﻿ZABURU.
126.
Laguna ziara. Wakutuuna KAWASANA OPU apambuli kadhaangiana Sion amembali amalape pendua, ingkita mboomo mia mopongipi. 
Wakutuu incia sumai o ngangata apotawa roonamo tamasanaa tee o dhelata asambo-sambo roonamo takaunde-unde. Sabutuna manga lipu mosagaanana apogau, "KAWASANA OPU padhamo apewau giu momaoge to manga incia." 
KAWASANA OPU padhamo apewau giu momaoge to ingkita, sababuna sumai takaunde-undemo. 
E KAWASANA OPU, maasangia upambulia pendua o kadhaangiamami momalape, mboomo umala i Tana Negeb akouwe pendua i bulaana wao. 
Manga mia mohewina apoose atangi, naile itu bheatimpu tee asambo-sambo. 
Mia molimbana minaaka i bhanua tee amaasi apoose abhawa wine to ahewia, dhaanamo bheambuli asambo-sambo apoose abhawa hasilina timpuana. 
