﻿ZABURU.
113.
Pujimea o KAWASANA OPU! Pujimea, e manga bhatuana KAWASANA OPU, pujimea o sarona KAWASANA OPU! 
Bhari-bharia kapujia to sarona KAWASANA OPU, sii-sii sampe saʼumurua! 
Pepuu minaaka i abhete matanaeo sakawana asoo matanaeo, sarona KAWASANA OPU alaenga atopuji. 
KAWASANA OPU amalanga tee akokuasa i bhawona bhari-bharia lipu, tee kamuliangina alabhi amalanga minaaka i laiana. 
Incema buaka mboomo KAWASANA OPU, Aulataʼalata, mokokauncuramakana i tampa momalanga, 
tee mopaʼungkona karona to apotonto i laiana tee i alamu? 
Incia aangka mia misikini minaaka i ngawu, tee apalimba mia monarakaa minaaka i kabumbuna ngawu 
to apauncura manga incia aposaangu tee manga kaogesa minaaka i uumatina. 
Incia arahumatiakea anaana i manga bhawine mokomba, sabutuna o bhawine sumai akaunde-unde i nuncana bhanuana. Pujimea o KAWASANA OPU! 
