﻿ZABURU.
109.
To kapalana molaguna. Zaburuna Daud. Bholi inda tee uuʼuumu, e Aulataʼala ipuji-pujiku. 
Roonamo ngangana manga mia madhaki tee pande gau-gau padha apogauakaaku madhaki; manga incia afitanaaku tee dhela mogau-gau. 
Pogau ibhoasakana manga incia abukeaka kabancia, tee aewangiaku inda akoʼalasa. 
Manga incia araeakaaku kupewau kadhaki to abalasi kaasiku, moomini i tangasaana kudoʼaakea. 
Jadi manga incia abalasi kalapeku tee kadhaki, tee abalasi kaasiku tee kabancia. 
Angkamo o mia madhaki to alawani musuku, taroakamo o mia i weta kaanana to araeakea. 
Ande atoʼadili, taraoakamo incia atobhotukiaka amembali mia mosala, tee doʼana atoabhi dosa. 
Maasangia o umuruna amampodho, tee taroakamo kauncuramakana aalea mia mosagaanana. 
Taroakamo manga anana amembali amaelu, tee o bhawinena amembali iaiaro. 
Taroakamo manga anana apekalingka-lingka tee apengkaemani, maasangia manga incia atopadhencu minaaka i karunggana bhanuana. 
Maasangia o mia pande giwuna dhosa aalea bhari-bharia pewauana modhaangiana i karona, tee maasangia mia mosagaanana arampasia hasilina usahana. 
Bholi dhaangia samia uka momalapena incana tee incia, atawa momaasiakana manga ana-anana momaeluna sumai. 
Taroakamo bhari-bharia siwuluna atopabinasa, tee o sarona atomalinguaka i siwulu muri-murina. 
Taroakamo kasalahana opu-opuana sadhaadhaa audhania KAWASANA OPU, tee inda ahapusu dosana inana. 
Taroakamo kasalahana sadhaadhaa i aroana KAWASANA OPU, tee inda dhaangia uka moudhanina mia incia sumai i alamu, 
roonamo incia inda dhaangia audhani kalape, tangkanamo apadhende mia monarakaa tee mia motopisaki, tee mia momaporona incana sakawana amate. 
Incia sadia apekatunda, jadi taroakamo o katundana akangkanai karona! Incia amendeu adoʼaaka tee abarakati mia mosagaanana, jadi taroakamo o barakati amaridho minaaka i karona! 
Incia apake katunda mboomo bajuna, maasangia katunda sumai apesua i nuncana badana mboomo uwe, tee apesua i nuncana buku-bukuna mboomo mina. 
Taroakamo o katunda sumai amembali mboomo juba ipakena to mosalibumbungiakana karona, tee mboomo kabhokena tanga mosadiana abhokeaka tangana. 
Taroakamo o giu incia sii amembali kabalasina KAWASANA OPU to manga mia moraeakaaku, tee manga mia mopogauakaaku madhaki. 
Maka Ingkoo, e KAWASANA OPU, e Aulataʼalaku, tulungiakumo roonamo saromu, tee upasalaamatiaku roonamo kalapemu tee kaasimu molagina. 
Roonamo iaku sii kunarakaa tee kumisikini, tee i nuncana karoku amambela o ngangarandaku. 
Iaku kuila mboomo ngkamia-mia i wakutuuna konowia; inyawaku mboomo kabhoro itantamaka. 
Toputuku arengku roonamo kupoasa, tee o badaku amangkurumo. 
Mia moraeakaaku ahinaaku; wakutuuna akamataaku, manga incia alengko-lengko bhaana. 
E KAWASANA OPU, e Aulataʼalaku, tulungiaku. Pasalaamatiaku apokana tee kaasimu molagina. 
Taroakamo o musuku amataua ande bhari-bharia sumai ipewauna limamu, tee amataua ande Ingkoo mopewaua e KAWASANA OPU. 
Taroakamo manga incia apekatunda, maka Ingkoo ubarakatiaku. Taroakamo manga incia apotibhaaka kaea, maka o bhatuamu sii bheakaunde-unde. 
Taroakamo manga mia moraeakaaku apake kaʼaebu to bajuna, tee taroakamo manga incia aposalibumbuaka kaeana mboomo juba motutubhina karona. 
Iaku sadia bhekusukuru i KAWASANA OPU tee ngangaku, tee bhekupujia i tanga-tangana mia bhari 
roonamo Incia aewaaka mia misikini to apasalaamatia minaaka i manga mia mohukumua. 
