﻿ZABURU.
112.
Pujimea o KAWASANA OPU! Amasanaamo mia momaekana i KAWASANA OPU, mopeeluna mpuu manga parintana. 
Manga opu-opuana bheakokuasa i alamu, tee siwulu momakatena incana bheatobarakati. 
Harataa tee karangkaea dhaangia i nuncana bhanuana, tee kabanarana manga incia sadhaadhaa to saʼumurua. 
Moomini i nuncana kalalanda, dhaangia tee kainawa to mia mosaalihi; siitumo to mia momalape, momaasi, tee mobanara. 
Akodhawuamo o mia mobukeakana kaasi tee momenturuna mopekapadhaakana doina, tee aʼadili i nuncana bhari-bharia karajaana. 
Roonamo iimanina mia mobanara inda bheakohudha saʼumurua, tee bheatoudhani saʼumurua. 
Manga incia inda amaeka tee lele madhaki; incana amatangka roonamo aparacaea i KAWASANA OPU. 
Incana amatangka tee manga incia inda amaeka; sabutuna manga incia bheakamata manga musuna amatalo. 
Tee relana totona incana, manga incia sadia asadakaa i mia misikini. Kabanarana sadhaadhaa to saʼumurua; manga incia akokuasa tee atohoromati. 
Manga mia madhaki akamata giu incia sumai asabhaakea randana; manga incia uka apakiri-kiri ngincina, kasiimpo amofu. Opea ihaejatiakana mia madhaki inda bheamembali. 
