawik ba dasing? Aho.
1CO 14:17 Ginda wamu take siknga yake Anutue inimbakngakaing ngana wamu waakngata notzatane musia dua papan kekekaning.
1CO 14:18 Siwan nata wamu inata kundu yapii dua nataat ngana genatakan asinggan yake nata ginu kuupbamu sanga waakngae atdapbikum. Sike ie nata Anutue asinimbaknganggat.
1CO 14:19 Ngana miti kanangge natake Jesue aminabamda unekan apana nata enake wamu kwaapzang yanike wamu wa inata kundu yapii dua nataat tangan yanangge dua nataat. Aho. Asingu nata wamu mateknga siknga yake nata aminu kundu gatayamit.
1CO 14:20 Mate notnabam. Ginu sanga musipzaatang usanzike kepi waatdaka mateknga tawake sangae katak dua natagwaanguke tasikaing kaknga ma tasiwam. Siwan ngana waatdaka matekga sanga waiakngae dua natanggamatakaing. Ina unzakan ginda waatdaka matek binga dakngake yutnong. Ngan. Natdetdetza aminu buyambam takake kekekngana kayata nataaing binga natake yutnong.
1CO 14:21 Sike wamu takngatu Anutue wapatangu ayanikapsa aminu tapatuta anzing matakut, “Buyambam tapaninda anzing yakut, ‘Nata aminu wamu inata kundu yakaingge natane wama yama take aminu dongu ninane aminde kuke wamu keu komdune nana amindane wam tangan yaniwawa ngana maau dua pake natapning,’ ngang matakut.”
1CO 14:22 Siwan wamu waaknga natake ninu anzing natapnim. Sanga Waung Kapata amindane musia pangenawan wamu inata kundu yapii dua nataaing ngana genatakan yakaingu waaknga natake aminu Anutue masa imukaingga ie apbitaning. Bitake wa aminda kepman nana amin dakngake yuaing kakngata anggaman siwik. Siwan ngana sanga Waung Kapata nindane musipmin pangenawan ninda wamu inata kundu yapii dua nataamang ngana nindane genindakan yakamangu waaknga Anututa nindekan natake dua tasinimunggak. Aho. Ita aminu kepman nana aminde natake tasinggak. Siwan gatu sanga Waung Kapata amindane musia pangenawan Anutue wamu takngatu natake yanikapmakaingu waaknga aminu Anutue masa imukainggane musia papan kekekaningge natake dua Anututa tasinggak. Aho. Ita ninu itane amina dakngake yuamangga natapnimde natake sanga waaknga tasinimunggak.
1CO 14:23 Unzingge ginu Anutue aminabam dakngake yuaingu kuupbamda unekan apuke wamu inata kundu yapii dua nataaing ngana ginu kuupbamda genzatakan yaning. Unzing yawawa aminu sanga wa tasikainggane yapii dua nataaingu kepman nana aminda ginde banakan koke natakengu dasing natapning? Wa aminda koke ginde yake ginu atdatdaptakaing ngang yaning.
1CO 14:24 Sike ngana ginu kuupbamda wamu Anututa danikut taknga yanikapmake tasiwawa aminu kepman nana tapatuta koke natapanu gindane wamzata aminu waapatane musia atepik. Itane musia tepan aminu waapata natake gindane wamzata sanga kuupbamu nata pasikumunin usanzike tasinggak ngang natapik.
1CO 14:25 Natake ita sanga kuupbam inane musiaatang kusopuke yuaingu wa anggaman siwan natapik. Natake ita musiaatangu waiaknganae meya siknga natake apmaakake ita akgwetake Anututane umana yatangenake anzing daniwik. Siakan siknga. Anututa gikat gatake yuaing ngang daniwik.
1CO 14:26 Siwan mate notnabam. Ginu wamu waakngae natake ginda dasing tasining? Tapduknga ginu miti kanangge unekan apuke yutning gwene Waung Kapata gindane musipza pangenawan gikat nana tapatuta kau takngatue natake yawan taining. Siwan tapatuta wamu kaya siwanu ita enake ginde danikapik. Sike tapatuta wamu Anututa iniwan natapbut taknga ginde danikapik. Siwan tapatuta wamu inata kundu yapii dua nataak ngana genatakan yawik. Yawan tapatuta enake wamu waakngatane yapii natake ginde danikapik. Siwan puya wa ginda pasikaingu kuupbamu ginda notza kekekayamunangge natakengu take tasinong.
1CO 14:27 Sike aminu kundu wamu inata kundu yapii dua nataaing ngana genatakan yananggengu tapaaya ba tapaat tapatuatdakan take yaning. Yake tapatu tapatuta masan yanong. Sike tapaat tapatuatda yawa puyuwana gatu tapatuatda yananga dua. Wena. Siwan tapatuta yawan puyuwana tapatuta enake wamu wa yakutdane yapii yanikapsok.
1CO 14:28 Sike aminu wamu waakngatane yapii yanikapnanga apa wena kakengu aminu wamu inata kundu yapii dua nataak kangan yanangge nataak kapata kuma yuyok. Ita inane musiaatangu wamu waaknga natake Anutue inimbakngayok.
1CO 14:29 Siwan aminu Waung Kapata itane musia tangenawan ita Anutue wamu takngatu yanikapnangge natakengu tapaaya ba tapaat tapatuatdakan take yaning. Yawawa aminu kuupbamda maak pake natake usanzike katak natdetnong.
1CO 14:30 Sike aminu tapatuta wamu ayaniwawan ngana Anututa wamu takngatu aminu tapatue yeikngamanu aminu wamu ayawik kapata teke kuma yuyok. Yuwawan notnata yawik.
1CO 14:31 Ngan. Ginu kuupbamda Anutue wamu take yanikapnong. Yanikapmake tapatu tapatuta masan yanong. Yawawa ginu kuupbamda natdetdet pawawa wamu waakngata gindane musipza papan kekekaning.
1CO 14:32 Sike ninu atnataamang. Aminu Waungga musia pangenawan Anutue wam yanikapmakaingga wam yaningge Waungga asiknga dua yaniyapimbik. Aho. Wa aminda inae baniaatang natake kundusimu yukenga yanangge natakengu take tasining.
1CO 14:33 Ngan. Anutu sanga aknga pandambanukgakge yapii dua. Aho. Ita musip kwikwikge yapii. Siwan Anututane mama wamu takngatu Jesue aminabamu kepna kepna nana aminu kuupbamda tawake anzing tasikaing. Mayata miti kanangge koke wawitane gepbiatang yuke kuma yuke wamu nataaing.
1CO 14:35 Natake wamu takngatutane yapii natapnanggengu mayata apna inane yotnaatang yanikwaikaing. Mayata wamu Anutue aminabamda sande kanangge tasikaing gwene yawiu sanga waaknga mayakngana kaya.
1CO 14:36 Siwan ginu wamu waakngae sapdukaing aminda dasing nataaing? Asikaya ginu Anututane wamde yapii gin ba dasing? Ba asikaya Anutue inane wamna gindekan damukut ba dasing?
1CO 14:37 Sike aminu tapatuta inane natake na aminu Anutue wam yanikapmanggat tapa ngang natapik. Ba ita inae natake Waung Kapata ninae musipma tangenawan puya takngatu tasinggat tapa ngang natapiu waapata natake mama wamu nata matanggau wa Buyambam tapanindane mama wam ngang natapsok.
1CO 14:38 Siwan aminu tapatuta wamu waakngae natapan kem siwanu ninu aminu waapae natapna aminu Anutue wam yanikapmanggak kapa dua singgak.
1CO 14:39 Siwan mate notnabam. Wamu waakngae natake ginu puya Waungga gindane musipza pangenawan Anutue wam yanikapmake tasikaing kakngae apbaknganong. Apbakngake puya waaknga tasinangge take siknga natapnong. Siwan ginda puya Waungga amindane musia pangenawan wamu inata kundu yapii dua nataaing ngana genatakan yake tasikaing kaknga ma yanindekngawam.
1CO 14:40 Ngan. Ginda sanga wa kuupbam tapa takawan tasiwa noman siyok.
1CO 15:1 Siwan mate notnabam. Nata wamu takeaknga tupa danikapbumu wa gatuna ginda natdetningge natake daniwa natapnong. Ginu wamu take waaknga natake ginda gitna siknga take yuaing.
1CO 15:2 Siwan ginda wamu take waaknga gitna siknga take yuwawa wamu waakngata gin gatandamuke gindane waiakngasa sandekgak. Sike ngana ginda katak dua natdeke Jesue natapa kekekawanu wamu waakngata ginu gatandamunanga dua.
1CO 15:3 Siwan wamu tupa na naniwa natapbum takngakan danikum. Sike nata wamu waakngae natapa sanga tupan siknga siwan nata ginde danikapbumu anzing. Kraisda apuke nindane waiaknganin sandetnangge natake ita ninde tangge kungwanimukut. Unzing wamu ayanikapsa aminda Anutue wapatangu tupa siknga ie mataking binga tasike ita ninde kungwanimukut.
1CO 15:4 Kungwaniman aminda kwaiking. Siwan gunziu gweaat gwenduat yuwawan Anututa gatu tangenakut. Unzing wamu tupa siknga Anutue wapatang mataking binga ita akumbut katangga gatu tangenakut.
1CO 15:5 Tangenawan Kraisda gatu gweake ita Sifasdane kaine anggaman siwan kakut. Kawana ita kuke itane pandetna 12-pat nana kuupbamdane kaine anggaman siwan kaking.
1CO 15:6 Siwan masande aminu itane amina dakngake yukingu buyambam siknga 500 yapbikut binga aminda unekan apuke yuwawa ita kuke wa amindane kaine anggaman siwan kaking. Siwan aminu wa kakikat nana kunduta yusika akumbing ngana buyambamda apmanu ayuaing.
1CO 15:7 Siwan masande ita kuke Jemsdane kaine anggaman siwan kakut. Sike masande ita kuke aminu inane kwiiknga dakngakingu kuupbamdane kaine anggaman siwan kaking.
1CO 15:8 Siwan masan siknga ita apu nae nomane anggaman siwan kakum. Kake yuwawa ita na tapan itane kwiiknga dakngakum. Ngana nata Jesue aminabamde semna siknga natayamuke nata apasiwa mainingge kumzang tasikum. Tasike tasike tasinggawa nata itane kwiiknga dakngananga dua apa binga dakngake yukum. Unzingge nata amunandang yuwa aposel aminu kuupbamda na atnapbike yuaing. Unzing engangu tapatuta kepi engangu kuupbamda aakaing kaknga dua tawake aawik binga nata waiaknga buyak yuwawa ngana itane kwiiknga dakngawitde na takut.
1CO 15:10 Siwan Anututa musip kwikwiu nae natangamuke na tapan yuat. Ngan. Ita musip kwikwiu nae natangamukut takngata dua pimakut. Aho. Sanga waaknga buya aawan nata itane puya kwatan siknga tasikum. Sike aminu itane aposel amin dakngake yuaingu kuupbamda puya buyambamu apasikaing ngana nata puya kwatan siknga pasike wa aminu ayapbikum. Ngana puya wa nata ninatakan dua tasikum. Aho. Anututa inane musiaatangu nae kwikwiknga natake ita asinggan naat gatake yuke gatangaman tasikumak.
1CO 15:11 Unzingge ninda natake sanga wa aminda na napbikaing ba nata wa amin yapbikgat takngae natapna sanga moo binga singgak. Siwan ninda wamu ginde danikapbumang. Danikapna natake ginda wamu waakngae natapa kekekakut.
1CO 15:12 Siwan ninda Kraisde natake Anututa waapa akumbut katangga gatu tangenakut ngang yanikamang. Sike dasingge aminu gikat nana kunduta yake kepi akumbing katangga gatu enatnanga wena ngang yakaing?
1CO 15:13 Ninda kepi gatu enatnanga wena ngang natapna kekeknga siwanu asikaya ninda natake Kraisda akumbut katangga gatu enakut ngang natapnim ba dasing? Wena.
1CO 15:14 Siwan Kraisda gatu dua enakut ngang natapna siakan siwanu asikaya ninda natake wamu wa ninda tupa ginde danikumang kaknga yapiina kaya ngang natapnim ba dasing? Wena. Siwan yapii wena siwanu asikaya sanga ginda wamu waakngae natapa siakan sikut taknga buya asaawik ba dasing? Wena.
1CO 15:15 Siwan kepi Anututa aminu gwa kumbingu gatu pangenatnanga aknga wena siwanu ninda natake ita Krais akumbut katangga gatu dua tangenakut ngang ninda natapna siakan siyok. Natapna siakan siwanu ginda ninu Anututa Jesu atangenakut ngang yakumang aminde natapa aminu Anutue wam takusopuke kem wam yakaing amin siwik.
1CO 15:16 Ngan. Kepi Anututa aminu gwa kumbingu gatu pangenatnanga aknga wena siwanu ita Krais dua tangenakut ngang natapnangge.
1CO 15:17 Siwan ita Krais dua tangenakut ngang yana siakan siwanu sanga ginda ie natapa kekekakut taknga buya dua aawik. Buya dua aawan Anututa gindane waiakngasa gwa sandetdamukut takngata wena siwik.
1CO 15:18 Siwan aminu Kraisde natapa kekekawan yusika kumbingu kuupbamda waiaknganae toknga apake yuaing ngang natapnangge.
1CO 15:19 Siwan wa aminda kungwake toknga pake yuaing gamu ninu Kraisde natake sanga ita gatanimunanga akngae natayuamang aminde butaya siknga natanimam. Unzing aminda aminu kundue butaya natayamukaing binga dua natanimam. Dasingge? Ninda kayuk yuke ie natayuwatna take singgak ngana kungwakenga buya siknga tananga dua ngang natake ninde butaya siknga natanimam.
1CO 15:20 Siwan ngana unzingu wena siknga. Aho. Anututa siakande siknga Krais akumbut katangga gatu tangenakut. Tangenawan ita akupsa aminu masan pangenawik aminde tupan enakut tapa Krais unin.
1CO 15:21 Ninu atnataamang. Aminu yakap siknga sanga wai takngatu tasikuu waapata sanga aminda akumnanga akngatane yapii unin. Siwan ina unzakan ninda anzing natapnim. Aminu tapatuta sanga aminda akumbing katangga gatu enatning kakngatane yapii dakngake yuak.
1CO 15:22 Ngan. Sanga ninda akumnim takngae yapii Adamu waapanin. Siwan sanga ninda akumnim patangga gatu enatnimde yapii Krais unin.
1CO 15:23 Siwan tapdukngane Anututa aminu kuupbamu gatu pangenawik. Ngan. Krais yakap siknga tangenawan ita aminu masan pangenawikgane tupan enakut tapa unin. Siwan masande tapduknga Kraisda gatuna apik gwene Anututa aminu Kraisdane amina dakngake kumbingu kuupbam gatu pangenawik.
1CO 15:24 Pangenawana tapduknga sanga kuupbamda wena sining gwenda asapik. Asapan tapduu wagwene Jesuta aminu kekeknga ba umana kaya ba buyambam tapaapa dakngake yuaingu kuupbam yapbike pasiwan pimaning. Pasiwan pimapana ita sanga kekeknga aknga kuupbam pake Nanin Anututane katakngane pewan yutning.
1CO 15:25 Dasingge? Anututa tupa yawan Kraisda tupan sikngaapa dakngake aminu kuupbamde kuyana yuak. Yusika ita inane iwana kuupbam yapbike pasiwan pimake itane gepbiatang yutning.
1CO 15:26 Ita yapbike sanga ninda akumnanga aknga iwana tapatu binga masan siknga tanguwan pimapik.
1CO 15:27 Unzing wamu takngatu Anutue wapatang ayanikapsa aminu tapatuta matakuu wa Anututa yake, “Aminu kuupbamda ie gepbiatang koyutningge yakut,” ngang matakut binga Anututa tasiwik. Siwan wamu wa aminu kuupbamda ie gepbiatang koyutning ngang yakut takngae natake anzing natapnim. Aminu kuupbam ie gepbiatang koyutningge yakut. Ngan. Anututa aminu kuupbamda Jesue gepbiatang koyutningge yawan Jesuat amin bapatda Anutue gepbiatang koyutning. Ngan.
1CO 15:28 Anututa tasiwan aminu kuupbamda itane waakngae gepbiatang koke yuwawa waaknga waapata ina banipda siwan natake Nana Anutue gepbiatang koyuwik. Koyuwawan Anututa aminu kuupbam yapbike kuupbamdane tupan tapa dakngake yuwik.
1CO 15:29 Sike wamu waaknga siakan dua siwanu dasingge aminu kunduta notna akumbing aminde natake yangga saukaing? Kepi akumbingga gatu enatnanga wena siwanu dasingge aminu kunduta aminu wa akumbingge natake yangga saukaing?
1CO 15:30 Sike nikaya kuut dasingge ninu asinggan sanga nin pasiwan mainanga akngane yuke ngana dua teke datakukamang?
1CO 15:31 E! Mate notna! Nata tapdukbamu asinggan sanga na nuwa kumnanga akngane yuat. Siakan. Ginu atnataaing. Nata Buyambam tapaninu Jesu Kraisdane puya pasiwa buya aakut taknga ginu unin ngang natake nata ginde apbaknganggat. Siwan ginda ie natapa siakan siyok. Sike ginda natake nata wamu wa akumnanga akngane yuat ngang yanggat taknga kuutda natapa siakan siyok.
1CO 15:32 Siwan gatu enatnanga kepi wena siwanu nata Efesas yot gapmane kuke puya tasiwawa iwana kaapzongga notnaat amake yasikaing binga na tasiwa maiwitde tasiwawa nata dasingge kekekake yukum? Sike akumbingga gatu enatnanga kepi wena siwanu asingu ninda wamu takngatu kunduta yake, “Kwepna ninda kungwake wena sinim. Undanga. Apmanu ninda apbakngake nanaminu take nake tangopnim,” ngang yakaing kaknga ninda take tawake tasinim.
1CO 15:33 Siwan ngana ginu wamu waakngae siakan ngang ma natapam. Ginu atnataaing. Ninda aminu wai amikat gatake sukunanu wa aminda nindane sanga take aknganinu apasiwa maining.
1CO 15:34 Unzingge ginda natdetdetza gutonga aknga teke katak siknga natdeke gindane waiakngasa gatu ma tasiwam. Dasingge? Aminu gikat nana kunduta Anutue dua nataaing. Nata wamu wa yanggat taknga ginda natake apmaakaningge yanggat.
1CO 15:35 Sike ngana aminu tapatuta wamu waaknga natake yakwaik wamu takngatu anzing ba nanikwaiwik, “Akupsa aminda sanga dasing binga tasike gatu enatning? Siwan wa aminu gupna dasing binga pake gatu enatning,” ngang nanikwaiwik.
1CO 15:36 Nanikwaiwanu nata yake anzing iniwit, “Ga katukatum amin! Poyak tapunu gata kwaiwiyau ita dua baptakengu zuna dua akopik.
1CO 15:37 Siwan sanga wa gata kwaiwiyau poyak tapunu tape buyak dua kwaiwiyak. Ba nanam zak yapunangge gata gupna buyak dua yapuwiyak. Aho. Gupbikenga buyakan yapuwiyak.
1CO 15:38 Ngana baptawawan Anututa ie gupna kayuu asimunggak. Ngan. Ita nanam zau kuupbam inandek inandek gupna inata inata ayamunggak.
1CO 15:39 Ginu atnataaing. Sanga kuupbamu buya kundukan dua. Aho. Ninu aminu inata. Kaau inata. Kwaiu inata. Pis inata.
1CO 15:40 Siwan sanga ena banakan kakaa komune nana gatu sanga kepdakane nana ngangu undang yuaing. Sike ngana sanga ena banakan komune nana kana kakaana inata kundu singgak. Siwan sanga kepdakane nana kana sanga gwaam siknga singgak.
1CO 15:41 Siwan gunzitdane kakaa inata kundu. Siwan yekap gwendane kakaa inata kundu. Siwan yekapdakgane kakaa inata kundu. Yekapdau inata inata kaamang.”
1CO 15:42 Sike sanga akupsa aminda gatu enatning kakngaaya kuut ina unzakan. Gupna sanu ninda akwaikamang. Sike ngana gupna akumbing katangga gatu enatningu wa sanga kekeknga asinggan asinggan yutnangata enatning.
1CO 15:43 Siwan gupna sanu ninda kwaikamangu wa sanga gawaknga kapanga kaya kaamang. Sike ngana gupna gatu enatningu wa sanga gwaam siknga daknganing.
1CO 15:44 Gupna sanu ninda kwaikamangu wa gupde sanga akngae gepbiatang yuaing. Siwan ngana gupna gatu enatningu wa gupde sanga akngae gepbiatang dua yutning. Aho. Gupna wa Anututane sanga. Ngan. Aminda gupde sanga akngae gepbiatang yuaing ngangu ginu atnataaing. Siwan aminu wa gatu enatningga gupna inata kundu dakngake Anututane sanga akngae gepbiatang yutning ngangu ginda ie natapa siakan siyok.
1CO 15:45 Unzing wamu takngatu Anutue wapatangu ayanikapsa aminu tapatuta matakut binga siwik. Sike anzing matakut, “Aminu tupan tumukut tapa Adam. Sike Anututa sanga kayuk yutnanga aknga iman ita aminu kayukapa dakngake yukut,” ngang matakut. Siwan Jesu akupsa aminu gatu enatninggane tupan enakut tapa dakngake yuak. Yuke ita akupsa aminde sanga kayuu gatu yutnanga aknga ayamunggak kapanin.
1CO 15:46 Siwan ngana tupanu sanga gupdane akngata asaakgak. Ngan. Sanga enandang nana akngata tupanu dua aawik. Aho. Sanga waakngata masan aawik.
1CO 15:47 Sike aminu tupan tumukut tapa wa kep dakane nana. Anututa kaik pake aminu waapa tumukut. Siwan aminu wa masan aakut tapa enandang nana.
1CO 15:48 Siwan ninu aminu wa Anututa kaik pake tumukut tapatane dongune aakumangu kuupbamda aminu waapa binga akumnanga amin dakngake yuamang. Sike gatu ninu aminu wa enandang nana amindane amina dakngake yuamangu kuupbamda aminu waapa binga gatu enake kayuk yutnanga amin dakngake yutnim.
1CO 15:49 Ngan. Apmanu ninu aminu Anututa yakap siknga kaik pake tumukut tapa binga dakngake yuamang. Ina unzakan apmea ninu aminu enandang nana waapa binga dakngake kayuk asinggan yutnim.
1CO 15:50 Siakan mate notna. Nata daniwa natapnong. Aminu kep dakane nana aminda gupna buyak Anutue daman gwene kopnanga dua. Ngan. Gupminu apbukatananga buyak kokengu sanga kayuu asinggan asinggan yutnanga aknga tananga dua. Wena siknga.
1CO 15:51 Siwan dasing natapnim? Nata wamu takngatu Anututa takusopuwan yukut taknga ginde danikapa natapnong. Ninu kuupbam dua kumnim. Aho. Ngana ninu kuupbam gupminu iwaa binga teke gupminu inata kundu daknganim.
1CO 15:52 Tapduu ngwenga gwene angelata pum puyapan zetgaman siknga ninu gupminu inata kundu daknganim. Ngan. Pum puyapan akupsa aminu kuupbam Anututa gatu pangenawik. Pangenawan wa amindane gupna gatu bukatananga dua. Aho. Ita nin pangenawan ninu sanga inata kunduta iwaa teaing binga dakngake yutnim.
1CO 15:53 Ngan. Gupminu apbukataningu iwaa binga teke gupminu dua bukatawik kaknga atanim. Gupminu kekeknga dua yuaingu teke gupminu kekeknga asinggan asinggan yutnanga aknga atanim.
1CO 15:54 Siwan tapduu ninda sanga waaknga tanim komune wamu takngatu Anutue wapatang ayanikapsa aminu tapatuta matakut taknga buya asaawik. Sike wamu anzing matakut, “Sanga ninda akumnanga aknga Anututa gatukande yaitapaakusike tasiwan wena sikut.
1CO 15:55 Siwan kekeknga akumnanga akngata zandang yuak? Amin zipan kumnanga akngata zandang yuak,” ngang matakut.
1CO 15:56 Sanga amin zipan kumnanga akngatane yapii amindane waiaknga unin. Siwan sanga aminu wai amin dakngananga akngatane yapii mama wamu unin. Mama wam sandeke aminu wai amin dakngake undang akumning.
1CO 15:57 Ngana Anututa yawan Buyambam tapaninu Jesu Kraisda nin gatanimuke akumnanga akngatane kekeknga aknga yaitapaakusikut. Yaitapaakusike ita sanga akumnanga aknga tasiwan wena gwa sikut. Unzingge ninda Anutue asiknga inimbaknganim!
1CO 15:58 Siwan mate notna. Wamu waakngae natake ginda Anutue kekeknga yutnong. Yuke iwanzata gin pasiwa mainingge enake tasiwanu ginda akekekake yutnong. Yuke ginda natake puya Buyambam tapaninde pasikamang kakngata buya asaawik ngang natapa kekekawan ginda itane puya akngana kekeknga asinggan pasingamunong.
1CO 16:1 Siwan wamu takngatuat ayuau aminu Anutue aminabamde gupna gatayamunangge mani mutningge daniwa natapnong. Nata wamu waaknga Anutue aminabamu Galesia kep komune yuaingge gwa yanikum. Ge gikaya wamu waakngakan tawake tasinong.
1CO 16:2 Sike Sande kuupbamu ginu kuupbamda inandek inandek mani Sande atepda gwene pakingge natake usanzitnong. Usanzike kautdu Anutue aminabam gatayamunanga pake gisae yotzane pewa katak yutnong. Ginda manisa pandakngake yuwawa nata ginde apanu ginu sanga waaknga tasinangge dua yawaning.
1CO 16:3 Sike nata ginde apanu ginda aminu gikat nana kundutane umana yanong. Yake ginda pas sandu matake wa aminde yama nata wa amin yanipewa kuke manisa ginda gwa pandakngakingunin pake Jerusalem yot gapmane pakuning.
1CO 16:4 Sike nata natapa naat kuut kunanga siwanu wa amikat naat kunim.
1CO 16:5 Sike nata puya tasitakuke Masedonia kep komde banakan kunangge nataat. Kuke keu wakom yapbike nata ginde kundopit.
1CO 16:6 Kundoke nata gikat mateknga kundusim yuwit ba nata gikat gatake yuwatna tapduu yangga sambuya enakgak komu kana sandewana kuwit ba dasing. Nata ie katak dua nataat. Ngana masande nata gin dapmake keu komdune kunangge tasiwa ginda nae natake kepiapane kusika sangae dapsak ngang natake gatangamuningge natake nata gikat gatake mateknga kundusim yutnim.
1CO 16:8 Ngan. Nata ginde kundoke na zetgaman gin dapmake kuwitde dua nataat. Aho. Buyambam tapaninda na nandutewanu nata gikat tapduu mamaya yutnim. Ngana nata Efesas yot gapmane yuke tapduu yuwatakau gwendu umana Pentekos ngang inikamang gwenu andang yuke kawit.
1CO 16:9 Dasingge? Andangu miti puya buyana kwaapzang asaatnanga akngae natake nata kwatan pasinggat. Pasiwawa natane iwana kwaapzangga enake yuaing. Unzingge nata puya teke ginde zet kunanga dua.
1CO 16:10 Siwan ngana Timotita ginda apanu ginda katak toike ita gin banakanu musia kwikwiknga natake yuwikge tasinong. Ginu atnataaing. Ita Buyambam tapanindane puyana pasinggak. Unzing nata pasinggat binga pasinggak.
1CO 16:11 Unzingge aminu gikat nana tapatuta ie natapan moo binga siwan ie masa ma iman. Aho. Ita gin dapmake nae gatu apnangge yawanu ginda ie banip gwaang natangamuke ita kepiapane kusika sangae dapsak ngang natake ginda gatangamunong. Ngan. Ita gatuna nae apikge nata kayuat. Iat notna Jesue amina dakngake yuaing aminu kunduat apningge nata kayuat.
1CO 16:12 Siwan wamu ginda notninu Apolosde naniking kakngae natake yake daniwit. Ita ginde kuwikge nata wamu kekeknga inikum. Ita notninu kunduat gatake ginde kuningge iniwawa ngana ita apmau kunangge apbitanggak. Bitake ngana masande kepi kaya kakengu ita ginde kuwik.
1CO 16:13 Siwan ginu katak siknga tagwautnong. Tagwauke Anutue kekeknga yuke musipza gitnata yutnong.
1CO 16:14 Yuke sanga ginda tasiningu kuupbam ginda notzae butaya natayamuyuk tasinong.
1CO 16:15 Siwan mate notnabam. Ginu dongu Stefanaskat gatake yuaing aminde atnataaing. Aminu Akaia kep komune nana Jesue amina dakngaking aminu tupanu wa aminda dakngaking. Dakngake aminu Anutue aminabam dakngake yuaing amin gatayamunangge iaknga siknga natake kekeknga tasikaing.
1CO 16:16 Siwan ginda aminu puya waaknga pasikaing aminde gepbiatang yutnong. Aminu wa binga gatu puya aminu kuupbapatde gepbiatang yutnong.
1CO 16:17 Siwan aminu tapaat tapatuat umana Stefanas gatu Fotyunetas gatu Akaikas ngang yanikaingga apa kake nata asiknga bakngake yuat. Dasingge? Ginu kuupbamda ane apnanga dua sikut. Siwan wa aminda ginde tangge apbing.
1CO 16:18 Apuke natane musipma tapa kekekanggak. Sike wa aminda tupa gindane musipza papa kekekaking ngangu nata natapa siakan singgak. Siwan wa amindane umana ginda yapangenatnong.
1CO 16:19 Siwan Anututane aminabamu Esia kep komune yuaing aminda gaak wamu ginde danikaing. Sike Akwilaat gatu Priskaat gatu aminu Anutue inindetapnangge tapdukngane waapaatdane yotnane koke tumuk wam yakaingu wa amikatda ginu Buyambam tapaninde gepbiatang yuaing aminde gaak wamu kumzang siknga danikaing.
1CO 16:20 Sike notninu Jesue amina dakngake yuaing aminu kuupbamda gaak wamu ginde danikaing. Siwan ginu kuupbamda inandek inandek notza Jesuat nana aminu gaak wam yanike kataknga ipnong.
1CO 16:21 Sike na Pol. Nata ninane katakngata gaak wamu ginde danike matandamunggat.
1CO 16:22 Siwan aminu tapatuta musip gwaangu Buyambam tapaninde dua natangamunggau Anututa waapa tasiwan maiwikge yayok. O! Buyambam tapaninda apsok.
1CO 16:23 Buyambam tapaninu Jesuta musip kwikwiu ginde natandamuke gikat gatake yutnong.
1CO 16:24 Sike nata Krais Jesue gepbiatang yuke ginu kuupbamde musip gwaang natandamunggat. Unukan.
2CO 1:1 Na Pol. Anututa ina banipda siwan na tapan nata Jesu Kraisdane kwiikngaapa dakngake yuwawa aminda nae natapa aposel amin singgak. Siwan naat gatu Jesue puya amin notninu tapatu umana Timoti ngang inikamang kapaatda unekan gatake yuamak. Sike nitda pas asanu ginu Anututane amina dakngake Korin yot gapmane yuaing aminde gatu Akaia kep komune yuaing aminu kuupbamde matandamukamak.
2CO 1:2 Nitda tumuk wam yata Nanin Anutuat gatu Buyambam tapaninu Jesu Kraiskatda ginde musip kwikwik natandamat ginu musipza kwikwikngata yutnong.
2CO 1:3 Sike ginu Anututane umana yatangenatnong. Waapa Buyambam tapaninu Jesu Kraisdane Nana. Sike butaya akngae yapii Anutu unin. Ita aminu musia meya nataainggane musia pasiwan kwikwiknga sikaingunin.
2CO 1:4 Sike meya takngatu takngatu nae apan ngana ita natane musipma tasiwan kwikwiknga singgak. Siwan ngana ita naekan dua natake tasinggak. Aho. Ita amin bamde natake na gatangaman meya takngatu takngatu notninde apa kakengu nata wa amindane musia pasiwa kwikwiknga sining. Unzing ita natane musipma tasiwan kwikwiknga singgak binga nata ginu notnae pasidamitde natake Anututa na gatangamunggak.
2CO 1:5 Ngan. Meya takngatu takngatu iwanda enake Kraisde ima pakut bingata nae apuwawa buyambam singgak. Siwan ngana Krais waapata natane musipma tasiwan kwikwiknga singgak kaknga buyambam siknga singgak.
2CO 1:6 Siwan nata meya takngatu takngatu kakumu wa nata gin gatandamunangge natake nata Anututane puyana pasiwa buya aawan ita waiakngane ginu sandewikge tasisika meya waaknga pakum. Pake nata masande gindane musipza pasiwa kwikwiknga siningge natake ita natane musipma tasiwan kwikwiknga sikut. Siwan meya wa pakum taknga ginda pake ngana gindane musipza papa kekekawan ita gindane musipza pasiwan kwikwiknga sining.
2CO 1:7 Siwan na atnataat. Meya wa pakum takngata ginde apuwawan Anututa natane musipma tasiwan kwikwiknga sikut binga ita gindane musipza pasiwan kwikwiknga sining. Siwan nata unzing ginde natapa kekekawan ginu akekekake dua pimaning ngangu natane musipmaatangu nata kekeknga natayuat.
2CO 1:8 Siwan mate notna! Na ginde meya waaknga nae keu Esia ngang inikaing komune apbut takngae katak siknga natapningge nataat. Meya nata wa kakumu buyambam sikngata na tapaakusikut. Na tapaakusiwan nata apba kupit ngang natapbum.
2CO 1:9 Ngan. Iwanata atnuwa kupit ngang natapbum. Siwan ngana nae meya wa apbuu waaknga nata ninane kekeknga aknganae natapa kekeknga dua siwikge apbut. Ngan. Nata Anututa akupsa aminu gatuna pangenakgak kapaekan natapa kekekawikge meya waakngata nae apbut.
2CO 1:10 Siwan meya waakngata na paa nuwan kumbum takngane ita na sandekutde na anzing nataat. Ita masan kaya kuut na gatuna sandewik. Ngan. Ita gatuna na sandewikge natapa kekeknga singgak. Nata sanga waakngae apbakngake natayuat.
2CO 1:11 Siwan ginda na gatangamunangge natake Anutue tumuk wam ininong. Tumuk wamu asinggan iniwa Anututa natake na gatangaman kake aminu buyambamda ie inimbaknganing.
2CO 1:12 Sike sanga nata ie apbaknganggat takngae natake daniwa natapnong. Nata nina natapa natdetdetna kakaa siknga singgak. Siwan sanga nata ginde tasindamukumu wa Anututa na gatangaman sanga nomana akngakan tasikum. Tasike natdetdeu aminu Anutue masa imukainggane akngae dua natake tasikum. Aho. Anututa ninde musip kwikwik natanimunggak kakngane yuke nata ginde tasindamukum.
2CO 1:13 Sike wamu wa nitda ginde matandamukamak kaknga yapii kusopuknga dua. Aho. Ginda gisa take kendeke wamu waakngatane yapii anggaman natapningge matakamak. Sike na atnataat. Aminu gikat nana kunduta nae banip sikaing. Unzing nata tapduknga Buyambam tapaninu Jesuta gatuna apik gwene ginde banip siwit binga ginu kuupbamda nae banip siningge take nataat.
2CO 1:15 Sike sanga wa ginu nae banip sikaing kakngae natake nata ginde kunangge natapbum. Ginde kuke nata gikat gatake yuwatna ginda apbaknganing. Unzing tupa nikat gatake yukumang binga nata gin gatandama ginda gatusa bakngawa sipmaya siwikge natake ginde kunangge natapbum.
2CO 1:16 Nata tupa ginde gambok kukenga Masedonia kep komune kunangge natapbum. Siwan gatu na Masedonia teke nata ginde apuke yusika gatu na gin dandupnangge Judia kep komune kunangge natapbum. Nata Judia kep komune kusika sangae dua dapitde ginda na gatangamuningge natapbum.
2CO 1:17 Siwan ginu dasing nataaing? Nata ginde unzing kunangge natake ngana dua kukumdane yapii dasing? Asikaya nata natdetdeu anggaman dua natake yakum ba dasing? Ba sanga musia enayaaknga tawake tasike natane gupma gatangamuningge natake yakum ba dasing? Ba aminu tapatuta sanga takngatu tasinangge yake ngana dua tasiwik. Ba aho ngang yake ngana atasiwik binga nata waaknga tasikum ba dasing? Wena siknga.
2CO 1:18 Anututa siakan wam takngakan asinggan yanggak binga nata siakan wamban ginu danikum. Kem wamu takngatu nata dua siknga danikum.
2CO 1:19 Dasingge? Na gatu Silvenes gatu Timoti ngangga ginde banakan koke wamu Anututane waaknga Jesu Kraisde natake danikapbumangu wa ita natdetdeu anggaman dua natake tasikut ngangu ninda dua yakumang. Aho. Ita siakan wam takngakan asinggan yake tasikut ngang danikumang.
2CO 1:20 Ngan. Wamu Anututa nin gatanimunangge yawan kekekakut taknga Jesu waapata tasiwan buya asaawik. Tasiwan buya aawan ninda Anutue kekeknga natake itane umana yatangenake yutnim.
2CO 1:21 Siwan Anututa naat gikat kekekaniman ninda Kraisde kekeknga yuamang. Ngan. Ita nin papan ninda itane amina dakngake yuamang.
2CO 1:22 Ita nin pake inane Waung Kapa ninde nimukut. Unzing ikwawa toikga ikwawa matekge maakngine tuwang matakut taknga kake ikwawa ninane ngang natapik binga ita Waunga ninde niman pana nindupan inane amina siwik. Siwan ita Waungu ninde nimukuu waapae anzing natapnim. Ita inane Waunga Waapa ninde gwa niman nindane musipmikatang pukuke nin pake yuak. Sike masande Anututa inane sanga ninde nimunangge nataak kaknga kuupbam atnimik ngang natapna kekekanggak.
2CO 1:23 Sike nata kem wam yawa kakengu Anututa natane wai waaknga anggaman tapan tapik. Nata ginde kunangge natapbum ngana na gatuna natagwaanguke nata ginde kuke kaanga danike gindane musipza papa nomataning. Unzing tasiwa ginda nae semna natake yamandet sikaing kakngata kekekayak ngang natake nata ginde dua kukum.
2CO 1:24 Sike wamu wa yanggau ginda nae gepbiatang yutningge natake dua yanggat. Aho. Ginda Anutue natapa kekeknga gwa siwan yuaing. Unzingge nata gin gatandamunangge natake yanggat. Gin gatandama ginda musipza tatanga natake apbaknganingge natake yanggat.
2CO 2:1 Siakan. Nata ninane musipmaatangu anzingu gwa natapbum. Nata ginde gatuna kuke kaanga gatu daninangge apbitanggat. Nata kaanga daniwa ginda nae semna natapnang ngang natake na dua kuwit ngang natapbum.
2CO 2:2 Sike nata ginde kuke tasiwa ginda musipza meya natapanu asikaya aminu gikat nana tapatuta natane musipma tasiwan wikawik ba dasing? Wena.
2CO 2:3 Siwan pas tupan sanu nata ginde matandamukumu wa nata masande ginde kundopa ginda nae semna dua natapa na meya buyak dua yuwitde natake matakum. Ngan. Nata ginde natake ginu aminu natane musipma tasiwa wikawik amin ngang natake pas wasanu matakum. Sike nata ginu kuupbamde anzing natapa kekekanggak. Nata musipma tatanga natake apbakngawa nanduke ginu kuupbamda ina unzakan apbaknganing.
2CO 2:4 Ngan. Tupa nata pas ginde matandamukumu wa nata meya takngatu ginde damunangge natake dua nata matakum. Aho. Natane musipma meya siknga ginde natapbum. Natake kwanamu kumzang siyuk pas wasanu ginde matandamukum. Sike pas wasanu ginda kendeke nata ginde musip gwaang natandamunggat taknga anggaman siwan kaningge natake matakum.
2CO 2:5 Siwan aminu sanga maakngana kaya aknga tasikut tapae natake yawit. Ita maaknga ginu kuupbamde damukut ngana nae wena.
2CO 2:6 Sike aminu waapae ginu kuupbamda semna natangamuke inikwasiwa kukut takngae natapa take singgak. Siwan ginda meya kunduat ma imam. Meya wa ginda ie yake imukaing kaknga atenong.
2CO 2:7 Ateke waiakngana sandekngamuke itane musipna tasiwa kwikwikngata yuyok. Musia meya ita nataak kakngata buyambam siknga sike tasiwan maiwanu take dua siwik.
2CO 2:8 Unzingge ginda aminu waapae butaya natangamuke aminu kuupbamda kaningge sanga take aknga ie tasingamunong.
2CO 2:9 Ngan. Tupa nata pas sanu ginde matandamukumu wa nata gin pasiwa siwikge natake na ginde kunangge apbitakum. Apbitake na pas wasanu matake ginu natane wama apba tawaning ba apba sandetning ngang natake tasikum.
2CO 2:10 Sike aminu ginda waiakngana sandekngamukaingu waapatane waiakngana kaya kuut asandekngamunggat. Sike nata waiaknga sandekngamunggau wa nata gin gatandamunangge natake Kraisde gepbiatang yuke tasinggat.
2CO 2:11 Siwan ninu atnataamang. Setenda natdetdeu takngatu takngatu natake nin nipbike pasiwan mainimde tasinggak ngangu atnataamang. Sike ita unzingu ninu dua pasiwan mainimde natake nata aminu waapatane waiakngana gwa sandekngamunggat.
2CO 2:12 Siwan na wamu takeaknga Kraisda ninde tasinimukut taknga yanikapnangge nata Troas yot gapmane kundopa Buyambam tapata nae kepi tasingamukut.
2CO 2:13 Tasingaman yanikapbum ngana natane puya amin notna tapatu umana Taitas ngang inikamang kapata gin dapmake nae apikge yuwa maikut. Sike waapae kawa maiwan natane musipmaatangu ginde nangaakan natake nata notna Troas yot gapmane nana peke ginde kunangge Masedonia kep komune kukum.
2CO 2:14 Siwan ngana nata Kraisde gepbiatang yuwawa Anututa na gatangamuke nanitakuwan take siknga kunggat. Kuwawa Anututa na nanitakuwan kuke puyana pasiwa buya asaakgak. Buya aawan itane wamnata keu kuupbam tawamban sandekgak. Unzing kapanga take siknga akngata keu kuupbam tawamban sandewan aminu buyambamda natake apbaknganing binga Anututa gatangaman itane wamna yanitakuke tasinggat.
2CO 2:15 Ngan. Anututa puya nata wa tasinggat takngae natapan take singgak. Unzing sanga kapanga take siknga aknga Kraisda Anutue iman natapan take siknga singgak binga ita puya waakngae natapan take singgak. Siwan puya wa nata tasitakunggat takngata kapanga akngata binga keu kuupbam tawamban sandewan aminu kuupbamda wamu waaknga atnataaing. Aminu Anutue gepbiatang kopnangge tasikaing amikat gatu aminu Anutue masa imuke toknga pananga akngae gepbiatang kopnangge tasikaing amin kaya kuut atnataaing.
2CO 2:16 Kunduta wamu wa yanikapmanggat takngae natapa wamu toknga pananga aknga singgak. Siwan ngana kunduta wamu waakngaekan natapa wamu take yutnanga aknga singgak. Siwan aminu tapatuta ina banipda siwan puya waaknga take tasiwik ba dasing? Wena siknga.
2CO 2:17 Sike ginu atnataaing. Aminu kunduta enake Anututane wamu takeaknga yanikapsa amin binga dakngakaing. Dakngake siakan wam takngaat gatu kem wam takngaat ngangu bokngan yawa take dua singgak ngana aminu buyambamda wamu waaknga natake siakan wam ngang nataaing. Siwan ngana na aminu wa kem panzike yakaing amin binga dua dakngake tasinggat. Aho. Anututa na take nanitewan kuke nata musipmane takngaaya dua natake Kraisdane gepbiatang koyuke Anututane kaine inane siakan wam takngakan yanikapmanggat.
2CO 3:1 Siwan wamu nata wa yanggat takngae natake ginu dasing nataaing? Asikaya nata gatu tuwanguke ninane umana yatangenakgat ba dasing? Ba asikaya na aminu kundu binga dakngake nata ginde pas sasanu aminda natane umana yatangenake matakaing san damunangge natake yanggat ba dasing? Ba ginda nae apbakngake pas aminu kundue matayamuningge natake yanggat ba dasing? Wena siknga.
2CO 3:2 Siwan natane musipmaatangu ginde natapa ginda pas aminda notnatane umana yatangenatnangge pas matakaing binga dakngakaing. Ngan. Wamu nata ginde kuke danikapbumu waakngata gin pasiwan ginda amin noman dakngawa danduke aminu kuupbamda nae natapa aminu Anututa tapan tasinggat tapa singgak.
2CO 3:3 Siwan aminu kuupbam atnataaing. Ginda pas Kraisda natane umana yatangenatnangge matakut binga dakngake yuaing. Unzing pas pepa sane matakaing ba mama wamu sup sane Anututa matakut binga dua dakngakaing. Pepa san ba sup sanu wa apmuban kuwanu wamu wena siwik. Siwan ngana Kraisda na nanitewan nata ginde kuke itane wamna danikapa natake ginda musipza tapa tekwamban ie kuking. Ngan. Wamu waaknga Anutu kayuk asinggan yuak kapatane Waung Kapata gindane musipzaatang pamukut takngata kekeknga siknga asinggan yuwik.
2CO 3:4 Sike wamu nata wa yanggau Kraisda natane musipma tapan kekekawan nata Anutue natake ita na take nanitewan kuke tasinggat ngang natapa kekekanggakge natake yanggat.
2CO 3:5 Sike ita na dua takut gamu nata ninatakanu puya waaknga tasinanga dua. Wena siknga. Anututa na gatangaman tasinggat.
2CO 3:6 Ngan. Ita na gatangaman nata itane puyana tasike wam kwikwiu kayuk kaknga ita yawan kekekakut takngae natake yanikapmanggat. Sike wam kwikwiu wa kayuk kaknga ita yawan kekekakuu wa mama wamu tupa ita matakut binga dua daknganggak. Aho. Wamu kayuk kaknga Waung Kapata nindane musipmikatang pamunggak. Sike wamu waakngata nindane musipmin papan wikawan takekan yutnim. Sike ngana mama wamu wa tupa siknga matakut takngata nindane waiaknganinu anggaman tapan tapanu ninda undang kumnim.
2CO 3:7 Siwan tupa siknga Anututa inane mama wamu katau kuut musaat suu sayane matakut. Matake Mosesde iman pake aminabamde yamunangge apbut. Anututane kakaa akngana buyak apuke itane nomna waenga siknga sikut. Siwan waenga waakngata sike yuwawan Isrel nana aminda nomna kanangge ngana maaknga siwan dua kaking. Dua kawawa waenga waakngata asopukut. Siwan ie dasing yanim? Mama wamu waakngata ninu akumnanga akngane nipmambik. Sike mama wamu waaknga yamunangge tasiwan kakaa waakngata kakaayaman mama wamu waakngata sanga take siknga aknga sikut.
2CO 3:8 Siwan wam kwikwiu kayuk kaknga nata wa yanikapmanggat takngane Anututa inane Waunga aminde yamuwawan sanga moo binga singgak ba dasing? Aho. Mama wamu wa tupa yamukut taknga yapbike ita sanga take siknga aknga daknganggak.
2CO 3:9 Ngan. Mama wamda nindane waiaknganinu anggaman tapa tapan ninu akumnanga akngane nipmanggak ngana mama wamu waaknga aminde yamunangge tasiwawan sanga take aknga sikut. Siwan wam kwikwiu wa kayuk kakngata nin pasiwan ninda Anutue nomune amin noman daknganim. Unzingge wamu waakngata sanga take siknga aknga singgak.
2CO 3:10 Siakan. Mama wamu wa tupa sanga take sikut taknga wamu wa apmanu take siknga singgak kakngata tanguwan pimake sanga moo binga singgak.
2CO 3:11 Siwan mama wamu wa pimake sanga moo binga singgak kaknga Isrel nana aminde yamunangge tasiwan sanga take aknga sikut. Siwan wamu kekeknga siknga asinggan yuwiu waakngata sanga take siknga aknga singgak.
2CO 3:12 Siwan wamu wa yanggat takngae natake wam kwikwiu waakngata na gatangamikge apbakngake kayuat. Kayuke wamu kusopuknga binga dua yanikapmanggat.
2CO 3:13 Siwan sanga Mosesde nomnane waenga siknga sikut takngata mateknga sitakuke sopuwikge natake Mosesda inane nomna tauk pipitda takusopuke notna Isrel aminda dua kawawa wena siwik ngang natake tasikut. Siwan ngana sanga wa binga nata dua tasinggat.
2CO 3:14 Sike Isrel nana aminu waakwakgane natdetdetna dapaknga siwan anggaman dua natake yuking. Yuke wamu tupa siknga Anututa yawan kekekakut taknga kendeke ngana wa aminda yapii anggaman dua natapbing. Siwan apu tapduu apmanu aomune apunggak. Unzing Mosesda nomna tauk pipitda takusopuwawan notnata nomna kananga dua sikut binga Isrel nana aminda wamu waaknga asinggan kendeke ngana itane yapii dua nataaing. Siwan Mosesda yusika tauk pipiu wa nomna takusopukut taknga sandewan aminbamda itane nomna anggaman kaking binga Kraisda apuke sanga wa ninde tasinimukut takngae natapna wamu wa tupa siknga Anututa yawan kekekakut takngae yapii agamanu gwa singgak.
2CO 3:15 Ngan. Wa aminu tupa siknga yukingga wamu waaknga kendeke ngana natdetdetna anggaman dua natake itane yapii dua natapbing. Siwan apu tapduu apmanu aomune apunggak.
2CO 3:16 Sike ngana wa aminda musia tapa tekwamban Buyambam tapaninde kuwanu natdetdeu wa dapaknga sikut takngane Anututa sandewik. Sandeke natdetdetna papan nomatawa wamu waakngatane yapii anggaman natdetning.
2CO 3:17 Ngan. Yapii anggaman natdeke takekan yutnanga akngatane yapii Buyambam tapa unin. Siwan aminu tapatuta natdetdetna anggaman dua natake apbotasukuke na mama wam tawake tasiwanu Anututa na nandupan take siwik ngang natapik. Natapan ngana Buyambam tapanindane Waung Kapata aminu waapatane musiaatang pukuke tapik. Take ita natdetdetna anggaman dua natake botasukunggau waakngane waapa sandewik.
2CO 3:18 Siwan ninu kuupbamda sanga Anututa nin gatanimuke tasikut takngae anggaman natdeke ie natanggamatake Buyambam tapaninde natapna nomana siknga apa siwik. Sike ninda nomana siknga waapa binga daknganim. Unzing gunzitdane waengata glas sakatang kawan waengata amindane nopatang tapan waenga siwik binga ninu wamu take siknga waakngae natanggamatake tasikengu ninda amin noman daknganim. Tupanu take daknganim. Ge gatu masanu takesim daknganim. Dakngake ina unzakan tasitakusika masande aminu nomana siknga Anutu binga daknganim. Siwan puya waakngatane yapii Buyambam tapaninu unin. Ngan. Waung Kapata nin pasiwan aminu nomana siknga daknganim.
2CO 4:1 Siwan Anututa nae musia kwikwiknga natangamuke ita puya nae namukut. Nae naman tasiwawa meya takngatu takngatu iwanata enake nama pake ngana na puya wa nae namukut taknga tasinangge semna dua nataat.
2CO 4:2 Aho. Nata sanga maakngana kaya aknga kuupbam gwa bitapekum. Bitapeke nata kemu dua panzike tasinggat. Ba Anututane wam yanikapnangge natake wamu siakan wam takngaat gatu kem wam takngaat ngangu takngaaya dua yanggat. Aho. Nata Anutue kaine yuke siakan wam takngakan yanikapmake tasitakuwa aminu kuupbamda na nandupa aminu nomanaapa singgak.
2CO 4:3 Siwan wamu wa yanikapmanggat takngae natake aminu kunduta ie natapa kusopuknga binga siwiu wa aminda waiaknganae toknga pananga kepi apane sukukaing aminu unin.
2CO 4:4 Ngan. Setenu aminu Anutue masa imukaingga ie inindatakaing kapata tasike wa aminda Anututane wamu takeaknga natapningge kepi asumuyamukgak. Umuyaman ninu Kraisde natapna ita Anutu binga singgau waapatane wamna waakngata wa amindane musiaatangu dua pukunggak. Unzing kakaa akngata wa aminde kakaayamikge kepi umuban zikaa akngane yuaing binga tasiyaman wa aminda Kraisde natapa sanga moo binga singgak. Siwan ngana ninda ie natapna sanga tupan siknga binga singgak.
2CO 4:5 Siwan ginu atnataaing. Nata ninae wam taknga dua yanikapmanggat. Aho. Nata Jesu Kraisde natake ita nindane Buyambam tapanin ngang yanggat. Yake na Jesue puya tasingamunangge natake gin gatandamunangge nataat ngang yaninggat.
2CO 4:6 Dasingge? Tupa Anututa wamu takngatu anzing yakut. Zikaa dakaatangu kakaa akngata take kakaayok ngang yakut. Siwan Anutu wamu wa yakut tapata sanga kakaa akngata tawamban sandekgak kaknga binga tasike itane wamna natane musipmaatang tamukut. Tamuban nata Kraisde yapii anggaman nataat. Ngan. Kraisde yapii anggaman natake nata Anutue anzing natdekgat. Nomana sikngaapa unin. Na natdetdeu waaknga natdewitde natake ita inane wamna musipmaatang tamuban kakaa sikut.
2CO 4:7 Siwan na anzing nataat. Na Anututa kaik pake aminu wa tumukut tapatane dongune aakum. Aake na akumnanga amin dakngake kekeknga asinggan dua yuwit ngana ita inane natdetdeu take siknga waaknga nae namukut. Nae naman take nata yanikapmake tasiwa buya aawan kake aminu kuupbamda nae dua natapning. Aho. Anututane kekeknga aknganata puya waaknga pasike gatanimunggak ngang natapning.
2CO 4:8 Siakan. Na puya waaknga tasitakuwawa iwanata enake meya takngatu takngatu nae namuking ngana meya waakngata na dua tasiwan maikum. Ngan. Na puya tasinangge tasiwawa ngana kepi meya waakngata umuban ngana Anututa kepi takngatu tasingaman undang dua pimakum.
2CO 4:9 Sike iwanata enake na wai tasinangge tasiking ngana Anututa na dua napmake kukut. Na wa tasiwa maiwitde tasiwawa ngana ita na gatangaman nata akekekake yuke puya dua tewa pimakut.
2CO 4:10 Ngan. Meya takngatu takngatu Jesue apan ita undang kumbut binga nata meya asinggan pake sukunggat. Sike masande nata akupit katangga gatuna enake Jesuta enake kayuk yuak binga dakngake yuwit.
2CO 4:11 Sike na kayuk yuke Jesutane puyana tasiwawa iwanata enake na nutnangge asinggan tasikaing. Tasiwa nata meya waaknga pake sukuwawa ginu na akumnanga amin nanduke kepi Jesuta tawake tasikut takngane sukunggak ngang natapnong.
2CO 4:12 Kepi waakngane sukuke puya tasiwawa meya akumnanga akngata asinggan na tanggak. Siwan ngana sanga waaknga buya aawan ginu sanga kayuk asinggan yutning kaknga pake yuaing.
2CO 4:13 Siwan wamu takngatu Anututane wam yanikapsa aminu tapatuta tupa siknga anzing matakut, “Nata Anutue natapa kekekawan wamu waaknga yakum,” ngang matakut. Siwan aminu wamu waaknga matakut tapata Anutue natapan kekekakut binga nata Anutue natapa kekekawan itane wam yanikapmanggat.
2CO 4:14 Ngan. Nata Anutue natapa kekekanggak ngang yanggau wa Anutu Buyambam tapaninu Jesu akumbut katangga gatuna tangenakut tapata yawan Jesuta na akupit katangga tangenawik ngang natake yanggat. Na tangenake ita naat gikat ninipake Anutue nomune pakuwan takekan yutnim ngang natake yanggat.
2CO 4:15 Siwan ginu natapnong. Nata gin gatandamunangge tasiwawa meyata apa pake ngana puya tasiwawa Anututa musip kwikwiu aminde natayamuke inae patakunggawan buyambam siwik. Siwan aminu buyambamda ie inimbakngake itane umana yatangenawa buyambam siknga siwik.
2CO 4:16 Siwan unzingge na puya waaknga tasinangge dua tuyukanggat. Ngan. Natane gupma wai sinangge siwan ngana natane musipmaatangu tapdukbam asinggan Jesue kekeknga natayuat takngata buyambam singgak.
2CO 4:17 Siakan. Nata meya wa asinggan kaat takngae dua natanggamatanggat. Aho. Sanga apmanu kainata dua kaat takngae nata asinggan natanggamatanggat. Dasingge? Sanga dua kaamangu wa kekeknga asinggan yutning ngana sanga kaininda akaamangu wa tapduu dapaknga siknga yuke wena asining. Siwan nata meya wa asinggan kaatde natapa sanga mateknga binga daknganggak. Meya waakngata tapduu dapaknga siknga yuwiunin. Sike meya waaknga buya aawan Anututa natane umana aknga yatangenawan asinggan asinggan yuwik. Siwan sanga waakngae natapa sanga buyambam siknga singgakge iekan nata asinggan natanggamatake yuat.
2CO 5:1 Sike natane gupmae natapa sel you gwendu binga singgak. Toikngata yotna siknga kunangge natakengu ita sel yot gwen waike takuwik binga nata akungwake gupmasan teke kuwawa aminda gupmasan taku kwaining. Siwan na. Nata yotna siknga Anututa ina enandang tasingaman kekeknga asinggan yuak gwene koke yuwit.
2CO 5:2 Sike ngana na keu ayuamang komune yuke nata you enandang yuak gwende natake butaya wamu yanggat. Sike you wa gwenu gupma kayuk take yuwitde natake butaya wamu yanggat.
2CO 5:3 Unzing aminda tauu bumi teke ita kwaga yutnangge bitake tauu kayuk gom tasiwik binga nata gupma kayuk tanangge take siknga nataat.
2CO 5:4 Sike nata gupma kepda tumukut san take yusika gupma kayukge natake nata butaya wamu asinggan yanggat. Sike butaya wamu nata yanggau wa nata gupma kepda tumukut san tenangge dua yanggat. Aho. Nata kayuk yusika gupma kayuk tanangge nataat. Gupma kayuk tapa sanga akumnanga akngane Anututa na sandewan nata dua kungwake kayuu asinggan yutnangge natake wamu waaknga yanggat.
2CO 5:5 Siwan Anututa ina na gupma kayuk tapitde natake na tandakngakut. Tandakngake ita inane Waung Kapa nae naman take yusika masande ita gupma kayuu atnamik ngang nataat.
2CO 5:6 Sike ita sanga waaknga nae namikge apbakngake natayuat. Sike na atnataat. Na gupma kepda tumukut san take kayuk yusika nata sanga kainata akaat takngae dua natanggamatake sukunggat. Aho. Nata sanga kainata kananga dua akngae natanggamatake sukunggat. Sukuke enandang keu Buyambam tapaninda yuak komune kunanga dua. Wena.
2CO 5:8 Ngana nata kayuk yuke puya tasiwitde apbakngake ie musipmaatangu meya dua nataat. Sike ngana natane gupma kepda tumukut san teke undang kunangge take siknga nataat.
2CO 5:9 Sike nata keu ninda ayuamang komune yuwit ba ie kukengu undanga. Asinggan nata kekeknga siknga sanga ita take nataak kaknga tawake tasinangge natanggamatanggat.
2CO 5:10 Ninu kuupbam Kraisdane nomnane paku nipmamban ninu wamnin yanim. Yana sanga kuupbam ninda gupminu kepda tumukut san pake yuke tasikumang kaknga ita usanziwik. Usanzike natapan sanga waiaknga siwanu ita ninu kuupbam inandek inandek pasiwan mainim ba sanga takeaknga siwanu ita ninde inandek inandek take pasiwan yutnim.
2CO 5:11 Siwan ita nin usanzike tasiwikge natake nata ie akgwaukgat. Unzingge nata aminu buyambamdane musia pangenawa ie kuningge tasinggat. Tasiwa natdetdeu natane musipmaatangu nata nataat takngata anggaman siwan Anututa atnataak. Siwan gikaya kuut natdetdeu wa nata natake puya tasinggat taknga anggaman natapningge take nataat.
2CO 5:12 Sike wamu nata yanggau wa nata ninae umana yatangenawa ginda nae natapa aminu umana kayaapa siwikge dua natake yanggat. Aho. Aminu kunduta inane natake aminda ninde apbakngakaing ngang natake inane umana yapangenakaing. Sike ngana wa aminda moo siknga inane umanae bakngake nae sapdukngamuwawanu ginda yake anzing yaninong. Ginu unzingu ma yawam. Ita Anutue gwauke puya kekeknga tasike aminu buyambamdane musia pangenawan Anutue kuningge tasinggak ngang yake yaninong.
2CO 5:13 Ngan. Nae natake wa aminda yake ita atdatdaptake tasinggak ngang yake sapdukngamanu ginda yake ita Anutue natanggamatake tasinggak ngang yaninong. Sike ginda nae natapa aminu natdetdetna nomana sikngaapa siwanu ita nin gatanimunangge tasinggak ngang natapnong.
2CO 5:14 Dasingge? Kraisda ninde butaya natanimunggak kakngata na tanomanuwan tasinggat. Ngan. Ita ninde butaya natanimuke ita aminu tapatukan ngana ninu kuupbamde tangge kungwanimukut. Unzingge sanga ninde wa kumbut takngata yutake apu aminu kuupbam panggak ngang nataat.
2CO 5:15 Siwan aminu kundu pake wa aminu waiaknganae toknga pananga akngane sandewan kayuk yutnanga aknga pake yutningu wa aminda sanga inane akngaekan dua natanggamatake sukuningge natake ita kungwanimukut. Wa aminda inane sanga akngae dua natake aminu wa nin gatanimunangge kungwake gatuna akumbut katangga enakutdane sanga akngae natanggamatake sukuningge natake ita ninde kungwanimukut.
2CO 5:16 Unzingge nata aminu tapatu usanzitnangge natakengu nata kainatakan kake dua usanziwit. Sike tapdukbamu asinggan nata unzingu dua tasiwit. Tupa nata Krais usanzike kainata kake usanzike natapa aminu moo apa sikut. Siwan ngana apmanu nata musipma tapa tekwamban unzingu ie dua nataat.
2CO 5:17 Siakan. Aminu tapatuta Kraisde kuwan iat musia takngatukan natapzanu Anututa waapa tasiwan natdetdeu kayuk kaknga pake aminu inata kundu dakngawik. Dakngawan natdetdeu wai tupa natapbut taknga Anututa kaiwan kungaman natdetdeu kayuk kaknga musiaatang tamuban yuwik.
2CO 5:18 Sike Anutu sanga waaknga kuupbamdane yapii. Tupa na itane iwana dakngake yukum ngana ita Krais initewan apuke kepi tasiniman ninda tana tekwamban Anutue kunimde tasikut. Unzingge nata ie kuwa iat musipmiu takngatukan nataamak. Siwan ita puya nae naman tasike nata aminu ie masa imukaingge kuke gatayama wa aminda musia tapa tekwamban ie kuke iat musia takngatukan natapning.
2CO 5:19 Sike puya waaknga tasike wamu nata yanikapmanggau wa anzing. Aminu kuupbamda Anutue masa imuke itane iwana dakngake yuaing. Ngana Anututa ina banipda siwan aminu kuupbamda sanga ie iwana dakngake tasikaing kaknga teke iat musia takngatukan natake yutningge take natapbut. Natake Krais initewan apuke ie iwanu wa dakngake yuking kaknga tanguwan kupikge puya tasikut. Tasiwan Anututa waiaknga kuupbamu wa aminda tasiking kaknga asandeyamukut. Sandeyamuke ita na take nanitewan kunggat. Kuke nata yanikapmake ninu aminu kuupbamdane waiaknganinu Anututa sandetnimuke ninda Anutue iwan dakngakumang kaknga teke itane notna dakngake iat gatake yutnimde kepi tasinimukut takngae yanikapmanggat.
2CO 5:20 Ngan. Nata Kraisde wam take yanikapmanggau wa nata Anututa tasinggak binga tasike aminu kuupbamde yayawanggat. Yayawake nata anzing yaninggat. Ginda sanga Anutue iwana dakngake tasikaing kaknga teke ie kunong. Kuke iat musipza takngatukan natake yutnong ngang yake yayawanggat.
2CO 5:21 Siwan Jesu waiakngana wena. Ita kepi nomana siknga akngane sukuwawan kake Anututa ninde natake ita Jesu tewan ita waiaknganin pake ninde tangge kungwanimik kapa dakngakut. Dakngake nin gataniman ninda ie kuke iat gatake yuke Anutue nomune amin noman dakngake yutnim.
2CO 6:1 Siwan nata Anutuat musipmiu takngatukan natake puya tasikamak. Tasike nata ginde musipmaatangu butaya siknga natake daninggat. Anututa ginde musip kwikwik natandamuke sanga tasindamukut. Siwan ginda sanga waakngae natapa sanga moo binga dua siwan. Aho. Ginda Jesue katak tagwautnong.
2CO 6:2 Tagwauke yuwawa nata wamu Anututa anzing yakut takngae daniwa natapnong. “Tapduknga nata tekum gwene gata nae apu naniwi natapbum. Tapduknga aminu kuupbam gatayamuke waiakngane sandetnanga gwene nata ga gatagamukum,” ngang yakut. Siwan ginu natapnong. Tapduknga ita nin gatanimunangge tekut gwenu gwa apunggak. Unzingge apmanu tapduu ayuamang komune ginda ie kunong. Kuwa ita gin gatandamuke ginda waiaknga tasikaingune ginu sandewik.
2CO 6:3 Siwan nata natake aminda Anututane puya nata tasinggat takngae sapdutnang ngang natake nata kepi nomana akngane sukunggat. Sukuke aminu kuupbamda nae natapa take siwikge tasinggat.
2CO 6:4 Ngan. Aminda nae natapa Anututane puya amina siwikge tasinggat. Tasiwa meya takngatu takngatu iwanata enake nama ngana akekekake puya dua tekum.
2CO 6:5 Siakan. Aminda enake na kayata ipmapa nuking. Gatu na kaautde napmaking. Gatu aminbamda naat amnangge natake nae apuke naninggamataking. Siwan nata puya kekeknga siknga tasikum. Gatu zikaane ngana amin gatayamunangge natake dapuna dua peke kayukum. Gatu nata puya toma buyak tasike yukum.
2CO 6:6 Gatu natdetdeu takngatukan natake tasikum. Gatu natdetdetna anggaman natake yanikapbum. Gatu meya buyambam nae nama pake ngana puya tasinangge semna dua natapbum. Aho. Akekekake tasikum. Gatu aminu kuupbamde butaya natake gatayamukum. Ngan. Anututane Waung Kapata natane musipma tangenawan nata musipmaatangu takngaaya dua natake aminde butaya siknga natayamukum.
2CO 6:7 Natayamuke siakan wamban yanikapbum. Siakan. Anututa na gatangaman nata itane kekeknga akngane yuke tasikum. Siwan amak aminda amakge sanga kwaapzang pake amakaing binga nata sanga wa nomana aknga kwaapzang tasinggat.
2CO 6:8 Sike aminda natane umana yatangenakaing ba nae wam sapduke ayaitapaakusikaing. Undanga. Nata puya atasinggat. Gatu aminda nae natapa kem amin tapa singgak ngana yake siakan wamban yanikapmagat.
2CO 6:9 Gatu aminda na nanduke zaneka nanaapa ngang nataaing ngana aminu buyambamda natane umana atnataaing. Gatu aminda nae natapa aminu akumnanga apa singgak ngana nata kayuk yuat. Ngan. Aminda meya buyambamu nae nama pake ngana na dua kumbum.
2CO 6:10 Gatu aminda nae natapa aminu musia meya natake yuak kapa singgak ngana nata apbakngake yuat. Gatu aminda nae natapa aminu sangaapana wenaapa singgak ngana nata aminu buyambam gatayamunggat. Ngan. Nae natapa aminu sangae dapmagat tapa singgak ngana sanga Anututa tanomanuke nae tengamunggakge natake sangae dapmagat ngangu nata dua natake yuat.
2CO 6:11 O ginu Korin yot gapmane nana amin! Nata wamu wa ginde daninggau nata musip gwaang siknga natandamuke wamu natane musipmaatang nataat taknga danikapmanggat.
2CO 6:12 Nata ginde musip gwaang natandamunggat ngana ginda nae baniu kekeknga dua sikaing.
2CO 6:13 Siwan ngana nata ginde natapa ginu natane waaknga yapana binga siwan nata ginde daninggat. Ginda yake nae musip gwaang natangamunong.
2CO 6:14 Ngan. Nae musip gwaang natangamuke ginda aminu Anutue masa imukaing amikat gatake ma sukuke tasiwam. Asikaya aminu nomana siknga akngane sukunggak kapaat gatu kepi gutonga akngane sukunggak kapaatda unekan gatake sukusan ba dasing? Wena. Ba asikaya kakaa akngaat gatu zikaa akngaatda unekan gatake yutzan ba dasing?
2CO 6:15 Asikaya Kraisda musia takngatukanu Setenkat atnatapzan ba dasing? Ba asikaya aminu Anutue masa imunggak kapata musia takngatukanu ginu Anutue gepbiatang yuaing amikat atnatapning ba dasing?
2CO 6:16 Ba asikaya Anututane yot takwan gwene ninda anutu pupukngatane weena take penim ba dasing? Ginu atnataaing. Anutu kayuu asinggan yuak kapatane yot takwan gwen binga ninda dakngake yuamang. Unzing wamu takngatu tupa Anututa yakut binga dakngake yuamang. Sike wamu waaknga anzing, “Nata wa amikat gatake yuke wa aminde banakan sukuwit. Siwan wa aminda natane aminabam dakngake nae natake nindane Anutunin ngang yaning,” ngang yakut.
2CO 6:17 Yake Buyambaminu waapata wamu takngatuat anzing yakut, “Ginda wa aminde banakan enake wa aminu peke ginda paku keu komdune kuke gisatakan yutnong. Yuke ginda sanga waiakngae masa imuke yuwanu nata ginde natapa take siwik.”
2CO 6:18 “Siwan nata gin toike gindane nanza binga dakngawa ginda natane waaknga yapana binga dakngake yutning,” ngang Buyambam tapaninda yakut.
2CO 7:1 Wamu wa Anututa yawan kekekakuu wa ita ninde natake yakut. Unzingge ninda ie natake sanga nin pasiwan aminu wai amin daknganim takngae apbitateke yutnim. Yuke ninda Anutue akgwauke kepi nomana siknga akngane sukunangge tasinim.
2CO 7:2 Siwan ginda nae musipza kekeknga natapnong. Nata aminu tapatu dua tasiwa maikut. Ngan. Nata aminu tapatutane natdetdetna dua tasiwa maikut. Sike nata aminu tapatu kemu dua tanzike itane sangaapana kaiwa kuking. Wena siknga.
2CO 7:3 Sike wamu nata yanggau wa ginde dua yamangusipa yanggat. Aho. Wamu tupa nata ginde danikum taknga ginu atnataaing. Nata ginde musip gwaang natandamunggat. Natandamuke nata tapdukbamu asinggan gikat gatake yutnangge take siknga nataat. Sike yusika gin banakan kupanu take siwik ngang nataat.
2CO 7:4 Natake nata ginde anggaman siknga daninggat. Sike nata gindane umanza asiknga yapangenakgat. Ngan. Ginda natane wama gwaamuke tasikaing kakngata natane musipma tapan kekekanggat. Siwan iwanata enake nae meya buyambamu asinggan namuwawa ngana natane musipmaatangu nata kumzang siknga baknganggat.
2CO 7:5 Ngan. Tupa nata Masedonia kep komune apundoke ngana ugwak saakaya meya takngatu takngatu nata kakum. Kake musipma kwikwikngata yutnanga dua sikut. Aho. Meya takngatu takngatu nae apbing. Aminda na tasiwa maiwitde kekeknga tasiking. Tasiwa nata puya gwauya buyak tasike yukum.
2CO 7:6 Siwan ngana Anutu aminu meya buyak yuke nangaakan nataaing amin gatayamuke musia papan kekekakaing kapata natane musipma tapan kekekakum. Ngan. Taitasda gikat gatake yusika gin dapmake apan kake nata ie apbakngakum.
2CO 7:7 Ita apuke wamu ginda itane musia tapa kekekakut takngae na nanikut. Nanike ginu na nandupnangge musipzaatangu toknga siknga nataaing. Gatu ginu musipza tapa tekwamban waiakngasae meya siknga natake yuaing. Gatu ginu nae musipza kekeknga nataaing ngangu wamu waaknga nae nanikut. Naniwan natake nata ginde asiknga bakngakum.
2CO 7:8 Sike na atnataat. Pas sanu nata tupa ginde matandamukumu wa kendeke ginda musipza meya natapbing. Siwan ginda meya natapbing kakngae natake nata ginde butaya natandamukum. Ngana ginda musipza meya natake zetgaman musipza tapa tekwamban takekan sukukaing ngang Taitasda naniwan natake butaya wa nata natapbum taknga wena sikut. Wena siwan nata natake pas wasanu take matandamukum ngang natake apbaknganggat. Sike nata apbaknganggau wa ginda meya natapbing kakngae dua natake yanggat. Aho. Ginda musipza tapa tekwamban takekan sukukaing kakngae natake apbaknganggat. Ngan. Ginda waiakngasae natake musipza takngatukan Anutuat natapbing. Natake ginda musipza meya siknga waiakngasa tasikingge natake yuking. Unzingge pas wa nata matandamukum sanda ginu dua pasiwan maiking. Aho. Ita gin gatandamukutde natake nata apbaknganggat.
2CO 7:10 Sike na atnataat. Aminu tapatuta Anutuat musia takngatukan natake ita musia meya siknga sanga waiakngana tasikutde natapiu waapata musia tapan tekwamban Anututa gatangamuke aminu waapa sanga toknga waiaknganae papik kakngane sandewik. Sandewan asikaya aminu tapatuta ie meya natapik ba dasing? Wena. Siwan ngana aminu Anutue masa imunggak kapata sanga tapatue musia meya natake ngana ita musia dua tapan tekwambik. Dua tapan tekwambanu meya waakngata aminu waapa tasiwan maike ita undang akupik.
2CO 7:11 Siwan ginu atnataaing. Gindane musipza meya natapbingu waakngata gin daniyapiban ginda enake waiakngasa wa ginda tasiking kakngae natake zetgaman bitateking. Ngan. Ginu wamza yatapa takawikge asenake tasiking. Asenake tasike ginu sanga wai waakngae semna siknga natapbing. Natake Anutue gwauke wai waakngata wena siwikge musipzaatangu toknga siknga natapbing. Natake ginda aminu wai waaknga tasikut tapatane natdetdetna tapa nomatawikge akekekaking. Akekekake tasiwa nomatawan ginu gutongasa wena ngangu anggaman gwa singgak.
2CO 7:12 Siwan siakan. Tupa nata pas wasanu ginde matandamukum ngana nata aminu wai wa tasikut tapaekan natake dua matakum. Siwan aminu sanga waiaknga tasike ita aminu tapatue meya imukut. Sike aminu ita meya wa imukut tapaekan natake dua matakum. Aho. Nata gikat kuutde natake matakum. Ngan. Sanga ginda nae musipza kekeknga siknga nataaing kakngata anggaman siwik. Anggaman siwan sanga wa Anututa ie atnataak kakngae natake yutningge matakum.
2CO 7:13 Siwan ginda sanga waakngae natake apbakngakaing kakngata natane musipma tasiwan kwikwikngata yuat. Sike Taitasda gikat gatake yuwawa ginda itane musia tasiwa kwikwikngata yukut. Siwan sanga ginda unzingu wa tasiking kakngata natane musipma tapan kekekake kumzang baknganggat.
2CO 7:14 Ngan. Tupa nata ginde natake Taitas inike gindane umanza yapangenakum. Sike wamu wa nata ginde musip gwaang natandamuke yakum taknga kem dua sikut. Unzing wamu kuupbamu nata gin danikumu wa siakan wamban yakum binga nata ginde natake wamu Taitas inikumu wa siakan siknga sikut.
2CO 7:15 Siwan tupa nata Taitas waapa initewa kuke ita ginde kundopan kake ginda take siknga yotzane takopbing. Takoke natane wama gwaamuke sanga waie asiknga gwauking. Siwan Taitasda sanga ginda unzing tasiking kakngae natanggamatake ita ginde musip gwaang natandaman buyambam singgak.
2CO 7:16 Siwan na. Nata ginde nangaakan dua nataat. Aho. Ginda sanga take akngakan asinggan tasining ngang natapa kekekawan na asiknga bakngake yuat.
2CO 8:1 Siwan mate notnabam. Sanga Anututa tasikut takngae natake nata gin daniwa natapnong. Ita musip kwikwiu inane aminabamu Masedonia kep komune nanae natayamuke gatayamukut.
2CO 8:2 Siwan tupa wa amindane iwanata enake meya takngatu takngatu yamuking. Yamuwawa wa aminda sangaapana wena amin dakngake gatukande upeeke yuwawa ngana Anututa musia pangenawan asiknga bakngake yuking. Bakngake yusika wa aminda notna gatayamunangge natake sangana dua siknga kotnaking.
2CO 8:3 Aho. Wa aminda inane mani usanzike buyambam muke upeetnam ngang dua natake mani kwaapzang peke tasiwa kakum. Ngan. Wa aminda ina banipda siwan
2CO 8:4 notna Jesuat nana amin gatayamunangge take siknga natake na naniking. Nanike nata mani gwa pekingu pakuke Anutue aminabamde yamitde kekeknga naniking.
2CO 8:5 Sike sanga wa aminda tasikingu wa nata tupa wa aminde natake mani mateknga ba pening ngang natapbum taknga binga dua tasiking. Aho. Tupanu wa aminda Buyambam tapaninde kuke ie gepbiatang koke gitna siknga yuking. Yuwawa Anututa wa amindane musia pangenawan puya waaknga tasinangge nanike nata natdetdetna panomanuwitde yaking.
2CO 8:6 Unzingge nata Taitas aminu puya take waaknga gin banakan koke tuwanguke tasikut tapae kekeknga inike ita ginde gatuna kuke tasiwan puyuwikge yakum.
2CO 8:7 Na atnataat. Ginu Anutue natapa kekeknga siknga siwan ginda wamu take siknga yanikapmakaing. Gatu ginu natdetdetza buyambam siknga. Sike puya take takngatu takngatu tasinangge take siknga nataaing. Gatu ginu nae musip gwaangu kumzang natangamukaing. Siwan apmanu ginda puya wa notza gatayamunanga aknga kuut tasinangge mani dua kotnake buyambam peningge nataat.
2CO 8:8 Wamu wa nata daninggau nata mama wam binga dua daninggat. Aho. Aminu kunduta puya waaknga tasinangge asiknga enakaing aminda natake nata gin pasiwa singgak. Siwan ginde natake ginu aminde butaya natapa buya asaawik ba dasing ngang natake daninggat.
2CO 8:9 Ginu atnataaing. Buyambam tapaninu Jesu Kraisda ginde musip kwikwik natandamuke tasikut. Ita sangabamdane toiknga ngana ginde butaya natake nisa gup dakngakut. Dakngake aminu sangana wena apa binga dakngake ninde banakan yukut. Sike ita gin pasiwan ginda Anututane sanga kekeknga asinggan yuwik kaknga kwaapzang pake yuaing.
2CO 8:10 Siwan nata puya waakngae natake na anzing nataat. Ginu puya wa nakanu gwa kakumang gwene tasinangge natake ginda tuwanguke tasiking. Sike apmaau ginu take puya waaknga tasiwa puyuyok.
2CO 8:11 Ginda tupan tuwanguke tasinangge take siknga natapbing. Ina unzakan ginda puya waaknga tasiwa puyuwikge take siknga natapnong. Tasike mani ginda gwa pakingu wa usanzike aminu mani buyambam pakuu waapata buyambam muban gatu matekngakan pakuu waapata mani mateknga take mumsok.
2CO 8:12 Ngan. Aminu tapatuta musip gwaang natake mani kundu mutnangge take siknga natake ngana mani matekngakan pakut. Sike ita wa pakuunin usanzike kautdu Anutue imanu buyambam dua siwik. Undanga. Anututa atnataak. Mutnangge take siknga natapbut ngana mani buyambam dua pakut ngang natake Anututa aminu waapae take natapik.
2CO 8:13 Siwan nata wamu wa yanggau aminu kunduta isangepuke mateknga muwawa ngana ginda isakoke buyambam mutningge natake dua yanggat.
2CO 8:14 Aho. Ginu tapduu aomune gindane sangaapasa kwaapzang pake yuaing. Unzingge ginda aminu sangae dapmakaingu take gatayamunong. Siwan masande ginu sangae dapanu aminu wa ginda gatayamukaing aminda sangaapana buyambam pake asikaya ginu dua gatandamuning ba dasing? Aho. Akgatandamuning. Unzing tasiwanu aminu sangae dapmakaingu kuupbam asinggan gatayamuwawa aminu kuupbamda takekan yutning.
2CO 8:15 Ngan. Sanga waakngae natake wamu takngatu ayanikapsa aminu tapatuta Anututane wapatang anzing matakut, “Aminu nanamu kwaapzang pakuu waapata napan musia gitnawan nanamu wena sikut. Siwan aminu nanamu matekngakan pakuu waapata nanamde dua dapbut,” ngang matakut.
2CO 8:16 Siwan Anututa notna Taitasdane musia tangenawan ita gin gatandamunangge nataak. Unzing nata gin gatandamunangge nataat binga ita take siknga nataak. Unzingge nata Anutue asiknga inimbaknganggat.
2CO 8:17 Ngan. Nata inike ita ginde kuwikge yawa natake ita kunangge take siknga natapbut. Ita take siknga kunangge natapan kake nata ie anzing natapbum. Waapata ina banipda siwan kunangge natake yuwawan nata masande initewa kuwikge inikum.
2CO 8:18 Siwan puya amin notna tapatuta Anututane wamu takeaknga asinggan yanikapmake tasitakuwawan Anututane amina kepna kepna nana aminu kuupbamda itane umana yatangenakaing. Sike nata aminu waapaat Taitaskat ngang yanipewa ginde kusan.
2CO 8:19 Siwan aminu waapatane umana Anututane aminabamda yatangenake ita naat gatake sukusimde yaking. Yawa niu mani ginda notza gatayamunangge pekingu wa pake kayutzimde yaking. Siwan nitda puya waaknga tasita Buyambam tapanindane umana yatangenake aminu kuupbamda nitde natake nin gatanimunangge natake tasikamayak ngang anggaman natapning.
2CO 8:20 Siwan nata ninae tagwauke mani buyambamu ginda peningu wa kayuke tasiwawa aminu tapatuta puya waakngae sapdut wamu takngatusimu yananga dua siwikge natake nata nomana siknga tasinggat.
2CO 8:21 Ngan. Nata puya nomana siknga Buyambam tapaninde kaine tasinangge nataat. Natake gatu amindaaya kuut puya waaknga tasiwa nandupa take siwikge nataat.
2CO 8:22 Nata unzing natake puya amin notna tapatu initewa ita aminu wa yanggat tapaakat gatake ginde kuning. Aminu waapata naat gatake puya tasiwatda nata sipdu sipdune i tasiwa siwan ita puya tasinangge akekekawan kakum. Siwan ita apmanu ginde natake ginda puya wa notza gatayamunanga aknga tasinangge dua tuyukakaing ngang natapan kekeknga singgak. Siwan ita ginde kuke puya waaknga tasinangge take siknga nataak.
2CO 8:23 Siwan ginu atnataaing. Taitas waapa natane puya amin notna dakngake iat naat unekan gatake puya tasikamak kapanin. Siwan aminu tapaaya iat gatake ginde kuningge yanggau waapaau Anututane aminabamda paut tasike umana yake ginde yanipewa kuningge yaking. Sike aminu waapaatda tasiwat umana Kraisdane akngata buyambam singgak.
2CO 8:24 Siwan wa aminda ginde kundopanu ginda musip gwaang natayamuke tasinong. Ginda unzing tasiwa aminu Anututane amina dakngake yuaingu kepna kepna nana aminu kuupbamda ginde natake ginda puya aminu waakwakge musip gwaang natayamukaing kaknga anggaman siwan kaning. Natake wamu nata ginde apbakngake gindane umanza yapangenake yakum taknga siakan singgak ngang natapning.
2CO 9:1 Siwan ginu sanga wa Anututane aminabam gatayamunangae atnataaing. Unzingge nata wamu mamaya ie dua matawit.
2CO 9:2 Na atnataat. Ginda puya waaknga tasinangge musipza asenakaing. Siwan nata ginde natake aminu Masedonia kep komune nana amin anzing yaninggat. Aminu Akaia kep komune nana aminda puya waaknga tasinangge natake nakanu gwa kakumang gwene tandakngaking ngang yaninggat. Yaniwa wamu wa ginda puya waaknga tasinangge akekekakaing ngang yaninggat takngata aminu Masedonia nana aminu kwaapzanggane musia pangenawan yuaing.
2CO 9:3 Siwan na wamu waaknga nata yake gindane umanza yapangenake yanggau wa wamu moo aknga binga siwikge na apbitanggat. Ngan. Ginda tandakngake mani peke yutningge na take nataat. Natake nata puya amin notna wa aminu yanipewa ginde kuning.
2CO 9:4 Dasingge? Masande nata ginde kunangge yawa aminu kundu keu Masedonia komune nana aminda naat gatake kuke ginu dandupa dua tandakngake yutninga dandupning. Siwanu nata wa aminde nangaakan natake yuwawa ginda wa aminde apmaakaning.
2CO 9:5 Unzingge nata puya amin notna yanike ginda gamok kuwawa nata masana apit ngang kekeknga yanikum. Yaniwa ginde kuke mani ginda penangge gwa yakingu pandaknganing. Pandakngawa nata masande kuke papa kake aminu tapatuta nae natake ita ginde kataune kaiwan kundamukut ngangu daninanga dua. Aho. Ginda gisa banipda siwan notza gatayamunangge take siknga natake mani wa peking ngangu anggaman siwan kaning.
2CO 9:6 Siwan nata ie natake tuwang wamu takngatu daniwa natapnong. Aminu tapatuta nanam zau matekngakan kwaiwiu waapata masande nanamde dapik. Siwan ngana aminu tapatuta nanam zau kwaapzang kwaiwiu waapata nanamu kwaapzang pake napik.
2CO 9:7 Siakan. Ginu kuupbam inandek inandek musipzaatang gisa katak siknga natdetnong. Natdeke ginda natdetdeu waaknga tawake mani penong. Peke ginda mani wa pekingge butaya ma natapam. Ngan. Ginda natake aminu tapatuta asiknga kekekake nindane mani katakngine kaiwan kunimukaing ngang natakengu ma pewam. Ginu atnataaing. Aminu apbakngake sangaapana yamunangge take siknga natake tasiwiu Anututa waapae musip gwaang natangamunggak.
2CO 9:8 Natangamuke ita musip kwikwiu ginu apbakngake sangasa yamunangge take natake tasikingge natandamuke sanga kuupbam ginda ie dapningu ginde atdamik. Ginde daman buyambam siwan ginda kwaapzang pake puya takngatu takngatu amin gatayamunanga aknga take tasining.
2CO 9:9 Sanga waakngae natake ayanikapsa aminu tapatuta wamu takngatu Anututane wapatang anzing matakut, “Aminu waapata sanga kwaapzang siknga aminu sangaapana wena aminde yamutakunggak. Unzingge ita sanga amin gatayamunanga akngae dua dapik,” ngang matakut.
2CO 9:10 Ngan. Anututa nin gatanimuke nanam zau asinggan nimunggak. Sike ita tasiwan akoke buya aawan pake sake nakamang. Sike ina unzakan ita gin gatandaman sanga ginda amin gatayamunanga aknga tasikaing kaknga buyambam siwik.
2CO 9:11 Siwan ginu sangaapa kwaapzang pake ginda amin gatayamunangge sanga kwaapzang yamuning. Yama nata pakuke aminu sangae dapmakaingge nomana siknga yamit. Yama kake aminu kuupbamda Anutue inimbaknganing.
2CO 9:12 Ngan. Ginda puya unzing tasike Anututane aminabam gatayamuning. Gatayama kake aminu buyambamda apbakngake Anutue inimbaknganing.
2CO 9:13 Ginda sanga kwaapzang amin gatayamunangge yamuwawa danduke aminu buyambamda anzing natapning. Ginu wamu take Kraisdane aknga tawake puya waaknga tasikaing ngang anggaman natapning. Natake Anututane umana yatangenatning.
2CO 9:14 Yatangenake ginde natake Anututa musip kwikwiu ginde natandamuke gindane musipza pangenawan puya waaknga take siknga tasiking ngang natake wa aminda ginde musip gwaang siknga natandamuning. Natandamuke tumuk wam yawa Anututa ginu asinggan gatandamik.
2CO 9:15 Siwan Anututa ninde musip kwikwik natanimuke gatanimunggakge natake ninda asiknga inimbaknganim. Inimbakngake sanga wa ita nin gatanimunggak kakngae natake ninda asiknga inimbakngake wamu mamaya siknga yanim.
2CO 10:1 Siwan aminu gikat nana kunduta nae natake anzing yakaing. Ita ninde apuke nikat gatake yukengu ita ninde puya wepda tasinimuke wamu yanggak ngana nin nipmake maa kuke yukengu ita wamu kekeknga ninde nimunggak ngang yakaing. Siwan ngana nata gin daninangge natake musip kwikwiu Kraisda aminde natake wepda tasiyamukut taknga tawake nata wamu takngatu daniwa natapnong.
2CO 10:2 Aminu gikat nana kunduta natane puya aknga usanzike natapa sanga musia enaya akngaekan natake sukunggat tapa binga singgak. Siwan masande nata ginde kundoke wa aminu kaanga siknga take yaniwit. Ngana asingu ginda gisae tagwauke natane musipma tapa wikayok.
2CO 10:3 Ginu atnataaing. Na aminu gin binga kepdakane nana tapatuta yuat. Yuke ngana puya tasike aminda amake sanga inane akngaekan natanggamatake tasikaing binga nata dua tasinggat. Wena.
2CO 10:4 Amak tasinangge natakengu aminda inane kekeknga akngane amakaing ngana nata ninae kekeknga akngane puya dua tasinggat. Aho. Nata Anututane kekeknga akngane yuke puya tasinggat. Unzing amak aminda apuke iwanatane damanu kekeknga siknga gwenu atzipbutning binga nata puya tasinggat.
2CO 10:5 Tasike natdetdeu gutonga aminda kem nataaing kaknga nata yaitapaakusinggat. Ngan. Nata wamu take Anututane aknga aminu buyambam yanikapnangge tasiwawa iwanata yamandet sike natane kepina umukngamukaing ngana nata ayapbike puya atasinggat. Tasike nata amindane natdetdetna papa nomatawa wa aminu yanipaku pewa Kraisdane gepbiatang koke yuaing.
2CO 10:6 Puya waaknga tasiwa ginu kuupbamda ie gepbiatang koke yutning. Koke yuwa kakengu nata ginde natake aminu gikat nana tapatuta yamandet siwan kakengu nata waapatane natdetdetna tapa nomatawikge natake meya takngatu asimit.
2CO 10:7 Siwan ginda sanga kaisatakan kake usanzikaing. Sike aminu gikat nana tapatuta inae natapan aminu Kraisdane amina tapatu siwiu waapata inane musiaatangu gatuna natdeyok. Asikaya na kaya Kraisdane amina kuut dua yuat ba dasing? Ngan. Waapaata naat kuut Kraisdane amina dakngake yuamak ngang anggaman natapsok.
2CO 10:8 Siwan Buyambam tapaninda puya nae naman nata gindane natdetdetza pasiwa maiwikge natake dua namukut. Aho. Nata gin pasiwa ginu Anutue kekeknga yutningge natake Anututa puya waaknga nae naman tasinggat. Sike ita puya nae wa namukut takngae natake nata apbakngake ninae umana yatangenawa kunduta natake sapdut wamu nae yawanu nata wa aminde dua maakawit.
2CO 10:9 Siwan wamu waaknga kendeke ginda dasing natapning? Asikaya nata pas sasan matandama kake ginda nae atnandugwautningge natake yanggat ba dasing? Aho. Nata unzing dua natake ginde matandamunggat. Wena.
2CO 10:10 Siwan aminu gikat nana tapatuta nae natake anzing yakut. Polda pas sasanu matanimuke wamu kekeknga siknga yanggak ngana ita nikat gatake yukengu ita wepda siknga niniwan ninda itane wamna natapna sanga moo binga singgak ngang yakut.
2CO 10:11 Siwan aminu wamu waaknga yakut tapata katak siknga natake ita anzing natapsok. Nata maa yuke wamu pas sakatangu ginde matandamunggat takngakan tawake ginde kundokengu nata waaknga tasiwit.
2CO 10:12 Siwan ngana na aminu gikat nana kunduta inane umana yapangenakaing amin binga daknganangge dua kekekanggat. Aho. Aminu waakwakgane natdetdetna wena siwan wa aminda inane natdetdetnaekan natake ninu natdetdetnin baban ngang yake inane umana moo siknga yapangenakaing. Ngan. Wa aminda inane puyae natapa take siwan ninu puya nomana siknga tasikamang ngang yake inane umana yapangenakaing.
2CO 10:13 Siwan ngana na. Na puya Anututa nae naman nata puya wa tasikum takngaekan natake apbaknganggat. Puya waaknga tasitakuke nata ginde kuut apundoke gin banakan yuke tasikum.
2CO 10:14 Puya nata gin banakan koke danikapbumu wa nata puya Anututa nae namukut taknga tasiwa puyuwan gatu masande nata nina banipda siwan puya kunduat tasinangge natake ginde dua apundoke tasikum. Aho. Na Anutue banip tawake nata tupanu ginde apundoke wamu take Kraisdane aknga danikapbum.
2CO 10:15 Siakan. Nata ninae umana yatangenatnangge natake aminu kunduta puya tupa tasiking kakngae natapit. Natakengu ie sapdukngamuke nata dua apuke puya dua tasikum gamu puya wa tupa tasiking kakngata apimapan ngang natake nata unzingu dua yanggat. Aho. Nata ginde natake ginda Jesue natapa kekeknga singgak kakngata buyambam siwikge na apbakngake natayuat. Ginda Jesue kekeknga siknga yuwanu nata puya kunduat Anututa nae namukut taknga tasiwa buyambam siwik.
2CO 10:16 Puya waaknga tasinangge natake nata gin dapmake keu maa komdune kuwit. Kuke keu komdu puya aminu tapatuta tupa undangu dua kukut komune kuke tasiwit. Tasike nata ninae umana moo siknga puya kundu aminu tapatuta gwan tasikut takngae natake dua yatangenawit.
2CO 10:17 Siwan Anututane wapatang wamu takngatu anzing yuak, “Aminu tapatuta apbaknganangge natakengu waapata puya Buyambam tapaninda tasikut takngae natake itane umana yatangenayok.”
2CO 10:18 Ginu atnataaing. Aminu inane umana yatangenawiu waapae Anututa natapan aminu umana wenaapa siwik. Siwan ngana aminu tapatu Anututa ie natapan take siwanu aminu waapata Anutue nomune gitna yuwik.
2CO 11:1 Siwan ginda na nandutewa nata wamu gutonga kundusimu natdetdetna wena apata yanggak binga yanangge nataat. Ngan. Nata wamu wa binga yawitde ginda na atnandutenong.
2CO 11:2 Wamu wa binga yanangge nataatdane yapii anzing. Nata puya tasike ginda Kraisde kuke iat gatake kekeknga siknga yutningge tasikum. Unzing aminda natake yapana tapatu apnae dua siknga kukut tapata apna tapatuekan kuwikge yawan kekekawik binga nata gin pasiwa ginda Kraisde kuking. Unzingge nata ginde musip gwaang siknga natandamuke ginu dua pimaningge asiknga natanggamatanggat.
2CO 11:3 Nata gin pasiwa ginda Kraisde kuke iat gatake kekeknga siknga yuke ie wamdekan natanggamatake tasikaing. Siwan ngana aminu kunduta enake natdetdeu nomana siknga wa ginda nataaing kaknga pasiwa wai siyak ngang natagwauke daninggat. Unzing gomou tapatuta tupa siknga Ivde kuke kem tasike iniwan pimakut binga ginda pimanang ngang natake daninggat.
2CO 11:4 Na atnataat. Aminu kunduta ginde apuke wamu take aknga nata tupa ginde danikapa taking kaknga teke wamu inata takngatu natake daniwa ngana ginda wamu waaknga katak dua usanzike zetgaman takaing. Ngan. Wa aminda apuke Jesu inata tapatue natake gin danikaing. Gatu Waungu inata tapatu Anututa gindane musipzaatang dua tamuban takingu waapae natake ginde danikaing. Danike tasiwa ngana ginda dua yanindakngakaing. Aho. Ginda wa amin kapewa wamu inata kundu danindamukaing. Unzingge nata ginde natake ginda pimanang ngang natagwauke daninggat.
2CO 11:5 Siwan ginda wa aminde apbakngake amin gwaang Jesutane kwiiknga dakngake apbing ngang nataaing. Ngana na. Nata wa aminde natake na dua napbiking ngang nataat.
2CO 11:6 Na aminbamde kuke wamu takngatu takngatu yanikapnangge tasiwa ginda nandupa aminu wamu aminbamde yaninanga kepi katak dua kakumu tapatu binga dakngakum. Siwan ngana ginu atnataaing. Na natdetdeu takngatue dua dapmake Anututane puyana tasikum.
2CO 11:7 Sike tupa na gin banakan koke wamu take Anututane aknga ginde danikapmake ngana nata danike sanga natane gupma gatangamunanga akngae dua danikum. Aho. Nata gin gatandamunangge natake sangaapanae dapmake nata meya buyak tasike yukum. Siwan ginda natake kepi wa nata tawake tasikum takngae natapa sanga waiaknga sikut ba dasing?
2CO 11:8 Sike nata gin banakan koke puya tasiwawa Anututane aminabamu keu komdune nana aminda na gatangama wa amindane mani pake tasikum. Ngan. Na gin gatandamunangge natake nata wa amindane mani pake puya tasikum.
2CO 11:9 Unzingge na gikat gatake yuke manie dapmake ngana nata meya aminu tapatue dua imukum. Wena. Natane notna Jesuat nana aminu Masedonia kep komuneta apuke sanga nata dapbumu atnamuking. Atnama pake nata ginde meya takngatu dua damukum. Sike gatu apmea ina unzakan nata meya ginde dua damit.
2CO 11:10 Siakan. Nata Kraisdane gepbiatang yuke siakan wamban ginu daniwa natapnong. Sanga nata ginde meya dua damukumu wa nata dua tewit. Aho. Aminu tapatu keu wa ginda ayuaing komune nana tapatuta natake nata sanga waaknga tasiwitde kepi dua umukngamik. Wena.
2CO 11:11 Sike wamu nata yanggau wa asikaya nata ginde musip gwaangu dua natandamuke yanggat ba dasing? Aho. Anututa atnataak. Nata musip gwaang siknga ginde atnataat.
2CO 11:12 Ngan. Kepi nata tawake tasinggau wa nata asinggan tasiwit. Tasiwawa aminu wa natane puya akngae sapdutnangge nataaingga sapdut wam yanangge apmeptaning. Ngan. Na gindane sanga panangge kekeknga siknga bitanggau waakngata wa amindane kepi umuyaman wa aminda yake ninda Polkat musipminu takngatukan natake puya tasikamang ngangu yananga dua. Wena.
2CO 11:13 Siwan wa aminda ninu Jesutane kwiiknga amin dakngake itane puyana atasikamang ngangu kem yakaing. Yake ginu kem panzike pasiwa ginda wa aminde natapa aminu Kraisdane kwiiknga siwan umana aposel ngang yanikaing.
2CO 11:14 Ginu atnataaing. Setenda kem tasike ita angela tapatu binga dakngake apan kake ninda angela tapatu Anutuat yusika teke apunggak ngang natapnim. Siwan wa aminda ina unzakan tasiwanu ginu ie ma satnawam.
2CO 11:15 Setendane puya amina kuut Anututane puya amina binga dakngake apukaing. Ngana ginda ie ma satnawam. Masande wa aminu Anututa kepi nomana akngane usanzike toknga mateknga dua wa aminde yamik.
2CO 11:16 Siwan wamu tupa nata ginde pas asane gwa danit taknga gatuna daniwa natapnong. Aminu gikat nana tapatuta nae natake aminu natdetdetna wenaapa ngangu dua yawan. Siwan ngana aminu tapatuta nae natapan aminu natdetdetna wenaapa siwanu undanga. Ginda aminu wa natdetdetna wena amindane wamna atakaing. Ina unzakan ginda nata ninane wamu kuut nata gin daniwitde na atnandutenong. Na nandutewa nata wa amin binga dakngake ninae umana yatangenawit. Asikaya wa aminda inane umana kumzang dua yapangenakaing ba dasing.
2CO 11:17 Siwan ngana wamu nata yanggau wa nata Buyambam tapaninde banip tawake dua yanggat. Aho. Wamu nata ninae umana yatangenatnangge yanggau wa nata aminu natdetdetna wena apa binga dakngake yanggat.
2CO 11:18 Siwan aminu kwaapzangga inane sanga kepdakane nana akngae natanggamatake inane umana yapangenawa kake nakaya kuut sanga ninane sanga kepdakane nana akngae natake ninane umana yatangenatnangge natake gin daniwit.
2CO 11:19 Na atnataat. Ginda natdetdetnin baban amin dakngakamang ngang kem natake aminu natdetdetna wena amin kapewa wa aminda wamu gutonga ginde danindamutningge take siknga nataaing!
2CO 11:20 Ngan. Ginda kapewa wa aminda gin panggaganuke gindane sangaapasa kwaapzang kaiwa kundama ginu danduyutnangge akekekake gindane aamza wesikaing. Ngana ginda wa aminde apbakngake kapewa tasikaing.
2CO 11:21 Siakan. Nata tuyukake puya tasike sanga aminu waakwakga kekeknga siknga tasikaing binga dua tasikum. Wena. Nata akekekake kepi aminu waakwakgane aknga tawake dua tasikum. Siwan nata sanga waaknga dua tasikumde natake asikaya nata ginde apmaakawit ba dasing? Wena siknga. Siwan ngana aminu tapatuta inane sanga akngae natake inane umana yatangenawiu waapae natake nata wamu aminu natdetdetna wena apata yawik kaknga tawake yawit. Nakaya kuut ina unzakan ninane sanga akngae natake yawit.
2CO 11:22 Wa aminda yake ninu aminu Hibru wam tangan yakaing aminde dongune aakumang ngang yakaing. Siwan nakaya kuut aminu Hibru wam tangan yakaing aminde dongune aakum. Sike wa aminda yake ninu baminu tapatutane umana Isrel ngang inikinggane dongune aakumang ngang yakaing. Siwan nakaya kuut aminu waapatane dongane aakum. Sike wa aminda yake ninu Ebrahamdane dongune aakumang ngang yakaing. Siwan nakaya kuut dongu waaknganekan aakum.
2CO 11:23 Sike wa aminda yake ninu Kraisdane puya amina dakngake tasikamang ngang yakaing. Siwan nata aminu natdetdetna wenaapa binga dakngake wamu takngatuat daniwa natapnong. Nakaya kuut Kraisdane puya amina dakngake nata wa aminu ayapbike puya buyambam tasikum. Ngan. Nata puya kwatan siknga tasike wa aminu ayapbikum. Sike iwanata enake sipdu sipdune na kaautde napmake tewa buyambam sikut. Siwan sipdu sipdune na kayata ipmapa nuwawa buyambam sikut. Siwan sipdu sipdune nata akumnangge dapaknga sikum.
2CO 11:24 Siwan Judia nana aminda na tanggaganuke nap takngata ipmapa nukgawa kuku 39 dakngakut. Sike sanga waaknga sipdu sipdune tasiwawa kuku katau kuut musa sikut.
2CO 11:25 Siwan sipmaat sipduat iwanata enake na kandata ipmapa nuking. Sike sipdune supda nutnangge mutnawaking. Siwan sipmaat sipduat sipda wai siwan nata yanggabam gwene yuke paa kumbum. Gatu sipdune nata yanggabam gwende banakan kuwawa sipda wai siwan na yanggabam gwene upeeke yuke yuwawa kuku zikaake kwakakut.
2CO 11:26 Sike tapdukbamu asinggan nata puya tasitakuke kepi mamaya siknga apane kunggat. Sike kuwawa sipdu sipdune yanggata paptake na paa kaitake kunggak. Gatu sipdu sipdune wai aminu kepiapane sukuke natane sangaapana kaiwa kuningge natake na paa nuwa kumbum. Gatu aminu kundu natane notna Judia kep komune nana ngana sipdu sipdune na nutnangge natake paa tasiwa maikum. Gatu aminu Judia kep komune nana dua ngana keu komdune nana aminda na tasiwa maiwitde natake gatu gatu tasiking. Ngan. Nata yot gapma gapmane tasitakuke ba kepiapane kuke keu amina wena komune kuke ba sip gwen take yanggabam gwene kusika nata wai paa sikum. Sike aminu kundu natane iwanata nae apa nata kawawa notna binga dakngawa ngana wa aminda na paa tasiwa maikum.
2CO 11:27 Sike nata puya kwatan siknga tasikum. Tasike sipdu sipdune nata zikaane pasike dapuna dua pekum. Gatu sipdu sipdune nata toma natake yanggae natake guyaknga kupia sikut. Siwan nata nanamde gatu yotde gatu taukge ngang dapmake yukum.
2CO 11:28 Sike wamu buyambamu undang ngana nata kautdukan yanggat. Tapdukbamu asinggan na Anututane aminabamu kepna kepna nana katak siknga kayutnangge natake tasinggat. Puya waaknga kwatan siknga tasisika nata musipmaatangu nangaakan nataat.
2CO 11:29 Siakan. Aminu tapatuta atuyukawan kakengu asikaya nata ie butaya dua natangamit ba dasing? Ba aminu tapatuta waiakngaatang pimapan kakengu asikaya nata musipma meya siknga dua natapit ba dasing? Aho. Meya wa bingata na paya tasiwa mainggat.
2CO 11:30 Siwan nata ninae umana yatangenatnangge apbitanggat ngana wa aminda natane musipma tangenawa natake nata sanga wa na tasiwa maikum takngae yawit ngang natapbum.
2CO 11:31 Anututa atnataak. Wamu nata yanggau wa nata kem dua yanggat. Aho. Anutu Buyambam tapaninu Jesu Kraisdane nana apata nae natake ita kem wam dua yanggak ngangu atnataak. Itane umana asinggan asinggan yatangenatna kekeknga siknga yuwik.
2CO 11:32 Sike nata ie natake siakande daniwit. Nata Damaskas yot gapmane kundoke yuwawa aminu tapatu umana Aretas ngang iniking kapa wa amindane gavmanu buyambam tapa dakngake yukut. Ita yawan aminu tapatu you wa gapmane nana kayukut. Kayuke na tanggaganuke kaautde napmanangge natake ita kayuya aminu you wa gapmae gwabok gwaune pewan yuking.
2CO 11:33 Pewan yuwawa ngana natane notna kunduta na gatangamuke kandayak dakane napmake you wagapma yuainggane daman gwendane windo gwaune nap taknganeta tatawaawa nata kepman pukukum. Pukuke nata teke atdatakuwawa iwanata na nutnangge nawamba maikut.
2CO 12:1 Siwan natane umana nina yatangenawanu aminu tapatu dua gatangamik. Siwan ngana nata mia takngatu takngatu Buyambam tapaninda yeikngaman kakum takngae natake ginde daniwa natapnong.
2CO 12:2 Tupa nata aminu Jesuat nana tapatue natapbum. Natake nakanu katau kuut musaat kautdu gweaat gweaat ngang yuwawa wena sikut. Siwan aminu waapa Anututa enandang takopbut. Siwan wa takopbut taknga ita mia kawawan uyunga takopbut ba kayuk yuwawan gupna buyak siakan siknga takopbut ba dasing? Na ie katak dua nataat. Anututakan ie atnataak.
2CO 12:3 Ngan. Nata aminu waapae atnatapbum ngana ita mia kawawan Anututa enandang takopbut ba gupna buyak takopan siakande siknga kopbut ngangu na katak dua nataat. Anututakan ie atnataak.
2CO 12:4 Siwan aminu waapata wamu takngatu takngatu aminda gatu yananga dua aknga natapbut. Ngan. Wamu ita natapbuu waaknga aminu tapatuta yawanu take dua siwik.
2CO 12:5 Siwan na aminu waapae natake apbaknganggat ngana sanga ninane akngae natake ninae umana nata dua yatangenawit. Wena. Siwan ngana nata sanga na tasiwan maikum takngaekan natanggamatake ninae umana yatangenawit.
2CO 12:6 Siwan na ninae umana yatangenatnangge natakengu take tasiwit. Tasikengu nata aminu natdetdetna wenaapa binga dua dakngawit. Wena. Nata ninae umana yatangenakengu nata siakan wamban yawit.
2CO 12:7 Sike ngana unzing yatangenatnangge bitake nata dua tasiwit. Aho. Aminu tapatuta wamu nata ninane umana yatangenatnangge yawit takngae natake ita na usanziwikge natake dua yanggat. Aho. Ita puya nata tasikum ba wamu nata yanikapbumde natake na usanziwikge nataat.
2CO 12:8 Siwan Anututa gatangamuke nata natdetdeu ita nae namukut takngae natake ninae umana asiknga dua yatangenawitde natapbut. Natake ita na tasiwan meya takngatu take yuat. Sike meya waakngane na sandewikge inikum ngana dua sandekut. Aho.
2CO 12:9 Na dua sandeke ita anzing nanikut, “Nata gaat gatake yuke ga gatagama gata dua upeeke yuwiyak,” ngang nanikut. Nanike, “Gata atuyukake yuwawi nata ga gatagama puya tasiwawi ninane kekeknga akngata anggaman siwan kaning.” Sike kekeknga Kraisdane akngata na usikwatanapmamban puya tasiwit.
2CO 12:10 Ngan. Nata upeeke apimanangge dapaknga siwanu ita take siknga kekekangaman enake puya tasinggat. Unzingge nata upeeke yuke ba aminda na nanisapdutning ba meya takngatu takngatuta nae apning ba aminda nae wai tasingamuning ba sanga wai wa bingata nae apanu nata kekeknga Kraisdane akngata na gatangaman dua pimapit ngang natake apbaknganggat.
2CO 12:11 Siwan wamu wa yanggau nata aminu natdetdetna wena apata yanggak binga nata ninae umana yatangenakgat. Sike wamu wa nata nina banipda siwan dua yanggat. Aho. Ginda natane musipma tangenawa yanggat. Sike ginda natane umana yatangenakaing gamu take siwan. Ngana nata ninae musipmaatang natake na aminu umana yatangenatnangaapa dua ngang nataat. Ngan. Unzing nataat ngana ginda aminu kundue natake Jesutane kwiiknga dakngake yuaing ngang natake umana asiknga yapangenakaing ngana wa aminda na dua napbiking. Wena siknga.
2CO 12:12 Nata gin banakan koke puya tasiwawa aminu kunduta meya takngatu takngatu nae namuking. Namuwawa ngana nata wikake puya kekeknga tasike duya takngatu takngatu tasikum. Nata puya waaknga tasiwawa sanga Jesuta na tapan itane kwiiknga dakngake Anututane kekeknga akngane tasikum takngata anggaman sikut.
2CO 12:13 Siwan ginu atnataaing. Nata Anutue amina kepna kepna nana aminde kuke puya kekeknga tasikum. Tasike gin banakan koke puya ina unzakan tasikum. Tasike sanga awia takngatukan dua gin banakan tasikum. Sanga natane gupma gatangamunanga akngae natake nata ginu dua danikum. Dua danike asikaya nata wai takngatu undang tasikum ba dasing? Sanga gupma gatangamunanga akngae dua danikum takngae natake ginda ie sanga wai ngang kakengu ginda natane wai waakngana sandekngamunong.
2CO 12:14 Siwan nata gatuna ginde kunangge nataat. Sipduat kuwa sipmaat sipduat dakngawikge tandaknganggat. Siwanu nata gatuna ginde kuke sanga gupma gatangamunanga akngae dua daniwit. Wena. Nata gindane sangaapasa kaiwa kuningge dua nataat. Aho. Nata gin gatandama ginda nae musip gwaang natangamuningge natake yanggat. Asikaya waaknga yapanata puya tasike sanga unekan peke minga nana gatayamuning ba dasing? Aho. Minga nanata puya tasike sanga unekan peke waaknga yapana gatayamuning.
2CO 12:15 Unzingge nata gin gatandamunangge natake ninane sangaapa kuupbam mutnangge take siknga nataat. Siwan gatu gin gatandamuke tasiwawa ngana iwanata enake na nuwa kupanu take siwik. Ie na dua gwaukgat. Sike nata ginde butaya siknga natandamuke tasinggatde natake asikaya ginda nae musip gwaangu mateknga siknga natangamuning ba dasing?
2CO 12:16 Sike ngana aminu gikat nana kunduta nae anzing yakaing. Ita nindane sanganinu dua kaiwan kunimuking ngang yakaing. Yawa ngana kunduta nae semna natake anzing yakaing. Ita ninu kem panzike nin kaipakuwan ninda notninu sangae dapmakaing amin gatayamunangge natake mani mukumang ngang yakaing.
2CO 12:17 Yawa natake nata dasing yawit? Asikaya natane notna kundu nata yanipewa ginde kukingkat nana tapatuta ginu kem panzike sangaapasa kaiwan kuwa nata mani buyambamu ninae pakum ba dasing? Wena siknga.
2CO 12:18 Nata Taitas initewa ginde kukut. Siwan inatakan dua kukut. Aho. Nata notninu Jesuat nana tapatuat Taitas waapaat yanipewa waapaatda unekan gatake ginde kukumayak. Asikaya Taitasda kem panzike gindane sangaapasa kaiwan kuking ba dasing? Wena. Ita naat musipmiu takngatukan nataamak. Natake asikaya ita kepi nata sukukum taknga dua tawake tasikut ba dasing? Aho. Nitda kepi takngatukan tawake tasikamak.
2CO 12:19 Siwan wamu nata yanggau wa dasingge natake yanggat? Ginu dasing nataaing? Asikaya nata wamu waaknga matake natane wama yawa takawikge natake matanggat ba dasing? Aho. Nata Kraisdane amina dakngake Anutue kaine wamu yanggat. Nata ginde musip gwaang natake gin gatandama ginda Anutue kekeknga yuaing kakngata buyambam siwikge natake yanggat. Ngan. Puya tasike ba wam yake ba sanga kuupbam nata tasinggau wa nata gin gatandamunangge natake tasinggat.
2CO 12:20 Wamu nata wa yanggau nata ginde nangaakan natake yanggat. Nata ginde apuke gin dandupa take dua ba siwik ngang natake nata natagwauke yanggat. Nata ginde apuke gindane natdetdetza papa nomatawikge meya takngatu ginde damit. Damanu ginda nae natapa take dua ba siwik ngang natake yanggat. Nata ginde apuke danduwawa ginu kunduta yanganutning. Sike kunduta musia wai notnae natapning. Siwan kunduta musia toknga natake notnae kaanga yanining. Siwan kunduta inae sanga kotnake notna dua gatayamuning. Siwan kunduta sapdut wam yaning. Yake notnatane umana aknga tasiwa maiwikge tasining. Siwan kunduta yamandet sike inae umana buyambam siwikge tasining. Siwan kunduta notna pandambanutning. Ngan. Nata ginde apuke dandupa ginda sanga wa binga dua tasiwa dandupit ba dasing ngang natake nata meya buyak yuat.
2CO 12:21 Sike nata ginde gatuna apuke ginda waiakngasa tupa tasiking kakngae masa dua imuke musipza dua tapa tekwamban sanga musia enayaaknga tawake ginda sanga yasewa aknga tupa tasikaking kakngane sukuning. Sukuwa dandukengu nata gin banakan yuke Anutue apmaakawit. Sike ginde musipma meya siknga natake nata kwanamu asiwit. Nata ie natagwaanguke ginde nangaakan natayuat.
2CO 13:1 Siwan nata ginde sipduat kuwa sipmaat sipduat siwik. Siwan mama wamda anzing yanggak. Aminu tapatuta inane wamna yawikge takuwanu aminu tapaaya ba tapaat tapatuatda aminu waapatane waiaknganae natake wamu buya takngatukan yaning. Yawanu wam usanziwik kapata natake wamu gwa yatana takanggak ngang natapik. Ina unzakan nata ginde apuke tasinangge nataat.
2CO 13:2 Tupa nata gatuna ginde kuwa sipmaya dakngakut. Sike tapduu wagwene nata ginu anzing danikum. Masande nata gin dapmake kuke yusika gatuna ginde apukengu nata aminu waiaknga tasikaing aminu moo siknga dua kapewit. Aho. Nata meya takngatu yamuke wa amindane natdetdetna panomanuwit ngang danikum. Sike apmanu nata maa yuke wamu wa tupa danikum takngaekan natake gatuna daninggat. Nata ginde apuke gikat nana kundu waiaknga tasikaing aminu nata moo siknga dua kapewit.
2CO 13:3 Dua kapeke meya takngatu ginde dama kake ginda anzing natapning. Kraisda natane musipma tangenawan nata itane wam takngae natake daninggat. Ginda ie natapa siakan siwikge tasiwit. Asikaya Kraisda ginde atuyukake tasinggak ba dasing? Aho. Ita gin banakan yuke ginde kekeknga siknga tasinggak.
2CO 13:4 Ginu atnataaing. Tupa ita iwana kapewan kekekngana wena ngang natake i amin saamdakane tanguwa kumbut. Ngana Anututa inane kekeknga aknganata gatu tangenawan kekeknga waakngane ita kayuk ayuak. Siakan. Nakaya kuut kekekngana wena siwan sukunggat. Ngana nata Jesuat gatake sukuke Anututane kekeknga akngane puya gin banakan koke tasiwit.
2CO 13:5 Siwan ginda Jesue natapa akekekanggak ba dasing? Ginda gisane natdetdetzaatangu ie nataaing kaknga asinggan usanzitnong. Usanzike ninu Jesue kekeknga dua ba yuamang ngang natake usanzike yutnong. Sike Jesu Kraisda nindane musipmikatang pukuke nin pakut ngangu dua nataaing ba dasing? Dua natake ginda gisa usanzike natapa ninu yangga aminu moo siknga dakngakumang ngang anggaman siwanu Jesuta ninu inae dua pakut ngang natapnong.
2CO 13:6 Siwan ngana nata ginde apuke puya tasiwawa ginda natane wama usanzike natapnong. Na Jesue puya amina dakngake tasinggatde natapningge take nataat.
2CO 13:7 Sike nata tumuk wamu Anutue iniwa ita gin gatandaman ginda wai takngatu dua tasining. Tumuk wamu wa yanggau nata itane puya amina dakngake ginde puya pasiwa buya asaakgak ngang anggaman siwikge natake dua yanggat. Aho. Aminda nae natake Jesue puya amina tapatu dua ngang natapninga kakengu undanga. Ginda kepi nomana siknga tawake tasiningge take natake tumuk wamu waaknga ininggat.
2CO 13:8 Ginu atnataaing. Na siakan wam yaitapaakusinangge dua nataat. Aho. Nata siakan wam tapa kekekawikge natake tasiwit.
2CO 13:9 Tasiwawa aminda nae semna natake kekekngana wena ngang yaninga kakengu undanga. Ginda Jesue kekeknga yutningge natake puya tasinggat. Tasike tumuk wamu Anutue iniwa ita gatandaman sanga ginda ie kekeknga yuaing kakngata buyambam siwik.
2CO 13:10 Siwan nata maa yuke wamu wa ginda gisa usanzike natapnong ngang yake matandamunggau wa nata ginde apuke gin daniyapimbitde apbitake yanggat. Ngan. Buyambam tapaninda puya waaknga nae naman take nata meya ginde damuke gindane natdetdetza papa nomataning. Ngana nata ginde meya waaknga damunangge apbitake wamu waaknga ginde matandamunggat.
2CO 13:11 Siwan mate notnabam. Wamu takngatusipat ayuak. Ginda apbakngake yutnong. Yuke kepi nomana siknga akngane sukunong. Sukuke natane wamu katak siknga natapnong. Natake ginu kuupbamda musipza takngatukan natake yutnong. Yuke ginu musipza kwikwikngata yutnong. Yuwawa Anutu musip gwaang gatu musip kwikwikgane yapii. Ita gikat gatake yutning.
2CO 13:12 Sike ginu kuupbamda inandek inandek notza Anutue amina dakngake yuainggane kataknga ipmake gaak wam yaninong.
2CO 13:13 Siwan Anutue aminabamu andang yuaingu kuupbamda gaak wamu ginde danikaing.
2CO 13:14 Siwan nata tumuk wam iniwa Buyambam tapaninu Jesu Kraisda ginde musip kwikwik natandamuke yuwawan gatu Anututa ginde butaya natandaman inane Waung Kapata gindane musipzaatang pukuke papan ginda iat musipza takngatukan natake yutning. Unukan.
GAL 1:1 Na Pol. Nata kainata siknga Jesu kawawa ita na take nanitewan kuke nata itane kwiiknga dakngake wamna yanikapmanggat. Na kep dakane nana aminda dua nanitewa kukum. Aho. Nanin Anutu Jesu akumbut katangga tangenakut tapaat gatu Jesu waapaatda na tapat itane kwiiknga dakngake yuat. Unzingge na aposel ngang nanikaing.
GAL 1:2 Siwan nata gatu notna Jesue amina naat gatake yuamangga pas asanu ginu Galesia yot gapmane nana Anutue aminabam dakngake yuaingge matandamukamang.
GAL 1:3 Ninda tumuk wamu ginde natake inina Nanin Anutuat gatu Buyambam tapaninu Jesu Kraiskatda ginde musip kwikwik natandamusan.
GAL 1:4 Jesu waapata Nanin Anutue banip tawake nin gatanimukut. Gatanimuke ninu nisane waiaknganinde toknga pananga akngane ninu sandekut. Ninu aminu wai aminu tapduu ayuamang komune nana aminde gepbiatang dua yutnimde natake ita epuke kungwanimukut.
GAL 1:5 Unzingge ninda Anutu waapatane umana asinggan asinggan yatangenatnim. Siakan.
GAL 1:6 Ngan. Kraisda ginde tangge kungwandaman kake Anututa musip kwikwik natandamuke gin yandawamban ginda ie kuking. Ngana ginda zetgaman tapa tekwamban masa imuke tasikaing. Tasike wamu inata takngatu ginda wamu a takeaknga ngang yakaing kakngae gepbiatang koke yuaing. Mate! Ginda zetzet tasikingge natake nata asiknga asatnakum.
GAL 1:7 Dasing singgak? Asikaya Anututa wamu take inata inata ninde nimukut ba dasing? Wena. Ngana aminu kunduta enake gindane natdetdetza pasiwa maiwa ginu nangaakan natayuaing. Wa aminda wamu takeaknga Kraisda ninde tasinimukut taknga tapa tekwamban gutonga wam daninangge tasikaing.
GAL 1:8 Siwan ninda wamu takeaknga tupa ginde danikumang kaknga teke wamu inata takngatu daninanu Anututa ninde musia toknga asinggan natayuwanu noman siwik. Gatu angela enandang nana tapatuta epuke wamu inata takngatu daniwanu Anututa waapae musia toknga asinggan natangamanu noman siwik.
GAL 1:9 Sike wamu tupa ninda danikumangu nata gatu daniwa natapnong. Aminu tapatuta enake wamu tupa ninda danina natapbing kaknga teke ita wamu inata kundu daniwanu Anututa aminu waapae musia toknga asinggan natayuwik.
GAL 1:10 Siwan ginu dasing nataaing? Asikaya nata natake aminda nae apbaknganingge natake wamu waaknga yanggat ba dasing? Ba Anututa nae apbakngawikge natake yanggat ba dasing? Aminda nae take natapningge nataat gamu nata Kraisdane puya amina dua dakngawam.
GAL 1:11 Siakan mate notnabam. Nata ginde daniwa natapnong. Wamu takeaknga nata gin danikumu wa aminda dua tangenakut.
GAL 1:12 Aminu tapatuta dua wamu waaknga nanindamuban natdekum. Aho. Jesu Kraisda ina yeikngaman natdekum.
GAL 1:13 Sike ginu atnataaing. Tupa na sanga ninu Judia nana amindane aknganinu gitna siknga take yukum. Yuke aminu Jesue aminabam dakngake yukingge semna siknga natayamuke nata wai pasiyamuke kumzang siknga pasiwa maiking.
GAL 1:14 Ngan. Nata sanga baminda tasikaking kaknga tawanangge take siknga natake tasikum. Tasike Judia nana aminu dongu nakanu gwendunekanu naat aakumang aminu kundu bamindane kepi tawake tasikingu wa nata kuupbam ayapbikum.
GAL 1:15 Siwan ngana tapduu na dua aakum gwene Anututa nae natake na itane puya amina dakngawitde yakut. Yake ita nae musip kwikwik natangamuke yanawamban ie kukum.
GAL 1:16 Sike Anutu na yanawakuu waapata take natake inane waaknga nata kainata kawitde yeikngamunangge natapbut. Natake nata aminu keu komduine nana Anutue dua natapbing aminde kuke sanga Jesuta tasinimukut takngae yanikapitde natake yeikngaman kake itane waaknga siknga na anggaman kakum. Kake nata aminu tapatue dua kuke inikwaikum.
GAL 1:17 Dua inikwaike nata aminu tupanu Jesue kwiiknga dakngakingu Jerusalem yot gapmane yukingge dua kukum. Aho. Nata Damaskas yot gapmaneta Arebia kep komune ninatakan kukum. Kuke yusika nata Damaskas yot gapmae gatuna kukum.
GAL 1:18 Kuke yusika nakanu gweaat gwenduat kawa sandewana nata Jerusalem yot gapmane koke Sifas kanangge kopbum. Koke nata gunziu 15 ngang iat gatake yukumak.
GAL 1:19 Yuke ngana aminu tupanu Jesue kwiiknga dakngakingu tapatu nata dua kakum. Sike Jems Buyambam tapanindane uyapnakan kakum.
GAL 1:20 Siwan wamu wa nata matandamunggat takngae natake Anututa natapan kem dua singgak ngang natapnong.
GAL 1:21 Sike aminu waapaat kakenga nata keu maa kuke keu komaya Siria gatu Silisia ngang yanikaing komaaune kukum.
GAL 1:22 Kuke yuwawa aminu Judia kep komune nana Kraisdane amina dakngake yukingga natane noma dua nandupbing.
GAL 1:23 Dua nanduke wa aminda wamu takngatu anzing natapbing, “Aminu tupa nin pasiwan maikumangu waapata musia tapan tekwamban sanga ninda Jesue natapna kekekanggak kaknga ita yaitapaakusikuu waakngae apbakngake yanikapmanggak,” ngang natapbing.
GAL 1:24 Natake wa aminda nae natake Anutue umana yatangenaking.
GAL 2:1 Siwan nakanu 14-nu gwa sandewana nata Jerusalem yot gapmane gatu kopbum. Naat gatu Banabaskatda Taitas initake kopbumak.
GAL 2:2 Anututa naniwan natake nata koke wamu wa keu komduine nana aminde kuke nata yaninggat taknga yakapbum. Aminu Jesue amina dakngakinggane tupan amin takwakge yakapbum. Nata wa aminde natake puya tupa tasikupat gatu apman tasinggakat kuut wa aminda ie bitake yawa pimapsak ngang natake yanikapbum.
GAL 2:3 Aminu kunduta wamu kekeknga yake aminu Grik kep komune nana apata naat gatake yukumau umana Taitas ngang inikamang. Mosesdane mama wam tawake itane gupna matanangge yaking. Ngana take aminda wamu nata yanikapbum taknga natake gupna matanangge dua yaking.
GAL 2:4 Aho. Aminu kundu kem panzike notninu Jesuat nana amin dua ngana wepda gaman nin banakan akoke wamu waaknga yaking. Wa aminu atnatapbing. Ninda natake aminu Judia nana dua ngana Jesue amina dakngakingga Mosesdane mama wamde gepbiatang koke gupna mataningge dua yanikumang. Siwan ninu mama wamde gepbiatang katak siknga yutnimde natake niniyapitnangge akopbing.
GAL 2:5 Akoke yawawa ngana ninda ginde natake wamu takeaknga ginda gwa paking kaknga tasiwa maiyak ngang natake kekekakumang.
GAL 2:6 Kekekake yuwatna aminu umana kaya akwakga wamu takngatusimu nata ninane wapat ngwakngake gin daniwitde dua naniking. Sike Anututa sanga ninda tasike aminu kundutane umana yapangenakamang kakngae natapan moo binga singgak. Ina unzakan nata aminu wa umana kaya akwakge natake ie dua gwaukum.
GAL 2:7 Siwan na aminda natane wama natake anzing natdeking. Anututa Pita tapan ita Jesue wamu takeaknga take aminu Mosesdane mama wam tawake gupna matakaing aminde kuke yanikapmanggak. Sike Anututa na tapan nata aminu Mosesde mama wamde gepbiatang dua yuaing aminde kuke wamu takeaknga yanikapmanggat.
GAL 2:8 Dasingge? Anututa Pita tapan ita gupna matakaing aminde kuke yaniwikge takut tapatakan na kaya kuut tapan nata kepman nana aminde kuke yanikapmanggat.
GAL 2:9 Siwan Anututa musia kwikwiknga nae natangamuke puya wa namukut takngata anggaman siwan kaking. Kake Jems gatu Sifas gatu Jon ngangga naat gatu Banabaskat musipminu buya takngatukan natake notna notna dakngake ninda katakngin ipbumang. Ipmake nitda aminu keu komduine nana aminde kuwatda wa aminda Judia nana aminde kuningge yawa kekekakut. Sike aminu Anutue aminabam dakngake yukingga wa aminde natake nindane tupan amin takwak ngang yaking.
GAL 2:10 Siwan katakngin ipmake niu aminu sangae dapmake yuaingge natanggamatake asinggan gatayamusimde niniking. Siwan sanga wa niniking kaknga tasinangge nata iaknga siknga natapbum.
GAL 2:11 Ngan. Wamu waaknga yaking ngana masande Sifasda Antiok yot gapmane apuke ita sanga gutonga takngatu tasiwan kake nata ie kuke inisapdukum.
GAL 2:12 Ita aminu Judia kep komune nana dua ngana keu komduine nana amikat gatake yuke nanamu asinggan naking. Nake tasiwawa aminu Jemskat nana kunduta apundoke yuwawa Sifasda aminu mama wam tawake gupna matananga akngae yakaingu wa apbingge akgwaukut. Akgwauke nanamu kepman nana amikat gatu nanangge apmaakake tekut.
GAL 2:13 Teke yuwawan kake notninu Judia nana ngana Jesue amina dakngake yukingu kuupbamu wa amikat gatake yuke naking amin kaya wa apbing aminde kagwauke nanamu gatu nanangge apmaakaking. Apmaakake teking kakngata yutake apu masande Banabas tapan i kuut atekut.
GAL 2:14 Siwan nata kawawa wa aminda wamu takeaknga katak dua tawake tasiwa kake nata aminbamde kaine Sifas anzing inikum, “Ga Judia nana tapatu ngana sanga Judia nana aminda tawake tasikaing kaknga teke gata aminu kepman nana aminde kepi tawake tasinggayak,” ngang inikum. “Unzingge gata kepman nana aminda kepi Judia nana amindane aknga tawake tasiningge ma yaniwim,” ngang inikum.
GAL 2:15 “Siwan ninu kepman nana sanga wai akngakan tawake tasikaing amindane dongune dua aakumang. Aho. Ninu Judia nana mama wamu Mosesda yakut taknga tawake tasikaing amindane dongune aakumang.
GAL 2:16 Ngana ninu atnataamang. Aminu Mosesdane mama wam tawake tasiwiu Anututa waapae natapan amin noman dua siwik. Aho. Aminu Jesu Kraisde natapan kekekawiu waapata Anutue nomune amin noman dakngawik. Sike ninu sanga waaknga atnataamang aminda Anutue nomune amin noman daknganangge natake Mosesdane mama wamna tawake aminu noman daknganimde dua nataamang. Aho. Ninda Jesue natapna kekekawan amin noman daknganimde natake tasikamang. Dasingge? Aminu tapatu Mosesdane mama wamna tawake tasiwiu waapae natake Anututa ga dudumna apa ngang dua iniwik. Wena,” ngang inikum.
GAL 2:17 “Siwan ninu Anutue nomune amin noman daknganangge natake ninda Jesue gepbiatang koke yuamang. Koke yuwatna aminu kunduta ninde natapa aminu Mosesdane mama wam sandeya aminu kepman nana binga singgak. Sike ie dasing natapnim? Asikaya Kraisda sanga waiaknga tangenakgak ba dasing? Wena siknga!
GAL 2:18 Aminu Judia nana aminda natake Anututa nindupan aminu mama wam tawake tasiya amin siwanu ita nindane waiaknganinu asandetnimik ngang natake tasikaing. Siwan nata kepi wa tawake tasikaing kaknga Jesue amina dakngake ayandakngakum. Sike asikaya nata sanga ayandakngakumu wa gatuna yanindamumbit ba dasing? Aho. Nata gatuna yanindamumbit gamu aminu wai tasiya amin dakngawam.
GAL 2:19 Dasingge? Mama wamda nanindamuban natake nata anzing natdekum. Anututa nandupan aminu mama wam tawake tasiya amin siwanu natane waiakngana asandewik ngang natapbum taknga yapii wena. Siwan kepi waaknga bitateke nata Anutue banip tawake tasinggat.
GAL 2:20 Tawake tasike nata anzing nataat. Aminda Krais amin saamdakane tanguwa ita ninde tangge ninu waiaknganinde dua kumnimde kungwanimukut. Unzingge nata Kraisde kekeknga yuke aminu iat gatake kumbumau tapatu binga dakngake nata mama wamde gepbiatang dua yuat. Unzing akupsa aminda mama wamde gepbiatang dua yuaing binga dakngake yuat. Yuke nata sanga ninae banipda siwan nataat taknga dua tawake tasinggat. Aho. Kraisdane Waungata natane musipmaatang pukuke na tapan nata itane banip tawake tasinggat. Tasike Anututane waakngata nae butaya natangamuke nae tangge kungwangamukut tapae natanggamatake ie gen gwaamuke sukunggat.
GAL 2:21 Nata musip kwikwiu Anututa natanimunggak kaknga dua sandekgat. Aho. Aminu mama wam tawake tasikaingu wa aminde Anututa natapan amin noman siwik gamu Kraisda moo siknga kupan ngang nataat,” ngang inikum.
GAL 3:1 Ginu Galesia kep komune nana! Aminu tapatuta ginde sanga dasing kaknga tasindaman ginu katum binga dakngake botasukukaing? Asikaya nata gin banakan yuke wamu Kraisda amin saamdakane kumbut taknga anggaman dua danikapbum ba dasing?
GAL 3:2 Nata wamu takngatu danikwaiwit. Ginda sanga dasing kaknga tasiwa Anututane Waung Kapata gindane musipzaatang pukukut? Asikaya ginda mama wam tawake tasiwawa pukukut ba dasing? Aho. Ginda wamu ninda danikapbumangu waakngae natapa kekekawan pukukut.
GAL 3:3 Ngana ginda ie apbotake tasikaing ba dasing? Waung Kapata gindane musipza pangenawan ginda Jesue amina dakngake kepi kayuk kaknga tawatuwanguking ngana kepi waaknga gatukande tawanangge dasingge ginda amindane natdetdetnaatang tupa sanga kem natapbing kakngae natake tasikaing?
GAL 3:4 Asikaya meya kwaapzangu ginde apbing kaknga buya dua aakut ba dasing? Aho. Nata natake buya asaakut ngang nataat.
GAL 3:5 Siwan Anututa inane Waung Kapa ginde damuke duya takngatu takngatu gin banakan pasinggak kapata sanga dasing kakngae natake pasinggak? Asikaya ginda mama wam tawake tasiwawa ita ginde apbakngake pasinggak ba dasing? Aho. Ginda wamu ninda danikapna natapbingu natake ie natapa kekekawan ita ginde apbakngake Waunga damuke duya wa pasinggak.
GAL 3:6 Ngan. Ebrahamde natake wamu takngatu Anutue wapatang aminu tapatuta anzing matakut, “Ita Anututane wamde natapan kekekakutde Anututa ie natapan amin noman sikut,” ngang matakut.
GAL 3:7 Unzingge ginda anzing natapnong. Aminu Anutue natapa kekekanggau wa aminda Ebrahamdane donga binga dakngake yuaing.
GAL 3:8 Siwan Anututa ina musiaatang natake aminu kepman nana nae natapa kekekawiu kuupbamde nata natapa aminu waiakngana wena siwik ngang natapbut. Natake ita tupanu wamu takeaknga Ebrahamu anzing inikut, “Sanga gata nae natangamunggayak kakngata yutake kuku aminu kepna kepna nana kuupbam papan take siknga yutning,” ngang inikut. Siwan wamu take wa inikut taknga aminu tapatuta Anutue wapatang matakut.
GAL 3:9 Siwan wamu waakngae natake ninu atnataamang. Aminu Anutue natapa kekekawiu wa aminda Anutue nomune amin noman daknganing. Unzing Ebrahamda ie natapan kekeknga siwan Anututa ie natapan amin noman dakngakut binga wa aminda amin noman daknganing.
GAL 3:10 Siwan ninu atnataamang. Aminda mama wamde natake ita gataniman ninu Anutue nomune amin noman daknganim ngang natapa kekekawiu wa aminde sanga toknga waiaknganae pananga akngata ayuyamik. Ngan. Wamu takngatu wa binga Anutue wapatangu aminu tapatuta anzing matakut, “Aminu tapatuta mama wamu Anutue wapatang matakingu takngatu sandewiu waapatane waiakngana usanzike ie toknga iman tapsok,” ngang matakut.
GAL 3:11 Siwan wamu takngatuat Anutue wapatang ayanikapsa aminu tapatuta anzing matakut, “Aminu Anutue natapan kekekawiu waapata Anutue nomune aminu nomanaapa dakngake gitna siknga yuwik,” ngang matakut. Sike wamu wa matakut takngae natake ninu atnataamang. Aminu Mosesde mama wam tawanangge tasiwiu waapata Anutue nomune gitna yutnanga dua siwik.
GAL 3:12 Siwan wamu takngatuat anzing yuak. Aminu mama wamu kwatan siknga tawake tasike takngatusimu dua sandewiu waapata aminu nomanaapa dakngake Anutue kaine gitna yuwik. Sike wamu waakngae natake ninu atnataamang. Mama wamda sanga ninu Anutue natapna kekeknga siwik kakngae dua yanggak. Wena.
GAL 3:13 Siwan Anutue wapatang aminu tapatuta wamu takngatuat anzing matakut, “Aminu tapatu inane waiaknganae tanguwa kupana gupnasan take katau dakatune mitapningu waapae Anututa atemna natangamunggak kapa unin,” ngang matakut. Sike wamu waakngae natake ninu Kraisde natapna aminu Anututa ie atemna natangamukut tapa binga dakngakut. Dakngake ita nin gatanimuke ninu mama wam sandekumangge aminda nisipa kumna Anututa ninde atemna natanimunanga akngane ninu sandekut.
GAL 3:14 Sike wamu Anututa Ebraham iniwan kekekakut taknga buya aawan Jesu Kraisda aminu keu komduine nana aminde tangge kungwayamuke tasiwan wa aminda Anutue nomune amin noman daknganing. Unzing Anututa Ebraham inikut binga Jesuta tasiwik. Tasiwan ninu kuupbamda Anutue natapna kekekawan Anututa inane Waung Kapa ninde niman tanimde Jesuta kungwake aminu Anututa ie atemna natangamunggak kapa binga dakngakut.
GAL 3:15 Siwan mate notnabam. Nata tuwang wamu takngatu sanga ninda asinggan tasikamang kakngae natake tuwanguke daniwa natapnong. Wamu atasinangge yawa kekekakut taknga sandetnanga dua. Wamu Anututane dua amindanekan ngang natake ngana sandetnanga dua ngang nataamang. Ngan. Wamu gwa yawa tanomanukut takngae natake aminbamda yawa kekekawanu wamu kunduat ngwakngake yananga dua.
GAL 3:16 Ina unzakan wamu Anututa Ebrahapat gatu aminu itane dongune aawiu tapatuat yaniwan kekekakut. Siwan wamu ita yakut taknga katak siknga natapnong. Anututa yake aminu buyambamda itane dongune aatningge dua natake yakut. Aho. Ita aminu tapatutakan itane dongune aawikge natake yakut. Siwan aminu waapa Krais unin.
GAL 3:17 Sike nata tuwang wamu wa daninggat takngae yapii daniwit. Tupanu Anututa wamu takngatu Ebraham iniwan kekekakut. Siwan masande nakanu buyambam siknga 430 ngangu yuwa sandewana Anututa mama wamu Mosesde imukut. Sike wamu tupan yawan kekekakut taknga mama wamu masande Mosesde imukut takngata tanguwan pimananga dua.
GAL 3:18 Aho. Asikaya ninda sanga Anututa Ebraham inikut taknga tanangge natakengu mama wam tawake tanim ba dasing? Wena. Unzing tanim gamu wamu wa iniwan kekekakut takngata pimapan buya dua aawan. Sike ninu atnataamang. Anututa musip kwikwiu Ebrahamde natangamuke sanga waaknga tasingamunangge iniwan kekekakut.
GAL 3:19 Wamu waakngae natake ninda dasing natapnim? Anututa dasingge mama wamu masande ngwakngake yakut? Asikaya mama wamda nin papan nomatanimde natake Anututa Mosesde imukut ba dasing? Aho. Aminde wam sandeya amin dakngake yuaing kakngata anggaman siwikge natake ita mama wamu imukut. Mama wam iman kekeknga yuwawan aminu Ebrahamdane dongune aawik kapae Anututa tupa ie natake wamu yawan kekakakut tapata asaawik. Aawana mama wam takngata pimapik ngang natake ita Mosesde imukut. Siwan Mosesde imunangge natake ita angelana yanipewan kuke mama wam imuking.
GAL 3:20 Sike wamu wa ita yanipewan kuke imuking ngang yanggat takngae natake aminu buyambamda sanga waaknga tasiking ngang natapnim. Siwan ngana Anututa inatakan inane wamu Ebrahamde genaneta iniwan kekekakut.
GAL 3:21 Siwan ninda dasing natapnim? Asikaya mama wamu waakngata wamu Anututa tupa Ebraham iniwan kekekakut taknga tanguwan pimakut ba dasing? Wena siknga. Mama wamu Anututa Mosesde imukuu wa nindane musipmin pangenawan ninda mama wamu wa katak tawake sanga kayuk asinggan yutnanga aknga tanim gamu mama wamda gataniman ninda Anutue nomune gitna yutnam.
GAL 3:22 Ngana Anutue wapatang wamu takngatu takngatuta anzing yakaing, “Aminu kuupbam waiakngata panggaganuwan yuaing,” ngang yakaing. Sike ninda waiakngae gepbiatang yuamang kaknga teke epu kepman kunangge natakengu ninda Jesu Kraisde natapna kekekawik. Ngan. Aminu ie natapa kekekawiu wa aminde Anututa sanga ita Ebrahamde tasingamunangge yawan kekekakut taknga atasiyamik. Unzing siwikge natake Anututa yake waiakngata aminu kuupbam panggaganukgak ngang yawan ayanikapsa aminda natake mataking.
GAL 3:23 Siwan Jesuta dua apbut gwene ninda ie dua natapna kekekawawan Mosesdane mama wam takngata ninu ninduyukut. Ninduyuwawan yuwatna sanga wa ninda Jesue natapna kekekawik kakngata aakut. Aake sanga wa nin ninduyukut takngane ninu sandekut.
GAL 3:24 Ngan. Mama wamda nin ninduyuwawan Kraisda apbut. Apan mama wamda ninu ninipake Kraisde pakapikge natake Anututa Mosesde mama wamu imukut. Nin ninipakuwan Kraisde kuke ie natapna kekekawikge natake mama wamu imukut.
GAL 3:25 Siwan sanga Jesue natapna kekekawik kakngata gwa apan kake ninu mama wamu tupa nin ninduyuke Kraisde ninipakapbut takngae natapna sanga moo binga siwan ninda wamu waakngae gepbiatang gatu yutnanga dua.
GAL 3:26 Siakan. Ginu Jesu Kraisde natapa kekekakut aminu kuupbamda Anututane waaknga binga dakngake yuaing.
GAL 3:27 Ngan. Ginu Kraisdane amina dakngake yangga saukingu kuupbam Anututa danduke ita Kraisde natapan take singgak binga ginde natandamunggak.
GAL 3:28 Siwan ginu Kraiskat nana aminda dongu takngatukan dakngake yuaing. Aminu gikat nana kundu Judia kep komune nana amin gatu kundu keu komduine nana amin ngangga yuaing. Sike kundu puya toikga panggaganuke puya buyana wena yama pasike umana wena amin dakngakaing. Sike kundu dua panggaganuwa wa aminu puya ina banipda siwan natake tasikaing. Sike kundu maya gatu kundu wawi ngangga yuaing. Ngana ginu kuupbamda musipza takngatukan natake dongu takngaaya dua dakngake yuaing.
GAL 3:29 Siwan ginu Kraisdane amina dakngake yuaingu ginda aminu Ebrahamdane dongune aaking binga dakngake yuaing. Sike sanga wa Anututa Ebrahamde imunangge yakuu ginda apaning.
GAL 4:1 Wamu wa ginda sanga apaning ngang yanggat takngae gatu yawa yapii anggaman siwik. Waatdaka mateu tapatutane nanata akupanu kwatangi kuupbam ita papik. Ngana waatdakata mateknga yusika ita puya amin binga dakngake nanatane sanga pananga dua.
GAL 4:2 Aho. Ita aminu akgatangamuke kayuaing aminde gepbiatang yuwawan tapduknga wa nanata yakut gwene kuwik.
GAL 4:3 Siwan nikaya ina unzakan. Ninu Judia nana natdetdetninu wena waatdaka binga dakngake yukumang. Yusika ninda meya buyak yuke sanga kepdakane nana akngae gepbiatang yukumang.
GAL 4:4 Ngana tapduknga Anututa inane waaknga initewan apik gwenu gwa siwan ita initewan apbut. Apan maya tapatuta tangaiwan ita aake Mosesdane mama wamde gepbiatang yukut.
GAL 4:5 Ita ninu mama wamde gepbiatang yukumang amin gatanimuke nindane waiaknganinde akumnanga akngane ninu sandetnangge apbut. Ita ninu itane waaknga dakngake yutnimde natake aake ita mama wamde gepbiatang yukut.
GAL 4:6 Sike ginu itane waaknga gwa dakngake yuaing. Unzingge Anututa Waung Kapa initewan apuke gisane musipzaatang pukuwik. Ita Anututane waaknga binga dakngake pukuke Anutue “Nan. Nan,” ngang ininggak.
GAL 4:7 Unzingge Anututa gin papan ginu itane waaknga dakngake yuaing. Ginu puya amin binga gatu yutnanga dua. Aho. Ginu itane waaknga dakngake sanga ita Ebrahamde iniwan kekekakut taknga taning.
GAL 4:8 Siakan. Tupa ginda Anutue dua natapbing. Dua natake ginda Anutu siknga dua ngana anutu pupukngae gepbiatang yuking.
GAL 4:9 Ngana apmanu ginda Anutue atnataaing ngangu take yananga ngana Anututa ginde atnataak ngang natake nata gin daniwit. Ginda dasingge sanga tuyuknga kepdakane nana akngae gepbiatang yusika teke epu kepman kuking ngana gatu kopnangge tasikaing?
GAL 4:10 Kopnangge tasike ginu tapduk takwanu yuwatakak gwenu buyambam kanangge tasikaing. Tasike yekau kayuk gwen gatu sande buyambam gwen ba nuyia kanangge tasikaing.
GAL 4:11 Tasike Anutue nomune gitna yutnangge tasikaing. Unzingge nata ginde natagwaukgat. Puya nata ginde banakan kwatanbam tasikum taknga buya dua ba aawik ngang natake ginde nangaakan nataat.
GAL 4:12 O mate notnabam! Nata ginu kekeknga daniwit. Ginkat naat musipminu takngatukan natapnim. Ginu atnataaing. Nata ginde kuke ginu Mosesdane mama wamde gepbiatang dua yuaing amin binga dakngake danindamukum. Siwan ginda gutonga takngatu nae dua tasingamuking. Wena.
GAL 4:13 Ginu atnataaing. Tupa natane kekekngana wena siwan nata gikat gatake komdubam yusika wamu gin danikapbum.
GAL 4:14 Siakan. Natane kekekngana wena ngana ginda nae dua nandugwauke naat gatake yutnangge dua bitaking. Aho. Ginda nae natake angela tapatu ba Jesu Kraisda apan kake ie apbakngake taning binga ginda nae apbakngake taking.
GAL 4:15 Sike ginda dasingge musipza papa tekwamban nae bitakaing? Ginu atnataaing. Tupa ginda nae apbakngake nata gin danike kaisa kwagike namunong ngang danikum gamu ginda akwagike namam.
GAL 4:16 Sike apmanu ginu dasing nataaing? Nata wamu siakan taknga ginde danike ngana asikaya nata gindane iwanza dakngake yuat ba dasing?
GAL 4:17 Siakan. Aminu kunduta ginu kem danindatdauke ginda nae masa namuningge natake tasikaing. Tasike ginda nae masa namuke wa aminde apbaknganingge natake ginu danindatdaukaing.
GAL 4:18 Sike ginda aminu kundue apbaknganingge natake nata dua bitanggat. Aho. Wa aminda gin gatandamunangge nataaing gamu nata ginu ie kuningge dua bitawam. Siwan ngana nata gin dapmake kuwawa ginda nae apbakngaking kaknga ma tewam.
GAL 4:19 O waatdakana! Nata ginde meya siknga natandamuwawa tapduknga ginu Kraisdane gepbiatang koke yutning gwenda apik.
GAL 4:20 Ngan. Nata ginde nangaakan natake gikat gatake yutnangge take siknga nataat. Naat unekan yuamang gamu paut tasike wam yana takawan.
GAL 4:21 Ginu aminu Mosesdane mama wamde gepbiatang yutnangge nataaingu asikaya ginu Anututane wamu dua natapbing ba dasing?
GAL 4:22 Miti wamda Ebrahamde nininggak. Itane waaknga tapaaya. Maya inane puya amina tapatuta waaknga tapatu tangaikut. Siwan maya inane maatna sikngata waaknga tapatu tangaikut.
GAL 4:23 Sike engangu puya aminata tangaikuu wa Ebrahamda waak musip tangaman aakut. Ngana engangu maatna sikngata tangaikuu wa Anututa wamu Ebraham iniwan kekekakut takngane aakut.
GAL 4:24 Siwan engangu wa tapaau pangaikumayakge tuwanguke yawa natapnim. Ninda maya wa tapaatde tuwanguke wamu takngaaya Anututa yawan kekekakut takngaatde natapnim. Maya tapatu umana Hega ngang iniking kapa wa maya puya amin tapa. Sike itane waakngata puya toikngae gepbiatang yuking kakngae natake ninda anzing natapnim. Anututa inane mama wamna tawanu Sainai dakane epuke Mosesde imuke yawan kekekawan itane aminabamda wamu waakngae gepbiatang yuking.
GAL 4:25 Sike tawanu umana Sainai ngang inikamangu wa aminu Arebia kep komune nana Hegatane dongune aake yuaingga tawanu wandakatane umana Hega ngang inikaing. Siwan aminu Jerusalem yot gapmane apmanu ayuaingga mama wamde gepbiatang yuaing. Unzing aminu Hega puya amina ngana maatna dakngakut tapae dongune aakingu wa aminu puya toikga panggaganuwa wa aminde gepbiatang yuking ngang natake wa aminu mama wamda panggaganuwan ie gepbiatang yuaing ngang natapnim.
GAL 4:26 Ngana maya tapatu Ebrahamdane maatna siknga umana Sera ngang iniking. Itane waakngae tuwanguke ninu Jesu enandang nanatane amina dakngake yuamang aminde natapnanga. Ninu maya waapatane waakngae dongune aaking amin binga dakngake yuwatna Mosesdane mama wamda nin panggaganutnanga dua.
GAL 4:27 Sanga waakngae natake ayanikapsa aminu tapatuta Anutue wapatang anzing matakut, “Ga maya. Ga engangu dua tangaike waak songge yuayak kapata apbakngayo. Ga toknga engang tangaitnangge dua natapbuyak kapata apbakngake ainggamatayo. Dasingge? Maya wa apnaat yukumayak kapata waaknga kundu pangaikut ngana aminu maya wa waak songge yukut tapatane dongune aakingu wa buyambam siknga,” ngang matakut.
GAL 4:28 Siwan mate notnabam. Wamu Anututa yawan kekekakut takngane Aisakga aakut. Ina unzakan ginda wamu Anututa ninde niniwan kekekakut takngane ginda itane waaknga dakngake yuaing.
GAL 4:29 Sike ninu atnataamang. Aminu wa Ebrahamda waak musip tangaman aakut tapata enake uyapna wa Anututa yawan kekekawan Waung Kapata tasiwan aakut tapa tasiwan maikut. Siwan sanga waakngata yutake apu apman apunggak.
GAL 4:30 Sike ngana wamu dasing kaknga Anututane wamda yakut? Ita anzing yakut, “Maya puya aminu waapaat gatu itane waakngaat yanikwasipewa kuson. Maya waapatane waakngaat gatu maya maatna sikngatane waakngaatda dua gatake yutzan. Nanata kupanu waaknga wa tapaatda kwatangi usanzike tapatu kautdu papan gatu tapatuta kautdu papan ngang tasiwanu take dua siwik.”
GAL 4:31 Siwan mate notna! Tuwang wamu wa yanggat takngae natake dasing natapnim? Ninda anzing natapnim. Ninu waaknga wa maya puya aminu waapata tangaikut tapatane dongune aaking amin binga dua dakngake yuamang. Aho. Ninu waaknga wa maatna sikngata tangaikut tapatane dongune aaking amin binga dakngake yuamang.
GAL 5:1 Ngan. Jesuta nin gatanimuke sanga Judia nana aminda inane miti kepi kwaapzangu kwatan siknga tawake tasikaing kakngane ita ninu sandekut. Unzingge ginda akekekake aminu dua kapewa ginu gatu danipakopa sanga waakngae gepbiatangu ma kopam.
GAL 5:2 Natapnong. Na Pol. Nata ginu daniwa natapnong. Ginu Anutue nomune gitna yutnangge natake Mosesdane mama wam tawake gupza matawanu Kraisda dua gatandaman ginu Anutue nomune amin nomanu dakngananga dua.
GAL 5:3 Ngan. Ginu aminu kundu kapewa wa aminda Mosesdane mama wam tawake gindane gupza mataningge natagwaanguke yuaing amin! Nata kekeknga siknga ginu gatu daniwa natapnong. Gindane gupza matawanu ginu Mosesdane mama wamu kwaapzang tawake itane gepbiatang katak siknga yutnong.
GAL 5:4 Siakan. Ginu Anutue nomune gitna yutnangge natake Mosesdane mama wamu katak siknga tawake tasinim ngang yakaing amin! Ginu Kraisda dua gatandaman ginda sanga Anututa musip kwikwiu ginde natandamukut takngae masa imuke pimaking.
GAL 5:5 Siakan. Siwan Waung Kapata musipmin pangenawan ninda Kraisde natapna kekekanggak. Ie natapna kekekawan ita waiaknganin sandetnimuke gataniman ninu Anutue nomune gitna yutnimde apbakngake kayuamang.
GAL 5:6 Dasingge? Aminu Jesu Kraiskat gatake yukengu sanga wa Mosesde mama wam tawake gupna matakaing kakngae natapa sanga moo siwik. Siwan sanga aminda mama wamde masa imuke gupna dua matawiu wa kuut sanga moo siwik. Siwan ngana aminda Jesue natapa kekekawan notnae butaya natayamukaing kaknga buya siknga unin.
GAL 5:7 Tupa ginda kepi take siknga sukukaking. Sike ngana ginda siakan wam taknga teningge asikaya aminu tapatuta kepisa umutdaman teking ba dasing?
GAL 5:8 Anutu gin yandawamban ie kuking kapata dua danindatdauwan teking. Wena.
GAL 5:9 Wamu takngatusimu ninda tapdukbam tuwanguke anzing yakamang, “Sanga poyakat sakaingu mateknga tangana ita poyau kuupbam tasiwan apaptanggak. Sike ginda ateking kakngatane yapii unin.”
GAL 5:10 Siwan nata natake Buyambam tapaninda gin gatandamikge natapa kekekanggak. Ita gin gatandaman ginda natane natdetdeu waakngakan tawaning ngang natapa kekekanggak. Sike aminu wa ginde natdetdetza pasiwan maikaing kapatane umana na dua nataatde undanga. Anututa aminu waapae inane waiaknganae toknga asimik.
GAL 5:11 Siwan mate notnabam! Nata Mosesde mama wam tawake gupna mataningge yaninggat gamu Judia nana aminda na dua tasiwa maiwan. Ngan. Nata gupna mataningge yanikengu nata wamu Jesuta amin saamdakane ninde tangge kungwanimukut takngae wa aminda ie semna nataaing kaknga nata teke dua yaniwit.
GAL 5:12 Sike nata aminu wa natdetdetza pandambanukaingge semna siknga natayamunggat. Wa aminda Mosesde mama wam tawake gupna matakaing. Asingu gupna kuupbam matake zitnong. Unzing katum aminda tasikaing binga tasinong.
GAL 5:13 Siakan mate notnabam. Anututa ginde natake ginda sanga Judia nana aminda inane miti kepi kwatanbam tawake tasikaing kakngae gepbiatang dua yutningge ginu yandawamban ie kuking. Ngan. Ginu sanga waakngae gepbiatang dua yuaing ngana ginda gisae tagwautnong. Asikaya sanga waaknga teke sanga gindane musipza enayaaknga tawake tasining ba dasing? Aho. Unzingu tasinanga dua. Ginda notzae butaya natayamuke gatayamunong.
GAL 5:14 Dasingge? Mosesda mama wamu takngatu anzing yakut, “Gata aminu gae wesim yuak kapae butaya natangamuyo,” ngang matakut. Siwan ginda mama wamu awia waakngakan tawake tasikengu ginu mama wam sandeya amin dua daknganing.
GAL 5:15 Siwan ngana ginda kaakaanga yake asinggan yanganuke sapdut wam yakaing kaknga atenong. Ginda unzing yake notza pasiwa mainang.
GAL 5:16 Siwan nata ginu daniwa natapnong. Ginda natake Waung Kapata musipza pangenake daninggak kakngae natanggamatake tasinong. Tasike sanga musipza enayaaknga ma tawake tasiwam.
GAL 5:17 Dasingge? Sanga musipmin enaya akngata enake sanga Waung Kapata tangenakgak kaknga yaitapaakusinggak. Sike Waung Kapata tasike sanga musia enayaaknga yaitapaakusinggak. Siwan sanga wa takngaatda amak binga tasikamayak. Tasike gindane kepisa umutdamat ginda sanga musia enayaaknga tasinanga dua.
GAL 5:18 Sike ngana ginda katewa Waung Kapata gin danipakuwanu Mosesdane mama wamda gin dua panggaganuwan ginda ie gepbiatang dua yutning.
GAL 5:19 Siwan sanga musia enaya akngae ginu atnataaing. Musia enawan aminda yasewa tasike gatu
GAL 5:20 anutu pupukngae yanindatake gatu gaam ba gom ba pitatapa pasikaing. Pasike gatu notnae atemna natake gatu wambam yake yanganuke gatu aminu tapatutane sangae geenguke ie musia zikaa natangamukaing. Natake gatu musia toknga natake gatu yamandet sike gatu amnangge yake gatu dongu takngaaya dakngakaing.
GAL 5:21 Dakngake gatu musia kupia natake gatu yangga toknga aknga tangoke datdaptake yanganuke gatu sanga kuupbamu wa binga atasikaing. Siwan wamu nata tupa danikum takngakan nata gatuna daniwa natapnong. Aminu sanga wa binga tasikaingu Anututa dua papan itane gepbiatangu kopnanga dua. Wena siknga.
GAL 5:22 Siwan ngana Waung Kapata nindane musipmin pangenawan ninda notninde butaya natayamuke gatu apbakngake gatu musip kwikwik natayamunim. Natayamuke gatu iwaninde musipminu toknga zet dua natayamuke gatu amin gatayamuke gatu sanganinu dua kotnake gatu wamu ayakamang kaknga tasina buya aakgak.
GAL 5:23 Gatu sapdut wamu dua yake gatu natdetdetnin tagwauke tasikamang. Aminu sanga wa binga tasikaingu mama wamda dua yanindaknganggak. Aho. Mama wamda sanga wa binga pangenatnangge yanggak.
GAL 5:24 Siwan aminu Jesu Kraisdane amina dakngake yuaingga sanga musia enayaaknga gwa tanguwa kumbut.
GAL 5:25 Sike Waung Kapata nindane musipmin pangenawan ninda kepi kayuk kakngane sukukengu ninda Waung Kapa katena ita nin ninipakuwan sukunim.
GAL 5:26 Sukuke ninda apiapit wam teke aminu nin binga dua ngang kakengu nambiknga dua yanike musipminu zikaa notninde dua natayamunim.
GAL 6:1 Sike mate notnabam! Aminu gikat nana tapatuta sanga wai takngatu tasiwan kakengu ginu Waung Kapata danipakunggak aminda waapae musipza kwikwiknga natangamuke itane musia tapa nomatayok. Ginu waapae natake ginda gisae tagwauke sanga wai ita tasikut takngane pimanam ngang natake gatangamunong.
GAL 6:2 Ngan. Ginu meyaaknga notzata kaning kakngae natake gatayamunong. Sike aminu unzingu notna gatayamiu waapata mama wamu Kraisda tawake yanikut taknga tawake tasinggak kapa unin.
GAL 6:3 Siakan. Aminu tapatuta notna gatayamunangge dua natake ita inane musiaatang apiapit wam yawiu waapata kem natake aminu moo amin binga dakngake yuwik.
GAL 6:4 Siwan ginu kuupbam inandek inandek sanga ginda tasikaing kaknga gisa usanzike natapnong. Usanzike notzatane sangae dua natake ginda gisa usanzike natapa take siwanu ginda apbaknganong. Ginu notzatane sanga aknga kake gindane sanga akngasa ma usanziwam.
GAL 6:5 Dasingge? Aminu kuupbamda sanga atasikaing kaknga inandek inandek usanzike natapanu asikaya tapatutane waiakngana wena siwik ba dasing? Aho. Kuupbamda inane waiaknganae atnatapning.
GAL 6:6 Siwan aminu Anututane wamu gin danikapmakaingu gindane sangasa dua kotnake wa amindane gupna gatayamunanga aknga ginda ayamunong.
GAL 6:7 Sike ginda kemu ma natapam. Aminu tapatuta Anutu kem tanzike ininanga dua. Aho. Sanga aminda tasiwik kaknga buya asaawan buya waakngakan tapik.
GAL 6:8 Ngan. Aminu tapatuta sanga inane musia enaya akngae natanggamatake tasiwanu sanga waaknga buya aake ita aminu waapa atasiwan maiwik. Ngana aminu tapatuta katewan Waung Kapata waapa initakuwan sukuwiu ita akupanu Waungga gatu tangenake gatangaman ita kayuk asinggan asinggan yuwik.
GAL 6:9 Siwan ninu kepi nomana akngane sukuke kwatan ngang natake dua bitatenim. Ninda semna dua natakengu tapduknga Anututa tekut gwene ninu buya waaknga atanim.
GAL 6:10 Unzingge ninda tapduu notnin gatayamunanga gwene yuamang. Yuke aminu Jesue natapa kekekawan itane donga dakngakaing amin gatayamunim. Wa amikat gatu aminu kuupbamu kuut gatayamunim.
GAL 6:11 Nata leta buyambam daka daka nata ninae katakngata a matanggat daka daka kake ginda atnatapning. Na Pol. Nata pas asanu ginde matandamunggat.
GAL 6:12 Aminu wa gin danindamuke gindane gupza Mosesdane mama wam tawake matanangge yakaingge natake nata daniwit. Wa aminu umana buyambam siknga aminu kundue kaine tanangge natake ginu gupza mataningge danikaing. Wa aminda natake aminbamda ninu pasiwa mainam ngang natake wamu Kraisda ninde tangge amin saamdakane kungwanimukut taknga takusopuke ginda sanga waakngae gepbiatang yutningge dua danikaing.
GAL 6:13 Ngan. Aminda Mosesdane mama wam tawake gindane gupza matananga akngae danikaingu wa aminda mama wamu waaknga katak siknga dua tawake tasikaing. Aho. Ginda wa amin kapewa gindane gupza matake gin papa ginu Judia nana binga daknganing. Dakngawa wa aminda sanga waakngae umana buyambam tanangge natake danikaing.
GAL 6:14 Ngana na. Nata sanga takngatu nata nina tasikum takngae baknganangge asiknga bitanggat. Nata Buyambam tapaninu Jesu Kraisde natake ita ninde tangge amin saamdakane kungwanimukut takngaekan natake apbakngawit. Sanga waakngata tasike sanga kepdakane nana tupa nata ie apbakngakum taknga tanguwan kumbut. Tanguwan kupan nata sanga waaknga gatukande tekum. Unzing aminu amin saamdakane kumbut tapata sanga kepdakane nana tupa ie apbakngakut taknga gatukande teke yuak binga nata sanga wa kuupbam gwa pekum.
GAL 6:15 Sike na atnataat. Aminda gupna matawa kake Anututa natapan sanga moo singgak. Siwan aminda gupna dua matakingu Anututa wa aminde dua bitanggak. Ngana Waung Kapata tasiwan ninu musipmin tana tekwamban aminu inata kundu dakngake yuamang kakngata gataniman ninda Anutue nomune gitna yutnim.
GAL 6:16 Siakan. Aminu kuupbam Anututane amina siknga dakngake natdetdeu waaknga gitna pake tawake tasikaingu wa aminde Anututa musia kwikwiknga natayamuke wa aminda butaya natayamikge natake nata wamu waaknga daninggat.
GAL 6:17 Siwan aminu gikat nana tapatuta natane umana gatu dua tasiwan maiwan. Dasingge? Nata Jesue puya tasike yuwawa asikaya aminda na nuwa kupitde tasike na nukinggane gupmane gwaiknga wena ba dasing?
GAL 6:18 Mate notnabam! Nata ginde natake Buyambam tapaninu Jesu Kraisda ginde musip kwikwik natandamikge take siknga nataat. Unukan.
EPH 1:1 Na Pol. Anututa yawan Jesu Kraisda na tapan itane kwiiknga dakngakum. Dakngake itane puyana tasiwa nanduke aminda aposel ngang nanikaing. Siwan nata pas asanu ginu Jesu Kraisde natapa kekekawan itane aminabam dakngake yuaingu Efesas yot gapmane nana aminde matandamunggat.
EPH 1:2 Nata tumuk wam yawa Nanin Anutuat gatu Buyambam tapaninu Jesu Kraiskatda ginde musip kwikwik natandamuke gin gatandamat ginda musipza kwikwikngata yutning.
EPH 1:3 Ninda umana Nanin Anutuat gatu Buyambam tapaninu Jesu Kraiskatdane aknga yapangenatnim. Dasingge? Anutu sanga Kraisda nin gatanimukut takngane ita nin pasiwan ninda itane gepbiatang koke kekeknga yutnimde tasinimukut.
EPH 1:4 Ngan. Tapduknga yekapat kepat dua tasike tekut gwene Anututa sanga Jesu Kraisda nin gatanimik kakngae natake ita ninde butaya siknga natanimukut. Natanimuke ita ninu inae panangge natapbut. Ita nin papan ninda itane amina dakngake itane nomune amin noman dakngake yutnimde natake nin panangge yawan yukut. Yawan yuwan Anututa inane waaknga Jesue musip gwaang siknga natake sanga Jesu waapata ninde tangge tasinimukut takngae apbakngake ita ninde musip kwikwik natanimukut. Natanimuke ita ninu inae papan ninda itane waaknga yapana binga dakngake yuamang. Yuke ie apbakngake ninda itane umana akngana asiknga yatangenatnim.
EPH 1:7 Siwan Jesu waapata ninde butaya siknga natanimuke ita ninde tangge kungwanimukut. Unzingge Anututa ninde musip kwikwik nataniman buyambam siknga sikut. Siwan ita nindane waiaknganin sandetnimukut.
EPH 1:9 Sike natdetdeu ita natake tekuu waaknga tapduknga ita yawan yukut gwene buya aawan Anututa sanga kuupbam enandang yuaing ba kepdakane yuamangu kuut pake ita Kraisde gepbiatang pewan koyutnim. Siwan natdetdeu ita wa natapbuu ita inane musiaatang natake tekut. Teke yusika ngana natdetdeu wa ina banipda siwan natapbuu waaknga ita ninde gwa yeutniman nataamang.
EPH 1:11 Ninu atnataamang. Anututa sanga ina banipda siwan tasinangge yawan yukut taknga atasiwik. Sike ita aminu Kraisde natapa kekekawiu wa inae panangge yawan yukut taknga atasike pakut. Tasike ita ninu inae papan aminu kuupbamde gamok ninda Kraisde tupan natapna kekekakut. Siwan ninda sanga ita nin gatanimukuu waakngae natake itane umana akngana asiknga yatangenatnim.
EPH 1:13 Siwan gikaya kuut siakan wamu atnatapbing. Natapa wamu take waakngata gindane musipza pangenawan ginda Anutue kuwa ita ginu inae papan yuaing. Siwan tupa Anututa natake inane Waung Kapa initewan kuke waapata itane aminabamdane musiaatang pukuke papikge natake yawan yukut. Sike wamu ita wa yawan yukut taknga tasike ita inane Waung Kapa ginde damukut. Ita Waungu waapa ginde damukuu ita ginu inae papan ginda itane aminabam dakngakingge natake ginde damukut.
EPH 1:14 Waungu ita ginde damukuu waapa ginda take yuwawa kuku tapduknga Anututa ninu aminabamu waiakngane gatukande sandeke enandang ninipakopik gwenda apik. Siwan ita inane Waungu waapa ginde daman ginda natake Anututa apmea ninu waiaknganinu gatukande sandewan ninda iat gatake asinggan yutnim ngang natapa kekekanggak. Unzingge ninda Anutu ninu take siknga gatanimukut tapatane umana asiknga yatangenatnim.
EPH 1:15 Siwan nata wamu ginda Jesue natapa kekekawan musip gwaangu Anututane aminabamde natayamukaing kakngae natapbum.
EPH 1:16 Natake asinggan nata Anutu ginde inimbaknganggat. Tendeknga wena inimbakngake nata tumuk wamu asinggan ginde natake iniwa ita gin gatandamikge yanggat.
EPH 1:17 Yake nata Buyambam tapaninu Jesu Kraisdane Anutunae ininggat. Waapa nindane Naninu nomana siknga apa unin. Waapae iniwa ita inane Waung Kapa ginde daman ita natdetdeu nomana siknga ginde damik. Daman ginda Anutue katak siknga natdetning.
EPH 1:18 Ngan. Nata waapae iniwa ita natdetdeu buyambamu ginde daman kakaa siwik. Natdetdeu wa ginde daman ginda anzing natapning. Anututa ninu waiakngane sandetnangge natapbut. Natake ita ninu yaniwamban ie kunimde natake yawan yukut ngang natapning. Siwan ita ninu yaniwamban ninda ie kuke Anututa ninu waiakngane gatukande sandewikge bakngake natayuamang ngang natapning. Ginu natdetdeu waaknga anggaman natapningge natake ita inane Waung Kapa ginde damukut. Daman ita gindane natdetdetza tapan kakaawan ginda natdetdeu kuupbam Anututa ginde natake gatandamunangge yawan yukut taknga atnatapning.
EPH 1:19 Natake ginda natdetdet pake Anututa inane kekeknga siknga aknganata ninu ie natapna kekeknga singgak aminde banakan tasinimunggak ngang natapning. Ngan. Ita inane kekeknga siknga aknganata tasike
EPH 1:20 Krais akumbut katangga gatuna tangenakut. Ina unzakan ita ninde banakan yuke kekeknga waaknganata gatanimuke atasinggak ngang natapning. Siwan ita Krais gatuna tangenake enandang initakopbut. Initakoke itane umana buyambam siknga singgak ngang natake Anututa iniwan Kraisda kataknga siyaapane pukwiikut.
EPH 1:21 Pukwiiwan Anututa itane gepbiatang aminu tupan tapaapa kepna kepna nana gatu enandang nanaaya kuut pekut. Itane gepbiatang pewan Kraisda aminu umana kaya apaapa kuupbam ayapbike ninu kuupbamdane toikngin dakngake asinggan asinggan yuwik.
EPH 1:22 Ngan. Anututa aminu kuupbam pake itane gepbiatang pekut. Pewan ita ninu inane aminabam dakngake yuamang aminde tupan siknga amin tapa dakngake ninduyuak.
EPH 1:23 Siwan ginu atnataaing. Ninu Jesutane aminabam dakngake yuamangga dongu takngatukan binga dakngake yuamang. Siwan ninda itane aminabamu dua dakngake yuamang gamu ita aminu kuupbamu inane dua papan puyuwan. Ngana sangabapat ninu amikatde toikngin siknga Jesu unin. Ita inane kekeknga aknganata ninu kepna kepna nana aminu kuupbam ninduyuak.
EPH 2:1 Siwan ngana tupa ginda Anutue dua natake ginda wai takngatu takngatu tasike apbotasukuke yuking. Botasukuke yuwawa Anututa ginde natake ginu akupsa aminu nikat gatake dua yuamang amin binga Anututa naat gatake dua yuamang ngang natapbut.
EPH 2:2 Natake yuwawan ngana ginda sanga wai aminu Anutue masa imukaingga asinggan tasikaing kaknga tawake tasiking. Tasike ginda wamu Setendane aknga tawake tasiking. Siwan Setenu wa waungu waiakwakgane tupan tapa unin. Ita aminu waiakngane sukukainggane natdetdetna kaipakunggak.
EPH 2:3 Siakan. Tupa ninu kuupbamda aminu waiakwakat gatake sukukumang. Sukuke nikaya kuut sanga wai musia enaya akngakan tawake tasikumang. Ngan. Ninu kuupbamda sanga wai takngatu takngatu pasiwatna sanga Anututa toknga nimunanga akngata aminu kunduekan dua yuyamukut. Aho. Sanga toknga waakngata ninu kuutde yutnimukut.
EPH 2:4 Siakan. Ninda nisane waiaknganinu kumzang tasike yuwatna sanga wa toknga yake ninde nimunanga akngata ayutnimukut. Yutniman ngana Anututa ninde butaya siknga natanimuke ita musip kwikwik natanimukut. Siwan nindane musipminu sanga Kraisda akumbut katangga gatuna enakut takngata pangenawan ninda musipmin tana tekwamban waiaknganin bitateke Jesue kukumang. Ninda Jesue kuna ninduke Anututa nin gatanimuke sanga toknga wa ninde nimunanga akngane ninu sandekut. Sandeke ita nin pasiwan ninda iat gatake asinggan kekeknga yutnim. Ngan. Anututa ina musip kwikwiu ninde natanimuke ninu toknga pananga akngane sandekut.
EPH 2:6 Sandeke ninda Kraiskat gatake yuamangge bakngake ita nin pasiwan ninda inane nomune amin noman dakngake yuamang.
EPH 2:7 Siwan ita ninu toknga pananga akngane wa sandekuu ita ninde butaya siknga natanimuke sandetnimukut. Ita sanga Jesu Kraisda gatanimukut takngae natake ninde musip kwikwik natanimukut takngata buyambam siknga sikut. Siwan sanga wa ita ninde musip kwikwik natanimukut taknga aminu kuupbamu ninu apmanu tapduu ayuamang komune nana gatu apmea aatning aminu kuutda natapnimde tasikut.
EPH 2:8 Ginu atnataaing. Anututa ginu wa sandekuu ita ina banipda siwan musip kwikwiu ginu Jesue natapa kekekanggak aminde natandamuke toknga ginde yutdamukut takngane ginu sandekut. Sike ita ginu wa sandekuu ginda kepi nomana sukuwa dandupan take sikutde natake dua sandekut. Aho. Sanga wa sandekut taknga Anututa ina banipda siwan ginde musip kwikwiu natandamukut. Natandamuke ita ina banipda siwan gindane musipza pangenawan ginda waiakngasa bitateke ie natapa kekekakut. Ginda ie natapa kekekawan danduke ita toknga pananga akngane ginu sandekut. Ngan. Ginda gisa banipda siwan dua Anutue natapa kekekakut.
EPH 2:9 Aho. Ita ina gindane musipza pangenawan ginda ie natapa kekekawan ginu sandekut. Unzingge ginda gisane umanza yapangenatnanga dua. Wena.
EPH 2:10 Anututa ina nin pasiwan ninda Kraisde kuke iat gatake yuamang. Ngan. Ita nin pasiwan ninda nisane musipmin tana tekwamban Jesue kuke natdetdeu kayuk kaknga take kepi nomana akngane sukunimde natake tasinimukut. Sike tupa ita kepi nomana waakngane sukunimde natake yawan yukut.
EPH 2:11 Siwan ginu tupa katum amin dakngake yuking kakngae ma botawam. Ngan. Tupa ginda Anututane mama wamu dua natake ginda tuwangu Anututane amina bamdane aknga gisane gupzane dua mataking. Dua matawa aminu Judia nana inane gupna matake ninu Anututane aminbam dakngake yuamang ngang yaking. Yake ginde sapduke ginu gupza dua mataking aminde natake katum amin ngang daniking.
EPH 2:12 Sike tapduu waomune ginda Kraisde dua natake ie dua kuking. Dua kuke ginda Anututane aminabamu Isrel kep komune nana amikat gatake dua yuking. Aho. Ginu dongu takngatune nana. Siwan Anututa wamu inane aminabamu Isrel nana amin gatayamikge yawan kekekawan ngana gin gatandamikge dua yakut. Wena. Ginda kepman yuke wamu wa itane aminabam gatayamikge yakut taknga apu ginde apikge dua natake ginda ie dua bakngake natayuking. Ngan. Ginda Anutue dua siknga natake Anutu dua yuak na natapbing.
EPH 2:13 Natake ginda Anutue maa yuking ngana apmaau ginda ie gwa kuking. Dasingge? Jesu Kraisda ginde tangge kungwandamuke inane daknga tukngwakut. Siwan sanga wa ita gin gatandamukut takngata gindane natdetdetza kaipakuwan ginda Jesue gepbiatang kopbing. Koke ginda Anututane aminabam dakngake Anututane nomune amin noman dakngake yuaing.
EPH 2:14 Siwan tupanu ginda Anututane mama wamde kepman yuwawa ngana ninu Judia nana aminda mama wamu waakngae gepbiatang yukumang. Yuke gikat nikat iwan dakngake yukumang. Siwan iwan dakngakumangu waaknga damanu gwendu binga ninde banakan yukut. Yuwawan Jesuta damanu wagwen waitnangge natapbut. Waike sanga wa ninda iwan dakngakumang kaknga tanguwan kupikge natapbut. Tanguwan kupan ita ninu kuupbam gikat nikat kuut ninipakuwan Anutue kuke itane gepbiatang kopnimde natapbut. Koke gikat nikat dongu takngaaya yukumang ngana dongu takngatukan binga dakngake yutnimde natapbut. Ngan. Ita damanu wagwen waitnangge natapbut. Natake ita gikat nikat kuutde tangge amin saamdakane kungwanimukut. Kungwanimuke ita kepi kayuu Anutue nomune amin noman dakngananga aknga ninde tasinimukut. Kepi kayuu waaknga tasike ita kepi ninu Judia aminda tawake tasikumang kaknga tanguwan pimakut. Siwan kepi ita wa tanguwan pimakuu waaknga ninda mama wamu kwaapzangge gepbiatang yuke tasina Anututa nindupan take siwik ngang natapbumang kaknga unin. Kepi waaknga Jesuta ina tanguwan pimapan sanga gikat nikatda iwan dakngakumangu waaknga wena sikut. Siwan ninu kuupbamda Anutue gepbiatang koke dongu takngatukan binga dakngake gikat nikat unekan gatake takekan yuamang. Unzingge ninda natake sanga ninda Anutue nomune gitna yutnanga akngae yapii Jesu unin ngang nataamang.
EPH 2:17 Siwan ita apuke wamu wa Anutue nomune take yutnanga aknga ninikapbut. Ita wamu waaknga ninu Judia nana Anututane aminabam dakngakumang aminde ninikapmake gatu ginu kepman nana Anutue maa yuking amikat nana kunduaya kuut danikapbut.
EPH 2:18 Ngan. Ita ninu kuupbam kepman nana amikat gatu Judia nana amikat kuut gataniman Anututane Waungu awia tapatutakan nindane musipmikatang pukuke pake ninu kuupbam ninipakapan Anutue kuke itane nomune amin noman dakngake yuamang.
EPH 2:19 Unzingge ginu kepman nana amin dakngake yukingu apmaau ginda Anututane amina dakngake gikat nikat gatake yuke itane dongu awia takngatukan dakngake yuamang.
EPH 2:20 Siwan nata anzing nataat. Ninda Anututane yotna binga dakngake yuamang. Dasingge? You gwendu mitapnangge natake gwak kwaike sup pamuban gitnaning. Gitnawa yotde kwatai mitakaing. Ina unzakan Anututane you wagwendane gwak papan gitnaningge yapii Jesu Krais unin. Ita ninu kuupbam papan kekekakamang. Sike aminu yot gwak pakapu kwaikaingge yanggau wa Kraisda aminu kundu papan itane kwiiknga dakngake wamu takeaknga yanikapmaawa gatu ita aminu kundu papan ayanikapsa amin dakngake puya pasikingge natake nata tuwanguke yanggat. Siwan wa aminda Anututane you wagwen tuwanguke tasiking. Siwan yotde kwatai mitakaing binga Anututa ninu kuupbam ninipakapuke nin pasiwan ninda itane aminabam dakngake yuamang.
EPH 2:21 Siwan yot gwenu nomana siknga mitake tasiwa puyukgak binga Jesu waapata ninu kuupbam papan kekekakamang. Papan kekekake yuwatna ita nin pasiwan ninda Anututane aminabam dakngakumang. Dakngake yuwatna Anututa apuke ninde banakan yuakge natake ninu kuupbamda itane yotna binga dakngakamang ngang nataat. Ngan. Ita gikat nikat kuut pake unekan nipmamban gikat nikat gatake you gwendu Anututa ayuak gwen binga dakngake yuamang. Ngan. Ita inane Waung Kapa initewan apuke nindane musipmikatang pukuke papan yuamang.
EPH 3:1 Siwan Anututa sanga waaknga ninde tasinimukutde natake nata ginu keu komduine nana aminde daninggat. Na Pol. Na Jesu Kraisda tapan na itane kwiiknga dakngake gin gatandamunangge tasiwawa aminda kaautde napmaba yuat. Yuke nata Anututa gin gatandamikge natake ie tumuk wam ininggat.
EPH 3:2 Ginu atnataaing. Anututa na tapan itane kwiiknga dakngakum. Dakngawa ita na nanitewan kuke nata ginu Anutue dua natapbing aminde kuke itane wamna ginde danikapitde nanikut.
EPH 3:3 Sike tupa ita natdetdeu takngatu inane musiaatang natake tekut ngana ita natdetdeu waaknga nae nanikapan natapbum. Natapbumde nata natdetdeu waakngae natake pas asane wamu dapaknga gwa matat.
EPH 3:4 Sike wamu dapaknga nata wa matau ginda kendeke Jesuta natdetdeu wa nae nanikapan natapbum takngae anggaman natdetningge natake matat.
EPH 3:5 Siwan natdetdeu wa aminu tupa yukingge Anututa dua yanikapbut. Aho. Anututa nin papan itane kwiiknga dakngana gatu ita aminu kundutane musia pangenawan itane wamna yanikapmakaing. Sike ita ninu inane puya amindekan natdetdeu wa ninikapnangge natake inane Waung Kapa initewan apuke ninde yeutnimukut.
EPH 3:6 Siwan natdetdeu ita ninde wa yeutnimukut taknga anzing. Wamu Jesuta nin gatanimukut takngae natake ginu tupa Anutue dua natapbing aminda Jesu Kraisde kuke iat gatake yutning. Yuwawa wamu tupa Anututa Jesue natake ninu Judia nana inane aminabam gatanimunangge yawan yukut takngata yutake apu gikaya kuutde apik. Ngan. Kepi waaknga tawake ita gikat nikat pake unekan nipmamban dongu takngatukan binga dakngake yutnim. Sike natdetdeu ita ninde wa yeutnimukut taknga unin.
EPH 3:7 Siwan Anututa na tapan nata itane kwiiknga dakngakum. Dakngawa ita inane kekeknga aknganata tasike nata natdetdeu ita gwa nanikapbuu waaknga take yanikapitde napmanggut.
EPH 3:8 Ngan. Nata aminu Anututane aminabam dakngake yuaingu kuupbamde natapa amin gwaang singgak. Siwan aminu waakwau kuupbamda na atnapbiking ngana Anututa puya nae namunangge na tapan nata itane kwiiknga dakngakum. Dakngake nata Jesue natake amin gwaang siknga apa ngang natake gatu ie akgatanimunanga apa ngang natake nata ginu Anutue dua natapbing aminde kukum. Kuke natdetdeu nata Jesue nataat takngae natake ginde danikapbum.
EPH 3:9 Ngan. Anututa natake nata aminu kuupbamdane natdetdetna papa kakaatningge natake puya waaknga nae namukut. Nae naman nata tasike natdetdeu wa tupa Anutu sangabam tasike tekut tapata inane musiaatang natake tekut taknga yanikapitde puya namukut.
EPH 3:10 Naman yanikapmake tasiwa aminu buyambamda itane aminabam dakngake dongu takngatukan binga dakngakaing. Dakngawa kake angela enandang nana umana kaya akwakga Anututane natdetdetnae natapa buyambam siknga siwikge natake ita puya waaknga nae namukut.
EPH 3:11 Siwan natdetdeu waaknga tupa siknga Anututa inane musiaatang natake apmea tasinangge natake tekut. Sike natdetdeu ita wa natake tekut taknga tasinangge natake ita Buyambam tapaninu Jesu tapan ita akgatanimunangaapa Krais ngang inikamang kapa dakngake ninde epbut.
EPH 3:12 Siwan ninda Jesu waapae natapna kekekawan ninda Anutue kundopnangge dua gwaukamang. Aho. Jesuat gatake yuke take kundopnim.
EPH 3:13 Unzingge natake nata wamu kekeknga ginde daninggat. Nata gin gatandamitde kepi umukngamunangge natake iwanata enake meya takngatu takngatu nae namukaing. Sike meya wa namukaingge natake ginda ma tuyukawam. Kekeknga yutnong. Dasingge? Meya nata wa panggau nata gin gatandamunangge panggatde natake aminu buyambamda gindane umanza yapangenataning.
EPH 3:14 Siwan natdetdeu Anututa wa nae nanikapbut takngae natake nata Naninde gwetake tumuk wam ininggat.
EPH 3:15 Naninu waapa ninu itane aminabam dakngake yuamangu kuupbamu kepdakane yuamakat gatu enandangu iat gatake yuaikat nganggane Naninu unin. Sike ninda itane donga awia takngatukan dakngake yuamang.
EPH 3:16 Siwan ita kekeknga akngae yapii ngang anggaman natake nata tumuk wam iniwa ita gin gatandamunangge yawan itane Waung Kapata gindane musipza papan kekekake ginda kekeknga siknga yutning.
EPH 3:17 Ngan. Ginda Kraisde natapa kekekawan ita gindane musipzaatang pukuke papikge natake nata tumuk wam ininggat. Iniwa ita gindane musipzaatang pukuke papan ginda musip gwaangu Anutuat gatu notza itane aminabam dakngake yuaing amikatde natayamukaing kakngata kekeknga siknga siwik. Siwan katap muyakga katau buya daka tapan kekekawan gitna yuwik. Ina unzakan ita gin papan kekekaningge natake inindatanggat.
EPH 3:18 Inindatapa ita gindane natdetdetza papan kakaawan gikat gatu Anututane amina kuupbapatda natake Kraisda ninde butaya natanimukut takngae anggaman natapning. Ginda ie natapa buyambam siknga siwikge natake inindatanggat.
EPH 3:19 Siwan butaya ita wa natanimukut takngae natapna buyambam siknga siwan ninda kuupbam pananga dua singgak ngang nataat. Ngana ginda butaya waakngae natake yuwawa Anututa inane natdetdetna gindane musipzaatang kwaapzang pamumbikge natake inibutanggat.
EPH 3:20 Siwan sanga ninda ie inibutakamang kakngaat gatu sanga nindane musipmikatang natake ita gatanimikge nataamang kakngaat kuut apasiwik. Ita sanga kwaapzangu unin pasinangge dua meptawik. Aho. Ita sanga wa kuupbam pasiwan puyuwana sanga kunduat inane kekeknga aknganata nin gatanimunangge tasiwik. Siwan itane kekeknga waakngata apmanu nindane musipmin katang apasinggak. Ge itane aminabamda Jesu Kraisde apbakngake Anutu waapatane umana asiknga yatangenawa enane siknga asinggan asinggan yuwik. Siakan.
EPH 4:1 Siwan na. Nata Buyambam tapanindane puya pasingamuwawa iwanata enake kaautde na napmaba yuat. Nata wamu kekeknga ginde daniyapikgat. Anututa gin yandawamban ginda kepi nomana akngane sukuningge natake yandawakut. Unzingge ginda kepi nomana waakngakan tawake tasinong.
EPH 4:2 Tasike ginda apiapit wam taknga teke aminu kuupbamde wepda wepda pasiyamunong. Pasiyamuke notzae butaya natayamuke meya notzata ginde dama kakengu ginda wikake yutnong.
EPH 4:3 Yuwawa Waung Kapata gindane natdetdetza kaipakuwan ginda musipza takngatukan nataaing. Sike musipza takngatukanu wa nataaing kaknga gitna siknga take ginda dongu takngatukan binga dakngake yutnong.
EPH 4:4 Ginu atnataaing. Ninda dongu awia takngatukan yuamang. Gatu Anututane Waunga awia tapatukan. Ina unzakan Anututa gin yandawamban ginda sanga takngatuekan apbakngake natayutningge yakut.
EPH 4:5 Siakan. Buyambaminu awia tapatukan. Siwan natdetdeu ninda gitna take ie natapna kekekanggau awia takngatukan take yuamang. Gatu ninu kuupbam yangga sautnimunangge natake natdetdeu awia takngatuekan natake yangga sautnimuking.
EPH 4:6 Gatu Anutu awia tapatukan. Ita ninu kepna kepna nana ie nataamangu kuupbamdane Nanin. Ninu kuupbam nipbike nindane tupan siknga apa yuak. Ita ninde banakan yuke nin papan ninda musipminu takngatukan natake yuamang.
EPH 4:7 Siwan Kraisda natdetdetde toiknga. Ita puya inana ninde inandek inandek nimunangge natake inane natdetdetna usanzike ninde nimukut.
EPH 4:8 Ngan. Ayanikapsa aminu tapatuta tupa siknga iekan natake ita Anututane wapatang wamu takngatu anzing matakut, “Ita enandang koke aminu kundu tupa iwanata panggaganuwa yuking amin sandeke inae pakut. Pakenga ita wa aminde sanga takeaknga moo siknga ayamukut,” ngang matakut.
EPH 4:9 Siwan ninda wamu wa ita enandang kopbut ngang matakutdane yapii dasing natapnim? Wamu ita wa matakuu Jesuta enandang kopbut nganggan dua natapnim. Aho. Tupanu ita enandang yuke uneta epbut. Epuke aminu kepdakane nana tapatu dua yapbikut. Aho. Ita amunandang siknga yukut ngang natapnim.
EPH 4:10 Sike aminu wa enandangga epbut tapata gatuna enandang koke aminu kuupbam yapbiban itane umana akngata enane siknga yuak ngang natapnim.
EPH 4:11 Siwan wamu wa ita sanga takeaknga wa aminde moo siknga ayamukut ngang matakutdane yapii anzing. Jesuta aminu kundu inae pakut. Pake ita aminu tapatu tapatue natdetdeu takngatu takngatu yaman pake wa aminda itane kwiiknga dakngaking. Dakngawa kake ninda wa aminde aposel ngang yanikamang. Siwan itane natdetdetna inana aminu kundue inandek inandek yaman pake wa amikat nana kunduta itane wamu aminbamde yanikapmakaing. Gatu kunduta Jesutane wamna take yanikapmake tasitakukaing. Gatu kunduta Anututane aminabam kayuke siakan wam taknga yanindamukaing.
EPH 4:12 Ngan. Ita puya inana yaman tasike wa aminda ninu Anututane aminabamdane natdetdetnin papa nomataningge natake yamukut. Yaman tasike wa aminda nin gatanimuke nindane musipmin papa nomatawa ninda Anutue kekeknga yutnimde natake puya waaknga yamukut.
EPH 4:13 Yaman take tasike ninu kuupbamda Jesue natake Anututane waaknga siknga ngang natapnimde tasikaing. Ngan. Ninda Jesue natapna kekekawan ninu kuupbamda natdetdeu waakngakan take musipminu takngatukan natapnimde natake tasikaing. Tasike ninda natdetdetninu anggaman natake Anutue kekeknga siknga yutnimde tasikaing. Tasike ninda kepi nomana siknga Kraisda tawake tasikut takngane sukunimde tasikaing.
EPH 4:14 Wa aminda puya waaknga tasiwa buya aawan ninda sanga waatdakata natdetdetna anggaman dua natake botasukukaing binga ninda dua tasinim. Aho. Siu gwendu yanggata tapan taiwan gotda puyatawamban kunggak. Ina unzakan kem aminu kunduta ninu kem panzike nindane natdetdetnin kaipakuke ninda kem wam taknga tawanimde natake tasiwa ngana ninda natdetdetninu anggaman natake wa amindane wam takngae masa imuke akekekanim. Kekekake dua pimanim.
EPH 4:15 Aho. Ninda aminde musip gwaang natayamuke siakan wamban yaninim. Yanike ninda kepi Kraisda tawake tasikut taknganekan sukunim. Sukuke ninda Jesu nindane tupan siknga aminu waapae gepbiatang yutnim.
EPH 4:16 Itane gepbiatang yuwatna ita nin kekekaniman ninda notninu Anututane aminabam dakngake yuaingge musip gwaang natayamunim. Natanggamuke ninda Anutue kekeknga siknga yutnim. Ginu atnataaing. Waatdaka tapatu itane gupnatane sanga kuupbamu takekan siwanu waapata atakawik. Ina unzakan ninu Anututane aminabamda itane gepbiatang koyuwatna ita ninu akekekanimik.
EPH 4:17 Siwan nata wamu takngatu Buyambam tapanindane umana akngae yake nata ginu daniyapikgat. Ginda kepi aminu Anutue masa imukaingga sanga moie natanggamatake botasukaing kaknga ma tawake tasiwam.
EPH 4:18 Wa aminda natdetdetna wena siwan yamandet sikaing. Yamandet sike sanga kayuk yutnanga aknga Anututa nimunangge yakut taknga dua take yuaing.
EPH 4:19 Ngan. Wa aminda waiaknga tasiwa kaanga yaniwa ngana dua maakake gatuna tasikaing. Tasike wa aminda sanga wai takngatu takngatu amaakatang siknga koke tasikaing. Tasike wa aminda amindane sangaapae asiknga geenguke sanga wai inata inata kwaapzang pasikaing.
EPH 4:20 Ngana gin. Ginda sanga Kraisdane akngae natdeke sanga aminu waakwakga wai tasikaing bingae ginda dua natapbing. Wena siknga.
EPH 4:21 Na atnataat. Ginda Kraisde wam natake itane gepbiatangu gwa kopbing. Koke ginda iat gatake yuwawa siakan wamu tupa Jesuta Anututane kepi akngae natake yakut taknga puya aminu kunduta gwa danindamuking.
EPH 4:22 Wamu wa aminda gin danindamuking kaknga anzing. Ginda gisane natdetdeu tupa ginda natake tasiking kakngae masa imuke atenong. Dasingge? Natdetdeu waakwakga ginu kem pasiwan pimaking.
EPH 4:23 Sike ginda katewa Anututa gindane natdetdetza papan nomatawa ginda natdetdeu kayuk panong.
EPH 4:24 Ngan. Natdetdeu nomana siknga Anututa ina nataakgan ginda tanong. Take ginda natdetdeu waakwak tawake tasinong.
EPH 4:25 Tawake tasike kem wamu ginda yakaing kaknga apbitatenong. Bitateke ninu kuupbamda Jesue kuke dongu takngatukan binga dakngake yuamang ngang natapnong. Natake ginu kuupbamda inandek inandek gindane notzae siakan wamban yaninong.
EPH 4:26 Ginda notzae musia toknga natayamukengu sanga wai takngatu ma tasiwam. Aho. Gunziu wagwenekan gunzitda dua pukuwawan musipza toknga wa nataaing kaknga atenong.
EPH 4:27 Ngan. Ginda dua katewa Setenda ginu pasiwan maiwik.
EPH 4:28 Sike aminu gikat nana tapatuta amindane sangaapana kukae pakutna kakengu waapata gatuna kukae ma papan. Waapata puya takngatu kake tasiyok. Tasike ita puya wa tasiwik kakngane mani kundu kaike aminu kundu sangaapae dapningu apme gatayamik.
EPH 4:29 Siwan wamu wai takngatu ginda dua siknga yawam. Aho. Wamu take akngakan yanong. Yake ginda notza gatayamunangge natake wamu wa amindane musia papa kekekananga akngakan yaninong.
EPH 4:30 Ngan. Anututane Waung Kapata gin gatandamunangge natake tasiwawan ginda itane kepi ma umukngamam. Ita ginde musia meya natapsak. Dasingge? Ita ginu gwa pake danduyuwawan kuku tapduknga Anututa ginu waiakngane gatukande sandeke danipakopik gwenda apik.
EPH 4:31 Siwan gindane notzae musipza wai natake zikaa siknga nataaing kaknga ginda apbitatenong. Bitateke musipza toknga ma natapam. Ngan. Sanga musipza toknga natake amak wam yake notzae yanisapdukaing kaknga apbitatenong. Gatu sanga inata inata gindane musipzaatang wai nataaingu kuupbam apbitatenong.
EPH 4:32 Bitateke ginda musipzaatang notzae kwikwiknga natayamuke wepda pasiyamunong. Pasiyamuke wa aminda ginda semna natake sanga wai takngatu tasiwa kakengu ginda waiakngana sandeyamunong. Ginu atnataaing. Kraisda nin gatanimukut takngae natake Anututa nindane waiaknganinu gwa sandetnimukut. Ina unzakan ginda notzatane waiakngana sandeyamunong.
EPH 5:1 Siakan. Ginda Anututane waaknga yapana binga dakngake yuaing. Unzingge ginda sanga Anututa asinggan tasinggak kakngakan tawake tasinong. Tasike ginda aminde butaya asinggan natayamunong.
EPH 5:2 Ngan. Kraisda ninde butaya siknga natanimuke ninde tangge kungwanimukut taknga ginda tawake tasike aminde butaya natayamunong. Siwan ita ninde tangge kungwanimukuu wa Anututa nindane waiaknganinde natapan wikawan toknga dua nimikge natake ita ninde tangge kungwanimukut.
EPH 5:3 Siwan ginda Anututane aminabamu gwa dakngake yuaing. Unzingge ginda sanga yasewa aknga ma tasiwam. Ngan. Sanga wai kuupbam amindane sangaapanae geenguke ba sanga inata inata wa binga ma tasiwam. Asikaya ginda Anututane aminabamu dua dakngaking ba dasing? Aho. Ginda gwa dakngake yuaing.
EPH 5:4 Unzingge sanga wai kuupbamu ginda apbitapenong. Wamu yapiina wena aknga ginda moo siknga ma yawam. Wamu wa binga Anututane aminabamda yananga dua. Wena. Ginda wamu wa binga teke gindane musipzaatangu apbakngake wamu take akngakan yanong.
EPH 5:5 Ginu atnataaing. Aminu tapatuta sanga yasewa aknga tasike ba wai takngatu tasiwiu waapata Kraisdane daman gwene dua yuak kapanin. Gatu aminu tapatuta amindane sangaapanae geenguwiu waapata Anutue masa imuke sanga kepdakane nana akngae gepbiatang koyuak kapanin. Aminu waapata aminu anutu pupukngae natanggamatakaing amindane dongaat nana tapatu binga dakngawik. Unzingge ninda aminu waapae natake ita Anututane daman gwene dua koke yuak ngang anggaman natapnim.
EPH 5:6 Siwan ginda dua kapewa aminda ginu kem panzike wamu yapiina wena daniwam. Ginu atnataaing. Anututa aminu itane wamde masa imuke wamu wa binga yakaingge semna siknga natayamunggak.
EPH 5:7 Unzingge ginda wa aminde akagwautnong.
EPH 5:8 Siakan. Tupa ginda zikaa akngane sukuking ngana apmanu ginda Buyambam tapanindane aminabam dakngake kakaa akngane yuaing. Unzingge ginda kakaa akngane sukunong.
EPH 5:9 Ginu atnataaing. Kakaa akngane sukuke tasiwa buya aawan ginda sanga takekan tasike kepi nomana siknga akngane sukuning.
EPH 5:10 Sike kakaa akngane sukuke ginda sanga Buyambam tapaninda take nataak kakngae natdetnangge tasinong.
EPH 5:11 Tasike ginda kepi aminu zikaa akngane sukukaing amikat dua gatake sukuwam. Sanga wa aminda zikaa akngane sukuke tasikaing kaknga buya dua aawik. Wena. Sike ginda wa amindane natdetdetna papa kakaawa wa aminda kepi ina sukukaing kakngae natapa wai siwik.
EPH 5:12 Nata wamu sanga waiaknga wa aminda kusopuke tasikaing kakngae yanangge apmaakanggat.
EPH 5:13 Ngana sanga tapatu kakaa akngane takapuke kaininda anggaman kaamang. Ginu atnataaing. Sanga tapatu kakaa akngane takapuke kana wai siwanu ninda sanga waapa take tanomanuke tasinim. Ina unzakan wamu wa amindane natdetdetna papan kakaatningu wamu waaknga sanga kakaa akngane nana.
EPH 5:14 Unzingge wamu takngatuta anzing yanggak, “Ga aminu apmanu dapun pekgau ga asenayo! Ngan. Ga akumbuyak katangga enawi Kraisda gatane natdetdetda tapan kakaawik.”
EPH 5:15 Siwan ginda gisae katak tagwautnong. Tagwauke aminu natdetdetna wenata tasikaing kaknga ginda ma tasiwam. Aho. Ginda gisane natdetdetza anggaman natake sukunong.
EPH 5:16 Sukuke tapduk ayuamang komune aminda sanga wai takngatu takngatu kwaapzang pasikaing ngang anggaman natake ginda sanga takeaknga tasinangge kepi akakengu atasinong.
EPH 5:17 Sike aminda sanga wai kwaapzang tasikaingge natake ginda sanga aminu natdetdetna wenata tasikaing kaknga ma tasiwam. Aho. Ginda sanga Anututa take nataak kakngae natdetnangge tasinong.
EPH 5:18 Tasike ginda yangga toknga aknga tangoke ma datdaptawam. Dasingge? Yangga toknga aknga tangokaingu waakngata gin panggagunuke pasiwan maining. Ngana ginda katewa Waung Kapata gindane musipzaatang pukuke pake gindane natdetdetza kaipakuwik.
EPH 5:19 Kaipakuwawan ginda notzae yaninangge natakengu miti kapde wamu takngatu takngatue natake yaninong. Yanike Buyambam tapaninde inimbakngake ginda miti kap tainong.
EPH 5:20 Taike Buyambam tapaninu Jesu Kraisdane umana akngae Nanin Anutue kuke ginda sanga ita gin gatandamunggau kuupbamde natake asinggan inimbaknganong.
EPH 5:21 Siwan ginda Kraisdane gepbiatang yuaing. Yuke ie natanggamatake gindane notzae wam gwaamutnong.
EPH 5:22 Siwan ginu maya. Ginda Buyambam tapanindane gepbiatang yuaing. Ina unzakan ginda apzae gen gwaamuke tasinong.
EPH 5:23 Ginu atnataaing. Kraisda ninu inane aminabamdane tupan tapanin. Siwan ninu itane dongata awia takngatukan binga dakngake yuamang. Yuwatna ita ninu asinggan gataniman takekan yuamang. Ina unzakan wawita inane maatnatane tupan tapa binga dakngawik.
EPH 5:24 Siwan ninu Kraisdane aminabamda ie gepbiatang yuamang. Ina unzakan ginu maya kuut. Asinggan ginda apzae gepbiatang koyutnong.
EPH 5:25 Siwan ginu wawi. Ginda kepi Kraisdane aknga tawake tasinong. Ita ninu kuupbamde butaya natanimuke ninde tangge kungwaniman ninda itane aminabam dakngake yuamang. Ina unzakan ginda gisane maatzae butaya natayamunong.
EPH 5:26 Ngan. Kraisda ninde tangge wa kungwanimukuu ita ninu itane aminabamdane waiaknganin sandetnimunangge natake tasikut. Nindane waiaknganin sandetniman yanggata sautnimukaing binga inane wam takngata nin papan nomatanimde natake ita ninde tangge kungwanimukut.
EPH 5:27 Siwan aminu tupan aminu tapatuta maatna kayuk tanangge yawan itane puya amina kunduta maya mateu tapatu take yangga saukngamuke tauknga pusaknga dua saweknga siknga pasingamuning. Pasingamuke maya mateu waapa initakuke apnae nomune tewa ita kake natapan take siknga siwik. Siwan ina unzakan Kraisda ninu inae panangge natake ita nin pasiwan ninda itane nomune amin noman daknganimde natapbut. Natake wamu ita gatanimukut takngata nin papan nomatanimde natapbut. Ninda amin noman siknga dakngake nindane waiaknganinu wenata yutnimde natapbut. Natake ita ninde tangge kungwanimukut.
EPH 5:28 Ina unzakan ginu wawi. Ginda gisane maatzae butaya natayamuke gatayamunong. Unzing ninda nisane gupminde akgwaukamang binga ginda maatza katak toike gatayamunong. Siwan aminu inane maatnae butaya natangaman kake nata ie natapa aminu inae musip gwaang nataak binga singgak.
EPH 5:29 Ginu atnataaing. Aminu kunduta gin dasipnangge tasiwanu asikaya ginda gisane gupza kotnake dua gwautning ba dasing? Akgwautning. Ngan. Ginda gisane gupza kotnake katak siknga gwaukaing. Ina unzakan Kraisda ninu inane aminabam ninduyuke katak siknga toikgak.
EPH 5:30 Dasingge? Ita ninde natapan ninu itane gupnatane sanga kaina ba kepi ba katakngi binga daknganggak.
EPH 5:31 Siwan natdetdeu waakngakan natake Anututane wamu takngatuta anzing yanggak. Wawita inane minga nana peke inane maatnaat yutzan. Yuke apna maatna ngang dakngake unekan gatake yuwat sanga tapatukan binga siwik ngang yanggak.
EPH 5:32 Siwan wamu waakngata natdetdeu take siknga takngatu Anututa inane musiaatang natake tekut takngae nininggak. Sike nata itane yapiie anzing nataat. Anututa Kraiskat gatu itane aminabapatde natake wamu waaknga yakut.
EPH 5:33 Kautdu unin. Siwan kautdu anzing nataat. Wamu waaknga natake ginu apna maatna gwa paking aminu ginda maatzae natake gisane gupzae gwaukaing binga ginda mayae butaya natayamunong. Siwan ginu mayata apzae gepbiatang koyutnong.
EPH 6:1 Siwan ginu waatdaka. Ginu Buyambam tapaninda dandupan take siwikge natake ginda wamu nanza mingzata danining kaknga tawake tasinong. Ngan. Ginda kepi nomanu waakngane sukunong.
EPH 6:2 Siakan. Anututa mama wamu buyambam Mosesde imukut ngana mama wamu banakan katang yuau takngatu Anututa anzing yakut. Gata nangga minggae wam gwaamumso ngang yakut.
EPH 6:3 Sike mama wamu waaknga tawake tasiwinu nata kekekanggama gata takekan yuke tapduu mamaya siknga yusikanga kupiyak ngang yawan kekekakut. Yawan kekekawan Anututa mama wamu kunduat imukut.
EPH 6:4 Siwan ginu waakza yapasa kaya amin. Ginda waakza yapasatane musia ma pasiwa maiwam. Musia toknga natapnang ngang natake ginda wa aminu katak toike natdetdetna papa nomatawa Buyambam tapanindane kepi natdeke tawake tasiningge yanindamutnong.
EPH 6:5 Siwan ginu puya amin. Ginda aminu gisane puya toikzae akgwauke gisane banip teke wa amindane wamu katak siknga gwaamutnong. Gwaamuke ninda Kraisdane puyana tasingamukamang ngang natake puyasa nomana siknga tasinong.
EPH 6:6 Ngan. Puya toikga gin danduyuwawan ginda puya nomana siknga atasikaing ngana ita ginu atdapmake kuwawanu ginda puya nomana waakngae semna ma natapam. Aho. Ninda puya Kraisdane aknga tasikamang ngang natake ginda Anutue banip tawanangge gindane musipzaatangu asiknga bakngake pasinong.
EPH 6:7 Ginda musipzaatang take natake puya gindane puya toikzata damuningu wa take pasinong. Ginda aminu tapatutane puyana pasingamukaing ngana puya wa ginda Buyambam tapaninde natanggamatake pasinong. Puya toikzaekan ma natapam.
EPH 6:8 Ginu atnataaing. Aminu tapatuta puya nomana aknga tasikengu ita aminu tapatutane puyana pasingamik ba gatu inane puya pasiwan kakengu Buyambam tapaninda apmea sanga takeaknga waapae asimik.
EPH 6:9 Siwan ginu puya amin kayuaing amin. Ginda wamu nata yanggau ginda waakngakan tawake tasinong. Tasike ginda gisane puya aminza pasiwa gwautningge tasikaing kaknga atenong. Ginu atnataaing. Buyambam tapa enandang yuwau wa gikat gatu gindane puya aminzatdane tupan tapa. Siwan ita puya ninda tasikamang kaknga usanzike ngana nindane nomin ninduke dua usanziwik. Aho. Puya aknganindekan natake ita usanziwik.
EPH 6:10 Siwan nata wamu takngatuat ginde daniwa natapnong. Ginda kekeknga Buyambam tapanindane aknga take ie kekeknga siknga yutnong.
EPH 6:11 Yuwawa Setenda inane natdetdeu takngatu takngatue natake gin pasiwan mainingge tasiwik. Tasiwan ngana ginda sanga Seten tanguwa pimananga Anututa ginde damunggau kuupbam gitna panong. Pake ginda sanga Setendane aknga kuupbam apme yaitapaakusining.
EPH 6:12 Dasingge? Ninda aminu kunduat amake yapbitnangge dua tasikamang. Aho. Ninda akekekake waungu wai enandang nana kwaapzangu umana kaya akwakga nin panggaganuke pasiwa pimanimde tasikaingge akgwauke nikat waungu waakwakat amak binga tasikamang. Waungu wai waakwakga aminu zikaa dakane sukukaing amin papa yuaing. Sike ninda waungu waakwakge asiknga gwauke nisipnang ngang natake yuamang.
EPH 6:13 Unzingge sanga waungu waakwak yaipapaakusinanga Anututa ginde gwa damukuu kuupbam ginda gitna pake yutnong. Gitna pake yukengu tapduknga iwanza waakwakga gin dasipnangge natake apning gwene ginda apme kekekake yutning. Kekekake tapduu wa amning gwene ginda ayapbike kekeknga yutning.
EPH 6:14 Sike ginda anzing tandakngake yutnong. Amak aminda amak tasinangge simbuna wamake tauk gwenu nangonga usikwatapikge mapan pukuwan gatuna kepi tauknga kepinane mapa pukuwan gatuna tuyunggu tewan pukunggau wa iwanata sakut muke dua tepikge tasinggak. Siwan gatu kupna gwapuke gatuna paipna ngang pake kuke ita amau tasiwik. Siwan ginu Jesue amina dakngake yuaing aminda gindane iwanza waakwak pasiwa pimaningge sanga ina unzakan pake yutnong. Pake ginda Anututane siakan wamu gitna take kepi nomana siknga akngane sukunong. Sukuke ginda wamu takeaknga Anututa ginde musip kwikwik natandamunggak kaknga gitna tapa wamu waakngata gin kekekandamik. Siwan sanga ginda Anutue natapa kekekakut taknga ma tewam. Aho. Ginda sanga waaknga gitna siknga take yuwawa Setenda gin pasiwan mainingge tasinggak kaknga sakutna toknga dakandaka binga muke damnangge tasiwik. Tasiwawan ngana sanga ginda Anutue natapa kekeknga singgak kakngata gin gatandamuke sakuu wa dakandaka atzipbuwik. Siwan Anututa nindane waiaknganinu gwa sandetnimukut takngae natanggamatake gatu Anututane wamu Waung Kapata gindane musipzaatang pamunggak kaknga gitna tanong. Take iwanza yaipapaakusinangge tasining kaknga zagwa binga zipa pimaning.
EPH 6:18 Siwan tumuk wamu Waung Kapata gindane musipza pangenawan natapningu waaknga asinggan yake ginda Anutue yatawanong. Yatawake tendeknga wena asinggan ininong. Inike ginda tumuk wamu Anututa inane aminabam gatayamikge natake inindatapnong.
EPH 6:19 Inindatake ginda nakaya kuut gatangamikge yanong. Ginda tumuk wam iniwa Anututa wamu takeaknga tupa inane musiaatang natake tekut taknga natane genane tewik. Tewan nata aminde dua gwauke wamu waaknga yanikapit.
EPH 6:20 Sike wamu take waaknga yanikapitde natake Anututa na tapan nata itane kwiiknga binga dakngawa ita na nanitewan kukum. Kuke tasiwawa ngana iwanata na kaautde napmaba yuat. Yuwawa ginda tumuk wamu Anutue iniwa ita na gatangaman nata aminde dua gwauke gitna yuke yanikapit. Nata puya waaknga tasiwitde natake Anututa tupa na takut.
EPH 6:21 Siwan nindane notninu tapatu umana Tikikas ngang inikamang kapata puya Buyambam tapanindane aknga take siknga tasinggak. Siwan nata waapae musip gwaang natangamunggat. Sike aminu waapata ginde apuke wamu nata yuat takngae daniwik.
EPH 6:22 Ngan. Ita wamu waakngakan ginde daniwikge natake nata ie initewa kuwikge gwa inikum. Nata i initewa kuke ita ginde apuke wamu ninu kuupbamda yuamang kakngae kuut daniwik. Siwan wamu wa ita ginde daniwik kakngata gindane musipza papan kekekaningge natake inikum.
EPH 6:23 Siwan nata ginde natake Nanin Anutuat gatu Buyambam tapaninu Jesu Kraiskatda ginde musip kwikwik natandamusande natake nata tumuk wam yanggat. Yawa gin gatandamat ginda ie natapa kekekawan ginda gisane notzae musip gwaang natayamuning.
EPH 6:24 Sike nata Anutue tumuk wam iniwa aminu gikat nanata Buyambam tapaninu Jesu Kraisde musip gwaang natangamuke ie musia takngaaya dua nataaing aminde ita musip kwikwik natayamuke wa amin gatayamik. Unukan.
PHI 1:1 Na Pol. Naat gatu notna Timotiat niu Jesu Kraisdane puya amina dakngake yuamak. Sike nitda pas asanu ginu Jesu Kraisdane aminabam dakngake Filipai yot gapmane yuaing aminde matandamukamak. Nitda ginde natake aminu akayuya amin gatu puya amin gatu moo aminu kuut ginu kuupbamde natake matandamukamak.
PHI 1:2 Matake gaak wamu anzing danikamak. Nanin Anutuat gatu Buyambam tapaninu Jesu Kraiskatda ginde musip kwikwik natandamat ginu musipza kwikwikngata yutnong.
PHI 1:3 Sike tapduknga nata ginde nataat gwene tumuk wamu ginde ayanggat.
PHI 1:4 Tumuk wamu ginde yanggau nata ginde apbakngake yanggat.
PHI 1:5 Ginda na gatangama puya tasike wamu takeaknga yanikapbumangge natake apbaknganggat. Tapduknga ginda wamu wa yakap siknga natapbing gwene tuwanguke na gatangama tasiwawa apu apman apunggakge natake nata apbaknganggat.
PHI 1:6 Sike nata ginde nangaakan dua nataat. Aho. Anututa inane puya gin banakan tuwanguke tasikuu ita atasiwawan kuku puya waaknga tapduknga Jesu Kraisda gatuna apik gwene tasiwan puyuwik ngang nata natapa kekekanggak.
PHI 1:7 Sike natdetdeu nata wa nataatdane yapii anzing. Anututa na gatangaman nata itane wamu takeaknga take aminbamde yanikapbum. Yanikapmake nata wamu waaknga tapa kekekakut. Siwan Anututa na gatangamunangge natake ita gindane musipza pangenawan ginda natane puya amin notna binga dakngake na gatangamuking. Sike apmanu nata kaautde yuwawa ita asinggan gatangamuke gindane musipza pangenawan ginda akgatangamukaing. Unzingge nata ginde natayuke apbaknganggat. Apbakngake nata take natdetdeu wa ginde natapa kekekanggak.
PHI 1:8 Siwan nata ginde natayuke Jesu Kraisda ginde banip sike ita natane musipma tangenawan nata gin dandupnangge take siknga nataat takngae Anututa atnataak.
PHI 1:9 Sike nata tumuk wam iniwa Anututa gin gatandaman ginda musip gwaangu Anutue natangamuke gatu aminde butaya natayamukaing kakngata buyambam siwik. Siwan ginda Anutue sanga aknga kuupbam atnatdetning.
PHI 1:10 Ginu natdetdeu wa pake ginda sanga kuupbam usanzike sanga take siknga akngae apbaknganing. Apbakngake tapduknga Kraisda gatuna apik gwende tandakngake ginda waiakngasa gatukande teke kepi nomana akngane sukuwawa aminda wamu ginde daninangge dua natapning.
PHI 1:11 Siwan Jesu Kraisda gin gatandaman ginda kepi nomana siknga akngane sukuwawa aminbamda gin danduke Anututane umana yatangenawa buyambam siknga siwik.
PHI 1:12 Siwan mate notnabam! Nata sanga nae singamukut takngae natake daniwa natapnong. Sanga wa nae apbingu kuupbam aminbamda wamu takeaknga natake taningge kepi dua umukut. Aho.
PHI 1:13 Sanga wa nae singaman aminu buyambam taukdapakat gatu aminu kuupbapatda nae natake nata Kraisde puya pasiwawa aminu Kraisde iwana dakngaking aminda na kaautde napmaba yuat ngang atnataaing.
PHI 1:14 Unzingge natane notna Jesuat nana aminu you anggapmane nana aminu buyambamdane musia sanga nata kaautde yuke ngana Anututane wam tenangge dua nataat takngata papan kekekakaing. Papan kekekake tupa wa aminda Anututane wam yanikapnangge dua gwauking ngana apmanu wa aminda musia gitna sikngata yuke wamu waaknga ayanikapmakaing.
PHI 1:15 Siwan ngana aminu kunduta na napbitnangge natake wamu Kraisda gatanimuke tasikut taknga yanikapmakaing. Sike kunduta nae musia take natangamuke wamu waaknga yanikapmakaing.
PHI 1:16 Siwan aminu nae take natangamuke yanikapmakaingu wa aminda nae natake Anututa na take nata wamu takeaknga tapa kekekawikge takut ngang natake nae musip gwaang natangamuke tasikaing.
PHI 1:17 Siwan ngana aminu na napbitnangge tasikaingu wa aminda na kaautde yuke meya buyak yuat takngaat gatu meya kunduat ngwakngake namunangge tasikaing. Tasike wamu Kraisda gatanimukut taknga yanikapmake ngana wa aminda Kraisde baniu kautdukan sike nae semna natangamuke natdetdeu takngaayae natake tasikaing.
PHI 1:18 Siwan na ie dasing yawit? Aminu wamu Kraisde natake yanikapmakaingu kunduta natdetdeu kem takngaat siakan takngaat bokngan pake tasikaing. Sike kunduta siakande siknga Kraisdekan natanggamatake tasikaing. Undanga. Kuupbamda wamu Kraisda tasinimukut taknga yanikapmakaing ngang natake nata asiknga bakngake yuat.
PHI 1:19 Sike na atnataat. Ginda nae natake tumuk wam iniwa Kraisda yawan Waung Kapata inane kekeknga aknganae yuke ita na gatangamuke tasiwan nata dua pimake sanga Jesue natapa kekekanggak kakngata buyambam siwik.
PHI 1:20 Siwan nata Kraisdane wamu takeaknga yanikapnangge apmaakawitde dua siknga nataat. Aho. Nata yusika yanikapmake ba aminda na nuwa kungwakengu nata Kraisdane umana yatangenatnangge take siknga nataat. Nata tupa tasikum binga apmanu kuut nata musipma gitnata yuke yanikapmake itane umana yatangenakgat.
PHI 1:21 Ngan. Nata anzing nataat. Nata dua kungwake kayuk yuke Kraisdane puya tasinangge take nataat. Sike ngana nata akupitde natapa take siknga singgak.
PHI 1:22 Siwan nata kayuk yukengu nata Jesue puya tasiwa buya asaawik. Siwan sanga wa takngaatde natake nata zaaknga take tapitde ngang dua nataat.
PHI 1:23 Na ie musipmaatang natdetdeu takngaaya nataat. Takngaaya natake akungwake Kraisde kuke iat gatake yutzimde take nataat. Ie natapa take siknga singgak.
PHI 1:24 Siwan ngana kayuk yuke nata gin gatandamit takngae natapa take siknga singgak. Nata kayuk dua yukengu ginu gatandamunanga dua.
PHI 1:25 Sike natdetdeu waaknga gitna take nata atnataat. Nata kayuk yuke gin gatandama ginda Jesue natapa kekekanggak kakngata buyambam siwan apbaknganing.
PHI 1:26 Ngan. Nata kayuk yuke masande ginde gatuna kundopa nanduke ginda apbakngake Jesu Kraisdane umana yatangenatning.
PHI 1:27 Siwan nata andang yuke ba ginde kundopit. Ginda wamu take Kraisdane aknga katak tawake kepi nomana akngane sukunong. Ginda musipza takngatukan natayuke akekekake ginu kuupbamda unekan gatake wamu takeaknga tapa kekekawan
PHI 1:28 gindane iwanzata gin pasiwa mainingge dua gwauke tasinong. Sike aminu tapatuta ginda unzing tasikaingge natake ita nae apu naniwanu nata ginde apbakngawit. Siwan ginda unzing tasiwa danduke gindane iwanzata natake Anututa nin pasiwan mainim ngang anggaman natdetning. Siwan ngana ginda iwanzae dua gwauke anzing natapning. Anututa iwaninde kataune ninu sandewik ngang natapa kekekayok.
PHI 1:29 Ginu atnataaing. Anututa ginde musip kwikwik natandamuke gindane musipza pangenawan ginda Kraisde natapa kekekawan itane puyana pasingamuningge natake tasindamukut. Puyana pasingamuwawa iwanzata enake gin pasiwa maiwa toknga damuning.
PHI 1:30 Tupa meya waakngakan nata kake yuwawa apu apman apunggak ngangu ginu atnataaing. Siwan apmanu meya waakngata ginde gwa apan kake yuaing.
PHI 2:1 Siwan ginda Kraisdat gatake yuwawa asikaya ita gindane musipza dua papan kekekakaing ba dasing? Asikaya ita ginde butaya natandamunggak kakngata gindane musipza dua pangenakgak ba dasing? Asikaya Waung Kapata nindane musipmikatang dua pasiwan musipminu takngatukanu dua nataamang ba dasing? Asikaya ginda notzae musipzaatangu butaya dua natayamukaing ba dasing?
PHI 2:2 Sike unzing kakengu ginda musipza takngatukan natapnong. Natake ginda musip gwaangu notzae natayamuke tasinong. Ginda unzing tasiwanu nata ginde asiknga bakngawit.
PHI 2:3 Siwan ginu gisaekan ma natanggamatawam. Aminda gisane umanza yapangenatningge ma natanggamatake sukuwam. Wena. Ginda gisane umanza akngae natake ginda nindane umanin yapangenatnong ngangu ma yawam. Aho. Ginda notzatane umana yapangenatnangge tasinong.
PHI 2:4 Ginu gisane sangaekan dua natanggamatawam. Aho. Ginda aminu kundue kuut natanggamatake wa amindane umana dua pimapikge tasinong.
PHI 2:5 Sike ginu natdetdeu Jesu Kraisda natake tasikut takngakan gindane musipzaatang natapnong:
PHI 2:6 Ita Anutu siknga yuke itane umana buyambam ngana sanga waakngae dua natanggamatake
PHI 2:7 ita kepdakane epan maya tapatuta i tangaiwan nisa gup dakngake aakut. Aake ita Anutue gepbiatang koke itane puya amina dakngakut.
PHI 2:8 Ita nisa gup dakngake inane umana yatangenatnangge dua natake Anutue gen gwaamukut. Gwaamuke tasisika kumbut. Ngan. Amin saamdakane aminu wai amin zipa kungwakaing binga tanguwa kumbut.
PHI 2:9 Unzingge Anututa itane umana yatangenake tasiwan umana buyambam siknga sike kundutane umana kuupbam ayapbike yuak.
PHI 2:10 Ngan. Aminu kuupbam enandang nana gatu kepdakane nana gatu akupsa aminu gatuna enatningu kuutda Jesutane umana yatangenake ie muna puke anzing yaning.
PHI 2:11 Nindane Buyambam tapaninu Jesu Krais unin ngang yawawa umana Nanin Anututane akngata buyambam siknga siwik.
PHI 2:12 Siwan mate notnabam. Nata ginde musip gwaang siknga natandamuke daninggat. Tupa ginda natane wamna asinggan tawakaking. Ina unzakan apman kaya ginda tasinong. Nata wamu wa yanggau tapduknga na gikat yutnim gwenekan tasiningge dua yanggat. Aho. Apmanu nata maa yuwawa ginda gisae tagwauke tasinong. Ngan. Anututa gin gatandamuke waiakngane ginu sandekut taknga buya aawan ginda pimanang ngang natake sanga Anututane akngane asinggan sukunong.
PHI 2:13 Dasingge? Anututa gindane musipzaatang pasiwan ginu itane banip tawanangge natapningge pasinggak. Sike ginu sanga ita ina nataak kaknga tawake tasiningge natake gindane musipza pangenakgak.
PHI 2:14 Sanga kuupbam ginda tasiningu wa ginda kwatan wam dua yake dua yanganuyuk puyasa pasiwam.
PHI 2:15 Ginda unzing tasikengu ginu nomana yuwa waiakngasa wena siwik. Siwan ginda aminu kepi nomana akngane dua sukuke sanga waiaknga asinggan pasikaing aminde banakan yuke ginda nomana yuke Anututane waaknga aminu waiakngasa wena amin dakngake yutnong. Dakngake yuke ginda wamu ginde sanga kayuk yutnanga aknga atdamunggak kaknga gitna take yanikapnong. Unzing aakatap gatapan kakaa aknganata isikakaanggak binga ginda wamu waaknga yanikapa natapnong. Unzingge tapduknga Kraisda gatuna apik gwene nata anzing natapit. Na puya moo siknga dua tasike wamu takeaknga nata yumdekan tapa kekekakut. Aho. Puya atasikum taknga buya asaakut ngang natake apbakngawit.
PHI 2:17 Sike nata gin pasiwa ginu Jesue natapa kekekanggau wa Anututa ie natapan sanga take singgak. Siwan nata Anututane puyana tasike gin gatandamuwawa ngana iwanata enake na apba nuwa kupit. Nata ie undanga ngang nataat. Puya pasiwa buya aawan ginda Anututane amina dakngake yuaing ngang natake apbaknganggat. Unzingge aminda na nuwa kupitde meya dua nataat.
PHI 2:18 Siwan ina unzakan gikaya nata apbaknganggat takngae natake ginda apbaknganong.
PHI 2:19 Siwan nata nina banipda siwan anzing nataat. Buyambam tapaninu Jesuta na nandutewanu tapduknga mateknga siknga yuke nata Timoti initewa ginde kuwik. Kuke ita gatuna apuke ginde wamu na naniwik kakngata natane musipma tapan kekekawit.
PHI 2:20 Na aminu waapa binga tapatu wena. Ita naat musipmiu takngatukan natake yuamak. Ge ita musia takngatukan dua natake gin gatandamunangge take siknga nataak.
PHI 2:21 Sike aminu kuupbamda inane sangae natanggamatake Jesu Kraisdane sangae dua natanggamatake tasikaing.
PHI 2:22 Siwan ngana ginu Timotie atnataaing. Aminu nomanaapa unin. Ita naat gatake yuke wamu takeaknga yanikapmakamak. Unzing waakngata nana gatayamukaing binga tasinggak.
PHI 2:23 Sike nata kaautde yuwawa nae wam usanzike yawa natakenga nata initewa ginde kuwik.
PHI 2:24 Sike na Buyambam tapaninu Jesuta kepi apme tasingaman nakaya ginde apitde apbakngake natayuat.
PHI 2:25 Sike nata Epafrodaitas initewa ginde kuwikge nataat. Waapa Jesuat nana tapatu dakngake natane notna dakngake yuak. Ita Jesue puya amin notna dakngake naat gatake puya pasikamaunin. Tupa ginda initewa nae apuke sanga nata dapbumunin gatangamuke ginde tangge tasikut.
PHI 2:26 Sike ita ginu gatuna dandupnangge musiaatangu toknga siknga nataak. Ngan. Ita mait sike yuwawan aminu tapatuta ie natake gin daniwan natapbingge meya natake ita gin dandupnangge natayuak.
PHI 2:27 Siakan. Tupa ita apmaike paa siknga kumbut ngana Anututa waapae butaya natangamuke maitna sandekngamukut. Sike ita awia waapaekan dua butaya natangamukut. Aho. Anututa nae natake meya buyambam sikngata usikwatapsak ngang natake waapatane maitna sandekngamukut.
PHI 2:28 Unzingge nata initewa ginde kundopan kake ginda apbaknganingge natake initewa kuwikge take siknga nataat. Ginda waapa kake apbakngawawa meya wa nae apbut takngata kundusimu asisapmambik.
PHI 2:29 Unzingge aminu waapata ginde kundopanu ginda ie natake notninu Jesuat nana tapatu ngang natake asiknga bakngake i tanong. Sike ginda aminu wa bingatane umana yapangenatnong.
PHI 2:30 Dasingge? Tapduu dapaknga siknga ita Kraisdane puya aknga pasike paa kumbut. Ginda na gatangamunanga kepi wena siwan ita ginde tangge apuke gatangamuke akupikge dua gwauke tasikut.
PHI 3:1 Siwan mate notnabam! Wamu takngatuat ayuakge wa nata daniwit. Ginda Buyambam tapaninde natake apbaknganong! Siwan wamu tupa nata danikum taknga gatuna daninangge musipmaatangu meya dua nataat. Aho. Nata gin gatandamunangge natake wamu waaknga gin daniwa natake ginda dua pimaning.
PHI 3:2 Sike aminda ikwawa zongge gwauke gwaut buyak kukaing binga ginda aminu wa ginu kem panzike danindamukaing aminda apuke gindane gupza wai matanangge yakaingge akagwautnong.
PHI 3:3 Ginu atnataaing. Anututane Waung Kapata nindane musipmin pangenawan ninda Anutu inimbakngake Jesu Kraisdane umana yatangenakamang. Yatangenake sanga wa Anututa wam yawan kekekakut takngae natapna siakan siwan ninu inane amina siknga dakngake yuamang. Siwan ngana aminu kunduta inane sanga akngae natake inane umana yapangenake Anututa nindane sanga waakngae natake ninde take natapik ngang yakaing. Sike ninda wa amindane sanga akngae natapna sanga moo binga singgak.
PHI 3:4 Siwan ginu atnataaing. Wa aminda inane sanga Anutue nomune gitna yutnanga akngae natake apbakngakaing. Sike tupa na wa amin yapbike sanga wa binga ninane akngae natake nakaya kuut asiknga bakngakum.
PHI 3:5 Siakan. Nata aminu Hibru wam tangan yakainggane dongune aakum. Ngan. Baminu Isreltane waaknga tapatu umana Benjamin ngang inikinggane dongune aakum. Aake yuwawa gunziu katau kuut musa kautdu gweaat gwenduat ngang sandewana wagwene aminda Mosesdane mama wamu katak tawake natane gupma matangamuking. Siwan buyambam takake nata mama wamu gitna siknga take Ferisi amin dakngakum.
PHI 3:6 Dakngake nata mama wam tapa kekekawikge musipmaatangu toknga siknga natake aminu Jesue natapa kekekakingu kwaapzang pasiwa maiking. Sike nata mama wamu katak siknga tawake tasiwawa aminda usanzike natapanu na waiakngana wena.
PHI 3:7 Sike tupa sanga wa kuupbamu nata ie apbakngake na gatangaman Anutue nomune amin noman dakngawit ngang natapbum. Ngana Kraisda na gatangamikge natake nata sanga wa kuupbamu tupa ie apbakngakum takngae natapa sanga na tasiwan mainanga aknga singgak.
PHI 3:8 Siakan. Nata Jesu Kraisde natake ita natane Buyambam tapana ngang natapa kekekanggak. Natapa kekekawan ita na gatangamuke sanga kuupbamu aminda tasike sanga waakngata nin gataniman Anutue nomune gitna yutnim ngang nataaing kaknga ita ayapbikut. Unzingge nata Krais waapa tanangge natake nata sanga wa tupa ie apbakngakum takngae apbitateke natapa sanga moo siknga mutewa kunanga aknga binga singgak.
PHI 3:9 Ngan. Nata Kraisdat gatake yutzimde take siknga nataat. Natake sanga nata mama wamu katak tawake tasinggat takngata na gatangaman Anutue nomune amin noman dakngawitde dua nataat. Aho. Na Kraisde natapa kekekawan Anututa nandupan aminu nomanapa siwikge natayuat.
PHI 3:10 Natdetdeu waaknga take nata Kraisdat gatake yutzimde nataat. Nata Kraisdat gatake yuwatda ita akumbut katangga gatu enakut tapatane kekeknga aknganata natane musipmaatang tasiwan nata iwana kapewa meya takngatu takngatu nae namukaing. Siwan Kraisdane iwanata enake meya buyambam imunangge tasiwa kake ita dua yandakngakut. Aho. Ita akapewan tasiking. Sike ita unzing kapekutde natanggamatake nata sanga musia enayaaknga apbitatewit. Bitateke nata musipma takngatukan Kraisdat natake nata waiakngae gepbiatang gatuna kopnangge dua natapit.
PHI 3:11 Nata natdetdeu waaknga take tasike nakaya akupit katangga gatuna apba enake iat gatake asinggan yutzimde natayuat.
PHI 3:12 Sike nata Anutue kekeknga siknga natayuke na pimananga dua ngangu na unzing dua nataat. Aho. Nata kayuk yuke Anutue kekeknga siknga yutnanga aknga tanangge natake puya kekeknga siknga tasike yuat. Dasingge? Jesu Kraisda na tapan itane amina dakngake yuat.
PHI 3:13 Siwan mate notnabam! Nata sanga wa iat gatake asinggan yutnanga aknga gwa takum ngangu dua nataat. Aho. Na natdetdeu takngatukan anzing nataat. Sanga nata tupa tasikum takngae dua natanggamatake na puya kekeknga sanga masan tananga akngae natanggamatake tasinggat.
PHI 3:14 Ngan. Jesu Kraisda ninda iat gatake asinggan asinggan yutnimde kepi tasinangge natake ita ninde tangge kungwanimukut. Siwan Anututa na yanawamban ie kuke iat gatake asinggan asinggan yutzimde take siknga natake nata puya kekeknga tasinggat.
PHI 3:15 Sike ninu Jesue aminabamda natdetdetninu kekeknga nataamangu ninu kuupbamda wamu nata wa yanggat takngae natake musipminu takngatukan natapnim. Sike aminu kunduta puya kekeknga wa tasinangge yanggat takngae apbitawanu Anututa wa amindane natdetdetna apanomanuyamik.
PHI 3:16 Natdetdeu wa yanggat takngae dua natapanu undanga. Ninu natdetdeu Anututa ninde gwa niman takumangu waaknga ninda gitna tanim.
PHI 3:17 Siwan mate notnabam! Ginu kuupbam kepi nata tawake tasinggat takngane sukunong. Sukuke aminu kepi wa nata tawake tasinggat takngane sukukaing amin kake ginda wa amin yawanong.
PHI 3:18 Ginu atnataaing. Aminu kwaapzangga enake wamu Kraisda ninde tangge amin saamdakane kungwanimukut takngae masa imuke sukukaing. Wa aminde natake nata tupa tapduu buyambam ginu gwa danikum. Sike apmanu gatuna danike kai yanggana pimakaing.
PHI 3:19 Wa aminda sanga inane gupna gatayamunanga akngaekan natanggamatakaing. Natanggamatake sanga musia enayaakngae gepbiatang koyuaing. Koyuke sanga takngatu takngatu maakngana kaya aknga ngana wa aminda asiknga tasike apbakngakaing. Wa aminu Anututa gatukande pasiwan maiwa yanikwasipewan kuning.
PHI 3:20 Ngana ninun. Ninu enandang nana amin binga dakngake yuamang. Sike ninda Buyambam tapaninu Jesu Kraisda enandang teke epikge kayuamang. Nin gatanimunggak kapa unin.
PHI 3:21 Ita epuke itane kekeknga aknganata aminu kuupbam inane gepbiatang pewan yutning kakngata nin pasiwan nindane gupminu tuyuknga ngana ita pasiwan gupminu kekeknga yutning. Unzing itane gupna akumbut katangga enakuu wa inata kundu dakngake kekeknga siknga yuak binga dakngake ninda yutnim.
PHI 4:1 Sike mate notnabam! Nata ginde musip gwaang natandamuke gin dandupnangge musipmaatangu toknga siknga nataat. Nata ginde asiknga bakngake yuat. Siwan wamu wa gin daninggat takngae natake ginda Buyambam tapaninde kekeknga yutnong. O mate! Na ginde butaya siknga natandamunggat.
PHI 4:2 Nata giu Yuodia gatu Sintikiatde natake daninggat. Gitda Buyambam tapaninde natanggamatake musipza takngatukan natapzon.
PHI 4:3 Siwan ga Susugee natake ganinggat. Ga natane puya amin notna siknga dakngake yuayak. Gata maya wa tapaau gatayamuyo. Ga atnataayak. Maya waapaat gatu notninu umana Klemen ngang inikamang kapaatda naat gatake wamu takeaknga aminu buyambamde yanikapbumang. Siwan wa amindane umana Anututa atnataak. Natake buu gomdu aminu iat gatake asinggan asinggan yutninggane umana matanggak gomune wa amindane umana gwa matawan yuaing.
PHI 4:4 Sike ginu Buyambam tapaninde natake apbaknganong. Ngan. Nata gatuna daniwit. Ginu ie natanggamatake apbaknganong.
PHI 4:5 Ginu atnataaing. Tapduknga Buyambam tapaninda apik gwenu gwa dapakanggak. Unzingge ginda aminu kuupbamde wepda wepda pasiyamunong.
PHI 4:6 Pasiyamuke ginda sanga takngatue nangaakan ma natapam. Aho. Sanga kuupbam meya takngatuta ba sanga take takngatuta ginde apanu ginda Anutu tumuk wam ininong. Ngan. Anutue inimbakngake tumuk wam ininong.
PHI 4:7 Iniwa musip kwikwiu Anututa ninde atnatanimunggak kakngata ginu Jesu Kraisde gepbiatang koyuaing amin papan kekekaning. Sike musip kwikwiu wa inata kundu. Ninu nisane natdetdetnin natdeke meyanin sandetnangge tasina maiwik ngana ninu sanga wa Anututa musip kwikwiu ninde natanimunggak kakngae natanggamatana meyaninu wena siwik.
PHI 4:8 Siwan mate notnabam! Nata wamu takngatuat daninangge nataat. Ginu sanga siakan takngaekan natanggamatanong. Ngan. Sanga nomana aknga ba sanga take aknga ba sanga dudumna aknga ba sanga musip gwaang ie natapnanga aknga ngangge natanggamatanong. Sanga ie apbakngananga aknga ba itane umana yatangenatnanga aknga ba sanga kuupbam take siknga aknga wa ginda ie siknga asinggan natanggamatake yutnong.
PHI 4:9 Wamu kuupbam nata danindamuba natdeking kaknga ginda atawake tasinong. Sike sanga nata gin banakan yuke tasiwa nandupbing kakngae natake tasinong. Unzing tasiwawa Anutu musip kwikwikgane yapii apata gikat gatake yutning.
PHI 4:10 Siwan nata Anutu inimbakngake yuat. Ngan. Tupa ginda take siknga na gatangamuking. Gatangamuke tasiwawa ngana kepisa wena siwan kake teking. Siwan apmanu kepi gatusa kake ginda gatu akgatangamukingge natake nata Anutue asiknga inimbaknganggat.
PHI 4:11 Wamu nata yanggau wa na wamu sangae dapmanggatde dua natake yanggat. Aho. Nata natdetdeu anzing natake yuat. Sanga inata inata nae apanu nata ie meya dua natapit.
PHI 4:12 Aho. Na sangae dapmakengu nata musipmaatangu meya dua natapit. Ba sanga kwaapzang pakengu nata asiknga dua bakngawit. Wena. Sanga kuupbam nae apukaingu wa nanamu kwaapzang nananga ba toma natake yutnanga aknga ngangga apanu nata takekan natayuat.
PHI 4:13 Siakan. Kraisda na kekekangaman sanga wa kuupbam nae apa ngana nata akekekake yuat.
PHI 4:14 Natdetdeu waaknga nata take yuat ngana nata meya takngatu kawawa ginu take siknga na gatangamuke natane meyana gwaamukngamuking.
PHI 4:15 Siwan ginu Filipai yot gapmane nana aminda atnataaing. Tupa ginu wamu takeaknga yakap siknga natake tuwanguke tawaking gwene nata gin dapmake Masedonia kep kom teke kuwawa aminu Jesue amina dakngake yukingu you gapmandune nana aminda dua gatangamuking. Wena. Gindakan nae natake sangasa pewa apa pake nata sangae dua dapbum.
PHI 4:16 Ngan. Na kepi maa dua kuke Tesalonaika yot gapmane yuwawa ginda gatu gatu gatangamuke sangasa pewa apbing.
PHI 4:17 Wamu nata yanggau wa nata gindane sangasa nae pewa apningge dua natake yanggat. Aho. Ginda unzing na gatangama buya aawan Anututa yake tasindaman gin gatandamunanga akngata buyambam sike ginde yutdamikge natake daninggat.
PHI 4:18 Siwan sanga ginda Epafrodaitasde ima pakapbuu wa nata gwa pakum. Pake nata ie anzing nataat. Sanga buyambam siknga pake sanga takngatue dua dapmanggat. Sike nata atnataat. Ginda sanga take siknga nae wa nama kake Anututa nae umande natake imukaing ngang nataakge na ginde asiknga baknganggat.
PHI 4:19 Sike na atnataat. Natane Nana Anututa ginde natake ginda Jesu Kraisdat gatake yuaing ngang danduke ita sanga kuupbam ginda dapningu atdamik. Asikaya ita sanga kuupbamdane toiknga dua ba dasing?
PHI 4:20 Anutu wa nindane Naninu Anutu unin. Siwan itane umana asinggan asinggan yatangenatnim. Siakan.
PHI 4:21 Ginu natane gaak wama aminu Jesu Kraisdane amina dakngake yuke gikat gatake yuaingu kuupbamde yamunong. Sike notza Jesuat nana naat gatake yuamang aminda gaak wamu ginde danikaing.
PHI 4:22 Aminu Jesue amina dakngake yuaingu aminu tupan sikngaapa Sisaat gatake yuaing aminda gaak wamu ginde danikaing. Ngan. Jesue amina nikat gatake yuaingu kuupbamda gaak wamu ginde danikaing.
PHI 4:23 Siwan nata tumuk wam iniwa Buyambam tapaninu Jesu Kraisda ginde musip kwikwik natandamuke gikat gatake yutning. Unukan.
COL 1:1 Na Pol. Anututa ina banipda natake na tapan nata Jesu Kraisdane kwiiknga dakngake yuat.
COL 1:2 Naat gatu notna Timotiatda pas asanu ginu Anututane aminabamu Kolosi yot gapmane nana aminu Krais nin gatanimunggak kapae natapa kekekanggak aminde matandamukamak. Sike nitda Anutue tumuk wam inita ita ginde musip kwikwik natandamuke gindane musipza pasiwan ginda kwikwikngata yutning.
COL 1:3 Siwan nitda tumuk wamu Anutu Buyambam tapaninu Jesu Kraisdane Nanae inike niu ginde natake asinggan inimbakngakamak.
COL 1:4 Dasingge? Niu puya amin notniu tapatu umana Epafras ngang inikamang kapae nitda musip gwaang natangamukamak. Waapata Kraisdane puyana take siknga tasike ita nitde tangge ginde kukut. Ginde kuke ita tupa siakan wam taknga Anututa ninde musip kwikwik natanimunggak ngang danikapan natapbing. Siakan. Nitkat puya amin notniu kunduat wamu take waaknga take aminu buyambam yanikapmakamang. Ninda yanikapna wamu waakngata keu kuupbam tawamban sandekut. Tawamban sandewan buya asaawan aminda wamu waaknga gitna take yuwa buyambam daknganggak. Ina unzakan wamu waakngata ginde apuke tasiwan buya asaakut. Tupa tapduknga ginda wamu waaknga natake katak siknga natdeke taking gwenuneta apu apman apan wamu waakngata buya asaakgak. Siwan wamu waakngae natake ginda sanga Anututa ginde enandang pewan yutdamunggak kakngae apbakngake natayuaing. Natayuke ginda Kraisde natapa kekekawan aminu itane aminabam dakngake yuaingu kuupbamde musip gwaang natayamukaing. Siwan Epafras waapata wamu Waung Kapata gindane musipza pangenawan ginda notza Jesue aminabamde musip gwaang natayamukaingge ninikut. Niniwan nitda apbakngake Anutue asinimbakngakamak.
COL 1:9 Siwan tapduknga nitda wamu waaknga natapbumak gwenuneta apu apman apan nitda Anutue tumuk wamu gin gatandamikge asinggan inikamak. Inita ita gindane musipza papan kakaawan ginda itane banipde take natapning. Natake natdetdeu nomana siknga papa buyambam siwik.
COL 1:10 Siwan ginda Buyambam tapaninde banip tawake tasiwa danduke ita natapan take siwik. Siwan natdetdeu wa pake tasiwa buya aawan ginda kepi nomana akngane sukuke natdetdeu Anututane sanga akngae ginda anggaman natapa buyambam siwik.
COL 1:11 Siwan nitda tumuk wam inita Anututa inane kekeknga siknga aknganata gin kekekandaman ginda meya inata inata kakengu ginda wikake yuke musipzaatang kwanga natayutning.
COL 1:12 Natayuke ginda Naninde inimbaknganing. Ita nin kekekaniman ninu aminu itane aminabam dakngake kakaa akngane sukukaing amikat gatake sukunim.
COL 1:13 Ngan. Ita ninu zikaa aknganae sandeke ninipakuke inane waakngatane gepbiatang pekut. Sike ita waaknga waapae musip gwaang natangamuke itane gepbiatang ninu pewan kopbumang.
COL 1:14 Ngan. Itane waaknga waapata ina gatanimuke nindane waiaknganin sandetniman yuamang.
COL 1:15 Siwan ninda kaininda Anutu kananga dua ngana Kraisdane nomna kaininda gwa kakumang. Kake ie natapna ita Anutu binga daknganggak. Sike tapduknga Anututa sangabamu dua tasike tekut gwene Krais waapata ayukut. Yuke ita Anututane sanga kuupbam kayukut.
COL 1:16 Dasingge? Anututa yawan sangabamu enandang nana kaininda dua kaamangkat gatu kepdakane nana kaininda akaamangu kuut Krais waapata tasike tekut. Tasike enandang nana kekekngana kaya akwau ita pangenakut. Ngan. Anututa natake Krais waapata sangabamde toiknga dakngawikge natake yawan waapata sanga kuupbam tasike tekut.
COL 1:17 Sike tapduu ita sangabamu dua tasike tekut gwene ita ayukut. Yuke ita inane kekeknga aknganata sanga kuupbam papan kekekake yuaing.
COL 1:18 Sike ita ninu inane aminabamdane tupan tapanin. Ita akumbut katangga gatuna enake akupsa aminu matmat katangga gatuna enatninggane tupan tapa dakngake yuak. Ngan. Aminu kuupbamdane tupan tapa dakngawikge ita gatuna enakut.
COL 1:19 Dasingge? Anututa inane natdetdetnaat gatu inane kekeknga aknganaat kuut Krais waapae iman tapikge take siknga natapbut. Natake ita inane sanga wa ie iman pake ita Anutu binga dakngake yuak.
COL 1:20 Siwan aminu kuupbam kepdakane nana gatu enandang nana aminu kuutda Anutue masa imuke itane iwana dakngake yuking. Yuwawa ngana Anututa ina banipda siwan natake Kraisda sanga wa iwan taknga tanguwan kupikge natapbut. Natake yawan Krais waapata apuke ninde tangge amin saamdakane kungwanimuke inane daknga tukwakut. Siwan sanga ita wa kungwanimukut takngata nin gatanimuke sanga ninda Anutuat iwan dakngake yukumang kaknga atanguwan kumbut.
COL 1:21 Siwan ginda Anutue masa imuke sanga wai takngatu takngatu tupa tasiking. Tasike ginda Anutue iwan dakngake ie maa siknga yuking.
COL 1:22 Ngana Jesuta gin danipakuke Anututane nomune pewan danduke ita ginde natapan aminu nomana siknga siwikge natapbut. Natake ita nisa gup take ninde tangge kungwanimukut. Siwan sanga ita ninde wa kungwanimukut takngata gin gatandamuke ginda tupa Anutuat iwan dakngake yuking kaknga tanguwan kumbut.
COL 1:23 Tanguwan kumbutde ginda Jesue banip sike itane wamu takeaknga gitna siknga take yutnong. Yuke ginda wamu take waaknga natake Anututa ninu apme gatanimik ngang natake natayuaing kaknga ma tewam. Ginda aminu tapatu dua katewa ita gindane natdetdetza dua kaipakuwan tening. Wena. Ginda atewanu asikaya Jesuta gin danipakuke Anututane nomune pewan gitna yutning ba dasing? Wena. Siwan wamu take waakngata kepna kepna kuupbam tawamban sandekut. Ngan. Na Pol. Anututa na tapan nata wamu waakngakan yanikapitde takut.
COL 1:24 Siakan. Anututa na tapan nata itane puyana tasingamuke gin gatandamunangge tasiwawa ngana iwanata enake meya takngatu takngatu nae namukaing. Nae nama pake ngana nata apbakngake yuat. Dasingge? Jesuta meya buyambam pakut taknga binga nakaya ina unzakan papa sandewikge nataat. Natake nata Jesue aminabam gatayamunangge tasiwawa meya nae nama panangge dua gwaukgat.
COL 1:25 Aho. Anututa ina banipda siwan natake na tapan nata itane puya amina dakngake ginu itane aminabam gatandamitde puya nae namukut. Naman nata itane wamna aminu kuupbamde yanitakuwa sandewikge natake na takut.
COL 1:26 Sike ita tupa siknga wamu waaknga inane musiaatang natake tewan aminu tapatuta dua natapbut. Wena siknga. Siwan ngana apmanu wamu waaknga Anututa ninu inane aminabamde yeutnimunggak.
COL 1:27 Ngan. Wamu wa ita tupa ina natake tekut takngata ginu Anutue masa imuking aminde apuke tasiwan buya asaakgak. Buya asaawan Krais nin gatanimunggak kapata gikat gatake yuaing. Yuke ginda iekan natanggamatake Anutuat asinggan kekeknga yutningge apbakngake natayuaing. Siwan sanga wa ginde apbut takngae natake nitda Anututane wamu wa tupa ita ina natake tekut takngae natapda wam gwaang siknga singgak.
COL 1:28 Siwan nitda wamu Kraisda nin gatanimukuu waakngae natake aminbamde yanikapmakamak. Yanikapmake nitda natdetdetniu anggaman natake aminu kuupbamdane natdetdetna pata nomataningge natake yanindamukamak. Yanindamuke nitda gatayamuke wa aminu kuupbam inandek inandek anggaman siknga natake Kraisde baniu kautdukan dua sining. Aho. Wa aminda ie kekeknga siknga yutningge nataamak.
COL 1:29 Natake nata puya waaknga kekeknga tasiwawa Jesuta inane kekeknga aknganata natane musipma asiknga tangenawan nata kwatan siknga tasinggat.
COL 2:1 Siakan. Wamu nata wa daninggau ginu kuupbamda puya nata gin gatandamunangge tasinggatde natapningge yanggat. Ngan. Nata puya kwatan siknga aminu natane noma dua nandupbing amin gatayamunangge tasinggat. Tasike gikat gatu aminu Leodisia yot gapmane nana amikat gatu kepna kepna nana aminda na dua nandupbingu wa kuupbamde natake tasinggat.
COL 2:2 Tasike nata gindane musipza papa kekekake ginu kuupbamda notza Jesuat nana aminde musip gwaang natayamuke musipza takngatukan natapning. Natake Jesuekan natanggamatake kekeknga yutningge natake tasinggat. Tasiwa natdetdeu Anututa inane musiaatang natake Kraisda apu nin gatanimikge natake tekut taknga nomana pake ginda wamu waakngae natapa siakan siwikge tasinggat.
COL 2:3 Siwan Krais waapa natdetdeu nomana kuupbamdane yapii unin.
COL 2:4 Wamu nata wa daninggau aminu tapatuta ginu wam datdat danike gindane natdetdetza pasiwan mainang ngang natake yanggat.
COL 2:5 Sike na gikat gatake dua yuamang ngana natane musipmaatangu na ginde asinggan natanggamatanggat. Natanggamatake ginda musipza takngatukan natake Kraisde natapa kekeknga siknga singgakge apbaknganggat.
COL 2:6 Ginda Jesu Kraisde natake ita nindane Buyambam tapanin ngang natapa kekekanggakge natake nata ginu daninggat. Ginda iat gatake sukunong.
COL 2:7 Sukuke ginu katapdakata muyakngi kepatang puku take kekeknga singgak binga ginda Jesue kuke itane sanga aknga gitna siknga tanong. Take ginda siakan wamu itane puya amina kunduta tupa gin danindamuking kakngae natapa kekeknga siknga siyok. Ginda natapa kekekawan gindane musipzaatangu apbakngawa buyambam siyok.
COL 2:8 Siwan ginda gisae katak siknga tagwautnong. Aminu tapatuta natdetdeu yapiina wena akngae natake ginu kem danike panziyak. Ita wamu inane bapunata tangenake sanga kepdakane nana akngae natake yaking kaknga tawake ginde damuyak. Ita wamu Kraisdane aknga teke ginu kem wam daniyak.
COL 2:9 Ginu atnataaing. Anututa Krais waapa tapan itane natdetdetna ba kekeknga akngana ba itane sanga akngana kuupbamda Kraisdane gupnane asaaking.
COL 2:10 Asaawa ita aminu tupan tapaapa kuupbam yapbike ninu kuupbamdane tupan siknga apa dakngake yuak. Yuke ita ginu inae papan ginda iat gatake yuwawa Anututane natdetdetnata gin papan kakaa siknga siwik.
COL 2:11 Siwan Judia nana aminda notna tapatutane waaknga take itane gupna matake waaknga waapata Anututane amina tapatu daknganggak ngang nataaing. Siwan ngana gin. Kraisda ginu inae papan ginda sanga wai gindane musipza enakaing kaknga kuupbam bitapewa danduke Kraisda ginu natane amina ngang daninggak.
COL 2:12 Siwan ginda gisane waiakngasa bitapewa aminda ginu yangga sautdamuking. Sike sanga wa ginu yangga sautdamukingu wa sanga Jesuta kupan kwaikingge natake tuwanguke tasiking. Siwan Anututa Krais akumbut katangga gatuna tangenakut takngae ginda natapa siakan singgak. Siwan ginda natapa siakan singgau waakngata gin gatandaman ginda sanga asinggan kayuk yutnanga waaknga takingge natake Jesuta gatuna enakut takngae tuwanguke ginu yangga sautdamuking.
COL 2:13 Ngan. Tupa ginu Anutue maa siknga yuwawa aminu tapatuta Anututane wam tawake nata gindane gupza matawa ginda Anututane aminabam daknganing ngangu dua yakut. Aho. Ginda waiakngane sukuke Anutue dua siknga kuking. Dua kuwawa ngana Anututa ninu kuupbamdane waiaknganin sandetnimukut. Sandetnimuke ita ginu danipakuwan Kraisde kuke ginda itane gepbiatang kopbing.
COL 2:14 Ngan. Sanga moo pakaingge buk gopatang nindane umaninu kaya. Ge ninda yake asimunanga kaya ngana mani yake imunanga wena siwan kakengu notninu tapatuta gatanimuke iman umanin dotdonguwan mani yake imunanga dua siwik. Ina unzakan Anututane mama wamda nindane waiaknganin yeutniman kaamang. Yeutniman kake ninda waiaknganinde toknga apananga kaya ngana notninu Jesuta gataniman kake Anututa nindane waiaknganin sandetnimuke toknga pananga akngane ninu sandekut. Siakan. Sanga moo pakaingge yake mani ima pakengu mani yake gwa namuking ngang natake umana pepa sane matakuu take tapmang gakane mapan pukuwik. Ina unzakan aminda tapmangga Jesu amin saamdakane tanguwa ita nindane toknganin panimuke kupan kake Anututa nindane waiaknganin sandetniman toknga pananga wena sikut.
COL 2:15 Siwan Anututa kekeknga Setendane aknga yapbike tanguwan pimakut. Tanguwan pimapan aminu kuupbamdane kaine tasiwan Setenu sanga moo binga dakngakut. Ngan. Sanga Jesuta aminbamde kaine amin saamdakane kungwake ninde tangge toknganin panimukut takngata Setenu tanguwan pimakut.
COL 2:16 Unzingge ginda dua kapewa aminu kunduta nanam nake tangopsa aknga ginu danindaknganing. Ba ginde mama wamu yekau kayuk gwenda akopan kake ie natake yuwatakak tapduu gwendu kanangge danining. Ba sande asinggan kaaing kakngae natake danining.
COL 2:17 Siwan mama wamu wa binga tawake tasiwa kakengu wa aminda sanga masan aawikge puya tuwanguke tasikaing ngang natapnim. Siwan puya tuwanguke tasikaingu waakngatane buya siknga Krais unin.
COL 2:18 Siwan ginda dua katewa aminu tapatuta wamu ginde temapa yawik. Dasingge? Aminu tapatuta mia takngatu takngatu ba kawik. Kakengu ita mia wa kakutde apbakngawik. Bakngake natdetdeu wa ita mia kake pakutde natake inane umana moo siknga yatangenawik. Ngan. Natdetdeu wa inane musiaatangga enakgak kakngaakngae natake gin yaipapaakusinangge natake daniwik. Danike asikaya ginda gisatakan Anutue take kundopning ba dasing ngang danisapduwik. Aho. Ninda angela akwakgekan inindatapnanu take siwik ngang daniwik. Siwan ngana ginda dua katewa wamu wa binga daniwik. Wena.
COL 2:19 Aminu waapata nindane tupan tapaninde wam teke ina banipda siwan daniwik. Ngana nindane tupan amin tapaninda ninu inane aminabam papan kekekakamang. Ngan. Anututa nin papan kekekamangu waakngata sitake kuku buyambam siwik.
COL 2:20 Siwan ginda Kraiskat gatake yuke wamu gisane bapusata tangenake sanga kepdakane nana akngae natake yaking kaknga ginda gwa bitateking. Dasingge apmanu ginu wamu wa kepdakane nana akngae gepbiatang gatusa kopnangge nataaing? Natake mama wamu takngatu takngatu aminu tapatuta ina banipda siwan natake yanggak kaknga ginda gatusa tawanangge tasikaing. Ginda unzingu take dua tasikaing. Ngan. Mama wamu takngatu takngatuta yake, “Sanga wa takwan! Gata ma tapim! Ba gata ma napim! Ba gata ma tanggaganuwim,” ngang yanggak. Siwan sanga atnananga ba katakngata tananga akngae natake takwan ngang yanggak ngana aminda sanga waaknga take ba napan kana wena siwik.
COL 2:23 Siwan mama wamu wa bingata ninu gatanimunanga dua. Aho. Mama wamu waakwakga nindane musipmin pangenawan ninda puya kekeknga siknga tasike sanga nindane musipmikatang enakaing kaknga yaitapaakusinangge tasinim. Unzingge ninda mama wamu waakwakge natapna natdetdetna take binga singgak. Siwan ninda sanga wai nisane musipmikatang enakaingu kuupbam yaipapaakusinangge natakengu mama wamu wa tawake tasinim. Tasina ngana buya dua aawik. Wena.
COL 3:1 Siwan Kraisda akumbut katangga enakut. Enake ita enandang kopan Anututa itane umana tasiwan buyambam siknga siwikge natake yawan Jesuta itane kataknga siaapa saak pukwike yuak. Ina unzakan ginda iat gatake yuke gisane waiakngasa bitateke sanga kayuk asinggan yutnanga aknga gwa taking. Unzingge ginda sanga Jesuta enandang koke yuak komune nana akngaekan natanggamatanong.
COL 3:2 Natanggamatake ginda sanga kepdakane nana akngae ma natanggamatawam.
COL 3:3 Dasingge? Ginda sanga wai gisane musipzaatang enakaingu kuupbam gwa bitapeking. Siwan sanga kayuk asinggan yutnanga ginda wa taking kakngae yapii Krais unin. Ita Anutuat gatake enandang yuke sanga wa kayuk yutnanga aknga kayuwawan wai dua siwik.
COL 3:4 Siwan Krais wa sanga ninda kayuk asinggan yutnimde yapii apata gatuna asaapik. Siwana tapduu waomune ginda iat gatake kakaa akngane sukuke takekan yutning.
COL 3:5 Unzingge ginda sanga wai kepdakane nana gindane musipzaatang natake tasikaingu kuupbam tanguwa kupsok. Ngan. Sanga yasewa tasiya aknga gatu sanga wai maakngana kaya kuupbam ginda apbitapenong. Gatu aminu kundutane sangaapanae geengukaing kaknga kuut apbitatenong. Dasingge? Aminu tapatuta amindane sangaapanae geenguwiu waapata sanga kepdakane nana akngae natanggamatake Anutue masa asimik. Asimuke ita aminu anutu pupukngae natanggamatakainggane dongaat nana tapatu binga dakngawik.
COL 3:6 Siwan aminu sanga wai wa binga tasikaingu Anututa musia toknga natayaman sanga toknga pananga akngata wa aminde asapik.
COL 3:7 Sike tupa ginda aminu wai waakwakat gatake sanga wai wa kuupbamu atasiking.
COL 3:8 Sike ngana ginda sanga wai wa kuupbam bitapeke gatusa ma tasiwam. Musipza toknga ma natapam. Musipza toknga natake kaanga wamu ma yawam. Aminde musipza wai ma natapam. Sapdut wamu ma yawam. Wamu wai inata inata ma yawam.
COL 3:9 Ginda aminde kemu ma yaniwam. Asikaya ginda sanga wai musipza enakingu wa kuupbam dua bitapeking ba dasing? Ngan. Natdetdeu wa ginda tupa tawake tasikingu kuupbamde masa gwa imuking.
COL 3:10 Siakan. Anututa natdetdeu kayuu ita ina nataak kaknga ginde gwa damukut. Daman take ginda aminu inata kundu binga dakngaking. Siwan sanga wa ginda aminu inata kundu binga dakngaking kakngae yapii Anutu unin.
COL 3:11 Ita natdetdeu kayuu waaknga ginde daman take ginda anzing nataaing. Ninu keu komdune nana tupa iwan dakngake yukumang ngana apmanu nin banakanu damanu gwendu wena kaamang. Ngan. Aminu nikat nana kundu tupa katum aminde yuking siwan gatu kundu ninu Judia amindane mama wamde gepbiatang yuking. Ngan. Kunduta kepman nana katum aminde yuke amin zipnanga akngane sukuking. Gatu aminu kundu puya toikga kekeknga siknga panggaganuke puya mani pananga dua aknga asinggan yamukaing. Gatu kunduta inandek inandek inane puyana take pasikaing. Siakan. Kraisda ninu kuupbam inae papan ninda itane gepbiatang koyuke nin banakanu damanu gwendu wena kaamang.
COL 3:12 Ngan. Anututa ginde butaya natandamuke ginu kuupbam inae pakut. Papan ginda itane aminabam dakngawa ita ginde musip gwaang natandamunggak. Unzingge ginda aminde butaya natayamuke gatayamunong. Gatu ginda musipza kwikwiknga aminde natayamuke wepda pasiyamunong. Ngan. Ginda musipza toknga zet ma natapam.
COL 3:13 Sike aminu gikat nana tapatuta sanga waiaknga ginde tasindaman kakengu ginda akateke waiakngana sandekngamunong. Asikaya Buyambam tapaninda gindane waiakngasa dua sandetdamukut ba dasing? Aho. Ita gindane waiakngasa gwa sandekut. Ina unzakan ginda gindane notzatane waiakngana sandeyamunong.
COL 3:14 Sandeyamuke ginda aminu gikat nana Jesue aminabamde musip gwaang natayamunong. Sike musip gwaangu wa nataamang kakngata sanga kuupbam yapbike wamu waakngata tupan daknganggak. Siwan sanga musip gwaangu wa nataaing kakngata gin papan kekekake ginda dongu takngatukan binga daknganing. Dakngake ginda musipza takngatukan natake yutning.
COL 3:15 Siwan Kraisda gindane musipza pangenawan ginda musipzaatang kwikwiknga natake yuaing. Unzingge ginda gisae tagwauke takekan yutnong. Ginda unzing yutningge natake Anututa gin yandawamban ie kuking. Kuke ginu kuupbamda itane aminabamda dongu takngatukan binga dakngake yuaing. Unzingge ginda Anutue asinggan inimbaknganong.
COL 3:16 Sike ginda wamu kuupbamu Kraisda yakuu musipzaatang gitna siknga pake yutnong. Yuke ginda natdetdeu nomana siknga takngatu takngatu gindane notzae yanindamutnong. Yanindamuke ginda musipzaatang Anutue inimbakngake miti kau inata inata tainong.
COL 3:17 Siwan sanga bamu ginda wam yake ba puya tasining. Wa ginda Buyambam tapaninu Jesue natanggamatake tasinong. Tasike ita nin gataniman tasikamang ngang natake ginda Nanin Anutue asinggan inimbaknganong.
COL 3:18 Siwan ginu maya. Ginda gisane apzae gepbiatang yutnong. Yuwa danduke Buyambam tapaninda ginde natapan take siwik.
COL 3:19 Siwan ginu wawi. Ginda gisane maatzae butaya natayamuke ma zipam.
COL 3:20 Siwan ginu waatdaka. Ginda nanza mingzae wam natake wa aminde gen gwaamutnong. Gwaamuke tasiwa danduke Buyambam tapaninda ginde natapan take siwik.
COL 3:21 Siwan ginu waakza yapasa kaya amin. Ginda waakza yapasatane musia ma pangenawa ginde semna dua natandamam.
COL 3:22 Siwan ginu aminu gisane puya toikzata kekeknga siknga gin panggaganuke puya mani pananga dua aknga ginde dama pasikaing amin. Ginda wamu gisane puya toikzatane genu katak siknga gwaamutnong. Ngan. Ginda Buyambam tapaninde gwauke puya waakngae musipzaatangu puyaekan nomana natake tasinong. Puya toikzatane kainekan puya nomana ma pasiwam. Aho. Ita gin dapmake kuwawanu ginda puya atasining kaknga noman gan tasinong.
COL 3:23 Ngan. Sanga kuupbam ginda tasiningu wa ginda puya toikzaekan dua natake tasiwam. Aho. Ginda Buyambam tapaninu kuutde natake puya kekeknga siknga ie pasingamunong.
COL 3:24 Ginu atnataaing. Ginda Buyambam tapaninu Kraisde natanggamatake puya ie pasingamukengu sanga ita ginde damunangge yawan yukuu wa kuupbam ita apmea ginde daman paning.
COL 3:25 Siwan ngana aminu gikat nana tapatuta puya gutonga tasiwiu Buyambam tapaninda aminu waapae toknga asimik. Dasingge? Anututa amin usanzitnangge natakengu ita nindane nomin ninduke dua usanziwik. Aho. Nindane puyanindekan natake ita nomana siknga ninu usanziwik.
COL 4:1 Siwan ginu puya toik dakngake yuaing amin. Ginu atnataaing. Enandang nana tapatuta ginu asinggan danduyuak. Unzingge ginda ie natanggamatake gisane puya aminzae wamu wikake nomana akngakan yaninong.
COL 4:2 Siwan ginu aminu kuupbam. Ginda tumuk wamu Anutue asinggan inike ma tuyukawam. Ginda tumuk wamu asinggan yake yake yasika ngana dapunde natake ma petakwemapam. Aho. Ginda kayuk yuke Anutue inimbaknganong.
COL 4:3 Inimbakngake ginda tumuk wam iniwa ita nit gatanimik. Gatanimuke ita kepi nitde tasiniman nitda natdetdeu Anututa ina natake Kraisda nin gatanimikge natake tekut takngae natake aminu buyambam yanikapzim. Nata wamu waaknga yanikapmake tasitakuwawa iwanata na kaautde napmaba yuat.
COL 4:4 Yuwawa ginda nae natake Anutue tumuk wam iniwa ita na gatangaman wamu waaknga anggaman yanikapit. Dasingge? Anututa tupa puya waaknga nae atnamukut.
COL 4:5 Siwan aminu Anutue masa imukaingu kepman nana aminde banakan yuke ginda natdetdetza anggaman natake sukunong. Sukuke ginda tapdukngane siknga zet tasinong. Sike tapduknga ginda amin gatayamunanga wa gwenda ginu dapbimsak.
COL 4:6 Siakan. Ginda wamu kaa sikngakan yanike tasiwawa natake wa aminda ginde natapa amin gwaang siknga siyok. Siwan wa amikat nana tapatuta yakwaik wamu takngatu gin danikwaiwanu ginda gisae tagwauke wamu takekan yake ininong.
COL 4:7 Siwan notninu tapatu umana Tikikas ngang inikamang kapae nata musip gwaang natangamunggat. Sike waapata Buyambam tapaninde puya take siknga pasinggak. Pasike nitdane puya amin notniu tapatu dakngake yuak. Ita ginde kuke wamu nata dasingga yuat taknga ginde daniwik.
COL 4:8 Ita wamu waaknga ginde daniwikge natake nata initewa kuwikge gwa inikum. Siwan ita ginde apuke danike gindane musipza papan kekekaning.
COL 4:9 Siwan gatu gindane notza tapatu umana Onisimas ngang inikaing kapaaya kuut nata ie musip gwaang natangamunggat. Ita ninu Jesutane amina dakngake yuamakat nana tapatu dakngake Jesue kekeknga siknga natayuak. Siwan nata ie initewa ita Tikikaskat gatake ginde kusande gwa inikum. Siwan notninu waapaatda ginde apuke wamu takngatu takngatu sanga kuupbamu ane aakingge natake danikapzan.
COL 4:10 Siwan notna tapatu umana Aristakas ngang inikamang. Ita natane kaaut notna tapatu. Sike ita gaak wamu ginde daninggak. Siwan gatu notninu tapatu umana Mak ngang inikamangu waapa Banabasdane namaknga. Itaaya kuut ginde gaak wam daninggak. Waapae natake nata wamu ita ginde apundopan kakengu ginda ie apbakngake initakopningge ginde gwa tewa kukut.
COL 4:11 Siwan notninu tapatu umana takngaaya. Takngatu Jesu gatu takngatu Jastas ngang inikamang. Itaaya kuut ginde gaak wam daninggak. Sike aminu wa tapaat tapatuatda natane notna siknga Judia kep komune nana amin ngana aminu waakwakga Jesue amina dakngake na take siknga gatangama puya pasikamang. Pasike ninda wamu Anututa aminu buyambam inae panangge tasikutde natake yanikapmakamang. Siwan notninu Judia nana kundu Jesue amina dakngake ane yuaing ngana wa aminda na dua gatangamukaing. Wa amikat nana aminu tapaat tapatuatdakan na gatangamukaing.
COL 4:12 Siwan gatu gindane notza tapatu umana Epafras ngang inikamang. Itaaya gaak wamu ginde daninggak. Sike ita puya Jesu Kraisdane aknga apasingamunggak. Pasingamuke asinggan ita gin gatandamunangge itane musiaatangu toknga siknga natake tumuk wamu Anutue ininggak. Inike Anututa gin papan kekekake gindane musipzaatangu Anutue baniu ginu kuupbamda natdeke itane kepi katak siknga tawake tasiningge natake ita tumuk wam ininggak.
COL 4:13 Sike ita gikat gatu Leodisia yot gapmane nana amikat gatu Hirapolis yot gapmane nana amikat ngang gatandamunangge natake ita puya kekeknga siknga pasiwan kakum. Kakumde nata apme daniwa natapning.
COL 4:14 Siwan gatu nindane dokta umana Luk ngang inikamang kapae ninda musip gwaang natangamukamang. Iat gatu Dimaskatda ginde gaak wamu danikamayak.
COL 4:15 Siwan ginda natane gaak wama natane notnabamu Jesue amina Leodisia yot gapmane nana aminde yamunong. Siwan gatu natane gaak wamu maya tapatu umana Nimpa ngang inikamang. Iat gatu aminu Anututane aminabam dakngake maya waapatane yotnane miti kanangge asinggan kokaing amikat kuutde yamunong.
COL 4:16 Sike ginda pas asanu kendewa puyuwana ginda tewa kuwan Anututane aminabamu Leodisia yot gapmane nana aminda unekan apuke pas asanu kendetningge yaninong. Sike pas nata Leodisia nana aminde tewa kukut sanu gikaya kuut take kendetnong.
COL 4:17 Siwan ginda notza tapatu umana Akipas ngang inikamang kapae anzing ininong, “Puya Buyambam tapaninda gae gamukut takngae natanggamatake gata katak siknga tasiyo,” ngang ininong.
COL 4:18 Siwan na Pol. Nata ninane katakngata siknga gaak wamu aaknga ginde matandamunggat. Nata kaautde yuat takngae ma botawam. Siwan nata tumuk wam iniwa Anututa ginde musip kwikwiu asinggan natandamuke yuwik. Unukan.
1TH 1:1 Mate notnabam! Ginu Tesalonaika yot gapmane nana aminu Nanin Anututane aminabam dakngake yuaing aminde nata pas asanu ginde matandamunggat. Siwan na Pol gatu notna Silvenes gatu Timoti ngangga unekan gatake yuke pas asanu ginu Jesu Buyambam tapaninu Anututa tapan Krais akgatanimuya apanin dakngake yuak kapatane aminabamde matandamukamang. Matandamuke Anututa ginu asinggan gatandamunggak kakngaat gatu musia kwikwiknga natandamunggak kakngaatda gikat gatake yutningge take nataamang.
1TH 1:2 Tapduk bamu ninda ginde natake Anutu asinimbakngakamang. Siwan ninda gindane umanza tumuk wam yakamang gwekatangu ayakamang.
1TH 1:3 Yake ginda Jesue natapa siakan siwan puyana take aknga tangenakaing kakngae natake asinimbaknganangge semna dua nataamang. Siwan gatu ginda musip gwaang natake puya tasikaing kakngaat gatu ginu musipza tapa kekekawan Buyambam tapaninu Jesu Kraisda gatuna epikge natayuaing kakngaat natake Nanin Anutu asinimbakngakamang.
1TH 1:4 Siwan mate notna. Anututa ginde musip gwaang natake ginu papan itane aminabam dakngake yuaing kakngae natake asinimbakngakamang.
1TH 1:5 Sike wamu take aknga ninda danikapmake tasiwatna Anututane Waung Kapata kekeknga siknga tasindaman ginda natake wamban mooi ngangu dua natapbing. Aho. Ginda musipzaatang natapa siakan sikut. Siwan ninda siakande siknga atnatapbumang. Waung Kapata kekeknga siknga tasindamukutden. Sike ninda unzingu gin banakan yuke gin gatandamunangge tasikumang kakngae atnataaing.
1TH 1:6 Siwan ginda nin ninduyuwawa ninda unzing tasikumang kaknga kake ginda ina unzakan tawayuk Buyambam tapaninda asinggan tasikut taknga tawake tasiking. Sike ginda Anutue wam natake banipzaatang gitna take yuwawa aminu banip dua siking aminda meyambamu ginde damukaing. Unzing damuwawa ngana Anututane Waung Kapata gatandaman ginu meya buyak yuke ngana apbakngakaing.
1TH 1:7 Unzingge ginda kepi waaknga yeuyamuking. Yeuyama aminu Jesue natapa kekeknga singgak aminu keu komaya Masedonia gatu Akaia ngang yanikamang komaune nana kuupbamda tawake tasikaing.
1TH 1:8 Sanga Buyambam tapaninda tasinimukutde wam natake ginda tuwanguke yanikapa yatakuwawa aminu keu wa komaune nana amindakan dua natapbing. Aho! Yotna yotna nana kuupbamda atnatapbing. Ginda Jesue natapa kekeknga singgakgen. Siwan ginda unzingu wa natake yuaing kakngae aminu kuupbamda atnataaing ge ninda yaninanga dua. Aho!
1TH 1:9 Aminu waakwakga asinggan nin ninike ninda ginde kuke kundopna ninu yotzaatang pakoke katak siknga ninu toiking kakngae natake asinggan ninikaing. Ninike ginda musipza tapa tekwamban anutu pupukngae masa yamuke Anutu siakan siknga yuak kapae kuke asinggan asinggan kayuu wa yuak kapatane puyana tasinangge natake ie kuking kakngae ninikaing.
1TH 1:10 Siwan ginda kuke Jesu itane waaknga apata enandang teke gatuna epikge kayuaing kakngae ninikaing. Siwan aminu waapa akupan Anututa akumbut katangga gatuna tangenakut. Tangenawan ita gatanimuke Anututa toknga waiaknganinde nimunangge nataak kaknga sandetnimik kapae natayuaing.
1TH 2:1 Mate notna! Gisa atnataaing. Tupa ninda yanisukuke ginde kundoke wamu takeaknga danikapna buya asaakutden.
1TH 2:2 Sike tupanu Filipai yot gapmane ninda yanisukuke tasiwatna nin ninisapduke nindane gupminu apasiwa maiking kakngae ginu atnataaing. Siwan ngana Anutuninda nindane musipmin papan kekekawa ninda iwaninu dua kagwaukumang. Wena. Ninda akekekake Anututane wamu takeaknga ginde atdanikapbumang.
1TH 2:3 Sike ginda siakan ngang natapningge natake kemu dua panzikamang. Sike gawaknga aknga buyak dua yuke gwaut wamu ginde danikamang.
1TH 2:4 Aho. Anututa nindupan take siwan puya ninda wamu takeaknga aminbamde yanikapnim taknga atnimukut. Unzing nimukutde ninda tasike aminda ninde puyae take natapningge dua natake yanikapmakamang. Aho. Anututa ina ninde musipatangu nataamang kaknga usanzikgak kapata take natapikge wamna yakapmakamang.
1TH 2:5 Siwan ginu atnataaing. Ninda ginu dua danidatdaukumang. Wena siknga. Sike Anututa atnataak. Ninda puya waaknga tasikumangu sanga akgeengutnanga aknga dua takusopuke tasikumang.
1TH 2:6 Ninda puya tasina ginda ba aminu kunduta umanin yapangenatningge dua natake tasikumang. Wena siknga. Siwan aminu Anututa tapan Krais akgatanimunggak kapaninda nin papan itane kwiiknga aposel aminu umaninu kaya akwak dakngakumangu nin ninipewan kuke yanisukukamang kakngae natake ninda ginu umanin yapangenake sangasa nimuke gatanimunong ngang danikumang gamu noman siwan.
1TH 2:7 Ngana tapduknga ninu gikat yukumang gwene ninu dua daninggamatake sanga wepda siknga tasikumang. Unzing mingata waatdakana katak siknga toikgak binga.
1TH 2:8 Ninda ginde take siknga natake Anututane wamu take aknga ginde damunangge take siknga unzing natapbumang. Sike wamu waaknga ginde damuke gin gatandamuke akumnimde dua bitakumang. Aho. Ninda ginde musip gwaang natandamuke gin gatandamunangge tasikumang.
1TH 2:9 Mate notna! Ginu puya kwatan bamu ninda tasikumang kakngae atnataaing. Ninda puya kekeknga tasike Anututane wamu takeaknga ginde daniyuk gindane nanam gatu sangasa ngangu dua kaitnangge natake ninu kwakngaom gatu zikaane ngangu kuut gupminde puya pasike yukumang.
1TH 2:10 Ginu atnataaing. Siwan Anutu kuut atnataak. Sanga ninda ginu Jesue natapa kekeknga sikut aminde tasikumangu noman siknga tasikumanggen. Gutonga takngatu wena.
1TH 2:11 Ginu atnataaing! Sanga nanata waakngae tasinggak kaknga tuwanguke
1TH 2:12 ginu inandek inandek tasikumanggen. Ninda unzing tasike gin danidamuke gwaut wamu asinggan danike ginda kepi Anututa take nataak kaknga tawake tasiningge take siknga natake danidamukumang. Siwan Anutu wa nin yaniwamban ninda itane kekeknga aknga gepbiatang koyutnimde yaniwanggak kapa unin.
1TH 2:13 Siwan tupa ninda Anututane wam taknga gin danikapna ginda natake Anututa unzing siknga nininggak ngang natake musipzaatang gitna pake yuaing. Aminde wamban ngang natake undang dua teking. Aho. Wamu wa danina natapbingu Anututane wamu siakande siknga yuak. Siwan ginu wamu waaknga natake siakan ngang natake yuaing amindane natdetdetza Anututa pangenakgak. Ge ginda unzing natake yuaing kakngae natake ninda asinggan Anutue inimbakngakamang.
1TH 2:14 Siwan mate notna! Tupa siknga aminu Judia nana aminda Anutue wam yanikapsa aminu atzipa kumbing. Siwan aminu wa zipa kumbing amindane zakngita yawa kekekawan Jesu Buyambam tapaninu tanguwa kumbut. Siwan aminu Anututa tapan Krais akgatanimuya apanin dakngake yuak kapa Jesu unin. Siwan aminu Judia kep komune yuaingga enake dongu takngaaya dakngake dongu takngatuta iwana dakngake Jesutane aminabamdane gupna pasiwa maiking. Unzing pasiwa maiwa ninu atninikwasipewa kukumang. Unzingge Anututa natapan take dua singgak. Siwan aminu waakwakga Jesue semna siknga natake ninda kepna kepna nana amin gatayamunangge wa aminda inane waiaknganae toknga dua paningge wamu takeaknga yanikapmake tasisukuwatna kepininu asumutnimunangge natake asinggan tasikaing. Unzing tasike aminu kuupbamdane iwana dakngake tasiwawa waiakngana buyambam siknga singgak. Siwan Anututa bania toknga siknga natayamuke waiaknganae toknga yamik kakngata undang yuyamunggak. Siwan ngana ninda atnataamang. Meya wa atnimuking kakngata ginde gwa apbutden. Notza une nanatakan Jesue banip sikaing kakngae semna natake gindane gupza pasiwa maikaing ngangu atnataamang.
1TH 2:17 Mate notna! Ninda gin dapmake zetzet kunimde natake you gapmandune kukumang. Kuke ginde gwangat siknga natdamuke toitoitda minga nanae gwangat siknga nataaing binga natandamuke yuamang. Siakan. Ninda ginde nomu dua danduamang ngana ninde musipmikatangu ginde atnatanggamatake ginde gatunin kunangge toknga siknga natapbumang. Ninde musipatangu gin dandupnangge toknga siknga natake ninu puya kekeknga siknga kepi kake ginde kunangge tasikumang. Siwan na Pol. Nata tapdukbamu ginde kunangge tasiwa ngana Setenda naat notnaatdane kepininu asumutnimunggak ngana
1TH 2:19 gin dandupnangge asiknga bakngakamang. Dasingge? Masande nindane Buyambam tapa Jesuta gatuna apana ninda ie nomune yutnim. Sike tapduu waomune sanga tapatuekan natayuamang kaknga kakengu apbaknganim. Siwan sanga unzingu ninda musip gwaangu minae natapnim? Ginu unin.
1TH 2:20 Ngan! Ninda ginde danikumangu ginda akgwaamukaing kakngae natake asiknga bakngake yutnim. Siwan unzingge gatunin ginde kunangge musipminu toknga siknga nataamang.
1TH 3:1 Unzingge naat gikat unekan dua gatake yuwatna tapduu mamaya siwan nata ginu dasingga yuaing ngang natake nangaakan natapbum. Natake kundusipat yutnangge asiknga bitakum ngana ginde akuwitde natapa kepi wena sikut. Siwan natakan Atens yot gapmane yuwawa
1TH 3:2 Timotita napmake ginde kuwikge wam yakumak. Unzing yata takawan nata notna Timoti initewa ginde kukuu waapata naat unekan gatake yuke Anututane puya tasike wamu takeaknga aminu Anututa tapan Krais akgatanimunggak kapae natake asinggan yanikapmanggak kapa unin. Siwan nata initewa ginde kuke gin kekekandamuke ginda Jesue aminabam dakngake yuaing kaknga kekeknga siwikge natake kukut.
1TH 3:3 Kuke aminu Jesue masa imukaing aminda meya atdamukaing kakngaatang pimanang ngang natake nata initewa ginde kukut. Siwan gisa atnataaing. Ninda meya wa atnimukaing kaknga dua kanimde kepi wena singgakgen.
1TH 3:4 Siwan meya wa pakamang kakngae natake tupa ninu gikat gatake yukumang gwene ninda anzing danikumang. Iwanzata enake meya takngatu takngatu atdanining ngang danikumang kaknga buyana gwa aawan kaaing.
1TH 3:5 Meya waaknga ginde gwa apbut ngang natake ginu dasingga yuaing ngang natake nangaakan natapbum. Asikaya Setenda asinggan ninu pasiwan singgak. Siwan ita ginu gwa danidatdaukut. Danidatdauwan pimanang ngang natake nata puya ninda gatandamunangge pasikumang kakngata apba maiwik ngang natake akgwaukum. Nata akgwauke ginda Jesue natapa kekeknga singgak kakngae wam natapnangge nata Timoti initewa ginde kukut.
1TH 3:6 Siwan Timoti wa initewa kukuu gatuna gin dapmake apmaatzim siknga gatuna apuke wamu take siknga aknga na gwa nanik. Ita ginu Jesue natapa kekeknga singgak kakngae wamu gwa nanik. Nanike ginu nae musip gwaang natangamuke apbakngakaing kakngae wamu kuut gwa nanik. Gatu ginda na nadupnangge gwangat nataaing kakngae wamu kuut gwa nanik. Unzing nata gin dandupnangge nataat binga.
1TH 3:7 O mate notnabam! Ita wamu wa nanikut takngata musipma tapan kekekanggak. Ginu Jesue natapa kekeknga sikut taknga gitna take yuaing ngang natake ninda meya buyak ane yuamang ngana apmanu musipmikatang tatanga natake yuamang.
1TH 3:8 Sike ginda Buyambam tapaninde kekeknga yuaing kakngae wam natake ginde nangaakan natapbum taknga wena gwa singgak.
1TH 3:9 Wena siwan kake ninda Anutue asiknga inimbakngakamang. Inimbakngake ninda ginde natake Anututa musipmin pangenawan banipmikatang iaknga siknga natake Anutue asiknga inimbakngake yuamang.
1TH 3:10 Inimbakngake yuke kwepapman tendeknga wena tumuk wamu asinggan ninda gindane nomza dandupnangge musipmikatangu toknga siknga natake yakamang. Yake ginda Jesue atnataaing kaknga dapaknga ba siwanu gindane natdetdetza pana nomatawan gatu take siwikge natake yakamang.
1TH 3:11 Sike ninu Nanin Anutuat gatu Buyambam tapaninu Jesuatda ninu ginde kunimde kepi Setenda umutnimukut taknga zipmandakngawat kunimde nataamang.
1TH 3:12 Siwan ngana ninu Jesu Buyambam tapaninda musipza pangenawan ginda notza Jesuat nana amikat aminu kuupbapatde musip gwaang natayamukaing kaknga buyambam siwikge nataamang. Unzing ninda ginde musip gwaang natandamukamang binga.
1TH 3:13 Sike Anututa unzing tasike gindane musipza tapan kekekawan masande Buyambam tapaninu Jesuat gatu inane amin takwakat gatuna kepdakane epning gwene ginda noman yuke gutongasa takngatu Anutu Naninde kaine wenata yutning.
1TH 4:1 Siwan mate notnabam! Buyambam tapaninu Jesuta nin pakutde ninda ginde kekeknga wamu takngatuat danina natapnong. Tupa ninda danidamuke ginda kepi anzing tawake tasiwawa Anututa dandupan take siwik ngang danidamukumang kakngakan ginda tawake atasikaing. Siwan kepi wa tawake tasining kakngata buyambam siknga siyok.
1TH 4:2 Siwan ginu wamu kuupbam Jesu Buyambam tapaninda nin niniwan natake ninda ginde tupa gwa danidamukumang kaknga atnataaing.
1TH 4:3 Wamu waaknga danike Anutue banip takngae natake anzing danidamukumang. Ginda Anutuekan natanggamatake aminu noman siknga amin daknganong. Dakngake sanga yasewa tasikaing kaknga gatukande bitake tenong.
1TH 4:4 Teke yuke kepi maya papsa aknga ginu kuupbamda inandek inandek katak siknga natdeke Anutue banip taknga noman gan tawake maya panong.
1TH 4:5 Aminu kepman nana Anutue dua natake yuaing aminda mayae geenguke yumdekan pakaing ngana ginda unzingu ma siknga tasiwam.
1TH 4:6 Ginda sanga wai waaknga teke notza Jesuat nana amindane maatnae ma geenguwam. Sanga waakngae tupa ninda danidamuke Buyambam tapaninda aminu kuupbam unzing geengusukukaing aminde meya yake ayamikge gwautnong ngang gwa danikumang kakngae natake ginda noman gan yutnong.
1TH 4:7 Siwan Anututa nin papan ninda aminabam dakngake sanga noman gan tawake tasinimde pakut. Ninda sanga wai waaknga tawake tasinimde dua. Wena siknga. Unzingge ginda sanga takeakngakan tawake tasinong.
1TH 4:8 Siwan aminu tapatuta wamu waakngae masa imanu ita masa amindekan dua imik. Aho. Ita Anutu inane Waunga dudumna yuak kapana atnimunggak kapaatde kuut masa imik.
1TH 4:9 Siwan ninda wamu kundu ginde dua danidamuke matanim. Sanga notza Jesuat nana aminde musip gwaang natayamukaing kakngaen. Dasingge? Anututa sanga waakngae ginu gwa danidamukut.
1TH 4:10 Siwan ginda aminu Jesuat nana Masedonia kep komune gikat gatake yuaing aminu kuupbamde musip gwaangu atnatayamukaing. Ngana mate notna. Ninda ginde kekeknga wamu takngatuat danina tasinong. Ginda sanga waaknga tasiwa buyambam siknga siyok.
1TH 4:11 Ginda wepda yutnangge musipza iaknga siknga natayutnong. Wepda yuke ginu gisane sangakan kayuke ginu sangae dua dapningge natake gisane puya pasinong. Unzing ninda tupa ginu gwa danidamukumang binga.
1TH 4:12 Unzing tasike ginda kepi noman gan tawake tasike sanga tapatue dua dapmake notza dua yaninggakaning kaknga kake aminu kepman nana aminda natapa take siknga siwik.
1TH 4:13 Siwan mate notnabam! Ninu ginda notza Jesuat nana aminu gwa kumbing aminde dua botaningge nataamang. Aminu kepman nana aminda notna gwa kumbing aminde apbotake akumbing katangga gatuna enatningge dua nataaing. Sanga waakngae dua natake aminu gwa kupsa aminde butaya siknga natake kwanam sikaing. Siwan gikaya unzakan dua botake kwanamu dua sitningge natake ninda danidamutna natapnong.
1TH 4:14 Ninda natake Jesuta akungwake gatuna enakutde natapna siakan singgak. Unzingge ninu atnataamang. Anututa aminu Jesue aminabamu atdakngake yusika kumbingu gatu pangenake Jesuat unekan gatake yutningge yanipakopikgen. Jesuta gatuna asepik gwene ita yanipakopik.
1TH 4:15 Siwan Jesu Buyambam tapaninda wamu atninidamukut takngakan danina natapnong. Masande ninda yuwatna Buyambam tapata gatuna epik gwekatangu kayuk yukengu ninda Anutue aminu gwa kumbing aminu dua yapbike kopnim. Wena.
1TH 4:16 Sike aminu wa enandangga asepik kapa Jesu Buyambam tapaninu unin. Ita epuke wamu kekeknga aminbamde yayawamban angela tupan tapata Anututane pum puyapan kepdakane gatuna epik. Epuwawan aminu Jesutane aminabam dakngake yusika akumbingu gatuna enatning.
1TH 4:17 Akumbing katangga enawana Anututa ninu dua kungwake kayuk yuamangu Buyambam tapaninu minga musane koke kanimde nikat wa amikat pakopik. Enane pakopan nikat Buyambam tapanikat unekan gatake asinggan asinggan yutnim.
1TH 4:18 Siwan ginda notza wamu waaknga yanike notna gwa kumbingge butaya siknga nataaing kaknga sandeyamunong.
1TH 5:1 Siwan mate notnabam. Buyambam Tapaninda gatuna epikge tapduk gwenu dua matanim.
1TH 5:2 Ninda apmanu ita dua apik ngang natapnim gwekatang apik. Kuka aminda zikaane apikge dua natake kayuamang gwekatang apunggak binga apikge gisa atnataaing.
1TH 5:3 Tapduknga aminda yake, “Apmanu tapduu take siknga singgak. Sanga gwauya aknga dua kanim,” ngang yakaing gwekatangu tapduu waomunekan sanga wa amin pasiwan mainanga zetgaman wa aminde apan asatnake sanga wa yapbitnanga dua. Wena siknga. Unzing mayata engang tangaiwikge katak dua tandakngake yuak gwekatang toknga natapan engangu asaakgak binga.
1TH 5:4 Siakan notnabam. Siwan ngana ginu zikaa akngane unzing dua yuke dua satnaning. Tapduknga wagwenu asapik gwenden. Kuka aminda zikaane apan satnakaing binga ginda tapduu wagwene dua satnaning. Wena siknga.
1TH 5:5 Siwan ninu kuupbam gikat nikatda kakaa akngane yuamang. Ninda zikaa akngane dua yuwatna tapduu wagwenda apanu dua satnanim.
1TH 5:6 Unzingge ninda aminu dapuna pepbotakaing binga katum aminda tasike yuaing kaknga dua tawake botanim. Dua botake yuwatna natdetdetninu anggaman siwik.
1TH 5:7 Siwan ninu atnataamang. Aminu dapuna petnangge natakengu zikaane pekainggen. Gatu aminu yangga toknga aknga tangoke datdaptakaingu wa zikaane datdaptakaing.
1TH 5:8 Unzing tasikaing ngana ninda tapduu wagwenu asapikge akayuamang. Unzingge ninu kaininu akekekawan anggaman natake yutnim. Unzing yuke aminu amakge tandakngake taukgwen mapan pukuwan kupna kekeknga siknga gwapuke yuaing binga tasinim. Tasike ninda Jesue natapna kekeknga siyok. Siwan aminde musip gwaang natayamunim. Sike Jesuta gatuna epuke ninu akgatanimuke waiaknganinde toknga apanim taknga sandetniman ninda iat gatake asinggan asinggan yutnimde natanggamatake kayutnim.
1TH 5:9 Dasingge? Anututa ninu toknga waiaknganinde yake nimunangge dua yaniwanggut. Wena. Ita Jesu tapan Buyambam tapa Krais akgatanimuya apanin dakngake apu ninde tangge kungwanimukut. Siwan Anututa nin papan Jesuta ninde natake tapduknga ita enandang koke gatuna epik gwekatangu ninda kayuk yutnim ba apba kungwakengu ninda iat gatake yutnimde kungwanimukut. Ita unzing kungwaniman toknga wa waiaknganinde panim taknga sandetnimunangge natake Anututa nin papan itane aminabam dakngake yuamang.
1TH 5:11 Unzingge ginda wamu wa takeaknga notza Jesuat nana aminde yamuke ginda inandek inandek musia papa kekekakaing kakngakan tawake asinggan tasinong. Tasiwawa Jesue natapa siakan singgak kakngata buyambam siyok.
1TH 5:12 Siwan mate notnabam. Ginda aminu gikat nana Anututane puya pasike gin danduyuke gindane natdetdetza panomanukaing aminde gepbiatang yutnong. Buyambam tapaninda wa aminu gindane tupan takwakza pekutde natake wa aminde gepbiatang yutnong.
1TH 5:13 Yuke wa amindane puyanae natake musip gwaang siknga natayamuke umana asiknga yapangenatnong. Unzing tasiyuk ginda notzaat takekan yutnong.
1TH 5:14 Gatu wamu kunduat danina natapnong. Ginda aminu semna natasukukaing aminde gwaut wam yamunong. Yamuke aminu baniaatang meya natayuaing amin gatayamuke meya akngana sandeyamunong. Sandeyamuke aminu Anututane aminabam dakngake yuaing ngana wa aminu Anutue natapa kekeknga dua singgak kakngae gatayamuke papa kekekanong. Papa kekekawa aminbamde wikake pasiyamunong.
1TH 5:15 Ginda waiaknga aminda ginde tasindamukaing kakngae yake yake ma pasiyamam. Yake dua pasiyamuke tapdukbamu asinggan ginda sanga takeaknga notza Jesuat nana amikat gatu aminu kuupbapatde pasiyamunangge banip gwaang natake pasinong.
1TH 5:16 Siwan ginda asinggan baknganong.
1TH 5:17 Ginu tumuk wamu asinggan asinggan yanong.
1TH 5:18 Ginda sanga kuupbam meya ba take ba ginde apanu Anutu inimbaknganong. Ina unzakan aminu Anututa tapan Krais akgatanimuya apanin dakngake yuak kapa Jesuta kepi waakngakan tawake tasike yeutnimukut. Kepi wa yeutnimukut taknga Anututa ginda tawake tasiningge take nataak.
1TH 5:19 Ginda sanga Anututane Waung Kapata amindane musia pangenawan pasikaing kaknga ma yandakngawam.
1TH 5:20 Ginda Anututane Waung Kapata amindane musia pangenawan Anututane wamu ginde danikapmakaing kakngae masa ma imam.
1TH 5:21 Siwan ngana ginda sanga kuupbam usanzike sanga take siknga aknga kakengu atanggaganutnong.
1TH 5:22 Tanggaganuke sanga wai kuupbamu undang peke masa yamunong.
1TH 5:23 Anutu musip kwikwikge yapii ita ina ginu pasiwan aminu noman siknga amin daknganingge take nataamang. Dakngake yuwawa ita gindane natdetdetzaat gatu musipzaat gatu gupzaat ngangu take siknga kayuwawan gutongasa wena siknga siwik. Siwan tapduknga Buyambam tapaninu Jesu Kraisda gatuna apik gwene ita dandupan ginu takekan siwik.
1TH 5:24 Anutu gin yandawanggak kapa noman siknga. Ita sanga wa daninggat taknga take tasindamik.
1TH 5:25 Mate notna. Ginda Anutue tumuk wam inike ita nin gatanimikge yanong.
1TH 5:26 Sike ginda nae tangge yuke notza Jesutane amina kuupbamde gaak wam yanike wa aminu kuupbam kataknga ipmake yanimbaknganong.
1TH 5:27 Nata wamu kekeknga Jesue umande daniwa natapnong. Ginda pas asanu notza Jesuat nana kuupbamde kendeyamunong.
1TH 5:28 Siwan bania kwikwiknga nindane Buyambam tapaninu Jesu Kraisda atnatanimunggak kaknga wa gikat gatake yutningge natake tumuk wamu ininggat. Unukan.
2TH 1:1 Na Pol siwan naat notna Silveneskat gatu Timotiat ngangga unekan gatake yuke pas asanu ginu Buyambam tapaninu Jesu Kraiskat nana Anututane kekeknga aknganae gepbiatang yuya aminu Tesalonaika yot gapmane yuaing aminde matandamukamang.
2TH 1:2 Sike Nanin Anutuat gatu Buyambam tapaninu Jesu Kraiskatda musip kwikwiu ginde natandamat ginda waapaatdane kaine wikake yutningge take nataamang.
2TH 1:3 Mate notnabam. Ginu Jesue natapa kekeknga singgak kakngaat gatu ginu inandek inandek musip gwaangu aminbamu notza Jesuat nana kundue natayamukaing kakngaatda mateknga mateknga sitake sitake kuku buyambam singgak kakngae wam natake ninda asinggan Anutu inimbakngakamang. Unzing dua inimbakngakamang gamu noman dua siwan. Siwan Anututa nindupan take dua siwan.
2TH 1:4 Siwan ginda unzing tasike yuaing kakngae wam natake ninda yotna yotna kuna sandewan Anututane aminabamde banakan koke umanza yapangenakamang. Sike notza kunduta Jesue semna nataaing aminu iwanza dakngake gupza baknga dua pasiwa maikaing. Gupza pasiwa maiwa ginda meya buyak yuke ngana akekekake ginu Jesue kuke yuaing kakngasa gitna take yuaing kakngae wam yanisukuke umanza yapangenakamang.
2TH 1:5 Siwan iwanzata meya waaknga ginde damuwawa ngana ginda akekekake yuaing kakngata sanga takngatu anzing yeutniman kaamang. Anututa kepi noman gan tawake tasike aminbamu usanziwikgen. Usanziwan ginda kepi aminbamu Anututane kekeknga aknganae gepbiatang koke yutnanga aknga tangenake meya waaknga pake yuwawa ita usanzike ginu dandupan aminu noman takwak siwik. Danduke yawan kekekawan ginda masande kekeknga waakngae gepbiatang koyutning.
2TH 1:6 Ita unzing usanzike tasike toknga yake aminu ginda meya damukaingge ayamunangge natapan noman singgak.
2TH 1:7 Siwan unzingu toknga yake yamuke ita ginu meya apmanu wa pakaing kakngaat gatu meya ninda pakamang kakngaat sandetnimunangge natapan noman singgak. Siwan ita tapduknga Buyambam tapaninu Jesuat gatu inane angela kekeknga akwakatda enandang teke katap mumuyangga isike pakubasiwawan anggaman epuwawa aminbamda akagwautning.
2TH 1:8 Unzingu apuke tapduu waomunekan ita toknga yake aminu Anutue semna natake gatu Buyambam tapaninu Jesutane kekeknga aknganae gepbiatang yutningge wamu take akngae masa imukaing aminde yake toknga yamik.
2TH 1:9 Toknga yake yamuke ita pasiwan maiwa yanikwasipewan kuke waaminda Buyambam tapatane nomnane maa siknga asinggan asinggan yutning. Ita yanikwasipewan kuke itane kekeknga aknganae gepbiatangu kakaa aknganae yutnanga dua siwik. Aho. Asinggan asinggan wai siknga yutning.
2TH 1:10 Siwan tapduu wa apik gwenzimunekan aminu Anututa papan itane aminabam dakngake noman yuaingga kepi tawake tasikaing kakngata tasiwan Jesutane umana buyambam siwik. Siwan ina unzakan ginda wamu tupa ninda danikapbumang kakngae natapa siakan singgak kakngata tasiwan itane umana buyambam siwik. Sanga waakngata aawikge natake Jesuta ie epik.
2TH 1:11 Unzingge ninda ginde tumuk wamu asinggan yakamang. Yake Anututa gin yandawamban ginda ie kuke yuaing aminu dandupan take siwikge yakamang. Gatu ginda Jesue natapa kekeknga sikut takngata musipza pangenawan ginda sanga takekan tasinangge natake tasikaing kaknga kuupbamu Anututa inane kekeknga aknganata tasiwan puyuwikge tumuk wamu asinggan yakamang.
2TH 1:12 Tumuk wamu wa yakamang kaknga buyana asawanu Anutunikat gatu Buyambam tapa Jesu Anututa tapan Krais akgatanimuyaapa dakngake apbut tapaatdane banip kwikwik kaknganane yuke gin gatandaman ginda kepi noman gan tawake tasining. Kepi nomanu unzing tawake tasiwawa umana Buyambam tapaninu Jesutane umana aknganata enane siknga kopik. Kopan gisane umanza akngasa kuut buyambam siwik.
2TH 2:1 Siwan mate notnabam. Ninda wamu takngatuat Buyambam tapaninu Jesu Kraisda gatuna epu ninu yaniwamban ninda ie kuke iat unekan gatake yutnimde wam danina natapnong.
2TH 2:2 Ginda tapduknga Buyambam tapaninda gatuna epik gwenu gwa singgakge wam natake zetgaman ma satnatamaba kuwan. Aminu tapatuta ba enake Waungga wamu waaknga atnaniwan natapbum ngang gin daniwan natapbing. Ba aminu kunduta enake Polda wamu waaknga tupa niniwan natapbumang ngang daniwa natapbing. Ba Polda pas sandu unzingu ninde matakut ngang daniking. Ba sanga dasingga siwan wamu waakngae natake nangaakan natayuaing kaknga tenong.
2TH 2:3 Aminu tapatuta tanzike wamu waaknga ba kem wamu dasing kakngae natake gin daniwanu ginda siakan ngangu ma natapam. Dasingge? Buyambam tapata moo dua apik. Wena. Tupanu aminu Anututane daman gwekatang yuaing aminu kwaapzangga yamandet sike Anutue masa imuning. Masa ima aminu wai aminu tapatu masande Anututa gatukande tasiwan maiwan wai asinggan asinggan yuwik kapata enake anggaman apik. Apuke sanga kuupbamu aminda yanidatakaing kaknga anutu pupuknga ba Anutu siknga yuak kapae iwana dakngawik.
2TH 2:4 Iwana dakngake sanga wa kuupbam yapbitnangge waakwakgane umana natake yaipapaakusike Anututane yot takwan gwene kopik. You wagwene koke pukwike nata nina siknga Anutu ngang yawan kekekawik. Siwan sanga waakngata aawana Buyambam tapaninda une apik.
2TH 2:5 Tupa na gikat yuke nata ie gwa danikum. Asikaya ginu gwa ba botaking ba dasing?
2TH 2:6 Siwan ginda sanga aminu wai waapata tapduknga Anututa yawan yukut gwenekan asapikge kekekngana kayaapata apmanu waapatane kepi umukgak kakngae atnataaing.
2TH 2:7 Siwan apmanu sanga gutonga waakngata akusopuke pasiyuak. Ita akusopuke pasiyuwawan aminu wa itane kepina umukgak kapata asisakuwana
2TH 2:8 aminu wa waiapata anggaman siwik. Anggaman siwana Buyambam tapaninu Jesuta wamu takngatu genaneta yawan wamu waakngata aminu waapa tanguwan akupik. Sike Jesuta apuke inane umana enane siknga yuak kakngane kakaa buyambam takngana buyak apuke aminu waapa yapbike asiknga tasiwan maiwan wena siwik.
2TH 2:9 Siwan ngana tupanu tapduknga aminu wai waapa anggaman apiu kekeknga Setendane akngane apik. Kekeknga siknga akngane apuke ita aminu kuupbam panzitnangge duya takngatu takngatu pasiwik.
2TH 2:10 Pasiwawan aminu Jesuta waiaknganinu asandetnimikge pasiwawan ngana asiknga bitakaing aminda kepi apmainanga akngane aminu wa apanzikgak kapata sanga wai siknga kemu takngatu takngatu waaminde pasiyaman kaning.
2TH 2:11 Pasiyamuke yuwawan siakan wamde apbitakaing kakngae natake Anututa waaminu kem takngae gepbiatang yutningge pasiyaman kemu aminu wa panzikgak kapata yaniwik kakngae natapa siakan siwik.
2TH 2:12 Siwan kem wamu waakngae natapa siakan singgak kakngae natake Anututa aminu wa siakan wamde baniu dua sike sanga waiakngakan tasinangge apbaknganing amin usanzike yawan toknga pananga aknga waaminde yuyamik.
2TH 2:13 Siwan ngana mate notnabam. Buyambam tapaninu Jesuta ginde musip gwaang natandamunggak. Siwan ninda ginde natake asinggan Anutue dua inimbakngakamang gamu noman dua siwan. Unzingge ninda asinggan inimbakngakamang. Siwan Anututa ginu tupa waiakngasae gepbiatang tupa yuking kaknga sandetdamunangge natapbut. Natapan Waung Kapata ginde musipatang pukuke pasiwan ginda siakan wamu Jesue danikumang kakngae natapa siakan sikut. Ginda natapa siakan siwan aminu dudumna amin daknganingge natake Anututa tupa siknga tapduknga kepat yekapat dua tasike tekut gwene ita yawan yuaing. Ita unzing yakut takngae natake ninda asinggan Anutue inimbakngakamang.
2TH 2:14 Siwan Anututa ginde natake ginda aminu dudumna amin dakngake Buyambam tapaninu Jesu Kraiskat unekan gatake asinggan asinggan yutningge natake gindane umanza yake yandawanggut. Ginde yandawake tasiwan ninda wamu takeaknga yanisukuke gikat kuut danikapbumang.
2TH 2:15 Unzingge mate notna. Ginda kekekake Anututane wamu kuupbam ninda gentangan ba pas tangan ngang danidamukumangu ginda gitna pake yutnong.
2TH 2:16 Siwan Nanin Anututa ninde butaya natake take siknga gatanimuke ninu musipmin pangenake papan kekekawan ninda iat unekan gatake asinggan asinggan yutnim takngae kayuamang. Siwan Buyambam tapaninu Jesu Kraiskat Nanin Anutuatda musipza pangenake gin gatandamat puya takekan tasike ba wamu noman gan yake yutnangge dua bitaningge nataamang.
2TH 3:1 Siwan mate notnabam. Ninu wamu takngatuat ayuakge wamu waaknga danina natapnong. Wamu waaknga anzing. Ginda ninde natake Anutue tumuk wam ininong. Iniwa ita nin gataniman puyana tasina wam takngana kepna kepna yatakuwawa wamdane kepi umukaing kaknga kuupbam yapbike keu kuupbam tawamban sandewan aminbamda natake apbaknganong. Unzing ginda tupa natake bakngaking binga.
2TH 3:2 Siwan ginda Anutue tumuk wam iniwa ita ninu wai aminde katakngine sandewikge wam ininong. Ginu atnataaing. Aminu kwaapzangga Anutue masa imuke aminu wai amin dakngake pasikainggen.
2TH 3:3 Siwan ngana aminu kem wamu dua yake siakan gan asinggan tasinggak kapa Buyambam tapaninu Jesu unin. Sike ita gin papan kekekawan gin toiban Setenda ginu dua kaipakuwik.
2TH 3:4 Siwan Buyambam tapaninu Jesuta nindane banipmin pangenawan ninda ginde natake ginda aminu semna semna amin dakngake dua yuke wamu apman matandamukamangu akgwaamukaing ngang natapna siakan singgak. Siwan ginde genu asinggan gwaamuke yutning ngang banipmikatang natapna kekeknga singgak.
2TH 3:5 Siwan ninda ginde natake Buyambam tapaninu Jesuta gindane natdetdetza papan nomatawan Anututa ginde musip gwaang natandamunggak kakngaat gatu Kraisda meya takngatu takngatu kake ngana akekekake yuke undang dua pimakut takngaat ngangge ginda natanggamataningge nataamang.
2TH 3:6 Siwan mate notnabam. Ninda wamu takngatu umana Buyambam tapaninu Jesu Kraisdane akngae ginde danina natapnong. Notza tapatu aminu Jesuat nana amin dakngake ngana wamu wa ninda gwa damukumang kaknga dua gwaamuke kamun dakngake moo siknga yuwan kakengu ginda aminu waapae akagwauke iat ma gatake sukuwam.
2TH 3:7 Ginu atnataaing. Tupa ninu gikat unekan gatake yuke ninda kamun dua dakngake yukumang kaknga tawake tasinanga akngaen. Ngana aminu gikat nana kunduta unzingu dua tawake tasikaing ngang natake iat ma gatake sukuwam ngang danikamang.
2TH 3:8 Ginu atnataaing. Ninda nanamu kundu gindane moo dua pakumang. Aho. Ninda asusikumang. Ninda gupminde puya kwatan siknga kwakngaom gatu zikaane ngang pasike nanamu manita usike ginda gatanimuningge dua danikumang.
2TH 3:9 Unzing ninda gin danina ginda gatanimuningge take gwa sikut ngana ninda kepi takeaknga yeutdamuna kake tawake tasiningge natake unzingu dua danikumang.
2TH 3:10 Sike ninu gikat gatake yukumang gwene ninda kepi waaknga yeutdamuyuk mama wamu takngatu anzing danikumang. Aminu tapatuta puya pasinangge apbitakengu nanamu dua napan ngang danina gwa kekekakut.
2TH 3:11 Siwan wamu takngatu ninde asinggan apuwawan nataamang kaknga anzing. Aminu kundu gikat nana aminda kamunde yuke sanga yapiina wena aknga asinggan tasike puya takngatusimu dua tasikaing ngang niniwawa nataamang. Natake ginu aminu unzing tasikaing aminde akagwautningge wam pas asane gwa matandamumang.
2TH 3:12 Sike aminu kamunde yuke tasikaing aminda wikake yuke puyana pasiwa buya aawa nanamna naningge natake mama wamu Buyambam tapaninu Jesu Kraisdane umana akngae yakamang.
2TH 3:13 Siwan ngana mate notnabam. Ginu kepi noman taknga tawake tasinangge semna ma natapam.
2TH 3:14 Sike aminu tapatuta wamu kuupbam ninda pas asakatang matakamang kaknga tawanangge apbitawanu ginda aminu waapata waiaknganae maakawikge tasike wai amin tapa ngang kake iat ma gatake sukuwam.
2TH 3:15 Dua gatake sukuke ngana ie natapa iwanza ma dakngawan. Aho. Ginda ie natapa notza dakngawan ginda gwaut wam ininong.
2TH 3:16 Siwan musip kwikwikgane yapii Buyambam tapaninu Jesu unin. Sike ginu sanga kuupbam ginde apning kaknga kawa ngana ita musip kwikwiu ginde tapdukbamu asinggan tendamikge nataamang. Siwan Buyambam tapaninu Jesuta ginu kuupbapat gatake yuke gatandamuyok.
2TH 3:17 Siwan na Pol. Nata nina siknga gaak wamu aaknga ginde katakngata matandamunggat. Sike nata unzingu wa matanggat taknga natake pas kuupbamdane tuwangu unin. Nata ina unzakan asinggan matanggaunin.
2TH 3:18 Banip kwikwiu Buyambam tapaninu Jesu Kraisdane aknga ginu kuupbamde gatake yutdamuyok. Unukan.
1TI 1:1 Na Pol. Anutu nin gatanimuke nindane waiaknganin sandetnimukut tapaat gatu Jesu Kraiskatda na Jesu Kraisdane kwiiknga dakngawitde natake yakumayak. Yawat dakngake nata puya waaknga tasiwa nanduke aminda nae aposel ngang nanikaing. Siwan apmea Anututa waiakngane ninu gatukande sandeke ninipakopan iat gatake yutnimde apbakngake ninda natayuamanggane yapii Jesu Krais unin.
1TI 1:2 Siwan nata pas asanu ga Timotie matanggamunggat. Tupa nata ga ganindamuba gata Jesue natapi kekekawan nata gae natapa natane waaknga siknga binga daknganggayak. Sike nata Anutue tumuk wam iniwa Nanin Anutuat gatu nindane Buyambam tapaninu Jesu Kraiskatda gae butaya natake gatu musip kwikwik natanggamuke tasiwat musipba kwikwikngata yuya.
1TI 1:3 Siwan tupa nata Efesas yot gapma teke Masedonia kep komune kunangge natake nata wamu ga ganikumu wa gatuna ganinggat. Gata Efesas you wanggapma ma teke kuwim. Aho. Aminu you wanggapmane nana kunduta wamu Jesutane aknga teke wamu inata kundue natake yanindamukaing. Siwan gata wa aminu ayanindakngayo.
1TI 1:4 Yanindakngake gata dua kapewi wa aminda wamu takngatu takngatu yapiina wenae natake yanining. Ba inane bapunae umana kwaapzang yake ginda sanga aminu wa Judia nana amindane akngane sukuningge tasining. Aho. Gata dua kapewi yawam. Ga atnataayak. Wamu wa yanikaing kakngata amindane musia pangenawan nangaakan natake ayanganukaing. Ayanganuwawa ngana ninda puya Anututa ninde nimukut taknga tasina buya aawan aminda Jesue kuke ie natapa kekekawik. Sike wa aminda puya waaknga dua tasikaing. Wena.
1TI 1:5 Siwan gata wa amin yanindakngake tasiwi buya aawan aminda notnae musip gwaang natayamuning. Ngan. Gata tasike wa amindane musia papi nomatawa wa aminda inandek inandek ina natapa natdetdetna kakaa siknga siwik. Siwan wa aminda Jesue natake musia takngaaya dua natapning. Aho. Ie natapa akekekawik. Unzingge wa aminda inane notnae musip gwaang natayamuning.
1TI 1:6 Siwan aminu kunduta sanga wa peke wamu yapiina wena natake apbotasukukaing.
1TI 1:7 Wa aminda Anututane mama wam yanindamutnangge take siknga nataaing ngana natdetdeu anggaman dua nataaing ngana natdetdeu anggaman dua nataaing kaknga danikaing. Danike wamu wa ginde danikaing kakngae yapii katak dua nataaing. Dua natake ngana wa aminda wamu waakngae baniu kekeknga siknga sike daniyapikaing.
1TI 1:8 Siwan ninda Mosesdane mama wamde natake wai aminda ie akgwauke waiakngana teningge apbut ngang natakengu ninda mama wamu waakngae natapna sanga take siknga siwik.
1TI 1:9 Ngan. Aminu kepi nomana akngane sukukaing aminde dua natake Anututa mama wamu nimukut. Aho. Ita aminu yamandet sike wamu dua gwaamuke Anutue masa imuke sanga wai takngatu takngatu pasikaing aminde natake mama wamna ninde nimukut. Aminu zikaa akngane sukuke Anutue dua gwaukaing aminda nana minga ba aminu kundu zipa kupa
1TI 1:10 gatu sanga yasewa aknga tawake kamunda binga tasikaing. Gatu aminu tapatu kukae take takusopuke teke wamu notnae tewa kuwan mani buyambam pewa apan kakengu aminu waapa asinitewa epu kunggak kaknga wai tasikaing. Gatu kem wam yakaing. Gatu aminda wam yaniningge pakoke siakan wamban yanong ngang yaniwa ngana akusopuke kem wam yanikaing. Ngan. Wamu take nin pasiwan akekekanim taknga yaitapaakusinangge natake sanga wai takngatu takngatu kwaapzang pasikaing.
1TI 1:11 Siwan Anutu nata ie natapa Anutu gwaam siknga singgak kapata wamu take waaknga nata take yanikapitde natake ita puya waaknga nae namukut. Siwan ngana ita aminu sanga wai wa binga tawake tasikaing aminde natake ita mama wamna tupa siknga Mosesde imukut.
1TI 1:12 Siwan nata Buyambam tapaninu Jesu Kraisde inimbaknganggat. Ngan. Ita nae natapan aminu itane puya tasinangge semna dua natapit tapa dakngakum. Sike ita na tapan nata itane puya amina tapatu dakngawa ita na take siknga kekekangamukut.
1TI 1:13 Siakan. Tupa nata asinggan itane umanae sapdut wam yakum. Yake nata itane aminabamde semna siknga natake wa amin pasiwa mainingge puya kekeknga siknga tasikum. Ngana na itane yapii katak dua natake nata apbotasukuke tasikum. Unzingge ita nae butaya natapbut.
1TI 1:14 Ngan. Nindane Buyambam tapaninu Jesu Kraisda nae musip kwikwik natangaman buyambam siknga sikut. Siwan ita natane musipma tangenawan nata ie natapa kekekawan ie musip gwaang natangamunggat.
1TI 1:15 Siwan wamu takngatu Jesu Kraisda kepdakane epuke ninu wai aminu waiakngane sandetnangge epbut ngang yakamangu waakngae natapna siakan siknga siyok. Sike aminu kuupbamda natake baniu asinanga. Siwan tupa aminu wai tasikingu kuupbam nata yapbike aminu wai siknga dakngake yukum.
1TI 1:16 Ngana Anututa nae butaya natangamukut. Ngan. Ita aminu kundu masande Jesue banip sining aminde natake sanga ita wa amin gatayamunanga aknga yeuyamunangge natapbut. Natapan na aminu wai siknga dakngake yukum ngana Jesu Kraisda na tanangge natake ita musia kwikwiknga nae natangamuke toknga zet dua namukut. Siwan masande aminu kunduta sanga ita nae natangamukuu waakngae natake nikaya kuut ina unzakan kwikwiknga natanimik ngang natapning. Natake ie natapa kekekawan sanga kayuk asinggan yutnanga aknga ataning. Siwan Anututa sanga waaknga buya unzing aawikge natake ita nae butaya natangamuke na takut.
1TI 1:17 Unzingge ninda Anututane umana asiknga yatangenatnim. Ngan. Anutu waapa tupan siknga apa asinggan asinggan yuwawik kapa unin. Ninda kaininda kananga dua ngana ita wena dua siwik. Anutu siknga awia waapakan. Siakan.
1TI 1:18 Siwan ga Timoti. Gata natane waaknga binga dakngake yuayak. Sike tupa Waung Kapata Anututane puya aminu kundutane musia pangenawan wamu gata Jesutane puya amina tapatu dakngawiyakge yaking. Wamu wa yaking kakngae natake nata ga ganiyapiba tasiwiyakge natake yanggat. Wamu wa tupa gae yaking kakngata gatane musipba tangenawan gata enake Anututane iwana kuupbam yaipapaakusinangge tasiyo.
1TI 1:19 Tasike tupa gata Jesue natapi kekekakut taknga ma tewim. Aho. Gitna take gata gika natapi natdetdetda kakaa siknga siyok. Sike aminu kunduta sanga tupa ina tasiking kakngae musia enawa meya natapbing ngana yamandet sike waiakngana dua teking. Sike tupa wa aminda Jesue natapa kekekakut ngana gatuna yamandet sike pimaking.
1TI 1:20 Siwan wa pimaking amikat nana tapaaya umana Haimenias gatu Aleksanda ngang yanikamang kapau nata Setendane kataune pekum. Ngan. Setenda aminu waapaat pasiwan maiwat natdetdetna kakaawan Anutue asapduke kem wamu gatuna dua yasande pekum.
1TI 2:1 Siwan wamu tupan taknga gata tawake tasiwiyakge natake nata ganiwa natapso. Gaat gatu notninu gikat gatake yuaing amikatda Anutue inimbakngake tumuk wam iniwa ita aminu kuupbam gatayamik.
1TI 2:2 Ngan. Ginda aminu gisane tupan tapaapa gatu gavmande kuut natake tumuk wam inindatapa wa aminda ninu atnindupewa ninda wamu Anututane aknga tawake sanga nomana akngane sukunim. Sukuwatna wa aminda meya takngatu dua nimuningge natake yanong.
1TI 2:3 Ginda tumuk wamu wa binga yawa Anutu nin gatanimuke waiakngane nin sandewik kapata tumuk waminu waakngae natapan take siknga siwik.
1TI 2:4 Siwan ita aminu kuupbam gatayamuke waiakngana sandetnangge take nataak. Sandeke wa amindane musia papan kakaawa itane siakan wam taknga natapningge take nataak.
1TI 2:5 Siwan siakan wamu waaknga anzing. Anutu awia tapatutakan yuak. Sike tupa iat gatu aminu kuupbapat iwan dakngake yuking ngana aminu awia tapatutakan enake sanga iwanu wa dakngake yuking kaknga tanguwan kumbut. Sike aminu atanguwan kumbuu waapa Jesu Krais unin.
1TI 2:6 Ita aminu kuupbamdane waiakngana sandeyamunangge natake ita ninu kuupbamde tangge kungwanimukut. Siwan siakan wamu ita nindane waiaknganin sandetnimunangge natake tasikuu waaknga aminu kuupbamda natapningge natake Anututa tapduknga yawan yukut.
1TI 2:7 Sike tapduu ita yawan yukut komune nata aminu buyambamde wamu waaknga yanikapitde ita na takut. Na tapan nata itane kwiiknga dakngakum. Dakngawa aminda na aposel ngang nanikaing. Ngan. Ita na tapan nata ginu keu komduine nana aminde kuke gin danindamumbitde na takut. Nata ginu Judia nana amin dua ngana gikaya kuut Anututane siakan wam taknga danindamuba ginda wamu waakngae banip siningge natake puya waaknga nae namukut. Kem dua. Wamu nata wa yanggau nata siakande yanggat.
1TI 2:8 Siwan nata aminu yotna yotna nana kuupbamda Anutue tumuk wam yaningge nataat. Sike wa aminda sanga wai kuupbamde masa imuke sanga tapatue dua yanganuke katakngi tangenake tumuk wam yaningge nataat.
1TI 2:9 Sike nata mayae kuut natake daniwa natapnong. Mayata tauknga pake inaapmang pasiningge nataat. Sike mayata gupna tasigwaanutnangge natakengu sanga inata kundu tasike gwapaknga kwaikwaapa kuningge apbitanggat. Gatu tauk ba kamakumu gwaam siknga mani buyambamda usinanga pasikwaapa kuningge apbitanggat.
1TI 2:10 Sike mayata yake nata Anutue gepbiatang koke yuat ngang yawiu waapata inane gupna tasigwaangutnangge dua natanggamatake kepi nomana tawake amin gatayamunangge tasiyok.
1TI 2:11 Ngan. Mayata gena umuke maak gwaang pake miti wamu katak natapningge nataat.
1TI 2:12 Nata maya tapatu dua katewa aminbamu miti wam yanindamumbik ba wawi apaapa yapbike tupan tapa binga dakngawik. Wena. Mayata kuma yuke wamban natapningge nataat.
1TI 2:13 Ginu atnataaing. Anututa Adam gamok tumukut. Tumukenga ita Iv masan tasike tekut.
1TI 2:14 Siwan Adamda dua botake kem wamde natapan siakan dua sikut. Siwan ngana maya waapata botake kem wamde banip sike Anututane wamu unin sandekut.
1TI 2:15 Ngana apmanu mayata puya inaapmang tasike engang pangaikaingge natake Anututa wa aminu waiakngane sandetnangge dua bitawik. Aho. Maya tapatuta Anutue natapan kekekawan aminde musip gwaang natayamuke kepi nomana siknga akngane sukuwiu waapatane waiakngana Anututa asandekngamik.
1TI 3:1 Siwan ninda siakan wamu takngatu anzing yakamang. Aminu tapatuta Anututane aminabam kayutnangge natapiu waapata puya take siknga akngae nataak kapanin.
1TI 3:2 Siwan aminu tapatuta Anututane aminabamde kuyana dakngawikge tanangge natakengu gata aminu nomana siknga apa tapso. Ngan. Aminu maatna tapatukan takut tapa kakengu gata waapa take tapso. Ita ina tagwauke yangga toknga aknga buyambam dua tangoke natdetdeu takekan take kepi nomana akngane sukuwan kakengu waapa take tapso. Ita aminu maata apa kakengu inane yotnane pakoke take siknga toimbik. Gatu ita aminu kundu miti wam yanindamuke natdetdetna papan kakaawan kakengu take tapso.
1TI 3:3 Ngana ita yangga toknga akngae natanggamatake asinggan tangoke datdaptake kwikwiknga wam teke amak wam yawan kakengu gata waapa ma tapim. Ba ita asinggan yanganuwik ba amindane sangaapanae geenguwan kakengu waapa ma tapim. Wena.
1TI 3:4 Ba ita aminu ina paanu katak kayuke inane waaknga yapana pasiwan itane wamna gwaamuba kakengu gata waapa tapi kayuya aminu tapatu dakngayok.
1TI 3:5 Ga atnataayak. Aminu tapatuta ina paanu wai toipmaiwiu asikaya waapata Anututane aminabamu katak kayuwik ba dasing? Wena.
1TI 3:6 Sike aminu Jesue kuke itane amina kayuk siknga dakngawiu waapata kayuya aminu zet dakngananga dua. Asikaya aminu wa bingata kayuya aminu zet dakngakengu itane umana asenawan yamandeu dua dakngawik ba dasing? Dakngake toknga Setenda tupa pakut takngakan papsak ngang natake gata aminu wa binga ma papim.
1TI 3:7 Aho. Aminu tapatu aminu Jesue dua natake kepman yuaing aminde banakanu umana take siwanu itakan akayuya aminu tapatu take dakngake yuwik. Sike aminu wa binga dua ngana kayuya amin dakngawiu waapa Setenda kem tanziwan pimake apmaakawik.
1TI 3:8 Ina unzakan aminu miti yot kayuke tapa takanggak amin panangge natakengu gata aminu sanga tasining kakngae katak siknga natagwaangukaing ba gena gwakngaaya binga dua dakngake yuaing amin papso. Sike aminu yangga toknga aknga asinggan tangoke datdaptakaing ba mani buyambam kaitnangge tasikaing aminda miti you kayutnanga dua.
1TI 3:9 Aho. Natdetdeu tupa Anututa inatakan natake tekut taknga apmanu ita ninde yeutniman kaamang kaknga gitna tapik. Gitna take ita ina natapan natdetdetna kakaa siknga siwiu waapata miti you take kayuwik.
1TI 3:10 Siakan. Tupanu gata amindane puya usanzike wa aminda kepi nomana nata ayanggat takngane sukuwa kakengu gata wa amin papi miti yot kayuya amin dakngake yutnong.
1TI 3:11 Siwan wa amindane maatnaaya kuut puya atasining kakngae katak siknga natagwaanguke sapdut wamu dua yake yangga toknga aknga mateknga sikngakan tangoke dua datdaptake asinggan sanga takeakngakan tasining. Maatnata unzing tasiwanu wa amindane apnata miti yot kayuya aminu take daknganing.
1TI 3:12 Sike aminu maatna tapatukan paking. Pake ina paanu katak siknga kayuke tasiningu wa aminda miti yot kayuya aminu take daknganing.
1TI 3:13 Dakngake puya waaknga nomana siknga pasiwanu wa amindane umana take siknga siwik. Siwan wa aminda wamu Jesu Kraisde natapa kekekanggak kakngae natake kekeknga yanikapning.
1TI 3:14 Siakan. Nata zetgaman gae kunangge nataat ngana kepina wena siwanu zet apnanga dua siwik ngang natake nata pas asanu gae matanggamunggat. Siwan gata pas asan kendeke sanga Anututane aminabamda take tasining kaknga natapso. Natake Anututa ninu inane aminabamde banakanu ayuak ngang natapso. Ita ayuakge ninda itane siakan wam taknga tana kekekawikge puya tasinimde katak natapso.
1TI 3:16 Siwan Anututane wamu tupa ita ina natake tekuu wa ninda tawake tasikamang kakngae natapna wamu gwaam siknga singgak. Siwan aminu tapatuta wamu nata wa yanggat taknga yaitapaakusinanga dua. Wena. Sike wamu ninda ie natapna wamu gwaam siknga singgak kaknga anzing, “Ita nisa gup takut. Waung Kapata wamu aminda ie temapa iniking kaknga tanguwan kumbut. Siwan angelata i kaking. Wamu ita nin gatanimukut taknga take aminu keu komduine nana Anutue dua natapbing aminde yanikapbing. Aminu kepdakane nana aminda ie natapa akekekakut. Anututa ie enandang initakopan itane umana buyambam siknga sikut.”
1TI 4:1 Siwan Anututane Waungata wamu takngatu anggaman anzing yakut. Masande aminu kunduta Jesue banip sining ngana gatuna tening. Tewa Setenda wa amindane natdetdetna kaipakuwan wa aminda kem wamban tawaning.
1TI 4:2 Sike kem wamu wa tawaninggane yapii aminu kem wam takngae gepbiatang koke yuya aminu unin. Kem aminu waakwakga sanga wai wa tasining kakngae natake wai atenanga ngang natake ngana yamandet siknga sike waiakngane sukuning.
1TI 4:3 Sukuke wa aminda maya pananga aknga ayanindaknganing. Gatu aminde nanamu kundu aminda dua naningge ayanindaknganing. Ngana Anututa nanamu wa ninu itane siakan wam taknga natake ie banip sikamang aminda take nanimde natake ita tasike tekut. Ngan. Ninda Anutue inimbakngakenga nanamu wa take nanim.
1TI 4:4 Ninu atnataamang. Sanga kuupbamu Anututa tasike tekuu wa takekan. Ngan. Ninda sanga kundue takwan ngangu yananga dua. Aho. Sanga atnananga kuupbamde natake ninda Anutue inimbakngake pake nanim.
1TI 4:5 Ngan. Ninda Anututane wamde natanggamatake ie inimbakngananu ita ninde dua yandakngawik. Wena siknga.
1TI 4:6 Siwan gata Anututane wamu nomana siknga aknga atawake Jesue natapi kekekanggak. Sike wamu take waakngata gatane musipba tapan kekekawan gata wamu nata pas asane gwa matat takngae natapso. Natake wamu waakngakan notda Jesue amina dakngake yuaing aminde yamuyo. Gata unzing tasiwi ganduke gata Jesu Kraisdane puyana katak siknga pasinggayak ngang ganining.
1TI 4:7 Siwan ngana gata wamu takngatu takngatu yapiina wena aminu Anutue dua nataaing aminda tangenakaingge masa yamuyo. Yamuke gata natdetdeu Anutue kepi katak siknga tawake tasinanga aknga gitna siknga tapso.
1TI 4:8 Ga atnataayak. Gata sanga kwatanda akekekananga aknga tasinangge natakengu tasiwinu take gatanggamik. Siwan ngana Anututane kepi tawake tasiwinu take siknga siwik. Siwan sanga waakngata tapduu apmanu ninda ayuamang komune ga take siknga gatanggamik. Ngan. Ga gatanggaman gata takekan yuwiyak. Siwan tapduu apmea ninda ayutnim komune kuut sanga waakngata ga akgatanggamik.
1TI 4:9 Sike wamu nata wa yanggau nata siakan wam takngakan yanggat. Ngan. Aminu kuupbamda wamu waaknga gitna taningge nataat.
1TI 4:10 Sike nitda siakan wamu wa yanggat takngae natanggamatake puya kekeknga siknga aminu buyambamda taningge pasikamak. Pasike nitda Anutu kekeknga ayuak kapata ninu kuupbam gatanimikge apbakngake natayuamak. Anutu waapa aminu kuupbam gatayamuke meya akngane sandekgak kapa unin. Sike ninu ie natapna kekekanggak amin gatanimuke ita nindane waiaknganin sandetnimunggak.
1TI 4:11 Siwan gata wamu nata wa yanggau take gata aminu buyambamde yamuyo. Yamuke gata yanindamumbi katak tawake tasinong.
1TI 4:12 Sike aminda ga gandupa aminu kwakwaknga singgak ngana gata wamu take siknga yanike kepi nomana siknga akngane sukuyo. Sukuke gata wa aminde musip gwaang natayamuke Anutue kekeknga siknga yuke puya gutonga takngatu dua tasiwim. Gata unzing tasike aminda gatane wamba yaitapaakusiningge kepi umuyamuyo.
1TI 4:13 Sike gata puya kekeknga siknga tasike Anututane wamu aminde kendeyamuyo. Kendeyamuke wamdane yapii yanikapmake katak siknga yanindamumso. Yanindamuke tasiwawi kuku tapduu nata gae apit gwenda apik.
1TI 4:14 Sike tupa Waung Kapata puya aminatane musia pangenawan wamu takngatu gae yaking. Gae yawa natake aminu Anututane aminabam kayuking aminda puya wa yaking kaknga gae gamunangge natake katakngita ga wasiking. Wasiwa natdetdeu Anututa gae gamukut taknga gata tasiyuk yuyo.
1TI 4:15 Ngan. Puya wa gata gwa takuyak kakngae natayuke asinggan tasiyo. Tasiwi ganduke aminu kuupbamda apmanu gatane puyaka nomana siknga singgak ngang yaningge tasiyo.
1TI 4:16 Tasike gata gikae tagwauke wamu aminbam yanindamutnanga aknga katak siknga usanzike gata wamu nomanggan yaniyo. Ngan. Gata asinggan puya wa binga kekeknga tasiyo. Gata unzing tasiwinu puya wa gata tasiwiyak kakngata gika gatanggamik. Gatanggamuke aminu gatane wamba apmea taning aminu kuut gatayaman takekan yutning.
1TI 5:1 Siwan wawi aminuake tapatuta sanga waiaknga tasiwan kakengu gata kaanga ma iniwim. Aho. Gata aminu waapae natapi gikane nangga binga dakngawan gata wamu wepda yake tanomanukngamuyo. Siwan gata wawi matekge natapi gikane uyapba binga dakngawa gata panomanuyamuyo.
1TI 5:2 Siwan maya aminuake natapi gikane mingga binga dakngawa panomanuyamuyo. Gatu maya matekge natapi gikane samingga binga dakngawa panomanuke sanga maya matekga wai tasinangge ganiwanu ga akgwaumso. Gwauke sanga nomana sikngakan tasiyo.
1TI 5:3 Sike maya kombakobau tapatuta upeeke yuwan kakengu gata katak siknga toimso.
1TI 5:4 Siakan ngana maya waapa waaknga yapana ba aina kaya kakengu wa aminda toitnong. Ngan. Anututane kepi akngane sukuke kombakobau waapatane waaknga ba yapana ba ainata katak siknga anzing natapnong. Wa amindane puyana tupan taknga anzing. Nana minga katak toike yake tupa engang yuwawa toikingge natake yake toitnong. Ga atnataayak. Anututa sanga waakngae take siknga nataak.
1TI 5:5 Siwan maya kombakobau tapatu waaknga yapana aina wena kakengu aminu gatangamunanga wena waapata Anutuekan bakngake atnatayuwik. Natayuke ita kwakngaom gatu zikaane ngang asinggan Anutue yatawake tumuk wam asinggan inindatapik.
1TI 5:6 Siwan ngana maya kombakobau tapatuta sanga musia enakaing kakngaekan natayuke tawambiu waapata kayuk ayuak ngana sanga take siknga Anututane akngae masa imuke yuwik.
1TI 5:7 Siwan gata wamu nata wa yanggat takngae natake maya kombakobau kuupbamdane musia pangenawi wa aminda kepi nomana tawake tasinong. Tasiwa kake aminu tapatuta wa aminde wamu dua temapa yawik. Wena siknga.
1TI 5:8 Siwan aminu tapatuta inane dongaat nana aminu kundu akgatayamuyok. Ngan. Inane minga nana bapuna apeknga ngangu katak siknga toimsok. Sike ita dua toiban kakengu ninda waapae natapna aminu songa binga dakngawik. Ita Jesutane kepi aknga ateke kukut ngang natapnim. Ngan. Waapata aminu zikaa akngane yuke botasukukaing aminu kuupbam yapbike ita aminu wai siknga apa daknganggak ngang natapnim.
1TI 5:9 Sike Jesue aminabam dakngake yuaingge maya kombakobau asupeeke yuaing amin gatayamuningge yaniyo. Yanike maya waakwakgane umana akgatayamunanga pepa sane matayo. Matawi wa aminda sanga wa gatayamunanga aknga pake yake miti puya asinggan tasining. Ngana kuupbamdane umana matananga dua. Aho. Maya tapatuta nakana 60 ngang kawan sandewan gatu apna tupa nana akupan wawi kayuu tapatu dua takutna kakengu itane umana take matayo.
1TI 5:10 Sike tupa kombakobau waapata puya nomana tasike inane waaknga yapana katak toiban takawa Jesutane amina kunduta puya pasitakuke kepi maata apa kake inane yotnaatang pakopbut. Pakoke kepine ngwayuu gatakukingu yangga sauyamukut. Gatu aminu asupeeke yuwa kakengu ita akgatayamuke puya take siknga inata inata wa bingakan kwatan tasikutna kakengu gata waapatane umana matayo.
1TI 5:11 Sike ngana maya kombakobau aminuake dua sike kekeknga yuak kapata umana matawiyakge ganiwan ngana gata maya waapatane umana ma matawim. Wena. Ga atnataayak. Waapatane umana matake gatangami ngana masande itane musia gatuna enawan wawi kayuk tanangge musiaatangu toknga siknga natapik. Siwan sanga wa musia enayaakngata mayatane natdetdetna kaitakuwan mayata yamandet sike apnae kuwik.
1TI 5:12 Apna kayuk kapae kukengu maya waapata wamu tupa Kraisdekan natanggamatake puya ie pasingamikge yakut taknga asandewik. Sandeke meya buyak yuwik.
1TI 5:13 Sike maya wa bingata puya tasinangge semna natapning. Natake bautna bamdane yotnane moo siknga kongepuke wamu aminu tapatuta wepda akusopuke yakut takngae natake ngana anggamande yatakuning. Yatakuke inane puya dua pasike kungapuke amindane puyae natake wamu asinggan yanining. Yanike wamu inata kundu take dua yaning.
1TI 5:14 Unzingge maya kombakobau kekekngana kaya amindane umana ma matawim. Wena. Aminu wa bingata apna kayukge kuningge take nataat. Apnae kuke engang pangaike inane apna ba waaknga yapana toike yutning. Yuwawa kake aminu tapatuta ninu Jesutane aminabam dakngake yuamang aminde semna natanimuke ngana ita ninisapdutnangge apmeptawik.
1TI 5:15 Ninu atnataamang. Maya kombakobau nikat nana kunduta gwa nipmake kuku Setendane kepi akngane yuke botasukukaing.
1TI 5:16 Siwan maya kombakobau tapatu inane dongaat nana tapatu Jesue natapan kekekanggak kapata ie toimsok. Toiban Jesue aminabamda maya waapa dua gatangamuning. Maya kombakobau inatakan siknga aminu gatangamunanga wena amin gan take gatayamuning.
1TI 5:17 Siwan take aminu puya nomana siknga tasike Jesue aminabamu katak kayuaing amin gatayamuke sangaapa kwaapzang yamuningge nataat. Nata aminu puya kekeknga siknga tasike Anututane wam yanikapmake aminu buyambam yanindamukaing aminde natake yanggat.
1TI 5:18 Ninu atnataamang. Anututa tupa siknga inane puya aminae natake tuwang wamu takngatu yawan natake itane amina tapatuta anzing matakut, “Gata ikwawa gamanu gwenduta gikane puyaka pasinggamuke nanam tape yainggamumbikge kaitakuke gata ikwawa gamande gena ma wamakusiwim. Aho. Nanam nanangge natakengu take napik,” ngang matakut. Siwan wamu takngatuat anzing yuak, “Puya aminu take mani apapik,” ngangu ninu atnataamang.
1TI 5:19 Siwan aminu tapatuta take aminu tapatue wamu atemapa yawan kakengu gata wamu waakngae masa imuyo. Sike ngana aminu tapaaya ba tapaat tapatuatda wamu ie atemapa yawanu gata wa amindane wam usanzike natapi siyok.
1TI 5:20 Siwan take aminu tapatutane waiakngana tapi tapan kakengu gata aminbamde kaine aminu waapa kaanga inike natdetdetna tanomanuyo. Gata unzing tasiwi ganduke aminu kuupbamda sanga wai takngatu tasinangge akgwautning.
1TI 5:21 Siwan nata wamu kundu Anutu gatu Jesu Krais gatu Anututane angelana ngangge kaine ga ganinggat. Wamu nata pas asane matanggau wa gata katak siknga tawake tasiyo. Tasike aminu takeapa ngana itane natdetdetna tapi nomatawikge gata ma gwaumbim. Aho. Aminu moo apaat gatu aminu takeapaaya kuut panomanuyamuke gata kepi buya takngatukan tawake tasiyo.
1TI 5:22 Sike gata aminu tapatu Jesutane puya amina tapatu dakngawikge natake gata zetgaman ma tapim. Aho. Katak siknga usanzike natapi take siwanu gata take tapso. Sike gata natake aminu waiakngane sukunggak kapa katak dua usanzike zetgaman nata tapanu aminbamde kaine aminu waapatane waiakngana nae apsak ngang natapso. Natake gata gikae katak tanggwauke kepi nomana siknga tawake tasiyo.
1TI 5:23 Siwan gata yangga tangopnanggengu yangga moo akngakan ma tangopim. Aho. Musibaatangu maiu takngatusimu ayuakge natake gata wain yangga kundusipat tangopso. Tangopi wain yangga akngata maitda apba tanguwan kupik.
1TI 5:24 Siwan ga atnataayak. Aminu kunduta sanga wai takngatu takngatu tasiwawa anggaman siwan kaamang. Kake wa aminda wamna yaningge pakokamang. Sike ngana aminu kunduta sanga wai takngatu takngatu wepda kusopuknga tasike yuaing. Siwan masana wai wa anggamanu asining.
1TI 5:25 Ina unzakan sanga take tasikaingu kuut anggaman kaamang. Siwan sanga take wepda kusopuknga binga tasiwa ngana asinggan kusopunanga dua. Aho. Masana sanga take wa anggamanu asining.
1TI 6:1 Siwan aminu kundu puya toikga gitna siknga panggaganuke puya mani pananga dua aknga asinggan yama pake pasikaing aminde natake nata ga ganiwa natapso. Aminu puya aminu wa binga dakngake yutningu Jesue amina dakngakengu wa aminda puya toikge gepbiatang katak yutnong. Yuwa kake aminu tapatuta wa aminde natake Anututane umana gatu Anututane wamu ninda yanikapmakamang kakngae sapdut wamu dua yawik.
1TI 6:2 Siwan puya aminu wa bingatane puya toikga Jesue amina dakngake yuwa kakengu itane puya aminata ie natake Jesue amin notnin ngang natapning. Unzing natake ngana itane gepbiatang koyutnangge semna dua natapam. Aho. Waapa Jesue amin notnin ngang kakengu puya aminata aminu puya toiu waapae musip gwaang natangamuke akgatangamunangge take siknga natapnong. Natake wa amindane puyana nomana siknga pasingamunong. Siwan wamu nata wa matanggat takngae natake gata aminu buyambam yaniyapimbi tasinong.
1TI 6:3 Siwan ngana aminu tapatuta wamu inata kundue natake yanindamumbik. Ngan. Wamu take siknga Buyambam tapaninu Jesu Kraisde natake yanikapmakamang kakngata amindane musia papan kakaawa wa aminda Anututane kepi nomana akngane sukuning. Ngana aminu tapatuta wamu waakngae sapdut wam yawik.
1TI 6:4 Yawan kakengu ninda anzing natapnim. Aminu waapatane natdetdetna dapaknga siknga siwan ngana waapata aminbam yapbitnangge natake tasinggak. Tasike ita wamu takngatusimde natake wamdane yapiie yanganutnangge take siknga nataak. Natake waapata aminu buyambamdane natdetdetna pasiwan maiwa aminu kunduta notnae musia zikaa natayamuke sapdut wam yaning. Yake wamu moo siknga notnae atemapa yanangge natapning.
1TI 6:5 Natake tasiwanu aminu kundu natdetdetna wena siwan apbotasukukaing aminda Anututane siakan wamde dua siknga natapning. Dua natake ninda miti wam tawake tasina sangaapa buyambamda ninde asapning ngang kem siknga natake ayanganutning.
1TI 6:6 Siakan. Sanga ninda Anututane kepi katak tawake tasikamang kakngata akgatanimik. Akgatanimuke sanga waakngata nindane natdetdetnin papan kakaawan ninda sangaapaninu gwa pakumangge natake nisaapmang pake yuamang ngang natapnim. Natake apbakngake takekan yutnim.
1TI 6:7 Ninu atnataamang. Tapduknga nindane minginda nin pangaiwa aakumang gwene asikaya ninda sanga tapatu kataknginda atake aakumang ba dasing? Wena siknga. Sike masande ninda akumnim gwene nindane sanganinu tapatu ninda dua takuunim. Wena.
1TI 6:8 Unzingge ninu nanam gatu taukngin ngangu kaya siwanu ninda take ngang natake sanga nisaapmang pake yuamang ngang yanim.
1TI 6:9 Siwan ngana aminu sangaapa kwaapzang panangge natapiu waapa natdetdeu wa nataak kakngata tanggaganuke tasiwan apimapik. Ngan. Waapatane musia sanga wai kwaapzangge enawan waapata apbotasukuke ina sawatake toknga apapik. Apake waapata meya buyak yuke gatukande apmaiwik.
1TI 6:10 Siakan. Natdetdeu wa sangaapa kwaapzang panangge nataaing kaknga wa sanga wai kuupbamdane yapii unin. Ngan. Aminu kundutane musia natdetdeu waakngae enawa wa aminda Anututane kepi teke apbotasukuking. Botasukusika meya buyambam siknga paking.
1TI 6:11 Ngan. Wa aminda meya apaking ngana ga. Gata Anututane amina tapatu dakngakuyak. Ge gata natdetdeu wa sangaapa kwaapzang panangge tasikaing kakngae masa imuyo. Masa imuke gata kepi nomana akngane sukunangge puya kekeknga tasiyo. Tasike Anutue banip tawake gata Jesue natapi kekekayok. Sike gata aminde musip gwaang natayamuke wa aminda meya takngatu takngatu gae gama kakengu gata puya awikake pasiyo.
1TI 6:12 Ngan. Gata puya awikake Anutue kekeknga siknga natayuyo. Sike tupa Anututa ga iat gatake kekeknga asinggan yutzande yanggawambaman ie kukuyak. Ie kuke gata ie natapi kekekakut takngae natake aminbamdane kaine yakapbuyak. Unzingge gata Anutuat gatake kekeknga asinggan yutnangge natake kekeknga tasiyo.
1TI 6:13 Sike nata Anutu sanga kayuk yuaingu kuupbam tasike tekut tapatane kaine ga ganinggat. Sike gatu nata Jesu Kraisda inane yapii Pontias Pailatde nomune yuke anggaman yakapbut tapatane kaine ga ganiwa natapso.
1TI 6:14 Gata mama wamu nata pas asane gae matanggamunggau kuupbam katak siknga tawake tasiyo. Tasike aminu tapatuta ga ganisapdutnangge dua natapikge natake gikae katak siknga tagwaumso. Tagwauke yuwawi kuku tapduu Buyambam tapaninu Jesu Kraisda gatuna apik gwenda apik.
1TI 6:15 Siwan Anututa tapduknga ina yawan yukut gwene ita tasiwan Kraisda kepdakane gatuna epik. Siwan Anutu awiapatakan kekeknga siknga yuwawan ninda ie asiknga baknganim. Ngan. Ita buyambam tapaapa kuupbam yapbike tupan siknga apa dakngake aminu waakwau akayuak.
1TI 6:16 Sike awia waapatakan kekeknga asinggan asinggan yuwik. Sike ita kakaa siknga akngane banakan yuwawan ninda ie wesimu kunanga dua. Ie kundopnangge tasina maaknga siknga siwik. Siwan aminu tapatuta Anutu waapa kainata dua kakut. Aho. Ninda kaininda kananga dua. Sike ninda itane umana yatangenake ita kekeknga siknga asinggan asinggan yuak ngang yanim. Siakan.
1TI 6:17 Siwan gata aminu sangaapana kwaapzang pake yuaing aminu anzing yaniyo. Ginda yamandet sike gisane umanza yapangenatnangge ma tasiwam. Ngan. Ginda sangasa kwaapzangge apbakngake nin gatanimunanga unin ngangu ma natapam. Aho. Gindane sangasa zetgaman sopukengu ginu gatandamunanga dua. Wena. Ngana sanga kuupbamu ninda pake apbakngakamanggane yapii Anutu unin. Ginda iekan bakngake natayutnong.
1TI 6:18 Siwan gatu wamu takngatuat gata anzing yaniyo. Ginda sanga takekan pasinong. Ngan. Ginda puya kwaapzangu take siknga pasinong. Pasike sangaapasa ma kotnawam. Aho. Ginda sangaapasa usanzike aminu kundue usike yamunong.
1TI 6:19 Siwan ga atnataayak. Aminda kepi nata wa yanggat takngane sukukaingu sanga wa tasikaing kakngata masanu akgatayamik. Akgatayaman wa aminda Anutuat gatake asinggan takekan yutning.
1TI 6:20 O Timoti! Gata puya Anututa gae gamukuu waaknga nomana siknga tasiyo. Tasike gata gikae tagwauke wamu yapiina wena aminu Anutue masa imukaingga tangenakaing kakngae gata masa imuyo. Wa aminda wamu wa bingae natake aminu natdetdetna kayata wamu waakngae banip sikaing ngang kem yakaing.
1TI 6:21 Yake kem wamu wa binga tawake tasikaing aminda apbotasukuke natdetdeu Anutue natapa kekekakut taknga ateaing. Siwan nata Anutue tumuk wam iniwa ita musip kwikwiu gaat gatu aminu gaat gatake yuaing amikat kuutde natandamuke yuwik. Unukan.
2TI 1:1 Na Pol. Na Jesu Kraisdane aposel amin dakngake yuat. Ngan. Sanga Jesu Kraisda ninde tasinimukut takngae natake Anututa nindane waiaknganin sandetnimuke ninda kayuk asinggan yutnimde yawan kekekakut. Siwan wamu wa yawan kekekakut taknga nata aminu kuupbam yanikapitde natake Anututa yawan Jesu Kraisda na tapan itane kwiiknga dakngake yuat. Unzingge aminda na aposel ngang nanikaing.
2TI 1:2 Siwan nata wamu takeaknga yanikapa natake gata Jesue banip sike ga natane waaknga binga dakngake yuayakge nata ga Timotie pas asanu gae matanggamunggat. Nata tumuk wam iniwa Nanin Anutu gatu Buyambam tapaninu Jesu Krais kuutda gae musip kwikwik gatu butaya natanggamuke tasiwat musipba kwikwikngata yuyo.
2TI 1:3 Sike natane bamata tupa musiaatangu natdetdeu gutonga takngatue dua natanggamatake Anututane kepi tawake nomana siknga sukukaking. Ina unzakan nakaya atasinggat. Tasike tumuk wamu zikaane gatu kwakngaom ngang yanggau asinggan na gae natanggamatake Anutu inimbaknganggat.
2TI 1:4 Nata ga gapmake kunangge tasiwa nanduke ga ma kuwim ngang nanike gata kwanam sikuyak kakngae natanggamatake nata ga gatuna gandupnangge take siknga nataat. Nata ga ganduke asiknga bakngawit.
2TI 1:5 Sike gata siakande siknga Jesue natapi kekekakut takngae natanggamatanggat. Ina unzakan apekga Loiskat gatu mingga Yuniskatda Anutue natapat kekekakut. Siwan apmanu gakaya kuut ie natapi kekeknga singgak ngang musipmaatang nataat.
2TI 1:6 Natake nata gae natdetdetda tangenatnangge ganiwit. Tupa nata kataknga gwapakgane wasiwa Anututa ga tapan itane puya amina dakngakuyak. Dakngawi ita gatane musipba tangenake natdetdeu gae gaman puyana tasinggayak. Sike gata puya waaknga tasinangge take siknga natake tasiyo.
2TI 1:7 Ga atnataayak. Anututa inane Waung Kapa ninde nimukuu waapata nin gataniman ninda aminde dua gwautnim. Aho. Ita gataniman ninda Anutue kekeknga siknga yuke notninde banip sike nisae katak siknga tagwauke natdetdetninu anggaman natake tasinim.
2TI 1:8 Unzingge gata nindane Buyambam tapanindane wamna yanikapnangge dua maakawim. Siwan na itane puyana tasiwawa na kaautde napmaba yuatde natake gata natane notna daknganangge ma maakawim. Aho. Nata wamu takeaknga yanikapmake tasiwa meya namukaing. Siwan meya wa namukaing kakngata gae apanu gata akekekake yuyo. Anututa ga kekekanggaman yuyo.
2TI 1:9 Ita nin gatanimuke nindane waiaknganinde toknga panim takngane ninu sandeke yaniwamban ie kukumang. Ninu inane amina dakngake yutnimde natake yaniwamban kukumang. Ita sanga take ninda tasikumang kakngae dua natake ninu yaniwakut. Aho. Inae banipda siwan ninde musip kwikwik natanimuke yaniwakut. Tupa siknga Anututa kepdaka dua tasike tekuune ita sanga Jesu Kraisda ninde tasinimik kakngae natake Anututa musip kwikwiu ninde natapnangge yawan yukut.
2TI 1:10 Siwan apmanu tapduu ayuamang komune nin gatanimuya apaninu Jesu Kraisda nisa gup dakngake kepdakane epuke tasiwan musip kwikwiu wa Anututa natake yawan yukut takngata anggaman sikut. Siwan Jesuta nin gatanimuke waiaknganinde akumnanga aknga tanguwan pimakut. Tanguwan pimapan sanga ita nin gatanimunanga akngae natake Jesuta wamu takeaknga yakapan ninda kayuk asinggan yuke gupminu kekeknga asinggan yutnim takngae anggaman natdekumang.
2TI 1:11 Wamu take waaknga nata yanikapitde Anututa na tapan itane kwiiknga dakngakum. Dakngawa ita na nanitewan kuke aminu buyambamu wamu waaknga yanikapmake yanindamuwawa natdeking.
2TI 1:12 Yanindamuwawa meya nae nama pake yuat. Siwan ngana meya wa panangge na dua maakanggat. Aho. Na Anutu waapa nata ie natapa kekekanggak kapae atnataat. Na nanduyuwikge iniwa ita na nanduyuwawan kuku tapduknga Jesuta gatuna apik gwene kuwik ngangu natane musipmaatang natapa siakan singgak.
2TI 1:13 Siwan gata wamu nomana siknga wa nata ga ganikum takngakan gitna take yuyo. Gitna take gata Jesu Kraisde natapi kekekawan ie musip gwaang natangamuke wamu waaknga tawake tasiyo.
2TI 1:14 Sike Anututane Waung Kapa nindane musipmikatang pukuke nin panggak kapata siakan wam taknga gatane katakgane gamukuu waakngakan gata asinggan natayuke natanggamatayo.
2TI 1:15 Ga atnataayak. Aminu Esia kep komune nana Anututane amina dakngake yuaingu kuupbamda nae semna natangamukaing. Ngan. Aminu tapaaya umana Fiselas gatu Hemosenis ngang yanikaing kapaau kuutda semna natangamukamayak.
2TI 1:16 Ngana notna Onesiforasda tapdukbamu asinggan natane musipma tapan takanggakge natake nata Buyambam tapaninde tumuk wam iniwa ita aminu waapaat gatu aminu iat gatake yuaikatde butaya natayamik. Ga atnataayak. Onesiforas waapata na kaautde yuwawa natane notna daknganangge dua maakakut.
2TI 1:17 Aho. Ita Rom yot gapmane apundoke kwatan siknga na nandupnangge tasikut. Tasike nae nawake nawasika masande ita na nandupbut.
2TI 1:18 Unzingge nata tumuk wam iniwa Buyambam tapaninda tapduknga ita apik gwene butaya ie natangamik. Ga katak siknga atnataayak. Onesiforas waapata Efesas yot gapmane yuke puya kwaapzang Jesue aminabamde pasiyamukut.
2TI 2:1 Siwan ga. Nata ga ganindamuba Jesue natapi kekeknga sikutde natake nata gae natapa natane waaknga singgakge ganinggat. Jesu Kraisda gae musip kwikwik natanggamuke kekekanggaman yuyo.
2TI 2:2 Sike wamu kuupbam nata aminu buyambam yanikapa natapbuyak kakngakan natanggamatayo. Natanggamatake aminu kundu gata ie banip singgayak aminde wamu waaknga yami take wa aminda aminu kunduatde yamuningge tasiyo.
2TI 2:3 Gata puya waaknga Jesu Kraisde tasingamuke yuwawi iwandata enake meya takngatu takngatu gae gamanu gata akekekake yuyo. Unzing amak aminu tapatuta akekekake tasinggak binga tasiyo.
2TI 2:4 Sike ie natake tuwang wamu kundue natake ganiwit. Aminu amak amin dakngawiu waapa inane tupan tapae natake ita ie take natangamikge tasiwik. Tasike amak aminu waapa amakge puya akngata gitna gwa takutde ita puya takngatuat tasinanga dua.
2TI 2:5 Gatu aminu ayapbitnangge isapmakengu ita mama wamu ayapbitnangatane aknga katak tawamsok. Sike ita dua tawake ngana isapmake tuwangu tupan siknga yapbimbik. Yapbiban ngana sanga dua imuning.
2TI 2:6 Gatu aminu puya kekeknga pasike nanam zak kwaike kayuwiu waapata nanamu puya waangane buya aawa ita gamok papik.
2TI 2:7 Gata tuwang wamu takngaat takngatuat nata wa yanggatde natagwaanguwi Buyambam tapaninda gatane natdetdetda tapan kakaawik. Tapan kakaawan gata tuwang wamu wa kuupbamdane yapii atnatapiyak.
2TI 2:8 Sike gata Jesu Krais akumbut katangga gatuna enakut tapae natanggamatayo. Ita baminu Devitdane dongune aakut tapa unin. Ie natake nata wamu takeaknga yanikapmake tasiwawa
2TI 2:9 aminda nae natapa aminu waiapa siwan na kaautde napmaba nata meya buyak yuat. Unzing yuwawa ngana Anututane wamde kepi umutnanga dua.
2TI 2:10 Unzingge nata meya wa kuupbam pake nata musipma tapa kekekawan aminu Anututa inae kapekut amin gatayamunangge tasinggat. Tasiwa Jesu Kraisda wa aminu waiaknganae toknga pananga akngane sandewan wa aminda iat gatake kakaa akngane asinggan asinggan yutningge natake tasinggat.
2TI 2:11 Siwan wamu takngatu ninda ie natapna kekeknga sinanga aknga anzing yakamang, “Ninu ie natanggamatake itane puyana tasike iwaninda nisipa kumnimde dua gwaukengu ninda kayuu iat kuut yutnim.
2TI 2:12 Ninu meya pake ngana musipmin pana kekekawanu ninu iat gatake tupan amin dakngake yutnim. Ninu ie masa imunanu ita ninde masa atnimik.
2TI 2:13 Ninu itane wamde apbitateke yuwatna ngana ita inane wamde dua bitawik. Aho. Wamu ita tupa yakut takngae natake ita dua sandewik,” ngang yakamang kakngae natapna siakan singgak.
2TI 2:14 Siwan gata aminde musia wamu waakngata asinggan yanike pangenayo. Yanike pangenake ginu wamu takngatu takngatue ma yanganuwam. Anututa dandupan take dua siyak ngang kekeknga yaniyo. Ga atnataayak. Aminda wam takngae yanganukaing kakngata aminu tapatu gatangamunanga dua. Aho. Sanga waakngata aminu wamu ayanganukaing kaknga nataaing aminu apasiwan maikaing.
2TI 2:15 Siwan ga Anututa gatane puyaka kawan take siwikge natake gata siakan wam taknga katak siknga yanikapmake tasiyo. Tasike Anutue kaine yutnangge dua maakawiyak.
2TI 2:16 Sike aminu kunduta wamu yumdekanu takngatu takngatu yapiina wena yanindamukaingge gata akagwaumso. Ga atnataayak. Wamu waakngata aminu kaipake kepi masa Anutue imunanga apane pakuwik.
2TI 2:17 Ngan. Wata wai gwenduta sitake kunggawan kunggawan buyambam siknga siwik. Ina unzakan. Wamu waakngata aminu buyambam pasiwan maining. Siwan aminu wamu waaknga yakaikat nana tapaaya umana Haimenias gatu Failitas ngang yanikaing.
2TI 2:18 Wa tapaatda siakan wam taknga teke wamu gutonga anzing yakamayak. Anututa ninu akumbumang katangga gatu gwa pangenawan ninu gatu dua enatnim ngang yakamayak. Sike wamu waaknga yanindamuke aminu kundu siakan wam takngae natapa kekekakut amindane natdetdetna pasiwat maikaing.
2TI 2:19 Siwan ngana Anututa inane aminabamde katak siknga atnataak. Sike aminu Anutue natake nindane Buyambam tapanin ngang inikaingu wa aminda masa waiakngae imunong. Unzing aminu yot mitapsa tapatuta gwau kekeknga siknga daka kwaiwik. Ina unzakan. Wamu wa Anututa inane aminabamde katak siknga atnataak ngang yanggat takngata Anututane aminabamde musia papan kekekakaing. Gatu aminu yot mitapiu waapata natake aminda you wagwen kake toiknga na ngang natapningge umana gwau wandakane matawik. Ina unzakan. Wamu waakngata yeutniman ninu Anututane amina dakngake yuamang ngang natapnim.
2TI 2:20 Siwan ninu atnataamang. You buyambam gwene dis ba botol ba sanga apamunanga yuaingu wa kundu sanga gamanggamanata pasikaing. Gatu kundu sanga waenga kayata pasikaing. Siwan dopangu kundu kuut katap gom pasike pasikaing. Gatu gapma kaikga tumuke pasikaing. Sike sanga wa kundue apbakngake nanamu wa gwegwene peke naning. Siwan ngana sanga kundue natapa sanga moo binga siwanu sabasaba wa gwegwene peke paku apmupewa kuning.
2TI 2:21 Siwan aminu tapatuta waiakngana gatukande bitatekengu ita amin gwaang dakngake Buyambam tapanae puyana tasinangge tandakngawik. Ngan. Dis gwendue apbakngake nanamu wagwekatang peke nanggak. Ina unzakan. Aminu waapae Anututa apbakngake inane puya asimik.
2TI 2:22 Siwan ga natdetdeu wawi matekge musiaatang enakaing kakngae atdatakuke natdetdeu nomana aknga natake sukuyo. Sukuke gatane puyaka Jesue natanggamatake katak siknga tasiyo. Tasike notdae musip gwaang natayamuyo. Natayamuke gaat gatu aminu kuupbam waiaknganae gwa apbitateke Buyambam tapaninde inindatakaing amikatda musipza kwikwikngata yutnong.
2TI 2:23 Yuke gata wamu yumdekan yapiina wena yake paut tasike yakaing kakngae masa yamuyo. Ga atnataayak. Wamu wa bingata ayanganukaing kaknga tangenakgak.
2TI 2:24 Sike aminu tapatu Buyambam tapanindane puya amina dakngakuu waapata dua yanganuwan. Aho. Ita puya aminu kuupbamde wikake pasiyok. Pasike amindane natdetdetna usanzike wikake katak siknga yanindamumsok.
2TI 2:25 Yanindamuke aminu kunduta itane wamna sapdukngama kakengu ita wa amindane natdetdetna wepda papan nomatanong. Sike ita unzing tasiwanu Anututa wa aminu apba gatayaman musia tapa tekwamban siakan wamde katak siknga natapning.
2TI 2:26 Tupa Setenda wa amin panzike panggaganuwan itane wamna gwaamuke tasikaking. Ngana wa aminda siakan wamde natapa natdetdetna gatu anggaman siwana Setendane kataknga sandeke kuningge yanindamumsok.
2TI 3:1 Siakan ngana gata anzing natapso. Tapduknga Jesuta gatu apnangge dapaknga siwik gwene meya wai siknga takngatu takngatuta apning.
2TI 3:2 Apuwawa aminda inaekan natanggamataning. Sike mani buyambam panangge take siknga natapning. Sike yamandet sisukuke inane umana yapangenake sapdut wamu asinggan yaning. Sike nana mingae wam sandetning. Sike aminu akgatayamuning aminde dua yanimbaknganing. Sike sanga takeaknga ayaitapaakusining.
2TI 3:3 Sike aminda notnae semna natayamuke kaanga yasukuning. Sike sapdut wam yake gatu sanga musia enayaaknga tawake tasike amin zong daknganing. Sike sanga takeaknga kuupbamda semna siknga natayutning.
2TI 3:4 Sike notna iwande kataune yamuning. Sike natdetdeu anggaman dua natake waiakngana zetgaman tasining. Sike inae natapa aminu buyambam takwak siwik. Sike gupdane sanga aknga tasike apbakngakaing kaknga tasinangge iaknga siknga natapning. Sike Anutue take dua natapning.
2TI 3:5 Aho. Anututane kekeknga akngae masa imuke ngana umana yangga amin ngang yanikaing kakngakan take yutning. Gata aminu wa bingae akagwaumso.
2TI 3:6 Sike maya kunduta inane waiaknganae natake ie toknga panam ngang natake meya buyak yutning. Yuwawa ngana aminu Anutue masa imukingu nata wa ganinggat aminda wepda kuke maya waakwau panzike yanindamutning. Yanindamuba natake mayata wa amindane pandetna daknganing. Dakngawa wa aminda natdetdetna kaipakuwawa maya waakwakga undang kuyawaning. Kuyawake wamu waakngata apba gatanimik ngang natake maak gwaang pake siakan wam natapnangge tasining ngana kem wamban yanindamuba natapning. Natake natdetdetna nomana dua siwan musia enayaaknga tawake sukuning.
2TI 3:8 Sike aminu maya waakwak panzike yanindamukaingu wa amindane natdetdetna wai siwan siakan wam takngae apbotakaing. Unzing tupa siknga aminu tapaaya umana Janis gatu Jambris ngang yaniking kapaatda Mosesde iwana dakngake yapbitnangge tasikumayak binga wa aminda siakan wamde apbitake yandakngake kem wam yanikaing.
2TI 3:9 Ngana sanga wa tasikaing kakngata buyambamu sinanga dua. Aho. Aminu kuupbamda wa amin kawa aminu kem panzikaing amin siwik. Unzing tupa sanga aminu wa tapaatda Mosesde iwana dakngake kem panzike tasikumayak kaknga buya dua aakut. Ina unzakan. Wa aminda atasiwa ngana buyambam dua siwik.
2TI 3:10 Siwan ngana ga. Gata wamu nata asinggan yanikapmanggat taknga atnataayak. Sike gata kepi nata asinggan tawake tasinggat taknga atnataayak. Siwan gatu natane natdetdeu musipmaatang natake tasinggat taknga kuut atnataayak. Sike nata Anutue kekeknga yuat taknga atnataayak. Ngan. Nata aminde wikake butaya natayamuke meya takngatu takngatu nae nama pake ngana nata musipma tapa kekekawan pasinggatde atnataayak.
2TI 3:11 Sike sanga kuupbamu aminu you Antiok gatu Aikoniam gatu Listra ngang yanikaingune nana aminda meya nae namuking kakngae gata atnataayak. Meya wa asinggan namuwawa pake nata akekekake yuwawa Buyambam tapaninda meya waakngane na sandekut.
2TI 3:12 Ngan. Aminu Jesu Kraiskat gatake yuke Anututa na gatangaman nata itane banip tawake tasiwit ngang yawa kekekawiu wa aminu iwanata enake wai pasiyamuning.
2TI 3:13 Wai pasiyamuke wa aminu kem panzike yanindamutning kakngata buyambam siknga siwik.
2TI 3:14 Siwan ngana ga. Gata wamu tupa natdeke ie natapi siakan siknga sikut taknga kekeknga tapso. Dasingge? Aminu wamu waaknga ga ganindamukumangge gata atnataayak.
2TI 3:15 Sike tupa gata waatdaka yuke natapbuyak komuneta asinggan Anututane wamu ayanikapsa aminda tupa siknga mataking kaknga nataayak. Sike wamu waakngata gatane natdetdetda tapan nomatawan gata sanga Jesu Kraisda ninde tasinimukut takngae natapi kekekawan Anututa waiakngane ga sandewikge atnataayak.
2TI 3:16 Siwan wamu Anututane wam yanikapbing aminda matakingu wa kuupbam Waung Kapata wa amindane musia pangenawan yanikapbing. Sike wamu waakngata take siknga ninu ninindamuke ninde waiaknganin yeutnimuke nindane musipmin papan nomatanim. Sike kepi nomana akngae ninindamuban natdetnim.
2TI 3:17 Natdeke ninu Anututane amina dakngake yuamang aminda puya take siknga tasinim. Wamu waakngata nin gatanimuke pasiwan natdetdetninu nomana siknga pake puya tasinim.
2TI 4:1 Siwan nata wamu kekeknga ganinggat. Anutuninu Jesu Kraisda aminu kuupbam kayuk yuaing gatu akupsa ngang kuut usanziwik. Tapduknga ita apuke aminu kuupbam panggaganuke usanziwik gwenu gwa dapakanggak. Siwan ie natake nata anzing ganinggat.
2TI 4:2 Itane wamna tapdukbamu asinggan yanikapso. Tendeknga wena puya kekeknga tasike itane wamna yanikapso! Yanikapmake aminu wai tasikaingu kaanga yaniwi natake wa aminda musia tapa tekwamban wa amindane musia papi kekekaning. Sike gata wa aminde asinggan wikake wepda yanindamuke tasiyo.
2TI 4:3 Dasingge? Masande aminda wamu nomana aknga tanangge apbitaning. Apbitake wamu wa aminda natake apbaknganing kakngakan natapnangge tasining. Tasike aminu wamu waakngaekan natake yanindamumsa aminu tapatu tapatu papa buyambam siknga siwik.
2TI 4:4 Siwan siakan wam bitateke wa aminda maak gwaang pake wamu inata inata yapiina wena natapnangge tasining.
2TI 4:5 Tasiwawa ngana ga. Gata natdetdetda anggaman natake iwandata enake meya gamanu akekekake yuyo. Yuke wamu takeaknga yanikapmake puya Anututa gae gamukuu wa tasitakuwi puyuyok.
2TI 4:6 Siwan tapduknga iwanata na nuwa kupitde dapaknga gwa singgak.
2TI 4:7 Siwan puya Anututa nae namukuu wa nata kekeknga siknga pasiwa puyukgak. Unzing aminda isapmake aminbam yapbitnangge kekeknga siknga isapmakaing binga nata tasikum. Tasike siakan wam taknga gitna take nata wamu waakngakan yanikapbum.
2TI 4:8 Yanikapmake tasiwa nanduke Anututa natapan take siwan ita sanga takeaknga namunangge yawan yuak. Tapduknga Buyambam tapaninda aminu kuupbam nomana siknga usanziwik gwene ita sanga waaknga atnamik. Unzing aminu asisapmake yapbimbik kapa kupna gwapungaman umana buyambam siwik binga ita sanga takeaknga nae namik. Sike ita na awia apaekan dua namik. Aho. Ita aminu ita apikge take siknga nataaingu kuupbamde kuut sanga takeaknga ayamik.
2TI 4:9 Siwan puya amin notna tapatu umana Dimas ngang inikamang kapata sanga kepdakane nana akngae take siknga natake ita na napmake Tesalonaika yot gapmane gwa kukut. Unzingge gata zetgaman nae apso. Dasingge? Notna Kresensda napmake Galesia kep komune gwa kukut. Sike Taitasda Dalmesia kep komune kuke yuak.
2TI 4:11 Sike notna Luk awiaapatakan naat gatake yuamak. Siwan gata notda Mak initakapso. Ita na take gatangamik.
2TI 4:12 Sike nata notna Tikikas gwa initewa Efesas yot gapmane kukut.
2TI 4:13 Sike gata asapnanggengu got tauknga mamaya gomu nata Troas yot gapmane notna Kapasde yotnane tekumu wa gata atakapso. Gatu buk gogomu kuut pakapso. Sike apakapnanggengu buu kundu kaap gupda pasikingu wa ma botawim. Wa kuut asiknga panangge nataat.
2TI 4:14 Siwan aminu tapatu sanga ainda pasinggak kapa umana Aleksanda ngang inikaing. Ita na tasiwan maiwitde puya kekeknga tasikutde masande Buyambam tapaninda toknga yake ie asimik.
2TI 4:15 Ita nindane wamu wai siknga sapdukut. Unzingge gata aminu waapae akagwaumso.
2TI 4:16 Siwan tapduknga natane wama yawitde aminda na takopa tupanu yakum gwene aminu tapatuta naat dua yuke wam yawitde dua gatangamukut. Wena. Aminu kuupbamda akgwauke na atnapmake datakuking. Siwan nata Anutue tumuk wam iniwa ita wa amindane wai waakngana sandeyamik.
2TI 4:17 Wa aminda na napmake kuwawa ngana Buyambam tapaninda gatangamuke ita na kekekangamukut. Kekekangaman nata itane wamna yanikapa kepman nana aminu yukingu kuupbamda natapbing. Siwan ita gatangamuke na nuwa kupit takngane na asandekut. Unzing kaap zongu gwendu umana laion ngang inikamang gwenda aminu tapatu isinangge apan kake notnata gatangamuke tanguwan kupik. Ina unzakan. Anututa na gatangaman na wai dua sikum.
2TI 4:18 Sike nata musipmaatangu anzing nataat. Buyambam tapaninda sanga kuupbamda na tasiwa maiwit takngane na sandewik. Sandeke ita na katak siknga nanduyuke masande na enandang ita tupan sikngaapa dakngake yuak komune takopik. Waapatane umana asinggan asinggan yatangenatnim. Siakan.
2TI 4:19 Siwan gata natane gaak wama Priskaat gatu itane apna Akwilaat gatu Onesiforaskat gatu aminu iat gatake yuaing amikatde yamuyo.
2TI 4:20 Sike notna Irastasda Korin yot gapmane yuak. Sike Trofimasda apmaiwan kake nata Mailitas yot gapmane teke apbum.
2TI 4:21 Sike gata nae zetgaman apso. Tapduu gou waita puyapik gwenda apuke kepika umukgamuyak. Ge zet apso. Sike notda Yubyulas gatu Pyudens gatu Lainas gatu Klodia gatu notda kuupbamda gae gaak wamu yatewa kunggak.
2TI 4:22 Buyambam tapaninda gaat gatake yutzon. Ngan. Nata tumuk wam iniwa ita musip kwikwiu ginu kuupbamde natdamuke kekekandamik. Unukan.
TIT 1:1 Na Pol na Anututane puya amina dakngake yuat. Siwan Jesu Kraisda na take na nanitewan kuke wamna aminbamde yanisukuke tasiwawa aposel amintapa ngang nanikaing. Ita na nanitewan kuke aminu Anututa panangge yapewan yuaing amin gatayama Anutue natapa kekeknga siwikge na nanitewan kukum. Siwan siakan wam takngatu musia pangenawan Anutue natanggamatake yutningge wam yaniwa natapa siakan siwikge Anututa na nanitewan kukum.
TIT 1:2 Siwan tapduknga kepat yekapat dua tasike tekut gwekatangu Anututa ninde natake kayuk asinggan yutnanga aknga nimunangge gwa yawan kekekakut. Unzingge wa aminda sanga wa kayuk yutnanga akngae tandakngake kayutningge na ninitewan kukum. Siwan Anutu kemu dua yanggaunin.
TIT 1:3 Aho. Tapduknga ayawan yukut gwene Anutu akgatanimuya apaninda yake wamu waaknga yakapnanga akngae puya nae namukut. Nae namuke na nanitewan kuke wamu kayuk yutnanga atnimik kakngae wam yakapmake tasiwawa itane wamu waaknga anggaman sikut.
TIT 1:4 Siwan waaknga Taitas. Nata pas asanu gae matanggamunggat. Ga natane pandetna dakngake Anutue natapi kekeknga siwan waaknga siknga binga dakngake yuayak. Unzing ninu Jesuat nana aminu kuupbamda ie natapna kekeknga singgak binga. Siwan Nanin Anutuat gatu aminu ita initewan apuke nin gatanimunggak kapa Jesuatda musia kwikwiknga gae natanggamuke gatane musipba tasiwat kwikwikngata yuyo.
TIT 1:5 Tupa gata Krit kep yangga banakan yuak gakane yuwawi nata ga gapmake kukum. Gapmake kuwawa gata puya nitda tangenake tasikumak kaknga tasiwi sandewikge natake ga gapmake kukum. Kuwawa gata puya waaknga tasike take aminu kundu yotna gapmandu gapmandune nana kundu papi Anututane aminabam kayuke yutnong. Unzing nata ga tupa ganikum takngakan tasiwiyakge nata ga gapmake kukum.
TIT 1:6 Sike nata anzing ganikum. Aminu aminde kaine nomana siknga yuaing amin papeyo. Aminu maatna tapatukan pake katak yuaing amin papi yutnong. Aminu itane waaknga yapanata Anutue natapa kekeknga siwan yamandeu dua sike katum binga dua dakngake yuaing ngang kakengu unzing amindane nana papi yutnong.
TIT 1:7 Ga atnataayak. Anututane aminabam kayuak kapa wa Anututane puya kayuaunin. Unzingge ita kepina noman gan sukuyok. Ita aminde kaine nomana siknga yuyok. Ita yamandeu dua siwan. Gatu musia toknga zetgaman ma natapan. Gatu yangga toknga aknga asinggan dua tangoke datdaptawan. Ita musia toknga siknga dua natake yaniyapiban. Gatu mani kwaapzang panangge kemu ma panziyuk mani papan.
TIT 1:8 Aho. Ita aminu you gapmanduneta apningu yotnaatang pakoke ita take toimsok. Ita sanga nomana akngae take natake natdetdeu noman gan tawamsok. Ita Anututane mama wamu katak tawake tasike Anutue asinggan natanggamatake inae natdetdetna katak siknga kayuke tagwaumsok.
TIT 1:9 Ita Anututane wamu take siknga masande buya siakande siknga asaawiu nata asinggan aminbam yanindamunggat taknga gitna take yuyok. Gitna take yukengu aminu kundu yanindamuke Anututane wamu noman siknga yaniwik. Yanike aminu wamu waaknga sapdukaing amindane natdetdetna papan kakaawa katak natdeke yutnong. Siwan nata wamu wa tupa ganikum taknga tawake gata take amin papi yutnong.
TIT 1:10 Dasingge? Aminu yangga amin dakngakikat nana kundu aminu buyambamda yamandet sikaing. Yamandet sike wamu yapiina wena yakaing. Yake wamu kem panzike wamu inata takngatu yanindamukaing. Aminu Judia nana amindane miti aknga tawake tasiking amikat gatu katum aminda sanga aknga tasikaing kaknga tawake tasiking amikat ngangga yangga aminu gwa dakngake yuaing ngana wa amikat nana kwaapzangga wamu wa binga yake tasikaing. Siwan ngana Judia nana amindane miti aknga tawake tasikaing aminu kwaapzangga unzingu tasikaing.
TIT 1:11 Unzingge gata yanindakngawi unzingu ma yaniwam. Dasingge? Wa aminda mani amindane kaitnangge natake sanga ninda tawake tasinanga dua aknga yanindamukaing. Unzing yanindamuke dongu ina paandane aminu kwaapzang sikngatane natdetdetna pasiwa maikaing.
TIT 1:12 Siwan aminu Krit kep dakane nana tapatu anutu pupukngae wam yakapsa amin tapata tupa siknga wamu takngatu anzing yakut. Krit nana aminda kem yakaing amin dakngake yuaing ngang yakut. Aminu wai siknga amin yuke nanamu tapdukbamu asinggan kwaapzang nake ngana puya pasinangge natapa maiwan semna semna natake yuaing ngang yakut.
TIT 1:13 Wamu wa yakut taknga siakan singgak. Unzingge gata mama kekeknga siknga yaniwi musia tapa tekwamban Anutue natapa siakan sikut taknga kekeknga siyok.
TIT 1:14 Kekeknga siwan wa aminu wamu yumdekanu yapiina wena Judia nana aminda yakaing kaknga natapnangge maau dua paning. Maau dua pake mama wamu inata inata aminu Anututane siakan wamde masa imuke tasikaing aminda yanindamukaing kaknga dua gwaamutningge gata kekeknga siknga yanindakngayo.
TIT 1:15 Siwan aminu Anututa gatayamuke sanga gawaknga musiaatang nataaing kaknga sandeyamanu amin noman dakngake yutning. Aminu unzing yuaing aminda sanga kuupbamde natapa takekan siwik. Siwan aminda sanga kuupbam usanzike sanga wa takwan. Nananga dua ba sanga wa ma tapam ngang yakaing kakngae natapnangge maau dua paning. Siwan ngana aminu Jesue masa imuke aminu wai amin dakngake yuainggane natdetdetna gwa pasiwa maiwa sanga tupa tasiking kakngae musia enawa meya nataaing ngana yamandet sike wa aminda waiakngae gepbiatang yuaing.
TIT 1:16 Sike gentangan yake na Anutue natake iat gatake sukukamak ngang yakaing ngana kepi sukukaing kakngata yeutniman wamu wa yakaing kaknga kem siwan kaamang. Kake aminu gawaknga siknga amin dakngake yamandet sike tasiwawa Jesutane aminabam kayutningge gata wa aminu dua papi tasiwam. Wena siknga.
TIT 2:1 Unzing yuaing ngana gata aminbam yanindamumbi Anututane wamu noman siknga akngata musia pangenawan kepi noman tasinanga akngae yaniyo.
TIT 2:2 Wamu waakngae natake wawi aminuake gwa siya aminu gata anzing yaniwi natapnong. Ginda yangga toknga aknga dua tangoke datdaptawam. Dua datdaptake kem wamu dua yake natdetdetza pewa wikawa yutnong ngang yaniyo. Yaniwi wa aminda Jesue natapa kekeknga sikut taknga gitna take yutnong. Gitna take yuke aminde banip gwaang natayamunong. Natayamuke meya takngatu takngatuta apa kake ngana akekekake yutnong. Sike kepi waaknga tawake tasinangge semna dua natake yuwam ngang yaniwi natapnong.
TIT 2:3 Siwan maya aminuake gwa siya aminu gata yanike kepina nomana ina unzakan sukuningge gata yanindamumso. Yanindamumbi sapdut wamu dua yawam. Yangga toknga akngae gepbiatangu dua yuwam. Aho. Wa aminda wamu noman gan yanindamuke maya kekeknga yuaing amin yanike musia panomanuwa musip gwaangu apnae gatu waaknga yapanae kuut natayamunong.
TIT 2:5 Natayamuke kem wamu dua yake natdetdetna pewa wikawa yasewa aknga gatukande bitake tenong. Bitateke yotna gwene gitna yuke waaknga yapana katak toike puya nomana pasinong. Pasike amin gatayamunangge natake wikake apnae gepbiatang yutnong. Aminda Anututane wamu takeakngae sapdutnang ngang natake kepi waaknga tawake tasinong ngangu gata yanindamumbi natapnong.
TIT 2:6 Ina unzakan gata wawi kekeknga yuaing amindane musia pangenawi wa aminda kem wamu dua yake natdetdetna pewa wikawa yutnong.
TIT 2:7 Sike sanga kuupbam gata tasinggayak kakngae gata kepi noman siknga yeuyami kake ga gawake puya nomana waakngakan tasinong. Sike gata aminbam yanindamukgayau gata wamu waiakngaat undanggan ma yaniwim.
TIT 2:8 Dua yanike natdetdetda pewi wikawa wamu nomana aknga aminda gutonga undangu dua kananga akngakan yanindamumbi natapnong. Wamu waaknga yanindamumbi natake iwaninda ninu Jesuat nana aminde ninisapdutnangge apmeptake maakake gatu dua ninining.
TIT 2:9 Sike gata puya tasike aminu puya amin dakngake yuaing amin yanindamuke anzing yaniyo. Ginda puya toikzae gepbiatang yuke puya noman gan pasiyama dandupa take siknga siyok. Siwan puya toikgane wamu dua sapduyamuke tasiwam.
TIT 2:10 Dua sapduke tasike sangana kautdusimu kukae ma papam. Kukae dua pake kepi nomana tawake tasiwawa puya toikga dandupa aminu noman amin siwik. Siwan sanga kuupbam ginda nomana pasikaing kaknga kake wamu ninda Anutu akgatanimuya apaninde yanikapmakamang kakngae natake aminbamda banip sining. Baniu unzing siningge natake ginda kepi wa nomana aknga tawake tasinong ngang gata puya aminu unzing yanindamumbi natapnong.
TIT 2:11 Dasingge? Anututa ninde musip kwikwik natanimunggak kakngata anggamanu gwa apbut. Musia kwikwiknga unzing natake ita kepi ninu aminu kuupbamdane waiaknganin sandetnimunanga aknga tasike yeutniman anggamanu gwa sikut.
TIT 2:12 Siwan musip kwikwiu Anututa natanimunggak kakngata musipmin papan nomatawa yeutniman ninu aminu kunduta Anutue masa imukaing kaknga apbitatenim. Ninda apbitateke sanga waiakngae kundutane baniaatang take siknga tasinangge nataaing kaknga apbitateke yutnim. Bitateke yusika natdetdetnin pana wikawa yuke kepi nomana akngane apmanu tapduu ayuamang komune sukuke Anutue asinggan natanggamatake tasinim.
TIT 2:13 Siwan Anututa kekeknga siknga nin gatanimuyaapa Jesu Krais unin. Sike waapata umana enane siknga siwan yuak kakngane yusika gatuna kepdakane epik. Sike ita unzing epik kakngae natake apbakngake kayuke kepi gae wa matanggamunggat taknga tawake tasinim. Ninu kepi waaknga tawake tasinimde natake Anututa musip kwikwik kakngana yeutniman anggaman sikut takngata musipmin papan nomatanggak.
TIT 2:14 Siwan Jesu waapata ninde natake nin papan itane aminabam dakngake kepi nomana akngane iaknga siknga natake sukunimde natake ita ninde tangge kungwanimukut. Ita ninu waiaknganinde gepbiatang yukumang kaknga sandetnimikge kepi tasinimunangge kungwanimukut.
TIT 2:15 Siwan Anututa ga tapan itane puya amina dakngake yuayak kakngae natanggamatake wamu wa ganinggat taknga aminbam yanike musia papi kekekanong. Musia papi kekekawa aminu wamu waakngae masa imukaing aminde mama wamu kekeknga siknga yanike tasiyo. Unzing gata asinggan tasinggayak kaknga binga. Sike puya waaknga tasike yuwawi aminu tapatuta ga ganduke moo aminu tapatu ngangu dua natapan. Aho. Puya aminu tapatu ngang natapsok.
TIT 3:1 Siwan gata yanindamuke wamu tupa gwa natake ngana apbotaking kakngae amindabam yanindamumbi natapnong. Yanindamuke aminu gin danduyuaing amindane kekeknga aknga gepbiatang yuke wamna gwaamuke puya takeakngasa tasinangge semna ma natapam ngang yaniwi natapnong.
TIT 3:2 Sike wa aminda sapdut wamu aminu tapatue ma yawam. Amau ma tasiwam. Aho. Musia kwikwikngata yuke sanga kwikwiknga akngakan aminu kuupbamde pasiyamuningge yanindamumso.
TIT 3:3 Sike tupa nikaya natdetdetninu nomana dua siwan yukumang kakngae natake wamu waaknga ganinggat. Tupa nikaya katum amin yuke wamu asandekakumang. Sanga buyana wena kem takngae gepbiatang yukumang. Musia sanga waiakngae enakaing kakngata nin panggaganuwan yukumang. Aminde semna natayamuke amindane sangaapana kake musipminu wai natapbumang kakngane sukukumang. Unzing sukuke tasiwatna aminda ninde semna natanimuke tasiwawa ninda yake semna natayamukumang.
TIT 3:4 Ninda tupa unzing sukukumang ngana Anutu nin gatanimuya apata ninde butaya siknga natanimunggak kakngata anggaman apana
TIT 3:5 ita gatanimuke toknga aknga waiaknganinde pananga aknga sandetnimukut. Ninda sanga nomana aknga tasikumang gamu ita nindupan take siwan ngana waiaknganinu ina banipda siwan sandetnimunangge natake Anututa yawan aminu akgatanimuya apaninu Jesu Kraisda Anututane Waunga gatukande siknga nimukut. Siwan ninu Waungu wa nimukut tapatane gepbiatang yuwatna ita kekeknga aknganata sautnimuke pasiwan sanga aminu kayuk binga dakngake yutnim taknga musipmikatang tamukut. Tamuban buya aake pasiwan ninu Anututane dongane aake aminu kayuk binga dakngake yuamang. Siwan kepi waakngakan tawake tasike Anututa gatanimuke waiaknganinde toknga pananga aknga sandetnimukut.
TIT 3:7 Ita unzing musia kwikwiknga akngane gatanimuke ninu aminu waiaknga dua siknga tasikumang amin binga nindupnangge natapbut. Gatu ita ninu itane dongane aake yusika kayuk asinggan asinggan yutnim takngae apbakngake kayutnimde natapbut. Natake ita ninu toknga pananga aknga unin sandetnimukut.
TIT 3:8 Wamu waaknga siakan siknga. Ge gata wamu waakngae natake aminbam yanikapmake maak gwaang pake katak natapnong ngang yaniyo. Yaniwi aminu Anutue natapa kekeknga singgak aminda sanga nomana akngae natanggamatake tasinong. Wamu nomana siknga waakngata aminu kuupbam akgatayamuke musia papan kekekaning.
TIT 3:9 Siwan ngana wamu yumdekanu yapiina wena yakaing kaknga natapnangge maau dua pake masa imuyo. Wamu yumdekanu aminu tapatuta yawan ie yanganukaing kakngaat gatu aminu tapatuta enake Mosesdane mama wamu katak tawake tasinim ngang yawan ie yanganukaing kakngaatde kuut masa imuyo. Wamu wa yanganukaing kakngata natdetdetnin pasiwan maiwan gatanimunanga dua.
TIT 3:10 Sike aminu tapatuta Anututane aminabamde banakan enake wamu gutonga aknga yanindamuke tasiwan wesike dongu takngaaya dakngawa kakengu gata aminu waapatane natdetdetna tapi nomatayok. Unzing tapi nomatawan ngana yamandet siwanu gata sipduat tanomanuyo. Sike sipmaya gwa tanomanuwi ngana yamandeu gatuna siwan kekekawanu wa aminde akagwauke iat ma gatake sukuwim.
TIT 3:11 Ga atnataayak. Aminu waapata kepi nomana aknga teke tasinggak kakngata natdetdetna gwa tasiwan maikutden. Gwa tasiwan maiwan waiakngana anggaman siwan kake iat gatake sukunanga dua.
TIT 3:12 Sike masande nata notna Atemas ba Tikikas ba initewa gae kuwawan nata Nikopolis yot gapmane kuke tapduknga yangga sambuya enawan kunanga dua siwik gwene yutnangge gwa yakum. Sike initewa gae tangge gwa apundopan kakenga gata zetgaman nae apso.
TIT 3:13 Siwan gata notninu tapaaya umana Sinas gatu Apolos ngang yanikamang kapaatda gupde sangae atdapat kakengu gata gatayami pake kuson. Sinas waapa mama wamde natdetdetna kayaapanin.
TIT 3:14 Unzing tasike gata amindabamu kepi yeuyami kake aminu sangae asiknga dapning amin gatayamunangge iaknga siknga natapning. Natake tasikengu songa amin binga dua yutning.
TIT 3:15 Sike aminu kuupbam naat gatake yuamang aminda gaak wamu gae yatewa kunggak. Siwan gata ninde tangge yuke nindane gaak wamu maya wawi Anututane dongune aake yuaingga ninde banip gwaang natanimukaing aminde yaniyo. Anututa musia kwikwiknga natanimunggak kakngata ginu kuupbapat gatake yutnong. Unukan.
PHM 1:1 Na Pol. Na Jesu Kraisde puya pasinggat takngae semna nataaing aminda na tanggaganuke kaautde napmaba yuat. Yusika naat gatu puya amin notniu Timotiatda pas asanu Filimonde gae matanggamukamak. Gakaya Jesue puya pasinggayak. Ge nitda gae banip gwaang natanggamukamak.
PHM 1:2 Sike nitda pas asanu matake gatane maatda Apia Anututane dongune yuke nitdane puya amin notnit dakngake yuak kapae kuutde matakamak. Siwan gatu Akipas nitdane puya amin notnit tapae kuutde matakamak. Siwan aminu Jesutane aminabam dakngake gatane yot gwene unekan gatake koke Jesue inindatakaing aminu kuupbapatde matakamak.
PHM 1:3 Nindane Naninu Anutuat gatu Buyambam tapaninu Jesu Kraiskatda ginu musip kwikwik kaknganata gatandamuke musipza pangenawat ginu musipza kwikwikngata yutnong.
PHM 1:4 Siwan nata wamu nataawa aminda gae asinggan yake gata Buyambam tapaninu Jesue natapi kekekawan banip gwaangu itane aminabamde natayamunggayak ngang yawawa nataat. Natake tumuk wam yanangge natakengu nata gae asinggan natake gatane umanda yake gaak wamu Anutunae inimbaknganggat.
PHM 1:6 Nata tumuk wam iniwa gata Jesue natapi kekeknga singgak kakngata buya aake tasiwan gata aminu sangakata gatayamuke tasiwawi sanga take kuupbamu ninda Kraisde pakamang kakngae atnatapsa.
PHM 1:7 Ngan notna. Gata Jesutane aminabamde musip gwaang natayamunggayak kakngata wa amikat naatdane musipmin papan kekekakaing. Unzingge na asiknga apbaknganggat.
PHM 1:8 Unzingge nata wamu takngatu ganike sanga nomana atasinanga aknga gata tasiwiyakge natake ganinggat. Ganike Kraisda na tapan itane puya amina dakngake yuat takngae natake wamu kekeknga ganiwit gamu noman siwan ngana unzing ganinangge dua nataat.
PHM 1:9 Aho. Nata ga musip gwaang nataayak kakngaekan natake sanga tapatusimde ganinangge nataat. Na Pol. Na aminuake gwa singgat. Siwan aminda Jesu Kraisdane umana akngae semna natake na take kaautde napmaba yuke ganinggakanggat.
PHM 1:10 Nata kaautde yuke aminu tapatu inindamuba Jesue natapan kekeknga siwan nitda nana waaknga binga dakngake yuamak kapa Onisimas waapanin.
PHM 1:11 Tupa ita puyaka nomana siknga dua gatanggamunangge tasikut ngana apmanu ita puya nomana tasike naat gaat gatanimunangaapa daknganggak.
PHM 1:12 Siwan nata ie musip gwaang siknga natangamuke yuat ngana ita gae gatu apikge gwa init.
PHM 1:13 Siwan ngana kaautde tapduknga wena napmamban yuat komune nata aminu waapa tapa ita gae tangge yuke na gatangamikge take siknga natapbum ngana gatuna natagwaanguke natapa take dua sikut. Aho.
PHM 1:14 Gata aminu waapata na dua gatangamikge natakengu gata take naniyo. Naniwi nata waapa dua kotnawit. Gata gika banipda siwan sanga takeaknga tasike na nandutewi aminu waapa tapa ita gatangamikge nataat.
PHM 1:15 Nata yumdekan tanangge dua natapbum. Aho. Gata aminu waapa gatuka tapi ita asinggan gaat gatake yutzande natake Anututa apba katewan ita ga gapmake kuke tapduu dapakngakan yuak ngang natake moo dua tapit. Wena.
PHM 1:16 Siwan nata gae initewa apan gata gatuka tapi ita tupa puya aminda dakngakut ngana apmanu notda siknga dakngawan ie banip gwaang natangamuke puya amina mooapa ngangu ma natapim. Dasingge? Ie nata banip gwaang siknga natangamunggat. Siwan iat gaat yotza gapmandune nanakande notna notna dakngake yuamak ngana ita Anututane amina dakngake notna siknga binga dakngake yuak ngang natapso. Sanga waakngata aawikge natake Anututa apba katewan ita ga gapmake kukut.
PHM 1:17 Sike gata nae natapi nitda Jesue amin notna dakngake yuamak ngang natakengu Onisimas waapa initewa gae apan kake gata na binga yotdane takoke toimso.
PHM 1:18 Sike ita sanga tapatu gae wai ba tasinggamukut ba ita sanga tapatu yake akgamunanga kaya siwanu ie ma iniwim. Na ie tangge yuat tapae naniyo.
PHM 1:19 Sike nata wamu waaknga ninae katakngata siknga matanggamunggat. Na Pol. Nata sanga wa yake akgamit. Siakan ngana gata atnataayak. Tupa nata ga gatanggamuke musipba tapa nomatawan gata apbakngake sanga asinggan asinggan kayuk yutnanga aknga take yuayakgen. Sike sanga wa nata gatanggamukum takngae natanggamatake gata apmanu yake gatangamuyo. Gatangamuke sanga wa ganinggat taknga tasingamuyo ngang ganinangge dua natat.
PHM 1:20 Siakan notna. Gaat naat Buyambam tapaniu Jesue amin notna dakngake yuamak kakngae natake sanga wa na gatangamunanga aknga tasiyo. Sanga waaknga tasingamuyuk musipma tapi kekekayok.
PHM 1:21 Pas asanu matake sanga waaknga apme tasiwiyakge natapa kekekanggak. Siwan semna dua natake sanga waakngakan dua tasiwiyak. Aho. Sanga tapatu gika banipda siwan natapiyak kaknga kuut atasiwiyak ngang natapa kekekanggak.
PHM 1:22 Sike unzing tasike gata you gwendu nata gaat gatake yutzimde tandakngayo. Dasingge? Ginda tumuk wamu Anutue iniwa ita gin gatandamunangge natake na tapan ginde apit ngang natapa kekekanggak.
PHM 1:23 Siwan puya amin notna tapatu nata kaautde yuwawa gatanamunggak kapa umana Epafras ngang inikamang. Ita gaak wamu gae yatewan kunggak.
PHM 1:24 Sike aminu kundu natane puya amin notna umana Mak gatu Aristakas gatu Dimas gatu Luk ngang yanikamang aminu kuutda gaak wamu gae yatewa kunggak.
PHM 1:25 Siwan nata tumuk wam iniwa Buyambam tapaninu Jesuta musia kwikwiknga ninde natanimunggak kakngata gikat gatake yutnong. Unukan.
HEB 1:1 Tupa siknga Anututa inane wamu ninu inane aminabam nininangge natake sipdu sipdune ita tuwanguke aminu tapatu tapatu pake inane wamu takngatu takngatu yaniwan natake wa aminda inandek inandek enake nindane baminde yamuking.
HEB 1:2 Siwan ngana apmanu tapduu ayuamang komune ita inane waaknga tapan ita sanga kuupbam gatu ninu aminu kuupbam nganggane kuyanin dakngakut. Dakngawan Anutu waapata wamu ninu tapduu masan siknga nana aminde inane waaknga waapatane genuneta ninikapbut. Tupa ita waaknga waapa iniwan enake ita sanga kuupbam tasike tekut.
HEB 1:3 Sike waaknga waapata nindane natdetdetnin papan kakaawan Anututane yapii anggaman siknga siwan nataamang. Siwan waaknga waapa Anutu siknga unin. Itane wamna kekekngana kaya. Siwan wamu ita yakut takngata sanga kuupbamu enandang nana gatu kepdakane nana kuut papan kekekakaing. Papan kekekawa ita ninu aminu kuupbamdane waiaknganinde toknga panimukut. Panimuke waiaknganin sandetnimunangae kepi tasinimuke ita enandang gatuna kopbut. Koke ita Anutu enane siknga yuak kapae kataknga siyaapa saak pukwikut. Pukwiwan itane umana enane siknga yuak.
HEB 1:4 Itane umana enane siknga koke angelatane umana ayapbikut. Ayapbiban angela kuupbamda itane gepbiatang koyuaing.
HEB 1:5 Siwan tupa Anututa inane angelana tapatue natake, “Apmanu ga nata tapa aminbamdane kaine gata natake waaknga binga dakngaya,” ngangu dua inikut. Gatu angela tapatue Anututa natake, “Nata itane nana binga dakngake yuwit. Siwan ita natane waaknga binga dakngake yuwik,” ngangu dua yakut. Wena siknga. Ngana wamu waaknga ita inane waaknga asinikut.
HEB 1:6 Ngan. Tapduknga Anututane waaknga siknga tupa ayukut tapa sangabamdane yapii Anututa initewan kepdakane epikge natake ita inane angelana anzing yanikut, “Ginu kuupbamda waapae gepbiatang koke asiknga inimbaknganong,” ngang yanikut.
HEB 1:7 Sike ita inane angelanae natake wamu takngatu yawan natake ayanikapsa aminu tapatuta anzing matakut, “Ita inane angelana pasiwan got taknga binga dakngake gotda puyake zet zaknganggak binga tasikaing. Ita inane puya amina pasiwan katap mumuyangga isisika akungwakaing binga tasikaing,” ngang matakut.
HEB 1:8 Sike ngana wamu takngatu Anututa inane waakngae natake yakut takngae natake itane amina tapatuta anzing matakut, “Anutu! Gata aminu kuupbam asinggan asinggan kayuke yuayak. Kayuke gata aminu kuupbamde katak siknga pasiyamunggayak.
HEB 1:9 Gata sanga nomana akngae apbakngake sanga gutonga akngae asiknga bitanggayak. Unzingge Anutu, gatane Anutuka yuak kapata, gatane puya amin notdatane umana yapangenakut. Sike ngana ita ga tapan gata wa aminu kuupbam yapbike umanda buyambam siknga take asiknga baknganggayak,” ngang matakut.
HEB 1:10 Gatu wamu takngatuat Anututa yakut takngae natake aminu tapatuta anzing matakut, “Buyambam tapa! Tupa siknga gata kepdaka tasike tekuyak. Ngan. Sanga ena kakaa banakan komune nana kuupbam gata gikane katakgata tasike tekuyak.
HEB 1:11 Siwan masana sanga gata wa tasike tekuyau kuupbamda wena siwa ngana ga awiapatakan asinggan yuwiyak. Ngan. Sanga wa kuupbamda tauu bumi binga daknganing.
HEB 1:12 Dakngawa kake gata sanga wa kuupbam pake aminda tauu sandu akoomuke tamumbik binga gata pasiwi wena sining. Ngan. Gata sanga kuupbam pake aminda tauu kayuu gomdu tasinangge natake tauu tupa nana atewik binga gata pasiwi sopuning. Siwan ngana ga! Gata kekeknga asinggan yusika sipdune wena dua siwiyak. Kekeknga gatukande yuayak,” ngang matakut.
HEB 1:13 Siwan Anututa yake, “Ga natane kataknga siyaapa saak pukwiwi gatane umanda enane siknga kopsok. Kopan yuwawi nata gatane iwanda yapbike kaipakapa gae gepbiatang koyutning,” ngangu angela tapatue dua inikut. Wena siknga.
HEB 1:14 Asikaya angelata Anututane puya amina dua dakngake yuaing ba dasing? Ngan. Angelata Anutue puya pasingamuwawa ita yanipewan kuke aminu kundu Anututa waiakngana sandeyamuke papan iat gatake kayuk asinggan yutning amin gatayamunangge angelata kuke pasikaing.
HEB 2:1 Siwan wamu Anututane waakngata amikat angelaat kuut yapbikuu waakngae natake ninda miti wamu tupa natapbumang kaknga gitna take yutnim. Ninda natdetdeu waaknga botanam.
HEB 2:2 Ninu atnataamang. Tupa siknga Anututane mama wamu angelata yanikapmake yawa kekekakut. Siwan aminu yamandet sike wamu wa sandeking amindane waiaknganae natake aminu tupan tapaapata kepi nomana siknga tawake wa aminde toknga ayamuking.
HEB 2:3 Siwan ninda dasing natapnim? Anututa nin gatanimunanga kepi aknga gwaam siknga gwa tasinimukut ngana ninda ie masa imukengu dasing yutnim? Asikaya ninda toknga dua panim ba dasing? Kepi nin gatanimunanga waakngae natake tupa Buyambam tapaninda ina yakapbut. Yakapan aminu kundu itane genune wamu waaknga natapbing aminda ninde niniwa natapna siakan sikut.
HEB 2:4 Siwan Anututa wamu waaknga tapan kekekawikge natake ita ina banipda siwan aminu wa ninde ninikapbing amin kekekayaman duya takngatu takngatu pasiking. Pasiwa kake ninda wa amindane wamde natapna siakan sikut. Siwan Anututane Waung Kapata Anutue banip tawake natdetdeu inata inata wa aminde inandek inandek yamukut. Yaman pake wa aminda puya inata takngatu takngatu pasike yuaing.
HEB 2:5 Sike apmanu nata sanga gwa aakutde natake yanggat ngana sanga wa angelata kayutningge natake dua Anututa yakut. Aho.
HEB 2:6 Wamu takngatu Anututane buk gopatangu ayanikapsa aminu tapatuta anzing matakut, “Anutu! Ninu kepdakane nana aminde gata natanggamatanggayak. Asikaya ninda sanga take siknga binga dakngakumang ba dasing? Dasingge gata ninde natapi take siknga singgak,” ngang matakut.
HEB 2:7 “Sike gata yawi nindane umanin taknganinu angela akwakgane umana akngata atnipbiba ninda tapduu dapaknga sikngakan amunandang binga yuamang. Yuwatna gata nindane umanin taknganinu asiknga yapangenawi ninda tupan tapaapa binga dakngake yuamang.
HEB 2:8 Ngan. Gata yawi sangabapat gatu aminu kuupbam ngangga nindane gepbiatang koyuaing,” ngang matakut. Sike wamu nindane gepbiatang koyuaing ngang matakuu wa Anututa sanga tapatu ba aminu tapatu ngangu dua katewan moo yuke ninde gepbiatangu dua yuwik ngang natake matakut. Ita siakan wam matakut ngana apmanu ninda kana wamu waaknga buya dua aawan kaamang. Ngan. Sanga kundu gatu aminu kundu ngangga ninde gepbiatang dua kopa kaamang. Wena.
HEB 2:9 Ngana ninda Jesue anzing nataamang. Anututa yawan Jesutane umana akngaaya kuut angelatane umana akngata ayapbikut. Yapbiban Jesuta amunandang binga tapduu dapaknga sikngakan yukut. Yuwawan Anututa ninde butaya natanimuke tasiwan buya aawan Jesu waapata ninu kuupbam gatanimikge ita nindane toknganin panimuke kumbut. Kupan tangenake Anututa itane umana asiknga yatangenake tasiwan ita tupan sikngaapa dakngake yuak.
HEB 2:10 Ngan. Anutu sanga kuupbam tasike teke amin tumuke kayuak kapata aminu buyambam yanipakuwan iat gatake kakaa akngane yutningge natapbut. Natake Jesuta aminu buyambam gatayamuke waiakngana sandewikge kepi tasiyamik ngang natake Anututa yawan ita nindane toknganin panimukut. Sike wamu take Anututa wa yakuu Jesuta nomana siknga tasikut. Tasike aminu nin gatanimik kapata nindane toknganinu gatukande siknga panimuke kumbut.
HEB 2:11 Kungwake ita nindane waiaknganin sandetniman nikat iatdane naninu awia tapatukan yuak. Unzingge Jesu waapata ninu uyapma ngang nininangge semna dua nataak. Wena.
HEB 2:12 Tupa siknga aminu tapatuta wamu takngatu wa binga Anututane buk gopatangu gwa matakut. Sike wamu wa anzing matakut, “Anutu! Nata gatane umanda aknga natane uyapmabamde yanikapit. Ngan. Gatane amindabamda unekan apa nata wa aminde banakan koke gatane umanda yatangenake kau takngatu takngatu taiyamit,” ngang matakut.
HEB 2:13 Siwan gatu wamu takngatuat Anutue natanggamatake anzing yakut, “Nata ie natake ita na akgatangamik ngang natapa kekekanggak,” ngang yakut. Sike gatu wamu takngatuat ninde natake anzing yakut, “Ginda na nandupnong! Anututa aminu kundu pake nae naman natane waatdakana dakngake yuaing. Siwan naat wa amikat gatake ane yuamang,” ngang yakut.
HEB 2:14 Sike ninu itane waatdakana dakngake yuamang aminu kepdakane nana aminda yuamang. Yuwatna Jesuta nin gatanimunangge natake ita nisa gup takut. Sike nisa guu ita wa takuu ita Setenu ninu akumnimde yapii apa tasiwan pimapikge natake nisa guu takut. Take ita ninde tangge kungwanimuke
HEB 2:15 ninda kumnam ngang natake tapduk bamu asinggan natake gwaukamang amin gatanimukut. Gatanimuke ita gwauya waakngane ninu sandekut.
HEB 2:16 Siakan. Ita nisa guu wa takuu ita angela gatayamunangge natake dua tasikut. Aho. Ita ninu Ebrahamdane dongune aakumang amin gatanimunangge tasikut.
HEB 2:17 Sike ita nin gatanimunangge natake ngana nisa gup tanangge apbitakut gamu nin gatanimikge kepi wena siwan. Siwan ngana ita nisa gup take ninu inane waatdakana dakngake yutnim amikat nana tapatu binga dakngawan siakan sikut. Siwan ita nikat nana tapatu binga dakngakuu wa ita puya Anututa ie iman take ita nomana siknga tasiwikge natake dakngakut. Ngan. Ita puya Anututane yot takwan gwene Anutue pasingamukaing amindane tupan tapata tasinggak binga tasike ita ninde butaya natanimuke toknga Anututa nindane waiaknganinde nimunangge yakut taknga ita panimikge natake nikat nana tapatu binga dakngakut.
HEB 2:18 Siwan ita toknganinu wa panimukut takngae natake ninu anzing nataamang. Meya waakngata Jesu tasiwan siwan ngana dua tanguwan pimakut. Wena. Unzingge meya takngatu ninde apanu ita ninu akgatanimik.
HEB 3:1 Siwan ginu natane Anutue amin notnabam! Anutu enandang yuak kapata ginu yandawamban ie kuking. Ginda Jesue katak siknga natapnong. Waapa Anututa initewan epuke ita Anututane yapii ninde yeutniman kakumang. Kana ita nin ninipakuke Anututane nomune nipmamban gitna yutnimde tasinimukut. Sike ninda natake ita Anututane sanga kuupbam kayuke yuak ngang natake ninda itane umana yanikapmakamang.
HEB 3:2 Ninu atnataamang. Tupa siknga Mosesda Anutue aminabamde banakan yuke ita puya Anututa imukut taknga nomana siknga tasikut. Ina unzakan Jesuta Anutue natanggamatake puya Anututa imukut taknga nomana siknga tasikut.
HEB 3:3 Siwan Anututa Mosesdane umana tangenawan umana buyambam sikut. Siwan ngana Anututa Jesutane umana asiknga yatangenake tasiwan itane umana akngata Mosesdane umana ayapbike buyambam siknga sikut. Dasingge? Ninda you gwendue apbakngakamang ngana aminu you wagwen tasikut tapae bakngake itane umana yatangenakamang.
HEB 3:4 Siwan puya aminda you gwendu gwendu apmitakaing ngana sanga kuupbamdane yapii Anutu unin.
HEB 3:5 Siwan Moses waapata Anututane aminabamde banakan yuke puya nomana siknga tasikut. Ita Anututane puya amina tapatu dakngake wamu Anututa masande nin ninikapnangge yakut takngae natake ita tuwanguke yanikapbut.
HEB 3:6 Siwan ngana Krais Anututane waaknga. Sike ita aminu Anututane aminabam kayuke nomana siknga toikgak. Siwan nindane musipmikatangu ninda iat gatake takekan asinggan yutnimde apbakngake natayuamang. Sike natdetdeu waaknga gitna siknga take ninda asinggan ie kekeknga siknga yutnanu Anututa nindupan ninda itane aminabam daknganim.
HEB 3:7 Siwan wamu takngatu aminu tapatutane musia Anututane Waung Kapata tangenawan natake Anututane wapatang matakut takngae natake nata ginu daniwa natapnong: “Apmanu gunziu anggwene ginu natane wama natakengu
HEB 3:8 ginda yamandeu gindane bapusata dakngaking binga ma dakngawam. Sike wa aminda keu amina wena komune yuwawa yamandet sisukusika sipdu sipdune na tasiwa sikum.
HEB 3:9 Tapduu waomune na tasiwa sike nata gatayamuke nakanu 40 duya takngatu takngatu tasiwawa kake ngana nae masa namuking.
HEB 3:10 Unzingge nata musipma toknga siknga wa aminde natapbum. Natake nata anzing yakum, ‘Aminu waakwau natane kepi akngae dua natake musiaatangu natdetdetdeu gutonga natake botasukukaing,’ ngang yakum.
HEB 3:11 Yake nata musipma toknga natayamuke nata anzing yakum, ‘Wa aminda natane daman gwene ayuwa takaningge dua kopning. Wena siknga,’ ngang yawa kekekakut,” ngangu Anututa unzing yakut.
HEB 3:12 Siwan mate notnabam! Ginda gisae katak siknga tagwautnong. Aminu gikat nana tapatuta musia tapan tekwamban Anutu kayuu asinggan yuak kapae natapan meya siwan ie masa imuyak.
HEB 3:13 Siwan apmanu tapduu ayuamang komune ginda tapdukbamu asinggan wamu take notzae yanike wa amindane musia pangenatnong. Pangenawa waiakngata ginu kem panziwan aminu gikat nana tapatuta yamandeu dua sike waiakngaatangu dua pimapikge tasinong.
HEB 3:14 Ginu atnataaing. Tupa ninda Kraisde natapna kekekakut. Sike apmanu ninda natdetdeu waaknga gitna siknga take sukunanu Anututa ninde natake ninda sanga Kraisda nin gatanimunangge tasikut takngane sukukamang ngang natapik. Siwan ngana apmea ninda natdetdeu waaknga teke yusika kungwakengu ninda anzing natapnim. Tupa wamu ninda yake Kraisdane kepi akngane sukukamang ngang yakumang kakngata kem siwik.
HEB 3:15 Siakan. Wamu takngatu anzing yuak, “Apmanu ginda Anututane wam natakengu ginda yamandeu ma siwam. Tupa gindane bapusata Anutue masa imuking kaknga ginda ma tawake tasiwam.”
HEB 3:16 Siwan wamu waakngae natake ninda dasing natapnim? Wamu aminu Anututane wamna natake ngana yamandet sike masa ie imuking aminde yakuu wa mamin aminde natake yakut? Wa aminu kuupbam Mosesda yanipakuwan Isip kep kom teke kukingunin.
HEB 3:17 Siwan gatu nakanu 40 wa yuking katangu Anututa musia toknga mamin aminde natayamukut? Ita musia toknga aminu waiaknga keu amina wena wa yuking komune tasike kumbing. Ngan. Anututa wa amindekan musia toknga natayamukut.
HEB 3:18 Siwan gatu Anututa mamin aminde yake wa aminda natane daman gwene ayuwa takaningge dua kopning ngang yawan kekekakut? Ita aminu waakwakgakan itane wamna sandeking aminde natake wamu waaknga yawan kekekakut. Siwan sanga wa sikut takngae natake ninu atnataamang. Wa aminda Anutue baniu dua siking.
HEB 3:19 Siwan Anutue daman gwene dua kopningge yakutdane yapii unin.
HEB 4:1 Siwan Anututa wamu ninda itane daman gwene koke yutna takawikge yanggak. Unzing yanggakge ninda nisae katak siknga tagwautnim. Aminu nikat nana tapatuta undang dua koke yusika kupanu tapduu akopnanga gwenda aminu waapa yapbimsak ngang natake tagwautnim.
HEB 4:2 Siwan aminu tupa yukingu waakwakge Anututane siakan wam takngata apbut. Apan wa aminda maakngita atnatapbing ngana baniu dua siking. Unzingge wamu waakngata wa aminu dua gatayamukut. Siwan ngana wamu take akngata nikaya kuutde apbut.
HEB 4:3 Apan natake ninu wamu waakngae natapna siakan sikut aminda damanu wa ayutna takananga gwene koke yuamang. Sike ngana tupa Anututa aminu baniu dua sining aminde natake wamu takngatu anzing yakut, “Nata musipma toknga wa aminde natayamuke nata anzing yakum. ‘Wa aminu natane daman gwene ayuwa takaningge dua siknga kopning,’ ngang yawa kekekakut,” ngangu Anututa unzing yakut. Sike tupa siknga tapduknga ita sangabam tasike tekut gwene Anututa puya pasiwan puyuwana ita ayuwan takakut.
HEB 4:4 Ngan. Anututa tapduu katau kuut musa kautdu gwendune ngangu puya pasiwan puyuwana gwendune ayuwan takakut gwende natake wamu takngatu Anututane wapatang aminu tapatuta anzing matakut, “Anututa inane puya kuupbam pasiwan puyuwana tapduu katau kuut musa kautdu gweaya ngang dakngakut gwene ita ayuwan takakut,” ngang matakut.
HEB 4:5 Siwan wamu wa matakut takngata gatuna anzing yanggak, “Wa aminu natane daman gwene ayuwa takawikge dua siknga kopning,” ngang yanggak.
HEB 4:6 Siwan aminu tupa Anututane wamna maakngata natapbing aminda wamu waakngae baniu dua siking. Unzingge tupa wa aminda ayuwatakaningge dua kopbing. Ngana apmea Anututa aminu kundu kapewan iat gatake ayuwatakaning.
HEB 4:7 Siakan. Anututa tapduu aminu kunduta daman gwenu ayuwatakaningge kopning komde natapan gunziu gwendukan binga dakngawan ita apmanu akopning ngang yawan yukut. Ngan. Masande nakanu kwaapzang kuwan puyuwana aminu tapatu umana Devit ngang iniking. Itane musia Anututa tangenawan Deviu waapata wamu nata wa yanggat taknga Anututane wapatang anzing matakut, “Apmanu gunziu anggwene Anututane wamna natakengu ginda yamandeu ma siwam,” ngang matakut.
HEB 4:8 Siwan tupa siknga aminu tupan aminu tapatu umana Josua ngang iniking kapata ina amin yanipakuwan keu ayuwatakawik komune kuking gamu masande Anututa tapduu aminda ayuwatakaning gwende dua yawan.
HEB 4:9 Unzingge ninu atnataamang. Ninu Anututane aminabamda apmea ayutnatakawik.
HEB 4:10 Ngan. Aminu tapatuta Anututane damanu wa ayuwantakananga gwene kopiu waapata inane puyana tasiwan puyuwan ayuwantakawik. Unzing tupa Anututa inane puyana tasiwan puyuwan ayuwantakakut binga waapata ayuwantakawik.
HEB 4:11 Siwan ninda puya kekeknga tasike ninda Anututane daman gwenu ayutnatakananga gwene kopnim. Ngan. Aminu nikat nana tapatuta enake sanga aminu waakwakga tupa siknga wam sandeke dua kopbing kaknga dua tawake tasiwan. Siwan aminu tapatuta yamandet siwiu waapataaya kuut dua siknga kopik.
HEB 4:12 Siwan Anututane wam takngata puya kekeknga siknga tasiwan buya asaawik. Sike nata wamu waakngae natapa paiu gena kaukaut toknga siknga daka binga daknganggak. Ngan. Ninda natdetdet ba wamu gutonga musipmikatang natake takusopukamangu kuupbam Anututane wamu waakngata atapan tapik. Nindane natdetdetninu kuupbam tapan tapan Anututa ninu asusanziwik.
HEB 4:13 Asusanzike tasinggawan ninu kuupbamdane waminu anggaman siwik. Siwan wamu takngatusimu takusopunanga dua. Aho. Ninu kuupbamda anggaman siknga Anututane kaine yutnim. Yuke ninda sanga kuupbamu tasikumanggane yapii inikapnim.
HEB 4:14 Siwan ngana Jesu Anututane waakngata nin gatanimuke ita enandang koke Anutue nomune yuke ita wamu ninda toknga waiaknganinde pananga aknga atanguwan kumbut. Unzingge ninda waapae natapna kekekawan itane umana yanikapmake tasikamang kaknga gitna siknga tanim.
HEB 4:15 Ninu atnataamang. Jesu wa nin gatanimuke wamu ninda toknga pananga aknga atanguwan kumbut tapata ninde butaya atnatanimunggak. Atnatanimunggakge meya takngatuta ninde apuke nin pasiwan siwan kakengu ita ninde semna dua natapik. Aho. Meya kuupbamda apuke nin pasiwan singgau meya wa kuupbamu ie apuke ie kuut tasiwan sikut. Siwan ngana ita waiakngaatang dua pimakut.
HEB 4:16 Unzingge ninda Anutu enane siknga yuak kapae wesim kunangge dua gwautnim. Aho. Meya takngatuta ninde apan kakengu ninda Anutue inindatapna ita ninde musip kwikwik natanimik. Natanimuke ita nin gatanimuke ninu meya waakngane sandewik.
HEB 5:1 Siwan ninu atnataamang. Anututa aminu tapatutane umana yawanu aminabamda aminu waapa tapa ita aminu Anututane yot takwan gwene pasikainggane tupan tapa binga dakngawik. Dakngake ita Anututane puyana tasike inane notnabam gatayamik. Gatayamuke tasiwawan aminu kunduta sanga wai tasiking kakngae meya natake sangaapana pakapuke Anutue imunangge tasining. Tasiwa kake aminu wa tupan tapa dakngakut tapata sanga wa pakapningunin pake Anutue asimik. Asiman Anututa aminu sangaapana pakapbinggane waiakngana asandeyamik.
HEB 5:2 Siwan aminu puya waaknga pasinggak kapaaya kuut atuyukake waiakngane pimananga amin daknganggak. Ita kawawan aminu kunduta apbotasukuke waiakngaatang pimapa kakengu waapata wa aminde musip kwikwik natayamik.
HEB 5:3 Sike ita puyana tasike sanga aminda Anutue imunangge pakapningu wa pake Anutue asimik. Asimuke waapaaya kuut inane waiaknganae meya natake inane sangana tapduk bamu asinggan pakapuke ita Anutue asimik.
HEB 5:4 Siwan aminu tapatuta puya wa Anututane yot takwan gwene pasiwikge puya ina tananga dua. Aho. Aminu Anututa ina tapik kapatakan puya waaknga tasiwan umana buyambam siwik. Siwan unzingu aminu tapatu umana Eron ngang iniking kapa Anututa yakap siknga tapan ita puya waaknga tupan siknga takut.
HEB 5:5 Ina unzakan Kraisda puya waaknga ina dua takut. Aho. Anututa anzing inikut, “Apmanu ga nata tapa aminbamdane kaine gata natane waaknga binga dakngawi nata gatane nangga binga dakngake yuat,” ngang inikut.
HEB 5:6 Sike gatu wamu kautduatangu wamu takngatuat Anututa inikut takngae natake aminu tapatuta anzing matakut, “Gata puya aminda Anutue kuningge kepi tasike asinggan asinggan yuwiyak. Unzing tupa siknga aminu tapatu umana Melkisedek ngang iniking kapata puya waakngakan tasikut. Siwan gata wa amindane dongaat nana tapatu binga dakngawiyak,” ngang matakut.
HEB 5:7 Siwan tupa Jesuta nisa gup take kepdakane yukut. Sike tapduu waomune ita tumuk wam yake Anutue inindatapbut. Inindatake ita kumzang siknga yanggamatakut. Sike gatu ita kwanamu kumzang sike tumuk wamu Anutu i gatangaman dua kupik kapae yatawakut. Sike ita Anutue gepbiatang yuwan kake Anututa itane tumuk wamna natapbut.
HEB 5:8 Siwan Jesu waapa Anututane waaknga ngana ita meya takngatu takngatu pakut. Sike meya wa pakutda itane natdetdetna kaitakuuwan ita Anututane wamna tawanangge semna dua natapbut.
HEB 5:9 Sike ita natdetdeu waaknga katak siknga take ita nindane waiaknganin sandetnimikge puya tasikut. Tasike ita aminu itane wamna tawamsa aminu kuupbam gatayamuke waiakngane sandewan wa aminda Anutuat gatake takekan asinggan asinggan yutningge puya tasikut.
HEB 5:10 Unzing tasikutde aminu tapatu umana Melkisedek ngang iniking kapa aminda Anutue kuningge kepi tasikainggane tupan tapatane dongaat nana tapatu Jesu waapata dakngawikge natake Anututa yawan dakngakut.
HEB 5:11 Siwan Jesuta Melkisedekgane dongaat nana tapatu dakngakutdane wamu kwaapzangga yuaing. Sike ngana gindane natdetdetza kekeknga dua singgak ngang natake nata wamu waakngatane yapii yeutdamunangge natapa meya singgak.
HEB 5:12 Siwan ginda wamu asinggan natawawa kuku tapduu kwaapzang kuwan puyuwan gindane natdetdetza kekeknga sikut gamu ginda aminbam yanindamubam. Siwan ngana ginda natdetdetde tawamba aminu tapatuta ginu Anututane wamu tupan takngae yapii take danindamumbik. Siwan ginda engangu katak dua takakut tapa binga dakngake yuaing. Engangga gwa takakengu ngwamde apbitawik. Siwan ngana ginda engangu buyambamu gwa takake ngana asinggan ngwamde yanggak kapa binga dakngake tasikaing.
HEB 5:13 Sike aminu Anututane wamu tupan tuwanguke natapbut takngakan tawakengu wa aminda wamu ninda sanga nomana tasinanga aknga tananga dua. Unzing engangga ngwamban asinggan napiu waapata nanam siknga nananga dua binga gindane natdetdetza kekeknga dua singgak.
HEB 5:14 Siwan aminu tapatuta buyambam takakengu ita nanam siknga atnapik. Ita asinggan nake nanamu kundue take natake napik ngana nanamu kundue apbitake dua napik. Ina unzakan aminu sanga nomana tasinanga aknga take natdetdetna kekeknga siwiu waapata wamu kuupbamda usanzike Anututane wam takngae apbakngake tapik.
HEB 6:1 Siwan ninda wamu Kraisdane yapiie tupa tuwanguke gwa natapbumang. Ge wamu waakngakan dua yanim. Aho. Ninda Anututane wam taknga natdeke natdetdeu asinggan pakana buyambam siwik. Siwan aminu tapatuta yotdane gwau tapduk bamu asinggan gatu gatu dua kwaiwik. Sike asikaya nata wamu tupan takngakan ginu asinggan danindamumbit ba dasing? Wena. Wamu ninda musipmin tana tekwamban sanga yapiina wena nin gatanimunanga dua akngae masa imuke Anutue natapna kekeknga siwik ngangu tupa ninda gwa natapbumang.
HEB 6:2 Gatu wamu ninu yangga sautnimunanga akngae atnataamang. Gatu tupan tapata tumuk wam yake katakngita nin wasiwan Waung Kapata nindane musipmikatang pukuke papan ninda natdetdeu Anututane puya tasinanga aknga tanimde wamu tupa ninda gwa natapbumang. Gatu akupsa aminu kuupbamda gatuna enatningge wam takngae tupa gwa natapbumang. Gatu masande Anututa aminu kuupbam usanzike yawan kekekawan wamu ita yawik kakngata kekeknga asinggan asinggan yuwik ngangu ninda gwa natapbumang.
HEB 6:3 Siwan Anututa nin nindupewanu ninda Anututane wam takngae natdeke natdetdeu asinggan pakana buyambam siwik.
HEB 6:4 Siwan Anututa nindane natdetdetnin papan kakaawan Anututane kakaa akngane yuke sukuwatna Anututa inane natdetdetna ninde niman pakumang. Pana Waung Kapata nindane musipmikatang pukuke pakut.
HEB 6:5 Papan ninda Anututane wamu takeakngae natapna wamu gwaam siknga singgak. Siwan Anututa inane kekeknga aknganata nindane musipmin pangenawan ninda puya kekeknga tapduu apmea kanim komune tasinanga aknga tasikamang.
HEB 6:6 Sike ngana aminu nikat nana kunduta apimake Anutue masa imanu wa aminda gatuna apuke musia tapa tekwambikge kepi wena. Aho. Anututa wa aminde natapan aminu Anututane waaknga amin saamdakane tanguwa kupan aminbamdane kaine ie asapdukngamuking amin binga daknganggak.
HEB 6:7 Ninu atnataamang. Tapduk bamu sopa tangawan kepdakata sopa yangga tapik. Tapan nanam zau aminda kwaikaingu akoke buya aawa pake naning. Sike Anututa keu wandaka tasiwan wikawik.
HEB 6:8 Siwan ngana keu wandakane nanam zau dua akopa sanga paanga kaya kosaak ba bobing ba sanga wambingata akopning. Akopa kake keu wandaka wai gwa singgak ngang natake gatukande tewan atzokawik.
HEB 6:9 Siwan mate notna. Nata ginde musip gwaang natake daninggat. Sike tuwang wamu nata wa daninggau nata ginde tuwanguke dua yanggat. Aho. Nata ginde natake ginda Anutue kuwa ita gin gatandamuke gindane waiakngasa gwa sandetdamukut. Sandetdamuke tasiwan buya asaakgak ngang nataat.
HEB 6:10 Buya asaawan ginda Anutue musip gwaang natangamuke gindane notza Anututane aminabam gatayamuke tasiking. Tasiwawa apu apman apunggak. Siwan Anututa puya ginda wa tasiyuaing kakngae dua botawik. Dua botake ita ginde natapan takekan siwik.
HEB 6:11 Siwan ginu kuupbamda inandek inandek puya waakngakan kekeknga tasiningge take siknga nataat. Ngan. Ginda puya kekeknga tasiyuwawa tapduu ginda Anutuat gatake takekan yutnanga akngae apbakngake natayuaing kaknga buya aawik gwenda apik.
HEB 6:12 Sike ginda puya wa tasinangge semna ma natapam. Aho. Aminu kunduta Anutue natapa kekekawan wamu Anututa akgatayamunangge yawan yukut taknga buya aawikge apbakngake natayuaing. Natayuwawa wamu waaknga buya aawan apaning. Siwan ginda kepi wa aminda tawake tasikaing kakngane sukunong.
HEB 6:13 Siwan tupa Anututa wamu takngatu Ebraham inike ita yawan kekekakut. Siwan aminu tapatuta Anutu ayapbikut gamu Anututa wamu waaknga aminu waapatane umana akngae yawan kekekawan. Siwan ngana aminu Anutu yapbikuu tapatu wena siwan Anututa inane umana aknganae yawan kekekakut.
HEB 6:14 Ita Ebrahamu anzing inikut, “Nata siakande siknga ga ganinggat. Nata ga take siknga gatanggamuke tasiwa gatane donggata zakngiatake kuku buyambam siknga siwik,” ngang yawan kekekakut.
HEB 6:15 Siwan Ebrahamda wamu waakngae apbakngake natayuwawan wamdane buya asaakut.
HEB 6:16 Ninu atnataamang. Aminu tapatuta yake aminda itane wamde natapa siakan siwikge natake ita aminu buyambam tapatane umana akngae yawan kekekawik. Yawan kekekawan wamu ayanganutning kaknga tanguwan kupik.
HEB 6:17 Ina unzakan wamu Anututa wa yawan kekekakuu ita ninde natake yakut. Yawan kekekawan tasiwan buya aawan Anututa Ebraham gatangamikge yakut taknga ninda panim. Sike ninda wamu Anututa wa yakut takngae natake ita wamu waaknga dua siknga sandewik ngang natapna kekekawikge natake Anututa inane umana akngae yawan kekekakut.
HEB 6:18 Ita wamu moo siknga dua yawan kekekakut. Aho. Ita inane umana akngae yawan wamu waakngata kekeknga siknga siwan wamu waaknga sandetnanga dua. Wena. Siwan wamu ita wa yawan kekeknga sikut takngata ninu Anutue kuna ita nin gatanimikge natake iatang yuamang amindane musipmin papan kekekawikge natake Anututa kekeknga siknga yakut. Yawan wamu waakngata nindane musipmin papan kekekawan ninda wamu ita wa yakut taknga buya aawikge apbakngake natayuamang. Apbakngake natayuke natdetdeu ninda Anutuat gatake takekan asinggan yutnim taknga gitna siknga take yuamang.
HEB 6:19 Sike natdetdeu waakngata nindane natdetdetnin papan kekekawan ninda Jesu enandangu Anutuat gatake yuamayak kapae kekeknga siknga asinggan yutnim.
HEB 6:20 Dasingge? Jesuta nin gatanimikge natake ita gamok enandangu kopbut. Koke ita kepi ninda Anututane nomune gitna yutnimde kepi ninde tasinimukut. Siwan tupa siknga aminu tapatu umana Melkisedek ngang iniking kapata puya waakngakan tasikakut. Siwan Jesuta aminu waapatane dongaat nana tapatu binga dakngake asinggan asinggan yuwik.
HEB 7:1 Siwan tupa siknga Melkisedeu waapa Selem yot gapmane nana amindane tupan tapana dakngakut. Sike gatu ita Anutu enane siknga yuak kapatane puya tasikut. Tasiwawan Ebrahamda amak tasike take aminu buyambam tapaapa zipa kupa gatuna yotna kunangge kepiapane kuwawan kakut. Kepiapane kake ita wam kwikwiu ie imukut.
HEB 7:2 Iman Ebrahamda inimbakngake sangaapa amak tasike pakuu kuupbamu katau kuut musaat usanzike kautdu Melkisedekge imukut. Siwan ninda umana Melkisedek ngangu waaknga anzing tana tekwambik. Aminu sanga nomana siknga tasikaing amindane tupan tapa. Siwan itane yot gapma umana Selem ngang inikingu waaknga anzing tana tekwambik. Musip kwikwik. Siwan ita you wangapmane nana amindane tupan tapa dakngakutde itane umana anzing ininim. Aminu musip kwikwik nataaing amindane tupan tapa.
HEB 7:3 Siwan wamu itane minga nana ba itane dongae dua mataking. Aminu tapatuta Anututane wapatangu tapduknga mingata tangaikut gwende natake dua matakut. Gatu tapduknga ita akumbut gwende dua natake matakut. Wena. Siwan waapata Anututane waaknga binga dakngake ita Anututane puya tasike yuwawan wamu ita wena sikut taknga wena kaamang.
HEB 7:4 Siwan wamu aminu waapatane umana buyambam siknga sikutde katak natdetnong. Ebrahamu nindane baminu tupan siknga yukut tapata musip gwaang natake sanga amak tasike pakuu kuupbam usanzike katau kuut musaat pekut. Pewan kuku katau minga daka sikuu wa Melkisedekge imukut.
HEB 7:5 Siwan aminu tapatu umana Liwai ngang iniking. Ita Ebrahamdane dongune aakingkat nana tapatu. Sike masande Anututa Liwai waapatane dongaat nana kundu papan wa aminda Anututane yot takwan gwende puya pasike yuwawa apu apman apunggak. Siwan Liwai gatu Isrel ngangga Ebrahamdane dongune aakumayak. Ngana Mosesdane mama wamda yawan Isreldane dongune aaking aminda sangaapana asinggan pakaingu kuupbam usanzike katau kuut musaat pewa kuku katau minga daka singgau wa Liwaitane dongge yama pakaing.
HEB 7:6 Siwan Melkisedeu waapa donga inata siwan gatu Liwai donga inata. Siwan tupa Anututa Ebrahamu waapa gatangaman itane dongata buyambam siknga siwikge wam iniwan kekekakut. Ngana Ebrahamu waapata sanga pakuu usanzike pewan katau minga daka sikuu Melkisedeu waapae imukut. Iman pake ita wam kwikwiu ie imukut.
HEB 7:7 Siwan ninu atnataamang. Aminda wam kwikwiu aminu tapatue imiu ita enane yuak. Siwan aminu ita wam kwikwik imik kapata amunandang binga yuak. Asikaya aminu tapatuta wamu nata wa yanggat takngae sapdut wam yawik ba dasing? Wena siknga.
HEB 7:8 Siwan Liwaitane dongune aaking aminda kuupbam inandek inandek akumning. Kekeknga asinggan asinggan dua yutning ngana apmanu wa aminda sanga notnata pewa minga daka dakngakaingu apakaing. Siwan tupa Melkisedeu waapata sanga Ebrahamda pewan minga daka dakngakuunin iman apakut. Siwan Anututane wamu ninda kendeke ita ayuak ngang nataamang.
HEB 7:9 Siwan Liwai Ebrahamdane dongune aakuu tapatu. Sike nata waapae natake tuwanguke yawit. Tapduknga ita dua aakut gwene Melkisedekga Ebrahamu kepiapane kakut. Sike tapduu waomune Liwaita Ebrahamdane gupnane binga yukut. Yuwawan iat kuutda binga yuke waapaatda sanga Melkisdekge imukumayak ngang natake tuwanguke yanggat. Siwan ngana apmanu Isreldane dongune aaking aminda sanga pewa kuku minga daka dakngakaingu aminu Liwaitane dongune aakingge yama apakaing. Ngana dongu waakwakga Melkisedeu dua yapbiking.
HEB 7:11 Siwan Anututa wamu inane aminabamdane waiakngana sandeyamikge natake ita Mosesde iman Mosesda aminabamde yamukut. Yamuke ita Eron gatu Erondane notna Liwaitane dongune aakikat nana kundu ngang papan puya Anututane yot takwan gwene pasiking. Pasike wamu waaknga tapa kekekanggak. Sike wa aminda puyana pasike aminbam gatayama take siknga sikut gamu Anututa aminu kayuu Melkisedekgane dongaat nana tapatu Erondane dongune dua aakut tapa dua tapan.
HEB 7:12 Ngana Anututa aminu kayuk kapa takut. Take asikaya ita inane wamna tupa yamukut takngae dua sandeteke wamu kayuk kaknga ninde dua nimukut ba dasing? Aho. Ita sandeteke wamu kayuk kaknga gwa nimukut.
HEB 7:13 Siwan nindane Buyambam tapaninu Jesu aminu kayuu Anututa takut tapa unin. Sike ita Erondane dongune dua aakut. Aho. Jesu waapa dongu takngatune nana. Sike tupa itane donga tapatuta Anututane yot takwan gwene puya dua pasikut. Wena siknga.
HEB 7:14 Ninu atnataamang. Jesu waapata Judatane dongune aakut. Siwan tupa Mosesda wamu aminu Judatane dongune aakingga Anutue yot takwan gwene puya pasiningge dua yakut. Wena.
HEB 7:15 Siwan aminu kayuu Anututa wa takut tapata enake ninda Anutue nomune gitna yutnimde kepi tasinimukut. Ita Melkisedekgane dongaat nana tapatu binga dakngake yuak. Siwan wamu waakngata nindane natdetdetnin papan kakaawan ninda anzing natapnim. Anututa wamu tupa yakut taknga sandeteke ita wamu kayuk kaknga tangenakut.
HEB 7:16 Siwan tupa itane wamda yawan aminu Liwaitane dongune aakikat nana amindakan Anututane yot takwan gwene puya pasiking. Ngana wamu waakngata aminu kayuu waapae dua yakut. Aho. Sanga kekeknga asinggan asinggan yuak kakngata Jesu gatangaman ita enake ninda Anutue nomune gitna yutnimde kepi tasinimukut.
HEB 7:17 Ninu atnataamang. Anututa waapae anzing inikut, “Gata puya aminda Anutue kuningge kepi tasike asinggan asinggan yuwiyak. Unzing tupa siknga Melkisedekga tasikut binga gata tasiwiyak. Tasike gata aminu waapatane dongaat nana tapatu binga dakngawiyak,” ngang matakut.
HEB 7:18 Siakan. Wamu Anututa tupa yamukut taknga kekekngana wena siwan buya dua aakut. Unzingge Anututa wamu waaknga gwa sandetekut.
HEB 7:19 Ngan. Wamu waakngata aminu tapatu Anutue nomune gitna yuwikge kepi dua tasikut. Wena. Ngana wamu kayuu Anututa wa nimukut takngata ninu Anutue nomune gitna yutnimde kepi siakande atasinimukut. Siwan ninda wamu kayuu waaknga buya aawikge asiknga bakngake natayuamang.
HEB 7:20 Siwan tupa Liwaitane dongune aaking aminda Anututane yot takwan gwene puya pasiningge natake Anututa inane umana akngae dua yawan kekekakut. Aho. Ita wamu takngatu yawan aminu dongu waakngane nana aminda puya waaknga tasiking. Siwan ngana Jesu aminu kayuu waapa take Anututa inane umana akngae yawan kekekawan puya ie iman takut. Siwan wamu wa Anututa yawan kekekakut takngae natake aminu tapatuta anzing matakut, “Buyambam tapaninda siakan wamu inane umana akngae yawan kekekawan ita wamu waaknga dua sandetewik. Wena siknga. Sike ita aminu kayuk kapae anzing inikut, ‘Gata puya aminda Anutue nomune gitna yutningge asinggan tasike dua tewiyak,’ ngang inikut,” ngang aminu tapatuta Anututane wapatang matakut.
HEB 7:22 Siwan Anututa wamu kayuu waaknga inane umana akngae yawan kekekakut taknga buya aawikge tasinggak kapa Jesu unin. Siwan wamu tupa Anututa Mosesde imukut taknga wamu kayuu Jesuta apuke aminda Anutue nomune gitna yutningge kepi tasiwikge yakuu waakngata ayapbikut.
HEB 7:23 Siwan tupa aminu kwaapzangga Anutue yot takwan gwene puya pasiking. Dasingge? Aminu kunduta puya pasiyuk kungwatakapunggawa apu apman apunggak.
HEB 7:24 Siwan ngana Jesuta dua kupik. Aho. Asinggan asinggan yuke ita puya ninda Anutue nomune gitna yutnimde kepi asinggan tasiyuwik. Tasiyuwawan ie tangge aminu tapatuta dua tapik. Wena.
HEB 7:25 Unzingge aminu Jesu kakusike Anutue wesim kunangge tasining aminu kuupbam akgatayamik. Ngan. Jesuta kayuk asinggan asinggan yuke wa amin gatayamunangge natake ita Anutue tumuk wamu asinggan inindatake yuak.
HEB 7:26 Sike Jesuta dua gatanimukut gamu ninda wai sinam. Siwan ngana ita ninu take siknga gatanimuke kepi ninda Anutue nomune gitna yutnimde tasinimuke yuak. Waapa aminu nomana sikngaapa. Siwan gutonga takngatu ie dua yuak. Ita inane musiaatangu natdetdeu gutonga takngatu dua nataak. Ita aminu wai amikat musia takngatukan dua nataaing. Wena siknga. Siwan itane umana aknga Anututa tasiwan aminu umana kaya apaapatane umana yapbike enane siknga kopbut.
HEB 7:27 Siwan aminu Anututane yot takwan gwene pasiya amindane tupan tapata inane waiaknganae meya natake tapduk bamu asinggan sangaapana pakapuke Anutue iman kake Anututa aminu waapatane waiakngana sandekut. Sandewana ita aminu kuupbam gatayamuke kepi Anututa wa amindane waiakngana sandeyamikge tasiyamukut. Siwan aminu buyambamda puya waakngakan pasiyuk kungwatakapunggawa apu apman apunggak. Siwan Jesuta puya wa aminda asinggan tasikaing binga dua tasinggak. Aho. Ita kepi Anututa ninu kuupbamdane waiaknganin sandetnimikge tasike ita sanga Anutue awia sipdukan imukut. Sike ita sanga Anutue imukuu wa ita aminu kundu kapewan tanggaganuke tanguwa kumbut taknga unin.
HEB 7:28 Siwan Mosesdane wamda kep aminu kundu papan aminu Anututane yot takwan gwene puya pasikainggane tupan tapaapa dakngakaing ngana waiakngana kaya nin binga ngang nataamang. Siwan ngana wamu Anututa inane umana akngae yawan kekekakut takngata Mosesdane wamu waakngae masan aakut. Wamu waakngata Anututane waaknga tapan ita nin gatanimuke puya nomana siknga asinggan asinggan tasiyuak.
HEB 8:1 Siwan wamu nata wa yanggatdane yapii buya siknga anzing. Aminu tapatuta Anutu enandang yuak kapae katakngi siyaapa saak pukwike umana buyambam siknga take yuak. Waapata nin gatanimuke kepi ninda Anutue nomune gitna yutnimde tasinimunggak.
HEB 8:2 Waapata enandang Anututane yot takwanu buya gwene puya tasinggak. Siwan you wagwenu aminda dua mitapbing. Aho. Buyambam tapaninu Anututa ina tasike tekut.
HEB 8:3 Siwan aminu Anutue yot takwan gwene puya pasikainggane tupan tapaapa kuupbamda sanga Anutue imuke Anututa aminbamdane waiakngana sandeyamikge tasikaing. Ina unzakan Jesuta kepi ninu Anutue nomune gitna yutnimde tasike iaya kuut sanga Anutue asimukut.
HEB 8:4 Sike ita kepdakane yuak gamu ita puya waaknga dua tasiwan. Dasingge? Anutue yot takwan gwene puya pasikaing aminda sanga inata inata Mosesda yakut taknga tawake Anutue imukaing.
HEB 8:5 Wa aminda puya wa pasikaingu wa sanga buya siknga dua pasikaing. Aho. Wa amindane puyae natapna uyungakan moo binga singgak. Siwan sanga enandang yuak kakngae tuwanguke tasikaing. Siwan ninu atnataamang. Anututa Moses inike Mosesda yot takwanu gwendu mitapikge yakut. Yake ita anzing inikut, “Gata tawan dakane kopi nata sanga enandang yuak kaknga yeikgama kake gata sanga wa binga tandaike katak siknga tasiyo,” ngang inikut.
HEB 8:6 Iniwan tasiwana puya aminda yot takwanu wagwene puya take tasiking ngana puya waaknga Kraisda puya ninu Anutue kunimde kepi tasinimunggak kakngata asiknga yapbikgak. Ina unzakan wamu Anututa tupa yamukut taknga wamu kayuu ita ninde nimukut takngata asiknga yapbikgak. Dasingge? Jesu waapata wamu kayuu waaknga tapan kekekanggak. Tapan kekekawan buya take siknga asaawik. Ngana wamu Anututa tupa yamukut taknga buya dua aakut.
HEB 8:7 Sike wamu waaknga buya take siknga aakut gamu Anututa wamu kayuk kaknga tangenatnangge dua natapan.
HEB 8:8 Siakan. Anututa Isrel amindane waiakngana tapan tapikge natake ita yawan aminu tapatuta Anututane wapatang anzing matakut, “Buyambam tapaninu Anututa anzing yakut, ‘Nata ginu daniwa natapnong! Masande tapduu komdune nata wamu kayuk kaknga yawa kekekawik. Wamu waaknga nata ginu Isrel kep komune nana amikat gatu Judia kep komune nana amikat gatandaman natane gepbiatang koyutningge yawit.
HEB 8:9 Wamu kayuu nata yawiu wa wamu tupa nata gindane bamsae yamukum taknga binga dua yawit. Aho. Tupa nata wa amin yanipakuwa wa aminda Isip kep kom teke kuking. Kuke keu komdune yuwawa nata gatayamunangge yawa kekekawan ninane wama yamukum. Yama pake ngana wa aminda natane wama dua tawake tasiking. Dua tawake tasiwa kake nata wa aminde masa yamukum,’ ngangu Buyambam tapata unzing yakut.
HEB 8:10 Yake ita anzing yakut, ‘Masande tapduu komdune nata wamu kayuu takngatu Isrel amin gatayamunangge yawa kekekawik. Sike wamu waaknga anzing, Nata ninane wamu waaknga anzing. Nata ninane wamu kuupbam wa amindane natdetdetnaatang pamumbit. Ngan. Wa amindane musiaatang pamuba wa aminda natane aminabam dakngake yuwawa nata wa amindane Anutuna yuwit.
HEB 8:11 Yuwawa aminu wa amikat nana tapatuta notna tapatu inindamuke gata Buyambam tapa Anutue natdeyo ngangu dua iniwik. Wena. Tapduu waomune aminu kuupbamu moo amikat gatu tupan amikat kuut nae katak siknga natdeke yutning.
HEB 8:12 Natdeke yuwawa nata wa aminde musip kwikwik natayamit. Natayamuke nata wa amindane waiakngana sandeyamuke nata gatuna ie dua natapit. Wena siknga.’ Ngangu Buyambam tapa Anututa unzing yakut,” ngang matakut.
HEB 8:13 Siwan wamu kayuu Anututa wa yakuu ita wamu tupa yawan kekekakut taknga sandeke yakut. Yake ita wamu tupa nana waaknga tanguwan kumbut. Unzing sanga bumi gwa siwan kakengu ninda apmupena kukaing binga ita wamu tupa nana waaknga gwa sandekut.
HEB 9:1 Siwan wamu tupan yawan kekekakut taknga tawaningge yakuu Anututa wamu kundu Anutue wesim kuningge natake yamukut. Yamuke ita yot takwanu gwendu mitapningge yakut.
HEB 9:2 Yawan wa aminda yot takwanu gwendu mitake kaapde gup sasanda tasibasike usikwatapbing. Tasibasike usikwatake tauu buyambamu sandu bupmake gwabok gwaune mitapbing. Mitake gatu tauu saaya pakapuke yoakatang banakan mitapa you gweaya dakngakut. Dakngawan you tupan gwene wa aminda lam gwegwen gatu tebo dakatu gatu poyau Anutue nomune pewa yutning gogom ngang pakoke peking. Peke you wa gwende natake yot takwan ngang iniking.
HEB 9:3 Sike you tauk sanda wesiwan kautdu gwenu yot takwan siknga ngang iniking.
HEB 9:4 Siwan you takwan siknga wa gwene tebo mateknga dakatusim teking. Wa dakane gol sake pasikakingu pakapu pewa gatakuking. Sike tebo wa dakane sanga kapanga kaya sawa isiwawan yot gwenu kapanga take siknga siwikge natake tewa yukut. Siwan gatu pukwiu gwendu tasike wagwene gol sake pakapu pewa gatakukingu gwendu takapuke you wagwenekan tewa yukut. Sike pukwiu wagwene gapma gwendu gol sake tasikingu gwendu tamuba yukut. Sike gapma wagwene sanga Anututa enandangga pewan epan pake nakakingu kundu pake pamuking. Sike gatu pukwiu wagwene Erondane gusoknga tupa kainga kaikasike akopbing kapa take tamuba yukut. Sike gatu suu saaya tupa Anututa mama wamu Mosesde iman une matakut saat pake pukwiu wagwene pamuba yukumayak. Siwan pukwiu wagwende natake wamu Anututa nin gatanimunangge yawan kekekakut takngae pukwit gwen ngang yaking.
HEB 9:5 Sike angela tapaatane uyunga katap gomda pasike pukwiu wagwenu engatangan yapupeking. Yapupeke angela waapau pasike pia pandaike kaukaut peke pia saatde gepbiatangu pukwit gwendane zangutna san take zanguuking. Sike zangutna wasande natake tupan tapata dak pake pasiwan zangutnane pimapa kake Anututa ninde musip kwikwik natanimuke nindane waiaknganin sandetnimunggak ngang yaking. Sike angela wa tapaau amigwaang siknga Anututa enandang yuak komune nana pandaike wagwene yapupeking. Siwan wamu sanga wa tupa tasikakingu kuupbamdane yapii kuupbamu nata dua ngwakngake yawit.
HEB 9:6 Sike ngana sanga wa kuupbam tandakngake tasiwa puyukut. Tasiwa puyuwana aminu yot takwanu wagwende puya pasiya aminda tapduk bamu asinggan you tupan gwene koke puyana tasinangge kopbing.
HEB 9:7 Siwan puya aminu waakwakgane tupan tapatakan yot takwan siknga kautdu gwene kopbut. Ita tapduk bamu asinggan dua you wagwene kokakut. Aho. Ita nakanu kuupbamu sipdukan kokakut. Ita moo siknga dua kokakut. Aho kaapdane daknga pake you wagwene kokakut. Ita dau wa pake Anutue nomune pasiwan pimapa kake Anututa itane waiakngana sandekngamikge tasikakut. Tasike gatu sanga gutonga aminbamda tasikingu kuupbamu Anututa sandeyamikge tasikakut.
HEB 9:8 Siwan sanga wa tasikingge Anututane Waungata ninu anzing yeutniman kake nataamang. Tapduknga yot takwanu wa tupan gwene koke puya tasike yuking komune ninda yot takwan siknga Anututa yuak gwene kopnimde kepi wena sikut.
HEB 9:9 Siwan you wagwene puya tasikingu wa sanga tapduu ninda ayuamang komune aakut takngae tuwanguke tasiking. Ngan. Tupa wa aminda you wagwene uyungakan moo binga tasiking. Tasike wa aminda sanga inata inata Anutue imuke Anututa aminbamdane waiakngana sandeyamikge tasiking. Tasiwa ngana puya wa tasikingga aminu Anutue inindatake sangana pakapuke ie imukinggane musia dua panomanukut. Wena. Wa aminda Anutue inindatake sangana ie imuke ngana ina natapa natdetdetna kakaa dua sikut. Wena.
HEB 9:10 Kepi tupa tasikakingu wa wamu sanga gupdanekan tawake tasikaking. Ngan. Wamu sanga atnananga ba atangopnanga ba sanga inata inata yangga sautnanga nganggekan tawake tasikaking. Tasike yuwawa kuku tapduknga uyunga wa tasikakinggane buya siknga aawik gwenda apik.
HEB 9:11 Siwan Kraisda enandangga epuke ita puya Anututane yot takwan gwene pasiya amindane tupan tapa kuupbamda tupa tuwanguke tasikaking kakngatane buya siknga tasikut. Ita tasike sanga take siknga apmea aawikge tasikut. Tasike ita yot takwanu gwaam siknga aminda dua mitapbing gwene kopbut. Siwan you wagwenda yot takwanu kepdakane mitapbing gwenu ayapbikut. Yot takwan siknga wa enandang yuak gwene tapduu awia sipdukan koke ita kaap dau dua pake kopbut. Aho. Ita inane daknga pake kopan kake Anututa wamu nindane waiaknganin sandetnimuke ninda itane nomune gitna siknga asinggan asinggan yutnanga aknga yawan yukut.
HEB 9:13 Siwan aminu tapatuta inane katak dua tagwauke amindane ba kaapdane gupnasan tapan kakengu Mosesdane wam tawake puya aminda aminu waapa inikwasiwa kuke ita kepman yuwik. Ngana kepman yutnangge apbitakengu ita puya aminde kuke yaniwan ikwawa gaman mateu tupa tanguke katap sawa muyup dakngakut. Sike muyuu wa dakngakuunin pake gapma gwene tukngwake yanggaat kwaidotdonguwik. Kwaidotdonguke katakngata tasiwan aminu waapatane gupnane pimaning. Unzing tasike aminu waapa dua inikwasiwik. Aho. Ita Anutue wesimu take kuwik. Sike muyupdakan dua tasikaing. Aho. Dau ikwawa gaman ba memenggane daknga pake katakngata tasiwan pimapa kepi waakngane Mosesdane mama wam tawake meya asandekaing.
HEB 9:14 Siwan ngana dau wa pasiwa pimakaingu Kraisdane dakngata asiknga yapbikut. Ngan. Krais waapata asinggan asinggan yuak kapanin. Sike ita sanga gutonga takngatu dua tasikut. Wena siknga. Waapata kepi Anututa nindane waiaknganin sandetnimikge tasinangge natake ita aminu kundu kapewan wa aminda i tanguwa kungwake daknga tukngwakut. Unzing tasikut takngata sangata ninu dua gatanimuking kakngane asandewik. Asandeke nindane musipmin pangenawan Anutu asinggan asinggan yuak kapata puya ninde niman pasinim.
HEB 9:15 Siwan wamu tupa Anututa ina banipda siwan natake Isrel nana aminda itane mama wamna tawake tasiwanu ita wa amin gatayamikge yawan kekekakut ngana wa aminda mama wamu wa sandeke apimaking. Pimake yuwawa apu apman apunggak. Siwan Jesuta aminu mama wamu wa sandeke pimakingge tangge kungwayamukut. Kungwayamuke ita wa amindane waiakngana sandeyamikge kepi tasiyamukut. Unzingge Jesu waapata gatuna gweake ita wamu kayuu Anututa nin gatanimunangge yawan kekekakut taknga ninde takapbut. Takapuke niman take aminu Anututa inae panangge yayawakut aminda sanga wa Anututa gatayamunangge yawan kekekakuu wa kuupbamu apaning. Pake wa aminda Anutuat gatake takekan asinggan asinggan yutning.
HEB 9:16 Siwan ninu atnataamang. Aminu tapatuta masande akupikge natakengu ita wamu maminda inane sangaapana paningge wamu pepa sakatangu apmatawik. Matawan wamu wa kekeknga siknga siwik. Siwan aminu wamu wa matakut tapata kayuk yuwawan aminu tapatuta wamu wa matakut taknga tawake sangaapana pananga dua. Aho. Wam matakuu waapata tupan gamok kupana wamu wa matakut takngata buya aawik. Buya aawan sangaapana take paning.
HEB 9:18 Sike kepi waakngakan tawake aminda kaap zipa kupa kaapdane daknga pake pasiwan pimapa mama wamu tupa Anututa aminabam gatayamunangge yakut taknga dakngata tapan kekekakut. Sike kaau dua zipa kumbing gamu wamu waaknga dua tapan kekekawan.
HEB 9:19 Ginu atnataaing. Tupanu Mosesda mama wamu kuupbam aminbamde yanikapbut. Yanikapan puyuwana ita ikwawa gaman matek gatu memeng zipa kupa daknga pakut. Pake gapma gwene peke yanggaat kwaidotdonguke sipsipdane danggamita taukge tasikingu gamana siknga sanzim takut. Take ita katau mateknga dakatusimu umana hisop ngang yanikinggane kaingaapane koomukut. Koomuke gapma wa gwene tamuban bukatawan take ita buu mama wamu gwa matakut gomune dakaat yanggaat ngang pasiwan pimaking. Gatu aminbamdane gupnane kuut pasiwan pimaking.
HEB 9:20 Pasiwan pimapa Mosesda anzing yanikut, “Mama wamu Anututa ginda gwaamutningge natake yakut taknga nata dau a pake pasiwa pimakaing kakngata tapan kekekanggak,” ngang yanikut.
HEB 9:21 Yanike ina unzakan Moses waapata dak pake yot takwan gwen gatu dopang gatu sanga kuupbamu yot takwan gwene nana ngangge pasiwan pimaking.
HEB 9:22 Siwan Mosesdane mama wam tawake puya aminda dak pake pasiwan pimapanu amin gatu sanga kuupbam ngangga Anutue kaine noman sining. Sike dau dua pasiwan pimapanu dudumna sinanga dua. Ngan. Dau dua tukngwamban kakengu Anututa amindane waiakngana dua sandewik. Wena.
HEB 9:23 Siwan sanga enandang nana pandaike pasikingu kuupbamde dak pake pasiwan pimapa Anutue kaine dudumna siking. Siwan ngana kaapdane dak pake sanga pandaike pasikinggane buya siknga enandang yuaingu pasiwan dudumna dua sining. Aho. Sanga takngatuta dau waaknga asiknga yapbikut takngatakan tasiwan sanga enandang yuaingga dudumna sining.
HEB 9:24 Siakan. Yot takwanu aminda tasike sanga enandang yuaingunin pandaike mitapbing gwene Kraisda dua kopbut. Aho. Ita enandangu Anututa ayuak komune siknga kopbut. Koke ita Anututane nomune yuke puya Anututa nindane waiaknganin sandetnimikge tasinimunggak.
HEB 9:25 Siwan nakanu kuupbam Anutue yot takwan gwene puya pasiya amindane tupan tapata dak pake kokakut. Sike dau ita wa pakokakuu wa ita inane daknga dua pakokakut. Aho. Ita kaapdane daknga pake kokakut. Siwan Jesuta inane daknga pake Anutue nomune enandang kopbuu wa ita asinggan nakanu kuupbam dua tasinggak. Wena.
HEB 9:26 Asikaya tapduknga sangabam tasike tekut gwenuneta ita nakanu kuupbam kepdakane epuwawan kake aminda i tanguwa kungwawan apu apman apunggak ba dasing? Wena. Apmanu tapduu dapaknga wena asinangge singgak komune Jesuta kepdakane sipdukan epbut. Epuke ita amin kapewan wa aminda i tanguwa kumbuu wa ita kepi Anututa nindane waiaknganin sandetnimikge tasinimukut.
HEB 9:27 Siwan ninu atnataamang. Aminu kuupbamda sipdune akumning. Akupana masande Anututa wa amindane wamna usanziwik.
HEB 9:28 Ina unzakan Kraisda awia sipdukan kumbut. Ngan. Aminu kuupbamdane toknga payamunangge natake ita awia sipdukan amin kapewan i tanguwa kumbut. Kungwake ngana gatuna gweake ita masana gatu sipduat epan sipmaaya siwik. Sike aminu ita gatuna epikge ninu apbakngake natayuamang aminde epuke ita ninu waiakngane sandewik ngana ita ninde tangge gatuna dua kungwanimik.
HEB 10:1 Siwan Mosesdane mama wam tawake nakanu kuupbam kaap zipa kupa dak pake pasiwan pimaking gatu sanga kuupbam wa binga tasikakingu wa tuwangakan sanga take siknga masan aatnanga pandaike tasiking. Unzingge kepi wa tasikaking kakngata aminu Anutue wesim kunangge natake sangaapana pakapuke ie imukingu wa aminu pasiwan take siknga sinanga dua. Wena.
HEB 10:2 Aminu waakwau sanga waakngata apapan nomataking gamu wa aminda ina natapa kakaa siknga siwan. Ina natapa kakaa siknga siwanu wa aminda waiakngana Anututa gatuna sandeyamikge natake sangaapana nakanu kuupbam Anutue dua imam.
HEB 10:3 Ngana wena. Nakanu kuupbam sangaapana Anutue imunangge sakaing. Sike sanga Anutue sakaingu wa aminda waiaknganae asinggan natake Anututa gatuna sandewikge kepi asinggan tasikaing.
HEB 10:4 Dasingge? Kaap dau ikwawa gaman ba memenggane pake tuwanggan pasiwan pimakaingu waakngata aminu tapatutane waiakngana sandetnanga dua.
HEB 10:5 Unzingge tapduknga Kraisda kepdakane epbut gwene ita Anutue anzing inikut, “Gata gae kaap sangamuningge take siknga dua nataayak. Ngana nata kep aminde gup tapitde take siknga natake gata aminde guu wa tandakngatekuyak.
HEB 10:6 Ngan. Kaau aminda kataune gae sawa kake ngana gata wa aminde natapi take dua singgak.
HEB 10:7 Siwan nata gae anzing ganikum, ‘Anutu! Nata ga ganiwa natapso. Tupa aminda nae natake buk gopatang mataking binga apmanu na gatane banip tawanangge apunggat,’ ngang ganikum,” ngangu wamu waaknga Anutue inikut.
HEB 10:8 Siwan wamu ita wa yakuu tupanu ita anzing yakut, “Aminda kaau gae saningge gata take siknga dua nataayak. Siwan kepi waaknga tawake gata wa amindane waiakngana sandeyamiyakge tasiwa kake gata natapi take siknga dua singgak,” ngang yakut. Siwan ngana wa aminda Mosesdane mama wam tawake kaau gae asakaing.
HEB 10:9 Siwan masande ita anzing yakut, “Nata ga ganiwa natapso. Na gatane banip tawanangge apunggat,” ngang yakut. Sike wamu ita yakuu wa ita kepi tupa tawake tasikaking kaknga tanguwan pimapan wamu kayuk kaknga tapan kekekawikge yakut.
HEB 10:10 Siwan Jesu Kraisda Anutue banip tawake tasikut. Tasike ita nisa gup take amin kapewan i tanguwa kumbuu wa ita ninu kuupbamde tangge kungwanimukut. Ita awia sipdukan ninde kungwanimukut takngata nin gataniman ninda Anutue kaine amin noman sike yuamang.
HEB 10:11 Siwan Anutue yot takwan gwene puya pasiya aminu kuupbamda tapduk bamu asinggan pasikaking. Pasike sanga asinggan asinggan Anutue sawawa kake ngana Anututa aminu tapatutane waiakngana sanga waakngae dua sandekngamukut. Wena.
HEB 10:12 Ngana Kraisda awia sipdukan sanga Anututa ninu kuupbamdane waiaknganin sandetnimikge asimukut. Asiman Anututa nindane waiaknganinu wa sandetnimukuu tapduk bamu asinggan yuwik. Unzingge Krais waapatane umana buyambam siwan ita koke Anututane kataknga siyaapa saak pukwike yuak.
HEB 10:13 Yuke tapduknga Anututa itane iwana yapbike kaipakapuke itane gepbiatang pewan kopning gwenda apikge kayuak.
HEB 10:14 Ninu atnataamang. Aminu Anututa waiakngana sandeyaman itane nomune amin noman dakngake yuaing aminu kuupbam Krais waapata awia sipdukan kumbutde wa aminda takekan asinggan asinggan yutning.
HEB 10:15 Siwan Anututane Waungata wamu waaknga tapan kekekawikge ita anzing ninikut,
HEB 10:16 “Buyambam tapata anzing yakut, ‘Tapduu waomu wena siwana nata wamu takngatu wa amin gatayamunangge yawa kekekawik.’ Sike wamu wa anzing, ‘Nata ninane mama wamu kuupbam wa amindane musiane pewa natdetning,’ ngang yakut.
HEB 10:17 Siwan ita wamu waaknga gatu ngwakngake anzing yakut, ‘Nata wa amindane waiaknganae gatu dua natapit,’ ngang yakut.”
HEB 10:18 Siwan Anututa nindane waiaknganinu kuupbam gwa sandetnimukutde puya takngatu Anututa waiaknganin sandetnimikge tasike sanga imunangge dua natapnim. Wena.
HEB 10:19 Siwan mate notnabam. Sanga Jesuta ninde tangge kungwanimuke daknga tukngwakut takngata nindane musipmin papan kekekakamang. Papan kekekake ninda Anututane yot takwan siknga enandang yuak gwene kopnangge dua gwautnim. Wena.
HEB 10:20 Dasingge? Jesuta kepi kayuu ninda Anutue wesim kunimde gwa tasinimukut. Siwan kepi ita ninde tasinimukuu waapata asinggan asinggan yuwik. Sike kepi ita wa tasinimukuu ita nisa gup take ninde tangge kungwanimuke tasinimukut. Siwan puya amindane tupan tapata tapdukngane yot takwan siknga gwene kopnangge natake ita tauu buyambam san wesiwan kuwawan kokakut. Ngana Jesuta Anututane yot takwan siknga enandang yuak gwene kopnangge natake ita aminu kundu kapewan i tanguwa kumbut. Kungwake gatuna gweake you wagwene koke ita kepi ninda kuut kopnanga aknga tasinimukut.
HEB 10:21 Tasinimuke ita puya Anututane akngae tupan sikngaapa binga dakngake ninu Anututane aminabamu ita atninduyuak.
HEB 10:22 Unzingge ninda Anutue wesimu take kunim. Ngan. Ninda nindane musipmikatangu Anutue natanggamatake ita nin gatanimik ngang natapna kekekawan ie wesimu take kunim. Siwan Jesuta inane dakngata nindane waiaknganinu gwa sandetnimukut ngang natake ie wesimu take kunim. Kuke ninda nisa natapna natdetdetninu kakaa siknga siwan yangga dopna wenata ninu sautnimukingge ninda Anutue wesim take kunim.
HEB 10:23 Sike ninda wamu Anututa ninde nimukut takngata buya asaawikge apbakngake natayuamang. Natayuke wamu ita apmea nin gatanimunanga aknga atasiwik ngang yanikapmakamang. Sike wamu ninda yanikapmakamangu waaknga ninda gitna siknga take yutnim.
HEB 10:24 Yuke ninda notninu Jesuat nana aminde musip gwaang natayamuke gatayamunim. Unzing tasike ninda notninu waakwakgane musia pangenatna wa aminda ina unzakan tasining.
HEB 10:25 Siwan aminu kunduta miti kanangge bitake gikat gatake dua apukaing. Sike ginda kepi wa aminda tasikaing kakngane ma sukuwam. Aho. Ginda gindane notzatane musia papa kekekake asinggan apning. Ngan. Tapduknga Buyambam tapata apik gwenda apnangge dapaknga singgakge ginda gindane notzatane musia asiknga pangenatnong.
HEB 10:26 Dasingge? Ninda Anututane siakan wam taknga gwa natapbumang. Asikaya ninda sanga wai tupa tasikumang kaknga dua bitateke asinggan tasinim ba dasing? Ninda waiakngane sukuwatnanu maminda sanga Anutue iman kake wai waaknganinu sandetnimik? Wena siknga.
HEB 10:27 Ninda kumzang siknga gwauke tapduknga ninda wam yanim gwenda apikge kayutnim. Ngan. Aminu Anututane iwana dakngake yutningu kuupbam Anututa apasiwan maining. Unzing katau toknga siknga gwenda sanga kuupbam yasiwan puyukgak binga ita wa amin pasiwan mainingge akgwauke yutnim.
HEB 10:28 Ninu atnataamang. Aminu tapatuta Mosesdane mama wam sandewik. Sandewan kakengu aminu tapaaya ba tapaat tapatuatda wamu atemapa yaning. Yawa siakan siwan kakengu aminu waapae butaya dua natapning. Aho. Tupan tapata yawan aminu waapa atanguwa kupik.
HEB 10:29 Siwan aminu Anutue waakngatane umana yaitapaakusiwik kapae ginu dasing nataaing? Asikaya Anututa aminu waapae butaya natapik ba dasing? Sike Jesutane dakngata aminu waapa gatangaman waapata Anutue nomune amin noman dakngakut ngana dau waakngae natapan sanga mooi binga siwik. Siwan Waungu musip kwikwikgane yapii apae masa imuke asapdukngamanu aminu waapae Anututa butaya dua natangamik. Aho. Ita aminu waapae toknga kwaapzang asimik.
HEB 10:30 Ngan. Wamu takngatu anzing yuak, “Nata nina aminu wai tasikingge toknga yake yamit. Puya toknga yake yamunanga wa puya natane.” Siwan wamu unzing yakut tapae ninu atnataamang. Sike wamu takngatuat anzing yuak, “Buyambam tapata inane aminabamdane wamna usanziwik.”
HEB 10:31 Siakan. Anutu kayuu asinggan yuak kapata ninde toknga nimunangge natake nin panggaganuwikge ninda kumzang siknga gwautnim.
HEB 10:32 Siwan ngana ginda tapduu Anututa gindane musipza papan kakaakut gwende natapnong. Ginda Anututane kakaa akngane take sukuking ngana tapduu waomune gindane iwanzata enake sipduine ginde meya buyambam damuking. Dama pake ngana ginda akekekake dua pimaking.
HEB 10:33 Ngan. Meya buyambamu aminbamde kaine ginde danisapduke toknga takngatu takngatu ginde damuking. Sike wa aminda Jesue amina kundue toknga takngatu takngatu yamuwawa ngana ginda gisae gupzae dua gwauke notza toknga pakingu waakwau gatayamuking.
HEB 10:34 Ngan. Ginda aminu toknga yamuke kaautde pewa yukingge butaya natapbing. Siwan sipduine gindane iwanzata enake gindane sangasa sandeke pandama ngana ginda kake ie meya dua natapbing. Aho. Ginda sanga take siknga kekeknga asinggan yutdamunggakge apbakngake wa aminu kapewa yuking.
HEB 10:35 Sike tapduu waomune ginda Anutue kekeknga wa natayuking kaknga ma tewam. Aho. Anutue kekeknga natayukingu waakngata ginu take siknga gatandamik.
HEB 10:36 Unzingge aminda toknga ginde dama pakengu ginda wikake kekeknga yutnong. Yuke ginda Anututane banip tawanong. Tawake ginda sanga tupa Anututa gin gatandamunangge yawan kekekakut taknga apaning.
HEB 10:37 Ngan. Anututa wamu takngatu anzing yakut, “Aminu wa asapnanga apata tapduu mamaya dua yuwik. Aho. Tapduknga ita apik gwenu gwa dapakanggak.
HEB 10:38 Ngana natane amin nomana ita na nandukusike yuwik. Sike ngana ita nae natake nitda moo kukamak ngang natake iwanae akgwaubanu nata waapae natapa take dua siwik,” ngang yakut.
HEB 10:39 Siwan ninu akgwauke Anutu dua kakusike yuaing amin binga dua dakngake yuamang. Aho. Wa aminda Anutue masa imuke waiakngaatang pimaning. Siwan ngana ninda Anutu kakusike yuwatna ita ninu akgatanimik.
HEB 11:1 Siwan Anutue natapa kekekawan ie natanggamatake yuaing aminda dasing tasining? Wa aminda sanga apmea aawikge bakngake sanga waakngata asaawik ngang natapa kekekawan natayutning. Ngan. Buya dua aawan kake ngana apmea asaawik ngang natapa kekekawik.
HEB 11:2 Ngan. Aminu tupa siknga yukikat nana Anutue natapa kekekakuu wa aminde Anututa natapan take sikut.
HEB 11:3 Siwan ninda Anutue natapna kekekawan ninda anzing nataamang. Ena kakaa banakan kopat gatu kepdakau Anututa ina yawan aake yuaing. Ngan. Sanga kuupbamu ninda kaininda kaamangu wa Anututa sanga ninda dua kaamangga pake tasikut ngang natapna kekekanggak.
HEB 11:4 Siwan tupa siknga Ebelda Anutue natapan kekekawan ita sangana ie imukut. Iman kake Anututa ie natapan take sikut. Siwan Ken kaya kuutda sangana Anutue iman kake ngana Anututa sanga wa imukutde natapan take dua sikut. Ngan. Ebelda Anutue natapan kekekakutde Anututa ie natapan amin noman sikut. Siwan sanga wa Ebelda imukutde natapan take sikut. Siwan Ebelda yuke akumbut ngana ita Anutue natapan kekekakuu waakngata nindane musipmin pangenawan natanggamatakamang.
HEB 11:5 Siwan Inokga Anutue natapan kekekakutde ita dua kumbut. Aho. Ita kayuk yuwawan Anututa gupna buyak enandang takopbut. Takopan itane notnata gupna sande atawamba maikut. Dasingge? Anututa gupna buyak takopbut. Siwan wamu Anututane wapatangu aminu tapatuta Inokge natake anzing matakut, “Tapduknga Anututa dua takopbut komune Anututa ie natapan take sikut,” ngang matakut.
HEB 11:6 Siwan aminu tapatuta Anutue dua natapan kekekawiu waapae Anututa natapan take dua siwik. Wena. Aminu tapatuta Anutue wesim kunangge natakengu waapata Anutue natake ita ayuak ngang natapan kekekayok. Ngan. Ita natake nata Anutue kunangge natanggamatake tasiwawa ita na akgatangamik ngang natapan kekekawanu waapata Anutue wesimu take kuwik.
HEB 11:7 Siwan Noata Anutue natapan kekekakutde ita wamu Anututa inike meya takngatu masan aawikge iniwan natapan siakan sikut. Ngan. Wamu waakngata buya dua aakut komune Noata Anutue gwauke itane wam gwaamuke ita siu buyambam siknga gwendu tasikut. Tasiwan puyuwan iat gatu ina paandakan siu wagwene koke takekan yuking. Sike ita unzing tasikut takngata aminu sip gwene kopnangge apbitakingu wa kuupbamdane waiakngana papan tapbing. Siwan Noata Anutue natapan kekekawan puya waaknga tasikutde Anututa ie natapan amin noman sikut.
HEB 11:8 Siwan Ebrahamda Anutue natapan kekekawan Anututa yatawake keu komdu ie imik komune initewan kuwikge inikut. Iniwan natake Ebrahamda undang kukut. Ngan. Anututane gen gwaamuke ita inane dak kep teke keu komdune kukut. Ita kepiapane kusika keu Anututa nae namunangge yakut komu zandang yuak ngangu dua natake kukut.
HEB 11:9 Kuke ita keu Anututa ie imunangge yakut komune yuke apmea Anututa keu aomu nae atnamik ngang natapan kekekakut. Sike ita keu wa komune aminu pakapuyut amin binga dakngake yukut. Yuke ita you sel dakandakata mitake iat gatu waaknga Aisak gatu Aisakgane waaknga Jekop ngangga yuking. Sike waaknga bapuna waapaau inandek inandek Anututa yanike keu wa komban yamunangge yakut.
HEB 11:10 Siwan Ebrahamda you sel daka dakatakan mitapbuu wa ita yot bamu gapmandue natanggamatake tasikut. Ngan. Yot bam gapma Anututa ina mitake tapan kekekanggau wa gapmane kunangge natanggamatakut.
HEB 11:11 Siwan Serata tapduknga engang tangaitnanga komu wena gwa sikut. Siwan ngana Anututa i gatangamunangge iniwan natake ita wamu waakngae natapan siakan sikut. Siwan Anututa kekekangaman engang tangaikut.
HEB 11:12 Unzingge Ebrahamu aminuake sike kumnanga dapaknga gwa sikut ngana Anututa gatangaman ita waak zak tasiwan maatna Serata engang tangaikut. Tangaiwan waak zak sitake kuku kwaapzang siknga singgak. Siwan ninda kendetnanga dua. Unzing yekapdaak ba saisai yanggabam gwene nana kendetnanga dua binga ninda aminu Ebrahamdane dongune aakingu kuupbam kendetnanga dua.
HEB 11:13 Siwan aminu waakwau kuupbamda Anutue natapa kekekawan yuke kumbing. Sike dua kumbing komune wa aminda ayuwawa wamu Anututa gatayamunangge yakut takngata buya dua aakut. Aho. Sanga nin gatanimunanga akngata maa yuwan kakengu ninda apbakngakamang. Ina unzakan wa aminda Anututane wamu waakngata buya apmea aawikge natanggamataking. Natanggamatake buya asaawik ngang natapa kekekawan wa aminda anzing yaking, “Ninu kepdakane yuamangu unzing keu komdune nana aminda pakapuyut binga dakngake yuamang,” ngang yaking.
HEB 11:14 Sike wamu aminu waakwakga yakingu wa ninda natake wa aminda inane kepna siknga tanangge yakaing ngang natapnim.
HEB 11:15 Sike wa aminda keu tupa teke apbing kom tanangge dua yaking. Keu waomde yaking gamu wa aminda gatuna une akuwam.
HEB 11:16 Ngana wa aminda keu waom tanangge dua yaking. Aho. Keu waomu take ngana keu take siknga komdu enandang yuakge natake wa aminda musia tewa undang kukut. Unzingge Anututa yot bamu gapmandu wa aminda yutningge gwa tandakngatekut. Tandakngatekutde wa aminda ga nindane Anutunin ngang ininingge Anututa semna dua nataak.
HEB 11:17 Siwan Anututa Ebraham tasiwan siwan ngana Ebrahamda Anutue natapan kekekawan itane gen gwaamukut. Gwaamuke ita inane waaknga Aisak initakuke Anutue imukut. Ngan. Tupa Anututa Aisau waapae natake ita Ebrahamu anzing inikut, “Aisakgane dongata waak zak sitake kuku aminu kwaapzang aatning aminda gatane donggabam daknganing,” ngang yawan kekekakut. Siwan wamu waakngae natapan siakan siwan Ebrahamda Aisakge anzing natapbut. Nata Anututane gen gwaamuke natane waaknga waapa Anutue imunangge atanguwa kupanu undanga. Anututa gatuna i take tangenawan gweake kayuk yuwik ngang natapan kekekakut. Natapan kekekawan Ebrahamu waapa Anututa wamu wa Aisakgane dongae natake iman takut tapata waaknga awia waapakan initakuke Anutue imunangge tuwanguke tasikut. Tasiwan ngana Anututa yawan Ebrahamu waapata Aisau paa tanguwan kumbut takngane sandeke gatu takut.
HEB 11:20 Siwan masana Aisau waapata Anutue natapan kekekawan ita inane waaknga tapaaya Jekop gatu Iso ngangge wam kwikwiu Anututa apmea gatayamikge natake yanike yawan kekekakut.
HEB 11:21 Siwan masana Jekou waapata Anutue natapan kekekawan yuke tapduknga ita akupikge dapaknga siwan ita wam kwikwiu inane bapuna Josepdane waaknga apaatde yamukut. Yamuke ita gusokangan yuke gwetake Anutue inimbakngakut.
HEB 11:22 Siwan masana Joseu waapata Anutue natapan kekekawan tapduknga ita akupikge dapaknga siwan ita wamu masande inane notnabamu Isreltane dongune aaking aminda Isip kep kom teke kuningge natake yakut. Yake ita wamu takngatu wa aminda itane kwatai take apmea tapduu komdubamu yukengaa keu wa kuning komune kwainingge yanikut.
HEB 11:23 Siwan Mosesdane nana mingata Anutu kakusike yukumayak. Kakusike yuke mingata Moses tangaiwan kawat engangu take siknga apa sikut. Siwan nana mingata i yekau gweaat gwenduat takusopuke wamu tupan tapata yake engangu wawi apaapa zipa kumningge yakut taknga sandetnangge dua gwaukumayak.
HEB 11:24 Siwan Mosesda buyambam takake ita Anutue natapan kekekakut. Sike tupa aminu tupan tapatane yapanata i tapan maya waapatane waaknga binga dakngakut. Ngana Moses waapata aminda ie maya waapatane waaknga ngang ininingge apbitakut.
HEB 11:25 Ngan. Ita maya waapatane waaknga dakngake yukut ngana ita Isip nana amikat gatake yuke sanga wai takngatu takngatue apbakngake tawake tapduknga dapaknga yuke kupikge apbitakut. Apbitake ita Anutu kakusike iat Anututane aminabapat gatake yuke meya takngatu takngatu Isip nana aminda yama paningge dua gwaukut. Wena.
HEB 11:26 Ita Anutu kakusike apmea Anututa na akgatangamik ngang natake Isip nana amindane sangaapana kwaapzang ngana ie natapan sanga moo binga sikut. Siwan sanga panangge bitake ita Anututane aminabamu iwanatane kataune sandewikge maaknga aknga Isip nana aminde kaine tapikge dua gwaukut. Aho. Ita maaknga wa tapik kakngae natapan sanga take siknga binga dakngakut.
HEB 11:27 Ngan. Moses waapata Anutue natapan kekekawan ita enake Isip kep kom teke kuwawan Isip kep komune nana amindane tupan tapata musia toknga natapbut. Ngana Moses waapata Anutu ninda kaininda kananga dua apa kakusike ita tupan aminu waapae dua gwaukut. Dua gwauke ita akekekake kukut.
HEB 11:28 Ngan. Moses waapata Anutue natapan kekekawan ita Anutue gen gwaamuke tapduk takwanu umana Pasova ngang inikamang gwen tangenakut. Tangenake ita wamu Isrel nana kuupbamda kaapdane dak pake yot gwegwendane gwabok gwakgwau kwaimune pasiwa pimaningge yanikut. Yaniwan dak pake pasiwa pimakingu wa angelata wawi tupan aaking kapaapa kukgan zipnangge apuke ngana waapata dau wa kake Isrel nana amin yapbike Isip nana amindekan kuwikge natake tasiking.
HEB 11:29 Siwan Isrel nana kuupbamda Anutue natapa kekekawan wa aminda Isip kep kom teke yanggabam gwenu umana Yangga Gamana Gwen ngang inikamang gwenu banakan dakngake kuwan keu wawaa daka binga siwan kuking. Kuke yangga tang gwekatang pukuke kautdu saak kopbing. Kowawa kake amak aminu Isip nana akwakga apanggaganutnangge isapmake yangga wa gwenu banakan keu wawaa wandakane kuking. Kuwawa ngana yanggata gatu apu usikwatapan wa aminu yangga tangoke apmepmekoke akumbing.
HEB 11:30 Siwan masande Isrel nana aminu waakwakgane zakngita enake wa aminda Anutue natapa kekekakut. Ngan. Wa aminda iwanaat amnangge natake Anutu kakusike ie gen gwaamuking. Gwaamuke tapduu katau kuut musa kautdu gweaya ngangu kepi kuke Jeriko yot gapmae damanu supda tasiking gwenu atakubasiking. Takumbasiwa puyuwana sup damanu wa gwenda ina awaike pimakut.
HEB 11:31 Siwan ngana tupa Isrel nana aminu tapaata you wangapma wepda kanangge kusopuknga kukumayak. Kuwawat maya you wangapmane nana tapatu umana Rehep ngang iniking kapata you gwendu aminu maata apningga petnanga gwen kayukut. Sike waapata Anutu kakusike aminu wa apbumayak kapaat gatayamukut. Unzingge tapduu you wangapmatane daman gwenda waike pimakut gwene Isrel nana aminda akoke aminu yamandet sikingu kuupbam atzipa kumbing. Zipa kungwawa ngana maya waapa gatangama wai dua sikut.
HEB 11:32 Siwan nata wamu zaaknga ngwakngake yawit? Nata wamu aminu Anutu kakusike yukingu kuupbamde yawanu wamu mamaya siknga siwik. Siwan Anututane wam yanikapsa aminu kundu umana Gidion gatu Berek gatu Samson gatu Jefta gatu Devit gatu Samuel ngang yanikingge wamu zaaknga yawit? Ngan. Anutue wam yanikapsa aminu kuupbamde wamu zaaknga yawit?
HEB 11:33 Wa aminda inandek inandek Anutu kakusike aminu buyambam tapaapa kwaapzanggane amak aminu ayaipapaakusiking. Yaipapaakusike wa aminu katak siknga kayuking. Kayuke wa aminda wamu Anututa wa amin gatayamikge yawan kekekakut taknga buya aawan kaking. Siwan kaapzongu buyambamu gwendui umana laion ngang yanikamang gwegwenda wa amin yasinangge tasiwa ngana wa aminda Anutu kakusike yuwawa dua yasiking.
HEB 11:34 Ngan. Wa amikat nana kundu katapbapatang sawa yasiningge tasiwa ngana wa aminda Anutu kakusike yuwawa katapda dua yasikut. Siwan wa amikat nana kundutane iwanata enake zagwa ba paipda zipa kumningge tasiwawa ngana wa aminda Anutu kakusike yuwawa dua zipbing. Tupa wa aminu tuyukngata yuking. Siwan ngana masana wa aminda Anutu kakusike kekekngana kaya dakngake yuking. Ngan. Wa aminda kekekngana kaya dakngake yuwawa iwanata enake amnangge apbing. Apa kake amak aminu waakwau atzipmake yawamba datakuking.
HEB 11:35 Siwan aminu waakwakat nana kunduta akumbing ngana wa kumbing amindane minga ba maatna ba samina ngangga Anutue natapa kekekawan aminu akumbingu gatuna enaking. Siwan iwanata enake aminu waakwakat nana kundutane gupna asiknga pasiwa maiwa wa aminu akumnanga siking. Sike wa aminda masa Anutue imanu iwanata wa aminu asandeke pewa kuning. Ngana wa aminda Anutu kakusike iwanae wamu dua tawaking. Aho. Wa aminda natake ninda Anutue kekeknga yuke kumnanu apmea Anututa ninu gatuna pangenawan ninda take siknga yutnim ngang natake yuwawa zipa kumbing.
HEB 11:36 Ngan. Wa amikat nana kundu iwanata sapduyamuke asipmapa zipbing. Sike kundu panggaganuke sen takngata wambing. Sike kundu kaautde peking.
HEB 11:37 Sike kundu supda zipnangge muyawaking. Sike kundu panggaganuke so aknga pake wa amindane gupna matdakngaking. Sike kundu zagwata zipa kumbing. Siwan wa amikat nana kundue meya takngatu takngatu yamuke sangaapana kaiwa kuwa payamuwawa wa aminda gupdane sanga kuupbamde atdapbing. Atdapmake wa aminda sipsip ba memenggane gupna taukge binga wambing. Wamake kepiapane kuwawa aminda toknga yamuke pasiwa maiking.
HEB 11:38 Ngan. Wa aminda unda undang kuke keu amina wena kopatang kusopuke yuking. Siwan gatu mekngan katang kuke sup gapbat katang yuking. Siwan ninda wa aminde natapna amin gwaang siknga singgak. Siwan wa aminda aminu waiakwakat gatake yuwa take dua siwik ngang nataamang.
HEB 11:39 Ngan. Wa aminu kuupbamda Anutue natapa kekekakutde umana take siknga aknga Anutue kaine taking. Siwan ngana wa aminda kayuk yuke wamu Anututa tupa wa amin gatayamikge yakut takngata buya dua aawan kaking. Aho.
HEB 11:40 Tupa siknga Anututa sanga take siknga ninde tandakngatekut. Sike ita wa aminde natake nikat gatu wa amikat kuut sanga wa tapduu gwendune apmea unekan gatake yuke panimde natapbut. Natake wa aminde tupan gamok dua yaman paking.
HEB 12:1 Siwan ninu dasing natapnim? Aminu wa tupa yukingge natake aminu kwaapzangga ninde sanga Anutu kakusike yutnanga aknga yeutnimuking ngang natapnim. Natake ninda sanga meya gatu waiakngata nin pakaing kaknga atenim. Teke kepi ninda tawake tasinimde natake Anututa tupa yakut taknga tawake tasinim.
HEB 12:2 Tasike ninda Jesue natanggamatake kepi ita katak siknga tawake tasikut taknga tawake tasinim. Siwan Jesu waapata amin saamdakane kupikge dua gwaukut. Aho. Ita Anutu kakusike Anututa i gatangaman apmea take siknga yuwikge apbakngakut. Bakngake ita maaknga amin saamdakane kungwake tapik kakngae natapan sanga kwanga moo binga sikut. Siwan apmanu itane umana buyambam siknga siwan ita Anutu nin ninduyuak kapatane katakngi siyaapa saak pukwike yuak. Sike waapata Anutue natapan kekekawan tasikuu wa ita aminu Anutue natapa kekekakuu kuupbam yapbike Anutue asiknga natanggamatake tasikut. Sike ita unzing tasikut takngata nindane musipmin pangenawan ninda Jesu katasike nikaya kuut Anutue natanggamatake tasinim.
HEB 12:3 Siwan ginda Jesu waapae natanggamatanong. Tupa aminu kunduta enake Jesutane iwana siknga dakngake i yaitapaakusinangge tasiking. Tasiwa ngana ita kekeknga siknga yukut. Siwan ginda ie natanggamatakengu gindane musipzaatangu tuyuknga dua natapning. Ginda tuyukake itane kepi tenangge dua natapning. Wena siknga.
HEB 12:4 Asikaya ginda sanga wai kuupbam yaipapaakusinangge pasiwawa iwanzata enake ginu dak dasipbing ba dasing? Wena.
HEB 12:5 Ba asikaya ginda wamu takngatu ginu Anututane waaknga binga dakngakingge yakut takngae gwa botaking ba dasing? Siwan wamu wa anzing, “Ginu natane waaknga! Buyambam tapaninu Anututa gindane natdetdetza papan nomataningge tasiwanu ginda undanga ngang ma natapam. Ngan. Ita meya takngatu ginde damanu ginda musipzaatangu itane kepi atenangge ma natapam.
HEB 12:6 Ginu atnataaing. Buyambam tapaninda musip gwaangu aminu tapatue natangamukengu ita aminu waapatane natdetdetna atapan nomatawik. Ngan. Aminu tapatuta itane waaknga binga dakngawanu ita aminu waapa atanguwan natdewik.”
HEB 12:7 Siwan meya ginda pakaingu wa Anututa gindane natdetdetza papan nomataningge natake aminu kundu kapewan wa aminda meya wa ginde damuwawa pakaing. Pake ginda natake Anututa ninde natapan itane waaknga siwan tasinggak ngang natapnong. Natake ginda meya wa pakengu ginda itane kepi atenangge ma natapam. Asikaya nanata inane waatdakana dua panomanuwik ba dasing? Asinggan panomanukaing.
HEB 12:8 Ina unzakan Anututa aminu inane waaknga yapana binga dakngake yuaingu kuupbam apanomanukgak. Siwan ita ginu dua panomanuwan kakengu ginu itane waaknga siknga dua ngang natapning. Anututa ginde natapan ginu nanza wena akwak ngang binga natake ita ginu dua toikgak ngang yaning.
HEB 12:9 Siwan gatu wamu waaknga ngwakngake nata ginu daniwa natapnong. Nindane naninda ninu papa nomatake natdeke ninda wa amindane gepbiatang yuke ie gen gwaamukumang. Sike apmanu ninda Naninu enandang yuke ninu inae pakut tapatane gepbiatang yutnangge asiknga bakngake takekan yutnim.
HEB 12:10 Ngan. Nindane naninda ina banipda siwan tapduu dapaknga komune ninu panomanukut. Ngana Anutu waapata nin panomanukgau wa ninu asiknga gatanimikge tasinggak. Tasiwan ninda itane kepi nomana siknga akngae natdeke tawake tasinimde tasinggak.
HEB 12:11 Siwan ita nindane natdetdetnin papan nomataningge tasiwan meya pakengu ninda dua bakngakamang. Aho. Tapduu waomune ninda meya buyak yuamang. Sike ngana masande meya waakngata ninu panomanuwan anggaman natdetnim. Natdeke ninu kwikwikngata yuke kepi nomana siknga akngane sukunim.
HEB 12:12 Siwan gindane katakza moosa pewa yuaingu ginda pangenake puyasa pasinong. Ngan. Gindane munza atuyukawa yukengu ginda gatusa ngwakngake kunong.
HEB 12:13 Kuke ginda kepi nomana akngane sukunong. Ngan. Gindane kepisa tapatuta wai siwanu ginda akindumuke nindane muninda gwapzitnanga ngang natake ginda keu gapmenekan sukunong. Sukuwawa gindane kepisa gatuna take sining.
HEB 12:14 Siwan tuwang wamu nata wa yanggau ginda aminu kuupbamde musipza kwikwiknga natayamuningge natake yanggat. Ngan. Ginda kepi nomana siknga akngane sukunong. Unzingu dua sukukengu ginda Buyambam tapaninde wesimu kunanga dua. Wena siknga.
HEB 12:15 Sike ginda gisae katak tagwautnong. Aminu gikat nana tapatuta wamu Anututa ninde musip kwikwik natanimuke yakut takngae masa imuyak ngang natake tagwautnong. Ngan. Aminu gikat nana tapatuta masa wamu waakngae imukengu waapata enake gindane natdetdetza apasiwan maiwik.
HEB 12:16 Siwan aminu gikat nana tapatuta sanga yasewa aknga ma tasiwan. Ba sanga Anututane akngae natapan sanga moo siwan ita sanga tupa siknga Isota tasikut taknga tawake ma tasiwan. Ginu atnataaing. Tupa Anututa wamu Isotane nana gatangamikge yawan kekekakut. Siwan wamu waakngata buya aawana masande Iso waapata nanatane kwatangi pakengu ita Anututane wamu waakngaaya kuut papikge yakut. Ngana nanamu sipdukan panangge natake sanga wa masana papiu kuupbamde masa imuke yakut.
HEB 12:17 Yake ngana masande ita musia tapan tekwamban sanga ie masa imukuu wa atanangge yakut ngana kepi wena. Ngan. Ita sanga wa tanangge musiaatangu toknga siknga natake kwanam siwan ngana itane nanata kotnake Iso waapata tapikge dua yakut. Wena.
HEB 12:18 Siwan tupa tawanu Sainai dakane kuke katakngata wasinanga akngae natake kuking. Ngana apmanu ginda sanga wa bingae dua kukaing. Siwan tupa siknga Isrel nana aminda tawanu wandaka wesim kuke kawawa katau buyambam gwenda isiwan kaking. Kawawa gatu zikaa siknga siwan gou kekeknga puyapan kaking.
HEB 12:19 Kake wa aminda nataawa gakngau pum puyanggak binga siwan natapbing. Nataawa wamu takngatu inata kundu Anututa yawan natapbing. Natake wamu wa binga masande natapningge apbitake yaking.
HEB 12:20 Siwan wamu Anututa wa yakuu ita anzing yakut, “Aminu tapatuta katakngita tawanu andakane wasiwan kakengu ginda waapa supda muke tanguwa kupsok. Siwan gindane kaau gwenduta undang kopan kakengu ginda wagwen kaya kuut tanguwa kupsok,” ngang yakut.
HEB 12:21 Sanga kumzang gwautnanga akngaakngata tawanu wandakane aawan kake Mosesda anzing yakut, “Na kumzang siknga gwauba na dandana asiknga yamukgak,” ngang yakut.
HEB 12:22 Siwan ngana ginu sanga wa bingae wesimu dua kuke yuaing. Aho. Ginda yot bamu gapmandu Anutu kekeknga siknga apata yuak gapmae natanggamatakaing. Siwan you wanggapmae natake yot bamu umana takngaaya Jerusalem gatu Saion ngang inikamang gapmae tuwanguke yanggat. Siwan yot bamu wa enandang yuak gapmane angela kwaapzang sikngata yuaing. Siwan gikat angela waakwakatda Anutue gepbiatang koyuaing.
HEB 12:23 Siwan aminu Anututane waaknga tupan dakngakingu wa amindane umana enandangu gwa matakut. Sike wa aminda yot bamu wangapmane yuke apbakngakaing. Siwan ginda wa amikat dongu takngatukan dakngake yuaing. Ngan. Ginda Anutu ninu kuupbam ninduyuke aminu kuupbamdane wam usanziwik kapae kuking. Kuke ginda aminu nomana akwau enandangu Anutuat gatake takekan yuaing amikat dongu takngatukan dakngake yuaing.
HEB 12:24 Siakan. Jesu waapata wamu kayuu Anututa nin gatanimunangge yakut taknga takapbut tapae ginda gwa kuking. Siwan ita wamu wa Anututa yakut taknga takapuke tapan kekekawikge natake Jesuta ninde tangge kungwanimuke inane daknga tukngwakut. Siwan ginda sanga waakngae gepbiatang koyuaing. Dasingge? Tupa siknga Ebelda kungwake daknga tukngwakutde aminu kunduta enake yake tangutnangge yaking. Ngana Jesuta kungwake daknga tukngwakutde ninda enake kepi Anutue wesim kunanga akngane sukukamang.
HEB 12:25 Siwan Anututa wamu takngatu gin daniwanu ginda maakza ma umukusiwam. Ginu atnataaing. Tupa siknga Anututa wamu kekeknga siknga Mosesde iman pake ita aminbamde yanikapbut. Yanikapan natake ngana wa aminda Moses waapae masa imuking. Masa unzing imukingge wa aminu kuupbamda toknga pananga aknga dua yapbike wa aminda toknga apaking. Siwan apmanu Anututa enandang yuke wamu kekeknga ninde nimunggak. Asikaya aminda ie masa imik kapata toknga pananga aknga ayapbimbik ba dasing? Aho. Ninda ie masa imukengu ninda toknga siknga apanim.
HEB 12:26 Tupa Anututa wamu kapzang yawan kep tapa ayamukut. Siwan apmanu ita wamu anzingu gwa ninikut, “Apmea nata gatu sipduat kepdaka gatuna tamakaiwit. Tamakaike nata kepdakaat gatu sanga ena kakaa banakan komune yuaikat kuut pamakaiwit,” ngang yakut.
HEB 12:27 Siwan wamu “sipduat gatuna pamakaiwit” ngang yakut takngae natake ninu anzing natapnim. Anututa sanga kundu pasiwan wena sining. Ngan. Sanga tupa tuwanguke tasikuu kuupbamda wena sining. Wena siwa ngana sanga kundu kekeknga siknga yuaingu wa pamakaitnanga dua. Aho. Kekeknga asinggan yutning ngang natapnim.
HEB 12:28 Ngan. Anututa ninu inae panangge tasinggak kakngae gepbiatang koyuamang. Koyuwatna aminu tapatuta sanga waakngane ninu sandetnanga dua ngang natake ninda ie kekeknga asinggan yuke apbaknganim. Ninda ie inimbakngake itane umana yatangenake kepi ita take nataak kakngane sukunim. Sukuke ie akgwauke itane puyana tasinim.
HEB 12:29 Dasingge? Katau buyambam siknga gwenda sanga kwaapzang yasiwan puyuwik. Ina unzakan nindane Anutuninu waapata sanga wai kuupbamde musia toknga siknga natayamuke apasiwan maining.
HEB 13:1 Unzingge ginda gisane notza Jesuat nana aminde musip gwaangu asinggan natayamunong.
HEB 13:2 Natayamuke aminda maata apa kakengu ginda gisane yotzane pakopningge wamu ginda ma botawam. Ginu atnataaing. Tupa angela kunduta apa kake ngana aminu kunduta maata apukaing ngang natake aminu kunduta yotnane pakoke gatayamuking.
HEB 13:3 Siwan gindane iwanzata enake notza Jesuat nana aminu kundue toknga yamuke kaautde pewa yuaing aminde ginda natapnong. Meya notzata wa pakaingu gikat kuut binga pake natanggamatanong. Ngan. Notza meya takngatu takngatu papa kakengu ginda gisae gupde akgwauke meya wa pakaingu gikat kuut binga pake natanggamatanong.
HEB 13:4 Sike ginda sanga apna maatna papsa akngae natapa sanga take siknga siyok. Siwan apnaat maatnaatda unekan takekan yutnong. Ginu atnataaing. Sanga yasewa aknga tasining amindane wamu Anututa usanzike ita wa aminde toknga ayamik.
HEB 13:5 Siwan ginda manie ma geenguwam. Ngan. Sanga ginda pakaingge natake ninda sanga nisaapmang pakamang ngang yanong. Dasingge? Anututa anzingu gwa yakut, “Nata ga dua gapmambit. Siakan. Nata gae masa dua gamit. Wena siknga,” ngang yakut.
HEB 13:6 Unzingge ninda nisane musipmin tana kekekawan anzing yanim, “Buyambam tapaninda na akgatangamunggak. Nata waapa kakusike aminu na tasiwa pimapit aminde na dua gwaumbit. Wena,” ngang yanim.
HEB 13:7 Siwan ginda gindane take aminzae natapnong. Tupa wa aminda Anututane wamu ginde danikapbing. Wa aminda Anututane kepi akngane sukuke tasiwa buya aakutde natapnong. Sike wa aminda Anutue natapa kekekakutde natake ginda ina unzakan tasinong.
HEB 13:8 Sike ginda Jesu Kraisde natapnong. Waapata asinggan asinggan yuak. Yuke ita natdetdeu tupa natapbut takngae dua bitatewik. Aho. Tupa gatu apman gatu apmea ngangu waapata natdetdeu takngatukan natake tasinggak.
HEB 13:9 Unzingge ginda aminu kundu dua kapewa wa aminda mama wamu inata kundu takapuke gindane natdetdetza kaipakuke pasiwan maining. Ngan. Wa aminda mama wamu inane musiaatang natake sanga wa takwan! Ma napam ngang yakaing. Siwan ngana mama wamu wa bingata wa aminu dua gatayamuking. Wena. Siwan wamu Anututa musip kwikwiu ginde natake gin gatandamunangge yakutde natanggamatanong. Sike natdetdeu waakngata ginu take siknga papan kekekaning.
HEB 13:10 Siwan aminu Anututane yot takwan gwene pasiya aminda kepi Anututa waiaknga sandetnanga aknga nakan bamu asinggan tasikaing. Tasike wa aminda sanga Anutue imunangge natakengu kaau gwendu tanguwa kupan Anutue imuning. Imuke puya aminu waakwakgane tupan tapata dak pake yot takwan siknga gwene pakopik. Pakoke tasiwan kake Anututa waiakngana sandekngamikge tasiwik. Tasiwan puya aminu kunduta kaau wa dua sake naning. Aho. Wa aminda kaapdane sapbiat gupnaat ngang pake yot gapma teke epu kuke kepmakatang katapda sawa yasikuke muyup daknganing. Siwan aminu kepi waaknga tawake tasikaingu Kraisda wa aminu dua toimbik. Wena. Ngana ita ninde tangge kungwanimuke kepi nindane waiaknganin sandetnanga aknga atasinimukut. Ngana sanga wa ninde tasinimukut taknga wa aminda tananga dua. Wena.
HEB 13:12 Siwan wa aminda kaap pake yot gapma teke epu kuke kepmakatang katapda sawa yasikaking. Ina unzakan aminda Jesu initakuke Jerusalem yot gapma teke epu kuke kepmakatang i tanguwa kumbut. Sike ita kumbuu wa ita inane dak pake kepi ninu kuupbamda Anutue wesim kunanga aknga tasinimunangge tasikut.
HEB 13:13 Unzing tasikutde ninu Isrel nana aminda nisane daman gwen teke epu kuke kepmakatangu Jesue kunim. Siwan Jesu inikwasiwa kepman kuke ita apmaakakut. Ina unzakan ninda ie kuke yutnanu aminda nin ninikwasiwa kuke apmaakanim. Apmaakake ngana ninda ie meya dua natapnim.
HEB 13:14 Ninu atnataamang. Keu ayuamang komune ninda asinggan dua yutnim. Ngan. You ayuamang gapmane ninda asinggan dua yutnim. Aho. Apmea ninda yot bamu gapmandune kuke wangapmane asinggan yutnim. Sike ninda you wa gapmane kunangge natanggamatakamang.
HEB 13:15 Unzingge ninda sanga Jesuta nin gatanimukutde natake Anutue asinggan asinggan inimbakngana ita nindupan take siwik. Ngan. Ninda nisane geninda yake itane umana aknga yakapmake asinggan asinggan tasinim.
HEB 13:16 Tasike ginda wamu amin gatayamunanga aknga ma botawam. Ngan. Gindane sangaapasa dua kotnake notzata sangae atdapa kakengu ginda wa amin gatayamunong. Ginda unzing tasiwa danduke Anututa ginde take siknga natapik.
HEB 13:17 Siwan gindane take aminzata ginde asinggan danduyuaing. Danduyuke ninu masande wamu puya kuupbamu ninda tasikamangge Anutue yakapnim ngang natake kwatan tasikaing. Unzingge ginda wa aminde gepbiatang yuke wa aminde gen gwaamutnong. Sike ginda unzing tasiwanu wa aminda apbakngake puyana gitna taning. Ngan. Wa aminda gin danduyutnangge musia meya dua natapning. Wena. Siwan ginda wa amindane wamu dua gwaamuba kakengu wa aminda gin danduyutnangge musia meya natapning. Natake ginu take yutningge dua tasining.
HEB 13:18 Sike ginda Anutue tumuk wam iniwa ita na gatangamik. Dasingge? Nata nina natapa natdetdetna kakaa siknga singgak. Siwan nata kepi noman gan tapduk bamu asinggan sukunangge nataat.
HEB 13:19 Natake ginda Anutue tumuk wam iniwa ita na nanitakuwan nata ginde zetgaman apitde musipmaatangu toknga siknga nataat.
HEB 13:20 Siwan Anutu waapa musip kwikwikge yapii. Tupa ita wam kwikwiu nin gatanimikge yakut. Siwan wamu wa yakut taknga tapan kekekawikge Buyambam tapaninu Jesuta ninde tangge kungwanimuke daknga tukngwakut. Daknga tukngwamban ngana Anututa akumbut katangga gatuna tangenakut. Tangenake yawan Jesu waapata ninu Anututane aminabam ninduyuak. Ninduyuwawan ninda ie natapna nindane tupan sikngaapa singgak.
HEB 13:21 Siwan nata tumuk wamu Anutu waapae iniwa ita gin gatandaman ginda itane banip tawake puya nomana tasiwa buyambam siwik. Ngan. Ita sanga ina take nataak kaknga ninu kuupbamde banakan pasiwan buya aatningge natake ininggat. Siwan sanga wa aatninggane yapii Jesu Krais unin. Itane umana aknga ninda asiknga yatangenatna enane siknga asinggan asinggan yuwik. Siakan.
HEB 13:22 Siwan mate notnabam! Wamu nata pas asane matanggat takngata gindane musipza papa kekekawikge ginda maak gwaang pake natapnong. Asikaya nata wamu mamaya pas asane matanggat ba dasing? Wena. Wamu dapakngakan matanggat.
HEB 13:23 Sike nata wamu take takngatu daniwa natapnong. Nindane notninu Timotita kaautde yukut ngana gwa sandetewa yotna kukut ngang kunduta naniwa natapbum. Siwan waapata nae zetgaman apanu nata iniwa nitda ginde kusim.
HEB 13:24 Siwan ginda natane gaak wamu gindane take aminu kuupbam gatu Anututane amina kuupbamde yamunong. Sike Jesue aminabamu keu Itali komune nana nikat gatake yuamang aminda ginde gaak wamu danikaing.
HEB 13:25 Siwan nata tumuk wamu Anutue iniwa ita ginu kuupbamde musiaatang kwikwiknga natandamik. Unukan.
JAM 1:1 Na Jems. Na Anutuat Jesu Kraiskatdane puya amina tapatu dakngake yuat. Nata pas asanu ginu Anututane aminabamu kepna kepna yuaingu kuupbamde matandamunggat. Matandamuke gaak wamu ginde daninggat.
JAM 1:2 Siwan mate notnabam. Meya takngatu takngatuta ginde apa kakengu ginda apbaknganong.
JAM 1:3 Ginu atnataaing. Meya waakngata apuke sanga ginda Jesue natapa kekekanggak kaknga tasiwan siwik. Sike meya wa gin pasiwan singgak kakngata gindane musipza papan kekekaning.
JAM 1:4 Siwan wa papan kekekaning kakngata buyambam siknga siyok. Siwan ginda dua siknga tuyukake pimaning. Wena siknga.
JAM 1:5 Siwan aminu gikat nana tapatuta natdetdetna dapaknga siwanu ita Anutue tumuk wam ininangge take natapsok. Ita Anutu aminu kuupbamde natdetdeu yamusaanguke ngana dua yanisapdukgak kapae inike
JAM 1:6 musia takngaaya ie dua natapan. Aho. Ie meya dua natake inindatapsok. Ginu atnataaing. Aminu Anutue natake musia takngaaya natapiu waapata nangaakan natapik. Unzing yanggabam gwene sambuyata enawa gotda puyapakunggak binga aminu waapata Anutue natapan kekeknga dua siwik.
JAM 1:7 Siwan aminu wa bingata natdetdeu takngatu takngatu nataakge sanga takngatukan dua tawake tasinggak. Unzingge ita Buyambam tapaninda sanga tapatu apmea ba nae namik ngang yananga dua.
JAM 1:9 Siwan notninu Jesue amina tapatu sangana wenaapata Anutue nomune umana kayaapa daknganggakge apbakngayok.
JAM 1:10 Sike notninu Jesue amina tapatu sangaapana kaya apatane sanga Anututa kaiwan kungaman kakengu ita apbakngayok. Ginu atnataaing. Zongazonga tapunu take kaamangga zet sopukaing. Ina unzakan sangaapaninda zet sopuning. Siwan meya waakngata aminu waapae apuke kekekangaman ita apbakngawik.
JAM 1:11 Ngan. Sangaapana kayaapata sanga kunduat panangge tasisika ngana akupik. Unzing gunzitda akoke gunzitdane toknga akngata zongazonga tapun yasiwan zetzet kupiake pimakaing binga waapata kupik.
JAM 1:12 Siwan aminu gikat nana tapatu aminu tapatuta tasiwan pimapikge tasinggak ngang kakengu ita apbakngayok. Dasingge? Ita akekekake dua pimapanu Anututa waapatane umana yatangenake sanga kayuk asinggan yutnanga aknga asimik. Sanga waaknga aminu Anutue musip gwaang natangamuningu kuupbamde yamunangge gwa yawan kekekakut.
JAM 1:13 Siwan aminu tapatu inane musia enayaakngata tasiwan siwanu ita anzing ma yawan, “Anututa na wai waaknga tasiwitde natake ita natane musipma tangenakgak.” Ginu atnataaing. Sanga takngatuta Anutu tasiwan pimananga takngatu wena. Siwan Anututa aminu tapatuta sanga wai takngatu tasiwikge natake dua tasiwik. Wena siknga.
JAM 1:14 Sike aminu tapatu sanga waiakngata tasiwan siwan waapatane musia enayaakngata inindatdauke kaitakuwan ita apimapik.
JAM 1:15 Siwan musia enayaakngata tasiwan buya aawan aminu waapata sanga wai takngatu tasiwik. Tasike tasinggawan buyambam siwanu waapata akungwake Anutuat gatake yutnanga dua siwik.
JAM 1:16 Siwan mate notnabam. Nata ginde musip gwaang natandamuke daninggat. Ginu Anututa nin pasiwan pimanimde natake tasinggak ngangu kemu ma natapam.
JAM 1:17 Kakaa kuupbam ninde kakaatnimukaingu gunzit ba yekap ba yekapdaak ngangu sanga wa kuupbam Anututa ina tasike tekut. Sike ita enandang yuke sanga take siknga kuupbam ninda pakamangu wa atnimunggak. Ita noman tasinggak kaknga teke wai dua tasiwik. Unzing yekap gwenda sipdune buyambam akonggak siwan gatu sipdune mateknga akonggak binga dua Anututa tasike asinggan nomana akngakan tasinggak.
JAM 1:18 Tasike ita ina banipda siwan nin gataniman aminu kunduta itane siakan wam taknga ninikapbing. Sike wamu waakngata nindane musipmin pangenawan ninda gamok itane amina dakngake yuamang. Unzing Judia nana aminda nanam zak kwaike kayuwawa buya tupan aakaing gwegwen deke Anutue sanga ngang natake ie imukaing binga ninda gamok itane amina dakngakumang.
JAM 1:19 Siwan mate notnabam. Nata ginde musip gwaang natandamuke anzing daniwa natapnong. Wamu takeaknga natapnangge ginu maak gwaang panong. Pake ngana wamu katak siknga dua natake zetgaman kuke aminu kundue ma yanikapam. Siwan aminda wamu wa yanikapning kaknga zet dua papa kakengu ginu wikake tasike musipza toknga zet ma natapam.
JAM 1:20 Dasingge? Aminu musia toknga natapiu waapata Anututane puya nomana tasinanga dua.
JAM 1:21 Unzingge ginda waiakngasa kuupbam apbitapenong. Apbitapeke Anutue gepbiatang koyuke itane wamna gindane musipzaatang kwainggau waaknga gitna take apbaknganong. Siwan wamu waakngata gin gatandamuke ginda waiakngasae toknga pananga akngane ginu asandewik.
JAM 1:22 Siwan ginu natdetdetzane anggaman natake kemu ma natapam. Anututane wamna moo siknga ma natapam. Aho. Maak gwaang pake wamu waaknga natake tawake tasinong.
JAM 1:23 Sike aminu tapatu Anututane wamna moo siknga natake wamu waaknga dua tawake tasiwiu waapata wamu waaknga zet botawik. Unzing aminu tapatuta inane nomna kuku amin wee kaaing sane kawik.
JAM 1:24 Kake ngana ita kuke nomnae zetgaman botake noma unzing siknga ngangu dua natapik binga aminu waapata wam natake ngana dua tawake tasikengu ita zet botawik.
JAM 1:25 Siwan ngana Anututane wamu nomana siknga waakngata nindane musipmin pangenake sanga musia enayaakngane ninu sandewan take siknga yutnim. Sike aminu wamu waaknga gitna take asinggan natanggamatake tasiwiu waapata dua botasukuke tasiwan buya aawan ita apbakngawik.
JAM 1:26 Siwan aminu tapatuta na yangga aminu gwa dakngake yuat ngang natake ngana inae katak dua tagwauke wamdekan yawiu waapa kem nataak kapanin. Ita yangga amin gwa dakngakut ngana buya dua tasiwan aakgak.
JAM 1:27 Siwan aminu tapatuta Anutue siakande siknga inimbaknganangge natakengu ita sanga Nanin Anututa take nataak kakngae natake anzing tasiyok. Toitoit gatu maya kombakobat ngangga meya takngatu kawanu ita akgatayamuyok. Gatu ita sanga waiaknga aminu Anutue masa imukaingga tasikaing kakngae apbitateyok.
JAM 2:1 Siwan mate notnabam. Ginu Buyambam tapaninu Jesu Krais take siknga apae natapa kekekawan ginda aminu kuupbamde musipza takekan natayamunong.
JAM 2:2 Sike aminu tapatuta ba siotna take siknga tasike katasipna waenga gamanggamanata ba tasiking gwenu katakngi boopmi tapatusimune ba mapan pukuwik. Siwan ita tasikwaapzawan kuwan miti yotzaatang ba akopik. Akowawan gatu aminu tapatu sangaapana wena apata siot saak gatu tauk saak ngang pasike ngana ita miti yotzaatang ba akopik.
JAM 2:3 Aminu waapaatda akopat kakengu ginu dasing tasining? Asikaya ginda kuke aminu tauknga take siknga pasiwik kapa initakuke, “Pomu a take siknga akngane pukwiyo,” ngang inike gatu tauknga bumi pasiwik kapa inike, “Ga atuomune dandamake yuyo,” ba, “Ane, natane pom takngane wesim kepdakane pukwiyo,” ngang ba inining?
JAM 2:4 Ginda sanga unzing tasiwanu take dua siwik. Ginda unzingu natdetdetza takngaaya natake tasining. Tasike ginda musipzaatang natdetdetza wai natake kepi waiaknga tawake amin usanzikaing.
JAM 2:5 Siwan mate notnabam. Nata musip gwaangu ginde natandamuke daniwa natapnong. Aminu sangaapana wena yuaingu asikaya Anututa wa amikat nana kundu dua kapewan ie natapa kekekaning ba dasing? Asikaya ita wa aminu dua kapewan sanga ita aminu inane panangge tasinggak kakngae gepbiatangu kopning ba dasing? Koke aminu sangaapana kwaapzang pake yuaing binga dakngake yuke apbaknganing. Ngan. Sanga waakngae gepbiatang aminu musip gwaangu ie natapning aminda kopningge Anututa gwa yawan kekekakut.
JAM 2:6 Siwan ngana ginda aminu sangaapana wena pasiwa apmaakawa aminu sangaapana kaya amindane umana yapangenakaing. Asikaya aminu sangaapana buyambamu kayata ginu dua daipapaakusike meya damukaing ba dasing? Ngan. Wa aminda ginda wamza yaningge moo siknga natake ginu zet pakokaing.
JAM 2:7 Sike wa aminda ginde Jesue amina ngang danike sapdut wamu umana gwaamu waakngae asinggan yakaing.
JAM 2:8 Siwan ginu mama wamu takngatu Buyambam tapaninda yawan ayanikapsa aminu tapatuta tupa siknga natake matakut taknga katak siknga tawake tasiwanu take siwik. Siwan mama wamu waaknga anzing yakut, “Gata aminu gae wesim yuak kapae butaya natangamuyo. Gata gikane gupbae akgwaukgayak. Ina unzakan gata aminu waapae butaya natangamuyo,” ngang yakut.
JAM 2:9 Siwan ginda kaisatakan kake amin usanzike sangaapana kayatane umana yapangenake ngana sangaapana wenae masa yamanu take dua siwik. Siwan ginu Anututane mama wam sandeya amin daknganing.
JAM 2:10 Siakan. Aminu tapatuta mama wamu kuupbam tawake tasisika ngana mama wamu takngatusimu asandewiu waapata wam sandeyaapa dakngawik.
JAM 2:11 Ninda atnataamang. Anututa “Ginu yasewa aknga ma tasiwam,” ngang yakut tapatakan gatu “Ginda aminu ma zipa kupam,” ngang yakut tapanin. Ge ginu yasewa aknga dua tasike ngana aminu tapatu tanguwa kupanu ginu mama wam sandeya amin daknganing.
JAM 2:12 Ge ginu musipzaatang anzing natayutnong. Anututa nin usanzitnangge natake wamu wa ita waiakngane nin sandetnangge yakut taknga tawake gitna taking ba ie masa imuking ngang natake usanzike natapik. Ita unzingu gin usanziwikge natake ginda gisae tagwauke wamu noman yake kepi nomana akngane sukunong.
JAM 2:13 Dasingge? Aminu tapatuta aminde butaya dua natake tasiwiknga kakengu Anututa aminu waapa usanzike butaya ie dua natangamik. Siwan ngana aminu tapatuta aminde butaya natake tasiwiu waapae Anututa usanzike natapan take siwik.
JAM 2:14 Siwan mate notna! Aminu tapatuta yake na Jesue natapa kekekanggak ngang yawik. Yake ngana ita Jesue puya takngatu dua tasiwiu waapae dasing yanim? Asikaya sanga wa ita Jesue nataak kakngata gatangamuke tasiwan Anututane amina tapatu dakngawik ba dasing? Wena.
JAM 2:15 Sike aminu Jesue amina dakngakengu maya ba wawita taukge ba nanamde ba dapning.
JAM 2:16 Dapa kakengu asikaya ginda wa aminde gaak wam yanike, “Got taukza pasike nanamza napa musipza gitnayok,” ngang yanike ngana tauk ba nanam ba dua yamanu wamu waakngata akgatayamik ba dasing? Wena.
JAM 2:17 Ina unzakan. Aminu tapatuta Jesue natapan kekekawan ngana ita Jesue puya takngatu dua tasiwanu sanga wa Jesue nataak kakngata songa siwik.
JAM 2:18 Siwan aminu tapatuta wamu waakngae natake ita notna tapatu anzing iniwik, “Ga Jesue natapi kekekanggak. Siwan na Jesue puya takngatu takngatu pasinggat,” ngang iniwik. Iniwan natakengu nata yake anzing iniwit, “Gata na nanike nata Jesue puya aknga dua tasike ngana nata Jesue natapa kekeknga singgak,” ngang naniwinu asikaya nata gatane wamu waaknga natapa siakan siwik ba dasing? Wena. Sike ngana nata, “Jesue puya takngatu takngatu tasiwa nandupi aminu Jesue natapan kekekanggak kapa siwik,” ngang iniwit.
JAM 2:19 Siwan gata Anutu awia tapatukan yuak ngang natapi siakan singgak. Ngan. Gata unzingu ie nataayak ngana ie dua gwauke itane puyana takngatu dua tasiwinu asikaya natdetdeu waakngata ga akgatanggamik ba dasing? Wena siknga. Ninu atnataamang. Setendane waungu waiakwakga natdetdeu waakngakan moo siknga takaing. Take Anutu waapae kagwauke dandai kumzang yamuba ngana itane puya aknga ayaitapaakusikaing ngang nataamang.
JAM 2:20 Siwan ngana gatane natdetdetda dapaknga singgak ba dasing? Aminu tapatuta Jesue puya aknga dua tasike ngana na ie natapa kekekanggak ngang yawanu natdetdeu wa Jesue nataak kakngata dua gatangamik. Aho. Songa siwan buya dua aawik. Sike gata natdetdeu waaknga gitna tapiyakge natake ganiwa natapso ngang iniwit.
JAM 2:21 Nindane Baminu Ebrahamda tupa siknga waaknga umana Aisak ngang inikut tapa initakuke Anutue imunangge tasikut. Unzing aminda buka supda tasike sanga Anutue imuke katap sawa yasikaking binga ita Anututane wamna gwaamuke imunangge tasikut. Imunangge tasiwan kake Anututa ie natapan aminu nomanaapa sikut ngang iniwit.
JAM 2:22 Siwan ga anzing natapso. Ebrahamu waapata Anututane wamde natapan siakan siwan wamu waaknga tawake tasikut. Tawake puya waaknga tasiwan sanga wa wamde natapan siakan sikut taknga buya unin aakut.
JAM 2:23 Siwan sanga waakngaekan natake ayanikapsa aminu tapatuta Anututane wapatang anzing matakut, “Ebrahamda Anutue natapan kekekawan kake Anututa ie natapan aminu nomanaapa sikut ngang matakut taknga buya aawan Ebrahamde natake Anututa natane notna,” ngang inikut.
JAM 2:24 Sike wamu waakngae natake ginu atnataaing. Aminu tapatuta Anutue natapan kekekawan ngana itane puyana dua tasiwiu waapata Anututane nomune aminu nomanaapa dakngananga dua. Siwan ngana ita ie natapan kekekawan itane puyana tasiwanu Anututa ie natapan aminu nomanaapa siwik ngang iniwit.
JAM 2:25 Siwan ina unzakan maya tapatu umana Rehep ngang inikaing. Ita you gwendu aminu maata apuke petnanga gwendu kayukut. Kayuwawan aminu Josuata yanipewan kukingu yotnaatang pakoke kayukut. Kayusika gatuna yanike kepi tapatu iwanata kananga dua apae yanike ita yanipewan kuking. Ita unzing tasikutde Anututa maya waapae natapan take sikut.
JAM 2:26 Siwan ginu atnataaing. Aminu tapatutane waungata wena siwan kakengu ita gwa kungwak ngang yakamang. Ina unzakan. Aminu tapatuta Jesue natapan kekekawan ngana itane puyana dua tasiwan kakengu sanga wa ita Jesue nataak kakngae natapna sanga moo siwik.
JAM 3:1 Siwan mate notna. Ginu atnataaing. Ninu natdetdetninu anggaman natake aminu buyambam yanindamukamang amin usanzike Anututa sanga ninda tasikamang kaknga katak siknga kake natagwaanguwik. Ngana aminu Jesue amina dakngake maak pake nindane wamin nataaing amindane natdetdetna usanzike wikake natapik. Unzingge gikat nana buyambamda wam yanindamumsa amin daknganangge musipzaatangu toknga ma natapam.
JAM 3:2 Ngan. Ninu kuupbamda wam yananggengu sipdu sipdune song yakamang. Sike aminu tapatuta wamna yake ngana ita wamu gutonga takngatusimu dua siknga yawiu waapa aminu noman siknga. Ita inae katak siknga tagwaukgak kapa unin.
JAM 3:3 Siakan. Ninda sanga ain gomda tasikaingu gomdu take ikwawa gamanu hos gwendane genune wamake kaitawaatna nisane banip tawake kunggak.
JAM 3:4 Siwan gatu siu buyambam siknga gwenu gou kekeknga sikngata puyatawawan yanggabam tangan kunggak. Kuwawan stiandaka dakuban sanga mateknga amakatang yuak sanzimda tapatekwaawan aminu atdakunggak kapata take ita akunangge nataak gwak dakuban sip gwenda ugwak saak kunggak.
JAM 3:5 Ina unzakan. Nindane yembininu sanga mateknga siknga ngana ninu wamu kumzang yakamang kaknga sanga kuupbamdane yapii. Unzing katap paimu mateknga siknga gwenzim mutena kuke zonga tangatu isikengu isimapan kuwan katau baknga dua isiwik. Ina unzakan wamu gutonga takngatusimu ninda yakamangga nindane natdetdetninu kuupbam pasiwan maining.
JAM 3:6 Nata nindane yembininde natapa ita katap paim binga singgak. Ngan. Nata ie natapa ita sanga wai kwaapzanggane yapii singgak. Siwan ninu wamu kwaapzang yakamang kakngata nisane natdetdetnin pasiwan maikaing. Pasiwa maiwa kepi sukukamang kaknga kuupbam pasiwan maikaing. Sike wamu waakngatane yapii Setenu unin.
JAM 3:7 Ninu atnataamang. Aminda kaap zongu kundumaman pake toiba gaakakaing. Kwait gatu gomok gatu yanggabam gwene nana ngang kuut pake toiba gaakakaing. Siwan kaau kunduta aminde akgwaukaing.
JAM 3:8 Sike ina unzakan aminu tapatuta inae katak siknga tagwauke wamu nomanggan asinggan yanggau wa binga tapatu wena kaamang. Ngan. Wamu ninda yakamang kaknga katak kayutnanga dua. Wamu waakngata aminu apasiwan maikaing. Unzing gomou waiapata amin yasiwan kungwakaing binga ita tasinggak.
JAM 3:9 Sike ninda wam yake Naninu Buyambam tapanindane umana yatangenakamang. Siwan Anututa amin tumuke iat musia takngatukan natapningge natake tasikut ngana ninda wamdekan yake amin yanisapdukamang.
JAM 3:10 Ngan. Aminu tapatutakan genaneta wamu take akngaat gatu waiakngaat ngang yanggak. Mate! Sanga wa ninda tasinanga dua aknga ngana tasina take dua singgak.
JAM 3:11 Asikaya yangga kaaya siknga akngaat gatu yangga kapanga kaya akngaat ngangga dapuya gwatdunetakan akoke zipmakaing ba dasing?
JAM 3:12 Mate! Asikaya katau baap dakata katau Oliv daka binga dakngawan buya Oliv tapun aatning ba dasing? Ba nau wain takngata katau baapdaka binga dakngawan baap tapun aatning? Ba yangga pangu kaya akngata yangga mooi aknga dakngawik ba dasing? Wena siknga.
JAM 3:13 Siwan aminu gikat nana natdetdetna buyambamu kaya tapatu ayuaknga kakengu ita kepi nomana akngane sukuyok. Sukuke katak natake aminde wikake yaniwan aminu kuupbamda ie natapa aminu natdetdetna buyambamu kayaapa siwik.
JAM 3:14 Siwan ngana ginda gisae umanza yapangenake notzae musipza zikaa natayamuke tasikengu ginu siakan wamu ma bitateke kem wamu dua yawam. Yake gisae umanza yapangenatnangge ma tasiwam.
JAM 3:15 Aminu sanga wa binga tasikaing amindane natdetdeu waaknga enandang yuak kapatane dua. Aho. Natdetdeu waaknga sanga aminda inane musia enayaaknga tawake tasikaing amindane. Ngan. Natdetdeu waakngatane yapii Setenu unin.
JAM 3:16 Ginu atnataaing. Aminu inae umana yapangenake notnae musia zikaa natayamukaingu wa aminda sanga wai aknga kwaapzang pasike notna apandambanukaing.
JAM 3:17 Unzing pasikaing ngana aminu natdetdeu enandang yuak kapatane aknga pake yuaing aminda musia takngaaya dua natake kepi nomana akngane sukukaing. Sukuke aminda meya takngatu takngatu yama pake ngana wa aminde musia kwikwiknga natayamukaing. Natayamuke yamandet amin dua sike wai aminde yake semna dua natayamuke wikake yuaing. Yuke aminu sangae dapmake yuaingge butaya natake gatayamukaing. Gatayamuke musia takngaaya dua natake kem wamu dua yakaing.
JAM 3:18 Sike aminda kepi wa nomana akngane sukuke musip kwikwiu aminde natayamukaing kaknga buya aawan aminu kuupbamda kepi wa nomana akngane sukuning.
JAM 4:1 Siwan dasing yanim? Ginda ayanganuke amakaing kaknga zaneta apunggak? Asikaya gisane musipza enayaaknga tawake tasikaing kaknganeta dua apunggak ba dasing? Ngan. Uneta apunggak.
JAM 4:2 Sike ginda sangaapae geenguke ngana pananga dua siwan toiknga atzipa kungwakaing. Ngan. Ginda sangaapae geenguke ngana pananga dua siwan toikngaat yanganuke amakaing. Sike ginda sangae dapmakaing kakngae natake Anutue tumuk wam inindatapning gamu ginda apapam.
JAM 4:3 Sike ginda Anutu inindatake ngana dua pakainggane yapii dasing? Asikaya ginda sangaapa pake gisae gupzaapakan toitnangge dua natake inikaing ba dasing? Ngan. Ginda natdetdeu wai waaknga natake iniwa unzingge ita ginde dua damunggak.
JAM 4:4 Ginu masa Anutue imukaing amin! Anututa sanga kundue masa yamunggakge ginda banip sikengu ginda Anutue iwana daknganing. Asikaya ginu ie dua nataaing ba dasing? Ngan. Aminu tapatuta gupde sanga ba sanga kepdakane nana akngae banip sikengu ita Anututane iwana dakngawik.
JAM 4:5 Siwan wamu ayanikapsa aminu tapatuta tupa siknga matakut taknga asikaya ita moo siknga matakut ba dasing? Aho. Ita siakan wamu takngatu anzing matakut. Waungu Anututa ninde nimukut tapata ninda Anutuekan natanggamatake yutnimde take siknga natake nin papan kekekakamang.
JAM 4:6 Siakan ngana sanga wa musia enayaaknga kekeknga sikut taknga Anututa akekekake yapbikut. Yapbike nin gatanimunggak. Unzing wamu ayanikapsa aminda matake, “Anututa yamandet sikaing aminu ayaipapaakusinggak. Ngana ita aminu ie gepbiatang koyuaing aminu akgatayamunggak,” ngang matakut taknga binga Anututa atasinggak.
JAM 4:7 Unzingge ginda Anutue gepbiatang koke yutnong. Koyuke ginda akekekake Setendane sanga akngae apbitatewanu ita gin dapmake atdatakuwik.
JAM 4:8 Ngan. Ginda Anutue kuke kekeknga yutnong. Yuwawa ita gin gatandamik. Ginu waiaknga pasiya amin! Gindane waiakngasa gatukande bitapenong. Siwan ginu natdetdetzaatang takngaayana kaya nataaing amin! Gindane musipzaatang takngaaya wa nataaingu apbitateke takngatukan tawake Anutue natanggamatanong.
JAM 4:9 Ginu musipzaatang waiakngasae butaya siknga natake kwanam sike yutnong. Ngan. Ginu aminu apmanu apbakngake mikaingu ginda sanga apmimza aknga teke musipzaatang meya siknga natake kwanamu kumzang sitnong.
JAM 4:10 Sike ginda unzing tasike Buyambam tapanindane kaine ninu aminu wai amin dakngake yuamang ngang natake tasinong. Tasiwa dandupan take siwan ita gindane umanza yapangenawik.
JAM 4:11 Siwan mate notna! Ginu notza Jesue amina dakngake yuaingge semna natake sapdut wamu ma yawam. Aminu tapatuta inane notna tapatue semna natake sapdut wam yawiu waapata mama wamu notzae musip gwaang natayamunong ngang yakut taknga asandewik. Sandeke mama wamu waaknga usanzike natapan wamu mooi binga siwik. Siwan ita mama wam tawake tasiya aminu dakngananga dua. Aho. Ita mama wamu asandekgak.
JAM 4:12 Siwan aminu mama wamna ninde nimukuu wa Anutu awia tapatukan. Sike ita inatakan nin usanziwik. Ngan. Ita inatakan amin gatayamuke pasiwan amin noman daknganing. Sike inatakan yamandet sikaing amin usanzike pasiwan maining. Unzingge ginu dasing tasining? Asikaya ginda notza usanzike wam temangusipa yawa take siwik ba dasing? Wena siknga.
JAM 4:13 Siwan aminu kunduta anzing yakaing, “Apman ba kwepna ninda enake you buyambamu gapmandune kunim. Kuke ninda puya mani kaitnangge nakanu gwendunekan tasinim. Tasike ninda mani kwaapzang siknga pake gatunin apnim,” ngang yakaing. Sike nata ginu wamu wa binga yakaing aminde natake anzing daniwa natapnong.
JAM 4:14 Ginu sanga kwepna siwik kakngae dua nataaing. Sike ginu tapduu mateknga kundusim yuke akumning. Unzing minga dakatuta kepdakane epuke tapduu mateknga kundusim yuke wena singgak binga ginda wena sining.
JAM 4:15 Unzingge wamu waaknga ma yawam. Aho. Asingu ginda anzing yanong, “Buyambam tapaninda nin nindupewanu ninda kayuk yuke puya takngatu anzingu apme ba tasinim,” ngang yanong.
JAM 4:16 Siakan ngana ginda yamandet sisukuke sanga gisane musipza enayaaknga tasinangge yakaing. Sike wamu wa yakaing kaknga take dua.
JAM 4:17 Ngan. Aminu tapatuta sanga nomana akngae natake ngana ita bitake dua tasiwiu waapata aminu wai tasinggak kapa dakngawik.
JAM 5:1 Siwan nata ginu sangaapasa babanu kaya amin daniwa natapnong. Meya takngatu takngatu ginde apning kakngae natake ginda kwanamu kumzang sitnong.
JAM 5:2 Gindane sangasa pekingu wai gwa siking. Ngan. Taukza gwakgwakga gwa yasikwambing.
JAM 5:3 Siwan gindane manisa kwaapzang pakingu koknga kwake gwa pupukaking. Sike koknga wa kwaking kakngata aminu kuupbam yeutdaman sangasa kotnakaing kaknga anggaman siwan kaning. Siwan Anututa yake toknga buyambamu ginde atdamik. Unzing katapda katap isinggak binga ita ginde toknga aknga daman paning. Siwan ninu tapduknga Jesuta gatuna apik gwenda dapaknga gwa singgak komune yuamang ngana ginda sangaapasa buyambam peke tasiking.
JAM 5:4 Siakan. Ginu gisane puya aminza gisane puyasa pasikaingu kem panzike wa amindane mani kautdu gisae pakaing. Sike mani ginda wa kotnakingge natake wa aminda yanggamatawawa Anutu nindane Buyambam tapaninu kekeknga siknga apata gwa natapbut.
JAM 5:5 Sike ginu sanga musipza enayaaknga tawake sangaapasa buyambam peaing. Unzing ikwawa gamanata suyuknga siwan tanguwan kupan matanangge natake toikngata nanamu buyambam iman nanggak. Ina unzakan ginda tasinggawa tasinggawa gindane waiakngasa buyambamu gwa singgak. Siwan tapduknga Anututa gin usanzike toknga aknga ginde yake damik gwenda gwa dapakanggak.
JAM 5:6 Siakan. Ginda aminu sanga nomana akngakan tasikaing amin usanzike natapa wai siwan wa aminda akumningge gwauke ngana wamu dua yawawa ginda atzipa kungwakaing.
JAM 5:7 Siwan mate notna! Wamu waakngae natake ginda musipza tapa kekekawan yuwana kuku tapduknga Buyambam tapaninda gatuna apik gwenda apik. Ginu atnataaing. Aminda nanam zak pake puyanane kwaiwan akoke buya aatningge akayuaing. Akayuke musia tapa kekekawan yuwawa sopata zipan wikake akopning.
JAM 5:8 Siwan gikaya kuut musipza papa kekekanong. Papa kekekawa tapduknga Buyambam tapaninda gatuna apik gwenu gwa dapakanggak ngang natake ginda ie apbakngake kayutnong.
JAM 5:9 Sike mate notna! Ginda notzae ma sapduke yawam. Anututa gin usanzike natapan wai siwan toknga ginde damuyak. Dasingge? Gin usanziwiu waapata apikge dapaknga gwa singgak. Unzing aminda yot gwene kopnangge natake kepman apuke gwabok gwaune yuak binga ita gwa apnanggenggak.
JAM 5:10 Mate! Ginda aminu Anututane wamu ayanikapbing aminde natapnong. Wa aminde iwanata enake pasiwa mainingge tasiwawa ngana wa aminu musia papa kekekawa dua pimaking. Sike ginda kepi wa aminda sukukaking kaknga tawake tasinong.
JAM 5:11 Ngan. Wa aminda meya takngatu takngatu pake ngana akekekake yuke dua pimaking. Sike ninda wa aminde apbakngake umana yapangenakamang. Sike ginu aminu tapatu umana Jop ngang inikinggane wamu gwa natapbing. Ita meya kwaapzang pakut ngana musia tapan kekekawan ita dua pimakut. Siwan masande Buyambam tapaninda take siknga i gatangamukut. Ngan. Ginu atnataaing. Buyambam tapaninda asinggan ninde butaya siknga natake ninu akgatanimunggak.
JAM 5:12 Siwan mate notna! Wamu take siknga gin gatandamik kakngae daniwa natapnong. Ginda wamin yana natapan siakan siwik ngang natakengu ginda wamu wa yaning kakngae ma yawa kekekawan. Gisane wamzae natapa siakan siwikge natakengu ginda gisae wam ngwakngake yake Anututa atnataak ngangu ma yawam. Ba kepdakane yuaing aminda atnataaing ngangu wamu wa binga takngatu ma yawa kekekawan. Aho. Ginu musipzaatangu wamu takngatue natake ngan ngang yanangge natakengu ginda ngan nganggan yake wamu kunduat ngwakngake ma yawa kekekawan. Sike gindane musipzaatang natake aho ngang yanangge natakengu ginda aho nganggan yanong. Anututa gin usanzike natapan wai siwan toknga damuyak.
JAM 5:13 Siwan aminu gikat nana tapatuta meya takngatu kakengu waapata Anutue tumuk wam inindatapsok. Sike tapatuta musia tatanga natake apbakngawiu waapata Anututane umana yatangenake kau takngatu taiyok.
JAM 5:14 Sike aminu tapatuta mait sikengu waapata take aminu Anututane aminabam kayuaing amin yayawamsok. Yayawamban apuke wa aminda wel yangga takapuke itane gupnane pasingamuke tumuk wamu Anutu iniwa gatangamuyok.
JAM 5:15 Sike wa aminda Anutue natapa kekekawan ie tumuk wam inining kakngata gatangaman Buyambam tapaninda aminu waapatane maitna sandekngamik. Sike waiaknga mait siwik kapata tupa tasikut taknga wa kuupbam sandekngamik.
JAM 5:16 Unzingge ginda waiakngasa notzae yanikapnong. Sike ginda notza gatayamunangge tumuk wam iniwa Anututa maitna sandeyamik. Ninda atnataamang. Tumuk wamu aminu nomana apata yawik kaknga buya asaawik. Tumuk wamu wa binga kekeknga siknga. Aminu take siknga akgatayamik.
JAM 5:17 Siwan ayanikapsa aminu tapatu umana Ilaija ngang iniking. Ita aminu nisa binga dakngake yukut. Yuke ita Anutue tumuk wamu kekeknga siknga sopata dua tawikge inikut. Iniwan buya aawan sopata dua tawan kuku nakanu gweaat gwenduat gatu yekau katau kuut musa gatu kautdu musane gwendu ngangu dua takut.
JAM 5:18 Siwana masande ita tumuk wamu gatu iniwan sopata tawan sangabamu zuyuknga gatu waiking.
JAM 5:19 Siwan mate notna! Aminu gikat nana tapatuta siakan wam taknga tawake tasinggak kapata kepi waaknga teke kuwik. Teke kuwan kakengu aminu tapatuta aminu waapatane musia tapan nomatawik.
JAM 5:20 Sike aminu wa itane musia tapan nomatawik kapata wai aminu waapa gatangamuke Anututa ie toknga iman wai siwik kakngane sandewan waiakngana kwaapzang ngana wena siwik. Unzingge ginda wamu waaknga asinggan natanggamatake yutnong.
1PE 1:1 Na Pita. Na Jesu Kraisda tapan itane kwiiknga dakngake yuat. Yuwawa aminda aposel ngang nanikaing. Nata pas asanu ginu Anututane aminabam dakngake yuaingge matandamunggat. Ginu keu komdu komdune yuaing aminu Pontas kep komune nana gatu kundu Galesia kep komune nana gatu kundu Kapadosia kep komune nana gatu kundu Esia kep komune nana gatu kundu Bitinia kep komune nana ngangge natake matandamunggat. Ginu kepna kepna yuaing ngana Anututane amina dakngake yuaingge natake nata anzing nataat. Anututa enandang yuak komu gindane yotza siknga unin.
1PE 1:2 Siwan Nanin Anututa tupa ginde natake ginda Jesu Kraisdane gen gwaamutningge natake ita ginu inae panangge yawan yukut. Yawan sanga Jesuta ginde tangge kungwandamuke inane daknga tukngwakut takngata gin gatandaman Anututa gindane waiakngasa sandetdaman inane Waung Kapata gindane musipzaatang pukuke papan ginu inane amina daknganingge natake yawan yukut. Siwan nata tumuk wam iniwa Anututa ginde butaya natandaman ginu musipza kwikwikngata yuwawa buyambam siyok.
1PE 1:3 Nanin Anutu Buyambam tapaninu Jesu Kraisdane Anutu unin. Sike ninda ie asiknga inimbaknganim. Dasingge? Ita ninde butaya siknga natake nin gatanimunangge natake ita Jesu Krais akumbut katangga gatu tangenakut. Sike wa tangenakut takngata ninu take siknga gatanimukut. Gataniman ninda sanga kayuk asinggan yutnanga aknga gwa takumang. Take yusika ninda sanga take siknga Anututa ninde tasinimunangge yakut takngae apbakngake natayuamang.
1PE 1:4 Ngan. Sanga kayuk asinggan yutnanga aknga take yusika ninda natake Anututa apmea ninu waiakngane gatukande sandewik ngang nataamang. Nin sandetnangge natake ita nomana siknga tasiwan waiaknganinu wena siknga siwan ninda asinggan asinggan take siknga yutnim. Siwan Anututa ninde unzing tasinimunangge natayuak.
1PE 1:5 Siwan sanga nata wa yanggau Anututa inane kekeknga aknganata ginu Jesue natapa kekekawan itane amina dakngake yuaingu katak siknga danduyuak. Danduyuakge tapduknga asandewik gwene ita ginu waiakngane gatukande sandewik. Ita gin sandetnangge natake inane musiaatang natayuak ngana tapduu wagwene ita ginu gatukande sandetdaman kanim.
1PE 1:6 Ita unzing sandetdamikge natake ginda asiknga bakngakaing. Ngana tapduknga ninu ayuamang komune meya takngatu takngatu ginde apa kake ginda mateknga kundusimu musipza meya natake yutning.
1PE 1:7 Siwan meya wa ginde apukaingu Anututa gin pasiwan siwan ginda ie kekeknga yutning ba atuyukake atening ngang natake kapewan meya wa ginde apukaing. Ninu atnataamang. Gol pake aminda pasiwan maining. Ngana aminda gol pake katapda sawanu wai dua sining. Aho. Dapandapa engatangan akopa kwaamuke mupewa kuwana gol buya sikngakan panangge pasikaing. Ina unzakan meya wa gin pasiwa siwan ginda Anutue kuke ie gitna yuaing kakngata kekeknga siknga siwik. Siwan tapduknga Jesu Kraisda gatuna apik gwene Anututa ginde take siknga natake gindane umanza yapangenawan buyambam siwik.
1PE 1:8 Siwan ginda Jesu kaisata dua kaking ngana ginda ie musip gwaang natangamukaing. Ginu kaisata apmaau dua kaaing ngana ginda ie natapa kekekanggak. Sike ginda ie natapa kekekanggak kaknga buya aawan Anututa ginde musip kwikwik natandamuke waiakngasane ginu sandekgak. Siwan ginda sanga wa ita gin sandekgak kakngae natake ginda asiknga bakngake musipza iaknga siknga natake yuaing.
1PE 1:10 Aminu Anutue wam yanikapbingu tupa siknga yukingga wamu kwikwiknga wa ginu Anututa waiakngasane sandewik kaknga ayanikapbing. Ngan. Wa aminda wamu waaknga ayanikapbing ngana itane yapii kanangge natake puya kekeknga siknga tasike tawaking.
1PE 1:11 Wa aminda Anututane wam yanikapmake aminu tapatuta masande apuke nin gatanimuke ngana meya takngatu takngatu papik. Papan ngana itane umana buyambam siwik ngang yanikapbing. Wa amindane musia Waung Kapata pangenawan wamu waaknga yakapbingga inane musiaatangu anzing natagwaanguking. Aminu wa ita asapik ngang yakamang ngana ita zaapduknga apik ngangu apbotake unzing yaking. Aminu waapata apuke nin gatanimik ngang yanikapmakamang ngana maminda aminu akgatanimuyaapa dakngake apik ngang natake ie natapa siwan yuking.
1PE 1:12 Natapa siwan yuwawa Anututa ina yeuyaman wa aminda natake wamu wa yanikapbing kaknga buya zet dua aawik ngang natapbing. Apmea buya aawan aminu masan aatning aminda akaning ngang natapbing. Ngan. Wamu wa tupa yanikapbing kaknga buya asaakut. Buya aawan Anututa inane Waung Kapa enandangga initewan epbut. Epuke aminu kundutane musiaatang pukuke papan wa aminda enake ginde kuking. Kuke wamu wa tupa siknga yanikapbing kaknga buya aakutde natake wamu take waaknga ginde danikapbing. Sike angelata wamu wa ginde danikapbing kakngae natdetdet panangge take siknga natake yuaing.
1PE 1:13 Siwan ginde kuke wamu takeaknga ginde danikapa natake ginda gisae natdetdetza tanomanutnong. Tanomanuke Jesu Kraisda gatuna apuke ita ginde musip kwikwik natandamuke gatandamikge natake ginda ie apbakngake natayutnong. Natayuke ginda gisae katak siknga tagwautnong.
1PE 1:14 Tagwauke ginda wam gwaamukaing amin dakngake tasinong. Tasike tupa ginda katumde yuke sanga musia enayaaknga tawake tasikaking ngana apmanu ginu gatusa kepi waaknga ma tawake tasiwam.
1PE 1:15 Ginu atnataaing. Wamu takngatu Anututa yawan natake ayanikapsa aminu tapatuta anzing matakut, “Na nomana sikngaapa. Unzingge gikaya kuut aminu nomana siknga dakngake yutnong,” ngang yawan natake matakut. Siwan Anutu gin yandawamban ie kuking kapata nomana sikngaapa ngang natake gikaya kuut aminu nomana siknga dakngake yutnong.
1PE 1:17 Ngan. Ginda Anutue natake inindatake Nanin ngang yakaing. Sike Nanin ngang inikaing kapata aminu kuupbam inandek inandek kepi nomana akngane usanziwik. Usanzike aminu tapatue dua kagwauke tasiwik. Aho. Sanga tupa tasikut takngaekan natake katak siknga usanzike tasiwik. Unzingge ginda gisae natake ninu keu andakane pakapuyut amin binga dakngake yuamang ngang natapnong. Nindane yotnin siknga andangu wena ngang natake Anutu gin usanziwik kapae akgwauke nomana siknga yutnong.
1PE 1:18 Ginu atnataaing. Tupa ginda sanga bapusata apbotake moo siknga tasikaking kaknga tawake tasiking. Ngana Anututa gin gatandamuke sanga wa yapiina wena akngane ginu sandekut. Siwan aminda notna gatangamuke iwanatane kataune sandetnangge mani mukaing ngana mani wa mukaing kakngae natapna sanga asopunanga aknga singgak. Siwan ngana Anututa gin gatandamuke sanga asopunanga wa bingata dua ginu sandekut. Wena siknga.
1PE 1:19 Kraisda ninde natake puya kekeknga siknga tasinimuke ninde tangge kungwanimuke inane daknga tukngwakutde natake Anututa Krais waapae apbakngake gindane waiakngasa sandetdamukut. Siakan. Aminu tapatuta inane waiaknganae natake Anututa sandekngamikge kepi tawambik. Tawake ita inane sipsip mateu maitna wena ba watana wena gwendu kaitakapik. Kaitakapan puya aminda sipsiu wa gwendane guyakngi matawan sipsiu wagwenda inane toikngae tangge kungwake daknga tukngwambik. Tukngwamban kake Anututa natapan take siwik. Siwan aminu waapatane waiakngana asandekngamik. Ina unzakan. Kraisda ninde tangge kungwake daknga tukngwamban kake Anututa nindane waiaknganin sandetnimunangge yawan yukut.
1PE 1:20 Krais waapa tapduknga kepat yekapat dua tasike tekut gwene Anututa tapan yukut. Siwan tapduknga wenga ninda ayuamang komune Anututa initewan apuke Krais waapata sanga gin gatandamunanga aknga tasikut.
1PE 1:21 Tasike gindane musipza pangenawan ginda Anutue kekeknga natake yuaing. Anutu waapata ginde natake ginda ie natapa kekekawan apbakngake yutningge natapbut. Natake ita Jesu akumbut katangga gatu tangenakut. Tangenake tasiwan Jesu waapatane umana buyambam siknga sikut.
1PE 1:22 Siwan na atnataat. Ginda gisane musipza papa nomatawan siakan wam takngaekan natake kepi nomana siknga aknga atawake tasikaing. Tasike ginda notza Jesue amina dakngake yuaing aminde musip gwaang natayamukaing. Siwan ginu siakan wam gwaamuke ginda gisane notza Jesue aminae musip gwaang siknga natayamuke kumzang tasinong.
1PE 1:23 Ginu atnataaing. Anututane wamu kekeknga asinggan yuwik kakngata gin pasiwan ginda itane aminabam dakngaking. Dakngake ginu Nanza kekeknga asinggan yuwik kapatane waaknga yapana binga dakngake yuaing. Ngan. Tupa gindane mingzata gin pangaiwa ginda aake wa amindane waaknga yapana dakngake yuaing. Ngana Anututa gin pasiwan sanga ginda itane waaknga yapana binga dakngake yuaing kakngae natake nata ginde natapa ginu aminu sipmaya aaking amin binga dakngakaing.
1PE 1:24 Siwan wamu takngatu Anututa yawan ayanikapsa aminu tapatuta natake anzing matakut, “Aminu kuupbamde natapa zongazonga binga singgak. Aminda ina tasibakngakaingge natapa zongazongatane tapuya binga singgak. Zongazongata akupiawan tapuyata apimapik.
1PE 1:25 Siwan ngana Buyambam tapanindane wam takngata kekeknga asinggan yuwik,” ngang matakut. Siwan wamu wa kekeknga asinggan yuwik kakngae natake puya aminda ginde kuke wamu takeaknga ginde danikapbing.
1PE 2:1 Siwan wamu takeaknga ginde danikapa natake ginda musipza wai notzae natayamukaing kaknga gatukande bitatenong. Bitateke ginda kemu ma panziwam. Gatu aminu tapatutane sangaapanae geenguke waapae musipza zikaya ma natangamam. Gatu sapdut wamu ma yawam.
1PE 2:2 Dasingge? Buyambam tapaninda ginde butaya siknga natake gin gatandamunggak. Asikaya ginda ie dua nataaing ba dasing? Aho. Ginu atnataaing. Engangu kayuk kapata ngwamde take siknga nataak. Ina unzakan ginda wamu takeakngae asiknga baknganong. Dasingge? Wamu waakngata gin pasiwan ginda sanga Anututa ginu waiakngane apmea gatukande sandewik kaknga ataning. Take ginda kekeknga asinggan yutning.
1PE 2:4 Siwan ginu atnataaing. Jesu kekeknga asinggan yutnangaapa. Unzing supda kekeknga asinggan yuaing binga ita kekeknga asinggan yuwik. Sike aminda ie natapa aminu moo apa siwan masa ie imuking ngana Anututa ie natapan take siknga sikut. Siwan ita waapa tapan yukut. Siwan ginda ie kuke yuwawa
1PE 2:5 Anututa ginu inae pake sanga ginda asinggan kayuk yutnanga aknga ginde atdamunggak. Atdamuke ita gin pasiwan ginu itane aminabamda dongu takngatukan binga dakngake yuaing. Yuwawa ita apuke ginde banakan ayuak. Siwan aminu tapatuta suu kekeknga asinggan yutnanga gwegwen pake pakapu sup you gwendu tasiwik. Tasiwan puyuwan waapata apuke you wagwene yuwik. Ina unzakan Anututa ginu inae papan ginda itane aminabam dakngawa ita ginde banakanu ayuak. Anututa ginde banakan yuke ita gin pasiwan ginu itane puya amina dakngake yuaing. Dakngake yuke ginda itane puyana tasike anzing tasining. Ie apbakngake ginda sangasa pakapuke ie imuning. Siwan nata sangasa ginda wa imuningge yanggau nata mani ba nanam ba sangasae natake dua yanggat. Aho. Ginu ie bakngake itane banip tawake ie gepbiatang koke ie kekeknga yutningge natake yanggat. Ginda sanga wa binga Anutue imunangge tasiwawa Jesu Kraisda gin gatandamik. Gin gatandamuke ita sanga wa ginda ie natake tasining kaknga take Anutue nomune kuke ie yeikngaman kake Anututa natapan take siwik.
1PE 2:6 Siwan wamu takngatu Anututa yawan ayanikapsa aminu tapatuta natake ita anzing matakut, “Nata ginu daniwa natapnong! Nata suu take siknga mani buyambam sikngata usinanga gwendu takum. Take nata suu wagwenu Saion yot gapmane tewa yuak. Sike suu nata wa yanggau nata aminu tapatue natake tuwanguke yanggat. Siwan aminu waapa aminu tapatuta ie natapan kekekawiu masande waapata gatuna natdeke na ie kem natapbum ngangu dua siknga natapik,” ngang yawan natake Anutue wapatang matakut.
1PE 2:7 Wamu wa matakut takngae natake ginu Anutue natapa kekekanggak aminda Jesue natapa ita amin gwaang siknga singgak. Siwan ngana aminu Anutue masa imukaingga yamandet sike itane wam sandekaing. Sandeke wa aminda undang pimakaing. Siwan tuwang wamu takngatu Anutue wapatang anzing yuak, “Suu gwendu yot tasiking aminda ie natapa wai siwan mutewa kukuu apmanu suu wagwenda yot gwen tapan kekekanggak.”
1PE 2:8 Siwan wamu takngatuat Anutue wapatang anzing yuak, “Suu wagwende botake aminda kenzomna ayamning. Yamake wa aminda undang pimaning.” Ngan. Wa aminda apimaningge natake Anututa tupa siknga yawan yukut.
1PE 2:9 Ngana Anututa ginu inae gwa pakut. Papan ginu itane aminabam dakngake yuaing. Ngan. Ginu Buyambam tapanindane puya amina dakngake yuaing. Yuke ginu itane dongabam dakngake yuaing. Siwan Anututa ginde natake ginu zikaa akngane yuking ngana teke ginda itane kakaa take akngane kopningge natake ginu yandawakut. Sike ginda natake ita ginu yandawamban ie kukingge ginda apbakngakaing. Apbakngake sanga take siknga ita wa gatandamukut takngae natake aminu buyambam yanikapnong. Sike ginda wamu waaknga yanikapningge natake ita ginu inae pakut.
1PE 2:10 Tupa ginu katum amin moo siknga yuking ngana Anututa ginu inae papan ginu itane aminabam dakngake yuaing. Ngan. Tupa Anututa ginde musip kwikwiu dua natandamuke ita ginde semna natapan yuking. Ngana apmaau ita ginde musip kwikwiu atnatandamunggak.
1PE 2:11 Siwan mate notnabam. Nata musip gwaangu ginde natandamuke daninggat. Nata ginde natake ginu Anutue aminabam dakngawa gindane yotza siknga enandang yuak ngang natake ginu keu ayuamang komune yuke pakapuyut amin binga dakngake yuaing. Nanzatane yotna keu komdune yuak ngang natake nata ginu daniwa natapnong. Sanga musia enayaakngata nin pasiwan mainam ngang natake ginda sanga wai musia enayaakngae akgwauke masa imunong.
1PE 2:12 Gindane notza katum aminde banakan yuke ginda kepi nomana siknga akngane sukunong. Sukuwa ngana wa aminda gindane sanga take takngatue natapa take dua siwik. Siwan ginde wamu atemapa yaning. Yawa ngana masande Anututa apuke wa amindane musia panomanuke tasiwik. Tasiwan aminu waakwakga musia tapa tekwamban gindane sanga tupa ie natapa wai sikut takngae gatuna natake ie apbakngake Anututane umana yatangenatning.
1PE 2:13 Siwan ginu Buyambam tapaninde natake aminda itane umana yaitapaakusinang ngang natake ginda aminu tupan amin tapaapa kuupbamde gepbiatang yutnong. Ginda aminu tupan siknga yuak kapae gepbiatang yutnong.
1PE 2:14 Gatu aminu kundu ita pake yanipewan apu gin danduyuaing amindane gepbiatang yutnong. Wa amin pake aminu wai tasining amin panggaganuke meya yamuke natdetdetna papa nomataningge natake ita yanipewan apuke ginu danduyuaing. Danduyuke aminu sanga takeaknga tasiwiu waapae apbakngake itane umana yatangenatning.
1PE 2:15 Ginda aminu gin danduyuaingge gepbiatang yutnong ngang nata wa daninggau ginda Anutue banip tawake kepi nomana siknga akngane sukuningge natake daninggat. Ginda sukuwawa danduke aminu yamandet sikaing aminda wamu moo siknga ginde atemapa yanangge tasike ngana apmeptaning.
1PE 2:16 Siwan ginda aminu tapatu dua katewa ita gin panggaganuke gindane natdetdetza kaipakuwik. Ginu dua kateke ginda natake aminu tapatuta ninu dua panggaganuke nindane natdetdetninu dua kaipakunggak ngang natake sanga musia enayaaknga take tawake tasinim ngangu ma natapam. Aho. Ginda Anutue banip tawake itane puyana asinggan tasinong.
1PE 2:17 Tasike ginda aminu kuupbamde inandek inandek musipzaatang takekan natayamunong. Natayamuke gindane notza Jesue amina dakngake yuaingge musip gwaang natayamunong. Natayamuke Anutue gwauke itane gen gwaamutnong. Gwaamuke ginda aminu tupan siknga yuak kapae apbakngake ie gepbiatang yutnong.
1PE 2:18 Ginda puyae tawake kake aminde puya pasiyamukaingu ginda puya toikzae wamu katak tawake pasinong. Pasike puya toikzata ginde wepda pasidamuke ba toknga pasidamuninga kakengu undanga. Itane puya amina dakngakengu ginda waapatane genu akgwaamutnong.
1PE 2:19 Akgwaamuke ginda Anutue natanggamatake ie baniu katak tawaning ngana puya toikzata yamandet sike moo siknga toknga takngatu ginde damuning. Ginde toknga dama kakengu ginda akekekake Anutue kepi dua tewam. Dua tewa danduke Anututa ginde natapan take siwik.
1PE 2:20 Siwan ngana ginda puya gutonga tasiwa danduke gindane puya toikzata ginu kayata dasipanu asikaya Anututa gindane umanza ayapangenawik ba dasing? Wena. Siwan ginda puya nomana siknga tasiwa ngana puya toikzata gindane puyasae natapa wai siwan ginu atdasipning. Dasipa toknga waaknga pake ngana ginda awikake yuwanu Anututa ginde natapan take siwik.
1PE 2:21 Siwan ginu kepi waaknga tawake tasiningge natake Anututa ginu yandawakut. Asikaya Kraisda ginde tangge toknga buyambam dua pakut ba dasing? Ita ginde tangge toknga akngasa pandamuke tasikut taknga tawake ina unzakan ginda amin kapewa toknga ginde dama panong.
1PE 2:22 “Ngan. Ita sanga wai takngatu dua siknga tasikut. Tasiwan aminu tapatuta itane wamna natake kem wamu takngatu dua siknga natapbut.”
1PE 2:23 Siwan Jesutane iwanata enake Jesue inisanduking ngana ita yake dua yanisapdukut. Itane iwanata atanguking ngana ita yake toknga takngatu yamunangge dua yakut. Aho. Ita Anutu kepi nomana siknga akngane aminu kuupbam usanziwik kapae natanggamatake Anututa ina itane wamna yawan takawikge apbakngake natayukut.
1PE 2:24 Ngan. Jesuta nin gatanimuke nindane toknga aknganinu Anututa waiaknganinde natake ninde atnimik kaknga panimuke ita amin saamdakane ninde tangge kungwanimukut. Ita ninde natake nindane waiaknganin sandetnimuke ninda Anutue baniu katak siknga tawake tasinimde natake ita kungwanimukut. Ngan. Sanga wa Jesu tanguwa ita ginde tangge kungwandamukut takngata gin pasiwan take siking.
1PE 2:25 Sike ginu atnataaing. Sipsiu gwenduta inane toikngae genu dua natakengu ita apbotasukuke zong dakngawik. Ina unzakan tupa ginda Anutue wamu dua natake apbotasukuking. Ngana ginu sanga wa Jesuta ginde tangge kungwandamukut takngae natake ginda gisane musipza tapa tekwanggut. Tapa tekwamban waiakngasae apbitateke ginda Anutu gin danduyuke toikgak kapae gwa kuking.
1PE 3:1 Siwan ginu maya apza kaya aminda gisane apzae gepbiatang yutnong. Siwan puya aminda inane puya toikngae gepbiatang yutningge gwa yat. Sike ina unzakan ginda gisane apzae gepbiatang yutnong. Yuke gikat nana tapatutane apnata masa Anututane wamde imik. Iman kake ngana itane maatnata wamu takngatu ga Anutue kuyo ngangu dua iniwik. Aho.
1PE 3:2 Maatnata Anutue gwauke kepi nomana siknga akngane sukuke inane apnae gepbiatang katak yuwan kake apnata ina musia tapan tekwamban Anutue kuwik.
1PE 3:3 Siwan ginu maya akwakga sanga gupza tasigwaangutnanga akngaekan asinggan natanggamatake ma tasiwam. Gisane gwapat dagamza tasigwaangutnangge natanggamatake ma pasikwaapa kuwam. Ba katasiu gwaam siknga mani buyambamda usinanga gwegwenu ma mapa kopam. Ba tauu inata inata take siknga gogomu ma pasiwam.
1PE 3:4 Aho. Ginda gisa tasigwaangutnangge natakengu sanga musipzaatang nataaingu kaininda kananga dua aknga gitna take yutnong. Sanga wa tasigwaangutningu wai sinanga dua. Aho. Sanga wa tasigwaangutningu musipza kwikwiknga aminde natayamuke wepda pasiyamuningunin. Ginda unzing tasiwa danduke Anututa ginde natapan take siknga siwik.
1PE 3:5 Siwan tupa siknga maya kunduta Anutue amina dakngake ie apbakngake natayukingu wa aminda ina tasigwaangutnangge natake kepi nata ginde wa daninggat takngakan tawake tasikaking. Tasike wa aminda inane apnae gepbiatang yuking. Yuwawa apnata kawa take siknga sikut.
1PE 3:6 Siwan maya waakwakat nana tapatu umana Sera ngang iniking. Itane apna umana Ebraham ngang iniking. Sike Sera waapata inane apnae gepbiatang yuke ie gen gwaamukut. Siwan ginda kepi wa Serata sukukakut takngakan tawake tasinong. Tasike apzata gin pasiwa mainingge ma gwaubam. Aho. Mayata sanga takeaknga tasikaingu wa Seratane yapana binga dakngake yuaing.
1PE 3:7 Siwan ginu wawi maatza kaya amin. Ginda natdetdeu nomana pake gisane maatzaat gatake take yutnong. Yuke ginda gisane maatzae natapa sanga tuyuknga binga siyok. Siwan ginda maatzae wepda pasiyamuke asinggan gatayamunong. Ginu kuupbamda inandek inandek anzing natapnong. Nitda Anutue tumuk wam inisimde kepi sanga takngatuta umutnimuyak ngang natake ginda maatzaat gatake takekan yutnong. Dasingge? Anututa musip kwikwiu ginde natake gikat gatu gindane maatzaat kuut sanga asinggan kayuk yutnanga aknga atdamik.
1PE 3:8 Siwan wamu takngatuat nata gin daninangge nataat. Ginu kuupbamda musipza takngatukan natake yutnong. Yuke ginu notzae butaya natayamunong. Natayamuke musip gwaangu notzae natayamunong. Ngan. Ginu notzae musipzaatang takekan natapnong. Natake yamandeu ma siwam.
1PE 3:9 Gindane iwanzata enake gin pasiwa maining ba atdanisapduwa ngana ginda yake wa amin pasiwa maining ba ayanisapdutnangge ma natapam. Aho. Ginda awikake yuke wamu takekan yake wa aminu Anututa gatayamikge natake yanong. Asikaya Anututa gin gatandamunangge natake ginu dua yandawakut ba dasing?
1PE 3:10 Ginu wamu takngatu Anututane wapatang ayanikapsa aminu tapatuta tupa siknga matakut taknga atnataaing. Ita anzing matakut, “Aminu tapatuta ayutnangge take siknga natake sanga inane gupna gatangamunanga panangge natapiu waapata wamu wai ayanggak kaknga ateyok. Ateke ita kem wamu asinggan yanggak kaknga apbitateyok.
1PE 3:11 Ngan. Waapata sanga waiakngana teke sanga takeaknga tasiyok. Tasike ita musia kwikwiknga aminde natayamunangge natapsok.
1PE 3:12 Ninu atnataamang. Anututa aminu kepi nomana akngane sukukaingu asinggan kayuak. Kayuke wa amindane tumuk wamu asinggan maak gwaang pake nataak. Ngana ita masa aminu waiaknga pasikaingge ayamunggak,” ngang matakut.
1PE 3:13 Siwan ginda sanga takeaknga kumzang tasiwanu asikaya aminu tapatuta ginu take pasiwan maining ba dasing? Wena.
1PE 3:14 Siwan ginda sanga takeaknga tasiwawa ngana iwanzata enake gin pasiwa mainingge tasiwanu Anututa gin gatandaman ginda apbaknganing. Unzingge ginu sanga iwanzata gin pasiwa maining kakngae natake ginda ma gwaubam. Ie natake ginda nangaakan ma natapam.
1PE 3:15 Aho. Gindane musipzaatangu ginda Kraisde natake nindane Buyambam tapaninu unin ngang natake iekan natanggamatanong. Ngan. Ginda wamu Anututa tupa yawan yukut taknga buya aawikge natayuaing. Natayuwa ngana aminu tapatuta wamu buya aawik kakngae apbotake gin danikwaiwik. Danikwaiwanu ginda wepda yake inikapmake gisae tagwauke ininong. Ginda unzing ininangge natakengu tapduknga ita ginu dua danikwaiwik gwene ginda natdetdetza tanomanuke wamu yake anzing ininim ngang natake tandaknganong.
1PE 3:16 Tandakngake ginda kepi nomana siknga akngane sukunong. Ginda Kraisdane amina dakngake gisae natapa natdetdetza kakaa singgak ngana aminu kunduta ginde masa damuke danisapdutning. Danisapduwa ngana ginda nomana siknga yuwawa danduke wa aminda apmaakaning.
1PE 3:17 Dasingge? Anututa iwanin kapewan ninda sanga takeaknga tasiwatna ngana iwaninda enake nin pasiwa mainimu wa ninda ie natapna meya dua siwik. Siwan ngana ninda waiaknganin tasiwatna ninduke aminda toknga yake nima kakengu ninda ie natapna sanga meya siknga siwik.
1PE 3:18 Dasing? Asikaya Kraisda ginde tangge dua kungwandamukut ba dasing? Aho. Ita awia sipdukan nindane waiaknganin sandetnimikge kumbut. Sike i aminu nomana sikngaapa ge ninu wai aminde tangge kungwanimukut. Ngan. Ita nin ninipake Anutue kunangge natake ita kapewan iwanata enake i tanguwa ita ninde tangge kumbut. Tanguwa kupan ngana itane uyungata wena dua sikut. Aho.
1PE 3:19 Itane gupnasan teke uyungata kuke aminu kundu tupa siknga kupa Anututa wa amindane uyunga panggaganuwan kaautde binga yukingge kuke wamu takeaknga yanikapbut.
1PE 3:20 Siwan tupa siknga tapduknga Noata siu buyambam gwen tasike yukut gwene wa aminda yamandet siking. Sike Anutue wamde masa imuke tasiwawa kake ngana Anututa wai waakngae zet dua enake pasiwan maiking. Aho. Ita wa amin kapewan yamandet sisukuwawa yangga bamda enake wa aminu atzipa kumbing. Siwan aminu katau kautdu musa gatu kautdune tapaat tapatuatdakan yanggaatang wena dua siking. Siu buyambam gwene koke yangga engatangan takekan yuking.
1PE 3:21 Siwan yangga buyambamu wa enakuu aminu kunduta yangga gwene engatangan take yukingge natake nata tuwanguke wamu ninde yangga sautnimuking kakngae daniwa natapnong. Yangga waakngata gin gatandamunggak ngana yangga sautnimukingu wa nindane wasapmin sauwan ninda amin noman dakngakumang ngangu yananga dua. Wena. Sanga Jesu Kraisda akumbut katangga gatuna enakut takngata nindane musipmin pangenawan ninda kepi nomana tawanangge natapbumang. Natake nisae natapna natdetdetninu kakaa siknga singgak kaknga akekekawikge natake yangga saukumang.
1PE 3:22 Siwan Jesu waapata gatuna enake enandang kopbut. Koke ita Anutuat gatake yuwat angela umana kaya siwan kekekngana kayata kawa ita umana buyambam siknga take Anututane kataknga siyaapane yuwan kake itane gepbiatang koke yuaing.
1PE 4:1 Siwan iwanata enake Krais tanguwa kumbutde natake ginda gisane musipza papa kekekawikge natdetdeu Jesuta natapbut taknga tanong. Natdetdeu wa take ginda anzing natapnong. Aminu tapatuta toknga pakengu asikaya waapata waiakngana undang dua bitatewik ba dasing? Aho. Ita asiknga bitatewik.
1PE 4:2 Bitateke waapata sanga wai musia enayaakngane dua sukuwik. Aho. Ita asinggan Anutue banip tawambik. Tawake tasiwawan kuku tapduknga ita akupik gwenda apik.
1PE 4:3 Siwan tupa ginda sanga katum aminda tasinangge take siknga nataaing kakngane sukuke tasiking. Sanga wa ginda tasikingu wa ginda sanga yasewa aknga tasike kamun binga dakngaking. Dakngake sanga wai kuupbam musia enakaing kaknga tawake kumzang tasiking. Tasike yangga toknga aknga buyambam tangoke datdaptake sanga wai siknga katum aminda tasikaing kakngae apbakngake tasiking. Ngan. Ginda sanga wai siknga tasiwawa buyambam siknga sikut.
1PE 4:4 Siwan ngana apmanu ginu sanga waaknga gwa bitateke ginda katum amikat dua gatake sanga ginda tupa wai wa tasiking kaknga dua tasikaing. Ginda dua tasiwa danduke wa aminda ginde nangaakan natake danisapdukaing.
1PE 4:5 Ngana masande wa aminda inane wam yake Anutue sanga wai waaknga tasikaingge yapii inining. Sike Anututa wa aminu kuupbamdane wam usanzitnangge gwa tandakngake yuak. Ita aminu kayuk yuaing gatu akupsa amin nganggane wamna usanziwik kapanin.
1PE 4:6 Siwan ie natake Jesuta aminu kayuk yuking amindekan dua yanikut. Aho. Anututa aminu kuupbamdane wam usanziwik binga tasike ita wa amindane wamna usanzike yawan waiaknganae kumbing. Sike Jesuta wa aminde kuke wamu takeaknga yanikapbut. Aminu wa yanikapbuu sanga Anututa kekeknga asinggan yuwik kaknga take wa aminda asinggan kayuk yutningge natake yanikapbut.
1PE 4:7 Siwan tapduknga sandetnangge dapaknga gwa singgakge ginda gisae natdetdetzane anggaman natake yutnong. Yuke ginda gisae katak tagwauke Anutue tumuk wamu asinggan ininong.
1PE 4:8 Sike ginda notzae musip gwaangu asiknga natayamunong. Ginu atnataaing. Aminu tapatuta inane notnae musip gwaang natayamiu waapata wa amindane waiaknganae natapan wena siwik.
1PE 4:9 Siwan notza maata apa kakengu ginda wa aminde apbakngake gisane yotzane zet pakopnong. Pakoke sangasa yamuning kakngae nangaakan ma natapam. Wena.
1PE 4:10 Siwan Anututa natdetdeu inana ginu kuupbamde inandek inandeu gwa damukut. Sike natdetdeu ita wa daman paking kaknga ginda ma kotnawam. Aho. Ginda Anututa natdetdeu ginde wa damukuunin pake notza nomana siknga gatayamunong.
1PE 4:11 Ngan. Gikat nana tapatuta natdetdeu Anututane wam yanikapnanga aknga tapiu waapata wamu Anututa itane musia tangenawan natapbut takngaekan natake yanikapsok. Siwan gatu gikat nana tapatuta natdetdeu aminde gupna gatayamunanga aknga tapiu waapata natake Anututa inane kekeknga akngata na gatangaman nata enake puya waaknga tasike aminu kundu gatayamunggat ngang natapsok. Ginda unzing natake puya inana tasiwawa danduke aminu kuupbamda anzing natapning. Jesu Kraisda gin gatandaman ginda puya take siknga tasikaing ngang natake Anututane umana asiknga yatangenatning. Siwan Anututane umana enane siknga yuwawan ita inane kekeknga akngane yuke asinggan asinggan yuwik. Siakan.
1PE 4:12 Mate notnabam! Nata musip gwaangu ginde natandamuke wamu takngatuat daniwa natapnong. Sanga meya sikngata ginde apanu akaaing ngana ginda sanga wa inata kunduta ninde apunggak ngangu dua natake ie ma satnawam.
1PE 4:13 Aho. Ginda natake Kraisda meya buyambam pakutde ninu kuut ina unzakan pakamang ngang natake apbaknganong. Apbakngake tapduknga Jesuta gatuna apan ita aminu umana buyambam siknga kayaapa ngang anggaman siwik gwene ginda asiknga baknganing.
1PE 4:14 Siwan apmaau ginda Kraisde gepbiatang yuke tasiwawa danduke aminu kunduta ginde atdanisapdukaing. Ngana Anututane Waungu umana enane siknga yuak kapata gikat gatake yuaingge natake ginda apbaknganing.
1PE 4:15 Unzingge aminu gikat nana tapatuta aminu ma tanguwan kupan. Ba ita kukae ma papan. Ba ita sanga waiaknga dua tasiwan. Ba ita aminu kundutane sangaekan kanggamatake ma yaniwan. Dasingge? Aminda gin danduwawa gikat nana tapatuta sanga wai wa binga tasiwan kake wa aminda yake toknga waapae asimuning. Sike toknga nimunang ngang natake ginda gisae katak tagwauke sanga wa bingae apbitatenong.
1PE 4:16 Siwan ginu Jesue amina dakngake yuaingge natake aminu kunduta gikat nana tapatue semna natangamuke toknga ima papanu toknga wa papik kapata ie dua maakawan. Wena. Toknga papiu waapata Jesue amina dakngake yuakge natake ie apbakngayok. Apbakngake ita Anututane umana yatangenayok.
1PE 4:17 Ginu atnataaing. Tapduknga Anututa ninu inane aminabamde wamin usanziwik gwenu gwa apunggak. Siwan ita aminu kuupbamdane wamna usanzitnangge yake wamu ninde gamok tuwanguke usanziwik. Unzingge ninda dasing natapnim? Aminu yamandet sike Anututane wamu takeakngae masa imukaingu ita kakgan sike wa amindane wamna dua usanziwik ba dasing? Aho. Ita kaanga siknga yaniwik.
1PE 4:18 Ina unzakan wamu takngatuat Anutue wapatang ayanikapsa aminu tapatuta anzing matakut, “Aminu Anutue kepi nomana siknga tawake tasinggau waapata meya buyambam pake paa pimakut. Sike ita apimakut gamu waiakngana dua sandewan. Siwan aminu Anutue masa imuke waiakngane sukukaingu asikaya Anututa wa amin gatayamuke waiakngana asandeyamik ba dasing? Wena siknga,” ngang matakut.
1PE 4:19 Unzingge Anututa kapewan gikat nana kundu amin noman ngana iwanata enake toknga yama paningu wa aminda kepi nomana akngane sukunong. Sukuke wa aminda Anutu ninu mingindane musiaatang tumukut tapata ninu katak siknga atoikgak kapae kuke ie natapa kekeknga siyok.
1PE 5:1 Siwan na. Nata aminu Anutue amina dakngake yuaingunin kayuke nata puya amin dakngake yuat. Sike tupa nata ninane kainata kawawa aminda toknga Kraisde imuke tanguwa kumbut. Siwan apmea ita gatuna apan kake aminu kuupbamda ie natapa aminu tupan sikngaapa dakngawik. Ita apana nata iat gatake yuke nakaya kuut aminu umana kayaapa dakngawit. Sike nata aminu gikat nana kundu gin danduyuke puya aminu na binga dakngake yuaing aminde natake nata wamu kekeknga yawa natapnim.
1PE 5:2 Ginu puya tasike aminu Anututa inae pake gindane kataune pekuu wa ginda katak siknga kayutnong. Notzata daniyapiba tasiwanu take dua siwik. Siwan dua daniyapiba ginu gisa banipda siwan puya waaknga tasinangge takekan natapnong. Take natake mani buyambam panangge natake ginda kemu ma panziwam. Wena. Gindane musipza puya waaknga tasiningge enawan tasinangge asiknga bakngake tasinong.
1PE 5:3 Tasike aminu wa Anututa ginde kataune pewan kayuaingu dua yaipapaakusiwam. Ba ginda enane yuke wamza tawaningge kumzangu ma kekekawam. Aho. Ginda kepi nomana akngane sukuwawa aminza bamda danduke kepi nomana waakngakan tawake tasining.
1PE 5:4 Ginda unzing tasike yuwawa aminu ninu kuupbam ninduyuak kapata gatuna apan kanim. Sike tapduu waomune ita ninu itane gepbiatangu tupa kopbumang amin ninipakopan ninda enandangu iat gatake kekeknga asinggan yutnim.
1PE 5:5 Siwan nata ginu maya gatu wawi matekge natake gikaya kuut daniwa natapnong. Ginu kuupbamda aminu take apaapae wam gwaamutnong. Ngan. Ginda notzae wam natake yamandeu ma siwam. Ginu atnataaing. Wamu takngatu Anutue wapatang ayanikapsa aminu tapatuta anzing matakut, “Anututa aminu yamandet siningge masa ayamik, ngana aminu wam natapningu ita wa aminde musip kwikwik natake akgatayamik,” ngang matakut.
1PE 5:6 Unzingge ginu kuupbamda Anutu kekeknga siknga yuak kapae gepbiatang koyutnong. Koyuwawa masande tapduknga ita yawan yukut gwene Anututa gindane umanza yapangenawik.
1PE 5:7 Ngan. Ginu ie gepbiatang yuke sanga meya akngata ginde apan kake ginda ie nangaakan nataaing. Sike sanga kuupbamu ginde wa apukaingge ginda Anutue inikapmake inindatapnong. Asikaya ita ginde butaya dua natandamunggak ba dasing? Aho. Ita butaya ginde natandamuke ginu katak siknga atoimbik.
1PE 5:8 Siwan ngana gindane iwanza Setenu unin. Ita gin pasiwan mainingge natake asinggan sukunggak. Siwan ginda ie natake gisa katak tagwauke kayutnong. Ginu atnataaing. Kaap zongu buyambamu gwendu umana laion ngang inikamang gwenda kaap notna nanangge toknga siknga natake yawanggak. Ina unzakan Setenda gin pasiwan mainingge puya kekeknga siknga tasinggak.
1PE 5:9 Ita gin pasiwan mainingge tasinggak ngana ginu atnataaing. Gindane notza Jesue amina dakngake yuaingu kepna kepna nana kuupbam Setenda pasiwan mainingge toknga tasinggak. Siwan ginu wa aminde natake ginda Jesue kekeknga siknga natake Setende yandakngawa ita ginu dua pasiwan maining.
1PE 5:10 Sike Setenda gin pasiwan mainingge tasiwawan ginda meya waakngane mateknga kundusim yutning. Yuwawa Anututa ina gin panomanuke kekekandaman ginda ie natapa kekekawan kekeknga siknga yutning. Siwan Anutu waapa musip kwikwikgane yapii unin. Ita ginde natake ginu Kraisde kuke iat gatake yutningge natake ginu yandawamban ie kuking. Kuke ginda iat gatake itane kakaa akngane asinggan yutningge natake gin yandawakut tapa unin.
1PE 5:11 Sike Anutu waapata kekeknga siknga yuwawan ninda ie gepbiatang koke yuwatna ita ninu asinggan asinggan ninduyuwik. Siakan.
1PE 5:12 Notninu Jesuat nana tapatu umana Silvenes ngang inikamang. Ita pas asanu natane genaneta natake matanggak. Waapae natapa amin gwaang singgak. Siwan wamu ita ginde matanggau wa nata natake Anututa ninde musip kwikwik natanimuke gatanimunggak ngang natake daninggat. Nata wamu waakngata gindane musipza papan kekekaningge natake yanggat. Siwan ginda musip kwikwiu Anututa unzingu wa natanimunggak kakngane kekeknga siknga yutnong.
1PE 5:13 Siwan aminu Anututane aminabam dakngake yuaingu you gapmandu umana Bebilon ngang inikamang gapmane nana aminda gaak wamu ginde damukaing. Wa amikat gikat Anututa inae papan ginu kuupbamda itane donga binga dakngake yuaing. Siwan notninu tapatu umana Mak ngang inikamang kapaaya kuut ginde gaak wam daninggak. Ita naat gatake yuamakge nata ie waaknga ngang ininggat.
1PE 5:14 Siwan ginu kuupbamda notza Jesuat nana aminde musip gwaang natayamuke kataknga ipnong. Ginu Kraisde kuke iat gatake yuaingu kuupbamde natake nata tumuk wam iniwa Anututa gin pasiwan ginda musipza kwikwikngata yutning. Unukan.
2PE 1:1 Na Saimon Pita. Na Jesu Kraisda tapan itane kwiiknga dakngake itane puyana tasinggat. Tasiwa nanduke aminda aposel ngang nanikaing. Siwan nata pas asanu ginu Jesu Kraisde natapa kekekanggak aminde matandamunggat. Siwan Anutuninu Jesu Kraisda nin gatanimuke kepi nomana siknga tawake ninu kuupbamdane musipmin pangenawan ninu Judia nana amikat gikatda ie natapna kekeknga singgak. Siwan sanga wa ninda ie banip sikamang kakngae natapna take siknga singgak.
2PE 1:2 Siwan nata ie tumuk wam iniwa ita ginde natake ginda natdetdeu anggaman Anutu gatu Buyambam tapaninu Jesue nataaing ngang natake ita ginde musip kwikwiu asiknga natandamuke gin pasiwan ginda musipza kwikwiknga yutning kakngata buyambam siwik.
2PE 1:3 Siwan Jesuta ninde natake ninu ie natdetdetninu anggaman siknga natdeke ie kuke iat gatake yutnimde natake yaniwakut. Ngan. Ninda ie kuke ninda itane banip tawake kepi nomana siknga akngane sukunimde natake Jesuta inane kekeknga aknganata ninu yaniwakut.
2PE 1:4 Yaniwake ita ninu take siknga gatanimunangge yawan yukut. Siwan ita wamu wa yawan yukut taknga buya aawan ginda sanga wai musia enayaaknga bitatening. Sanga wai musia enakaingu wa aminda wai siningge yapii unin. Siwan ginda teke Anutue banip tawake tasining. Ginda unzing tasiningge natake Anututa wamu tupa yawan yukut taknga ginde damukut.
2PE 1:5 Unzingge ginu Anutue banip sikengu ginda sanga nomana siknga tasinangge puya kekeknga siknga tasinong.
2PE 1:6 Gatu ginda gisae natdetdetzae kuyana yutnong. Gatu gindane iwanzata enake toknga takngatu takngatu ginde dama pakengu ginda wikake yutnong. Gatu ginda Anutue banip tawake tasinong.
2PE 1:7 Gatu ginda notza Anutue amina dakngake yuaingge musip gwaang natayamunong. Gatu aminu kuupbamde butaya natayamuke gatayamunangge takekan natapnong.
2PE 1:8 Ginu atnataaing. Ginu sanga wa kuupbamu kumzang tasikengu ginda natdetdeu nindane Buyambam tapaninu Jesu Kraisdane akngae anggaman nataaing kaknga buya aawan ginda itane banip atawake tasining.
2PE 1:9 Siwan aminu tapatuta kepi waaknga dua tawake tasiwiu waapa tupa Anututa gatangamuke itane waiakngana sandekngamukut ngana ita apbotasukunggak. Apbotasukuke kai zikaawan sanga maa siknga dua kawik binga dakngake sanga tupa Anututa gatangamukut takngae botake sukuwik.
2PE 1:10 Siakan mate notna. Ita apbotasukuwik ngana gin. Ginda kepi nata wa daninggat taknga tawake tasikengu ginu akekekake dua siknga pimaning. Siwan ginda pimanam ngang natanggamatake sanga Anututa ginu inae pake yandawamban ie kuking kaknga kekeknga siwikge tasinong.
2PE 1:11 Tasike dua pimake yuwawa danduke Anututa ginde asiknga bakngake gwaboknga zitdamik. Zitdamuke ginu pakopan ginda enandangu Buyambam tapaninu Jesu Kraisda kuyana yuak komune kopning. Koke Jesu wa nindane waiaknganin sandetnimukut tapatane gepbiatang koke kekeknga asinggan asinggan yutning.
2PE 1:12 Siakan. Wamu nata wa daninggatde ginu atnataaing. Natake siakan wamu waaknga gitna gwa take ie kekeknga yuaing. Siwan ngana undanga. Tapduk bamu nata gindane natdetdetza pangenake daniwa ginda ie asinggan natdeke yutning ngang natake yanggat.
2PE 1:13 Na atnataat. Buyambam tapaninu Jesu Kraisda tupa nanike na tapduknga dapaknga yusika akupitde yakut. Siwan wamu ita wa yakut taknga buya asaawik ngang natake nata gindane natdetdetza pangenake daniwa gatusa natdetning. Ngan. Nata take siknga daninangge nataat. Danike tasiwawa kuku tapduknga nata akupit gwenda apik.
2PE 1:15 Siwan ginda wamu nata ginde daninggau waakngae asinggan natdeke yutningge natake puya kekeknga tasiwit. Tasike akupana ginda wamu waakngakan gitna take yutning.
2PE 1:16 Siwan ninu itane kwiiknga dakngake wamu Buyambam tapaninu Jesu Kraisda apmea gatuna apuke puya kekeknga siknga takngatu takngatu pasiwikge natake ginde danikapbumang. Sike wamu ninda danikumangu wa ninda wamu nisane banipda siwan natake dua danikumang. Ninda kopap wamu yapiina wena moo siknga takngatu dua tawake danikumang. Wena siknga. Tupa ninda nisa kaininda siknga kawatna Jesu waapata apuke puya kekeknga tasiwan kakumang. Kake ninda ie natapna aminu enandang nana tapatu dakngakut. Unzingge ninda wamu ita gatuna asapikge natake danikapbumang.
2PE 1:17 Ngan. Ninda kaininda kawatna Nanin Anututa enandang yuke Jesutane umana asiknga yatangenake ita anzing yakut, “Waapa natane waaknga. Na ie take siknga nataat,” ngang yakut. Sike wamu ita wa yakut taknga enandangga epan natapbumang.
2PE 1:18 Ninda Jesuat gatake tawan dakane yuwatna wamu waaknga enandangga epan natapbumang. Natake tawanu wandakae natapna Anututane kep tapa binga dakngakut.
2PE 1:19 Siwan kaininda kawatna Anututane siakan wamu ayanikapsa aminda tupa siknga yaking kaknga buya unin aawan kakumang. Kake ngana wamu takngatu ita gatuna apikge apbakngake natayuamang. Siwan gikaya kuut wa amindane wamna buya apmea aawikge apbakngake natayutnong. Dasingge? Wamu wa aminda yakapbing kakngae natapna lamu gwenduta zikaa dakaatang isikonggak binga daknganggak. Isiwawan kuku akwakawan yekapdaau gwaim gwenda yuak binga daknganggak. Siakan. Wamu waakngata natdetdetninu kaipake kuwan ninda Jesue kukumang. Kuke kakaa itane akngane yuamang. Yuwatna kuku tapduknga aminu kakaa waakngatane toiknga apata asapik gwenda apik.
2PE 1:20 Ginu atnataaing. Anututa tupa siknga aminu tapatu tapatu inae papan itane kwiiknga dakngaking. Dakngawa Waung Kapata wa amindane musia pangenawan Anututane siakan wamu takngatu takngatue natake yanikapbing. Sike wamu wa yanikapbingu ina banipda siwan dua yaking. Aho. Wamu wa yakinggane yapii Waung Kapa unin. Siwan ginu wa aminda wamu Anututa ina yaniwan natake yaking kakngae yapii kanangge natake natdetdeu gisane akngane yananga dua. Aho. Waung Kapata wamu waakngae yapii ginde yeutdaman kanong.
2PE 2:1 Siakan ngana tupa siknga aminu kunduta Isrel nana aminde banakan enaking. Enake Anututane siakan wam taknga teke kem wam taknga yanindamuking. Ina unzakan aminu kunduta ginde banakan enake gikaya kuut kem wam taknga danindamutnangge tasining. Buyambam tapaninda wa amindane waiakngana gwa sandewan yangga aminu gwa dakngaking ngana tapa tekwamban wa aminda akusopuke kem wamu inata inata gindane natdetdetza pasiwan mainanga aknga tangenatning. Tangenake Buyambam tapaninde masa asimuke kem wam taknga danindamutning. Wa aminu masande Anututa pasiwan zetgaman wai sining.
2PE 2:2 Siwan ngana aminu kwaapzangga sanga wai musia enayaaknga aminu waakwakga tangenaking kakngae bakngake tawake tasining. Tasiwawa kake aminu kunduta botake yangga amin ngana sanga gawaknga tasikaing ngang natake siakan wamde kepi sapduke danining.
2PE 2:3 Siwan kem wamu gin danindamutning aminu waakwakga puya tasike mani buyambam panangge natapning. Natake kem wamu kwaapzang danindamuke gindane sangaapasa kaiwa kundamuningge tasining. Wa aminde Anututa tupa siknga toknga aknga yamunangge gwa yawan yukut. Ngan. Ita wa yawan yukutde natake dapuna dua pekgak. Aho. Ita kayuke wa aminde toknga yamunangge kayuak.
2PE 2:4 Ginu atnataaing. Tupa siknga angela kunduta waiaknga tasiking. Tasiwa kake Anututa angela waakwau kakgan dua sikut. Aho. Ita angela waakwau ayanikwasipewan kuku keu katau asinggan isinggak komune kuking. Kuke zikaa wai siknga dakaatang yuaing. Yuwawa kuku tapduknga Anututa aminu kuupbam usanziwik gwenda apik.
2PE 2:5 Gatu aminu tupa siknga yuke masa Anutue imuke waiakngane sukukingu wa Anututa dua kapewan tasiking. Aho. Ita tasiwan yangga buyambamda apaptake wa aminu kuupbam zipa puyukut. Zipa puyuwan ngana Anututa aminu tapatu umana Noa ngang iniking. Ita wamu kepi nomana aknga tawake tasiningge natake aminu kuupbam yanikapbut. Yanikapmake tasiwawan Anututa i gatangaman yanggaatangu dua kumbut. Iat gatu aminu katau kuut musa kautdu tapaaya ngang gatayaman yanggaatang dua kumbing.
2PE 2:6 Gatu Anututa you gapmaaya umana Sodom gatu Gomora ngang yaniking gapmaaune nana aminu kuupbamdane wam usanzike natapan wai siknga sikut. Siwan ita tasiwan you wa gapmaau katapda yasikut. Yasike aminu you wa gapmaaune nana kuupbam yasiwan kumbing. Yasiwan kupa ngana aminu tapatu umana Lot ngang iniking. Ita aminu nomanaapa. Sike ita kawawan wa aminda sanga yasewa aknga kumzang tasiwawa kake ie musiaatang meya siknga natapbut. Natapan Anututa Lot waapa gatangaman katapda dua isiwan kumbut. Ngana aminu wa katapda yasiwan kumbingu masande aminu masa Anutue imuningga wa aminde natake akgwautning. Ninda toknga ina unzakan panam ngang natake waiakngana bitateningge natake Anututa tasiwan you wa gapmaau katapda yasikut.
2PE 2:8 Siwan ngana Lot. Aminu nomana waapata wa aminde banakan yukut. Yuke tapduk bamu asinggan kawawan wa aminda wamu wai siknga yake gatu sanga waiaknga kwaapzang pasiwawa kakut. Kake ita musia toknga siknga wa aminde natayamuke yukut.
2PE 2:9 Siwan ginda wamu waaknga natake ginu atnataaing. Buyambam tapaninda aminu sanga takeakngane sukukaingu take gatayamuke sanga apasiwa sinanga akngata wa aminde apik kaknganae asandewik. Ita wa aminu take sandewik ngana wai aminde natake ita toknga yamunanga aknga teyamunggak. Teyamuwawan kuku tapduknga aminu kuupbam usanziwik gwenda apik.
2PE 2:10 Ngan. Wai aminde toknga akngata ayuyamunggak. Siwan aminu sanga wai musia enayaaknga tawake yasewa aknga tasike gatu aminu tupan tapaapatane wamde semna nataaing aminde natake Anututa toknga siknga yamunanga aknga teyaman wa aminde yuyamunggak. Siwan aminu wa kem wam taknga danindamukaing aminda yamandet sike inane sanga akngaekan natanggamatakaing. Natanggamatake aminu umana kaya apaapa yanisapdutnangge dua gwaukaing.
2PE 2:11 Sike angelata aminu waakwau asiknga yapbike yuaing ngana wa aminde wam temapa yanangge angelata Buyambam tapaninde nomune kuke dua sapdukngamukaing. Wena.
2PE 2:12 Siwan ninda kaap zongge natapna sanga ayamnanga singgak. Siwan aminu kem wamu gin danindamukaing aminda kaap zongu dua yapbiking. Aho. Wa aminda sanga musia enayaakngakan tawake natdetdeu takngatu takngatu natake ngana yapii katak dua natake asapdukaing. Siwan sanga wai wa tasikaing kakngata wa aminu apasiwan maining.
2PE 2:13 Ngan. Sanga wai takngatu takngatu wa aminda pasikingge natake Anututa wa amin pasiwan wai sining. Aminu waakwau gawaknga siknga. Sanga musia enayaaknga maakngana kaya ngana wa aminda asiknga bakngake aminbamde kaine tasikaing. Sike wa aminda gikat gatake yuke nanamu nakaing. Nake ginu kem panzitnangge apbakngake tasikaing. Tasike sanga take ginda tasinanga aknga tasiwa mainggak.
2PE 2:14 Sike wa aminda maya gikat nana kundue geenguke yasewa asinggan tasinangge natanggamatakaing. Gatu aminu kepi nomana akngane sukunangge kekeknga dua nataaingu wa aminda ayanindatdaukaing. Ngan. Kepi kem panzike amindane sangaapana kaiwan kuyamuning kakngae katak siknga natdeke tasikaing. Siwan wa aminu Anututa apasiwan maining.
2PE 2:15 Dasingge? Kepi nomana akngane sukuking ngana wa aminda gwa teke botasukukaing. Botasukuke aminu tapatu umana Belam ngang iniking. Ita Beotane waaknga. Sanga waapata tasikut taknga wa aminda tawake tasikaing. Siwan Belamu waapa Anututane wam yanikapsa aminu tapatu ngana ita mani panangge take siknga natapbut. Natake yuwawan aminu tapatuta mani imuke gata sanga wai takngatu anzing tasiyo ngang inikut. Iniwan natake waapata mani wa imukuunin pake sanga wai waaknga tasinangge kukut.
2PE 2:16 Tasinangge kuwawan itane dongki gwenu amindane wamna yananga dua ngana Anututa tasiwan dongki wagwenda wamu ninda yakamang kakngane yakut. Yake sanga wai waaknga Belamda botasukuke tasinangge natapbut taknga ayandakngakut.
2PE 2:17 Siwan aminu kem wamu gin danindamukaingga kepi aminu waapata tawake tasikut takngakan tawake tasikaing. Puya pasiwa ngana buya dua aawik. Nata wa aminde natapa yangga tangopnangge natake yangga apane kuke kawa ngana gwa zakngakut binga singgak. Ngan. Nata kem aminu waakwakge natapa sopa tawikge natayuwawa ngana gou buyambamda minga dakandaka puyatawamban kuwawa sopa dua tanggak binga singgak. Siwan siakan wamu takngatu wa aminda nininingge natayutna mainggak. Unzingge Anututa keu zikaa daka wa aminde gwa tandakngatekut. Sike keu wa komune kuke zikaa akngane yuwawa buyambam siknga siwik.
2PE 2:18 Dasingge? Wa aminda inane wai akngae apbakngake inane umana moo siknga yapangenakaing. Siwan aminu kunduta apmaatzim sanga wai katum aminda tasikaing kakngae bitateke yuaing. Bitateke yuwawa ngana aminu wai waakwakga sanga musia enawan yasewa pasinanga akngae yanindatdaukaing. Yanindatdauke kaipakuwa aminu sanga waiaknga teke datakukaingga tapa tekwamban kuku yawaningge yanikaing.
2PE 2:19 Yanike ginda aminu tapatue gepbiatang dua yuwam ngang yakaing. Ginda sanga musia enaya akngaekan natake tasinong ngang yakaing. Yake ngana wa aminda inane waiaknganae gepbiatang yuwawa wai waakngata gitna siknga panggaganuwan yuaing. Ginu atnataaing. Aminu tapatu sanga takngatuta yapbike tasiwan pimapanu aminu waapata sanga waakngae gepbiatang yuwik.
2PE 2:20 Siakan. Buyambam tapaninu Jesu Kraisda nin gatanimuke nindane waiaknganinu gwa sandetnimukut. Siwan aminu sanga Jesuta gatanimukuu waakngae natdeke gitna pakengu wa aminda sanga nin pasiwan mainanga akngae apbitateke tasining. Tasiwawa ngana sanga wai waakngata gatu panggaganuke wa amin pasiwan pimapa kakengu wa aminde natake anzing yanim. Tupa wa aminda sanga wai akngaatang yuke dua bitateking. Dua bitateke wa aminda wai yuking. Ngana apmanu gatu panggaganuke pasiwan pimake wa aminda wai siknga yuaing ngang yanim.
2PE 2:21 Ninda Anututane mama wam taknga yanikapna wa aminda gwa natapbing. Natake ngana gatu tapa tekwamban ie masa imukaing ngang kakengu wai siknga yuaing ngang yanim. Asingu wa aminda natdetdeu kepi nomana siknga akngane sukunanga akngae dua natapbing ngang yanim.
2PE 2:22 Yake wa aminda tapa tekwamban gatuna pimapa kakengu wamu asinggan yakamang kaknga buya unin aakgak ngang yanim. Yake sanga wa gatuna pimaking kakngae natake, “Kamunda akngwatuke gatuna kuke nanggak binga tasikaing,” ngang tuwanguke yanim. Gatu ina unzakan wamu takngatuat anzing yanim, “Toikngata ikwawana yangga gwa saukngaman ngana enake kaik kanzang gwegwekatang kwaidotdongukgak binga tasikaing,” ngang tuwanguke yanim.
2PE 3:1 Sike mate notnabam. Nata musip gwaangu ginde natandamuke pas asan matandama saaya daknganggak. Sike nata gindane natdetdetza nomana aknga papa kekekawa ginda natdetdeu nomana siknga pake yutningge natake nata pas sandu tupa ginde matandamukum. Sike apmanu nata gatuna natdetdetza papa nomataningge natake nata pas asanu ginde matandamunggat.
2PE 3:2 Ngan. Wamu tupa siknga Anututane wam yanikapbing aminda yakuu waakngae ginda gatusa natdetningge natake matanggat. Gatu mama wamu Buyambam tapaninu nindane waiaknganin sandetnimuke gatanimukut tapata yakut takngae natake daninggat. Wamu waaknga ita nin papan itane kwiiknga dakngakumangge niman pake aminu nikat nana kunduta ginde kuke danikapbing. Sike mama wamu wa danikapbingu ginda gatusa natdetningge natake nata ginde matandamunggat.
2PE 3:3 Sike wamu tupan taknga anzing. Tapduknga masanu asandewik gwene yamandet aminu kunduta enake sanga musia enaya akngakan tawake sapdut wam yaning.
2PE 3:4 Yake wa aminda anzing yaning, “Ita gatuna apikge yakut taknga buya dua aawan kaamang,” ngang yaning. Yake, “Nindane naninda wamu ita yakut takngae natapa kekekawan yusika gwa kumbing ngana sanga kuupbam tapduknga Anututa tasike tekut gwenuneta apu apman apan sanga kuupbamu ayuking kakngakan apman kaya ayuaing,” ngang yaning.
2PE 3:5 Yake ngana wa aminda sanga Anututa tupa siknga tasikutde natapnangge apbitake wamu waaknga yaning. Siakan. Tupa siknga Anututa genata yawan sanga ena kakaa banakan komune yuaingga aake yuaing. Gatu keu yangga banakan enake yangga banakan yukut.
2PE 3:6 Yuwawan ngana Anututa genata yawan yangga buyambamda apaptake aminu undang yukingu kuupbam zipa kumbing.
2PE 3:7 Ngan. Wa aminu atzipa kumbing ngana wamu Anututa gwa yawan yukut takngane sanga ena kakaa banakan komune yuaikat gatu sanga kepdakane yuaikat ngangu masande katapda ayasiwan wena sining. Sanga wa kuupbamda ayutningge natake Anututa yake tasiwawan kuku tapduknga ita wai aminu kuupbamdane wam usanziwik gwenda apik. Apana ita wa aminde toknga yamuke pasiwan maining.
2PE 3:8 Siwan mate notna. Nata ginde musip gwaang natandamuke daniwa natapnong. Ginda ma botawam. Buyambam tapaninda tapduu gwendue natapan nakanu buyambam siknga 1,000 binga singgak. Siwan ita nakanu 1,000-de natapan tapduu gwendu binga singgak. Siwan wamu waaknga ginda ma botawam.
2PE 3:9 Siakan. Aminu kunduta Anutue natake wamu ita yawan yukut taknga buya apmea aawik ngang yake ita zet dua tasiwik ngang yakaing. Yawa ngana ita wamu wa yakut taknga atasinanggenggak. Atasinangge nataak ngana ginu kuupbamda musipza tapa tekwamban waiakngasa apbitateningge natayuak. Aminu tapatu inane waiaknganae toknga imuke tasiwan maiwikge bitake yuak. Yuke ita ginde wepda siknga tasindamunggak.
2PE 3:10 Siwan ngana Buyambam tapaninda zetgaman asapik. Tapduknga ninda ie dua natapnim gwene apan kake asatnanim. Aminu tapatuta kukae panangge apan kake satnakamang binga ita apan satnanim. Sike tapduu wagwene sanga ena kakaa banakan komune yuaingga gakngau kapzang siknga yake tapmake wena sining. Siwan katapda sanga kuupbam yasiwa sopuning. Ngan. Kepdaka kuut gatu sanga kuupbapat amikat kuut ayasiwan puyuwik.
2PE 3:11 Sanga wa kuupbam asopuning ngang natake ginda kepi dasing kakngane sukunangge natapning? Ginda Anutue natanggamatake ie gepbiatang koke kepi nomana siknga akngane sukunong.
2PE 3:12 Ngan. Tapduknga Anututa tasiwan sanga ena kakaa banakan komune yuaingu katapda yasiwan asopuning gwende kayuke ginda sanga takekan tasinong. Tasike Anututa sanga waaknga zet tasiwikge puya ginda kekeknga tasinong.
2PE 3:13 Siakan. Ninda tapduu wagwenda apikge kayuamang ngana Anututa wamu ita ena kakaa banakan kom gatu kepdaka ngangu kayuk tasinangge gwa yakut. Siwan wamu wa yakut taknga buya aawana aminu kuupbamu undang yutningga kepi nomana aknganekan sukuning. Siwan ninda sanga waakngata asaawikge apbakngake natayuamang. Ninda musip kwikwiu Anututa ninde natanimunggak kakngane yutnimde natake yakut.
2PE 3:14 Siwan mate notnabam. Nata musip gwaangu ginde natandamuke daninggat. Ginda tapduu wagwenda apikge kayuke puya kekeknga siknga tasike kepi nomana siknga aknga tawake tasinong. Tasiwawa tapduk wagwenda apan Anututa gin dandupan take siwan ginde musip kwikwik natandamikge tasinong.
2PE 3:15 Tasike ginda Buyambam tapaninde natake ita ginde wepda tasindamunggakge natapnong. Ita ninde natake ninda ie kuna ita waiakngane ninu sandewikge natake wepda tasinimunggak ngang natapnong. Siwan natdetdeu nomana waaknga notnin siknga Polde Anututa iman take ita kuut wamu wa bingakan ginde matandamukut.
2PE 3:16 Ngan. Pas kuupbam ita matakut katangu wamu nata a matanggat takngaekan natake apmatakut. Siwan wamu kundu ita pas sasane matakuu wa anggaman siknga dua. Siwan aminu kundutane natdetdetna dapaknga siwan Anutue kekeknga dua nataaingga wamu wa Polda anggaman dua matakut taknga papa gutokawan yawa kem singgak. Siwan Anututane wamu tupa mataking kaknga kuupbamu kuut wa aminda yapii anggaman dua natake papa gutokawan yawa kem singgak. Siwan kem wamu wa yakaing kakngata wa aminu apasiwan maining.
2PE 3:17 Siwan mate notnabam. Nata ginde musip gwaang natandamuke daninggat. Ginda kepi wai wa aminda tawake tasikaing kakngae tupa atnatapbing. Unzingge ginda gisae katak siknga tagwautnong. Ginda siakan wamde kekeknga yuaing ngana wai aminu waakwakga nin kaipakuwa wai waakngane pimanam ngang natake wa aminde akagwautnong.
2PE 3:18 Ngan. Buyambam tapaninu Jesu Kraisda ninde musip kwikwik natanimukut. Natanimuke nin gatanimuke nindane waiaknganin sandetnimukut. Siwan ginda ie asinggan natanggamatake sanga ita gin gatandamukut taknga gitna siknga tapa kekeknga siknga siyok. Siwan itane umana akngata apmanu buyambam siwan enane siknga asinggan asinggan yuwik. Siakan.
1JO 1:1 Na gatu notna naat gatake yuamang aminda pas asanu ginde matandamuke wamu kayuk yutnanga akngae yapii danina natapnong. Wamu wa tapduknga kepat yekapat dua tasike tekut gwene yukut taknga ninda maaknginda natapbumang. Natayuk ninda kaininda kake kataknginda takumangge ginde danikapmakamang.
1JO 1:2 Wa kayuk asinggan yutnanga akngae yapii aknganata anggaman apan kakumang. Siwan wa kakumang kakngata tupa Nanin Anutuat gatake yukumayak. Sike ita anggaman apan kakumang.
1JO 1:3 Sike wa kayuk yutnanga akngae yapii ninda kake wamna natapbumang kakngae ginde danikapmakamang. Ninda Nanin Anutuat gatu itane waaknga Jesu Kraiskat musipminu takngatukan natake unekan binga yuamang. Sike ninda unekan yuamang binga ginu ina unzakan dakngawa musipminu takngatukan natake unekan binga yutnimde natake ginde danikapmakamang.
1JO 1:4 Siwan wamu waaknga ginde matandamukamangu ninda apbakngakamang kakngata buyambam siwikge natake matandamukamang.
1JO 1:5 Siwan wamu wa ninda ie natake gatu ginde danikapnangge nataamang kaknga anzing. Anutu kakaa akngatane yapii. Siwan zikaa takngatusimu iat gatake dua yuamayak.
1JO 1:6 Sike ninda zikaa akngane sukuyuk ninu Anutuat musipminu takngatukan natake unekan binga yuamang ngang yananu kem siwik. Siwan ninda sanga siakan takngae gepbiatang dua yuke wamu waaknga yananu kem siwik.
1JO 1:7 Siwan Anutu kakaa akngatane yapii. Siwan ninda kakaa akngane sukukengu ninda musipminu takngatukan natake ninu kuupbamda notna notna dakngake yutnim. Dakngake yuwatna Anututane waaknga Jesuta ninde tangge kungwanimuke daknga tukngwakut takngata nindane waiaknganinu kuupbam sandetnimunggak. Sandetniman kepi nomana akngane sukunim.
1JO 1:8 Sike ninda musipmikatang kem natake ninu waiaknganinu wena ngang yananu Jesutane siakan wamu takngatu musipmikatangu dua yuak ngangu anggaman siwik.
1JO 1:9 Siwan ngana ninda waiaknganin yakapnanu Anututa wamu tupa yawan yukut takngae ita natanggamatawik. Natanggamatake kepi nomana aknga tawake tasike waiaknganinu kuupbam sandetnimik.
1JO 1:10 Sike ngana ninda ninu waiaknganinu wena ngang yake Anututane wam sapduknganunanu Anutu kem amintapa binga dakngawik. Siwan itane wamde gepbiatang dua yuamang ngangu anggaman siwik.
1JO 2:1 O ginu natane pandetnabam. Wamu aaknga ginde matandamuke ginu waiakngasa dua tasiningge natake matandamunggat. Sike ngana aminu tapatuta wai takngatu tasiwanu aminu waiaknganinde wamu Nanin Anutuat yatapat takawik kapata akgatangamik. Wa akgatanimik kapa aminu nomana siknga apa Jesu Krais ngang inikamang kapa unin.
1JO 2:2 Ita ninu itane aminabamdane waiaknganikat gatu aminu kuupbamdane waiaknganaatde wam yatapan takanggak kapa dakngake yuak.
1JO 2:3 Sike ninda Anututane mama wamu kuupbam tawake tasikengu ninda Jesuat musipminu takngatukan natake unekan binga yuamang ngang natapna siakan siwik.
1JO 2:4 Siwan ngana aminu tapatuta Anututane mama wam sandeke ngana na Jesuat musipmiu takngatukan nataamak ngang yanggau ita kem yanggak kapanin. Siwan siakan wam taknga itane musiaatangu wena.
1JO 2:5 Sike aminu tapatuta Anututane wamu katak gwaamukgau ita Anutue musip gwaangu kumzang siknga natangamunggak kapanin. Sike aminu tapatuta na Anutuat musipmiu takngatukan natake sukukamak ngang yakengu ita kepi Kraisda sukukut taknganekan sukuyok. Sike ninda kepi waakngane sukukengu ninda Anutuat gatake sukukamang ngang natapna siakan siwik.
1JO 2:7 Ngan notnabam. Nata musip gwaangu ginde natandamunggat. Sike wamu nata ginde wa matanggat taknga wa kayuk kaknga dua. Aho. Wamu wa tupa siknga tapduknga Jesutane wam takngata ginde apbut kopatangu ginda gwa natapbing kaknganin.
1JO 2:8 Siwan ngana nata mama wamu apmanu ginde matanggat taknga mama wamu kayuk kaknga. Sike zikaa akngata wena sinangge siwawan kakaa akngata apnangge siwan ginda kepi kayuu Jesuta tawake yeutnimukut taknga ginda tawake tasikaing.
1JO 2:9 Sike aminu tapatuta notnae semna natangamuyuk na kakaa akngane yuat ngang yanggau ita zikaa akngane asinggan yuak.
1JO 2:10 Sike ngana aminu tapatuta notnae musip gwaang natangamunggau ita kakaa akngatane gepbiatang asinggan yuak kapanin. Sike kakaa akngane yusika ita waiakngaatang dua pimapik.
1JO 2:11 Sike ngana aminu tapatuta notnae semna natangamunggau ita zikaa akngane yuak kapanin. Ita zikaa akngane sukuke zikaa akngata kaina tasiwan maiwan kepie botasukuke wasiyawatakuwik.
1JO 2:12 Ngan waatdakana. Nata ginde natapa sanga Jesuta tasinimukut takngae natake Anututa waiakngasa gwa sandetdamukut ngang natake pas asanu ginde matandamunggat.
1JO 2:13 Sike nata ginu wawi aminuake gwa siya aminde natapa ginda aminu kepat yekapat dua tasike tekut gwene yukut tapae atnataaing ngang natake ginde matandamunggat. Siwan gatu ginu wawi kekeknga yuaing aminde natapa ginda Setenu gwa yapbike yuaing ngang natake gikat kuutde matandamunggat. Ngan waatdakana. Ginda Nanin Anutue atnataaing ngang natake ginde matandamunggat.
1JO 2:14 Sike ginu aminuake gwa siya aminda aminu kepat yekapat dua tasike tekut komune yukut tapae atnataaing ngang natake ginde matandamunggat. Siwan gatu ginu wawi kekeknga yuaing aminda Anututane wam takngae musipzaatang natapa kekekawan ginda akekekake Setenu gwa yapbike yuaing ngang natake gikat kuutde matandamunggat.
1JO 2:15 Ginda sangabamu aminu Anutue masa imuke pasikaing kakngae musip gwaangu ma natapam. Kepi wa aminda sukukaing kaknga apbitatenong. Ginda sanga wai waakngae musip gwaang natayamukengu ginu musip gwaangu Nanin Anutue dua natapning. Wena.
1JO 2:16 Aminda musia enawan ina banipda siwan sanga waiaknga tasikaing. Ba kainata kawa musia enawa sanga waiaknga pasikaing. Ba sangaapana buyambam pake notnae sapduyamuke pasikaing. Sanga wa tasikaing kakngae yapii Nanin Anutu dua. Aho. Aminu Anutue masa imukaing aminu yapii unin.
1JO 2:17 Sike sanga wa aminda tasinangge ba tanangge natanggamatakaing kakngata pimanangge singgak. Siwan ngana aminu tapatuta Anutue banip tawake tasiwiu ita kayuu asinggan asinggan yuwik.
1JO 2:18 Siakan waatdakana. Tapduu wenga gwenu gwa sinanggenggak. Tupa ginda wamu takngatu Kraisde iwanata apme apik ngang yawa natapbing kaknga buyana gwa aakgak. Iwana kwaapzangga gwa apukaing. Apa kake tapduu wenga gwenu gwa sinanggenggak ngang natapna siakan singgak.
1JO 2:19 Wa Kraisde iwana dakngake yuaing aminda nikat gatake yukumang ngana gwa nipmake kuking. Wa aminda nikat musipminu takngatukan natake yukumang gamu dua nipmake kuwam. Ngana unzingu dua natake nipmake kuwawa wa aminu kuupbamda nikat musipminu takngatukan dua nataamang kakngata anggaman siwan kaamang.
1JO 2:20 Siwan ngana Anututane dudumnaapa Jesuta Waunga ginde daman Waungu waapata musipza pangenawan ginu kuupbamda siakan wam takngae atnataaing.
1JO 2:21 Nata ginde natapa ginu siakan wam takngae dua nataaing ngang dua natake ginde matandamunggat. Aho. Ginda siakan wamde atnataaing. Aminu siakan wamde gepbiatang yukengu ita kem wamu dua yanggakgen ngang natake ginde matandamunggat.
1JO 2:22 Siwan kem wamdane yapii mamin? Aminu tapatuta Jesue natake ita Anutuat dua gatake yuke aminu kepdakane nana amindane donguneta aakumang binga aakut ngang yanggak kapanin. Aminu wamu waaknga yanggau ita Kraisde iwana dakngake Nanin Anutuat gatu itane waakngaatde masa yamunggak kapanin.
1JO 2:23 Dasingge? Aminu masa Anututane waakngae imiu ita masa Nanaatde kuut imunggak kapanin. Siwan ngana aminu tapatuta Jesue natake ita Anututane waaknga siknga ngang yakapmanggau waapata Nanin Anutuat musia takngatukan natake unekan binga yuamayak kapanin.
1JO 2:24 Siwan wamu tupa Jesue wam takngata ginde apbut kopatangu ginda gwan natapbingu wa ginda gitna pake yutnong. Gitna pake yukengu ginda Nanin Anutuat gatu itane waakngaat gatake unekan binga asinggan yutning.
1JO 2:25 Jesuta unzing yutnimde natake ita wa kayuk asinggan asinggan yutnanga aknga ninde nimunangge gwa yawan kekekakut.
1JO 2:26 Ngan. Nata aminu gin panzike kem wam danindamukaing aminde natake wamu aaknga ginde matandamunggat.
1JO 2:27 Sike ngana nata ginde natapa Jesuta ginde Waunga gwa damukut ngang nataat. Siwan Waungu waapata gikat gatake yuwawan ginda natdetdetde dua dapning. Wena. Waungu waapata ginde sanga kuupbamu atdanindamukgak. Danindamuwawan ginda wamu kuupbam usanzike kem ba. Ba siakan ba ngang takngaana kaya dua natapning. Noman gan natapning. Dasingge? Waungga kem wam taknga teke siakan wamban danindamukgak. Siwan ginda wamu wa danindamukgak kaknga gwaamuke ginda Jesuat musipza takngatukan natake yutnong.
1JO 2:28 Ngan waatdakana. Ginda Jesuat gatake yutnong. Iat gatake yuwawa tapduknga ita gatu apik gwene ninda natake ita waiaknganinu gwa sandetnimukut ngang natake apbakngake nomnane kunim.
1JO 2:29 Ginda atnataaing. Jesuta nomana sikngaapa yuakgen. Ita unzing yuak ngang natakengu aminu kepi nomana akngane sukukaing aminda Anututane waaknga yapana dakngake sukukaing ngang ginda natapa siakan siyok.
1JO 3:1 Siwan Nanin Anututa ninde butaya siknga natanimunggak kakngae natake asiknga bakngakamang. Ita ninde natake waaknga yapana ngang nininangge natake ita nindane musipmin pangenawan ninda tana tekwamban Anututane waaknga yapana dakngake yuamang. Dakngake yuwatna aminu Anutue masa imukaing aminda ninde dua nataaing. Dasingge? Wa aminda Anutue kuut dua nataaing.
1JO 3:2 Ngan waatdakana. Ninda Anututane waaknga yapana dakngake yuamang. Sike tapduknga Jesuta gatu apik gwene ninda sanga akanim takngae ita dua apuwawan ninda botake yuamang. Ngana atnataamang. Ninda itane nomna kana ita yuak kakngakan dakngake unzing yutnim ngang natapna siakan singgak. Siwan ngana ita ninda unzing dakngake yutnim takngae dua yeutniman kakumang.
1JO 3:3 Siwan aminu Jesuta yuak kakngakan dakngake yutnangge nataaing aminda inane musia tapa nomatawan Jesuta aminu nomana sikngaapa yuak binga dakngake yutning.
1JO 3:4 Siwan sanga wai aminda tasikaing kakngata Anututane mama wamu asandekgak. Unzingge aminu tapatuta waiaknga tasikengu ita Anututane mama wam sandekgak kapa dakngake yuwik.
1JO 3:5 Siwan ginda atnataaing. Jesutane waiakngana wena siknga siwan nindane waiaknganin sandetnimunangge natake ita kepdakane apbutden.
1JO 3:6 Siwan aminu tapatuta Jesuat musia takngatukan natake unekan binga gatake yuwiu aminu waapata waiakngane dua sukuwik. Sike aminu waiakngane sukuwiu aminu waapata Jesue natake aminu nomana sikngaapa yuak ngang dua nataak kapanin.
1JO 3:7 Siakan waatdakana. Ginu katak tagwautnong. Aminu tapatuta enake ginu kem wam danike tasiyak. Aminu kepi nomana akngane sukuwiu waapa aminu nomana amin. Unzing nomanaapa Jesu binga.
1JO 3:8 Siwan tupa siknganeta apu apmanu Setenda sanga waiakngana asinggan pasinggak. Pasinggakge aminda wai waaknga tawake tasiningu wa aminda Setendane dongune yuaing amin. Siwan Setendane kekeknga waaknga tanguwan pimapikge natake Anutue waakngaapata kepdakane epbut.
1JO 3:9 Siwan aminu Anututane Waungga kekeknga akngata aminde pasiyaman tapa tekwamban Anututane waaknga yapana dakngake yuaing aminda waiakngane dua sukukaing. Dasingge? Anutue banip tawake tasinangge asiknga bakngake sukukaing. Unzing Anututa ina banipda siwan tasinggak binga. Sike Anutue waaknga yapana dakngake yukengu wa aminda waiakngane sukunanga dua.
1JO 3:10 Sike aminu sanga nomana aknga dua tasinggau ita Setendane dongune yuak kapanin. Gatu aminu notnae musip gwaangu dua natayamunggak kapata Anututane waaknga dua dakngake yuak kapanin. Ngangu wamu waaknga natake amin usanzike wa Setendane ba aminu wa Anututane ngang nomana siknga natapnim.
1JO 3:11 Ginu atnataaing. Tupa Jesue wam takngata ginde apbut gwene ninda notninde musip gwaang natayamunimde wam natapbinggen.
1JO 3:12 Unzingge ninda kepi Kenda tawake tasikut takngane sukunanu take dua siwik. Kenu waapata Setendane dongune yuke ita uyapna tanguwan kumbut. Sike ita dasingge tanguwan kumbut? Ita sanga waiaknga tasiwawan ngana uyapnata sanga nomana tasiwan kake atemna natangamuke tanguwan kumbut.
1JO 3:13 Ngan notnabam. Aminu Anutue masa imukaing aminda ginde atemna natandama kakengu ginda nangaakan ma natapam.
1JO 3:14 Ninu atnataamang. Ninda sanga kumnanga aknga teke kayuk yutnanga akngane yuamanggen. Ninda banip gwaangu notninu Jesuat nana aminde natayamukamang kakngae natake ninda kayuk yutnanga akngane yuamang ngang natapna siakan singgak. Siwan aminu notnae musip gwaang dua natayamunggau waapata sanga kumnanga aknga gitna take yuak kapanin.
1JO 3:15 Aminu notnae atemna natayamunggau waapata amin tanguwan kupik kapa binga dakngake yuak kapanin. Sike aminu wa bingata kayuk yutnanga akngane dua yuak.
1JO 3:16 Siwan sanga Jesuta ninde tangge kungwanimukut takngata yeutniman ninu sanga notninde musip gwaang natayamunanga akngatane yapii unin kaamang. Kake ninda ina unzakan notninde tangge kungwayamunimde semna natapnanga dua.
1JO 3:17 Siwan aminu sangana babanu kaya tapatuta kaawan itane notna tapatuta sangae dapmake yuwan kake ngana akotnake dua gatangamik. Kotnake dua gatangamuke ngana na Anutue banip gwaang natangamunggat ngang yawanu siakan dua siwik.
1JO 3:18 Siakan waatdakana. Ninda notninde banip gwaang natayamukamang kaknga genin tangan gan dua yanim. Puyana atasinim.
1JO 3:19 Siwan ngana ninda musipmikatang natagwaanguke asikaya ninu Anutue nomune taketa dua ba yuamang ngang natapnim. Unzing natakengu ninda dasing kaknga natapna kusiwan Anutue nomune gitna yutnim? Ninda notninde banip gwaang natayamukamang kakngae natapna kusiwan Anutue nomune gitna yutnim. Ninda banip gwaangu unzingu wa natayamukamang kakngata yeutniman ninu siakan wamde gepbiatang yuamang kakngata anggaman siwan kanim. Kake itane nomune take yutnim ngang natapna kekekawik. Dasingge? Anututa sanga kuupbamde atnataak. Sike ita sanga ninda musipmikatang natagwaanguke nangaakan unzing nataamang kakngae anggaman atnatake ngana musia kwikwikngata yuak.
1JO 3:21 Ngan notnabam. Ninu musipmikatangu Anutue nomune take yutnim ngang natapna kekekawanu itane nomune yutnangge dua gwautnim.
1JO 3:22 Dua gwauke ninda itane banip tawake tasike itane mama wamna tawayuk sanga tapatue tumuk wam ininanu ita ninde atnimunggak.
1JO 3:23 Sike wamu ninda tawake tasinimde wamu ita kekeknga yakut taknga anzing. Ninda Jesue natake Anututane waaknga ngang natapnim. Anututa tapan ita akgatanimuya apanin dakngake apan umana Krais ngang inikamang kakngae natapna kekekawik. Natapna kekekawan ninda wamu tupa Jesuta ninikut taknga tawake notninde banip gwaang natayamunim.
1JO 3:24 Sike aminu Anututane mama wam tawake tasiwiu waapata Anutuat musia takngatukan natake unekan binga gatake yuamayak. Siwan Waungu Anututa ninde nimukut tapata musipmin pangenakgak. Pangenawan ninu Anututane mama wamna gwaamukamang kakngata yeutniman Anututa nikat gatake yuamang kakngata anggaman siwan kaamang.
1JO 4:1 Ngan notnabam. Aminu kunduta enake Anututa musipmin pangenawan itane wamu takngatu natapbumang ngang kem yake tasikaing aminu kwaapzangga yanisukukaing. Sike wa amikat nana tapatuta yawanu ginda siakan ngangu zet ma natapam. Aho. Wamu wa aminda yakaing kaknga usanzitnong. Usanzike wamu wa Anututane ba Setendane ba ngang natapa siyok.
1JO 4:2 Siwan aminu kunduta apuke Jesue natake danindamuke Anututa tapan Krais akgatanimuyaapa dakngake kepdakane epuke nisae gup dakngake aakut ngang danining. Aminu wamu waaknga danining aminda Anututane wamu siakande siknga yakaing aminu unin. Siwan ngana aminu tapatuta Jesue natake wamu waaknga dua yawiu waapatane musia Anututa dua tangenawan yanggak. Aho. Waapata Jesue iwana dakngake yuak kapanin. Tupa ginda wamu takngatu natawawa Kraisde iwanata apme apik ngang yawa natapbing kaknga buyana unin aawan kaaing.
1JO 4:4 Siakan waatdakana. Ginda Anutue gepbiatang yuaing. Yuwawa Anutu gikat gatake yuak kapata kekeknga siknga. Sike ita aminu ie masa imukaing aminu ayaipapaakusinggakge ginda aminu wa kem yakaing aminu gwa yaipapaakusiwa yuaing.
1JO 4:5 Siwan aminu waakwau Anutue masa imukaikat nana. Unzingge wa aminda wamu masa imunanga aknga yawawa aminu masa imukaing notnata wa aminde wamu atnataaing.
1JO 4:6 Siwan ngana ninda Anutue gepbiatang yuamang. Yuke itane wamna yana aminu Anutue atnataaing aminda nindane wamu atnataaing. Ngana aminu Anututane amina dua dakngake yuaingga ninde wamu dua nataaing. Sike tuwangu waakngae ninda siakan amin ba kem amin ngang usanzike kanim.
1JO 4:7 Ngan notnabam. Nata ginde musip gwaang natandamunggat. Ina unzakan ninu kuutda nikat nana aminde musip gwaang natayamunim. Dasingge? Anututa nindane musipmin pangenawanu ninda notninde musip gwaang natayamunim. Sike aminu notnae musip gwaang nataau waapata Anututane waaknga dakngake yuak kapanin. Sike ita Anutue asiknga nataak kapanin.
1JO 4:8 Siwan ngana aminu notnae musip gwaang dua natayamunggau waapata Anutue dua nataak kapanin. Dasingge? Anutu wa sanga aminde musip gwaang natayamuya akngae toiknga siknga.
1JO 4:9 Sike ita ninde butaya siknga natanimunggak kaknga yeutnimunangge natapbut. Yeutnimunangge natake ita waaknga awia tapatukan ngana dua kotnakut. Dua kotnake initewan waaknga waapata kepdakane epbut. Epuke ita sanga ninde tasinimik kakngata gataniman kayuk yutnanga aknga take ninda kayuk asinggan yutnimde natake initewan apbut.
1JO 4:10 Sanga wa Anututa ninde butaya natanimunggak kaknga sanga ninda ie musip gwaang natangamukamang kakngata dua yeutniman kaamang. Aho. Anututa inane waaknga initewan apuke ita tasinimukut takngata nindane waiaknganinde wamu yatapan takawikge initewan apbut takngata yeutniman Anututa ninde butaya siknga natanimunggak kakngata anggaman siwan kaamang.
1JO 4:11 Ngan notnabam. Anututa ninde butaya natanimuke unzing gataniman kakengu ninda nikat nana aminde musip gwaang natayamunim.
1JO 4:12 Aminu tapatuta Anutu kainata dua kakut ngana ninda nikat nana aminde musip gwaang natayamukengu Anututa nikat gatake yuamang ngang natapnim. Ita nikat gatake yuke ninde butaya natanimunggak kakngata buya aawan ninda notninde musip gwaang natayamukamang kakngata buyambam siwik.
1JO 4:13 Siwan Anututa inane Waunga niman Waungu waapata nindane musipmin pangenawan ninda natake ninu Anutuat musipminu takngatukan natake unekan binga gatake yuamang ngang natapna kekekanggak.
1JO 4:14 Sike Nanin Anututa inane waaknga tapan ita akgatanimuya apanin dakngake yuak. Dakngake yuwan Nanata initewan kepdakane epuke ninu kuupbamdane waiaknganin sandetnimukut. Ita kepdakane apan ninda kaininda kakumang. Sike sanga wa kakumang kakngae aminbamde yanikapmakamang.
1JO 4:15 Sike aminu tapatuta Jesue natake ita Anututane waakngaapa ngang aminbamde yaninggau waapata Anutuat musia takngatukan natake unekan binga gatake yuamayak kapanin.
1JO 4:16 Siwan ninu Anututa ninde butaya natanimunggak kakngae natapna kekekanggak. Sike Anutu wa sanga aminde musip gwaang natayamuya akngae toiknga. Siwan aminu inane notnae musip gwaang natayamuya akngae gepbiatang yuaing aminda Anutuat musia takngatukan natake unekan binga gatake yuaing aminu unin. Siwan Anututa wa amikat gatake unekan yuaing.
1JO 4:17 Siwan notninde musip gwaang natayamukengu ninu sanga Jesuta kepdakane yuke tasikut takngakan tawake tasinim. Tawake tasiwatna ninda musip gwaangu notninde natayamukamang kakngata buyambam siwik. Siwan masande Anututa aminu kuupbam usanziwik gwene ninda itane nomune yutnangge dua gwautnim.
1JO 4:18 Aho. Aminu Anutue nomune yutnangge akwaukgau waapata natake asikaya Anututa toknga waiaknganae apba namik ngang natake gwaukgak kapanin. Sike aminu Anutue wa gwauke yuau waapata Anutue musip gwaang siknga dua nataak. Sike ita Anutue musip gwaang siknga nataak gamu ie nomune yutnangge dua gwauban. Aho. Anutue musip gwaangu siakande siknga natangamukenga aminu waapata Anutue nomune gitna yuwik.
1JO 4:19 Siwan Anututa ita gamok ninde butaya natanimukutde ninda yake ie musip gwaang natangamukamang.
1JO 4:20 Sike aminu tapatuta na Anutue musip gwaang natangamunggat ngang yawik. Yake ngana notnae atemna natangamukengu ita kem amintapa dakngawik. Dasingge? Ita notna asinggan kaak kapae musip gwaang dua natakengu ita Anutu kainata dua kaak kapae musip gwaang natangamunanga dua.
1JO 4:21 Unzingge Jesuta mama wamu anzing nimukut. Aminu Anutue musip gwaang natangamunggak kapata inane notnae kuut musip gwaang natangamuyok ngang nimukut.
1JO 5:1 Aminu tapatuta Jesue natake Anututa i tapan Krais akgatanimuya apanin dakngake yuak ngang yanggau waapata Anututane waaknga dakngake yuak kapanin. Dasingge? Aminu kunduta aminu tapatue musip gwaang natangamukaing aminda aminu waapatane waakngae kuut musip gwaang natangamuning.
1JO 5:2 Sike ninda Anutue musip gwaang natangamukengu itane mama wamu atawake tasinim. Mama wamna tawake tasikengu ninda aminu Anututane waaknga yapana dakngake yuaing aminde musip gwaang natayamukamang kakngata anggaman siwan kanim.
1JO 5:3 Dasingge? Aminu Anutue mama wam tawake tasining aminda Anutue musip gwaang atnatapning. Siwan aminu Waungga musia tangenawan tapan tekwamban Anututane waaknga dakngake yuwiu waapata sangaaknga kuupbam Anutue iwana dakngake tasikaing kaknga ayaipapaakusiwik kapanin. Sike aminu waapata Anututane mama wam tawake Anututa kwatan siknga niniwawan tasikamang ngangu ita dua yawik. Wena. Ninda Jesuta akgatanimik ngang natapna kekekawanu ninda sanga aknga kuupbam Anutue iwana dakngake tasikaing kaknga ayaipapaakusinim.
1JO 5:5 Siwan maminda sanga waaknga yaipapaakusiwik? Aminu tapatuta Jesu Anutue waakngaapa unin ngang natapan kekekawiu waapata Anutue iwana ayaipapaakusiwik kapanin.
1JO 5:6 Siwan sanga takngaata yeutnimat Jesu kepdakane nana tapatu ngangu dua natapnim. Aho. Anututa initewan Krais akgatanimuyaapa dakngake kepdakane epbut tapa Jesu unin ngang natapnim. Sanga waakngaaya anzing. Jonda Jesu saukngamukut takngaat gatu Jesuta kungwake daknga tukngwakut takngaatda yeutnimat Jesuta Anutuat yusika apbut tapa unin ngang nataamang. Sike yangga saukngamukut takngaekan natake Jesu Anutuat nanaapa ngangu natapnanga dua. Ngana yangga saukngamukut takngaat gatu ita daknga tukngwakut takngaatde natapna Jesu Anutuat yusika epbut ngang anggaman siwan kaamang. Siwan sanga tapatuatda Jesue yakapan ita Krais Anutuat yusika apbut tapa unin ngang siakan singgak. Sanga waapa Anututane Waung Kapa unin. Sike Waungu waapata siakan wamdane yapii.
1JO 5:7 Siwan yangga saukngamukut takngaat gatu daknga tukngwakut takngaat gatu Waungkat ngangga sanga takngatukan yeutnimukaing. Sike sanga wa takngaat takngatuatda yeutnima kana siakan singgak.
1JO 5:9 Siwan wamu aminda ninikaing kakngae natapna siakan singgak ngana wamu Anututa nininggak kakngae natapna siakan siknga siwik. Siwan wamu wa Anututa inane waakngae nininggak kaknga anzing.
1JO 5:10 Aminu tapatuta Jesu Anututane waaknga sikngaapa ngang natapan siakan siwiu waapata wamu wa Anututa nininggak kakngae musiaatang natapan kekekanggak. Siwan ngana aminu tapatuta wamu Anututa inane waakngae nininggak kakngae natapan kem siwiu ita Anutu kem amintapa ngang natapik.
1JO 5:11 Siwan wamu wa Anututa ninde nininggak kaknga anzing. Anututa ninde sanga kayuk asinggan asinggan yutnanga aknga gwa nimukut. Sike kayuk yutnanga waakngatane toiknga Anututane waaknga unin.
1JO 5:12 Siwan aminda Anututane waakngaat musia takngatukan natake unekan binga gatake yuamayau waapata kayuk yutnanga aknga take yuak kapa unin. Siwan ngana aminu Anututane waakngaat dua gatake yuamayau waapata kayuk yutnanga akngana wena.
1JO 5:13 Siwan nata wamu waakngae natake ginu Jesu Anututane waaknga sikngaapa ngang natapa kekekanggak aminde matandamunggat. Ginda natake ninu kayuk asinggan yutnanga aknga gitna gwa take yuamang ngang natapa kekeknga siwikge natake wamu waaknga ginde matandamunggat.
1JO 5:14 Sike atnataamang. Ninda sanga tapatu Anututa tasinangge take nataak kakngae inindatapnanu ita nindane tumuk waminu atnatapikgen.
1JO 5:15 Sike ita nindane tumuk wamu kuupbam atnataak ngang natapna kekekanggak. Natapna kekekawanu ninda sanga tapatue inindatakamangu ita atniman takamang ngang natapna kekeknga siwik.
1JO 5:16 Sike aminu tapatuta kawawan notna tapatuta wai takngatu tasiwan kawik. Kawawan wai waaknga tasiwan Anututa dua inikwasiwan kumnanga akngane dua kuwik ngang natakengu ita notna waapa gatangamunangge Anutue inindatapsok. Inindatapanu Anututa waiakngana asandekngaman kayuk asinggan yutnanga aknga take yuwik. Siwan ngana sanga wai takngatu undang yuak. Aminu wai waaknga tasikengu ita akumnanga akngae gepbiatang koke yuwik. Sandekngamunanga dua. Sike notza wai waaknga tasiwik kapae dua ginda tumuk wam yaningge daninggat. Aho.
1JO 5:17 Ninda atnataamang. Sanga waiaknga aminda pasikaing kaknga kuupbamu Anututa kawan take dua singgakgen. Siwan ngana waiaknga kundu pasiwa kake Anututa dua yanikwasipewan kuke kumnanga akngane dua yutning. Aho. Ginda wa aminde tumuk wam inindatapa Anututa sandeyamuyok.
1JO 5:18 Siwan ninu atnataamang. Aminu Anutue waaknga yapana dakngake yuaing aminda sanga waiakngae gepbiatang dua yuainggen. Wena. Anututane waaknga Jesu waapata aminu Anutue waaknga yapana dakngake yuaing aminu katak siknga kayuak. Kayuke Setendane katakngane wa aminu sandewan waiakngae kepi dua tawakaing. Wena.
1JO 5:19 Sike ninu atnataamang. Ninu Anututane waaknga yapana dakngake yuwatna ngana aminu kuupbamda Setendane kekeknga akngae gepbiatang yuainggen.
1JO 5:20 Siwan gatu ninu atnataamang. Anututane waakngata apuke natdetdeu ninde nimukut. Niman ninda Anutu siakan tapae atnataamang. Natake ninda Anutu siknga apaat gatu inane waaknga sikngaapa Jesu Kraiskat musipminu takngatukan natake unekan binga gatake yuamang. Siwan Anutu waapa Anutu siknga. Siwan kayuk asinggan yutnanga akngae toiknga unin.
1JO 5:21 Siakan waatdakana. Ginda Anutu pupuknga kuupbamde masa yamunong. Unukan.
2JO 1:1 Na aminuake kwaknga kayaapa Jesue aminabam kayuya amin tapata pas asanu matanggat. Ginu Anututa papan inane aminabam dakngake yuaing amikat gatu aminu gikat gatake yuaing amikat ngangge nata pas asanu ginde matandamunggat. Sike nata ginde musip gwaang siknga natandamunggat. Sike natakan dua. Aho. Aminu kuupbamu Anututane siakan wamde atnataaing aminu kuutda ginde musip gwaang natandamukaing.
2JO 1:2 Sike ninda siakan wamde gepbiatang yuke wamu waaknga musipmikatang gitna take yuamang. Unzingge ninda ginde musip gwaang natandamukamang.
2JO 1:3 Natandamuke Nanin Anutuat gatu inane waaknga Jesu Kraiskatda ninde butaya natake musip kwikwik natanimusande tumuk wam yanikamang. Yanina musip kwikwik natanimat ninda Anutue nomune gitna yutnim. Yusika ninda siakan wam takngaat gatu musip gwaang natapsa akngaatde gepbiatang yuke sukunim.
2JO 1:4 Siwan Nanin Anututa ninu siakan wam takngane sukunimde tupa ninikut. Siwan na wamu aminu gikat gatake yuaing aminu kunduta sanga wa ninikut taknga tawake tasiwa natake na asiknga baknganggat.
2JO 1:5 Bakngake nata wamu takngatu kayuk binga dua matandamunggat. Aho. Wamu tupa tapduknga Jesutane wamda ninde apbut gwekatang natapbumang kaknga matandama natapnong. Ninda notninde musip gwaang natayamunimde wamu waaknga gwa natapbumang.
2JO 1:6 Siwan sanga wa musip gwaang natayamunimde tupa natapbing kaknga tawanong. Sike aminu mama wamu waaknga tawambiu waapata notnae musip gwaang natayamik.
2JO 1:7 Siwan aminu kwaapzangga kem wam yanisukukaing. Kem wam yanike Jesuta Anutuat dua gatake yusika Krais akgatanimuyaapa dua dakngake yuke kepdakane dua epuke nisae gup dua dakngakut ngang yake panzikaing. Wa panzikaing aminda Kraisde iwana dakngake aminbam yanidatdaukaing.
2JO 1:8 Yanidatdauwawa ginda wa aminde gwautnong. Danidatdauwa sanga ninda gin gatandamukumang kakngata pimapsak. Wamu ninda gin danikumang kakngakan ginda tawawawa Anututa danimbakngake sanga damunangge yakut taknga kuupbamu asingu ginda apaning.
2JO 1:9 Sike aminu tapatuta Kraisdane wamu gitna dua take ita yatupmake wamu takngatune kuwiu waapata Anutuat musia takngatukan dua natake unekan binga dua gatake yutzan. Sike aminu wamu Kraisda ninidamukut taknga gitna take yuaing amindakan Nanin Anutuat gatu itane waakngaapaat musia takngatukan natake unekan binga gatake yutning.
2JO 1:10 Sike aminu tapatuta ginde kundoke wamu wa Jesuta ninidamukut taknga dua takapanu ginda aminu waapae gaak wamu dua inike gindane yotzane ma takuwam.
2JO 1:11 Sanga waiaknga aminu waapata tasinggak kakngata ginde gatapsak.
2JO 1:12 Nata ginde wamu kwaapzang daninangge natat ngana wamu wa pas asane dua matawit. Aho. Nata kuke gin dandupana ninu kuutda wamu yanimde natat. Ninda unekan gatake yuke wamu yasika asiknga baknganimde natat.
2JO 1:13 Aminu Anututa papan inane aminabam dakngake yuaing aminu notzata gaak wamu ginde yatewa kunggak. Unukan.
3JO 1:1 Na aminuake kwaknga kayaapa Jesue aminabamdane kayuya amin tapata pas asanu ga Gaiasde matanggamunggat. Sike nata gae musip gwaang siknga natanggamunggat.
3JO 1:2 Notna. Nata atnataat. Gata Anutuat gatake kekeknga yuayakgen. Sike nata tumuk wamu Anutue iniwa gata sangabam tasinggayak kakngata take siwikge inidatanggat. Siwan gatu maiu dua sike kekeknga yuwiyakge inidatanggat.
3JO 1:3 Sike gata siakan wamu atawanggayak kakngae natake notna Jesuat nana aminu kunduta apu naniking. Nanike ga siakan wamde kekeknga yuayakge naniwa natake nata gae asiknga bakngakum.
3JO 1:4 Nata sanga kundue apbaknganggat. Siwan ngana nata wamu natane waatdakanata siakan wam tawakaing ngang natake nata asiknga baknganggat.
3JO 1:5 O notna. Gata notninu Jesuat nana aminu kundu take siknga gatayamukuyak. Keu komdune nana ngana gata katak toimbi sanga gata Anutue kekeknga yuayak kakngata anggaman siwan kakumang.
3JO 1:6 Wa aminda apuke aminu Jesuat nana kuupbamu andang yuamang aminde niniking. Ninike gata wa aminde musip gwaang natayamukuyak kakngae niniking.
3JO 1:7 Sike wa aminda Jesue puya tasitakuke sanga tapatue dapmakengu wa aminda ginda gatanimunong ngangu katum aminde dua siknga yaniking. Wena. Unzingge gata wa aminu Anututane puya amin ngang natake katak siknga gatayamuyo. Kepiapane kusika sanga tapatue dapnang.
3JO 1:8 Ninu Jesuat nana aminda aminu puya waaknga pasikaing aminu akgatayamunim. Gatayamuke ninda wa amindane notna dakngake yutnim. Ninda unzingu dua gatayamunanu noman dua siwik.
3JO 1:9 Siwan nata wamu takngatusimu tupa Anututane aminabamu gaat gatake yuaing aminde matayamukum. Ngana Daiotrefisda wa aminde tupan tapa daknganangge tasike natane wamu dua nataak.
3JO 1:10 Unzingge nata ginde kundokenga nata wamu aminu waapata sanga akngana tasinggakge aminbamde yanikapit. Yanikapmake ita nae kem wamu takngatu takngatu yumdekan yake nanisapdukut taknga yanikapit. Siwan waapata sanga wai waakngakan dua tasikut. Aho. Ita kawawan notninu kunduta apundopa kake ngana yotnane yanipakopnangge dua nataak. Dua natake ita dua kapewan aminu kunduta wa aminu pake yotnane pakopning. Siwan gatu ita aminu yotnane pakopnangge yakaing aminu yanikwasipewan kuke kepman nana amin dakngake yutningge tasinggak.
3JO 1:11 O notna. Gata sanga wai aminu waapata tasinggak kaknga ma tawambim. Aho. Gata sanga nomana akngakan tawamso. Aminu sanga nomana aknga tawambiu waapata Anututane waaknga dakngake yuak kapanin. Ngana aminu sanga gutonga aknga tawambiu ita Anutue dua nataak kapanin.
3JO 1:12 Siwan ngana aminu kuupbamda Demitriasde apbakngakaing. Siwan siakan wam takngae toiknga apata kuut ie apbaknganggak. Siwan na kuut aminu waapae apbaknganggat. Siwan gata atnataayak. Wamu waaknga yawa siakan singgakgen.
3JO 1:13 Nata wamu gae kwaapzang ganinangge natat ngana nata wamu waaknga pas asane matanggamunangge dua nataat. Aho.
3JO 1:14 Ninae musipmaatang anzing nataat. Nata zetgaman kuke ga gandupa niu kuut nitda wamu yasim. Gata Anututane musia kwikwiknga akngae gepbiatang yuyo. Notdata gaak wamu gae yatewa kunggak. Siwan gata natane gaak wamu notna kuupbamde yaniyo. Unukan.
JUD 1:1 Na Jut. Na Jesu Kraisdane puya amin tapa. Na Jemsdane uyapna apata pas asanu matanggat. Nata ginu aminu Nanin Anututa yandawamban ie kuke itane aminabam dakngake yuaing aminde matandamunggat. Siwan Anututa ginde musip gwaang natandaman Jesu Kraisda ginu toikgak.
JUD 1:2 Siwan nata ginde anzing nataat. Anututa ginde butaya natandamunggak kakngaat gatu ita musip kwikwik natandamunggak kakngaat gatu ginda ita musip gwaang natandamunggak kakngae gepbiatang koyuwawa sanga wa takngaat takngatuatda ginde buyambam siknga siyok.
JUD 1:3 Mate notnabam. Nata ginde musip gwaang natandamunggat. Sike nata wamu kundu musipmaatang natake matandamunangge take siknga natapbum. Anututa ninu kuupbam gatanimuke ninu waiakngane sukukumang kaknga sandetnimukut takngae natake nata wamu waakngae ginde matanangge natapbum. Natake yuwawa aminu Anutue masa imukaing aminu kunduta kusopuke apuke ninu Jesue aminabam dakngake yuamangge banakan katang akopbing. Akoke wamu gutonga aknga anzing yakaing. Sanga Anututa ninde butaya natanimuke waiaknganin sandetnimunggak kakngae gepbiatang yukengu ninda sanga musia enawan pasikaingu takngatu takngatu take tasinim ngang yakaing. Yake aminu waakwau masa Buyambam tapaninu Jesu Kraisde imukaing. Jesu waapa nindane toiknginu awia tapatukan. Sike wa aminda akoke yawa natake nata wamu tupa daninangge natapbum taknga teke ginda wa aminde gwautningge matandamunggat. Ginda siakan wamu Anututa ninu Jesue amina dakngake yuamang aminu kuupbamde gwa nimukut taknga gitna siknga pake yutnong. Sike aminu Anututane wam yakapsa aminda tupa siknga wamu takngatu aminu wa amin bingae natake mataking. Toknga pananga akngata yuyamunggak kakngae natake mataking.
JUD 1:5 Siwan ginda atnataaing. Tupa siknga Buyambam tapaninda aminu Isrel nana aminu Isip kep komune nana aminde katakngane sandeke yanipakuwan Isrel aminu kuupbamda Isip kep teke kuking. Sike masande aminu wa teke kuking aminda Anututane wam natapa siakan dua siwan ie masa imuking aminu Anututa yawan wa aminda akumbing. Ngan. Ginda sanga waaknga gwa natapbing ngana ginda gatusa natdetningge natake nata wamu waaknga ginde matandamunggat.
JUD 1:6 Sike gatu angelata Anutue nomnane umana kaya akwak dakngake yuking ngana kunduta yamandet sike Anutu yapbitnangge natapbing. Natake tasiwawa ngana Anututa panggaganuke keu zikaa siknga dakaatang wamapewan yuaing. Yusika tapduknga Anututa aminu kuupbam usanzitnangge yayawamban apning gwene angela waakwakga wamna yaning. Siakan. Ginda atnataaing ngana gatusa natdeke yutnong.
JUD 1:7 Siwan gatu tupa siknga aminu Sodom yot gapmane nana amikat gatu Gomora yot gapmane nana amikat gatu you kundu you wanggapmaaune wesim yuking gapma gapmane nana amikat ngangga mayae geenguke yasewa asinggan tasimapa kukakut. Tasimapa kuwawan Anututa tasiwan katapda enandangga pimake wa aminu kuupbam yasiwan kupa puyukut. Toknga wa angelata paking kaknga binga paking. Siwan toknga wa paking kakngae natake ninda kepi wa tasikaking kaknga tawanimde asiknga gwautnim.
JUD 1:8 Sike aminu wa nin banakan akopbing aminda aminu wa toknga aknga paking aminda tasiking kaknga tawake tasikaing. Tasike sanga musia enayaaknga tawake yasewa tasike Buyambam tapaninde yamandet sikaing. Sike aminu umana buyambam siknga gwa siya enandang nana aminde yanisapdukaing.
JUD 1:9 Siwan ngana angela kuupbamdane tupan tapa umana Maikel ngang inikaing kapata Setende inisapdutnangge dua natapbut. Aho. Iat Setenkatda yanganuke maminda Mosesdane gupnasanu tapik ngang yake yanganuke ngana Maikel waapata yamandeu dua sike Setenu anzing inikut, “Buyambam tapata ga kaanga ganiyok,” ngang inikut.
JUD 1:10 Siwan ngana aminu waakwau sapdut wamu sanga kuupbamu yapii dua nataaing kakngae kuut ayakaing. Yake sanga musia enayaaknga tawake tasikaing. Siwan sanga wa tasikaing kakngata wa aminu asiknga pasiwan maikaing.
JUD 1:11 Unzingge wa aminda toknga siknga aknga apaning. Dasingge? Aminu waakwau sanga Kenda tasike yamandet sikut takngane sukukaing. Gatu sanga aminu tapatu umana Belam ngang iniking kapata tasikut taknga tawake tasikaing. Tasike mani kaitnangge kem wam yanindamuke panzikaing. Gatu sanga aminu tapatu umana Kora ngang iniking kapata tasike Anutue yamandet sikut taknga tawakaingge Kora waapata toknga pake kumbut takngane yutning.
JUD 1:12 Siwan tapduknga kayane notza unekan apa notzaat musip gwaang natake nanamza nakaing gwene wa aminda gindane pauu wagwene koke ginda dua gwauke nanamu gikat nakaing. Gikat gatake yuke inaekan natanggamatake kumzang napa ginda notzae natayuk nakaing binga dua napa kawa wai singgak. Siwan gunzitda tapdukbam yuke nanam ba zonga kuupbam zipan kupa kake minga zikaata apan sopa tananggenggak ngang yakaing. Ngana gotda puyapan unda undang kuwa sopa dua tawan sopa tanangge kem siknga yakaing. Ina unzakan. Aminu waakwakga kem wam danike panzikaing. Siwan gatu katau buya atnapsa dakatuta buya dua aake songa daka siwan kakengu toikngata katau wandaka akwaiziwik. Kwaizike muban kuke undang yusika kupiawik. Ina unzakan. Aminu waakwakga kem wam danikaing kaknganata buya dua aake songa siwik.
JUD 1:13 Siwan gatu yanggabam gwene sambuya buyambam enawan yangga gwenu aap aapban siwan kaamang. Ina unzakan. Aminu waakwakga sanga maakngana kaya aknga tasiwawa waiakngana anggaman siwan kaamang. Siwan gatu yekapdaakga deke pupzang kuwa kana wena sikaing. Sike tangine gitna yuwan gamu take siwan. Ina unzakan. Aminu waakwakga wamu nomana aknga gin danindamukaing gamu take siwan. Ngana kem wam takngakan danindamuke Anututa keu zikaa siknga daka tandakngatekut komune kuke wa aminda asinggan asinggan yutning.
JUD 1:14 Siwan Adamdane waakngata waakzak sitake kunggawan aminu tapatuta aawan umana Inok ngang iniking. Anututa wamu takngatu Inok waapae iniwan natake ita aminu waakwakge natake yakapmake anzing yakut, “Nata daniwa natapnong. Buyambam tapanikat gatu angela kwaapzang siknga naatda apning.
JUD 1:15 Apuke aminu kuupbam usanzitnangge yayawamban apning. Yayawamban apuke wa aminda wamna yaning. Wamna yawa sanga wai kuupbam aminu waakwakga tasike Anutue masa imuke inisapdukaing kakngata anggaman siwik. Anggaman siwan Anututa yake toknga ayamik.
JUD 1:16 Aminu waakwau asinggan numunumu yake yamandet sike sanga musia enayaaknga tawake tasikaing. Tasike kundutane umana yaipapaakusike inane umana yapangenatnangge tasike wamu asinggan yanggamatakaing. Sike wa aminda aminu kundu sangaapana kaitnangge yanindatdaukaing.”
JUD 1:17 Unzing tasikaing ngana mate notnabam. Nata ginde musip gwaang natandamuke ginde daniwa natapnong. Ginda wamu takngatu aminu kundu Buyambam tapaninu Jesu Kraisdane puya amina dakngake umana aposel ngang yanikamang aminda sanga apmea apikge yaking kakngae natanggamatanong.
JUD 1:18 Wa aminda anzing daniking, “Tapduknga Jesuta gatuna dua apik gwekatangu aminu kunduta enake ginu Jesuat nana aminde danimike sanga wai takngatu takngatu musia enaya akngakan tawake tasining,” ngang yaking.
JUD 1:19 Siwan Anututane Waung Kapata aminu sanga waaknga tasikaing amindane musiaatangu dua pukuke papan sanga waiaknga ina banipda siwan natake tawake tasikaing. Tasike ayanganutningge wam tangenake yawa aminu Jesuat nana aminda kuut yanganukaing.
JUD 1:20 Siwan ngana notnabam. Ginda Anututane siakan wam takngae natapa kekeknga singgak kakngata buyambam siwikge tasinong. Tasike Waungga musipzaatang pukuke papan kekekake ginda tumuk wamu Anutue inindatapnong.
JUD 1:21 Inindatake ginda Anututa butaya natanimunggak kakngae gepbiatang gitna yutnong. Gitna yuwawa Buyambam tapaninu Jesu Kraisda ninde butaya natanimuke sanga kayuk asinggan asinggan yutnanga aknga gatukande ginde damikge apbakngake kayutnong.
JUD 1:22 Kayuke aminu kunduta Jesue wamde semna semna natake yuaing aminde butaya natake ginda musia papa kekekanong.
JUD 1:23 Siwan aminu kunduta pimanangge dapaknga siknga siwa kakengu ginda gatayamunong. Unzing sanga tapatuta kataune pimanangge kuwawan toikngata kaiwan kunggak binga pasiyamuke ginda wa amindane musia papa kekekanong. Siwan aminu kunduta Jesue wamde semna natake waiakngane pimapa kakengu ginda sanga wai wa tasikaing kakngata ninde gatapsak ngang natake akagwautnong. Kagwauke ngana ginda wa aminu akgatayamuke musia papa kekekanong.
JUD 1:24 Siakan. Anututa nin gatanimunangge natake Buyambam tapaninu Jesu tapan Krais akgatanimuya apanin dakngake apbut. Apuke sanga ninde tasinimukut takngata nindane waiaknganinu sandetnimukut. Anutu awia waapatakan ayuak. Siwan ita ginde katak siknga toiban ginda dua pimaning. Dua pimake yuwawa ita ginu danipake inane nomune pakuwik. Pakuwan ginu gutongasa wena siwan gitna yusika ginda kumzang siknga bakngake yutning. Anutu waapae umana enane siknga yatangenatnim. Ita tupa siknga kekeknga akngana kayaapata yukut. Umana buyambam siknga yuak kapanin. Sanga kuupbamdane toiknga tupan siknga apata yuakge apman gatu tapdukbamu asinggan asinggan ninda umana akngana kumzang yake yatangenatnim. Siakan.
REV 1:1 Tupa wamu Anututa inane musiaatang natake tekut taknga Anututa Jesu Kraisde inikapbut. Inikapan natake Jesu waapata inane aminabamde yanikapan wa aminda sanga kuupbam zetgaman aatningge tasikut. Siwan Jesuta inane angelana initewan kuke Jonu itane puya amina waapae wamu wa inikapbut.
REV 1:2 Inikapan natake wamu Anututa Jesu Kraisde inikapbut takngae natake Jonu waapata buu anggomune wamu waakngaat gatu sanga mia akngane kakut takngaatde natake matakut.
REV 1:3 Siwan aminda wamu Jonda yakapmake matakuu aaknga kendetningu wa aminda asiknga baknganing. Siwan gatu aminda wamu aaknga natake gwaamutningu wa amikaya kuutda asiknga bakngake yutning. Dasingge? Tapduu wamu aakngata buya aawik gwenda apikge dapaknga gwa singgak.
REV 1:4 Na Jon. Nata wamu aaknga ginu Esia kep komune nana Anututane aminabamu you katau kuut musa kautdu gapmaane nana aminde matandamunggat. Nata Anutu asinggan ayuak kapae tumuk wam iniwa iat gatu Waung Kapaat gatu Jesu Kraiskat ngangga ginde musip kwikwik natandamuke gin pasiwa ginda musipza kwikwikngata yutnong. Siwan Waungu awia tapatukan ngana ita puya inata inata pasinggakge nata ie natapa Waungu katau kuut musa kautdu tapaaya binga sikut. Sike Waungu waapa Anutu nin ninduyuak kapae nomune yuak. Siwan Anutu waapata tupa siknga ayukut. Sike ita apmanu ayuak. Gatu ita asinggan asinggan yuwik. Siwan Jesu waapata wamu Anututa ie imukut takngakan take ninde ninikapbut. Waapata akumbut katangga gatuna enake ita aminu akumbing katangga gatuna enatninggane tupan tapa dakngake yuak. Yuke ita aminu tupan tapaapa kepdakane yuaingu kuupbam kayuak. Ita ninde butaya natanimuke ninde tangge kungwanimuke daknga tukwakut. Unzing tasikutde ita nindane toknga aknga panimuke ninu toknga pananga akngane sandekut.
REV 1:6 Sandeke ita ninu inae pake ninduyuwawan ninda ie gepbiatang koke yuamang. Yuke ninde puya Anutu Jesu waapatane Anutue pasingamukamang. Sike Anutu waapa Jesutane Nanaapa unin. Siwan nata Jesu Krais waapae natake ita umana buyambam siknga take tupan tapa kekeknga asinggan asinggan yuwikge take siknga nataat.
REV 1:7 Natapnong! Waapata minga banakan gwa apnanggenggak. Ita apuwawan aminu kuupbamda waapa inane kainata siknga kaning. Ngan. Aminu kuupbamda tupa i tanguwa kumbuu wa amikaya kuut akaning. Kake aminu kepna kepna nana kuupbamda asiknga kagwauke kwanamu kumzang sitning. Ngan. Sanga wa unzingu asaawik. Siakan.
REV 1:8 Siwan Buyambam tapaninu Anutu kekeknga siknga yuak kapata anzing yakut, “Na Anutu awia tapatutakan yuat,” ngang yakut. Sike waapata tupa siknga yuwawan apu apman apunggak. Siwan ita asinggan asinggan ayuak.
REV 1:9 Na Jon. Na ginu Jesue aminabamdane notza tapatu yuat. Nata Jesutane umana yakapmake tasiwawa aminda enake meya takngatu takngatu nae nama panggat. Siwan gikaya kuut meya wa binga apakaing. Sike gikat naat Anututa ninduyuwawan ninda ie gepbiatang koyuke ninu kuupbamda kekeknga yuamang. Ngan. Nata Anututane wam yanikapmake Jesutane umana yakapmake tasiwawa iwanata enake na nanikwasike keu yangga banakan yuak komu umana Patmos ngang inikaingu apmanu yuak komune napmaba yuat.
REV 1:10 Siwan tapduu ninda ayutna takawan Buyambam tapaninde natayuamang gwene Waung Kapata na kekeknga siknga tapan nata mia takngatu kakum. Kake natane masanaatang nataawa wamu takngatu kekeknga pumdane gakngat binga yanggamatakut.
REV 1:11 Yanggamatake anzing nanikut, “Sanga kuupbam gata kawiyau wa gata buu gomdune matayo. Matake tewi Anututane amina yotna yotna katau kuut musa kautdu gapmaatane umana Efesa gatu Smena gatu Pegaman gatu Taiataira gatu Sadis gatu Filandelfia gatu Leodisia ngang yanikaing gapma gapmane yuaing aminde tewi kuyok,” ngang nanikut.
REV 1:12 Siwan nata aminu wamu waaknga nanikut tapa kanangge natake nata tapa tekwamban kakum. Kawa lamu golda sake pasikingu katau kuut musa kautdu gweaya ngangga yuwa kakum.
REV 1:13 Siwan nata kawawa aminu kepdakane nana binga tapatu lamu waakwakge banakan yuwan kakum. Kawa ita tauknga mamaya aknga tasiwan pakepu ketapunane yukut. Siwan ita simbuna golda sake tasiking kaknga wambutna kake ie natapa aminu tupan siknga apa sikut.
REV 1:14 Siwan gwapak danggamna kwaknga siknga. Sike ita kainata nandunggamatawan natane musipmaatang katapda binga nasikut.
REV 1:15 Siwan itane kepina kwaknga siknga kawawa gunzitda kapa sakatang kawan waenga singgak binga siwan kakum. Kawa ita wamu takngatu yawan nataawa yangga buyambamu tapatuta zipmake gakngae yanggak binga siwan natapbum.
REV 1:16 Siwan ita yekapdaau katau kuut musa kautdu gweaya ngana katakngi siyaapane pake yuwan kakum. Kawawa ita paiu gena kaukauu toknga siknga dakatu genaatang isinggangganuke yuwan kakum. Sike nata itane nomna kake gunzit gwekatang kana maaknga singgak binga siwan kakum.
REV 1:17 Nata unin kake na itane kepine wesim pimake na akupsa amin binga dakngakum. Siwan ngana ita katakngi siyaapata na napmake anzing nanikut, “Ga ma gwaumbim. Na sanga kuupbamdane yapii. Sike nata aminu kuupbam kayuat.
REV 1:18 Sike tupa na akumbum ngana gatuna gweake kayuk yuat. Ngan. Nata kayuk asinggan asinggan yuwit. Sike nata sanga aminda akumnanga ba kayuk yutnanga akngae kayuat. Sike gatu nata keu akupsa aminda yuaing komde kayuat,” ngang nanikut.
REV 1:19 “Unzingge gata wamu sanga akaayakge natake matayo. Ngan. Sanga apman yuaing gatu sanga masande aatningge wamu gata matayo,” ngang nanikut.
REV 1:20 “Siwan gata kaawi yekapdaau katau kuut musa kautdu gweaya ngangu natane kataknga siyaapane yuwa kayak gatu lamu golda sake tasikingu katau kuut musa kautdu gweaya ngangu andang yuwa kayak. Wa unzing tuwang binga. Sike itane yapiie ganiwa natapso. Yekapdaau wa kwiiknga aminu Anututane amina yotna yotna katau kuut musa kautdu gapmaane nana aminde kuke Anututane wamu yanikapmakaing. Siwan lamu wa Anututane amina you wa gapma gapmane yuaing,” ngang nanikut.
REV 2:1 “Siwan gata wamu kundu Anututane amina Efesas yot gapmane yuainggane tupan tapae anzing matangamuyo,” ngang nanikut. “Na aminu yekapdaau katau kuut musa kautdu gweaya golda sake tasikingge banakan sukunggat tapata gae natake wamu kundu ganiwa natapso.
REV 2:2 Na sanga kuupbamu gata tasinggayakge na atnataat. Ngan. Gata kwatan tasinggayakge na atnataat. Siwan gatu aminda meya takngatu takngatu gae gama pake ngana gata kekeknga yuayak. Sike ga aminu wai aminde asiknga bitanggayak. Ngan. Aminu kunduta enake ninu Jesutane kwiiknga dakngake yuamang ngangu kem yakaing. Siwan gata wa amindane wam usanzike natapi kem sikut.
REV 2:3 Siwan na atnataat. Gata natane umana akngana yanikapmake tasiwawi ngana natane iwanata enake meya takngatu takngatu gae gamukaing. Gae gama pake ngana gata puya tasinangge semna dua nataayak. Aho. Meya wa gae gamukaingu kuupbam gata apake ngana kekeknga yuayak. Ie na atnataat.
REV 2:4 “Ngana na gae wamu kaya. Tapduknga gata dangem siknga nae natapi kekekakut gwene gata nae musip gwaang siknga natangamukuyak. Ngana apmanu gata musip gwaangu wa gwa tekuyak.
REV 2:5 Sike sanga gata atekuyau wa gatuka natapso. Natake gata musipba tapi tekwamban puya dangemu wa tasikuyak kakngakan gatuka tasiyo. Sike wena kakengu nata gae apit. Apuke nata lamu wa gata kayuayak gwenu atanguwa kupik.
REV 2:6 Siwan nata wamu Nikolasdane dongata yake tasikaingge semna atnataat. Ina unzakan gata wa amindane wamde semna nataayakge nata apbaknganggat.
REV 2:7 “Siwan aminu maaknga kaya kakengu waapata wamu Waung Kapata Anututane amina yotna yotna yuaingge yanikapmanggak kaknga natapsok. Aminu meya iwanata enake iman take ngana kekeknga yuke ayapbiban kakengu nata aminu waapa katewa apmea ita keu take siknga Anututa ayuak komune kuke katap tapunu aminda nake kayuu asinggan asinggan yuwik gwegwenu atdeke napik.”
REV 2:8 “Siwan gata wamu kundu Anututane amina Smena yot gapmane yuainggane tupan tapae anzing matangamuyo,” ngang nanikut. “Na aminu sangabamde yapii gatu aminu kuupbam kayuat tapata yanggat. Tupa nata akumbum ngana nata gatuna gweake kayuk yuat. Nata gae natake wamu kundu ganiwa natapso.
REV 2:9 Na atnataat. Gatane iwandata enake meya takngatu takngatu gae gamuwawa gata sangae asiknga dapmake yuayak. Sike ngana gata sanga Anututa ga gatanggamunanga kwaapzang pake yuayak. Siwan aminu kunduta yake ninu Judia nana amin ngang yakaing ngana nata wa aminde natapa dongu keu komdune nana katum aminu Setendane donga binga daknganggak. Siwan wa aminda gae asapdukgamukaing. Ie na atnataat.
REV 2:10 Siwan masana tapduu mateknga kundusim yuke gata meya takngatu takngatu apapsa ngana ga ie ma gwaumbim. Ie nata ganiwa natapso. Setenda ga tasiwan siwikge natake ita iwandatane musia pangenawan wa aminda enake aminu gaat nana kundu kaautde pake paku pening. Pewa tapduknga dapakngakan meya waaknga pake yutning. Ngan. Tapduu katau kuut musaat bingakan tapduknga dapaknga siknga meya buyak yutning. Siwan ngana gata Anutue kekeknga yuke tasiwawi kuku tapduknga gata akupiyak gwenda apik. Gata unzing iwan yapbike kekeknga siknga yuwinu nata apbakngake sanga kayuk asinggan yutnanga aknga gae gamit.
REV 2:11 “Siwan aminu maaknga kaya kakengu waapata wamu Waung Kapata Anututane amina yotna yotna yuaingge yanikapmanggak kaknga natapsok. Sike aminu kekeknga siknga yuke iwana ayapbitningu wa aminda akupanu Anututa dua yanikwasipewan kuke toknga asinggan dua pake yutning. Wena siknga. Wa aminda Anutuat gatake kayuu asinggan asinggan yutning.”
REV 2:12 “Siwan gata wamu kundu Anututane amina Pegamam yot gapmane yuainggane tupan tapae anzing matangamuyo,” ngang nanikut. “Na aminu paiu gena kaukauu toknga siknga daka take yuat tapata gae natake wamu kundu ganiwa natapso.
REV 2:13 Na gatane yotdae atnataat. Gata keu Setenda take yuak komune yuayak. Siwan keu Setenda pake yuau wa komune natane amina tapatu umana Antipas ngang iniking. Ita kekeknga yuke natane umana yanikapmake tasiwawan ngana iwanata enake i tanguwa kumbut. Siwan tapduu waomune gata natane umana dua takusopukuyak. Aho. Gata natane umana aknga gitna siknga take yukuyak.
REV 2:14 “Ngana apmanu na gae wamu kundu kaya. Aminu gaat gatake yuaing amikat nana kunduta wamu tupa siknga aminu tapatu umana Belam ngang iniking kapata tangenakut taknga gitna takaing. Siwan Belamu waapata aminu tupan tapa umana Belek ngang iniking kapa inindamukut. Inindamuban Beleu waapata enake Isrel nana amindane musia pangenawan wa aminda Anututane wam sandeking. Sandeke kaau aminu kunduta anutu pupukngae sakingunin naking. Siwan gatu sanga yasewa aknga tasiking.
REV 2:15 Ina unzakan aminu gaat nana kunduta wamu Nikolasda tangenakut taknga gitna takaing.
REV 2:16 Unzingge gata musipba tapi tekwamban wamu waaknga yandakngayo. Sike wena kakengu tapduu mateknga siknga yuke na gae apit. Apuke nata wa amikat naat paiu natane genane yuak dakaat amnim.
REV 2:17 “Siwan aminu maaknga kaya kakengu waapata wamu Waung Kapata Anututane amina yotna yotna yuaingge yanikapmanggak kaknga natapsok. Sike aminu kekeknga siknga yuke iwana ayapbimbiu waapae nata nanamu enandang nana kundu apmanu akusopuke yuau asimit. Sike nata suu kwaknga gwendu take umana kayuk kaknga suu wagwene matake ie asimit. Siwan umana kayuu waaknga aminu tapatuta dua natapik. Aho. Aminu suu wagwen tapik kapatakan atnatapik.”
REV 2:18 “Siwan gata wamu kundu Anututane amina Taiataira yot gapmane yuainggane tupan tapae anzing matangamuyo,” ngang nanikut. “Na Anututane waaknga. Sike nata amin kanggamatawa wa amindane musiaatangu katapda binga yasinggak. Siwan natane kepina kwaknga siknga kawawa gunzitda kapa sakatang kawan waenga singgak binga siwan kaaing. Nata gae natake wamu kundu ganiwa natapso.
REV 2:19 Na sanga kuupbamu gata tasinggayakge atnataat. Ngan. Gata Anutue musip gwaang natangamuke itane wam takngana gitna siknga tanggayak. Take gata ie puya kwatan pasingamuke aminda meya buyambamu gae gama pake ngana gata kekeknga yuayak. Ie na atnataat. Siwan tapduu gata dangem siknga nae natapi kekekakut gwene gata puya takesim tasikuyak. Sike apmanu gata puya tasiwi buyambam singgak.
REV 2:20 “Ngana na gae wamu kundu kaya. Maya tapatu umana Jesebel ngang inikaing kapata yake na Anututane puyana tasike itane wamu ayanikapmanggat ngangu kem yanggak. Ngana gata maya waapa katewi ita natane puya amina yanindamuke wa amindane natdetdetna kaipakuwan sanga yasewa aknga tasikaing. Gatu kaau aminda anutu pupukngae sakaingunin nakaing.
REV 2:21 Siwan maya waapata musia tapan tekwamban waiakngana bitatewikge natake nata tapduu kundusimu kakgan sike yukum. Yuwawa ngana waapata puya gutonga wa pasinggakge dua bitanggak.
REV 2:22 Unzingge ita akgwaumsok. Nata maya waapa tasiwa ita maiu buyambam siwik. Siwan maya waapata yasewa aknga tasike aminu kundutane musia pangenawan wa amin kaya kuutda yasewa pasikaing. Sike wa aminda musia dua tapa tekwamban sanga wa tasikaingge masa dua imanu nata meya buyambam siknga wa aminde yamit.
REV 2:23 Yamuke nata maya waapatane waaknga yapana kuupbam atzipa kumning. Atzipa kupa kake Anututane amina kepna kepna nana kuupbamda nae anzing natapning. Na natdetdeu aminda musiaatang natake teaingu kuupbamde anggaman atnataat. Ngan. Nata aminu kuupbamdane wamna katak siknga usanzike wamu noman gan wa aminde inandek inandek yaniwit.
REV 2:24 Siwan aminu gikat nana kunduta maya waapatane wam takngae natake natdetdeu Setenda inane musiaatang natake tekut taknga unin ngang yakaing. Siwan aminu kunduta natdetdeu wa gwa taking. Siwan ngana ginu Taiataira nana natdetdeu wa dua taking aminde natake nata mama wamu kwaapzang dua daniwit.
REV 2:25 Aho. Natdetdeu nomana aknga ginda gwa takingu wa ginda gitna siknga take yuwawa kuku tapduknga nata apit gwenda apikge natake wamu waakngakan ginde daniwit.
REV 2:26 “Sike aminu kekeknga siknga yuke iwana ayapbike natane puya tasike yuwawa kuku tapduknga ita akupik gwenda apik. Waapata aminu kepna kepna nana amin kayuwikge yawit.
REV 2:27 Yawa waapata aminbam kayuke puya toknga siknga yamik. Unzing aminda ainu tapatu take gapma gwendu zipmakapmanggawan mateknga siknga sining binga tasike waapata puya toknga siknga wa aminde yamik. Yamuke ita kekeknga siknga yuwik. Ina unzakan natane Nana Anututa na naniwan nata kekekngana kaya apa dakngake aminu kuupbam kayuat.
REV 2:28 Sike nata waapae yekapdaau gwaim gwenu asimit.
REV 2:29 Siwan aminu maaknga kaya kakengu waapata wamu Waung Kapata Anututane amina yotna yotna yuaingge yanikapmanggak kaknga natapsok.”
REV 3:1 “Siwan gata wamu kundu Anututane amina Sadis yot gapmane yuainggane tupan tapae anzing matangamuyo,” ngang nanikut. “Waungu awia tapatukan ngana ita puya inata inata pasinggakge aminda ie natapa Waungu katau kuut musa kautdu tapaaya binga singgak. Siwan nata Waungu waapa take gatu yekapdaau katau kuut musa kautdu gweaya ngang pake gae natake wamu kundu ganiwa natapso. Na sanga kuupbamu gata tasinggayakge atnataat. Aminda gae natake wamu gata Anutue wesim kuke yuayakge yakaing ngana wena. Gata aminu akupsa apata nin nipmake maa kukut binga gata Anutu teke ie maa siknga yuayak.
REV 3:2 Gata gikae katak tagwaumso! Tupa natdetdeu nomana kundu gwa pakuyak. Siwan natdetdeu nomana gata dua tekuyuau wena sinanggenggak. Unzingge gata natdetdeu wa atapi kekekayok. Ngan. Na atnataat. Sanga kuupbamu gata tasinggau Anutu natane Anutue kaine noman siknga dua singgak.
REV 3:3 Siwan tupa gata Anututane wamu takeaknga natake gitna takuyakge gatuka natapso. Natake gata musipba tapi tekwamban wamu waakngakan gitna tapso. Sike gata unzing dua tagwauke tasiwinu nata gatane wamba usanzitnangge natake kuka aminda wepda kusopuknga zetgaman apik binga nata zetgaman gae apit. Ngan. Gata tapduknga nata gae apit gwende ga apbotaya.
REV 3:4 “Siwan ngana aminu Sadis yot gapmane nana kunduta waiakngaatang dua pimaking. Wa aminda unzing aminu tauknga pasiwa wasau dua sikaing binga take siknga yuaing. Unzingge ginu Anututane wam taknga gitna take yuaing aminda naat gatake yuke sukunim. Sukuke ginda Anutue nomune amin noman daknganing. Unzing aminda tauknga kwaknga siknga pasike sukuwa kana take siknga singgak binga ginda naat gatake yuke sukunim.
REV 3:5 Sike aminu kekeknga siknga yuke iwana ayapbimbiu nata tauu kwaknga wa binga ie tasingamit. Tasingamuke nata itane umana aknga dua dotdonguwit. Aho. Buu kayuk asinggan yutnanga gomune itane umana akngata asinggan yuwik. Yuwawan nata itane umana natane Nanae gatu itane angelanae nomune ayakapit. Yakapmake aminu waapa natane amina tapatu ngang yawit.
REV 3:6 Siwan aminu maaknga kaya kakengu waapata wamu Waung Kapata Anututane amina yotna yotna yuaingge yanikapmanggak kaknga natapsok.”
REV 3:7 “Siwan gata wamu kundu Anututane amina Filandelfia yot gapmane yuainggane tupan tapae anzing matangamuyo,” ngang nanikut. “Na Anututane amina nomana siknga apa. Siwan siakan wamdane yapii na. Nata ki Devitdane daka take itane tangine yuat. Yuke nata gwabou atziwanu aminu tapatuta gatuna yapunanga dua. Sike nata gwabou ayapuwanu aminu tapatuta dua ziwik. Wena siknga. Siwan nata gae natake wamu kundu ganiwa natapso.
REV 3:8 Na sanga kuupbamu gata tasinggayakge atnataat. Nata gae gwabou gwa zikgamukum. Siwan aminu tapatuta yapunanga dua. Wena. Na atnataat. Gatane kekekngaka buyambam dua ngana gata akekekake natane umana dua takusopukuyak. Aho. Gata natane wam taknga gitna take yuayak.
REV 3:9 Siwan aminu kunduta kem yake ninu Judia nana Anututane aminabam ngang yakaing. Wa aminda Setendane donga dakngake kem yakaing. Sike nata aminu waakwau yanipakuwa wa aminda gae apuke gwetake gatane umanda yatangenatning. Ngan. Ninda gae musip gwaang natanggamukamang ngang ganike gae wesim apning.
REV 3:10 Siwan tupa nata wamu gata meya takngatu takngatu pakengu gata kekeknga yuyo ngang ganikum takngae natake gata wamu waaknga tawake tasinggayak. Unzingge nata ga katak toiba apmea meya aminu kepna kepna nana kuupbamde apuke pasiwan siningu waakngata gae dua apik.
REV 3:11 “Siwan gatane wamba usanzitnangge natake nata gae zetgaman apit. Unzingge natdetdeu nomana gata nataayak kaknga gitna tapso. Take anzing natapso. Anututa nae natapan take siwanu apmea ita inane sanga takngatu nae namik ngang natake aminu tapatuta na tasiwan pimapa ita sanga waaknga kaiwan kungamuyak ngang natake kekeknga yuyo.
REV 3:12 Siwan aminu kekeknga siknga yuke iwana ayapbimbiu waapa nata take natane Anutunae yot takwan gwene initakopa ita wagwene kekekngana kayaapa dakngake asinggan asinggan yuwik. Unzing yot gwendane gwakga kekeknga yuaing binga waapata yot takwanu wagwenu dua teke kuwik. Aho. Kekeknga asinggan asinggan yuwik. Yuwawan nata ninane Anututane umana wa amindane gupnane matawit. Matake gatu Anututane yot bam gapmatane umana kuut matawit. Siwan apmanu ninda Jerusalemde natake Anututane yot bam gapma unin ngang yakamang. Siwan Anututane yot bamu kayuu wanggapmata enandang yuak. Sike enandangu Anututa ayuak komuneta epik. Siwan natane umana kayuk kaknga kuut nata waapatane gupnane matawit.
REV 3:13 “Siwan aminu maaknga kaya kakengu waapata wamu Waung Kapata Anututane amina yotna yotna yuaingge yanikapmanggak kaknga natapsok.”
REV 3:14 “Siwan gata wamu kundu Anututane amina Leodisia yot gapmane yuainggane tupan tapae anzing matangamuyo,” ngang nanikut. “Na siakan wamde yapii. Siwan nata Anututane wamu kuupbam noman gan yakapmanggat. Na Anututa sangabamu tasike tekutdane yapii na. Sike nata gae natake wamu kundu ganiwa natapso.
REV 3:15 Na sanga kuupbam gata tasinggayakge atnataat. Gata natane kepi tawanangge musipbaatangu toknga siknga dua natake gata semda semda tasinggayak. Sike gata musipbaatang toknga siknga nataayak gamu take siwan. Sike gata nae semna nataayak gamu apmea gata musipba tapi tekwambik ngang natapam. Ngana wena.
REV 3:16 Unzingge nata ga ganikwasitewa kuya. Unzing aminda yangga tangopan guyakguyaknga siwan sutamamban kuwik binga tasiwit.
REV 3:17 Ngan. Gata anzing yanggayak. Na sangana buyambamda yuaing. Na sanga tapatue dua dapmanggat ngang yanggayak. Ngana wena. Gata Anututane sangae asiknga dapmake upeekgayak. Unzing aminu sangaapana wena. Kaina kukgweat kusiwat kwangga yuke sukunggak binga dakngake yuwi ganduat.
REV 3:18 Unzingge nata ga anzing ganinggat. Gata nae wesim apso. Apuke natane sanga take siknga aknga papso. Unzing aminda gol take katapda sawa dudumna siknga sikingunin usikengu aminu tapatutane sangaapana buyambam siknga siwik. Ina unzakan gata natane sanga akngana papso. Siwan aminda tauu kwaknga sandu usike tasikengu ita kwangga dua yuke dua maakawik. Gatu ita kainatane marasin take pasikengu ita take akngana siwik. Ina unzakan gata waiakngaka bitapeke nae wesim apuke natane sanga akngana gitna siknga tapso.
REV 3:19 “Ga atnataayak. Nata aminu kundue butaya natakengu na wa amindane natdetdetna panomanutnangge natake nata wa amindane waiakngana tapa tapik. Sike nata gatane waiakngaka tapa tapan kake gata musipba tapi tekwambikge musipbaatangu toknga siknga natapso.
REV 3:20 Siwan na gwabok gwaune yuke nata ga ganinangge yawandewan gwabok tangukgat. Sike aminu tapatuta natane guyaknga natake gwabok zikngamanu nata akopit. Akoke nata iat gatake yuke nanamu nasim.
REV 3:21 “Siwan aminu kekeknga siknga yuke iwana ayapbimbiu nata waapa katewa aminu waapata kekekngana kayaapa dakngake ita naat gatake nitda aminbam kayutzim. Sike tupa naaya kekeknga siknga yuke natane iwana ayapbikumde nata kekekngana kayaapa dakngake nata natane Nanaat gatake yuke nitda aminbam kayuamak.
REV 3:22 Siwan aminu maaknga kaya kakengu waapata wamu Waung Kapata Anututane amina yotna yotna yuaingge yanikapmanggak kaknga natapsok.”
REV 4:1 Siwan ita wamu wa kuupbam naniwan puyuwana nata mia takngatuat kakum. Kawawa ena kakaa banakan komune gwabou gwatdu kwangga gwak yuwan kakum. Kawawa ngana wamu kekeknga pumdane gakngat binga tupa yanggamatawan natapbumu waakngata gatuna nanikut. Na nanike, “Gata ane akopso,” ngang yakut, “Gata ane akopi nata sanga kuupbam masan aawikge yeikgama kayo,” ngang nanikut.
REV 4:2 Siwan zetgaman siknga Waung Kapata na kekeknga siknga tapan nata mia anzing kakum. Enandangu sia dakatu tupan siknga apata pukwike kayutnanga daka kakum. Kawawa aminu tapatuta sia wandakane pukwiwan kakum.
REV 4:3 Kawa aminu waapa waenga siknga siwan kakum. Ngan. Suu kwaknga siknga kundu umana jaspa ngang yanikamang gatu suu gamana siknga umana konilian ngang yanikamang. Sike suu wagwegwenu kana waenga siknga siwan kaamang binga aminu waapa kawa waenga siknga sikut. Siwan zawiakwanu buyambam siknga takngatu kawa gwegwenga siwan gatu waenga siknga siwan kakum. Suu gwegwenga siknga umana emeral ngang yanikamang gwen binga kakum. Kawa zawiakwanu waakngata sia takeapata pukwike yukut daka takumbasiwan kakum.
REV 4:4 Kawa sia dakandaka 24 ngangga takeapatane sia dakana pebasiwa sia wa dakandakane aminu take apaapa 24 ngangga pukwike yuwa kakum. Sike take aminu waakwau tauknga kwaknga siknga kakum. Sike kupna gol sake pasikingu tupan tapaapata gwapukaing binga wa aminda gwapuke yuwa kakum.
REV 4:5 Kawawa tupan siknga apatane sia dakaneta yapasiu takngatu takngatu siwan nataawa gakngau buyambamda gatu gatu yawawa natapbum. Sike tupan tapatane nomune aakatau katau kuut musa kautdu saaya ngang yasikoke yuwa kakum. Sike aakatau waakwakgane yapii Anututane Waunga unin. Waungu waapa awia tapatukan ngana ita puya inata inata pasinggakge nata ie natapa Waungu katau kuut musa kautdu tapaaya binga singgak.
REV 4:6 Siwan tupan tapatane nomune yangga gapanu buyambam siknga gwenu kawa yangga dopna wena kakaa siknga siwan kakum. Sike sanga kayuk yuaingu gweaat gweaatda tupan tapa takumbasike yuwa kakum. Sike sanga wa gweaat gweaat ngangu kaina kwaapzang sikngata nomnane gatu maseapane ngang tapa sopukutna kakum.
REV 4:7 Sike kayuk yuau tupan gwenu kawa kaapzongu toknga gwendu umana laion ngang yanikamang gwen binga siwan kakum. Sike sanga kayuk yuau masan gwenu kawa ikwawa gaman mateu wawi gwen binga siwan kakum. Sike sanga kayuk yuau banakan gwenu kawa nomna amin nom binga siwan kakum. Sike sanga kayuk yuau masan siknga gwenu kawa tinggigita pia tapan waiwan yuak binga yuwan kakum.
REV 4:8 Sike sanga wa gweaat gweaatda inandek inandeu piana 6 ngang kakum. Sike kaina kwaapzang sikngata gupnane gatu pia engetanan gatu amakatang ngang tapa sopukutna kakum. Sike kwakngaom gatu zikaane ngang tapduk bamu asinggan kau anzing taikaing, “Anutu, Buyambam tapa. Anutu, takwan, takwan, takwan sikngaapa. Ita tupa siknga ayukut. Ita apmanu ayuak. Ita kekeknga asinggan asinggan yuwik.”
REV 4:9 Sike sanga wa gweaat gweaatda Anutu kekeknga asinggan asinggan yuau sia tupan siknga apatane dakane pukwike yuak kapae inimbakngake itane umana asiknga yatangenakaing. Yatangenake tapduk bamu asinggan asinggan tasiwawa
REV 4:10 aminu take aminu 24 waakwau Anutu sia wa dakane pukwikgak kapae nomune gwetakaing. Gwetake wa aminda Anutu wa kekeknga asinggan asinggan yuak kapae inimbakngakaing. Inimbakngake aminu waakwau kupna aminu tupan tapaapa dakngake gwapukaingunin ukgwike muba aminu tupan sikngaapae nomune pimapa anzing yakaing,
REV 4:11 “Ga nindane Buyambam tapanin. Ga nindane Anutunin. Ga nomana sikngaapa. Aminbamda gatane umanda take yatangenatning. Aminbamda gatane gepbiatang take koyutning. Dasingge? Gata sangabam tasike tekuyak. Gikae banipda siwan gata sangabam pasiwi aake ayuaing.” Sike wa aminda wamu wa unzing yawa natapbum.
REV 5:1 Sike nata mia kawawa aminu tupan tapa sia buyambam dakane pukwike yukut tapata pepa mamaya sandu gwa tapakopbutna katakngi siyaapata takutna kakum. Kawa pepa wa gomu amakatang gatu engatangan ngangu wamu kundu gwa matakutna kakum. Kawa aminda pepa wa gomu katap gomune koomuke gatak gatakga katau kuut musa kautdu dakaaya ngangu amakatang papan gatapbing ngang kakum.
REV 5:2 Sike nata kawawa angela kekeknga siknga tapatuta enake ita wamu apaa siknga anzing yanggamatakut, “Maminda pepa anggomu apme take gatak gatak dauke tapan waiwik,” ngang yakut.
REV 5:3 Yawan ngana aminu pepa wa gom dauwikge umana kaya tapatue tawamba maikut. Enandang gatu kepdakane gatu keu akupsa aminda yuaing komune kuut aminu pepa wa gom dauke kawikge umana kayaapae tawamba maikut. Wena siknga.
REV 5:4 Siwan nata kawa aminu tapatuta pepa wa gom dauke tapan waiwan wamu pepa wa gomune yuak kaknga kendewiu tapatue tawamba maiwan kake nata kwanamu kumzang sikum.
REV 5:5 Na kwanamu kumzang siwawa ngana aminu take aminu 24 wa yukikat nana tapatuta anzing nanikut, “Ga kwanamu ma siwim. Kayo! Aminu tapatu Devitdane dongune aakuu tapatu kaapzongu laion gwen binga dakngake aminu Judia nana kuupbamdane kuyana dakngake yuak kapata kekeknga siknga yuke ita iwana ayapbikut. Unzingge waapata apme gatak gatau wa katau kuut musa kautdu dakaaya ngangu dauke pepa wa gomu tapan waiwik,” ngang nanikut.
REV 5:6 Sike ita wamu waaknga naniwan natake nata laionu wagwen kanangge natapa ngana sipsip mateu gwenduta yuwan kakum. Kawa sipsip mateu wagwenu tupa aminda tanguwa kumbutna kakum. Sike sipsiu wagwenda gatuna gweake tupan sikngaapa gatu sanga kayuk yuaingu wa gweaat gweaat gatu take aminu waakwak ngangge banakan yuwan kakum. Sike sipsiu wagwendane komna katau kuut musa kautdu dakaaya. Siwan kaina kuut katau kuut musa kautdu gweaya ngang kakum. Sike kom dakandaka gatu kai gwegwendane yapii Anututane Waung Kapa unin. Waungu awia tapatukan ngana ita puya inata inata pasinggakge nata ie natapa waungu katau kuut musa kautdu tapaaya binga sikut. Siwan Anututa waungu waakwau yanipewan kepna kepna kuupbam kuwa sandekgaunin.
REV 5:7 Siwan nata kawawa sipsip mateu wagwenda kuku pepa gomu aminu tupan siknga apa sia buyambam dakane pukwike yukut tapata katakngi siyaapane takuu wa gomu atakut.
REV 5:8 Tapana sanga kayuk yuaingu gweaat gweaat gatu aminu 24 ngangu waakwakga enake sipsip mateu wagwende wesim kuke itane nomune gwetaking. Sike take aminu kuupbamda inandek inandek sanga tanguke kap tainanga gita tasikingunin paking. Sike gatu gapma gwegwenu kuut paking. Siwan sanga katapatang sawa kapanga take siknga singgakgane muyup muyup ngang pake gapma wagwegwene pamuba dopbing ngang kakum. Siwan muyup muyupdane yapii tumuk wamu Anututane aminabamda yakaingunin.
REV 5:9 Siwan wa aminda kau kayuu takngatu sipsip mateu wagwende anzing taingamuking, “Ninda ga gandupna take singgakge gata pepa wagomu take tapsa. Takenga gata gatak gatau take dauya. Dasingge? Aminda ga gwa guwa kumbuyak. Kungwake dakga tukngwakuyak kakngata aminbamu waiakngane sandewan wa aminda Anututane amina dakngake yuaing. Ngan. Gata aminu kwaapzang pasiwi aminu dongu kuupbapat nana kunduta Anututane amina dakngake yuaing. Siakan. Aminu wamna inata inata yakaing gatu gupna inata inata gatu kepna inata inata ngangu kuut kundukan gata pasiwi itane amina dakngake yuaing.
REV 5:10 Anututane amina dakngake yuwawa Anututa aminu waakwau akayuak. Kayuke pasiwan wa aminda itane gepbiatang koyuaing. Koyuke wa aminda Anututane puya amina dakngake itane puyana pasingamukaing. Pasingamuke wa aminda buyambam tapaapa dakngake kepna kepna nana kuupbam kayutning.”
REV 5:11 Siwan nata mia kawawa angela kwaapzang sikngata kau takngatu taiwawa natapbum. Ngan. Angela kwaapzang sikngata aminu tupan sikngaapa gatu sanga kayuk yuaingu wa gweaat gweaat gatu take aminu 24 ngangga yubasike kau taiking.
REV 5:12 Kau taike apaa siknga anzing taiking, “Sipsip mateu anggwenu tupa aminda atanguwa kumbutde ninu asiknga bakngakamang. Sipsip mateu anggwenda kekekngana kayaapa dakngawan kaamang. Anggwenda sangaapana kwaapzang papan kaamang. Gatu anggwenda natdetdeu buyambam siknga papan kaamang. Pake anggwenda kekeknga siknga yuwan kaamang. Yuwawan aminu kuupbamda anggwendane umana asiknga yatangenake ie inimbaknganing.”
REV 5:13 Siwan kau waaknga taiwana nata nataawa sanga kuupbamu Anututa tasike tekuu wa enandang yuaing gatu kepdakane yuaing gatu keu akupsa aminda yuaing komune gatu yanggabam gwene yuaing ngangga kap taiking. Ngan. Sangabapat kaapat amikat ngangu kepna kepna yuaingga kau takngatu anzing taiking, “Anutu sia tupan siknga apatane dakane pukwike yuak kapa gatu sipsip mateu kuutde yanimbakngake umana asinggan asinggan yapangenatnim. Sike waapaatda kekeknga siknga asinggan asinggan yutzan,” ngang taiking.
REV 5:14 Sike kau waaknga taiwa puyuwana sanga kayuk yuaingu wa gweaat gweaatda, “Siakan,” ngang yaking. Yawawa take aminu waakwakga gwetake Anutuat gatu sipsip mateu wagwekatde ayanimbakngaking.
REV 6:1 Siwan nata mia kawawa sipsip mateu wagwenda pepa wagomu gatak gatau tupan daka dauwan kakum. Kake nata nataawa sanga kayuk yuaingu wa gweaat gweaat ngang yukingkat nana gwenduta yake, “Ga apso,” ngang yawan itane guyakngi natapa gakngat binga sikut.
REV 6:2 Siwan nata kake ikwawa gamanu hos ngang yanikaingu kwaknga gwendu kakum. Sike aminu hos wagwendane masene pukwikut tapata kweemu dakatu take yukut. Yuwawan aminu tapatuta apuke kupna dakatu aminu iwana ayapbiba yamunanga daka ie imukut. Iman take gwapuke aminu waapata aminu iwana ayapbitnanga tapatu binga dakngake ita kuke iwana ayapbike tasikut.
REV 6:3 Siwan nata kawawa sipsip mateu wagwenda gatak gatau dakatuat dauwan dakaaya sikut. Siwan nata nataawa sanga kayuk yuaingu wa gweaat gweaat ngangu wa yukingkat nana masan gwenda yake, “Ga apso,” ngang yawan natapbum.
REV 6:4 Sike nata kake ikwawa gamanu hos ngang yanikaingu gamana siknga gwendu kakum. Sike aminu hos wagwendane masene pukwikut tapae umana yawan ita aminbamdane musia pangenawan notna notna zipa kumningge puya takut. Tapan aminu tapatuta apuke paiu buyambamu dakatu puya waaknga tasiwikge ie iman kakum.
REV 6:5 Sike nata kawawa sipsip mateu wagwenda gatak gatau dakatuat dauwan dakaat dakatuat sikut. Siwan nata nataawa sanga kayuk yuaingu wa gweaat gweaat ngangu wa yukikat nana banakan gwenda yake, “Ga apso,” ngang yawan natapbum. Sike nata kake ikwawa gamanu hos ngang yanikaingu zikaa siknga gwendu kakum. Sike aminu hos wagwendane masene pukwikut tapata sangaapa mitapsa daka umana skel ngang yanikaingu dakatu katakngine takut.
REV 6:6 Take yuwawan nata nataawa gakngau wam taknga binga siwan natapbum. Nataawa wamu takngatu sanga kayuk yuaingu wa gweaat gweaatde banakan yawan natapbum. Sike wamu waakngata skel daka tanggak kapae anzing inikut, “Poyau wit ngang yanikaingu gapma mateknga gwendusimu buyana enane siknga isakopan buyambam siknga unzing puya aminu tapatuta gunziu gwendune pasike mani panggak binga isatake kokaing ngang yakut. Yake poyau bali gapma gweaat gwenduatdane buyana ina unzakan isatake kokaing ngang yakut. Yake gata katau oliv dakatane yangga gatu wain yangga ngang ma tasiwi maiwan,” ngang yakut.
REV 6:7 Siwan nata kawawa sipsip mateu wagwenda gatak gatau dakatuat dauwan dakaat dakaat sikut. Siwan nata nataawa sanga kayuk yuaingu wa gweaat gweaat ngangu wa yukikat nana masan siknga gwenda yake, “Ga apso,” ngang yawan natapbum.
REV 6:8 Sike nata kake ikwawa gamanu hos ngang yanikaingu kwaknga kwaknga gwendu kakum. Sike aminu hos wagwendane masene pukwikut tapatane umana amin zipan kumnangaapa ngang iniking. Siwan itane maseatang aminu tapatu umana akupsa amin kayuak kapa ngang iniking kapata i tawatakapbut. Siwana aminu wa tapaatdane umana yawan waapaatda aminu kuupbam usanzike dongu takngaat takngaat ngang peke dongu takngatukan pasande yakut. Sike dongu waakngane nana aminu kuupbam zipat kumningge yakut. Ngan. Wa amikat nana kundu paipda zipat kumning. Gatu aminu kundu pasiwat wa aminda tomna siknga natake akumning. Gatu aminu kundu pasiwat maiu inata inatata apuke zipa kumning. Gatu kaapzongu toknga siknga gwegwenda enake aminu kundu yasiwa kumning. Unzing tasinggawa aminu dongu waakngane yuaingu kuupbamda akumningge aminu wa tapaatdane umana yakut.
REV 6:9 Siwan nata kawawa sipsip mateu wagwenda gatak gatau dakatuat dauwan katau kuut musa sikut. Siwan tupa aminu kundu Anutue wamu kekeknga siknga take yanikapmake tasiking. Tasiwawa ngana iwanata enake wa aminu atzipa kumbing. Siwan nata mia kake wa amindane uyunga kakum. Kake uyunga wa sanga puya aminda engatangan kaau Anutue sake Anututa amindane waiakngana sandeyamikge kepi tasikaingge gepbiatang yuwa kakum.
REV 6:10 Kake nata nataawa uyunga waakwakga apaa siknga anzing yanggamataking, “O Buyambam tapaninu sanga kuupbamdane toiknga! Ga nomana siknga yuayak! Sike ga kepi nomana siknga tawake nindane wamin usanziwi siakan siwik kapanin! Ga zaapduknga nindane wamin usanzike aminu nin nisipa kumbumang aminde toknga yake yamuya? Tapduu mamaya yuwi sandewana aminu kepdakane nana waakwakge toknga yamuya ba dasing,” ngang yanggamataking.
REV 6:11 Yanggamatawa aminu tapatuta apuke tauu mamaya kwaknga sasanu wa aminde inandek inandek yamukut. Yaman pake tasiwa wa aminu anzing yanikut, “Masande iwanzata aminu gindane Jesue amin notza kundu gatu gindane puya amin notza kundu ngangu atzipa kumning. Unzing gisa dasipbing binga wa aminu atzipa kumning. Ngana notza kuupbamu dua zipa puyuwik. Aho. Tupa Anututa ina natake nata kapewa aminu zipmanggawa kuku namba anzing tapik ngang yawan kekekakut. Siwan notza zipmanggawa kuku namba ayakut dakane tapik. Siwan ginda tapduu mateknga kundusim yuwa takawan kuku tapduu namba wa yakut dakanekan tapik gwenda apik. Apan kake ita wa aminde toknga ayamik,” ngang yanikut.
REV 6:12 Siwan nata kawawa sipsip mateu wagwenda gatak gatau dakatuat dauwan katau kuut musa kautdu dakatu ngang sikut. Siwan nata kawawa miyamunu buyambam siknga kepdakane siwan kakum. Kawawa gunzit gwenu zikaa siknga katakumbi binga siwan kakum. Kawawa yekau yapii gwenu gamana siknga dak binga siwan kakum.
REV 6:13 Kawawa yekapdaau kuupbamda deke kepdakane pimaking. Unzing yoka tapunu gwa yukaawa gou buyambamda puyapan saa sike pimakaing binga yekapdaakga pimaawa kakum.
REV 6:14 Kawawa ena kakaa banakan komu wena sikut. Unzing aminda mat daka koomuke take kuwik binga sanga wa kuupbam wena siwa kakum. Sike tawanu kuupbam gatu keu yangga banakan yuaingu kuupbam ayuaing komu teke asisang kuke wena siwa kakum.
REV 6:15 Sike kepdakane nana tupan tapaapa gatu moo aminu kuupbam ngangga unda undang datakuke kunduta sup gapbat katang kusopuke yuwawa gatu kunduta suu buyambamu tawan dakandakane yuaingune kuke amaakatang koke kusopuke yuking. Ngan. Aminu umana kaya gatu amak amindane tupan tapaapa gatu sangaapana buyambamu kaya amin gatu aminu kekekngana kaya gatu umana wena gatu puya inata inata pasiya amin ngangu wa aminu kuupbamda ina unzakan unda undang datakuke kusopuwawa kakum.
REV 6:16 Kake nata nataawa wa aminda gwauya siknga natake, “Tawan daka daka gatu suu kuupbamda ninde engatangan pimanong. Anutu sia buyambam dakane pukwike ninduyuak kapaat gatu sipsip mateu waapaatda nindupzan.
REV 6:17 Dasingge? Tapduu waapaatda toknga nin nisipnangge yawat yukut gwenda gwa apuk. Siwan maminda toknga wa yapbimbik? Wena siknga. Ninu kuupbamda toknga wa apanim,” ngang yanggamatawa natapbum.
REV 7:1 Sike sanga wa kuupbam nata kawa puyuwana nata kake angela tapaat tapaatda keu kaukaut yuke gou ina unzakan takngaat takngaat panggaganuke yuwa kakum. Gou wa panggaganuke umuba got takngata kepdakane ba yanggabam gwene ba katap dakandakane ngangu dua puyapikge tasiwawa kakum.
REV 7:2 Sike nata kawawa angela tapatuta gunzitda akonggak katangga apan kakum. Kawawa ita tuwangu Anutu kekeknga asinggan yuak kapatane aknga tapan kakum. Sike nata nataawa angela waapata angela wa tapaat tapaatde yanindakngakut. Ngan. Angela kekeknga kepdakaat yanggabam gwekat pasiwa mainingge pakingu wa tapaat tapaatde yanindakngake ita anzing yanggamatakut,
REV 7:3 “Ginda zetgaman kepdaka gatu yanggabam gwen gatu katap dakandaka ma pasiwa maiwam. Ninda Anututane tuwangu itane aminae damanane matayamuke tasina puyawana masande ginda sanga wa take pasiwa maining,” ngang yanggamatawan natapbum.
REV 7:4 Sike nata nataawa aminu tuwanga takinggane nambana angela tapatuta na naniwan natapbum. Sike wa aminu Isrel nana amin gan. Sike aminu buyambam siknga 144,000 ngangga tuwangu paking. Ngan. Aminu kundu Isrel nana amindane donga kuupbam inandek inandek tuwangu paking.
REV 7:5 Pake aminu Judiatane dongune aakikat nana 12,000-da tuwangu paking. Sike aminu Rubendane dongune aakikat nana 12,000-da paking. Sike Gatdane dongune aakingkat nana 12,000-da paking.
REV 7:6 Sike aminu Asatane dongune aakingkat nana 12,000-da paking. Sike aminu Naftalaitane dongune aakingkat nana 12,000-da paking. Sike aminu Manasatane dongune aakingkat nana 12,000-da paking.
REV 7:7 Sike aminu Simiondane dongune aakingkat nana 12,000-da paking. Sike aminu Liwaitane dongune aakingkat nana 12,000-da paking. Sike aminu Isakatane dongune aakingkat nana 12,000-da paking.
REV 7:8 Sike aminu Sebyulandane dongune aakingkat nana 12,000-da paking. Sike aminu Josepdane dongune aakingkat nana 12,000-da paking. Sike aminu Benjamindane dongune aakingkat nana 12,000-da paking.
REV 7:9 Siwana nata kawawa aminu kwaapzang sikngata unekan gatake yuwa kakum. Sike wa aminu mateknga dua. Nata nambana kendetnanga dua. Sike aminu waakwau dongu kuupbapat nana siwan kepna kepna yuaingu kuupbapat nana siwan gupna inata inata siwan wamna inana inana yakaing amin ngangga yuwa kakum. Sike wa aminda tauknga kwaknga mamaya pasike katap tatau isat tatak binga kundu katakngita papa saking. Sike wa aminda Anutu sia buyambam dakane pukwike kayuak kapaat gatu sipsip mateu wagwekatde nomune yuwa kakum.
REV 7:10 Sike nata nataawa wa aminda apaa anzing yanggamataking, “Nindane Anutuninu sia buyambam dakane pukwike nin ninduyuak kapaat gatu sipsip matekatda nin gatanimuke toknga pananga akngane ninu sandetnimukumayak,” ngang yaking,
REV 7:11 Yawana angela kuupbamda, “Siakan,” ngang yaking. Sike angelata yuke tupan sikngaapaat gatu take amin takwakat gatu sanga kayuk yuaingu wa gweaat gweaat ngang yupbasikinga kakum. Kawawa angelata Anutue nomune gwetake ie inimbakngaking. Inimbakngake anzing yaking, “Ninda nisane Anutue kumzang siknga baknganim. Bakngake itane umana aknga asiknga yatangenatnim. Sike itane natdetdetna buyambam siknga. Ge ninda ie asinimbaknganim. Sike ita kekeknga siknga yuak. Ngan. Ninda itane umana asinggan asinggan yatangenatna kekeknga asinggan asinggan yuwik. Siakan,” ngang yawa natapbum.
REV 7:13 Siwan take amikat nana tapatuta na anzing nanikwaikut, “Aminu tauknga mamaya kwaknga pasiingu waakwau mamin? Siwan waakwau zandangga apbing,” ngang nanikwaikut.
REV 7:14 Nanikwaiwan nata ie yake anzing inikum, “Na dua nataat. Gata gika atnataayak,” ngang inikum. Iniwa ita na anzing nanikut, “Aminu waakwau meya buyambam iwande kataune paking. Pake ngana wa aminda akekekake dua pimakingge keu ninda ayuamang komune apuke yuaing ngang nanikut. Sike wa aminda tauknga sipsip mateu wagwendane dakngata sauwa tauknga kwaknga sikaing.
REV 7:15 Unzingge wa aminda Anutu nin ninduyuak kapatane nomune gitna yuaing,” ngang nanikut. “Sike kwakngaom gatu zikaane ngangu Anututane yot takwanu buya gwene yuke ie puya pasingamukaing. Puya pasingamuwawa Anutu sia buyambam dakane pukwike nin ninduyuak kapata wa amikat gatake yuke wa amin gatayamik.
REV 7:16 Gatayaman wa aminu gatuna tomna dua natake yanggae gatuna toknga dua natapning ngang nanikut. Siwan gunzitda wa aminu toknga dua yasiwik. Siwan sanga toknga akngata wa aminde dua apik.
REV 7:17 Dasingge? Sipsip mateu Anutu tupan siknga apatane nomune yuak kapata wa aminu akayuke yangga dapunu asakonggak dakane yanipakuwan kuning. Kuke yangga wa tangoke kayuu asinggan asinggan yutning. Yuwawa Anututa kai yangga pasiwan kuwa wa aminu kwanamu gatu dua sitning,” ngang naniwan natapbum.
REV 8:1 Sike nata kawawa sipsip mateu wagwenda gatak gatau masan siknga daka dauwan kakum. Sike nata nataawa sanga tapatuta gakngau dua siknga yakut. Aho. Enandangu sanga kuupbamu kuma siknga yuwawa kuku tapduknga mamaya komdusim sikut.
REV 8:2 Siwana masande nata kake angela katau kuut musa kautdu tapaaya ngangga Anutue nomune yukingunin kakum. Kawawa angela waakwau inandek inandek pumu gwendu gwendu papa kakum.
REV 8:3 Siwan angela tapatuta apu tebo dakasimu sanga kapanga kaya sakaingune wesim yukut. Sike angela waapata gapma mateu gwendu gol sake tasikingunin take yuwan kakum. Yuwan kawawa angela tapatuta sanga kapanga kaya muyup binga kwaapzang ie iman ita sawan kupanu kapanga take siknga akngata akopikge imikut. Ngan. Waapata sawan kapanga take akngaat gatu tumuk wamu Anututane aminabamda yakaing kakngaat ngangga unekan gatake Anutue nomune akopningge imukut. Iman pake angela waapata tebo mateknga Anutu nin ninduyuak kapae nomune yuak dakane tukngwamban pukuwa Anutue sakut.
REV 8:4 Sike waapata Anutue nomune yuke sawan kupanu kapanga take siknga akngata Anutue nomune akopbing. Akopa Anututane aminabamde tumuk wamu kuupbamda kapanga take waakngaat gatake Anutue nomune akopbing.
REV 8:5 Siwan nata kawawa angela waapata katap paimu tebo mateknga wandakasimune yukingu pake ita gapma mateu wagwene pamuban dopbut. Pamuban dopana ita katap paimu wa muban kuke kepdakane pimaking. Pimapa gakngau takngatu takngatu yawawa yapasiu takngatu takngatu siwawa kepdaka miyamun sikut.
REV 8:6 Siwan nata mia kawawa angela katau kuut musa kautdu tapaaya ngangu pum pakingu waakwakga pumna puyapnangge atandakngawa kakum.
REV 8:7 Sike nata nataawa angela tupan tapata pumna puyapbut. Puyapana katau asisiwawan sopa zambumu kuut gatu dau kuut muban kepdakaatang pukuwan kakum. Sike kepdakaatang pukuke kep kokomu kautdusimban gatu katap dakandaka kautdu simban nganggan yasiwawa gatu zongazonga kuupbam yasiwan puyuwan kakum.
REV 8:8 Sike nata nataawa angela masan tapata pumna puyapan natapbum. Natake nata kawawa sanga tawanu buyambam daka katapda isinggak binga kakum. Sike angelata sanga wa muban kuke yanggabam gwekatang pimapan kakum. Pimapan kawawa yanggabam gwenu kautdusimban dak dakngakut.
REV 8:9 Sike kaau yanggabam gwene nana kautdusimban atzipa kumbing. Sike sip gwegwenu kautdusimban atzipbuwa yanggaatang pukuwa kakum.
REV 8:10 Sike nata nataawa angela banakan tapata pumna puyapan tapaat tapatuat sikut. Siwan nata kawawa yekapdaau buyambam siknga gwendu katapda isike aakatapda binga isikopbut. Isikopan yekapdaau wagwenda deke asepbut. Asepuke wagwenda yangga apaapane gatu yangga dapun dakandakane kuut pimakut. Pimapan yangga apaapa gatu yangga dapun dakandaka ngangu kautdusimban wai siking.
REV 8:11 Siwan yekapdaau wagwendane umana nau tokngana kaya aknga ngang iniking. Sike wagwenda yangga kautdusimban pasiwan wai dakngawan aminu yangga wai waaknga tangopbingu kwaapzangga akumbing. Dasingge? Yanggata amin zipnanga sikut.
REV 8:12 Siwan nata nataawa angela tapatuta pumna puyapan tapaat tapaat sikut. Sike nata kawawa gunzit gwekat yekap gwekat ngangu zipan kukgweat kautdusimban zikaa siwat kakum. Kawawa yekapdaau kautdusimban zipan kupa kakum. Sike gunzitda zet dua akopan zikaa buyambam sikut. Tapduknga gunzitda akonggak komune dua kwakake yusika tapduknga gunzitda akoke awekanggak komune kwakawan gunzitda akopbut. Ina unzakan yekap gwenda zet dua akopan zikaa buyambam sikut.
REV 8:13 Siwan nata kawawa tinggigi buyambamu gwendu enane siknga bepmake kuwan kakum. Sike nata nataawa tinggigi wagwenda bepmayuk apaa anzing yanggamatakut, “Butaya! Butaya! Butaya! Aminu kepdakane yuaingge butaya siknga! Angela tapaat tapatuatda pumna puyapa meya buyambam siknga wa aminda apaning,” ngang yanggamatawan natapbum.
REV 9:1 Sike nata nataawa angela tapatuta pumna puyapan katau kuut musa dakngakut. Siwana nata kawawa yekapdaau gwendu enandang teke kepdakane pimakutna kakum. Sike nata kawawa aminu tapatuta ki daka gapma amunandang siknga pukuwan pakepu ayukuu wena daka zitnanga daka ie imukut.
REV 9:2 Iman take yekapdaau wagwenda gapma wa dakatane zangutna atzikut. Atziwana kupanu kwaapzang unzing katau buyambam gwende kupanda binga gapma wandakaatangga akopbut. Akoke kupanu waakngata minga binga dakngake gunzit takusopukut.
REV 9:3 Takusopuwawan gwak gwau kwaapzang apmak bingata kupanu wagwen teke kuke kepatang pukuking. Sike gwak gwau waakwakgane tokngana tunggane binga.
REV 9:4 Siwan gwak gwau waakwakga zongazonga ba katau dakatu ba sanga tatakngina kaya kuupbam dua pasiwa mainingge yandakngakut. Yandakngake ngana aminu Anututane tuwangu damanane dua mataking amin gan pasiwa mainingge kapekut.
REV 9:5 Kapewan wa aminde toknga yamuwawa kuku yekau katau kautdu musakan siwik. Siwan zipa kumningge dua kapekut. Ngana wa amin yasiwawa wa aminda toknga tungga yasiwa toknga nataaing binga natapbing.
REV 9:6 Sike tapduu waomune wa aminda gupnane toknga siknga natake akumnangae kepie tawamba maiwik. Ngan. Wa aminda kumnangge asiknga baknganing ngana kepi wena siwik.
REV 9:7 Siwan nata apmau waakwau kawa aminda ikwawa gamanu hos pake amak tasinangge amakgane sanga pasiyamukaing binga siking. Siwan nata apmau wa kawa gwapakngane kupna gol sake tasikaingu aminu tupan tapaapata gwapukaing binga gwapukinga kakum. Sike waakwakgane nomna kawa amin nom binga siking.
REV 9:8 Sike gwapak danggamna mamaya. Sike gena toknga takwau kawa kaapzongu laiondane binga sikut.
REV 9:9 Sike waakwakgane nangongane sanga taukgwen binga mapa pukukinga kakum. Sike nata nataawa waakwakga bepmake gakngau kwaapzang siknga unzing aminda ikwawa gamana hos gwegwen wamake amak tasinangge yaninapiba isapmake karis gwegwen kaipake kuwawa gakngae yakaing binga tasiwa natapbum.
REV 9:10 Sike waakwakgane ngwangi tunggane binga. Sike amin yasike tokngabam yamuke tasiwawa kuku yekau katau kautdu musakan siwik.
REV 9:11 Siwan gwak gwau waakwakgane tupan tapata yuwan kakum. Waapa angela tapatu. Ita gapma amunandang siknga pukuke pakepu ayukuu wena dakatane toikngaapa unin. Sike itane umana Hibru wam tanganu Abadon ngang inikaing. Sike gatu Grik wam tanganu Apoluon ngang inikaing. Sike gatu nisane wam tanganu aminu sanga kuupbam pasiwan maikaingunin ngang ininim.
REV 9:12 Siwan meya buyambamu tupan nana aknga unin. Sike ngana meya takngaaya ayuamayak ngang masana apzan. Sike nata meya waakngaatde natake daniwa natapnong.
REV 9:13 Sike nata nataawa angela masan nana tapatuta pumna puyapan katau kuut musa kautdu tapatuat sikut. Siwan nata nataawa wamu takngatu yawan natapbum. Sike tebo dakatu gol sake tasikingune sanga Anutue sangamukaing dakata Anutue nomune yukut. Siwan wandakatane nomna dakandakane sanga kom dakandaka binga pandaike yapupekinga kakum. Sike wamu waakngata komu wa dakaat dakaatde banakan komuneta apan natapbum.
REV 9:14 Sike nata nataawa wamu waakngata angela pum pakingkat nanatane namba 6 tapae anzing inikut, “Gata enake angela yangga buyambam tapa umana Yufretis ngang inikainggane kwaim tapane wamapekingu wa tapaat tapaat sandepewi kunong,” ngang inikut.
REV 9:15 Iniwan waapata asandepewan kuking. Kuke angela wa tapaat tapaatda aminu kautdusimban zipa kumbing. Siwan tupa Anututa angela wa pake nakanu wa gwene puya waaknga tasiningge natake ita waakwau pandakngapekut. Ngan. Yekau wa gwene enake tapduu wagwene puyana tasiningge pakut. Papan tapduu ita yawan yukut gwenzimunekan enake angelata aminu waakwau atzipa kumbing.
REV 9:16 Ngan. Angela wa tapaat tapaatdane amak aminu kwaapzang siknga ikwawa gamanu hos gwegwene pukwikinga kakum. Sike nata nataawa wa aminu kendeke nambana 200,000,000 (200 milion) ngang yawan natapbum.
REV 9:17 Sike nata mia waaknga kawawa amak aminu waakwakga ikwawa gamanu hos gwegwendane masene pukwikinga kakum. Sike amak aminu waakwau kuupbamda inandek inandek taukgwen mapa pukukinga kakum. Sike taukgwenu wa kundu gamana katap mumuyang binga. Sike kundu katapda suu kundu zangwam binga umana salfa ngang yanikamang gwegwen yasiwan kupanu gwegwenga aknga akonggak binga sikut. Sike kundu zangwam binga ngang kakum. Sike ikwawa gamanu hos waakwakgane nomna kaapzongu laiondane binga. Sike katapat gatu kupakat gatu suu zangwam binga aakatapda binga isikowawan hos waakwakgane genaatangga akoke isikakaatakuwan kakum.
REV 9:18 Sanga wa genaatangga akoke isikakaatakuke aminu kautdusimban zipa kumbing.
REV 9:19 Ngan. Sanga hos waakwakgane genaatangga akonggau waakngata amin zipbing. Gatu hosdane ngwangi gomok binga. Sike gena kaya. Sike genata amin yasiwan maiwa kakum.
REV 9:20 Siwan aminu hos waakwakga dua zipa kumbingu kuupbamda musia dua tapa tekwamban sanga katakngita pasikingge masa dua yamuking. Aho. Wa aminu sanga takwanu katakngata tasikingu wa gol ba silwa ba kapa gamanggamana sake gatu sup takwan gatu katap gom pasike tasiking. Siwan waakwau akake ba wam natake ba kepi kunanga dua ngana wa aminda sanga wa Setendane akngae ayanindatake tasiwa kakum.
REV 9:21 Siwan aminu waakwakga aminu kundu atzipa kupa gatu gaam ba gom ba pitatapa ngang pasike gatu yasewa aknga tasike gatu amindane sangaapana kukae pake ngang pasiking. Ngana musia dua tapa tekwamban sanga wa tasiking kakngae masa dua imuking.
REV 10:1 Siwan nata mia waaknga kawawa angela kekeknga tapatuta enandangga epan kakum. Sike ita minga dakatu taukge tasiwan zawiakwanu takngatuta itane gwapakngane yuwan kakum. Sike nata itane nomna kawa gunzit binga maaknga siknga sikut. Siwan nata kepi kutapaat kawawa katap mumuyangga binga isiking.
REV 10:2 Sike ita pepa tupa koomukuu gomdusim tapan waiwan katakngita tapan kakum. Sike ita kepina siyaapa yanggabam gwenu engatangan yaike kepina kwanaapa kepdakane yaikut.
REV 10:3 Unzing yaike ita apaa siknga ainggamatawan natapa kaapzongu laion gwegwenda ainggamatakaing binga sikut. Siwan ita ainggamatawana gakngatda katau kuut musa kautdu dakaaya ngang yawan natapbum.
REV 10:4 Natake nata wamu wa yaking kaknga apmatanangge tasiwa ngana wamu takngatu enandangga epan nataawa wamu wa gakngatda wamu katau kuut musa kautdu dakaaya yanggau wa, “Gata ma matawim. Aho. Gata wamu wa gikae natdetdetdanekan natake teyo,” ngang yawan natapbum.
REV 10:5 Sike angela tupa nata kawawa yanggabam gwene gatu kepdakane ngang yaike yukut tapata katakngi siyaapa tangenawan kakum.
REV 10:6 Katakngi tangenake ita wamu kekeknga takngatu Anututane umanae yawan kekekakut. Ngan. Anutu tupa sanga kuupbamu ena kakaa kom gatu kep gatu yanggabam gatu sanga enane ba kepdakane ba yanggabam gwene yuaingu kuupbam tasike tekut tapata kayuk asinggan asinggan yuak. Anutu waapatane umanae yake angela waapata anzing yakut, “Wamu Anututa tupa yawan yukutdane buya aatnangge dapaknga gwa singgak.
REV 10:7 Ngan. Masande angela katau kuut musa kautdu tapaaya ngangu pum pakingkut nana masan siknga tapata pumna puyapik. Sike tapduu waomzimunekan wamu tupa Anututa ina natake aminu itane wam yanikapsa aminde yanikapbut takngata buya asaawik,” ngang yawan natapbum.
REV 10:8 Sike nata nataawa wamu tupa enandangga na nanikuu waakngata gatuna anzing nanikut, “Gata kuku pepa wagomu angela yanggabam gwene gatu kepdakane ngang yaike yuak kapata tapan waiwan katakngine tanggak gomu tapso,” ngang nanikut.
REV 10:9 Naniwan natake nata angela waapae kuke anzing inikum, “Gata pepa mateknga wagomzimu nae namuyo,” ngang iniwa ita nae namuke anzing nanikut, “Gata anggomu takenga gata napso. Napi kaaya siknga wait binga siwik. Ngana guyanguwi musipbaatang pukuke amak tasiwan musipbaatang toknga gasiwik,” ngang nanikut.
REV 10:10 Nanike ita pepa wagomzimu nae naman take nata atnakum. Napa kaaya siknga wait binga siwan ngana nata guyanguwa musipmaatang pukuke amak tasiwan musipmaatang toknga nasikut.
REV 10:11 Sike nata nataawa wamu takngatu anzing nanikut, “Gata Anutue wam natake gatuka yanikapso. Ngan. Sangabamu aminu dongu takngatu takngatu kepna kepna nana wamna inata inata yakaing amin gatu wa amindane take aminu kwaapzang ngangge apik kakngae natake yakapso,” ngang naniwan natapbum.
REV 11:1 Sike nata kawawa angela tapatuta katau gusok kapa binga takapuke sanga nata tuwanga papitde nae namukut. Namuke ita anzing nanikut, “Gata enake Anututane yot takwan gwendane tuwanga tapso. Take gata tebo daka sanga Anutue imunangge peaing dakatane tuwanga kuut tapso. Take gata aminbamu you wagwene yuke Anutue inimbakngakaingu kuupbam kendeyo,” ngang nanikut.
REV 11:2 “Ngana gata yot takwande kekeu kepman yuak komu ayapbike tuwanga ma tapim. Dasingge? Kekeu wa komu katum aminde yamunangge Anututa gwa yawan yukut,” ngang nanikut. “Siwan wa aminda Anututane yot bam gapmane koke aminu you wanggapmane yuaingu ayaipapaakusike Anututane kep tapa tasiwa maiwikge tasiwawa kuku yekau 42 dakngawik,” ngang nanikut.
REV 11:3 “Siwan nata aminu nae wam yanikapzanu waapaat kekekayamuke yanipewa kusan. Yanipewa kuke aminu waapaatda bek saau zikaa aminu musia meya nataaing aminda taukge tasikaing binga tasisan. Tasike waapaatda Anututane wamna yanikapmake tasiwawat kuku yekau 42 dakngawik,” ngang naniwan natapbum.
REV 11:4 Siwan aminu waapaau wamu katau oliv ngang yanikaingu dakaaya gatu lamu gweaya ngangu Anutu aminu kepdakane yuainggane Buyambam tapae nomune yuamayakge yakut takngae yapii unin.
REV 11:5 Sike aminu kunduta aminu waapaau apasiwa maisande tasiwanu katau waapaatde genaatangga akoke waapaatdane iwana kuupbam yasiwan kumning. Ngan siakan. Aminda aminu waapaau apasiwa maisande tasikengu waapata unzing akupik.
REV 11:6 Sike aminu waapaau Anututa kekekayaman apme tapduk bamu sopa dua tawikge yandakngake waapaatda Anututane wam yanikapzan. Sike waapaatda apme yangga pasiwat dak daknganing. Gatu aminu kepdakane yuaingge meya inata inata yamunangge natakengu take tasisan. Ngan. Sipdu sipdune wa aminu apasiwat mainingge natakengu waapaatda apme tasisan.
REV 11:7 Sike waapaatda wamu Anututa yamukut taknga yanikapat puyuwana sanga kaapzongu buyambamu gwendu gena toknga gwenu gapma amunandang siknga pukuke pakepu ayukuu wena dakaatangga akoke wagwenda aminu waapaakat amning. Amake waapaau ayapbike zipan kumzan.
REV 11:8 Zipan kupat aminu waapaatdane gupna saau yot bamu gapmandu tupa iwanata aminu waapaatdane Buyambam tapana amin aamdakane tanguking gapmatane kepibam tapane yutzan. Sike ninda you wanggapmae tuwanguke umana takngaaya Sodom binga gatu Isip binga ngang yakamang.
REV 11:9 Sike aminu kwaapzangu kepna kepna nana gupna inata inata wamna inata inata yakaingu dongu inata nana aminda apuke aminu waapaatdane gupna saat katasike notnata dua kwainingge yandakngake yuwawa kuku tapduu gweaat gwenduat gatu kautdukan ngang siwik.
REV 11:10 Siwan aminu kepdakane nana aminbamda waapaatda kumbumayakge apbakngake wakum taike nanam sake nake sanga inane notnae imanggaman tasining. Ngan. Wa aminda natake tupa Anututane wam yanikapsa aminu waapaatda meya takngatu takngatu aminu kepdakane nana aminde yamuke tasiwat buyambam sikutde natake waapaatda kumbumayakge asiknga baknganing.
REV 11:11 Siwan ngana nata mia kawawa tapduu gweaat gwenduat gatu kautdukan ngang yuwat sandewana Anututa pangenawan gatuna gweawat kakum. Kawawa waapaatda asenake dandam tangan yuwat kake aminu kuupbamda kumzang siknga gwauking.
REV 11:12 Siwan waapaatda nataawat wamu takngatu enandangga epuke, “Giu ane akopzon,” ngang apaa yaninggamatakut. Yaninggamatawan waapaatdane iwanata kawawa waapaatda enandang minga musane kopbumayak.
REV 11:13 Siwan tapduu waomzimunekan miyamunu buyambam siknga siwan yotbamu wa gapmatane yot gwegwenu kautdusimban awaike pimake aminu kwaapzang siknga 7,000 ngangu atzipa kumbing. Siwan aminu ayukingu wa kuupbamda kumzang siknga gwauke Anutu enandang yuak kapatane umana yatangenaking.
REV 11:14 Siwan meya buyambamu masan nana aknga unin. Sike ngana meya takngatuat ayuak ngang masana apik. Sike nata meya waakngae natake daniwa natapnong.
REV 11:15 Siwan nata nataawa angela katau kuut musa kautdu tapaaya ngangu pum pakingkat nana masan siknga apata pumna puyapan natapbum. Sike nata nataawa wamu kundu enandangu apaa anzing yanggamataking, “Nindane Buyambam tapanin gatu aminu ita tapan itane aminabam gatayamuke waiakngane sandekut tapaat ngangga aminu kepna kepna nana amin kayuaingu kuupbam pake waapaatda kekekake aminu waakwau asinggan asinggan akayuamayak,” ngang yaking.
REV 11:16 Yawana take aminu 24 sia dakandakane Anutue nomune pukwike yuaingu waakwau Anutue gwetake anzing inimbakngaking,
REV 11:17 “Anutu! Nindane Buyambam tapanin! Ga kekeknga siknga ayuayak. Tupa siknga gata ayukuyak. Ninda ga ganimbakngakamang. Gata gikane kekeknga akngakane tuwanguke aminu kuupbam pake kayuayak.
REV 11:18 Ngan. Katum aminu kepna kepna nana kuupbamda yamandet sike gae semna siknga natanggamuke yuking. Ngana tapduknga gata toknga wa aminde yamiyak gwenda gwa apunggak. Sike apmanu akupsa aminda wamna yawa natake gata wa amindane wamna usanziwiyak. Usanzike gata sanga take siknga gikane aminda gikane puyaka pasinggamuke gikane wamba yanikapbing aminde ayamiyak. Ngan. Aminu gae gwauke gae gepbiatang koyuaingu umana kaya gatu umana wena aminu kuutda gata apmanu sanga take siknga ayamiyak. Siwan tapduknga gata aminu kepdakane yuke aminbam pasiwa maiking aminu kuupbam pasiwi maining gwenda gwa apunggak.”
REV 11:19 Siwan wamu waaknga yawa puyuwana nata kawawa Anututane yot takwanu enandang yuak gwendane gwabok gwau atziwan kakum. Sike pukwiu gwendu wamu Anututa nin gatanimunangge yawan kekekakut takngae pukwit gwenu inane yot takwan siknga gwene anggaman yuwan kakum. Sike nata kawawa yapasiu takngatu takngatu siwan gakngau takngatu takngatu yawawa miyamun siwawan sopa zambumu kwaapzang sikngata pimapa kakum.
REV 12:1 Sike nata mia kake tuwangu buyambamu takngatu enandang aawan kakum. Sike maya tapatuta gunzit gwenu taukge tasikut. Sike yekap gwenu itane kepie gepbiatang yukut. Sike nata itane kupna kawa yekapdaau katau kuut musaat kepianganu gweaya ngang yuwa kakum.
REV 12:2 Sike ita engang musipna kaya. Ge engang tangaiwikge toknga takngatu takngatu natake ita apaya ainggamatawan natapbum.
REV 12:3 Siwan nata kawawa gatu tuwangu takngatuat enandang aawan kakum. Sike nata mia kake kepmaamu gamanaapa kakum. Sike waapa gwapakngi katau kuut musa kautdu gweaya siwan komna katau kuut musaat kakum. Sike ita kupna aminu tupan tapaapata gwapukaing binga itane gwapakngi waakwaune gwapukutna kakum.
REV 12:4 Sike waapatane ngwangita yekapdaau kautdusimban kwaamupamapan kuke kepdakane pimaking. Siwan kepmaamu waapata yuke maya waapata engang tangaiwan engangu kayuu waapa isipa napikge natake maya waapae nomune yukut.
REV 12:5 Yuwawan maya waapata engangu wawiapa tangaikut. Sike engangu waapata masande ita aminu kuupbam kayuke puya toknga siknga ayamik. Siwan engangu waapata aawana Anututa zetgaman kaiwan kuwan song isiwan engangu waapa enandang takopbut. Takoke keu enandangu Anututa kayuak komune takuke Anutue wesim tekut.
REV 12:6 Siwan maya waapa datang keu amina wena kopatang kukut. Sike tupa keu waopatangu Anututa you gwendu maya waapae tandakngatekut. Sike maya waapata you wagwene kusopuwan aminda katak toike tasiwawa kuku yekau 42 dakngawik.
REV 12:7 Siwan nata mia kawawa amau buyambam siknga enandang enawan kakum. Sike angela buyambamu tapatu umana Maikel ngang inikaingu waapaat gatu itane angelanaatda enake kepmaamu waapaat ambing. Amake kepmaamu waapaat gatu itane dongaatda enake amau waakwakge yake zipnangge amaawa kakum.
REV 12:8 Sike nata kawawa kepmaamu waapaat gatu itane dongaat yapbike zipa pimapa Anututa dua kapewan enandang yuking.
REV 12:9 Aho. Anututa kepmaamu waapaat gatu itane donga ngang ayanikwasipewan kuke waakwakga kepdakane pukuking. Sike kepmaamu waapatane yapii gomou tupa siknga yukut tapa unin. Itane umana takngaaya Seten gatu Aminbamde Wam Temapa Yanggak Kapa ngang inikaing. Waapata aminu kepdakane nana kuupbam kem panzikgaunin.
REV 12:10 Siwan nata nataawa wamu takngatuta enandangu apaa yanggamatake anzing yakut, “Nindane Anutuninda ninu waiakngane gwa sandekgak. Ngan. Ita kekeknga aknganane ninu ninduyuak. Iat gatu aminu ita tapan nin gatanimukuu wa umana Krais ngang inikamang kapaat ngangga kekeknga siknga yuke ninu ninduyuamayak. Ninduyuke waapaatda aminu wa wamu nindane notninde asinggan temapa yanggak kapa gwa inikwasitewat kuke enandangu teke kukut. Tupa waapata wa aminde wamu Anututane kaine kwakngaom gatu zikaane ngang asinggan asinggan temapa yakut.
REV 12:11 Siakan. Nindane notninu sipsip mateu wagwendane dak kakngae gepbiatang yuke inane gupde dua gwauking. Aho. Wa aminu akapewa iwanata zipa kumningge dua gwauking. Dua gwauke wa aminu siakan wamu aminbamde yanikapbingu waakwakga Setenu waapa gwa yapbiking.
REV 12:12 Unzingge ginu enandang yuaingu kuupbam! Ginu apbaknganong! Ngana ginu kepdaka gatu yanggabam gwene nana! Ginu gwautnong! Dasingge? Setenda ginde gwa pukunggak. Sike ita atnataak. Itane tapduknga dapaknga gwa singgak. Siwan ita musia toknga siknga nataakge ita meya buyambam siknga ginde damunanggenggak. Butaya siknga,” ngangu wamu waaknga apaa yanggamatawan natapbum.
REV 12:13 Siwan kepmaamu waapa inikwasitewan kepdakane pukukut. Pukuke mayata engangu wawi wa tangaikut tapa isinangge tawakut.
REV 12:14 Isinangge tawamban ngana tinggigitane pia saaya maya waapae ima pake ita apbepmake datakuke keu amina wena komune kukut. Kuke inane yotnane koke yuwawan Anututa i katak siknga toike tasiwawan kuku nakanu gweaat gwenduat gatu kautdu ngang dakngakut.
REV 12:15 Siwan ngana kepmaamu waapata yangga genaatangga ngwatuwawan yangga buyambam tapa binga dakngakut. Dakngake yangga waapata zipmake kuku maya waapa tawake tanguwan kupikge natake ngwatukut.
REV 12:16 Siwan ngana kepdakata maya gatangamuke aminda gena akngake yangga tangokaing binga kepda pukapan yangga kepmaamda genaneta wa ngwatuwan zipbut tapata kepdakaatang pukukut.
REV 12:17 Siwan kepmaamu waapata maya waapae musia toknga siknga natapbut. Natake maya waapa gatu itane engangu kayuk kapa ngang peke maya waapatane dongu kunduat amnangge kukut. Siwan maya waapatane donga aminu Anututane wam tawake Jesue wam yanikapmakaing unin. Siwan kepmaamu waapata kuke yanggabam gwenu kwaim tapane yukut.
REV 13:1 Siwan nata mia kawawa kaapzongu buyambamu gwendu yanggabam gwekatangga akopan kakum. Sike wagwendane komna katau kuut musaat siwan gwapakngi katau kuut musa kautdu gweaya ngang kakum. Sike wagwendane komnane kuupbam inandek inandek kupna aminu tupan tapaapata gwapukaing binga gwapukutna kakum. Sike wagwendane gwapakngane kuupbam inandek inandek umana inata inata matakinga kakum. Sike umana waakwau sapdut wamu Anutue sapdukngamukaing unin.
REV 13:2 Siwan nata kaapzongu wagwen kawa kaapzongu toknga siknga tootooknga kaya gwendu umana lepat ngang inikamang gwen binga kakum. Sike wagwendane kepina kawa kaapzongu kekeknga siknga gwendu umana bea ngang inikamang gwendane binga sikut. Siwan wagwendane gena kawa kaapzongu gena toknga siknga umana laion ngang inikamang gwendane binga sikut. Siwan kepmayamu waapata inane kekeknga aminbam kayutnanga aknga kaapzongu wagwende imukut. Iman take wagwenda umana buyambam siknga take aminbamde kuyana dakngakut.
REV 13:3 Siwan nata gwapaknga gwendu kawa apbinga temake tanguwa kumbut. Ngana watana gwa takakutna kakum. Sike aminu kepdakane nana kuupbamda kaapzongu wagwende nangaakan natake itane gepbiatang koyuking.
REV 13:4 Siwan kepmaamu waapata inane kekeknga akngana kaapzongu wagwende imukutna kake aminu kuupbamda kepmaamu waapae tumuk wam iniking. Inike tumuk wamu kaapzongu wagwenu kuutde inike anzing yaking, “Asikaya aminu tapatuta kekeknga siknga kaapzongu anggwen binga yuak ba dasing? Ba aminu tapatuta enake wagwekat amau atasisan ba dasing? Wena siknga,” ngang yaking.
REV 13:5 Siwan Anututa kaapzongu wagwenu katewan inane umana yatangenake Anutue sapdukngamukut. Sapdukngamuke wagwenda aminu kepdakane nana kuupbam kayuke tasiwawan kuku yekau 42 dakngakut.
REV 13:6 Siwan kaapzongu wagwenda Anutue sapdut wam yake Anututane umana ayaitapaakusikut. Gatu enandangu Anututa yuak kom gatu aminu Anutuat gatake yuaingu kuutde sapduyamukut.
REV 13:7 Siwan Anututa kaapzongu wagwenu katewan wagwenda amau Anututane aminabapat tasike wa amin yapbikut. Yapbike wagwenda tupan tapa dakngake aminu kuupbam kepna kepna nana dongu inata inata gatu wamna inata inata yakaingu gupna inata inata ngang papan aminu kuupbamda itane gepbiatang koyuking.
REV 13:8 Siwan aminu kepdakane yuaingu kuupbamda kaapzongu wagwende tumuk wam iniking. Sike wa amindane umana tupa siknga tapduu Anututa sangabamu dua tasike tekut komune sipsip mateu masande aminda tanguwa kumbuu wagwendane buk gomune Anututa dua matakut. Aho. Buu wagomune aminu kayuu asinggan asinggan yutning amindane umanakan matakut.
REV 13:9 Siwan aminu maakngi kaya kakengu waapata wamu aaknga katak siknga natapsok!
REV 13:10 Anututa aminu tapatutane iwanata waapa tanggaganutningge kapewanu waapa atanggaganutning. Sike iwanata waapa paipda tanguwa kupikge kapewanu atanguwa kupik. Sike sanga waakngata asaawanu Anututane aminabamu kekeknga yuke wa aminu Anutue natapa kekeknga siyok.
REV 13:11 Siwan nata mia kawawa kaapzongu gwendu kep ganang katangga enake akopan kakum. Sike itane komna dakaaya unzing sipsip matekgane binga kakum. Sike itane wamna natake gwautnanga siknga sikut.
REV 13:12 Siwan kaapzongu masanu wa apbut gwende kaapzongu tupan apbut gwenda inane kekeknga akngana imukut. Iman take wagwenda kaapzongu tupan apbut gwendane umana yakapmake aminu kepdakane yuaingu kuupbamda wagwendane gepbiatang koke tumuk wam ininingge tasikut. Siwan kaapzongu tupan apbuu wagwenu tupa aminda tanguwa akumnanga sikut ngana watana gwa takakut.
REV 13:13 Sike kaapzongu masan apbuu wagwenda duya inata inata kundu buyambam siknga pasikut. Pasike aminbamde kaine wagwenda tasiwan katapda enandang teke kepdakane epan kaking.
REV 13:14 Siwan Anututa katewan wagwenda duya inata inata kundu kaapzongu tupan apbut gwende nomune yuke tasikut. Tasike aminu kepdakane nana kuupbam kem panzikut. Kem panzike wagwenda aminbamu kaapzongu tupa aminda tanguwa kumbut ngana akgweake kayuk yuak gwendane weena katap gom pasike tandaitningge yanikut.
REV 13:15 Yaniwan wa aminda weena katap gom pasike tandaike tewana Anututa kaapzongu masan apbuu wagwenu katewan wagwenda wee wagwendane nomna gwak waunga puyapan pukuwan wee wagwenda wamu ayakut. Siwan kaapzongu wagwenu katewan wagwenda enake aminu wee wagwende tumuk wam ininangge apbitawanu wa aminu atzipan kumbing.
REV 13:16 Siwan kaapzongu wagwenda kekekake yawan itane puya aminata enake tuwangu takngatu katakngi siyaapane ba damanane ngang aminu kuupbamde pasiking. Ngan. Aminu moo amikat gatu umana kaya amin gatu aminu sangaapana bamban takwak gatu sangana wena amin gatu aminu inandek inandek inane puya pasiking amin gatu aminu iwan kuke inane puya dua pasiking aminu kuutde tuwang pasiking.
REV 13:17 Pasiwana aminu tuwangu kaapzongu wagwendane umana wena siwanu wa aminda sanga imanggaman tasinanga dua.
REV 13:18 Siwan ninda ie katak siknga natdetnim. Aminu natdetdetna kaya kakengu ita kaapzonggane namba kendeke itane yapiie natagwaanguyok. Sike namba wa daka amindane nambana binga 666 ngang kakum.
REV 14:1 Sike nata kawawa sipsip mateu wagwenu tawanu Saion dakane yuwan kakum. Siwan aminu kwaapzang 144,000 ngangga iat gatake yuwa kakum. Siwan sipsip matekgane umana gatu Anutu itane nanatane umana ngangu Anututa wa aminde damanane matakutna kakum.
REV 14:2 Sike nata nataawa wamu takngatu enandang yawan natapa gakngae yangga buyambam tapata zipmake yanggak binga siwan natapbum. Ngan. Nata wamu waaknga natapa gakngau buyambam yanggak binga siwan natapbum. Sike nata nataawa aminda kau takngatue natake sanga gita binga tanguwa gakngae siwan natapbum.
REV 14:3 Sike wa aminda kau kayuu takngatu Anutu nin ninduyuak kapae nomune gatu sanga kayuk yuaingu wa gweaat gweaatde nomune yuke taiking. Siwan aminu tapatuta kau kayuu waakngae natdetnanga dua. Aho. Aminu kepdakane nana 144,000-nu waakwau Jesuta waiakngane sandekut amindakan kau waakngae natdetdeu paning.
REV 14:4 Sike aminu waakwau sanga yasewa aknga dua tasiking. Aho. Wa aminu maatna ba apnae dua siknga kuking. Sike kepi kuupbam sipsip mateu waapata kunggak kapane aminu waakwau i tawake kukaing. Sike Anututa aminu kuupbam usanzike aminu buyambam peke aminu waakwau inae pake ita wa aminu waiakngane sandekut. Iat gatu sipsip mateu wagwekat aminu waakwau tupan pakumayak.
REV 14:5 Sike wa aminu kem wamu dua yaking. Wena siknga. Wa aminu noman siknga gutongana wena.
REV 14:6 Siwan nata mia kawawa angela tapatuta bepmake ena kakaa banakan komune kuwan kakum. Sike angela waapata wamu takeaknga Anututa yawan asinggan asinggan yuak kaknga take kukut. Sike aminu kepdakane yuaingu kuupbamu wamu waaknga yanikapikge kukut. Ngan. Aminu kepna kepna nana dongu inata inata gatu aminu wamna inata inata yakaingu gupna inata inata yuaingu kuupbamde yanikapikge kukut.
REV 14:7 Ita bepmake kuyuk wamu apaa anzing yanggamatakut, “Ginu kuupbamda Anutue gwautnong! Tapduknga Anututa aminu kuupbamdane wamna usanziwik gwenu gwa singgak. Unzingge ginda Anutu sanga ena kakaa banakan kom gatu kep gatu yanggabam gwen gatu yangga dapun ngang tasikut tapae umana yatangenatnong,” ngang yakut.
REV 14:8 Siwan angela tapatuta angela wa tupan apbut tapa tawatake apan kakum. Sike angela masan apbuu waapata anzing yakut, “Aminu Bebilon yotbam gapmane nana kuupbamda wai gwa sikaing. Tupa aminu waakwakga aminu kepna kepna nana kuupbam yanindatdauwawa wa aminda yasewa kwaapzang you wanggapmane nana aminda tasiking kaknga tawake tasikaing. Unzing maya tapatuta wawi apa inindatdauwan wain yangga aknga tangoke datdaptake musia enawan ita maya waapaat gatake yasewa aknga tasisan binga pasiwan aminu kwaapzangga wai siking.”
REV 14:9 Siwan wamu waaknga yawan puyuwana angela tapatuta apuke angela waapaat yawatakapbut. Sike ita wamu apaa anzing yanggamatakut, “Aminu tapatuta kaapzongu wagwen gatu itane wee gwen ngangge tumuk wam yanike katewan aminda tuwangu wagwendane damanane ba katakngine matawik.
REV 14:10 Aminu waapae Anututa toknga buyambamu asimik. Ngan. Anututa musia toknga siknga aminu wa bingae natayamuke toknga buyambam siknga yaman paning. Pake wa aminda katau asinggan suu aakatapda binga isinggak gwene koyuke Anututane angela gatu sipsip mateu wagwendane kaine toknga buyambam pake yutning.
REV 14:11 Pake yuwawa kupanu katau wagwenda toknga yasiwan akoke asinggan asinggan kopik. Kowawan aminu kaapzong gatu itane weena ngangge tumuk wam yanike tuwangu itane umanae paningu wa aminu kwakngaom gatu zikaane ngang toknga asinggan asinggan pake yuwa takananga dua siwik.” Siwan wamu waaknga angelata yanggamatawan natapbum.
REV 14:12 Siwan wamu wa yanggamatakut taknga buyana aawanu Anututane aminabamu Anututane gen gwaamuke Jesue natapa kekekakut taknga gitna takaing aminda kekeknga yutnong.
REV 14:13 Siwan epuke nataawa wamu takngatu enandangga epuke anzing yawan natapbum, “Gata wamu takngatu anzing matayo, ‘Buyambam tapaninde natapa kekekawan apman ba tapduk bamu masan ngangu akumningu aminu waakwau aminu takekan yuke apbakngananga aminu unin,’ ngang matayo.” Sike Waung Kapata anzing yanggak, “Ngan. Wa aminu Anututane puya kwatan bamu tasikaingu ateke wa aminda apbakngake ayuwa takawik. Dasingge? Wa aminda puya tasikaingu waaknga buyana asaakgak. Sike buya asaakgau waakngata wa amikat gatake keu ayuwa takawik komune kuning,” ngangu wamu waaknga yawan natapbum.
REV 14:14 Sike nata mia kawawa minga kwaknga musatune aminu tapatuta pukwike yuwan kakum. Sike nata nomna kawa aminu tapatu binga sikut. Siwan ita kupna aminu iwana ayapbikutde iman gwapuwik binga gol sake tasiking unin gwapukutna kakum. Sike ita paiu gena toknga siknga dakatu katakngine takutna kakum.
REV 14:15 Sike nata kawawa angela tapatuta Anututane yot takwanu enandang yuak gwekatangga kepman epbut. Kepman epuke ita aminu minga musane yukuu waapae apaa anzing ininggamatakut, “Nanamu kepdakane nana kuupbam gwa yukakaing! Gata nanamu gikane paipbata patziyo! Apmanu tapduknga nanamu unin pananga singgak,” ngang inikut.
REV 14:16 Iniwana aminu minga musane yukuu waapata paipna take nanamu kepdakane nana kuupbam patziwan kakum.
REV 14:17 Sike nata kawawa angela tapatuta yot takwanu wagwekatangga kepman epan kakum. Sike waapaaya kuut paipna toknga siknga takutna kakum.
REV 14:18 Sike nata kawawa angela tapatu katap kayuak kapata tebo sanga Anutue sanga munanga daka teke kukut. Kuke ita angela paipna toknga siknga takut tapae apaa anzing ininggamatakut, “Wain tapunu kepdakane nana kuupbam gwa yukakaing! Gata tapuya gikane paipbata matayo,” ngang inikut.
REV 14:19 Iniwan natake angela waapata paipna take wain tapunu kepdakane nana kuupbam matakut. Matake ita tapuya waakwau pake mupewan sup gapma wain tapun zipmanggamuwawan yanggata pukuningge gapma tasiking dakane pukuking. Siwan sup gapma wain tapun zipmanggamuwawan yanggata pukuningu wa Anututa aminbamde musia toknga siknga natayamunggak kaknga unin.
REV 14:20 Siwan aminda wain tapunu sup gapma yotbam gapma kepman yuak dakane zipmanggamuwawa kakum. Sike gapma wa gwenuneta dau buyambam siknga epuke zipmake kukut. Kuke mamaya siknga 200 mail unzing binga kukut. Kuke zipmake apaptake ikwawa hos gwendane genanekan akopan kakum.
REV 15:1 Sike nata mia kawawa tuwangu buyambamu takngatu enandang aawan kake nata ie nangaakan natapbum. Sike tuwangu nata wa kakumu angela katau kuut musa kautdu tapaaya ngangga yuking. Sike angela waakwau inandek inandek sanga amin pasiwan mainanga katakngine pake yuking. Sike meya wa kuupbam aminbamde yama puyuwana masande meya takngatuta dua apik. Aho. Anututa musia toknga aminde natayamuke ita meya wa kuupbam yaman puyuwana ita gwan ngang natake tewik.
REV 15:2 Siwan nata sanga gwendu yanggabam gwen binga kakum. Sike nata yanggabamu wagwen kawa glas kwaknga siknga gatu gamana katap mumuyang binga unekan peking binga sikut. Siwan aminu kaapzongu wagwenu ayapbike itane weenae tumuk wamu dua inike tuwangu dua taking aminda glas wasanu engatangan yuwa kakum. Siwan Anututa sanga tanguke kap tainanga gita binga tasikingunin wa aminde inandek inandek yaman paking.
REV 15:3 Pake wa aminda kau takngatu tupa siknga Mosesda Anututane puya amina dakngake itane aminabamu iwanae kataune sandekutde taikut binga taiking. Ngan. Kau wa sipsip mateu wagwenda wa aminu iwanae kataune sandekutde natake anzing taiking, “Buyambam tapaninu Anutu! Ga kekeknga sikngaapa! Puya kuupbam gata tasinggau wa take siknga. Ninda gatane puyakae nangaakan nataamang. Ga ninu aminu kuupbamdane tupan tapa. Kepi kuupbamu gata tasinggau wa noman siknga.
REV 15:4 Buyambam tapanin. Ga awiapatakan nomana siknga yuayak. Asikaya aminu tapatuta gae dua gwaumbik? Dua gwauke gatane umanda dua yatangenawik ba dasing? Wena. Aminu kepna kepna nana kuupbamda gae apuke tumuk wam ganining. Ngan. Puya kuupbamu gata nomana siknga pasinggayak kaknga anggamanu aminu kuupbamda gwa kaking.”
REV 15:5 Siwan kau unzing taiwa puyuwana nata kawawa yot takwan siknga enandang yuak gwendane gwabok gwau atziwa kakum. Sike you wagwene Anututa ayuak.
REV 15:6 Siwan nata kawawa angela katau kuut musa kautdu tapaaya ngangu sanga amin pasiwa mainanga katakngine inandek inandek pakingu waakwakga yot takwanu wagwen teke kepman epa kakum. Sike angela waakwau tauknga dudumna siknga wasapna wena kwaknga siknga pasiwa kakum. Sike simbuna gol sake pasiking unin wa binga kakum.
REV 15:7 Sike nata kawawa sanga kayuk yuaingu wa gweaat gweaat ngangu wa yukingkat nana gwenduta gapma katau kuut musa kautdu gweaya ngangu gol sake pasiking unin pake angela waakwakge inandek inandek gapma gwendu gwendu yaman paking. Siwan sanga gapma wagwegwene pamuba dopbingu wa Anutu kayuu asinggan asinggan yuak kapata aminbamde musia toknga natayamunggak kaknganin.
REV 15:8 Sike wagwenda gapma wa yaman papana Anututa inane umana buyambam siknga aknganaat gatu inane kekeknga aknganata ngang tasiwan kupanu yot takwanu wagwene koke ikwasiwan aminu tapatuta kopnanga dua sikut. Siwan dua koke yuwawa kuku tapduknga angela katau kuut musa kautdu tapaaya ngangga puya amin pasiwa mainanga aknga pasiwa puyuwik gwenda apik.
REV 16:1 Siwan nata nataawa wamu takngatu yot takwan siknga gwekatang apaa yawan natapbum. Yake wamu waakngata angela katau kuut musa kautdu tapaaya ngangu waakwakge anzing yaninggamatakut, “Ginu asiknga kuke gapma wa katau kuut musa kautdu gweaya ngangu tukngwaba Anututa musia toknga aminu kepdakane yuaingge natayamunggak kaknga wa aminde kuyok,” ngang yanikut.
REV 16:2 Yawana angela tupan tapata gapma inane gwen take kuke kepdakane tukngwamban pukukut. Siwan wata buyambamu toknga siknga aminu kaapzongu wagwendane tuwang take itane weenae tumuk wam inikinggane gupnane siking.
REV 16:3 Siwana angela masan tapata gapma inane gwen take kuke yanggabam gwene tukngwamban pukukut. Siwan yanggabam gwenu dak dakngakut. Sike nata dau waaknga kawa gwa kupsa amindane dak binga sikut. Siwan kaau yanggabam gwene nana kuupbamda akumbing.
REV 16:4 Siwana angela banakan tapata inane gapma gwen take kuke yangga apaapane gatu yangga dapun gwegwene ngang tukngwamban pukuwan yangga wa kuupbam dak dakngaking.
REV 16:5 Siwan nata nataawa angela wa yangga kuupbam pasiwan dak dakngaking kapata Anutue anzing inikut, “Nomana siknga yuayak kapa! Ga apmanu ayuayak. Sike tupa siknga ga ayukuyak. Sike gata aminbamdane wamna katak siknga usanzike meya wa gata wa aminde yami kawa noman siknga singgak,” ngang inikut.
REV 16:6 “Ngan. Wa aminda enake gatane amindabam gatu aminu gatane wamu ayanikapbing amin ngang zipa kungwake daknga tukngwaking. Unzingge gata wa amindane wamna katak siknga usanzike dau yami tangokaing. Wa aminde meya waaknga yami pakaingu wa nomana siknga tasinggayak,” ngang inikut.
REV 16:7 Iniwana nata nataawa tebo daka sanga Anutue sakaing uneta wamu takngatu anzing yakut, “Siakan. Anutu Buyambam tapanin! Ga kekeknga siknga yuayak. Sike gata amindane wamna usanzike nomana siknga tasinggayak,” ngang yakut.
REV 16:8 Siwan angela gapma gwegwen pakingkat nana tapatuta inane gapma gwen take kuke gunzit gwene tukngwamban pukuwan angela tapaat tapaat sikut. Siwan Anututa gunzit gwen katewan ita aminbamu katapda binga toknga siknga yasikut.
REV 16:9 Aminbamdane gupna toknga siknga yasiwawan wa aminda Anutu meya wa kuupbam kapewan apbing kapatane umanae sapdut wam yaking. Sapdut wam yake wa aminda musia dua tapa tekwamban Anututane umana dua yatangenaking.
REV 16:10 Siwan angela tapatuta inane gapma gwen take kuke sia buyambam daka kaapzongu wagwenda pukwike aminbam kayukut dakane tukngwamban pukuwan angela katau kuut musa sikut. Siwan keu kaapzongu wagwenda take kayukut komu kuupbam zikaa siwan aminu keu wakomune nana kaapzongge gepbiatang koyukingu kuupbamda gupnane toknga siknga natapbing. Natake wa aminda upeeke inane yembina yasiking.
REV 16:11 Yasinggamuke wa aminda toknga paking kakngaat gatu watana kekekngaatde natake Anutu enandang yuak kapae sapdukngamuking. Sike wa aminu musia dua tapa tekwamban sanga wai tasiking kakngae masa dua imuking.
REV 16:12 Siwan angela tapatuta inane gapma gwen take kuke yangga buyambam tapa umana Yufretis ngang inikamang kapane tukngwamban pukuwan angela katau kuut musa kautdu tapatu ngang sikut. Siwan yangga waapata gatukande siknga zakngakut. Zakngawan kepi aminu buyambam tapaapata keu gunzitda akonggak katangga apningge kepina dakngawan kakum.
REV 16:13 Sike nata kawawa waungu wai tapaat tapatuat ngangu gwapbam binga kakum. Sike tapatuta kepmaamu waapatane genaatangga akopbut. Siwan waungu tapatuta kaapzongu wagwendane genaatangga akopbut. Siwan gwenduta aminu kem panzike na Anutue wam danikapa natapnong ngang yanggak kapatane genaatangga akopan kakum.
REV 16:14 Sike waungu waakwau kawa Setendane puya amina sikut. Siwan waakwakga duya inata inata kundu pasike kepna kepna kuwa sandekut. Kepna kepna kuke aminu kepdakane nana kuupbamdane tupan tapaapa yanipakapa unekan apuke amau buyambam siknga tasiningge yaniking. Sike tapduu Anutu kekeknga siknga yuak kapata aminbam usizitnangge yawan yukut komune wa aminu kuupbamda amau atasining.
REV 16:15 Siwan nata nataawa wamu takngatuta anzing yakut, “Ginu natapnong! Nata ginde apiu nata wepda kusopuknga kuka aminda apunggak binga apit. Sike tapduu waomune aminu dapuna dua peke tauknga katak tasike ita kwanggaapa dua sukuke aminde kaine dua maakawiu waapata apbakngayok,” ngang yawan natapbum.
REV 16:16 Siwan waungu waakwakga aminu tupan tapaapaat gatu wa amindane amak aminaat ngang yanipakapa keu komdu umana Hibru wam tanganu Amagedon ngang inikaing komune unekan apbing.
REV 16:17 Siwan angela gapma gwegwen pakikat nana masan siknga apata inane gapma gwen take kuke ena kakaa banakan komune tukngwamban pukukut. Siwan nata nataawa wamu takngatu yot takwan siknga gwenu Anututa sia buyambam dakane pukwike kayuak komuneta wamu apaa anzing yanggamatakut, “Tapduknga gwa singgak,” ngang yawan natapbum.
REV 16:18 Sike nata kawawa yapasiu takngatu takngatuta siwawa gakngau takngatu takngatu yawawa miyamunu buyambam siknga sikut. Sike miyamunu wa sikuu tapduk bamu asinggan aminu kepdakane yuaingu tupa miyamunu buyambamu wa sikut binga gwendu dua siwan kaking.
REV 16:19 Sike yotbamu buyambamu wanggapmae banakan keu takngaaya pukapan you gapmaat gapmanduat binga dakngakut. Siwan yotbam gapma gapma kepna kepna yukingu kuupbam apasiwan maiking. Siwan Anututa yotbamu umana tuwanguke Bebilon ngang inikamang gapmae natapbut. Natake ita aminu you wanggapmane yukingge kau wain yanggana kaya gom yaman tangopbing. Sike wain yangga waaknga Anututa wa aminde musia toknga siknga natayamukut taknganin.
REV 16:20 Siwan keu yanggabam gwenu banakan yukingu kuupbamda isakuke yangga amaakatang pukusopuwawa kakum. Kawawa tawanu kuupbam ina unzakan isakuke depimake wena siking.
REV 16:21 Siwan sopa zambumu buyambam siknga gwegwenda pimake aminbam zipbing. Sike zambumu wagwegwen kawa gwendutane meyana buyambam siknga sanga mitapsa dakatane namba 100 binga sikut. Siwan meya buyambam siknga waakngata apan take aminda Anutue sapdukngamuking.
REV 17:1 Siwan nata mia kawawa angela tapatu gapma gwegwen pakingkat nana tapatuta apuke na anzing nanikut. Ga apso! Maya tapatu yasewa aknga kamunda binga tasinggak kapata meya buyambam siknga pake yuwawan nata yeikgama kayo. Sike maya nata yanggau wa yotbamu gapmandu yangga buyambam tapa apatane kwaim tapane yuaunin.
REV 17:2 Siwan aminu tupan tapaapa kepna kepna nana aminda yasewa aknga maya waapaat tasiking. Ngan. Kepdakane nana aminde maya waapata wain yangga aknga ayaman tangoke dataptaking. Sike wain yangga wa sanga yasewa aknga maya waapata tasikut taknganin.
REV 17:3 Siwan nata mia kawawa Waung Kapata na kekeknga siknga take keu amina wena komune nanitakukut. Nanitakuwan ngana ugwak saau kawawa maya tapatuta kaapzongu danggami gamana siknga gwendane masene pukwiwan kakum. Sike kaapzongu wagwenu umana kwaapzang sikngata gupnane tapa sopukutna kakum. Sike umana wa kuupbamu Anutue sapdut wam ininggaunin. Siwan kaapzongu wagwenu gwapakngi katau kuut musa kautdu gweaya siwan komna katau kuut musaat kakum.
REV 17:4 Sike maya waapa tauknga gamana siknga gatu kundui gang binga ngang pasikut. Sike maya waapata inane gupna tasigwaanguke sanga gol sake tasikingunin tasike gatu kamakumu inata kundu gatu mani buyambam sikngata usinanga gwegwen ngang bungatakut. Sike katakngine kau gomdu gol sake tasikingu gomdu takut. Sike kau wagomune sanga wai maakngana kaya akwak pamuban dopbing. Sike sanga wa yasewa tasikut taknganin.
REV 17:5 Sike itane damanane umana yapii kusopuknga aknga anzing mataking, “Bebilonu yotbam gapma. Yasewa akngae yapii. Sanga wai kuupbamu aminu kepdakane yuaingga tasikaing kakngae yapii,” ngang matakinga kakum.
REV 17:6 Sike nata kawawa maya waapata Anututane aminabam gatu aminu Jesue kekeknga yuking aminu kuut atzipan kumbinga kakum. Unzingge nata maya waapa kawa wa amindane daknga tangopbutde ita datdaptawan kakum. Kake nata kumzang satnake nangaakan natapbum.
REV 17:7 Siwan angela waapata anzing nanikwaikut, “Dasingge ga maya waapae nangaakan nataayak? Maya waapatane yapiina gatu kaapzongu ita engatangan yuau gwapakngi katau kuut musa kautdu gweaya siwan komna katau kuut musaat ngangu wa gwendane yapiina ngangge nata ganiwa natapso.
REV 17:8 Kaapzongu gata kaayau wagwenda tupa kayuk yuke ngana wena sikut. Sike apmanu wagwenda dua yuak. Ngana masande wagwenda gapma amunandang siknga pakepu ayukuu wena dakaneta akoke keu komdu Anututa tasiwan maiwik komune kuwik. Siwan aminu kundu kayuu asinggan asinggan yutninggane umana Anututa buu gomdune tapduknga sangabamu dua tasike tekut komune matakut. Ngana aminu umana buu wagomune dua matakut aminu kepdakane yuaingga kawawa kaapzongu wagwenda gapmaatangga akopan kake wa aminda nangaakan natapning. Dasingge? Tupa wagwenda kayuk yukut. Ngana akungwake apmanu wagwenu dua yuak. Siwan ngana masana wagwenu gatuna akopik,” ngangu angelata unzing nanikut.
REV 17:9 “Sike aminu natdetdetna kaya siwanu ita wamu waakngae katak siknga natdeyok. Sike gwapakngi katau kuut musa kautdu gweaya nganggane yapiina kautdu baku dakandaka katau kuut musa kautdu dakaaya maya waapata yuak dakandakanin.
REV 17:10 Siwan yapiina kautdu tupan aminu katau kuut musa kautdu tapaaya ngangu unin. Sike tupan aminu waakwakat nana katau kuut musakanu gwa pimaking. Sike tapatuta apmanu ayuak. Sike tapatuta tupan tapa dua dakngak. Masande ita dakngakenga ita tapduu dapaknga siknga yuwik.
REV 17:11 Siwan kaapzongu tupa ayukut ngana apmanu dua yuau wagwendane yapii aminu tupan aminu tapatu. Ita tupan tapa katau kuut musa kautdu tapaat gatake namba 8 dakngawik. Sike ita keu Anututa atasiwan maiwik komune akuwik,” ngang angelata unzing nanikut.
REV 17:12 “Sike kaapzongu wagwendane komna katau kuut musaau gata gwa kayau wandakandakatane yapii aminu tupan tapaapa katau kuut musaat ngangu unin. Sike waakwau tupan tapaapa dua dakngaing. Ngana masana aminu waakwau kekeknga pake kaapzongu wagwekat gatake yuke aminbam kayutning. Kayuke tasiwawa tapduu mateknga kundusim siwan atening.
REV 17:13 Sike tupan aminu waakwau natdetdetna buya takngatukan natapning. Natake waakwau kaapzongu wagwende gepbiatang koyuke itane gen gwaamuke aminbam kayutning.
REV 17:14 Siwan waakwau sipsip mateu wagwekat amning. Amawawa ngana sipsip mateu wagwenda aminu waakwau asiknga yapbimbik. Ngan. Wagwekat gatu aminu inae panangge yayawamban ie kuke iat gatake kekeknga siknga yuaing amikat ngangga aminu waakwau ayapbitning. Dasingge? Sipsip mateu wagwendane yapii wa aminu tupan siknga apanin. Ita aminu tupan tapaapa kuupbam kayuak. Ngan. Aminu tupan tapaapa kuupbamdane tupan siknga awia apatakan ayuak,” ngangu angelata unzing naniwan natapbum.
REV 17:15 Sike nata mia kawawa angela waapata anzing nanikut “Maya waapata yangga buyambam tapaapane yuwan kayak. Sike yangga wa kayakgane yapii wa aminu kuupbam. Ngan. Aminu kepna kepna nana kuupbam donga inata inata nana gatu wamna inata inata yakaing gatu gupna inata inata ngangu aminu kepdakane nana kuupbamu unin.
REV 17:16 Sike kaapzonggane komna katau kuut musaau gata gwa kayak. Komu wa kuupbam gatu kaapzongu wagwen ngangga maya yasewa tasikuu waapae semna siknga natangamuning. Semna siknga natangamuke waakwau maya waapa tandambanuke tauknga kuupbam waipamaba kuwa kwangga yuwik. Yuwawan waakwau itane sapbina atnake gupnasanu katapatang gatukande saning.
REV 17:17 Ngan. Anututa waakwakgane musia pangenawan waakwakga natdetdeu buya takngatukan natake Anutue banip tawake tasining. Tasike waakwau kaapzongu wagwende gepbiatang koyuke maya waapa tasiwa maiwikge tasiwawa kuku tapduu Anututa yawan yukut gwenda apik.
REV 17:18 Siwan maya gata kayau wa yotbamu buyambam gapma kepdakane nana kuupbamde tupan gapma yuaingunin,” ngang angela waapata unzing naniwan natapbum.
REV 18:1 Sike sanga wa kawa puyuwana nata mia kawawa angela tapatuta enandang teke epan kakum. Sike waapata kekeknga siknga kayuwawan itane kakaa buyambam takngata keu kuupbam kakaawan kakum.
REV 18:2 Sike nata nataawa ita apaa anzing yanggamatakut, “Bebilon yot gapma bumi gwa sinanggenggak. You buyambam gapma ngana pupuknga gwa sinanggenggak. Siwan waungu wai Setendane dongu buyambamda you wanggapmane yutnangge tasikaing. Siwan kwaiu wai siknga inata inata gwegwenda you wanggapmane yutnangge tasikaing.
REV 18:3 Dasingge? Aminu you wanggapmane nana aminda wain yangga aknga aminu kuupbamde ayama tangopbing. Sike wain yangga atangopbingu wa sanga yasewa aknga wa amikat tasiking unin. Ngan. Aminu tupan tapaapa kuupbamda aminu you wanggapmane nana amikat yasewa aknga atasiking. Sike wa aminda you wanggapmane koke imanggaman tasike sangaapana kwaapzang paking.” Ngang angelata wamu waaknga yanggamatawan natapbum.
REV 18:4 Siwan nata nataawa wamu takngatu enandangga epuke anzing yakut, “Ginu natane aminabam! Ginda you wanggapma teke epukunong! Ginda aminu you wanggapmane yuaikat gatake yuwanu sanga wai takngatu takngatu aminu waakwakga tasikaing kakngata gin papsak. Sike meya wa aminda paning kakngata ginde apsak.
REV 18:5 Wa aminda waiakngana buyambam siknga tasinggawa Anutue kaine sangabamu unekan pewa enandang siknga konggak binga singgak. Siwan Anututa you wanggapmane nana amindane waiaknganae atnataak.
REV 18:6 Sike wa aminda gin pasiwa maiking binga ina unzakan ginda yake wa amin pasiwa mainong. Ngan. Wa aminda ginu mateknga dasipbing ngana ginda yake iwanza kwaapzang siknga zipnong. Sike wa aminda wain yangga toknga aknga kap gomune tukngwaba pukuke dopan ginde dama tangoke wai siking. Ngana ginda yake kau wagomunekan yangga toknga siknga tukngwayama wa aminda tangoke wai siknga sinong.
REV 18:7 Wa aminda inane umana yapangenake inane gupna kumzang pasigwaanguking. Sike ginda wa amindane umana yaipapaakusike wa aminde meya kwaapzang yamunong. Dasingge? Maya waapata inane musiaatang anzing nataak: ‘Nata tupan sikngaapa yuat. Na kombakobat tapa dua yuat. Sike meya takngatuta nae dua apik,’ ngang nataak.
REV 18:8 Maya waapata wamu waaknga yanggakge meya takngatu takngatu ie tapduu gwendunekan asapik. Ngan. You wanggapmane nana aminda maiu takngatu takngatu sining. Sike wa aminda kwanamu kumzang sitning. Siwan tomu buyambam sikngata wa aminde asapik. Sike you wanggapma katapda gatukande isiwik. Asikaya Buyambam tapa Anutu wa amindane wamna usanzikgak kapata kekeknga dua yuak ba dasing?” Ngangu wamu takngatuta yawan natapbum.
REV 18:9 “Siwan katapda you wanggapma isiwawan kupanda tuyuknga dua akopik. Akonggawan kake aminu buyambam tapaapata tupa iat yasewa tasike gatu imanggaman tasike sangaapana buyambam paking aminda kwanamu kumzang siknga sitning.
REV 18:10 Ngan. Wa aminda maa siknga yuke meya you wanggapmae apunggak kakngata ninde apsak ngang natake akgwautning. Akgwauke wa aminda anzing yaning, ‘Bebilon! Butaya. Butaya siknga. Yotbamu buyambam gapma ngana tapduu mateknga siknga komzimunekan Anututa gindane wamza usanzike gin pasiwan maikaing,’ ngang yaning.
REV 18:11 “Sike aminu kepdakane nana mani puyae pasikaingu kuupbamda you wanggapmae natake kwanamna sike musia meyata yutning. Dasingge? Aminu wa amindane sangaapana gatu usinanga dua. Wena siknga.
REV 18:12 Sike wa amindane sangaapa wa gol gatu silwa gatu suu inata kundu dumbaknga siknga gatu sanga kamakum binga yanggabam gwene nana gatu tauu take siknga sasan gatu tauu gang binga gatu tauu saweknga umana silika ngang yakaing. Siawan taau gamana siknga gatu katau kapanga take siknga gatu sanga inata kundu kaau gwendu umana elefan ngang inikamanggane genata pasiking. Gatu sanga bamu katau buyana buyambamda usikaingga pasiking. Gatu sanga kapa gamanggamanata pasiking. Gatu sanga ain gatu suu kekeknga siknga tuwanga kunzi kunzina kayata pasiking.
REV 18:13 Gatu katau kundu umana sinamon ngang yanikainggane gupna nanapat sake napa kaa siknga singgak. Siwan gatu sanga inata inata kapanga take siknga gatu gris inata inata wata pasiwa takananga gatu sanda kapanga take siknga gatu wain yangga aknga gatu wel yangga gatu plaua gatu poyak tapun gatu ikwawa gaman gatu sipsip gatu ikwawa gamanu hos ngang yanikamang. Gatu karis hosda kaipakukaing. Gatu aminu manita usike puya moo siknga buyana wena yama pasikaing amin. Sike wa aminu kaautde binga yuaing. Siakan. Sanga wa kuupbam imanggaman tasinangge ngana aminda dua usining.
REV 18:14 “Siwan aminu waakwau mani puya pasiya aminda you wanggapmae natake anzing yaning, ‘Sanga take siknga ginda usinangge natapbingu kuupbam kaiwa kundamukut. Ngan. Ginda sangaapasa kwaapzang pake take siknga yuking ngana apmanu aminda sanga wa binga ginde yuwan kaning,’ ngang yaning.
REV 18:15 Siakan. Aminu sanga wa imanggaman tasike mani buyambamu you wanggapmane nana aminde pakingu kuupbamda kake meya you wanggapmane nana aminda pakaing kakngata ninde apsak ngang yaning. Yake ie akgwauke maa siknga yuke ie kwanam sike musia meya buyak yutning.
REV 18:16 Sike wa aminda anzing yaning, ‘Butaya! Butaya siknga yotbamu buyambamu wanggapman! Tupa you wanggapmane nana aminda tauknga take siknga kundu gang binga gatu kundu gamana siknga ngang pasiking. Siwan gupna tasigwaanguke sanga gol sake pasiking gatu suu inata kundu dubaknga gwegwen gatu kamakumu inata kundu yanggabam gwene nana ngang bungatapbing.’
REV 18:17 ‘Siwan ngana tapduu mateknga siknga komzimunekan sangaapa buyambam siknga wa pasiwan maikaing,’ ngang yaning. “Siwan nata mia kawawa aminu sip gwegwene puya pasiking amindane tupan tapaapa gatu wa amindane puya amina gatu aminu imanggaman tasike sangaapana sip gwegwene pamuke pewa kukaing amin ngangu kuupbamda maa yuking.
REV 18:18 Maa yuke wa aminda kawawa katapda you wanggapma isinggawan kupanda akowawan kake anzing yanggamataking, ‘You anza binga gapmandui wena ngang yawa kakum.’
REV 18:19 Siwan wa aminda musia meya siknga natake kwanamna sike kepdakatane muyupmuyup pake enandang muba koke epu gupnaatang pimaawa anzing yanggamataning, ‘Butaya! Butaya siknga yotbamu buyambamu wa gapman! Sip gwegwendane toikngata you wanggapmae mani pake manina kaya dakngaking. Ngana tapduu mateknga komzimunekan you wanggapma gatukande tasiwan mainggak,’ ngang yawa kakum.
REV 18:20 ‘Siwan ginu enandang nana gatu aminu Anututa papan itane kwiiknga dakngake yuaing gatu yakapsa amin dakngakingu kuupbamda natake you wanggapma wai gwa singgakge apbaknganong. Ngan. Tupa you wanggapmane nana aminda toknga takngatu takngatu ginde damuking ngana apmanu Anututa ginde natake ita toknga yake yamunggak,’ ngang yakut.”
REV 18:21 Siwan nata mia kawawa angela kekeknga siknga tapatuta suu buyambam siknga gwendu aminda take poyak zipmanggamukaing binga gwen tangenake yanggabam gwene mutewan pukukut. Mutewan pukuwan ita anzing yakut, “Nata suu anggwenu kumzang siknga mutewa pukunggak binga Anututa kwata pake yotbamu Bebilonu wanggapma atasiwan maiwan you wanggamata wena siknga siwik.
REV 18:22 Siwan aminu kap tainangge gita ba musik tanguke ba pum puyakaing amikat nana tapatuta you wanggapmane dua yuwik. Sike aminu sanga bamu inata inata pasikaing amikat nana tapatuta you wanggapmane dua yuwan kaning. Siwan maya tapatuta supda poyak zipmanggamunggakgane gakngae takngatu you wanggapmane dua siwan natapning.
REV 18:23 Sike aminu tapatuta lamu gwendu you wanggapmane dua gatapan isikopan kaning. Siwan aminu you wanggapmane maatna apna paningge wamu takngatu dua yawan natapning. Dasingge? Tupa you wanggapmane nana imanggaman tasiking aminda umana buyambam paking. Pake aminu kepna kepna nana kuupbamde iak pasike kem panziking.
REV 18:24 Siwan you wanggapmane nana aminda aminu Anutue wam yanikapbing amin gatu Anututane aminabamu kuupbam atzipa kumbing. Ngan iwanata enake kepna kepna nana aminu atzipa kungwake daknga you wanggapmanekan tukngwaking.” Ngangu angelata wamu waaknga unzing yawan natapbum.
REV 19:1 Siwan sanga wa kawa puyuwana nata nataawa aminu kwaapzangu enandang yuaingga wamu apaa siknga anzing yanggamataking, “Ninda Anututane umana asiknga yatangenatnim! Nindane Anutuninu awia tapatutakan ninu waiakngane sandekut. Sike itane umana awia akngakan buyambam siknga singgak. Sike ita kekeknga siknga yuak.
REV 19:2 Sike ita amindane wamna usanzike yawan siakan siknga siwik. Siwan maya wa yasewa aknga kwaapzang tasikut tapata aminu kepna kepna nana buyambam pasiwan maiking. Unzingge Anututa maya waapatane wamna usanzike toknga asimukut. Ngan. Maya waapata Anututane puya amina zipan kumbingge Anututa toknga waaknga yake imukut,” ngang yaking.
REV 19:3 Unzing yake wa aminda gatu anzing yanggamataking, “Ninda Anututane umana asiknga yatangenatnim! Katapda yotbamu wanggapma isike isike yuwawan kawatna kupanu asinggan enandang konggak,” ngang yaking.
REV 19:4 Siwan take aminu 24 ngangu wa yuking gatu sanga kayuk yuaingu gweaat gweaat ngangga gwetake Anutu sia buyambam dakane pukwike kayuak kapae inimbakngake anzing yaking, “Siakan. Ninda Anututane umana asiknga yatangenatnim,” ngang yaking.
REV 19:5 Siwan wamu takngatu sia buyambamu Anututa pukwike kayuak gakaneta apuke anzing yanggamatakut, “Ginu Anututane puya amina! Ginu moo amin gatu ginu umanza kaya ginu kuupbamda Anututnindane umana asiknga yatangenatnong,” ngang yakut.
REV 19:6 Siwan nata wamu takngatu nataawa aminu kwaapzang sikngata wamu kumzang yawa gakngatda binga yakut. Sike gatu yangga buyambam tapaapata zipmake gakngae yakaing binga sike gatu gakngau takngatu takngatuta yakaing binga sikut. Siwan nata nataawa wamu waakngata anzing yanggamatakut, “Ninda Anututane umana asiknga yatangenatnim! Anutu wa nindane Buyambam tapaninda kekeknga siknga yuke sangabam kayuak!
REV 19:7 Apmanu ninu kumzang bakngake itane umana asiknga yatangenatnim! Dasingge? Tapduknga sipsip mateu wagwenda maatna tapik gwenu gwa singgak! Siwan maatnata atandakngake yuak.
REV 19:8 Siwan Anututa maya waapa katewan tauknga take siknga dudumna siknga kwaknga siknga ngang tasikut,” ngang unzing yawan natapbum. Siwan tauu kwaknga wa unzing. Anututane aminabamda kepi noman tawake tasikaing kaknganin.
REV 19:9 Siwan nata mia kawawa angela waapata na anzing nanikut, “Gata wamu aaknga matayo, ‘Aminu Anututa yayawamban sipsip mateu wagwenda maatna tapikge nanamde apning aminde ninda apbaknganim,’ ngang matayo,” ngang nanikut. Siwan ita gatu na anzing nanikut, “Wamu nata wa yanggau wa Anututane siakan wam yanggat,” ngang nanikut.
REV 19:10 Ita unzing naniwan natake nata angela waapa tumuk wam ininangge natake nata itane nomune gwetawa ngana ita na anzing nanikut, “Gata unzingu ma tasiwim! Aho. Na Anutu dua. Na gatane puya amin notda tapatu. Sike na gatane notda bamu Jesutane umana yakapmakaing amindane puya amin notna tapatu. Gata Anutu awiapaekan tumuk wam iniyo,” ngang nanikut. Siwan wamu ninda Jesue natake yanikapmakamangu Anututane wam yanikapsa aminu kuupbamda wamu waakngakan yanikapmakaing.
REV 19:11 Siwan nata mia kawawa ena kakaa banakan komda matawan kuwan kakaa siwan ikwawa gamanu hos ngang yanikamangu kwaknga gwenduta yuwan kakum. Sike aminu hos wagwendane masene pukwikut tapatane umana takngaaya anzing. Aminu puyana katak siknga kayuak kapa gatu Aminu siakan wamban yanggak kapa ngang iniking. Sike ita amindane wamu katak siknga usanzike yawan siakan siwik. Siwan ita wai aminkat amau atasinggak.
REV 19:12 Sike ita kainata nandunggamatawan natane musipmaatang katapda binga nasikut. Sike ita kupna kwaapzang tupan tapaapata gwapukaing binga gwapakngane gwapukutna kakum. Sike itane gupnane umana matakinga kakum. Sike inatakan awiaapata umana waakngae atnataak.
REV 19:13 Sike tauknga mamaya gomu ita tasikuu dakgan sikutna kakum. Sike itane umana takngatu Anututane wamna ngang iniking.
REV 19:14 Siwan amak aminu enandang nana kwaapzangga ikwawa gamanu hos ngang yanikamangu kwaknga gwegwendane masene pukwike aminu waapa tawatakuking. Sike wa aminda tauknga gwaam siknga wasapna wena dudumna siknga pasiking.
REV 19:15 Sike paiu toknga siknga dakatu aminu waapatane genaatang isinggangganuke yuwan kakum. Sike ita paiu wandaka takutda aminu kepna kepna nana kuupbam atzipan kumning. Ngan. Ita aminu kuupbam kayuke puya toknga siknga ayamik. Siakan. Anutu kekeknga siknga yuak kapata aminu wai aminde musia toknga siknga natayamunggak kakngae natake ita aminu waakwakge toknga buyambam siknga ayamik.
REV 19:16 Sike itane umana matakingu wa itane taukngane gatu itane kepine ngang yuwan kakum. Sike itane umana anzing: Aminu Tupan Sikngaapa Aminu Tupan Tapaapa Kuupbam Kayuak.
REV 19:17 Siwan nata mia kawawa angela tapatuta gunzit gwende banakan yuwan kakum. Sike nata nataawa angela waapata wamu apaa kwait bamu ena kakaa banakan komune bepmakaingge anzing yaninggamatakut, “Ginu apnong! Anututa nanamu kwaapzang ginde pedamunggakge apu nanong,” ngang yanikut.
REV 19:18 “Ginu apuke aminu buyambam tapaapatane gupnatane sapbi nanong. Ngan. Amak amindane tupan tapaapa gatu aminu kekeknga siknga yuaing gatu ikwawa gamanu hos gatu aminu hos gwegwenu engatangan pukwike kukaing nganggane sapbi apu nanong. Siakan. Ginda apuke aminu inandek inandek inane puya pasikaing gatu aminu iwan kuke inane puya dua pasikaing nganggane sapbi apu nanong. Sike moo amikat gatu aminu umana kaya amikat gatu aminu kuupbamdane sapbi apu nanong,” ngang yanikut.
REV 19:19 Siwan nata kawawa kaapzongu wagwekat gatu aminu kepna kepna nana kuupbamdane tupan tapaapa gatu wa amindane amak aminu kwaapzang ngangga unekan apuke amau aminu ikwawa gamanu hos gwendane masene pukwikuu waapaat gatu itane amak amin takwakat amningge natapbing.
REV 19:20 Siwan amak gwekatang kaapzongu wagwekat gatu aminu kem panzike nata Anututane wam daniwa natapnong ngang kem yakut tapaat panggaganuking. Sike aminu waapata tupa duya inata kundu kwaapzang kaapzongge nomune tasikut. Tasike ita aminbamu kem panziwan aminu kaapzonggane tuwanga gupnane matawa itane weenae tumuk wam inikingu waakwakga kake ngana siakan ngang natapbing. Sike kaapzongu wagwekat gatu aminu wa kem panzikut tapaatda kayuk yuwawat waapaau mupewa gapma buyambamu dakatu katau toknga siknga suu aakatapda binga isikonggak dakaatang pukukumayak.
REV 19:21 Siwan aminu ikwawa gamanu hos gwendane masene pukwikut tapata amak aminu wa apbingu kuupbam paiu itane genaatang isinggangganuke yukut dakata atzipan kumbing. Atzipan kupa kwaiu kuupbamda apuke aminu waakwakgane sapbina napa musia asiknga gitnawa kakum.
REV 20:1 Siwan nata mia kawawa angela tapatuta enandang teke epan kakum. Sike ita katakngane ki dakatu gapma amunandang siknga pukuke pake ayukuu wena dakatane takutna kakum. Sike ki wandakaat gatu senu buyambam taknga ngang pakut.
REV 20:2 Sike ita kepmaamu waapa tanggaganuke senda gitna siknga wamake gapma amunandang siknga pukukuu wandakaatang mutewan pukukut. Mutewan pukuwana angela waapata gapma wandaka zangutna gitna siknga zanguuke ita Anututane tuwanga zangutna wasane matakut. Matake nakanu 1,000 ngang yuwikge tasikut. Sike kepmaamu waapa gomou tupa siknga yukuunin. Sike tuwang wamu waakngatane yapii aminu aminbamde wamu atemapa yanggak kapa umana Seten ngang inikamang. Sike waapata gapma wandakane yuke aminu kepdakane yuaing aminu gatu kemu panzitnanga dua. Ita unzing yuwawan nakanu 1,000-nu apuyuwik. Siwana masande Anututa sandetewan ita gatu akoke tapduu dapaknga sikngakan kepdakane sukuwik.
REV 20:4 Siwan nata kawawa sia buyambam dakandakane aminu tupan tapaapata pukwike kayuwa kakum. Sike Anututa puya wa aminde aminu kuupbamdane wamna usanzitningge yamukutna kakum. Sike nata kawawa aminu kwaapzangu tupa Anututane wamu gitna take Jesue umana yakapmake kaapzongu wagwen gatu itane weena ngangge tumuk wamu dua yanike yuwawa aminda itane tuwangu wa amindane damanane ba katakngane dua mataking. Sike wa amindane iwanata enake guyakngi matapamaba kuking. Siwan wa amindane uyungata yuwa kakum. Sike wa aminu gatu gweake kayuk yuwa kakum. Sike wa aminda Kraiskat gatake aminbam kayuke tasiwawa kuku nakanu 1,000-da apik.
REV 20:5 Sike wa dangem siknga aminu akumbing katangga enatning. Siwan ngana akupsa aminu kundu tapduu waomune dua gweatning. Aho. Wa aminu nakanu 1,000-nu wa yuwa sandewana akumbing katangga enake kayuk yutning.
REV 20:6 Siwan ninda aminu dangem siknga enatningu wa aminde apbakngake wa aminde natapna aminu nomana siknga siwik. Siwan masanu wa aminda gatuna dua kumning. Aho. Wa aminda Anutuat gatu Kraiskatdane nomune yuke waapaatde puya pasiyamuning. Pasiyamuke wa amikat Kraiskatda aminu kuupbam kayuke tasiwawa kuku nakanu 1,000-da apik.
REV 20:7 Sike masande nakanu 1,000-nu wa yuwan sandewana Anututa Setenu sandetewan ita kaautde yuak kaknga atewik.
REV 20:8 Teke kepman epuke ita aminu kepna kepna nana kuupbam kem panziwik. Kem panzike ita wa amin yanipakapan amak tangenatnangge unekan apning. Sike dongu wa apningu umana Gok gatu Negok ngang yanikaingu buyambam siknga. Mateknga dua. Wa aminu kendetna nambana saisai yanggabam gwene nana binga siwik.
REV 20:9 Siwan nata mia kawawa wa aminu keu kuupbam gitnake tawamba sandewan kuking. Kuke you Anututane aminabamda yuking gapmane kundoke takumbasiking. Sike you wanggapmae Anututa take siknga nataak. Siwan you wanggapma takumbasike yuwawa ngana katau enandangga epuke amak aminu wa kuupbam asiknga yasiwan kumbing.
REV 20:10 Siwan Setenu aminu waakwau kem panzikut tapa Anututa mutewan gapma buyambamu katau toknga siknga suu aakatapda binga isikonggak dakaatang pukukut. Sike iat gatu kaapzongu wagwekat gatu aminu kem panzike na Anutue wam yanikapsa aminu tapatu ngang yakut tapaat ngangga unekan gatake yuking. Sike waakwakga tokngabamu kwakngaom gatu zikaane ngangu asinggan asinggan pake yutning.
REV 20:11 Siwan nata kawawa sia dakatu tupan siknga apaapata pukwike kayuaing binga kwaknga daka kakum. Sike buyambam tapata sia wandakane pukwike kayuwawan kakum. Siwan kepat gatu ena kakaa banakan kopatda aminu buyambamu waapae nomune gitna yutnanga dua. Aho. Waapa ateke kuke kusika akusopuwa kakum.
REV 20:12 Sike nata kawawa akupsa aminu kuupbamda asenake aminu buyambamu waapae nomune dandam tangan yuwa kakum. Sike aminu umana kaya gatu moo amin ngangga yuwa kakum. Sike tupa sanga wa aminda kayuk yuke tasikingu kuupbam buk gogomune gwa matakutna kakum. Sike nata kawawa ita buu wagogom papan waiking. Papan waiwana ita buu gomduaya atapan waikut. Siwan tupa buu wagomune aminu kayuu asinggan asinggan yutninggane umana gwa matakut. Siwan buu wagogopatang wamu aminu waakwakga sanga tasiking kakngae wam tawake usanzikut.
REV 20:13 Siwan nata kawawa yanggabam gwene kumbing aminu gatu enaking. Ngan. Akupsa aminu kuupbamda akumbing katangga gatu enake yuwawa aminu buyambamu waapata wamu tupa tasiking kakngae wam tawake usanzikut.
REV 20:14 Usanzike yawan akupsa aminu wa kuupbam pake mupewa gapma buyambamu katau toknga siknga isikonggak dakaatang pukuwa kakum. Sike nata ie natake wa aminda tupa gwa kumbing ngana gapma wa katau toknga siknga isikonggak dakaatang pukuke gatu kupa sipmaya dakngawan wa aminda toknga buyak asinggan yuwawa akumnanga aknga wena siwan kakum.
REV 20:15 Sike amin usanzikut tapata aminu tapatutane umana buu kayuk yutning gopatangu wena kakengu ita yawan aminu waapa mutewa gapma buyambamu katau toknga siknga isikonggak dakaatang pukuwan kakum.
REV 21:1 Sike nata mia kawawa sanga kayukga ena kakaa banakan komune tupa nanatane tangine aawa kakum. Sike keu kayuk gakata tupa nanatane tangine aawan kakum. Ngan. Sanga tupa ena kakaa banakan komune yuking gatu keu tupa yukut daka ngangga wena gwa sikinga kakum. Sike yanggabam gwen kaya kuut wena sikutna kakum.
REV 21:2 Sike nata kawawa Anututane you kayuk gapma umana Jerusalem ngang inikaing gapmata aawan kakum. Sike nata you wanggapma kawawa wanggapmata enandangu Anututa ayuak komuneta epan kakum. Sike yotbamu wa gapma sangasanga take siknga mayata apna tanangge natake gupnane tasigwaanguke apna tanggak binga tasikwaapa kukutna kakum.
REV 21:3 Sike nata nataawa wamu takngatu sia tupan sikngaapata pukwike kayuak dakaneta apuke apaa siknga anzing yanggamatakut, “Ginu daniwa natapnong! Apmanu Anututa kepdakane epuke amin bapat gatake yuak. Ngan. Ita aminde banakan yuwan wa aminda itane aminabam dakngake yutning. Siakan. Anututa inane amin bapat yutning.
REV 21:4 Sike ita amindane kai yangga kuupbam pasiwan kuning. Sike aminu tapatuta dua kupik. Gatu aminu tapatuta musia meya dua natake kwanamu dua sike sanga toknga gupnane dua natapik. Wena siknga. Sanga tupa nana wa kuupbam gatukande gwa sandekgak,” ngang yawan natapbum.
REV 21:5 Sike nata nataawa aminu sia buyambam dakane pukwike kayukut tapata anzing yakut. “Ginu daniwa natapnong. Nata sanga kuupbam tasiwa kayuk dakngakaing,” ngang yakut. Yake ita na anzing nanikut, “Gata wamu nata yanggat taknga apmatayo. Dasingge? Wamu waaknga siakan siknga. Siwan aminbamda ie banip siknga sining,” ngang nanikut.
REV 21:6 Nanike ita gatu anzing nanikut, “Nata puya waaknga gwa tasiwa puyukgak. Na Anutu awia tapatutakan yuat. Na sangabamdane yapii siwan puya kuupbamu nata tangenake tasikumu atasiwa puyukgaunin. Sike aminu yanggae natapanu nata yangga aminda tangoke kuyuu asinggan yutnanga aknga zike ie ima tangopik. Sike nata yangga wa moo siknga ima waapata mani dua muke usike tangopik,” ngang nanikut.
REV 21:7 Nanike ita anzing nanikut, “Aminu iwana ayapbikengu ita sanga take siknga papik. Sike sanga ita papiu wa anzing. Nata itane Anutuna yuke i katak toimba ita natane waaknga binga dakngake yuwik.
REV 21:8 Siwan ngana aminu iwanae akgwauke masa nae namuke waiakngaatang pimakingga gapma buyambamu katau toknga suu aakatapda binga isikonggak dakaatang pukuke yutning. Ngan. Wa amikat gatu aminu amin zipa kumbing gatu yasewa aknga tasiking amin gatu aminu gaam ba gom ba pitatapa ngang pasiking amin gatu aminu anutu pupukngae tumuk wam yanikaing gatu aminu kem wam yakingu kuupbamda gapma wandakane pukuke yutning. Sike aminu waakwau tupa gwa kumbing ngana gapma wandakane pukukingu wa gatu kupa sipmaya dakngawik.”
REV 21:9 Siwan ita wamu waaknga naniwan puyuwana nata kawawa angela tapatu nae apan kakum. Sike waapa angela katau kuut musa kautdu tapaaya sanga masan siknga amin pasiwan mainanga katau kuut musa kautdu takngaaya ngangu gapma katau kuut musa kautdu gweaya ngang gwegwene pamuba dopa pake yukingkat nana tapatu. Sike ita apuke na anzing nanikut, “Ga apso. Nata sipsip mateu wagwendane maatna yeikgama kayo,” ngang nanikut.
REV 21:10 Naniwana Waung Kapata na tapan angela waapata na nanitakuke tawanu buyambamu dakatune enane siknga takopbut. Takoke ita Anututane yotbamu wa Jerusalemu kayuk gapma yeikngamukut. Yeikngaman kawawa you wanggapmata enandangu Anututa ayuak komuneta epan kakum.
REV 21:11 Sike nata you wanggapma kawa waenga siknga sikut. Sike Anutu kakaa siknga akngane yuau waapatane yotna kakaana inata kundu unzing suu kundu glas binga ngana mani buyambam sikngata usinanga gwegwen kana waenga siknga sikaing binga siwan kakum.
REV 21:12 Sike yotbamu wanggapmatane damanu buyambam enane siknga. Sike damanu wagwenu gwabou katau kuut musaat kepianganu gwakngaaya. Siwan angela katau kuut musaat kepianganu tapaaya ngangga gwabou wa kuupbam inandek wesim yuwa kakum. Sike dongu Isrel nana katau kuut musaat kepianganu tapaaya nganggane umana gwabou wa gwakgwaune kuupbam inandek matakinga kakum.
REV 21:13 Sike damanu gunzitda akonggak saau gwabou gwakngaat gwakguat. Siwan damanu aigwak saau gwabou gwakngaat gwakguat. Siwan damanu amugwak saau wa gwakngaat gwakguat. Siwan damanu kautdu gunzitda pukunggak saau ina unzakan. Gwabou gwakngaat gwakguat ngang kakum.
REV 21:14 Sike suu kundu engenda amaande tepuwa kopan damanu suu engatangan tasikinga kakum. Sike sipsip mateu wagwendane kwiiknga amina katau kuut musaat kepianganu tapaaya nganggane umana suu wa kuupbam inandek matakinga kakum.
REV 21:15 Siwan angela wa na nanikut tapata sanga katap tapa binga ngana golda sake tasikingunin take yotbamu wanggapmae tuwanga tanangge kukut. Sike you wanggapma gatu gwabok gwakgwak gatu daman gwen nganggane tuwanga tanangge kukut.
REV 21:16 Kuke ita yotbamu wanggapmae kwaim tapatane tuwanga tapan mamayana kwaimu kautdu saak 12,000 sikut. Siwan kwaimu wa tapaat tapaatdane mamayana buya kundukan. Siwan yotbamu wanggapmane yot gwegwenu engende amaande mitanggawa apu enane koke enane siknga kopbut. Siwan itane mamayana tapan kwaim tapatane tuwanga 12,000 sikut.
REV 21:17 Siwan daman gwenu engende amaande tasiwa koke enane siknga kopbutna kakum. Sike angela waapata tuwanga tapan 144 sikut. Siwan angela waapata tuwanga wa pakuu ninu kepdakane yuamang aminda pakamang bingakan papan nambana inata dua sikut.
REV 21:18 Siwan nata yotbamu wanggapma kawa wanggapmatane daman gwenu suu glas binga umana jaspa ngang yanikaing gwegwenda tasikinga kakum. Sike you wanggapmane yot gwegwenu golda pasike mitapbinga kakum. Sike nata kawa kakaa glas binga sikut.
REV 21:19 Siwan nata suu damanu amaakatang pekingu wa kuupbam kawa suu take siknga inata kundu mani buyambam sikngata usinanga gwegwen pakapu une papa gatakukinga kakum. Sike suu tupan sane suu kundu glas binga umana jaspa ngang yanikaing gwegwen papa gatakuking. Sike suu masan sane suu kundu gang binga umana sapaia ngang yanikaing gwegwen papa gatakuking. Sike banakan sane suu kundu kwaknga umana aget ngang yanikaing gwegwen papa gatakuking. Sike suu namba 4 sane suu kundu gwegwenga umana emeral ngang yanikaing gwegwen papa gatakuking.
REV 21:20 Sike suu namba 5 sane suu kundu gamana umana sadonikis ngang yanikaing gwegwen papa gatakuking. Sike suu namba 6 sane suu kundu gamana siknga umana konilian ngang yanikaing gwegwen papa gatakuking. Sike suu namba 7 sane suu kundu zangwam binga umana krisolait ngang yanikaing gwegwen papa gatakuking. Sike suu namba 8 sane suu kundu gwegwenga umana beril ngang yanikaing gwegwen papa gatakuking. Sike suu namba 9 sane suu kundu gwegwenga umana topas ngang yanikaing gwegwen papa gatakuking. Sike suu namba 10 sane suu kundu gwegwenga umana krisopres ngang yanikaing gwegwen papa gatakuking. Sike suu namba 11 sane suu kundu gang binga umana haiasin ngang yanikaing gwegwen papa gatapbing. Sike suu masan siknga sane suu kundu gang siknga binga umana ametis ngang yanikaing gwegwen papa gatakuking.
REV 21:21 Sike gwabou katau kuut musaat kepianganu gwakngaaya wa sanga yanggabam gwene nana kamakum binga ngana buyambam sikngata tasiking. Sike gwabou inandeu kuupbamu sanga wa kamakum binga gwenduta tasiking. Sike you wanggapmatane kepi apaapa kuupbam golda tasiwa kakaa siknga glas binga dakngakutna kakum.
REV 21:22 Sike nata yot takwanu gwendu yotbamu wanggapmane dua yuwan kakum. Wena. Dasingge? Yotbamu wanggapmatane yot takwan gwenu Anutu nindane Buyambam tapaninu kekeknga siknga yuak kapa gatu sipsip mateu wagwen ngangu unin.
REV 21:23 Siwan Anututane kakaa akngane siknga yuke you wanggapmane nana aminda gunzitkat yekapatdane kakaa aknga tanangge dua nataaing. Aho. You wanggapmatane lam gwenu sipsip mateu wagwen unin.
REV 21:24 Sike aminu kuupbamda yotbamu wanggapmatane kakaa akngane sukuning. Sukuke aminu tupan tapaapa kepdakane yuaingga ie gepbiatang yuke sangaapana ie pakopning.
REV 21:25 Sike gunzit tapane damande gwabou dua yapuning. Dua yapuke yuwawa zikaa you wanggapmane dua singgak. Aho. Kakaa aknganekan asinggan yuaing.
REV 21:26 Sike aminu kuupbamda you wanggapmae gepbiatang yuke sangaapana kwaapzang pakopning.
REV 21:27 Sike ngana sanga you wanggapma tasiwan mainanga aknga dua takopning. Wena siknga. Aminu tapatu sanga maakngana kaya tasiwik kapata ba gatu aminu kem wam yawik kapa ngangga you wanggapmane kopnanga dua. Aho. Sipsip matekga aminu kundutane umana buu aminu kayuu asinggan yutninggane umana matananga gomune gwa matakut. Siwan aminu wa umana buu wagomune matakut amindakan yotbamu wa gapmaatangu take kopning.
REV 22:1 Siwan nata mia kawawa angela waapata yangga tapatu yeikngaman kakum. Sike aminu yangga wa tangopiu waapata kayuu asinggan asinggan yuwik. Siwan yangga waapa kawa dopna wena. Kwaknga siknga glas binga sikut. Sike nata kawawa yangga waapata sia buyambam daka Anutuat sipsip mateu wagwekatda pukwike sangabam kayuamayak dakaneta epan kakum.
REV 22:2 Sike yangga waapata epuke yotbamu wanggapmatane kepibam tapae banakan zipmake kuwan kakum. Sike katau dong kaknga yangga waapatane kwaimune kautdu apane takngatu gatu kautdu apane takngatu ngang kwaikinga kakum. Sike katau wa dakandaka tapuya yekau kuupbamu buya asinggan aakaing. Siwan aminda buya wa napiu waapata kayuu asinggan asinggan yuwik. Sike katau wa dakandakatane tatakngita aminu kuupbamdane maitna sandeke pasiwa take sining.
REV 22:3 Sike tupa Anututa wai aminu ayanikwasipewan kuking ngana you wanggapmane natdetdeu amin yanikwasipewan kunanga aknga dua yuak. Wena siknga. Sike you wanggapmane sia Anutuat gatu sipsip matekatda pukwike sangabam kayuamayak dakata ayuak. Siwan Anututane aminabamda ie tumuk wam inike asiknga inimbaknganing.
REV 22:4 Inimbakngake wa aminda itane nomna kainata akaning. Siwana ita inane umana wa aminde damanane matayamik.
REV 22:5 Sike Anutu Buyambam tapaninda kakaa wa aminde yaman wa aminda gunzitkat yekapat lam gwekatdane kakaa akngana tanangge dua natapning. Aho. Anututane kakaa siknga akngane yuke wa aminda buyambam tapaapa dakngake aminu kuupbam asinggan asinggan kayutning.
REV 22:6 Siwan nata mia kawawa angela waapata na anzing nanikut. Nata siakan wamu takngatu ganiwa natake gata ie banip siyo. Anutu Buyambam tapata ayanikapsa amindane musia pangenawan wa aminda ie wamu ayanikapbing. Sike Anutu waapata na inane angelana nanitewan nata itane amina kuupbam sangabamu zetgaman apik kakngae yeuyamitde yakut.
REV 22:7 Sike ita anzing yakut, “Nata ginu daniwa natapnong. Nata ginde zetgaman apit. Sike aminu tapatuta wamu buu anggopatang yuak kaknga tawake tasiwiu waapae nata asinimbakngawit,” ngang yakut. Sike wamu wa kuupbam angela waapata na naniwan natapbum.
REV 22:8 Sike na Jon. Nata mia kake wamu wa kuupbam natake kawawa sanga wa kuupbamu siwa kakum. Sike nata sanga wa kuupbam kawa puyuwana nata angela wa nae yeikngamukut tapae tumuk wam ininangge natake itane nomune gwetakum.
REV 22:9 Gwetawa ngana waapata yandakngake, “Gata unzingu ma tasiwim,” ngang nanikut, “Gata Anutuekan tumuk wamu iniyo,” ngang nanikut, “Naat gaat niu puya amin gan dakngake yuamak. Ngan. Na gaat gatu gatane notda ayanikapsa aminbampat gatu aminu buu anggomde wamu atawakaing amikat nana puya amin notza tapatu,” ngang na nanikut.
REV 22:10 Nanike ita anzing nanikut, “Gata Anututane wamu buu anggopatang yuak kaknga ma takusopuwim. Aho. Tapduknga Anututa sanga wa kuupbam tasiwik gwenu gwa dapakanggak.
REV 22:11 Siwan aminu waiaknga tasinggau gata katewi ita wai waakngane sukuyok. Ngan. Aminu sanga maakngana kaya aknga tasinggau gata katewi ita sanga wai waakngane sukuyok. Siwan aminu sanga noman siknga aknga tawake tasinggau ita kepi nomana akngane take sukuyok. Ngan. Aminu Anututane kepi tawake tasinggau waapata kepi waaknganekan sukuyok.” Sike angela waapata wamu waaknga na naniwan natapbum.
REV 22:12 Siwan Jesuta anzing yakut, “Nata ginu daniwa natapnong. Na sangabamdane yapii. Sike puya nata tuwanguke tasikumu wa nata atasiwa puyuwik. Sike nata zetgaman apuke sanga aminu kuupbamda tasiking kaknga kuupbam usanziwit. Usanzike nata kepi noman siknga tawake wa aminde inandek inandek sanga takngatu takngatu yamunangge apit.
REV 22:14 Sike aminu tauknga asauwa dudumna sikaingu wa kuupbamda katau wa tapuya nake kayuu asinggan yutnanga dakandakatane tapuya take naning. Ngan. Wa aminda yotbamu anggapmae gwabok gwaune take akopning.
REV 22:15 Sike ngana aminu sanga wai takngatu takngatu tasikaing aminda you anggapmane akopnanga dua. Ngan. Aminu gaam ba gom ba pitatapa pasikaing amikat gatu aminu yasewa tasikaing amikat gatu aminda amin zipa kumbing amikat gatu aminu anutu pupukngae tumuk wam yanikaing amikat gatu aminu sanga kem takngae banip sike kem panzike tasikaing amikat ngangga Anututane yotbam gapmae kepman gan yutning.
REV 22:16 Sike na Jesu. Nata angelana initewa ita ginu Anututane aminabamu kepna kepna yuaingu kuupbamde kuke wamu waaknga danikapikge inikum. Sike nata Devitdane dongune aakum. Unzing katapdaka pasiwan gatu kainga kaikasiwik binga aakum. Sike nata yekapdaau gwaim gwen binga dakngake yuwawa aminda na nanduke kepi kakaa akngane yutnimde dapaknga gwa singgak ngang nataaing.” Sike wamu waaknga Jesuta yawan natapbum.
REV 22:17 Siwan Waung Kapaat gatu sipsip matekge maatnaatda yake, “Ga apso,” ngang yakamayak. Sike aminu wamu waaknga natakengu waapataaya ga apso ngang yayok. Siwan aminu yanggae natapiu ita asapsok. Ngan. Aminu yangga wa aminda tangoke kayuu asinggan asinggan yuwik kaknga atangopnanggengu ita asapuke yangga waakngae mani dua muke usike tangopik. Aho. Ita moo siknga tangopik.
REV 22:18 Siwan nata wamu kekeknga siknga aminu Anututane wamu buu anggopatang yuak kaknga natapning aminde natake yawa natapnim. Aminu tapatuta wamu inata takngatu wamu aakngane ngwakngake yawanu sanga amin pasiwan mainanga nata buu anggopatang matakumu wa kuupbam Anututa aminu waapae asimik.
REV 22:19 Sike aminu tapatuta Anututane wamu kundu buu anggopatang yuaingunin sandewiu Anututa itane umana asandewik. Asandewan aminu waapata katap dakandakatane tapuya aminda nake kayuu asinggan asinggan yutningu wa dua napik. Ngan. Aminu waapata Anututane yotbam gapma buu anggomda ie yanggak gapmane yutnanga dua.
REV 22:20 Sike aminu sanga wa kuupbamde yakapmanggak kapata anzing yanggak, “Siakan siknga! Nata zetgaman apit,” ngang yanggak. Ngan. Buyambam tapaninu Jesu! Ga apso!
REV 22:21 Siwan nata tumuk wam iniwa Buyambam tapaninu Jesu Kraisda ninu itane aminabamde musia kwikwiknga natanimik. Unukan.
