﻿ZABURU.
100.
Zaburu to kurubani kasukuru. Sambo-sambomo to KAWASANA OPU, e saangua alamu! 
Sambaheamo i KAWASANA OPU tee ukaunde-undemo, umbamo i aroana tee ulaguaka lagu-lagu momasanaa. 
Mataumea ande o KAWASANA OPU sumai o Aulataʼala. Inciamo manga padhaangiana, tee ingkita o pewauana; ingkitamo o uumatina tee dumba-dumba igembalana. 
Pesuamo ulaloi bhambana lawana upoose ulaguaka lagu kasukuru, upesua i aroana Bhanuana Aulataʼala upoose upujia. Sukurumo i Incia tee upujimo sarona. 
Roonamo o KAWASANA OPU sumai amalape; kaasina molagina abakaa saʼumurua, tee Incia akeni janjina saʼumurua zamani. 
