﻿ZABURU.
130.
Laguna ziara. Minaaka i mbolongana kanarakaa iaku kugoraakako, e KAWASANA OPU! 
E Kawasana Opu, maasangia urangoa o suaraku! Taroakamo uperangoia opea iemaniku. 
E KAWASANA OPU, ande Ingkoo utorotorosu uudhani dosamami, incema bhemomembalina abebasi minaaka i kahukumumu, e Aulataʼala? 
Maka Ingkoo sadia usiapu to upekaʼamponi, mamudhaakana o mia amembali ahoromatiko. 
Iaku kuantagi katulungina KAWASANA OPU, tee o janjina kuharapua. 
Ngangarandaku aharapuaka Kawasana Opu alabhi minaaka i pande jagana kota mopemeliliakana akawa o wakutuuna matanaeo akotila. 
E Israel harapumo i KAWASANA OPU! Roonamo KAWASANA OPU dhaangia tee kaasina molagina, tee Incia sadia bheamangapasalaamati. 
Incia bhemopabebasina Israel minaaka i bhari-bharia kasalahana. 
